The New Testament of our Lord and Saviour Jesus Christ

Matius 1

1 Ia to nunnungan nene-Na Puang Isa Almaseh, bati'nai Raja Daud jio mai bati'na Nabi Ibrahim susi tee: 2 Nabi Ibrahim njajian Ishak, Ishak njajian Yakub, Yakub njajian Yehuda sola ba'tu pira-pira sile'tona muane, 3 Yehuda njajian Peres sola Zerah (nadisanga Tamar to indona), Peres njajian Hezron, Hezron njajian Ram, 4 Ram njajian Aminadab, Aminadab njajian Nahason. Nahason njajian Salmon, 5 Salmon njajian Boas (disanga Rahab to indona), Boas njajian Obed (disanga Rut to indona), Obed njajian Isai, 6 Isai njajian Raja Daud. Raja Daud njajian Raja Sulaiman (indona pura bainena tomate Uria), 7 Raja Sulaiman njajian Rehabeam, Rehabeam njajian Abia, Abia njajian Asa, 8 Asa njajian Yosafat, Yosafat njajian Yoram, Yoram njajian Uzia, 9 Uzia njajian Yotam, Yotam njajian Ahas, Ahas njajian Hizkia, 10 Hizkia njajian Manasye. Manasye njajian Amon, Amon njajian Yosia, 11 Yosia njajian Yekhonya sola ba'tu pira-pira sile'tona muane tonna dibawa to to-Yahudi lako tana Babel. 12 Ia tonna jiomo tana Babel to to-Yahudi, ia to Yekhonya njajian Sealtiel, Sealtiel njajian Zerubabel, 13 Zerubabel njajian Abihud, Abihud njajian Elyakim, Elyakim njajian Azur, 14 Azur njajian Zadok, Zadok njajian Akhim, Akhim njajian Eliud, 15 Eliud njajian Eleazer, Eleazer njajian Matan, Matan njajian Yakub, 16 Yakub njajian Yusuf, iamo muanena Maryam, na Maryam njajian Puang Isa to disanga Almaseh. 17 Sangpulo a'pa' papa'na jio mai kajajianna Nabi Ibrahim ratu lako jajinna Raja Daud. Sangpulo a'pa' papa'na sipammula jio mai Raja Daud ratu lako kamaleanna dipali' to to-Yahudi lako tana Babel. Sangpulo a'pa' papa'na jio mai kamaleanna dipali' ratu lako kajajian-Na Puang Isa Almaseh. 18 Susi tee to kajajian-Na Puang Isa Almaseh. Maryam, to tangka'na Yusuf, iamo la njajian Puang Isa. Ia tonna te'dapa namamma' sola Yusuf, keba'tangmi. Te'da naissenni Yusuf kumua ia to kakeba'tanganna jajii nasaba' kuasan-Na Roh Allataala. 19 Ia tee Yusuf madoangngi kamma'-kamma' bang la mpatorroi to kasitangkasanna sola Maryam, nasaba' mesa'i tomelo penawanna na te'da namadoang mpakasiri'i to Maryam jio olona tobuda. 20 Apa ia tonna mangpikkiri' susi joo, mamma'mi namangtindo. Nakitai lan tindona to malaeka'-Na Puang Allataala mpangkadaii nakua, "Ee, Yusuf, bati'na Raja Daud, danggi' mubata sibali to Maryam, nasaba' ia to kakeba'tanganna jajii sanga kuasan-Na Roh Allataala. 21 La njajianni mesa' pea muane na la musangai Isa (battuananna "Tomangpasalama'"), nasaba' iamo la mpasalama' umma'-Na jio mai pangpatumangna dosana." 22 Susimi joo najaji to kadan-Na Puang Allataala mangka napau nabi tonna anu' kumua, 23 "La den mesa' anakdara, to te'dapa nalambanni muane, nakeba'tang, na njajian mesa' pea muane. Nadisanga Imanuel", battuananna "Torroi Puang Allataala ssolanki'." 24 Ia tonna mi'cikmo to Yusuf, napugaukmi to napauanni malaeka', nasibali Maryam. 25 Apa te'dapa namamma' sola ratu lako kakeanakanna. Na ia tonna jajimo joo pea, nasangaimi Yusuf, Isa.

Matius 2

1 Ia tonna jajimo Puang Isa jio kota Betlehem, ratumi jao kota Yerusalem to ba'tu pira-pira tomacca ngkita bintuin jio mai kadellekan. Ia to kota Betlehem mesa' kota jio tana Yudea, to naparenta Raja Herodes. 2 Namekutana tuu lako tau nakua, "Umbora nanii jaji to pea la menjaji rajana to-Yahudi? Kikita to bintuin-Na jao langi' jio kadellekan, na la ratukan ssuju'i." 3 Gaja sabakanmi to Raja Herodes sola tobuda jio kota Yerusalem tonna sa'dingngi to apa napau tee topakita bintuin. 4 Nasuami Raja Herodes to kapala imang sola guru agama sirempun. Nakutanaimi nakua, "Umbora la nanii jaji to Raja Mangpasalama', to pura napau jolomo Puang Allataala?" 5 Pada nakuamo mebali, "Jio kota Betlehem, jio tana Yudea, nasaba' susimo joo to mangka nauki' nabi tonna anu', 6 'Ee, kamu' to-Betlehem, jio tana Yehuda, te'da kumua kotamimo biccukkuna, nasaba' lan mai tangnga-tangngami la den to menjaji tolamparenta umma'-Ku' to-Israel.' " 7 Ia tonna issenmi Raja Herodes umbo nanii la jaji Raja Mangpasalama', napangpetambaian bunimi tee topakita bintuin, nakutanaii la ngkanassai kumua, "Umbora wattu mikitai joo bintuin?" 8 Ia tonna mangkamo mpauanni, nasuami male lako kota Betlehem, napasanni kumua, "Malemo kamu' nnangah meloi joo pea. Na ia ammiampa'mi, pauanna', kumale toda ssuju'i." 9 Ia tonna mangkamo ssa'ding kadanna raja tee topakita bintuin, mpatarruhmi kalingkanna. Gaja parannu penawanna, nasaba' nakita pole' omi to bintuin to mangka nakita jio kampongna. Ia joo bintuin njoloanni, namane' torro jao sipatunna to bola nanii torro joo pea. 11 Mentamami bola tee topakita bintuin, nakitai joo pea sola Maryam indona, anna suju' ssompai. Nabukaimi to sepu' ewanan nabawanni tee pea, napangngoloi to bulawan, kamanynyang sola mur. 12 Ia tonna polemo lako kampongna, lalan leko'mo naola, nasaba' napangngingaranni Puang Allataala lan tindona nakua, "Danggi'mo mimale ssikitan pole' Raja Herodes." 13 Mangkai joo, nakitami Yusuf to malaeka'-Na Puang Allataala lan tindona ngkuanni kumua, "Mi'cokko, palaianni tuu pea sola indona lako tana Mesir, nasaba' naangahhi Raja Herodes la nabuno! Torroko jio, na kupauanpoko, mumane' pole jio mai!" 14 Ta'pa mi'cokmi to Yusuf joo bongi, namale mpalaianni to Puang Isa sola indona do' Mesir. 15 Torromi jio ratu lako matena Raja Herodes. Susimi joo najaji to kadan-Na Puang Allataala mangka napau nabi tonna anu' kumua, "Jio mai Mesir kutambaii to Anak-Ku'." 16 Mabirihmi to Raja Herodes tonna issenmi kumua nauragai tee topakita bintuin, nasaba' lalan leko'mi naola. Napangparentanmi kumua la dibuno ngasan to pea muane to te'dapa natallung taun umuru'na jio kota Betlehem na mengguririkkina. Nasaba' sipatumo to wattu napauanni topakita bintuin. 17 Susimi joo najaji to kadan-Na Puang Allataala to mangka napau Nabi Yeremia tonna anu' kumua, 18 "Jio kampong Rama den sarro na karrak nasa'ding tau. Rahel mbatingngi bati'na. Na cia'mi dipakatana to masse penawanna, nasaba' te'damo bati'na." 19 Ia tonna matemo Raja Herodes, nakita pole' omi Yusuf jio tana Mesir to malaeka'-Na Puang Allataala lan tindona, ngkuanni kumua, 20 "Mi'cokmoko, mumale ssolanni tuu pea sola indona lako tana Israel, nasaba' mate ngasanmi to tolambunoi." 21 Mi'cokmi, namale ssolanni to Puang Isa sola indona lako tana Israel. 22 Apa malaja'i Yusuf pole lako tana Yudea, sanga nasa'dingngi kumua ia to Arkhelaus anakkana Raja Herodes ssulle ambe'na mangparenta jio tana Yudea. Napatujui Puang Allataala lan tindona anna male re' tana Galilea. 23 Ia tonna ratumo re', torro jiomi mesa' kota disanga Nazaret. Susimi joo najaji to kadan-Na Puang Allataala mangka napau ba'tu pira-pira nabinna tonna anu' kumua, "La disanga to-Nazaret to Raja Mangpasalama'."

Matius 3

1 Ba'tu pirang-pirang pulo taunna den mesa' nabi disanga Yahya mpamula jamanna, namale lako tangnga padang pallawangan jio tana Yudea. Namangngajahhi nakua, 2 "La mengkatoba' kamu' jio mai dosami, nasaba' cingga'tu'mora naratu Puang Allataala mangparenta susi Raja." 3 Nasaba' iamo tee to nasanga Nabi Yesaya tonna anu' kumua, "Den tau metamba-tamba jio padang pallawangan nnajahhi tobuda kumua, 'Pasadianni lalan to Puang, ranteii to lalan la naola.' " 4 Ia to bajunna Nabi Yahya bulu unta na saripinna balulang digaraga. Na ia to kandena batik sola canik pangngala. 5 Buda to-Yerusalem, na to-Yudea sola tosiandah Sa'dan Yordan male lako Nabi Yahya, 6 na pada nnakui dosana, najio'i Nabi Yahya jiong Sa'dan Yordan. 7 Apa ia tonna kitai kumua buda to-Farisi sola to-Saduki ratu kumua nadijio' toda, mangkadami nakua, "Ee, kamu' bati' ulah balu! Te'da mikullei mpalaian kalemi jio mai pangcalla-Na Puang Allataala to la ratu! 8 Iamo joo la mipangpekitan to panggaukan melomi mpamanassai kumua mengkatoba'mo kamu' jio mai dosami! 9 Danggi' misangai kumua te'damo miladicalla, nasaba' bati'na kamu' Nabi Ibrahim. La mikatappa'i kumua, makuasa to Puang Allataala mpupenjaji bati'nai Nabi Ibrahim tee mai batu! 10 Sadiamo Puang Allataala la ncalla kamu', susi to garonto' kaju dipasadian wase jiong garonto'na la dita'banganni. Sininna garonto' kaju to te'da namembua melo la dita'bangngi nadica'bean tama api. 11 Kujio' kamu' wai, nasaba' mengkatoba'mo kamu' jio mai dosami. Apa den tau la ratu ke mangkana' la njio' kamu' Roh Allataala na den too kamu' dijio' api pangcalla. La'bi makuasa Ia na aku'. Moi mbawa sapatun-Na te'da too kusipato'. 12 Ia joo tau wa'ding dipangpasusii mesa' tau to sitoe ta'pian la nta'pii pangtambakkana. Ia to resa' malapuh narempun melo lan pa'pak, apa ia to malangkona la nasumpun lan api to dukku tarruh." 13 Ia joo wattu ratumi Puang Isa jio mai tana Galilea do' Sa'dan Yordan la mangpejio' lako Nabi Yahya. 14 Apa te'da namelo Nabi Yahya njio'i. Nakuanni, "Aku'ra to sipato' la tajio'. Ciapari na Kita' ora ratu la mpangpejioran kale-Ta'?" 15 Apa mebalii Puang Isa nakua, "Ake'mo najaji tee, nasaba' susimo tee la tapugauk situru' pakkaeloran-Na Puang Allataala." Najio'mi Nabi Yahya. 16 Ia tonna mangkamo dijio', endekmi de' randan sa'dan, nata'pa titimbak to langi', nakitai Puang Isa to Roh Allataala mellao jao mai susi jangan-jangan nta'paii. 17 Nadisa'ding to gamaran-Na Puang Allataala nakua, "Iamo tee to Anak kupakamoja' to mpamasannangna'."

Matius 4

1 Mangkai joo, napatujumi Roh Allataala to Puang Isa namale de' tangnga padang pallawangan, dikua anna pengkulle-kullei nasede Ballisi' mpugauk dosa. 2 Ia tonna mangkamo Puang Isa puasa patang pulo allona patang pulo bonginna, tangbarahmi. 3 Ratumi to Ballisi' mpengkulle-kullei ssedei mpugauk dosa nakua, "Suai tee batu menjaji kande, sanga Anak Allataalako." 4 Apa mebalii Puang Isa nakua, "Den diuki' lan Sura' Allataala kumua, 'Tangngia kande manda to la naputuo tau, apa kadan-Na too Puang Allataala.' " 5 Nasolan omi Ballisi' to Puang Isa de' kota Yerusalem, (iamo to kota-Na Puang Allataala), anna solanni de' bubungan Bola Puang Allataala. 6 Nakuanni, "Polloranko kalemu, sanga Anak Allataalako. Te'da muciapa, nasaba' den diuki' lan Sura' Allataala kumua, 'La nasuai Puang Allataala to malaeka'-Na la njagaiko. La natimangko, na moi aje-Mu te'da nalatitampah lako batu.' " 7 Mebalimi Puang Isa nakua, "Den toopa diuki' lan Sura' Allataala kumua, 'Danggi' muuji Puangmu, Puang Allataala.' " 8 Nasolan pole' omi Ballisi' to Puang Isa de' buntu gaja jao, napakitanni to sininna kaparentan lan lino sola kamala'biranna. 9 Nakua pole' omo lako Puang Isa, "La kuben ngasanko joo mukitanna, ke messuju'ko ssompana'." 10 Mebalimi nakua, "Ee Ballisi', malaiko! Den diuki' lan Sura' Allataala kumua, 'La ssompako Puangmu, Puang Allataala, na Ia manda to la mupu-Puang.' " 11 Malaimi to Ballisi', nasaba' ditalomi, anna ratu to malaeka'-Na Puang Allataala mbenni to naparalluin-Na Puang Isa. 12 Ia tonna sa'dingmi Puang Isa kumua ditarungkumi to Nabi Yahya, malemi re' tana Galilea. 13 Nasalaimi to kota Nazaret, namellele lako kota Kapernaum jio randan Tasik Galilea, tana Zebulon sola Naftali. 14 Susimi joo najaji to kadan-Na Puang Allataala mangka napau Nabi Yesaya tonna anu' kumua, 15 "Tanana pangrapuanna Zebulon sola pangrapuanna Naftali, diola lako tasik, sambali'na Sa'dan Yordan, tana Galilea, buda natorroi bangsa tangngia to-Yahudi. 16 Ia to tote'dapa naissen Puang Allataala, susimo to totuo lan kamalillinan, na ngkitamo arrang-Na Puang Allataala. Ia tuu lako tau susimo to totorro lan lino tomate, napubua' dosana, naarrangngimi arrang kasalamatan-Na Puang Allataala." 17 Ia joo wattu napamulami Puang Isa mpangpeissenanni kumua, "La mengkatoba' kamu' jio mai dosami, nasaba' cingga'tu'mora naratu Puang Allataala mangparenta susi Raja." 18 Ia tonna lumingka-mingkamo Puang Isa jio randan Tasik Galilea, ngkitami dua tosile'to disanga Simon ba'tu Petrus sola sile'tona to disanga Andreas mangjala jiong tasik, sanga iamo jamanna. 19 Nakuamo lako sola dua "Male kamu' mai nturu'na'! La kuben kamu' jaman nnajahhi tau ngkatappa'ina'." 20 Nata'pa mpatorro jalana sola dua, namale nturu'i. 21 Mpatarruhmi kalingkan-Na Puang Isa, na ngkita omo dua tosile'to disanga Yakub na Yahya anakkana Zebedeus, mpemeloi jalana lan lopi sola ambe'na. Natambai omi sola dua. 22 Nata'pa ssalai lopinna sola ambe'na, namale nturu' Puang Isa. 23 Male bangmi to Puang Isa mpasitarruh-tarruh kampong jio tana Galilea, namangngajahhi lan bola passambajangan, mpangpeissenan Kareba Kasalamatan kumua la ratumi Puang Allataala mangparenta susi Raja, na mpamalagah mangrupa-rupa sakinna tau. 24 Kaissenanmi to Puang Isa ratu re' tana Siria. Iamo joo nasabuda-budanna tau ratu lako kale-Na ssolan tomasaki to mangrupa-rupa sakinna sola kamapa'dikan, susinna tonatamai setang, tota'taran sola tokupi', napamalagahhi. 25 Ia joo wattu buda tau undi nturu' Puang Isa. Den to ratu jio mai tana Galilea, tana Sangpulo Kota, kota Yerusalem, tana Yudea, na den too to ratu jio mai sambali'na Sa'dan Yordan.

Matius 5

1 Ia tonna kitami Puang Isa to tobuda, malemi de' buntu nacumadokko jao, natalimbungngi anak gurun-Na. 2 Napamulami mangngajahhi nakua, 3 "Masannang to tau nnissenan kalena kumua tangpakulle na lako manda Puang Allataala nanii sande', nasaba' ia to tau susi joo umma'-Na Puang Allataala. 4 Masannang to tau masussa penawa, nasaba' la napakatana Puang Allataala. 5 Masannang to tau mpamajiong penawanna, nasaba' la nnampui Lino Baru. 6 Masannang to tau mamali' mpugauk pakkaeloran-Na Puang Allataala, nasaba' la naben Puang Allataala to apa nakamali'. 7 Masannang to tau ngkamasei padanna rupa tau, nasaba' la nakamasei too Puang Allataala. 8 Masannang to tomaruruh penawanna, nasaba' la ngkita Puang Allataala. 9 Masannang to tau mpasikalino padanna rupa tau, nasaba' la disanga anakka-Na Puang Allataala. 10 Masannang to tau dipakario-rio, ke mpugaukki pakkaeloran-Na Puang Allataala, nasaba' ia to tau susi joo umma'-Na Puang Allataala. 11 Masannang kamu', ke dicacca kamu', ke dipakario-rio kamu' sola ke napau gaja' kamu' tau, nasaba' mituru'na'. 12 Parannu kamu' mimasannang, nasaba' buda pahalami jao suruga. Ia tee kadipakario-rioanmi tee too, susi bang una to pura digaukanni tuu lako nabi tonna anu'." 13 Mangngajahhimi Puang Isa nakua, "Dipasangrapang kamu' ce'la! Ia ke tangmeloi penawammi, susi kamu' ce'la tangbuaci' to te'damo nadikulle mpebuaci'i pole'i, anna te'da bua'na lako padammi tolino. Ia ke te'damo bua'na to ce'la, la dica'beanmira, nasilese-lesei tau. 14 Kamu'mo to dipasusi arrangna tolino. Ia to kampong jao buntu la pajan ia. 15 Te'da tau mpadukku palita nasamboii busu, apa napajaori ngenan palita, dikua naarrangngi ngasanni to tau lan bola. 16 Iamo joo, pemakassingngimi tuu panggaukanmi nturu' Puang, nakitai tau susi lampu nnarrangngi tau, nawa'ding nnissenni to kameloan-Na Ambe'mi Puang Allataala jao suruga." 17 Mangngajahhimi Puang Isa nakua, "Danggi' misangai kumua mentamana' lino la nta'dei atoranna Nabi Musa sola pangngajaranna nabi laen. Te'da kuratu kumua la kuta'deii, apa la kupamanassanra kamu' to battuananna. 18 La miingaran tee kadang-Ku' kumua, te'dapa nala-Kiama' to lino, ke te'dapi najaji ngasan to diuki' lan atoran-Na Puang Allataala! Jaji, moi mesa' hurupu' te'da naladita'dei lan joo atoran. 19 Iamo joo ia to tote'da napesa'dingngii to parenta-Na Puang Allataala, moiraka to nasanga tangparallu, napangpangngajaran tooi susi joo, la direken tokaminang majiong jio mai umma'-Na Puang Allataala. Na sibalikanna, ia to tompesa'dingngii, napangpangngajaranni lako tolaen, la direken tokaminang mala'bih jio mai umma'-Na Puang Allataala. 20 Iamo joo, la miingaran kumua, te'da milangkullei menjaji umma'-Na Puang Allataala, ke te'da mila'bi nturu' pakkaeloran-Na Puang Allataala na ia to guru agama sola to-Farisi." 21 Mangpangngingaranmi Puang Isa nakua, "Miissenmo to pangngajah jio mai Puang Allataala lako tojolota' nakua, 'Danggi' pabuno! Ia to topabuno la dipangngoloi lako tomangra'tah kara-kara.' 22 Apa kukuan kamu' kumua, ia to tomabirih lako padanna rupa tau, la dipangngoloi lako tomangra'tah kara-kara, na ia to tongkada-kadai padanna rupa tau la dipangngoloi lako tomangparenta, na ia to tomangkada lako padanna rupa tau kumua, "Te'da iko bua'mu", sipato' dibuang tama api naraka. 23 Iamo joo, ia ke la mangkarobako, ammuingaranni kumua den solamu mangka mupa'dikki penawanna, 24 la mupatorroi jolo' to pangkarobanmu jio Bola Puang Allataala, mumale sipemeloan joo solamu, mumane' pole mangkaroba. 25 Ia ke denni tau la mparapa' kamu', na te'dapa miratu lako tomangra'tah kara-kara, madoi' kamu' sikalino jolo'. Ianna te'da mipasusii joo, la napatarruh kamu' lako tomangra'tah kara-kara, to la mpangngolo kamu' lako pulisi ammidipatama pangtarungkuan. 26 La miingaran tee kadang-Ku' kumua, ia ke te'dapi mibajahhi angge macerona to indanmi, te'da mikullei messun lan mai pangtarungkuan!" 27 Mangpangngingaranmi Puang Isa nakua, "Miissenmo to pangngajah jio mai Puang Allataala kumua, 'Danggi' manggauk sala.' 28 Apa kukuan kamu' kumua, ia to tongkita mesa' baine na madoang nggauk salai, disangami manggauk sala lan penawanna lako joo baine. 29 Jaji ianna mata kananmi ntumang kamu' mipugauk dosa, cukke'i, ammica'beanni! La'biran, ke tangsukku'i to batang kalemi, na ia ke sukku'i, apa dipatama kamu' naraka. 30 Ia ke lima kananmi ntumang kamu' mipugauk dosa, ta'takkii, ammica'beanni! La'biran, ke tangsukku'i to batang kalemi, na ia ke sukku'i, apa dipatama kamu' naraka." 31 Mangpangngingaranmi Puang Isa nakua, "Den too pangpangngajah susi tee, 'Ia to muane ssarak bainena la naben sura' talla' joo bainena.' 32 Apa kukuan kamu' kumua, ia to tossarak bainena to te'da namanggauk sala, ia mpusaba'i namanggauk sala joo baine, ke kemuane pole'i. Na ia to tompubainei to baine disarak, manggauk sala todai." 33 Mangpangngingaranmi Puang Isa nakua, "Miissen too to pangngajah jio mai Puang Allataala lako tojolota' kumua, 'Danggi' mikalupaii to apa mangka mipangngakui mpake sapah. La mipugauk to mipangngakuinna jio olo-Na Puang Allataala.' 34 Apa kukuan kamu' kumua, danggi' lalo mimangngaku mpake sapah. Danggi' mikua, 'Jao mai ngkitana'', nasaba' ia to langi' ngenan cadokkoan-Na Puang Allataala. 35 Danggi' too mikua, 'Jiong mai la ngkitana'', nasaba' ia to lino ngenan pelleseanna Puang Allataala. Danggi' too mikua, 'Jao mai kota Yerusalem ngkitana'', nasaba' iamo kota-Na Tomaraja Puang Allataala. 36 Danggi' too mikua, 'Gere'i kollongku'', nasaba' te'da mikullei mpupemmabusa ba'tu mpupemmalotong sanglambah beluakkami. 37 Danggi' mimangkada totosik, apa la mikua 'io' ke tonganni, 'te'da' ke tangtonganni. Ia ke mangngakuko mpake sapah, pole jio ngasan mai Ballisi'." 38 Mangpangngingaranmi Puang Isa nakua, "Miissen too to pangngajah kumua, 'Ia ke misolanganni mesa' matanna to tau, la disolangan todai mesa' to matammi, ba'tu ia ke misolanganni mesa' isinna to tau, la disolangan todai mesa' to isimmi.' 39 Apa kukuan kamu' kumua, danggi' mimangpabalahhi lako to tompa'dikki penawammi. Apa sibalikanna, ia ke den tau ssala'pai to popo kananmi, patananan pissenni to popo kairimmi. 40 Ianna den tau ngkadoangngi bajummu anna parapa' kamu' lako to pangbicara, la miben pissenni to baju landomi. 41 Ianna den puanggawa mparuku kamu' mpanglembanni mesa' kilo belana, panglembaran pissenni dua kilo. 42 Ianna den tau mpeta'dai kamu' apa, benni to napeta'da. Ianna den tau mpangngindanni kamu', danggi' mikua te'da." 43 Mangpangngingaranmi Puang Isa nakua, "Den too pangpangngajah misa'ding kumua, 'Pakamoja'i to solami, ammikaba'cii to ewalimmi.' 44 Apa kukuan kamu' kumua, pakamoja'i to ewalimmi, mipassambajanganni to tompakario-rio kamu', 45 ammiwa'ding dikita anakka-Na Ambe'mi Puang Allataala jao suruga. Nasaba' Puang Allataala mpadenan allo tokassing sola togaja' na mparatuan too uran tomelo sola totangmelo. 46 Sitonganna, ia ke mipakamoja'i to tompakamoja' kamu', te'da miampa'i to pahalami jao suruga, nasaba' moi passassung napugauk toda susi joo. 47 Ia ke ia manda misalama' to padammi tomatappa', apara kala'bianmi na tau laen? Moi to tau te'da naissen Puang Allataala napugauk toda susi joo. 48 Ia to Ambe'mi Puang Allataala jao suruga mpakamoja' sininna tolino. Iamo joo la susi toda mipugauk."

Matius 6

1 Mangngajahhimi Puang Isa nakua, "Danggi' mipugauk panggaukan melo ke la mipangpekitanri lako tau, dikua napuji kamu'. Ia ammimanggauk susi joo, te'da miampa'i to pahalami jio mai Ambe'mi Puang Allataala jao suruga. 2 Jaji, ia ammimangpangben, danggi' mipau-paui susi tomajekkong. Ia to tau susi tuu lako nakabudai mpugauk panggaukan makassing lan bola passambajangan, ba'tu jio lalan maroah, dikua nakitai tau napujii. La miingaran tee kadang-Ku' kumua, mangkami ia natarima to pahalana. 3 Apa ia to kamu', ia ammimangpabengan, danggi' mipau-paui, nadanggi' naissenni tau. 4 Ma'na bangmo te'da tau nnissenni to mipugaukkuna, saliwanna Ambe'mi Puang Allataala jao suruga to ngkita apa membuni, na la mben kamu' pahalami." 5 Mangngajahhimi Puang Isa nakua, "Ia ammimassambajang, danggi' misusi tomajekkong. Ia to tau susi tuu lako nakabudai massambajang lan bola passambajangan sola jio too pangpasitammuan lalan, dikua nakitai tau. La miingaran tee kadang-Ku' kumua, mangkami ia natarima to pahalana! 6 Apa ia ke massambajang kamu', mentama kamu' sapa', misalli'i, mimane' massambajang lako Ambe'mi Puang Allataala, to tangnakita mata. Na ia to mipugaukkuna nakita Ambe'mi Puang Allataala, to la ben kamu' pahalami. 7 Ia ammimassambajang, danggi' midadu'-dadu' bangngi to kada mipau, susi to tau tangmatappa' lako Puang Allataala. Nasaba' nasangai kumua ia to apa napassambajangan, la natarima Puang Allataala, ke malandoi passambajangna. 8 Danggi' misusi joo, nasaba' te'dapa mipeta'dai, naissen jolomo Ambe'mi Puang Allataala to miparalluinna. 9 Jaji, ia ammimassambajang, la mikua susi tee: Oo, Ambe'ki', Puang Allataala jao suruga. Dennaa upa' na sininna tau mpakala'bihki', 10 anna tarima parenta-Ta'. Dennaa upa' najaji pakkaeloran-Ta' lan tee lino susi jao suruga. 11 Benkan kande to kiparalluinna tee allo. 12 Dampangankan, susi kami' ndampangan tokasalan lako kaleki'. 13 Danggi' taelorankan ta'de kamatapparanki' ke disedekan mpugauk dosa, apa la'parankan jio mai kuasanna Ballisi'. Nasaba' Rajaki', makuasaki' na mala'bihki' te'da cappa'na. Amin. 14 Ia ke midampanganni to tokasalan lako kalemi, manassa kumua nadampangan toda kamu' Ambe'mi Puang Allataala jao suruga. 15 Apa ia ke te'da midampanganni, manassa kumua te'da toda nadampangan kamu' Ambe'mi Puang Allataala." 16 Mangngajahhimi Puang Isa nakua, "Ia ammipuasa, danggi' mimenggamuru bang susi tomajekkong. Ia to tau susi joo naanggai' bang tangmendau', dikua naissenni tau kumua puasai. La miingaran tee kadang-Ku' kumua, mangkami ia ntarimai to pahalana! 17 Ia ammipuasa, mendau' kamu', ammimessuru' melo, 18 danggi' naissenni tau kumua puasa kamu', na Ambe'mi manda Puang Allataala to tangnakita mata, la nnissenni, to la mben kamu' pahalami." 19 Mangngajahhimi Puang Isa nakua, "Danggi' murempunan kalemu ewanan lan lino, to wa'ding nakande ane, ta'garan, ba'tu naboko tau. 20 Sibalikanna la'bi melo ke manggauk meloko, nasaba' susimi joo murempunan kalemu ewanan jao suruga, to te'da nakullei nakande ane, ta'garan, ba'tu naboko tau. 21 Nasaba' umbo-umbo nanii to ewananmu, la munawa-nawa tarruh bangngi. 22 Ia to mata penawa dipasangrupa lampunna kale. Ianna makassing to mata penawammi, manassa la nnissen kamu' pangngajaran tongan jio mai Puang Allataala. 23 Apa ianna tangmelo to mata penawammi, manassa te'da mipahangngi to pangngajaran tongan. Jaji, ianna pamalillinni Ballisi' to mata penawammi, manassa te'da mipahangngi to pangngajaran tongan. 24 Te'da tau ngkullei mengkaunan lako dua puanggawa, sanga la nakabudai ia to mesa' na ia to laenna nakaba'ci, ba'tu la napangjaman tongan-tongan to mesa' na ia to laenna makuttui mpangjamanni. Susi too kamu', te'da mikullei nturu' pakkaeloran-Na Puang Allataala, ke kasugiran lino manda miangah. 25 Iamo joo, la miingaran! 'Danggi' mipuselangngi to katuoanmi, to kumua apara la mikande, ba'tu la miiso', ba'tu apara to la miputamangkale. Nasaba' la'bi parallu ia to katuoan na ia to kande, na ia to batang kale la'bi parallu na ia to pakean! 26 Kitari to manuk-manuk jao langi'. Te'da namantanan, te'da namepare, ba'tu rrempun pare anna patamai pa'pak, apa napatuo unai Ambe'mi Puang Allataala jao suruga. Na la'bi keangga' kamu' na ia to manuk-manuk! 27 Moi mipuselangngi to katuoanmi, te'da mikullei mpamalambeh sunga'mi moi sangmanne'! 28 Danggi' mipuselangngi to la mipake! Kitari to bunga bakung umbo nakua tuona jio padang. Te'da namangjama, te'da too namangngunu.' 29 Apa la miingaran, 'Moi Raja Sulaiman, to gaja sugih, te'da nampake pakean susi ballona joo bunga!' 30 Ee, totangmatappa'! Ia ke naballoii Puang Allataala to reu jio padang susi joo, to tuo tee allo, na masawa disumpun, apa pole'raka to kamu' sola ngasan! 31 Iamo joo, danggi' mipuselangngi to kumua, apara to la mikande, ba'tu apara to la miiso', ba'tu apara to la miputamangkale. 32 Ia ngasan to susi joo naangah bang tolino to tangnturu' Puang Allataala. Apa naissen ia Ambe'mi jao suruga kumua miparallui ngasan joo. 33 La mipengkulle-kullei mpugaukki to pakkaeloran-Na Puang Allataala sola to apa nakabudai, na ia to laenna miparallui la naben too kamu'. 34 Iamo joo danggi' mipuselangngi to la miputuona masawa. Ganna'mo ke mipikkiri'i to la miputuona tee allo, nasaba' masawanna, laen o ia to napuselangna."

Matius 7

1 Mangngajahhimi Puang Isa nakua, "Danggi' mipasala padammi rupa tau, anna danggi' napasala kamu' Puang Allataala. 2 Nasaba' ia to minii mpasala tau, ia toda la napasalan kamu' Puang Allataala. Ia to pesuka' misukatan tau, la napake too Puang Allataala ssuka' kamu'. 3 Ciapari mikitai to bulicak lan matanna padammi rupa tau, na kaju sangbatang lan matammi te'da misa'dingngi. 4 Umbo la mikua mangkada lako padammi rupa tau, 'Ake'mo na aku' nnalaii tuu bulicak lan mai matammu' nasitonganna den kaju sangbatang lan matammu. 5 Ee, tomajekkong! Alaii jolo' to kaju sangbatang lan matammi! Ianna macoramo pengkitanmi, mane'ra kamu' wa'ding nnalaii to bulicak lan mai matanna padammi rupa tau. 6 Danggi' mupangben apa mala'bih lako asu, nasaba' la messailei ngkengkeko, na danggi' mupangben mutiaramu lako bai, nasaba' la naleseri." 7 Mangngajahhimi Puang Isa nakua, "Peta'dai lako Puang Allataala to miparalluinna, ammidiben. Angahhi to miparalluinna, ammiampa'i. Peta'dai ammidiben, susi to tomangdedek la ditimbakan bola. 8 Nasaba' ia to tometa'da lako Puang Allataala la dibenni, na ia to tonnangahhi la naampa'i, na ia to tomangdedek la ditimbakanni bola. 9 Te'da tau mben batu anakkana, ke meta'dai nande, 10 ba'tu nabenni ulah, ke meta'dai bale. 11 Jaji, moi mitogaja', la miissen mbenni to melona lako anakkami, apa pole'raka to Ambe'mi Puang Allataala jao suruga la mben kamu' to miparalluinna, ke meta'da kamu'. 12 Pugaukki lako padammi rupa tau, to apa mikadoangngi napugauk tau lako kalemi. Nasaba' iamo joo to dipangpangngajaran lan sura'na Nabi Musa sola sura'na nabi laen." 13 Mangngajahhimi Puang Isa nakua, "Nnola tama kamu' babangan si'pi', nasaba' maluah to babangan na maluah too to lalan diola lako naraka na buda tau nnolai. 14 Apa gaja si'pi' to babangan na si'pi' too to lalan diola lako katuoan melo te'da cappa'na, na ci'di'ra tau to nnampa'i." 15 Mangpakainga'mi Puang Isa nakua, "Majaga melo kamu' lako nabi tangtongan, to mentama tangnga-tangngami mangmalamma-lamma susi bembala', apa sitonganna susi asu lampung penawanna. 16 Jio mai panggaukanna la minii nnissen tonganni kumua indara ia. Duri kamban te'da namembua anggoro', na pangngala duri te'da namembua ara. 17 Ia to kaju melo, melo toda buanna. Apa ia to kaju gaja', tangmelo toda buanna. 18 Te'da nakullei to kaju melo la gaja' buanna, ba'tu kaju gaja' la melo buanna. 19 Ia to kaju gaja' buanna, la dita'bangngi ngasan, nadisumpun. 20 Jaji, ia to nabi tangtongan la miissen jio mai panggaukanna." 21 Mangngajahhimi Puang Isa nakua, "Te'da na ia ngasan to tau to metamba-tamba lako kale-Ku' nakua, 'Oo Puang! Oo Puang!' to la menjaji umma'-Na Puang Allataala. Apa iara to tau mpugauk pakkaeloran-Na Ambe'-Ku' jao suruga, la menjaji umma'-Na. 22 Ia ke Kiama'mi lino, buda tau la mangkada lako kale-Ku' kumua, 'Oo, Puang! Ia tongkipangpeissenan Kareba Kasalamatan ba'tu nnula'ikan setang sola mpugauk buda tanda mejangngaran, sangan-Ta' kipau.' 23 Apa la kukuan pissenri, 'Ee togaja', palai kamu' ntee! Tangngia kamu' taung-Ku'!' " 24 Mangngajahhimi Puang Isa nakua, "Iamo joo, ia to tompesa'dingngii tee kadang-Ku', napugaukki, iamo dipasusi tomandalan tangngah to mpake'deh bolana jao pondasi batu. 25 Ianna uran rambak nasaba' to wai, namangngiri' to angin bara' ssiokki joo bola, te'da naro'pok, nasaba' dipake'dehhi jao pondasi batu. 26 Apa ia to tossa'ding kadang-Ku', na te'da napugaukki, iamo dipasusi tobango' mpake'deh bolana jao bungin. 27 Ianna uran rambakmo nasaba' to wai, namangngiri' to angin bara' ssiokki joo bola, ta'pa ro'pokmi." 28 Ia tonna mangka ngasanmo napangpangngajaran Puang Isa joo, sijangngaranmi to tobuda ssa'ding pangngajaran-Na, 29 nasaba' matongko ke mangngajahhii, te'da nasusi guru agama.

Matius 8

1 Ia tonna mellaomo Puang Isa jao mai joo buntu, liwa' buda tau undi nturu'i. 2 Ta'pa ratumi mesa' to tomasolak, suju' jio olo-Na Puang Isa nakua, "Oo Puang, ia ke melohki', manassa kumua makuasaki' mpamalagahna'." 3 Nne'te'mi liman-Na Puang Isa, nakaka'i nakua, "Melohna', malagahmoko!" Ta'pa melomi to kalena joo wattu. 4 Nakuamo Puang Isa, "Danggi' lalo mucuritai moi lako mesa' tau, apa maleko lako imang jao kota Yerusalem, mupeta'dai napattantui kumua malagah tonganmoko! Mumane' mpugauk tooi to karoba kamalagaranmu situru' atoranna Nabi Musa, namenjaji butti lako sininna tau." 5 Ia tonna malemo tama kota Kapernaum to Puang Isa, ratumi mesa' to kamandang surudadu Roma mengkamalah-malah, 6 nakua, "Oo Puang, kupi'i to kaunanku' jio bolaku', namamma' bangmira, naliwa' dikka' maparri'na." 7 Mebalimi nakua, "La malena' lako bolamu la mpamalagahhi." 8 Apa mebalii tee kamandang nakua, "Oo Puang, te'da kusipato' la ntarimaki' jio bolaku'. Jaji mangkada bangmiki', napumalagahhi to kaunanku'. 9 Nasaba' ia tee aku' tonturu'na' parentana tomparentana', na den toda surudadu kuparenta to nturu' parentaku'. Ia angkusuai to surudadu kumua, 'Maleko!', nang la malei, na ia angkukua lako to laenna, 'Maleko mai!' nang la ratui. Na ia angkusuai to kaunanku' kumua, 'Pugaukki tee!' nang la napugaukki ia." 10 Jangngahmi Puang Isa ssa'dingngi joo kadanna. Messailemi anna mangkada lako tobuda to undi nturu'i nakua, "La miingaran tee kadang-Ku' kumua, liwa' matappa' tee tau! Te'dapa tau kuampa' kamatapparan susi tee, moi lan tangnga-tangngana to-Israel! 11 La miingaran! Buda tau tangngia to-Yahudi la ratu jio mai kadellekan sola jio mai kalambunan, na la mangmaroah-roah sola Nabi Ibrahim, Ishak, na Yakub lan Lino Barun-Na Puang Allataala. 12 Na sitonganna buda to-Israel to sipato' la menjaji umma'-Na Puang Allataala, la dica'bean tama ngenan malillin, iamo to disanga naraka. Ntuu jio la nanii kumarrak na sunggarigi'." 13 Mangkai joo too, nakuamo Puang Isa lako joo kamandang, "Polemoko. Apa to mukatappa'i, iamo la jaji." Ia joo wattu ta'pa malagahmi to kaunanna. 14 Malemi Puang Isa lako bolana Petrus. Mentamami bola, nakitai to indo matuanna Petrus makula' kale namamma' bang. 15 Nakaka'i Puang Isa to limanna, nata'pa malagah. Ke'dehmi, namale mpasadianni kande to Puang Isa. 16 Ia tonna kabuhmo allo, budami tau ratu mbawa tonatamai setang sola tomasaki lako Puang Isa, na sangbukura kada napau, nnula'ii tuu lako setang lan kalena tau, napumalagah ngasanni to tomasaki. 17 Susimi joo najaji to kadan-Na Puang Allataala mangka napau Nabi Yesaya tonna anu' kumua, "Iamo mpupa'dik pa'dikkita' na llendokan sakinta'." 18 Ia tonna kitai Puang Isa buda tau ntalimbungngi, nasuami to anak gurun-Na, nalamban lian sambali'na tasik. 19 Denmi mesa' guru agama ratu lako Puang Isa nakua, "Oo, Guru! La undina' nturu'ki' umbo-umbo taola." 20 Mebalimi nakua, "Cinggallun den ia lo'ko'na, sola manuk-manuk den ia serangna, apa ia tee Aku', Anak Mentolino, te'da ngenan kunii mamma'." 21 Den pole' omi mesa' tonturu'i meta'da nakua, "Oo, Puang! Eloranpa' jolo' kupole llamun ambe'ku'." 22 Apa mebalimi nakua, "Undiko nturu'na'! Ake'mo na tomatemora llamun tomatena." 23 Ia tonna endekmo Puang Isa de' lopi, endek todami to anak gurun-Na. 24 Ta'pa mangngumbukmi to angin bara' jiong tasik, na la tallan to lopi, nasaba' natamai wai bombang, apa mamma' bangngi to Puang Isa. 25 Malemi to anak gurun-Na ntundanni nakua, "Oo Puang, turunnikan, la tallanmiki'!" 26 Mebalimi nakua, "Ammimalaja'ra na te'da mikatappa'ina'!" Ke'dehmi nagarra'i to kalimpuru sola bombang, narapa' to tasik. 27 Jangngah ngasanmi tuu lako tau nakua, "Indara ia sitonganna tee tau, na moi angin sola tasik nturu' too parenta-Na!" 28 Ratumi Puang Isa lian sambali'na Tasik Galilea jio tana Gadara. Den dua tau tonatamai setang ntuu jio. Liwa' sa'ga' joo tau sola dua, napusaba'i na te'da tau barani nnolai joo lalan. Ia tonna ratumo Puang Isa ntuu jio, messunmi sola dua lan mai lo'ko' tomate namale mpessitammuii. 29 Metamba-tambami nakua, "Anak Allataala! La tapatumbamorakan tee? La ratumiriki'ka la ncallakan, na te'dapa nawattunna?" 30 Te'da namambela jio mai ntuu joo, den buda bai massumben. 31 Ia tuu lako setang meta'da lako Puang Isa nakua, "Ia ke la taula'ikan, suakan mentama ntuu lako bai." 32 Nakuanmi Puang Isa, "Malemo kamu'." Messunmi tuu lako setang, namentama bai. Sikinjarasanmi tuu lako bai jao mai awa', nampentujoan kalena do' tasik, anna mate ngasan. 33 Ia joo tomangrewa bai, sikinjarasanmi male tama kota, mpaui to apa mangka jaji lako joo dua tau natamai setang, napau tooi to bai simatean. 34 Messun ngasanmi to tau lan mai kota mpessitammui Puang Isa. Ia tonna sikitamo, meta'da tongan-tonganni kumua nasalaii joo tana Gadara.

Matius 9

1 Mangkai joo endekmi Puang Isa de' lopi, nalamban lian kampong-Na. 2 Denmi mesa' tokupi' nabulle tau lako Puang Isa, dipamamma' bang jiong ampah. Ia tonna issenmi Puang Isa matumba kamatapparanna tuu lako tau mangkadami lako joo tokupi', nakua, "Ee anak-Ku'! Pemalapuhhi penawammu. Didampanganmoko." 3 Denmi ba'tu pira-pira guru agama ssa'dingngi, namangkada lan penawanna nakua, "Ia tee tau ncapa' Puang Allataala, sanga mpapada Ia Puang Allataala kalena." 4 Naissen Puang Isa to lan penawanna tuu lako guru agama. Iamo joo nakuanni, "Ciapari mimangpikkiri' gaja' susi tuu? 5 Umbonnara marawa, dikuaraka, 'Didampanganmoko', ba'tu dikuaraka, 'Ke'dehmoko mulumingka.' 6 Apa ia tee wattu la kupakitan kamu', kumua makuasana' Aku', Anak Mentolino, ndampangan tomadosa lan tee lino. Iamo joo kukua lako tee tokupi', 'Ke'dehmoko, angka'i tuu ampahmu, mupole.' " 7 Ke'dehmi joo tokupi' napole. 8 Ia tonna kitami tobuda joo apa jaji, silajatan ngasanni, anna mpakala'bih Puang Allataala to mpangben kuasa liwa' tonggo lako tolino. 9 Ia tonna mpatarruhmo kalingkan-Na Puang Isa, ngkitami mesa' passassung disanga Matius cumadokko lan kantoro'na. Nakua Puang Isa lako, "Maleko mai nturu'na', kupuanak guruko!" Ta'pa ke'dehmi anna male nturu'i. 10 Ia tonna kumande Puang Isa sola anak gurun-Na jio bolana Matius, ratumi buda to passassung laen, sola to tonasangamo tau togaja', nakumande sola. 11 Denmi to-Farisi ngkitai anna kutanaii to anak gurun-Na Puang Isa nakua, "Ciapari nakumande ora gurummu sola passassung na totangnturu' atoran agama?" 12 Nasa'ding Puang Isa to pekutananna, napebalii nakua, "Ia to tomalagah te'da naparallui tomangjampi, apa tomasakira. 13 Te'da kuratu la ntulung tossanga kalena tomelo, apa ratura' ntulung tomadosa, anna mengkatoba'. Pelajahhii apa battuananna tee kadan-Na Puang Allataala lan Sura' Allataala, 'Kamamaseanra lako padammi rupa tau to kuangah, tangngia karoba olok-olok.' " 14 Mangkai joo ratumi to anak gurunna Nabi Yahya lako Puang Isa, namekutana nakua, "Ciapari na kami' manda sola to-Farisi to puasa, na te'da ia to anak gurun-Ta'?" 15 Napebalii Puang Isa mpake pangpasusian nakua, "Ianna botting to tau, misangaraka kumua la puasai to toratu! Ianna solapa tobotting muane, tantu te'da! Apa la den wattunna naladiala jio mai tangnga-tangngana joo tobotting muane, iamo tee Aku', mane'ri puasa to toratu, iamo tee anak gurung-Ku'." 16 Nakua pole' omo, "Te'da tau mpangtampiran pancurikan baru lako baju maluse, nasaba' la timporon joo pangcurikan baru naca'ceanni joo baju maluse, nasaca'ce-ca'cena. 17 Te'da tau mpatama anggoro' baru tama pangpanian malusemo, to dikabua' jio mai balulang, nasaba' ia namangkamburamo, tiba'tui joo pangpanian malusemo, natibaku to anggoro'. Jaji la sajang duai to anggoro' sola pangpanianna. Ia to anggoro' baru la dipatama todapi ia pangpanian baru, dikua nasalama' joo anggoro' sola pangpanianna." 18 Ia tonna mangkada unapa Puang Isa lako anak gurunna Nabi Yahya, ratumi to kapala bola passambajangan. Suju'mi jio olo-Na Puang Isa nameta'da nakua, "Mane' mangka dikka' mate to becce'ku'. Apa mengkamase-masena' lako kale-Ta' ke wa'dingngi, antamalepa ngkaka'i, natuo pole'." 19 Ke'dehmi to Puang Isa namale situru' joo tau, naundi toda to anak gurun-Na. 20 Ia tonna jiomo tangnga lalan, denmi mesa' baine to sangpulo duamo taunna maparri' tongan nasa'ding, nasaba' macarepa tarruh bangngi. Malemi mpendete'i Puang Isa jio mai boko'-Na, anna kaka'i to tampak baju lando-Na, 21 nasaba' nakua lan penawanna kumua, "Moi kukaka' bangri to baju lando-Na, manassa la kupumalagah." 22 Ta'pa messailemi to Puang Isa nakitai joo baine, namangkada nakua, "Ee, anak-Ku', pemawatangngii to penawammu! Malagahmoko, nasaba' mukatappa'ina'!" Ia joo wattu ta'pa malagahmi. 23 Ia tonna ratumo to Puang Isa lako bolana joo kapala bola passambajangan, ngkitami buda tau mbating sola tomassuling kamasussan. 24 Nakuanmi Puang Isa tuu lako tau, "Messun ngasan kamu'! Te'dara namate tee pea, apa mamma'ri." Napetawa-tawaimi tau. 25 Ia tonna simessunanmo to tau, malemi Puang Isa ntoei to limanna joo pea, nata'pa tuo pole'. 26 Ia joo kajajian ta'pa naissen sininna tau lan joo kampong na mengguririkkina. 27 Ia tonna patarruhmo kalingkan-Na Puang Isa, denmi dua tobuta undi metamba-tamba nakua, "Oo Puang, bati'na Raja Daud, kamaseikan dikka'." 28 Ia tonna mentamamo bola, ratumi joo tobuta sola duai lako Puang Isa. Nakutanaimi Puang Isa nakua, "Mikatappa'iraka kumua wa'dingna' mpapakita kamu'?" Mebalimi nakua, "Ie', kikatappa'i kita' Puang!" 29 Nakaka'mi Puang Isa to matanna nakua, "Susi to mikatappa'ina, iamo jaji." 30 Pakitami sola dua. Napakainga'mi Puang Isa kumua, "Danggi' lalo naden tau mipauan joo apa jaji." 31 Apa ia tonna messunmo lan mai bola sola dua, malemi ncuritai lako tau lan joo kampong na mengguririkkina. 32 Ia tonna malemo joo tau dua, den omi mesa' tomamang, sanga natamai setang, nabawai tau lako Puang Isa. 33 Naula'imi Puang Isa joo setang, nata'pa mangkada joo tau. Jangngahmi to tobuda nakua, "Wah, te'dapa takita to susinna tee inde' Israel!" 34 Apa nakua to to-Farisi, "Kuasanna puanggawana setang napake nnula'i setang." 35 Mangkai joo, malemi Puang Isa llelei kota sola kampong napasitarruh-tarruhhi. Mangngajahhimi lan bola passambajangan, mpangpeissenan Kareba Kasalamatan kumua la ratumi Puang Allataala mangparenta susi Raja, na mpamalagah tau to mangrupa-rupa sakinna. 36 Ia tonna kitami Puang Isa joo tobuda, massemi penawan-Na, sanga susi bangmira bembala' to te'damo tomangrewana, tangnnissenmo pangngujungan na tangpakulle. 37 Nakuamo Puang Isa lako anak gurun-Na, "Siririanmo to pare, apa ci'di'ra tomepare. 38 Iamo joo peta'dai lako to ampunna uma, nasuai to tau male mpepareanni!"

Matius 10

1 Natambaimi Puang Isa to sangpulo dua anak gurun-Na sirempun, nabenni kuasa nnula'i setang, na mpamalagah mangrupa-rupa sakinna tau. 2 Ia to sanganna joo sangpulo dua rasulu'-Na Puang Isa susi tee: Simon (ba'tu Petrus) na Andreas to sile'tona. Namane' dua anakkana Zebedeus, iamo to Yakub na Yahya. 3 Sitarruhna Filipus, Bartolomeus, Tomas, Matius to passassung, Yakub anakkana Alfeus, Tadeus, 4 Simon tobarani, na Yudas Iskariot to undinna mpangpejokkoan Puang Isa. 5 Nasuami Puang Isa joo sangpulo dua anak gurun-Na, napasanni kumua, "Danggi' mimale lako bangsa tangngia to-Yahudi, moi lako to-Samaria. 6 Apa male lako manda kamu' to-Israel, nasaba' susimi to bembala' sala lalan. 7 Pauanni kumua cingga'tu'mora naratu Puang Allataala mangparenta susi Raja. 8 Pamalagahhi to tomasaki sola tomasolak, patuoi to tomate, ula'ii to setang. Ia tee diben bangra kamu', iamo joo la mipangben bang todari. 9 Ia ammimale, danggi' mibawa doi' bulawan, ba'tu salaka iarika tambaga. 10 Danggi' too mibawa sepu', ba'tu baju duang lambah, iarika sapatu ba'tu tekken. Nasaba' ia to tomangjama, sipato' ntarima sarona. 11 Ia ke ratu kamu' lako mesa' kota ba'tu kampong, angahhi tosipato'na la minii torro jio sanggemmi male pole' mpatarruh kalingkanmi. 12 Ia ammimentama bola la mikua, 'Dennaa upa' nabarakka'i kamu' Puang Allataala.' 13 Ia ke natarima melo kamu' joo ampu bola, ia joo pangbarakka'mi la torroi lan joo bola. Apa ia ke te'da natarima melo kamu', ake'mo na pole pole' joo pangbarakka'mi lako kalemi. 14 Ia ammiratu lako mesa' bola ba'tu kota, na te'da natarima kamu' to tau jio, iarika tangnapesa'dingngi kamu', salai joo bola ba'tu kota, mipentambakanni to carepa jio ajemi. 15 Ingaranni! Ia ke Kiama'mi lino, la'bi nasessai Puang Allataala to tau lan joo kota na ia to to-Sodom na to-Gomora." 16 Nakuan pole' omi Puang Isa to anak gurun-Na, "Pesa'dingngii! Kusua kamu' male susi bembala' mentama tangnga serigala. Iamo joo la macca kamu' mbawa kalemi, mimaruruh. 17 La majaga kamu', nasaba' la dijokko kamu', ammidipangngolo lako tomangra'tah kara-kara. La dirambi kamu' lan bola passambajangan. 18 La dipangngolo kamu' lako tomangparenta sola raja, nasaba' mituru'na'. Iamo joo wattu la minii mpangpeissenanni to Kareba Kasalamatan lako tuu lako tau, sola totangnnissenpa Puang Allataala. 19 Apa ia ammidipangngolo, danggi' miselang kumua apara la mipau, ba'tu umbo la mikua mebali. Nasaba' la dipauan kamu' apa to la mipau joo wattu. 20 Jaji tangngia kamu' la mangkada joo wattu, apa Roh-Na Ambe'mi Puang Allataala mpupangkada kamu'. 21 La nakaba'ci kamu' buda tau, nasaba' mikatappa'ina'. Na la jaji susi tee, tomassile'to mpangpebunoan sile'tona. Susi toda ambe' lako anakkana. Anak nnewa tomatuanna, napangpebunoanni. Apa ia to tomatappa' tarruh ratu lako ssalainna lino la dipasalama'. 23 Ianna pakario-rio kamu' tau lan mesa' kampong, palai kamu' lako kampong laen, nasaba' sitonganna Aku', Anak Mentolino, ngkuan kamu' kumua, 'Te'dapa napura to kota jio Israel milelei, kuratu pole' keanu'.' 24 Ia to mesa' passikola te'da nala'bi matande na gurunna, susi toda to kaunan te'da nala'bi matande na puangna. 25 Ganna'mi ke passikola pada gurunna, na kaunan pada puangna. Ia ke nasangana' tau Beelzebul, puanggawana setang, apa pole'pi kamu' to tonturu'na' la'bi-la'bi la gaja' sangammi." 26 Nakua pole' omo Puang Isa, "Danggi' mimalaja' lako tolino, nasaba' te'da to membuninna tangladipangpekitan, na te'da to dibunianan tangladipangpeissenan undinna. 27 Apa to kupauan kamu' ke bongi, la mipau ke allomi. Na apa to kupangbisikan lako kamu', la mipetamban jio pangbudan tau. 28 Danggi' mimalaja' lako tolino to batang kale manda nakulle nabuno, apa te'da nakullei mbuno penawammi. Puang Allataalara to sipato' mikalaja', nasaba' ianna mangka mbuno kamu', makuasapa Ia mpatamai naraka to batang kalemi sola penawammi. 29 Mesa'ra de'pen allinna ke dua denah, apa moi mesa' te'da nakullei mate, ke te'da napuelohhi Ambe'mi Puang Allataala. 30 Susi toomo moi beluak jao ulummi mangkamo dibilang ngasan. 31 Iamo joo danggi' mimalaja', nasaba' la'bi keangga' kamu' na ia to denah!" 32 Mpatarruhpa kadan-Na Puang Isa nakua, "Ia to tonnakuina' jio olona tobuda kumua tomenturu'i lako kale-Ku', la kuakui todai jio olo-Na Ambe'-Ku' jao suruga. 33 Apa ia to tompessakkannina' jio olona tobuda, kumua te'da namenturu' lako kale-Ku', la kupessakkanni todai jio olo-Na Ambe'-Ku' jao suruga." 34 Nakuapa Puang Isa, "Danggi' misangai kumua ratuna' mbawa kasikalinoan tama lino. Tangngia kasikalinoan to kubawa, apa kasiewalianra. 35 Ia to karatuan-Ku' napusaba' anna anak muane nnewa ambe'na, anak baine nnewa indona, na anak mamintunna baine nnewa indo matuanna. 36 Pada kamu' tosangbola la siewali tarruh. 37 Inda-inda to la'bi mpakamoja' tomatuanna na Aku', tangsipato' menjaji taung-Ku'. Susi toomi to la'bi mpakamoja' anakkana na Aku'. 38 Na ia to tocia' mpassan kaju sitambenna na nturu'na', tangsipato' menjaji taung-Ku'. 39 Ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na." 40 Mpatarruhpa kadan-Na Puang Isa nakua, "Ia to tontarima kamu', padamo to Aku' natarima. Na ia to tontarimana', padamo to ntarima Puang Allataala to ssuana'. 41 Ia to tontarima nabi, sanga tonasuai Puang Allataala, la llolongan barakka' susi nabi. Na ia to tontarima tomanggauk melo, sanga tomeloi, la llolongan barakka' susi tomanggauk melo jio mai Puang Allataala. 42 Ia to tompaiso' sala mesa'na tee todikita majiong, nasaba' naturu'na', moi wai lino bangra, ingaranni, kumua la llolonganni barakka'."

Matius 11

1 Ia tonna mangkamo Puang Isa nnajahhi sangpulo dua anak gurun-Na, mpatarruh pole'mi kalingkan-Na male lako kampong to nasiandaran mpangpeissenan Kareba Kasalamatan. 2 Ia tonna sa'dingmi Nabi Yahya lan pangtarungkuan to kareba apa to napugauk Puang Isa, nasuami to ba'tu pira-pira anak gurunna male lako Puang Isa mekutana kumua, 3 "Kita'moraka Raja Mangpasalama' to kitajan, ba'tu la ntajanpakan tau laen?" 4 Mebalimi Puang Isa nakua, "Polemo kamu' mipauanni gurummi apa to misa'ding sola mikita. 5 Pakitamo to tobuta, lumingkamo to tokupi', dipamalagahmo to tomasolak, pasa'dingmo to tomataru, dipatuomo to tomate, na dipangpeissenanmo to Kareba Kasalamatan lako tomakario-rio. 6 Masannang tongan to tau tangmenassan ntarimana'." 7 Ia tonna polemo to pesuanna Nabi Yahya, napamulami Puang Isa mpaui lako tobuda to Nabi Yahya nakua, "Apara male mikita jio padang pallawangan? Te'da mimale ngkita sanglambah reu nairi' angin. 8 Apara male mikita? Tomangpakean balloraka? Te'da too, sanga ia to tau mangpakean susi joo, torro lanri ia salassa'! 9 Jaji, apara male mikita? La ngkitara kamu'ka nabi? Tongan. La mikatappa'i kumua, la'bipa ia na nabi. 10 Nasaba' Nabi Yahyamo to mpasadia tau la ntarimana'. Susi to diuki' lan Sura' Allataala mpau Nabi Yahya kumua: Mangkadai Puang Allataala, 'Iamo tee pesuang-Ku', to kusua la njoloanko, anna pemakassingngii to lalan la muola.' " 11 Nakuapa Puang Isa, "La miingaran tee kadang-Ku' kumua, lan tee lino te'da tau la'bi mala'bih na Nabi Yahya, apa moi nasusi joo ia to tokaminang majiong jio mai umma'-Na Puang Allataala la'bi mala'bihpa ia na Nabi Yahya. 12 Sipamulanna Nabi Yahya mangngajahhi ratu lako too allo, buda tau nnewamo kaparentan-Na Puang Allataala madoang la rampa kuasan-Na. 13 Nasaba' ia tonna te'dapa naratu Nabi Yahya, napau jolomo sininna nabi na diuki' toomo lan sura'na Nabi Musa to karatuanna kaparentan-Na Puang Allataala. 14 Ia tonna anu' den nabi mpaui kumua la ratu pole' to Nabi Elia. Ia ke mitarimai, Nabi Yahyamo to Nabi Elia. 15 Ingaranni to apa mangka misa'ding, sanga ketalinga kamu'! 16 Apara la kupasusianni to tau too allo? Susi to pea sicadokkoan jio pasa' metamba-tamba lako solana, 17 'Kipassulinganmo kamu', apa cia' kamu' menari'. Mpakkelonganmokan kelong kamasussan, na te'da mimbating.' 18 Battuananna: ratumo to Nabi Yahya, napuasa na te'da naiso' anggoro', nakua ora tau kumua, 'Natamaii setang.' 19 Na ratu omo' Aku', Anak Mentolino, kukumande sola mangngiso', nakua omo tau kumua, 'Kitai joo tomaullak, pangngiso', soba'na passassung sola togaja' sipa'na.' Apa moi na susi joo, mandalan tangngah to Puang Allataala, na ia to kamandalanan tangngah-Na pajan lan panggaukan-Na." 20 Liwa' nacacca Puang Isa to tau lan ba'tu pira-pira kota mangka nanii mpugauk buda panggaukan mejangngaran. Nasaba' te'da namadoang mengkatoba' jio mai panggaukan gaja'na tuu lako tau. 21 Nakua Puang Isa, "Macilaka kamu' to-Khorazim sola to-Betsaida! Buda tanda mejangngaran to mangka kupugauk jio kotami, apa te'dapa mimengkatoba'. Ia kenna la dipugauk joo tanda mejangngaran jio kota Tirus sola kota Sidon, masaimo mengkatoba' tuu lako tau jio, moi na bangsa tangngia to-Yahudi. La mangpakean kamasussan, napessamboran too au de' ulunna, sanga mpenassannii dosana. 22 Ingaranni! Ia ke Kiama'mi lino, la'bi maringngan ia sessana to to-Tirus sola to-Sidon, na ia to sessami sola ngasan. 23 Na kamu' to-Kapernaum! Misangaraka la dipamatande kamu' ratu de' langi'? Te'da! Apa la dipembuangan kamu' do' ngenan kaminang majiong! Nasaba' ia kenna la ia tee tanda mejangngaran to mangka dipugauk lan tangnga-tangngami dipugauk lo' kota Sodom, la denpa ia ratu lako too allo. 24 La miingaran kumua, ia ke Kiama'mi lino, la'bi mabanda' kamu' sessami na ia to to-Sodom." 25 Ia joo wattu massambajangmi Puang Isa nakua, "Oo Ambe', Puangna langi' sola lino. Mangkurru sumanga'na' lako Ambe', nasaba' ia ngasan joo tabunianan lako tomandalan pahangna sola tomacca, tapangpeissenanmi lako totangpaissen. 26 Oo Ambe', iamo tapumasannang." 27 Nakuapa Puang Isa, "Sininna apa mangka ngasanmo' naben Ambe'. Na te'da mesa' tau nnissenni to Anak, saliwanna Ambe'. Te'da too mesa' tau nnissenni to Ambe', saliwanna Aku' Anak, sola ia to tokupueloh kupaissenni. 28 Ee kamu', tomasussa penawa sola totangmasannang, nasaba' atoran masussa to nakabua' guru agama. Malemo kamu' mai, angkupemasannangngi kamu'. 29 Turu'i to parenta-Ku', mipelajahhii to pangngajaran-Ku', nasaba' Aku' tee te'da kulassussai kamu', te'da kamu' to la kukita majiong, milolongan kamasannangan. 30 Ia to parenta-Ku' mpemasannangngi tau, na marawa dituru'i."

Matius 12

1 Den pissen wattu tonna Allo Katorroan nannola jio bara'bah gose' Puang Isa, na ngge'te gose' to anak gurun-Na natiboi, sanga tangbarahmi. 2 Nakitami to-Farisi napasalai to Puang Isa nakuanni, "Kitari to anak gurun-Ta'! Ciapari na te'da naturu'i to atoran agamanta', anna pugaukki to dipemalian dipugauk ke Allo Katorroan?" 3 Mebalimi nakua, "Tantu mibacamo to apa napugauk Daud, tonna tangbarahmo sola surudadunna. 4 Mentamami bola to dinii ssompa Puang Allataala, nakandei to roti dipangngolo lako Puang Allataala. Nasitonganna, ianna situru' atoran agamanta', imang manda ia to wa'ding ngkandei joo roti. 5 Tangden toomoraka mibacai to sura'na Nabi Musa kumua, ia to imang mangjama bang lan Bola Puang Allataala ke Allo Katorroan, to tangsituru' atoran, na te'da nadipasala? 6 La miingaran melo kumua, la'bina' Aku' na ia to Bola Puang Allataala. 7 Jaji makuasana' mpattantui apa to wa'ding dipugauk ke Allo Katorroan nasaba' Puangnana' Allo Katorroan tee Aku', Anak Mentolino. Den diuki' lan Sura' Allataala kumua, 'Kamamaseanra lako padammi rupa tau to kuangah, tangngia karoba olok-olok.' Ia ke mipahang tonganni tee, te'damo milampasalai to totangsala." 9 Mpatarruhmi kalingkan-Na Puang Isa, namentama mesa' bola passambajangan. 10 Den mesa' tau to mate sangbali limanna ntuu jio. Ba'tu pira-pira tau, to la nnangah bang kasalanna Puang Isa anna wa'ding mparapa'i, mekutana lako Puang Isa nakua, "Ianna situru' atoran agamanta', wa'dingraka mpamalagah tomasaki ke Allo Katorroan?" 11 Mebalimi Puang Isa nakua, "Ia ke den kamu' nnampui mesa' bembala', napolloh do' garuang ke Allo Katorroan, tantu ta'pa miangka' jiong mai. 12 Na la'bi keangga' ia to tau na ia to bembala'! Ia ke susii joo wa'dingki' mpugauk kameloan lako padanta' rupa tau ke Allo Katorroan." 13 Mangkai joo nakuamo Puang Isa lako joo tomate sangbali limanna, "E'te'i tuu limammu!" Nae'te'mi, namelomo susi to lima sangbalinna. 14 Apa ia joo to-Farisi messunmi lan mai bola passambajangan, namale sipangkada-kada la mbunoi to Puang Isa. 15 Naissen Puang Isa to akkattana tuu lako to-Farisi la mbunoi, iamo joo namale mpemboko'ii, apa buda tau undi nturu'i. Napamalagah ngasanmi to tomasaki. 16 Apa naanggaii Puang Isa tuu lako tau nakua, "Danggi' mimale mpangpeissenanna'." 17 Iamo namangkada susi joo dikua najaji to kadan-Na Puang Allataala mpaui, to pura napau Nabi Yesaya tonna anu' kumua, 18 "Iamo tee to pesuro-Ku' kupilei. Iamo tee kupakamoja', to mpamasannangna'. La kuben kapakullean pole jio mai Roh-Ku' Napangpeissenanni to parenta-Ku' lako sininna bangsa. 19 Te'da namassite'geh, te'da nameoli-oli, te'da gamaranna disa'ding jio pangbudan tau. 20 Te'da namaparrang lako tomalamma penawa, malaboh lako totangpakulle. Katampakanna nnendekan kamarurusan-Ku', 21 na sininna bangsa ia ngasan nanii mangrannuan." 22 Mangkai joo, denmi tobuta na mamang too, nasaba' natamai setang, nabawa tau lako Puang Isa. Napapakitai sola napupangkada tooi. 23 Jangngah ngasanmi to tobuda nakua, "Ba'tu bati'nara Raja Daud tee tau to mangka dipau tonna anu'?" 24 Ia tonna sa'dingngi to-Farisi susi joo mangkadami nakua, "Kuasanna Beelzebul, iamo to puanggawana setang, napake nnula'i setang." 25 Apa naissen Puang Isa to napikkiri' tuu lako to-Farisi. Nakuamo ngkuanni, "Ia ke denni mesa' kaparentan nasiricuan bang to taunna na te'da namesa' penawa, tantu te'da namasai nalanynya'. Na ia ke mesa' kota ba'tu to tosangbola, ke te'da namesa' penawa, tantu te'da namasai nasisarak-sarak. 26 Susi toomi to kaparentanna puanggawana setang. Ia ke puanggawana setang nnula'i setang laen, battuananna sirarii pada setang, manassa la madoi' lanynya' joo kaparentanna. 27 Mikua kumua kuasanna Beelzebul kupake nnula'i setang. Ia ke la susi joo, kuasa pole umbora napake anak gurummi nnula'i setang? Ia kalena to panggaukanna anak gurummi la mpangpekitanni kumua sala kamu'. 28 Apa ia ke mpakena' kuasan-Na Roh Allataala nnula'i setang, battuananna kumua ratumi Puang Allataala mangparenta susi Raja lan tangnga-tangngami." 29 Mangkai joo, mangngajahhimi Puang Isa mpake pangpasusian nakua, "Na umbo nakua to taboko mentama bola, ke mawatangngi to ampu bola? La napumpungri jolo' to ampu bola, namane' nnalai ngasanni to ewananna. 30 Ia to tote'da namenturu' lako Aku', iamo nnewana'. Na ia to tote'da nabaliina', iamo nggaja'-gaja' jaman-Ku'. 31 Iamo joo la miingaran kumua, ia to tompugauk dosa ba'tu ncapa' Puang Allataala, wa'dingpa didampangan. Apa ia to toncapa' Roh Allataala, te'damo nawa'ding didampangan. 32 Ia ke den tau nnewa kadana' tee Aku', Anak Mentolino, wa'dingpa didampangan, apa ia to toncapa' Roh Allataala, te'damo nawa'ding didampangan, la ia tee too, la jiona ahera'!" 33 Mangngajahhimi Puang Isa nakua, "Ia ke denni kaju melo, melo too buanna. Apa ia ke gaja'i to kaju, gaja' toda ia buanna. Buannara to dinii nnissenni kumua meloraka ba'tu gaja'raka joo garonto' kaju. 34 Togaja' kamu'! Umbora la mikua mpau melona ke gaja'i to penawammi? Nasaba' apa lan penawanna tau, iamo napau timu. 35 Ia to tomelo penawanna, melona bangra to napau, nasaba' kameloan manda lan penawanna. Na ia to togaja', gaja'na bangra to napau, nasaba' kagajatan manda lan penawanna. 36 Iamo joo ingaranni: Ia ke Kiama'mi lino pada la napebalii tau to kada tangkebattuanna lako Puang Allataala. 37 Nasaba' kadammi kamu' to la mpattantui kumua salara kamu'ka ba'tu te'daraka." 38 Mangkai joo, den ba'tu pira-pira guru agama sola to-Farisi ngkuanni to Puang Isa kumua, "Oo Guru, meta'dakan antapugauk tanda mejangngaran, to la mpamanassai kumua ia to kuasan-Ta' pole jio tongan mai Puang Allataala." 39 Mebalimi Puang Isa nakua, "Takkaliwa' gaja' natangmatappa' tee tau too allo. Napeta'dai kumua la kupakitanpi tanda mejangngaran, namane' la ngkatappa'ina'. Apa ia manda tanda la dipakitanni susi to apa jaji lako Nabi Yunus. 40 Susi Nabi Yunus torro lan ba'tang bale tallung allo tallung bongi, susi toomi la jaji lako tee Aku', Anak Mentolino, la torrona' lan lamunan tallung allo tallung bongi. 41 Ia ke Kiama'mi lino, ia to to-Niniwe la dipatuo pole' sola to tau too allo, la mpasalai, nasaba' mengkatoba' ia to to-Niniwe tonna sa'dingmi to pangngajahna Nabi Yunus. Apa den tau lan tangnga-tangngami tee too to la'bi mala'bihpa na Nabi Yunus! Moi nasusi joo te'dapa mikatappa'ii to kadan-Na. 42 Na ia ke Kiama'mi lino, ia to raja baine lo' mai pollo'na wai la dipatuo pole' sola to tau too allo la mpasalai. Nasaba' ia joo raja baine mambela naola ratu la mpesa'dingngi pangngajahna Raja Sulaiman to mandalan tangngah. Apa denni lan tangnga-tangngami tee too to la'bi mala'bihpa na Raja Sulaiman!" 43 Mpatarruhhi kadan-Na Puang Isa nakua, "Ia namessun to setang lan mai tau, malei llelei padang pallawangan nnangah ngenan la nanii kenden, apa te'da naampa'i. 44 Iamo joo nakua, 'La pole pole'na' lako to bola mangka kusalai.' Ia tonna ratumo lako, lo'bang unapa, mapaccing na marappi toomi. 45 Malemi ntambai pitu setang laenna to la'bi masa'ga' pole' opa na ia. Napentamaimi joo tau, natorro lan. Mangkatampakanna la'bi masussa pole' opa joo tau na ia tonna jolona. Susi toomi joo to la jaji lako to togaja' to tuo tee wattu." 46 Ia tonna mangkada unapa to Puang Isa lako tobuda, ratumi indo-Na sola sile'to-Na, najenjen bang jio salean. Madoangngi ssikitanni, apa te'da lalan naola, nasaba' gaja buda tau ntalimbungngi to Puang Isa. 47 Denmi mesa' tau mpauanni nakua, "Oo Puang, jioi salean to indo-Ta' sola sile'to-Ta'. Madoangngi ssipangkadanki'." 48 Mebalii nakua, "Indara to indo-Ku'? Indara to sile'to-Ku'?" 49 Najillokmi Puang Isa to anak gurun-Na nakua, "Iamo tee indo-Ku' sola sile'to-Ku'. 50 Inda-inda to tompugauk pakkaeloran-Na Ambe'-Ku' jao suruga, iamo sile'to-Ku' sola indo-Ku'."

Matius 13

1 Allo ia bang unamo joo namessun Puang Isa lan mai joo bola, namale lako randan tasik na cumadokko jio. 2 Gaja buda tau ntalimbungngi. Iamo joo naendek de' lopi cumadokko. Na ia to tobuda jenjen bang jio randan tasik. 3 Buda apa naajaranni Puang Isa mpake pangpasusian. Mpamulami curitan-Na nakua, "Den mesa' pangdusung male nnamboh banne. 4 Ia tonna ambohmi, den to ta'pah do' lalan, naratu to manuk-manuk ncappu'ii. 5 Den too to ta'pah do' batu-batu to te'da nabuda litakkana. Madoi' bang tuo joo banne, nasaba' ci'di'ra litakkana. 6 Apa ia tonna malussumo allo, nala'da'mi allo joo tananan mane' cumucuk. Ta'pa malajumi anna mate, nasaba' te'da namandalan to waka'na. 7 Den too to ta'pah lan tangnga duri. Saloboh-lobohnami joo duri, nasirimpihhii joo tananan arannai mate. 8 Apa den too to ta'pah do' litak malompo, anna membua. Den to manglokkon pessaratuh, den pennannan pulona, na den too to manglokkon pentallung pulo." 9 Ia tonna mangkamo Puang Isa mpaui joo pangpasusian, nakuamo, "Ingaranni to apa mangka misa'ding, sanga ketalinga kamu'!" 10 Undinna ratumi to anak gurun-Na Puang Isa namekutana nakua, "Oo Puang, ciapari tatuli mpakera pangpasusian ke mangngajahhiki' lako tobuda?" 11 Nakuamo Puang Isa mebali, "Dibenmo kamu' barakka' la nnissenni to apa tangnaissen tau kumua la ratui Puang Allataala mangparenta susi Raja, apa ia to tau laen te'da nadipaissenni. 12 Nasaba' ia to tonnampuimo buda apa la dirangngannipa la'bi buda, anna kala'bian pissen. Apa ia to totangnnampui apa, ia to apa ci'di'mora naampui, la dialai pissen. 13 Iamo joo kupake pangpasusian ke mangngajahhina' lako tobuda, nasaba' moi namengkita, apa susi to te'da napakita. Moi nasa'ding, apa susi totangpasa'ding na te'da napahangngi. 14 Jajimi to mangka napau Nabi Yesaya tonna anu' kumua, 'Nakua Puang Allataala: Ia tee mai tau da'tan bang mpesa'dingngii, apa te'da nalampahangngi. Da'tan bang mpemakitaii, apa te'da naissenni apa to jaji. 15 Nasaba' liwa'mo membattuk tee bangsa, namataru talinganna, na mpamamma' matanna. Ia tee jaji dikua danggi' napakita matanna, nadanggi' namangpesa'ding talinganna, nadanggi' napahangngi, nadanggi' namengkatoba' lako kale-Ku', anna danggi' kupamalagahhi.' " 16 Nakuamo Puang Isa lako anak gurun-Na, "Jaji, masannang kamu', nasaba' mipahangngi to apa misa'ding sola mikita. 17 La miingaran tee kadang-Ku' kumua, buda nabi sola taun-Na Puang Allataala tonna anu' madoang la ngkitai to apa mikita tee too, apa te'da nakitai! Madoang too la ssa'dingngi to apa misa'ding tee too, apa te'da nasa'dingngi." 18 Nakua Puang Isa, "Iamo joo, pesa'dingngimi to battuananna joo pangpasusian tomangngamboh. 19 Ia to banne ta'pah do' lalan dipasangrapangngi to tossa'ding kareba kumua la ratui Puang Allataala mangparenta susi Raja, apa te'da napahangngi. Ratumi to Ballisi' rrampai joo kareba mangkamo nasa'ding. 20 Ia to banne ta'pah do' batu-batu dipasangrapangngi to tossa'ding kadan-Na Puang Allataala anna masannang ntarimai. 21 Apa te'da natorro tongan lan penawanna na cingga'tu'ra natangnningaranmi. Ianna ratuimi kamasussan ba'tu kadipakario-rioan, sanga ia joo kada, ta'pa balik pole'mi. 22 Ia to banne ta'pah lan tangnga duri dipasangrapangngi to tossa'ding kadan-Na Puang Allataala, apa mpuselang bangngi katuoanna, namadoang bang too la sugih. Iamo joo nni'pinnii joo kada lan penawanna, anna te'da namembua. 23 Na ia to banne ta'pah do' litak malompo dipasangrapangngi to tossa'ding kadan-Na Puang Allataala, napahangngi napugaukki, anna membua melo. Den to manglokkon pessaratuh, den pennannan pulona, na den too to manglokkon pentallung pulo." 24 Mangcurita pole' omi Puang Isa lako tobuda mpake pangpasusian nakua, "Ianna mangparentamo Puang Allataala susi Raja, wa'ding dipasangrapang pangdusung nnamboh banne melo. 25 Ia tonna bongimo namamma' ngasanmo to tau, ratumi to ewalinna joo pangdusung nnambohhi todai pare-pare, namale ssalai. 26 Ia tonna sunmo buanna joo pare, pajan todami to pare-pare lan tangnga pare. 27 Ratumi to tomangjamanna nakua, 'Oo puang, kisanga melo ngasan to banne taamboh. Umbora nakua nagaja buda pare-pare tuo sola joo pareta'?' 28 Mebalimi joo pangdusung nakua, 'Panggaukanna ewalinta' joo.' Mekutanami tuu lako tomangjamanna nakua, 'Oo puang, wa'dingraka kimale rrebu'ii joo pare-pare?' 29 Mebalimi joo pangdusung nakua, 'Danggi', nasaba' ia ke direbu'i to pare-pare, la tirebu' todai to pare. 30 Ma'namo napada tuo jolo', sadipepareinna. Undipi kumane' mpangpesuanni lako tomepare narebu'i jolo' to pare-parena, naujunni nadisumpun. Narempun meloi to pare nadipatama pa'pak.' " 31 Mangcurita omi Puang Isa mpake pangpasusian lako tobuda nakua, "Ianna mangparentamo Puang Allataala susi Raja wa'ding dipasangrapang pangdusung ntanan sanglise' sawi jio bara'bahna. 32 Ia joo lise' sawi iamo lise' kaminang biccukkuna. Apa ianna tuomo, memmatonggomi na ia to tananan utan-utan laen, namembarana', namesserang to manuk-manuk jio tangkena." 33 Denpa pangpasusian laen nacurita Puang Isa lako tobuda nakua, "Ianna mangparentamo Puang Allataala susi Raja wa'ding dipasangrapang ragi, naala baine napasigerokki patang pulo litere' ta'pung, anna loboh." 34 Sininna joo napangpangngajaran Puang Isa lako tobuda mpake pangpasusian. Te'da bang natangmpake pangpasusian, ke nnajahhii tobuda, 35 dikua anna jaji to kadan-Na Puang Allataala mangka napau nabi tonna anu' kumua, "Ia angkumangngajahhi, mpakena' pangpasusian. La kupangpeissenan sininna to tangnaissennapa tolino sipammula jio mai dipadenna lino." 36 Messarakmi Puang Isa jio mai tobuda, namale mesa sola anak gurun-Na. Ia tonna mentamamo bola, meta'dami anak gurun-Na nakua, "Oo Puang, pauankan battuananna joo pangpasusian pare-pare tuo lan tangnga pare." 37 Mebalimi Puang Isa nakua, "Ia to pangngamboh banne melo, Aku' bang unamo, Anak Mentolino. 38 Ia to uma dipangpasusii lino. Banne melo dipangpasusii tomenjajimo umma'-Na Puang Allataala. Na ia to pare-pare dipangpasusii tonturu' Ballisi'. 39 Ia to ewali nnambohhi pare-pare, iamo Ballisi'. Na wattu peparean, iamo ke Kiama'mi lino, na ia to tomepare, iamo sininna malaeka'-Na Puang Allataala. 40 Ia to pare-pare dirempun na dipatorro leko' disumpun, susi toomi to menturu' lako Ballisi' la dirempun leko' nadipatama api naraka. 41 Aku' Anak Mentolino la ssua malaeka'-Ku' mpilei lan mai tangnga-tangngana umma'-Na Puang Allataala sininna to tompalao sala padanna rupa tau na tomanggauk gaja'. 42 La dipatama api naraka manglaka-laka nanii tau sikarrakan na sunggarigi'. 43 Na ia to tau mpugauk pakkaeloran-Na Puang Allataala la tiarrang susi allo gaja cora lan Lino Barun-Na Ambe' Puang Allataala. Iamo joo ingaran meloi to apa mangka misa'ding, nasaba' ketalinga kamu'!" 44 Mangcurita pole' omi Puang Isa lako tobuda mpake pangpasusian nakua, "Ianna mangparentamo Puang Allataala susi Raja, wa'ding dipasangrapang to ewanan dilamun do' litak, naampa'i tau. Nalamun pole'i, namane' male mbaluk ngasanni to ewananna, naallianni joo padang nanii nnampa' ewanan nena', nasaba' gaja sannangngi joo tau." 45 Mpau pole'pa pangpasusian Puang Isa nakua, "Ianna mangparentamo Puang Allataala susi Raja, wa'ding dipasangrapang pangdangkang to nnangah mutiara mellong. 46 Ia tonna kitamo mutiara sanglise' liwa' mellong, ta'pa malemi mbaluk ngasan ewananna naallianni joo mutiara." 47 Mangcurita pole' omi Puang Isa lako tobuda mpake pangpasusian nakua, "Ianna mangparentamo Puang Allataala susi Raja, wa'ding dipasangrapang puka to ditanan jiong tasik, na nnala mangrupa-rupa bale. 48 Ianna ponnomo bale, narui'mi pangjala de' randan tasik nacumadokko mpileii. Ia to melona napatama embere' na ia to gaja'na naca'bean. 49 Susimi joo ke Kiama'mi lino, ia to malaeka'-Na Puang Allataala la mpilei napasisarakki to tompugauk pakkaeloran-Na Puang Allataala na ia to totangmenturu' lako Puang Allataala. 50 Ia to totangmenturu' lako Puang Allataala la dipatama api naraka manglaka-laka nanii tau sikarrakan sola sunggarigi'." 51 Mekutanami Puang Isa lako anak gurun-Na nakua, "Mipahang unaraka battuananna joo sininna pangpasusian?" Mebalimi to anak gurun-Na nakua, "Ie' Puang, kipahang ngasan." 52 Nakuamo Puang Isa, "Iamo joo la mipahang kumua ia to guru agama to-Yahudi to menjaji umma'-Namo Puang Allataala na ntarimamo pangngajaran-Na, susimo to ampu bola mpasun ngasan ewananna la jolona la barunna lan mai ngenanna, napangpekitanni." 53 Ia tonna mangkamo Puang Isa ncurita ngasanni joo pangpasusian, nasalaimi joo ngenan, 54 napole lako kota Nazaret to dinii mpelobohhii. Ntuu jio lan bola passambajangan nanii mangngajahhi nasijangngaran to tossa'dingngi, nakua, "Umbora Ia nanii mpelajahhi kapaissenan susi joo? Na pole umbora to kuasa napake mpugauk tanda mejangngaran? 55 Tanganakkanaraka Ia pande bola, na Maryam to indo-Na? Na ia to sile'tona, iamo to Yakub, Yusuf, Simon na Yudas. 56 Na torro lan too ntee kotata' to sile'to-Na baine. Umbora Ia nanii llolonganni tuu lako?" 57 Iamo joo nacia' tuu lako tau ntarimai to Puang Isa. Nakuanni Puang Isa, "Ia to nabi dikasiri' ia umbo-umbo nanii, apa jio kampongna ba'tu jio bolana te'da nadikasiri'." 58 Iamo joo na te'da nabuda tanda mejangngaran napugauk jio kampong-Na, nasaba' te'da nakatappa'ii tau.

Matius 14

1 Ia joo wattu nasa'dingmi Raja Herodes Antipas, to mparenta tana Galilea, to karebanna Puang Isa. 2 Nakuamo lako pangjamana, "Tonganna Nabi Yahya tee tuo pole'! Iamo joo namakuasa mpugauk tanda mejangngaran." 3 Iamo namangkada susi joo Raja Herodes, nasaba' ia to apa pura jaji tonna tee. Ia joo Raja Herodes sibalii Herodias bainena sile'tona to disanga Filipus. Apa napangngingaranni Nabi Yahya kumua, "Pemali ke sibaliki' Herodias to balinna sile'tota'." Madoangngi la mpangpebunoanni, apa malaja'i lako tobuda, nasaba' nasanga ia tau nabi to Yahya. Iamo joo napangpejokkoan bangri nadipumpung dipatama pangtarungkuan. 6 Ia tonna mpengngingaranni allo kajajianna Raja Herodes menari'i to anakkana baine Herodias napengkitaii toratu, na liwa' napumasannang Raja Herodes. 7 Iamo joo namassapah nakua, "Ee, apa to mupeta'da, iami la kubenko." 8 Ia joo anakdara nturu' pakkaeloranna indona nakua, "Ie' puang, meta'dana' kita', ulunna Nabi Yahya nadipajiong baki', kuta'pa diben silalona." 9 Masussa penawanna Raja Herodes tonna sa'dingngi to peta'danna joo anakdara, apa la napatumbapi namangkamo napassaparan jio olona toratunna. Jaji natarimami to peta'danna. 10 Ta'pa nasuami to tau male lako pangtarungkuan lle'toi to ulunna Nabi Yahya. 11 Nabawami tama to ulunna Nabi Yahya jiong baki' nabenni joo anakdara. Nabawami lako indona napakitanni. 12 Ia tonna sa'dingmi anak gurunna Nabi Yahya, malemi nnalai to batang rabukkuna, anna patamai liang. Mangkai joo, malemi mpauanni Puang Isa kumua matemi to Nabi Yahya. 13 Ia tonna sa'dingngi Puang Isa joo kareba kumua matemi to Nabi Yahya, messarakmi namale mesa sola anak gurun-Na manglopi mangnguju lako padang pallawangan. Apa naissenni tobuda, nasimessunan lan mai kampongna nannola gantanan njoloii to Puang Isa sola anak gurun-Na. 14 Ia tonna mellaomo Puang Isa jao mai lopi, nakitami joo tobuda, anna masse penawan-Na. Napamalagahhi to tomasaki to ratu nasolan tau. 15 Ia tonna karuenmo, malemi to anak gurun-Na ngkandoppi' Puang Isa nakuanni, "Oo Puang, la bongimi, na pallawangan tee tanii. La'bi melo ke tasuami tee mai tau napada male nnalli kande ntuu lako kampong mengguririkkita'." 16 Apa napebalii nakua, "Danggi'mo namale, kamu' ia to la mpakandei." 17 Nakuamo to anak gurun-Na, "Limamora roti na duapa bale kiampui!" 18 Nakuamo Puang Isa, "Bawai mai." 19 Nasuami joo tobuda cumadokko jio reu malammak. Naalami joo lima roti na dua bale, anna mentingngara de' langi' mangkurru sumanga' lako Puang Allataala. Namane' nti'pek-ti'pekki joo roti, nabenni anak gurun-Na anna tawa-tawanni joo tobuda. 20 Kumandemi sola ngasan sabarahna. Ia tonna mangkamo kumande, napasirempunmi to torrona, ponnopa sangpulo dua baku'. 21 Agi-agi den limang sa'bu muane to kumande, tangdibilangpa to baine sola pea. 22 Mangkai joo, nasuami Puang Isa to anak gurun-Na endek de' lopi, najolo lian sambali'na tasik. Ia tonna polemo tuu lako to buda, malemi Puang Isa de' buntu massambajang mesa-mesa. Ia tonna la bongimi, jao unapi buntu. 24 Na ia joo wattu mambelami tama tangnga tasik to lopinna anak gurun-Na. Nagasa'i bombang, nasaba' ssussangngi angin bara'. 25 Ia tonna dannarimo, ratumi Puang Isa lumingka jao wai, mpendete'i to anak gurun-Na. 26 Ia tonna kitami to Puang Isa lumingka jao wai, silajatanni to anak gurun-Na. Nasimetamba-tamban nakua, "Bombo!" 27 Apa ta'pa nakuanni Puang Isa nakua, "Ee, rapa' kamu'! Danggi' mimalaja'! Aku' tee." 28 Nakuamo Petrus, "Ia ke Kita' tongan Puang, suamo' kulumingka toda jao wai." 29 Mebalimi Puang Isa nakua, "Malemoko mai." Iamo joo namellao Petrus jao mai lopi, nalumingka jao wai male lako Puang Isa. 30 Apa ia tonna kitai Petrus to bombang tonggo, malaja'mi, nasado'-do'na, metambami nakua, "Ee Puang, tatulungna'!" 31 Ta'pa malemi Puang Isa ngkorongngii natoei, nakuanni, "Ee Petrus, ammubatara? Ciapari na te'da mukatappa'ina'?" 32 Endekmi de' lopi sola dua nata'pa radan to angin bara'. 33 Nasuju'mi anak gurun-Na to Puang Isa. Namangkada nakua, "Kita'mo Anak Allataala." 34 Ratumi Puang Isa sola anak gurun-Na lian sambali'na tasik, namellao jio tana Genesaret. 35 Ia tonna issenmi tau kumua Puang Isa tonganmo joo ratu, malemi mpangpeissenanni lako mengguririkkina tana Genesaret, naratu to tau ssolan tomasakinna. 36 Anna meta'da lako Puang Isa kumua, ke wa'dingngi nakaka' mandai to baju lando-Na, moi na tampakkana bangra. Padami tau ngkaka' baju landona pada toomi malagah.

Matius 15

1 Den ba'tu pira-pira to-Farisi sola guru agama jao mai kota Yerusalem ratu ssikitan Puang Isa. Mekutanami lako nakua, 2 "Ciapari na te'da naturu'i anak gurun-Ta' to ada' tojolota'? Te'da nabasei limanna jolo', namane' kumande." 3 Mebalimi Puang Isa nakua, "Na ciapari na te'da mituru' parenta-Na Puang Allataala, na ia ora mituru' tongan to atoran migaraga kalena? 4 Nasaba' nakua Puang Allataala, 'Kasiri'i to tomatuammu. Na ia to tongkada-kadai tomatuanna la dibuno.' 5 Apa sibalikanna to mipangpangngajaran lako tau kumua, te'da nasala ke den tau ngkuan tomatuanna, 'Ia to doi' la kuben kamu' la miputuo, iamo to mangka kupangkaroban lako Puang Allataala', 6 Jaji ia joo tau te'damo naparallu ngkasiri' tomatuanna. Ia ke susii joo, te'damo mituru'i to parenta-Na Puang Allataala, napubua' ada' tojolomi. 7 Ee, tomajekkong kamu'! Nang tongan to napau Nabi Yesaya tonna anu' mpau kamu' kumua, 8 'Nakua Puang Allataala: Ia tee mai tau kadanna manda kumua napakala'bihna', apa sitonganna te'da nakasiri'na'. 9 Te'da bua'na ssompana', nasaba' ia to napangpangngajaran atoran tolino, butung to kumua mpangpangngajaran parenta-Ku'.' " 10 Natambaimi Puang Isa tuu lako tobuda nakuanni, "Pesa'dingngi, ammipahangngi! 11 Te'da na ia to dikandena ncarepai tau, apa iara to messun jio mai timu, anna mentangsipato'mo to tau ssompa Puang Allataala." 12 Ratumi to anak gurun-Na Puang Isa ngkutanaii nakua, "Taissenraka kumua ia to kadan-Ta' napugalli to-Farisi?" 13 Mebalimi Puang Isa nakua, "Ia to to-Farisi wa'ding dipasangrapang tananan to tangngia pantanan-Na Ambe'-Ku' jao suruga. Iamo joo naladirebu'i. 14 Paboko'i bangmi penawa tuu mati' to-Farisi. Samanna ia tobuta tuu mati'. Na ia ke pada tobutamo sirenden, tantu la melolinni ia do' garuang." 15 Nakuamo Petrus, "Oo Puang, meta'dakan, tapauankan battuananna joo pangpasusian." 16 Mebalimi Puang Isa lako anak gurun-Na nakua, "Oo, te'da todaraka pale' mipahangngi? 17 Parallu miissen kumua, ia to dikande mentama ba'tang namessun, ke malei mangcarepa to tau. 18 Jaji, apa to messun jio timu, pole jio ngasan mai penawa, iamo joo to ncarepai tau. 19 Nasaba' pole lan mai penawa to nanii pangtangngaran gaja' na mpalao sala tau susinna: mangbuno, manggauk sala, ncarepai tananan dapohna tau, boko, sa'bi tangtongan, na mpau gaja' tau. 20 Ia ngasanmo joo to ncarepai tau. Apa ia ke te'da nabasei limanna to tau nakumande, te'da ia naciapa." 21 Ke'dehmi Puang Isa jio mai ntuu joo, namale re' tana mengguririkkina kota Tirus sola kota Sidon. 22 Denmi mesa' baine to-Kanaan ratu ngkandoppi' Puang Isa metamba-tamba nakua, "Oo Puang, bati'na Raja Daud, kamaseina'! Natamai setang to anakkaku' baine. Takkajulu' maparri'na!" 23 Te'da bang napebalii Puang Isa. Meta'dami anak gurun-Na nakua, "Ee Puang, suai palai joo baine. Undi bang jio boko'ta' rrekaiki'." 24 Mebalimi Puang Isa nakua, "Disua lako mandara' to-Israel to susi bembala' lao salamo." 25 Suju'mi joo baine jio olo-Na Puang Isa nameta'da nakua, "Oo Puang, tulungna' dikka'." 26 Mebalimi Puang Isa nakua, "Te'da namelo ke dialai to kandena pea nadiben asu." 27 Mebalimi nakua, "Oo Puang, tongan tuu, apa ia to asu ngkande bota to polloh do' sulluk mejana puangna." 28 Nakuanmi, "Ee, indo', matappa' tonganko! La jaji to mupeta'da." Ia joo wattu ta'pa malagah bang unami joo anakkana. 29 Polemi Puang Isa jio mai ntuu joo, namale mangrundun randan Tasik Galilea, namane' endek de' buntu. Ia tonna cumadokkomo, 30 budami tau ratu mbawa tokupi', tokeppang, tobuta, tomamang na budapa tomasaki laenna napajioi olo-Na Puang Isa. Napamalagahhi. 31 Jangngah ngasan to tau ngkitai tuu lako tokupi' lumingka, tokeppang memmaruruh lingkana, tobuta pakita, na tomamang mangkada. Pada mpakala'bihmi Puang Allataala, Puangna to-Israel. 32 Natambaimi Puang Isa to anak gurun-Na nakuanni, "Masse penawang-Ku' ngkitai tee mai tobuda, sanga tallung allomiki' sola na cappu'mi to kinallona. Te'da kueloranni pole ke tangbarahhi, iamo ke limpui lako lalan." 33 Mekutanami anak gurun-Na Puang Isa nakua, "Umbo tanii nnala kande la dipakandeanni tee tau gaja buda, na padang pallawangan tee tanii?" 34 Mekutanami Puang Isa nakua, "Pirapara roti miampui?" Mebalimi nakua, "Pitumora na ba'tu pira bale'-bale' sibiccuk." 35 Nasuami Puang Isa cumadokko tuu lako tobuda jiong padang. 36 Naalami joo pitu roti sola bale'-bale', namangkurru sumanga' lako Puang Allataala. Mangkai joo nati'pek-ti'pekmi joo roti sola bale, nabenni anak gurun-Na, anna tawa-tawanni joo tobuda. 37 Kumande ngasanmi tuu lako tau sabarahna. Ia tonna mangkamo kumande, napasirempunmi anak gurun-Na Puang Isa to torrona, ponnopa pitu baku'. 38 Den patang sa'bu muane to kumande, tangdibilangpa to baine sola pea. 39 Ia tonna polemo tuu lako tobuda endekmi de' lopi Puang Isa, namale lako tana Magadan.

Matius 16

1 Den ba'tu pira-pira to-Farisi sola to-Saduki ratu la ssedei to Puang Isa. Meta'dai anna pugauk tanda mejangngaran, la mpamanassai kumua ia to kuasan-Na pole jio tongan mai Puang Allataala. 2 Mebalii Puang Isa nakua, "Ia ke kabuhmi allo, mikua mangkada, 'La melo to allo, sanga malea to randan langi'.' 3 Na ia ke makale', mikua mangkada, 'La uran, sanga malea to randan langi' na maru'gun.' Macca kamu' mbattuanannii to tanda mikita jao langi', apa te'da miissenni mbattuanannii to apa kupugauk, tanda karatuan-Na Puang Allataala mangparenta susi Raja. 4 Takkaliwa' gaja' natangmatappa' tee tau too allo! Napeta'dai kumua la kupakitanpi tanda mejangngaran, namane' la ngkatappa'ina'. Apa ia manda tanda la dipakitanni susi to apa jaji lako Nabi Yunus." Ia tonna mangkamo Puang Isa mangkada susi joo, malemi ssalai joo tobuda. 5 Ia tonna ratumo lian sambali'na tasik to anak gurun-Na Puang Isa, mane' naingaranri kumua te'da nabawa roti. 6 Mangkadami Puang Isa nakua, "Majaga kamu' lako raginna to-Farisi sola to-Saduki." 7 Apa te'da naissenni anak gurun-Na joo pangpasusian nasipangkada-kada nakua, "Iamo namangkada susi joo, nasaba' te'da tabawa roti." 8 Naissen Puang Isa to apa nasipangkadai. Iamo joo nakuanni, "Ee, kamu' totangmatappa'! Anna ia ora misipangkadai kumua te'da mibawa roti? 9 Te'daparaka mipahangngi to kuasang-Ku'? Te'damoraka miingaranni to lima roti dipakandean tau limang sa'bu? Pirapara baku' torrona to mipasirempun? 10 Susi too to pitu roti dipakandean tau patang sa'bu. Pirapara baku' torrona to mipasirempun? 11 Ciapari na te'da mipahangngi kumua tangngia roti tongan to kusanga, 'Majaga kamu' lako raginna to-Farisi sola to-Saduki.' " 12 Mane'ri napahang anak gurun-Na kumua, ia to nasanga majaga lako raginna to-Farisi sola to-Saduki battuananna majaga lako pangngajaranna to-Farisi sola to-Saduki. 13 Malemi Puang Isa lako siandahna kota Kaisarea Filipi. Ia tonna ratumo lako, nakutanaimi to anak gurun-Na nakua, "Ia ke pahangna tau, indara nasanganna' tee Aku', Anak Mentolino?" 14 Mebalimi nakua, "Den tau kumua Nabi Yahya, den too tau kumua Nabi Elia, na ia to laenna kumua Nabi Yeremia, ba'tu sala mesa'na nabi tonna anu'." 15 Mekutana pole' omi nakua, "Apa ia ke pahangmi, indara' tee?" 16 Mebalimi Petrus nakua, "Kita'mo Raja Mangpasalama', Anak to pole jio mai Puang Allataala to tuo te'da cappa'na." 17 Nakuamo Puang Isa, "Simon anakkana Yona. Masannangko, nasaba' tangngia tolino mpauanko to ianna tuu, apa pole jio mai Ambe'-Ku' jao suruga. 18 Iamo joo, kusangai tooko Petrus, battuananna batu mawatang. Susi batu ariri dinii mpake'deh bola namawatang, susi toomi kusuako la mpemawatangngi tomatappa' lako Aku' na moi kamatean te'da nalantaloii. 19 La kubenko goncingna Lino Barun-Na Puang Allataala. Ia to mupangnganggai lan lino, napangnganggai too Puang Allataala. Na apa to mueloran lan lino, naeloran too Puang Allataala." 20 Ia tonna mangka joo, napakainga'mi Puang Isa to anak gurun-Na kumua danggi' naden tau napauan kumua Iamo Raja Mangpasalama'. 21 Ia joo wattu napamulami Puang Isa mpauanni to anak gurun-Na kumua, "La malena' de' kota Yerusalem, anna pamaparri'na' pekaamberan to-Yahudi, kapala imang sola guru agama. La dibunona', apa ia ke allo mangpentallun, la dipatuo pole'na' jio mai kamatean." 22 Nasarakki mesami Petrus to Puang Isa anna ta'tanni nakua, "Oo Puang, dennaa upa' napamambelai Puang Allataala joo la jaji lako kale-Ta'!" 23 Apa messailei Puang Isa nakuanni to Petrus, "Ee, Ballisi', palai laloko ntee! La mutumangna', nasaba' ia to pikkirisanmu, pikkirisan tolino ia, tangngia pikkirisan jio mai Puang Allataala." 24 Mangkadami Puang Isa lako anak gurun-Na nakua, "Ia to tolanturu'na', te'da nalanturu'i bang pakkaeloran penawanna, apa la mpassan kaju sitambenna, naturu' tarruhna'. 25 Nasaba' ia to tocirinnai katuoanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na. 26 Apara bua'na lako tau ke naassang ngasanni tee lino, apa te'da naampa' katuoan melo te'da cappa'na? Wa'dingraka joo katuoan dipasiangga' waramparan? 27 Te'damo namasai kuratu, Aku' Anak Mentolino sola malaeka'-Ku', angkupupangngarrangngi to kamala'biran-Na Ambe'-Ku'. Ia joo wattu la kunii mbenni assele' panggaukanna to tolino. 28 La miingaran tee kadang-Ku' kumua, sitonganna den kamu' to ntee, te'dapa namate ke te'dapi nakitana' tee Aku', Anak Mentolino, mangparenta susi Raja!"

Matius 17

1 Annan allona mangkanna joo, nasolanmi Puang Isa to Petrus, Yakub sola Yahya sile'tona, namale messarak de' buntu majao. 2 Ia tonna ratumo de', nakitami to Puang Isa balik rupan-Na. Ia to rupan-Na susi allo mangngarrang na ia to pakean-Na memmabuccang cumbia'-bia'. 3 Nakita toomi to Nabi Musa sola Nabi Elia sipangkada-kada sola Puang Isa. 4 Nakuamo Petrus, "Oo Puang, masannangki' ntee. Ia ke takabudai la ngkabua'na' tallu bola-bola, mesa' tanii, mesa' nanii Nabi Musa, na mesa' nanii Nabi Elia." 5 Ia tonna mangkada unapa Petrus, ratumi to saleu' macorrang mbombonnii sola ngasan na den gamara nasa'ding lan mai nakua, "Iamo tee to Anak kupakamoja' to mpamasannangna'. Pesa'dingngii!" 6 Silajatanmi sola tallu joo anak gurun-Na Puang Isa tonna sa'dingngi to gamara, namessuju' do' litak. 7 Apa nakandoppi'i Puang Isa nakaka'i, nakuanni, "Jenjen kamu', danggi' mimalaja'!" 8 Ia tonna mengkitamo, te'da bangmo tau laen nakita saliwanna Puang Isa mandamo. 9 Ia tonna solohmo jao mai buntu, napakainga'mi Puang Isa nakua, "Ia ke dipatuo pole'mo' jio mai kamatean tee Aku', Anak Mentolino, mane'ri wa'ding mipauan tau to apa mangka mikita." 10 Mekutanami to anak gurun-Na nakua, "Matumbai pale' nakua to guru agama, kumua la ratui jolo to Nabi Elia?" 11 Mebalimi nakua, "Tongan, la ratui to Nabi Elia, la mpasadia ngasanni. 12 Apa sitonganna kukuan kamu': Ratumi ia to Nabi Elia, apa nasakka' gaukki bangngi tau, sanga te'da naissenni. Susi toomi to la nagaukanna' tee Aku', Anak Mentolino." 13 Napahang anak gurun-Na kumua Nabi Yahya to nasanga Puang Isa. 14 Ia tonna polemo Puang Isa sola to tallu anak gurun-Na lako to nanii tobuda, den muane ngkandoppi'i, namengguntu' suju' jio olo-Na, 15 nakua, "Oo Puang, takamaseii dikka' joo anakkaku'. Nakannai saki ta'ta', naliwa' maparri'na. Pembudamo melolin tama api ba'tu do' wai. 16 Mangkamo kusolan lako anak gurun-Ta', apa te'da nakullei mpamalagahhi." 17 Mebalimi nakua, "Takkaliwa' ngasan kamu' tee! Tangmatappa' sola sala lalan to tau too allo! Piranpara masainna la kunii torro, to la minii mpa'dikki penawang-Ku'. Bawai mai tuu pea." 18 Nagarra'i Puang Isa joo setang namessun lan mai joo pea. Messunmi, nata'pa malagah silalona joo pea. 19 Ia tonna Puang Isa mandamo sola anak gurun-Na, mane'ri nakandoppi' anna mekutana nakua, "Oo Puang, ciapari na te'da kikullei nnula'ii joo setang?" 20 Mebalimi nakua, "Malammai to kamatapparanmi. La miingaran tee kadang-Ku' kumua, ia ke denni kamatapparanmi moi pada bangra lise' sawi, wa'ding kamu' kumua lako tee buntu, 'Tiangka'ko lako ntuu joo', nang la tiangka' ia. Te'da to apa tanglamikulle mipugauk. 21 Apa ia manda to passambajang sola puasa wa'ding nnula'i to setang susi joo." 22 Ia tonna sirempunmo Puang Isa sola anak gurun-Na jio tana Galilea, nakuamo Puang Isa lako, "Te'damo namasai ia tee Aku', Anak Mentolino, kuladipangben lako kuasanna tolino. 23 La dibunona', apa allo mangpentallun la dipatuo pole'na' jio mai kamatean." Masussami penawanna to anak gurun-Na sola ngasan. 24 Ia tonna ratumo re' Kapernaum Puang Isa sola anak gurun-Na, ratumi to ba'tu pira-pira tomangrempun sima la dipatama Bola Puang Allataala namekutana lako Petrus nakua, "Nabajah unaraka gurummu to sima dipatama Bola Puang Allataala?" 25 Mebalimi Petrus nakua, "Tantu nabajah." Ia tonna polemo lako bola, napajoloimi Puang Isa ngkutanaii to Petrus nakua, "Simon, umbo nakua pahangmu? Indara to parallu mbajah sima sola sassung lako raja lan lino? Topangtondokanraka ba'tu tomentamaraka tondok?" 26 Mebalimi Petrus nakua, "Tomentama tondok." Nakuamo Puang Isa, "Ia ke susii joo, te'da naparallu to pangtondokan mbajah sima. 27 Apa dikua danggi' namabirih tee mai tau, malemoko mamekan lako randan tasik. Ia to bale bungah muala den doi' lan anga'na, alai tapamajaranni sola dua tama Bola Puang Allataala."

Matius 18

1 Te'da namasai ratumi to anak gurun-Na Puang Isa mekutana nakua, "Indannara to kaminang mala'bih jio mai umma'-Na Puang Allataala?" 2 Natambaimi Puang Isa to pea biccuk, napajenjenni lan tangnga. 3 Nakua, "La miingaran tee kadang-Ku' kumua, ia ke te'da mipatorro sipa' jolomi, ammisusi pea, te'da milamenjaji umma'-Na Puang Allataala. 4 Ia to tau mpamajiong penawanna susi tee pea, iamo kaminang mala'bih jio mai umma'-Na Puang Allataala. 5 Ia to tontarima pea to susi tee, sanga kamatapparanna lako Aku', pada bang unamo to Aku' natarima." 6 Mpatarruhhi kadan-Na Puang Isa nakua, "Ia to tontumangngi sala mesa'na tee mai pea biccuk nate'damo namatappa' lako Aku', la'bi melo ia, ke ditoke'ii batu pelullu' gose' to kollongna naditallanan do' tasik. 7 Na liwa' macilakanna to tolino, to tompalao sala padanna rupa tau. La den bang ia to tomangpalao sala, apa macilaka to tau susi joo. 8 Ia ke limammu ba'tu ajemu ntumangko mumadosa, ta'takkii ammuca'beanni, sanga la'biran ke menjaji tosalatampako, apa tuoko sola Puang Allataala, na ia ke sukku'i to kalemu, apa dipatamako api naraka dukku te'da cappa'na. 9 Na ia ke matammu ntumangko mumadosa, sungki'i lan mai ammuca'beanni! La'biran menjaji tosalatampako, apa tuoko sola Puang Allataala, na ia ke sukku'i to kalemu apa dipatamako api naraka." 10 Mpatarruhpa kadan-Na Puang Isa nakua, "Ingaranni! Danggi' na den tee pea biccu' mikita majiong. Nasaba' la miissen kumua, den malaeka'na jio olo-Na Puang Allataala jao suruga nnampaii. 11 Nasaba' Aku', Anak Mentolino, mentama lino la mpasalama' to tolao salamo natumang dosa. 12 Matumbai pahangmi? Ia ke denni tau nnampui saratuh bembala', nata'de mesa', apara la napugauk to puangna? Tantu la napatorroi to kasera pulona kasera jio sare buntu, namale ntiroi joo ta'dena. 13 Na ia ke naampa'mi, la miingaran tee kadang-Ku' kumua, la liwa' parannunna joo puangna lako joo mesa'na na ia to kasera pulona kasera! 14 Susi toomi Ambe'mu Puang Allataala jao suruga tangnaeloran sala mesa'na joo pea sibiccu' la ta'de kamatapparanna." 15 Mpatarruh omi kadan-Na Puang Isa nakua, "Ia ke ia to padanta' tomatappa' mpugauk kasalan lako iko, maleko mpakainga'i joo panggaukanna. Sola dua bangmoko. Ia ke napesa'dingngiko, battuananna mupusile'to pole'mi. 16 Apa ia ke te'da natarimai to pangpakainga'mu, ssolanko mesa' ba'tu dua tau lako. Nasaba' den diuki' lan Sura' Allataala, 'Iapi nawa'ding dira'tah kara-karana to tau ke denni dua ba'tu tallu sa'bi.' 17 Apa ia ke te'da unapi namadoang mpesa'dingngii to pangpakainga'na joo tau musolan lako, la mupaui lako jamaa, namale mpakainga'i. Ia ke te'da natarimai, la mireken susii to passassung ba'tu totangmatappa'." 18 Mpatarruhpa kadan-Na Puang Isa nakua, "La miingaran tee kadang-Ku' kumua, apa to mipangnganggai lan lino, napangnganggai toda Puang Allataala jao suruga. Na ia to mieloran lan lino, naeloran toda Puang Allataala jao suruga. 19 Na la miingaran too kumua, ia ke den kamu' dua tau mesa' penawa massambajang meta'da lako Ambe'-Ku' jao suruga, nang la diben kamu' to mipeta'danna. 20 Nasaba' umbo-umbo nanii dua tallu taung-Ku' massambajang, la jiona' sola." 21 Malemi Petrus lako Puang Isa namekutana nakua, "Oo, Puang! Ia ke ia to padangku' rupa tau mpugauk kasalan lako aku', pempiranra la kudampangan? Pempituraka?" 22 Mebalimi Puang Isa nakua, "Te'da napempitu manda, apa manglokkon pempitung pulo sipitu. 23 Nasaba' ianna mangparentamo Puang Allataala susi Raja, wa'ding dipasangrapang mesa' raja ssingah kaunanna, nasaba' napaindannii. 24 Ia tonna paressai to kaunanna, denmi mesa' diampa' to kaindanan sangpulo sa'bu talenta indanna, 25 na tangnakullemi mbajahhi. Nakuamo joo raja, 'Balukki tee kaunan sintong repokkona na sininna ewananna, napakei mbajah indanna.' 26 Suju'mi tee kaunan jio olona raja rrannuan asse penawa nakua, 'Ie', sabbara'ki'. Nang la kubajahna to indanku'.' 27 Massemi penawanna joo raja nahallalasan bangmi to pangpeindanna. 28 Ia tonna messunmo lan mai bolana raja joo kaunan, sitammumi padanna kaunan to napaindanni saratuhra dinar. Natoemi natekkei joo solana nakuanni, 'Bajah ngasanni to indanmu!' 29 Mangkai joo nasuju'mi joo solana, nameta'da nakua, 'Sabbara'ko mane, nang la kubajahna to indanku'!' 30 Apa te'da namadoang ntarimai, nakannori napangpetarungkuan joo solana ratu lako nabajahna to indanna. 31 Ia tonna kitai kaunan laen, massemi penawanna naparapa'i lako raja joo kaunan mangka dihallalasan indanna. 32 Natambaimi raja joo kaunan gaja sa'ga', nakuanni, 'Ee, kaunan masa'ga'! Ia to indanmu mangkamo kuhallalasan ngasan, nasaba' mengkamase-maseko lako kaleku'. 33 Ciapari na te'da unamo asse penawammu lako solamu, susi to kupugauk lako kalemu?' 34 Gaja gallimi joo raja. Na ia joo kaunan gaja sa'ga' dipatama pangtarungkuan sanabajahna to indanna." 35 Natampakkimi Puang Isa joo curitan-Na nakua, "Susi toomi Ambe'-Ku' jao suruga, la napasusi too kamu', ke te'da midampangan tongan padammi rupa tau."

Matius 19

1 Ia tonna mangka ngasanmo joo napangpangngajaran Puang Isa, ke'dehmi jio mai tana Galilea na male lako tana Yudea lian sambali'na Sa'dan Yordan jio kadellekan. 2 Buda tau undi nturu'i, napamalagah ngasanni to masakinna. 3 Ratumi to ba'tu pira-pira to-Farisi madoang la ssede Puang Isa namekutana nakua, "Situru' atoran agamanta', wa'dingraka to tau ssarak bainena, nasaba' mangrupa-rupa passabatan?" 4 Mebalimi Puang Isa nakua, "Te'daparaka mibacai lan Sura' Allataala kumua sipamulanna lino napaden Puang Allataala to muane sola baine? 5 Na mangkai joo, mangkadami Puang Allataala nakua, 'Iamo joo, na ia to muane la messarak jio mai tomatuanna, namale memmesa' sola bainena, nasangkale sola dua.' 6 Jaji, te'damo nadireken dua tau, apa mesa'mira. Iamo joo ia to mangkamo napamesa' Puang Allataala, danggi' napasisarakki tolino." 7 Mekutanami tuu lako to-Farisi nakua, "Ianna susi joo, ciapari nasuai Nabi Musa to muane mben sura' talla' lako balinna ke la nasarakki?" 8 Mebalimi nakua, "Naeloran kamu' Nabi Musa ssarakki to bainemi, nasaba' gaja battuk kamu' cia' diajahhi. Apa ia to pamulanna te'da ia nasusi joo. 9 La miingaran! Inda-inda to ssarak bainena, to te'da namanggauk sala, nakebaine pole', direken manggauk salai." 10 Mangkadami to anak gurun-Na lako Puang Isa nakua, "Ianna susi joo, la'bi melo ora ia ke te'da nakebaine-kemuane to tau." 11 Mebalimi Puang Isa nakua, "Te'da na ia ngasan tau ngkullei nturu'i joo kadammu, ia manda ia to tonapattantumo Puang Allataala. 12 Den tau te'da nakullei mendapoh simula jajinna. Den to dianggai' meman too, dikua nate'da namerrampean. Na den too to cia' merrampean, nasaba' nala'biranni to pangjaman Puang Allataala. Ia to tau ngkullei nturu'i tee pangngajah, ma'namo ia napugaukki." 13 Den tau ratu ssolan pea sibiccuk lako Puang Isa anna kaka'i nabarakka'ii. Apa nakagallii anak gurun-Na tuu lako tau. 14 Apa nakuanni Puang Isa, "Eloranni tuu mati' pea ratu lako Aku'. Danggi' mianggaii, nasaba' tosusimora tuu mati' to la menjaji umma'-Na Puang Allataala." 15 Nakaka'i Puang Isa to ulunna joo pea nabarakka'ii. Mangkai joo mpatarruhmi kalingkan-Na. 16 Den mesa' tokallolo male lako Puang Isa mekutana nakua, "Oo Guru, pauanna' apara to melona tongan sipato' la kupugauk angkuampa'i to katuoan melo te'da cappa'na?" 17 Mebalimi nakua, "Ciapari mupekutananni to panggaukan melo lako Aku'? Mesa'ra ia tomelo, Puang Allataala manda ia. Ia ke madoangko nnampui katuoan melo te'da cappa'na, turu'i to parenta-Na Puang Allataala." 18 Mekutana omi joo tokallolo nakua, "Umbonnara kita' joo parenta?" Mebalimi nakua, "Danggi' pabuno, danggi' manggauk sala, danggi' boko, danggi' sa'bi tangtongan, 19 kasiri'i to tomatuammu, mupakamoja'i to padammu rupa tau susi iko mpakamoja' kalemu." 20 Mebalimi joo tokallolo nakua, "Oo Puang, kuturu' ngasanmo kita' joo parenta, denparaka to parallunna?" 21 Nakuamo Puang Isa, "Ia ke madoangko sukku', malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'!" 22 Ia tonna sa'dingmi joo kada, masussami penawanna joo tokallolo namale memboko', nasaba' gaja sugihhi. 23 Nakuamo Puang Isa lako anak gurun-Na, "La miingaran tee kadang-Ku' kumua, gaja sussa ia to tosugih la menjaji umma'-Na Puang Allataala! 24 La mikatappa'i kumua, la'bi marawa ia to unta mentama to'tok jarun, na ia to tosugih mentama Lino Barun-Na Puang Allataala." 25 Sijangngaranni to anak gurun-Na ssa'dingngi joo kadan-Na, namangkada nakua, "Ia ke susii joo, indamo ia to wa'ding la salama'?" 26 Nakitami Puang Isa nakuanni, "Ia ke tolino, te'da nakullei la jaji, apa ianna Puang Allataala te'da ia apa tanglajaji." 27 Nakuamo Petrus, "Takitai Puang, kisalai ngasanmo to apangki', angkiundi nturu'ki'. Apara to la kiampa'?" 28 Nakuamo Puang Isa lako anak gurun-Na, "La miingaran tee kadang-Ku' kumua, lan Lino Barun-Na Puang Allataala, ia tee Aku', Anak Mentolino, la cumadokkona' jao cadokkoan kaminang mala'bih! Iamo joo wattu milacumadokko toda jao sangpulo dua cadokkoan mala'bih la mparenta sangpulo dua pangrapuanna to-Israel. 29 Ia to tossalaimo bolana, ba'tu sile'tona, tomatuanna, anakkana, ba'tu bara'bahna, nasaba' matappa'i lako Aku', la ntarimai pahalana manglokkon pessaratuh. Na la nnampa' toopa katuoan melo te'da cappa'na. 30 Apa buda tau tee too, to disanga tomala'bih la mentomajiong, na buda too tau tee too, to disanga tomajiong la mentomala'bih."

Matius 20

1 "Ianna mangparentamo Puang Allataala susi Raja, wa'ding dipasangrapang tomangbara'bah anggoro' melambik male nnangah tokumande gaji la mangjama jio bara'bahna. 2 Ia tonna sipatuimi to gajinna mesa' dinar sangngallo, nasuami mangjama jio bara'bahna. 3 Ia tonna tatte' kaseramo, malemi lako pasa' joo ampu bara'bah, na ngkita ba'tu pira-pira tosumongge'-mongge' bang jio. 4 Nakuamo ngkuanni, 'Ia ammimadoang kumande gaji, male kamu' lako bara'bah anggoro'ku'. Sitinaja to gaji.' 5 Malemi sola ngasan mpangjamanni. Susi too tonna tatte' sangpulo duamo na tatte' tallu karuen, male omi joo ampu bara'bah nnangah tokumande gaji. 6 Na agi-agi tatte' lima karuen, male omi, nannampa' unapa tosumongge'-mongge', nasaba' te'dai jaman. Mekutanami lako nakua, 'Ciapari misijenjenan bangra tangmangjama?' 7 Mebalimi tuu lako tau nakua, 'Te'da jaman kiampa'.' Nakuamo, 'Ia ke susii tuu, male lako kamu' bara'bah anggoro'ku' mangjama.' 8 Ia tonna kabuhmo allo, nakuanmi ampu bara'bah to bandoro'na, 'Tambaimi tuu lako tokumande gaji, nadipagaji. Bajahhi jolo' to undinna mentama, namane' ia to jolona nasitarruhna.' 9 Ratumi to tomangjama mammula tatte' lima. Pada natarimami to gajinna simesa' dinar. 10 Ratu todami to mentama melambi' mangjama. Nasangami kumua te'da na la mesa' manda dinar natarima, apa nang mesa' bang unari dinar dibenni. 11 Ia tonna tarimami, sipangnuku-nukuanmi lako ampu bara'bah nakua, 12 'Ia tee mai to mentama tatte' lima, sangjangra ia mangjama. Na ia tee kami' mangjama mabanda'kan siupuh allo nala'da' toopakan allo, na la pada bang una ia dibenkan!' 13 Mebalimi joo ampu bara'bah lako sala mesa'na nakua, 'Ee, mane, te'da aku' kusala lako kalemu. Tangmusitujuiraka kumua mesa' dinar kupagajianko sangngallo? 14 Alami tuu gajimmu mumale. Canning atingku' aku' mbenni tuu lako to undi mentama pada to kubenko. 15 Te'daraka kusipato' mpugaukki to pakkaeloranku'? Ciapari mumangngimburu ke mamasena'?' " 16 Nakua omo Puang Isa, "Susimi joo ia to disanga tomala'bih la mentomajiong na ia to disanga tomajiong la mentomala'bih." 17 Ia tonna malemo Puang Isa de' kota Yerusalem, natambai mesami to sangpulo dua anak gurun-Na, nakuanni, 18 "Pesa'dingngii! Mangngujumiki' de' kota Yerusalem tee too. Na ia tee Aku', Anak Mentolino, la dipangngolona' lako kapala imang sola lako guru agama, nara'tahhi la mbunona', 19 namane' mpangbenna' lako bangsa tangngia to-Yahudi nacapa'-capa'na', narambina', namane' mpampangna'. Apa ia ke allo mangpentallun, la dipatuo pole'na'." 20 Ratumi indona Yakub ssolan Yakub na Yahya lako Puang Isa, namessuju' jio olo-Na, nasaba' den peta'danna. 21 Nakutanaimi Puang Isa nakua, "Ee indo', denraka parallunta'?" Mebalimi nakua, "Ie', ia ke mangparentamiki' susi Raja keanu', ia tee anakkaku' sola dua ke wa'dingngi tamangparenta sola, mesa' jio sa'de kanan-Ta' na mesa' jio sa'de kairin-Ta'." 22 Nakuamo Puang Isa, "Te'da miissenni to apa mipeta'da. La misararaka mpuparri'i to kamaparrisan-Ku'?" Mebalimi nakua, "Ie', kisara Puang." 23 Nakuamo Puang Isa, "Nang la mipumaparri' ia to kamaparrisan-Ku'. Apa ia to la cumadokko jio kairi kanan-Ku', tangngia issen-Ku'. Ia joo pura napattantumo ia Ambe'-Ku' Puang Allataala, inda to la napajio." 24 Ia tonna issenmi to sangpulopa anak gurun-Na Puang Isa joo peta'danna Yakub sola Yahya, magalli ngasanmi ngkitai. 25 Iamo joo natambai ngasanni Puang Isa to anak gurun-Na nakuanni, "Miissen kumua ia to tomangparenta lan lino to tangngkalaja' Puang Allataala mpandasa bang taunna. Na ia to tomapangka' mangkada mesa bang. 26 Apa te'da miwa'ding susi joo. Sibalikanna, ia to tomadoang menjaji to toditaratte' la menjaji todisua-sua. 27 Na ia ammiden madoang la menjaonan, parallu mpamajiongan kalena susi kaunan. 28 Susi tee Aku', Anak Mentolino, te'da kuratu tama lino la massua, apa ratura' la menjaji todisua-sua sola la mpangben sunga'-Ku' kumua nadila'bak to tolino jio mai dosana." 29 Ia tonna messunmo Puang Isa jio mai kota Yerikho, buda tau undi nturu'i. 30 Denmi dua tobuta cumadokko jio randan lalan. Ia tonna sa'dingmi sola dua kumua liumi to Puang Isa, metamba-tambami nakua, "Oo Puang, bati'na Raja Daud, takamaseikan dikka'!" 31 Nakagallimi tobuda nasuai kamma'. Apa la'bi naandongngi ori metamba nakua, "Oo Puang, bati'na Raja Daud, kamaseikan dikka'!" 32 Kendenmi Puang Isa natambaii. Nakutanaimi nakua, "Apara to mikadoangngi la kupugauk lako kalemi?" 33 Mebalimi nakua, "Oo Puang, madoangkan pakita." 34 Massemi penawan-Na Puang Isa, nakaka'i to matanna sola dua. Ta'pa pakitami silalona anna undi nturu' Puang Isa.

Matius 21

1 Ia tonna mandoppi'mo kota Yerusalem, ratumi lako kota Betfage jio sare Buntu Zaitun, napajolomi Puang Isa to dua anak gurun-Na, 2 napasanni kumua, "Male kamu' sola dua lako joo kampong tapangngujui. Ia ammiratu lako, ta'pa la nnampa' kamu' keledai sola anakkana dila'ka'. Bukaii, mibawa duai jio mai. 3 Ia ke denni tau ngkutanai kamu' kumua, ciapari mibukaii, la mikua, 'Naparallui Puang, na madoi' una la napapole.' " 4 Susimi joo najaji to kadan-Na Puang Allataala mangka napau nabi tonna anu' kumua, 5 "Pauanni to-Yerusalem kumua, Ee, ratumi to Rajami. Mpamajiong penawanna ssakei keledai, mesa' keledai lundara." 6 Malemi joo anak gurun-Na Puang Isa sola duai napugaukki to apa disuanni. 7 Nabawami, nalapikkii baju landona, anna sakeii Puang Isa. 8 Buda tau mballah baju landona jio lalan, na den too tau male lle'to tangke kaju, naampahhi jio lalan to la naola Puang Isa. 9 Ia to tonjoloii sola toundi jio boko'na Puang Isa simetamba-tamban nakua, "Pakala'bihhi bati'na Raja Daud! Dibarakka'i to toratu mpusanga sangan-Na Puang. Pakala'bihhi Puang Allataala jao kaminang majaona!" 10 Ia tonna ratumo de' kota Yerusalem to Puang Isa, sireka bangmi to tau lan. Na pada mekutana nakua, "Indara ia joo tau?" 11 Mebalimi tee mai tau undi nturu'i nakua, "Nabi Isa jio mai kota Nazaret jio tana Galilea." 12 Mentamami rante Bola Puang Allataala to Puang Isa naula'ii to tomangbaluk sola tomangngalli lan. Nabalittua' simesa'i to meja nanii tompasitongka doi' sola cadokkoan pangbaluk jangan-jangan. 13 Nakuanni Puang Isa tuu lako tau, "Den diuki' lan Sura' Allataala nakua Puang Allataala kumua, 'Ia to Bola-Ku', iamo bola la dinii massambajang.' Apa mipasusimo bola parampo'!" 14 Denmi tobuta sola tokupi' male lako rante Bola Puang Allataala mpessitammui Puang Isa, napapakitai to tobuta napalumingkai to tokupi'. 15 Apa mabirih tuu lako kapala imang sola guru agama ngkitai to panggaukan mejangngaran napugauk Puang Isa. Nakagalli tooi tuu lako pea jio rante Bola Puang Allataala sipetamba-tamban nakua, "Mala'bih to bati'na Raja Daud!" 16 Nakua lako Puang Isa, "Tasa'dingraka apa napau tee mai pea'-pea'?" Mebalii nakua, "Kusa'ding. Te'daparaka mibacai lan Sura' Mazmur to napau Raja Daud lako Puang Allataala kumua, 'Ia to pea'-pea' sola to mane' jajinna mangkamo taajahhi la lantuk penawa mangpakala'bih'?" 17 Messarakmi Puang Isa jio mai tuu lako tau, namale lako kota Betania, namangbongi jio. 18 Masawanna melambi' tonna polemo Puang Isa sola anak gurun-Na de' kota Yerusalem, tangbarahmi to Puang Isa. 19 Ngkitami garonto' kaju ara jio randan lalan. Malemi lako, apa te'da bang buanna naampa', daunna mandari. Nakuanni joo garonto' kaju ara, "Mangpamula tee allo, te'damo mulamembua!" Ta'pa malajumi joo garonto' kaju ara. 20 Ia tonna kitai anak gurun-Na, jangngah ngasanmi. Namekutana nakua, "Umbo nakua nata'pa mate joo garonto' kaju ara?" 21 Mebalimi nakua, "La miingaran tee kadang-Ku' kumua, ia ke matappa' kamu' na te'da mibata, wa'ding kamu' mpugaukki susi tee kupugauk lako tee garonto' kaju ara! Na te'da na ia manda joo, apa wa'ding too kamu' mangkada manda lako joo buntu mikua, 'Tiangka'ko mutibuang do' tasik.' Nang la jajinna ia! 22 Apa to mipeta'da ke massambajang kamu', la diben kamu', ke matappa' tongan kamu'." 23 Male pole' omi Puang Isa lako rante Bola Puang Allataala, namangngajahhi. Ia tonna mangngajahhimo, ratumi to kapala imang sola pekaamberan to-Yahudi, namekutana nakua, "Apara napenggaronto'i mupugauk ngasanni joo? Indara mbenko kuasa?" 24 Mebalimi nakua, "La kukutanai toda kamu'. La mipebalina' jolo', kumane' mpebali kamu'. 25 Indara mbenni kuasa Nabi Yahya njio' tau? Puang Allataalaraka iarika tolino?" Sipangkada-kadami nakua, "Ia antamebali kumua, 'Kuasa pole jio mai Puang Allataala', la nakuanki', 'Ciapai na te'da mikatappa'ii to pangngajahna Nabi Yahya?' 26 Apa ia ke la takua, 'Kuasa jio mai tolino', malaja'ki' lako tobuda, nasaba' nasanga ia nabi joo Yahya." 27 Iamo joo mebalimi nakua, "Te'da kami' kiissenni". Nakuanni Puang Isa, "Ia ke susii tuu te'da toda kulampauan kamu', kuasa pole umbo angkuwa'ding mpugaukki joo". 28 Mpatarruhmi kadan-Na Puang Isa nakuanni tuu lako kapala imang sola pekaamberan to-Yahudi, "Umbora mikua mpahangngi tee? Den mesa' ambe' dua anakkana, pea muane dua. Malemi lako anak pamungahna nakuanni, 'Ee, anakku', maleko mangjama lako bara'bah anggoro'ta' tee allo.' 29 Napebalii anakkana nakua, 'Te'da kumadoang.' Apa mangpikkiri' pole'i joo pea, namenassan namale lako bara'bah anggoro'na. 30 Male omi joo ambe'na lako anak tampakkana, nasua tooi male lako bara'bah anggoro' mangjama. Mebalimi joo anakkana nakua, 'Ie'.' Apa te'dara namale. 31 Jaji, umbonnara joo to sile'to sola duai to nturu' kadanna ambe'na?" Mebalimi tuu lako kapala imang sola pekaamberan to-Yahudi nakua, "Ia to kakanna." Nakuamo Puang Isa, "La miissen kumua ia to passassung sola tuu lako baine sala kedo la la'bi marawa menjaji umma'-Na Puang Allataala na kamu'. 32 Nasaba' ratumo to Nabi Yahya mpakitan kamu' lalan katuoan pangkabudaian-Na Puang Allataala. Apa te'da mipesa'dingngii to pangngajahna. Apa ia tuu lako passassung sola tuu lako baine sala kedo nakatappa'i ia. Na moi miissen ngasanmo tuu lako kumua memmatappa'mi, apa te'da mimenassan na te'da too mimatappa' lako Puang Allataala." 33 Mpatarruh omi kadan-Na Puang Isa nakuanni tuu lako kapala imang sola pekaamberan to-Yahudi, "Denpa tee pangpasusian la mipesa'dingngi. Den mesa' ampu bara'bah ntananni anggoro' bara'bahna. Narompoi mengguririkkina, nakali kalo'bong pangparran anggoro', nakabua' too korang la dinii mangngampa. Mangkai joo, napangpenduluanmi joo bara'bah anggoro' lako ba'tu pira-pira tomendulu, namale lako tondok laen. 34 Ia tonna wattu peanggorosanmo, nasuami to kaunanna male la nnalanni to tawana. 35 Apa ia tonna ratumo lako, najokkomi tomendulu. Den to narambi, den to nabuno na den too to nasilekko'i batu. 36 Nadadu' omi joo ampu bara'bah ssua la'bi buda kaunanna male la nnalanni to tawana. Apa napegaukki unai tomendulu susi to nagaukanni to jolona. 37 Mangkatampakanna anak jajiannamo nasua male la nnalanni to tawana. Mangkadai lan penawanna nakua, 'La nakasiri' ia to anakkaku'.' 38 Apa ia tonna kitami joo tomendulu bara'bah kumua ratui to anakkana joo ampu bara'bah, sipangkada-kadami joo tomendulu nakua, 'Inde'mi pale' to la mpumanahhi tee bara'bah. Tabunoi, antaala ngasanni tee manahna.' 39 Najokkomi, nabawai lako saleananna bara'bah, nabunoi." 40 Mekutanami Puang Isa lako tuu lako kapala imang sola pekaamberan to-Yahudi nakua, "Ia ke ratumi joo ampu bara'bah, apara la nagaukanni tuu lako tomendulu?" 41 Mebalimi tuu lako tau nakua, "La ratui mbuno ngasanni, namane' mpangpenduluanni joo bara'bahna lako tolaen, to wa'ding la mpangbenni lako ampu bara'bah to tawana unamo ia, ke wattunnami." 42 Nakuamo Puang Isa lako, "Tantu denmo mibacai lan Sura' Allataala to mpauna' kumua, 'Ia to batu naca'bean pande bola menjajimo batu ariri petuo. Iamo tee panggaukan-Na Puang Allataala to kaminang melo.' " 43 Nakuamo Puang Isa lako tuu lako kapala imang sola pekaamberan to-Yahudi, "La miingaran! Te'da milampumanahhi to manahna umma'-Na Puang Allataala. La dialai kamu' nadiben lako bangsa to madoang nturu' parenta-Na Puang Allataala. 44 Susi to totipessambak lako joo batu, la maicak, na ia to tonai'pinni, la maninnang, susi toomi la jaji lako tau to cia' ntarimana'." 45 Ia tonna sa'dingmi kapala imang sola to-Farisi joo pangpasusian napau Puang Isa, naissen kumua, ia napapatui joo kadan-Na. 46 Iamo joo napangngattaimi la njokkoi, apa malaja'i lako tobuda, nasaba' nasanga ia tobuda kumua nabi to Puang Isa.

Matius 22

1 Mpatarruhhi curitan-Na Puang Isa lako tuu lako kapala imang, to-Farisi na pekaamberan to-Yahudi mpake pangpasusian nakua, 2 "Ianna mangparentamo Puang Allataala susi Raja, dipasangrapang raja la mpabotting anakkana muane. 3 Ia tonna la mangpabottingmo, nasuami to kaunanna male ntambaii to tomangka dipauan la ratu lako joo pangmaroasan. Apa ia joo todipauan te'da bangngi madoang ratu. 4 Nasua pole' omi to kaunan laenna male ntambaii tuu lako tau nakua, 'Pauanni kumua: Sadiamo to kande pangmaroasan. Mantunu sapin muane sola anak sapin to dipelompoi, na la kumande mandamo to tau. Malemo kamu' mai.' 5 Apa te'da bang mpuinawai la male lako tuu lako to ditambai. Pada maleri lako pangjamanna, den to male lako bara'bah, den to male mangdangkang. 6 Na den too to kannori njokkoi joo kaunan, napa'dikki, namane' mbunoi. 7 Ia tonna sa'dingngmi joo raja, gaja gallimi. Nasuami to surudadunna male mbunoi to tombuno kaunanna, nasumpun tooi to kotana. 8 Mangkai joo too nasua pole' omi to kaunan laenna nakua, 'Sadiamo tee pangmaroasan, apa ia to tau ditambai, te'da bang nasipato' la ratu. 9 Iamo joo male kamu' mitambai ngasanni to sininna tau misitammuan lako lalan ratu ntee pangmaroasanku'.' 10 Malemi tuu lako kaunan. Narempun ngasanni to tau nasitammuan lako lalan, nasolanni lako joo tomangpabotting, la tomelo, la togaja'. Ponnomi bola to toratu mangpabotting. 11 Mentamami tangnga-tangngana toratu joo raja ngkitai to toratunna. Denmi mesa' totangmangpakean sipato'na dipake lako pangmaroasan. 12 Nakuamo, 'Ee mane, ammumentamara ntee pangmaroasanku' na tangsipato' bang tuu pakeanmu.' Te'da naissenni mebali joo tau. 13 Nakuamo joo raja lako to kaunanna, 'Pumpungngi to limanna sola ajena tee tau mica'beanni lako ngenan kaminang malillin. Ntuu jio ngenan nanii tau sikarrakan sola sunggarigi'.' " 14 Natampakkimi Puang Isa joo pangpasusian susi tee, "Buda tonatambai Puang Allataala, apa ci'di'ra to napilei menjaji umma'-Na." 15 Malemi sipangkada-kada tuu lako to-Farisi umbo nakua la nnakkalannii to Puang Isa, naden lalan nanii mpasalai. 16 Nasuami to ba'tu pira-pira anak gurunna sola ba'tu pira-pira taunna Raja Herodes male lako Puang Isa. Nakua lako Puang Isa, "Oo Guru, kiissen kumua maruruhki' mpangpangngajaran pakkaeloran-Na Puang Allataala lako tobuda, nasaba' te'da tau tapasilaenan. 17 Iamo joo la mekutanakan kumua, 'Ianna situru' atoran agamanta', wa'dingriki'ka mbajah sima lako Tomaraja Roma ba'tu te'daraka?' " 18 Apa naissen Puang Isa to lan penawanna joo tomekutana, iamo joo nakuanni, "Ee, tomajekkong! Ciapari micobana'? 19 Pakitanna' to doi' mipake mbajah sima." Nabenmi mesa' dinar. 20 Mekutanami Puang Isa nakua, "Indara sipugambara' sola sipusanga tee?" 21 Mebalimi nakua, "Tomaraja Roma." Nakuamo Puang Isa, "Ia ke susii tuu, benni Tomaraja to apanna, mibenni Puang Allataala to apan-Na!" 22 Jangngah ngasanni ssa'dingngi joo pebalin-Na Puang Isa, anna male ssalaii. 23 Ia bang unamo joo allo naratu to ba'tu pira-pira to-Saduki lako Puang Isa. Ia joo to-Saduki te'da nakatappa'i to katuoan pole' jio mai kamatean. 24 Nakuamo, "Oo Guru, mangka napangpangngajaran Nabi Musa susi tee: Ia ke matei to muane, na te'dapa anakkana joo bainena, la nasulle allonanni adinna, dikua napajajianni bati'. 25 Nasaba' den lan kampongki' pitu muane massile'to. Ia to pamungah kebainemi, apa te'dapa anakkana namatemo. Napubainemi adinna joo bainena. 26 Apa ia joo adinna mate todami, na te'da toopa anakkana. Susi toomi jaji lako adi mangpenduanna ratu lako adi tampakkana, den ngasanmo nasibali joo baine, namate ngasan toomi, apa te'da bangngi to sijajian bati'. 27 Mangkatampakanna mate todami joo baine. 28 Ia ke dipatuo pole'mi to tomate, indannamira la sibali tarruh joo baine? Nasaba' mangka ngasanmi sibali." 29 Mebalimi Puang Isa nakua, "Oo, massala pahang kamu', sanga te'da miissen tonganni to apa diuki' lan Sura' Allataala, na te'da too mipahangngi to kuasan-Na Puang Allataala. 30 Nasaba' ia ke mangkami tuo pole' to tau jio mai kamatean, te'damo ia tokebaine-kemuane, apa la tuomi susi malaeka' jao suruga. 31 Tantu denmo mibacai to kadan-Na Puang Allataala to mpaui to tomate dipatuo pole' jio mai kamatean. Nakua Puang Allataala, 32 'Aku'mo Puang Allataala to nasompa Nabi Ibrahim, Ishak, na Yakub.' Totuora to ssompa Puang Allataala, tangngia tomate!" 33 Ia joo tossa'dingngi to pangngajah-Na Puang Isa, jangngah ngasanni. 34 Ia tonna sa'dingngmi to-Farisi kumua te'damo apa napebalian joo to-Saduki lako Puang Isa, malemi sirempun. 35 Denmi sala mesa'na, male lako Puang Isa la nnakkalannii, naden lalan nanii mpasalai. Ia joo tau guru agama. 36 Nakuamo mekutana, "Oo Guru, umbonnara joo parenta-Na Puang Allataala to kaminang parallu?" 37 Mebalimi Puang Isa nakua, "La mupakamoja' tongan to Puangmu, Puang Allataala, situru' canning atimmu na sininna kapaissenanmu ratu lako ssalaimmu lino. 38 Iamo joo garonto'na parenta to kaminang parallu. 39 Na parenta mangpenduanna to pada bang una joo parenta bungahna: Pakamoja'i to padammu rupa tau, susi iko mpakamoja' kalemu. 40 Sininna parenta agama to diuki' lan atoranna Nabi Musa sola sura'na nabi laen menggaronto' lan ngasan joo dua parenta." 41 Ia tonna sirempun unapa to to-Farisi ntuu jio, nakutanaimi Puang Isa nakua, 42 "Umbo nakua pahangmi to Raja Mangpasalama'? Indara bati'?" Napebalimi nakua, "Bati'na Raja Daud." 43 Mekutana unapi Puang Isa nakua, "Ia ke susii joo, ciapari na Raja Daud una napekapuangngii, tonna patujui Roh Allataala, namangkada nakua: 44 Nakua Puang Allataala mangkada lako Puangku', 'Cumadokkoko ntee sa'de kanan-Ku', angkupupentalo ngasanni to ewalim-Mu mukuasaii.' 45 Jaji, ia ke Raja Daud mpekapuangngii joo Raja Mangpasalama', matumbai nalabati'na Raja Daud?" 46 Moi mesa' tau te'da nnissenni mpebalii to Puang Isa. Mangpamulami joo wattu, moi mesa' tau te'damo barani ngkutanai.

Matius 23

1 Nakua Puang Isa lako tobuda sola anak gurun-Na, 2 "Ia joo guru agama sola to-Farisi pada bang una Nabi Musa ke mpangpangngajaranni pangngajaranna Nabi Musa. 3 Iamo joo turu' ngasanni to pangngajaranna. Apa danggi' mituru'i to panggaukanna, nasaba' ia to napangpangngajaran te'da ia napugaukki. 4 Nasaba' nakabua' to atoran tangnakulle tau mpugaukki, apa ia kalena te'da natulungngi to tau, umbo nakua mpugaukki. 5 Ia ngasan to panggaukanna napangpekitan bangri lako tau. Iamo joo na ia to pakean tanda kamatapparanna, susinna to rombe-rombe bajunna dipemalandoi, na ia to karappe' dinii nnanna aya' Sura' Allataala napematonggoi. 6 Gaja nakabudai cumadokko jio olo lan bola passambajangan na ngenan kata'pan mata jio pangramean. 7 Namadoang bang ditaratte' jio pasa', namadoang too ditambai 'Guru'. 8 Danggi' mimadoang disanga 'Guru', nasaba' tosile'to ngasan kamu' na mesa'ra Gurummi. 9 Danggi' naden mesa' tau lan lino mitambai 'Ambe'', nasaba' mesa'ra Ambe'mi, iamo to Ambe' jao suruga. 10 Na danggi' mimadoang disanga 'Puanggawa', nasaba' mesa'ra to puanggawami, iamo to Almaseh. 11 Ia ke den kamu' madoang disanga to toditaratte', parallu la menjaji todisua-sua. 12 Ia to tompamajao kalena la dipamajiong, na ia to tompamajiong kalena la dipamajao." 13 Nakua omo Puang Isa mpatarruh kadanna, "Macilaka kamu' to guru agama sola to-Farisi, nasaba' tomajekkong kamu'! Tangmieloran to tau menjaji umma'-Na Puang Allataala. Te'da mimadoang menjaji umma'-Na, na ia to tomadoang kannori mianggai. 14 Macilaka kamu' to guru agama sola to-Farisi, nasaba' tomajekkong kamu'! Miuraga bang to baine matemo muanena, mirampai to ewananna. Mianggai' bang too mpemalandoi passambajangmi, to minii mpembunianan panggaukan gaja'mi. Iamo joo nala'bi mabanda' to sessami. 15 Macilaka kamu' to guru agama sola to-Farisi, nasaba' tomajekkong kamu'! Male kamu' manglalan mambela llamban tasik na ngguririkki padang nnangah mesa' tau la mipupenjaji anak gurummi. Ia tonna turu'mo kamu', mipupenjajimi tawana naraka, na manglokkon penduan to gaja'na na ia to gaja'mi sola ngasan. 16 Macilaka kamu' to pekaamberan tobuta! Mipangpangngajaran susi tee: 'Ia ke massapahhi to tau mpau Bola Puang Allataala, te'da namatumba ke te'da napugaukki. Apa ia ke massapahhi mpau bulawan lan Bola Puang Allataala, la napugaukki situru' passapahna.' 17 Ee tobuta, tobango' kamu'! Umbonnara parallu, bulawanraka iarika Bola Puang Allataala to mpupessipato'i joo bulawan dipake lan Bola Puang Allataala? 18 Mipangpangngajaran too to susinna tee, 'Ia ke massapahhi to tau mpau ngenan pangkaroban, te'da namatumba. Apa ia ke massapahhi mpau apa dipangkaroban, la napugaukki situru' passapahna.' 19 Buta tongan kamu'! Umbonnara la'bi parallu, iaraka joo karoba ba'tu ngenan pangkarobanraka to mpemapaccingngii joo apa dipangkaroban? 20 Iamo joo, ia ke den tau massapah mpau ngenan pangkaroban, pada bang unamo to mpau ngasanni to apa jao. 21 Na ia ke den tau massapah mpau Bola Puang Allataala, battuananna massapahhi mpaui joo Bola Puang Allataala sola Puang Allataala to torro lan. 22 Na ia ke denni tau massapah mpau suruga, battuananna massapahhi mpau cadokkoan kamala'biran-Na Puang Allataala sola Puang Allataala to cumadokko jao. 23 Macilaka kamu' to guru agama sola to-Farisi, nasaba' tomajekkong kamu'! Ia to assele' tanananmi to tangkeangga'na susinna tulasi, bua adas na jintang, mipangben sangtawa sangpulona lako Puang Allataala. Apa ia to parenta kaminang parallu lan atoranna Nabi Musa te'da mipugaukki susinna: kamarurusan, mamase, nturu' pakkaeloran-Na Puang Allataala. Na iara joo to kaminang parallu la mipugauk, apa la mipugauk too to laenna. 24 Pekaamberan tobuta kamu'! Kasisi' jiong waimmi mikita nnalaii, apa ia to unta miamma' malebu. 25 Macilaka kamu' to guru agama sola to-Farisi, nasaba' tomajekkong kamu'! Ia ammibasei isotan ba'tu kandean, saleanna manda mibasei, apa lanna liu carepa unapa. Susimi joo, ia to ada' wa'ding nakita tau mituru' tongan, apa lan penawammi buda kamaullakan sola kamadoangan rrampa apanna tau. 26 Ee, to-Farisi buta! Pemeloii jolo' to penawammi sola pangtangngaranmi, namane' melo to sipa'mi sola panggaukanmi. 27 Macilaka kamu' to guru agama sola to-Farisi, nasaba' tomajekkong kamu'! Susi kamu' lamunan dikapuhhi mabuccang. Gaja ballo dikita saleanna, apa lanna liu ponno buku tomate sola to mecarepan laenna. 28 Susi toda kamu'. Ia ke dikitai, melo sipa'mi lako padammi rupa tau, apa lan penawammi kagajatan manda ponno sola kamajekkongan." 29 "Macilaka kamu' to guru agama sola to-Farisi, nasaba' tomajekkong kamu'! Mipemellongngi pole' to lamunanna nabi sola to tompugauk bang pakkaeloran-Na Puang Allataala, 30 mimangkada kumua, 'Ia kenna kijajimo tonna wattunna tuo to tojoloki', te'da kami' kilaturu' mbuno nabi.' 31 Jaji miakui una kumua, bati'na kamu' topabuno nabi! 32 Ia ke susii joo, patarruh pissen bangmi to dosa napugaukmo tojolomi. 33 Togaja' kamu', sanga bati' togaja' kamu'! Umbora la mikua mpalaian kalemi jio mai pangsessa naraka! 34 Pesa'dingngii! La kuparatuan kamu' tomapahang, nabi na guru, denni to la mibuno, na den tooi to la mipampang. Denni to la mirambi lan bola passambajangan, na den tooi to la miula' tarruh-tarruh jio mai mesa' kota lako kota laen. 35 Iamo joo miladipabalahhi toopa sininna to panggaukanna tojolomi to mbuno taun-Na Puang Allataala, mammula jio mai Habel tomelo, ratu lako Zakariya anakkana Berekhya, to mibuno jio napatangnga ngenan pangkaroban na Bola Puang Allataala. 36 La miingaran tee kadang-Ku' kumua, ia to tau too allo la dipabalahhi sininna panggaukan gaja'na tojolona!" 37 Mangkadai Puang Isa nakua, "Ee, to-Yerusalem! Tombuno kamu' nabi! Mirura batui to tonasua Puang Allataala ratu lako kalemi, sanggenna mate. Ba'tu pempiranmo' madoang rrempun kamu', susi indo manuk rrempun anakkana jiong pani'na, apa te'da mimadoang! 38 Iamo joo la makarorrong to bolami, nasaba' te'damo nasolan kamu' Puang Allataala. 39 La miingaran! Mammula tee too te'damo milangkitana' sanggenna mikua, 'Dibarakka'i to toratu mpusanga sangan-Na Puang!' "

Matius 24

1 Ia tonna messunmo Puang Isa lan mai rante Bola Puang Allataala, ratumi to anak gurun-Na. Napakitanni garaganna joo Bola Puang Allataala. 2 Nakuamo Puang Isa, "Mikita ngasanmoraka kabua'na joo bola? La mikatappa'i kumua den wattunna keanu', na sininna tee mikita la diro'pokan ngasan na moi mesa' batu te'damo nnii ngenanna!" 3 Mangkai joo, malemi Puang Isa de' buntu Zaitun nacumadokko jao. Ratumi to anak gurun-Na la ssipangkadan mesai nakua, "Oo Guru, pauankan, piranra nalajaji joo? Na apara tandana ke la ratu pole'miki' na la Kiama'mo lino?" 4 Mebalimi Puang Isa nakua, "Majaga kamu', danggi' naden tau mpalao sala kamu'. 5 Nasaba' buda tau la ratu mpusanga sangang-Ku' nakua, 'Aku'mo Raja Mangpasalama'!' na buda tau la napalao sala. 6 La ssa'ding kamu' oni kasirarian sola kareba kasirarian, apa danggi' mimalaja'. Nasaba' nang la jaji ngasanni joo, apa te'dapa nawattunna Kiama' lino. 7 Ia to mesa' bangsa la sirari nnewa bangsa laen, ia to mesa' kaparentan la rrarii kaparentan laenna. Umbo-umbo nanii la den nino sola karorian la'da'. 8 Ia tuu lako, mane' pamulannari kamasussan susi pa'dikkina ke mane' mangnguriwa'i to baine la keanak. 9 Ia joo wattu la dijokko kamu' midisessa ammidibuno. La nakaba'ci kamu' sininna bangsa, nasaba' mituru'na'. 10 Ia joo wattu buda tau la balik mentangmatappa', na la mpangpejokkoan solana na sikaba'ci too. 11 Buda nabi tangtongan la ratu mpalao sala buda tau. 12 Buda tau te'damo nasikamasean, nasaba' sakerangngan-rangngannamo to kagajatan. 13 Apa ia to tomatappa' tarruh ratu lako ssalainna lino, iamo la salama'. 14 Na ia to Kareba Kasalamatan kumua la ratumi Puang Allataala mangparenta susi Raja la dipangpeissenan lan lili'na lino, dikua nasa'dingngi sininna bangsa. Ianna mangka joo, mane'ri Kiama' lino." 15 Mpatarruhhi kadan-Na Puang Isa nakua, "La ngkita kamu' 'apa to liwa' mecarepan' dipake'deh lan Bola Puang Allataala, susi to mangka napau Nabi Daniel. (Ia to tombacai tee, la naissen meloi apa battuananna!) 16 Ia joo wattu, ia to totorro jio tana Yudea la palai de' membuntunna. 17 Na ia ke susinna denni tau jao bubungan bola, la mellaoi, natarruh bangmo male, danggi'mo namentama bola la nnalapa apanna. 18 Susi toomi ia to tojio bara'bah, danggi'mo napole nnala baju landona. 19 Liwa' parri'na joo wattu to tokeba'tang sola to tomangpacucupa. 20 Massambajang kamu', danggi' nasimata wattu peuranan ba'tu Allo Katorroan joo wattu dinii palai. 21 Nasaba' ia joo wattu la den pangsessa gaja parri', to te'dapa naden susinna joo sipammula lino dipaden ratu lako too allo, na te'da toomo naladen pole'pa. 22 Na ia kenna te'da napemadoi'i Puang Allataala nnanggeii joo wattunna, te'damo tau la salama'. Apa napemadoi'i, nasaba' umma'-Na to mangka napilei. 23 Ia ke denni tau ngkuan kamu' joo wattu, 'Kitari, inde'i to Raja Mangpasalama'!' ba'tu nakua, 'Iti'i joo!' danggi' mikatappa'ii. 24 Nasaba' buda nabi tangtongan sola tossanga kalena tomangpasalama' la mpangpekitan kalena. La mpugauk mangrupa-rupa tanda mejangngaran sola panggaukan mekalajatan, la mpalao sala tau, na ke wa'dingngi moi too umma'-Na Puang Allataala. 25 Jaji, ingaranni tee! Kupauan jolomo kamu' moi na te'dapa najaji. 26 Ia ke den tau kumua, 'Kitai, ntuumi jio padang pallawangan!', danggi' mimale lako. Ba'tu nakua, 'Kitari, inde'i lan sapa'!', danggi' mikatappa'i. 27 Nasaba' ia to karatuan-Ku', tee Aku', Anak Mentolino, la susi kila' mellepa' jio mai kadellekan ratu lako kalambunan. 28 Ia to nanii batang rabuk, jio too nanii to langkan pekande batang rabuk. Susi toomi to karatuan-Ku' la nakita ngasan tau." 29 Mpatarruhhi kadan-Na Puang Isa nakua, "Te'da namasai ke mangkami joo kamaparrisan, na te'damo namangngarrang to allo sola bulan. La sipolloranni to bintuin jao mai langi' na la mausa' ngasan to tontoe kuasa jao langi'. 30 Ia ke mangkai joo, pajanmi jao langi' to tanda karatuan-Ku' tee Aku', Anak Mentolino. Ia joo wattu sininna bangsa lan lino la sikarrakan ngkitana' ratu jao mai langi' lan saleu', makuasa na mala'bih too susi Raja. 31 Dipannonii to tarompe' gaja tonggo, angkumane' ssuai to malaeka'-Ku', rrempun ngasanni to taung-Ku' jio mai sulapa'na lino." 32 Mpatarruhhi kadan-Na Puang Isa nakua, "Ala kamu' pangpasusian jio mai garonto' kaju ara. Ianna macikki' na malutte'mo to ringena, na mengkacocokmo, miissenmi kumua cingga'tu'mora napealloan. 33 Susi toomi ke mikita ngasanmi joo tanda, la miissen kumua cingga'tu'mora angkuratu. 34 La miingaran tee kadang-Ku' kumua, la jaji ngasan tee, ke te'dapi namate ngasan to tau tuopa tee wattu! 35 Ia to langi' sola lino la lanynya', apa ia to kadang-Ku' la tatta' te'da cappa'na." 36 Nakuapa Puang Isa, "Te'da tau nnissenni to wattu karatuan-Ku', moi malaeka' jao suruga, moi tee Aku', Anak, Ambe' manda ia to nnissenni. 37 Ia ke wattunnamo' ratu pole' tee Aku', Anak Mentolino, la susi tonna linona Nabi Nuh tonna anu'. 38 Ia tonna te'dapa namangngola joo wai saba', ia to tau mangmaroah-roah bang nakebaine-kemuane. Susi tarruhmi joo ratu lako mentamanna kappala'na Nabi Nuh. 39 Ia tonna mangngolamo to wai saba' la ssamboi ngasanni, mane'ri sabakan ngkitai apa to jaji. Susi toomi to la jaji ke ratu pole'na' tee Aku', Anak Mentolino. 40 Ia joo wattu, den dua tau mangbuah jio bara'bah, la dibawa to mesa' na dipatorro to mesa'. 41 Den dua baine rumido, la dibawa to mesa' na dipatorro to mesa'. 42 Jaji majaga kamu'! Nasaba' te'da miissenni, kumua piranra kularatu. 43 Ingaranni! Ia kenna issenni ampu bola wattunna joo nanii ratu to taboko ke bongii, la te'da namamma' nnampai bolana, danggi' namentama. 44 Iamo joo, la da'tan bang kamu' majaga, nasaba' ia to karatuan-Ku' tee Aku', Anak Mentolino, te'da mikalannaii." 45 Mangkadami Puang Isa nakua, "Susinna ke den kaunan melo to wa'ding dikatappa'i, iamo la naben kuasa puangna ngkapalai kaunan laenna, nabenni kande ke wattu kakumandeanmi. 46 Liwa' ia masannangna joo kaunan, ke polemi to puangna, naampa'i puangna mpugaukki to jamanna. 47 La mikatappa'i kumua, ia joo kaunan la naben kuasa puangna mparakai to sininna ewananna. 48 Apa ia ke masa'ga'i joo kaunan, la mangkadai lan penawanna, 49 'Masaipa namane' pole to puangku'', nabunomi to padanna kaunan, namangmaroah-roah too sola topangngiso'. 50 Apa te'da nakalannai, nata'pa ratu to puangna. 51 Napemoncongngimi puangna, napatamai ngenan tomajekkong, to nanii tau sikarrakan sola sunggarigi'."

Matius 25

1 Mangkada omi Puang Isa nakua, "Ia ke ratu pole'na' tee Aku', Anak Mentolino, wa'ding dipasangrapang tee curita sangpulo anakdara mbawa palita male la ntammui tobotting muane. 2 Lima anakdara bango', na lima anakdara macca. 3 Ia to lima bango', mbawai palita, apa ci'di'ra minynyakkana. 4 Na ia to lima macca, buda ia minynyak nabawa. 5 Apa mela'i ratu to tobotting muane, marojami na sileppengan tuu lako anakdara. 6 Ia tonna tangngamo bongi, metamba-tambami to tau nakua, 'Jiomi mai to tobotting muane! Tammuimi!' 7 Mi'cokmi joo sangpulo anakdara, na pada mpasadia palitanna. 8 Nakuamo joo lima anakdara bango', 'Benkan ci'di' tuu minynyakkami, la bosimo tee palitangki'.' 9 Mebalimi tuu lako anakdara macca nakua, 'Te'da kilampangbenni, nasaba' te'da dau naganna' kipake. Male kamu' nnallii.' 10 Malemi joo lima anakdara bango' nnalli minynyak. Ia tonna malemo, ratumi to tobotting muane. Ia joo lima anakdara macca mentamami pangmaroasan sola tobotting muane, nadisalli' to bola. 11 Mane'ri ratu joo lima anakdara bango'. Metamba-tambami nakua, 'Oo puang, timbakanpakan bolata'.' 12 Apa mebalii joo tobotting muane nakua, 'Te'da lalo kuissen kamu'!' " 13 Natampakkimi Puang Isa joo pangpasusian susi tee, "Iamo joo, majaga kamu', nasaba' te'da mikalannaii to karatuan-Ku'." 14 Nakuapa Puang Isa, "Ia ke ratu pole'na' tee Aku', Anak Mentolino, menjaji Puang la jaji susi lan tee pangpasusian. Den mesa' tau la male sompa'. Ia tonna te'dapa namale, ntambaimi kaunanna la napabarakkanni sininna ewananna. 15 Pada diben doi' nadangkanganni situru' pakullena. Den to diben lima talenta, den to diben dua talenta, na ia to laenna diben mesa' talenta, namane' male sompa. 16 Ia joo kaunan to diben lima talenta, ta'pa malemi ndangkanganni, nasumaro manglokkon penduan. 17 Susi todami joo kaunan diben dua talenta, nasumaro too manglokkon penduan. 18 Apa ia joo kaunan diben mesa' talenta, maleri ngkali padang, nalamunni joo talentana puangna. 19 Ia tonna masaimo, polemi joo puangna, natambai to kaunanna, nasaba' madoangngi la nnissenni to sarona. 20 Ia joo kaunan diben lima talenta napapolemi menjaji sangpulo talenta. Namangkada nakua, 'Oo puang, takitai, lima talenta tabenna', nasumaro lima talenta.' 21 Nakuamo joo puangna, 'Gaja kassing tuu panggaukanmu! Natatta' makassing to penawammu lako aku'. La kupabarakkanniko to la'bi matonggo, sanga wa'dingko dikatappa'i moi na panggaukan biccu'ra. Malemoko mai, taperasai kamasannangan sola!' 22 Ratu todami joo kaunan diben dua talenta namangkada nakua, 'Oo puang, takitai, dua talenta tabenna', nasumaro dua talenta.' 23 Nakuamo joo puangna, 'Gaja kassing tuu panggaukanmu! Natatta' makassing to penawammu lako aku'. La kupabarakkanniko to la'bi matonggo, sanga wa'dingko dikatappa'i moi na panggaukan biccu'ra. Malemoko mai, taperasai kamasannangan sola!' 24 Ia joo kaunan diben mesa' talenta, ratumi namangkada nakua, 'Oo puang, kuissen kumua kita'mo tau masa'ga'na. Mpeburaiki' apa tangngia pantananta', na nnala bangki' kita' to tangngia assele' pangngambohta'. 25 Iamo joo kumalera llamunni do' litak to talenta tabenna', nasaba' malaja'na'. Inde'mi kupapoleanki'.' 26 Mebalimi joo puangna nakua, 'Ee, ikomo kaunan ganjangna sipa'mu na kuttuan! Muissenmo kumua, mpeburai bangna' tangngia pantananku', nnala toona' assele' tangngia pangngambohku'. 27 Ia ke susii joo, la mupatamari bang joo talentaku', na ia ke polemo' kualai sola bunganna.' 28 Nakuanmi to kaunan laenna, 'Alaii joo talenta, ammibenni joo kaunan to nnampuimo sangpulo. 29 Nasaba' ia to todenmo naampui, la dibenpa la'bi buda, na kala'bian pissen. Apa ia to tangnnampui apa, ia to apa ci'di'mora naampui la dialai pissen. 30 Ia joo kaunan tangmakkeguna, ca'beanni lako ngenan kaminang malillin. Ntuu jio nanii kumarrak sola sunggarigi'!' " 31 Mpatarruhhi kadan-Na Puang Isa nakua, "Ia ke ratu pole'na' Aku', Anak Mentolino, sola sininna malaeka'-Ku' mpupangngarrang kamala'biran-Ku', la cumadokkona' jao cadokkoan mala'bih, angkumangparenta susi Raja. 32 Sininna bangsa lan lino la dipupennolo lako kale-Ku'. Kumane' mpangduai ngenanna susi to tomangrewa mpasisarak bembala' na beke. 33 Ia to bembala', iamo to tompugauk pakkaeloran-Na Puang Allataala, dipangmesa jio sa'de kanan-Ku'. Na ia to beke, iamo to totangmpugauk pakkaeloran-Na Puang Allataala, dipajio sa'de kairing-Ku'. 34 Mangkai joo kukuamo lako tojio sa'de kanan-Ku' kumua, 'Malemo kamu' mai sininna to tonabarakka'i Ambe'-Ku' Puang Allataala. Mentamamo kamu' kaparentan-Ku' to nang dipasadiamo sipamulanna lino. 35 Nasaba' ia tongkutangbarah, mibenna' kande, na ia tongkumawakke, mibenna' wai diiso'. Ia tongkumentoratu, te'da mikita tolaenna'. 36 Ia tongkutangmebaju, mibenna' baju. Ia tongkumasaki, mijaranaina'. Ia tongkuditarungku, ratu kamu' ngkitana'.' 37 Mebalimi tuu lako tojio sa'de kanan-Ku' nakua, 'Oo Puang, umbora wattu antatangbarah, kibenki' kande, ba'tu mawakkeki', kibenki' wai diiso'? 38 Umbora wattu antamentoratu, na te'da kikita tolaenki'? Umbora wattu antatangmebaju, kipakeiki'? 39 Umbora wattu antamasaki, kijaranaiki', ba'tu ditarungkuki', kimale ngkitaki'?' 40 La mebalina' kukua, 'Sitonganna kukuan kamu' kumua, ia to mipugauk lako tee mai to kupusile'to, moi namakario-rio, battuananna mipugauk lako too Aku'.' 41 Mangkai joo kukuamo lako to tojio sa'de kairing-Ku' kumua, 'Ee, kamu' to ditampakki ropu, palai kamu' ntee! Mentama kamu' api naraka dukku te'da cappa'na, to dipasadianmo Ballisi' sola tuu lako malaeka'na. 42 Nasaba' ia tongkutangbarah, te'da mibenna' kande. Ia tongkumawakke, te'da mibenna' wai diiso'. 43 Ia tongkumentoratu, te'da mikambaroina'. Ia tongkutangmebaju, te'da mibenna' pakean. Ia tongkumasaki sola ditarungku, te'da mijaranaina'.' 44 Mebalimi tuu lako tojio sa'de kairing-Ku' nakua, 'Oo Puang, wattu umbora antatangbarah ba'tu mawakke ba'tu mentoratu, ba'tu tangmebaju, ba'tu masaki, ba'tu ditarungku angkitangnjaranaiki'?' 45 La mebalina' kukua, 'Sitonganna kukuan kamu' kumua, ia to te'da mipugaukki lako tee mai to kupusile'to, moi namakario-rio, battuananna te'da mipugaukki lako kale-Ku'.' 46 Ia tuu lako tau susi joo la disessa te'da cappa'na, apa ia to tompugauk pakkaeloran-Na Puang Allataala la diben katuoan melo te'da cappa'na."

Matius 26

1 Ia tonna mangka ngasanmo napangpangngajaran Puang Isa joo, nakuamo lako anak gurun-Na, 2 "Miissen kumua duang allopi na pangramean Paskah, na ia tee Aku', Anak Mentolino, la dipangbenna' kudipampang." 3 Ia joo wattu ia to kapala imang sola pekaamberan to-Yahudi sirempun jio salassa' Imang Lompo to disanga Kayafas. 4 Sipangkadami umbo nakua nnangah lalan la njokko buni Puang Isa anna bunoi. 5 Pada mangkadai kumua, "Apa danggi' na ia ke wattu pangramean nadipugauk, nasaba' wa'ding marongka to tobuda." 6 Ia tonna jio kota Betania to Puang Isa lan bolana Simon to masolak tonna anu', 7 denmi mesa' baine male lako Puang Isa mbawa minynya'-minynya' lan bittolo' pualam to gaja suli' allinna. Ia tonna cumadokkomo Puang Isa kumande, natua'imi minynya'-minynya' to ulun-Na naminynyakkii. 8 Nakitami anak gurun-Na Puang Isa anna magalli nakua, "Ah, apara bua'na dipaboro-boro joo minynya'-minynya'? 9 Na ia joo wa'ding dibaluk masuli', na ia to allinna diben tokaasi-asi!" 10 Naissen Puang Isa to napikkiri' anak gurun-Na, namangkada nakua, "Danggi' mirekaii, melo to napugauk lako Aku'. 11 Ia to tokaasi-asi, la den punala bang ia misolan, apa ia tee Aku' te'da ammilassolan tarruhna'. 12 Naminynyakki jolomo', la mpasadiai to kadilamunan-Ku'. 13 La miingaran tee kadang-Ku' kumua, umbo-umbo dinii lan tee lino mpangpeissenan Kareba Kasalamatan, tuli la dicurita todai to apa napugauk, dinii nningaranni!" 14 Yudas Iskariot iamo sala mesa'na to sangpulo dua anak gurun-Na Puang Isa, male lako kapala imang. 15 Nakua lako, "Apara la mibenna' ke kupangpejokkoanni to Puang Isa?" Nabilanganni tallung pulo doi' pera' nabenni. 16 Mangkai joo nnangahmi wattu melo Yudas Iskariot, to la nanii mpangpejokkoan Puang Isa. 17 Ia tonna allo bungahna pangramean ngkande Roti Tangkeragi, ratumi to anak gurun-Na lako Puang Isa namekutana nakua, "Oo Puang, umbora to takadoangngi, la kinii mpasadianki' kande Paskah?" 18 Nakuamo Puang Isa, "Malemo kamu' lako kota, mikuanni to tau jio, kumua: Nakua Guru, 'Nadete'mi wattung-Ku', la mang-Paskahna' jio bolamu sola anak gurung-Ku'.' " 19 Napugaukmi anak gurun-Na susi to napasananni Puang Isa, napasadiami to kande Paskah. 20 Ia tonna bongimo, cumadokkomi Puang Isa sola sangpulo dua anak gurun-Na kumande. 21 Ia tonna kumande ngasan unapa, nakuamo Puang Isa, "La miingaran tee kadang-Ku' kumua, den kamu' mesa' la mpangpejokkoanna'!" 22 Gaja sussai penawanna to anak gurun-Na tonna sa'dingngi to Puang Isa mangkada susi joo, anna pada mekutana nakua, "Oo Puang, tantu te'da na aku' tasanga?" 23 Mebalimi nakua, "Ia to tokusolan ncummu roti do' kandean, iamo la mpangpejokkoanna'. 24 Ia tee Aku' Anak Mentolino, nang la matena', susi to diuki' lan Sura' Allataala. Apa macilaka to tompangpejokkoanna'. La'bi melo ia, kenna danggi' pissen nadijajian." 25 Mebalimi Yudas to la mpangpejokkoan Puang Isa nakua, "Oo Guru, aku'ra tuu tasanga." Mebalimi Puang Isa nakua, "Susimi tuu kadammu." 26 Ia tonna kumandemo sola ngasan, naalami Puang Isa joo roti, namangkurru sumanga' lako Puang Allataala, namane' nti'pek-ti'pekki, nabenni anak gurun-Na, nakua, "Alai mikandei, batang kale-Ku' tee." 27 Mangkai joo, nnalami isotan anggoro', namangkurru sumanga' lako Puang Allataala, namane' mbenni anak gurun-Na nakua, "Mangngiso' kamu' sola ngasan. 28 Nasaba' rara-Ku' tee, to mpaassah basse-Na Puang Allataala, rara to dipato'do la ndampangan buda tau. 29 La miingaran! Mammula tee too, te'damo kulanniso' pole'pa anggoro', ke te'dapi namangparenta Ambe'-Ku', Puang Allataala susi Raja, antasola nniso' anggoro' baru lan Lino Baru-Na." 30 Mangkai joo, mpakkelonganmi kelong pangpujian, namane' male de' Buntu Zaitun. 31 Mangkai joo, nakuanmi Puang Isa to anak gurun-Na, "Ia tee bongi la misalaina' sola ngasan. Susi to kadan-Na Puang Allataala diuki' lan Sura' Allataala kumua, 'La kubunoi to tomangrewana, anna sisarak-sarak to bembala'na.' 32 Apa ia ke dipatuo pole'mo' jio mai kamatean, la kujoloi kamu' male re' tana Galilea." 33 Mebalimi Petrus nakua, "Oo Puang, moi nasalai ngasanki' titi' mati', te'da kulassalaiki'!" 34 Nakuamo Puang Isa ngkuanni, "Ee Petrus! La muingaran tee kada kupauanko kumua, te'dapa nakekkua to manuk tee bongi, mupentallunmo mpessakkannina'." 35 Nakuamo Petrus, "Oo Puang, moi antapada mate, nang te'da kulampessakkanniki'." Mangkada ngasanni to anak gurun-Na susi joo. 36 Ia tonna ratumo Puang Isa sola anak gurun-Na lako bara'bah zaitun disanga Getsemani, nakuamo lako anak gurun-Na, "Nteemo kamu' cumadokko, kumalepa massambajang." 37 Nasolanmi to Petrus, Yakub na Yahya. Mangpamulami masussa penawan-Na, nagaja parri' too nasa'ding. 38 Nakuamo lako joo tallu anak gurun-Na, "Liwa' masussanna penawang-Ku' susi to kumua la matemo'. Torromo kamu' ntee, tapada merroja." 39 Malemi ba'tu pirang-pirang tengkan, nasuju' massambajang nakua, "Oo Ambe', ke wa'dingngi, lendokanni tee kamaparrisan jio mai kale-Ku', apa tangngia pakkaeloran-Ku' to la jaji, apa pakkaeloran-Na ia Ambe'." 40 Mangkai joo, polemi Puang Isa lako to nanii tallu anak gurun-Na, natimba'i simammasan. Nakuamo lako Petrus, "Tangmikulle unamoraka ssolanna' merroja sangjang bang? 41 Majaga kamu', mimassambajang too, danggi' mimadosa ke disede kamu' mpugauk dosa. Sitonganna madoang to penawammi mpugauk katonganan, apa te'da mikullei, sanga malamma to sipa' tolino." 42 Male pole' omi massambajang nakua, "Oo Ambe', ia ke te'da nalatilendok tee kamaparrisan jio mai kale-Ku', apa nang la kupassanni, pakkaeloran-Na Ambe' to jaji." 43 Ia tonna pole omo lako to nanii tallu anak gurun-Na, natimba'i omi simammasan, sanga gaja rojai. 44 Napatorro omi Puang Isa joo anak gurun-Na namale massambajang mangpentallunna, na ia to passambajang-Na susi una to jolona. 45 Mangkai joo, polemi lako to nanii tallu anak gurun-Na namangkada nakua, "Mamma' bang unapara kamu'ka mpessau bo'jo'mi? Kitai! Nadete'mi wattunna tee Aku', Anak Mentolino, la dipangbenna' lako kuasanna tomadosa. 46 Mi'cokmo kamu', tamale. Kitai! Ia to tolampangpejokkoanna', ratumi." 47 Ia tonna mangkada bang unapa Puang Isa, ratumi Yudas, to sala mesa'na anak gurun-Na, ssolan buda tau sitakin pa'dang sola mbawa tarasulu', to nasua kapala imang sola pekaamberan to-Yahudi. 48 Mangka jolomo Yudas mpaui lako tuu lako tau kumua, "Ia to tau kuudung, iamo taunna. Jokkomi!" 49 Ta'pa malemi Yudas lako Puang Isa namangkada nakua, "Oo Guru!", anna udungngi. 50 Nakua Puang Isa mebali, "Ee, todipusile'to, apara mutungkanan ratu?" Na ia joo tobuda ratu sola Yudas lluruii to Puang Isa anna jokkoi. 51 Denmi mesa' to nasolan Puang Isa jio, ta'pa nnonok pa'dangna, napa'dangngii to kaunanna Imang Lompo, nata'tak to talinganna. 52 Nakuamo Puang Isa ngkuanni, "Pasibanua pole'i tuu pa'dangmu! Nasaba' inda to maningo pa'dang la mate nakande pa'dang. 53 Musangaraka tanglawa'dingna' meta'da lako Ambe'-Ku', naparatuanna' massa'bu-sa'bu malaeka' la ntulungna'? 54 Apa ianna susi joo, umbo nakua la jaji to mangka jolomo diuki' lan Sura' Allataala kumua, te'da nawa'ding tanglajaji to apa la jaji tee too?" 55 Mangkai joo nakuamo Puang Isa lako joo tobuda, "Misangaraka parampo'na', ammiratu sitakin pa'dang sola mbawa tarasulu' la njokkona'? Allo-allona' mangngajahhi jio Bola Puang Allataala na te'da mijokkona'. 56 Apa nang la jaji susi joo, dikua anna jaji to diuki' lan sura'na nabi." Mangkai joo pada sipalaianmi to anak gurun-Na ssalaii. 57 Ia tonna mangkamo tuu lako tau njokko Puang Isa, nasolanmi lako bolana Imang Lompo Kayafas. Ia to guru agama sola pekaamberan to-Yahudi sirempun ngasanni ntuu jio. 58 Naturu'i mambela-bela bangngi Petrus to Puang Isa, ratu lako rante bolana Imang Lompo. Mentamami rante bola to Petrus na cumadokko sola pangjaga. Madoangngi la nnissenni, apara to la jaji undinna. 59 Ia tuu lako kapala imang sola padanna Pangbicara Agama mpengkulle-kullei nnampa' kasa'bian tangtongan, la nanii mpasalai to Puang Isa, anna wa'ding dipangpebunoan. 60 Apa te'da lalo kasalan-Na naampa', moi nabuda tau menjaji sa'bi tangtongan. Katampakanna den dua tau male lako olo. 61 Namangkada nakua, "Ia tee tau den namangkada kumua, 'Wa'dingna' rro'pokan Bola Puang Allataala, na tallung allora kunii mpake'deh pole'i.' " 62 Ke'dehmi joo Imang Lompo namangkada lako Puang Isa nakua, "Te'daraka mulampebalii to diparapasanko?" 63 Apa kamma' bangngi to Puang Isa. Nadadu' omi to Imang Lompo mangkada nakua, "La massapahko mpau Puang Allataala to tuo te'da cappa'na, mpauankan, Ikomoraka Raja Mangpasalama', Anak Allataala." 64 Mebalimi Puang Isa nakua, "Ie', susi tuu tapaunna, Aku'mo. Katappa'i kumua, mammula tee wattu, la mikitana' tee Aku', Anak Mentolino, cumadokko jio sa'de kanan-Na Puang Allataala to makuasa, na la ratuna' jao mai langi' lan saleu'!" 65 Gaja gallii joo Imang Lompo anna ca'ce-ca'cei to pakeanna namangkada nakua, "Toncapa' Ia Puang Allataala! Te'damo nadiparallui to sa'bi. Misa'ding kalenamo kumua ncapa' Ia Puang Allataala. 66 Ia tee too, matumbara pahangmi?" Mebalimi tuu lako tau nakua, "Madosai to Puang Isa, sipato'mo Ia ke dibunoi." 67 Nacikkuduimi to lindo-Na Puang Isa nasijangguru'ii na den toda to ntampelengngi, 68 nakuanni, "Ee Raja Mangpasalama'! Tappuike', indara to ntampelengko?" 69 Ia to Petrus cadokkoi jio salean jio rante bola. Den mesa' baine kaunan ratu ngkandoppi'i nakuanni, "Tangngiko todaraka sibawanna joo Puang Isa to-Galilea?" 70 Apa messakkanni Petrus jio olona tobuda, namebali nakua, "Te'da kupahangngi apara tuu musanga." 71 Malemi Petrus lako babangan. Den omi mesa' kaunan baine laen ngkita Petrus, nakuanni to tau ntuu jio nakua, "Ia toda tee tau sibawanna nena' joo Puang Isa to-Nazaret." 72 Apa messakkan omi Petrus, namassapah nakua, "Te'da lalo kuissenni joo tau!" 73 Te'da namasai joo, ia tuu lako tau ke'deh ntuu jio male lako Petrus, ngkuanni, "Tonganna kumua ikopa mesa' anak gurun-Na, nasaba' manassa bang jio la'go kadammu." 74 Anna massapah tongan to Petrus nakua "Tampak ropu ke la kuissenni joo tau misanga!" Ia joo wattu kekkuami to manuk. 75 Naingaranmi Petrus to apa mangka nakuanni Puang Isa kumua, "Te'dapa nakekkua to manuk, mupentallunmo mpessakkannina'." Ta'pa kumarrakmi Petrus nna'de-a'de, namale lako salean.

Matius 27

1 Melambi'pa nara'tahmi tuu lako kapala imang sola pekaamberan to-Yahudi la mbunoi to Puang Isa. 2 Mangkai joo, napangpepumpunganmi, namale ssolanni, napangngoloi lako Gubernur Pilatus. 3 Ia tonna kitami Yudas to Puang Isa kumua dibicarami nadira'tahmo la dibuno, menassanmi, napapolei to doi' tallung pulo pera' lako kapala imang sola pekaamberan to-Yahudi. 4 Nakua, "Sala tonggomo', nasaba' aku'mora napusaba' naladibuno to totangkasalan." Apa mebalii tuu lako tau nakua, "Tangngia kami' issenki' tuu. Iko ikona." 5 Napessamboranni joo doi' pera' tama Bola Puang Allataala, namale ntoke' kalena. 6 Naalami kapala imang joo doi' pera' namangkada nakua, "Ia tee doi' te'da nawa'ding dipatama kasna Bola Puang Allataala situru' atoran agama, nasaba' ia tee doi' direken alli rara, battuananna mangkamo dipake ngka'tu sunga'na tau." 7 Ia tonna mangkamo ssituru'i, naallianmi padang disanga Padang Panampa Kurin, napulamunanni tomentama tondok. 8 Iamo joo nadisangai too Padang Rara ratu lako too allo. 9 Susimi joo anna jaji to mangka napau Nabi Yeremia tonna anu' kumua, "Natarimami to tallung pulo doi' pera', pada allinna mesa' tau jio Israel, susi to pura dipattantumo jio, 10 na ia joo doi' napake nnalli Padang Panampa Kurin, susi to napasan Puang Allataala lako kaleku'." 11 Ia tonna dipangngolomo Puang Isa lako Gubernur Pilatus, nakutanaimi nakua, "Tongannaraka, Ikomo Raja to-Yahudi?" Napebalimi nakua, "Susi tuu tapaunna, Aku'mo." 12 Apa ia to naparapasanni kapala imang sola pekaamberan to-Yahudi to Puang Isa te'da bang napebalii. 13 Iamo joo namangkada Gubernur Pilatus nakua, "Te'daraka musa'dingngi kumua gaja buda to apa naparapasanko?" 14 Apa te'da bang napebalii Puang Isa. Iamo joo najangngah Gubernur Pilatus. 15 Ia ke pangramean Paskah, kabiasannamo Gubernur Pilatus lla'paran mesa' toditarungku situru' peta'danna tobuda. 16 Na ia joo wattu den mesa' toditarungku gaja kaissenan to panggaukanna disanga Barabas. 17 Ia tonna budamo tau sirempun, mekutanami Gubernur Pilatus lako nakua, "Indannara mikadoangngi la kula'paran? Barabasraka ba'tu Isaraka to disanga Almaseh?" 18 Iamo namekutana susi joo, nasaba' naissen kumua iari napangngoloi kapala imang sola pekaamberan to-Yahudi to Puang Isa lako kalena, sanga masere atiri. 19 Ia tonna cumadokkomo Gubernur Pilatus ntangngahhi tee kara-kara, ratumi to pepasan jio mai bainena kumua, "Danggi' mpentamaii urusanna tee mai tonnewai tuu tau te'da kasalanna, nasaba' kupangtindoan joo tau te'da kasalanna na liwa' melajatan." 20 Apa narasii kapala imang sola pekaamberan to-Yahudi joo tobuda kumua napeta'dai nadila'paran to Barabas, nadibuno to Puang Isa. 21 Nakutanai omi Gubernur Pilatus tuu lako tobuda nakua, "Indannara la kula'paran tee tau sola dua?" Mebalimi nakua, "Barabas." 22 Nakuamo, "Ia ke susii joo, na la kupatumbai joo Puang Isa to disanga Almaseh?" Metambami tuu lako tobuda nakua, "Pampangngi Ia." 23 Nadadu' pole'pa mekutana nakua, "Kasalan apara to mangka napugauk?" Apa naandongngi pole' mearrak joo tobuda nakua, "Pampangngi Ia!" 24 Ia tonna kitai Gubernur Pilatus kumua te'damo nalampesa'dingngii tau, na la maricumi, nnalami wai nabasei limanna jio olona tobuda namangkada nakua, "Te'da kupuissenni to kamateanna joo tau! Issenmi kamu' sola ngasan." 25 Mebali ngasanmi tuu lako tobuda nakua, "Ake'mo na kami'mora sola bati'ki' mpuissenni to kamatean-Na." 26 Nala'paranmi Gubernur Pilatus to Barabas, napangperambianni to Puang Isa, namane' mpangbenni la dipampang. 27 Nabawami surudadunna Gubernur Pilatus to Puang Isa tama salassa' gubernur, namane' ntambai ngasanni to solana anna talimbungngi. 28 Naalaimi to bajun-Na napapakeii baju lando makudara'. 29 Napasongko'i mahkota, to ringe keduri dikabua', napatoei tekken to lima kanan-Na. Namengguntu' jio olo-Na nacapa'-capa'i nakua, "Salama' Raja to-Yahudi!" 30 Nacikkudui, napa'tongngi tekken to ulun-Na. 31 Ia tonna mangkamo tuu lako surudadu ncapa'-capa'i, nasulleimi joo baju lando makudara', napapakei to bajun-Na unamo ia. Namane' ssolanni to Puang Isa lako salean la dipampang. 32 Ia tonna messunmo joo surudadu male ssolan Puang Isa, sitammumi mesa' tau jio tangnga lalan. Ia joo tau disanga Simon, to-Kirene. Naparukui tuu lako surudadu mpassanni to kaju sitamben-Na Puang Isa. 33 Ia tonna ratumo lako buntu-buntu disanga buntu Golgota, battuananna, 'Buntu Ulu Tau', 34 napaiso'mi anggoro' dipasirau pa'du to Puang Isa. Ia tonna lepa'i, cia'i nniso'i. 35 Napampangmi to Puang Isa, namane' lloterei to pakean-Na la nanii nnissenni kumua umbonnara to la naputawa. 36 Mangkai joo sicadokkoanmi nnampai to Puang Isa. 37 Den pangnguki' dipajao de'na ulun-Na Puang Isa to mpaui ciapari nadipampang to kumua, "Iamo tee Puang Isa, Raja to-Yahudi." 38 Den toda dua parampo' nasolan Puang Isa dipampang, mesa' jio sa'de kanan-Na na mesa' jio sa'de kairin-Na. 39 Ia to tau liu lalan ntuu jio pada mangroge kollong ncapa'-capa' Puang Isa, 40 nakua, "Ee, Ikomo to la rro'pokan Bola Puang Allataala, na tallung allora la munii ngkabua' pole'i! Ia ke tongannako Anak Allataala, pasalama'ko kalemu ammumellao jao mai ntuu kaju sitamben." 41 Susi todai tuu lako kapala imang, guru agama na pekaamberan to-Yahudi ncapa'-capa'i Puang Isa nakua, 42 "Ee, tau laen napasalama', apa tangnakulle mpasalama' kalena! Ia ke rajana tonganni to-Israel, mellaoi tee too jao mai kaju sitamben, kimane' ngkatappa'ii. 43 Nakatappa'i to Puang Allataala, na nakua toopa kumua Anak Allataalai. Jaji la takitai, madoangrika Puang Allataala mpasalama'i tee too." 44 Ia to parampo' to dipampang sola, la'bi ncapa'pa Puang Isa susi joo. 45 Ia tonna tangngamo allo, memmapattang ngasanmi joo tondok, tallung jang masainna. 46 Ia tonna tatte' tallumo karuen nnandongngimi gamaran-Na to Puang Isa metamba nakua, "Eli, Eli, lama sabakhtani?" to battuananna, "Oo, Puang Allataala-Ku'! Oo, Puang Allataala-Ku', ciapari musalaina'?" 47 Ba'tu pira-pira to tossa'dingngi joo petamba-Na, namangkada nakua, "Ntambaii Nabi Elia." 48 Den mesa' tau ta'pa male nnala baraba batu, nacummui tama anggoro' macukka, namane' mpalakoi cappa' sangtangke kaju anna pamimmii to Puang Isa. 49 Apa nakua to tau laen, "Tajanni, antakitai ba'tu la ratu tonganrika Nabi Elia la mpasalama'i." 50 Katampakanna nnandongngi omi gamaran-Na Puang Isa metamba, naka'tu sunga'-Na. 51 Ia joo wattu, ia to kaen pesapa' lan Bola Puang Allataala ca'cei tipangdua jao mai ratu do', nino to padang, natipiak to buntu batu, 52 na ia to liang titimbak na buda batang rabuk tomatappa' tonna anu' dipatuo pole'. 53 Na ia tonna tuo pole'mo Puang Isa, messunmi lan mai liang tuu lako totuo pole'mo, namale de' Yerusalem kota-Na Puang Allataala. Na buda tau ngkitai. 54 Ia to kamandang surudadu sola solana to nnampai Puang Isa, silajatan tonganni tonna sa'dingngi to nino sola nakitai to apa jaji, namangkada nakua, "Tonganna, Ia tee tau Anak Allataala." 55 Den too buda baine ntuu jio mambela-bela bang mengkita. Iamo to nturu'mo Puang Isa nabalii tonna jio unapa tana Galilea. 56 Susinna jioi to Maryam Magdalena, Maryam indona Yakub sola Yusuf, na indona Yakub sola Yahya. 57 Ia tonna la bongimo, ratumi to tosugih disanga Yusuf to-Arimatea, to tonturu'mo Puang Isa. 58 Malemi mangngolo lako Gubernur Pilatus, mpeta'dai kumua anna diben to batang rabukku-Na Puang Isa. Napangparentanmi Gubernur Pilatus anna diben. 59 Natarimami Yusuf joo batang rabuk, nabalunni kaen lenan to ba'rukpa, 60 namane' mpatamai liang baru to nagaraga Yusuf jio buntu batu. Mangkai joo nalentenni to batu tonggo natungusanni joo liang, namane' male. 61 Ia to Maryam Magdalena, sola Maryam laenna, torro bang cumadokko ntuu jio sioloan ba'ba liang. 62 Masawanna tonna Allo Katorroanmo, malemi tuu lako kapala imang sola to-Farisi mangngolo lako Gubernur Pilatus, 63 nameta'da nakua, "Tabe' kita', kiingaranpa to kadan-Na joo tomangpalao sala tonna tuopa nakua, ianna allo mangpentallunnamo, la tuo pole', ade', jio mai kamatean. 64 Iamo joo mbai melo ke denni tau tasua njagai joo liang-Na ratu lako allo mangpentallun, danggi' naratu to anak gurun-Na mbokoi to batang rabukku-Na. Namale mpalao sala tobuda kumua, tuo pole'mi jio mai kamatean-Na. Na la'bi buda tau dipalao sala na ia tonna tuo unapa." 65 Nakuamo Pilatus lako, "Bawami tee mai surudadu, napemajagai tonganni to liang-Na." 66 Malemi nasolan joo surudadu, nasua ntungu'i meloi joo liang najagai tonganni.

Matius 28

1 Ia tonna mangkamo Allo Katorroan, tonna marimu-rimu unapa joo allo Aha', malemi Maryam Magdalena sola Maryam laen lako liang-Na Puang Isa. 2 Ta'pa nino tonggomi, nasaba' den mesa' malaeka'-Na Puang Allataala mellao jao mai suruga. Ratu llentennii joo batu petungu' liang, nacumadokko jao. 3 Ia to rupanna joo malaeka' gaja corrang susi palepa', na ia to bajunna gaja buccang. 4 Ia to surudadu ntuu jio mangjaga liang, silajatanni na mbe'beh anna sisongkan nasusi bangmira tomate dikita. 5 Nakuamo joo malaeka' ngkuanni tuu lako baine, "Danggi' mimalaja'! Kuissen kumua nnangah kamu' Puang Isa to mangka dipampang. 6 Te'damo Ia ntee! Tuo pole'mi Ia, susi to napau jolona. Male kamu' mai mikitai tee ngenan dinii mpanii. 7 Ia tee too, malemo kamu' madoi' mpauanni to anak gurun-Na kumua, 'Tuo pole'mi Ia jio mai kamatean, na ia tee too malemi njoloi kamu' re' tana Galilea, na jiopa la minii sikita.' Ingaranni tee apa mangka kupauan kamu'." 8 Ta'pa malemi tuu lako baine ssalai joo liang. Moi namalaja', apa gaja parannui male kinjara' la mpauanni anak gurun-Na Puang Isa joo apa mangka jaji. 9 Te'da nakalannai nata'pa ratu Puang Isa ssitammuanni nakuanni, "Salama' kamu'." Ia tuu lako baine mpendete'imi to Puang Isa, naraka'i to aje-Na nasompai. 10 Mangkadami Puang Isa nakuanni, "Danggi' mimalaja'! Malemo kamu' mpauanni to sile'to-Ku', anna male re' tana Galilea, na jiopa kunii sikita." 11 Ia tonna malemo tuu lako baine, male todami to ba'tu pira-pira surudadu pangjaga liang lako kota la mpaui lako kapala imang sininna to mangka jaji nakita. 12 Ia to kapala imang sola pekaamberan to-Yahudi mesa' kada, la mbenni buda doi' tuu lako pangjaga, 13 nakuanni, "La mikua lako tau kumua, 'Anak gurun-Na Ia ratu bongi mbokoi to batang rabukku-Na tongkikaleppengan.' 14 Na ia ke naissenni gubernur kumua ta'dei to batang rabukku-Na Puang Isa kami'mora ssedei, danggi' mimalaja' kumua la denni apa-apa lako kalemi." 15 Naalami tuu lako surudadu joo doi', napugaukki to dipasananni. Iamo joo nakaissenan unapa joo kareba jio to-Yahudi ratu lako too allo. 16 Malemi joo sangpulo mesa anak gurun-Na Puang Isa re' tana Galilea naendek de' buntu jio susi to mangka napauanni. 17 Nakitami to Puang Isa ntuu jio, nasuju' ssompai, apa den toopa to batapa lan penawanna. 18 Nakandoppi'mi to anak gurun-Na namangkada nakua, "Sininna kuasa la jao suruga, la lan lino, mangkamo diben lako Aku'. 19 Iamo joo malemo kamu' lako sininna bangsa lan lino, mipupenjajii taung-Ku'. Jio'i mpau sangan-Na Ambe', Anak na Roh Allataala. 20 Ajahhii anna pugaukki sininna to apa mangka kuparentan kamu'! Ingaranni kumua, la kusolan tarruh kamu' ratu lako tampakkana lino."

Markus 1

1 Iamo tee Kareba Kasalamatan mpamanassai to Puang Isa Almaseh, kumua Iamo Anak Allataala. Susimi tee to pamulanna. 2 Susi to nauki' Nabi Yesaya tonna anu' kumua, "Mangkadai Puang Allataala, 'Iamo tee pesuang-Ku', to kusua la njoloanko anna pemakassingngii to lalan la muola.' 3 Den tau metamba-tamba jio padang pallawangan nnajahhi tobuda kumua, 'Pasadianni lalan to Puang, ranteii to lalan la naola.' " 4 Jajimi susi to mangka nauki' Nabi Yesaya. Iamo joo nampangpekitan kalena Nabi Yahya jio tangnga padang pallawangan, mangjio'i napangpeissenanni to Kareba Kasalamatan. Namangngajahhi nakua, "La mengkatoba' kamu' jio mai dosami midijio', anna dampangan kamu' Puang Allataala." 5 Buda tau ratu jio mai tana Yudea na kota Yerusalem mpesa'dingngi pangngajahna Nabi Yahya. Na pada nnakui dosana, najio'i Nabi Yahya jiong Sa'dan Yordan. 6 Ia to bajunna Nabi Yahya bulu unta na saripinna balulang digaraga. Na ia to kandena batik sola canik pangngala. 7 Napangpeissenanmi tee kareba nakua, "Den tau la ratu ke mangkana', la'bi makuasa Ia na aku'. Moi la mbukai ulang sapatun-Na, te'da too kusipato'. 8 Ia tee aku' njio' kamu' wai, apa Ia to tau la ratu, la njio' kamu' Roh Allataala." 9 Ia joo wattu, ratumi Puang Isa jio mai kota Nazaret jio tana Galilea. Najio'i Nabi Yahya jiong Sa'dan Yordan. 10 Ia tonna endekmo de' randan sa'dan to Puang Isa, ta'pa nakitai to langi' titimbak, na Roh Allataala mellao jao mai susi jangan-jangan nta'paii. 11 Nadisa'ding to gamaran-Na Puang Allataala nakua, "Ikomo Anak-Ku' to kupakamoja', to mpamasannangna'." 12 Ia tonna mangkamo joo, ta'pa napatujumi Roh Allataala to Puang Isa namale de' tangnga padang pallawangan. 13 Na torro ntuu jio patang pulo bonginna, napengkulle-kullei Ballisi' ssedei mpugauk dosa. Den too olok-olok malaira nasolan jio, na malaeka' mbenni to naparalluin-Na. 14 Ia tonna ditarungkumo to Nabi Yahya, malemi Puang Isa re' tana Galilea, na jio nanii mpangpeissenanni to Kareba Kasalamatan jio mai Puang Allataala. 15 Nakua, "Cingga'tu'mora naratu Puang Allataala mangparenta susi Raja. Iamo joo mengkatoba' kamu' jio mai dosami, na la mikatappa'i to Kareba Kasalamatan." 16 Ia tonna lumingka-mingkamo Puang Isa jio randan Tasik Galilea, ngkitami Simon sola adinna to disanga Andreas mangjala jiong tasik, sanga iamo jamanna. 17 Nakuamo lako sola dua, "Male kamu' mai, nturu'na'! La kuben kamu' jaman nnajahhi tau ngkatappa'ina'." 18 Nata'pa mpatorro jalana sola dua, namale nturu'i. 19 Mpatarruhmi kalingkan-Na Puang Isa, anna ngkita omo dua to sile'to disanga Yakub na Yahya, anakkana Zebedeus, mpemeloi jala lan lopinna. 20 Ta'pa natambaimi sola dua. Nasalaimi to ambe'na sola to pangjamana lan lopi, namale nturu' Puang Isa. 21 Ratumi jaja kota Kapernaum to Puang Isa sola anak gurun-Na. Ia tonna Allo Katorroan pole' omo, mentamami bola passambajangan to Puang Isa, anna mangngajahhi. 22 Gaja jangngah to tossa'ding pangngajah-Na, nasaba' matongko ke mangngajahhii, te'da nasusi guru agama. 23 Ia joo wattu den mesa' tau natamai setang, mentama bola passambajangan anna metamba-tamba nakua, 24 "Oo, Puang Isa, to-Nazaret, la mupatumbamorakan? Raturokoka la ssabu'ikan? Kuissen kumua indaroko. Ikomo pesua mattantun-Na Puang Allataala!" 25 Nagarra'i Puang Isa joo setang nakua, "Kamma'ko, messunko lan mai tee tau!" 26 Ta'pa napambe'behhi setang joo tau, namane' messun lan mai ntuu joo tau metamba-tamba. 27 Jangngah ngasanmi to tobuda nasipangkada-kada nakua, "Takkajulu' to kadan-Na! Mesa' pangngajaran mane' den! Makuasa mparentai to setang messun, namessun tongan." 28 Namadoi' bang joo karebanna Puang Isa kaissenan lan tana Galilea. 29 Mangkai joo, messunmi Puang Isa lan mai joo bola passambajangan, anna male sola Yakub na Yahya tama bolana Simon na Andreas. 30 Ia joo wattu, ia to indo matuanna Simon makula' kale, anna mamma' bang. Ta'pa napauanmi tau to Puang Isa kumua masakii joo baine. 31 Malemi ssikitanni, nakaka'i to limanna, namane' mpami'cokki. Ta'demi to kula'na, namale mpasadianni kande to toratu. 32 Ia tonna kabuhmo allo, budami tau ratu mbawa tomasaki sola tonatamai setang lako Puang Isa, 33 nasirempun ngasan to tokota jio ntuu joo olo bola, 34 anna buda tau napamalagah to mangrupa-rupa sakinna. Nnula'i tooi buda setang. Te'da naeloranni to setang mangkada, nasaba' naissen setang kumua indara to Puang Isa. 35 Masawanna tonna marimu-rimu unapa, mi'cokmi to Puang Isa namessun lan mai joo bola nanii mangbongi. Malemi lako pallawangan namassambajang ntuu jio. 36 Apa ia to Simon sola solana male nnangahhi to Puang Isa. 37 Na ia tonna kitami, mangkadami nakua, "Oo Puang, nasiangah-angahhi bangmiki' tau." 38 Apa mebalii nakua, "La maleki' tatarruh lako kampong laen ntee mengguririkkita'. La mangngajahhi toopa' ntuu jio, nasaba' iamo kutungkanan kuratu inde'." 39 Iamo joo, namale Puang Isa mpasitarruh-tarruh kampong jio tana Galilea, namangngajahhi jio bola passambajangan, anna nnula'i buda setang. 40 Ratumi mesa' to tomasolak mengguntu' jio olo-Na Puang Isa, anna mengkamase-mase nakua, "Oo Puang, ia ke melohki', manassa kumua makuasaki' mpamalagahna'." 41 Massemi penawan-Na Puang Isa anna e'te' liman-Na nakaka'i nakua, "Melohna', malagahmoko!" 42 Ta'pa malagahmi joo tau. 43 Nasuai Puang Isa male, napangngingaranni nakua, 44 "Danggi' lalo ammucuritai moi lako mesa' tau, apa maleko lako imang jao kota Yerusalem, mupeta'dai napattantui kumua malagah tonganmoko. Mumane' mpugauk tooi to karoba kamalagaranmu situru' atoranna Nabi Musa, namenjaji butti lako buda tau." 45 Apa ia tee tau male bangmi nacurita to apa jaji lako kalena. Napusaba'i namembuni bangmira Puang Isa ke mentamai kota, natorro bangmo saleanan kota jio pallawangan. Apa moi nasusi joo, saratu-ratunna bang to tau jio mai buda kampong lako to nanii Puang Isa.

Markus 2

1 Den ba'tu pirang-pirang allo mangkanna joo, polemi Puang Isa lako kota Kapernaum. Kaissenanni kumua lanmi bola. 2 Budami tau ratu sirempun, nate'damo ngenan lo'bang lan bola. Moi jio pelalan ponno tau mpesa'dingngii, tonna mpangpeissenan Kareba Kasalamatan jio mai Puang Allataala. 3 Ia tonna mangngajahhimo Puang Isa denmi a'pa' tau ratu mbulle mesa' tokupi', la nabawa lako Puang Isa. 4 Apa liwa' budanna tau, nate'damo lalan naola tama bola mpendete'i to Puang Isa. Iamo joo nannola jio pelalan endek de' dea bola, natimbakkii to dea situjunna Puang Isa do', namane' rroroanni jao mai joo tokupi' jiong ampahna. 5 Ia tonna issenmi Puang Isa matumba kamatapparanna tuu lako tau, mangkadami lako joo tokupi', nakua, "Ee anak-Ku', didampanganmoko." 6 Denmi ba'tu pira-pira guru agama to nasolan cumadokko, pada mekutana lan penawanna nakua, 7 "Gaja barani ia tee tau mangkada susi joo. Ncapa' Ia Puang Allataala, sanga mpapada Ia Puang Allataala kalena. Te'da tau wa'ding ndampangan tomadosa, saliwanna Puang Allataala." 8 Ta'pa naissen Puang Isa to lan penawanna tuu lako guru agama. Iamo joo nakuanni, "Ciapari mimangpikkiri' susira tuu? 9 Umbonnara marawa, dikuaraka lako tee tokupi', 'Didampanganmoko', ba'tu dikuaraka, 'Ke'dehmoko, angka'i tuu ampahmu, mulumingka.' 10 Apa ia tee wattu la kupakitan kamu' kumua makuasana' Aku', Anak Mentolino, ndampangan tomadosa lan tee lino. Iamo joo kukua lako tee tokupi', 11 'Ke'dehmoko, angka'i tuu ampahmu, mupole!' " 12 Ta'pa ke'dehmi, naangka'i to ampahna, namessun, nakitai tobuda. Jangngah ngasanmi to tau ngkitai, anna mpakala'bih Puang Allataala nakua, "Te'da lalopa naden takitai to apa jaji susi tee." 13 Male pole' omi Puang Isa do' randan Tasik Galilea. Buda tau ratu lako kalena anna ajahhii. 14 Ia tonna polemo, ngkitami mesa' passassung disanga Lewi anakkana Alfeus cumadokko lan kantoro'na. Nakua Puang Isa lako, "Maleko mai, nturu'na', kupuanak guruko!" Ta'pa ke'dehmi anna male nturu'i. 15 Ia tonna kumandemo Puang Isa sola anak gurun-Na jio bolana Lewi, ratumi buda to passassung laen sola to tonasangamo tau togaja', nakumande sola. Nasaba' budami tuu lako tau to nturu'mo Puang Isa. 16 Den ba'tu pira-pira guru agama jio mai to-Farisi ngkita Puang Isa kumande sola passassung na tonasangamo tau togaja'. Iamo joo, anna kutanaii to anak gurun-Na Puang Isa nakua, "Ciapari nakumande ora gurummu sola passassung na totangnturu' atoran agama?" 17 Nasa'ding Puang Isa to pekutananna, napebalii nakua, "Ia to tomalagah te'da naparallu tomangjampi, apa to tomasakira mparallui tomangjampi. Te'da kuratu la ntulung to tossanga kalena tomelo, apa ratura' ntulung tomadosa, anna mengkatoba'." 18 Den pissen na ia to anak gurunna Nabi Yahya sola anak gurunna to-Farisi puasai. Denmi tau ratu lako Puang Isa mekutana nakua, "Ciapari na anak gurunna manda Nabi Yahya sola anak gurunna to-Farisi to puasa, na te'da ia to anak gurun-Ta'?" 19 Napebalii Puang Isa mpake pangpasusian nakua, "Ianna botting to tau, misangaraka kumua te'da nawa'ding kumande to toratu! Ianna solapa tobotting muane, tantu te'da napuasa! 20 Apa la den wattunna, naladiala jio mai tangnga-tangngana joo tobotting muane, iamo to Aku'. Ia joo wattu, mane'ri puasa to toratu, iamo tee anak gurung-Ku'." 21 Nakua pole' omo, "Te'da tau mpangtampiran pangcurikan baru lako baju maluse. Nasaba' la timporon joo pancurikan baru naca'ceanni joo baju maluse, nasaca'ce-ca'cena. 22 Susi toomi joo, te'da tau mpatama anggoro' baru tama pangpanian malusemo, to dikabua' jio mai balulang. Nasaba' ia namangkamburamo joo anggoro', tiba'tui joo pangpanian malusemo. Katampakanna, la sajang dua, joo anggoro' sola pangpanianna. Ia joo anggoro' baru, la dipatama todapi pangpanian baru!" 23 Den pissen tonna Allo Katorroan nannola jioi bara'bah gose' Puang Isa, na ngge'te gose' to anak gurun-Na. 24 Napasalai to-Farisi to Puang Isa nakuanni, "Kitari! Ciapari to anak gurun-Ta' nate'da naturu'i to atoran agamanta', anna pugaukki to dipemalian dipugauk ke Allo Katorroan?" 25 Mebalimi nakua, "Tantu mibacamo to apa napugauk Daud, tonna tangbarahmo sola surudadunna, sanga te'damo apa nakande. 26 Ia joo wattu, Abyatar menjaji Imang Lompo. Mentamami bola to dinii ssompa Puang Allataala, nakandei to roti dipangngolo lako Puang Allataala, naben tooi to surudadunna. Nasitonganna, ianna situru' atoran agamanta' imang manda ia to wa'ding ngkandei joo roti." 27 Mangkada omi nakua, "Ia to Allo Katorroan dipaden dikua napumeloi tau. Tangngiara tau dipaden, dikua napumeloi Allo Katorroan. 28 Puangnana' Allo Katorroan tee Aku', Anak Mentolino. Jaji makuasana' mpattantui apa to wa'ding dipugauk ke Allo Katorroan."

Markus 3

1 Male pole' omi Puang Isa tama bola passambajangan. Ntuu jio den mesa' tau to mate sangbali limanna. 2 Na den too tau laen jio to madoang bang nnangah kasalanna Puang Isa anna wa'ding mparapa'i. Jaji, napesa' tarruhhi kumua ba'tu la mpamalagahhi tau ke Allo Katorroanni. 3 Nakuamo Puang Isa lako joo tomate sangbali limanna nakua, "Maleko mai, mujenjen lan tangnga!" 4 Mekutanami lako joo tompesa'i nakua, "Ianna situru' atoran agama, apara to wa'ding tapugauk ke Allo Katorroan? Manggauk meloraka, ba'tu manggauk gaja'raka? Mpasalama'riki'ka padanta' rupa tau, ba'tu mbunoriki'ka padanta' rupa tau?" Apa pada kamma' bangngi. 5 Nakita mengguririkmi Puang Isa tuu lako tau na magalli, apa masse tooi penawan-Na, nasaba' totangmangpesa'ding ngasanni. Nakuanni joo tomate sangbali limanna, "E'te'i tuu limammu!" Nae'te'mi to limanna, namelo pole'mo. 6 Apa ia joo to-Farisi messunmi lan mai bola passambajangan, namale sipangkada-kada ba'tu pira-pira to tonturu' Raja Herodes la mbunoi to Puang Isa. 7 Malemi Puang Isa sola anak gurun-Na mpemboko'ii, namale lako Tasik Galilea. Apa liwa' buda to-Galilea undi nturu'i. Buda toda to ratu jao mai tana Yudea, 8 kota Yerusalem, tana Idumea, na kadellekanna Sa'dan Yordan na jio mai mengguririkkina kota Tirus na kota Sidon. Ratu ngasanni ssikitan Puang Isa, nasaba' nasa'dingmi to apa mangka napugauk. 9 Nasuami to anak gurun-Na mpasadianni lopi, nasaba' kabudanna tau, dikua danggi' nasisi'pinnii tobuda. 10 Gaja buda tau napamalagah Puang Isa. Iamo joo nasisi'pin-si'pinni bangmi to tomasaki mpendete'ii, la ngkaka'i. 11 Na ia tonna kitami tonatamai setang, ta'pa suju'mi jio olo-Na, nametamba nakua, "Kita'mo Anak Allataa." 12 Apa naanggai Puang Isa joo setang mpaui, kumua indara Ia. 13 Mangkai joo endekmi Puang Isa de' buntu, natambaii to tonaala penawan-Na. Ratu ngasanmi, 14 napileii sangpulo dua, nakua, "Kupileimo kamu', ammisolanna', na la kusua kamu' male mpangpeissenanni to Kareba Kasalamatan jio mai Puang Allataala, 15 na la diben kamu' kuasa la nnula'i setang." 16 Iamo tee sanganna joo sangpulo dua tau to napilei Puang Isa: Simon (to nasangai Petrus), 17 namane' dua anakkana Zebedeus, iamo to Yakub na Yahya (to nasangai Boanerges, battuananna 'anak galugu'), 18 Andreas, Filipus, Bartolomeus, Matius, Tomas, Yakub anakkana Alfeus, Tadeus, Simon to-Zelot (battuananna Simon tobarani), 19 na Yudas Iskariot to undinna mpangpejokkoan Puang Isa. 20 Mangkai joo, polemi Puang Isa tama bola. Anna buda omo tau ratu sirempun. Iamo joo na te'damo wattunna kumande Puang Isa sola anak gurun-Na. 21 Na ia tonna sa'dingmi rapunna Puang Isa to ianna joo, malemi la nnalai to Puang Isa, nasaba' nakua tuu lako tau, "Mamemi Ia". 22 Ia to guru agama to ratu jao mai kota Yerusalem mangkadami nakua, "Natamaimi Beelzebul, ba'tu puanggawana setang! Jaji kuasanna puanggawana setang napake nnula'i setang." 23 Natambaimi Puang Isa tee tobuda, nacuritanmi pangpasusian nakua, "Umbo nakua, la wa'dingraka to Ballisi' ba'tu puanggawana setang nnula'i padanna setang? 24 Ia ke denni mesa' kaparentan natitawa-tawa to taunna na te'da namesa' penawa, tantu te'da namasai nalanynya'. 25 Na ia to tosangbola, ke te'da namesa' penawa, tantu te'da namasai nasisarak-sarak. 26 Susi toomi to kaparentanna Ballisi' ba'tu puanggawana setang. Ia ke puanggawana setang nnewa setang laen, battuananna sirarii pada setang na te'da namesa' penawa, te'da namasai nalanynya' joo kaparentanna." 27 Mangkai joo, mangngajahhimi Puang Isa mpake pangpasusian nakua, "Te'da nakulle to taboko mentama bola, ke mawatangngi to ampu bola. La napumpungri jolo' to ampu bola, namane' nnalai ngasanni to ewananna. 28 La miingaran tee kadang-Ku' kumua, ia to tompugauk dosa ba'tu ncapa' Puang Allataala, wa'dingpa didampangan. 29 Apa ia to toncapa' Roh Allataala, te'da lalomo nawa'ding didampangan. Nasaba' ncapa' Roh Allataala, iamo dosa te'da cappa'na." 30 (Iamo napaui Puang Isa susi joo, nasaba' den tau mangkada kumua, natamaimi setang.) 31 Ia tonna mangkamo joo, ratumi indo-Na sola sile'to-Na Puang Isa. Jenjen bangngi jio salean, nasua tau male ntambai. 32 Ia joo wattu buda tau cumadokko ntalimbung Puang Isa. Mangkadami nakua, "Oo Puang, jioi salean to indo-Ta' sola sile'to-Ta' nnangahki'." 33 Mebalii Puang Isa nakua, "Indara to indo-Ku'? Indara to sile'to-Ku'?" 34 Nakitami to tau cumadokko ntalimbungngi anna mangkada nakua, "Iamo tee indo-Ku' sola sile'to-Ku'! 35 Inda-inda to tompugauk pakkaeloran-Na Puang Allataala, iamo sile'to-Ku' na indo-Ku'."

Markus 4

1 Mangngajahhi omi Puang Isa jio randan tasik. Gaja buda tau ntalimbungngi. Iamo joo naendek de' lopi cumadokko. Ia to tobuda jenjen bang jio randan tasik na mangngajahhi Puang Isa jao lopi jiong tasik. 2 Mangngajahhii mpake buda pangpasusian. Susi tee to napangpangngajaran: 3 "Pesa'dingngii tee! Den mesa' pangdusung male nnamboh banne. 4 Ia tonna ambohmi, den to ta'pah do' lalan, anna ratu to manuk-manuk ncappu'ii. 5 Den too to ta'pah do' batu-batu to te'da nabuda litakkana. Madoi' bang tuo joo banne, nasaba' ci'di'ra litakkana. 6 Apa ia tonna malussumo allo, nala'da'mi allo joo tananan mane' cumucuk. Ta'pa malajumi anna mate, nasaba' te'da namandalan to waka'na. 7 Den too to ta'pah lan tangnga duri. Saloboh-lobohnami joo duri, nasirimpihhii joo tananan, anna te'da namembua. 8 Apa den too to ta'pah do' litak malompo. Malompomi joo banne na maloboran, anna membua. Den to manglokkon pentallung pulo, den pennannan pulona, na den too to manglokkon pessaratuh." 9 Ia tonna mangkamo Puang Isa mangngajahhi, nakuamo, "Ingaranni to apa mangka misa'ding, sanga ketalinga kamu'!" 10 Ia tonna torro mesamo to Puang Isa, ratumi to tomenturu'mo lako kalena sola to sangpulo dua anak gurun-Na, nameta'da nakua, "Pauankan battuananna joo pangpasusian." 11 Nakuamo Puang Isa, "Dipaissennimo kamu' la nnissenni to apa tangnaissen tau, kumua la ratui Puang Allataala mangparenta susi Raja. Apa ia to tau laen diajahhi mpake pangpasusian, 12 dikua 'Moi da'tan bang mpemakitaii, apa te'da naissenni apa to jaji. Moi da'tan bang mpesa'dingngii, apa te'da napahangngi, nadanggi' namengkatoba' lako Puang Allataala, anna danggi' nadampanganni.' " 13 Nakuamo Puang Isa, "Ia ke te'da mipahangngi joo pangpasusian, umbo la mikua mpahangngi to pangpasusian laen? 14 Ia joo tonnamboh banne, iamo to tomale mpangpeissenan Kareba Kasalamatan jio mai Puang Allataala. 15 Ia to banne ta'pah do' lalan dipasangrapangngi to tossa'ding kadan-Na Puang Allataala. Mangka manda nasa'ding joo kada, nata'pa ratu to Ballisi' rrampai joo kada mangka nasa'ding. 16 Ia to banne ta'pah do' batu-batu dipasangrapangngi to tossa'ding kadan-Na Puang Allataala, anna masannang ntarimai. 17 Apa te'da natorro tongan lan penawanna na cingga'tu'ra natangnningaranmi. Ianna ratuimi kamasussan ba'tu dipakario-rioi, sanga ia joo kadan-Na Puang Allataala, ta'pa balik pole'mi. 18 Ia to banne ta'pah lan tangnga duri dipasangrapangngi to tossa'ding kadan-Na Puang Allataala, 19 apa mpuselang bangngi katuoanna. Madoang bangri la sugih na mangrupa-rupa kamadoangan laen to nni'pinnii joo kada lan penawanna, anna te'da namembua. 20 Na ia to banne ta'pah do' litak malompo dipasangrapangngi to tossa'ding kadan-Na Puang Allataala, namasannang ntarimai napugaukki, anna membua melo. Na den to manglokkon pentallung pulo, den pennannan pulona na den too to manglokkon pessaratuh." 21 Mangkada omi Puang Isa nakua, "Te'da tau mpadukku palita, nasamboii busu, ba'tu napajiongngi sulluk katindoan. Apa napajaori ngenan palita. 22 Te'da to membuninna tangladipangpekitan, na te'da to dibunianan tangladipangpeissenan undinna. 23 Iamo joo, ingaranni to apa mangka misa'ding, sanga ketalinga kamu'!" 24 Mangkada omi to Puang Isa nakua, "Ingaran meloi tee apa misa'ding! Ia to pesuka' misukatan tau, la napake too Puang Allataala ssuka' kamu', na la'bi budapa. 25 Nasaba' ia to tonnampuimo buda apa, la dirangngannipa la'bi buda. Apa ia to totangnnampui apa, ia to apa ci'di'mora naampui, la dialai pissen." 26 Mpatarruhmi kadan-Na Puang Isa nakua, "Ianna mangparentamo Puang Allataala susi Raja, wa'ding dipasangrapang mesa' tau nnamboh banne jio umanna. 27 Mamma'i ke bongi, mi'cikki ke allo. Ia joo banne saloboh-lobohna, namatonggo. Apa umbo nakua natuo, te'da naissenni. 28 Ia joo banne tuo namembua kalena. Mulanna dikita batangna, namane' bulinna, anna undinna bua malapuhna. 29 Na ianna maririmo to buanna, napepareimi, nasaba' wattunnami mepare." 30 Mekutanai Puang Isa nakua, "Ianna mangparentamo Puang Allataala susi Raja, apara to la dipasirapanganni? Pangpasusian apara to la dipamanassanni? 31 Ianna mangparentamo Puang Allataala susi Raja, la susii tee pangpasusian: Den sanglise' lise' sawi naala tau, natananni. Ia to lise' sawi iamo lise' biccukkuna lan lino. 32 Apa ianna tuomo, memmatonggomi na ia to tananan utan-utan laen. Ia to tangkena membalumbun, namesserang to manuk-manuk jio." 33 Susimi joo ke mangngajahhii to Puang Isa mpake mangrupa-rupa pangpasusian to napahang tobuda. 34 Te'da bang natangmpake pangpasusian, ke nnajahhii tobuda. Apa ianna anak gurun-Na manda nasolan, napamanassan ngasanni. 35 Ia tonna karuenmo, nakuanmi Puang Isa to anak gurun-Na nakua, "Melo ke talamban lian sambali'na tasik." 36 Endekmi de' lopi to Puang Isa. Meta'da dampangngi to anak gurun-Na namane' ssalaii joo tobuda jio randan tasik, namane' endek toda de' lopi to nanii Puang Isa. Ia tonna malemo manglopi lian, den todapa lopi laen undi nasolan. 37 Te'da namasai, ratumi to kalimpuru. Ia joo lopinna nasamboi bombang, na ci'di'mora naponno wai. 38 Ia to Puang Isa mamma' lo' pollo' lopi mangngallonan. Ia joo wattu, malemi to anak gurun-Na ntundanni nakua, "Oo, Guru, danggi' tamamma' bang! Te'daraka tapuinawai kumua la tallanmiki'!" 39 Mi'cokmi to Puang Isa, nagarra'i to kalimpuru, nakua lako tasik, "Radanko, rapa'ko!" Radanmi to kalimpuru narapa' to tasik. 40 Mangkadami lako anak gurun-Na nakua, "Ciapari mimalaja'? Te'daparaka mikatappa'ina'?" 41 Gaja laja'i sola ngasan, nasipangkada-kada nakua, "Indara ia sitonganna tee tau na moi angin sola tasik nturu' too parenta-Na!"

Markus 5

1 Ratumi Puang Isa sola anak gurun-Na lian sambali'na Tasik Galilea, jio tana Gerasa. 2 Mellaonna jao mai lopi, natammuimi mesa' muane, to messun lan mai lo'ko' tomate. Natamai setang joo tau, 3 natorro bang jio lo'ko'. Cau'mi to tau mpumpungngi, moi rante bassi dipake. 4 Pembudamo dirante bassi to ajena sola limanna, apa tuli naka'tu-ka'tui na ia to sangkala bassi jio ajena nale'to-le'to too, sanga gaja watangngi, na te'da tau ntaloi. 5 Torro tarruh bang jio lo'ko' nanii tomate na jao buntu anna metamba-tamba, nakojong-kojongngi batu to kalena. 6 Mambelapa to Puang Isa nakitami, ta'pa kinjara'mi lako, nasuju' jio olo-Na. 7 Nasuai Puang Isa joo setang, nakua, "Ee, setang, messunko lan mai tee tau!" Metambai joo setang nakua, "Oo, Puang Isa, Anak Allataala to kaminang makuasa! La tapatumbamora' tee? Nakitana' Puang Allataala, meta'dana' danggi' dikka' tacallana'!" 9 Nakutanaimi Puang Isa nakua, "Indara sangammu?" Mebalimi nakua, "Disangana' 'Legiun' nasaba' budakan sola!" 10 Nadadu'-dadu' mpeta'dai lako Puang Isa, nakua, "Danggi' taula'ikan jio mai ntee padang." 11 Ntuu jio den buda bai massumben jio sare buntu, agi-agi duang sa'bu budanna. Ia joo setang meta'da lako Puang Isa nakua, "Suamokan mentama ntuu lako bai." Natarimai Puang Isa joo peta'danna. Messunmi joo setang, namentama bai. Sikinjarasanmi tuu lako bai jao mai awa', nampentujoan kalena do' tasik, anna tallan ngasan. 14 Ia joo tomangrewa bai, sikinjarasanmi male tama kota na kampong mengguririkkina mpaui to apa jaji lako bai. Simessunanmi to tau ngkitai to apa mangka jaji. 15 Ia tonna ratumo lako to nanii Puang Isa, nakitami joo tobuda setang diula'i lan mai kalena cumadokko ntuu jio mangpakeanmo, na melomo pangtangngaranna. Malaja' ngasanmi tuu lako tau. 16 Ia joo tomangrewa, to ngkita kalenai to apa jaji lako joo tonatamai setang sola ia tuu lako bai, ncuritanni to apa mangka jaji. 17 Iamo joo, meta'dami to pangkampong lako Puang Isa, anna male ssalai joo tana Gerasa. 18 Ia tonna endekmo de' lopi to Puang Isa, meta'dami joo todiula'i to setang lan mai kalena la undi nturu' Puang Isa. 19 Apa te'da naeloranni Puang Isa, ke undii. Apa nakuanri, "Polemoko, mupangpeissenanni lako rapummu, to apa mangka napugauk Puang Allataala lako kalemu, maka matumba to kamamasean-Na." 20 Polemi joo tau, namale lako tana Sangpulo Kota, mpangpeissenanni to apa mangka napugauk Puang Isa lako kalena. Jangngah ngasan to tossa'dingngi. 21 Lamban pole' omi to Puang Isa lian sambali'na tasik. Buda tau sirempun jio randan tasik ntalimbungngi. 22 Ratumi Yairus mesa' kapala bola passambajangan jio ntuu joo kota. Ia tonna kitami to Puang Isa, suju'mi jio olo-Na, 23 namengkamalah-malah tongan lako nakua, "Oo Puang, ia to becce'ku' nnadangmi. Ia ke wa'dingngi, antamalepa ngkaka'i, namalagah, anna danggi' namate!" 24 Malemi Puang Isa sola Yairus. Buda tau male nasiturusan, nasisi'pin-si'pinni bangmi tau. 25 Denmi mesa' baine to sangpulo duamo taunna maparri' tongan nasa'ding, nasaba' macarepa tarruh bangngi. 26 Puramo to ewananna nabaluk napake male mangpejampi lako dottoro'. Apa te'da nakullei mpamalagahhi, sibalikanna satama-tamannari to sakinna. 27 Ia joo baine budamo nasa'ding to karebanna Puang Isa. Iamo namale nnellak tobuda, mpendete'i Puang Isa jio mai boko'-Na, nasaba' nakua lan penawanna kumua, "Moi kukaka' bangri to baju lando-Na, manassa la kupumalagah." Nakaka'mi to baju lando-Na, nata'pa te'damo rara messun, nasa'dingmo kumua malagahmi. 30 Ta'pa naissen Puang Isa kumua den kuasa messun lan mai kale-Na. Iamo joo namessaile lako tobuda, anna mekutana nakua, "Indara to ngkaka' baju lando-Ku'?" 31 Jangngahhi to anak gurun-Na anna kumua, "Oo Puang, tangtakitaraka to tau gaja buda ssisi'pin-si'pinniki'! Matumba oi antamekutanapa kumua, indara to ngkaka' baju lando-Ku'?" 32 Apa mengkita mengguririkki to Puang Isa, la ngkitai to tongkaka' baju-lando-Na. 33 Ia joo baine naissen to apa mangka jaji lako kalena, mbe'behmi na malaja', anna suju' jio olo-Na Puang Isa, napau ngasanni to apa mangka napugauk. 34 Nakuanni Puang Isa, "Ee anak-Ku', malagahmoko, nasaba' mukatappa'ina'. Paela'-ela' bangmoko lako lalan! Malagah tarruhmoko!" 35 Ia tonna mangkada unapa Puang Isa susi joo, ratumi to ba'tu pira-pira tau jio mai bolana Yairus, nakua lako Yairus, "Danggi' omo tasussai tuu Guru male lako bola. Matemi to becce'ta'." 36 Te'da napuinawai Puang Isa to apa napau joo tau, namangkada lako Yairus nakua, "Danggi' mumalaja', matappa'ko lako Aku'!" 37 Tarruhmi male, apa te'da naeloranni to tau laen undi, saliwanna Petrus, sola Yakub na Yahya to massile'to. 38 Ia tonna ratumo lako bolana Yairus, nakitami to tau sirongka bang kumarrak na mbating. 39 Mentamami bola, namekutana nakua, "Ciapari mimarongka gaja sikarrakan? Te'da ia namate, apa mamma'ri!" 40 Napetawa-tawaimi tau to Puang Isa. Nasua ngasanmi to tau messun lan mai bola, anna solanni to tomatuanna joo pea, sola to tallu anak gurun-Na, namentama to nanii joo pea. 41 Natoemi to limanna joo pea, anna pangkadai nakua, "Talita kum!", battuananna, "Ee becce', mi'cokko!" 42 Ta'pa mi'cikmi tee pea, namale lumingka. (Sangpulo duamo taunna umuru'na joo pea.) Jangngah tongan to tongkitai joo kajajian. 43 Apa naanggai Puang Isa kumua danggi' naden tau napauan. Namane' ssuai to tau anna benni kande joo pea.

Markus 6

1 Polemi Puang Isa lako kota Nazaret to dinii mpelobohhii. Nasolanni to anak gurun-Na. 2 Ia tonna Allo Katorroan mangngajahhimi lan bola passambajangan. Buda tau jio sijangngaran mpesa'dingngi pangngajah-Na. Sikutanami nakua, "Umbora Ia nanii llolonganni tuu lako? Kapaissenan matumbara ia joo naampui? Matumbai nawa'ding mpugauk tanda mejangngaran? 3 Tangpande bolaraka Ia, na anakkana Maryam? Na ia to sile'tona iamo to Yakub, Yoses, Yudas na Simon. Na torro lan too ntee kotata' to sile'to-Na baine." Iamo joo nacia' tuu lako tau ntarimai to Puang Isa. 4 Nakuanni Puang Isa, "Ia to nabi dikasiri' ia umbo-umbo nanii, apa jio kampongna iarika lan pangrapuanna ba'tu jio bolana te'da nadikasiri'." 5 Jangngahhi Puang Isa, nasaba' te'da nakatappa'ii tau. Iamo joo na te'da nampugauk tanda mejangngaran jio kampong-Na, saliwanna ba'tu pira-pira tomasaki nakaka' mandai namalagah. Mangkai joo, malemi Puang Isa lako ba'tu pira-pira kampong mangngajahhi. 7 Natambaimi to sangpulo dua anak gurun-Na sirempun, nabenni kuasa nnula'i setang, namane' ssuai male sidua-dua, 8 Napasanni kumua, "Ia ammimale, danggi' mibawa apa-apa, susinna kande, ba'tu sepu', ba'tu doi', ba'tu baju duang lambah, saliwanna tekken na sandala'." 10 Nakuapa, "Ia to bola dinii ntarima melo kamu', jiomo kamu' torro sanggenna male pole' kamu' mpatarruh kalingkanmi. 11 Apa ia ammiratu lako mesa' kampong, nate'da natarima kamu' tau jio, iarika tangnapesa'dingngi kamu', salaii joo kampong. Mipentambakanni to carepa jio ajemi la mpangngingaranni tuu lako tau to kasalanna!" 12 Mangkai joo, malemi to sangpulo dua anak gurun-Na, mpangpeissenanni kumua parallu to sininna tau mengkatoba' jio mai dosana. 13 Buda setang naula'i na buda too tomasaki naparussui minynyak namalagah. 14 Nasa'ding todamo Raja Herodes to karebanna Puang Isa, nasaba' kaissenanmo umbo-umbo nanii. Den tau mpaui kumua, "Nabi Yahya tee tuo pole'! Iamo joo namakuasa mpugauk tanda mejangngaran." 15 Den too tau kumua, "Nabi Elia Ia." Na ia to laenna nakua, "Nabi Ia susi to sala mesa'na to nabi tonna anu'." 16 Ia tonna sa'dingmi Raja Herodes to ianna joo nakuamo, "Tonganna Nabi Yahya Ia, to mangka kupangpele'toan ulunna na tuo pole'." 17 Iamo namangkada susi joo Raja Herodes, nasaba' ia to apa pura jaji tonna tee. Ia joo Raja Herodes sibalii Herodias bainena sile'tona to disanga Filipus. Apa napangngingaranni Nabi Yahya kumua, "Pemali ke sibaliki' Herodias to balinna sile'tota'." Iamo joo namagalli Herodias anna madoang la mpangpebunoanni, apa malaja'i sanga tangnapangben Raja Herodes. Dipangpejokkoan bangri to Nabi Yahya nadipumpung dipatama pangtarungkuan. Nasuai Raja Herodes to tau njagai meloi to Nabi Yahya lan pangtarungkuan, sanga nakalaja'i. Naissen kumua maruruh penawanna Nabi Yahya nturu' pakkaeloran-Na Puang Allataala. Na nakabudai mpesa'dingngii ke mangngajahhii, apa siputtak lan to penawanna ke nasa'ding omi to pangngajahna. 21 Ia tonna mpengngingaranni allo kajajianna Raja Herodes, ia toomo wattu melo lako Herodias nanii la mangpabalahhi. Ia joo Raja Herodes mparenta tana Galilea. Jaji ia joo allo dipaden to pangmaroasan, napangpetamban ngasanni tuu lako to tontoe kuasa, pangbarani, na sininna tomapangka' lan kaparentanna. 22 Ia joo wattu menari'mi to anakkana baine Herodias, na gaja napumasannang Raja Herodes sola toratunna. Nakuanmi Raja Herodes joo anakdara, "Ee, apara mukadoangngi, peta'dai angkubenko." 23 Massapahmi nakua, "Apa to mupe'tada, iami la kubenko, moi sangsesena kaparentanku'." 24 Malemi joo anakdara ngkutanai indona nakua, "Ee indo', apara la kupeta'da?" Napebalimi indona nakua, "Meta'dako ulunna Nabi Yahya." 25 Male pole' omi lako Raja Herodes nakua, "Ie' puang, meta'dana' kita', ulunna Nabi Yahya nadipajiong baki', kuta'pa diben silalona." 26 Masussa penawanna Raja Herodes tonna sa'dingngi to peta'danna joo anakdara, apa la napatumbapi namangkamo napassaparan, na jio olona toratunna. Te'da namadoang tangntarima peta'danna. 27 Ta'pa nasuami to pangbaraninna male lako pangtarungkuan lle'toi to ulunna Nabi Yahya. 28 Nabawami to ulunna Nabi Yahya jiong baki' nabenni joo anakdara. Naalami nabenni indona. 29 Ia tonna sa'dingmi anak gurunna Nabi Yahya, malemi nnalai to batang rabukkuna, anna patamai liang. 30 Ia tonna polemo joo rasulu', sirempunmi sola Puang Isa. Nacurita ngasanni to apa mangka napugauk sola to napangpangngajaran. 31 Susi bangmi lintik budanna to tau male lako male jio mai ssikitan Puang Isa, anna moi la kumande sola anak gurun-Na te'damo wattunna. Iamo joo nakuamo ngkuanni, "Tamale mesa lako padang pallawangan tapessau opa bo'jo'ta'." 32 Male mesami Puang Isa sola anak gurun-Na manglopi mangnguju lako padang pallawangan. 33 Apa ia tonna malemo manglopi buda tau ngkitai, naissen too to napangngujui. Simessunanmi lan mai kampongna, anna nnola gantanan njoloi to Puang Isa sola anak gurun-Na. 34 Ia tonna mellaomo Puang Isa jao mai lopi, nakitami joo tobuda, anna masse penawan-Na, sanga susi bangmira bembala' to te'damo tomangrewana. Napamulami Puang Isa nnajahhii mangrupa-rupa pangpangngajah. 35 Ia tonna la bongimo, malemi to anak gurun-Na ngkandoppi' Puang Isa nakuanni, "Oo Puang la bongimi na pallawangan tee tanii. 36 La'bi melo ke tasuami tee mai tau napada male nnalli kande ntuu lako tomangbara'bah iarika lako kampong mengguririkkita'." 37 Apa napebalii nakua, "Kamu' ia to la mpakandei." Nakuamo to anak gurun-Na, "Wah, la dua ratuhpi dinar diallian roti, namane' siagi tee tau pada budanna." 38 Nakutanaii Puang Isa to anak gurun-Na nakua, "Pirapara to roti mibawa? Male kamu' ngkitai." Ia tonna kitami nakua, "Limamora roti na duapa bale." 39 Nasuami joo tobuda cumadokko mangtorro-torroan jio reu malammak. 40 Ia tonna cumadokkomo, den ba'tu pirang-pirang torroan, den to sisaratuh na den too to silimang pulora tau lan sangtorroan. 41 Naalami Puang Isa joo lima roti na dua bale, anna mentingngara de' langi', mangkurru sumanga' lako Puang Allataala. Namane' nti'pek-ti'pekki joo roti, nabenni anak gurun-Na anna tawa-tawanni joo tobuda. Susi joo dua bale ditawan too tobuda. 42 Kumandemi sola ngasan sabarahna. 43 Ia tonna mangkamo kumande, napasirempunmi to torrona, ponnopa sangpulo dua baku'. 44 Agi-agi den limang sa'bu muane to kumande, ke ia manda to dibilang. 45 Mangkai joo, nasuami Puang Isa to anak gurun-Na endek de' lopi, najolo lian kota Betsaida, sambali'na tasik. Ia tonna polemo tuu lako tobuda, 46 malemi Puang Isa de' buntu massambajang. 47 Ia tonna la bongimo mambelami tama tangnga tasik to lopinna anak gurun-Na, na jao bang unapi gantanan to Puang Isa. 48 Nakita Puang Isa to anak gurun-Na tonna sigasa'mo mangbise, nasaba' ssussangngi angin bara'. Ia tonna dannarimo, ratumi lumingka jao wai, mpendete'i to anak gurun-Na, apa susi to kumua la liu lalan bangngi. 49 Ia tonna kitami anak gurun-Na to Puang Isa lumingka jao wai, nasangai kumua bombo. Sikarrakanmi malaja'. Apa ta'pa nakuanni Puang Isa, "Ee, rapa' kamu'! Danggi' mimalaja'! Aku' tee." 51 Endekmi de' lopi to Puang Isa, nata'pa radan to angin bara'. Liwa' jangngah to anak gurun-Na, 52 nasaba' te'dapa napahangngi to kuasan-Na Puang Isa mpugauk tanda mejangngaran tonna mpakande limang sa'bu tau na limara roti na dua bale. Disamboii pangngingaranna joo wattu. 53 Ratumi Puang Isa sola anak gurun-Na lian sambali'na tasik namellao jio tana Genesaret. 54 Ia tonna mellaomo jao mai lopi, ta'pa naissenmi tau to Puang Isa. 55 Pada simessunan to tau lan mai kampongna, naparri-parrii male mbulle tomasaki jiong ampah lako to nanii Puang Isa. 56 Umbo-umbo nanii ratu to Puang Isa, la lako kampong la lako kota, la male ia to tau mbawa tomasaki, napasirempunni jio pasa'. Anna meta'da lako Puang Isa kumua, ke wa'dingngi, nakaka' mandai to baju lando-Na, moi na tampakkana bangra. Padami tau ngkaka' baju landona pada toomi malagah.

Markus 7

1 Den ba'tu pira-pira to-Farisi sola guru agama jao mai kota Yerusalem ratu ssikitan Puang Isa. 2 Ia joo to-Farisi susi bang una padanna to-Yahudi nturu' tarruh ada' tojolona. Te'da nakumande, ke te'dapi namembase lima. Ia to apa dialli jio mai pasa', pemali dikande ke te'dapi nadibasei jolo'. Na budapa atoran laen to napengkullei tongan la mpugaukki. Susinna mbasei isotan, kandean na kurin. Na ia tee to-Farisi sola guru agama ngkitai to ba'tu pira-pira anak gurun-Na Puang Isa kumande nasangai carepa, nasaba' te'da nambasei limanna jolo'. 5 Iamo joo namekutana lako Puang Isa nakua, "Ciapari na te'da naturu'i anak gurun-Ta' to ada' tojolota'? Te'da nabasei limanna jolo', namane' kumande." 6 Mebalimi Puang Isa nakua, "Ee, tomajekkong kamu'! Nang tongan to napau Nabi Yesaya tonna anu' mpau kamu' kumua, 'Nakua Puang Allataala: Ia tee mai tau kadanna manda kumua napakala'bihna', apa sitonganna te'da nakasiri'na'. 7 Te'da bua'na ssompana', nasaba' ia to napangpangngajaran atoran tolino, butung to kumua mpangpangngajaran parenta-Ku'.' 8 Mipupangbarang bua' to parenta-Na Puang Allataala ammituru' tonganni to atoran tolino." 9 Nakuanpa Puang Isa, "Wah, liwa' macca kamu' tangnturu' parenta-Na Puang Allataala, na ia ora mituru' tongan to atoran migaraga kalena. 10 Nabenmo kamu' Nabi Musa tee parenta tonna anu', 'Kasiri'i to tomatuammu. Na ia to tongkada-kadai tomatuanna la dibuno.' 11 Apa sibalikanna to mipangpangngajaran lako tau kumua, te'da nasala ke den tau ngkuan tomatuanna, 'Ia to doi' la kuben kamu' la miputuo, iamo to mangka kuben Puang Allataala.' 12 Jaji mieloranmo to tau tanglantulung tomatuanna. 13 Ia ke susii joo te'damo mituru'i to parenta-Na Puang Allataala, napubua' ada' to mipumanah jio mai tojolomi. Budapa to susinna joo mipugauk." 14 Natambaimi Puang Isa tuu lako tobuda nakuanni, "Pesa'dingngi, ammipahangngi! 15 Tangngia to apa jio mai salean mentama tau ncarepaii, apa iara to messun jio timu mecarepan, anna mentangsipato'mo to tau ssompa Puang Allataala. 16 Jaji, mangpesa'ding kamu'." 17 Ia tonna pessalaimi Puang Isa joo tobuda, namentama bola, nakutanaimi anak gurun-Na, "Ee Puang, apara battuananna joo kadan-Ta' kumua, 'Ia to messun lan mai tau ncarepaii'?" 18 Napebalimi nakua, "Oo, te'da todaraka pale' mipahangngi? Parallu mipahang kumua ia to apa salean namentama kale, te'da na ia ncarepai tau, 19 nasaba' te'da namentama penawa, apa mentamari ba'tang namessun, ke malei mangcarepa to tau." Ia joo kadan-Na mpamanassai kumua sininna kande wa'ding ngasan dikande. 20 Nadadu'pa kumua, "Apa to messun jio timu, iamo joo to ncarepai tau. 21 Nasaba' pole lan mai penawa to nanii pangtangngaran gaja' na mpalao sala tau, susinna: manggauk sala, boko, mangbuno, 22 ncarepai tananan dapohna tau, madoang nnassang sininna apa, menjaji sala sipa', mangnguraga, tangmessipa', masere ati, mpau gaja' tau, matampo na manggauk susi totangmalilingan. 23 Ia tuu lako panggaukan gaja' messun lan ngasan mai penawa. Ia ngasanmo joo to ncarepai tau." 24 Ke'dehmi Puang Isa jio mai ntuu joo, namale re' tana menggurikkina kota Tirus. Mentamami mesa' bola la mpembunianan kalena, sanga cia'i ke naissenni tau. Apa kaissenan bang unai. 25 Denmi mesa' baine ta'pa nnissenni. Ia joo baine tangngia to-Yahudi apa to-Fenisia Siria ia. Malei ssikitan Puang Isa, nasuju'i, sanga natamai setang to anakkana baine, anna peta'dai ke wa'dingngi naula'ii joo setang lan mai anakkana. 27 Napebalimi Puang Isa nakua, "Pea ia to la dipebarahhi jolo'. Te'da namelo ke dialai to kandena nadiben asu." 28 Mebalimi nakua, "Oo Puang, tongan tuu, apa ia to asu ngkande bota to napolloran pea do' sulluk meja." 29 Nakuamo Puang Isa, "Paela'mi mupole, sanga makassing to pebalimmu. Messunmi joo setang lan mai anakkamu." 30 Polemi lako bolana nakitai to anakkana mamma'mi jao katindoan, sanga malagahmi. 31 Ke'dehmi Puang Isa jio mai lili'na kota Tirus, na mpatarruh kalingkan-Na re' Sidon, namane' pole boko' mangnguju sau' Tasik Galilea nnola jio tana Sangpulo Kota. 32 Den tomamang na mataru too, nasolan tau lako Puang Isa napeta'danni, ke wa'dingngi nakaka'i. 33 Ia tonna messarakmo Puang Isa jio mai tobuda, napatamai patomalimi jarin-Na to talinganna jolo', namane' ncikkudui jarin-Na, nakaka'i to lilana. 34 Mangkai joo mentingngarami de' langi' anna menawa bussan, nakua, "Efata", battuananna "Tibukako!" 35 Ta'pa pasa'dingmi, natiku'bi' toomi timunna namangkada. 36 Te'da naeloranni Puang Isa tuu lako tau ncuritai lako tolaen to apa mangka jaji. Apa moi natangnneloranni samale-malena ncuritai. 37 Jangngah ngasan to tossa'dingngi joo apa mangka jaji. Nakua, "Makassing ngasan ia to napugauk, tomataru napupasa'ding, na tomamang napupangkada."

Markus 8

1 Te'dapa namasai mangkanna joo, buda pole' omi tau ratu lako Puang Isa. Ia tonna cappu'mo to kinallona, natambaimi Puang Isa to anak gurun-Na, nakuanni, 2 "Masse penawang-Ku' ngkitai tee mai tobuda, sanga tallung allomiki' sola na cappu'mi to kinallona. 3 Te'da kueloranni pole, ke tangbarahhi, iamo ke limpui lako lalan, nasaba' denni to mambela nanii ratu." 4 Mebalimi to anak gurun-Na nakua, "Umbo dinii nnala kande la dipakandeanni, na padang pallawangan tee tanii?" 5 Mekutanami Puang Isa nakua, "Pirapara roti miampui?" Mebalimi nakua, "Pitumora." 6 Nasuami Puang Isa cumadokko tuu lako tobuda jiong padang. Naalami joo pitu roti, namangkurru sumanga' lako Puang Allataala. Mangkai joo, nati'pek-ti'pekmi joo roti, nabenni anak gurun-Na, anna tawa-tawanni joo tobuda. Napugaukmi anak gurun-Na susi to disuanni. 7 Den toopa ci'di' bale'-bale'na. Nakurru sumanga'i Puang Isa joo bale lako Puang Allataala, namane' ssuai to anak gurun-Na ntawa-tawanni tobuda. 8 Kumande ngasanmi tuu lako tau sabarahna. Agi-agi den patang sa'bu tau budanna. Ia tonna mangkamo kumande, napasirempunmi anak gurun-Na Puang Isa to torrona, ponnopa pitu baku'. Ia tonna polemo tuu lako to buda, 10 ta'pa endekmi Puang Isa de' lopi sola anak gurun-Na, namale lako tana Dalmanuta. 11 Den ba'tu pira-pira to-Farisi ratu lako Puang Isa ssite'geranni sanga madoangngi la ssedei. Meta'dai anna mpugauk tanda mejangngaran, to la mpamanassai kumua ia to kuasan-Na pole jio tongan mai Puang Allataala. 12 Nna'danmi Puang Isa namebali nakua, "Ah, ciapari tee tau too allo napeta'dai kumua la kupakitanpi tanda mejangngaran, namane' la ngkatappa'ina'? Te'da! Te'da lalo kulampakitanni." 13 Nasalaimi, namale manglopi lian sambali'na tasik. 14 Mesa'ra roti nabawa anak gurun-Na Puang Isa napukinallo tonna male manglopi. 15 Napupangngingaranmi Puang Isa nakua, "Majaga kamu' lako raginna to-Farisi sola Raja Herodes." 16 Apa te'da naissenni anak gurun-Na joo pangpasusian anna sipangkada-kada nakua, "Iamo namangkada susi joo, nasaba' te'da tabawa roti." 17 Naissen Puang Isa to apa nasipangkadai. Iamo joo nakuanni, "Ee, kamu' totangmatappa'! Anna ia ora misipangkadai kumua te'da mibawa roti? Te'da bangra kamu'ka mangtangngah? Te'daparaka mipahangngi to kuasang-Ku'? 18 Kemata kamu', apa te'da mimengkita melo. Ketalinga kamu' apa te'da mimangpesa'ding. Te'damoraka miingaranni 19 tongkuti'pek-ti'pek lima roti na mitawa-tawanni limang sa'bu tau? Pirapara baku' torrona to mipasirempun?" Nakua, "Sangpulo duapa baku'." 20 "Na ia tonna pitu roti ditawan tau patang sa'bu, pirapara baku' torrona to mipasirempun?" Nakua to anak gurun-Na, "Pitupa." 21 Nakuanmi Puang Isa, "Te'da unaparaka mipahangngi to kusanga?" 22 Ratumi Puang Isa sola anak gurun-Na jio Betsaida. Den tau ssolan tobuta lako, napeta'danni ke wa'dingngi nasapui to matanna napakita. 23 Natoemi Puang Isa to limanna, nasolanni messun lan mai kota. Nacikkuduimi to matanna, namane' ssapui. Nakutanaii nakua, "Den unamoraka apa mukita?" 24 Nabijaranmi to matanna nakua, "Ie', denmo tau kupewajang lumingka, apa susi bangri to batang kaju." 25 Nasapu pole' omi to matanna, na la'bi manyarrahmo to pengkitanna, sanga malagahmi. 26 Naeloranmi Puang Isa pole nakuanni, "Danggi' mumale tama ntuu joo kota ncuritai, apa pole lakomoko bolamu." 27 Malemi Puang Isa sola anak gurun-Na lako kampong mengguririkkina kota Kaisarea Filipi. Nakutanaimi to anak gurun-Na jio tangnga lalan nakua, "Ia ke pahangna tau, indara nasanganna'?" 28 Mebalimi nakua, "Den tau kumua Nabi Yahya, den toda tau kumua Nabi Elia, na ia to laenna kumua sala mesa'na nabi tonna anu'." 29 Mekutana pole' omi nakua, "Apa ia ke pahangmi, indara' tee?" Mebalimi Petrus nakua, "Kita'mo Raja Mangpasalama'!" 30 Napakainga'mi Puang Isa to anak gurun-Na kumua danggi' naden tau napauan kumua Iamo Raja Mangpasalama'. 31 Ia tonna mangkamo joo, napamulami Puang Isa nnajahhi anak gurun-Na nakua, "Ia tee Aku' Anak Mentolino, la gaja parri'na'. La naewana' pekaamberan to-Yahudi, kapala imang sola guru agama. La dibunona', apa ia ke allo mangpentallun, la dipatuo pole'na' jio mai kamatean." 32 Ia joo kadan-Na napau maruruh bang mpemanassai to apa la jaji. Iamo joo napupessarak mesai Petrus to Puang Isa anna ta'tanni. 33 Apa messailei nakita ngasanni to anak gurun-Na, nagarra'i to Petrus nakua, "Ee, Ballisi', palai laloko ntee! Ia to pikkirisanmu, pikkirisan tolino ia, tangngia pikkirisan jio mai Puang Allataala." 34 Mangkai joo, natambaimi Puang Isa to tobuda nasirempun sola to anak gurun-Na, nakuanni, "Ia to tolanturu'na', te'da nalanturu'i bang pakkaeloran penawanna, apa la mpassan kaju sitambenna, naturu' tarruhna'. 35 Nasaba' ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' sola nturu' kadan-Na Puang Allataala moi la dibuno, iamo la nnampa' katuoan melo te'da cappa'na. 36 Apara bua'na lako tau ke naassang ngasanni tee lino, apa te'da naampa' katuoan melo te'da cappa'na? 37 Wa'dingraka joo katuoan dipasiangga' waramparan? 38 Ia to tongkasirisanna' na te'da naakui to pangngajaran-Ku' lan tee wattu to nanii gaja' sipa'na natangmatappa' ngasanmo to tau, la kukasirisan todai tee Aku', Anak Mentolino, ke ratuna' sola malaeka'-Ku', mpupangngarrang kamala'biran-Na Ambe'-Ku'.

Markus 9

1 La miingaran tee kadang-Ku' kumua, sitonganna den kamu' to ntee, te'dapa namate ke te'dapi nakitai to Puang Allataala mangparenta susi Raja mpake kuasan-Na!" 2 Annan allona mangkanna joo, nasolanmi Puang Isa to Petrus, Yakub na Yahya, namale messarak de' buntu majao. Ia tonna ratumo de', nakitami to Puang Isa balik rupan-Na. 3 Ia to pakean-Na memmabuccang cumbia'-bia'. Moi mesa' tomassassa' lan tee lino te'da nakullei mpemabusai passassa'na susi joo. 4 Nakita toomi to Nabi Musa sola Nabi Elia sipangkada-kada sola Puang Isa. 5 Nakuamo Petrus, "Oo Guru, masannangki' ntee. Melo ke ngkabua'kan tallu bola-bola, mesa' tanii, mesa' nanii Nabi Musa na mesa' nanii Nabi Elia." 6 Iamo namangkada susi joo to Petrus, nasaba' malaja'i sola tallu na te'damo naissen to apa la napau. 7 Ia joo wattu ratumi to saleu' mbombonnii sola ngasan, na den gamara nasa'ding lan mai saleu' nakua, "Iamo tee to Anak kupakamoja'. Pesa'dingngii." 8 Ia tonna messaile mengguririkmo sola tallu, te'da bangmo tau laen nakita saliwanna Puang Isa mandamo. 9 Ia tonna solohmo jao mai buntu napakainga'mi Puang Isa nakua, "Ia ke dipatuo pole'mo' jio mai kamatean, tee Aku', Anak Mentolino, mane'ri wa'ding mipauan tau apa to mangka mikita." 10 Te'da tongan namale ncuritai, apa madoang nnissenni to battuananna joo kadan-Na. Iamo joo nasipangkadai kumua, "Apara battuananna joo nasanga, 'Tuo pole' jio mai kamatean?' " 11 Mekutanami to anak gurun-Na lako Puang Isa nakua, "Matumbai pale' nakua to guru agama, kumua la ratui jolo to Nabi Elia?" 12 Mebalimi Puang Isa nakua, "Tongan, la ratui la mpasadia ngasanni. Apa sitonganna kukuan kamu': ratumi ia to Nabi Elia, apa nasakka' gaukki bangngi tau susi to diuki' jolomo lan Sura' Allataala. Apa matumbai tee Aku', Anak Mentolino? Ciapari nadiuki' lan Sura' Allataala kumua ia to Anak Mentolino la gaja parri' na nacapa'-capa' tau?" 14 Ia tonna ratumo Puang Isa sola to tallu anak gurun-Na, nakitami to tau gaja buda ntalimbungngi to solana. Ia joo anak gurun-Na site'gehhi ba'tu pira-pira guru agama. 15 Sijangngaranmi tuu lako tobuda tonna kitai to Puang Isa, naparri-parrii male ntammuii. 16 Mekutanami Puang Isa lako anak gurun-Na nakua, "Apara misite'gehhi sola guru agama?" 17 Mebalimi mesa' joo tobuda nakua, "Oo Guru, ratuna' ssolan anakkaku' ssikitanki', sanga natamaii setang namemmamang. 18 Ia ke natamai omi joo setang, mpessambakan omi kalena do' litak, sanggenna mangkambura-bura to kasolena, sunggarigi', namatoro to kalena. Kupeta'damo lako anak gurun-Ta', kumua naula'ii joo setang, apa te'da nakullei." 19 Mebalimi Puang Isa nakua, "Takkaliwa' ngasan kamu' tee! Tangmatappa' to tau too allo! Piranpara masainna la kunii torro, to la minii mpa'dikki penawang-Ku'. Bawai mai tuu pea." 20 Nasolanni lako. Mane' ngkitai Puang Isa joo setang, nata'pa tisintak-sintak kalena joo pea, nasongka mengkaro-karo, namangkambura-bura to kasolena. 21 Nakutanaimi Puang Isa to ambe'na nakua, "Piramira masainna susi tuu?" Mebalimi nakua, "Masaimo, mellao jiopa mai biccu'na. 22 Pembudamo joo setang la mbunoi, nasongkanni tama api, nalontinan do' wai. Apa ia ke takullei, kamaseikan dikka' tatulungkan!" 23 Mebalimi Puang Isa nakua, "Ah, apa mukua? Ia ke kukullei? Moi apa nang la jaji, ke nakatappa'i tonganna' tau." 24 Ta'pa mebalimi joo ambe'na nakua, "Oo Puang, matappa'na'. Tatulungna' dikka', nasaba' malammai to kamatapparanku'." 25 Ia joo wattu nakitami Puang Isa kumua sabuda-budannami tau sirempun, nagarra'i Puang Isa joo setang nakua, "Ee setang mamang sola mataru, messunko lan mai tee pea, danggi'mo mutamai pole'i." 26 Melallakmi joo setang, namane' mpandasai joo pea namangkaluttete'. Mangkai joo, messunmi lan mai joo pea. Ia joo pea susi bangmo tomate. Buda tau ssangai kumua matemi. 27 Apa natoei Puang Isa to limanna, napami'cikki, nata'pa ke'deh joo pea. 28 Ia tonna polemo Puang Isa tama bola, na ia mandamo sola anak gurun-Na, mane'ri mekutana to anak gurun-Na nakua, "Oo Puang, ciapari na te'da kikullei nnula'ii joo setang?" 29 Mebalimi Puang Isa nakua, "Te'da laenna to wa'ding nnula'i setang susi joo, passambajangan manda ia." 30 Ke'dehmi Puang Isa sola anak gurun-Na jio mai ntuu joo, mpatarruh kalingkanna nnola tana Galilea. Cia'i ke kaissenanni to nanii torro, 31 nasaba' anak gurun-Na manda la naajahhi. Nakua Puang Isa lako, "Ia tee Aku' Anak Mentolino, la dipangbenna' lako kuasanna tolino, la dibunona', apa allo mangpentallun la dipatuo pole'na' jio mai kamatean." 32 Te'da napahangngi anak gurun-Na joo kadan-Na, apa malaja'i ngkutanaii. 33 Ratumi Puang Isa sola anak gurun-Na tama kota Kapernaum. Ia tonna lanmo bola, nakutanaimi to anak gurun-Na nakua, "Apara to misite'gehhi jio tangnga lalan nena'?" 34 Te'da bangngi mebali, nasaba' ssite'gehhii to kumua indannari to kaminang mala'bih. 35 Cumadokkomi Puang Isa natambai ngasanni to sangpulo dua anak gurun-Na nakuanni, "Ia to madoang la mpajaonan kalena, la mengkajiongan, anna njaranai padanna rupa tau." 36 Mangkai joo, naalami to pea biccuk napajenjenni lan tangnga. Naraka'i, nakuanni to anak gurun-Na, 37 "Ia to tontarima pea to susi tee, sanga kamatapparanna lako Aku', pada bang unamo to Aku' natarima. Na ia to tontarimana', tangngia Aku' manda natarima, apa natarima toomo to Puang Allataala to ssuana'." 38 Nakua Yahya lako Puang Isa, "Oo Guru, den tau kikita nnula'i setang mpau sangan-Ta', angkianggaii, nasaba' tangngia solata'." 39 Apa nakua Puang Isa, "Danggi' mianggaii, nasaba' te'da tau mpugauk tanda mejangngaran mpau sangang-Ku', nata'pa mpau gaja'na'. 40 Nasaba' ia to tote'da naewaliki', battuananna iamo solata'. 41 Ingaranni tee kadang-Ku' kumua, ia to tompaiso' kamu', nasaba' mituru'na' Aku', Almaseh, la llolonganni barakka'." 42 Nakua Puang Isa, "Ia to tontumangngi sala mesa'na tee mai pea biccuk, nate'damo namatappa' lako Aku', la'bi melo ia, ke ditoke'ii batu pelullu' gose' to kollongna, naditallanan do' tasik. 43 Ia ke limammu ntumangko mumadosa, ta'takkii, sanga la'biran ke menjaji tangsukku'ko, apa tuoko sola Puang Allataala, na ia ke sukku'i to kalemu, apa dipatamako naraka, to nanii api dukku tarruh. 44 Lan ntuu joo manglaka-laka tarruh to api namangkande tarruh too to ulli'. 45 Na ia ke ajemu ntumangko mumadosa, le'toii! La'biran ke menjaji tangsukku'ko, apa tuoko sola Puang Allataala, na ia ke sukku'i to kalemu, apa dipatamako naraka. 46 Lan ntuu joo manglaka-laka tarruh to api namangkande tarruh too to ulli'. 47 Ia ke matammu ntumangko mumadosa, cukke'ii! La'biran ke menjaji tangsukku'ko, apa menjajiko umma'-Na Puang Allataala, na ia ke sukku'i to kalemu apa dipatamako naraka. 48 Lan ntuu joo manglaka-laka tarruh to api namangkande tarruh too to ulli'. 49 Simesa'-mesa' tau pada la dipakario-rio, dikua anna menjaji matona' lan kamatapparanna. 50 Jaji parallu kamu' sipemeloan penawa sola ngasan. Ianna te'da misusi joo, susi bang kamu' ce'la tangbuaci' to te'damo nadikulle mpebuaci'i pole'i."

Markus 10

1 Mangkai joo, malemi Puang Isa jio mai ntuu joo, namale lako tana Yudea na lamban lianna Sa'dan Yordan. Ratu omi to tau gaja buda sirempun sola Puang Isa. Susi kabiasan-Na, mangngajahhi omi Puang Isa lako tobuda. 2 Ratumi to ba'tu pira-pira to-Farisi madoang la ssede Puang Isa, namekutana nakua, "Situru' atoran agamanta', wa'dingraka to tau ssarak bainena?" 3 Mekutanami Puang Isa nakua, "Apara naparentan kamu' Nabi Musa tonna anu'?" 4 Mebalimi joo to-Farisi nakua, "Naeloran Nabi Musa to tau ssarak bainena, assalan nnuki'i sura' talla' jolo'" 5 Nakuamo Puang Isa, "Naukiran kamu' Nabi Musa joo parenta, nasaba' gaja battuk kamu' cia' diajahhi. 6 Apa sipamulanna lino napaden Puang Allataala to muane sola baine. 7 Iamo joo, na ia to muane la messarak jio mai tomatuanna, namale memmesa' sola bainena, 8 nasangkale sola dua. Jaji, te'damo nadireken dua tau, apa mesa'mira. 9 Iamo joo ia to mangkamo napamesa' Puang Allataala, danggi' napasisarakki tolino." 10 Ia tonna mentamamo bola Puang Isa sola anak gurun-Na, napekutananmi anak gurun-Na to ianna tee. 11 Nakua Puang Isa, "Inda-inda to ssarak bainena, nakebaine pole' baine laen, direken manggauk salai. 12 Susi toomi to baine ke ssarakki muanena, nakemuane pole' muane laen, direken manggauk sala tooi." 13 Den tau ratu ssolan pea sibiccuk lako Puang Isa anna kaka'i nabarakka'ii. Apa nakagallii anak gurun-Na tuu lako tau. 14 Ia tonna kitai Puang Isa to ianna joo, magallimi anna kuanni to anak gurun-Na, "Eloranni tuu mati' pea ratu lako Aku'. Danggi' mianggaii, nasaba' tosusimora tuu mati' to la menjaji umma'-Na Puang Allataala. 15 La miingaran tee kada kupauan kamu' kumua, ia to tote'da nasusi pea biccu' ntarimai to kaparenta-Na Puang Allataala, te'da nalamenjaji umma'-Na Puang Allataala." 16 Ia tonna mangkamo Puang Isa mangkada susi joo, naraka' simesa'-mesa'mi joo pea, nakaka'i to ulunna anna barakka'ii. 17 Ia tonna patarruhmo kalingkan-Na Puang Isa, den mesa' tau ratu kinjara' mpendete'i, anna mengguntu' jio olo-Na, namekutana nakua, "Oo Guru, tomelo penawan-Ta'. Pauanna' apara to sipato' la kupugauk, angkuampa'i to katuoan melo te'da cappa'na?" 18 Mekutanami Puang Isa nakua, "Ciapari musangara' tomelo? Moi mesa' te'da ia tomelo, saliwanna Puang Allataala manda Ia, 19 Tantu muissen ngasanmo to parenta-Na Puang Allataala kumua, 'Danggi' pabuno, danggi' manggauk sala, danggi' boko, danggi' sa'bi tangtongan, danggi' mangnguraga, kasiri'i to tomatuammu!' " 20 Mebalimi joo tau nakua, "Oo Puang, kuturu' ngasanmo kita' joo parenta, tempon jio mai biccu'ku'." 21 Massemi penawan-Na Puang Isa ngkitai joo tau anna mangkada nakua, "Mesa'pa to parallu la mupugauk. Malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'." 22 Ia tonna sa'dingngmi joo kada, biccuk penawai, namasussa joo tau, namale memboko', nasaba' gaja sugihhi. 23 Nakita silelemi Puang Isa to tobuda, namane' ngkuan anak gurun-Na, "Gaja sussa ia to tosugih la menjaji umma'-Na Puang Allataala." 24 Sijangngaranni to anak gurun-Na ssa'dingngi joo kadan-Na. Apa napatarruhpa Puang Isa nakua, "Ee anak-Ku', gaja sussa ia to la menjaji umma'-Na Puang Allataala. 25 La'bi marawa ia to unta mentama to'tok jarun, na ia to tosugih mentama Lino Barun-Na Puang Allataala." 26 Liwa' jangngah to anak gurun-Na ssa'dingngi joo kadan-Na, anna sikutana-tana nakua, "Ia ke susii joo, indamo ia to wa'ding la salama'?" 27 Nakitami Puang Isa to anak gurun-Na nakuanni, "Ia ke tolino te'da nakullei la jaji, apa ia ke Puang Allataala te'da ia nasusi joo. Nasaba' ianna Puang Allataala te'da ia apa tanglajaji." 28 Mangkadami Petrus nakua, "Takitai Puang, kisalai ngasanmo to apangki', angkiundi nturu'ki'." 29 Mebalimi Puang Isa nakua, "La miingaran tee kadang-Ku' kumua, ia to tossalaimo bolana, ba'tu sile'tona, tomatuanna, anakkana, ba'tu bara'bahna, nasaba' matappa'i lako Aku' sola ngkatappa'i Kareba Kasalamatan, 30 la ntarima pahalana manglokkon pessaratuh ia bang unamo tee wattu: bola, sile'to, tomatuanna, anak, bara'bah, moi nadenpa kadipakario-rioan. Na jio ahera', la nnampa' toopa katuoan melo te'da cappa'na. 31 Apa buda tau tee too todikasiri' la menjaji totangdikasiri', na buda too tau tee too totangdikasiri' la menjaji todikasiri'." 32 Mpatarruhmi kalingkanna Puang Isa sola anak gurun-Na de' kota Yerusalem. Jolomi to Puang Isa na undi to anak gurun-Na sijangngaran na sumandeang-deang penawanna, na ia to tobuda silajatan too. Iamo joo natambai mesa omi to sangpulo dua anak gurun-Na napauanni apa to la jaji lako kale-Na. 33 Nakuanni, "Pesa'dingngii! Mangngujumiki' de' kota Yerusalem tee too. Na ia tee Aku' Anak Mentolino, la dipangngolona' lako kapala imang sola lako guru agama, nara'tahhi la mbunona', namane' mpangbenna' lako bangsa tangngia to-Yahudi. 34 La nacapa'-capa'na', nacikkuduina', narambina', namane' mbunona'. Apa ia ke allo mangpentallun, la dipatuo pole'na'." 35 Mangkai joo, malemi anakkana Zebedeus disanga Yakub sola Yahya ssikitan Puang Isa nakua, "Oo Guru, den peta'danki' sola dua ke wa'dingngi tatulungkan." 36 Mebalimi nakua, "Apara la mipeta'da sola dua?" 37 Nakuamo, "Ie', ia ke mangparentamiki' susi Raja mala'bih keanu', ke wa'dingngi tamangparenta sola, mesa'kan jio sa'de kanan-Ta' na mesa' jio sa'de kairin-Ta'." 38 Nakuamo Puang Isa, "Te'da miissenni to apa mipeta'da. La misararaka mpuparri'i to kamaparrisan-Ku' sola kamatean-Ku'?" 39 Mebalimi nakua, "Ie', kisara Puang." Nakuanmi Puang Isa, "Nang la mipumaparri' ia to kamaparrisan-Ku' sola kamatean-Ku'. 40 Apa ia to la cumadokko jio kairi kanan-Ku', tangngia issen-Ku'. Ia joo pura napattantumo ia Puang Allataala, inda to la napajio." 41 Ia tonna issenmi to sangpulopa anak gurun-Na Puang Isa joo peta'danna Yakub sola Yahya, magalli ngasanmi ngkitai. 42 Iamo joo natambai ngasanni Puang Isa to anak gurun-Na nakuanni, "Miissen kumua ia to tomangparenta lan lino to tangngkalaja' Puang Allataala mpandasa bang taunna. Na ia to tomapangka' mangkada mesa bang. 43 Apa te'da miwa'ding susi joo. Sibalikanna, ia to tomadoang menjaji toditaratte' la menjaji todisua-sua. 44 Na ia ammiden madoang la menjaonan, parallu mpamajiongan kalena susi kaunan. 45 Nasaba' ia tee Aku', Anak Mentolino, te'da kuratu tama lino la massua, apa ratura' la menjaji todisua-sua sola la mpangben sunga'-Ku' kumua nadila'bak to tolino jio mai dosana." 46 Ratumi Puang Isa sola anak gurun-Na lako kota Yerikho apa naola liu lalan bangri na buda tau undi nturu'i. Denmi mesa' tobuta cumadokko jio randan lalan meta'da-ta'da disanga Bartimeus anakkana Timeus. 47 Ia tonna sa'dingmi kumua liumi to Puang Isa to-Nazaret metamba-tambami nakua, "Oo, Puang Isa, bati'na Raja Daud, kamaseina' dikka'!" 48 Nakagallimi tobuda nasuai kamma'. Apa la'bi naandongngi ori metamba nakua, "Oo bati'na Raja Daud, kamaseina' dikka'!" 49 Kendenmi Puang Isa napangpetambanni joo tobuta. Jaji, ditambaimi, nakuan tooi tau, "Masannangmoko muke'deh, natambaimoko." 50 Naalaimi to baju landona napatorroi, nata'pa ke'deh, namale lako Puang Isa. 51 Nakutanaimi Puang Isa nakua, "Apara to mukadoangngi la kupugauk lako kalemu?" Mebalimi nakua, "Oo Guru, madoangna' pakita." 52 Nakuanmi, "Pakitamoko, nasaba' mukatappa'ina'!" Ta'pa pakitami. Ia tonna eloranmi pole, malemi sola tobuda undi nturu' Puang Isa.

Markus 11

1 Ia tonna mandoppi'mo kota Yerusalem, ratumi lako kota Betfage sola kota Betania jio sare buntu Zaitun, napajolomi Puang Isa to dua anak gurun-Na, 2 napasanni kumua, "Male kamu' sola dua lako joo kampong tapangngujui. Ia ammimentamamo, la nnampa' kamu' mesa' anak keledai dila'ka', to te'da bangpa nadisakei. Bukaii, mibawai jio mai. 3 Ia ke denni tau ngkutanai kamu' kumua, ciapari mibukaii, la mikua, 'Naparallui Puang na madoi' una la napapole.' " 4 Malemi sola dua, naampa' tongan anak keledai dila'ka' jio randan lalan sikandoppi' bola. Nabukaimi joo anak keledai. 5 Den tau ke'deh ntuu jio ngkutanai sola dua nakua, "Ee, apa mipugauk? Ciapari mibukai tuu anak keledai?" 6 Mebalimi susi to napauanni Puang Isa. Mane'ri naeloran male mbawai. 7 Nabawami lako Puang Isa, nalapikkii baju landona, anna sakei Puang Isa. 8 Buda tau mballah baju landona jio lalan, na den too tau nnampahhi tangke kaju kendaunpa to naala lan mai bara'bah. 9 Ia to tonapajolo sola tonapaundi, simetamba-tamban nakua, "Pakala'bihhi Puang Allataala! Dibarakka'i to toratu mpusanga sangan-Na Puang! 10 Dibarakka'i to kaparentan-Na to la ratumo! Kaparentanna Raja Daud tojolota'! Pakala'bihhi Puang Allataala jao kaminang majaona." 11 Ratumi Puang Isa de' kota Yerusalem, natarruh tama Bola Puang Allataala, anna mengkita mengguririk. Mangkai joo, malemi sola to sangpulo dua anak gurun-Na lako kota Betania, sanga la bongimi. 12 Masawanna tonna polemo Puang Isa sola anak gurun-Na jio mai kota Betania, tangbarahmi to Puang Isa. 13 Nakita mambelami, den garonto' kaju ara membalumbun daunna. Malemi ngkandoppi'i, nasangai den buanna. Apa ia tonna ratumo lako, te'da bang buanna naampa', daunna mandari, sanga tangwattunnapa membua. 14 Nakuanni joo garonto' kaju ara, "Mangpamula tee allo, moi mesa' tau te'damo la ngkandei to buammu!" Nasa'ding anak gurun-Na joo kadan-Na. 15 Ia tonna ratumo sola anak gurun-Na de' kota Yerusalem, mentamami rante Bola Puang Allataala to Puang Isa, naula'ii to tomangbaluk sola tomangngalli lan. Nabalittua' simesa'i to meja nanii tompasitongka doi' sola cadokkoan pangbaluk jangan-jangan. 16 Na moi mesa' tau te'damo naeloranni mbawa apa-apa nnola jio sa'de Bola Puang Allataala. 17 Mangkai joo mangngajahhimi jio nakua, "Den diuki' lan Sura' Allataala nakua Puang Allataala kumua, 'Ia to Bola-Ku', iamo bola la nanii massambajang sininna bangsa.' Apa mipasusimo bola parampo'." 18 Ia tonna sa'dingngi kapala imang sola guru agama joo kadan-Na Puang Isa, nnangahmi lalan la mbunoi. Apa malaja'i, nasaba' jangngah ngasan tuu lako tobuda ssa'dingngi to pangngajah-Na. 19 Ia tonna marimu-rimumo, messunmi sola anak gurun-Na lan mai kota. 20 Masawanna melambi' male omi Puang Isa de' kota Yerusalem sola anak gurun-Na. Nakitai joo garonto' kaju ara to mangka natampakki ropu Puang Isa, matemo, namakase ngasan ratu do' waka'na. 21 Naingaranmi Petrus to apa mangka jaji. Nakuamo lako Puang Isa, "Oo Guru, takitari! Ia joo garonto' kaju ara tatampakki ropu, matemi." 22 Mebalimi Puang Isa nakua, "Katappa'i kamu' Puang Allataala. 23 La miingaran tee kadang-Ku' kumua, la mangkada manda kamu' lako joo buntu mikua, 'Tiangka'ko, mutibuang do' tasik', nang la jajinna ia. Assalan mikatappa'ii, na te'da mibata kumua ia joo apa mipau, nang la jajinna ia. 24 Iamo joo la miissen melo kumua, ia ammimassambajang na den apa mipeta'da, katappa'i kumua la naben kamu' Puang Allataala. 25 Na ia ammimassambajang, na den tau mipemannan, dampanganni jolo', anna dampangan toda kamu' Ambe'mi jao suruga. 26 Ia ke te'da mudampanganni to tau laen, te'da toda nadampanganko Ambe'mu jao suruga." 27 Ratu pole' omi Puang Isa sola anak gurun-Na de' kota Yerusalem. Ia tonna male Puang Isa ngguririkki rante Bola Puang Allataala, ratumi ba'tu pira-pira kapala imang, guru agama na pekaamberan to-Yahudi ssikitanni. 28 Namekutana nakua, "Apara napenggaronto'i mupugauk ngasanni joo? Indara mbenko kuasa?" 29 Mebalimi nakua, "La kukutanai toda kamu'. La mipebalina' jolo', kumane' mpebali kamu'. 30 Indara mbenni kuasa Nabi Yahya njio' tau? Puang Allataalaraka iarika tolino?" 31 Sipangkada-kadami nakua, "Ia antamebali kumua, 'Kuasa pole jio mai Puang Allataala', la nakuanki', 'Ciapai na te'da mikatappa'ii to pangngajahna Nabi Yahya?' 32 Apa masussa ke la takua, 'Kuasa pole jio mai tolino.' Iamo namangkada susi joo tuu lako pekaamberan to-Yahudi, sanga malaja'i lako tobuda, nasaba' nasanga ia nabi joo Yahya. 33 Iamo joo mebalimi nakua, "Te'da kami' kiissenni." Nakuanni Puang Isa, "Ia ke susii tuu, te'da toda kulampauan kamu', kuasa pole umbo angkukullei mpugaukki joo."

Markus 12

1 Mpatarruhmi kadan-Na Puang Isa lako kapala imang, guru agama sola pekaamberan to-Yahudi mpake pangpasusian nakua, "Den mesa' tau ntananni anggoro' bara'bahna. Narompoi mengguririkkina, nakali kalo'bong pangparran anggoro', nakabua' too korang la dinii mangngampa. Mangkai joo, napangpenduluanmi joo bara'bah anggoro' lako ba'tu pira-pira tomendulu, anna male lako tondok laen. 2 Ia tonna wattu peanggorosanmo, nasuami to mesa' kaunanna male la nnalanni to tawana. 3 Apa ia tonna ratumo lako, najokkori tomendulu, narambii, namane' ssuai pole mangpala' lo'bang. 4 Nadadu' omi joo ampu bara'bah, ssua pole' mesa' kaunanna. Apa te'da bang una naangga'i susi to jolona, iamo joo nasipa'tongngii. 5 Nasua pole' unapa to mesa' kaunanna. Ia joo to disua pole', nabuno unai. Susi tarruh joo napugauk lako to tonasua ampu bara'bah. Den to napakario-rio na den too nabuno. 6 Indapa to la nasua tee too? Mesa'mora, ia mandamo to anak gaja napakamoja'. Jaji, mangkatampakanna, anakkanami nasua male la nnalanni to tawana. Mangkadai lan penawanna nakua, 'La nakasiri' ia to anakkaku'.' 7 Apa sipangkada-kadami joo tomendulu nakua, 'Inde'mi pale' to la mpumanahhi tee bara'bah. Tabunoi, antaala ngasanni tee manahna.' 8 Najokkomi, nabunoi. Ia to batang rabukkuna napembuanganni lan mai joo bara'bah." 9 Ia tonna mangkamo joo, mekutanami Puang Isa nakua, "Apara la nagaukanni ampu bara'bah tuu lako tomendulu? La ratui mbuno ngasanni joo tomendulu, namane' mpangpenduluanni joo bara'bahna lako tolaen. 10 Tantu denmo mibacai tee aya' lan Sura' Allataala to mpauna' kumua, 'Ia to batu naca'bean pande bola, menjajimo batu ariri petuo. 11 Iamo tee panggaukan-Na Puang Allataala, to kaminang melo.' " 12 Ia tonna sa'dingmi pekaamberan to-Yahudi joo pangpasusian napau Puang Isa, naissen kumua, ia napapatui joo kadan-Na. Iamo joo napangngattaimi la njokkoi to Puang Isa apa malaja'i lako tobuda. Iamo joo napada male mpemboko'i. 13 Den ba'tu pira-pira to-Farisi sola taunna Raja Herodes nasua pekaamberan to-Yahudi male mekutana la silecco kada Puang Isa ke wa'dingngi naden lalan nanii mpasalai. 14 Ratumi ngkutanai nakua, "Oo Guru, kiissen kumua maruruhki' mpangpangngajaran pakkaeloran-Na Puang Allataala lako tobuda, nasaba' te'da tau tapasilaenan. Iamo joo la mekutanakan, 'Ianna situru' atoran agamanta', wa'dingriki'ka mbajah sima lako Tomaraja Roma, ba'tu te'daraka?' " 15 Apa naissen Puang Isa to lan penawanna joo tomekutana. Iamo joo nakuanni, "Ciapari micobana'? Pakitanna' to doi' dinar." 16 Nabenmi doi' dinar. Mekutanami Puang Isa nakua, "Indara sipugambara' sola sipusanga tee?" Mebalimi nakua, "Tomaraja Roma." 17 Nakuamo Puang Isa, "Ia ke susii tuu, benni Tomaraja to apanna, miben tooi Puang Allataala to apan-Na!" Jangngah ngasanni ssa'dingngi joo pebalin-Na Puang Isa. 18 Mangkai joo, ratumi to ba'tu pira-pira to-Saduki lako Puang Isa. Ia joo to-Saduki te'da nakatappa'i to katuoan pole' jio mai kamatean. Nakuamo, 19 "Oo Guru, mangka napangpangngajaran Nabi Musa susi tee: Ia ke matei to muane, na te'dapa anakkana joo bainena, la nasulle allonanni adinna, dikua napajajianni bati'. 20 Nasaba' denni pitu muane massile'to. Ia to pamungah kebainemi, apa te'dapa anakkana, namatemo. 21 Napubainemi adinna joo bainena. Apa te'da todapa anakkana, namate todami. Susi todami jaji lako adi mangpenduanna, 22 ratu lako adi tampakkana. Pitumi nasibalian joo baine namate ngasan toomi, apa te'da bangngi to sijajian bati'. Mangkatampakanna mate todami joo baine. 23 Ia ke dipatuo pole'mi to tomate, indannamira la sibali tarruh joo baine? Nasaba' mangka ngasanmi sibali." 24 Napebalimi Puang Isa nakua, "Oo massala pahang kamu', sanga te'da miissen tonganni to apa diuki' lan Sura' Allataala, na te'da too mipahangngi to kuasan-Na Puang Allataala. 25 Ianna tuo pole'mo to tau jio mai kamatean, te'damo ia tokebaine-kemuane, apa la tuomi susi malaeka' jao suruga. 26 Na buttinna kumua ia to tomate dipatuo pole', tantu mibacamo to apa diuki' lan sura'na Nabi Musa, to mpaui to pangngala-ala duri dukku! Nakua Puang Allataala lako Nabi Musa, 'Aku'mo Puang Allataala to nasompa Nabi Ibrahim, Ishak na Yakub.' 27 Totuora to ssompa Puang Allataala, tangngia tomate! Sala pahang ngasan kamu'." 28 Den guru agama jio ssa'dingngi tonna sipangkada Puang Isa sola joo to-Saduki. Ia tonna kitami kumua tongan to pebalin-Na Puang Isa, malemi lako ngkutanai nakua, "Oo Guru, umbonnara joo parenta-Na Puang Allataala to kaminang parallu?" 29 Mebalimi Puang Isa nakua, "Ia joo parenta-Na Puang Allataala to kaminang parallu susi tee: 'Ee to-Israel, pesa'dingngii! Mesa'ra to Puangta' Puang Allataala. 30 La mupakamoja' tongan to Puangmu Puang Allataala, situru' canning atimmu, sininna kapaissenanmu na sininna kapakulleanmu ratu lako ssalaimmu lino.' 31 Na parenta mangpenduanna, 'Pakamoja'i to padammu rupa tau, susi iko mpakamoja' kalemu.' Te'damo parenta laenna to njaonannii joo dua parenta." 32 Nakua joo guru agama lako Puang Isa, "Oo Guru, tongan! Tongan to tapau kumua, mesa'ra to Puang Allataala, te'damo laenna. 33 Jaji, ia to tau la mpakamoja' Puang Allataala situru' sininna kamadoanganna, sininna kapaissenanna na sininna kapakulleanna. Na la mpakamoja' too padanna rupa tau, susi ia mpakamoja' kalena. Ia joo la'bi melo, na ia to mpangkaroban apa ditunu na karoba laen lako Puang Allataala." 34 Ia tonna sa'dingmi Puang Isa kumua gaja melomo to pebalinna, nakuanmi, "Ee, ci'di'mora mumenjaji umma'-Na Puang Allataala." Mangkai joo, moi mesa' tau te'damo barani ngkutanaii. 35 Ia tonna mangngajahhi Puang Isa lan Bola Puang Allataala, mekutanami nakua, "Matumbai nasangai guru agama kumua, ia to Raja Mangpasalama' bati'na Raja Daud? 36 Na pangpatujun-Na Roh Allataala na Raja Daud kalena mangkada nakua: Nakua Puang Allataala mangkada lako Puangku', 'Cumadokkoko ntee sa'de kanan-Ku', angkupupentalo ngasanni to ewalim-Mu mukuasaii.' 37 Jaji ia ke Raja Daud mpekapuangngii joo Raja Mangpasalama', matumbai nalabati'na Raja Daud?" Ia to tobuda lan Bola Puang Allataala masannangngi ssa'ding Puang Isa mangngajahhi. 38 Nakuanmi Puang Isa, "Majaga kamu' lako guru agama! Nakabudai bang male lumingka mangbaju lando tandana kumua todikasiri', namadoang bang ditaratte' jio pasa'. 39 Gaja nakabudai cumadokko jio olo lan bola passambajangan sola ngenan kata'pan mata jio pangramean. 40 Nauraga bang to baine matemo muanena, narampai to ewananna. Naanggai' bang too mpemalandoi passambajangna to nanii mpembunianan panggaukan gaja'na. Ia to tosusi joo la la'bi mabanda' to sessana." 41 Ia tonna cumadokko sioloan patti doi' sudakka to Puang Isa lan Bola Puang Allataala, nakita rampa' tee mai tau ke mpatamai doi'na. Buda tosugih mpatama sibuda doi'. 42 Anna ratu toda to mesa' baine kaasi-asi to matemo muanena napatamai dua de'pen. Iamo doi' majiongna angga'na. 43 Natambaimi Puang Isa to anak gurun-Na nakuanni, "La miingaran! Sitonganna ia joo baine kaasi-asi, la'bi buda ia to napatama, na ia to napatama tuu lako tau sola ngasan. 44 Nasaba' ia tuu mati' tau mangpangben jio mai kala'bianna, apa ia tee baine kaasi-asi mangpangben jio mai kakuranganna. Napangben ngasan to la naputuona."

Markus 13

1 Ia tonna messunmo Puang Isa lan mai rante Bola Puang Allataala, denmi mesa' to anak gurun-Na ngkuanni, "Oo Guru, takitari tee Bola Puang Allataala. Gaja ballo dibelo-beloi batu makassing." 2 Mebalimi Puang Isa nakua, "Mukita ngasanmoraka kabua'na tee bola tonggo? Den wattunna keanu', na sininna tee mukita la diro'pokan ngasan na moi mesa' batu te'damo nnii ngenanna." 3 Mangkai joo, malemi Puang Isa de' buntu Zaitun anna cumadokko sioloan Bola Puang Allataala. Ratumi Petrus, Yakub, Yahya na Andreas la ssipangkadan mesai. 4 Namekutana nakua, "Oo Guru, pauankan, piranra nalajaji joo? Na apara tandana, ke nadete'mi wattunna?" 5 Mebalimi Puang Isa nakua, "Majaga kamu', danggi' naden tau mpalao sala kamu'. 6 Nasaba' buda tau la ratu mpusanga sangang-Ku' nakua, 'Aku'mo Raja Mangpasalama'!' na buda tau la napalao sala. 7 Ia ke ssa'ding kamu' oni kasirarian sola kareba kasirarian, danggi' mimalaja'. Nasaba' nang la jaji ngasanni joo, apa te'dapa nawattunna Kiama' lino. 8 Ia to mesa' bangsa la sirari nnewa bangsa laen, ia to mesa' kaparentan rrarii kaparentan laenna. Umbo-umbo nanii la den nino sola karorian la'da'. Ia tuu lako, mane' pamulannari kamasussan susi pa'dikkina ke mane' mangnguriwa'i to baine la keanak. 9 La majaga kamu', nasaba' la dijokko kamu', ammidipangngolo lako tomangra'tah kara-kara. La dirambi kamu' lan bola passambajangan. La dipangngolo kamu' lako tomangparenta sola raja, nasaba' mituru'na'. Iamo joo wattu la minii mpangpeissenanni to Kareba Kasalamatan lako tuu lako tau. 10 La dipangpeissenan ia jolo' lako sininna bangsa to Kareba Kasalamatan namane' Kiama' lino. 11 Ia ke dijokko kamu' ammidipangngolo lako to dinii rra'tah kara-kara, danggi' miselang kumua apara la mipau mebali. Nasaba' Roh Allataala la mpauan kamu' apa to la mipebalian joo wattu. 12 La nakaba'ci kamu' buda tau, nasaba' mikatappa'ina'. Na la jaji susi joo, tomassile'to mpangpebunoan sile'tona. Susi too ambe' lako anakkana. Anak nnewa tomatuanna, napangpebunoanni. Apa ia to tomatappa' tarruh ratu lako ssalainna lino, la dipasalama'." 14 Mpatarruhhi kadan-Na Puang Isa nakua, "La ngkita kamu', 'apa to liwa' mecarepan' dipake'deh jio ngenan to tangsipato'na nanii. (Ia to tombacai tee la naissen meloi apa battuananna!) Ia joo wattu, ia to totorro jio tana Yudea la palai de' membuntunna. 15 Susinna ia ke den tau jao bubungan bola la mellaoi, natarruh bangmo male, danggi'mo namentama bola nnalapa apanna. 16 Susi toomi, ia to tojio bara'bah, danggi'mo napole nnala baju landona. 17 Liwa' parri'na joo wattu to tokeba'tang sola to tomangpacucupa. 18 Massambajang kamu', danggi' nasimata wattu peuranan. 19 Nasaba' ia joo wattu la den pangsessa gaja parri', to te'dapa naden susinna sipammula lino dipaden ratu lako too allo, na te'da toomo naladen pole'pa. 20 Na ia kenna te'da napemadoi'i Puang Allataala nnanggeii joo wattunna, te'damo tau la salama'. Apa napemadoi'i nnanggei, nasaba' umma'-Na to mangka napilei. 21 Ia ke denni tau ngkuan kamu' joo wattu, 'Kitari, inde'i to Raja Mangpasalama'!' ba'tu nakua, 'Iti'i joo!', danggi' mikatappa'ii joo tau. 22 Nasaba' buda nabi tangtongan sola tossanga kalena tomangpasalama' la mpangpekitan kalena. La mpugauk mangrupa-rupa tanda mejangngaran sola panggaukan mekalajatan, la mpalao sala tau, na ke wa'dingngi moi too umma'-Na Puang Allataala. 23 Jaji, majaga kamu'! Kupauan ngasanmo kamu' jolo' joo, moi na te'dapa najaji." 24 Mpatarruhhi kadan-Na Puang Isa nakua, "Ianna mangkamo joo kamaparrisan, te'damo namangngarrang to allo sola bulan. 25 La sipolloranni to bintuin jao mai langi' nalamausa' ngasan to tontoe kuasa jao langi'. 26 Ia joo wattu, la nakitana' tau tee Aku', Anak Mentolino, ratu jao mai langi' lan saleu', makuasana' kumala'bih too susi Raja. 27 Kumane' ssuai to malaeka'-Ku' rrempun ngasanni to umma'-Ku' jio mai sulapa'na lino." 28 Mpatarruhpa kadan-Na Puang Isa nakua, "Ala kamu' pangpasusian jio mai garonto' kaju ara. Ianna macikki' na malutte'mo to ringena, na mengkacocokmo, miissenmi kumua cingga'tu'mora napealloan. 29 Susi toomi ke mikita ngasanmi joo tanda, la miissen kumua cingga'tu'mora angkuratu. 30 La miingaran tee kadang-Ku' kumua, la jaji ngasan tee, ke te'dapi namate ngasan to tau tuopa tee wattu! 31 Ia to langi' sola lino la lanynya', apa ia to kadang-Ku' la tatta' te'da cappa'na." 32 Nakuapa Puang Isa, "Te'da tau nnissenni to wattu karatuan-Ku', moi malaeka' jao suruga, moi tee Aku', Anak, Ambe' manda ia to nnissenni. 33 Iamo joo, majaga kamu', nasaba' te'da mikalannaii to karatuan-Ku'. 34 Ia joo wa'ding dipasangrapang mesa' tau ssalai bolana la male sompa'. Ia tonna te'dapa namale, pada napabarakkanni jaman to kaunanna. Ia to tomangjaga ba'ba napangngingaran, anna mangjaga melo. 35 Iamo joo majaga tarruh kamu'! Nasaba' te'da miissenni piran nalapole joo ampu bola, wa'ding karuen, tangnga bongi, dannari iarika ke tibangkahmi mariwang. Jaji moi nata'pa ratu, te'da sussana ke natimba'i joo kaunanna majaga tongan. Susi todamo kamu' la majaga tongan, nasaba' te'da miissenni kumua piranra kularatu. 37 Ia tee apa kupauan kamu', kupauan ngasan toomo tau, kumua, 'Majaga kamu'.' "

Markus 14

1 Duang allopa na pangramean Paskah sola pangramean ngkande Roti Tangkeragi. Ia to kapala imang sola guru agama nnangah bang lalan la njokko buni Puang Isa anna bunoi. 2 Apa nakua to kapala imang sola guru agama, "Danggi' na ia ke wattu pangramean nadipugauk, nasaba' wa'ding marongka to tobuda." 3 Ia tonna jio kota Betania to Puang Isa lan bolana Simon to masolak tonna anu', denmi mesa' baine male lako Puang Isa mbawa minynya'-minynya' lan bittolo' pualam to gaja suli' allinna, to waka' busarungngu' digaraga. Ia tonna cumadokkomo Puang Isa kumande, nale'toi joo bittolo' natua'i joo minynya'-minynya' de' ulun-Na Puang Isa. 4 Ba'tu pira-pira tau ntuu jio magalli, anna sipangkada-kada nakua, "Ah, apara ia bua'na joo minynya'-minynya' dipaboro-boro? 5 Na ia joo wa'ding dibaluk la'bi tallu ratuh dinar, na ia to allinna diben tokaasi-asi." Magalli tuu lako tau lako joo baine. 6 Apa nakua Puang Isa, "Eloranni ia! Danggi' mirekaii! Melo to napugauk lako Aku'. 7 Ia to tokaasi-asi, la den punala bang ia lan tangnga-tangngami. Na ia ke madoang kamu' ntulungngi, wa'ding bang ia moi piran. Apa ia tee Aku' te'da kutorro tarruh lan tangnga-tangngami. 8 Ia tee baine mpugaukmi ia to pakullena. Naminynyakki jolomo' la mpasadiai to kadilamunan-Ku'. 9 La miingaran tee kadang-Ku' kumua, umbo-umbo dinii lan tee lino mpangpeissenan Kareba Kasalamatan, tuli la dicurita todai to apa napugauk joo baine, dinii nningaranni!" 10 Yudas Iskariot, iamo sala mesa'na to sangpulo dua anak gurun-Na Puang Isa, male lako kapala imang, la mpangpejokkoan Puang Isa. 11 Liwa' sannang tuu lako kapala imang ssa'dingngi, namangngaku la mbenni doi'. Nnangahmi wattu melo to Yudas Iskariot la nanii mpangpejokkoan Puang Isa. 12 Ia tonna allo bungahna pangramean ngkande Roti Tangkeragi, iamo to allo panggeresan bembala' kande Paskah, mekutanami to anak gurun-Na Puang Isa nakua, "Oo Puang, umbora to takadoangngi, la kinii mpasadianki' kande Paskah?" 13 Jaji nasuami Puang Isa to dua anak gurun-Na nakua, "Malemo kamu' sola dua lako kota, na la sitammu kamu' mesa' muane mbawa busu ponno wai. Male kamu' sola, 14 ammipekutananni lako ampu bola to nanii mentama kumua: napekutanan Gurungki', 'Umbora to la kunii ngkande kande Paskah sola anak gurung-Ku'.' 15 La napakitan kamu' ngenan maluah jao loteng to sadia sola parewananna la dipake. Pasadian ngasanki' ntuu jio." 16 Malemi tama kota sola dua, naampa' ngasanni susi to napauanni Puang Isa. Napasadiami to kande Paskah. 17 Ia tonna bongimo, ratumi Puang Isa sola anak gurun-Na. 18 Ia tonna kumande ngasan unapa, nakuamo Puang Isa, "La miingaran tee kadang-Ku' kumua, den kamu' mesa' la mpangpejokkoanna', to kusolan kumande tee too!" 19 Gaja sussami to anak gurun-Na tonna sa'dingngi to Puang Isa mangkada susi joo, anna pada mekutana nakua, "Oo Puang, tantu te'da na aku' tasanga?" 20 Mebalimi nakua, "Sala mesa'mi tee sangpulo dua kusinduan kumande. 21 Ia tee Aku' Anak Mentolino, nang la matena', susi to diuki' lan Sura' Allataala. Apa macilaka to tompangpejokkoanna'. La'bi melo ia, kenna danggi' pissen nadijajian." 22 Ia tonna kumandemo sola ngasan, naalami Puang Isa joo roti, namangkurru sumanga' lako Puang Allataala, namane' nti'pek-ti'pekki, anna benni anak gurun-Na nakua, "Alai mikandei, batang kale-Ku' tee." 23 Mangkai joo, nnalami isotan anggoro', namangkurru sumanga' lako Puang Allataala, namane' mbenni anak gurun-Na, anna mangngiso' anggoro' sola ngasan. 24 Nakuamo Puang Isa, "Rara-Ku' tee, to mpaassah basse-Na Puang Allataala, rara to dipato'do la ndampangan buda tau. 25 La miingaran tee kadang-Ku' kumua, te'damo kulanniso' pole'pa anggoro', ke te'dapi naratu Puang Allataala mangparenta susi Raja. Iapi joo wattu kumane' nniso' anggoro' baru lan Kaparentan-Na." 26 Mangkai joo, mpakkelonganmi kelong pangpujian, namane' male de' Buntu Zaitun. 27 Mangkai joo, nakuanmi Puang Isa to anak gurun-Na, "La misalaina' sola ngasan. Susi to diuki' lan Sura' Allataala nakua Puang Allataala kumua, 'La kubunoi to tomangrewana, anna sisarak-sarak to bembala'na.' 28 Apa ia ke dipatuo pole'mo' jio mai kamatean, la kujoloi kamu' male re' tana Galilea." 29 Mebalimi Petrus nakua, "Oo Puang, moi nasalai ngasanmiki' titi' mati', te'da kulassalaiki'!" 30 Nakuamo Puang Isa ngkuanni, "Ee Petrus! La muingaran tee kada kupauanko kumua, te'dapa napenduan kekkua to manuk tee bongi, mupentallunmo mpessakkannina'." 31 Mattongan-tonganni Petrus mebali nakua, "Oo Puang, moi antapada mate, nang te'da kulampessakkanniki'." Mangkada ngasanni to anak gurun-Na susi joo. 32 Ia tonna ratumo Puang Isa lako bara'bah zaitun disanga Getsemani nakuamo lako anak gurun-Na, "Nteemo kamu' cumadokko, kumalepa massambajang." 33 Nasolanmi to Petrus, Yakub na Yahya. Mangpamulami masussa penawan-Na, nagaja parri' too nasa'ding. 34 Nakuamo lako joo tallu anak gurun-Na, "Liwa' masussanna penawang-Ku', susi to kumua la matemo'. Torromo kamu' ntee, tapada merroja." 35 Malemi ba'tu pirang-pirang tengkan, nasuju' massambajang nakua, "Oo Ambe', te'da to apa tanglawa'ding jaji, ke Kita'. Lendokanni tee kamaparrisan jio mai kale-Ku', ke wa'dingngi. Apa tangngia pakkaeloran-Ku' to la jaji, apa pakkaeloran-Ta' Kita'." 37 Mangkai joo, polemi Puang Isa lako to nanii tallu anak gurun-Na, natimba'i simammasan. Nakuamo lako Petrus, "Ee Simon, mamma'rokoka? Tangmukulle unamoraka merroja sangjang bang?" 38 Nakua toopa, "Majaga kamu', mimassambajang too, danggi' mituru'i ke disede kamu' mpugauk dosa. Sitonganna madoang to penawammi mpugauk katonganan, apa te'da mikullei, sanga malamma to sipa' tolino." 39 Male pole' omi Puang Isa massambajang, na ia to passambajang-Na susi una to jolona. 40 Mangkai joo, polemi lako to nanii tallu anak gurun-Na, natimba'i omi simammasan, sanga gaja rojai. Te'da naissen to apa la napau lako Puang Isa. 41 Ia tonna mangpentallunnamo pole, nakuanmi to anak gurun-Na, "Mamma' bang unapara kamu'ka mpessau bo'jo'mi? Ganna'mi! Nadete'mi wattung-Ku' tee Aku', Anak Mentolino, la dipangben lako kuasanna tomadosa. 42 Mi'cokmo kamu', tamale. Kitari! Ia to tolampangpejokkoanna', ratumi." 43 Ia tonna mangkada unapa Puang Isa, ratumi Yudas, to sala mesa'na anak gurun-Na, ssolan buda tau sitakin pa'dang sola mbawa tarasulu', to nasua kapala imang, guru agama na pekaamberan to-Yahudi. 44 Mangka jolomo joo tompangpejokkoanni mpaui lako tuu lako tau kumua, "Ia to tau kuudung, iamo taunna. Jokkomi, namijagai meloi mibawa." 45 Ratumi lako ntuu joo ngenan, ta'pa malemi Yudas lako Puang Isa namangkada nakua, "Oo Guru!" anna udungngi. 46 Na ia joo tobuda ratu sola Yudas, njokkomi Puang Isa anna pumpungngi. 47 Apa sala mesa'na to tau jio, ta'pa nnonok pa'dangna, napa'dangngii to kaunanna Imang Lompo, nata'tak to talinganna. 48 Nakuanni Puang Isa tuu lako tau, "Misangaraka parampo'na', ammiratu sitakin pa'dang sola mbawa tarasulu' la njokkona'? 49 Allo-alloki' sola ke mangngajahhina' jio Bola Puang Allataala na te'da mijokkona'. Apa nang la jajimi susi joo, dikua anna jaji to diuki' lan Sura' Allataala." 50 Sipalaianmi to anak gurun-Na Puang Isa ssalaii. 51 Den tokallolo, medodo bangri, undi nturu' Puang Isa. La najokko toda tau, 52 apa nalossokanni to dodona, namale kinjara' mangkale-kale. 53 Malemi tuu lako tau ssolanni to Puang Isa lako bolana Imang Lompo. Ia to kapala imang, guru agama na pekaamberan to-Yahudi sirempun ngasanni ntuu jio. 54 Naturu'i mambela-bela bangngi Petrus to Puang Isa, ratu lako rante bolana Imang Lompo. Ntuu jio nanii Petrus cumadokko sola pangjaga mendarang. 55 Ia to kapala imang sola padanna Pangbicara Agama mpengkulle-kullei nnampa' kasa'bian tangtongan, la nanii mpasalai to Puang Isa, anna wa'ding dipangpebunoan, apa te'da naampa' kumua mpugaukki kasalan. 56 Moi buda tau menjaji sa'bi tangtongan, apa ia to kasa'bianna, sisala ngasan bang. 57 Denmi ba'tu pira-pira tau ke'deh, mpau kasa'bian tangtongan nakua, 58 "Denmo kisa'dingngi tee tau nakua, 'La kuro'pokan tee Bola Puang Allataala pangkabua' tolino, na tallung allora kunii mpake'dehhi to laenna, to tangngia pangkabua' tolino.' " 59 Apa ia to kasa'bianna tuu lako tau, sisala ngasan bang una. 60 Ke'dehmi joo Imang Lompo, namangkada lako Puang Isa nakua, "Te'daraka mulampebalii to diparapasanko?" 61 Apa kamma' bangngi to Puang Isa. Te'da bang namebali. Pissenpa to Imang Lompo mekutana nakua, "Ikomoraka Raja Mangpasalama', Anak Allataala to disompa?" 62 Mebalimi nakua, "Ie', Aku'mo. La mikitana' tee Aku', Anak Mentolino, cumadokko jio sa'de kanan-Na Puang Allataala to makuasa, na la ratuna' jao mai langi' lan saleu'." 63 Gaja gallii joo Imang Lompo anna ca'ce-ca'cei to pakeanna namangkada nakua, "Te'damo nadiparallui to sa'bi. 64 Misa'ding kalenamo to kadan-Na, kumua ncapa'i Puang Allataala. Ia tee too, matumbara kamu' pahangmi?" Mesa' kada ngasanmi nakua, "Madosai to Puang Isa, sipato'mo Ia ke dibunoi." 65 Den ba'tu pira-pira tau ncikkudui to Puang Isa, nasapu'i to lindo-Na, nasijangguru'i, nakuanni, "Ee nabi! Tappuike', indara to njangguru'ko?" Ia to tomangjaga jio mentama toda ntampelengngi. 66 Jio bang unapa rante bola to Petrus, naratu ntuu jio mesa' baine kaunanna Imang Lompo. 67 Ia tonna kitami to Petrus mendarang, nakaje'jekmi nakuanni, "Tangngiko todaraka sibawanna joo Puang Isa to-Nazaret." 68 Apa messakkanni Petrus nakua, "Te'da kupahangngi. Te'da too kuissenni apara tuu musanga." Malemi Petrus lako babangan. Ia joo wattu, kekkuami to manuk. 69 Ia joo baine kaunan nakaje'jekki to Petrus, anna kuanni to tau ntuu jio, "Ia toda tee tau sala mesa'na anak gurun-Na joo tau." 70 Apa messakkan omi Petrus. Te'da namasai joo, ia tuu lako tau ke'deh ntuu jio ngkuan omo Petrus, "Te'damo nasalai, anak gurun-Nako, nasaba' to-Galileako." 71 Massapah tonganmi to Petrus nakua, "Tampak ropu ke la kuissenni joo tau misanga!" 72 Ia joo wattu kekkua penduanmi to manuk. Naingaranmi Petrus to apa mangka nakuanni Puang Isa kumua, "Te'dapa nakekkua penduan to manuk, mupentallunmo mpessakkannina'." Ta'pa kumarrakmi Petrus nna'de-a'de.

Markus 15

1 Melambi' unapa nasirempunmo to Pangbicara Agama, iamo to kapala imang, guru agama na pekaamberan to-Yahudi. Napangpepumpunganni to Puang Isa, namale ssolanni, anna pangngoloi lako Gubernur Pilatus. 2 Nakutanaimi Gubernur Pilatus nakua, "Tongannaraka, Ikomo Raja to-Yahudi?" Napebalimi Puang Isa nakua, "Susi tuu tapaunna, Aku'mo." 3 Budapa to naparapasanni kapala imang to Puang Isa, apa te'da bang napebalii. 4 Nakutanai omi Gubernur Pilatus nakua, "Ciapari mucia' mebali? Pesa'dingngii pira budanna to apa naparapasanko tau." 5 Apa te'da bang napebalii Puang Isa. Iamo joo najangngah Gubernur Pilatus. 6 Ia ke pangramean Paskah, kabiasannamo Gubernur Pilatus lla'paran simesa' toditarungku situru' peta'danna tobuda. 7 Den tau disanga Barabas lan pangtarungkuan sola ba'tu pira-pira to tomangka nasolan nnewa tomangparenta na buda tau nabuno. 8 Mangngolomi to tobuda lako Gubernur Pilatus, meta'da nadila'paran mesa' to toditarungku susi kabiasanna. 9 Mekutanami Gubernur Pilatus nakua, "Mikadoangngiraka ke Ia tee Raja to-Yahudi kula'paran?" 10 Naissen Gubernur Pilatus, kumua iari napangngoloi kapala imang to Puang Isa lako kalena, sanga masere atiri. 11 Apa narasii kapala imang joo tobuda, kumua napeta'dai lako Gubernur Pilatus, nadila'paran to Barabas. 12 Nadadu' pole'pa Gubernur Pilatus ngkutanai tuu lako tobuda nakua, "Ia ke susii joo, na la kupatumbai joo tomisanga Raja to-Yahudi?" 13 Napissennimi mearrak nakua, "Pampangngi Ia." 14 Nadadu' pole'pa Gubernur Pilatus mekutana nakua, "Kasalan apara to mangka napugauk?" Apa naandongngi pole'i mearrak nakua, "Pampangngi Ia." 15 Jaji madoangngi Gubernur Pilatus la mpemasannangngii joo tobuda. Iamo joo nala'paranni to Barabas lako tobuda, napangperambianni to Puang Isa, namane' mpangbenni la dipampang. 16 Nabawami surudadu to Puang Isa lako to dinii rra'tah kara-kara, lan salassa' gubernur, namane' ntambai ngasanni to solana anna sirempun. 17 Napapakeii baju lando makudara', napasongko'i mahkota, to ringe keduri dikabua'. 18 Mangkai joo napekatabe'imi sola ngasan nakua, "Salama' Raja to-Yahudi." 19 Napa'tongngi tekken to ulun-Na, nacikkuduii, namengguntu' ssompai. 20 Ia tonna mangkamo tuu lako surudadu ncapa'-capa'i, nasulleimi joo baju makudara', napapakeii to bajun-Na unamo ia. Namane' ssolanni to Puang Isa lako salean la dipampang. 21 Jio tangnga lalan sitammumi mesa' tau mangnguju lako kota Yerusalem, naparukui surudadu mpassan kaju sitamben-Na Puang Isa. Ia joo tau disanga Simon, to-Kirene, iamo ambe'na Aleksander sola Rufus. 22 Nasolanmi to Puang Isa lako buntu-buntu disanga buntu Golgota, battuananna, "Buntu Ulu Tau." 23 Ia tonna ratumo de' ntuu joo buntu, napaiso'mi anggoro' dipasirau mur, apa cia'i nniso'i. 24 Napampangmi to Puang Isa tonna tatte' kasera makale', namane' lloterei to pakean-Na la nanii nnissenni kumua umbonnara to la naputawa. 26 Den pangnguki' dipajao de'na ulun-Na Puang Isa to mpaui to napusaba' nadipampang kumua, "Raja to-Yahudi." 27 Den toda dua parampo' nasolan Puang Isa dipampang, mesa' jio sa'de kanan-Na na mesa' jio sa'de kairin-Na. 28 Susimi tee najaji to diuki' lan Sura' Allataala kumua, "Disangai togaja'." 29 Ia to tau liu lalan ntuu jio, pada mangroge kollong ncapa'-capa' Puang Isa nakua, "Ee, Ikomo to la rro'pokan Bola Puang Allataala, na tallung allora la munii ngkabua' pole'i! 30 Pasalama'ko kalemu mumellao jao mai ntuu kaju sitamben." 31 Susi toda tuu lako kapala imang sola guru agama ncapa'-capa' Puang Isa, nakua sipangkada-kada, "Ee, tau laen napasalama', apa tangnakulle mpasalama' kalena! 32 Ia ke rajana tonganni to-Israel, mellaoi tee too jao mai joo kaju sitamben angkikitai, kimane' ngkatappa'ii kumua Iamo Raja Mangpasalama'." Ia to tau dipampang sola, ncapa'-capa' tooi. 33 Ia tonna tangngamo allo, memmapattang ngasanmi joo tondok tallung jang masainna. 34 Ia tonna tatte' tallumo karuen nnandongngimi gamaran-Na to Puang Isa metamba nakua, "Eloi, Eloi, lama sabakhtani?" to battuananna, "Oo, Puang Allataala-Ku'! Oo, Puang Allataala-Ku', ciapari musalaina'?" 35 Ba'tu pira-pira tau ssa'dingngi joo petamba-Na, namangkada nakua, "Pesa'dingngii, ntambaii Nabi Elia." 36 Den mesa' tuu lako tau ta'pa male nnala baraba batu, nacummui tama anggoro' macukka, namane' mpalakoi cappa' sangtangke kaju anna pamimmii to Puang Isa, anna mangkada nakua, "Tajanni, antakitai ba'tu la ratu tonganrika Nabi Elia la lla'paranni jao mai joo kaju sitamben." 37 Nnandongngii gamaran-Na Puang Isa metamba, anna ka'tu sunga'-Na. 38 Ia joo wattu ia to kaen pesapa' lan Bola Puang Allataala, ca'cei tipangdua jao mai ratu do'. 39 Na ia to kamandang surudadu ke'deh jio sikandoppi' joo kaju sitamben mpemanassa tonganni matumba to kamatean-Na Puang Isa namangkada nakua, "Tonganna, Anak Allataala tee tau." 40 Den toda ba'tu pira-pira baine ntuu jio mambela-bela bang ngkitai. Susinna jioi to Salome, Maryam Magdalena, Maryam indona Yakub malolle' sola Yoses. 41 Ia tuu lako baine, iamo baine nturu'mo Puang Isa, anna balii tonna jio unapa tana Galilea. Na buda toopa baine laenna ntuu jio to nasolan Puang Isa de' kota Yerusalem. 42 Ia tonna la bongimo, ratumi Yusuf, to-Arimatea. Ia joo Yusuf mesa' Pangbicara Agama na todikasiri' too. Ia mesa' tontajan wattunna Puang Allataala la mangparenta susi Raja. Ia joo allo dinii mangpasadia, nasaba' la Allo Katorroanmi. Iamo joo, nambaranian kalena Yusuf male mangngolo lako Gubernur Pilatus, mpeta'dai kumua anna diben to batang rabukku-Na Puang Isa. 44 Jangngahhi Gubernur Pilatus ssa'dingngi kumua matemi to Puang Isa. Iamo joo napangpetambanni to pangbarani surudadu, nakutanai kumua ba'tu la masaimi mate-Na to Puang Isa. 45 Ia tonna sa'dingmi to curitanna joo pangbarani, naeloranmi to Yusuf nnalai joo batang rabukku-Na Puang Isa. 46 Naallii Yusuf to kaen pebalun lenan, namane' mpupellaoi joo batang rabuk jao mai kaju sitamben, anna balunni. Mangkai joo, napatamami liang to digaraga jio buntu batu, nalentenni to batu tonggo natungusanni joo liang. 47 Na ia to Maryam Magdalena na Maryam indona Yoses mmatai bangngi umbo nanii mpanii joo batang rabukku-Na Puang Isa.

Markus 16

1 Ia tonna mangkamo Allo Katorroan, malemi Maryam Magdalena, Maryam indona Yakub na Salome nnalli minynya'-minynya' busarungngu' la naminynyakan batang rabukku-Na Puang Isa. 2 Melambi'pa tonna mane' ollong allo joo allo Aha', malemi tuu lako baine lako liang. 3 Sipangkada-kadami jio tangnga lalan nakua, "Indamora to la llentenanki' dau joo batu petungu' liang?" Nasaba' gaja tonggo joo batu. Apa ia tonna ratumo lako, nakitami mangkamo dilentenni. 5 Ta'pa tarruhmi tama liang. Apa gaja sabakanni, sanga ngkitai tokallolo mangpakean baju malando mabuccang cumadokko jio sa'de kanan. 6 Mangkadami joo tokallolo nakua, "Danggi' mimalaja'! Kuissen kumua nnangah kamu' Puang Isa to-Nazaret, to mangka dipampang. Te'damo Ia ntee! Tuo pole'mi Ia. Kitami tee ngenan dinii mbujuhhi. 7 Ia tee too, malemo kamu' madoi' mpauanni to anak gurun-Na Puang Isa sola Petrus kumua, 'Malemi njoloi kamu' re' tana Galilea, na jiopa la minii ngkitai, susi to mangka napauan kamu'.' " 8 Messunmi lan mai joo liang, nata'pa sikinjarasan, nasaba' gaja sabakanni na silajatan tooi. Te'da bang tau napauan apa to mangka jaji, sanga malaja'i. 9 Ia tonna tuo pole'mo Puang Isa, allo Aha' melambi', mpangpekitanmi kalena lako Maryam Magdalena. Ia joo Maryam, mangka nanii Puang Isa nnula'i pitu setang. 10 Malemi Maryam Magdalena mpauanni to tonturu' Puang Isa, to da'tan bangpa masussa nakumarrak kumua, "Ee, tuo pole'mi to Puang Isa, nakukitamo aku'." Apa ia tonna ssa'dingngi joo kadanna Maryam Magdalena, kumua tuo pole'mi to Puang Isa, te'da nakatappa'ii. 12 Ia tonna mangka omo joo, laen omi carana Puang Isa mpangpekitan kalena lako dua tau to nturu'mi, tonna lan kalingkanna sola dua mangnguju lako mesa' kampong. 13 Jaji, ta'pa polemi sola dua, anna curitai joo kajajian lako solana, apa te'da nakatappa'ii joo curitanna. 14 Mangkatampakanna mpangpekitanmi kalena Puang Isa lako sangpulo mesa anak gurun-Na, tonna kumande. Nacaccai Puang Isa, nasaba' kamembattukan penawanna nacia' ngkatappa'i curitanna to tongkitami kumua tuo pole'mi Ia. 15 Anna kuanni nakua, "Malemo kamu' lako a'pa' sulapa'na lino, mpangpeissenanni to Kareba Kasalamatan jio mai Puang Allataala lako sininna rupa tau. 16 Ia to tongkatappa'ii na dijio', la salama', nasaba' te'damo nadireken to salana, apa ia to tote'da nakatappa'ii la nasessa Puang Allataala. 17 Ia to tau matappa' la ntarima kuasang-Ku' la mpugauk tanda mejangngaran, nnula'i setang, na mangkada mpake basa to te'da naissenni. 18 Ianna ntoe ulah bolong, ba'tu nniso' racun, te'da namatumba. Ianna kaka'i tuu lako tomasaki, la malagah." 19 Ia tonna mangkamo Puang Isa sipangkada sola anak gurun-Na, tiangka'mi de' suruga, na cumadokko jio sa'de kanan-Na Puang Allataala. 20 Malemi joo anak gurun-Na Puang Isa mpangpeissenanni to Kareba Kasalamatan lako sulapa'na lino. Na Puang tuli ntulungngi lan jamanna, mpugaukki to tanda mejangngaran, la menjaji butti kumua tongan ia to apa napau.

Lukas 1

1 Ee, Teofilus, to mala'bihku'. Budamo tau mpengkulle-kullei tonganni nnuki' rampa'i katuoan-Na Puang Isa to mangkamo jaji lan tangnga-tangngata'. 2 Ia to nauki' tau, susi bang unamo to napangpeissenan to tongkita kalenai apa to mangka jaji, mellao jio mai pamulanna. Iamo tuu lako tau mpangpangngajaran kadan-Na Puang Allataala tongkuuki'i tee. 3 Ia tongkupasilolongan ngasanni tuu lako mellao jio mai pamulanna, kusanga melo ke kuukiran pole'ki' to mangrundunanna. 4 Iamo kupugaukki susi joo, dikua antaissenni kumua, tongan to apa mangka tasa'ding. 5 Ia tonna Raja Herodes mangparenta jio tana Yudea, den imang jio disanga Zakariya, rapunna imang Abia. Ia to bainena disanga Elisabet, bati' imang toda ia. 6 Ia to sipa'na sola dua napumasannang Puang Allataala, na naturu'i ngasan to parenta-Na na atoran-Na Puang Allataala. 7 Te'da anakkana, nasaba' tamanangngi to Elisabet na matuami sola dua. 8 Den pissen wattu, tonna dete'mi wattunna rapunna imang Abia la mangjama, mentamami Bola Puang Allataala imang Zakariya, nasaba' nakannai undi la ntunu kamanynyang. Ia to kabiasan joo wattu, ia to carana mpattantu imang la mangjama, diundi. 10 Ia tonna ntunu kamanynyang, ia to tobuda massambajang jio salean. 11 Denmi malaeka'-Na Puang Allataala mpangpekitan kalena lako Zakariya. Ia joo malaeka' ke'deh jio sa'de kananna meja to dinii ntunu kamanynyang. 12 Ia tonna kitami, sabakanmi namalaja' too. 13 Apa mangkadai joo malaeka' nakua, "Ee, Zakariya, danggi' mumalaja'! Natarimamo Puang Allataala to passambajangmu. Ia to balimmu la njajianni mesa' pea muane, ammusangai Yahya. 14 La gaja sannangko, na buda tau la mpumasannangngi to kajajianna joo pea. 15 Ia joo pea, la mala'bih situru' pengkitan-Na Puang Allataala, na te'da nalamangngiso' anggoro' ba'tu nniso' to makarrahna. Mangpamula nakeba'tangan indona nakuasai tarruhhi Roh Allataala. 16 Buda to-Israel la napapole lako Puang Allataala, Puangna. 17 Na la menjaji pesuro matappa'-Na Puang Allataala, na dipakuasa susi Nabi Elia. La napasikalinoi to ambe' na anakkana. Na ia to totangkainawa naajahhi mangtangngah susi tomelo penawa. Susimo joo napasadiai to tau ntarima Puang." 18 Mangkadami Zakariya lako joo malaeka' nakua, "Umbo la kukua nnissenni kumua la jaji susi joo? Sanga matuamo', na ia to balingku' matua todamo." 19 Mebalimi joo malaeka' nakua, "Aku'mo tee Jibrail, pesuro matappa'-Na Puang Allataala, disua mpauanko tee kareba kamarioan. 20 Apa ia to kupauanko la jaji ke wattunnami. La mamangko sajajinna joo, sanga te'da mukatappa'i." 21 Ia to tobuda ntajan bangmo Zakariya jio salean. Takkajanna' tuu lako tau, sanga gaja sainmi lan Bola Puang Allataala. 22 Na ia tonna messunmo Zakariya, tangnaissenmi mangkada. Mangkada tomamang bangmira lako tau, sanga mamangmi. Ta'pa naissenmi tobuda kumua mangkami ngkita pengkita makalaen-laen lan Bola Puang Allataala. 23 Ia tonna puramo to wattu mangjama lan Bola Puang Allataala, polemi Zakariya lako bolana. 24 Te'da namasai mangkanna joo, keba'tangmi Elisabet balinna, anna torro bang membuni jio bolana limang bulan. 25 Mangkadami nakua, "Iamo tee pangtulung-Na Puang Allataala lako kaleku', nata'dei to siri'ku'." 26 Ia tonna annanmo bulanna keba'tang Elisabet, nasuami Puang Allataala to malaeka' Jibrail male lako kota Nazaret, mesa' kota jio tana Galilea, 27 lako mesa' anakdara disanga Maryam, to dipasitangka'mo Yusuf, bati'na Raja Daud. 28 Ia tonna ratumo lako, mangbere sallangmi nakua, "Salama', nabarakka'imoko Puang Allataala narande pala'ko." 29 Sabakanni Maryam ssa'dingngi joo kadanna, natangngah-tangngahhi lan penawanna kumua apa battuananna joo passalama'. 30 Mangkadami joo malaeka' nakua, "Maryam, danggi' mumalaja', nasaba' napumasannangko Puang Allataala. 31 La keba'tangko ammujajian mesa' pea muane, na la musangaii Isa. 32 La mala'bihhi joo pea nadisanga Anak Allataala jao majaona. La naangka'i Puang Allataala menjaji Raja susi Raja Daud, tojolona. 33 Na la mparenta bati'na Yakub. Na ia to kadatuan-Na te'da cappa'na." 34 Mangkadami Maryam nakua, "Umbo nakua la jaji tuu, na anakdara unapa'?" 35 Mebalimi joo malaeka' nakua, "Roh Allataala la rratuiko na kuasan-Na Puang Allataala la torro ssolanko. Iamo joo namala'bih joo pea la jaji nadisanga Anak Allataala. 36 Parallu muissen, Elisabet to rapummu, annanmi bulanna keba'tang, moiraka nakua ngasanmo to tau tamanangngi, sanga matuami. 37 Te'da to apa tanglajaji napugauk Puang Allataala!" 38 Mangkadami Maryam nakua, "Ia tee aku' kaunannana' Puang Allataala. Ake'mo najaji lako kaleku', susi tuu mupau." Mangkai joo ta'demi joo malaeka'. 39 Mangkai joo malemi Maryam lako mesa' kota jio padang membuntunna tana Yudea. 40 Ia tonna ratumo lako, mentamami bolana Zakariya, namangbere sallang lako Elisabet. 41 Ia tonna sa'dingmi Elisabet to passalama'na Maryam, nakuasaii Roh Allataala, nata'pa pundiu to tau lan ba'tangna, 42 anna gumalasi Elisabet nakua, "Ee, ikomo baine to kaminang dibarakka'i to sininna baine! Dibarakka'i tooi tuu tau la mujajian! 43 Indara' tee, anna ratura indo-Na Puangku' ssikitanna'? 44 Kusa'dingna passalama'mu, pundiumi to tau lan ba'tangku', sanga kamarioanna. 45 Masannangko iko, nasaba' mukatappa'i kumua la jaji to apa napauanko Puang Allataala." 46 Mangkadami Maryam nakua, "Kupakala'bih to Puang Allataala, 47 na mariona', nasaba' Puang Allataala mpasalama'na'. 48 Naingaranna' dikka' aku' tokai'da'-i'da'! Mammula tee too nakua sininna tau kumua masannangna'. 49 Nasaba' Puang Allataala to makuasa mpupenjaji tauna'. Dipakala'bih sangan-Na! 50 Napangpekitanmi to kamamasean-Na lako mangpapa'-papa' bati' to ngkasiri'i. 51 Napangpekitanmi to kuasan-Na, Napasisarambui to tomajao penawanna, na tangjaji to pangtangngaranna. 52 Napamajiong to raja, anna te'damo namangparenta, Napaendek tuka'i to tokai'da'-i'da'. 53 Nabenni to totangbarah na sabarahna, na ia to tosugih nasua pole mangpala' lo'bang. 54 Natulungmiki' to to-Israel, taun-Na, situru' basse-Na lako tojolota'. 55 Naingaran bang Puang to basse-Na, mpangpekitan tarruh kamamasean-Na lako Nabi Ibrahim na lako ia sininna bati'na." 56 Torromi Maryam jio bolana Elisabet agi-agi tallung bulan, namane' pole lako bolana. 57 Nadete'mi allo kakeanakanna Elisabet, njajianmi pea muane. 58 Ia tonna sa'ding ngasanmi bali bolana sola rapunna to kamamasean-Na Puang Allataala, mariomi sola Elisabet. 59 Ia tonna karuamo allona jajinna joo pea, ratumi to tau la ssunna'i, nalassangaii Zakariya, susi sanganna ambe'na. 60 Apa mangkadai to indona nakua, "Tangngia! La disanga ia Yahya." 61 Mangkadami tuu lako tau nakua, "Te'da rapummi mpusangai joo sanga." 62 Iamo joo nabenni tau tanda to ambe'na, ngkutanai apara la disanganni joo anakkana. 63 Mpeta'dami batu dinii mangnguki' nauki'i, "La disangai Yahya." Jangngah ngasanmi to tau. 64 Ta'pa mangkadami ambe'na mpakala'bih Puang Allataala. 65 Malaja' ngasanmi to bali bolana, na ia ngasan tau ncuritai joo kareba jio sininna membuntunna tana Yudea. 66 Padami tossa'dingngi, mangpikkiri'i nakua, "Ba'tu la umbo ia susinna joo pea keanu'?" Nasaba' pajan, kumua narande pala'i Puang Allataala. 67 Nakuasaii Roh Allataala joo ambe'na Nabi Yahya napaui to pepasan-Na Puang Allataala nakua, 68 "Tapakala'bihhi to Puang Allataala, Puangta' kita' to-Israel, sanga ratumi ntulungki' anna la'bakki'. 69 Nabenmiki' Tomangpasalama' to makuasa, bati'na Raja Daud, taun-Na. 70 Susi to pura napau Puang Allataala tonna anu', napatarruhhi nabin-Na to pura napilei kumua, 71 la napasalama'ki' jio mai ewalinta', na jio mai kuasanna to tongkaba'ciki'. 72 Nampangpekitanmo kamamasean-Na lako tojolota', naingaranmi to basse mala'bih-Na. 73 Massapahmo lako Nabi Ibrahim, ambe' tojolota', kumua la napasalama'ki' jio mai ewalinta', anna te'damo tamalaja' ssompai, 75 antapangben kaleta' lako Puang, napumasannangngi penawan-Na, padapi tanii tuo. 76 Ee anakku', la disangako nabin-Na Puang, to Puang Allataala makuasa. Disuako njoloan Puang, la mpasadianni lalan naola, 77 la mpangpeissenanni lako umma'-Na, kumua la dipasalama'mi, ke nadampanganmi Puang Allataala. 78 Mamase na manana' Puangta'. Ratumi la mpasalama'ki'. Susi to allo ollong ke makale' 79 la nnarrangngi sininna tau, to tuo lan kamalillinan na kamalajatan. Napatujuki' lako lalan to nanii kasikalinoan." 80 Samatonggo-tonggona na saendek-endekkena toomi sumanga'na tee anakkana Zakariya. Torromi jio padang pallawangan, sanadete'na wattunna mpangpekitan kalena lako to-Israel.

Lukas 2

1 Ia joo wattu napangparentanmi Tomaraja Agustus anna sininna tau lan kaparentan Roma mpangpeukiran sanganna la dibilang. 2 Mane'na tee nadipugauk mbilang tau, na ia joo wattu Kirenius mangparenta jio propinsi Siria. 3 Ia joo wattu pole ngasan to tau lako kampongna la diuki' sanganna. 4 Susi toomi Yusuf male jio mai kota Nazaret jio tana Galilea, lako kota Betlehem jio tana Yudea, kota kajajianna Raja Daud, nasaba' Yusuf bati'na Raja Daud. 5 Malemi Yusuf la mpangpeukiran sanganna sola Maryam, sitangka'na, to mbawamo banda'. 6 Ia tonna jiomo kota Betlehem sola dua, nadete'mi wattu kakeanakanna Maryam. 7 Njajianmi pea muane, anak pamungahna, nakalemu'imi, napamamma'i jiong kandean olok-olok susi issong londe to nanii jarame, sanga te'damo ngenan nanii mangbongi. 8 Ia joo bongi, den ba'tu pira-pira tomangrewa torro bang jio tangnga padang salean kota, njagai bembala'na. 9 Ta'pa denmi malaeka'-Na Puang Allataala mpapajan kalena, naarrangngi arrang kamala'biran pole jio mai Puang Allataala nnarrangngi tuu lako tomangrewa, na liwa' simalajatan. 10 Apa mangkadai joo malaeka' nakua, "Danggi' mimalaja'! Ratuna' mpauan kamu' kareba to mpamasannang sininna tau. 11 Ia tee allo jajimi to Tomangpasalama'mi jio kotana Raja Daud. Iamo Almaseh, Puang. 12 Iamo tee buttinna, la nnampa' kamu' mesa' pea dikalemu'i na dipamamma' jiong kandean olok-olok." 13 Ta'pa buda omi malaeka' laen mellao jao mai suruga ssolanni, nampakala'bih Puang Allataala nakua, 14 "Pakala'bih Puang Allataala to makuasa jao suruga! Sikalino to tolino to napumasannang!" 15 Ia tonna polemo tuu lako malaeka' de' suruga, sipangkada-kadami tuu lako tomangrewa nakua, "Tamale lako kota Betlehem ngkitai joo apa jaji, to napauanki' Puang Allataala." 16 Naparri-parrimi male, anna ampa'i to Maryam sola Yusuf, na ia joo pea mamma' jiong kandean olok-olok. 17 Ia tonna kitami joo pea, nacuritami to apa mangka napauanni malaeka'. 18 Jangngah ngasan to tau ssa'ding curitanna. 19 Napallan penawa ngasanni Maryam joo curita, natangngah mandalan tonganni. 20 Pole ngasanmi tuu lako tomangrewa mpakala'bih Puang Allataala, nasaba' padami to apa nakita, nasa'ding, susi to apa mangka napauanni malaeka'. 21 Ia tonna karuamo allona jajinna joo pea, disunna'mi nadisangai Isa. Iamo to sanga napauanni malaeka' to indo-Na, tonna te'dapa nakeba'tanganni. 22 Nadete'mi wattunna Yusuf sola Maryam la mpugauk atoran kadipamaceroan, situru' atoranna Nabi Musa. Ia joo wattu malemi sola dua mbawai joo pea lako kota Yerusalem, napangngoloi lako Puang Allataala, 23 nasaba' den diuki' lan atoran-Na Puang Allataala kumua, "Sininna to pea muane pamungah, la dipangngolo lako Puang Allataala." 24 Male tooi sola dua la mpangkaroban sangpasang bu'ku ba'tu dua anak jangan-jangan, susi to dipattantu lan atoran-Na Puang Allataala. 25 Ia joo wattu, den tau disanga Simeon torro jio kota Yerusalem. Tomelo penawa joo tau na ngkasiri' Puang Allataala, ntajan bang wattunna Puang Allataala la mpasalama' to-Israel. Nakuasai bang Roh Allataala. 26 Mangkamo napauan Roh Allataala kumua, te'dapa nalamate, ke te'dapi nakitai to Raja Mangpasalama' to napau jolo Puang Allataala. 27 Ia tonna bawai Yusuf sola Maryam to Puang Isa lako Bola Puang Allataala, la mpugaukki to apa napangparentan atoran agama, nasolanni Roh Allataala to Simeon lako. 28 Naalami Simeon joo pea, napawara'i, anna pakala'bih Puang Allataala, nakua, 29 "Oo Puang! Tapupembuttimo kadan-Ta' tee too. Ake'mo kumate rampa'mo, 30 nasaba' kukitamo to Tomangpasalama' taparatu, 31 to tapasadian lako sininna bangsa. 32 Iamo mpakanassai to pakkaeloran-Ta' lako bangsa tangngia to-Yahudi, na mpaden kamala'biran lako umma'-Ta' Israel." 33 Jangngahhi to tomatuan-Na ssa'dingngi to apa napau Simeon. 34 Nabarakka'imi Simeon sola tallu, namangkada lako Maryam indona joo pea nakua, "Napileimo Puang Allataala tee pea la ssabu'i sola la mpasalama' buda to-Israel. Iamo la menjaji tanda jio mai Puang Allataala to la naewa buda tau, 35 dikua anna kakitanan to apa lan penawanna tau. Na iko Maryam, la sikitako kamasussan, to la mpapolloh buammu susi pa'dang mataran." 36 Den omi nabi baine to gaja tuamo, disanga Hana, anakkana Fanuel, jio mai pangrapuanna Aser. Pitung taunni mangkanna botting, 37 namate muanena. Na ia tee wattu karuami pulona a'pa' taunna umuru'na. Te'da bang nasalai Bola Puang Allataala, massambajang na puasa ssompa tarruh Puang Allataala. 38 Ratu todai joo wattu, nampakala'bih Puang Allataala, anna mangcurita mpaui joo pea lako sininna tau to ntajan wattunna Puang Allataala lla'paran kota Yerusalem. 39 Ia tonna mangkamo Yusuf sola Maryam mpugauk ngasanni to atoran-Na Puang Allataala, polemi sola tallu re' kota Nazaret jio tana Galilea. 40 Ia joo pea samatonggo-tonggonami na memmawatang. Liwa' melo pangtangngaran-Na na napakamoja' tarruhhi Puang Allataala. 41 Taun oi, tuli male tomatuan-Na Puang Isa de' kota Yerusalem la mangrame-rame Allo Paskah. 42 Ia tonna sangpulo duamo taunna umuru'na to Puang Isa, malemi sola tomatuan-Na lako joo pangramean situru' kabiasanna. 43 Ia tonna mangkamo joo pangramean, polemi, apa torro bangpi Puang Isa jio kota Yerusalem na te'da naissenni tomatuan-Na. 44 Nasangai kumua malemi sola tau buda. Ia tonna sangngallomo lumingka, mane'ri naangah tomatuan-Na jio tangnga-tangngana rapunna sola sitanda-tandanna. 45 Apa te'da naampa'i. Iamo joo polemi de' kota Yerusalem nnangahhi. 46 Ia tonna tallung allomo, mane'ri naampa' cumadokko lan Bola Puang Allataala, mpesa'dingngi pangngajahna guru agama na sisulle to sikutana. 47 Jangngah ngasan to tau ssa'dingngi, sanga gaja macca na mandalan to pebalin-Na. 48 Moi to tomatuan-Na jangngah toda ngkitai. Nakuanmi indona nakua, "Ee mane, ammupasusirakan tee? Selang tonganmokan male nnangahko!" 49 Napebalimi Puang Isa nakua, "Oo, miangahna' pale'? Te'daraka miissenni kumua ia tee Aku' la jiona' bola-Na Ambe'-Ku' torro?" 50 Apa te'da napahangngi tomatuan-Na joo pebalin-Na. 51 Mangkai joo polemi Puang Isa sola tomatuan-Na re' kota Nazaret, namengkaturu' bang. Napallan penawa ngasanni indona to ianna joo. 52 Samatonggo-tonggonami Puang Isa, samandalan-dalanna pahang-Na, na sanapakamoja'-moja'na too Puang Allataala na sininna tau.

Lukas 3

1 Ia tonna sangpulo limamo taunna Tomaraja Tiberius mangparenta jio kaparentan Roma, na Pontius Pilatus menjaji gubernur jio tana Yudea, Raja Herodes mangparenta jio tana Galilea, Filipus sile'tona Raja Herodes mangparenta jio tana Iturea na tana Trakhonitis, na ia to Lisanias mangparenta jio tana Abilene. 2 Ia to menjaji Imang Lompo, Hanas na Kayafas. Ia joo wattu naparatui Puang Allataala to kadan-Na lako Nabi Yahya anakkana Zakariya jio padang pallawangan. 3 Jaji, malemi Nabi Yahya llelei tana to mengguririkkina Sa'dan Yordan mpangpeissenanni to Kareba Kasalamatan. Mangngajahhii nakua, "La mengkatoba' kamu' jio mai dosami, midijio', anna dampangan kamu' Puang Allataala." 4 Susi to diuki' lan sura'na Nabi Yesaya tonna anu' kumua, "Den tau metamba-tamba jio padang pallawangan nnajahhi tobuda kumua, 'Pasadianni lalan to Puang, ranteii to lalan la naola. 5 Ia to mellombokkona la dibumbun, na ia to membuntu-buntunna la dirantei. Ia to manglekko-lekkona la dipakaruruh, na ia to mengkalo'bong-lo'bongna la dibumbun. 6 La nakita ngasan tolino, kumua Puang Allataala mpasalama' tau.' " 7 Buda tau ratu lako Nabi Yahya mangpejio'. Nakuanni Nabi Yahya, "Ee, togaja' kamu', susi kamu' bati' ulah balu! Te'da mikullei mpalaian kalemi jio mai pangcalla-Na Puang Allataala to la ratu. 8 Iamo joo la mipangpekitan to panggaukan melomi mpamanassai kumua mengkatoba'mo kamu' jio mai dosami! Danggi' misangai, kumua te'damo miladicalla nasaba' bati'na kamu' Nabi Ibrahim. La mikatappa'i kumua, makuasa to Puang Allataala mpupenjaji bati'nai Nabi Ibrahim tee mai batu! 9 Sadiamo Puang Allataala la ncalla kamu', susi to garonto' kaju dipasadian wase jiong garonto'na la dita'banganni. Sininna garonto' kaju to te'da namembua melo la dita'bang nadica'bean tama api." 10 Mekutanami to tobuda lako Nabi Yahya nakua, "Ia ke susii joo, apamo la kipugauk?" 11 Mebalimi nakua, "Ia to tonnampui dua baju, la naben mesa' lako to te'da bajunna. Na ia to tonnampui kande la natawa-tawan tote'da kandena." 12 Ba'tu pira-pira passassung ratu toda lako Nabi Yahya la mangpejio'. Mekutanami nakua, "Ee, guru, apamo la kipugauk?" 13 Mebalimi nakua, "Danggi' peta'dai la'bi buda na ia to napattantumo tomangparenta." 14 Den too ba'tu pira-pira surudadu mekutana toda nakua, "Na ia tee kami', umbomo nakua, apara la kipugauk?" Mebalimi nakua, "Danggi' mipakario-rio tau, ba'tu miparukui mben kamu' doi'. Sukkuru'i bangmi to gajimmi!" 15 Ia joo wattu buda tau ntajanni to karatuan-Na Raja Mangpasalama' to nabasse jolomo Puang Allataala tonna anu'. Iamo joo ia to tobuda mangpikkiri' kumua, "Mbai na iamo Raja Mangpasalama' tee Nabi Yahya to masaimo ditajan." 16 Apa napauanni Nabi Yahya kumua, "Kujio' kamu' wai, nasaba' mengkatoba'mo kamu' jio mai dosami. Apa den tau la ratu ke mangkana' la njio' kamu' Roh Allataala na den too kamu' dijio' api pangcalla. La'bi makuasa Ia na aku'. Moi la mbukai ulang sapatun-Na, te'da too kusipato'. 17 Ia joo tau wa'ding dipangpasusii mesa' tau to sitoe ta'pian la nta'pii pangtambakkana. Ia to resa' malapuh, narempun melo lan pa'pak, apa ia to malangkona la nasumpun lan api dukku tarruh." 18 Susimi joo Nabi Yahya nnajahhi tobuda mpake mangrupa-rupa cara, tonna pangpeissenanni to Kareba Kasalamatan. 19 Apa nta'tan tooi Raja Herodes to mparenta tana Galilea, nasaba' malei mpubaine Herodias to bainena sile'tona, na budapa to panggaukan gaja' napugauk. 20 Iamo joo napangpetarungkuanni to Nabi Yahya. Susimi joo na rrangnganni pissen panggaukan gaja'na. 21 Ia tonna mangka ngasanmo tuu lako tau najio' Nabi Yahya, tonna te'dapa naditarungku, najio' toomi Nabi Yahya to Puang Isa. Ia tonna massambajangmo to Puang Isa, titimbakmi to langi', 22 namellao to Roh Allataala jao mai mangrupa jangan-jangan nta'paii. Namane' den gamaran-Na Puang Allataala disa'ding nakua, "Ikomo Anak-Ku' to kupakamoja', to mpamasannangna'." 23 Ia tonna agi-agi tallung pulomi taunna umuru'na Puang Isa, napamulami to jaman-Na. Ia to naissenna tau, Yusuf to pajajianna. Na ia to njajian Yusuf disanga Eli, 24 ia to njajian Eli disanga Matat. Ia to njajian Matat disanga Lewi. Ia to njajian Lewi disanga Malkhi. Ia to njajian Malkhi disanga Yanai. Ia to njajian Yanai disanga Yusuf. 25 Ia to njajian Yusuf disanga Matica. Ia to njajian Matica disanga Amos. Ia to njajian Amos disanga Nahum. Ia to njajian Nahum disanga Hesli. Ia to njajian Hesli disanga Nagai. 26 Ia to njajian Nagai disanga Maat. Ia to njajian Maat disanga Matica. Ia to njajian Matica disanga Simei. Ia to njajian Simei disanga Yosekh. Ia to njajian Yosekh disanga Yoda. 27 Ia to njajian Yoda disanga Yohanan. Ia to njajian Yohanan disanga Resa. Ia to njajian Resa disanga Zerubabel. Ia to njajian Zerubabel disanga Sealtiel. Ia to njajian Sealtiel disanga Neri. 28 Ia to njajian Neri disanga Malkhi. Ia to njajian Malkhi disanga Adi. Ia to njajian Adi disanga Kosam. Ia to njajian Kosam disanga Elmadam. Ia to njajian Elmadam disanga Er. 29 Ia to njajian Er disanga Yesua. Ia to njajian Yesua disanga Eliezer. Ia to njajian Eliezer disanga Yorim. Ia to njajian Yorim disanga Matat. Ia to njajian Matat disanga Lewi. 30 Ia to njajian Lewi disanga Simeon. Ia to njajian Simeon disanga Yehuda. Ia to njajian Yehuda disanga Yusuf. Ia to njajian Yusuf disanga Yonam. Ia to njajian Yonam disanga Elyakim. 31 Ia to njajian Elyakim disanga Melea. Ia to njajian Melea disanga Mina. Ia to njajian Mina disanga Matata. Ia to njajian Matata disanga Natan. Ia to njajian Natan disanga Daud. 32 Ia to njajian Daud disanga Isai. Ia to njajian Isai disanga Obed. Ia to njajian Obed disanga Boas. Ia to njajian Boas disanga Salmon. Ia to njajian Salmon disanga Nahason. 33 Ia to njajian Nahason disanga Aminadab. Ia to njajian Aminadab disanga Admin. Ia to njajian Admin disanga Arni. Ia to njajian Arni disanga Hezron. Ia to njajian Hezron disanga Peres. Ia to njajian Peres disanga Yehuda. 34 Ia to njajian Yehuda disanga Yakub. Ia to njajian Yakub disanga Ishak. Ia to njajian Ishak disanga Nabi Ibrahim. Ia to njajian Nabi Ibrahim disanga Terah. Ia to njajian Terah disanga Nahor. 35 Ia to njajian Nahor disanga Serug. Ia to njajian Serug disanga Rehu. Ia to njajian Rehu disanga Peleg. Ia to njajian Peleg disanga Eber. Ia to njajian Eber disanga Salmon. 36 Ia to njajian Salmon disanga Kenan. Ia to njajian Kenan disanga Arpakhsad. Ia to njajian Arpakhsad disanga Sem. Ia to njajian Sem disanga Nuh. Ia to njajian Nuh disanga Lamekh. 37 Ia to njajian Lamekh disanga Metusalah. Ia to njajian Metusalah disanga Henokh. Ia to njajian Henokh disanga Yared. Ia to njajian Yared disanga Mahalaleel. Ia to njajian Mahalaleel disanga Kenan. 38 Ia to njajian Kenan disanga Enos. Ia to njajian Enos disanga Set. Ia to njajian Set disanga Adam. Na ia to mpaden Adam Puang Allataala.

Lukas 4

1 Ia tonna polemo Puang Isa jio mai Sa'dan Yordan nakuasaimi Roh Allataala, namale lako tangnga padang pallawangan, situru' pangpatujun-Na Roh Allataala. 2 Torromi jio patang pulo bonginna, napengkulle-kullei Ballisi' ssedei. Te'da bang nakumande to Puang Isa, arannai tangbarah. 3 Napengkulle-kullei Ballisi' ssedei mpugauk dosa nakua, "Suai tee batu menjaji kande, sanga Anak Allataalako." 4 Mebalimi Puang Isa nakua, "Den diuki' lan Sura' Allataala kumua, 'Tangngia kande manda to la naputuo tau.' " 5 Nasolan omi Ballisi' to Puang Isa de' ngenan majao, napakitanni sangkappidian mata to sininna kaparentan lan lino. 6 Mangkadami nakua, "Sininna joo kaparentan sola kamala'biranna la kuben ngasanko, nasaba' diben ngasanmo', nawa'ding kupangben lako to tokukabudai. 7 Sininna joo la mupuapa, ke musompana'." 8 Mebalimi Puang Isa nakua, "Den diuki' lan Sura' Allataala kumua, 'La ssompako Puangmu, Puang Allataala, na Ia manda to la mupu-Puang.' " 9 Nabawa pole' omi Ballisi' to Puang Isa de' kota Yerusalem, anna solanni de' bubungan Bola Puang Allataala nakuanni, "Polloranko kalemu, sanga Anak Allataalako. 10 Te'da muciapa, nasaba' den diuki' lan Sura' Allataala kumua, 'La nasuai Puang Allataala to malaeka'-Na la njagaiko. 11 La natimangko, na moi aje-Mu te'da nalatitampah lako batu.' " 12 Mebalimi nakua, "Den diuki' lan Sura' Allataala kumua, 'Danggi' muuji Puangmu, Puang Allataala.' " 13 Ia tonna mangkamo to Ballisi' mpengkulle-kullei ssede Puang Isa, malemi ssalaii na ntajan pole' o wattu melo. 14 Mangkai joo, nakuasaimi Roh Allataala to Puang Isa napole re' tana Galilea. Kaissenanmi to karebanna lan lili'na tana Galilea. 15 Mangngajahhimi lan bola passambajangan, napakala'bih ngasanni tau. 16 Malemi Puang Isa lako kota Nazaret to dinii mpelobohhii. Ia tonna Allo Katorroan, susi kabiasanna, malei tama bola passambajangan. Ke'dehmi la mbaca Sura' Allataala, 17 nadiben sura'na Nabi Yesaya. Naballahhi, naampa'i tee aya' nabacai kumua, 18 "Nakuasaina' Roh Allataala, nasaba' naangka'mo' la mpangpeissenan Kareba Kasalamatan lako tokaasi-asi. Nasuamo' mpangpeissenan kadila'paran lako toditarungku, mpapakita tobuta, lla'paran todipandasa. 19 Nasuamo' mpangpeissenanni kumua wattun-Namo Puang Allataala mbarakka'i umma'-Na." 20 Mangkai joo nalulun pole'mi joo sura' napapolei lako to tonnannai, nacumadokko la mangngajahhi. Mengkita ngasanni to tau lako Puang Isa lan bola passambajangan. 21 Napamulami mangngajahhi nakua, "Ia tee aya' misa'ding, jajimi tee too." 22 Liwa' makassing to kadan-Na. Iamo joo nasijangngaran to tossa'dingngi napujii, anna mangkada nakua, "Umbo nakua anna gaja allusu' to apa napau!" Apa mangkai joo nakua omo, "Tanganakkanaraka Ia Yusuf!" 23 Mangkadami Puang Isa nakua, "Tantu den kamu' la mikua lako Aku' mpake sambenan kada susi tee, 'Ee, tomangjampi! Pamalagahhi kalemu.' Battuananna: ia ke tonganko nabi, la mupugauk tooi ntee kampongmu to tanda mejangngaran kisa'ding mupugauk jio kota Kapernaum." 24 Mpatarruhhi kadan-Na nakua, "La miingaran tee kadang-Ku' kumua, te'dapa ia naden nabi dikasiri' jio kampongna! 25 La miingaran kumua, ia tonna linona Nabi Elia tonna anu', napebarrangan tallung taun sitangnga, anna karorian la'da' ngasan to tondok. Ia joo wattu buda baine to matemo muanena jio tana Israel. 26 Apa moi nasusi joo, ia to Nabi Elia te'da nasuai Puang Allataala male ntulung sala mesa'na mesa' joo baine to matemo muanena jio tana Israel, apa disuari ntulung mesa' baine to matemo muanena jio kota Sarfat jio tana Sidon. 27 Susi unai tonna linona Nabi Elisa tonna anu', buda tau masolak jio tana Israel, na te'da bang moi mesa' tau dipamalagah, apa Naaman manda joo to-Siria." 28 Ia tonna sa'dingngi joo kadan-Na Puang Isa, magalli ngasan to tau lan joo bola passambajangan. 29 Sike'deranmi, naula'ii to Puang Isa lako salean kota, nasolanni lako randan awa' jao buntu, to nanii kota Nazaret. Nasangai la nasumbananni do' awa'. 30 Apa naola tangngai to tobuda, anna tarruh male. 31 Mangkai joo, malemi Puang Isa lako kota Kapernaum jio tana Galilea. Na ia tonna Allo Katorroan nnajahhi tau jio bola passambajangan. 32 Gaja jangngah to tossa'ding pangngajah-Na, nasaba' matongko ke mangkadai. 33 Den tau ntuu jio bola passambajangan natamai setang, anna metamba-tamba nakua, 34 "Oo, Puang Isa, to-Nazaret, la mupatumbamorakan? Raturokoka la ssabu'ikan? Kuissen kumua indaroko. Ikomo pesua mattantun-Na Puang Allataala!" 35 Nagarra'i Puang Isa joo setang nakua, "Kamma'ko, messunko lan mai tee tau!" Napessambakanni setang joo tau jio olona tobuda, namane' messun, apa te'da napa'dikkii. 36 Jangngah ngasanmi to tobuda nasipangkada-kada nakua, "Takkajulu' to kadan-Na! Matongko na makuasa mparentai to setang messun namessun tongan." 37 Kaissenanmi to karebanna Puang Isa lan joo kota na mengguririkkina. 38 Mangkai joo, messunmi Puang Isa lan mai joo bola passambajangan, anna male lako bolana Simon. Makula' kalei to indo matuanna Simon. Iamo joo nameta'da tulung to tau lako Puang Isa. 39 Malemi lako sa'dena, nagarra'i joo kula' kale nakua, "Messunko." Ta'demi to kula'na, nata'pa mi'cok mpasadianni kande to toratu. 40 Ia tonna la kabuhmo allo, budami tau ratu mbawa sininna repokkona to mangrupa-rupa sakinna lako Puang Isa. Pada nakaka'i tuu lako tomasaki namalagah ngasan. 41 Nnula'i tooi setang lan mai buda tau. Ia tuu lako setang messun lan mai tau ntandai Puang Isa anna metamba nakua, "Anak Allataalako!" Apa nagarra'i Puang Isa joo setang, na te'da naeloranni mangkada, nasaba' naissen setang kumua Raja Mangpasalama' to Puang Isa. 42 Masawanna tonna ollongmo allo messunmi Puang Isa lan mai joo kota, namale lako pallawangan. Apa ia to tobuda male nnangahhi, na ia tonna ampa'mi, meta'dai lako danggi' namale ssalaii. 43 Apa mebalii Puang Isa nakua, "Ia to Kareba Kasalamatan kumua la ratumi Puang Allataala mangparenta susi Raja, la kupangpeissenan too jio kota laen, nasaba' iamo nasuanna' Puang Allataala mentama lino." 44 Iamo joo, namale Puang Isa llelei bola passambajangan mangngajahhi jio tana Yudea.

Lukas 5

1 Den pissen nake'deh Puang Isa jio randan Tasik Genesaret. Sisi'pin-si'pin tongan to tobuda la mpesa'dingngi kadan-Na Puang Allataala. 2 Ngkitami dua lopi to Puang Isa torro jio randan tasik, na ia to pangjalana mellao ngasanmi mpemaceroi jalana. 3 Endekki to Puang Isa de' lopinna Simon, napeta'dai anna bisei ci'di' jio mai randan tasik. Mangkai joo cumadokkomi lan lopi nnajahhi tobuda. 4 Ia tonna mangkamo mangngajahhi, nakuamo lako Simon, "Bise lakoi mandalanna, ammupembuanganni jalamu la njokko bale." 5 Napebalii Simon nakua, "Oo Guru, sangbongi bangmokan bo'jo' tongan mangjala, na te'da bang bale kiampa'! Apa melomi kumangjala pole', nasaba' tasuana'." 6 Ia tonna buangmi to jalana jio mandalanna, nnalami bale gaja buda, na ia to jalana ci'di'mora naca'ce. 7 Iamo joo nako'bi'i to solana jio lopi laen naratu mbalii. Ratu ngasanmi to solana mbalii, napatamai dua lopi joo bale, na ci'di'mora nakaran. 8 Ia tonna kitami Simon Petrus joo apa jaji, mengguntu'mi jio olo-Na Puang Isa ssuju'i anna mangkada nakua, "Oo Puang, melo ke tasalaimo', nasaba' tomadosana' dikka' tee!" 9 Mangkadai Simon susi joo sanga jangngahhi namalaja' too sola solana ngkitai joo kabudanna bale naala. 10 Susi too to solana Simon, iamo to Yakub na Yahya anakkana Zebedeus. Nakuamo Puang Isa lako Simon, "Danggi' mumalaja'! Mammula tee too te'damo mumangjala bale. La kubenko jaman baru nnajahhi tau anna menjaji tonturu'na'." 11 Ia tonna rui'mi Simon sola solana joo lopinna lako randan tasik, nasalai ngasanni, namale nturu' Puang Isa. 12 Den pissen najio mesa' kota to Puang Isa. Den mesa' muane masolak na maloo' tonganmo. Ia tonna ngkitamo Puang Isa, suju'mi jio olo-Na, anna mengkamase-mase nakua, "Oo Puang, ia ke melohki', manassa kumua makuasaki' mpamalagahna'." 13 Nne'te'mi liman-Na Puang Isa, nakaka'i nakua, "Melohna', malagahmoko!" Ia joo wattu ta'pa melomi to kalena. 14 Napangnganggai Puang Isa ncuritai joo kajajian lako tau laen, nakuanni, "Maleko lako imang jao kota Yerusalem, mupeta'dai napattantui kumua malagah tonganmoko. Mumane' mpugauk tooi to karoba kamalagaranmu situru' atoranna Nabi Musa, namenjaji butti lako sininna tau." 15 Apa moi nasusi joo, ia to karebanna Puang Isa satitaleh-talehnamo, na gaja buda tau ratu mpesa'dingngi ke mangngajahhii. Natuli ratu too to tomasaki meta'da lako Puang Isa anna dipamalagah. 16 Mangkai joo male omi Puang Isa massambajang jio padang pallawangan. 17 Den pissen, tonna mangngajahhi Puang Isa, naden toda ba'tu pira-pira to-Farisi sola guru agama cumadokko jio. Denni to ratu jio mai kampong lili'na tana Galilea na tana Yudea na den too to ratu jio mai kota Yerusalem. Kuasan-Na Puang Allataala napake to Puang Isa, anna mpamalagah tomasaki. 18 Naden tau ratu mbulle mesa' tokupi' dipamamma' bang jiong ampahna. Nnangah lalan umbo nakua la mbawai tama bola lako Puang Isa. 19 Te'da nakullei, nasaba' liwa' budanna tau. Iamo joo, nannola jio pelalan endek de' dea bola, natimbakki to dea, namane' rroroanni sola ampahna do' olo-Na Puang Isa lan tangnga tobuda. 20 Ia tonna issenmi Puang Isa matumba kamatapparanna tuu lako tau, mangkadami lako joo tokupi', nakua, "Ee todipusile'to, didampanganmoko." 21 Pada mangkada lanni penawanna joo guru agama sola to-Farisi nakua, "Indara ia tee tau? Gaja barani Ia mpapada Puang Allataala kale-Na! Te'da tau wa'ding ndampangan tomadosa, saliwanna Puang Allataala." 22 Apa naissen Puang Isa apa to lan penawanna tuu lako guru agama sola to-Farisi. Iamo joo nakuanni, "Apara to mipikkiri'? 23 Umbonnara marawa, dikuaraka, 'Didampanganmoko', ba'tu dikuaraka, 'Ke'dehmoko mulumingka.' 24 Apa ia tee wattu la kupakitan kamu', kumua makuasana' Aku', Anak Mentolino, ndampangan tomadosa lan tee lino. Iamo joo kukua lako tee tokupi', 'Ke'dehmoko, angka'i tuu ampahmu, mupole.' " 25 Ta'pa ke'dehmi jio olona tobuda, naangka'i to ampahna napole mpakala'bih Puang Allataala. 26 Jangngah ngasan tuu lako tau anna mpakala'bih Puang Allataala. Silajatan ngasanni nakua, "Liwa' mejangngaran to apa takita tee allo!" 27 Mangkai joo messunmi Puang Isa, na ngkita mesa' passassung disanga Lewi cumadokko lan kantoro'na. Nakua Puang Isa lako, "Maleko mai, nturu'na', kupuanak guruko!" 28 Ta'pa ke'dehmi, napatorroi to jamanna, anna male nturu'i. 29 Ia tonna mangkamo joo, mangmaroah-roahmi Lewi jio bolana ntoratu Puang Isa. Buda passassung na tolaen nasolan kumande. 30 Tangmasannang to ba'tu pira-pira to-Farisi sola guru agama, to nturu' toda pangngajaranna to-Farisi, anna kutanaii to anak gurun-Na Puang Isa nakua, "Ciapari mikumande sola passassung na totangnturu' atoran agama?" 31 Mebalimi Puang Isa nakua, "Ia to tomalagah te'da naparallu tomangjampi, apa to tomasakira mparallui tomangjampi. 32 Te'da kuratu la ntulung tossanga kalena tomelo, apa ratura' ntulung tomadosa, dikua namengkatoba' jio mai dosana." 33 Den tau nakua lako Puang Isa, "Ianna anak gurunna Nabi Yahya sola anak gurunna to-Farisi, tuli puasa na massambajang, apa ianna anak gurun-Ta' kumande bang ia namangngiso'." 34 Mebalimi Puang Isa nakua, "Wa'dingraka misua to toratu puasa jio pangmaroasan tobotting, ke sola unapi tobotting muane? Tantu te'da! 35 Apa la den wattunna na la diala jio mai tangnga-tangngana joo tobotting muane, iamo to Aku'. Ia joo wattu, mane'ri puasa tuu lako tau, iamo tee anak gurung-Ku'." 36 Nacuritanpa Puang Isa tee pangpasusian nakua, "Te'da tau nca'cean baju baru napangtampiranni lako baju maluse. Nasaba' la mangca'ceanni joo baju baru na ia to kaen petampih baru te'da namelo dikita jio baju maluse. 37 Susi toomi joo, te'da tau mpatama anggoro' baru tama pangpanian malusemo to dikabua' jio mai balulang. Nasaba' ia namangkamburamo joo anggoro' baru, tiba'tui joo pangpanian malusemo, natibaku to anggoro'. Jaji la sajang duai joo anggoro' sola pangpanianna. 38 Ia to anggoro' baru, la dipatama todapi pangpanian baru. 39 Na te'damo tau madoang nniso' anggoro' baru ke biasami nniso' anggoro' masaimo, nasaba' nakua, 'la'bi melo ia to anggoro' masaimo.' "

Lukas 6

1 Den pissen tonna Allo Katorroan nannola jio bara'bah gose' Puang Isa, na ngge'te gose' to anak gurun-Na. Naridii jiong pala'na natiboi. 2 Ba'tu pira-pira to-Farisi mpasalai nakua, "Ciapari na te'da mituru'i to atoran agamanta', ammipugaukki to dipemalian dipugauk ke Allo Katorroan?" 3 Mebalimi Puang Isa nakua, "Tantu mibacamo to apa napugauk Daud, tonna tangbarahmo sola surudadunna. 4 Mentamami bola to dinii ssompa Puang Allataala, naalai nakandei to roti dipangngolo lako Puang Allataala, naben tooi to surudadunna. Nasitonganna, ianna situru' atoran agamanta', imang manda ia to wa'ding ngkandei joo roti." 5 Nakua unapa Puang Isa, "Puangnana' Allo Katorroan tee Aku', Anak Mentolino. Jaji, makuasana' mpattantui apa to wa'ding dipugauk ke Allo Katorroan." 6 Ia tonna Allo Katorroan laen omo, malemi Puang Isa mangngajahhi jio bola passambajangan. Ntuu jio den mesa' tau to mate sangbali limanna. 7 Ba'tu pira-pira guru agama sola to-Farisi la nnangah bang kasalanna Puang Isa anna wa'ding mparapa'i. Jaji, napesa' tarruhhi kumua ba'tu la mpamalagahhi tau ke Allo Katorroanni. 8 Apa naissen Puang Isa to lan penawanna tuu lako tau. Iamo joo nakuanni joo tomate sangbali limanna, "Maleko mai, mujenjen lan tangnga." Ke'dehmi, najenjen. 9 Mekutanami Puang Isa lako joo tompesa'i nakua, "Ianna situru' atoran agama, apara to wa'ding tapugauk ke Allo Katorroan? Manggauk meloraka, ba'tu manggauk gaja'raka? Mpasalama'riki'ka padanta' rupa tau, ba'tu mbunoriki'ka padanta' rupa tau?" 10 Mengkitami Puang Isa lako sininna tau, namane' ngkuanni joo tomate sangbali limanna, "E'te'i tuu limammu!" Nae'te'mi to limanna, namelo pole'mo. 11 Gaja galli tuu lako guru agama sola to-Farisi anna sipangkadaii, apa to la napugauk lako Puang Isa. 12 Mangkai joo, malemi Puang Isa de' buntu la massambajang. Massambajangmi jao siupuh bongi lako Puang Allataala. 13 Ia tonna mariwangmo, nasuai ratu to tomenturu' lako kale-Na anna pileii sangpulo dua to nasangai rasulu', iamo to: 14 Simon (to nasanga too Petrus), na Andreas to sile'tona, Yakub na Yahya, Filipus na Bartolomeus, 15 Matius na Tomas, Yakub anakkana Alfeus na Simon (to disanga too tobarani), 16 Yudas anakkana Yakub na Yudas Iskariot to undinna mpangpejokkoan Puang Isa. 17 Ia tonna solohmo Puang Isa sola anak gurun-Na jao mai buntu, kendenmi jio padang malappa. Buda tau to menturu'mo lako kale-Na sirempun ntuu jio na buda too tau ratu jio mai lili'na tana Yudea, kota Yerusalem, na kota Tirus sola kota Sidon jio randan tasik. 18 Ia tuu lako tau ratu la mpesa'dingngi pangngajah-Na Puang Isa, na la dipamalagah jio mai mangrupa-rupa sakinna. Ia to tonatamai setang ratu too nadipamalagah. 19 Napengkulle-kullei ngasan tuu lako tau ngkaka' Puang Isa, nasaba' den kuasa messun lan mai kale-Na mpamalagah tau. 20 Nakitami Puang Isa to tomenturu' lako kale-Na namangkada nakua, "Masannang kamu' tokaasi-asi, nasaba' kamu'mo umma'-Na Puang Allataala. 21 Masannang kamu' to tangbarah tee too, nasaba' la dipebarahhi kamu'. Masannang kamu' to kumarrak tee too, nasaba' la metawa kamu'! 22 Masannang kamu', ke dikaba'ci kamu', ke diula'i kamu', ke dicacca kamu', sola ke disanga kamu' togaja', nasaba' mituru'na' Aku', Anak Mentolino. 23 Susi todamo joo napugauk tojolona joo tau lako tuu lako nabi tonna anu'. Ia ke susii joo, la masannang kamu' mimenari', nasaba' buda pahalami jao suruga. 24 Apa macilaka kamu' to sugih, nasaba' mangkamo miampa' to kamasannangan lan kasugiranmi. 25 Macilaka kamu' to barahmo tee too, nasaba' la tangbarah kamu'. Macilaka kamu' to metawamo tee too, nasaba' la masse penawammi mikumarrak. 26 Macilaka kamu', ke napakala'bih kamu' tau, nasaba' susi toomo napugauk tojolona tuu lako tau mpakala'bih nabi tangtongan tonna anu'." 27 Mangngajahhimi Puang Isa nakua, "Kupasan kamu', to mpesa'dingngi kadang-Ku'! Susi tee, pakamoja'i to ewalimmi, mimanggauk melo lako to ngkaba'ci kamu'. 28 Barakka'i to tontampakki kamu' ropu. Passambajanganni to tompakario-rio kamu'. 29 Ia ke den tau ssala'pa popomu sangbali, patananan pissenni to sangbalinna. Ianna den tau rrampa baju landomu, ma'namo naala tooi to bajummu. 30 Ia ke den tau mpeta'dai kamu' apa, benni to napeta'da. Na ia ke apammi dirampa, danggi'mo mipeta'da pole'i. 31 Pugaukki lako padammi rupa tau, to apa mikadoangngi la napugauk lako kalemi. 32 Ia ke mipakamoja'i to tompakamoja' kamu', apara kala'bianmi? Moi tomadosa mpakamoja' too to tompakamoja'i. 33 Ia ke mpugauk kamu' kameloan lako tompugauk melo lako kalemi, apara kala'bianmi? Moi tomadosa napugauk tooi susi joo. 34 Na ia ke mpangpeindanan kamu' doi', apa lako manda towa'ding mbajah pole'i, apara kala'bianmi? Moi tomadosa sipaindanan, sanga nakatappa'i kumua la natarima pole' pada to napangpeindanan. 35 Te'da na la susi joo! Sibalikanna, pakamoja'i to ewalimmi, na la manggauk melo kamu' lako kalena. La mangpaindan kamu', na danggi'mo mitajanni to polena. Ia ke susii joo, la buda to pahalami, na la menjaji kamu' anak Puang Allataala Jao Majaona. Nasaba' melo to penawan-Na Puang Allataala lako totangnnissen mangkurru sumanga' na tomanggauk gaja'. 36 Mamase kamu', susi Ambe'mi Puang Allataala mamase!" 37 Mangpangngingaranmi Puang Isa nakua, "Danggi' mipasala padammi rupa tau, anna danggi' napasala kamu' Puang Allataala. Danggi' mimangcacca, anna danggi' nacacca kamu' Puang Allataala. Dampanganni to tolaen, anna dampangan toda kamu' Puang Allataala. 38 Mangpabengan kamu' lako tolaen, anna ben toda kamu' Puang Allataala. La naben kamu' buda, susi ke mpake pesuka' melo, to dirodo, ditemme', na diboncoi too. Nasaba' ia to pesuka' misukatan tau, la napake too Puang Allataala ssuka' kamu'." 39 Nacuritan pole'pa Puang Isa tee pangpasusian nakua, "Ia ke pada tobuta sirenden, manassa la melolinni ia do' garuang. 40 Ia to mesa' passikola te'da nala'bi matande na gurunna. Apa ia ke tamma'mi melajah, la menjaji padami gurunna. 41 Ciapari mikitai to bulicak lan matanna padammi rupa tau, anna kaju sangbatang lan matammi te'da misa'dingngi? 42 Umbo la mikua mangkada lako padammi rupa tau, 'Ee mane! Ake'mo na aku' nnalai tuu bulicak lan mai matammu', anna kaju sangbatang lan matammi te'da mikitai? Ee, tomajekkong! Alaii jolo' to kaju sangbatang lan matammi! Ianna macoramo pengkitanmi, mane'ra kamu' kullei nnalaii to bulicak lan mai matanna padammi rupa tau." 43 Mangngajahhimi Puang Isa nakua, "Te'da ia to kaju melo buanna mpaden bua gaja'. Susi toomi to kaju gaja' buanna, te'da nampaden bua melo. 44 Buanna dinii ntandai to kaju. Pangngala duri te'da namembua ara, na duri kamban te'da namembua anggoro'. 45 Ia to tomelo penawanna, la melona ia to napau, nasaba' kameloan manda lan penawanna. Na ia to togaja', gaja'na bangra napau, nasaba' kagajatan manda lan penawanna. Nasaba' apa lan penawanna tau, iamo napau timu." 46 Mangngajahhimi Puang Isa nakua, "Ciapari mipekapuangngina', apa te'da mipugaukki to apa kupauan kamu'? 47 Indara to wa'ding dipasusianni to toratu lako Aku' napesa'dingngii tee kadang-Ku', anna pugaukki? Melo ke kupauan kamu'. 48 Ia joo tau dipasusi to tolangkabua' bola, napemandalanni ngkali padang, anna kabua' pondasi jao batu. Wattunna saba' to wai sa'dan ratu ntumpai joo bola, te'da natigesu' jio ngenanna, nasaba' dipake'dehhi jao pondasi batu. 49 Apa ia to tossa'ding kadang-Ku', na te'da napugaukki, iamo dipasusi to tau mpake'deh bola, te'da napajaoi pondasi batu. Wattunna saba' to wai ratu ntumpai, ta'pa ro'pokmi!"

Lukas 7

1 Ia tonna mangkamo Puang Isa mpau ngasanni joo lako tobuda, malemi tama kota Kapernaum. 2 Den kamandang surudadu Roma ntuu jio, na den kaunanna to gaja napakamoja'. Masakii joo kaunanna nalamate mandami. 3 Ia tonna sa'dingmi to karebanna Puang Isa, ssuami ba'tu pira-pira pekaamberan to-Yahudi namale mpeta'dai lako Puang Isa, anna ratu jio bolana mpamalagahhi joo kaunanna. 4 Ia tonna sitammumo Puang Isa, memmasei nakuanni, "Ee Puang, sipato' tatulung joo kamandang, 5 nasaba' nakamaseiki' to kita' to-Yahudi, nakabuatankan bola passambajangan." 6 Malemi Puang Isa sola joo tau. Ia tonna mandoppi'mo bolana joo kamandang, ssuami solana mpauanni nakua, "Oo, Puang! Danggi'mo tabojo'i bang kale-Ta' male lako bolaku'. Te'da kusipato' la ntarimaki' jio bolaku'. 7 Iamo joo na te'da too kusipato' ssitammuanki'. Jaji, mangkada bangmiki', napumalagahhi to kaunanku'. 8 Nasaba' ia tee aku' tonturu'na' parentana tomparentana', na den toda surudadu kuparenta to nturu' parentaku'. Ia angkusuai to surudadu kumua, 'Maleko!', nang la malei, na ia angkukua lako to laenna, 'Maleko mai!' nang la ratui. Na ia angkusuai to kaunanku' kumua, 'Pugaukki tee!' nang la napugaukki ia." 9 Jangngah Puang Isa ssa'dingngi joo kadanna. Messailemi anna mangkada lako tobuda to undi nturu'i nakua, "La miingaran! Liwa' matappa' tee tau! Te'dapa tau kuampa' kamatapparan susi tee, moi lan tangnga-tangngana to-Israel." 10 Ia tonna polemo lako bolana kamandang joo todisua, malagahmi joo kaunanna. 11 Tangmasai mangkanna joo, malemi Puang Isa sola anak gurun-Na lako kota Nain, na buda too tau undi nturu'i. 12 Ia tonna mandoppi'mo lako babangan kota, denmi tau mbulle tomate messun lan mai kota. Ia joo tomate, mesa' pea muane, anak tungga'na mesa' baine to matemo muanena. Buda pangtondokan ssolanni to indona joo pea. 13 Ia tonna kitami Puang Isa joo baine, massemi penawan-Na nakuanni, "Ee indo', danggi' takumarrak!" 14 Nakandoppi'mi Puang Isa joo bullean nakaka'i. Kenden ngasanmi to tomamulle. Mangkadami nakua, "Ee, mane, mi'cikko!" 15 Mi'cikmi na cumadokko joo pea muane tuo pole'mo anna mangkada-kada. Nasolanmi Puang Isa lako indona. 16 Malaja' ngasanmi tuu lako tau na mpakala'bih Puang Allataala nakua, "Denmo mesa' nabi tonggo lan tangnga-tangngata'. Ratumi Puang Allataala mpasalama' umma'-Na!" 17 Kaissenanmi to karebanna Puang Isa jio lili'na tana Yudea na mengguririkkina. 18 Napauanni anak gurunna Nabi Yahya sininna to apa mangka jaji. Mangkai joo natambaimi Nabi Yahya to dua anak gurunna, 19 anna suai male ngkutanai Puang Isa kumua, "Kita'moraka Raja Mangpasalama' to kitajan, ba'tu la ntajanpakan tau laen?" 20 Malemi sola dua lako Puang Isa nakua, "Nasuakan gurungki' mekutana lako kita', 'Kita'moraka Raja Mangpasalama' to kitajan, ba'tu la ntajanpakan tau laen?' " 21 Ia joo wattu napamalagah Puang Isa to mangrupa-rupa sakinna tau, nnula'i buda setang na mpapakita buda tobuta. 22 Iamo joo napebalii nakua, "Polemo kamu' mipauanni gurummi apa to mikita sola misa'ding: pakitamo to tobuta, lumingkamo to tokupi', dipamalagahmo to tomasolak, pasa'dingmo to tomataru, dipatuo pole'mo to tomate, na Kareba Kasalamatan dipangpeissenanmo lako tomakario-rio. 23 Masannang tongan to tau tangmenassan ntarimana'." 24 Ia tonna polemo to pesuanna Nabi Yahya, napamulami Puang Isa mpaui lako tobuda to Nabi Yahya nakua, "Apara male mikita jio padang pallawangan? Te'da mimale ngkita sanglambah reu nairi' angin. 25 Apara male mikita? Tomangpakean balloraka? Te'da too, sanga ia to tau mangpakean susi joo na kala'bian, torro lanri ia salassa'! 26 Jaji, apara male mikita? La ngkitara kamu'ka nabi? Tongan. La miingaran kumua, la'bipa ia na nabi. 27 Nasaba' Nabi Yahyamo to mpasadia tau la ntarimana'. Susi to diuki' lan Sura' Allataala mpau Nabi Yahya kumua, Mangkadai Puang Allataala, 'Iamo tee pesuang-Ku', to kusua la njoloanko, anna pemakassingngii to lalan la muola!' " 28 Nakuapa Puang Isa, "Ingaranni, lan tee lino te'da tau la'bi mala'bih na Nabi Yahya, apa moi nasusi joo, ia to tokaminang majiong jio mai umma'-Na Puang Allataala, la'bi mala'bihpa ia na Nabi Yahya." 29 Sininna tobuda mpesa'dingngi kadan-Na Puang Isa, susi toomi to passassung, napada nnakui kumua tongan to Puang Allataala. Iamo joo napangpejioran kalena lako Nabi Yahya. 30 Apa ia to to-Farisi na guru agama cia'i ntarima akkatta-Na Puang Allataala to mpatu kalena, nacia'i najio' Nabi Yahya. 31 Mangkada pole' omi Puang Isa kumua, "Apara la kupasusianni tee tau too allo? Apara dipapadanni? 32 Susi to pea sicadokkoan jio pasa' mpetambanni to solana, 'Kipassulinganmo kamu', apa cia' kamu' menari'! Mpakkelonganmokan kelong kamasussan na te'da mimbating!' 33 Battuananna: ratumo to Nabi Yahya, napuasa na te'da naiso' anggoro', mikua ora kumua, 'Natamaii setang!' 34 Na ratu omo' Aku', Anak Mentolino, kukumande sola mangngiso', mikua omo kua, 'Kitai joo tomaullak, pangngiso', soba'na passassung sola togaja' sipa'na.' 35 Apa moi nasusi joo, mandalan tangngah to Puang Allataala, na ia to kamandalanan tangngah-Na napapajan sininna tonturu'i." 36 Den mesa' to-Farisi disanga Simon ntambai Puang Isa ratu kumande jio bolana. Malemi Puang Isa lako, nacumadokko kumande sola. 37 Den mesa' baine lan joo kota mpugauk bang panggaukan gaja'. Ia tonna sa'dingngi kumua ia to Puang Isa kumandei jio bolana Simon to-Farisi, malemi lako mbawa minynya'-minynya' lan bittolo' pualam. 38 Ia tonna ratumo lako, malemi ke'deh jio boko'-Na Puang Isa nakumarrak jio to' aje-Na, anna bosokkii wai matanna. Napa'dii beluakkana joo aje-Na Puang Isa, anna udungngi, namane' ntua'i minynya'-minynya'. 39 Ia tonna kitami Simon to-Farisi to apa napugauk joo baine, mangkadai lan penawanna, "Ia kenna la nabi tee tau, la naissen ia kumua tomatumbara joo baine ssapuii. Tantu la naissen kumua tomadosa!" 40 Nakuamo Puang Isa lako Simon to-Farisi, "Ee, Simon! Den la kupauanko." Napebalimi nakua, "Ie', tapauanmo' Guru." 41 Nakuamo Puang Isa, "Den mesa' tau mpangpeindanan doi'na lako dua tau. Mesa' to napaindanni lima ratuh dinar, na ia to mesa' limang pulora. 42 Ia joo tokaindanan sola dua pada tangnakullemo mbajah indanna. Melo penawanna joo to mpaindannii anna puttai bangmi to indanna. Jaji, indannara joo tau sola duai to la'bi la mpakamoja'i joo tompaindannii?" 43 Mebalimi Simon to-Farisi nakua, "Kusanga ia to budanna indanna diputtai!" Nakuamo Puang Isa, "Tongan tuu pebalimmu." 44 Mengkitami Puang Isa lako joo baine namangkada lako Simon to-Farisi nakua, "Kitari tee baine! Ratuna' inde' bolamu, te'da mupasadianna' wai la kubasean aje-Ku', apa ia tee baine nabasei to aje-Ku' wai matanna, namane' mpa'dii beluakkana. 45 Ia tongkumentama bolamu, te'da muudungna', apa ia tee baine nena'pa te'da bang natorroii nnudung aje-Ku'. 46 Te'da muminynyakkii to ulung-Ku', apa ia tee baine natua'i minynya'-minynya' to aje-Ku'. 47 La miingaran kumua, liwa' pangpakamoja'na, nasaba' didampanganmo ia, moi nabuda dosa napugauk! Ia to toci'di'ra dosana didampangan, la ci'di' toora pangpakamoja'na." 48 Nakuamo Puang Isa lako joo baine, "Didampanganmoko." 49 Ia tuu lako tonasolan Puang Isa kumande sipangkada-kadai nakua, "Indara ia tee tau nawa'ding ndampangan tomadosa?" 50 Apa nakua Puang Isa lako joo baine, "Dipasalama'moko, nasaba' mukatappa'ina'. Paela'-ela' bangmoko lako lalan!"

Lukas 8

1 Mangkai joo, malemi Puang Isa llelei buda kota sola kampong mpangpeissenan Kareba Kasalamatan kumua la ratumi Puang Allataala mangparenta susi Raja. Ia to sangpulo dua anak gurun-Na undi nturu'i. 2 Den ba'tu pira-pira baine undi too nturu'i. Den to mangka naula'i Puang Isa to setang lan mai kalena sola napamalagah jio mai sakinna. Susinna Maryam Magdalena to pitu setang napissenni naula'i lan mai kalena. 3 Susi too Yohana, bainena Khuza. (Ia to Khuza nnurusu' doi'na Raja Herodes.) Den tooi Susanna na ba'tu pira-pirapa baine laenna. Ia tuu lako baine pada mpasadia kaparalluanna Puang Isa sola anak gurun-Na mpake kasugiranna. 4 Te'da ka'tunna to tau male lako Puang Isa jio mai kota laen. Ia tonna budamo tau sirempun, mangngajahhimi Puang Isa mpake pangpasusian nakua, 5 "Den mesa' pangdusung male nnamboh banne. Ia tonna ambohmi, den to ta'pah do' lalan nasilesei tau, anna cappu'ii manuk-manuk. 6 Den too to ta'pah do' batu-batu to ci'di'ra litakkana. Ia tonna cumucukmo, madoi' bang malaju, nasaba' makase to litak nanii tuo. 7 Den too to ta'pah lan tangnga duri. Natuo sola, apa saloboh-lobohnami joo duri, nasirimpihhii joo tananan arannai mate. 8 Apa den too to ta'pah do' litak malompo. Maloboranmi, namembua manglokkon pessaratuh." Ia tonna mangkamo Puang Isa mangngajahhi naandongngimi gamaran-Na nakua, "Ingaranni to apa mangka misa'ding, sanga ketalinga kamu'!" 9 Napekutananmi anak gurun-Na Puang Isa apara battuananna joo pangpasusian. 10 Nakuamo Puang Isa mebali, "Dibenmo kamu' barakka' la nnissenni to apa tangnaissen tau kumua la ratui Puang Allataala mangparenta susi Raja. Apa ia to tau laen diajahhi mpake pangpasusian, dikua moi napemakitaii, apa te'da nakitai. Moi nada'tan bang mpesa'dingngii, apa te'da napahangngi." 11 Napauanmi Puang Isa battuananna joo pangpasusian nakua, "Ia to banne iamo to kadan-Na Puang Allataala. 12 Ia to banne ta'pah do' lalan dipasangrapangngi to tossa'ding kadan-Na Puang Allataala. Apa ratui to Ballisi' rrampai joo kada mangkamo nasa'ding, dikua anna danggi' namatappa' na te'da nadipasalama'. 13 Ia to banne ta'pah do' batu-batu dipasangrapangngi to tossa'ding kadan-Na Puang Allataala anna masannang ntarimai. Apa te'da natorro tongan lan penawanna. Te'da namasai matappa', nasaba' ianna den pecoba rratui, ta'pa balik pole'mi. 14 Ia to banne ta'pah lan tangnga duri dipasangrapangngi to tossa'ding kadan-Na Puang Allataala, apa mpuselangngi katuoanna. Madoang bangri la sugih mpusannang katuoan lan lino, to nni'pinni joo kada lan penawanna, anna te'da namembua melo. 15 Ia to banne tuo jio litak malompo dipasangrapangngi to tossa'ding kadan-Na Puang Allataala, napallan penawa meloi na maruruh penawanna, namatappa' tarruh sanggenna membua." 16 Mangngajahhimi Puang Isa nakua, "Te'da tau mpadukku palita nasamboii busu, ba'tu napajiongngi sulluk katindoan, apa napajaori ngenan palita, dikua naarrangngi to tau ke mentamai bola. 17 Te'da to membuninna tangladipangpekitan undinna, na te'da to tangdipaunna tangladipau anna kaissenan undinna. 18 Iamo joo ingaran meloi tee apa misa'ding. Nasaba' ia to tonnampuimo buda apa la dirangngannipa la'bi buda. Apa ia to totangnnampui apa, ia to apa ci'di'mora naampui, la dialai pissen." 19 Ia tonna mangkamo joo, ratumi indo-Na sola sile'to-Na Puang Isa, apa te'da nakullei sikita, nasaba' gaja buda tau ntalimbungngi to Puang Isa. 20 Denmi mesa' tau mpauanni nakua, "Oo Puang, jioi salean to indo-Ta' sola sile'to-Ta'. Madoangngi ssikitanki'." 21 Apa mebalii Puang Isa nakua, "Sininna to tau ssa'ding kadan-Na Puang Allataala napugaukki, iamo indo-Ku' sola sile'to-Ku'." 22 Den pissen naendek de' lopi to Puang Isa sola anak gurun-Na. Nakuanni, "Melo ke talamban lian sambali'na tasik." Malemi manglopi. 23 Ia tonna malemo manglopi lian, mamma'i to Puang Isa. Te'da namasai, ratumi to kalimpuru. Ia to lopinna natamaimi wai na la tallanmi. 24 Malemi to anak gurun-Na ntundanni nakua, "Oo, Guru, la tallanmiki'!" Mi'cokmi to Puang Isa nagarra'i to kalimpuru sola bombang. Radanmi to kalimpuru narapa' to tasik. 25 Nakuamo lako anak gurun-Na, "Ciapari na te'dara mikatappa'ina'!" Jangngah ngasanmi sola silajatanni nasipangkada-kada sikutana, "Indara ia sitonganna tee tau na moi angin sola bombang nturu' tooi to parenta-Na!" 26 Lambanmi Puang Isa sola anak gurun-Na lian tana Gerasa sambali'na Tasik Galilea. 27 Ntuu jio den mesa' tau jio mai kota to natamai buda setang. Masaimo tangmebaju na te'damo namadoang torro jio bola. Torro lan bangmira lo'ko' tomate. Pembudai nakuasai setang, anna moi dipumpung rante bassi to limanna sola ajena nadiampai bang, apa naka'tu-ka'tupa to pumpungna, na male ngkinjarasanni setang lako padang pallawangan. Ia tonna mellaomo Puang Isa jao mai lopi, ia joo tonatamai setang male mpessitammuii. Ia tonna kitami to Puang Isa, nakandoppi'mi nasuju' jio olo-Na, nnandongngi mangkada nakua, "Oo, Puang Isa, Anak Allataala to kaminang makuasa! La tapatumbamora' tee? Meta'dana', danggi' dikka' tacallana'!" Mangkadai susi joo, nasaba' nasuai Puang Isa joo setang messun lan mai kalena. 30 Nakutanaimi Puang Isa nakua, "Indara sangammu?" Mebalimi nakua, "Disangana' Legiun", nasaba' buda setang lan kalena. 31 Meta'dami tuu lako setang lako Puang Isa kumua, danggi' naula'i tamai posi' tana to gaja dalan. 32 Te'da namambela jio mai ntuu joo, den buda bai massumben jio sare buntu. Ia joo setang meta'da lako Puang Isa nakua, "Eloranmokan mentama ntuu lako bai." Natarimai Puang Isa joo peta'danna. 33 Messunmi joo setang lan mai joo tau, namentama bai. Sikinjarasanmi tuu lako bai jao mai awa', nampentujoan kalena do' tasik, anna makkan ngasan. 34 Ia tonna kitami tomangrewa bai joo apa jaji sikinjarasanmi male mpaui tama kota na kampong mengguririkkina. 35 Simessunanmi to tau ngkitai to apa mangka jaji. Ia tonna ratumo lako to nanii Puang Isa, nakitami joo todiula'i to setang lan mai kalena cumadokko jiong to' aje-Na Puang Isa mangpakeanmo, na melomo pangngingaranna. Malaja' ngasanmi tuu lako tau. 36 Ia joo tomangrewa ngkitai to apa jaji, ncuritanni umbo nakua joo setang messun lan mai joo tau. 37 Napeta'dami to-Gerasa lako Puang Isa kumua nasalaii joo tondok, nasaba' gaja laja'i. Endekmi de' lopi to Puang Isa nalamban pole' lian. 38 Ia joo todiula'i to setang lan mai kalena meta'dai lako Puang Isa la undi nturu'i. Apa nasuari Puang Isa pole nakua, 39 "Polemoko mupangpeissenanni to apa mangka napugauk Puang Allataala lako kalemu." Polemi joo tau, namale llingkai joo kota mpangpeissenanni to apa mangka napugauk Puang Isa lako kalena. 40 Ia tonna lamban pole' omo Puang Isa lian sambali'na tasik, marioi to tobuda ntammuii, nasaba' natajan tarruhhi. 41 Ratumi Yairus mesa' kapala bola passambajangan jio ntuu joo kota. Suju'mi jio olo-Na Puang Isa namengkamalah-malah tongan kumua namale lako bolana, 42 nasaba' la mate mandamo to mesa-mesanna anakkana baine umuru' sangpulo duamo taunna. Malemi Puang Isa lako bolana Yairus na gaja buda tau nturu'i ssisi'pin-si'pinnii. 43 Den mesa' baine to sangpulo duamo taunna maparri' tongan nasa'ding, nasaba' mecarepa tarruh bangngi. Puramo to ewananna nabaluk napake male mangpejampi lako dottoro', apa te'da nakullei mpamalagahhi. 44 Malemi mpendete'i Puang Isa jio mai boko'-Na, anna kaka'i to tampak baju lando-Na, nata'pa te'damo rara messun. 45 Mekutanami Puang Isa nakua, "Indara to ngkaka' baju lando-Ku'?" Te'da bang tau mangngaku, anna mangkada Petrus, "Oo, Puang! Liwa' buda tau ntalimbungki' nasisi'pin-si'pinniki'!" 46 Apa nakua Puang Isa, "Den tau ngkaka'na'. Kuissenni joo, sanga den kuasa messun lan mai kale-Ku'." 47 Ia joo baine mbe'behmi na malaja', nasaba' kaissenanni to apa mangka napugauk, anna suju' jio olo-Na Puang Isa. Napaui jio olona tobuda ciapari nakaka'i to tampak baju lando-Na Puang Isa, napau too kumua ta'pa te'damo rara messun joo wattu. 48 Nakuamo Puang Isa lako joo baine, "Ee, anak-Ku'! Malagahmoko, nasaba' mukatappa'ina'. Paela'-ela' bangmoko lako lalan." 49 Ia tonna mangkada unapa Puang Isa susi joo, ratumi mesa' todisua jio mai bolana Yairus. Nakua lako Yairus, "Danggi' omo tasussai tuu Guru male lako bola. Matemi to becce'ta'." 50 Ia tonna sa'dingngi Puang Isa joo kareba, nakuamo lako Yairus, "Danggi' mumalaja', matappa' bangmoko lako Aku', nang la salama' to becce'mu." 51 Ia tonna ratumo lako bolana Yairus, te'da tau laen naeloran mentama, saliwanna Petrus, Yahya, Yakub sola tomatuanna joo pea. 52 Sikarrakan to tau mbatingngii. Apa nakua Puang Isa ngkuanni, "Danggi' mikumarrak! Te'da ia namate, apa mamma'ri!" 53 Napetawa-tawaimi tau to Puang Isa, nasaba' naissen kumua matemi ia. 54 Natoemi Puang Isa to limanna joo pea namangkada nakua, "Ee becce', mi'cokko!" 55 Polemi sunga'na joo pea, nata'pa mi'cik. Nasuami Puang Isa to tau mbenni kande. 56 Jangngah to tomatuanna ngkitai joo kajajian. Apa naanggai Puang Isa kumua danggi' naden tau napauan.

Lukas 9

1 Natambaimi Puang Isa to sangpulo dua anak gurun-Na sirempun, nabenni kuasa nnula'i setang, na mpamalagah tomasaki. 2 Nasuami sola ngasan male mpangpeissenanni kumua la ratumi Puang Allataala mangparenta susi Raja, nasua tooi male mpamalagah tomasaki. 3 Napasanni kumua, "Ia ammimale, danggi' mibawa apa-apa, susinna tekken, ba'tu sepu', ba'tu kande, ba'tu doi', ba'tu baju duang lambah. 4 Ia to bola dinii ntarima melo kamu', jiomo kamu' torro sanggenna male pole' kamu' mpatarruh kalingkanmi. 5 Apa ia ammiratu lako mesa' kota, na te'da miditarima, salai joo kota, mipentambakanni to carepa jio ajemi, la mpangngingaranni tuu lako tau to kasalanna!" 6 Ia tonna mangkamo Puang Isa mbenni pepasan, malemi to anak gurun-Na mpasitarruh-tarruh kampong mpangpeissenanni to Kareba Kasalamatan. Na mpamalagah too tomasaki. 7 Ia tonna sa'dingngi Raja Herodes Antipas, to mparenta tana Galilea, to apa napugauk Puang Isa, tangrapa' penawanna nnawa-nawai. Nasaba' den to mpaui kumua tuo pole'mi to Nabi Yahya. 8 Den too tau kumua Nabi Eliara to mpangpekitan omo kalena. Den omo tau laen kumua den mesa' nabi tonna anu' tuo pole'mo. 9 Nakuamo Raja Herodes, "Ianna Nabi Yahya, mangkamo kupangpele'toan ulunna. Apa ia to Puang Isa, indara ia sitonganna? Gaja budamo kusa'ding to apa napugauk." Iamo joo napengkulle-kullei la mpessitammuii to Puang Isa. 10 Ia tonna polemo joo rasulu' jio mai kalingkanna, pada nacuritami lako Puang Isa to apa napugauk. Mangkai joo, napessalaii Puang Isa to tobuda, namale mesa sola to rasulu' lako kota Betsaida. 11 Apa naissen tobuda kumua malemi, naundi nturu'i. Napessitammuimi, namangngajahhi umbo nakua to tau menjaji taun-Na Puang Allataala lan kaparentan-Na. Napamalagah ngasan tooi to tomasaki. 12 Ia tonna la bongimi, malemi to anak gurun-Na ngkandoppi' Puang Isa nakuanni, "Oo Puang! La'bi melo ke tasuami tee mai tobuda namale nnangah ngenan pangbongian sola kande ntuu lako kampong sola tomangbara'bah mengguririkkita', nasaba' pallawangan tee tanii." 13 Apa napebalii nakua, "Kamu' ia to la mpakandei." Nakuamo to anak gurun-Na, "Limamora roti na duapa bale kiampui! La malerakanka nnallianni kande tee mai tau?" 14 Ia joo wattu den agi-agi limang sa'bu tau ke muane manda dibilang. Nakuamo Puang Isa lako anak gurun-Na, "Suami tee mai tau cumadokko silimangpulo tau sangtorroan." 15 Napugaukmi anak gurun-Na susi to disuanni. Ia tonna cumadokko ngasanmo joo tau sola ngasan, 16 naalami Puang Isa joo lima roti na dua bale, anna mentingngara de' langi', mangkurru sumanga' lako Puang Allataala. Namane' nti'pek-ti'pekki joo roti sola bale, nabenni anak gurun-Na anna tawa-tawanni to tobuda. 17 Kumandemi sola ngasan sabarahna. Ia tonna mangkamo kumande, napasirempunmi to torrona, ponnopa sangpulo dua baku'. 18 Den pissen namale Puang Isa torro mesa massambajang, anna ratu to anak gurun-Na lako joo nanii. Mekutanami Puang Isa nakua, "Ia ke pahangna tobuda, indara nasanganna'?" 19 Mebalimi nakua, "Den tau kumua Nabi Yahya, den too tau kumua Nabi Elia, na ia to laenna kumua sala mesa'na nabi tonna anu' to tuo pole'." 20 Mekutana pole' omi nakua, "Apa ia ke pahangmi, indara' tee?" Mebalimi Petrus nakua, "Kita'mo Raja Mangpasalama' to pura nabasse Puang Allataala." 21 Napakainga'mi Puang Isa to anak gurun-Na kumua danggi' naden tau napauan kumua Iamo Raja Mangpasalama'. 22 Nakuapa Puang Isa, "Ia tee Aku' Anak Mentolino, la gaja parri'na'. La naewana' pekaamberan to-Yahudi, kapala imang sola guru agama. La dibunona', apa ia ke allo mangpentallun, la dipatuo pole'na' jio mai kamatean." 23 Nakua omo Puang Isa lako tobuda, "Ia to tolanturu'na', te'da nalanturu'i bang pakkaeloran penawanna, apa allo-allo la mpassanni kaju sitambenna, naturu' tarruhna'. 24 Nasaba' ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na. 25 Apara bua'na lako tau ke naassang ngasanni tee lino, apa te'da naampa' katuoan melo te'da cappa'na? 26 Ia to tongkasirisanna' na te'da naakui to pangngajaran-Ku', la kukasirisan todai tee Aku', Anak Mentolino, ke ratuna' mpupangngarrang kamala'biran-Ku' to susi una kamala'biran-Na Ambe'-Ku' na kamala'biranna malaeka'-Ku'. 27 La miingaran! Sitonganna den kamu' to ntee, te'dapa namate ke te'dapi nakitai to Puang Allataala mangparenta susi Raja." 28 Agi-agi sangminggu mangkanna joo, nasolanmi Puang Isa to Petrus, Yahya na Yakub, namale de' buntu la massambajang. 29 Ia tonna massambajang unapa Puang Isa membalikmi rupan-Na, na ia to pakean-Na memmabuccang cumbia'-bia'. 30 Nata'pa den dua tau, iamo to Nabi Musa sola Nabi Elia, dikita lan arrang kamala'biran pole jao mai suruga. Nasipangkadaimi Puang Isa sola Nabi Musa na Nabi Elia to kamatean-Na Puang Isa to la jaji jao kota Yerusalem situru' akkatta-Na Puang Allataala. 32 Mamma'i Petrus, Yahya na Yakub, apa ia joo wattu ta'pa mi'cikmi nakitai to kamala'biran-Na Puang Isa na ia joo tau dua nasolan ke'deh. 33 Ia tonna la malemo joo tau sola duai ssalai Puang Isa, nakuamo Petrus lako Puang Isa, "Oo Guru, masannangki' ntee. Melo ke ngkabua'kan tallu bola-bola, mesa' tanii, mesa' nanii Nabi Musa, na mesa' nanii Nabi Elia." (Ia joo kada napau punala bangri Petrus, te'da naissenni patunna.) 34 Ia tonna mangkada unapa Petrus ratumi to saleu' mbombonnii sola ngasan. Na ia tonna samboimi saleu', silajatanmi to anak gurun-Na. 35 Denmi gamara nasa'ding lan mai saleu' nakua, "Iamo tee to Anak kupilei. Pesa'dingngii!" 36 Ia tonna te'damo disa'ding joo gamara, nakitami mesa-mesamira Puang Isa ntuu jio. Ia tuu lako anak gurun-Na pada kamma' bangngi joo wattu, na te'da naden tau napauan to apa mangka nakita. 37 Masawanna, tonna solohmo Puang Isa jao mai buntu sola joo tallu anak gurun-Na, siratuan omi to tau buda lako kale-Na. 38 Denmi mesa' muane nnandongngi mangkada lan tangnga-tangngana tobuda nakua, "Oo Guru, takamaseina' dikka'! Takitapi joo anak tungga'ku'! 39 Ia ke natamai omi joo setang, metamba-tamba tongan natisintak-sintak to kalena sanggenna mangkambura-bura to kasolena. Te'da namessun joo setang ke te'dapi nasessa tonganni dikka'! 40 Kupeta'damo lako anak gurun-Ta' kumua naula'ii joo setang, apa te'da nakullei." 41 Mebalimi Puang Isa kumua, "Takkaliwa' ngasan kamu' tee! Tangmatappa' sola sala lalan tee tau too allo! Piranpara masainna la kunii torro, to la minii mpa'dikki penawang-Ku'? Bawai mai tuu anakkamu!" 42 Ia tonna mandoppi'mo joo pea lako Puang Isa, napessambakanmi setang natisintak-sintak to kalena. Apa nagarra'i Puang Isa joo setang, naula'i lan mai joo pea. Napamalagahmi Puang Isa joo pea, namane' solanni lako ambe'na. 43 Jangngah ngasan tuu lako tau, nasaba' kuasan-Na Puang Allataala. Ia tonna jangngah bang unapa tuu lako tau ntangngahhi sininna to mangka napugauk Puang Isa, nakuamo lako anak gurun-Na, 44 "Pesa'dingngii mituli nningaranni tee kadang-Ku'! 'Ia tee Aku' Anak Mentolino, la dipangbenna' lako kuasanna tolino.' " 45 Te'da napahangngi anak gurun-Na joo kadan-Na, apa malaja'i ngkutanaii. Dibuniananni joo lako kalena, dikua anna danggi' napahangngi. 46 Site'gehhi to anak gurun-Na Puang Isa kumua indannari to kaminang mala'bih. 47 Apa naissen Puang Isa apa to lan penawanna. Iamo joo naalami to pea biccuk, napajenjenni jio sa'de-Na. 48 Mangkadami lako anak gurun-Na nakua, "Ia to tontarima pea to susi tee, sanga kamatapparanna lako Aku', pada bang unamo to Aku' natarima. Na ia to tontarimana', natarima toomo to Puang Allataala to ssuana'. Nasaba' ia to tossanga kalena kaminang biccu' jio tangnga-tangngami, iamo kaminang matonggo!" 49 Nakua Yahya mangkada, "Oo Guru, den tau kikita nnula'i setang mpau sangan-Ta', angkianggaii, nasaba' te'da namenturu' lako kita'." 50 Apa nakua Puang Isa ngkuanni, "Danggi' mianggaii, nasaba' ia ke te'da naewaliki', battuananna iamo solata'." 51 Ia tonna la madoi'mo Puang Isa diangka' de' suruga, nakuamo, "La malena' de' kota Yerusalem." 52 Nasuami to ba'tu pira-pira tau njoloanni. Malemi joo todisua namentama mesa' kampong to-Samaria la mpasadianni kaparalluan-Na Puang Isa. 53 Apa ia to tau lan joo kampong te'da namadoang ntarimai to Puang Isa, nasaba' naissen kumua la male de'i kota Yerusalem. 54 Ia tonna issenni Yakub sola Yahya kumua te'da natarimai to-Samaria to Puang Isa, nakuanmi, "Oo, Puang! Wa'dingraka kipeta'da api jao mai langi' nasabu'i to tau lan joo kampong?" 55 Apa messailei Puang Isa nagarra'i joo anak gurun-Na. 56 Ia tonna mangka joo, malemi lako kampong laen. 57 Ia tonna mpatarruhmo kalingkan-Na Puang Isa sola anak gurun-Na, denmi mesa' tau mangkada lako Puang Isa nakua, "Oo Puang! La undina' nturu'ki' umbo-umbo taola!" 58 Mebalimi nakua, "Cinggallun den ia lo'ko'na, sola manuk-manuk den ia serangna, apa ia tee Aku', Anak Mentolino, te'da ngenan kunii mamma'." 59 Nakuamo Puang Isa lako mesa' tau laen, "Undiko nturu'na'." Apa nakua joo tau, "Oo Puang! Eloranpa' jolo' kupole llamun ambe'ku'." 60 Apa mebalimi nakua, "Ake'mo na tomatemora llamun tomatena. Apa maleko mpangpeissenanni kumua la ratumi Puang Allataala mangparenta susi Raja." 61 Den omi tau mangkada lako Puang Isa nakua, "Oo Puang! La undina' nturu'ki', apa eloranna' jolo' kupole lako bolaku' mpaui." 62 Apa nakua Puang Isa, "Ia to tau mangpamulamo manengko, apa messaile pole' opa lako boko', te'da nasipato' menjaji umma'-Na Puang Allataala."

Lukas 10

1 Mangkai joo napilei omi Puang Isa to pitung pulo tau laen to nturu'i, nasuai male sidua-dua njoloanni lako sininna kota sola kampong to la napangngujui. 2 Nakuanni, "Siririanmo to pare, apa ci'di'ra tomepare. Iamo joo peta'dai lako ampunna uma, nasua tau male mpepareanni. 3 Malemo kamu'! Kusua kamu' male susi bembala' mentama tangnga serigala. 4 Danggi' mibawa sepu' ba'tu tas, ba'tu sapatu. Danggi' mimasai sipangkada-kada tau jio tangnga lalan. 5 Ia ammimentama bola la mikua, 'Dennaa upa' nabarakka'i kamu' Puang Allataala!' 6 Ia ke den tau lan joo bola ntarimai to pangbarakka'mi la torroi lan joo bola. Ia ke te'da namadoang ntarimai, ake'mo na pole pole' joo pangbarakka'mi lako kalemi. 7 Ia ke ditarima kamu', danggi'mo mimellele-lele. Tarima meloi to kande naben kamu'. Nasaba' ia to tomangjama, sipato' ntarima sarona. 8 Ia ke mentama kamu' kota, natarima melo kamu' tau, la mikande apa to naben kamu'. 9 Pamalagahhi to tomasaki lan joo kota, mipangpeissenanni kumua, cingga'tu'mora naratu Puang Allataala mangparenta susi Raja. 10 Apa ia ke mentama kamu' kota, na te'da miditarima, messun kamu' mipangpeissenanni jio bata' kumua, 11 'Moi to carepa kotami le'ke' jio ajeki' kipentambakan too, la mpangngingaran kamu' to kasalanmi. Apa la miissen kumua cingga'tu'mora naratu Puang Allataala mangparenta susi Raja!' 12 Ingaranni! Ia ke Kiama'mi lino, la'bi nasessai Puang Allataala to tau lan joo kota na ia to to-Sodom!" 13 Mpatarruhhi kadan-Na Puang Isa nakua, "Macilaka kamu' to-Khorazim sola to-Betsaida! Buda tanda mejangngaran to mangka kupugauk jio kotami, apa te'dapa mimengkatoba'. Ia kenna la dipugauk joo tanda mejangngaran jio kota Tirus sola kota Sidon, masaimo mengkatoba' tuu lako tau jio, moi na bangsa tangngia to-Yahudi. La mangpakean kamasussan, napessamboran too au de' ulunna, sanga mpenassannii dosana. 14 Ia ke Kiama'mi lino, la'bi maringngan ia sessana to to-Tirus sola to-Sidon, na ia to sessami sola ngasan. 15 Na kamu' to-Kapernaum! Misangaraka la dipamatande kamu' ratu de' langi'? Te'da! Apa la dipembuangan kamu' do' ngenan kaminang majiong!" 16 Nakuamo Puang Isa lako tonturu'i, "Ia to tau mpesa'dingngi kamu', padamo to Aku' napesa'dingngi. Ia to tote'da natarima kamu', padamo to Aku' te'da natarimai. Na ia to totangntarimana', padamo to Puang Allataalara, to ssuana', te'da natarimai." 17 Gaja rioi tuu lako pitung pulo tonturu' Puang Isa tonna polemo jio mai to nanii male sidua-dua, anna kua, "Ee Puang, ia ke mpakekan sangan-Ta' nnula'i setang, naturu'mokan!" 18 Mebalimi Puang Isa nakua, "Den kukita Ballisi' polloh jao mai langi' susi palepa'. 19 Pesa'dingngii! Kubenmo kamu' kuasa miwa'ding ntaloi ulah bolong, singki'-singki', na la mitaloi ngasan too to kuasanna ewalimmi Ballisi', na te'da namangpanggaukan lako kamu'. 20 Moi nasusi joo, danggi' mimario nasaba' naturu'mo kamu' setang, apa la mario kamu', nasaba' diuki'mo to sangammi jao suruga." 21 Ia joo wattu mario tongan to Puang Isa, nasaba' nakuasaii Roh Allataala, nakua, "Oo Ambe', Puangna langi' sola lino! Mangkurru sumanga'na' lako Ambe', nasaba' ia ngasan joo tabunianan lako tomandalan pahangna sola tomacca, tapangpeissenanmo lako totangpaissen. Oo Ambe', iamo tapumasannang." 22 Nakuapa Puang Isa, "Sininna apa naben ngasanmo' Ambe'. Na te'da mesa' tau nnissenni to Anak, saliwanna Ambe'. Te'da too mesa' tau nnissenni to Ambe', saliwanna Aku' Anak, sola ia to tokupueloh kupaissenni." 23 Messailemi Puang Isa lako anak gurun-Na, napauan mesai kumua, "Masannang kamu', nasaba' mikitamo to mikitanna tee too. 24 La miingaran! Buda nabi sola raja tonna anu' madoang la ngkitai to apa mikita tee too, apa te'da nakitai. Madoang too la ssa'dingngi to apa misa'ding tee too, apa te'da nasa'dingngi." 25 Mangkai joo, denmi mesa' guru agama la nnakkalanni Puang Isa, naden lalan nanii mpasalai. Malemi lako, nakua, "Oo Guru! Apara to sipato' la kupugauk, angkuampa' katuoan melo te'da cappa'na?" 26 Mebalimi nakua, "Apara to diuki' lan atoranna Nabi Musa? Umbora nakua pahangmu joo?" 27 Nakuamo mebali joo guru agama, "Ie'. La mpakamoja' tonganki' Puangta' Puang Allataala, situru' canning atinta', sininna kapaissenanta' na sininna kapakulleanta' ratu lako ssalainta' lino na mpakamoja' tooki' padanta' rupa tau, susi ke mpakamoja'ki' kaleta'." 28 Mebalimi nakua, "Tongan tuu pebalimmu. Pugaukmi, ammuampa' katuoan melo te'da cappa'na." 29 Apa cia'i masiri' joo guru agama, namekutana nakua, "Indara to padangku' rupa tau?" 30 Mebalimi Puang Isa mpake pangpasusian nakua, "Den mesa' muane male jao mai kota Yerusalem mangnguju do' kota Yerikho. Natammuii parampo' jio tangnga lalan, narampai to pakeanna sola sininna apanna, namane' nggasa'i na ci'di'mora namate. Mangkai joo nasalai bangmi. 31 Denmi mesa' imang nnola ntuu jio. Ia tonna kitami joo todirampo', lambanni lako sambali'na mpessalai, namane' tarruh. 32 Den toda to-Lewi, tomangjama lan Bola Puang Allataala, nnola ntuu jio. Ia tonna kitami joo todirampo', lamban todai lako sambali'na mpessalai, namane' tarruh. 33 Apa denni to-Samaria, to mambela lalan, nnola ntuu toda jio. Ia tonna kitai joo todirampo', massemi penawanna. 34 Malemi ngkandoppi'i, nabasei anggoro' to kojongna, najampii minynyak, namane' mba'ba'i. Napade'i keledainna, nabawai lako bola pangbongian, naparakai meloi. 35 Masawanna joo naalanmi dua dinar, nabenni to ampu bola pangbongian, napasanni nakua, 'Parakai meloi tee tau. Ianna te'da naganna' tuu doi', ratu pole'pa' kumane' mbajahki'.' " 36 Natampakkimi Puang Isa joo curitan-Na nakutanaii joo guru agama, "Ia ke iko, umbonnara tee tau tallu to ssangai padanna rupa tau joo todirampo'?" 37 Mebalimi joo guru agama nakua, "Ia to tongkamaseii joo todirampo' anna tulungngi." Nakuamo Puang Isa, "La mupugaukki susi joo!" 38 Malemi Puang Isa mpatarruh kalingkan-Na sola anak gurun-Na, namentama mesa' kampong. Denmi baine jio disanga Marta ssuai naratu lako bolana. 39 Ia joo Marta den sile'tona disanga Maryam. Ia joo Maryam cadokko bang siandah Puang Isa mpesa'dingngi pangngajah-Na. 40 Apa ia joo Marta naparri-parri ntoratui. Malemi lako Puang Isa nakua, "Oo Puang, antakamma' bangra Kita' na te'da bang napuinawai Maryam mbaliina'? Ke wa'dingngi, takuanni nabalii unamo', dikka'!" 41 Mebalimi Puang Isa nakua, "Ee Marta, buda bang to mupuselang sola mupikkiri'. 42 Na mesa'ra ia to gaja parallu. Napileimo ia Maryam joo kaminang melo, iamo to mpesa'dingngi kadan-Na Puang Allataala, na te'damo na la dialai."

Lukas 11

1 Den pissen namale Puang Isa massambajang. Ia tonna mangkamo, ratumi mesa' to anak gurun-Na mangkada nakua, "Oo Puang, ajahhikan massambajang susi Nabi Yahya nnajahhi anak gurunna." 2 Nakuamo Puang Isa lako anak gurun-Na, "Ia ammimassambajang, la mikua susi tee, 'Oo Ambe', Dennaa upa' na sininna tau mpakala'bihki', anna tarima parenta-Ta'. 3 Benkan kande to kiparalluinna keallo-keallo. 4 Dampangankan, nasaba' kidampangan tooi to tokasalan lako kaleki'. Danggi' taelorankan ta'de kamatapparanki' ke disedekan mpugauk kasalan.' " 5 Nakuapa Puang Isa lako anak gurun-Na, "Ia ke denko male tangnga bongi lako bolana solamu mukua, 'Ee, mane, paindannipa' rotimmu tallu, 6 nasaba' den soba'ku' leppang jio bolaku', na te'damo kande la kubenni!' 7 Ia ke mebalii joo solamu lan mai bolana kumua, 'Danggi' musussaina'. Mangkamo' llacak bolaku' na mamma'mo sola anakkaku'. Te'damo kulami'cok mbenko tuu mupeta'danna.' 8 Apa kukuan kamu' kumua, moi na te'da namadoang mi'cok mbenko to mupeta'danna nasaba' solamu, apa la mi'cokki ia mbenko to apa muparallui, ke te'dai mumasiri' ndadu'-dadu' bangngi meta'da. 9 Iamo joo kukuan kamu': Peta'dai lako Puang Allataala to miparalluinna, ammidiben. Angahhi to miparalluinna, ammiampa'i. Peta'dai ammidiben, susi to tomangdedek la ditimbakan bola. 10 Nasaba' ia to tometa'da lako Puang Allataala, la diben, na ia to tonnangahhi, la naampa', na ia to tomangdedek la ditimbakan bola. 11 Te'da kamu' to ambe' mben ulah anakkana, ke meta'dai bale, 12 ba'tu nabenni singki'-singki', ke meta'dai talloh. 13 Jaji, moi mitogaja', la miissen mbenni to melona lako anakkami, apa pole' to Ambe'mi Puang Allataala jao suruga la mben kamu' Roh Allataala ke meta'da kamu'!" 14 Den pissen nannula'i setang Puang Isa lan mai tomamang. Ia tonna messunmo ta'pa mangkadami joo tau. Jangngahmi to tobuda. 15 Apa den to mangkada nakua, "Kuasanna Beelzebul, iamo to puanggawana setang, napake nnula'i setang." 16 Den too tau laen madoangngi la ssedei to Puang Isa. Meta'dai anna pugauk tanda mejangngaran, la mpamanassai kumua ia to kuasan-Na pole jio tongan mai Puang Allataala. 17 Apa naissen Puang Isa to napikkiri' tuu lako tau. Namangkada nakua, "Ia ke denni mesa' kaparentan nasiricuan bang to taunna na te'da namesa' penawa, tantu te'da namasai nalanynya'. Susi todami to tosangbola, ke te'da namesa' penawa, tantu te'da namasai nasisarak-sarak. 18 Mikua kumua nakuasaina' kuasanna Beelzebul, iamo to puanggawana setang, angkuwa'ding nnula'i setang. Apa ia ke la nakuasaina' puanggawana setang nnula'i setang laen, battuananna sirarii pada setang, anna manassa te'da namasai nalanynya' to kaparentanna. 19 Mikua kumua kuasanna Beelzebul kupake nnula'i setang. Ia ke la susi joo, kuasa pole umbora napake anak gurummi nnula'i setang? Ia to napugauk anak gurummi mpangpepajananni kumua tosala kamu'! 20 Apa ia ke mpakena' kuasan-Na Puang Allataala nnula'i setang, battuananna kumua ratumi Puang Allataala mangparenta susi Raja lan tangnga-tangngami. 21 Ia joo puanggawana setang wa'ding dipasangrapang mesa' tomawatang. Ia ke naampai to bolana mpake sininna parewa kapararian, salama' to ewananna. 22 Apa ia ke denni to la'bi mawatang ratu rrarii, nataloi, manassa kumua la naalai ngasanni joo parewa kapararian narannuan, narampai to ewananna natawa-tawai. 23 Ia to tote'da namenturu' lako Aku', iamo nnewana'. Na ia to tote'da nabaliina', iamo nggaja'-gaja' jaman-Ku'!" 24 Nakuamo Puang Isa, "Ia namessun to setang lan mai tau, malei llelei padang pallawangan nnangah ngenan la nanii kenden, apa te'da naampa'i. Iamo joo nakua, 'La pole pole'na' lako to bola mangka kusalai!' 25 Ia tonna ratumo lako, mapaccing na marappi toomi. 26 Malemi ntambai pitu setang laenna, to la'bi masa'ga' pole' opa na ia. Napentamaimi joo tau, natorro lan. Mangkatampakanna la'bi masussa pole' opa joo tau, na ia tonna jolona." 27 Ia tonna mangkada unapa Puang Isa susi joo, denmi mesa' baine nnandongngi mangkada lan mai tangnga-tangngana tobuda nakua, "Liwa' masannangna to baine njajianki' na mpacucuki'!" 28 Apa mebalimi Puang Isa nakua, "La'bi masannang pole' opa to tompesa'dingngi kadan-Na Puang Allataala napugaukki!" 29 Ia tonna sitalimbungngii tau to Puang Isa, mpatarruhmi kadan-Na nakua, "Takkaliwa' gaja' tee tau too allo. Napeta'dai kumua la kupakitanpi tanda mejangngaran, namane' la ngkatappa'ina'. Apa ia manda tanda la dipakitanni susi to apa jaji lako Nabi Yunus. 30 Susi Nabi Yunus menjaji tanda lako to-Niniwe, susi toomi tee Aku', Anak Mentolino, la menjaji tanda lako tee tau too allo. 31 Ia ke Kiama'mi lino, ia to raja baine lo' mai pollo'na wai la dipatuo pole' sola to tau too allo la mpasalai. Nasaba' ia joo raja baine mambela naola ratu la mpesa'dingngi pangngajahna Raja Sulaiman to mandalan tangngah. Apa denni lan tangnga-tangngami tee too to la'bi mala'bihpa na Raja Sulaiman! 32 Na ia ke Kiama'mi lino, ia to to-Niniwe la dipatuo pole' sola to tau too allo la mpasalai, nasaba' mengkatoba' ia to to-Niniwe tonna sa'dingmi to pangngajahna Nabi Yunus. Apa denni lan tangnga-tangngami tee too to la'bi mala'bihpa na Nabi Yunus! Moi nasusi joo te'dapa mikatappa'ii to kadan-Na." 33 Nakua omo Puang Isa, "Te'da tau mpadukku palita nabuniananni ba'tu nasamboii busu. Apa napajaori ngenan palita dikua naarrangngi to tau ke mentamai bola. 34 Ia to mata penawa dipasangrupa lampunna kale. Ianna makassing to mata penawammi, manassa la nnissen kamu' pangngajaran tongan jio mai Puang Allataala. Apa ianna tangmelo to mata penawammi, manassa te'da mipahangngi to pangngajaran tongan. 35 Iamo joo jagai anna danggi' napamalillinni Ballisi' to mata penawammi. 36 Ia ke naarrangngi Puang Allataala to mata penawammi sanggenna te'da pangngajaran tongan jio mai Puang Allataala to te'da miissenni, melo ngasan to katuoanmi, susi bola ke naarrangngi lampu." 37 Ia tonna mangkamo Puang Isa mangkada susi joo, denmi to-Farisi ssuai naratu kumande jio bolana. Malemi Puang Isa lako, nakumande jio. 38 Jangngahmi joo to-Farisi ngkita Puang Isa kumande, nasaba' te'da nabasei limanna jolo', situru' atoran agama, namane' kumande. 39 Iamo joo namangkada Puang Isa nakua, "Ee kamu' to-Farisi! Ia ammibasei isotan ba'tu kandean, saleanna manda mibasei, apa lanna liu carepa unapa. Susimi joo, ia to ada' wa'ding nakita tau mituru' tongan, apa lan penawammi buda kagajatan sola kamadoangan rrampa apanna tau. 40 Tobango' kamu'! Te'da na batang kalemi manda napaden Puang Allataala, apa Ia too mpadenni to penawammi. 41 Pangbenni jolo' to penawammi lako Puang Allataala, namane' ia to panggaukanmi situru' ngasan pakkaeloran-Na Puang Allataala. 42 Macilaka kamu' to to-Farisi! Ia to assele' tanananmi to tangkeangga'na susinna tulasi, kunyi', na rampa-rampa laen miben sangtawa sangpulona lako Puang Allataala, apa te'da mipugaukki to kamarurusan sola pangpakamoja' lako Puang Allataala. Na iara joo to kaminang parallu mipugauk, apa la mipugauk too to laenna. 43 Ee to-Farisi, tomacilaka kamu'! Gaja mikabudai cumadokko jio olo lan bola passambajangan, na madoang bang ditaratte' jio pasa'. 44 Tomacilaka kamu'! Nasaba' susi kamu' lamunan te'da pasukkuna, to nasilese-lesei tau, nasaba' te'da naissenni kumua lanna liu ponno buku tomate to mecarepan." 45 Denmi mesa' guru agama mangkada lako Puang Isa nakua, "Oo Guru! Ia tuu kadan-Ta' mpakasiri' todakan!" 46 Nakuamo Puang Isa, "Ee, guru agama, tomacilaka too kamu'! Nasaba' mikabua' to atoran tangnakulle tau mpugaukki, apa kamu' bang una te'da mitulungngi to tau matumba carana la mpugaukki. 47 Tomacilaka kamu'! Nasaba' mipemellongngi pole' to lamunanna nabi, to mangka nabuno tojolomi. 48 Ianna susi joo, mitonganan kumua mikabudai to apa napugauk tojolomi, sanga tojolomi mbuno nabi na mipemellongngii to lamunanna. 49 Iamo joo napattantui Puang Allataala kumua, 'La kuparatuanni nabi sola rasulu', denni to la nabuno, na den tooi to la nasessa.' 50 Iamo joo la dipabalahhi keanu' to tau too allo nasaba' panggaukanna tojolona mbuno nabi sipammula dipadenna lino, 51 mammula jio mai Habel, ratu lako Zakariya to dibunoi jio napatangnga ngenan pangkaroban na Bola Puang Allataala. La miingaran: Ia to tau too allo la dipabalahhi sininna panggaukan gaja'na tojolona. 52 Macilaka kamu' to guru agama! Sitonganna kamu'ra to la nnajahhi tau umbo nakua menjaji umma'-Na Puang Allataala. Te'da mimadoang menjaji umma'-Na, na ia to tomadoang kannori mianggai." 53 Ia tonna salaimi Puang Isa joo bola, napemannanmi guru agama sola to-Farisi. Nabumbunni bang mangrupa-rupa pekutana lako, 54 dikua ba'tu dennai nasala kada to Puang Isa napasalai.

Lukas 12

1 Ia joo wattu sirempunmi massa'bu-sa'bu to tau madoang ngkita Puang Isa. Nasisi'pin-si'pin ntalimbungngi to Puang Isa anna den to disilesei ajena. Napamulami Puang Isa nnajahhi anak gurun-Na nakua, "Majaga kamu' jio mai raginna to-Farisi. Ia to kusanga iamo to kamajekkonganna. 2 Te'da to membuninna tangladipangpekitan, na te'da to dibunianan tangladipangpeissenan undinna. 3 Jaji, apa to mipau ke bongi, la nasa'ding tau ke allomi. Na apa to mipangbisikan lako solami lan kamara' dilacak, la dipetamban jio pangbudan tau." 4 Mpatarruhpa kadan-Na Puang Isa nakua, "Ee kamu', to kusanga soba'-Ku'. Ingaranni! Danggi' mimalaja' lako tolino to batang kale manda nakulle nabuno, apa te'da nakullei mbuno penawammi. 5 La kupauan kamu' to sipato' la mikalaja': Malaja' kamu' lako Puang Allataala! Nasaba' ianna mangka mbuno kamu', makuasapa Ia mpatama kamu' naraka. Ingaranni, Ia mandara to parallu mikalaja'. 6 Duara de'pen allinna ke lima denah, apa moi mesa' te'da tangnaingaran Puang Allataala. 7 Moi beluak jao ulummi mangkamo dibilang ngasan. Iamo joo danggi' mimalaja', nasaba' la'bi keangga' kamu' na ia to denah." 8 Mangkada unapa Puang Isa nakua, "La miingaran kumua, ia to tonnakuina' jio olona tobuda kumua tomenturu'i lako kale-Ku', la kuakui todai to Aku', Anak Mentolino, jio olona malaeka'-Na Puang Allataala. 9 Apa ia to tompessakkannina' jio olona tobuda, kumua te'da namenturu' lako kale-Ku', la kupessakkanni todai jio olona malaeka'-Na Puang Allataala. 10 Ia to tonnewa kadana' tee Aku', Anak Mentolino, wa'dingpa didampangan, apa ia to toncapa' Roh Allataala, te'damo nawa'ding didampangan. 11 Ia ammidikara-kara lan bola passambajangan iarika jio olona tomangparenta ba'tu tomangra'tah kara-kara, danggi' miselang kumua apara la mipau, ba'tu umbo la mikua mpangngewai kalemi. 12 Nasaba' apa to mipebalian la napatuju kamu' Roh Allataala ke wattunnamo kamu' la mebali." 13 Den tau mangkada jio mai tangnga-tangngana tobuda lako Puang Isa nakua, "Oo Guru, ia ke wa'dingngi, takuanpi to sile'toku' nabenna' to tawaku' jio mai manahna tomatuangki'." 14 Mebalimi Puang Isa nakua, "Oo mane, indara to nnangka'na' menjaji pangbicara ba'tu tomantawa ewananmi sola dua?" 15 Mpatarruhhi kadan-Na Puang Isa lako tobuda ntuu jio nakua, "Majaga kamu', miingaran meloi, danggi' mimadoang nnassang sininna apa lan tee lino. Nasaba' ia to katuoanna tau te'da napole jio mai kasugiran, moi nasugih lallang." 16 Mangcuritami Puang Isa mpake pangpasusian nakua, "Den tosugih nnampui bara'bah gaja loang, nabuda assele'na. 17 Mangpikkiri'mi joo tau nakua, 'Te'damo naganna' to ngenan kunii nnanna assele' bara'bahku'. La kuapamira?' 18 Mangpikkiri' omi namangkada lan penawanna nakua, 'Denmi pale' akkalanku', la kupematonggoi to ngenan assele' bara'bahku', na ia kunii nnannai to assele' bara'bahku' sola ewanan laenku'. 19 Angkumangkada lako kaleku' kumua: Masannangmoko! Tanglapura to sininna ewanan muampui, moi mangpulo-pulo taunna. Mpessaumoko bo'jo'mu! La mupemasannangngimi to katuoanmu, kumande mandamoko sola mangngiso'.' 20 Apa nakua Puang Allataala mangkada lako joo tosugih, 'Ee, tobango'! Ia bang unamo tee bongi naladika'tu to sunga'mu. Na indamora la mpuapai to ewanan murempun?' 21 Susimi joo katuoanna to tau nnangaran kasugiran kalena lan lino, apa situru' Puang Allataala tangngia kasugiran tongan joo." 22 Nakuamo Puang Isa lako anak gurun-Na, "Iamo joo, la miingaran! 'Danggi' mipuselangngi to katuoanmi, to kumua apara to la mikande, ba'tu apara to la miputamangkale.' 23 Nasaba' la'bi parallu ia to katuoan na ia to kande, na ia to batang kale la'bi parallu na ia to pakean! 24 Kitari to kaok! Te'da namantanan, te'da namepare, te'da naampui pa'pak, apa napatuo unai Puang Allataala! Na la'bi keangga' kamu' na ia to manuk-manuk! 25 Moi mipuselangngi to katuoanmi, te'da mikullei mpamalambeh sunga'mi moi sangmanne'! 26 Na ia joo apa biccukra na tangmikullemo mpugaukki, matumbai milampuselang ori to laenna? 27 Kitari to bunga bakung umbo nakua tuona jio padang. Te'da namangngunu, te'da too natumannun. Apa la miingaran, moi Raja Sulaiman to gaja sugih, te'da nampake pakean susi ballona joo bunga! 28 Ee, totangmatappa'! Ia ke naballoii Puang Allataala to reu jio padang susi joo, to tuo tee allo na masawa disumpun, apa pole'raka to kamu' sola ngasan! 29 Iamo joo danggi' mipuselangngi to kumua apara to la mikande ba'tu apara to la miiso'. Danggi' mika'tu rannu. 30 Ia ngasan to susi joo naangah bang tolino to tangnturu' Puang Allataala. Apa naissen ia Ambe'mi Puang Allataala kumua miparallui ngasan joo. 31 La mipengkulle-kullei mpugaukki to pakkaeloran-Na Puang Allataala, na ia to laenna miparallui la naben too kamu'." 32 Naajahhimi Puang Isa to anak gurun-Na nakua, "Danggi' mimalaja' moi mitangpira! Nasaba' napumasannang Ambe'mi Puang Allataala jao suruga mpupenjaji kamu' taun-Na lan kaparentan-Na. 33 Balukki to ewananmi mibenni tokaasi-asi. La nnangah kamu' doi' to te'da namemmatua, iamo to kasugiran dianna jao suruga. Ia joo kasugiran te'da nata'de, nasaba' te'da nakullei la naboko tau, na te'da nakullei nakande ane. 34 Nasaba' umbo-umbo nanii to ewananmi, la minawa-nawa tarruh bangngi." 35 Mangngajahhimi Puang Isa nakua, "Majaga kamu' ammituli ntajanni to karatuan-Ku'. Massa'wak rampa' kamu', mipadukku bangngi to palitammi. 36 La sadia kamu' mangjama susi mesa' kaunan ntajan puangna pole jio mai tobotting. Sadia bang ntimbakanni ba'ba ke mangdedekki. 37 Liwa' masannangna tuu lako kaunan ke naampa'i puangna ntajanni. La mikatappa'i kumua, ia to puangna la massa'wak rampa' todai nasuai joo kaunanna cumadokko naparakaii. 38 Masannang tuu lako kaunan ke diampa'i sadia bang, moi tangnga bongi iarika dannarimo naratu to puangna. 39 Ingaranni! Ia kenna issenni ampu bola wattunna joo nanii ratu to taboko ke bongii, la te'da namamma' nnampai bolana, danggi' namentama joo taboko. 40 Susi toomo kamu', la da'tan bang kamu' majaga, nasaba' ia to karatuan-Ku' tee Aku', Anak Mentolino, te'da mikalannaii." 41 Mekutanai Petrus nakua, "Oo Puang, kami'raka tapapatui tuu pangpasusian, iarika sininnaraka tau?" 42 Mebalimi Puang Isa nakua, "Iamo kupapatui to kaunan melo to wa'ding dikatappa'i. Iamo la naben kuasa puangna ngkapalai kaunan laenna, napakandei ke wattunnami kakumandean. 43 Liwa' ia masannangna joo kaunan ke polemi to puangna, naampa'i puangna mpugaukki to jamanna. 44 Katappa'i kumua, ia joo kaunan la naben kuasa puangna mparakai to sininna ewananna! 45 Apa macilakai joo kaunan ke mangkadai lan penawanna kumua, 'Masaipa namane' pole to puangku'', nabunomi to padanna kaunan, la muane la baine, namangmaroah-roah, sanggenna malango. 46 Apa te'da nakalannaii nata'pa ratu to puangna. Napemoncongngimi puangna, napasusii parri'na to totangnturu' Puang Allataala. 47 Ia to kaunan naissen apa to nakabudai puangna, apa te'da namajaga sola te'da napugaukki, iamo na la dipemoncongngi. 48 Apa ia to kaunan te'da naissenni apa to nakabudai puangna, napugauk kasalan to la dinii rrambii, te'da nadipemosoi dirambi. Nasaba' ia to todiben buda, la dipeta'dai too buda. Na ia to todipabarakkanni buda, la'bi buda pole' opa dipeta'da jio mai kalena." 49 Mangngajahhimi Puang Isa nakua, "Iamo kuratu tama lino sanga ratuna' mbawa api, na kurannuan namanglulu-lulu to dukkunna! 50 Denpa kamaparrisan tonggo la kuperasai. Na te'da narapa' to penawang-Ku', ke te'dapi najaji. 51 Misangaraka kumua ratuna' mbawa kasikalinoan tama lino? Te'da! Tangngia kasikalinoan to kubawa, apa kasiewalianra. 52 Mammula tee too, ia ke denni lima tau lan bola, ia to tallu nnewai to duanna, ba'tu dua nnewai to tallu. 53 Ambe' la nnewa anakkana muane, na anak muane la nnewa ambe'na. Indo la nnewa anakkana baine, na anak baine la nnewa indona. Indo matuanna la nnewa anak mamintunna baine, na anak mamintunna baine la nnewa indo matuanna." 54 Nakuapa Puang Isa lako tobuda, "Ia ke ngkita kamu' saleu' endek jio kalambunan, ta'pa mikua, 'La uran'. Na uran tongan. 55 Ia ke mangngiri' lo'i mai to angin, mikua, 'La pebarrangan omo'. Na jaji tongan susi joo. 56 Ee, kamu' tomajekkong! Macca kamu' mbattuanannii to tanda mikita jao langi' sola lan lino. Apa te'da miissenni mbattuananni to apa kupugauk, tanda karatuan-Na Puang Allataala mangparenta susi Raja." 57 Mangngajahhimi Puang Isa nakua, "Ciapari na te'da kamu' mipikkiri'i to melona la mipugauk? 58 Ia ke denni ewalimmi male mparapa' kamu' lako tomangra'tah kara-kara, ammijio unapa tangnga lalan, la'bi melo ke sikalino bangmo kamu' jolo'. Nasaba' ianna te'da misikalino, la nabawa kamu' lako olona tomangra'tah kara-kara, namane' tomangra'tah kara-kara mpangngolo kamu' lako pulisi ammidipatama pangtarungkuan. 59 La miingaran! Ia ke te'dapi mibajahhi angge macerona to indanmi, te'da mikullei messun lan mai pangtarungkuan."

Lukas 13

1 Ia joo wattu nacuritami tau lako Puang Isa to ba'tu pira-pira to-Galilea to male mangkaroba lako Puang Allataala, nabunoi Gubernur Pilatus. 2 Mebalimi nakua, "Misangaraka kumua iamo namate joo to-Galilea susi joo, nasaba' la'bi buda dosana na ia to to-Galilea laenna? 3 Te'da lalo ia! Apa la miingaranni, ia ke te'da mimengkatoba' jio mai dosami, pada la mate too kamu'. 4 Na umbo toda ia nakua to sangpulo karua tau to mate jio Siloam tonna songkaii bola batu matande? Misangaraka kumua iamo joo mpattantui kumua la'bi buda dosana na ia to tau leko' to torro jao kota Yerusalem? 5 Te'da lalo ia! Apa la miingaranni, ia ke te'da mimengkatoba' jio mai dosami, pada la masolang too kamu'." 6 Mangkai joo mpau omi pangpasusian Puang Isa susi tee, "Den mesa' tau nnampui garonto' kaju ara lan bara'bah anggoro'na. Tuli malei ntiroi to buanna, apa te'da bang naampa' moi mesa'. 7 Den pissen wattu mangkadami lako tomangbara'bahna nakua, 'Ee kitari! Tallung taunmo' ratu ntiroi buanna tee garonto' ara, apa te'da bang kuampa'i moi mesa'. Ta'bangngi bangmi! La mpemadokoi mandari bara'bah!' 8 Apa nakua joo tomangbara'bah, 'Ee puang! Eloranpi tuo sangtaunpa. La kubingkungngi mengguririkkina angkupalakoi pangpelompo. 9 Mbai namembua ke taun pole'i. Apa ia ke te'dai, wa'dingmiki' mpangpeta'banganni.' " 10 Ia tonna Allo Katorroan, mangngajahhimi Puang Isa jio mesa' bola passambajangan. 11 Den baine jio, sangpulo karuamo taunna sopok, nasaba' natamaii setang, na te'da nakullei maruruh jenjen, sanga bukku'i. 12 Ia tonna kitami Puang Isa joo baine, natambaimi nakua, "Ee indo', la'pahmoko jio mai sopokkomu!" 13 Nakaka'i Puang Isa joo baine bukku', nata'pa maruruh jenjen nampakala'bih Puang Allataala. 14 Mabirihmi joo kapala bola passambajangan, nasaba' napamaruruhhi Puang Isa joo tobukku' na Allo Katorroan. Iamo joo namangkada lako tau nakua, "Den annan allona dinii mangjama, allo-allo iapa joo minii ratu ammidipakaruruh ba'tu dipamalagah, danggi' anna Allo Katorroan!" 15 Mebalimi Puang Isa nakua, "Ee, tomajekkong! Ianna Allo Katorroan lla'paran ngasan kamu' sapinmi ba'tu keledaimmi, mimale mbawai mipaiso'. 16 Ia tee baine bati'na Nabi Ibrahim nakuasai Ballisi' sangpulo karuamo taunna. Iamo joo nasipato' dila'paran jio mai kuasanna Ballisi' ke Allo Katorroanni." 17 Ia joo pebalin-Na Puang Isa gaja napumasiri' to tonnewalii. Apa ia tuu lako tau laen masannang ngkitai sininna to mejangngaran napugauk. 18 Mekutanai Puang Isa nakua, "Ianna mangparentamo Puang Allataala susi Raja, apara to la dipasirapanganni na apara to la kupapadanni? 19 Wa'ding dipasangrapang sanglise' sawi, naala tau natananni jio bara'bahna. Ia tonna tuomo, lobohmi anna membarana', namesserang to manuk-manuk jio tangkena." 20 Nakuapa Puang Isa, "Ianna mangparentamo Puang Allataala susi Raja, apara to wa'ding kupasirapanganni? 21 Wa'ding dipasangrapang ragi, naala baine, napasigerokki patang pulo litere' ta'pung, anna loboh." 22 Lan kalingkan-Na de' kota Yerusalem napasitarruh-tarruhhi Puang Isa to kota na kampong anna mangngajahhi jio. 23 Den tau ngkutanaii nakua, "Oo Puang, ci'di'raka tau la dipasalama'?" Mebalimi Puang Isa nakuanni nakua, 24 "Ia to tau dipasalama' wa'ding dipasirapang tomentama ba'ba si'pi'. Iamo joo pengkulle-kullei mentama nnola ba'ba si'pi', nasaba' buda tau mpengkullei mentama apa te'da nakullei. 25 Ia ke malemi to ampu bola llacak bolana, la jenjen bangmo kamu' jio salean ammimeta'da kumua, 'Oo, ampu bola! Timbakanpakan bolata'!' La mebalii joo ampu bola nakua, 'Te'da kuissenni topole umbora kamu'!' 26 Na la mikua mebali, 'Mangkamokan tasolan kumande. Na mangkamiki' mangngajahhi jio kotaki'!' 27 Apa la nakuan pole' kamu' joo ampu bola kumua, 'Ee togaja', palai kamu' ntee! Te'da kuissenni topole umbora kamu'.' 28 Ia ke mikitami Nabi Ibrahim, Ishak na Yakub sola sininna nabi laen mangmaroah-roah lan Lino Barun-Na Puang Allataala, la kumarrak kamu', misunggarigi', nasaba' diula'i kamu'! 29 Buda tau tangngia to-Yahudi la ratu jio mai kadellekan sola jio mai kalambunan, jajanna mai na lo'na mai, na la mangmaroah-roah lan Lino Barun-Na Puang Allataala. 30 Buda tau to tangdikasiri' la menjaji todikasiri' keanu'. Na buda tau to dikasiri' tee too la menjaji totangdikasiri' keanu'." 31 Ia joo wattu den ba'tu pira-pira to-Farisi ratu lako Puang Isa nakua, "Melo ke tasalaii tee kampong, nasaba' madoang Raja Herodes la mbunoki'." 32 Napebalimi Puang Isa nakua, "Malemo kamu' mpauanni Raja Herodes, tokalasi, kumua, 'Ia tee allo na masawa la nnula'ina' setang na mpamalagah toona' tomasaki. Apa ianna allo mangpentallunnamo la mmangkaina' jaman-Ku'.' 33 Moi nasusi joo, la kupatarruh to kalingkan-Ku' tee allo, masawa na duang bongi, nasaba' te'da nawa'ding to nabi dibuno jio saleanna kota Yerusalem. 34 Ee, to-Yerusalem! Tombuno kamu' nabi! Mirura batui to tonasua Puang Allataala ratu lako kalemi, sanggenna mate! Ba'tu pempiranmo' madoang rrempun kamu', susi indo manuk rrempun anakkana jiong pani'na, apa te'da mimadoang! 35 Pesa'dingngii! Iamo joo la makarorrong to bolami, nasaba' te'damo natorro Puang Allataala ssolan kamu'. Mammula tee too te'damo milangkitana', sanggenna mikua, 'Dibarakka'i to toratu mpusanga sangan-Na Puang.' "

Lukas 14

1 Den pissen simata Allo Katorroan, namale Puang Isa kumande jio bolana mesa' kapala to-Farisi. Padami to tau ntuu jio ssikita-kitai to Puang Isa. 2 Ratumi lako Puang Isa to tomasaki, kambang ajena sola limanna. 3 Nakutanaimi Puang Isa tuu lako guru agama sola to-Farisi nakua, "Wa'dingriki'ka mpamalagah tomasaki ke Allo Katorroan ba'tu te'daraka, situru' atoran agamanta'?" 4 Apa kamma' bangngi sola ngasan. Natoemi Puang Isa joo tau, napamalagahhi, nasuai pole. 5 Mangkai joo nakuanmi Puang Isa tuu lako tau, "Ia ke den kamu' nnampui pea ba'tu sapin, napolloh do' bubun ke Allo Katorroan, tantu ta'pa miangka' silalona jiong mai." 6 Apa te'da bang tau ssarai mpebalii Puang Isa. 7 Ia tonna kitai Puang Isa kumua den toratu mpilei cadokkoan to kaminang melona, naajahhimi mpake pangpasusian nakua, 8 "Ia ke ditambai kamu' male mangpabotting, danggi' micumadokko jio cadokkoan to kaminang melo. Iamo ke denni tau ditambai toda to la'bi dikasiri' na kamu', 9 anna ia to ampu bola ratu lako kalemi namangkada kumua, 'Tabe', ia tee cadokkoan mangkami dipasadian tee tau.' Anna liwa'mo masiri'mi ke mellele kamu' cumadokko jio boko'. 10 Iamo joo, ia ammiditambai male mangpabotting, pilei memanni to cadokkoan kaminang jio boko'. Mbai la ratu to ampu bola nakuan kamu', 'Ee mane, melleleki' cumadokko jio cadokkoan to la'bi melo.' Ianna susi joo dipakala'bih kamu' jio olona toratu. 11 Nasaba' ia to tompamajao kalena la dipamajiong, apa ia to tompamajiong kalena la dipamajao." 12 Nakua toopa Puang Isa lako joo tontambai ratu lako bolana kumua, "Ia ke mangmaroah-roah kamu' kumande allo ba'tu kumande bongi, danggi' omo mitambai to soba'mi ba'tu sile'tomi, rapummi ba'tu bali bolami tosugih, nasaba' la natambai toda kamu' dau. Ianna susi joo mitarimami to poleanna. 13 Jaji, ia ke mangmaroah-roah kamu', ntambai naratu to tokaasi-asi, tosopok, susinna tokupi' sola tobuta. 14 Na la dibarakka'i kamu', nasaba' ia tuu lako tau te'da nalangkullei mpabalahhii to kameloanmi. La miampa' to pahalami jio mai Puang Allataala, ke wattunnami to tomelo dipatuo pole' jio mai kamatean." 15 Ia tonna sa'dingngmi joo kadan-Na Puang Isa nakuamo sala mesa'na to tonasolan kumande jio kumua, "Masannang to tomangmaroah-roah lan Lino Barun-Na Puang Allataala." 16 Nakuamo Puang Isa lako joo tau, "Den pissen wattu naden tau mpugauk pangmaroasan gaja roah na buda tau ditambai ratu. 17 Ia tonna dipamulamo joo pangmaroasan, nasuami to kaunanna male ntambai to mangka dipauan la ratu, nakuanni, 'Malemiki' mai, nasaba' sadia ngasanmi!' 18 Apa ia tuu lako tau meta'da dampang ngasanni. Ia to jolona mangkada lako joo kaunan nakua, 'Mangkana' mangngalli tana sangngenan, na paralluna' male ngkitai. Meta'da dampangna'.' 19 Ia to laenna nakua, 'Mangkana' nnalli sapin limang ajoka, la malepa' ncobai. Meta'da dampangna'.' 20 Ia to laenna pole' nakua, 'Mane' mangkana' botting, iamo joo na te'da kularatu.' 21 Polemi joo kaunan, napauanni puangna. Gaja gallii joo puangna, nakua lako kaunanna, 'Maleko madoi' llingkai lalan sola sepe'-sepe' lan kota. Solanni jio mai to tokaasi-asi, tosopok, susinna tobuta na tokupi'.' 22 Mangkai joo nakuamo joo kaunan, 'Oo puang, kipugauk ngasanmo to tasuankan, apa budapa ngenan lo'bang.' 23 Nakuamo joo puang lako kaunanna, 'Maleko llingkai bata' sola lalan salean kota, mparukui to tau naratu, naponno to bolaku'. 24 La miingaran! Moi mesa' te'da to ditambai jolomo, la kumande lan pangmaroasanku'!' " 25 Buda tau undi nturu' Puang Isa lan kalingkan-Na. Messailemi Puang Isa ngkuanni tuu lako tau, 26 "Ia ke den tau la ratu lako kale-Ku', apa la'bi napakamoja'i ia to indona, ambe'na, balinna, anakkana, sile'tona, iarika kalena, ia joo tau te'da nakullei menjaji tonturu'na'. 27 Ia to tocia' mpassan kaju sitambenna nturu'na', te'da nakullei menjaji tonturu'na'. 28 Susinna ia ke den tau madoang manggaraga bola batu matande, manassa la cumadokkoi jolo' mpikkiri'i to ongkoso'na anna issenni kumua ganna'raka to doi'na la mpamangkaii ba'tu tangganna'paraka. 29 Nasaba' ia ke mangkami dikabua' to pondasinna, apa te'damo nakullei mmangkaii, manassa la napetawa-tawai sininna tau to ngkitai. 30 La mangkadai to tau kumua, 'Wah, ia tee tau to mpamulaii, apa te'da nakullei mmangkaii!' 31 Ba'tu ia ke den raja nnampui sangpulo sa'bu surudadu la nararii raja laen to nnampui duang pulo sa'bu surudadu, manassa la cumadokkoi jolo' ntangngahhi kumua nakulle unaraka la nnewai joo balinna. 32 Ianna issenni kumua te'da nakullei, manassa mambelapi to balinna, nasuami to taunna male mpeta'da kasikalinoan." 33 Mpatarruhhi kadan-Na Puang Isa nakua, "Susi toda kamu'. Te'da bang kamu' mesa' tau ngkullei menjaji tonturu'na', ke te'da mipasalaii penawa to apammi. 34 Melo to ce'la, apa ia ke tangbuaci'mi, te'damo nadikulle mpebuaci'i pole'i. 35 Te'damo ia bua'na lako bara'bah moi diala pangpelompo, jaji dica'bean mandamira. Ia to tonnampui talinga la mangpesa'ding melo!"

Lukas 15

1 Den pissen naratu buda to passassung sola tonasangamo tau togaja' mpesa'dingngi Puang Isa. 2 Mangnuku-nukui to to-Farisi sola guru agama nakua, "Wah, nasiama' ora Ia togaja' nakumande sola!" 3 Iamo joo nacuritanni Puang Isa tee pangpasusian nakua, 4 "Ia ke den kamu' nnampui saratuh bembala', nata'de mesa', apara la mipugauk? Tantu la mipatorroi to kasera pulona kasera jio padang pallawangan, mimale ntiroi joo ta'dena samiampa'na. 5 Na ia ke miampa'mi, liwa' masannangmi ammisompoi pole. 6 Ia tommiratumo lako bola, mitambaimi to soba'mi na bali bolami ratu, mikuanni, 'Male kamu' mai, tamangmaroah-roah, nasaba' kuampa'mi to bembala'ku' ta'de!' 7 Katappa'i kumua, susi toomi joo den kamarioan la'bi matonggo jao suruga, ke den mesa' tomadosa mengkatoba', na ia to kamarioan nasaba' kasera pulona kasera tomelo, to te'da naparallu mengkatoba'." 8 Nakua unapa Puang Isa, "Ia ke den baine nnampui sangpulo doi' pera', nata'de mesa', apara to la napugauk? Tantu mpadukkui lampu naparurui bolana, naangahhi sanaampa'na. 9 Na ia ke naampa'mi, natambai to solana na bali bolana ratu, nakuanni, 'Male kamu' mai, tamangmaroah-roah, nasaba' kuampa'mi to doi'ku' ta'de!' 10 Katappa'i kumua, susi todamira joo to malaeka'-Na Puang Allataala mario ke denni mesa' tomadosa mengkatoba'!" 11 Mangkada pole'pi Puang Isa nakua, "Den ambe' dua anakkana muane. 12 Nakuamo to tampakkana lako ambe'na, 'Ee, Ambe', benmo' aku' to tawaku' jio mai ewananna ambe'.' Jaji, natawanmi ambe'na joo ewananna sola dua. 13 Te'da namasai mangkanna joo, ia joo anak tampak nabaluk ngasanni to tawana, namale sompa' lako tondok mambela. Napaboro-boro bangmi to doi'na male sumongge'-mongge' ntuu lako. 14 Ia tonna cappu' ngasanmo to doi'na, jajimi to karorian la'da' jio to nanii, anna gaja sussa katuoanna. 15 Malemi mangjama lako mesa' pangtondokan jio, nasuai lako padang nnampai bainna. 16 Madoangmi ngkande pangparran kande bai, apa te'da bang tau mbenni. 17 Mane'ri mangngingaran namangkada nakua, 'Pira ia budanna to tau mpangjaman ambe'ku' nakala'bian kande, na aku' inde' la mate tangkumande! 18 La mangpangngujumo' pole lako ambe'ku', kukuanni: Oo Ambe', madosamo' lako Puang Allataala na lako kita'. 19 Te'damo kusipato' disanga anakkata'. Pasusi bangmo' mesa' tomangjamanta'.' 20 Ta'pa ke'dehmi, napole lako ambe'na. Mambela unapi jio mai bola, nakitami ambe'na. Massemi penawanna nakinjara' ntammuii, naraka'i naudungngi. 21 Nakuamo joo anakkana, 'Oo Ambe', madosamo' lako Puang Allataala na lako ambe'. Tangsipato'mo' disanga anakkana ambe'.' 22 Apa nasuai ambe'na to kaunanna nakuanni, 'Madoi'ko, alanni to pakean kaminang maballo, mupapakeanni. Papakei tooi cincin na sapatu. 23 Mangkai joo alai to anak sapin malompona migere'i. La kumandeki' mangmaroah-roah, 24 nasaba' ia tee anakkaku' samannamo to mangka mate natuo pole', mangkami ta'de nadiampa'.' Napamulami mangmaroah-roah. 25 Ia joo wattu jioi bara'bah to anak pamungah. Ia tonna polemo jio mai bara'bah namandoppi'mo lako bola, ssa'dingmi oni suling sola pakkelongan tari'. 26 Natambaimi sala mesa'na to kaunanna, namekutana, 'Mangngapari to tau?' 27 Mebalimi joo kaunan nakua, 'Polemi adinta'! Na mangkami ambe'ta' mangpesua nggere' anak sapin malompo, nasaba' salama'mi to adinta' pole!' 28 Gaja birihhi joo anak pamungah, nacia' mentama bola, anna messun to ambe'na ssedei namentama bola. 29 Apa mangkadai nakua, 'Ee Ambe', mangtaun-taunmo masainna kunii tangnnissen bo'jo' mpangjaman ambe'. Te'dapa naden kutangnturu' parentana Ambe'. Na te'da bangpara apa tabenna'! Moi mesa' anak beke te'da bangpa tabenna' kupake mangmaroah-roah sola soba'ku'! 30 Apa ia joo anakkana Ambe' to mane' ratu namangka ncappu'i ewananna Ambe' male maningo sola baine bandarang, nageresan una ia Ambe' anak sapin malompo!' 31 Napebalii ambe'na nakua, 'Oo anakku'! Ia to iko na torro bang unaki' sola. Sininna to kuampui mupuapa toomo. 32 Paralluki' mangmaroah-roah, nasaba' ia joo adimmu samannamo to mangka mate, apa tuo pole'mi. Mangkami ta'de, apa diampa'mi.' "

Lukas 16

1 Nakuamo Puang Isa lako anak gurun-Na, "Den tosugih nnampui pangjama to nnannanni doi'na na mpusara ewananna. Den tau mparapa'i joo pangjama lako tosugih nakua, 'Napaboro-boro bangngi to apanta''. 2 Iamo joo natambai tosugih joo pangjamana naratu nakuanni, 'Apara iko mupugauk napauko tau? Ia bang unamo tee too pakitan ngasanna' sura' indanna tau, nasaba' te'damo muwa'ding nnanna doi'ku'.' 3 Mangkadami lan penawanna joo pangjama nakua, 'Apamo la kupugauk tee? La napasunmo' puangku'. Tangkukulle mangbingkung, na masiri'na' kata'da-ta'da. 4 Oo, kuissenmo apa to la kupugauk, anna den tau ntarimana' jio bolana, moi kudipasun jio mai jamanku'!' 5 Nasuami ratu simesa'-mesa' to tokaindanan lako puangna. Mangkadami lako to bungah ratu nakua, 'Pirara indanmu lako puangku'?' 6 Mebalimi joo tau nakua, 'Tallung sa'bu litere' minynyak zaitun.' Nakuamo lako joo tau, 'Inde' to sura' indanmu, muta'pa nnuki'ii silalona to laenna, uki'i sangsa'bu lima ratuh.' 7 Mangkai joo nakuamo lako tomangpenduanna, 'Na iko mane, pirara indanmu?' Mebalimi joo tau nakua, 'Sangsa'bu pikulu' gose'.' Nakuamo lako, 'Inde' to sura' indanmu. Uki' pole'i to laenna, muuki'i karua ratuhna pikulu'.' 8 Ia tonna sa'dingmi tosugih to apa napugauk joo pangjama tangmaruruh, napujii nasaba' maccai mangngakkalan. Nasaba' ia to tolino tangnturu' Puang Allataala, la'bi macca ia lako padanna rupa tau, na ia to tonturu'mo Puang Allataala." 9 Mangkadami Puang Isa nakua, "La miingaran! Pakei tee mai kasugiran lino mpupenjajii soba'mi to tau, anna tarima kamu' Puang Allataala jao bola tangmasolang, ke te'dami bua'na tee kasugiran lino lako kalemi. 10 Ia to todikatappa'i nnurusu' ewanan ci'di', dikatappa'i too nnurusu' ewanan la'bi buda. Na ia to totangmaruruh nnurusu' ewanan ci'di', te'da too namaruruh nnurusu' ewanan la'bi buda. 11 Jaji, ia ke kasugiran lino nate'da mikullei dikatappa'i, inda pole' opa madoang mpabarakkanni kamu' kasugiran tongan jao suruga? 12 Na ia ke te'da mimaruruh mpusara kasugiranna tau to dipabarakkanan kamu', inda pole' opa madoang mben kamu' to apa la mipuapa kamu'? 13 Te'da tau ngkullei mengkaunan lako dua puanggawa, sanga la nakabudai ia to mesa' na ia to laenna la nakaba'ci, ba'tu la napangjaman tongan-tongan to mesa' na ia to laenna makuttui mpangjamanni. Susi too kamu', te'da mikullei nturu' pakkaeloran-Na Puang Allataala, ke kasugiran lino manda miangah." 14 Den to-Farisi ssa'dingngi apa to napau Puang Isa, napetawai-tawai, nasaba' gaja pangdoi' ngasanni. 15 Apa nakua Puang Isa lako, "Mianggai' bangra melo jio olona tau, apa naissen Puang Allataala to lan penawammi. Nasaba' apa to nasanga tolino mala'bih, nakaba'ci Puang Allataala. 16 Ia to atoranna Nabi Musa na pangngajaranna nabi laen tatta'i dipake angge wattunna Nabi Yahya. Mammulami joo wattu dipangpeissenan tarruh to Kareba Kasalamatan umbo nakua Puang Allataala mangparenta susi Raja. Na napassialai tongan tau la menjaji umma'-Na Puang Allataala lan kaparentan-Na. 17 Apa te'da natanglajaji to apa diuki' lan atoranna Nabi Musa. La'bi madoi' ia to langi' sola lino la lanynya', na ia ke tanglajajimira to apa diuki' lan joo atoran, moi mesa' hurupu'. 18 Inda-inda to ssarak bainena, nakebaine pole' baine laen, direken manggauk salai. Na ia to tompubainei to baine mangka nasarak muanena, direken manggauk sala tooi." 19 Mangngajahhimi Puang Isa nakua, "Den tosugih mangpakean maballo namasuli' allinna. Mangmasannang-sannang bangngi keallo-keallo, sanga sadia ngasan to apa naparallui. 20 Den toda tokaasi-asi disanga Lazarus mamma'-mamma' bang jio to' pelalanna joo tosugih, ponno bang kele to kalena. 21 Madoang bang dikka' ngkandei to bota polloh jao mai mejana joo tosugih, apa asu ora to ratu llepa'i kelena. 22 Matemi joo tokaasi-asi nabawai malaeka' lako ngenan mala'bih jio sa'dena Nabi Ibrahim. Mate todami joo tosugih nadilamun. 23 Ia tonna lanmo lino tomate, liwa' maparri'na, nakita mambelami to Nabi Ibrahim sola Lazarus jio sa'dena. 24 Metambami nakua, 'Oo ambe', Nabi Ibrahim, kamaseina'! Tasuapi dikka' tuu Lazarus nao'tonni to jarinna do' wai, nacakka'ii to lilaku', nasaba' tangkusaramo to lussunna tee api.' 25 Apa nakua Nabi Ibrahim, 'Ee, anakku'! Ingaranni, mangkamoko llolongan tawa melomu tommutuo unapa. Susi todami Lazarus mangkami llolonganni to maparri'na. Apa ia tee too dipakatanami ia ntee, na iko omo llolonganni to maparri'na. 26 Te'da na ia manda joo, apa den mila' mparalla'ki'. Jaji, ia to tau ntee tangnaola male mati', na ia to tau ntuu tangnaola male mai.' 27 Nakuamo joo tosugih, 'Oo, ambe'! Ia ke susii tuu, kamaseina' dikka' tasuapi Lazarus male lako bolana ambe'ku' 28 naajahhi to sile'toku' lima, napangngingaranni anna danggi' namentama ntee ngenan kamaparrisan.' 29 Apa nakuanni Nabi Ibrahim, 'Denmo sura'na Nabi Musa sola nabi laen. Iamo joo la napesa'dingngi apa to dipau lan.' 30 Nakuamo joo tosugih, 'Ie', te'dapa kita' naganna' joo. Apa ia ke denni tomate pole mpauanni, manassa la mengkatoba'i.' 31 Apa nakua Nabi Ibrahim lako, 'Ia ke te'da napesa'dingngii to sura'na Nabi Musa sola nabi laen, umbora la nakua mpesa'dingngii kenna la den tomate tuo pole' la male mpakainga'i.' "

Lukas 17

1 Nakua Puang Isa lako anak gurun-Na, "Nang la den to tossede tau mpugauk dosa. Apa macilaka joo tomassede. 2 La'bi melo ia, ke ditoke'ii batu pelullu' gose' to kollongna, naditallanan do' tasik, na ia ke pangkatumanganna nasala mesa'na tee mai pea biccuk na te'damo namatappa' lako Aku'. 3 Majaga kamu'! Pakainga'i to padammi tomatappa', ke mpugaukki dosa lako kalemi. Ia ke menassanni, dampanganni. 4 Ia ke mpugaukki dosa lako kalemi pempitu sangngallo, na pempitu too ratu lako kalemi mpenassanni dosana nameta'da didampangan, la midampangan tooi." 5 Nakuamo tuu lako rasulu' lako Puang Isa, "Pamawatangngi to kamatapparanki'!" 6 Mebalimi Puang Isa nakua, "Ia ke denni kamatapparanmi moi pada bangra lise' sawi, wa'ding kamu' kumua lako tee garonto' kaju tonggo, 'Tiangka'ko mutitanan lan tasik', nang la naturu'i to kadammi." 7 Nakuapa Puang Isa, "Ia ke nnampui kamu' mesa' kaunan to manengko ba'tu mangrewa, apara mikuanni ke polei mangjama? Mikuanrika, 'Malemoko madoi' kumande!'? 8 Te'da. Sibalikanna mikuara lako joo kaunan, 'Massa'wak rampa'ko! Mukamajaina', pasadianna' kandeku', kukumande. Kumangkapa, mumane' kumande.' 9 Tantu te'da mipujii to kaunanmi, ke napugaukki to misuanni. 10 Susi toomo kamu', danggi' mitajan pangpujian. Apa ia ammimangkamo mpugaukki to nasuan kamu' Puang Allataala, la mikua, 'Kaunan biasa bangrakan, ia manda kipugauk to disuankan.' " 11 Ia tonna male Puang Isa de' kota Yerusalem nnola jioi paralla'na tana Samaria na Galilea. 12 Ia tonna la mentama kampong denmi sangpulo tomasolak ratu ntammuii. Mambela bangngi ke'deh, 13 nametamba nakua, "Oo Puang Isa, kamaseikan!" 14 Nakitami Puang Isa namangkada nakua, "Malemo kamu' mpangpekitan kalemi lako imang jao kota Yerusalem." Ia tonna malemo, ta'pa malagahmi. 15 Denmi mesa' joo tomasolak pole boko' nnandongngi mangkada mpakala'bih Puang Allataala, sanga ngkitai kalena kumua malagahmi. 16 Ia tonna ratumo lako Puang Isa suju'i jiong to' aje-Na mangkurru sumanga'. To-Samaria joo tau. 17 Nakuamo Puang Isa, "Tangmalagah ngasanmiraka to tau sangpulo nena'? Umbomira to kasera? 18 Ciapari na ia mandara tee mesa' tau, na bangsa tangngia to-Yahudi, pole boko' mpakala'bih Puang Allataala?" 19 Nakuanni joo tomasolak, "Ke'dehmoko mumale. Dipasalama'moko, nasaba' mukatappa'ina'." 20 Den ba'tu pira-pira to-Farisi mekutana lako Puang Isa nakua, "Piranra nalaratu to Puang Allataala mangparenta susi Raja?" Napebalii Puang Isa nakua, "Te'da nadikita ke mangparentami to Puang Allataala susi Raja. 21 Na te'da too tau kumua, 'Kitari inde'i', ba'tu 'Iti'i joo', nasaba' lanri penawanta' mangparenta to Puang Allataala." 22 Nakuamo Puang Isa lako anak gurun-Na, "Den wattunna mimadoang ngkitana' Aku', Anak Mentolino, moi sangngallo, apa te'da milangkitana'. 23 Na ia joo wattu den tau la ngkuan kamu', 'Kitai to Anak Mentolino, iti'i joo. Kitari, inde'i!' Danggi' miundi lako nturu'i. 24 Nasaba' ia to karatuan-Ku' pole', tee Aku', Anak Mentolino, la susi kila' mellepa' jao mai langi', namangngarrang jio mai randan langi' ratu lako randan langi'. 25 Apa tee too la gaja parri'na', na te'da too natarimana' tee tau too allo. 26 Ia ke wattunnamo' ratu pole' tee Aku', Anak Mentolino, la susi tonna linona Nabi Nuh tonna anu'. 27 Ia to tau mangmaroah-roah bang, nakebaine-kemuane. Susi tarruhmi joo ratu lako mentamanna kappala'na Nabi Nuh, anna ratu to wai saba' ssolangngi ngasanni. 28 Susi to jaji tonna linona Lot. Mangmaroah-roah bang to tau, mangngalli sola mangbaluk, mantanan sola mpajenjen bola. 29 Apa ia tonna salaimi Lot to kota Sodom, ratumi to uran api na colo' jao mai langi', ssolangngi ngasanni joo tau. 30 Susi toomi to la jaji, ke ratu pole'na' tee Aku', Anak Mentolino. 31 Ia joo wattu ta'pa palai kamu'. Na ia ke susinna denni tau jao bubungan bola, la mellao, natarruh bangmo male, danggi' omo namentama bola nnala apanna. Susi toomi, ia to tojio bara'bah, danggi' omo napole. 32 Ingaranni to napugauk bainena Lot! 33 Ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na. 34 La miingaran! Ia joo bongi, den dua tau mamma' jao mesa' katindoan, la dibawa to mesa', na dipatorro to mesa'. 35 Den dua baine rumido, la dibawa to mesa', na dipatorro to mesa'. 36 Ia ke denni dua tau jio bara'bah, la dibawa to mesa', na dipatorro to mesa'." 37 Mekutanami anak gurun-Na Puang Isa nakua, "Oo Puang, umbora la nanii jaji joo?" Mebalimi nakua, "Ia to nanii batang rabuk, jio too nanii to langkan pekande batang rabuk. Susi toomi to karatuan-Ku' la nakita ngasan tau."

Lukas 18

1 Napauan pole' omi pangpasusian Puang Isa to anak gurun-Na la mpamanassai kumua danggi' naka'tu rannu sola marosso massambajang lako Puang Allataala. 2 Nakua, "Den pangbicara lan mesa' kota, te'da namalaja' lako Puang Allataala, na te'da too naangga'i to padanna rupa tau. 3 Den toda mesa' baine jio to matemo muanena, tuli ratu bang meta'da lako kumua, 'Ra'tahpi dikka' tee kara-karaku'.' 4 Masai-sainni te'da bang namadoang joo pangbicara mpuinawai. Apa undinna nakua lan penawanna, 'Moi kutotangmalaja' lako Puang Allataala, na te'da bang mesa' tau kuangga', 5 apa la kura'tahmo to kara-karana, nasaba' nasussai bangna'. Ia ke te'da kutulungngi la ratu punala bangngi, mangkatampakanna matena' napubua'.' " 6 Nakuamo Puang Isa, "Ingaran meloi to apa napau joo pangbicara tangmaruruh. 7 La'bi-la'bi Puang Allataala la ntulung sininna tonapileimo, to massambajang bang allo-bongi. Te'da namangmela'-mela' ntulung umma'-Na! 8 La miingaran! La madoi'i Ia ntulungngi. Apa ia ke ratuna' Aku', Anak Mentolino, la den unaraka tau kuampa' lan tee lino to matappa' lako kaleku'?" 9 Den pangpasusian napau Puang Isa napatuju lako tossanga bang kalena melo, na ngkita majiong bang padanna rupa tau. 10 Nakua, "Den tau dua male lako Bola Puang Allataala la massambajang, mesa' to-Farisi na mesa' passassung. 11 Ke'deh mesami joo to-Farisi namassambajang nakua, 'Oo Puang, mangkurru sumanga'na' mati' kalemi, nasaba' te'da aku' kususi tau laen. Te'da kumangrampa, te'da kumasa'ga', te'da kumanggauk sala, na te'da too kususi joo passassung. 12 Penduanna' puasa sangminggu, angkupangben sangtawa sangpulona to assele' kuampa'.' 13 Apa ia joo passassung ke'deh mambela-bela bang. Moi mentingngara de' langi' tangnasara, apa ssauru'i babara'na, nakua, 'Oo Puang Allataala, kamaseina' dikka' aku' tee mesa'na' tomadosa!' 14 La miingaran! Ia tee passassung, ke polei lako bolana, mangkami napupenjaji tomelo Puang Allataala, na ia tee to-Farisi te'da. Nasaba' ia to tompamajao kalena la dipamajiong, apa ia to tompamajiong kalena, la dipamajao." 15 Den tau ratu ssolan pea sibiccuk lako Puang Isa anna kaka'i nabarakka'ii. Ia tonna kitai anak gurun-Na nakagallii tuu lako tau. 16 Apa nasua ori Puang Isa to tau ssolanni joo pea lako kalena, anna kuanni to anak gurun-Na, "Eloranni tuu mati' pea ratu lako Aku'. Danggi' mianggaii, nasaba' tosusimora tuu mati' to la menjaji umma'-Na Puang Allataala. 17 La miingaran tee kadang-Ku' kumua, ia to tote'da nasusi to pea biccu' ntarimai to kaparentan-Na Puang Allataala, te'da nalamenjaji umma'-Na Puang Allataala." 18 Den pekaamberan to-Yahudi mekutana lako Puang Isa nakua, "Oo Guru, tomelo penawan-Ta'. Pauanna' apara to melona tongan sipato' la kupugauk, angkuampa'i to katuoan melo te'da cappa'na?" 19 Mekutanami Puang Isa lako nakua, "Ciapari musangara' tomelo? Moi mesa' tau te'da ia tomelo, saliwanna Puang Allataala manda Ia. 20 Tantu muissen ngasanmo to parenta-Na Puang Allataala kumua, 'Danggi' manggauk sala, danggi' pabuno, danggi' boko, danggi' sa'bi tangtongan, kasiri'i to tomatuammu!' " 21 Mebalimi joo tau nakua, "Oo Puang, kuturu' ngasanmo kita' joo parenta, mellao biccu'ku'." 22 Ia tonna sa'dingmi Puang Isa joo pebalinna, nakuanmi, "Mesa'pa to parallu la mupugauk. Malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'." 23 Ia tonna sa'dingmi joo, masussami penawanna joo tau, nasaba' gaja sugihhi. 24 Nakitai Puang Isa kumua masussai joo tau, iamo namangkada nakua, "Gaja sussa ia to tosugih la menjaji umma'-Na Puang Allataala. 25 La'bi madoi' ia to unta mentama to'tok jarun, na ia to tosugih mentama Lino Barun-Na Puang Allataala." 26 Sijangngaranni to tossadingngi namekutana, "Ia ke susii joo, indamo ia to wa'ding la salama'?" 27 Nakuamo Puang Isa, "Ia ke tolino te'da nakullei la jaji, apa ianna Puang Allataala wa'ding bang ia jaji." 28 Nakuamo Petrus, "Takitai Puang, kisalaimo to apangki', angkiundi nturu'ki'." 29 Nakuamo Puang Isa lako anak gurun-Na, "La miingaran tee kadang-Ku' kumua, ia to tossalaimo bolana, ba'tu bainena, sile'tona, tomatuanna, anakkana, nasaba' mpangjamanni Puang Allataala, 30 la ntarima pahalana manglokkon ia bang unamo tee wattu. Na jio ahera', la nnampa' toopa katuoan melo te'da cappa'na." 31 Natambaimi Puang Isa to sangpulo dua anak gurun-Na nakuanni, "Pesa'dingngii! Mangngujumiki' de' kota Yerusalem tee too, anna jaji sininna to mangka nauki' nabi tonna anu' mpauna' tee Aku', Anak Mentolino. 32 La dipangbenna' lako bangsa tangngia to-Yahudi, nacapa'-capa'na', napegaukkina', nacikkuduina', 33 narambina', namane' mbunona'. Apa ia ke allo mangpentallun, la dipatuo pole'na'." 34 Apa ia joo napau Puang Isa te'da ngasan napahangngi anak gurun-Na, sanga dibuniananni lako kalena. Iamo joo na te'da naissenni anak gurun-Na apa to nasanga Puang Isa. 35 Ia tonna la ndete'mi Puang Isa joo kota Yerikho, denmi mesa' tobuta cumadokko jio randan lalan meta'da-ta'da. 36 Ia tonna sa'dingmi buda tau liu lalan, mekutanami nakua, "Mangngapari to tau?" 37 Napauanmi tau kumua, "Liu lalanni Puang Isa to-Nazaret." 38 Naandongngimi metamba nakua, "Oo Puang Isa, bati'na Raja Daud, kamaseina' dikka'!" 39 Nakagallimi tuu lako tonjoloan Puang Isa nasuai kamma'. Apa la'bi naandongngi ori metamba nakua, "Oo bati'na Raja Daud, kamaseina' dikka'!" 40 Kendenmi Puang Isa, napangpetambanni nadisolan ratu. Na ia tonna sikandoppi'mo nakutanaimi nakua, 41 "Apara to mukadoangngi la kupugauk lako kalemu?" Mebalimi nakua, "Oo Puang, madoangna' pakita!" 42 Nakuanmi Puang Isa, "Pakitamoko, nasaba' mukatappa'ina'!" 43 Ta'pa pakitami, naundi nturu' Puang Isa, na mpakala'bih Puang Allataala. Sininna to tau ngkitai joo mpakala'bih toda Puang Allataala.

Lukas 19

1 Mentamami kota Yerikho to Puang Isa, natarruh bang mbulewanni joo kota. 2 Den mesa' kapala passassung jio disanga Zakheus, gaja sugih. 3 Madoangngi ngkitai matumbara ia joo disanga Puang Isa, apa gaja budai tau, na ia joo Zakheus liwa' pance, jaji te'da nakullei ngkitai. 4 Kinjara'mi njoloi tobuda, namenteke' de' barana' la ngkitai to Puang Isa, nasaba' ntuumi jio la nanii liu lalan. 5 Ia tonna dete'mi Puang Isa to nanii Zakheus, mentingngarami, nakua, "Ee, Zakheus, mellaoko madoi', nasaba' la leppangna' tee allo jio bolamu." 6 Ta'pa naparri-parrimi Zakheus mellao, sanga masannangngi ntarima Puang Isa jio bolana. 7 Sipangnuku-nukuan ngasanmi to tongkitai joo nakua, "Wah, naleppang ora Ia jio bolana togaja'." 8 Apa ke'dehhi Zakheus, nakua lako Puang Isa, "Oo Puang, sangsesena to ewananku' la kuben tokaasi-asi, na ia ke denni apanna tau kurampa, la kupapolean manglokkon penna'pa'." 9 Nakuamo Puang Isa lako Zakheus, "Ia bang unamo tee allo napasalama'ko Puang Allataala sola rapummu, nasaba' moi iko bati'na todako Nabi Ibrahim. 10 Ia tee Aku' Anak Mentolino, ratuna' nnangah sola mpasalama' tolao sala." 11 Ia joo wattu mandoppi'mi Puang Isa de' kota Yerusalem, anna sangai tobuda kumua cingga'tu'mora naratu Puang Allataala mangparenta susi Raja. Iamo joo mpatarruhmi curitan-Na mpake pangpasusian lako tau ntuu jio to mpesa'dingngii. 12 Nakuamo Puang Isa, "Den mesa' puang la male lako tondok mambela la diangka' menjaji raja jio tondokkona, namane' pole mangparenta. 13 Ia tonna te'dapa namale, ntambaimi sangpulo kaunanna, napada mbenni simesa' doi' bulawan nakuanni, 'Pakei tee doi' mangdangkang ratu lako poleku'.' 14 Apa nakaba'cii sangtondokkona joo puang. Jaji, ia tonna malemo, disuami to tau undi rrundunni anna kuanni to tolannangka'i kumua, 'Te'da kami' kimadoang naparenta joo tau.' 15 Ia tonna mangkamo joo puang diangka' menjaji raja, polemi. Napangpesuanmi naratu joo kaunanna ssikitanni, sanga madoangngi la nnissenni kumua sipira unara sarona. 16 Ratumi joo kaunan bungahna nakua, 'Oo puang, ia to mesa' doi' bulawan tabenna', manglokkon pessangpulo to sarona.' 17 Nakuamo joo puangna, 'Gaja kassing tuu panggaukanmu! Natatta' melo to penawammu lako aku'. La mparentako sangpulo kota, sanga maruruhko mpugauk apa biccu'.' 18 Ratumi joo kaunan mangpenduanna nakua, 'Oo puang, ia to mesa' doi' bulawan tabenna' manglokkon pellima to sarona.' 19 Nakuanni lako, 'La mparentako lima kota.' 20 Ratumi to kaunan laen nakua, 'Oo puang, inde'i to doi'ta', kuparisepu' bang, 21 nasaba' malaja'na' lako kaleta', sanga kita'mo tau masa'ga'na. Nnala bangki' kita' to tangngia pangngannata', na mpeburaiki' apa tangngia pantananta'.' 22 Nakuanmi puangna lako, 'Ee, kaunan gaja'ko! La kusessako situru' kadammu. Muissen kumua aku' tee tomasa'ga', nnala bangna' tangngia pangngannaku', mpeburaina' tangngia pantananku'. 23 Ia ke susii joo, ciapari na te'da mupatamai bang joo doi', na ia ke polemo' kualai sola bunganna?' 24 Nakuanmi joo tojenjen jio, 'Alaii joo doi' bulawan, ammibenni joo kaunan to nnampuimo sangpulo.' 25 Nakuamo tuu lako tau, 'Oo puang, denmo ia sangpulo naampui.' 26 Mebalimi joo puangna nakua, 'La miingaran! Ia to todenmo naampui, la dibenpa la'bi buda. Apa ia totangnnampui apa, ia to apa ci'di'mora naampui, la dialai pissen. 27 Na ia tee too, solanni mai sininna to tonnewalina', to cia' mpurajana', mibuno ngasanni jio oloku'.' " 28 Ia tonna mangkamo mpau ngasanni Puang Isa joo, menjolomi mpatarruh kalingkan-Na de' kota Yerusalem. 29 Ia tonna mandoppi'mo kota Betfage sola kota Betania jio sare Buntu Zaitun, napajolomi Puang Isa to dua anak gurun-Na, 30 napasanni kumua, "Male kamu' sola dua lako joo kampong tapangngujui. Ia ammimentamamo, la nnampa' kamu' mesa' anak keledai dila'ka', to te'da bangpa nadisakei. Bukaii, mibawai jio mai. 31 Ia ke denni tau ngkutanai kamu' kumua, ciapari mibukaii, la mikua, 'Naparallui Puang.' " 32 Malemi joo todisua, naampa'i susi ngasan to pura napaunni Puang Isa. 33 Ia tonna bukaimi joo anak keledai, nakuamo to puangna, "Ciapari mibukaii?" 34 Nakuamo sola dua mebali, "Naparallui Puang." 35 Nabawami joo anak keledai lako Puang Isa, nalapikkii baju landona, namane' mpupessakei to Puang Isa jao. 36 Ia tonna liumo, mballahmi baju landona jio lalan tuu lako tau. 37 Ia tonna solohmo do' sarena Buntu Zaitun sikandoppi' kota Yerusalem, mario ngasanmi to tonturu' Puang Isa na nnandongngi mangkada mpakala'bih Puang Allataala, nasaba' sininna to tanda mejangngaran mangka nakita. 38 Metamba-tamba tuu lako tau nakua, "Dibarakka'i to Raja ratu mpusanga sangan-Na Puang. Pakala'bihhi Puang Allataala jao kaminang majaona, na kasikalinoan jao suruga." 39 Den ba'tu pira-pira to-Farisi, to undi sola tobuda, mangkada lako Puang Isa nakua, "Oo, Guru anggaii titi' mati' tonturu'ki', danggi' napaui susi joo." 40 Napebalimi nakua, "Katappa'i kumua, ia ke kamma'i, batu la ssullei gumalasi-lasi." 41 Ia tonna mandoppi'mo nakitami joo kota Yerusalem, nakarrakkii, 42 nakua lako to-Yerusalem, "Ando' ee, tangpada ia melona, kenna ia bang unamo tee allo mupahangngi indara to la mpadenanko kasikalinoan. Apa te'da muissenni. 43 Nasaba' la ratu to allo kamacilakanmu, natalimbungko ewalimmu nnewako. Manggaraga tamba kuku ngguririkki kotamu mpasingki'ko, sanggenna te'damo mukullei ssalaii. 44 Na la nasabu'i kotamu sola issinna sanggenna te'damo batu sitodo', nasaba' te'da mupahangngi wattunnami ratu Puang Allataala mpasalama'ko." 45 Mangkai joo, mentamami rante Bola Puang Allataala to Puang Isa, naula'ii to tomangbaluk lan. 46 Nakuanni Puang Isa tuu lako tau, "Den diuki' lan Sura' Allataala, nakua Puang Allataala kumua, 'Ia to Bola-Ku', iamo bola la dinii massambajang.' Apa mipasusimo bola parampo'." 47 Mangngajahhii to Puang Isa lan Bola Puang Allataala allo-allo. Na ia to kapala imang sola guru agama nnangah lalan la mbunoi. Susi toda to pekaamberan to-Yahudi. 48 Apa te'da naampa' lalan la mbunoi, nasaba' sininna tobuda ngkabudaii, na napesa'dingngii to pangngajah-Na.

Lukas 20

1 Den pissen tonna mangngajahhi Puang Isa lako tobuda lan Bola Puang Allataala mpangpeissenan Kareba Kasalamatan, ratumi to kapala imang, guru agama na pekaamberan to-Yahudi ssikitanni. 2 Nakua lako Puang Isa, "Apara napenggaronto'i mupugauk ngasanni joo? Indara mbenko kuasa?" 3 Mebalimi nakua, "La kukutanai toda kamu'. La mipebalina', 4 'Indara mbenni kuasa Nabi Yahya njio' tau, Puang Allataalaraka iarika tolino?' " 5 Sipangkada-kadami nakua, "Ia antamebali kumua, 'Kuasa pole jio mai Puang Allataala', la nakuanki', 'Ciapai na te'da mikatappa'ii to pangngajahna Nabi Yahya?' 6 Apa ia ke la takua, 'Kuasa jio mai tolino', la narura batuki' tobuda, nasaba' nasanga ia nabi joo Nabi Yahya." 7 Iamo joo mebalimi nakua, "Te'da kami' kiissenni." 8 Nakuanni Puang Isa, "Ia ke susii tuu, te'da toda kulampauan kamu', kuasa pole umbo angkuwa'ding mpugaukki joo." 9 Mangkai joo too, mangcuritami Puang Isa lako tobuda mpake pangpasusian nakua, "Den mesa' tau ntananni anggoro' bara'bahna. Mangkai joo napangpenduluanmi lako ba'tu pira-pira tomendulu, anna male lako tondok laen, natorro masai jio. 10 Ia tonna wattu peanggorosanmo, nasuami to mesa' kaunanna male la nnalanni to tawana. Apa narambiri tomendulu, namane' ssuai pole mangpala' lo'bang. 11 Nadadu' omi joo ampu bara'bah, ssua pole' mesa' kaunanna, apa narambi unai, te'da bang una nakasiri'i susi to jolona namane' ssuai pole mangpala' lo'bang. 12 Sitarruhna nasua pole' omi to kaunan mangpentallunna, apa nakojong-kojongngi ori, namane' mpembuanganni lako salean bara'bah. 13 Mangkatampakanna nakuamo joo ampu bara'bah, 'Apapa la kupugauk? La kusuai to anakkaku' kupakamoja', tantu la nakasiri' ia.' 14 Apa ia tonna kitami joo tomendulu bara'bah kumua ratui to anakkana joo ampu bara'bah, sipangkada-kadami nakua, 'Inde'mi pale' to la mpumanahhi tee bara'bah. Tabunoi, antaala ngasanni tee manahna.' 15 Nabawai lako saleananna bara'bah joo anakkana ampu bara'bah anna bunoi. Apara la nagaukanni ampu bara'bah tuu lako tomendulu? 16 La ratui mbuno ngasanni joo tomendulu, namane' mpangpenduluanni joo bara'bahna lako tolaen." Ia tonna sa'dingmi tuu lako tau joo pangpasusian, nakuamo, "Napamambela-belai Puang Allataala joo jio mai kaleki'." 17 Apa nakaje'jekki Puang Isa nakuanni, "Ia ke susii joo, apara battuananna tee aya' lan Sura' Allataala kumua, 'Ia to batu naca'bean pande bola, menjajimo batu ariri petuo.' 18 Susi to totipessambak lako joo batu, la maicak, na ia to tonai'pinni, la maninnang, susi toomi la jaji lako tau to cia' ntarimana'." 19 Naissen guru agama sola kapala imang kumua iara napapatui joo kadan-Na Puang Isa. Iamo joo napengkulle-kulleimi la njokkoi, apa malaja'i lako tobuda. 20 Jaji natuntunanni wattu melo. Nasuai to tau nnaran-naranni. Ia joo tau naanggai' bang susi tomelo apa sitonganna den akkattana la nnangahhi to kada sala-Na Puang Isa, anna wa'ding mparapa'i lako gubernur nasessai. 21 Mekutanami joo tau lako nakua, "Oo Guru, kiissen kumua tongan ngasan sininna kadan-Ta' sola pangngajah-Ta'. Te'da tapasilaenan tau, na maruruhki' mpangpangngajaran pakkaeloran-Na Puang Allataala. 22 Iamo joo la mekutanakan kumua, 'Ianna situru' atoran agamanta', wa'dingriki'ka mbajah sima lako Tomaraja Roma, ba'tu te'daraka?' " 23 Apa naissen Puang Isa to lan penawanna joo tomekutana. 24 Iamo joo nakuanni, "Pakitanna' to doi' dinar. Indara sipugambara' sola sipusanga tee?" Napebalii nakua, "Tomaraja Roma." 25 Nakuamo Puang Isa, "Ia ke susii tuu, benni Tomaraja to apanna, mibenni Puang Allataala to apan-Na!" 26 Jaji, te'da naampa'i to kada sala-Na Puang Isa moi mesa' jio olona tobuda. Sikammatan bangmi, nasaba' jangngahhi mpesa'dingngi joo pebalin-Na. 27 Mangkai joo, ratumi to ba'tu pira-pira to-Saduki lako Puang Isa. Ia joo to-Saduki te'da nakatappa'i to katuoan pole' jio mai kamatean. 28 Nakuamo, "Oo, Guru, mangka napangpangngajaran Nabi Musa lan sura'na susi tee: Ia ke matei to muane, na te'dapa anakkana joo bainena, la nasulle allonanni adinna, dikua napajajianni bati'. 29 Nasaba' den pitu muane massile'to. Ia to pamungahna kebainemi, apa te'dapa anakkana, namatemo. 30 Napubainemi adinna joo bainena. Apa te'da todapa anakkana namate. 31 Susi toomi jaji lako adi mangpenduanna ratu lako adi tampakkana, den ngasanmo nasibali joo baine, na mate ngasan toomi, apa te'da bangngi to sijajian bati'. 32 Mangkatampakanna mate todami joo baine. 33 Ia ke dipatuo pole'mi to tomate, indannamira la sibali tarruh joo baine? Nasaba' mangka ngasanmi sibali." 34 Nakuamo Puang Isa mebali, "Ianna lan tee lino kebaine-kemuane to tau, 35 apa ia to tosipato' dipatuo pole' jio mai kamatean, na tuo jio lino undi te'damo ia tokebaine-kemuane. 36 Nasaba' la tuomi susi malaeka' to te'damo nalamate pole'. Menjajimi ia anak Allataala, sanga dipatuo pole'mi jio mai kamatean. 37 Napamanassa Nabi Musa kumua la dipatuo pole' to tomate lan curitanna to pangngala-ala dukku. Nauki'i Nabi Musa kumua, 'Ia to Puang, iamo Puang Allataala to nasompa Nabi Ibrahim, Ishak na Yakub.' 38 Totuora to ssompa Puang Allataala, tangngia tomate! Sanga ia ke Puang Allataala, tuo ngasan ia to tau." 39 Mebalimi to ba'tu pira-pira guru agama nakua, "Oo, Guru, tongan tuu kadan-Ta'." 40 Mangpamulami joo wattu te'damo nabarani to to-Saduki ngkutanaii to Puang Isa. 41 Apa nakutanaii Puang Isa tuu lako tau nakua, "Matumbai nadisanga kumua, ia to Raja Mangpasalama' bati'na Raja Daud? 42 Nasaba' lan Sura' pangpujianna Raja Daud, ia kalena mangkada nakua: Nakua Puang Allataala mangkada lako Puangku', 'Cumadokkoko ntee sa'de kanan-Ku', 43 angkupupentalo ngasanni to ewalim-Mu mukuasaii.' 44 Jaji, ia ke Raja Daud mpekapuangngii joo Raja Mangpasalama', matumbai nalabati'na Raja Daud?" 45 Ia tonna mangpesa'ding ngasan to tobuda, nakuamo Puang Isa lako anak gurun-Na, 46 "Majaga kamu' lako guru agama! Nakabudai bang male lumingka mangbaju lando tandana kumua todikasiri', namadoang bang ditaratte' jio pasa'. Nakabudai bang cumadokko jio olo lan bola passambajangan na ngenan kata'pan mata jio pangramean. 47 Nauraga bang to baine matemo muanena, narampai to ewananna. Naanggai' bang too mpemalandoi passambajangna to nanii mpembunianan panggaukan gaja'na. Ia to tosusi joo la la'bi mabanda' to sessana."

Lukas 21

1 Nakitami Puang Isa to tosugih mpatama sudakkana tama patti doi' sudakka lan Bola Puang Allataala. 2 Nakita too to baine kaasi-asi to matemo muanena mpatamai dua de'pen. 3 Mangkadami Puang Isa nakua, "La miingaran! Sitonganna, ia joo baine kaasi-asi, la'bi buda ia to napatama na ia to napatama tuu lako tau sola ngasan. 4 Nasaba' ia tuu mati' tau mangpangben jio mai kala'bianna, apa ia tee baine kaasi-asi mangpangben jio mai kakuranganna. Napangben ngasan to la naputuona." 5 Den tau mpaui kumua matumba ia melona joo Bola Puang Allataala dibelo-beloi batu melo sola apa to dipangkaroban lako Puang Allataala. Napauanmi Puang Isa nakua, 6 "Den wattunna dau, na sininna tee mikita la diro'pokan ngasan na moi mesa' batu te'damo nnii ngenanna!" 7 Mekutanami to anak gurun-Na Puang Isa nakua, "Oo Guru, piranra nalajaji joo? Na apara tandana ke nadete'mi wattunna?" 8 Mebalimi Puang Isa nakua, "Majaga kamu', danggi' naden tau mpalao sala kamu'. Nasaba' buda tau la ratu mpusanga sangang-Ku', nakua, 'Aku'mo Raja Mangpasalama'!' na 'Wattunnamo.' Apa danggi' mipesa'dingngii. 9 Ia ke ssa'ding kamu' kareba kasirarian na kamaricuan, danggi' too mimalaja'. Nasaba' nang la jaji ngasanni joo jolo', apa te'dapa nawattunna Kiama' lino." 10 Nakua toopa, "Ia to mesa' bangsa la sirari nnewa bangsa laen. Ia to mesa' kaparentan rrarii kaparentan laenna. 11 Umbo-umbo nanii la den nino tonggo, ra'ba beang sola karorian la'da'. La jaji to apa mpamirrang bulu na tanda mepunininan jao langi'. 12 Ianna te'dapa najaji ngasan joo, la dijokko kamu' ammidipakario-rio. La dira'tah kara-karami jio bola passambajangan, ammidipatama pangtarungkuan. La dipangngolo kamu' lako raja sola tomangparenta, nasaba' mikatappa'ina'. 13 Iamo joo wattu melo, la minii mpangpeissenanni to Kareba Kasalamatan. 14 Danggi' mipuselangngi to apa la mipau mpangngewai kalemi. 15 Aku' kalena la mben kamu' kapaissenan umbo mikua la mebali, anna te'da nakullei ewalimmi mbalii iarika mpasalai apa to mipau. 16 La nakaba'ci kamu' buda tau, nasaba' mikatappa'ina'. Moi tomatuammi kalena, sile'tomi, rapummi na sisoba'mi la mpangpejokkoan kamu'. Den too kamu' ba'tu pira-pira to la nabuno tomangparenta. 18 Apa moi sanglambah beluakkami te'da nalamatumba. 19 Ia ammimatappa' tarruh, la miampa' to katuoan melo te'da cappa'na." 20 Mangkai joo nakuamo Puang Isa, "Ia ammikitami joo kota Yerusalem natalimbung surudadu, la miissen kumua te'damo namasai na la diro'pokan. 21 Ia joo wattu, ia to totorro jio tana Yudea la palai de' membuntunna. Ia to tau lan kota Yerusalem te'da nawa'ding tangmessun, na ia to salean danggi'mo namentama kota. 22 Nasaba' ia joo allo iamo allo nanii mangpabalahhi Puang Allataala, dikua anna jaji to apa diuki' lan Sura' Allataala. 23 Liwa' parri'na joo wattu to tokeba'tang sola to tomangpacucupa. La nadete'mi sussa tonggo tee tondok, nasaba' la napabalahhimi Puang Allataala tee bangsa. 24 Denni to la dipa'dangngi, den tooi to la dijokko nadipali' lako mangrupa-rupa tondok. Na ia to bangsa tangngia to-Yahudi la ssolang-solangngi joo kota Yerusalem angge wattu to napattantu Puang." 25 Nakuapa Puang Isa, "Mangkai joo, la pajanmi to tanda jio allo, bulan na bintuin. La silajatan na putta tangngahna sininna tolino la ssa'ding bombang menggalugu. 26 La silanjanganni anna limpu to tau ngkitai to apa la jaji lan lino, nasaba' la mausa' ngasanni to tontoe kuasa jao langi'. 27 Ia joo wattu, la nakitana' tau tee Aku', Anak Mentolino, ratu jao mai langi' lan saleu', makuasana' kumala'bih too susi Raja. 28 Ianna mangpamulamo jaji susi joo, ta'pa parannumo kamu', nasaba' cingga'tu'mora midipasalama'." 29 Nacuritanmi Puang Isa mesa' pangpasusian nakua, "Ingaran meloi to garonto' kaju ara ba'tu barana' leko'. 30 Ianna mengkacocokmo, miissenmi kumua cingga'tu'mora napealloan. 31 Susi toomi ke mikita ngasanmi joo tanda, la miissen kumua cingga'tu'mora naratu Puang Allataala mangparenta susi Raja. 32 La miingaran tee kadang-Ku' kumua, la jaji ngasan tee, ke te'dapi namate ngasan to tau tuopa tee wattu! 33 Ia to langi' sola lino la lanynya', apa ia to kadang-Ku' la tatta' te'da cappa'na." 34 Mangkai joo nakuamo Puang Isa, "Majaga kamu'! Danggi' nakatuoan linomi mandamo minawa-nawa, mangmaroah-roah, iarika mangngiso'-iso' samalangommi, anna te'damo misadia, ke nadete'mi to allo karatuan-Ku' to tangdikalannai, 35 nasaba' ia joo Allo la ratui susi poja lako sininna tau lan lino. 36 Majaga kamu', mimassambajang, ammimawatang nnoloi sininna to apa la jaji, miwa'ding mangngolo lako Aku', Anak Mentolino." 37 Ia to Puang Isa, ia ke alloi mangngajahhi jio Bola Puang Allataala, na ia ke bongii malei de' Buntu Zaitun namangbongi jao. 38 Ia ke melambi', ratu ngasanmi to tau mpesa'dingngi Puang Isa mangngajahhi jio Bola Puang Allataala.

Lukas 22

1 La nadete'mi to pangramean ngkande Roti Tangkeragi to disanga pangramean Paskah to-Yahudi. 2 Ia to kapala imang sola guru agama nnangah bang lalan la mbuno buni Puang Isa, nasaba' malaja'i lako tobuda. 3 Mangkai joo natamaimi Ballisi' joo Yudas to disanga too Iskariot, iamo sala mesa'na to sangpulo dua anak gurun-Na Puang Isa. 4 Iamo joo malemi Yudas sipangkada-kada kapala imang sola kapala pangjagana Bola Puang Allataala umbo nakua la mpangpejokkoan Puang Isa. 5 Liwa'i masannang ssa'dingngi joo kadanna Yudas, namangngaku la mbenni doi'. 6 Nasitujuimi Yudas. Iamo joo na nnangah wattu melo la nanii mpangpejokkoan bunii to Puang Isa, anna te'da naissenni tau. 7 Ia tonna allo bungahna pangramean ngkande Roti Tangkeragi, iamo to allo panggeresan bembala' kande Paskah, 8 nasuami Puang Isa to Petrus sola Yahya nakuanni, "Malemoko sola dua mpasadianki' kande Paskah." 9 Mekutanami nakua, "Oo Puang, umbora la kinii mpasadiai?" 10 Napebalii Puang Isa, "Ia ammimentamamo kota, la sitammu kamu' mesa' muane mbawa busu ponno wai. Male kamu' sola, ammipekutananni lako ampu bola to nanii mentama kumua: napekutanan Gurungki', 'Umbora to la kunii ngkande kande Paskah sola anak gurung-Ku'?' 12 La napakitan kamu' mesa' ngenan maluah jao loteng to sadia sola parewananna la dipake. Pasadia ngasanni ntuu jio." 13 Malemi Petrus sola Yahya, naampa' ngasanni susi to napauanni Puang Isa. Napasadiami to kande Paskah. 14 Ia tonna la ngkandemo kande Paskah, cumadokkomi Puang Isa sola rasulu'-Na kumande. 15 Nakuanmi lako, "Gaja sannangna' mang-Paskah ssolan kamu' tee bongi, ta'bulu' te'dapa kudiparri'i! 16 La miingaran! Te'damo kulandadu' pole'pi mang-Paskah ke te'dapi naratu Puang Allataala mangparenta susi Raja, wattunna dinii mpahangngi to battuananna mang-Paskah." 17 Mangkai joo naalami Puang Isa joo isotan anggoro', namangkurru sumanga' lako Puang Allataala, namane' kumua, "Alai tee, misipalelei miiso'. 18 La miingaran! Mammula tee too, te'damo kulanniso' pole'pa anggoro', ke te'dapi naratu Puang Allataala mangparenta susi Raja." 19 Mangkai joo, nnalami roti, namangkurru sumanga' lako Puang Allataala, namane' nti'pek-ti'pekki, anna benni anak gurun-Na nakua, "Batang kale-Ku' tee to dipangkaroban, sanga kamu'. Pugaukki susi tee minii nningaranna'." 20 Susi too tonna mangkamo kumande, nnalami isotan anggoro', nakua, "Ia tee isotan nanii titanan basse barun-Na Puang Allataala napaassah to'doan rara-Ku' to dipato'doan kamu'." 21 Mangkai joo nakuamo Puang Isa, "Apa kitari! Inde'i kusolan to tolampangpejokkoanna'. 22 Ia tee Aku' Anak Mentolino, nang la matena', susi to pura napattantu Puang Allataala. Apa macilaka to tompangpejokkoanna'!" 23 Pada sikutanami nakua, "Indannariki' to la mpugaukki susi joo?" 24 Sipekkami to anak gurun-Na Puang Isa indannara to la dikita la'bi majao. 25 Nakua Puang Isa lako, "Ia to raja lan lino to tangmalaja' lako Puang Allataala mpandasa bang taunna, na ia to tomakuasa disanga 'Tompangngewai taunna.' 26 Apa te'da miwa'ding susi joo. Sibalikanna, ia to tossanga kalena tomala'bih, la menjaji tomajiong, na ia to tossanga kalena tomassua, la menjaji todisua-sua. 27 Indara to la'bi matonggo: iaraka to tokumande, ba'tu iaraka to tomangparaka? Tantu ia to tokumande. Apa lanna' tangnga-tangngami susi to tomangparaka. 28 Lan sininna kamasussan-Ku' tuli solaki'. 29 Iamo joo la kuben kamu' kuasa mangparenta, susi Ambe'-Ku' mangka mbenna' kuasa, 30 antamasannang sola, ke menjaji Rajamo'. Na la cumadokko kamu' jao sangpulo dua cadokkoan mala'bih la mparenta sangpulo dua pangrapuanna to-Israel." 31 Nakuamo Puang Isa, "Ee Simon, ee Simon pesa'dingngii! Dieloranmo to Ballisi' ssedeko, susi gose' dirido nadita'pii, anna sisarak issinna na sowokkona. 32 Apa mangkamo' mpassambajanganko ammuda'tan matappa'. Na ia mumengkatoba'mo, la mupamawatang kamatapparanna to padammu tomatappa'." 33 Mebalimi Petrus nakua, "Oo Puang, sadiana' ditarungku, kupada mate Puang!" 34 Nakua Puang Isa ngkuanni, "Ee Petrus! La muingaran kumua, te'dapa nakekkua to manuk tee bongi, mupentallunmo mpessakkannina'." 35 Mangkai joo nakuanmi Puang Isa to anak gurun-Na, "Ia tongkusua kamu' tonna tee male mpangpeissenan Kareba Kasalamatan, kuanggai kamu' mbawa karappe', sepu' ba'tu sandala', kakuranganra kamu'ka?" Napebalii nakua, "Te'da!" 36 Nakuamo Puang Isa, "Apa ia tee wattu, ia ke denni karappe'mi iarika sepu'mi, bawai. Na ia ke te'dapi pa'dangmi, mibalukki to baju landomi miallianni pa'dang. 37 Pugaukki joo, nasaba' la jajimo tee too to diuki' lan Sura' Allataala, to mpauna', nakua, 'Dikita togaja'i.' " 38 Nakuamo to anak gurun-Na, "Oo Puang, denmo dua pa'dang inde'." Napebalii Puang Isa, "Ganna'mo!" 39 Ia tonna messunmo Puang Isa lan mai kota, malemi de' Buntu Zaitun susi biasanna, male todami to anak gurun-Na sola. 40 Ia tonna ratumo lako ntuu joo, nakuanmi, "Massambajang kamu', danggi' mimadosa ke disede kamu' mpugauk dosa." 41 Mangkai joo malemi ba'tu pirang-pirang tengkan to Puang Isa, agi-agi sangpellekkosan batu, namengguntu' massambajang, 42 nakua, "Oo Ambe', ia ke wa'dingngi, lendokanni tee kamaparrisan jio mai kale-Ku', apa tangngia pakkaeloran-Ku' to la jaji, apa pakkaeloran-Na ia Ambe'." 43 Den mesa' malaeka' ratu mpemawatangngii. 44 Gaja parri' penawan-Na Puang Isa, anna mattongan-tonganmi massambajang. To'do to ma'puh-Na do' litak susi rara. 45 Ia tonna mangkamo massambajang, polemi Puang Isa lako to nanii anak gurun-Na. Natimba'i simammasan, sanga masse gajai penawanna. 46 Nakuanmi, "Oo, ammimamma' bangra? Mi'cokmo kamu' mimassambajang, danggi' mituru'i ke disede kamu' mpugauk dosa." 47 Ia tonna mangkada bang unapa Puang Isa, ratumi to tau buda nakapalai Yudas iamo to sala mesa'na anak gurun-Na. Ta'pa tarruhmi nnudung Puang Isa. 48 Apa nakuanni Puang Isa, "Ee Yudas, iamoraka tuu pangngudung munii mpangpejokkoanna' tee Aku', Anak Mentolino." 49 Ia tonna issenmi to tonasolan Puang Isa apa to la jaji, mangkadami nakua, "Oo Puang, la kipa'dangngi bangmi!" 50 Na sala mesa'na tuu lako tau, ta'pa nnonok pa'dangna, napa'dangngii to kaunanna Imang Lompo, nata'tak to talinga kananna. 51 Apa nakua Puang Isa, "Ganna'mo!" Nasapumi Puang Isa talinganna joo tau, napamolei. 52 Nakua Puang Isa lako kapala imang sola kapala pangjagana Bola Puang Allataala na pekaamberan to-Yahudi to ratu ntuu jio la njokkoi, "Misangaraka parampo'na', ammiratu sitakin pa'dang sola mbawa tarasulu' la njokkona'? 53 Allo-allo solaki' jio Bola Puang Allataala, na te'da mijokkona'. Apa iamo tee wattunna minii sola kuasanna Ballisi' la mangpugauk." 54 Najokkomi to Puang Isa, nasolanni lako bolana Imang Lompo. Naturu'i mambela-bela bangngi Petrus. 55 Ia tonna dipadukkumo to api dipendarang jio tangnga rante bola, malemi Petrus cumadokko sola to tontalimbungngi. 56 Den mesa' baine kaunan ngkita Petrus cumadokko naarrang api dipendarang. Nakaje'jekki to Petrus, anna kuanni, "Ia too tee tau sibawanna Puang Isa nena'!" 57 Apa messakkanni Petrus, nakua, "Te'da lalo kuissenni joo tau!" 58 Te'da namasai, den omi mesa' tau laen ngkita Petrus nakuanni, "Iko toda mesa' anak gurun-Na joo tau!" Apa napebalii Petrus, "Te'da. Tangngiana'!" 59 Agi-agi sangjang mangkanna, den pole' omi mesa' tau mpetambanni to Petrus nakua, "Ia toda tee tau sala mesa'na anak gurun-Na Puang Isa, nasaba' to-Galilea toda ia!" 60 Apa napebalii Petrus nakua, "Apara tuu musanga, te'da lalo kuissenni!" Ia tonna mangkada unapa Petrus, kekkuami to manuk. 61 Messailemi Puang Isa nakitai to Petrus. Naingaranmi Petrus to apa mangka nakuanni Puang Isa, "Te'dapa nakekkua to manuk tee bongi, mupentallunmo mpessakkannina'." 62 Ta'pa kumarrakmi Petrus nna'de-a'de, anna male lako salean. 63 Ia to tau nnampai Puang Isa, nacapa'-capa'i sola nasijangguru'i. 64 Nasapu'i to lindo-Na, namekutana lako, "Ee nabi! Tappuike', indara to njangguru'ko?" 65 Budapa kada pangcapa' nakuanni. 66 Melambi' unapa nasirempunmo to Pangbicara Agama, iamo to pekaamberan to-Yahudi ba'tu kapala imang sola guru agama. Na dipangngolo to Puang Isa lako tuu lako tau. 67 Nakuamo lako Puang Isa, "Pauankan, Ikomoraka Raja Mangpasalama'?" Mebalii Puang Isa, "Moi kupauan kamu', nang te'da too milangkatappa'i. 68 Na moi kukutanai kamu', nang te'da too mipebalii. 69 Apa mammula tee wattu, ia tee Aku' Anak Mentolino la cumadokko jio sa'de kanan-Na Puang Allataala to makuasa." 70 Nakua ngasan mangkada, "Ia ke susii joo, Ikomoraka tee Anak Allataala?" Mebalii Puang Isa, nakua "Susi tuu tapaunna, Aku'mo." 71 Mangkadami nakua, "Te'damo nadiparallui to sa'bi! Misa'ding kalenamo to kadan-Na!"

Lukas 23

1 Ke'dehmi tuu lako tau lan joo kasirempunan, namale ssolanni to Puang Isa lako Gubernur Pilatus. 2 Ntuu jio nanii mparapa'i. Nakua mangkada, "Kiampa'i tee tau mpatuju sala bangsata'. Nnajahhi tau cia' mbajah sima lako Tomaraja Roma, nasaba' nakua, iamo Raja Mangpasalama', battuananna nakua kumua iamo Rajaki'." 3 Nakutanaimi Gubernur Pilatus to Puang Isa nakua, "Tongannaraka, Ikomo Raja to-Yahudi?" Napebalimi Puang Isa nakua, "Susi tuu tapaunna, Aku'mo." 4 Nakua Gubernur Pilatus lako kapala imang sola lako tobuda, "Moi mesa' kasalan napugauk lako tomangparenta te'da kuampa' to sipato'na kunii la ntarungkui." 5 Apa ia tuu lako tau la'bi napattantui kumua, "Mpatuju sala tau la nnewa tomangparenta lan lili'na Yudea mellao jio mai Galilea, na ratu toomi ntee." 6 Ia tonna sa'dingngi Gubernur Pilatus joo, mekutanami nakua, "To-Galilearaka tee tau?" 7 Ia tonna dipauanmo kumua, "Ia kita' tee Puang Isa to lan kuasa kaparentanna Raja Herodes," nakiringmi Gubernur Pilatus lako Raja Herodes to ratu toda ia jao kota Yerusalem joo wattu. 8 Gaja sannangngi Raja Herodes tonna kitai to Puang Isa, sanga masaimo nasa'ding to karebanna namadoangngi la ngkitai, namadoang tooi la ngkitai to tanda mejangngaran napugauk. 9 Iamo joo buda nakutananni Raja Herodes to Puang Isa, apa te'da bang napebalii. 10 Male todami tuu lako kapala imang sola guru agama mangngolo lako Raja Herodes, mpasala tongan-tonganni to Puang Isa. 11 Na Raja Herodes sola surudadunna mpelle' Puang Isa na ncapa'-capa' tooi, napapakeii pakean kamala'biran. Mangkai joo, namane' mpapolei lako Gubernur Pilatus. 12 Iamo joo allo nanii Raja Herodes sola Gubernur Pilatus sikalino pole', sanga ia tee pura diboko', siewalii. 13 Narempunmi Gubernur Pilatus to kapala imang, pekaamberan to-Yahudi sola tobuda. 14 Nakuanni, "Ia tee tau mibawa lako kaleku', misanga kumua nnajahhi sala tau. Na mangkamo kuparessa jio olomi, apa moi mesa' te'da kagajatan kuampa' napugauk la nnewa tomangparenta susi to miparapasanni. 15 Susi too pangngampa'na Raja Herodes, nasaba' napapoleankan tonna mangka mparessai. Moi mesa' te'da apa napugauk tee tau to sipato' la dinii mbunoi. 16 Iamo joo la kupangperambianni, kumane' lla'paranni." 17 Napissennii to tau ntuu jio mangkada nakua, "Bunoi! La'paranni Barabas!" Ianna pangramean Paskah omo, tuli den mesa' toditarungku nala'paran Gubernur Pilatus lako tobuda. 19 (Ia joo Barabas naditarungku, nasaba' turu' nnewa tomangparenta na buda tau nabuno.) 20 Sitonganna madoang Gubernur Pilatus la lla'paranni to Puang Isa. Iamo joo nadadu'pi pissen sipangkada tuu lako tobuda. 21 Apa siarrakanni tuu lako tobuda nakua, "Pampangngi Ia! Pampangngi Ia!" 22 Mangpentallunnami Gubernur Pilatus mekutana nakua, "Kasalan apara to mangka napugauk? Moi mesa' kasalan te'da kuampa' to sipato'na dinii la mbunoi! La kurambii, kumane' lla'paranni." 23 Apa metamba-tambai joo tobuda kumua nadipampang joo Puang Isa. Na katampakanna ditarima to peta'danna joo tobuda. 24 Nara'tahmi Gubernur Pilatus kumua la dibunoi joo Puang Isa situru' pangkabudaianna tobuda, 25 nala'paranni to tonapeta'da, iamo joo to ditarungku, nasaba' nnewa tomangparenta na mbuno buda tau. Mangkai joo, napangbenmi to Puang Isa lako tobuda anna pugaukki apa to nakadoangngi. 26 Mangkai joo, malemi nasolan surudadu to Puang Isa lako to dinii la mpampangngi. Jio tangnga lalan sitammumi mesa' to-Kirene disanga Simon, mangnguju lako kota. Ta'pa natoemi surudadu, naparukui mpassanni to kaju sitamben-Na Puang Isa, naundi jio boko'-Na Puang Isa. 27 Buda tau meundi jio boko'na Puang Isa. Den too ba'tu pira-pira baine to-Yerusalem. Ia tuu lako baine ngkillakki sola mbatingngi Puang Isa. 28 Apa nasailei Puang Isa nakuanni, "Ee, kamu', baine to-Yerusalem! Danggi' mikillakkina'. Kalemimo mikillakki sola anakkami. 29 Nasaba' den wattunna nakannai sussa tonggo tee kota Yerusalem, nakua to tau, 'Gaja sannang ia to baine te'dapa naden nakeba'tang, to te'dapa naden naampui anak sola te'dapa naden nampacucu pea'-pea'!' 30 Iamo joo wattu la mangkada to tau lako buntu, 'I'pinnikan mai!' Na lako buntu-buntu, 'Samboikan mai!' 31 Nasaba' ia ke lako Aku', to sangrapang kaju tuopa, napugaukki susi tee, apa pole' opa ke lako kamu', to sangrapang kaju makasemo!" 32 Den toda dua togaja', nasolan surudadu la dipasibuno sola Puang Isa. 33 Ia tonna ratumo lako buntu-buntu disanga 'Buntu Ulu Tau,' napampangmi to Puang Isa, napampang tooi joo dua togaja', mesa' jio sa'de kanan-Na Puang Isa na mesa' jio sa'de kairin-Na. 34 Massambajangngi Puang Isa nakua, "Oo, Ambe', dampanganni tee mai tau! Te'da naissenni apa to napugauk." Namane' lotereii surudadu to pakean-Na la nanii nnissenni kumua umbonnara to la naputawa. 35 Sike'deran to tau ntuu jio mengkita, na ia to pekaamberan to-Yahudi ncapa'-capa'i Puang Isa nakua, "Mangkamo Ia mpasalama' tau laen. Ia ke tonganni napilei Puang Allataala menjaji Raja Mangpasalama', nampasalama' kalena tee too!" 36 Ia joo surudadu ncapa'-capa' toda Puang Isa. Siratuanni mbenni wai anggoro' macukka, 37 nakua unapa, "Ia ke Raja to-Yahudiko, pasalama'ko kalemu!" 38 Den pangnguki' dipajao de'na ulun-Na Puang Isa kumua: "Raja to-Yahudi tee tau." 39 Den sala mesa'na joo togaja' dipampang ncapa'-capa' Puang Isa nakua, "Kusanga Ikomo Raja Mangpasalama'? Ia ke tongannako, pasalama'moko kalemu, mupasalama' todakan!" 40 Apa ia to togaja'pa mesa' ngkuanni joo solana nakua, "Te'daraka iko mumalaja' lako Puang Allataala? Susi bangki' pada la dibuno. 41 Ia mandari ia to kaladibunoanta' sola dua nang siangga' kita' panggaukanta'. Apa Ia tee tau, te'da lalo napugauk kasalan!" 42 Nakua mangkada lako Puang Isa, "Oo Puang, taingaranna' dikka' ke ratuki' menjaji Raja!" 43 Nakuanni Puang Isa, "Katappa'i, mammula tee allo la solaki' lan suruga." 44 Ia tonna tangngamo allo, agi-agi tatte' sangpulo dua te'damo namangngarrang to allo, namemmapattang ngasan joo tondok, angge tatte' tallu karuen. 45 Ca'ce tipangduami to kaen pesapa' lan Bola Puang Allataala. 46 Naandongngi Puang Isa metamba nakua, "Oo, Ambe'! Kusorongmi mati' sunga'-Ku'!" Ia tonna mangka mangkada susi joo, ka'tumi sunga'-Na. 47 Ia tonna kitami kamandang surudadu apa joo mangka jaji, mpakala'bihmi Puang Allataala, anna mangkada nakua, "Tonganna, te'da Ia nakasalan!" 48 Ia to tobuda ratu mengkita ntuu jio, nakita to apa jaji. Pole ngasanmi tuu lako tau simenassanan. 49 Na sininna to sola-Na Puang Isa, jio tooi to baine nturu'i jio mai tana Galilea, jenjen mambela-bela bangngi ngkita ngasanni joo. 50 Den mesa' tau disanga Yusuf, to-Arimatea jio tana Yudea. Tomelo penawanna, na todikasiri' too, tontajan wattunna Puang Allataala la mangparenta susi Raja. Moi na mesa' Pangbicara Agama, apa te'da nasitujuii to kara'tasanna sola panggaukanna solana. 52 Malemi Yusuf mangngolo lako Gubernur Pilatus, mpeta'dai kumua anna diben to batang rabukku-Na Puang Isa. 53 Mangkai joo, napupellaoi joo batang rabuk jao mai kaju sitamben, anna balunni kaen lenan, namane' mpatamai liang to digaraga jio buntu batu, to te'da bangpa nadipatamai tomate. 54 Ia joo wattu Allo Juma', na cingga'tu'mora na Allo Katorroan. 55 Ia tuu lako baine to ratu jio mai tana Galilea sola Puang Isa, malei sola Yusuf, anna kitai joo liang nakita tooi umbo nakua joo batang rabukku-Na Puang Isa dibujuh lan liang. 56 Mangkai joo, polemi mpasadia minynya'-minynya' busarungngu' la naminynyakan batang rabukku-Na Puang Isa. Ia tonna Allo Katorroanmo te'damo namangjama tuu lako baine situru' atoran agama.

Lukas 24

1 Ia tonna marimu-rimu unapa joo allo Aha', malemi tuu lako baine lako liang-Na Puang Isa mbawai joo minynya'-minynya' busarungngu' to mangka napasadia. 2 Nakitami to batu petungu' liang mangkamo dilentenni, 3 na ia tonna mentamamo, te'da naampa'i to batang rabukku-Na Puang Isa lan. 4 Jenjen bangmi ntuu jio, sanga pussakki ntangngahhi joo, ta'pa denmi dua tau ke'deh jio sa'dena mangpakean cumbia'-bia'. 5 Tarruh malaja'i, nacukku suju' do' litak, anna ia joo tau dua ngkuanni, "Ciapari miangah totuo lan tangnga-tangngana tomate? 6 Te'damo Ia ntee. Tuo pole'mi Ia! Ingaranni to apa mangka napauan kamu' tonna jiopa tana Galilea, 7 kumua, 'Ia tee Aku' Anak Mentolino, la dipangbenna' lako kuasanna tomadosa, napampangna', na ia ke allo mangpentallun la tuo pole'na'.' " 8 Naingaranmi tuu lako baine to kadan-Na Puang Isa. 9 Ia tonna polemo jio mai liang, malemi lako to nanii sangpulo mesa rasulu'-Na Puang Isa sola sininna solana, napauan ngasanni to apa mangka jaji. 10 Ia to baine to mpaui joo lako rasulu'-Na Puang Isa, iamo to Maryam Magdalena, Yohana na Maryam indona Yakub, na ia to baine laen to nasolan. 11 Apa nasanga tuu lako rasulu' kumua ia joo kareba nagaraga-raga bangra tuu lako baine. Te'da nakatappa'i joo curitanna. 12 Apa ta'pa ke'dehhi to Petrus nakinjara' lako liang. Ia tonna ratumo lako liang, cukkumi mangpenunu tama, apa pebalun manda lan nakita. Gaja jangngahhi, anna pole nnawa-nawai joo apa mangka jaji. 13 Allo ia bang unamo joo, den dua tau to nturu'mo Puang Isa male lako kampong Emaus, agi-agi sangpulo mesa kilo belana jio mai kota Yerusalem. 14 Nasipangkadai lan kalingkanna to apa mangka jaji. 15 Ia tonna sipangkada-kadamo, ta'pa ratumi Puang Isa ngkandoppi'i namale situru'. 16 Nakita to Puang Isa, apa disamboi pengkitanna, jaji te'da naperupai. 17 Nakua Puang Isa ngkutanai, "Apamora tee dicurita jio lalan?" Massei penawanna sola dua anna kenden. 18 Mesa'i to disanga Kleopas mekutana lako Puang Isa nakua, "Ee, Ambe'! Mbai Kita' manda to toratu jao kota Yerusalem, to te'da taissenni to apa mane' mangka jaji?" 19 Nakutanaii Puang Isa, "Apara ia joo?" Napebalii nakua, "Ia to Puang Isa, to-Nazaret, mesa' nabi. Makuasa sininna buangan kadan-Na anna pugauk buda tanda mejangngaran to natonganan Puang Allataala, la'bi-la'bi tobuda. 20 Mangka dipangngolo lako kapala imang sola pekaamberanta' anna dipampang namate jao kaju sitamben. 21 Kisanga bangmi kami' dikka' kumua Iamo la lla'paran to-Israel jio mai kuasanna to-Roma! Tallung allomi too mangkanna jaji. 22 Apa pole'pi, ba'tu pira-pira solaki' baine mpasabakankan. Melambik unapa namale lako liang, 23 apa te'da naampa'i to batang rabukku-Na jio. Polemi nakua ngkitai malaeka', to mpauanni kumua tuo pole'mi. 24 Ba'tu pira-pira solaki' male lako joo liang ntongananni to apa napau tuu lako baine. Apa te'da nakitai to Puang Isa." 25 Nakuamo Puang Isa lako, "Ee, nang bango' kamu'! Ciapari migaja sussa ngkatappa'i ngasanni to pura napasan nabi! 26 Tanglamperasairaka kamaparrisan jolo' to Raja Mangpasalama', namane' ntarima kamala'biran-Na?" 27 Mangkai joo nabattuanannimi Puang Isa to apa pura diuki' lan Sura' Allataala to ntuju kalena. Napamula jio mai sura'na Nabi Musa ratu lako sura'na nabi laen. 28 Samandoppi'-doppi'nami lako to kampong napangngujui. Susi to la mpatarruh bangngi kalingkan-Na Puang Isa, 29 apa naattianni. Nakuanni, "Tatorromo mangbongi, sanga la bongimi na la malillinmi." Mentamami bola la sipangbongian. 30 Ia tonna cumadokko la kumande sola, nnalami roti Puang Isa, namangkurru sumanga' lako Puang Allataala, namane' nti'pek-ti'pekki joo roti natawanni. 31 Mane'ri natandai kumua Puang Isa pale' Ia. Apa ta'pa ta'dei jio mai pengkitanna. 32 Sipangkada-kadami sola dua nakua, "Gaja endek sumanga'ta' tonna pangkadaiki' jio tangnga lalan, sola mpauanki' battuananna issinna to Sura' Allataala!" 33 Ta'pa polemi sola dua lako kota Yerusalem. Ntuu jio nanii siampa' to anak gurun-Na Puang Isa sangpulo mesa tonna sirempun sola solana to laenna. 34 Nakuamo joo anak gurun-Na mangkada, "Nang tongan kumua, tuo pole'mi to Puang! Mangkamo mpangpekitan kalena lako Simon!" 35 Ia joo dua tau to mane' ratu ncuritan toomi to apa mangka jaji jio tangnga lalan, na umbo nakua nnissenni to Puang tonna nti'pek-ti'pek roti. 36 Ia tonna mangcurita unapa tuu lako tau ta'pa ke'dehmi Puang Isa lan tangnga-tangngana nakuanni, "Salama' kamu', mimasannang!" 37 Sabakanni namalaja' sola ngasan, nasangai ngkitai bombo. 38 Apa nakua Puang Isa, "Matumbari mimalaja'? Matumbai mibata lan penawammi? 39 Kitai pala' limang-Ku' sola aje-Ku'. Katappa'i, kumua Aku' kalena tee! Sapui ammikita meloi, sanga te'da ia juku'na ba'tu bukunna to bombo, susi tee mikita jio kale-Ku'." 40 Ia tonna mangkada susi joo napangpekitan to pala' liman-Na sola aje-Na. 41 Apa te'dapa nakatappa'i anak gurun-Na, sanga liwa' masannangngi na jangngah tooi. Iamo joo nakutanaimi Puang Isa nakua, "Denraka kande iti'?" 42 Nabenmi sangle'to tunu bale. 43 Naalami joo bale, nakandei jio olona sola ngasan. 44 Ia tonna mangkamo joo, nakuamo Puang Isa lako anak gurun-Na, "Iamora tee to pura kupauan kamu' tontasola unapa, kumua sininna to pangnguki' mpauna' lan sura'na Nabi Musa, nabi laen, na Pangpujian, nang la jajinna ia." 45 Napamacorami Puang Isa to tangngahna napahangngi to issinna Sura' Allataala. 46 Nakuanni kumua, "Den diuki' lan Sura' Allataala kumua ia to Raja Mangpasalama' la maparri', na la tuo pole' jio mai kamatean, ke allo mangpentallun. 47 Den too diuki' kumua la dipangpeissenan joo Kareba, mpake sangan-Na Almaseh, lako sininna bangsa lan lino anna mengkatoba' jio mai dosana, nadampanganni Puang Allataala. Na ia joo Kareba dipangpeissenan mangpamula jio mai kota Yerusalem. 48 La titanan sa'bi kamu' to ianna joo. 49 Na Aku' kalena la mben kamu' kuasa susi to pura napau Ambe'-Ku'. Apa la torro kamu' lan ntee kota, ntajanni sanggenna ia to kuasan-Na Puang Allataala ngkuasai kamu'." 50 Ia tonna mangkamo joo, nasolanmi Puang Isa to anak gurun-Na messun lan mai kota Yerusalem, na male lako kampong Betania. Nnangka'mi liman-Na ntuu jio nabarakka'ii. 51 Ia tonna pugaukki joo, tiangka'mi de' suruga anna messarak jio mai anak gurun-Na. 52 Suju'mi to anak gurun-Na ssompai, namane' pole lako kota Yerusalem masannang ngasan, 53 na tuli mpakala'bih Puang Allataala lan Bola Puang Allataala.

Yahya 1

1 Mammula jiona mai tonna te'dapa napadenni Puang Allataala tee lino, denmo todisanga Kada. Ia joo Kada solai Puang Allataala, na ia joo Kada, Ia bang una Puang Allataala. 2 Mammula jiona mai solai Puang Allataala. 3 Sininna apa to dipaden, napaden Puang Allataala mpakei joo Kada, na ia ngasan to dipadenmo, moi mesa' te'da lalo ia, ke te'dai joo Kada. 4 Iamo garonto'na katuoan, na ia toomo Arrang nnarrangngi penawanna tolino. 5 Ia joo Arrang mangngarrang lan kamalillinan, na ia to totuo lan kamalillinan te'da nakullei mpahangngi. 6 Den tau nasua Puang Allataala disanga Nabi Yahya. 7 Iamo menjaji sa'bi ratu mpangpeissenanni joo Arrang, anna kitai tobuda, namenjaji matappa'. 8 Tangngia ia Arrang joo Nabi Yahya, apa iara mpangpeissenanni. 9 Ia joo Kada, iamo Arrang tongan, ratumo tama lino nnarrangngi penawanna sininna tolino. 10 Sininna apa lan lino, napaden Puang Allataala mpakei joo Kada, apa ia tonna mentamamo lino, te'da naissenni tolino. 11 Mentamai tondokko-Na, apa cia'i to sangtondokko-Na ntarimai. 12 Apa ia to tontarimai, nakatappa'ii, naben kuasa menjaji anak Puang Allataala. 13 Ia to todiben kuasa menjaji anak Puang Allataala, te'da nadijajian susi pea, apa Puang Allataala kalena mpupenjaji anakki. 14 Ia joo Kada mentolinomi namari'pihmi lan tangnga-tangngata'. Takitamo to kamala'biran-Na, to natarima jio mai Ambe' sanga Ia Anak tungga'-Na. Iamo joo Anak mpamanassa tonganni to Puang Allataala sola pangpakamoja'-Na. 15 Ratui Nabi Yahya mpangpeissenanni joo Kada nakua, "Iamo joo to kupau kumua, 'La den tau ratu ke mangkana', apa la'bi makuasa Ia na aku', nasaba' te'dapa kudijajian na den memanmi Ia.' " 16 Liwa' Ia mpakamoja'ki', na te'da ka'tun-Na mbarakka'iki'. 17 Ia to atoran-Na Puang Allataala nabenki' Nabi Musa, apa ia to pangpakamoja' sola katonganan jio mai Puang Allataala napamanassa Puang Isa Almaseh. 18 Moi mesa' tau te'dapa ngkita Puang Allataala, saliwanna ia to Anak tungga'-Na, Ia bang una Puang Allataala, to torro sola. Iamo mpamanassai lako kita' to Ambe'. 19 Susimi tee pangngakuanna Nabi Yahya lako ba'tu pira-pira imang sola to-Lewi, to nasua pekaamberan to-Yahudi jio kota Yerusalem ngkutanaii kumua, "Indariki'?" 20 Napaui to sitonganna nakua, "Tangngiana' Raja Mangpasalama'." 21 Mekutana pole'i nakua, "Ia ke susii tuu, indariki'? Kita'raka Nabi Elia?" Mebalii Nabi Yahya nakua, "Tangngiana'." Mekutana unapi nakua, "Kita'moraka to nabi napau Puang Allataala la ratu?" Mebali omi nakua, "Tangngiana'." 22 Nakua unapa, "Ia ke susii tuu, pauankan indariki' pale' sitonganna, angkipebalianni lako to tossuakan. Na apara la tapau mpau kaleta'?" 23 Mebalimi Nabi Yahya mpau kadanna Nabi Yesaya kumua, "Aku'mo tee to metamba-tamba jio padang pallawangan nnajahhi tobuda kumua, 'Ranteii to lalan la naola Puang!' " 24 Ia joo todisua den too ba'tu pira-pira to-Farisi. 25 Nakua lako Nabi Yahya kumua, "Ciapari pale' tajio' tau, ke tangngiaki' Raja Mangpasalama', tangngia tooki' Nabi Elia ba'tu nabi to napau Puang Allataala la ratu?" 26 Mebalimi Nabi Yahya nakua, "Kujio'i wai to tau, apa den lan tangnga-tangngami to te'da miissenni. 27 Iamo ratu ke mangkana'. Apa moi mbukai ulang sapatun-Na te'da too kusipato'." 28 Ia ngasanmo joo jaji jio kampong Betania, sambali' kadellekanna Sa'dan Yordan, to nanii mangjio' Nabi Yahya. 29 Masawanna malemi Puang Isa lako Nabi Yahya. Ia tonna kitai Nabi Yahya to Puang Isa mangkadami nakua, "Iamo joo Anak Bembala'-Na Puang Allataala ratu la ndampangan tolino. 30 Iamo joo kusanga tongkumangkada kumua, 'Iamo la ratu ke mangkana', apa la'bi makuasa Ia na aku', nasaba' te'dapa kudijajian, na denmi Ia.' 31 Na iamo kuratu njio' wai tau, dikua angkupangpeissenanni to Raja Mangpasalama' lako to-Israel. Susi toda aku' tonna pamulanna, te'da kuissenni kumua indara to Raja Mangpasalama'." 32 Napangpeissenan tooi Nabi Yahya nakua, "Ngkitana' Roh Allataala susi jangan-jangan mellao jao mai langi', natorro jao Puang Isa. 33 Te'da kuissenni kumua Iamo Raja Mangpasalama', apa Puang Allataala to ssuana' njio' wai tau, mangka mpauanna' nakua, 'Ia ke ngkitako Roh Allataala mellao jao mai langi', natorro jao mesa' tau, Iamo joo la njio' tau Roh Allataala.' " 34 Nakuapa Nabi Yahya, "Mangkamo' ngkita kalenai na kupangpeissenanmo kumua, Iamo Anak Allataala." 35 Masawanna ke'deh pole' omi Nabi Yahya ntuu jio sola anak gurunna dua. 36 Ia tonna kitai liu lalan to Puang Isa, nakuamo, "Iamo joo Anak Bembala'-Na Puang Allataala!" 37 Nasa'dingngi joo anak gurunna dua, naundi lako Puang Isa. 38 Apa messailei Puang Isa, nakitai kumua napeundii, nakuamo ngkutanai, "Apara miangah?" Nakuamo mebali, "Rabi (battuananna Guru), umbora tanii torro?" 39 Napebalii Puang Isa nakua, "Malemo kamu' mai mikitai." Malemi sola nakitai to nanii torro, natorro sola ba'tu pirang-pirang jang. Ia joo wattu agi-agi tatte' a'pa'mi soloh allo. 40 Sala mesa'na joo dua tau, to ssa'ding kadanna Nabi Yahya, male sola Puang Isa disanga Andreas to sile'tona Simon Petrus. 41 Ia joo Andreas ta'pa male ntiroi Simon sile'tona napauanni kumua, "Siampa'mokan Almaseh, battuananna Raja Mangpasalama'." 42 Nasolanni lako Puang Isa, nakaje'jekki nakuanni, "Iko Simon, anakkana Yahya, la disangako Kefas." (Kefas lan basa Yahudi pada una Petrus lan basa Yunani, battuananna: buntu batu.) 43 Masawanna mangngattami Puang Isa male lako tana Galilea. Sitammumi Filipus, nakuanni, "Maleko mai nturu'na'." 44 Ia joo Filipus sangkampongngi Andreas sola Petrus, to-Betsaida. 45 Malemi Filipus ntiro solana disanga Natanael napauanni kumua, "Siampa'mokan Raja Mangpasalama' to nauki' Nabi Musa sola sininna nabi laen lan sura'na tonna anu'. Iamo to disanga Puang Isa to-Nazaret anakkana Yusuf." 46 Apa mebalii Natanael nakua, "Te'da lalo ia kameloan messun lan mai kota Nazaret." Mebalimi Filipus nakua, "Malemoko ngkitai." 47 Malemi Natanael lako Puang Isa. Ia tonna kitami Puang Isa to Natanael nakuamo mpaui, "Inde'mi to tomassipa' to-Israel tongan, te'da lalo pangnguraga lan kalena!" 48 Mekutanami Natanael nakua, "Umbora takua nnissenna'?" Mebalimi Puang Isa nakua, "Te'dapa natambaiko Filipus, kukitamoko jiong garonto' ara." 49 Nakua pole' omo Natanael, "Oo Guru, Anak Allataalaki'. Kita'mo rajana to-Israel." 50 Nakua Puang Isa, "Iara mumatappa' nasaba' kukuanko, 'Kukitako jiong garonto' ara.' Te'dapa nasipennapan joo mukitanna. Denpa to la'bi mala'bih na ia joo la mukita!" 51 Nakuapa Puang Isa ngkuanni tuu lako tau, "La miingaran tee kadang-Ku' kumua, la mikita to langi' titimbak na ia to malaeka'-Na Puang Allataala lao lisu jao mai langi' ratu lako Aku', Anak Mentolino."

Yahya 2

1 Duang bongi mangkanna joo den tobotting jio kota Kana tana Galilea, na den todai to indo-Na Puang Isa jio. 2 Dipauan tooi Puang Isa sola anak gurun-Na naratu. 3 Ia tonna cappu'mo to anggoro', mangkadami indo-Na lako Puang Isa nakua, "Cappu'i anggoro'na." 4 Mebalii Puang Isa nakua, "Oo indo', danggi'pa suana'. Te'dapa nadete'i wattung-Ku' la mpangpeissenan kale-Ku'." 5 Nakua indo-Na Puang Isa ngkuanni to todisua, "Moi apa nasuan kamu', pugauk bangngi." 6 Den annan busu batu sigaja tonggo jio, dipasadia dipanii wai la dipenje'ne' situru' ada'na to-Yahudi. Ia to mesa' busu agi-agi la saratuh litere' issinna. 7 Nakua Puang Isa ngkuanni tuu lako todisua, "Issii wai tuu mati' busu." Napeponnoi tonganmi wai. 8 Nakua omo Puang Isa, "Siokki ci'di', mibawanni joo todipatoei sara." Malemi nabawan. 9 Nacobai joo wai menjajimo anggoro', apa te'da naissenni, kumua anggoro' pole umbora ia joo. Ia mandara to todisua nnissenni. Natambaii joo tobotting muane, 10 nakuanni, "Ia to tau napangngolo ia jolo' to anggoro' kaminang melo. Ia ke mangkami to tau mperasaii to melona, mane'ri to biasanna. Apa ia to kita' tee, taanna to melona, ratu lako cappa'na pangmaroasan." 11 Jiomo kota Kana tana Galilea nanii Puang Isa mpugaukki joo tanda mejangngaran. Iamo joo tanda mejangngaran bungah napugauk, nanii mpangpekitan kamala'biran-Na, nakatappa'ii anak gurun-Na. 12 Ia tonna mangkamo joo, malemi Puang Isa lako kota Kapernaum sola indo-Na, sile'to-Na na anak gurun-Na, apa ba'tu pirang-pirang bongiri jio. 13 Ia joo wattu madoi'mo nadete' pangrameanna to-Yahudi disanga Allo Paskah, namale Puang Isa de' kota Yerusalem. 14 Naampa'i Puang Isa jio rante Bola Puang Allataala to pangdangkang sapin, beke, bembala', sola jangan-jangan na tompasitongka doi' cumadokko jio. 15 Nnalami ulang Puang Isa nagaragai perambi, namane' nnula'i ngasanni to tau messun lan mai rante Bola Puang Allataala sola sininna bekena, bembala'na, na sapinna. Ia to doi' dipangpetongkan napessamboranni do' litak, namane' mbalittua'i to mejana. 16 Nakua ngkuanni to pangdangkang jangan-jangan, "Alai ngasanni tuu mati', danggi' mipasusii pasa' to Bola-Na Ambe'-Ku'." 17 Ta'pa naingaran anak gurun-Na to diuki' lan Sura' Allataala kumua, "Ee Puang, pangkabudaian-Ku' lako Bola-Mi mpamalussu penawang-Ku'." 18 Ia to pekaamberan to-Yahudi nnewali Puang Isa nakuanni, "Tanda mejangngaran apara la tapugauk to mpamanassai kumua wa'dingki' mpugaukki susi tuu?" 19 Napebalii Puang Isa nakua, "Ro'pokanni tee Bola Puang Allataala, na tallung allora kunii mpake'deh pole'i." 20 Jangngahhi to pekaamberan to-Yahudi nakuanni, "Wah, patang pulo annan taunna dinii nggaragai tee Bola Puang Allataala, antakullei la mpake'dehhi tallung allora?" 21 Apa ia to nasanga Puang Isa Bola Puang Allataala, batang kale-Na Ia. 22 Mangkamira tuo pole' Puang Isa jio mai kamatean-Na, namane' nningaranni anak gurun-Na kumua mangkamo napau joo. Mane'ri nakatappa'i to apa diuki' lan Sura' Allataala sola to apa mangka napau Puang Isa. 23 Jao unapi kota Yerusalem Puang Isa tonna pangramean Paskah, na buda tau matappa' lako kale-Na, sanga nakitai to tanda mejangngaran napugauk. 24 Apa ia to Puang Isa te'da nakatappa'ii tuu lako tau, nasaba' naissen ngasan to penawanna tau. 25 Te'da naparallu dipangpeissenan lako Puang Isa kumua matumba sipa'na to tolino, nasaba' naissen jolo Ia to apa lan penawanna tau.

Yahya 3

1 Den to-Farisi disanga Nikodemus, mesa' pekaamberan to-Yahudi. 2 Ratu bongii lako Puang Isa nakua ngkuanni, "Ee Guru! Kiissen kumua nasuaki' Puang Allataala ratu menjaji guru, nasaba' moi mesa' tau te'da ngkullei mpugauk tanda mejangngaran susi to tapugauk, ke te'da na Puang Allataala mpakuasai." 3 Napebalii Puang Isa nakua, "Ingaranni! Moi mesa' tau te'da nawa'ding menjaji umma'-Na Puang Allataala lan kaparentan-Na, ke te'dai nadijajian pole'." 4 Nakua Nikodemus ngkuanni, "Umbo susi to tau la dijajian pole' ke matuami? Wa'dingraka pole pole' tama ba'tangna indona, anna dijajian pole'?" 5 Napebalii Puang Isa nakua, "Ingaranni! Ia ke te'da nadijajian pole' to tau jio mai wai sola Roh Allataala, te'da nawa'ding menjaji umma'-Na Puang Allataala lan kaparentan-Na. 6 Ia to tolino najajian padanna tolino nang tolinoi ia, apa ia to katuoan baru ditarima pole jio mai Roh Allataala. 7 Danggi' mijangngah, ke kukuan kamu', 'La dijajian pole' kamu'.' 8 Ia to angin mangngiri' te'da dikita malena. Tasa'ding to ongngohna, apa te'da taissenni kumua umbo nanii ratu, na umbo nanii male. Susi toomi to tontarima katuoan baru pole jio mai Roh Allataala." 9 Mebalimi Nikodemus nakua, "Matumbai nawa'ding susi joo?" 10 Mebalimi Puang Isa nakua, "Oo, gurunnako to-Israel anna te'da muissenni battuananna tee kadang-Ku'! 11 Katappa'i, kipau to apa kiissen sola kipangpeissenan to apa kikitamo, apa te'da mitarimai. 12 Ia una to apa lan lino kupau na te'da mikatappa'ii, ia pole'raka ke apa jao suruga milangkatappa'ii! 13 Na moi mesa' tau te'dapa ia endek de' suruga, apa mane' Aku'ra tee, Anak Mentolino, to pole jaomo mai. 14 Susi Nabi Musa tonna palakoi kaju to ulah tambaga napamajaoi jio padang pallawangan tonna anu', susi toda Aku' Anak Mentolino, la dipamajaona', 15 anna ia to tomatappa' lako Aku', la nnampa' katuoan melo te'da cappa'na. 16 Liwa' napakamoja' Puang Allataala to tolino. Iamo joo nasuai to Anak tungga'-Na mpangben sunga'-Na naputuoi tolino. Na ia to tomatappa' lako, te'da nalamasolang, apa la nnampa' katuoan melo te'da cappa'na. 17 Nasuai Puang Allataala to Anak mentama lino, te'da anna la sessai to tolino, apa la napasalama'ri. 18 Ia to ngkatappa'ii, te'da naladisessa, apa ia to tote'da namatappa', la dipabalahhi to dosana, nasaba' te'da nakatappa'ii to Anak tungga'-Na Puang Allataala. 19 Iamo tee dinii mpasalai to tolino kumua ratumo tama lino to arrang nnarrangngi, iamo to Anak, apa la'bi nakabudai to kamalillinan, iamo to kagajatan, nasaba' gaja'i to panggaukanna. 20 Ia to tompugauk panggaukan gaja' nakaba'ci to arrang. Iamo nate'da naratu jio to nanii arrang, nakua nate'da nakitai tau to panggaukan gaja'na. 21 Apa ia to tompugauk pakkaeloran-Na Puang Allataala, ratu ia lako arrang, anna menjaji manassa to kumua ia to panggaukanna situru'mo pakkaeloran-Na Puang Allataala." 22 Mangkai joo malemi Puang Isa lako tana Yudea sola anak gurun-Na, natorro jio ba'tu pirang-pirang allo njio' tau. 23 Ia joo wattu te'dapa naditarungku Nabi Yahya. Njio' tau jio kampong Ainon, sikandoppi' kampong Salim, sanga buda wai jio, nabuda too tau ratu madoang dijio'. 25 Den ba'tu pira-pira to anak gurunna Nabi Yahya sipekka mesa' to-Yahudi, ssipekkaii to atoran pangje'nesan to-Yahudi. 26 Malemi lako Nabi Yahya to anak gurunna ngkuanni, "Ee Guru, ia to tau tasolan jio sambali'na Sa'dan Yordan, to tapakitankan, njio' todami Ia tau tee too, namale lako ngasanmi to tau." 27 Mebalimi Nabi Yahya nakua, "Moi mesa' apa te'da naampui tau, ke te'da na Puang Allataala mbenni jao mai suruga. 28 Na misa'ding kalenamo kukua, 'Tangngiana' Raja Mangpasalama', apa disuara' njoloanni mpasadia lalan.' 29 Susinna jio pangmaroasan tobotting, tobotting muane ia to majao, sanga ia puangna tobotting baine. Ia to soba'na mesa' ke'deh nasikandoppitan, liwa' sannang ssa'dingngi to gamaranna tobotting muane. Ia tee aku' susira' soba'na tee tobotting muane. Liwa'na masannang tee too, nasaba' budamo tau ratu lako Puang Isa. 30 Sipato' Ia la samajao-jaona, na aku' la samajiong-jiongna." 31 Ia to Puang Isa, iamo to pole jao mai suruga, najaonanni ngasan to sininna apa. Ia to topole jio mai lino, direken ia tolino, namangkada tolino too. Apa Puang Isa pole jao mai suruga, najaonanni to sininna apa. 32 Napamanassamo to apa mangka nakita sola nasa'ding, apa moi mesa' tau cia' ntarimai to kadan-Na. 33 Ia to tontarimai joo kadan-Na Puang Isa, naakui kumua tongan to kadan-Na Puang Allataala, 34 nasaba' Puang Isa nasua Puang Allataala mpangpeissenan kadan-Na, napangben pissenmo Puang Allataala to Roh Allataala lako Puang Isa. 35 Napakamoja' Ambe' to Anak, jaji sininna apa napangben ngasanmo nakuasai Anak. 36 Na ia to tomatappa' lako Anak, la nnampa' katuoan melo te'da cappa'na. Apa ia to tote'da naturu'i to pakkaeloran-Na Anak, te'da nalannampa' katuoan melo, apa la nasessa tarruh Puang Allataala.

Yahya 4

1 Nasa'dingmi to-Farisi kumua la'bi buda tau najio' Puang Isa naturu'i, na ia tonturu' Nabi Yahya. 2 Sitonganna te'da na Puang Isa njio' tau, apa anak gurun-Nari. 3 Na ia tonna issenmi Puang Isa kumua nasa'dingmi to-Farisi joo, ssalaimi tana Yudea, napole re' tana Galilea. 4 Apa lan kalingkan-Na Puang Isa re' tana Galilea la nnola lakori tana Samaria. 5 Agi-agi tatte' sangpulo dua ratumi lako mesa' kota jio tana Samaria disanga Sikhar, siandah padangna Yakub to mangkamo natawan anakkana tonna anu' to disanga Yusuf. Den bubunna Yakub jio. Gaja bo'jo'i Puang Isa lumingka tangnga allo nacumadokko jio sa'dena joo bubun. 7 Nata'pa tarruh tama kota to anak gurun-Na nnalli kande. Ratumi mesa' to baine to-Samaria la mewai. Nakua Puang Isa ngkuanni, "Ee indo', wa'dingraka mubenna' wai la kuiso'." 9 Jangngahhi joo baine, sanga to-Yahudi na to-Samaria te'da nasisumuan. Iamo joo nakua kumua, "Oo, na to-Yahudiki', na to-Samariana', antapeta'daina' wai diiso'." 10 Mebalimi Puang Isa nakua, "Te'da muissenni to barakka'-Na Puang Allataala na te'da too muissen kumua indara' tee mpeta'daiko wai diiso'. Ia ke la muissenni, iko pole'ra la mpeta'da wai lako Aku', angkubenko wai mangpatuo." 11 Nakua joo baine ngkuanni, "Ee Puang, napole umbo la tanii nnampa'i joo wai mangpatuo, na te'da siok taampui, anna liwa' mandalan tee bubun. 12 Ia tee bubun natawankan tojoloki' Yakub tonna anu'. Na moi ia wai lan toda mai ntee bubun naiso' sola anakkana na patuoanna. Tasangaraka la'bi majaoki' na ia joo tojoloki' Yakub?" 13 Mebalimi Puang Isa nakua, "Ia to tonniso'i tee wai bubun, la mawakke unapa ia. 14 Apa ia to tonniso'i to wai la kupangben, te'da lalomo nalamawakke. Sanga ia joo wai la kubenni la menjaji susi kalimbuah tangmate lan kalena na lolong messun mbenni katuoan melo te'da cappa'na." 15 Nakua joo baine ngkuanni, "Ee Puang, tabenna' tuu wai, nate'damo kumawakke, nadanggi' kuratu punala ssiok wai ntee." 16 Nakua Puang Isa ngkuanni, "Malemoko ntambaii to balimmu muratu ssolanni ntee." 17 Mebalii nakua, "Te'da aku' balingku'." Nakua Puang Isa, "Tongan tuu kadammu kumua te'da balimmu. 18 Pellimamoko botting, na ia to muane musolan tee too, tangngia balimmu. Jaji tongan to kadammu." 19 Nakua joo baine ngkuanni, "Ee Puang, kukanassamo tee too, kumua nabiki'. 20 Ia to tojoloki' ssompa Puang Allataala jao ntee buntu, apa mikua kamu' to to-Yahudi jaori kota Yerusalem to nanii tau massompa." 21 Nakua Puang Isa ngkuanni, "Ee indo', katappa'ina', la den wattunna ia to tau ssompa Ambe' te'da na jao manda ntee buntu, te'da too na jao manda kota Yerusalem. 22 Kamu' to to-Samaria ssompa apa te'da miissenni, na ia to kami' to-Yahudi ssompakan to apa kiissen, nasaba' ia to Tomangpasalama' pole jiori mai to-Yahudi. 23 Apa nadete'mi wattunna, na wattunnamo tee too to kumua, pangpatuju pole jio mai Roh Allataala lako tau anna te'da nasala ke ssompai Ambe', sanga iamo to susi joo napumasannang. 24 Kuasan-Na mandara Roh Allataala nawa'ding tau ssompa Puang Allataala situru' katonganan-Na, nasaba' Roh to Puang Allataala." 25 Nakuamo joo baine lako Puang Isa, "Kuissen kumua la ratui to Raja Mangpasalama' to disanga Almaseh. Na ia ke ratumi, Iamo mpamanassan ngasanki' to sininna apa." 26 Nakua Puang Isa ngkuanni, "Na Aku'mo tee to musipangkadan." 27 Ia joo wattu ratumi to anak gurun-Na pole nnalli kande, nasijangngaran ngkitai to Puang Isa sipangkada joo baine. Apa te'da bangngi moi mesa' mekutana lako joo baine kumua, "Apara parallummi indo'," ba'tu mekutana lako Puang Isa kumua, "Ciapari tasipangkada joo baine?" 28 Napatorroi busunna joo baine, napole lako kota mpauanni to tau jio 29 nakua, "Male kamu' ngkitai, den tau ntuu jio. Naissen ngasan sininna to apa mangkamo kupugauk. Ba'tu tangngiamora Ia joo to Raja Mangpasalama'?" 30 Messunmi tee lako tau lan mai kota namale lako to nanii Puang Isa. 31 Ia joo wattu natambaimi anak gurun-Na to Puang Isa nakua, "Ee Guru, takumandemo!" 32 Apa mebalii Puang Isa nakua, "Den kande-Ku' to te'da miissenni." 33 Mangpamulami to anak gurun-Na sikutana-tana nakua, "Denraka tau mbawanni kinande?" 34 Nakua omo Puang Isa, "Ia to kande-Ku', iamo to nturu' pakkaeloran-Na Puang Allataala angkumangkai tooi to jaman nasuanna'. 35 Mikua patang bulanpi namane' peparean. Apa kukuan kamu': Kitari, siririanmo to uma, sadia la dipeparei. 36 Ia to tomepare mangpamulami ntarima bassena anna wa'ding pada masannang to tomantanan sola to tomepare. Ia to apa napeparei, iamo to tontarima katuoan melo te'da cappa'na. 37 Tongan tee sambenan kada to kumua, 'Laen to tomantanan na laen to tomepare.' 38 Kusua kamu' male mpeparei joo uma to tangmikabo'jo'i, tolaen mangjama jio, na kamu' ntarimai to assele'na." 39 Buda to-Samaria lan joo kota memmatappa' lako Puang Isa, nasaba' kadanna joo baine kumua, "Napauan ngasanna' sininna to apa mangkamo kupugauk." 40 Ia tonna sitammumo tuu lako to-Samaria na Puang Isa, napeta'dai anna torropa sola. Jaji torro unapi jio duang bongi. 41 La'bi budapa to tau matappa', nasaba' pangngajah-Na. 42 Nakua tuu lako tau ngkuanni joo baine, "Matappa'mokan tee too, tangngia ia manda to kadammu lako kami', apa kisa'dingmo kami' to pangngajah-Na, na kiissen kumua Iamo mpasalama' tolino." 43 Duang bongii torro Puang Isa jio tana Samaria, namane' mpatarruh kalingkan-Na re' tana Galilea. 44 Den ia napaui Puang Isa nakua, "Te'dapa ia naden nabi dikasiri' jio kampongna." 45 Ia tonna ratumo re' tana Galilea, masannangngi to tau jio ntarimai, sanga jaoi kota Yerusalem sola ngasan tonna pangramean Paskah anna kita ngasanni to apa napugauk Puang Isa. 46 Pole pole'mi Puang Isa lako kota Kana jio tana Galilea, to nanii mpupennanggoro' wai. Den mesa' tomangparenta jio kota Kapernaum sikandoppi' kota Kana masaki anakkana. 47 Ia tonna sa'dingmi joo tomangparenta kumua ratu pole'mi Puang Isa jio mai tana Yudea, malemi mpessitammuii nameta'da tulung, namale do' kota Kapernaum mpamalagahhi joo anakkana to la mate mandamo. 48 Nakua Puang Isa ngkuanni joo tomangparenta, "Ia ke te'da mikita tanda mejangngaran, te'da mimatappa'." 49 Mebalii joo tomangparenta nakua, "Oo Puang, madoi'ki' dikka' male ta'bulu' te'da unapa namate joo anakkaku'." 50 Nakuamo Puang Isa lako, "Polemoko, malagahmi to anakkamu." Nakatappa'i joo tau to kadan-Na Puang Isa, napole. 51 Mangtangnga lalanmi pole lako bolana, natammuimi kaunanna napauanni nakua, "Malagahmi to anakkata'." 52 Mekutanai joo tomangparenta nakua, "Tatte' pirara namammula te'da namakula' kalena?" Mebalii nakua, "Sangbo' agi-agi tatte' mesa'." 53 Naingaranmi ambe'na kumua iamo joo wattu nakuanni Puang Isa kumua, "Malagahmi to anakkamu." Memmatappa'mi sintong repokkona. 54 Iamo joo tanda mejangngaran mangpenduan napugauk Puang Isa jio tana Galilea, mangkanna pole jio mai tana Yudea.

Yahya 5

1 Mangkai joo, den pangrameanna to-Yahudi, namale Puang Isa de' kota Yerusalem. 2 Den mesa' kollang jao kota Yerusalem sikandoppi' babangan to disanga Babangan bembala', den lima lalan dideai ngguririkkii. (Ia joo kollang lan basa Ibrani disanga Betesda.) 3 Buda tomasessa simammasan jio ntuu joo lalan, susinna tomasaki, tobuta, tokeppang na tokupi'. Pada ntajanni umbo wattu na tigonggang joo wai jiong kollang. 4 Sanga sipissen-pissen namellao do' to malaeka'-Na Puang nagonggangngi to wainna. Na ia to tokaminang jolo mendo', ke tigonggangmi, malagahhi jio mai sakinna. 5 Den mesa' muane jio tallung pulomo karua taunna kupi'. 6 Mamma' bangngi jio, nakitai Puang Isa na naissen kumua liwa'mo masainna kupi'. Nakutanaii Puang Isa nakua, "Madoangrokoka malagah?" 7 Mebalii joo tokupi' nakua, "Ie' Puang, te'da dikka' tompado'na' kollang, ke tigonggangngi to wainna. Mane' la malena' lako, najoloimo' tau." 8 Nakuamo Puang Isa ngkuanni, "Ke'dehmoko, angka'i tuu ampahmu, mulumingka." 9 Ia bang unamo joo wattu ta'pa ke'dehmi, naangka'i to ampahna, nalumingka. Ia joo jaji tonna Allo Katorroan. 10 Iamo joo na ia to pekaamberan to-Yahudi ngkuanni joo to te'damo nakupi', "Allo Katorroan tee allo, te'da muwa'ding mpassan ampahmu." 11 Apa mebalii nakua, "Ia to tompalumingkana' nena' ssuana' nakua, 'Angka'i ampahmu mulumingka.' " 12 Nakutanai pole'i nakua, "Indara joo tongkuanko angka'i ampahmu mulumingka?" 13 Apa te'da naissenni inda tompalumingkai, nasaba' ta'pa menta'dei Puang Isa mentama tangnga-tangngana tobuda. 14 Ia tonna sitammu pole' omo lan Bola Puang Allataala nakuamo Puang Isa, "Malagahmoko tuu too, danggi'mo mupugauk pole' dosa anna danggi' mumasessa pole' to la'bi mabanda'." 15 Messunmi joo tau namale mpauanni to pekaamberan to-Yahudi nakua, "Puang Isa to mpalumingkana'." 16 Iamo joo na ia to pekaamberan to-Yahudi nnangah lalan la mpakario-rio Puang Isa, nasaba' napugaukki joo tonna Allo Katorroan. 17 Apa nakua Puang Isa ngkuanni, "Ratu lako too allo mangjama tarruh to Ambe'-Ku', jaji moi Aku' mangjama tarruh todana'." 18 Iamo tee to kada gaja mpamasumanga' pekaamberan to-Yahudi nnangah lalan la mbuno Puang Isa. Te'da na ia manda to ntengkai atoran Allo Katorroan, apa ia toomo to nakua, "Ambe'-Ku' to Puang Allataala." Nasaba' ia ke susii joo, mpapadai kalena Puang Allataala. 19 Napebalii Puang Isa joo pekaamberan to-Yahudi nakua, "La miingaran tee kadang-Ku' kumua, ia tee Aku' Anak Allataala, te'da kuwa'ding mpugauk apa situru' pakkaeloran-Ku', ke te'da na Ambe'-Ku' kukita mpugaukki. Sanga apa to napugauk Ambe'-Ku', ia todamo kupugauk. 20 Napakitan ngasanna' sininna to apa napugauk Ambe', sanga napakamoja'na'. Na la napakitan pole'pa' tanda mejangngaran to la'bi matonggo ammijangngah. 21 Susi to Ambe'-Ku' mpatuo tomate, nabenni katuoan melo te'da cappa'na, susi todami Aku' Anak mpangben katuoan melo te'da cappa'na lako ia to tokukadoangngi. 22 Moi mesa' tau te'da ia nara'tah Ambe' to kara-karana, apa sininna kuasa rra'tah kara-kara napangben ngasanmo lako Aku' Anak. 23 Napugaukki Ambe' susi joo, nakua nakasiri'na' sininna tau, susi tau ngkasiri' Ambe'-Ku'. Ia to tocia' ngkasiri'na', te'da toda nakasiri'i Ambe'-Ku' to ssuana'. 24 La miingaran tee kadang-Ku' kumua, ia to tompesa'dingngi to kadang-Ku', namatappa' lako to tossuana', iamo tonnampui katuoan melo te'da cappa'na. Te'damo ia naladisessa. La'pahmi jio mai kamatean, anna nnampa' katuoan melo te'da cappa'na. 25 La miingaran kumua, la nadete'mi wattunna, na sitonganna wattunnami tee too, kumua ia to tomate la ssa'ding gamarang-Ku', tee Aku' Anak Allataala, na ia to tossa'dingngi la tuo pole'. 26 Susi Ambe'-Ku' makuasa mpatuo pole' tomate, susi toda Aku' naben kuasa mpatuo tomate. 27 Mangka toomo mpangben kuasa lako Aku' la rra'tah kara-karana tolino, nasaba' Aku'mo Anak Mentolino. 28 Danggi' mijangngah ssa'dingngi tee, nasaba' la nadete'mi wattunna kumua sininna to tomatemo ssa'ding gamarang-Ku'. 29 Na ia to tomelo panggaukanna la messun lan mai lamunan anna tuo melo te'da cappa'na, apa ia to togaja' panggaukanna la messun too lan mai lamunan anna disessa." 30 Mpatarruhhi kadan-Na Puang Isa nakua, "Te'da kuwa'ding mpugauk apa situru' pakkaeloran-Ku'. Rra'tahna' kara-karana tolino susi to naparentanna' Ambe'. Maruruh to pangra'tah-Ku', nasaba' te'da naeloh-Ku', apa pakkaeloran-Na Ambe' to ssuana'. 31 Ia ke la Aku' bang mpaui kumua, 'Ambe' to ssuana'', te'da mikatappa'ii to apa kupau. 32 Apa den Ambe'-Ku' mpaui kumua, 'Kusuako', na kuissen kumua tongan to napau. 33 Na mangkamo kamu' ssua tau lako Nabi Yahya. Na tonganmo joo kadanna mpauna'. 34 Apa sitonganna te'da kuparallu natonganan tolino, apa kupangngingaran kamu' tee kukua ammidipasalama'. 35 Ia to Nabi Yahya susi palita dukku mangngarrang. Na ia joo kadanna susi arrang, apa cingga'tu'ra kamu' masannang ntarimai. 36 Apa den ia la'bi matonggo ntongananna' na ia to kadanna Nabi Yahya. Iamo to jaman napangparentan Ambe' lako Aku' la kumangkai, ia toomo ssa'bii kumua Ambe'-Ku' to ssuana'. 37 Na denpa ia to la'bi matonggo, iamo to Ambe'-Ku' to ssuana', Iamo ntongananna'. Te'dapa misa'dingngi gamaran-Na, ba'tu ngkitai lindo-Na. 38 Te'da mikatappa'i to kadan-Na Puang Allataala, nasaba' cia' kamu' ngkatappa'ina' tee Aku' to nasua. 39 Mpelajahhi kamu' issina Sura' Allataala, nasaba' misangai kumua iamo joo mipugauk ammiampa' katuoan melo te'da cappa'na. Na moi Sura' Allataala, Aku' bang una to napau, 40 apa cia' kamu' ratu lako kale-Ku', ammiampa' katuoan melo te'da cappa'na. 41 Te'da kuparallu nakasiri' tolino. 42 Kuissen kamu' kumua te'da mipakamoja' Puang Allataala. 43 Ratuna' napakuasa Ambe'-Ku', apa cia' kamu' ntarimana'. Apa mitarima ke den tau laen ratu mpukuasa kuasanna. 44 Umbo la mikua matappa' lako Aku', ke nnangahra kamu' kadipujian jio mai padammi tolino, na te'da miangahhi to kadipujian pole jio mai Puang Allataala te'da susinna. 45 Danggi' misangai kumua la kupasala kamu' jio olo-Na Ambe'. Ia to la mpasala kamu', Nabi Musara to misanga la ntulung kamu'. 46 Ia ke la matappa' tongan kamu' lako Nabi Musa, tantu la matappa' too kamu' lako Aku', sanga Aku'ra to napau Nabi Musa lan sura'na. 47 Apa ia ke te'da mikatappa'ii to apa napau Nabi Musa, te'da too mikatappa'ii to apa kupau."

Yahya 6

1 Mangkai joo malemi Puang Isa lian sambali'na Tasik Galilea to disanga too Tasik Tiberias. 2 Gaja buda tau mpeundii, sanga nakitamo to tanda mejangngaran napaden ke mpamalagahhi tomasaki. 3 Anna endek de' buntu-buntu Puang Isa, nacumadokko jao sola anak gurun-Na. 4 Ia joo wattu madoi'mo nadete' to pangrameanna to-Yahudi disanga pangramean Paskah. 5 Mengkita mengguririkmi Puang Isa nasiassa'-assa' bangmi to tau ratu lako Ia, mangkadami lako Filipus nakua, "Umbomo la dinii nnalli kande nawa'ding kumande ngasan tee tau?" 6 Sitonganna naissenmo Puang Isa to apa la napugauk, apa naanggai'ra mangkada susi joo, nasaba' madoangngi nnuji kamatapparanna Filipus. 7 Mebalii Filipus nakua, "Na moi dua ratuh dinar diallian roti tee tau pada budanna, te'dapa nalaganna' moi naditawai sisangti'pekra." 8 Den mesa' anak gurun-Na Puang Isa disanga Andreas, sile'tona Simon Petrus, mangkada nakua, 9 "Inde' to pea muane mbawa lima roti na dua bale, apa la siagiraka nakande tee tau pada budanna?" 10 Nakua Puang Isa, "Suai tuu mati' tau nacumadokko." Jaji cumadokkomi joo tobuda mpennampah reu, sanga buda reu jio. Agi-agi den limang sa'bu tau ke muane manda dibilang. 11 Naalai Puang Isa joo roti, namangkurru sumanga' lako Puang Allataala. Mangkai joo natawa-tawanmi tobuda joo roti, namane' ntawa-tawan tooi joo bale, nakumande to tau sabarahna. 12 Ia tonna barahmo to tau, nakuamo Puang Isa lako anak gurun-Na, "Rempunni to torrona, danggi' nasajang." 13 Napasirempunni naden sangpulo dua baku' ponno to torrona joo lima roti nakande tobuda. 14 Ia tonna kitami tobuda joo tanda mejangngaran napaden Puang Isa, nakuamo, "Ia tonganmo tee to nabi napau Puang Allataala tonna anu' la ratu tama lino." 15 Naissen Puang Isa kumua la ratui joo tobuda la mparukui menjaji rajana. Iamo joo namale messarak de' buntu. 16 Ia tonna la bongimo malemi do' randan tasik to anak gurun-Na Puang Isa. 17 Malillinmi na te'da unapa naratu to Puang Isa lako to nanii anak gurun-Na, iamo joo naendek de' lopi to anak gurun-Na, nalamban mangnguju lian kota Kapernaum. 18 Mangpamulami to bombang, sanga mangngiri'mi to angin bara'. 19 Agimo lima iarika annan kilo nanii manglopi, mane'ri ngkitai to Puang Isa lumingka jao wai mpendete'i to lopinna, anna silajatan to anak gurun-Na. 20 Apa nakua Puang Isa ngkuanni, "Ee, danggi' mimalaja'! Aku' tee." 21 Ia tonna sa'dingmi anak gurun-Na to gamaran-Na, masannangmi ntarimai napaendekki de' lopi, nata'pa ratumo lako randan tasik to napangngujui. 22 Masawanna joo too, naissenmi tobuda to torropa sambali'na tasik kumua mesa'ra to lopi jio, namalemi napake anak gurun-Na Puang Isa, apa te'da namale Puang Isa. 23 Apa ia joo wattu denmi ba'tu pira-pira lopi ratu jio mai kota Tiberias nakenden sikandoppi' to nanii mangka ngkurru sumanga' roti Puang Isa nakande tobuda. 24 Ia tonna kitami tobuda kumua te'damo Puang Isa jio, na moi toda anak gurun-Na, endek todami de' joo lopi namale lako kota Kapernaum nnangah Puang Isa. 25 Ia tonna ampa'mi tobuda to Puang Isa jio sambali'na tasik, mekutanami lako nakua, "Oo Guru, piranra taratu inde'?" 26 Mebalimi Puang Isa nakua, "La miingaran tee kadang-Ku' kumua, iara miangahna', sanga barahmo kamu' mangka ngkande roti, tangngia nasaba' miissenni apa battuananna joo tanda mejangngaran kupugauk. 27 Danggi' mimangjama nnangahhi to kande la cappu' ba'tu buruk. Apa iara miangah to kande te'da nalaburuk, to la mben kamu' katuoan melo te'da cappa'na. Ia joo kande, iamo to la kuben kamu' Aku', Anak Mentolino, sanga mangka napangpeissenan Ambe'-Ku' Puang Allataala kumua natarimana'." 28 Mekutana omi lako Puang Isa nakua, "Apara nakadoangngi Puang Allataala la kipugauk?" 29 Mebalii Puang Isa nakua, "Iamo tee to nakadoangngi Puang Allataala jio mai kalemi: la matappa' kamu' lako kale-Ku' kumua Aku'mo to nasua Puang Allataala." 30 Mekutana pole' omi lako Puang Isa nakua, "Ia ke susii tuu, tanda apara tapugauk kikitai, angkiwa'ding ngkatappa'iki'? Apara la tapugauk? 31 Ia to tojolota' mangka ngkande kande disanga manna jio padang pallawangan, susi to diuki' lan Sura' Allataala kumua, 'Nabenni kande jao mai suruga nakandei.' " 32 Nakua Puang Isa ngkuanni, "La miingaran tee kadang-Ku' kumua, tangngia Nabi Musa tonna anu' to mben kamu' kande jao mai suruga, apa Ambe'-Ku' Ia to mben kamu' kande tongan jao mai suruga. 33 Na ia to kande napangben Puang Allataala, Aku'mo to mellao jao mai suruga, na mpangben katuoan melo te'da cappa'na lako tolino." 34 Nakua omo tuu lako tau ngkuanni, "Oo Puang, taben punalakan joo kande." 35 Nakua omo Puang Isa, "Aku'mo kande to mben katuoan tolino. Ia to toratu lako Aku', te'da tarruhmo nalatangbarah. Ia to tomatappa' lako Aku', te'da tarruh toomo nalamawakke. 36 Apa mangkamo kamu' kukuan, 'Moi mikitamo, te'da mimatappa'.' 37 Sininna to tonapangben Ambe' lako Aku', iamo la ratu lako kale-Ku'. Na moi inda ke ratumi, te'da kutanglantarimai. 38 Sanga mellaona' jao mai suruga, tangngia kumua pakkaeloran-Ku' la kupugauk, apa pakkaeloran-Na Ambe'-Ku' to ssuana'. 39 Iamo tee pakkaeloran-Na to Ambe' to kumua sininna to tau nabenmo', moi mesa' te'da nalamasolang, apa la kupatuo pole' ke Kiama'mi lino. 40 Na pakkaeloran-Na too, to kumua ia to tonnissenmi kumua Aku'mo Anak Allataala nakatappa'ina', la ntarima katuoan melo te'da cappa'na, na la kupatuo pole' ke Kiama'mi lino." 41 Sipangnuku-nukuanni to to-Yahudi lako Puang Isa, sanga ia to nakua, "Aku'mo kande to mangka mellao jao mai suruga." 42 Pada nakuamo, "Ah, Iamo Puang Isa to anakkana Yusuf. Kiissen to tomatuan-Na! Matumbai nawa'ding kumua, 'Mellaona' jao mai suruga?' " 43 Nakua Puang Isa ngkuanni, "Danggi' misipangnuku-nukuan. 44 Moi mesa' tau te'da ngkullei ratu lako Aku', ke te'da na Ambe'-Ku' to ssuana' mpupembalikki to penawanna. Na ia to toratu lako Aku', la kupatuo pole' ke Kiama'mi lino. 45 Den diuki' lan sura'na nabi kumua, 'La napaggurui Puang Allataala sininna joo tau.' Iamo joo ia to tompesa'dingngi Ambe', la ratu lako Aku'. 46 Ia joo tangngia battuananna kumua denmo tau mangka ngkita Ambe'-Ku', saliwanna mane' Aku' mandara, to pole jio mai Puang Allataala. 47 La miingaran tee kadang-Ku' kumua, ia to tomatappa' nnampuimo katuoan melo te'da cappa'na. 48 Aku'mo kande to mpatuo tau. 49 Mangkamo to tojolomi ngkande kande disanga manna tonna anu' jio padang pallawangan, namate unai. 50 Apa te'da nasusi joo to kande mellao jao mai suruga. Ia to tongkandei joo kande, te'damo nalamate. 51 Aku'mo kande to mellao jao mai suruga, kande to naputuo tau. Ia to tongkandei tee kande, la tuo tarruhhi. Ia to kande la kuben tau lan lino naputuoi, iamo tee batang kale-Ku'." 52 Ia tonna sa'dingngi to-Yahudi joo kadan-Na, napada ia sipekka nakua, "Umbo nakua tee tau wa'ding la mbenki' batang kale-Na takande?" 53 Iamo joo nakua Puang Isa ngkuanni, "La mikatappa'i kumua, ia ke te'da mikandei to batang kale-Ku' na te'da miiso'i to rara-Ku' Aku', Anak Mentolino, te'da miampui katuoan tongan. 54 Ia to tongkande batang kale-Ku' sola tonniso' rara-Ku', iamo to nnampui katuoan melo te'da cappa'na na la kupatuo pole' ke Kiama'mi lino. 55 Nasaba' ia to batang kale-Ku', iamo kande tongan, na ia to rara-Ku', iamo apa diiso' tongan. 56 Na ia to tongkande batang kale-Ku' na nniso' rara-Ku', da'tanni memmesa' sola Aku' na Aku' toda memmesa' sola ia. 57 Ia to Ambe'-Ku' to ssuana', Iamo naputuo tau. Susi Aku' tuo jio mai kale-Na, susi toomi to tongkande batang kale-Ku', la tuo jioi mai kale-Ku'. 58 Mangkamo nakande tojolomi to kande disanga manna, namate unai. Apa ia to tongkandei tee kande kubenni, te'damo nalamate, apa la tuo tarruhmo, sanga Aku'mo tee to kande mellao jao mai suruga." 59 Ia ngasanmo tee napau Puang Isa tonna mangngajahhi lan bola passambajangan jio kota Kapernaum. 60 Ia tonna mangkamo to tobuda ssa'dingngi joo kadan-Na Puang Isa, budai to tonturu'i kumua, "Ah, gaja sussa tee pangngajah, na indara ia la ntarimai!" 61 Naissen Puang Isa kumua sipangnuku-nukuanni tuu lako tau nakuanni, "Misa'dinganraka tee kadang-Ku'? 62 Na umbomo susi jajinna ke mikitana' Aku', Anak Mentolino, endek pole' de' ngenan jolo-Ku'! 63 Roh Allataala to naputuo tau. Te'da lalo pakullena to tolino. Ia tee kada kupauan kamu', iamo kadan-Na Roh Allataala to mpangben katuoan. 64 Apa den unapa kamu' to te'dapa mimatappa'." Naissen jolomo Puang Isa kumua indara to la cia' ngkatappa'ii, sola indara to la mpangpejokkoanni. 65 Nakua Puang Isa, "Iamo joo mangkamo kamu' kukuan, 'Moi mesa' tau te'da nakullei ratu lako Aku', ke te'da napuelohhi Ambe'-Ku'.' " 66 Mammula joo wattu buda tau mboko'i pole'i, na cia'mo nturu'i. 67 Mekutanami Puang Isa lako to sangpulo dua anak gurun-Na nakua, "La male todamora kamu'ka ssalaina'?" 68 Mebalimi Simon Petrus nakua, "Oo Puang, inda opara la kinii male? Na Kita' mandara to mpau kada mpangben katuoan melo te'da cappa'na. 69 Matappa'mokan na kiissenmo kumua Kita'mo to pesua mattantun-Na Puang Allataala." 70 Mebalimi Puang Isa nakua, "Aku'ra to mpilei kamu' tee tau sangpulo dua. Apa den mesa' tonatamai setang lan tangnga-tangngami." 71 Ia to nasanga Puang Isa, iamo joo Yudas anakkana Simon Iskariot. Sanga moi na ia joo Yudas sala mesa'na jio mai to sangpulo dua anak gurun-Na, apa iamo la mpangpejokkoanni.

Yahya 7

1 Mangkai joo, malemi Puang Isa ngguririkki tana Galilea. Cia'mi pole lako tana Yudea, sanga ia to pekaamberan to-Yahudi jio nnangah bangmo lalan madoang la mbunoi. 2 Ia joo wattu madoi'mo to pangramean to-Yahudi disanga pangramean Pondo' Daun. 3 Iamo joo nakua to sile'to-Na ngkuanni, "Salaimi tee tana Galilea, mupolemo sau' tana Yudea, nakita tooi to tonturu'ko to tanda mejangngaran mupugauk. 4 Te'da ia nabuniananni tau to apa napugauk, ke madoangngi mentokaissenan. Jaji ia ke mpugaukko tanda mejangngaran, mpangpekitanroko kale-Mu lako tobuda!" 5 Iamo namangkada susi joo to sile'to-Na, sanga moi ia te'da toda nakatappa'ii. 6 Nakua Puang Isa ngkuanni, "Te'dapa nadete'i wattung-Ku'. Ia ke kamu', sininna wattu wa'ding ngasan minii male. 7 Te'da apa napusaba' tee tolino la ngkaba'ci kamu'. Apa ia ke Aku' nakaba'cimo', nasaba' tuli kukuanni kumua gaja' panggaukanna. 8 Jolomo kamu' male lako joo pangramean, te'da kulamale, sanga te'dapa nadete'i wattung-Ku'." 9 Susimi joo kadan-Na Puang Isa lako sile'to-Na, natorropa Ia jio tana Galilea. 10 Ia tonna laba'mo to sile'to-Na male lako pangramean, mane'ri undi Puang Isa, apa te'da naissenni tau. 11 Padai masainna jio pangramean, naangah tarruhhi pekaamberan to-Yahudi nakua, "Umbomira Ia?" 12 Buda tau ncurita buni bangngi. Den to mpau meloi nakua, "Tomelo Ia." Den too to mpau tangmeloi nakua, "Te'da na tomelo, tompalao sala tobuda." 13 Apa te'da tau barani mpaui to tonganna, sanga malaja'i lako pekaamberan to-Yahudi. 14 Ia tonna pirang-pirang allomo joo pangramean, malemi Puang Isa lako rante Bola Puang Allataala namangngajahhi. 15 Sijangngaranmi to pekaamberan to-Yahudi namangkada kumua, "Ciapari na gaja macca Ia tee tau, na te'da namassikola?" 16 Mebalimi Puang Isa nakua, "Ia tee pangngajaran kuajaran kamu', pangngajaran pole jio mai Puang Allataala to ssuana', tangngia pangngajaran-Ku'. 17 Ia ke den tau madoang nturu' pakkaeloran-Na Puang Allataala, la naissen kumua pole umbora tee pangngajaran-Ku'. La naissen kumua pole jioraka mai Puang Allataala, iarika pangngajaran-Ku' Aku'. 18 Na ia to tompangpangngajaran ia kamaccanna, iamo to nnangaranra kadipujian kalena. Apa ia to tonnangaran kadipujian to tossuai, iamo to maruruh penawa, to te'da namangnguraga. 19 Mangkamo kamu' naben Nabi Musa to atoran-Na Puang Allataala tonna anu'! Apa te'da bang kamu' nturu'i joo atoran-Na. Ciapari milambunona'?" 20 Mebalimi to tobuda nakua, "Ah, tonatamaiki' setang! Indara la mbunoki'?" 21 Nakua omo Puang Isa ngkuanni, "Mane' mesa'ra tanda mejangngaran kupugauk tonna Allo Katorroan, ammisijangngaranmo. 22 Napattantumo Nabi Musa kumua parallu misunna' ngasan to anakkami. Sitonganna ia joo atoran te'da napole jio mai Nabi Musa, apa pole jiora mai tojolota' tonna te'dapa najaji Nabi Musa. Na massunna' too kamu' ke Allo Katorroanni, 23 ammikua danggi' mitengkai atoranna Nabi Musa. Ia ke susii joo ciapari mikagallina', ke mpamalagahna' mesa' tau ke Allo Katorroan? 24 Danggi' na ia manda to nakita matammi mira'tah, apa la mangra'tah kamu' situru' katonganan." 25 Ba'tu pira-pira to to-Yerusalem mangkada kumua, "Tangngiaraka tee to todiangah bang la dibuno? 26 Te'da bangmo kada nabuni jio olona tobuda, na te'da bang pekaamberanta' mpebalii. Naissen tonganmiraka kumua Iamo Raja Mangpasalama'? 27 Apa ia ke ratui to Raja Mangpasalama', moi mesa' tau te'da nnissenni kumua topole umbora Ia. Na Ia tee tau taissen to nanii ratu." 28 Ia tonna mangngajahhi Puang Isa jio rante Bola Puang Allataala, naandongngi gamaran-Na nakua, "Mipikkiri' kumua miissen indana' tee, na topole umbona'. Apa ia to karatuan-Ku' te'da naeloh-Ku', apa nasuana' Puang Allataala to sipato' dikatappa'i, na Iamo te'da miissenni. 29 Kuissen Aku', nasaba' topole jiona' mai kale-Na, na Iamo ssuana' ratu." 30 Ia joo wattu den tau pada nnangah lalan la njokkoi, apa moi mesa' tau te'da barani njokkoi, nasaba' te'dapa nadete'i wattunna. 31 Apa buda too tau matappa' lako Puang Isa nakua, "Manassa kumua nang Raja Mangpasalama' Ia, sanga la'bi buda tanda mejangngaran napugauk na ia to tau laen." 32 Nasa'dingngi to-Farisi to tobuda ncurita membuni Puang Isa. Iamo joo namesa' kada sola kapala imang ssuai to ba'tu pira-pira pangjagana Bola Puang Allataala la njokkoi. 33 Ia joo wattu nakua Puang Isa lako tobuda, "Cingga'tu'mora nate'damo tasola, sanga la polemo' lako to tossuana' ratu. 34 La miangahna', apa te'da mikullei nnampa'na', nasaba' te'da mikullei ratu lako to kunii." 35 Sipangkada-kadai joo pekaamberan to-Yahudi nakua, "La male umborika ia tee tau, nate'damo tawa'ding ssitammuanni? La malerika lako to-Yahudi to torro jio tangnga-tangngana to-Yunani naajahhi to to-Yunani jio? 36 Apara battuananna tee kada napau kumua, 'La miangahna', apa te'da mikullei nnampa'na', nasaba' te'da mikullei ratu lako to kunii?' " 37 Ia tonna allo cappa'namo joo pangramean Pondo' Daun, ia toomo allo kaminang parallu, ke'dehmi Puang Isa mangkada mpematonggoi gamaran-Na nakua, "Ia to tomawakke, la ratui lako Aku', namangngiso'. 38 Ia to tomatappa' lako Aku' la susii to diuki' lan Sura' Allataala kumua, 'La nanii lolong wai katuoan.' " 39 (Ia to nasanga wai katuoan, iamo to Roh Allataala, to la natarima tomatappa' lako kale-Na. Ia joo wattu ia to Roh Allataala te'dapa nadipangben, nasaba' te'dapa nadiangka' to Puang Isa de' suruga.) 40 Buda tau ssa'dingngi joo kadan-Na Puang Isa, naden to kumua, "Ia tonganmo tee to nabi nasanga Puang Allataala tonna anu' la ratu." 41 Den too to kumua, "Iamo tee Raja Mangpasalama'!" Apa den toopa to kumua, "Wah te'da nalapole lan mai tana Galilea to Raja Mangpasalama'! 42 Nasaba' diuki' lan Sura' Allataala kumua, Ia to Raja Mangpasalama' bati'na Raja Daud, na todijajian jio kota Betlehem, to kotana too Raja Daud." 43 Susimi joo nasipekkaimi tobuda to Puang Isa. 44 Ba'tu pira-pira to tau madoang njokkoi, apa moi mesa' tau te'da barani. 45 Ia to pangjagana Bola Puang Allataala, to nasua kapala imang sola to-Farisi njokko Puang Isa, polemi, nakutanaii nakua, "Ciapari na te'da misolanni Puang Isa jio mai?" 46 Mebalimi nakua, "Te'da kijokkoi, sanga te'dapa kisa'ding mesa' tau susi maccana mangkada!" 47 Nakua to to-Farisi, "Napalao sala todamora kamu'ka? 48 Te'da ia to pekaamberanta' ba'tu to-Farisi matappa' lako kale-Na. 49 Apa ia tee tobuda ngkatappa'ii, nasaba' te'da naissenni to atoranna Nabi Musa. La ditampakkimi ia ropu!" 50 Den mesa' to-Farisi jio disanga Nikodemus, to denmo naratu bongi lako Puang Isa. Mangkadai lako padanna to-Farisi, 51 nakua, "Situru' atoranta', te'da tawa'ding ssessa tau, ke te'dapi tasa'dingngi iarika taissenni to apa napugauk." 52 Mebalimi joo solana nakua, "To-Galilea todarokoka? La muparessai to Sura' Allataala, muissenni kumua te'da ia nabi pole lan mai tana Galilea." 53 Mangkai joo too, pada polemi lako bolana.

Yahya 8

1 Male todami Puang Isa de' buntu Zaitun. 2 Ia tonna makale'mo, male pole'i lako rante Bola Puang Allataala na buda tau ratu sirempun. Nacumadokko Puang Isa napamulai nnajahhi tobuda. 3 Ia joo wattu, ratumi to guru agama sola to-Farisi ssolan mesa' baine, to naampa' manggauk sala. Nasuai ke'deh lan tangnga tobuda, 4 namane' mpaui lako Puang Isa nakua, "Oo Guru, ia tee baine kiampa' tonna manggauk sala. 5 Den diuki' lan sura'na Nabi Musa kumua, 'Ia to baine susi tee, la disilekko'i batu samatena.' Na ia tee too Guru, matumbai kita' to passangan-Ta'?" 6 Naanggai' mekutana susi joo la ncobai to Puang Isa dikua nawa'ding mpasalai. Apa cukku bangngi Puang Isa, na mpangngukiran jarin-Na do' litak. 7 Apa ia tonna dikutanai tarruh bang, ke'dehmi, namane' mpebalii nakua, "Indara kamu' to te'da namadosa, iamo jolo' la llekko'i batu tee baine." 8 Namane' cukku pole' mangnguki' do' litak. 9 Ia tonna mangkamo ssa'ding kadan-Na Puang Isa, malai simesa'-mesa'mi tuu lako tau pamula jio mai to kaminang matuanna, naarannai Puang Isa mandamo torro jio sola joo baine. 10 Anna ke'deh Puang Isa ngkuanni joo baine, "Oo, umbo ngasanmira? Te'da bangrika ssessako?" 11 Mebalimi joo baine nakua, "Te'da Puang." Nakua omo Puang Isa, "Melomi, moi Aku' te'da too angkulassessako. Malemoko. Mammula tee too, danggi' o mupugauk dosa." 12 Mangkada pole' omi Puang Isa lako tobuda nakua, "Aku'mo arrang to nnarrangngi penawanna tolino. Ia to tonturu'na', te'da nalalumingka lan kamalillinan, apa la nnampui arrang to mbenni katuoan." 13 Nakua to to-Farisi ngkuanni, "Te'da natongan to kadan-Ta', sanga ssa'biki' kale-Ta'." 14 Mebalimi nakua, "Moi kusa'bii kale-Ku', tongan to kadang-Ku', nasaba' kuissen to kunii ratu, kuissen too to la kunii male. Nate'da miissenni to kunii ratu, ba'tu la kunii male. 15 Ia ammira'tah kara-karana tau, mangra'tah tolino unamo kamu'. Apa ia ke Aku' te'da tau kura'tah kara-karana, moi mesa'. 16 Apa ia ke la Aku' mangra'tah, maruruh to pangra'tah-Ku', sanga te'da na Aku' manda mangra'tah, apa solana' Ambe' to ssuana'. 17 Den diuki' lan sura'na Nabi Musa, kumua, 'Ianna den dua tompangben kasa'bian sangrupa, wa'ding ditarima joo kasa'bianna.' 18 Na dua ia to sa'bing-Ku', Aku' sola Ambe' to ssuana'." 19 Nakua joo to-Farisi ngkuanni, "Umbori nanii joo ambe'-Ta'?" Mebalii Puang Isa nakua, "Te'da miissenna', sola Ambe'-Ku'. Ia ke la miissenna', tantu miissen toomi to Ambe'-Ku'." 20 Ia tee kada napau Puang Isa tonna mangngajahhi jio rante Bola Puang Allataala sikandoppi' patti doi' sudakka. Apa moi mesa' tau te'da njokkoi, nasaba' te'dapa nadete'i wattunna. 21 Nakua pole' omo Puang Isa lako tobuda, "La malena' ammilannangahna', apa la mate tangdidampangan kamu'. Na ia to la kunii male, te'da mikullei ratu lako." 22 Ia tonna sa'dingngi pekaamberan to-Yahudi, sipangkadai nakua, "Oo, mbai la mbunoi kalena, sanga nakua kumua, 'Te'da kamu' ngkullei ratu lako to la kunii male.' " 23 Nakua omo Puang Isa, "Topole jiong kamu' mai, na topole jaona' mai. Tojio kamu' mai lino, na Aku' te'da kutopole jio mai lino. 24 Iamo joo kukuan kamu' kumua, la mate tangdidampangan kamu'. Na la mate tangdidampangan kamu', nasaba' te'da mikatappa'i to kadang-Ku' mpamanassai kumua, 'Aku'mo to disanga D|scENNA'|r.' " 25 Mekutanai nakua, "Indariki' sitonganna?" Mebalimi Puang Isa nakua, "Te'da bua'na la ssipangkadan kamu'. 26 Budapa to wa'ding la kupau mpasala kamu', apa te'da kupugaukki. Apa ia to tossuana', wa'ding dikatappa'i, na ia to apa kusa'ding jio mai kale-Na, ia toomo kupau lako kamu' tolino." 27 Te'da naissenni to tau kumua Ambe'-Na to napau Puang Isa. 28 Iamo joo nakua pole' Puang Isa ngkuanni, "Ia ke mipampangmo' jao kaju sitamben tee Aku', Anak Mentolino, mane'ra kamu' nnissenni kumua, Aku'mo tee to disanga 'DENNA''. Mane' toori miissen kumua, te'da kupugaukki to apa situru' pakkaeloran-Ku', apa ia manda to naajaranna' Ambe'-Ku'. 29 Na iamo joo Ambe'-Ku' to ssuana', nasolan bangna'. Te'da nasalaina', nasaba' tuli kupugauk to napumasannang." 30 Ia tonna mangkamo mpau ngasanni joo, buda to-Yahudi matappa' lako kale-Na. 31 Nakua Puang Isa ngkuanni to tomatappa'mo lako kale-Na, "Ia ke mituru'mi to pangngajah-Ku', tongannamo kamu' anak gurung-Ku', 32 na la miissen to Puang Allataala, na Iamo la lla'paran kamu'." 33 Mebalimi joo tau nakua, "Bati'nakan Nabi Ibrahim. Te'dapa kami' naden tau mpukaunankan. Na apara tuu tasanga kumua, la dila'parankan?" 34 Nakua Puang Isa ngkuanni, "La miingaran tee kadang-Ku' kumua, ia to tompugauk dosa, iamo tonapukaunan kuasa dosa. 35 Na ia to kaunan te'da mari'pih tarruh lan bolana puangna. Apa ia joo anakkana joo puang la mari'pih tarruh ia lan bolana ambe'na. 36 Jaji, ia ke kula'paran kamu' jio mai dosami, mane'ra kamu' la'pah tongan, sanga Aku'mo Anak Allataala. 37 Kuissen kumua bati'na kamu' Nabi Ibrahim, apa den tau lan tangnga-tangngami nnangah lalan la mbunona', nasaba' cia'i ntarimai to pangngajah-Ku'. 38 Ia to apa kukita jio Ambe'-Ku', iamo kupauan kamu'. Na ia todamo mipugauk to naajaran kamu' ambe'mi." 39 Mebalimi joo tau nakua, "Nabi Ibrahim to ambe'ki'!" Nakua Puang Isa, "Ia ke la anakkana tongan kamu' Nabi Ibrahim, tantu ia toomo la mipugauk to napugauk. 40 Kupauan kamu' katonganan to kusa'ding jio mai Puang Allataala. Apa ia to mipugauk, nnangah ora kamu' lalan la mbunona', na ia to panggaukan susi joo, te'da napugaukki Nabi Ibrahim. 41 Panggaukanna kamu' ambe'mi mipugauk." Mebalimi nakua, "Tangngiakan to dijajian jio mai panggaukan sala. Mesa'ra ambe'ki', Puang Allataala manda." 42 Nakua omo Puang Isa, "Ia ke la Puang Allataala Ambe'mi, la mipakamoja'na', nasaba' pole jiona' mai Puang Allataala. Na ratuna' te'da naeloh-Ku', apa Ia ssuana'. 43 Manassa iamo nate'da mipahangngi to buangan kadang-Ku', nasaba' cia' kamu' mpesa'dingngi pangngajaran-Ku'. 44 Ballisi' kamu' to ambe'mi. Iamo mimadoang bang mpugaukki to pangkabudaianna Ballisi'. Mammula jiona mai topabuno ia. Te'da lalo ia nampau katonganan, sanga te'da katonganan naampui. Ia ke mangnguragai, sipato'namo, sanga iamo garonto'na sininna pangnguraga. 45 Jaji iamo nate'da mikatappa'ina' ke kupauan kamu' katonganan. 46 Te'da bang kamu' ngkullei mpamanassai kumua den dosa jio kale-Ku'. Na ia ke mpauna' katonganan, ciapari na te'da mimatappa'? 47 Ia to topole jio mai Puang Allataala nakabudai mpesa'dingngi kadan-Na Puang Allataala. Apa ia to kamu' cia' kamu' mpesa'dingngii, sanga te'da mipole jio mai Puang Allataala." 48 Mebalimi to to-Yahudi nakua, "To-Samariaki'. Natamaiki' setang." 49 Mebalii Puang Isa nakua, "Te'da natamaina' setang, apa ngkasiri'ra' Ambe'-Ku'. Na ia ke kamu' te'da miangga'na'. 50 Tangngia Aku' nnangaran kadipujian kale-Ku', apa Puang Allataalara to mpujina'. Na tongan to kanapujian-Ku'. 51 La mikatappa'i kumua, ia to tonturu' kadang-Ku', te'da tarruhmo nalasikita kamatean." 52 Nakua to to-Yahudi ngkuan Puang Isa, "Oh, kiissenmi tee too kumua natamai tonganmiki' setang, nasaba' mangkami mate Nabi Ibrahim, mate toomi to sininna nabi, antakumua, 'Ia to tonturu' kadang-Ku', te'da tarruhmo nalasikita kamatean.' 53 Ia to tojoloki' Nabi Ibrahim mangkamo mate, sola to sininna nabi mangka toomo mate. Indara tapapadanni to kale-Ta'? Te'da antalala'bi matonggo na ia to Nabi Ibrahim!" 54 Mebalimi Puang Isa nakua, "Ia ke la kupakala'bihhi to kale-Ku', moi ci'di' te'da bua'na. Apa Ambe'-Ku'ra mpakala'bihna'! Ia toomo misanga Puangmi. 55 Te'da kamu' miissenni na kuissen Aku'. Na ia ke la kukua te'da kuissenni, pangnguragana' susi kamu'. Apa kuissen Aku', na kuturu' to kadan-Na. 56 Ia to tojolota' Nabi Ibrahim gaja sannang la ngkita allo karatuan-Ku'. Nakitamo tee too namasannangmo." 57 Nakua omo to to-Yahudi ngkuanni, "Te'dapa na limang pulo taun umuru'-Ta', antakua takitamo to Nabi Ibrahim?" 58 Mebalii Puang Isa nakua, "La mikatappa'i kumua, te'dapa nadijajian Nabi Ibrahim, na den memanmo'." 59 Ia tonna sa'dingngi to-Yahudi joo kadan-Na, pada nnalai batu la nalekkosanni samate-Na, apa membunii Puang Isa, namane' male ssalai Bola Puang Allataala.

Yahya 9

1 Ia tonna liu lalan Puang Isa, ngkitai tobuta simula jajinna. 2 Mekutanami to anak gurun-Na nakua, "Oo Guru, ciapari nabuta tee tau dijajian, iaraka madosa ba'tu tomatuannaraka mpugauk dosa?" 3 Mebalimi nakua, "Te'da na dosana tee tobuta ba'tu tomatuanna, apa dikua anna dipapajan to kuasan-Na Puang Allataala. 4 Ianna allo unapa, la tajamai to jaman-Na to tossuana'. Ia ke bongimi, moi mesa' tau te'damo ngkullei mangjama. 5 Padana' masainna lan lino, Aku'mo arrangna tolino." 6 Ia tonna mangkamo Puang Isa mpau ngasanni joo, mangcikkudumi do' litak, napasiraui litak anna mellombu, namane' mpapa'dii to matanna joo tobuta. 7 Mangkai joo nakuanmi, "Malemoko mendau' jiong kollang Siloam." (Siloam, battuananna disua.) Malemi mendau', na ia tonna polemo, pakitami. 8 Ia to bali bolana sola tobiasa ngkitai joo tobuta meta'da-ta'da silelei mekutana nakua, "Indara joo tau ntuu jio? Tangngiaraka joo tau to biasa meta'da-ta'da?" 9 Den to kumua, "Tongan, iamo tee." Den too to kumua, "Tangngia, apa susiri." Kale-kalena mangkada nakua, "Tongan, aku'mo." 10 Nakua joo tau ngkuanni, "Matumbai muwa'dingmo pakita?" 11 Mebalimi joo tomangka buta nakua, "Ia to disanga Puang Isa mpupellombui to litak ci'di', napapa'dii to matangku', namane' ngkuanna', 'Malemoko mendau' jiong kollang Siloam.' Angkumale, na ia tongkumangkamo mendau', pakitamo'." 12 Mekutanami joo tau ngkuanni, "Umbomira Ia?" Mebalimi joo tomangka buta nakua, "Te'damo kuissenni." 13 Malemi joo tau ssolanni joo tomangka buta lako to-Farisi, 14 nasaba' Allo Katorroan tonna pupellombui Puang Isa to litak, la napake mpapakitai joo tobuta. 15 Nakutanaimi to-Farisi joo to mangka buta nakua, "Matumbari muwa'dingmo pakita." Mebalii nakua, "Puang Isa mpapa'dii lombu to matangku', kumane' mendau' na wa'dingmo' pakita." 16 Ba'tu pira-pira to to-Farisi mangkada nakua, "Tangngia topole jio mai Puang Allataala joo, nasaba' te'da naturu'i to atoran Allo Katorroan." Nakua to laenna, "Te'da ia to tomadosa la mpugauk tanda mejangngaran susi joo." Susimi joo sipekkami to to-Farisi. 17 Mekutana pole' omi to to-Farisi lako joo to mangka buta nakua, "Na ia ke iko, apa la musanganni joo tau, nasaba' mangkamoko napapakita?" Mebalii nakua, "Oo, nabi Ia." 18 Apa ia to pekaamberan to-Yahudi, te'da namatappa' kumua, ia joo tau mangka buta anna pakitamo tee too. Iamo joo nasuai to tomatuanna ratu, 19 nakutanaii nakua, "Iamoraka tee to anakkami misanga kumua buta tonna dijajian? Matumbari nawa'dingmo pakita tee too?" 20 Mebalimi to tomatuanna nakua, "Ie', iamo anakkaki' tee. Buta simula jajinna. 21 Apa matumbai nawa'dingmo pakita tee too, te'da kiissenni. Na inda mpapakitai, te'da too kami' kiissenni. Takutanai bangmi, sanga matonggomo ia. Wa'dingmo mpebalian kalena." 22 Naanggai' to tomatuanna mangkada susi joo, sanga malaja'i lako pekaamberan to-Yahudi. Mangkamo nasituru'i kumua, ia to tonnakui kumua Raja Mangpasalama' to Puang Isa, la dipassala, na te'damo nadieloran mentama bola passambajangan. 23 Iamo joo nakumua to tomatuanna, "Takutanai bangmi, sanga matonggomo ia." 24 Natambai pole' omi pekaamberan to-Yahudi joo tomangka buta nakuanni, "Massapahko lako Puang Allataala kumua la mupau to tonganna. Kiissen kumua tomadosa joo tau." 25 Mebalii nakua, "Tomadosaraka joo tau ba'tu te'daraka, te'da kuissenni. Apa ia mandara kuissen kumua mangkana' buta, na pakitamo' tee too." 26 Nakutanai pole' omi nakua, "Apara napugauk lako kalemu? Matumba carana mpapakitako?" 27 Mebalii nakua, "Wah! Mangkamo' mpauanki' tacia' mpesa'dingngii! Ciapari tamadoang pole' omo mpesa'dingngii? Mbai madoang todaki' menjaji anak gurun-Na?" 28 Nakada-kadaii pekaamberan to-Yahudi nakua, "Iko-iko to anak gurun-Na, apa ia to kami', anak gurunnakan kami' Nabi Musa. 29 Kiissen kumua mangkamo Puang Allataala mangkada lako Nabi Musa tonna anu', apa ia joo tau, te'da kami' kiissenni kumua topole umbora ia." 30 Mebalimi joo tomangka buta nakua, "Liwa' ia mejangngaranna, ke te'dai taissenni kumua topole umbora ia, na mangkamo' napapakita. 31 Taissen kumua te'da napesa'dingngii Puang Allataala to tompugauk dosa, apa iara napesa'dingngi to tossompai sola mpugauk pakkaeloran-Na. 32 Mellao jiona mai ratu lako too allo, te'dapa ia disa'ding kumua den tau mpapakita tobuta simula jajinna. 33 Ia ke te'da na topole jio mai Puang Allataala joo tau, te'da nakullei mpugauk apa-apa." 34 Mebalimi to pekaamberan to-Yahudi nakua, "Apa iko! Iko tuu ponno dosa simula jajimmu, na iko pole' la nnajahhikan!" Mammula joo wattu te'dami nadieloran mentama bola passambajangan. 35 Nasa'dingngi Puang Isa kumua, te'damo naeloranni tau mentama bola passambajangan joo tomangka buta, naampa'i nakutanaii nakua, "Matappa'rokoka lako Anak Mentolino?" 36 Mebalimi joo tomangka buta nakua, "Indara ia joo Puang? Tatulungna' tapauanna' kumatappa' lako kale-Na." 37 Nakua Puang Isa, "Te'da mukita mandai. Aku'mo tee musipangkadan." 38 Nakuamo, "Matappa'mo' Puang." Nasuju' jio olo-Na Puang Isa ssompai. 39 Nakua Puang Isa, "Ratuna' tama lino la rra'tah kara-karana tolino, anna ia to tobuta la pakitai, na ia to topakita, la membutai." 40 Ba'tu pira-pira to to-Farisi jio ssa'dingngi joo kadan-Na Puang Isa namekutana nakua, "Iaraka to battuananna tuu kadan-Ta' kumua buta todakan?" 41 Mebalimi Puang Isa nakua, "Ia ke la susi kamu' tobuta to te'da naissen pangngajaran tongan, te'da mimadosa. Apa mikua kumua, 'Pakitakan', iamo joo mida'tanpa madosa."

Yahya 10

1 Mangngajahhimi Puang Isa nakua, "La miingaran tee kadang-Ku' kumua, ia ke denni tomentama bala bembala', na te'da nannola babangan, apa nteke'ri rompo, iamo taboko na parampo'. 2 Apa ianna tomangrewa nnola babangan ia. 3 Ia joo tomangngampa babangan natimbakanni, namentama joo tomangrewa. Ia to bembala'na mpesa'dingngi to gamaranna, ke natambai simesa'-mesa'i to sanganna, nasolanni messun. 4 Ia ke napasunmi joo bembala'na, jolomi lako lumingka joo tomangrewana, naundi to bembala'na nasaba' napegamarai to gamaranna. 5 Cia'i meundi lako tolaen, apa la palairi, sanga te'da napegamarai." 6 Nacuritanni Puang Isa tuu lako tau tee pangpasusian, apa te'da naissenni to battuananna. 7 Iamo joo nakua pole' Puang Isa, "La miingaran tee kadang-Ku' kumua, Aku'mo to susi babangan to naola bembala' mentama balana. 8 Sininna to toratu jolo na Aku', iamo taboko ba'tu parampo', apa te'da napesa'dingngii bembala' to gamaranna. 9 Aku'mo to susi babangan. Ia to tomentama bala na Aku' naola, la salama'i. Ia joo tau la susi to bembala' mentama messun balana nnampa' kande. 10 Ia to taboko raturi ia la boko, la pabuno na makkasolang. Apa ia tee Aku' ratuna' la mben katuoan tolino anna tuo tangkakurangan. 11 Aku'mo tomangrewa makanana'. Ia to tomangrewa makanana' mpangben sunga'-Na ssullei to bembala'-Na. 12 Ia to tomangrewa to kumande gajira, te'da nasusi tomangrewa to nnampuii joo bembala'. Ia ke nakitai to asu lampung ratu, la palaii ssalaii to bembala'. Nasa'makki asu lampung joo bembala' napasisarak-sarakki. 13 Palaii joo todipagajira, sanga doi'ra ia to naangah. Te'da na ia napuinawai to bembala'. 14 Aku'mo tomangrewa makanana'. Susi Ambe' nnissenna', na Aku' nnissen Ambe', susi toda Aku', kuissen ngasan to bembala'-Ku' na ia ngasan toda nnissenna', na mpangbenna' sunga'-Ku' ssulle bembala'-Ku'. 16 Den unapa bembala' laen, to bembala'-Ku' toda, apa te'da ia napole lan mai ntee bala. Na la kusolan toda, nasa'dingngi to gamarang-Ku', namangmesa sola ngasanni na mesa'ra tomangrewana. 17 Napakamoja'na' Ambe', sanga la mpangbenna' sunga'-Ku', angkutuo pole'. 18 Moi mesa' tau te'da nakullei nnalai sunga'-Ku' ke te'da kupuelohhi. Makuasana' mpangben sunga'-Ku', na makuasa toona' tuo pole'. Iamo tee to parenta kutarima jio mai Ambe'-Ku'." 19 Sipekka pole' omi to to-Yahudi ssa'dingngi joo kadan-Na Puang Isa. 20 Budai to kumua, "Natamaii setang na mamemi. Ammipesa'dingngi ori kamu'?" 21 Apa den too tolaen kumua, "Ia to tonatamai setang te'da ia namangkada susi tuu! Te'da nakullei to setang mpapakita tobuta." 22 Mangkai joo nadete'mi wattunna to pangramean dinii nningaranni to kadicerakanna Bola Puang Allataala jao kota Yerusalem. Na ia joo wattu, wattu kamacakketan. 23 Lumingka-mingkai Puang Isa jio rante pentionganan to disanga rante Sulaiman jio salean Bola Puang Allataala. 24 Naratu sirempun to pekaamberan to-Yahudi ngguririkki Puang Isa, nakutanaii nakua, "Piranpara masainki' la mangtangngah? Pauan pissenmokan manassana ke Kita'mo to Raja Mangpasalama'." 25 Mebalii Puang Isa nakua, "Mangkamo kamu' kupauan, micia' matappa'. Ia to panggaukan kupugauk mpake kuasan-Na Ambe'-Ku', iamo mpamanassana'. 26 Cia' kamu' matappa', sanga tangngia kamu' bembala'-Ku'. 27 Nasa'ding bembala'-Ku' to gamarang-Ku'. Na kuissenni, na undi ngasanmi lako Aku'. 28 Angkubenni katuoan melo te'da cappa'na, na te'da tarruhmo namasolang. Moi mesa' tau te'da ngkullei rrampai jio mai Aku'. 29 Ambe'-Ku' to kaminang makuasa. Iamo mangka mpangbenni joo bembala' lako Aku'. Moi mesa' tau te'da ngkullei rrampai jio mai Ambe'-Ku'. 30 Aku' na Ambe'-Ku', tomesa'kan." 31 Nnala pole' omi batu to to-Yahudi la nalekkosanni to Puang Isa. 32 Apa nakua Puang Isa ngkuanni, "Budamo to panggaukan melo mikita mangka kupugauk to nasuanna' Ambe'-Ku'. Panggaukan umbonnara to sipato' la minii lekko'na' batu?" 33 Mebalii to to-Yahudi nakua, "Te'da na ia to panggaukan melota' angkilalekko'ki', apa iara to ncapa'ki' Puang Allataala. Mesa'ki' tolino, tapapadai Puang Allataala to kale-Ta'." 34 Nakua Puang Isa, "Den diuki' lan Sura' Allataala kumua: Nakua Puang Allataala, 'Kamu'mo dipapada allataala.' 35 Miissen kumua te'damo nawa'ding dita'dei to diuki' lan Sura' Allataala. Jaji ia ke den diuki' lan Sura' Allataala kumua Puang Allataala ssangai allataala to tontarimai to kadan-Na, 36 matumbai misangana' ncapa' Puang Allataala, ke kukua 'Anak Allataalana''? Na Ambe' Ia mpileina' nasuana' tama lino. 37 Ia ke la te'dai kupugaukki to jaman nasuanna' Ambe', danggi' mikatappa'ina'. 38 Apa ia ke kupugaukmi joo jaman nasuanna', micia' ngkatappa'ina', ia bangmo joo jaman kupugauk mikatappa'i kumua jaman pole jio mai Puang Allataala. Na ia minii mpahang tonganni kumua Ambe' memmesa' sola Aku', na Aku' memmesa' sola Ambe'." 39 Nadadu' unapi to tau la njokko Puang Isa, apa mpella'paranni kalena. 40 Pole pole'i Puang Isa lian sambali'na Sa'dan Yordan. Natorro jio to nanii mangjio' Nabi Yahya tonna tee. 41 Ratu omi to tobuda lako Puang Isa. Nakua, "Te'da napugauk tanda mejangngaran Nabi Yahya, apa tongan ngasan to napau mpaui tee tau." 42 Buda tau sambali' matappa' lako Puang Isa.

Yahya 11

1 Den tau disanga Lazarus to torro jio kota Betania sola sile'tona Maryam sola Marta. (Iamo tee Maryam, to baine ntua'i minynya'-minynya' busarungngu' aje-Na Puang Isa, na ia to lolongna napa'dii beluakkana.) Den pissen wattu namasaki joo Lazarus. 3 Ia joo sile'tona dua baine ngkiringanni kareba Puang Isa nakua, "Oo Puang, ia to totapakamoja', masakii." 4 Ia tonna sa'dingngi Puang Isa joo kareba nakua, "Ia tee saki te'da anna la mpumatei, apa la mpamanassari kamala'biran-Na Puang Allataala sola Aku', Anak Allataala." 5 Napakamoja' Puang Isa to Marta, Maryam sola Lazarus. 6 Apa ia tonna sa'dingngi kumua masakii to Lazarus, naanggai'pa torro duang bongi jio to nanii. 7 Mangkai joo, nakuanmi to anak gurun-Na, "Tapole pole' lako tana Yudea." 8 Mebalii to anak gurun-Na nakua, "Oo Guru, mane' mangkanna to to-Yahudi la llekko'ki'. Antalapole unapa kita' lako?" 9 Mebalii Puang Isa nakua, "Sangpulo dua jangna lan sangngallo. Ia to tolumingka ke alloi, te'da natitodo, nasaba' nakitai to arrangna lino. 10 Na ia ke lumingka bongii to tau, titodoi, nasaba' te'da nnarrangngii." 11 Susimi joo kadan-Na Puang Isa. Mangkai joo, nakuanmi to anak gurun-Na, "Mamma'mi sile'tota' Lazarus, apa la malena' mpami'cokki." 12 Nakua to anak gurun-Na, "Oo Puang, ia ke mamma' bang unari, la malagah ia." 13 Apa ia to nasanga Puang Isa mamma', battuananna mate. Na ia to napikkiri' anak gurun-Na, mamma' tongan. 14 Iamo joo napau manassa pissenni Puang Isa kumua, "Matemi Lazarus. 15 Apa masannangna' na te'da kuratu joo wattu, sanga la'bi melo lako kamu', ammiwa'ding matappa'. Tamalemo tee too lako Lazarus." 16 Ia to Tomas (to disanga too Rendu), ngkuan padanna anak gurun-Na Puang Isa, "Tamale ssolanni tapada-pada mate." 17 Ia tonna ratumo lako kota Betania Puang Isa, tallung bongimi Lazarus lan liang. 18 Ia to kota Betania sikandoppi' kota Yerusalem, agi-agi tallu kilo paralla'na. 19 Buda to-Yahudi ratu la mpakatana Marta sola Maryam, sanga ia joo kamateanna sile'tona. 20 Ia tonna sa'dingmi Marta kumua ratumi Puang Isa, malemi ntammuii. Apa ia to Maryam, torroi jio bola. 21 Nakua Marta ngkuan Puang Isa, "Oo Puang ia ke la inde'ki' joo wattu, te'da nalamate to sile'toku'. 22 Moi nasusi joo kuissen kumua sininna to apa tapeta'da lako Puang Allataala, la nabenki'." 23 Nakua Puang Isa ngkuan Marta, "La tuo pole' to sile'tomu." 24 Mebalii Marta nakua, "Kuissen kumua la tuo pole', ke dipatuomi to tomate ke Kiama'mi lino." 25 Nakua Puang Isa, "Aku'mo mpangben katuoan sola mpatuo pole' tomate. Ia to tomatappa' lako Aku', la tuo pole', moi namatemo. 26 Na ia to totuopa namatappa' lako Aku', te'da tarruhmo nalamate. Mukatappa'iraka joo?" 27 Mebalii Marta nakua, "Oo Puang, matappa'na' kumua Kita'mo Anak Allataala, Raja Mangpasalama' to napau Puang Allataala tonna anu' la ratu tama lino." 28 Ia tonna mangkamo Marta mangkada susi joo, malemi nasipangkada buni Maryam sile'tona nakua, "Denni Guru jio, naangahko." 29 Nasa'dingna Maryam joo, ta'pa naparri-parrimi male sitammu Puang Isa. 30 Apa ia joo wattu te'dapa naratu tama kota to Puang Isa. Jio unapi to nanii Marta ntammuii. 31 Ia to to-Yahudi nasolan Maryam jio bola la mpakatanai, ngkita Maryam ta'pa ke'deh male, naundi toda messun, nasaba' nasangai kumua la malei lako liang nambating jio. 32 Ratunna Maryam lako to nanii Puang Isa, nakitai, nata'pa suju' ratu do' litak jio to' aje-Na nakuanni, "Oo Puang, ia ke la inde'ki' joo wattu, te'da nalamate to sile'toku'." 33 Ia tonna kitami Puang Isa to Maryam mbating sola to to-Yahudi nasolan ratu, massemi penawan-Na namaranna'. 34 Mekutanai Puang Isa ngkutanaii joo to-Yahudi nakua, "Umbora minii llamunni?" Mebalii nakua, "Tamalemo ngkitai." 35 Nakumarrak to Puang Isa. 36 Nakua joo to-Yahudi, "Kitari, liwa' ia napakamoja' to Lazarus!" 37 Apa ba'tu pira-pira to tau nakua, "Na ia mpapakita tobuta, te'daraka nakullei mpamalagahhi to Lazarus nadanggi' namate?" 38 Maranna' pole'i Puang Isa, namale lako liang. Liwa' tonggo joo liang, naditungu'i batu to babana. 39 Nakua Puang Isa, "Palelei tuu batu!" Nakua Marta sile'tona joo tomate Lazarus, "Oo Puang, gaja baumo, nasaba' tallung bongimo mangkanna mate." 40 Mebalii Puang Isa nakua, "Mangkako kupauan kumua la mukita to kamala'biran-Na Puang Allataala, ke matappa'ko!" 41 Napalelei tau joo batu, namentingngara Puang Isa de' langi', namane' kumua, "Oo Ambe', mangkurru sumanga'na' mati', sanga mipesa'dingngimo'. 42 Kuissen kumua tuli mipesa'dingngina', apa iara kumangkada susi tee, kukua anna matappa' tee tobuda inde' kusolan, kumua Ambe' tonganmo to ssuana'." 43 Ia tonna mangkamo mangkada susi joo, nnandongmi gamaran-Na nakua, "Oo Lazarus, messunko mai!" 44 Ta'pa messunmi joo to mangka mate. Ia to ajena sola limanna diba'ba' unapa pebalun na ia to lindona diba'ba' toopa. Nakua Puang Isa ngkuanni joo tau, "Bukaii to pebalunna, ake'mo namale lumingka." 45 Buda to-Yahudi ratu mpakatana Maryam memmatappa' lako Puang Isa tonna kitami to apa napugauk. 46 Apa den ba'tu pira-pira to solana male lako to-Farisi, napauanni apa to mangka napugauk Puang Isa. 47 Iamo joo na ia to kapala imang, sola to-Farisi mpangpesuanni nasirempun to padanna Pangbicara Agama, nasipangkadai nakua, "Apamora la tapugauk? Nasaba' ia joo tau gaja budamo tanda mejangngaran mangka napugauk! 48 Na ia ke tapupangngelohna bangngi susi joo, la matappa' ngasan to tobuda lako kale-Na. Katampakanna, ratu to tomangparenta to-Roma rro'pokanni to Bola Puang Allataala sola ssa'buii bangsata'." 49 Den mesa' tau disanga Kayafas, iamo Imang Lompo joo taun, mangkada ngkuanni tuu lako solana, "Te'da kamu' apa miissen! 50 Te'da miissenni kumua la'bi tapumelo, ke mesa'i tau mate ssullei tee bangsata' danggi' nasabu'." 51 Napaui Kayafas susi joo, sanga iamo Imang Lompo joo taun. Napau joloi kumua la mate to Puang Isa ssulle to-Yahudi. Mangkadai susi joo apa tangngia pikkirisanna. 52 Nate'da na to-Yahudi manda la nasulle, apa la napasirempun too napangmesai to taun-Na Puang Allataala to sisarak-sarakmo. 53 Mangpamulami joo wattu mesa' kadai to pekaamberan to-Yahudi la mbunoi to Puang Isa. 54 Iamo joo na te'damo napangpekitan kalena Puang Isa lako tobuda jio tana Yudea. Mellelemi lako kota disanga Efraim sikandoppi' padang pallawangan, natorro jio sola anak gurun-Na. 55 Na ia joo wattu madoi'mo to pangrameanna to-Yahudi disanga pangramean Paskah. Na buda tau jio mai kampong malemo de' kota Yerusalem mpemaceroi kalena situru' atoran agamanna, namane' wa'ding mang-Paskah. 56 Pada nnangahmi Puang Isa. Ia tonna sirempunmo jio rante Bola Puang Allataala, sipangkada-kadami nakua, "Umbo kamu' susi pangngampa'mi? Te'daraka nalaratu inde' pangramean?" 57 Ia to kapala imang sola to-Farisi, mangkamo mpau parenta kumua, "Ia to tonnissenni to nanii torro Puang Isa, la napau nadijokko."

Yahya 12

1 Annanpa allona namane' pangramean Paskah, ratumi Puang Isa jio kota Betania to nanii torro Lazarus, to mangka napatuo pole' Puang Isa jio mai kamateanna. 2 Ditambaii to Puang Isa kumande jio, na Marta mangpasadia kande. Ia to nasolan Puang Isa cumadokko kumande, den todai Lazarus. 3 Ratumi Maryam mbawa minynya'-minynya' gaja suli' allinna to disanga narwastu agi-agi sitangnga litere'. Natua'i lako aje-Na Puang Isa namane' mpa'dii beluakkana. Silele lan bola to baunna, sanga liwa' busarungngu'na. 4 Apa den mesa' anak gurun-Na Puang Isa disanga Yudas Iskariot, iamo to la mpangpejokkoanni, mangkadai nakua, 5 "Ciapari ia joo minynya'-minynya' nate'da nadibaluk tallu ratuh dinar, na ia to allinna diben tokaasi-asi?" 6 Tangngia tokaasi-asi natangngaran Yudas namangkada susi joo, apa madoangri mbokoi. Biasamo mboko doi' kasirempunan dianna lan sepu', sanga ia nnannai. 7 Nakua Puang Isa, "Eloranni tuu baine! Napugaukki susi joo, la mpasadiai to kadilamunan-Ku'. 8 Ia to tokaasi-asi, la den bang ia lan tangnga-tangngami, apa ia tee Aku' te'da kutorro tarruh lan tangnga-tangngami." 9 Buda to-Yahudi ssa'dingngi kumua jioi kota Betania to Puang Isa, iamo joo namale lako la ssitammuanni. Te'da na Puang Isa manda naparallui namale lako, apa male tooi ngkita Lazarus, to mangka napatuo pole' jio mai kamatean. 10 Na ia to kapala imang madoang too la mbuno Lazarus, 11 sanga ia mpusaba'i nate'da namenturu' lako kapala imang to tobuda apa matappa' lakori Puang Isa. 12 Ia tonna masawannamo, buda tau jio kota Yerusalem ssa'dingngi kumua mangtangnga lalanmi Puang Isa mangnguju lako kota. Ia joo wattu gaja budamo tau ratu sirempun la mpamaroahhi to pangramean Paskah jio kota Yerusalem. 13 Pada nnalami daun kaju palem jio mai garonto'na namale ntammui to Puang Isa. Nametamba-tamba nakua, "Pakala'bihhi Puang Allataala! Dibarakka'i to toratu mpusanga sangan-Na Puang, rajana to-Israel!" 14 Nnalai keledai lundara to Puang Isa, nasakeii susi to diuki' lan Sura' Allataala kumua, 15 "Ee kamu' to-Yerusalem, danggi' malaja'! Kitai, ratumi to Rajami, ssakei keledai lundara." 16 Ia joo wattu te'dapa napahangngi to anak gurun-Na Puang Isa joo apa napugauk tau. Apa mangkamira dipakala'bih to Puang Isa tonna dipatuo pole'mo jio mai kamatean, namane' nningaranni kumua, mangkami diuki' lan Sura' Allataala joo napugauk tau lako Puang Isa. 17 Buda tau to nasolan Puang Isa tonna tambaii to Lazarus messun lan mai liang anna patuo pole'i jio mai kamatean, male bang mpangpeissenanni joo kareba. 18 Iamo joo namale to tobuda ntammui Puang Isa, sanga nasa'dingmo kumua mangkami napugauk joo tanda mejangngaran. 19 Sipangkada-kadami to to-Farisi nakua, "Te'damo apa wa'ding tapugauk. Kita bangmi, sininna tau menturu' ngasanmi lako." 20 Ia tuu lako tomale de' kota Yerusalem la massambajang ke pangramean Paskah, den too ba'tu pira-pira to-Yunani. 21 Malei to to-Yunani lako Filipus nakuanni, "Oo mane, ia ke wa'dingngi, madoangkan la sitammu Puang Isa." (Ia to Filipus to-Betsaida jio tana Galilea.) 22 Iamo joo namale Filipus mpauanni Andreas, namane' male sola dua mpauanni Puang Isa. 23 Nakua Puang Isa ngkuanni, "Nadete'mi wattung-Ku' tee Aku', Anak Mentolino, la dipakala'bih. 24 La miingaran tee kadang-Ku' kumua, wa'dingna' dipasangrapang banne. Ia ke te'da naditanan do' litak namate, la da'tan bangngi sanglise'. Apa ia joo sanglise' banne ke ditananni namate, mane'ri membuda buanna. 25 Ia to tonturu' bang pakkeloran penawanna, te'da nalannampa' katuoan melo te'da cappa'na. Apa ia to tote'da naturu' bang pakkeloran penawanna lan tee lino, iamo la nnampa' katuoan melo te'da cappa'na. 26 Inda-inda kamu' to madoang mpangjamanna', la undii lako Aku', anna umbo-umbo kunii male, jio todai. Ia to tompangjamanna' la naangga' Ambe'-Ku'." 27 Nakua Puang Isa, "Gaja liah penawang-Ku'. Apara to la kupau tee too? La kukuaraka, 'Oo Ambe', pasalama'na' jio mai tee kamaparrisan'? Te'da, sanga iamo joo nasuanna' Ambe'-Ku', angkuratu. 28 Oo Ambe' pakala'bihmi sangam-Mi!" Ia tonna mangka mpaui susi joo, den gamara jao mai suruga nakua, "Kupakala'bihmo, na la kupakala'bih unapa!" 29 Ia to tobuda jio to ssa'dingngi joo gamara sipangkada-kadai nakua, "Oo, oni galugu!" Apa den to kumua, "Tangngia! Den malaeka' ssipangkadanni!" 30 Mangkadai Puang Isa ngkuanni joo tobuda, "Ia joo gamara misa'ding tangngia kaparalluan-Ku', apa kaparalluanmi. 31 Nadete'mi wattunna la dira'tah kara-karana tolino. Ia tee too la dica'beanmo lako salean to Ballisi' to ngkuasaii tee lino. 32 Apa ia tee Aku', la dipamajaona' lan lino, na la kuparatu to sininna tau lako Aku'." 33 Iamo namangkada susi joo, sanga napangpeissenanni matumbai carana la mate. 34 Nakua to tobuda ngkuanni, "Menuru' to diuki' lan Sura' Allataala, ia to Raja Mangpasalama' la tuo te'da cappa'na. Matumbai takua kumua ia to Anak Mentolino la dipamajao lan lino? Indara pale' joo Anak Mentolino?" 35 Mebalimi Puang Isa nakua, "Cingga'tu'mora tee Aku' arrang ssolan kamu'. Jaji lumingkamo kamu' ke sola unapa kamu' tee arrang, danggi' mikalillinan. Ia to tolumingka lan kamalillinan, te'da naissenni umbora la nanii male. 36 Katappa'ii tee Aku' arrang ke sola unapiki', ammimenjaji anak arrang." Ia tonna mangkamo Puang Isa mangkada susi joo, mellelemi na te'damo napangpekitan kalena lako tobuda. 37 Moi nabudamo tanda mejangngaran napugauk Puang Isa jio olona tobuda, apa cia'i ngkatappa'i. 38 Susimi joo najaji to napau jolomo Nabi Yesaya kumua, "Oo Puang! Ci'di'ra tau ngkatappa'ii to kareba kipangpeissenan. Moi dipakitan tau to kuasan-Ta', te'da too nakatappa'i." 39 Iamo joo na te'da namatappa' to tobuda, nasaba' nakua toopa Nabi Yesaya, "Nakua Puang Allataala, 40 'Kupabutai to matanna, kupembattukki to penawanna, nadanggi' napakita matanna, nadanggi' napahangngi, nadanggi' namengkatoba' lako kale-Ku', anna danggi' kupamalagahhi.' " 41 Napau jolomo Nabi Yesaya susi joo mpau Puang Isa, sanga mangkamo nakita to kamala'biran-Na. 42 Moi nasusi joo, buda una pekaamberan to-Yahudi matappa' lako Puang Isa, apa te'da nabarani mpaui lako tau, sanga malaja'i tangnaeloran to-Farisi mentama bola passambajangan. 43 La'bi nakabudai to kadipujian pole jio mai tolino, na ia to kadipujian pole jio mai Puang Allataala. 44 Nnandongngii gamaran-Na Puang Isa nakua, "Ia to tomatappa' lako Aku', tangngia Aku' manda nakatappa'i, apa matappa' tooi lako Puang Allataala to ssuana'. 45 Na ia to tongkitana', nakita toomi to tossuana'. 46 Ratumo' tama lino susi arrang, dikua na ia to tomatappa' lako Aku', te'damo nalatorro lan kamalillinan. 47 Na ia to tossa'ding kadang-Ku', na te'da napugaukki, te'da na Aku' la ssessai, nasaba' te'da kuratu la ssessai to tolino, apa la kupasalama'ri. 48 Ia to tocia' ntarimana' sola tocia' mpesa'dingngi kadang-Ku', iamo joo kada kupangpeissenan la rra'tah kara-karana ke Kiama'mi lino. 49 Nasaba' tangngia pakkaeloran-Ku' kumangkada, apa ia to kupau, iamo to naparentanna' Ambe' to ssuana'. 50 Na kuissen kumua ia joo parenta-Na mpangben katuoan melo te'da cappa'na. Ia to apa kupangpeissenan susi to napauanna' Ambe'."

Yahya 13

1 Sangngallopa na pangramean Paskah, naissenmi Puang Isa kumua nadete'mi wattunna la ssalai tee lino la pole pole'i lako Ambe'-Na. Napakamoja' to sininna tau lan lino to tonturu'mi, nada'tan la napakamoja' ratu lako kamatean-Na. 2 Ia tonna bongi nakumande Puang Isa sola anak gurun-Na, na ia to Ballisi' mangkai ssede Yudas anakkana Simon Iskariot anna la mpangpejokkoan Puang Isa. 3 Naissen Puang Isa kumua sininna kuasa napaben ngasanmo Ambe' lako kale-Na. Naissen too kumua topole jioi mai Puang Allataala, na la pole lako pole' tooi Ia Puang Allataala. 4 Iamo joo namengke'deh Puang Isa naalaii to baju lando-Na, na nnala kaen lenan sanglambah napusa'wakki, 5 namane' ntolloi to wai do' katoang, napamulai mbaseii to ajena anak gurun-Na, napemamaraii mpake kaen lenan to napessa'wak. 6 Ia tonna dete'mi to Simon Petrus la nabasei, nakuamo ngkuan Puang Isa, "Oo Puang, anna Kita' ora mbasei ajeku'?" 7 Mebalimi Puang Isa nakua, "Ia tee too te'dapa mupahangngi tee apa kupugauk, apa undinnapi mumane' mpahangngi." 8 Nakua Petrus ngkuan Puang Isa, "Oo Puang, danggi' lalo na Kita' mbaseanna' ajeku'!" Apa mebalii Puang Isa nakua, "Ia ke te'da kubasei ajemu, tangngiako taung-Ku'." 9 Nakua omo Simon Petrus ngkuanni, "Oo Puang, Ia ke susii tuu, danggi' na ajeku' manda, apa moi limangku' sola ulungku'." 10 Nakua omo Puang Isa, "Ia to tomangkamo menjio', maceromi ia. Te'damo naparallu la dipemaceroi pole', apa ajena mandamora. Maceromo kamu', apa te'dari mimacero ngasan." 11 Naissen Puang Isa to tolampangpejokkoanni, iamo joo nakua kumua, "Maceromo kamu', apa te'dari mimacero ngasan." 12 Ia tonna mangka ngasanmo mbaseii ajena anak gurun-Na, mpake pole'mi baju lando-Na, namale pole' cumadokko nakua ngkuan anak gurun-Na, "Mipahangraka to apa mane' mangka kupugauk lako kalemi? 13 Misangana' Guru sola Puang, na tongan joo, sanga Guruna' ku-Puang too. 14 Ia ke Aku' Gurummi sola Puangmi kubasean kamu' ajemi, moi kamu' parallu too sibasean ajemi. 15 Kupugaukki susi tee lako kalemi, ammipugauk todai lako padanta' tomatappa'. 16 La miingaran tee kadang-Ku' kumua, ia to mesa' kaunan te'da nala'bi matande na puangna, susi toda to todisua te'da nala'bi matande na ia to tossuai. 17 Miissen ngasanmo tee, na masannangmo kamu' ke mipugaukki. 18 Na ia tee apa mane' mangka kupau, te'da na kamu' ngasan kupauan. Kuissen ngasan to tau kupileimo. Apa la jaji to kada mangka diuki' lan Sura' Allataala kumua, 'Ia to tokusolan kumande, la nnewana'.' 19 Kupauan jolomo kamu' tee tonna te'dapa najaji, na ia ke jajimi dau, matappa'mo kamu' kumua, Aku'mo to disanga |scDenna'|r. 20 La miingaran tee kadang-Ku' kumua, ia tontarimai to tokusua, iamo to ntarimana'. Na ia tontarimana', ia toomo ntarimai to tossuana'." 21 Ia tonna mangkamo Puang Isa mpaui joo, liwa'mi maliah penawan-Na, anna kumua, "La miingaran tee kadang-Ku' kumua, den kamu' mesa' la mpangpejokkoanna'!" 22 Ta'pa sikita-kitai to anak gurun-Na, nasijangngaran, sanga te'da naissenni kumua indannara to nasanga. 23 Na ia to anak gurun-Na Puang Isa, to liwa' napakamoja', cumadokko jio sa'de-Na. 24 Nako'bi'i Simon Petrus kumua namekutana lako Puang Isa, indara ia joo nasanga. 25 Mpuperra'bai kalena lako Puang Isa namekutana lako nakua, "Oo Puang, indara ia?" 26 Mebalimi nakua, "Ia to la kucummuran roti do' mangko', kumane' mbenni." Mangkanna Puang Isa mangkada susi joo, nnalami roti nacummui do' mangko', nabenni Yudas anakkana Simon Iskariot. 27 Ia tonna mangka Yudas nnalai joo roti, natamaimi Ballisi'. Nakuamo Puang Isa ngkuanni, "Apa mukadoangngi mupugauk, pugaukmi madoi'!" 28 Moi mesa' tuu lako tonasolan cumadokko kumande te'da nnissenni, apa battuananna Puang Isa namangkada susi joo lako Yudas. 29 Den tossangari kumua, mbai nasuai Puang Isa male nnalli kaparalluan la dipake pangramean iarika nnalli apa-apa la diben tokaasi-asi, nasaba' Yudas ntoe sepu' doi'. 30 Ta'pa naalai Yudas joo roti naparri-parrii male. Bongimi joo wattu. 31 Ia tonna malemo Yudas, mangkadami Puang Isa nakua, "La dipakala'bihmo' tee too Aku', Anak Mentolino. Na dipakala'bih tooi to Puang Allataala, nasaba' Aku'. 32 Ia na dipakala'bih to Puang Allataala nasaba' Aku', napakala'bih toona' Puang Allataala. Na madoi'mo Puang Allataala mpakala'bihna'. 33 Oo anak-Ku' sola ngasan. Te'damo kumasai torro ssolan kamu'. La miangahna', apa susi to mangka kupauan pekaamberan to-Yahudi, na moi kamu' kupauan toomo kumua ia to kunii male, te'da mikullei ratu lako. 34 Kuben kamu' parenta baru kumua, la sipakamoja' kamu'. Susi Aku' mpakamoja' kamu', susi toda kamu' la sipakamoja'. 35 Ia ke sipakamoja'mo kamu', iamo nanii nnissen ngasanni tau kumua, kamu'mo tonturu'na'." 36 Mekutanai Simon Petrus lako Puang Isa nakua, "Oo Puang, umbora la tanii male?" Mebalii nakua, "Ia to la kunii male, te'dapa muwa'ding la male lako tee too. Apa keanu'ri mumane' undi lako Aku'." 37 Mekutana pole'i Petrus nakua, "Oo Puang ciapari na te'dapa kuwa'ding male sola Kita' tee too? Mpangbenna' sunga'ku' mpangngewaiki'." 38 Mebalii nakua, "Manassaraka kumua madoang tonganko mate mpangngewaina'? La muingaran tee kada kupauanko kumua, te'dapa nakekkua to manuk dau, mupentallunmo mpessakkannina'."

Yahya 14

1 Nakua Puang Isa lako anak gurun-Na, "Danggi' mimausa'. Matappa' kamu' lako Puang Allataala, mimatappa' too lako Aku'. 2 Buda ngenan dinii mari'pih lan bola-Na Ambe'-Ku'. La malena' lako mpasadian kamu' ngenan. Na te'da kulamangkada susi joo lako kamu', ke te'dai natongan. 3 Ia ke mangkamo' male mpasadian kamu' ngenan, la ratu pole'na' kusolan kamu' lako, antatorro jio sola to kunii mari'pih. 4 Miissenmo to lalan lako to kunii mari'pih." 5 Nakua Tomas lako Puang Isa, "Oo Puang, te'da kiissenni umbo la tanii male. Na umbo kikua la nnissenni to lalan lako?" 6 Mebalimi Puang Isa nakua, "Aku'mo minii nnissen Puang Allataala sola nnampa' katuoan. Moi mesa' tau te'da nakullei ratu lako Ambe', ke te'dai kupuissenni. 7 La miissenmo to Ambe'-Ku', sanga miissenmo'. Ia tee too miissenmo to Ambe'-Ku', mikita toomo." 8 Nakua Filipus lako Puang Isa, "Oo Puang, tapakitankan joo Ambe' nasau penawangki'." 9 Mebalimi Puang Isa nakua, "Oo Filipus! Liwa'mo' masainna torro ssolan kamu', anna te'da unapa muissenna'! Ia to tomangkamo ngkitana', mangka toomo ngkita Ambe'. Matumbai mukua, 'Pakitankan joo Ambe''! 10 Te'daraka mumatappa' kumua Aku' memmesa' sola Ambe', na Ambe' memmesa' sola Aku'? Ia to apa kupauan kamu', te'da na Aku' bangra mpaui. Apa Ambe' to da'tan memmesa' sola Aku', Iamo mpugauk ngasanni to apa kupugauk. 11 Katappa'ina' kumua Aku' memmesa' sola Ambe', na Ambe' memmesa' sola Aku'. Ia ke cia' kamu' ngkatappa'ii to kadang-Ku', wa'ding kamu' matappa' lako Aku' nasaba' mikitamo to jaman mangka kupugauk. 12 La miingaran tee kadang-Ku' kumua, ia to tomatappa' lako Aku', la napugauk to apa mangkamo kupugauk. La'bi matonggo pole'pa ia to la napugauk, nasaba' malena' kutorro sola Ambe'-Ku'. 13 Na moi apa mipeta'da mpau sangang-Ku', la kuben kamu', anna dipakala'bih to Ambe', nasaba' Aku' tee Anak. 14 Moi apa mipeta'da lako Aku', la kuben kamu'." 15 Mpatarruhhi kadan-Na Puang Isa nakua, "Ia ke mipakamoja'na', la mituru' ngasan to parenta-Ku'. 16 La meta'dana' lako Ambe', naparatuan kamu' tomangpakatana, iamo to Roh Allataala, to la torro tarruhmo ssolan kamu'. Iamo la mpamanassan kamu' to pangngajaran tongan. Ia to tote'da namatappa', te'da nakullei ntarimai, nasaba' te'da nakitai na te'da too naissenni. Apa ia to kamu' miissen, sanga nasolan kamu', nalatorro lan penawammi. 18 Te'da kulassalai kamu' susi tobiung, apa la ratu unapa' lako kamu'. 19 Cingga'tu'mora na te'damo nakitana' tolino. Apa ia to kamu' la mikitana'. La tuo kamu', nasaba' tuona'. 20 Ia ke nadete'mi wattunna, la miissen kumua memmesa'na' sola Ambe'-Ku', na kamu' memmesa' sola Aku', na Aku' memmesa' sola kamu'. 21 Ia to tontarima parenta-Ku' napugaukki, iamo tompakamoja'na'. La napakamoja' Ambe'-Ku' to tompakamoja'na'. Moi Aku' mpakamoja' todai na kupangpekitan kale-Ku'." 22 Ia to Yudas (tangngia Yudas Iskariot) mekutana lako Puang Isa nakua, "Oo Puang, ciapari na kami' tapakitan kale-Ta', te'da na lako totangmatappa'?" 23 Mebalii Puang Isa nakua, "Ia to tompakamoja'na', la naturu' to pangngajah-Ku'. La napakamoja' Ambe'-Ku' joo tau. La ratuna' sola Ambe'-Ku' lako to tonturu' pangngajaran-Ku', angkitorro mari'pih sola. 24 Ia to tote'da napakamoja'na', te'da naturu'i to pangngajah-Ku'. Ia joo pangngajaran misa'ding, te'da napole jio mai Aku', apa pole jio mai Ambe' to ssuana'. 25 Kupauan ngasanmo kamu' tee, tontasola unapa. 26 Ia to Roh Allataala, to tomangpakatana, la nasua Ambe' ratu ssullena'. Iamo la nnajahhi kamu' to sininna apa napangngingaran pole' kamu' to apa mangkamo kupauan kamu'. 27 Kupatorroan kamu' to la mipumasannang, iamo to kamasannangan pole jio mai Aku'. Ia joo kamasannangan kuben kamu' te'da nasusi to naben kamu' tolino. Danggi' mimausa' ba'tu malaja'. 28 Misa'dingmo kukua, 'La malena', apa la ratu unapa' lako kalemi.' Ia ke mipakamoja'na', la masannang kamu' kumale lako Ambe', sanga la'bi makuasa ia to Ambe' na Aku'. 29 Kupauan jolomo kamu' tee, moi na te'dapa najaji, na ia ke jajimi keanu', mikatappa'imo'. 30 Te'damo nabuda bang la kupauan kamu', nasaba' wattunnami la ratu to Ballisi', to ngkuasai tee lino. Apa te'da nakuasaina'. 31 Apa la jaji ngasan susi joo, nasaba' parallu naissen tolino kumua mpakamoja'na' Ambe'. Iamo joo kupugaukki to sininna apa naparentanna'. Ikee, tamellele ntee."

Yahya 15

1 Nakua omo Puang Isa, "Aku'mo garonto' anggoro' melo, na Ambe'-Ku' pangbara'bahna. 2 Ia to tangke-Ku' to te'da namembua, nasembangngi Ambe'. Na ia to den buanna naalai pira' to daunna, nabajaii anna la'bi buda buanna. 3 Nabajaimo kamu' pangngajah-Ku' to mangka kuajaran kamu'. 4 La da'tan kamu' memmesa' sola Aku', kumemmesa' sola kamu'! Susi to tangke anggoro' te'da nakullei membua, ke te'dai nale'ke' jio garonto'na, susi todamo kamu' te'da mikullei membua, ke te'dai mimemmesa' sola Aku'. 5 Aku'mo garonto' anggoro', na kamu'mo to tangkena. Ia to tomemmesa' sola Aku', na Aku' memmesa' sola ia, iamo la membua buda. Nasaba' ia ke te'da mimemmesa' sola Aku', te'da lalo mikullei mpugauk apa. 6 Ia to tote'da namemmesa' sola Aku', la dica'bean lako salean, namerrangko susi rangko anggoro' to disembangngi. Ia joo rangko dirempun nadisumpun. 7 Ia ke da'tan kamu' memmesa' sola Aku', miingaran tooi to pangngajaran-Ku', moi apa mipeta'da lako Ambe', la naben kamu'. 8 Na ia ke membua budamo kamu', iamo dinii mpakala'bih Ambe'-Ku'. Pajan toomi kumua kamu'mo to ntongan-tongannii nturu'na'. 9 Susi Ambe' mpakamoja'na', susi toda Aku' mpakamoja' kamu'. Jaji la da'tan kamu' memmesa' sola Aku', angkuda'tan mpakamoja' kamu'. 10 Ia ke mituru'i to pakkaeloran-Ku', la da'tanna' mpakamoja' kamu', susi Ambe' da'tan mpakamoja'na', sanga nturu'na' pakkaeloran-Na. 11 Kupauan ngasanmo kamu' tee, ammisamasannang-sannangna susi Aku'. 12 Iamo tee parenta-Ku' to kumua, la sipakamoja' kamu' padammi rupa tau, susi Aku' mpakamoja' kamu'. 13 Nate'damo ia pangpakamoja' la'bi matonggo, na ia to pangpakamoja'na mesa' tau tompangben sunga'na naputuoi soba'na. 14 Kusangamo kamu' soba'-Ku', ke mipugaukki to kuparentan kamu'. 15 Te'damo kusanga kamu' kaunan, nasaba' ia to kaunan te'da ia naissenni to apa la napugauk puangna. Apa ia to kamu' kusangamo kamu' soba'-Ku', sanga sininna to apa mangka kusa'ding jio mai Ambe'-Ku', mangka ngasanmo kamu' kupauan. 16 Tangngia kamu' mpileina', apa Aku'ri mpilei kamu', angkusua kamu' male ammimembua buda, to bua te'da nalamasolang. Na ia to apa mipeta'da lako Ambe' mpau sangang-Ku', la naben kamu'. 17 Iamo tee parenta-Ku' lako kamu' kumua, sipakamoja' kamu'." 18 Mangngajahhimi Puang Isa nakua, "Ia ke nakaba'ci kamu' totangmatappa', ingaranni kumua la'bi jolona' nakaba'ci na kamu'. 19 Ia ke la taunna kamu' totangmatappa', tantu nakabudai kamu'. Apa tangngiamo kamu' taunna, sanga mangkamo kamu' kupilei lan mai tangnga-tangngana totangmatappa', iamo nakaba'ci kamu'. 20 Ingaranni to apa mangkamo kupauan kamu', 'Ia to mesa' kaunan te'da nala'bi matande na puangna.' Jaji ia ke mangkamo' nasessa, moi kamu' la nasessa too. Na ia ke naturu'i to pangngajaran-Ku', la naturu' tooi to pangngajaranmi. 21 Na la nasessa kamu', sanga mituru'na' na te'da too naissenni to Ambe' to ssuana'. 22 Ia ke la te'dai kuratu nnajahhi tau, te'da nalamadosa. Apa ia tee too, te'damo nawa'ding mpessakkanni dosana. 23 Ia to tongkaba'cina', ia toomo ngkaba'ci Ambe'-Ku'. 24 Ia ke la te'dai kupugauk tanda mejangngaran lan tangnga-tangngana tobuda, to te'da napugaukki tau laen, te'da nalamadosa. Apa moi nakitamo to apa kupugauk, nakaba'cina', na moi Ambe'-Ku' nakaba'ci todami. 25 Apa nang la susimi ia joo anna jaji to diuki' lan sura'na Nabi Musa kumua, 'Nakaba'cina', moiraka nate'da kupugauk dosa.' 26 La kusua lako kalemi to tomangpakatana pole jio mai Ambe'. Iamo to Roh Allataala to la mpamanassai to pangngajaran tongan. Ia ke ratui, Ia mpangpeissenanna'. 27 Moi kamu' la mipangpeissenan toona', sanga sola bangmiki' jio mai pamulanna.

Yahya 16

1 Kupauan ngasanmo kamu' joo, anna danggi' mika'tu rannu ammitangmatappa' pole'. 2 La diula'i kamu' lan mai bola passambajangan. La den too ia wattunna, na ia to tombuno kamu' nasangai kumua mpugaukki kameloan lako Puang Allataala. 3 Napugaukki susi joo lako kamu', nasaba' te'da naissenni to Ambe', na moi Aku' te'da too naissenna'. 4 Apa kupauanmo kamu' tee too, anna ia ke jajimi, la miingaran kumua mangka jolomo' mpauan kamu'." Mpatarruhhi kadan-Na Puang Isa nakua, "Sininna tee kupau te'dapa naden kupauan kamu' mellao jiona mai, sanga sola bang unapiki'. 5 Apa ia tee too, la polemo' lako tossuana'. Na moi mesa' te'da bang kamu' ngkutanaina' kumua, 'Umbora la tanii male?' 6 Na la memmasse penawammi tee too, nasaba' kupauanmo kamu' kumua, 'La polemo''. 7 Tongan tee kupauan kamu' kumua, 'La'bi den bua'na lako kamu' ke polena'', sanga ia ke la te'dai kupole, te'da nalaratu joo tomangpakatana. Apa ia ke polena', la kusuai ratu lako kalemi. 8 Na ia ke ratumi to Roh Allataala la napamanassai kumua sala to tolino. La napamanassai lako tolino apa to disanga dosa, pangsessa-Na Puang Allataala na kumua totangmadosana'. 9 La napamanassa kumua madosai to tolino, sanga te'da namatappa' lako Aku'. 10 La napamanassa too kumua totangmadosana', sanga polena' lako Ambe' natarimana', na te'damo milangkitana'. 11 La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino. 12 Budapa to la kupauan kamu', apa te'dapa mikullei mpahangngi. 13 Apa ianna ratumo joo Roh Allataala, Iamo la mpamanassai to katonganan-Na Puang Allataala, na Ia toomo mpatuju kamu' nnissenni to sininna pangngajaran tongan. Te'da namangkada situru' pakkaeloran-Na, apa sininna to nasa'ding jio mai Aku' iamo napau. Na la napauan too kamu' to apa la jaji keanu'. 14 La napakala'bihna', nasaba' ia to napauan kamu', natarima pole jio mai kale-Ku'. 15 Sininna to apa naampui Ambe', apang-Ku' too. Iamo kukua kumua ia to apa napauan kamu' Roh Allataala, pole jio mai kale-Ku'." 16 Mpatarruhhi kadan-Na Puang Isa nakua, "Cingga'tu'mora na te'damo mikitana', na cingga'tu' toomora ammikita pole'na'." 17 Ba'tu pira-pira to anak gurun-Na sikutana-tana nakua, "Apara battuananna joo nakuanki', 'Cingga'tu'mora na te'damo mikitana', na cingga'tu' toomora ammikita pole'na''? Na apa pole'pa battuananna joo nakua, 'La polena' lako Ambe''?" 18 Sikutana tarruhpa ia nakua, "Apara ia battuananna joo 'cingga'tu''? Te'da kita' taissenni apara ia joo napau!" 19 Naissen Puang Isa kumua madoangngi la ngkutanaii. Iamo joo nakua ngkuanni, "Kukua nena', 'Cingga'tu'mora na te'damo mikitana', na cingga'tu' toomora ammikita pole'na'.' Iamoraka joo misipangkadai? 20 La miingaran tee kadang-Ku' kumua, la kumarrak kamu', mimbating too, apa la marioi to totangmatappa'. La masussa penawammi, apa ia to kamasussanmi la nasullei kamasannangan. 21 Ia to kamasannanganmi susi to baine la keanak. Ia ke la keanakki, liwa' sussa na mapa'dik mangnguriwa'. Apa ianna kala'paranmo, ta'pa te'damo naingaranni to pa'dikkina nena', nasaba' gaja sannangngi njajian mesa' pea tama lino. 22 Susi toomo kamu'. Masussa penawammi tee too, apa la kusiamparan pole' kamu', ammimemmasannang. Na moi mesa' tau te'da ngkullei nnalai kamu' joo kamasannanganmi. 23 Na ia joo wattu te'damo ammilangkutanaina'. La miingaran tee kadang-Ku' kumua, moi apa mipeta'da lako Ambe' mpau sangang-Ku', la naben kamu'. 24 Naratu lako too allo, te'dapa mipeta'dai to apa lako Ambe' mpau sangang-Ku'. Peta'dai ammidiben, nasukku' to kamasannanganmi!" 25 Mpatarruhhi kadan-Na Puang Isa nakua, "Sininna tee kupauan kamu', kupakean ngasan pangpasusian. Apa la den wattunna nate'damo kupakeanni pangpasusian, apa kupau manassa bangmo lako kamu', mpamanassai to Ambe'. 26 Ia joo wattu la meta'da kamu' lako Ambe' mpau sangang-Ku'. Te'da naparallu Aku' la mpeta'dan kamu' lako Ambe', 27 sanga napakamoja'mo kamu' Ambe'. Napakamoja' kamu', nasaba' mipakamoja'na', mimatappa' too kumua topole jiona' mai Ambe'. 28 Topole jiona' mai Ambe', kumentama lino. Na ia tee too la kusalaimi tee lino, kupole pole' lako Ambe'." 29 Mangkadami to anak gurun-Na ngkuanni, "Oo Puang, mane'ri tapau manassa tee too. Te'damo tapake kada pangpasusian. 30 Mane' kiissenri kumua Kita' nnissenni to sininna apa. Taissen jolo to apa la nakutananki' tau. Iamo joo matappa'kan kumua topole jioki' mai Puang Allataala." 31 Napebalii Puang Isa nakua, "Jaji matappa'mora kamu'ka tee too? 32 La nadete'mi wattunna, na sitonganna wattunnami tee too, kumua la dipasisarak-sarak kamu'. Pada la pole kamu' lako bolami, ammisalaina' mesa-mesa. Apa sitonganna te'da kumesa-mesa, sanga den Ambe' kusolan. 33 Kupauan ngasanmo kamu' tee, ammiampa' kamasannangan nasaba' memmesa'mo kamu' sola Aku'. La maparri' kamu' dipakario-rio lan lino. Apa pemawatangngii penawammi, nasaba' mangkamo' ntaloi kuasanna lino."

Yahya 17

1 Ia tonna mangkamo Puang Isa mpaui joo, mentingngarami de' langi' nakua, "Oo Ambe', nadete'mi wattunna. Pakala'bihmo' tee Aku' Anak, angkupakala'bih tooki'. 2 Tapakuasamo' ngkuasaii to sininna tolino, jaji kuasa toomo' mbenni katuoan melo te'da cappa'na to totapangbenmo lako Aku'. 3 Iamo tee to katuoan melo te'da cappa'na, ke naissen tonganmiki' tau kumua Kita'mo Puang Allataala tongan, anna issen toona' kumua Aku'mo Puang Isa Almaseh to mangka tasua. 4 Mangkamo' mpakala'bihki' lan tee lino, nasaba' mangkamo' njamai to jaman tasuanna'. 5 Oo Ambe'! Pakala'bihmo' tee too. Ben pole'mo' to kamala'biran kuampuimo tontasola unapa, tonna te'dapa nadipaden tee lino. 6 Kupangpeissenanmiki' lako sininna tau to mangkamo tabenna' lan tee lino. Ia tuu lako tau tabenna', taun-Ta', nanturu'mo kadan-Ta', 7 naissenmo tee too kumua sininna to apa tabenna' pole jio ngasan mai Ambe'. 8 Kupauanmo kadan-Ta' to mangka tapauanna', na natarimamo. Naissen toomo kumua tonganna' topole jio mai Ambe'. Nakatappa'imo kumua Kita'mo to mangka ssuana'. 9 Kupassambajanganmo tuu lako tau. Te'da kupassambajangan ngasanni to tolino, apa ia mandara to tomangkamo tabenna', sanga taun-Ta' tuu lako tau. 10 Sininna to taung-Ku' taun-Ta' too, na sininna to taun-Ta' taung-Ku' too. Na ia to kamala'biran-Ku' pajan lan tangnga-tangngana tuu lako taun-Ta'. 11 Na ia tee too la polemo' lako Ambe'. Te'damo kulatorro lan lino, apa lan unapi lino tuu lako taun-Ta'. Oo, Ambe' mala'bih! Kuasan-Ta', to mangka tabenna', nnampaii tuu lako taun-Ta', na memmesa' susi Ambe' na Aku'. 12 Ia tongkusola unapa, kuasan-Ta' kupake nnampaii. Kuampai melomo anna moi mesa' te'da namasolang, saliwanna to pura dipattantumo anna jaji to diuki' lan Sura' Allataala. 13 Na ia tee too la polemo' lako Ambe'. Kupau ngasanni tee tongkulan unapa lino, anna wa'ding liwa' masannang tuu lako taun-Ta' susi Aku' masannang. 14 Kupauanmi to kadan-Ta'. Iamo joo nakaba'cii totangmatappa', nasaba' tangngia taunna, susi Aku' tangngia toona' taunna. 15 Te'da kumeta'da kumua antaalaimi lan mai lino tuu lako taun-Ta', apa meta'dara' lako kale-Ta' antaampaii jio mai kuasanna togaja'. 16 Susi Aku' tangngiana' taunna totangmatappa', moi tuu lako taun-Ta' tangngia too taunna. 17 Dennaa upa' ia tuu lako taun-Ta' nturu' kadan-Ta' na mpangmesa lako mandai Puang Allataala to katuoanna. Katonganan to kadan-Ta'. 18 Susi Ambe' mangkamo ssuana' tama lino, susi toomi Aku' mangkamo ssuai tuu lako taun-Ta' male lako padanna rupa tau. 19 Mangkamo kuturu' to kadan-Ta' angkumpangben kale-Ku' susi karoba, anna pumeloi tuu lako taun-Ta'. Kupugaukki susi joo dikua anna ia tuu lako taun-Ta' nturu' toda kadan-Ta' na mpangben toda kalena lako kale-Ta' namenjaji tau mesan-Ta'. 20 Te'da na ia manda tee taun-Ta' kupassambajangan, apa kupassambajangan too to la matappa' lako Aku', ke napangpeissenanmi tuu lako taun-Ta' to Kareba Kasalamatan. 21 Oo Ambe', meta'dana' ke wa'dingngi anna memmesa' sola ngasanni susi Ambe' na Aku' memmesa', na Aku' memmesa' sola Ambe'. Dennaa upa' namemmesa' sola Ambe', anna matappa' to sininna tolino kumua Ambe' to ssuana'. 22 Mangkamo kuben kamala'biran to tabenna', anna memmesa' sola ngasan susi Ambe' na Aku' memmesa'. 23 Memmesa'mo' sola tuu lako taun-Ta', na Ambe' memmesa' sola Aku', anna mattongan-tongan memmesa'mo sola ngasan. Ia ke susii joo na la naissen tolino kumua tasuana', na issen tooi kumua tapakamoja'i tuu lako taun-Ta' susi Aku' tapakamoja'. 24 Oo Ambe', meta'dana' na ia tuu lako taun-Ta' to tabenna' la torro jio to kunii, anna kitai to kamala'biran-Ku'. Tabenmo' joo kamala'biran tonna te'dapa nadipaden tee lino, nasaba' tapakamoja'na'. 25 Oo Ambe' maruruh! Te'da naissenki' tolino, apa Aku' kuissenki', na naissen ngasan taun-Ta', kumua tasuana'. 26 Kupangpeissenanmiki' lako tuu lako taun-Ta', na la kupugauk tarruh susi joo, dikua naperasai to pangpakamoja'-Ta' lako Aku', susi Aku' mperasaii, angkumemmesa' sola tuu lako taun-Ta'."

Yahya 18

1 Ia tonna mangkamo Puang Isa massambajang susi joo, lambanmi lian sambali'na Sa'dan Kidron sola anak gurun-Na. Den bara'bah ntuu jio nanii mentama sola ngasan. 2 Ia to Yudas, to la mpangpejokkoanni, naissen too joo bara'bah, nasaba' tuli sirempun Puang Isa sola anak gurun-Na jio. 3 Iamo joo, namale Yudas lako ntuu jio ssolan surudadu to-Roma sola ba'tu pira-pira pangjagana Bola Puang Allataala, to nasua kapala imang na to-Farisi. Mbawai pangbuno sola palita na sulo. 4 Naissen ngasan Puang Isa to apa la jaji lako kale-Na. Jaji malemi ngkandoppi'i tuu lako tau, namekutana nakua, "Indara miangah?" 5 Mebalimi tuu lako tau nakua, "Puang Isa to-Nazaret." Nakua Puang Isa, "Aku'mo tee." Ia to Yudas to mpangpejokkoanni ke'dehhi jio sola tuu lako tau. 6 Ia tonna mebali Puang Isa nakua, "Aku'mo tee." sorong boko' ngasanni nasisongkan do' litak. 7 Nakutanai pole'i Puang Isa nakua, "Indara miangah?" Mebalii nakua, "Puang Isa to-Nazaret." 8 Nakua Puang Isa, "Mangkamo kukua, Aku'mo tee. Ia ke Aku' to miangah, eloranni tee mai tau laen namale ia." 9 Mangkada susii joo, najaji to mangka napau jolomo nakua, "Oo Ambe' ia to tonabenna' Ambe', moi mesa' te'da namasolang." 10 Ia to Simon Petrus mbawa pa'dang, ta'pa nanonokki, napa'dangngii to kaunanna Imang Lompo, nata'tak to talinga kananna. Ia joo kaunan disanga Malkus. 11 Nakua Puang Isa ngkuanni to Petrus, "Pasibanuai tuu pa'dangmu! Nang la kuolanna tee kamaparrisan to napasadianmo' Ambe'." 12 Ia to surudadu Roma sola kamandangna na pangjaga to-Yahudi njokko Puang Isa napumpungngi. 13 Napangngoloi to Puang Isa jolo' lako Hanas, ambe' matuanna Kayafas. Na ia to Kayafas iamo Imang Lompo joo taun. 14 Iamo to mangka mpangngingaranni to pekaamberan to-Yahudi kumua, "La'bi melo ke mesa' tau mate ssullei to sininna bangsa." 15 Simon Petrus sola mesa' anak guru laen mpeundii Puang Isa. Ia joo solana Petrus naissen Imang Lompo. Iamo joo nawa'ding mentama rante bolana Imang Lompo sola Puang Isa, 16 apa ia to Petrus mangtajanni jio salean jio babangan. Na ia joo solana to naissen Imang Lompo, messun pole'i lan mai, nasipangkada to baine kaunan pangjaga babangan, namane' ssolanni to Petrus mentama. 17 Nakua joo baine kaunan pangjaga babangan lako Petrus, "Ee, tangngiko todaraka sala mesa'na anak gurun-Na joo tau?" Mebalii Petrus nakua, "Tangngiana'." 18 Macakke'mi joo wattu. Iamo joo, na ia to kaunan sola pangjaga mpadukku lalotin api dipendarang. Male todai Petrus lako ntuu jio, nake'deh mendarang sola tuu lako tau. 19 Mekutanai to Imang Lompo lako Puang Isa, mpekutananni to pangngajaran-Na sola anak gurun-Na. 20 Mebalimi Puang Isa nakua, "Tuli mangcurita maruruh bangna' jio olona tobuda. Tuli mangngajahhina' jio bola passambajangan sola jio Bola Puang Allataala to biasa nanii buda to-Yahudi sirempun. Te'dapa naden apa kupau membuni. 21 Na matumbai takutanaina'? Kutanai bangmi tuu mati' tau to mangka ssa'dingna' mangngajahhi. Nang la naissen ia to apa kupau." 22 Ia tonna mangkada Puang Isa susi joo, denmi mesa' pangjaga jio ntampelengngi, nakua ngkuan Puang Isa, "Liwa' baranimmu mangkada susi tuu lako Imang Lompo!" 23 Mebalimi Puang Isa nakua, "Ia ke denni sala to kupau, pauanna' umbonnara to sala. Apa ia ke tonganni to kupau, ciapari mutampelengna'?" 24 Napangpesuanni Hanas anna ia to Puang Isa to dipumpung unapa dipangngolo lako Kayafas to Imang Lompo joo taun. 25 Ke'deh unapi Simon Petrus mendarang ntuu jio, na den ba'tu pira-pira tau ngkuanni, "Ee, tangngiko todaraka sala mesa'na anak gurun-Na joo tau?" Apa messakkanni Petrus nakua, "Tangngia aku'!" 26 Den mesa' kaunanna Imang Lompo, sirapu to kaunan napa'dangngi Petrus talinganna, mangkada nakua, "Tangngikoraka to kukita nasolan lan joo bara'bah?" 27 Anna pessakkanni omi Petrus nakua, "Tangngia aku'!" Siampa' melo bang joo wattu, nata'pa kekkua to manuk. 28 Melambi' unapa nasolanni to Puang Isa jio mai bolana Imang Lompo Kayafas, male lako salassa' gubernur to dinii mangra'tah kara-kara. Apa te'da namentama salassa' gubernur to pekaamberan to-Yahudi, dikua danggi' nacarepa situru' atoran agama, nawa'ding kumande kande Paskah. 29 Iamo joo namale Gubernur Pilatus lako salean ngkutanaii nakua, "Apara miparapasanni tee tau?" 30 Mebalimi tuu lako tau nakua, "Ia ke la tangngia togaja', te'da kipangngoloi lako gubernur." 31 Nakua Gubernur Pilatus ngkuanni, "Alai mati' na kamu' rra'tahhi situru' ada'mi!" Apa nakua to to-Yahudi mebali, "Te'da kiwa'ding mbuno tau." 32 (Susimi ia joo anna jaji to kadan-Na Puang Isa mpaui to carana la mate.) 33 Mentama pole'mi salassa' Gubernur Pilatus natambai to Puang Isa, nakutanaii nakua, "Tongannaraka, Ikomo raja-Na to-Yahudi?" 34 Napebalimi nakua, "Ia tuu pekutananta', pekutananta' unaraka, ba'tu denmoraka tau ncuritana' lako kita'?" 35 Mebalimi Gubernur Pilatus nakua, "Oo to-Yahudira'ka? Bangsamu una sola kapala imang ratu ssolanko mangngolo lako aku'. Apara to mangka mupugauk?" 36 Mebalimi Puang Isa nakua, "Ia to kaparentan-Ku' te'da napole lan mai lino. Ia ke la pole lanni mai lino, nalamangngewa to taung-Ku', anna danggi' kudipangngolo lako pekaamberan to-Yahudi. Apa te'da meman napole lan mai lino to kaparentan-Ku'." 37 Mekutana omi Gubernur Pilatus lako Puang Isa nakua, "Ia ke susii joo, Rajarokoka?" Mebalii Puang Isa nakua, "Susi tuu tapaunna kumua Rajana'. Dijajianna' kumentama lino mesa'ra akkatta-Ku', iamo to la mpamanassa katonganan. Ia to topole jio mai katonganan, napesa'dingngina'." 38 Mekutana pole'i Gubernur Pilatus nakua, "Apara joo musanga katonganan?" Mangkai joo messun pole' omi Gubernur Pilatus, namangkada lako to-Yahudi nakua, "Moi mesa' kasalan-Na te'da kuampa'. 39 Apa situru' kabiasanmi, tuli lla'paranna' mesa' toditarungku ke pangramean Paskah. Mikadoangngimoraka ke Ia tee Raja to-Yahudi kula'paran?" 40 Mebalii siarrakan nakua, "Cia'kan. Danggi' na Ia, apa Barabasmo!" (Parampo' joo Barabas.)

Yahya 19

1 Mangkai joo nasuami Gubernur Pilatus to surudadu rrambii to Puang Isa. 2 Ia to surudadu mpasongko'i mahkota, to ringe keduri dikabua'. Mangkai joo, napapakeimi baju lando makudara', 3 namempole-pole lako olo-Na ncapa'-capa'i nakua, "Salama' Raja to-Yahudi", namane' ntampelengngi. 4 Mangkai joo, messun unapi Gubernur Pilatus namangkada lako tobuda nakua, "Kitai! La kupangngoloi lako kamu', ammiissenni kumua moi mesa' kasalan-Na te'da kuampa'." 5 Messunmi Puang Isa mpake mahkota duri sola baju malando makudara'. Nakua Gubernur Pilatus ngkuan tobuda, "Kitari tuu tau!" 6 Simetamba-tambanni to kapala imang sola to pangjagana Bola Puang Allataala tonna kitami to Puang Isa nakua, "Pampangngi! Pampangngi!" Nakua Gubernur Pilatus, "Alami mipampangngi, sanga te'da lalo kasalan-Na kuampa'." 7 Nakua to to-Yahudi mebali, "Situru' atoranki', la dibuno Ia, nasaba' ssanga kalena Anak Allataala." 8 Mandongmi malaja' Gubernur Pilatus tonna sa'dingngi to tobuda mangkada susi joo. 9 Mentama pole'mi bola pangra'tasan kara-kara, nadisolan Puang Isa tama, nakutanai pole'i nakua, "Topole umboroko?" Apa cia'i Puang Isa mbalii. 10 Iamo joo nakua Gubernur Pilatus, "Cia'rokoka ssipangkadanna'? La muissen kumua, kuasana' lla'paranko, kuasa toona' mpampangko!" 11 Mebalii Puang Isa nakua, "Ianna te'da nabenki' Puang Allataala joo kuasa, te'da lalo takullei ngkuasaina'. Iamo joo, na ia to tompangpejokkoanna', la'bi matonggo ia dosana na kita'." 12 Ia tonna sa'dingngi Gubernur Pilatus joo, nnangahmi lalan la lla'paran Puang Isa. Apa simetamba-tambanni to to-Yahudi nakua, "Ia ke tala'paranni, tangngiaki' soba'na Tomaraja Roma! Ia to tossanga kalena raja, iamo tonnewa Tomaraja!" 13 Ia tonna sa'dingngi Gubernur Pilatus joo kadanna, messunmi ssolanni to Puang Isa, namane' cumadokko jao cadokkoan pangra'tasan, jio ngenan disanga Sali Batu. (Lan basa Ibrani disanga Gabata.) 14 Cingga'tu'mora natatte' sangpulo dua tangnga allo joo wattu. Masawannapi nadete'i pangramean Paskah. Nakua Gubernur Pilatus ngkuanni to to-Yahudi, "Inde'mi Rajami." 15 Simetamba-tambanni nakua, "Bunoi, bunoi, pampangngi!" Nakutanaii Gubernur Pilatus nakua, "Madoangra kamu'ka ke aku' mpangpepampangan Rajami?" Mebalimi to kapala imang nakua, "Mesa-mesanna Tomaraja Roma rajaki'!" 16 Katampakanna napangbenmi Gubernur Pilatus to Puang Isa lako tuu lako tau anna pampangngi. Mangkai joo, malemi nasolan tuu lako tau to Puang Isa. 17 Na mpassan kaju sitamben-Na to Puang Isa, male lako buntu-buntu disanga 'Ulu Tau'. (Lan basa Ibrani disanga Golgota.) 18 Ntuumo jio dinii mpampangngi. Den toda dua tolaen nasolan Puang Isa dipampang, mesa' jio sa'de kairin-Na, na mesa' jio sa'de kanan-Na, na Puang Isa lan tangngana. 19 Mangkami massua Gubernur Pilatus nadipale'ke' tee pangnguki' jao kaju sitamben-Na Puang Isa: "Isa to-Nazaret, Raja to-Yahudi." 20 Buda to-Yahudi mbacai joo pangnguki', nasaba' te'da namambela jio mai kota to dinii mpampangngi. Ia joo pangnguki' diuki' lan basa Ibrani, basa Latin na basa Yunani. 21 Nakua to kapala imang ngkuan Gubernur Pilatus, "Danggi' tauki' 'Raja to-Yahudi', apa tauki'i, 'Nakua tee tau, Aku' Raja to-Yahudi.' " 22 Apa mebalii Gubernur Pilatus nakua, "Ia to mangka kuuki', te'damo nawa'ding disullei." 23 Ia tonna mangkamo napampang surudadu to Puang Isa, naalami to pakean-Na, natawa a'pa'i, sangtawa a'pa'na mesa' tau mputawai. Naala tooi to baju lando-Na. Ia joo baju te'da jai'na, mesa'ra tannun jao mai, sangkalae ratu do'. 24 Sipangkada-kadai joo surudadu nakua, "Danggi'mo talontok-lontokki tee baju. Taloterei bangmi, mpattantui kumua indannariki' nnampa'i." Susimi tee najaji to diuki' lan Sura' Allataala kumua, "Natawa-tawai to pakean-Ku', Naloterei tooi to baju lando-Ku'." Napugauk tongan joo surudadu susi joo. 25 Jio siandah kaju sitamben-Na Puang Isa, ke'dehhi indo-Na Puang Isa sola indoure-Na Puang Isa, na Maryam balinna Klopas sola Maryam Magdalena. 26 Ia tonna kitai Puang Isa to indo-Na ke'deh jio sola to anak gurun-Na napakamoja', mangkadami lako indo-Na nakua, "Oo indo', iamo tuu anakkami." 27 Namane' ngkuanni joo anak gurun-Na napakamoja', "Iamo tuu indomu." Mammula joo wattu natarimami to indo-Na Puang Isa, natorro jiomo bolana. 28 Ia tonna issenmi Puang Isa kumua mangka ngasanmi najama to nasuanni Ambe', mangkadami nakua, "Mawakkena'" anna jaji to diuki' lan Sura' Allataala. 29 Den busu jio ponno anggoro' macukka. Den tau ncummui to baraba batu tama joo anggoro', napalakoi cappa' sangtangke hisop, naulohhi lako timun-Na Puang Isa. 30 Nacuccu'i Puang Isa joo anggoro', namane' mangkada nakua, "Mangkami!" Namane' cukku, naka'tu sunga'-Na. 31 Ia tonna dipampang to Puang Isa, sangngallomora na Allo Katorroan. Cia'i to pekaamberan to-Yahudi, ke mendoke' unapi jao kaju sitamben to batang rabukkuna to todipampang nadete'i Allo Katorroan. Apa pole' opi na ia joo Allo Katorroan la'bi parallu na ia to Allo Katorroan laen. Iamo joo namale to to-Yahudi lako Gubernur Pilatus meta'da nadile'toan ajena to todipampang, namane' dipupellao to batang rabukkuna jao mai kaju sitamben. 32 Iamo joo namale to surudadu lle'toan jolo ajena joo dua tau to dipampang sola Puang Isa. 33 Ia tonna dete'i lako to Puang Isa, nakitai matemi, te'damo nale'toanni to aje-Na. 34 Apa mesa' to surudadu ntossokki doke to sa'de-Na, nata'pa messun to rara sola wai. 35 Ia to tongkitai joo apa jaji, iamo ncuritai, ammimatappa' toda. Na tongan joo kadanna, na naissen kumua tongan to napau. 36 Susimi joo najaji to diuki' lan Sura' Allataala kumua, "Moi mesa' bukun-Na te'da nadile'toan." 37 Den too diuki' lan Sura' Allataala kumua, "Nakitai to tomangka natossok." 38 Mangkai joo, ia to Yusuf to-Arimatea meta'da lako Gubernur Pilatus, naalai to batang rabukku-Na Puang Isa. (Ia tee Yusuf tonturu'mo Puang Isa, apa membuni-buni bangri, sanga malaja'i lako pekaamberan to-Yahudi.) Naeloranni Gubernur Pilatus, jaji malemi Yusuf nnalai joo batang rabukku-Na Puang Isa. 39 Ia to Nikodemus to denmo naratu bongi lako Puang Isa tonna tee, male todai sola Yusuf. Nabawai Nikodemus to minynya'-minynya' busarungngu', iamo to mur dipasirau gaharu, agi-agi tallung pulo kilo banda'na. 40 Malemi sola dua nnalai joo batang rabukku-Na Puang Isa, nabalunni kaen lenan, naguguhhii joo minynya'-minynya' busarungngu' situru' ada'na to-Yahudi. 41 Den sanglimbo bara'bah jio to dinii mpampang Puang Isa. Na den liang baru lan ntuu joo bara'bah, to te'da bangpa nadipatamai tomate. 42 Napatama jiomi ntuu joo liang to batang rabukku-Na Puang Isa, sanga mandoppi'i, na cingga'tu'mora na Allo Katorroan.

Yahya 20

1 Ia tonna marimu-rimu unapa joo allo Aha', malemi Maryam Magdalena lako liang-Na Puang Isa. Nakitami to batu petungu' liang tigesu'mo jio mai ba'ba liang. 2 Ta'pa kinjara'mi male nnangah Simon Petrus sola to anak gurun-Na to napakamoja' Puang Isa, napauanni kumua, "Mangkai naala tau to Puang lan mai liang, na te'da kiissenni umbo napanii." 3 Malemi Simon Petrus lako liang sola joo anak guru laen. 4 Sikinjarasan bangmi sola dua, apa dicau' malassii Petrus kinjara' anna la'bi madoi' ia ratu lako liang joo solana. 5 Cukkumi mangpenunu tama liang, nakitai to pebalun lan, apa te'da natarruh tama. 6 Undi ia to Simon Petrus ratu, anna tarruh mentama ntuu joo liang. Nakitai to kaen pebalun torro melo bangmo jio, 7 apa ia to kaen peputu' ulun-Na Puang Isa torro leko'mi tilulun unapa. 8 Ia to anak guru laen, to jolo ratu, mentama todai ngkitai, namatappa'. 9 (Ratu lako joo wattu, te'dapa napahangngi to apa diuki' lan Sura' Allataala kumua, "La tuo pole'i jio mai kamatean.") 10 Mangkai joo, polemi sola dua lako to nanii torro. 11 Ke'dehhi Maryam Magdalena jio ba'ba liang, nakumillak. Ia tonna kumillak, mellingi'i tama liang, 12 nakitai den dua malaeka' mangpakean mabusa cumadokko jio to mangka dinii mbujuh batang rabukku-Na Puang Isa. Mesa' jio ngenan ulun-Na na mesa' jio ngenan aje-Na. 13 Mekutanai joo malaeka' nakua, "Oo indo', ciapari mikumillak?" Mebalii Maryam Magdalena nakua, "Mangkai naala tau to Puangku', na te'da kuissenni umbo napanii." 14 Ia tonna mangkamo mangkada susi joo, messailemi lako boko'na nakitai to Puang Isa ke'deh jio. Apa te'da naissenni kumua Puang Isa joo. 15 Mekutanai Puang Isa ngkutanaii, "Ee baine, ciapari mukumillak? Indara muangah?" Nasangai Maryam to pangbara'bah, iamo joo nakuanni, "Oo ambe', ia ke kita' mpalelei, tulungna' tapauanna' umbo tapanii, kumale nnalai." 16 Mangkadai Puang Isa nakua, "Oo Maryam!" Messaile Maryam lako Puang Isa, namangkada lan basa Ibrani nakua, "Rabuni" (battuananna guru). 17 Nakua Puang Isa ngkuanni, "Danggi' kaka'na', nasaba' te'dapa kumale de' Ambe'. Apa malemoko lako sile'to-Ku', mupauanni kumua la polemo' de' Ambe'-Ku', na Ambe'na too, Puang-Ku' na Puangna." 18 Ta'pa malemi Maryam mpauanni to anak gurun-Na Puang Isa nakua, "Mangkamo' ngkita Puang." Nacuritanni to apa mangka napauanni Puang Isa. 19 Ia tonna bongimo, allo Aha' ia bang unamo joo, nasirempun to anak gurun-Na Puang Isa lan bola dilacak, nasaba' malaja'i lako pekaamberan to-Yahudi. Ta'pa ratui Puang Isa ke'deh lan tangnga-tangngana, namangkada nakua, "Salama' kamu', mimasannang!" 20 Ia tonna mangka mangkada susi joo, mpangpekitanmi liman-Na sola sa'de-Na. Gaja sannangngi sola ngasan ngkita Puang. 21 Nadadu' pole'i Puang Isa mangkada nakua, "Salama' kamu', mimasannang. Susi Ambe' ssuana', susi toomi Aku' ssua kamu'." 22 Namane' mpupessue penawan-Na lako anak gurun-Na nakua, "Tarimai to Roh Allataala. 23 Ia ke midampanganni to tau, nadampangan todai Puang Allataala. Na ia ke te'da midampanganni, te'da toda nadampanganni Puang Allataala." 24 Den mesa' anak gurun-Na Puang Isa disanga Tomas (to disanga too Rendu). Te'da na jio sola solana, tonna ratu Puang Isa mpangpekitan kalena. 25 Nakua solana ngkuanni, "Mangkamokan ngkita Puang!" Apa mebalii nakua, "Ianna te'dapa kukitai na te'da toopa kukaka'i to lalan paku jio liman-Na na te'dapa kukaka'i to lalan doke jio sa'de-Na, te'dapa kumatappa'." 26 Sangminggu mangkanna joo, sirempun pole' omi to anak gurun-Na ntuu joo bola, najio todai Tomas. Dilacak ngasanni to ba'ba, apa ta'pa ratui Puang Isa, nake'deh lan tangnga-tangngana. Namangkada nakua, "Salama' kamu', mimasannang." 27 Namane' ngkuanni to Tomas, "Kitai limang-Ku'! Panteei tuu jarimmu, muulohhi tuu limammu, mukaka'i tee sa'de-Ku'. Danggi' mubata unapa, apa matappa'moko!" 28 Nakua Tomas lako Puang Isa, "Oo Puangku'! Oo Puang Allataala to kusompa!" 29 Apa nakua Puang Isa ngkuanni, "Matappa'moko tee too, nasaba' mukitamo'. Masannang to tomatappa', moi te'da nakitana'!" 30 Budapa tanda mejangngaran laen to napugauk Puang Isa jio olona anak gurun-Na, apa te'da nadiuki' lan tee sura'. 31 Ia ngasan tee diuki', ammimatappa' kumua Raja Mangpasalama' na Anak Allataala to Puang Isa, ammiampa' katuoan melo te'da cappa'na, sanga matappa' kamu'.

Yahya 21

1 Mangkai joo mpangpekitan pole' omi kalena Puang Isa lako anak gurun-Na jio randan Tasik Tiberias. Susi tee jajinna: 2 Den sangbongi nasirempun to Simon Petrus, Tomas (to disanga too Rendu), Natanael to-Kana jio tana Galilea, anakkana Zebedeus, na denpa dua anak gurun-Na laen. 3 Nakua Simon Petrus lako solana, "La malena' mebale." Nakua toda to solana, "La male todakan." Male ngasanmi manglopi, apa siupuh bongi te'da bang apa naampa'. 4 Ia tonna mane' ollong allo, ke'dehmi Puang Isa jio randan tasik, apa te'da naissenni anak gurun-Na kumua Puang Isa joo. 5 Nakua Puang Isa ngkuanni, "Oo pea, denraka balemi?" Mebalii nakua, "Te'da Kita'!" 6 Nakua omo Puang Isa ngkuanni, "Pembuangan lakoi sa'de kananna lopi tuu jalami, ammiwa'ding nnampa' bale." Napembuanganmi joo jalana, na tangnakullemi rrui' pole'i, sanga liwa' buda bale lan. 7 Ia to anak guru napakamoja' Puang Isa ngkuan Petrus, "Puang joo!" Ia tonna sa'dingngi Simon Petrus, ta'pa mpakei bajunna sanga te'da namebaju, namella'bu do' tasik. 8 Ia to anak gurun-Na pira' undimi manglopi lako gantanan, narui' bangngi joo jalana ponno bale, nasaba' te'da namambela jio mai gantanan, denra agi-agi saratuh metere'. 9 Ia tonna ratumo lako gantanan, nakitai denmo kuaro jio nanii ntunu bale sola roti. 10 Nakua Puang Isa ngkuanni to anak gurun-Na, "Bawai kee mai pira' tuu bale mane' miala." 11 Endekki de' lopi Simon Petrus, narui'i joo jala lako gantanan. Ponno bale joo jala, na simatonggo, den saratuh limang pulo tallu. Apa moi nabuda susi joo, te'da naca'ce to jalana. 12 Nakua Puang Isa ngkuanni to anak gurun-Na, "Takumandemo!" Te'da bangngi moi mesa' barani mekutana kumua, "Indariki'?" sanga naissenmi kumua Puang Ia. 13 Namane' ngkandoppi'i Puang Isa to anak gurun-Na, naalai to roti, natawa-tawanni. Napasusi tooi joo bale. 14 Iamo tee mangpentallunna Puang Isa mpangpekitan kalena lako anak gurun-Na mangkanna tuo pole' jio mai kamatean. 15 Ia tonna mangkamo kumande, nakuamo Puang Isa ngkuan Simon Petrus, "Simon anakkana Yona, la'bi mupakamoja'ra'ka na ia tee mai tau to mpakamoja' todana'?" Mebalii Petrus nakua, "Ie', Puang. Taissen kumua kupakamoja'ki'." Nakua Puang Isa ngkuanni, "Rewai to anak bembala'-Ku'." 16 Mangpenduanna Puang Isa ngkutanaii nakua, "Simon anakkana Yona, mupakamoja'ra'ka?" Mebalii Petrus nakua, "Ie', Puang. Taissen kumua kupakamoja'ki'." Nakua Puang Isa ngkuanni, "Rewai to bembala'-Ku'." 17 Mangpentallunna Puang Isa ngkutanaii nakua, "Simon anakkana Yona, mupakamoja'ra'ka?" Memmassei penawanna Petrus, nasaba' pentallunmi nakutanai Puang Isa. Mebali omi Petrus nakua, "Oo Puang. Kita' nnissenni to sininna apa. Taissen kumua kupakamoja'ki'!" Nakua Puang Isa ngkuanni, "Rewai to bembala'-Ku'. 18 La muingaran tee kadang-Ku' kumua, ia ke malolle' unapoko, messa'wakko mumale umbo-umbo mukadoangngi. Apa ia ke matuamoko, la mpangbenko limammu, napumpungngi tau laen, nasolanko male lako to tangmukabudainna." 19 Mangkadai susii joo Puang Isa mpangpeissenanni umbo nakua carana to kamateanna Petrus anna pumala'bihhi Puang Allataala. Mangkai joo, nakuamo Puang Isa ngkuan Petrus, "Undiko nturu'na'!" 20 Ia tonna messaile Petrus lako boko'na, nakitai jio to solana anak guru to napakamoja' Puang Isa. Iamo to cumadokko ngkandoppi' Puang Isa tonna kumande, namekutana kumua, "Oo Puang, indara ia to la mpangpejokkoanki'?" 21 Nakitai Petrus namekutana lako Puang Isa nakua, "Oo Puang, la matumba ia tee solaku'?" 22 Mebalimi Puang Isa nakua, "Ia ke la madoangna', moi ia tuopa kuratu pole' keanu', tangngia iko issenmu. Apa ia to iko, undiko nturu'na'!" 23 Lelemi to kareba lan tangnga-tangngana anak gurun-Na kumua ia joo anak gurun-Na napakamoja' te'damo ia nalamate. Na te'da ia nakumua susi joo Puang Isa, apa nakuara, "Ia ke la madoangna', na moi ia tuopa kuratu pole' keanu', tangngia iko issenmu." 24 Iamo tee to anak gurun-Na mpangpeissenanni to sininna tee kajajian, na ia toomo mangka nnuki'i. Na taissen kumua tongan ngasan to apa napau. 25 Budapa laenna to napugauk Puang Isa. Na ia ke la diuki' simesa'-mesa'i, kusanga ia to sura' dinii nnuki'i te'da nalasiagi tee lino.

Jamanna Rasulu' 1

1 Ee, tokupusile'to Teofilus! Mangkamo kupamanassa lan sura' joloku' sininna to napugauk na napangpangngajaran too Puang Isa mellao jio mai mammulanna mangjama, 2 ratu lako kadiangkasanna de' suruga. Ia tonna tuo pole'mo jio mai kamatean, patang pulopa allona nanii pempiran-piran mpangpekitan kalena lako rasulu', na budapa to tanda mpamanassai kumua tuo pole' tonganmi. Ia joo wattu pangpatujun-Na Roh Allataala anna ajahhii to rasulu' mangka napilei. Naajahhi matumbai to akkatta-Na Puang Allataala la mpasalama' na mparenta taun-Na susi Raja. 4 Ia tonna kumande sola rasulu'-Na, nakuanni susi tee, "Danggi' misalai kota Yerusalem! Mangtajan bang kamu' inde' jolo' sanggenna naben kamu' Ambe' to apa pura nabasse, susi to kupauan kamu'. 5 Ianna Nabi Yahya mangjio' wai, apa ianna kamu', ba'tu pirang-pirang allomora midijio' Roh Allataala." 6 Ia tonna sola unapa nakutanaii rasulu', nakua, "Oo Puang, iamoraka tee wattu tanii menjaji raja nnendekan pole'i to kaparentanna Israel?" 7 Napebalii Puang Isa nakua, "Ambe' Ia to mpattantui to wattunna na allona. Te'da naparallu miissen joo, sanga Ambe' Ia mpuissenni. 8 Apa la diben kamu' kuasa ke diparatuimo kamu' Roh Allataala, ammilampangpeissenanna' la jio kota Yerusalem, la lan lili'na tana Yudea na Samaria, ratu lako randan langi'." 9 Ia tonna mangkamo mpaui joo, tiangka'mi de' suruga nakita rasulu', nabombonni saleu' na te'damo nakitai. 10 Ia tonna da'tanpa mentingngara de' langi', tonna dipaendek Puang Isa de', tangdikalannai naden dua tau ke'deh jio sa'dena mangpakean mabuccang, 11 nakuanni, "Ee, kamu' to-Galilea, mangngapa kamu' sijenjenan bang ntuu mentingngara de' langi'? Ia to Puang Isa mikita tiangka' lan mai tangnga-tangngami de' suruga, la ratu unapa susi bang una to mikita nena'." 12 Ia tonna mangkamo joo, polemi to rasulu' jao mai Buntu Zaitun de' kota Yerusalem. Ia joo buntu agi-agi mesa' kilo belana jio mai kota Yerusalem. 13 Ia tonna mentamamo kota, endekmi de' kamara' jaonan to nanii torro unamo Petrus sola Yahya, Yakub sola Andreas, Filipus sola Tomas, Bartolomeus sola Matius, Yakub anakkana Alfeus, Simon tobarani sola Yudas anakkana Yakub. 14 Sangnginawa bangngi sola ngasan sirempun massambajang sola ba'tu pira-pira baine na Maryam indo-Na Puang Isa na sile'to-Na. 15 Den pissen wattu, tonna sirempun agi-agi saratuh duang pulo tomatappa', ke'dehmi Petrus mangkada nakua, 16 "Ee, todipusile'to! Ia to diuki' lan Sura' Allataala, nang la jajinna ia. Ia tonna anu' Raja Daud napake Roh Allataala mpaui to Yudas to male mpangpejillokan Puang Isa na dijokko. 17 Pada dipileiki' sola Yudas tonna tee la mangjama sola." 18 (Mangkamo ia nnalli padang, mpake doi' tanghallala' jio mai panggaukan gaja'na anna tipalumbang natiba'tu to ba'tangna anna tilalu ngasan lan mai to tambukkuna. 19 Naissen ngasan to-Yerusalem joo. Iamo joo nasangaii tau lan basana, 'Akeldama', battuananna Padang Rara.) 20 Nakua Petrus, "Den diuki' lan Sura' Pangpujian kumua, 'Ma'namo namakarorrong to bolana. Moi mesa' danggi' naden tau torro lan.' Den too diuki' susi tee, 'Ma'namo nadiben tau leko' to jamanna.' 21 Iamo joo la denpi ia mesa' tau dirangngananki' menjaji sa'bi kumua tuo pole'mi to Puang Isa jio mai kamatean. Ia joo tau la dipilei jio mai to tasolanmo tontaturu' Puang Isa male lako male jio mai, mammula mangkanna najio' Nabi Yahya, ratu lako tonna tiangka' Puang Isa de' suruga lan mai tangnga-tangngata'." 23 Denmi dua tau nasitujui tosirempun, iamo to Yusuf na Matias. Ia to Yusuf disanga too Barsabas ba'tu Yustus. 24 Massambajangngi sola ngasan nakua, "Oo Puang, taissen ngasan to lan penawanna tau, pakitanmokan indannai tee tau sola dua to mangkamo tapilei, 25 la ntoe pangjaman rasulu' ssulle Yudas to mboko'i Puang Isa anna male lako to sipato'na unamo nanii." 26 Nalotereimi nakannai to Matias, nadiangka' menjaji rasulu' sola to sangpulo mesapa rasulu' laen.

Jamanna Rasulu' 2

1 Ia tonna pangramean Pentakostamo, sirempun ngasanmi to tomatappa'. 2 Ta'pa ssa'dingmi oni jao mai langi', susi oni angin bara' mangngumbuk, lumbun lan joo bola nanii sirempun. 3 Ngkitami susi api dukku mangrupa lila mangngulala' nta'pai simesa'-mesa'i. 4 Nakuasai ngasanmi Roh Allataala namangkada mpake mangrupa-rupa basa to silaen-laenan. Pada mangpaui situru' apa to napatujuanni Roh Allataala la napau. 5 Ia joo wattu budamo to-Yahudi ratu jio mai mangrupa-rupa tondok lan lili'na lino la ssompa Puang Allataala jao kota Yerusalem. 6 Ia tonna sa'dingmi joo oni, gaja buda tau ratu ntalimbungngi. Sijangngaran ngasan ssa'dingngi tuu lako tomatappa' mangkada mpake basana sola ngasanni. 7 Liwa'i takkajanna' nakua, "Oo, tangto-Galilea ngasanraka tee mangkada? 8 Matumbai ia antapada ssa'dingngi mangkada mpubasa basata', basa jio mai tondokkota', 9 kita' to-Partia, Media, Elam, Mesopotamia, Yudea na Kapadokia, to jio mai Pontus na Asia, 10 Frigia na Pamfilia, Mesir na to jio mai Libia sikandoppi'na Kirene, na denki' to ratu jio mai kota Roma. 11 Denki' to-Yahudi, na den tooki' to bangsa tangngia to-Yahudi apa mangngagama to-Yahudimiki'. Denki' to jio mai tana Kreta na den tooki' to jio mai tana Arab. Tasa'ding sola ngasan mangkada mpake basata' mpaui to apa mejangngaran napugauk Puang Allataala." 12 Sijangngaranni napussak ntangngahhi joo apa jaji, napada sikutana nakua, "Apara ia battuananna tee?" 13 Apa den too to mpelle'ri nakua, "Aa, mipesa'dingngi ori tuu mati', na tomalango nniso' anggoro'." 14 Ke'dehmi Petrus sola joo sangpulo mesa rasulu' laen, naandongngii mangkada mpangpeissenanni lako tobuda nakua, "Ee, kamu' to kupusile'to, la kamu' to-Yahudi na kamu' sola ngasan to ntorroi kota Yerusalem! Pesa'dingngi meloi tee kadangku'. 15 Te'da namalango tee tau susi to passanganmi, sanga mane' tatte' kasera tuka' allo. 16 Apa ia tee apa mikita sola misa'ding, mangkamo napau Nabi Yoel tonna anu', 17 'Nakua Puang Allataala: Sininna rupa tau la kuparatuan ngasan Roh-Ku', ke tampakkanami lino. Ia to anakkami la muane la baine la mpauan kamu' apa to mangka kupauanni. Ia to tokallolomi la ngkita apa to kupakitanni. Ia to tomatuammi la mangtindo mputindo tindo la kubenni. 18 Ia joo wattu la kuparatuanni Roh-Ku' to taung-Ku' la muane la baine la mpangpeissenanni to apa mangka kupauanni. 19 La mpadenna' buda apa mejangngaran jao langi', na apa liwa' makalaen-laen lan tee lino, susi rara, api, saleu' na rambu. 20 La memmapattang to allo, na memmalellang to bulan susi rara ke la nadete'mi allo-Na Puang, allo matonggo na mala'bih. 21 Ia joo wattu, ia to tometa'da tulung lako Puang la dipasalama'.' " 22 Mpatarruhmi kadanna Petrus nakua, "Ee, tokupusile'to to-Israel! Pesa'dingngii tee kadangku'. Ia joo Puang Isa to-Nazaret mangkamo napilei naangka'i Puang Allataala menjaji Raja Mangpasalama' lako kalemi. Manassa joo, nasaba' nabenmo kuasa mpugauk tanda mejangngaran na tanda to te'da susinna lan tangnga-tangngami susi to miissenmo kamu'. 23 Mangkamo napangben Puang Allataala lako kalemi ammipangpebunoanni lako togaja' napampangngi. Apa sitonganna ia joo situru'mo akkatta-Na Puang Allataala mellao jiona mai. 24 Apa napatuo pole'mi Puang Allataala jio mai kamatean. Nala'paranmo Puang Allataala, moi naamma'i kamatean, sanga te'da lalo nakullei to kamatean la ntaloi tarruhhi. 25 Den napau joloi Raja Daud tonna anu' to Puang Isa nakua, 'Tuli kukita lindo to Puang jio oloku', jio bang sa'deku' ssolanna', dikua anna te'da kutiapa-apa. 26 Iamo joo gaja sannang penawangku', angkumakkelong mpukelong pangpujian, anna ia tee batang kaleku', parannu mangtajan lan lamunan. 27 Nasaba' te'da taeloranna' torro lan lino tomate, na te'da too taeloran batang kaleku' la buruk lan lamunan, sanga Aku'mo kaunan-Ta' to mangka tapilei. 28 Mangkamo' tapakitan to lalan mangnguju lako katuoan tongan. Liwa'na' mario nasaba' da'tanna' taampai.' " 29 Mpatarruhpa kadanna Petrus nakua, "Ee, todipusile'to, baranina' mpau maruruh bangngi lako kamu' to Raja Daud tojolota', kumua mangkami mate na mangka toomi dilamun. Den unapa to lamunanna takita ratu lako too allo. 30 Apa naissenmo, sanga mesa'i nabi, to apa la jaji keanu'. Na mangkamo nabasse Puang Allataala kumua, 'La kuangka'i to bati'mu menjaji raja ssulleko.' 31 Iamo joo napau joloi Raja Daud kumua ia to Raja Mangpasalama' la tuo pole'. Nakua, 'Te'da nadieloran torro lan lino tomate, na te'da too nalaburuk to batang kale-Na lan lamunan.' 32 Ia joo Puang Isa iamora napatuo pole' Puang Allataala jio mai kamatean. Na iamora joo to mangka kikita kipangpeissenanni sola ngasan. 33 Ia tonna pamatandei Puang Allataala napajioi sa'de kanan-Na, nabenni Roh Allataala to Puang Isa susi to dipau jolo, na Iamo mparatuankan joo Roh, susi tee misa'ding sola mikita too. 34 Te'da ia na Raja Daud to mende' suruga, apa nakuara ia mangkada: Nakua Puang Allataala mangkada lako Puangku', 'Cumadokkoko ntee sa'de kanan-Ku', 35 angkupupentalo ngasanni to ewalim-Mu mukuasaii.' " 36 Mpatarruh omi kadanna Petrus nakua, "Iamo joo naparallu kamu' to-Israel nnissen tonganni kumua ia to Puang Isa mangka mipampang, Iamo napilei Puang Allataala menjaji Puang na menjaji too Raja Mangpasalama'." 37 Masussami penawanna to tobuda tonna sa'dingngi, anna kutanaii to Petrus sola to rasulu' laenna nakua, "Ee, todipusile'to, ianna susi joo naapamo la kipugauk?" 38 Napebalii Petrus nakua, "Mengkatoba' kamu' jio mai dosami, ammipada mpangben kalemi dijio' mpau sangan-Na Puang Isa Almaseh anna dampangan kamu' Puang Allataala, naben too kamu' Roh Allataala. 39 Jajii susi joo, sanga kamu' napatujui joo basse-Na Puang Allataala sola bati'mi sola sininna to tomambela, to napilei Puang Allataala." 40 Susimi joo napamanassanni Petrus, na budapa to kada laen nanii Petrus mpangngingaranni to tobuda nakua, "Mengkatoba' kamu'! Danggi' mituru' togaja' to tuo tee wattu, dikua danggi' nakanna kamu' pangsessa jio mai Puang Allataala." 41 Buda tau ngkatappa'ii to pangngajahna Petrus anna dijio'. Kerangngan omi budanna to tomatappa' joo allo agi-agi tallung sa'bu. 42 Nalundukki tarruh melajah lako rasulu' to tau. Na tuli sirempun too kumande sola, mpugauk Kakumandean Macero na massambajang. 43 Liwa' buda tanda mejangngaran napugauk rasulu', anna jangngah to tobuda na malaja' too. 44 Sangnginawa tarruhhi sola ngasan to tomatappa', na ia to apa naampui napuapai sola ngasan. 45 Ianna den mbaluk apanna ba'tu ewananna, natawa-tawanni solana to allinna situru' kaparalluanna simesa'-mesa' tau. 46 Allo-allo tuli sangnginawa llundukki kasirempunan lan Bola Puang Allataala. Napasilele to bolana nanii sirempun mesa' penawa sipakario-rio kumande na ngkande roti mpengngingaranni kamatean-Na Puang Isa, 47 na mpakala'bih Puang Allataala. Napumasannang ngasan tau. Allo-alloi tuli napakerangnganni Puang Allataala to todipasalama'.

Jamanna Rasulu' 3

1 Den pissen wattu tonna wattu passambajanganmo tatte' tallu soloh allo, namale Petrus sola Yahya lako Bola Puang Allataala. 2 Den mesa' muane kupi' mammula jajinna, jio bang sikandoppi' babangan to disanga Babangan Ballo. Allo-allo tuli nabawa tau lako la meta'da-ta'da lako to tau mentama Bola Puang Allataala. 3 Ia tonna kitai to Petrus sola Yahya mentama Bola Puang Allataala, mengkamase-masei lako rrannuan sudakka. 4 Apa nakaje'jekki Petrus sola Yahya nakuanni, "Ee, kitakan!" 5 Nakaje'jekmi, sanga nasangai kumua la den apa nabenni. 6 Apa nakua Petrus, "Ee, mane! Te'da doi' kuampui, apa ia to kuampui la kubenko. Kupaui sangan-Na Puang Isa Almaseh to-Nazaret, 'Lumingkako!' " 7 Natoei Petrus to lima kananna napake'dehhi. Ta'pa memmawatang to ajena sola panglesoanna. 8 Ke'dehmi anna male lako male jio mai, namane' mentama rante Bola Puang Allataala sola Petrus na Yahya. Ia tonna lumingkamo mella'bu-la'bu too mpakala'bih Puang Allataala. 9 Jangngah ngasan to tau jio ngkitai lumingka sola mpakala'bih too Puang Allataala. Takkajanna'i, sanga naissen sola ngasan kumua ia joo tau to mengkamase-mase bang nabiasa cumadokko jio Babangan Ballo. 11 Meundii joo tau lako Petrus sola Yahya. Ia tonna ratu sola tallu lako rante pentionganan disanga "Rante Sulaiman", siratuan ngasanmi to tau jangngah ntalimbungngi. 12 Ia tonna kitai Petrus to tobuda nakuamo, "Ee, to-Israel, matumbari mijangngahra? Matumbari mikaje'jek tarruh bangkan? Misangaraka kumua kapakulleanki'ra ba'tu kamenturusanki' lako Puang Allataala anna wa'ding lumingka tee tau? 13 Ia to Puang Allataala nasompa tojolota' Nabi Ibrahim, Ishak na Yakub, Iamo mangka mpakala'bih Puang Isa, kaunan-Na. Iamo joo Puang Isa to mipangngolo lako tomangparenta, micia' too ntarimai tonna la lla'paranni Pilatus. 14 Moi na pesua mattantun-Na Puang Allataala to te'da nakasalan, apa cia' kamu' ntarimai ammipeta'dai lako Pilatus la la'paranni joo to mbuno tau. 15 Mangka mipangpebunoan, nasitonganna Iamo garonto'na katuoanna sininna tau. Apa napatuo pole'mi Puang Allataala jio mai kamatean, na kiissen kumua tongan joo, nasaba' kikita kami'. 16 Iamo mpalumingkai nasaba' kamatapparannamora lako Puang Isa, anna kuasan-Na mpemawatangngi pole'i to ajena tee tau miissen jolona kupi'. Ia joo kamatapparan mpamalekei jio olomi sola ngasan. 17 Ee, todipusile'to, kamu'mo sola torroan pekaamberanmi mpangpebunoan Puang Isa. Kuissen kumua ia mipugaukki susi joo, sanga te'da mipahangngi. 18 Apa moi nasusi joo, jajimi to apa pura napasan Puang Allataala to napau sininna nabin-Na tonna anu', kumua ia to Raja Mangpasalama' la gaja parri'. 19 Ee todipusile'to! Iamo joo la mpenassanni kamu' dosami mimengkatoba', mimenturu' lako Puang Allataala anna dita'dei to dosami, 20 ammiperasai kamasannangan. La nasua Puang Allataala to Puang Isa, to pura napileimo tonna anu', ratu lako kamu', menjaji Raja Mangpasalama'mi. 21 La torroi jao suruga sanggenna nabarui Puang Allataala to pangpajajinna, susi to napasan nabin-Na tonna anu'. 22 Denmo napaui Nabi Musa kumua, 'La napadenan kamu' Puang Allataala mesa' nabi susi tee aku', napilei lan mai rapummi. Pesa'dingngi to apa la napauan kamu'. 23 Ia to tau te'da napesa'dingngii to apa napau joo nabi, la disarakki jio mai umma'-Na Puang Allataala na disabu'i.' 24 Sininna nabi mellao jio mai Nabi Samuel napangpeissenan ngasanmo apa to la jaji tee too. 25 Kamu'mo bati'na joo nabi. Na ia to basse-Na, napaden Puang Allataala lako tojolomi, dipatuju lako kamu'. Ia tonna paui Puang Allataala to basse-Na lako Nabi Ibrahim, nakua kumua, 'La kubarakka'i to sininna bangsa lan tee lino, sanga bati'mu.' 26 Iamo joo napatuo pole'i Puang Allataala to Puang Isa, kaunan-Na, nasuai male lako kamu' jolo', dikua nabarakka'i kamu', napupengkatoba' kamu', ammipada mpatorroi to panggaukan gaja'mi."

Jamanna Rasulu' 4

1 Ia tonna mangkada unapa Petrus sola Yahya lako tobuda, siratuanni to imang sola kapala pangjagana Bola Puang Allataala na to-Saduki. 2 Mabirihhi lako Petrus sola Yahya, sanga ia to nnajahhii tobuda kumua, tuo pole'mi to Puang Isa jio mai kamatean. Na iamo joo mpamanassai kumua la tuo pole' to tomate. 3 Najokkoi joo rasulu' sola duai, napatamai pangtarungkuan. Dipallan bangmi sola dua ratu lako masawanna, nasaba' bongimi. 4 Apa ia to mangka mpesa'dingngi pangngajahna rasulu', budai to matappa'. Kerangngan pole'mi to tomatappa' namenjaji agi-agi limang sa'bu muane. 5 Ia tonna masawanna, sirempunmi jio kota Yerusalem to pekaamberan agama, pekaamberan to-Yahudi, na guru agama. 6 Jio tooi to Imang Lompo disanga Hanas. Na denpa Kayafas, Yahya sola Aleksander na sininna rapu laenna Imang Lompo. 7 Ia tonna dibawamo Petrus sola Yahya lako kasirempunan, nakutanaimi nakua, "Umbo mikua mpamalekei joo tokupi'? Indara kuasa, ba'tu kamawatangan pole umbora mipake mpamalekei?" 8 Kuasan-Na Roh Allataala, namebali Petrus nakua, "Ie', kita' pekaamberan agama sola pekaamberan to-Yahudi! 9 Iamo kidiparessa tee allo sanga mpugaukkan kameloan, ntulung mesa' tokupi', na madoang tooki' nnissenni umbo kikua mpamalekei joo tau. 10 Parallu taissen sola sininna to-Israel kumua ia tee tau maleke ke'deh jio olota', sanga kuasan-Na Puang Isa Almaseh to-Nazaret. Iamo to mangka tabuno tontapangpepampanganni jao kaju sitamben, apa napatuo pole'mi Puang Allataala jio mai kamatean. 11 Puang Isamo to nasanga tee aya' lan Sura' Allataala kumua, 'Ia to batu mica'bean to kamu' pande bola, menjajimo batu ariri petuo.' 12 Puang Isa mandara mpasalama' tau. Sanga sininna to narande tana nasambo langi' te'da tau laen to naben kuasa Puang Allataala la mangpasalama'." 13 Jangngah tomparessa Rasulu' Petrus sola Yahya, sanga naissen kumua tobiasa bangri na te'da too sikolana, apa matumbai nabarani mebali susi joo. Naissen kumua tonturu' Puang Isa. 14 Na te'damo apa napau, sanga jioi joo to mangka dipamaleke ke'deh jio sa'dena Petrus sola Yahya. 15 Nasuami messun lan mai bola pangra'tasan kara-kara, namane' mbicara pole'i, 16 nakua, "Apara la tagaukanni tee tau? Naissen ngasanmo to-Yerusalem kumua mejangngaran tongan ia to apa napugauk. Na tangdiissen mpessakkannii. 17 Apa dikua danggi' nasabuda-budanna tau nnissenni tee, melo ke taanggaii, anna moi mesa' tau te'da lalo nanii ncuritai joo tau disanga Puang Isa." 18 Natambai pole' omi to Petrus sola Yahya mentama, nakuanni, "Te'damo miwa'ding mpangpangngajaranni joo tau misanga Puang Isa." 19 Apa napebalii nakua, "Tapikkiri' bangmi, umbonna to nakabudai Puang Allataala, nturu'raka parentata' iarika nturu' parenta-Na. 20 Ia ke kami', te'da kilantorroii mpaui apa to mangkamo kikita sola kisa'ding." 21 Apa te'da lalan la nanii to pangbicara la ncallai to Petrus sola Yahya, nasaba' sininna tau mpakala'bih Puang Allataala sanga ia joo kajajian mejangngaran. Iamo joo naanggai bangri, namane' lla'paranni. 22 La'bimi patang pulo taunna joo todipamaleke. 23 Ia tonna dila'paranmo, male pole'mi Petrus sola Yahya lako solana, nacuritan ngasanni to pura napauanni kapala imang sola pekaamberan to-Yahudi. 24 Ia tonna mangkamo solana ssa'dingngi, mpamesa'i penawa namassambajang lako Puang Allataala nakua, "Oo Puang, kita'mo to mpaden langi', lino na tasik sola sininna issinna. 25 Pangpatujun-Na Roh Allataala namangkada kaunan-Ta' Raja Daud tojoloki' mpau kadan-Ta' kumua, 'Matumbari namabirih to bangsa tangngia to-Yahudi? Matumbari namangtangngah tangkebattuan, sininna rupa tau? 26 Sininna raja lan lino mangngatta la parari, na sininna kapala sirempun nnewa Puang Allataala sola Raja Mangpasalama' to napilei.' " 27 Mpatarruhmi kadanna nakua, "Oo Puang, tongan to kadan-Ta', nasaba' denmo nasirempun Raja Herodes na Gubernur Pontius Pilatus lan tee kota sola bangsa tangngia to-Yahudi na to-Yahudi nnewa Puang Isa kaunan-Ta'. Ia to kaunan mattantun-Ta' mangkamo taangka' menjaji Raja Mangpasalama'. 28 Mesa' penawai la mbuno Puang Isa. Apa sitonganna ia to kadibunoanna, tapattantu jolomo la jaji situru' kuasan-Ta' na pakkaeloran-Ta'. 29 Oo, Puang! Takitari, nagarra'-garra'mokan. Tatulungkan kimawatang angkibarani mpangpeissenan kadan-Ta'. 30 Papajanmi to kuasan-Ta', angkiwa'ding mpamalagah tomasaki, sola mpugauk tanda mejangngaran mpake kuasan-Na Puang Isa, kaunan mattantun-Ta'." 31 Ia tonna mangkamo massambajang, tirogemi to nanii, anna kuasai ngasanni Roh Allataala, nabarani mpangpeissenan kadan-Na Puang Allataala. 32 Ia to tomatappa' mesa' penawa bang. Moi mesa' te'da ssangai kumua ia to apa naampui, apa mesanna. Padami to apa naampui, napuapai sola ngasan. 33 Ia to rasulu', matongko ke mangkadai, mpangpeissenanni kumua tuo pole'mi to Puang Isa, nabarakka'i ngasanni Puang Allataala to tomatappa'. 34 Moi mesa' te'dai kasumpuan. Sanga ia to tonnampui padang ba'tu bola, nabalukki, na ia to allinna 35 napangbenni lako rasulu' anna tawa-tawanni ia to tomparalluii. 36 Susi toomi napugauk Yusuf to-Siprus. Mbalukki padangna, nabenni rasulu' to allinna. Ia joo Yusuf bati'na Lewi na ia to rasulu' ssanga tooi Barnabas (battuananna tomangpakatana).

Jamanna Rasulu' 5

1 Apa den mesa' muane disanga Ananias na bainena disanga Safira mbaluk toda ia padangna. 2 Sesena joo alli padangna napatorro na sesena naben rasulu'. Ia joo nasitujui sola bainena. 3 Nakuanni Petrus, "Ee, Ananias, ammueloran bang ora kalemu nakuasai Ballisi', ammuuragara Roh Allataala, ssarakan buni kalemu sesena alli padangmu? 4 Ia joo padang, apammu iko tonna te'dapa mubalukki. Na ia to allinna tommumangka mbalukki, apammu too iko. Jaji anna mase ora penawammu male manggauk susi joo? Tangngia iko tolino muuraga apa Puang Allataala Ia!" 5 Ia tonna mangka ssa'dingngi joo kada, ta'pa tipessambakmi Ananias namate. Padami to tossa'dingngi joo, memmalaja' ngasan. 6 Siratuanmi to tokallolo nabalunni to batang rabukkuna, nabullei lako salean, natarruh male llamunni. 7 Mbai tallung jang mangkanna ratumi to bainena. Te'da naissenni to apa mane' mangka jaji. 8 Nakuanni Petrus, "Pauanna' sitonganna, pada tonganmoraka tee allinna to padang mubaluk sola muanemu?" Napebalii bainena nakua, "Tongan, padamo tuu allinna." 9 Nakuanni Petrus, "Ciapari musikangkolo'ra muanemu ncoba mpamagalli Roh Allataala? Den tau ke'deh jio ba'ba mane' pole llamun muanemu na ia bang unamo la male pole' o mbulleko lako salean." 10 Ta'pa tipessambak bang unami joo bainena jio olona Petrus namate. Na ia tonna mentama to tokallolo, nakitai matemo. Nabullemi lako salean to batang rabukkuna, namane' male llamunni napasiandah muanena. 11 Gaja lanjang ngasan to tomatappa' sola to tau laen to ssa'dingngi joo. 12 Ia to rasulu' mpugauk mangrupa-rupa tanda mejangngaran lan tangnga-tangngana tobuda. Tuli mesa' penawai to tomatappa' sirempun jio rantena Sulaiman jio Bola Puang Allataala. 13 Te'da tosalean barani ratu rraui, apa gaja naangga' tobuda to tomatappa'. 14 Samasai-sainna sakerangngan-rangnganna to tomatappa' lako Puang la muane la baine. 15 Susimi joo, to tanda mejangngaran napugauk rasulu', arannai ia to tomasaki dikolong lako randan lalan nadipajao katindoan iarika ampah, dikua na moi bajo-bajona bangra Petrus ngkannai ke nnola jioi, wa'ding napumalagah tomasaki. 16 Buda tau siratuan jio mai mengguririkkina kota Yerusalem mbawa tomasaki sola to natamai setang, nadipamalagah ngasan, nadipasun too to setang jio mai kalena. 17 Katampakanna magajinawai joo Imang Lompo sola taunna, iamo to torroan to-Saduki, 18 najokkoi to rasulu', napatamai pangtarungkuan. 19 Apa ia tonna bonginna, den malaeka'-Na Puang ntimbakanni joo ba'ba pangtarungkuan, napasunni to rasulu'. Nakua joo malaeka' ngkuanni, 20 "Ee, male kamu' tama Bola Puang Allataala ammipangpeissenanni to katuoan baru lako tobuda!" 21 Naturu'i joo kadanna, na masawanna melambi' mentamami Bola Puang Allataala mangngajahhi. Ia joo wattu ia to Imang Lompo sola taunna mpangpesuanni nasirempun to Pangbicara Agama, iamo to sininna pekaamberan agama sola pekaamberan to-Israel. Napangpesuanni to rasulu' nadipasun lan mai pangtarungkuan, nadibawa ratu mangngolo. 22 Apa ia tonna ratu lako pangtarungkuan to todisua, te'damo naampa'i to rasulu' lan. Jaji polei mpaui lako to tossuai, nakua, 23 "Ia tongkiratumo lako pangtarungkuan, tikunci melo to ba'ba na jio bang unai to pangjaga mangngampa. Apa ia tongkitimbakkii to ba'ba, moi mesa' te'damo tau lan kikita." 24 Ia tonna sa'dingngi kapala pangjagana Bola Puang Allataala sola kapala imang joo kadanna, pussakmi ntangngahhi kumua ba'tu la apamo jaji lako to rasulu'. 25 Apa den mesa' tau ratu mpaui nakua, "Oo! Ia to totapatama pangtarungkuan nnajahhi tobuda lan Bola Puang Allataala tee too." 26 Ta'pa malei joo kapala pangjagana Bola Puang Allataala sola taunna njokko pole'i joo rasulu'. Apa te'damo naewa karrahhi, sanga malaja'i lako tobuda, iamo ke nasilekko'i batu. 27 Nasolanni kapala pangjaga sola taunna joo rasulu' lako kasirempunan Pangbicara Agama, naparessai Imang Lompo. 28 Nakuanni, "Ee, kusanga mangkamo kamu' kianggai kumua danggi' lalo mipangpangngajaranni to Puang Isa. Ammipugauk pole' omi joo? Kannori mipatitaleh to pangngajaranmi lan lili'na kota Yerusalem, ammilantanda omokan kumua kami' ntumangngi namate joo tau." 29 Apa napebalii Petrus sola padanna rasulu' nakua, "Kila'biran kami' nturu' Puang Allataala na ia to nturu' tolino! 30 Ia to Puang Allataala nasompa tojolota', Iamo mpatuo pole'i jio mai kamatean to Puang Isa to mangka mipangpepampangan jao kaju sitamben. 31 Napamatande napajioi sa'de kanan-Na, namenjaji Raja Mangpasalama', dikua anna den wattunna to bangsa Israel namengkatoba' jio mai dosana na didampangan. 32 Kami'mo tee to mangka ngkitai kipangpeissenanni lako kamu' sola Roh Allataala, to nasua lako to tonturu' parenta-Na." 33 Gaja pallai tuu lako Pangbicara Agama tonna sa'dingngi joo, namadoang la mbunoi to rasulu'. 34 Apa den mesa' to-Farisi Pangbicara Agama, disanga Gamaliel. Ia tee Gamaliel guru agama nakasiri' ngasan tau. Ke'dehhi ssua tau mbawai joo rasulu' lako salean jolo', 35 namane' mangkada nakua, "Ee, tokupusile'to to-Israel! Tangngah meloi apa to la mipugauk lako tee tau. 36 Nasaba' den tau tonna tee disanga Teudas, ssanga kalena iamo mattujunna, na mbai den pata ratuh tau nturu'i. Apa dibunoi, nasisarak-sarak ngasan to taunna, te'damo najaji to akkattana. 37 Mangkai joo, tonna dipugauk mbilang tau, den omi Yudas to-Galilea. Buda tau nasolan turu'i nnewa tomangparenta. Apa dibuno tooi, nasisarak-sarak too to tonturu'i. 38 Jaji, ianna aku', danggi' lalo mipatumba-tumbai tee tau, la'paran bangmi ia. Sanga ia ke ia to akkattana sola panggaukanna pole jio mai tolino, nang la mangnganggean ia. 39 Apa ia ke pole jioi mai Puang Allataala, te'da mikullei la ntaloii. Wa'ding pajan undinna kumua tonnewara kamu' Puang Allataala." Natarima tuu lako Pangbicara Agama joo pangpangngingaranna Gamaliel. 40 Napangpesuanni to rasulu' ratu, napekajui, namane' ngkuanni, "Te'damo miwa'ding mpangpangngajaranni to misanga Puang Isa." Mangkai joo dila'paranmi. 41 Masannang to rasulu' messun lan mai joo kasirempunan Pangbicara Agama, sanga narekenmo Puang Allataala sipato' dipakario-rio, nasaba' kamatapparanna lako Puang Isa. 42 Allo-allo te'da ka'tunna mangngajahhi, la lan Bola Puang Allataala, la lan bolana tau, napangpeissenanni to Kareba Kasalamatan kumua Raja Mangpasalama' to Puang Isa to pura dipau tonna anu'.

Jamanna Rasulu' 6

1 Samasai-sainna sakerangngan-rangnganna to tomatappa' lako Puang Isa. Ia joo wattu ia to to-Yahudi mangbasa Yunani mangnuku-nuku lako to-Yahudi mangbasa Yahudi unamo, nakua, "Ia to solaki' baine to te'damo muanena, te'da nadiingaran ke ditawanni kandena to tau keallo-keallo." 2 Iamo joo na ia to sangpulo dua rasulu' rrempun ngasanni to tomatappa' nakuanni, "Te'da namelo ke kitorroii mpangpeissenan kadan-Na Puang Allataala passalan la nnurusu' kande. 3 Jaji melo ke mpilei kamu' pitu tau lan mai tangnga-tangngami to todikasiri', tomelo pangtangngaranna nakuasai too Roh Allataala. Iamo la kiangka' nnurusu'i tee, 4 angkiwa'ding tongan-tongan massambajang sola mpangpeissenan kadan-Na Puang Allataala." 5 Nasitujui ngasan tomatappa' joo kadanna rasulu', napileii to Stefanus, mesa' tomatappa' tongan lako Puang Isa, nakuasai too Roh Allataala. Ia to laenna dipileii Filipus, Prokhorus, Nikanor, Timon, Parmenas na Nikolaus to-Antiokhia. Ia to Nikolaus tangngia to-Yahudi, apa mangngagama to-Yahudimo. 6 Disua ngasanni male lako rasulu', napassambajanganni, napalullungngi pala'na mbarakka'ii. 7 Susii joo laoanna nasatitaleh-talehna to kadan-Na Puang Allataala na sakerangngan-rangnganna too to tomatappa' lako Puang Isa jio kota Yerusalem. Na moi imang buda too memmatappa'. 8 Ia to Stefanus nabarakka'i Puang Allataala anna benni kuasa mpugauk tanda mejangngaran lan tangnga-tangngana tobuda. 9 Apa den duang torroan to-Yahudi nnewalii. Ia to sangtorroan, ba'tu pira-pira to-Kirene sola to-Aleksandria jio mai bola passambajangan to-Yahudi to jolona kaunan. Ia to sangtorroanpa to-Kilikia na to-Asia. Sipekkai Stefanus joo tau sola ngasan, 10 apa te'da nakullei ncau' kadai, sanga Roh Allataala mbenni kamaccan mangkada. 11 Iamo joo namale nnarak ba'tu pira-pira tau nabenni apa anna mangkada kumua, "Denmo kisa'dingngi tee tau ntampakki ropu Nabi Musa na Puang Allataala." 12 Susimi joo rrasi tobuda, pekaamberan to-Yahudi sola guru agama, namale njokkoi to Stefanus, namane' mbawai lako kasirempunan Pangbicara Agama nadipangngolo. 13 Napangngolo too to sa'bi tangtongan to mpaui kumua, "Ia tee tau tuli ncocco Bola Puang Allataala sola atoranna Nabi Musa. 14 Denmo kisa'dingngi mangkada nakua, 'Ia joo Puang Isa to-Nazaret la naro'pokan tee Bola Puang Allataala, na sininna to ada' tamanah jio mai Nabi Musa la nasullei.' " 15 Mengkita lako ngasan Stefanus sininna to tau lan joo kasirempunan Pangbicara Agama. Ia to lindona susi bang lindo malaeka' dikita.

Jamanna Rasulu' 7

1 Nakutanaii Imang Lompo to Stefanus nakua, "Tonganraka to napau tuu mati' tau?" 2 Napebalii Stefanus nakua, "Tabe' lako to tomala'bihku' sola ngasan, pekaamberan agama, pekaamberan to-Yahudi na guru agama! Tapesa'dingngi meloi! Ia tonna torro jio unapa tana Mesopotamia to tojolota' Nabi Ibrahim, te'dapa namellele lako kota Haran, ratui to mala'bih, Puang Allataala, 3 ngkuanni, 'Messarakko lan mai tondokkomu sola rapummu, mumale lako tondok to la kupakitanko.' 4 Messunmi Nabi Ibrahim lan mai tondok to-Kasdim na mellele lako kota Haran. Ia tonna mangkamo mate ambe'na, nasuami Puang Allataala mellele tama tee tondok, tee tatorroi too. 5 Ia joo wattu te'da nabenni Puang Allataala tee tondok lako Nabi Ibrahim la napumanah, moi sangjangkan te'da too nabenni. Apa napangngakui Puang Allataala kumua la naben Nabi Ibrahim napuapai ratu lako bati'na. Ia joo wattu te'dapa anakkana Nabi Ibrahim. 6 Apa nakuanmo ia Puang Allataala kumua, 'La mentoratui to bati'mu jio tondokkona tau, na la napukaunan sola nasessai pata ratuh taun masainna. 7 Apa la messunni lan mai joo tondok anna sompana' ntee, ke kusessai joo bangsa mpukaunanni.' 8 Susimi joo napangngakui Puang Allataala anna suai to Nabi Ibrahim disunna' menjaji tandana joo pangngakuan. Ia tonna jajimo to anakkana disanga Ishak, nasunna'i tonna umuru' karuamo allona. Susi toomi Ishak ssunna' anakkana to disanga Yakub, na Yakub ssunna' ngasanni to sangpulo dua anakkana, iamo tojolota' kita' bangsa Yahudi. 9 Apa masere atii to tojolota' lako mesa' sile'tona disanga Yusuf, anna balukki nadipukaunan jio tana Mesir. Apa tuli naampaii Puang Allataala, 10 anna tulungngi ke masussai. Nabenni barakka' sola kamaccan tonna mangngolo lako Firaun, Raja Mesir, anna angka'i menjaji gubernur jio, napakuasa tooi lan salassa'na. 11 Den pissen napealloan la'da' lan lili'na tana Mesir sola Kanaan anna liwa' parri' to tau, te'damo nanii nnampa' kande to tojolota'. 12 Apa ia tonna issenni Yakub kumua den gose' jio tana Mesir, nasuami male lako to anakkana, iamo tojolota'. Iamo joo bungah kamaleanna lako. 13 Ia tonna mangpenduannamo male lako, mane'ri mpangpeissenan kalena Yusuf lako sile'tona. Mane' toori joo naissenni Raja Mesir to rapunna Yusuf. 14 Mangkai joo napepasanni Yusuf to ambe'na disanga Yakub napeta'dai namellele ngasan sola rapunna lako tana Mesir -- pitung puloi lima sola ngasan. 15 Mellelemi Yakub sola rapunna lako tana Mesir na jio nanii mate sola to tojolota'. 16 Ia to batang rabukkuna dibawa pole lako kota Sikhem, nadilamun jio lamunan mangka naalli doi' pera' Nabi Ibrahim lako bati'na Hemor jio kota Sikhem. 17 Ia tonna la ndete'mi wattunna Puang Allataala mpugauk pangngakuan-Na lako Nabi Ibrahim, sabuda-budannami to bangsata' jio tana Mesir, 18 arannai den raja laen mangparenta jio, na te'da naissenni to Yusuf. 19 Nacapa'-capa' to bangsata', na gaja parrang lako tojolota'. Naparuku nca'beanni to peana ke mane' jajii, nakua danggi' namembuda. 20 Iamo joo wattu najaji Nabi Musa. Malolo situru' pengkitan-Na Puang Allataala. Tallung bulan masainna ditaranak lan bolana ambe'na. 21 Na ia tonna dica'bean, naalai anakdara anakkana Firaun nataranakki susi anak tonganna. 22 Sininna kamaccanna bangsa Mesir diajaranni, arannai pacau' la lan buangan kada la lan sipa'na. 23 Ia tonna patang pulomi taunna to Nabi Musa, mamali'mi la male ssikitan to-Israel bangsana. 24 Ngkitai mesa' solana nasessa to-Mesir, napessangkaii joo solana, nabunoi joo to-Mesir. 25 Nasanga napahang bangsana kumua iamo nasua Puang Allataala la'paranni. Apa sitonganna te'da napahangngi. 26 Masawanna ngkita omi dua tau pada to-Israel sibobo', naalla'ii la mpasipemeloanni, nakuanni, 'Ee mane, to sile'to kamu' tee. Ammisipasusira kamu'?' 27 Apa ia joo tosala lako solana, naturrunni to Nabi Musa nakuanni, 'Indara nnangka'ko kapala ba'tu tombicara kara-karaki'? 28 La mubuno toora'ka susi to-Mesir mubuno sangbo'?' 29 Ia tonna sa'dingngi Nabi Musa to kadanna, ta'pa malaii lako tana Midian, natorro jio. Jio nanii jaji to anakkana dua. 30 Patang pulo taun mangkanna joo den mesa' malaeka' ratu lako Nabi Musa jio padang pallawangan sikandoppi' Buntu Sinai. Nampangpekitan kalena susi dukku api messun lan mai pangngala duri. 31 Jangngahhi ngkitai joo, namadoang ngkanassai. Iamo joo namale ngkandoppi'i, na ssa'ding gamaran-Na Puang Allataala kumua, 32 'Aku'mo Puang Allataala to nasompa tojolomu, Nabi Ibrahim, Ishak na Yakub.' Mbe'behhi Nabi Musa, sanga malaja'i, na te'damo nabarani ngkitai. 33 Mangkada pole' omi Puang Allataala nakua, 'Alaii sandala'mu, nasaba' ia tuu munii ke'deh, iamo tana nanii Puang! 34 Kukitamo kamapa'dikanna umma'-Ku' jio tana Mesir. Kusa'ding toomo to sarrona angkumellao la la'paranni. Jaji, la kusuako pole lako tana Mesir!' 35 Ia tee Nabi Musa to te'da natarimai bangsa Israel tonna kuanni, 'Indara nnangka'ko kapala ba'tu tomangra'tahki'?' Na ia to malaeka' mpangpekitan kalena lako Nabi Musa lan pangngala-ala duri dukku, iamo nasua Puang Allataala nnangka'i kapala nasua male lla'bak umma'-Na. 36 Iamo mpasun bangsa Israel jio mai tana Mesir mpake mangrupa-rupa tanda mejangngaran la jio tana Mesir, la jio Tasik Malea, na jio padang pallawangan patang pulo taun masainna. 37 Ia toomo mpauanni to bangsa Israel kumua, 'La napadenan kamu' Puang Allataala mesa' nabi susi tee aku', napilei lan mai rapummi.' 38 Nabi Musamo to lan tangnga-tangngana to-Israel jio padang pallawangan mpangpeissenanni lako tojolota' to apa napauanni malaeka' jao Buntu Sinai. Iamo ntarimai to kada diputuo pole jio mai Puang Allataala to disimanahhi ratu lako kita'. 39 Moi nasusi joo cia'i to tojolota' nturu'i. Te'da natarimai, apa madoangri ia pole pole' lako tana Mesir. 40 Nakuanni to imang Harun, 'Garagankan kami' tau-tau dewata, na ia njoloankan. Sanga te'damo kami' kiissenni apa to jaji lako Nabi Musa, to mangka ssolankan messun jio mai tana Mesir!' 41 Iamo joo wattu nanggaraga tau-tau dewata susi anak sapin, namane' mpaden pangramean karoba ssompai joo tau-tau dewata panggaraganna. 42 Jaji napemboko'imi Puang Allataala napupangngelohna bangngi ssompa bintuin jao langi' susi to diuki' lan sura' nabi kumua, 'Ee to-Israel! Denmoraka mipangkaroban karoba panggere' sola karoba laen lako Aku' lan joo patang pulo taun masainna jio padang pallawangan? 43 Te'da bangpa, apa malera kamu' mbulle-bulle tenda tau-tau dewata Molokh sola bintuin dewatammi to disanga Refan. Iamo to tau-tau dewata migaraga la misompa. Iamo joo kulampali' kamu' mambela sambali' kota Babel.' " 44 Mpatarruhhi kadanna Stefanus nakua, "Ia tonna jio unapa padang pallawangan to tojolota', napangpeparentanni Puang Allataala lako Nabi Musa na nggaraga tenda, susi to apa mangka napakitanni. Ia joo tenda menjaji tanda kumua Ia to Puang Allataala mari'pih lan tangnga-tangngana tolino. Jaji tuli nabawa melakoi jio padang pallawangan. 45 Sitarruhna nabawa tooi, tonna solanni Yosua male parari mpassialaii tee tondokkota' jio mai kuasanna bangsa laen to naula'i Puang Allataala jio mai olona. Ia joo tenda jioi tangnga-tangngana to-Israel ratu lako kaparentanna Raja Daud. 46 Masannang penawan-Na Puang Allataala lako Raja Daud. Iamo joo napeta'dai Raja Daud lako Puang Allataala to nasompa Yakub tonna anu' nakua, 'Oo Puang, taeloranna' kugaraganki' bola.' 47 Apa Sulaimanra mpake'deh Bola Puang Allataala. 48 Apa te'da ia natorro lan bola panggaraga tolino to Puang Allataala makuasa, nasaba' den diuki' lan sura' nabi nakua Puang Allataala kumua, 49 'Langi' iamo kunii cumadokko mangparenta, na lino iamo pelleseang-Ku'. Bola apara to la migaraganna'? Umbora to kunii torro? Apa tang-Aku'raka mpadenni to sininna apa den?' Susimi joo kadan-Na Puang Allataala." 51 Mpatarruhhi kadanna Stefanus nakua lako tuu lako Pangbicara Agama, "Ie' kita', antatakkaliwa'ra membattuk tagaja sussa menturu' lako Puang Allataala! Gaja taru to talinganta' mpesa'dingngi kadan-Na! Pada bangki' tojolota' tuli nnewa Roh Allataala! 52 Denraka to nabi tangnasessa? Buda nabi nasua Puang Allataala tonna anu' mpaui to karatuanna Tomalampu'-Na apa nabunoi tojolomi. Na mangten tooki' too allo tapangpejokkoanni antapangpebunoanni. 53 Mangka toomiki' naparatuan malaeka' to atoranna Nabi Musa apa te'da taturu'i!" 54 Ia tonna sa'dingngi tuu lako Pangbicara Agama sininna to napau Stefanus, gaja pallami nasunggarigi'. 55 Apa ia to Stefanus nakuasai Roh Allataala, namentingngara de' langi' nangkita kamala'biran-Na Puang Allataala na Puang Isa ke'deh jio sa'de kanan-Na. 56 Mangkadai nakua, "Wah, ngkitana' langi' titimbak na pajan to Anak Mentolino ke'deh jio sa'de kanan-Na Puang Allataala!" 57 Pada ntampunni talinganna, napissennii mearrak naluruii to Stefanus. 58 Nagararakki lako salean kota, namane' rrura batui. Ia to sa'bi tangtongan mpangpeampan pakeanna lako mesa' tokallolo disanga Saulus. 59 Da'tan bang unapi dirura batu to Stefanus, namassambajang nakua, "Oo Puang Isa, tarimai to sunga'ku'!" 60 Namane' mengguntu' naandongngii mangkada nakua, "Oo Puang, danggi' dikka' tapapassannii to dosana tee tau!" Mangkanna mangkada susi joo, matemi.

Jamanna Rasulu' 8

1 Napusannang Saulus joo kadibunoanna Stefanus. 2 Ia to tonturu' Puang Allataala malei llamunni to batang rabukkuna Stefanus, namasse penawanna nabatingngii. 3 Apa ia to Saulus madoang tarruh bang la ssabu'i joo jamaa. Iamo joo namale llelei bola, narui' simesa'i lan mai la muane la baine, napangpetarungkuanni. 4 Ia to tomatappa' sisarak-sarak male llelei sininna kampong mpangpeissenan Kareba Kasalamatan jio mai Puang Allataala. 5 Ia to Filipus male lakoi mesa' kota jio tana Samaria, mpangpeissenanni lako to tau jio, kumua Raja Mangpasalama' to Puang Isa, to pura napau Puang Allataala. 6 Den too tanda mejangngaran napugauk. Ia tonna sa'dingngi to-Samaria nakita tooi to tanda mejangngaran napugauk, natarimai to pangngajaranna. 7 Buda tau nanii messun setang. Na ia tonna messunmo, melallak-lallak to tau. Buda too tokupi' sola tokeppang dipamaleke. 8 Gaja sannang to tau jio. 9 Den mesa' muane jio disanga Simon, masaimo mpatakkajanna' to-Samaria, sanga macca massando. Ssanga kalena kumua ia manda tau. 10 Sininna tau jio la tokaissenan, la tobiasa ngkabudaii, nakua, "Ia to dewata disanga Kaminang Matonggo mentolino menjaji Simon." 11 Gaja sainmo mpatakkajanna' tau massando, natarimai tau to pangngajaranna. 12 Apa ia tonna ratu Filipus jio, naajahhii kumua Raja Mangpasalama' to Puang Isa. Naajahhi tooi kumua parallui ngkatappa'i Puang Isa anna menjaji taun-Na Puang Allataala lan kaparentan-Na. Nakatappa'ii, napangpejioran kalena la muane la baine. 13 Moi Simon memmatappa' todai, na ia tonna mangka dijio' ta'pa malei nturu' Filipus. Takkajanna'i ngkitai to tanda mejangngaran. 14 Ia tonna sa'dingngi rasulu' jao kota Yerusalem kumua ntarimamo kadan-Na Puang Allataala to to-Samaria, nasuami to Petrus sola Yahya male re'. 15 Ia tonna ratumo sola dua, napassambajanganni dikua anna tarima Roh Allataala, 16 sanga moi mesa' te'da bangpi to ntarima Roh Allataala. Mane' dijio' bangri mpau sangan-Na Puang Isa. 17 Napalullungngi pala'na Petrus sola Yahya to to-Samaria, namane' ntarima Roh Allataala. 18 Ia tonna kitami Simon kumua ia to tau diben Roh Allataala, sanga napalullungngi pala'na rasulu', ta'pa la nabenni doi' to Petrus sola Yahya, 19 nakuanni, "Ben todana' tuu kuasa anna inda bangmo kupalullungngi pala'ku', iami la ntarima Roh Allataala." 20 Apa napebalii Petrus nakua, "Ee, masolangko sola tuu doi'mu! Sanga musangai iko wa'ding dialli doi' to pangkamasean-Na Puang Allataala. 21 Te'da iko musipato' nturu'i tee jamanki', sanga te'da iko mumalampu' lako Puang Allataala. 22 Iamo joo, mengkatoba'ko jio mai kagajatanmu, mumassambajang lako Puang anna dampanganko, nasaba' mangkako mangtangngah gaja'! 23 Sanga kuissen sigaru bang to bitokkomu lan anna napukaunanko kagajatan." 24 Napebalii Simon nakua, "Tulungna' dikka', mipassambajanganna' lako Puang, anna moi mesa' to mipaunna, te'da la jaji lako kaleku'." 25 Ia tonna mangkamo sola dua mpangpeissenan kadan-Na Puang Allataala, polemi de' kota Yerusalem. Ia tonna polemo, buda kampong jio tana Samaria nanii mpangpeissenan Kareba Kasalamatan. 26 Den malaeka'-Na Puang mangkada lako Filipus nakua, "Ke'dehmoko mumale ntuu sau' lalan jao mai kota Yerusalem male do' Gaza." Makarorrong joo lalan. 27 Ta'pa male bang unami Filipus. Ia joo wattu den mesa' to-Etiopia pole massambajang jao mai kota Yerusalem. Ia joo tau tomapangka', ia nnissenan sininna ewananna Raja Kandake, raja baine jio tana Etiopia. Mangnguju lakoi tondokkona, na mbaca sura'na Nabi Yesaya jao karetana. 29 Mangkadami to Roh Allataala lako Filipus nakua, "Maleko ngkandoppi'i joo kareta." 30 Kinjara'mi ngkandoppi'i nasa'dingngi joo tau mbaca sura'na Nabi Yesaya. Nakutanaii nakua, "Tapahangraka apara tuu tabaca?" 31 Nakua joo tau mebali, "Umbo la kukua mpahangngi, ke te'dai tau mpapahangngina'?" Nasuai to Filipus namende' kareta nacumadokko sola. 32 Ia to aya' nabaca kumua, "Dipasusi bembala' dirui' lako ngenan panggeresan. Tangmangngapa susi anak bembala', ke digoncingngii to bulunna, susi toomi joo tangtiku'bi' timun-Na mpau kada sangbuku. 33 Te'da tau ngkasiri'i na tangngia bang gauk to digaukanni. Moi mesa' tau te'da wa'ding la mpaui kumua den bati'na, sanga madoi'i dialai sunga'na lan mai tee lino." 34 Nakua joo tomapangka' lako Filipus, "La kukutanaiko, indannara to nasanga tee nabi? Kale kalenaraka, ba'tu tau laenraka?" 35 Mangpamulami Filipus mangkada, mpauanni karebanna Puang Isa mammula lan mai joo aya'. 36 Mpatarruhhi kalingkanna na dete' wai, nakua, "Inde'mi to wai, denparaka halanganna ke dijio'na'?" 37 Napebalii Filipus nakua, "Wa'dingmiki' dijio', ke lantuk tongan penawanta' ngkatappa'i Puang Isa." Nakua mebali, "Kukatappa'i kumua Anak Allataala to Puang Isa Almaseh." 38 Nasuami to tompamale kareta napakendenni, namane' mendo' wai sola dua, najio'i Filipus. 39 Ia tonna endekmo jiong mai wai, ta'pa ratumi Roh Allataala nnalai to Filipus nabawai, anna ia joo tomapangka' te'damo nakitai. Masannangngi mpatarruh kalingkanna. 40 Apa ia joo Filipus jioi pale' ia kota Asdod. Na ia tonna mpatarruh kalingkanna, mpangpeissenan Kareba Kasalamatan lan sininna kota ratu lako kota Kaisarea.

Jamanna Rasulu' 9

1 Ia joo wattu mapalla tarruh bang penawanna Saulus madoang la mbunoi to tomatappa' lako Puang Isa. Na male lako Imang Lompo, 2 mpeta'da sura' kuasa nabawa lako kapala bola passambajangan to-Yahudi jio kota Damsyik, dikua ianna ampa' to tonturu' pangngajaran-Na Puang Isa jio la muane la baine, wa'dingngi najokko nabawai lako kota Yerusalem. 3 Malemi lako kota Damsyik. Ia tonna mandoppi'mo lako kota, ta'pa denmi arrang pole jao mai langi' nnarrangngii mengguririkkina. 4 Tipessambakki do' padang na den gamara nasa'ding metamba nakua, "Ee Saulus! Ee Saulus! Matumbai musessa tarruh bangna'?" 5 Nakutanaimi Saulus nakua, "Ie', indariki' kita' Puang?" Napebalii nakua, "Aku'mo Puang Isa to musessa. 6 Apa ke'dehmoko tee too ammumale lako joo kota. Jiopa mudipauan apa to sipato' la mupugauk." 7 Sabakan to tau nasolan Saulus natangnnissenmi mangkada, sanga ia joo gamara nasa'ding, na moi mesa' te'da bangra tau nakita. 8 Ke'dehmi Saulus nampami'cik matanna, apa tangpakitami. Jaji natoe bangmira tau to limanna, nasolanni male lako kota Damsyik. 9 Tallung allo masainna tangpakita, tangkumande tangngapa. 10 Den mesa' tomatappa' lako Puang Isa jio kota Damsyik disanga Ananias. Den pissen nangkita pengkita. Lan joo pengkitanna nasa'ding to petamba-Na Puang ngkuanni, "Ee Ananias!" Napebalii nakua, "Ie', inde'na' kita' Puang." 11 Nakuanni Puang, "Ee, malemoko tee too lako bolana Yudas jio to disanga Lalan Maruruh! Pekutananni jio to disanga Saulus to-Tarsus. Massambajangngi too, 12 na nakitamoko lan pengkitanna, ratu mpendete'i la mpalullungngi pala'mu, dikua anna wa'ding pakita pole'." 13 Napebalii Ananias nakua, "Oo, Puang! Tuli kusa'ding napau tobuda kumua ia joo tau takkaliwa' to pangsessana lako taun-Ta' jio kota Yerusalem. 14 Na ia tee karatuanna inde' tee too, napakuasa kapala imang la njokko sininna tossompaki'." 15 Apa nakua Puang ngkuanni, "Male bangmoko! Nasaba' mangkamo kupilei la mpangjamanna', dikua napangpeissenanna' lako bangsa tangngia to-Yahudi, lako raja, na lako too to-Yahudi. 16 Na Aku' kalena la mpakitanni sininna kamaparrisan to la naperasai nasaba' Aku'." 17 Malemi Ananias lako ntuu joo bola, napalullungngi pala'na to Saulus, nakua, "Ee, tokupusile'to Saulus! Ia to Puang Isa, mukita jio tangnga lalan tommumangnguju jio mai, ssuana' ratu, dikua ammuwa'ding pakita pole', nakuasai tooko Roh Allataala." 18 Ia bang unamo joo, naden susi sissik bale tikalopak jio mai matanna Saulus anna pakita pole'. Ta'pa ke'dehmi nadijio'. 19 Mangkanna kumande, memmawatang pole'mi. 20 Tarruh bang unami llelei bola passambajangan to-Yahudi mpangpeissenanni kumua Anak Allataala to Puang Isa. 21 Sininna to tau ssa'dingngi joo jangngah nakua, "Oo, apa tangngiamoraka tinde' to la ssabu'i sininna tomatappa' lako Puang Isa jio kota Yerusalem? Apa tangngiamoraka naakkattai naratu inde' la mangjokko na pangngoloi lako kapala imang?" 22 Apa samasai-sainna Paulus mpangpeissenan Kareba Kasalamatan sabuda-budanna tooi tau matappa'. Na ia tonna pamanassai kumua Raja Mangpasalama' to Puang Isa, mempussakmi to to-Yahudi torro jio kota Damsyik. 23 Ia tonna ba'tu pirang-pirang allomo, mesa' kadai to to-Yahudi la mbunoi. 24 Tuli natajan allo bongi jio babangan kota la mbunoi. Apa naissenni Paulus to akkattana. 25 Iamo joo, anna ia to tonturu'i ratu bongi nnalai, napatamai buriah, nadokkenni ratu do' litak lliwa'i betteng kota, nata'pa male. 26 Ia tonna ratumo Saulus lako kota Yerusalem, nacobai male siama' to tomatappa' lako Puang Isa. Apa nakalaja'i, sanga te'dapa nakatappa'i kumua menturu' tonganmi lako Puang Isa. 27 Apa malei natammui Barnabas nasolanni lako rasulu'. Nacuritanni kumua mangkamo Saulus ngkita Puang Isa jio tangnga lalan lako kota Damsyik, na sipangkada toomo. Nacuritan tooi matumbai to kabaranianna Saulus mpangpeissenanni to Puang Isa jio kota Damsyik. 28 Iamo joo natorro Saulus jio sola tomatappa', barani mpangpeissenan Puang lan lili'na kota Yerusalem. 29 Sipangkadai na sihakiki too to to-Yahudi to mangbasa Yunani ntuntun bang akkalan la mbunoi. 30 Apa ia tonna issenni tomatappa' joo akkalanna, nasolanni to Saulus lako kota Kaisarea, namane' ngkuanni napole pole' lako kota Tarsus. 31 Jaji te'damo nadisessa to jamaa jio tana Yudea, Galilea na Samaria. Na pangtulung-Na Roh Allataala anna samawatang-watangna na sakerangngan-rangnganna too joo jamaa, ssompa Puang. 32 Malei Petrus llelei jamaa. Den pissen wattu namale ngkita umma'-Na Puang jio kota Lida. 33 Den mesa' tokupi' naampa' disanga Eneas, karuamo taunna mamma' bang. 34 Nakuanni Petrus, "Ee Eneas! Napamalekeko Puang Isa Almaseh. Ke'dehko lulunni tuu ampahmu." Ta'pa ke'deh bang unami Eneas. 35 Memmatappa' ngasan lako Puang to tau jio kota Lida sola rante Saron tonna kitai to Eneas. 36 Den mesa' baine jio kota Yope disanga Tabita. (Lan basa Yunani disanga ia Dorkas, battuananna jonga.) Matappa'mo lako Puang Isa. Melo panggaukanna na ntulung tomakario-rio. 37 Ia joo wattu masakii namate. Dipajaoi loteng to batang rabukkuna tonna mangka dibasei. 38 Te'da namambela joo kota Yope jio mai kota Lida. Jaji, ia tonna issenni to tomatappa' lako Puang Isa jio kota Yope, kumua jioi kota Lida to Petrus, den dua tau nasua male ngkuan Petrus, namadoi' ratu. 39 Ta'pa malemi Petrus sola. Ratunna lako, disolanni de' loteng. Ia to baine jio, to te'damo muanena, kumarrak ngasan, na ntalimbung Petrus napakitanni to baju pura najaisanni Tabita tonna tuopa. 40 Nasua ngasanni Petrus messun, namengguntu' massambajang. Ia tonna oloimi joo batang rabukkuna nakuanni, "Ee Tabita, mi'cokmoko!" Ta'pa mpami'cikmi matanna, nami'cok cumadokko tonna kitai to Petrus. 41 Natoei Petrus to limanna napake'dehhi. Mangkai joo natambaii to tote'damo muanena sola tomatappa' laen, nasuai ratu ngkitai to Tabita tuo pole'mo. 42 Ta'pa titaleh joo kareba lan lili'na kota Yope, anna membuda tau ngkatappa'i Puang Isa. 43 Ba'tu pirang allopa Petrus torro jio kota Yope, jio bolana Simon to pangjama balulang.

Jamanna Rasulu' 10

1 Den mesa' to-Roma jio kota Kaisarea disanga Kornelius, kamandang surudadu to-Italia. 2 Mesa'i tomelo penawa na massompa too sintong repokkona lako Puang Allataala. Buda sudakkana lako to-Yahudi kaasi-asi na te'da nasalai wattu massambajang. 3 Den pissen wattu agi-agi tatte' tallu soloh allo na ngkita manassa malaeka'-Na Puang Allataala lan pengkitanna, ratu ngkuanni, "Ee Kornelius!" 4 Malanjang Kornelius tonna kitai joo malaeka' nakua, "Ie', apara kita' Puang?" Mebalii nakua, "Natarimamo Puang Allataala to passambajangmu sola kamalaboranmu. 5 Iamo joo suami ba'tu pira-pira tau too male lako kota Yope, ntambai Simon to disanga too Petrus. 6 Torro jioi bolana pangjama balulang to disanga Simon, jio randan tasik." 7 Ia tonna polemo joo malaeka', natambaimi Kornelius to dua kaunanna sola mesa' surudadu pangjoa'na to mangngagama Yahudimo. 8 Nacuritanni Kornelius apa to mangka jaji, namane' ssuai male lako kota Yope. 9 Masawanna tangnga allo tonna kandoppi'mo kota Yope joo tonasua Kornelius, mende'i loteng Petrus la massambajang. 10 Madoangmi kumande sanga tangbarah gajai, apa ia tonna dipasadia to kande ngkitami pengkita. 11 Titimbakki to langi' nakita, na den apa susi kaen masangka dikapu' a'pa' to tetukkuna, didokken ratu do' litak. 12 Sininna rupa olok-olok a'pa' ajena, olok-olok lumeme' na manuk-manuk den ngasan lan. 13 Den gamara nasa'ding ngkuanni, "Ee Petrus, mi'cokko! Gere'i tuu, mukasaraii, mukandei!" 14 Napebalii Petrus nakua, "Ie', masussa kita' Puang! Sanga te'da lalopa nabulewanni anga'ku' to apa diharangan ba'tu dipemalian." 15 Apa ssa'ding pole' omi gamara ngkuanni, "Apa to pura nahallalasan Puang Allataala, danggi' muharanganni." 16 Pentallun susi joo, namane' tiangka' de' langi' joo kaen. 17 Pussakki Petrus ntangngahhi apa battuananna joo pengkitanna. Ia tonna mangtangngah-tangngah unapi, ia to tonasua Kornelius nnampa'mi bolana Simon na jiomi babangan. 18 Mekutanami nakua, "Iamoraka tee bola nanii torro Simon to disanga too Petrus?" 19 Ia tonna tangngah bang unapi Petrus apa battuananna joo pengkitanna, nakuanni Roh Allataala, "Ee Petrus! Den tau tallu nnangahko. 20 Madoi'moko mellao, nadanggi' mubata male sola, sanga Aku' ssuai ratu!" 21 Mellaoi Petrus nakuanni, "Aku'mo to miangah. Apara mitungkanan?" 22 Nakua mebali, "Nasuakan Kamandang Kornelius ratu inde'. Ia mesa' tomelo, to ssompa Puang Allataala, nakasiri' sininna to-Yahudi. Mangka nasua malaeka'-Na Puang Allataala mpeta'dako male lako bolana, dikua nasa'dingngi apa to la mupauanni." 23 Nasuai Petrus mentama namangbongi jio. Masawanna mi'cokmi Petrus namale sola. Den too ba'tu pira-pira tomatappa' jio kota Yope meundi. 24 Masawanna pole' o ratumi lako kota Kaisarea. Natajan bangmo Kornelius jio sola sininna rapunna na solana to pura nasua ratu. 25 Ia tonna ratumo Petrus, malemi Kornelius ntammuii, namengguntu' jio olona ssuju'i. 26 Apa natoei Petrus to limanna nakuanni, "Ke'dehko! Tolino bang toda unana' aku'." 27 Sipangkada unapi Kornelius namentama bola. Buda tau nakita lan nnampaii. 28 Nakua Petrus lako tuu lako tau, "Miissen kumua napemalian agamangki' to-Yahudi ke malekan massangbola-bola ba'tu sirau bangsa laen. Apa mangkamo' napamanassan Puang Allataala kumua te'da napemali sirau to-Yahudi na bangsa laen, nasaba' te'da tau naharangan Puang Allataala. 29 Iamo joo namaringngan penawangku' ratu tommipepasannina'. Jaji, iamo tee madoangna' nnissenni apara parallummi." 30 Napebalii Kornelius nakua, "Ntallung bongi, agi-agi tatte' tallu soloh allo susi tee, kumassambajang inde' bola. Tangdikalannai naden mesa' muane ta'pa ke'deh jio oloku'. Mangpakean cumbia'-bia', 31 nakua, 'Ee Kornelius! Natarimamo Puang Allataala to passambajangmu sola kamalaboranmu. 32 Jaji, suamoko tau male lako kota Yope ntambai Simon to disanga too Petrus. Torroi jio bolana pangjama balulang disanga Simon, jio randan tasik.' 33 Iamo joo kuta'pa madoi' ssua tau male ntambaiko. Na melomi sanga maringngan penawa unako ratu. Ia tee kami' sirempun ngasanmokan jio olo-Na Puang Allataala la ssa'dingngi sininna to nasuanko Puang Allataala la mpauankan." 34 Napamulaimi Petrus mangkada nakua, "Kupahang tonganmo tee too, kumua te'da tau napasilaenan Puang Allataala. 35 Moi tau tangngia to-Yahudi, apa ia ke ssompai Puang Allataala na mpugauk kameloan, natarima too Puang Allataala. 36 Ia tee kareba napangpeissenan Puang Allataala lako kami' to-Yahudi kumua ia to tolino wa'ding sikalino pole' sola Puang Allataala ke matappa'i lako Puang Isa Almaseh, nasaba' iamo Puangna sininna tau. 37 Miissenmo apa to mangka jaji lan lili'na tana Yudea, mammula jio mai tana Galilea to nanii Nabi Yahya njio' tobuda. 38 Miissenmo kumua ia joo Puang Isa to-Nazaret mangkamo napilei Puang Allataala, naben tooi Roh Allataala sola kuasa. Miissen toomo kumua tuli malei mpugauk kameloan umbo-umbo nanii, na nnula'i setang lan mai kalena tonatamai, nasaba' Puang Allataala ssolanni. 39 Kami'mo tee mai tongkitai sininna to napugauk la jio tana Yudea, la jio kota Yerusalem. Moi nasusi joo dibunoi nadipampang jao kaju sitamben. 40 Apa napatuo pole' Puang Allataala jio mai kamatean tonna allo mangpentallunnamo. Napangpekitanni lako kami' to napilei jolomo la mpangpeissenanni. Jaji te'da na sininna tau ngkitai. Kumandekan sola tonna tuo pole'mo jio mai kamatean. 42 Na Iamo ssuakan mpangpeissenan Kareba Kasalamatan lako tau kumua Iamo naangka' Puang Allataala menjaji tomangra'tah kara-kara lako tolino, la ia totuo unapa, la ia tomatenamo. 43 Sininna nabi mpangpeissenanni kumua ia to tongkatappa'i Puang Isa la didampangan, nasaba' kuasan-Na Ia Puang Isa." 44 Ia tonna mangkada unapa Petrus, mellaomi to Roh Allataala ngkuasai sininna to mpesa'dingngii joo kadanna. 45 Jangngah ngasanmi to to-Yahudi to matappa'mo lako Puang Isa nasiturusan Petrus jio mai kota Yope, ngkitai to bangsa tangngia to-Yahudi diben too Roh Allataala. 46 Sanga nasa'ding to tau mangkada mpake mangrupa-rupa basa to nabenni Roh Allataala, mpakala'bih Puang Allataala. Nakuanni Petrus, 47 "Kitari tee mai tau, susi kita' diben toomi Roh Allataala. Jaji te'da nawa'ding nahalangngi tau ke dijio'i wai." 48 Napangpesuanni Petrus nadijio' to tau mpau sangan-Na Puang Isa Almaseh. Mangkai joo napeta'dai sola ngasan natorropa Petrus ba'tu pirang-pirang allo masainna.

Jamanna Rasulu' 11

1 Nasa'ding rasulu' sola tomatappa' jio tana Yudea kumua ia to bangsa tangngia to-Yahudi ntarima toomo kadan-Na Puang Allataala. 2 Ia tonna ratumo Petrus de' kota Yerusalem, den ba'tu pira-pira to-Yahudi ncoccoi. Ia joo to-Yahudi matappa' lako Puang Isa, apa madoangngi kumua moi to bangsa tangngia to-Yahudi la disunna'. 3 Nakuanni to Petrus, "Ammumalera lako bola to totangdisunna'? Ammukumande sola?" 4 Iamo joo napamanassan ngasanni Petrus lako, apa to mangka jaji jio mai pamulanna nakua, 5 "Ia tongkumassambajang jio kota Yope, den pengkita kukita. Den mesa' apa kukita susi kaen masangka dikapu' a'pa' to tetukkuna didokken jao mai langi' ratu jio oloku'. 6 Ia tongkukitai la mpemajappuii, oh, na lan ngasan ia to olok-olok sia'pa' ajena, olok-olok lampung, olok-olok lumeme' na manuk-manuk. 7 Na den gamara kusa'ding ngkuanna', 'Ee Petrus, ke'dehko! Gere'i tuu, mukasaraii, mukandei!' 8 Apa kupebalii kukua, 'Ie', masussa kita' Puang! Sanga te'da lalopa nabulewanni anga'ku' to apa diharangan ba'tu dipemalian.' 9 Apa kusa'ding pole' joo gamara jao mai langi' ngkuanna', 'Apa to nahallalasan Puang Allataala, danggi' muharanganni.' 10 Pentallun jaji susi joo, namane' diangka' pole' de' langi'. 11 Na ia toomo joo wattu, ia to tau tallu disua jio mai kota Kaisarea mpessitammuina', ratu jio bola to kunii torro. 12 Nakuanna' Roh Allataala, 'Danggi' mubata male sola tuu mati' tau.' Malemokan sola, na denpa tee annan sile'to jio mai kota Yope, kisolan male lako kota Kaisarea, angkimentama bolana Kornelius. 13 Nacuritankan matumbai tonna ngkita mesa' malaeka' ke'deh lan bolana ngkuanni, 'Suai to tau namale lako kota Yope ntambai Simon to disanga too Petrus. 14 La napauanko kareba to la mpasalama'ko sintong repokkomu.' " 15 Mpatarruhhi Petrus kadanna nakua, "Ia tongkupamulai mangkada susi joo, ta'pa nakuasaimi Roh Allataala, susi to jaji lako kita' tonna pamulanna. 16 Kuingaran tooi kumua den nakua Puang Isa, 'Ianna Nabi Yahya mangjio' wai, apa ianna kamu' la dijio' kamu' Roh Allataala.' 17 Jaji manassa naben too Puang Allataala Roh Allataala to bangsa tangngia to-Yahudi, susi to nabenki' tontamatappa' lako Puang Isa Almaseh. Iamo joo naumbo la kukua hhalangngii to Puang?" 18 Mangkanna nasa'ding joo, napahangmi. Mpakala'bihmira Puang Allataala nakua, "Ianna susi joo, moi pale' bangsa tangngia to-Yahudi natarima toomi Puang Allataala, ke mengkatoba'i jio mai dosana, anna benni katuoan melo te'da cappa'na." 19 Ia tonna mangkamo Stefanus dibuno, mangpamulami to tomatappa' lako Puang Isa dipakario-rio, arannai male sisarak-sarak. Den male lako tana Fenisia, lako pulau Siprus na den too to male lako kota Antiokhia. Umbo-umbo nanii tuli mpangpeissenan Kareba Kasalamatan, apa lako manda to-Yahudi. 20 Apa den ba'tu pira-pira to tomatappa' pole jio mai pulau Siprus na kota Kirene ratu lako kota Antiokhia, na mpangpeissenan too Kareba Kasalamatan lako to-Yunani kumua Puangngi to Isa. 21 Nabuda tau memmatappa', napangben kalena lako Puang, nasaba' natulungngi kuasan-Na Puang. 22 Ia tonna sa'dingmi jamaa jio kota Yerusalem kumua buda tau matappa', nasuami to Barnabas male lako kota Antiokhia. 23 Na ia tonna ratumo lako, gaja sannangngi ngkitai, sanga nabarakka'i Puang Allataala to tau jio. Namangngajahhi nakua anna tatta' nturu' Puang. 24 Ia joo Barnabas to melo penawa, nakuasai Roh Allataala, namatappa' tongan too, iamo nabuda tau memmatappa' lako Puang. 25 Mangkai joo malemi Barnabas ntiro Saulus jio kota Tarsus. 26 Ia tonna sitammumo, nasolanmi lako kota Antiokhia. Sangtaunni torro jio sola jamaa na nnajahhi buda tau. Jiomo dinii pamula ssangaii Tosarani to tomatappa' lako Puang Isa. 27 Ia joo wattu den ba'tu pira-pira nabi ratu jao mai kota Yerusalem lako kota Antiokhia. 28 Denni mesa' disanga Agabus nakuasai Roh Allataala anna mangkada nakua, "La jaji to pealloan la'da' lan lili'na lino." (Najaji tongan unamo joo, tonna Tomaraja Roma disanga Klaudius mangparenta.) 29 Mesa' kada ngasanni to tomatappa' lako Puang Isa napada rrempun pangtulunganna situru' pakullena, napangpeawanni to tomatappa' jio tana Yudea. 30 Mangkanna dirempun joo doi', disuai to Barnabas sola Saulus male mbawai lako pekaamberan jamaa jao kota Yerusalem.

Jamanna Rasulu' 12

1 Ia joo wattu napamulami Raja Herodes ssessa tomatappa' lako Puang Isa. 2 Napangpesuanni to sile'tona Yahya disanga Yakub, napa'dangngii namate. 3 Ia tonna issenni Raja Herodes kumua napumasannang to-Yahudi joo, napangpejokkoan omi to Petrus tonna allo pangramean ngkande Roti Tangkeragi. 4 Ia tonna dijokkomo, napangpesuanni nadipatama pangtarungkuan. Patang torroan surudadu jio disua nnampaii. Ia to sangtorroan sia'pa' surudadu lan. Akkattana mangkapi pangramean Paskah, namane' mbicarai to kara-karana jio olona tobuda. 5 Jaji dipallan bangpi pangtarungkuan to Petrus. Apa napassambajangan tarruh jamaa lako Puang. 6 Ia tonna bongi, dikua la masawapi napangngoloi Raja Herodes lako tobuda, na ia to Petrus dirante bassi dua to limanna, mamma' napatangnga dua surudadu tomangngampana. Den todapa pangjaga laen jio sikandoppi' ba'ba pangtarungkuan. 7 Tangdikalannai naden malaeka'-Na Puang ke'deh jio sikandoppi' Petrus na den to arrang mangngarrang lan joo pangtarungkuan. Natundanni to Petrus, naroge-rogei to ajena nakuanni, "Ee! Mi'cokko madoi'!" Ta'pa tibuka bang unami to rante lan mai limanna. 8 Mangkada pole' omi nakua, "Mebajumoko ammumassapatu!" Mangkai joo nakua pole' omi, "Pakeko baju landomu, muundi nturu'na'!" 9 Messunmi joo malaeka' napeundii Petrus lako salean. Apa te'da naissenni kumua tongan ngasan tuu lako, nasangari kumua pengkitanna bangri. 10 Ia tonna liwa'imi to dua pangjagan, ratumi lako babangan bassi tingngo lako kota. Titimbakmi joo babangan, namessun nnola lalan biccu', nata'pa ta'de joo malaeka'. 11 Mangkai joo mane'ri nakanassai tongan Petrus to apa mangka jaji lako kalena, nakua, "Mane'ri kuissen kumua Puang tonganmo mangka ssua malaeka'-Na la'paranna' jio mai kuasanna Raja Herodes na jio mai sininna to la nagaukanna' to-Yahudi." 12 Mangkanna naissen susi joo, malemi lako bolana Maryam, indona Yahya to disanga too Markus. Buda tau jio sirempun massambajang. 13 Ia tonna ndedek babangan to Petrus, den mesa' baine kaunan disanga Rode ratu la ntimbakanni. 14 Ta'pa napegamara to Petrus. Apa te'da natimbakanni, saba' liwa' sannangna, ta'pa pole ori tama napauanni to tau jio kumua saleananni babangan Petrus. 15 Apa nakua to tau ngkuanni, "Mangtindoko iko tuu." Nakua pole', "Tonganna ia Petrus joo jio salean." Nakuanni, "Malaeka'nari joo!" 16 Apa mangdedek tarruhhi Petrus, na ia tonna timbakanni to babangan sijangngaran ngasanni ngkitai. 17 Mpupangngimbai limanna Petrus nakamma' to tau, namane' ncuritanni umbo nakua Puang la'paranni lan mai pangtarungkuan. Nakua, "Pauanni Yakub to apa jaji sola tomatappa' pira'." Mangkai joo too messunmi, namale lako bola laen. 18 Masawanna melambi' marongkami to tomangjaga. Pussakki ntangngahhi apa to jaji lako Petrus. 19 Napangpesuanni Raja Herodes nnangahhi to Petrus, apa te'da nakulle nnampa'i. Iamo joo napangparentanni nadiparessa to tomangjaga nadibuno. Mangkai joo malemi Raja Herodes jio mai tana Yudea lako kota Kaisarea na torro jio ba'tu pirang-pirang allo. 20 Gaja nakagallii Raja Herodes joo to-Tirus na to-Sidon. Iamo joo namesa' kada ratu mpessikitaii. Nasedei jolo' to kapala salassa' raja disanga Blastus la mpangkadanni, namane' male sikita raja. Meta'dai la sipemeloan, sanga ia joo tondokkona pole jiora mai tondokkona Raja Herodes nanii nnala kande. 21 Den pissen wattu to pura dipattantumo, mpakemi pakean kamala'biranna to Raja Herodes nacumadokko jao cadokkoan kaparentan, namangkada lako joo tau sola ngasan. 22 Napissenni to tau mearrak mpebalii nakua, "Samanna ia to dewata tee mangkada, tangngia tolino." 23 Ta'pa natampeleng bang unami malaeka'-Na Puang, sanga te'da nakasiri'i to Puang Allataala. Nasikandeii kalindoro, arannai mate. 24 Satitaleh-talehnami to kadan-Na Puang Allataala na sabuda-budanna toomi tau ngkatappa'ii. 25 Ia tonna mangka Barnabas sola Saulus mpangbenni to pangtulungan lako tomatappa', polemi jao mai kota Yerusalem nasolanni to Yahya to disanga too Markus.

Jamanna Rasulu' 13

1 Den ba'tu pira-pira nabi sola guru jamaa jio kota Antiokhia: Barnabas, Simeon to disanga too tomalotong, Lukius to-Kirene, Menahem to dipelobohhi sola Raja Herodes Antipas tonna peapa, na Saulus. 2 Ia tonna massambajang na puasa too, nakuanni Roh Allataala, "Pileii to Barnabas sola Saulus, anna jamai to jaman mangka kupattantuanni." 3 Ia tonna mangka puasa sola massambajang, napassambajanganni to Barnabas sola Saulus, namane' ssuai sola dua male. 4 Pangpatujun-Na Roh Allataala namale Barnabas sola Saulus lako kota Seleukia, na mangkappala' jio mai male lako pulau Siprus. 5 Ia tonna ratu lako kota Salamis jio pulau Siprus, mpangpeissenanni kadan-Na Puang Allataala lan bola passambajangan to-Yahudi. Den todai Yahya Markus to nasolan mbalii. 6 Naguririkki ngasan joo pulau ratu lako kota Pafos. Den mesa' to-Yahudi nasitammuan jio disanga Baryesua, macca massando na ssanga too kalena nabi. (Lan basa Yunani disanga Elimas.) 7 Sikabudai melo to gubernur jio disanga Sergius Paulus, mesa' tomacca. Madoangngi ssa'ding kadan-Na Puang Allataala. Iamo joo nasuai to Barnabas sola Saulus ratu. 8 Apa ia joo sando mpengkulle-kullei hhalangngii to Barnabas sola Saulus, nakua danggi' namatappa' lako Puang Isa joo gubernur. 9 Apa ia to Saulus to disanga too Paulus nakuasai Roh Allataala nakaje'jekki. 10 Nakuanni, "Ee bati'na Ballisi'! Ewalinnako sininna kameloan! Topangnguraga la'da'ko! Te'daraka mulantorroi hhalangngi akkatta-Na Puang Allataala mpasalama' tolino? 11 La mukita to napabalaranko Puang! La buta bang unamoko tee too, ba'tu pirang alloko to tanglapakita." Ta'pa memmapattangmi pengkitanna, sanga susi to kumua den apa malotong ssapu' matanna na sumaka'-maka' bangmira ntuntun tau la ssolanni. 12 Memmatappa'i joo gubernur tonna mangka ngkitai joo, sanga jangngah tarruhhi ssa'dingngi joo pangngajaran-Na Puang. 13 Mangkappala'mi Paulus sola to solana jio mai kota Pafos lako kota Perga jio tana Pamfilia. Ntuumo jio nanii messarak Yahya Markus napole lako kota Yerusalem. 14 Apa ia to Paulus sola Barnabas mpatarruhhi kalingkanna jio mai kota Perga lako kota Antiokhia jio tana Pisidia, na ia tonna Allo Katorroan mentamai bola passambajangan to-Yahudi nasicadokkoan lan. 15 Ia tonna mangkamo dibaca sura'na Nabi Musa sola sura' nabi laen, massuami to kapala bola passambajangan ngkuan tau namekutana lako Paulus sola solana. Nakuanni, "Ee todipusile'to! Tulungkan mipaui ke denni kada pangpangngajah lako tee mai tau." 16 Ke'dehmi Paulus nampupangngimba limanna nta'tan tau nakua, "Ee kamu' padangku' to-Israel na kamu' to ssompa todamo Puang Allataala, pesa'dingngii! 17 Ia to Puang Allataala, to nasompa bangsa Israel, mangka mpilei tojolota', na pupemmatonggoi tee bangsa tonna mentoratupa jio tana Mesir, namane' mpasunni jio mai, mpake kuasa kamala'biran-Na. 18 Patang pulo taunna jio padang pallawangan nanii ssabbarasanni Puang Allataala to panggaukanna. 19 Ia tonna mangka ssabu'i pitu bangsa jio tana Kanaan, natawa-tawanni joo tana napumanahhi. 20 Den agi-agi pata ratuh limang pulo taun masainna joo. Ia tonna mangkamo ditawa-tawa joo tana Kanaan, nabenmi Puang Allataala ba'tu pira-pira pangbicara to ntoe too parenta. Nabi Samuelmo to pangbicara tampakkana. 21 Mangkai joo naben omi Puang Allataala to Saul menjaji rajana situru' pangpeta'danna, namangparenta patang pulo taun masainna. Ia joo Saul anakkana Kis, bati'na Benyamin. 22 Ia tonna pasoro'i Puang Allataala to Saul menjaji raja, naangka'i to Daud menjaji raja ssullei. Nakua Puang Allataala mpaui to Daud, 'Kuampa'mi to tolampugauk pakkaeloran-Ku', to la mpemasannangngi penawang-Ku', iamo tee Daud anakkana Isai.' 23 Pole jio mai bati'na Raja Daud nanii Puang Allataala mpasadiai to Raja Mangpasalama' lako bangsa Israel, iamo joo Puang Isa, susi to pura napau jolo. 24 Ia tonna te'dapa napamulai jaman-Na Puang Isa, nasuami Nabi Yahya to to-Israel kumua namengkatoba' jio mai dosana na dijio'. 25 Na ia tonna la katampakannamo Nabi Yahya mangjama, nakua mangkada, 'Ia tee aku' tangngiana' to raja mitajan, apa den ia to la ratu ke mangkamo', na moi mbukai sapatun-Na tangsipato' toona'.' 26 Ee todipusile'to, la kamu' to bati'na Nabi Ibrahim, la kamu' to ssompa todamo Puang Allataala! Mangkamo kamu' naparatuan Puang Allataala to Kareba Kasalamatan. 27 Ia to to-Yerusalem sola pekaamberanna cia'i ntarimai to Puang Isa. Te'da napahangngi to pangngajahna nabi to tuli dibacanni ke Allo Katorroan oi, iamo joo napangpebunoanni. Apa ia toomora joo kanabunoanna, anna jaji apa to pura napau nabi tonna anu'. 28 Moi nate'da naampa'i to sipato'na la dinii mbunoi, apa napeta'dai lako Pilatus anna dibuno. 29 Na ia tonna mangkamo napugauk sininna to diuki' jolomo to jiona Ia lan Sura' Allataala, napupellaomi to batang rabukku-Na jao mai kaju sitamben, namane' mpeliangngi. 30 Apa napatuo pole'i Puang Allataala jio mai kamatean. 31 Masaipa nanii mpangpekitan kalena lako to tomangka nasolan jio mai tana Galilea lako kota Yerusalem. Ia ngasanmo to mpangpeissenanni tee too lako bangsa Israel kumua Raja Mangpasalama' to Puang Isa. 32 Na ia tee kami' kipauanmo kamu' to Kareba Kasalamatan, kumua ia to apa pura nabasse Puang Allataala lako tojolota', 33 mangkamo napugauk Puang Allataala lako kita', tonna patuoi to Puang Isa jio mai kamatean. Susi to napau jolomo lan Pangpujian mangpenduan, 'Ikomo Anak-Ku'. Mammula tee too Aku'mo ambe'mu.' 34 Mangkamo napatuo pole' Puang Allataala jio mai kamatean, na te'damo nalamate pole'. Napamanassamo Puang joo lan tee kada nakua, 'La kuben kamu' barakka', to mangka kupasanan Raja Daud kumua nang la jajinna ia.' 35 Susi toomi to apa dipau lan Pangpujian laen nakua, 'Te'da taeloran batang kaleku' la buruk lan lamunan, sanga Aku'mo kaunan-Ta' to mangka tapilei.' 36 Ia tee kada te'da nadipatuju lako Raja Daud. Matemi tee Raja Daud tonna mangkamo mpugaukki to nasuanni Puang Allataala. Ia tonna matemo dilamunni sola tojolona, anna buruk toomo to batang rabukkuna. 37 Apa ia to Puang Isa napatuo pole'mi Puang Allataala jio mai kamatean, na te'da Ia nasusi Raja Daud. 38 Ee todipusile'to! Parallu miissen kumua nadampangan kamu' Puang Allataala, nasaba' apa to napugauk Puang Isa. Ia to atoranna Nabi Musa te'da nakullei mpupenjaji tomelo kamu', 39 apa ia to tomatappa' lako Puang Isa direken tomelo. 40 Iamo joo la mangpesa'ding melo kamu', danggi' najaji lako kalemi to apa dipau lan sura'na nabi nakua, 41 'Ee kamu', to tangkasiri' Puang Allataala! Mangpesa'ding melo kamu'! La jangngah kamu' ammisabu', sanga ia tee wattu den apa kupugauk to la te'danna milangkatappa'ii, moi naden tau mpamanassan kamu'.' " 42 Ia tonna messunmo Paulus sola Barnabas lan mai bola passambajangan, napeta'dai tau jio naratu ke Allo Katorroan pole'i la mpangpangngajaran pole'i joo. 43 Mangkanna massambajang, buda to-Yahudi na tau laen to mangngagama to-Yahudi todamo menturu' lako Paulus sola Barnabas. Naajahhi sola dua napangngingaranni kumua nada'tan rrannuan pangkamoja'-Na Puang Allataala. 44 Ia tonna Allo Katorroan pole'mo, sangratuan ngasanni to tau lan joo kota mpesa'dingngi kadan-Na Puang Allataala. 45 Ia tonna kitai to-Yahudi to tobuda, masere atimi nacapa'i to Paulus, napasala tooi sininna to napaunna. 46 Apa kannori sabarani-raninna Paulus sola Barnabas ntarrusanni kada nakua, "Na kamu'mo to-Yahudi jolo' dipauan to kadan-Na Puang Allataala. Apa te'da mitarimai, mipattantu kamu' kumua te'da misipato' ntarima katuoan melo te'da cappa'na. Iamo joo kimale lako bangsa laen. 47 Sanga susi ia tee to nasuankan Puang Allataala kumua, 'Pura kupattantumo kamu' menjaji arrang lako bangsa tangngia to-Yahudi dikua ammiparatui to kasalamatan lako lili'na lino.' " 48 Ia tonna sa'dingngi bangsa tangngia to-Yahudi joo, masannang ngasan na mpakala'bih kadan-Na Puang. Na memmatappa' lako Puang Isa sininna to tonapattantumo Puang Allataala la nnampa' katuoan melo te'da cappa'na. 49 Dipangpeissenanmi to kadan-Na Puang lan lili'na joo tondok. 50 Apa naarakkii to-Yahudi to tomapangka' lan joo kotana sola baine to dipekapuangngi to ssompa toda Puang Allataala, nasessai to Paulus sola Barnabas, namane' nnula'ii sola dua lan mai joo tondok. 51 Apa mpentambakanni ajena Paulus sola Barnabas. Mangkai joo malemi lako kota Ikonium. 52 Masannang to tomatappa' jio kota Antiokhia, nakuasaii Roh Allataala.

Jamanna Rasulu' 14

1 Ia to mangka jaji jio kota Antiokhia susi bang una to jaji jio kota Ikonium. Malemi Paulus sola Barnabas mentama bola passambajangan to-Yahudi namangngajahhi. Buda to-Yahudi sola to-Yunani memmatappa' lako Puang Isa. 2 Apa ia to to-Yahudi to cia' matappa' rrasi tau tangngia to-Yahudi anna kaba'cii to tomatappa' lako Puang Isa. 3 Masainni Paulus sola Barnabas torro jio. Te'da namalaja' mpangpeissenan kameloan penawan-Na Puang. Napabutti tooi Puang kumua tongan to kareba napangpeissenan, nasaba' nabenni kuasa la mpugauk tanda mejangngaran. 4 Apa sisala-salai to tau lan joo kota na sisesean. Den to rempe' lako to-Yahudi na den too to rempe' lako joo rasulu' dua. 5 Mesa' kadai to to-Yahudi sola to pekaamberanna na ia to bangsa tangngia to-Yahudi la ssessai narura batui joo rasulu'. 6 Apa ia tonna issenni joo, malaii lako tana Likaonia, natorro sikandoppi' kota Listra na kota Derbe 7 mpangpeissenan Kareba Kasalamatan jio. 8 Den mesa' muane jio kota Listra tangnaissen lumingka, sanga kupi'i simula jajinna. 9 Cumadokko bangngi mpesa'dingngi Paulus tonna mangngajahhi. Nakaje'jekki Paulus naissenni kumua matappa' joo tau anna wa'ding dipamaleke. 10 Naandongngi mangkada ngkuanni, "Ke'deh maruruhko!" Ta'pa ke'dehmi, nalumingka. 11 Ia tonna kitai tobuda to apa napugauk Paulus, napetambanni mangbasa Likaonia nakua, "Mellaomi to dewata mangrupa tau lan tangnga-tangngata'." 12 Nasangaii Zeus to Barnabas na ia to Paulus nasangaii Hermes, sanga ia mangbicara. 13 Ia to bolana dewata Zeus salean kota. Ia to imangna mbawa ba'tu pira-pira sapin muane sola bunga lako babangan kota, sanga madoangngi la mangkaroba lako rasulu' sola tobuda. 14 Nca'ce-ca'cei pakeanna Barnabas sola Paulus tonna issenni to apa la napugauk tobuda, nakinjara' tama tangnga-tangngana nakuanni, 15 "Ee kamu' sola ngasan ammimangpasusira tuu? Tolino biasa bang unakan tee susi kamu'! Iari kami' kintee la mpangpeissenanrakan Kareba Kasalamatan lako kamu', dikua ammipatorroi tee apa tangmakkeguna, ammipole lako Puang Allataala to tuo, to mpaden langi' sola lino na tasik na sininna to issinna. 16 Ia to wattu pura diboko', napupangngelohna bang Puang Allataala to sininna bangsa pada nturu' ia pakkaeloranna. 17 Apa te'dara natangmpangpekitan kalena lan mangrupa-rupa panggaukan melo susinna: naben kamu' uran jao mai langi' sola assele' padang ke wattunna omi. Naben kamu' kande, napemasannangngi tooi to penawammi." 18 Apa moi namangkada susimo joo tuu lako rasulu', ci'di'mora nate'da nakullei nnanggaii to tobuda la mangkaroba lako kalena. 19 Apa den to-Yahudi ratu jio mai kota Antiokhia na kota Ikonium narasii to tobuda, narura batui to Paulus, namane' nggararakki lako salean kota, sanga nasangai kumua matemi. 20 Apa ia tonna sirempun to tomatappa' jio ntalimbungngi, mi'cokki namentama pole' kota. Masawanna malei lako kota Derbe sola Barnabas. 21 Ia tonna mpangpeissenan Kareba Kasalamatan Paulus sola Barnabas jio kota Derbe, buda tau memmatappa' lako Puang Isa. Mangkai joo polemi lako kota Listra, tarruh lako kota Ikonium, namane' lako kota Antiokhia jio tana Pisidia. 22 Napamawatang ngasan penawanna to tomatappa' lan simesa'-mesa' kota, dikua anna tatta' to kamatapparanna. Nakuanni, "La buda kamaparrisan diolai, tamane' mentama Lino Barun-Na Puang Allataala." 23 Naangka' tooi Paulus sola Barnabas to pekaamberan lan simesa'-mesa' jamaa. Puasai sola massambajang jolo', namane' mpangbenni joo pekaamberan lako Puang to nakatappa'i. 24 Mangkai joo mpatarruhmi kalingkanna nnola tana Pisidia lako tana Pamfilia. 25 Ia tonna mangka mpangpeissenan kadan-Na Puang jio kota Perga malei lako kota Atalia, 26 namane' mangkappala' pole lako kota Antiokhia jio tana Siria. Iamo joo kota Antiokhia nanii mpamula kalingkanna tonna tee. Ia toomo to jamaa jio mpassambajanganni, dikua naampaii Puang Allataala lan jamanna to puramo najama too. 27 Ia tonna ratumo lako, nasuai nasirempun to jamaa jio kota Antiokhia. Nacuritan ngasanni matumbai Puang Allataala ntulungngi nawa'ding njama jamanna. Nacuritan tooi matumbai Puang Allataala ntulungngi anna ia to bangsa tangngia to-Yahudi memmatappa' lako Puang Isa. 28 Masainni Paulus sola Barnabas torro jio sola to tomatappa'.

Jamanna Rasulu' 15

1 Ba'tu pira-pira tau ratu jio mai tana Yudea male lako kota Antiokhia nnajahhi tomatappa' nakua, "Te'da mikullei dipasalama', ke te'dai midisunna' situru' to ada' nabenki' Nabi Musa." 2 Apa cia' lalo Paulus sola Barnabas ntarimai joo pangngajahna. Katampakanna disuai sola dua na ba'tu pira-pira tomatappa' laen jio mai jamaa male de' kota Yerusalem la sipangkadaii joo sola rasulu' na pekaamberan laen jio. 3 Nasolanni jamaa ratu lako salean kota, namane' tarruh nnola tana Fenisia sola tana Samaria to nanii ncuritai kumua denmo to bangsa tangngia to-Yahudi mengkatoba' na matappa'. Gaja napumarioi to tomatappa' jio ntuu joo. 4 Ia tonna ratumo de' kota Yerusalem, natarima melo jamaa sola rasulu' na pekaamberan laen. Nacuritan ngasanni matumbai Puang Allataala ntulungngi nawa'ding njama jamanna. 5 Apa den to-Farisi to memmatappa'mo mengke'deh nakua, "Ia to tau jio mai bangsa laen to matappa'mo parallu disunna', nadisua nturu' atoranna Nabi Musa." 6 Sirempunmi to rasulu' sola to pekaamberan mbicarai to ianna joo. 7 Gaja sainni ssite'gehhi bangngi joo passalan, namane' ke'deh Petrus nakua, "Ee todipusile'to! Na miissen kumua Puang Allataala mpileina' tonna tee lan mai tangnga-tangngami la mpangpeissenan Kareba Kasalamatan lako bangsa tangngia to-Yahudi, dikua anna sa'dingngi nakatappa'i. 8 Natarruh Puang Allataala to penawanna tau. Namangkamo napamanassa kumua natarimamo to bangsa tangngia to-Yahudi. Iamo napamanassa tonna benni Roh Allataala susi to mangka nabenki'. 9 Te'da napasilaenanki' Puang Allataala na bangsa laen, nadampangan too ke matappa'i. 10 Ianna susi joo, matumbai milambali-bali Puang Allataala male mpapassanni atoran na pemali mabanda' tee tomatappa', na kita' una sola tojolota' tangdikulle mpugaukki? 11 Sibalikanna takatappa'i kumua iara tadipasalama' nasaba' pangkamasean-Na Puang Isa, susi toomi to ia." 12 Sikammatan ngasan to tau sirempun jio, namane' mpesa'dingngii to Barnabas sola Paulus ncurita pole'i matumbai Puang Allataala ntulungngi nawa'ding mpugauk mangrupa-rupa tanda mejangngaran lan tangnga-tangngana bangsa tangngia to-Yahudi. 13 Ia tonna mangkamo sola dua mangkada, nakuamo Yakub, "Ee todipusile'to, mipesa'dingngipi la mangkadana'! 14 Mane' mangkanna nacurita Simon Petrus kumua napangpekitanmo Puang Allataala to kameloan penawan-Na lako bangsa tangngia to-Yahudi, tonna mpilei umma'-Na lan mai tangnga-tangngana tonna tee. 15 Susi joo to mangka napau nabi. Sanga den diuki' lan Sura' Allataala susi tee: 16 Nakua Puang Allataala, 'La ratu pole'na', angkupake'deh pole'i to bolana Raja Daud mangka ro'pok. La kupake'deh pole'i, ke mangkai kusullei to maraponamo, 17 dikua naangahna' sininna bangsa tangngia to-Yahudi to mangkamo kupilei menjaji taung-Ku'.' Susi joo kadan-Na Puang, to la mpugauk ngasanni, 18 to mangka napangpeissenan tonna anu'." 19 Nakuapa Yakub, "Jaji, ia ke aku', danggi'mo tasussaii to bangsa tangngia to-Yahudi, to mpangbenmo kalena lako Puang Allataala. 20 Apa paralluki' ngkiringanni sura' mpakainga'i, dikua danggi' nakande kande diharangan, susinna moda', rara na kande mangka dipassompan lako dewata, iarika danggi' namanggauk sala. 21 Susimi tee, nasaba' mellao jionapa mai nadipangpeissenanmo to atoranna Nabi Musa lan simesa'-mesa' kota ratu lako too allo, ianna Allo Katorroan dibaca omi lan bola passambajangan." 22 Mangkai joo too, mesa' kadami to rasulu' sola pekaamberan laen na jamaa jio kota Yerusalem, na mpilei dua tau todikasiri' lan tangnga-tangngana nadisua male lako kota Antiokhia sola Paulus na Barnabas. Ia joo tau disanga Silas na Yudas to disanga too Barsabas. 23 Den too sura' dibenni, to nakua kumua: "Kamu' sola ngasan to jio mai bangsa laen to kipusile'tomo, to torro jio kota Antiokhia, tana Siria na Kilikia. Sallangki' sola ngasan kami' rasulu' sola pekaamberan to mipusile'to. 24 Den kisa'ding kumua den ba'tu pira-pira to kisolan inde' male mati' nnajahhi sala kamu', mpapussak penawammi ammibata apa te'dara nakami' ssuai mpugaukki susi joo. 25 Iamo joo angkimesa' kada mpilei Yudas sola Silas, kisuai male mati' sola Barnabas na Paulus to kipakamoja', 26 na ntangga' toomo sunga'na sola dua, nasaba' Puangta' Puang Isa Almaseh. 27 Ia to Yudas sola Silas iamo la mpauan kamu' issinna tee sura'. 28 Nakabudai Roh Allataala na moi kami' to kumua danggi' midipapassanni atoran sola pemali to la'bi mabanda'na na ia to parallunna. 29 Iamo joo danggi' mikandei to kande diharangan, moda', rara na kande mangka dipassompan lako dewata, iarika danggi' mimanggauk sala. Ianna te'damo mimanggauk susi joo, battuananna manggauk melomo kamu'. Anggemi ntee, pada salama'ki'!" 30 Ia tonna pada mangkamo sisalama', malemi Yudas sola Silas lako kota Antiokhia. Nasua ngasanni to tomatappa' sirempun, nabenni joo sura'. 31 Gaja sannangngi sola ngasan tonna mangka mbacai, nasaba' mangpakatanai. 32 Ia joo Yudas sola Silas nabi todai, masainni sipangkada-kada sola tomatappa' jio kota Antiokhia mpaendek sumanga'na anna tatta' matappa'. 33 Ia tonna ba'tu pira-piramo masainna sola dua torro jio, naeloranmi tomatappa' pole lako to tossuai. Nakuan tooi naparatuanni sallangna lako. 34 Apa torro bangngi ia Silas jio kota Antiokhia. 35 Ba'tu pira-pira todai masainna Paulus sola Barnabas torro jio kota Antiokhia. Buda tau laen nasolan mangngajahhi sola mpangpeissenan too Kareba Kasalamatan. 36 Te'da namasai joo too nakuanni Paulus to Barnabas, "Melo ke male pole'ki' ngkitai to tomatappa'mo lako Puang Isa lan sininna kota to mangka tanii mpangpeissenan kadan-Na, antaissenni ba'tu la matumba-tumba unai." 37 Madoangngi Barnabas la ssolanni to Yahya to disanga too Markus, 38 apa te'da namadoang Paulus ke disolanni, sanga pole boko'i tonna jio tana Pamfilia, te'da napatarruh jamanna. 39 Sipekkami Paulus na Barnabas, anna te'damo namale sola. Ia to Barnabas nakuanni to Markus, "Tamale sola mangkappala' lako pulau Siprus." 40 Apa ia to Paulus, Silas to napilei nasolan male, tonna mangka to jamaa mpassambajanganni, dikua naampaii Puang Allataala. 41 Malei llilingngi tana Siria na Kilikia mpamawatang jamaa.

Jamanna Rasulu' 16

1 Mpatarruhmi kalingkanna Paulus lako kota Derbe na lako kota Listra. Den tomatappa' lako Puang Isa jio disanga Timotius. Ia to indona to-Yahudi na tomatappa'mo lako Puang Isa, na ia to ambe'na to-Yunani. 2 Ia to tomatappa' jio kota Listra na kota Ikonium nakasiri' to Timotius. 3 Nakabudai Paulus ssolanni lan kalingkanna, iamo joo napangpesunnatanni nakua natarimai to-Yahudi. Nasaba' ia to to-Yahudi jio naissen ngasan kumua to-Yunani to ambe'na. 4 Napadami to kota nanii male Paulus sola solana, napauan ngasan to tomatappa' to kara'tasan pura nasitujui rasulu' sola pekaamberan pira' jio kota Yerusalem. Napupangngingaran meloi kumua naturu'i joo kara'tasan. 5 Susimi joo namemmawatang kamatapparanna to Tosarani na allo-allo sakerangngan-rangnganna too. 6 Nnola jioi tana Frigia na Galatia to Paulus sola solana, nasaba' te'da naeloranni Roh Allataala mpangpeissenan kadan-Na jio propinsi Asia. 7 Ia tonna mentamamo tana Misia, madoangngi la tarruh re' propinsi Bitinia, apa naanggaii Roh-Na Puang Isa. 8 Jaji mangpatarruh bangmi jio tana Misia male do' kota Troas. 9 Ia tonna bonginna nakitami Paulus lan pengkitanna den mesa' to-Makedonia ke'deh jio ntambaii nakua, "Lamban kamu' mai mitulungkan!" 10 Ia tonna mangkamo ngkitai susi joo, ta'pa sadiamokan male lamban lian propinsi Makedonia. Kikatappa'i lan penawangki' kumua Puang Allataala Ia ssuakan mpangpeissenan Kareba Kasalamatan lako to tau jio. 11 Malemokan jio mai kota Troas kilamban lian pulau Samotrake na masawanna ratukan sambali' kota Neapolis. 12 Kimane' tarruh lako kota Filipi jio kabupaten nomoro' mesa' jio propinsi Makedonia, kitorro jio ba'tu pirang-pirang allo. Ia to kota Filipi parentanapa to-Roma. 13 Ia tonna Allo Katorroan kimale do' randan sa'dan salean babangan kota, nasaba' kisangai iamo joo nanii sirempun to-Yahudi massambajang. Cumadokkomokan sipangkada-kada to baine sirempun jio. 14 Den mesa' pangdangkang kaen ungu jio, disanga Lidia to-Tiatira, to ssompamo Puang Allataala. Ia tonna sa'dingngi to pangngajahna Paulus, napakedoi Puang to penawanna natarimai, 15 anna dijio' ngasan sintong repokkona. Ia tonna mangkamo dijio', napeta'dakan nakua, "Ee, kupusile'to, ia ammisangai kumua matappa' tonganmo' lako Puang Isa, mileppangpa dikka' mangbongi jio bolaku'." Mengkamase-mase tonganni angkitorro mangbongi. 16 Den pissen tongkimale pole' lako joo nanii sirempun to-Yahudi massambajang, kisitammu mesa' baine kaunan. Ia joo baine nakuasai setang to pakita-kita, naissen jolo to apa la jaji. Napupealan tonggo puangna joo jamanna ngkitan dalle'na iarika totona tau. 17 Meundi tarruh bang lako kami', metamba nakua, "Ee! Ia tee mai tau kaunan-Na Puang Allataala to kaminang matande. Ratui mpauan kamu' umbo dikua ammisalama'." 18 Ba'tu pirang allo masainna metamba-tamba bang susi joo. Ia tonna marossomo Paulus, messailei nakuanni joo setang, "Kuasan-Na Puang Isa Almaseh kupupangngewa, kusuako messun lan mai ntee baine!" Ta'pa messun bang unami lan mai kalena. 19 Ia tonna issenmi to puangna kumua ta'dei to pangngangaran doi'na, najokkomi to Paulus sola Silas, nagararak duai lako pangra'tasan kara-kara. 20 Ia tonna pupangngolomi lako tomangparenta Roma, naparapa'i nakua, "To-Yahudi tee tau. Mpaden rongka lan kotata'. 21 Nasua to tau mpugauk ada' sisala atoranta' kita' to-Roma. Te'da kita' tawa'ding ntarimai iarika nturu'i joo ada'." 22 Naluruimi tobuda to Paulus sola Silas, napangperabakanni tomangparenta to pakeanna sola dua, namane' mpangperambianni. 23 Ia tonna mangkamo dipemoncongngi dipekaju, dipatamami pangtarungkuan sola dua. Dikuan to kapala pangtarungkuan napemajagai tonganni. 24 Iamo joo nasangkalai, napatamai kamara' lanna lalo liu. 25 Mbai tangnga bongi namassambajang Paulus sola Silas anna makkelong mpuji Puang Allataala. Napesa'dingngii to tonasolan ditarungku to kelongna. 26 Tangdikalannai anna nino tonggo, na moi to pondasi pangtarungkuan tiroge too. Ta'pa titimbak ngasan to ba'ba na tibuka ngasan too to pepumpungna to toditarungku. 27 Ia tonna mi'cikmo joo kapala pangtarungkuan, nakitai to ba'ba titimbak ngasan, nnonokki pa'dangna la mbuno kalena, sanga nasanga kumua la'pah ngasanmi to toditarungku. 28 Apa metambai Paulus ngkuanni, "Danggi' mibuno kalemi! Inde' ngasan unakan!" 29 Mpeta'dami palita joo kapala pangtarungkuan, nalari mentama seka'-seka' mbe'beh, suju' jio olona Paulus sola Silas. 30 Nasolanmi messun nakutanaii, "Tabe' kita', apara sipato' la kupugauk, angkusalama'?" 31 Napebalii Paulus sola Silas nakua, "Katappa'iko Puang Isa! Musalama' la iko, la ia to repokkomu!" 32 Napamanassanni Paulus sola Silas to karebanna Puang Isa lako joo kapala pangtarungkuan na lako sininna repokkona. 33 Ia bang unamo joo bongi nasolanni kapala sola dua, nabaseii to kojongna. Ta'pa dijio' bang unami sintong repokkona joo kapala pangtarungkuan. 34 Mangkai joo nasolanmi to Paulus sola Silas lako bolana natoratui. Gaja sannangngi sola repokkona, nasaba' matappa'mi lako Puang Allataala. 35 Masawanna melambi', ia to tomangparenta ssuami taunna male mpauanni to kapala anna dila'paran to Paulus sola Silas. 36 Napatarruhhi kapala pangtarungkuan lako Paulus, nakua, "Tabe', napangpesuanmo tomangparenta lla'paran kamu'. Jaji wa'dingmo kamu' pole too. Paela'-ela' kamu' lako lalan." 37 Apa nakuanni Paulus tuu lako taunna tomangparenta, "Tabe', to-Romakan tee. Te'da bangpa kidibicara, angkidipekajumo jio olona tobuda, kidipatama pangtarungkuan. Na ia tee too la napasun buni omokan? Te'da kimadoang! Kuanni tuu mati' tomangparenta na ia ratu lla'parankan." 38 Napauanni joo lako tomangparenta. Ia tonna issenni kumua to-Roma pale' to Paulus sola Silas, malaja'mi. 39 Anna male lako Paulus sola Silas meta'da dampang, namane' ssolanni sola dua lan mai pangtarungkuan, napeta'da tulungngi namessun lan mai kota. 40 Ia tonna messunmo lan mai pangtarungkuan sola dua, malei lako bolana Lidia. Napamawatang ngasan to tomatappa' jio, namane' male sola dua.

Jamanna Rasulu' 17

1 Mpatarruhmi kalingkanna Paulus sola Silas nnola jio kota Amfipolis sola Apolonia, naratu lako kota Tesalonika. Den bola passambajangan to-Yahudi jio. 2 Malemi Paulus lako ntuu joo bola passambajangan susi biasanna, pentallun Allo Katorroan situru'-turu' nanii ncuritai sola tau to issinna Sura' Allataala. 3 Naajahhii napabuttian tooi mpake Sura' Allataala, kumua ia to Raja Mangpasalama' to napau Sura' Allataala, la mate Ia, natuo pole' jio mai kamatean. Nakuapa Paulus, "Raja Mangpasalama' to Puang Isa kupangpeissenan lako kamu'." 4 Ba'tu pira-pira to tau memmatappa' na menturu' lako Paulus sola Silas. Buda toda to-Yunani, to mangngagama to-Yahudimo, memmatappa', na budapa to baine todipekapuangngi. 5 Iamo joo namasere ati to to-Yahudi, narempun ba'tu pira-pira tomasa'ga' jio mai to sumongge'-mongge' bang jio pasa' anna mpaden rongka lan kota. Simaleanmi lako bolana Yason nnangah Paulus sola Silas la napangngolo lako kasirempunan tobuda, 6 apa te'da naampa'i. Iamo joo nasirui'-rui'ii to Yason na ba'tu pira-pira tomatappa' laenna lako olona tomangparenta lan kota. Napetambanni nakua, "Ia tee mai tau ntampa bang ia ricu, moi umbo nanii! Na mangten-ten too allo ratumi ntee mai kotata', 7 napupangbongii Yason jio bolana. Ia tee tau te'da nakasiri'i to parentana Tomaraja Roma, sanga nakua ia kumua, denpa ia raja laen disanga Puang Isa." 8 Ia joo kadanna mpamarongka tobuda sola tomangparenta lan joo kota. 9 Nasuami tomangparenta to Yason sola to tomatappa' pira' mbajah doi' napuboro'. Mangkai joo namane' dila'paran. 10 Ta'pa nasua bang unami tomatappa' to Paulus sola Silas namale bongi lako kota Berea. Ia tonna ratumo lako, malei lako bola passambajangan to-Yahudi. 11 Ia to to-Yahudi jio kota Berea la'bi melo ia penawanna na ia to to-Yahudi jio kota Tesalonika. Masannang ia ssa'ding karebanna Puang Isa, na allo-allo bang mbaca Sura' Allataala, madoang la nnissenni kumua sicoco'raka pangngajaranna Paulus. 12 Budai to-Yahudi matappa' lako Puang Isa, na buda toda to-Yunani todipekapuangngi memmatappa' la baine la muane. 13 Ia tonna sa'dingngi to-Yahudi jio kota Tesalonika kumua napangpeissenan too Paulus to kadan-Na Puang Allataala jio kota Berea, male todami lako rrasii na pamausa' tobuda jio. 14 Ta'pa nasolanmi tomatappa' to Paulus lako randan tasik, apa torro bangngi ia Silas sola Timotius jio. 15 Ia tonna mangkamo ssolan Paulus ratu lako kota Atena, polemi to tomatappa' lako kota Berea, napasanni Paulus to Silas sola Timotius namadoi' undi lako. 16 Ia tonna tajan bangmi Paulus to Silas sola Timotius jio kota Atena, masussami penawanna ngkitai joo kota ponno tau-tau dewata. 17 Iamo joo nasipangkadaii Paulus lan bola passambajangan sola to-Yahudi na tolaen to ssompa toda Puang Allataala. Susi too nasipangkadai to tonasitammuan jio pasa' keallo-keallo. 18 Sihakiki tooi sola guru to nturu' pangngajaranna Epikuros na Stoa. Denni to mangkada nakua, "Apara la naissen tee tau! Sangkanuku malotongra to paissenna, apa buda kadari!" Ba'tu pira-pira tolaen nakua, "Susi ia to mpangpeissenan dewata jio mai tondok laen." Ia namangkada susi joo, nasaba' ia to Puang Isa na katuoanna pole' tolino jio mai kamatean napangpeissenan Paulus. 19 Jaji nasolanni to Paulus lako kasirempunan jio buntu Areopagus nakuanni, "Madoangkan nnissenni to pangngajaran baru mipangpeissenan. 20 Nasaba' ia to apa mipau makalaen-laen lako pangpesa'dingki'. Na madoangkan nnissenni to battuananna." 21 Ia to to-Atena sola tomentama jio, gaja nakabudai mmatean allona mpesa'dingngi sola mbicarai to apa-apa baru. 22 Ia tonna ke'deh Paulus jio olona tosirempun jio buntu Areopagus, mangkadai nakua, "Tabe' lako kamu' to-Atena! Budamo to kukita mpamanassai kumua pangngagama ta'da' kamu' sola ngasan. 23 Nasaba' ia tongkumale lumingka llelei tee kotami angkukitai to apa misompa, den too mesa' ngenan pangkaroban kukita nanii pangnguki' kumua, 'Lako puang to tangdiissen.' Jaji ia to apa misompa te'da miissenni, iamo la kupangpeissenan lako kalemi. 24 Puang Allataala to mangka mpadenni tee lino sola issinna, Iamo Puangna langi' na lino. Te'da Ia natorro lan bola dewata panggaraga tolino. 25 Te'da too Ia naparallui pangtulung tolino, butung to den kakuranganna, nasaba' Iara mben katuoan, penawa na sininna kaparalluanna tolino. 26 Mesa'ri tau nanii mpaollongngi to sininna rapu tau ntorroi tee kuli'na padang. Ia toomo mpattantuanni pentaunan mellao jiona mai na pangnganggeanna to la nanii mari'pih. 27 Iamo napaden Puang Allataala to tolino, nakua anna angahhi naampa'i. Apa sitonganna te'da namambela jio mai kale simesa'-mesa'ta'. 28 Ia mpadenki', mpatuoki', mpapundiuki', susi to pura napau too tomaccammi nakua, 'Ia tee kita' bati'na todaki' Allataala.' 29 Te'da tawa'ding mpapadai tau-tau bulawan, ba'tu salaka, ba'tu tau-tau batu, panggaraga to tomacca, nasaba' bati'naki' Allataala. 30 Te'damo napallan penawai to wattu katangpaissenanta', apa ia tee too nasua ngasan to tau lan lino mengkatoba' jio mai dosana. 31 Nasaba' mangkamo napattantuan mesa' allo la dinii rra'tahhi to panggaukanna to tolino situru' kamarurusan-Na. Denmo mesa' tau napilei la mpugaukki joo. Mangkamo napatuo pole' joo tau jio mai kamatean, dikua anna manassa kumua Iamo napilei." 32 Ia tonna sa'dingmi tau tee kadanna Paulus, denni to mpetawaii, nasaba' te'da nakatappa'i kumua la tuo pole' to tau jio mai kamatean. Den too to kumua, "Madoang unapakan ssa'ding pole'ko mpaui tee." 33 Mangkai joo messunmi Paulus lan mai joo kasirempunan. 34 Apa den toda to rempe' lako Paulus, nasaba' matappa' lako Puang Isa, susinna Dionisius sala mesa'na tongkapalai kasirempunan jio buntu Areopagus, na mesa' baine disanga Damaris, na ba'tu pirapa to laenna.

Jamanna Rasulu' 18

1 Mangkai joo mellelemi Paulus jio mai kota Atena lako kota Korintus. 2 Den mesa' to-Yahudi jio nasitammuan disanga Akwila, to-Pontus. Mane' ratunna jio mai propinsi Italia sola balinna disanga Priskila. Ia namellele lako kota Korintus, nasaba' nasua ngasan Tomaraja Klaudius to to-Yahudi messun jio mai kota Roma. Malei Paulus ssikitanni sola dua, 3 natorro jio namangjama sola, sanga susi to jamanna pada manggaraga tenda. 4 Apa ianna Allo Katorroan omo, male omi Paulus sipangkada-kada to-Yahudi sola to-Yunani jio bola passambajangan, dikua namatappa' lako Puang Isa. 5 Ia tonna ratumo Silas sola Timotius jio mai propinsi Makedonia, ia mandamo napugauk to mpangpeissenan kadan-Na Puang Allataala. Napamanassai lako to-Yahudi kumua, "Raja Mangpasalama' to Puang Isa, to pura napau Puang Allataala tonna anu'." 6 Apa tuli naewali tau, nacapa' tooi. Iamo joo naperrimbakanni to pakeanna mpangngingaranni to kasalanna tuu lako tau. Nakua mangkada, "Ia ammiden masolang undinna, tangngiamo salaku'! Lesso' suru'mo' aku'! Mammula tee too la male lakomo' bangsa tangngia to-Yahudi." 7 Nasalaimi Paulus tuu lako tau, namale lako bolana Titius Justus jio siandah bang una joo bola passambajangan. Ia joo Titius Justus bangsa tangngia to-Yahudi, apa ssompamo Puang Allataala. 8 Na ia to kapala bola passambajangan disanga Krispus matappa'i ia sintong repokkona lako Puang Isa. Na buda toopa to-Korintus laenna to mpesa'dingngi pangngajahna Paulus matappa' lako Puang Isa, nadijio' sola ngasan. 9 Den sangbongi nakua Puang lako Paulus lan pengkitanna, "Danggi' malaja'! Pangpeissenan tarruhhi to kadang-Ku', danggi' mukammatanni, 10 nasaba' kusolan tarruhko. Moi mesa' tau te'da ngkullei la nnapako, sanga buda taung-Ku' lan tee kota." 11 Iamo joo natorro Paulus sangtaun annan bulanna jio kota Korintus mpangpangngajaran kadan-Na Puang Allataala. 12 Ia tonna Galio gubernur jio propinsi Akhaya, mesa' kadai to to-Yahudi nnewa Paulus, najokkoi nabawai lako bola pangra'tasan kara-kara. 13 Naparapa'i nakua, "Tabe' kita', ia tee tau male bang nnajahhi tobuda nakua nassompa Puang Allataala to tangsituru' atoranna Nabi Musa!" 14 Ia tonna la mpebalii Paulus, ta'pa mangkadai Gubernur Galio lako to-Yahudi nakua, "Ee, kamu' to-Yahudi! Ia ke la kasalan ba'tu kagajatan miparapasanni tee tau, la sipato'na' sabbara' mpesa'dingngii. 15 Apa ia tee kasipekkan kadara sola sanga na atoranmi kamu'! Jaji kamu' bangmo ssipangkadaii. Te'da kulambicarai to apa susi tee." 16 Naula'ii lan mai bola pangra'tasan kara-kara. 17 Najokkoi tobuda to Sostenes, kapala bola passambajangan, natundunni jio olona bola pangra'tasan kara-kara. Apa te'da napuinawai Gubernur Galio. 18 Ba'tu pirang allopa Paulus torro jio kota Korintus, namane' mangparamisi, sanga la mpatarruhmi kalingkanna. Ia to akkattana la male lakoi tana Siria mangkappala'. Apa male lakopi kota Kengkrea jolo' sola Priskila na Akwila. Jiomi nanii mangpecakkuru' Paulus, nasaba' nadete'mi wattunna ngganna'i nazirna. Mangkai joo malemi sola tallu mangkappala' lako kota Efesus. 19 Ia tonna ratu lako kota Efesus, torromi Priskila sola Akwila jio, namale Paulus la mpatarruh kalingkanna. Apa liupi jolo' jio bola passambajangan sipangkada-kada to-Yahudi. 20 Napeta'dai kumua namasai-sai torro sola, apa te'da nasitujuii. 21 Apa moi nasusi joo, ia tonna la mangnguju lako tana Siria mpatorroi pepasan nakua, "Ianna puelohhi Puang Allataala, la ratu unapa'." Mangkanna napau susi joo, malemi mangkappala' jio mai kota Efesus. 22 Ia tonna menggantananmo jio kota Kaisarea, tarruhmi de' kota Yerusalem la ssitammuanni to jamaa jio. Mangkai joo tarruh pole' omi de' kota Antiokhia jio tana Siria. 23 Ba'tu pirang alloi torro jio, namale lako tana Galatia na Frigia mpamawatang penawanna sininna tomatappa' jio. 24 Den mesa' to-Yahudi jaji jio kota Aleksandria disanga Apolos ratu jio kota Efesus. Macca mangkada joo tau, napahang melo too to issinna Sura' Allataala. 25 Mangkamo diajahhi pangngajaran-Na Puang Isa. Liwa' masumanga' mpangpangngajaran tonganni, moi namane' pangjioranna mandara Nabi Yahya naissen. 26 Barani mangngajahhi lan bola passambajangan. Ia tonna sa'dingmi Priskila sola Akwila to pangngajahna, nasolanni lako bolana, anna la'bi mpamanassanni to pangngajaran-Na Puang Isa. 27 Ia tonna mangngatta Apolos la male lamban lian tana Akhaya, mangnguki' sura'i to tomatappa' jio kota Efesus mpauanni to tomatappa' jio tana Akhaya dikua natarima meloi to Apolos. Na ia tonna ratumo lako, makkeguna tongan to pangtulungna lako tomatappa', nasaba' pangkamasean-Na Puang Allataala. 28 Natalo kadai to to-Yahudi jio olona tobuda ke site'gehhi, nasaba' kamatongkoanna mangkada. Napabuttii mpake Sura' Allataala kumua Raja Mangpasalama' to Puang Isa, pura dipau tonna anu'.

Jamanna Rasulu' 19

1 Ia tonna jio unapa kota Korintus to Apolos, malei Paulus llingkai ba'tu pira-pira tondok arannai ratu lako kota Efesus. Ia tonna ratumo jio, den ba'tu pira-pira tomatappa' lako Puang Isa nasitammuan. 2 Nakutanaimi nakua, "Ee, todipusile'to! Denmoraka Roh Allataala mitarima tommimatappa' lako Puang Isa?" Napebalii nakua, "Te'dapa. Te'da toopa naden kisa'ding kumua den pale' Roh Allataala." 3 Nakutanai pole' omi nakua, "Ia nasusi tuu, pangjioran apara to dijioran kamu'?" Napebalii nakua, "Pangjioran to napangngajaran Nabi Yahya." 4 Nakuamo Paulus, "Ia to pangjioranna Nabi Yahya mpamanassai kumua ia to todijio' mengkatoba'mo jio mai dosana. Apa napangpeissenan tooi Nabi Yahya lako to-Yahudi kumua la nakatappa'i to Puang Isa, mane' la ratu." 5 Ia tonna sa'dingmi joo, dijio'mi mpau sangan-Na Puang Isa. 6 Ia tonna palullungngi pala'na Paulus joo tau, nakuasaimi Roh Allataala, namangkada mpake mangrupa-rupa basa mejangngaran to nabenni Roh Allataala na mparatu too pepasan-Na Puang Allataala. 7 Mbai denni sangpulo dua tau budanna. 8 Te'da namalaja' Paulus sipangkada-kada tarruh bang tuu lako tau lan bola passambajangan to-Yahudi jio kota Efesus tallung bulan masainna. Napamanassanni umbo nakua menjaji taun-Na Puang Allataala lan kaparentan-Na. 9 Apa denni ba'tu pira-pira to membattuk cia' matappa'. Nacacca mate-matean to pangngajaran-Na Puang Isa jio olona to tosirempun. Iamo joo nasalaii Paulus sola to tongkatappa'imo Puang Isa, namale lako passikolan Tiranus nanii nnajahhi tau keallo-keallo. 10 Duang taun masainna nanii mangngajahhi tarruh bang susi joo, arannai ssa'ding ngasan kadan-Na Puang to tontorroi propinsi Asia, la to-Yahudi la to-Yunani. 11 Puang Allataala mbenni kuasa to Paulus mpugauk tanda liwa' mejangngaran. 12 Ianna dibawan tomasaki to saputanganna iarika kaen puramo napake Paulus, malagahhi, napessunni tooi setang. 13 Den ba'tu pira-pira to-Yahudi pangjampi-jampi, male bang llelei tondok, nnula'i setang lan mai kalena tau. Nacoba toda ia mpau sangan-Na Puang Isa la nnula'i setang, nakua, "Sangan-Na Puang Isa to napangpeissenan Paulus kupau, messunko!" 14 Den pitu pea muane anakkana Skewa kapala imang to-Yahudi mpugauk todai susi joo. 15 Apa nakua ori joo setang, "Ee, kuissen to Puang Isa, moi Paulus kuissen too, apa ia to kamu', inda kamu'?" 16 Ta'pa lumurumi joo tonatamai setang, nakarangkangngi sola ngasan sanga nacau' bukui, arannai sikinjarasan lan mai bola sikojong-kojongan, na mangkale-kale too, nasaba' narabakkii to pakeanna lan mai kalena. 17 Nasa'ding ngasan to-Yahudi sola to-Yunani to torro jio kota Efesus joo, namemmalaja'. Sadipakala'bih-la'bihnami to Puang Isa. 18 Buda tomatappa'mo lako Puang Isa ratu mangngaku jio olona tobuda, nnakui panggaukan salana to wattu pura diboko'. 19 Na ia to tobiasamo mpake ule-ule, narempun ngasanni to sura'na, nasumpunni jio olona tobuda. Den agi-agi allian limang pulo sa'bu pera' ke dirempun ngasanni. 20 Susimi joo lalanna nasakaissen-issenanna to kadan-Na Puang, nasabuda-budanna tonturu'i. 21 Ia tonna mangkamo joo, madoangmi Paulus male lako kota Yerusalem nnola propinsi Makedonia sola propinsi Akhaya, nakua, "Ia angkumangkamo liu jio kota Yerusalem, mane'ra' tarruh lako kota Roma." 22 Nasuami to Timotius sola Erastus to mbalii, najolo lako propinsi Makedonia. Apa torro unapi ia Paulus ba'tu pirang-pirang allo jio propinsi Asia. 23 Agi-agi ia joo wattu naden kamarongkan la'da' jio kota Efesus, passalan pangngajaran-Na Puang Isa. 24 Den mesa' pande salaka disanga Demetrius nggaraga bola-bola dewata napasusi bola dewata Artemis. Gaja buda panglolonganna to tomangjamanna. 25 Iamo joo narempunni to tomangjamanna sola pande salaka laen, nakuanni, "Ee, kamu' to kupusile'to! Miissen kumua buda panglolonganmi. 26 Na mikita na misa'ding toomo to apa napugauk Paulus. Nakua ia kumua, ia to dewata nagaraga tolino, te'da lalo nasipato' la disompa. Na budamo tau napalao sala ngkatappa'i pangngajaranna, te'da na inde' manda kota Efesus, apa sala-sala lan lili'na propinsi Asia. 27 Cilakanna te'damo nalalolo' tee jaman pangngangaranta', na te'da na ia manda joo, moi bola dewata Artemis te'damo nakasiri'i tau la nasilese-leseimira. Na dewata Artemismo to kaminang mala'bihna nasompa sininna tau lan propinsi Asia na lan lili'na lino." 28 Ia tonna sa'dingmi susi joo, malussu ngasan daun talinganna to tau, napissennii metamba nakua, "Mala'bih Artemis, dewatangki' to-Efesus." 29 Marongka ngasanmi to tau lan joo kota. Najokkoi to Gayus sola Aristarkhus, nagararakki tama panggoloran lan joo kota. (Ia to Gayus sola Aristarkhus to-Makedonia nasolan Paulus lan kalingkanna.) 30 Madoangngi Paulus mentama toda anna sipangkada-kada, apa naanggaii to tomatappa' lako Puang Isa. 31 Ba'tu pira-pira tomapangka' jio propinsi Asia siissenna Paulus, mesua mpauanni kumua danggi' namale tama panggoloran. 32 Sirongka bang toomo to tau jio. Simeoli-olian te'da nadiissen ulunna pollo'na to napau, nasaba' budai to te'da naissenni apa to nasirempunni. 33 Denni to ssangai kumua Aleksander to passabatanna, sanga ia naturrun to-Yahudi lako olo. Nnangka'mi limanna Aleksander napupangngimba-imbai meta'da nadiben wattu mpaui to sitonganna. 34 Apa ia tonna kitai kumua to-Yahudi bang una, ta'pa simeolian pole' omi mbai duang jang masainna nakua, "Mala'bih Artemis dewatangki' to-Efesus." 35 Katampakanna juru tulisi' kotamora mpakamma'i to tau. Nakuanni, "Ee, kamu' to-Efesus! Sininna tau lan lino nnissenni kumua ia tee kota Efesus nnampui bola dewata Baine Artemis to kaminang matonggo, susi toomi to tau-tau batunna polloh jao mai langi'. 36 Moi mesa' tau te'da ngkullei nte'gehhii joo. Iamo joo rapa' melo kamu', danggi' mimesa mangpugaukkuna bang. 37 Ia tee mai tau misolan mai, te'da bangra to mbokoi bola dewata ba'tu ncapa' dewatanta'. 38 Ianna den tau la naparapa' Demetrius sola tomangjamanna, la nabawa lakoi bola pangra'tasan kara-kara. Tuli jio bang to taunna gubernur sadia bang too ntarimai. 39 Apa ianna denpa to laenna miangah penawa, la mipau jio kasirempunan tobuda situru' atoran. 40 Nasaba' wa'ding tapusabu' to apa jaji tee allo. Wa'dingki' disanga tonnewa tomangparenta, nasaba' te'da bang pentoeanta' la ntongananni tee kamarongkan." 41 Ia tonna mangka mpangngingaranni, nasuami juru tulisi' kota pole to tobuda.

Jamanna Rasulu' 20

1 Ia tonna rapa'mo to tomarongka jio kota Efesus, nasuami Paulus sirempun to tomatappa' jio napamasumanga'i. Meta'da dampangmi, namane' tarruh lian propinsi Makedonia. 2 Napasilelei to tomatappa' jio, naajahhi buda pangpangngajah dikua namasumanga', namane' tarruh sau' tana Yunani. 3 Tallung bulanni masainna torro jio. Ia tonna madoang la mangkappala' lamban lian tana Siria, naissenmi kumua den to-Yahudi mesa' kadamo la mbunoi. Iamo joo napattantui la male lako propinsi Makedonia nnola gantanan. 4 Den ba'tu pira-pira tau nasolan: Sopater to-Berea anakkana Pirus, Aristarkhus na Sekundus to-Tesalonika, Gayus to-Derbe, Tikhikus na Trofimus to-Asia, na Timotius. 5 Jolo ngasanmi lako kota Troas nnampaikan. 6 Ia tonna mangkamo pangramean ngkande Roti Tangkeragi, mangkappala'mokan jio mai kota Filipi. Limang allo mangkanna joo sirempun pole'mokan jio kota Troas. Sangminggukan torro jio. 7 Ia tonna bongi Aha' sirempunkan kumande sola mpugauk Kakumandean Macero. Mangkada tarruhhi Paulus mangngajahhi ratu lako tangnga bongi, sanga madoangngi la male masawanna. 8 Buda palitanna to loteng kinii sirempun. 9 Den mesa' tokallolo disanga Eutikhus cumadokko jio pentiroan. Marojai anna leppeng, napolloh jao mai lata' mangpentallun, nasaba' masai gajai Paulus mangbicara. Naturunnii tau, apa matemi. 10 Apa mellaoi Paulus llumbangngii, naraka'i, nakua, "Danggi' mikillakkii, tuo unapi ia!" 11 Pole pole'mi Paulus de', natawa-tawai to roti nakumande sola ngasan. Mangbicara unapi Paulus ratu lako makale', namane' male. 12 Nasolanmi tau joo tokallolo tuo pole'mo pole lako bolana, na gaja sannang sola ngasan. 13 Mende'mokan kappala' kijolo lako kota Asos la ntammui Paulus, nasaba' madoangngi la nnola gantanan. 14 Ia tongkisikitamo jio, kisolanni lako kappala', kimane' mangkappala' lako kota Metilene. 15 Mangkappala' pole' omokan jio mai, na masawanna jiokan sioloan mesa' pulau disanga Khios. Dua bonginna ratukan lako pulau Samos na masawanna lako kota Miletus. 16 Mangkamo napattantu Paulus kumua te'da kileppang jio kota Efesus, danggi' kimateanni allo jio tana Asia. Madoangngi mpendete'i kota Yerusalem, ke wa'dingngi, najiomo ke pangramean allo Pentakosta. 17 Jio kota Miletus nanii Paulus mpangpetamban pekaamberan jamaa jio kota Efesus naratu ssitammuanni. 18 Ia tonna ratumo, nakuanni, "Ee, todipusile'to! Miissen kumua mellao jio mai ratungku' inde' tana Asia matumbai to katuoanku' mikita. 19 Kuala to kamajiongan penawa njama jaman-Na Puang. Buda kamaparrisanku' sola tuli mangwai matana', nasaba' madoangngi to to-Yahudi la mbunona'. 20 Miissen kumua te'da kubunian kamu' to apa la mipumelona. Kuajahhi kamu' la jio passitammuan tobuda na la jio bola. 21 Tuli kupangngingaran la lako to-Yahudi na lako bangsa laen anna mengkatoba' jio mai dosana, na mpangben kalena lako Puang Allataala, na matappa' lako Puangta' Puang Isa. 22 Na ia tee la malena' de' kota Yerusalem, sanga nasuana' Roh Allataala. Te'da kuissenni apa to la jaji lako kaleku' jao. 23 Ia mandara kuissen kumua umbo-umbo kunii male, napamanassanmo' Roh Allataala kumua la disessana' kuditarungku jao kota Yerusalem. 24 Apa moi nasusi joo, te'da kucirinnai penawangku', podo wa'dingna' mpatarruhhi to jaman nasuanna' Puang Isa la llundukkii samateku' mpangpeissenanni to Kareba Kasalamatan kumua nakamaseiki' Puang Allataala. 25 Mangkamo kamu' kusikitan sola ngasan kuajahhi kamu' ammimenjaji taun-Na Puang Allataala lan kaparentan-Na. La miissen kumua tampakkata'mo tee sikita. 26 Iamo joo kupangngingaran kamu' tee too kumua ia ammiden masolang undinna, tangngiamo salaku'. 27 Kupamanassanmo kamu' sininna to pakkaeloran-Na Puang Allataala. 28 Njagai kamu' kalemi. Mijagai tooi jamaa to mangka napangben Roh Allataala la mijagai, nasaba' kamu'mo diangka' menjaji tonnatoro' jamaa-Na Puang Allataala. La mijagai melo to taun-Na susi tomangrewa rrewai bembala'na, nasaba' elohnamo Puang Allataala namate Puang Isa dikua nawa'ding lla'bak taun-Na. 29 Kuissen kumua ia angkumalemo, la ratu to tau massipa' susi asu lampung mentama tangnga-tangngami, na te'da nalancirinnaii to tau pura diben kamu'. 30 Na den too kamu' lan mai tangnga-tangngami la mpangpeissenan kareba tangtongan. Ia napugaukki susi joo la mpalao salari to tomatappa'mo lako Puang Isa nakua anna ia naturu'. 31 Iamo joo majaga melo kamu'! La miingaran tee kumua tallung taunna' mangwai mata, te'da kutorroi nnajahhi simesa'-mesa' kamu' allo bongi. 32 La kupangbenmo kamu' lako Puang Allataala tee too, anna Ia mpuissen kamu' ammirannuan tongan-tonganni to kareba kameloan penawan-Na. Makuasa Ia la mpamawatang kamu' nabarakka'i kamu' to barakka' mangka napasadian sininna umma'-Na. 33 Moi mesa' tau te'dapa naden kukadoangngi apanna, doi'na ba'tu pakeanna. 34 Na miissen kumua to'doan a'puhku' kuputuo sola to tokusolan. 35 Budamo to kupakitan kamu' la miala palelean mata kumua sila'da'ki' mangjama ntulung to totangpakulle. La miingaran to apa mangka napau Puang Isa nakua, 'La'bi masannang ia to mangpabengan na ia to mangtarima.' " 36 Ia tonna mangkamo Paulus mangkada, mengguntu'mi sola ngasan namassambajang. 37 Mangkai joo nna'de-a'demi sikillakan, naraka'i, namane' ssalama'i to Paulus. 38 Gaja massei penawanna, la'bi-la'bi to kadanna Paulus kumua te'damo nalangkita pole'i. Nasolanmi ratu lako to' kappala'.

Jamanna Rasulu' 21

1 Ia tongkisisarakmo joo pekaamberan jamaa jio mai kota Efesus, malemokan mangkappala' tarruh lako pulau Kos. Na masawanna jiokan pulau Rodos, kimane' male lako kota Patara nanii kenden kappala'. 2 Jiomo kinii nnampa' kappala' mangnguju lako tana Fenisia. Mende'mokan, 3 kimale arannai kikita to pulau Siprus jio kairingki', apa tarruh lakokan tana Siria. Mellao jiokan kota Tirus, nasaba' jio dinii mpupellaoi to luranna joo kappala' kinii. 4 Sangminggukan torro jio kimale sitammu to tomatappa' lako Puang Isa. Pangpatujun-Na Roh Allataala, anna anggaii to Paulus male lako kota Yerusalem. 5 Apa ia tonna anggemo wattungki' torro jio kota Tirus, sisarakmokan kipatarruh kalingkanki'. Male ngasanni sintong repokkona ssolankan ratu lako salean kota. Ia tongkijiomo randan tasik, mengguntu' ngasankan kimassambajang. 6 Mangkai joo sisalama'mokan, kimende' kappala', na pada pole todamo ia lako bolana. 7 Mangkappala' tarruhkan jio mai kota Tirus ratu lako kota Ptolemais, cappa'na kinii mangkappala'. Malekan ssitammuan tomatappa' jio, na sangngallokan torro jio. 8 Masawanna male omokan, kiratu lako kota Kaisarea. Malekan lako bolana Filipus to mpangpeissenan Kareba Kasalamatan, kitorro jio. Sala mesa'nai jio mai to pitu tau dipilei jio kota Yerusalem. 9 Den a'pa' anakkana, anakdara ngasan, nabarakka'i Puang anna wa'ding mpangpeissenan kareba jio mai Puang Allataala. 10 Ba'tu pira-piramokan masainna jio, denmi mesa' nabi ratu jio mai tana Yudea disanga Agabus. 11 Ratui lako to kinii, naalai to saripinna Paulus, napumpungngi to ajena sola limanna nakua, "Susi tee to napau Roh Allataala, 'Ia to puangna tee saripi la napumpung to-Yahudi susi tee jio kota Yerusalem, anna benni lako bangsa tangngia to-Yahudi.' " 12 Ia tongkisa'dingngi, kipeta'dai sola to tomatappa' jio kota Kaisarea, anna danggi'mo namale Paulus de' kota Yerusalem. 13 Apa nakua mpebalii, "Oo, danggi'mo dikka' mikillakkina', nasaba' samasse-massena penawangku'. Sitonganna macanning sininna bulu-bulungku', tangngia la dipumpung manda jio, apa dibuno toona', nasaba' Puang Isa." 14 Kamma' bangmokan, nasaba' te'da napesa'dingngikan. Kikua mandamo mangkada, "Ma'namo na pakkaeloran-Na Puang jaji." 15 Ia tongkiba'tu pira-piramo allona torro jio kota Kaisarea, ssari'mokan ropo'-ropo'ki' kimale de' kota Yerusalem. 16 Ba'tu pira-pira to tomatappa' jao ssolankan male lako bolana Manason jao kota Yerusalem, nasaba' jao la kinii mangbongi. (Ia joo Manason to-Siprus masaimo menturu' lako Puang Isa.) 17 Masannang to tomatappa' jao kota Yerusalem ntammuikan. 18 Masawanna malekan sola Paulus sikita Yakub, na jio ngasan todai to sininna pekaamberan jamaa. 19 Mangkanna Paulus mangsalama' lako, nacuritan ngasanni to pangtulung-Na Puang Allataala lan jamanna lan tangnga-tangngana bangsa tangngia to-Yahudi. 20 Mpakala'bihhi Puang Allataala sola ngasan tonna mangka ssa'dingngi joo. Namane' ngkuanni to Paulus, "Ee, todipusile'to! La muissen kumua massa'bu-sa'bumo to-Yahudi memmatappa' lako Puang Isa, nallundukki atoranna Nabi Musa. 21 Apa den tau mpauko kumua muajahhi ngasanni to to-Yahudi torro jio tondok laen mpatorro atoranna Nabi Musa, danggi' napangpesunnatan anakkana ba'tu nturu' ada' laenna. 22 Na tantu la nasa'ding kumua inde'moko. Jaji, apa la dipugauk? 23 Melo ke mupesa'dingngikan. Den a'pa' tau inde' la ganna'mi wattunna menjaji nazir. 24 Iamo joo malemoko sola lako Bola Puang Allataala, musolanni mpemaceroi kalemu. Mubajaran tooi ongkoso' karobanna situru' atoran anna wa'ding mangpecakkuru', battuananna mangkami wattunna menjaji nazir. Ianna susi joo, la naissen ngasan tau kumua te'da pale' natongan to kada nasa'ding mpauko, nasaba' iko una, na mupugauk too to atoranna Nabi Musa. 25 Apa ia to tomatappa' lako Puang Isa to bangsa tangngia to-Yahudi, mangkamo kikiringan sura' mpauanni to kara'tasanki' kumua, te'da nawa'ding ngkandei to kande dipangngolo lako dewata, te'da nawa'ding ngkande rara, ba'tu ngkande moda' na te'da too nawa'ding manggauk sala." 26 Ia tonna masawanna nasolanmi Paulus joo tau a'pa', male sola mpamulai nceroi kalena. Mangkai joo mentamami Bola Puang Allataala mpaui pirang allopa namane' mangka, na ia to karoba la napangkaroban sola a'pa'i. 27 Ia tonna la katampakanna joo pitung allo, ba'tu pira-pira to-Yahudi jio mai propinsi Asia ngkitai to Paulus lan Bola Puang Allataala, anna rasii to tobuda najokkoi. 28 Metamba nakua, "Ee, tulungkan kamu' to-Israel! Iamo tee tau to male bang nnajahhi sininna tau umbo-umbo nanii, mpake pangngajaran nnewa to-Israel, atoranna Nabi Musa na ia tee Bola Puang Allataala. Na ia too ssolan omi tau tangngia to-Yahudi tama Bola Puang Allataala ncarepai tee bola macero!" 29 Ia namangkada susi joo, nasaba' denmo nakitai to Trofimus to-Efesus sola Paulus lan kota. Na nasanga denmo nasolanni Paulus mentama Bola Puang Allataala. 30 Marongka ngasanmi to tau lan kota, na siratuan kinjara' ngkitai. Najokkoi to Paulus nagararakki lako salean Bola Puang Allataala, nata'pa ditutu' to babanganna. 31 Ia tonna la mbunoi tomaricu, napauanni tau to pangbarani surudadu Roma, kumua marongka ngasan to tau lan kota Yerusalem. 32 Ta'pa nasua pangbarani to ba'tu pira-pira kamandangna na surudadunna anna sikinjarasan lako to nanii tau marongka. Ia tonna kitai tobuda joo pangbarani sola surudadunna, te'damo natundunni to Paulus. 33 Nakandoppi'i pangbarani to Paulus najokkoi, napangpepumpunganni mpake dua rante bassi. Namane' mpekutananni indara joo Paulus na apara napugauk. 34 Sesena to tobuda mebali nakua susi tee, na sesena pole'pa kumua susi tuu. Te'da naissenni joo pangbarani apa sitonganna to jaji, nasaba' gaja rongkai to tau. Iamo joo napangpeparentanni anna dibawa lako tangsi to Paulus. 35 Ia tonna ratumo lako to' pelalan, nabullei surudadu, nasaba' marontami to tomaricu. 36 Buda tomaricu undi nturu'i jio boko' metamba-tamba nakua, "Bunoii!" 37 Ia tonna la mentamamo tangsi, nakuamo Paulus lako joo pangbarani, "Wa'dingriki'ka sipangkada cingga'tu'?" Napebalii nakua, "Oo macca todako mangbasa Yunani? 38 Ia nasusi tuu, tangngiako pale' to-Mesir, to mane' mangka mpaden ricu nnewa tomangparenta, namale mbawa patang sa'bu to pangbuno lako padang pallawangan?" 39 Napebalii Paulus nakua, "Ia tee aku' to-Yahudina', dijajian jiona' kota Tarsus, kota kaminang kaissenan jio tana Kilikia. Tatulungna' dikka' ke wa'dingngi, kumangkada lako tuu mati' tau." 40 Ia tonna dieloranmo mangkada, ke'dehmi jio pelalan, nampupangngimba-imba limanna nta'tan tau. Ia tonna kamma'mo tuu lako tau, mangkadami Paulus mangbasa to-Yahudi nakua,

Jamanna Rasulu' 22

1 "Tomala'bihku' sola ngasan! Tabe' tapesa'dingngii kupaui to sitonganna anna kita'mora ntimbangngi to melona na gaja'na." 2 Ia tonna sa'dingngi to Paulus mangbasa to-Yahudi, ta'pa sikammatan ngasan, napatarruhhi to kadanna nakua, 3 "Ia tee aku', to-Yahudina'. Jaji jiona' kota Tarsus tana Kilikia, apa matonggo inde'na' kota Yerusalem. Mangguru lakona' Gamaliel to nnajahhi tonganna' atoran tojolota' to nabenni Nabi Musa. Pada bang una tee kita' to mala'bihku' sola ngasan, moi aku' nturu' tongan todana' Puang Allataala. 4 Kupakario-rio samatena to tonturu' pangngajaran-Na Puang Isa. Kujokko ngasanni la muane la baine, angkupangpetarungkuanni. 5 Imang Lompo sola padanna Pangbicara Agama to wa'ding mpaissenniki' kumua te'da kumangnguraga. Ia bang unamo mangka mbenna' sura' kubawan to-Yahudi jio kota Damsyik, dikua angkuwa'ding njokkoi to tomatappa' lako Puang Isa, angkubawai lako kota Yerusalem nadipakario-rio." 6 Mpatarruhmi kadanna Paulus nakua, "Ia tongkumandoppi'mo lako kota Damsyik, tangnga allo, tangdikalannai naden arrang pasillo pole jao mai langi' nnarrang mengguririkna'. 7 Ta'pa tipessambakna' do' padang na den gamara kusa'ding mpangkadaina' nakua, 'Ee, Saulus! Ee, Saulus! Matumbai musessa tarruh bangna'?' 8 Mekutanamo', 'Ie', indariki' kita' Puang?' Napebalina' nakua, 'Aku'mo Puang Isa to-Nazaret to musessa.' 9 Ia to tau jio kusolan nakita toda joo arrang, apa te'da nasa'dingngi to gamara kusa'ding. 10 Kukutanai pole'mi kukua, 'Ie', apa kita' to sipato'na la kupugauk?' Napebalina' nakua, 'Ke'dehko mumale re' kota Damsyik. Jiopi mumane' dipauan ngasan apa to nakabudai Puang Allataala la mupugauk.' 11 Natoe bangri solaku' to limangku' tongkimale re' kota Damsyik, nasaba' butana', napubua' joo arrang pasillo. 12 Den mesa' tau jio disanga Ananias. Tomatappa' tongan joo tau na tatta' mpugauk atoranna Nabi Musa. Sininna to-Yahudi to torro jio kota Damsyik ngkasiri'i. 13 Ratui ngkitana', najenjen jio sa'deku', nakuanna', 'Ee, Saulus todipusile'to, pakita pole'moko!' Mentingngarana', kuta'pa ngkitai. 14 Mangkai joo too nakuanna', 'Mangkamoko napilei Puang Allataala to nasompa tojolota', dikua ammuissenni to pakkaeloran-Na, ammukitai to Puang Isa ammussa'dingngi to gamaran-Na. 15 Ia to apa mangka mukita sola musa'ding la mupangpeissenan lako sininna tau. 16 Jaji danggi'mo mubata. Ke'dehmoko, mupangpejioran kalemu. Meta'da tulungko lako Puang anna dampanganko.' " 17 Mpatarruhmi kadanna Paulus nakua, "Ia tongkupolemo lako kota Yerusalem, kumassambajang lan Bola Puang Allataala, ta'pa nakuasaina' Roh Allataala, 18 angkukita Puang nakuanna', 'Madoi'ko ssalai kota Yerusalem, nasaba' ia to tau inde' cia'i ntarimai ke mupangpeissenanna'.' 19 Mangkadana' kukua, 'Oo Puang, naissen melona' tuu mati' tau kumua aku'mo to mangka male llelei bola passambajangan kujokkoi to tongkatappa'iki', kupekajui, kumane' mpangpetarungkuanni. 20 Susi toomi tonna dibuno to sa'bin-Ta' Stefanus, jio toona', na kukabudai joo kadibunoanna. Na aku'mo to nnampaii pakeanna to tombunoi.' 21 Apa nakuanna' Puang, 'Male bangmoko, nasaba' la kusuako male mambela lako bangsa tangngia to-Yahudi.' " 22 Napatarruh bang unapa tobuda mpesa'dingngi Paulus mangkada, apa ia tonna la tampakkanamo joo kada metamba-tambami tobuda nakua, "Bunoi bangmi, te'da ia nasipato' tuo to tau susi tuu!" 23 Da'tanni metamba, naperrimbakan tooi to baju landona, nasumarambu de' langi' to sara'buk. 24 Massuami to pangbarani to-Roma mbawai to Paulus lako tangsi, nasuai mpekajui na diparessa la dinii nnissenni matumbai napetambanni to-Yahudi. 25 Apa ia tonna mangkamo dipumpung la dipekaju, mekutanami Paulus lako joo kamandang ke'deh jio nakua, "Wa'dingriki'ka mpekaju mesa' to-Roma, ke te'dapi nadira'tah kara-karana?" 26 Ia tonna sa'dingngi joo kamandang, malei mekutana lako joo pangbarani nakua, "Apamora la tagaukanni tee tau? Nasaba' to-Roma pale' ia." 27 Malei joo pangbarani ngkutanai Paulus nakua, "Pauanna', to-Roma tonganrokoka?" Napebalii Paulus nakua, "Ie', to-Romana' kita'." 28 Nakua pole'pa joo pangbarani, "Gaja buda aku' kubajah kumane' direken to-Roma." Napebalii Paulus nakua, "Apa ia tee aku', mellao jio mai dijajianku' to-Romana' aku'." 29 Ia joo wattu sorong boko'i to surudadu la mparessai, namemmalaja' toomi joo pangbarani, sanga naissenni kumua to-Roma pale' ia, na iamo mangka mpangpepumpunganni. 30 Gaja doangngi joo pangbarani to-Roma nnissenni apa sitonganna naparapasanni to-Yahudi joo Paulus. Iamo joo ia tonna masawanna nasuai sirempun to kapala imang na padanna Pangbicara Agama, napangpebukanni to pepumpungna nadipangngolo lako tosirempun jio.

Jamanna Rasulu' 23

1 Nakaje'jekki Paulus tuu lako Pangbicara Agama, namangkada nakua, "Ee, todipusile'to sola ngasan! Ratu lako too allo, tuli kupugauk to situru' pakkaeloran-Na Puang Allataala, na maruruh to penawangku'." 2 Ia tonna mangkada susi joo, nasuai Imang Lompo Ananias to tau jio sa'dena Paulus ssala'pai to timunna. 3 Napebalii Paulus nakuanni, "Ee, kita' tomajekkong. La nasala'pa todaki' Puang Allataala! Cumadokkoki' ntuu la mbicara kara-karaku' situru' atoranna Nabi Musa, na kita' bang unamo tangnturu'i joo atoran tontasua tau ssala'pana'!" 4 Nakua to tonasikandoppitan Paulus ngkuanni, "Wah, te'da iko mukasiri'i to Imang Lompo-Na Puang Allataala!" 5 Napebalii Paulus nakua, "Oo, todipusile'to, te'da aku' kuissenni kumua Imang Lompo pale' ia. Den diuki' lan Sura' Allataala kumua, 'Danggi' mutangkasiri'i to kapala bangsamu.' " 6 Naissen Paulus kumua ia tuu lako Pangbicara Agama sesena to-Saduki na sesena to-Farisi. Iamo joo naandongngi mangkada nakua, "Ee, todipusile'to! Ia tee aku' to-Farisina', bati' to-Farisina'. Ia kudiparessa ntee, nasaba' kukatappa'i kumua la tuo pole' to tomate." 7 Ia tonna mangkada susi joo, sipekkami to to-Farisi na to-Saduki, anna sisesean to tosirempun. 8 Nasaba' ia to pahangna to-Saduki nasanga ia kumua te'da ia natuo pole' to tomate, te'da too ia malaeka' sola to disanga roh. Apa nakatappa'i ngasan ia to-Farisi kumua den. 9 Marongkami to tau. Ba'tu pira-pira guru agama torroan to-Farisi, ke'deh malea-lea tongan massite'geh nakua, "Ianna kami' te'da lalo ia salana tee tau moi sangkanuku malotong! Mbai den ia roh iarika malaeka' mpangkadaii!" 10 Sipekka tonggomi, namemmalaja' joo pangbarani kumua iamo ke nasigasa'ii to Paulus. Iamo joo nasuai to surudadunna male nnalai lan mai tangnga-tangngana, nabawai lako tangsi. 11 Ia tonna bonginna pole'mo, ke'dehhi Puang Isa jio sa'dena Paulus nakuanni, "Ee, pemawatangngi penawammu! Mangkamoko mpangpeissenanna' jio kota Yerusalem, susi toomi jio kota Roma la mupangpeissenan unapa'." 12 Masawanna melambi', mesa' kadai to to-Yahudi namassapah kumua te'da nalakumande iarika mangngiso', ke te'dapi nabunoi to Paulus. 13 Denni la'bi patang pulo tau joo mesa' kada. 14 Simaleanmi lako kapala imang na pekaamberan to-Yahudi nakua, "Mangkamokan massapah sola ngasan, te'da kilakumande iarika mangngiso', ke te'dapi kibunoi to Paulus. 15 Iamo joo, mbai melo ke kamu' to Pangbicara Agama sola ngasan mangkiring sura' lako joo pangbarani to-Roma ammipeta'dai, anna bawa pole'i napupangngoloi lako kamu' joo Paulus, butung to la mipemaparessai pole' to kara-karana, angkibunoi jio tangnga lalan." 16 Apa nasa'ding anakkurena Paulus joo akkattana to-Yahudi. Malei lako tangsi, mpauanni to ambe'urena. 17 Nakuanni Paulus to mesa' kamandang, "Tasolanpi tee pea lako pangbarani, den apa la napauanni." 18 Nasolanmi kamandang lako pangbarani. Nakuamo lako pangbarani, "Natambaina' Paulus toditarungku, nasuana' ssolanni tee pea lako kaleta', nasaba' den to parallu la napauanki'." 19 Natoemi pangbarani to limanna joo pea nasolan mesai, nakutanaii nakua, "Apara la mupauanna'?" 20 Napebalii nakua, "Ie', mesa' kadai to to-Yahudi mpeta'dai antasolanni to Paulus mangngolo lako Pangbicara Agama masawa, butung to la napemaparessai pole' to kara-karana. 21 Apa danggi' tapekaioii to peta'danna, nasaba' den la'bi patang pulo tau membuni la ntammuii jio tangnga lalan. Mangka ngasanmo massapah te'da nalakumande iarika mangngiso', ke te'dapi nabunoi to Paulus. Na sadia bangmi tee too, pebalinta' mandamo naampai." 22 Nakuanni pangbarani joo pea, "Danggi' lalo naden tau mupauan kumua mangkamo' mupauan." Mangkai joo, nasuami pole joo pea. 23 Ssuami dua kamandang joo pangbarani nakuanni, "Pasadiai dua ratuh surudadu sola pitung pulo surudadu makkanyarang, na dua ratuh surudadu mbawa doke, mita'pa male bang unamo lako kota Kaisarea tee bongi tatte' kasera. 24 Pasadian tooi nyarang to Paulus nasakeii, misolan meloi lako Gubernur Feliks." 25 Nnuki'i sura' joo pangbarani kumua, 26 "To-Mala'bihku' Gubernur Feliks! Salama'ku', aku' kita' tee Klaudius Lisias! 27 Cinding lalomora nabunoi to-Yahudi tee tau tonna jokkoi, ke la te'dai kuratu ssolan surudadungku' lla'paranni, nasaba' kusa'ding kumua to-Roma tee tau. 28 Kusolanni lako Pangbicara Agamanna, nasaba' madoangna' nnissenni apa sitonganna salana to naparapasanni. 29 Na te'da bang mesa' to apa napugauk sipato' ditarungkuanni iarika dibunoanni. Atoran agamanna mandari to diparapasanni. 30 Mangkamo' dipauan kumua den to-Yahudi nduanni nawa-nawa la mbunoi. Iamo joo kuta'pa tarruh mpangpebawanni lako kita'. Na mangka toomo kusua to tomparapa'i mpatarruhhi lako kita' to naparapasanni." 31 Naalami surudadu to Paulus situru' to diparentanni, anna bawa bongii ratu lako kota Antipatris. 32 Masawanna mpatarruhmi kalingkanna to tomakkanyarang male sola Paulus, anna ia to surudadu laen pole ia lako tangsi. 33 Ia tonna ratumo lako kota Kaisarea joo tomakkanyarang, nabenmi gubernur to sura', napangben tooi to Paulus lako. 34 Ia tonna mangkamo gubernur mbacai joo sura', nakutanaimi to Paulus nakua, "Topole umboroko?" Ia tonna issenmi kumua to-Kilikia, 35 nakuamo, "Melomi! Ianna ratu to mparapa'ko, mane'ri kuparessa to kara-karamu." Napangpeparentanmi anna dipatorro Paulus lan salassa' gubernur to napangpekabuatan Raja Herodes tonna anu'.

Jamanna Rasulu' 24

1 Limang bongi mangkanna joo, ratumi to Imang Lompo Ananias lako Kaisarea sola ba'tu pira-pira pekaamberan to-Yahudi na sala mesa'na to la mpangkadananni disanga Tertulus. Malei mangngolo lako Gubernur Feliks mparapa'i to Paulus. 2 Ia tonna disuamo Paulus lako olo, napamulami Tertulus mparapa'i nakua, "Tabe' kupajolo lako olona Gubernur mala'bih Feliks! Ia tee tondokki' rapa' to padamo masainna taparenta. Na buda toomo to apa pura dipugauk napumelo bangsaki', sanga kamaccanta'. 3 Kikurru sumanga' ngasan tee, na moi piran na la kiingaran tarruh bang. 4 Apa dikua danggi' nabuda wattunta' masala, kipeta'da kamalogaran penawanta', ke wa'dingngi, tasa'dingpi cingga'tu' tee pangparapa'ki'. 5 Kikanassaimo tee tau mbawa abala' la'da'! Iamo puanggawana tonturu' pangngajaran-Na Puang Isa, to-Nazaret. Umbo-umbo nanii tuli mpaden kamaricuan lan tangnga-tangngana to-Yahudi lan lili'na lino. 6 Mangka toomo la ncarepai Bola Puang Allataala, apa ta'pa kijokkoi. La kibicara kami' situru' atoran agamangki', 7 apa ta'pa narampai bangkan Pangbarani Lisias, 8 nasuakan to tomparapa'i mangngolo lako kaleta'. La tasa'ding kita' jio mai Paulus, ke taparessai, kumua tongan ngasan to kiparapasanni." 9 Padami to to-Yahudi ratu jio mpasala ngasanni to Paulus na tongananni to kadanna Tertulus. 10 Nako'bi'mi gubernur to Paulus nakua namangkada. Mangkadami Paulus nakua, "Tabe' kita', kuissen kumua mangtaun-taunmiki' masainna nnoloii tee bangsa sola rra'tahhi to kara-karana. Jaji masannangna' tee jio olota' mpauanki' katonganan. 11 Kusanga wa'ding kita' takanassai tee kumua sangpulo duami bonginna too tongkumale massambajang jao kota Yerusalem. 12 Te'da bangpara naden to-Yahudi nnampa'na' massisakka moi pissen, ba'tu nna'pan tau la mpaden rongka la lan Bola Puang Allataala, la lan bola passambajangan ba'tu umbo bang nanii lan tee kota. 13 Na te'da too nakullei la mpangbuttii tee too, to apa naparapasanna' lako kaleta'. 14 Apa la kuakui jio olota' kumua nang ssompana' Puang Allataala, situru' pangngajaran-Na Puang Isa, to napasala tuu mati'. Ia to Puang Allataala kusompa, nasompa too tojoloki'. Na kukatappa'i unapa to sininna pura diuki' lan sura'na Nabi Musa na sura'na nabi laen. 15 Sitonganna susi bang unana' tuu mati', pada kirannuan lako Puang Allataala kumua sininna tomate la napatuo pole' jio mai kamatean, la tomelo, na la togaja'. 16 Iamo joo kutuli mpengkulle-kullei tonganni manggauk melo la lako padangku' rupa tau, la lako Puang Allataala. Susiri joo to tonganna. 17 Ba'tu pirang taunmo masainna, te'da naden kumale de' kota Yerusalem, apa mane' iari tee kumale de' mbawan doi' pangtulungan bangsaku', kumangkaroba too lako Puang Allataala. 18 Jiomo ntuu joo nanii ngkitana' ba'tu pira-pira to-Yahudi jio mai propinsi Asia, tongkumangka mpemaceroi kale lan Bola Puang Allataala. Te'dara tobuda kusolan, na te'da toora tau marongka joo wattu. 19 Sitonganna iara sipato' la ratu inde' mangngolo lako kita' mparapa'na', kenna la den to apa la naparapasanna', apa te'da naratu. 20 Iarika ia bangmo tee tau inde' mpaui denraka salaku' naampa' tongkudipangngolo lako Pangbicara Agama. 21 Ba'tu iaraka nasanga salaku' to kada sangbuku kupau lako sola ngasanni, kukua, 'Iamo kudiparessa ntee tee allo, nasaba' kukatappa'i kumua la dipatuo pole' to tomate.' " 22 Natampakkii Gubernur Feliks joo kasirempunan mbicara kara-kara, sanga budamo naissen to pangngajaran-Na Puang Isa. Nakua, "La kura'tah tee kara-kara, ke ratumi Pangbarani Lisias." 23 Nasuami to kamandang mpatorro tarruhpi to Paulus, apa la napemaringngannimo ci'di', nawa'ding toomo nabawan solana to apa naparallui. 24 Ba'tu pirang bongi mangkanna joo, ratumi Gubernur Feliks sola bainena disanga Drusila, mesa' to-Yahudi. Napangpesuanni Gubernur Feliks to Paulus naratu ncuritanni to kamatapparanna lako Puang Isa Almaseh. 25 Apa mpatarruhhi kadanna Paulus nakua, "Nang la mpugaukki' kameloan, ntaloi penawa katolinoanta', nasaba' ia ke Kiama'mi lino, la dira'tah kara-karana tolino." Ia tonna sa'dingmi joo malaja'mi Gubernur Feliks nakua, "Aa, polemoko too! Ianna den wattungku', iapa kutambai pole'ko." 26 Naangah penawa Gubernur Feliks kumua la nabenni doi' Paulus. Iamo joo natuli mpangpetambanni la ssipangkadanni. 27 Napallan bangngi pangtarungkuan to Paulus, nasaba' madoangngi Gubernur Feliks nnala penawanna to-Yahudi. Ia tonna duang taunmo, endekmi Perkius Festus menjaji gubernur ssulle Feliks.

Jamanna Rasulu' 25

1 Duang bongimi Festus mangkanna diangka' menjaji gubernur, malemi jio mai kota Kaisarea de' kota Yerusalem. 2 Jiomo nanii kapala imang sola to-Yahudi tomapangka' mparapa'i to Paulus. Nasede tarruhhi to Gubernur Festus, 3 nakua na ia to kameloan penawanna Gubernur Festus lako sola ngasanni, napangpebawanni to Paulus de' kota Yerusalem, nasaba' mesa' kadami la mbunoi jio tangnga lalan. 4 Apa napebalii Gubernur Festus nakua, "Jio kota Kaisarea dinii ntarungkui to Paulus, na te'damo namasai, kupole o lako. 5 Jaji, ianna den kasalan napugauk, ma'namo na ia to pekaamberan lan tangnga-tangngami kusolan male lako, na jiopi minii sikara-kara." 6 Agi-agi pitu iarika kasera bonginna Gubernur Festus torro jao kota Yerusalem, namane' pole lako kota Kaisarea. Masawanna cumadokkomi jao cadokkoan pangra'tasan kara-kara, napangpesuanni nadipangngolo to Paulus. 7 Ia tonna ratumo Paulus, ke'dehmi to to-Yahudi to ratu jao mai kota Yerusalem ntalimbungngi, napamulaimi mpau simesa'-mesa'i to apa mabanda' diparapasanni. Apa te'da nakullei mpangbuttii. 8 Mpangngewaimi kalena Paulus nakua, "Te'da bang mesa' to apa kupugauk sala! Tangsalana' lako atoranna Nabi Musa, tangncarepa'i toona' Bola Puang Allataala, susi toomi te'da kumbali-bali Tomaraja Roma." 9 Apa nakutanaii Gubernur Festus to Paulus nakua, "Madoangrokoka male de' kota Yerusalem, na jaopa mudiparessa jio oloku' to apa naparapasanko?", nasaba' madoangngi nnala penawanna to-Yahudi. 10 Napebalii Paulus nakua, "Na inde'mo' jio olota' kita' to pangbicarana Tomaraja Roma to sipato' mbicarai tee kara-karaku'. Na taissenmo kumua te'da lalo salaku' lako tuu mati' to-Yahudi. 11 Jaji ia naden tongan salaku' to sipato'na dinii mbunona', sadiana' ntarimai. Apa ia ke te'dai natongan to naparapasanna', te'da lalo kuwa'ding dipangben lako tuu mati' tau. Jaji kupeta'dai nadipatarruh lako Tomaraja Roma to kara-karaku'!" 12 Ia tonna mangkamo Gubernur Festus ssitimbang-timbangngii sola to tonasolan, nakuanni to Paulus, "Male lakomoko Tomaraja Roma mangngolo, sanga mupeta'dai nadipatarruh to kara-karamu lako!" 13 Te'da namasai mangkanna joo, ratumi Raja Agripa sola Bernike lako kota Kaisarea, mangsalama' lako Gubernur Festus. 14 Ia tonna ba'tu pirang bongimo jio, napaumi to kara-karana Paulus, nakua ncuritai, "Den mesa' toditarungku inde', ditarungkumo tonna Gubernur Feliks mangparenta. 15 Mangkamo naparapa' kapala imang sola pekaamberan to-Yahudi tongkujaopa kota Yerusalem. Napeta'dai angkura'tahhi to kara-karana, kusessai. 16 Apa kukua mpebalii kumua, ianna to-Roma, te'da ia mesa' tomane' diparapa' bang ta'pa la disessa, ke te'dapi nadipasioloan to tomparapa'i, nadiben toopa ia wattu mpangkadanan kalena. 17 Jaji ia tonna ratumo tee tomparapa'i, ta'pa mpasirempunmo' tau tonna masawanna, kupangpesuan tooi to Paulus mangngolo, nadibicara to kara-karana. 18 Ia tonna ke'dehmo to tomangparapa'na mpaui to naparapasanni, te'da bangngi mpaui to kasalanna susi to kuangah penawa. 19 Passalan agamanna mandara nasipekkai, na den mesa' tau disanga Puang Isa. Mangkami mate joo tau, apa nakua ia Paulus, 'Tuo pole'i Ia.' 20 Tangkuissenan umbo la kukua nnampa'i to majappunna joo, angkukutanaii Paulus, 'Madoangrokoka male de' kota Yerusalem na jaopa nadibicara to kara-karamu?' 21 Apa napeta'dai nadipatarruh to kara-karana. Nakua ake'mo nadipallan bang pangtarungkuan sanggenna nara'tah Tomaraja Roma to kara-karana. Iamo joo kupangpesuanni nadipallan bangpa pangtarungkuan, sanggenna den wattungku' mpangpebawanni mangngolo lako Tomaraja Roma.' " 22 Nakua Raja Agripa lako Gubernur Festus, "Moi aku' madoang todana' ssa'dingngi to kadanna joo tau." Nakua Gubernur Festus mpebalii, "Masawapa tapesa'dingngii." 23 Masawanna ratumi Raja Agripa sola Bernike mpake pakean kamala'biranna. Mentamami to dinii mbicara kara-kara sola tuu lako pangbarani, na sininna tomapangka' lan joo kota. Napangpesuanni Gubernur Festus to Paulus nadipupangngolo. 24 Mangkadami Gubernur Festus nakua, "Tomala'bihku' Raja Agripa na sininna tosirempun tee allo! Iamo tee tau to mangka naparapa' sininna to-Yahudi lako kaleku', la jao kota Yerusalem la ntee mai. Mangkamo ratu lako aku' sipetamba-tamban nakua, 'Sipato'mi ke dibunoi tee tau.' 25 Apa te'da bangpa panggaukanna sala to sipato' la dinii mbunoi. Kusuai la mpangpebawanni lako Tomaraja Roma, nasaba' ia una mangka mpeta'dai nadibicara jio olona Tomaraja Roma to kara-karana. 26 Apa te'dapa kuissen apa la kuuki' lan sura'ku' lako Tomaraja Roma. Iamo joo kupangngoloi lako kita' sola ngasan, la'bi-la'bi lako tomala'bihku' Raja Agripa, angkuissenni apa to la kuuki' ke mangkai diparessa ntee. 27 Ia ke aku', te'da nasipato', ke mesa' toditarungku disua male mangngolo, na te'da namanassa tongan to kasalan diparapasanni."

Jamanna Rasulu' 26

1 Nakua Raja Agripa mangkada lako Paulus, "Wa'dingmoko mpangkadanan kalemu." Mpupangngimbami limanna Paulus mpasadia tau, nakua, 2 "Ee, Tomala'bihku' Raja Agripa! Kusanga gaja sannangna' diben wattu mpaui to pebalingku' jio olota', sininna to naparapasanna' to-Yahudi, 3 la'bi-la'bi nasaba' taissen tongan kita' to ada'na sola katangsipatuanna to-Yahudi. Jaji kupeta'da melo lako kita' tasabbara'pa mpesa'dingngina'. 4 Naissen ngasan to-Yahudi to katuoanku' mellao jio mai biccu'ku'. Naissen too tongkumatonggomo torro jao kota Yerusalem sola bangsaku'. 5 Mellao jio mai naissenna'. Na ia sitonganna, ke la madoangngi, na wa'dingngi la mpangpeissenanni kumua mellao jiona mai, tuomo' susi to-Farisi to mata'da' nturu' atoran agamangki'. 6 Na iamo kudiparessa ntee too, nasaba' ngkatappa'ina' basse naben Puang Allataala lako tojoloki'. 7 Na ia toomo joo narannuan, namassompa allo bongi lako Puang Allataala to sangpulo dua pangrapuanna to-Israel. Anna ia toomora kita' tee napasalana' to-Yahudi, sanga kurannuan joo basse. 8 Matumbari kita' tee to-Yahudi na te'da takatappa'i ke mpatuo pole'i tomate to Puang Allataala? 9 Moi aku' tonna tee kusanga gaja kuewali tooi to tonturu' Puang Isa to-Nazaret. 10 Na iamo kupugauk jio kota Yerusalem. Ia tonna benmo' kuasa kapala imang, buda taun-Na Puang Allataala kupatama pangtarungkuan, na kusitujui too ke dibunoi. 11 Pembudana' ssessai lan bola passambajangan, kuparukui napessakkanni pole'i to Puang Isa. Tanda kamapallanku' lako, angkumale ntiroi moi jio kota laen." 12 Mpatarruhhi kadanna Paulus nakua, "Ia toomora joo akkattaku' la ssessa Tosarani kumale lako kota Damsyik mbawa sura' kuasa jio mai kapala imang. 13 Lan kalingkanku' tonna tangngamo allo, ngkitana' arrang jao mai langi' la'bi manynyarra ia na mata allo. Ia joo arrang nnarrangkan sola to tokusolan. 14 Sisongkan ngasankan, anna den gamara kusa'ding ngkuanna' lan basa to-Yahudi, 'Ee, Saulus! Ee, Saulus! Matumbai musessa tarruh bangna'? Iko bang una iko la mpa'dikki kalemu, ke nnewa tarruhko Puangmu.' 15 Mekutanamo' kukua, 'Ie', indariki' kita' Puang?' Nakua mpebalina', 'Aku'mo Puang Isa to musessa. 16 Ke'dehmoko! Iamo kupangpekitan kale-Ku' lako iko, nasaba' la kupupenjajiko tompangjamanna'. La mupangpeissenan lako tau apa to mukita tee too sola to apa la kupakitanpoko dau. 17 La kujagaiko, na te'da mumatumba ke mangngoloko lako to-Yahudi iarika bangsa laen. La kusua pole'ko lako 18 mpami'cikki to matanna, ssolanni jio mai kamalillinan lako macerona, lla'paranni jio mai kuasanna Ballisi' lako kuasan-Na Puang Allataala, anna didampangan, namenjaji umma'-Na to napilei Puang Allataala, sanga matappa'i lako Aku'." 19 Mpatarruhpa kadanna Paulus nakua, "Tomala'bihku' Raja Agripa! Tuli kupengkullei kita' nturu' meloi apa to mangka napau Puang lan joo pengkita. 20 Iamo joo kupangpeissenan lako sininna tau kumua namengkatoba' jio mai dosana namenturu' lako Puang Allataala. Na la napapajan lan katuoanna kumua mengkatoba' tonganmo. Bungahna kupangpeissenan lako to-Yahudi jio kota Damsyik, na jao kota Yerusalem, na lan lili'na tana Yudea, namane' lako bangsa laen. 21 Iamo joo najokkona' to-Yahudi lan Bola Puang Allataala nalambunona'. 22 Apa pammase-Na Puang ratu lako too allo, angkuwa'ding ke'deh ntee mpangpeissenanni la lako tokaissenan, la lako tobiasa. Ia to apa kupau te'da laenna na ia to pura napau Nabi Musa sola nabi laen tonna anu', 23 kumua, 'Ia to Raja Mangpasalama' nabasse Puang Allataala, la dipakario-rio, apa iamo jolona la tuo pole' jio mai kamatean, dikua anna mbawa arrang, iamo to Kareba Kasalamatan, la lako to-Yahudi la lako bangsa laen.' " 24 Ia tonna da'tan unapa Paulus mangkada mpau pebalinna, kumassakmi Gubernur Festus, nakua, "Ee, Paulus! Totangmalilinganko iko tuu. Liwa' buda paissenmu, na iamo mpatangmalilinganko." 25 Apa napebalii Paulus nakua, "Ie', matanana' kita' tomala'bih! Ia tee kadangku', kada tongan, kada tomalilingan na kutangngah mandalan kumane' mpaui. 26 Tomala'bihku' Raja Agripa to nnissen meloi tee. Iamo joo kubarani ntarrusan bangki' mati'. Kusanga moi mesa' te'da tangtaissen, nasaba' ia tee te'da najaji jio kampong kabunianan. 27 Tabe' kita' tomala'bihku' Raja Agripa, la mekutanapa', 'Takatappa'iraka to nabi? Kuissen kumua takatappa'i!' " 28 Nakua Raja Agripa mebali lako Paulus, "Musangaraka marawa bangna' mupasarani lan tee wattu sangkappidian mata?" 29 Apa nakua Paulus, "Sangkappidian mataraka ba'tu masairaka, apa kupassambajanganki' lako Puang Allataala sola sininna to tossa'ding kadangku' tee allo, ke wa'dingngi, tasusi tee aku', tantu saleanan jio mai tee kadipumpunganku'." 30 Katampakanna ke'dehmi joo raja na gubernur sola Bernike na sininna tonasolan cumadokko. 31 Ia tonna saleananmo pada sipangkadami nakua, "Te'da bangra apa napugauk tee tau to sipato'na dinii la ntarungkui iarika mbunoi." 32 Nakua Raja Agripa lako Gubernur Festus, "Wa'dingmo dila'paran, kenna tangngia kalena ia mpeta'dai mpatarruh kara-karana lako Tomaraja Roma."

Jamanna Rasulu' 27

1 Ia tonna dipattantumo kumua la malemokan mangkappala' lako Italia, ia to Paulus sola ba'tu pira-pira toditarungku laenna dipangben lako Yulius, kamandang surudadu to-Roma to disanga "Resimen Tomaraja". 2 Mende'mokan kappala' jio kota Kaisarea, kappala' jio mai kota Adramitium, kilamangnguju mpasitarruh-tarruh ba'tu pira-pira kakendenan kappala' jio propinsi Asia. Den mesa' to-Makedonia pole jio mai kota Tesalonika kisolan disanga Aristarkhus. 3 Masawanna ratukan lako kota Sidon. Mabassa joo Kamandang Yulius lako Paulus, jaji naeloranni male lako ba'tu pira-pira solana, to mbenni apa naparallui. 4 Ia tongkimangpatarruhmo kalingkangki' jio mai, nnola jiokan randan pulau Siprus, nasaba' ssussangkan angin, na nasala ia angin. 5 Mangkai joo too, nnola jiokan olona tana Kilikia na Pamfilia, kiratu lako kota Mira jio tana Likia. 6 Jiomo ntuu joo nanii Kamandang Yulius nnampa' mesa' kappala' pole jio mai kota Aleksandria mangnguju lako propinsi Italia, nanii mpalelekan lako. 7 Ba'tu pirang allo to nanii menonoh-nonoh manda to kappala'ki', butung to te'da kilandete' kota Knidus. Te'da kikullei nnola jio to kipangngattai jolo, sanga mangngumbuk bang unapi to angin. Mangnguju sau'kan pulau Kreta lliwa'i Tanjung Salmone mpessalai angin. 8 Gaja sussa to kappala'ki' nnola jio sa'dena joo pulau, kimane' ratu lako mesa' kampong disanga Kakendenan Melo sikandoppi' kota Lasea. 9 Budamo wattungki' masala bang, na liwa' toomi to wattu nanii to-Yahudi puasa. Iamo tandana kumua te'da namelo ke la tarruhpi to kappala'ki'. Iamo joo napupangngingaranni Paulus to tau, nakuanni, 10 "Ee, todipusile'to! Ia ke aku', la masussa tonggoki' ke la tarruhpiki'. La sabu' tonggoki', nasaba' tangngia ia manda tee kappala' sola luranna la ta'de, apa moi sunga'ta'." 11 Apa la'bi nakatappa'i ia Kamandang Yulius joo jurumudi sola puangna joo kappala' na ia to kadanna Paulus. 12 Te'da namelo joo kakendenan kappala' dinii torro ke wattu peurananni. Iamo joo nala'bi buda to pangjama kappala' ssitujuii, ke tarruh bangmi male ssalaii la mpendete'i kota Feniks jio pulau Kreta, na torro jio ke peurananni. Ia to kakendenan kappala'na tingngo tama suin lo'na liu, na suin jajanna liu. 13 Ia joo wattu mangngiri' lo' mai to angin biasa. Nasangami pangjama kappala' kumua wa'dingmi male. Jaji napaendekki to sau kappala', namale mangrundun randan tasik jio sa'dena pulau Kreta. 14 Apa te'da namasai, mangngiri'mi to angin bara' pole jao mai gantanan disanga angin pole jio mai kadellekan jajanna liu, 15 natampai to kappala'ki'. Kila'paran bangmi napupangdongga-donggai angin lan tasik, nasaba' tangnatananmi ssussang angin. 16 Napupangdongga-dongga tarruhkan angin bara', sanggenna ndete'kan randan mesa' pulau biccu' disanga Kauda. Gaja sussakan ntuu joo, kimane' ngkullei rrui' sekoci kappala', 17 nadipaendek de'. Mangkai joo dikapu' mengguririkki ulang joo kappala', dikua namawatang. Napalaoi to sompa', nala'paran bangngi joo kappala' nnawang-ngawang nabawa bombang, nasaba' malaja'i titumbu jio kassi' mangtombon disanga Sirtis. 18 Masawanna joo too kibuang bangmi do' tasik to luran kappala', sanga mangngumbuk tarruhhi to angin bara'. 19 Ia tonna allo masawanna pole' omo, ia to pangjama kappala' naca'bean to pakakasa' kappala' do' tasik. 20 Ba'tu pirang allomi to te'da bang kikita allo na bintuin na mangngumbuk tarruh bang too to angin bara'. Katampakanna te'damo kikua la tuopakan. 21 Ba'tu pirang allomi tangkumande to tau, namale Paulus mentama tangnga-tangngana ngkuanni, "Ee, todipusile'to sola ngasan! Ia ke la mipesa'dingngina' sola ngasan, nadanggi'mo tamale jio mai pulau Kreta, te'da talamasussa sola rugi susi tee. 22 Apa moi nasusi tee, kupeta'da mipamawatang penawammi. Moi mesa' te'daki' la mate, moi namasolang tee kappala'. 23 Nasaba' ia to Puang Allataala kusompa kupupuang too, ssua malaeka'-Na pubongi' ratu jio sa'deku', 24 nakuanna', 'Ee, Paulus! Danggi' mumalaja', sanga la mangngolommu lako Tomaraja Roma! Sininna tomusolan mangkappala' te'dai la matumba, nasaba' kameloan penawan-Na Puang Allataala lako kalemu.' 25 Iamo joo, tokupusile'to sola ngasan, pemawatangngi to penawammi! Sanga matappa'na' lako Puang Allataala kumua sininna to napauanna' la jaji ia. 26 Apa te'da nasalai, la nabawaki' wai lako mesa' randan pulau." 27 Ia tonna bongi mangpessangpulo a'pa'na napamale melako bang unapakan angin bara' jio Tasik Adria. Agi-agi tangnga bongi nasangai pangjama kappala' kumua la ndete'mi gantanan. 28 Natoke'i batu to ulang na dokkenni do' tasik la ssuka'i to mandalanna. Ci'di'mora naganna' patang pulo metere' dalanna. Te'da namambela jio mai ntuu joo, nasuka' pole' omi, na agi-agimora tallung pulo metere' dalanna. 29 Napado'i to a'pa' sau jao mai boko' kappala', nasaba' malaja'i titampah jio batu karang. Natajanni kumua kenna mariwangmo. 30 Madoangngi la ssalai bunii joo kappala'. Napado'i tasik to sekoci, naanggai'-gai'i butung la mpado' sau jio olo kappala'. 31 Apa nakua Paulus lako joo Kamandang Yulius sola to surudadu jao kappala', "Ianna la malai tee mai pangjama kappala', la sabu' ngasanki'." 32 Iamo joo naka'tuanni surudadu to ulang sekoci, nabawai wai. 33 Ia tonna la mariwangmo, nasuami Paulus to tau kumande sola ngasan nakuanni, "Ee, todipusile'to! Sangpulo a'pa'mo kamu' bonginna sola ngasan tangmangngapa tangkumande. 34 Jaji kupeta'da mikumande sola ngasan, ammimasumanga' pole'. Sanga moi mesa' te'daki' to la matumba." 35 Mangkanna mangkada susi joo, nnalami roti to Paulus, namangkurru sumanga' lako Puang Allataala jio olona sola ngasanni, namane' nti'pek-ti'pekki nakandei. 36 Masumanga' pole'mi sola ngasan nakumande toda. 37 Dua ratuhhi pitung pulo annan tau sola ngasan jao joo kappala'. 38 Ia tonna barah ngasanmo, naballuanmi do' tasik to gose', dikua namaringngan to kappala'. 39 Ia tonna mariwangmo, ngkitami gantanan to pangjama kappala', apa te'da naissenni gantanan umbonna. Nakita tooi to tasik mengkokonna namarante to randanna. Jaji madoangngi, ke wa'dingngi, la mpasissare kappala'na ntuu joo. 40 Naka'tuanni to ulang sau, natallan do' tasik. Nabukai tooi to ulang dipake ngkapu' kemudi, namane' mpaendekki to sompa' jio ulu kappala', dikua nairi'i angin lako randan tasik. 41 Apa titampahhi jio kassi' mangtombon joo kappala'. Ia to ulunna mellammak, te'damo napundiu, na ia to boko'na maicak, nakanna bombang tonggo. 42 Madoangngi to surudadu la mbuno ngasanni to toditarungku, dikua danggi' naden male nnorong mpella'paran kalena. 43 Apa madoangngi Kamandang Yulius la mpasalama' Paulus. Iamo joo naanggaii to surudadu mpugauk akkattana. Padami to macca nnorong nasua ngasan jolo mella'bu do' tasik, na nnorong lamban lian. 44 Na ia to pira'na la undi mentoe lako bangmo papan iarika lako piakkana joo kappala'. Susimi joo kimane' salama' sola ngasan ndete' randan tasik.

Jamanna Rasulu' 28

1 Ia tongkiendek melomo de' gantanan, mane'ri kiissen kumua jiomokan pale' pulau Malta. 2 Gaja bassa to tau jio lako kami'. Natarima melo ngasankan, napadukkuankan api, sanga mammulami uran, naratumi to wattu cakke'. 3 Ia tonna male Paulus mekaju napatamai api, den ulah mello'do' lan mai, sanga nalussuii api, natittoi to limanna. 4 Ia tonna kitai tau to ulah mendoke' jio limanna Paulus, sipangkadami nakua, "Ee! Ia tee tau te'da nasalai tombuno tau, sanga moi nala'pahmo jio mai abala' lan tasik, apa te'da naeloranni tuo dewata Baine Malampu'." 5 Apa napempi'pikanni Paulus joo ulah tama api, na moi cinding te'dara naciapa. 6 Nasangai te'da namasai, nakambang to limanna, iarika ta'pa mate pissenni. Apa ia tonna masai-saimo ntajanni, na te'da bang una namatumba, laen omi tangngahna, nakua, "Dewata tee tau." 7 Te'da namambela jio mai ntuu joo, den padangna Publius, mesa' tomangparenta ntuu joo pulau. Masannang penawanna ntarimakan, napupangbongikan tallung bongi, natoratu melo toopakan. 8 Ia joo wattu masaki to ambe'na, lumalla'i, natittai rara too. Mentamai Paulus tama kamara'na, napassambajanganni, na kaka'i, namalagah. 9 Ia tonna mangka joo, siratuan todami lako Paulus to tomasaki laen, napamalagah ngasanni. 10 Gaja nakasiri'kan, na ia tongkilamalemo, nabenkan sininna to kiparalluinna lan kalingkanki'. 11 Ia tongkitallung bulanmo jio pulau Malta, malemokan jio mai mpake kappala' jio mai kota Aleksandria disanga Dioskuri. Ia joo kappala' masainni torro jio pulau Malta ntajan soro'na peuranan. 12 Ia tongkiratu lako kota Sirakusa tallung bongikan jio, 13 kimane' male mangrundun randan tasik pole' sanggenna kota Regium. Masawanna mangngiri' lo' mai to angin, na duang bongira kiratu lako kota Putioli. 14 Sangminggukan torro jio sola ba'tu pira-pira tomatappa' lako Puang Isa, sanga nasuakan torro tongkisitammu. Mangkai joo too, malemokan lako kota Roma. 15 Ia tonna sa'dingngi to tomatappa' jio, siratuanmi jio Pasa' Apius sola pangbongian disanga Pasanggarahan Tallu la sikitankan. Ia tonna kitami Paulus, mangkurru sumanga'i lako Puang Allataala, naendek sumanga'na. 16 Ia tongkiratumo lako kota Roma, dipatorro mesai to Paulus najagaii mesa' surudadu. 17 Tallung bongi mangkanna joo, napangpesuanni Paulus naratu to pekaamberan to-Yahudi jio. Ia tonna sirempunmo nakuanni, "Ee, todipusile'to! Sitonganna te'da salaku' lako bangsata' ba'tu lako ada' tojolota'. Apa moi nasusi joo, dipangngolona' lako to-Roma, tongkudijokko jio kota Yerusalem. 18 Ia tonna mangkamo mparessai to kara-karaku', madoangngi la la'paranna', sanga moi sangkanuku malotong te'da salaku' naampa' to sipato' dinii la mbunona'. 19 Apa te'da nasitujui to-Yahudi, na iamo joo kupeta'dai nadibicara to kara-karaku' jio olona Tomaraja Roma. Sitonganna te'dara apa kuparapasan bangsata'. 20 Iamo joo kumeta'da tasitammu ssitimbang-timbangngii. Sanga iari kudipumpung, iari to Raja Mangpasalama', to masai allomo tatajan kita' to-Israel." 21 Napebalii to-Yahudi nakua, "Nate'da bangra sura' sanglambah kitarima jio mai tana Yudea, na te'da too tau ratu mpauko ba'tu mpau gaja'ko. 22 Apa madoangkan ssa'dingngi to pangngajaran muturu', sanga kisa'ding kumua umbo-umbo nanii, nacacca tau." 23 Mpattantumi mesa' allo sola Paulus nanii la sitammu. Ia joo allo buda tau ratu lako to nanii Paulus. Mellao melambi' ratu lako soloh allo naajahhi ngasan to tau umbo nakua menjaji taun-Na Puang Allataala lan kaparentan-Na. Napabuttii jio mai sura'na Nabi Musa na sura'na nabi laen kumua Raja Mangpasalama' to Puang Isa, to napau Puang Allataala tonna anu'. 24 Den to ngkatappa'i to apa napau Paulus, apa den too to te'da nakatappa'ii. 25 Ia tonna sipekkamo to tau, nasisarak-sarak, nakuamo Paulus, "Liwa' tongan to apa napau Roh Allataala lako tojolomi, to napau Nabi Yesaya tonna anu'. 26 Nakua, 'Malemo kamu' mpauanni to-Yahudi: Da'tan bang kamu' mpesa'dingngii, apa te'da milampahangngi. Da'tan bang kamu' mpemakitaii apa te'da miissenni apa to jaji. 27 Nasaba' liwa'mo membattuk tee bangsa, namataru talinganna, na mpamamma' matanna. Ia tee jajii dikua danggi' napakita matanna, nadanggi' namangpesa'ding talinganna, nadanggi' napahangngi, nadanggi' namengkatoba' lako kale-Ku' anna danggi' kupamalagahhi.' " 28 Katampakanna nakua Paulus, "Ee, kamu' to dipusile'to! Parallu miissen kumua ia to Kareba Kasalamatan jio mai Puang Allataala dipangpeissenan toomo lako bangsa tangngia to-Yahudi, na la natarimai ia!" 29 Ia tonna mangkamo Paulus mpaui susi joo, sipekkami to to-Yahudi anna male mpemboko'ii. 30 Duang taunni Paulus jio kota Roma, torro jio bola nasewa ia. Masannang penawanna ntarimai to toratu ngkitai. 31 Te'da namalaja' mpangpeissenanni umbo nakua menjaji taun-Na Puang Allataala lan kaparentan-Na, napangpeissenan tooi kumua Raja Mangpasalama' to Puang Isa. Masannang Paulus mangpangngajah, sanga te'da tau nnanggaii.

Roma 1

1 Ee, todipusile'to jio kota Roma, to napakamoja' Puang Allataala, to napileimo menjaji taun-Na! Napilei toomo' menjaji taun-Na, naangka'na' menjaji rasulu' la mpangpeissenan Kareba Kasalamatan jio mai Puang Allataala. 2 Mangkamo napau Puang Allataala lako nabi, na mangka toomo diuki' lan Sura' Allataala kumua ia to Kareba Kasalamatan la dipangpeissenan. 3 Ia to Kareba Kasalamatan, iamo to karebanna Puangta' Puang Isa Almaseh, Anak Allataala. Ianna situru' katolinoan-Na, bati'nai Raja Daud, 4 apa ianna kuasa kapuanganna, disangai Anak Allataala. Manassa to kuasan-Na, nasaba' tuo pole'mi jio mai kamatean. 5 Nabenna' barakka' Puang Allataala menjaji rasulu' nasaba' Puang Isa Almaseh, angkuwa'ding la mpatuju sininna bangsa kumua namatappa' sola menturu' lako Almaseh. 6 Na ia to kamu' to-Roma mentama toomo kamu' rekenan sininna bangsa la menjaji umma'-Na Puang Isa Almaseh. 7 Iami joo na aku' Paulus nnukiran kamu' tee sura' mati'. Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 8 Mangkurru sumanga'na' lako Puangku' Puang Allataala, mpau sangan-Na Puang Isa Almaseh, nasaba' naissen ngasanmo sininna bangsa kumua ia to kamu' to-Roma matappa' tongan lako Puang Isa Almaseh. 9 Puang Allataala nnissenni kumua kupau too kamu' ke massambajangna'. Na iamo nanii lantuk tongan penawangku' menturu', angkuwa'ding mpangpeissenanni to Kareba Kasalamatan, karebanna Anak Allataala. 10 Dennaa upa' napuelohhi Puang Allataala kuwa'ding male mati', 11 nasaba' mamali'na' la ssitammuan kamu', angkuwa'ding mben kamu' to barakka' nabenna' Roh Allataala, to la mpamawatang kamatapparanmi. 12 Battuananna kumua ia to kamatapparanku' lako Puang Isa wa'ding mpamawatang kamu', na ia to kamatapparanmi wa'ding mpamawatangna'. 13 Ee todipusile'to, parallu miissen kumua pembudamo' madoang male mati' la ssitammuan kamu', apa tuli den bang halangan. Madoangna' kumua na ia to jamanku' lako kalemi den assele'na. Susi to keassele'mo lako bangsa tangngia to-Yahudi jio kota laen. 14 Nasuana' Puang Allataala mpangpeissenan Kareba Kasalamatan lako sininna bangsa, la lako topaissen, la lako totangpaissen. 15 Iamo joo kugaja doang too mpangpeissenanni to Kareba Kasalamatan lako kamu' to-Roma. 16 Kukatappa'i tongan kumua ia to Kareba Kasalamatan iamo kuasan-Na Puang Allataala. Iamo carana Puang Allataala mpasalama' tomatappa' lako Puang Isa, la to-Yahudi, la bangsa tangngia to-Yahudi. 17 Ia to Kareba Kasalamatan mpaissenniki' umbo nakua carana Puang Allataala mpupenjaji tomeloi to tolino. Iamo to kamatapparan manda lako Puang Allataala, te'da ia cara laen. Susi to diuki' lan Sura' Allataala kumua, "Ia to tau dipupenjaji tomelo sanga matappa'i lako Puang Allataala, na iamo la nnampa' katuoan melo te'da cappa'na." 18 Dipangpeissenanmo jao mai suruga to kamabirisan-Na sola pangcalla-Na Puang Allataala lako tolino, nasaba' dosana na kedo gaja'na. Iamora joo hhalangngi tolino nnissenni to pangngajaran tongan jio mai Puang Allataala. 19 Apa sininna apa to nakulle tolino nnissenni to jiona Puang Allataala, naissen melomo, sanga Puang Allataala Ia mangka mpamanassai. 20 Sipamulanna napaden Puang Allataala tee lino, napahangmo tolino kumua umbora susi joo Puang Allataala to tangkakitanan. Ia to kapuangan-Na na kuasan-Na to te'da cappa'na, pajan jio mai sininna to apa mangka napaden. Iamo joo na te'da lalan la nanii tolino mpessakkananni. 21 Moi naissen to Puang Allataala, te'da napakala'bihhi na te'da too namadoang mangkurru sumanga' lako. Kannori to tangparallunna napikkiri', na te'damo napahangngi to pangngajaran tongan. 22 Ssanga kalena paissen apa sitonganna tangpaissen. 23 Nala'biranmo to ssompa tau-tau to apa la mate susinna: tau, manuk-manuk, olok-olok a'pa' ajena, olok-olok lumeme' jiong litak, na ia to ssompa Puang Allataala to tuo tarruh. 24 Iamo joo napupangngelohnai Puang Allataala mpugaukki to kagajatan situru' kamadoangan penawanna, na mpugauk mekaba'cianna lako padanna rupa tau. 25 Napasullei pangngajaran tangtongan to pangngajaran tongan jio mai Puang Allataala. La'bi nakabudai to ssompa pangpajajin-Na Puang Allataala, na ia to ssompa Puang Allataala to mpajajii. Na Puang Allataalara to sipato' disompa te'da cappa'na! Amin. 26 Iamo joo napupangngelohnai Puang Allataala mpugaukki to mesirisanna. Ia to baine te'damo namadoang lako muane, apa lakomora padanna baine. 27 Susi toda to muane, te'damo namadoang lako baine apa padannamora muane. Muane mpugauk mesirisan lako padanna muane. Iamo joo nannampa'mo bua-buanna to panggaukan gaja'na. 28 Napupangngelohnai Puang Allataala to tolino mangpikkiri' gaja', anna pugaukki to tangsipato'na, nasaba' nasangai kumua te'damo naparallu nnissen Puang Allataala. 29 Kagajatan mandamo lan penawanna na apa tangtongan, madoang nnassang sininna apa, tangngah gaja' na masere ati, madoang bang mangbuno, sibobo', mangnguraga, na malla' parru. Nakabudai ncurita tangtongan tau laen, 30 mpau sala tau, majao penawa, tangmessipa', ngkaba'ci Puang Allataala, buda kada. Nnangah bang lalan la mpugauk kagajatan, nnewa tomatuanna, 31 buta pangtangngaranna, te'da natoe tongan kadanna, tompatuo mesa kalena, te'da namamase lako padanna rupa tau. 32 Nnissen parenta-Na Puang Allataala kumua ia to tomanggauk susi joo sipato' la dibuno. Apa moi nasusi joo, da'tan bangngi mpugauk kagajatan, nakabudai too ke napugaukki tau laen susi to napugauk.

Roma 2

1 Iamo joo, to matumbara kamu' milampasalara tau laen? Te'da lalan la minii mpessakkanan kalemi jio mai kasalanmi. Nasaba' mpasala kamu' tau laen, na kamu' bang una mpugaukki to mipake mpasala tau, battuananna mpasala kamu' kalemi. 2 Taissen kumua ia ke nacallaki' Puang Allataala ke mpugaukki' to tangsipato'na, maruruh joo pangra'tah-Na. 3 Apa kamu' bang una mpugaukki to kasalan mipake mpasala tau laen! Na misangaraka kumua te'da nalancalla kamu' Puang Allataala? 4 Ba'tu te'daraka miangga'i to kamamasean-Na Puang Allataala, kameloan penawan-Na na kasabbarasan-Na to napakitan kamu'? Miissen kumua madoangri Puang Allataala ke mengkatoba' kamu', iamo joo napemeloan kamu' penawa. 5 Apa membattuk kamu' ammicia' mangpesa'ding. Iamo joo, kamu' bang una mpemabanda'i pangpabalah lako kalemi ke Kiama'mi lino. Ia joo allo napangpekitanni Puang Allataala to kamabirisan-Na na pangpabalah maruruh-Na lako to tolino. 6 Pada la napabalahhiki' Puang Allataala situru' apa to tapugauk. 7 Ia to toda'tan bang mpugauk kameloan, nakua anna nnampa' kamala'biran, kadipujian na katangmasolangan, la naben Puang Allataala katuoan melo te'da cappa'na. 8 Apa ia to tompangnginawan mesa bang kalena, na te'da namadoang mpugauk pakkaeloran-Na Puang Allataala, na nturu'ra kagajatan, liwa' nakaba'cinna Puang Allataala. 9 Sininna to tompugauk bang panggaukan gaja' la nnampa' kamasussan na kamaparrisan, la lako to-Yahudi, la lako bangsa tangngia to-Yahudi. 10 Apa sininna to tompugauk kameloan la mperasai kamala'biran, kadipujian na kamasannangan, la lako to-Yahudi, la lako too bangsa tangngia to-Yahudi, 11 nasaba' te'da tau napasilaenan Puang Allataala. 12 Ia to bangsa tangngia to-Yahudi te'da naissenni to atoranna Nabi Musa. Na la dipabalahhi to dosana, apa tangngia atoranna Nabi Musa la ngkannai. Apa lako to-Yahudi den atoranna Nabi Musa, na la dipabalahhi to dosana situru' joo atoran. 13 Tangngia tossa'ding manda atoranna Nabi Musa to napupenjaji tomelo Puang Allataala, apa iara to mpugaukki joo atoran. 14 Ia to bangsa tangngia to-Yahudi te'da naissenni to atoranna Nabi Musa. Apa ia ke tuo lanni ia mai penawanna mpugaukki joo atoran, iamo ia mpupenjajii atoran lako kalena. 15 Na panggaukanna mpapajanni kumua ia to apa dipangparentan lan atoranna Nabi Musa, den lan penawanna. Na penawanna mpabuttii joo, nasaba' penawanna biasa mpasalai ba'tu ntongananni to panggaukanna. 16 Susimi joo to la jaji ke Kiama'mi lino. Ia joo allo, situru' Kareba Kasalamatan kupangpeissenan, nasuai Puang Allataala to Puang Isa rra'tah kara-kara to membuni lan penawanna tolino. 17 Na ia tee too, ia to kamu' to-Yahudi, apara to nasanga penawammi? Ssangamo kamu' kalemi to-Yahudi. Mipikkiri'i kumua la salama'mo kamu', nasaba' dibenmo kamu' to atoranna Nabi Musa. Na mipumajao penawai, nasaba' disanga kamu' umma'-Na Puang Allataala. 18 Mipahang to pakkaeloran-Na Puang Allataala, miissenni umbo to melona ba'tu gaja'na, nasaba' miissen to atoranna Nabi Musa. 19 Mikanassai to kalemi kumua to rrenden kamu' tote'dapa naissen Puang, la nnajahhii to tompugauk kagajatan. 20 Mikanassai too kumua tomangpatuju kamu' lako totangmessipa', mimangngajahhi too lako tobango'. Mikanassai kumua miampa' to kapaissenan sola pangngajaran tongan lan atoranna Nabi Musa. 21 Nnajahhi kamu' tau laen, apa ciapari na te'da miajahhii to kalemi? Mianggai to tau boko, apa kamu' bang una boko! 22 Mikua mangngajahhi, "Danggi' manggauk sala!" Apa kamu' bang una mpugaukki! Mikaba'ci to tau-tau dewata, apa kamu' bang una nnala apa-apa lan bola dewata. 23 Mipumajao penawa to atoranna Nabi Musa, apa napumasiri' Puang Allataala, sanga te'da mituru'i to parenta-Na. 24 Den diuki' lan Sura' Allataala kumua "Ia to Puang Allataala napau gaja' bangsa laen, nasaba' sipa'mi kamu' to-Yahudi." 25 Ia ke mituru'i to atoranna Nabi Musa, ia to sunna'mi den too bua'na. Apa ia ke te'da mituru' tonganni, te'da lalo bua'na tuu sunna'mi. 26 Na ia to bangsa tangngia to-Yahudi to tangdisunna', ia ke nturu'i atoranna Nabi Musa, tantu la natarima Puang Allataala susi to todisunna'. 27 Ia to totangdisunna' la mpasala kamu' to-Yahudi, nasaba' todisunna' kamu' na den atoran agamammi, apa te'da mipugaukki. Na ia to bangsa tangngia to-Yahudi te'da nadisunna', apa naturu' tonganni. 28 Ia to to-Yahudi to direken umma'-Na tongan Puang Allataala, te'da na sanganna mandara to-Yahudi, na ia to todisunna' te'da napusanga mandari to disunna'. 29 Sibalikanna ia to to-Yahudi, to direken umma'-Na tongan Puang Allataala, iamo to to mangpenawa to-Yahudi tongan, na ia to sunna' tongan lanri ia penawa. Ia tee napugauk Roh Allataala, na tangnakulle atoran agama mpugaukki. Ia to tosusi joo kadipakala'biranna te'da napole jio mai tolino, apa pole jio mai Puang Allataala.

Roma 3

1 Ia ke susii joo, apara kala'bianna to to-Yahudi? Denraka bua'na ke disunna' kamu'? 2 Tantu bangmo buda bua'na! Nasaba' sininna kadan-Na Puang Allataala to-Yahudimo jolo dipauan. 3 Apa umbo susi ke denni to-Yahudi tangmatappa'mo na tangnturu'mo kadan-Na Puang Allataala? Wa'dingraka Puang Allataala mpessakkannii to kadan-Na? 4 Tantu te'da! Moi namangnguraga ngasan to tolino, tonganni ia to napau Puang Allataala, susi to nauki' Raja Daud lan Sura' Allataala, "Oo Puang! Ia to kadan-Ta' la naissen tau kumua tongan, ia ke dikara-karaki' Puang, pataloki'." 5 Apa ia ke ia to panggaukan gaja'ta' napusaba' nasapajan-pajanna to kamarurusan-Na Puang Allataala, apara la takua? Takuaraka kumua tangmaruruh to Puang Allataala, ke nacallaki'? Mangkada tobiasana' tee. 6 Te'da ia nasusi! Nasaba' ia ke te'da namaruruh to Puang Allataala, umbo la nakua rra'tah kara-karana to tolino? 7 Mbai den tau mpikkiri'i susi tee: "Te'da natongan ke dira'tahna' susi tomadosa, ke sapajan-pajannai to kamarurusan-Na Puang Allataala, napumala'bihhi, nasaba' panggaukan gaja'ku'." 8 Ia ke susii joo, ciapai na te'da tamangkada kumua, "Pugaukmi to kagajatan, nampaden kameloan"? Sitonganna den tau mpau salana' kumua mangkada susina' joo. Apa ia joo tau sipato' nacalla Puang Allataala. 9 Jaji umbo susi? Denraka kala'bianna to to-Yahudi na ia to tau laen? Te'da! Mangkamo kupau kumua la to-Yahudi, la bangsa tangngia to-Yahudi, tonakuasai ngasanmo kuasa dosa. 10 Susi to diuki' jolomo lan Sura' Allataala kumua, "Moi mesa' te'da tau mpugauk pakkaeloran-Na Puang Allataala, 11 te'da bang tau nnissen Puang Allataala, na te'da bang tau ssompai. 12 Sininna tau memboko' ngasanmo jio mai Puang Allataala, sala lalan ngasanmi. Te'da bang moi mesa' manggauk melo! Moi mesa' te'da! 13 Ia to kadanna mbuno tau, lan mai anga'na lolong bang to pangnguraga. Ia to kasolena tiburah-burah bang mpau sala tau susi ipoh ulah. 14 Tampak ropu manda jio timunna na pangcacca. 15 Gaja ringngan to ajena ke malei mbuno tau. 16 Kamasolangan manda na sussa to napaden umbo-umbo nanii. 17 Te'da namadoang sikalino padanna rupa tau, 18 na te'da bang nangkasiri' Puang Allataala." 19 Taissenmo kumua ia to atoran agama dipatuju lako to tomangka diben joo atoran. Iamo joo na te'damo tau wa'ding mpangngewan kalena, apa Puang Allataala la mbenni assele' panggaukanna to sininna tolino. 20 Te'da ia tau napupenjaji tomelo Puang Allataala, ke mpugaukki atoran agama. Sibalikanna ia to atoran agama napakitanriki' to dosata'. 21 Ia tee too napakitanmiki' lalan Puang Allataala, umbo nakua carana to tolino dipupenjaji tomelo. Na ia to sura'na Nabi Musa sola sura'na nabi laen mangka mpangpeissenanni tonna anu', na tangngia nasaba' nturu'ki' atoran agama. 22 Napupenjaji tomelo Puang Allataala to tau, nasaba' matappa'i lako Puang Isa Almaseh. Na ia tee napatujui Puang Allataala lako sininna tolino, te'da tau dipasilaenan, 23 nasaba' sininna tolino mpugauk dosa na te'da nasipato' ntarima kasalamatan. 24 Apa pangkamasean-Na Puang Allataala to mpakamoja'ki', antawa'ding dipupenjaji tomelo, nasaba' matappa'ki' lako Puang Isa Almaseh, to mangkamo la'bakki' jio mai kuasa dosa. 25 Mangkami napangkaroban Puang Allataala to Puang Isa Almaseh nalolong rara-Na, dikua anna ia to tomatappa' wa'ding dila'bak jio mai kuasa dosa. Iamo joo nanii Puang Allataala mpangpekitanni to kamarurusan-Na, nasaba' ia tonna jolona te'da nadipabalahhi dosana to tolino. 26 Apa ia tee too napapajanmi Puang Allataala to kamarurusan-Na, ke napupenjaji tomeloi to tomatappa' lako Puang Isa. 27 Iamo joo moi taturu' ngasanni to atoran agama, te'da talampumajao penawai. Ciapari nasusi joo? Nasaba' te'da tadipupenjaji tomelo sanga nturu'ki' atoran agama, apa kamatapparanta'ra. 28 Susimi ia tee: Napupenjaji tomelo Puang Allataala to tau, ke matappa'i lako Puang Isa Almaseh, tangngia ke mpugaukki atoran agama. 29 Ia to Puang Allataala te'da kumua to-Yahudi manda to la ssompai, apa sininna tolino la mpupuang too Puang Allataala, 30 nasaba' mesa'ra to Puang Allataala. Iamo mpupenjaji tomeloi to to-Yahudi, ke matappa'i. Na ia toomo mpupenjaji tomeloi to bangsa tangngia to-Yahudi, ke matappa'i. 31 Na ia ke matappa'miki' lako Puang Isa Almaseh, wa'dingmoraka taca'bean to atoran agama? Tantu te'da! Apa sibalikanna taangga'ri ia to atoran agama, nasaba' kamatapparanta' lako Puang Isa Almaseh.

Roma 4

1 Ia ke susii joo, apara la takua to jaji lako Nabi Ibrahim tojolota'? 2 Ia ke la dipupenjaji tomeloi nasaba' panggaukanna, sipato' ia majao penawa, apa te'da nasipato' mpugaukki susi joo dikua nakitai Puang Allataala. 3 Den diuki' lan Sura' Allataala kumua, "Ia to Nabi Ibrahim dipupenjaji tomeloi, sanga matappa'i lako Puang Allataala." 4 Ia to gajinna tomangjama te'da nadiben bangra, apa dibenni nasaba' sulle to'doan a'puhna. 5 Apa ia to kasiumputanta' sola Puang Allataala, to mpupenjaji meloi to tomadosa, te'da nasusi joo, te'da namenggaronto' lako panggaukanta'. Ia to tomadosa to te'da napattuan panggaukan melona, apa napattuan lakori Puang Allataala, dipupenjaji tomelo, sanga kamatapparanna. 6 Susimi joo to nasanga toda Raja Daud. Namangkada kumua masannang to tonapupenjaji tomelo Puang Allataala, moi na tangsipato' dipemeloi. Iamo joo namangkada nakua, 7 "Masannang ia to todidampanganmo, to nata'deimo Puang Allataala salana! 8 Masannang ia to totangnapasireken Puang Allataala dosana!" 9 Ia joo kamasannangan nasanga Raja Daud, te'da nadipatuju lako manda todisunna', apa dipatuju lako too totangdisunna'. Susi to mangka kipau jolo kumua, ia to Nabi Ibrahim dipupenjaji tomeloi, sanga matappa'i lako Puang Allataala. 10 Umbora wattu najaji joo? Mangkamiraka disunna' to Nabi Ibrahim, ba'tu te'daparaka? Io, ia tonna te'dapa nadisunna'. 11 Mangkamira joo, namane' disunna'. Ia to kadisunnatanna tandana kumua ia to Nabi Ibrahim napupenjaji tomeloi Puang Allataala, nasaba' matappa'i, moi na te'dapa napugaukki to atoran sunna'. Iamo joo na ia to Nabi Ibrahim menjaji ambe'na sininna tomatappa', to dipupenjaji tomelo, moiraka na te'da nadisunna'. 12 Susi too lako todisunna', napuambe' too to Nabi Ibrahim, ke matappa' tooi lako Puang Allataala susi kamatapparanna Nabi Ibrahim tonna te'dapa nadisunna'. 13 Ia to Nabi Ibrahim sola bati'na nabasse Puang Allataala la nnampui tee lino, tangngia nasaba' Nabi Ibrahim mpugauk atoran agama, apa nasaba' matappa'i anna dipupenjaji tomelo. 14 Ia ke la dipatuju lakori tompugauk atoran agama joo basse-Na, manassa torro sala to kamatapparanna tau lako Puang Allataala, na te'da bua'na to basse-Na. 15 Ia to atoran agama mpaden kamabirisan-Na Puang Allataala ke ditengkaii. Apa ia ke te'dai atoran, te'da too apa la ditengkai. 16 Jaji ia joo basse menggaronto' lako kamatapparan, dikua namanassa kumua dipangben situru' kameloan penawan-Na Puang Allataala. Na ia ke napangbenni situru' kameloan penawan-Na, manassa la napugauk. Ia joo basse dipatuju lako ngasan bati'na Nabi Ibrahim, tangngia lako manda todiben atoran agama, apa ia ngasan to tomatappa' lako Puang Allataala, susi kamatapparanna Nabi Ibrahim, to tapuambe' sola ngasan. 17 Den diuki' lan Sura' Allataala nakua Puang Allataala lako Nabi Ibrahim kumua, "La kupupenjajiko ambe'na buda bangsa." Susimi joo to basse-Na Puang Allataala anna katappa'ii Nabi Ibrahim Iamo Puang Allataala to mpatuo tomate, Ia toomo mangkada mandari mpadenni to apa te'da, namenjaji den. 18 Moiraka nabutung te'damo rannunna Nabi Ibrahim la nnampa' anak, apa matappa'i kumua la menjaji ambe'nai buda bangsa. Nakatappa'i to napau Puang Allataala kumua, "Ia to bati'mu la susi bintuin budanna." 19 Moiraka na ia to Nabi Ibrahim nasanga te'damo nalannampa' anak, nasaba' matuami, la saratuhmi taunna, na tamanang pole'pa to Sara bainena, apa te'da namoro' to kamatapparanna lako basse-Na Puang Allataala. Na samawatang-watangna ora, na mpakala'bih tarruh bang Puang Allataala. 21 Nakatappa'i Nabi Ibrahim kumua apa to mangka napau Puang Allataala, nang la napugaukki Ia. 22 Iamo joo na ia to Nabi Ibrahim dipupenjaji tomeloi. 23 Ia tee kada, "Napupenjaji tomelo Puang Allataala", te'da nadipatuju lako manda Nabi Ibrahim, 24 apa dipatuju lako too kaleta'. Napupenjaji tomelo tooki' Puang Allataala, ke matappa'ki' lako Puang Allataala to mangka mpatuo Puangta' Puang Isa jio mai kamatean. 25 Ia to Puang Isa dibuno, nasaba' dosata'. Napatuo pole'i Puang Allataala jio mai kamatean, tawa'ding dipupenjaji tomelo.

Roma 5

1 Napupenjaji tomeloki' Puang Allataala, nasaba' kamatapparanta'. Iamo joo tasikalino pole'mo Puang Allataala. Sininna tee jaji, nasaba' Puangta' Puang Isa Almaseh. 2 Iamo nneloranki' mperasai kameloan penawan-Na Puang Allataala to taperasai tee too, nasaba' kamatapparanta'. Jaji la marioki' sanga den kaparannuanta' mputawa kamala'biran-Na Puang Allataala jao suruga. 3 Te'da na ia manda joo, apa mario tooki', moi nakannaki' kamaparrisan, nasaba' taissen kumua kamaparrisan mpamawatangki', 4 na ia ke mawatangki' te'da tapugauk kasalan ke nakannaki' pecoba antaparannu. 5 Na ia joo kaparannuanta' te'da natangmpamasannangki', nasaba' ia to Roh Allataala nabenki' Puang Allataala, la mperasai pangpakamoja'-Na. 6 Ia tontatangpakullepa, matemi Almaseh la mpasalama'ki' tee kita' tomadosa. Ia joo wattu napattantu Puang Allataala. 7 Liwa' sussa diampa' to tau madoang mate mpangngewan tomaruruh. Mbai den tau madoang mate ke mpangngewanni tomelo penawanna. 8 Apa napakitanmiki' Puang Allataala to pangpakamoja'-Na, nasaba' ia tonna taloi unapiki' kuasa dosa, matei to Almaseh mpangngewanki'. 9 Dipupenjaji tomeloki', nasaba' kamatean-Na Almaseh. Iamo joo buttinna kumua la napasalama'miki' Almaseh jio mai pangcalla-Na Puang Allataala ke Kiama'mi lino. 10 Ia tonna jolona siewaliki' Puang Allataala. Moi nasusi joo, dipasikalino pole'miki' Puang Allataala, sanga kamatean-Na Anak. Apa pole'raka tee too, ke sikalino pole'miki' Puang Allataala, tantumo la dipasalamami'ki', nasaba' katuoan-Na Almaseh. 11 Na te'da na ia manda joo, apa mario tooki', nasaba' mangkami Puangta' Puang Isa Almaseh mpasipemeloanki' Puang Allataala. 12 Ia to dosa mentama lino, nasaba' mesa' tau mpugaukki, iamo to Nabi Adam. Na ia to Nabi Adam mate, nasaba' madosai. Iamo joo nalamate to sininna tolino, nasaba' te'da tolino tangmadosa. 13 Ia tonna te'dapa nadipaden to atoranna Nabi Musa, denmo dosa lan lino. Apa te'dapa nadireken dosa, tonna te'dapa atoran. 14 Moi nasusi joo, sipammula jio mai Nabi Adam ratu lako Nabi Musa, nang matemo to tolino. Matei to tau susi Nabi Adam, moi na ia to dosana te'da nasusi dosana Nabi Adam ntengkai parenta-Na Puang Allataala. Ia to Nabi Adam wa'ding dipasusi joo to la undi ratu, iamo to Puang Isa Almaseh. 15 Apa ia joo barakka' napangben Puang Allataala te'da napada to dosa napugauk Nabi Adam. Tongan kumua napumate ngasan tolino, sanga dosana Nabi Adam. Apa la'bi keangga' to kasalamatan napangben Puang Allataala lako tobuda nasaba' mesa' tau, iamo to Puang Isa Almaseh. 16 Te'da napada to barakka'-Na Puang Allataala na ia to dosa napugauk Nabi Adam. Nasaba' ia tonna madosamo Nabi Adam, nara'tahmi Puang Allataala nakua, "Tokasalan." Apa ia tonna madosamo to sininna tolino, nabenmiki' barakka'-Na Puang Allataala, nara'tahhi to tolino nakua, "Tote'da salana." 17 Mattantumo kumua nang la matei to sininna tolino, nasaba' dosana Nabi Adam. Apa ia to napugauk Puang Isa Almaseh la'bi mattantupa ia. La'bi mattantu kumua ia to tomangka dipakitan kameloan penawan-Na Puang Allataala na mangka dipupenjaji tomelo, la tuo te'da cappa'na nasaba' kamatean-Na Almaseh. 18 Jaji, nang la dicallai to sininna tolino, nasaba' panggaukan gaja'na mesa' tau, iamo to Nabi Adam. Susi unai joo la dila'paran to tolino jio mai pangcalla na diben katuoan, nasaba' panggaukan melo-Na mesa' tau, iamo to Almaseh. 19 Memmadosai to tolino, nasaba' mesa' tau te'da nanturu' pakkeloran-Na Puang Allataala, iamo to Nabi Adam. Susi toomi ia to tolino dipupenjaji tomeloi, nasaba' mesa' tau nturu' pakkaeloran-Na Puang Allataala, iamo to Almaseh. 20 Ia to atoranna Nabi Musa nabenni Puang Allataala, dikua namanassa kumua madosa to tolino. Sanapengkulleinna tolino nturu'i to atoran, sabuda-budanna to dosa napugauk. Apa moi sabuda-budanna dosana to tolino, samelo-melona penawan-Na Puang Allataala lako tolino. 21 Sipato'ki' mate, nasaba' dosata'. Apa napakamoja'ki' Puang Allataala, napupenjajiki' tomelo. Iamo joo nabenmiki' katuoan melo te'da cappa'na, nasaba' Puangta' Puang Isa Almaseh.

Roma 6

1 Ia ke susimi joo, apara la takua? La da'tan bangpiriki'ka mpugauk dosa, dikua anna samelo-melona penawan-Na Puang Allataala lako kaleta'? 2 Tantu te'da! Te'damo nasipato' ke mpugauk unapiki' dosa, nasaba' mangkamiki' mate sola Almaseh antadila'paran jio mai kuasa dosa. 3 Te'daraka miissenni kumua, ia tontadijio'mo, memmesa'miki' sola Puang Isa Almaseh. Ia tontadijio', pada matemiki' antapada dilamun sola Almaseh, dikua antatuo baru susi Almaseh tonna patuo pole'i Ambe' mpake kuasan-Na. 5 Na ia ke memmesa'miki' sola Almaseh, sanga matemiki' sola, dipatuo todamiki' susi Almaseh. 6 Taissenmo kumua ia to sipa' gaja'ta' mangkami dita'dei tontadipampang sola Almaseh jao kaju sitamben. Na ia ke susii joo, te'damo napukaunanki' kuasa dosa, nasaba' ia to tomatemo dila'paranmi jio mai kuasa dosa. 8 Ia antamatemo sola Almaseh, takatappa'imo kumua tuoki' sola, 9 nasaba' taissen kumua mangkami dipatuo to Almaseh jio mai kamatean, na te'damo nalamate pole'. Te'damo nalangkuasaii kuasa kamatean. 10 Ia to Almaseh pissenra mate, dikua na ntaloi kuasa dosa. Na ia to katuoan-Na Almaseh tee too dipatuju lako Puang Allataala. 11 Susimi joo la misanga too mangkamo kamu' mate lako kuasa dosa, ammituo lako Puang Allataala, nasaba' memmesa'mo kamu' sola Puang Isa Almaseh. 12 Iami joo, danggi'mo mieloranni to kuasa dosa mpukaunan kamu' nadanggi' mituru'i bangngi to kamadoangan gaja'mi. 13 Danggi' toomo mieloranni to batang kalemi la mpugauk kagajatan. Apa la miben Puang Allataala to batang kalemi, to butung matemo napatuo pole'i Puang tee too. Benni Puang Allataala to batang kalemi, anna pakei situru' pakkaeloran-Na. 14 Te'damo miwa'ding napukaunan kuasa dosa, sanga te'damo nakuasai kamu' atoranna Nabi Musa, apa tuomo kamu' situru' kameloan penawan-Na Puang Allataala. 15 Umbomora la takua too? Wa'dingriki'ka mpugauk dosa, nasaba' nakuasaimiki' kameloan penawan-Na Puang Allataala, na te'damo nakuasaiki' atoran agama? Te'da nalasusi joo! 16 Tantu miissen kumua ia ke denni mipupuang mituru'i to napueloh, tantu ia minii mengkaunan. Ia ke mengkaunan lako kamu' kuasa dosa, la mate kamu'. Ia ke mengkaunan lako kamu' Puang Allataala, la dipupenjaji tomelo kamu'. 17 Apa kurru sumanga' lako Puang Allataala, nasaba' jolona napukaunan kamu' kuasa dosa, apa ia tee too tatta' kamu' nturu' pangngajaran tongan to mangka diben kamu'. 18 Mangkamo kamu' dila'paran jio mai dosami, na ia tee too mengkaunan lakomo kamu' Puang Allataala, ammimenturu' lako pakkaeloran-Na. 19 Ia una kupake pangpasusian mengkaunan, dikua ammimadoi' mapahang. Susi tonna jolona mieloran to batang kalemi napukaunan penawa gaja'mi sola mangrupa-rupa kagajatan, susi toomi tee too la mipangben to batang kalemi mimengkaunan lako pakkaeloran-Na Puang Allataala ammituo susi to sipato'na tau mesan-Na Puang Allataala. 20 Ia tonna pukaunanpa kamu' kuasa dosa, te'da mituru' pakkaeloran-Na Puang Allataala. 21 Apara bua-buanna miampa' joo wattu? Iamo to apa mipumasiri'mo too, nasaba' katampakanna kamateanra diampa'. 22 Apa ia tee too la tuo kamu' susi to sipato'na tau mesan-Na Puang Allataala na la nnampa' kamu' katuoan melo te'da cappa'na, nasaba' mangkamo kamu' dila'paran jio mai kuasa dosa, mimengkaunan lako Puang Allataala. 23 Kamateanra to buanna dosa, apa katuoan melo te'da cappa'na nabenki' Puang Allataala, nasaba' memmesa'miki' sola Puangta' Puang Isa Almaseh.

Roma 7

1 Ee, todipusile'to! La mipahangmo tee kupau, sanga miissen to atoran agama, kumua ianna tuopa to tau la nakuasaipa ia atoran agama. 2 Susinna mesa' baine kemuane, ianna tuo unapa to muanena, nakannapa atoran tosibali. Apa ia ke matemi muanena, la'pahmi jio mai joo atoran. 3 Ianna den baine male sola muane laen, disangai manggauk sala, ke tuo unapi to muanena. Apa ia ke matemi to muanena, la'pahmi jio mai muanena situru' atoran tosibali. Na ianna kemuane pole' sola muane laen, te'da nadisanga manggauk sala. 4 Susi too kamu' to todipusile'to. Ia tonna jolona napukaunan kamu' atoran agama. Apa ia tee too dilaparanmo kamu' jio mai atoran agama, nasaba' mangkamo kamu' mate sola Almaseh. Jaji ia tee too taun-Namo kamu' Almaseh to dipatuo pole' jio mai kamatean, anna ia to katuoanmi makkeguna lako Puang Allataala. 5 Ia tonna jolona tuo bangpiki' situru' penawa gaja'ta', sanga nakuasaiki' kamadoangan mpugauk kagajatan to napaden atoran agama. Iamo pole' joo tapugauk bang tangmelo, to mpaden kamatean. 6 Apa ia tee too mangkamiki' mate tadila'paran jio mai atoran agama. Te'damo tasusi jolona mengkaunan lako atoran to diuki', apa mengkaunanmiki' lako Puang Allataala situru' cara baru to napakitanki' Roh Allataala. 7 Na ia ke susii joo apara la takua? Takuaraka kumua gaja' to atoranna Nabi Musa? Te'da ia! Apa nnissenmo' dosa, nasaba' kuissen to atoranna Nabi Musa. Ia kenna te'da nadiuki' lan atoranna Nabi Musa kumua, "Danggi' ngkadoangngi apanna padammu rupa tau!", te'da kuissenni to madoang. 8 Ia to kuasa dosa mpaden mangrupa-rupa kamadoangan gaja' lan penawangku', nasaba' atoran. Apa te'da namakuasa to kuasa dosa, ke te'da atoran agama. 9 Ia tonna jolona te'da kuissen atoran agama. Apa ia tongkuissenmi, napamulamo' napukaunan kuasa dosa, 10 na iamo joo kupumate. Ia to atoran agama to kusanga la mpatuona', na kannori la kupumate. 11 Ia to kuasa dosa mpaden mangrupa-rupa kamadoangan gaja' lan penawangku', nasaba' atoran. Susimi joo ia to kuasa dosa ngkalasiina' anna bunona'. 12 Maruruh na melo to sininna atoranna Nabi Musa, sanga ia to sura'na Nabi Musa na atoran lan joo sura', pole jio mai Puang Allataala. 13 Ia ke susii joo, la kupumateraka to apa melo, iamo to atoranna Nabi Musa? Te'da nasusi joo! Kuasa dosara ia mpaden kamatean. Na ia to kuasa dosa mpakei to apa melo mbunona', anna pajan kumua liwa' gaja' to dosa. 14 Taissen kumua ia to atoranna Nabi Musa pole jio mai Roh Allataala. Apa aku' tee tolino malammana', nasaba' susimo' todibaluk napukaunanmo' kuasa dosa. 15 Te'da kupahangngi to panggaukanku'. Ia to sipato'na la kupugauk, te'da na ia kupugauk. Apa ia to kukaba'cinna, ia ora kupugauk. 16 Apa ia ke mpugaukna' to tangkukabudainna, battuananna kukatonganni kumua melo to atoran agama. 17 Jaji, sitonganna tangngia aku' mpugaukki joo, apa kuasa dosara to ngkuasai kaleku'. 18 Kuissen kumua tangmelo to penawangku', nasaba' moi madoangna' mpugaukki to melona, te'da kukullei mpugaukki. 19 Ia to kameloan kukadoangngi la kupugauk, te'da na ia kupugauk, apa ia to kagajatan to te'da kumadoang mpugaukki, ia pole' ora kupugauk. 20 Ia ke kupugaukki to tangkukabudainna, tangngia aku' mpugaukki, apa kuasa dosara to ngkusai kaleku'. 21 Jaji iamo tee to jaji lako kaleku': madoangna' mpugaukki to melona, apa ia ora to tangmelona kupugauk. 22 Ia to penawangku' nakabudai to atoran-Na Puang Allataala, 23 apa te'da kukullei nturu'i, nasaba' den kuasa laen rrarii penawangku' nataloina'. Na iamo joo kuasa dosa to ngkuasaina'. 24 Aku'mo tau macilakanna! Indara ngkullei lla'paranna' jio mai kuasa dosa to la mbunona'? 25 Kurru sumanga' lako Puang Allataala! Iamo lla'paranna', nasaba' Puangta' Puang Isa Almaseh! Jaji ia to penawangku' menturu' lako atoran-Na Puang Allataala, na ia to kamadoangan gaja' lan penawangku' menturu' lako kuasa dosa.

Roma 8

1 Ia tee too te'damo nakannai pangcalla to tomemmesa'mo sola Puang Isa Almaseh, 2 nasaba' kuasan-Na Roh Allataala mangka lla'paranki' jio mai kuasa dosa sola kuasa kamatean. Ia to Roh Allataala mangka mbenki' katuoan baru sola Puang Isa Almaseh. 3 Ia to atoran agama te'da nakullei lla'paranki' jio mai kuasa dosa, nasaba' tangtakulle nturu' atoran agama. Apa ia to tangnakulle atoran agama mpugaukki, mangkami napugauk Puang Allataala. Nasuai to Anak mentolino. Na ia to batang kale-Na susi bang batang kale tolino biasa. Na ia tee Anak matei dikua anna ia to dosana tolino dipabalahhi lakoi batang kale-Na Anak. 4 Napugaukki Puang Allataala susi joo, dikua anna ia to pakkaeloran-Na, to pajan lan atoran agama, wa'ding tapugauk, nasaba' te'damo tatuo situru' kamadoangan penawanta', apa situru' Roh Allataala. 5 Ia to totuo situru' kamadoangan penawanna, nnawa-nawa bang pangkabudaianna. Apa ia to totuo situru' Roh Allataala, nnawa-nawa pangkabudaian-Na Roh Allataala. 6 Ia ke nakuasaiki' kamadoangan penawanta', manassa la dipumate. Apa ia ke nakuasaiki' Roh Allataala, la nnampa'ki' kamasannangan sola katuoan melo te'da cappa'na jio mai Puang Allataala. 7 Ia to tonakuasai kamadoangan penawanna, iamo tosiewali Puang Allataala, sanga te'da naturu' atoran-Na Puang Allataala, nasaba' tangnakullei. 8 Na te'da too nakullei mpamasannang Puang Allataala. 9 Ia to kamu' te'damo mituru' kamadoangan penawammi, sanga nakuasaimo kamu' Roh Allataala, to tuo lan kalemi. Ia to te'da Roh Almaseh lan kalena, tangngia taun-Na Almaseh. 10 Apa ianna den Almaseh lan kalemi, la naben kamu' katuoan Roh Allataala, nasaba' napupenjaji tomelomo kamu' Puang Allataala, moi nalamate to batang kalemi nasaba' dosa. 11 Ia to Roh Allataala mangka mpatuo Almaseh jio mai kamatean. Ia ke Roh Allataala tuo lan kalemi, Ia toomo la mpatuo kamu'. 12 Ee, todipusile'to! Iamo joo na te'damo tawa'ding nturu' bang kamadoangan penawanta'. 13 Ia ke taturu'i to kamadoangan penawanta', la mateki'. Apa ia ke taeloranni to Roh Allataala ntulungki' nca'beanni to panggaukan gaja'ta', la tuo meloki' te'da cappa'na. 14 Ia to tonakuasai Roh Allataala, iamo disanga anak Allataala. 15 Ia to Roh Allataala, to nabenki' Puang, te'da napukaunanki', anna te'da takalaja'i. Sibalikanna ia to Roh Allataala mpupenjajiki' anak Allataala, antawa'ding kumua lako Puang: "Ambe', ie' Ambe'ku'!" 16 Roh Allataala sola penawanta' mpamanassai kumua anak Allataalaki'. 17 Ia ke anak Allataalamiki', wa'dingmiki' la ntarima barakka'-Na Puang Allataala sola Almaseh. Na ia ke mperasaiki' parri' tee too susi Almaseh tonna tee, la dipakala'bih todaki' sola Almaseh. 18 Ia ke aku', mabanda' to kamaparrisan taperasai tee too, apa la manglokkon pembuda to kamala'biran la taampa' keanu'. 19 Sininna olok-olok na apa laen to napaden Puang liwa' mamali' ngasan ntajanni kumua piranpara napapajan ngasanni Puang Allataala to anakkana. 20 Ia to napaden Puang mangka ditampakki ropu. Tangngia elohna nasusi joo, apa elohnara Puang Allataala. Moi nasusi joo den unapa rannunna, 21 kumua den wattunna naladila'paran jio mai kamasolanganna, anna dipamala'bih sola sininna anak Allataala. 22 Taissen kumua sininna to napaden Puang sanggenna tee too sumarro na maparri' tarruh too susi to tolakeanak. 23 Na te'da na ia manda to napaden Puang, apa moi kita' sumarro na maparri' tooki'. Moiraka tamangkamo ntarima Roh Allataala, to bungah barakka', apa ntajan unapiki' la naganna'i Puang Allataala to kadila'bakanta' jio mai kuasa dosa napupenjajiki' anak. 24 Mangkamiki' dipasalama', iamo rannunta'. Apa ia ke taampa'mi to tarannuan, te'damo nadisanga apa dirannuan. Te'da tau mparannuanpi ke naampa'mi to apa narannuan! 25 Apa ia ke te'dapi taampa'i to apa tarannuan, la sabbara'ki' ntajanni. 26 Na Ia to Roh Allataala ntulungki' ke tangtakullei. Susinna ke te'da taissenni umbo dikua sitonganna massambajang, Ia mangngolo lako Puang Allataala mpeta'danki', mpau sarrota' to tangdiissen la mpaui. 27 Puang Allataala, to nnissenni apa to lan penawanna tolino, naissen too apa to natungkanan joo Roh Allataala, sanga Ia mpeta'dai lako Puang Allataala apa to naparallui umma'-Na situru' pakkaeloran-Na. 28 Taissen kumua Puang Allataala Ia nnatoro'i to sininna apa, anna benni kameloan lako to tompakamoja'i, to napileimo situru' eloh-Na. 29 Na ia to tonaissenmo, pura napattantumo la menjaji sangrupa Puang Isa Almaseh, Anak Allataala, dikua na Almaseh menjaji pamungah jio mai sininna sile'to tomatappa'. 30 Susimi joo to pura jolomo napattantu Puang Allataala napilei. Na ia tee mai to tonapileimo, napupenjaji tomelo. Na ia to napupenjaji tomelo, nabenmi kamala'biran-Na Puang Allataala. 31 Apara la takua tee too to sininna joo? Ia ke napangngewaiki' Puang Allataala indara la nnewaki'? 32 Na ia to Puang Allataala te'da napangnganggai to Anak mperasai parri', kannori napangben menjaji karoba lako kita' sola ngasan. Umbora nakua tanglambenki' to laenna? 33 Te'da ia tau ngkullei la mparapa'ki' to tonapileimo Puang Allataala, sanga Puang Allataala ngkuanki' kumua tote'da salata'. 34 Te'da ia tau ngkullei ncallaki', sanga Puang Isa Almaseh la mpangkadananki'. Iamo to mangka mate, natuo pole' na cumadokkomo sola Puang Allataala. 35 Te'da ia apa ngkullei hhalangngi Almaseh mpakamoja'ki'. Moi kamasussan, kamaparrisan ba'tu kadipakario-rioan, katangbarasan, kakaasi-asian, kamacilakan, ba'tu kamatean te'da nakullei mpupessarakki' jio mai pangpakamoja'-Na Almaseh. 36 Susi to diuki' jolomo lan Sura' Allataala kumua, "La nabunokan tau, dipasusikan bembala' la digere', nasaba' kituru'miki'." 37 Apa sapatalo-talota', sanga naampaiki' to tompakamoja'ki'. 38 Kuissen kumua, la kamatean, la katuoan, la malaeka', kuasa ba'tu kamawatangan laenna, pegarra' to dennamo too ba'tu mane' la ratunna, 39 ba'tu apa jao langi', ba'tu apa lan kuli'na padang, ba'tu laennapa, te'da nakullei mpupessarakki' jio mai pangpakamoja'-Na Puang Allataala, susi to napapajan Puangta' Puang Isa Almaseh.

Roma 9

1 Ia tee aku', taun-Nana' Almaseh na ia to penawangku' nakuasai Roh Allataala. Jaji ia tee kupau te'da kumangnguraga, apa tonganna kumua, 2 masse na liwa' parri' penawangku', 3 nasaba' sile'to sangbangsaku' to-Israel to te'da namatappa'. Kueloranni to kaleku' nakanna tampak ropu sola napasisarakna' Almaseh anna ia to sangbangsaku' sirapu Almaseh. 4 Iamo to to-Israel napilei Puang Allataala anna pupenjajii anak, napakitanni kamala'biran-Na. Mangkami dipadenan basse nadiben atoran agama, umbo nakua ssompa Puang Allataala. 5 Ia to to-Israel bati'nai Nabi Ibrahim, Ishak na Yakub. Na ia to Almaseh, to mentolino, bati'na todai. Apa Iamo Allataala to te'da apa njaonannii, to sipato' dipakala'bih te'da cappa'na. Amin. 6 Tangjajiraka basse-Na Puang Allataala, nasaba' buda to-Israel te'da namatappa'? Te'da, nasaba' te'da na sininna to-Israel to napilei Puang Allataala. 7 Te'da na ia ngasan to bati'na Nabi Ibrahim menjaji umma'-Na Puang Allataala, nasaba' nakua Puang Allataala lako Nabi Ibrahim kumua, "Bati'na manda Ishak to disanga bati'mu situru' basse-Ku'." 8 Battuananna kumua ia to bati'na Nabi Ibrahim to menjaji anak Allataala, iamo to jaji jio mai basse-Na Puang Allataala, tangngia kumua sininna bati'na. 9 Nasaba' nakua to basse-Na Puang Allataala kumua, "Wattu susimo tee la kunii ratu ke taun pole', na ia to Sara la mangkami njajian mesa' pea muane." 10 Na te'da na ia manda joo. La'bi manassa kumua te'da na ia ngasan bati'na Nabi Ibrahim menjaji anak Allataala, tonna keanak Ribka njajian pea rendu muane dua disanga Esau na Yakub, nasibalii Ishak tojolota'. 11 Nakua Puang Allataala lako Ribka kumua, "Ia to pamungah la mengkaunan lako adinna." Ia joo wattu te'dapa najaji joo pea dua, na te'dapa napugauk melo iarika gaja', apa pura napattantumo Puang Allataala to tonapilei. Jaji pajan kumua ia to tonapilei-Na Puang Allataala, te'da nasituru' to apa napugauk tolino, apa situru' eloh-Na Puang. 13 Den too diuki' lan Sura' Allataala kumua, "Kupakamoja' to Yakub na kukaba'ci to Esau." 14 Ia ke susii joo, la takuaraka kumua te'da namaruruh to Puang Allataala? Te'da nasusi joo! Maruruh Ia to Puang Allataala! 15 Nasaba' nakua Puang Allataala lako Nabi Musa kumua, "La kupakitanni kameloan penawang-Ku' to tokupueloh, na la kukamasei too to tokupueloh." 16 Jaji ia to barakka' sola pangkamasean-Na Puang Allataala tangngia elohna ba'tu kapakulleanna tolino mpattantui, apa kameloan penawan-Na Ia Puang Allataala. 17 Den diuki' lan Sura' Allataala kumua, "Mangkadami Puang Allataala lako Firaun, Raja Mesir nakua, 'Kuangka'ko jaji raja la kunii mpangpekitan kuasang-Ku', na kaissenan to sangang-Ku' lako sininna tolino.' " 18 Jaji Puang Allataala mpakitanni kameloan penawan-Na to mesa' tau ke napuelohhi, apa mpupembattuk too tau laen ke napuelohhi. 19 Mbai la mangkadako lako Aku' kumua, "Ciapai namangcacca bangpa Puang Allataala, na te'da tau wa'ding nnewai to pakkaeloran-Na?" 20 Ee, todipusile'to, tolino biasaki'! Na danggi' mubali-bali Puang Allataala! Te'da nawa'ding to kurin la mangkada lako tontampai kumua, "Ciapari mutampa susina' tee?" 21 Tantu ia to tomangtampa kurin elohna ia ntampai to kurin. Ia to sanglemong litak wa'ding ia natampa duang rupa kurin, mesa' liwa' ballo, na ia to laenna kassara'. 22 Susi toomi to wa'ding napugauk Puang Allataala lako kita' tolino. Madoang Ia mpapajan kamagallian-Na sola kuasan-Na lako to sipato' dipabalahhi. Apa sabbara'i, 23 dikua anna mpangpepajanan kamala'biran-Na to napatuju lako kita' tonakamasei. Na mangkamiki' napasadia la ntarimai joo kamala'biran. 24 Kita'mo to mangka napilei jio mai to-Yahudi sola bangsa laen. 25 Susi to mangka napau Puang Allataala lan sura'na Nabi Hosea nakua, "Ia to totangngia taung-Ku' la kusangai taung-Ku'. Na ia to tangkupakamoja' la kusangai 'Pangpakamoja'-Ku'.' 26 Ia to nanii Puang Allataala mangka mangkada kumua, 'Kamu' tee tangngia umma'-Ku'', ia toomo la dinii ssangaii kumua menjajimo anak lako Puang Allataala to tuo." 27 Gaja karrah Nabi Yesaya mangkada lako to-Israel nakua, "Moi na ia to bati'na to-Israel susi bungin budanna jiong tasik, apa ci'dikra la salama'. 28 Nasaba' sangkappidian matara ke naparatui Puang Allataala to pangcalla lako tolino, na mangkanna joo mangkami ia." 29 Susi to mangka napau Nabi Yesaya tonna anu', "Ia kenna te'da napatorroi Puang Allataala to makuasa ci'di' to bati'ta', wa'dingmiki' lanynya' susi to-Sodom na to-Gomora." 30 Apa omo la takua? Susii tee: Ia to bangsa tangngia to-Yahudi te'da napengkullei dipupenjaji tomelo, apa napupenjaji tomelo Puang Allataala, nasaba' kamatapparanna. 31 Sibalikanna, ia to to-Yahudi napengkullei tongan nturu' atoranna Nabi Musa dikua nadipupenjaji tomelo, apa te'da nakullei. 32 Ciapari na te'da nakullei? Nasaba' te'da namatappa' lako Puang Allataala. Nasangari kumua wa'ding ia ke mpugaukki atoran agama. Jaji titodomi lako "Batu Katitodoan", 33 susi to diuki' lan Sura' Allataala kumua, "Pesa'dingngii tee, 'Den mesa' tau kupajio kota Sion to dipasangrapang batu katitodoan. Ia joo batu nanii titodo tau na buda tau nalolinan. Apa ia to tongkatappa'i, te'da naladipakasiri'.' "

Roma 10

1 Ee, todipusile'to! Gaja doangna' kumua nadipasalama' to bangsaku'. Iamo joo kupassambajangan bangngi. 2 La mikatappa'i kumua masumanga' tongan ia ssompa Puang Allataala. Apa ia joo masumanga'na te'da nasituru' kapaissenan jio mai Puang Allataala. 3 Te'da napahangngi na te'da natarimai umbo nakua Puang Allataala mpupenjaji tomeloi to tolino. Apa napengkullei mpupenjaji tomelo kalena. 4 Mangkami naganna'i Almaseh to atoranna nabi Musa. Iamo joo ia to tomatappa' lako Almaseh, napupenjaji tomeloi Puang Allataala. 5 Den nauki' Nabi Musa matumba carana dipupenjaji tomelo to tolino, ke nturu'i atoran agama. Nauki' Nabi Musa kumua, "Ia to tompugauk atoran agama la naputuoi." 6 Na nauki' unapa Nabi Musa matumba carana dipupenjaji tomelo to tolino, ke matappa' lakoi Puang. Nauki'i kumua, "Danggi' mukua lan penawammu, 'Indara to la endek de' suruga?' (battuananna to la mpupellao Almaseh jao mai suruga), 7 ba'tu, 'Indara to la male do' lino tomate?' (battuananna to la mpatuoi to Almaseh jiong mai kamatean.)" 8 Nauki' omi Nabi Musa kumua, "Ia joo kadan-Na Puang Allataala mandoppi'ra jio mai kalemu, jioi timummu sola lanni penawammu." Iamo to kareba kipangpeissenan kumua sininna tau parallu la matappa' lako Puang. 9 Nasaba' ia ke miakui jio olona tobuda kumua Puangngi to Isa, ammikatappa'ii lan penawammi kumua mangkamo to Puang Isa Almaseh napatuo Puang Allataala jio mai kamatean, la salama' kamu'. 10 Nasaba' penawara namatappa' to tau, napupenjaji tomeloi Puang Allataala. Na pangngakuan timunna to tau anna dipasalama'. 11 Den diuki' lan Sura' Allataala kumua, "Ia to tomatappa' te'da naladipakasiri'." 12 Na ia joo dipatuju lako ngasan sininna tau, la to-Yahudi, la lako bangsa laenna. Mesa'ra Puang Allataala lako sininna tau, Iamo mben barakka' lako sininna to meta'da tulung lako kale-Na. 13 Den diuki' lan Sura' Allataala kumua, "Inda-inda to meta'da tulung lako Puang, la dipasalama'i." 14 Na umbo la nakua meta'da tulung lako Puang ke te'dapi namatappa'? Na umbo la nakua matappa' lako Puang ke te'dapi naissenni inda to la nakatappa'i? Na umbo la nakua to tau nnissenni to Puang, ke te'dapi tau mpangpeissenanni? 15 Na umbo la nakua tau mpangpeissenanni to Puang ke te'da nadisua mpangpeissenanni? Den diuki' lan Sura' Allataala kumua, "Liwa' melona karatuanna to tomale mpangpeissenan Kareba Kasalamatan jio mai Puang Allataala." 16 Apa te'da na ia ngasan tau ntarimai joo Kareba Kasalamatan. Nakua Nabi Yesaya, "Oo Puang! Ci'di'ra tau ngkatappa'ii to kareba kipangpeissenan!" 17 Jaji, ia ke denni tau mpangpeissenanni to karebanna Almaseh, mane'ri disa'ding. Na ia ke denmi tau ssa'dingngi, mane'ri wa'ding nakatappa'i. 18 Apa mekutanana': Te'daparaka ia nasa'dingngi to-Israel joo kareba? Tantu nasa'dingmo, nasaba' den diuki' lan Sura' Allataala kumua, "Nasa'dingmo sininna tolino to gamaranna. Ia to karebanna ratumi lako randan langi'." 19 La mekutana pole'pa': Te'daparaka ia naissenni to-Israel? Ia joo pekutana, bungahna napebalii Nabi Musa to kada napasan Puang Allataala lako to-Israel, nakua, "La kupamasere ati kamu' lako bangsa tangngia taung-Ku', na la kupamagalli kamu' lako bangsa te'da apa naissen." 20 La'bi barani pole' opa Nabi Yesaya mpaui to kada napasan Puang Allataala lako to-Israel nakua, "Ia to totangnnangahna', naampa'mo'. Kupangpeissenanmo to kale-Ku' lako totangmpekutananna'." 21 Apa nakua Nabi Yesaya mpaui to kada napasan Puang Allataala lako to-Israel nakua, "Da'tan bangna' mpupengkorongan limang-Ku' lako kamu', bangsa to tangmenturu' naewa toona'."

Roma 11

1 Mekutanana': Te'damoraka napuumma'i Puang Allataala to to-Israel? Umma'-Na unapa! Aku' una tee na to-Israelna' jio mai bati'na Nabi Ibrahim, pangrapuanna Benyamin. 2 Te'da natangmpuumma'i Puang Allataala to umma'-Na to napilei jolomo. Miissen curitanna Nabi Elia to diuki' lan Sura' Allataala, tonna pangpeasanni to to-Israel lako Puang Allataala. Nakua Nabi Elia, 3 "Oo Puang, nabunoi to-Israel to nabi, na nagaja'-gaja' tooi to ngenan pangkaroban. Aku' mandamo to tuo na la nabuno todana'." 4 Apara nakua Puang Allataala mebali? Nakua, "Kupatorro unapa pitung sa'bu to taung-Ku', to te'dapa naden nassompa dewata Baal." 5 Susi toomi tee too, nasaba' den unapa ci'di' tau to napilei Puang Allataala situru' kameloan penawan-Na, 6 na tangngia nasaba' panggaukan melona. Ia kenna la situru'ra panggaukan melona nadipilei, tangngiamo ia kameloan penawan-Na Puang Allataala. 7 Jaji umbo nakua? Ia to to-Israel mpengkullei la dipupenjaji tomelo, apa te'da naampa'i. Ci'di'ra to nnampa'i, iamo to tonapileimo Puang Allataala. Na ia to laenna napupembattukki penawanna, na te'da namatappa'. 8 Susi to diuki' lan Sura' Allataala kumua, "Napupembattukki Puang Allataala to penawanna tee tau, namembuta to mata penawanna, namemmataru too to talinganna, ratu lako too allo." 9 Nakua too Raja Daud mangkada, "Ake'mo na ia to pangrameanna mpojai, namenjaji susi garuang nanii melolin nnampa' balahna. 10 Ake'mo namaraun to matanna danggi' napakita, na ake'mo na mperasai tarruh bang kamaparrisan." 11 Mekutana pole'na': Melolinraka to to-Yahudi dikua nate'damo napuumma'i Puang Allataala? Te'da nasusi joo! Ia to bangsa laen dipasalama', nasaba' dosana to to-Yahudi, dikua anna masere ati to to-Yahudi lako joo bangsa laen. 12 Ia ke nnampa'i barakka' to bangsa tangngia to-Yahudi jio mai Puang Allataala, nasaba' kasalanna na katangmenturusanna to to-Yahudi, manglokkon to barakka' naampa' bangsa tangngia to-Yahudi, ke mengkatoba'i na dipasalama' too to to-Yahudi! 13 Ia to kamu' to bangsa tangngia to-Yahudi, ia tee aku' rasulu' napilei Puang Isa mpaissenni kamu' Kareba Kasalamatan. Kukua mangkada mati', kupakala'bihhi tee jamanku', dikua anna 14 masere ati to bangsaku' to-Yahudi, anna katampakanna nnampa' kasalamatan jio mai Puang Allataala. 15 Ia ke sikalino pole'i Puang Allataala sola to bangsa tangngia to-Yahudi, nasaba' mangka mboko'i Puang Allataala to to-Yahudi, apa pole'raka ke ditarima pole'i, butung to tomate tuo pole'! 16 Ia ke ia to bungah pangti'pekan roti diben Puang Allataala, tantu ia to torrona tawa-Na tooi Puang Allataala. Na ia ke ia to waka' kaju apan-Na Puang Allataala, tantu ia to tangkena apan-Na tooi Puang Allataala. 17 Ia to to-Yahudi dipasusi kaju zaitun dipiara. Na ia to bangsa tangngia to-Yahudi dipasusi kaju zaitun lampung. Den tangke kaju zaitun pira' dipiara na disembangngi dinii mpencangkoran tangke kaju zaitun lampung, iamo to kamu' to bangsa tangngia to-Yahudi. Ia tee jaji, dikua ammiperasai toda barakka' jio mai Puang Allataala to dipatuju lako to-Yahudi. 18 Iami joo nadanggi' mipamajao penawammi lako to susi tangke kaju dile'toimo. La miingaran kumua tangke bangra kamu', sanga tangngia tangke kaju to mpangben kande lako waka', apa waka'ra to mpangben kande lako tangke kaju. 19 Mbai la mangkada kamu' kumua, "Ie', disembangngii joo tangkena angkiwa'ding dipencangkoran jio." 20 Tongan tuu mipaunna. Apa iara nadisembangngi nasaba' te'da namatappa', na ditarima kamu' nasaba' matappa' kamu'. Iamo joo danggi' mimajao penawa, apa la malaja' kamu' lako Puang Allataala. 21 Nasaba' ia ke te'da nakasajangngii Puang Allataala to to-Yahudi to dipasusi tangke kaju dipiara nasembangngii, ia pissenraka to bangsa tangngia to-Yahudi te'da nalangkasajangngi nasembangngii. 22 Iamo joo nanii butti kumua liwa' buda kameloan penawan-Na Puang Allataala, apa liwa' buda too makarrahna. Makarrah lako to nasembangngi, totangmatappa', apa melo penawan-Na lako kamu', assalan da'tan bang kamu' matappa' lako Puang Allataala. Ia ke te'da mituru' pakkaeloran-Na Puang Allataala, la nasembangngi toda kamu'. 23 Na ia to to-Yahudi ke matappa'mi, la natarima ia Puang Allataala, napencangkoran pole'i. 24 Kamu' to bangsa tangngia to-Yahudi dipasusi kaju zaitun lampung. Na ia ke kamu' to tangsiolanan sipa'mi dipencangkoranmo lako kaju zaitun to tangngia garonto'mi, la'bi marawa ia to to-Yahudi la dipencangkoran pole' lako garonto'na unamo ia. 25 Ee todipusile'to! Denpa kareba to parallu miissen to te'dapa napangpeissenanni Puang Allataala lako tau tonna anu'. Madoangna' ammiissenni, anna danggi' mimajao penawa. Ia joo kareba iamo to kumua buda to to-Yahudi dipupembattuk penawanna. Na la susi bangngi joo to sipa'na, saganna'na to bangsa tangngia to-Yahudi dipasalama'. 26 Mangkai joo dipasalama' ngasanmi to to-Yahudi. Nasaba' den diuki' lan Sura' Allataala, nakua Puang Allataala kumua, "Ia to Tomangpasalama' ratu jio mai kota Sion. Iamo la mpamambela kagajatan jio mai bati'na Nabi Yakub. 27 Iamo tee to la kusibassei ke kudampanganni." 28 Nabarakka'i kamu' Puang Allataala, to bangsa tangngia to-Yahudi, nasaba' ia to to-Yahudi te'da natarimai to Kareba Kasalamatan anna ewai to Puang. Apa moi nasusi joo, ia to to-Yahudi napakamoja' unai Puang Allataala, nasaba' mangka napilei to tojolona to-Yahudi. 29 Ia ke napileimi Puang Allataala to tau, nabenni barakka', te'damo napenassannii. 30 Ia tonna jolona tangmangpesa'ding kamu' lako Puang Allataala. Apa ia tee too didampanganmo kamu', sanga katangmangpesa'dinganna to-Yahudi. 31 Susi toomi joo to to-Yahudi, tangmangpesa'dingngi tee too lako Puang Allataala, anna den wattunna na la didampangan, susi kamu' didampangan. 32 Napupangngelohnai Puang Allataala tangmangpesa'ding to sininna tolino, dikua la nanii mpangpekitan kameloan penawan-Na. 33 Tangnadete' akkalanna tolino to kamala'biran-Na, kamaccan-Na sola kapaissenan-Na Puang Allataala! Te'da ia tau wa'ding nnissenni to pura napattantu. Te'da too ia tau wa'ding mpahangngi to napugaukkuna. 34 Den diuki' lan Sura' Allataala kumua, "Te'da tau nnissenni to lan penawan-Na Puang. Te'da tau wa'ding la mpakainga'i. 35 Te'da tau mangka mpangben apa lako Puang Allataala, na la mpapole pole'i." 36 Sininna issinna lino panggaragan-Na ngasan Puang Allataala na apan-Na ngasan too, nadipatuju ngasan lako kale-Na. Iamo joo, sipato'ki' mpakala'bih tarruhhi to Puang Allataala te'da cappa'na! Amin.

Roma 12

1 Ee, todipusile'to! Gaja napakamoja'ki' Puang Allataala, susi to kupaissenanmo kamu'. Iamo joo kupakainga' kamu' kumua la mipangben tongan to katuoanmi lako Puang Allataala susi karoba tuo to sipato' dipangben lako Puang. La susiri joo to passompami to nakabudai Puang Allataala. 2 Danggi' mikaturu'-turu' bang lako tote'da naissen Puang Allataala. Ake'mo ia na Puang pemeloii to penawammi, ammiwa'ding nnissenni to pakkaeloran-Na, apa to melo na sukku', na apa to nakabudai Puang Allataala. 3 Kupakainga' kamu', nasaba' mangkamo' diben barakka' jio mai Puang Allataala menjaji rasulu': Danggi' misanga kalemi la'bi majao na ia to sitonganna. La miangga' to kalemi situru' pakullemi to napabarakkanan kamu' Puang Allataala, nasaba' kamatapparanmi lako Puang Isa Almaseh. 4 Ia to batang kale buda lesoanna. Na pada den patunna to simesa'-mesa' lesoan kale. 5 Susi toomi kita' sola ngasan. Moi budaki', apa butung to sangkalemiriki' na pada siparalluanki', nasaba' memmesa' penawamiki' sola Almaseh. 6 Pada nabenmiki' Puang Allataala mangrupa-rupa barakka' situru' kameloan penawan-Na. Iamo joo la tapake meloi to barakka' dibenki'. Ia ke barakka' mpau pepasan jio mai Puang Allataala dipatujuanki', la tapugauk situru' kamatapparanta'. 7 Ia to diben barakka' mangtulung, la napugauk tongan. Ia to diben barakka' mangngajahhi, la mangngajahhi tongan. 8 Ia to diben barakka' mangpamasumanga', la napugauk tongan. Ia to diben barakka' mangpangben, pasituru'i kamabassan. Ia to diben barakka' mangngamberan, la mangngamberan tongan. Na ia to diben barakka' kamamasean, la masannang mpugaukki. 9 La sipakamoja' tongan kamu'! Kaba'cii to kagajatan, mipengkulleii to kameloan. 10 Sipakamoja' kamu' susi to tosile'to, misitaratte' too. 11 Danggi' makuttu njamai to jaman-Na Puang Allataala situru' pangpatujun-Na Roh Allataala. 12 Pesannangngii penawammi nasaba' tomangrannuan kamu' lako Puang Allataala. Sabbara' kamu', ke nakanna kamu' kamasussan, ammimassambajang tarruh bang. 13 Parallu kamu' ntulungngi ke denni kaparalluanna padammi tomatappa', mitarima meloi lan bolami, moi na te'dapa misiissen. 14 Passambajanganni ke denni tau ssessa kamu', nabarakka'ii Puang Allataala, danggi' natampakkii ropu. 15 La pada parannu kamu' sola to toparannu, pada kamu' kumarrak ke denni to tokumarrak. 16 La mesa' penawa kamu'. Danggi' na den ssanga kalena tomajao, apa la siama' kamu' tomajiong. Danggi' misanga kalemi tomacca. 17 Danggi' mipasibalahhi kagajatan na kagajatan, pugaukki to nasanga tau melo. 18 Pengkulleii, ke wa'dingngi, misikalino ngasan tau. 19 Ee, todipusile'to! Danggi' lalo mimangpabalahhi. Ma'namo ia na Puang Allataala mpabalahhii. Nasaba' den diuki' lan Sura' Allataala kumua, "Nakua Puang Allataala, 'Aku' mpuissenni to mangpabalahhi, Aku'ra to wa'ding mpattantu pangpabalah.' " 20 Sibalikanna, ia ke tangbarahhi to ewalimmi, benni kande. Ia ke mawakkei, benni wai. Nasaba' ia ke mipugaukki susi joo, napumasiri'. 21 Danggi' nataloi kamu' kagajatan, apa mpugauk kamu' kameloan ntaloi kagajatan.

Roma 13

1 Parallu kamu' nturu' atoran tomangparenta, nasaba' te'da ia to tomangparenta tangnapattantu na te'da too to tangnaben kuasa Puang Allataala. 2 Iamo joo na ia to tonnewa tomangparenta, pada una ke nnewai to pura napattantumo Puang Allataala, na la dipabalahhi to tosusi joo. 3 Te'da ia tomanggauk melo la malaja' lako tomangparenta, apa tosalara. Iamo joo, ia ke manggauk melo kamu', te'da miparallu malaja' lako tomangparenta, apa napakala'bih kamu' tomangparenta. 4 Kaunan-Nai Puang Allataala to tomangparenta la mpaden kameloanmi. Na ia ke gaja'i to panggaukanmi, la mikalaja'i, nasaba' kaunan-Nai Puang Allataala la mpabalahhi to tompugauk kagajatan. 5 Jaji, parallu mituru' to tomangparenta nasaba' miissen lan penawammi kumua melo joo, tangngia manda nasaba' malaja'ra kamu' la dipabalahhi. 6 Ia toomo joo mimamajah sima, sanga ia to tomangparenta la nnurusu'i jamanna mpangjaman Puang Allataala. 7 Jaji, bajahhi to sipato'na mibajah. Susinna sima la mibajah lako to tontarima sima, sassung la mibajah lako tomassassung. Kasiri'i to tosipato' dikasiri', pekatabe'ii to tosipato'na mipekatabe'i. 8 Danggi' mikaindanan lako padammi rupa tau, apa sipakamoja' kamu'. Ia to tompakamoja' padanna rupa tau, padai to nturu' ngasan atoranna Nabi Musa. 9 Ia to atoranna Nabi Musa, iamo to: Danggi' manggauk sala, danggi' pabuno, danggi' boko, danggi' ngkadoangngi apanna padammu rupa tau, na denpa to laenna, dipangmesa na menjaji mesa'mora atoran, "Pakamoja'i to padammu rupa tau susi iko mpakamoja' kalemu." 10 Ia to tompakamoja' padanna rupa tau, te'da napugauk kagajatan lako tau laen. Iami joo na ia to tompakamoja' padanna rupa tau, padami to nturu' ngasan sininna atoran agama. 11 La mipugauk susi joo, nasaba' miissen wattu apara tee too. Miissen kumua wattunnamo kamu' la mi'cik, nasaba' la'bi mandoppi'mi to wattu nanii Puang Allataala la mpasalama'ki', na ia tontamane' matappa'. 12 Cingga'tu'mora naratu to kasalamatan. Iamo joo tapajaimi mpugauk kagajatan. Taparewaimo kaleta' panggaukan melo. 13 La maruruhki' susi kumua ratumi to kasalamatan. Danggi' mitakkajulu' gaja mangmaroah-roah, ammimalango. Danggi' manggauk sala, danggi' mipugaukki to tangsipato'na, danggi' massibobo' ba'tu masere ati. 14 Ake'mo na Puang Isa Almaseh mpatuju kamu' to sipato'na mipugauk. Danggi' mituru'i bang kamadoangan gaja'mi.

Roma 14

1 Tarima meloi to padammi tomatappa', moi to malamma kamatapparanna. Danggi' misite'gehhi to pahangna toda ia. 2 Den to matappa' kumua sininna kande wa'ding ngasan dikande, apa den to tomalamma kamatapparanna, na utan-utan bangra nakande. 3 Ia to sininna kande wa'ding nakande, danggi' nakita majiongngi to tomattantu bang nakande. Na ia to tomattantu bang nakande, danggi' napasalai to padanna tomatappa' to sininna kande wa'ding nakande, nasaba' natarima toomi Puang Allataala. 4 Tangsipato' kamu' la mpasala padammi tomatappa', nasaba' kaunanna tau laen. Na den ia Puangna nnissenni, la ke'dehrika ba'tu melolinrika. Apa la mawatangngi ke'deh, nasaba' Puang Allataala mpamawatangngi. 5 Den tau mpahangngi kumua den allo la'bi melo na ia to allo laenna. Den too to mpahangngi kumua pada ngasan to allo. Ma'namo ia napugaukki to nasanga tongan situru' pahangna. 6 Nasaba' ia to mpahangngi kumua den allo la'bi melo na ia to allo laenna, napugaukki susi joo anna pakala'bih Puang Allataala. Na ia to tote'da apa tangnakande, napugaukki susi joo anna pakala'bih Puang, nasaba' mangkurru sumanga' lakoi Puang Allataala. Ia to tomattantu kandena napugauk too susi joo. 7 Te'daki' la ntuoan mesa kaleta' ba'tu la mmatean mesa kaleta'. 8 Ia antatuo, tuo lakoki' Puang Allataala. Ia antamate, mate lako tooki' Puang Allataala. Jaji, tuoki' ba'tu mateki', nang taun-Naki' Puang. 9 Mangkamo mate to Almaseh, natuo pole'. Iamo pole' joo, Iamo Puangna to tuo, na Puangna to mangkamo mate. 10 Jaji, danggi' mipasala padammi tomatappa'. Te'da too miwa'ding la ngkita majiongngi. Nasaba' pada la mangngolo lako ngasanki' Puang Allataala tadiben to assele' panggaukanta'. 11 Den diuki' lan Sura' Allataala kumua, "Nakua Puang Allataala, 'Massapahna' kumua sininna tolino la messuju' jio olo-Ku'. Na sininna tolino la mangngaku kumua Aku'mo Puang Allataala.' " 12 Jaji, pada la mpebalianki' kaleta' to panggaukanta' lako Puang Allataala. 13 Iamo joo, danggi' tasipasala melako. La'bi melo ia ke tapengkullei anna danggi' tapugauk dosa to napusaba' na padanta' tomatappa' mpugauk toda dosa. 14 Kukanassai, nasaba' memmesa' penawamo' sola Puang Isa, kumua sitonganna te'da ia kande harang, apa ia takua kita' lan penawanta' harang, tantu harang lako kaleta'. 15 Apa ia ke ia to mikandena napupa'dik penawanna padammi tomatappa', sala to mipugaukkuna, sanga te'da mipakamoja'i. Danggi' na kandemi napugaja'i padammi tomatappa' to tomangkamo napumate Almaseh. 16 Iamo joo, moi misangai kumua melo to mipugauk, danggi' mipugaukki, ke nacaccai tau laen kumua sala. 17 Ia ke Puang Allataala ngkuasai to katuoanna tau, tangngia dikandena ba'tu diiso'na to parallu, apa iara to kasikalinoan pole' Puang Allataala, mpugauk pakkaeloran-Na, na kamasannangan to nabenni Roh Allataala. 18 Ia to tonturu' Almaseh susi joo, napusannang Puang Allataala, nakasiri' tooi tau laen. 19 Iamo joo tapengkulleimi mpaden kasikalinoan, sola to apa den bua'na lako kamatapparanna padanta' tomatappa'. 20 Danggi' migaja'-gaja'i to mangkamo napugauk Puang Allataala lako padammi tomatappa', sanga kande. Sininna kande hallala' ngasan dikande, apa mipusala, ke mikandei na pumadosai tau laen. 21 La'biran danggi' mikandei to juku' ba'tu nniso' anggoro', ba'tu apa bangmo mipugauk, ke la napumadosari padammi tomatappa'. 22 Ia to mikatappa'i jiona kande, ake'mo na Puang Allataala manda nnissenni sola iko. Masannang to totangssassan kalena ke napugaukki to nasanga tongan. 23 Apa ia to tobata ngkandei to kande, napasala Puang Allataala, nasaba' te'da napasituru'i kamatapparanna. Ia to panggaukan susi joo napumadosa.

Roma 15

1 Ia to kita', to mawatang una kamatapparanta', la sabbara'ki' ntulung padanta' tomatappa' to malamma kamatapparanna, ke denni tangnaala penawanna. Danggi' tapemasannangngi mesa kaleta'. 2 Sibalikanna la tapemasannangngi joo padanta' tomatappa' to la napumelona, napumawatangngi kamatapparanna. 3 Almaseh una nate'da nakamasannangan-Na manda napikkiri', susi to diuki' lan Sura' Allataala mpaui kumua, "Sininna kada pangcapa' lako Puang Allataala, mangkamo kuperasai." 4 Sininna to diuki' lan Sura' Allataala nnajahhiki', dikua antasabbara' ke nakannaki' kamaparrisan, nasamawatang-watangna to rannunta' lako Puang Allataala. 5 Dennaa upa' na Puang Allataala, to mangpasabbara' sola mangpakatana, la ntulung kamu' ammituo mesa' penawa situru' pakkaeloran-Na Puang Isa Almaseh. 6 Ia ke susii joo, mpamesa' kamu' penawa sola ngasan mpakala'bih Puang Allataala, Ambe'na Puangta' Puang Isa Almaseh. 7 La sitarima melo kamu' mesa' sola mesa', susi Almaseh mangkamo ntarima kamu', anna dipakala'bih to Puang Allataala. 8 La miingaran ia kumua mangkami Almaseh mentama lino ntulung to-Yahudi, la nanii Puang Allataala mpugauk basse-Na lako tojoloki', anna manassa kumua tongan to kadan-Na Puang. 9 Na ia to bangsa laen wa'ding mpakala'bih Puang Allataala, nasaba' kameloan penawan-Na Puang Allataala. Susi to diuki' lan Sura' Allataala kumua, "Iamo joo kupakala'bihki' lan tangnga-tangngana bangsa tangngia to-Yahudi. La kupakkelonganki' pangpujian mpau sangan-Ta'." 10 Denpa diuki' susi tee, "Ee, parannu kamu' sininna bangsa tangngia to-Yahudi sola umma'-Na Puang Allataala." 11 Na iapa tee, "Ee, kamu' sininna bangsa tangngia to-Yahudi, la mpakala'bih kamu' Puang. Ee, sininna tolino pakala'bihhi." 12 Susi toda tee to napau Nabi Yesaya, "Jio mai bati'na Isai la jaji mesa' tau, to la mparenta sininna bangsa na lako kale-Na nanii sininna bangsa mangrannuan." 13 Puang Allataala Iamo rannummi. Dennaa upa' naben kamu' kamarioan sola kamasannangan, nasaba' mikatappa'i, na ia to Roh Allataala mpamawatang kaparannuanmi lako Puang Allataala. 14 Ee, tokupusile'to! Kukanassai kumua buda kameloanmi, na miissen melo to pangngajaran-Na Puang ammiwa'ding nnajahhi tau laen. 15 Apa lan tee sura' kuuki', kupamanassa to kupangngingaranan kamu', nasaba' napabarakkannimo' Puang Allataala tee jamanku'. 16 Napupenjajimo' kaunan-Na Puang Isa Almaseh to disua male lako bangsa tangngia to-Yahudi. Na menjajimo' susi imang to mpangpeissenan Kareba Kasalamatan jio mai Puang Allataala. Dennaa upa' na Roh Allataala mpupenjajii to bangsa tangngia to-Yahudi susi karoba to napumasannang penawan-Na Puang Allataala. 17 Masannang penawangku' ncuritai lako kamu' to jamanku' lako Puang Allataala, nasaba' memmesa' penawana' sola Puang Isa Almaseh. 18 Baranina' mpaui umbo nakua Almaseh ntulungna' mangkada sola mangjama, anna ia to bangsa tangngia to-Yahudi menturu' lako Puang Allataala. 19 Nabenna' Almaseh kuasan-Na Roh Allataala mpugauk panggaukan mejangngaran to tangnadete' akkalan. Susimi joo kupangpeissenanmi to Kareba Kasalamatan, karebanna Almaseh, lako sininna tau, mammula jio mai kota Yerusalem ratu lako tana Ilirikum. 20 Na mangngattamo' mpangpeissenanni tee Kareba Kasalamatan lako tote'dapa nasa'dingngi to karebanna Almaseh. Te'da kumadoang mpake'deh bola jao pangrantena tolaen. 21 Apa madoangna' mpugaukki susi to diuki' lan Sura' Allataala kumua, "Ia to tote'dapa nadipauan to karebanna la naissen indari Ia, na ia to tote'dapa nasa'dingngi to karebanna, la napahang." 22 Tuli tangjajina' male mati', nasaba' jamanku'. 23 Apa ia tee too ia to jamanku' inde' mangka unamo na mangtaun-taunmo' madoang ssitammuan kamu'. 24 Jaji, ia ke malena' lako tana Spanyol nnola kota Roma, madoangna' la leppang mati' jolo'. Ia ke mangkamiki' mpaliu mali'ta', melo ke mitulungna' mpatarruh kalingkanku' lako tana Spanyol. 25 Apa la malena' jolo' lako kota Yerusalem mbawanni kaparalluanna to umma'-Na Puang jio. 26 Sanga situjumi to jamaa jio tana Makedonia sola Akhaya rrempunanni doi' to tokaasi-asi jio kota Yerusalem to matappa'mo. 27 Canning atinna sola ngasan ssituru'ii mpugaukki joo. Sipato'nami la ntulung tokaasi-asi jio kota Yerusalem, nasaba' ia to bangsa tangngia to-Yahudi ntarimamo barakka'na to-Yahudi. Iamo joo nasipato' ntulung to-Yahudi mpake barakka' ewanan. 28 Ia ke mangkami kujama tee mpangbenni joo doi', mane'ra' male lako tana Spanyol nnola mati' kota Roma, kuleppang jolo' ssitammuan kamu'. 29 Na kuissen kumua ia ke malena' mati', la kubawan kamu' barakka' jio mai Almaseh. 30 Ee, tokupusile'to! Meta'dana' mitongan-tongannii massambajang lako Puang Allataala mpassambajanganna', susi to kupassambajangan. Meta'dana' susi tee, nasaba' memmesa' penawamiki' sola Puangta' Puang Isa Almaseh na sipakamoja' toomiki', nasaba' Roh Allataala. 31 Massambajang kamu' angkudila'paran jio mai totangmatappa' lako Puang Isa Almaseh jio tana Yudea. Massambajang too kamu' anna tarima meloi umma'-Na Puang Allataala tokaasi-asi jio kota Yerusalem tee pangtulungan. 32 Ia ke susimi joo, ianna puelohhi Puang Allataala, la male masannangna' mati', anna matana to penawangku'. 33 Dennaa upa' na Puang Allataala, to mpangben kamasannangan, nnampai kamu' sola ngasan. Amin.

Roma 16

1 La kupangpetandan to todipusile'to baine disanga Febe, mesa' tontulung jamaa jio kota Kengkrea. 2 Tarima meloi susi mesa' umma'-Na Puang, sola susi to sipato'na natarima umma'-Na Puang Allataala. La miben ke denni kaparalluanna, nasaba' budamo pangtulungna lako aku' sola tau laen. 3 Sallangku' lako Priskila na Akwila, sangpangjamanku' lan jaman-Na Puang Isa Almaseh. 4 Ci'di'mora namate sola dua mpessangkaina'. Te'da na aku' manda to mangkurru sumanga' lako kalena sola dua, apa sininna too jamaa bangsa tangngia to-Yahudi inde'. 5 Sallangku' lako jamaa to sirempun jio bolana. Sallangku' lako tomatappa' Epenetus, to kupakamoja'. Iamo jolona to-Asia matappa' lako Almaseh. 6 Sallangku' lako Maryam to mbalii tarruh kamu'. 7 Sallangku' lako Andronikus na Yunias, sangtondokku' to mangka kusolan ditarungku. Jolo ia menturu' lako Almaseh na aku', na to katandan lan tangnga-tangngana rasulu'. 8 Sallangku' lako tomatappa' Ampliatus, to kupakamoja'. 9 Sallangku' lako Urbanus sangpangjamanta' lan jaman-Na Almaseh. Sallangku' too lako Stakhis, to kupakamoja'. 10 Sallangku' lako Apeles. Mangbuttimo to kamatapparanna lako Almaseh. Sallangku' lako rapunna Aristobulus, 11 sola lako Herodion, to sangtondokku'. Sallangku' too lako rapunna Narkisus to matappa'. 12 Sallangku' lako Trifena sola Trifosa to tangmekabo'jo' mpangjaman Puang. Sallangku' lako Persis to kupakamoja', to tangmekabo'jo' too mpangjaman Puang. 13 Sallangku' lako Rufus to napilei Puang Allataala, sola indona, to butung kupuindo' toomo. 14 Sallangku' lako Asinkritus, Flegon, Hermes, Patrobas, Hermas sola tomatappa' laenna to nasolan jio. 15 Sallangku' lako Filologus na Yulia, na Nereus sola sile'tona baine, na Olimpas na lako to tomatappa' to nasolan. 16 Pada sisalama' melo kamu'. Sininna jamaa to matappa' lako Almaseh massallang mati' sola ngasan. 17 Ee, tokupusile'to! Kupakainga' kamu', majaga kamu' lako to mpaden bang kasisakkan, na mpaputta kamatapparan lako Puang Allataala. Ia to pangngajaranna sisala to pura diajaran kamu'. Danggi' misiama'. 18 Ia to tosusi joo te'da namengkaunan lako Almaseh Puangta', apa naniiri ia mpemasannangngi penawanna. Melo bang to kadanna to la nanii nnuraga tomaruruh kaju dalle. 19 Na naissen ngasan tau kumua mangka kamu' nturu' pangngajaran-Na Puang Allataala. Na liwa' napusannang penawangku' joo. Dennaa upa' mimacca mpugauk kameloan, na tangmiissen mpugaukki to kagajatan. 20 Puang Allataalamora, to mben kamasannangan lako tolino, la rro'pokanni to kuasa Ballisi'. Dennaa upa' nabarakka'i kamu' Puangta' Puang Isa Almaseh. 21 Sallangna sangpangjamanku' Timotius mati'. Sallangna sangtondokku' Lukius, Yason na Sosipater mati'. 22 Aku', Tertius, padammi tomatappa' lako Puang to nnuki'i tee sura', massallang todana' mati'. 23 Sallangna Gayus mati' to mpupangbongina' jio bolana to nanii too sirempun jamaa massompa. Sallangna Erastus to nnanna doi' kota. Sallangna too tomatappa' Kwartus. 24 Dennaa upa' nabarakka'i kamu' Puangta' Puang Isa Almaseh! Amin. 25 Pakala'bihhi to Puang Allataala! Iamo to kuasan-Na mpamawatang kamatapparanmi situru' Kareba Kasalamatan jio mai Puang Isa Almaseh to kupangpeissenan. Ia tee Kareba te'da naissenni tau tempon jio mai dipadenna lino, 26 apa ia tee too dipangpeissenanmi lan sura'na nabi lako sininna bangsa, situru' parenta-Na Puang Allataala to tuo te'da cappa'na, dikua namatappa' ngasan na menturu' lako Puang Allataala. 27 Iamo Puang to mandalan tangngah, te'da ia Puang laen. Iamo joo la tapakala'bih tarruhhi te'da cappa'na, nasaba' ia to mangka napugauk Puang Isa Almaseh. Amin.

1 Korintus 1

1 Ee, tomala'bihku' sola ngasan, tomatappa' lako Puang Allataala jio kota Korintus, to napilei Puang Allataala menjaji umma'-Na, to napatorro leko' Puang Isa Almaseh jio mai to totangnturu' Puang, sola sininna to tossompa Puangta' Puang Isa Almaseh umbo-umbo nanii! Iamo Puangta' sola ngasan. Aku' Paulus sola padanta' tomatappa' Sostenes ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang Isa Almaseh. 3 Dennaa upa' nabarakka'i kamu' Ambe'ta' Puang Allataala sola Puang Isa Almaseh naben kamu' kamasannangan. 4 Tuli mangkurru sumanga'na' lako Puangku' Puang Allataala, sanga nabenmo kamu' barakka'-Na nasaba' Puang Isa Almaseh. 5 Iamo joo miampui buda apa. Susinna mipahang to apa masussa dipahang, na macca kamu' mpangpangngajaranni lako tau. 6 Iamo mpamanassai kumua ia to pangngajaran jio mai Almaseh mikatappa'i tonganmo, 7 anna te'da barakka' tangmiampui jio mai Puang Allataala, ammida'tan ntajanni to karatuan-Na pole' Puangta' Puang Isa Almaseh. 8 Puangta' Puang Isa Almaseh Ia la mpamawatang kamu' mida'tan matappa' ratu lako cappa'na anna moi ci'di' te'da kasalanmi, ke ratu pole'mi. 9 Ia to Puang Allataala sipato' dikatappa'i. Iamo mpilei kamu' ammimesa' penawa sola Anak Allataala, Puangta' Puang Isa Almaseh. 10 Ee, tomala'bihku' sola ngasan! Kuasan-Na Puangta' Puang Isa Almaseh kumeta'da kumua mimesa' pangtangngaran. Danggi' misipekka, apa la memmesa' penawara kamu'. 11 Ee, tomala'bihku'! Napauanna' rapunna Kloe kumua sipekka-pekka kamu'. 12 Susi tee to kusanga, pada mipau kumua, "Nturu'na' Paulus," "Nturu'na' Apolos," "Nturu'na' Petrus," ba'tu "Nturu'na' Almaseh." 13 Te'da namentama akkalan ke titawa-tawai to umma'-Na Almaseh. Tangngia Paulus dipampang jao kaju sitamben ammididampangan. Te'da too midijio' mpake sanganna Paulus. 14 Mangkurru sumanga'na', nasaba' te'da tau kujio' iti', sangadinna Krispus manda sola Gayus. 15 Jaji, te'da milamangkada kumua, "Dijio'na' mpake sanganna Paulus." 16 Oo, aku' too pale' njio'i Stefanus sola rapunna. Ia to kuingaranna te'damo tolaen kujio'. 17 Nasuara' Almaseh male mpangpeissenan Kareba Kasalamatan, te'da nasuana' male njio' tau. Tangngia kamaccanku' ba'tu kapaissenanku' kupake mpangpeissenan Kareba Kasalamatan. Sanga ia ke susii joo, te'da naissenni tau to kuasa kamatean-Na Almaseh jao kaju sitamben. 18 Ia to tolannampa' kamaparrisan keanu' nasangari curita tangtongan to kareba kumua matemi Puang Isa jao kaju sitamben la mpasalama' tolino. Apa ia to kita' to dipasalama'mo taissen kumua, ia joo kareba iamo carana Puang Allataala mpapajan kuasan-Na. 19 Nakua Puang Allataala lan Sura' Allataala kumua, "Ia to kapaissenanna tomacca la kupasiputtakki na ia to pahangna to buda paissenna la kulanynya'i." 20 Ia ke susii joo, te'damo bua'na to tomacca, guru agama sola to buda paissenna lan tee lino. Napangpekitanmo Puang Allataala kumua ia to kapaissenanna tolino te'da lalo angga'na. 21 Sanga moi samatumbanna macca to tolino, te'da nakullei nnissen Puang Allataala mpake kamacanna. Apa macca to Puang Allataala. Iamo joo naeloranni dipangpeissenan to Kareba Kasalamatan, to nasanga tolino curita tangtongan, anna pasalama'i to tongkatappa'ii. 22 Meta'dai to to-Yahudi tanda mejangngaran menjaji butti, na ia to to-Yunani gaja mpattuanni kapaissenan linona. 23 Ia to kita' mpangpeissenan mandaki' Almaseh to mate dipampang jao kaju sitamben. Cia' lalo to to-Yahudi ntarimai joo kareba na ia to bangsa tangngia to-Yahudi nasangari curita tangtongan. 24 Apa ia to tonapileimo Puang Allataala, la to-Yahudi, ba'tu bangsa tangngia to-Yahudi, napahang kumua, iamo carana Puang Allataala mpapajan kuasan-Na sola kapaissenan-Na. 25 Ia to nasanga tolino tangpakulle-Na Puang Allataala, la'bipa ia pakulle-Na na ia to pakullena tolino. Na ia to nasanga tolino tangpaissen-Na Puang Allataala, la'bipa ia paissenna na ia to kapaissenanna tolino. 26 Ee, tomala'bihku' sola ngasan! Ingaranni torroanmi tonna pilei kamu' Puang Allataala. Nasanga tolino ci'di'ra kamu' to tomacca, topakulle ba'tu todikasiri'. 27 Napilei Puang Allataala to nasanga tolino tangpaissen anna masiri' to tossanga kalena macca. Napilei too Puang Allataala to nasanga tolino tangpakulle anna masiri' to tossanga kalena topakulle. 28 Napilei Puang Allataala to nasanga tolino tomajiong torroanna ba'tu tote'da bua'na iarika totangdikasiri', anna lanynyasan ngasanni Puang Allataala to nasanga tolino parallu. 29 Iamo napugaukki susi joo dikua anna moi mesa' tau te'da wa'ding mpikkiri'i kumua, "Napileina' Puang nasaba' kamaccanku'." 30 Menjajimo kamu' umma'-Na Puang Isa Almaseh, nasaba' Puang Allataalara. Iamo ssua Puang Isa la mpasalama' kamu', napupenjaji kamu' tomacca, tomelo, napatorro leko' kamu' jio mai to totangnturu' Puang, nala'bak kamu' jio mai kuasa dosa. 31 Iamo joo naden diuki' lan Sura' Allataala kumua, "Ia to tomangpuji, iara la napuji to apa napugauk Puang."

1 Korintus 2

1 Ee, tomala'bihku' sola ngasan! Ia tongkuratu iti' mpaissenni kamu' to apa napamanassa Puang Allataala to te'dapa naissenni to totangnturu' Puang, ia joo wattu te'da kupake kapaissenan tolinoku' ba'tu kada mala'bih. 2 Nasaba' kuakkattai kumua la padana' too masainna iti' misolan, te'da apa laenna la kupau, ia mandara joo Puang Isa Almaseh matemo dipampang jao kaju sitamben. 3 Ia tongkuiti', tangpakullena' kumbe'beh malaja'. 4 Ia tongkupangpeissenan Kareba Kasalamatan lako kamu', te'da kupake kada massede to la nnala penawammi susi kada tomacca. Apa ia to kuasan-Na Roh Allataala pajan lan kadangku'. 5 Iamo kupugaukki susi joo, kukua anna danggi' mimatappa' lako kapaissenan tolino, apa matappa' lakora kamu' kuasan-Na Puang Allataala. 6 Moi nasusi joo, mpakekan kapaissenanki' ke sipangkadamokan to masaranianmo. Na ia joo kapaissenanki' tangngia kapaissenan naajarankan tolino ba'tu kapaissenan to naampui to tongkuasaii tee lino, sanga la lanynya' joo tongkuasaii. 7 Apa ia joo kipau, kapaissenan pole jio mai Puang Allataala. Ia joo kapaissenan te'da naissenni tolino, apa napasadiamo Puang Allataala joo kapaissenan tonna te'dapa nadipaden tee lino, antapumala'bihhi. 8 Moi mesa' to tongkuasaii tee lino te'da nnissenni. Sanga ia ke la naissenni, tantu te'damo anna la mpampangngi joo Puang mala'bih jao kaju sitamben. 9 Kipangpeissenanni to apa diuki' lan Sura' Allataala kumua, "Napasadiamo Puang Allataala to la naben lako to tompakamoja'i to te'da lalopa nakitai tolino, to te'da lalopa nasa'dingngi, ba'tu to te'da lalopa nakalannaii." 10 Apa lako kita' mangkamiki' napamanassan Roh Allataala, to nabenki' Puang, joo kapaissenan to te'da naissenni tolino. Roh Allataala nnissen sininna apa, moi akkatta-Na Puang Allataala to kaminang mandalan. 11 Na ia to issi penawanta', kita' mandara nnissenni, te'da naissenni tau laen. Susi toomi Roh Allataala mandara nnissenni to issi penawan-Na Puang Allataala. 12 Te'da nabenki' Puang Allataala cara mangpikkiri' susi tolino, apa Roh Allataalara nabenki', dikua antaissen ngasanni to apa mangka nabenki'. 13 Iamo joo, ia ke kipangpeissenanni to kadan-Na Puang Allataala lako tonnampuimo Roh Allataala, te'da kipake kapaissenan tolinoki', apa iara kipake to kada naajarankan Roh Allataala. 14 Ia to tote'da naampui Roh Allataala, te'da natarimai to apa naajaranni Roh Allataala, nasaba' nasangari ia curita tangtongan. Te'da nakullei mpahangngi apa to naajaranni Roh Allataala, sanga iapi napahangngi ke denni Roh Allataala lan kalena joo tau mpapahangngii. 15 Ia to tonnampui Roh Allataala wa'ding mpahangngi to sininna apa, apa ia to te'da naampui Roh Allataala te'da nakullei mpahang issi penawanna to tonnampui Roh Allataala. 16 Te'da nakullei, sanga den diuki' lan Sura' Allataala kumua, "Te'da tau nnissenni to lan penawan-Na Puang anna wa'ding mpakainga'i." Apa ia to lan penawanta' susi to lan penawan-Na Almaseh.

1 Korintus 3

1 Ee, tomala'bihku' sola ngasan! Ia tongkuiti' unapa, te'da naden kupangkadai kamu' susi tosipangkada tonnampuimo Roh Allataala. Apa susira' tossipangkadan tonturu'pa kamadoangan penawanna, ba'tu butung pea'-pea'pa to kamatapparanna lako Almaseh. 2 Iamo joo, ia to kuajaran kamu' iamo to pangngajah madoi' mentama akkalanmi, tangngiapa to pangngajah susi lako tomasaranianmo, sanga te'dapa mikullei ntarimai. Na moi tee too, te'da bang unapa mikullei ntarimai, 3 sanga mituru' unapa to kamadoangan penawammi. Sanga ia ke masere ati unapa kamu', mimassite'geh bang unapa, iamo joo mpabuttii kumua massipa' susi bangpa kamu' to totangnturu' Puang. 4 Ia ke den kamu' kumua, "Nturu'na' Paulus," nakua o to laenna, "Nturu'na' Apolos," manassa kumua susipa kamu' to totangnturu' Puang Allataala. 5 Sitonganna, ia joo Apolos na ia tee aku' Paulus pada tompangjamanrakan Puang Allataala, to mpatuju kamu' mimatappa' lako Almaseh. Pada kipugauk unamira kami' to nasuankan Puang. 6 Aku' ntananni na Apolos nco'bohhi, apa Puang Allataala to mpatuoi. 7 Jaji, ia to tomantanan sola tomangbolloh te'da na ia kaminang parallu. Apa Puang Allataalara to kaminang parallu, nasaba' Ia mpatuoi. 8 Pada torroanna to tomantanan na tomangbolloh. Pada-pada tooi ntarima assele'na situru' jamanna. 9 Ia tee kami', tompangjaman Puang Allataala. Na ia to kamu' butung kamu' bara'bah-Na iarika bola-Na Puang Allataala. 10 Ia tee aku' napabarakkannina' Puang Allataala bungah mpangpeissenan karebanna Almaseh lako kamu'. Jaji, ia tee aku' wa'ding dipangpasusii pande bola to macca ngkabua' pangrante melo, apa tau leko'ra la mpake'dehhii bola. Na ia to tompangjaman Puang pada la njama melo jamanna, susi pande bola mpemeloii ke mpake'dehhi bola jao pangrante. 11 Nasaba' te'da cara laen menjaji umma'-Na Puang Allataala, saliwanna matappa' lako Almaseh. Jaji, Puang Isa Almasehra to pangrante to mangka napasadia Puang Allataala, te'da pangrante laen. 12 Den tau mebola bulawan jao joo pangrante, den to mebola salaka, den too tompake batu paramata, apa den too tompake kaju, mpake reu makase ba'tu jarame. 13 Ia to jamanna tau pada la pajanni ke ratu pole'mi Almaseh la rra'tah kara-karana tolino, nasaba' ia joo wattu api la pada mpamanassai to jamanna. 14 Ia ke denni bola te'da nakandei api, la nnampa' pahalana joo tompake'dehhi. 15 Apa ia ke nakandei api, la kata'dean pahalana joo tompake'dehhi. Battuananna la salama' ia, apa susimira to kumua mpella'paranri kalena lan mai api. 16 Ee, tomala'bihku' sola ngasan! Manassa miissen kumua kamu'mo bola-Na Puang Allataala, sanga torromi to Roh Allataala lan kalemi. 17 Ianna den tau nggaja'-gaja' kasikalinoanna umma'-Na Puang Allataala, la nagaja'-gaja' todai Puang Allataala joo tau. Nasaba' ia to bola-Na Puang Allataala, ia mandara Ia la ntorroii, na kamu'mo joo bola-Na. 18 Danggi' lalo naden tau nnuraga kalena. Ianna den tau lan tangnga-tangngami ssanga kalena paissen situru' kapaissenan tolinona, la'biran ke mbangosanni kalena jolo', nawa'ding menjaji topaissen situru' Puang. 19 Nasaba' ia to disanga kapaissenan lan tee lino, nasanga kabangosanri ia Puang Allataala. Diuki' lan Sura' Allataala kumua, "Kadanna to tossanga kalena paissen nanii njokkoi Puang Allataala." 20 Diuki' too lan Sura' Allataala kumua, "Naissen Puang kumua te'da bua'na to tangngahna topaissen." 21 Iamo joo danggi' lalo naden tau misanga mala'bih na ia to tau laen. Sininna joo naben ngasanmo kamu' Puang la mipumelo. 22 La Paulus, Apolos na Petrus, la ia tee lino, la katuoan na kamatean, la ia tee too la jiona ahera', la mipumelona ngasan. 23 Na ia to kamu', apan-Na kamu' Almaseh, na ia to Almaseh apan-Na Puang Allataala.

1 Korintus 4

1 La misangakan kumua tompangjamankan Almaseh, sanga nasuakan Almaseh mpangpeissenanni to akkatta-Na Puang Allataala to te'dapa naissenni to totangnturu' Puang. 2 Ia to kaminang parallu lako to todisua, iamo to kumua la tatta'i mpugaukki to apa nasuanni puangna. 3 Iamo joo te'da naciapa ke mitongananni ba'tu mipasalai to jamanku'. Te'da naciapa moi inda mpugaukki joo. Moi aku' te'da kutonganan ba'tu mpasala kaleku'. 4 Ia ke aku' te'da caccaku' moi ci'di', apa te'da na ia joo la menjaji butti kumua tomelona'. Puangra ia to la mparessana' anna tongananna' ba'tu napasalana'. 5 Iamo joo danggi' mimadoi' bang mpasala tau kumua tokasalan, ba'tu ntongananni kumua tomelo, sanga te'dapa nadete'i wattunna. Tajanni karatuan-Na pole' Puang, sanga Ia la nnarrangngi to apa membuni. Ia too la mpapajanni to akkattana tolino to nabunianan lan penawanna. Ia joo wattu mane'ri napuji Puang Allataala to tau, to tosipato' dipuji. 6 Ee, tomala'bihku'! Ia tee mangka kupau nena' nakannana' sola Apolos. Mpakekan kaleki' la mialai palelean mata to la mipumelona ammipahangngi tee kada to kumua, "Turu'i to atoran denmo". Ia ke mipahangmi joo, te'damo mimatampo na te'da too mipasilaenanni to tompangjaman Puang, battuananna te'da mikita majaoi mesa' mikita majiongngi to laenna. 7 Te'da kamu' matande na ia to tolaen. Sininna to apa miampui mitarima jio ngasan mai Puang Allataala. Jaji, ciapari mimatampo susi to misangai kumua sininna to apa miampui te'da napole jio mai Puang Allataala! 8 Misangaraka kumua te'damo apa miparallui, sanga sugihmo kamu'! Misangaraka kumua menjajimo kamu' raja na te'da kami'na! Gaja sannangkan ke la tonganna kamu' menjaji raja, antaraja sola! 9 Ia to passanganku', ia tee kami' rasulu' napileanmokan Puang Allataala to torroan kaminang majiong, sanga susikan to mangkamo dipapassanni pangsessa kamatean, nasikita-kitaikan sininna apa lan lino, la malaeka', la tolino. 10 Ia tee kami' rasulu' nasangakan tau tobango', sanga mpangpeissenankan karebanna Almaseh! Na ia to kamu' misanga kumua tomaccamo kamu', sanga memmesa' penawamo kamu' sola Almaseh! Ia tee kami' totangpakullekan, apa ia to kamu' misanga kumua topakulle kamu'! Ia tee kami' te'da nataratte'kan tau, apa ia to kamu' nataratte' kamu' tau! 11 Ratu lako too allo den kitangbarah na mawakke tookan. Ia to pakeanki', ia mandamo to kipakena. Nasessakan tau, na te'da to kinii mari'pih. 12 Kipengkullei tongan nnangahhi to la kikandena. Ianna tampakkikan ropu tau, kibarakka'i. Ianna sessakan, sabbara'kan. 13 Ianna pau gaja'kan tau, kipangkadai meloi. Te'da silaenanki' to burauk lan tee lino. Ratu lako too allo nasanga unapakan tau to ncarepai lino. 14 Ia tee kuukiran kamu', te'dara kukua ammimasiri', apa kupangngingaranra kamu' susi anak jajianku'. 15 Nasaba' moi na buda gajamo gurummi nnajahhi kamu' karebanna Almaseh, apa aku'mo mikita ambe'. Sanga aku'mo mpangpeissenan Kareba Kasalamatan lako kamu' ammimemmatappa' lako Puang Isa Almaseh. 16 Iamo joo kupangngingaran kamu' dikua anna aku' miala palelean mata. 17 Na kusuami mati' to Timotius, to kupakamoja'. Ia to Timotius susi anak tonganku', natatta' mpugauk jaman-Na Puang. Iamo la mpangngingaran kamu' matumba caraku' nturu' Almaseh, susi to kupangpangngajaran lako sininna jamaa la umbo-umbo nanii. 18 Den ba'tu pira-pira tau lan tangnga-tangngami memmatampo, nasaba' nasangai te'da kulamale mati'. 19 Apa ia ke napuelohhi Puang, la madoi'na' male mati'. Ratupa' mati', kuissenni kuasa pole jioraka mai Roh Allataala ba'tu kadanna bangri merambu-rambu tuu mati' tomatampo! 20 Nasaba' ianna kuasaii Puang Allataala to tau, la napabutti lan panggaukanna, tangngia kadanna manda. 21 Jaji, umbonnara mikabudai? La kusessara kamu'ka, ba'tu la kupakitanra kamu'ka pangpakamoja'ku' angkupangkadai rampa' kamu'?

1 Korintus 5

1 Sitonganna denmo kareba napauanna' tau kumua den kamu' to manggauk sala liwa' gaja'. Den padanta' tomatappa' sibali indo porona. Ia una ia to tote'dapa naissen Puang Allataala, te'da ia napugaukki to susi joo! 2 Na moi madosa susi joo, kannora kamu' mpamajao penawammi. Sitonganna la massera kamu' ntangngahhi, ammipasunni lan mai tangnga-tangngami tuu joo tomanggauk susi joo. 3 Moi sikambelaki', apa ia to penawangku' sitonganna butung to iti'na' lan tangnga-tangngami sola ngasan. Na mangka kura'tah lan penawangku' to apa la digaukanni lako to tomangka mpugaukki susi joo, butung to iti'na'. 4 Jaji, ia tommisirempun, la misanga ia kumua iti'na' misolan, na kuasan-Na Puangta' Puang Isa Almaseh nnampai kamu', situru' kuasa to nabenki', 5 la mialai lan mai tangnga-tangngami joo tau ammisorongngi lako kuasanna Ballisi' anna masolang to batang kalena, na ia to penawanna dipasalama', ke ratu pole'mi Puang Isa rra'tah kara-karana tolino. 6 Te'da lalo misipato' matampo. Tantu miissen battuananna tee pangpasusian kumua, "Ia to ragi ci'di' mpaloboh ta'pung ke mangkami dilama." 7 Ca'beanmi joo ragi, iamo to dosa, ammida'tan menjaji tau mesan-Na Puang Allataala, susi panglama baru tangdiragii. Umma'-Namiki' Puang Allataala, nasaba' mangkamo dipangkaroban to bembala' Paskah to lla'bakki' jio mai dosa, iamo to Almaseh. 8 Jaji, la mangrame-ramemiriki' mpangramean Allo Paskah ngkande roti tangkeragi, ragi to dipangpasusii dosa ba'tu kagajatan, battuananna ia mandamora la tapugauk to napumasannang Puang Allataala. 9 Kupaumo lan to sura' joloku' lako kamu' kumua danggi' misibawanni to tomanggauk sala. 10 Ia to kusanga tangngia to sininna tomanggauk sala lan tee lino, ba'tu tongkake'lai ewanan, tokalasi ba'tu tossompa dewata. Te'da na ia tuu lako tosusi joo to kusanga, nasaba' ia ke tosusi joo, la messunmora kamu' lan mai tee lino. 11 Apa ia to kusanga, iara to tossangamo kalena matappa', anna manggauk sala unapa, ngkake'lapa ewanan, ssompa unapa dewata, mpau gaja' tau, pangmalangoanpa, kalasi unapa. Moi cumadokko kamu' kumande sola to tosusi joo, danggi' lalo ia. 12 Tangngia jamanku' la rra'tah kara-karana to tote'dapa namatappa' lako Puang Allataala. Puangra la rra'tahhi to kara-karana to totangmatappa'. Susi toda kamu', kara-karana ia to tomatappa'mo mira'tah. Susi to diuki' lan Sura' Allataala kumua, "Ula'ii to togaja' lan mai tangnga-tangngami."

1 Korintus 6

1 Ciapari na denra to barani lan tangnga-tangngami male mangparapa' lako tomangra'tah kara-kara to te'da naissen Puang, ke denni kara-karana sola padanna tomatappa'? Ciapari na te'da namale lako to tomatappa' meta'da na ia mpasipemeloanni? 2 Tantu miissenmo kumua umma'-Nara Puang Allataala to la mbicarai to tolino. Na ia ke susii joo, na tantu moi kara-kara biccu' mikulle too rra'tahhi. 3 Tantu miissenmo kumua kita'ra la mbicarai tuu mati' malaeka', ke Kiama'mi lino. Apa pole' oraka to kara-kara biasa bangra keallo-keallo! 4 Na ia ke denni kara-karami, ciapari mimalera mpangngoloi lako to tote'da namatappa'? 5 Liwa' ia mesirisan! Tantu den lan tangnga-tangngami to padammi tomatappa' na paissen, to wa'ding mbicarai joo kara-karami. 6 Apa sibalikanna, male ora kamu' mparapa' padammi tomatappa' lako totangmatappa'. 7 Ia unapa tuu pada sipekka kamu' na mesa'mo kaditaloanmi. Ia pole' oraka to male kamu' siparapa' lako tomangra'tah to te'da namatappa'. Ciapari na te'da mipada ntaloan bangmo kalemi! La'biran ke dipaolai kamu' tangmaruruhna ba'tu diparugi kamu'! 8 Apa kannora kamu' majekkong mpaden karugian lako tau laen. Na ia joo lako pissen o padammi tomatappa'! 9 Tantu miissenmo kumua ia to tote'da naturu' pakkaeloran-Na Puang Allataala, te'da namenjaji umma'-Na Puang Allataala. Danggi' miuraga kalemi! Ia to tomanggauk sala, tossompa dewata, tosibali padanna muane, 10 taboko, tomangkake'la, topangmalangoan, tompau gaja' tau, tokalasi, ia ngasanmo to tosusi joo te'da namenjaji umma'-Na Puang Allataala. 11 Ba'tu pira-pira tau lan tangnga-tangngami massipa' susi joo tonna jolona. Apa ia tee too, ia to Puang Isa Almaseh sola Roh Allataala to pole jio mai Puangta' Puang Allataala mangka lla'paran kamu' jio mai kuasa dosa, na mpupenjaji tau mesan-Na kamu' Puang Allataala, sola napupenjaji tomelokamu'. 12 Den tau nakua, wa'ding ngasan dipugauk to sininna apa. Apa ianna aku' kukua te'da na ia ngasan bang to panggaukan den bua'na. Jaji, moi na hallala' ngasan to apa lako kaleku', apa cia'na' nneloran kaleku' nakuasai moi apa. 13 Den too tomangkada kumua, ia to kinande nandena ba'tang, na ia to ba'tang dipasadian nande. Apa pada la nalanynyasanni Puang Allataala. Ia to batang kale te'da nadipaden la manggauk sala, apa dipadenri la ssompa Puang, na Iamora ngkuasaii to batang kale. 14 Mangkamo Puang Allataala mpatuo pole' Puang Isa jio mai kamatean, susi toomi kita' la napatuo pole' tooki' kuasan-Na Puang Allataala. 15 Ee, tomala'bihku'! Tantu miissenmo kumua ia to kalemi lesoan kale-Na Almaseh. Nawa'dingraka ke kualaii mesa' to lesoan kale-Na Almaseh kupupenjajii lesoan kalena baine bandarang? Te'da lalo ia nawa'ding! 16 Tantu miissen toomo kumua ia to tosigauk sala sola baine bandarang, ia to batang kalena memmesa'mira sola joo baine. Nasaba' den diuki' lan Sura' Allataala kumua, "Mesa' kalemira sola dua." 17 Apa ia to tompangmesa' kalena lako Puang, memmesa' penawa tooi sola Puang. 18 Danggi' manggauk sala, sanga sininna dosa laen to napugauk tau, saleanan jio mai kalena joo tau. Apa ia to tomanggauk sala, ia una mpamasolang batang kalena. 19 Tantu miissenmo kumua ia to batang kalemi bola-Na Roh Allataala, to naben kamu' Puang Allataala torro lan kalemi. Jaji, ia tee batang kalemi tangngiamo apammi, apa apannamo ia Puang Allataala. 20 Mangkamo kamu' naalli putta Puang Allataala. Iamo joo pake meloi to batang kalemi, anna pakala'bihhi tau to Puang Allataala.

1 Korintus 7

1 Ia to la kupau tee too, iamo to miuki' lan sura'mi. Melo ke te'dai nakebaine to mesa' muane. 2 Apa dikua anna danggi' namanggauk sala to tau, melo ke denni balinna. 3 Na ia to muane la napugauk to sipato'na napugauk muane lako bainena, susi toda to baine, la napugauk to sipato'na napugauk baine lako muanena. 4 Sanga ia to baine te'da nakuasai batang kalena, apa muanenara to ngkuasaii. Susi toda to muane, te'da nakuasai batang kalena apa nakuasai todai bainena. 5 Danggi' micia' mamma' sola balimmi. Wa'ding una ke te'dai nalamasai, assalan misitujuimi sola dua, anna den wattummi massambajang lako Puang Allataala. Ianna dete'mi to wattu misitujui, pole pole'mo kamu' lako balimmi, sanga ia ke te'dai misusi joo, wa'ding kamu' nasede Ballisi' manggauk sala, ke te'da mikullei nta'tan kamadoanganmi. 6 Tangngia parenta tee kupau, apa wa'ding mipugauk ke situjumo kamu' to tosibali. 7 Sitonganna la'bi kukabudai ke belang ngasanni to tau susi aku'. Apa pada ntarimamo kamu' barakka' mattantu jio mai Puang Allataala. Jaji, silaenan to barakka' pada ditarima. 8 Na lako to tote'dapa nakebali sola to tomatemo balinna kukua, la'bi melo ke tangkebali bangmi susi aku'. 9 Apa ia ke tangmikullei nta'tan kamadoanganmi, kebali bangmo kamu'. Nasaba' la'biran ke kebali kamu' na ia ke mallua'-lua'i to penawammi. 10 Na lako kamu' to denmo balinna kusuai susi tee, sitonganna tangngia aku' massua, apa Puang. Kusuai kumua ia to baine kemuanemo, danggi' nasarak muanena. 11 Apa ia ke nasarakki, la da'tan bang tangkemuane, iarika sipole pole'i muanena. Susi toda to muane, danggi' nasarak bainena. 12 Na lako tolaen to denmo balinna, kupau too susi tee. Kadangku' aku' tee, tangngia kadan-Na Puang. Kupau kumua ia ke denni muane matappa' na te'dapa namatappa' to bainena, apa madoangngi torro sola joo muanena, danggi' nasarakki joo bainena. 13 Susi too, ia ke denni baine matappa' na te'dapa namatappa' to muanena, apa madoangngi torro sola joo bainena, danggi' nasarakki joo muanena. 14 Nasaba' ia joo muane tangmatappa' dipasusimo umma'-Na Puang Allataala sanga kamatapparanna joo bainena. Susi too ia to baine tangmatappa' dipasusimo umma'-Na Puang Allataala sanga kamatapparanna joo muanena. Ia ke te'dai nasusi joo, ia to anakkana te'da nadipasusi umma'-Na Puang Allataala, apa ia tee too dipasusimi umma'-Na. 15 Apa ia ke meta'dai to totangmatappa' disarak, ake'mo naeloranni tomatappa' namale. Kamu' to tomatappa'mo te'da midiparuku torro tarruh sola balimmi ke susii joo. Apa madoangri Puang Allataala kumua misikalino. 16 Na kamu' baine tomatappa'mo, umbo mikua nnissenni kumua ba'tu la mipasalama' unai to muanemi? Susi toda kamu' muane tomatappa'mo, umbo mikua nnissenni kumua ba'tu la mipasalama' unai to bainemi? 17 Kupangpangngajaran lako sininna jamaa la umbo-umbo nanii kumua, pada la tuo kamu' susi to mangkamo napabarakkanan kamu' Puang Allataala. Jaji, la tuo kamu' susi tommimane' matappa'. 18 Susinna, ia ke denni tau mangkamo disunna' tonna memmatappa', danggi' namadoang nta'deii joo sunna'na. Susi too ke denni tau tangdisunna' tonna memmatappa', danggi' too namadoang la disunna'. 19 Naturu'i ba'tu tangnaturu'i joo atoran sunna', pada bang unai pada te'da bua'na. Ia to kaminang parallu, iara to nturu' parenta-Na Puang Allataala. 20 La'bi melo ia ke ia to tau pada la da'tan tuo susi tonna mane' matappa'. 21 Ia ke kaunan kamu' tommimane' matappa', te'da naciapa. Apa ianna den wattummi dipamaradeka, pakei joo wattu. 22 Ia to kaunan namatappa'mo lako Puang, tomaradekan-Namo ia Puang. Na ia to tomaradeka namatappa'mo lako Puang, kaunan-Na ia Almaseh. 23 Danggi'mo mieloran kalemi menjaji kaunanna tolino, nasaba' mangkamo kamu' naalli putta Puang Allataala. 24 Ee, tomala'bihku'! La da'tan bang kamu' tuo susi tommimane' matappa'. 25 Ia to kamu' to te'dapa nakebali la kupau susi tee. Te'da kuampa' parenta jio mai Puang, apa ia tee pangngampa'ku' la kupau, nasaba' mangkana' napabarakkanni Puang kumua ia to kupau wa'ding dikatappa'i. 26 Kupau kumua ia ke mipikkiri'i to kamaparrisan to naoloi tomatappa' tee too, kusanga la'biran ia, ke da'tanmo kamu' tuo susi tee too. 27 Ianna denmo bainemi, danggi' mimeta'da la ssarakki. Na ia ke te'dapa bainemi, danggi' omo mikebaine. 28 Apa tangngia dosa ke kebaine kamu'. Na ia ke den anakdara kemuane, tangngia too ia dosa. Ia mandara ia to kumua, ia to tokebalimo nnoloi buda parri'. Na ia ke elohku', kukua kenna te'da nakanna kamu' kamaparrisan. 29 Ee, tomala'bihku' sola ngasan! Susi tee to kusanga. Cingga'tu'mora to wattunta'. Mammula tee too ia to tokebalimo la tuoi susi tote'dapa nakebali. 30 Ia to tokumillak la butung tote'da namasse penawanna. Ia to tometawa la butung to te'da namario. Ia to tomangka nnalli buda apa la butung tote'da apa naampui. 31 Na ia to tonasarai sara' lan lino la butung to te'da apa ssaraii. Nasaba' ia tee lino, susi to takita tee too, te'damo namasai nalanynya'! 32 Madoangna' kumua kenna danggi' miperasai kamasussan. Susinna ia to tobelangpa, Puang manda napikkiri', nasaba' madoangngi mpamasannang Puang. 33 Apa ia to tokebainemo, ia to apa lan lino napikkiri', susinna umbo nakua la mpamasannang bainena, 34 naarannai sitawa-tawa to penawanna. Ia to baine te'damo muanena sola to anakdara Puang manda napikkiri', nasaba' madoangngi mpassompan kalena lako Puang. Apa ia to baine kemuanemo mpangmesa lakomo apa lan tee lino to penawanna, nasaba' madoangngi mpamasannang muanena. 35 Iamo kuuki' ngasanni tee, sanga la mipumelona, te'dara kumua kuanggai kamu' mpugaukki to ianna joo, ba'tu ianna tee. Ia mandara kukadoangngi to kumua, ammipugaukki to tonganna sola sipato'na, ammipangmassang lakoi Puang to penawammi. 36 Ia ke den muane mangpikkiri' kumua te'da napugaukki to sipato'na lako sitangka'na ke te'dai nasibali, na ia ke te'da nakullei nta'tan kamadoanganna, namangpikkiri' kumua melo ke sibalii joo sitangka'na, ake'mo nasibali ke napumeloi, sanga te'da namadosa ke sibalii. 37 Apa ia ke cia'i la sibali joo tangka'na, na ia joo kara'tasanna te'da naparukui, melo joo, assalan nakullei nta'tan kamadoanganna. 38 Iamo joo melo ke sibalii joo sitangka'na, apa la'bi mellong ke te'dai nasibali. 39 Ia to baine kemuanemo ia mandara nakannai atoran tosibali, ke tuo unapi to muanena. Ianna matemo to muanena, la'pahmi joo baine, wa'dingmo ia kemuane pole' ke madoangngi, assalan padanna tomatappa' lako Almaseh. 40 Na ia ke pangngampa'ku', la'bi masannangpa ia, ke te'dami nakebali. Na kusanga kuasan-Na Roh Allataala kumangkada susi joo.

1 Korintus 8

1 Ia omo la kupau tee too to juku' dipassompan lako dewata. Tonganna to nasanga tau kumua macca ngasanmiki'! Apa ia joo kamaccan mpupemmatampo tau, na ia to pangpakamoja' mangpamasumanga' tau. 2 Ia to tossanga kalena kumua buda apa naissen, sitonganna te'dapa naissen apa to sipato'na naissen. 3 Apa ia to mpakamoja' Puang Allataala, to naissen ia Puang Allataala. 4 Ia to juku' mangka dipassompan lako dewata, wa'dingraka dikande ba'tu te'daraka? Taissen kumua te'da ia dewata kepenawa, sanga mesa'ra Puang Allataala na te'da laenna, 5 moi nabuda to apa nasanga tau dewata sola puang, la jao langi' ba'tu lan lino. 6 Apa ia ke kita', mesa'ra Puang Allataala. Iamo to Ambe' Puang Allataala to mpadenni to sininna apa, na ia to katuoanta' tapatuju lako kale-Na. Mesa' toora Puang, iamo joo Puang Isa Almaseh. Sininna apa dipaden nasaba' Ia. Ia too mpusaba'i antatuo. 7 Apa moi nasusi joo te'da na ia ngasan tomatappa' nnissenni kumua te'da dewata kepenawa. Denpa tomatappa' mpatuju lakopa dewata penawanna, sanga ia tonna jolona dewatara nasompa. Iamo joo ratu lako too allo, nasanga kumua ia to juku' mangka dipassompan lako dewata, kandena dewata. Jaji, ianna kandei joo juku', nasanga kumua madosai, nasaba' sitawa-tawai to penawanna kumua wa'dingraka dikande joo juku' mangka dipassompan lako dewata ba'tu te'daraka. 8 Sitonganna te'da natongan kumua natarimaki' Puang Allataala sanga kande, na te'da too natongan kumua tangnatarimaki' Puang Allataala sanga kande. Nasaba' takandei ba'tu tangtakandei joo juku', te'dara apa tapusaro ba'tu tapurugi. 9 Apa ingaranni! Moi wa'ding kamu' ngkandei joo juku' nasaba' kapaissenanmi, danggi' anna kamu' napusaba' namenjaji madosa to tolaen to te'dapa namasaranian, sanga nakita kamu' ngkandei joo juku'. 10 Susi tee to kusanga. Ia ke kamu' to buda kapaissenanmi kumande jio to dinii mpakande dewata, naden to tositawa-tawapa penawanna ngkita kamu', tantu madoang todai la ngkandei. 11 Susimi joo na ia to kapaissenanmi mpalao sala padammi tomatappa' to sitawa-tawa unapa penawanna. Na ia toomora tee totangmasaranian napumate Almaseh, anna pusalama' tooi. 12 Na ia ammipugauk kasalan susi joo lako padammi tomatappa' to tangmasaranianpa, madosa kamu' lako Almaseh, sanga kamu'ra nakita anna pugauk todai, nasapussak-pussakna umbonna melo umbonna gaja' to napugauk. 13 Iamo joo na ia ke la kandera napumadosa padangku' tomatappa', la'biran danggi' lalomo kukande juku'.

1 Korintus 9

1 Ia tee aku' rasulu'na' na sitonganna te'da na aku' la nnangahhi to la kuputuona. Mangka kukita to Puangta' Puang Isa, na kamu'mo to assele'na jamanku' lako Puang. 2 Ia ke cia'i to tolaen nnakuina' kumua mesa'na' rasulu', kamu'mo nnakuina'! Kamatapparanmimo lako Almaseh buttinna kumua rasulu'na'. 3 Ia tee Barnabas sola aku' la kipebalii to tomparessakan susi tee, kumua 4 sipato'kan ntarimai to la kikandena, nasaba' jamanki'. 5 Wa'dingkan ssolan baine padangki' tomatappa' lan kalingkanki' susi to rasulu' laen, sile'to-Na Puang Isa na Petrus. 6 Danggi' na aku' mandara sola Barnabas rasulu' to disua nnangahhi to la kiputuona! 7 Te'da ia surudadu nnongkoso'i mesa kalena! Te'da too ia pangdusung mantanan anggoro' jio bara'bahna, na te'da nakandei assele'na joo bara'bahna! Susi tooi te'da ia tomangrewa bembala', na te'da naiso'i to dadikkina joo bembala'na! 8 Ia tee kupau, tangngiara pangngampa'na manda tolino, apa dipau too lan Sura' Allataala. 9 Diuki' lan atoranna Nabi Musa kumua, "Danggi' mitangnneloranni to sapin ngkande lise' gose', ke llullu'i gose'." Tangngia sapin to dipatujui tee kadan-Na Puang Allataala, 10 apa kita'ra. Ia joo kadanna Nabi Musa diuki' lako kita' tolino na ia to tonjamai joo bara'bah sola to torridoi joo gose' la natarimai to assele' jamanna. 11 Mangkamokan nnamboh banne kasaranian lan kalemi, jaji sipato' ke nnampa'kan to la kiputuona jio mai kamu'. 12 Na ia ke sipato'i to tolaen mpeta'dai kamu' tee, la'bi sipato'kan kami'. Apa te'dapara kipugaukki to susi joo. Kanri la'bi kikabudai ke kami' nnangahhi to la kiputuona, danggi' na kami' menjaji halangan mpangpeissenanni to karebanna Almaseh. 13 Miissen kumua, ia to tomangjama lan Bola Puang Allataala, lan too mai Bola Puang Allataala nanii ntarimai to la naputuona. Na ia to tonnurusu' ngenan pangkaroban, ditawai jio mai to apa dipangkaroban. 14 Susi too to pura napattantu Puang kumua, ia to tompangpeissenan Kareba Kasalamatan, la tuo jioi mai joo Kareba Kasalamatan. 15 Apa moi pissen te'da lalopa naden kupeta'dai kamu' to la kuputuona. Na ia tee kuuki', te'dara kukua ammibenna' to la kuputuona. La'biran matena', na ia ke kata'deanna' tee apa kupake mpuji kaleku'. 16 Apa te'da kupuji kaleku' ke mpangpeissenanna' Kareba Kasalamatan, nasaba' nasuara' Puang Allataala. Macilakana' ke te'dai kupangpeissenanni joo Kareba Kasalamatan. 17 Ia ke la aku' mpilei angkupangpeissenan Kareba Kasalamatan, la dipagajira'. Apa tangngia pangpileanku', sanga napabarakkannira' Puang Allataala mpangpeissenanni. 18 Na ia ke susii joo, apara saroku'? Iamo saroku' to kumua tangssussaina' moi mesa' tau mpangpeissenanni joo Kareba Kasalamatan, nasaba' te'da kuangahhi to sipato' la kupusaro. 19 Ia tee aku' moi mesa' tau te'da mpukaunanna'. Apa moi nasusi joo, mangkamo' mpupengkaunan kaleku' lako sininna tau. Iamo kupugaukki susi joo, kukua anna buda tau kupupentaun-Na Almaseh. 20 Ia ke solana' to-Yahudi, mpupento-Yahudina' kaleku', angkuwa'ding mpupentaun-Nai Almaseh. Ia ke solana' to tonturu' atoranna Nabi Musa, mpupenturu'na' kaleku', moi nasitonganna mangkamo' dila'paran jio mai joo atoran. Kupugaukki susi joo, kukua angkuwa'ding mpupentaun-Nai Almaseh to tonturu'i atoranna Nabi Musa. 21 Ia ke solana' to bangsa tangngia to-Yahudi, mpupentotang-Yahudina' kaleku'. Kupugaukki susi joo, kukua angkuwa'ding mpupentaun-Nai Almaseh to bangsa tangngia to-Yahudi. Ia joo, te'da to kumua, te'damo kuturu' parenta-Na Puang Allataala, nasaba' da'tanna' nturu' parenta-Na Almaseh. 22 Ia ke solana' to te'dapa namasaranian, menjaji susi todana' to te'dapa namasaranian, angkuwa'ding mpamawatangngi. Nna'gah-a'gahna' kaleku' lako sininna tau, angkuwa'ding mpasalama'i tuu lako tau pira'. 23 Iamo kupugaukki susi joo, anna sabuda-budanna tau ngkatappa'i to Kareba Kasalamatan, angkuturu' toda dibarakka'i. 24 Miissen kumua ia ke massimbarai to tau, kinjara' ngasanni, apa mesa'ra la nnampa' paraseng. Iamo joo massimbaramo kamu', ammiampa'i joo paraseng. 25 Ia to tomassiewa watang tuli ngkuasai kalena. Napugaukki susi joo, dikua nadiben paraseng to la madoi' malaju, iamo to bunga kapataloan. Apa ia to kita' ngkuasaiki' kaleta', nasaba' madoangki' diben paraseng to te'da nalamalaju. 26 Ia tee aku' susina' tokinjara' to mpengkulle-kullei ratu lako to dipangngujui. Na susi toona' tomassijangguru', te'da kumangjangguru' sala-sala. 27 Kupengkulle-kullei tongan ngkuasai kaleku', sanga iamo ke aku'mo to mpangpeissenan Kareba Kasalamatan na aku' pole' ora tangdipasalama'.

1 Korintus 10

1 Ee, tomala'bihku' sola ngasan! La miingaranni to apa jaji lako tojolota' to nasolan Nabi Musa jio mai tondok Mesir tonna anu'. Pada naongannii saleu', nasalama' llambanni Tasik Malea. 2 Na ia joo apa mangka jaji dipapadai kadijioran. Jaji, ia to tojolota' susimi todijio' ngasanni lan saleu' na lan tasik namenjaji anak gurunna Nabi Musa. 3 Mangka ngasanni ngkandei to kande nabenni Puang Allataala, 4 sola nniso' to wai naben tooi Puang Allataala. Ia joo wai messun jio mai buntu batu to nasolan anna putuoi. Ia joo buntu batu, iamo Almaseh. 5 Apa moi nasusi joo, budai to te'da napumasannangngi Puang Allataala to sipa'na. Iamo joo na pada simatean bangmo jio padang pallawangan. 6 Ia ngasanmo joo mpupangngingaranki' nadanggi' tamadoang mpugaukki to apa gaja' susi tuu lako tau. 7 Susi too to kumua danggi' misompa dewata susi to napugauk tuu lako tau pira' tonna anu'. Den diuki' lan Sura' Allataala kumua, "Kumandei, mangngiso', namane' manggellu' ssompa dewata." 8 Danggi' tamanggauk sala susi to napugauk tuu lako tau pira' tonna anu'. Sangngallora na duang pulo tallu sa'bu tau mate, sanga napugaukki to susi joo. 9 Danggi' tacoba-coba mpamagalli Puang Allataala, susi to napugauk tuu lako tau pira' tonna anu', namate natitto ulah keipo. 10 Danggi' too mimangpasanga-sanga susi tuu lako tau pira' tonna anu', naarannai mate nabuno Kalamau'. 11 Mangka ngasanmo joo jaji lako tuu lako tau tonna anu', la mpupangngingaran tolaen. Na ia toomo nadiuki' ngasan, dikua anna pakainga'ki', nasaba' wattu la cappa'nami tee lino. 12 Jaji, ia to tossanga kalena matappa' tongan, la majagai nadanggi' namenjaji tomadosa susi tuu lako tau tonna anu'. 13 Ia to apa ssede kamu' mpugauk dosa, passede biasa bang ia lako tolino. Apa naingaranni Puang Allataala to basse-Na, na te'da naeloran kamu' disede la'bi na ia to mikulle nnewai. Na ia ke disede kamu' mpugauk dosa, napamawatang kamu' ammikullei nnewai. 14 Ee, tokupakamoja'! Iamo joo danggi' misompa dewata. 15 Kuajahhi kamu' susi to nnajahhi tomandalanmo tangngahna, na la mitimbang melo tee kada la kupau. 16 Ia ke Kakumandean Maceroki', nniso'iki' cangkiri'-Na Puang tamangkurru sumanga' too lako Puang Allataala. Iamo tandana kumua mateki' sola Almaseh. Na takande tooi to mesa' roti ditawa-tawa. Iamo tandana kumua mesa'miriki' lan kale-Na Almaseh. 17 Jaji, moi budaki', susimiriki' to mesa' batang kale, nasaba' mesa'ra joo roti to takande. 18 Takitari to to-Israel. Ia to tongkandei to apa dipassompan jao ngenan pangkaroban, iamo tomangmesa ntuu joo ngenan pangkaroban. 19 Apara battuananna joo kupau? Iamo to kumua moi to dewata, ba'tu ia to kande dipassompan lako dewata, te'dara nalannapa kamu', 20 apa ia to apa dipassompan jao ngenan pangkaroban dewata, dipassompanra lako setang, tangngia lako Puang Allataala. Na cia' lalona' ke sipusola kamu' setang. 21 Te'da lalo miwa'ding nniso'ii cangkiri'-Na Puang, ammilanniso'i too cangkiri'na setang. Te'da too miwa'ding kumande jio meja-Na Puang, ammilakumande too jio mejana setang. 22 Ia ke tapugaukki susi joo, mpamagalliriki' Puang. Tasangaraka kumua la'bi mawatangki' na Ia? 23 Den tau nakua, wa'ding ngasan dipugauk to sininna apa. Apa ianna aku' kukua te'da na ia ngasan bang den bua'na. Jaji, moi na hallala' ngasan to apa, te'da na ia ngasan mpamawatang tomatappa'. 24 Danggi' naden mesa' tau mpangngundaran mesa kalena. Pada-padaki' la ntangngaran too kaparalluanna padanna rupa tau. 25 Wa'ding mikande to sininna juku' dibaluk jio pasa'. Danggi'mo milamparessa opi jolo' kumua mangkaraka dipassompan lako dewata iarika te'da. Ia to penawammi danggi' nasitawa-tawa ngkandei joo juku'. 26 Nasaba' den diuki' lan Sura' Allataala kumua, "Apan-Na Puang Allataala tee lino na sininna issinna." 27 Ianna den tote'dapa namatappa' ntambai kamu' kumande, ammimadoang male, kandei to apa napalennatan kamu'. Na ia to penawammi danggi' omo nasitawa-tawa ngkandei joo juku'. 28 Apa ianna den tau ngkuan kamu', "Ia tuu juku' mangka dipassompan lako dewata," danggi' mikandei, situru' passanganna joo tau to ngkuan kamu'. 29 Ia to kusanga tangngia issi penawammi, apa iara to issi penawanna joo tau. Mbai naden tau mekutana, "Matumbari na issi penawanna tau laen la nnatoro'na'. 30 Ia ke mangkurru sumanga'na' lako Puang Allataala kumane' ngkandei joo juku', ia to tau laen te'da nawa'ding mpasalana'." 31 Kupebalii, moi apa mipugauk, la kumanderaka la mangngiso'raka, la mipugaukki joo anna pakala'bihhi tau to Puang Allataala. 32 Danggi' na panggaukanmi napusaba'i tolaen madosa, la to-Yahudi, la bangsa tangngia to-Yahudi, iarika jamaa-Na Puang Allataala. 33 Kupengkulle-kullei anna sininna panggaukanku' napumasannang sininna tau. Te'da na ia kuangah to kupumelona, apa iara kuangah to napumelona tolaen, kukua anna wa'ding toda ia dipasalama'.

1 Korintus 11

1 Turu'i to panggaukanku', susi aku' nturu' panggaukan-Na Almaseh. 2 Kupuji kamu' sanga tuli miingaranna', ammituru' tooi to pangngajah kuajaran kamu'. 3 Madoangna' ke miissenpi tee to kumua, Almaseh to ngkapalai muane, na muane ngkapalai baine, na ia to ngkapalai Almaseh Puang Allataala. 4 Ia to muane ke massambajangngi iarika mpangpeissenanni pepasan-Na Puang Allataala lan jamaa, anna manglullung, ia joo muane te'da nakasiri'i to Almaseh. 5 Ia to baine ke massambajangngi iarika mpangpeissenanni pepasan-Na Puang Allataala lan jamaa, anna te'da namanglullung, ia joo baine te'da nakasiri'i to muanena. Padai to kumua ia joo baine digalettungngimi. 6 Jaji, ia to baine nacia'mo manglullung jio jamaa, la'biran ke digalettungngii. Apa te'da angga'na, ke ia to baine digalettungngi, ba'tu digoncingngi to beluakkana. Iamo joo, la'biran ia, ke manglullungngi. 7 Ia to muane te'da nawa'ding massongko' iarika mangtopi, ke massambajangngi ba'tu mpangpeissenanni pepasan-Na Puang Allataala jio jamaa, nasaba' mpupangngarrangngi kamala'biran-Na Puang Allataala. Na ia to baine mpupangngarrangngi kamala'biranna muane. 8 Susimi joo, nasaba' ia to muane te'da nadiala jio mai baine, apa bainera to diala jio mai muane. 9 Na ia pole' to muane te'da nadipaden sanga naparalluii baine, apa iari to baine dipaden sanga naparalluii muane. 10 Iamo joo ia to baine la manglullung, mesa' tanda kumua nakapalai muanena, anna pumasannangngi sininna malaeka'. 11 Moi nasusi joo, ia to kita' tonturu' Puang, da'tanki' mangmesa tasisulle sipurannu. Jaji, pada bang una torroanna to baine na muane. 12 Nasaba' susi to baine bungah diala jio mai muane, susi toda to muane najajian baine, na sininna apa pole jio ngasan mai Puang Allataala. 13 Kamu' ia la mpikkiri'i, meloraka ke massambajangngi to baine lako Puang Allataala jio jamaa, ke te'dai namanglullung! 14 Menjaji kabiasanmo to kumua, te'da nasipato' ke malandoi beluakkana to muane, 15 apa melo ke malandoi beluakkana to baine. Ia to beluak malando ssamboi ulunna, iamo joo napumala'bih. 16 Ianna den tau te'da natarimai tee, namadoang ssite'gehhi, mesa'ra to wa'ding la kupau kumua, "La kami', la ia to tomatappa' laenna umbo-umbo nanii, ia manda kabiasanna to mangka kupauan kamu'." 17 Sitarruhna denpa to la kupauan kamu', apa te'da angkulampuji kamu'. Sanga ia ke sirempun kamu' ssompa Puang, te'da nampaden kameloan, apa sibalikanna mpadenri tangmelona. 18 Bungahna kusa'ding kumua sipekka kamu', ke sirempun kamu' ssompa Puang. Na kukatappa'i joo napauanna' tau. 19 Sitonganna te'da namejangngaran ke susii joo, napajan kumua indannara kamu' tomatappa' tongan. 20 Ia ke sirempun kamu' ia to mipugauk tangngia Kakumandean Macero. 21 Sanga ianna wattu kumandemo, pada massialamo kamu' nnalan mesa kalemi, anna denmo kamu' to soso ammiden to malango. 22 Ciapari misusi ora joo? Tangdenraka bolami minii kumande jolo' sabarahmi! Te'daraka mikasiri'i to jamaa-Na Puang Allataala! Ba'tu madoangra kamu'ka mpakasiri' tokaasi-asi! Cia'na'! Cia' lalona' mpuji kamu'! 23 Ia to mangka kuajaran kamu', iamo to napabarakkananna' Puang kumua, ia joo bongi tonna dipangpejokkoan Puang Isa, nnalai roti, 24 na ia tonna mangka mangkurru sumanga' lako Puang Allataala, nati'pek-ti'pekki, anna mangkada nakua, "Batang kale-Ku' tee, to dipangkaroban nasaba' kamu'. Pugaukki susi tee minii nningaranna'." 25 Susi too tonna mangkamo kumande, nnalami isotan anggoro' nakua, "Ia tee anggoro' nanii titanan basse barun-Na Puang Allataala, napaassah to'doan rara-Ku'. Pugaukki susi tee, minii nningaranna', ke miiso' oi." 26 Jaji, ia ke mikande oi joo roti, miiso' oi joo anggoro', mpangpeissenan omo kamu' kamatean-Na Puang ratu lako karatuan-Na pole'. 27 Iamo joo ia to totangsipato' ngkandei joo roti ba'tu tangsipato' nniso'i joo anggoro', madosai lako Puang to mpangbenmo kale-Na na rara-Na. 28 Jaji, ia to tau pada la mparessa penawanna jolo', namane' ngkandei joo roti sola nniso'i joo anggoro'. 29 Nasaba' ia to tongkandei joo roti sola nniso'i joo anggoro', na te'da napahangngi kasiumputanna lako kamatean-Na Puang, mparatuan pangsessa kalena jio mai Puang Allataala. 30 Iamo joo ammibuda masaki sola tangpakulle, na buda too to kannori mate. 31 Apa ia ke taparessai penawanta' jolo', te'da nasessaki' Puang Allataala. 32 Na ia ke nasessaki' Puang Allataala, naajahhiriki', nadanggi' tadisessa sola totangnturu' Puang. 33 Ee, tomala'bihku' sola ngasan! Iamo joo, ia ke la sirempun kamu' la kumande Kakumandean Macero, la sitajan kamu'. 34 Ia ke denni to tangbarahmo, melo ke kumandei jolo' jio bolana, anna ia to kasirempunanmi te'da naparatuan kamu' pangsessa jio mai Puang Allataala. Ia to apa laennapa ratupa' mati' kumane' mpamanassan kamu'.

1 Korintus 12

1 Ee, tomala'bihku'! Sitarruhna la kupau to barakka'-Na Roh Allataala. Madoangna' ke miissenni to katongananna. 2 Ingaranni kumua ia tonna te'dapa miissen Puang, da'tan bangpa kamu' dipatuju sala ssompa dewata mamang. 3 Iamo joo kupamanassan kamu' kumua, ia to tonapatuju Roh Allataala, moi mesa' tau te'da nalamangkada kumua, "Tampak ropu ia joo Puang Isa." Susi toomi joo te'da mesa' tau ngkullei mangkada kumua, "Puang to Isa!" ke te'dai napatujui Roh Allataala. 4 Mangrupa-rupa barakka'-Na Roh Allataala, apa mesa'ri Ia. 5 Mangrupa-rupa carana mpangjamanni to Puang, apa mesa'ri Ia. 6 Mangrupa-rupa kapakullean pajan lan tangnga-tangngami, apa mesa' toori to Puang Allataala mbenki' joo kapakullean. 7 Roh Allataala pada mbenki' barakka'-Na to la tapumelona sola ngasan. 8 Den tau naben barakka' kamatongkoan mangkada, na den too to tau naben barakka' kamaccan mpamanassai to kadan-Na Puang Allataala. Mesa'ra Roh Allataala to mbenni. 9 Ia bang una joo Roh Allataala to mesa'ra mbenni barakka' to mesa' tau namatappa' te'da susinna. Na ia to tau pira' naben barakka' mpamalagah tomasaki. 10 Den tau naben barakka' mpugauk tanda mejangngaran, na ia to tolaenna naben barakka' mpangpeissenan pepasan-Na Puang Allataala. Na ia pole' o tolaenna, ia bang una joo Roh Allataala mbenni barakka' mpasilaenanni kumua umbonna to barakka' jio mai Roh Allataala, na umbonna to tangngia. Den toopa to naben barakka' kamaccan mangkada mpake basa mejangngaran. Naden too tolaen naben barakka' kamaccan mbattuanannii joo basa. 11 Mesa'ra ia joo Roh Allataala to mpangben ngasanni joo. Pada naben barakka'-Na to tau, situru' pakkaeloran-Na. 12 Mesa'ra to batang kale, apa buda lesoanna. Ia to Almaseh wa'ding dipasangrapang batang kale. Jaji, moi buda to lesoan-Na, mesa'ri Ia. 13 Jaji, ia to kita' tomatappa' dipupenjaji ngasanmiki' mesa' lan Almaseh, nasaba' pada najio'miki' Roh Allataala. La kita' to-Yahudi, la kita' bangsa tangngia to-Yahudi, la kita' tokaunan, la kita' tomaradeka, pada ngasanmiki' ntarima mesa' Roh Allataala. 14 Ia to batang kale te'da namesa'ra lesoanna, apa buda. 15 Jaji, ia ke la nakua to aje, "Tangngiana' aku' lesoan batang kale, sanga tangngiana' aku' lima." Te'da na ia joo natangdireken lesoan batang kale. 16 Ba'tu ia ke la nakua to talinga, "Tangngiana' aku' lesoan batang kale, sanga tangngiana' aku' mata." Te'da na ia joo natangdireken lesoan batang kale. 17 Ia ke la sininna lesoan batang kale la menjaji mata, umbomo dikua la mangpesa'ding! Ba'tu ia ke la sininna lesoan batang kale la menjaji talinga, umbomo dikua la mangnguduk! 18 Iamo joo Puang Allataalamora nnatoro'i anna pupenjajii buda rupanna to lesoan batang kale situru' pakkaeloran-Na. 19 Ia ke la mesa'ra rupanna lesoan, te'damo to disanga batang kale. 20 Jaji, moi buda to disanga lesoan, apa mesa'ra batang kale. 21 Te'da nawa'ding mata ngkuanni to lima, "Te'da kuparalluiko!" Ba'tu ulu ngkuanni to aje, "Te'da kuparalluiko!" 22 Sitonganna ia to lesoan batang kale to disanga malamma, kannori ia gajara taparallui. 23 Na ia to lesoan batang kale to disanga te'da nadiangga', ia ora taben kadianggasan tongan. Ia to lesoan batang kale to mesirisan dikita, iamo tabuni melo. 24 Ia to lesoan batang kale to te'da namesirisan dikita, te'damo naparallu dibuni. Susimi joo naatoro' melo memanmo ia Puang Allataala joo batang kale, anna ia to lesoan batang kale disanga tangmakeangga', iamo dipupenjaji makeangga'. 25 Napugaukki susi joo, anna te'da nasitawa-tawa to batang kale, na ia to lesoan sisulle sipuinawa. 26 Susimi joo, ianna den mesa' tomatappa' maparri', la mperasai ngasan too kamaparrisan to laenna. Na ia ke denni mesa' tomatappa' dipakala'bih, la turu' ngasan masannang to laenna. 27 Ee, tomala'bihku' sola ngasan! Batang kale-Nai Almaseh to tomatappa', na ia to tomatappa' pada lesoan-Nai joo batang kale-Na Almaseh. 28 Na mangkamo naatoro' Puang Allataala to jamaa napada mbenni jaman to tomatappa'. Bungahna den menjaji rasulu', mangpenduanna den menjaji nabi, mangpentallunna den menjaji guru, na sitarruhna den to tompugauk tanda mejangngaran, naden to diben barakka' mpamalagah tomasaki, barakka' ntulung padanna rupa tau, barakka' mangparenta, ba'tu barakka' mangkada mpake basa mejangngaran. 29 Te'da namenjaji rasulu' ngasan, ba'tu nabi, iarika guru ngasan. Te'da na ia ngasan diben barakka' mpugauk tanda mejangngaran, 30 ba'tu diben barakka' mpamalagah tomasaki, mangkada mpake mangrupa-rupa basa mejangngaran, iarika mbattuanannii joo basa mejangngaran. 31 Iamo joo la mitongan-tonganni nnangahhi to barakka' kaminang parallu. Na la kupakitan kamu' to lalan kaminang melo.

1 Korintus 13

1 Moi angkumacca mangkada mpake mangrupa-rupa basa tolino sola basa malaeka', apa ia ke te'da kupakamoja' padangku' rupa tau, ia to apa kupau te'da bua'na, susi bangri to darong lo'bang nnoni. 2 Moi angkudiben barakka' mpangpeissenan pepasan-Na Puang, barakka' nnissen ngasanni to te'da naissenni tau, ba'tu barakka' mpahangngi to apa masussa dipahang, iarika barakka' matappa' te'da susinna lako Puang Allataala kuwa'ding mpeta'dai nadipalele to buntu jio mai ngenanna, apa ke te'dai kupakamoja' padangku' rupa tau, manassa te'da bua'ku'. 3 Moi na sininna ewananku' kupassudakkan lako tokaasi-asi, ba'tu mpangbenna' kaleku' ditunu, apa ke te'dai kupakamoja' padangku' rupa tau, manassa ia joo te'da ngasan bua'na lako kaleku'. 4 Ia to tompakamoja' padanna rupa tau tosabbara', tomelo penawa, tote'da napangngimburuan, tote'da napamatande kalena, tote'da namatampo, 5 tote'da nakassara', tote'da nakaparalluan mesanna manda to naangah, tote'da nasalle galli, tote'da napemannan tau. 6 Ia to tompakamoja' padanna rupa tau masussa ke ngkitai tau mpugauk kagajatan, apa masannang ke ngkitai tau mpugauk pakkaeloran-Na Puang Allataala. 7 Tuli matana bang nnoloii to sininna apa, tuli nakatappa'i to apa melo jio mai tolaen. Tuli sabbara' na te'da namadoi' bang ka'tu rannu moi samatumbanna to apa jaji lako kalena. 8 Te'da cappa'na joo pangpakamoja'. Apa la den wattunna nate'damo tau nnampui barakka' mpangpeissenan pepasan-Na Puang Allataala, barakka' mangkada mpake basa mejangngaran ba'tu barakka' mpahangngi to apa masussa dipahang. 9 Sanga ia to barakka' mpahangngi to apa masussa dipahang na ia to barakka' mpangpeissenan pepasan-Na Puang Allataala den kakuranganna. 10 Apa ia ke nadete'mi to te'da kakuranganna, te'damo nadiparallui to den kakuranganna. 11 Ia tongkupeapa, mangkada peana', mangpenawa peana', na mangpikkiri' pea toona'. Apa ia tongkumatonggomo kusulleimi to sipa' kapeanku'. 12 Ia tee too ia to apa takita susiri to bajo-bajo tangmanyarrah lan cammin, apa la takita manyarrah keanu'. Ia tee too denpa kakuranganna to kapaissenanku' jiona Puang Allataala. Apa ia ke keanu', la kuissen to Puang Allataala susi Ia nnissenna'. 13 Jaji, den tallung rupa to la tapugauk tee too, iamo to matappa'ki', mangrannuanki', antapakamoja' padanta' rupa tau. Na ia to kaminang parallu jio mai joo tallu, iamo to mangpakamoja'.

1 Korintus 14

1 La mipengkulle-kulleii ammipakamoja' padammi rupa tau, na la mipengkulle-kullei tooi nnampa' mangrupa-rupa barakka' to napangben Roh Allataala. Ia to kaminang parallu iamo to barakka' mpangpeissenan pepasan-Na Puang Allataala. 2 Ia to tomangkada mpake basa mejangngaran, te'da namangkada lako tolino, apa lakora Puang Allataala. Na te'da tau mpahangngi to apa napau, sanga Roh Allataala mbenni to kada napau, na Puang Allataala manda mpahangngi. 3 Apa ia to tompangpeissenan pepasan-Na Puang Allataala, namangkada lako tolino, napamawatangngi, napamasumanga'i, napakatana tooi. 4 Ia to tomangkada mpake basa mejangngaran mpamawatang mandari kamatapparanna, na ia to tompangpeissenan pepasan-Na Puang Allataala, mpamawatang kamatapparanna sininna tomatappa' to ssa'dingngi. 5 Melo ke nnampui ngasan kamu' barakka' mangkada mpake basa mejangngaran, apa la'bi melo ke nnampui kamu' barakka' mpangpeissenan pepasan-Na Puang Allataala. Nasaba' la'bi parallu ia to tompangpeissenan pepasan-Na Puang Allataala, na ia to tomangkada mpake mangrupa-rupa basa mejangngaran. Laen o, ke macca tooi mbattuanannii joo apa napau, anna den bua'na lako tomatappa' to ssa'dingngi. 6 Ee, tomala'bihku'! Ia ke ratuna' mati' kumangkada mpake mangrupa-rupa basa mejangngaran, te'da bua'na lako kalemi, ke te'dai miissenni battuananna. Laen o, ke mpangpeissenanna' apa to mangka napakitanna' Puang Allataala, ba'tu mpapahangngi kamu' to apa masussa dipahang, iarika mpangpeissenanna' pepasan-Na Puang Allataala, ba'tu mangngajahhina'. 7 Susi una ke ia to parewa mossi', susinna suling na cu'bikan, nadipannoni tangsirundunan, te'da naissenni tau kumua kelong apara to napukelong. 8 Iarika ke ia to tarompe' dipannoni punala, te'da naissenni to surudadu la sadia mangrari. 9 Susi unai ke mangbicara kamu' mpake basa mejangngaran. Te'da tau la nnissenni joo kada mipau, ke te'dai mipamanassai kumua apara battuananna joo kada mipau. Jaji, ia joo kanni te'da bua'na. 10 Liwa' ia budanna basa lan tee lino, apa te'da ia basa tangden battuananna. 11 Apa ia ke te'da kuissenni battuananna to basa napau tau, tokabaruna' lako joo tau, na moi ia tokabaru too lako aku'. 12 Na kuissen kumua gaja doang kamu' nnampa' barakka'-Na Roh Allataala. Jaji, la mipengkulle-kullei nnampa' barakka' to mpamawatang kamatapparanna tau lan jamaa. 13 Iamo joo, na ia to tonnampui barakka' mangkada mpake basa mejangngaran, la massambajangngi lako Puang Allataala, naben tooi barakka' mbattuanannii apa joo napau. 14 Nasaba' ia ke massambajangna' mpake basa mejangngaran, massambajangngi to penawangku', apa ia to tangngahku' te'da napahangngi to kupeta'danna. 15 Jaji, apara la kupugauk? Iamo to kumua la massambajangna' mpake penawangku', angkumassambajang too mpake tangngahku'. La makkelongna' mpuji Puang Allataala mpake penawangku', angkumakkelong too mpake tangngahku'. 16 Ia ke mangkurru sumanga' kamu' lako Puang Allataala mpake penawammi, naden tolaen te'da naissenni joo basa mejangngaran, te'da nawa'ding mpau, "Amin", nasaba' te'da napahangngi apara joo mipau. 17 Moi namakassing joo pangkurrusumanga'mi lako Puang Allataala, apa te'da napamawatang kamatapparanna tau laen. 18 Mangkurru sumanga'na' lako Puang Allataala, nasaba' kucau' ngasan kamu' mangkada mpake basa mejangngaran. 19 Apa moi nasusi joo, ia angkulan jamaa, moi limang bukura kada kupake mangngajahhi apa napahangngi tau, na ia ke massa'bu-sa'bu kada lan basa mejangngaran kupau apa te'da napahangngi. 20 Ee, tomala'bihku' sola ngasan! Danggi' mimangtangngah susi tote'da apa naissen. Sibalikanna la mangtangngah susira kamu' tomasaranianmo. Apa ianna kagajatan, la da'tan kamu' susi tote'dapa apa naissen. 21 Nakua Puang lan Sura' Allataala kumua, "La kupake to bangsa tangngia to-Yahudi, to mpake basa tangngia basa to-Yahudi, mpangkadaii tee mai umma'-Ku'. Apa moi nasusi joo, te'da namadoang mpesa'dingngina'." 22 Jaji, ia to barakka' mangkada mpake basa mejangngaran, mesa' tanda lako totangmatappa', tangngia lako tomatappa'. Na ia to barakka' mpangpeissenan pepasan-Na Puang Allataala, iamo tanda lako to tongkatappa'i Almaseh, tangngia lako to totangmatappa'. 23 Susinna ia ke sirempunmo kamu' sola ngasan la ssompa Puang, ammimangbicara ngasan mpake basa mejangngaran, naden tolaen ratu tote'dapa namatappa', tantu nasanga kumua tomame ngasanmo kamu'. 24 Apa ia ke mpangpeissenan kamu' pepasan-Na Puang Allataala, naden tolaen ratu to te'dapa namatappa', ia joo apa mipau mpaissennii to dosana, nasassan kalena. 25 Kaissenanni to apa membuni lan penawanna, anna suju' ssompa Puang Allataala. Nakatappa'i kumua, "Lan tonganmo tangnga-tangngami to Puang Allataala." 26 Ee, tomala'bihku' sola ngasan! Apa ngasanra battuananna tee? Ia ke sirempun kamu' la ssompa Puang, pada den patummi. Den tomakkelong, tomangngajahhi, tompangpeissenan to apa mangka napakitanni Puang Allataala, tomangkada mpake basa mejangngaran, na den too tombattuananni to apa napau. Apa ia ngasan joo la dipugauk anna pamawatangngi to kamatapparanna tomatappa'. 27 Ia ke den kamu' la mangkada mpake basa mejangngaran, ganna'mo ke denni dua ba'tu tallu tau sisulle-sulle. Apa la den too tau la mbattuanannii to apa napau. 28 Ianna te'da tau la mbattuanannii, ia joo tolamangkada mpake basa mejangngaran ake'mo namangkada lan bangmo penawanna lako Puang Allataala. 29 Dua ba'tu tallu tau la mpangpeissenan pepasan-Na Puang Allataala, anna sitimbangngii tolaen kumua tongannaraka pole jio mai Puang Allataala joo apa napau. 30 Apa ia ke den tau laen jio kasirempunan naden to apa napakitanni Puang Allataala, ta'pa la kamma'i to tomukkun mangkada. 31 Susimo tee carana ammiwa'ding ngasan sisulle-sulle mpangpeissenan pepasan-Na Puang Allataala, miwa'ding ngasan too ntarima pangngajaran, anna samawatang-mawatangna to kamatapparanmi. 32 Ia to tonnampui barakka' mpangpeissenan pepasan-Na Puang Allataala ngkuasaii kalena, anna tajanni sanadete'na wattunna mangkada. 33 Nasaba' iara nakabudai Puang Allataala to karapasan, tangngia kamarongkan. Susi to biasanna dipugauk ke sirempunni to tomatappa' umbo-umbo nanii, 34 la kamma'i to baine. Te'da nawa'ding sipangkada-kada, apa la mangpesa'ding bangri situru' atoran agama. 35 Ianna den apa madoang la naissen, jiopi bolana napekutananni lako balinna. Liwa' ia mesirisan ke sirekai to baine lan jamaa. 36 Misangaraka kumua pole jioi mai kalemi to kadan-Na Puang Allataala! Ba'tu misanga tooraka kumua kamu' mandara dipatujuan joo kadan-Na Puang Allataala! 37 Ianna den tau ssanga kalena kumua todiben barakka' mpangpeissenan pepasan-Na Puang Allataala, ba'tu naben barakka' laen Roh Allataala, la naingaranni kumua ia tee kuuki' parenta-Na Puang Allataala. 38 Apa ianna den tau cia' ntarimai tee, danggi'mo misailei. 39 Ee, tomala'bihku' sola ngasan! Iamo joo pengkulle-kulleii miampa' barakka' mpangpeissenan pepasan-Na Puang Allataala, apa danggi' mianggai tau mangkada mpake basa mejangngaran. 40 La mipasirundunan meloi to sininna apa, susi to sipato'na.

1 Korintus 15

1 Ee, tomala'bihku' sola ngasan! Sitarruhna, la kupangngingaran pole' kamu' to Kareba Kasalamatan to mangka kuajaran kamu'. Mangkamo kamu' ntarimai, mimatappa' tongan lako Almaseh situru' joo Kareba Kasalamatan. 2 Na ia ke mituru' tarruhhi susi to kupangpeissenan, la napasalama' kamu'. Apa ia ke te'da mituru'i, te'da bua'na to kamatapparanmi. 3 Ia to kareba kaminang parallu to kupaissenanmo kamu', ia toomo to mangka dipabarakkananna' kumua, matei to Almaseh la ssulleki' to tomadosa, susi to diuki' jolomo lan Sura' Allataala. 4 Dipatamai liang, natuo pole' tonna allo mangpentallun, susi too to diuki' jolomo lan Sura' Allataala. 5 Kupaissenan toomo kamu' kumua, ia tonna dipatuo pole'mo mpangpekitanmi kalena lako Petrus, namane' lako anak guru laen-Na. 6 Mangkai joo mpangpekitan pole' omi kalena lako to tonturu'i, den la'bi lima ratuh tau. Budai tuu lako tau tuo unapa tee too, moi naba'tu pira-pirami to jolomo lako. 7 Mangka oi joo, mpangpekitan omi kalena lako Yakub, namane' lako rasulu' sola ngasan. 8 Katampakanna mpangpekitan tooi kalena lako aku'. Ia tee aku' susina' to pea jaji malolo, sanga tangdikalannai napangpekitanni Puang to kalena lako aku'. 9 Aku'mo rasulu'-Na Puang to kaminang majiongna. Tangsipato'na' disanga rasulu', nasaba' gaja budamo tomatappa' lako Puang Isa kusessa. 10 Apa barakka'-Nara Puang Allataala, angkumenjaji susi tee too. Na te'da natorro sala joo barakka'-Na lako aku', sanga la'bi bo'jo'pa' aku' mangjama na ia tuu mati' rasulu' laen. Apa sitonganna tangngia aku' to mangjama, apa barakka'-Na Puang Allataala to mpamawatangna' mangjama. 11 Susimi joo issinna to Kareba Kasalamatan to kipaissenanmo kamu', la aku', la ia to rasulu' laen, na mitarimami. 12 Ia ke kipangpeissenanmi kumua dipatuo pole'mi to Almaseh jio mai kamatean-Na, matumbai naden tau lan tangnga-tangngami kumua, te'damo naladipatuo pole' to tomate? 13 Ia kenna la te'da naladipatuo pole' to tomate, manassa kumua te'da too nadipatuo pole' to Almaseh. 14 Na ia kenna la te'da nadipatuo pole'mo to Almaseh, te'da bua'ki' mpangpeissenanni na te'da too bua'mi matappa', nasaba' tangtongan to mikatappa'i. 15 Na la manassa kumua topangnguragakan, nasaba' kipangpeissenan kumua mangkamo napatuo pole' Puang Allataala to Almaseh, na te'da pale' ia, ke la tonganni kumua, te'da naladipatuo pole' to tomate! 16 Nasaba' ia kenna la te'da nadipatuo pole' to tomate, moi Almaseh te'da nadipatuo pole' jio mai kamatean. 17 Na ia kenna la te'damo nadipatuo pole' to Almaseh, te'da bua'na to kamatapparanmi, nasaba' te'da mididampangan. 18 Na ia to Tosarani matemo, la dipatama naraka. 19 Iamo joo ia ke mangrannuanki' lako Almaseh la mpasalama'ki' lan mandara ntee lino, tangngia jio lino undi, kita'mo kita' to kaminang macilakanna sininna tolino. 20 Apa manassamo kumua mangkamo dipatuo pole' to Almaseh. Iamo joo buttinna kumua la dipatuo pole' todai to tomate. 21 La mate sininna tolino, nasaba' mesa'ra tau madosa. Susi toomi la dipatuo pole' to tolino, nasaba' panggaukanna toora mesa' tau. 22 Jaji, napumate ngasan tolino, sanga Adam. Susi toomi la naputuo ngasan to tolino, sanga Almaseh. 23 Apa pada la dipatuo situru' wattunna. Almaseh, iamo bungah dipatuo. Namane' ia to taun-Na, ke ratu pole'mi Almaseh. 24 Mangkai joo, Kiama'mi lino. Ia joo wattu la nataloi Almaseh to sininna kaparentan, kamakuasan, na sininna kamawatangan, namane' mpangben kakuasan-Na susi Raja lako Ambe'ta' Puang Allataala. 25 Nasaba' la mangparentai to Almaseh sanapangbenna Puang Allataala to sininna ewalin-Na nakuasaii. 26 Ia to ewali kaminang undinna nataloi, iamo to kuasa kamatean. 27 Den diuki' lan Sura' Allataala kumua, "Napangben ngasan Puang Allataala to sininna apa nakuasaii." Ia to disanga sininna apa, te'da nadireken to Puang Allataala to mangpangben. 28 Na ia ke nakuasai ngasanmi Almaseh to sininna apa, la mpangbenmi kalena lako Puang Allataala, to mangka mbenni to sininna apa nakuasaii. Susimi joo nakatampakanna naparenta ngasanni Puang Allataala to sininna apa. 29 Sitarruhna, ia ke te'dai nadipatuo pole' to tomate, ciapari na den tau mpangpejioran kalena ssulle to tomatemo. Ia ke te'dai nadipatuo pole' to tomate, te'da bua'na joo napugauk. 30 Na te'da bua'ki' tuli nnoloi abala', ke te'dai nadipatuo pole' to tomate! 31 Ee, tomala'bihku'! Allo-allona' mpengkulleii maparri' na te'da kucirinnai sunga'ku', sanga kupumasannang to sipa'mi, nasaba' matappa'mo kamu' lako Puangta' Puang Isa Almaseh. 32 Denmo kunnewa tau susi olok-olok masia' inde' kota Efesus. Te'da saroku', ke la te'dami nadipatuo pole' to tomate. La'biran tapugauk bangmi susi to nakua tau, "Takumande sola tamangngiso', tamangmasannang-sannang, sanga la matemiki' masawa." 33 Danggi' mieloran kalemi napalao sala tau! Ia ke sibawaki' togaja', la mentogaja' todaki'. 34 Mangngingaran melo kamu', na danggi'mo mipugauk dosa. Sitonganna la mipumasiri' to kumua, denpa tau lan tangnga-tangngami to te'dapa naissen Puang Allataala. 35 Mbai den tau mekutana kumua, "Umbora dikua mpatuo pole' tomate? Na batang kale matumbara to la diben tau ke mangkami dipatuo pole'?" 36 Ee, tobango'! Ia ke nnamboh kamu' banne, te'da nata'pa tuo bang joo banne, ke te'dapi namate jolo'. 37 Na ia to banne miamboh, banne gose' ba'tu banne laen, lise'na mandara joo banne miamboh, te'da na ia ngasan bang unamo joo batangna. 38 Puang Allataalara la mpatuoi joo banne susi to nakabudai, anna pasibatangngi batangna. Na pada laen rupanna to lise' banne, pada laen too batangna. 39 Susi too batang kalena to apa kepenawa, silaen-laenan. Susinna tolino, laen ia batang kalena, laen batang kalena to olok-olok, laen too batang kalena to manuk-manuk, na laen too batang kalena to bale. 40 Susi tooi to apa jao langi', na ia to apa lan lino, silaen-laenan. Na ia to apa jao langi', silaenan too kamaballoanna. Susi too to apa lan lino. 41 Silaenan kamaballoanna to allo, kamaballoanna to bulan, na kamaballoanna bintuin. Na ia to bintuin pada silaen-laenan too kamaballoanna. 42 Susi toomi joo ke dipatuo pole'mi to tomate. Ia ke mateki', dilamunni to batang kaleta', naburuk. Na ia ke dipatuo pole'miki', laenmo joo batang kaleta', te'damo nalaburuk. 43 Ganjang to batang kale dilamun, apa maballo to batang kale dipatuo pole'. Malamma naburuk to batang kale dilamun, apa mawatang natangburuk to batang kale dipatuo pole'. 44 Ia to batang kale dilamun, iamo batang kale to sipato' tuo lan tee lino, apa ia to batang kale dipatuo pole', iamo batang kale sipato' tuo jao suruga. Ia ke denni batang kale sipato' tuo lan tee lino, den toda batang kale to sipato' tuo jao suruga. 45 Den diuki' lan Sura' Allataala kumua, "Kepenawa to pamula tolino, iamo to Adam," apa penawa mangpatuo to cappa' Adam, iamo to Almaseh. 46 Ia to pamula batang kaleta' iamo to sipato' tuo lan lino. Na ia to batang kale cappa'ta' iamo to sipato' tuo jao suruga. 47 Ia to pamula Adam digaraga jio mai litak, na ia to cappa' Adam pole jao mai suruga. 48 Ia to batang kalena tolino susi batang kalena Adam to digaraga jio mai litak. Na ia to batang kalena to la mentama suruga susi batang kale-Na Almaseh to pole jao mai suruga. 49 Ia tee kita' tee too, susimiki' pamula Adam to digaraga jio mai litak, apa la susimiki' Almaseh to pole jao mai suruga keanu'. 50 Ee, tomala'bihku' sola ngasan! Ia to kusanga, iamo to kumua, ia tee batang kaleta' to la mate naburuk, te'da nakullei mentama Lino Barun-Na Puang Allataala, sanga te'da nakullei torro jio to te'da nanii kamatean. 51 Ingaranni tee, to tangnaissen tau kumua, te'dapa tamate ngasan ke ratu pole'i Puang Isa, apa la dipupembalik ngasanni to batang kaleta'. 52 Sangkappidian matara tee najaji, ke nnoni cappa'nami to tarompe'. Ia ke disa'dingmi joo oninna, la dipatuo pole'mi to sininna tomate anna te'damo nalamate. Na ia to kita' to tuo unapa la dipupembalikki'. 53 Ia tee batang kale la mate naburuk, la dipupembalik batang kale tanglamate na tanglaburuk. 54 Ianna mangkamo joo, mane'ri jaji to diuki' lan Sura' Allataala kumua, "Mangkamo ditaloi to kuasa kamatean, te'damo nalamate to tau!" 55 "Ta'demi kapataloanna to kuasa kamatean. Te'damo nakullei ssolangngiki'." 56 La mate to tolino, nasaba' dosa. Ia to tolino la dipabalahhi, nasaba' ntengkaii atoran-Na Puang Allataala. 57 Apa mangkurru sumanga'ki' lako Puang Allataala, to lla'paranmiki' jio mai kuasa kamatean na kuasa dosa, nasaba' Puangta' Puang Isa Almaseh. 58 Ee, tomala'bihku' to kupakamoja'! Iamo joo la mpemawatangngi kamu' kamatapparanmi, danggi' nasitawa-tawa to penawammi. La mpangjaman tarruh kamu' Puang Allataala, nasaba' miissen kumua, sininna to apa mijaman Puang Allataala, den ngasan bua'na.

1 Korintus 16

1 Sitarruhna ia tee karrempunanmi doi' la diben padanta' tomatappa' kaasi-asi jio tana Yudea la mipugauk susi to mangka kuajaran tomatappa' jio tana Galatia. 2 Ianna dete' omi allo Aha', pada la misarakki to doi' la mipangben situru' assele'mi, miannai jio bolami, danggi' naratupa' mati' mimane' la nnangahhi. 3 Na ia ke ratumo' mati', la kusuai to tomipileimo, namale mbawai joo doi' de' kota Yerusalem. La miben sura' mpangpetandanni tuu lako tau, napasibawai joo doi' pangtulungan, anna male mbawai de' kota Yerusalem. 4 Nadikitapa kumua parallura'ka male, kumane' male sola tuu lako tau. 5 La malena' mati' ssikitan kamu' apa la liupa' jolo jio tana Makedonia, nasaba' kuakkattai la nnola jio. 6 Mbai la torropa' iti' sola kamu' masai-sai ke wattu macakke'. Mangkai joo, ke wa'dingngi, mitulungna' kupatarruh kalingkanku' umbo-umbo to kunii la male. 7 Te'da kumale mati' kulaleppang bangra cingga'tu', apa ia ke napuelohhi Puang la torrona' masai ssolan kamu'. 8 La inde' unapa' kota Efesus, namane' pangramean Pentakosta, 9 sanga den wattu melo inde' kunii njama jaman makkeguna, moi nabuda tau nnewalina'. 10 Ianna ratu Timotius mati', tarima meloi anna masannang torro sola kamu', nasaba' susi bang una aku' mpangjaman Puang Allataala. 11 Danggi' lalo miden ngkita sere'i. Tulungngi nawa'ding mpatarruh kalingkanna nasalama' pole, sanga kutajanni sola padanta' tomatappa' inde'. 12 Ia to padanta' tomatappa' Apolos tuli kukuanmo namale mati' sola ba'tu pira-pira padanta' tomatappa' ssitammuan kamu', apa te'dapa nasadia la ratu tee too. Apa moi nasusi joo, ianna den wattunna, la male una ia mati'. 13 La majaga kamu', mituru' tarruhhi to pangngajaran tongan. Barani kamu' mipamawatang tooi to kamatapparanmi. 14 Na sininna apa mipugauk, la mipugaukki sanga kasipakamojatan. 15 Ee, tomala'bihku' sola ngasan! Tantu miissen to repokkona Stefanas. Iamo tuu lako tau to pamula matappa' jio tana Akhaya, namaringngan penawanna ntulung umma'-Na Puang Allataala. 16 Meta'da tongan-tonganna' lako kamu', mituru'i to tosusi joo, sola tolaen to pada-pada mangjama ntulung tomatappa'. 17 Kupumasannang to karatuanna Stefanas, Fortunatus na Akaikus. Susi to kumua ia to karatuanna kamu' to rratuina', nasaba' gaja kukamali' kamu'. 18 Mangkamo' napamario, susi too kamu' mangka napamasannang. Iamo joo sipato' dikasiri' to tosusi joo. 19 Massallang ngasankan lako kamu' to jamaa inde' propinsi Asia Biccu'. Akwila na Priskila sola jamaa to sirempun jio bolana gaja sannangngi massallang lako padanna tomatappa' iti'. 20 Ia ngasan to padanta' tomatappa' inde' kusolan massallang todai lako kamu'. Sisalama' kamu' misikamasean too, susi taun-Na tongan Puang Allataala. 21 Kurangngannipa ntee passallang to aku' nnuki'i. Sallangku' Paulus. 22 Ia to tocia' mpakamoja' Puang, ake'mo ditampakki ropu! Maranata, battuananna ratumiki' Puang! 23 Dennaa upa' nabarakka'i kamu' Puang Isa! 24 Kupakamoja' kamu', sininna taun-Na Puang Isa Almaseh. Padamo jolo' too. Sallangki' mati', Paulus.

2 Korintus 1

1 Ee, tomala'bihku' sola ngasan, tomatappa' lako Puang Allataala jio kota Korintus sola sininna to tomatappa' lan lili'na propinsi Akhaya! Aku' Paulus sola padanta' tomatappa' Timotius ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang IsaAlmaseh. Dennaa upa' nabarakka'i kamu' Ambe'ta' Puang Allataala sola Puang Isa Almaseh naben kamu' kamasannangan. 3 La mangkurru sumanga'ki' lako Puang Allataala, Ambe'-Na Puangta' Puang Isa Almaseh. Iamo Ambe' to ngkamasei na tuli mpakatana too tolino. 4 Ia mpakatanakan ke nakannakan mangrupa-rupa kamaparrisan. Na ia joo pangpakatana kitarima jio mai Puang Allataala, la kipangpakatanan pole' lako tau laen to maparri' toda. 5 Ia to kamaparrisan naperasai Almaseh, moi kami' buda todamo mangka kiperasai. Susi unakan tuli mperasai pangpakatana, nasaba' Almaseh. 6 Ia ke maparri'kan, ia joo la mpakatana kamu' ammisalama'. Ia ke dipakatanakan, dipakatana toda kamu', ammimemmawatang toda lan kamasussan susi to kiperasai. 7 Tuli matappa'kan anna te'da kikagiangan kamu'. Kiissen kumua turu' toda kamu' mapa'dik ke mapa'dikkan na iamo joo mituru' toda dipakatana ke dipakatanakan. 8 Ee, tomala'bihku'! Madoangkan ke miissenni to kamaparrisan kiperasai lan propinsi Asia. Ia to kamaparrisanki' liwa' nno'tonnikan, naarannai susi to kumua ka'tu rannumokan la tuo. 9 Ia to kiperasai susi to kumua la matemokan sanga mangkamokan dipapassanni pangsessa kamatean. Apa dipasusikan joo, dikua nadanggi' kipattuan kaleki', sangadinna mpattuankan Puang Allataala to mpatuo tomate. 10 Iamo mangka mpasalama'kan jio mai joo abala' kamatean, na Ia toomo la mpasalama'kan keanu'. Kirannuan la susi joo, 11 nasaba' mipassambajangankan. Ia ke mipugaukki susi joo, buda tau la mangkurru sumanga' lako Puang Allataala, nasaba' barakka' to la nabenkan situru' passambajangmi. 12 Kipumario, sanga kiissen lan penawangki', kumua maruruh na te'da caccana to panggaukanki', to padamokan masainna lan tee lino, la'bi-la'bipa lako kamu', natuli situru' pakkaeloran-Na Puang Allataala. Te'da napatujukan kapaissenan tolino, apa barakka'-Nara Puang Allataala to nabenkan. 13 Ia to kisanga lan tee sura'ki', ia mandara to apa miissen ammipahangngi ke mibacai. Kiparannuan kumua la miissen tongankan, 14 sanga ia tee too miissen sala-salarakan. Ia ke susimi joo, la diangga' kamu' nasaba' kami' na moi kami' la diangga'kan nasaba' kamu', ke ratu pole'mi Puang Isa. 15 Na iamo joo rannungki', naden kuakkattaii la ssitammuan kamu' jolo' amminnampa' barakka' manglokkon penduan. 16 Melohra' jolo' la ssitammuan kamu' ke malena' lako propinsi Makedonia, na ia ke polemo' jio mai la leppang pole'na' iti', ammiwa'ding ntulungna' mpatarruh kalingkanku' lako tana Yudea. 17 Apa kusullei joo akkattaku'. Misangaraka kumua mangnguragara' la male mati'? Misangaraka kumua elohku' bangra kuturu'i, tongkumangkada kumua, "Io", na cingga'tu'ra kumangkada o kumua "Te'da"? 18 Susi Puang Allataala wa'ding dikatappa'i, susi too to kadangki' lako kamu' te'da namembalik kumua "Io" menjaji "Te'da". 19 Susi too Puang Isa Almaseh, Anak Allataala, to kipangpeissenan lako kamu' sola Silas na Timotius, te'da namembalik to kadan-Na kumua "Io" menjaji "Te'da". Apa sibalikanna, tatta' napau "Io". 20 Puang Isa mpekaioii ba'tu mpugaukki to sininna basse-Na Puang Allataala. Iamo joo tamangkada lako Puang Allataala kumua, "Amin", battuananna tongan, anna dipakala'bih to Puang Allataala. 21 Iamo mpamawatangki' sola ngasan antamatappa' lako Almaseh napileiki' naputau mesaki'. 22 Ia toomo mpaassahki' menjaji ampun-Na tonna benki' Roh Allataala menjaji butti lako kita' kumua la nabenki' to sininna apa mangka nabasseanki'. 23 Puang Allataala, to nnissen issi penawangku', ssa'biina', kumua iamo na te'da kujaji male mati' sanga cia'na' mpamasse penawa kamu'. 24 Te'da kupassa kamu' to apa la mikatappa'i, nasaba' liwa'mo kamu' matappa' lako Almaseh. La kibalii mandamora kamu', ammila'bi masannang.

2 Korintus 2

1 Iamo joo, namangkamo kupattantu kumua te'dapa kulamale mati' ssitammuan kamu', sanga ia ke la malena' mati' tee too la massei penawammi. 2 Nasaba' ia ke masse penawammi, na inda pole' opa to wa'ding la mpakatanana', ke te'dai na ia bang una tuu mati' tomangka kupamasse penawanna. 3 Iamo patunna to sura' mangka kuukiran kamu'. Te'da kulassitammuan kamu' ammilasussaira'. Nasibalikanna kamu'ra to la mpamariona', sanga kuissen kumua ia ke mariona', la mario ngasan toda kamu'. 4 Gaja massena' nnukiran kamu' joo sura', anna sito'doan wai matangku'. Te'da lalo lan penawangku' kumua kemmimasussa, apa kukuara ammiissenni kumua gaja kupakamoja' kamu'. 5 Miissen to tompugauk kasalan nampamasse penawa. Ia joo tau te'da na aku' manda napamasse, apa kita' sola ngasan, ba'tu te'daraka na ia ngasan, nadanggi' kurangngan-rangngannii to kupau. 6 Ci'di'mora kamu' to tangssessai joo tau na kusanga ganna'mo to sessana. 7 Na ia tee too, la midampanganmira, mipakatana tooi, anna danggi' namasse gaja penawanna kannoi ka'tu rannu. 8 Iamo joo kumeta'da lako kamu', ammipangpekitan pole'i kumua mattongan-tongan kamu' mpakamoja'i. 9 Ia to sura' mangka kuukiran kamu' la kunii nnuji kamu' kumua tuli madoang tongan unara kamu'ka nturu'i to pangpatujungku'. 10 Ia ammidampanganni to tomangka mpugauk kasalan lako kalemi, moi aku' kudampangan tooi. Nasaba' ia ke denni to parallu didampangan, kudampanganni sanga Almaseh, ammipumeloi. 11 Kupugaukki susi joo, nadanggi' nataloiki' Ballisi', sanga taissenmo to pangtangngaranna. 12 Ia tongkuratumo jio kota Troas la mpangpeissenanna' karebanna Almaseh, nabenmo' Puang wattu la mangjama jio, 13 apa te'da kumasannang sanga te'da kusitammu padanta' tomatappa' Titus. Jaji, meta'da dampangna' lako tomatappa' jio, kumane' tarruh inde' propinsi Makedonia. 14 Apa kurru sumanga' lako Puang Allataala to tuli ssolankan nabenkan kapataloan, nasaba' memmesa' penawakan sola Almaseh! Napakekan Puang Allataala mpangpeissenanni to karebanna Almaseh, anna kaissenan susi bau bunangngu' silele to padang la umbo-umbo kinii. 15 Na ia tee kami' susikan kamanynyang napassompan Almaseh lako Puang Allataala. Ianna lako to toladisessa, ia tee kami' susikan bau kamatean topabuno, apa ianna lako to todipasalama', susikan bau bunangngu' to mbawa katuoan. Na te'da tau to ngkullei mpugaukki tee jaman ke te'da natulungngi Puang. 17 Te'da kisusi to napugauk buda tau, kumua ia to kadan-Na Puang Allataala napasusi bangri ewanan didangkangan. Apa maruruh to akkattaki'. Puang Allataala Ia ssuakan mpangpeissenanni joo karebanna Almaseh na Iamo ngkitakan kumua kipangpeissenanni susi to sipato'na taun-Na Almaseh.

2 Korintus 3

1 Ia tee kami' te'da to kumua mpuji pole' omokan kaleki'. Te'da too kisusi tuu mati' tau pira' kumua mpangpekitankan sura' mpangpetandan kaleki' lako kalemi, iarika surat mpangpetandankan jio mai kalemi kipangpekitanni lako tolaen. 2 Na kamu'mo sura' mpangpetandan kaleki' to diuki' lan penawangki', nawa'ding nnissenni sola mbacai sininna tau. 3 Ia tuu lako tau ngkitai to assele' jamanki' kumua kamu'mo susi sura' to nauki' Almaseh, na kami' napake ngkiringngi. Ia joo sura' tangngia dawa' dipake nnuki'i, apa Roh Allataala to tuo. Te'da too nadiuki' jiong batu susi atoranna Nabi Musa, apa diuki' lan penawanna tau. 4 Iamo kimangkada susi joo, sanga kamatapparanki' lako Puang Allataala nasaba' Almaseh. 5 Ia ke kami' te'da kapakulleanki' mpugaukki tee jaman, apa Puang Allataala mbenkan kapakullean. 6 Ia mbenkan kapakullean angkiwa'ding menjaji pangjama-Na mpangpeissenan basse baru, to nabenmiki' Roh Allataala apa te'da diuki' lan atoran agama. Nasaba' ia ke mpengkulle-kulleiki' mpugauk atoran agama dikua antadipupenjaji tomelo, la mateki'. Apa ia ke matappa'ki' lako Puang Allataala, la nabenki' Roh Allataala katuoan melo te'da cappa'na. 7 Ia tonna diben joo atoran agama, to mbawa kamatean, nadiuki' do' papan batu, cundallak to arrang kamala'biran-Na Puang Allataala gaja cora jio lindona Nabi Musa. Liwa' ia macorana joo arrang anna tangsarai to to-Israel ngkitai to lindona Nabi Musa, apa te'da namasai joo arrang. Jaji, ia kemala'bihhi joo atoran agama, to mbawa kamatean, 8 tantu ia to basse baru, to napangben Roh Allataala, la'bi mala'bih pole' opa na ia joo atoran agama. 9 Na ia ke mala'bih joo atoran agama, to mbawa pangsessa lako tolino, tantu la'bi pole' opa ia mala'bihna joo basse baru to nneloran tolino dipupenjaji tomelo. 10 Sitonganna ia joo apa jolona disanga mala'bih, te'damo nadisanga mala'bih tee too, sanga nacau'mi mala'bihna basse baru. 11 Na ia ke mala'bih to apa na cingga'tu'ra nata'de, tantu ia to apa te'da nalata'de, te'da ia cappa'na to kamala'biranna. 12 Baranikan mangkada susi joo, nasaba' susimi joo to rannungki'. 13 Te'da kisusi Nabi Musa ssamboi kaen lindona, anna danggi' nakitai to-Yahudi sata'de-ta'dena joo arrang kamala'biran-Na Puang, naarannai ta'de ngasan jio lindona. 14 Pussakki joo to-Yahudi susi to disamboi tangngahna. Ratu lako too allo da'tanpa susi to nasamboi kaen to tangngahna ke ssa'dingngi atoran agama dibaca, anna te'da napahangngi tujunna. Iapi natitimbak joo kaen, ke memmesa' penawai sola Almaseh. 15 Moi to-Yahudi tee too, da'tan bang susi to nasamboi kaen to tangngahna, ke ssa'dingngi sura'na Nabi Musa dibaca. 16 Apa ia ke matappa'mi to tau lako Puang, te'damo na susi to nasamboi kaen to tangngahna. 17 Na ia to disanga Puang ntee, iamo to Roh Allataala. Na ia to Roh Allataala lla'paranki' jio mai kuasa kamatean. 18 Na ia tee too tapupangngarrangmo to kamala'biran-Na Puang, te'damiki' susi to nasamboi kaen to lindota'. Iamo joo samasai-sainna ia to sipa'ta' la susi sipa'-Na Puang, na saendek-endekkena to kamala'biranta' nabenki' Roh Allataala.

2 Korintus 4

1 Kiissen kumua Puang Allataala mpabarakkannikan tee jaman, nasaba' melo penawan-Na lako kami'. Iamo joo na te'da kika'tu rannu. 2 Te'da kipugaukki to sininna panggaukan membuni to mesirisan, tangngia tookan pangnguraga iarika tompau sala kadan-Na Puang Allataala. Apa Puang Allataala ngkitakan kumua tangmembunikan kipangpeissenanni to pangngajaran tongan. Kieloranni to sininna tau ntimbangkan lan penawanna. 3 Ia ke den tau te'da napahangngi to Kareba Kasalamatan kipangpeissenan, iamo tandana kumua mangnguju lakoi naraka. 4 Ia to Ballisi', to ngkuasaii tee lino, iamo ssamboii tangngahna tuu lako tote'da namatappa', anna te'da nakitai to arrangna Kareba Kasalamatan to napupangngarrang kamala'biran-Na Almaseh to sangrupa bang una Puang Allataala. 5 Tangngia kaleki' tee kipangpekareban, apa karebanna Puang Isa Almaseh kumua Iamo Puang, na kami'mo kaunanmi situru' pakkaeloran-Na Puang Isa. 6 Ia tonna padenni Puang Allataala tee lino mangkadai nakua, "La ollong to arrang lan kamalillinan." Ia toomo nnarrangngii to penawanta', antakullei nnissenni to kamala'biran-Na Puang Allataala to mangngarrang jio lindo-Na Almaseh. 7 Apa ia tee ewanan, iamo to arrang kamala'biran-Na Puang Allataala, dianna lan batang kaleki' to te'da nakeangga', sanga susikan busu digaraga jio mai litak. Susimi joo, napajan kumua ia to kuasa mala'bih pole jiora mai Puang Allataala, te'da napole jio mai kaleki'. 8 Disilatukkikan diewa, apa te'da kidirimpih. Sumpalingankan, apa te'da kika'tu rannu. 9 Liwa' buda tonnewalikan, apa te'da lalo nasalaikan Puang Allataala. Moi angkipembudamo disessa, apa te'da kimate. 10 Tuli kiperasai lan kaleki' to kamatean-Na Puang Isa, dikua anna moi kuasa katuoan-Na pajan lan kaleki'. 11 Battuananna: ia angkituo unapa, tuli naancangkan kamatean, sanga nturu'kan Puang Isa. Na ia tee jaji anna pajan lako tolino kumua tuo pole'i Puang Isa, nasaba' nakitai to kuasan-Na lan batang kaleki' to la mate. 12 Jaji, ia to kami' tuli naancangkan kamatean, dikua ammiampa' katuoan melo te'da cappa'na. 13 Den diuki' lan Sura' Allataala kumua, "Iamo kumangkada-kada, nasaba' matappa'na' lako Puang Allataala." Ia joo kada nakanna todakan. Moi kami' mangkada todakan, nasaba' matappa'kan. 14 Matappa'kan kumua Puang Allataala, to mangka mpatuo pole' Puang Isa, la mpatuo pole' todakan, sanga memmesa' penawamokan sola Puang Isa, antadipangngolo sola ngasan jio olo-Na. 15 Ia to kamaparrisan kiperasai la mipumelona. Nasaba' ia ke sabuda-budanna tau mperasai kameloan penawan-Na Puang Allataala, sabuda-budanna tooi pangkurrusumanga' dipaendek de' Puang Allataala, anna Ia manda dipakala'bih. 16 Iamo joo kupaui nena' kumua te'da kika'tu rannu. Moi na ia tee batang kaleki' disolangngi, apa ia to penawangki' allo-allo tuli dibarui. 17 Ia tee kamaparrisan kiperasai cingga'tu'ra namaringngan too, nalampadenankan kamasannangan te'da susinna na te'da cappa'na. 18 Te'da na ia kipikkiri' to apa nakita mata to cingga'tu'ra, apa iara to tangnakita mata to te'da cappa'na.

2 Korintus 5

1 Nasaba' taissen kumua ia ke diro'pokanmi to bola ba'tu burukmi to batang kale to tanii mari'pih lan tee lino, la napasadianki' Puang Allataala jao suruga mesa' bola ba'tu batang kale baru te'da cappa'na, to tangngia panggaraga tolino. 2 Sumarro bangki' lan tee batang kale tanii mari'pih lan tee lino, nasaba' mamali' gajamiki' la mari'pih lan batang kale barunta' jao suruga. 3 Ia ke mari'pihmiki' lan batang kale barunta', te'damo tamangkale-kale. 4 Padaki' masainna mari'pih lan tee batang kale lan tee lino, pada tooki' masainna sumarro sanga buda kamaparrisanta'. Tangngiara to kumua madoangki' la'pah jio mai batang kaleta', apa madoangmiki' mari'pih lan batang kale panggaragan-Na Puang Allataala, anna ia tee batang kale la mate disullei batang kale baru to tuo te'da cappa'na. 5 Puang Allataala mpasadianki' joo batang kale barunta', nabenki' to Roh Allataala menjaji butti kumua la napugaukki. 6 Iamo joo tamawatang tarruh. Taissenni kumua padapiki' masainna mari'pih lan tee batang kaleta', pada toopiki' masainna te'dapa tatorro sola Puang jao suruga. 7 Nasaba' ia ke tuo unapiki' lan tee lino, kamatapparanra lako Puang Isa mpatujuki', tangngia apa nakita mata. 8 Mawatangki' moi nala'bi takabudai la'pah jio mai tee batang kaleta', antawa'ding mari'pih sola Puang. 9 Tapengkulle-kullei mpemasannangngi Puang, la lanpiki' tee batang kaleta', la jaomiki' suruga sola. 10 Nasaba' la dipangngolo ngasanki' lako Almaseh antapada diben assele' panggaukanta', la panggaukan melo, la panggaukan gaja'. 11 Kiissen apara battuananna to ngkasiri' Puang. Iamo joo kipengkulle-kulleii anna issenni tau kumua ia tee kami' wa'ding dikatappa'i. Naissen tongankan Puang Allataala. Na kurannuan tooi kumua miissenkan. 12 Te'da kimeta'da kumua ammipujikan, apa madoangrakan mben kamu' wattu melo to la minii mpumasannangkan, ke sioloan kamu' tomajekkong iti' to matampo sanga pengkitanna tau, tangngia sanga sipa'na. 13 Ia ke la mangkada susimokan tomame mikita, ia joo urusanki' kami' sola Puang Allataala. Na ia ke la mangkada matana unapakan, ia joo la mipumelona. 14 Napamasumanga'kan pangpakamoja'-Na Almaseh, sanga kiissen kumua ia ke mesa' tau mpumate sininna tau, pada to kumua sininna tau mate ngasanmi. 15 Matemi Almaseh ssulle sininna tau, dikua anna ia to kita' to tuo unapa te'damo taturu' pakkaeloranta', apa nturu'ki' pakkaeloran-Na Almaseh, to mangkamo mate natuo pole' ssulleki'. 16 Iamo joo na te'damo na pangngampa' tolinoki' kipake mpattantui kumua, meloraka ba'tu gaja'raka to tau. Moi denmo kipattantui meloraka ba'tu gaja'raka to Almaseh mpake pangngampa' tolinoki', apa te'damo kisusi joo tee too. 17 Ia to memmesa' penawamo sola Almaseh, menjaji tau barumo. Lanynya'mi to masainna, anna menjaji baru ngasanmo. 18 Puang Allataalara to mpugauk ngasanni joo. Nakalino pole'miki' Puang Allataala nasaba' Almaseh, namane' mbenki' jaman kumua na ia to tolaen tapupenjaji todai tonakalino Puang Allataala. 19 Kipangpeissenan kumua Puang Allataala mpasikalino pole' tolino na kalena, nasaba' Almaseh. Te'damo napallan penawai to kasalan tapugauk lako Ia. Na ia joo kareba kasikalinoan nasuakan Puang mpangpeissenanni lako tolaen. 20 Jaji, topesuannakan Almaseh. Nasuakan Puang Allataala mparatuan kamu' pepasan-Na. Nasuakan Almaseh meta'da lako kalemi, "Pemaringngannii penawammi, ammisikalino pole' Puang Allataala." 21 Puang Allataala mpabalahhi Almaseh moi na te'da namadosa. Ia ssulleki', nasaba' dosata', anna pupenjaji tomeloki' nasaba' memmesa' penawaki' sola Almaseh.

2 Korintus 6

1 Ia tee kami', mpangjamankan Puang Allataala. Iamo joo kimeta'da tongan-tongan lako kalemi, nadanggi' mitangmpuinawai to barakka' kasalamatan mangka mitarima anna membua melo. 2 Nakua Puang Allataala lan Sura' Allataala kumua, "Ia joo wattu kupueloh, kusa'dingmo to peta'danmu, na kutulungmoko joo wattu kamangpasalamatan." Pesa'dingngii, iamo tee too to wattu napueloh Puang Allataala nanii to tau dipasalama'. 3 Kipengkulle-kulleii na moi mesa' tau te'da la mpasalakan, nasaba' te'da namelo ke dicaccai to jamanki'. 4 Iamo joo kipangpekitanni lan sininna panggaukanki' kumua tonasuakan Puang Allataala. Kiewai kasabbarasan moi mangrupa-rupamo kamaparrisan kiperasai, susinna disessakan, disussaikan, 5 dirambikan, ditarungkukan ba'tu disigasa'ikan. Na kipengkullei tongan mangjama, biasakan tangmamma', biasa tookan tangkumande. 6 Manassa kumua tonasuakan Puang Allataala, sanga mpugaukkan kamarurusan, buda kapaissenan nabenkan Puang, sabbara'kan sola melo penawangki', torro to Roh Allataala lan kaleki', mangpakamoja' tongankan, 7 mpangpeissenankan pangngajaran tongan jio mai Puang Allataala, napajan kuasan-Na lan jamanki'. Na ia tee sininna panggaukan meloki' kipake mpangngewai kaleki'. 8 Manassa kumua tonasuakan Puang Allataala, moi nataratte'kan tau ba'tu napakasiri'kan, moi napujikan ba'tu napau gaja'kan. Nasangakan tau pangnguraga moi natonganna bang to kipau. 9 Den tau te'da natarimakan, moi na buda tau naissenkan kumua rasulu'kan. Disanga tomatemokan, moi kituo unapa. Moi kidisessa, te'da kipumatei. 10 Tuli mariokan, moi kiperasai kamasussan. Mpasugihmokan barakka' kasalamatan lako tobuda, moi susikan tokaasi-asi dikita. Sitonganna kiampui ngasan to sininna apa, moi susikan tote'da lalo apa kiampui. 11 Ee, tomala'bihku' to-Korintus! Te'damo apa kibunianan kamu'. Kipakamoja' tongan kamu'. 12 Kipakamoja' kamu', apa kamu'ra to te'da mipakamoja'kan. 13 Eloranna' mangkada susi ke sipangkadana' anak jajianku', "Kupeta'dai kumua, ammipakamoja' todakan." 14 Danggi' mimesa' penawa sola totangmatappa' lako Puang Isa, nasaba' tangsipato' dipugauk to susi joo. Te'da nalasibawa to kameloan na kagajatan! Te'da nakullei sialla' tomelo na togaja'! 15 Te'da nakullei Almaseh la mesa' penawa sola Ballisi'! Te'da apa napuapa tomatappa' napuapa tooi totangmatappa'! 16 Te'da kasiumputanna Bola Puang Allataala na bolana dewata! Na kita'mo Bola Puang Allataala to tuo, susi to napau Puang Allataala kumua, "La mari'pihna' sola tuu lako tau, na la torrona' lan tangnga-tangngana. La menjajina' Puang Allataala to nasompa, na ia tuu lako tau la menjaji umma'-Ku'. 17 Iamo joo salaii tuu lako tocia' matappa' lako Puang Allataala, messarak kamu' jio mai tuu lako tau. Danggi' lalo misitumbu to apa harang, angkuwa'ding ntarima kamu'. 18 La mupuambe'na', na iko la kupuanak. Susimi tee kadan-Na Puang to makuasa."

2 Korintus 7

1 Ee, tomala'bihku' to kupakamoja'! Ia joo basse-Na Puang dipatujui ngasanki'. Iamo joo danggi'mo tapugauk sininna panggaukan sola pikkirisan tangmelo. La takalaja' takasiri' to Puang Allataala, anna te'da caccata' naputau mesaki'. 2 Tarimamokan antasipakamoja'! Te'da salaki' moi lako mesa' tau. Te'da lalo too tau kipesaroi ba'tu kibangkarru'i. 3 Mangkadana' susi joo, te'da to kumua kupasala kamu', nasaba' susi to mangka kupau jolona, kumua gaja kupakamoja' kamu' na sadiakan tapada mate ba'tu tapada tuo sola. 4 Liwa'na' ngkatappa'i kamu', mipamariona'. Moi kipembuda mperasai kamasussan, liwa'na' matana nasaba' kamu', na mario tonganna'. 5 Ia tongkiratumo inde' propinsi Makedonia, te'da lalo kimatana. Buda kamasussan rratuikan, kasisakkan jio mai tolaen, na kamalajatan lan mai penawangki'. 6 Apa Puang Allataala, to tuli mpakatanai to toka'tu rannu, ssuai Titus ratu na iamo mpakatanakan. 7 Te'da na ia manda to karatuanna Titus mpakatanakan, apa ia toomo to nacuritankan to kumua mipakatanai. Napauankan Titus kumua gaja mali' kamu' la ssitammuanna', mipenassannimo to panggaukan jolomi, na sadia toomo kamu' mpangkadananna' tee too. Iamo joo la'bi mpamario pole'na'. 8 Moi na mangkamo mpamasse kamu' to sura' mangka kukiringan kamu', te'damo kumenassan nnuki'i. Menassanna' tommimasse, apa cingga'tu'ra joo kamasseanmi. 9 Apa masannangmo' tee too. Te'da kumasannang, sanga masse kamu', apa masannangna', nasaba' ia to kamasseanmi mpupengkatoba'mo kamu'. Napake Puang Allataala joo kamasseanmi to la mipumelona. Jaji, te'dara mipurugii to sura'ku'. 10 Ia to kamassean, to naperasai tau situru' pakkaeloran-Na Puang Allataala, mpabalik penawa. Na ia ke balikmi to penawa, te'damo tau mpenassannii, nasaba' la nnampa' kasalamatan. Sibalikanna ia to kamassean, to naperasai tolino to tangnturu' Puang, te'da na mpabalik penawa, apa mpadenri kamatean. 11 La mipikkiri' meloi to assele'na kamassean to miperasai situru' pakkaeloran-Na Puang Allataala! Ia to assele'na kumua ammipengkulle-kullei mpangkadanan kalemi, mikaba'ci dosa, mikasiri' Puang, mikamali'kan, masumanga' kamu', barani kamu' ssessai to tokasalan. Ia ngasanmo tee minii mpangpekitanni kumua te'da mikasalan. 12 Ia to sura' mangka kuuki' lako kamu', te'da kuuki'i kukua angkupasalai joo tokasalan, te'da too kukua angkupangkadananni to todipa'dikki. Apa iara kuuki'i, kukua anna manassa lako kamu' to sumanga'mi sola pangpakamoja'mi lako kami'. Puang Allataala ngkitakan. 13 Iamo joo kimatana. Te'da kimatana manda, apa mario tookan, nasaba' ngkitakan kamarioanna Titus, to mipemasannangngimo sola ngasan. 14 Mangkamo kamu' kupuji lako Titus, na melomi sanga te'da una mipakasiri'na'. Tongan ngasan to apa kipauan kamu', susi too tongan ngasan to apa mangka kipujian kamu' lako Titus. 15 Sanapakamoja'-moja'mimo, ke naingaranni kumua tongan-tongan kamu' sola ngasan nturu' parentana, mitarima meloi, sanga liwa' mikasiri' mitaratte' tooi. 16 Gaja sannangna', nasaba' wa'ding kamu' dikatappa'i tongan.

2 Korintus 8

1 Ee, tomala'bihku'! Elorankan kipauanni kameloan-Na Puang Allataala to jamaa inde' propinsi Makedonia. 2 Da'tanni mario, moi namangkamo mperasai kamasussan la'da'. Malaboh mangpangben ntulung tolaen, moi naliwa' kaasi-asi. 3 Wa'dingna' mpamanassai kumua macanning atinna mangpangben. Biasa too napala'bii moi te'da tau ssuai. 4 Napeta'da tonganni lako kami' kumua ia ke wa'dingngi napabalian toda mpangben pangtulungan ntulung umma'-Na Puang Allataala jio tana Yudea. 5 La'bi buda ia to napangben na ia to kirannuan. Pamulanna mpangbenni kalena lako Puang, namane' lako kami' susi to napueloh Puang Allataala. 6 Iamo joo kipeta'dai Titus namale mati' mpatarruhhi tee jaman melo rrempun doi' pangtulungan lan tangnga-tangngami, sanga iamo mangka mpamulai. 7 Te'da kakuranganmi. Matappa' tonganmo kamu', miissenmo to pangngajaran tongan na maccamo kamu' mangngajahhi lako tau, masumanga'mo kamu', na mipakamoja' tongankan. Iamo joo kupeta'dai lako kalemi anna kamu'mo nomoro' mesa'na ntulung umma'-Na Puang Allataala jio tana Yudea. 8 Te'dara kupangpesuanni tee, apa kupaissennira kamu' kumua liwa' masumanga' to tolaen ntulung padanna tomatappa', angkuissenni kumua mangpakamoja' tonganmora kamu'ka. 9 Miissen kumua gaja napakamoja' kamu' Puangta' Puang Isa Almaseh. Sugih Ia, apa mpupengkaasi-asii kalena nasaba' kamu', anna ia joo kakaasi-asian-Na mpupessugih kamu'. 10 Ia ke aku', melo ke mimangkaii rrempun doi' pangtulungan to mipamulamo tonna taun jolo. Nasaba' kamu'mo to mangpamula ssitangngahhii sola mpugaukki. 11 Jaji ia tee too, la mipatarruhhi situru' kapakulleanmi. La masumanga' kamu' mmangkaii, susi tonna jolona gaja masumanga' kamu' tommimane' ssitangngahhii. 12 Ia ke masumanga' kamu' mpangbenni situru' to apa miampui, manassa masannang Puang Allataala ntarimai. Te'da napeta'dai to apa tangmiampui. 13 Te'da lalo kumua la kupesannangngi to tolaen, angkusussai kamu'. Apa melo ke pada situlung-tulungki'. 14 Ia tee too kala'bian ngasanmo kamu', jaji sipato'mo ke miganna'ii to kakuranganna to tau laen. Na iapa ke kakurangan toda kamu', nakala'bian to tau laen, natulung toda kamu'. Na ia ke susii joo, pada-padamiki' sisulle situlung. 15 Susi to diuki' lan Sura' Allataala kumua, "Ia to tosibuda assele'na, te'da nakala'bian. Na ia to tosici'di'ra assele'na, te'da nakakurangan." 16 Gaja mangkurru sumanga'kan lako Puang Allataala, nasaba' napamasumanga'i to Titus susi kami' ntulung kamu'! 17 Natarimai to peta'danki' la male mati', sanga madoang meman tooi ntulung kamu'. 18 Den too mesa' padanta' tomatappa' kisua nasolan. Na nakasiri' tongan jamaa la umbo-umbo nanii, sanga melo to jamanna mpangpeissenan Kareba Kasalamatan. 19 Na te'da nadikasiri' manda, apa ia joo tau mangka toomo napilei jamaa inde' la kisolan male mbawai to doi' lako kota Yerusalem, naissenni to padanta' tomatappa' jio tana Yudea kumua macanning atingki' ntulungngi anna dipakala'bih to Puang. 20 Nasolanni joo tau sanga cia'kan disanga tomajekkong, nadanggi' naden tau mpasalakan nnurusu'i joo doi' liwa' buda. 21 Madoangkan ke manassai kumua tomaruruhkan, te'da na situru' manda Puang, apa situru' too tolino. 22 Denpa mesa' padanta' tomatappa' laen nasolan Titus. Tuli kikita sipa'na napajan kumua manassa madoang mangtulung. Na ia tee too la'bi madoangpa ntulung kamu' nnurusu'i tee pangrempunan doi', nasaba' liwa' kamu' nakatappa'i. 23 Ia tee Titus sangpangjamanku', to kusolan ntulung kamu'. Na ia joo padanta' tomatappa' dua nasolan Titus, iamo nasua jamaa inde' male mati'. Melo to sipa'na. Iamo joo napumala'bihhi Almaseh. 24 La mipangpekitan to pangkamoja'mi lako, anna issen ngasanni jamaa kumua tomangpakamoja' kamu', namanassa kumua tongan to apa kipujian kamu'.

2 Korintus 9

1 Sitonganna te'damo kuparallu nnukiran pole' kamu' sura' to sudakka lako umma'-Na Puang Allataala jio tana Yudea. 2 Nasaba' kuissen kumua mikabudai massudakka, na mangkamo kamu' kupuji lako to-Makedonia. Kupauanni kumua, "Ia unapa tonna taun jolo anna sadiamo tuu lako padanta' tomatappa' jio tana Akhaya la massudakka." Na ia to kamasumangatanmi mpamasumanga' toda buda tau inde' propinsi Makedonia. 3 Na ia tee too kusuamo to Titus mati' sola joo padanta' tomatappa' dua, anna ia to apa mangka kupujian kamu' te'da nakareba angin bangra. Apa la sadiamo kamu' mangtulung, nasaba' mangkamo' mpauanni to-Makedonia kumua sadia jolomo kamu' mangtulung. 4 Danggi' na ia ke malena' mati', naden to-Makedonia mpeundiina', na ia ke te'dapi misadia, liwa' kupusiri', nasaba' mangkamo' mpauanni kumua gaja kikatappa'i kamu'. Na moi kamu' la mipusiri' too! 5 Iamo joo kupikkiri'i kumua parallu kusua jolo mati' to Titus sola joo padanta' tomatappa' dua, anna urusu'i to sudakka to mangka mipangngakui. Iamo kupugaukki susi tee, kukua anna ia ke ratuna' mati', sadia jolomo joo sudakkami. Na ianna susi joo, manassa macanning atimmi mangpangben, te'da midiparuku. 6 Ingaranni tee! Ia to tonnamboh ci'di' banne, ci'di' toora assele'na la natarima. Na ia to tonnamboh buda banne, buda too assele'na la natarima. 7 Ia to tau pada la mangpangben situru' canning atinna. Danggi' naturu'i nuku-nuku ba'tu naparukuri, sanga iara napakamoja' Puang Allataala to tomacanning atinna mangpangben. 8 Makuasa Puang Allataala llokkon sininna barakka'-Na, ammituli nnampuii to sininna apa miparallui. Na ia ke susii joo, sadiamo kamu' mpugauk mangrupa-rupa kameloan, ntulung tokakurangan. 9 Susi tee to diuki' lan Sura' Allataala mpau Puang Allataala kumua, "Mamasei lako tokaasi-asi, te'da cappa'na kameloan penawan-Na." 10 Puang Allataala mpasadianni banne to tomangngamboh sola kande la nakande. Susimi joo napasadian kamu' apa to miparalluinna, nabarakka'i to pangpabenganmi anna mangngassele' melo. 11 La napabarakka'i kamu' to sininna apa miparallui, ammituli mangpangben situru' canning atimmi. Na ia ke kitawa-tawanni to-Yudea to pangpabenganmi, buda tau la mangkurru sumanga' lako Puang Allataala. 12 Nasaba' ia tee panggaukan melo mipugauk, te'da nalangganna'i mandari to kakuranganna umma'-Na Puang Allataala jio tana Yudea, apa la napusaba' too nabuda tau mangkurru sumanga' lako Puang Allataala. 13 Ia ke nakitai umma'-Na Puang Allataala jio tana Yudea tee panggaukan melomi, la mpakala'bihhi Puang Allataala, nasaba' nakitai kumua mangkamo mitarima to karebanna Almaseh, ammituru' tonganmi. Buttinna kumua mangpangbenmo kamu' situru' canning atimmi lako to-Yudea sola tolaen. 14 Ia ke susimi joo nakamali' kamu', napassambajangan kamu' lako Puang Allataala, nasaba' nalokkonmi Puang Allataala to barakka'-Na lako kamu'. 15 La mangkurru sumanga'ki' lako Puang Allataala sanga pangpabengan-Na to te'da susinna!

2 Korintus 10

1 Den ba'tu pira-pira tau lan tangnga-tangngami ssangana' kumua, baranina' ke sikambelaki', porrokanna' ke sioloanki'. Apa ia tee aku' melo penawangku' na tangmakarrah toona' susi Almaseh meta'dana' lako kalemi kumua, 2 danggi' miparukuna' mangkada makarrah ke sitammumiki'. Nasaba' kuakkattai la nnatoro'i tuu mati' tau tossangakan kumua ia to sipa'ki' susi sipa'na totangmatappa'. 3 Tonganna kumua tolinokan, nasaba' tuo unapakan lan tee lino, apa ia to panggaukanki' te'da nasusi panggaukanna tolino to tangnturu' Puang. 4 Jaji, ia ke sioloankan ewalingki', te'da kipake kapaissenan tolinoki', apa kuasan-Nara Puang Allataala kipatalo. Iamo joo kuasan-Na kipake ntaloi te'gehna tompasala pangngajaran tongan, 5 tomatampo, na tohhalangngi tau nnissen Puang Allataala. Na ia joo kuasan-Na kipake too mpabalik pangtangngaranna tau, anna menturu' lako Almaseh. 6 Na iapi kisadia la ssessai sininna to totangnturu' unapa Almaseh, ke mituru' tonganmi to Almaseh. 7 La mipikkiri'i to tonganna. Ia to tau ssanga kalena taun-Na Almaseh la nasanga too kumua moi kami' taun-Na todakan Almaseh. 8 Te'da kupumasiri'i ke tuli mpujina' kaleku' nasaba' ia to kuasa nabenmokan Puang. Na ia joo kuasa dibenkan la mpemawatangngira kamu', tangngia la ssolangngi kamu'. 9 Cia'na' ke misangai kumua sininna to sura'ku' kupakeri mpakalaja' kamu'. 10 Susinna ke nakua tau, "Barani na matongko to Paulus lan sininna sura'na. Apa ianna ratumo lan tangnga-tangngata', tangmatongkomi na te'da lalo nakebattuan to kada-kadanna!" 11 Ia to tomangkada susi joo la naingaran kumua, ia ke ratumo' lan tangnga-tangngami la kupugauk susi unamo to kuuki' lan sininna sura'ku'. 12 Tantu te'da kibarani la mpapada kaleki' to tompuji kalena. Liwa' ia bango' tuu lako tau! Nasaba' nggaragan ia pesuka' kalena to napake ssukatan kalena. 13 Te'da kami' kisusi joo. Te'da kipujii to apa te'da nasipato' la dipuji. Na ia ke mpujikan kaleki', iara kipuji to jamanki' to napabarakkanankan Puang Allataala. Na moi lako kamu' disuakan male mpangpeissenan Kareba Kasalamatan. 14 Jaji, te'da kiliwannii to tondok disuankan njamai ke kisangai kumua lan kamu' to tondok dipattantuanmokan, sanga jolomokan mpangpeissenan karebanna Almaseh lako kamu'. 15 Te'da kipujii to apa te'da nasipato' dipuji, na te'da too kipuji kaleki' mpaui kumua ia to assele' jamanna tau laen sitonganna assele'ki'. Sibalikanna kiparannuan kumua samatappa'-tappa'mimo lako Almaseh, ammisangkasiri'-siri'nakan, nasaba' jamanki' lan tangnga-tangngami situru' to napattantuanmokan Puang Allataala. 16 Ia ke susimi joo, wa'dingmokan mpangpeissenan Kareba Kasalamatan jio tondok laen to misikambelan, to te'dapa nadipattantu lako tau laen, na te'da kipuji kaleki' mpaui kumua ia to assele' jamanna tau laen sitonganna assele'ki' ade'. 17 Den diuki' lan Sura' Allataala kumua, "Ia to tomangpuji, iara la napuji to apa napugauk Puang." 18 Nasaba' ia to tompuji kalena, te'da naissenni kumua la natarimaraka Puang Allataala. Iara to tonapuji Puang Allataala nnissenni kumua natarimai Puang Allataala.

2 Korintus 11

1 Sabbara' kamu' jolo', sanga la mpujipa' kaleku' ci'di' susi tobango'! Kuissen kumua sabbara' kamu'! 2 Masussana' mpikkiri' kamu' susi masussanna Puang Allataala. Susi kamu' anakdara, na aku'mo to nnatoro'i to kasitangkasanmi sola mesa' muane, iamo to Almaseh. Na madoangna' mbawa kamu' lako Almaseh susi mesa' baine to te'dapa nalambanni muane. 3 Apa magiangna', iamo ke denni to mpalao sala kamu' ammicia'mo matappa' tongan lako Almaseh susi jolona. Susi todai Hawa tonna anu' tonna ssedei ulah napalao salai. 4 Nasaba' susi to kumua masannang bang kamu' ntarimai to tomale mati' nakua kumua la naajahhi kamu' karebanna Puang Isa na Kareba Kasalamatan, apa sitonganna gaja silaenan na ia to mangka kiajaran kamu'. Na susi too kumua madoang bang too kamu' ntarima roh to gaja silaenan Roh Allataala to mangkamo mitarima. 5 Te'da lalo nacau'na' tuu mati' tau to ssanga kalena rasulu' te'da susinna. 6 Moi na te'da kumacca mangkada-kada, apa tangngiana' tobango' jiona kapaissenan, nasaba' kuissen to pangngajaran tongan, na tuli kupabuttii lako kalemi lan sininna kadangku'. 7 Ia tongkupangpeissenan Kareba Kasalamatan lako kalemi, mpamajiongna' kaleku' makkareso na iamo joo kunii mpamatande kamu' sanga moi pissen te'da kupeta'dai kamu' to la kuputuona. Ammisanga ora' kumua iamora joo kupusala lako kamu'! 8 Ia tongkupangjaman kamu', natulungna' jamaa jio tondok laen. Wa'ding dipau to kumua kubangkarru'i joo jamaa laen, kuwa'ding mpangjaman kamu'. 9 Ia joo wattu ke denni kaparalluanku', moi mesa' te'da kupeta'dai kamu' to la kuputuona. Apa ia to padanta' tomatappa' inde' propinsi Makedonia ratu ngganna'i to kakuranganku'. Kujagai melomo anna te'da kusussai kamu' mpeta'dai to la kuputuona, na la kujagai tarruh nate'da kusussai kamu'. 10 Moi umbo-umbo nanii iti' tana Akhaya, te'da tau la nnanggaina' mpuji kaleku', sanga te'da kupeta'dai kamu' to la kuputuona. Ia tee aku' taun-Nana' Almaseh na tongan tee kupau. 11 Ia ke te'da kupeta'dai kamu' to la kuputuona, misangaraka kumua iamo kupugaukki, sanga te'da kupakamoja' kamu'! Naissen Puang Allataala kumua kupakamoja' kamu'. 12 Ia to apa mangka kupugauk, la kupugauk tarruh. Te'da kulampeta'dai kamu' to la kuputuona, anna ia tuu mati' tau to ssanga kalena rasulu' te'da nawa'ding mpuji kalena anna mangkada kumua susikan. 13 Rasulu' tangtongan tuu lako tau. Mpalao sala tau, ssanga kalena rasulu'-Na Almaseh. 14 Te'da namejangngaran ke susii joo, nasaba' moi Ballisi' ssullei too kalena mpuarrang arrang malaeka'-Na Puang Allataala. 15 Jaji, te'da too namejangngaran, ke ia tuu lako tompangjaman Ballisi' ssanga toda kalena tompangjaman Puang Allataala. Apa la nnampa' una balahna siangga' to panggaukanna. 16 Susi to pura kupau kumua, danggi' naden tau ssangana' tobango'. Apa ia ke den kamu' ngkita tobango'na', pugaukmi susi to migaukan tobango', ammieloranna' kupuji kaleku' ci'di'. 17 Ia tee apa kupau, te'da kumangkada situru' pakkaeloran-Na Puang, apa susira' tobango' mpuji kaleku'. 18 La mpuji todana' kaleku', sanga buda tau mpuji kalena nasaba' kapakullean kalena. 19 Susi to kumua masannang bang kamu' ntarimai to tobango', nasaba' misanga kumua tomacca kamu'! 20 Susi to kumua mieloran bang to tau mparenta kamu' susi kaunanna, nnuraga sola nnala apammi, naangga' majao to kalena na kamu', na nggarra' kamu'! 21 Masiri'na', sanga gaja tangkisara mangpanggaukan susi joo! Apa ia ke baranii to tolaen mpuji kalena, moi aku' barani todana'! (Mangkada susira' tobango' tee.) 22 To-Ibraniraka tuu mati'? Moi aku' to-Ibrani todana'. To-Israelraka tuu mati'? Moi aku' to-Israel todana'. Bati'naraka Nabi Ibrahim tuu mati'? Moi aku' bati'na todana'. 23 Tompangjamanraka Almaseh tuu mati' tau? Mangkada susina' tobango' tee, "Aku'mo tompangjaman Almaseh la'bi melo." La'bi tangmekabo'jo'na' aku' mangjama, la'bi pembudamo' aku' ditarungku, la'bi pembuda toona' dirambi, na tuli ci'di'mora kumate. 24 Pellimamo' nacalla to-Yahudi, kudirambi sipentallung pulo kasera. 25 Pentallunmo' dirambi. Den too kudisilekko'i batu. Pentallunmo tallan to kappala'ki', na pissenmo' nnawang-ngawang sangngallo sangbongi jiong tasik. 26 Pembudamo' mperasai pa'dik lan kalingkanku'. Susinna napakalaja'na' parampo', abala' wai saba', abala' jio mai to-Yahudi, na abala' jio mai bangsa tangngia to-Yahudi, abala' lan kota na salean kota, abala' jiong tasik, abala' jio mai tomatappa' tangtongan. 27 Gaja makkaresona', tangmekabo'jo'na' mangjama, pembudamo' tangmamma', tangkumande, tangmangngiso', puasa, macakke' na tangmangpakean. 28 Te'da na ia manda joo, apa allo-allona' ngkagiangan sininna jamaa. 29 Ia ke denni totangmasannang sanga te'dapa namasaranian, moi aku' tangmasannang todana'. Ia ke denni tau disede na mpugauk dosa, moi aku' masussana' mpikkiri'i. 30 Ia ke la paralluna' mpuji kaleku', mpujina' kaleku' sanga te'da kapakulleanku'. 31 Puang Allataala, Ambe'-Na Puang Isa, nnissenni kumua te'da kumangnguraga. Ia dipakala'bih te'da cappa'na. 32 Ia tonna wattunna mangparenta Raja Aretas, kujio kota Damsyik, ia to gubernur ssuai to surudadu njagai babangan kota la njokkona'. 33 Apa dipatamana' buriah kudirorro' jao mai to'tok betteng. Susimi joo kula'pah jio mai gubernur.

2 Korintus 12

1 Te'da bua'na to tau mpuji kalena. Apa diparukuna' mpuji toda kaleku' to apa mangkamo napakitanna' Puang Allataala. 2 Den kuissen mesa' tomatappa' lako Almaseh to sangpulo a'pa'mi taunna mangkanna disolan cingga'tu' de' suruga kaminang majao. Te'da kupahang tonganni kumua batang kalena tonganrika disolan, iarika pengkitanna bangra, apa Puang Allataala nnissenni. 3 Ia to kuissen kumua ia joo tau disolanni tama suruga. Te'da kupahangngi kumua batang kalena tonganrika disolan iarika pengkitanna bangra. Puang Allataala nnissenni. Ntuumo jio nanii joo tau ssa'dingngi to kada melo te'da susinna anna te'da nakullei tolino mpaui, na te'da too nadieloran mpaui. 5 Iara joo tau la kupuji, apa te'da kulampuji kaleku'. Ia manda la kunii mpuji kaleku' to katangpakulleanku'. 6 Apa ia ke la madoangna' mpuji kaleku', te'da kulampugauk kabangosan, nasaba' katonganan to la kupau. Apa nta'tanna' kaleku', anna, ia ke den tau la mpujina', ia manda to panggaukanku' to mangkamo nakita iarika nasa'ding to la natimbang, 7 tangngia to pengkitangku' to te'da susinna. Apa nabenna' Puang Allataala sangrupa kamaparrisan, anna danggi' kupumatampoi joo pengkitangku'. Ia joo kamaparrisan susi duri ntossokna', napake tonasua Ballisi' mbunona', anna danggi' kumatampo. 8 Pentallunna' massambajang lako Puang Allataala, anna lla'paranna' jio mai tee kamaparrisan. 9 Te'da nala'paranna' apa napebaliina' nakua, "Kubarakka'iko na ganna'mo joo barakka'-Ku' lako iko, nasaba' iara nala'bi pajan to kuasang-Ku' ke tangpakulleko." Iamo joo kula'bi masannang mpuji kaleku' ke tangpakullena', nasaba' ia ke tangpakullena', iara joo wattu kusa'dinganni to kuasan-NaAlmaseh nnampaina'. 10 Jaji, la'bi masannangra' ke tangpakullena', ke tangdiangga'na', ke mapa'dikna', ke disessana', ke masussana', nasaba' mpangjamanna' Almaseh. Mariona', nasaba' ia to wattu kunii tangpakulle, ia toomo joo wattu nabenna' Almaseh kapakullean. 11 Sitonganna ia to kupau nena' susimo' tobango', nasaba' mpujina' kaleku'. Apa miparukuna' mpugaukki susi joo, nasaba' kamu'ra to la mpujina'. Na moi nate'da bua'ku', apa te'da lalo nacau'na' tuu mati' tau to ssanga kalena rasulu' te'da susinna. 12 Ia tongkuiti', napakena' Puang Allataala mpugauk buda tanda mejangngaran sola apa-apa laen to te'da susinna, sabbara'na' njama jamanku' lan tangnga-tangngami. Iamo buttinna kumua rasulu' tonganna'. 13 Umbora kukua mpamajiong kamu' na jamaa laen? Ia mandara kuissen kupusala kumua te'da kupeta'dai kamu' to la kuputuona. Ia ke susii pale' joo, dampangan bangmo', sanga tangmaruruhna'! 14 Na ia tee too mangpentallunnamo' sadia la male mati'. Apa te'da kulampeta'dai kamu' to la kuputuona, sanga ratura' la ntulung kamu'. Tangngia apammi kukadoangngi, apa kamu'ra. Nasaba' tangngia anak to nnangaran kaparalluanna tomatuanna, apa tomatuannara nnangaran kaparalluanna anakkana. 15 Iamo joo namacanning atingku' mpangbenni to sininna apa kuampui, moi batang kaleku' kupangben too nasaba' kamu'. Na ia ke susimo' joo mpakamoja' kamu', te'da nasipato' ke te'damo mipakamoja'na'! 16 Kamu' nnissenni kumua te'da lalo kupeta'dai to la kuputuona. Apa den unapa kamu' pale', to mangkada kumua kupesaroi kamu', nasaba' tokalasina'! 17 Te'da lalo natongan tuu! Iaraka tuu mati' tau kusua mati' kupake mpesaroi kamu'? 18 Kusuamo mati' to Titus, na den too mesa' padanta' tomatappa' laen kusua anna male sola. Napesaroira kamu'ka Titus? Kamu' nnissenni kumua ia to aku' sola Titus mesa'ra akkattaki' mangjama sola, anna sangrupa toora to sipa'ki'. 19 Mbai misangai kumua sininna tee kuukiran kamu' mpangngewankan kaleki' jio olomi. Ee, tokupakamoja'! Puang Allataala ngkitakan kumua sitonganna sininna tee apa kiuki' situru'ra pakkaeloran-Na Almaseh. Na sininna to kiuki' ba'tu kipugauk, la napumawatang kamatapparanmi. 20 Magiangna' kumua, ia ke iti'mo', ia to kamu' te'damo misusi to kukadoangnginna, na moi tee aku' te'da toomo kususi to mikadoangnginna. Danggi' na ia ke iti'mo' anna ia mandamo kukita to tosibobo', tomapa'dik ati, topangmabirisan, tompangngundaran mesa kalena, tompau gaja' tolaen, tomangpeasa, tomatampo na tomangpasisala-sala. 21 Magiangna' kumua, ia ke iti'mo', la napamajiong pole'na' Puang Allataala lan tangnga-tangngami. Magiangna' kumua la kumillakna', nasaba' buda tau lan tangnga-tangngami to tomadosamo jolona na te'da bang unapa namenassan, apa da'tanpa manggauk sala, mpugaukki to panggaukan tangmelona, ba'tu totangsipato' dipugauk.

2 Korintus 13

1 Mangpentallunnamo' tee la male mati'. Den diuki' lan Sura' Allataala kumua, "Iapi nawa'ding dira'tah kara-karana to tau ke denni dua ba'tu tallu sa'bi." 2 Ia tongkutorro iti' mangpenduan, mangkamo kupangngingaran to tompugauk dosa. Na ia tee too, ke te'dapa kuratu mati' mangpentallun, kudadu' to pangngingaranku' lako joo tau na tau laen, kumua ia ke ratumo' mati', te'damo nala'pah jio mai pangcallaku'. 3 Mane'ri la miampa' ngasan buttinna to mikadoangngi kumua manassa tonasuana' Almaseh mparatuan kamu' pepasan-Na. Te'da natangkullei to Almaseh mpaissenni kamu' kasalanmi na sessa kamu'. 4 Tangnakullei Almaseh tonna dipampang, apa ia tee too tuo pole'mi nasaba' kuasan-Na Puang Allataala. Moi tee kami', to memmesa' penawamo sola Almaseh, tangkikulle toda, apa ia ke iti'mokan la miperasai kumua ia to kami' sola Almaseh mangka naben kuasa Puang Allataala. 5 La mparessa kamu' kalemi kumua mipahang tonganraka apara battuananna matappa' lako Almaseh! Miissen kumua torromo Puang Isa Almaseh lan kalemi. Ia ke te'dai natorro Almaseh lan kalemi, te'da naakui kamu' Puang Allataala. 6 Kurannuan mikanassai kumua ia tee kami' naakuimo Puang Allataala kumua rasulu'-Nakan. 7 Massambajangkan lako Puang Allataala nate'da mipugauk kasalan. Te'dara kimassambajang susi joo la mpamanassai kumua naakuikan Puang Allataala, apa kikuara mipugaukki to pakkaeloran-Na Puang Allataala, moi naden tau ssangakan kumua te'da naakuikan Puang Allataala. 8 Ia ke ratukan mati', te'da kilannewai to pangngajaran tongan, apa kipangngewairi. 9 Masannangkan ke tangkikullei, na kamu' to ngkullei. Kipassambajangan too kamu' lako Puang Allataala, ammimenjaji tote'da caccana. 10 Iamo kuuki'i tee sura' ta'bulu' te'dapa kuiti' misolan, anna ia ke ratumo' mati' keanu', te'damo kuparallu makarrah lako kamu' mpake kuasan-Na Puang, sanga nabenmo' joo kuasa la mpemawatangngira kamu', te'da nalassolangan kamu'. 11 Ee, tomala'bihku' sola ngasan! Katampakanna, la mario kamu' sola angahhi to la mipumakassingna. Tarimai to sininna pangpangngingaranku'. La mesa' penawa kamu' misikalino, anna ampai kamu' Puang Allataala. Iamo Puang mangpakamoja' sola mangpasikalino. 12 Pada sisalama' kamu' susi sipato'na lako padanta' tomatappa'. Sininna umma'-Na Puang Allataala inde' ngkiringan kamu' sallangna. 13 Dennaa upa' nabarakka'i kamu' Puang Isa Almaseh, napakamoja' kamu' Puang Allataala, sola napamesa' penawa kamu' Roh Allataala sola ngasan. Padamo jolo' too. Sallangki' mati', Paulus

Galatia 1

1 Ia tee sura' pole jio mai aku', Paulus, sola padanta' tomatappa' to kusolan, kikiring lako jamaa jio tana Galatia. Ia tee aku' mesa' rasulu' tangngia napilei tolino, tangngia too nasua tolino, apa nasuana' Puang Isa Almaseh sola Ambe' Puang Allataala, to mangka mpatuo Puang Isa jio mai kamatean. 3 Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 4 Ia to Puang Isa mangka mpangben kalena dibuno situru' pakkaeloran-Na Ambe'ta' Puang Allataala, dikua anna dampanganki' to tomadosa, danggi'mo tatuo susi togaja' lan lino. 5 La mpakala'bih tarruhki' Puang Allataala te'da cappa'na! Amin. 6 Jangngahna' aku', sanga madoi' bang kamu' mboko'i Puang Allataala to mpileimo kamu' menjaji umma'-Na. Torro sala bang to pangpakamoja'-Na Almaseh, nasaba' male kamu' nturu' kareba kasalamatan laen. 7 Na ia to laenna tangngia ia Kareba Kasalamatan, apa denri tau la mpalao sala kamu' na madoang la mbalikki to karebanna Almaseh. 8 Moiraka na kami' ba'tu malaeka' jao mai suruga mpangpeissenanni to Kareba Kasalamatan ke sisalai to mangkanna kipangpeissenan lako kamu', ake'mo nakannai tampak ropu. 9 Susi to mangkamo kipauan kamu', kudadu' pole' kupau kumua, ia ke denni tau mpangpeissenan Kareba Kasalamatan, na te'da nasusi to mangkannamo mitarima, la ditampakkii ropu. 10 Na umbo nakua, pangkabudaian tolinoraka to kuangah? Te'da, apa pangkabudaian-Na Puang Allataala. Ba'tu nnangahra'ka lalan dikua nakabudaina' tolino? Ia ke nnangah unapa' lalan dikua nakabudaina' tolino, manassa tangngiana' taun-Na Almaseh. 11 Ee, kamu' to kupusile'to! Kupauan kamu' kumua, ia to Kareba Kasalamatan kupangpeissenan, tangngia curita nagaraga tolino, 12 sanga te'da kutarima jioi mai tolino. Na tangngia too tolino nnajahhina', apa kutarima jio mai Puang Isa Almaseh to mpangpekitan kalena lako aku'. 13 Misa'dingmo to panggaukanku' tonna tee, tongkumangngagama to-Yahudipa, kumua liwa' kusessa to tomatappa' lako Puang Isa na la kusabu'i, 14 angkusamacca-maccanna lan agama Yahudi, kucau' ngasanni to sangbara'ku' jio bangsaku', sanga liwa' kukanana'i to atoran tojoloku'. 15 Apa moi nasusi joo, ia to Puang Allataala mangka mpileina' tongkulan unapa ba'tangna indoku', na Iamo mpakedoi penawangku', sanga kameloan penawan-Na lako aku'. 16 Ia tonna puelohmi Puang Allataala, napangpeissenanmi to Anak lako aku' lan pengkita, kumua la kupangpeissenanni lako bangsa tangngia to-Yahudi. Na ia joo wattu te'damo kupeta'da pangngampa'na tolino. 17 Susinna te'damo kumale lako kota Yerusalem, ssikitanni to tojolomo ia menjaji rasulu' na aku', apa ta'pa malena' lako tana Arab, kumane' male pole' lako kota Damsyik. 18 Tallung taun mangkanna joo, kumane' male lako kota Yerusalem mpessitammui Petrus, kumangbongi jio bolana sangpulo a'pa' bonginna. 19 Apa ia to rasulu' laen te'da kusikita, Yakub mandara to sile'to-Na Puang Isa. 20 Puang Allataala nnissenni tee kuuki' kumua nang tongan, na te'da kumangnguraga. 21 Mangkai joo malemo' lako tana Siria sola Kilikia. 22 Ia joo wattu, te'da bang naperupana' to jamaa jio tana Yudea. 23 Apa ssa'ding bangri kareba kumua, "Ia to tau mpakario-rioki' tonna tee, ia too allo mpangpeissenan omi karebanna Puang Isa, na mangkamo mpengkulle-kullei tonna tee mparuku tau mboko'ii." 24 Mpakala'bihmi Puang Allataala, nasaba' ia to apa jaji lako aku'.

Galatia 2

1 Ia tonna ganna' omo sangpulo a'pa' taunna, male omo' lako kota Yerusalem sola Barnabas, angkusolan tooi to Titus. 2 Malena' lako kota Yerusalem, nasaba' nasuana' Puang Allataala. Kusitammu pekaamberan jamaa jio, la mpamanassai apa issinna to Kareba Kasalamatan to mangkamo kupangpeissenan lako bangsa tangngia to-Yahudi, dikua nadanggi' nalao sala to kupugaukkuna too allo ba'tu ia to mangkannamo. 3 Ia to solaku' Titus, to-Yunani, te'da too nadiparuku massunna' situru' atoran agama to-Yahudi, 4 moi naden ba'tu pira-pira tau la mpangpeparukuanni. Puang Isa Almaseh mangka lla'paranki' jio mai atoran agama, apa ia tuu lako tau to sitonganna tangngia padanta' tomatappa' mentama buni tangnga-tangngata' la hhalangngii to kadila'paranta', dikua napukaunan pole'ki' atoran agama. 5 Apa moi ci'di' te'da kilamenturu' lako kalena, dikua na ia to Kareba Kasalamatan to mangka mitarima te'da nadipasirau pangngajaran tangtongan. 6 Na ia tuu lako pekaamberan jamaa, tokaissenan, moi umbo susi mapangka'na, te'dara silaenanna tee aku', sanga ia to Puang Allataala te'da tau napasilaenan. Moi matumba ia tee mai tokaissenan, te'da nasuana' rrangngannii pangngajaran laen. 7 Apa sibalikanna natarimai kumua dipabarakkannimo' jaman la mpangpeissenan Kareba Kasalamatan lako bangsa tangngia to-Yahudi, susi Petrus mpangpeissenan Kareba Kasalamatan lako to-Yahudi, 8 nasaba' Puang Allataala mbenna' kuasan-Na menjaji rasulu' lako bangsa tangngia to-Yahudi, na Ia too mpangben kuasan-Na lako Petrus la menjaji rasulu' lako to-Yahudi. 9 Yakub, Petrus, na Yahya direken paloloan lan jamaa. Ia tonna katappa'imi kumua Puang Allataala mpabarakkannina' tee jaman, sisalama'mokan Barnabas sola tuu lako tau, kumua mesa' penawamokan. Ia to aku' sola Barnabas male lakomokan bangsa tangngia to-Yahudi, na ia male lako to-Yahudi mpangpeissenan Kareba Kasalamatan. 10 Samari peta'danna kumua angkiingaranni tee mai to makario-rio, anna ia joo kiingaran tarruhhi. 11 Ia tonna ratumo Petrus jio kota Antiokhia, kuewai jio olona tobuda, sanga susi tee to kasalan napugauk: 12 Ia tonna ratumo to tonasua Yakub, messarakmi Petrus jio mai totangngia to-Yahudi nacia'mo kumande sola, moi namangkamo kumande sola. Napugaukki susi joo, nasaba' malaja' lakoi tau to mangngajahhi kumua sininna tomatappa', moi bangsa tangngia to-Yahudi, nang la disunna'ri. 13 Ia tee mai to-Yahudi pira' to saranimo, turu' todami majekkong susi to napugauk Petrus, naarannai to Barnabas turu' todami mpugaukki susi joo. 14 Ia tongkukitami kumua ia to napugaukkuna te'damo nasusi to natuntunna Kareba Kasalamatan, kukuamo lako Petrus jio olona tobuda, "Ia ke mesa'ko to-Yahudi, apa te'damo muturu' atoranna to-Yahudi, umbora la mukua mparuku bangsa tangngia to-Yahudi la nturu' atoranna to-Yahudi?" 15 Ia tee kami' to-Yahudikan situru' kajajianki', na tangngiakan tomadosa susi bangsa tangngia to-Yahudi. 16 Moi nasusi joo, kiissen kumua te'da tau napupenjaji tomelo Puang Allataala, sanga mpugaukki atoran agama, apa kamatapparannara lako Puang Isa Almaseh. Susimi joo angkimatappa'mo lako Puang Isa Almaseh, dikua angkidipupenjaji tomelo, tangngia sanga mpugaukkan atoran agama. Te'da mesa' taudipupenjaji tomelo, nasaba' mpugaukki atoran agama. 17 Apa ianna kami' mpengkulle-kulleii la direken tomelo mpulalan Almaseh, kakitanan kumua tomadosakan susi bangsa tangngia to-Yahudi, battuanannaraka kumua Almaseh to mpusaba'i kimadosa? Te'da lalo nasusi joo! 18 Na ia ke kutarima pole'i to atoran agama to mangkamo kupatorro, mpangpeissenanna' kaleku' kumua tomadosana'. 19 Apa mangkamo' mate lan kamenturusan atoran agama, battuananna mangkamo' la'pah jio mai atoran agama, dikua angkutuo lako Puang Allataala, sanga mangkamo' dipampang sola Almaseh. 20 Ia tee too moi angkutuo, tangngiamo aku' mputuoi, apa Almasehmo tuo lan kaleku'. Ia tee katuoanku' tee too, matappa'na' lako Anak Allataala to mangka mpakamoja'na', na mangka mpangkarobananna' kalena, sanga dosaku'. 21 Susimi tee te'da kukita majiongngi to kameloan penawan-Na Puang Allataala, iamo to kamatean-Na Puang Isa Almaseh. Apa ia ke la den tolino napupenjaji tomelo Puang Allataala, nasaba' mpugaukki atoran agama, te'da bua'na joo kamatean-Na Almaseh.

Galatia 3

1 Ee, to-Galatia to kupusile'to! Nang manassa bango' kamu'! Indamora mangka mpakedoi penawammi? Te'daraka miingaranni ciapari namate Puang Isa Almaseh jao kaju sitamben, to mangka kupamanassa lako kamu' to butung kamu' ngkita kalenai? 2 Ia mandara tee kupangngingaranan kamu' kumua, te'da mitarima Roh Allataala, sanga mpugauk kamu' atoran agama, apa iara to ssa'ding kamu' Kareba Kasalamatan jio mai Puang Allataala, ammimatappa' lako Puang Isa Almaseh. 3 Ciapari mimembango'ra kamu'? Llolonganmo kamu' katuoan baru jio mai Roh Allataala, ciapai ammilampake kamawatanganmi la mpaganna'i? 4 Te'daraka bua'na to miperasaimo? Kusanga te'da nasusi joo, apa den ia bua'na! 5 Na ia to Puang Allataala naben tarruh kamu' Roh Allataala, sola napakitan tarruh kamu' tanda mejangngaran. Tangngiara sanga mpugauk kamu' atoran agama, apa iara to ssa'ding kamu' Kareba Kasalamatan ammimatappa' lako Puang Isa Almaseh. 6 Susi unai tojoloki' Nabi Ibrahim dipupenjaji tomeloi, sanga matappa'i lako Puang Allataala. 7 Iamo joo la miissen kumua, sininna to matappa' lako Puang Allataala direken bati'na Nabi Ibrahim. 8 Susi to diuki' jolomo lan Sura' Allataala kumua la napupenjaji tomelo Puang Allataala to bangsa tangngia to-Yahudi sanga kamatapparanna. Iamo joo napangpeissenan jolomi Puang Allataala to Kareba Kasalamatan lako Nabi Ibrahim nakua, "La kubarakka'i to sininna bangsa lan tee lino, sanga iko." 9 Jaji, ia to tomatappa' dibarakka'i susi Nabi Ibrahim dibarakka'i, nasaba' kamatapparanna. 10 Den diuki' lan Sura' Allataala kumua, "Tampak ropu ngasan lako totangtatta' nturu'i to sininna atoran agama." Iamo joo, padami to tomparannuan atoran agama, padami nakanna tampak ropu, nasaba' te'da tau ngkullei nturu'i. 11 Manassa te'da tau napupenjaji tomelo Puang Allataala sanga nturu'i atoran agama, susi to diuki' lan Sura' Allataala kumua, "Ia to tau dipupenjaji tomelo sanga matappa'i lako Puang Allataala, iamo la nnampa' katuoan melo te'da cappa'na." 12 Apa ia ke tapengkulle-kullei menjaji tomelo mpulalan atoran agama, panggaukanta'ra takatappa'i, tangngia Puang Allataala, susi to diuki' lan Sura' Allataala kumua, "Ia to tompugauk tongan atoran agama, la naputuo." 13 Mangkamiki' nala'bak Almaseh jio mai tampak ropu to napaden atoran agama lako kita', nasaba' te'da takullei nturu'i. Iari ssulleki' nakanna tampak ropu, susi to diuki' lan Sura' Allataala kumua, "Tampak ropu to sininna tau to mate dipampang jao kaju." 14 Ia to Puang Isa Almaseh mate jao kaju sitamben, dikua anna ia to barakka' to dibasse lako Nabi Ibrahim, diparatu too lako bangsa tangngia to-Yahudi, anna kita' tomatappa' diben Roh Allataala to mangka dibasse. 15 Ee, tokupusile'to! Melo ke mpakena' mesa' pangpasusian to biasanna takita keallo-keallo. Ia ke denni tau mpaden basse na dipaassahmo, te'damo nawa'ding dita'dei iarika nadirangnganni moi ci'di'. 16 Susi toomi to basse-Na Puang Allataala sola Nabi Ibrahim na bati'na. (Issen meloi, te'da nadiuki' lan Sura' Allataala kumua, "na sininna bati'na", battuananna buda tau. Diuki' ia kumua, "na bati'na", battuananna mesa'ra tau, iamo to Almaseh.) 17 Iamo to kusanga to pangpasusian nena' kumua, ia to basse mangkamo napaassah Puang Allataala, te'damo nawa'ding nata'dei atoran agama, to a'pa' ratuh tallung pulo taunna namane' den. 18 Ia ke ia to barakka' nabasse Puang Allataala lako Nabi Ibrahim sola bati'na, diben lako mandari tonturu' atoran agama, tangngiamo ia disanga basse. Apa nang mangkamo ia nabasse jolo Puang Allataala lako Nabi Ibrahim to barakka' la nabenni. 19 Na ia ke susii joo apara patunna nadipaden to atoran agama? Ia una nadipaden undi ia na basse, dikua anna pajan dosana to tolino. Ia to atoran agama dipake angge ratunna bati'na Nabi Ibrahim to mangka nabasse Puang Allataala lako Nabi Ibrahim. Ia to atoran agama naparatu malaeka' lako mesa' passumbungan kada. 20 Jaji ia to atoran agama dipauan tolino mpake passumbungan kada. Apa ia to basse lako Nabi Ibrahim Puang Allataala Ia mpaui. 21 Ia ke susii joo, sisalaraka to atoran agama na basse-Na Puang Allataala? Te'da lalo ia! Sanga ia ke dibenni atoran agama to tolino to la mpatuoi, manassa iamo mpupenjaji tomeloi ke naturu'i joo. Apa te'da nakullei to atoran agama mpugaukki susi joo, 22 nasaba' situru' Sura' Allataala madosa ngasanmiki' to tolino. Iamo joo ia to barakka' mangka dibasse la dibenri tongkatappa'i Puang Isa Almaseh. 23 Ia tonna jolona te'dapa tamatappa' lako Puang Isa, susiki' to natarungku atoran agama, ratu lako dipangpeissenanna to kamatapparan lako Puang Isa. 24 Jaji, ia to atoran agama mpatujuki' ratu lako ratun-Na Puang Isa Almaseh, antadipupenjaji tomelo sanga matappa'ki' lako Almaseh. 25 Na ia tee too, nadete'mi wattunna matappa' lako Puang Isa, iamo joo te'damo nakuasaiki' atoran agama. 26 Napuanak ngasanmo kamu' Puang Allataala, sanga matappa'mo kamu' lako Puang Isa Almaseh. 27 Mangkamo kamu' dijio' mpau sangan-Na Almaseh, jaji mitarimamo to sipa'-Na Almaseh. 28 Te'damo nadipasilaenan to-Yahudi na bangsa tangngia to-Yahudi, kaunan na tangkaunan, muane na baine, nasaba' sirapumo kamu' Puang Isa Almaseh tommidijio'. 29 Na ia ke taun-Namo kamu' Almaseh, bati'na toomo kamu' Nabi Ibrahim to la ntarimai to barakka' mangka nabasseanni Puang Allataala.

Galatia 4

1 Parallu kupamanassa kumua, ia tonna biccu'pa to pea mangmanah, te'da bang silaenanna mesa' kaunan, moiraka na ia puangna joo manah. 2 Sanga ditaranakpa ia, na tau laen nnurusu'i to ewananna ratu lako wattu to napattantu ambe'na la nanii mpumanahhi. 3 Susi toomi kita', ia tonna jolona susipiki' pea napukaunan dewata lan tee lino. 4 Apa ia tonna dete'mi to wattu napattantu Ambe' Puang Allataala, nasuami to Anak Allataala mentama lino. Najajianni mesa' baine, na nturu' atoran agama, 5 dikua anna la'bakki to sininna tau jio mai atoran agama, anna puanakki' Puang Allataala. 6 Nasuai Puang Allataala to Roh-Na Anak Allataala torro lan penawammi, sanga napuanakmo kamu'. Na ia to Roh-Na Anak Allataala mpusaba'i tametamba kumua, "Oo, Ambe'ku'!" 7 Jaji tangngiamo kamu' kaunan, apa menjaji anakmo kamu'. Iamo joo, la ntarima kamu' manah jio mai Puang Allataala. 8 Ia tonna te'dapa miissenni to Puang Allataala, mengkaunanpa kamu' lako mangrupa-rupa dewata to sitonganna tangngia Puang Allataala. 9 Apa ia tee too, umbora mikua mimadoang bangpa mengkaunan pole' lako tuu lako dewata, na miissenmo to Puang Allataala, ba'tu la'bi manassa ke dikua naissenmo kamu' Puang Allataala. Mipugauk bang unapa to mpattantu allo, bulan, wattu, na taun minii mangmaroah-roah. Na ia tuu lako dewata te'dabua'na na te'da nakullei mpupenjaji kamu' tomelo. 11 Kukagiangan kamu', iamo ia ke te'dai bua'na to resoku' lako kalemi. 12 Ee, tokupusile'to! Kupeta'da misusi aku', sanga aku' tee susi toomo' kamu' to bangsa tangngia to-Yahudi, sanga te'damo napukaunanna' atoranna Nabi Musa. Moi ci'di' te'da salami lako kaleku'. 13 Miissen kumua pamulanna kupangpeissenanni tee Kareba Kasalamatan lako kamu', sanga masakina' joo wattu. 14 Moi kususi joo, te'da mikita majiongna', te'da too mikako'dosanna', moi nasitonganna ia to sakingku' menjaji pecoba lako kalemi. Apa sibalikanna, mangkamo' mitarima butung to malaeka'-Na Puang Allataala, ba'tu butung to Puang Isa Almaseh. 15 Masannang tongan kamu' joo wattu. Kuissen kumua kenna la wa'ding micukke'i to matammi mibenna', tantu la mipugauk. Apa ia tee too, umbomira to kasannangan penawammi? 16 Misangamora'ka ewalimmi too, nasaba' kupauan kamu' katonganan? 17 Ia to tau laen napengkulle-kullei tongan ssede kamu', apa te'da namelo to pattujunna, madoangri la mpasisarak kamu', ammituru'i. 18 Melo una ke napengkulle-kullei tau massede, ke meloi patunna, moi na te'da kujio ssolan kamu'. 19 Ee, anakku'! Mapa'dikna', nasaba' kamu'. Susina' tomangnguriwa' sanggenna pajan to Almaseh lan katuoanmi. 20 Tangkuissen apapara la kupugauk lako kalemi. Iamo joo ia to elohku', kukua kentata'pa sioloanmo too, angkupangkadai rampa' kamu'. 21 Ee, tokupusile'to to madoang bangpa napukaunan atoran agama! Pesa'dingngii tee kadangku'! La kupangpeissenanni to apa napau atoran agama to diuki' lan sura'na Nabi Musa. 22 Den diuki' lan kumua ia to Nabi Ibrahim dua anakkana, mesa' jio mai Hagar, iamo baine kaunan, na mesa' jio mai Sara, iamo baine tangngia kaunan. 23 Ia to anak jaji jio mai baine kaunan, dijajian susi tolino biasa. Apa ia to jaji jio mai baine tangngia kaunan, nabassemo ia Puang Allataala. 24 Ia tee susi mesa' pangpasusian, sanga ia joo baine dua, susi dua basse, battuananna dua carana dipupenjaji tomelo to tolino. Ia to Hagar dipangpasusii basse to dipajaji jao Buntu Sinai, na ia to ngkanana'ii la napukaunan tarruh atoran agama, dikua nadipupenjaji tomelo. 25 Jaji, ia to Hagar dipasisanga Buntu Sinai jio tana Arab, to dipapadai kota Yerusalem too allo, sanga napukaunan atoran agama to to-Yerusalem. 26 Apa ia to Sara dipapadai kota Yerusalem jao suruga, iamo indota', to te'da napukaunanni atoran agama. 27 Sanga den diuki' lan Sura' Allataala kumua, "Ee, iko totamanang to te'da najajian bati', mariomoko! Ee, iko to tangmperasai pangnguriwasan, gumalasimoko na parannu toomoko! Nasaba' ia to baine tangnapuinawa muanena, la llolongan ia buda bati' na ia to baine den muanena." 28 Ee, tokupusile'to! Napuanakmo kamu' Puang Allataala situru' basse-Na lako Nabi Ibrahim, susi Ishak. 29 Na susi jolona, ia to anak dijajian sanga Roh Allataala, napa'dikki anak to dijajian susi tolino biasa. Susi toomi too allo ia to tomatappa' lako Puang Isa, napa'dikki to tonapukaunan atoran agama. 30 Na apara nakua to diuki' lan Sura' Allataala? Diuki' susi tee: "Ula'ii tuu baine kaunan sola anakkana, nasaba' te'da nalampumanahhi joo manah sola anakkana baine tangngia kaunan." 31 Ee, tokupusile'to! Jaji, tangngiaki' bati'na baine to napukaunan atoran agama, apa bati'namiki' baine to te'da napukaunanni atoran agama.

Galatia 5

1 Nala'paranmiki' Almaseh jio mai atoran agama! Iamo joo la mitoe mandik to kadila'paranmi jio mai kakaunanan, danggi' napukaunan pole' kamu'. 2 Pesa'dingngii tee! Aku' Paulus mpauan kamu' kumua, ia ke mpangpesunnatan kamu' kalemi dikua napupenjaji tomelo kamu' Puang Allataala, te'da bua'na to Almaseh lako kalemi. 3 Na la kupamanassapa lako kalemi kumua, ia ammipangpesunnatan kalemi, parallu kamu' nturu' ngasanni to atoran agama to-Yahudi. 4 Ia ke la mipengkulle-kullei nturu' atoran agama dikua napupenjaji tomelo kamu' Puang Allataala, te'damo milasipusola Almaseh, na te'da toomo milamperasai kameloan-Na Puang Allataala. 5 Apa ia tee kami', kirannuan napupenjaji tomelokan Puang Allataala, sanga matappa'kan lako Puang Isa Almaseh. Parannukan susi joo, nasaba' napamanassankan Roh Allataala. 6 Ia ke sirapumiki' Puang Isa Almaseh, te'damo silaenanna todisunna' ba'tu totangdisunna'. Apa ia to parallu, iara to kamatapparan lako Puang Isa Almaseh, to napamanassa kasipakamojatanta' padanta' rupa tau. 7 Melomo to kamenturusanmi lako Puang Allataala tonna tee. Indamora mangka ssede kamu', na te'damo mituru'i to pangngajaran tongan? 8 Ia joo tomassede te'da napole jio mai Puang Allataala to mpileimo kamu' ammimenjaji umma'-Na! 9 Ia to pangngajaranna wa'ding memmaluah, susi to napau tau, "Ia to ragi ci'di' mpaloboh ta'pung, ke mangkami dilama." 10 Moi nasusi joo, kukatappa'i kumua te'dara milatipepa' lako joo pangngajaran tangtongan, nasaba' memmesa' penawamo kamu' Puang Isa. Na ia to tompalao sala kamu' la nacallai Puang Allataala, moi na tomatumba. 11 Ee, tokupusile'to! Ia tee aku', ke kupangngajaran unapi kumua la disunna' to tau, ciapai nakaba'ci unapa' to-Yahudi? Ia ke susii joo, ia to kaju sitamben te'damo namenjaji katitumbukan, battuananna te'damo naparallu dipangngajaran kumua ia to kamatean-Na Puang Isa jao kaju sitamben, la mpupenjaji tomelo tau. 12 Ia to tompalao sala kamu', kenna ssarakki bangmo ia kalena! 13 Ee, tokupusile'to! Nala'paranmo kamu' Puang Isa jio mai atoran agama! Apa danggi' mipake salai to kadila'paranmi mpugauk mangrupa-rupa kagajatan situru' kamadoangan penawammi, apa la situlungra kamu', misipakamoja' too. 14 Nasaba' sininna atoran agama dipamesa' lan mesa' parenta to diuki' lan Sura' Allataala kumua, "Pakamoja'i to padammu rupa tau susi iko mpakamoja' kalemu!" 15 Apa ia ke sikaba'ci kamu', iarika sipa'dikan ati kamu', jagai danggi' misipandasa. 16 Ia to kusanga iamo to: Ake'mo na Roh Allataala mpatuju kamu' lan katuoanmi, dikua nate'da mituru'i kamadoangan gaja'mi. 17 Nasilaenan pangkabudaianna tolino na pangkabudaian-Na Roh Allataala. Siewali tarruhhi sola dua, sanga madosa ngasan to tau. Iamo joo na te'da mikullei mpugaukki apa to mikadoangngi. 18 Apa ia ke nasolan kamu' Roh Allataala, te'damo napukaunan kamu' atoran agama. 19 Ia to kamadoangan penawanna tau pajan bang jio panggaukan gaja'na, susinna manggauk sala, sala kedo, mangkada carepa, 20 ssompa dewata, pangngissenan, kasisakkan, siallang, mangngimburu, kamabirisan, ngkitan mesa kale, te'da namesa' penawa, mpasisala tau, 21 masere ati, pangmalangoan, takkaliwa' mangmaroah-roah na budapa to susinna joo. Ia ngasan to panggaukan susi joo kupakainga' kamu' susi to kupauan kamu' tonna tee, kumua ia to tompugaukki to susi joo, te'da namenjaji umma'-Na Puang Allataala. 22 Apa ia to tau nasolan Roh Allataala, melo panggaukanna: mangpakamoja', mario, masannang bang penawanna, sabbara', mabassa, melo penawa, mangngingaran tarruh, 23 mpamajiong penawa, mparenta kalena. Te'da ia atoran agama nnanggaii to panggaukan susi joo. 24 Na ia to taun-Na Puang Isa Almaseh mangkami naca'bean to kamadoangan gaja'na. 25 La nturu'miki' Roh Allataala, nasaba' mangkamiki' naben katuoan baru! 26 Danggi' tamatampo, danggi' too tasipa'dikan penawa iarika sipangngimburuan.

Galatia 6

1 Ee, tokupusile'to! Ia ke denni mesa' tau diampa' mpugauk dosa, ia to kamu' nturu' Roh Allataala la mipatuju rampa'i joo tau lako lalan kameloan. Apa la mijagai to kalemi danggi' mituru' toda mpugaukki. 2 La sibalian kamu' mpassan pamawanmi, sanga iamo joo la minii mpugaukki to atoran-Na Almaseh. 3 Ia ke denni tau ssanga bang kalena makkeguna, apa te'da natongan, iamo mbango'-bango'i kalena. 4 Pada la mparessaki' kaleta' kumua, meloraka ba'tu te'daraka namelo to panggaukanta'. Ia ke melomi, mane'ki' wa'ding masannang. Apa te'da tawa'ding mpasibandingngi panggaukanna tolaen, 5 sanga simesa'-mesa' tau pada la mpebalian kalena. 6 Ia to tontarima pangngajaran-Na Puang Isa Almaseh, pada la natawa-tawai barakka'na sola gurunna. 7 Danggi' mitobango'-bango'i kalemi! Nasaba' Ia to Puang Allataala te'da nawa'ding dipaningoi. Apa to natanan tau, iamo la napebuai, 8 sanga ia to tonturu' bang kamadoangan penawanna, la llolongan kasaburan. Na ia to tonturu' pangpatujun-Na Roh Allataala, la nnampa' katuoan melo te'da cappa'na. 9 Danggi' tamarosso mpugauk kameloan, nasaba' ia ke te'da tamarosso, nang la den pissen talolonganni to assele'na. 10 Iamo joo ia naden unapa wattu dibenki', tamanggauk melo lako padanta' rupa tau, la'bi pole'pa lako sile'to padanta' to matappa'. 11 Kitai matumba matonggona tee hurupu' pangnguki'ku' mati'. 12 Ia to guru tangtongan, madoangri la napakala'bih tau. Naparuku kamu' mpugauk sunna', dikua nadanggi' napakario-rioi to-Yahudi, sanga pangngajaran kaju sitamben-Na Almaseh, battuananna kumua kamatean-Na mandara Almaseh jao kaju sitamben la mpupenjaji tomelo tau. 13 Nasaba' ia una to tompugauk sunna', te'da naturu' ngasanni to atoran agama, apa iara nakabudai ke mpugauk kamu' sunna', anna pemajaoi penawanna kumua, "Naturu'i to-Galatia to pangngajaranki'." 14 Ia tee aku', te'da kulampemajaoi penawangku', apa mpakala'bihna' Puangta' Puang Isa Almaseh to mangkamo mate jao kaju sitamben. Iamo joo ia to tolino na atoranna te'damo bua'na lako aku'. Susi too aku' lako tolino. 15 Nasaba' todisunna' ba'tu totangdisunna' pada te'da naparallu, apa ia to parallu iamo to katuoan baru. 16 Dennaa upa' nabenni Puang Allataala kamamasean-Na sola kamasannangan-Na sininna to nturu'i tee pangngajaran, iamo to umma'-Na Puang Allataala. 17 Danggi'mo naden tau ssussaina', nasaba' budamo lape' jio kaleku' to buttinna kumua umma'-Nana' Puang Isa. 18 Dennaa upa' nabarakka'i tarruh kamu' Puang Isa Almaseh. Amin. Sallangki' mati', Paulus

Efesus 1

1 Ee, tomala'bihku' sola ngasan, tomatappa' na tonturu' Puang Isa Almaseh jio kota Efesus! Ia tee sura' pole jio mai aku' Paulus, rasulu'-Na Puang Isa Almaseh situru' pakkaeloran-Na Puang Allataala. 2 Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 3 Pakala'bihhi Puang Allataala, Ambe'-Na Puangta' Puang Isa Almaseh! Iamo mangka mbenki' sininna barakka' jao mai suruga, nasaba' memmesa'miki' sola Almaseh. 4 Napakamoja'ki' Puang Allataala. Napileimiki' tonna te'dapa nadipaden tee lino nasaba' Almaseh, antawa'ding menjaji tau mesan-Na nate'da caccata' ba'tu kakuranganta'. 5 Ia joo wattu napattantu jolomiki' Puang Allataala kumua la diangka'ki' menjaji anakka-Na situru' pakkaeloran-Na nasaba' Puang Isa Almaseh. Iamo nanii pajan to pangpakamoja'-Na. 6 Pakala'bihhi Puang Allataala, nasaba' pangpakamoja'-Na to te'da susinna. Manassa to pangpakamoja'-Na, nasaba' nabenmiki' Anak to napakamoja'. 7 Mangkamiki' nala'bak Puang Allataala jio mai kuasa dosa, battuananna didampanganmiki', nasaba' kita'ra namate to Almaseh. 8 Napugaukki Puang Allataala susi joo, nasaba' liwa'ki' napakamoja'. Liwa' mandalan tangngah namacca to Puang Allataala! 9 Situru' ia pakkaeloran-Na, napaissennimiki' akkatta-Na to tangnaissen tau tonna anu'. Na ia tonna te'dapa nadipaden tee lino, pura napattantu kumua Almasehra la mpugaukki joo akkatta-Na. 10 Ia to akkatta-Na kumua sininna apa la jao suruga, la lanna lino, la menjaji mesa' na Almaseh menjaji kapalana. La napugaukki Puang Allataala joo ke nadete'mi wattunna. 11 Ia to napugauk-Na Puang Allataala, napasituru' tarruhhi akkatta-Na sola pakkaeloran-Na to pura napattantumo. Ia tonna te'dapa nadipaden tee lino napileimiki', sanga madoangngi antamenjaji umma'-Na, nasaba' memmesa'ki' sola Almaseh. 12 Napugaukki susi joo anna ia tee kami' to-Yahudi to pamulanna mangrannuan lako Almaseh, mpakala'bih Puang Allataala to mala'bih. 13 Susi todamo kamu' tommisa'dingmo kareba tongan jio mai Puang Allataala, iamo to Kareba Kasalamatan, menjajimo kamu' umma'-Na ammidipasalama'. Ia tommimatappa'mo lako Almaseh, dibenmo kamu' Roh Allataala to nabasse tonna anu', menjaji butti kumua umma'-Namo kamu'. 14 Ia joo Roh Allataala buttinna kumua la tatarimamo to apa nabasse Puang Allataala lako umma'-Na. Battuananna, iamo tanii ngkanassai kumua la nala'bak tonganki' Puang Allataala kita' tee umma'-Na. Napugaukki susi joo antapakala'bih Puang Allataala to mala'bih! 15 Iamo joo anna ia tongkusa'dingngi kumua matappa'mo kamu' lako Puang Isa, na sipakamoja' kamu' sininna umma'-Na Puang Allataala, 16 mangkurru sumanga' tarruh bangna' lako Puang Allataala nasaba' kamu', ke kupassambajangan o kamu'. 17 Kupassambajangan kamu' lako Puang Allataala, Ambe' mala'bih, Puang-Na Puangta' Puang Isa Almaseh, anna ia to Roh Allataala mben kamu' kapaissenan, ammiwa'ding nnissen tonganni to Puang Allataala. 18 Kupassambajangan too kamu', napapahangngi kamu' Puang Allataala, ammiwa'ding nnissenni to apa mirannuan jio mai Puang Allataala to mangka mpilei kamu' menjaji umma'-Na. Ammiissenni kumua liwa' melo to apa nabasse Puang Allataala lako umma'-Na. 19 Ammiissen tooi kumua tangdikulle mpikkiri'i to kuasan-Na Puang Allataala ntulungki' to tomatappa' lako kale-Na. Liwa' mejangngaran joo kuasan-Na. 20 Iamo joo kuasa to mangka napake mpatuo pole' Almaseh jio mai kamatean, napacadokkoi jao cadokkoan mala'bih jio sa'de kanan-Na jao suruga anna mangparenta sola. 21 La'bi majao ia to torroan-Na Almaseh na ia to torroanna sininna kuasa ba'tu kaparentan jao langi' na lan lino, ba'tu laenna to dikita majao, la tuona tee too, ba'tu ia ke jio ahera'. 22 Nabenni Puang Allataala to sininna apa nakuasaii Almaseh, na iamo menjaji kapalana sininna tomatappa' lako. Iamo susi ulu, 23 na ia to tomatappa' susi batang kale-Na. Ia to tomatappa' mpasukku' Almaseh na ia to Almaseh mpasukku'i to sininna apa.

Efesus 2

1 Ia tonna jolona susi kamu' tomate, te'da miampui katuoan baru jio mai Puang Allataala, natumang kedo gaja'mi sola dosami. 2 Ia joo wattu ia to panggaukanmi susi bang to panggaukanna tolino to tangnturu' Puang, ammituru' Ballisi' jao langi' to mparenta sininna setang. Iamo tatta' ngkuasaii to totangmatappa' lako Puang Allataala. 3 Ia joo wattu susimiki' tuu lako tau sola ngasan. Nturu' bangki' kamadoangan penawanta', antapugauk bangngi to gaja'na la mpesannangngi penawanta'. Iamo joo sipato' kumua nakagalliki' Puang Allataala anna la mpabalahhiki' susi tolaen. 4 Apa mamase na mangpakamoja' to Puang Allataala te'da susinna. 5 Iamo joo ia tontasusi unapa tomate natumang dosata', napatuo pole'miki' sola Almaseh. Napasalama'ki', nasaba' kameloan penawan-Na. 6 Napatuo pole'miki' sola Almaseh, napacadokkoki' jao cadokkoan mala'bih sola Almaseh jao suruga antamangparenta sola, nasaba' memmesa'miki' sola Almaseh. 7 Napugaukki susi joo dikua anna pangpekitanni lako tolino to tuo lan wattu la dioloi lako kumua tangdikulle mpikkiri'i to pangpakamoja'-Na sola kameloan penawan-Na lako kita', nasaba' ia to napugauk Puang Isa Almaseh. 8 Dipasalama' kamu', nasaba' kameloan penawan-Na Puang Allataala, sanga matappa' kamu' lako Puang Isa. Na ia joo tangngia kamu' nnangahhi, apa barakka'-Nara Puang Allataala. 9 Te'da midipasalama' nasaba' panggaukanmi. Iamo joo tangsipato' ke denni tau matampo nasaba' kasalamatanna. 10 Tangsipato'ki' susi joo, sanga Puang Allataalara mbenki' katuoan baru, nasaba' memmesa'miki' sola Puang Isa Almaseh. Nabenmiki' katuoan baru antapugauk kameloan, to napasadia jolomo la tapugauk. 11 Ee, kamu' to tangngia to-Yahudi! Ingaranni torroanmi tonna jolona. Nasanga kamu' to-Yahudi kumua totangdisunna', nasaba' te'da tanda sunna' jio kalemi. Napaui to-Yahudi kumua ia joo tanda sunna', tandana kumua umma'-Nami Puang Allataala to to-Yahudi, apa taura ssunna' tau. 12 La miingaran kumua ia joo wattu te'dapa mimemmesa' sola Almaseh. Te'dapa midireken tonapilei Puang Allataala. Te'dapa nabasse kamu' Puang Allataala susi to pura nabasse lako umma'-Na to-Yahudi. Lan tee lino te'dapa rannummi la dipasalama', na te'da toopa miissen Puang Allataala. 13 Apa ia tee too te'damo misusi joo, nasaba' memmesa'mo kamu' sola Puang Isa Almaseh. Ia to kamu' jolona to te'da miissen Puang Allataala, miissenmi, nasaba' kamatean-Na Almaseh jao kaju sitamben. 14 Napasikalinomi Almaseh to to-Yahudi sola bangsa tangngia to-Yahudi. Ia to kamatean-Na mpamesa'ki'. Iamo mangka nta'dei to tasialla'i jolona, iamo to kasiewalian. 15 Nata'dei to atoran agama to-Yahudi sola parentana, dikua anna mpupenjaji mesa'ki' bangsa baru to memmesa' sola Ia. Susimi joo carana mpasikalinoi to to-Yahudi na bangsa tangngia to-Yahudi. 16 Ia to kamatean-Na jao kaju sitamben mpasikalino toomi to-Yahudi sola bangsa tangngia to-Yahudi na Puang Allataala. Ia to kamatean-Na nta'dei kasiewalian. 17 Ratui Almaseh la mpangpeissenan kasikalinoan, la lako bangsa tangngia to-Yahudi to tangnnissenpa Puang Allataala, la lako to-Yahudi to nnissenmo Puang Allataala, 18 anna la to-Yahudi, la totang-Yahudi wa'dingngi nasolan Roh Allataala lako Ambe', nasaba' Almaseh. 19 Iamo joo ia to kamu' bangsa tangngia to-Yahudi, tangngiamo kamu' tosaleanan ba'tu totangnabasse Puang Allataala. Apa pada-padamo kamu' umma'-Na Puang Allataala sola to-Yahudi to matappa'mo, na direkenmo kamu' pangrapuan-Na Puang. 20 Susimo kamu' bola to dipajenjen jao pangrante mangka narantei rasulu' sola nabi, na Puang Isa Almasehmo to batu aririnna. 21 Almaseh mpasikalakki sininna pangkajuanna joo bola dipajenjen sanggenna mangka namenjaji mesa' bola ballo-Na Puang Allataala. 22 Napake too kamu' Almaseh mpajenjenni joo bola sola tomatappa' laen, nasaba' memmesa'mo kamu' sola Ia, anna menjaji ngenan nanii torro Roh Allataala.

Efesus 3

1 Ia tee aku' Paulus ditarungkuna', nasaba' mpangpeissenanna' Puang Isa Almaseh lako kamu' bangsa tangngia to-Yahudi. 2 Tantu misa'dingmo akkatta-Na Puang Allataala la mpasalama'i to bangsa tangngia to-Yahudi, nasaba' melo penawan-Na. Iamo joo napabarakkannina' tee jamanku' to la mipumelona. 3 Mangkamo kupau ci'di' lan tee sura'ku' kumua napakitanna' Puang Allataala joo akkatta-Na to te'da naissen tau jolona. 4 Na ia ke mibacai, miissenmi kumua kupahang tonganmo joo akkatta-Na to mangka napugauk Almaseh. 5 Ia tonna jolona ia joo akkatta-Na te'da bang tolino dipauan, apa ia tee too mangka napangpeissenanmo Roh Allataala lako rasulu'-Na sola nabin-Na. 6 Na ia joo akkatta-Na kumua ia to bangsa tangngia to-Yahudi la ntarima toda barakka'-Na Puang Allataala sola to-Yahudi, na la menjaji susi mesa' kale sola to-Yahudi, anna wa'ding toda la ntarimai to apa nabasse Puang Allataala lako to-Yahudi. Ia tee jaji, nasaba' kamatapparanna bangsa tangngia to-Yahudi lako Puang Isa Almaseh tonna sa'dingmo Kareba Kasalamatan. 7 Napabarakkannina' Puang Allataala tee jaman mpangpeissenan Kareba Kasalamatan anna kuasan-Na Puang Allataala mbenna' kapakullean mpugaukki. 8 Aku'mo mase-masena to sininna umma'-Na Puang Allataala, apa napabarakkannina' Puang Allataala tee jaman mpangpeissenan Kareba Kasalamatan lako bangsa tangngia to-Yahudi kumua ia to barakka'-Na Almaseh te'da susinna. 9 Napabarakkanni toona' jaman mpamanassai lako sininna tau joo akkatta-Na to jolona te'da bang tolino napauan Puang Allataala to mangka mpaden sininna apa. 10 Napugaukki Puang Allataala susi joo la mpapajanni to mangrupa-rupa kamaccan-Na sola kapaissenan-Na Puang Allataala lako mangrupa-rupa tomakuasa ba'tu tomangparenta jao langi' ke nakitai to tomatappa' menjaji susi mesa' kale. 11 Susimi joo napattantu Puang Allataala tonna te'dapa nadipaden tee lino, na iamo joo nasuai to Puangta' Puang Isa Almaseh mpugaukki to akkatta-Na. 12 Kamatapparanta'mora lako Almaseh sola kamangmesan penawanta'mora sola Ia, antabarani mangngolo lako Puang Allataala. 13 Iamo joo kumeta'da lako kalemi kumua, danggi' napumoro'i penawammi ke maparri'na' lan pangtarungkuan nasaba' kamu'. La mipumelona joo sola ngasan. 14 Suju'na' lako Ambe' massambajang, ke kupikkiri'i joo akkatta-Na sola barakka'-Na Puang Allataala lako kamu' to tangngia to-Yahudi. 15 Iara mpaden sininna apa la jao suruga, la lan lino. 16 Massambajangna' lako Puang Allataala, to kaminang mala'bih, anna pamawatang kamu' Roh Allataala. 17 Ia ke susimi joo, mari'pihmi Almaseh lan penawammi, nasaba' matappa' kamu' lako kale-Na. Massambajang toona' kumua moi apa mipugauk, mipugaukki nasaba' pangpakamoja'. 18 Ia ke susimi joo, mapahang tonganmo kamu' susi padammi umma'-Na Puang Allataala, kumua maka matumba maluahna, malandona, matandena sola mandalanna to pangpakamoja'-Na Almaseh lako kita' sola ngasan, 19 moi tangnadete' akkalanna tau la mpahangngi. Ia ke miperasaimi to pangpakamoja'-Na, ia to sipa'-Na Puang Allataala mipusipa' toomi. 20 Ia to Puang Allataala, to ntulung tarruhki', nakulle la mpugaukki la'bi budapa na ia to tapeta'da doangan ba'tu ia to tapikkiri', sanga liwa' Ia makuasa. 21 Iamo joo, ia to kita' tomatappa', to memmesa'mo sola Puang Isa Almaseh, la mpakala'bih tarruhki' Puang Allataala te'da cappa'na! Amin.

Efesus 4

1 Ia tee aku', to ditarungku nasaba' mpangjamanna' Puang, meta'dana' lako kamu' kumua ia to sipa'mi la sipato' susi sipa'na umma'-Na Puang Allataala, nasaba' mangkamo kamu' dipilei menjaji umma'-Na. 2 Danggi' mimatampo, sipangkada rampa' kamu', sisabbarasan kamu' ammisipakamoja' too. 3 Mipengkulle-kullei tatta' sikalino ammida'tan nnampuii to kamangmesan penawa napaden Roh Allataala. 4 Ia to tomatappa' dipasangrapang mesa' batang kale. Mesa' toora Roh Allataala. Susi too mesa'ra to mirannuan jio mai Puang Allataala to mangka mpilei kamu' menjaji umma'-Na. 5 Mesa'ra Puang, mesa'ra kamatapparan, mesa' toora pangjioran. 6 Mesa'ra Puang Allataala, to napuambe' sininna tau. Iamo Puangna sininna tolino, Ia toomo ngkuasaii sininna issinna lino na torro too lan kaleta'. 7 Pada ntarimamiki' barakka' jio mai Almaseh situru' pakkaeloran-Na. 8 Susi to diuki' lan Sura' Allataala mpau Almaseh kumua, "Ia tonna mangka ntaloi ewalinna, endekki de' ngenan kaminang majao, mbawai buda todirampa, na mben barakka' tolino." 9 Apara battuananna joo kada? Ia ke dikua, "Endekki" battuananna denmo namellao do' ngenan kaminang majiongna lino. 10 Jaji, Ia to Almaseh to mangka mellao, Ia toomo mangka endek de' ngenan majaoannapa na langi', kumua napasukku'i to sininna apa lan lino. 11 Pada nabenni barakka' to umma'-Na. Den to napupenjaji rasulu', den to napupenjaji nabi, den to napupenjaji tompangpeissenan Kareba Kasalamatan, den to napupenjaji guru iarika tonnurusu' jamaa. 12 Nabenni joo barakka' anna kullei umma'-Na mpangjamanni na pamawatang tooi kamatapparanna to umma'-Na to dipasangrapang batang kale-Na Almaseh. 13 Ia ke susimi joo, memmesa' penawamiki', nasaba' pada matappa'miki' lako Anak Allataala na pada tapahangngi kumua indara Ia. Tomasaranianki' na samasai-sainna arannai sukku'ki' susi Almaseh. 14 Te'damo tasusi tontamane' matappa' napamale melako mangrupa-rupa pangngajaranna tokalasi, to madoang mpalao sala ba'tu nnuragaki'. 15 Apa nturu' tonganmiki' pangngajaran tongan na sipakamoja' tooki'. Na samasai-sainna menjajimiki' susi Almaseh lan sininna passalan. Iamo dipasangrapang ulu, 16 na ia tee kita' dipasangrapang mangrupa-rupa lesoan batang kale-Na Almaseh. Te'da natiseran joo kale, nasaba' Almaseh nnampaii. Saloboh-lobohna na samawatang-watangna to kale, ke sipakamoja'ki' na pada mpangjamanki' Puang situru' barakka' to mangka dibenki'. 17 Kuasan-Na Puang kupangngingaran kamu' kumua, "Danggi' omo mimessipa' susi totangnturu' Puang Allataala." Tangsipato'na bang to napikkiri' tuu lako tau, 18 na te'da namapahang. Te'da naampa' katuoan baru to nabenni Puang Allataala, sanga te'da naissenni to pangngajaran tongan na tangmangpesa'ding tooi. 19 Te'da namasiri', anna kamadoangan gaja'na bangra naturu', nampugauk mangrupa-rupa panggaukan to tangsipato'na. 20 Na ia to Almaseh to diajaran kamu' te'da ia nasusi sipa'na joo. 21 Katongananni Ia. Misa'dingmo to pangngajaran-Na. Na mangkamo kamu' diajahhi to sipa'-Na. 22 Midiajahhi kumua la mipatorro to sipa' jolomi. Danggi' mituru' omo kamadoangan gaja'mi to mpalao sala kamu' ammimasolang. 23 Sibalikanna la misulleimi to sipa'mi mipemeloii to penawammi, 24 ammipamulai to katuoan baru situru' pakkaeloran-Na Puang Allataala. La maruruh na tongan to panggaukanmi susi sipato'na tau mesan-Na Puang. 25 Ee, tomala'bihku'! Danggi' mimangkada tangtongan lako padammi rupa tau, apa maruruh kamu' mpaui to tonganna, nasaba' umma'-Namo kamu' Almaseh. 26 Ia ke mabirih kamu', danggi' mipugauk dosa. Danggi' paratui lako kabuh allo ke mabirih kamu', 27 anna danggi' naden wattunna Ballisi' ssede kamu' mpugauk dosa. 28 Ia to tobiasa boko, danggi'mo naboko. Apa la maruruhri mangjama, naampa'i to la naputuona, nawa'ding too ntulungngi to tomakario-rio. 29 Danggi' mimangkada to napumasolang tau, apa kada mpamasumanga'ra to napumelo to tossa'dingngi anna nnampa' barakka'. 30 Danggi' mipugaukki to apa ssussai Roh Allataala to torro lan kalemi. Ingaranni kumua ia to katorroan-Na lan kalemi, iamo buttinna kumua umma'-Namo kamu' Puang Allataala. Na Iamo la mikanassai kumua la napasalama' kamu' Puang Allataala jio mai pangsessa ke Kiama'mi lino. 31 Danggi' mimapa'dik ati, mangpabalah, magalli, massipura, ngkada-kadai tau, maba'ci ba'tu laennapa. 32 Apa la sipemeloan penawa kamu', misikamasean, misidampangan too susi Puang Allataala ndampangan kamu' nasaba' Almaseh.

Efesus 5

1 Turu'i to sipa'-Na Puang Allataala, nasaba' kamu'mo anak napakamoja'. 2 La sikamasean kamu' susi Almaseh ngkamaseiki', iamo na mpangkaroban kalena la mpasalama'ki'. Ia joo kamatean-Na susi karoba bunangngu' to napumasannang Puang Allataala. 3 Jagai sangammi, danggi' naden tau mpaui kumua manggauk sala kamu', madoang kamu' nnassang sininna apa iarika mpugauk kamu' panggaukan tangsipato' laenna. Te'da nasipato' joo, nasaba' umma'-Na kamu' Puang Allataala. 4 Tangsipato' too kamu' mangkada carepa, mangkada tangkebattuan sola nnamboh bang kada. Apa la mangkurru sumanga'ra kamu' lako Puang Allataala. 5 Nasaba' miissen kumua te'da nawa'ding menjaji umma'-Na Almaseh sola Puang Allataala lan kaparentan-Na to tomanggauk sala, tomangkedo tangsipato'na, ba'tu tomadoang bang nnassang sininna apa, nasaba' ia to tomangngassang dipapadai tossompa dewata. 6 Danggi' mieloranni to tau susi joo mpalao sala kamu' mpake kada-kada mala'bih apa sitonganna te'da natongan. Nasaba' mabirih Puang Allataala lako to tocia' nturu' parenta-Na. 7 Danggi' lalo misiama' tosusi joo. 8 Ia tonna jolona ia to sipa'mi susi sipa'na to tote'da naissen Puang, apa ia tee too nnissenmo kamu' Puang. Iamo joo ia to panggaukanmi la susi unamo panggaukanna umma'-Na Puang. 9 Panggaukan melo, maruruh na tongan pole jio ngasan mai Puang. 10 Pengkulle-kulleii nnissenni apara nakabudai Puang ammipugaukki. 11 Danggi' mipugaukki susi to napugauk to tote'da naissen pakkaeloran-Na Puang, nasaba' te'da lalo napumelona tau joo apa napugauk. Apa la mipaissennii kumua tangmelo joo. 12 Ia to napugauk buni, mesirisan mpaui. 13 Apa la pajan kumua gaja' to panggaukanna, ke naissenmi to pakkaeloran-Na Puang. 14 Nasaba' ia to pakkaeloran-Na mpaissennii joo tau. Iamo joo naden dipau kumua, "Ee, iko to mamma'na, mi'cikmoko, ammutuo pole' jio mai kamatean, anna la napamanassanko Almaseh to pakkaeloran-Na Puang!" 15 Iamo joo mangngingaran melo kamu', danggi' mimessipa' susi tobango', apa la messipa' susira kamu' tomasaranian. 16 La mipake to wattummi mpugaukki to dipumelona, nasaba' gaja' sipa'na to tau tee wattu. 17 Danggi' messipa' susi tobango', apa la miissen to pakkaeloran-Na Puang. 18 Danggi' mimalango nasaba' ia mpaden panggaukan gaja', apa eloranni to Roh Allataala ngkuasai kamu'. 19 La sipamasumanga' kamu' makkelong Zabur sola kelong pangpujian, mimakkelong situru' canning atimmi ke sitammu kamu' mpakala'bih Puang. 20 La mangkurru sumanga' tarruh kamu' lako Ambe'ta' Puang Allataala mpau sangan-Na Puangta' Puang Isa Almaseh, nasaba' sininna to mangka napugauk lako kamu'. 21 La mangpasituru' kamu' mesa' sola mesa'. Iamo buttinna kumua mikasiri' to Almaseh. 22 Ee, kamu' baine! La menturu' kamu' lako muanemi susi lako Puang. 23 Nasaba' muane ngkapalai baine, susi Almaseh ngkapalai jamaa. Na Ia toomo mpasalama' tomatappa' to dipasangrapang batang kale-Na. 24 Susi tomatappa' menturu' lako Almaseh, susi todami to baine la tuli menturu' lako muanena. 25 Ee, kamu' muane! Pakamoja'i to bainemi susi Almaseh mangpakamoja' napangkaroban kalena ssulle tomatappa'. 26 Susimi joo napatorro leko' kamu' Almaseh ammimenjaji tau mesan-Na. Nadampangan kamu' mpake wai pangjioran sola pangngajah-Na. 27 Napugaukki susi joo anna te'da salana, kakuranganna, ba'tu cacca laenna to tomatappa', apa melo, mala'bih na sipato' ke'deh jio sa'dena Almaseh susi tobotting baine ke'deh jio sa'dena tobotting muane. 28 Susimi joo ia to pangpakamoja'na muane lako bainena la pada pangpakamoja'na lako kalena. Nasaba' ia to mpakamoja' bainena, pada ke mpakamoja'i kalena. 29 Te'da ia mesa' tau ngkaba'ci batang kalena, apa naparakairi ia. Susi too Almaseh mparakai tomatappa', 30 nasaba' ia to tomatappa' dipasangrapangngi batang kale-Na. 31 Den diuki' lan Sura' Allataala kumua, "Iamo joo na ia to muane la messarakki jio mai tomatuanna, namale memmesa' sola bainena, nasangkale sola dua." 32 Liwa' mandalanna battuananna tee kada. Ia to kusanga iamo to kasiumputanna Almaseh na tomatappa'. 33 Jaji, ia to pangpakamoja'na muane lako bainena la pada pangpakamoja'na lako kalena, na ia to baine la ngkasiri' muanena.

Efesus 6

1 Ee, kamu' to anak! La mangpesa'ding kamu' lako tomatuammi! Iamo joo to sipato' mipugauk, nasaba' umma'-Namo kamu' Puang. 2 Den diuki' lan Sura' Allataala kumua, "Kasiri'i to tomatuammu." Iamo parenta kaminang parallu, to diumpusan basse kumua, 3 "Ammumasannang namalambeh sunga'mu lan tee lino." 4 Ee, kamu' to ambe'! Ajahhi meloi to anakkami situru' atoran sola pangpakainga'-Na Puang, danggi' mpaden pa'dik penawa lako anakkami to apa migaukanni. 5 Ee, kamu' to kaunan! Danggi' mianggai' bangri menturu' lako puangmi lan tee lino. La menturu' tongan kamu', ammikasiri'i, susi kamenturusanmi lako Almaseh. 6 Danggi' na ia manda ke nakita kamu' mipemasannangngii to penawanna, apa susi mesa' kaunan-Na Almaseh kumua, la masumanga' kamu' mpugauk pakkaeloran-Na Puang Allataala. 7 La masannang kamu' mpugaukki to jamanmi, susi ke Puang Allataala mipangjaman na tangngia tolino manda. 8 La mikanassai kumua, moi kaunan ba'tu tomaradeka pada la nnampa' pahalana jio mai Puang Allataala to sininna panggaukan melona. 9 Ee, kamu' to puang! La susi too mipugauk lako kaunanmi, danggi' migarra'i. Ingaranni kumua ia to Puangna jao suruga ia bang una Puangmi, na te'da namangpasilaenan lako tolino. 10 Na mangkatampakanna, eloranni to kuasan-Na Puang mpamawatang kamu', nasaba' memmesa' penawamo kamu' sola Ia. 11 Nnewa kamu' Ballisi'. Iamo joo pake ngasanni to parewa kapararian-Na Puang Allataala, ammikullei nnewai to passedena Ballisi'. 12 Nasaba' tangngia padanta' rupa tau to taewa, apa nnewaki' sininna tomakuasa ba'tu to mparentai tee lino gaja', sola sininna setang to mangparenta jao langi' tee wattu. 13 Iamo joo pake ngasanmi to parewa kapararian-Na Puang Allataala, anna ia ke nadete'mo kamu' sussa, mikulle nnewai, na mangkai joo da'tan bang kamu' mawatang matappa'. 14 La mawatang kamu' ammisadia mangngewa. Ia to pangngajaran tongan, la mipake susi saripi, na ia to kamarurusan la mipake susi baju bassi. 15 Canning atimmi mpangpeissenan Kareba Kasalamatan, umbo nakua Puang Allataala sikalino pole' tolino, susi sapatu mipake. 16 La da'tan kamu' mpubalulang kamatapparanmi lako Puang Allataala, nasaba' iamo joo la mipake mbosian sininna pana apinna Ballisi'. 17 La ntarima kamu' songko' bassi kasalamatan. La ntarima too kamu' pa'dang to naben kamu' Roh Allataala, iamo to kadan-Na Puang Allataala. 18 Ia ke nnewa kamu' Ballisi', la massambajang tarruh bang kamu' mpeta'da pangtulung-Na Puang Allataala. La massambajang kamu' situru' pangpatujun-Na Roh Allataala. Danggi' mipajaii massambajang. Passambajanganni to sininna umma'-Na Puang Allataala. 19 La mipassambajangan todana', anna benna' kada tongan Puang Allataala ke mangkadana', sola kabaranian mpangpeissenan Kareba Kasalamatan to tangnaissenpa tau. 20 Naangka'na' Puang Allataala menjaji pesuan-Na. Na ditarungkumo' tee too, nasaba' kupangpeissenanni to Kareba Kasalamatan. Passambajanganna' angkubarani mpangpeissenanni, susi to sipato'na la kupau. 21 Sininna to apa jaji lako kaleku' la napauan kamu' padanta' tomatappa' Tikhikus to tapakamoja'. Ia to Tikhikus sangpangjamanku', to tatta' mpangjaman Puang Allataala. 22 Kusuai male mati' la mpauan ngasan kamu' kumua matumba-tumba unakan anna pakatana kamu'. 23 Dennaa upa' na Ambe'ta' Puang Allataala sola Puang Isa Almaseh mpupenjaji sininna taun-Na masannang, sipakamoja', sola da'tan matappa' lako Almaseh. 24 Dennaa upa' nabarakka'i Puang Allataala sininna tau to mpakamoja' tarruhhi to Puangta' Puang Isa Almaseh. Padamo jolo' too. Sallangki' mati', Paulus.

Filipi 1

1 Ee, tomala'bihku' tonnatoro' jamaa sola tontulung jamaa na sininna umma'-Na Puang Isa Almaseh jio kota Filipi! Aku' Paulus na Timotius taun-Nakan Puang Isa Almaseh ngkiringan kamu' tee sura'. 2 Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 3 Tuli mangkurru sumanga'na' lako Puang Allataala, ke kuingaran o kamu', 4 na masannangna' tongkupassambajangan kamu'. 5 Mangkurru sumanga'na' lako Puang Allataala, nasaba' tatta' kamu' mesa' penawa ntulungna' mpangpeissenanni to Kareba Kasalamatan mammula jio mai misa'dingna ratu lako too allo. 6 Kukatappa'i kumua, ia to pangjaman melo to napamula Puang Allataala ssullei sipa'mi, la napemangkaii sanggenna ratu pole' Puang Isa Almaseh. 7 Sipato'na' mangpikkiri' susi joo, nasaba' kupakamoja' kamu' na mituru' toomi to jaman mangka dipabarakkananna', la lanna' pangtarungkuan, la ia ke mpangpeissenanna' Kareba Kasalamatan iarika mpamanassai kumua tongan joo Kareba. 8 Nakitana' Puang Allataala na naissen kumua kukamali' gajamo kamu'. Kupakamoja' kamu' susi Puang Isa Almaseh mangpakamoja'. 9 Massambajangna', dennaa upa' mipede' mpakamoja' Puang Allataala mipakamoja' too padammi rupa tau, na samacca-maccammi nnissen pangngajaran tongan na samandalan-dalanna to tangngahmi. 10 Ia ke susimi joo, miissenmi mpilei apa to melona, na te'da caccami ke ratu pole'mi Almaseh, 11 na melo tarruh sipa'mi, nasaba' Puang Isa Almaseh, anna dipakala'bih to Puang Allataala. 12 Ee, tokupusile'to! Parallu miissen kumua moi ditarungkuna' tee too, sabuda-budanna tau ssa'dingngii to Kareba Kasalamatan. 13 Sininna surudadu pangngampa bola Tomaraja sola tau laen lan tee kota nnissenmi kumua ditarungkuna', sanga mpangpeissenanna' Almaseh. 14 Moi kuditarungku, ia to padanta' tomatappa' samatappa'-tappa'na lako Puang, na sabarani-raninnami mpangpeissenanni to Kareba Kasalamatan. 15 Moi naden ba'tu pira-pira tau mpangpeissenan Almaseh sanga masere atii ngkita pangjamanku' namadoangri la ssisakkanna', apa ia to tau laen situru' ia canning atinna. 16 Ia tuu lako tau mpangpeissenanni Almaseh, sanga napakamoja'i to Puang Allataala. Naissen kumua diangka'na' la mpamanassai to Kareba Kasalamatan kumua tongan. 17 Apa ia to ba'tu pira-pira tau mpangpeissenanni Almaseh, nasaba' nasanga la napumelo mesai, tangngia nasaba' kamarurusan penawa. Nasanga too kumua la mapa'dik penawangku' lan pangtarungkuan, ke manggauk susii joo. 18 Ake' bangmo. Masannangna', apa bangmo akkattana, meloraka, tangmeloraka, ke Almaseh unai to napangpeissenan. La masannang tarruhna', 19 nasaba' kuissen kumua dila'paranna', sanga passambajangmi, na pangtulung-Na Roh-Na Isa Almaseh. 20 Ia to kukadoangngi sola kurannuan, iamo to kumua te'da lalo kuladipakasiri', apa la barani tonganna' mpebalian Kareba Kasalamatan tee too, susi biasanna. Na ia ke susii joo, la dipakala'bih to Almaseh, nasaba' pebalingku', la tuoku', la mateku'. 21 Ia to tuoku' kupatuju lako ngasan Almaseh, na kamatean iamo pahalaku'. 22 Apa ia ke tuona', den bua'na lako jamanku', na te'da kuissenni umbonnamora la kupilei. 23 Nasialaina' tee dua. Madoangna' ssalaii tee lino angkumari'pih sola Almaseh, nasaba' iamo joo to kaminang melo. 24 Apa la'bi kebattuan lako kalemi, ke tuo unapa' lan lino. 25 Na kamatapparan iamo tee kunii nnissenni kumua da'tanna' la mari'pih ssolan kamu' sola ngasan, ammisamatappa'-tappa'na lako Almaseh, misamasannang-sannangna too. 26 Na ia angkuratu mati', la'bipa to pangpakala'bihmi lako Puang Isa Almaseh, sanga aku'. 27 Samari ia to kumua la mituru' tarruh bang to pangngajaran-Na Almaseh. Na moi malena' mati' ba'tu tangmalena' mati', da'tan bang kusa'ding to karebammi kumua mesa' penawa kamu', mipada-pada mpengkulleii anna buda tau matappa' lako Kareba Kasalamatan, 28 na moi mesa' to tonnewa kamu' te'da la mikalaja'. Ia joo mpamanassai lako tonnewa kamu' kumua la nasessai Puang Allataala, apa la dipasalama' kamu'. 29 Ia to barakka' mangka diben kamu', tangngia manda to matappa' lako Almaseh, apa ia toomo to dikua la maparri' kamu' sanga Almaseh. 30 Jaji, ianna susi joo turu' todamo kamu' mpamanassai kumua tongan joo Kareba Kasalamatan, susi to mikita mangka kupugauk na misa'ding unapa tee too.

Filipi 2

1 Mangkami Almaseh mpamasumanga' kamu', na ia to pangpakamoja'-Na mpamasannangmo kamu', na Roh Allataala mpamesa' penawamo kamu', ammisipakamoja', misikamasean. 2 Iamo joo la'bi la mipemasannangngina', iamo to la sipahang melo kamu', la sipakamoja' kamu', la mesa' pattuju kamu', 3 na danggi' miangahhi to mipumelo mesa, ba'tu pangpuji tangkebattuan. Apa sibalikanna, la mpupengkajiongan kamu' kalemi, na la mikasiri' to tau laen na kalemi. 4 Na danggi' na ia manda to kaparalluan mesammi miangah, apa la miangah too to naparalluinna tau laen. 5 Na ia to penawammi la susi penawan-Na Puang Isa Almaseh: 6 Moi sangrupa Puang Allataala to Almaseh, apa te'da napapajanni to kapuangan-Na. 7 Apa canning atinna napatorroi to kapuangan-Na, namenjaji susi kaunan. Mentolino, natuo susi tolino. 8 Mpupengkajiongan kalena anna menturu' tongan lako Puang Allataala, naarannai mate. La'bi pole'pi mate jaoi kaju sitamben. 9 Iamo joo nagaja mpamajaoi Puang Allataala, nabenni kuasa kaminang majao, 10 anna sininna to kepenawa mengguntu' ssompa Puang Isa, la jaona langi', la lanna lino, la jiong lino nanii tomate. 11 Na sininna tokepenawa la mangngaku kumua, "Puang to Isa Almaseh", anna la dipakala'bih to Ambe' Puang Allataala. 12 Ee, tomala'bihku' sola ngasan to kupakamoja'! Susi tongkutorropa lan tangnga-tangngami, la'bi-la'bi tee too moi mambelana' jio mai kalemi, la tatta' kamu' nturu'i to pangngajahku'. Mangkamo kamu' napasalama' Puang Allataala. Jaji, la mipengkulle-kullei tuo susi sipato'na umma'-Na Puang Allataala, iamo to ssompa Puang mimalaja' mpugauk kasalan. 13 Puang Allataala mpupembalik penawammi ammimadoang, mikulle tooi mpugaukki to pakkaeloran-Na. 14 Danggi' mimangnuku-nuku iarika site'geh ke denni apa mipugauk, 15 dikua namanassa lako tolino to tangmaruruh na togaja', kumua tomelo kamu' mimaruruh na te'da caccami, apa taun-Namo kamu' Puang Allataala. Miarrangngii to tolino to tangnturu' Puang Allataala susi arrang lako tosala lalan, 16 ke mipangpeissenanni to Kareba Kasalamatan. Na ia ke susii joo, wa'dingna' mpumasannangngi ke ratu pole'mi Almaseh, sanga te'da nalao sala to jamanku'. 17 Ia tee aku' mangkana' mpaissenni kamu' to Kareba Kasalamatan ammimemmatappa'. Na moi nadipato'do to raraku', nabutung dipatibolloh susi karoba lako Puang Allataala nasaba' ia to mangka kupugauk lako kalemi, la masannangna' antamasannang sola. 18 Na susi too kamu' la masannang, antapada-pada masannang. 19 Ia ke napuelohhi Puang Isa, madoangna' ssuai madoi' mati' to Timotius, dikua na ianna pole mai, ia to karebammi mpamasannang penawangku'. 20 Nasaba' ia manda kusolan sangpenawa mpikkiri' tonganni to miparalluinna. 21 Ia to tau laen pada mparinawa bangri kalena, tangngia pakkaeloran-Na Puang Isa Almaseh. 22 Mikitamo kumua wa'ding dikatappa'i to Timotius. Mangkamo' natulung mpangpeissenan Kareba Kasalamatan susi anak ntulung ambe'na. 23 Iamo kuakkattai la kusua male mati', ke mangkami to kara-karaku' dira'tah. 24 Apa kurannuan kumua la naeloranna' Puang Allataala kumadoi' toda male mati'. 25 Ia to sangpangjamanku' padanta' tomatappa' Epafroditus, to mangka misua ratu inde' ntulungna', kusanga parallu too kusua pole mati', 26 sanga gaja nakamali' kamu', nanawa-nawa tooi, nasaba' misa'ding kumua masakii. 27 Masaki tonganni ia, na garapai mate. Apa nakamaseii Puang Allataala, na te'da na ia manda nakamasei apa moi aku', dikua nadanggi' kusamaparri'-parri'na. 28 Iamo joo kumadoi' ssuai mati', ammimasannang ke mikitami, nadanggi' nakerangngan to sussaku'. 29 Masannang kamu' ntarimai susi sipato'na ntarima to mpangjaman Puang. Parallu mikasiri' to tau susi joo, 30 nasaba' garapai mate tonna mpangjaman Almaseh, iamo to mpugaukki to apa la mitulunganna', na te'damo nacirinnai sunga'na.

Filipi 3

1 Ee, tomala'bihku'! Mangkatampakanna, la masannang kamu' sanga mesa' penawamo kamu' sola Puang Allataala. Ia ke kudadu'i nnukiran kamu' to apa mangka kupauan kamu' mati', te'dara namatumba, na la mipumelona ia. 2 Majaga kamu' lako guru tangtongan, nasaba' gaja' to sipa'na susi sipa' asu. Majaga kamu' lako to tomangparuku massunna', 3 nasaba' kita'ra to disanga todisunna' tongan na kita' toora to ssompa Puang Allataala situru' pangpatujun-Na Roh Allataala. Kita'ra to masannang, nasaba' mesa' penawamiki' sola Puang Isa Almaseh, te'da na atoran agama tapattuan mpupenjaji tomeloki'. 4 Moiraka nawa'ding toona' mpattuan kamenturusanku' lako atoran agama, nasaba' ia ke denni tau mpattuan atoran agama, la'bi pole'pi aku'. 5 Disunna'na' tonna karuamo allona jajingku', to-Israelna', bati'na Benyamin, jaji to-Ibrani massangna', na mangngagama to-Yahudina' situru' pangngajaran Farisi. (Jaji to-Farisi toona'.) 6 Ia ke panggaukanku', aku'mo to kaminang ssessa tomatappa' lako Puang Isa. Ia ke kamenturusanku' lako atoran agama, te'da atoran tangkuturu'i. 7 Ia to panggaukan to kusanga kupusaro tonna jolona, kupurugimo tee too nasaba' Almaseh. 8 Kupurugi ngasan joo, nasaba' kupahang kumua la'bi melo to nnissen Puangku' Puang Isa Almaseh, na ia to laenna. Te'da ngasanmo kupugaukki, na kusangamira burauk, dikua angkuampa'i to Almaseh, 9 angkumesa' penawa sola. Te'da kudipupenjaji tomelo, sanga mpugaukna' atoran agama, apa napupenjaji tomelona' Puang Allataala, sanga matappa'na' lako Almaseh. 10 Ia to gaja kukadoangngi iamo to nnissen Almaseh, sola mperasaii to kuasa mpatuo pole'i jio mai kamatean. Madoang toona' mperasai parri' sola kamatean susi to naperasai Almaseh, 11 kudipatuo pole' toda jio mai kamatean keanu'. 12 Te'da kukua mangkamo' nnampa'i joo kukadoangngi, iarika mangkamo' menjaji totangkasalan. Apa tarruh-tarruh bangpa' mpengkulleii, kenna wa'ding kuampa' todai, nasaba' iamo joo patun-Na napupenjajina' Puang Isa Almaseh taun-Na. 13 Ee, tomala'bihku'! Te'dara kumua kuampa'mi. Apa ia to kupugauk, iamo to la kupengkulle-kullei ratu lako to kupangngujui, na kupasalaimo penawa to apa pura kupugauk. 14 Ia tee aku', susina' tomassimbara. Kinjara'na' angge cappa'na la nnampa' paraseng. Ia joo paraseng iamo to kumua nasuana' Puang Allataala mentama suruga, nasaba' kamatean-Na Puang Isa Almaseh. 15 Ia tomasaranianmo la mangpikkiri' susiki' joo. Apa ia ke den kamu' mangpikkiri' laen, na Puang Allataalamora mpamanassai joo lako kalemi. 16 Samari kumua ia to pangngajaran mangka diajaranki', ia bang toomo la taturu' tarruh. 17 Ee, tomala'bihku'! La mialai palelean mata to sipa'ku'. Mituru' todai sipa'na to tonnalakan palelean mata. 18 Nasaba' tuli kupauan bang kamu', na kupauan omo kamu' too mpenjio' wai matangku', kumua ia to sipa'na buda tomatappa' tangsipato' bang penawa melo-Na Almaseh, iamo to kamatean-Na jao kaju sitamben. 19 Mangkatampakanna la sabu' tuu lako tau, nasaba' mpupuang ba'tangna, mpumatampo panggaukanna to mesirisan, na ia to tangngahna napatuju lako mandai katuoan lan lino. 20 Apa ia tee kita', jao suruga to tondok kajajianta', na jao toomo mai la tanii ntajan Puang Isa Almaseh, Tomangpasalama'. 21 Iamo la mpajajii tee batang kaleta' to tangmala'bih menjaji mala'bih susi kale-Na, mpake kuasan-Na to napake too ntaloi sininna apa.

Filipi 4

1 Ee, tomala'bihku' to kupakamoja' na kukamali' too! La matappa' tongan-tongan kamu' lako Puang. Kupumasannang sola kupumala'bih kamu'! 2 Kupeta'dai namesa' penawa to Euodia sola Sintikhe susi to sipato' napugauk to tonturu' Puang. 3 Ee, sangpangjamanku' sola ngasan! Kupeta'dapa lako kalemi, tulungngi tuu baine sola dua, to mangkamo kusibawan mpengkulle-kullei mpangpeissenan Kareba Kasalamatan sola Klemens, na budapa solaku' laenna, to diuki' sanganna lan Sura' Katuoan. 4 Da'tan kamu' masannang sanga mesa' penawa kamu' sola Puang Allataala! Kudadu'pi mpaui: Masannang kamu'! 5 Pangpekitanni to kameloan penawammi lako sininna tau. Cingga'tu'mora naratu to Puang. 6 Danggi' naden apa mipuselang, apa paui to miparalluinna lako Puang Allataala lan passambajangmi, mimangkurru sumanga' too, 7 na ia to kamasannangan jio mai Puang Allataala, to te'da nakullei mpahangngi tolino, la mpamambelai joo napuselangna penawammi, nasaba' mesa' penawa kamu' sola Puang Isa Almaseh. 8 Ee, tomala'bihku' sola ngasan! Mangkatampakanna, la mipallan penawai sininna to pangngajaran tongan, sininna to mala'bih, sininna to maruruhna, sininna to tangkasalan, sininna to maballona, sininna to melona disa'ding, to mangpamasannang sola sipato'na dipuji. 9 La mituru' to sininna pangngajaran to mitarimamo mipelajahhi toomo, la ia to kupaunna, la ia to kupugaukkuna, anna ampai kamu' Puang Allataala to mpangben kamasannangan. 10 Liwa' masannangku' nang kumangkurru sumanga' lako Puang, nasaba' ia tee too mikiringan omo' pangtulungan. Sitonganna ia to wattu puramo miingaran una ia, apa tangpadete' kamu'. 11 Te'da kumangkada susi joo, kumua kakuranganna', sanga ia to aku' tee kupelajahhimo mpasigannatanni to apa jio kaleku'. 12 Mangkamo' kaasi-asi, mangka toomo' kala'bian. Moi apa ngkannana' kupumasannang, la kabarasanraka, la katangbarasanraka, la kala'bianraka, la katanggannatanraka. 13 Kukulle to sininna apa, sanga Puang Isa Almaseh mbenna' kapakullean. 14 Apa melo tuu mipugaukkuna, nasaba' miingaran to kamaparrisanku'. 15 Ee, tomala'bihku' to-Filipi! Miissen kumua ia tommimane' dipaissenni to Kareba Kasalamatan, mesa-mesammi jamaa to ngkiringanna' pangtulungan tongkulamessunmo lan mai propinsi Makedonia. 16 Susinna ia tongkujio kota Tesalonika pempiran kamu' ngkiringanna' pangtulungan ke kuparallui omi. 17 Te'da kuangah pangpabenganmi, apa iara kuangah kumua na sabuda-budanna barakka' miampa', sanga mitulungna'. 18 Kutarima ngasanmo, na la'bi budamo na ia to kuparalluinna. Kala'bianmo', tongkutarimami jio mai Epafroditus to apa mipangben. Ia to pangpabenganmi susi karoba bunangngu', to napumasannang Puang Allataala. 19 Dennaa upa' na Puangku' Puang Allataala, to tangdikulle mbilangngi to kasugiran-Na, mben kamu' to apa miparallui, nasaba' Puang Isa Almaseh. 20 Iami joo la mpakala'bih tarruhki' Ambe'ta' Puang Allataala te'da cappa'na. Amin. 21 Massallangna' lako sininna umma'-Na Puang Isa Almaseh. Sininna padanta' tomatappa' to kusolan ntee too massallang toda mati'. 22 Sininna umma'-Na Puang Allataala inde' kota massallang ngasanni mati', la'bi-la'bi to torro jio bola Tomaraja Roma. 23 Dennaa upa' nabarakka'i kamu' Puang Isa Almaseh. Padamo jolo' too. Sallangki' mati', Paulus.

Kolose 1

1 Ee, tomala'bihku' sola ngasan, tomatappa' na tonturu' Almaseh jio kota Kolose! Aku' Paulus sola padanta' tomatappa' Timotius ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang Isa Almaseh. Dennaa upa' nabarakka'i kamu' Ambe'ta' Puang Allataala, naben kamu' kamasannangan 3 Ia angkipassambajangan kamu', tuli mangkurru sumanga'kan lako Puang Allataala, Ambe'-Na Puangta' Puang Isa Almaseh, 4 nasaba' kisa'dingmo kumua mikatappa'i tonganmi to Puang Isa Almaseh, mipakamoja' tooi to sininna umma'-Na Puang Allataala. 5 Matappa' kamu' misipakamoja', nasaba' mirannuan to Puang Allataala kumua la naben kamu' to apa napasadianmo kamu' jao suruga, situru' Kareba Kasalamatan to mangka misa'ding jolona. Tongan joo Kareba Kasalamatan, 6 to nasa'dingmo tau lan lili'na lino, na mpaden barakka' lako tau. Susi toomo kamu' nabarakka'i sipamulanna misa'ding, ammiperasai tonganni to kameloan penawan-Na Puang Allataala. 7 Ia tee Kareba Kasalamatan mangka naajaran kamu' Epafras, sangpangjamanki' to kipakamoja'. Iamo mesa' tompangjaman Almaseh to tatta' mbalii kamu'. 8 Ia mpauankan kumua sipakamoja' tonganmo kamu', nasaba' kuasan-Na Roh Allataala. 9 Iamo joo tongkisa'dingngi to apa jaji lako kalemi, kipassambajangan tarruh kamu' lako Puang Allataala, kumua ammisannissen-nissennai to pakkaeloran-Na ammiampa' tooi to sininna kapaissenan to pole jio mai Roh Allataala. 10 Ianna susimo joo, ia to sipa'mi la situru' pakkaeloran-Na Puang Allataala anna pumasannangngi penawan-Na. Susinna, mipugaukki to mangrupa-rupa kameloan, misannissen-nissennai to Puang Allataala, 11 natuli mpamawatang kamu' kuasa mala'bih-Na, ammisabbara' mimario bang moi maparri' kamu', 12 mituli mangkurru sumanga' lako Ambe'ta' Puang Allataala. Ia mpasipato' kamu' la nnampa'i jao suruga to apa nabasse lako umma'-Na. 13 Ia toomo mangka lla'paranki' jio mai kuasanna Ballisi' napupenjajimiki' taun-Na lan kaparentan-Na Anak to nakamasei. 14 Iamora tee Anak lla'bakki' jio mai kuasa dosa, battuananna didampanganmiki'. 15 Tangdikita to Puang Allataala. Apa ia to Almaseh mpamanassai lako kita' sipa'-Na sola kuasan-Na. Iamo Anak Pamungah, na te'da njaonannii to sininna apa mangka napaden Puang Allataala. 16 Iamo napake Puang Allataala mpadenni to sininna apa lan lino na sininna apa jao suruga, ia to dikitanna na tangdikitanna, sininna kuasa ba'tu kaparentan jao langi'. Ia tee lino sola issinna dipaden mpake Almaseh na dipatuju lako too Almaseh. 17 Ia tonna te'dapa naden to sininna apa, nang denmo ia to Almaseh. Iamo nnampaii tee lino anna te'da natiseran. 18 Almaseh toomo kapalana sininna tomatappa' to dipasangrapang batang kale-Na. Iamo Anak Tungga' to bungah dipatuo pole' jio mai kamatean, dikua namenjaji kaminang matande jio mai to apa den. 19 Napuelohhi Puang Allataala kumua sininna to apa den jio kalena, den toda jio Anak. 20 Nasuai Puang Allataala to Almaseh mentama lino, namate jao kaju sitamben, anna pasikalinoi to sininna apa lan lino na lan suruga sola kalena. 21 Susi toda kamu' tee too dipasikalinomo Puang Allataala. Jolona tangngia kamu' umma'-Na Puang Allataala na miewali tooi, sanga gaja' to penawammi sola panggaukanmi. Napasikalinomo kamu' Puang, nasaba' kamatean-Na Anak, ammidipatorro leko' jio mai totangnturu' Puang, anna te'da caccami ba'tu kakuranganmi ke dipangngolomo kamu' lako Puang Allataala. 23 Apa la tatta' kamu' matappa', danggi' nasitawa-tawa to penawammi. La mirannuan tarruhhi to Puang Allataala kumua la napugaukki to apa nabassean kamu' lan Kareba Kasalamatan to mangka misa'ding. Ia joo Kareba dipangpeissenanmo lako issinna lino. Na ia tee aku' Paulus menjajimo' tompangpeissenanni. 24 Ia to tomatappa' lako Almaseh wa'ding dipasangrapang batang kale-Na. Jaji, maparri' to batang kaleku' tee too susi Almaseh maparri' tonna anu', nasaba' jamanku' mbalii to tomatappa'. Iamo joo kumasannang, ke maparri'na' sanga kubalii kamu'. Na ia tee kamaparrisanku' la ngganna'i sininna kamaparrisan to la naperasai tomatappa' lako Almaseh. 25 Menjajina' tompangjaman tomatappa' tonna pabarakkannina' Puang Allataala jaman mpangpeissenanni lako kamu' bangsa tangngia to-Yahudi to kadan-Na Puang Allataala, 26 iamo joo akkatta-Na to te'da naissenni tau sipamulanna lino, apa ia tee too dipangpeissenanmo lako umma'-Na Puang Allataala. 27 Madoangngi Puang Allataala mpangpekitanni lako sininna umma'-Na to melona sola mala'bihna joo akkatta-Na lako kamu' bangsa tangngia to-Yahudi kumua, natorro too Almaseh lan kalemi, na iamo buttinna kumua la turu' toda kamu' mperasai kamala'biran-Na Puang Allataala jao suruga. 28 Karebannamora Almaseh to kipangpeissenan lako sininna tau. Kipake sininna kapaissenanki' mpakainga' sola nnajahhii, dikua anna mesa'-mesa' tau wa'ding kipangngolo lako Puang Allataala susi to tomasaranian, sanga memmesa'mi sola Almaseh. 29 Iara joo kupengkulle-kullei mpugaukki, mpake sininna kuasa to nabenna' Almaseh to mangjama lan kaleku'.

Kolose 2

1 Madoangna' ke miissenni kumua kupangjaman tongan kamu' la mpugaukki to mipumelona, sola tomatappa' jio kota Laodikia na kota laen, moiraka na te'dapa tasitammu. 2 Kupugaukki tee ammipada-pada mawatang sola ngasan ke memmesa' penawamo kamu' nasaba' sipakamoja' kamu', ammipahang tonganni akkatta-Na Puang Allataala to jolona tangnaissen tau, battuananna miissenmo to Almaseh. 3 Nasaba' Almasehra mpamanassai to sininna kapaissenan-Na sola kamaccan-Na Puang Allataala. 4 Kupauan kamu' tee kumua danggi' naden tau mpalao sala kamu', to nnanggai'-gai' bangra mpangkadai melo kamu'. 5 Moi tapada mambela, apa ia to penawangku' torro lan tangnga-tangngami. Na liwa'na' mario ssa'dingngi kumua mesa' penawa kamu' na mawatang too to kamatapparanmi lako Almaseh. 6 Mitarimamo to Puang Isa Almaseh kumua iamo Puangmi. Iamo joo ia to panggaukanmi la situru' panggaukanna to tompupuangngi to Almaseh. 7 La tatta' kamu' memmesa' sola Almaseh, mirannuanni. La samatappa'-tappa'na toomo kamu' lako Almaseh, susi to mangka diajaran kamu'. La tuli mangkurru sumanga' too kamu' lako Almaseh. 8 Majaga kamu', danggi' naden tau mpalao sala kamu' nnajahhi kamu' kapaissenan tolino ammimengkaunan pole'. Te'da bua'na joo kapaissenan tolino, na te'da too napole jio mai Almaseh, apa pole jio mai tomakuasa ba'tu tomangparenta jao langi' to ngkuasai lino na pangngajaran disimanahhi jio mai tojolota'. 9 La mikanassai kumua, sininna to apa den jio Puang Allataala, den toda jio Almaseh, 10 na te'da kakuranganmi, sanga ia to sipa'-Na sola kuasan-Na Puang Allataala miputawa too, nasaba' memmesa'mo kamu' sola Almaseh. Ia to Almaseh ngkuasai sininna tomakuasa ba'tu tomangparenta. 11 Wa'ding dipau kumua mangkamo kamu' disunna', nasaba' memmesa' penawamo kamu' sola Almaseh. Te'da nasunna' kamu' tau, apa iara to penawammi nasunna' Almaseh. Battuananna mangkami Almaseh lla'paran kamu' jio mai sipa' jolomi. 12 Nasaba' ia tommidijio', susi kamu' tomate, midilamun sola Almaseh ammidipatuo pole' too sola Almaseh, nasaba' matappa' kamu' lako kuasan-Na Puang Allataala to mangka mpatuo pole' Almaseh jio mai kamatean. 13 Ia tonna jolona susimo kamu' tomate, te'da miampui katuoan baru jio mai Puang Allataala, nasaba' madosa kamu', na te'da midisunna' situru' atoran agama to-Yahudi. Apa ia tee too napatuomo kamu' Puang Allataala sola Almaseh. Nadampanganki' moi nabuda dosata'. 14 Nata'dei Puang Allataala to sura' dinii nnuki'i to sininna panggaukanta' to ntengkai pakkaeloran-Na to dipake mparapa'ki'. Napugaukki susi joo, nasaba' kamatean-Na Almaseh jao kaju sitamben. 15 Nataloi Almaseh jao kaju sitamben to sininna tomakuasa ba'tu tomangparenta jao langi' anna te'damo nakullei mangpanggaukan. Napugaukki Puang Allataala susi joo nanii mpakasiri'i to tomakuasa ba'tu tomangparenta jao langi' anna pasusii to toditalo lumingka jio boko'-Na Almaseh na jolo to Almaseh susi topatalo. 16 Iamo joo danggi' naden tau mpasala kamu', sanga te'da mituru' pemali kumande ba'tu nniso', ba'tu atoran allo lompona agama, pangramean bulan mane' ollong ba'tu Allo Katorroan. 17 Ia joo atoran susiri bajo-bajo to diben la mpamanassai to kameloan la ratu, na Almasehmo to buttinna! 18 Danggi' mieloran kalemi dipasala ke te'da mituru' pangngajaranna tuu lako tau. Naanggai' ssessa kalena, na ssompa malaeka', denmo nakita pengkita. Ia to pikkirisanna to te'da bua'na mpumemmatampoi tuu lako tau, 19 anna te'da naturu' Almaseh to disanga ulu. Ia to tomatappa' wa'ding dipasangrapang mangrupa-rupa lesoan batang kale-Na Almaseh na ia to Almaseh dipasangrapang ulunna joo kale. Jaji, ia to Almaseh nnampai joo kale anna te'da natiseran anna saloboh-lobohna situru' pakkaeloran-Na Puang Allataala. 20 Wa'ding dipau kumua mangkamo kamu' mate sola Almaseh, battuananna dila'paranmo kamu' jio mai kuasanna sininna tomakuasa ba'tu tomangparenta jao langi' to ngkuasai lino. Ia ke susii joo, ciapari mituru' unapi joo atoran susi to napugauk totangnturu' Puang? 21 "Danggi' kaka'i tee! Danggi' lepa'i joo! Danggi' tumbui tee!" 22 Te'da napumeloi tau joo atoran, nasaba' panggaraga tolinora, na la dicappu'i dikande ba'tu diiso' joo apa dianggai. 23 Nasanga tau kumua melo joo atoran, nasaba' ia to tonturu'i dikita kumua tomangngagama, nasaba' mpamajiongngi kalena sola ssessa kalena, apa sitonganna te'da bua'na, napakeri mpassau penawanna.

Kolose 3

1 Angahhi to apa jao suruga to nanii Almaseh cumadokko mangparenta jio sa'de kanan-Na Puang Allataala, nasaba' wa'ding dipau kumua dipatuo pole'mo kamu' jio mai kamatean sola Almaseh. 2 Battuananna, ia to penawammi la mipatuju lakoi to la miampa' jao suruga, danggi' na apa lan lino mipikkiri'. 3 Wa'ding dipau kumua mangkamo kamu' mate, na ia to katuoan barummi sola Almaseh te'dapa napajan, nasaba' te'dapa napapajanni Puang Allataala. 4 Apa ianna ratu pole'mo to Almaseh, to mben kamu' katuoan baru, iamora joo wattu napajan too to kamala'biran-Na Almaseh ammimala'bih sola. 5 Iamo joo ca'beanni to sininna kamadoangan gaja'mi, susinna manggauk sala, panggaukan laen to tangsipato', nturu' bang pakkaeloran penawa, mangpanggaukan tangmelo na madoang nnassang sininna apa, nasaba' ia to tomangngassang dipapadai tossompa dewata. 6 Ia ngasanmo joo la mparatu kamagallian-Na Puang Allataala lako totangnturu' Puang. 7 Mpugauk toda kamu' panggaukan susi joo tonna jolona, tommituru'pi to kamadoangan gaja'mi. 8 Apa la mica'beanmi tee too to panggaukan susi joo, susinna mabirih, mangpabalah, mpugauk kagajatan, mpau gaja' tau, mangkada carepa. 9 Danggi' misiuraga, nasaba' mangkamo kamu' nca'bean sipa' jolomi sola kamadoangan gaja'mi. 10 Mangkamo kamu' diben katuoan baru. Menjajimo kamu' tau baru to napaden Puang Allataala. Na da'tan bang kamu' dibarui, ammisannissen-issenna Puang Allataala sola ammisasusi-susinna sipa'-Na. 11 Iamo joo te'damo nadipasilaenan to umma'-Na Almaseh. Te'damo nadipasilaenan to-Yunani na to-Yahudi, todisunna' na totangdisunna', bangsa laen na bangsa to tangmessipa', kaunan na tangkaunan, nasaba' pada bang unaki' dipupenjaji tau baru. Almasehra to kaminang parallu na Iamo torro lan kita'sola ngasan. 12 Napakamoja' kamu' Puang Allataala na mangkamo kamu' napilei menjaji tau mesan-Na. Iamo joo la sikamasean kamu' padammi rupa tau, melo penawa, danggi' matampo, mangkada rampa' lako tau, sola sabbara' kamu'. 13 Sisabbarasan kamu' ke denni to sala lako kalemi, ammidampanganni. Susi Puang Allataala mangka ndampangan kamu', susi too to tau laen la midampangan. 14 Ia to kaminang parallu iamo to sipakamoja' kamu', nasaba' ia ke sipakamoja' kamu' la memmesa' tongan to penawammi. 15 Napileimo kamu' Almaseh menjaji susi lesoan batang kale-Na. La sikalino kamu' sola padammi tomatappa'. Eloranni kamasannangan to pole jio mai Almaseh, ngkuasai penawammi. La mangkurru sumanga' too kamu' lako Puang Allataala. 16 La mipallan penawa tarruhhi to pangngajaran-Na Almaseh ammituru'i. La da'tan bang kamu' siajaran misipakainga' too mpake sininna kapaissenanmi. La macanning atimmi mangkurru sumanga' lako Puang Allataala mimakkelong Zabur, kelong pangpujian ba'tu kelong laen. 17 Moi apa mipugauk ba'tu mipau, ia to panggaukanmi la situru' panggaukanna umma'-Na Puang Isa. Mangkurru sumanga' kamu' lako Ambe' Puang Allataala, nasaba' apa to napugauk Puang Isa lako kalemi. 18 Ee, kamu' to baine! Menturu' kamu' lako muanemi, sanga iamo la napugauk tonturu' Puang. 19 Ee, kamu' to muane! Pakamoja'i to bainemi. Danggi' mipasusii to todisua-sua bangra lan bolami. 20 Ee, kamu' to anak! La tuli mangpesa'ding kamu' lako tomatuammi, nasaba' iamo nakabudai Puang Allataala. 21 Ee, kamu' to ambe'! Danggi' mipa'dikkii to penawanna anakkami anna danggi' naka'tu rannu. 22 Ee, kamu' to kaunan! Turu'i to sininna parentana puangmi lan tee lino. Danggi' na ia manda ke nakita kamu' mipemasannangngii to penawanna. Apa la mituru' tonganni to parentana, ammikasiri'i susi ngkasiri' Puang Allataala. 23 Ianna den jaman nasuan kamu', la masumanga' kamu' njamai, susi ke Puang Allataala mipangjaman na tangngia tolino manda. 24 Ingaranni kumua la miampa' pahalami jio mai Puang, susi to mangka nabasse lako umma'-Na. Puangmi to Almaseh na Iamo mipangjaman. 25 Ia to tompugauk kasalan la dipabalahhi, nasaba' te'da tau napasilaenan Puang Allataala ke mangsessai.

Kolose 4

1 Ee, kamu' to puang! La maruruh kamu' lako kaunanmi, danggi' mipasilaenanni. Ingaranni kumua te'da na kamu' manda to la dipekapuangngi, apa den toda Puangmi jao suruga. 2 Danggi' mipajaii massambajang lako Puang Allataala. Na ia ke massambajang kamu' mangkurru sumanga' too kamu'. 3 Passambajangankan, anna benkan wattu Puang Allataala mpangpeissenan akkatta-Na, to jolona tangnaissenpa tau, to napugaukmo Almaseh. Na iamora joo kuditarungku. 4 Passambajanganna', angkukullei mpangpeissenanni anna pahangngi tau, nasaba' iamora jamanku'. 5 La macca kamu' ke sola kamu' totangnturu' Puang. Na la mipake to wattu diben kamu' mpangpeissenanni to karebanna Almaseh umbo-umbo minii. 6 Ia ammimangkada la napumasannang to tossa'dingngi. Mebali melo kamu' ke denni tau ngkutanai kamu'. 7 Sininna to apa jaji lako kaleku' la napauan kamu' padanta' tomatappa' Tikhikus to tapakamoja'. Ia to Tikhikus sangpangjamanku', to tatta' mpangjaman Puang Allataala. 8 Kusuai male mati' la mpauan ngasan kamu' kumua matumba-tumba unakan anna pakatana kamu'. 9 Ia to padanta' tomatappa' Onesimus la male toda mati'. To-Kolosei, to tatta' matappa' na kipakamoja' tongan. Iamora joo sola duai la mpauan kamu' kumua matumba-tumba unakan. 10 Sallangna mati' Aristarkhus, to kusolan ditarungku. Sallangna toda Markus, sampu pissenna Barnabas. Susi to kuuki' jolo, la mitarima melo ke malei mati'. 11 Sallangna mati' Yesua, to disanga toda Yustus. Ia mandara tee tau sola tallu jio mai to-Yahudi, to matappa'mo lako Puang, kusolan mpangjaman Puang Allataala. Na iamora mpamasumanga'na'. 12 Sallangna Epafras mati', mesa' to-Kolose, pangjama-Na Puang Isa Almaseh. Te'da napajaii mpellao doangan kamu' sola ngasan, dikua ammisamawatang-watangnamo susi mesa' tomasaranian, ammituli nturu'i to pakkaeloran-Na Puang Allataala. 13 Mangka aku' kukita liwa' mattongan-tongan mpangjaman kamu' sola to-Laodikia na to-Hierapolis. 14 Padanta' tomatappa' dottoro' Lukas, to tapakamoja', ngkiring sallangna mati', susi toda Demas. 15 Paratuankan sallangki' lako tomatappa' jio kota Laodikia. Sallangki' lako Nimfa sola jamaa to sirempun jio bolana. 16 Ia ammimangka mbacai tee sura'ku', la miben todai jamaa jio kota Laodikia nabacai. Susi too to sura'ku' lako to-Laodikia la mibaca tooi ke nakiringan kamu'. 17 Pauanni Arkhipus anna jama melo jamanna to napabarakkananni Puang Allataala. 18 Sallangku' Paulus. Aku' nnuki'i tee passallang. Danggi' mikalupaii kumua lan unapa' pangtarungkuan! Dennaa upa' nabarakka'i kamu' Puang Allataala. Padamo jolo' too. Sallangki' mati', Paulus.

1 Tesalonika 1

1 Ee, tomala'bihku', tomatappa' lako Ambe' Puang Allataala sola Puang Isa Almaseh! Aku' Paulus nnuki'i tee sura' sola Silas na Timotius lako kamu' jamaa jio kota Tesalonika. Dennaa upa' nabarakka'i kamu' Puang Allataala, naben kamu' kamasannangan. 2 Ia ke kipaui sangammi lan passambajangki', tuli mangkurru sumanga'kan lako Puang Allataala, nasaba' kamu' sola ngasan. 3 Mangkurru sumanga'kan sanga kiingaran tarruhhi jio olo-Na Ambe'ta' Puang Allataala to panggaukan melo mipugauk nasaba' kamatapparanmi. Kiingaran too to pangtulungmi lako padammi rupa tau nasaba' pangpakamoja'mi. Kiingaran kumua da'tan kamu' mawatang nnoloi mangrupa-rupa pecoba nasaba' mangrannuan kamu' lako Puangta' Puang Isa Almaseh. 4 Ee, tomala'bihku' to napakamoja' Puang Allataala! Mangkamo kamu' napilei Puang menjaji umma'-Na. 5 Kiissen kumua napileimo kamu', nasaba' ia tongkipangpeissenan Kareba Kasalamatan lako kamu', tangngia kumua kada manda, apa kuasan-Na Roh Allataala ntulungkan mpugauk tanda mejangngaran. Na liwa' kikatappa'i to katongananna Kareba Kasalamatan. Miissen to apa kipugauk tontasola unapa, kiwa'ding ntulung kamu', to napumelona katuoanmi. 6 Kiissen kumua napileimo kamu' Puang Allataala, nasaba' mialamo palelean mata to Puang Isa, miala toomokan palelean mata. Jaji, moi miliwa' dipakario-rio, nasaba' mitarimai to Kareba Kasalamatan, da'tan kamu' mperasai to kamarioan pole jio mai Roh Allataala. 7 Na iamo joo, mimenjaji palelean mata lako sininna tomatappa' lako Puang Isa jio tana Makedonia na tana Akhaya. 8 Nasaba' pole jio mai kamu' na ia to karebanna Puang Isa kaissenan tarruh lako tana Makedonia na Akhaya. Na te'da najio manda, apa umbo-umbo nanii silelemo male to kareba kumua matappa'mo kamu' lako Puang Allataala. Jaji te'damo kiparallu mpaui to kamatapparanmi, 9 sanga nacurita ngasan tau kumua mitarima melokan tongkimale jolo mati'. Nacurita too kumua miboko'imo to dewata, mimassompa lako manda Puang Allataala. Iamo Puang Allataala tongan to tuo tarruh. 10 Nacurita toopa kumua mitajan tongan to karatuan-Na pole' Anak Allataala jao mai suruga, iamo to Puang Isa to mangka napatuo pole' Puang Allataala jio mai kamatean. Puang Isamo la mpasalama'ki' jio mai pangsessa-Na Puang Allataala keanu'.

1 Tesalonika 2

1 Ee, tomala'bihku' sola ngasan! Miissen kumua te'da natangden bua'na to karatuanki' iti'. 2 Miissen kumua ia tonna te'dapa kimale mati' kota Tesalonika, mangkakan dipakario-rio sola dipakasiri' jio kota Filipi. Susi too iti' budamo to nnewakan, apa kabaranian pole jio mai Puang Allataala, angkiwa'ding mpangpeissenan Kareba Kasalamatan jio mai Puang Allataala lako kamu'. 3 Ia to kipangpeissenan lako kamu' tangngia pangnguraga. Te'da too tangngah gaja' lan penawangki', te'da kimadoang ngkalasii kamu'. 4 Te'da lalo ia! Tangngia kipau to la napusannang tolino, apa iara kipau to napusannang-Na Puang Allataala to nnissen penawangki'. Nasaba' nasangamokan Puang Allataala sipato' mpangpeissenanni joo Kareba Kasalamatan. 5 Miissen kumua tangngiakan tomassede, iarika to mbunianan kamu' tangngah gaja' kumua den lan penawangki' madoang sumaro. Puang Allataala ngkitakan! 6 Te'da too kami' na ia kiangah to la napuji tau, la jio mai kalemi, la jioraka mai tolaen. 7 Sitonganna te'da kisala ke kipeta'dai kamu' apa, sanga rasulu'-Nakan Almaseh. Apa mangpakamoja'kan tongkilan tangnga-tangngami, susi mesa' indo to mpemajampangngi anakkana. 8 Tangngia to kumua sadia mandakan mpangpeissenanni to Kareba Kasalamatan jio mai Puang Allataala, apa moi sunga'ki' sadia tookan mpangbenni, nasaba' liwa'kan mpakamoja' kamu'. 9 Miingaran unapa, umbo kikua mangngangah. Mangjama allo bongi tongankan, dikua anna danggi' kisussai kamu' tongkipangpeissenan Kareba Kasalamatan jio mai Puang Allataala lako kamu'. 10 Kamu' ngkitakan sola Puang Allataala kumua te'da salaki', tomelo penawangki' na te'da caccana to panggaukanki' lako kamu' to tomatappa' lako Almaseh. 11 Miissen kumua ia to panggaukanki' lako kamu' sola ngasan, susi mesa' ambe' njampang anakkana. 12 Kipangngingaran kamu', kipamasumanga' kamu', angkimeta'da lako kalemi na ia to panggaukanmi la susi sipato'na umma'-Na Puang Allataala. Nasaba' Puang Allataalamo mpilei kamu' menjaji umma'-Na lan kaparentan-Na ammiwa'ding mperasai kamala'biran-Na. 13 Denpa mesa' napusaba', angkituli mangkurru sumanga' lako Puang Allataala. Iamo to kumua, ia tongkipangpeissenanni lako kamu' to kareba jio mai Puang Allataala, mipesa'dingngii mitarimai joo kareba, tangngia kumua pole jio mai tolino, apa mikatappa'i kumua pole jio mai Puang Allataala. Tongan kumua kadan-Na Puang Allataala joo kareba, to da'tan mangjama lan penawammi to tomatappa' lako Puang Isa. 14 Ee, tomala'bihku' sola ngasan! Kiissen kumua mitarimamo to kadan-Na Puang Allataala, sanga ia to apa jaji lako jamaa-Na Puang Allataala jio tana Yudea, to matappa' lako Puang Isa Almaseh, ia toomo jaji lako kamu'. Padammi bang una to-Tesalonika mpa'dikki kamu'. Susi toomi to jamaa jio tana Yudea napa'dikkii too padanna to-Yahudi. 15 Ia to to-Yahudi to mangka mbuno buda nabi tonna anu', ia too to mangka mbuno Puang Isa, ia toomo mpakario-riokan. Napugauk tarruh to panggaukan te'da napusannangngi Puang Allataala, na nnewa buda tau. 16 Kannori naanggaikan mpangpeissenan karebanna Puang Isa lako bangsa tangngia to-Yahudi anna wa'ding dipasalama'. Susimi joo sakerangngan-rangnganna to dosana takkaliwa'mo budanna. Na katampakanna la nasessai Puang Allataala. 17 Ee, tomala'bihku' sola ngasan! Gaja mali'kan moi cingga'tu'riki' sisarak. Moi tapada mambela nang sikandoppi'ki' lan penawa. Iamo joo kipengkulle-kullei la ssikitan pole' kamu'. 18 Pattujungki' la male pole'kan mati' na kupengkulle-kullei te'da napissen penduanra, apa tuli nahalangngikan Ballisi'. 19 Madoangkan ssikitan kamu' nasaba' sitonganna kamu'ra kipuparannu sola kipumario. Ia ke ratumi Puangta' Puang Isa keanu' antamangngolo, masannangkan ngkita assele' jamanki'. 20 Kamu'mo kipumala'bih sola kipumario!

1 Tesalonika 3

1 Liwa'mokan mamali'. Iamo joo kisanga la'bi melo ke torro bangmokan sola Silas jio kota Atena, 2 angkisuai to padanta' tomatappa' Timotius male mati'. Ia to Timotius sangpangjamanki' nasua Puang Allataala mpangpeissenan karebanna Almaseh. Kisuai male mati' la mpamasumanga' kamu' ammisamatappa'-tappa'na. 3 Susimi joo, danggi' lalo miden mpessakkanni Almaseh moiraka mimaparri'. Miissen kumua ia tee kamaparrisan akkattanamo Puang Allataala lako kalemi. 4 Ia tontasola unapa, kipauan jolomo kamu' kumua la maparri'ki'. Tongan joo kada sanga mangkamo taperasai to parri'. 5 Iamo kusuai to Timotius male mati' sanga gaja doangmo' nnissenni kumua matappa' tarruh unara kamu'ka lako Almaseh. Batana', iamo ke nataloimo kamu' Ballisi' na sininna to jamanki' menjaji te'da bua'na. 6 Apa ia tee polenna mai Timotius mpauankan kareba to kipusannang, kumua da'tan una kamu' matappa' misipakamoja' too. Napauan toomokan kumua tuli miingaran melo unakan. Na mikamali' unapa la ssikitankan, susi kami' mamali' la ssikitan kamu'. 7 Ee, tomala'bihku'! Napamasumanga'kan joo kareba. Moi kimaparri' dipakario-rio, masumanga'kan ssa'dingngi kumua da'tan kamu' matappa'. 8 Ia tee too matana tonganmokan, sanga samatappa'-tappa'mimo lako Puang. 9 Mangkurru sumanga' tongankan lako Puangta' Puang Allataala, nasaba' kamarioan to kiperasai jio olo-Na, sanga kamu'. 10 Meta'da tulung tongankan keallo kebongi lako Puang Allataala, dennaa upa' kiwa'ding unapa mpessikitai pole' kamu' kiajahhi kamu' to apa te'dapa miissenni ammisamatappa'-tappa'na lako Puang Isa. 11 Dennaa upa' natulungkan Ambe'ta' Puang Allataala sola Puangta' Puang Isa angkiwa'ding ssikitan kamu'. 12 Na dennaa upa' mipede' sipakamoja' sola ngasan, mipede' mpakamoja' too sininna tau, susi kami' mpakamoja' kamu'. 13 Na dennaa upa' napamawatangngi Puang penawammi, anna te'da dosami na te'da caccami jio olo-Na Puang Allataala, Ambe'ta', ke ratu pole'i Puangta' Puang Isa sola sininna taun-Na.

1 Tesalonika 4

1 Ee, tomala'bihku' sola ngasan! Mangkamo kamu' kiajahhi matumba sipa'mi anna pusannangngi Puang Allataala. Tongan kumua tuomo kamu' susi joo. Apa ia tee too, kipangngingaran kamu' mpau sangan-Na Puang Isa, ammila'bi mpengkulle-kulleipi tuo susi joo. 2 Nasaba' miissenmo to parenta-Na Puang Isa to mangkamo kiajaran kamu'. 3 Na iara nakadoangngi Puang Allataala kumua mituo susi to sipato'na tau mesan-Na, nadanggi' manggauk sala. 4 Parallu la mipahang kamu' to muane umbo mikua mpugaukki lako balimmi to sipato'na, to napumasannangna Puang Allataala sola tolino. 5 Danggi' mituru'i bang kamadoangan batang kale susi to napugauk totangnnissenpa Puang Allataala. 6 Jaji, la lako baine, la lako muane kupakainga' kamu', danggi' mangpanggaukan sala. Danggi' mikalasii padammi tomatappa'. Mangkamo kamu' kupakainga' rampa' kumua ia to tompugaukki susi joo la nasessa Puang. 7 Te'da napileiki' Puang Allataala kumua la mangpanggaukan salaki', apa iara nabenki' Roh Allataala dikua antapugaukki to napusannang-Na. Ia to tocia' ntarimai tee pangngajah tangngia tolino nakacia', apa Puang Allataalara. 9 Te'damo kiparallu nnuki'i umbo la mikua mpakamoja' padammi tomatappa', sanga mangkamo kamu' naajahhi Puang Allataala. 10 Mipakamoja'mo to sininna padammi tomatappa' jio lili'na tana Makedonia. Moi nasusi joo liwa'pa kipeta'da lako kamu' sola ngasan, ammila'bi mpengkulle-kulleipi sipakamoja'. 11 Pengkulle-kulleii ammituo rapa', nadanggi' miurusu'i to jamanna tolaen. Angahhi to kaparalluanmi susi to mangka kipangparentan lako kamu' jolona. 12 Ia ke susimi joo to sipa'mi, te'damo mimangpenanda bang lako tolaen. Na ia to totangmatappa' lako Puang Isa la ngkasiri' kamu'. 13 Ee, tomala'bihku'! Parallu miissen kumua apa to la jaji lako padanta' tomatappa' to jolomo lako, dikua nate'da namasse penawammi susi totangmatappa', to te'da namangrannuan lako Puang Allataala. 14 Takatappa'i kumua mangka mate to Puang Isa apa tuo pole'i. Iamo joo la takatappa'i too kumua la napatuo pole' todai Puang Allataala to sininna tomatappa' to jolomo lako, anna tuo sola Puang Isa. 15 La kipapahangngi rampa' kamu' tee pangngajaran-Na Puang Isa kumua ia ke ratu pole'i keanu', ia to kita' to tuopa te'da talanjoloii to tojolomo lako sitammu Puang Isa. 16 Ia ke mellaomi Puang Isa jao mai suruga disa'ding to gamaranna puanggawana malaeka' gaja tonggo na dipannoni too to tarompe'-Na Puang Allataala. Iamo joo menjaji tanda na ia to tomatappa' lako Almaseh to jolomo lako la dipatuo jolo'. 17 Mangkai joo too, kita' to tuopa diangka'miki' sola joo tomangka dipatuo pole' mentama saleu' tasitammu Puang Isa jao langi', antatorro tarruh sola. 18 Jaji ia tee kada la mipake sipamawatang.

1 Tesalonika 5

1 Ee, tomala'bihku' sola ngasan! Te'damo kiparallu nnukiran kamu' to kumua, umbo wattu nalaratu pole' Puang Isa. 2 Miissen melomo kumua ia to wattu karatuan-Na pole' Puang Isa susi karatuanna taboko ratu bongi te'da nadikalannai. 3 Den wattu nalamangkada to tau kumua, "Masannangmiki', te'damo tamalaja'". Na iamora joo wattu nata'pa mperasai to pangsessa, na te'da nakullei palai. Ia joo pangsessa te'da nadikalannai, susi wattunna mesa' baine mangnguriwa' la keanak. 4 Ee, tomala'bihku'! Ia to kamu' te'da nasusi sipa'mi to totangnnissen Puang Allataala. Jaji te'damo milasabakan ke ratui Puang Isa, susi tau sabakan ke denni taboko ratu. 5 Tuo kamu' nturu' pakkaeloran-Na Puang Allataala. Tangngiaki' tomanggauk gaja'. 6 Jaji la majagaki' antata'tan kaleta'. Danggi' tatangmangngingaran susi tomamma' ke bongii. 7 Nasaba' ia ke bongi wattu kamammasanna tau, na wattu bongi too nanii malango tau. 8 Apa ia to kita' tee, tonturu'ki' pakkaeloran-Na Puang Allataala. Iamo joo la nta'tanki' kaleta'. Paralluki' da'tan matappa' lako Puang Allataala, tapakamoja' padanta' rupa tau, anna den pellendunganta' susi surudadu mpake baju bassi. Takatappa'i tooi kumua la napasalama'ki' Puang Allataala, anna den pellendunganta' susi surudadu mpake topi bassi. 9 Te'da napileiki' Puang Allataala la nasessa, apa la napasalama'ki' Puangta' Puang Isa Almaseh. 10 Mangkami mate ssulleki', dikua ianna ratu pole' la tuoki' sola, la lako kita' to tuo unapa, la lako to tojolomo lako. 11 Iamo joo, la sipamasumanga'mo kamu' misipamawatang too, susi to mipugauk tee too. 12 Ee, tomala'bihku' sola ngasan! Kipeta'da tongan ammikasiri'i to pekaamberan lan jamaa. Iamo to tomangpatuju nnajahhi kamu' nturu' pakkaeloran-Na Puang Allataala. 13 Parallu mikasiri' tongan sola mipakamoja' sanga ia joo jamanna. Tuli la sipamasannang kamu' sola ngasan. 14 Ee, tomala'bihku' sola ngasan! Meta'da tookan ammipangkadai rampa'i to tomakuttu mangjama. Pamasumanga'i to tomalaja'. Tulungngi to toparallu ditulung. Sabbara' kamu' lako sininna tau. 15 Jagaii na danggi' naden tau mangpabalahhi panggaukan gaja' na gaja'. Mipengkulle-kulleii ammituli mpugauk kameloan lako padammi tomatappa' na lako sininna tau. 16 La da'tan bang kamu' mario. 17 Mituli massambajang. 18 Mida'tan bang mangkurru sumanga' lako Puang Allataala moi apa jaji lako kalemi, nasaba' iamo nakadoangngi jio mai kalemi to tomesa' penawa sola Puang Isa Almaseh. 19 Danggi' mihalangngii to jaman-Na Roh Allataala. 20 Danggi' too micapa'i to kada napasan Roh Allataala, 21 apa la mipikkiri' meloi joo kada. Ianna tongan kumua pepasan jio mai Roh Allataala, pugaukki. 22 Danggi' mpugauk kagajatan. 23 Dennaa upa' na Puang Allataala, to mpangbengan kamasannangan, mpupenjaji kamu' tau mesan-Na, na dennaa upa' na Ia njagai to penawammi, tangngahmi, na panggaukanmi nadanggi' mikasalan nate'da caccami, ke ratu pole'i Puangta' Puang Isa Almaseh. 24 Napileimo kamu' Puang Allataala. Iamo joo najagai kamu' sanga tatta' napugauk to basse-Na. 25 Ee, tomala'bihku' sola ngasan. Pellao doangankan! 26 Sallangki' lako sininna tomatappa' lako Puang Isa iti'. 27 Kuasan-Na Puang kumeta'da mati' ammibacanni sininna tomatappa' tee sura'. 28 Dennaa upa' nabarakka'i kamu' Puangta' Puang Isa Almaseh. Padamo jolo' too. Sallangki' mati', Paulus

2 Tesalonika 1

1 Ee, tomala'bihku', tomatappa' lako Ambe'ta' Puang Allataala sola Puang Isa Almaseh! Aku' Paulus nnuki'i tee sura' sola Silas na Timotius lako kamu' jamaa jio kota Tesalonika. 2 Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 3 Ee, tomala'bihku'! Tuli mangkurru sumanga'kan lako Puang Allataala nasaba' kamu'. Ia tee sipato' ke kipugaukki nasaba' samatappa'-tappa'mimo lako Puang Isa Almaseh mipede' sipakamoja' too. 4 Iamo joo, angkituli mpau kamu' umbo-umbo kinii male sitammu jamaa-Na Puang Allataala. Pa'jakkan ncuritai, matumba to kasabbarasanmi, ammida'tan matappa' lako Puang Isa Almaseh moi midipakario-rio sola dipa'dikki. 5 Manassamo lako kita' to kamarurusan-Na Puang Allataala rra'tah kara-karana tolino. Mapa'dikmo kamu', nasaba' nturu' kamu' pakkaeloran-Na Puang Allataala, apa ia toomo joo midisanga sipato' menjaji taun-Na lan kaparentan-Na. 6 Maruruh to Puang Allataala, iamo joo nalampabalahhii panggaukanna to tompa'dikki kamu'. 7 Na lako kamu' tomapa'dik susi toomi kami', la naben Puang Allataala kamasannangan ke ratu pole'i to Puang Isa mellao jao mai suruga mpangpekitan kalena sola buda malaeka'-Na to napakuasa, 8 na den too api manglaka-laka. La ratu pole'i to Puang Isa na ssessai to tote'da nakasiri' Puang Allataala sola tocia' ntarimai to karebanna Puangta' Puang Isa. 9 Ia tuu lako tau la disessa te'da cappa'na, diula'i jio mai olo-Na Puang, na te'da naperasaii to kuasa mala'bih-Na. 10 La jaji ngasan joo ke ratu pole'mi Puang Isa. Ia joo wattu ia to Puang Isa la napakala'bih sola nakasiri' umma'-Na, iamo to sininna to tongkatappa'ii. Ia joo wattu la mipakala'bih tooi, nasaba' mikatappa'imo to kareba kipangpeissenan. 11 Napileimo kamu' Puangta' Puang Allataala menjaji umma'-Na. Iamo joo kituli mpassambajangan kamu' dennaa upa' napupenjaji kamu' tosipato' disanga umma'-Na. Kipeta'da too kumua na kuasan-Na ammisamadoang-doangna mpugauk sininna panggaukan melo ammikullei mmangkaii sininna jamanmi to mijama nasaba' kamatapparanmi. 12 Ia ke susimi joo la dipakala'bihmi to Puangta' Puang Isa, nasaba' panggaukanmi, na midipakala'bih toda, sanga kameloan penawan-Na Puangta' Puang Allataala na Puang Isa Almaseh.

2 Tesalonika 2

1 Ee, tomala'bihku'! Sitarruhna la kipangngingaran kamu' kumua apara la jaji ke ratu pole'mi Puangta' Puang Isa Almaseh la rrempunki' tatorro sola. Misa'dingmo to kareba napau tau kumua wattunnamo ratu pole' Puang Isa. Mbai den tau ssangai kumua ia joo kareba napasanmo Roh Allataala ba'tu pole jiorika mai pangngajaranki' iarika kiuki'i lan sura'ki'. Meta'da lalokan lako kamu' sola ngasan danggi' mimadoi' bang selang natangrapa' penawammi. Nasaba' tangtongan joo kareba. 3 Moi apa nakua tau, danggi' lalo mimatappa', sanga tomangnguragara. Nasaba' den dua kara-kara la jaji namane' ndete'i wattu karatuan-Na pole' Puang Isa. Mangpempissenna buda tau la mpessakkanni Puang Isa. Na mangpenduanna den mesa' tau la mpangpekitan kalena, iamo to Togaja' to napattantumo Puang Allataala la mentama naraka. 4 Ia joo Togaja' la nnewa Puang Allataala. Gaja burru' ia, sanga nakita majiong ngasan to nasompa tolino. Ia mandamo ssanga tau kalena, anna male cumadokko tama Bola Puang Allataala mpangpeissenan kalena kumua "Aku'mo Puang Allataala". 5 Ingaranni kumua mangka ngasanmo kamu' kupauan tee tontaiti' unapa sola. 6 Ia tee wattu te'dapa napapajan kalena joo Togaja', nasaba' denpa hhalangngii. Na miissenmo to apa hhalangngii. Ia ke nadete'mi to wattu dipattantumo, mane'ri mpapajan kalena. 7 Sitonganna ia to kuasa kagajatan to ngkuasaii joo Togaja' mangjama buni bang lan lino tee too. Ia ke dialaimi to hhalangngii joo Togaja', 8 mane'ri pajan. Apa ia ke ratu pole'mi Puang Isa, la nasuei joo Togaja' mpake kuasa mala'bih-Na arannai mate. 9 Ia joo Togaja' la napaollong Ballisi', na mpaden mangrupa-rupa to apa makalaen-laen na mejangngaran, apa sininna joo te'da ngasan natongan. 10 La mpake mangrupa-rupa akkalan gaja' mpalao sala toladisessa. La disessa tuu lako tau, nasaba' te'da nakabudai nacia' ntarimai to pangngajaran tongan jio mai Puang Allataala to mpasalama'i. 11 Iamo joo naparatuanni Puang Allataala pangtangngaran sala tuu lako tau, dikua nakatappa'i to kada tangtongan napau joo Togaja'. 12 Napugaukki Puang Allataala susi joo, dikua na sininna tongkabudai mpugauk dosa, na cia' ngkatappa'i pangngajaran tongan, la disessa. 13 Ee, tomala'bihku' to napakamoja' Puang Isa! Tuli mangkurru sumanga'kan lako Puang Allataala nasaba' te'dapa nadipaden tee lino napilei jolomo kamu' Puang Allataala la napasalama'. Dipasalama' kamu', nasaba' kuasan-Na Roh Allataala mpilei kamu', napupenjaji kamu' tau mesan-Na, mikatappa'i tooi to pangngajaran tongan jio mai Puang Allataala. 14 Ia to Kareba Kasalamatan to kipangpeissenan iamo carana Puang Allataala mpupenjaji kamu' umma'-Na, ammiwa'ding mperasai kamala'biran-Na Puangta' Puang Isa Almaseh. 15 Ee, tomala'bihku'! Iamo joo la da'tan kamu' ngkatappa'ii to pangngajaran mangkamo kiajaran kamu', la ia to kipaunna, la ia to kiuki'na. 16 Napakamoja'ki' Puangta' Puang Isa Almaseh sola Ambe'ta' Puang Allataala. Napamasumanga' tarruh to penawanta', naben tooki' kasabbarasan ntajanni to melona, nasaba' kameloan penawan-Na. 17 Iamo joo dennaa upa' napamasumanga' tarruh kamu' mpugaukki to sininna kameloan, la panggaukanmi, la buangan kadammi.

2 Tesalonika 3

1 Ee, tomala'bihku' sola ngasan! Sitarruhna, kipeta'dai mipassambajangan tookan, anna sabuda-budanna tau ssa'dingngi to karebanna Puang Isa natarima meloi susi to jaji lako kamu' tonna jolona. 2 La mipassambajangan tookan anna ampaikan Puang Allataala jio mai tomasussuk na togaja', nasaba' te'da na ia ngasan tau to ssa'dingngi tee karebanna Puang Isa la ngkatappa'ii. 3 Da'tan kamu' naampai Puang Allataala. La napamawatang to penawammi naampai kamu' jio mai Togaja'. 4 Napamanassanmokan Puang kumua sininna pangngajah to mangka kipauan kamu' mipugauk tonganmo, na la mipugauk tarruh bang. 5 Dennaa upa' napatuju kamu' Puang ammiissen tonganni kumua napakamoja'mo kamu' Puang Allataala, na Puang Isa Almaseh ntulung kamu' ammimawatang ke naratui kamu' parri'. 6 Ee, tomala'bihku' sola ngasan! Nakita Puang Isa Almaseh, angkipangngingaran kamu' danggi' misiama' bang tuu mati' padanta' tomatappa' to makuttu mangjama, sola to te'da natarimai to apa mangka kipangpangngajaran. 7 Miissen kumua te'da kimakuttu tontasola unapa. Jaji la mialakan palelean mata. 8 Te'da kikande punala bangngi to kandena tau. Kipengkaukui mangjama allo bongi, kikua danggi' naden kamu' kisussai. 9 Sitonganna te'da kisala ke meta'da tulungkan lako kamu', apa te'da kipugaukki joo. Mangjamakan kikua ammialakan palelean mata. 10 Ia tontasola unapa, kipauan kamu' tee parenta kumua, ia to tocia' mangjama danggi'mo ia nakumande. 11 Iamo kimangkada susi tee, nasaba' kisa'ding kumua den ba'tu pira-pira tau lan tangnga-tangngami makuttu mangjama, apa male bangri solle' nnurusu' jamanna tau laen. 12 Nakita Puang Isa Almaseh, angkipangngingaranni kumua nada'tan tuo melo, angkisua tooi namangjama nnangahhi to kaparalluanna. 13 Apa kamu' tomala'bihku', danggi' mimarosso mpugauk kameloan. 14 Ianna den tau cia' ntarimai to kada kiuki' lan tee sura', la misiissenni joo tau, danggi' misiama', anna masiri'. 15 Apa danggi' mipasusii ewalimmi. Pangngingaran melo bangngi susi sipato'na padanta' tomatappa'. 16 Pole jio mai Puang Isa to kamasannanganta'. Dennaa upa' na Puang Isa da'tan mben kamu' sininna kamasannangan, naampai tarruh kamu' sola ngasan. 17 Sallangku' Paulus. Aku' nnuki'i tee passallang. Sininna to sura'ku' kupanii ngasan passallang tandana sura'ku'. 18 Dennaa upa' na Puangta' Puang Isa Almaseh mbarakka'i kamu' sola ngasan. Padamo jolo' too. Sallangki' mati', Paulus

1 Timotius 1

1 Ee, Timotius, to kupuanak, sanga matappa'moko lako Puang Isa nasaba' pangngajahku'! Aku' Paulus ngkiringanko tee sura'. Pakkaeloran-Na Puang Allataala, Tomangpasalama'ta' kumenjaji rasulu'-Na Puang Isa Almaseh to tarannuan. Dennaa upa' nabarakka'iko nakamasei tooko Ambe' Puang Allataala sola Puangta' Puang Isa Almaseh nabenko kamasannangan. 3 Susi to mangka kupauanko tongkulamale lako propinsi Makedonia kupangngingaranko kumua madoangna' ke torro tarruhko jio kota Efesus ammuanggaii to tau jio to mangpangngajah sala na 4 mmatean too wattunna lako curita tojolo to tangkebattuan na nunnungan nene to te'da cappa'na. Nasaba' ia ngasan joo mpaden mandari kasipekkan na hhalangngi tau nnissen akkatta-Na Puang Allataala mpasalama' tolino. Tomatappa' manda ngkullei nnissenni joo. 5 Ia to patunna kusuako nnanggaii, dikua namangpenawa melo to tau, nawa'ding nnissenni umbonna to melo ba'tu gaja', namatappa' tongan-tongan lako Puang Allataala, na ia ke susimi joo, wa'dingmi sipakamoja'. 6 Ia to tomangpangngajah sala te'damo nakatappa'i to pangngajaran tongan, namale bangmira ssite'gehhi to apa te'da battuananna. 7 Madoang ngasanni menjaji guru agama, na sitonganna ia una nate'da naissenni to apa napau, ba'tu ia to apa napangpangngajaran to nasangamo tongan. 8 Taissen kumua melo to atoran agama, ke dipangpangngajaranni situru' patunna unamo ia. 9 Parallu diingaran kumua, ia joo atoran dipaden tangngia lako tomelo, apa lakori togaja' iarika totangmangpesa'ding, lako totangnturu' Puang iarika tomadosa, lako totangssompa iarika totangkasiri' Puang, lako tombuno indona iarika ambe'na, na sininna to mbuno padanna rupa tau, 10 lako tomanggauk sala, tosigauk sala padanna muane ba'tu padanna baine, torrampa tau, topangnguraga, sa'bi tangtongan, na lako ia to tompugauk to tangsituru' pangngajaran tongan. 11 Ia joo pangngajaran diuki' lan Kareba Kasalamatan to pole jio mai Puang Allataala to liwa' mala'bih na sipato' dipakala'bih. Ia joo kareba dipabarakkannimo' mpangpeissenanni. 12 Mangkurru sumanga'na' lako Puangta' Puang Isa Almaseh, nasaba' naangga'mo' kumua sipato'mo' naangka' menjaji rasulu'-Na. Iamo nabenna' kapakullean la mpangjamanni, 13 moi kupau gaja'i tonna jolona angkupakario-rioi to tonturu'i. Apa nakamaseina' Puang Allataala, sanga ia joo wattu te'da kuissenni to apa kupugauk, nasaba' te'dapa kumatappa'. 14 Napakabuhhina' kameloan penawan-Na Puangta', to mpupemmatappa'na' lako kale-Na, angkupakamoja' padangku' rupa tau. Ia joo napugauk Puang lako kita' sola ngasan, tontamesa' penawamo sola Puang Isa Almaseh. 15 Tongan na sipato' ditarima tee kada to kumua, "Mentolino to Puang Isa Almaseh la mpasalama' tomadosa", na aku'mo to kaminang madosanna. 16 Apa sitonganna iamora joo nakamaseina' Puang Allataala, dikua napapajanni Puang Isa Almaseh to kasabbarasan-Na lako aku' tee toliwa' buda dosana. Napugaukki Puang Isa susi joo anna buda tau la ngkitai to kasabbarasan-Na lako tomadosa na memmatappa' lako kale-Na na nnampa' katuoan melo te'da cappa'na. 17 Rajai to Puang Allataala to mangparenta te'da cappa'na. Mesa'ri, tangkakitanan na te'da nataloii kamatean. Iamo joo, sipato' Ia dikasiri' na dipakala'bih te'da cappa'na! Amin. 18 Ee, tokupuanak Timotius! Kupabarakkananko mpangngingaran tau, susi to mangka nakua nabi lan jamaa mpauko. Ingaranni joo apa napau nabi, ammuwa'ding ncau'i to tomangpangngajah sala, 19 mutatta' matappa', muissen tooi umbonna to melo ba'tu gaja'. Den tau cia'mo nnissenni umbonna to melo ba'tu gaja', anna te'damo namatappa' lako Puang Isa. 20 Susinna to Himeneus na Aleksander to kusorongmo sola dua lako kuasanna Ballisi', anna penassannii ncapa' Puang Allataala.

1 Timotius 2

1 Kaminang paralluna' mpeta'dai ammimpassambajanganni, mpeta'da doanganni sola mpangkurrusumangasan sininna tau, 2 sininna raja na sininna tomatonggo lako Puang Allataala. Pugaukki susi joo antatuo masannang sola manyaman, na te'da apa hhalangngiki' ssompa Puang Allataala antamessipa' melo too lako padanta' rupa tau. 3 Melo joo, na napumasannang Puang Allataala, Tomangpasalama'ta'. 4 Madoangngi Puang anna dipasalama' ngasan to tau sola nnissen pangngajaran tongan, kumua 5 mesa'ra to Puang Allataala, na mesa' toora tau mpasikalino Puang Allataala na tolino, iamo to Puang Isa Almaseh, 6 to mangka mpangben kalena dipampang la lla'bak ngasan tolino jio mai kuasa dosa. Susimi joo to wattu pura napattantu napabuttii Puang Allataala kumua madoangngi mpasalama' ngasan tau. 7 Na iamo joo naangka'na' Puang Allataala menjaji rasulu' angkudisua male lako sininna bangsa tangngia to-Yahudi la mpangpangngajaranni to kamatapparan tongan. Na tongan tee kupau, te'da kumangnguraga. 8 Ia ke sirempunki' la umbo-umbo tanii, kukadoangngi na ia to muane to massambajang, la nturu' pakkaeloran-Na Puang Allataala, na danggi' naden kamabirisan ba'tu kasisakkan. 9 Ia to baine la mpake pakean sipato'na. Danggi' namassimbolong takkaliwa', ba'tu mpake belo-belo bulawan ba'tu mutiara, ba'tu pakean to masuli' allinna. 10 Sibalikanna panggaukan melora to napake la mbeloi kalena, susi to sipato'na lako baine tomassompa lako Puang Allataala. 11 Ia to baine la kamma' bangri napesa'dingngii to apa dipangpangngajaran. 12 Te'da kutongananni ke denni baine nnajahhi ba'tu mparenta muane, apa la kamma' ngasan bang ia. 13 Nasaba' Adamra to bungahna dipaden, namane' Hawa. 14 Apa pole'pi tangngia Adam, apa bainera to nakalasii ulah, anna memmadosa. 15 Apa moi nasusi joo, salama'i to baine nasaba' mangjajian taui, assalan tatta'i mpangben kalena lako Puang Allataala, mpajiong kalena matappa' lako Puang Isa Almaseh na mpakamoja' padanna rupa tau.

1 Timotius 3

1 Tongan tee kada, "Ia to tomadoang menjaji tonnatoro' jamaa ngkadoangngii pangjaman melo." 2 Ia to tonnatoro' jamaa parallu tomakassing. La mesa'ra bainena, to nta'tan kalena, tomandalan tangngah, messipa' melo. La masannang ke den tau lleppangngii, macca mangngajahhi, 3 danggi' napangngiso' ba'tu passiboboran, apa mabassa, te'da napassite'geran. Te'da napangdoi'. 4 La macca nnurusu' repokkona na mangpesa'ding nakasiri' tooi anakkana. 5 Nasaba' ia ke tangnaissenni nnurusu' repokkona, umbo nakua la nnurusu' jamaa-Na Puang Allataala? 6 Danggi' too na ia tomane' matappa', nasaba' wa'dingngi matampo, anna disessa susi Ballisi'. 7 La nakasiri' too tobuda, nasaba' ia ke te'dai nasusi joo, la napau gaja' tau, anna kuasaii Ballisi'. 8 Ia to tontulung jamaa parallu messipa' melo, te'da namangkada tangtongan, te'da napangngiso', na te'da too napangdoi'. 9 Apa parallu to nnissen umbonna to melo ba'tu gaja', to nturu' pangngajaran kasaranian, to tangkaissenan tonna anu' apa ia tee too napangpeissenanmi Puang Allataala. 10 La diparessa jolo' joo tau, ia namanassa kumua tomakassing, mane'ri wa'ding mangjama ntulung jamaa. 11 Ia too ke denni baine menjaji tomangjama ntulung jamaa la tomelo toopi, te'da nawa'ding mpau gaja' padanna rupa tau, apa nta'tan kalena na maruruh lan sininna passalan. 12 Ia to muane menjaji tomangjama ntulung jamaa, la mesa'ra bainena, na macca nnurusu' anakkana sintong repokkona. 13 Dikasiri'i to tomangjama ntulung jamaa ke meloi jamanna, na sabarani-raninna mpangpeissenanni umbo dikua ngkatappa'i Puang Isa Almaseh. 14 Kusanga te'damo namasai kuratu ssikitanko. Apa moi nasusi joo, kuukiran unapoko tee sura', 15 nasaba' ia angkumela' ratu, muissenmo to sipa' sipato'na lako tonapuanak Puang Allataala to tuo tarruh. Kita' sola ngasan to matappa' lako Puang Allataala mpangngewai pangngajaran tongan, susi pangrante iarika batu ariri mpemawatangngi bola. 16 Te'da mesa' tau tanglantongananni kumua liwa' ia mala'bihna to pangngajaran kasaranian, to tangkaissenanpa tonna anu', apa ia tee too napangpeissenanmo Puang Allataala. Susi tee joo pangngajaran kasaranian, "Mentolinomo Puang Isa Almaseh. Napabuttii Roh Allataala kumua Iamo napusannang Puang Allataala. Nakita sininna malaeka', napangpeissenanni tau lako sininna bangsa. Nakatappa'i tolino, naangka'i Puang Allataala tama suruga."

1 Timotius 4

1 Napamanassai Roh Allataala kumua, ia to wattu la dioloi lako, den ba'tu pira-pira tau la mentangmatappa' pole' lako Puang Isa Almaseh. Ia tuu lako tau la menturu' lako roh mangpalao sala na nturu' pangngajaranna setang. 2 Ia joo pangngajaran napangpangngajaran tomajekkong sola tomangnguraga, to nnissen umbonna to melo ba'tu gaja', apa te'da napugaukki. 3 Mangngajahhii tuu lako tau kumua, danggi' nakebaine ba'tu kemuane to tau. Den too kande mattantumo napemalian nakande. Nasitonganna ia joo kande napaden Puang Allataala la dikande, anna ia to tomatappa'mo na nnissen toomo pangngajaran tongan mangkurru sumanga' ngkandei. 4 Melo ngasan to napaden Puang Allataala, na moi mesa' te'da to diharangan dikande, ke mangkurru sumanga'ki' ntarimai. 5 Nasaba' passambajang na kadan-Na Puang Allataala lan joo passambajang mpupenhallala'i. 6 Ia ammutuli mpangpangngajaran ngasanni joo lako sininna padanta' tomatappa', manassamoko menjaji tomangjama melo-Na Puang Isa Almaseh, ammumatappa' tongan-tongan too, nasaba' tatta'ko mpelajahhi kadan-Na Puang Allataala sola pangngajaran tongan to muturu'mo mammula biccu'mu. 7 Danggi' mumatean wattu lako curita tojolo to tangkebattuan na tangdiangga' too to Puang Allataala, apa la tatta'ko mpangben kalemu lako Puang Allataala. 8 Ia ke melajahki' maningo, te'da nabuda bang bua'na, apa ia ke tatta'ki' mpangben kaleta' lako Puang Allataala, makkeguna lan buda passalan, nasaba' ia tee too na jiona ahera' la ntarimaki' katuoan to mangka napau Puang Allataala. 9 Tongan joo kada mane' mangka kupauanko. Jaji la mukatappa'i mutarimai. 10 Mangjamaki' tangmekabo'jo', nasaba' mangrannuanki' lako Puang Allataala to tuo tarruh. Iamo Tomangpasalama'na sininna tau, la'bi-la'bi sininna to tomatappa'. 11 La mupangpangngajaran ngasan joo, ammukuanni to tau naturu' tonganni. 12 Danggi' naden mesa' tau ntunaiko, nasaba' kallolopoko, apa la menjajiko palelean mata lako tomatappa' ke mangkadako, ke messipa'ko, ke mangpakamoja'ko padammu rupa tau, ke matappa'ko, mujagai kalemu anna te'da caccana. 13 Ianna te'dapa kuratu mati', la muajahhi to tau, na mubacanni to Sura' Allataala mupamanassan tooi. 14 La tatta'ko mpakkegunai to barakka' mangka nabenko Roh Allataala. Ia joo wattu den nabi mpaui to apa la jaji lako kalemu sola napalullungngiko pala'na pekaamberan jamaa. 15 La mutonganni njamai to mangka kupauanko, dikua anna kita ngasanni tau samelo-melona to jamanmu. 16 La mujagai melo to kalemu sola pangngajaranmu. La tatta'ko mpugaukki to mangka kuajaranko, nasaba' ia ke susii joo la salama'ko sola to mpesa'dingngiko.

1 Timotius 5

1 Danggi' mumangkada maka'do lako tomatua muane, apa la mupangkadai susi to ambe'mu. Ia to tokallolo la mukita sile'to, 2 na ia to baine matua, la mukita indo. Ia to anakdara la mukita adi tonganmu. La mupugaukki joo anna te'da caccamu. 3 Kasiri'i to baine te'damo muanena, na mesa-mesa bangmora. 4 Apa ia ke den anakkana iarika ampona, iamo la dipapahangngi, kumua sipato'i la njaranai ba'tu naingaran to penawa melona. Iamo joo napumasannang Puang Allataala. 5 Ia to baine te'damo muanena na te'damo tau njaranai, mellao doang tarruhhi mpeta'da pangkamasean-Na Puang Allataala, sanga ia mandamora narannuan. 6 Apa ia to baine te'damo muanena na nturu'i bang pakkaeloran penawanna, sitonganna tomatemo ia, moi natuo unapa. 7 Pauanni tee pangpakainga', dikua danggi' naden caccana. 8 Apa ia ke den tau te'da najaranai tomatuanna ba'tu repokkona, padai to mpessakkanni kamatapparanna. La'bi gaja' ia, na ia to totangmatappa'. 9 Ia to baine wa'ding diuki' sanganna tama sura' baine te'damo muanena, iamo to kaminang majiongna annan pulona taunna, na pissenra kemuane, 10 kaissenan kumua melo panggaukanna, susinna njampang melo anakkana, masannang ke den tau leppangngii, mbalii tomatappa', ntulung tomasussa, na tuli mpugauk kamakassingan laennapa. 11 Ia to baine te'damo muanena na malolle'pa, danggi' nadiuki' to sanganna tama joo sura', nasaba' iamo ke tangnasarami nta'tan kamadoanganna la kemuane pole', nasalaii to Almaseh. 12 La nacallai Puang Allataala, nasaba' te'damo naturu'i to kadanna, kumua la mpangjaman mandari Puang. 13 Mpangbiasa bangmi kalena makuttu, male lako male jio bang mai mentama bolana tau. Na la'bi gaja'pi to napugauk, mpau gaja' tau laen, njama tangngia jamanna, na ncurita apa tangkebattuan. 14 Iamo joo kukabudai ke ia to baine malolle'pa nakemuane pole', keanak, na nnurusu' repokkona, anna ia to ewalinta' te'damo lalan nanii mpau gaja' tomatappa'. 15 Kukabudai ke susi joo, sanga denmo baine to te'damo muanena ssalaii to Almaseh na menturu' lakomo Ballisi'. 16 Apa ia to baine matappa' to den repokkona baine te'damo muanena, la najaranai meloi, danggi'mo na jamaa njaranaii. Na ia ke susii joo, ia to pangjarananna jamaa dipatuju lakomira baine te'damo muanena na mesa-mesa bangmora. 17 Ia to pekaamberan jamaa to mangjama tongan, la ditaratte' naditulung, la'bi-la'bi to mangngajahhi kadan-Na Puang Allataala. 18 Susi to diuki' lan Sura' Allataala kumua, "Danggi' mitangnneloranni to sapin ngkande lise' gose', ke llullu'i gose'", susi toomi, "Ia to tomangjama, sipato' ntarima sarona." 19 Danggi' mukatappa'i punala bangngi to apa diparapasan pekaamberan jamaa, sangadinna ke denni sa'bi, dua ba'tu tallu tau. 20 Ia to tau mpugauk dosa la dipakainga' jio olona jamaa, dikua namalaja' to tau laen. 21 La nakita Puang Allataala, Puang Isa Almaseh na malaeka'-Na to napilei, kumeta'da tongan lako iko, ammuturu'i tee mangka kupauanko, danggi' mukabataii moi mesa' tau na te'da too la mupasilaenan. 22 Danggi' mumarawa bang nnangka' tau menjaji pekaamberan jamaa, sanga ianna sala undinna padai to iko sala. Danggi' naden caccamu. 23 Danggi' na wai mangmesa bang muiso', apa la nniso' tooko anggoro' ci'di', nasaba' biasako mapa'dik ba'tang. 24 Den tau pajan bangmo to dosana dikita moi te'dapa nadiparessa, na ia to tau laen diparessapi namane' diissen to dosana. 25 Susi toomi to panggaukan melo, den to ta'pa pajan bang dikita, na ia to membuninna, te'da nalamembuni tarruh.

1 Timotius 6

1 Ia to kaunan matappa'mo lako Puang Isa nang la sipato' nakasiri' melo to puangna, nadanggi' nadipau gaja' to Puang Allataala ba'tu pangngajaran kasaranian. 2 Ia to kaunan matappa' na tomatappa' toda to puangna, danggi' nasangai kumua ia to puangna te'da naparallu nakasiri' nasaba' pada tomatappa'i. Sibalikanna la la'bi napemelori to pangjamanna lako, nasaba' ia joo puangna napangjaman pada tomatappa'i na pada dipakamoja' tooi. La mupangpangngajaran ngasan tee, mupake tooi mpangngingaran tau. 3 Ia to tompangpangngajaran pangngajaran laen na ia to mangka kubenko, te'da naturu'i to pangngajaran tongan jio mai Puangta' Puang Isa Almaseh na pangngajaran agamanta'. 4 Iamo tomatampo na te'da apa naissen. Madoang bangri la massite'geh sola massita'go anna mpaden kamasereatian, kasisalan, mpau gaja' tau, ngkabatai bang tau, 5 massisala tarruh te'da cappa'na. Gaja' tarruhmi sipa'na tuu lako tau na te'damo naissenni to pangngajaran tongan. Nasangai kumua, la buda dalle'na, ke mangngagamai. 6 Sitonganna buda barakka'na to tonturu'i pangngajaran agamanta', ke napusannangngi to apa naampui. 7 Denraka apa tabawa mentama tee lino? Te'da! Nadenraka apa wa'ding tabawa ssalaii tee lino? Te'da! 8 Iamo joo ganna'mo ke nnampuiko pakean sola kande. 9 Ia to tomadoang sugih, la madoi' mpugauk mangrupa-rupa panggaukan gaja', sanga nataloii kamadoangan gaja'na, susi to naala poja. Tangmakkeguna joo pattujunna kannori mpa'dikkii, na iamo la mbawai lako kamasolangan. 10 Nasaba' kamacinnan lako doi' mpaden mangrupa-rupa kagajatan. Den to tau mentangmatappa' pole'mo lako Puang Isa Almaseh, nasaba' male bangngi nnangah doi', apa undinna melliwa' pa'dik penawari. 11 Ee, Timotius! Danggi' mupugaukki tuu lako, sanga taun-Namoko Puang Allataala. Apa la mpugaukroko pakkaeloran-Na Puang Allataala, massompa lako kale-Na, matappa' lako Puang Isa Almaseh, mpakamoja' padammu rupa tau, sabbara' lan kamaparrisan na mpangkadai rampa' tau. 12 Moi nabuda ewalimmu, apa la tatta'ko matappa', ammutarima paraseng katuoan melo te'da cappa'na. Iamo joo napileimoko Puang Allataala, tommumangngaku jio olona tobuda kumua matappa'moko lako Puang Isa Almaseh. 13 La nakita Puang Allataala, to mpatuo sakka' saianna, na Puang Isa Almaseh to mangka mpangben kasa'bian tongan lako Gubernur Pontius Pilatus, kumeta'da tongan lako iko, ammuturu' meloi sininna to kupauanko, mupugauk ngasanni ratu lako karatuan-Na pole' Puangta' Puang Isa Almaseh. 15 Ia to karatuan-Na pole', Puang Allataala Ia la mpattantui. Iamo tomangkada mesa, to mala'bih. Rajana sininna raja na Puangna sininna puang. 16 Ia manda to te'da nataloii kamatean. Moi mesa' tau te'da ssarai ngkandoppi'i to arrang nanii torro. Moi mesa' tau te'da ngkitai, nang la te'da tau ngkitai. Iamo tomakuasa dipakala'bih te'da cappa'na. Amin. 17 La mupangngingaran to tosugih lan tee lino, danggi' namabangka', danggi' napattuan kalena lako kasugiranna to la cappu', apa la mangpattuan lakori Puang Allataala to la mbenki' sininna taparalluinna antapakei masannang. 18 Kuanni na mpugauk kameloan lako padanna rupa tau, mamase na malaboh. 19 Na ianna susimo joo, padai to torrempunmi kasugiran makkeguna jio ahera', nalantarima katuoan melo te'da cappa'na. 20 Ee, Timotius! La mujagai melo to pangngajaran napabarakkananko Puang Allataala. Danggi' mumatean wattu lako curita tangkebattuanna to tangkasiri' Puang Allataala, mupasalai tooi penawa to kasite'geran te'da bua'na, to nasanga tau kamaccan apa sitonganna tangngia. 21 Den tau ssanga kalena nnampuii joo kamaccan, anna te'damo nakatappa'i pangngajaran kasaranian to nakatappa'imo jolona. Dennaa upa' nabarakka'i kamu' Puang Allataala sola ngasan. Padamo jolo' too. Sallangki' mati', Paulus.

2 Timotius 1

1 Ee, Timotius to kupuanak na kupakamoja'! Aku', Paulus, ngkiringanko tee sura'. Pakkaeloran-Na Puang Allataala angkumenjaji rasulu'-Na Puang Isa Almaseh, disua mpangpeissenanni to katuoan nabasse Puang Allataala. Ia joo katuoan tatarima, tontamesa' penawamo sola Puang Isa Almaseh. Dennaa upa' nabarakka'iko nakamasei tooko Ambe' Puang Allataala sola Puangta' Puang Isa Almaseh nabenko kamasannangan. 3 Mangkurru sumanga'na' lako Puang Allataala to kusompa situru' canning atingku', susi to napugauk tojoloku' tonna anu'. Tuli kupau to sangammu ke massambajang omo' la allo la bongi. 4 Kuingaran tonna gaja masse penawammu. Iamo joo kugaja doang ssikitanko, angkula'bi mario. 5 Mangkurru sumanga'na' ke kuingaranni to kamatapparanmu to mandalan tongan. Ia to pamulanna matappa' lako Puang Isa, iamo to nenemu Lois na indomu Eunike. Na kuissen kumua susi todako joo. 6 Iamo joo kupakainga'ko, ammujama tonganni to jamanmu mpakkegunai to barakka' mangka nabenko Puang Allataala tongkupalullungngiko pala'ku'. 7 Nasaba' ia to Roh Allataala nabenki' Puang Allataala, tangngia Roh mangpakalaja'. Apa sibalikanna ia joo Roh mpamawatangki', antakullei sipakamoja' sola nta'tan kaleta'. 8 Iamo joo la baranimoko mpangpeissenanni to Puangta' Puang Isa lako tau laen, na danggi' too mukasirisanna', to ditarungku nasaba' nturu'na' Puang Isa. Apa sibalikanna, la maparri'ko susi aku', nasaba' mpangpeissenanko Kareba Kasalamatan, situru' kapakullean to nabenko Puang Allataala. 9 Napileimiki' Puang Allataala menjaji umma'-Na, napasalama'ki'. Tangngia kumua mpugaukmiki' kameloan anna pugaukki susi joo, apa naakkattai memanmo situru' kameloan penawan-Na, tonna te'dapa nadipaden tee lino. Naakkattai kumua la napakitanki' Puang Isa Almaseh to kameloan penawan-Na Puang. 10 Na ia tee too mentolinomi to Puang Isa Almaseh, Tomangpasalama'ta', napakitan tonganmiki' to kameloan penawan-Na Puang. Iamo mangka ntaloi kuasa kamatean, anna pamanassai lako kita' to katuoan melo te'da cappa'na, ke ngkatappa'iki' Kareba Kasalamatan. 11 Puang Allataala nnangka'na' menjaji rasulu' na guru, la mpangpeissenanni joo Kareba Kasalamatan. 12 Iamo joo angkumaparri' susi tee lan pangtarungkuan. Apa te'da kukasirisanni, nasaba' kukanassai inda to kukatappa'i. Na kuissen kumua apa to napabarakkanna', makuasa too njagai sanggenna Kiama' lino. 13 La mupangpangngajaran to pangngajaran tongan to mangka kuajaranko, mutatta' too matappa' sola mangpakamoja', nasaba' mesa' penawamoko sola Puang Isa Almaseh. 14 Pangtulung-Na Roh Allataala to torro lan kalemu, ammujagai melo pangngajaran to mangka dipabarakkananko. 15 Muissen, kumua te'damo napuinawana' to solata' jio tana Asia, moi Figelus sola Hermogenes. 16 Dennaa upa' napakitanni Puang kameloan penawan-Na to repokkona Onesiforus, nasaba' ia to Onesiforus tatta'i mpamariona' na te'da nakasirisanna' moi kuditarungku. 17 Ratunna jio kota Roma, ta'pa naangahna' sanaampa'ku'. 18 Na muissen kumua budamo pangtulungna lako kaleku' tongkujio kota Efesus. Dennaa upa' napakitanni Puang kameloan penawan-Na, ke nadete'mi wattunna Puang Allataala rra'tah kara-karana sininna rupa tau.

2 Timotius 2

1 Ee, Timotius to kupuanak! Eloranni to kameloan penawan-Na Puang Isa Almaseh mpamawatangko. 2 Ia to pangngajaran tongan to mangka kuajaranko jio olona buda tau, la mupabarakkanan tau to wa'ding dikatappa'i sola macca mpangpangngajaran pole'i lako tau laen. 3 La maparri'ko sola umma'-Na Puang Isa Almaseh, susi surudadu to nturu' bang parenta. 4 Ia to mesa' surudadu male parari te'da naurusu'i to laenna, nasaba' madoangri mpugaukki to apa la napumasannang kamandangna. 5 Susi todami to tau massiewa watang, te'da nalapatalo lan kapaningoanna, ke te'da naturu'i to atoran kapaningoan. 6 Susi toda to pangdusung mangjama tangmekabo'jo', iamo la nduppai jolo' to assele' tanananna. 7 Parinawai to apa kupau, nasaba' Puang Allataala la mbenko kamaccan ammuwa'ding mpahang ngasanni. 8 Ingaran meloi tee! Situru' Kareba Kasalamatan to kupangpeissenan, ia to Puang Isa Almaseh, bati'na Raja Daud, mangka tuo pole' jio mai kamatean. 9 Ditarungkuna', angkumaparri' butung togaja', nasaba' mpangpeissenanna' Kareba Kasalamatan. Apa ia to kadan-Na Puang Allataala te'da nawa'ding dikammatan. 10 Namawatang bangna' ntarima ngasanni, nasaba' kaparalluanna to tau mangkamo napilei Puang Allataala, dikua nalolongan kasalamatan jio mai Puang Isa Almaseh, sola kamala'biran te'da cappa'na. 11 Tongan tee kada, "Ia ke mateki' sola Almaseh, la tuo todaki' sola. 12 Ia ke tatta'ki' sabbara', la mangparentaki' sola Almaseh. Ia ke tapessakkannii, la napessakkanni todaki'. 13 Ia ke tapaboko'i penawa, tatta' Ia nningaranki', nasaba' nang susimi Ia." 14 La mupangngingaran to sininna tau to mangka kuuki' nena'. Pakainga'i to tau kumua nakita Puang Allataala, danggi' nasite'geh. Te'da bua'na joo, apa ssolangngiri to tossa'dingngi. 15 La mupengkulle-kullei anna tarimako Puang Allataala susi mesa' tomangjama to sipato' mpangjamanni, tangngia to ngkasirisan jamanna, apa to mangngajahhi pangngajaran tongan jio mai Puang Allataala. 16 Danggi' mumatean wattu lako curita tangkebattuanna to tangkasiri' Puang Allataala. Nasaba' ia to tomangcurita susi joo sagaja'-gaja'na. 17 Ia to curitanna joo tau male bang mangngulala', dipangpasusii kojong tangjampi-jampianna. Ia to tomangcurita susi joo iamo to Himeneus sola Filetus. 18 Te'damo namenturu' lako pangngajaran tongan, na mpalao sala kamatapparanna tau. Mangkadai kumua, ia to katuoan pole' jio mai kamatean mangkami ia jaji. 19 Apa ia to pangngajaran tongan jio mai Puang Allataala susi pondasi mawatang to te'da nalatiroge. Den diuki' jio ntuu joo pondasi nakua, "Naissen Puang to taun-Na" sola "Te'damo nawa'ding mpugauk kagajatan to tomangngaku kumua, 'Taunnana' Puang Allataala.' " 20 Lan bola tonggo mangrupa-rupa to dikabua' parewanan dapoh. Den to dikabua' jio mai salaka ba'tu bulawan, apa den too to kaju ba'tu litak. Den to mattantu dinii mpakei, na den to dipake allo-allo. 21 Susi todami to tau, den tomelo na den totangmelo. Ia ke te'dami napugauk kagajatan, mattantumo ia to dinii mpakei. Iamo dipasadia napake puangna jio mangrupa-rupa pangjaman melo. 22 Iamo joo danggi' muturu'i bang kamadoanganmu mpugauk kagajatan to biasa napugauk tokallolo. Apa la mupengkulle-kullei tuo situru' pakkaeloran-Na Puang Allataala, muturu' tonganni to pangngajaran-Na, mpakamoja' padammu rupa tau, na musikalino sola tossompa Puang Allataala lantuk tama penawanna. 23 Danggi' muturu' passite'geran tangkebattuanna tobango', nasaba' muissen kumua ia joo mpaden kasipekkan. 24 Ia to tau mpangjaman Puang Allataala tangsipato' massipekka, apa la mangkada melo lako sininna rupa tau, macca mangngajahhi na sabbara', 25 na mpangkadai rampa' tobatta'. Dennaa upa' naben unapi wattu Puang Allataala to tau susi joo namengkatoba' jio mai dosana anna issenni to pangngajaran tongan. 26 Ia ke susimi joo, la menassan joo tau anna te'damo nakuasaii Ballisi' to ntarungkui sola mparuku tooi mpugaukki to pakkaeloranna.

2 Timotius 3

1 Ingaran meloi tee! La buda kamaparrisan ke tampakkanami lino. 2 Tangsiissenanmo to tau, doi' mandamo napikkiri', namatampo. Nakabudai ncapa' tau, nnewa tomatuanna, tangnaissen to penawa melo na tangkasiri' Puang Allataala. 3 Te'da nakamasei padanna rupa tau, cia' mangdampangan, nakabudai mpau gaja' tau laen, mangparuku, masa'ga', na tangnakabudai to kameloan. 4 Nakabudai mpangpejokkoan solana, samangpugaukna bang sola tossanga bang kalena. Nakabudai to mangmasannang-sannang na ia to menturu' lako Puang Allataala. 5 Ianna dikita ssompa ia Puang Allataala, apa sitonganna te'da naeloran kuasan-Na Roh Allataala ssulleii to sipa'na. Danggi' musiama' to tau susi joo. 6 Den guru tangtongan susi joo macca massede namentama bolana tau anna palao sala baine katuru'-turu' to gaja buda dosana, na mangrupa-rupa too kamadoanganna. 7 Ia joo baine madoang tarruh ntarima pangngajaran baru, apa te'da napahangngi to pangngajaran tongan jio mai Puang Allataala. 8 Ia joo guru tangtongan nnewa pangngajaran-Na Puang Allataala, susi Yanes na Yambres tonna jolona nnewa Nabi Musa. Masolangmo pangtangngaranna joo guru na te'damo namatappa' lako Almaseh. 9 Apa te'damo nalallolongan apa, nasaba' ia to kabangosanna la naissen ngasan tau, susi toda to jaji lako Yanes sola Yambres. 10 Apa ia to iko muturu'imi to pangngajaranku', sipa'ku', na ia to patunna katuoanku'. Iko ngkitai matumba kamatapparanku' lako Puang Isa Almaseh sola pangpakamoja'ku' lako padangku' rupa tau, na muissen toomo to kasabbarasanku' sola kamawatanganku' lan kamaparrisan. 11 Mukitamo' dipakario-rio na maparri'na'. Muissen toomo sininna to apa ngkannana' jio kota Antiokhia, Ikonium sola Listra, apa nala'paranna' Puang jio mai joo kamaparrisan takkaliwa'. 12 Manassa kumua sininna tau to madoang ssompa na nturu' Puang Isa Almaseh la dipakario-rio, 13 apa ia to togaja' na topangnguraga la sagaja'-gaja'nai. Ia tuu lako tau nnuraga tau laen, apa sitonganna moi ia diuraga too. 14 Apa ia to iko, Timotius, la muturu' to pangngajaran tongan to mangka diajaranko na mukatappa'imo, nasaba' muissen indara gurummu. 15 Ingaranni kumua muissenmo mammula biccu'mu to apa diuki' lan Sura' Allataala, to mpupenjajiko mandalan tangngah ammumatappa' lako Puang Isa Almaseh napasalama'ko. 16 Sininna to diuki' lan Sura' Allataala, kadan-Na Puang Allataala. Den bua'na na melo dipake mpangpangngajaranni to tonganna, mangpakainga', mpemeloi togaja' anna manggauk melo, sola nnajahhi tau anna turu' pakkaeloran-Na Puang Allataala. 17 Ia to umma'-Na Puang Allataala, ke dipakinalloii to apa diuki' lan Sura' Allataala, nakullei mpugauk sininna pangjaman melo.

2 Timotius 4

1 La ratu pole' to Puang Isa Almaseh mangparenta susi Raja. La rra'tah kara-karana totuo sola tomate. Iamo joo, nakita Puang Allataala na Puang Isa Almaseh, kumeta'da tongan lako iko 2 ammupangpeissenanni to Kareba Kasalamatan lako tau, madoangrika ba'tu cia'rika, na la mupakainga' na mupapahangngi tooi to kasalanna. Apa la mupaendek tooi sumanga'na na musabbara' nnajahhii. 3 Nasaba' la den wattunna nate'damo namadoang to tau mpesa'dingngi pangngajaran tongan. Sibalikanna rrempunri buda guru naajahhii to apa napumasannang penawanna, anna wa'ding nturu'i bang kamadoangan gaja'na. 4 Cia'i mpesa'dingngi to pangngajaran tongan, apa iara napesa'dingngi to curita tojolo to tangkebattuan. 5 Apa ia to iko, la mangngingaranko moi apa to jaji. La sabbara'ko moi muoloi buda parri'. La mupangpeissenan tarruhhi to Kareba Kasalamatan. Na susi mesa' tompangjaman Puang Allataala la mujamai moi apa nasuanko. 6 Na ia tee aku', nadete'mi wattunna, la matena' butung karoba lako Puang Allataala. Te'damo namasai kusalaiko. 7 Mangka kupengkulle-kullei mpangpeissenanni to Kareba Kasalamatan susi to massiewa watang na kudete'mi to kupangngujuinna. Matappa' tarruhna' lako Puang Isa angge cappa'na. 8 Na ia tee too dipasadianmo' paraseng kapataloan. Ia to Puang Isa, tomangra'tah tangbimbang, la mbenna' joo paraseng kapataloan ke Kiama'mi lino, nasaba' napupenjaji tomelona' Puang Allataala. Na tangngia aku' manda to la llolonganni, apa sininna to tomamali' ntajan karatuan-Na Puangta'. 9 La mupengkulle-kullei madoi' ratu ssikitanna'. 10 Nasalaimo' Demas, nasaba' la'bi nakabudaimo ia tee lino, na male lako kota Tesalonika. Male toomi Kreskes lako tana Galatia na Titus lako tana Dalmatia. 11 Lukas mandamo torro kusolan. Angahhi Markus ammuratu sola, nasaba' wa'dingngi mbaliina' lan jamanku'. 12 Kusuamo Tikhikus male mati' kota Efesus. 13 Ia ammuratu, bawanna' baju kamban to kupatorro jio kota Troas, jio bolana Karpus. Bawa ngasan tooi to sura'ku', la'bipa to sura' balulang dikabua'. 14 Aleksander, to pande tambaga, mangka mpugaukki to liwa' ganjang lako aku'. Na Puang Allataalamora mpabalahhii to sipato'na panggaukanna. 15 La majagako lako ia, nasaba' gaja nakaba'ci to apa tapangpeissenan. 16 Ia tongkubungah dipangngolo mpangkadanan kaleku' jio olona tomangra'tah kara-kara, te'da bang moi mesa' tau kusolan, nasalai ngasanmo'. Apa dennaa upa' nadanggi' napasalai Puang Allataala. 17 Apa naampaimo' Puang, naben toomo' kapakullean, angkuwa'ding mmangkai jamanku' mpangpeissenan Kareba Kasalamatan lako sininna bangsa tangngia to-Yahudi inde', napasalama'na' Puang jio mai kamatean. 18 La nala'paranna' Puang jio mai sininna kagajatan to mpatuna' anna ssolanna' tama suruga to nanii mangparenta. Iami joo, la dipakala'bih tarruhhi te'da cappa'na. Amin. 19 Sallangku' lako Priskila sola Akwila na lako rapunna Onesiforus. 20 Ia to Erastus torroi jio kota Korintus. Kupatorroi Trofimus jio kota Miletus, nasaba' masakii. 21 La mupengkulle-kullei muratumo inde' namane' wattu macakke'. Massallangngi Ebulus, Pudes, Linus sola Klaudia lako iko. Susi toda to sininna tomatappa' pira' inde'. 22 Dennaa upa' naampaiko Puang nabarakka'i kamu' sola ngasan! Padamo jolo' too. Sallangki' mati', Paulus

Titus 1

1 Ee, Titus to kupuanak! Aku', Paulus, mesa'na' taun-Na Puang Allataala na rasulu'-Na Puang Isa Almaseh ngkiringanko tee sura'. Dipileina' angkuajahhi to tonapilei Puang Allataala, namatappa' tongan. Dipilei toona' mpatuju ngasanni, anna issenni to pangngajaran tongan, natuo situru' pakkaeloran-Na Puang, 2 namangrannuan kumua la nnampa'i katuoan melo te'da cappa'na, to nabassemo Puang Allataala to tangmangnguraga tonna te'dapa nadipaden tee lino. 3 Ia joo basse-Na Puang Allataala napapajan tonna dete'mi wattunna. Dipabarakkannimo' situru' parenta-Na Puang Allataala, Tomangpasalama'ta', angkupangpeissenanni. 4 Titus, kupuanak tonganmoko, nasaba' pada matappa'miki' lako Almaseh. Dennaa upa' nabarakka'iko Ambe' Puang Allataala sola Puang Isa Almaseh, Tomangpasalama'ta', nabenko kamasannangan. 5 Kupatorroko jio pulau Kreta, dikua ammujamai to parallupa diatoro' na la nnangka' tooko pekaamberan jamaa lan simesa'-mesa' kota. Ingaranni tee kupasananko, kumua 6 ia to tau la menjaji pekaamberan, iamo to tomakassing, mesa'ra bainena, na ia to anakkana tomatappa' ngasanmo lako Puang Isa, te'da natangmangpesa'ding ba'tu diparapa' mpugauk sala. 7 Ia to tonnatoro' jamaa, iamo to mpangjaman Puang Allataala. Iamo joo naparallu tomakassing sola totangmangkada mesa. Te'da nawa'ding salle galli, ba'tu pangngiso', ba'tu passiboboran, ba'tu pangdoi'. 8 Parallu mario ke denni tau lleppangngii, nakabudai mpugauk kameloan, tomandalan tangngah, tomangkada tongan, tonturu' pakkaeloran-Na Puang Allataala na tonta'tan kalena. 9 Parallu nturu' pangngajaran tongan, to mangka diajaranni na nakatappa'imo. Ianna susi joo, wa'dingngi mpamasumanga' tau ke mpangpangngajaranni pangngajaran tongan, na wa'ding too mpauan salana tau to mbali-balii joo pangngajaran. 10 Parallu susi joo, nasaba' budamo tau tangmangpesa'ding, la'bi pole'pa to tau jolona mangngagama Yahudi. Ia tuu lako tau mangkada tangkebattuan na mpalao sala tau laen. 11 Ia to tau susi joo danggi' nadipupangkada, nasaba' buda tosangbola nasolangngi, naajahhii to tangsipato'na. Napugaukki susi joo, nasaba' madoangngi mesaro punala. 12 Denmo to nabinna to-Kreta mangkada nakua, "Salle pangnguraga to to-Kreta, susi olok-olok masa'ga', maullak na kuttuan." 13 Tongan bang to napau joo nabi. Iamo joo, la mupakainga' meloi joo to-Kreta, dikua anna turu'i to pangngajaran tongan, 14 na danggi' napesa'dingngi curita tangkebattuanna to-Yahudi ba'tu atoran nakabua' tau to cia' mpesa'dingngii to pangngajaran tongan. 15 Ia to tomangpenawa melo, melo too ia panggaukanna. Apa ia to tomangpenawa gaja' na tangmatappa', te'da namelo panggaukanna. Gaja' pangtangngaranna na te'da naissenni umbonna to melo ba'tu gaja'. 16 Mangngakui kumua nnissen Puang Allataala, apa sitonganna diissen kumua mangnguragai nasaba' te'da naturu' pakkaeloran-Na Puang. Meko'dosan na cia'i nturu' Puang. Te'da bang nakullei mpugaukki to disanga melo.

Titus 2

1 Apa ia to iko, Titus, la mpangpangngajaranko pangngajaran tongan. 2 Pakainga'i to tomatua muane, anna ta'tan kalena, mandalan tangngah, na tomelo anna sipato' dikasiri'. La matappa'i lako Puang Isa Almaseh, mpakamoja' padanna rupa tau, sabbara' ke maparri'i. 3 Susi toomi joo, la mupakainga' to tomatua baine, dikua anna menturu' lako manda Puang Allataala. Te'da nawa'ding mpau gaja' padanna rupa tau, te'da napangngiso', apa la mpangpangngajaranri to disanganna melo. 4 Ia ke susimi joo sipa'na to tomatua baine, wa'dingmi nnajahhi baine malolle' nampakamoja' muanena sola anakkana, 5 mandalan tangngah, danggi' naden caccana, nnurusu' melo bolana, tomelo na menturu' lako muanena. Na ia ke susimi joo te'damo tau la ncaccai to kadan-Na Puang Allataala. 6 Susi toomi la muajahhi too to tokallolo anna mandalan tangngah. 7 La mpangpekitanko sipa' melo lan sininna passalan. Susinna ia ammumangngajahhi, la mangkada tonganko ammutongan-tongannii mangngajahhi. 8 La mangkada meloko, to te'da nacaccai tau, dikua anna masiri' to ewalimmu, nasaba' te'da lalan la nanii mpau gaja'ko. 9 Pakainga'i to kaunan anna tuli menturu' lako puangna anna pumasannangngi. Te'da napabali-bali, 10 te'da nakaala-ala, apa la mpangpekitanni kumua wa'ding dikatappa'i. Ianna massipa' susimo joo, la tuli napujii tau to pangngajaran-Na Puang Allataala, Tomangpasalama'ta'. 11 Mupakainga'i susi joo, nasaba' napangpekitanmi Puang Allataala to kameloan penawan-Na anna suai to Puang Isa mentolino la mpasalama' sininna rupa tau. 12 Napake Puang Allataala joo kameloan penawan-Na nnajahhiki', antatorroii mpugaukki to apa tangnakabudai, nadanggi' taturu' kamadoangan gaja'ta' susi to tapugauk tonna te'dapa tamatappa'. Sibalikanna naajahhiki' mandalan tangngah, mpugauk pakkaeloran-Na sola ssompai, ke tuo unapiki' lan tee lino. 13 Ia tee too tatajanni joo Wattu tanii la mario-rio. Ia joo Wattu la nakita tau to kamala'biran-Na Puang Isa Almaseh, iamo Puang Allataala mala'bih na Tomangpasalama'ta'. 14 Mangkamo Ia mpangkaroban kalena la lla'bakki' jio mai sininna kagajatanta' napupenjajiki' umma'-Na to tangmadosa antatatta' too mpugauk kameloan. 15 Pangpangngajaran ngasanni joo. La matongkoko mangpamasumanga' sola mpakainga'i to tompesa'dingngiko. Danggi' naden tau ntunaiko.

Titus 3

1 Pangngingaranni sininna to tomatappa' iti', namenturu' lako to ambe' lan tondok na tomangparenta, anna danggi' nabali-balii. La sadia bang mpugauk panggaukan melo, 2 danggi' pau gaja' tau, danggi' massipura, apa la mabassa na mangkada rampa' too lako sininna rupa tau. 3 Nasaba' moi kita' tonna jolona bango' tooki', antalao sala, te'da too taturu' Puang Allataala. Napukaunan tooki' mangrupa-rupa kamadoangan sola pakkaeloran penawa. Mpugauk tooki' kagajatan sola masere ati, na massikaba'ci bangki'. 4 Apa Puang Allataala, Tomangpasalama'ta', mpakitanki' pangpakamoja'-Na sola kameloan penawan-Na. 5 Napasalama'miki', tangngia kumua mpugaukmiki' kameloan, sangadinna nasaba' pangkamasean-Na lako kita'. Nabaseiki' jio mai dosata' antadijajian pole', napemeloii to penawanta' mpake kuasan-Na Roh Allataala. 6 Nasuami Puang Allataala to Puang Isa, Tomangpasalama'ta', mpakabuhhiki' Roh Allataala, 7 dikua antaampa' katuoan melo te'da cappa'na, susi to pangrannuanta', sanga mangkamiki' dipupenjaji tomelo nasaba' kameloan penawan-Na. 8 Tongan tee kada mangka kupau. Madoangna' ammupangpangngajaran tonganni sininna joo, dikua anna ia to tomatappa'mo lako Puang Allataala natongan-tongannii mpugaukki to panggaukan melo na den bua'na lako tobuda. 9 Danggi' musite'gehhi to curita tangkebattuan sola nunnungan nene. Danggi' too mupassipuraii ba'tu ssibobo'i to atoranna Nabi Musa. Sininna joo te'da ngasan bua'na na te'da too tujunna. 10 La mupakainga'i pissen ba'tu penduan to tompaden kasisalan lan tangnga-tangngana tomatappa'. Anna ia ke cia'i mangpesa'ding, danggi'mo musiama' to tau susi joo. 11 Nasaba' la muissen kumua ia to tau susi joo tibalikmo jio mai kamatapparan tongan na ia to dosana la mpamanassai kumua la disessai. 12 Ia angkusuami mati' Artemas ba'tu Tikhikus, la mupengkulle-kullei ammumadoi' ratu ssikitanna' jio kota Nikopolis, nasaba' kuakkattai la torrona' jio ke wattu macakke'i. 13 La mutulung tongan-tonganni to Zenas, mesa' to macca mbicara kara-kara, sola Apolos, dikua anna dipasadian ngasan kaparalluanna nawa'ding mpatarruh kalingkanna. 14 Makassing ke sininna solata' tomatappa' melajah mpugaukki to apa melo anna angahhi to naparalluinna, danggi' natuo te'da bua'na. 15 Sininna padanta' tomatappa' kusolan inde' massallang lako iko. Paratuankan sallangki' lako sininna solata' tomatappa'. Dennaa upa', anna barakka'i ngasan kamu' Puang Allataala. Padamo jolo' too. Sallangki' mati', Paulus

Filemon 1

1 Ee, sangpangjamanki' Filemon, tokipakamoja' sola jamaa to sirempun iti' bolamu na padanta' tomatappa' Apfia na sangpangjamanta' Arkhipus! Aku' Paulus, to ditarungku, nasaba' nturu'na' Puang Isa Almaseh, ngkiringan kamu' tee sura' sola padanta' tomatappa' Timotius. 3 Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 4 Ia angkumassambajang tuli kupassambajanganko, mangkurru sumanga'na' lako Puang Allataala sanga iko, 5 nasaba' kusa'ding kumua matappa'ko lako Puang Isa, na mupakamoja' tongan to umma'-Na Puang Allataala. 6 Massambajangna' kumua ammuissen tonganni to sininna barakka' pole jio mai Almaseh, sanga pada matappa'ki'. 7 Ee, sile'toku'! Ia tongkusa'dingngi kumua mupakamoja'i to sininna umma'-Na Puang Allataala, masannangna' na masumanga' toona', nasaba' mupaendek sumanga'na umma'-Na Puang Allataala. 8 Sitonganna wa'dingna' ssuako mpugaukki to la sipato'na mupugauk, nasaba' nabenmo' kuasa Almaseh. 9 Apa kupeta'da bangri lako iko, nasaba' ia to pangpakamoja'mu lako umma'-Na Puang Allataala. Ia tee aku' mesa'na' tomatua, na ia tee too ditarungkuna', sanga rasulu'-Nana' Puang Isa Almaseh. 10 Iamo joo kupeta'dai lako kalemu mpatu Onesimus anak kupakamoja', to kuajahhi lan pangtarungkuan anna matappa' lako Puang Isa Almaseh. 11 Ia tee Onesimus jolona te'da bang bua'na lako iko, apa ia tee too denmo bua'na lako iko sola aku'. 12 Ia tee Onesimus, to kupakamoja', kusuai pole mati'. 13 Madoangra' la mpatorropi anna sulleko mbaliina' ke lanpa' pangtarungkuan, nasaba' mpangpeissenanna' Kareba Kasalamatan. 14 Apa te'da kulampatorroi, ke tangmueloranni. Madoangra' kumua ia ke mueloranni, te'da kuparukuko, apa la situru' canning atimmu. 15 Mbai iamo misisarak cingga'tuk, dikua ammutarimai ratu lako ahera', 16 apa te'damo nalasusi bang kaunanmu, apa la susi sile'tota' to kaminang dipakamoja'. Na kupakamoja'mo, apa pole' iko. Mupakamoja'i susi kaunanmu sola sile'tomu to pada matappa'mo lako Almaseh. 17 Ia ke mupusile'tona', meta'dana', "Tarimami tee Onesimus susi aku' mutarima." 18 Ia ke denni salana, karugianmu ba'tu indanna lako iko, aku'mora mpuindanni. 19 Aku' Paulus nnuki'i tee: aku' la mbajahhi to indanna Onesimus. (Te'da kuparallu mpangngingaranko kumua ia to indan penawa meloku' lako iko la'bi buda, nasaba' kuajahhiko ammumatappa' lako Puang Isa Almaseh.) 20 Ee, sile'toku'! Kupeta'dai dennaa upa' naden bua'na pole jio mai iko, situru' pakkaeloran-Na Puang Allataala. Pamasannangna', nasaba' pada matappa'ki' lako Almaseh. 21 Kukanassai kumua la mupesa'dingngi unana', na kuissen too kumua la'bi melo to mupugaukkuna na ia to kupeta'danna. Iamo joo kuuki'i tee sura' lako iko. 22 Mepasan toona' kumua mupasadianna' ngenan iti' bolamu, nasaba' kukanassai kumua la natarima Puang Allataala to peta'da doangmi sola ngasan, kuwa'ding pole mati' tatorro sola. 23 Sallangna Epafras, to kusolan inde' pangtarungkuan, nasaba' nturu' todai Puang Isa Almaseh. 24 Sallangna toda sangpangjamanku' Markus, Aristarkhus, Demas sola Lukas. 25 Dennaa upa' nabarakka'i kamu' Puang Isa Almaseh. Padamo jolo' too. Sallangki' mati', Paulus

Ibrani 1

1 Ia tonna anu' buda cara tuli napake Puang Allataala ssua nabi mparatuanni kadan-Na lako tojolota'. 2 Apa ia tee wattu tampakkana lino nasuai to Anak mpaui lako kita'. Ia joo Anak mangkamo napattantu Puang Allataala to sipato' mpuapai to sininna apa, nasaba' Iamo napake Puang Allataala mpadenni tee lino. 3 Iamo joo Anak to mpapajanni lako kita' to kamala'biran-Na Puang Allataala. Ia to sipa'-Na sola kuasan-Na susi una sipa'-Na sola kuasan-Na Puang Allataala. Ia toomo nnampaii tee lino mpake kada makuasan-Na na te'da natiseran. Ia tonna mangkamo mate la ndampangan tolino, cumadokkomi jao suruga jio sa'de kanan-Na Puang Allataala to kaminang makuasa namangparenta. 4 Ntarimami torroan mala'bih na ia to malaeka', na mala'bih too to sanga nabenni Puang Allataala na ia to sanga naben malaeka'. 5 Moi mesa' malaeka' te'da naden nakuan Puang Allataala, "Ikomo anak-Ku'. Mammula tee too Aku'mo ambe'mu." Te'da too naden nakuanni to malaeka' kumua, "La napuambe'na', na ia la kupuanak." 6 Apa ia tonna suai Puang Allataala to Anak Tungga'-Na mentolino, mangkadai nakua, "Sininna malaeka'-Ku' la ssompai joo Anak-Ku'." 7 Napaui Puang Allataala to malaeka' kumua, "Kupupenjaji susi angin to malaeka'-Ku', susi api dukku to tompangjamanna'." 8 Apa ia to Anak nakuanni Puang Allataala, "Ee, Allataala, ia to kaparentan-Mu la te'da cappa'na! Maruruh to kaparentan-Mu. 9 Mukabudai to kamarurusan na mukaba'cii to kamajekkongan. Iamo joo Aku' Puang-Mu ntokkoko, kuminynyakkii to ulummu menjaji tanda mala'bihmu na kubenko kamarioan la'bi na ia to sola-Mu." 10 Nakuan toopa Puang Allataala to Anak, "Ee Puang, mammula jiona mai Ikomo mpadenni tee lino, na ia to langi' iamo panggaragam-Mu. 11 La masere ngasan tuu lako susi pakean, nalanynya', apa ia to Iko tanglamembaliko. 12 Ia tee lino sola langi' la mulu'pi'i susi baju lando, ammusulleii leko'na. Apa ia to Iko tanglamembaliko na tanglamangnganggean to katuoan-Mu." 13 Moi mesa' malaeka' te'da nakuan Puang Allataala kumua, "Cumadokkoko ntee sa'de kanan-Ku', angkupupentalo ngasanni to ewalim-Mu mukuasaii." 14 Ia to malaeka' mpangjaman Puang Allataala to nasua ntulungngi to tolantarima kasalamatan.

Ibrani 2

1 Mala'bih to Almaseh na ia to malaeka'. Iamo joo nagaja paralluki' nningaranni to pangngajah mangkamo tasa'ding, danggi' nasata'de-ta'dena to kamatapparanta'. 2 Tongan to atoran agama naparatu malaeka' lako tojolota', na ia tocia' mpesa'dingngii ba'tu nturu'i, disessai situru' panggaukanna. 3 Apa pole'pi kita', ia ke te'da taingaran meloi joo Kareba Kasalamatan, tantu te'da talala'pah jio mai pangsessa. Sanga la'bi melo joo Kareba Kasalamatan na ia joo atoran naparatu malaeka' tonna anu'. Puang Isa Ia to bungah mpangpeissenanni, na mangkamiki' napauan tuu lako tobungah ssa'dingngi, antaissenni kumua tongan. 4 Te'da na ia manda joo, apa Puang Allataala Ia ntongananni to kadanna tuu lako tau, anna benni kuasa mpugauk mangrupa-rupa tanda mejangngaran, naben tooi barakka' Roh Allataala situru' pakkaeloran-Na. 5 Te'da nabenni kuasa Puang Allataala to malaeka' la mangparenta keanu' lan Lino Baru to kupau tee too. 6 Sibalikanna, den diuki' lan Sura' Allataala kumua, "Oo, Puang Allataala! Apa todara ia to tolino ammiingaranni? Ia to tolino tau bangri, apa mipuinawa! 7 Mangka mipamajiong to tolino cingga'tu' na ia to malaeka'. Mimane' mpupenjaji tomala'bih, todikasiri', 8 sola tongkuasai sininna apa." Mangka napakuasa Puang Allataala to tolino lako sininna apa. Jaji, moi mesa' te'da apa tangnakuasai to tolino. Moi nasusi joo, ia tee too te'dapa takitai kumua nakuasai tolino to sininna apa. 9 Apa takitamo to Puang Isa to mangka dipamajiong cingga'tu' na ia to malaeka', kumua dipupenjajimo tomala'bih na todikasiri', tonna mangkamo mperasai parri' ratu lako mate-Na. Napattantui Puang Allataala kumua la mate to Puang Isa ssullei to sininna tolino, sanga kameloan penawan-Na. 10 Mangkamo napaden, naampai tarruh tooi Puang Allataala to sininna apa. Naakkattai anna buda tau nasolan Puang Isa lako kamala'biran. Iamo joo napattantui kumua sipato' to Puang Isa mperasai parri' ratu lako mate-Na anna menjaji Tomangpasalama' te'da caccana ba'tu kakuranganna, nawa'ding mpasalama' tau. 11 Puang Isamo to mpupenjajiki' tau mesan-Na Puang Allataala. Tosangrapura to tompupenjaji tau mesan-Na Puang Allataala, na ia to todipupenjaji tau mesan-Na Puang Allataala. Iamo joo na te'da nakasirisanni mpusile'toi to tolino. 12 Nakua Puang Isa lako Puang Allataala, "La kupangpeissenanko lako sile'to-Ku', la kupujiko lan tangnga-tangngana umma'-Mu." 13 Nakua toopa Puang Isa, "La mangrannuan lako mandana' Puang Allataala." Na nakuapa, "Inde'mo', sola tee mai anak to mangka nabenna' Puang Allataala." 14 Ia tuu lako to nasanga anak, tolino ia. Iamo namentolino Puang Isa, anna menjaji susi tuu lako anak. Napugaukki susi joo, dikua anna ia to kamatean-Na wa'dingngi ntaloi Ballisi' to ngkuasai kamatean. 15 Susimi joo nawa'ding Puang Isa lla'paranki' jio mai kuasa kamatean. Dipukaunan tarruhki' jolona, sanga malaja'ki' lako kamatean. 16 Manassamo kumua tangngiara malaeka' to natulung, apa kita'ri bati'na Nabi Ibrahim. 17 Jaji, mentolinomo to Puang Isa namenjaji susi tolino, anna wa'ding menjaji Imang Lompo mangpakamoja', to njama tarruh jaman-Na Puang Allataala. Na ia ke susii joo, wa'dingngi mpasikalino Puang Allataala na tolino na ndampangan too tolino. 18 Na Ia una nadenmo namaparri', nadipengkulle-kullei ssedei mpugauk dosa. Iamo joo nakullei ntulungngi to todipengkulle-kullei toda disede danggi' na mpugauk dosa.

Ibrani 3

1 Ee, todipusile'to padangku' tomatappa' to mangkamo napilei Puang Allataala la mentama suruga! Ingaran meloi to sipa'-Na Puang Isa to takatappa'i, to napattantu Puang Allataala menjaji Rasulu' na Imang Lompo lan agamanta'. 2 Najama tarruhhi to jaman nasuanni Puang Allataala njamai. Susi too Nabi Musa tonna anu' njama tarruhhi to jamanna ntulung taun-Na Puang Allataala. 3 Apa sipato' la'bi dipakala'bih to Puang Isa na Nabi Musa, susi to pande bola la'bi diangga' na ia to bola nagaraga. 4 Simesa'-mesa' bola nang den pandena, apa ia to Puang Allataala mpandei sininna apa. 5 Najama tarruhhi Nabi Musa to jamanna ntulung sininna taun-Na Puang Allataala susi mesa' todisua. Ia to panggaukanna Nabi Musa iamo bajo-bajona apa to undinna la napangpeissenan Puang Allataala. 6 Apa Anak to Almaseh to dipabarakkanni jaman ntulung sininna taun-Na Puang Allataala. Na kita'mo tee to taun-Na, ke da'tanki' matappa' sola da'tanki' mangrannuan lako manda Puang Isa. 7 Iamo joo susi to napau Roh Allataala lan Sura' Allataala kumua, "Ia tee too, ke misa'dingngi to gamaran-Na Puang Allataala, 8 danggi' mimembattuk susi tojolomi to nasolan Nabi Musa jio mai tondok Mesir, tonna mbali-bali Puang Allataala, na nnuji Puang Allataala, jio padang pallawangan. 9 Nakua Puang Allataala, 'Ntuumo jio nanii nnujina' tojolomi, moi na patang pulo taun masainna nanii ngkitai to pangtulung-Ku'.' 10 Iamo joo namagalli Puang Allataala lako tuu lako tau nakua, 'Da'tanni nnewana', na cia' lalo nturu' parenta-Ku'. 11 Angkumagalli kumassapah kukua: Nang la te'damo namentama ntuu joo tondok, to nanii kenden tarruhmo sola Aku'.' " 12 Ee, tomala'bihku'! Ingaran meloi, danggi' naden to mangpenawa gaja' susi joo, ammicia' matappa' lako Puang Allataala to tuo. 13 Jaji, allo-allo kamu' la sipupangngingaran, danggi' naden tau nnuraga kalena mpugauk dosa, mimembattuk. La sipupangngingaran kamu' ke tuo unapa kamu' lan tee wattu to nasanga lan Sura' Allataala, "Ia tee too." 14 Sanga kita' ngasanmo nnampa' barakka' jio mai Almaseh, ke matappa' tarruhki' susi tontamane' matappa' ratu lako ssalainta' lino. 15 Susi tee to diuki' lan Sura' Allataala kumua, "Ia tee too ke misa'dingngi to gamaran-Na Puang Allataala, danggi' mimembattuk, susi tojolomi to nasolan Nabi Musa jio mai tondok Mesir, tonna mbali-bali Puang Allataala." 16 Indamora to ssa'ding gamaran-Na Puang Allataala nabali-balii? Ia to sininna tau nasolan Nabi Musa messun lan mai tondok Mesir. 17 Na indara to nakagalli Puang Allataala patang pulo taun masainna? Ia to tompugauk dosa anna mate jio padang pallawangan. 18 Na indara to mangkamo napassaparan Puang Allataala, kumua te'dai la mentama tondok to nanii kenden tarruhmo mangjama sola Ia? Ia to tocia' menturu' lako Puang Allataala. 19 Jaji, tapahangmo kumua te'da nadieloran mentama, nasaba' cia'i matappa' lako Puang Allataala.

Ibrani 4

1 Tatta' bang unapa to basse-Na Puang Allataala kumua wa'dingki' mentama tondok to tanii kenden tarruhmo mangjama sola Ia. Iamo joo taingaran meloi danggi' naden tau tanglamentama ntuu joo tondok kakendenan to dibasseanki'. 2 Mangkamo dipangpeissenan joo Kareba Kasalamatan lako kita' susi bang una lako to-Yahudi tonna anu'. Apa te'da bua'na lako kalena, sanga te'da namatappa' tonna sa'dingngi. 3 Kita'mo tomatappa' la mentama ntuu joo tondok kakendenan nabasseanki' Puang Allataala. Apa ia to totangmatappa' te'da nalamentama, situru' kadan-Na Puang Allataala kumua, "Magallina' kumassapah kukua, 'Nang la te'damo namentama ntuu joo tondok, to nanii kenden tarruhmo sola Aku'.' " Te'da namentama ntuu joo tondok kakendenan sola Puang Allataala moi namangkamo dipasadia mellao jio mai kajajianna tee lino. 4 Na ia to allo mangpempitu, den diuki' lan Sura' Allataala kumua, "Ia tonna allo mangpempitu nakendennii Puang Allataala to sininna jaman-Na." 5 Na den toopa diuki' lan Sura' Allataala kumua, "Te'da nalamentama ntuu joo tondok, to nanii kenden tarruhmo sola Aku'." 6 Jaji, ia to bungah ssa'dingngi joo Kareba Kasalamatan te'dai mentama ntuu joo tondok kakendenan sanga cia'i matappa'. Ia ke susii joo, manassamo kumua den tolaen wa'ding mentama. 7 Iamo joo napattantu pole' omi Puang Allataala to wattu laen nanii wa'ding to tolino mentama ntuu joo tondok kakendenan. Na ia joo wattu sitonganna iamo tee too. Buttinna kumua mangtaun-taun mangkanna Nabi Musa, nauki' pole'i Raja Daud kadan-Na Puang Allataala to mangka tasa'ding nena' kumua, "Ia tee too ke misa'dingngi to gamaran-Na Puang Allataala, danggi' mimembattuk!" 8 Ia ke la nakullei Yosua ssolanni to to-Yahudi mentama ntuu joo tondok kakendenan to nabasse Puang Allataala, la te'damo napau pole'i Puang Allataala to mesa' wattu laen. 9 Jaji, tatta' bang unapa to basse-Na Puang Allataala lako umma'-Na, iamo to kakendenan susi kakendenan-Na Puang Allataala ke allo mangpempitui. 10 Sanga ia to tomentama ntuu joo tondok kakendenan la nakendenni tarruhhi to jamanna susi Puang Allataala. 11 Iamo joo melo ke tapengkulle-kullei mentama ntuu joo tondok kakendenan to nabasse Puang Allataala, dikua danggi' naden tau tangmentama, susi to-Yahudi tonna anu', sanga cia'i matappa' lako Puang Allataala. 12 Kada tuo na mawatang too to kadan-Na Puang Allataala, na la'bi mataran na ia to pa'dang mataran patomali. Susi pa'dang ntarruh kale ratu lako panglesoan na buku lampa, susi too kadan-Na Puang Allataala ntarruh penawa nnissen pikkirisanna sola akkalanna tolino. 13 Moi mesa' to apa kepenawa te'da membuni jio olo-Na Puang Allataala. Sininna apa pajan jio olo-Na Puang Allataala. Na la tapebalii to panggaukanta' lako Puang Allataala. 14 Denmo Imang Lompo tomala'bihta' to malemo de' suruga mangngolo lako Puang Allataala, iamo to Puang Isa, Anak Allataala. Iamo joo la matappa' tarruhki' na danggi' tapessakkannii kumua tangngia Puangta' to Puang Isa. 15 Ia joo Imang Lompota' naissen to katangpakulleanta', sanga mangkami dipengkulle-kullei disede mpugauk dosa susi kita', apa te'da napugauk dosa. 16 Iamo joo tapada mbaranian kaleta' mangngolo lako Puang Allataala to mpakamoja'ki'. Ia ke tapugaukki susi joo, la taperasai to pangkamasean-Na sola kameloan penawan-Na, nasaba' te'da namela' ntulungki' tontaparalluii.

Ibrani 5

1 Sininna Imang Lompo dipilei jio mai tau biasa, nadiangka' la mpangjaman Puang Allataala wwakkele'ii tuu lako tau. Iamo jamanna to mpangngolo passompan sola karoba lako Puang Allataala dikua nadidampangan to tau. 2 Tau biasa joo Imang Lompo na buda caccana ba'tu kakuranganna. Iamora joo nawa'ding nnissen apara naperasai to tompugauk dosa nasaba' te'dapa naissenni to pangngajaran tongan. 3 Ia ke mpassompanni karoba, tangngia nasaba' dosana mandara tobuda, apa dosana todai ia, sanga buda toda ia kakuranganna. 4 Moi mesa' tau te'da nnangka' kalena menjaji Imang Lompo, apa iapi namenjaji Imang Lompo ke napileii Puang Allataala susi to apa jaji lako imang Harun tonna anu'. 5 Susi toomi to Almaseh. Te'da na ia nnangka' kalena menjaji Imang Lompo. Apa Puang Allataalara nnangka'i tonna kuanni, "Ikomo Anak-Ku'. Mammula tee too Aku'mo ambe'mu." 6 Lan aya' laen nakua toopa Puang Allataala, "Ikomo to imang te'da cappa'na susi imang Melkisedek." 7 Ia tonna tuo unapa Puang Isa lan lino, massambajangngi napasibawai wai matanna to sarro-Na lako Puang Allataala to makuasa mpasalama'i jio mai kamatean. Natarima Puang Allataala to peta'dan-Na, nasaba' mpamajiongngi kalena na mangpesa'ding lako Puang Allataala. 8 Anak Allataalai to Puang Isa, apa moi nasusi joo napelajahhi todai mengkaturu' tonna maparri'. 9 Susimi joo nadipupenjaji Tomangpasalama' te'da caccana ba'tu kakuranganna to mben katuoan melo te'da cappa'na lako tomengkaturu' lako Ia. 10 Naangka'i Puang Allataala menjaji Imang Lompo, susi imang Melkisedek. 11 Budapa to parallu la kiajaran kamu' to kadiangkasan-Na Puang Isa menjaji Imang Lompo, apa masussa kamu' la diajahhi sanga makuttu kamu' mangpesa'ding. 12 Masaimo mituru' to Puang Isa. Sitonganna wattunnamo kamu' mpangpangngajaran kadan-Na Puang Allataala. Apa ianna dikita, parallupa kamu' diajahhi pole' to pangngajaran jio mai kadan-Na Puang Allataala to biasa diben tau mane' matappa' lako Puang Isa. Susipa kamu' pea biccu', tangmitamapangkande kande makarrah, tollo' bang unapa la mikande. 13 Ia to tongkandepa tollo', battuananna pea biccu'pa ia, te'dapa naissenni to disanga melo na gaja'. 14 Ia to kande makarrah dipasadian tomasaranianmo. Tomasaranianmo battuananna ia joo tau nnissenmo to disanga melo na gaja', naturu'i to melo.

Ibrani 6

1 Iamo joo melo ke mipamulai mpelajahhii to pangngajaran kasaranian to sipato' dipangngajaran lako to masaranianmo, danggi' na ia manda mipelajahhi to bungah pangngajaran. Danggi' omo na ia midadu'-dadu' bang to bungah pangngajaran to kumua la tatorroimi mpugaukki to apa te'da bua'na, na la matappa' lako Puang Allataala, 2 ba'tu bungah pangngajaran laen susinna to pangjioran, kapanglullungan pala', katuoan pole' jio mai kamatean, ba'tu pangsessa te'da cappa'na. 3 Jaji, ia ke napuelohhi Puang Allataala, la memmasaranianmiki'! 4 Ia ke denni tomatappa'mo lako Puang Isa anna cia' pole' omo matappa', te'damo nadikulle mpupengkatoba' pole'i. Naperasaimo to barakka'-Na Puang Allataala, naperasai toomo to kuasan-Na Roh Allataala, naissenmo to kumua melo to kadan-Na Puang Allataala, naperasai toomo to kuasan-Na to la napake jio ahera'. Apa ia ke susii joo, nacia'mo ia matappa' lako Puang Isa, te'damo nadikulle mpupengkatoba' pole'i, sanga padami to mpampang pole' Anak Allataala jao kaju sitamben. Iamo joo napusaba' nate'damo nakasiri'i tobuda to Puang Isa. 7 Ia to padang ncuccu' wai uran ke uran oi, na mpaendek assele' tananan makkeguna lako to tonjamai, nabarakka'i Puang Allataala. 8 Apa ia to padang ke natuoii dea sola duri, te'da bua'na. La natampakki ropu Puang Allataala na undinna la disumpun. 9 Ee, tomala'bihku' to kupakamoja'! Moi angkimangkada susi joo, apa kikatappa'i kumua ia to kamu' susi to padang nabarakka'i Puang Allataala ammimangnguju lako kasalamatan. 10 Te'da natangmaruruh to Puang Allataala. Te'da natangnningaranni to apa mipugauk, iamo to pangpakamoja'mi to mipangpekitan lako kale-Na tommitulung padammi tomatappa', la jolona, la ia too allo. 11 Gaja kirannuan kumua kemmipada masumanga' tarruh ratu lako cappa'na ammitarimai to apa mirannuan. 12 Cia'kan ke memmakuttu kamu'. Apa madoangkan kumua miala palelean matai to tomatappa' lako Puang Allataala, anna sabbara' ntajanni sanaampa'na to apa nabasseanni Puang Allataala. 13 Ia tonna pau basse-Na Puang Allataala lako Nabi Ibrahim, namassapah kumua la napugauk to apa pura nabasseanni. Massapah Puang Allataala mpau sangan-Na, nasaba' te'da tau la'bi makuasa na Ia. 14 Napassaparanni to kalena kumua, "Danggi' musangana' Puang Allataala, ke te'dai kubarakka'iko, angkupupembudai to bati'mu." 15 Sabbara'i to Nabi Ibrahim ntajanni to janjinna, sanggenna naampa' to apa nabasseanni Puang Allataala. 16 Ianna massapah to tau, biasa mpau sanganna tau to la'bi makuasa na kalena. Iamo ntongananni joo kadanna anna te'damo tau mpebalii. 17 Madoangngi Puang Allataala mpamanassai lako to ntarimai to apa nabasseanni kumua te'da natanglampatarruhhi to akkatta-Na. Iamo joo namassapah tonna pau basse-Na. 18 Ia joo dua, iamo to basse-Na sola sapah-Na te'da namembali, sanga te'da nakullei Puang Allataala mangnguraga. Susimi joo napamasumanga'ki' kita' to napasalama'mo Puang Allataala, antarannuan tarruh Puang Allataala kumua la napugaukki to apa nabasseanki'. 19 Ia joo rannunta' susi jangkar titanan mandalan antasamatappa'-tappa'na. Ia joo rannunta' ntarruh kaen pesapa' Ngenan Kaminang Macero jio Bola Puang Allataala jao suruga antamangngolo lako Puang Allataala. 20 Najoloanmiki' Puang Isa lako ntuu joo, na menjaji Imang Lompota' te'da cappa'na, susi imang Melkisedek.

Ibrani 7

1 Raja joo Melkisedek jio kota Salem tonna anu' na imang tooi to nnurusu' kamassompan lako Puang Allataala to kaminang mala'bih. Ia tonna polemo Nabi Ibrahim mangrari ntalo ba'tu pira-pira raja, malemi imang Melkisedek ntammuii nabarakka'ii. 2 Nabenni Nabi Ibrahim tawa sangpulona sininna to apa narampa. (Ia to imang Melkisedek disanga "Raja Kamarurusan", sanga ia to kada melkisedek battuananna raja kamarurusan. Disanga tooi "Raja Kasikalinoan", sanga rajai jio kota Salem, na salem battuananna kasikalinoan.) 3 Ia tee imang Melkisedek te'da bang apa diissen to jiona kalena, la tomatuanna ba'tu nunnungan nenena, te'da ia pamulanna, na te'da too cappa'na to katuoanna. Susii Anak Allataala, sanga tatta'i imang te'da cappa'na. 4 Jaji, lan ntee tanii nnissenni kumua tomatande tee imang Melkisedek. Ia to Nabi Ibrahim tomatande too, nasaba' iamo to napuambe' sininna to-Israel. Moi nasusi joo naangga' Nabi Ibrahim to imang Melkisedek anna benni tawa sangpulona sininna to apa narampa lan kapararian. 5 Situru' atoranna Nabi Musa, ia to imang bati'na Lewi la nnampa' tawa sangpulona assele'na to-Yahudi, moi napada-padai bati'na Nabi Ibrahim. 6 Apa ia to imang Melkisedek tangngia bati'na Lewi. Moi nasusi joo nnampa' toda tawa sangpulona to apa narampa Nabi Ibrahim. Puang Allataala mpau basse-Na lako Nabi Ibrahim. Moi nasusi joo ia to Nabi Ibrahim nabarakka'i imang Melkisedek. 7 Sininna tau nnissenni kumua matande ia to tomangbarakka'i na ia to todibarakka'i. 8 Ia to imang bati'na Lewi, to ntarima passompan tawa sangpulona, la mate sanga tolino biasai. Apa ia to imang Melkisedek, to ntarima toda passompan tawa sangpulona, tuo tarruhhi ia situru' Sura' Allataala. 9 Wa'ding dipau kumua, ia tonna mamajah Nabi Ibrahim tawa sangpulona lako imang Melkisedek, meccoe' todami mamajah Lewi sola bati'na, to la nnampa' tawa sangpulona assele'na padanna to-Israel. 10 Wa'ding dipau susi joo, sanga ia tonna sitammu imang Melkisedek to Nabi Ibrahim, lanmo batang kalena Nabi Ibrahim to Lewi, moi te'dapa najaji. 11 Ia tonna benni Puang Allataala to atoran agama lako to-Yahudi, naangka' tooi to bati'na Lewi menjaji imang nnajahhi tau nturu'i joo atoran. Jaji, den kasiumputanna imang na atoran agama to-Yahudi. Apa te'da nakullei to imang bati'na Lewi mpupenjaji tomelo tau. Iamo joo parallu den imang laen susi imang Melkisedek to te'da napole jio mai bati'na Lewi susi imang Harun. 12 Jaji, ia ke ia to imang bati'na Lewi mangka disullei imang laen, ia to atoran agama to-Yahudi la disulle toda ia. 13 Na Puangta'mo tee kusanga. Iamo to disanga imang laen, to pole jio mai pangrapuan laen. Na ia joo pangrapuan laen te'da naden bati'na menjaji imang. 14 Naissen ngasan tau kumua ia to Puangta' pole jio mai pangrapuanna Yehuda, na te'da naden napaui Nabi Musa kumua la den bati'na Yehuda menjaji imang. 15 Manassamo kumua te'da nakullei to imang bati'na Lewi mpupenjaji tomelo tau, sanga naangka'mo Puang Allataala to mesa' imang laen susi imang Melkisedek. 16 Te'da nadiangka' situru' atoran tolino, apa diangka'i sanga kuasa katuoan-Na to te'da cappa'na. 17 Sanga den diuki' lan Sura' Allataala kumua, "Ikomo to imang te'da cappa'na, susi imang Melkisedek." 18 Susimi joo natangdipuinawamo to atoran jolo, to tanglakomo na te'damo bua'na, 19 sanga ia to atoranna Nabi Musa te'da nakullei mpupenjaji melo tau, moi mesa'. Na ia to tarannuan tee too la'bi melo na ia to dirannuan jolona, antabarani mangngolo lako Puang Allataala. 20 Apa pole'pi, den sapah-Na Puang Allataala anna menjaji imang to Puang Isa. Te'da namassapah tonna diangka' to imang laen. 21 Apa massapah Puang Allataala anna diangka' Puang Isa menjaji imang. Ia joo wattu nakuanni Puang Allataala, "Aku' Puang massapahmo, na te'da kulassullei kadang-Ku', 'Ikomo to imang te'da cappa'na.' " 22 Pajanmo lan joo sapah kumua Puang Isamo mpasijajianni to basse la'bi melo. 23 Na sitarruhna, budai joo imang bati'na Lewi, sanga pada matei anna te'da nakullei mpatarruhhi to jamanna. 24 Na ia to kaimangan-Na Puang Isa te'da nadiben tau laen, sanga tuoi te'da cappa'na. 25 Iamo joo na te'da lalo natorroii mpasalama' tau to mangngolo lako Puang Allataala mpau sangan-Na, sanga tuo tarruhhi la mpangkadananni lako Puang Allataala. 26 Jaji, iamo Imang Lompo taparallui to Puang Isa. Tomelo Ia, te'da sala-Na ba'tu kakurangan-Na. Todipatorro leko' jio mai tomadosa, na dipaendek de' la'bi majaona na ia to langi'. 27 Te'da nasusi to Imang Lompo laen, to allo-allo mangkaroba jolo' meta'da nadidampangan, namane' mpangkaroban tobuda. Na ia to Puang Isa pissenri mangkaroba lako Puang Allataala, iamo to mpangkaroban batang kale-Na. 28 Situru' atoranna Nabi Musa ia to tolino biasa diangka' menjaji Imang Lompo moi naden caccana ba'tu kakuranganna. Apa ia to sapah-Na Puang Allataala, to dipau undi na ia to atoranna Nabi Musa, nnangka'i joo Anak to te'da caccana ba'tu te'da kakuranganna menjaji Imang Lompo. Ia joo Anak mangkamo napupenjaji Tomangpasalama' te'da cappa'na.

Ibrani 8

1 Ia to garonto'na sininna tee kupau: Iamo to Imang Lompota' cumadokko jao suruga jio sa'de kanan-Na Puang Allataala to kaminang makuasa, anna mangparenta sola. 2 Njamai jaman Imang Lompo lan bola-Na Puang jao suruga. Ia joo bola iamo Tenda Tongan, to napake'deh Puang, tangngia panggaraga tolino. 3 Sininna Imang Lompo diangka' la mpugauk mpassompan sola karoba lako Puang Allataala. Susi toomi Puang Isa to Imang Lompota' parallu den apa napassompan. 4 Ia kenna la inde' unapa lino, te'da lalo nalanjama jaman imang, sanga denmo imang mpassompan karoba situru' atoranna Nabi Musa. 5 Ia to jaman najama tuu lako imang, sitonganna pangpasusianra ba'tu bajo-bajonara to apa denmo jao suruga. Susi toomi ia to tenda passompan napake'deh Nabi Musa tonna anu', bajo-bajonara to Tenda Tongan. Iamo joo nakuanni Puang Allataala to Musa, "Ingaranni! Padami to la mugaraga, la mupasusi ngasanni to apa mangka dipakitanko jao buntu." 6 Apa la'bi melo to jaman dipabarakkananni Puang Isa na ia to jamanna imang bati'na Lewi. Puang Isamo mpasijajianni to basse-Na Puang Allataala sola tolino. Na ia joo basse la'bi melo na ia to basse napasijajian Nabi Musa. La'bi melo joo basse baru, sanga la'bi melo to apa dipau lan. 7 Ia kenna la te'da caccana ba'tu kakuranganna to basse jolo, tantu te'damo naparallu dipaden to basse baru. 8 Apa kasalanni to umma'-Na Puang Allataala. Iamo joo nakuanni, "Ingaranni, la den wattunna angkulampaden basse baru sola pangrapuanna Israel na Yehuda. 9 Te'da nasusi to basse kupaden sola tojolona, tongkusolanni messun lan mai tondok Mesir. Te'da napugaukki joo basse, iamo joo te'da kutarimai. 10 Iamo tee basse la kupaden sola to-Israel to wattu la dioloi lako: la kupallan pikkirisanna to atoran-Ku', na kuuki'i lan penawanna. Aku' Puang Allataala to la nasompa, na ia la kupupenjaji umma'-Ku'. 11 Na te'damo naparallu siajaran solana, ba'tu la ngkuan sile'tona 'Issenni to Puang Allataala', sanga la tobiasa, la tokaissenan, la naissen ngasanna'. 12 La kudampangan ngasanni, na te'damo kulanningaranni to dosana." 13 Napaui Puang Allataala kumua la dipadenni to basse baru. Iamo mpamanassai kumua matuami na tangdipuinawamo to basse jolo. Na ia to apa ke memmatuami te'damo nadipake, cingga'tu'mora nalanynya'.

Ibrani 9

1 Ia to basse jolo-Na Puang Allataala, den atoran passompan, na den too tenda passompan panggaraga tolino. 2 Ia joo tenda passompan disapa'i. Ia to ngenan jio olo disanga Ngenan Macero. Den ngenan palita jio, na den too meja dipanii roti to dipassompan lako Puang Allataala. 3 Ia to lanna liu, to napasisarak kaen pesapa', disanga Ngenan Kaminang Macero. 4 Den meja disapu' bulawan jio, to dipade'i pangdupan. Na den too mesa' patti disanga Patti Kasibassean to disapu' ngasan bulawan. Lan joo patti den kurin bulawan to nanii kande disanga manna, tekkenna imang Harun to mentarukmo tonna anu', na dua papan batu to dinii nnuki' sangpulo parenta-Na Puang Allataala. 5 Den dua tau-taunna Kerub jao tungu'na joo patti, tanda kumua jioi to Puang Allataala. Mballahhi pani'na joo kerub na ssamboi tutu' patti to dinii ndampangan tau. Apa te'damo naladipau simesa'-mesa' tee too. 6 Susimi joo diatoro' joo tenda passompan. Allo-allo tuli mentama Ngenan Macero to imang la njama jamanna. 7 Imang Lompo manda to mentama Ngenan Kaminang Macero, na sipissen toori sangtaun napugauk. Ianna mentama, mbawai rara karoba napassompan lako Puang Allataala, meta'da anna didampangan ke den dosa te'da nadianggai'i moi to napugauk imang iarika tobuda. 8 Susimi joo n