1 Tealaba te ruka fagmai merisukisuki narogorogoana gi seratrogo laba te bi lesoko berakati bakiigita, 2 Tebeloana, nara ruka ba selafe libisia namitera bo bi tasila gi nafisan, ruka trogorogkinia bakiigita; 3 Tewanaga e mo kwia kinou, taka ba selafea usi berakati bakoutia, aga manago mitiria ega lena Teofile nawot, 4 Kuga ataisuki nafilesokoena gi nafisana mouana ruka tikiataikosa. 5 Maloana, Erote eka meramera Iutaiasa, natamole toumata iskei eka toko, nagiena Sakaria, nakeinaga ni Abia: go anagaruni nani Aron iskei, nagiena Elisabet. 6 Go raka rua lena nirai ni Atua bo to usi bakouti nafisuakien go natonakiena gi Nawota, raka tiba merisa mou. 7 Go nanira eka tika, Elisabet teka ruma, go intoura eka laba. 8 Go eka fakilini, nai teka to wisiwis nawisiena gi natamole toumafa nirai ni Atua nalio ni aginai nakeinaga. 9 E takusi subwi natamole toumafa eka te aginai ega sili nasuma gi Nawota bo tubwaraki teanabowia. 10 Go nerei laba ruka to bakouti ekatema mal na tubwaraki teanabowiana. 11 Go agelo gi Nawot eka fakilini kinia bo tu matuena ni fata ini teanabowia. 12 Go Sakaria eka libisia bo tururuis go namtakuen eka fakilini kinia. 13 Go agelo eka fisabakinia, bo tuli, Ba tiba mitaku mou, Sakaria: teka rogi nafiran aginago; go amagaruni Elisabet ego manago biselaki totou nanoi, go bo so nagiena ki Ioane. 14 Go nago kugo maro bo lailai; go tealaba rugo lailai nafakilinien aginai. 15 Tego matua nirai Nawot, go ego tiba mun wain go namunuen kasua mou; go ego bura ki Nimaruna Tab ba nakwela ni bwilena. 16 Go ego bati tealaba gi nani Israel rugo meraroa baki Nawot Atua aginara. 17 Go ego bea kinia bobo ni Elaia go nakasuan aginai, ega bati nakbo tematua ega meraroa baki totou, go natamole sigsigleo namitamatuan gi natamole lena; ega merisukisuki nerei ruga toraki Nawot. 18 Go Sakaria eka fisabaki agelo, bo tuli, Ago atai toanaga insefa? tabi nimarik, go agagaruni intouna laba. 19 Go agelo eka fisateraia bo tuli, Kinu a bi Kabriel, a tu nirai ni Atua; go eka tubwakiluou aga tuli narogorogoanaui wanaga bakigo. 20 Go, baleo, kugai bunutana bo biso sarafi baki naliati wan seratrogo mouanaga ego bakilinasa, kuka tiba seralesoko nafisau aginou mou e bi inlaken, nalion ego sokos mal agana. 21 Go nerei ruka teraki Sakaria, ruka maga natokasuen aginai asuma tab. 22 Go eka faki ekatema bo bisa sarafi bakita: go ruka ataia teka libi teafakilini nasuma tab: teka tu tasuki bakita, eka fi busa tu. 23 Go eka fakilini noubwe nawisien aginai ekai nu, go eka faki nasum aginai bano. 24 Naliati mouanaga rukai nu, go Elisabet anagaruni eka tiena, go eka tumana tasurikinian atulagi lima, bo tuli, 25 Takanoanaga Nawot eka maginou batia naliati eka lobakinou ega selalu toane natamol ruka futuliousa. 26 Go atulagi kelatesa Atua eka tubwakilu agelo, Kabriel, ega faki natokon ini Kalilai, nagiena Nasaret. 27 Ega fa libi mitaona, anuwota nagiena Iosef, nakeinaga gi Tafit; go nagie mitaona Mere. 28 Go agelo eka sili banamai libisia bo tuli, Ba maro, E trutrumiko, Nawot e neko toko: e bisakwiakigo seranagaruni. 29 Go eka libisia bo tururu nafisan aginai, go eka mitroasera nafisatafiena netu e naga ega ku. 30 Go agelo eka tikinias, Ba tiba mitaku mou, Mere: te ku bagmouri insouwiana ki Atua. 31 Go, baleo, kugo tiena bo biselaki totou nanoi, go bo so nagiena ki Iesu. 32 Nai ego matua go rugo seki Nani nataskinabakilag, go Nawot Atua ego tuai trono gi Tafit anafa: 33 Go ego meraki nakeinaga gi Iakob baki serali; go namerameran aginai ego tiba nu mou. 34 Go Mere eka fisabaki agelo, bo tuli, Toanaga ego tubalise? ta tiba atai te nanoi mou. 35 Go agelo ika fisateraia bo tuli, Nimaruna Tab ego banamai matoako, go nakasuana gi Nataskinabakilag ego melugoriko: tewanaga Teatab kugo biselakinia rugo mero seki Nani Atua. 36 Go, baleo, Elisabet intama e bi fiteriki bo tiena ki totou: go atulagi wanetou e bi kelatesa aginai ruka seas e ruma tu. 37 Atua te tiba batsarafi te namatuna mou. 38 Go Mere eka tuli, Baleo, nagaruni gi Nawot; ega fakilini kinou ega takusi nafisan aginago. Go agelo eka mwilu tua kinia bano. 39 Go Mere eka tulena maloan bo ban marafirafi baki alia intafa, baki natokona iskei ni Iuta; 40 Go eka sili nasuma gi Sakaria bo bisatafi Elisabet. 41 Go eka fakilini, Elisabet teka rogi nafisatafiena gi Mere go totou eka soka nalwelinasa; go Elisabet eka fura ki Nimaruna Tab: 42 Go eka fioso naliona kwila, bo tuli, Eka fisakwiakigo seranagaruni, go eka fisakwiaki nua nakwelima. 43 Go toanaga e maginou ba se banamai, bwile Nawot aginou te banamai libisiou? 44 Baleo, wan nalio nafisatafien aginago eka sili intaligagu, totou eka soka nalailaien nakweligu. 45 Go nai taka seralesoko e maro: tealaba Nawot eka tikinias, nalion ego sokos. 46 Go Mere eka tuli, Nakbogu e seralomatua Nawot, 47 Go Nimarugu e lailai Atua Natemutiou. 48 Teka mitroaki nagaruni atara aginai te tika ki seratrogo: baleo, ba maloanaga serintagonatamole te rugo soou ki a maro. 49 Nai te skinamiel teka maginou bati seratrogo matua, go nagien e tab. 50 Go e rogaisa toane ru mitoukinia serintagonatamole 51 Narun e merigasua; e sabiriki natamole merimitaga namitroena gi nakbora. 52 E busiliki nawota ki trono, go e busaki natamole mole. 53 E bakafuka ki natamole bitelo ki teawia; go e tubwatubwa sogaleba ru bura bano. 54 E bakamarmaro Israel nikarikik aginai bo mitroaberakati natrumien; 55 Tebeloan eka fisabaki temagita, baki Abraam go naworaworana serali. 56 Go Mere eka nea mato, mesa atulagi tolu, bo liliu baki sum aginai. 57 Go mal nafiselana gi Elisabet eka fakilini; go eka fiselaki totou nanoi. 58 Go intana go nakan kiena ruka rogi takanoai Nawot eka trumia bikwila; go nara me nai ruka mou maro. 59 Go eka fakilini naliati kelatolu te ruka fanamai ruga tefe totou: go ruka seki nagie anafa Sakaria. 60 Go bwilena eka fisaterara bo tuli, E tika; me loane ego bi nagiena. 61 Go ruka tikinias, Te intama e tiba seluagiena wanaga mou. 62 Go ruka tasuki baki anafa, insefa e mesouna ega bi nagiena. 63 Go eka fitago nababa namtirien bo mitiriasa, Nagiena Ioane. Go ruka nou magas. 64 Go nagolina eka bamaoto marafirafi, go namenana eka wia, go eka fisa bo bisakwia ki Atua. 65 Go namtakuen eka fakilini ki bakouti nakan kieta taliferi: go ruka trogorogki seratrogo mouanaga useriki bakouti worintafa ni Iutaia. 66 Go tealaba te ruka to rogia, ruka fatiitu nakbora bo tuli, Totou wanaga ego bati ega tubalise? go naru Nawot eka nea toko. 67 Go Sakaria anafa eka fura ki Nimaruna Tab go eka fi brofeta bisa bo tuli. 68 Tuga bisakwia ki Nawot Atua gi Israel; te banamai libi nerei aginai bo tuli. 69 Bo minigita ske nabati namutiena tulena nasuma gi Tafit karikiki aginai; 70 Tebeloana eka ba selafea tulia nagoli nabrofeta tabu aginai: 71 Tega mutiigita ki waluatugita, go ki naru tealaba oane ru bubosakiigita; 72 Ega bati natrumiena baki temagita, go ega mitroaberakati nafisaleen tabu aginai; 73 Nafisan naskemouena eka skemouis baki Abraam temagita, 74 Tega fuluigita ki naru waluatugita bo tuigitas tuga tika ki namtakuena sileia, 75 Ki bobomwaru go ki namerilenana niraiena sera naliati agi namourien anigita. 76 Go nago totou rugo soko ki brofeta gi Nata-skina-bakilag: te kugo fea ki nirai Nawot bo merisukisuki nabua aginai; 77 Kuga fiseiki aginai nerei nabua namutien, te batilu nasigsigleoen aginara, 78 Natrumiena matua gi Atua anigita e bi inlakena; namirama ini elag e aliatibisaki-igitasa, 79 Ega miramani toane ru to nimaligo go melu nimatiena, ega belaki natuogita baki nabua netomate. 80 Go totou eka to lebaleba go eka kasua nimaruna, go eka to lia milati baki naliati wan eka fakilini ki Israelis.