/1 Ia na Kalou sa vakatakila na nona loloma vei keda, ni sa mate na Karisito me nodai sosomi ni da sa tamata ca. Ia ni sa bera na kana vata ni lako-sivia, ka sa kila ko Jisu sa yaco mai na nona gauna me lako tani yani e vuravura oqo vua na Tamana, ka ni sa lomani ira na nona era sa tiko e vuravura, sa lomani ira ki nai otioti. Maivei Jisu Karisito talega, na dautukutuku yalodina, na ulumatua vei ira era sa tu cake tale mai na mate, kei na nodra Turaga levu na tui e vuravura. Vei koya sa lomani keda, ka savai keda mai na nodai valavala ca e na nona dra dina. Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu. Sa rairai eliu vei au ko Jiova ka kaya; Io, ka'u sa lomani iko e na loloma sa sega ni mudu: o koya oqo ka'u sa vakadedetaka kina na loloma vei iko.

/2 Ia na ka oqo sa sega ni veiletitaki ni sa ka levu na ka ni Kalou ka vuni tu eliu: Sa rairai vakatamata na Kalou, sa vakadinadina vei koya na Yalo Tabu, sa raici koya na agilose eso, sa vunautaki ko koya vei ira na veimatanitu, sa vakabauti koya eso na kai vuravura, sa kau cake ki na vanua vakaiukuuku. Ia sa yaco kecega oqo, me vakayacori kina na vosa ni Turaga ko ya sa tukuna na parofita, ka kaya, Raica, ena bukete e dua na goneyalewa, ka na vakasucuma e dua na gonetagane, Ka na vakayacani ko Imanueli: a kenai balebale, Na Kalou ka tiko vata kei keda. Sa kaya vua ko Jisu, Ni'u sa tiko dede vakaoqo kei kemudou, ko sa sega li ni kilai au, Filipi? ko koya sa raici au, sa raici Tamaqu; ia ko sa kaya vakacava, Vakatakilai Tamamu vei keitou? E nai vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa. A sa yaco me tamata ko koya na Vosa, ka tiko vata kei keda, sa sinai e na loloma kei na dina.

/3 A sa vosa na agilose, ka kaya vua, Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: ia ko koya ena sucu mai vei iko ena vakatokai kina me ka tabu na Luve ni Kalou. O koya yadua ena vakatusa ni sa Luve ni Kalou ko Jisu, sa tiko sara na Kalou vei koya, ia sa tiko ko koya vua na Kalou. Ni sa tiko e na yagona na ka kecega sa sinai kina na Kalou. Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa; ena vakatokai na yacana ko Veivakurabuitaki, nai Vakavuvuli, na Kalou kaukauwa, na Tama ni gauna tawa mudu, na Tui ni Sautu. Ni sa vosa tiko ko koya, raica, sa dua na o lumilumisa sa vakarurugi iratou: ka raica, sa rogo e dua na vosa mai na o, sa kaya, Oqo na noqu Gone ni toko, au sa dauvinakata vakalevu; dou vakarogoci koya.

/4 A sa kaya vei ira ko koya, Dou sa lako mai ra; au sa lako mai cake: dou sa vakavuravura; au sa sega ni vakavuravura. Sa kaya vua ko Jisu, Oi au na vu ni tu-cake-tale, kei na vu-ni-bula: ko koya sa vakabauti au, kevaka sa mate, ena bula ga. Dou sa vakatokai au me'ui Vakavuvuli, me'u Turaga talega: ia dou sa vosa dina; ni'u sa vakakina. A sa kaya vei ira ko Jisu, Koi au na madrai ni bula: ko koya sa lako mai vei au, ena sega ni viakana; ia ko koya sa vakabauti au, ena sega ni viagunu tale. Ni'u sa tiko e vuravura, au sa rarama kei vuravura. Sa kaya vei irta ko Jisu, E dina, e dina, au sa kaya vei kemudou, Ni sa bera ni sucu ko Eparaama, au sa bula. Sa qai kaya tale vei ira ko Jisu, E dina, e dina, au sa kaya vei kemudou, Oi au na katuba ni sipi.

/5 Sa qai vosa ko koya vei ira na lewe vuqa me ra tiko sobu e na co, a sa taura nai buli madrai e lima, kei na ika e rua, a sa ta cake ki lomalagi, ka lotutaka, a sa dovia na veibuli madrai, ka solia vei ira na tisaipeli, ia ko ira na tisaipeli era sa solia vei ira na lewe vuqa. A ra sa kana kecega, a ra sa mamau: a ra sa tomika vata na vo ni ka sa dovi, a sa tinikarua nai su sa sinai kina. Ia ko ira sa kana era sa lewe lima beka na udolu na tagane, ia ko ira na yalewa kei na gone era sa sega ni wili. A sa vosa ko Saimoni, ka kaya vua, Na Turaga, keitou sa ia tiko e na bogi ka sigavaka, ka keitou sa sega ni rawata e dua na ka; ia e na vuku ni nomuni vosa, ka'u na viritaka sobu na lawa. Ia ni ratou sa kitaka vakakina, sa ka levu sara na ika eratou sa kovuta: a sa bote kina na nodratou lawa. Ka raica, e lewe rua na tamata mataboko sa tiko e na bati ni sala, ia ni rau sa rogoca sa lako voli yani ko Jisu, erau sa kacikaci, ka kaya, Mo ni lomani keirau mai, na Turaga, na Luve i Tevita. Sa qai yalololoma ko Jisu, a sa tara na matadrau: a sa rai vinaka vakasauri na matadrau, a rau sa muri koya.

/6