The Old Testament of the Holy Bible

Vakatekivu 1

Nai Tukutuku Ni Veibuli

1 Na Kalou, e nai tekitekivu ni ka kecega, sa vakavuna na veilomalagi kei na vuravura. 2 Na vuravura sa sega ni vakavotukana tu, qai lala talega; na kena butobuto sa titobu sara. Na Yalo ni Kalou sa vakaraica sobu tu mai na dela ni wai. 3 Na Kalou sa tukuna, "Me sa rarama mai," sa qai dua sara na rarama. 4 Na Kalou sa raica na rarama, ka sa vinaka. Na Kalou sa wasea na rarama mai na butobuto. 5 Na Kalou sa tukuna, na rarama me Siga, kei na butobuto me Bogi. Na karobo ni yakavi ki na kida ni mataka, sai matai ni siga. 6 Na Kalou sa tukuna, "Me dua mada na kabukabu, me wasea na veiwai mai na veiwai." 7 Na Kalou sa qai cakava na kabukabu, ka sa wasea na wai sa tiko ena ruku ni kabukabu kei na wai ena dela ni kabukabu, sa yaco me vakakina. 8 Na Kalou sa vakayacana na kabukabu ni maliwa lala, na Lomalagi, sa karobo na yakavi ka sa mataka tale, sai karua ni siga. 9 Na Kalou sa tukuna, "Na wai kece ena ruku i lomalagi, me vakasoqoni kece ena dua na vanua, ka me basika mai na vanua mamaca;" sa yaco me vakakina. 10 Na Kalou sa vakayacana na vanua mamaca me Vuravura, kei na wai sa vakasoqoni vata tu, me, Wasawasa. Na Kalou sa raica oqo ni sa vinaka. 11 Na Kalou sa qai tukuna, "Na vanua me vakatubura mai na veico, na veisenikau kei na botebotekoro sa vakasorena, na veivunikau sa vakavuana ena kena veimataqali sa tiko e loma na sorena," sa yaco me vakakina. 12 Sa tubu mai na veico, na veisenikau, na botebotekoro vakasorena na kena veimataqali, na veivunikau vakavuana sa tiko e loma na sorena ena kena veimataqali. Na Kalou sa raica ni sa vinaka. 13 Sa karobo, ka sa mataka tale na i katolu ni siga. 14 Na Kalou sa tukuna tale, "Me dua na rarama me tiko mai lomalagi, me wasea na siga mai na bogi, me vakatakilakila ni veiveisau ni veitabadraki kei na veitaba-gauna, vakasiga ka vakayabaki talega; 15 "Me rarama kina na veilomalagi ka me solia mai na rarama e vuravura." Sa yaco me vakakina. 16 Na Kalou sa cakava e rua na rarama levu, na rarama levu me lewa na siga kei na rarama me lewa na bogi. Sa bulia talega na veikalokalo. 17 Na Kalou sa vakatikori ira na veirarama oqo ena veiyasana vakalomalagi, me ra solia mai na rarama ki vuravura, 18 ka me ra lewa talega na siga kei na bogi, me ra wasea na rarama mai na butobuto. Na Kalou, ni sa raica oqo, sa vinaka vua. 19 Oqo na karobo ni yakavi kei na mataka, sa i ka va ni siga. 20 Na Kalou sa qai tukuna, "Me sa levu mai na wai, ka me levu talega mai na vei manumanu bula, me ra sa vuka mai na manumanu vuka e delai vuravura ka vukaca yani na veiyasana vakalomalagi." 21 Na Kalou sa qai bulia na veimanumanu levu ni waitui kei na veika bula kecega era sinai tu mai na wailevu ena kena veimataqali, na vei manumanu kece vakatabana ena kena veimataqali. Na Kalou, ni sa raica oqo sa vinaka vua. 22 Na Kalou sa qai vosa vakalouvinakataka na veika oqo ka tukuna, "Mo ni yagavakalevu ka vakavuqataki kemuni ka vakatawana na wai ni wasawasa kei na manumanu vuka me levu sara e vuravura." 23 Sa qai karobo na yakavi ka mataka tale ni kalima ni siga. 24 Na Kalou sa qai tukuna, "O vuravura me kauta mai na veika bula me vaka na kena veimataqali na manumanu yavai va, na veimanumanu kece sa qasi voli, na veimanumanu kila ni veikau, o ira kece oqo kei na kena veimataqali," sa yaco me vakakina. 25 Na Kalou sa bulia na veimanumanu ni vuravura me vaka na kena veimataqali, na bulumakau, na veika sa qasi voli, na veimanumanu kila ni vanua, me vaka na kedra dui veimataqali. Na Kalou ni sa raica oqo, sa vinaka dina. 26 Na Kalou sa tukuna, "Medatou bulia mada na tamata me vakataki kedatou, me rairai vakataki kedatou, me ra lewa na vei ika kecega mai wai, na veimanumanu vuka e macawa kei na manumanu kecega ni vanua kei na veika kecega sa qasi voli e delai vuravura." 27 Na Kalou, sa qai bulia na tamata me vakataki Koya ga, e nai rairai ga e va-Kalou, na Kalou sa bulia kina na tamata, na tagane kei na yalewa sa bulia o Koya. 28 Na Kalou sa vakalouvinakataki rau, ka sa tukuna vei rau, "Mo drau yagavakalevu ka vakalewelevutaki kemudrau, me vakatawai o vuravura ka me vakarorogo vei kemudrau; drau lewa na ika mai wai, na manumanu vuka e macawa, kei na veika kecega sa lako voli e delai vuravura." 29 Na Kalou sa tukuna, "Raica, Au sa solia vei kemudrau na veico kei na veika sa tubu mai ena qele, ka vakasorena tiko kei na vei vunikau vakavuana sa tiko e loma na sorena, oqori me kakana. 30 "Na vei manumanu kece ni veikau kei na manumanu vuka ni macawa kei na veika kecega sa qasi voli e vuravura ka bula tiko, Au sa solia vei ira na co kei na botebotekoro kecega sa tubu mai me kedra kakana;" sa yaco me vakakina. 31 Na Kalou, ni sa raica na veika kece sa cakava oti, io, sa dina, sa vinaka sara. Sa qai karobo na yakavi ka mataka ni ka ono ni siga.

Vakatekivu 2

1 Na veilomalagi kei na vuravura, kei na ka kecega sa tiko kina, sa buli oti. 2 Ena i kavitu ni siga, sa mai oti kina na Nona cakacaka na Kalou. Sa vakacegu ena i kavitu ni siga na Kalou mai na Nona cakacaka kecega ni veibuli sa cakava oti. 3 Na Kalou sa qai vakalouvinakataka nai kavitu ni siga ka vakatabuya, baleta ni sa vakacegu mai na Nona cakacaka kecega sa cakava ka bulia na Kalou. 4 Oqo nai tukutuku ni veigauna kei lomalagi kei vuravura, ena gauna rau sa buli kina, ena siga sa bulia kina na lomalagi kei na vuravura na Kalou o Jiova, 5 ni se bera ni tubu mai e dua na kau ena vanua se, e dua na co me tubu mai. Na Kalou o Jiova e se bera ni vakavuna me tau mai na uca ki vuravura, ka e se bera ni tiko e dua na tamata me vakarautaka na qele; 6 sa lako cake ga mai na tegu mai vuravura ka vakasuasuataka na qele taucoko. 7 Na Kalou o Jiova sa bulia na tamata mai na kuvu ni soso mai na qele ka solia nai cegu ni bula ki na ucuna; sa qai yaco me dua na ka bula na tamata.

Na Bula E Nai Teitei Ni Kalou

8 Na Kalou o Jiova sa tea e dua nai teitei ena tokalau kei Iteni, sa qai vakatikora e kea na tamata sa bulia oti. 9 Mai na qele, na Kalou o Jiova sa vakatubura mai kina na kau kecega sa vinaka ni laurai, ka sa vinaka talega ni laukana. Na vunikau ni bula sa tiko talega ena loma ni teitei kei na vunikau talega sa kilai kina na vinaka kei na ca. 10 E dua na uciwai sa drodro mai Iteni me vakasuasuataka na i teitei. Mai Iteni ga sa wase va mai kina na uciwai oqo. 11 Nai matai ni uciwai o Pisoni, sa drodro yani ena vanua taucoko o Avila, na vanua sa tiko kina na koula. 12 Na koula ni vanua oqo sa rui vinaka. Na vatu talei, na onikisa sa tu e kea. 13 Na yaca ni karua ni uciwai o Kioni; oqo e curuma yani na vanua taucoko o Kusi. 14 Nai katolu ni uciwai o Itekeli, na uciwai oqo sa lako yani vaka ki Asiria. Na i ka va ni uciwai na Uferetisi. 15 Na Kalou o Jiova sa kauta na tamata ka biuti koya ena i teitei mai Iteni me qarava ka maroroya. 16 Na Kalou o Jiova sa vakarota na tamata ka vaka: "Na veika kece sa tiko ena i teitei oqo mo kana mai kina; 17 "Ia na vunikau ga ni kila na ka vinaka kei na ka ca, mo kua ni kania, na siga o na kania kina na vuana, o na mate dina." 18 Na Kalou o Jiova sa tukuna, "Sa sega ni vinaka vua na tamata me tiko duadua. Au na cakava e dua na nonai i vukevuke me vakatautauvatataki kei koya." 19 Na Kalou o Jiova sa bulia mai na qele na manumanu kecega ni vanua kei na manumanu vuka ni macawa ka kauta mai vei Atama me raica se ena kacivi ira vakacava. Na yaca ga sa kacivi ira kina o Atama, sa yacadra sara ga. 20 O Atama sa vakayacani ira kece na manumanu yavai va kei na manumanu vuka kecega kei na manumanu kecega ni vanua. Ia me baleti Atama, sa sega ni kune e dua me tautauvata kei koya me rawa ni dau veivuke vua. 21 Na Kalou o Jiova sa vakavuna e dua na moce bi vei Atama ka sa moce lutu sara kina. Na Kalou sa taura mai e dua na sui ni sarisarina ka ubia vinaka tale na lewena. 22 Na Kalou o Jiova sa vakayagataka na sui nei Atama me bulia kina na yalewa, ka sa kauta sara mai vua na tamata. 23 Sa tukuna sara o Atama: "Oqo na sui mai na suiqu, na lewe mai na lewequ, sa na Yalewa o koya, baleta ni a wasei mai vua na Tagane." 24 Oqo, na vuna, ena biuta kina na tamana kei na tinana na tagane ka sema vei yalewa (watina), me rau sa yago vata. 25 E rau sa luvawale ruarua tu na tagane kei na watina, e rau sa sega ni madua kina.

Vakatekivu 3

Na Vakaisini Kei Na Lutu Ni Tamata

1 Na gata sa dauveivakaisini sara, mai vei ira kecega na manumanu ni vanua sa bulia na Kalou o Jiova. Na gata sa tukuna vua na yalewa ka vaka: "Sa tukuna dina na Kalou, 'Mo drau kua ni kana mai na vunikau kecega sa tu ena i teitei'?" 2 Sa tukuna mai na yalewa vua na gata, "Keirau na kana mai na kau kecega sa tu ena i teitei; 3 "Ia, na vuanikau mai na vunikau ga sa tiko e na loma donu ni teitei, sa tukuna na Kalou, 'Mo drau kakua ni kania, se mo drau tara, de drau mate.'" 4 Sa tukuna mai na gata vua na yalewa, "Drau na sega dina ni mate. 5 "Ni sa kila na Kalou, mai na siga drau na kania kina, ena rai na matamudrau, drau na vakatalega na Kalou ena nomudrau kila na veika vinaka kei na veika ca." 6 Na yalewa, ni sa raica na vunikau, ni sa vinaka me kakana, ka sa vinaka talega ki na mata, sa domona talega na vunikau me vuku kina, sa tauca sara na vuana ka kania. Sa solia talega vei watina e rau sa tiko vata, sa kana talega o tagane. 7 Sa qai rai na matadrau, ka rau sa kila ni rau sa luvawale ruarua. E rau sa cula vata na drau ni lolo me nodrau i sulu. 8 E rau sa qai rogoca na rorogo ni Nona veilakoyaki voli na Kalou o Jiova ena loma ni teitei ena batabata vinaka ni siga, ka rau sa vunitaki rau mai na mata ni Kalou o Jiova ena veivunikau ni teitei. 9 Sa kaci yani na Kalou o Jiova vei Atama ka vaka: "O sa tiko e vei?" 10 Sa sauma mai o Atama ka vaka: "Au sa rogoca na Domomuni e nai teitei, ka au sa rere vakalevu baleta ni'u sa luvawale tu, au sa qai vuni." 11 Na Kalou o Jiova sa taro tale mai, "O cei e tukuna ni o sa luvawale tu? O sa kana beka mai na vunikau, Au a vakarota vei iko mo kua ni kana mai kina?" 12 Sa sauma mai na tamata, "Na yalewa ga o ni a solia mai vei au me keirau tiko vata, o koya ga sa solia mai vei au na vua ni vunikau oqo, au sa kania sara." 13 Na Kalou o Jiova sa tukuna vua na yalewa, "Na cava sara mada oqo, o sa cakava?" Sa sauma na yalewa ka vaka: "Sa vakaisini au na gata, ka, au sa kana sara." 14 Na Kalou o Jiova sa tukuna vua na gata: "Baleta na veika o sa cakava oqo, o sa rukaki vakalevu cake kina mai vei ira na manumanu ni vanua; o na lako voli e ketemu, o na kania na kuvu ni qele ena veisiga kece o sa bula kina. 15 Au na vaka veimecakitaki iko kei na yalewa, o ira na nomu kawa kei na nona kawa; o koya ena vakamavoataka na ulumu, ka o na vakamavoataka na bukubuku ni yavana." 16 Na Kalou o Jiova sa tukuna talega vua na yalewa; "Au na vakalevutaka vei iko na rarawa ena gauna ni nomu kunekune; ena mosi levu, o na vakasucuma mai kina na gone; na nomu gagadre sa na tiko ga vua na watimu, ka ena vakatulewa tiko ga vei iko o koya." 17 Na Kalou o Jiova sa tukuna vakaoqo vei Atama, "Baleta ni o sa vakarorogo ki na domo i watimu, ka o sa kana mai na vunikau Au a vakarota vei iko ka vaka, 'Mo kua ni kana mai kina': "Sa rukaki na qele ena vukumu; o na buno ka oca ni o sa kana mai kina, ena veisiga kece ni nomu bula. 18 Na co kei na kau vakavotona sa na basika mai ena vukumu, o na kania na botebotekoro era na tubu mai. 19 Ena buno ni yadremu, o na qai kana madrai kina me yacova ni o sa lesu tale ki na qele, baleta ni o a kau ga mai na qele. Ni o a kuvu ni soso ga, o na lesu tale ki na kuvu ni soso." 20 O Atama sa kacivi na watina me o Ivi, ni sa tinadra na bula. 21 Vei Atama kei watina talega, sa cakava kina na Kalou o Jiova na kuli ni manumanu ka vakaisulutaki rau kina. 22 Na Kalou o Jiova sa tukuna, "Raica na tamata sa vakataki Kedatou, me kila na vinaka kei na ca. Oqo de qai taura talega na vua ni kau ni bula, ka kania, ena qai bula ka sega ni mudu" – 23 O koya oqo, sa vakatalai koya tani kina na Kalou mai na Nona i teitei mai Iteni, me la'ki cukicuki ka teitei ki na vanua sa kau kina. 24 Sa vakatalai tani na tamata mai Iteni ka sa vakatikora na Jerupi ena tokalau ni teitei mai Iteni kei na seleiwau yameyame ni bukawaqa sa veigoleyaki voli me rau yadrava na vunikau ni bula.

Vakatekivu 4

Sa Labati Epeli O Keni

1 O Atama sa curumi Ivi, ka sa mani kunekune sara o Ivi, ka vakasucumi Keni ka tukuna, "Au sa rawata e dua na tagane mai vei Jiova." 2 Sa vakasucu tale, oqo sa sucu o Epeli na tacina. O Epeli sa dau vakaraici ira na sipi, o Keni sa dau teitei ena vanua. 3 Ni sa toso tiko na gauna, sa qai yaco me kauta mai o Keni e so na i soro vuata ni vanua vei Jiova. 4 O Epeli talega sa kauta mai na ulumatua ni nona sipi kei na kedra uro me i soro. O Jiova, sa doka vakalevu nai soro nei Epeli, 5 sa sega ni taleitaki Keni kei na nona i soro. Sa cudru sara vakalevu o Keni ka sa duatani mai na kena i rairai. 6 O Jiova sa qai vosa vei Keni ka vaka: "Na cava o via cudru kina? Na cava na vuna sa duatani kina nai rairai ni matamu? 7 "Kevaka o sa caka vinaka, o na sega beka ni ciqomi? Ia, kevaka o sega ni caka vinaka, sa wawa tiko nai valavala ca mai na mata ni katuba. Sa tiko na nona gagadre vei iko, ia, mo lewa vinaka ga ena vukuna." 8 E rau sa dau veivosaki o Keni kei Epeli na tacina; sa yaco na gauna ni rau sa tiko e na vanua, sa tucake o Keni ka sa yalocataki Epeli na tacina ka vakamatei koya. 9 Sa taro mai o Jiova vei Keni, "E vei o Epeli na tacimu?" Sa sauma mai, "Au sa sega ni kila, oi au beka na nonai vakatawa?" 10 Sa tukuna mai o Jiova, "Na cava o sa cakava, na domo ni dra i tacimu sa tagi tiko mai vei Au mai na qele. 11 "Oqo o sa vakaloucataki mai vuravura, ni sa dolava na gusuna me ciqoma na dra i tacimu mai na ligamu. 12 "Ni o sa tea na qele, ena sega ni solia na nona taucoko vei iko. O na tamata dauvakacudrui rawarawa ka o na dau veilakoyaki tu ga e vuravura." 13 Sa tukuna mai o Keni vei Jiova, "Na kequ i totogi sa rui levu sara ka sa rui bibi! 14 "Sa dina sara, o ni sa vakasavi au ena siga oqo mai na Matamuni; au na tamata sevaki ka dauveitosoyaki tu ga e vuravura, ena yaco na tamata kecega sa raici au ena via vakamatei au." 15 Sa tukuna vua o Jiova, "O koya sa vakamatei Keni, ena vakasukai vua me vakavitu tale." O Jiova sa vakatakilakilataki Keni, de qai dua e kunei koya ka vakamatea.

Na Vuvale Nei Keni

16 Sa lako tani o Keni mai na mata i Jiova, ka la'ki tiko ena vanua o Noti, ena ra kei Iteni. 17 Sa curu vei watina o Keni, ka sa kunekune sara o watina, ka qai vakasucumi Inoke. Sa tara sara e dua na koro o Keni ka vakayacana na koro o ya vei luvena ga—o Inoke. 18 Mai vei Inoke, sa basika mai kina o Irati, o Meujaeli, o Lemeki mai vei Metuisela. 19 O Lemeki sa rua na watina, e dua o Ada kei na kena i karua o Sila. 20 O Ada sa vakasucumi Jabali, o koya oqo na tamadra na dau vakavale laca tuga ka ra dau susu manumanu talega. 21 Na tacina o Jubali. O koya oqo na tamadra na dauvakatagi api kei na bitu uvuci. 22 Vei Sila sa sucu kina o Tubale-Keni na kena dau ni matai ni varasa kei na kaukamea. Sa dua na gane i Tubale-Keni, na yacana o Naema. 23 Sa tukuna o Lemeki vei rau na watina, "Kemudrau o Ada kei Sila, drau rogoci au na wati Lemeki, drau rogoca na domoqu! Au sa vakamatea e dua na tamata ni a vakamavoataki au, io, e dua na cauravou ni a vakararawataki au. 24 Kevaka sa saumi vei Keni me vakavitu, vei Lemeki me vakavitusagavulu na vitu."

E Dua Na Gone Tagane Sa Sucu Vou

25 Sa curumi watina tale o Atama, ka sa vakasucuma vua e dua na gone e tagane, ka sa vakayacani koya me o Seci, "Ni o Jiova na Kalou sa solia tale vei au e dua mei sosomi kei Epeli, o koya sa vakamatea o Keni." 26 Mai vei Seci, sa vakasucumi vua e dua na gone ka tagane na yacana o Inosi. Oqo na vanua sa vakatekivu kina vei ira na tamata me ra kaciva kina na yaca i Jiova.

Vakatekivu 5

Na Vuvale Nei Atama

1 Oqo nai vola i tukutuku ni kawa vaka-Atama. Na Kalou, ena siga sa bulia kina na tamata, sa cakava me veiucui vata kei na Kalou. 2 Sa bulia na tagane kei na yalewa na Kalou ka vosa vakalouvinakataki rau ka vakatokai rau me tamata mai na siga rau sa buli kina. 3 Sa bula tiko o Atama me dua na drau tolusagavulu na yabaki ka sa vakasucumi vua e dua na gone, e tagane sa vakataki koya ga, me rau veiucui, na yacana o Seci. 4 Ni sa sucu oti o Seci, sa bula tale tiko o Atama me walu na drau na yabaki. Sa qai sucu tale eso na luvena tagane kei na luvena yalewa. 5 Na veisiga kece nei Atama, sa ciwa na drau tolusagavulu na yabaki, ka sa qai mate yani. 6 Sa yabaki dua na drau ka lima o Seci, sa qai vakasucumi vua o Inosi. 7 Ni oti na sucu nei Inosi, sa bula tale tiko o Seci me walu na drau ka vitu na yabaki. Sa vakasucumi tale eso na luvena tagane kei na luvena yalewa. 8 Na veisiga taucoko nei Seci sa ciwa na drau tinikarua na yabaki, ka sa qai mate yani. 9 Sa yabaki ciwasagavulu o Inosi qai vakasucumi vua o Keinana. 10 Ni sa sucu oti o Keinana, sa bula tiko o Inosi me walu na drau tinikalima na yabaki, ka sa sucu talega eso na luvena tagane kei na luvena yalewa. 11 Sa mate o Inosi, ni sa ciwa na drau kalima na yabaki ni nona bula. 12 Sa yabaki vitusagavulu o Keinana, ni sa sucu o Maelalieli. 13 Sa vakasucumi vei Keinana o Maelalieli, sa yabaki walu na drau vasagavulu o Keinana ka sa vakasucumi talega vua e so na luvena tagane kei na luvena yalewa. 14 Na yabaki ni bula taucoko nei Keinani sa ciwa na drau ka tini na yabaki ka sa qai mate yani. 15 Sa yabaki onosagavulu ka lima tiko o Maelalieli, sa qai vakasucumi vua o Jareti. 16 Ni sa sucu oti o Jareti, sa bula tiko o Maelalieli me walu na drau tolusagavulu na yabaki ka sa sucu tale eso na luvena tagane kei na luvena yalewa. 17 Na yabaki ni bula nei Maelalieli e walu nadrau ciwasagavulu ka lima na yabaki, ka sa qai mate yani. 18 Sa bula o Jareti me yabaki dua na drau onosagavulu ka rua sa qai sucu o Inoke na luvena. 19 Ni sa sucu oti o Inoke sa bula tale tiko o Jareti me walu na drau na yabaki ka sa sucu tale eso na luvena tagane kei na luvena yalewa. 20 Na veisiga kece nei Jareti sa ciwa na drau onosagavulu karua na yabaki ka sa qai mate yani. 21 O Inoke, sa yabaki onosagavulu ka lima ni sa vakasucumi vua o Mecusela. 22 Ni sa vakasucumi oti vua o Mecusela, sa kune vua, ni rau sa daulako vata kei na Kalou me tolu na drau na yabaki, ka sa vakasucumi talega vua na luvena tagane kei na luvena yalewa. 23 Na veisiga kece nei Inoke sa tolu na drau onosagavulu ka lima na yabaki. 24 Sa daulako vata kei na Kalou o Inoke; ka sa yali eke, ni sa kauti koya na Kalou. 25 Sa yabaki dua na drau walusagavulu ka vitu o Mecusela ni sa vakasucumi vua o Lemeki. 26 Ni sa sucu oti o Lemeki, sa bula tale tiko o Mecusela me vitu na drau walusagavulu ka rua na yabaki, ka sa sucu tale e so na luvena tagane kei na luvena yalewa. 27 Na veisiga kece ni bula nei Mecusela sa ciwa na drau onosagavulu ka ciwa na yabaki, ka sa qai mate yani. 28 O Lemeki sa yabaki dua na drau walusagavulu karua ni sa vakasucumi vua e dua na luvena tagane. 29 Sa vakayacani koya me o Noa, ni sa tukuni, "O koya oqo ena vakacegui keda mai na noda oca kei na cakacaka ni ligada, ena vuku ni qele sa rukaka oti o Jiova." 30 Ni sa sucu oti o Noa, sa bula tale tiko o Lemeki me lima na drau ciwasagavulu ka lima na yabaki, ka sa sucu tale kina eso na luvena tagane kei na luvena yalewa. 31 Na veisiga kece nei Lemeki sa vitu na drau vitusagavulu kavitu na yabaki ka sa qai mate yani. 32 Sa yabaki lima na drau o Noa, ni ratou sa sucu o Semi, o Ame, kei Jevica.

Vakatekivu 6

Nai Valavala Vakasisila Kei Na Nodra Lewai Na Tamata

1 Sa qai yaco ni ra sa lewe levu mai na tamata e dela i vuravura, sa levu talega na luvedra yalewa, 2 O ira na luve ni Kalou, ni ra sa raici ira na luvedra yalewa na tamata, ni ra sa rui totoka; era sa tauri ira me watidra, o ira kecega era sa digitaka. 3 Sa qai tukuna o Jiova, "Na Yaloqu ena sega ni veicoqacoqa tikoga kei na tamata me sega ni mudu, baleta ni sa vakayago na tamata; na nona veisiga sa na dua na drau ruasagavulu ga na yabaki." 4 Era sa tu e vuravura ena gauna o ya, na tuwawa, era sa dau lako mai na luve ni Kalou ka veidauci kei ira na luvedra yalewa na tamata, era sa mani sucu kina na gone. Oqo, o ira na tamata kaukauwa ka kilai ena gauna o ya. 5 O Jiova, ni sa qai raica na vakasisila ni tamata ni sa rui sivia e vuravura, na nakinaki kei na vakanananu ni yalo ni tamata, sa caca tikotikoga. 6 Sa veivutunitaka sara ga o Jiova ena Nona a bulia na tamata e vuravura, ka sa rarawa vakalevu kina na Yalona. 7 Sa tukuna kina vaka oqo, o Jiova, "Au na vakarusa na tamata mai na delai vuravura, o koya Au a bulia, kecekece, na tamata, na manumanu, na veika era qasi voli kei na manumanu vuka ni macawa, ni'u sa rarawataka sara ga, na noqu a buli ira." 8 O Noa duaduaga sa kune loloma ena mata i Jiova.

O Noa E Vakalomavinakataka Na Kalou

9 Oqo nai tukutuku ni bula nei Noa. O Noa sa tamata dodonu ka sega ni cala ena nona i tabatamata. Sa dau lako vata kei na Kalou o Noa. 10 Sa vakasucumi vei Noa e tolu na luvena tagane: O Semi kei Ame kei Jevica. 11 Sa ca ka vakacacani vakalevu o vuravura ena mata i Jiova, o vuravura sa sinai talega ena i valavala kaukauwa e ca sara. 12 Na Kalou sa rai yani ki vuravura, ka raica, ni sa ca dina na kena i tuvaki, ni ra sa ca na tamata kecega kei na nodra i valavala kecega, e delai vuravura.

Sa Vakarautaki Na Waqa

13 Na Kalou sa qai tukuna vei Noa, "Nai tinitini ni ka kecega e vakayago, sa lako cake mai vei Au oqo, ni ra sa vakasinaiti vuravura ena veika e kaukauwa ca; raica, Au na vakarusai ira vata kei na vuravura. 14 "Mo cakava vei iko e dua na waqa kau, cakava e loma ni waqa na veirumu, botana na loma ni waqa ena kuluta, e tuba talega. 15 "Mo cakava vaka oqo: na balavu ni waqa me va na drau limasagavulu na fiti, na kena raraba me vitusagavulu ka lima na fiti kei na kena cere me vasagavulu ka lima na fiti. 16 ²Me dua na katuba leka ni waqa, me tinikawalu na idi mai na dela ni waqa. Na katuba me tiko e baba ni waqa. Me taba tolu taki na loma ni waqa. 17 "Mo kila, oi Au na kauta mai na waluvu levu e vuravura, me vakarusai kina na yago vakalewe kece e ruku i lomalagi, sa tiko vei ira na i cegu ni bula, kei na ka kecega sa bula e vuravura, e na mate. 18 "Ia, Au na tekivuna na Noqu veiyalayalati kei iko – o na curu ki waqa, o iko, o iratou na luvemu tagane, o na watimu, kei iratou na dui watina na luvemu. 19 "Na veika bula kece, me kau mai e rua na kena mataqali ki na waqa, me ra bula tiko vata kei iko, me dua e ka tagane kei na dua na ka yalewa. 20 "O ira na manumanu vuka na kena veimataqali, na manumanu yavaiva ena kena veimataqali, na veika sa qasi voli ena kena veimataqali, me ra lako yaya rua mai, me ra maroroi me ra bula. 21 "Mo kauta mai vei iko na kakana kecega e laukana, mo kumuna vei iko na kakana kei na kedra talega na manumanu." 22 Sa cakava o Noa, me vaka sa vakarota vua o Jiova, sa cakava vaka kina.

Vakatekivu 7

Na Waluvu Levu

1 O Jiova, sa qai vosa vei Noa ka vaka: "Curu mai ki waqa, o iko, kei iratou na nomu vuvale, baleta ni, Au sa raica ni o sa yalododonu e Mataqu e na i tabatamata oqo. 2 "Mo kauta vata kei iko e vitu na manumanu savasava mai na veimanumanu kecega, na ka tagane kei na ka yalewa, me rua na kena mataqali sa sega ni savasava, na ka tagane kei na ka yalewa; 3 "Me vakatalega kina na manumanu vuka, na kena ka tagane kei na kena ka yalewa, me rawa ni ra bula tiko na kena kawa e delai vuravura. 4 "Sa vo tale tiko oqo e vitu na siga, Me'u na vakavuna na uca ki vuravura me vasagavulu na siga ka vasagavulu na bogi; ka Au na vakawabokotaka kina mai vuravura na ka bula kecega Au a bulia." 5 Sa cakava kecega o Noa me vaka sa vakarota vua o Jiova. 6 Sa yabaki ono na drau o Noa ena gauna sa waluvu kina o vuravura. 7 O Noa kei iratou na luvena tagane, kei na watina, kei iratou na vugona yalewa, era sa lako kece ki loma ni waqa, baleta ni sa levu mai na wai ni waluvu. 8 Na manumanu savasava kei na kena e sega ni savasava, na manumanu vuka talega kei na kena era qasi voli, 9 era sa curu yarurua ki na waqa vei Noa, na ka yalewa kei na ka tagane, me vaka sa vakarota o

Jiova vei Noa

10 Ni sa oti e vitu na siga na wai ni waluvu sa robota tu na vuravura. 11 E nai ka ono na drau ni yabaki ni bula nei Noa, e nai karua ni vula, nai ka tinikavitu ni siga, ena siga o ya sa kabasu mai kina nai vurevure ni wai titobu kecega, kei na katuba lalai kecega ni lomalagi sa tadola mai. 12 Sa tau tiko na uca e vuravura me vasagavulu na siga ka vasagavulu na bogi. 13 Oqori, na siga sara ga e ratou sa curu kina ki waqa, o Noa kei iratou na luvena tagane, kei watina kei iratou na vugona - 14 O iratou, kei ira kece na manumanu na kena veimataqali, na bulumakau kece kei na kena veimataqali, na veika kece sa qasi voli e delai vuravura kei na veimataqali manumanu vuka kecega. 15 Era sa lako ki na waqa vei Noa, yarurua kei na ka kecega sa tiko e ucuna nai cegu ni bula. 16 O ira kece sa curu ki waqa, na ka tagane kei na ka yalewa – era sa curu ki waqa me vaka sa vakarota vei Noa na Kalou; o Jiova sa sogolati Noa talega e loma. 17 Na waluvu sa tiko e vuravura me vasagavulu na siga. Sa tubu cake tikoga na wai ka sa ciri na waqa, sa ciri sara tiko e cake mai na delai vuravura. 18 Sa tubu cake tikoga vakalevu na wai ena delai vuravura, ka sa veitosoyaki tiko na waqa ena dela ni wai. 19 Sa tubu cake tikoga na wai, ka sa vakalevu sara ni ra sa luvu kece na vei delana cecere ena ruku i lomalagi. 20 Sa tubu tikoga na wai me sivia e ruasagavulu ka rua na fiti na dela ni veiulunivanua cecere. 21 Era sa mate na ka bula kecega era sa veilakoyaki voli e vuravura: na manumanu vuka, na bulumakau, na manumanu kila tale e so, na veika kece era qasi voli, kei na tamata kecega. 22 Na veika kecega sa tiko kina nai cegu ni bula ena ucudra, na veika kece sa tiko ena vanua mamaca, era sa mate. 23 Na Kalou sa vakarusa na ka bula kecega era sa tiko e delai vuravura: na tamata, na manumanu, na veika sa qasi voli, kei na manumanu vuka ni macawa. Era sa vakarusai kece mai vuravura. O Noa ga, kei ira kece sa tiko ena loma ni waqa, sai ira ga sa bula tiko. 24 Sa tiko ga na wai e vuravura me dua na drau limasagavulu na siga.

Vakatekivu 8

Na Vakabulai Nei Noa

1 Na Kalou sa qai nanumi Noa kei na veika bula kecega, na manumanu kecega era sa tiko vata kei Noa e waqa. Sa vakavuna na Kalou me liwa e dua na cagi e vuravura,ka sa lutu sobu nai vakarau ni wai. 2 Nai vurevure mai na vei wai titobu kei na veikatuba lalai mai lomalagi era sa tasogo. Sa tu vakadua na uca mai lomalagi. 3 Sa drodro tani tiko ga yani na wai mai vuravura. Nai otioti ni ka dua na drau limasagavulu ni siga, sa lailai sara na wai. 4 Ena i ka tinikavitu ni siga, ni kavitu ni vula, sa mai kasa toka na waqa ena dela ni ulunivanua mai Ararata. 5 Sa lutu sobu tikoga na wai ni waluvu me yacova na i katini ni vula. Ena matai ni siga ni katini ni vula, era sa laurai mai na dela ni veiulunivanua. 6 Sa qai yaco, ni sa yacova mai na mua ni ka vakasagavulu ni siga, sa dolava o Noa na vei katuba lalai ni waqa, ea tara ga o koya. 7 Sa vakatala yani o Noa e dua na reveni, ka sa veivukayaki tiko ga, me yacova ni sa mamaca mai na vanua. 8 Sa vakatala talega mai vua, e dua na ruve, me raica se sa maca dina na wai mai na delai vuravura. 9 Na ruve sa sega ni raica e dua na vanua me ro kina, ka sa vuka lesu tale ki waqa vei Noa, ni se luvu tiko ga o vuravura. Sa dodoka yani o Noa na ligana ka taura mai na ruve, sa kauta mai na ruve ki vei koya e waqa. 10 Sa wawa tale me vitu na siga, sa qai vakatala tale yani na ruve mai na waqa. 11 Sa lesu tale mai vua na ruve ena yakavi, ka sa kauta tiko mai e dua na drau ni olive e se qai beti vou, ena gusuna; oqo sa kila kina o Noa ni sa oti na waluvu. 12 Sa wawa tale me vitu na siga ka vakatala tale yani na ruve, na ruve oqo sa sega tale ni lesu mai vua. 13 Ena i ka ono na drau ka dua ni yabaki, ena i matai ni siga ni matai ni vula, sa maca vakadua na wai mai na delai vuravura; sa cecega o Noa na i ubi ni waqa ka rai yani, sa dina sara, sa mamaca tu o vuravura. 14 Ena i ka ruasagavulu ka vitu ni siga ni karua ni vula, sa mamaca sara na qele. 15 Na Kalou sa vosa vei Noa ka vaka, 16 "Lako tani mai na waqa, o iko, kei iratou na luvemu tagane, o watimu kei iratou na vugomu. 17 "Me ra lako tani mai vata kei iko na veika bula kece sa vakalewe, na manumanu vuka, na bulumakau kei na veika kece sa qasi voli e delai vuravura, me ra mai vakalewelevutaki ira e vuravura, me ra mai yaga vakalevu ka tubu talega me levu." 18 Sa curu ki tuba o Noa kei iratou na luvena tagane, o watina kei iratou na vugona. 19 Na manumanu kece, na veika kece e qasi voli e delai vuravura, na manumanu vuka, me vaka na nodra dui kawa, era sa lako tani mai na waqa.

Na Veiyalayalati Ni Kalou Kei Na Veika Kece Sa Buli

20 Sa tara o Noa e dua nai cabocabo ni soro vei Jiova, ka taura mai na veimanumanu savasava kei na veimanumanu vuka e savasava, ka vakacabora me i soro kama ena i cabocabo ni soro. 21 O Jiova, sa boica nai boi kamikamica. Sa qai tukuna ga e Lomana, "Au na sega tale ni rukaka na qele ena vuku ni tamata, e dina mada ga ni sa cala tu na vakanananu ni yalo ni tamata mai na gauna e se cauravou kina. Au na sega ni vakarusa tale e dua na ka bula me vaka Au sa vakayacora oti. 22 "Baleta ni se tiko ga na vuravura, na kakaburaki kei na tatamusuki, na batabata kei na katakata, na vulai liliwa kei na vulai katakata, na siga kei na bogi ena sega ni oti."

Vakatekivu 9

Na Yalayala Ni Kalou Vei Noa

1 Na Kalou sa vakalouvinakataki Noa kei iratou na luvena, ka tukuna vei iratou, "Mo dou yagavakalevu ka vuavuai, mo dou vakalevutaki kemudou ka vakatawai vuravura. 2 "Na manumanu kece ni vanua kei na manumanu vuka kece kei na ka kecega sa yavavala e delai vuravura, kei na ika kece ni loma ni wai, era na rerevaki kemudou ka taqayataki kemudou. Era sa soli kece ki na ligamudou. 3 "Na veika kecega e bula ka yavavala era na kakana vei kemudou. Au sa solia vei kemudou na ka kecega wili kina na veimataqali co. 4 "Mo dou kua ga ni kania vata na lewena kei na bula, oqori na kena dra. 5 "Ena vuku ni nomu drabula, Au na vakataroga; mai na ligadra na manumanu kila, mai na ligadra talega na tamata. Mai na ligadra kecega na veitacini, Au na taroga mai kina na bula ni dua na tamata. 6 "O koya sa vakadavea na dra ni tamata, na tamata talega ena vakadavea na nona dra; ena veiucui e Vakalou, na Kalou sa bulia kina na tamata. 7 Io, veikemudou, mo dou yaga ga vakalevu ka vuavuai ka tubu me lewe levu; me sega o vuravura ka tubu tikoga kina." 8 Na Kalou sa qai vosa vei Noa kei iratou na luvena ka vaka: 9 "Ena Vukuqu, Au sa tauyavutaka oqo na Noqu veiyalayalati vata kei iko kei ira na nomu kawa era na muri mai, 10 "Kei na ka bula kecega sa tiko vata kei iko, na manumanu vuka, na bulumakau, na manumanu kecega ni vanua era sa tiko vata kei iko, o ira kecega sa lako tani mai waqa. 11 "Au na vakatauyavutaka na Noqu veiyalayalati vata kei iko: ena sega tale, sa na sega ni vakarusai tale o vuravura ena waluvu." 12 Na Kalou sa tukuna: "Oqo nai vakatakilakila ni veiyalayalati Au sa cakava vei kedaru, kei na veika bula kecega sa tiko vata kei iko, ki nai tabatamata e sega ni mudu: 13 "Au sa na tuvana na Noqu drodrolagi ena vei o, mei vakatakilakila ni veiyalayalati mai vei Au kei vuravura. 14 "Ni sa yaco, Me'u kauta mai na vei o e delai vuravura, ka sa raici na drodrolagi ena vei o; 15 "Au na nanuma na Noqu veiyalayalati ena kedaru maliwa kei na veika bula kece sa vakalewe; na wai ena sega tale ni waluvu me vakarusa na veikabula e vuravura. 16 "Na drodrolagi ena tiko ga ena vei o, Au na vakaraica yani Me'u vakananuma kina na veiyalayalati e sega ni mudu Nona na Kalou kei na veika bula kecega e vuravura." 17 Na Kalou sa qai tukuna vei Noa, "Oqo nai vakatakilakila ni veiyalayalati Au sa tauyavutaka vei Au kei na ka bula kecega era sa tiko e vuravura."

O Noa Kei Iratou Na Luvena

18 O iratou na luvei Noa sa lako tani mai na waqa, o Semi, Ame kei Jevica. O Ame sa tamadra na kai Kenani. 19 O iratou oqo na luve i Noa, sa vakatawani kina o vuravura taucoko. 20 O Noa, sa tekivu me teivaka na vanua, sa vaka veivaini o koya. 21 Sa gunu waini o koya, sa mateni kina ka sa luvawale ni sa davo moce tu ena nona valelaca. 22 O Ame na tamadra na kai Kenani, sa raici tamana ni sa luvawale tu, sa qai tukuna veirau na tacina e tautuba. 23 O Semi kei Jevica, e rau sa taura e dua nai sulu ka biuta e tabadrau, e rau sa lako vakanadaku ka ubia na luvawale nei tamadrau. E rau sa rai tani tuga – me rau kua ni raica kina na luvawale nei tamadrau. 24 Ni sa oti na nona mateni o Noa, sa qai kila na veika sa cakava o Ame vua. 25 Sa qai tukuna: "Me rukaki o Kenani; na nodra dauveiqaravi na dauveiqaravi, oqo o koya vei ira na tacina." 26 Sa qai tukuna tale, "Me kalouvinaka o Jiova na Kalou i Semi, ka me nona dauveiqaravi o Kenani. 27 Na Kalou talega me vakalevutaki Jevica, ka me tiko e vale nei Semi, me nona dauveiqaravi o Kenani." 28 Sa bula tale tiko o Noa ni sa oti na waluvu me tolu na drau limasagavulu na yabaki. 29 Na veisiga kece ni bula nei Noa sa ciwa na drau limasagavulu na yabaki, ka sa qai mate yani.

Vakatekivu 10

Na Kawa Era Basika Mai Vei Noa

1 Oqo na veikawa nodratou na luvei Noa: O Semi, o Ame kei Jevica. O ira oqo sa sucu ni oti na waluvu. 2 O ira na luvei Jevica tagane oqo: O Qoma, Mekoki, Madai, Javana, Tubali, Mesake, kei Tirasa. 3 O iratou na luvei Qoma tagane oqo: O Asakenasa, Rifaci, kei Toqama. 4 O iratou na luvei Javana tagane oqo: O Ilaisa, Tasisi, Kitimi, kei Dodanimi. 5 Mai vei ira oqo, o ira na tamata ni veibaravi ni kai matanitu tani, era sa wasei tani mai na nodra vanua, o ira vakayadua me vaka na nodra dui vosavosa, me vaka na nodra dui vuvale kei na nodra dui vanua. 6 O ira na luvei Ame tagane oqo: O Kusi, Misirami, Puti kei Kenani. 7 O ira na luvei Kusi tagane oqo: O Seba, Avila, Sebata, Raema kei Sabeteka; kei na luvei Raema tagane, o Seba kei Didani. 8 O Kusi sa vakasucumi vua, o Nimirote; sa tekivu me tamata qaqa mai e vuravura. 9 Sa tamata qaqa ni vakasasa ena mata i Jiova; oqo sa tukuni kina, "Me vakataki Nimirote ena mata i Jiova." 10 Nai tekitekivu ni nona matanitu sai Pepeli, o Ereki, o Akadi kei Kalanei, ena vanua o Sina. 11 Mai kea, sa lako yani ki Asiria ka tarai Ninive cake, o Reopoci Uri, Kela, 12 Kei Riseni, ena kedrau maliwa o Ninive kei Kela (na koro levu). 13 O Misirami sa vakasucumi vua o Ladimi, Ananimi, o Leabimi, o Navitaimi, 14 O Pacurusimi, kei Kasuluimi (era sa basika mai vei koya na Filisitia kei na Kapatorimi). 15 O Kenani sa vakasucumi vua o Saitoni na nona ulumatua kei Eci; 16 Na Jepusaiti, na Amoraiti, kei na Kirikisaiti; 17 Na Ivaiti, na Arakaiti kei na Sainaiti; 18 Na Arivadaiti, na Semaraiti kei na Ametaiti. Era sa qai tawase na vuvale nei Kenani, ni oti oqo. 19 Nai yalayala nei Kenani, sa tekivu mai Saitoni, ni o sa lako yani ki Kerari, me yaco sara i Qasa, ka lako sara i Sotoma, Komora, Adama kei Seboimi me yaco sara ki Lasa. 20 Oqo o ira na luve i Ame, me vaka na nodra veivuvale, me vaka na nodra i vosavosa ena nodra vanua, ena nodra matanitu. 21 Era sa vakasucumi talega na gone vei Semi, na tamadra na luvei Eba, na taci Jevica na qase. 22 O ira na luvei Semi oqo: O Ilama, Asuri, Afakisati, Ladi kei Erami. 23 O ira na luvei Erami oqo: O Usi, Uli, Qesa kei Masi. 24 O Afakisati sa vakasucumi vua o Sala kei Eba sa vakasucumi vei Sala. 25 Sa vakasucumi vei Eba e rua na luvena tagane na yacana e dua o Veleki (ni nona gauna sa tawase kina o vuravura) kei Joketani na tacina. 26 Sa vakasucumi vei Joketani o Alemodidi, Selefa, Asemaveci, Jera, 27 Adorami, Usali, Dikala, 28 O Obala, Abimaele, Seba, 29 O Ofiri, Avila kei Jobaba. O ira kece oqo na luvei Joketani. 30 Na vanua era tiko kina mai Mesa, ena vanua vaka ki Sefara, na ulunivanua mai na tokalau. 31 O ira oqo na luvei Semi, me vaka na nodra dui vuvale, me vaka na nodra dui vosavosa, ena nodra vanua, me vaka na nodra veimatanitu. 32 Sai ira oqo na vuvale nei Noa, me vaka na nodra dui taba-tamata ena nodra dui yasana, eke era sa dui wasei kina na veimatanitu e vuravura ni oti na waluvu.

Vakatekivu 11

Na Vale Vakaitaba Mai Pepeli

1 Na vuravura taucoko sa dua ga na kena vosa ka sa dua talega na kena i vosavosa. 2 Sa qai yaco, ni ra sa lako tiko mai na tokalau, era sa kunea sara e dua na buca ena vanua o Sina, ka era sa tiko sara kina. 3 Era sa veivosaki vakai ira ka vaka, "Me da sa buli vatutuva mada ka kuvuya vakavinaka." Sa tu vei ira na veika me buli kina na vatutuva oqo. 4 Era sa tukuna sara, "Ni lako mai, meda tara mada e dua na noda koro kei na dua na vale vakaitaba, na delana me tiko mai lomalagi; me kilai kina na yacada, de, eda na qai vakasesei yani ena matai vuravura taucoko." 5 Sa lako sobu mai o Jiova me raica na koro kei na vale vakaitaba, o koya era sa tara tiko na tamata. 6 Sa tukuna o Jiova, "Era sa dua ga na tamata, ka sa dua ga na nodra vosa. Raica oqo na veika era sa tekivu mera cakava, sa sega na veika e tiko tale, me na tarova na veika era sa nakita. 7 "Mai, Medatou lako sobu ka vakasesea na nodra vosa, me ra kakua ni veikilai vosavosa kina." 8 O Jiova sa vakacemuri ira tani mai kea ki na veiyasai vuravura kece, sa mai tu vakadua na tarai cake ni koro. 9 Sa vakayacani na koro o ya me Pepeli, baleta, ni o Jiova sa vakasesea na nodra vosa kecega e vuravura. Mai kea talega sa wasewasei ira yani kina ki vuravura taucoko.

Na Kawa Tamata I Semi

10 Oqo na kawa tamata i Semi. O Semi sa yabaki dua na drau ni sa vakasucumi vua o Afakisati, oqori ni sa oti e rua na yabaki mai na waluvu. 11 Ni sa sucu oti o Afakisati, sa bula tale tiko o Semi me lima na drau na yabaki, ka sa so tale na luvena tagane kei na luvena yalewa. 12 O Afakisati sa yabaki tolusagavulu ka lima ni sa sucu o Sala. 13 Sa sucu oti o Sala, sa bula tale tiko o Afakisati me yabaki va na drau ka tolu, ka sa so tale na luvena tagane kei na luvena yalewa. 14 Sa yabaki tolusagavulu o Sala ni sa sucu o Eba. 15 Sa bula tiko o Eba me va na drau ka tolu tale na yabaki ka sa so tale na luvena tagane kei na luvena yalewa. 16 Sa yabaki tolusagavulu ka va o Eba ni sa sucu o Veleki. 17 Ni sa sucu oti o Veleki, sa bula tale tiko o Eba me va na drau tolusagavulu na yabaki ka sa so talega na luvena tagane kei na luvena yalewa. 18 Sa yabaki tolusagavulu o Veleki ni sa sucu o Reu. 19 Ni sa sucu oti o Reu, sa bula tale tiko o Veleki me rua na drau ka ciwa na yabaki ka sa sucu tale eso na luvena tagane kei na luvena yalewa. 20 O Reu sa yabaki tolusagavulu ni sa sucu o Seruki. 21 Ni sa sucu oti o Seruki, sa bula tale tiko o Reu me rua na drau ka vitu na yabaki ka sa sucu tale eso na luvena tagane kei na luvena yalewa. 22 Sa yabaki tolusagavulu o Seruki ni sa sucu o Neori. 23 Ni sa sucu oti o Neori, sa bula tale tiko o Seruki me rua na drau na yabaki, era sa sucu talega eso na luvena tagane kei na luvena yalewa. 24 Sa yabaki ruasagavulu ka ciwa o Neori, ni sa sucu o Tera. 25 Ni sa sucu oti o Tera, sa bula tale tiko o Neori me dua na drau tinikaciwai ka sa so tale na luvena tagane kei na luvena yalewa. 26 Sa yabaki vitusagavulu o Tera ni ratou sa sucu o Eparama, Neori kei Arana.

Na Kawa Nei Tera

27 Oqo na kawa nei Tera: Sa vakasucumi vei Tera o Eparama, Neori kei Arana. Mai vei Arana sa kune kina o Loti. 28 Sa mate o Arana ena mata i tamana o Tera, ena nona vanua mai Uri e Kalitia. 29 E rau sa vakawati o Eparama kei Neori, na yaca ni wati Eparama o Serai kei na wati Neori o Milika, na luvei Arana yalewa, na tamai Milika, kei Isika. 30 Sa yava o Serai ka sega na luvena. 31 O Tera sa kauti rau na luvena o Eparama kei makubuna o Loti na luvei Arana, o na vugona o Serai na wati Eparama. E ratou sa lako tani mai kea, ka lako ki na vanua o Kenani, ka e ratou sa mai tiko e Arana. 32 Na veisiga taucoko nei Tera sa rua na drau ka lima na yabaki, ka sa mate mai Arana o Tera.

Vakatekivu 12

Na Vosa Ni Yalayala Vei Eparama

1 O Jiova sa tukuna vei Eparama: "Mo lako tani mai na nomu vanua, mai vei ira na wekamu, mai na vale nei tamamu, ki na vanua Au na vakaraitaka vei iko. 2 "Au na cakava mo matanitu levu; o iko talega na veivakalouvinakataki. 3 "Au na vakalouvinakataki ira sa vakalouvinakataki iko, Au na rukaki ira sa rukaki iko; mai vei iko na veivuvale kecega e vuravura era na vakalouvinakataki." 4 Sa lako o Eparama me vaka sa vosa kina vua o Jiova, sa lako vata kei koya o Loti. Sa yabaki vitusagavulu ka lima o Eparama ni sa lako tani mai Arana. 5 Sa kauti Serai o Eparama kei Loti na luvei tacina kei na veika kece e taukena era sa soqona mai kei ira na tamata era sa nona mai Arana. Era sa lako ki na vanua o Kenani. Era sa yaco mai Kenani. 6 Sa lako curuma mai na vanua o Eparama me yaco sara i Sikemi ena vuni teribinici e More. Era sa tiko ena vanua na kai Kenani. 7 O Jiova sa basika mai vei Eparama ka tukuna vua, "ki vei ira na nomu kawa, Au sa solia kina na vanua oqo." Sa tara mai kea o Eparama e dua nai cabocabo ni soro vei Jiova, o koya e a basika mai vua. 8 Sa lako mai kea ki na veiulunivanua ena tokalau kei Peceli, sa vakaduria mai kea na nona vale-laca, e Peceli ena ra kei Ai ena tokalau; mai kea sa tara kina e dua nai cabocabo ni soro ka kaciva na yaca i Jiova. 9 Sa lako tikoga o Eparama, ka lako vakadodonu tikoga ki na ceva.

O Eparama E Ijipita

10 Sa dua na lauqa levu sa yaco ena vanua, o Eparama sa lako sobu ki Ijipita me la'ki tiko kina ni sa rui levu na lauqa ena vanua. 11 Sa qai yaco ni sa voleka yani ki Ijipita, sa tukuna vei Serai na watina, "raica, au sa kila ni o sa rui yalewa rairai totoka. 12 "Ena yaco ni ra sa raici iko na Ijipita, era na tukuna ka vaka, 'Oqo na watina,' era na qai vakamatei au ka mo bula ga o iko. 13 "Au kerea mo tukuna ni o iko na ganequ, me vinaka kina vei au ena vukumu, me'u bula kina baleti iko." 14 Sa vaka kina ni sa yaco yani ki Ijipita o Eparama, era sa raica na yalewa na kai Ijipita ni sa rui totoka dina. 15 O ira na sauturaga nei Fero era sa raici Serai talega ka vakatututaki koya sara vei Fero. Sa mai kau sara yani na yalewa oqo ki na vale nei Fero. 16 Sa qaravi vinaka o Eparama ena vuku ni yalewa. Sa tu talega na nona sipi, na bulumakau, na asa tagane, o ira na nona dauveiqaravi tagane kei na yalewa kei na kameli. 17 O Jiova, sa vakatubura vei Fero kei na nona vuvale ena mate ca levu baleti Serai na wati Eparama. 18 Sa kacivi Eparama mai o Fero ka taroga, "na cava o sa cakava oqo vei au? Na cava o sega ni tukuna kina vei au ni o koya e watimu? 19 "Na cava o tukuna kina ni 'o koya na ganemu? voleka sara ni'u kauti koya me watiqu. Oqo, tauri koya yani ka lako ena nomu i lakolako." 20 Sa solia nai vakaro o Fero me baleti koya, era sa vakatalai koya yani kei Serai na watina kei na ka kecega e nona.

Vakatekivu 13

O Eparama Sa Taukeni Kenani

1 Sa lako tani mai Ijipita o Eparama, kei watina kei na veika kece e nona, kei Loti, mai na Ceva. 2 Sa vutuniyau sara o Eparama ena manumanu susu, ena siliva kei na koula. 3 Sa lako yani ena nona i lakolako mai na ceva me yaco sara ki Peceli – sa yaco sara yani ena vanua ea tiko kina e liu, o ya ena kedrau maliwa o Peceli kei Ai, 4 ki na vanua e a cakava kina nai cabocabo ni soro. E kea sa kaciva kina o Eparama na yaca i Jiova. 5 O Loti talega – ni rau a lako vata kei Eparama, sa levu sara na nona manumanu susu kei na nona bulumakau kei na nona veivale laca. 6 Sa sega ni levu na vanua me rau tiko kina, baleta ni sa rui levu na veika e rau taukena. 7 Era sa veiqati talega na dauqaravi ira na nodrau manumanu, na nei Eparama kei na nei Loti. O ira na kai Kenani kei ira na Perisaiti era sa tiko ena vanua. 8 Sa tukuna o Eparama vei Loti, "Raica, me daru kua ni veiqati, se o ira na nodaru dauqaravi manumanu, ni da sa veiwekani voleka. 9 "Sa sega beka ni tu oqori e matamu na vanua taucoko? Au kerea, me daru sa tawase, kevaka o sa lako ki nai mawi, au na lako ki nai matau, se o lako ki nai matau, au na lako ki nai mawi." 10 Sa rai cake o Loti ka raica na buca ena Joritani, ni sa tu na wai e na veiyasana kecega (oqo ni se bera ni vakarusai kina o Sotoma kei Komora) ka sa vaka na were nei Jiova, sa vaka na vanua mai Ijipita ni o lako yani vaka ki Soa. 11 Sa digitaka o Loti na buca ni Joritani – sa lako ki na tokalau o Loti. E rau sa veitawasei. 12 Sa tiko e Kenani o Eparama, ka sa tiko ena veikoro mai na buca o Loti, sa la'ki birika sara na nona vale-laca e Sotoma. 13 O ira na tamata mai Sotoma, era sa tamata i valavala vakasisila sara ka sinai e nai valavala ca vei Jiova. 14 O Jiova sa qai tukuna vei Eparama ni sa lako tani mai vua o Loti: "Mo rai cake mai na vanua o sa tu kina oqori – ki na vualiku – ki na ceva – ki na tokalau - ki na ra; 15 "Na vanua kece o sa raica oqori, Au sa solia vei iko kei ira kece na nomu kawa me sega ni mudu. 16 "Au na cakava vei ira na nomu kawa me ra vaka na kuvu ni soso e vuravura; kevaka e dua na tamata e wilika rawa na kuvu ni soso – ena qai wiliki rawa na nomu kawa. 17 "Oqo mo tu cake, ka lakova na balavu kei na kena raraba ni vanua Au sa solia vei iko." 18 Sa tucake o Eparama ka lobika na nona valelaca ka lako yani ka la'ki tiko ena vuni-terebinici e Mamire, oqori e Epironi, sa tara maikea e dua nai cabocabo ni soro vei Jiova.

Vakatekivu 14

Na Vesu Kei Na Vakabulai Nei Loti

1 Sa qai yaco ena veisiga nei Emarafeli na tui Sina, Arioki na tui Elasa, Jadorilaoma na tui Ilama, kei Tidala na tui ni veimatanitu, 2 Era sa vala kei Bera na tui Sotoma – Birisa na tui Komora, o Sinabe na tui Atama, Semeba na tui Seboimi kei na tui Bila (oqori o Soa). 3 O ira kece oqo era sa mai sotasota ena buca mai Sidimi (oqori na Waitui Masima). 4 E tinikarua na yabaki era sa qaravi Jadorilaoma, ena i ka tinikatolu ni yabaki, era sa via veicoqa ka talaidredre. 5 Ena i katinikava ni yabaki, o Jadorilaoma kei ira na tui era sa tiko vata era sa lako mai ka valuti Refaimi e Esitaroci Karenaimi, o ira na Susimi e Ame, o ira na Emimi e Savei Kiriacaimi, 6 kei ira na Oraite ena veiulunivanua e Sairi, me yaco sara ki Eli-Perana o ya ena vanua liwa. 7 Era sa vuki lesu tale ka lako mai ki Misifata (o ya o Kadesi) ka valuti ira kece na Amalekaiti kei ira na Amoraiti, o ira sa vakaitikotiko e Asesoni Tamari. 8 Na tui Sotoma, na tui Komora, na tui Atama, na tui Seboimi kei tui Bela (oqori o Soa) era sa lako yani ka duavata ena i valu mai na buca o Sidimi 9 me valuti Jodarilaoma na tui Ilama, Tidala na tui ni veimatanitu, Amarafaele na tui Saina, kei Arioki na tui Elasa – e va na tui kei ira na lima na tui. 10 Na buca mai Sidimi sa sinai kina na qara dregadregata; o ira na tui ni Sotoma kei Komora era sa dui dro, eso era sa lutu ki na qara ka so era dro ki na veiulunivanua. 11 Era sa taura kece nai yaya vinaka mai Sotoma kei Komora kei na nodra i votavota ka era sa lako yani. 12 Era sa kauti Loti talega – na luvei taci Eparama, o koya sa tiko mai Sotoma, kei na veika kece e nona, ka lako. 13 E dua vei ira sa dro mai, ka mai tukuna vei Eparama na Iperiu, ni sa tiko o koya mai Mamire ena veivunikau e Amoraiti, na taci Esekoli, na taci Ena, era sa duavata kei Eparama. 14 Ni sa rogoca o Eparama, sa kau vakavesu na tacina, sa vakayaragitaki ira na tolu na drau tinikalima na nona dauveiqaravi sa vakavulici oti, o ira oqo, era sa sucu ga ena nona loma ni vale, era sa cici muri yani vaka ki Tani. 15 Sa wasei ira na nona i valu ena bogi. O koya kei ira na nona tamata era cici muri ira na meca me yaco sara ki Oba ena vualiku kei Tamasiko. 16 Sa kauta lesu mai na vei ka kece nei Loti kei Loti talega, o ira na yalewa kei ira kecega na tamata. 17 Sa lako yani o tui Sotoma me sotavi koya mai na buca o Savei (oqori na Tui ni Buca) ena nona lesu mai ena nona vakadrukai o Jadorilaoma kei ira na tui era sa tiko vata.

O Eparama Kei Melekisateki

18 O Melekisateki na tui Salemi sa kauta mai na madrai kei na waini. O koya oqo na bete nei Koya na Kalou Cecere. 19 Sa vosa vakalouvinakataki Eparama ka vaka: "Me kalouvinaka o Eparama ni Kalou Cecere, Na i Taukei, ka lewa na lomalagi kei vuravura; 20 Me kalouvinaka talega na Kalou sa cecere sara, o Koya sa soli ira na kemu meca e ligamu." Sa solia vua o Eparaama nai sigana (katini) kecega. 21 Sa tukuna na tui Sotoma vei Eparama, "Mo soli ira na tamata mai vei au ka kauta kece na veika sa tu oqori." 22 Sa sauma yani o Eparama vei tui Sotoma, "Au sa laveta oti na ligaqu vei Jiova, na Kalou Cecere, nai Taukei kei lomalagi kei vuravura, 23 "Ni'u na sega ni kauta e dua na ka, mai nai vesu ni vava, au na sega ni kauta e dua na ka e nomu, de o na tukuna, 'Au sa vaka vutuniyautaki Eparama'— 24 "Vakavo walega na veika era sa kania na cauravou, nai votavota ni tamata era sa lako vata kei au: O Ana, o Esikoli, kei Mamire; me ratou kauta na nodratou i votavota."

Vakatekivu 15

Na Kalou Sa Veiyalayalati Kei Eparama

1 Ni sa oti oqo, sa lako mai na vosa i Jiova vei Eparama ena raivotu ka tukuna, "Mo kua ni rere Eparama, oi Au na nomu i sasabai, kei na nomu i votavota e levu sara." 2 Sa tukuna mai o Eparama, "I Jiova na noqu Kalou, na cava o ni na solia vei au, sa sega na luvequ, na kawa ga ni noqu o Iliesa na kai Tamasiko?" 3 Sa tukuna tale o Eparama, "Raica o ni sa sega ni solia vei au na kawa: me dua ga e sucu e noqu vale me noqu kawa!" 4 Sa qai lako tale mai vua na vosa i Jiova ka vaka: "O Iliesa ena sega ni nomu kawa, e dua ga ena lako mai ena yagomu dina ena wili me nomu kawa." 5 O Jiova sa qai kauti koya i tuba ka tukuna, "Mo rai mada i lomalagi ka wilika mada na veikalokalo, kevaka e rawa ni o wilika ira," sa tukuna tale vua, "Era na vaka oqori na nomu kawa." 6 Sa vakabauti Jiova o Eparama, na Kalou sa wiliki Eparama me yalododonu. 7 Na Kalou sa vosa vei Eparama ka vaka, "Oi Au o Jiova, o Koya sa kauti iko mai Uri e Kalitia, Me'u solia vei iko na vanua oqo mo taukena." 8 Sa sauma yani o Eparama, "I Jiova na Kalou me'u kila vakacava ni'u na taukena?" 9 Na Kalou sa sauma vei Eparama, "Kauta mai vei Au e dua na luve ni bulumakau yabaki tolu, e dua na me yalewa yabaki tolu, e dua na luve ni sipi yabaki tolu, e dua na ruve dina kei na dua na ruve kawa vata." 10 Sa kauta kece mai oqo o Eparama vei Jiova musuka wase rua na manumanu kece ka sega ga na ruve e rua oqo. 11 Ni ra sa vuka sobu mai na tuivucilevu me ra mai kana, sa cemuri ira tikoga o Eparama. 12 Ni sa dromu sobu na siga, sa tarai Eparama e dua na via moce levu, sa yaco mai vua e dua na rere kei na butobuto levu. 13 Na Kalou sa tukuna vei Eparama, "Mo kila oqo – ni o ira na nomu kawa era na vulagi ena vanua oqo, o koya sa sega ni nodra, era na qaravi ira, era na vakararawataki kemuni me va na drau na yabaki. 14 "Na matanitu talega era na qarava, Au na veilewaitaki ira – ni oti o ya era na qai sereki mai kei na veika era na taukena, ena levu sara. 15 "O iko, o na lako vei ira na tamamu ena vakacegu. O na buluti ni o sa qase vinaka sara. 16 "Ena i kava ni tabatamata, era na qai lesu tale mai eke, baleta na nodra talaidredre vakasisila na Amoraiti e se bera ni taucoko." 17 Sa oti oqo, sa qai dromu na matanisiga, sa butobuto sara, sa dua na lovo sa kuvu tiko, kei na yameyame sa caudre tiko, sa lako voli ena kedra maliwa na lewe ni manumanu. 18 Ena siga vata ga o ya, sa cakava kina e dua na veiyalayalati o Jiova kei Eparama ka vaka: "Kivei ira na nomu kawa Au sa solia kina na vanua oqo, mai na uciwai mai Ijipita ki na Uciwai levu na Uferetisi — 19 "Na Kenaiti, na Kenaseraiti kei na Kadomonaiti, 20 "Na Itaiti, na Perisaiti kei na Refaimi, 21 "Na Amoraiti, na Kenaninaiti, na Qeviqasaiti kei na Jepusaiti."

Vakatekivu 16

O Eka Kei Isimeli

1 O Serai na wati Eparama, e se sega tikoga ni vakasucuma e dua na gone. Sa tiko vei koya e dua na yalewa dauveiqaravi ni Ijipita, na yacana o Eka. 2 Sa tukuna o Serai vei Eparama, "Raica o Jiova sa tarovi au me'u vakaluveni, au kerea mo curumi koya na noqu dauveiqaravi, me dua kina na noqu gone mai vua." Sa vakaio sara ga o Eparama ki na vosa nei Serai. 3 O Serai na wati Eparama sa kauti Eka mai ka solia vei Eparama me rau veiwatini, oqo ni sa oti e tini na yabaki ena nona tiko e Kenani o Eparama. 4 Sa curumi Eka o Eparama, ka sa kunekune sara o Eka, sa mani dokadoka kina na matana. 5 Sa tukuna o Serai vei Eparama, "Sa baleti au ga na noqu cala, baleta ni'u soli Eka ki lomaseremu, ni sa kila o koya ni sa kunekune tiko, sa beci au vakalevu na matana. Me qai lewa o Jiova ena vukudaru." 6 Sa tukuna o Eparama vei Serai, "Sa tikoga e ligamu na nomu vada; mo cakava vua na veika ga o vinakata." Ni sa cakacaka vakaukauwa vua o Serai, sa qai yaco me sa dro yani na nona vada, mai vua. 7 Na Agilosi i Jiova sa raici Eka ena dua na mata ni wai ena vanua liwa, oqo, ena sala vaka ki Suri. 8 Sa tukuna sara, "I Eka na dauveiqaravi nei Serai, o lako tu mai vei, o lako tiko i vei?" Sa sauma mai, "Au sa dro tiko mai vua na noqu marama o Serai." 9 Na Agilosi i Jiova sa tukuna vua, "Mo lesu tale vua na nomu marama ka vakamalumalumutaki iko e ligana." 10 Na Agilosi i Jiova sa tukuna vua, "Au na vakalewevuqataka na nomu kawa me ra na sega ni wili rawa." 11 Na Agilosi i Jiova sa tukuna tale vua, "Raica, o sa tiko vata kei na gone, o na vakasucuma e dua na gone tagane, mo vakayacani koya o Isimeli, baleta ni sa rogoca na nomu vakararawataki o Jiova. 12 Ena tamata kila o koya, na ligana ena veivala kei ira na tamata kecega, kei na ligadra na tamata kecega era na veivala kei na ligana. Ena tiko o koya e matadra na tacina." 13 Sa qai masuta na yacai Jiova, o koya sa vosa vua, Sai-Kemuni-Na-Kalou-Sa-Rai tiko ni sa tukuna, "Au sa raici koya beka, o Koya sa raici au talega?" 14 Sa vakayacani na mataniwai o ya me Bea-Laei- Roi, oqo ena kedrau maliwa o Ketesa kei Bereti. 15 O Eka sa vakasucuma vei Eparama e dua na gone tagane, na gone sa vakasucuma oqo o Eka, sa vakayacani koya o Eparama me o Isimeli. 16 Sa yabaki walusagavulu ka ono o Eparama ni sa vakasucuma vua o Eka, na gonetagane sa vakayacani o Isimeli.

Vakatekivu 17

Nai Vakatakilakila Ni Veiyalayalati

1 Ena gauna sa yabaki ciwasagavulu ka ciwa sa basika vua o Jiova ka tukuna vua, "Oi Au na Kalou Kaukauwa, mo lako vakadodonu e mataqu ka mo kakua ni cala. 2 "Au na cakava na Noqu Veiyalayalati, o Au kei iko, Au na vakalevutaka sara na nomu kawa." 3 Sa cuva vakatoboicu o Eparama, ka rau sa veivosaki kei na Kalou ka vaka: 4 "Mai vei Au, raica, na Noqu Veiyalayalati sa tiko vata kei iko, o na tamadra na veimatanitu. 5 "Ena sega ni yacamu tiko o Eparama, oqo sa yacamu o Eparaama, Ni'u sa vakavuna vei iko mo tamadra na veimatanitu. 6 "Au na vakayacora vei iko mo vuavuai; Au na vakatubura mai vei iko na veimatanitu, Era na tubu mai vei iko na tui. 7 "Au na vakadeitaka na noqu veiyalayalati ena kedaru maliwa kei ira na nomu kawa era na muri mai, ena nodra dui tabatamata, me veiyalayalati e sega ni mudu, me Kalou vei iko kei ira kecega era na muri mai vei iko. 8 "Au sa solia talega vei iko kei ira na nomu kawa era na muri mai na vanua oqo dou sa tiko vulagi kina, na vanua kece o Kenani, mo ni taukena me sega ni mudu; oi Au, Me'u nodra Kalou talega." 9 Sa tukuna na Kalou vei Eparaama, "O iko, mo maroroya na Noqu veiyalayalati, o iko kei ira kece na nomu kawa ki na nodra i tabatamata kecega. 10 "Oqo na Noqu veiyalayalati mo na maroroya, ena kedaru maliwa kei ira na nomu kawa era na muri mai: O ira kece na gone era tagane ena kemuni maliwa, me ra cilivi; 11 "Me cilivi na yagomuni vakatagane, oqo mei vakatakilakila ni veiyalayalati ena kedaru maliwa. 12 "O ira kece sa bogi walu ena nodra sucu mai me ra na cilivi, o ira kece na gone era sucu tagane ena i tabatamata kecega, kei ira na gonetagane era voli mai ena i lavo ka sega ni mai na nomuni kawa. 13 "O koya sucu e vale kei ira sa voli ena i lavo me ra cilivi, na Noqu veiyalayalati oqo me tiko ena yagomuni (lewemuni) me veiyalayalati e sega ni mudu. 14 "Na gone tagane sa sega ni cilivi, o ira sa sega ni cilivi na lewedra, o koya oqo me qai muduki tani mai vei ira na kawa, baleta ni sa voroka na Noqu veiyalayalati." 15 Na Kalou sa tukuna vei Eparaama, "Vei Serai na watimu, ena sega ni yacana o Serai, me sa na yacana o Sera. 16 "Au na vakalouvinakataki koya, ka Au na solia talega vei iko e dua na gone tagane mai vua, o koya ena tinadra na veimatanitu Ni'u sa vakalouvinakataki koya, na nodra tui na veitamata era na basika mai vua." 17 Sa cuva vakatoboicu o Eparaama ka dredre ka tukuna e yalona, "Me vakasucumi beka e dua na gone vua e dua sa dua na drau na nona yabaki ni bula? Kei Sera, ni sa yabaki ciwasagavulu, me vakasucuma beka e dua na gone?" 18 Sa qai vosa o Eparaama vua na Kalou ka vaka: "Isa, me bula talega o Isimeli e Matamuni!" 19 Na Kalou sa tukuna mai, "E sega, o Sera na watimu ena vakasucuma e dua na gone tagane, mo vakayacani koya me Aisake; Au na tekivuna na Noqu Veiyalayalati e sega ni mudu vata kei koya kei ira na nona kawa era na muri mai. 20 "Me baleti Isimeli, Au sa rogoci iko, raica Au sa vakalouvinakataki koya, Au na vakavuavuai vinakataki koya, ka Au na vakalewe levu taki koya vakalevu sara. Ena basika mai vua e tinikarua na ravouvou ka Au na cakava me matanitu levu. 21 "Ia na Noqu veiyalayalati Au na tekivutaka mai vei Aisake, o koya ena vakasucuma vei iko o Sera ena gauna vakaoqo ni yabaki vou." 22 Na Kalou sa vakaotia na nona veivosaki kei Eparaama, ka sa lako cake na Kalou mai vei Eparaama. 23 O Eparaama sa kauti Isimeli na luvena, o ira kece sa sucu ena nona vale, o ira kece sa voli ena i lavo, na tagane kece ena vale nei Eparaama, sa cilivi kece na lewedra, nai ubi ni yagodra vakatagane, ena siga vata ga sa vosa kina vua na Kalou. 24 Sa yabaki ciwasagavulu ka ciwa o Eparaama ena gauna sa cilivi kina na lewena, nai ubi ni yagona vakatagane. 25 O Isimeli sa yabaki tinikatolu ena gauna sa cilivi kina na lewena, nai ubi ni yagona vakatagane. 26 Ena siga vata ga o ya, sa cilivi kina o Eparaama kei Isimeli na luvena; 27 kei ira kecega na tagane ena nona vale, o ira sa sucu e vale kei ira sa voli e nai lavo, era sa cilivi vata kei koya.

Vakatekivu 18

Na Gonetagane Sa Yalataki

1 Sa basika o Jiova vei Eparaama ena vunikau ni Mamire, ena nona a dabe tiko ena mata ni nona vale laca, ena katakata ni siga. 2 Sa rai cake ka raica, e tolu na tamata sa tu vata kei koya; ni sa raici iratou, sa cici yani me sotavi iratou, sa cuva sobu ki na qele, 3 Ka tukuna, "Noqu turaga kevaka au sa kune loloma e Matamuni, mo ni kua ni lako sivia na Nomuni tamata." 4 "Me kau mada mai e dua na wai me sava kina na yavamudou, ka dou vakacegu mada ena ruku ni vunikau. 5 "Au na kauta mai eso na madrai me vakabulabulataka na yalomudou, ni oti o ya, dou na qai lako, oqo, baleta ni dou sa lako mai vua na Nomudou tamata." E ratou sa tukuna mai, "Mo cakava me vaka o sa tukuna." 6 Sa vakatotolo o Eparaama ki na vale laca vei Sera ka tukuna, "Mo cakava mada vakatotolo e tolu nai vakarau falawa, bulia eso na keke." 7 Sa cici yani o Eparaama ka vakarautaka e dua na luve ni bulumakau vinaka ka solia vua na nona cauravou me vakarautaka vakatotolo. 8 Sa kauta mai na bata kei na sucu kei na manumanu sa vakarautaki, ka vakarautaka e matadratou; sa tu vakarau tuga o Eparaama ena ruku ni vunikau ni ratou sa kana tiko. 9 E ratou sa tukuna vei Eparaama, "E vei o Sera na watimu?" Sa sauma mai, "Oqo ena vale laca." 10 Sa qai tukuna o Koya, "Au na lesu tale mai vei iko ena gauna ni bula, ka raica, o Sera na watimu ena vakasucuma e dua na gone tagane." (Sa vakarorogo tu o Sera ena mata ni katuba ena dakui koya e vosa tiko.) 11 O Eparaama kei Sera e rau sa qase sara ka sa levu na nodrau veiyabaki; sa sivia talega o Sera na veiyabaki ni vakasucu gone. 12 Sa cuva ka dredre ga e lomana o Sera ka tukuna, "Au sa qase mai oqo, me'u na ia tale beka na veidomoni, ni sa qase talega o noqu turaga?" 13 Sa tukuna mai o Jiova vei Eparaama, "Na cava e dredre kina, o Sera ka tukuna, 'Au na vakasucu beka, ni'u sa qase mai?' 14 "E dua beka na ka e sa rui dredre vei Jiova? Ena gauna sa lokuci, Au na lesu tale mai vei iko, me vaka na gauna ni bula, o Sera ena vakasucuma mai e dua na gone tagane." 15 Sa cakitaka o Sera ka tukuna, "Au a sega ni dredre," baleta talega ni sa rere. Sa tukuna mai o Jiova, "E sega, o iko, e a dredre dina!"

Sa Vakamamasu O Eparaama Ena Vuku I Sotoma

16 E ratou sa tucake na tamata, ka rai yani ki Sotoma, sa lako talega vata kei iratou o Eparaama me raica na nodratou lesu yani. 17 Sa tukuna o Jiova, "Me'u vunitaka beka vei Eparaama na veika Au na cakava, 18 "Baleta, ni o Eparaama ena yaco me matanitu levu ka qaqa, na veimatanitu taucoko e vuravura era na vakalouvinakataki mai vua? 19 "Ni'u sa kilai koya, me rawa kina vua me vakaroti ira na luvena kei ira na nona vuvale era muri koya, me ra muria na sala i Jiova, me ra cakava na ka dodonu kei na lewa, me kauta mai kina o Jiova vei Eparaama na veika sa vosa oti kina vua." 20 Sa qai tukuna tale o Jiova, "Baleta na tagi me baleti Sotoma kei Komora sa rui levu sara, kei nai valavala ca sa rui vakasisila dina, 21 "Au na lako sobu oqo, Me'u raica, se, sa dina na veika sa lako cake mai vei Au; ke sega, Au na kila." 22 E ratou sa lako tani mai kea na tamata, ka lako vaka ki Sotoma, o Eparaama e se tu ga ena mata i Jiova. 23 Sa lako voleka mai o Eparaama ka tukuna, "O ni na vakarusai ira vata na yalododonu kei ira nai valavala ca? 24 "Kevaka mada ga era sa tiko ena koro e limasagavulu na yalododonu – o ni na vakarusa vata kei ira na yalododonu oqo? 25 "E sega ni dodonu vei Kemuni oqo, Mo ni vakarusai ira vata na yalododonu kei ira na i valavala ca, me ra vaka kina nai valavala ca na yalododonu – me yawa sara vei Kemuni oqo. Me kua beka ni lewa vakadodonu na Turaga ni lewa levu kei vuravura?" 26 Sa tukuna mai o Jiova: "Kevaka Au sa kunea e Sotoma e limasagavulu na tamata yalododonu, Au na sega ni vakarusa na koro ena vukudra na lewe limasagavulu na yalododonu oqo." 27 Sa vosa tale yani o Eparaama ka vaka, "O au sa vaka ga na kuvu ni soso kei na dravusa, o cei o au me'u vosa vei Jiova: 28 "Kevaka mada ga me vasagavulu ka lima na tamata yalododonu, o ni na vakarusa tikoga na koro?" Sa tukuna mai o Jiova, "Kevaka Au sa raica kina e vasagavulu ka lima na tamata yalododonu, Au na sega ni vakarusa na koro." 29 Sa vosa tale vei Jiova o Eparaama, "Kevaka mada ga sa kune kina e vasagavulu na yalododonu?" Sa sauma mai o Jiova, "Au na sega ni cakava ena vukudra na vasagavulu oqori." 30 Sa tukuna tale, "Me kua ni cudru mada o Jiova, au na qai vosa: Kevaka mada ga sa kune kina e tolusagavulu na yalododonu?" Sa sauma yani o Jiova, "Au na sega ni cakava ena vukudra na tolusagavulu na yalododonu oqori." 31 Sa tukuna tale, "Oqo sa na bale ga vei au, au na vosa yani oqo vei Jiova: vakacava ke ruasagavulu na tamata yalododonu era kune ena koro?" Sa tukuna mai o Jiova, "Au na sega ni vakarusa." 32 Sa tukuna tale, "Me kua ni cudru o Jiova, me'u vosa tale vakadua ga, vakacava ke kune kina e tini na yalododonu?" sa tukuna mai o Jiova, "Au na sega ni vakarusa ena vukudra na lewe tini oqori." 33 Sa lako sara yani o Jiova ena Nona sala ni sa vosa oti vei Eparaama – ka sa lesu tale o Eparaama ki na nona tikina.

Vakatekivu 19

Na Ca Kei Sotoma 1 E rua na Agilosi sa lako mai Sotoma ena yakavi, o Loti sa dabe tiko ena matamata mai Sotoma. Ni sa raici rau o Loti, sa lako yani me sotavi rau, sa cuva ka vakarokoroko vei rau. 2 Sa tukuna sara, "Oqo, oi kemudrau na noqu turaga, drau lako mai ki na nona vale na nomuni tamata ka vakacegu mada kina ena bogi oqo, mo ni mai savata mada na yavamuni, ka qai yadra ena mataka caca ka gole yani." E rau sa tukuna, "E sega, keirau na moce tuga ena saqata." 3 Sa cikevi rau vakaukauwa, ka rau sa lako mai ki na nona vale. Sa cakava veirau e dua nai vakayakavi, ka vavia veirau na madrai sega ni vakaleveni ka rau sa kana sara. 4 Ni se bera ni rau davo sobu me moce, o ira na tagane ena koro, o ira na tagane e Sotoma, kece, o ira na qase kei ira na gone – o ira kece mai na vei tikina, era sa mai vakavolivolita na vale ka tagava. 5 Era sa kaci yani vei Loti ka tukuna, "E vei oi rau na tamata e rau sa lako mai vei iko ena bogi oqo? Kauti rau mai tuba me keimami mai tulevu taki rau mada." 6 Sa lako yani ki tuba o Loti vei ira na tamata ka sogota na katuba mai dakuna; 7 Ka tukuna, "Au kerei kemuni na taciqu, mo ni kua na cakava na ka vakasisila oqo! 8 "Raica sa rua tiko na luvequ yalewa, era se bera ni kila na tagane, me'u kauti rau mai vei kemuni ka cakava vei rau na veika ga o ni vinakata; me kua ga vei rau na noqu vulagi oqo – ni oqo ga na vuna e rau mai vakaruru kina ena noqu vale." 9 Era sa tukuna mai, "Mo tu vakasuka," era sa tukuna tale, "O koya mada ga oqo, e se qai lako vou mai, ka sa via mai turaganilewa sara, keimami na cakava vaka ca sara vei iko, mai vei rau na rua oqori." Era sa vakaukauwataki Loti, me baleti rau na nona vulagi, ka sa voleka sara na kabasu mai na katuba. 10 Oi rau na tamata (Agilosi) e rau sa dodoka yani na ligadrau, ka dreti Loti mai ki loma ni vale ka sogota na katuba. 11 E rau sa samuti ira na tamata ena mataboko, o ira kece sa tu ena mata ni katuba. O ira na lelevu kei ira na lalai, sa dredre kina me ra kila se e vei na katuba ni vale.

Sa Vakarusai O Sotoma Kei Komora

12 E rau sa tukuna na tamata (Agilosi) vei Loti, "Sa tiko tale e dua na wekamu eke? Na vugomu, se luvemu tagane se luvemu yalewa, se o cei ga sa tiko ena koro – me ra kautani yani! 13 "Ni keirau na vakarusa na vanua oqo, baleta ni sa lako cake yani vei Jiova na veika ca ni vanua oqo – sa talai keirau mai kina o Jiova me vakarusa." 14 Sa lako yani o Loti me vosa vei rau na vugona tagane (oi rau na watidrau na luvei Loti yalewa) "Drau tucake ka dro yani – o Jiova ena vakarusa na vanua oqo!" Vei rau na vugona – sa vaka ga e veiwali tiko o Loti. 15 Ni sa kida mai na mataka, e rau sa vakatotolo taki Loti na Agilosi ka tukuna, "Tucake, taura na watimu kei rau na luvemu yalewa, de dou qai kama vata ena vakarusai ni koro oqo." 16 Ni se vakaberabera tikoga, na agilosi, sa taura na ligana, na ligai watina kei na ligadrau na luvena yalewa, ni sa rui lomani koya o Jiova, e rau sa kauti koya mai ka sereki koya ena taudaku ni koro. 17 Sa qai yaco ni ratou sa kau mai ki taudaku ni koro, sa qai tukuni vua, "Dro mo bula – kua ni rai tale i muri se mo vakacegu ena buca. Dro ki na veiulunivanua, de o na vakarusai talega." 18 Sa tukuna yani o Loti, "Isa noqu turaga, me kua oqori! 19 "Sa kune loloma na nomuni tamata e matamuni; o ni sa vakalevutaka na Nomuni loloma o ni sa vakaraitaka, ena Nomuni vakabulai au; au sa sega ni rawa ni dro ki na veiulunivanua – de ra qai toboki au na ca ka vakamatei au. 20 "Sa voleka na koro oqo me'u dro kina, e koro lailai ga me'u dro kina, me bula kina na yaloqu." 21 Sa tukuna mai na Agilosi vua, "Raica, Au sa totaki iko ena vuku ni ka oqo. Au na sega ni vakarusa na koro oqo, o sa digitaka mo dro kina. 22 "Totolo sara dro yani kina, Au na sega mada ni cakava e dua na ka me yacova ni dou sa yaco kina." Sa yaca ni koro o ya o Soa. 23 Sa cadra na siga e vuravura ni sa curu yani ki Soa o Loti. 24 Sa qai vakatauca o Jiova na kuvu kama, kei na bukawaqa e Sotoma kei Komore, mai vei Jiova mai lomalagi. 25 O Jiova sa vuaviritaka na veikoro oqori, na veibuca kei ira kece na lewe ni koro kei na veika sa tubu mai na qele. 26 O watina sa rai lesu me raici Loti, ka sa yaco me duru vatu (masima). 27 Sa lako vaka mataka o Eparaama, ena vanua sa tu kina o koya ena mata i Jiova. 28 Sa rai yani vaka ki Sotoma kei Komora, kei na veivanua vaka ki na buca, ka sa raica na kubou ni vanua sa vaka na kubou ni dua na kama levu. 29 Sa qai yaco ni sa vakarusa oti na Kalou na veikoro kece mai na buca, na Kalou sa qai nanumi Eparaama, ka sa qai vakatalai Loti tani mai na Nona vuaviri oqo, ni sa vuaviritaka na veikoro sa tiko kina o Loti.

Na Kawa Nei Loti

30 Sa lako tani mai Soa o Loti ka la'ki tiko ena veiulunivanua vata kei rau na luvena yalewa. Ni sa rere ni tiko e Soa. E ratou sa la'ki tiko ena veiqaravatu. 31 Sa tukuna o koya e qase veirau na yalewa vei koya e gone, "Sa qase o tamadaru, sa sega na tagane me mai curumi kedaru me vaka na kena i valavala e vuravura. 32 "Me daru vakamatenitaki tamadaru ena waini, ka me daru curumi kina mai vua, me daru maroroya kina na kawa mai vei tamadaru." 33 E rau sa vakagunuvi tamadrau ena waini ena bogi o ya, sa lako yani o koya e qase ka vakacurumi tamana vua. Sa sega ni kila o tamana na nona lako yani kei na nona lesu mai. 34 Ena siga ka tarava, sa tukuna na qase vua na tacina gone, "Au sa vakacurumi tamaqu oti vei au ena bogi, oqo me daru cakava tale na waini, me gunu ena bogi oqo, ka mo lako yani, ka vakacurumi koya vei iko me maroroi kina na kawa mai vei tamadaru." 35 E rau sa vakagunuvi tamadrau ena bogi o ya. Sa tucake yani o koya e gone, ka la'ki vakacurumi tamana vua. Sa sega ni kila o tamana na nona lako yani kei na nona lesu mai. 36 Oi rau ruarua na luvei Loti yalewa oqo, e rau sa vakagone mai vei tamadrau. 37 Sa vakasucuma e dua na gone tagane o koya e qase, ka sa vakayacani me o Moape; o koya sa tamadra na Moape me yacova na siga oqo. 38 O koya talega sa gone veirau, sa vakasucuma e dua talega na gone tagane, ka sa vakayacani me Peni-Ame (Peniame). O koya oqo na tamadra na Amoni me yacova na siga oqo.

Vakatekivu 20

O Eparaama Kei Apimeleki

1 Sa lako yani o Eparaama mai kea vaka ki na ceva me tiko ena kedrau maliwa o Ketesa kei Suri ka lako sara yani ki Kerari. 2 Sa tukuna o Eparaama ena vuku i Sera na watina, "Ni o koya na ganena." Sa talatala yani o Apimeleki na tui Kerari, me kau mai vua o Sera. 3 Na Kalou sa lako mai vei Apimeleki ena tadra e na bogi ka tukuna vua, "Mo kila ni o sa tamata mate ena vuku ni yalewa o sa taura mai; ni sa watina e dua na tagane o koya." 4 Ia, o Apimeleki e se bera ni tarai koya, ka sa tukuna kina, "I Jiova, o ni na vakarusa talega e dua na matanitu yalododonu? 5 "E sega beka ni a tukuna vei au, 'O koya na ganequ'? Na yalewa mada sa tukuna 'Ni o koya o ya na ganena tagane.' Ena dina ni yaloqu kei na savasava ni ligaqu, au sa cakava kina oqo." 6 Na Kalou sa tukuna vua ena tadra, "Au sa kila ni o cakava oqo ena dina ni yalomu, o Au talega talega, Au sa tarovi iko mo kua ni valavala ca vei Au, oqori na vuna Au sega ni vakatara kina mo tarai koya. 7 "Mo vakasuka tale na yalewa vua na watina, ni sa parofita o koya, ena qai masulaki iko; o na qai bula. Kevaka o sa sega ni cakava oqo – o na mate vakaidina, o iko kei ira kecega sa nomu." 8 Sa sou o Apimeleki ka kacivi ira na nona tamata, ka tukuna na veika kece oqo ni ra sa vakarorogo tu, era se rere na nona tamata. 9 O Apimeleki sa kacivi Eparaama ka tukuna vua, "Na cava o sa cakava vei keimami? Na cala cava au cakava vei iko, mo kauta mai kina ki na noqu matanitu, na i valavala ca levu oqo? O sa cakava vei Au na veika e sega ni dodonu me caka." 10 Sa qai tukuna o Apimeleki vei Eparaama, "Na cava o nanuma, ena nomu cakava kina vei au na ka oqo?" 11 Sa sauma mai o Eparaama, "Baleta au sa kila ni sa sega eke na rerevaka na Kalou, era na vakamatei au kina ena vuku i watiqu. 12 "O sa dina, e ganequ dina o koya, o koya e luvei tamaqu, ka sega ga ni luvei tinaqu, oqori sa mai watiqu kina. 13 "Ni sa vakavuna na Kalou, me'u lako tani mai na vale i tamaqu, au sa tukuna kina vua, 'Oqo na ka vinaka mo cakava vei au; ena vanua kecega daru na lako kina, mo na tukuna ni, "O koya na ganequ."'" 14 Sa kauta mai o Apimeleki na sipi kei na bulumakau kei ira na dauveiqaravi tagane kei na yalewa, ka soli ira vei Eparaama, ka sa soli Sera lesu tale vua. 15 Sa tukuna o Apimeleki, "Raica na vanua sa tu oqori e matamu, mo tiko ena vanua o vinakata." 16 Sa tukuna talega vei Sera, "Raica au sa solia vei ganemu e dua na udolu na tiki ni siliva, oqo me vakagalalataki iko mai vei ira kecega na tamata" – oqo sa vakadonui kina o Sera. 17 O Eparaama sa masu vua na Kalou: Na Kalou sa vakabulai Apimeleki, na watina kei ira na nona dauveiqaravi. Sa tekivu me ra vakaluveni; 18 Ni o Jiova, sa sogota kece na kato ni gone ena vuvale kece nei Apimeleki, baleti Sera na wati Eparaama.

Vakatekivu 21

Sa Sucu O Aisake

1 O Jiova, sa sikovi Sera me vaka ga ea tukuna, o Jiova, sa cakava vei Sera me vaka ga ea tukuna. 2 Sa kunekune o Sera ka vakasucuma vei Eparaama e dua na luvena tagane ni sa qase sara, ena gauna lokuci ga sa vosa kina vua na Kalou. 3 Sa vakayacani koya o Eparaama, na luvena tagane—na luvena tagane sa vakasucuma o Sera – me o Aisake. 4 O Eparaama sa cilivi na luvena o Aisake ni sa bogi walu oti, me vaka sa vakarota vua na Kalou. 5 Sa yabaki dua na drau o Eparaama ena gauna sa sucu kina o Aisake. 6 Sa tukuna o Sera, "Na Kalou sa vakavuna me'u dredre, ni o ira kece era na rogoca, era na dredre vata kei au." 7 Sa tukuna talega, "O cei ena tukuna rawa vei Eparaama, ni na mea e dua na gone o Sera? Ni'u sa vakasucuma vua e dua na gone vua ni sa qase sara o koya."

E Rau Sa Lako O Eka Kei Isimeli

8 Sa tubu cake na gone ka sa kali sara. Sa cakava o Eparaama e dua na kakana levu ena siga sa kali kina o Aisake. 9 O Sera, sa raica na luvei Eka na yalewa ni Ijipita vei Eparaama ni veivakalialiai tiko. 10 Sa tukuna kina vei Eparaama, "Mo vakagalalataki rau na yalewa bobula kei na luvena; na luvena na yalewa bobula ena sega ni mai taukei vata kei na luvequ o Aisake." 11 Na veika oqo sa sega ni taleitaka o Eparaama baleta na luvena o Isimeli. 12 Ia, na Kalou sa tukuna vei Eparaama, "Me kakua ni vakararawataki iko na veika me baleta na gone se o tinana na yalewa bobula. Na veika sa tukuna vei iko o Sera, mo rogoca na domona, baleta ena lako mai vei Aisake na nomu kawa. 13 "Au na cakava talega e dua na matanitu mai vua na luve ni bobula, baleta ni sa luvemu talega." 14 Sa sou ena mataka o Eparaama ka kauta na madrai kei na wai, ka biuta e domo i Eka ka solia na gone vua, sa qai vakatalai rau yani. E rau sa lako yani ka lako voli ena vanua liwa e Perisepa. 15 Sa maca na wai mai na kena bola, ka sa vakadabera tiko na gone ena dua na veico. 16 Sa lako yani o tinana, ka la'ki dabe veibasai tiko mai vei koya, me vaka e dua nai vana ena dakai titi, ni sa tukuna tikoga e lomana, "Me'u kua ni raica na nona mate na gone." Sa dabe tikoga mai vakayawa ka tagi tiko vakadomoilevu. 17 Na Kalou sa rogoca na domo ni gone, ka sa kaci yani vei Eka na Agilosi ni Kalou mai lomalagi ka tukuna vua, "Na cava o sa tagi kina Eka? Kua ni rere, na Kalou sa rogoca na domona na gone mai na vanua e tiko kina. 18 "Mo tucake, keveta na gone e ligamu, Ni'u na cakava me matanitu levu o koya." 19 Na Kalou sa vakaraitaka na matana, ka sa raica sara e dua na tobu wai. Sa la'ki takiva sara na wai ena kena bola, ka solia vua na gone me gunu. 20 Na Kalou sa tiko vata kei na gone; sa tubu cake na gone ka sa dau tiko ena vanua liwa, sa yaco talega me dauvavana. 21 Sa dautiko ena Vanua Liwa mai Parana, sa kauta vua o tinana e dua na watina mai na vanua o Ijipita. E Dua Na Veiyalayalati Vata Kei Apimeleki 22 Sa yaco mai e dua na gauna, o Apimeleki kei Fikoli, (nai liuliu ni mataivalu na Apimeleki) e rau sa veivosaki kei Eparaama ka vaka: "Sa tiko vata kei iko na Kalou ena veika kecega o cakava. 23 "Mo yalataka vei au ena Kalou, ni o na sega ni cakacaka vaka i lasu vei au, vei ira na noqu kawa kei na veika au taukena; me vaka ga na veika vivinaka au sa cakava vei iko, mo cakava vaka kina vei au, ki na vanua talega o na lako kina." 24 Sa sauma o Eparaama, "Au na cakava vaka kina." 25 O Eparaama sa vakadodonutaki Apimeleki, baleta na mataniwai era sa taura vakaukauwa na dauveiqaravi nei Apimeleki. 26 Sa tukuna o Apimeleki, "Au sega ni kila, se o cei sa cakava na ka oqo: O iko sa sega ni tukuna vei au, se me'u rogoca me yacova na siga oqo." 27 Sa taura na sipi kei na bulumakau o Eparaama ka solia vei Apimeleki, ka ra sa cakava e dua na veiyalayalati. 28 Sa vakatala yani o Eparaama e vitu na luve ni sipi vakataki ira ga. 29 Sa tarogi Eparaama o Apimeleki, "Na cava na kena i balebale oqo, na lami o sa vakatalai ira oqo?" 30 Sa tukuna mai, "Mo taura mai ligaqu na lami oqo, me noqu i vakadinadina ni'u sa kelia na tobu oqo." 31 Sa vakayacani kina na vanua me Perisepa, baleta ni rau sa bubului ena veiyalayalati e kea. 32 E rau sa cakava na veiyalayalati e Perisepa, sa tucake o Apimeleki kei Fikoli (nai liuliu ni mataivalu) ka rau sa lesu tale ki na vanua o Filisitia. 33 Sa tea o Eparaama e dua na vu ni tamarisi e Perisepa, ka sa kaciva mai kea na yaca i Jiova, na Kalou Sega Ni Mudu. 34 Sa lako voli o Eparaama e lomai Filisitia me vica vata na siga.

Vakatekivu 22

Sa Dei Na Vakabauta Nei Eparaama

1 Sa oti kece na veika oqo, na Kalou sa vakatovolei Eparaama, ka tukuna vua, "I Eparaama," sa sauma mai, "Sai au oqo." 2 Na Kalou sa tukuna tale vua, "Mo kauta na luvemu, na luvemu tagane e dua ga o Aisake, o koya, o sa daulomana, lako ki na vanua o Moraia – la'ki vakacabori koya me i soro kama ena dua na ulunivanua au na tukuna vei iko." 3 Sa sou ena mataka o Eparaama, sa vakarautaka na nona asa, ka kauta e rua na nona cauravou vata kei koya, kei Aisake na luvena; sa taya na buka ni soro kama – sa tucake ka lako ki na vanua sa tukuna vua, na Kalou. 4 Ena i katolu ni siga, sa rai cake o Eparaama, sa raica sara na vanua vakayawa. 5 Sa tukuna o Eparaama vei rau na nona cauravou, "Drau tiko eke kei na asa, na gone kei au, keirau na lako yani ka lotu vei Jiova ka qai lesu tale mai vei kemudrau." 6 O, Eparaama sa kauta yani na buka ni soro kama ka vakataqara vei Aisake, sa taura mai na buka e waqa kei nai sele, e rau sa lako vata yani. 7 Sa taro o Aisake, vei Eparaama na tamana ka vaka: "Tamaqu," sa sauma yani, "Sai au oqo na luvequ," sa tukuna sara mai, "Raica na buka e waqa kei na kau me buka sa tu oqo, e vei ga na lami me i soro kama?" 8 Sa sauma yani o Eparaama, "Na luvequ na Kalou ena vakarautaka vei koya ga e dua na lami me i soro kama." E rau sa lako ruarua vata yani. 9 E rau sa lako mai ki na vanua sa lesia na Kalou. Sa tara nai cabocabo ni soro o Eparaama ka tuva na buka. Sa vivigi Aisake na luvena ka vakacabora ena i cabocabo ni soro ena dela ni buka sa tuvai tu. 10 O Eparaama sa dodoka na ligana ka taura nai sele, me vakamatea nai soro (luvena). 11 Na Agilosi i Jiova sa kaci mai lomalagi ka vaka: "Eparaama i Eparaama!" sa sauma yani, "Sai au oqo." 12 Sa tukuna mai na Agilosi, "Kua ni vakamatea na gone, se cakava vua e dua na ka, ni oqo, Au sa kila ni o sa rerevaka na Kalou – ni o sa sega ni via maroroya na luvemu, na luvemu tagane e dua ga, mai vei Au." 13 Sa rai cake o Eparaama, ka raica e dua na lami sa tacori tu na nona i leu ena dua na veico e dakuna. Sa kauta mai o Eparaama ka vakacabora mei sosomi kei Aisake na luvena mei soro kama. 14 O Eparaama sa vakayacana na vanua o ya me, Sa Vakarautaka O Jiova, me yacova na siga oqo. "Ena Ulunivanua i Jiova, sa vakarautaki kina." 15 Na Agilosi i Jiova sa kacivi Eparaama vakarua mai lomalagi, 16 Ka vaka: "Vei Au ga vakai Au, Au sa bubului kina, sa tukuna vaka oqo o Jiova, ni o sa cakava na ka oqo, ka sa sega ni bureitaka na luvemu tagane e dua ga— 17 "Ena veivakalouvinakataki, Au na vakalouvinakataki iko, ena veivakatuburi, Au na vakatuburi iko vakalevu sara, me vaka na veikalokalo ni lomalagi, me vaka talega na nuku ni veimatasawa. O ira na nomu kawa era na taukena na nodra matamata na nodra meca. 18 "Mai vei iko, na matanitu kece e vuravura era na vakalouvinakataki, baleta ni o sa rogoca na Domoqu." 19 Sa lesu tale o Eparaama vei rau na nona cauravou, e rau sa tucake, ka ratou sa lesu vata ki Periesepa; ka sa tiko mai Periesepa o Eparaama.

Na Vuvale Nei Neori

20 Sa oti na veika oqo, sa tukuni vei Eparaama ka vaka, "O Milika talega sa vakasucu gone vei Neori na tacimu: 21 "O Usi na ulumatua, o Buse na tacina, o Kemueli na tamai Erami, 22 "O Keseti, o Aso, o Pilidosi, o Jidafa kei Pecueli." 23 O Pecueli sa vakasucumi vua o Repeka. O ira na lewe walu oqo sa vakasucuma o Milika vei Neori na taci Eparaama. 24 Na watina lailai o Reuma, sa vakasucumi Teba, Qaema, Taesi kei Maeka.

Vakatekivu 23

Na Mate Nei Sera Kei Na Nona Buluti

1 Sa bula tiko o Sera me dua na drau ruasagavulu ka vitu na yabaki; oqo na veiyabaki ni bula nei Sera. 2 Sa mate o Sera mai Kirijaci Araba (oqori o Epironi) ena vanua o Kenani. Sa lako mai o Eparaama me lolokutaki Sera ka tagicaki koya. 3 Sa tucake o Eparaama mai na nona mate; ka vosa ki vei ira na luvei Eci ka vaka, 4 "O au e dua na vulagi, ka dau veitosoyaki tu ga ena kemuni maliwa. Mo ni solia vei au e dua na tikina me noqu i bulubulu ena kemuni maliwa, me'u buluta tani kina na noqu mate mai mataqu." 5 Era sa sauma vei Eparaama na luvei Eci tagane ka vaka, 6 "Mo rogoci keimami, na neimami turaga, o sa tamata qaqa ena keimami maliwa, buluta na nomu mate ena vanua ga o sa digitaka. Ena sega ni dua vei keimami ena bureitaka na nona i bulubulu, mo buluta kina na nomu mate." 7 Sa tucake o Eparaama ka cuva ni vakarokoroko vei ira na tamata ni vanua, na luvei Eci. 8 Sa vosa talega vei ira ka vaka: "Kevaka sa nomuni gagadre me'u buluta tani na noqu mate mai mataqu – mo ni rogoci au, mo ni sota mada kei Efironi na luvei Soa ena vukuqu, 9 "Me solia mada vei au na veiqara vatu e Makapila, o koya sa tiko vua, sa tiko ena mua ni were oqo. Me solia vei au ena kena i sau taucoko. Me taukeni kina nai bulubulu oqo ena kemuni maliwa." 10 O Efironi sa tiko ena kedra maliwa na luvei Eci; sa sauma o Efironi na Itaiti vei Eparaama ena matadra na luvei Eci, o ira kece sa curu mai e nona matamata ka vaka, 11 "E sega noqu turaga, au sa solia vei iko na veiwere kei na qara vatu sa tiko kina. Au sa solia vei iko ena matadra kece na noqu tamata, au sa solia vei iko – buluta kina na nomu mate!" 12 Sa cuva sobu o Eparaama ena matadra na tamata ni vanua; 13 sa qai vosa vei Efironi ena matadra kece na tamata ka vaka: "Kevaka o sa solia vei au, mo rogoca talega oqo, au na solia vei iko nai lavo ena vuku ni vanua, taura oqo mai vei au – au na qai buluta na noqu mate e kea." 14 Sa sauma o Efironi vei Eparama ka vaka, 15 "Mo rogoci au na noqu turaga, na vanua sa kenai sau e rua na drau onosagavulu na dola, na cava oqori ena kedaru maliwa? Buluta ga yani na nomu mate." 16 Sa rogoca o Eparaama na vosa nei Efironi, ka sa vakarautaka na i lavo me vaka sa tukuni ena nodra vakarorogo na luvei Eci, e rua na drau onosagavulu na dola, ena i lavo ni veivoli. 17 Na vanua nei Efironi ena vanua e Makapila sa tiko ena matai Mamire, na vanua kei na qara vatu sa tiko kina, kei na vunikau kece sa tiko kina kei na veika kece sa tiko vakavolivolita, sa tiko ena veivolivoli oqo 18 Vei Eparaama me sa kena i taukei ena matadra kece na luvei Eci, o ira kece sa lako mai ena matamata ni koro. 19 Ni sa oti oqo, sa buluti Sera o Eparaama ena qaravatu ni vanua e Makapila e Mamire (oqori o Epironi) ena vanua e Kenani. 20 Na vanua kei na qaravatu sa tiko kina, sa volitaki vei Eparaama mai vei ira na luvei Eci, me nona i bulubulu.

Vakatekivu 24

Na Yalewa Me Wati Aisake

1 Sa qase mai o Eparaama ka sa levu sara na nona veiyabaki. o Jiova talega sa vakalouvinakataki Eparaama ena ka kecega. 2 Sa tukuna o Eparaama vua na nona dauveiqaravi qase duadua – o koya sa lewa na nona veika kecega, "Daramaka mada mai na ligamu ena ruku ni sagaqu, 3 "Me'u cakava vei iko, mo bubului vei Jiova, na Kalou ni lomalagi kei na Kalou ni vuravura, o ya, mo kua ni taura mai e dua na yalewa ni vanua oqo o Kenani, me watina na luvequ; 4 "Mo lako ga ki noqu vanua, vei ira na wekaqu ka kauta mai e dua me watina na luvequ o Aisake." 5 Sa tukuna vua na nona dauveiqaravi, "De qai sega ni vinakata, na yalewa me lako mai ki na vanua oqo. Me'u kauta lesu beka na luvemu ki na vanua o lako mai kina?" 6 Sa tukuna vua o Eparaama, "Mo qarauna mo kua ni kauta na luvequ ki kea. 7 "Na Kalou o Jiova, o Koya sa kauti au tani mai na vale i tamaqu kei na nodra vanua na wekaqu, o Koya sa vosa vei au ka yalataka vei au ka vaka: 'Ki vei ira na nomu kawa Au na solia kina na vanua oqo.' Ena tala liu na Nona Agilosi vei iko, o na kauta mai e dua na watina na luvequ mai kea. 8 "Kevaka sa sega ni via lako mai na yalewa vata kei kemuni, o sa na vakagalalataki mai na bubului oqo; mo kua ga ni kauta na luvequ tagane ki kea." 9 Na dauveiqaravi sa daramaka na ligana ena ruku ni sagai Eparaama na nona turaga, ka bubului ena vuku ni veika sa vakamacalataki. 10 Na dauveiqaravi sa kauta e tini na kameli ni nona turaga ka lako yani – ni sa tiko e ligana na veika kece ena vuku ni nona turaga. Sa lako yani ki Mesapotomia na koro nei Neori. 11 Era sa tekiduru sobu na nona kameli ena taudaku ni koro ena bat ni wai, ni sa yakavi mai – oqo na gauna era sa dau mai taki wai kina na yalewa. 12 Sa tukuna na dauveiqaravi, "I Jiova na Kalou nei Eparaama na noqu turaga, Mo ni solia vei au na qaqa e na siga oqo, ka Mo ni vakaraitaka na vinaka vua na noqu turaga o Eparaama. 13 "Mo ni raica, au sa tu oqo ena mata ni wai – era sa lako tiko mai oqo na yalewa mai na koro me taki wai. 14 "Me yaco, vei koya na gone yalewa au sa tukuna vua, 'Mo biuta sobu mada na nomu saqa me'u gunu mada,' ka me tukuna mai oqo, 'Gunu, au na vakagunuva talega na nomu kameli, 'me sai koya oqo o ni sa digitaka vua na Nomuni tamata o Aisake. Ena ka oqo au na kila kina ni o ni sa vakaraitaka na loloma vua na noqu turaga." 15 Sa yaco ni se bera ni oti na nona vosa, o Rapeka na luvei Petueli na luvei Milika, na wati Neori na taci Eparaama, sa lako vata tiko mai kei na nona saqa ena vatuvatu ni tabana. 16 Na goneyalewa oqo (Rapeka), sa ka ga me vakasaravi, baleta ni sa rui goneyalewa totoka ka sega ni kila na tagane. Sa lako sobu ki na wai ka vakatawana na nona saqa, ka lako cake mai. 17 Sa cici yani na dauveiqaravi me sotavi koya ka tukuna, "Au kerea me'u gunu mada ga mai na nomu saqa wai." 18 Sa tukuna mai na goneyalewa, "Mo gunu na noqu turaga" – sa biuta mai vakatotolo na nona saqa ka solia yani vua me gunu. 19 Ni sa solia oti me gunu, sa tukuna tale, "Au na la'ki taki wai talega me medra na kameli, me yacova ni ra sa gunu kece." 20 Sa vakatotolo yani me taki wai tikotiko ga me yacova ni ra sa gunu kece na kameli. 21 Sa vakaraici koya tikoga na dauveiqaravi, sa galu tiko ni via kila se sa lewa i Jiova oqo, se sega. 22 Ena gauna era sa gunu oti kina na kameli, na dauveiqaravi, sa taura mai e dua na mama ni ucu koula, ka dua nai kava na onisi na kena bibi kei na rua na qato ni liga koula, e lima na onisi na kena bibi, ka daramaka vua na yalewa, 23 ka taroga na goneyalewa, "O luvei cei o iko? Tukuna vei au, e tiko beka e so nai cili ena nomudou vale me keitou vakacegu kina?" 24 Sa sauma mai na goneyalewa, "Oi au na luvei Petueli, na luvei Milika, na wati Neori." 25 Sa tukuna tale vua, "Sa tu vei keitou na ka e veiraurau vei kemudou kei ira na manumanu, kei na i cili mo dou vakacegu kina." 26 Sa cuva sobu na dauveiqaravi i Eparaama ka lotu vei Jiova. 27 Sa tukuna, "Me vakalouvinakataki na Kalou o Jiova nei Eparaama, o Koya sa sega ni vakawaletaka na Nona loloma kei na Nona dina vua na noqu turaga. Ni sa tuberi au mai o Jiova ki na vale nei koya na taci noqu turaga." 28 Sa cici yani na goneyalewa ka tukuna vei ira na vale nei tinana na veika oqo. 29 O Rapeka sa dua na ganena, na yacana o Lepani, sa cici yani o Lepani ki vua na tamata mai na mata ni wai. 30 Sa yaco ni sa raica na mama ni ucu kei na qato e ligana na ganena, ka sa rogoci Rapeka talega ni sa tukuna, "Sa vosa vei au na tamata o ya," sa qai lako yani vua na dauveiqaravi i Eparaama ni sa tucake tu mai na mataniwai vata kei ira na kameli. 31 Sa tukuna yani, "Dou lako mai na veivakalouvinakataki i Jiova! Na cava dou sa tu ga kina e tuba? Au sa vakarautaka oti na vale kei na vanua me ra cegu kina na kameli." 32 Sa curu yani na tamata (dauveiqaravi) ki vale, sa sereka nai colacola ni kameli ka solia na kedra kakana. Sa savata na yavana kei na yavadra na nona i tokani era sa lako vata mai. 33 Sa biu mai matana na kakana me kana, ia, sa vosa mada e liu ka vaka: "Au na sega mada ni kana, me'u tukuna mada e liu na ka au mai cakava." Sa sauma mai o Lepani, "Mo vosa sara." 34 Sa tukuna mai, "Oi au na tamata dauveiqaravi nei Eparaama. 35 "O Jiova sa vakalouvinakataki koya vakalevu sara, ka sa tamata qaqa sara; na Kalou sa solia vua na manumanu, na siliva, na koula, na tagane kei na yalewa dauveiqaravi, na kameli kei na asa e levu sara. 36 "O Sera na watina na noqu turaga, sa vakasucuma e dua na gone tagane vua na noqu turaga ni sa qase sara; sa solia vua na luvena tagane oqo na veika kecega; o koya na noqu turaga. 37 "Sa cakava na noqu turaga me'u bubului, ka vaka: 'Mo kua ni kauta vua na luvequ tagane me watina e dua na yalewa ni vanua oqo, o Kenani; 38 'Mo lako ga ki na vale nei tamaqu, vei ira na wekaqu, ka kauta mai e dua na yalewa me watina.' 39 "Au sa taroga na noqu turaga, 'De qai sega ni via muri au mai na yalewa.' 40 "Sa sauma mai vei au o Jiova, 'O koya au sa lako voli e Matana ena tala mai na Nona Agilosi vei iko, ena vakataucokotaka na nomu i lakolako, ka o na kauta mai e dua na watina na luvequ mai vei ira na wekaqu – mai na vale i tamaqu. 41 'O na vakagalalataki mai na bubului oqo, kevaka o sa yaco yani vei ira na wekaqu, qai o sega ni kauta mai e dua na yalewa. O sa na galala mai na bubului oqo.' 42 "Ena siga oqo, ni'u sa lako mai ki na mata ni wai ka masu, 'I Jiova na Kalou ni noqu turaga o Eparaama, kevaka e dina ni o ni na vakataucokotaka nai lakolako oqo, 43 'Raica, au na tu ena mata ni wai, na goneyalewa ga ena lako mai me takiwai, ka au na tukuna vua – "Mo solia mai na wai me'u gunu." 44 'Ka me na sauma sara mai, "Oqo mo gunu, au na vakagunuvi ira talega na nomu kameli," me sai koya oqo na yalewa sa digitaka o Jiova me watina na luve ni noqu turaga.' 45 "Ni se bera ni'u masu oti, sa lako mai o Rapeka vata kei na nona saqa wai e domona – sa lako sobu sara ki na mata ni wai ka taki. 'Au sa kerekere sara me'u gunu.' 46 "Sa vakatotolo sara o koya me biuta e ra na nona saqa wai ka solia mai. me'u 'gunu – sa tukuna talega me vakagunuvi ira na kameli.' 47 "Au sa mani tarogi koya, 'O iko na luvei cei?' Sa sauma mai, 'Oi au na luvei Petueli na luvei Neori, sa vakasucuma vua o Milika.' Au sa vakadaramaka sara vua na mama ni ucu kei na qato ni liga, e ligana. 48 "Au sa cuva sobu ki na qele ka lotu vei Jiova, ka vakalouvinakataka na Kalou o Jiova, na Kalou ni noqu turaga o Eparaama, o Koya sa tuberi au mai ena sala dina me'u mai kauta na goneyalewa na luvena na tacina na noqu turaga me rau la'ki veiwatini kei na luvena tagane. 49 "Oqo, kevaka dou sa cakacaka vakadodonu vua na noqu turaga, mo dou tukuna vei au, se, me'u gole ki nai matau se ki nai mawi." 50 O Lepani kei Petueli, e rau sa sauma mai ka vaka: "Na veika sa lako mai vei Jiova keirau sa sega ni rawa ni tukuna ni vinaka se ca. 51 "Sa tu ga oqo o Rapeka, tauri koya ka drau lako yani me la'ki watina na luvena tagane na nomu turaga, me vaka sa tukuna o Jiova." 52 Ni sa rogoca oqo na dauveiqaravi i Eparaama, sa lotu vei Jiova ka vakacuva na uluna ki na qele. 53 Na dauveiqaravi sa kauta mai na i yau talei siliva, nai yau talei koula, na i sulu, ka solia vei Rapeka. Sa solia talega na yau talei sara vei ganena kei tinana. 54 Na dauveiqaravi kei ira na tamata era sa kana ka gunu ka vakacegu ena bogi. Era sa yadra ena mataka ka tukuna, "Laivi au mada me'u lako vua na noqu turaga." 55 Ia, o ganei Rapeka kei tinana e rau sa tukuna, "Me tiko mada vata kei keitou na goneyalewa me tini tale na siga, ka me qai lako yani." 56 Sa sauma yani na dauveiqaravi, "Dou kua ni vakataotaki au, o Jiova sa dolava oti na noqui lakolako; dou laivi au me'u lako – me'u lako yani vua na noqu turaga." 57 E ratou sa tukuna tale, "Me keitou taroga mada na goneyalewa." 58 E ratou sa kacivi Rapeka mai ka taroga, "O na lako beka vata kei na dauveiqaravi oqo?" Sa sauma mai o Rapeka, "Au na lako." 59 Era sa vakatalai Rapeka yani kei na nona nasi kei na dauveiqaravi nei Eparaama kei ira na tamata. 60 Era sa vosa vakalouvinakataki Rapeka ka tukuna vua: "Mo yaco mo tinadra na vei udolu kei na vei tini na udolu; kei na nomu kawa mera taukena na nodra veimatamata o ira sa cati kemuni." 61 O Rapeka kei ira na nona dauveiqaravi, era sa vodoka na kameli ka muri ira yani na tamata. Era sa kauti Rapeka yani, ka lako sara. 62 O Aisake sa lako mai vaka ki Bea-Laei-Roi, ni sa tiko mai na ceva. 63 Sa lako yani o Aisake ki na veibuca me vakanananu mada ni sa yakavi mai. Sa rai sara yani, ka raica na veikameli era sa lako tiko mai. 64 Sa rai yani o Rapeka, ka sa raici Aisake sara. Sa sobu mai ena nona kameli; 65 Ni sa taroga oti na dauveiqaravi – se ocei na tagane sa lako tiko mai oqo me sotavi ira? Sa tukuna yani vua, "Ni oqo na luve ni noqu turaga." Sa taura o Rapeka na nona i ubi ka ubi koya ga vakavinaka. 66 Na dauveiqaravi sa tukuna vei Aisake na veika kece sa cakava oti. 67 O Aisake sa kauta mai na goneyalewa ki na valelaca nei Sera na tinana; sa tauri Rapeka, ka sa yaco me watina ka sa lomani Rapeka dina sara. Oqo sa vakacegui vinaka kina o Aisake mai na mate nei tinana.

Vakatekivu 25

O Eparaama Kei Ketura

1 Sa vakawati tale o Eparaama, na yaca i watina o Ketura. 2 Sa sucu kina o Simirani, Jokesani, Medani, Mitiani, Isibaki kei Sua. 3 O Jokesani sa vakasucumi vua o Seba kei Didani. Na luvei Didani o Asurimi, Letusimi, kei Liumimi. 4 Na luvei Mitiani o Efa, Eferi, Anoti, Ebida, kei Eledae. O ira kece oqo na gone mai vei Ketura. 5 O Eparaama sa solia na veika kece sa nona vei Aisake. 6 O Eparama sa solia talega na veika vei ira na luvena ni watina talai. Ni se bula tikoga o Eparaama, sa vakatalai ira tani yani oqo, mai vei Aisake ki na tokalau.

Na Mate Nei Eparaama Kei Na Nona Bulu

7 Na veiyabaki sa bula kina o Eparaama sa dua nadrau vitusagavulu ka lima na yabaki. 8 Sa ceguva nai otioti ni nona i cegu o Eparaama ka sa mate yani ni sa qase sara. Sa lako yani vei ira na kai nona. 9 E rau sa buluti koya na luvena o Aisake kei Isimeli ena qaravatu mai Makapila, e Mamire, ena veiwere nei Efironi na luvei Soa na Itaiti; 10 na vanua sa volia o Eparaama mai vei ira na luvei Eci. E rau sa bulu mai kea o Eparaama kei Sera na watina. 11 Sa yaco ni sa mate oti o Eparaama, na Kalou sa vosa vakalouvinakataki Aisake na luvena. O Aisake sa tiko mai Bea-Laei-Roi.

Na Vuvale Nei Isimeli Kei Aisake

12 Oqo na kawa nei Isimeli na luvei Eparama vei Eka na yalewa dauveiqaravi ni Ijipita nei Sera. 13 Oqo na yacadra na luvei Isimeli – na dui yacadra kei na nodra dui kawa: na ulumatua nei Isimeli o Nebajoci; sa qai Kedari, Adibili, Mibisami, 14 Misama, Duma, Masa, 15 Adari, Tema, Jeturi, Nafisi kei Kedema. 16 Sai ira oqori na luvei Isimeli, oqo talega na yaca ni nodra vei koro kei nai tikotiko vagalala, e tinikarua na ravouvou me vaka na nodra dui vanua. 17 Oqo na veiyabaki nei Isimeli, e dua na drau tolusagavulu ka vitu na yabaki; sa ceguva nai otioti ni nona i cegu ka mate yani, sa soqoni yani vei ira na nona tamata. 18 (Era sa tiko mai Avila me yaco sara ki Suri, oqori ena tokalau kei Ijipita ni o lako yani vaka ki Asiria.) Sa mate ena matadra na tacina. 19 Oqo na kawa nei Aisake, na luvei Eparaama. o Eparaama sa vakasucumi vua o Aisake. 20 O Aisake sa yabaki vasagavulu ni rau sa veiwatini kei Rapeka na luvei Petueli na kai Siria mai Padani-Arami, na ganei Lepani na kai Siria. 21 O Aisake sa vakamamasu vei Jiova ena vuku i Rapeka na watina, ni sa yava (sega ni vakaluveni), o Jiova sa sauma na masu nei Aisake, ka sa kunekune sara o Rapeka. 22 E rau sa yavavala vakalevu na gone e ketei tinadrau, ka sa tukuna kina – "Kevaka sa vinaka oqo, na cava sa yaco tiko kina na yavavala e ketequ?" Sa lako yani me vakatarogi Jiova. 23 Sa tukuna vua o Jiova, "E rua na matanitu sa tiko oqori e ketemu, e rua na tamata e rau na tawase mai yagomu; e dua ena kaukauwa mai vua tale e dua – o koya na qase ena qaravi koya e gone." 24 Ni sa yaco mai na nona siga ni vakasucu, sa tiko ena kato e dua na drua. 25 O koya e liu mai e damusa, sa vaka e dua nai sulu vutivutia na yagona kece: sa vakayacani me o Iso. 26 Sa qai muri mai o tacina, na ligana sa vesuka tiko mai na bukubuku ni yavai Iso. Sa vakayacani me o Jekope. Sa yabaki onosagavulu o Aisake ni rau sa sucu mai na luvena drua oqo. 27 E rau sa tubu cake na gone. Sa dau vakasasa manumanu o Iso ka tamata ni veiwere. O Jekope sa tamata malumu tuga ka dau tiko ga e vale. 28 O Aisake sa dau lomani Iso, baleta ni sa dau kania na nona manumanu ni vakasasa. Ia, o Rapeka sa lomani Jekope vakalevu. Sa Volitaka O Iso Na Nona I Tutu Vakaulumatua 29 O Jekope sa vakasaqa kakana vakarakara tiko ena nona lesu mai na veiwere o Iso, ka sa wawale sara vakalevu. 30 Sa kerea yani o Iso vei Jekope me kania mada na kakana vakarakara damudamu sa vakarautaka tiko, ni sa rui wawale vakalevu. Sa vakayacani sara kina me o Itomi. 31 Sa tukuna yani o Jekope, "Mo volitaka na dodonu ni nomu ulumatua vei au ena siga oqo." 32 Sa tukuna mai o Iso, "Raica au sa voleka ni mate, na cava na kena yaga vei au na ulumatua oqo?" 33 Sa tukuna mai o Jekope, "Mo bubului vei au e dai." Sa bubului o Iso ena siga o ya vei Jekope ka volitaka na nona dodonu vakaulumatua vei Jekope. 34 O Jekope sa vakarautaka sara na kakana vakarakara damudamu kei na madrai vei Iso. Sa kana ka gunu o Iso ka tucake ka sa lako yani. O Iso sa vakawaletaka na dodonu ni nona ulumatua.

Vakatekivu 26

O Aisake Kei Apimeleki

1 Sa yaco e dua na dausiga levu ena vanua, me vaka na dausiga ena gauna nei Eparaama. O Aisake sa lako vei Apimeleki na tui Filisitia e Qarari. 2 Sa basika vei koya o Jiova ka tukuna: "Kua ni lako sobu ki Ijipita; mo tiko ga ena vanua Au na tukuna vei iko. 3 "Tiko ga ena vanua oqo, Au na tiko vata kei iko ka vakalouvinakataki iko; Vei iko kei ira na nomu kawa, Au na solia kina na vanua oqo, Au na vakayacora kina na yalayala. Au a bubului kina vei Eparaama na tamamu. 4 "Au na vakavuna na nomu kawa me ra vaka na kalokalo ni lomalagi; Au na solia vei ira na nomu kawa na vanua taucoko oqo; mai vei iko, ena vakalouvinakataki kina na veivanua kece oqo; 5 "baleta ni sa talairawarawa o Eparaama ki na Domoqu ka maroroya na Noqu i lesilesi, na Noqu i Vakaro, na Noqu Lewa kei na Noqu i Vunau." 6 O Aisake sa tiko ga e Qerari. 7 O ira na tagane ni vanua o ya era sa tarogi koya me baleta na watina. Sa tukuna kina, "O koya na ganequ" – ni sa rere o koya me tukuna, "O koya na watiqu;" ni sa nanuma "Ni ra na vakamatei koya ena vuku i Rapeka na watina, baleta ni sa rui yalewa totoka dina ni vakasaravi." 8 Sa yaco, ni sa dede tiko na nodra tiko e kea, o Apimeleki na tui Filisitia, ni sa rai tiko yani ena nona katuba leka – sa raica ni rau sa veiwedevi tiko o Aisake kei Rapeka na watina. 9 O Apimeleki sa kacivi Aisake yani ka tukuna, "E vaka vei au ni Rapeka e watimu; o tukuna rawa vakacava vei au ni o koya e ganemu?" Sa tukuna vua o Aisake, "Baleta ni'u sa kila, 'De ra na vakamatei au ena vukui Rapeka.'" 10 Sa tukuna mai o Apimeleki, "Na cava o sa cakava oqo vei keimami? Vaka cava kevaka e dua sa moceri koya, o iko ga sa na kauta mai vei keimami na bula e beitaki." 11 Sa vakarota kina o Apimeleki vei ira na nona tamata, "O koya sa tara na watina na tamata oqo, ena vakamatei vakaidina." 12 Sa kakaburaki ena vanua o ya o Aisake, ka sa tatamusuki ena yabaki vata ga o ya – ka sa yayadrau; Sa vakalouvinakataki koya o Jiova. 13 Sa tubu cake na nona sautu, sa gumatua tikotikoga me yacova ni sa sautu vakalevu sara; 14 ni sa taukena na qele ni manumanu, na qele ni bulumakau, ka sa levu sara na nona dauveiqaravi. Era sa vuvutaki koya na kai Filisitia. 15 O ira na Filisitia era sa sogota na vei mata ni wai kece era a kelia na tamata nei Eparaama na tamana, era sa buluta kece ena qele. 16 Sa tukuna o Apimeleki vei Aisake, "Mo lako tani mai vei keimami, ni o sa rui kaukauwa mai vei keimami." 17 Sa lako tani mai kea o Aisake ka la'ki tiko ena veibuca mai Qerari. 18 Sa kelia tale o Aisake na veimata ni wai, ea kelia e liu o Eparaama na tamana, ni ra sa sogota na Filisitia e na nona sa mate o Eparaama. O Aisake sa vakayacana tale ena yaca ga ea vakayacana kina e liu o tamana. 19 O ira talega na tamata i Aisake, era sa kelia e dua na mata ni wai sa drodro tu ga, mai na buca. 20 O ira na dau susu manumanu mai Qerari era sa veivala kei ira na dau susu manumanu nei Aisake ka tukuna, "Na wai sa neimami" sa vakayacani kina na wai o ya me Eseki, baleta ni ra sa veivala kei koya. 21 Era sa kelia tale e dua na mata ni wai – era sa veivala tale kina. Sa vakayacana o Aisake na vanua o ya me Sitina. 22 Sa lako tani mai kea ka kelia tale e dua na mata ni wai – era sa sega ni veivala kina, sa vakayacana me Reopoci, ni sa tukuna "O Jiova sa solia na galala vei keda, eda na vuavuai kina ena vanua." 23 Sa lako cake mai kea ki Periesepa. 24 O Jiova sa basika vua ena bogi tiko ga o ya ka tukuna, "Oi Au na Kalou nei tamamu o Eparaama; kua ni rere, Au sa tiko vata kei iko. Au na vakalouvinakataki iko ka vakalewelevutaki iko kei ira na nomu kawa, ena vuku i Eparaama." 25 Sa tara mai kea e dua nai cabocabo ni soro ka kaciva mai kea na yaca i Jiova. Sa tara talega e kea na nona valelaca; era sa kelia mai kea e dua na mata ni wai na dauveiqaravi nei Aisake. 26 O Apimeleki sa lako mai vua mai Qerari vata kei Ausaci, e dua na nona i tokani kei Fikoli nai liuliu ni nona mataivalu. 27 Sa tukuna vei iratou o Aisake, "Na cava dou sa mai cakava vei au – kemudou a cati au ka vakatalai au tani mai vei kemudou?" 28 E ratou sa sauma mai, "Keitou sa raica vakaidina ni sa tiko vata kei iko o Jiova. Keitou sa tukuna kina, me dua na nodatou veiyalayalati – o iko kei keitou. 'Me datou cakava e dua na veiyalayalati, 29 'Mo kua ni cakava vei keitou e dua na ka ca – ni keitou sa sega ni tarai iko. Ni keitou sa sega ni cakava e dua na ka ca, na ka vinaka ga – ni keitou sa vakatalai iko ena vakacegu. O sa kalouvinaka kina i Jiova.'" 30 Sa cakava o Aisake e dua na kakana, e ratou sa kana ka gunu. 31 E ratou sa yadra ena mataka, ka veiyalayalati, sa vakatalai iratou yani; E ratou sa lako tani mai vua ena vakacegu. 32 Ena siga tiko ga o ya, era sa lako mai na tamata nei Aisake ka tukuna vua me baleta na mata ni wai era a kelia, era sa mai tukuna, "Sa vure na wai." 33 Sa vakatoka ena yaca o Siepa. Sa yaca ni koro kina o ya o Perisiepa. 34 Ni sa yabaki vasagavulu o Iso, sa tauri Jutia na luvei Bieri na Itaiti, kei Vasemaca na luvei Eloni na Itaiti, me rau watina. 35 E rau sa rarawa kina vakalevu o Aisake kei Rapeka.

Vakatekivu 27

Sa Vakalouvinakataki Jekope O Aisake

1 Sa yaco na gauna ni sa qase mai o Aisake ka sa buwawa sara na matana – sa sega kina ni rai rawa, sa kacivi Iso mai, na nona ulumatua ka tukuna vua, "Na luvequ," sa sauma mai o Iso, "Sai au oqo." 2 Sa tukuna tale, "Raica, au sa qase sara, au sa sega talega ni kila na noqu siga ni mate. 3 "Oqo mo kauta mada na nomu i yaragi, na taga ni gasau kei na veqa ni dakai, lako yani ka vakasasataka mada mai e dua na kequ manumanu. 4 "Mo tavuna vakaveiwaki mai, me vaka au sa dau vinakata, kauta mai, me'u mai kania, me vakalouvinakataki iko kina na yaloqu ni bera ni'u mate." 5 Sa vakarorogo tu o Rapeka ni sa vosa tiko o Aisake vei Iso na luvena. Sa lako yani o Iso ki vanua me vavana ka me kauta lesu mai. 6 O Rapeka sa vosa vei Jekope na luvena ka vaka: "Au sa rogoci tamamu ni sa vosa oti vei Iso na tacimu ka vaka, 7 'Kauta mai e dua na manumanu, mo tavuna veiwaki ka kauta mai me'u kania ka vosa vakalouvinakataki iko ena mata i Jiova ni bera ni'u mate.' 8 "Na luvequ mo rogoca na noqu vosa, me vaka au sa vakarota vei iko. 9 "Lako ka kauta mai e rua na luve ni me vinaka, au na tavuna veiwakitaka me kania o tamamu me vaka e dau vinakata. 10 "Mo qai kauta vei tamamu, me kania, ka vosa vakalouvinakataki iko ni bera ni mate yani." 11 Sa tukuna o Jekope vei tinana – "Raica, o Iso e vutivutia na yagona, o au, e sega. 12 "De qai vakayamoca o tamaqu na ligaqu, ka kilai au – ena qai tukuna ni'u tamata dauveivakaisini, oqo au na kauta ga mai kina vei au na kalouca ka sega na kalouvinaka." 13 Sa tukuna vua o tinana, "Na nomu kalouca me noqu na luvequ, cakava ga na veika au sa tukuna oti vei iko, lako, kauta mai na manumanu." 14 Sa lako yani o Jekope, ka kauta mai na manumanu vei tinana. Sa vakarautaka o tinana me vaka sara ga sa dautaleitaka o Aisake. 15 Sa kauta mai o tinana nai sulu vinaka nei Iso sa tiko ga vua e vale, ka sa vakasulumi Jekope kina. 16 Sa vakabira tu e ligana na vuti ni me kei na domona talega. 17 Sa solia na kakana kei na madrai ea vakarautaka mai ki na ligai Jekope na luvena. 18 Sa lako yani o Jekope vei tamana ka tukuna, "Tamaqu," sa sauma mai, "Oi au oqo, o cei o iko na luvequ?" 19 Sa tukuna o Jekope vei tamana, "Oi au o Iso, na nomu ulumatua, au sa cakava mai oqo, me vaka o sa tukuna mai, au kerea mo duri cake, mo dabe, mo kania na ka au sa vakarautaka mai. Me vakalouvinakataki au kina na yalomu." 20 Sa tukuna mai o Aisake vei luvena, "O sa kunea vakacava, sa rui totolo na veika o cakava?" Sa sauma yani o Jekope, "Na Kalou o Jiova sa kauta mai vei au." 21 Sa tukuna tale o Aisake, "Toso voleka mai me'u yamoca na ligamu, se o iko dina o Iso se sega." 22 Sa toso voleka yani vei tamana o Jekope, ka sa yamoci koya sara o tamana ka tukuna, "Na domo sa domo i Jekope, ia, na ligana sa ligai Iso ga." 23 Sa sega ni kilai koya baleta ni sa vutivutia na ligana me vaka na ligai Iso. Sa qai vosa vakalouvinakataki koya. 24 Sa qai tukuna yani, "Sai iko dina oqo, Iso na luvequ?" Sa sauma mai o Jekope, "Sai au." 25 Sa tukuna o Aisake, "Kauta mai, me'u mai kania na ka o sa vakarautaka mai – me vakalouvinakataki iko kina na yaloqu." Sa kauta mai o Jekope, sa kana sara o Aisake, sa kau talega mai vua na waini ka sa gunu talega. 26 O Aisake na tamana sa tukuna vua, "Toso voleka mai ka reguci au, na luvequ." 27 Sa toso voleka mai o Jekope ka reguci tamana. Sa boica na nona i sulu o Aisake, ka vosa vakalouvinakataki koya ka vaka: "Nai boi kei na luvequ, sa vaka nai boi ni vanua sa vakalouvinakataka o Jiova. 28 O koya oqo me solia kina vei iko o Jiova na tegu mai lomalagi, na vuavuai vinaka kei vuravura, me levu na sila kei na waini. 29 Me ra qaravi iko na tamata, ka cuva vei iko na veimatanitu, o na turaga vei ira na tacimu, o ira na luvei tinamu era na cuva vei iko, era na kalouca o ira era na vakaloucataki iko, era na kalouvinaka o ira era na vakalouvinakataki iko!"

Sa Yalolailai O Iso

30 Ni sa oti na nona vakalouvinakataki Jekope o Aisake ka sa curu yani ki tuba mai vei Aisake na tamana – sa basika mai o Iso ena nona lesu tiko mai na vakasasa. 31 Sa vakarautaka sara mai vakavinaka na nona lewe ni vakasasa ka kauta mai vei tamana ka tukuna, "Me duri mada na tamaqu ka kania mada na lewe ni vakasasa na luvena, me rawa ni vakalouvinakataka kina na luvena mai na yalona." 32 Sa tarogi koya o Aisake na tamana, "O cei o iko?" Sa sauma mai, "O au na luvemu ulumatua, o Iso." 33 Sa kidacala o Aisake ka sautaninini, ka tukuna, "O cei? Sa E vei o koya sa vakasasa oti ka liu mai, ka sa kauta oti mai vei au? Au sa kana oti ni se bera ni o lako mai, au sa vakalouvinakataki koya – sa vakalouvinakataki dina o koya." 34 Ni sa rogoca oiso na vosa nei tamana, sa tagi vakararawa sara ka tukuna vei tamana "O au talega tamaqu, mo vakalouvinakataki au?" 35 Sa tukuna o Aisake, "Sa lako mai o tacimu ena veivakaisini, ka sa kauta tani na nomu vakalouvinakataki." 36 Sa tukuna tale o Iso, "Sa sega li ni vakayacani donu o Jekope? Ni sa vakaisini (Jekope) au vaka rua oqo – Sa kauta tani na noqu i tutu vakaulumatua, oqo, sa kauta talega na noqu vakalouvinakataki!" Sa tukuna talega, "Ka o sega ni bau biuta tu vei au edua na ka me noqui votavota?" 37 Sa sauma mai o Aisake ka tukuna vei Iso, "Raica, au sa cakava me nomu turaga o koya, o ira kece na tacina, me ra nona i talai, na sila kei na waini me maroroi koya – na cava tale me'u cakava vei iko na luvequ?" 38 Sa tukuna o Iso vei tamana, "Sa tu beka ga vei iko e dua na vosa ni veivakalouvinakataki? E sega ni rawa vei iko mo vakalouvinakataki au talega tamaqu!" Sa tagi vakadomoilevu sara o Iso. 39 Sa sauma mai o Aisake na tamana ka tukuna vua, "Raica na nomu i tikotiko, ena vanua vuavuai e vuravura, kei na kena tegu mai lomalagi e na lutu tiko ga mai. 40 O na bula ena nomu i seleiwau, ka o na qaravi tacimu; Ena yaco na gauna ni o sa sega ni kunea na vakacegu, - o na musuka tani na nona i vua mai na domomu."

Sa Dro O Jekope Mai Vei Iso

41 O Iso sa cati Jekope vakalevu ena vuku ni veivakalouvinakataki sa solia vua o tamana (Aisake), sa tukuna kina e lomana o Iso, "Sa voleka oqo na siga ni so mate vei tamaqu, ni oti o ya, au na qai vakamatei Jekope." 42 Sa tukuni vei Rapeka na vosa oqo nei Iso. Sa kacivi Jekope mai ka tukuna vua, "Raica sa vakamalumalumutaki koya tiko o Iso ena vukumu – ni sa nakita tiko me vakamatei iko. 43 "Oqo na luvequ – rogoca na noqu vosa, tucake, dro ki vei Lepani na ganequ ki Arana. 44 "Tiko mai kea me vica na siga, qai lesu mai ni sa oti na nona cudru, 45 "Ni sa oti na nona cudru ka sa guilecava talega, au na qai talatala yani mo lako mai. Na cava me'u rarawa kina vakalevu ena dua ga na siga?" 46 O Rapeka sa tukuna vei Aisake, "Au sa rarawa tiko vakalevu ena vukudra na luvei Eci yalewa; kevaka sa wati Jekope e dua na luvei Eci – me vakataki ira na goneyalewa ni vanua oqo. Ena vinaka vakacava na noqu bula vei au?"

Vakatekivu 28

1 O Aisake sa kacivi Jekope ka vosa vakalouvinakataki koya ka vakaroti koya ka tukuna, "Mo kua ni taura e dua me watimu, ena vanua oqo o Kenani. 2 "Mo lako ki na vanua o Padani-Erami ki na vale nei Pecueli (tukamu) na tama i tinamu; ka taura mai kea e dua na watimu, mai na vale nei Lepani na ganei tinamu. 3 "Na Kalou Kaukauwa, me vakalouvinakataki iko, ka mo yagavakalevu ka vuavuai, mo vakalewelevutaki talega – mo dua nai soqosoqo tamata; 4 Me soli talega vei iko na veivakalouvinakataki i Eparaama, vei iko kei ira talega na nomu kawa era na muri iko mai – mo taukena kina na vanua o tiko vulagi kina, na vanua sa solia na Kalou vei Eparaama." 5 Sa vakatalai Jekope yani o Aisake, ka sa lako sara ki Padani-Erami vei Lepani na luvei Petueli na kai Siria na ganei Rapeka na tinadrau o Jekope kei Iso.

O Iso Sa Vakawati Kei Maelaci

6 O Iso sa raici Aisake ni sa vakalouvinakataki Jekope ka sa vakatala yani ki Padani-Erami me taura mai kea e dua na watina, ni sa tukuna, "Mo kua ni taura me watimu e dua na yalewa ni Kenani," 7 ka sa talairawarawa vei tamana kei tinana o Jekope ni sa lako yani ki Padani-Erami. 8 Sa raica talega o Iso, ni sa sega ni vinakati ira na yalewa ni Kenani o tamana o Aisake. 9 O Iso sa lako yani vei Isimeli ka tauri Maelaci na luvei Isimeli, na luvei Eparaama, na ganei Nebatoce me watina, ka sai kuri ni watina era sa tiko rawa.

Sa Yalayala O Jekope E Peceli

10 Sa lako tani o Jekope mai Periesepa ka lako vaka ki Arana. 11 Sa yaco ki na dua na vanua ka tiko kina ena bogi taucoko, baleta ni sa dromu na mata ni siga. Sa taura e dua na vatu me nona i lokoloko ka davo sobu me moce. 12 Sa qai tadra, ka raica ni sa dua nai kabakaba sa lako yani e vuravura ka yacovi lomalagi, kei ira na Agilosi ni Kalou era sa veilakoyaki tiko kina – lako cake ka lako sobu mai. 13 O Jiova sa tu mai cake ka tukuna: "Oi Au o Jiova na Kalou i Eparaama, na Kalou i Aisake. Na qele o davoca tiko oqori, Au na solia vei iko kei ira na nomu kawa. 14 "O ira talega na nomu kawa era na vaka na kuvu ni qele (kedra i wiliwili); o na tete vaka ki na ra, ki na tokalau, ki na vualiku ki na ceva talega. Mai vei iko kei ira na nomu kawa, ena vakalouvinakataki kina o vuravura taucoko. 15 "Raica, Au sa tiko vata kei iko, me'u maroroi iko ena vanua kecega o sa na lako kina ka au na kauti iko lesu tale mai ki na vanua oqo, Au na sega ni laivi iko me yacova Ni'u sa cakava kece na veika Au sa vosa kina vei iko." 16 Sa yadra vakasauri o Jekope mai na nona moce ka tukuna, "Sa dina, o Jiova sa tiko eke ka au sa sega tu ni kila." 17 Sa rerevaka levu ka tukuna, "Sa vanua vinaka dina oqo, sa sega tale ni dua na ka oqo – na vale ni Kalou ga – oqo sara ga na matamata ki lomalagi!" 18 Sa yadra vakamataka lailai o Jekope, sa taura na vatu (nona i lokoloko) sa vakaduria me duru, ka sa lumuta ena waiwai. 19 Sa vakatoka na yaca ni vanua o ya me Peceli; na yaca ni vanua o ya e liu o Luse. 20 Sa yalayala (bubului) o Jekope ka vaka: "Kevaka sa tiko vata kei au na Kalou, ka maroroi au ena sala au sa lakova tiko oqo, ka solia vei au na kakana me'u kania kei nai sulu me'u suluma, 21 "Me'u lesu tale mai kina ki na vale nei tamaqu ena vakacegu – o Jiova, sa na noqu Kalou. 22"Na vatu oqo au sa vakaduria me duru, sa na vale ni Kalou. Na veika kece o ni na solia vei au, na kena i katini (sigana) au na solia vakaidina vei kemuni."

Vakatekivu 29

O Jekope Sa Sotavi Raijeli

1 O Jekope sa lako ena nona i lakolako ka sa yaco ki na nodra vanua na tamata mai na tokalau. 2 Sa rai yani ka raica e dua na mata ni wai ena buca; era sa davo voleka tu kina e tolu na qele ni sipi. Era sa dau gunu na sipi mai na mata ni wai oqori. E dua na vatu levu sa ubi tu kina na mata ni wai. 3 Era sa dau lako yani ki kea na qele ni manumanu, sa dau vakaqiqici tani na vatu mai na gusu ni mata ni wai, era sa dau gunu na sipi ka sogo tale na mata ni wai ena vatu. 4 Sa taro yani vei ira o Jekope, "Kemudou na taciqu, oi kemudou sara mada mai vei?" E ratou sa sauma, "Mai Arana." 5 Sa qai taro tale vei iratou, "Dou sa kilai Lepani beka, na luvei Neori?" E ratou sa sauma mai, "Keitou sa kilai koya." 6 "Sa vinaka tiko beka o koya se sega?" E ratou sa sauma mai, "Io, sa bula vinaka o koya, raica o Raijeli na luvena yalewa sa lako tiko mai oqori kei ira na sipi." 7 Sa tukuna sara o Jekope, "Raica e se sigalevu tutu na vanua, e se sega ni kena gauna me ra kacivi vata mai na sipi. Me ra gunu na sipi ka dou vakania talega." 8 E ratou sa tukuna mai, "Keitou na sega ni cakava oqori, vakavo ke sa soqoni vata kece mai na manumanu, ka vakaqiqici tani na vatu mai na gusu ni mata ni wai, era na qai gunu." 9 Ni se vosa tiko ga vei ira, sa lako mai o Raijeli kei na sipi nei tamana – ni sa dau qarava na vakatawani ni sipi. 10 O Jekope ni sa raici Raijeli, na luvei Lepani na ganei tinana, kei na sipi nei Lepani, sa toso yani o Jekope ka vakaqiqica tani na vatu mai na mata ni wai, ka vakagunuvi ira na sipi nei Lepani. 11 O Jekope sa reguci Raijeli, ka sa tagi. 12 O Jekope sa tukuna vei Raijeli ni o koya na wekai Lepani, ka ni sa luvei Rapeka. Sa cici yani o Raijeli ka tukuna vei tamana. 13 Ni sa rogoca o Lepani nai tukutuku kei Jekope na luvei ganena, sa cici sara yani me sotavi koya. Sa mokoti koya ka reguci koya ka kauti koya sara yani ki nona vale. Sa tukuna o Jekope na veika kece vei Lepani. 14 Sa tukuna vua o Lepani, "E dina, e daru sa sui vata ka lewe vata." Sa tiko e kea o Jekope me vula dua.

O Jekope Sa Vakawatitaki Lia Kei Raijeli

15 Sa tukuna o Lepani vei Jekope, "Baleta ni o sa wekaqu, e dodonu beka mo cakacaka wale vei au? Tukuna mada vei au, na cava me kemu i sau?" 16 O Lepani sa rua tiko na luvena yalewa: sa qase o Lia ka gone o Raijeli. 17 Sa mata kamica o Lia, ia, o Raijeli sa rui totoka qai talei na kena i rairai. 18 O Jekope e taleitaki Raijeli vakalevu ka tukuna, "Au na qaravi iko me vitu na yabaki ena vuku i Raijeli na luvemu yalewa gone." 19 Sa sauma o Lepani, "E vinaka me'u solia na luvequ vei iko – ka sega ni vua tale e dua na tagane. Mo tiko mada vata kei au." 20 Sa cakacakataka na vitu na yabaki o Jekope ena vuku i Raijeli – sa vaka ga e vica na siga na vitu na yabaki oqori, baleta ni sa rui vinakati Raijeli vakalevu. 21 O Jekope sa tukuna vei Lepani, "Solia vei au na watiqu, ni sa oti na noqu veisiga ni veiqaravi, ni'u sa vinakata me curumi koya." 22 Sa kacivi ira kece mai na tamata o Lepani, ka cakava e dua na kakana levu. 23 Ni sa yakavi bogi mai, sa tauri Lia ka kauti koya mai vei Jekope. Sa curumi koya sara o Jekope. 24 O Lepani sa soli Siliva na nona dauveiqaravi me dauveiqaravi nei Lia. 25 Ni sa mataka mai, sa kila o Jekope ni sa i Lia ka sega ni o Raijeli. Sa tarogi Lepani sara, "Na cava o sa cakava vei au? E sega beka ni au a cakacaka ena vuku i Raijeli? Na cava o sa vakaisini au kina?" 26 Sa sauma o Lepani, "E sega ni dodonu me caka oqo, ena neimami vanua – me dau soli e liu na gone mai vua na qase. 27 "Mo cakacakataka talega na nona gauna, me qai soli kina vei iko." 28 Sa qai cakacakataka o Jekope na vitu tale na yabaki, sa qai soli vei koya o Raijeli me watina. 29 O Lepani sa soli Bila na nona dauveiqaravi, me dauveiqaravi nei Raijeli. 30 Sa curumi Raijeli o Jekope ni sa taleitaki koya vakalevu, ni sa qaravi Lepani ena vitu tale na yabaki.

O Ira Na Luvei Jekope

31 Ni sa raica o Jiova ni sega ni lomani vakalevu o Lia – Na Kalou sa qai dolava na kato ni gone nei Lia, qai sogota na kato nei Raijeli. 32 Sa kunekune o Lia ka vakasucuma e dua na tagane, ka vakayacani koya me o Rupeni; ni sa tukuna, "O Jiova sa raica dina na noqu rarawa. Oqo ena lomani au kina o na watiqu Jekope." 33 Sa kunekune tale ka vakasucuma e dua na tagane ka tukuna, "O Jiova sa rogoca ni'u sa sega ni lomani. Oqo sa solia kina vei au e dua tale na tagane." Sa yacana o Simione. 34 Sa kunekune ka vakasucuma tale e dua na tagane, sa tukuna kina, "Oqo sa na qai kabiti au kina o watiqu (Jekope), baleta ni'u sa vakasucuma vua e tolu na gone tagane." Sa yacana o Livai. 35 Sa kunekune tale ka vakasucuma e dua tale na tagane, sa tukuna kina, "Oqo au na vakavinavinaka vua na Kalou." Sa vakayacana kina na gone me o Juta. Sa qai tu vakadua na nona vakasucu gone.

Vakatekivu 30

1 Ni sa raica o Raijeli ni sa sega tiko ni vakaluveni vei Jekope, sa vuvutaki tuakana vakalevu, sa tukuna vei Jekope, "Solia vei au e dua na gone, de'u na qai mate!" 2 Sa cudru vakalevu o Jekope ena vuku i Raijeli, sa tukuna kina, "O au beka na Kalou ni o Koya ga e lewa na vakaluveni, ni o Koya ga e sogota tiko na nomu bola ni gone?" 3 Sa tukuna mai o Raijeli, "Oqo o Bila na noqu dauveiqaravi, vakacurumi iko vua me vakasucuma kina e dua na gone e duruqu, me dua kina na luvequ mai vua." 4 Sa soli Bila vua, ka sa curumi koya sara o Jekope. 5 Sa kunekune o Bila, ka vakasucuma vei Jekope e dua na tagane. 6 Sa tukuna o Raijeli, "Sa vakatulewa vei au na Kalou; sa rogoca talega o koya na domoqu ka solia vei au e dua na gone." Sa vakayacani koya kina me o Tani. 7 Sa kunekune tale na dauveiqaravi nei Raijeli, o Bila, sa vakasucuma vei Jekope nai karua ni luvena. 8 Sa tukuna o Raijeli, "Au sa veiqati vakalevu kei na tuakaqu ia, au sa toso tikoga." Sa vakayacana na gone me o Navitalai. 9 O Lia, ni sa sega tiko ni dua tale na luvena, sa tauri Siliva na nona dauveiqaravi ka solia vei Jekope me curumi koya. 10 O Siliva sa vakasucuma vei Jekope e dua na tagane. 11 Sa tukuna o Lia, "Sa lako tiko mai na mataivalu." Sa vakayacana me o Kata. 12 O Siliva sa vakasucuma nai karua ni luvei Jekope. 13 Sa tukuna o Lia, "Au sa marau, ni ra na tukuna vei au na goneyalewa na dauveivakalouvinakataki." Sa vakayacani koya kina me o Aseri. 14 O Rupeni sa lako yani ena gauna ni tatamusuki, ka sa kunea mai e so na wainimate ni moce, ka sa kauta sara mai vei tinana. Sa kerekere yani o Raijeli vei Lia ka vaka: "Au kerea e so na wai ni moce nei Rupeni." 15 Sa sauma mai o Lia, "E se lailai vei iko o Jekope na watiqu? Oqo, o sa vinakata tale na wai ni moce nei luvequ talega?" Sa sauma yani o Raijeli, "Drau moce vata mada ena bogi oqo, mei sosomi ni wai ni moce oqori." 16 Ni sa lesu mai o Jekope mai na veiwere ena yakavi, sa lako yani o Lisa ka tukuna vua, "Mo mai curu vei au, ni sa o saumi oti ena wai ni moce nei luvequ." E rau sa mai veimoceri ena bogi o ya. 17 Na Kalou sa rogoci Lia, sa kunekune ka vakasucuma vei Jekope nai ka lima ni luvena tagane. 18 Sa tukuna kina o Lia, "Na Kalou sa solia vei au na kequ i voli, ni'u sa solia na noqu dauveiqaravi vei watiqu." Sa vakayacani koya kina me o Isakari. 19 Sa kunekune tale o Lia, ka sa vakasucuma nai ka ono ni luvena vei Jekope. 20 Sa tukuna o Lia, "Na Kalou sa vakatikora vei au na veika vivinaka, oqo sa na tikoga kina vata kei au o na watiqu, baleta ni'u sa vakasucuma vua e ono na luvena tagane." Sa vakayacani koya kina me o Sevuloni. 21 Sa qai vakasucuma tale e dua na luvena yalewa, ka vakayacani koya me o Taina. 22 Na Kalou sa qai nanumi Raijeli, sa rogoci koya ka dolava na nona kato ni gone. 23 Sa kunekune ka vakasucuma e dua na tagane, ka tukuna, "Na Kalou sa kauta tani na noqu rogorogo ca." 24 Sa vakayacani koya me o Joseva ka tukuna kina, "O Jiova ena solia tale vei au e dua na luvequ tagane."

Na Veiyalayalati Nei Jekope Kei Lepani

25 Ni sa vakasucumi Joseva oti o Raijeli, sa tukuna o Jekope vei Lepani, "Laivi au me'u lako, me'u lako ki na noqu tikina, ki na noqu vanua. 26 "Soli ira vei au na watiqu, kei ira na luvequ, o ira, au sa qaravi iko kina, ka laivi keimami me keimami lako, o sa kila talega na veiqaravi au sa cakava vei iko." 27 Sa tukuna vua o Lepani, "Mo tiko mada, kevaka au sa kune loloma e matamu, ni'u sa kila ka vulica ni o Jiova sa vakalouvinakataki au ena vukumu." 28 Sa qai tukuna tale yani, "Tukuna vei au na kemu i sau, au na solia vei iko." 29 Sa tukuna vua o Jekope, "O sa kila vinaka na noqu qaravi iko kei na qaravi ni nomu manumanu. 30 "Na veika e a tu vei iko e liu ni se bera na noqu lako mai, e lailai oqo sa levu sara; na Kalou sa vakalouvinakataki iko mai na gauna au a lako mai kina. Oqo au na vakania talega na noqu vale ena gauna cava?" 31 Sa tukuna mai o Lepani, "Na cava me'u solia vei iko?" Sa sauma mai o Jekope, "Kua ni solia vei au e dua na ka, au na tiko tale me'u veiqaravi, kevaka o solia vei au na ka: 32 "Me'u lako mada yani ki na qele ni manumanu ena siga oqo, na manumanu kece sa tavutonotono me wasei mai na kena e dravu. Na sipi, na lami, na me, oqori me kequ i sau. 33 "Ena saumi vei au na noqu yalododonu na veisiga ni mataka, ni sa lako mai vei iko na kequ i sau. Na manumanu kece sa sega ni tavutonotono ena kedra maliwa na me, ka dravu vei ira na lami, era na kilai me sa ka butakoci, kevaka era sa kune vei au." 34 Sa tukuna o Lepani, "Io, oqori sa na vaka na nomu vosa!" 35 Ena siga o ya sa kauta tani na me tagane kece sa tavutonotono, kei na me yalewa kece sa tavutonotono, o ira kece sa via vulavula tiko, kei na ka dravu kece vei ira na lami, sa solia yani ki na ligadra na luvena. 36 Sa lako yani vakayawa mai vei Jekope. (me vaka na yawa, ni lakovi ena tolu na siga). O Jekope sa vakania tiko na vo ni manumanu i Lepani. 37 O Jekope ka taura tiko na taba ni kau drokadroka mai na amodi kei na Jesinati. Sa vocia na kulini kau me laurai mai na vulavula ni kau e loma. 38 Na kau kece sa voci veilutuki, sa cuva tiko mai na mata ni wai ena vanua era dau lako yani kina na manumanu me ra gunu. Me ra kunekune kina ni ra sa mai gunu. 39 Era sa kunekune ena mata ni kau sa voci tu. Na manumanu kece era sa vakasucuma mai na ka tavutonotono. 40 O Jekope sa wasei ira na lami, na manumanu kece me ra sa raica tikoga na kau sa voci tu, o ira talega na ka dravu ena qele ni manumanu nei Lepani. Era sa tiko tani ga na nona manumanu mai vei ira na manumanu nei Lepani. 41 Sa yaco tiko ga na gauna, ni ra sa kunekune tiko mai na manumanu, o Jekope sa biuta tiko ga e matada na kau sa voci oti tu. Mera kunekune tiko ena nodra vakaraica tikoga na kau sa voci oti tu. 42 Na manumanu sa malumalumu sa biu tani – na ka kaukauwa sa nei Jekope kei na ka malumalumu sa nei Lepani. 43 O Jekope sa tamata kaukauwa sara ka tamata yaco, sa levu na nona manumanu, sa levu na nona dauveiqaravi yalewa kei na tagane, sa levu sara na nona kameli kei na nona asa.

Vakatekivu 31

O Jekope Sa Dro Mai Vei Lepani

1 Sa rogoca o Jekope na nodra vosa na luvei Lepani ka vaka: "O Jekope sa kauta kece na vei ka sa nei tamada, sa rawata na nona i yau, mai na veika ga sa nei tamada." 2 O Jekope sa raica tiko na veitokoni nei Lepani vua sa vaka e sega ni vinaka mai me vaka e liu. 3 O Jiova sa tukuna vei Jekope, "Mo lesu tale ki nomu vanua, vei ira na wekamu, Au na tiko vata kei iko." 4 O Jekope sa kacivi Raijeli yani kei Lia ki na buca ena vanua era sa tiko kina na manumanu, 5 Sa tukuna vei rau, "Au sa raica na nona veitokoni o tamamudrau – ni sa sega ni vinaka me vaka e liu, ia, na Kalou i tamaqu sa tiko vata kei au. 6 "Drau sa kila talega, au sa qarava na tamamudrau ena noqu kaukauwa kece. 7 "Ia, o tamamudrau sa vakaisini au ena nona veisautaka na kequ i sau vaka tini, ia, na Kalou sa sega ni vakatarai koya me vakacacani au. 8 "Kevaka sa tukuna vaka oqo, 'Na tavutonotono sa kemu i sau' – era na tavutonotono kece. Kevaka sa tukuna, 'Na roka veimama ena kemu i sau' – era na roka veimama kece. 9 "Na Kalou sa kauta tani na manumanu kece i tamamudrau ka solia mai vei au. 10 "Sa yaco ena gauna era sa kunekune kina na manumanu, au sa raica ena tadra na luve ni me era sa ladelade tiko – era sa veivolavolai kece tu ka tavutonotono. 11 "Na Agilosi ni Kalou sa vosa vei au ena tadra ka tukuna, 'Jekope', sa saumi mai, 'Sai au oqo.' 12 "Na Agilosi sa tukuna mai, 'Mo raica, na lami kecega sa rika tiko era sa volavolai ka tavutonotono, au sa raica na veika kecega sa cakava o Lepani, sa caka ga ena vukumudrau. 13 'Oi Au na Kalou kei Peceli – na vanua o a lumuta kina na duru ka cakava kina na bubului vei Au. Mo tucake, ka lako tani mai na vanua oqo, ka lesu ki na vanua e nodra na wekamu dina.'" 14 O Raijeli kei Lia e rau sa sauma vua ka vaka: "E se vo tale tiko e so nai votavota e neirau mai na vale nei tamai keirau? 15 "Keirau sa sega beka ni vulagi mai vua, ni sa volitaki keirau ka sa kania kece na neirau i lavo? 16 "Ni sai yau sa taura kece na Kalou mai vei tamai keirau sa neirau kei ira kece na luvei keirau; oqo, na veika ga sa tukuna vei iko na Kalou, mo cakava." 17 O Jekope sa vakavodoki ira na luvena kei na watina ena kameli. 18 Sa kauta talega na nona manumanu kece kei na veika kece e taukena, na veika kece e sa rawata mai Padani-Erami, ka lako vei Aisake na tamana ena vanua o Kenani. 19 O Lepani e se lako tu me kotiva na nona sipi – o Raijeli sa butakoca mai na matakau ni vuvale e nei tamana. 20 Sa dro yani o Jekope, ka sa sega ni kila o Lepani na kai Siria ni sa sega ni via tukuna vua. 21 Sa dro yani kei na ka kece sa tu vua, sa takosova yani na wai ka lako vaka ki na veiulunivanua e Kiliati.

O Lepani Sa Cici Muri Jekope

22 Ena i katolu ni siga sa tukuni vei Lepani ni sa dro o Jekope. 23 Sa kauti ira na nona ka cici muri Jekope me vitu na siga, sa qai yaco vei ira ena veiulunivanua mai Kiliati. 24 Na Kalou sa lako mai vei Lepani ena bogi ena tadra ka tukuna vua, "Qarauni iko, mo lewa vinaka na nomu vosa vei Jekope." 25 Sa yaco yani o Lepani vei Jekope ni se qai vakaduria tiko na nona veivale laca ena veiulunivanua e Kiliati. 26 Sa tukuna o Lepani vei Jekope, "Na cava o sa cakava, ni o sa lako vakavuni tani mai vei au, o sa kauti rau tani na luvequ me vaka na bobula e na i seleiwau? 27 "Na cava o sa dro kina vakavuni ka sega ni tukuna vei au, me'u veitalatala vinaka vei iko ena marau kei na lagasere kei na tibereli na api? 28 "O sa sega ni vakatara me'u reguci ira na luvequ tagane kei na luvequ yalewa. o sa cakacaka vakalialia. 29 "Sa tu vei au na kaukauwa me'u veitotogitaki, ia, na Kalou i tamamu sa vosa vei au ena bogi ka tukuna, 'Qarauni iko vinaka, ni o sa vosa vei Jekope.' 30 "O sa lako dina mai oqo, baleta ni o sa via lako ki na vale nei tamamu, ia, na cava ga o butakoca mai kina na noqu kalou-matakau?" 31 Sa sauma o Jekope, "Au sa rere baleta, 'De o na qai tauri rau tale vakaukauwa na luvemu yalewa.' 32 "Vei koya o sa raica vua na nomu kaloumatakau, me kua ni bula o koya. Ena matadra na tamata, mo vakatakilakilataka na ka e nomu ka taura yani." O Jekope sa sega ni kila ni sa kauta mai o Raijeli na ka o ya. 33 Sa lako yani o Lepani ki na vale laca nei Jekope, nei Lia, nodrau na dauveiqaravi, sa sega ga ni kunea na kalou-matakau. Sa lako yani ki na vale laca nei Raijeli. 34 O Raijeli sa biuta na kalou-matakau oqo ena i dabedabe ni ose ka qai dabeca yani. Sa vakasaqaqara o Lepani ena loma ni vale – ka sa sega ga ni kunea. 35 Sa tukuna yani vei tamana, "Me kua ni ca vua na noqu turaga ni'u sa sega ni tucake rawa, ni sa se tiko na rosi me vaka sa dauyacovi ira ga na yalewa – sa yaco vei au oqo." Sa vakasaqaqara, ia, sa sega ga ni kunea na kalou- matakau. 36 Sa cudru vakalevu o Jekope ka sa vosa vakaukauwa vei Lepani ka vaka: "Na cava au cala kina vei iko, na cava na noqu i valavala ca, mo cicivi au kina vaka oqo? 37 "O sa vakaraica kece na noqu veika au taukena, na cava e nomu o sa kunea? Biuta e mataqu oqo me ra vakatulewa kina o ira kece oqo e matadaru! 38 "E ruasagavulu na yabaki oqo au sa tiko vata kei iko, na nomu sipi kei na nomu me e se sega vakadua ni bau vakalutuka na luvena, au se sega talega ni kania e dua na luve ni me mai na kedra bai. 39 "O ira mada ga era sa basuraki mai vei ira na manumanu kila au sa sega ni kauta mai vei iko, au sa vakaisosomitaka ga na ka sa yali. O sa vinakata ga mai na ligaqu se era butakoci ena siga se ena bogi. 40 "Au sa tiko ga kei ira, ena siga sa kani au na katakata, ena bogi na batabata-liliwa, na noqu moce ni vakacegui sa drovaka na mataqu. 41 "Au sa tiko ena nomu vale me ruasagavulu na yabaki, au qaravi iko me tinikava na yabaki ena vukudrau na luvemu yalewa, ka ono tale na yabaki ena vukudra na manumanu ka o sa veisautaka na kequ i sau vaka tini na gauna. 42 "Baleta ni sa tiko vata kei au na Kalou i tamaqu, na Kalou i Eparaama, na Rerevaki i Aisake – e dina, o na vakatalai au tani ena liga lala. Na Kalou sa raica na noqu vakararawataki kei na cakacaka ni ligaqu, ka sa vunauci iko ena bogi."

Sa Veiyalayalati O Lepani Kei Jekope

43 Sa vosa o Lepani vei Jekope, "Oi rau na yalewa oqo e rau sa noqu, o ira na gone oqo era sa noqu, na manumanu kece oqo sa noqu, na ka kece o raica sa noqu. Ia, na cava me'u cakava vei rau na luvequ yalewa oqo kei ira na luvedrau? 44 "Lako mai me daru veiyalayalati mada, o iko kei au, me i vakadinadina ena kedaru maliwa." 45 Sa vakaduria o Jekope e dua na duru vatu. 46 Sa tukuna o Jekope vei ira na tamata, "Mo ni tomi vatu mai," era sa binia mai ka kana ena dela ni binibini vatu. 47 O Lepani sa vakayacana me Jeka-Saaduca, ia, o Jekope sa vakayacana me Kaliti. 48 Sa tukuna o Lepani, "Nai binibini vatu oqo sai vakadinadina vei kedaru ena siga oqo." Sa vakayacani kina me o Kaliti, 49 O Misipa talega, baleta ni sa tukuna, "Me raica tiko mai o Jiova ena kedaru maliwa, ni daru sa dui tikotiko. 50 "Kevaka o sa vakararawataki rau na luvequ, se o sa taura tale e so na watimu, sa sega na tamata me — raica na Kalou ga sai vakadinadina vei kedaru!" 51 Sa tukuna o Lepani vei Jekope. "Oqo nai binibini vatu kei na duru, sa tu oqo ena kedaru maliwa. 52 "Oqo nai vakadinadina, nai binibini vatu kei na duru, au na sega ni lako sivia nai binibini oqo ki vei iko, se, mo lako sivia mai nai binibini oqo ki vei au, me ia na veivakacacani. 53 "Na Kalou nei Eparaama, na Kalou nei Neori, na Kalou nei tamadrau me mai lewa ena kedaru maliwa." O Jekope sa bubului vei Koya na Rerevaki i Aisake na tamana. 54 Sa vakacabora o Jekope nai soro ena ulunivanua, ka sa kacivi ira mai na tamata me ra mai kana. Era sa kana madrai ka tiko ena ulunivanua me yacova na mataka. 55 Ena mataka lailai, sa tucake o Lepani ka reguci ira na gone kei rau na luvena yalewa ka vosa vakalouvinakataki ira. Sa lako o Lepani ka lesu tale ki nona vanua.

Vakatekivu 32

Sa Lako Mai O Iso Me Sota Kei Jekope

1 Sa lako yani ena sala o Jekope ka sa sota kei ira na Agilosi ni Kalou. 2 Ni sa raici ira o Jekope, sa tukuna, "Oqo nai tikotiko ni Kalou," ka sa vakatoka na yaca ni vanua o ya, me Maenaimi. 3 O Jekope sa vakatala eso na mata vei Iso na tacina ena vanua nei Sia e Itomi. 4 Sa vakarota vei ira ka vaka, "Mo ni vosa vei Iso na noqu turaga ka vaka, 'Sa tukuna na nomuni tamata o Jekope, "Au a tiko mai vei Lepani ka yacova oqo. 5 "Sa tu vei au na bulumakau, na asa, na sipi kei na me, na dauveiqaravi tagane kei na yalewa, au sa talatala yani me tukuni vua na noqu turaga, me'u kune loloma kina e matamuni."'" 6 Era sa lesu tale mai vei Jekope na i talaki ka tukuna, "Keitou sa lesu mai vei Iso, ka sa lako tiko mai o koya me mai sotavi iko. E va na drau na tamata sa tiko vata kei koya." 7 Sa rere ka taqaya vakalevu o Jekope, ka sa wasei ira na tamata sa tiko vata kei koya, na sipi kei na bulumakau kei na kameli, me rua nai wasewase. 8 Sa tukuna sara, "Kevaka sa lakova mai o Iso ka valuta e dua nai wasewase, me dro yani nai wasewase ka dua." 9 Sa tukuna tale o Jekope, "Na Kalou nei tamaqu o Eparaama, na Kalou nei Aisake na tamaqu, Na Kalou o Koya sa tukuna vei au, 'Lesu tale ki na nomu vanua, vei ira na wekamu, ka au na cakacaka vata kei iko': 10 "Ssa sega ni ganiti au na loloma kece kei na dina kece o ni sa vakaraitaka vei au na Nomuni tamata. Au a takosova mai na Joritani kei na noqu i titoko – ia, oqo au sa yaco me rua nai vavakoso levu. 11 "Mo ni vakabulai au mai na ligai koya na taciqu, mai na ligai Iso; ni'u sa rerevaki koya, de qai vala kei au kei ira na gone kei ira na tinadra. 12 "Ni Kemuni sa tukuna, 'Au na raica mo na vinaka, ka cakava na nomu kawa me vaka na nuku ni wasawasa, ni sa sega ni wiliki rawa na kena levu.'" 13 Sa moce mai kea ena bogi, ka taura na veika sa lako mai ligana – me ka ni loloma vei Iso na tacina: 14 E rua na drau na me yalewa, ruasagavulu na me tagane, ruanadrau na sipi yalewa kei na ruasagavulu na sipi tagane, 15 E tolusagavulu na kameli yalewa kei na luvedra, vasagavulu na bulumakau yalewa ka tini na bulumakau tagane (yadru), ruasagavulu na asa yalewa kei na tini na kena ka tagane. 16 Sa solia yani ki na ligadra na nona tamata ka tukuna vei ira, "Dou liu yani, ka me dua na veiyawaki ena keda maliwa." 17 Sa vakarota vei ira sa liu, "Kevaka sa sotavi kemuni o Iso ka tarogi kemuni, 'O ni sa nei cei? O ni na lako tiko ki vei? E nei cei na veika sa tu oqo?' 18 "Mo ni qai tukuna, 'Oqo era sa nona na nomuni tamata o Jekope. Oqo sa soli tiko mai me nona ka ni loloma vua na noqu turaga o Iso; o koya talega sa muri tiko mai.'" 19 Sa vakarota talega nai karua ni lawalawa kei nai katolu ka vaka: "Me vaka talega oqori na veika mo ni tukuna vei Iso ni kemuni sa kunei koya; 20 "Mo ni tukuna talega, 'Raica na nomuni tamata o Jekope sa muri tiko mai.'" Ni sa tukuna mai o koya, "Nai solisoli oqo ena vinaka vua ka ni oti oqori au na raici koya e mataqu; de na qai ciqomi au kina." 21 Sa liu sara vua nai solisoli oqori, ia, o koya e se bogi dua tale ena vanua era cegu tiko kina.

O Jekope Sa Veimulomulo Kei Na Kalou

22 Sa tucake o Jekope ena bogi ka kauti rau na watina, rau na dauveiqaravi kei ira na luvena e tinikadua, ka takosovi Japoki. 23 Sa kauti ira ka vakatalai ira yani ki tai kadua, ka vakauta talega yani na veika sa tu vua. 24 Sa tiko duadua ga o Jekope, sa dua na Tamata e rau sa veimulomulo kaya me yacova na kida ni mataka. 25 Na Tamata oqo, ni sa raica ni sa sega ni rawa ni gumatua vei Jekope, sa qai boboka na veiuturi ni sema ni sui ni dibina. Oqo sa lutu kina nai sema ni dibina ni rau sa veimulomulo tiko. 26 Sa tukuna mai na Tamata, "Laivi au me'u lako, ni sa kida mai na mataka." Sa sauma o Jekope, "Mo vakalouvinakataki au sara, au sa na qai laivi iko!" 27 Sa qai tarogi Jekope, "O cei na yacamu?" sa sauma yani, "O Jekope." 28 "Sa na sega tale ni yacamu o Jekope, sa na yacamu oqo o Isireli (sotia ni Kalou), ni o sa sasaga tiko ga vua na Kalou kei na tamata talega, ka sa gumatua kina." 29 O Jekope talega sa tarogi koya ka vaka: "O cei na yacamu?" Sa sauma mai, "Na cava o taroga kina na Yacaqu?" Sa qai vakalouvinakataki koya mai kea. 30 Sa vakatoka na yaca ni vanua o ya o Penieli, "Au sa raica na Kalou ena matana votu ka au se bula tiko ga." 31 Ni se takosovi Penieli tiko – sa cadra vua na matanisiga ka sa gera na dibina ni lako voli. 32 Me yacova mai nikua, o ira na Isireli era sa sega ni kania na lewe ni dibi. Baleta na Kalou sa tara na dibi i Jekope, ka sa (mavule) lutu kina na sui ni dibina.

Vakatekivu 33

E Rau Sa Sota O Jekope Kei Iso

1 Sa rai yani o Jekope, ka raica ni sa lako tiko mai o Iso vata kei na va na drau na nona tamata. Sa wasewasei ira vakatotolo na gone vei ira na dui tinadra. 2 Sa liu oirau na dauveiqaravi kei ira na luvena, tarava yani o Lia kei na luvena, ka muri sara o Raijeli kei Joseva. 3 Sa takoso yani o Jekope ka cuva ki na qele vakavitu, me yacova ni sa voleka mai vei Iso na tacina. 4 Ia, o Iso sa cici mai ka roqoti koya ka lele yani ki domona ka reguci Jekope ka tagi, ni rau sa veitagicaki ena marau. 5 Sa rai yani o Iso, ka sa raici ira na yalewa kei na dui luvedra ka taroga, "O cei o ira oqo?" sa sauma yani, "O ira na gone oqo era sai solisoli ni loloma ni Kalou vua na nomuni tamata." 6 E rau na lako talega mai na dauveiqaravi kei na luvedra ka cuva sobu. 7 Sa lako talega mai o Lia kei ira na luvena ka cuva sobu. Ni oti oqo sa lako talega mai o Joseva, kei Raijeli ka cuva talega. 8 Sa taroga mai o Iso, "Na cava nai balebale ni lawalawa kei oqo keimami sa sota oti?" Sa tukuna yani o Jekope, "Oqori me ra kune loloma kina ena mata ni noqu turaga." 9 Sa tukuna tale o Iso, "Sa levu tu vei au na veika, taciqu; maroroya kece oqo me nomu ga." 10 Sa sauma yani o Jekope, "E sega, kevaka au sa kune loloma e matamu, mo ciqoma nai solisoli mai na ligaqu – ni'u sa raica na matamu ni sa vaka ga ni'u raica na mata ni Kalou, ni o sa vinaka vei au. 11 "Au kerea mo taura na veivakalouvinakataki sa kau mai vei kemuni, baleta na Kalou sa levu dina na Nona yalololoma vei au, ka sa rui levu tale vei au oqo." Sa uqeti koya tikoga o Jekope – sa mani ciqoma o Iso. 12 Sa mani tukuna o Iso, "Mai me daru lako sara, au na liu tiko vei iko." 13 Sa sauma yani o Jekope, "Na noqu turaga sa kila ni ra sa malumalumu na gone, era sa malumalumu talega na manumanu, kevaka me ra na toso tale me dua na siga, era na mate kece. 14 "Au kerea, me liu ga yani na noqu turaga, ka me'u na kauti ira ga yani vakamalua na manumanu kei ira na gone ena neimami toso ga, me yacova ni keimami sa yaco yani vua na noqu turaga e Sia." 15 Sa tukuna mai o Iso, "Me'u biuta tiko mai eso na noqu tamata vata kei iko?" Sa sauma mai o Jekope, "Ena dua beka na kedra yaga? Me'u kune loloma mai na mata ni noqu turaga." 16 Sa lesu yani o Iso ena siga o ya, ena sala ki Sia. 17 Sa lako yani o Jekope ki Sakoca, sa tara e dua na nona vale, kei na vale me nodra na manumanu. Sa vakayacani kina na vanua o ya me Sakoca.

Sa Yaco Mai Kenani O Jekope

18 Sa yaco vinaka mai Sikemi o Jekope, ena vanua o Kenani, ena nona lako mai Padani-Erami; sa vakaduria na nona valelaca ena mata ni koro. 19 Sa volia na tiki ni vanua sa mai vakaduria kina na nona vale laca, mai vei ira na luvei Emori na tamai Sikemi ena rua na drau na dola. 20 Sa tara mai kea e dua nai cabocabo ni soro, ka vakatoka me Ilai-Eloe Isireli.

Vakatekivu 34

Na Veika Me Baleti Taina

1 O Taina na luvei Lia, o koya sa vakasucuma vei Jekope – sa lako yani me vakaraici ira na goneyalewa ni vanua. 2 Ni sa raici koya o Sikemi, na ravouvou ni vanua o Ivaiti, na luvei Emori, sa kauti koya, ka moceri koya, ka vakacacani koya. 3 Na yalona sa kabiti Taina na luvei Jekope, sa domoni Taina ka sa vosa vinaka vua. 4 Sa vosa vei Emori na tamana o Sikemi ka vaka, "Mo kauta mai na goneyalewa oqo me watiqu." 5 Sa rogoca o Jekope ni sa vakacacani Taina na luvena yalewa o Sikemi. O ira na luvena tagane era se tu mai na buca vata kei ira na manumanu. Sa tiko ga vakamalua o Jekope me yacova ni ra sa lesu mai. 6 Sa lako yani o Emori na tamai Sikemi vei Jekope me rau veivosaki. 7 Era sa lesu mai na luvei Jekope tagane mai vanua ka rogoca na ka sa yaco, era sa rarawa sara vakalevu – baleta ni sa cakava na tamata oqo e dua nai valavala toro sobu sara e Isireli. Ni sa mocera na luvei Jekope, e dua na ka e sega ni dodonu me yaco. 8 Sa vosa vei ira o Emori ka vaka: "Na yalo i Sikemi na luvequ, sa rui kabita dina na luvemudou yalewa. Au kerea mo dou soli koya me watina. 9 "Me da veimusumusuki, ni taura na neimami goneyalewa, ka me keimami taura na nomuni goneyalewa. 10 "Mo ni tiko vata kei keimami, sa tu oqori na vanua. Mo ni tiko kina ka veivoli kina, ka mo ni taura ga na veika o ni vinakata mai kina." 11 O Sikemi sa tukuna vei Jekope kei iratou na ganena, "Me'u kune loloma mada mai vei kemudou – na veika ga dou sa vinakata, au na solia vei kemudou. 12 "Dou tukuna vei au na cava ga me kena i vakamalua, au na solia vei kemudou. Me soli ga na goneyalewa oqo me watiqu." 13 O iratou na luvei Jekope e ratou sa sauma vei Sikemi kei Emori na tamana, ka vosa vakaukauwa sara baleta ni sa vakacacani na ganedratou o Taina. 14 E ratou sa tukuna vei rau, "Sa sega ni rawa oqo, me soli na neimami yalewa vei ira na sega ni cili, ni oqori sa dua nai valavala ca levu vei keimami. 15 "Ena ka ga oqo, keimami na yalovinaka kina: o ya mo ni vakataki keimami – na nomuni tagane kece me ra cilivi, 16 "Oqori ga keimami na soli ira kina na neimami goneyalewa vei kemuni, ka keimami na tauri ira kina na nomuni goneyalewa, keimami na tiko kina vata kei kemuni, eda na dua ga kina na tamata. 17 "Kevaka o ni sa sega ni rogoca na vosa mo ni cilivi kina, keimami na kauta na luvei keimami goneyalewa ka lako." 18 Na vosa oqo sa vinaka vei Emori kei Sikemi na luvena. 19 O Sikemi sa sega ni berabera tale ni cakava na ka sa tukuni vua, baleta ni sa rui domona dina na luvei Jekope goneyalewa. O Sikemi sa tamata dokai sara ena vale nei tamana. 20 O Emori kei Sikemi na luvena tagane, e rau sa lako mai ki na matamata ni koro ka vosa vei ira na tagane kecega ka tukuna: 21 "O ira na tamata oqo era sa duavata kei keda me ra tiko ena noda vanua ka veivoli kina. Ni sa veiraurau na vanua vei ira me da tauri ira na luvedra yalewa me watida ka soli ira na luveda yalewa me watidra. 22 "E dua ga na ka, era vinakata me ra tiko kina vata kei keda, ka meda dua ga na tamata, o ya me da cilivi me vaka era sa cilivi. 23 "E na sega beka ni noda na nodra manumanu kei na veika era taukena, na ka e nodra ena noda? Me da vaka io ga vei ira, ka era na tiko vata kei keda." 24 O ira kece sa lako yani ki na matamata, sa vaka io vei Emori kei Sikemi na luvena. Era sa cilivi kece na tagane mai na koro. 25 Sa yaco ni sa oti e tolu na siga – ni se tarai ira tiko na mosi-vuvuca ni veicili, o Simione kei Livai na luvei Jekope, o irau na ganei Taina – era sa taura na nodrau i seleiwau ka lako vakadoudou ki na koro ka vakamatei ira kecega na tagane. 26 E rau sa vakamatei Emori kei Sikemi talega e nai seleiwau ka vakacacana na koro ka kauti Taina tani mai na vale nei Sikemi ka lako tani. 27 Era sa curuma yani na koro, o ira na luvei Jekope ka raica na veivakamatei, baleta na veivakacacani sa caka vei Taina. 28 Era sa kauta na sipi, na bulumakau, na nodra asa – na veika sa tiko ena koro kei na veika sa tu mai vanua, 29 Kei na nodra i yau kecega, o ira na gone kei tinadra era sa kau vakavesu. Era sa vakacacana ka kauta kece na ka sa tiko e vale. 30 Sa tukuna o Jekope vei Simione kei Livai, "Drau sa vakaleqai au, ena nomudrau vakaboicataki au ena kedra maliwa na lewenivanua oqo, ena kedra maliwa na kai Kenani, kei na Perisaiti, ni'u sa lewe vica ga, era na vakasoqoni vata mai ka vakamatei au. Au na vakarusai kei na noqu vuvale." 31 E rau sa sauma mai na cauravou, "Me vakatautauvatataka na tamata oqo na ganei keirau me vaka na yalewa dauvolitaki koya?"

Vakatekivu 35

Sa Lesu Tale Ki Peceli O Jekope

1 Na Kalou sa tukuna vei Jekope, "Mo tucake ka lako ki Peceli ka la'ki tiko kina; mo cakava mai kea e dua nai cabocabo ni soro vei Jiova – o Koya e a basika mai vei iko, ena nomu a dro tiko mai vei Iso na tacimu." 2 O Jekope sa tukuna ki na nona vuvale kei ira kece sa tiko vua, "Me biu na Kalou tani sa tiko vei kemuni, ni vakasavasavataki kemuni, ka veisautaka na nomuni i sulu. 3 "Ka me da sa tucake ka lako ki Peceli; au na cakava mai kea e dua nai cabocabo ni soro vei Jiova, o Koya sa dau vakacegui au ena gauna ni veilecayaki, ka sa tiko vata kei au ena sala au lakova." 4 Era sa solia vei Jekope na veikalou tani, kei na kena sau ni daliga – o Jekope sa vunitaka ena ruku ni veikau e Sikemi. 5 Era sa lako yani, ka sa kani ira na rere na veimatanitu vakavolivoliti ira, ka era sa sega kina ni via veivala kei ira na luvei Jekope. 6 Sa lako mai o Jekope ki Lusi (oqori o Peceli) ena vanua o Kenani, o koya kei ira na tamata sa tiko vata kei koya. 7 Sa tara mai kea e dua na i cabocabo ni soro ka vakatoka me Eli-Peceli, baleta mai kea sa basika kina vua na Kalou ena nona dro mai vei Iso na tacina. 8 Sa mate o Tepora na dauveiqaravi nei Rapeka, ka sa buluti mai Peceli ena ruku ni vunikau, ena tikina e ra. Sa vakayacani na vanua o ya o Aloni- Bakuci. 9 Sa basika tale na Kalou vei Jekope ena nona lako mai Padani-Erami ka vakalouvinakataki koya. 10 Na Kalou sa tukuna vua, "Na yacamu o Jekope – o sa na sega tale ni Jekope, o Isireli sa na yacamu mai ni kua." Na Kalou sa kaciva na yacana me Isireli. 11 Na Kalou sa tukuna vua, "Oi Au na Kalou Qaqa, mo vuavuai ka lewe levu mai, na matanitu kei na veimatanitu era na lako mai vei iko, na veitui era na lako mai yagomu. 12 "Na vanua Au sa solia vei Eparaama kei Aisake, au sa solia vei iko kei ira na nomu kawa, au sa solia kina na vanua." 13 Na Kalou sa lako cake mai vua, ena vanua sa vosa kina vua. 14 Sa vakaduria o Jekope e dua na duru ena vanua sa vosa kina vua na Kalou, na duru vatu; sa sova kina e dua nai soro liviraki sa sova/lumuta talega kina na waiwai. 15 Sa vakayacana o Jekope na vanua sa vosa kina vua na Kalou, me o Peceli.

Na Mate Nei Raijeli

16 Era sa lako tani mai Peceli, ka se vo vakalailai me yaco ki Efiraca, sa taratara o Raijeli ka sa kaukauwa sara. 17 Ni sa kaukauwa sara na nona taratara ni vakasucu, sa tukuna vua na nona Nasi, "Kua ni rere, ena lako mai na gone tagane oqo." 18 Sa yaco, ni sa lako tani tiko vua na yalona (sa mate), sa vakayacani koya me Peni-oni, ia, o tamana sa vakayacana me Penijamini. 19 Sa mate o Raijieli, ka sa bulu ni ra sa lako tiko ki Efiraca (oqori o Peceliema). 20 Sa vakaduria e dua na duru o Jekope ena kena i bulubulu me yacova na siga oqo. 21 Sa lako tiko o Isireli, ka biria na nona vale-laca ni sivia na vanua ni yadra e Eola. 22 Sa yaco, ni sa tiko ena vanua o Isireli, o Rupeni sa moceri Bila na (dauveiqaravi) nei Raijeli, sa rogoca o Isireli na ka oqo.

Na Luvei Jekope E Tinikarua Na Gonetagane

Na luvei Jekope tagane e tinikarua: 23 Na luvei Lia tagane o Rupeni na ulumatua, o Simione, o Livai, o Juta, o Isakari kei Sevuloni; 24 Na luvei Raijeli tagane o: Joseva kei Penijamini; 25 Na luvei Bila tagane, (na dauveiqaravi) nei Raijeli; o Tani kei Navitalai; 26 Na luvei Sipa tagane, (na dauveiqaravi) nei Lia; o Kata kei Aseri. Oqo, o ira na luvei Jekope tagane era sa vakasucumi vua e Padani-Erami.

Na Mate Nei Aisake

27 Sa lako mai o Jekope vei tamana o Aisake e Mamire Kirijaci Araba (oqori o Epironi), na vanua e rau mai tiko kina o Eparaama kei Aisake. 28 Na yabaki nei Aisake e dua na drau ka mani walusagavulu na yabaki. 29 Sa ceguva nai otioti ni nona i cegu o Aisake, ka sa mate, sa lako yani vei ira na wekana ni sa qase sara ka sa levu na nona veisiga vinaka. E rau sa buluti koya na nona cauravou, o Iso kei Jekope.

Vakatekivu 36

Na Vuvale Nei Iso

1 Oqo nai vola ni kawa nei Iso, sa vakayacani talega me o Itomi. 2 O Iso sa taura na watina mai vei ira na goneyalewa ni Kenani: O Ada na luvei Eloni na Itaiti; o Aolibama na luvei Ana, na luvei Sibioni na Iraiti; 3 kei Vasemaca, na luvei Isimeli, na ganei Nebajoci. 4 O Ada sa vakasucumi Elifasi vei Iso kei Vasemaca sa vakasucumi Rueli. 5 O Aolibama sa vakasucumi Jeusi, Jaelami, kei Kora. Sai ira oqori na luvei Iso, sa vakasucumi vua ena vanua o Kenani. 6 O Iso sa kauti ira na watina, ira na luvena kei ira kece ena nona vuvale, na nona bulumakau kei na nona manumanu kece kei na nona veika kece sa rawata mai na vanua o Kenani. Ka sa lako ki na vanua vakayawa sara mai na matai tacina o Jekope. 7 Sa ka levu sara na nodrau dui-yau, sa na dredre kina me rau na tiko vata, kei na vanua e rau tiko vulagi kina, sa dredre me tokoni rau, baleta na levu ni nodrau manumanu. 8 O Iso, sa tiko ena ulunivanua o Sia. O Iso, sai Itomi. 9 Oqo na kawa nei Iso na tamadra na Itomi ena ulunivanua o Sia. 10 Oqo na yacadra na luvei Iso; o Elifasi na luvei Ada na wati Iso kei Rueli na luvei Vasemaca na wati Iso. 11 O ira na luvei Elifasi o Temana, o Omari, o Sefo, o Qatama kei Kenasi. 12 O Timina na wati Elifasi lailai sa vakasucumi Amaleki vei Elifasi. Sai ira oqo na luvei Ada na wati Iso. 13 Sai ira oqo na luvei Rueli; o Naaci, o Sera, o Sama kei Misa. Oqo o ira na luvei Vasemaca na wati Iso. 14 Sai ira oqo na luvei Aolibama, na wati Iso na luvei Ana yalewa, na luvei Sibione yalewa. Sa vakasucuma vei Iso, o Jeusi, o Jaelami kei Kora.

O Ira Na Turaga E Itomi

15 Sai ira oqo na vei turaga vei ira na luvei Iso. O ira na luvei Elifasi na ulumatua nei Iso, o Temami na turaga, o Oma na turaga, o Sefo na turaga, o Kenasi na turaga, 16 O Kora na turaga, o Qatama na turaga, o Ameleki na turaga. Sai ira oqo na vei turaga nei Elifasi ena vanua o Itomi. Oqo o ira na luvei Ada. 17 Sai ira oqo na luvei Rueli na luvei Iso. O Naaci na turaga, o Sera na turaga, o Sama na turaga kei Misa na turaga. Sai ira oqo na veituraga nei Rueli ena vanua o Itomi. Oqo o ira na luvei Vasemaca na wati Iso. 18 Sai ira oqo na luvei Aolibama, na wati Iso. O Jeusi na turaga, o Jaelami na turaga kei Kora na turaga. Sai ira oqo na vei turaga era sa lako mai vei Aolibama na wati Iso, na luvei Ana. 19 Sai ira oqo na luvei Iso, (Itomi); oqori o ira na kena vei turaga.

O Ira Na Luvei Sia Tagane

20 O ira oqo na luvei Sia na Oraite, o ira sa tawana tiko na vanua: o Lotani, o Sobali, o Sibione, kei Ana, 21 O Disioni, o Esari, kei Disani. Sai ira oqori na turaga nodra na Oraite, o ira na luvei Sia ena vanua o Itomi. 22 O ira na luvei Lotani, o Ori kei Emami, na ganei Lotani o Timina. 23 Sai ira oqo na luvei Sobali: O Elirani, o Manaeci, o Ibali, o Sefo, kei Onami. 24 Sai ira oqo na luvei Sibione, o rau o Aja kei Anae. O Anae oqo sa kunea na wai ena vanua liwa, ni a lako voli kina ka vakania tiko na asa nei tamana o Sibione. 25 Sai ira oqo na luvei Anae: O Disioni kei Aolibama na luvei Anae yalewa. 26 Sai ira oqo na luvei Disioni; o Amedani, o Esibana, o Icarani, kei Jerani. 27 Sai ira oqo na luvei Esari, Biliani, o Saerani, kei Akani. 28 Sai ira oqo na luvei Disani, o Usi kei Erani. 29 Sai ira oqo na veituraga e Oraite: O Lotani na turaga, o Sobali na turaga, o Sibione na turaga, o Anae na turaga, 30 O Disioni na turaga, o Esari na turaga, o Disani na turaga, o ira oqo na veituraga vei ira na Oraite, me vaka na nodra dui turaga ena vanua o Sia.

Na Vei Tui E Itomi

31 Sai ira oqo na veitui sa lewa e Itomi, ni se bera na tui vei ira na Isireli: 32 O Bela na luvei Peori, sa lewa e Itomi, na yaca ni nona koro o Diniaba. 33 Ni sa mate o Bela, o Jobaba na luvei Sera e Bosara sa veiliutaki ena vukuna. 34 Ni sa mate o Jobaba, o Usaemi ena vanua noda na Temanaiti sa lewa ena vukui Jobaba. 35 Ni sa mate o Usaemi, o Etati na luvei Betati, o koya sa kabai Mitiani ena buca mai Moape, sa lewa ena vukuna. Na yaca ni koro o Avici. 36 Ni sa mate o Etati, o Samila mai Masareka sa lewa ena vukui Etati. 37 Ni sa mate o Samila, o Saula mai Reopoci ena bati ni uciwai, sa lewa ena vukuna. 38 Ni sa mate o Saula, o Peali-Anana na luvei Akebori sa lewa ena vukuna. 39 Ni sa mate o Peali-Anana na luvei Akebori o Adari sa lewa ena vukuna; na yaca ni nona koro o Pau. Na yaca i watina o Maetabeli na luvei Matereti, na luvei Maseabi yalewa.

Na Veituraga E Iso

40 Sai ira oqo na veituraga nei Iso, me vaka na nodra veivuvale ena nodra i tikotiko, na yacadra yadudua oqo: o Timana na turaga, o Alava na turaga, o Jeteci na turaga, 41 O Aolibama na turaga, o Ela na turaga, o Pinoni na turaga, 42 O Kenasi na turaga, o Temana na turaga o Mibisa na turaga, 43 O Meqedeeli na turaga kei Irami na turaga. Sai ira oqo na veituraga e Itomi me vaka na nodra dui tikotiko ena vanua era sa taukena. o Iso sa tamadra na kai Itomi.

Vakatekivu 37

Sa Tadra Joseva Na Veika Cecere

1 O Jekope sa tiko ena vanua sa vulagi kina o tamana, ena vanua o Kenani. 2 Oqo na kawa i Jekope. o Joseva ni se qai yabaki tinikavitu, sa vaka na manumanu tiko vata kei ira na tacina. O koya sa tiko kei ira na luvei Bila kei ira na luvei Siliva na wati tamana. O Joseva sa kauta na kedratou i tukutuku ca vei tamana. 3 O Isireli, sa lomani Joseva vakalevu cake mai vei ira kece na luvena, baleta ni o koya e luvena ni sa qase sara. Sa dau cula talega na nona kote balavu ka dui rokaroka. 4 Ni ratou sa dau raica na tacina ni sa daulomani koya vakalevu o Isireli mai vei iratou, e ratou sa dau cati koya ka dauvosa vakaca vua. 5 O Joseva sa tadra e dua na tadra, ka tukuna sara vei ira na tacina; e ratou sa qai cati koya ga vakalevu. 6 Sa tukuna vei iratou na tacina, "Au kerea mo dou rogoca na noqu tadra: 7 "Edatou sa vau sila tiko ena were, sa duri ka tucake tu na noqui vau sila; na nomudou i vau sila talega sa tucake ka cuva kina noqu i vau sila." 8 E ratou sa tukuna vua na tacina, "O iko, mo na mai liutaki keitou? se O mai via vakatulewa vei keitou?" E ratou sa qai cati koya ga vakalevu baleta na nona tadra kei na nona vosa. 9 E se baci tadra tale e dua na tadra, ka tukuna vei ira na tacina ka vaka: "Au sa baci tadra tale, ka sa vaka oqo, na siga, na vula kei na veikalokalo era sa cuva kece vei au." 10 Sa tukuna vei tamana kei ira na tacina, sa vunauci koya o tamana ka tukuna vua, "E tadra vakacava oqo? Me lako beka mai o tinamu, o tamamu kei ira na tacimu ka mai cuva ki na qele e matamu?" 11 Era sa qai vuvutaki koya ga na tacina, ia, o tamana sa taura vuni tikoga ki yalona.

Era Sa Volitaki Joseva Na Tacina

12 Era sa lako ki Sikemi na tacina me ra vakania na sipi nei tamadra. 13 Sa tukuna o Isireli vei Joseva, "Era sa sega beka ni tiko mai Sikemi na tacimu? Lako mai me'u talai iko vei ira. Sa sauma mai o Joseva, "Sai au oqo." 14 Sa tukuna sara vua, "Lako ka raica se sa vakatiko E vei o ira na tacimu kei ira na manumanu, ka kauta lesu mai vei au na i tukutuku." Sa vakatalai koya tani yani mai na Buca o Epironi ka sa lako sara yani ki Sikemi. 15 E dua na tamata sa kunei koya, ni sa veilakoyaki voli ena vanua. Sa tarogi koya na tamata, "Na cava o sa vakasaqara tiko?" 16 Sa sauma yani, "Au vakaraici iratou tiko na tuakaqu, era sa vakana manumanu tiko e vei." 17 Sa tukuna mai na tamata, "Era sa lako tani eke, ia, au sa rogoci ira ga ni ra sa tukuna, 'Tou lako ki Tocani.'" A sa lako yani o Joseva ka kunei iratou na tuakana e Tocani. 18 Ni ra sa raici koya tiko mai vakayawa, era sa bosea me vakamatei koya. 19 Era sa veitukuniyaka, "Raica sa lako tiko mai oqo na dautadra! 20 "Mai, me da sa na vakamatei koya ka viritaki koya ki na dua na qara, me noda i ulubale, 'Me dua na manumanu kila sa vakamatei koya,' eda na qai raica se sa vakacava na nona tadra!" 21 Ia, ni sa rogoca o Rupeni, sa vakabulai koya mai na ligadra ka tukuna, "Me da kua ni vakamatei koya." 22 Sa tukuna vei ira o Rupeni, "Me kua ni vakadavei na dra, me viritaki ga ki na qara sa tiko mai na vanua liwa, me kua ga ni da tarai koya ena ligada" – ni sa nakita me vakabulai Joseva mai vei ira na tacina ka kauti koya lesu vei tamadra. 23 Ni sa qai yaco mai vei ira o Joseva, era sa basuraka na nona kote, na kote dui rokaroka sa dara tiko. 24 Era sa tauri koya ka viritaki koya ki na qara. Sa lala tu na qara, ni sa maca tu na kena wai. 25 Era sa dabe sobu ka kana. Ni ra sa rai yani, era sa lako tiko mai e dua nai lawalawa era luvei Isimeli, era lako tiko mai Kiliati kei na nodra kameli, kei na nodra i usausa ni voliciri ena nodra lako sobu tiko ki Ijipita. 26 Sa tukuna o Juta vei ira na tacina, "Na cava na kena yaga, kevaka e da na vakamatei koya ka vunitaka na nona dra? 27 "Me da volitaki koya vei ira na Isimeli, me kua ni tarai koya kina na ligada, ni o koya e tacida ka eda lewe vata." Era sa rogoca na tacina na veika oqo. 28 Era sa lako tale mai na kai Mitiani dauveivoli, era sa tauri Joseva mai ka volitaki koya yani vei ira na Isimeli me ruasagavulu na sikele siliva. Era sa kauti Joseva ki Ijipita. 29 Sa lesu yani o Rupeni ki na qara, ka sa yali kina o Joseva, sa basuraka na nona i sulu. 30 Sa lesu yani vei iratou na tacina ka tukuna, "Sa yali na gone, me'u lako beka i vei?" 31 Era sa taura na kote i Joseva, ka vakamatea e dua na me, sa qai toni na kote ena kena dra. 32 Era sa vakauta mai na kote vei tamadra ka tukuna, "Keimami sa kunea oqo, mo raica oqo, e nei luvemu se sega?" 33 Sa kila o Jekope ka tukuna, "Oqo na kote nei luvequ, e dua na manumanu kila sa kani koya, sa sega ni cala, o Joseva sa basuki vakalalai." 34 Sa basuraka na nona i sulu o Jekope ka vakaisulu taga na tolona ka lolokutaki Joseva me vica vata na siga. 35 O ira kece na luvena era sa mai vakacegui koya, sa tukuna o Jekope, "Au na lako sobu ki nai bulubulu vei luvequ ena vakaloloku." Sa tagi o Jekope ena vukuna. 36 O ira na Mitiani era sa volitaki Joseva sara ki Ijipita vei Potifa na vakai lesilesi i Fero ka sa nodra i liuliu na mata yadra.

Vakatekivu 38

O Juta Kei Tamare

1 Sa yaco ena dua na gauna sa lako tani mai kina o Juta mai vei ira na tacina, sa sikova yani e dua mai Etulama na yacana o ira. 2 Sa raica talega mai kea e dua na goneyalewa ni Kenani, na luvei Sua, sa vakawatitaki koya ka curumi koya sara. 3 Sa kunekune ka vakasucuma vua e dua na luvena talega sa yacana o Eri. 4 Sa kunekune tale, ka vakasucuma e dua na tagane, sa vakayacani koya o tinana me o Onani. 5 Sa dua tale na luvena tagane, sa yacana o Sela. Sa tiko mai Jesiba ena gauna sa sucu kina o Sela. 6 O Juta sa kauta mai e dua na wati Eri, na nona ulumatua, na yacana o Tamare. 7 Ia, o Eri na ulumatua i Juta, sa caka ca ena mata i Jiova, o Jiova ga sa vakamatei koya. 8 O Juta sa tukuna vei Onani, "Lako vei wati tacimu, mo drau veiwatini, ka vakatubura e dua na kawa vei tacimu." 9 Sa kila o Onami ni o na luvena ena sega ni nona, sa vakadrodroya kina qele, ena gauna sa curumi wati tacina tiko kina – de qai solia na kawa vei tacina. 10 Na veika oqo sa sega ni marautaka o Jiova, oqo, sa vakamatei Onani talega kina. 11 Sa tukuna o Juta vei vugona o Tamare, "Mo tiko yada mada ena vale i tamamu," me yacova ni sa cauravou mai o Sela." De qai mate tale me vakataki tacina." Sa lako o Tamare ka tiko wawa ena vale nei tamana. 12 Sa yaco na gauna sa mate kina na wati Juta, sa vakacegui ka lako cake vei ira na nona dauvakatawa sipi e Timana, o koya kei na nona i tokani o ira na kai Etulama. 13 Sa tukuni vei Tamare, "Raica o nomu momo sa lako cake i Timana me raica na nona sipi." 14 Sa luvata tani na nona i sulu vaka yada, sa ubi koya ka la'ki dabe tiko ena tikina lala ena sala vaka ki Timana; ni sa raici Sela sa cauravou levu mai – ia sa sega ga ni lako yani me rau veiwatini. 15 Ni sa raici koya o Juta, sa nanuma ni oqo e dua e volitaki koya tiko, baleta ni ubia tiko na matana taucoko. 16 Sa vuki yani vua ena sala ka tukuna, "Au kerea me'u curumi iko mada," sa sega ni kila, o ya o na vugona. Sa taroga o vugona, "Na cava o na solia vei au, me rawa ni o curumi au kina?" 17 Sa sauma mai, "Au na solia mai e dua na me gone." Sa tukuna tale yani, "Mo solia mai e dua na kena i vakadinadina?" 18 "Na cava me'u solia vei iko?" Sa sauma mai na nomu i taube/mama kei na nomu i titoko." Sa mani solia yani vua, ka curumi koya sara ka sa kunekune talega mai vua. 19 Sa tucake ka lako yani, sa veisautaka na nona i sulu ka dara tale na nona i sulu vakayada. 20 Sa vakauta yani o Juta na me gone, mai na ligana na nona i tokani na kai Etulama vua na yalewa. Ia, sa sega ga ni kune. 21 Sa tarogi ira na tagane ena vanua o ya, "E vei o koya na dau volivolitaki sa tu ena sala?" Era sa sauma, "Sa sega eke na dauvolivolitaki sa tu ena sala." 22 Sa lesu tale yani vei Juta ka tukuna, "Au sa sega ni raici koya, o ira talega na tagane mai keau era sa tukuna ni sa sega na dauvolivolitaki vakaoqo ena vanua." 23 Sa tukuna o Juta, "Me sa taura ga yani o koya de daru na qai madua – ni'u sa solia yani na me, ia sa yali o koya." 24 Ni sa oti tale e tolu na vula, sa tukuni sara vei Juta ka vaka: "O Tamare na vugomu ea volitaki koya ena sala ka sa bukete tiko." Sa tukuna yani o Juta, "Kauti koya mai me mai vakamai!" 25 Ni sa kau mai, sa tukuna vei nona momo, "O koya na tagane sa nona oqo, sa vakabuketetaki au," mo raica mada se nei cei oqo, nai taube, mama kei na i titoko." 26 Sa tukuna o Juta, ni sa kila ka sa tukuna, "Sa yalododonu cake o koya mai vei au, ni'u sa sega ni soli koya vei Sela baleta ni sa tamata levu mai." Sa sega ni curumi koya tale. 27 Ena gauna me sa vakasucu kina, sa tiko e ketena e rua na gone. 28 Ni sa vakasucu tiko, sa basika mai e dua na liga, o koya na dau ni veivakasucumi sa vesuka sara e dua na wa lokaloka e ligana ka tukuna, "Oqo e liu mai." 29 Na ka e yaco ni sa vakasuka lesu tale na ligana, sa basika mai o tacina vakasauri ni sega ni namaki, ka tukuna sara, "O lako mai vakacava? O takoso mai." Sa yacana kina me o Veresi. 30 Ni oti oqo sa qai basika mai o tacina ni sa tiko e ligana na wa lokaloka. Sa yacana o Sira.

Vakatekivu 39

Sa Bobula O Joseva Mai Ijipita

1 Sa kau sobu o Joseva ki Ijipita. O Potifa nai vakalesilesi nei Fero ka nodra i liuliu na mata yadra, sa voli koya mai vei ira na Isimeli. 2 Sa tiko vata kei Joseva o Jiova. Sa tamata yaco o koya; ka sa tiko ena vale ni nona turaga na kai Ijipita. 3 Sa raica tiko na nona turaga ni sa tiko vata kei koya o Jiova. O Jiova sa vakavuna na vuavuai vinaka na veika sa tara tiko na ligana. 4 Sa taleitaki tiko vakalevu o Joseva mai vua na nona turaga. Sa yaco me lewa taucoko na vale ni nona turaga. 5 Sa yaco talega me vakalouvinakataka o Jiova na nona vale na kai Ijipita oqo, ena vuku i Joseva, na kalouvinaka oqo sa tara yani na loma ni vale kei na vei ka e tuba. 6 Sa soli na veika kecega ki na ligai Joseva, sa sega ni via kila tale e dua na ka, vakavo ga na madrai ni sa taura e ligana me kana. Sa tamata rairai vinaka talega o Joseva. 7 Ni sa yaco tiko na veika oqo, na wati Potifa sa domoni Joseva vakalevu, sa mani tukuna kina vei Joseva, "Daru veidomoni mada." 8 Sa bese o Joseva ka tukuna, "Raica na noqu turaga sa sega ni kila na ka kece sa tu oqo e vale, baleta ni sa solia kece tu oqo ki na ligaqu. 9 "Sa sega ni dua e uasivi vei au ena vale oqo, sa sega talega ni vakavoca vei au e dua na ka me'u lewa, au sa lewa kecega, vakavo duadua o iko, ni o sa watina. Me'u cakava vakacava nai valavala ca levu oqo, nai valavala ca vua na Kalou?" 10 Sa sagai Joseva tikoga ena veisiga – sa sega ga ni via rogoci koya o Joseva. 11 Sa qai yaco ni sa lako tale yani o Joseva me cakava na nona cakacaka e vale – sa sega na tagane me kune e vale, 12 Sa vesuki Joseva vata kei na nona i oro bale ka tukuna, "Daru mai veicurumi mada." Sa biuta tu na nona i oro bale e ligana ka dro yani ki tuba. 13 Sa qai yaco, ni sa raica ni sa biuta tu mai o Joseva na nona i oro ena ligana ka dro yani ki tuba, 14 Sa kacivi ira mai na turaga ena vale ka tukuna vei ira, "Raica sa kau mai vei keda e dua na Iperiu oqo me vakalialiai keda. Sa lako mai ka vakasagai au, ka vinakata me moceri au, au sa qai kaila vakadomoi levu. 15 "Ni sa rogoca o koya ni'u sa qoqolou, sa qai biuta tu mai na nona i oro ka dro yani ki tuba." 16 Sa taura tiko ga na nona i oro me yacova ni sa lako mai na nona turaga ki vale. 17 Sa qai vosa vua me vaka oqo: "Na Iperiu dauveiqaravi o a kauta mai vei keda, sa lako mai vei au me vakalialiai au; 18 "Ena gauna au sa kaikaila kina, sa biuta tu mai na nona i oro ka dro yani ki tuba." 19 Ni sa rogoca o nona turaga na veika sa tukuna vua o watina ni sa tukuna, "Na nomu tamata sa cakava vaka oqo vei au," sa tubu sara na nona cudru. 20 Na turaga i Joseva sa tauri koya ka biuta ki vale ni veivesu. Na vanua era sa tiko kina na kaivesu ni tui. Sa tiko talega kina o Joseva. 21 Ia, o Jiova sa tiko vata ga kei Joseva, ka sa vakaraitaka tiko vua na nona loloma. Sa solia tiko ga vei Joseva na Nona vinaka ena mata i koya na i vakatawa ni vale ni veivesu. 22 Nai vakatawa ni valeniveivesu sa solia kece ki na ligai Joseva na lewa ni nodra bula kece na kaivesu; na ka kece era cakava sa nona lewa ga. 23 Sa sega tale ni via kila mai nai vakatawa ni valeniveivesu e dua na ka, baleta ni sa tiko vata kei koya o Jiova. Na veika kece e caka, sa vakagugumatuataka o Jiova.

Vakatekivu 40

Na Nodrau Tadra Na Kaivesu

1 Sa qai yaco ena dua na gauna, o koya na dauvakarau mena waini kei koya na dau vavi kakana nei Fero, e rau sa caka cala vua na nodrau turaga na tui Ijipita. 2 O Fero sa cudruvi rau vakalevu na nona dauveiqaravi oqo, na i liuliu ni caka waini kei nai liuliu ni dauvavavi. 3 Sa biuti rau ena ligai koya nai liuliu ni mata yadra ni valeniveivesu. Ena vanua sa vesu tiko kina o Joseva. 4 Nai liuliu ni mata yadra sa beitaki Joseva vata kei rau, ka sa qaravi rau. E ratou s vesu tiko vakawawa. 5 O koya na dauvakarau waini kei koya na dauvavavi nei Fero, e rau sa tadra ruarua, na nodrau tadra yadudua ena dua ga na bogi, ka duidui na kena i balebale. 6 Sa lako mai vei rau o Joseva ena mataka, ka raici rau, sa raica ni rau sa rarawa sara vakalevu. 7 Sa tarogi rau sara ka vaka: "Na cava drau sa rui rarawa kina vakalevu ena siga oqo?" 8 E rau sa tukuna vua, "Keirau sa dui tadra na tadra e duidui, ka sa sega na kena i vakavakadewa." Sa tukuna o Joseva, "Sa sega beka ni nona ga na Kalou na vakavakadewa? Drau tukuna mai vei au." 9 Nai liuliu ni dauvakarau waini sa tukuna vei Joseva na nona tadra ka vaka: "Ena noqu tadra, sa tu e mataqu e dua na vaini, 10 "Na vaini oqo sa tolu na tabana, sa kubu mai, sa vakadrauna sara, sa se ka kauta mai na vuana sa dreu tu. 11 "Sa tu e ligaqu na bula nei Fero, au sa taura na vaini dreu ka lobaka ena bilo nei Fero, ka au sa kauta sara na bilo ka solia ena ligai Fero." 12 Sa tukuna vua o Joseva, "Oqo na kena i vakavakadewa, na tolu na tabana sa tolu na siga. 13 "Ena tolu na siga oqo, o Fero ena laveti iko cake tale, ka vakatikori iko lesu tale ki na nomu i tutu, ka o na dau soli mena gunu tale na Fero me vaka ga o sa dau cakava e liu. 14 "Mo qai nanumi au mai ni o sa tiko vinaka, ka mo vakaraitaka vei au na nomu yalovinaka; mo dau tukuni au vei Fero, ka mo kauti au tani mai na vale oqo. 15 "Ni sa ka dina, na noqu kau tani mai vakaukauwa mai na nodra vanua na Iperiu; au sa sega talega ni cakava e dua na ka e ganita na noqu mai tu oqo." 16 Ni sa raica na i liuliu ni dau vavavi ni sa vinaka nai vakamacala nei Joseva, sa tukuna sara yani, "O au talega, ena noqu tadra, sa tolu na i su vulavula e uluqu. 17 "Nai su sa tiko duadua e cake, sa tiko kina na veikakana vavi me kei Fero, era sa mai kania na manumanu vuka, mai na uluqu." 18 Sa sauma vua o Joseva ka vaka: "Oqo na kena i balebale, e tolu na i su, sa tolu na siga. 19 "Ena tolu na siga oqo, o Fero ena vakaliliga na domomu ena dua na vunikau, mai kea, era na kania kina na lewemu na manumanu vuka." 20 Sa qai yaco ena i ka tolu ni siga, na siga talega ni vakananumi ni sucu nei Fero, sa cakava kina e dua na kakana levu vei ira na nona dauveiqaravi; sa vakaturi rau cake na nona i liuliu ni daucaka waini kei koya nai liuliu ni dau vavavi e matadra na dauveiqaravi. 21 Sa vakatikora lesu na nona dau caka waini, ka sa dau biuta na waini ena ligai Fero. 22 Sa vakakukunataki koya na dau vavavi, me vaka nai vakamacala nei Joseva vei rau. 23 Nai liuliu ni dau vakarau waini sa sega ni nanumi Joseva, ka sa guilecavi koya.

Vakatekivu 41

Na Tadra Nei Fero

1 Ni sa oti vinaka e rua na yabaki, sa tadra o Fero; ni sa tucake tu ena dua na bati ni uciwai. 2 Vakasauri e ratou sa basika mai wai e vitu na bulumakau rairai vinaka ka levulevu, ka era sa mai kakana voli. 3 Era sa muri tale mai e vitu tale na bulumakau lila ka rairai ca, ka ra sa mai tu talega ena bati ni uciwai. 4 O ira na ka lila rairai ca oqo, era sa kani ira na ka levulevu ka rairai vinaka oqo: sa yadra sara o Fero. 5 Sa moce tale, ka tadra ena i karua ni gauna, ni sa basika e vitu na sila mai na dua ga na vuna, sa bulabula ka rairai vinaka. 6 Sa basika tale mai e vitu na sila raqosa ka matemate, ena kena liwa mai na tokalau. 7 Na vitu na sila raqosa sa tiloma na vitu na sila bulabula ka vinaka oqo. Sa yadra o Fero, ka qai kila, ni sa tadra walega. 8 Ena mataka o ya, sa leqa vakalevu tiko na yaloi Fero, sa talatala yani me ra lako mai vua na dau caka i sausau kece e Ijipita kei ira kece na tamata vuku. Sa tukuna vei ira o Fero na nona tadra, ia, sa sega e dua me vakamacalataka rawa na kena i balebale vei Fero. 9 Sa qai vosa vei Fero nai liuliu ni dauvakarau waini ka tukuna, "ena siga oqo, au sa qai kila kina na noqu cala. 10 "Ena gauna sa cudru kina o Fero vei rau na nona tamata, o au kei koya na dauvavavi, ka keirau sa tu vakavesu, 11 "Keirau sa dui tadra yadudua ena dua ga na bogi. Sa tu ga na i vakavakadewa ni neirau dui tadra. 12 "Sa dua na cauravou ni Iperiu sa tiko vata kei keda, e nona dauveiqaravi na i liuliu ni mata yadra. Keirau sa tukuna vua na neirau tadra, ka sa vakabalebaletaka vei keirau na neirau tadra. 13 "Sa yaco me vaka sa vakabalebaletaka vei keirau. Au sa vakatikori lesu tale, o koya ka dua sa vakakukunataki." 14 Sa talatala o Fero me kau mai o Joseva, era sa kauti koya mai vakatotolo. Era sa vakasavasavataki koya, toro na kumina ka veisau na nona i sulu ka kau mai vei Fero. 15 Sa tukuna vua o Fero, "Au a tadra e dua na tadra, sa sega ni dua me tukuna vei au na kena i balebale. Au sa rogoca ni o iko, e rawa ni o vakaibalebaletaka na tadra." 16 Sa vosa o Joseva vei Fero ka vaka: "Sa sega ni o au, na Kalou ga, ena rawa ni sauma vei Fero ena vakacegu." 17 Sa qai tukuna o Fero na nona tadra vei Joseva, "Raica, ena noqu tadra, au sa tucake tu ena bati ni uciwai. 18 "Vakasauri, e ratou sa lako mai wai e vitu na bulumakau bulabula ka rairai vinaka, ka e ratou sa mai kakana voli. 19 "E ratou sa lako tale mai e vitu tale na bulumakau bulabula ka rairai vinaka, ka e ratou sa mai kakana voli. 20 "Era sa kani iratou na lewe vitu bulabula rairai vinaka ka basika e liu. 21 "Ni ratou sa kana oti, e sega sara ga ni kilai ni ratou kania e dua na ka, baleta ni ratou rairai tuga vaka e liu. Oqo sa vakayadrati au. 22 "Au sa raica talega ena noqu tadra, e vitu na sila vinaka ka bulabula sa basika mai na dua na vuna. 23 "Raica sa vitu talega na sila, lila ka raqosa, sa kauta mai na cagi tokalau sa basika cake talega mai. 24 "Na sila lila, raqosa malai oqo, sa tilomi ira na ka bulabula rairai vinaka. Au sa vakamacalataka oqo vei ira na kila ka, sa sega ni dua e vakaibalebaletaka rawa vei au." 25 Sa tukuna o Joseva vei Fero, "Sa dua ga na tadra nei Fero, na Kalou sa vakaraitaka vei Fero na veika sa vakarau me cakava: 26 "Na vitu na bulumakau, sa vitu na yabaki, na vitu na sila vinaka, sa vitu na yabaki vinaka – sa dua ga na tadra. 27 "Na vitu na bulumakau lila matemate sa muri mai, oqori sa vitu na yabaki kei na cagi tokalau, sa vitu na yabaki ni dausiga. 28 "Oqo na veika au sa tukuna vei Fero. Na Kalou sa vakaraitaka vei Fero na veika ena vakarau cakava. 29 "Raica, ena liu mai na vitu na yabaki ni sautu ena vanua taucoko e Ijipita; 30 "Ni oti o ya, ena lako mai na vitu na yabaki ni via kana. Ena guilecavi na vitu na yabaki vinaka ena vanua o Ijipita, na dausiga ena vakarusa na vanua. 31 "Na sautu ena guilecavi ena vanua, baleta ni sa lako mai na dausiga, ena ca vakalevu sara. 32 "Sa tokaruataki vei Fero nai balebale ni tadra, baleta na Kalou sa vakadeitaka, na Kalou ga ena vakayacora dina. 33 "Oqo, me qai digitaka o Fero e dua na tamata vuku ka rai yawa, me qarava na ka oqo ena vanua o Ijipita. 34 "Me cakava o Fero oqo, me digitaki ira nai vakalesilesi ena vanua taucoko, me ra kumuna mai e dua nai kalima na vua ni qele e Ijipita ena yabaki ni sautu oqo. 35 "Me ra sa kumuna mai na kakana ena vei yabaki vinaka oqo, ka biuta tiko ena i lololo ena lewa vakalawa i Fero, ka me ra maroroi tiko ena vei koro lelevu. 36 "Na lololo ni kakana oqo me ra tu vakarau tu ni sa basika mai na dausiga o koya ena tarai Ijipita mai, me kua ni leqa kina oijipita ni sa yaco mai na dausiga."

Sa Yaco Me Veiliutaki O Joseva

37 Nai vakasala mai vei Joseva, sa vinaka vei Fero kei ira kece nai vakalesilesi. 38 Sa tukuna o Fero vei ira na dauveiqaravi, "E rawa beka ni da kunea e dua na tamata vaka oqo, na tamata sa tu vua na yalo ni Kalou?" 39 Sa tukuna o Fero vei Joseva, "Me vaka sa vakaraitaka oqo vei iko na Kalou, sa sega tale e dua me rai yawa ka vuku me vakataki iko. 40 "O na lewa na noqu vale kei ira na noqu tamata era na lewai ena nomu vosa, ena i tikotiko vakaturaga ga, au na liu tiko kina vei iko." 41 Sa tukuna o Fero vei Joseva, "Raica au sa solia vei iko na lewa ena vanua taucoko o Ijipita." 42 Sa taura na nona mama ni lewa cecere o Ijipita ka vakacuruma e ligai Joseva, ka vakasulumi koya ena i oro bale lineni matailalai kei nai taube koula e domona. 43 Sa vakavodoki Joseva ena i karua ni qiqi vakatui, ka era sa kaciva yani "Mo ni tekiduru!" sa vakatikori koya me lewa taucoko e Ijipita. 44 Sa tukuna talega o Fero vei Joseva, "O au o Fero, ena nomu lewa ga, ena qai tara kina vua e dua me laveta na ligana se yavana ena vanua taucoko o Ijipita." 45 O Fero sa vakayacani Joseva me Sefanaci- Paenaca. Sa solia vua e dua na watina, na yacana o Asenaca na luvei Poti-Fera na bete mai Oni. Sa lako yani o Joseva ki na vanua taucoko o Ijipita. 46 Sa yabaki tolusagavulu o Joseva ni sa tu ena matai Fero na tui Ijipita. Sa lako tani mai na mata i Fero ka lako yani ki Ijipita taucoko. 47 Ena vitu na yabaki ni sautu, sa vuavuai dina na vanua e Ijipita. 48 Sa kumuna kece mai na kakana, ena vitu na yabaki ni sautu e Ijipita, ka binia ena veikoro lelevu na kakana mai na veivanua volivolita. 49 Sa kumuna mai na sila o Joseva, sa vaka na nuku ni matasawa, me yacova ga ni ra sa sega ni wiliki rawa. 50 Sa vakasucumi vei Joseva e rua na luvena tagane ni bera na dausiga mai vei Asenaca na luvei Poti-Fera na bete mai Oni. 51 O Joseva sa vakayacani koya na ulumatua me o Manasa, "Ni Kalou sa vakavuna me'u guilecava na noqu oca kei na noqu vuvale." 52 Sa vakayacani koya nai karua me o Ifereimi, "Ni Kalou sa vakavuna me'u vuavuai ena vanua ni noqu rarawa." 53 Sa mai cava na vitu na yabaki ni sautu ena vanua o Ijipita, 54 Sa tekivu me basika mai na veiyabaki ni dausiga, me vaka sa tukuna o Joseva. Na dausiga oqo sa tara na vanua taucoko, mai Ijipita ga sa tiko kina na madrai. 55 Na vanua taucoko sa tarai ira na dausiga, ka era sa tagi vei Fero me so na kedra madrai. Sa tukuna vei ira o Fero, "Ni lako vei Joseva, na veika ga sa tukuna vei kemuni mo ni qai cakava." 56 Sa tarai vuravura taucoko na dausiga oqo. O Joseva sa dolava na lololo kece ka volivolitaki vei ira na Ijipita. Sa qai ca ga mai na dausiga e Ijipita. 57 Na veivanua kece, era sa lako mai vei Joseva e Ijipita, me ra voli sila, baleta na dausiga sa sivia ena vanua kecega.

Vakatekivu 42

E Ratou Sa Lako Ki Ijipita Na Taci Joseva

1 Ni sa kila o Jekope ni sa tu na sila mai Ijipita, sa tukuna vei iratou na luvena, "Na cava dou sa veiraici tiko kina?" 2 Au sa rogoca ni sa tiko na sila mai Ijipita, "Dou lako sobu ka volivoli mai ena vukuda me da bula kina." 3 O iratou na lewe tini na taci Joseva, e ratou sa lako sobu i Ijipita me voli sila. 4 O Jekope sa sega ni vakatalai Penijamini na taci Joseva vata kei ira na tacina, ni sa tukuna, "De qai yacovi koya e dua na leqa." 5 O iratou na luvei Isireli e ratou sa la'ki voli sila vata kei ira na tamata, ni sa levu na dausiga e Kenani. 6 O Joseva sa kovana levu ena vanua, ni sai koya ga sa volivolitaki tiko ena vanua. E ratou sa lako mai na tacina ka cuva e matana. 7 Sa raici iratou o Joseva ka sa kilai iratou, sa vuki ga me vaka na vulagi vei iratou ka vosa tiko vakaukauwa vei iratou. Sa mani tarogi iratou, "Dou lako tiko mai vei?" E ratou sa sauma mai, "Mai Kenani me voli kakana." 8 Sa kilai iratou na tacina o Joseva, ia, o iratou e sega e ratou sega ni kilai koya. 9 Sa nanuma sara o Joseva na tadra e a tadra me baleti iratou, ka tukuna vei iratou, "Dou sa yamata vuni mai! Dou sa lako mai me raica na lala tu ni vanua!" 10 E ratou sa tukuna vei Joseva, "E sega neitou turaga, keitou sa lako me voli kakana ga. 11 "Keitou sa luvena kecega e dua na tamata, keitou sa tamata dina keitou sa sega ni yamata." 12 Sa tukuna tiko ga o koya, "E sega dou sa lako mai me vakaraica lo na vanua." 13 E ratou sa tukuna, "Keitou na nomuni tamata sa lewe tinikarua na veitacini, na luve ni dua na tamata ena vanua o Kenani; o koya e gone duadua sa tiko ga kei tamai keitou, ia, e dua tale sa sega." 14 Sa tukuna tiko ga o Joseva, "O au sa vosa tiko vei kemudou ka tukuna, 'Dou sa yamata vuni!' 15 "Oqo dou sa na vakatovolei, me vaka sa bula o Fero, dou na sega ni biuta na vanua vakavo, kevaka sa kau mai o koya e gone duadua. 16 "Dou vakatala e dua vei kemudou, me la'ki kauti tacina mai, na kena vo, dou na tiko e vale ni veivesu, me na kilai kina na dina sa tu vei kemudou; kevaka e sega, me vaka sa bula o Fero – dou sa yamata vuni dina!" 17 Sa biuti iratou kece ki vale ni veivesu me tolu na siga. 18 Sa tukuna vei iratou o Joseva e nai katolu ni siga, "Dou cakava oqo, mo dou bula, ni'u sa rerevaka na Kalou: 19 "Kevaka dou sa tamata dina, me dua vei kemudou me vesu tiko, dou lako ka kauta na kakana ni sa levu na dausiga ena nomudou vanua. 20 "Me kau mai na tacimudou gone duadua vei au: me vakadinadinataki kina na nomudou vosa, dou na sega ni mate kina." E ratou sa cakava vakakina. 21 E ratou sa veitukunayaka, "E datou sa cala dina ena vuku i tacidatou, ni datou sa raica na via bula ena yalona, ni sa vakamasuti kedatou, e datou sa sega ga ni via rogoci koya; o koya oqo sa lakovi kedatou mai kina na veilecayaki levu oqo." 22 Sa sauma yani vei iratou o Rupeni ka vaka: "E sega beka ni'u a tukuna vei kemudou, 'Mo dou kua ni valavala ca ena vuku ni gone;' ia, dou sa sega ni via vakarorogo? Ia, oqo na nona dra sa tarogi mai vei kedatou." 23 E ratou sega ni kila ni sa kila o Joseva na veika oqo – ni sa vosa tikoga vei iratou mai vua na dau vakavakadewa. 24 Sa vuki tani mai vei iratou ka tagi. Sa qai dau lesu tale mai vei iratou ka vosa tale vei iratou. Sa tauri Simione mai ka vesuki koya e matadratou.

Era Sa Lesu Tale Na Veitacini Ki Kenani

25 Sa solia nai vakaro o Joseva me vakatawani kece na nodra dui taga ena sila, me vakalesui tale na nodra i lavo ki na nodra dui taga, me soli talega na kedra i vaqa, e nai lakolako lesu. Sa vakayacori me vakakina. 26 Era sa vakavodoka na nodra dui asa ena sila ka lako yani mai kea. 27 Ia, sa dua vei ira, sa dolava na nona taga me vakania na nona asa ena sila ena nodra mai cegu tiko, sa raica nai lavo ena gusu ni nona taga. 28 Sa tukuna sara yani vei ira na tacina, "Na noqu i lavo sa vakasukai tale mai vei au, sa tu oqo ena noqu taga!" Era sa rere vakalevu ka veitukuniyaka, "Na cava sa cakava vei keda oqo na Kalou?" 29 Era sa lako vei tamadra o Jekope, ena vanua o Kenani ka tukuna vua na veika sa yaco ka vaka: 30 "Na nodra turaga ena vanua, sa vosa vakaukauwa vei keitou, ka tukuna ni keitou sa lako yani me raica lo na vanua. 31 "Keitou sa tukuna vua, 'Ni keitou sa vosa dina ka sega ni yamata vuni. 32 'Keitou sa lewe tinikarua ka dua ga na tamai keitou, e dua sa oti yani kei koya e gone duadua sa tiko vata kei tamai keitou ena siga oqo, ena vanua o Kenani.' 33 "Na turaga ni vanua sa tukuna vei keitou, 'Ena ka oqo au na kila kina ni dou sa dina, me biu tiko mai e ke e dua vei kemudou, dou kauta yani na kakana ni dausiga me kedra na nomudou vuvale, ka lako. 34 'Dou kauta lesu mai na tacimudou gone duadua vei au, me'u kila dina kina ni dou sa sega ni yamata vuni, ka sa tukuna na ka dina. Au na qai soli tacimudou yani ka veivoli talega ena vanua.'" 35 Sa yaco, ni ratou sa sova yani na nodratou dui taga – era sa dui kurabui ni sa tu na nodra dui taga i lavo ena nodra taga ni sila yadudua. Ni ra sa raica nai lavo kei tamadra talega, era sa sa rere vakalevu. 36 Sa tukuna vei ira o Jekope, "Dou sa vakayalolailaitaki au ena vuku ni luvequ. Sa yali o Joseva, sa yali o Simione, oqo dou sa via kauti Penijamini tani. Na veika kece oqo sa veicoqacoqa kei au." 37 Sa vosa o Rupeni vei tamana ka tukuna, "Vakamatei rau na luvequ tagane kevaka au sega ni kauti koya lesu tale mai vei iko; biuti koya e ligaqu – au na kauti koya lesu tale mai vei iko." 38 Sa tukuna mai o Jekope, "Na luvequ ena sega ni lako sobu kei kemudou, sa mate oti o tacina, sa vo duadua ga o koya. Kevaka ena yacovi koya e dua na ka ena sala dou na lakova, dou na kauta sobu na ulu sika oqo ena rarawa ki nai bulubulu."

Vakatekivu 43

Era Sa Lesu Tale Na Taci Joseva Vata Kei Penijamini

1 Sa ca vakalevu sara na dausiga ena vanua. 2 Sa yaco, ni ra sa kania oti na sila sa kau mai Ijipita, sa tukuna vei ira o tamadra, "Dou lesu tale ka volia tale mai na kakana." 3 Sa vosa vua o Juta, "Raica sa vosa vei keitou na tamata, 'Dou kua tale ni raica na mataqu, vakavo ke sa lako mai na tacimudou gone duadua.' 4 "Kevaka o sa vakatala vata kei keitou na taci keitou, keitou na qai lako sobu ka voli kakana. 5 "Kevaka e sega, keitou na sega ni lako sobu: ni sa tukuna vei keitou na tamata, dou na sega ni raica na mataqu, vakavo, ke sa lako mai na tacimudou.'" 6 Sa tukuna o Isireli, "Ena cava dou sa cakacaka vakaca kina vei au, ni dou sa tukuna vua na tamata ni se tiko tale e dua na tacimudou?" 7 E ratou sa tukuna, "Na tamata sa vakatarogi keitou vakalalai kei ira talega na wekai keitou ka vaka: 'E se bula tiko o tamamudou? E dua tale tiko na tacimudou?' Keitou sa sauma vua me vaka na nona taro. Keitou sa sega ni kila ni na tukuna mai, 'Me kau sobu mai o tacimudou'?" 8 Sa tukuna o Juta vei Isireli na tamana, "Mo vakatalai koya vata kei au, me keitou lako me da bula kina ka sega ni mate, o iko kei ira na lalai. 9 "O au, nai vakadei ni nona lako, mo na tarogi koya mai na ligaqu. Kevaka au na sega ni kauti koya lesu mai vei iko ka biuti koya e matamu. Me'u qai beitaki kina me sega ni mudu. 10 "Kevaka keitou a sega ni vakaberabera tiko, e dodonu me keitou sa lesu tale mai vakarua oqo." 11 Sa qai tukuna vei iratou o Isireli na tamadratou, "Kevaka sa dina oqori, dou cakava oqo – dou kauta na vuata vinaka duadua ni vanua ena nomudou taga ka vakacabora vua na tamata, so talega na waiwai boivinaka, vakalailai na oni, na i waki ni kakana, na pinati lalai kei na pinati lelevu. 12 "Me vakaruataki nai lavo mo dou kauta me kau lesu nai lavo e kune ena nomudou taga, de a sega ni nakiti. 13 "Dou kauti tacimudou talega, ka lako yani vua na tamata. 14 "Na Kalou me vakaraitaka na yalololoma vua na tamata me rawa ni sereki tacimudou kei Penijamini, kevaka me'u sa sega ni lomani, sa na vakakina ga!" 15 E ratou sa tucake na tamata ka lako yani ki Ijipita ka tu ena mata i Joseva kei nai yau vakayadua e a vakarautaki. 16 O Joseva, ni sa raici Penijamini vata kei iratou na tacina, sa tukuna vua na nona tamata, "Kauti iratou oqo ki noqu vale. Vakamatea e dua na manumanu ka vakarautaka rawa, o ira oqo era na kana vata kei au ena siga levu." 17 Era sa cakava na tamata me vaka sa vakarota o Joseva. E ratou sa kau sara kina vale nei Joseva. 18 Era sa rere na tamata ni ra sa kau sara ki na vale nei Joseva, e ratou sa tukuna, "Oqo sa baleta nai lavo sa tiko ena nodatou taga sila ena i matai ni lako mai, oqo sa vakasaqara e dua na ka, me rawa ni beitaki kedatou kina ka me qai tauri kedatou me nona bobula." 19 Ni ratou sa toso voleka yani vua na dauveiqaravi ni vale nei Joseva, era sa veivosaki sara ena mata ni katuba, 20 Ka tukuna, "Io, saka, keimami a lako mai ena i matai ni gauna me voli kakana; 21 "Sa yaco ni keimami sa lesu tale, keimami sa kunea na i lavo ena gusu ni neimami taga. Nai lavo o ya, keimami sa kauta lesu tale tiko mai oqo e ligai keimami. 22 "Keimami sa kauta tale tikoga mai eso na i lavo me voli kakana kina – keimami sa sega ga ni kila se o cei e biuta nai lavo ena neimami taga." 23 Ia, sa tukuna mai, "Mo dou vakacegu ka kua ni rere, na Nomudou Kalou kei na Kalou ni tamamudou sa solia nai yau ka biuta ena nomudou taga, sa tu vei au na nomudou i lavo." Sa sereki Simione lesu vei iratou. 24 Na dauveiqaravi sa kauti iratou mai ki vale, solia na wai me ratou vuluvulu kina kei na yavadratou talega ka solia na ka me ra kania na asa. 25 Era sa vakarautaka sara nai solisoli, ni na basika mai o Joseva ena siga levu – ni ra sa rogoca ni na mai kana madrai e kea. 26 Ni sa lako mai i vale o Joseva, era sa kauta mai nai solisoli loloma ena ligadra ki vale, ka era sa cuva sobu vua ki na qele. 27 Sa tarogi ira sara me baleta na nodra bula vinaka ka vaka: "E vinaka tiko beka o tamamudou, na qase dou a tukuna tiko? E se bula tiko o koya?" 28 E ratou sa sauma mai, "Na nomuni tamata na tamai keitou e se bula vinaka tiko ka bulabula talega." Era sa cuva sobu ka vakarokoroko. 29 Sa rai cake ka raici Penijamini, na luvei tinana ka taroga, "Oqo beka na tacimudou gone dou a tukuna vei au?" Sa tukuna tale, "Me yalololoma vei iko na Kalou na luvequ." 30 Sa luluvu na yalona ena vukui tacina, sa lako tani yani vakatotolo ka tagi e na nona rumu. 31 Sa tavoya na matana ka lako tale mai, sa tauri koya vinaka ka tukuna, "Me soli yani na madrai." 32 Sa vakarautaki ga na teveli taudua nei Joseva, na tikina ga me ra kana kina na tacina, na nodra tikina na Ijipita era veiqaravi – ni o ira na Ijipita era sega ni rawa ni kana vata kei ira na Iperiu, ni oqo na ka toro sobu vei ira na kai Ijipita. 33 Era dabe tuvai e matai Joseva, mai vei koya e qaseduadua ki vei koya sara e gone duadua. E ratou sa veiraici mada ga ena kidroa na veitacini. 34 Sa kauta yani o koya na veiqaravi vei ira, mai matana. Sa vakalimataki na ka vei Penijamini. Era sa gunu ka marau vata tiko kei Joseva.

Vakatekivu 44

Na Bilo Nei Joseva

1 Sa vakaroti ira na veiqaravi ena nona vale ka tukuna, "Vakatawana na kakana ena nodra taga na tamata, na kena levu ga e rawa ni ra kauta, me biu tale na nodra i lavo ena gusu ni nodra taga. 2 "Me biu na noqu bilo siliva ena gusu ni nona taga o Koya e gone duadua kei na nona i lavo talega ni sila." Sa caka me vaka na vosa sa tukuna o Joseva. 3 Ni sa kida na mataka, era sa vakatalai yani na tamata kei na nodra asa. 4 Ni ra sa lako tani yani mai na koro, ka e se bera sara na nodra lako yani vakayawa, sa tukuna o Joseva vua na dauveiqaravi "Tu cake, cici muri ira na tamata, ni o sa toboki ira, tukuna vaka oqo, 'Na cava dou sa caka ca kina ena vuku ni vinaka? 5 'Sa sega beka ni oqo na nona ka ni gunu na noqu turaga – oqo talega sa dau caka i sausau kina o koya, dou sa caka ca sara ena vuku ni ka oqo.'" 6 Sa toboki ira sara ka cavuta na veivosa oqori. 7 Era sa tukuna vua, "Na cava na vuna sa cavuta kina na vosa oqori na noqu turaga? Me kua sara vei keimami na nomuni tamata na cakava na veika oqori. 8 "Raica keimami sa kauta lesu tale mai, mai na vanua o Kenani nai lavo sa kune ena neimami taga, kila rawa vakacava me keimami butakoca na siliva se koula mai na vale ni neimami turaga? 9 "Vei koya ena kune vua, me na vakamatei, ka keimami na wili me nona bobula na noqu turaga." 10 Sa tukuna na tamata, "Sa na yaco me vaka na nomudou vosa, o koya sa na kune vua, ena noqu bobula, o kemudou dou na sega ni beitaki." 11 Era sa vakatotolo sara ka biuta kece ki ra na nodra dui usausa, ka dolava na nodra dui taga. 12 Sa tekivu mai vua sa qase ki vua sara sa gone: na bilo sa kune ena taga nei Penijamini. 13 Era sa basuraka na nodra i sulu, ka era sa vakavodoka tale na nodra dui asa ka lesu ki na koro. 14 O Juta kei ira na tacina, era sa lako mai ki na vale nei Joseva, (ni se tiko ga e vale) era sa cuva vua ki na qele. 15 Sa tukuna vei ira o Joseva. "Na cava dou sa cakava oqo? Dou sa sega beka ni kila ni tamata vakataki au, sa dau caka i sausau?" 16 Sa tukuna yani o Juta, "Na cava me keitou tukuna vua na neitou turaga? Na vosa cava? Se me keitou vakagalalataki keitou vakacava? Na Kalou sa raica na neitou cala, sai keitou oqo – keitou sa nona bobula na noqu turaga, oi keitou kei koya talega sa kune vua na bilo nei koya na noqu turaga." 17 Sa tukuna mai o Joseva: "Me kua sara vei au oqori, me'u cakava na ka vaka oqori, o koya ga sa kune vua na bilo, ena noqu bobula – vei kemudou, dou lako ena vakacegu vei tamamudou."

O Juta Sa Kerekere Ena Vuku I Penijamini

18 Sa toso voleka o Juta vei Joseva ka tukuna, "Noqu turaga, me'u vosa mada ka mo ni vakarorogo, me kua ni katakata na nomuni cudru vua na nomuni tamata; ni kemuni sa vakataki Fero ga. 19 "Na noqu turaga sa taroga na nomuni tamata ka vaka, 'Edua tiko na tamamudou, e dua tiko na tacimudou?' 20 "Keitou sa sauma vua na turaga, 'Sa tiko na tamai keitou ka sa qase sara, sa tiko talega na taci keitou, e luvei tamai keitou ni sa qase sara, e gone sara, sa mate o tacina, o koya ga na luvei tinana ka sa rui lomani koya vakalevu o tamana.' 21 "O ni sa tukuna vei ira na nomuni tamata, 'Me kau sobu mai me raici koya na matamuni.' 22 "Keimami sa tukuna vua na neimami turaga, 'Na gone sa sega ni rawa ni biuti tamana, ena mate o tamana kevaka sa biuti koya na gone.' 23 "O ni sa tukuna vei ira na nomuni tamata, 'Kevaka sa sega ni lako mai na gone, keimami na sega ni raici kemuni.' 24 "Ni keimami sa lako vei tamai keimami, keimami sa tukuna vua na vosa nei koya na neimami Turaga. 25 "Sa tukuna o tamai keimami,'Me keimami mai volia tale mada vakalailai na kakana.' 26 "Keimami sa tukuna, 'Keimami na sega ni lako na sobu, vakavo kevaka sa lako vata kei keimami na gone.' 27 "Na tamadra na nomuni tamata sa tukuna, 'Dou sa kila, na watiqu sa vakasucuma vei au e rua na luvequ tagane; 28 'O koya sa lako tani mai vei au, "Sa dina sara, sa basubasuki vakalalai"– au sa sega ni raici koya tale mai na siga o ya. 29 'Kevaka dou sa kauti koya tale oqo, ka yacovi koya na leqa, dou sa kauta sobu na ulu sika oqo ki nai bulubulu.' 30 "O koya oqo, ni'u na lako vua na nomuni tamata na tamaqu, ka sa sega ni tiko vata kei keitou na gone, na nona bula sa vesuki vata tiko kei na nona bula na gone, 31 "Ena yaco ni sa raica sa sega vei keitou na gone, ena mate o koya. O keitou sa na beitaki ni kauta sobu ki nai bulubulu ena rarawa na ulu sika – na tamai keitou. 32 "O au, na nomuni tamata, sa yalayala mei vakadei me baleta na gone vei tamana. 'Kevaka, au na sega ni kauta lesu mai na gone – sa na noqu na kena bili me sega ni mudu.' 33 "O koya oqo, me'u tiko o au na nomuni tamata ka me lako na gone, me'u nona bobula na noqu turaga – me lako ga yani na gone vata kei ira na tacina. 34 "Me'u lako rawa vaka-cava vei tamaqu Kevaka sa sega na gone, de, au na qai raica na rarawa levu ena lako mai vei tamaqu?"

Vakatekivu 45

Sa Vakaraitaki O Joseva Vei Iratou Na Tacina

1 Sa sega ni rawa ni vosoti koya tiko o Joseva e matadra sa tu vata kei koya, ka sa kaci yani, "Mera lako kece i tuba na tamata mai vei au!" Sa sega e tu vata kei koya ni sa tukuni koya tiko vei ira na tacina. 2 Sa tagi vakadomoi levu o koya, o ira na Ijipita kei ira na vuvale nei Fero, era sa rogoca. 3 Sa tukuna o Joseva vei ira na tacina, "O au o Joseva, e se bula tiko o tamaqu?" Era sa sega ni sauma rawa na tacina, ni ra sa kidacala e matana. 4 Sa tukuna o Joseva vei ira na tacina, "Dou toso voleka mai vei au." Sa qai tukuna tale, "O au o Joseva na tacimudou, o koya dou a volitaka mai ki Ijipita. 5 "Dou kua ni rarawa se cudruvi kemudou kina ni dou volitaki au mai ki ke; na Kalou sa talai au mai e liu vei kemudou, me maroroi kina na bula. 6 "Ena rua na yabaki oqo sa sega kina na kakana ena vanua, ka sa tiko tale oqo e lima na yabaki ena sega kina na cukicuki se na tatamusuki. 7 "Na Kalou sa talai mai liu vei kemudou me maroroi na sautu ena vuravura, ka me vakabulai kemudou ena veisereki levu. 8 "Ia, oqo sa sega ni oi kemudou sa talai au mai, na Kalou ga, o koya sa cakava me'u tama vei Fero, ka turaga ena nona vale taucoko ka lewa ena vanua taucoko o Ijipita. 9 "Dou totolo ka lako cake vei tamaqu ka tukuna vua, 'Sa tukuna vaka oqo o Joseva na luvemu: "Na Kalou sa cakava me'u turaga levu duadua e Ijipita taucoko, lako sobu mai vakatotolo – kua ni wawa tale. 10 "Dou na mai tiko ena vanua o Koseni, dou na mai tiko volekati au, o kemudou kei ira na luvemudou kei ira na luvena na luvemudou, na nomudou manumanu kei na ka kecega sa nomudou. 11 "Mai kea au na vakarautaka vei kemudou, de o ni na qai dravudravua o kemuni kei na nomuni vuvale kece, ni se vo tiko oqo e lima na yabaki ni dausiga."' 12 "Mo dou kila, na matamudou kei na matai Penijamini na taciqu, sa raica na gusuqu ni sa vosa tiko. 13 "Dou tukuna vei tamaqu na noqu cecere e Ijipita kei na veika kecega dou sa raica; mo dou vakatotolo kina ka kauta sobu mai na tamaqu e ke." 14 Rau sa veimokomokoti kei Penijamini na tacina ka veitagicaki. 15 Sa reguci iratou kece na tacina ka veitagici, ni sa oti o ya, era sa veivosaki. 16 Nai rogorogo ni veika oqo sa yaco sara ki na loma ni vale nei Fero ka vaka: "O ira na taci Joseva, era sa lako mai." Sa taleitaka o Fero kei ira na nona tamata na ka oqo. 17 Sa tukuna o Fero vei Joseva, "Tukuna vei ira na tacimu, 'Dou vakatawana nai lakolako, ka lako ki Kenani. 18 'Dou kauti tamamudou mai kei na nomudou vuvale ka lako mai vei au; au na soli vei kemuni na tikina vinaka duadua ena vanua o Ijipita, o ni na kania na uro ni vanua. 19 'O ni sa vakaroti mo ni cakava oqo O Mo ni kauta na qiqi vakavale me ra kau mai kina na gone kei tinadra ka mo ni kauti tamamuni talega mai. 20 'Mo ni kua ni leqataka na veika e nomuni, baleta, ni na soli vei kemuni na vanua vinaka duadua e Ijipita me nomuni.'" 21 O ira na luvei Isireli era sa cakava oqo, me vaka sa tukuni vei ira, sa soli vei ira na qiqi vakavale me vaka nai vakaro i Fero, sa soli talega vei ira na i vaqa ni lakolako. 22 Sa solia vei ira kece, vei ira vakayadua na veisau ni nodra i sulu; vei Penijamini ga sa solia kina e tolu na drau na tiki ni siliva kei na lima nai sulu ni veisau. 23 Sa vakauta vei tamana na veika oqo, e tina na asa sa vakavodoki kina na veika vivinaka e Ijipita, e tini na asa yalewa sa vakavodoki kina na sila, na madrai, kei na veikakana ni lakolako mai. 24 Sa vakatalai ira yani na tacina, ka era sa lako yani, ka sa tukuna vei ira, "Dou raica me kua na leqa ena sala." 25 Era sa lako cake tani yani mai Ijipita ka lako mai kina vanua o Kenani vei Jekope na tamadra. 26 Era sa tukuna vua, "O Joseva e se bula tiko, e sa lewa tiko ena vanua taucoko o Ijipita." Sa kidacala o Jekope baleta ni sa sega ni vakabauti ira. 27 Ia, ni ra sa tukuna vua na vosa kece i Joseva, ka sa raica talega na qiqi vakavale sa soli mai me mai vodo kina, sa vakabulabulataki tale na yaloi Jekope na tamadra. 28 Sa qai tukuna o Isireli, "Sa rauta, e se bula tiko o Joseva na luvequ. Au na lako ka raici koya ni bera ni'u mate."

Vakatekivu 46

Na I Lakolako I Jekope Ki Ijipita

1 Sa kauta o Isireli na nona veika kece ena nona i lakolako ka sa lako mai ki Perisepa ka vakacabora nai soro vua na Kalou i Aisake na tamana. 2 Na Kalou sa qai vosa vei Isireli ena raivotu ena bogi ka tukuna: "Jekope, Jekope," sa sauma mai o Jekope, "Sai au oqo." 3 Sa tukuna mai, "Oi Au na Kalou, na Kalou i tamamu, kua ni rere ni lako sobu i Ijipita, Au na vakayacora mo matanitu levu mai kea. 4 "Au na lako sobu vata kei iko ki Ijipita, Au na kauti iko lesu tale mai vakaidina. O Joseva ena biuta na ligana e mataqu." 5 Sa tucake o Jekope mai Perisepa, o ira na luvei Isireli era sa kauti Jekope, ira na nodra lalai, kei ira na watidra ena qiqi vakavale ea solia mai o Fero me ra mai vodo kina. 6 Era sa kauta na nodra manumanu kei na nodra i yaya, era sa rawata ena vanua o Kenani, ka lako sobu ki Ijipita, o Jekope kei ira kecega na nona kawa. 7 O ira na luvena tagane kei na luvedra tagane na luvena, na luvedra yalewa kei na luvedra yalewa na luvena tagane, kei ira kece na nona kawa, sa kauti ira kece ki Ijipita. 8 Sai ira oqo na yacadra na luvei Isireli, Jekope kei na luvena tagane, o ira sa lako sobu ki Ijipita. O Rupeni na ulumatua nei Jekope. 9 O ira na luvei Rupeni tagane, o Anoki, o Palu, o Esironi kei Kami. 10 O ira na luvei Simione tagane: O Jemueli, o Jamini, o Qada, o Jakini, o Soara, o Saula na luveni dua na yalewa ni Kenani. 11 O ira na luvei Livai tagane: O Kerisoni, o Koata, kei Merari. 12 O ira na luvei Juta tagane: O Eri, o Onani, o Sela, o Veresi, kei Sera. (O Eri kei Onani e rau sa mate ena vanua o Kenani). Na luvei Veresi o Esironi kei Amulu. 13 O ira na luvei Isakari tagane: O Tola, o Pura, o Jope, o Simironi. 14 O ira na luvei Sevuloni tagane: O Sareti, o Eloni, kei Jaelieli. 15 Sai ira oqori na luvei Lia tagane, sa vakasucuma vei Jekope mai Padani-Erami kei Taina na luvena yalewa. O ira kece oqo sa lewe tolusagavulu ka tolu na tamata. 16 O ira na luvei Kata tagane: O Sifioni, o Aqi, o Suni, o Esiboni, o Eri, o Arodi, kei Areli. 17 O ira na luvei Aseri tagane: O Jimina, o Isua, o Beria kei Sera na luvena yalewa. O ira na luvei Beria tagane, o Eba kei Malikieli. 18 Sai ira oqori na luvei Siliva na dauveiqaravi nei Lia. O ira kece oqo sa tinikaono na tamata. 19 Na luvei Raijeli tagane na wati Jekope: O Joseva kei Penijamini. 20 Vei Joseva ena vanua o Ijipita sa sucu kina o Manasa kei Ifereimi, e rau sa vakasucumi mai vei Vasemaca na luvei Poti-fera na bete. 21 O ira na luvei Penijamini tagane: O Bela, o Bikeri, o Asiveli, o Qera, o Nemani, o Ei, o Rosi, o Mupimi, o Upimi kei Areti. 22 O ira oqori na luvei Raijeli tagane, sa vakasucuma vei Jekope e tinikava na tamata. 23 Na luvei Tani: O Usimi. 24 O ira na luvei Navitalai: O Jasili, o Qani, o Jasa kei Silemi. 25 O ira oqori na luvei Bila na dauveiqaravi nei Raijeli. Sa vakasucuma vei Jekope e vitu na tamata. 26 O ira kece na tamata era sa lako vata kei Jekope ki Ijipita – o ira kece sa lako mai ena yagona, sa onosagavulu ka ono na tamata. 27 Oi rau na luvei Joseva sa sucu mai na vanua o Ijipita, sa lewe rua. O ira kece na vuvale i Jekope sa lako sobu ki Ijipita sa vitusagavulu na tamata.

Sa Tiko E Koseni O Jekope

28 Sa vakatalai Juta yani e liu o Jekope vei Joseva, me dusimaka vei ira na sala ki Koseni. Era sa lako mai ki na vanua o Koseni. 29 Sa vakarautaka o Joseva na nona qiqi vakavale ka lako cake ki Koseni me sota kei Isireli na tamana; sa mokoti tamana yani ka rau sa veitagicaki. 30 O Isireli sa tukuna vei Joseva, "Mo laivi au me'u mate, ni'u sa raica tale na matamu, baleta ni o se bula tiko." 31 O Joseva sa tukuna vei ira na tacina kei ira kece na vuvale nei tamana, "Au na lako cake vei Fero ka tukuna vua, 'Ni o ira kece na taciqu kei na vuvale kece nei tamaqu era sa tiko mai na vanua o Kenani, era sa lako mai oqo ki vei au. 32 'Era sa dau vakatawana na sipi, me vaka ga ni nodra cakacaka na vakania na sipi; era sa kauta talega mai na nodra manumanu kece.' 33 "Ni sa lako mai o Fero me tarogi kemuni, 'Se cava na nomuni cakacaka?' 34 "Mo ni qai tukuna, 'Na nodra cakacaka na nomuni tamata sa tu vata ga kei ira na manumanu, mai na neimami gone ka yacova na siga oqo, oi keimami kei ira talega na tamai keimami:' Mo ni tiko kina ena vanua o Koseni – o ira kece na vakatawa ni manumanu era sa ka vakasisila vei ira na kai Ijipita."

Vakatekivu 47

1 Sa lako o Joseva ka tukuna vei Fero, "O tamaqu kei ira na taciqu, na nodra manumanu kei na veika kece era taukena – era sa lako mai na vanua o Kenani, ka era sa tiko ena vanua o Koseni." 2 Sa kauta mai e lima, mai vei ira na tacina ka vakaraitaki ira vei Fero. 3 Sa tarogi iratou na tacina o Fero, "Na cava na nomudou cakacaka?" E ratou sauma vei Fero, "O ira na nomuni tamata sa dau vakatawa sipi, o keimami kei ira talega na neimami qase." 4 Era sa tukuna talega vei Fero, "Keimami sa lako curuma mai na vanua, ni sa sega na kakana me kedra na manumanu baleta ni sa rui levu na dausiga e Kenani. Me ra tiko mada na nomuni tamata ena vanua o Koseni." 5 Sa vosa o Fero vei Joseva ka vaka: "Eera sa lako mai na tamamu kei na tacimu vei iko. 6 "Sa tu e matamu na vanua o Ijipita. Me ra tiko na tamamu kei na tacimu ena vanua vinaka duadua e Ijipita, me ra tiko e Koseni. Kevaka, talega o sa raica e dua na tamata vinaka vei ira, me mai qarava na noqu manumanu." 7 O Joseva sa kauti Jekope mai na tamana vei Fero, ka me tu ena matai Fero. Sa vakalouvinakataki Fero o Jekope. 8 Sa tarogi Jekope o Fero ka vaka: "O sa yabaki vica?" 9 Sa sauma o Jekope, "Na veisiga ni noqu bula sa dua na drau ka mani tolusagavulu na yabaki, sa lailai ka ca na veisiga ni noqu bula, sa sega ni vaka na nodra veisiga ni bula na noqu qase." 10 Sa vakalouvinakataki Fero o Jekope ka lako tani mai matana. 11 O Joseva sa vakatikori ira na tamana kei na tacina ena vanua o Ijipita, na tikina vinaka duadua ena vanua e Ramisese, me vaka sa vakarota o Fero. 12 O Joseva sa vakani tamana kei ira na tacina, kei na nodra veivuvale me vaka na kedra i wiliwili.

Sa Sotava Na Dausiga O Joseva

13 Sa sega na madrai ena vanua taucoko, ni sa rui dede sara na dausiga, na vanua o Ijipita kei Kenani sa sega sara ga kina na ka baleta na balavu ni dausiga. 14 O Joseva sa kumuna kece nai lavo ena vanua o Ijipita kei na vanua o Kenani, ena vuku ni sila era sa mai volia. Sa kauta kece mai na i lavo ki na lololo nei Fero. 15 Ni sa oti kece nai lavo e Ijipita kei Kenani, era sa lako kece mai na Ijipita vei Joseva ka tukuna, "Solia mai na kakana, me keimami mate beka e matamuni? Ni sa oti nai lavo." 16 Sa sauma yani o Joseva, "Ni solia mai na manumanu mei voli ni madrai, kevaka sa sega nai lavo." 17 Era sa kauta mai na nodra manumanu vei Joseva, o Joseva sa solia vei ira na madrai mei sosomi ni manumanu era sa kauta mai ena yabaki o ya. 18 Ni sa oti na yabaki o ya, era sa lako tale mai ena yabaki ka tarava, ka tukuna vua, "Keimami na sega ni vunitaka ni sa sega vei keimami nai lavo, na neimami turaga talega sa taura na neimami manumanu. Sa sega tale na ka e vo – na yagoi keimami ga kei na neimami vanua. 19 "Na cava me keimami mate kina ena matamuni, oi keimami kei na neimami qele? Mo ni voli keimami kei na neimami vanua ena madrai. Oi keimami kei na neimami vanua keimami na bobula vei Fero; solia vei keimami nai tei. Me keimami bula ka sega ni mate, me kua ni lala na vanua." 20 O Joseva sa volia na vanua taucoko o Ijipita vei Fero, ni tamata kecega e Ijipita sa volitaka na nona vanua, baleta ni sa rui sivia sara ga na dausiga. Sa yaco me nei Fero kece na vanua. 21 Vei ira na tamata, o Joseva sa tosoi ira na tamata ki na koro lelevu, mai na dua na yasana ki na dua tale na yasai Ijipita. 22 Na nodra vanua ga na bete sa sega ni voli, ni o ira na bete, sa tu ga na kedra i votavota sa vakarautaka tu o Fero. Oqo, era sa sega ni volitaka kina na nodra vanua. 23 Sa qai tukuna o Joseva vei ira na tamata, "Raica au sa voli kemuni kei na vanua vei Fero. Oqo nai tei, mo ni tea na vanua. 24 "Ena gauna ni tatamusuki, me dua nai kalima me nei Fero, kei na va nai kalima me nomuni, kei na nomuni i tei talega, ka me kemuni talega kei na nomuni vuvale kei ira na gone me ra kana kina." 25 Era sa tukuna, "O ni sa vakabulai keimami, me keimami kune loloma ena mata ni neimami turaga, ka keimami na dauveiqaravi nei Fero." 26 O Joseva sa cakava, me sa dua na lawa e Ijipita taucoko me yacova na siga oqo – o ya, o Fero me nona e dua nai ka lima, me kua ga ena ka e nodra na bete, oqo sa sega ni nei Fero.

Sa Bubului O Joseva Vei Jekope

27 O Isireli sa tiko ena vanua o Ijipita, ena vanua o Koseni; sa tu e kea na veika e nodra, ka sa tubu me levu tiko ga. 28 Sa tiko mai Ijipita o Jekope me tinikavitu na yabaki. Na balavu ni yabaki ni bula nei Jekope sa dua na drau vasagavulu ka vitu na yabaki. 29 Ni sa toso mai na gauna me mate kina o Isireli, sa kacivi Joseva na luvena ka tukuna vua, "Kevaka, au sa kune loloma e matamu, mo biuta mada na ligamu ena ruku ni sagaqu ka cakacaka ena vinaka kei na dina vei au. Au kerea mo kua ni buluti au e Ijipita, 30 "Me'u la'ki davo vata ga kei ira na tamaqu, mo kauti au tani e Ijipita, ka buluti au ena nodra i bulubulu." Sa sauma yani o Joseva, "Au na cakava me vaka o sa tukuna." 31 Sa qai tukuna tale, "Mo bubului vei au," sa qai yalayala ka bubului vei tamana. Sa cuva sobu ena ulu ni nona i mocemoce o Isireli.

Vakatekivu 48

O Jekope Sa Vakalouvinakataki Rau Na Gonetagane Nei Joseva

1 Ia ni sa yaco sara na kena gauna, sa tukuni vei Joseva, "E dina, ni sa tauvimate o tamamu"; Sa kauti rau yani na luvena tagane e rua, o Manasa kei Ifereimi. 2 Sa tukuni sa vei Jekope ka vaka, "Raica sa lako tiko mai o Joseva na luvemu," sa vakaukauwataki koya o Jekope ka dabe ena nona i mocemoce. 3 Sa tukuna o Jekope vei Joseva, "Na Kalou Kaukauwa sa rairai mai vei au e Lusi, mai na vanua o Kenani ka vosavakalouvinakataki au, 4 "Ka tukuna vei au, raica Au na vakavuavuai iko ka vakalewelevutaki iko, 'O na matanitu levu ka solia na vanua oqo vei ira na nomu kawa me nomuni ka sega ni mudu.' 5 "O rau na luvemu oqo, o Ifereimi kei Manasa, o rau sa sucu vei iko ena vanua oqo o Ijipita ni bera ni'u lako mai eke, e rau sa noqu – me vaka ga ni rau sa noqu o Rupeni kei Simione. 6 "O ira era na qai muri rau mai, era na qai nomu. Era na kacivi vata kei ira na dui tacidra ena nodra duivotavota. 7 "Ia, vei au, ena noqu lako mai Padani-Erani, sa mate kina o Raijeli ena yasaqu ena sala mai Kenani – e yawa vakalailai ga mai Peceliema (Efaraca. Au sa buluti koya mai kea)." 8 O Isireli sa raici rau na luvei Joseva ka taroga, "O cei oi rau oqo?" 9 Sa sauma o Joseva, "Oqo, oi rau na luvequ sa solia vei au na Kalou eke." Sa tukuna yani o Jekope, "Kauti rau mai me'u vosa vakalouvinakataki rau." 10 Sa buwawa sara vakalevu na mata i Isireli. Sa kauti rau sara mai vakavoleka o Joseva vei tamana. Sa reguci rau ka roqoti rau o Isireli. 11 Sa tukuna vei Joseva, "Au sega ni kila, ni'u na raica tale na matamu, na Kalou sa vakaraitaka talega vei au na nomu kawa!" 12 Sa kauti rau mai o Joseva, ka sa mai cuva ena vakarokoroko vei tamana. 13 O Joseva sa tauri Ifereimi ena ligana i matau me donuya na liga i mawi nei tamana kei Masana ena ligana i matau, me donuya na liga i mawi nei tamana. Sa kauti rau sara mai vakavoleka vei Isireli. 14 Sa dodoka yani na ligana i matau o Isireli ka tara na ulu i Ifereimi (o koya e gone) kei na ligana i mawi vei Manasa. Sa kila tiko o Joseva ni sa nona ulumatua o Manasa. 15 Sa vakalouvinakataki Joseva ka vaka: "Na Kalou, e rau sa dau lako voli e matana o Eparaama kei Aisake na tamaqu. Na Kalou sa vakani au tiko ena noqu bula taucoko ka yacova na siga oqo, 16 Na Agilosi sa vakabulai au mai na ca kecega, mo ni vakalouvinakataki rau na gone oqo, me rau vakaacani ena yacaqu. Kei na yacadrau na tamaqu, o Eparaama kei Aisake; me rau tubu me levu sara e delai vuravura." 17 Ni sa raica o Joseva na ligai matau i tamana ena ulu i Ifereimi – sa sega ni marautaka. Sa taura mai na liga i matau nei tamana ka biuta e ului Manasa. 18 Sa tukuna o Joseva vei tamana – "Me kua oqori, e qase vei rau oqo, biuta vua na ligamu i matau." 19 Sa bese ga o tamana ka tukuna, "Au sa kila oqori, au sa kila – ena tamata qaqa talega o koya, ia, me'u tukuna ga vakaidina, ena levu o koya mai vei koya e qase, ena levu na nona kawa." 20 Sa vakalouvinakataki rau ena siga o ya ka tukuna, "Ena vukumudrau ena veivakalouvinakataki o Isireli ka vaka:" 'Me cakava na Kalou mo drau Ifereimi kei Manasa!'" Sa biuti Ifereimi e liu vei Manasa. 21 Sa tukuna o Isireli vei Joseva, "Raica, au sa na mate, na Kalou ena tiko vata kei iko ka na kauti iko lesu tale ki na vanua nodra na tamamu. 22 "Ia, au sa solia vei iko e dua nai votavota e levu cake mai vei ira na tacimu, o koya au sa taura mai vei ira na Amoraiti ena i seleiwau kei na dakai."

Vakatekivu 49

Na I Otioti Ni Vosa Nei Jekope Vei Iratou Na Luvena

1 Sa kacivi iratou mai na luvena o Jekope sa tukuna, "Dou soqoni mada mai, me'u tukuna vei kemudou na veika me baleti kemudou ena veisiga ni mataka: 2 "Dou soqoni mai ka rogoca, oi kemudou na luvei Jekope, ka rogoci Isireli na tamamudou. 3 "Rupeni, o iko na noqu ulumatua, na noqu qaqa, nai tekitekivu ni noqu kaukauwa, cecere ena dokai, cecere ena kaukauwa. 4 O na yavavala me vaka na wai, o na sega ni toso cake – baleta ni o sa kabata cake nai mocemoce i tamamu, ka vakaduka. 5 "O Simione kei Livai e rau sa veitacini, na liga ni yaloca kaukauwa ena tiko ena nodrau i tikotiko. 6 Na yaloqu me kua ni tiko ena nodrau bose; na noqu dokai me kua ni tiko ena nodrau soqoni vata; baleta ena nodrau cudru, e rau sa vakamatea kina na tamata. Ena nodrau murimuri lomadrau, e rau sa vakakukunataka kina na domo ni bulumakau. 7 Sa rukaki na nodrau cudru, ni sa rui sivia; kei na nodrau cudru-katakata – sa rui ca sara. Au na wasei rau e Jekope ka dui biubiuti rau e Isireli. 8 "O Juta, o iko, era na vakacerecerea na tacimu; na ligamu ena kidomoka na domodra na meca; o ira na luvei tamamu era na cuva ka vakarokoroko vei iko. 9 O Juta na luve ni laione; mai na baca, na luvequ, o na tubu cake, ena cuva sobu, ena davo sobu me vaka na laione; io, me vaka na laione, ena tucake ka kuretaki koya, o cei me na vakacudrui koya? 10 Nai sala vakatui ena sega ni yali mai vei Juta, se na vakatulewa mai yavana, me yacova ni sa basika mai o Sailo, ka era na talairawarawa vua na tamata. 11 Sa vesuka na nona asa ena vaini kei na luve ni asa ena vaini vinaka sara. Sa savata na nona i ubi ena waini kei na nona i sulu ena dra ni vua ni vaini. 12 Sa damu buto mai na waini na yaloka ni matana, ka sa vulavula cake mai na wai ni sucu na batina. 13 "O Sevuloni ena dautiko ena vei baravi ni wasawasa; na veiwaqa, era na mai vakaruru vua, na nona i yalayala ena yaco yani e Saitoni. 14 "O Isakari, sa asa kaukauwa, sa davoca tiko e rua nai colacola; 15 Sa raica na kena vosa vinaka, sa vinaka na vanua, sa cuva sobu ka vosota nai colacola, sa yaco mei lawalawa bobula. 16 "O Tani ena lewai ira na nona tamata, me vaka e dua na yavusa e Isireli. 17 O Tani ena vaka na gata ena sala, sa kunei na nona weli, ka katia na bukubuku ni yava ni ose, me bale kina ki muri o koya sa vodoka tiko. 18 Au sa waraka tiko na nomuni veivakabulai Jiova! 19 "O Kata, era na buturaki koya na meca, ia, e muri ena nona ga na qaqa. 20 "Na madrai mai Aseri ena levu, ena basika mai vua na veika vakaturaga. 21 "O Navitalai sa dua e tasere tu, ka sa dau solia na veivosa vinaka. 22 "O Joseva sa rui ka vuavuai, ka sa vua tu ga ena mataniwai, sa ubia ga yani na bai ni koro na kena tabana. 23 O ira na dau vavana era sa rarawataki koya vakaca sara. 24 Ia, sa kaukauwa tikoga na nona veqa ni dakai – na ligana sa vakaukauwataki mai vua na liga kaukauwa ni Kalou i Jekope (mai vua na i Vakatawa Levu na Vatu kei Isireli), 25 Mai vua na Kalou i tamamu, o koya ena vukei iko, ka na vakalouvinakataki iko ena veivakalouvinakataki mai lomalagi e cake, kei na veivakalouvinakataki e davo sara tu mai na boto ni sauloa, na veivakalouvinakataki ni sucu kei na i vurevure ni tamata. 26 Na veivakalouvinakataki nei tamamu ena sivia na nodra veivakalouvinakataki o ira sa liu vei au me yacova na veiulunivanua e sega ni mudu. Era na tiko ga ena ului Joseva, ena boto ni ului koya sa wasei mai vei ira na tacina. 27 "O Penijamini sa olifa daukata; ena mataka ena vesuka na kena, ena yakavi ena wasea nai toki ni valu." 28 O ira kece oqo na yavusa e tinikarua ni Isireli, kei na veika oqori sa vosa kina vei ira o tamadra. Sa vakalouvinakataki ira – sa vosa vakalouvinakataki ira me vaka na nona veivakalouvinakataki.

Na Mate Nei Jekope Kei Na Nona Bulu

29 Sa vakarota vei ira ka tukuna, "Au na lako yani vei ira na noqu, mo ni buluti au vata kei ira na tamaqu ena qaravatu sa tiko ena vanua nei Efironi na Itaiti, 30 "Ena qaravatu mai Makapila e Mamire ena vanua o Kenani, na vanua sa volia o Eparaama mai vei Efironi na Itaiti, me nona i bulubulu. 31 "E kea era sa buluti Eparaama kina kei Serai na watina. Sa bulu talega e kea o Aisake kei Rapeka na watina, e kea talega au buluti Lia kina. 32 "Na vanua kei na qaravatu, sa voli mai vei ira na luvei Eci." 33 Ni sa oti na nona vakaroti ira tiko na luvena – sa biuta mai vakavinaka na yavana ki na nona i mocemoce, ka ceguva nai otioti ni nona i cegu, sa qai lako yani vei ira na nona.

Vakatekivu 50

1 Sa tekiduru yani o Joseva ena matai tamana ka tagi vakalevu, ka qai reguci koya. 2 Sa vakaroti ira na nona vuniwai o Joseva, mera ovica ka vakasuluma vinaka na yagoi tamana. Era sa maroroya vinaka na yagoi Isireli na vuniwai. 3 Sa maroroi me vasagavulu na siga me vaka na kena i vakarau ni yago ni mate sa vakasulumi vakaoqo; o ira na Ijiptia era sa vakalolokutaki Isireli me vitusagavulu na siga. 4 Ni sa oti na veisiga ni vakaloloku, sa veivosaki o Joseva kei na vuvale nei Fero ka vaka: "Kevaka au sa kune loloma ena mata i Fero, me da veivosaki ni sa vakarorogo tiko o Fero. 5 'O tamaqu sa vakavuna na noqu bubului vua, ka tukuna: "Raica, au na mate ena noqu i bulubulu au sa kelia oti ena vanua o Kenani, mo buluti au ga mai kea."Oqo, au sa kerea me'u lako cake ka buluti tamaqu, au na lesu tale mai.'" 6 Sa sauma mai o Fero, "Lako cake, ka la'ki buluti tamamu me vaka sa cakava o koya mo bubului kina." 7 Sa lako cake o Joseva ka me buluti tamana, sa lako vata kei ira na tamata i Fero, o ira na qase ni nona vale, kei ira kece na qase e Ijipita, 8 sa vakatalega kina na vale nei Joseva, oiratou na tacina kei na vuvale kece nei tamana. O ira ga na lalai kei na manumanu susu kece, era sa tiko ga e Koseni. 9 Era sa lako vata kei Joseva na veiqiqi vakavale kei na kena ose. Sa dua sara nai lakolako levu. 10 Era sa lako mai ki na vanua ni butu sila e Etadi (ena tai ka dua ni Joritani). Era sa cakava e dua na so mate levu e kea. Era sa tiko me vitu na siga me vakalolokutaki tamana. 11 O ira e Kenani, ni ra sa raica na so mate levu ena vanua ni butu sila oqo, era sa tukuna, "Oqo na nodra so mate levu na Ijipita. Sa vakayacani kina me Epeli Misiraimi, oqo ena tai ni Joritani. 12 Era sa vakayacora na luvena, me vaka ga sa vakarota vei ira o Isireli na tamadra. 13 Ni o ira na luvena era sa kauti koya ki Kenani ka buluti koya ena qaravatu mai Makapila, e Mamire, na vanua e a volia o Eparaama mai vei Efironi na Itaiti, me nona i bulubulu. 14 Ni sa buluti tamana oti, sa lesu tale ki Ijipita o Joseva, o koya kei iratou na tacina, kei ira kecega sa lako vata mai kei koya.

Sa Cakava Na Veivakadeitaki O Joseva Vei Iratou Na Tacina

15 Ni ratou sa raica na taci Joseva ni sa mate o tamadratou, e ratou sa veitalanoa ka vaka: "Oqo ena cati kedatou o Joseva, baleta na veika ca e datou a cakava vua." 16 E ratou sa vakauta e dua nai tukutuku vei Joseva ka vaka: "Ni se bera ni mate na tamamu sa vakarota ka tukuna, 17 'Mo dou tukuna vei Joseva, "Mo vosota na nodratou caka cala na tacimu kei na nodratou i valavala ca, ni ratou sa caka cala vei iko."' Mo vosota na nodratou caka cala na tamata ni Kalou nei tamamu." Sa tagi o Joseva, ni ratou sa tukuna vua na veika oqo. 18 E ratou sa tagi talega na tacina ka cuva e matai Joseva ka tukuna, "Keitou sa nomuni tamata." 19 Sa tukuna vei iratou o Joseva, "Dou kua ni rere, au Kalou beka o au? 20 "Vei kemudou, dou sa caka ca vei au, ia, na Kalou sa nakita na ka vinaka vei kemudou, me yaco kina na bula ena siga oqo, me ra vakabulai kina e levu na tamata. 21 "O koya oqo, mo dou kua ni rere kina, ni'u sa tu me'u vakarautaka vei kemudou kei ira na lalai." Sa vakaitaukeitaki iratou; ena nona sa vosa vinaka tikoga vei iratou.

Sa Mate O Joseva

22 Sa tiko ga e Ijipita o Joseva kei ira na vuvale nei tamana. Sa bula tiko o Joseva me dua na drau ka tini na yabaki. 23 O Joseva sa raica nai katolu ni tabatamata nei Ifereimi. O ira talega na luvei Makiri na luvei Manasa era sa dau kau mai vei Joseva. 24 Sa tukuna o Joseva vei iratou na tacina, "Raica au sa na mate, na Kalou ena sikovi kemudou mai, ka na kauti kemudou ki na vanua sa bubului kina vei Eparaama, vei Aisake, kei Jekope talega." 25 Sa cakava o Joseva vei ra na luvei Isireli me ra bubului ka vaka: "Ni sa sikovi kemuni mai na Kalou, mo ni qai kauta cake na suiqu ki kea." 26 Sa mate o Joseva ni sa yabaki dua na drau ka tini; era vakasuluma na yagona, ka, biuti koya tiko ena dua na kato ni mate mai Ijipita.

Lako Yani 1

Na Nodra Vakararawataki Na Isireli Mai Ijipita

1 Oqo na yacadra na luvei Isireli era sa lako mai ki Ijipita: na tamata kei na nona vuvale era sa lakovata mai kei Jekope: 2 O Rupeni, Simione, Livai, kei Juta; 3 O Isakari, Sevuloni, kei Penijamini; 4 O Tani, Navitalai, Kata kei Esa. 5 O ira kece na kawa i Jekope sa vitusagavulu na tamata (ni sa tiko rawa mai Ijipita o Joseva). 6 Sa mate o Joseva kei ira na tacina kece kei na kawa tamata o ya. 7 Ia, o ira na luvei Isireli era sa vuavuai ka tubu me lewe levu, era sa tubu me lewe levu sara, ka era tamata qaqa, era sa vakasinaita talega na vanua. 8 Sa tubu cake mai e dua na tui vou e Ijipita ka sa sega ni kilai Joseva. 9 Sa tukuna vei ira na nona tamata, "Mo ni raica oqo, o ira na luvei Isireli era sa lewe levu ka kaukauwa vei keda; 10 "Me da cakacaka mada vakavuku vei ira, ni ra sa lewe levu tiko ka yaco ni sa basika mai na i valu, era sa na to vata kei ira na meca ka valuti keda tale ka lako tani mai na vanua." 11 Era sa vakavuna na cakacaka me ra vakararawataki kina ena nodra oca. Era sa tara vei Fero na veikoro o, Picomi kei Ramisesi. 12 Na levu ga ni nodra vakararawataki, sa vakavuna me ra sa tubu ga kina vakalewe levu. Oqo sa vakatubura talega na nodra rere na Ijipita me baleti ira na luvei Isireli. 13 O ira na Ijipita era sa vakacakacakataki ira na Isireli vakararawa sara. 14 Oqo, sa vakavuna na nodra bula vaka dredre na Isireli—Na cakacaka kecega era sa kitaka sa ka ni oca kei na veivakararawataki. 15 Sa vosa vei ira na dauvakasucu gone o tui Ijipita. Sa dua vei ira o Sifira ka kena i karua o Pua; 16 Sa tukuna vakaoqo: "Ni drau sa vakasucuma e so na Iperiu ka raica ni sa tagane, mo drau qai vakamatea, kevaka e yalewa me bula ga." 17 O ira na dauveivakasucumi oqo, era sa rerevaka na Kalou, era sa sega ni vakayacora me vaka e vakarota na tui, ia era sa vakabulai ira ga na gone tagane sa vakasucumi. 18 Sa kacivi ira na dauveivakasucumi na tui ka tarogi ira, "Na cava sa caka kina oqo, ni ra sa vakabulai na gone tagane?" 19 Era sa tukuna vei Fero, "O ira na Iperiu era sa duidui mai vei ira na Ijipita, ni ra sa vakasucu rawa, ni bera ni yaco yani na daunivakasucu." 20 Sa caka vinaka na Kalou vei ira na dauveivakasucumi, ka era sa tubu ga me lewe levu na tamata ka era sa tamata kaukauwa sara. 21 Sa yaco tiko oqo, baleta ni ra sa rerevaka tiko na Kalou o ira na dauveivakasucumi, ka sa veivakarautaki vei ira na Kalou. 22 Sa solia na i vakaro vei ira na nona tamata o Fero ka vaka: "Me ra vakamatei kece na gone tagane era vakasucumi ka viritaki ki na uciwai, o ira ga na gone yalewa me ra vakabulai."

Lako Yani 2

Sa Sucu O Mosese

1 Sa dua na tagane mai na vale i Livai, sa lako ka taura me watina e dua na goneyalewa luvena e dua na Livai. 2 Sa kunekune sara na goneyalewa oqo ka vakasucuma e dua na gone tagane. Ni sa raica o tinana ni sa mata vinaka na gone, sa qai vunitaki koya me tolu na vula. 3 Ni sa dredre tiko na kena vunitaki na gone, sa botana vinaka e dua na sova e na drega kabi vinaka, ka biuta kina na gone, ka vakacirima yani ki uciwai. 4 Sa tu vakayawa yani o ganena me vakaraica tiko se cava ena yaco vua. 5 Sa lako mai o luvei Fero goneyalewa, me mai sisili e wai. Sa lako voli na nona dauveiqaravi ena bati ni uciwai; sa raica sara na sova ni sa ciri tiko e wai ka sa kaciva na nona dauveiqaravi me kauta mai vua. 6 Ni sa dolava na sova, sa raica e dua na gone ni sa tagi tiko, sa qai lomana vakalevu, ka tukuna, "Oqo sara ga e dua na luve ni Ipiriu." 7 Sa tukuna sara o ganena vei luvei Fero, "O vinakata me lako mai e dua vei ira na yalewa ni Ipiriu me mai qarava vei iko na gone?" 8 Sa tukuna na luvei Fero, "Mo lako," sa lako o ganena ka kauti tinana mai. 9 Sa tukuna na luvei Fero vei tinana, "Kauta na gone ka qaravi koya vinaka ena vukuqu, au na solia na kemu i sau." Sa kauta na gone ka susuga. 10 Sa tubu levu na gone ka sa kau lesu tale vei na luvei Fero yalewa, sa yaco me luvena. Sa vakayacani koya sara o Mosese ka tukuna kina, "Baleta ni'u sa kauti koya tani mai wai."

Sa Dro Ki Mitiani O Mosese

11 Ni sa oti na veika oqo, ena nona sa tubu cake o Mosese me yalomatua mai, sa lako ki vei ira na tacina me raica na nodra vakaocai. Sa raica e dua na Ijipita ni sa kuitataka tiko e dua na Iperiu, e dua vei ira na tacina. 12 Sa veiraiyaki o koya, ni sa sega ni raica e dua, sa vakamatea na kai Ijipita ka buluta ena veinuku. 13 Ni sa lako tale yani ena i ka rua ni siga, e rau sa veivala tiko e rua na Iperiu, sa vosa sara veikoya sa vakavuna na veivala, "Na cava o sa mokuta tiko kina na nomu i tokani?" 14 Sa sauma mai o koya sa veimoku tiko, "O cei sa lewa mo mai vakatulewa vei keirau?" O sa nanuma beka mo mai vakamatei au me vaka o sa vakamatea na kai Ijipita o ya? Sa rere o Mosese ka vaka: "Sa dina, sa kilai na veika oqo!" 15 Sa rogoca o Fero na veika oqo, ka sa vakasaga me vakamatei Mosese. Sa dro o Mosese mai na matai Fero ka la'ki tiko ena vanua vakamitiani; sa la'ki dabe sobu ena dua na mata ni wai. 16 Na bete mai Mitiani sa vitu tiko na luvena yalewa. Era sa lako mai me taki wai, sa taura tiko na wai me ra gunu na manumanu nei tamadra. 17 Era sa lako mai na i vakatawa ka vakasavi ira tani; ia, o Mosese sa tucake mai ka vukei ira na goneyalewa oqo, ena nodra vagunuvi na manumanu. 18 Ni ra sa lako mai vei Rueli na tamadra, sa taro sara yani o tamadra, "Sa vakacava ni oqo o ni sa lako mai vakatotolo e dai?" 19 Era sa sauma mai, "E dua na kai Ijipita sa vukei keimami mai na ligadra na i vakatawa, o koya talega sa vukei keimami ena taki wai, me ra gunu kina na manumanu." 20 Sa tarogi ira na luvena yalewa ka vaka: "Sai vei o koya? Ena cava dou sa biuti koya kina? Me kacivi mai, me mai kana madrai mada." 21 Sa vinaka na yalo i Mosese me ratou tiko vata mada, sa solia na luvena yalewa o Sipora vei Mosese me watina. 22 Sa vakasucuma o Sipora e dua na luvena tagane ka vakayacani koya o Kerisoni ni sa tukuna, "Au sa vulagi tiko ena dua na vanua tani." 23 Sa qai yaco ni sa toso tiko na gauna sa mate na tui mai Ijipita. Era sa tagi vakalevu na Isireli ena vuku ni veivakabobulataki, era sa tabalaka na domodra ka sa lako yani vua na Kalou na nodra tagi ena vuku ni nodra vesuki. 24 Sa rogoca na Kalou na nodra tagi ka sa nanuma na Kalou na Nona veiyalayalati kei Eparaama kei Aisake kei Jekope. 25 Na Kalou sa rai vei ira na luvei Isireli, Na Kalou sa rogoci ira ka vaka io kina.

Lako Yani 3

O Mosese Ena Veikau Sa Kama Tiko

1 O Mosese sa dau vakatawa tiko na manumanu nei Jacoro na vugona, na bete mai Mitiani. Sa kauti ira yani na sipi ki na daku ni vanua liwa, ka lako yani ki Orepi na ulu ni vanua ni Kalou. 2 Sa rairai vua na Agilosi i Jiova ena yameyame ni bukawaqa mai na loma ni vanua tubua. Ni sa rai yani, sa raica ni sa caudre tu na vanua tubua oqo, sa sega ga ni kama yavu. 3 Sa tukuna e lomana o Mosese, "Au na lako mada vakatikitiki me'u raica na ka levu oqo, na cava e sega ni kama yavu kina na veikau lalai oqo." 4 Ni sa raica o Jiova ni sa lako mai vakatikitiki me mai raica voleka, sa kaci mai na Kalou, mai na loma ni vanua sa caudre tiko mai oqo ka vaka: "I Mosese, I Mosese!" sa sauma yani o koya, "Sai au oqo." 5 Sa qai tukuna mai o Koya, "Luvata nai vava mai na yavamu, ni sa tabu na vanua o sa tucake tu kina oqori." 6 Mo kila, "Oi Au na Kalou ni nomu qase o Eparaama, na Kalou nei Aisake, na Kalou nei Jekope." Sa vunitaki koya o Mosese ni sa rere na raica na Kalou. 7 Sa tukuna mai o Jiova, "Au sa raica dina na nodra vakararawataki na Noqu tamata era sa tiko mai Ijipita, ka Au sa rogoca talega na nodra tagi baleti ira na i liuliu ni cakacaka, Ni'u sa kila na nodra rarawa. 8 "Au sa lako sobu mai oqo, Me'u mai sereki ira tani mai na ligadra na Ijipita, ka kauti ira cake mai na vanua o ya, ki na dua na vanua vinaka ka levu, na vanua sa vakadrodroi kina na sucu kei na oni, ki na nodra vanua na Kenani, na Itaiti, na Amoraiti, na Perisaiti, na Ivaiti kei na Jepusaiti. 9 "Mo raica oqo, na nodra tagi na luvei Isireli sa lako cake mai vei Au, ka'u sa raica talega na nodra vakararawataki era sa vakararawataki kina mai vei ira na Ijipita. 10 "Mo lako mai, Me'u talai iko vei Fero, mo la'ki kauti ira mai na Noqu tamata, na luvei Isireli mai Ijipita." 11 Sa vosa mai o Mosese vua na Kalou, "O cei oi au, me'u lako kina vei Fero, me'u la'ki kauti ira tani mai na luvei Isireli mai Ijipita?" 12 Sa sauma mai o Jiova, "Au na tiko vata kei iko. Oqo nai vakatakilakila vei iko, Ni'u sa talai iko: Ni o sa kauti ira tani mai na tamata mai Ijipita, o na qarava na Kalou ena ulunivanua oqo." 13 Sa vosa vua na Kalou o Mosese ka vaka: "Sa dina, ni'u sa lako yani vei ira na luvei Isireli ka tukuna vei ira, 'Na nodra Kalou na nomuni qase sa talai au mai vei kemuni,' Era na taroga mai vei au na yacana?'' Na cava me'u tukuna vei ira?" 14 Sa vosa na Kalou vei Mosese, "SAI AU GA VAKAI AU." "Mo qai tukuna vei ira na luvei Isireli, 'OI AU GA, sa talai iko yani.'" 15 Sa vosa na Kalou vei Mosese, "Mo tukuna vei ira na luvei Isireli: 'O Jiova na nodra Kalou na nomuni qase, na Kalou i Eparaama, na Kalou i Aisake, na Kalou i Jekope, sa talai au vei kemuni, oqo na yacaqu dina sa sega ni mudu, oqo na Kequ i vakananumi me sega ni mudu.' 16 "Mo lako ka vakasoqoni ira na luvei Isireli ka tukuna vei ira, 'O Jiova na nodra Kalou na nomuni qase, na Kalou i Eparaama, na Kalou i Aisake, na Kalou i Jekope, sa basika vei au ka tukuna, "Au sa sikovi kemuni vakaidina oqo, ka raica talega na veika sa caka vei kemuni mai Ijipita; 17 "Ka Au sa tukuna oti, ni'u na kauti kemuni tani mai na veivakabobulataki mai Ijipita ki na vanua o Kenani, na nodra vanua na Itaiti, na Amoraiti, na Perisairi, na Ivaiti, kei na Jepusaiti, ki na vanua sa vakadrodroi kina na sucu kei na oni."' 18 "Era sa na vakarorogo ki na domomu; o na lako mai o iko kei ira na veiliutaki vei kemuni, ka lako vei Fero, ka mo ni tukuna vua, 'O Jiova na nodra Kalou na Iperiu sa lako mai veikeimami, oqo, mo sereki keimami me tolu na siga na neimami lako ki na vanua liwa me vakacaboi soro vei Jiova na neimami Kalou.' 19 "Ia, au vakadinata ni na sega ni sereki kemuni na tui Ijipita oqo, se me dua na liga kaukauwa tale. 20 "Au na dodoka na ligaqu ka samuta Ijipita ena Noqu kaukauwa, ni oti o ya ena qai sereki kemuni mo ni lako. 21 "Au na solia na veitovaki vei ira na Isireli ena matadra na Ijipita; ena yaco ni kemuni sa lako, ena sega ni dua e lako ni liga lala. 22 "O ira na yalewa kece, era na vinakata me ra kauta na siliva, na koula, na i sulu; mo ni qai vakatokara vei ira na luvemuni tagane kei na luvemuni yalewa, o ni na taura rawa vakaukauwa na veika oqo mai vei ira na Ijipita."

Lako Yani 4

Sa Caka Vei Fero Na Veika E Veivakurabuitaki

1 Sa sauma o Mosese ka vaka: "Vakacava kevaka era sa sega ni vakabauti au ka sega ni via rogoca na domoqu; me ra tukuna kina, 'O Jiova sa sega ni rairai vei iko.'" 2 Sa vosa vua o Jiova ka vaka: "Na cava sa tiko oqori e ligamu?" "Na i titoko," sa sauma mai o koya. 3 "Viritaka ki na qele,"sa viritaki ki na qele sa vuki me gata ka sa dro mai kea o Mosese. 4 Sa vosa tale na Kalou vei Mosese, "Mo dodoka yani na ligana ka taura na buina," (sa dodoka yani na ligana ka taura na buina ka sa vuki tale me titoko e ligana), 5 "Me ra vakabauta kina ni o Jiova na nodra Kalou na nomuni qase, na Kalou i Eparama, na Kalou i Aisake, na Kalou i Jekope sa vakatakilai koya vei iko." 6 Sa tukuna tale vua o Jiova, "Biuta na ligamu e vuremu." Sa cakava vaka kina o Mosese, ena gauna sa kauta tani mai kina, sa seka vula ena vukavuka. 7 Sa tukuna tale vua o Jiova, "Biuta tale na ligamu e vuremu." Sa cakava tale vaka kina, ka sa yaco me savasava me vaka ga e liu. 8 "Ena yaco dina vaka kina, kevaka era sa sega ni vakabauti iko, se era sa sega ni via kila na i tukutuku ni matai ni vakatakilakila, me ra sa vakabauta na i tukutuku ni ka sa yaco oqo e ligamu. 9 "Ena yaco kevaka era na sega ni vakabauta nai vakatakilakila e rua oqo, se vakarorogo ki na domomu, mo qai kauta mai na wai mai na uciwai ka sova ki na qele mamaca, na wai oqori ena vuki me dra ena qele mamaca." 10 Sa tukuna vei Jiova o Mosese, "Noqu Turaga au sa sakasaka ena vosa, e sega e liu ka yacova mai na Nomuni sa qai vosa oqo vua na Nomuni tamata; au sa berabera ni vosa ka yame kaka." 11 Sa tukuna vua o Jiova, "O cei sa bulia na gusu ni tamata? Se, o cei sa cakava me ra galu na tamata, me ra vara, me ra rai se mataboko? Sa sega beka ni oi Au, o Jiova? 12 "Mo lako, ka, au na tiko vata kei na gusumu ka vakavulici iko ena ka mo tukuna." 13 Ia, sa tukuna mai o Mosese, "I Jiova, mo ni tala tale e dua o ni sa vinakata me tala." 14 Sa cudruvi Mosese vakaukauwa o Jiova ka sa tukuna kina: "Sa sega beka ni tacimu o Eroni na Livai? Au sa kila ni gusu matata ni vosa o koya. Raica sa lako talega mai o koya me tavaki iko. Ni sa raici iko o koya ena mamarau na yalona. 15 "Mo vosa vua ka biuta na vosa e gusuna, Au na tiko vata na gusumu, Au na tiko vata talega na gusuna, Au na vakavulici iko ena ka mo cakava. 16 "Me nomu gusu ni vosa o koya vei ira na tamata. o koya me vaka na gusu vei iko. 17 "Mo kauta na i titoko oqo e ligamu, mo na vakayagataka me caka kina na i vakatakilakila eso."

Sa Lako Ki Ijipita o Mosese

18 Sa lesu o Mosese vei nona momo o Jacoro ka tukuna vua: "Au kerea mo laivi au me'u lesu tale vei ira na taciqu era tiko mai Ijipita, me'u la'ki raica se era se bula tiko se sega." Sa tukuna o Jacoro vei Mosese, "Mo lako ena vakacegu." 19 Sa vosa vei Mosese o Jiova mai Mitiani, "Mo lesu tale ki Ijipita; o ira kece sa vinakata mo vakamatei, era sa yali yani." 20 Sa vakavodoka na watina kei rau na luvena ki na asa, ka lesu ki na vanua o Ijipita. Sa taura tiko nai titoko ni Kalou e ligana. 21 Sa tukuna o Jiova vei Mosese, "Ni o sa lesu tale ki Ijipita, mo raica ni caka kece nai vakatakilakila e matai Fero, me vaka au sa biuta e ligamu Au na vakayaloqataki koya me kua kina ni sereki ira na Isireli. 22 "Mo tukuna kina vei Fero, 'Sa tukuna vaka oqo o Jiova, "O Isireli sa Luvequ dina, na Noqu ulumatua." 23 "Au sa tukuna vei iko, laivi na Luvequ me lako me mai qaravi Au. Kevaka o sa sega ni via sereki koya, mo kila, Ni'u na vakamatei na luvemu, na nomu ulumatua."'" 24 Sa yaco na gauna, ni rau sa sota kei Jiova, ka sa vinakata me vakamatei koya. 25 Sa taura o Sipora e dua na vatu gata ka ciliva na luvena ka biuta e yavai Mosese ka tukuna, "Mo kila, ni o sa watiqu ena dra vei au!" 26 Sa laivi koya me lako, sa qai tukuna Sipora, "O iko na tagane vakawati ni dra!" — baleta na veicilivi. 27 Sa vosa o Jiova vei Eroni, "Lako ki na vanua liwa mo drau sota kei Mosese." Ni rau sa sota ena ulunivanua i Jiova, mo reguci koya. 28 Sa tukuna o Mosese vei Eroni na vosa kece i Jiova, o koya sa veitalai mai, kei na i vakatakilakila sa vakaroti mai vua. 29 O Mosese kei Eroni e rau sa lako ka vakasoqoni ira kece mai na na qase ni Isireli. 30 O Eroni sa vosataka kece na veika sa vosa kina na Kalou vei Mosese. Sa qai cakava nai vakatakilakila ena matadra na tamata. 31 Era sa vakabauta na tamata; ni ra sa rogoca ni sa talevi ira tale na Nona tamata na Isireli o Jiova, ka sa raica talega na nodra vakararawataki, era sa vakacuva na uludra ka lotu vua.

Lako Yani 5

Na I Matai Ni Sota Kei Fero

1 Sa oti oqo, "E rau sa lako o Mosese kei Eroni ka vosa vei Fero ka vaka: 'Laivi ira na Noqu tamata me ra lako ka Solevu vei Au ena vanua liwa, sa tukuna o Jiova.'" 2 Sa sauma mai o Fero, "O cei o Jiova me'u rogoca na domona ka sereki ira na Isireli me ra lako? Au sa sega ni kilai Jiova ka sega talega ni laivi ira na Isireli me ra lako." 3 E rau sa tukuna, "Na nodra kalou na Iperiu sa rairai oti vei keirau, me keimami lako mada me tolu na siga ki na vanua liwa me vakacaboi soro vei Jiova na neimami Kalou, de qai saumi keimami ena mate ca, se e na i sele i wau." 4 Sa tukuna vei rau na tui Ijipita, "Mosese kei Eroni, na cava drau sa via kauti ira tani kina na tamata mai na nodra cakacaka? Me ra lesu tale ki na veika era sa cakava tiko." 5 Sa tukuna mai o Fero, "Raica era sa lewe levu mai na tamata ena vanua, drau sa qai cakava tale me ra cegu mai na nodra cakacaka!" 6 Ena siga tiko ga o ya sa vakarota o Fero vei ira na i liuliu ni cakacaka kei ira na veiliutaki tiko ka vaka, 7 "Me kua tale ni soli na sasa me ra bulia kina na vatubuli me vaka e liu. Me ra lako sara ga o ira me ra la'ki kumuni sasa mai. 8 "Me ra vakai colacolataki ena i votavota ni vatubuli era sa dau cakava e liu. Me kua ni vakalailaitaki, ni ra sa ka wale; era sa tagi tiko ga ka tukuna tiko, 'Me da lako ka vakacaboi soro ki vua na noda Kalou.' 9 "Me soli vakalevu vei ira na cakacaka me ra cakava tiko, me ra kua kina na veika e lasu." 10 O ira na i liuliu ni cakacaka kei ira na veiliutaki ena cakacaka, era sa lako ka vosa vei ira na tamata ka vaka: "Sa tukuna mai o Fero, 'Au na sega ni soli vei kemuni na sasa. 11 'Mo ni lako ka vakasaqara na sasa ena vanua cava ga o ni na kunea kina; ena sega ni vakamamadataki na nomuni cakacaka.'" 12 Era sa lako yani ki na vanua o Ijipita taucoko me ra vakasaqara mai kina na sasa. 13 Era sa vakatotolotaki mai vei ira na i liuliu ni cakacaka ka vaka: "Mo ni cakava na cakacaka o ni sa daucakava ena veisiga, me vaka ga sa sinai tu na sasa." 14 O ira talega na luvei Isireli era sa veiliutaki, me ra liutaka eso na i wasewase ni cakacaka, era sa totogitaki talega mai vei ira na veiliutaki i Fero, ka ra sa tarogi, " A cava o ni sega kina ni yacova na i yalayala ni cakacaka ena dua na siga me vaka e liu?" 15 Era sa lako mai Fero ka tagi o ira na Isireli sa wasei tu me ra liutaka eso na cakacaka ka vaka: "Ena cava o sa cakacaka kina vakaoqo vei ira na nomuni dauveiqaravi? 16 "Sa sega na sasa e soli vua na nomu tamata, ka ra tukuna vei keimami, 'Cakava na vatubuli! E dina era sa kuitataki na nomuni dauveiqaravi, ia na cala sa tiko vei ira na nomuni tamata." 17 Sa tukuna mai o koya, "O ni sa vucesa ga! O ni sa vucesa ga! O ni sa tukuna tiko kina, 'Me da lako cake ka vakacaboi soro vei Jiova.' 18 "O koya oqo mo ni lako ka cakacaka ni sa sega ni soli vei kemuni e dua na sasa, ia, me kau ga mai na i yalayala ni vatubuli e dodonu me caka ena dua na siga." 19 Era sa raica na luvei Isireli ni sa tarai ira na leqa ni sa tukuni oti vei ira, "Me kua ni lailai na i wiliwili ni nomuni vatubuli me vaka na i yalayala ni dua na siga." 20 Ni ra sa lesu mai vei Fero, era sa mai sota sara kei Mosese kei Eroni, ni rau sa wawa tu me sotavi ira. 21 E rau sa vosa sara vei ira, "Me rai tiko vei kemuni o Jiova ka lewai kemuni ni kemuni sa cakava me keimami sega ni taleitaki mai vei Fero kei mai na matadra talega na nona dauveiqaravi me ra taura kina na i seleiwau me vakamatei keimami." Sa Vakadeitaki Na Nodra Sereki Na Isireli 22 Sa lesu tale vei Jiova o Mosese ka tukuna, "I Jiova, ena cava o ni sa kauta mai kina na leqa vei ira na tamata oqo? Ena cava o ni sa talai au mai kina? 23 "Ni'u sa lako mai vei Fero me'u tukuna na Yacamuni, sa cakava tiko ga na ka ca vei ira oqo: ka o ni sega tiko ga ni sereki ira na Nomuni tamata, ni dodonu oqo."

Lako Yani 6

1 Sa tukuna o Jiova vei Mosese, "Oqo, o na raica na veika Au na cakava vei Fero. Ena liga kaukauwa ena sereki ira kina me ra lako, ena liga kaukauwa ena vakasavi ira kina mai na nona vanua." 2 Na Kalou sa vosa vei Mosese ka tukuna vua: "Oi Au o Jiova. 3 "Au sa vakatakilai Au vei Eparama, vei Aisake, vei Jekope, Ni'u sa Kalou kaukauwa, ia na yaca o Jiova sa sega ni kilai vei ira. 4 "Au sa vakadeitaka na Noqu veiyalayalati vei ira, Me'u solia vei ira na vanua o Kenani na vanua ni Sokalou era sa vulagi kina. 5 "Au sa rogoca talega na nodra tagi na luvei Isireli, o ira sa vakabobulataki tiko mai Ijipita, Au sa nanuma talega na Noqu veiyalayalati. 6 "O koya oqo, mo tukuna vei ira na luvei Isireli, 'ni oi Au o Jiova, Au na kauti kemuni tani mai na veivakaocai mai Ijipita, Au na vakabulai kemuni mai na veivakabobulataki, Au na voli kemuni lesu mai ena liga sa dodo tiko ena lewa cecere. 7 'Au na tauri kemuni me vaka na Noqu Tamata, Au na nomuni Kalou. o ni na qai kila ni sai Au o Jiova na nomuni Kalou o Koya sa kauti kemuni tani mai na veivakabobulataki mai Ijipita. 8 'Ka Au na kauti kemuni mai ki na vanua Au sa yalataka Me'u solia vei Eparama, vei Aisake, vei Jekope, ka Au na solia vei kemuni mei votavota: Oi Au o Jiova.'" 9 Sa tukuna na veika oqo o Mosese vei ira na Isireli; ia, era sa sega ga ni via rogoci Mosese baleta na kakavorovoro ni yalo kei na nodra vesuki tu ena veivakararawataki levu. 10 Sa vosa o Jiova vei Mosese ka vaka, 11 "Mo lako vei Fero na tui Ijipita, me sereki ira na luvei Isireli me ra lako." 12 Sa vosa o Mosese ena mata i Jiova ka vaka: "Era sa sega ni rogoci au na luvei Isireli, me na qai rogoci au vakacava o Fero, ni sa sega ni cili na tebenigusuqu?" 13 Sa vosa o Jiova vei Mosese kei Eroni ka solia veirau e dua nai vakaro, ena vukudra na luvei Isireli kei Fero na tui Ijipita, me ra kau tani mai na luvei Isireli mai na vanua o Ijipita.

Na Vuvale Nei Mosese Kei Eroni

14 Oqo o ira nai liuliu ni vuvale nei dui tamadra: o ira na luvei Rupeni, na ulumatua nei Isireli, o Anoki, o Palu, o Esironi kei Kami, oqo na vuvale nei Rupeni. 15 O ira na luvei Simione oqo: Jemueli, Jamini, Qada, Jakini, Soa kei Saulu na luvena e dua na yalewa ni Kenani. Oqo o ira na luvei Simione. 16 Oqo na yacadra na luvei Livai, o Keresoni, o Loata, kei Merari. Na yabaki taucoko nei Livai e dua na drau tolusagavulu ka vitu na yabaki. 17 Na luvei Keresoni o Libini kei Simi me vaka na nodrau vuvale. 18 Na luvei Koata o Imarani, o Isari, o Epironi kei Usaieli. Na yabaki taucoko nei Koata e dua na drau tolusagavulu ka tolu na yabaki. 19 Na luvei Merari o Maeli kei Musi. O ira oqo na vuvale nei Livai me vaka na nodra dui tabatamata. 20 O Amarami sa tauri Jokaveti me nona, na ganei tamana me watina; o Jokaveti sa vakasucumi Mosese kei Eroni. Na yabaki ni bula taucoko nei Amarami sa dua na drau tolusagavulu ka vitu na yabaki. 21 Na luvei Isari o Kora, o Nefeki kei Sikiri. 22 Na luvei Usaieli o Misieli, Elisafani, kei Siciri. 23 Sa tauri Ilisapeci o Eroni me watina, na luvei Amenatave, na ganei Nasoni. Sa vakasucumi Natapi, Abaiu, Iliesa kei Itamari. 24 Na luvei Kora, o Aseri, o Elikana, o Abia-safi: o ira oqo na kawa nei Kora. 25 O Iliesa na luvei Eroni sa taura ki vei koya e dua na luvei Putieli me watina. Sa sucu mai kina o Finaisi. Oqo o ira kece nai liuliu vakavuvale vakalivai me vaka na nodra i tuvatuva. 26 Oqo ga o Eroni kei Mosese, o irau sa vosa kina na Kalou, "Me rau kauti ira tani mai na luvei Isireli mai na vanua o Ijipita me vaka na nodra tamata i valu." 27 O ira oqo sa vosa vei Fero na tui Ijipita, me kauti ira tani mai Ijipita na luvei Isireli. Oi rau tiko ga oqo na Mosese kei Eroni.

O Eroni Na Gusu Ni Vosa Nei Mosese

28 Sa qai yaco ni sa vosa o Jiova vei Mosese ena vanua o Ijipita, 29 Sa vosa o Jiova vei Mosese ka vaka: "Oi Au o Jiova, mo vosa vei Fero na tui Ijipita, tukuna vua na veika Au sa tukuna vei iko." 30 Sa vosa o Mosese vei Jiova, "Raica au sa tebenigusu sega cili, me rogoci au vakacava o Fero?"

Lako Yani 7

1 Sa vosa o Jiova vei Mosese ka vaka: "Au sa buli iko oti mo vaka na Kalou vei Fero, kei Eroni na nomu parofita. 2 "Mo tukuna kece na veika au sa vakarota vei iko. O Eroni na tacimu ena vosa vei Fero me vakatalai ira kece na luvei Isireli me ra lako tani mai na vanua. 3 "Au na vakaukauwataka na yaloi Fero, ka Au na vakalevutaka nai vakatakilakila kei na vei ka era kurabui kina na kai Ijipita. 4 "O Fero ena sega ni rogoci iko, me rawa ni tarai Ijipita kina na Ligaqu, ka kauti ira tani mai na Noqui valu kei ira na Noqu tamata na luvei Isireli mai na vanua o Ijipita ena lewa kaukauwa. 5 "Era na kila kina na Ijipita ni sai Au o Jiova, Ni'u sa dodoka yani na ligaqu vei Ijipita me'u kauti ira tani mai na luvei Isireli mai vei ira." 6 E rau sa cakava vaka kina o Mosese kei Eroni me vaka sa vakaroti rau kina o Jiova. 7 Sa yabaki walusagavulu o Mosese ka sa yabaki walusagavulu ka tolu o Eroni, ni rau sa la'ki vosa vei Fero. Na I Titoko Veivakurabuitaki Nei Eroni 8 Sa vosa vei Mosese kei Eroni o Jiova ka vaka: 9 "Ni sa vosa vei kemudrau o Fero, me tukuna kina, 'Drau vakaraitaka mada e dua nai vakatakilakila,' mo qai tukuna vei Eroni, 'Taura na nomu i titoko ka viritaka e mata i Fero, ka ena yaco me gata.'" 10 E rau sa lako o Mosese kei Eroni vei Fero ka e rau sa cakava me vaka sa tukuna vei rau o Jiova me rau tukuna. Sa viritaka o Eroni na i titoko ena mata i Fero kei ira na nona dauveiqaravi, ka sa vuki me gata. 11 O Fero talega sa kacivi ira na nona tamata vuku, na dauvakatevoro, na daucakamana e Ijipita, era sa cakava talega na ka e rau sa cakava o Mosese ena marau. 12 Era sa viritaka ki na qele na nodra i titoko ka era sa gata mai. Ia, nai titoko ga i Eroni sa tiloma kece na nodra i titoko. 13 Sa qai kaukauwa ga na yaloi Fero, ka sa sega ni via vakarorogo vei rau o Mosese kei Eroni me vaka sa tukuna oti o Jiova.

Na I Matai Ni Totogi: Sa Vuki Na Wai Me Dra

14 Sa tukuna o Jiova, vei Mosese: "Sa baci yalo kaukauwa tale o Fero, sa bese ni laivi na tamata me ra lako. 15 "Lako vei Fero ena mataka lailai, ni sa lako ki wai o koya, mo tucake tu mai bati ni wai mo sotavi koya; mo kauta tiko na i titoko e ligamu. 16 "Mo tukuna vua; 'O Jiova na nodra Kalou na Iperiu sa talai au mai oqo vei iko me'u tukuna, "Mo laivi ira na Noqu tamata me ra lako ka qaravi Au ena vanua liwa," me yacova mai oqo, o se sega ga ni via rogoca e dua na ka! 17 'Sa tukuna o Jiova, "Ena ka oqo o na kila kina ni sai Au o Jiova. Au na samuta na wai ena i titoko ka ena vuki na wai me dra. 18 "Na ika era tiko ena loma ni wai era na mate kece, ena boica na wai, era na bese ni gunu wai mai kina o ira na Ijipita."'" 19 Sa vosa vei Mosese o Jiova, "Mo tukuna vei Eroni, 'Taura na i titoko e ligamu ka dodoka yani na ligamu ki na wai e Ijipita kei na kena vei sala ni wai na uciwai, na tobu talega kei na vanua kecega sa tu kina na wai sa na vuki me dra, ena vanua taucoko e Ijipita, ena bilo kau kei na bilo vatu.'" 20 E rau sa cakava o Mosese kei Eroni me vaka na i vakaro i Jiova. Sa laveta na i titoko ka samuta na wai ena mata i Fero kei ira na nona dauveiqaravi. Sa vuki na wai kece me dra. 21 Era sa mate na ika kecega, sa bona mai na wai, era sa sega ni rawa ni gunuva na wai o ira na Ijipita. Sa dra kecega na wai ena vanua. 22 Era sa cakava talega vakakina na kai Ijipita ena mamarau; sa qai yalo kaukauwa cake ga o Fero, ka sa sega ni via vakarorogo ki vei Mosese kei Eroni me vaka nai vakaro i Jiova. 23 Sa tucake o Fero ka lesu ki nona vale ni sa sega ni via vakayavalati ena dua na ka. 24 Era sa kelikeli na Ijipita me vakasaqaqara wai me ra gunu kina. Ni ra sa sega ni gunu rawa mai na uciwai. 25 Sa oti e vitu na siga ni sa samuta na veiuciwai o Jiova.

Lako Yani 8

Nai Karua Ni Totogi: Na Boto

1 Sa vosa vei Mosese o Jiova, "Lako vei Fero ka tukuna oqo vua; 'Sa tukuna o Jiova, "Mo laivi ira na Noqu tamata me ra lako, me ra la'ki qaravi Au. 2 "Kevaka o sa bese, Au na samuta na vanua ena boto. 3 "Na uciwai ena kauta mai na boto ena i wiliwili e sega ni wili rawa, era na lako cake yani ki nomu vale, ena rumu ni moce, ki na nomu i mocemoce sara, ki na nodra veivalevale kece na nomu dauveiqaravi, ira na nomu tamata, ki na lovo ni vakasaqa kei na kena veleti bilo kece. 4 "Era na lako cake yani vei iko na boto, vei ira na nomu tamata, vei ira na nomu veiqaravi talega."'" 5 Sa vosa o Jiova vei Mosese, "Tukuna vei Eroni, 'Me dodoka yani na i titoko e ligana e na vei sala ni wai, na uciwai, na tobu ka vakavuna me ra lako cake mai na boto e Ijipita taucoko.'" 6 Sa cakava vakakina o Eroni, ka era sa lako cake mai na boto e Ijipita taucoko. 7 O ira na daunicakamana e Ijipita era sa vakamurimuria talega na veika e rau sa cakava o Mosese kei Eroni ka era sa lako talega mai na boto e Ijipita. 8 O Fero sa kacivi Mosese kei Eroni ka tukuna, "Drau vakamasuti Jiova me kauta tani mai vei au na boto, mai vei ira talega na noqu tamata; au na qai sereki ira na tamata me ra lako ka qaravi Jiova." 9 Sa tukuna o Mosese vei Fero, "Mo ciqoma na dina ni vosa oqo, o ya, ni'u na ia na veisorovaki vua na Kalou ena vukumu, ena vukudra talega na nomu tamata kecega, me ra vakarusai na boto kecega mai vei iko kei na nomu veivale, ka me ra tiko ga mai na uciwai." 10 Sa tukuna mai o Fero, "Ni mataka," sa sauma o Mosese, "Sa na yaco me vaka na nomu vosa, o na kila talega kina ni sa sega tale e tautauvata kei Jiova na neimami Kalou. 11 "O ira na boto era na lako tani mai vei iko, mai na nomu vale, mai vei ira na nomu dauveiqaravi, mai vei ira na nomu tamata, era na tiko ga mai na uciwai." 12 E rau sa lako tani mai vei Fero o Mosese kei Eroni. Sa tagi vua na Kalou o Mosese me baleta na boto sa tu oqo ena vuku i Fero. 13 Sa vakayacora o Jiova me vaka na vosa i Mosese ka era sa mate na boto mai na veivale, mai na veimata ni vale, e na taudaku talega ni vale. 14 Era sa bini vata ka sa bona na vanua taucoko. 15 Ni sa raica o Fero ni sa dua na veivakacegui levu, sa vakayalokaukauwataki koya ka sega ni via rogoci Mosese kei Eroni me vaka sa vosa kina o Jiova.

Na I Katolu Ni Totogi: Na Kutu

16 Sa vosa vei Mosese o Jiova, "Me tukuna vei Eroni, 'Dodoka yani na nomui titoko ka samuta na qele, me basika kina na kutu ena vanua taucoko o Ijipita.'" 17 E rau sa cakava vaka kina. Sa dodoka na ligana kei nai titoko ka samuta na qele, sa basika na kutu vei ira na tamata kei ira na manumanu. Na kuvunisoso kece sa vuki me kutu e na vanua taucoko e Ijipita. 18 Era sa cakava vaka kina na kai Ijipita ka sa sega ni yaco. Sa kutu kecega na tamata kei na manumanu. 19 Era sa tukuna vei Fero na daucaka mana, "Oqo, sa liga ga ni Kalou." Sa qai yalo levu ga o Fero, ka sa sega ni via vakarorogo vei Mosese kei Eroni me vaka sa tukuna o Jiova.

Na I Ka Va Ni Totogi: Na Lago

20 Sa tukuna o Jiova vei Mosese, "Mo lako vei Fero ena mataka lailai ni sa lako mai wai. Mo tukuna vua, 'Sa vosa vaka oqo o Jiova: "Mo laivi ira na Noqu tamata me ra lako ka mai qaravi Au. 21 "Kevaka e sega o Jiova ena vakataki koya ena tala mai na lago vei iko, vei ira na nomu dauveiqaravi, vei ira na nomu tamata kina nomu vale. Na nodra vei vale kece na kai Ijipita sa na sinai ena lago kei na veivanua kecega era tu kina. 22 "Ena siga o ya, au na tawasei Koseni tani kina, na vanua era sa tiko kina na noqu tamata, ena sega ni vuka ki kea e dua na lago. Me rawa kina ni o kila, ni sai Au o Jiova sa tiko ena loma donu ni vanua. 23 "Au na cakava me duidui o ira na Noqu kei ira na nomu, ena yaco na i vakatakilakila oqo ena siga ni mataka."'" 24 Sa vakayacora vakakina o Jiova. Era sa lako mai na qele ni lago vavaku ki na vale i Fero, ki na nodra vale na dauveiqaravi, ki na vanua taucoko o Ijipita. Sa vakacacani vakalevu na vanua ena vuku ni lago. 25 Sa kacivi Mosese kei Eroni o Fero ka tukuna vei rau, "Mo ni lako ka vakacaboi soro vei Jiova." 26 Sa tukuna mai o Mosese, "Sa sega ni dodonu me caka oqori, ni keimami na vakacabora tiko na nodra ca na kai Ijipita vei Jiova na neimami Kalou. Kevaka keimami sa cakava oqo e matadra, era na sega beka ni vakaviriki keimami ena vatu? 27 "Keimami na lako tu, me tolu na siga ki na vanua liwa ka vakacaboi soro vei Jiova na neimami Kalou me vaka sa vakarota vei keimami." 28 Sa tukuna mai o Fero, "Au sa solia mo ni lako, mo ni lako ka vakacaboi soro vei Jiova na nomuni Kalou ena vanua liwa; mo ni kua ga ni lako vakayawa, drau veisorovaki talega ena vukuqu." 29 Sa tukuna tale mai o Mosese, "Au na lako tani vakaidina mai vei iko, au na kerei Jiova me ra lako tani na lago ni mataka mai vei Fero, mai vei ira talega na nona veiqaravi, kei ira na nona tamata. Me kua ga ni cakacaka vakailasu o Fero, me sogoti ira tale na tamata ena nodra la'ki vakacaboi soro vei Jiova." 30 Sa lako tani o Mosese mai vei Fero ka la'ki masuti Jiova. 31 Sa cakava o Jiova me vaka na vosa nei Mosese. Sa vakayalia o Jiova na lago kece mai vei Fero, mai vei ira na dauveiqaravi, mai vei ira na tamata. Sa sega tale ni vo e dua. 32 O Fero, sa baci vakaukauwataka na yalona; ka sega ni via laivi ira na Isireli me ra lako.

Na I Ka Lima Ni Totogi: Na Mate Ca Vei Ira Na Manumanu Susu

Lako Yani 9

9 Sa vosa tale o Jiova vei Mosese, ka vaka: "Tucake vakamataka lailai, ka tu ena mata i Fero ka tukuna vua, 'Sa tukuna vakaoqo o Jiova na nodra Kalou na Iperiu. "Mo laivi ira na Noqu tamata me ra lako, me ra la'ki qaravi Au. 2 "Kevaka o sa bese ni sereki ira, ka via vesuki ira tikoga, 3 "Rogoca, na ligai Jiova ena tara na nomu bulumakau, na nomu ose, na nomu asa, na nomu kameli, na nomu bulumakau ni cakacaka kei na nomu sipi—Ena dua na kedra mate ca sara. 4 "O Jiova ena cakava e dua na veivakaduiduitaki mai na nodra manumanu susu na Isireli mai na nodra na Ijipita. Ena sega ni dua e mate mai na nodra na luvei Isireli."'" 5 O Jiova sa biuta e dua na kena gauna, "Ni mataka, ena cakava o Jiova na veika oqo ena vanua." 6 Sa cakava dina na veika oqo o Jiova ena siga ka tarava. Era sa mate na manumanu e Ijipita, ia, na nodra na luvei Isireli sa sega. 7 Sa vakatataro o Fero, ka sa dina, ni sa sega ni mate e dua na nodra manumanu na Isireli. Sa qai kaukauwa ga mai na yalo i Fero ka sa sega ni laivi ira na Isireli me ra lako.

Na I Ka Ono Ni Totogi: Na Bo

8 O Jiova sa vosa vei Mosese kei Eroni ka vaka, "Drau taura na dravusa mai na lavo ka solia vei Mosese me kaburaka yani ki lomalagi ena mata i Fero. 9 "Ena yaco me kuvu ena vanua taucoko o Ijipita, oqori ena vakavuna na bo me ra kacabote ca sara vei ira na tamata yadua kei na manumanu e Ijipita." 10 E rau sa taura na dravusa mai na lovo ka tu ena mata i Fero, sa qai kaburaka o Mosese vaka ki lomalagi. Sa yaco me ra bo dra kece na kai Ijipita kei na kena manumanu talega. 11 Era sa sega ni tu rawa e matai Mosese o ira na daucaka mana baleta na bo sa tu vei ira kei ira kece na Ijipita. 12 O Jiova sa vakayaloqataki Fero tale, ka sa sega ni via vakarorogo, me vaka sa vosa kina vei Mosese o Jiova.

Na I Ka Vitu Ni Totogi: Na Mate Veitauvi – Uca Cevata

13 Sa vosa o Jiova vei Mosese, "Mo yadra vakamataka ka tu ena mata i Fero ka tukuna vua, 'Sa tukuna vakaoqo o Jiova na nodra Kalou na Iperiu, "Laivi ira na Noqu tamata me ra lako ka qaravi Au, 14 "Ena gauna kece oqo, au na tala na noqu veimate ca kecega me tara na yalomu, kei na nodra na nomu dauveiqaravi, kei ira na nomu tamata, mo kila kina ni sa sega e dua e tautauvata kei Au e vuravura. 15 "Oqo, kevaka Au sa dodoka na ligaqu ka tarai iko kei ira na nomu tamata ena mate ca, o ni na yali dina mai vuravura. 16 "Oqo dina na i naki ni noqu vakaturi iko cake, me rawa Ni'u vakaraitaka na noqu kaukauwa vei iko, me vakatakilai yani na yacaqu e vuravura taucoko. 17 "Ia, oqo, o se vakacerecerei iko tikoga vei ira na noqu tamata, ena nomu sega ni via sereki ira. 18 "Mo kila, ni mataka ena gauna vata ga oqo, au na vakatauca mai na uca cevata e se bera vakadua ni tau eke mai na gauna e dua kina na vanua, me yacova oqo. 19 "Oqo mo na vakasoqona rawa mai na manumanu era sa tu ena nomu i teitei, ni uca cevata oqo ena lutuki ira kece na manumanu kei na tamata e tu e tautuba, era na mate kina."'" 20 O ira kece sa rerevaka na vosa i Jiova, ena kedra maliwa na dauveiqaravi i Fero kei na nona manumanu, e ra sa dro kece ki na nodra veivale. 21 O ira kece sa beca na vosa i Jiova, era sa tu ga e tuba kei na nodra manumanu. 22 Sa tukuna o Jiova vei Mosese, "Dodoka yani na ligamu vaka ki lomalagi, me tau mai na uca cevata ki na vanua taucoko e Ijipita, vei ira na tamata, na manumanu, na veika kece sa tei e na vanua taucoko e Ijipita." 23 Sa dodoka yani na i titoko o Mosese vaka ki lomalagi; o Jiova sa vakatauca mai na kurukuru kei na uca cevata kei na bukawaqa ki na qele. Sa vakatauca o Jiova na uca cevata ena vanua o Ijipita. 24 Sa tau mai na uca cevata kei na bukawaqa, e rau sa veiwaki vata, era sa rui bibi sara, ka sa sega ni bau kune vakadua e Ijipita mai na gauna e tauyavutaki kina. 25 Sa ravuta na vanua taucoko e Ijipita, o ira kece sa tiko e tuba, na tamata kei na manumanu; na vei ka talega sa tei kei na vei vunikau kecega sa bula. 26 Sa sega ga e Koseni, na vanua era sa tiko kina na luvei Isireli. 27 Sa talatala o Fero me lako mai o Mosese kei Eroni ka tukuna vei rau. "Au sai valavala ca, ka sa dodonu o Jiova, era sa caka ca sara na noqu tamata. 28 "Mo masuti Jiova, me kua tale ni dua na ka vakaoqo, na kurukuru kei na uca cevata, me sa rauta, au na sereki kemuni, me kua tale ni dua e tiko." 29 Sa tukuna vua o Mosese, "Ni'u sa lako tani mai na vanua, au na dodoka na ligaqu vei Jiova, ena mudu na kurukuru kei na uca cevata ka mo ni na kila ni sa nei Jiova na vuravura. 30 "Ia, o iko kei ira na nomu dauveiqaravi, au sa kila ni o ni sa sega ni via rerevaki Jiova." 31 Na vuata tau mada sa vakacacani kei na kena e tubu vou mai. 32 Na witi kei na sila vuti, sa sega ni vakacacani kei na kena e tubu vou mai. 33 Sa lako tani o Mosese mai vei Fero ka dodoka yani na ligana vei Jiova, ka sa mudu na kurukuru kei na uca cevata, ni sa sega tale ni tau mai ki vuravura. 34 Ni sa raica o Fero ni sa mudu na kurukuru kei na uca, sa qai valavala ca vakalevu tale; sa vakaukauwataka tale na yalona o koya kei ira na nona dauveiqaravi. 35 Sa kaukauwa sara ga na yalo i Fero; sa sega ni via sereki ira na luvei Isireli me ra lako, me vaka sa vosa kina o Jiova mai vei Mosese.

Lako Yani 10

Na I Kawalu Ni Totogi: Na Vodre

1 Oqo o Jiova sa vosa vei Mosese ka vaka: "Mo lako vei Fero: Ni'u sa vakaukauwataka na yalona kei na yalodra talega na nona dauveiqaravi, Me'u na vakaraitaka kina na Noqu vakatakilakila e matana, 2 "Mo rawa ni tukuna vei ira na luvemu, na luvedra na luvemu na veika lelevu. Au sa cakava vei ira mai Ijipita kei nai vakatakilakila kece Au a cakava vei ira, mo kila Ni'u sa Kalou." 3 E rau sa lako mai o Mosese kei Eroni vei Fero ka tukuna vua, "Sa tukuna vaka oqo o Jiova na nodra Kalou na Iperiu: 'Na cava soti na dede ni nomu sega ni via vakamalumalumutaki iko kina vei Au? Laivi ira na Noqu tamata me ra lako ka qaravi Au. 4 'Kevaka, o na sega ni sereki ira me ra lako; mo kila ena siga ni mataka Au na kauta mai kina na vodre ki na nomu vanua. 5 'Era sa ubi vuravura ka ena sega ni dua e raica rawa na vanua; era na kania na ka kecega sa vo mai na veika sa vakavoca na uca cevata, era na kania kecega na vei vunikau kecega sa tubu cake mai na vanua. 6 'Era na vakasinaita na nomu veivale, na nodra veivale na nomu dauveiqaravi, na nodra veivale na kai IjipitaOoqo era se sega ni raica na tamamuni se tamadra na tamamuni se mai na siga era basika kina e vuravura me yacova mai oqo.'" Sa vuki ka gole tani mai vei Fero. 7 Sa vosa vei Fero o ira na nona dauveiqaravi. "Na cava soti na dede ni nodra mai voto ni moli tiko kina vei keda o ira oqo? Laivi ira me ra lako, me ra la'ki qaravi Jiova na nodra Kalou, o sa sega tiko ni kila ni sa vakarusai oti o Ijipita?" 8 E rau sa kau tale mai o Mosese kei Eroni vei Fero ka tukuna vei rau, "Ni lako ka qaravi Jiova na nomuni Kalou, ia o cei vei ira oqo ena lako?" 9 Sa sauma o Mosese ka vaka, "Keimami na lako vata kei ira na gone kei na qase; na luvei keimami tagane kei na yalewa, na neimami manumanu, keimami na lako ka ia na Solevu vei Jiova." 10 Sa tukuna vei ira o Fero, "Me tiko vata kei kemuni o Jiova, ni'u sa laivi kemuni me lako kei ira na lalai oqo mo ni lako! Mo ni qarauna na ca sa liu tiko vei kemuni. 11 "Mo ni lako oqo, oi kemuni sa tamata bula, ka qaravi Jiova, ni sai koya ga oqo na ka o ni sa gadreva." Era sa cemuri mai na mata i Fero. 12 Sa vosa vei Mosese o Jiova ka vaka: "Dodoka yani na ligamu vaka ki na vanua o Ijipita, me ra lako mai na vodre ki na vanua o Ijipita, ka kania na veika bula kecega ena vanuaOveika kece sa vakavoca na uca cevata." 13 Sa dodoka na i titoko o Mosese vaka ki na vanua o Ijipita, sa dolava mai o Jiova e dua na cagi tokalau ena vanua, ena siga ka bogi tale. Ni sa mataka mai sa kauta mai na vodre na cagi tokalau oqo. 14 Era sa lako yani na vodre e Ijipita taucoko ka ro ena ka kecega sa kune ena vanua o Ijipita. Era sa vakacaca sara vakalevu; sa sega ni bau vaka tu o ya e liu, ka na sega talega ni vaka o ya ena siga mai muri. 15 Era sa robota na vuravura taucoko ka sa buto kina na vuravura. Era sa kania na veika kecega sa tu ena vanua, na vuata ni veivunikau sa vakavoca mai na uca cevata. Sa sega tale ni vo e dua na ka me drokadroka ena vanua o Ijipita. 16 Sa kacivi rau vakatotolo o Mosese kei Eroni o Fero ka tukuna vei rau, "Au sai valavala ca vei Jiova na nomudrau Kalou, vei kemudrau talega. 17 "Drau vosoti au vakadua mada ga oqo, ka mo drau masuti Jiova na nomudrau Kalou me kauta tani mai vei au na mate oqo." 18 Sa lako tani mai vei Fero, ka sa masuti Jiova. 19 Sa qai vukica o Jiova e dua na cagi kaukauwa mai na ra, ka kauta tani na vodre ki na Wasawasa Damudamu. Sa sega tale ni kune e dua na vodre e na vanua taucoko o Ijipita. 20 O Jiova, sa vakayalokaukauwataki tale, ka sa sega ni via sereki ira na luvei Isireli me ra lako.

Na I Ka Ciwa Ni Totogi: Na Butobuto

21 Sa tukuna o Jiova vei Mosese, "Dodoka yani na ligamu vaka ki lomalagi, me dua kina na butobuto levu e na vanua taucoko e Ijipita. Na butobuto oqo me vakilai." 22 Sa dodoka yani na ligana o Mosese vaka ki lomalagi, ka sa dua na butobuto levu e Ijipita me tolu na siga. 23 Sa sega ni dua me raica rawa tale e dua, se dua me tucake rawa mai nodratou me tolu na siga. o ira kece na luvei Isireli era sa rarama tiko e na vanua era sa tiko kina. 24 O Fero sa kacivi Mosese ka tukuna vua, "Mo lako ka qaravi Jiova, mo biuta tiko ga mai na nomu manumanu, me ra lako talega na gone vata kei iko." 25 Sa sauma vua o Mosese, "Mo solia talega vei keimami nai soro kei na i soro kama, me keimami vakacabora vei Jiova. 26 "Na neimami manumanu susu talega me lako vata kei keimami, me kua ni dua e vo tiko mai. Me keimami kauta baleta me qaravi kina na Kalou, ni keimami sa sega ni kila se cava keimami na qaravi Koya kina, ni keimami sa yaco yani ki kea." 27 Ia, o Jiova sa vakaukauwataka na yalona, ka sa sega ni via sereki ira me ra lako. 28 Sa tukuna mai o Fero, "Mo lako tani mai vei au! Mo lewai iko, mo kua tale ni raica mai na mataqu. Na siga o raica mai kina na mataqu o na mate!" 29 Sa tukuna o Mosese, "O sa vosa vinaka mai, au na sega ni raica tale na matamu."

Lako Yani 11

Sa Vakarogoi Na Nodra Mate Na Ulumatua

1 Sa tukuna o Jiova vei Mosese, "Au na kauta tale mai e dua tale na ka ca levu vei Fero kei Ijipita talega. Ni oti oqo ena qai sereki kemuni. Ni kemuni sa lako tani eke, ena qai sereki kemuni vakaidina o koya. 2 "Mo vosa oqo, ni ra sa vakarorogo tiko na tamata, na tamata yadua, na tagane me kerea mai vua sa tiko voleka vua, na yalewa talega, na siliva kei na koula kei na vei ka era sa buli kina." 3 O Jiova sa solia vei ira na veitokoni ena matadra na Ijipita. Io, o Mosese sa tamata dokai ena vanua o Ijipita, ena matadra na dauveiqaravi i Fero, ena matadra talega na tamata. 4 Sa tukuna o Mosese, "Sa vosa vaka oqo o Jiova: 'Ena bogi levu tutu Au na lako ena kedra maliwa na Ijipita; 5 'O ira kece na ulumatua ena vanua o Ijipita era na mate, mai vei koya na ulumatua nei koya na yalewa dauveiqaravi o koya sa biu tu vakatikitiki kei na ulumatua ni manumanu. 6 'Ena dua na veitagicaki levu e Ijipita, e se sega ni se bau yaco mada ena dua na gauna ka ena sega ni yaco tale ena dua na gauna. 7 'Vei ira na luvei Isireli, ena sega mada ga ni yavala na gusuna e dua na koli vua na manumanu se tamata, mo ni kila kina ni sa cakava o Jiova e dua na duidui ena kedrau maliwa na Ijipita kei na Isireli.' 8 "O ira kece na nomu dauveiqaravi era na lako sobu mai vei au ka cuva sobu vei au ka tukuna, 'Mo lako tani kei ira kece ena muri iko ni oti oqo!' Au na qai lako tani." Sa qai lako tani mai vei Fero ena rarawa levu. 9 Sa tukuna tale o Jiova vei Mosese, "Ena sega ni vakarogoci iko o Fero, me rawa ni vakalevutaki kina na veika ca lelevu ena vanua o Ijipita." 10 O Mosese kei Eroni e rau sa cakava kece na vei ka lelevu oqo ena matai Fero, o Jiova sa vakaukauwataka na yaloi Fero, ka se sega ni laiva me ra lako na luvei Isireli tani mai na nona vanua.

Lako Yani 12

Sa Vakatikori Na Kana Vata Ni Lako Sivia

1 Sa vosa o Jiova vei Mosese kei Eroni ena vanua o Ijipita ka vaka, 2 "Na vula oqo me sai tekitekivu ni veivula, me sa matai ni vula ni dua na yabaki vei kemuni. 3 "Mo vosa vei ira kece na soqosoqo ni Isireli ka vaka: 'E na i ka tini ni siga ni vula oqo, o ira kece na tagane me taura vua e dua na lami, me vaka na vuvale nei tamana, me dua na lami dua na vuvale. 4 'Kevaka sa vuvale lailai, me ra qai veirairai kei na dua tale na vuvale me veiveirauti kina na lami e dua oqori. 5 'Me lami savasava, me tagane ka yabaki dua, mo lewa ga, me sipi se me. 6 'Mo maroroya tiko me yacova na i ka tinikava ni siga ni vula tiko ga o ya. Na i soqosoqo taucoko ni Isireli me ra qai vakamatea ni sa dromu na matanisiga. 7 'Me ra qai taura e so na kena dra ka boroya na duru ruarua ni katuba kei na ulu ni katuba era sa kana tiko kina. 8 'Me ra kania na lewena ena bogi o ya ni sa tavu vinaka, kei na madrai sa sega ni vakaleveni kei na co wiwi me ra kania vata. 9 'Me kua ni laukana droka se saqa vata na wai, me tavu ga ena bukawaqa—na uluna na yavana kei na kena wawa. 10 'Me kua tale ni dua na ka e vo me yacova na mataka, na veika sa vo me qai vakamai, ni sa biu ki na bukawaqa. 11 'Mo ni kana vaka oqo: me vakaivau na tolomuni, me vakaivava rawa na yavamuni, me tiko e ligamuni nai titoko. Mo ni kana sara vakatotolo, oqori na lako sivia i Jiova. 12 'Au na lako curuma yani na vanua taucoko e Ijipita ena bogi ni kanavata, ka Au na samuti ira kece na ulumatua ena vanua o Ijipita, na tamata kei na manumanu; kei ira kecega na Kalou e Ijipita, au na vakatauca na Noqu lewa: Oi au o Jiova. 13 'Na dra sa kemuni vakatakilakila, ena veivale sa boroi tiko kina. Ni'u sa raica na dra, Au na lako sivia na nomuni vale, ka ena sega ni tarai kemuni na veika ca me vakarusai kemuni, ena gauna Au na samuti Ijipita kina. 14 'Na siga oqo me dauvakananumi vei kemuni, mo ni maroroya me kana ni solevu vei Jiova ena nomuni tabatamata kecega. Mo ni maroroya me kana ni solevu ni sa kena lewa me sega ni mudu. 15 'Me vitu na siga mo ni kania na madrai sega ni vakaleveni. Ena matai ni siga me kau laivi kece na leveni mai vale. o koya sa kania na madrai vakaleveni mai na matai ni siga me yacova nai kavitu, na tamata koya me musuki tani mai Isireli. 16 'Ena matai ni siga, me dua na soqoni tabu, ena i kavitu ni siga me dua na soqo ni tabu vei kemuni. Me kua kina na cakacaka ena siga oqo; me ra kana ga na tamata—ena veika ga o ni sa vakarautaka. 17 'Mo ni qarava talega na kana madrai sega ni vakaleveni, ni siga vata ga oqo au sa kauti kemuni tani mai na vanua o Ijipita. Mo ni vakananuma kina na siga oqo ena nomuni tabatamata kecega, ka me sa dua kina na kena lewa me sega ni mudu. 18 'Ena i ka tinikava ni siga ni matai ni vula ena kena yakavi, mo ni kana madrai kina sa sega ni vakaleveni me yacova na i ka ruasagavulu ka dua ni siga ema yakavi. 19 'Ena vitu na siga oqo, me kua kina ni kune e dua na leveni ena nomuni veivale, ena gauna ga sa kune kina e dua ni sa kania tiko na ka vakaleveni, na tamata oqo ena musuki laivi mai na i soqosoqo ni Isireli, veitalia ke vulagi sei taukei. 20 'Mo ni kua ni kania e dua na ka e vakaleveni, ena nomuni i tikotiko me laukana ga kina na madrai e sega ni vakaleveni.'" 21 Sa kacivi ira kece na qase e Isireli o Mosese ka tukuna vei ira, "Mo ni digitaka na lami ena vuku ni nomuni vuvale ka vakamatei na lami ni Lakosivia. 22 "Mo ni taura na Isopi ka tonia ena bilo levu sa tiko kina na dra ka boroya na ulu ni katuba kei na kena duru e rua, me kua ni dua e curu ki tuba ena bogi taucoko ka yacova na mataka. 23 "O Jiova ena lako mai, me samuti ira na Ijipita, ni sa raica na dra ena ulu ni katuba kei na kena duru, o Jiova ena lako sivia ka sega ni vakatara na dauveivakarusai me lako mai ki na nomu vale me samuta. 24 "Mo ni vakananuma na lewa oqo, me nomuni kei ira na luvemuni me sega ni mudu." 25 "Ena yaco na gauna ni o ni sa lako mai ki na vanua sa solia vei kemuni o Jiova, me vaka sa yalataka, mo ni qai dau nanuma na veiqaravi oqo. 26 "Ni ra sa tarogi kemuni o ira na luvemuni, 'Na cava na i balebale ni vei ka oqo?' 27 "Mo ni qai sauma, oqo na Lako sivia i Jiova, 'O koya sa lako sivia na nodra veivale na luvei Isireli mai Ijipita ena gauna sa veivakamatei kina vei ira na Ijipita ka vakabula na noda vuvale.'"Era sa vakacuva na uludra na tamata ka lotu. 28 Era sa lako na luvei Isireli ka vakayacora, me vaka sa vosa kina o Jiova vei Mosese kei Eroni, era sa vakayacora. Nai Katini Ni Totogi: Nodra Mate Na Ulumatua 29 Sa qai yaco, ena lomaloma ni bogi, sa vakamatei ira kece na ulumatua mai Ijipita o Jiova, mai vua na ulumatua i Fero, o koya sa liu sara ki vei koya na ulumatua i koya sa muri sara, kei na ulumatua ni manumanu kecega. 30 Sa tucake o Fero ena bogi, o ira kece na nona dauveiqaravi kei ira kece na Ijipita, sa dua na veitagicaki levu, sa sega ni dua na vale sa vo, na mate sa tiko kece ena veivale.

Na Lako Yani

31 Sa kacivi Mosese o Eroni mai ka tukuna, "Mo ni tucake ka lako tani mai vei ira na noqu tamata, o kemudrau kei ira kece na luvei Isireli, mo ni lako ka qaravi Jiova me vaka o ni sa tukuna tiko. 32 "Mo ni kauta talega na nomuni manumanu me vaka o ni sa tukuna oti, ka lako ka cavuta vei au na veivakalouvinakataki." 33 Era sa veivakamasuti na Ijipita me ra lako tani vakatotolo, ni ra sa tukuna tiko, "Ni vakaidina era na mate kece." 34 Era sa taura na kedra ni se bera ni vakalevenitaki, sa sega na kedra i vaqa ka colata e tabadra. 35 Era sa cakava na luvei Isireli me vaka na vosa i Mosese, ka era sa kerea mai vei ira na Ijipita na veika sa caka ena siliva kei na koula kei na i sulu. 36 O Jiova sa solia na veitokoni vei ira na Isireli ena matadra na Ijipita me ra solia kina na Ijipita na veika era sa vinakata mai vei ira. Era sa taura mai vei ira na Ijipita. 37 Era sa lako na luvei Isireli mai Ramisese ki Sakoca, e ono na drau na udolu na tagane ena yavadra ka sega ni wili kina na gone. 38 E dua talega nai lawalawa levu sa lako cake vata kei ira, na manumanu—sa ka levu na manumanu susu. 39 Era sa vavi keke sega ni vakaleveni ena falawa sa kau mai Ijipita: ni sa sega ni vakaleveni baleta na nodra sa lako vakatotolo mai Ijipita, ka era sa sega ni vakarautaka vakavinaka kina na veika vaka o ya. 40 Na nodra i lakolako na luvei Isireli era sa tiko mai Ijipita sa va na drau ka tolusagavulu na yabaki. 41 Ni sa mai cava na va na drau tolusagavulu na yabaki — ena siga sa mai cava kina—era sa lako tani mai na sotia ni Kalou mai na vanua o Ijipita. 42 Sa dua na bogi ni vakanananu ki vei Jiova ena Nona kauti ira tani mai na Ijipita. Oqo na bogi nei Jiova, na bogi sa vakatabaki dua vei ira na luvei Isireli ena nodra veitabagauna.

Na I Vakaro Ni Lako Sivia

43 Sa tukuna o Jiova vei Mosese kei Eroni, "Oqo na i vakaro ni Lako Sivia, sa tabu ni dua na vulagi me kana kina. 44 "O ira kece na bobula sa voli ena i lavo, ka sa cilivi ira, me ra qai kana kina. 45 "O ira na daulako tu kei ira sa voli na nodra cakacaka me ra kua ni kana kina. 46 "Me laukana ga ena dua na vale: me kua ni kau ki tuba e dua na lewena, me kua ni kamusu na kena sui. 47 "Oqo, me ra maroroya kece o ira nai soqosoqo ni Isireli. 48 "Kevaka e dua na vulagi sa lako tu vata kei kemuni, ka sa via kania na Lako Sivia i Jiova, o ira kece na nona era tagane me ra cilivi. Ka me ra qai lako voleka mai ka vakaitavi; me vaka e dua ga na i taukei ni vanua o koya. Ni sa tabu me dua na sega cili me kana mai kina. 49 "Me dua ga na lewa vei ira na sucu i taukei kei ira sa daulako tu ka tiko vulagi vei kemuni." 50 Era sa caka vakakina na luvei Isireli me vaka sa vakarota o Jiova vei Mosese kei Eroni. 51 Sa qai yaco ena siga sara ga o ya, o Jiova sa kauti ira tani mai na luvei Isireli mai na vanua o Ijipita me vaka na nodra i valu.

Lako Yani 13

Era Sa Vakacabori Na Ulumatua

1 Sa vosa o Jiova vei Mosese ka vaka, 2 "Vakasavasavataki ira kece na ulumatua, na ka kece sa dolava na kato ni tamata se manumanu vei ira na Isireli; me ra sa Noqu."

Na Solevu Ni Madrai Sega Ni Vakaleveni

3 Sa tukuna o Mosese vei ira na tamata: "Mo ni nanuma na siga oqo, o ni sa lako tani kina mai Ijipita, mai na vale ni veivakabobulataki; ni sa kaukauwa ga ni ligai Jiova sa kauti kemuni tani mai na vanua o ya. Me kua ni laukana na madrai sa vakaleveni. 4 "Ena siga oqo, o ni sa lako tani kina, ena vula o Epipi. 5 "Ni sa kauti kemuni mai o Jiova ki na nodra vanua na Kenani, na Itaiti, na Amoraiti, na Ivaiti kei na Jepusaiti, na vanua sa yalataka vei ira na qase me solia vei kemuni, na vanua ni maroroya na veiqaravi oqo ena vula vata ga oqo. 6 "Me vitu na siga e na nomuni kania na madrai sega ni vakaleveni oqo, e na i kavitu ni siga, me dua na kanavata vei Jiova. 7 "Na madrai sa sega ni vakaleveni me laukana tiko me vitu na siga. Me kua ni laukune ena kemuni maliwa na madrai sa vakaleveni, se, ena nomuni i tikotiko. 8 "Mo ni tukuna talega vei ira na luvemuni ena siga o ya ka vaka: 'sa ca oqo, baleta na ka sa cakava vei au o Jiova ena noqu lako tani mai Ijipita.' 9 "Me i vakatakilakila oqo e na ligamuni, me vakananumi ena maliwa ni matamuni, nai vunau i Jiova, me tiko ena gusumuni; ni, ena liga kaukauwa sa kauti kemuni tani kina mai Ijipita o Jiova. 10 "Mo ni maroroya na lewa oqo ena kena gauna ena veiyabaki kecega.

Nai Vunau Me Baleti Ira Na Ulumatua

11"Ena gauna sa na kauti kemuni mai kina o Jiova ki na vanua o Kenani me vaka sa yalataka vei ira na qase, ka sa solia vei kemuni, 12 "mo ni qai vakatabui ira kece sa dolava na 'kato ni gone' me nona na Kalou, oqori na i matai mai vei ira na manumanu sa nomuni, na ka tagane kece; me nei Jiova. 13 "Nai matai mai vei ira na asa me veisau kei na lami; kevaka o sa sega ni veisautaka, me qai musuka na domona. o ira kece na ulumatua tagane mai vei kemuni, mo ni vakatabuya. 14 "Ni ra sa tarogi kemuni na luvemuni ena veisiga mai muri, ka vaka: 'Na cava oqo?' Mo ni qai tukuna vei ira, "Ena kaukauwa ni ligai Jiova, sa kauti keimami tani mai Ijipita, mai na vale ni veivakabobulataki. 15 'Ni sa yaco na gauna, sa yalo kaukauwa kina o Fero me kua kina ni sereki keimami, o Jiova sa vakamatei ira kecega na ulumatua ena vanua o Ijipita, ruarua, na ulumatua ni tamata kei na ulumatua ni manumanu talega. o koya oqo, au sa vakacabora kina vei Jiova na tagane kecega sa dolava na kato ni gone.' 16 "Me i vakatakilakila e ligamuni, ka me sa toka ga ena maliwa ni matamuni, ni ena kaukauwa ni liga i Jiova sa kauti keda tani mai Ijipita."

Na Sala Ena Vanua Liwa

17 Sa qai yaco, ni sa sereki ira na tamata o Fero me ra lako, sa sega ni vakatara o Jiova me ra lako yani ena nodra vanua na Filisitia, e dina ni voleka na sala o ya; ni sa tukuna o Jiova, "de ra qai veisautaka na nodra rai, ka era na qai via lesu tale ki Ijipita." 18 O Jiova sa liutaki ira vaka ki na vanua liwa na tamata ki na wasawasa damudamu. o ira na luvei Isireli era sa lako cake vakaituvatuva ena nodra lako tani mai Ijipita. 19 O Mosese sa kauta vata talega kei koya na sui nei Joseva, ni sa yalataka o koya vei ira na luvei Isireli ka vaka, "Ena talevi kemuni vakaidina na Kalou, ka mo ni na kauta vata kei kemuni na noqu sui." 20 Era sa tekivuna na nodra i lakolako mai Sakoca ka mai tiko vakalailai e Ecama ena i yalayala ni vanua liwa. 21 Sa liutaki ira o Jiova ena duru o ena siga me liutaki ira, kei na duru bukawaqa ena bogi me vakararamataki ira. Me ra lako tiko ena siga kei na bogi. 22 Sa sega ni kauta tani na duru o kei na duru bukawaqa ena bogi.

Lako Yani 14

Na Takosovi Ni Wasawasa Damudamu

14 Sa vosa vakaoqo o Jiova vei Mosese ka vaka: 2 "Mo vosa vei ira na luvei Isireli me ra gole ka tiko mada vakalekaleka e Pi-Airoci, oqori ena kedrau veimama o Mikidoli kei na wasawasa veibasai kei Peali Seponi; mo ni tiko mada e keya mai na yasana ena wasawasa. 3 "O Fero ena tukuna ena vukudra na luvei Isireli, 'Ni ra sa lialia ena vuku ni vanua, ka sa sogoti ira ki loma, na vanua liwa.' 4 "Au na vakayalokaukauwataki koya, me cicivi ira muri kina; Au na dokai mai Fero kei ira na nona mataivalu, era na kila kina na Ijipita ni sai Au o Jiova," ka sa vaka kina. 5 Sa tukuni mai oqo vua na tui Ijipita, ni ra sa dro na tamata, na yalo i Fero kei na yalodra na tamata sa cati ira na tamata, ka era sa tukuna, "Na cava e da sa cakava kina oqo, ena noda sa laivi ira na Isireli me ra lako tani mai na nodra qaravi keda?" 6 Sa vakarautaka na nona qiqi ni valu, ka kauti ira na nona tamata vata kei koya. 7 Sa kauta vata kei koya e ono na drau na qiqi ni valu digitaki kei na qiqi ni valu kece e Ijipita kei na kedra kavetani vakayadua. 8 O Jiova sa vakaukauwataka tale na yalo i Fero tui Ijipita ka sa cici muri ira na luvei Isireli, ka era sa lako tani ga na luvei Isireli ena yalo doudou. 9 Era sa cici muri yani na Ijipita, na ose kece, kei na qiqi ni valu nei Fero, na i valu ose kei na i valu yava, era sa siviti ira yani ka cegu vakalailai ena wasawasa volekati Pi-Airoci, o Peali – Seponi e liu. 10 Ni sa voleka mai o Fero, era sa rai mai na luvei Isireli ka raica ni ra sa toso voleka mai na Ijipita. Era sa rere vakalevu ka era sa kacivi Jiova na luvei Isireli. 11 Era sa tukuna vei Mosese, "Sa sega beka nai bulubulu mai Ijipita me keimami mai mate tu kina vakaoqo ena vanau liwa? Na cava o sa cakava vei keimami, mo kauti keimami tani kina mai Ijipita? 12 "Sa sega beka ni koya oqo na veika ga keimami sa dau tukuna tiko mai Ijipita, 'Mo laivi keimami ga me keimami qaravi ira na kai Ijipita'? E vinaka cake me keimami qaravi ira na kai Ijipita mai na neimami mai mate ena vanua liwa." 13 Sa tukuna o Mosese vei ira na tamata, "Mo ni kakua ni rere, ni tu vakadua, mo ni na raica na veivakabulai i Jiova o koya ena cakava vei kemuni ena siga oqo, o ni na sega ni raici ira tale me sega ni mudu. 14 "O Jiova ena vala ena vukumuni, ka o ni na kunea na vakacegu ni yalomuni." 15 Sa tukuna o Jiova vei Mosese, "Na cava o ni sa tagi tiko mai kina? Tukuna vei ira na luvei Isireli me ra toso ki liu. 16 "Mo laveta na nomui titoko ka dodoka yani vaka ki na wasawasa ka wasea rua. o ira na luvei Isireli era na lako ena vanua mamaca ena loma ni wasawasa. 17 "Au na vakayalokaukauwataka na yalodra na Ijipita ka era na muri yani. Au na vakarokorokotaki mai vei Fero kei ira kece na nona i valu, kei ira kece na nona qiqi ni valu kei ira na vodo ose. 18 "Era na kila na Ijipita Ni'u sa Kalou. Oi au o Jiova, ni sa Noqu ga na dokai, ka, Au sa cecere vei Fero kei na nona qiqi ni valu kei ira na nona dau vodo ose." 19 Na Agilosi ni Kalou sa dau liu vei ira na Isireli sa lako muri ira yani; na duru o sa dau liu vei ira, sa dau muri ira talega yani. 20 Sa qai lako mai ena kedrau maliwa ira na Ijipita kei ira na Isireli. Sa vakabutobutotaki ira na Ijipita, ka yaco me nodra rarama na luvei Isireli. Sa yaco kina me sega na veiriti ena bogi. 21 Sa dodoka yani na ligana o Mosese ki na wasawasa, sa qai vakavuna o Jiova me lobi lesu na wai ena cagi tokalau kaukauwa ena bogi taucoko, ka sa yaco me mamaca na wai ka sa tawase. 22 Era sa lako na luvei Isireli ena loma ni wasawasa ena vanua mamaca, ka sa kedra bai tale na wai, o ya na wai ga, e nai matau kei na i mawi. 23 Era sa cici muri ira tiko ga yani na Ijipita ena loma ni wasawasa, na qiqi ni valu kece nei Fero, na nona ose kece, kei ira na vodo ose. 24 Ni sa yaco na gauna ni veisau yadra ena mataka caca, sa rai sobu mai o Jiova vei ira na Ijipita mai na duru bukawaqa kei na duru o, sa qai vakaleqai ira na i valu ni Ijipita. 25 Sa qai vakaleqa na yava ni qiqi ni valu, me toso kina vakadredre na qiqi; era sa veitukuna yaka na Ijipita, "Me da sa dro mai vei ira na Isireli, ni sa vala ena vukudra o Jiova vei ira na Ijipita." 26 Sa tukuna o Jiova vei Mosese, "Dodoka yani na ligamu ki wasawasa, me luvuci ira kina na Ijipita na wai, me luvu talega na qiqi ni valu, kei na ose, kei ira sa vodo tiko kina." 27 Sa dodoka yani o Mosese na ligana ni sa kida mai na mataka, sa lesu tale mai na wai ena kena titobu taucoko, ni ra sa veidroyaki tiko na Ijipita. o Jiova sa vakamalumalumutaki ira na Ijipita ena loma ni wasawasa. 28 Sa lesu tale na wai ka vakaluvuci ira kece na qiqi ni valu, na ose kei ira sa vodoka tiko, na mata i valu taucoko nei Fero era sa tiko e loma ni wai. Era sa mate kece ka sega ni dro bula e dua. 29 O ira na luvei Isireli era sa lako voli ena mamaca kei na vanua mamaca ena loma donu ni wasawasa, ka sa vakalalagataki na wai vei ira ena i matau kei nai mawi. 30 Sa vakabulai ira na Isireli o Jiova ena siga o ya mai na ligadra na Ijipita, o ira na Isireli era sa raici ira na Ijipita ni ra sa mate tu ena matasawa. 31 O ira na Isireli era sa raica na cakacaka levu sa cakava o Jiova mai Ijipita. Era sa rerevaki Jiova na Kalou, ka vakabauti Jiova kei na nona tamata o Mosese.

Lako Yani 15

Na Sere Nei Mosese

1 O Mosese kei ira na luvei Isireli era sa lagata na sere oqo vei Jiova ka vaka: "Au na sere vei Jiova, ni sa qaqa vakaidina! Na ose kei koya sa vodoka sa viritaki rau ki wasawasa! 2 O Jiova, sa noqu kaukauwa ka noqu sere, sa yaco me noqu Kalou o koya, au na vakalevulevui koya; Na tamaqu na noqu Kalou, Au na vakacerecerei Koya. 3 O Jiova sa tagane ni vala; o Jiova na yacana. 4 O Fero kei na nona qiqi ni valu, Kei ira na nona i valu sa viritaka e wai o Koya; o ira na nona qaqa era sa vakaluvuci talega ena Wasawasa Damudamu. 5 Sa ubi ira na titobu; Era sa lutu dromu yani vaka na vatu. 6 "Na Ligamuni i matau, Jiova, sa yaco me cecere na kena kaukauwa; Na Ligamuni i matau, Jiova, era sa kasere kina vakamatailalai na meca. 7 Ena vakaitamera ni Nomuni uasivi sara, o ni sa vakadrukai ira sa tubu mai me veimecaki kei kemuni; o ni sa vakatala yani na Nomuni cudru katakata ka sa kani ira me vaka na yame ni i varo. 8 Nai cegu ni Ucumuni sa kumuni vata kina na wai kecega; Era sa tu vakadodonu na ualuvu me vaka na i vau sila; Kei na titobu sa cevata mai ena loma donu ni wasawasa. 9 Sa tukuna na meca, 'Au na cici muri ira, Au na tabaki ira, au na wasea na i toki ni valu; na noqu gagadre ena vakacegui mai vei ira, Au na taura na noqu sele i wau, Na ligaqu ena vakarusai ira.' 10 O ni sa uvuca yani na Nomuni cagi, Na wasawasa sa ubi ira; Era sa dromu me vaka na kaukamea ena wai levu. 11 "O cei sa vakataki kemuni, Jiova, e na kedra maliwa na Kalou? O cei sa vakataki Kemuni, sa vakaiukuuku ena yalosavasava e vakatatabutaki. Sa vakarokorokotaki ka vakacerecerei ka sa dau cakava na veika e vakaqoroqoroi? 12 O ni sa dodoka yani na ligamuni i matau; Sa tilomi ira. 13 Oi kemuni ena Nomuni yalololoma o ni sa liutaki ira na tamata o ni sa voli ira oti; o ni sa tuberi ira ena Nomuni kaukauwa ki na Nomuni tikotiko tabu. 14 "Na tamata era sa rogoca ka rere; Na rarawa ena vesuki ira sa tiko mai Palesitaina. 15 O ira na tui mai Itomi era na yalolailai; o ira na qaqa mai Moapi sa na vesuki ira na sautaninini; o ira sa tiko e Kenani, era na waicala yani. 16 Na rere kei na veilecayaki era lutuki ira mai; Ena kaukauwa ni Ligamuni, era na tuvakadua me vaka na vatu, Me yacova ni ra sa lako yani na Nomuni tamata, o ni sa voli ira oti. 17 O ni na kauti ira mai ka mai tei ira, Ena ulunivanua sa Nomuni votavota, Ena vanua, I Jiova, o ni sa cakava na ligamuni. 18 "O Jiova ena lewa me sega ni mudu ka sega ni mudu." 19 Na ose kece nei Fero era sa luvu vata kei na qiqi ni valu kei ira kece sa vodo kina ena wasawasa, sa qai kauta lesu tale mai o Jiova na wai ni wasawasa vei ira. O ira ga na luvei Isireli era sa lako ena vanua mamaca ena loma ni wai.

Na Sere Nei Miriama

20 O Miriama na parofita yalewa, na ganei Eroni, sa taura na tibereli, kei ira kece na yalewa era sa muri koya yani ka meke tiko ni ra sa sauvaka tiko na tibereli e ligadra. 21 Sa vosa vei ira na yalewa oqo o Miriama ka vaka: "Mo ni sere vei Jiova, Ni sa vakaiukuukutaki ena qaqa! Na ose kei koya sa vodoka sa viritaki rau ruarua ki wai o ya!"

Na Wai Wiwi Sa Kamikamica Mai

22 Sa kauti ira tani mai na Wasawasa Damudamu na Isireli o Mosese; ka era sa lako ki na Vanua Liwa vaka ki Suri. Era sa lako tiko me tolu na siga ka sa sega na wai. 23 Ni ra sa yaco mai ki Mara, era sa sega ni rawa ni gunuva na kena wai, ni ra sa wiwi tu. Sa vakayacani kina na vanua o ya me Mara. 24 Era sa kudru na tamata vei Mosese ka vaka: "Na cava me keimami gunuva?" 25 Sa tagi vei Jiova o Mosese ka sa vakatakila vua o Jiova e dua na vunikau; ni sa viritaka o koya ki wai na kau o ya, sa vuki sara me kamikamica na wai. Sa volai mai kea e dua na lewa kei nai vakaro vei ira me nodra. Ni mai kea sa vakatovolei ira kina o Jiova, 26 Ka tukuna, "Kevaka o ni sa vakarorogo vakavinaka ki na domo i Jiova na nomuni Kalou ka cakava na vei ka sa dodonu vua, ka solia na daligamuni ki na Nona i vakaro ka maroroya na nona lewa, Au na sega ni vakatauvimatetaki kemuni ena dua na mate sa dauveitauvi mai Ijipita, Ni sai Au o Jiova sa dauveivakabulai mai na tauvimate." 27 Era sa lako mai ki Elimi, sa tiko kina e tinikarua na i vurevure ni wai ka na vitusagavulu na vu ni balabala levu. Era sa mai tiko vakalailai e kea ena bati ni wai.

Lako Yani 16

Na Madrai Mai Lomalagi

1 Era sa lako mai Elimi, o ira kece na i soqosoqo ni luvei Isireli ki na vanua liwa ni valavala ca, ena kedrau veimama o Elimi kei Sainiai ena i ka tinikalima ni siga ni karua ni vula ena nodra lako tani mai Ijipita. 2 Era sa vosa kudrukudru na i soqosoqo kece ni luvei Isireli vei Mosese kei Eroni ena vanua liwa. 3 Era sa tukuna na luvei Isireli vei rau, "Me keimami mate ena ligai Jiova mai Ijipita ni keimami dabe ka kania na bulumakau sa sinai tu ena kuro kei na madrai ni sa sinai talega, ka mamau. Ia, drau sa kauti keimami mai oqo ki na vanua liwa me keimami mai mate ena via kana." 4 Sa tukuna o Jiova vei Mosese, "Raica Au na vakatauca mai na madrai mai lomalagi vei kemuni. Me ra lako na tamata ka kauta mai na kedra i vakarau ni dua ga na siga, Me'u na vakatovolei ira kina, se, era na lako voli ena Noqu lewa, se sega. 5 "Ena i ka ono ni siga, me ra vakarautaka na i vakarau era na kauta mai, ka me vakaruataki na i vakarau ni veisiga." 6 E rau sa vosa o Mosese kei Eroni vei ira na luvei Isireli, "Ena yakavi, o ni na kila ni sa kauti kemuni tani mai Ijipita. 7 "Ena mataka lailai o ni na raica kina na I ukuuku i Jiova; ni sa rogoca o Koya na nomuni vosa kudrukudrutaki Jiova. Na cava oi keirau, mo ni cakava kina na veika oqo vei keirau?" 8 Sa tukuna talega o Mosese, "Oqo na veika ena kune ena yakavi ni sa solia vei kemuni o Jiova na lewe ni manumanu mo ni kania, kei na mataka na madrai me levu sara, ni sa rogoca o Jiova na nomuni vosakudrukudru, o ni sa cakava tiko Vua. Na cava oi keirau? O ni sa cakava tiko oqo vei Jiova, sega, ni vei keirau." 9 Sa vosa o Mosese vei Eroni, "Tukuna vei ira taucoko na i soqosoqo taucoko ni luvei Isireli, 'Me ra toso voleka mai vei Jiova, ni sa kila o Koya na nomuni dau vosavosa vakacataka na ka.'" 10 Ni sa vosa tiko o Eroni vei ira na i soqosoqo taucoko e Isireli ka era sa rai kece tiko vaka ki na vanua liwa, sa basika mai na i ukuuku ni Kalou mai na vei o. 11 Sa vosa o Jiova vei Mosese ka vaka, 12 "Au sa rogoca na nodra vosavakacaca na luvei Isireli, 'Vosa vei ira ka tukuna, ena yakavi o ni na kana lewe ni manumanu, ena mataka o ni na vakasinaiti ena madrai, o ni na kila kina ni sai Au o Jiova na nomuni Kalou.'" 13 Era sa vuka mai na ga ena yakavi ka robota nai tikotiko taucoko, ena mataka sa robota na vanua taucoko na tegu vavaku. 14 Ni ra sa yali yani na tegu, era sa tu mai e so na ka mokimokiti lalai ena dela ni qele. 15 Ni ra sa raica na veika oqo o ira na luvei Isireli, era sa veivosakitaka, "Se sa cava oqo?" Ni ra sa sega ni kila na ka o ya. Sa qai vosa vei ira o Mosese ka vaka: "Oqori na madrai sa solia vei kemuni o Jiova mo ni kania. 16 "Oqori na veika sa vakarota o Jiova: 'Me ra dui kumuna, me vaka era sa vinakata, me dua nai vakarau me dua na tamata, me vaka na i wiliwili ni tamata era sa tiko ena vale laca.'" 17 Era sa cakava vaka kina na luvei Isireli ka kumukumuni, eso e levu ka so e lailai. 18 Ni ra sa cakava na kena i vakarau, vei koya sa levu, sa sega e vo, kei koya sa lailai, sa sega e oti. Era sa dui soqona, me vaka era sa vinakata. 19 Sa tukuna mai o Mosese, "Me kua ni dua na ka e vo ena vuku ni mataka." 20 Era sa sega ni via vakarogoci Mosese e so ka era sa maroroya tiko eso ena vuku ni mataka, sa ulo mai ka bona sara. Sa cudruvi ira sara vakalevu o Mosese. 21 Era sa qai dau kumukumuni ga ena mataka na tamata yadua me vaka na i vakarau ni kena. Ni sa katakata mai na siga, era sa waicala kece. 22 E na i ka ono ni siga, me ra kumuna vata e rua nai votavota vei ira, na vakarau ni dua na tamata. Era sa lako mai o ira na veiliutaki ka tukuna vei Mosese. 23 Sa qai tukuna vei ira, "Oqo na veika sa tukuna o Jiova: 'Ni mataka sa Siga ni Vakacecegu vei Jiova. Mo ni vavia na veika e dodonu me vavi ni kua ka me saqa talega na veika e dodonu me saqa; ka maroroya na veika kece sa vo me nomuni.'" 24 Era sa qai maroroya me vaka sa vakarota o Mosese; sa sega ni bona se tauva na ulo. 25 Sa qai tukuna vei ira o Mosese, "Mo ni kania oqo e dai, ni oqo na Siga ni Vakacecegu vei Jiova, o ni na sega talega ni raica oqo ena vanua. 26 "E ono na siga o ni sa dau kumukumuni kina, ia, ena i ka vitu ni siga, na Siga ni Vakacecegu, o ni na sega ni kunea kina e dua." 27 Sa qai yaco, ena dua na Siga ni Vakacecegu, sa lako yani e so na tamata me kumukumuni, ia, era sa sega ni kunea kina e dua. 28 Sa vosa kina o Jiova vei Mosese ka vaka: "Na cava soti na kena dede na nomuni sega ni via rogoca kina na Noqu i vakaro kei na Noqu vunau? 29 "Sa solia vei kemuni na Siga ni Vakacecegu o Jiova; oqori sa solia kina vei kemuni e na i ka ono ni siga na madrai ni vua na siga. Me ra tiko ga kina e vale na tamata me kua ni dua e lako ki tuba ena Siga ni Vakacecegu." 30 Era sa vakacegu na tamata ena Siga ni Vakacecegu. 31 Era sa vakatoka na Isireli na vei ka o ya me Mana. Sa vaka na sore ni koriada, kei na kena i kanakana sa vaka na parile mamaca, boro kina na oni. 32 Sa qai tukuna o Mosese, "Oqo ga na veika sa vakarota o Jiova, 'Vakatawana e dua nai wasewase ka me maroroi vei ira na i tabatamata kece, me ra raica kina na madrai Au a vakani kemuni kina mai na vanua liwa, ena Noqu kauti kemuni tani mai Ijipita.'" 33 Sa tukuna o Mosese vei Eroni, "Taura na kuro ka biuta kina e dua na i vakarau Mana, ka biuta tiko ena mata i Jiova. Me maroroi tiko ki na i tabatamata kecega." 34 Me vaka sa vakaroti Mosese o Jiova, sa vakayacora vaka kina o Eroni ena mata ni Veidinadinati, me maroroi kina. 35 O ira na luvei Isireli era sa kana Mana tiko me vasagavulu na yabaki me yacova ni ra sa lako mai ki na vanua sa sega tiko; era sa kana mana tiko me yacova ni ra sa yaco ki nai yalayala ni vanua o Kenani. 36 E dua nai vakarau ni mana me laukana vata kei na dua na bilo levu sa sega kina e rua na i vakarau wai.

Lako Yani 17

Na Wai Mai Na Vatu

1 Era sa tekivu lako yani nai soqosoqo taucoko ni luvei Isireli e na i lakolako mai na Vanua Liwa ni Valavala Ca, me vaka nai vakaro i Jiova, ka era sa mai tiko e Refidimi; ia, sa sega na wai me ra gunuva na tamata. 2 Era sa lako mai vei Mosese na tamata ka vaka: "Mo solia vei keimami na wai me keimami gunu." Sa tukuna vei ira o Mosese, "Na cava o ni sa cakava kina oqo vei au? Na cava o ni sa cakava kina oqo vei au? Na cava o ni sa vakatovolei Jiova kina?" 3 Era sa karamacataka na wai mai kea o ira na tamata, era sa vosakudrukudru vei Mosese ka vaka, "Na cava o sa kauti keimami kina mai Ijipita, ka mo mai vakamatei keimami kina, na luvei keimami kei na neimami manumanu susu ena viagunu?" 4 Sa tagi vei Jiova o Mosese ka vaka: "Na cava me'u cakava vei ira oqo? Ni ra sa voleka sara tikoga ni vakaviriki au ena vatu!" 5 Sa vosa mai o Jiova vei Mosese, "Mo lako ena matadra na tamata, ka kauta vata kei iko e so na nodra qase na Iisreli, mo kauta vata tale tiko ga kei iko na i titoko o a tawasea kina na wai. 6 "Mo kila, Au na tucake e matamu mai kea ena vatu e Orepi; mo samuta na vatu ka ena lako mai kina na wai, me ra gunu kina na tamata." Sa vakayacora vakakina o Mosese ena matadra na qase ni Isireli. 7 Sa vakayacana na vanua o ya me Masa kei Meriba, baleta na nodra veiqati na luvei Isireli, baleta talega na nodra vakatovolei Jiova ena nodra tukuna tiko, "Sa tiko vata kei keda o Jiova se sega?"

Era Sa Vakadrukai Amelekaiti

8 O ira na Amalekaiti era sa lako mai ka mai vala kei ira na Isireli e Refidimi. 9 Sa tukuna o Mosese vei Josua, "Mo digitaka vei keda eso na tamata ka lako yani me vala kei Amalekaiti. Ni mataka, au na tucake tu mai na delana kei na i titoko i Jiova e ligaqu." 10 Sa cakava o Josua me vaka sa tukuna vua o Mosese, ka vala kei ira na Amalekaiti. o Mosese kei Eroni kei Uri, e ratou sa gole cake ki na delana. 11 Sa qai yaco ni sa dulaka cake tiko na ligana o Mosese era sa kaukauwa mai na Isireli, ni sa malumu sobu mai na ligana, era sa kaukauwa mai na Amalekaiti. 12 Sa qai yaco me bibi mai na ligai Mosese; sa tuva na vatu me dabe kina. E rau sa vukei Mosese o Eroni kei Uri ena kena dulaki cake tikoga na ligana, ni rau sa yadua tu na yasana. E rau sa tauri koya matua tiko me yacova na kala ni matanisiga. 13 Sa vakadrukai ira na Amalekaiti o Josua ena i seleiwau. 14 Sa tukuna o Jiova vei Mosese, "Vola oqo mei vakananumi ena i vola me wiliki me rogoca o Josua, ni Au na vakakawabokotaka na kedra i vakananumi na Amalekaiti ena ruku i lomalagi." 15 Sa tara o Mosese e dua nai cabocabo ni soro mai kea ka vakayacana, O Jiova Na Noqu Qaqa; 16 Ni sa tukuni, "Me vaka sa yalataka o Jiova: o Jiova ena valuti ira na Amalekaiti mai na tabatamata oqo, ka yacova nai tabatamata kecega."

Lako Yani 18

Nai Vakasala Nei Jacoro

1 O Jacoro na bete mai Mitiani, na momo nei Mosese, sa rogoca na veika kece sa cakava na Kalou vei Mosese kei ira na Isireli na Nona tamata — ni sa kauti ira tani mai na Isireli mai Ijipita. 2 O Jacoro na momo nei Mosese, sa kauti Sipora, na wati Mosese, 3 Kei rau na luvena tagane, na yacana e dua o Keresoni, (ni sa tukuni, "Au a vulagi tu ena vanua tani") 4 Kei na yacana tale e dua o Iliesa, (ni sa tukuni, "Na Kalou nei tamaqu sa noqui vukevuke, ka sa vakabulai au mai nai seleiwau nei Fero"); 5 O Jacoro na momo nei Mosese sa lako mai kei na luvena tagane kei na watina talega vei Mosese ena vanua liwa. Ena vanua era sa tiko kina na ulunivanua ni Kalou. 6 Sa tukuna o koya vei Mosese, "Oi au o Jacoro na nomu momo, au sa lako mai oqo vei iko kei watimu kei rau na luvemu." 7 Sa lako yani o Mosese me sota kei nona momo ka vakarokoroko ka reguca na ligana. E rau sa veitarogi ena vuku ni nodrau dui tiko vinaka, ka rau sa gole sara yani ki na vale laca. 8 O Mosese sa tukuna vei Jacoro na veika kece sa cakava o Jiova vei Fero kei ira na Ijipita ena vukui Isireli, kei na veika dredre kece era sa sotava ena sala kei na i valavala ni veivakabulai nei Jiova vei ira. 9 Sa marautaka o Jacoro na veika kece sa cakava o Jiova vei ira na Isireli, o ira sa vakabulai mai na ligadra na Ijipita. 10 Sa tukuna o Jacoro, "Me cecere o Jiova, o koya sa veisereki mai na ligadra na Ijipita, na ligai Fero, sa sereki ira na tamata mai na ligadra na kai Ijipita. 11 "Oqo, au sa kila ni sa levu duadua o Jiova mai vei ira na Kalou kecega era sa cakava, sa cecere duadua o Jiova." 12 O Jacoro sa cakava e dua na i soro kama kei na i madrali vua na Kalou. Sa lako mai o Eroni kei ira kece na qase ni Isireli me kana madrai vata kei na momo nei Mosese ena mata ni Kalou. 13 Sa qai yaco ena siga sa tarava, sa dabe o Mosese me lewai ira na tamata; era sa tucake tu na tamata ena matai Mosese mai na mataka ka yacova na karobo ni yakavi. 14 Ni sa raica o Jacoro na veika sa caka vei ira na tamata, sa tukuna kina, "Na cava o sa cakava tiko vei ira na tamata? Na cava o dabe duadua tiko kina, ka me ra tucake tu ena matamu na tamata mai na mataka ka bogi yani?" 15 Sa tukuna o Mosese vei nona momo, "Era sa lako tiko mai vei au na tamata me vakataroga na Kalou. 16 "Ni ra kunea e dua na ka e dredre, era na lako mai vei au, ka au na vakatauca na lewa me baleta e dua mai vua tale e dua, au na vakaraitaka na lewa ni Kalou kei na Nona i vunau." 17 Sa tukuna o Jacoro vei Mosese ka vaka: "Na ka o sa cakava tiko oqo sa sega ni vinaka. 18 "O iko kei ira kece oqo, era sa vakaocai iko. Era sa rui lewe levu, sa sega ni rawa vei iko mo qarava duadua. 19 "Vakarorogo ki na domoqu; au na solia vei iko na i vakasala, na Kalou ena tiko vata kei iko: Mo tu ena mata i Jiova ena vukudra na tamata, mo kauta mai kina na veidredre oqori vua na Kalou. 20 "Mo vakavulica vei ira na lewa kei na i vunau ka vakaraitaka vei ira na sala kei na cakacaka me ra muria. 21 "Mo raica, na nomu digitaka mai vei ira na tamata, na tamata e kila na ka, o ira sa rerevaka na Kalou, tamata ni dina, cata na kocokoco; me ra mai veiliutaki vei ira na udolu, veiliutaki vei ira na drau, veiliutaki vei ira na limasagavulu, kei ira na veiliutaki vei ira e lewe tini. 22 "Me ra lewa vei ira na tamata ena veigauna kecega. Na veika lelevu sara me ra qai kauta mai vei iko. Na veika lalai me ra lewa ga o ira, me rawarawa kina vei iko, oqo era na colata kina na i colacola vata kei iko. 23 "Kevaka o sa cakava na veika oqo, me vaka sa vakarota vei iko na Kalou, sa na rawa kina vei iko mo vosota, ka era na lako na tamata vakayadua ki na nodra i tikotiko ena vakacegu." 24 Sa rogoca o Mosese na vosa nei nona momo ka vakayacora me vaka sa tukuni vua. 25 Sa qai digitaki ira na tamata o Mosese mai vei ira na Isireli ka cakava me rai liuliu vei ira na tamata, liuliu ni veiya-udolu, vei yadrau, vei yalimasagavulu, vei yatini. 26 Era sa lewa vei ira na tamata ena gauna kecega, na veika e dredre sara, sa qai dau kau mai vei Mosese, na veika lalai ga, era sa raica o ira. 27 Sa qai laivi Jacoro o Mosese me lako, ka lako yani ki na nona vanua o Mosese.

Lako Yani 19

O Ira Na Isireli Ena Ulunivanua O Sainiai

1 Ena i katolu ni vula ena nodra sa lako tani mai Ijipita na Isireli, ra sa yaco mai ki na Vanua Liwa e Sainiai ena siga vata ga era biuti Ijipita mai kina. 2 Era a sa lako tani mai Refidimi ka yaco mai ki na Vanua Liwa e Sainiai, era sa mai tiko ena vanua liwa na Isireli me veidonui na ulunivanua. 3 Sa lako cake vua na Kalou o Mosese, ka sa kaci mai vua o Jiova mai na ulunivanua ka vaka: "Mo tukuna vakaoqo ki na vale i Jekope, mo vosa ki na nodra vale na luvei Isireli: 4 'O ni sa raica na veika Au a cakava vei ira na kai Ijipita, kei na noqu roqoti kemuni me vaka na taba ni ikeli ka kauti kemuni mai ki vei Au. 5 'Oqo, kevaka ga o ni talairawarawa kina domoqu ka muri na Noqu veiyalayalati, o ni na qai i yau talei sara vei Au mai vei ira na tamata kecega; ni sa Noqu kecega o vuravura. 6 'O ni na mata bete vakaturaga vei Au, na matanitu tabu.' Oqo na veivosa mo ni tukuna vei ira na luvei Isireli." 7 Sa lako mai o Mosese ka kacivi ira na qase ni Isireli ka tukuna vei ira na vosa kece oqo, me vaka sa vakarota vua o Jiova. 8 Era sa sauma kece mai na tamata ka vaka, "Na veika kece sa tukuna o Jiova, keimami na cakava." Sa vakasuka kece vei Jiova o Mosese na ka era sa tukuna na Isireli. 9 Sa qai tukuna o Jiova vei Mosese, "Raica, Au na lako mai vei kemuni ena o vavaku, me ra na rogoca kina na tamata ni Au sa vosa vei iko, ka vakabauti iko me sega ni mudu." Sa tukuna o Mosese na nodra vosa na tamata vei Jiova. 10 Sa qai tukuna o Jiova vei Mosese, "Lako vei ira na tamata ka vakasavasavataki ira e dai, kei na siga ni mataka, raica me ra savata na nodra i sulu. 11 "Me ra vakarau tu ena i katolu ni siga. Ni ena i katolu ni siga, o Jiova ena lako sobu mai na ulunivanua o Sainiai ena matadra kecega na tamata. 12 "O na vauci ena vukudra kecega era sa tiko vakavoliti iko ni sa tukuni, 'Mo ni qarauni kemuni, ni kemuni sa sega ni lako cake ki na ulunivanua se tara na kena yavu. o koya sa tara na ulunivanua sa na vakamatei vakaidina. 13 'Me kua ni dua na liga me tarai koya, me vakaviriki ga ena vatu se vanai ena dua na dakai titi; se tamata se manumanu, me kakua ni vakabulai.' Ni sa rogo vakabalavu na davui, me ra qai lako mai vakavoleka ki ulunivanua." 14 Sa qai lako sobu mai na ulunivanua o Mosese ki vei ira na tamata ka vakasavasavataki ira, ka era sa savata na nodra i sulu. 15 Sa qai tukuna vei ira na tamata, "Ni tu vakarau e na i ka tolu ni siga mo ni kua ni lako voleka vei ira na watimuni." 16 Sa qai yaco ena i katolu ni siga, ena mataka, sa kurukuru kecega na vanua ka livaliva mai, sa dua na o vavaku sa tiko ena ulunivanua; sa rorogo vakalevu na domo ni davui, o ira kece na tamata era sa sautaninini. 17 Sa qai kauti ira tani mai na tamata o Mosese me ra mai sota kei Jiova na Kalou, era sa tu mai na rukuni ulunivanua. 18 Na Ulunivanua o Sainiai sa ubi taucoko tu ena kubou, baleta ni sa lako sobu mai kina o Jiova ena bukawaqa caucaudre. Sa lako cake na kubou me vaka mai na lovo. Sa yavavala vakalevu sara na ulunivanua. 19 Ni sa uvu tiko vakabalavu ka sa rogo levu tiko ga mai na davui, sa vosa o Mosese ka sa sauma mai na Kalou ena rorogo. 20 Sa lako sobu mai o Jiova ki na Ulunivanua Sainiai. o Jiova, sa kacivi Mosese cake mai ki na ulunivanua. Sa lako cake yani o Mosese. 21 Sa tukuna o Jiova vei Mosese, "Mo vakaroti ira na tamata, de so e via lako sivita mai na i yalayala ni ra via raici Au mai, era na rusa dina. 22 "O ira talega na bete era sa lako voleka mai vei Jiova, me ra vakasavasavataki ira, de qai vakacacani ira o Jiova." 23 Sa vosa o Mosese vei Jiova ka vaka, "Era sa sega ni rawa ni lako cake mai na tamata baleta ni Kemuni sa vakaroti ira, ena Nomuni tukuna, 'Me tiko e dua na i yalayala ena Ulunivanua o Sainiai ka me vakatabui.'" 24 Sa tukuna vua o Jiova, "Lako, lako sobu ka lako cake mai, o iko kei Eroni. Sa tabu ni dua na bete se tamata me takosova, se basuka mai na i yalayala ka lako mai vei Jiova, de qai vakacacani kemuni." 25 Sa lako sobu o Mosese vei ira na tamata ka tukuna vei ira na veika oqo.

Lako Yani 20

Nai Vakaro E Tini

1 Na Kalou sa vosa ka tukuna na veika kece oqo: 2 "Oi au o Jiova na nomuni Kalou, Au sa kauti kemuni tani mai na vanua o Ijipita mai na vanua ni veivakabobulataki. 3 "Me kua tale ni dua na Kalou vei kemuni, Oi Au ga. 4 "Mo ni kua ni cakava vei kemuni e dua na i vakatakarakara ceuti O se me dua na ka e veivakatautauvatanitaki ena ka mai lomalagi, se, e vuravura se, ena ruku i vuravura; 5 Mo ni kua ni cuva vei ira se qaravi ira. Ni sai Au o Jiova na Nomuni Kalou, oi Au na Kalou Vuvu, ka Au dau vakabasikata yani vei ira na gone ena i katolu kei na i kava ni tabatamata, na nodra caka cala na qase, o ira sa dau cati Au, 6 Ia, Au sa dauvakaraitaka na loloma, ki vei ira na vakaudolu, vei ira sa lomani Au ka maroroya na Noqu i vakaro. 7 "Mo ni kakua ni vakawaletaka na Yaca i Jiova na Nomuni Kalou, ni na sega ni vosoti ira sa vaka kawaletaka na Yacana. 8 "Mo ni nanuma na i kavitu ni siga, ka mo ni maroroya me ka tabu. 9 Me ono na siga ni cakacaka, ka me caka kina na cakacaka, 10 Ena i kavitu ni siga, sa Siga ni Vakacecegu i Jiova na Nomuni Kalou. Mo ni kua ni cakava kina e dua na cakacaka: kemuni se o ira na luvemuni tagane se yalewa, se o ira na dauveiqaravi tagane se yalewa, se na bulumakau se o ira na vulagi sa tiko ena nomuni loma ni bai. 11 E ono na siga, o Jiova sa bulia kina na lomalagi kei na vuravura, na wasawasa kei na ka kece sa tu kina, sa vakacegu ena i ka vitu ni siga. o Jiova sa vakalouvinakataka na siga ni vakacegu ka doka. 12 "Mo vakarokorokotaki rau na tamamu kei na tinamu, me balavu kina na nomuni veisiga ena vanua sa solia vei kemuni o Jiova na Nomuni Kalou. 13 "Mo ni kua ni laba. 14 "Mo ni kua ni cakava na veidauci. 15 "Mo ni kua ni butako. 16 "Mo ni kua ni beitaka vakailasu na wekamuni. 17 "Mo ni kua ni kocova na vale nei wekamuni; Mo ni kua ni kocova na watina na wekamuni, se na nona dauveiqaravi na wekamuni, se na nona manumanu se dua ga na ka sa nona na wekamuni."

O Ira Na Tamata Era Sa Rere Tiko Ena Mata Ni Kalou

18 O ira na tamata kece, era, sa vakadinadinataka na kurukuru kei na yaseyase, na rorogo ni davui kei na kena sa kubou mai na ulunivanua, ni ra sa raica na tamata na veika oqo, era sa sautaninini ka tu vakayawa. 19 Era sa tukuna vei Mosese, "Mo vosa mai, ni keimami na vakarorogo, me kua ga ni vosa vei keimami o Jiova de keimami na qai mate." 20 Sa tukuna o Mosese vei ira na tamata, "Mo ni kakua ni rere: ni sa lako mai o Jiova me vakatovolei kemuni, me tiko kina na rerevaki Jiova vei kemuni, mo ni kua kina ni valavala ca." 21 Era sa tu vakayawa na tamata, o Mosese ga sa qai toso voleka yani ki na vanua sa tu kina na Kalou.

Nai Vunau Ni Cabocabo Ni Soro

22 Sa tukuna o Jiova vei Mosese, "Mo tukuna vaka oqo vei ira na luvei Isireli; 'O ni sa raica ni, Au a sa vosa vei kemuni mai lomalagi. 23 'Mo ni kua ni cakava e dua na ka me tiko vata kei Au O na Kalou ni siliva se Kalou ni koula, mo ni kua ni cakava vei kemuni. 24 'Nai cabocabo ni soro qele, mo ni cakava vei Au, mo ni vakacabora kina na i soro kama kei na i soro ni veivinakati, na nomuni sipi kei na nomuni bulumakau. Ena vanua kecega sa teivaki kina na Yacaqu, Au na lako mai kina vei kemuni ka Au na vakalouvinakataki kemuni kina. 25 'Kevaka o ni sa cakava vei Au na i cabocabo ni soro vatu, mo ni kua ni cakava ena vatu sa bini oti tu. Kevaka o ni sa cakava ena i yaya ni cakacaka, o ni sa vakadukadukalitaka. 26 'Mo ni kua ni lako cake ena i kabakaba ki na Noqu i cabocabo ni soro, de na qai laukune kina na nomuni luvawale.'

Lako Yani 21

Nai Vunau Me Baleti Ira Na Dauveiqaravi

1 "Oqo na lewa, mo vakatauca vei ira na tamata: 2 "Kevaka o sa volia e dua na Iperiu sa veiqaravi, me veiqaravi o koya me ono na yabaki, ena i kavitu ni yabaki mo ni qai laiva me lako ena galala, ka me kua ni sauma e dua na ka. 3 "Kevaka sa lako lala mai, me lesu lala tale, kevaka sa lako vata mai kei watina me lesu tale vata kei watina. 4 "Kevaka sa soli vua e dua na watina, ka sa vakasucuma vua e dua na gone, tagane se yalewa ena gauna ni nona tiko vaka taukeni, na watina kei na luvena me nei koya me lako wale ga yani, me vaka ni a lako wale mai. 5 "Kevaka sa tukuna na dauveiqaravi, 'Au sa lomani kequ i taukei, kei na watiqu, kei na luvequ, au na sega ni via lako,' 6 "Na kena i taukei me qai kauta mai na dauveiqaravi vua na turaga ni lewa. Me qai kau mai ki na mata ni katuba, ka culai na daligana ka vakatakilakilataki, me qai qarava tiko na nona turaga me sega ni mudu. 7 "Kevaka e dua na tamata sa volitaka na luvena yalewa me dauveiqaravi, me kua ni lako o koya me vaka era sa dau cakava na dauveiqaravi tagane. 8 "Kevaka sa sega ni vakalomavinakataka na kena i taukei, o koya sa kauta mai me rau veiwatini, sa dodonu me vakagalalataki, me kua ni volitaka vua na vulagi, baleta ni sa cakacaka vakaveivakaisini vua. 9 "Kevaka sa musuki o koya vei luvena tagane, e dodonu me caka tiko vua na i valavala ni veiqaravi vinaka vei ira na goneyalewa. 10 "Kevaka sa taura tale e dua na yalewa na cauravou oqo, me soli tiko ga vua na dodonu ni kakana, i sulu kei na dodonu kece ni yalewa vakawati. 11 "Kevaka sa sega ni cakava na veika kece oqo vua na yalewa, me qai lako na yalewa oqo ena galala ka tabu ni sauma e dua nai lavo.

Nai Vunau Me Baleta Nai Valavala Kaukauwa

12 "Kevaka e dua sa vakamavoataka e dua tale ka vakamatea sara, me vakamatei o koya sa cakava. 13 "Kevaka sa sega ni tiko vakavuni o koya, ia, na Kalou sa soli koya ki na ligana, io, Au na digitaka vua na vanua me ra dro kina. 14 "Kevaka e dua na tamata sa nakita oti me vakamatea na kai nona, mo ni kauti koya tani mai na Noqu i cabocabo ni soro, me vakamatei. 15 "O koya sa samuti tamana se tinana, me vakamatei vakaidina. 16 "O koya sa butakoca mai na tamata ka kauta mai vakavesu, ka volitaka, se sa kune ni tiko e ligana, me vakamatei o koya. 17 "O koya sa rukaka na tamana se tinana, me vakamatei o koya oqo. 18 "Kevaka e rau sa veivala e lewe rua ka sa samuti e dua ena vatu se ena liga ka sega ni mate, ia, sa davo tiko ga ena nona i davodavo, 19 "Kevaka sa tucake tale ka veilakoyaki voli ena nona i titoko, me qai sereki o koya sa veisamuti. Me qai sauma ga vei koya sa mavoa, na nona gauna sa vakayali yani. Kei na nona sotavi tiko me yacova ni sa bula vinaka sara. 20 "Kevaka e dua sa vakamavoataka na nona dauveiqaravi tagane se yalewa ena kuita, ka sa mate sara ena ligana, me totogitaki o koya sa cakava oqo. 21 "Kevaka e se bula tiko me dua se rua na siga, me kua ni qai totogitaki, ni o koya oqo sa tamata taukeni. 22 "Kevaka era sa vala na tagane ka sa laki mavoa kina e dua na yalewa sa bukete tiko, ka vakavuna na nona vakasucu dole, e dina ke sega tale ni dua na ka ca e yaco sara, me totogitaki o koya sa cakava oqo me vaka sa lewa yani o tama ni gone; me qai sauma me vaka sa lewa yani o turaga ni lewa. 23 "Kevaka e qai yaco e dua na ka ca sara, me qai soli na bula mei sau ni bula, 24 "Na mata ki na mata, na bati ki na bati, na liga ki na liga, na yava ki na yava, 25 "Na kama ki na kama, na mavoa ki na mavoa, na kuita ki na kuita. 26 "Kevaka e dua sa samuta na mata i koya ka dua se matana na dauveiqaravi ka vakarusa sara, me qai laivi o koya me galala ena vuku ni matana. 27 "Kevaka sa vakalutuma na bati koya na dauveiqaravi tagane se yalewa, me qai sereki o koya ena vuku ni batina.

Nai Vunau Me Baleti Ira Na Manumanu

28 "Kevaka sa vakamatea e dua na tamata, se tagane se yalewa, e dua na bulumakau, me qai vakaviriki ena vatu me mate ka me kua ni laukana na lewena. Na i taukei ni bulumakau me sereki. 29 "Kevaka sa dauveivakamavoataki e liu na bulumakau oqo, ka sa kila vinaka na kena i taukei, ia sa sega ga ni qarauna vinaka, sa qai yaco me vakamate tamata, me qai vakaviriki ena vatu me mate na bulumakau, me vakamatei talega na kena i taukei. 30 "Kevaka sa vakatauci vua me sauma e dua nai wasewase ni i lavo, me qai sauma me vakabulai koya kina ena i lavo sa lavaki vua. 31 "Kevaka sa cumulaka vakaca e dua na gonetagane se goneyalewa, sa tautauvata vei ira kece na lewa oqo. 32 "Kevaka sa cumulaki e dua na dauveiqaravi tagane se yalewa, me qai soli vua na nona turaga e tolusagavulu na sikele siliva, kei na bulumakau talega me vakaviriki ena vatu me mate. 33 "Kevaka e dua sa dolava e dua na qara, se kelia e dua na qara ka qai sega ni ubia, ka sa qai lutu kina e dua na bulumakau se asa, 34 "Me qai vakavinakataka na qara na kena i taukei; me qai solia na i lavo vua na i taukei ni manumanu, me qai nona na manumanu. 35 "Kevaka e dua na bulumakau sa vakamavoataka e dua tale na bulumakau ka mate sara kina, me qai volitaki na bulumakau sa bula tiko ka me rau qai wasea talega na bulumakau sa mate. 36 "Kevaka sa dau kilai ena gauna e liu, ni sa dau veivakamavoataki na bulumakau o ya, ka sa sega ni maroroya vakavinaka na kena i taukei, me qai vakasosomitaki na bulumakau ena bulumakau, me nona ga na kena i taukei na bulumakau sa mate.

Lako Yani 22

Na Kena Qarauni Na Veika Vakaitaukeni

1 "Kevaka e dua sa butakoca e dua na bulumakau se sipi ka vakamatea sara, se volitaka, me qai vakaisosomitaka na dua na bulumakau ena lima tale na bulumakau, kei na dua na sipi ena va tale na sipi. 2 "Kevaka sa kune dua na daubutako ni sa butako tiko, ka sa vakamatei kina, ena sega ni beitaki e dua na vuku ni dra o ya. 3 "Kevaka sa cilavi koya sa mate na siga. Me dua e qai beitaki ena veivakamatei oqori. Me solia na kenai sau taucoko ni veivakamatei, kevaka sa sega ni tu vua e dua na ka, me qai volitaki o koya ena vuku ni nona butako. 4 "Kevaka sa kune bulabula ni se bula tiko e ligana na ka e butakoci se bulumakau, se asa, se sipi, e dodonu me vakaruataka lesu na kena i sosomi. 5 "Kevaka e dua sa vakavuna na kena buturaki na i teitei (were ni vaini) ena nona sereka na manumanu me ra laki kana kina, me qai sauma lesu ena veika vivinaka duadua mai na nona vei vaini. 6 "Kevaka sa tete e dua na kama ka sa kama yavu kina na sila sa bini tu kei na sila e se bera ni musuki, o koya sa vakavuna na kama koya, me qai sauma lesu na veika sa vakacacani. 7 "Kevaka e dua sa kauta vua na wekana na i lavo se dua na ka me maroroi kina, ka sa butakoci mai na vale ni tamata o ya, kevaka sa kune na daubutako, me qai sauma lesu vakarua. 8 "Kevaka sa sega ni kune na daubutako, me qai kau mai nai taukei ni vale ki vua na turaga ni lewa, de sa tara na ligana na nona i yau na wekana. 9 "Ena ka kece ni lako vakaveitalia, se bulumakau, se asa, se sipi, se nai sulu se dua ga na ka sa yali ka sa la'ki tukuna tale e dua ni nona, oi rau nai to ruarua me rau lako mai ena matai turaga ni lewa; o koya sa beitaki mai vei turaga ni lewa, me qai sauma vakarua vua na kai nona. 10 "Kevaka e dua sa kauta vua na kai nona na asa, se bulumakau, se sipi, se dua ga na manumanu me maroroya, ka sa la'ki mate, se mavoa, se sa yali ka sega ni dua e raica. 11 "Me qai dua na bubului vei Jiova me rau cakava ruarua, ni sa sega ni tara na ligana e dua na ka baleta na ka sa nei kai nona; o ya me ciqoma o koya sa nona na ka, me kua tale ni dua na ka me caka kina. 12 "Kevaka e dina ni sa butakoci, me qai sauma taucoko vua na kena i taukei. 13 "Kevaka sa basuraki vakaca sara mai vua e dua na manumanu, me qai kau mai na kena i vakadinadina, ka, ena qai sega ni sauma kina e dua ka. 14 "Kevaka e dua sa kerea e dua na ka mai vua na kai nona, ka sa mavoa se mate sara, sa sega kina ni kila kina e dua na ka o kena i taukei. E dodonu me vakavinakataki koya. 15 "Kevaka sa tiko kina o kena i taukei, me kua ni dua na ka me caka kina, kevaka sa tauri vakaivoli mai, sa qai rauta ga na kenai sau oqori.

Na Dodonu Na Dina Kei Na Vakacacabo

16 "Kevaka e dua na tagane sa vinakata e dua na yalewa sa sega ni tiko vata kei na tagane, ka se bera talega ni vosaki, ka e rau sa tiko vata sara, me sauma o koya na i sau ni yalewa sa vakawatitaki, ka me sa watina sara. 17 "Kevaka sa sega ni vinakata o tama ni yalewa me solia na luvena vei tagane, me qai solia o tagane nai lavo mei sau me vaka na i sau ni goneyalewa sega ni se tiko vata kei na tagane. 18 "Me kua ni vakatarai me bula tiko e dua na dau caka i sausau. 19 "O koya sa tiko vata kei na manumanu, me vakamatei o koya. 20 "O koya sa vakacaboi soro vua e dua tale na Kalou, ka sega ni ia vei Jiova, me vakarusai o koya oqori. 21 "Me kua na caka ca vei ira na vulagi se vakabobulataki koya, ni kemuni a vulagi tu mai Ijipita. 22 "Me ra kua ni vakacacani na yada kei ira na luveniyali. 23 "Kevaka era sa vakacacani, ka era sa tagi mai vei Au, Io, Au na rogoci ira vakaidina; 24 "Ena katakata mai na noqu cudru katakata, Au na vakamatei kemuni ena i seleiwau. Era na yada na watimuni, o ira na luvemuni era na sega ni vakatamani. 25 "Kevaka o sa soli dinau vei ira na Noqu tamata, o ira sa dravudravua ena kemuni maliwa, mo ni kua ni vaka e dua sa dausoli dinau vei o ya; me vakagalalataki mai na tubu ni dinau. 26 "Kevaka o sa taura na i sulu nei koya na kai nomu me ka ni yalayala, mo vakasuka tale vua ni bera ni dromu na matanisiga. 27 "Ni oqori sai vovo ga ni nona i ubi, sa sega tale nai karua ni nona i vakamamaca. Me cava e vakaitutuvi kina ni moce? Ni sa na tagi mai vei Au, Au na rogoca, ni, Au sa rui yalololoma. 28 "Mo ni kua ni vosacataka na Kalou, se rukaki ira na veiliutaki vei ira na tamata. 29 "Mo ni kua ni vakaberaberataka na sevutaka na i matai ni nomuni vuata dreu kei na kena wai. Na nomuni ulumatua tagane me soli talega mai vei Au. 30 "Me vaka talega kina na nomuni bulumakau kei na nomuni sipi, Me tiko vata ga kei ira na tinadra me vitu na siga, ena i kawalu ni siga me qai kau mai vei Au. 31 "O ni na qai ka tabu vei Au; mo ni kakua ni kania e dua na lewe ni manumanu sa basuraki mai vua tale e dua na manumanu ni vanua; mo ni viritaka me kena na koli.

Lako Yani 23

Na Lewa Dodonu Me Noda Kece

1 "Mo ni kua ni vakauta wavoki na i tukutuku lasu. Mo ni kua ni solia na ligamuni vua sa caka ca mei vakadinadina sega ni dodonu. 2 "Mo ni kua ni muri ira na lewelevu me cakava na ka ca; mo ni kua talega ni solia nai vakadinadina ni dua na veiba me to vata kei ira na kena vakatanitaki na dodonu. 3 "Mo kua ni vakaraitaka na veitovaki ki na dua na veileti, ni ra sa tiko kina na dravudravua. 4 "Kevaka o ni sa raica na bulumakau se asa nei koya na kemuni meca ni sa lako sese voli, mo ni qai kauta lesu tale vua. 5 "Kevaka o ni sa raica na nona asa na tamata sa cati kemuni ni sa tacori tu, ka o ni sega ni via vukea, mo ni qai vukei koya sa cati kemuni ena kena vakacegui na asa. 6 "Mo ni kua ni vakatanitaka na nona lewa dodonu na dravudravua ena nona i le ni veileti. 7 "Mo ni lako tani vakayawa mai na ka lasu; mo ni kua ni vakamatei koya sa lecaika, kei koya sa dodonu tiko. Ni Au na sega ni vakadonui ira na caka ca. 8 "Mo ni kua ni taura e dua na ka e soli, me caka kina na veivesuki, na ka vakaoqo e vakamatabokotaka na kila siqesiqe ni tamata ka vakatanitaka talega na nodra vosa na yalododonu. 9 "Me ra kua ni vakaocai na vulagi, ni kemuni sa kila vinaka na yalodra, ni kemuni a vulagi tu e liu mai Ijipita.

Na I Vunau Ni Siga Ni Vakacecegu

10 "Me ono na yabaki mo ni teitei kina ka kumuna vata na vuana, 11 "Eena i kavitu ni yabaki, me qai vakacegui na vanua mai na kena teivaki, me rawa ni ra kana talega na dravudravua: na vei ka sa vo me ra kana kina na manumanu kila ni vanua. Mo ni cakava vaka talega kina ki na nomuni veivaini kei na veiolive. 12 "Me ono na siga mo ni cakacaka kina, mo ni vakacegu ena i ka vitu ni siga, me ra vakacegu talega na nomuni bulumakau kei na asa, o ira na nomuni dauveiqaravi kei ira na luvedra tagane, o ira talega na vulagi me ra na vakabulabulataki kina. 13 "Ena veika kece au sa tukuna vei kemuni, mo ni raica, mo ni yalodina kina ka me kua ni cavuti tale e dua na yaca ni Kalou, se me rogoci mai na gusumuni.

E Tolu Na Solevu Vakayabaki

14 "Me vakatolu na nomuni maroroya na solevu vei Au ena veiyabaki: 15 "Mo ni maroroya na solevu ni madrai sega ni Vakaleveni (mo ni kania na madrai sega ni vakaleveni me dua na macawa/vitu na siga, me vaka Au sa vakarota vei kemuni, e na gauna sa lokuci ena vula o Epipi, ni oqori na gauna o ni sa lako tani mai kina na vanua o Ijipita; me kua ni dua e lako wale mai vei Au); 16 "Kei na solevu ni Tatamusuki, nai sevu ni nomuni cakacaka o koya o ni sa teivaka kina na qele; kei na solevu ni soqoni vata ni sa mai cava na yabaki ni kemuni sa soqona kece mai na vua ni nomuni cakacaka mai na qele. 17 "Me vakatolu ena veiyabaki, me ra lako kece mai na nomuni tagane, ka vakaraitaki ira ena mata i Jiova na Kalou. 18 "Mo ni kua ni vakacabora na dra ni Noqu i Soro kei na madrai vakaleveni, se na uro ni Noqu i Soro me tiko me yacova na mataka lailai. 19 "Na i matai ni sevu ni nomuni vanua, mo ni kauta mai ki na vale i Jiova na nomuni Kalou, mo ni kua ni vakasaqara na me gone ena sucu nei tinana me kena wai.

Na Agilosi Kei Na Vosa Ni Yalayala

20 "Raica, Au sa tala na Agilosi me liu ka maroroi kemuni ena sala, ka me kauti kemuni mai ki na vanua Au sa vakarautaka. 21 "Mo ni qaqarauni ena Vukuna ka muria na Domona; mo ni kakua ni vaka yalocataki Koya, ni na sega ni vosota o Koya na nomuni talaidredre; ni Yacaqu sa tiko Vua. 22 "Ia, kevaka o ni sa muria na Domona ka muria na veika kece Au sa tukuna, Au na qai kedra meca na kemuni meca, ka veisaqasaqa kei ira sa dau saqati kemuni. 23 "Na Noqu Agilosi ena liu vei kemuni ka na kauti kemuni vei ira na Amoraiti, na Itaiti, na Perisaiti, na kai Kenani, na Ivaiti kei na Jepusaiti; Au na musuki ira tani. 24 "Mo ni kua ni cuva vei ira na nodra Kalou, se qaravi ira, se cakava na veika era sa dau cakava; mo ni vaka ira ka basuraka vakadua na nodra veiduru tabu. 25 "Mo ni qaravi Jiova na nomuni Kalou, ka ena vakalouvinakataki kemuni o Koya, na kemuni madrai kei na memuni wai. Au na kauta tani na veimate caca mai na kemuni maliwa. 26 "Ena sega ni dua e vakalutu dole se yava na nona kato ni gone ena nomuni vanua; Au na sotava na nomuni veisiga yadua. 27 "Au na tala na Noqu rere e matamuni, Au na vakavuna na nodra veilecayaki na tamata kece, o ni sa lako tiko mai vei ira, ka na vakavuna vei ira kece na kemuni meca, me na solia na dakudra vei kemuni. 28 "Au na vakatalai ira na pi me ra liu vei kemudou, me ra laki cemuri ira na Ivaiti, na kai Kenani, kei ira na Itaiti mai na matamuni. 29 "Au na sega ni cemuri ira tani mai na matamuni ena loma ni dua ga na yabaki, de na qai lala vakatotolo na vanua ka me ra qai levu na manumanu kila vei kemuni. 30 "Era na cemuri tani vakalalai e matamuni me yacova ni kemuni sa lewe levu mai ka taukena na vanua. 31 "Au na biuta na i yalayala mai na wasawasa damudamu, mai na vanua liwa ki na uciwai levu. Au na soli ira sa tiko ena vanua ki na ligamuni, ka o ni na vakasavi ira tani mai na matamuni. 32 "O ni sa tabu ni cakava vata kei ira e dua na veiyalayalati kei na nodra Kalou. 33 "Me ra kua ni tiko tale ena nomuni vanua, de ra qai vakavuna na nomuni valavala ca vei Au. Kevaka o ni sa qarava na nodra Kalou oqori sa dua dina na i cori vei kemuni."

Lako Yani 24

Era Sa Vakadeitaka Na Veiyalayalati Na Isireli

1 Sa vosa o Jiova vei Mosese ka vaka, "Mo lako cake mai vei Jiova, o iko, kei Eroni, kei Natavi, kei Abaiu, kei na vitusagavulu na qase vei ira na Isireli, ka qaravi Au toka mai vakayawa. 2 "O Mosese duadua ga me lako cake mai vei Jiova, o ira na kena vo me ra tiko vakayawa mai vei Au, se o ira na tamata me ra lako cake vata kei Mosese." 3 Sa lako mai o Mosese ka tukuna vei ira na tamata na vosa kece i Jiova kei na nona lewa kecega. Era sa sauma yani na tamata kecega ena dua ga na domo, "Na vosa kecega sa tukuna o Jiova keimami na cakava." 4 Sa vola kece o Mosese na vosa i Jiova. Sa tucake ena mataka lailai ka tara e dua na i cabocabo ni soro ena ruku ni ulunivanua kei na tinikarua na duru, me vaka na kedra i wiliwili na yavusa e Isireli. 5 Sa tala o koya e so na cauravou ni luvei Isireli, me ra la'ki vakacabora na i soro kama ka vakacabora talega nai soro ni veivinakati na bulumakau vei Jiova. 6 O Mosese, sa taura e veimama ni dra ka biuta ena beseni kei na veimama ni dra sa kaburaki ki na i cabocabo ni soro. 7 Sa taura na i Vola ni Veiyalayalati o Mosese ka wilika vei ira na tamata ni ra sa vakarorogo tiko. Era sa tukuna lesu mai, "Na veika kecega sa tukuna o Jiova, keimami na cakava ka talairawarawa kina." 8 Sa taura o Mosese na dra ka kaburaka vei ira na tamata ka tukuna, "Raica na dra ni veiyalayalati sa cakava o Jiova vata kei kemuni me vaka na veivosa kece oqo."

Ena Ulunivanua Vata Kei Na Kalou

9 Sa lako cake o Mosese, kei Eroni, kei Natavi kei Abaiu kei ira na vitusagavulu na qase ni Isireli, 10 Era sa raica na Kalou ni Isireli. Ena ruku ni yavana, sa vaka e tuva tu kina na vatu Safaira, sa vaka na lomalagi na kena rarama savasava. 11 Vei ira na turaga ni gone ni Isireli sa sega ni tarai ira ena ligana. Era sa raica na Kalou ka kana ka gunu. 12 Sa tukuna o Jiova vei Mosese, "Lako cake mai vei Au ki na ulunivanua ka tiko kina: Au na solia vei iko nai taba-vatu, na i vunau kei na i vakaro Au sa vola oti mo vakavulica vei ira na tamata." 13 Sa tucake o Mosese kei Josua na nona i vukevuke, rau sa lako cake ki na ulunivanua ni Kalou. 14 Sa qai tukuna vei ira na qase. "Ni wawa tiko eke me yacova ni keirau sa lesu tale mai. Sa tiko vata kei kemuni o Eroni kei Uri. Kevaka sa kunea e dua na dredre ni bula, me qai lako vei rau." 15 Sa lako cake o Mosese ki na ulunivanua ka sa ubia na ulunivanua e dua na o. 16 Na i ukuuku ni Kalou sa toka vakadua ena Ulunivanua o Sainiai, ka sa ubia tiko na o me ono na siga. Ena i ka vitu ni siga sa kacivi Mosese o Jiova mai na o. 17 Na i rairai ni ukuuku i Jiova sa vaka na yameyame waqa sa kana voli ena ulunivanua ena matadra na luvei Isireli. 18 Sa lako o Mosese ena loma ni o, ka lako cake ki na ulunivanua. Sa tiko ena ulunivanua o Mosese me vasagavulu na siga ka vasagavulu na bogi.

Lako Yani 25

Na Soli Me Baleta Na Vale Ni Soro

1 Sa vosa o Jiova vei Mosese ka vaka: 2 "Mo vosa vei ira na luvei Isireli, me ra kauta mai vei Au na i solisoli. Me kau mai vei ira sa via solia walega, ni sa yalona kina, me tauri mai vei ira nai solisoli. 3 "Na i solisoli oqo mo ni taura mai vei ira: na koula, na siliva, na varasa; 4 "Na i sulu karakarawa, lokaloka, kei na kena roka damudamu rarama sara, na lineni culavakamatau kei na vuti ni me; 5 "Na kuli ni luveni sipi boro damudamu, na kuli ni rapete, na kau akaia; 6 "Na waiwai ni cina, na i waki ni waiwai ni veilumuti kei na i waki ni veika boi vinaka; 7 "Na veivatu talei me vaka na Onikisa, na veivatu talei ni Efoti kei na veivatu talei ni tuvatuva e lomaserena na bete. 8 "Me ra cakava vei Au e dua na vale ni soro, Me'u tiko kina ena kedra maliwa. 9 "Me vaka na veika kece Au sa vakaraitaka vei iko, oqori na kena mataqali vata na valevakacevaceva, kei na kena vakaiyayataki, me caka kece me vaka kina.

Na Kato Ni Vosa Ni Vakadinadina

10 "Me caka e dua na kato ena kau na Akaia, me tolu, tolu na i kava nafiti na kena balavu, rua, dua na i kava na fiti na kena raraba, kei na rua, dua na i kava na fiti na kena cecere. 11 "Mo qai vakataqara, me kabi e delana na koula dina, e loma e tuba talega, ena veiyasana taucoko me dregati vinaka ena koula dina. 12 "Me va na mama koula ena veitutuna vava, me rua ena tutuna ka dua, ka rua me veidonui ena tutuna tale ka dua. 13 "Mo cakava na kau balavu ena kau na Akaia ka ubia na yasana kece ena koula. 14 "Mo biuta na biuta na kau balavu e rua oqori ena dela ni kato, ni curumaki yani ena mama koula, sa vakarautaki tu, ena tutu ni kato vava, me dau colati kina na kato mai vei ira. 15 "Na kau babalavu oqori me curu tikoga ena mama koula, ka me kua vakadua ni kau tani mai kina. 16 "Mo qai biuta ena loma ni kato na vosa ni vakadinadina. Au na solia vei iko. 17 "Mo cakava talega e dua na i dabedabe ni yalololoma ena koula dina, me tolu, tolu na i kava na fiti na kena balavu, dua veimama na fiti na kena raraba. 18 "Mo cakava e rua na "Jerupi" ena koula dina me tuki vinaka ena mua ruarua ni dabedabe ni yalololoma. 19 "Mo cakava e dua na Jerupi ena dua na yasana ka dua tale ena dua tale na yasana; mo cakava na Jerupi, me rau sema vata kei na i dabedabe ni yalololoma. 20 "Na Jerupi oqo me rau dedeka yani na tabadrau vaka ki cake me vakaruruga tu na i "dabedabe ni yalololoma" ka me rau rai vata tu ki loma, na matadrau na "Jerupi" me vakadodonu tu ga ki na i dabedabe ni yalololoma. 21 "Mo biuta na i dabedabe ni yalololoma ena dela ni "kato," ena loma ni kato mo biuta kina na Vosa ni Vakadinadina. Au a solia vei iko. 22 "E kea Au na sota kina vata kei iko, Au na vosa mai vei iko mai na dela ni dabedabe ni yalololoma, mai na kedrau maliwa na Jerupi e rau sa toka ena dela ni "kato" ni Vosa ni Vakadinadina, ena ka kecega Au na solia vei iko ena i vakaro kivei ira na luvei Isireli.

Na Teveli Ni Madrai

23 "Mo cakava talega e dua na teveli caka ena kau na Akaia, me tolu na fiti na kena balavu, dua veimama na fiti na kena raraba, ka me rua, dua naikava na fiti na kena cere. 24 "Me vakaisulu ka ubia vinaka ena koula dina, me muloci vinaka ena koula. 25 "Me vakaitatarovi vinaka na yasana taucoko, me dua na i caga na kena raba. Me muloci ena koula na i tatarovi taucoko. 26 "Me caka talega kina e va na mama koula, ka me ra biu ena tutu vava ni teveli, ena vanua e coba mai kina na yavana. 27 "Na mama oqo me kabita tiko na tutu ni teveli me taura tiko na kau ni lavelave ni teveli. 28 "Mo cakava na kau i tautauri ena kau na Akaia ka ubia na kau ena koula, oqori na i lavelave ni teveli. 29 "Na kena veleti, na veleti titobu, kei na beseni mei sovasova. Me caka kece oqo ena koula dina. 30 "Me biu tiko kina na madrai vakaraitaki ena veiyasana kecega me'u raica tiko kina.

Nai Tutu Ni Cina Koula

31 "Mo cakava talega e dua na i tutunicina ena koula dina, na i tutunicina me cakacakataki ena i tuki. Me sema vata, me dua kecega na tikina na kena duru tu donu, na veitabana, na kena bilo, na i waqawaqa kei na kena senikau. 32 "Me ono na tabana, me ra lako mai ena yasana, me tolu na tabana ni tutu ni cina ena dua na yasana, ka tolu tale ena dua tale na yasana. Me ra sema kece mai na duru tu donu. 33 "Me tolu na bilo me lako mai vaka na seni amodi—me lako mai ena dui tabana mai na tabana e duru tu donu. 34 "Na tabana tu donu me ukutaki ena seni amodi, e va na bilo vata kei na senikau. 35 "Me toka e cake e dua kei na ono mai na veitabana yadua mai na tabana levu tu donu. 36 "Na veika kece oqo me caka mai na koula dina ka me dua-vata kecega na tikina. 37 "Mo qai cakava mai kina e vitu na cina. Na cina kece oqo me solia na rarama vaka yani ki liu. 38 "Na kena i dabedabe ni cina me koula dina. 39 "Me caka kece na vei yaya oqo ena koula me dua na taledi. 40 "Oqo me caka kece me vaka nai tuvatuva sa vakaraitaki mai na ulunivanua.

Lako Yani 26

Na Vale Vakacevaceva

1 "Mo cakava talega e tini na i latilati tali vakamatau ena lineni me ka ni vale vakacevaceva, me karakarawa, me lokaloka, me damudamu rarama sara, me tu kina na Jerupi sa tali vakavinaka. 2 "Na balavu ni latilati yadua me ruasagavulukawalu na kiupiti ka me va na kiupiti na kena raraba. Me tautauvata kece na kedra i vakarau na latilati kece. 3 "Me ra semasema vata nai latilati e lima, ka me vakatalega kina na i karua ni lima. 4 "Me cula vakidikidi nai sulu karakarawa ena tutu ni latilati, ena kena i lobi talega ni latilati e lima sa semasema vata, me caka talega vakakina na i karua ni wasewase ni latilati e lima. 5 "Me limasagavulu na i kidi me caka e na dua na i latilati sa semasema oti, me limasagavulu talega nai kidi me caka talega ena kena i lobi. Oqo me caka talega ki na i karua ni wasewase ni latilati. Me veikabikabi na i lobi. 6 "Me veiqaliqali na tikina koula e limasagavulu, me veikabikabi nai latilati taucoko me dua ga kina na valevakacevaceva. 7 "Mo cakava talega e dua na laca vuti ni me, me dua na valelaca me rawa ni vakaruruga na valevakacevaceva. Me tinikadua na kena levu na laca. 8 "Na balavu ni laca vakayadua me vasagavulu ka lima na fiti na kena balavu ka ono na fiti na kena raba. Me tautauvata na kena levu ni veilaca yadua. 9 "Me cula vata e lima na laca, ka me cula vata e ono, me veitaqavi na i ka ono ni laca ena mata ni valevakacevaceva. 10 "Mo caka e limasagavulu nai kidi ena tutu ni laca e lutu vakayawa sara tiko yani, me limasagavulu talega na i kidi ena i karua ni wase ni laca. 11 "Mo cakava e limasagavulu nai vesu varasa, me vesu vata na i lobi ni laca kei na valevakacevaceva me duavata. 12 "Nai vovo ni laca sa vo tu, na i vovo ni veimama ni laca sa vo tu, me ubi mai kina na daku ni valevakacevaceva. 13 "Na tabana lili ni laca ena veiyasana kece, me lili ubia na valevakacevaceva ena veiyasana kece. 14 "Me ubi talega na vale ena kuli ni sipi sa toni ena i boro damudamu ka me toka talega e cake na kuli ni manumanu ni bogi. 15 "Na vale vakacevaceva me vakaduri cake na kau na Akaia, me duri kina vakadodonu. 16 "Me tinikalima na fiti na kena balavu ka me rua, dua naikava na fiti na kena raraba. (latu raraba) 17 "Me veisasa na kau kece e vesuka vata na latu kece e vakaduria tiko na valevakacevaceva. 18 "Me ruasagavulu nai sema ena yasana ki na ceva. 19 "Me caka e vasagavulu na qara siliva me curu kina na kau e veibasai tiko, o koya sa vesuka vata tiko na latu ni vale vakacevaceva. 20 "Na yasana ki na vualiku, me ruasagavulu na kau vakababa me veisasa 21 "Me caka e vasagavulu na qara siliva, me curu kina na kau e veibasai tiko, na kau sa vesuka vata tiko na latu ni vale vakacevaceva. 22 "Na yasana vakayawa ni vale vakacevaceva, na yasana vakara, mo cakava kina e ono na kau veibasai vakababa. 23 "Me rua talega na kau veibasai e vakababa ena tutu ni yasana vakara, mo cakava kina e ono na kau veibasai vakababa. 24 "Me veikabiti vinaka e ra, e cake talega ena qara siliva vakarautaki. Me vaka oqo na kau veibasai ruarua. Me qaravi vakavinaka na tutu ni vale ruarua. 25 "Me walu na kau sa veibasai vata kei na kena qara siliva e tinikaonoOme rua na qara siliva ena dua a muaOni rua na kau veibasai kei na rua tale na qara siliva ki na mua tale kadua ni kau veibasai e rua oqori. 26 "Mo cakava na kau i tatarovi ena kau na Akaia, me lima na i tatarovi ni latu raraba ena dua na yasa ni vale vakacevaceva, 27 "me lima tale na kau i tatarovi ni latu raraba e na yasa ni vale vakacevaceva ka dua. 28 "Na kau tatarovi e loma donu me curumaki ena loma ni latu raraba, mai na yasana e dua ki na yasana kadua. 29 "Na lalaga kece oqo me vakabiti kina na koula, me vesuka kece na i sema ni latu raraba kei na kau kece me vakabiti kina na koula. 30 "Mo vakaduria cake na vale vakacevaceva me vaka sa dusimaki vei iko mai na ulunivanua. 31 "Mo cakava e dua nai ubi tali vakamatau me roka karakarawa, lokaloka kei na damudamu makare kei na i sulu lineni. Me cula vakamataitaki me vaka sa caka ki na Jerupi. 32 "Me vakaliligi kece oqo ena duru vava sa kabi tu kina na koula. Na kena i lilili me koula, kei na mama siliva e va me ra tauri kece kina vakadua na vale. 33 "'Mo vakaliliga nai ubi. Mo qai kauta mai na kato ni Vakadinadina ki loma, ka curu mai ena daku ni i ubi. Nai ubi oqo me wasea rua vei iko na tikina tabu mai na Tikina Tabu sara. 34 "Mo biuta na i dabedabe ni yalololoma ena dela ni kato ni Vakadinadina enaTikina Tabu sara. 35 "Ena daku ni i ubi oqo, mo biuta kina na teveli kei na tutu ni cina ena dua tale na yasana ena loma tikoga ni tikina tabu me veibasai kei na teveli. Na cina ena yasana i ra kei na teveli ena yasana i cake. 36 "Mo cakava e dua nai lati ena mata ni katuba ni vale vakacevaceva, me tali vinaka na vuti ni sipi roka karakarawa, roka lokaloka kei na kena roka damudamu makare sesea. Me tali vakamaqosa. 37 "Me duri nai lati oqo ena duru e lima sa caka ena kau Akaia, ka me qai ubi ena koula dina; na kenai lilili me koula, me lima na mamavarasa me kenai tautauri.

Lako Yani 27

Nai Cabocabo Ni Soro Kama

1 "Mo cakava e dua na i cabocabo ni soro ena kau akaia, me lima na kiupiti na kena balavu ka lima na kiupiti na kena raba— nai cabocabo ni soro me veiraurau na yasana vava—na kena cere me tolu na kiupiti. 2 "Mo cakava na kena i leu ena tutuna kece e va. Me yadua kecega na i leu, ka mo ubi kece ena varasa. 3 "Mo cakava talega na kena i dabedabe me lutu kina na dravusa, na i sivi, na kena bilo levu, na kena i cula kei na kena kuro ni buka. Oqo me caka kece ena varasa. 4 "Mo cakava na i tokatoka ni qilaiso ena varasa, ka me caka talega e va na mama varasa me tauri kina na tutuna vava. 5 "Mo biuta oqori ena ruku ni cabocabo ni soro. Na kedrau veimama na i cabocabo ni soro kei na vata ni qilaiso (bukawaqa) me tiko kina na lawalawa caka ena varasa. 6 "Mo cakava na kau mei tautauri ni cabocabo ni soro, na i tautauri oqo me caka ena kau akaia ka ubi ena varasa. 7 "Na i tautauri me curumaki ena mama varasa vakarautaki ka me tiko ena yasana ruarua ni cabocabo ni soro me kena i lavelave. 8 "Me vakalomana ena kau raraba, me vaka sa vakaraitaki mai na ulunivanua, mo cakava vaka kina.

Na Taudaku Ni Vale Vakacevaceva

9 "Mo cakava talega e dua na rara vakavolovolita na vale vakacevaceva: na yasana vaka ki na ceva me sogoti ena latilati tali vakamatau ena lineni me dua na drau limasagavulu na fiti ena dua na yasana. 10 "Na tinikarua na duru kei na tinikarua na kena bilo me caka kece ena varasa. Nai qila ni vei duru kece me caka ena siliva. 11 "Me vakatalega kina na yasana ni vale vakacevaceva ki na vualiku, me tautauvata na yasana ena ceva. 12 "Na yasana vakababa ni rara (kena raba) me vitusagavulu ka lima na fiti, me tini na kena duru ka tini talega na kena bilo. 13 "Na yasana e na tokalau (kena raba), me vaka talega na ra o ya me vitusagavulu ka lima na fiti. 14 "Na vanua lili ni matamata me rusagavulu ka rua na kena latilati ka vakaliligi ena duru e tolu ka dabe tiko ena bilo e tolu. 15 "Me vakatalega kina na yasana veibasai ka dua. 16 "Na matamata ni rara me tolusagavulu na fiti na kena raba ni latilati, me tali sara vakamatau ena i sulu karakarawa, lokaloka kei na damudamu makare sara na lineni dina. Me lili ena duru e va ka dabe vinaka tiko ena bilo e va. 17 "Na duru kece vakavolivolita na rara me semati ira vata na siliva dina; na i lilili ni latilati me siliva kei na kenai dabedabe na varasa. 18 "Na rara taucoko me duanadrau limasagavulu na fiti na kena balavu, vitusagavulu ka lima na fiti na kena raraba kei na latilati lalaga me vitu veimama na fiti na kena cere, sa mai na lineni muloci ka tali vakamatau. 19 "Nai yaya kece ni cakacaka ena vale vakacevaceva, era wili kina na pini, na i vako me ra lili kina nai yaya, me caka kece ena varasa.

Na Qarauni Ni Tutu Ni Cina

20 "Mo vakarota vei ira kece na luvei Isireli me ra kauta mai na waiwai ni olive dina me ka ni cina, me waqa tikotiko ga kina na cina. 21 "Ena loma ni vale vakacevaceva, ena taudaku ni vanua tabu sara, me biu kina na cina oqo, me raici tiko ena siga kei na bogi ena mata ni Kalou, me kua ni boko. Oqo me sa dua na kena i vakarau vei ira e Isireli taucoko.

Lako Yani 28

Nai Sulu Vakabete

1 "Oqo mo kauti Eroni na tacimu, kei ira na luvena mai vei ira na luvei Isireli, me mai veiqaravi vei Au, me vaka na Bete, o Eroni, o ira na luvei Eroni o Natavi, Abaiu, Iliesa, kei Itamari. 2 "Mo cakava nai sulu tabu vei Eroni na tacimu me totoka ka vakaiukuuku. 3 "Mo vosa vei ira kece sa tiko vei ira na i solisoli ni matai maqosa sara ni veika, o ira Au sa vakasinaiti ira ena yalo ni yalomatua, me ra cakava na i sulu nei Eroni, me tawasei kina me veiqaravi vei Au me bete. 4 "Oqo na i sulu me ra cakava: nai ubi e serena, na efoti, na i sulu yara, na i vau ni tolo, nai sala, kei na i sulu tabu. Me caka na i sulu tabu oqo vei Eroni na tacimu kei ira na luvena. Me veiqaravi kina vei Au me bete.

Na Efoti

5 "Me ra taura na koula kei na wa karakarawa na wa lokaloka kei na wa damudamu makare kei na lineni matailalai, 6 "E ra sa cakava na Efoti ena koula kei na wa karakarawa, na wa lokaloka kei na wa damudamu rarama sara kei na lineni tali vakarairai vinaka sara. 7 "Me rua na kena vesu vinaka ni tabana, ka sema vata na tabana. 8 "Nai culacula ni efoti, me tautauvata ga kei na i culacula ni kena lineni. 9 "Mo qai taura e rua na vatu onikisa, ka qai vola kina na yacadra na luvei Isireli: 10 "Me volai e ono na yaca ena dua na vatu ka ono tale ena dua tale na vatu, ia, me volai me vaka na i tuvatuva ni nodra sucu. 11 "Me vaka na nona cakacaka na dau ceu vatu, me ceuti vaka kina na yaca oqori ki na vatu ka me botani ena koula na yaca kece sa ceuti, me koula kina na yaca. 12 "Me biu na vatu ceuti oqori ena taba ni efoti, me vatu ni vakananumi vei ira na luvei Isireli. Me dau colata tiko o Eroni na yacadra na Isireli ena mata ni Kalou mei vakananumi. 13 "Mo cakava talega na koula me tuvatuvani, 14 "Me caka e rua na i taube, buli ena koula oqo me kena i vesu na koula sa tuvani oti tu.

Na I Ubi E Serena

15 "Me caka na i ubi e serena ni lewa dodonu, me caka vakarairai vinaka ka matau mai vua na kena dau, o koya sa cakava talega na efoti. 16 "Me vakaruataki na kena vavaku ka me dua nai caga na kena levu vakarivirivi. 17 "Me tuvani kina na veivatu, me ra na laini tuvani, na i matai me satiusa, na topasa kei na emerelita ena matai ni laini; 18 "Na i karua ni laini me tokuoise, na sagaia kei na daimani; 19 "Na i katolu ni laini, na jakinici, na agete kei na amecesiti; 20 "Na i ka va ni laini me berili, na onikisa kei na jasipa, oqo me ra kabi kece ena koula tuvani. 21 "Na vatu me tiko kina na yacadra na luvei Isireli, me tinikarua me vaka na dui yacadra me vaka ni ceuti na mama ni taba, o ira vakayadua me vaka na yacadra, me vaka ga na yavusa e tinikarua. 22 "Mo cakava talega na i taube ni ubi ni serena vesuki ena tutuna ruarua ena koula dina. 23 "Me rua na mama koula mo cakava ka biuta ena mua ni ubi ni serena. 24 "Me vakacurumi na i taube koula ena loma ni mama koula e rau sa tiko sara ena tutu ni ubi ni serena; 25 "Na mua ni taube e rua oqori, me vesuki ena rua nai tuvatuva koula sa tiko rawa, me toka ena vatuvatu ni taba me vesuki tiko ena mata ni efoti e liu. 26 "Mo cakava e rua na mama koula ka biuta toka e na bele ni ubi ni serena ena tikina e loma ni efoti. 27 "Mo cakava e rua na mama koula, ka biuta ena i vesu ena vatuvatu ni taba ena ruku ni efoti e liu, me donuya na i sema ni lobi ni efoti. 28 Me vesuki vata na mama koula ni ubi ni serena kei na mama koula ni efoti. Me vesuki vata ena wa karakarawa ka me toka e cake ena vanua tali vinaka ena efoti, me kua ni luluqa kina na i ubi ni serena mai na efoti. 29 "O Eroni me colata tiko na yacadra na luvei Isireli ena i ubi ni serena ni lewa dodonu e na yalona ni sa lako ki na tabu, mei vakananumi tiko vei Jiova ena veigauna kece. 30 "Me biu ena loma ni i ubi ni serena na lewa dodonu na Urimi kei na Cumimi, me ra vakabibitaka tiko na yaloi Eroni ni sa lako ena mata i Jiova ena veigauna kecega.

Nai Sulu Vakabete Tale Eso

31 'Mo cakava e dua na i sulu ubi ni efoti, ka me karakarawa taucoko. 32 "Me tadola tiko ena kena veimama mei daradara ni uluna na bete. Me cula vakamatau nai daradara ni ulu oqo me kua kina ni kabasu. 33 "Ena bele ni ubi sara e ra, me ra cula kina na pomekaraneti karakarawa, lokaloka ka damudamu makare sara, na lali koula me cula ena kedra maliwa na pomekaraneti, me sota sara na bele ni sulu taucoko: 34 "Me dua na lali koula, dua na pomekaraneti, dua na lali koula, dua na pomekaraneti, me sota sara na bele ni sulu taucoko. 35 "Me daramaka tiko o Eroni ni sa cakava tiko na veiqaravi vei Jiova, me rorogo tiko na ka oqo ni sa tiko ena mata ni Kalou, ka me vakatakila ni se bula tiko. 36 "Mo cakava talega e dua na peleti koula ka me ceuti kina na NA VAKATATABU KI VEI JIOVA. 37 "Mo vesuka ena wa karakarawa ka me toka ena mata ni ubi ni ulu. 38 "Me toka ena yadrei Eroni, me colata kina o Eroni na nodra caka cala ena vuku ni veika e tabu mai na i solisoli tabu sa dau vakacabori vei Jiova. Oqo me tiko ga ena yadrei Eroni, me rawa ni ciqomi tiko ga kina mai vei Jiova. 39 "Mo cula vakamatau ka vakamatailalai nai sulu balavu, na i ubi ni ulu me caka ena lineni matailalai, me vakatalega kina na i vau ni tolona. 40 "Vei ira na luvei Eroni mo cakava vei ira na i ubi me yaco e tolodra, mei ukuuku ka rairai matau dina. 41 "Mo vakatokara vei Eroni kei iratou na luvena, mo lumui iratou ka vakatabui iratou ka tawasei iratou, me ratou veiqaravi vei Au, vakabete. 42 "Mo cakava vei iratou nai sulu e loma (tarausese) caka ena lineni, me ubia na nodratou luvawale mai na tolodratou ka ubia yani na sagadratou. 43 "Me daramaka mai o Eroni kei iratou na luvena ni ratou sa lako mai ki na vale ni veitavaki, se ni ratou sa lako mai me veiqaravi ena i cabocabo ni soro ena tikina tabu. Me kua ni ratou cala kina ka mate sara. Oqo sai vakaro vua me sega ni mudu, vei ira talega na nona kawa era na muri mai.

Lako Yani 29

Sa Vakatabui o Eroni Kei Iratou Na Luvena Tagane

1 "Oqo na veika mo cakava me ratou vakatabui kina me ratou veiqaravi vei Au ena cakacaka vakabete. Mo taura e dua na bulumakau gone kei na rua na sipi gone, ka savasava, 2 "Kei na madrai sega ni vakaleveni, na keke sega ni vakaleveni veiwaki kei na waiwai, kei na keke mamare sara veiwaki ena waiwai, (me caka ena witi vinaka). 3 "Me biu oqori ena dua na sova ka me kau mai ena sova, vata kei na bulumakau kei na sipi gone e rua oqori. 4 "Kauti Eroni mai kei iratou na luvena ki na katuba ni vale ni veitavaki, ka mo vakasavasavataki iratou ena wai. 5 "Mo qai taura na i sulu ka vakasulumi Eroni kina kei na i ubi ni efoti, na efoti, na i ubi ni serena ka vauci koya ena i vau ni efoti. 6 "Biuta e uluna na i ubi ni ulu kei nai sala tabu ena i ubi ni ulu. 7 "Taura na waiwai ni veilumuti, sova e uluna ka lumuti koya kina. 8 "Mo qai kauti iratou mai na luvena ka vakasuluma vei iratou na i curucuru me yaco i tolodratou. 9 "Vauca na tolodratou ena i vau ni tolo, o Eroni kei iratou na luvena ka qai vakaisalataki iratou. Sa nodratou i tavi me cakava na cakacaka vakabete me sega ni mudu. Mo vakatabui Eroni kina kei iratou na luvena. 10 "Mo kauta talega mai na bulumakau ena mata ni vale ni veitavaki, o Eroni kei iratou na luvena, me ratou qai tabaka na ulu ni bulumakau. 11 "Mo qai vakamatea na bulumakau ena matai Jiova, ena katuba ni vale ni veitavaki. 12 "Mo qai kauta e so na dra ni bulumakau boroya na i leu ni cabocabo ni soro ena dra ni o vakayagataka nai qaqalo ni ligamu, ka sova na vo ni dra kece ki na yavu ni cabocabo ni soro. 13 "Mo taura kece na uro ni manumanu, ka vakama ena i cabocabo ni soro. 14 "Na lewe kece ni manumanu, na kulina, kei na benu kece, mo vakama ena taudaku ni bai. Oqori nai soro ni valavala ca. 15 "Mo taura talega e dua na luve ni sipi o Eroni kei iratou na luvena, me ratou tabaka na uluna na luve ni sipi oqo; 16 "Mo vakamatea na luve ni sipi oqo, ka taura na kena dra ka kureitaka kece ena cabocabo ni soro. 17 "Mo qai wasewase vakalailai na luveni sipi oqori, ka savata sara vakavinaka ka biuta vata tale kei na uluna. 18 "Mo qai vakama na luveni sipi taucoko ena i cabocabo ni soro. Oqori na i soro kama vei Jiova; oqori na ka boi vinaka, na i soro sa caka ena bukawaqa vei Jiova. 19 "Mo taura talega na luveni sipi ka dua, o Eroni kei iratou na luvena me ratou tabaka na ulu ni luve ni sipi oqo. 20 "Mo qai vakamatea na luveni sipi oqori, taura eso na kena dra ka boroya na bele ni daliga i matau i Eroni kei na bele talega ni daligadratou i matau na luvei Eroni, ena nodratou i dovidovi ni madrai i matau talega, kei nai qaqalo levu ni yavadratou i matau, ka kuretaka na kena vo ena i cabocabo ni soro. 21 "Mo taura talega eso na dra sa tiko ena cabocabo ni soro, kei na so na waiwai ni veilumuti, mo kureitaka vei Eroni, ena nona i sulu talega, me vaka talega kina ki vei iratou na luvena kei na nodratou i sulu talega, o Eroni kei iratou na luvena. 22 "Mo qai taura kece na uro ni luve ni sipi, na uro kece ni gacagaca, na uro ni sagana i matau (ni sa luve ni sipi ni veivakatabui oqo), 23 "Dua na i buli madrai, dua na keke caka ena waiwai, dua na keke mamare mai na sova ni madrai sega ni vakaleveni sa tiko ena mata i Jiova; 24 "Mo biuta kece oqo ena ligai Eroni kei na ligadra na luvena ka yalovaka, mei soro yalovaki ena mata i Jiova. 25 "Mo taura tale mai na ligadra ka vakama ena i cabocabo ni soro mei soro kama ka me ka boi vinaka ena mata i Jiova. Oqori na i soro sa caka vei Jiova ena bukawaqa. 26 "Mo taura na sarisari ni luve ni sipi sa vakatabui kina o Eroni ka yalovaka mei soro yalovaki vei Jiova; o ya me kemui votavota. 27 "Na luve ni sipi sa caka kina na veivakatabui mo vakasavasavataka, na serena sa yalovaki kei na sagana sa vakalavelaveti na i soro lavelaveti me kei Eroni kei iratou na luvena. 28 "Sa ka me lako mai vei ira na luvei Isireli kei Eroni kei iratou na luvena me vaka na i lesilesi me sega ni mudu. Ni sai koya oqo nai soro lavelaveti, mei soro lavelaveti mai vei ira na luvei Isireli, mai na i soro ni veivinakati, oqori na i soro lavelaveti vei Jiova. 29 "Nai sulu tabu nei Eroni, me nei luvena ni sa oti o koya, me lumuti vei iratou ka vakatabui vei iratou. 30 "Na luvena sa na bete me kenai sosomi me daramaka me vitu na siga, ni sa curu ki na vale ni veitavaki me veiqaravi ena tikina tabu. 31 "Mo taura talega na luve ni sipi ni veivakatabui, ka vakasaqara na lewena ena tikina tabu. 32 "O Eroni kei iratou na luvena, me ratou qai kania na lewe ni luve ni sipi kei na madrai sa tiko ena sova ena katuba ni vale ni veitavaki. 33 "Me ratou kania na veika oqori sa caka mei bulubulu, me vakatabui ka vakasavasavataki iratou; me kua ni kana kina na vulagi ni sa ka tabu. 34 "Kevaka e dua na lewe ni manumanu na i soro vakatabui, se madrai, sa vo tiko me yacova na mataka, me qai vakamai ena bukawaqa na veika oqori. Me kua ni laukana ni sa ka tabu. 35 "Mo cakava vei Eroni kei iratou kece na luvena me vaka sa vakaroti vei iko. Mo vakatabui iratou me vitu na siga. 36 "Mo vakacabora ena veisiga e dua na bulumakau tagane mei soro ni valavala ca e veibuluti. Mo vakasavasavataka nai cabocabo ni soro ni o sa cakava kina na veibuluti, mo lumuta me tawasei kina. 37 "Me vitu na siga me caka kina na veibuluti ni cabocabo ni soro ka vakasavasavataki. Na i cabocabo ni soro me ka tabu sara. Na ka kecega sa tara na i cabocabo ni soro e dodonu me ka tabu.

Na I Soro Ena Veisiga

38 "Oqo na veika mo cabora ena i cabocabo ni soro, me rua na lami ena matai ni yabaki, ena veisiga, ka me caka tikoga. 39 "Dua na lami ena mataka, ka me dua tale na lami ni sa karobo na yakavi. 40 "Mo vakacabora e dua na lami vata kei na dua na i katini ni vakarau falawa veiwaki vata kei na waiwai e va nai vakarau, me va talega nai vakarau waini, mei soro laugunu. 41 "Na lami tale kadua, mo vakacabora ni sa karobo na yakavi, mo vakacabora vata kei na i soro vuata kei na i soro laugunu me vaka ena mataka, me ka boi vinaka, na i madrali sa caka ena bukawaqa vua na Kalou. 42 "Oqo na i soro kama me sa caka tikoga ena taba tamata kecega, ena katuba ni vale ni veitavaki ena mata i Jiova, na vanua Au na sotavi iko kina ka vosa vei iko. 43 "E kea, Au na sota kina kei ira na luvei Isireli, ka ena tawasei na vale vakacevaceva ena Noqu i ukuuku. 44 "Au na vakasavasavataka na vale ni veitavaki kei na kena i cabocabo ni soro. Au na vakasavasavataki Eroni kei iratou na luvena, me ratou veiqaravi vei Au vakabete. 45 "Au na tiko vata kei ira na luvei Isireli, ka me'u nodra Kalou. 46 "Era na kila ni sai Au o Jiova na nodra Kalou, o Koya sa kauti ira tani mai na vanua o Ijipita, me rawa Ni'u tiko vata kei ira. Sai Au o Jiova na nodra Kalou.

Lako Yani 30

Na I Cabocabo Ni Soro Ni Ka Boi Vinaka

1 "Mo cakava e dua na i cabocabo ni soro me vakamai kina na ka boi vinaka; me caka ena kau akaia. 2 "Me dua na kiupiti na kena balavu ka dua na kiupiti na kena raba—me veiraurau na yasana vava—me rua na kiupiti na kena cecere. Na i leu kece me ra cokotivata me dua na tikina. 3 "Me vakaisulutaki ena koula dina na vei yasana kece ni cabocabo ni soro kei na kena i leu talega. Me buli na tutuna ena koula dina. 4 "Mo cakava talega kina e rua na mama koula ena ruku ni tutuna ena yasana ruarua, mei curucuru ni kenai tautauri me tuberi kina se colati kina. 5 "Na kena i tautauri me caka ena kau akaia ka boroi ena koula dina. 6 "Mo biuta oqo ena mata ni i lati sa tiko ena mata ni kato ni vakadinadina ena mata ni dabedabe ni yalololoma ena dela ni kato ni Vakadinadina, na vanua Au na sota kina kei iko. 7 "O Eroni me vakama tiko na ka boi vinaka ena veimataka; ni sa qarava tiko na tutu ni cina, me vakama talega na ka boi vinaka. 8 "Ni sa waqaca o Eroni na cina ena yakavi, me vakama talega kina na ka boi vinaka ena mata i Jiova ena nomudou tabatamata kecega. 9 "Mo kua ni vakacabora kina e dua tani tale na ka mai na kena sa vakaroti, se i soro kama, se i soro laukana; se mo sova kina na i soro laugunu. 10 "O Eroni talega me cakava na veibuluti ena kena i leu vakadua ena dua na yabaki ena dra ni soro ni valavala ca ni veibuluti; vakadua ena dua na yabaki me caka na veibuluti e na i taba tamata kecega. Oqo sa ka Tabu sara vei Jiova."

Nai Lavo Ni Veivakagalalataki

11 Sa vosa vei Mosese o Jiova ka vaka: 12 "Ni o sa taura na kedra i wiliwili na luvei Isireli me vaka na kedra lewe levu, na tamata yadua me solia na kenai sau vei Jiova, ni o sa wiliki koya, me kua kina ni dua na mate ca vei ira, ni o sa wiliki ira. 13 "Oqo na ka me ra solia o ira sa wiliki oti, me ra ya limasagavulu na sede, me soli ki na vale ni Kalou vua na Kalou. 14 "O ira kece sa wiliki mai na wiliwili oqo mai na yabaki ruasagavulu ka lako cake, me ra cakava na i solisoli oqo vei Jiova. 15 "O ira na vutuniyau me ra kua ni solia vakalevu, kei ira na dravudravua me ra kua ni solia vakalailai mai na limasagavulu na sede mei solisoli vei Jiova mei bulubulu ni yalomudou. 16 "Mo qai taura nai solisoli ni veibuluti oqori me yaga ki na cakacaka ena vale vakacevaceva ni veitavaki, me ka ni vakananumi vei ira na luvei Isireli ena mata i Jiova me ka ni nomuni veibuluti."

Na Dari Varasa

17 Sa vosa vei Mosese o Jiova ka vaka: 18 "Mo cakava talega e dua na dari varasa, na kena i dabedabe talega me varasa, me ka ni vuivui. Me biu ena veimama ni vale ni veitavaki kei na i cabocabo ni soro. Mo vakatawana ena wai, 19 "O Eroni kei iratou na luvena, me ratou savata kina na ligadratou kei na yavadratou. 20 "Ni ra sa lako ki na vale ni veitavaki, se ni ra lako voleka ki na i cabocabo ni soro me ra veiqaravi, me vakama na i madrali sa caka ena bukawaqa vei Jiova. Me ra vuluvulu ena wai, de ra na qai mate. 21 "Me ra qai vuluvulu ka savata na yavadra, de ra qai mate, me sa dua na i lesilesi oqo me sega ni mudu vei ira – vei koya kei ira na nona kawa taucoko ki na nodra i taba tamata kecega."

Na Waiwai Tabu Ni Veilumuti

22 Sa qai vosa tale o Jiova vei Mosese ka vaka: 23 "Mo kauta talega vei iko na veika boi vinaka sara – (me rua na drau limasagavulu na dola) na mura vinaka sara, na sinamoni boi vinaka me dua na drau rusagavulu ka lima na dola, me dua na drau ruasagavulu ka lima talega na dola na dovu kamikamica boi vinaka, 24 "Me rua na drau limasagavulu na dola na kasia boi vinaka ka boi kamikamica, me veiraurau kei na i lavo vaka ena vale ni Kalou, kei na rua veimama na qaloni na waiwai olive. 25 "Mo cakava mai na waiwai ni veilumuti oqo na i lumu sa caka vakamatau me vaka mai vua na dau caka i lumu. Me sa i lumu ni veilumuti tabu. 26 "Oqo, mo lumuta kina na vale ni veitavaki, kei na kato ni "Vakadinadina;" 27 "Na teveli kei na kenai yaya, nai tutu ni cina kei na kenai yaya kei na i cabocabo ni soro ni ka boi vinaka; 28 "Na i cabocabo ni soro ni soro kama kei na kena i yaya kece, na dari kei na kena i dabedabe. 29 "Mo tawasei ira, me ra ka tabu sara; o koya sa tara oqo, me sa vakatabui talega. 30 "Mo lumuti Eroni kei iratou na luvena ka vakatabui iratou, me ratou veiqaravi vei Au ena cakacaka vakabete. 31 "Mo tukuna talega vei ira na luvei Isireli ka vaka: Oqo nai lumu ni veilumuti tabu vei Jiova ki na nomuni i taba tamata kecega. 32 'Me kua ni lumulumu kina na tamata, se mo cakava e dua tale me via tautauvata me vaka na veika sa veiwaki vata. Sa tabu oqo, me ka tabu vei iko. 33 'Vei koya sa cakava e dua tale me tautauvata se cakava me kauta tani kina e dua na tikina, me musuki tani o koya oqo mai vei ira na kai nona.'"

Na Veika Boi Vinaka

34 Sa tukuna o Jiova vei Mosese: "Mo taura na i saluwaki kamikamica oqo, na sitakite, na onika, kei na kalipeno, na drega ni kau boi vinaka kei na kau boi kamikamica, me ra dui tautauvata na kedra i vakarau kece. 35 "Mo cakava kina na ka boi vinaka, me vaka sa cakava na dau caka waiwai vakasaluwaki, me vakamasima, ka dina sara, ka, ka tabu. 36 "Me natu e so me matailalai sara, me me biu e so ena mata ni kato ni "Vakadinadina" ena vale ni veitavaki, na vanua Au na sota kina vata kei iko, me ka tabu sara oqo vei iko. 37 "Ena vuku ni ka boi vinaka o na cakava, mo kua ni cakava e dua me nomu, me vaka na kena veiwaki kece. Oqori vei iko, me ka tabu sara vei Jiova. 38 "O koya ga sa cakava e dua me vaka kina, me dau boica, me musuki tani o koya oqori, mai vei ira na kai nona."

Lako Yani 31

O Ira Na Matai Me Tara Na Vale Vakacevaceva

1 Sa vosa o Jiova vei Mosese ka vaka: 2 "Raica, Au sa kacivi Besalieli ena yacana na luvei Urei, na luvei Uri ena yavusa o Juta. 3 "Au sa vakacuruma vua na Yalo ni Kalou, ena yalomatua, ena vuku kei na kila ka, kei na i valavala kecega ni cakacaka vakamatai, 4 "Me tuvana vakamatau na cakacaka, me vakayagataki kina na koula, na siliva kei na varasa, 5 "Na kena musumusuki na vatutalei kei na kena tuvani yani, na ceuti ni kau kei na cakacaka kecega vakamatei. 6 "Oi Au, vakaidina, Au sa digitaki Aoliapi talega na luvei Aisamaki mai na yavusa o Tani, ka, Au sa biuta na vuku – yalomatua ki na yalodra kecega na cakacaka vakamatai, me rawa ni ra na cakava kece, me vaka Au sa vakarota vei iko: 7 "Na vale ni veitavaki, na kato ni vakadinadina, kei na i dabedabe ni yalololoma sa toka e dela ni kato, kei nai yaya kece ni vale ni veitavaki— 8 "Na teveli kei na kena i yaya, na i tutu ni cina kei na kena i yaya kece, na i cabocabo ni soro ni ka boi vinaka, 9 "Na i cabocabo ni soro ni soro kama kei na kena i yaya kece, na dari kei na kena i dabedabe— 10 "Na i sulu ni veiqaravi, nai sulu tabu nei Eroni na bete, kei na nodratou i sulu na luvena ena vuku ni cakacaka vakabete, 11 "Kei na i lumu ni veilumuti kei na ka boi kamikamica ni tikina tabu. Me ra cakava me vaka Au sa vakarota vei iko."

Na I Vunau Ni Siga Ni Vakacecegu

12 Sa vosa o Jiova vei Mosese ka vaka, 13 "Mo vosa vei ira na luvei Isireli ka tukuna: 'mo ni maroroya vakaidina na Noqu Siga ni Vakacecegu, ni sai koya oqo na i vakatakilakila ki na i taba tamata kecega, mo ni kila kina ni sai Au o Jiova, sa vakasavasavataki kemuni. 14 'Mo ni maroroya na Siga ni Vakacecegu, ni sa tabu vei kemuni. o koya vakayadua sa vakacacana, me vakamatei, o koya sa cakacaka kina, me qai musuka tani mai vei ira na nona tamata. 15 'Me caka na cakacaka ena ono na siga, na i kavitu ni siga, sa siga ni vakacegu, ka sa tabu vei Jiova. o koya sa cakacaka ena Siga ni Vakacecegu, sa na vakamatei o koya oqori. 16 'Ena vuku ni ka oqo, me ra maroroya kina na Siga ni Vakacecegu na Isireli, me ra maroroya oqo ki na i tabatamata kecega, oqo na veiyalayalati e sega ni mudu. 17 'Oqo nai vakatakilakila mai vei Au kei ira na luvei Isireli me sega ni mudu; ni ono na siga sa cakava o Jiova na lomalagi kei na vuravura, e nai ka vitu ni siga sa vakacegu ka vakabulabula.'" 18 Ni sa oti na nona vosa tiko vei Mosese ena ulunivanua o Sainiai, o Jiova, sa qai solia vei Mosese e rua na vatu ni Vakadinadina, sa volavola kina na liga ni Kalou.

Lako Yani 32

Na Luve Ni Bulumakau Koula

1 Ni ra sa raica na tamata ni sa berabera na nona lako sobu mai o Mosese mai na ulunivanua. Era sa soqoni vata na tamata vei Eroni ka tukuna vua, "Mai cakava mada vei keimami na Kalou, me liu vei keimami; na tamata oqo o Mosese, na tamata sa kauti keimami tani mai Ijipita, keimami sa sega ni kila se cava sa yaco vua." 2 Sa tukuna vei ira o Eroni, "Mo ni kauta kece mai na koula sa tiko e daligamuni, na watimuni, na luvemuni tagane, na luvemuni yalewa, mo ni kauta mai vei au." 3 Era sa kauta mai na koula sa tu vei ira, o ira na tamata kecega, ka solia vei Eroni. 4 Sa ciqoma na koula mai na ligadra, ka sa bulia vakavinaka ena i yaya ni tulituli, ka sa kune sara e dua na luveni bulumakau buli. Era sa tukuna mai na tamata, "Oqo na nomuni Kalou, Isireli, o koya sa kauti kemuni tani mai Ijipita!" 5 Ni sa raica o Eroni, sa tara e dua nai cabocabo ni soro, ka cakava e dua na vakatutu ka vaka, "Ni mataka na Solevu vei Jiova." 6 Era sa yadra ena mataka ka dua, ka vakacabora na i soro kama, ka kauta mai nai soro ni veivinakati, era sa dabe sobu na tamata ka kana, ka gunu, ka tucake, ka veiqitori. 7 Sa vosa o Jiova vei Mosese, ka vaka: "Lako sobu, o ira na nomu tamata o a kauti ira mai Ijipita, era sa vakadukadukalitaki ira. 8 "Era sa vuki tani vakatotolo mai na sala Au a vakarota vei ira. Era sa cakava vei ira na luve ni bulumakau buli, era sa lotu kina ka vakacabo i soro kina, ka tukuna tiko, 'Oqo na nomuni Kalou, Isireli, o koya sa kauti kemuni tani mai na vanua o Ijipita!'" 9 Sa qai tukuna vei Mosese o Jiova, "Au sa raici ira na tamata oqo, e dina, era sa tamata domoqa! 10 "Oqo, mo laivi Au mada, me vakamai ira na Noqu cudru, ka Me'u kani ira. Au na cakava mai vei iko e dua na matanitu levu." 11 Sa vakamamasu o Mosese vei Jiova na nona Kalou ka vaka: "I Jiova ena cava sa rui katakata kina na Nomuni cudru ena vukudra na Nomuni tamata, o ira, o ni sa kauti ira tani mai Ijipita ena kaukauwa levu kei na ligamuni qaqa? 12 "Na cava me ra vosa kina na Ijipita ka tukuna, 'Sa kauti ira tani mai, me mai vakamavoataki ira ka vakamatei ira ena veiulunivanua ka vakayali ira mai na matai vuravura?' Mo ni vukica tani na Nomuni cudru katakata, ka vakagolea tani na ca levu oqo mai vei ira na nomuni tamata. 13 "Mo ni nanumi Eparama, Aisake, kei Isireli, na Nomuni tamata o ni a yalayala ga kina vakai Kemuni, ka tukuna, 'Au na vakalevutaka na nomu kawa me vaka na kalokalo ni lomalagi; kei na vanua kece oqo, Au na solia vei ira na nomu kawa, me ra taukena ka sega ni mudu.'" 14 O Jiova sa vakamamadataka na nodra cudruvi na Nona tamata me vaka sa tukuna oti. 15 Sa lako sobu mai na ulunivanua o Mosese kei na rua na vatu ni tukutuku sa tiko e ligana. Na vatu oqo sa volai ena yasana ruarua; sa volai ena yasana ka dua kei na yasana tale ka dua. 16 Na vatu oqo sa cakava ga na Kalou, na volavola sa volavola ga na Kalou, ceuti ena vatu. 17 Ni sa rogoca o Josua na rorogo mai vei ira na tamata ni ra sa kaikaila tiko, sa tukuna sara vei Mosese, "Sa tiko e dua na rorogo ni valu ena i tikotiko." 18 Sa tukuna mai o Mosese: "Oqori sa sega ni rorogo ni kena kailavaki na qaqa, se, na rorogo ni druka, sa rorogo ga ni lagalaga sere." 19 Ni sa lako voleka mai kina nodra i tikotiko, sa raica na luve ni bulumakau kei na veimeketi. Sa katakata mai na cudru nei Mosese, ka sa viritaka na vatu sa tu e ligana ka vorolaka ena i butubutu ni ulunivanua. 20 Sa taura na luve ni bulumakau ka vakama ena bukawaqa ka vorovorolaka vakalalai ka kaburaka yani ki wai ka cakava me ra gunuva na luvei Isireli. 21 Sa tukuna o Mosese vei Eroni, "Na cava era sa cakava vei iko na tamata oqo mo cakava kina e dua na i valavala ca vei ira?" 22 Sa sauma o Eroni ka vaka: "Mo raica me kua ni yaco na cudru katakata i Jiova. o sa kilai ira na tamata ni ra sa tu oqo ena ca. 23 "Ni ra sa tukuna vei au na tamata, 'Mo cakava vei keimami na Kalou me liu tiko vei keimami; ni o Mosese, na tamata sa kauti keimami tani mai na vanua o Ijipita, keimami sa sega tiko oqo ni kila se cava sa yaco tiko vua.' 24 "Au na qai tukuna vei ira, 'Me ra kauta mai na koula ki vei au, sa qai vakamai na koula kece oqo,' ka sa basika kina na luveni bulumakau." 25 Ni sa raica o Mosese ni ra sa sega ni tarovi rawa, (ni sa sega ni cakava rawa e dua na ka o Eroni, era na madua ga vata kei ira na meca), 26 Sa tucake tu ena matamata ni tikotiko o Mosese ka tukuna; "O cei sa tiko ena yasa ni Kalou me lako mai ki ke." Era sa lako kece mai vua na luvei Livai ka soqoni vata kece vua. 27 Ka tukuna, "Sa tukuna vaka oqo o Jiova na Kalou e Isireli, 'O ira na tamata oqo me ra biuta nai seleiwau e tutudra, ka me ra lako yani ka lako mai ena i curucuru kecega ni tikotiko, me ra vakamatea na tamata kecega, na tacidra, na nona i tokani kei ira na wekadra.'" 28 O ira na luvei Livai era sa cakava me vaka na vosa i Mosese. Era sa vakabalei ena siga tikoga koya e lewe tolu na udolu na tamata. 29 Sa tukuna mai o Mosese, "Mo ni vakasavasavataki kemuni e daidai vei Jiova, me vakalouvinakataki kemuni kina e dai, ni sa veivala na tamata kecega, na veiluveni, na veitacini." 30 Sa qai yaco ena siga ka tarava sa tukuna o Mosese vei ira na tamata, "O ni sa valavala ca ena valavala ca levu sara. Au na lako cake vei Jiova; me'u na cakava mada e dua na bulubulu ena vuku ni nomuni valavala ca." 31 Sa lesu o Mosese vei Jiova ka tukuna, "O ira na tamata oqo era sa valavala ca vakalevu sara ka era sa cakava vei ira e dua na Kalou koula! 32 "Ia oqo, kevaka o ni sa vosota na nodra i valavala ca, kevaka e sega, au sa kerea. Mo ni bokoca laivi na yacaqu mai na Noqui Vola ni Bula o ni sa dau vola." 33 Sa vosa o Jiova vei Mosese ka vaka: "O koya vakayadua sai valavala ca vei Au, Au na bokoca na yacana mai na Noqu i Vola ni Bula. 34 "Mo lako, ka liutaki ira na tamata ki na vanua Au sa tukuna vei iko, Raica, na noqu agilosi ena liu tiko. Na siga ga au na veisiko yani kina Me'u veitotogitaki, Au na veitotogitaki me vaka na nodra i valavala ca." 35 O Jiova sa vakacacani ira na tamata baleta na veika era sa cakava ena vuku ni luve ni bulumakau sa cakava o Eroni.

Lako Yani 33

Na I Vakaro Me Sa Biu o Sainiai

1 Sa qai vosa o Jiova vei Mosese, "Mo biuta na vanua oqo ka lako cake, o iko kei ira kecega o sa kauti ira tani mai na vanua o Ijipita, ki na vanua Au sa yalayala kina vei Eparama, vei Aisake, vei Jekope ka tukuna kina, 'Au na solia oqo vei ira na nomu kawa.' 2 "Au na tala na Noqu Agilosi me liu vei iko, Au na cemuri ira tani na kai Kenani, na Amoraiti, na Itaiti, na Perisaiti, na Ivaiti, kei ira na Jepusaiti." 3 "Lako cake ki na vanua sa drodro kina na sucu kei na oni; Au na sega ni lako cake vata kei kemuni, de, au na qai vakarusai kemuni ena sala, ni sai kemuni e dua na kawa tamata domoqa." 4 Ni ra sa rogoca na tamata na veika oqori, era sa vakaloloku ka sega ni dua e via ukutaki koya. 5 Ni sa tukuna oti o Jiova vei Mosese, "Tukuna tiko vei ira na luvei Isireli, 'Ni ra sa rui tamata domoqa. E rawa ga ni lako mai ena kemuni maliwa ka vakaqeavutaki kemuni. Oqo mo ni kauta tani na kemuni ukuuku, me rawa Ni'u kila kina se cava Me'u cakava vei kemuni.'" 6 O ira na luvei Isireli, era sa luvata tani na nodra i ukuuku ena ulunivanua o Orepi.

E Rau Sa Sota o Mosese Kei Jiova

7 Sa tara o Mosese na nona valelaca ena taudaku ni tikotiko, ka vakayacana me vale ni veitavaki. Sa qai yaco, vei koya sa via sota kei Jiova, me ra lako ki na vale ni veitavaki ena taudaku ni tikotiko. 8 Ena veigauna sa daulako kina o Mosese ki vale ni veitavaki, era sa dau tucake na tamata, na tamata yadua ena nodra dui katuba ka vakaraici Mosese me yacova ni sa curu ki na vale ni veitavaki. 9 Ni sa dau curu o Mosese ki na vale ni veitavaki, sa dau lako sobu mai na duru o ka tu vakadua ena katuba ni vale ni veitavaki, ka sa dau vosa tiko o Jiova vei Mosese. 10 Ni ra sa dau raica na tamata na duru o ni sa tu ena katuba ni veitavaki, era sa dau tu cake na tamata vakayadua me lotu ena katuba vakayadua ni nodra vei vale. 11 Sa vosa o Jiova vei Mosese ena matana votu, me vaka sa vosa na tamata vua na nona i tokani. Sa dau lesu tale mai o Mosese ki na nodra i tikotiko, ia, o Josua na nona dauveiqaravi na luvei Nuni, na cauravou sa tiko ga ena vale ni veitavaki.

Sa Yalataki Ni Na Tiko Na Kalou

12 Sa vosa vei Jiova o Mosese ka vaka: "Raica o ni sa tukuna vei au, 'Me'u kauti ira cake mai na tamata oqo,' ia, o ni sa sega ni vakaraitaka vei au, o cei ena talai vata kei au. o ni sa tukuna tiko ni o 'Ni sa kila na yacaqu ka'u sa kunea talega na loloma e mataqu.' 13 "Oqo au sa kerea, kevaka au sa kunea na loloma e Matamuni, Mo ni vakatakila vei au oqo na Nomuni sala, me'u kilai Kemuni kina ka kune loloma talega e Matamuni. Ka kila ni o ira oqo era sa Nomuni tamata." 14 Sa tukuna o Jiova, "Na Noqu i ukuuku ena lako vata kei kemuni ka Au na solia vei kemuni na vakacegu." 15 Sa sauma o Mosese vei Jiova ka vaka: "Kevaka sa sega ni lako vata kei keimami na Nomuni ukuuku, Mo ni kua ni kauti keimami mai ki ke. 16 "Keimami na kilai vakaevei ni o ira na Nomuni tamata kei au sa kune loloma e Matamuni, vakavo ni Kemuni sa tiko vata kei keimami? O ira na Nomuni tamata kei au, sa tawasei tu mai vei ira kecega na tamata sa tu e delai vuravura." 17 Sa qai vosa o Jiova vei Mosese, "Raica Au na cakava talega na ka o sa tukuna; Au sa kilai iko talega ena yacamu." 18 Sa qai kerea o Mosese, "Isa Mo ni vakaraitaka mada mai na Nomuni ukuuku." 19 Sa tukuna mai o Koya, "Au na cakava kece na Noqu vinaka me liu e matamu, Au na vunautaka na Yacaqu e matamu, Au na yalovinaka vua Au sa via yalovinaka vua ka au na lomani koya ga Au sa via lomana." 20 O na sega ni raica rawa na Mataqu, "Sa sega e bula – ni sa raica na Mataqu." 21 Sa tukuna mai o Jiova, "O na raici Au ga mai na dua na yasana, mo tucake tu mai na vatu. 22 "Ni sa lako yani na Noqu i ukuuku, Au na biuti iko ena tutu ni vatu, Au na ubi iko e ligaqu ni'u sa lako sivi iko. 23 "Au na qai vakagalalataka na ligaqu mai vei iko, mo raica ga na dakuqu, ia na mataqu ena sega ni raica rawa na tamata."

Lako Yani 34

Sa Taya o Mosese Na Vatu Vou

1 Sa vosa o Jiova vei Mosese ka vaka: "Mo taya tale e rua na vatu me vaka e liu, ka Au na vola tale kina na vosa sa volai ena vatu e liu o a vorolaka. 2 "Me sa vakarau tu ena mataka lailai, ka mo kauta cake mai ena ulunivanua o Sainiai, mo vakaraitaki iko mai vei Au ena ulunivanua. 3 "Me kua ni dua na tamata me lako cake vata mai kei iko, me kua talega ni dua na tamata me kune ena ulunivanua taucoko; me kua ni kune e dua na manumanu susu me kune, ni kakana voli ena ulunivanua." 4 Sa qai taya o koya e rua na vatu me vaka e liu. Sa yadra vakamataka lailai o Mosese ka lako cake ena Ulunivanua o Sainiai, me vaka sa vakarota vua o Jiova; ka sa kauta vata tiko na taba ni vatu e rua. 5 Sa lako sobu mai o Jiova ena o, ka sa mai tu vata kei Mosese ka cavuta na yaca i Jiova. 6 Sa lako e matana o Jiova ka vakarogoya, "O Jiova, o Jiova, na Kalou, yalololoma, daulomasoli, dauvosota vakadede, Sinai sara ena cakacaka vinaka kei na dina, 7 "Sa maroroya tiko na yalololoma vei ira na vakaudolu, sa vosota na caka ca kei na caka cala kei na i valavala ca, sa sega ni vakagalalataki ira sa yalodina ena caka ca. Sa totogitaki ira na qase ena vuku ni nodra caka ca me yacova na i katolu kei na ka va ni tabatamata." 8 Sa vakatotolo o Mosese, ka vakacuva na uluna vaka ki na qele, ka lotu. 9 Ka tukuna, "Kevaka au sa kune loloma e Matamuni, I Jiova, au kerea, me lako vata kei keimami na noqu Turaga, e dina mada ga ni keimami tamata domoqa; ia, o ni sa vosota na neimami caka cala kei na neimami valavala ca, ka o ni sa tauri keimami ga me Nomuni votavota." Sa Vakavoui Na Veiyalayalati 10 Sa tukuna o Jiova, raica, "Au na cakava na veiyalayalati. Ena matadra na tamata Au na cakava na ka veivakurabuitaki, na veika e se bera vakadua ni yaco e vuravura, se ki na dua na vanua, o ira kece na tamata sa tiko vata kei kemuni era na raica na cakacaka ni liga ni Kalou. Ni, Au na cakava e dua na ka levu vei kemuni. 11 "Mo ni raica na ka levu Au sa vakarota vei kemuni e daidai. Au na vakasevi ira tani mai matamuni na Amoraiti, na Kenanaiti, na Itaiti na Perisaiti, na Ivaiti, kei ira na Jepusaiti. 12 "Mo qarauni iko vinaka Mosese, de o qai cakava e dua na veiyalayalati kei ira na tamata sa tiko ena vanua o sa lako tiko kina, ka o na coriti kina. 13 "Ia, mo vakarusa ga na nodra i cabocabo ni soro, musuka laivi na duru tabu keina kena matakau kau 14 "(Mo ni kua ni qarava tale e dua na Kalou, o Jiova duadua ga, ni sa yacana o Vuvu, ni sa vuvu na Kalou), 15 "De o na qai cakava e dua na veiyalayalati kei ira sa tiko ena vanua, ka era sa veiqitori kei ira na nodra Kalou, ka sa sureti iko sara e dua me kania na kena i soro, 16 "Kemuni na taura talega na luvena yalewa vei ira na luvemuni tagane, o ira na luvena yalewa era sa veiqitori kei na nodra kalou ka qai vakavuna na nodra veiqitori na nodra kalou kei ira na luvemuni tagane. 17 "Mo ni kakua ni cakava vei kemuni, e dua na kalou buli. 18 "Mo ni maroroya na Solevu ni Madrai Sega Ni Vakaleveni, me vitu na siga me laukana kina na madrai sega ni vakaleveni, me vaka Au sa vakarota vei kemuni, ena gauna sa lokuci oti ena vula o Epipi. Ni vula o Epipi, o ni sa lako tani kina mai Ijipita. 19 "O ira kece sai dola ni kato ni gone i tinadra sa Noqu, kei na i sevu ni manumanu susu kecega ka tagane se sipi se bulumakau. 20 "Na ulumatua ni dua na Asa mo volia ena dua na lami. Kevaka o sa sega ni volia, mo qai musuka na domona. o ira kece sa ulumatua vei ira na luvemuni tagane mo voli ira. Me kua kina ni dua e lako wale mai vei Au. 21 "Mo cakacaka ena ono na siga, ia mo vakacegu ena i ka vitu ni siga, ena gauna ni teitei kei na gauna ni tatamusuki mo cegu kina. 22 "Mo maroroya na Solevu ni Veimacawa, na i sevu ni tatamusuki, kei na Solevu ni Kumukumuni ena gauna sa mai cava kina na yabaki. 23 "Vakatolu ena dua na yabaki, na tagane kece me ra vakaraitaki ira ena mata i Jiova, na Kalou kei Isireli. 24 "Au na vakasevi ira na veimatanitu ka vakalevutaka na nomuni yalayala ni vanua; ena sega ni dua ena kocova yani na nomuni vanua ni kemuni sa lako cake vei Jiova vakatolu ena dua na yabaki. 25 "Mo kua ni vakacabora vata na dra ni noqu i soro kei na leveni, se na Solevu ni Lako Sivia me vakavo tu me yacova na mataka. 26 "Na i matai ni sevu ni nomuni vanua me kau mai ki na vale i Jiova na nomuni Kalou. Me kua ni vakasaqari na luve ni me ena sucu nei tinana." 27 Sa qai tukuna o Jiova vei Mosese, "Mo vola na vosa oqo, ni rogorogo ni vosa oqo, sa tiko kina na veiyalayalati vata kei iko, kei ira talega na Isireli." 28 Sa tiko o Mosese kei Jiova me vasagavulu na bogi ka vasagavulu na siga; sa sega ni kana se gunu. Sa volavola o Mosese ena vatu, sa vola na vosa ni veiyalayalati, na i Vunau e Tini.

Na Serau Ni Matai Mosese

29 Sa qai yaco ni sa lako sobu mai o Mosese mai na ulunivanua o Sainiai (sa tu e ligana ruarua na Vatu ni Vakadinadina) Sa sega ni kila o Mosese ni sa serau tu na Matana ni rau sa veivosaki kei Jiova. 30 O Eroni kei ira kece na Isireli era sa rere na torovi Mosese mai, ni ra sa raica ni sa rui serau sara na i rairai ni matana. 31 Sa qai kacivi ira yani o Mosese, o Eroni kei ira kece na qase ni Isireli era sa gole mai vei Mosese, ka era sa veivosaki tale. 32 Ni sa oti o ya, era sa lako voleka mai na Isireli, sa soli vei ira na i vakaro kece sa vosa kina o Jiova vei Mosese ena Ulunivanua o Sainiai. 33 Ni sa oti na nona vosa o Mosese vei ira, sa ubia na matana ena i ubi. 34 Ena veigauna kecega sa lako kina o Mosese me veivosaki kei Jiova, ena kauta tani na i ubi ni mata, ka sa ubi tale ni sa lako mai ka vosa vei ira na tamata ena vuku ni veika sa vakaroti koya kina o Jiova. 35 Ena veigauna kecega ni ra sa dau raici Mosese kina o ira na luvei Isireli ni sa tu na i serau ni Kalou e matana, sa dau ubia na matana ena i ubi, me yacova na gauna sa dau lako kina me veivosaki kei Jiova.

Lako Yani 35

Na Lewa Ni Siga Ni Vakacecegu

1 Sa vakasoqoni ira kece na i soqosoqo ni luvei Isireli o Mosese, ka tukuna vei ira, "Oqo na veika sa vakarota o Jiova vei kemuni mo ni cakava: 2 "Na cakacaka me caka ena ono na siga, na i kavitu me sa tabu vei kemuni. Na siga ni vakacegu i Jiova. o koya sa cakacaka ena siga oqo, me vakamatei. 3 "Me kua ni waqa e dua na buka ena nomuni tikotiko ena siga ni cegu oqo."

Na Soli Ni Vale Ni Veitavaki

4 Sa vosa o Mosese vei ira kece na i soqosoqo ni luvei Isireli ka cavuta vei ira, "Na veika sa vakarota o Jiova ka vaka: 5 'Mo ni taura mai vei kemuni nai solisoli ki vei Jiova, o koya sa vinakati e yalona me kauta me vaka nai solisoli ki vei Jiova na koula, na siliva, na varasa; 6 'Na i sulu karakarawa, nai sulu lokaloka, na i sulu damudamu makare sara, na lineni matai lalai tuva vakamatau kei na vuti ni me silisilika; 7 'Na kuli ni sipi toni oti ena damudamu, na kuli vinaka sara kei na kau akaia; 8 'Na waiwai ni cina, na veika vakaisaluwaki ni waiwai ni veilumuti kei na saluwaki ni waiwai boi kamikamica; 9 'Na onikisa kei na veivatu me tuvani ena efoti kei na i ubi ni serena.

Nai Yaya Ni Vale Ni Veitavaki

10 'O ira kece sa matai maqosa sara sa tiko vei kemuni, me ra lako mai ka mai cakacaka me vaka sa vakarota o Jiova: 11 'Na vale ni veitavaki kei na kena vale laca, na kena i ubi, na kena i vesu, na kena kau, na kena kau tautauri, na kena duru kei na kena i sema; 12 'Na kato kei na kena i tautauri, kei na i dabedabe ni loloma, kei na i dabedabe ni loloma, kei na ubi ni sogo; 13 'Na teveli kei na kenai tautauri, na kenai yaya kece kei na madrai vakaraitaki; 14 'Nai tutu ni cina talega me veivakararamataki, na kena i yaya kece, na cina, na waiwai me waqa kina na cina; 15 'Na i cabocabo ni soro ni ka boi vinaka, na kena i tautauri, na i lumu ni veilumuti, na i saluwaki boi vinaka, na i latilati lawalawa ni katuba ena i curucuru ni vale ni veitavaki; 16 'Na i cabocabo ni soro ni soro kama, na kena i lawalawa varasa, na kena i tautauri, na kena i yaya kece, na tere kei na kena i dabedabe; 17 'Na i vakalilili ni loma ni bai, na kena duru, na kena veisema kei na kena i lati ni matamata ena loma ni bai; 18 'Na pini ni vale ni veitavaki, na pini ni loma ni bai kei na kena wa; 19 'Na i sulu ni veiqaravi ni veiqaravi ena vanua tabu. Na i sulu tabu me nei Eroni na bete kei na i sulu nodratou na luvena, me ratou veiqaravi vakabete.'" Sa Mai Soli Na Solisoli Ni Vale Ni Veitavaki 20 O ira kece nai soqosoqo ni luvei Isireli era sa lako tani mai na matai Mosese. 21 O ira kece sa yavalati na yalodra kei ira kece sa vinakata ena yalodra, era sa kauta mai na i solisoli vei Jiova, ki na cakacaka ni vale ni veitavaki kei na kena veiqaravi kece kei na kena i sulu kece. 22 Era sa lako mai, na tagane kei na yalewa o ira kecega sa vinakata mai ena yalodra era sa kauta mai nai ukuuku ni daligadra, na i ukuuku ni ucudra, na mama, nai taube era koula kecega, o ira na tagane kecega era sa solia na i solisoli koula vei Jiova. 23 Na tagane kecega sa tu vei ira na veika karakarawa, na veika lokaloka, na veika damudamu makare sesea, na lineni cula vakamatau, na vuti ni me, na kuli ni sipi toni ena i boro damudamu kei na vei kuli ni veika yaga, era sa kauta mai. 24 O ira kecega era sa solia rawa na siliva se na varasa era sa kauta mai nai solisoli vei Jiova. o ira kece sa tu vei ira na kau Akaia, sa rawa ni caka kina e dua na ka ni veiqaravi era sa kauta mai. 25 O ira kece na yalewa sa kena dau ni cakacaka ni liga, era sa kauta mai na vei ka era sa cakacaka kina ena kena e karakarawa se lokaloka se damudamu makare sara kei na lineni matai lalai. 26 O ira kece na yalewa era sa vakauqeti ira na vuku era mulomuloca na vuti ni me ka kauta mai. 27 O ira na veiliutaki era sa kauta mai na Onikisa na vatu talei sara, na vei vatu me mai tuva ena efoti kei na i ubi ni serena, 28 kei na i saluwaki kei na waiwai ni cina, na waiwai ni veilumuti kei na ka ni veika boi kamikamica. 29 O ira na luvei Isireli, era sa kauta mai na i solisoli ena yalo galala ki vei Jiova, o ira kece na yalewa kei na tagane, o ira sa vinakata ga mai ena yalodra era sa kauta mai na veika vei Jiova me caka kina na cakacaka sa vakarota o Jiova me caka ena ligai Mosese.

Era Sa Kacivi Na Kena Dau Ni Veicakacaka Mai Vua Na Kalou

30 Sa tukuna o Mosese vei ira na luvei Isireli, "Raica o Jiova sa kacivi Baselieli na luvei Urei, na luvei Uri mai na yavusa o Juta; 31 "Sa vakacuruma vei koya na Yalo ni Kalou, ena yalomatua, ena vuku, ena kila kei na i valavala kecega ni cakacaka vakamatai, 32 "Me tuvana vakamatau na i tuvatuva ni cakacaka me cakacakataki kina na koula, na siliva kei na varasa, 33 "Me musumusuki vaka matau na vatutalei na ceuti vinaka ni kau, kei na cakacaka vaka kena dau ni cakacaka. 34 "Sa biuta talega ena yalona me rawa ni vakatavuvulitaka vei Baselieli kei Aoliapi na luvei Aisameki mai na yavusa o Tani. 35 "Na Kalou sa vakacuruma vei rau na kila matau me caka kina na cakacaka kecega ni ceuceu, tuvai ka, na culacula kei na tulituli ni veika karakarawa, ni veika lokaloka, ni veika damudamu makare sara kei na lineni matailalai sara vei ira sa culacula O o ira sa cakava na cakacaka kei ira sa tuvana na cakacaka.

Lako Yani 36

1 "O Baselieli kei Aoliapi kei ira na kena dau ni cakacaka vakamatai ni ka kecega, vei ira oqo sa solia kina na Kalou na yalomatua kei na vuku me ra kila na vei cakacaka kecega ni cakacaka kei na veiqaravi ena vale ni Kalou. Era sa cakava kecega me vaka sa vakarota o Jiova."

Era Sa Solia Vakalevu Na Tamata

2 O Mosese sa kacivi Baselieli, kei Aoliapi kei ira kece sa kena dau ni cakacaka, o ira sa vakacurumi ki yalodra mai vua na Kalou na vuku, o ira vakayadua sa yavalati na yalodra me ra lako mai ka cakava na cakacaka. 3 Era sa taura mai vei Mosese na soli kece era sa solia na luvei Isireli me caka kina na cakacaka ni vale ni Kalou. Era sa lako tikoga mai na tamata me ra mai solia na i solisoli era sa yalovinaka kina ena veimataka. 4 Era sa lako mai na tamata era sa cakacaka tiko, mai na nodra dui cakacaka, 5 Era sa vosa vei Mosese ka vaka: "Era sa solia vakalevu na tamata ki na cakacaka sa vakarota o Jiova me caka, ka sa levu sara." 6 Sa solia e dua na i vakaro o Mosese ka era sa kacivaka ena i tikotiko taucoko ka vaka: "Me kua tale ni dua na tagane se na yalewa me vakuria tale na cakacaka ni soli ka ena vuku ni vale ni Kalou." Era sa cegu na tamata ena nodra kauta mai na ka, 7 Ni sa veiraurau na i yaya kece ni cakacaka me caka kina na cakacaka — io, sa levu sara na i yaya sa tu.

Na Tara Ni Vale Ni Veitavaki

8 O ira kece na kena dau oqo ni cakacaka vakamatana, era sa cula e tini na latilati cula vakamatau ena lineni matailalai kei na i sulu karakarawa, lokaloka, kei na damudamu makare sara kei na jerupi e totoka na kena i rairai. 9 Na balavu ni latilati yadudua e vasagavulu ka rua na fiti kei na kena raba e ono na fiti, me tautauvata na lelevu ni latilati yadudua. 10 Me ratou sema vata e lima, ka vaka talega kina na lima tale ka dua. 11 Na i sulu karakarawa me lobi ena mua ni latilati e sau ruarua, ka me vakatalega kina na i wasewase ni latilati ka dua. 12 Me limasagavulu na i lobi me caka ena dua na latilati me limasagavulu tale na i lobi ena i karua ni wasewase ni latilati. Na i lobi me vesuki rau vata na latilati e dua kei na i latilati tale kadua. 13 Sa cakava talega e limasagavulu na pini koula ka pinipini vata kina na i lobi ni latilati, me ka taucoko kina na vale ni veitavaki. 14 Sa cakava talega na i latilati caka ena vuti ni me, mei ubi ni vale ni veitavaki, sa caka kina e tinikadua na i latilati. 15 Na balavu ni latilati yadua oqo sa vasagavulu ka lima na fiti na kena balavu ka ono na fiti na kena raba, Me ra tautauvata kece na i latilati i ubi oqo. 16 Sa cula vata e lima na i latilati oqori, ka cula vata e ono na i karua ni wasewase ni latilati. 17 Sa cula e limasagavulu nail obi ena tutuna sara e sau ni dua na i wasewase latilati, ka me limasagavulu talega na i lobi ena tutuna sara e sau ni karua ni wasewase ni latilati. 18 Sa cakava talega e limasagavulu na pini varasa me pinitaka vata na latilati laca oqo, me dua ga. 19 Sa cakava talega nai ubi e cake ni latilati laca vuti ni me, ena kuli ni sipi, sa toni boro damudamu, oti, sa veitaqai ena i ubi kuli ni manumanu me toka e cake. 20 Na vale ni veitavaki sa caka ena kau Akaia vavaku, sa vakaduri cake tu. 21 Na balavu ni kau raraba vavaku oqo sa tinikalima na fiti ka rua veimama na fiti na kena raraba. 22 Na kau kece sa toka ena veimuana na ka me veivesuki kei na kau tale ka dua me taucoko kina na vale ni veitavaki. 23 Sa caka e ruasagavulu na kau akaia raraba me toka ena ceva. 24 Me vasagavulu na i sema siliva me tiko ena ruku ni ruasagavulu na kau raraba. Me rua na i sema dua na kau, na i sema siliva oqo me sema vata kina i na i sema sa tiko rawa ena kau. 25 Ena yasana ena vualiku, sa caka talega ena ruasagavulu na kau akaia raraba, 26 Nai sema siliva e vasagavulu: me rua nai sema dua na kau, rua na i sema dua na kau. 27 Na yasana vaka ki na ra, me ono ga na kau raraba. 28 Me rua na kau raraba ena tutu ruarua ni yasana e muri ni vale ni veitavaki. 29 Era sa veisemasemati vata na kau kece ena i sema, ka sa caka vakavinaka na tutuna ruarua. 30 Sa qai walu taucoko na kau raraba—ka tinikaono na kena i sema siliva – rua na i sema ena ruku ni vei kau raraba kece. 31 Na kau vakababa caka ena akaia, me lima me duri kina na kau raraba ena dua na yasana ni vale ni veitavaki, 32 me lima tale na kau vakababa me duri kina na kau raraba ena dua tale na yasana ni vale ni veitavaki, kei na lima tale na kau vakababa me duri ki na na kau raraba ni vale ni veitavaki ena yasana vakayawa sara. (yasana vakara) 33 Nai katolu ni kau vakababa (lomadonu) me vakacurumi ena loma ni kau raraba, mai na yasa kadua ki na yasana tale ka dua. 34 Sai ubi, ni boroi na kau raraba ena koula, na i tautauri ni kau vakababa sa caka ena koula. 35 Sa caka e dua na i sulu lobi karakarawa, lokaloka, kei na damudamu makare sara kei na lineni matai lalai, sa cula vakamatau kina na jerupi. 36 Sa va na duru kau akaia, sa boroi vinaka ena koula, na kena i tautauri e koula, sa tiko vata e va na i sema siliva me ra veitauri vata. 37 Sa cakava talega na i ubi ni katuba ni vale ni veitavaki, sa tali vata na i sulu karakarawa, lokaloka kei na i sulu damudamu makare sara kei na lineni matai lalai, sa caka e dua na dau talitali, 38 sa lima na kena duru sa tiko vata na kenai ruberube sa boroi na kena ka kece ena koula, ia, na kena i sema e lima sa caka ena varasa.

Lako Yani 37

Sa Caka Na Kato Ni Vakadinadina

1 O Baselieli sa cakava na kato ena kau akaia; e tolu, tolu na i kava na fiti na kena balavu, rua, dua na i kava na fiti na kena cere. 2 Sa boroya ena koula dina na lomana kei na kena e tuba. Sa cakava na koula me veimulomuloci e taudaku. 3 Sa va na i tautauri koula ena veitutuna vava. Sa rua ena dua na yasana ka rua tale ena yasana kadua. 4 Sa caka na kau akaia mei vua ka boroya ena koula dina. 5 Sa vakacurumi nai vua oqori ki na i tautauri koula sa toka ena tutu ni kato me colati kina na kato. 6 Sa caka talega na i dabedabe ni yalololoma ena koula dina, me tolu, tolu na i kava na fiti na kena balavu ka rua, dua na i kava na fiti na kena raraba. 7 Sa rua na kena jerupi caka ena koula dina ka me dua ga na tikina, ka me rau dabe veiqaravi tiko ena i dabedabe ni yalololoma: 8 dua na jerupi ena dua na yasana ka dua tale na jerupi ena dua tale na yasa. Sa dua ga na tikina e rau veiqaravi tiko ena dela ni dabedabe ni yalololoma. 9 Na jerupi e rau sa vakateteva yani na tabadrau ka vakaruruga na i dabedabe ni yalololoma ni Kalou. Na jerupi e rau sa veitadravi tiko ka rai tiko vaka ki na i dabedabe ni yalololoma.

Sa Caka Na Teveli Ni Madrai

10 Sa caka na teveli ni madrai ena kau akaia, sa tolu na fiti na kena balavu, dua veimama na fiti na kena raba, rua, dua nai kava na fiti na kena cere. 11 Sa boroi e cake na koula dina, ka sa caka vakavolivolita na koula muloci. 12 Sa caka talega na i tatarovi vakavolivolita na teveli me vaka na raba ni liga, ka sa muloci talega kina na koula. 13 Sa biu ena tutu vava ni teveli na i tautauri koula e yavana yadua. 14 Oqo sa tiko voleka ki nai tatarovi, mei curucuru ni i vua me colati kina na teveli. 15 Nai vua sa caka ena kau akaia ka boroi ena koula me colati kina na teveli. 16 Na veiyaya kece ni teveli sa caka ena koula dina; na tere, na bilo na dari lalai kei na bilo titobu mei sovasova.

Sa Caka Nai Tutu Ni Cina Koula

17 Sa caka talega na i tutu ni cina ena koula dina; oqo sa caka ena i tukituki, na tolona, na tabana, na kena bilo, na kena i vesu kei na kena senikau sa dua vata kecega. 18 Sa lako e na yasana e ono na tabana, e tolu na tabana ena dua na yasana, ka tolu tale ena dua na yasana. 19 Sa tolu na bilo sa vaka na seni amodi, e dua na i ukuuku mokimokiti, dua na senikau ena dua na tabanaOSa vaka kina na tabana onoono. 20 Na i tutu ni cina, sa va na bilo vaka na se ni amodi na kena i ukuuku kei na kena senikau. 21 sa veitaqataqai vakatolu na i ukuuku mokimokiti, me vei raurau vakatautauvata kei na taba onoono sa basika oti mai. 22 Sa tautauvata na kedra i ukuuku ka era sa tuki vata kecega mai na dua na tiki ni koula dina. 23 Sa vitu na kena cina ka koti vinaka na kena vauvau, na kena i dabedabe sa koula dina. 24 Sa caka kece oqo era koula dina e dua na taledi.

Sa Caka Nai Cabocabo Ni Ka Boi Vinaka

25 Sa caka nai cabocabo ni ka boi vinaka ena kau akaia. Na kena balavu e dua na kiupiti, na kena raba e dua na kiupiti— e veiraurau na yasana vava—rua na kiupiti na kena cere na kedrai leu sa cokotivata me dua na tikina. 26 Sa boroi ena koula dina na lomana e taudaku talega kei na i leu e tutuna. Ena yasana taucoko sa muloci kina na koula. 27 E rua nai tautauri koula sa toka ena dua na yasana ka rua tale ena dua tale na yasana, oqo mei curucuru ni kau i tautauri me laveti kina na i cabocabo, sa boroi oqo ena koula dina. 28 Sa caka na kau i tautauri (vua) ena kau akaia mei lavelave ni kato.

Sa Caka Nai Lumu Ni Veilumuti Kei Nai Vakaboi Vinaka

29 Sa caka talega na waiwai tabu ni veilumuti, sa ka boi vinaka sara, me vaka na nodra cakacaka na dau caka saluwaki.

Lako Yani 38

Sa Caka Nai Cabocabo Ni Soro Ni Soro Kama

1 Sa cakava na i cabocabo ni soro kama ena kau akaia; lima na kiupiti na kena balavu ka lima na kiupiti na kena raba— ka veiraurau na yasana vava—ka tolu na kiupiti na kena cere. 2 Sa toka na i leu ena tutuna vava, sa duavata ga na tikina ni i leu, ka ubi ka boroi ena varasa. 3 Sa cakava talega nai yaya kecega ni cabocabo ni soro; na sedre, na i sivi ni dravusa, na dari, na i cula ni leweni manumanu kei na tere ni qilaiso, sa caka kece oqo ena varasa. 4 Sa cakava na lawalawa varasa me dau tu ena veimama ni cabocabo ni soro. 5 Sa cakava e va na i tautauri ena tutu ni cabocabo, rua ena dua na yasana ka rua tale ena yasana ka dua. Sa caka ena varasa mei curucuru ni i vua. 6 Nai vua oqo sa caka ena kau akaia ka sa boroi ena varasa. 7 Sa vakacurumi nai vua ena i tautauri sa toka ena yasa ni cabocabo me colati kina. Na boto ni cabocabo sa botani ena kau raraba.

Sa Caka Na Dari Varasa

8 Sa caka talega e dua na dari varasa levu ka yavana talega na varasa, sa caka mai na nodra iloilo na marama sa dau veiqaravi era sa dau wawa tu ena katuba ni vale ni veitavaki.

Sa Caka Na Rara Ni Vale Ni Veitavaki

9 Sa caka na varada ena yasana vaka ki na ceva; sa vakabaitaki na varada ena lineni tali vakamatau me limasagavulu na i yate. 10 Sa ruasagavulu na kena duru, ka ruasagavulu talega na kena i sema caka ena varasa, ka sa siliva na i ruberube kece ena duru. 11 Ena yasana ki cake sa limasagavulu talega na i yate na kena balavu, sa ruasagavulu na kena duru vata kei na kena i sema caka ena varasa e ruasagavulu talega. Na i ruberube ena duru sa caka ena siliva. 12 Na varada ena yasana vaka ki na ra, sa ruasagavulu ka lima na i yate na kena balavu, ka sa tini na kena duru. Sa tini talega na kena i sema kei na i ruberube kina duru kei na kena i vesu sa caka ena siliva. 13 Sa vaka talega kina na yasana e na tokalau ni sa rusagavulu ka lima na i yate. 14 Na varada vaka ki na matamata sa vitu veimama nai yate, na kena balavu, sa tolu na kena duru kei na tolu na i sema, 15 Sa vaka talega kina na varada dakuna, ena dakuna oqo sa vitu veimama na i yate na kena balavu, sa tolu na kena duru, sa tolu na kena i sema. 16 Na varada kece vakavolivolita na vale sa tali vakamatau kina na lineni. 17 Na i sema ni duru kece oqo sa varasa, na i ruberube ena duru kece sa siliva kei na kena i vesu, ena uluna kece sa caka ena siliva kece kei na veika kece e loma sa siliva. 18 Nai tatarovi ena matamata sa tuvani vakavinaka ka tali vakamatau ena i sulu karakarawa, sulu lokaloka, kei na i sulu damudamu makare sara kei na lineni matai lalai sara. Na kena balavu sa tolusagavulu na i yate ka rua veimama na i yate na kena cere kei na kena raraba. 19 Sa va na kena duru ka va na kena i sema caka ena varasa, na i ruberube ena duru sa caka ena siliva kei na kena i vesu talega sa siliva. 20 Na pini kece ni vale ni veitavaki kei na kena varada wavoki sa caka ena varasa.

Nai Yaya Ni Vale Ni Veitavaki

21 Oqo nai wiliwili vakayaya ena vale ni Kalou, o ya na Vale ni Veitavaki sa tu kina na i vakadinadina, sa wili me vaka na i vakaro i Mosese, ena nodra veiqaravi na Livai, mai na liga i Icamari na luvei Eroni na bete levu. 22 O Baselieli na luvei Urei na luvei Uri mai na yavusa o Juta, sa cakava kece me vaka sa vakarota o Jiova vei Mosese. 23 Sa tiko vata kei koya o Aoliapi na luvei Aisameki mai na yavusa o Tani na dau– ceuceu ka dau-droini na dau-talitali ena ka karakarawa, lokaloka kei na sulu damudamu makare sara kei na lineni matailalai. 24 Na koula sa vakayagataki ena cakacaka ni Vanua Tabu, sa koula e soli mai e tolu na udolu walu na drau na paudi bibi. 25 Na siliva me vaka na i wiliwili ni tamata sa tinikarua na udolu na paudi bibi: 26 O ira na ono na drau ka tolu na udolu, lima na drau lima sagavulu na tagane yabaki ruasagavulu ka lako cake era sa solia ya limasagavulu na sede. 27 Na i sema qara kece ena Vale Tabu sa tinikadua na udolu, ono na drau na paudi bibi na siliva, koya me dua na drau tinikaono na paudi bibi dua na i sema qara. 28 Mai na vo ni va na drau na paudi bibi na siliva, sa cakava kina o koya nai ruberube ena duru, kei na wa ni veivauci. 29 Na i solisoli varasa sa volekata sara me tolu na tani. 30 Sa caka kina na i sema qara kecega, na katuba ni vale Tabu ni veitavaki, na i cabocabo varasa, na tere lawalawa ni qilaiso kei na yaya taucoko ni cabocabo ni soro, 31 Nai sema qara ni varada taucoko, na yavu ni matamata ni varada, na pini taucoko ni vale kei na pini taucoko ni varada.

Lako Yani 39

Sa Cula Na I Sulu Taucoko Vakabete

1 Na i sulu karakarawa, lokaloka, kei na damudamu makare sara, sa caka kina na i sulu ni veiqaravi, na veiqaravi ena vanua tabu, na i sulu tabu me nei Eroni, me vaka sa vakarota o Jiova vei Mosese.

Sa Cula Na Efoti

2 Sa caka na efoti ena koula kei na i sulu karakarawa, lokaloka, kei na i sulu damudamu makare sara, kei na lineni matailalai. 3 Sa tuki na koula me raraba, mamare, ka musumusu vakalalai, vakabalavu, me tali veicurumaki kei na i sulu karakarawa, lokaloka kei na i sulu damudamu makare sara, me vaka e dua na droini rairai vinaka. 4 Me caka na i vesu ni taba me vesuka vata na efoti, me vaka talega kina na muana tale e rua, kei koya sa dara tiko. 5 Na i vesu me vesuka na efoti kei koya sa dara tiko, sa tali talega vakamatau mai vua na dautalitali, me vaka sa vakarota o Jiova vei Mosese. 6 Sa vakabiri yani na vatutalei na onikisa ena koula sa tiko rawa, ka sa ceuti oti tu. Sa ceuti talega kina na yacadra na luvei Isireli. 7 Me tiko oqori ena dela ni efoti me vatu ni vakananumi vei ira na luvei Isireli me vaka sa vakarota o Jiova vei Mosese.

Sa Cula Na I Ubi Ni Serena

8 Sa caka na i ubi ni serena ena maqosa taucoko ena kena tali me vaka ni sa caka na efoti ena koula, kei na i sulu karakarawa lokaloka, kei na damudamu makare sara kei na lineni tali vakamatailalai. 9 Sa caka na i ubi ni serena vakatautauvata ka taqavi rua; sa dua na i caga vakarivirivi ni sa taqavi rua taki. 10 Sa qai tuva kina e va na i tuvatuva vatu talei, sa dua na yatu na topasa, na satiusa, na emerelita; 11 na i karua ni yatu, na tukoiso, na safaia, kei na daimani; 12 Na i katolu ni yatu, na jacini, na akaite, kei na Ameceitise; 13 Na i kava ni yatu, na berili, na onikisi kei na jasipa. Era sa vakabiti yani ena koula dina ena kena i tuvatuva. 14 E tinikarua taucoko na vatu talei me vaka na yacadra kece na luvei Isireli. Sa ceuti talega na yacadra vakayadua me vaka na nodra dui yavusa. 15 Sa qai caka na wa vakatuitui ena mua ni i ubi ni serena, na wa koula. 16 Sa rua talega na yavuyavu koula kei na rua na mama koula oqo ena mua sara ni i ubi ni serena oqo. 17 Sa vakacurumi na wa koula vakaituitui oqo ena mama ena mua ni i ubi ni serena. 18 Na mua ni wa koula vakatuitui oqo sa vesuki ena i tuvatuva vatu talei, ka biu ena i vesu ni taba ni efoti ena matana. 19 E rua na mama koula sa caka me toka ena yasa ni ubi ni serena, ena tutuna sara, ena yasana e loma ni efoti. 20 Sa caka talega e rua na mama koula ka biu ena vatuvatu ni taba ena ruku ni efoti ena matana e liu, ena i sema ni vanua cula vakamatau ni efoti. 21 Sa qai vesuvata nai ubi ni serena kei na efoti ena mama koula sa veiqaravi tiko mai na i ubi ni serena kei na efoti ena i vesu karakarawa, me toka ga ena dela ni vanua sa tali vakamatau ni efoti, me kua ni tasere kina na i ubi ni serena mai na efoti, me vaka sa vakarota o Jiova vei Mosese.

Sa Cula Eso Tale Na I Sulu Vakabete

22 Sa cakava e dua na i sulu ubi ni efoti tali vakamatau ka karakarawa kece. 23 Sa tadola tu e loma donu ni i sulu ubi oqo me vaka na i sulu ni valu, sa cula vinaka na bele ni vanua e tadola tiko me kua ni kadresu kina. 24 Na pomekareneti sa cula ena bele ni sulu ni ubi ena roka karakarawa, lokaloka kei na damudamu makare sara kei na lineni matailalai. 25 Sa caka na lali ena koula dina, ka sa cula ena kedrau maliwa e rua na pomekaraneti ena bele ni i sulu ni i ubi taucoko: 26 Dua na lali dua na pomekareneti, me vakatiko oqori me yacova ni sa sota na bele ni sulu kece, me vaka sa vakarota o Jiova vei Mosese. 27 Sa caka talega na i sulu levu cula vakamatau ena lineni matailalai vei Eroni kei iratou na luvena, 28 Na i ubi ni ulu caka ena lineni matailalai, nai sala vakabete ena lineni matailalai, na tarausese ena lineni matailalai, 29 Kei na i vau ni tolona ena lineni matai lalai, kei na i sulu karakarawa, lokaloka kei na damudamu makare sara me vaka sa vakarota o Jiova vei Mosese. 30 Sa caka e dua na i sala vakaturaga ena koula dina ka sa ceuti kina "SA TABU ME NEI JIOVA". 31 Sa vesuki ena wa karakarawa ki na i ubi ni ulu me vaka sa vakarota o Jiova vei Mosese.

Sa Mai Oti Na Cakacaka Oqo

32 Na cakacaka kece ni vale ni Kalou, na vale ni veitavaki sa vakaoti, o ira na luvei Isireli era sa cakava kece me vaka sa vakarota o Jiova vei Mosese. 33 Era sa kauta mai na Vale ni veitavaki vei Mosese, na vale laca kei na kena i yaya kece; na i vesu, na kau raraba, na kau vakababa, na duru kei na kena i sema kece; 34 Na laca kuli ni sipi boro damudamu, na laca kuli ni manumanu tale eso, kei na i latilati mei ubi; 35 Na kato ni vakadinadina kei na kena i vua kei na i dabedabe ni yalololoma; 36 Na teveli kei na madrai vakaraitaki kei na kena yaya kece; 37 Na i tutu ni cina kei na yaya kece kei na waiwai ni cina; 38 Na i cabocabo ni soro koula, na i lumu ni veilumuti, na veika boi kamikamica, na i lati ni katuba ni vale ni veitavaki; 39 Na i cabocabo ni soro varasa, na kena i vua kei na kena i yaya kece, na dari kei na kena i dabedabe; 40 Na varada kei na kena duru kece, na i sema kece, na i lati ni matamata, na kena i vesu, na kena pini, na i yaya kece ni veiqaravi ena vale ni veitavaki na vale ni Kalou; 41 Na i sulu ni veiqaravi, na i sulu ni veiqaravi ena tikina tabu, na i sulu nodratou na luvena, me cakacaka vakabete talega. 42 Me vaka na ka kecega sa vakarota o Jiova vei Mosese, era sa cakava na cakacaka kecega na luvei Isireli. 43 Sa vakaraica kece na cakacaka o Mosese, io, era sa cakava kece; me vaka sa vakarota o Jiova, era sa cakava vaka kina, ka sa vakalouvinakataki ira o Mosese.

Lako Yani 40

Sa Vakaduri Ka Tuvani Na Vale Ni Veitavaki

1 Sa qai vosa vei Mosese o Jiova ka vaka: 2 "Ena matai ni siga ni matai ni vula, mo sa vakaduria na vale vakacevaceva, na vale ni veitavaki. 3 "Mo biuta e loma na kato ni Veidinadinati, ka latia na vanua e tiko kina na kato ena dua na i ubi latilati. 4 "Mo kauta mai na teveli ka vakarautaka kina na veika e dodonu me tiko vata; mo kauta talega mai na i tutu ni cina kei na kena cina. 5 Mo kauta talega mai na i cabocabo ni soro koula ni veika boi vinaka me toka yani ena mata ni kato ni vakadinadina, me qai dua na i latilati me wasea na rumu e rua oqori, mai na katuba ni vale ni veitavaki. 6 "Mo qai tuvana na i cabocabo ni soro kama ena mata ni katuba ni vale ni veitavaki 7 "Me biu na dari ni vuluvulu ena maliwa ni vale ni veitavaki kei na i cabocabo ni soro kama, me vakatawani ena wai. 8 "Mo vakarautaka na varada ni vale ni veitavaki ena yasana kece, ka me vivi cake na i ubi ena matamata ni veiqaravi. 9 "Mo taura na waiwai ni veilumuti ka lumuta na vale ni veitavaki kei na veika kece sa tu kina. Mo vakatabuya na kena i yaya kece, me ka tabu. 10 "Mo lumuta talega na i cabocabo ni soro kama kei na kena yaya kece ni veiqaravi, ka vakatabuya na i cabocabo ni soro. Me ka tabu sara na i cabocabo ni soro. 11 "Mo lumuta talega na dari ni vuluvulu kei na kena i dabedabe ka vakatabuya. 12 "Mo qai kauti Eroni mai vei iratou na luvena ki na katuba ni vale ni veitavaki ka vakasilimi iratou ena wai. 13 "Mo vakasulumi Eroni ena i sulu tabu ka lumuti koya ka vakatabui koya, me veiqaravi vei Au ena veiqaravi vakabete. 14 "Mo kauti iratou mai na luvena ka vakasulumi iratou ena i sulu balavu. 15 "Mo lumuti iratou me vaka o sa lumuti tamadratou, me ratou veiqaravi vei Au vakabete; na nodratou lumuti sa ka me sega ni mudu na nodratou veiqaravi vakabete ena i tabatamata kecega." 16 Sa cakava o Mosese me vaka sa vakarota vua o Jiova. 17 Sa qai yaco ni sa matai ni vula ena i karua ni yabaki, ena i matai ni siga ni vula, sa vakaduri cake na vale ni veitavaki. 18 Sa vakaduria cake na vale ni veitavaki o Mosese, vakaukauwataki na kena i sema, na kau vakababa sa cobacoba me veitauri kei na duru sa vakaduri. 19 Sa vakataqari na kena laca ka sa ubi yani ena kena i ubi, me vaka sa vakarota o Jiova vei Mosese. 20 Sa sega na i Vola ni Vakadinadina ka biuta ena loma ni kato, ka vakacuruma na i tautauri ni kato ena kena mama, ka biuta na i dabedabe ni yalololoma ena dela ni kato. 21 Sa qai kauta mai na kato ki na vale ni veitavaki, sa vakaliliga cake na i ubi, ka sa latia tani na kato ni Vakadinadina me vaka sa vakarota o Jiova vei Mosese. 22 Sa kauta na teveli ki na vale ni veitavaki ena yasana e cake ni vale ni veitavaki ena taudaku ni i ubi; 23 Sa biuta na madrai ena dela ni teveli ena matai Jiova, me vaka sa vakarota o Jiova vei Mosese. 24 Sa biuta na i tutu ni cina kei na cina ena vale ni veitavaki me veidonui kei na teveli ni madrai ena dua na yasana, o ya na yasana ki ra; 25 sa waqa tiko na cina ena mata i Jiova me vaka sa vakarota o Jiova vei Mosese. 26 Sa biuta na i cabocabo ni soro koula ena loma ni vale ni veitavaki ena mata ni ubi ki na tikina tabu sara; 27 sa vakama na veika boi kamikamica ena i cabocabo ni soro koula me vaka sa vakarota o Jiova vei Mosese. 28 Sa qai vakaliliga cake na i latilati ena katuba ni vale ni veitavaki, 29 Sa qai biuta na i cabocabo ni soro kama ena mata ni katuba ni vale ni veitavaki ka vakacabora kina na i soro kama kei na i soro laukana me vaka sa vakarota o Jiova vei Mosese. 30 Sa biu na dari ni vuluvulu ena loma ni vale ni veitavaki veidonui tikoga kei na i cabocabo ni soro kama, ka sa vakatawani ena wai me ia kina na vuluvulu; 31 O Mosese kei Eroni kei ira na luvena era sa vuluvulu ka savata na yavadra mai na wai o ya. 32 Ni ra sa lako ki na vale ni veitavaki, ka lako voleka ki na i cabocabo ni soro, me ra vuluvulu ka vuivui me vaka sa vakarota o Jiova vei Mosese. 33 Sa vakaduri cake na veika kece me baleta na vale ni veitavaki. Sa vakaotia o Mosese na cakacaka.

Na O Kei Na I Serau Ni Kalou

34 Sa ubia tu na vale ni veitavaki na vei o, ka sa vakasinaita na vale ni veitavaki na i serau ni Kalou. 35 Sa sega ni rawa ni curuma na vale ni veitavaki o Mosese, baleta ni sa vakaruruga tu na vale na veio kei na i serau ni Kalou sa vakasinaita tale tu ga na vale ni veitavaki oqo. 36 Ni sa kau tani mai na vale ni veitavaki na vei o, era sa toso ena nodra i lakolako na luvei Isireli. 37 Kevaka sa sega ni toso na veio, era sa sega talega ni toso na Isireli, me yacova na siga sa toso kina na vei o. 38 Na vei o nei Jiova sa ubia na vale ni veitavaki ena siga, ka sa tu na veiduru o bukawaqa ena bogi, ena matadra na vuvale kecega e Isireli, ena nodra i lakolako kecega.

Vunau Ni Soro 1

Nai Soro Kama

1 Ia oqo sa kacivi Mosese o Jiova, ka vosa vua mai na vale ni veitavaki, ka tukuna, 2 "Mo vosa vei ira na Isireli, ka tukuna vei ira: 'Kevaka e dua vei kemudou sa vakacabora nai madrali vei Jiova, dou kauta mai na nomudou qele ni manumanu – na bulumakau se sipi se na me. 3 'Kevaka sa nonai madrali na bulumakau mei soro kama, me vakacabora o koya na ka tagane sa sega na kena ca; me vakacabora ena yalo e galala mai na katuba ni vale ni veitavaki e na mata i Jiova. 4 'Me qai tabaka o koya na ulu ni soro kama e na ligana, ka na ciqomi nai soro me vinakati kina o koya ka me nonai bulubulu. 5 'Me na vakamatea o koya na bulumakau e na mata i Jiova; ia o ira na bete, na luve i Eroni, me ra kauta na dra ka kureitaka wavokita nai cabocabo ni soro sa tu mai na katuba ni vale ni veitavaki. 6 'Ia me drudruga o koya nai soro kama ka tava vakalalai na lewena. 7 'O ira na luve i Eroni na bete me ra vakawaqaca na buka waqa e na dela ni cabocabo ni soro, ka tuva vakavinaka na buka e dela ni buka waqa. 8 'Ia o ira na bete, na luve i Eroni, me ra qai tuva vakavinaka na veitikina, na uluna, kei na kena uro, e na dela ni buka sa toka e na cabo-ni-soro; 9 'Ia na kena gacagaca kei na yavana me vuya e na wai. Me qai vakama kecega na bete e na dela ni cabocabo ni soro mei soro kama, sa vakacabori e na buka waqa, me ka boi vinaka vei Jiova. 10 'Kevaka e nonai madrali —na sipi se na me — mei soro kama, me na vakacabora o koya na ka tagane sa sega na kena ca. 11 'Me na vakamatea o koya e na yasa ni cabocabo ni soro vaka ki na vualiku e na mata i Jiova; ia o ira na bete, na luve i Eroni, me ra kureitaka na kena dra wavokita nai cabocabo ni soro. 12 'Me tava talega vakalalai, io na uluna kei na kena uro; me qai tuva vakavinaka na bete e na dela ni kau sa toka e dela ni buka waqa mai na dela ni cabocabo ni soro; 13 'Ia na gacagaca kei na yavana me vuya e na wai. Me qai kauta kecega na bete ka vakama e na dela ni cabocabo ni soro; oqo nai soro kama, sa vakacabori e na buka waqa, me ka boi vinaka vei Jiova. 14 'Ia kevaka sa nonai madrali na manumanu vuka mei soro kama vei Jiova, me qai cabora o koya na soqe se na luve ni ruve me nonai madrali. 15 'Me kauta na bete ki nai cabocabo ni soro, ka wirica na domona, ka vakama e na dela ni cabocabo ni soro; ia me sova yani na kena dra ki na yasa ni cabocabo ni soro. 16 'Me qai tunaka ka vutia ka biuta ki na yasa ni cabocabo ni soro vaka ki na tokalau, e na tikina sa biu kina na dravusa. 17 'Ka me tava na tabana, ia me kakua ni tawasea laivi; me qai vakama na bete e na dela ni cabocabo ni soro, e na dela ni kau sa toka e dela ni buka waqa. Oqo nai soro kama, sa vakacabori e na buka waqa, me ka boi vinaka vei Jiova.

Vunau Ni Soro 2

Nai Soro Laukana

1 'Ia ni sa vakacabora e dua na tamata nai soro laukana vei Jiova, me valawa qaqi vinaka na nona i madrali. Ia me livia kina o koya na waiwai, ka biuta kina na ka boi vinaka me vakamai. 2 'Me qai kauta vei ira na bete, na luve i Eroni, e dua me taura mai kina na valawa qaqi vinaka sa yakuta rawa e ligana, e veiwaki kei na waiwai, kei na ka boi vinaka me vakamai. Ia na bete me vakama eso e na dela ni cabocabo ni soro mei vakananumi, na ka sa vakacabori e na buka waqa, me ka boi vinaka vei Jiova. 3 'Na kena vo ni soro laukana ena kei Eroni kei iratou na luvena. Oqo na ka tabu sara e nai soro sa vakacabori e na buka waqa vei Jiova. 4 'Ia kevaka o kauta mai me i soro laukana na madrai sa vavi e na lovo, na keke me caka e na valawa qaqi vinaka e sega ni vakaivakatubu sa veiwaki vata kei na waiwai, se me keke mamare sara e sega ni vakaivakatubu sa boro e na waiwai. 5 'Ia kevaka sa nomui madrali nai soro laukana sa tavu e nai tavuteke kaukamea, me valawa, e sega ni vakaivakatubu, sa veiwaki vata kei na waiwai. 6 'Mo dovia vakalalai ka livia kina na waiwai; oqori na i soro laukana. 7 'Ia kevaka sa nomui madrali nai soro laukana mai nai tavuteke, me caka e na valawa qaqi vinaka kei na waiwai. 8 'Ia mo kauta nai soro laukana sa caka e na ka oqo vei Jiova. Ia ni sa soli vua na bete, me kauta o koya ki nai cabocabo ni soro. 9 'Me na qai kauta tani o koya na bete mai nai soro laukana e dua nai vakananumi, ka vakama e dela ni cabocabo ni soro. Me vakacabori e na buka waqa, me boi vinaka vei Jiova. 10 'Ia na kena vo ni soro laukana ena kei Eroni kei iratou na luvena.' Oqo na ka tabu sara e na ka sa vakacabori e na buka waqa vei Jiova. 11 'Me kakua ni dua nai soro laukana dou sa vakacabora vei Jiova me vakaivakatubu, ia mo dou kakua ni vakama e dua nai vakatubu se na o ni kei nai soro kecega sa vakacabori e na buka waqa vei Jiova. 12 'E nai soro ni sevu ga, mo dou na vakacabora vei Jiova, ia me kakua ni cabori e na i cabocabo ni soro me ka boi vinaka. 13 'Ia nai soro laukana kecega o na vakacabora mo vakamasimataka; ia mo kakua talega ni guilecava na masima ni veiyalayalati ni nomu Kalou e na nomui soro laukana. Mo vakacabora vata kei na masima na nomu i madrali kecega. 14 'Ia kevaka o sa vakacabora eso nai sevu mei madrali vei Jiova, mo vakacabora mei soro laukana ni nomu i sevu na sila vou sa vavi e na buka waqa, sa lautuki mai na sola vakalewena. 15 'Ia mo livia kina na waiwai, ka biuta e delana na ka boi vinaka me vakamai. Oqo nai soro laukana. 16 'Na bete me qai vakama na kena i vakananumi: eso na kena sila sa lautuki kei na so na kena waiwai, kei na ka boi vinaka me vakamai, oqo na ka sa cabori e na buka waqa vei Jiova.

Vunau Ni Soro 3

Nai Soro Ni Veivinakati

1 'Ni sa nonai madrali e dua nai soro ni veivinakati, kevaka sa vakacabora o koya e dua na bulumakau, se ka tagane se yalewa, me vakacabora e na mata i Jiova e dua sa sega na kena ca. 2 'Ia me tabaka na ulu ni nonai madrali e na ligana, ka vakamatea mai na katuba ni vale ni veitavaki; ia o ira na bete, na luve i Eroni, me ra na kureitaka na dra vakavolivolita na i cabocabo ni soro. 3 'Me qai vakacabora o koya mai nai soro ni veivinakati e dua nai madrali sa vakacabori e na buka waqa vei Jiova. Na uro e ubia na gacagaca, kei na uro kecega sa tu e na gacagaca, 4 'Kei na ivi ruarua kei na uro sa tu e batibatina, kei na uro e kabita na yate e na dela ni ivi, o koya me na kauta tani; 5 'Ia o ira na luve i Eroni me ra vakama e nai cabocabo ni soro e na dela ni soro kama, e dela ni kau sa toka e dela ni buka waqa, me ka sa vakacabori e na buka waqa, me boi vinaka vei Jiova. 6 'Ia kevaka sa nona i madrali me i soro ni veivinakati vei Jiova na sipi se na me, se ka tagane se yalewa, me cabora o koya e dua sa sega na kena ca. 7 'Kevaka sa vakacabora na lami me nona i madrali, me na cabora e na mata i Jiova. 8 'Ia me tabaka o koya na ulu ni nonai madrali e na ligana, ka vakamatea e na mata ni vale ni veitavaki; ia o ira na luve i Eroni me ra kureitaka na dra wavokita na i cabocabo ni soro. 9 'Me na vakacabora o koya na i madrali ni veivinakati, nai madrali sa vakacabori e na buka waqa vei Jiova, na kena uro kei na uro taucoko e buina me tava laivi o koya voleka ki na suitu. Kei na uro sa ubia na gacagaca kei na uro kecega sa tu e na gacagaca, 10 'Kei na ivi ruarua kei na uro sa tu e batibatina, na uro e kabita tu na yate e na dela ni vi, o koya me kauta tani; 11 'Me qai vakama e na dela ni cabocabo ni soro o koya na bete me kakana, nai madrali sa vakacabori e na buka waqa vei Jiova. 12 'Ia kevaka e nonai madrali na me, me cabora o koya e na mata i Jiova. 13 'Ia me tabaka na uluna e na ligana ka vakamatea e na mata ni vale ni veitavaki; ia o ira na luve i Eroni me ra kureitaka na dra wavokita nai cabocabo ni soro. 14 'Me na vakacabora o koya eso na tikina me nonai madrali, mei soro vakacabori e na buka waqa vei Jiova. Na uro e ubia na gacagaca kei na uro kece sa tu e na gacagaca, 15 'Kei na ivi ruarua kei na uro sa tu e na batibatina, kei na uro e kabita tu na yate kei na ivi, o koya me na kauta tani; 16 'Ia me qai vakama e dela ni cabocabo ni soro na bete me kakana, nai madrali e vakacabori e na buka waqa me ka boi vinaka; sa nei Jiova na uro kecega. 17 'Oqo sa kenai lesilesi me sega ni mudu e na nomudou veitabatamata e na nomudou i tikotiko kecega: mo dou kakua ni kania na uro se na dra.'"

Vunau Ni Soro 4

Nai Soro Ni Valavala Ca

1 Ia oqo sa vosa vei Mosese o Jiova, ka tukuna, 2 "Mo vosa vei ira na Isireli, ka vaka: 'Kevaka sa cala e dua na tamata ni sega ni nakita ka sa cakava e dua na ka sa vakarota o Jiova me kakua ni caka, ia sa cakava e na nona lecava, 3 'Kevaka sa vakacalaka na bete sa lumuti, ka vakavuna me ra beitaki e na ca na tamata, me qai vakacabora vei Jiova e na vuku ni nona i valavala ca sa cala kina o koya e dua na luve ni bulumakau sa sega na kena ca me i soro ni valavala ca. 4 'Ia me kauta na bulumakau ki na katuba ni vale ni veitavaki e na mata i Jiova, ka tabaka na ulu ni bulumakau e na ligana, ka vakamatea na bulumakau e na mata i Jiova. 5 'Ia na bete sa lumuti me kauta e dua nai wase ni dra ni bulumakau ki na vale ni veitavaki. 6 'Me qai tonia na nonai qaqalo na bete e na dra ka kureitaka vakavitu na dra e na mata i Jiova, e na mata ni lati ni vale tabu. 7 'Ia na bete me na boroya na dra e na tutuna balavu cake ni cabocabo ni ka boi kamikamica e tu e na mata i Jiova, ka sa tu e na vale ni veitavaki; ka me sova na kena vo ni dra kecega ni bulumakau ki na yavu ni cabocabo ni soro kama, mai na katuba ni vale ni veitavaki. 8 'Me kauta laivi maikina o koya na uro kecega ni bulumakau mei soro ni valavala ca. Na uro e ubia na gacagaca kei na uro kecega sa tu e na gacagaca, 9 'Kei na ivi ruarua kei na uro sa tu e batibatina, kei na uro e kabita tu na yate e na dela ni ivi, o koya me na kauta tani, 10 'Me vaka sa kau laivi mai na bulumakau sa vakacabori mei soro ni veivinakati; ka me na vakama na bete e na dela ni cabocabo ni soro kama. 11 'Ia na kuli ni bulumakau kei na lewena kecega, kei na uluna kei na yavana, kei na kena gacagaca kei na dena — 12 'Io na bulumakau taucoko me colata yani o koya ki na dua na vanua savasava e na i bili ni tikotiko, na vanua e dausova kina na dravusa, ka me vakama e na buka waqa e dela ni buka eso; e na tikina sa dausova kina na dravusa me vakamai kina. 13 'Ia oqo kevaka era vakacalaka nai soqosoqo taucoko ni Isireli, ka sa tabonaki na cala oqo vei ira nai soqosoqo, ka ra sa kitaka eso na ka sa vakarota o Jiova me kakua ni caka, era sa cala kina; 14 'Ni sa kilai na cala era a cakava, me ra qai vakacabora e dua na luve ni bulumakau o ira na i soqosoqo me baleta na cala, ka kauta mai ki na vale ni veitavaki. 15 'Ia o ira na qase vei ira na i soqosoqo me ra tabaka na ulu ni bulumakau e na ligadra e na mata i Jiova. Me qai vakamatei na bulumakau e na mata i Jiova. 16 'Na bete sa lumuti me na kauta e dua nai wase ni dra ni bulumakau ki na vale ni veitavaki. 17 'Me qai tonia na nonai qaqalo na bete e na dra ka kureitaka vakavitu e na mata i Jiova, e na mata ni lati. 18 'Me boroya talega e na dra na tutuna sa balavu cake e nai cabocabo ni soro sa tu e na mata i Jiova, ka sa tiko e na vale ni veitavaki; ka me sova na kena vo ni dra ki na yavu ni cabocabo ni soro kama, ka tu mai na katuba ni vale ni veitavaki. 19 'Me na kauta laivi mai na kena uro ka vakama e na dela ni cabocabo ni soro. 20 'Ka me na cakava vua na bulumakau me vaka e cakava e liu vua na bulumakau kai soro ni valavala ca; io me cakava vakakina oqo. Ka me sorovaki ira na bete, era na qai vosoti kina. 21 'Me qai colata o koya na bulumakau ki nai bili ni tikotiko, ka vakama me vaka sa vakama na bulumakau e liu. Oqo nai soro ni nodra vakacalaka na i soqosoqo. 22 'Ni sa vakacalaka e dua na turaga, ka sa cakava e na lecava e dua na ka sa vakatabuya o Jiova na nona Kalou, ka sa cala kina, 23 'Kevaka sa vakatakilai vua emuri na nona cala, me qai kauta mai o koya na nonai madrali, na me tagane sa sega na kena ca. 24 'Ia me tabaka na ulu ni me e na ligana, ka vakamatea e na tikina sa dauvakamatei kina nai soro kama e na mata i Jiova. Oqo nai soro ni valavala ca. 25 'Me na kauta o koya na bete e dua nai wase ni dra ni soro ni valavala ca e na nonai qaqalo, ka boroya kina na tutuna sa balavu cake e nai cabocabo ni soro kama, ka sova na dra ki na yavu ni cabocabo ni soro kama. 26 'Me qai vakama na kena uro kecega e na dela ni cabocabo ni soro, me vaka sa vakacabori na uro ni soro ni veivinakati. Me sorovaki koya kina na bete e na vuku ni nonai valavala ca, ena qai vosoti kina o koya. 27 'Kevaka sa vakacalaka e dua na lewe ni vanua ka kitaka e dua na ka sa vakatabuya o Jiova, ka sa cala kina, 28 'Kevaka sa qai kila emuri o koya na i valavala ca sa cakava oti, me qai kauta mai me nonai madrali e dua na luve ni me, na ka yalewa e sega na kena ca, e na vuku ni nona cala sa cakava oti o koya. 29 'Ia me tabaka o koya na ulu ni soro ni valavala ca e na ligana, ka vakamatea nai soro ni valavala ca e na tikina sa dau-vakacabori kina na i soro kama. 30 'Ia me kauta o koya na bete e dua na i wase ni kena dra e na nonai qaqalo, ka boroya kina na tutuna sa balavu cake e na i cabocabo ni soro kama, ka sova na vo ni kena dra ki na yavu ni cabocabo ni soro. 31 'Me na kauta laivi na kena uro kecega, me vaka sa kau laivi na uro mai nai soro ni veivinakati; ia me vakama o koya na bete e na dela ni cabocabo ni soro me ka boivinaka vei Jiova. Ia ena sorovaki koya na bete, ena qai vosoti kina o koya. 32 'Kevaka sa kauta mai o koya e dua na lami mei soro ni nonai valavala ca, me kauta mai e dua na ka yalewa sa sega na kena ca. 33 'Me qai tabaka o koya na ulu ni soro ni valavala ca e na ligana, ka vakamatea mei soro ni valavala ca e na tikina sa dauvakamatei kina nai soro kama. 34 'Me na kauta e dua na i wase ni dra ni soro ni valavala ca na bete e na nona i qaqalo, ka boroya kina na tutuna sa balavu cake e na i cabocabo ni soro kama, ka sova na vo ni kena dra kecega ki na yavu ni cabocabo ni soro. 35 'Me qai kauta laivi na kena uro kecega, me vaka sa kau laivi na uro ni lami mai nai soro ni veivinakati. Me qai vakama e na dela ni cabocabo ni soro o koya na bete, me vaka sa daucaka e na ka sa cabori e na buka waqa vei Jiova. Ia me sorovaki koya na bete e na vuku ni nona i valavala ca sa cakava, ena qai vosoti kina o koya.

Vunau Ni Soro 5

Nai Soro Ni Caka Cala

1 'Kevaka sai valavala ca e dua na tamata ni sa rogoca e dua na vosa bubului, ka sai vakadinadina ni sa raica se sa kila e dua na ka— kevaka sa sega ni tukuna, sa qai cala kina. 2 'Se dua na tamata sa tara na ka e sega ni savasava, se yago ni manumanu sega lasa e sega ni savasava, se na yago ni manumanu manoa e sega ni savasava, se na yago ni ka sa dolo e sega ni savasava, ke sega ni kila o koya, sa na sega ni savasava o koya sa na cala ga. 3 'Se sa tara na ka e sega ni savasava kina na tamata— se na ka cava ga e sega ni savasava kina na tamata, ke sega ni kila — ni sa qai kila ga mai, sa na cala ga. 4 'Se dua na tamata e bubului vakailoa, me kitaka na ka ca se me kitaka na ka vinaka, se cava ga ena bubului vakailoa kina na tamata, ka sega ni kila — ia ni sa kila, sa na qai cala e na dua vei ira na ka oqo. 5 'Ia, ni sa cala o koya e na dua na ka oqo, me qai vakatusa na ka sai valavala ca kina; 6 'ka me kauta vei Jiova na nonai soro e na vuku ni nonai valavala ca sa kitaka o koya, e dua na ka yalewa mai na qele ni manumanu, e dua na luve ni sipi se na me me i soro ni valavala ca. Me na sorovaki koya na bete e na vuku ni nona i valavala ca. 7 'Kevaka e sega ni kauta rawa o koya e dua na lami, me qai kauta mai vei Jiova, e na vuku ni nona i valavala ca, e rua na soqe se rua na luve ni ruve: e dua me i soro ni valavala ca kei na dua tale me i soro kama. 8 'Ia me kauta vua na bete, ia o koya me vakacabora e liu na i soro ni valavala ca, ka wirica na uluna mai na domona, ia me kakua ga ni drutia laivi. 9 'Me qai kureitaka na dra ni soro ni valavala ca e na yasa ni cabocabo ni soro, ia na kena vo ni dra me sova ki na yavu ni cabocabo ni soro. Oqo na i soro ni valavala ca. 10 'Me qai vakacabora nai karua mei soro kama me vaka na kena i valavala. Ia me sorovaki koya na bete e na vuku ni nonai valavala ca sa cakava oti, ena qai vosoti kina. 11 'Ia kevaka e sega ni rawata e rua na soqe se rua na luve ni ruve, me qai kauta mai o koya sai valavala ca me nonai madrali e dua nai ka tini ni dua efa na valawa qaqi vinaka mei soro ni valavala ca. Me kakua ni livia kina na waiwai, me kakua talega ni biuta kina na ka boi vinaka na bete, ni sai soro ni valavala ca. 12 'Me qai kauta o koya vua na bete, ia o koya na bete me yakuta e ligana me kenai vakananumi, ka vakama e nai cabocabo ni soro me vaka na ka sa vakacabori vei Jiova e na buka waqa. Oqo nai soro ni valavala ca. 13 'Me sorovaki koya na bete, e na vuku ni nonai valavala ca sa cala kina e na dua na ka oqo; ena qai vosoti kina. Ia na kena vo me nona na bete me vaka nai soro laukana.'"

Nai Soro E Soli Vata Kei Nai Sosomi Ni Ka Butakoci

14 Sa qai vosa vei Mosese o Jiova, ka vaka: 15 "Kevaka sa cakava e dua na ka cala e dua na tamata, ka vakacalaka e na vuku ni ka sa tabu vei Jiova, me qai kauta o koya vei Jiova mei soro ni nona caka cala e dua na sipi tagane sa sega na kena ca mai na qele ni sipi, kei na nomu i vakarau ni sikeli siliva me vaka na sikeli ni vale tabu, mei soro ni caka cala. 16 "Ia me sauma na ca sa cala kina e na vuku ni ka e tabu, ka me qai vakaikuritaka e na dua na i ka lima ni wase ka solia vua na bete. Ia me sorovaki koya na bete e na sipi tagane ei soro ni caka cala, ena qai vosoti kina. 17 "Kevaka sa cala e dua na tamata, ni sa kitaka e dua na ka sa vakatabui e na vunau i Jiova, ke sa sega ni kila, ena cudruvi ga e na nona caka cala. 18 "Me qai kauta e dua na sipi tagane sa sega na kena ca mai na qele ni sipi, vua na bete, ni o sa lewa mada na ka sa rauta na nona cala. Ia me sorovaki koya na bete e na vuku ni nona vakacalaka ka sega ni kila, ena qai vosoti kina. 19 "Oqo nai soro ni caka cala; sa cala vakaidina o koya vei Jiova."

Vunau Ni Soro 6

1 Sa vosa tale vei Mosese o Jiova, ka vaka: 2 "Kevaka sai valavala ca e dua na tamata ka sa caka cala vei Jiova ni sa vosa lasu vua na kai nona e na ka sa soli vua me maroroya, se na ka e veiyalayalati kina, se na ka e butakoci, se sa taura vakaukauwa e dua na ka vua na kai nona, 3 "Se sa kunea beka na ka sa yali ka lasu kina, ka bubului vakailasu – e na vuku ni dua na ka sa cakava na tamata kai valavala ca kina: 4 "Sa qai vakakina, ni sai valavala ca o koya ka sa beitaki kina, ena vakasuka na ka sa butakoca, se na ka sa taura vakaukauwa, se na ka sa soli vua me maroroya, se na ka e yali ka sa kunea o koya, 5 "Se dua na ka sa bubului vakailasu kina. Ena sauma kece, ka vakaikuritaka e na dua nai ka lima, me solia vua na kenai taukei, e na siga sa macala kina na nona cala. 6 "Ia me kauta mai o koya nai soro ni nona caka cala vei Jiova, na sipi tagane sa sega na kena ca mai na qele ni sipi, kei nai vakarau ni ka o sa lewa me rauta na nona cala, vua na bete. 7 "Ena qai sorovaki koya na bete e na mata i Jiova, ena qai vosoti kina e na dua na ka sa cala kina."

Nai Vunau Ni Soro Kama

8 Sa qai vosa vei Mosese o Jiova, ka vaka, 9 "Mo vakarota vei Eroni kei iratou na luvena, ka tukuna, 'Oqo na lewa e na vuku ni soro kama: Nai soro kama me tikoga e matadravu e na dela ni cabocabo ni soro e na bogi ka sigavaka, ka me waqa tikoga kina na buka waqa ni cabocabo ni soro. 10 'Ka me vakaisulu na bete e nonai sulu lineni, me daramaka talega na nona tarausese lineni, me qai kauta na dravusa ni soro kama mai na dela ni cabocabo ni soro, ka biuta voleka ki na i cabocabo ni soro. 11 'Me qai luvata na nona i sulu o koya, ka vakaisulu e na i sulu tani, ka kauta yani na dravusa ki nai bili ni tikotiko ki na dua na vanua savasava. 12 'Ia me waqa tikoga na buka e nai cabocabo ni soro; me kakua sara ni boko. Ka me vakama tiko na buka o koya na bete e na veimataka kecega, ka tuva vakavinaka kina na i soro kama; me vakama talega kina o koya na uro ni soro ni veivinakati. 13 'Me waqa tikoga na buka e na dela ni cabocabo ni soro; me kakua sara ni boko.

Nai Vunau Ni Soro Laukana

14 'Oqo nai vunau ni soro laukana: Me vakacabora o ira na luve i Eroni e na i cabocabo ni soro e na mata i Jiova. 15 'Ia me yakuta o koya na valawa qaqi vinaka mai nai soro laukana, kei na kena waiwai, kei na ka boi vinaka sa tu e nai soro laukana, ka vakama e na dela ni cabocabo ni soro me ka boi vinaka, ka mei vakananumi vei Jiova. 16 'Ia na kena vo me kania o Eroni kei ira na luvena; me laukana vata kei na madrai sa sega ni vakaivakatubu e na tikina tabu; e na loma ni rara sa vakabai ni vale ni veitavaki me ra kania kina. 17 'Me kakua ni vavi kei nai vakatubu. Au sa solia me kedra i votavota mai na ka sa cabori vei Au e na buka waqa; sa ka tabu sara, me vaka nai soro ni caka cala. 18 'Me ra kania o ira kecega na tagane vei ira na luve i Eroni. Oqo na vunau sa sega ni mudu e na vuku ni ka sa vakacabori vei Jiova e na buka waqa, e na nomudou veitabatamata. Ena tabu ga o ira kece sa tarai ira.'" 19 Sa vosa tale vei Mosese o Jiova, ka vaka, 20 "Oqo nai madrali nei Eroni kei ira na luvena, me ra vakacabora vei Jiova, e na siga sa lumuti kina: e dua nai katini ni efa na valawa qaqi vinaka mei soro laukana ena veisiga yadua, me veimama e na mataka ka veimama e na bogi. 21 "Me vavi kei na waiwai e nai tavuteke kaukamea. Ni sa buli oti, mo qai kauta mai ki loma. Ni veitiki ni soro laukana sa vavi mo cabora me ka boi vinaka vei Jiova. 22 "O koya vei iratou na luvena sa lumuti me bete, me kena i sosomi, me qai vakacabora. o ya sai lesilesi i Jiova ka sega ni mudu. Me na vakamai kecega. 23 "Nai soro laukana kecega ni bete me vakamai sara. Me kakua ni laukana."

Nai Vunau Ni Soro Ni Valavala Ca

24 Sa vosa talega vei Mosese o Jiova, ka vaka, 25 "Mo vosa vei Eroni kei iratou na luvena, ka tukuna, 'Oqo na vunau ni soro ni valavala ca: E na yasana sa vakamatei kina nai soro kama, me vakamatei kina nai soro ni valavala ca e na mata i Jiova. Oqo sa ka tabu sara. 26 'Na bete sa cabora e na vuku ni valavala ca me kania. Me laukana e na tikina tabu, e na loma ni rara sa vakabai ni vale ni veitavaki. 27 'Na tamata kecega ena tara na yagona me ra tabu. Ia ni sa kureitaki na kena dra ki na dua na i sulu, mo na savata oqori sa kureitaki kina, e na tikina tabu. 28 'Ia na kuro qele sa riri kina me vorolaki. Ia kevaka sa riri e na kuro varasa, me qai asi ka dere e na wai. 29 'Me ra kania o ira kecega na tagane vei ira na bete. Oqo sa ka tabu sara. 30 'Ia nai soro ni valavala ca e kau mai na kena dra ki na vale ni veitavaki, me ia kina na veibulubuluti e na tikina tabu, me kakua ni laukana. Me na vakamai e na buka waqa.

Vunau Ni Soro 7

Nai Vunau Ni Soro Ni Caka Cala

1 'E vaka talega oqo nai vunau ni soro ni caka cala (oqo sa ka tabu sara): 2 'Ena yasana era sa vakamatea kina na i soro kama me ra vakamatea kina nai soro ni caka cala. Ia na kena dra me kureitaki wavokita nai cabocabo ni soro. 3 'Ka me cabora o koya na kena uro kecega. Na buina uro kei na uro sa ubia na wawa, 4 'Kei na ivi ruarua kei na uro sa tu ena batibatina, kei na uro sa kabita na yate e na dela ni ivi, oqo me kau tani; 5 'Ka me vakama o koya na bete e na dela ni cabocabo ni soro me ka sa cabori e na buka waqa vei Jiova. Oqo nai soro ni caka cala. 6 'O ira kecega na tagane vei ira na bete era na kania. Me laukana e na tikina tabu. Sa ka tabu sara. 7 'Nai soro ni caka cala e tautauvata kei na i soro ni valavala ca; sa dua ga na kedrau i vunau: na bete sa cakava na veibulubuluti ena nona ga. 8 'Ia na bete sa vakacabora na nonai soro ni valavala ca e dua na tamata, ena nona na bete o ya na kuli ni soro kama sa vakacabora o koya. 9 'Kei na i soro laukana kecega sa vavi e na lovo kei na ka kece sa tavu e na i tavuteke, se nai tavuteke kaukamea, ena nona na bete sa vakacabora. 10 'Kei nai soro laukana kecega, sa veiwaki vata kei na waiwai se mamaca, ena nodratou kecega na luve i Eroni, me ra duivota vakatautauvata.

Nai Vunau Ni Soro Ni Veivinakati

11 'Ia oqo na vunau ni soro ni veivinakati ena vakacabora vei Jiova e dua na tamata: 12 'Kevaka sa cabora mei madrali ni vakavinavinaka, me cabora vata, kei nai soro ni vakavinavinaka, na keke e sega ni vakai-vakatubu sa veiwaki vata kei na waiwai, kei na keke mamare sara sa boro e na waiwai, se na keke e caka e na valawa qaqi vinaka sa waki vata kei na waiwai. 13 'Me kena i kuri ni keke, me nona i madrali me cabora talega na madrai e vakai-vakatubu kei na i madrali ni vakavinavinaka mai na nonai soro ni veivinakati. 14 'Ia mai na ka oqori me na vakacabora o koya e dua na keke mei madrali e lavelaveti vei Jiova. Oqo ena nona na bete sa kureitaka na dra ni soro ni veivinakati. 15 'Na lewe ni soro ni veivinakati e ka ni vakavinavinaka me na laukana ga e na siga e vakacabori kina. Me kakua na vakavoca o koya me yacova na mataka. 16 'Ia kevaka e ka ni bubului se i madrali ni yalayala, me na laukana ga e na siga e vakacabora kina o koya na nonai madrali; ia e na mataka me laukana talega na kena vo; 17 'Na lewe ni nonai madrali ni vakavinavinaka sa vo tu e na kenai katolu ni siga me vakamai e na bukawaqa. 18 'Ia kevaka e dua na lewe ni nonai madrali ni soro ni veivinakati sa laukana e na kenai katolu ni siga, e na sega ni vakadonui, se me na yaga vei koya e vakacabora; ena ka vakasisila vua sa vakacabora, ia na tamata e kania ena cudruvi e na nona caka ca. 19 'Na lewena e tara e dua na ka sa sega ni savasava me kakua ni laukana. Me vakamai e na bukawaqa. Ia na lewena savasava sa vo, me ra kania o ira kece sa savasava. 20 'Ia na tamata sa kania na lewe ni madrali ni soro ni veivinakati sa tabu me nei Jiova, ni sa dukadukali o koya, ena muduki tani na tamata o ya mai vei ira na kai nona. 21 'Io na tamata talega e tara e dua na ka sa sega ni savasava, na ka e sega ni savasava vua na tamata, na manumanu sega savasava, se dua na ka e sega ni savasava e vakasisilataki, se dua e kania na lewe ni madrali ni veivinakati sa tabu me nei Jiova, ena muduki tani na tamata o ya mai vei ira na kai nona.' " Na Uro Kei Na Dra Me Na Kakua Ni Laukana 22 Sa vosa talega vei Mosese o Jiova, ka tukuna, 23 "Mo vosa vei ira na luve i Isireli, ka vaka: 'Dou kakua ni kania e dua na uro, ni bulumakau se sipi se me. 24 'Ia na uro ni manumanu sa mate vakadodonu ga, kei na uro ni manumanu era dresulaka na manumanu kila, e tara me vakayagataki e na ka tani eso; ia dou kakua sara ni kania. 25 'Ni o koya ena kania na uro ni manumanu sa dau-vakacabori e na buka waqa vei Jiova, io na tamata e kania ena muduki tani mai vei ira na kai nona. 26 'E vakakina mo dou kakua talega ni kania na dra e na nomudou veivale kecega, se dra ni manumanu vuka se manumanu e yavai va. 27 'O koya ena kania na dra, ena muduki tani na tamata o ya mai vei ira na kai nona.'"

Nai Votavota I Eroni Kei Iratou Na Luvena Tagane

28 Sa vosa talega vei Mosese o Jiova, ka tukuna, 29 "Mo vosa vei ira na luve i Isireli, ka tukuna: 'O koya sa vakacabora na nonai madrali ni soro ni veivinakati vei Jiova me kauta mai na nona i madrali vei Jiova mai na nona i soro ni veivinakati. 30 'Ena ligana me kauta na ka sa vakacabori e na buka waqa vei Jiova. Me kauta na uro kei na serena, me yalovaka na serena mei soro e yalovaki e na mata i Jiova. 31 'Ia na bete me vakama na uro e na dela ni cabocabo ni soro, ia na serena me kedratou o Eroni kei na luvena. 32 'Ia na sagana i matau mo dou solia vua na bete mei soro e lavelaveti mai na i madrali ni nomudou i soro ni veivinakati. 33 'O koya vei iratou na luve i Eroni, sa cabora na dra ni soro ni veivinakati kei na uro, ena kena i votavota na sagana i matau. 34 'Na serena sa yalovaki kei na sagana sa lavelaveti Au sa taura mai vei ira na Isireli, mai na nodra i madrali ni soro ni veivinakati, ka'u sa solia vei Eroni na bete kei iratou na luvena mai vei ira na luve i Isireli me kena i lesilesi ka sega ni mudu.'" 35 Oqo sa vakatabui me kei Eroni kei iratou na luvena, mai na i madrali sa vakacabori e na buka waqa vei Jiova, e na siga sa kauti iratou kina o Mosese me ratou bete vei Jiova. 36 O Jiova sa vakarota me ra solia vei iratou o ira na luve i Isireli, e na siga sa lumuti iratou kina o Koya, me kenai lesilesi me sega ni mudu e na nodra veitabatamata. 37 Sa vakaoqo na vunau ni soro kama, na i soro laukana, nai soro ni valavala ca, na i soro ni caka cala, na vei-vakatabui, kei na i soro ni veivinakati me cabori, 38 O koya sa vakarota vei Mosese o Jiova mai na Ulunivanua o Saineai, e na siga sa vakaroti ira kina na Isireli me ra vakacabora na nodra i soro vei Jiova e na Lekutu mai Saineai.

Vunau Ni Soro 8

Sa Vakatabui o Eroni Kei Iratou Na Luvena Tagane

1 Sa vosa talega vei Mosese o Jiova, ka vaka: 2 "Mo kauti Eroni kei iratou talega na luvena, kei na veisulu, na waiwai ni veilumuti, e dua na bulumakau mei soro ni valavala ca, e rua na sipi tagane, kei na dua na sova madrai e sega ni vakaivakatubu; 3 "Ka vakasoqoni ira vata nai soqosoqo taucoko ki na katuba ni vale ni veitavaki." 4 Sa mani kitaka o Mosese me vaka e vakarota vua o Jiova. Era sa soqoni vata na i soqosoqo ki na katuba ni vale ni veitavaki. 5 Ka sa tukuna vei ira nai soqosoqo o Mosese, "Sa vakaoqo na ka sa vakarota o Jiova me caka." 6 Sa qai kauti Eroni kei iratou na luvena o Mosese ka vakasilimi iratou e na wai. 7 Ka vakaisulutaki koya e nai curucuru balavu e loma, e vauci koya e nai vau ni tolona, vakasulumi koya e nai sulu balavu esau, ka vakasuluma e na efoti; qai vauci koya e nai vau e tali vakamatai ni efoti, ka vauca vua kei na efoti. 8 Sa qai taubeni koya e nai sasabai ni lomaserena, ka vonota nai sasabai e na Urimi kei na Cumimi. 9 Ka tokara e uluna nai sala. E nai sala talega, e na muana e liu, e vakabira kina na veleti koula, me nonai sala tabu, me vaka e vakarota vei Mosese o Jiova. 10 E taura talega o Mosese na waiwai ni veilumuti, ka lumuta na vale ni Kalou kei na ka kece e tu kina, ka vakatabuya. 11 Ka kureitaka vakavitu o koya eso ki dela ni cabocabo ni soro, e lumuta nai cabocabo ni soro kei na kenai yaya kecega, kei na taqi kei na kena i tutu, ka me vakatabuya. 12 E livia talega o koya eso na waiwai ni veilumuti ki na ulu i Eroni ka lumuti koya, me vakatabui koya. 13 Sa qai kauti iratou mai na luve i Eroni o Mosese ka vakasulumi iratou e na i curucuru balavu, e vauci iratou e nai vau ni tolodra, e vakaisalataki iratou e nai sala, me vaka e vakarota vei Mosese o Jiova. 14 Ka kauta na bulumakau o koya mei soro ni valavala ca. o Eroni kei iratou na luvena e ratou sa qai tabaka e na ligadratou na ulu ni bulumakau me i soro ni valavala ca, 15 ka sa vakamatea o Mosese. Sa qai kauta o koya na dra, e tonia na nonai qaqalo ka boroya eso ki na tutuna balavu ni cabocabo ni soro, ka vakasavasavataka nai cabocabo ni soro. Ka sova na dra ki na yavu ni cabocabo ni soro, ka vakatabuya, me ia nai soro ni veibuluti. 16 Sa qai taura o koya na uro kecega e ubia tu na gacagaca, na uro e kabita tu na yate, kei na ivi ruarua kei na kena uro, sa vakama o Mosese e na dela ni cabocabo ni soro. 17 Ia na bulumakau, na kulina, na lewena, na dena, sa vakama o koya e na buka waqa e na i bili ni tikotiko, me vaka e vakarota vei Mosese o Jiova. 18 Sa qai kauta o koya na sipi tagane me i soro kama. Ia o Eroni kei iratou na luvena, e ratou sa tabaka na ulu ni sipi tagane e na ligadratou, 19 ka sa vakamatea o Mosese. Sa qai kureitaka o Mosese na dra wavokita nai cabocabo ni soro. 20 Ka sa tava vakalalai na sipi tagane o Mosese; Sa qai vakama o Mosese na uluna, na kena veitikina lalai, kei na uro. 21 Sa qai vuya o koya na gacagaca kei na yavana e na wai. Ka vakama na sipi tagane taucoko o Mosese e na dela ni cabocabo ni soro. Oqo nai soro kama me ka boi vinaka, nai madrali e vakacabori e na buka waqa vei Jiova, me vaka e vakarota vei Mosese o Jiova. 22 Sa kauta talega o koya na i karua ni sipi tagane, na sipi tagane ni veivakatabui. o Eroni kei iratou na luvena e ratou sa tabaka na ulu ni sipi tagane e na ligadratou, 23 ka sa vakamatea o Mosese. Sa kauta talega eso na kena dra o Mosese, ka boroya kina na vuso ni daliga i Eroni i matau, e nai dovidovinikakana ni ligana i matau, kei nai qaqalo levu ni yavana i matau. 24 Sa qai kauti iratou na luve i Eroni. Ka boroya o Mosese na dra e na vuso ni daligadratou i matau, e nai dovidovinikakana ni ligadratou i matau, kei nai qaqalo levu ni yavadratou i matau. Ka sa kureitaka o Mosese na dra wavokita nai cabocabo ni soro. 25 Sa qai taura o koya na uro kei na buina uro, kei na uro kecega e ubia tu na gacagaca, na uro e kabita tu na yate, na ivi ruarua kei na kena uro, kei na sagana i matau; 26 ia mai na sova ni madrai sa sega ni vakavakatubu sa tu e na mata i Jiova e kauta mai kina e dua na keke e sega ni vakavakatubu, e dua na i buli madrai e lumuti e na waiwai, kei na dua na keke mamare sara, ka biuta e na dela ni uro kei na sagana i matau; 27 ka solia kecega o koya ki na liga i Eroni kei na ligadratou na luvena, ka yalovaka mei soro e yalovaki e na mata i Jiova. 28 Sa qai taura mai na ligadratou o Mosese ka vakama e na dela ni cabocabo ni soro, e dela ni soro kama. Era sai soro ni veivakatabui me ka boi vinaka. o ya na i madrali e vakacabori e na buka waqa vei Jiova. 29 Ia sa kauta na serena o Mosese ka yalovaka mei soro e yalovaki e na mata i Jiova. o ya na i votavota i Mosese mai na sipi tagane ni veivakatabui, me vaka e vakarota vei Mosese o Jiova. 30 Sa qai kauta o Mosese eso na waiwai ni veilumuti kei na so na dra e tu e dela ni cabocabo ni soro, ka kureitaka vei Eroni, ena nona i sulu, vei iratou na luvena, kei na nodratou i sulu na luvena; a sa vakatabui Eroni, na nona i sulu, iratou na luvena, kei na nodratoui sulu na luvena. 31 Ka sa tukuna o Mosese vei Eroni kei iratou na luvena, "Dou vakasaqa na lewena mai na katuba ni vale ni veitavaki, ka kania vata mai kea kei na madrai e tu e na sova ni soro ni veivakatabui, me vaka Au a vakarota, ka vaka, 'Me kania o Eroni kei iratou na luvena.' 32 "Ia na kena vo ni lewena kei na madrai dou vakama e na buka waqa. 33 "Ka mo dou kakua ni curu ki tautuba mai na vale ni veitavaki me vitu na siga, me yacova ni sa oti na veisiga ni nomudou vakatabui. Ni na vitu na siga na Nona vakatabui kemudou tiko. 34 "Me vaka sa cakava o koya e na siga oqo, sa vakarota o Jiova me caka vakakina, me sorovaki kemudou. 35 "O koya oqo mo dou tikoga mai na katuba ni vale ni veitavaki ena siga kei na bogi me vitu na siga, ka maroroya nai vakaroi Jiova, mo dou kakua ni mate; me vaka au sa vakaroti vakakina." 36 Sa cakava vakakina o Eroni kei iratou na luvena na ka kecega sa vakarota o Jiova e na liga i Mosese.

Vunau Ni Soro 9

Sa Tekivu Na Veiqaravi Vakabete

1 Ia sa yaco e na kenai kawalu ni siga sa kacivi Eroni kei iratou na luvena kei ira na nodra qase na Isireli o Mosese. 2 Ka sa tukuna vei Eroni, "Mo kauta ena vukumu e dua na luve ni bulumakau tagane mei soro ni valavala ca kei na dua na sipi tagane mei soro kama, sa sega na kena ca, ka vakacabora e na mata i Jiova. 3 "Ia vei ira na luve i Isireli mo tukuna, ka vaka, 'Mo ni kauta e dua na luveni me mei soro ni valavala ca, ka dua na luve ni bulumakau kei na lami, me yabaki yadua, ka sega na kena ca, mei sorokama, 4 'Kei na dua na bulumakau tagane kei na sipi tagane mei soro ni veivinakati, me vakacabori e na mata i Jiova, kei na i soro laukana sa veiwaki vata kei na waiwai; ni na rairai vei kemuni e na siga oqo o Jiova.'" 5 Era sa kauta mai na veika e vakarota o Mosese mai na mata ni vale ni veitavaki. Ka ra sa toro voleka nai soqosoqo taucoko ka tu e na mata i Jiova. 6 Sa qai tukuna o Mosese, "Oqo na ka sa vakarota o Jiova mo ni cakava, ena qai rairai vei kemuni na serau i Jiova." 7 Ka sa tukuna vei Eroni o Mosese, "Mo lako ki nai cabocabo ni soro, vakacabora na nomui soro ni valavala ca kei na nomui soro kama, ka sorovaki iko kei ira na tamata. Vakacabora na nodra i madrali na tamata, ka sorovaki ira, me vaka sa vakarota o Jiova." 8 Sa lako vakakina o Eroni ki nai cabocabo ni soro ka vakamatea na luve ni bulumakau mei soro ni valavala ca, e na vukuna ga. 9 E ratou sa qai kauta vua na dra o iratou na luve i Eroni. Ka sa tonia o koya na nona i qaqalo ki na dra, ka boroya na tutu ni cabocabo ni soro e balavu cake, ka sova na dra ki na yavu ni cabocabo ni soro. 10 Ia na uro, na ivi, kei uro kabita tu na yate mai nai soro ni valavala ca sa vakama o koya e na dela ni cabocabo ni soro, me vaka e vakarota vei Mosese o Jiova. 11 Na lewena kei na kulina sa vakama o koya e na buka waqa e nai bili ni tikotiko. 12 Sa vakamatea talega o koya nai soro kama; e ratou sa solia vua na dra o iratou na luve i Eroni, ka sa kureitaka o koya wavokita na i cabocabo ni soro. 13 E ratou sa qai solia vua nai soro kama, na tikina yadua kei na uluna, ka sa vakama o koya e na dela ni cabocabo ni soro. 14 Ka sa vuya o koya na gacagaca kei na yavana, ka sa vakama e dela ni soro kama e na dela ni cabocabo ni soro. 15 Sa qai kauta o koya na nodra i madrali na tamata, ka taura na me, o ya na nodra i soro ni valavala ca na tamata, ka vakamatea ka vakacabora mei soro ni valavala ca, me vaka na kena e liu. 16 Ka kauta na i soro kama ka vakacabora me vaka na kena i valavala. 17 Sa qai kauta na i soro laukana, ka yakuta e ligana, ka vakama e dela ni cabocabo ni soro, ena yasa ni soro kama vakamataka. 18 Sa vakamatea talega o koya na bulumakau tagane kei na sipi tagane me i madrali ni soro ni veivinakati, e na vukudra na tamata. Ka ratou sa solia vua na dra na luve i Eroni, ka sa kureitaka o koya wavokita na i cabocabo ni soro, 19 Ia na uro ni bulumakau tagane kei na sipi tagane — na buina uro, kei na uro sa ubia na gacagaca kei na ivi, kei na uro e kabita tu na yate; 20 ka ratou sa biuta na uro ki na serena. Sa qai vakama o koya na uro e na dela ni cabocabo ni soro; 21 ia na seredrau kei na sagadrau i matau sa yalovaka o Eroni mei soro e yalovaki e na mata i Jiova, me vaka e vakarota o Mosese. 22 Sa qai dodoka yani na ligana o Eroni vaka kivei ira na tamata, ka vosa vakalouvinakataki ira, ka lako sobu ni sa vakacabora oti nai soro ni valavala ca, nai soro kama, kei nai soro ni veivinakati. 23 E rau sa curu ki na vale ni veitavaki o Mosese kei Eroni, ka curu tale kitautuba ka vosa vakalouvinakataki ira na tamata. Sa qai rairai vei ira na tamata kecega na serau i Jiova, 24 ka sa lako mai na buka waqa mai na mata i Jiova ka kania nai soro kama kei na uro e na dela ni cabocabo ni soro. Ia ni ra sa raica o ira na tamata kecega, era sa kaila ka cuva vakatoboicu.

Vunau Ni Soro 10

Na Bukawaqa Ni Veibeci I Netava Kei Avaiu

1 O Netava kei Avaiu, na luve i Eroni, e rau sa qai dui kauta na nona miqa ni ka boi vinaka ka rau biuta kina na buka waqa, ka biuta kina na ka boi vinaka, ka cabora na bukawaqa ni veibeci e na mata i Jiova, na ka e sega ni vakarota vei rau o Jiova. 2 Sa mani lako yani na buka waqa mai vei Jiova ka kani rau, ka rau sa ciba e na mata i Jiova. 3 Ka sa tukuna vei Eroni o Mosese, "Oqo na ka e a tukuna o Jiova, ka vaka: 'Vei ira era sa toro voleka vei au Me'u raici me ka tabu; ia e na matadra na tamata kecega na tamata Me'u vakarokorokotaki.'" Sa galu ga o Eroni. 4 Sa qai kacivi Misaele kei Ilisavani o Mosese, oirau na luve i Usieli na tama i Eroni lailai, ka tukuna vei rau, "Drau lako mai, ka colati rau tani na tacimudrau mai na mata ni vale tabu ki nai bili ni tikotiko." 5 E rau sa lako voleka ka laveti rau e na nodrau i curucuru balavu ki nai bili ni tikotiko, me vaka e tukuna o Mosese. 6 Ia sa tukuna vei Eroni o Mosese, vei rau talega na luvena, o Iliesa kei Icama, "Dou kakua ni luvata nai sala mai na ulumudou kakua talega ni dresulaka na nomudou i sulu, de dou mate, de yaco talega na cudru vei ira kecega na tamata. Ia dou laivi ira na wekamudou, na vuvale kecega i Isireli, me ra tagicaka na kama sa vakavuna o Jiova. 7 "Dou kakua ni curu yani ki tautuba mai na katuba ni vale ni veitavaki, de dou mate, ni dou sa lumuti e na waiwai i Jiova." E ratou sa muria na vosa i Mosese.

Nai Vakaro Ni Bula Vakabete

8 Sa qai vosa vei Eroni o Jiova, ka vaka: 9 "Dou kakua ni gunuva na waini se na yaqona kaukauwa, o iko, se o iratou na luvemu, ni dou sa curu ki na vale ni veitavaki, de dou mate. Oqo me kenai lesilesi ka sega ni mudu vei ira na nomudou veitabatamata, 10 "Mo dou kila na kedrau duidui na ka e tabu mai na ka e sega ni tabu, kei na ka e sega ni savasava mai na ka e savasava, 11 "Ka mo dou vakavulici ira na luve i Isireli e na vunau kecega sa vosataka o Jiova vei ira e na liga i Mosese." 12 Ia sa vosa o Mosese vei Eroni, vei Iliesa kei Icama, oi rau na luvena tagane sa vo: "Dou kauta nai soro laukana sa vo mai nai madrali e vakacabori e na buka waqa vei Jiova, ka kania ni sega ni vakaivakatubu e na yasa ni cabocabo ni soro; ni sa ka tabu sara. 13 "Mo dou kania ga e na dua na tikina tabu, ni sa nomu i votavota kei na nodrau i votavota na luvemu, mai na i madrali sa vakacabori e na buka waqa vei Jiova; ni'u sa vakaroti vakaoqo. 14 "Na serena sa yalovaki kei na sagana sa lavelaveti mo dou kania e na dua na tikina savasava, o iko, oi rau na luvemu tagane, kei iratou na luvemu yalewa; ni sa nomu i votavota kei na nodra i votavota na luvemu, ka ra a soli mai na nodra i madrali ni soro ni veivinakati na luve i Isireli. 15 "Na sagana sa lavelaveti kei na serena sa yalovaki me ra kauta vata mai kei na uro sa vakacabori e na buka waqa, ka yalovaka mei soro e yalovaki e na mata i Jiova. Ka me sa nomu ka nodra talega na luvemu, sai lesilesi me sega ni mudu, me vaka sa vakarota o Jiova." 16 Sa qai vaqaqa matua o Mosese na me ni soro ni valavala ca, ka raica – sa kama yavu. Ka sa cudru o koya vei Iliesa kei Icama, na luve i Eroni sa vo, ka tukuna, 17 "Na cava drau a sega ni kania kina na i soro ni valavala ca e na tikina tabu, ni sa ka tabu sara, ka a solia vei kemudou na Kalou mo dou colata kina na i valavala ca ni soqosoqo, ka sorovaki ira e na mata i Jiova? 18 "Raica! Na kena dra e a sega ni kau mai ki loma ni tikina tabu, e dodonu mo dou kania e na tikina tabu, me vaka au a vakarota." 19 Ia sa tukuna vei Mosese o Eroni, "Raica, era sa cabora e daidai na nodra i soro ni valavala ca kei na nodra i soro kama e na mata i Jiova, ka sa yacovi au na ka vakaoqo! Kevaka au a kania nai soro ni valavala ca e daidai, e na vinaka beka e na mata i Jiova?" 20 Ia ni sa rogoca o Mosese, sa vakadonuya.

Vunau Ni Soro 11

Na Kakana E Vakatarai Kei Na Kakana E Vakatabui Me Laukana

1 Ia oqo sa vosa vei Mosese kei Eroni o Jiova, ka tukuna vei rau, 2 "Drau vosa vei ira na Isireli, ka tukuna, 'Oqo na manumanu e yavai va e dodonu mo ni kania vei ira kecega na manumanu e vuravura: 3 'Na manumanu kecega, e wase na kena ququ, e tawase rua na kena ququ ka mama vakarua na kena — o ya mo ni kania. 4 'Ia o ira oqo vei ira era mama vakarua na kena se o ira e wase rua kena ququ ni kakua ni kania: na kameli, ni sa mama vakarua na kena ia e sega ni wase rua na kena ququ, e sega ni savasava vei kemuni; 5 'Na ravete ni veivatu, e mama na kena ia sa sega ni wase rua na kena ququ, e sega ni savasava vei kemuni; 6 'Na eri, e mama na kena ia sa sega ni wase rua na kena ququ, e sega ni savasava vei kemuni; 7 'Kei na vuaka, e dina ni wase rua na kena ququ, ia e sega ni mama vakarua na kena, e sega ni savasava vei kemuni. 8 'Mo ni kakua ni kania na lewedra, mo ni kakua talega ni tara na yagodra ni sa mate. Era sega ni savasava vei kemuni. 9 'Oqo na ka kecega mai wai mo ni na kania: na ka kecega mai wai e vakatutuna ka vakavarina, mai na waitui se na uciwai — mo ni kania. 10 'Ia na ka kecega mai na waitui se na uciwai e sega ni vakatutuna ka sega ni vakavarina, na ka kecega e yavavala e na wai se na ka bula kecega e tiko e wai, era na ka vakasisila vei kemuni. 11 'Me ra na ka vakasisila vei kemuni; mo ni kakua ni kania na lewedra, ia mo ni vakasisilataka na yagodra ni sa mate. 12 'Na ka kecega mai wai e sega ni vakatutuna ka sega ni vakavarina — sa na ka vakasisila vei kemuni. 13 'Oqo na manumanu vuka mo ni na vakasisilataka; me ra na kakua ni laukana, era ka vakasisila: na ikeli, na kia ikeli, na osipere, 14 'Na kaiti, kei na veimataqali vulituri; 15 'Na mataqali reveni kecega, 16 'Na ositereji, na lulu daliga-leka, nai co, kei na veimataqali manulevu; 17 'Na lulu lalai, na luluwai, na lulu dautagi; 18 'Na lulu vulavula, na jekedoa, na ikeli ni wai; 19 'Na veimataqali belo, na upu, kei na beka. 20 'Na manumanu vuka kecega e qasi ena yavana e va me ka vakasisila vei kemuni. 21 'Io oqo mai vei ira manumanu vuka kecega e qasi e na yavana vava: o ira era vakasagana ka yava balavu me daulade kina e dela i vuravura. 22 'Oqo ga vei ira mo ni na kania: na veimataqali maka, na vodre dauvakacaca ena kena vei mataqali, na kirikiti ena kena veimataqali, kei na vodre ena kena veimataqali. 23 'Ia na manumanu vuka lalai kecega e qasi ena yavana vava sa na ka vakasisila vei kemuni.

Na Manumanu Sega Ni Savasava

24 'E na ka oqo dou na sega kina ni savasava; o koya ga ena tara na yagodra ni sa mate ena sega ni savasava me yacova na yakavi; 25 'Ia o koya yadua sa colata tani na yagodra ni sa mate me savata na nonai sulu ka na sega talega ni savasava o koya me yacova na yakavi: 26 'Na yago mate ni manumanu kecega sa wase na kena ququ, ka sega ni basika na kena wase se sega ni mama na kena, e sega ni savasava vei kemuni. o koya yadua ena tara ena sega ni savasava. 27 'Kei na ka kecega sa lako e nai qaqalo ni ligana, vei ira na yavusa manumanu kecega era lako e na yavana vava, oqori e sega ni savasava vei kemuni. o koya ga ena tara na yagodra ni sa mate ena sega ni savasava me yacova na yakavi. 28 'O koya ena colata tani na yagodra ni sa mate me savata na nonai sulu ka na sega ni savasava me yacova na yakavi. Era sa sega ni savasava vei kemuni. 29 'Na ka talega oqo ena sega ni savasava vei kemuni mai vei ira na ka sa dauqasi e dela i vuravura: na veimataqali kalavo, na moko lelevu e na kena veimataqali; 30 'Io na veimataqali moko kece, kei na vokai. 31 'Era sega ni savasava na veika oqo vei kemuni mai vei ira na ka kecega sa dauqasi. o koya ena tara ni sa mate ena sega ni savasava me yacova na yakavi. 32 'Kei na ka kecega sa lutuka e dua na ka oqo, ni sa mate ena sega ni savasava, se dua nai yaya kau sei sulu se kuli se taga, se nai yaya cava ga, sa caka kina e dua na ka, me toni ena wai. Ena sega ni savasava me yacova na yakavi; ia ena qai savasava. 33 'Kei na bilo qele kecega e lutu ki loma e dua na ka oqo mo dou vorolaka; kei na ka kece e tu e loma ena sega ni savasava: 34 'e na bilo vaka o ya, na kakana vinaka ena turuma na wai ena sega ni savasava, kei na wai e na gunuvi e na bilo o ya ena sega ni savasava. 35 'Kei na ka kecega ena lutu kina e dua na tiki ni yagodra ni sa mate ena sega ni savasava; na ovani se sitovu ni vakasaqa, me sa basuki sobu; ni sa sega ni savasava, ka me sega ni savasava vei kemuni. 36 'Ia na mata ni wai se na saqa, e levu tu kina na wai, ena savasava, ia na ka ga e tara na yagodra ni sa mate ena sega ni savasava. 37 'Ia kevaka e dua na tiki ni yagodra sa lutuka e dua na sore ni kau sa la'ki kaburaki, ena savasava tikoga. 38 'Ia kevaka sa vakasuasuataki na sore ni kau, ka qai lutu kina na yagodra ni sa mate, ena sega ni savasava vei kemuni. 39 'Ia kevaka e dua na manumanu e tara mo ni daukania ni sa mate, o koya ena tara na yagona ena sega ni savasava me yacova na yakavi. 40 'Ia o koya ena kania e dua na tiki ni yagona ni sa mate me sava na nonai sulu, ka na sega ni savasava me yacova na yakavi. o koya talega sa colata na yagona ni sa mate me sava na nonai sulu ka na sega ni savasava talega me yacova na yakavi. 41 'Ia na ka dauqasi kecega sa qasi e na dela i vuravura e ka vakasisila. Me kakua ni laukana. 42 'Na ka kecega e dolo e na ketena, kei na ka sa lako e na yavana vava, kei na ka kecega e vuqa na yavana e na ka dauqasi kecega sa qasi e dela i vuravura – oqori mo ni kakua ni kania, ni sa ka vakasisila. 43 'Mo ni kakua ni cakava mo ni vakasisilataki ena vuku ni dua na ka sa dauqasi sa qasi voli; mo ni kakua talega ni cakava mo ni sega ni savasava e na ka oqori, de ra vakadukadukalitaki kemuni. 44 'Ni sai au o Jiova na nomuni Kalou: Mo ni vakatabui kemuni, mo ni savasava; Ni'u sa savasava oi Au. Mo ni kakua ni vakadukadukalitaki kemuni e na dua na yavusa ka dauqasi sa qasi e dela i vuravura. 45 'Ni sai au o Jiova ka kauti kemuni cake mai na vanua o Ijipita, me'u nomuni Kalou. Ia oqo mo ni savasava, ni'u sa savasava oi Au. 46 'Oqo nai vakaro e na vuku ni manumanu e yavai va kei na manumanu vuka kei na ka kecega e bula voli e na wai, kei na ka kecega sa qasi e dela i vuravura, 47 'Me kilai kina na kedra duidui na ka e sega ni savasava kei na ka e savasava, na manumanu talega e tara me laukana kei na manumanu e tabu ni laukana.'"

Vunau Ni Soro 12

Na Veika Me Caka Ni Sa Oti Na Vakasucumi Ni Gone

1 Sa qai vosa vei Mosese o Jiova, ka vaka, 2 "Mo vosa vei ira na luve i Isireli, ka tukuna: 'Kevaka sa kunekune e dua na yalewa, ka vakasucuma e dua na gonetagane, ena qai sega ni savasava me siga vitu; me tautauvata kei na gauna e tawase kina o koya e na vuku ni nona mate vakayalewa ena sega ni savasava kina. 3 'Ia e na kenai kawalu ni siga ena cilivi na kuli ni vusona na gonetagane. 4 'Me qai tiko ga na yalewa me siga tolusagavulu ka tolu e na vuku ni dra ena vakasavasavataki mai kina. Me kakua ni tara o koya e dua na ka tabu, se lako mai ki na vale tabu me oti mada na siga sa vakasavasavataki kina o koya. 5 'Ia kevaka e vakasucuma e dua na goneyalewa, ena qai sega ni savasava o koya me rua na macawa, me vaka na gauna sa tawase kina, ia me qai tiko ga me baleta na dra ni nona vakasavasavataki me onosagavulu ka ono na siga. 6 'Ni sa oti na veisiga ni vakasavasavataki, e na vuku ni gonetagane se goneyalewa, me qai kauta mai o koya vua na bete e dua na lami e yabaki dua mei soro kama, kei na dua na ruve gone se na soqe mei soro ni valavala ca, ki na katuba ni vale ni veitavaki. 7 'Me qai vakacabora o koya e na mata i Jiova, ka sorovaki koya na yalewa. Ena vakasavasavataki kina mai na nona turu dra balavu. Sa vakaoqo na lewa e na vuku i koya sa vakasucuma na tagane se yalewa. 8 'Ia kevaka e sega ni rawa ni kauta mai e dua na lami, me qai kauta e rua na soqe se rua na ruve gone – e dua mei soro kama ka dua mei soro ni valavala ca. Me na qai sorovaki koya kina na bete, ena qai savasava o koya.'"

Vunau Ni Soro 13

Nai Vunau Me Baleta Na Vukavuka

1 Ia o Jiova sa vosa vei Mosese kei Eroni, ka tukuna: 2 "Ni dua na tamata sa tauva na kulina na vuvuce, na karokaro, se na vula, ka sa tu e na kulina me vaka na vukavuka, me kau o koya vei Eroni na bete se vua e dua vei ira na luvena sa bete. 3 "O koya na bete me na dikeva na mate e na kulina; ia kevaka sa vulavula mai na vutina e na tikina sa tauva na mate, ka sa rairai ni sa kania na lewena, sa vukavuka o ya. Me qai dikevi koya na bete, ka vakaraitaki koya ni sa sega ni savasava. 4 "Ia kevaka sa vulavula mai na rama ena kuli ni yagona, ka rairai ni tauva walega na kulina, ka sega ni vulavula mai na vutina, me qai sogolati koya e tauvimate na bete me siga vitu. 5 "Me qai dikevi koya na bete e na kenai kavitu ni siga; ia kevaka sa mani laurai ni vakatuga e liu, me qai sogolati koya na bete me siga vitu tale. 6 "Me qai dikevi koya tale na bete ni sa oti na siga e vitu; e dina ke sa seavu yani na mate, ka sega ni tete na mate e na kulina, me qai vakaraitaki koya na bete ni sa savasava; ni sa karo walega, me savata o koya na nonai sulu ka sa na savasava. 7 "Ia ke sa mani tete vakalevu na karokaro e na kulina, ni sa raici koya oti na bete me vakaraitaki koya ni sa savasava, me qai raici koya tale na bete. 8 "Ia kevaka sa raica na bete ni sa tete vakaidina na karokaro e na kulina, me qai vakaraitaki koya na bete ni sa sega ni savasava. Sa vukavuka. 9 "Ni sa tauvi vukavuka e dua na tamata, me qai kau mai o koya vua na bete. 10 "Ka me dikevi koya na bete; e dina ni sa vulavula na vuvuce e na kulina, ka sa vukica me vulavula na vutina, ka sa basika e na vuvuce na leweni yago bulabula, 11 "O ya e dua na vukavuka makawa e na kulina. Me na vakaraitaka na bete ni sa sega ni savasava o koya, me kakua ni sogolati koya, ni sa sega ni savasava o koya. 12 "Ia ke sa tete sara na vukavuka e na kulina, ka sa robota kece na kuli ni yagoi koya sa tauvi vukavuka, mai na uluna ka cavaraka ki na yavana, e na tikina kecega sa dikeva na bete, 13 "me qai vakasamataka na bete; e dina sa robota na lewena taucoko na vukavuka, me qai vakaraitaka ni sa savasava o koya sa tauvi mate. Sa vulavula kece mai. Sa savasava o koya. 14 "Ia ke kune vua na lewe bulabula, ena sega ni savasava o koya. 15 "Ka me dikeva na lewena bulabula na bete ka vakaraitaki koya ni sa sega ni savasava; ni sa sega ni savasava na lewena bulabula. Oqo na vukavuka. 16 "Ia kevaka ena vuki tale na lewena bulabula me vulavula mai, me qai lako mai o koya vua na bete. 17 "Ka me dikevi koya na bete; kevaka e dina ni sa vulavula mai na mate, me qai vakaraitaka na bete ni sa savasava o koya ka tauvimate. Sa savasava o koya. 18 "Ia ke tubu e na kulina e dua na bo, ka sa maca, 19 "Ia e na tikina ka tu kina na bo e qai kune na vuvuce vulavula se na tikina rama, e vula damu, me na la'ki vakaraitaki vua na bete; 20 "Ia kevaka, me sa raica na bete, e dina sa rairai ni sa kakana ki na lewena, ka sa vulavula mai na vutina, me qai vakaraitaki koya na bete ni sa sega ni savasava. Oqo na vukavuka sa tubu mai e na bo. 21 "Ia kevaka sa dikeva na bete, e dina ni sega kina na vutina vulavula, ka tiko walega e na kulina, ka sa seavu mai, me qai sogolati koya na bete me bogi vitu; 22 "Ia kevaka sa tete vakalevu e na kulina, me qai vakaraitaki koya na bete ni sa sega ni savasava. Sa tauva na vukavuka. 23 "Ia kevaka e tu ga ena dua na tikina na rama, ka sega ni tete, sa qai macamaca ga ni bo; ia me na vakaraitaki koya na bete ni sa savasava. 24 "Se kevaka e kama na kulini yagona e na buka, ka sa tu e na lewena na bulabula na rama, e vulavula-damudamu, se vulavula ga, 25 "Me qai dikeva na bete; ia kevaka sa vulavula mai na vutina e na tikina rama, ka sa rairai ni sa kakana ki na lewena, oqo na vukavuka sa tubu mai e na tikina e kama e na buka waqa. Ia oqo me na vakaraitaki koya na bete ni sa sega ni savasava. Oqo na vukavuka. 26 "Ia kevaka sa dikeva na bete, e dina ni sega na vutina vulavula e na tikina rama, ka sa tu walega e na kulina, ka sa seavu mai, me qai sogolati koya na bete me siga vitu. 27 "Ka me na dikevi koya na bete e na kenai kavitu ni siga. Kevaka sa tete vakalevu e na kulina, me qai vakaraitaki koya na bete ni sa sega ni savasava. Oqo na vukavuka. 28 "Ia kevaka e tu ga ena dua na tikina na rama, ka sega ni tete e na kulina, ka sa seavu mai, oqo ga na vuvuce mai na kama, ia me vakaraitaki koya na bete ni sa savasava, ni sa we walega ni kama. 29 "Ia kevaka sa tauva e dua na tagane se dua na yalewa, na mate e na uluna se kumina, 30 "Me qai dikeva na mate na bete; ia kevaka e rairai ni sa kakana kina lewena, ka sa basika kina na drauna dromodromo matailalai, me qai vakaraitaki koya na bete ni sa sega ni savasava. Oqo na vukavuka-varivari e na uluna se kumina. 31 "Ia kevaka sa dikeva na mate ca na bete, ka rairai me vaka e tiko walega e kulina, ka sega kina na drauna loaloa me qai sogolati koya sa tauvi varivari o koya na bete me siga vitu. 32 "Ia ena kenai kavitu ni siga me dikeva na mate na bete; e dina kevaka e sega ni tete na varivari, ka sega kina na drauna dromodromo, ka sa rairai na varivari ni tiko walega e na kulina, 33 "Me na tasi koya vakai koya, ia me kakua ga ni tasia na tikina e tauvi varivari o koya. Me qai sogolati koya sa tauvi varivari na bete me siga vitu tale. 34 "Ena kenai kavitu ni siga me dikeva na varivari na bete; e dina kevaka e sega ni tete e na kulina na varivari, ka sega ni kakana ki na lewena; me qai vakaraitaki koya na bete ni sa savasava. Me savata o koya na nonai sulu ka na savasava. 35 "Ia kevaka sa tete vakalevu na varivari e na kulina ni sa vakasavasavataki oti, 36 "Me na qai dikevi koya na bete; e dina kevaka sa tete na varivari e na kulina, me kakua ni qai vakasaqara na drauna dromodromo na bete. Sa sega ni savasava o koya. 37 "Ia kevaka e rairai ni tu ga vakadua na varivari, ka sa tubu kina na drauna loaloa, sa mavo na varivari. Sa savasava o koya, ia me na vakaraitaki koya na bete ni sa savasava. 38 "Ia kevaka e dua na tagane se dua na yalewa sa tu e na kulina na tikina rama, vakabibi tikina rama e vulavula, 39 "Me na qai dikeva na bete; e dina kevaka sa vulaci mai na tikina sa rama e na kulina, oqo na tikina rama sa tubu mai e na kulina. Sa savasava o koya. 40 "Kivua na tamata sa cavuru na drau ni uluna, sa ulu cou, ia o koya sa savasava ga. 41 "O koya sa cavuru na drau ni uluna mai na yadrena, sa yadre drika o koya, ia o koya sa savasava ga. 42 "Ia kevaka sa tu e na ulu cou, se na yadre drika, e dua na vuvuce e vulavula - damudamu, oqo na vukavuka e tubu mai na ului koya sa cou, se na yadrei koya sa drika. 43 "Me na qai dikevi koya na bete; e dina kevaka sa vulavula-damudamu mai na vuvuce ni mate e na ului koya sa cou se na yadrei koya sa drika, me vaka nai rairai ni vukavuka e na kulina, 44 "Sa tamata vukavuka o koya. Sa sega ni savasava. Me na vakaraitaki koya na bete ni sega Ni savasava; sa tiko e na uluna na nona mate. 45 "Ia oqo o koya na vukavuka sa tauva na mate, me dresulaki na nonai sulu ka me kua ni ubi na uluna; ka me tabonaka o koya na nona sominiwai, ka kacivaka, Sega ni savasava! Sega ni savasava! 46 "Ena sega ni savasava o koya. Ena veisiga kece e tauvi koya tu kina na mate ena sega ni savasava. Sa sega ni savasava o koya, ka me na tiko ga vakai koya; me tiko ga e nai bili ni tikotiko.

Nai Vunau Me Baleta Na Nodra I Sulu Na Vukavuka

47 "Nai sulu talega sa tauva na vukavuka, sei sulu vuti ni sipi sei sulu lineni, 48 "Se sa tiko e ketena se dakuna e nai sulu lineni se vuti ni sipi, se e na kuli ni manumanu se dua na ka e caka mai kina, 49 "Ia kevaka e via drokadroka se via damudamu mai na mate e nai sulu se na kuli ni manumanu, e ketena se dakuna, se dua na ka e caka mai na kuli ni manumanu, oqo na mate ni vukavuka ka me vakaraitaki vua na bete. 50 "Me na dikeva na mate na bete ka sogolatia me siga vitu. 51 "Ka me qai dikeva tale o koya na mate e na kenai kavitu ni siga. Kevaka sa teteva nai sulu na mate, e na ketena se dakuna, se na kuli ni manumanu se dua na ka e caka mai kina, na mate o ya na vukavuka e bula. E sega ni savasava. 52 "Me vakama o koya nai sulu o ya ka tauva tu na mate, ke tiko e ketena se dakuna, e na vuti ni sipi sei sulu lineni, se dua na ka sa caka e na kuli ni manumanu, ni sa vukavuka e bula; me vakamai nai sulu o ya e na buka waqa. 53 "Ia kevaka sa dikeva na bete, e dina ni sega ni teteva nai sulu na mate, e ketena se dakuna, se dua na ka e caka mai na kuli ni manumanu, 54 "Me na qai vakarota na bete me ra savata na ka sa tauva tu na mate, ena qai sogolatia o koya me vitu tale na siga. 55 "Me na qai dikeva na mate na bete ni sa sava oti; ia kevaka e sega ni veisau mai na roka ni mate, e dina ga ni se sega ni tete na mate, e sega ni savasava, ka mo vakama e na buka waqa; e tete tikoga, se tiko na mate e eloma se e dakuna. 56 "Kevaka sa dikeva na bete, e dina sa seavu na mate ni sa sava oti, me qai dresuka tani mai nai sulu, se mai na ketena se dakuna, se mai na kuli ni manumanu. 57 "Ia kevaka sa laurai tale e nai sulu, se ketena se dakuna, se dua na ka e caka mai na kuli ni manumanu, na mate e tete tikoga; mo qai vakama e na bukawaqa na ka sa tiko kina na mate. 58 "Ia kevaka o savata nai sulu, na ketena se dakuna, se dua na ka e caka mai na kuli ni manumanu, kevaka sa takali kina na mate, me qai sava tale e nai karua ni gauna, ena qai savasava. 59 "Oqo na lewa e na vuku ni vukavuka e nai sulu vuti ni sipi sei sulu lineni, se tiko e ketena se dakuna, se dua na ka e caka mai na kuli ni manumanu, me vakaraitaki kina ni savasava se me vakaraitaki ni sega ni savasava."

Vunau Ni Soro 14

Na Veika Me Caka Me Savasava Kina Na Vukavuka Sa Vakabulai

1 Sa qai vosa vei Mosese o Jiova, ka vaka, 2 "Oqo na lewa e na vuku ni tamata vukavuka baleta na siga ni nona vaka-savasavataki: Me na kau mai o koya vua na bete. 3 "Ka me na lako yani na bete ki nai bili ni tikotiko, ka me na qai dikevi koya na bete; e dina kevaka sa vakabulai na vukavuka mai vua ka tauvi vukavuka, 4 "Me qai vakarota o koya na bete me kauta mai e na vukuna o koya me mai vaka-savasavataki e rua na manumanu vuka e savasava ka bula, na kau sitari, na ka kulakula, kei na isopa. 5 "Ka me na vakarota na bete me vakamatei e dua vei rau na manumanu, e na dua na bilo qele e dela ni wai drodro. 6 "Ia na manumanu e bula tiko, me taura o koya, na kau sitari kei na ka kulakula kei na isopa, ka tonia vata kei na manumanu bula ki na dra ni manumanu ka vakamatei e dela ni wai drodro. 7 "Ka me qai kureitaka vakavitu vua me vakasavasavataki mai na vukavuka, ka vakaraitaki koya ni sa savasava, ka me qai laiva na manumanu bula me vuka yani e dela ni vanua. 8 "O koya e mai vakasavasavataki me savata na nonai sulu, tasia na drau-ni-uluna taucoko, ka sili e na wai, me na savasava kina. Ni sa oti o ya me qai lako mai ki nai tikotiko, ka me tu ga e tautuba ni nona vale laca me siga vitu. 9 "Ia e na kenai kavitu ni siga me na tasia kece na drau ni uluna kei na kumina kei na vacuna – na vutina kecega me tasia o koya. Me qai savata o koya na nonai sulu ka sili talega e na wai, ena qai savasava o koya. 10 "Ia e na kenai kawalu ni siga me kauta e rua na lami tagane e sega na kena ca, ka dua na lami yalewa e yabaki dua ka sega na kena ca, kei na tolu nai katini ni efa na valawa qaqi sa veiwaki vata kei na waiwai mei soro laukana, kei na waiwai e lailai sobu mai na dua na paidi. 11 "Na bete ka vakasavasavataki koya, me qai kauta na tamata me vakasavasavataki, kei na ka kecega o ya, ki na mata i Jiova, mai na katuba ni vale ni veitavaki. 12 "Ka me taura e dua na lami tagane na bete ka vakacabora mei soro ni caka cala, kei na waiwai e lailai sobu mai na dua na paidi, ka yalovaka mei soro e yalovaki e na mata i Jiova. 13 "Me qai vakamatea na lami e na tikina e dauvakamatei kina nai soro ni valavala ca kei nai soro kama, e na tikina tabu; ni sa nona na bete nai soro ni valavala ca, sa vaka talega kina nai soro ni caka cala. Sa ka tabu sara. 14 "Na bete me na kauta eso na dra ni soro ni caka cala, ka me boroya na bete na vuso ni daligana i matau na tamata e mai vakasavasavataki, kei nai dovidovinikakana ni ligana i matau, kei nai qaqalo levu ni yavana i matau. 15 "Ka me na kauta na bete eso na waiwai e lailai sobu mai na dua na paidi, ka livia ki na qeteqete ni ligana i mawi vakai koya. 16 "Me qai tonia na bete na nonai qaqaloi matau ki na waiwai sa tu e na ligana i mawi, ka kureitaka vakavitu na waiwai e na nonai qaqalo e na mata i Jiova. 17 "Ia mai na kena vo ni waiwai e tu e ligana, me lumuta kina o koya na bete na vuso ni daligana i matau na tamata e mai vakasavasavataki, kei nai dovidovinikakana ni ligana i matau, kei nai qaqalo levu ni yavana i matau, e dela ni dra ni soro ni caka cala. 18 "Na kena vo ni waiwai e tu ena ligana na bete me livia o koya ki na ulu i koya e mai vakasavasavataki. Ia me sorovaki koya na bete e na mata i Jiova. 19 "Na bete me qai vakacabora nai soro ni valavala ca, ka sorovaki koya e mai vakasavasavataki mai na nona sega savasava. Ni sa oti o ya me qai vakamatea nai soro kama. 20 "Ka me qai cabora na bete nai soro kama kei nai madrali laukana e na dela ni cabocabo ni soro. Ia na bete me na sorovaki koya, ena qai savasava o koya. 21 "Ia kevaka e dravudravua o koya ka sega ni rawata, me qai kauta o koya e dua na lami tagane mei soro ni caka cala e yalovaki, me sorovaki koya kina, me dua nai katini ni efa na valawa qaqi e veiwaki vata kei na waiwai mei soro laukana, na waiwai e lailai sobu mai na dua na paidi, 22 "Kei na rua na soqe se rua na ruve gone, me vaka na ka e rawata o koya: e dua mei soro ni valavala ca, ka dua mei soro kama. 23 "Me na kauta o koya vua na bete e na kenai kawalu ni siga me ka ni nona vakasavasavataki, ki na katuba ni vale ni veitavaki, e na mata i Jiova. 24 "Ka me na taura o koya na bete na lami mei soro ni caka cala kei na waiwai e lailai sobu mai na dua na paidi, me qai yalovaka na bete mei soro e yalovaki e na mata i Jiova. 25 "Me na qai vakamatea o koya na lami mei soro ni caka cala, ka me kauta eso na dra ni soro ni caka cala na bete ka boroya kina na vuso ni daligana i matau na tamata e mai vakasavasavataki, e nai dovidovinikakana ni ligana i matau, kei nai qaqalo levu ni yavana i matau. 26 "Ka me qai livia eso na waiwai na bete ki na qeteqete ni ligana i mawi vakai koya. 27 "Me na qai kureitaka e nai qaqalo ni ligana i matau eso na waiwai sa tu e ligana i mawi vaka vitu e na mata i Jiova. 28 "Me qai lumuta na bete e na waiwai e tu e ligana na vuso ni daligana i matau na tamata e mai vakasavasavataki, e nai dovidovinikakana ni ligana i matau, kei nai qaqalo levu ni yavana i matau, e na tikina sa boro kina na dra ni soro ni caka cala. 29 "Na kena vo ni waiwai e tu e ligana na bete me livia o koya ki na ulu i koya e mai vakasavasavataki, me sorovaki koya e na mata i Jiova. 30 "Ka me qai vakacabora o koya e dua vei rau na soqe se vei rau na ruve gone, me vaka na ka e rawata– 31 "Me vaka na ka ga e rawata, e dua mei soro ni valavala ca ka dua mei soro kama, kei nai soro laukana. Ia na bete me na sorovaki koya e mai vakasavasavataki e na mata i Jiova. 32 "Oqo na lewa e na vukui koya e tauva na vukavuka, o koya e sega ni rawata na ka e lavaki e na vuku ni vakasavasavataki."

Nai Vunau Me Baleta Na Nodra Vale Na Vukavuka

33 Ka sa vosa o Jiova vei Mosese kei Eroni, ka vaka: 34 "Ni o ni sa yaco ki na vanua o Kenani, o ya Au sa solia vei kemuni mo ni taukena, ka'u sa vakatubura na vukavuka e na dua na vale e na vanua o ni sa taukena, 35 "Ka sa lako o koya nai taukei ni vale, ka tukuna vua na bete, ka vaka, 'E vaka vei au ni sa tiko e vale na ka e vaka na mate,' 36 "Me qai vakarota na bete me ratou vakalalataka mada na vale, ni bera ni qai curuma na bete me dikeva na mate, na ka kecega e tiko e vale me kakua mada ni tukuni me sega savasava; ia ni sa oti me qai curu na bete me vakadikeva na vale. 37 "Ia me na dikeva na mate o koya; ia kevaka sa tiko e lalaga ni vale na mate ka sa kabita vakaukauwa kei na kena dui roka, e via drokadroka se via damudamu, ka sa rairai titobu ki loma ni lalaga, 38 "Me qai curu kitautuba na bete, ki na katuba ni vale, ka sogota na vale me siga vitu. 39 "Ka me qai lako tale mai na bete e na kenai kavitu ni siga ka raica; e dina kevaka sa teteva na lalaga ni vale na mate, 40 "Me qai vakarota na bete me ra kauta tani na veivatu sa tu kina na mate, ka biuta laivi e na dua na yasana e sega ni savasava mai na taudaku ni koro. 41 "Ka me na vakarota o koya me kari na lalaga ni vale e loma, vakavolivolita, ia na duka kece era karia tani me ra la'ki sova ki na dua na yasana e sega ni savasava mai na taudaku ni koro. 42 "Me ra qai kauta mai eso na veivatu tani me sosomitaka na veivatu o ya; ka me kauta na lase vou ka botana na vale. 43 "Ia oqo kevaka e na lako tale mai na mate ka teteva e na vale, ni sa kau tani oti na veivatu, ni sa kari oti na vale, ka sa botani, 44 "Me na qai lako mai na bete ka raica; e dina kevaka sa tete na mate e na vale, oqo na vukavuka bula e na vale. Sa sega ni savasava. 45 "Me qai basuka sobu na vale o koya, na kena veivatu, na kena kau, kei nai botani kecega ni vale, ka me kauta tani ki taudaku ni koro, ki na yasana e sega ni savasava. 46 "Ia o koya e na curuma na vale ena gauna e sogo tu kina ena sega ni savasava o koya me yacova na yakavi. 47 "Kei koya e davo e na loma ni vale o ya me na savata na nonai sulu kei koya e kana e na loma ni vale o ya me na savata na nonai sulu. 48 "Ia kevaka sa curu kina na bete ka dikeva, ka sa sega ni tete na mate e na vale ni sa botani oti na vale, me qai vakaraitaka na bete ni sa savasava na vale o ya, ni sa takali na mate. 49 "Ia me kauta o koya, me vakasavasavataka kina na vale, e rua na manumanu vuka, na kau sitari, na ka kulakula, kei na isopa. 50 "Me qai vakamatea o koya e dua vei rau na manumanu e na dua na bilo qele e tu e dela ni wai drodro; 51 "me qai taura na kau sitari, na isopa, na ka kulakula, kei na manumanu vuka e bula, ka tonia e na dra ni manumanu sa vakamatei, kei na wai drodro, ka kureitaka vakavitu ki na vale. 52 "Ka me na vakasavasavataka o koya na vale e na dra ni manumanu kei na wai drodro kei na manumanu e bula, kei na kau sitari, na isopa, kei na ka kulakula. 53 "Me qai sereka o koya na manumanu bula me vuka yani e dela ni vanua mai na taudaku ni koro, ka me sorovaka na vale, ena qai savasava. 54 "Oqo na lewa e baleta na vukavuka kecega, kei na varivari, 55 "E na vuku ni vukavuka e nai sulu kei na vale, 56 "E na vuku ni vuvuce kei na karokaro kei na tikina rama, 57 "Me vakatavulica ni sa sega ni savasava se ni sa savasava. Oqo na lewa me baleta na vukavuka."

Vunau Ni Soro 15

Nai Vunau Me Baleta Na Turudra

1 Ia o Jiova sa vosa vei Mosese kei Eroni, ka vaka, 2 "Drau vosa vei ira na Isireli, ka tukuna vei ira, 'Ni sa turudra na yagona e dua na tagane, na nona turudra e sega ni savasava. 3 'Ia oqo na ka ena sega ni savasava kina o koya e na vuku ni nona turudra O se ni sa turudra vata kei na yagona, se sega, oqo na nona sega ni savasava. 4 'Nai davodavo kecega e davo kina o koya sa turudra, e na sega ni savasava: kei na ka kecega e na dabeca o koya e na sega ni savasava. 5 'O koya ga e na tara na nonai davodavo me na savata na nonai sulu ka sili e na wai, ena sega ni savasava me yacova na yakavi. 6 'O koya e na dabeca e dua na ka e a dabeca o koya sa turudra me savata na nonai sulu ka sili e na wai, ena sega ni savasava me yacova na yakavi. 7 'Kei koya sa tara na yagoi koya e turudra me savata na nonai sulu ka sili e na wai, ena sega ni savasava me yacova na yakavi. 8 'Ia kevaka e kasivita na tamata savasava o koya sa turudra, me qai savata na nonai sulu ka sili e na wai, ena sega ni savasava me yacova na yakavi. 9 'Kei nai dabedabe kecega e dabeca o koya e turudra ena sega ni savasava. 10 'O koya e na tara e dua na ka e tu e na rukui koya e turudra ena sega ni savasava me yacova na yakavi. o koya e colata e dua vei ira na ka oqori me savata na nonai sulu ka sili e na wai, ena sega ni savasava me yacova na yakavi. 11 'Kei koya ena tara o koya e turudra, ka sega ni vuya e na wai na ligana, me savata na nonai sulu ka sili e na wai, ia ena sega ni savasava me yacova na yakavi. 12 'Kei na bilo qele e tara o koya e turudra me vorolaki, kei na bilo kau kecega me vui e na wai. 13 'Ia ni sa savasava mai na nona sega ni savasava o koya e turudra, me qai wilika o koya vei koya e vitu na siga me vakasavasavataki kina, me savata na nonai sulu, ka sili e na wai drodro; ena qai savasava. 14 'E na kenai kawalu ni siga me na kauta vei koya e rua na soqe se rua na ruve gone, ka lako mai ki na mata i Jiova, ki na katuba ni vale ni veitavaki, ka solia vua na bete. 15 'Ena qai vakacabora na bete, e dua mei soro ni valavala ca ka dua mei soro kama. Ia me sorovaki koya kina na bete e na mata i Jiova e na vuku ni nona turudra. 16 'Kevaka e bura loa na nona wai e dua na tagane, me qai sili kece na yagona e na wai, ena sega ni savasava me yacova na yakavi. 17 'Kei nai sulu kecega kei na kuli ni manumanu kecega sa buraci wai ni tagane, me sava e na wai, ena sega ni savasava me yacova na yakavi. 18 'Na yalewa talega, ni rau sa tiko vata kei na dua na tagane ka sa bura loa na nona wai, me rau sili e na wai, e rau na sega ni savasava me yacova na yakavi. 19 'Kevaka e turudra e dua na yalewa, ia na ka sa turu mai yagona na dra, me na tawase tani o koya me vitu na siga; ia o koya e na tarai koya ena sega ni savasava me yacova na yakavi. 20 'Na ka kecega e davoca o koya e na gauna ni nona sega savasava ena sega ni savasava; na ka kece talega e na dabeca o koya ena sega ni savasava. 21 'O koya e tara na nonai davodavo me savata na nonai sulu ka sili e na wai, ena sega ni savasava me yacova na yakavi. 22 'Kei koya ena tara e dua na ka e a dabeca o koya me savata na nonai sulu ka sili e na wai, ena sega ni savasava me yacova na yakavi. 23 'Ia kevaka e dua na ka e tiko ena nona i davodavo se e na dua na ka e a dabeca o koya, ni sa tara e dua na tamata, ena sega ni savasava me yacova na yakavi. 24 'Ia kevaka e dua na tagane e tiko vata kei koya, ka sa tauvi koya na nona dra, ena sega ni savasava o koya me siga vitu; kei nai davodavo kecega ena davoca o koya e na sega ni savasava. 25 'Ia kevaka e dua na yalewa sa turudra tiko e na siga e vuqa, ka sega ni vaka na kena i vakarau dodonu, se sa sivia na balavu ni kena gauna dodonu, na veisiga kecega sa turu kina dra e sa sega ni savasava, ena vaka na veisiga ni nona tawase tani. Ena sega ni savasava o koya. 26 'Nai davodavo kecega ena davoca o koya e na veisiga kece e turudra kina ena tautauvata vua kei na nonai davodavo ni sa tawase tani; kei na ka kece sa dabeca o koya ena sega ni savasava, me vaka na nona sega ni savasava ni sa tawase tani. 27 'O koya e tara na veika oqori ena sega ni savasava; me savata na nonai sulu ka sili e na wai, ena sega ni savasava me yacova na yakavi. 28 'Ia kevaka sa savasava mai na nona turudra, me qai wilika vua e vitu na siga, ena qai savasava. 29 'Ia e na kenai kawalu ni siga me kauta o koya e na vukuna e rua na soqe se rua na ruve gone, ka kauta mai vua na bete, ki na katuba ni vale ni veitavaki. 30 'Me qai vakacabora o koya na bete e dua mei soro ni valavala ca kei na kenai karua mei soro kama, ka me sorovaki koya na bete e na mata i Jiova e na vuku ni turudra e sega ni savasava kina. 31 'Ia dou tawasei ira tani vakaoqo na Isireli mai na ka era sega ni savasava kina, de ra na mate e na nodra sega ni savasava ni ra sa vakadukadukalitaka na Noqu vale sa tu e na kedra maliwa. 32 'Oqo na lewa e na vuku i koya sa turudra, kei koya sa bura loa na nona wai ka sa sega ni savasava mai kina, 33 'Kei koya na yalewa sa sega ni cakava rawa e dua na ka ni sa tauva na mate vakavula; kei koya e turudra, se tagane se yalewa; kei na tagane e mocera na yalewa e sega ni savasava.'"

Vunau Ni Soro 16

Na Siga Ni Veibuluti

1 Ia oqo sa vosa vei Mosese o Jiova ni rau sa mate na luve i Eroni, ni rau a vakacabora nai soro ni veibeci e na mata i Jiova, ka mate kina; 2 Ka sa tukuna o Jiova vei Mosese: "Tukuna vei Eroni na tuakamu me kakua ni curu mai ena gauna ga e rawa ki na Tikina Tabu ki loma ni lati, e na mata ni cabocabo-ni-bulubulu e tu e dela ni kato, de mate kina o koya; ni'u na rairai mai na o e na dela ni cabocabo-ni-bulubulu. 3 "Me vakaoqo na nona curu o Eroni ki na Tikina Tabu: kei na dra ni dua na bulumakau tagane e gone mei soro ni valavala ca, kei na dra ni dua na sipi tagane mei soro kama. 4 "Me daramaka o koya nai curucuru balavu lineni sa tabu, ka daramaka na tarausese lineni e na yagona, me vau na tolona e nai vau lineni, ka vakaisala e nai sala lineni. Oqo nai sulu tabu. o koya oqo me sili mada o koya e na wai, ka qai vakaisulu kina. 5 "Ka me taura mai vei ira nai soqosoqo na Isireli e rua na me mei soro ni valavala ca, ka dua na sipi tagane mei soro kama. 6 "Me qai vakacabora o Eroni na bulumakau tagane mei soro ni valavala ca, e na vukuna ga, ka sorovaki koya kei na nona lewe-ni-vale. 7 "Me qai kauta o koya na me ruarua ka vakacabora e na mata i Jiova mai na katuba ni vale ni veitavaki. 8 "Me qai vakawiri madigi o Eroni e na vukudrau na me: e dua me nei Jiova ka dua me nei Asaseli. 9 "Ka me kauta o Eroni na me ka goleva na madigi me nei Jiova, ka vakacabora mei soro ni valavala ca. 10 "Ia na me e goleva na madigi me nei Asasela, me qai vakacabori bula e na mata i Jiova, me sorovaki o koya, me qai vakatalai tani me ka ni veibeitaki ki na vanua liwa. 11 "Ka me kauta o Eroni na bulumakau tagane e i soro ni valavala ca, e na vukuna o koya, ka me sorovaki koya kei na nona lewe-ni-vale, ka vakamatea na bulumakau mei soro ni valavala ca e na vukuna. 12 "Me qai kauta o koya na miqa e sinai e na qilaiso e waqa, mai nai cabocabo ni soro sa tu e na mata i Jiova, ka vakasinaita na ligana e na kau boi vinaka sa vuruvuru me matai lalai, ka kauta ki loma ni lati. 13 "Ka me viritaka na ka boi vinaka ki na buka waqa e na mata i Jiova, me ruguta nai cabocaboni- bulubulu sa tu e na dela ni kato ni vunau na o ni ka boi vinaka, de mate kina o koya. 14 "Me na kauta na dra ni bulumakau o koya, ka kureitaka e na nonai qaqalo ki dela ni cabocabo-nibulubulu vaka ki na tokalau; ka kureitaka vakavitu na dra e na nonai qaqalo ki na mata ni cabocabo-ni-bulubulu. 15 "Me qai vakamatea o koya na me mei soro ni valavala ca, e na vukudra na tamata, ka kauta na kena dra ki loma ni lati, ka cakava e na dra o ya me vaka e a cakava e na dra ni bulumakau, ka kureitaka ki dela ni cabocabo-ni-bulubulu, kei na mata ni cabocabo-ni-bulubulu. 16 "Me sorovaka vakaoqo o koya na tikina tabu, e na vuku ni nodra sega ni savasava na Isireli, kei na nodra caka cala, io na nodra i valavala ca kecega; ia me cakava vakakina e na vuku ni vale ni veitavaki na ka sa vo tiko vei ira e na maliwa ni nodra sega ni savasava. 17 "Me kakua na tamata me tiko e na vale ni veitavaki ni sa curu o koya ki na tikina tabu me vakacabora nai soro, me yacova ni curu tale mai, me sa sorovaki koya oti, kei na nona lewe-ni-vale, kei nai soqosoqo taucoko ni Isireli. 18 "Me na curu yani o koya ki nai cabocabo ni soro e tu e na mata i Jiova, ka sorovaka; ka kauta eso na dra ni bulumakau kei na dra ni me, ka boroya wavoki kina na tutu balavu cake ni cabocabo ni soro. 19 "Me qai kureitaka vakavitu na dra ki delana e na nonai qaqalo, me vakasavasavataka, ka vakatabuya mai na nodra sega ni savasava na Isireli. 20 "Ia ni sa oti na nona sorovaka na Tikina Tabu, na vale ni veitavaki, kei nai cabocabo ni soro, me qai kauta mai na me bula. 21 "Me qai tabaka na ulu ni me bula o Eroni e na ligana ruarua, ka vakatusa kina na nodra caka ca kecega na Isireli, kei na nodra caka cala kecega, e na vuku ni nodra i valavala ca kecega, ka tauca ki na ulu ni me, ka vakatala tani ki na vanua liwa ni sa tubera yani e dua na tamata e dina. 22 "Na me ena colata na nodra cala kecega ki na vanua liwa; me qai sereka o koya na me e na vanua liwa. 23 "Me qai curu mai o Eroni ki na vale ni veitavaki, ka luvata tani nai sulu lineni ka sulumaka o koya ni sa curu ki na tikina tabu, ka laiva tu mai kea. 24 "Ka me qai sili o koya e na wai e na dua na tikina tabu, daramaka na nonai sulu, curu mai, ka vakacabora na nonai soro kama, kei na nodra i soro kama na tamata, me sorovaki koya kei ira na tamata. 25 "Me na vakama o koya na uro ni soro ni valavala ca e na dela ni cabocabo ni soro. 26 "Ia o koya ka sereka na me ka sa colata na nodra cala, me savata na nonai sulu ka sili o koya e na wai, ni sa oti me qai curu mai ki nai tikotiko. 27 "Na bulumakau tagane me i soro ni valavala ca kei na me ei soro ni valavala ca, sa kau na kedrau dra ki na tikina tabu mei soro, me kau tani ki nai bili ni tikotiko. Ia me vakamai e na bukawaqa na kulidrau, kei na lewedrau, kei na dedrau. 28 "Ia o koya e vakamai rau me savata na nona i sulu ka sili o koya e na wai, ni sa oti me qa lako mai nai tikotiko. 29 "Oqo me kenai lesilesi ka sega ni mudu vei kemudou; e nai kavitu ni vula, e nai katini ni siga ni vula, mo dou vakararawataka na yalomudou, mo dou kakua ni cakava kina e dua na cakacaka, se i taukei ena nomudou vanua, se na kai tani e tiko vulagi kei kemudou. 30 "E na siga dina o ya e na sorovaki kemudou kina na bete, me vakasavasavataki kemudou, mo dou na savasava kina mai na nomudoui valavala ca kecega e na mata i Jiova. 31 "Ena Siga ni Vakacecegu mo dou vakacegu kina, ka mo dou vakamalumalumutaka na yalomudou, oqo sai lesilesi vei kemudou me sega ni mudu. 32 "Ia na bete, o koya sa lumuti ka vakatabui me bete mei sosomi kei tamana, ena vakacabora nai soro, ka sulumaka nai sulu lineni, io nai sulu tabu; 33 "Me qai sorovaka o koya na Vale Tabu, ka sorovaka na vale ni veitavaki kei nai cabocabo ni soro; me sorovaki ira talega na bete o koya kei ira kecega nai soqosoqo. 34 "Oqo sai lesilesi vei kemudou me sega ni mudu, ka me sorovaki ira na Isireli, e na vuku ni nodra i valavala ca kecega, vakadua ga e na veiyabaki." Ia sa cakava o koya me vaka e vakarota vei Mosese o Jiova.

Vunau Ni Soro 17

Na Savasava Ni Dra

1 Ia sa vosa vei Mosese o Jiova, ka vaka, 2 "Mo vosa vei Eroni kei iratou na luvena, kei ira kece na Isireli, ka tukuna vei ira, 'Oqo na ka sa vakarota o Jiova, ka vaka: 3 "A tamata kecega vei ira na mataqali i Isireli sa vakamatea na bulumakau, se lami, se me, e loma ni tikotiko, se vakamatea e nai bili ni tikotiko, 4 "A sa sega ni kauta ki na katuba ni vale ni veitavaki, me cabora nai madrali vei Jiova, e na mata ni vale nei Jiova; ena beitaki na tamata o ya ni sa vakadave dra: sa vakadavea walega na dra o koya; ia ena muduki tani na tamata o ya mai vei ira na kai nona, 5 "Ka me ra kauta ga na nodra i soro na Isireli era vakacabora mai vanua, io me ra kauta vei Jiova, ki na katuba ni vale ni veitavaki, vua na bete, ka vakacabora mei madrali ni veivinakati sa cabori vei Jiova. 6 "Ia me kureitaka na dra na bete e na dela ni cabocabo ni soro i Jiova, sa tu mai na katuba ni vale ni veitavaki, ka vakama na uro me ka boi vinaka vei Jiova. 7 "Ia me ra kakua ni vakacabora tale na nodra i soro vei ira na me tagane, era sa lako tani kina me muria. Na ka oqo sa kena i lesilesi ka sega ni mudu vei ira e na nodra veitabatamata."' 8 "Ia mo tukuna vei ira, 'A tamata kecega vei ira na mataqali i Isireli, se na kai tani sa tiko vulagi kei ira, sa vakacabora nai soro kama se dua nai soro, 9 'Ka sega ni kauta ki na katuba ni vale ni veitavaki, me vakacabora vei Jiova; na tamata o ya ena muduki tani vei ira na kai nona. 10 'Ia na tamata kecega vei ira na mataqali i Isireli, se na kai tani sa tiko vulagi kei ira, sa kania e dua na dra; ena dua tani kina na mataqu vua na tamata o ya sa kana dra, ia ka'u na muduki koya tani mai vei ira na kai nona. 11 'Ni sa kena bula ni yago na dra: ia ka'u sa solia vei kemudou me sorovaka na yalomudou e na dela ni cabocabo ni soro: ia sa rawa mei soro na dra, ni sai koya na bula.' 12 "O koya Au a tukuna kina vei ira na Isireli, 'Me kakua ni dua vei kemudou me kania na dra, me kakua talega ni kania na dra e dua na kai tani sa tiko vulagi kei kemudou.' 13 "Kei na tamata kecega vei ira na Isireli, se vei ira na kai tani sa tiko vulagi kei ira, sa vakasasa manumanu e yavai va se manumanu vuka sa tara me laukana; me livia mada ga o koya na kena dra, ka ubia e na soso; 14 "Ni sa kena bula ni yago kecega na dra sa tu e na yagona: o koya ka'u a tukuna kina vei ira na Isireli, 'Mo dou kakua ni kania na dra ni dua na manumanu: ni sa kena bula ni yago kecega na dra sa tu e na manumanu kecega: O ira kecega sa kania ena muduki tani.' 15 "Kei na tamata kecega sa kania na ka sa mate vakailoa, se na ka sa katilaka na manumanu, se dua vei kemudou, se sa kai tani, me sava nonai sulu o koya, ka sili e na wai, ia ena sega ni savasava ka yacova na yakavi: ena qai savasava. 16 "Ia kevaka sa sega ni sava nonai sulu, se sili e na wai, ena qai cudruvi e na nona caka ca."

Vunau Ni Soro 18

Nai Vunau Me Baleta Na Veimoceri

1 Sa qai vosa vei Mosese o Jiova, ka vaka, 2 "Mo vosa vei ira na Isireli, ka tukuna vei ira, 'Sai au o Jiova na nomudou Kalou. 3 'Mo dou kakua ni muria nai valavala ni vanua o Ijipita, dou a tiko kina: kei nai valavala ni vanua o Kenani, Au sa kauti kemudou kina, mo dou kakua ni muria; ia mo dou kakua ni muria na nodra i vunau. 4 'Na noqu lewa ga, mo dou cakava; kei na noqui lesilesi, mo dou vakabauta, mo dou muria ga: sai au o Jiova na nomudou Kalou. 5 'O koya mo dou vakabauta kina na noqu vunau, kei na noqu lewa; o koya kevaka sa cakava ga na tamata, ena bula kina: Sai au o Jiova. 6 'Me kakua ni dua vei kemudou me via mocera e dua na yalewa e wekana voleka dina, me vakaraitaka vua na nona luvawale: Oi au o Jiova. 7 'Mo kakua ni mocera na tinamu, o koya e rau sa veimoceri kei tamamu; sa tinamu dina o koya: mo kakua ni moce vata tukuna. 8 'Mo kakua ni moce vata tukuna na wati i tamamu; e rau sa veimoceri kei tamamu o koya. 9 'Mo kakua ni mocera na ganemu, se sa luve i tamamu, se sa luve i tinamu, se sa sucu mai nomudou, se sa sucu tani, mo kakua ni moceri ira. 10 'Mo kakua ni mocera na makubumu, se sa luvena yalewa na luvemu tagane, se sa luvena yalewa na luvemu yalewa: ni rau a tubu vua e dua drau a moce vata tukuna. 11 'Mo kakua ni moce vata kei na luve i tamamu ka yalewa, o koya sa vakasucuma vua o watina, sa ganemu o koya. 12 'Mo kakua ni moce vata ke na gane i tamamu: ni sa wekana dina na tamamu o koya. 13 'Mo kakua ni moce vata kei na taci i tinamu, se tuakana, ni sa wekana dina na tinamu o koya. 14 'Mo kakua ni moce vata kei na wati i tamamu lailai, sa tinamu lailai o koya. 15 'Mo kakua ni mocera na watina na luvemu tagane; mo kakua ni ca tukuna. 16 'Mo kakua ni mocera na watina na tuakamu, se na watina na tacimu. 17 'Mo kakua ni mocera e dua na yalewa, kei na luvena yalewa, se dua na makubuna yalewa; ni ratou sa veiwekani dina; oqo na ka ca. 18 'Mo kakua talega ni vakawati kei na tuakana na watimu se na tacina, ni sa bula tiko o koya, mo vakararawataki koya kina. 19 'Mo kakua talega ni mocera e dua na yalewa e na gauna sa vakatabui tu kina, ni tauvi koya na mate vakayalewa. 20 'Mo kakua talega ni mocera na watina na kai nomu, mo vakavelavelataki iko vata tukuna. 21 'Ia mo kakua ni vakacabora e dua na luvemu e na bukawaqa vei Moloke, ia mo kakua ni vakacacana na yaca ni nomu Kalou: sai au o Jiova. 22 'Mo kakua ni koto vata tukuna na tagane me vaka kei na yalewa: oqo sa ka vakasisila. 23 'Mo kakua talega ni koto tukuna e dua na manumanu, mo vakasisilataki iko kina: me kakua talega na yalewa me tu e mata ni manumanu me koto vua: oqo na ka ni veivakamaduataki. 24 'Dou kakua ni vakasisilataki kemudou e na dua na ka vakaoqo: ni ra sa vakasisilataki e na ka kecega oqo o ira na veimatanitu, ka'u sa vakaseva tani e na matamudou. 25 'A sa dukadukali na vanua: o koya ka'u sa sauma kina na kenai valavala ca, ia na vanua sa luaraka tani na lewena. 26 'Ia mo dou vakabauta ga na noqu vunau, kei na noqu lewa, ka mo dou kakua ni kitaka e dua na ka vakasisila oqo; se na kai nomu se na kai tani sa tiko vulagi kei kemudou 27 '(Ni ra sa kitaka na ka vakasisila kecega oqo o ira na lewe ni vanua era tiko kina e liu vei kemudou, a sa vakadukadukalitaki na vanua), 28 'Me kakua ni luaraki kemudou talega na vanua, ni dou sa vakadukadukalitaka, me vaka ka luaraka na matanitu era tiko kina e liu vei kemudou. 29 'Ia o ira kecega era kitaka e dua na ka vakasisila oqo, io na tamata era kitaka, era na muduki tani vei ira na kai nodra. 30 'O koya mo dou vakabauta kina na noqu vunau, mo dou kakua ni kitaka e dua nai valavala vakasisila oqo, sa caka e liu ni dou sa bera ni yaco kina, mo dou kakua ni vakadukadukalitaki kemudou kina: sai au o Jiova na nomudou Kalou.'"

Vunau Ni Soro 19

Nai Vunau Me Baleta Nai Tovo Se Nai Valavala

1 Sa vosa talega o Jiova vei Mosese, ka vaka, 2 "Mo vosa vei ira kecega nai soqosoqo ni luve i Isireli, ka tukuna vei ira: 'Mo ni savasava, Ni'u sa savasava oi Au o Jiova na nomudou Kalou. 3 'Na tamata yadua me vakarokorokotaki rau na tamana kei na tinana, ka maroroya na noqu veisiga ni Vakacecegu: Oi Au o Jiova na nomudou Kalou. 4 'Kakua ni vuki vei ira na kalou matakau, se bulia na kalou matakau mai na ka sa vakawaicalataki: Oi Au o Jiova na nomudou Kalou. 5 'Ia ni dou sa vakacabora nai soro ni veivinakati vei Jiova, mo dou cabora ena yalo e vinakata. 6 'Me na laukana ga ena siga dou vakacabora kina, kei na siga ka tarava. Ia ke sa vo tu me yacova nai katolu ni siga, me qai vakamai ena bukawaqa. 7 'Ia kevaka sa laukana e nai katolu ni siga, sa na vakasisila. Ena sega ni vakadonui. 8 'O koya oqo kivua ena kania ena cudruvi ena nona caka cala, baleta ni beca nai soro tabu i Jiova; ia na tamata o ya me tamusuki laivi mai vei ira na wekana. 9 'Ni dou sa tamusuka na vua ni nomudou vanua, mo dou kakua ni tamusuka na tutu kece sara ni nomudoui teitei, se mo dou tomitomika na kena vo ni nomudou vuata. 10 'Dou kakua talega ni tamusuka vakaoti na nomudou veivaini, se tauca kece na vua ni vaini mai na nomudou veivaini; mo dou biuta tu me kedra na dravudravua kei na vulagi: Oi Au o Jiova na nomudou Kalou. 11 'Dou kakua ni butako, se cakacaka vakailasu, se veilasutaki vakai kemudou. 12 'Dou kakua talega ni bubului vakailasu e na Yacaqu, se beca na Yaca ni nomudou Kalou: Oi Au o Jiova na nomudou Kalou. 13 'Kakua ni lawakitaka na wekamu, se butakoci koya. Na kenai sau na nomu tamata cakacaka mo kakua ni taura tiko ena bogi taucoko ka sigavaka. 14 'Kakua ni rukaka na daligavara, se biuta e matana na mataboko na ka me tarabe kina, ia mo rerevaka na nomu Kalou: Oi Au o Jiova. 15 'Dou kakua ni vakatulewa cala ni dou sa tauca na lewa. Mo kakua ni beitaka na dravudravua se doka na tamata kaukauwa. Mo vakatauca na lewa dodonu vua na kai nomu. 16 'Mo kakua ni kauta voli nai tukutuku lasu ena kedra maliwa na wekamu; se beitaka me mate na kai nomu: Oi Au o Jiova. 17 'Mo kakua ni cata na wekamu ena yalomu. Mo na dauvunauca na wekamu, ka kakua ni vosota nai valavala ca ena vukuna. 18 'Mo kakua ni sauma na ca, se yaloca vei ira na luvedra na kai nomu, ia mo lomana na kai nomu me vaka na nomu lomani iko: Oi Au o Jiova. 19 'Mo maroroya na Noqui vakaro. Mo kakua ni laiva e dua na nomu manumanu me rau vakaluveni kei na duatani na mataqali. Kakua ni tea vata na veimataqali i tei. Se daramaka na i sulu e cula vata na lineni kei na vutika ni sipi. 20 'Ia o koya ena veimoceri kei na yalewa sa musuki me watina lailai e dua na tagane, ia e se bera ni voli lesu se me soli vua na nona galala, e na vuku ni ka oqo ena tau kina vei rau na cudru; ia e rau na sega vakamatei, baleta ni se sega ni galala na yalewa. 21 'Ia me na kauta na tagane na nonai soro ni caka cala vei Jiova, ki na mata ni katuba ni vale ni veitavaki, e dua na sipi tagane mei soro ni caka cala. 22 'Na bete ena cakava na veisorovaki ena vukuna ni cabora na sipi tagane ka nona i soro ni caka cala ena mata i Jiova me baleta na cala e cakava. Ia sa na vosoti na cala e a cakava. 23 'Ia ni dou sa na yacoi na vanua o ya, ka tea na veimataqali kau vuata me kemudou, mo dou qai okata na vuana me sega ni cili. Me tolu na yabaki na kena sega ni cilivi vei kemudou. Me kakua ni laukana. 24 'Ia e nai kava ni yabaki ena tabu na vuata kece sara, me vakavinavinakataki kina o Jiova. 25 'Ia e nai kalima ni yabaki mo ni na qai kania na vuana, me na vakalevutaka kina na vuata e solia vei kemudou: Oi Au o Jiova na nomudou Kalou. 26 'Mo dou kakua ni kania e dua na ka vata kei na dra, dou kakua talega ni viavia raivotu se via tukuna na ka e se bera ni yaco mai ena veivuke ni o kei na gata. 27 'Mo dou kakua ni toroya na tutu ni ulumudou, se vakacacana na tutu ni kumimudou. 28 'Mo dou kakua ni tavalaka na yagomudou ena vukudra na mate, se samuqawetaka na yagomudou: Oi Au o Jiova. 29 'Dou kakua ni solia na luvemudou yalewa me dautagane, ka soli koya me dau veibutakoci, de sa lutu ki na bula ni veibutakoci na vanua, ka sa levu sara nai valavala ca e na vanua. 30 'Mo dou maroroya na Noqu veiSiga ni Vakacecegu ka vakarokorokotaka na Noqu vale tabu: Oi Au o Jiova. 31 'Kakua ni vakabauti ira na daucurumi kei na yalo sa vakakina; dou kakua ni vakasaqarai ira, me ra vakadukadukalitaki kemudou: Oi Au o Jiova na nomudou Kalou. 32 'Mo dou tucake e matadra na ulu sika ka doka na matana na tamata qase, ka rerevaka na nomudou Kalou: Oi Au o Jiova. 33 'Ia kevaka sa tiko vulagi kei kemudou ena nomudou vanua e dua na kai tani, dou kakua ni vakararawataki koya. 34 'O koya sa tiko vulagi kei kemudou me vaka ga e dua e sucu ena kemudou maliwa, ia mo dou lomani koya me vaka dou lomani kemudou; ni dou a tiko vulagi ena vanua o Ijipita: Oi Au o Jiova na nomudou Kalou. 35 'Mo dou kakua ni tauca na lewa ca ni dou sa vakatulewa, e nai vakarau ni kena balavu, kena bibi, se kena levu. 36 'Me tikoga vei kemudou na i vakarau dodonu, me dodonu na kena bibi, nai vakarau dodonu ni kena mamaca, kei nai vakarau dodonu ni kena suasua: Oi Au o Jiova na nomudou Kalou, o Koya ka kauti kemudou tani mai na vanua o Ijipita. 37 'O koya oqo mo dou vakabauta na Noqui vakaro kei na Noqu lewa kecega, ka cakava: Oi Au o Jiova.'"

Vunau Ni Soro 20

Nai Totogi Ni Basu Lawa

1 Sa qai vosa vei Mosese o Jiova, ka vaka, 2 "Mo tukuna tale vei ira na Isireli, 'Na tamata yadua vei ira na Isireli, se vei ira na kai tani sa tiko vulagi kei na Isireli, sa solia e dua na luvena vei Moloke; ena vakamatei vakaidina o koya: me ra vakaviriki koya e na vatu o ira na lewe ni vanua. 3 'Ia Au na cudruva na tamata o ya, ka muduka tani vei ira na kai nona; ni sa solia e dua na luvena vei Moloke, me vakadukadukalitaka na noqu vale tabu, ka vakacacana na yacaqu tabu. 4 'Ia kevaka sa tabonaka na matadra vua na tamata o ya o ira na lewe ni vanua, ni sa solia e dua na luvena vei Moloke, ka sega ni vakamatei koya, 5 'Au na qai cudruva na tamata o ya, kei na nona lewe-ni-vale, ka muduki koya tani, kei ira kece era sa muri koya, me gole vei Moloke, mai vei ira na kai nodra. 6 'Kei na tamata sa golevi ira sa daucurumi, kei ira na dauveinita, me muri ira, Au na cudruva na tamata o ya, ka muduka tani mai vei ira na kai nona. 7 'O koya mo dou vakasavasavataki kemudou kina, mo dou savasava: ni sai Au o Jiova na nomudou Kalou. 8 'Ia dou vakabauta na noqu vunau, ka cakava: Oi Au o Jiova, o koya sa vakasavasavataki kemudou. 9 'Ena vakamatei vakaidina o koya yadua sa rukaka na tamana se tinana. Sa rukaka na tamana se tinana o koya; sa baleti koya ga na nona mate. 10 'Na tagane talega sa veibutakoci kei na watina na tani, io sa veibutakoci kei na wati ni kai nona, e rau na vakamatei vakaidina ruarua, na tagane sa dauyalewa kei na yalewa sa dautagane. 11 'Kei na tagane sa mocera na wati ni tamana, sa veibutakoci kei koya e rau sa tiko vata kei tamana; e rau na vakamatei vakaidina ruarua; sa baleti rau na nodrau mate. 12 'Ia kevaka sa moce e dua na tagane kei na watina na luvena tagane, e rau na vakamatei vakaidina ruarua: E rau sa kitaka na ka ni veivakamaduataki; sa baleti rau ga na nodrau mate. 13 'Ia kevaka sa moce vata kei na tagane e dua na tagane me vaka sa moce vata kei na yalewa, e rau sa kitaka ruarua na ka vakasisila: E rau na vakamatei vakaidina; sa baleti rau ga na nodrau mate. 14 'Ia kevaka e dua na tagane sa na vakawati kei na dua na yalewa kei na tinana, sa ka ca sara: e ratou na vakamai e na bukawaqa, o koya kei rau talega; me kakua kina na ca e na kemudou maliwa. 15 'Ia kevaka sa tiko vata kei na manumanu e dua na tagane, ena vakamatei vakaidina o koya; mo dou vakamatea talega na manumanu. 16 'Ia kevaka sa dua na yalewa sa torova e dua na manumanu, me tiko vata tukuna, mo dou vakamatea na yalewa, kei na manumanu: E rau na vakamatei vakaidina; sa baleti rau na nodrau mate. 17 'Ia kevaka sa dua na tagane sa vakawati kei na ganena, na luve i tamana, se na luve i tinana, ka rau sa veibutakoci, e rau sa kitaka na ka e veivakamaduataki; e rau na muduki tani e na matadra na kai nodrau: Sa veibutakoci kei na ganena na tagane o ya: Ena cudruvi o koya e na nona caka ca. 18 'Ia kevaka e rau sa veimoceri na tagane kei na yalewa ni sa tauvi mate vakayalewa; sa vakarairaitaka na nona vure o koya na tagane; ia sa vakaraitaka na nona vure ni dra o koya na yalewa; e rau na muduki tani ruarua vei ira na kai nodrau. 19 'Mo kakua talega ni veimoceri kei na taci i tinamu se na tuakana, se na gane i tamamu: Ni sa veimoceri ni veiwekani dina oqo: E rau na cudruvi e na nodrau caka ca. 20 'Ia kevaka sa veimoceri na tagane kei na wati ni tamana lailai sa veimoceri o koya kei koya e rau sa tiko vata kei tamana lailai: E rau na cudruvi e na nodrau i valavala ca; e rau na mate sa na sega na luvedrau. 21 'Ke dua na tagane sa taura na watina na tuakana se tacina, sa ka velavela: Sa veimoceri o koya kei koya e rau sa tiko vata kei tuakana se tacina; ena sega na luvedrau. 22 'Ia dou muria na noqu vunau kecega, kei na noqu lewa kecega, ka cakava: Me kakua ni luaraki kemudou kina na vanua Au sa kauti kemudou kina mo dou tiko kina. 23 'Ia dou kakua ni muria na i valavala ni matanitu, Au sa vakasava tani e na matamudou: ni ra a kitaka na ka kecega oqo, era qai velavela sara vei au. 24 'Ia Au a tukuna vei kemudou, Dou na taukena na nodra vanua, ia Au na solia vei kemudou mo dou taukena na vanua sa dave kina na wai-ni-sucu kei na o ni: Oi au o Jiova na nomudou Kalou, o koya sa tawasei kemudou tani mai vei ira na veimatanitu. 25 'Dou vakatakilakilataka kina na manumanu savasava kei na manumanu sa sega ni savasava, kei na manumanu vuka sa savasava kei na manumanu vuka sa sega ni savasava: mo dou kakua kina ni vakavelavelataki kemudou e na vuku ni manumanu e yavai va, se na manumanu vuka, se dua na ka sa yaqa voli e na qele, Au sa wasea tani me sega ni savasava vei kemudou. 26 'Ia dou savasava vei au: ni'u sa savasava oi Au o Jiova, ia Au sa tawasei kemudou mai vei ira na veimatanitu, mo dou noqu. 27 'Ia na tagane se yalewa sa daucurumi, se sa dauveinita, me vakamatei vakaidina: me ra vakaviriki ira e na vatu: sa baleti ira na nodra mate.'"

Vunau Ni Soro 21

Nai Vakaro E Baleta Na Nodra i Valavala Na Bete

1 Ia o Jiova sa tukuna vei Mosese, "Mo vosa vei iratou na bete na luve i Eroni, ka tukuna vei iratou, 'Me kakua ni vakatawasavasavataki koya e dua e na vuku ni tamata mate vei ira na kai nona, 2 'Ia e na vuku ni wekana dina ga, e na vuku i tinana, se tamana, se na luvena tagane, se na luvena yalewa, se na tuakana, se na tacina; 3 'Se na ganena sa goneyalewa, sa wekana dina, o koya sa sega ni vakawati: io e na vukuna, e tara me vakatawasavasavataki koya kina. 4 'Me kakua ni vakatawasavasavataki koya ni sa turaga vei ira na nona tamata, me sega ni savasava kina. 5 'Me ra kakua ni tasia na uludra, se tasia na tutu ni kumidra, se tava na yagodra. 6 'Me ra savasava vua na nodra Kalou, ka kakua ni vakacacataka na yaca ni nodra Kalou: Ni ra sa vakacabora tiko na ka sa cabo e na buka waqa vei Jiova, me kakana me nei koya na nodra Kalou: o koya me ra savasava kina. 7 'Me ra kakua ni vakawati kei na dua na yalewa sa dautagane, se sa vaqasei; me ra kakua talega ni vakawati kei na dua na yalewa sa veibiu kei na watina: ni sa savasava o koya vua na nona Kalou. 8 'Mo vakasavasavataki koya kina; ni sa vakacabora o koya na kakana me nei koya na nomu Kalou: Mo nanumi koya me savasava: ni'u sa savasava oi au o Jiova, o koya sa vakasavasavataki kemudou. 9 'Ia na luvena yalewa e dua na bete sa vakacacani koya ni sa dautagane, sa vakacacani tamana: ena vakamai o koya e na buka waqa. 10 'Ia o koya na bete levu mai vei ira na wekana, sa livi ki na uluna na waiwai ni veilumuti, a sa buli me sulumaka nai sulu tabu, me kakua ni biuta na nona i sala, se dresulaka na nona i sulu; 11 'Me kakua talega ni torova e dua na yago sa mate; me kakua ni vakatawasavasavataki koya e na vuku i tamana, se tinana; 12 'Me kakua talega ni curu tani e na vale tabu, se vakacacana na vale tabu ni nona Kalou; ni sa vakatabui oti e na waiwai ni veilumuti sa nei koya na nona Kalou: Oi Au o Jiova. 13 'Ia me vakawati kei na dua sa goneyalewa ga. 14 'A yada, se yalewa sa biu, se yalewa sa vaqasei, se na dautagane, me kakua ni vakawati kei na dua sa vakaoqo: ia me vakawati kei na dua sa goneyalewa ga, mai vei ira na kai nona. 15 'Me kakua talega ni vakacacana na nona kawa e na kedra maliwa na kai nona; ni sai au o Jiova, ka vakasavasavataki koya.'" 16 Sa vosa talega vei Mosese o Jiova, ka tukuna, 17 "Mo vosa vei Eroni, ka tukuna, 'o koya vei ira na nomu kawa e na dua nai tabatamata, sa dua vua na tikina ka ca, me kakua ni toro o koya me vakacabora na kakana me nei koya na nona Kalou. 18 'Ia na tamata kecega sa dua na tikina ka ca, me kakua ni toro mai: a tamata mataboko, se lokiloki, se ucu raraba, se dua na tikina sa vakatani, 19 'Se sa ramusu na yavana, se ramusu na ligana, 20 'Se sa dakupusi, se na leka, se ca e dua na matana, se sa bu ca se vakanana, se ceke. 21 'A tamata kecega vei ira na luve i Eroni na bete, sa dua na tikina e ca, me kakua ni toro mai me vakacabora na ka sa cabo vei Jiova e na buka waqa; sa dua na tikina vua sa ca; me kakua kina ni toro mai o koya me vakacabora na kakana me nei koya na nona Kalou. 22 'Me kania ga o koya na kakana sa nei koya na nona Kalou, se ka tabu se ka tabu sara; 23 'Ia me kakua ga ni curu ki loma ni lati, se torova nai cabocabo ni soro, ni sa dua na tikina vua e ca; me kakua kina ni vakacacana na noqu veivale tabu: ni sai au o Jiova, ka vakasavasavataki ira.'" 24 'A sa tukuna o Mosese vei Eroni, kei iratou na luvena, kei ira kece na Isireli.

Vunau Ni Soro 22

1 Sa qai vosa vei Mosese o Jiova, ka tukuna, 2 "Mo vosa vei Eroni kei iratou na luvena, me ra tawasei ira mai na ka sa tabu vei ira na Isireli, me ra kakua ni vakacacana na yacaqu tabu e na ka era vakatabuya me noqu: Oi Au o Jiova. 3 "Mo tukuna vei ira, o koya vei ira kecega na nomudou kawa, 'E na nomudou veitabatamata, sa toro ki na veika tabu era vakatabuya vei Jiova na Isireli, ni sa sega ni savasava, na tamata o ya sa na muduki tani e mataqu: Oi Au o Jiova. 4 'A tamata kecega vei ira na luve i Eroni sa vukavuka, se turi, me kakua ni kania o koya na ka tabu, ka me savasava mada o koya. Kei koya sa tara na ka sa sega ni savasava e na vuku ni mate, se na tamata sa yau loa na nona wai ni tagane, 5 'Se koya sa tara e dua na ka sa qasi, sa vakatawasavasavataki kina, se sa tara na tamata sa tu vua e dua na ka ka sa vakatawasavasavataki kina— 6 'Na tamata sa tara e dua sa vakakina, ena sega ni savasava ka yacova na yakavi, ka na sega ni kania na ka tabu, kevaka sa sega ni sili mada e na wai. 7 'Ia ni sa dromu na mata-ni-siga, ena savasava, ka me qai kania na ka tabu, ni sa kena kakana oqo. 8 'Na ka sa mate loa, se sa katilaki, me kakua ni kania o koya me vakavelavelataki kina: Oi au o Jiova. 9 'Ia me ra vakabauta na noqu vunau, de ra cudruvi e na nodra cala, ka mate kina, ni ra sa vakacacataka: Oi au o Jiova, ka vakasavasavataki ira. 10 'Me kakua ni kania na ka tabu e dua na kai tani: a nona vulagi na bete, se nona tamata sa voli na nona cakacaka, me kakua ni kania na ka tabu. 11 'Ia kevaka sa volia e dua na tamata e nai lavo o koya na bete, me kana kina o koya, kei koya sa sucu e nona vale: me ra kania na kena. 12 'Na luvena yalewa talega na bete, o koya sa veiwatini kei na kai tani, me kakua ni kana o koya e nai madrali sa lavelaveti mai na ka tabu. 13 'Ia kevaka sa yada na luvena yalewa na bete, se veibiu kei na watina, ka sega na luvena, a sa lesu tale ki na vale nei tamana, me vaka ni sa goneyalewa, me kania ga na kei tamana: ia me kakua na kai tani me kania. 14 'Ia kevaka sa kania loa na ka tabu e dua na tamata ni sa sega ni kila, me qai solia vua na bete na ka sa tautauvata kei na ka tabu, ka kuria e na dua na kena wase ni sa wase lima. 15 'Ia me ra kakua ni vakacacana na nodra ka tabu na Isireli, era sa vakacabora vei Jiova, 16 'Ia ni ra kania na kedra ka tabu, era vakavuna na nodra cudruvi e na nodra caka cala; ni sai au o Jiova, sa vakasavasavataki ira.'"

Nai Soro E Vakadonui Kei Nai Soro E Sega Ni Vakadonui

17 Sa vosa talega vei Mosese o Jiova, ka tukuna, 18 "Mo vosa vei Eroni, kei iratou na luvena, kei ira kece na Isireli, ka tukuna vei ira, 'O koya yadua vei ira na mataqali i Isireli, se na kai tani sa tiko kei ira na Isireli, sa vakacabora na nonai madrali, e na vuku ni dua na nona bubului, kei na nona i soro kecega sa lomana me vakacabora, era via cabora vei Jiova mei soro kama— 19 'Mo dou vinakati kina, me dua na ka tagane sa sega na kena ca, se bulumakau, se sipi, se me. 20 'Ia na ka sa dua kina na kena ca, dou kakua ni cabora: ni na sega ni ka dou na vinakati kina. 21 'Ia o koya yadua sa vakacabora e dua nai madrali ni veivinakati vei Jiova, me vakayacora na ka ka bubului kina, se nai soro sa lomana ga me cabora, se bulumakau se sipi, me sega na kena ca, me vinakati; me kakua kina e dua na kena ca. 22 'Na mataboko, se ramusu, se mudu e dua na tikina, se dabo, se sa bu ca se vakanana, dou kakua ni vakacabora oqo vei Jiova, se vakacabora vei Jiova e dua na ka oqo e na buka waqa, e na dela ni cabocabo ni soro. 23 'Na bulumakau, se lami, sa dua na tikina sa vakatani se yali e dua na tikina, oqo e tara mo vakacabora ni sa lomamu ga; ia me vakayacori me ka ni bubului, ena sega ni donu kina. 24 'Dou kakua ni vakacabora vei Jiova e dua nai soro sa mavoa vakaca, se ramusu, se sa sele; ia dou kakua ni cabora e dua na ka oqo e na nomudou vanua. 25 'Dou kakua talega ni taura vei ira na kai tani e dua na ka vakaoqo mo vakacabora me kakana me nei koya na nomudou Kalou; ni sa tu kina na kena vuca, kei na kena ca: dou na sega ni vinakati kina.'" 26 Sa vosa talega vei Mosese o Jiova, ka tukuna, 27 "Ni sa sucu e dua na bulumakau, se sipi, se me, me tiko voli kei tinana ka bogi vitu; ia e na kenai kawalu ni siga, kei na veisiga emuri, ena donu ni sa cabo e na buka waqa mei soro vei Jiova. 28 "Ia na bulumakau yalewa se sipi yalewa, dou kakua ni vakamatea ruarua, o koya kei na luvena, e na siga e dua. 29 "Ia ni dou sa via vakacabora e dua nai soro ni vakavinavinaka vei Jiova, mo dou vakacabora mo dou vinakati kina. 30 "E na siga o ya ga me laukana; me kakua ni vo ki na mataka: Oi au o Jiova. 31 "Ia dou vakabauta na noqui vakaro, ka muria: Oi au o Jiova. 32 "Dou kakua tale ni vakacacana na yacaqu tabu; ia ka'u na vakarokorokotaki ga vei ira na Isireli: Oi au o Jiova, o koya ka vakasavasavataki kemudou, 33 "Ka'u a kauti kemudou mai na vanua o Ijipita, me'u nomudou Kalou: Oi au o Jiova."

Vunau Ni Soro 23

Na Solevu I Jiova

1 Ia sa vosa vei Mosese o Jiova, ka tukuna, 2 "Mo vosa vei ira na Isireli, ka tukuna vei ira, 'Na Solevu i Jiova, dou na kacivaka mei soqosoqo tabu, ia oqo na noqu Solevu.

Na Siga Ni Vakacecegu

3 'E ono na siga me caka kina na cakacaka: ia nai kavitu ni siga sa Siga ni Vakacecegu, nai soqosoqo tabu; dou kakua ni kitaka kina e dua na cakacaka: o koya sa Siga ni Vakacecegui vei Jiova e na nomudoui tikotiko kecega.

Na Lako Sivia Kei Na Madrai Sega Ni Vakai-Vakatubu [Sega Ni Vakaleveni]

4 'Oqo sa Solevu i Jiova, io nai soqosoqo tabu, dou na kacivaka e na kedra veivula. 5 'E na kenai katinikava ni siga e na i matai ni vula, e na yakavi, ena ia na lako-sivia i Jiova. 6 'Ia e na kena i katinikalima ni siga ni vula o ya, sa na ia kina na soqoni vei Jiova ni kana madrai sa sega ni vakaleveni: E vitu na siga dou kania kina na madrai sa sega ni vakaleveni. 7 'E na kenai matai ni siga, dou ia kina e dua nai soqosoqo tabu: Dou kakua ni cakava kina e dua na cakacaka vakavuravura. 8 'Ia dou vakacabora na i soro vei Jiova e na buka waqa e na siga e vitu: e na kenai kavitu ni siga sa na dua kina nai soqosoqo tabu: dou kakua ni cakava kina e dua na cakacaka vakavuravura.'"

Na Solevu Ni Sevu

9 Sa vosa talega vei Mosese o Jiova, ka tukuna, 10 "Mo vosa vei ira na Isireli, ka tukuna vei ira, 'Ni dou sa yaco ki na vanua ka'u sa solia vei kemudou, ka sa tamusuka kina na kena vuata, dou na qai kauta e dua nai vau sila, nai sevu ni nomudou vuata, vua na bete. 11 'Ia me qai yalovaka o koya nai vau sila e na mata i Jiova, me ka dou na vinakati kina: me yalovaka na bete e na mataka sa tarava na Siga ni Vakacecegu. 12 'Ia e na siga dou sa yalovaka kina nai vau sila, dou cabora kina e dua na lami tagane sa sega na kena ca sa yabaki dua ga, mei soro kama vei Jiova. 13 'Ia nai madrali sa laukana vata tukuna me rua na omeri madrai droka vinaka sa veiwaki vata kei na waiwai, nai soro sa cabo e na buka waqa vei Jiova me ka boi vinaka: ia nai madrali sa liviraki vata tukuna me waini e rua na paidi ka levu cake. 14 'Ia dou kakua ni kania na madrai, se na sila tavu, se na sola drokadroka, ka me yaco mada na siga dou sa kauta kina nai madrali vua na nomudou Kalou: oqo sai lesilesi ka sega ni mudu e na nomudoui tikotiko kecega, e na nomudou veitabatamata.

Na Solevu Ni Veimacawa (Limasagavulu Na Siga)

15 'Ia ni sa oti na Siga ni Vakacecegu, na siga dou a kauta kina nai vau sila mei soro e yalovaki, mo dou wilika vei kemudou e vitu sara na macawa. 16 'Ia me yacova na mataka ni sa oti na Siga ni Vakacecegu e vitu, dou wilika e limasagavulu na bogi; dou na qai cabora nai madrali laukana e na sila vou vei Jiova. 17 'Mo dou kauta mai na nomudou veivale e rua nai buli madrai sa caka e na omeri e rua, me yalovaki me madrai droka vinaka; me vavi kei na leveni; me kenai sevu vei Jiova. 18 'Ia dou cabora vata kei na madrai e vitu na lami sa sega na kena ca, sa yabaki dua ga, ka dua na bulumakau, ka rua na sipi tagane: ka me sai soro kama vei Jiova, kei nai madrali laukana kei nai madrali liviraki vata kei ira, io nai soro sa cabo e na buka waqa, me ka boi vinaka vei Jiova. 19 'Dou na qai vakamatea e dua na me tagane mei soro ni valavala ca, ka rua na lami tagane sa yabaki dua ga me cabori mei madrali ni veivinakati. 20 'Ia me yalovaka vata na bete kei na madrai sai sevu, mei soro sa yalovaki e na mata i Jiova, kei na lami ruarua: era na tabu me nei Jiova, me nona na bete. 21 'Ia e na siga o ya dou kacivaka, me dua na nomudoui soqosoqo tabu; dou kakua ni cakava kina e dua na cakacaka vakavuravura: me sai lesilesi ka sega ni mudu e na nomudou i tikotiko kecega e na nomudou veitabatamata. 22 'Ia ni dou sa tamusuka na vuata ni nomudou vanua, mo kakua ni vakaotia na bati ni nomu veiwere ni o tamusuka, mo kakua talega ni tomika na ka sa lulutu walega ni o sa tamusuka na sila: mo laiva ga me nodra na dravudravua, kei na vulagi; Oi Au o Jiova na nomudou Kalou.'"

Na Solevu Ni Uvu Davui

23 Sa vosa talega vei Mosese o Jiova, ka tukuna, 24 "Mo vosa vei ira na Isireli ka tukuna, 'E na kenai kavitu ni vula, e nai matai ni siga ni vula, me dua na nomudou Siga ni Vakacecegu, a gauna me vakananuma me uvu kina na davui, nai soqosoqo tabu. 25 'Dou kakua ni kitaka kina na cakacaka vakavuravura, dou cabora ga nai soro e na buka waqa vei Jiova.'"

Na Siga Ni Veibuluti

26 Sa vosa talega vei Mosese o Jiova, ka tukuna: 27 "A kenai katini talega ni siga e na kenai kavitu ni vula oqo, na siga ni veibuluti: oqo sa dua na nomudoui soqosoqo tabu; dou vakamalumalumutaki kemudou kina, ka vakacabora e dua nai soro e na buka waqa vei Jiova. 28 "Ia dou kakua ni kitaka e dua na cakacaka e na siga o ya: ni sa siga ni veibuluti, mo dou sorovaki kina e na mata i Jiova na nomudou Kalou. 29 "Ia na tamata kecega sa na sega ni vakamalumalumutaki e na siga o ya, ena muduki tani o koya vei ira na kai nona. 30 "Kei na tamata kecega sa kitaka e dua na cakacaka e na siga o ya, au na vakarusa tani na tamata o ya mai vei ira na kai nona. 31 "Dou kakua ni kitaka e dua na cakacaka: sai lesilesi ka sega ni mudu e na nomudou i tikotiko kecega, e na nomudou veitabatamata. 32 "Ena sega ni vakacecegu mo dou vakacegu kina, ia dou vakamalumalumutaki kemudou: e na kena i kaciwa ni siga ni vula, e na yakavi, mai na yakavi e dua ka yacova na yakavi e dua, mo dou ia kina na nomudoui vakacegu."

Na Solevu Ni Vale Vakacevaceva

33 Sa vosa talega vei Mosese o Jiova, ka tukuna, 34 "Mo vosa vei ira na Isireli, ka tukuna, 'A kena i ka tinikalima ni siga e na kena i kavitu ni vula oqo, me ia kina na solevu ni vale taba ni kau vei Jiova ka bogi vitu. 35 'E na kenai matai ni siga, me dua na i soqosoqo tabu; mo dou kakua ni kitaka kina e dua na cakacaka vakavuravura. 36 'E vitu na siga dou vakacabora kina nai soro e na buka waqa vei Jiova: e na kenai kawalu ni siga, me dua na nomudou i soqosoqo tabu, ia dou na cabora e dua nai soro e na buka waqa vei Jiova: sa soqoni tabu: dou kakua ni cakava kina na cakacaka vakavuravura. 37 'Oqo sa kena solevu vei Jiova, dou na kacivaka mei soqosoqo tabu, me vakacabora na i soro e na buka waqa vei Jiova, nai soro kama, kei na i madrali laukana, na ka sa vakacabori, kei na i madrali liviraki, sa dui caka e na kena siga— 38 'Ia oqo sa kenai kuri ni veiSiga ni Vakacecegu i Jiova, kei na nomudou i solisoli, kei na i madrali kecega dou sa bubului kina, kei na nomudou i soro kecega sa lomamudou mo dou cabora, o koya dou na solia vei Jiova. 39 'E na kenai katinikalima talega ni siga e na kenai kavitu ni vula, ni dou sa kumuna vata na vuata ni vanua, dou na ia kina na Solevu vei Jiova ka bogi vitu; nai matai ni siga ena Siga ni Vakacecegu, ia nai kawalu ni siga ena Siga ni Vakacecegu talega. 40 'Ia e na i matai ni siga dou taura na vua ni kau vinaka, kei na taba ni niu kei na taba ni kau sa sobi na drauna, kei na wilou mai na uciwai: ia dou na reki e na mata i Jiova na nomudou Kalou ka bogi vitu. 41 'Ia dou na ia na solevu oqo, na solevu vei Jiova, me bogi vitu e na veiyabaki. Oqo sa kena i lesilesi sega ni mudu e na nomudou veitabatamata: dou daukitaka e na kenai kavitu ni vula. 42 'Mo dou tiko bogi vitu e na veivale taba ni kau: o ira kecega sai taukei vei ira na Isireli era na tiko e na veivale taba ni kau, 43 'Me ra kila kina na nomudou veitabatamata ni sai au era dautiko kina o ira na Isireli e na veivale taba ni kau, ni'u a kauti ira mai na vanua o Ijipita: Oi Au o Jiova na nomudou Kalou.'" 44 Sa tukuna vei ira na Isireli na solevu i Jiova o Mosese.

Vunau Ni Soro 24

Qaravi Na Cina Ni Vale-Ni-Soro

1 Sa qai vosa vei Mosese o Jiova, ka tukuna: 2 "Mo vakaroti ira na Isireli, me ra kauta mai vei iko na waiwai olive makare sa lautuki, me yaga ena cina, me caudre tikoga kina na cina. 3 " Mai taudaku ni lati ni kato ni Vakadinadina, ena vale ni veitavaki, o Eroni sa na veiqaravi kina mai na yakavi me yacova na mataka, ena mata i Jiova e veisiga; oqo sa kenai lesilesi ka sega ni mudu ena nomudou veitabatamata. 4 "Me vakarautaka tikoga o koya na veicina e nai tutu-ni-cina makamakalivata, e na mata i Jiova.

Na Madrai Ni Vale-Ni-Soro

5 "Ia mo kauta na madrai droka vinaka, ka vavia e tinikarua na keki: me rua na omeri ena dua na keki. 6 "Mo qai tuva me yatu rua, me yaono na yatu yadua, ena dela ni teveli makamakalivata ena mata i Jiova. 7 "Mo qai viritura na drega dina me vakamai ena dela ni yatu kadua, me tu ki na madrai me dauveivakananumi, io nai madrali sa cabori ena buka waqa vei Jiova. 8 "Me vakatura vinaka tikoga o koya ena mata i Jiova ena veiSiga ni Vakacecegu kecega, ena vukudra na Isireli ena veiyalayalati sa sega ni mudu. 9 "Ia ena kedratou o Eroni kei na luvena; me ra kania ena tikina tabu: Ni sa nona ka sa tabu sara mai na vei madrali sa cabo vei Jiova ena bukawaqa, oqo nai vakaro ka sega ni mudu."

Nai Totogi Ni Vosa-Vakacaca

10 A sa dua na luve ni yalewa ni Isireli, sa kai Ijipita na tamana, sa lako yani ki na kedra maliwa na Isireli; ka rau a veivala e na i tikotiko, na luve ni yalewa ni Isireli oqo, kei na dua na tagane ni Isireli. 11 A sa vosavakacacataka na Yaca i Jiova o koya na luve ni yalewa ni Isireli ka ruru. A ra sa kauti koya vei Mosese: (ia na yaca i tinana o Silomeci, na luve i Tipiri, ena mataqali i Tani.) 12 A ra sa sogolati koya mada me vakatakilai vei ira na loma i Jiova. 13 A sa vosa vei Mosese o Jiova, ka tukuna, 14 "Mo kauti koya sa ruru ki nai bili ni tikotiko; ia o ira kecega sa rogoci koya, me ra tabaka na uluna ena ligadra, me ra qai vakavirika ena vatu o ira nai soqosoqo taucoko. 15 "Ia mo vosa vei ira na Isireli, ka vaka, 'O koya yadua sa rukaka na nona Kalou me cudruvi ena vuku ni nonai valavala ca. 16 'Ia o koya sa vosa vakacacataka na yaca i Jiova, me sa vakamatei vakaidina; era na vakavirika vakaidina ena vatu o ira nai soqosoqo taucoko: na vulagi se nai taukei, ni sa vosavakacacataka na yaca o ya, ena vakamatei. 17 'Ia o koya sa mokuta mate e dua na tamata, me vakamatei vakaidina o koya. 18 'Kei koya sa mokuta mate na manumanu e yavai va, me sauma na manumanu o ya ena dua sa tautauvata. 19 'Ia kevaka sa vakamavoataka na kai nona e dua na tamata, ena caka vua me vaka sa kitaka o koya. 20 'A mavoa mei sau ni mavoa, a mata mei sau ni mata, a bati mei sau ni bati: me vaka sa vakamavoataka e dua na tamata o koya, ena caka vaka talega kina vua. 21 'Io o koya sa vakamatea na manumanu e yavai va, me sauma me vakatautauvata: ia o koya sa vakamatea na tamata, me vakamatei. 22 'Me dua ga na nomudou lawa, vei koya na vulagi, vei koya nai taukei: ni sai au o Jiova na nomudou Kalou.'" 23 A sa vosa vei ira na Isireli o Mosese, era qai kauti koya ka ruru ki nai bili ni koro, ka vakavirika ena vatu, A ra sa kitaka na Isireli, me vaka ka vakarota vei Mosese o Jiova.

Vunau Ni Soro 25

Na Siga Ni Vakacecegu Ni Kavitu Ni Yabaki

1 A sa vosa vei Mosese o Jiova mai na Ulunivanua o Saineai, ka vaka, 2 "Mo tukuna vei ira na Isireli, 'Ni dou sa yaco ki na vanua ka'u sa solia vei kemudou, me qai ia e dua na vakacecegu vei Jiova na vanua. 3 'E ono na yabaki o na kaburaka kina na sila ena nomu veiwere, ka ono na yabaki o na samaka kina na nomu veivaini, ka kumuna na vuana: 4 'Ia na kena yabaki me sa gauna ni vakacecegu me vakacegu kina na vanua, a vakacecegu vei Jiova: mo kakua ni kaburaka na sila e na nomu veiwere, se samaka na nomu veivaini. 5 'A ka sa tubu mai na nomu sila ka lutu e na yabaki sa oti, mo kakua ni tamusuka, se vetia nai soso mai na nomu vaini sa sega ni samaki: sa yabaki me vakacegu kina na vanua. 6 'Ia ena kemudou na ka sa tubu e na gauna sa vakacegu kina na vanua; a kemu, kei na kena na nomu tamata, kei na kena na nomu vada, kei na kena na nomu tamata sa voli na nona cakacaka, kei na kena na kai tani, sa tiko vulagi kei iko, 7 'Kei na kedra na nomu manumanu e yavai va, kei na kedra na manumanu sega lasa sa tiko e nomu vanua—io ena kedra na ka kecega sa tubu kina.

Na I Ka Limagasavulu Ni Yabaki (Jupili)

8 'Ia mo qai wilika vei iko e vitu na yabaki ni vakacecegu, me vitu vakavitu na yabaki; ia na kena dede e vitu na yabaki ni vakacecegu, o ya sa vasagavulu ka ciwa na yabaki. 9 'Mo qai vakauvuca yani na davui sa domo levu, e na kenai katini ni siga e na kenai kavitu ni vula: e na Siga ni Veibuluti, dou vakauvuca yani kina na davui e na nomudou vanua taucoko. 10 'Ia dou vakatabuya na kenai kalimasagavulu ni yabaki, ka kacivaka yani na veisereki kivei ira kecega na lewe ni vanua: ena yabaki ni jupeli vei kemudou; ia dou na vakalesuya na tamata yadua ki na yasana sai taukei kina e liu, dou na vakalesuya na tamata yadua talega ki na nona mataqali. 11 'Ena yabaki ni jupeli vei kemudou na kena i ka limasagavulu ni yabaki o ya: dou kakua ni kaburaka na sila, se tamusuka na ka sa tubu kina mai na sila sa lutu, se vetia nai soso mai na vaini sa sega ni samaki kina: 12 'Ni sa jupeli: ena tabu vei kemudou; dou kania ga na ka sa tubu mai na were. 13 'E na Yabaki ni Jiupili oqo dou na vakalesuya na tamata yadua ki na yasana sai taukei kina e liu. 14 'Ia kevaka e dua vei kemudou sa volitaka e dua na ka vua na kai nomu, se volia mai vua e dua na ka dou kakua ni domonikocotaka: 15 'Mo volia vua na kai nomu me vaka na i wiliwili ni yabaki sa oti kina na jupeli; me volitaka vei iko o koya me vaka nai wiliwili ni yabaki ni vuata: 16 'Ke sa vuqa na yabaki, mo vakalevutaka na kenai voli; ia ke sa vica ga na yabaki, mo vakalailaitaka na kenai voli: ni sa volitaka vei iko o koya me vaka nai wiliwili ni vuata. 17 'Ia mo dou kakua ni dui cakava vakadomonikoco; mo rerevaka ga na nomu Kalou: ni sai au o Jiova na nomu Kalou.

Na Ka E Vakarautaki Ena Vuku Ni Kavitu Ni Yabaki

18 'Ia dou cakava na noqui vakaro, ka vakabauta na noqu lewa, ka muria; dou na qai tiko vakasautu e na vanua. 19 'Ia ena vuataka na kena vuata na vanua, ia dou na kana ka mamau, ka tiko vakasautu kina. 20 'Ia de dou sa tukuna, A cava na ka me keimami kania e na kenai kavitu ni yabaki? Raica, keimami na sega ni kaburaka na sila, se kumuna vata na neimami vuata?" 21 'Au na vakarota mo dou vakasaututaki e na kenai kaono ni yabaki, ia ena vuataka kina na vuana me rauta e tolu na yabaki. 22 'Ia dou na kaburaka na sila e na kena i kawalu ni yabaki, ka kania na vuata makawa ka yacova nai kaciwa ni yabaki; dou na kania tiko na vuata makawa ka me kumuni mada na vuata.

Na Voli Lesu Ni Ka E Nona

23 'Me kakua ni volitaki na vanua me takali sara: ni sa noqu ga na vanua; ia oi kemudou dou sa kai tani ka tiko vulagi ga vei au. 24 'Ia e na vanua taucoko dou sa taukena, dou na solia me voli tale na vanua. 25 'Kevaka sa dravudravua mai na wekamu, a sa volitaka eso na nona vanua, me qai volia tale e dua na wekana na ka ka volitaka yani na wekana. 26 'Ia kevaka sa sega na wekana na tamata o ya me volia tale, a sa qai rawata e muri o koya me volia tale, 27 'Me qai wilika o koya na veiyabaki sa volitaki kina, ka vakasuka na kena caca ni voli vua na tamata ka volia; ka me qai lesu o koya ki na vanua sa taukena e liu. 28 'Ia kevaka sa sega ni rawata me vakasuka vua, ena nona tiko ka volia me yaco mada na yabaki ni jupeli: ia e na jupeli, ena lutu mai vua, ena qai lesu ki na vanua o koya sa taukena e liu. 29 'Ia kevaka sa dua na tamata sa volitaka na vale sa tiko e loma ni koro vakabai, ena qai tara me volia tale e na yabaki ka volitaka kina; ni sa sega ni oti e dua na yabaki, sa tara vua me volia tale. 30 'Ia kevaka sa oti dina e dua na yabaki, ka sa sega ni voli tale, ena qai nona tiko ka volia na vale o ya, kei na nona veitabatamata ka sega ni mudu ena sega ni suka e na Yabaki ni Jiupili. 31 'Ia na veivale e na koro lalai sa sega ni vakabai, ena vakatauvatani kei na veiwere ni vanua: e tara ga me voli tale, a ra na suka e na jupeli. 32 'Ia e na nodra veikoro na Livai, na veivale e na koro era sa taukei kina, e tara me ra volia tale na Livai e na veigauna kecega. 33 'Ia kevaka sa volia tale e dua vei ira na Livai; ena qai suka e na jupeli na vale ka volitaki, ka tu e na koro sai taukei kina: ni ra taukena na Livai, e na kedra maliwa na veivale e na nodra veikoro na Isireli. 34 'Ia na vanua sa volita na nodra veikoro sa tabu ni volitaki; ni ra sa taukena ka sega ni mudu.

Soli Ka Vei Ira Na Dravudravua

35 'Ia kevaka sa dravudravua mai na wekamu, ka sa malumalumu mai na ligana ni drau a tiko tukuna, mo qai vukei koya; me vaka na kai tani, se vulagi; me bula vata kei iko o koya. 36 'Mo kakua ni taura mai vei koya na kena i kere ni ka sa kerea vei iko, se nai kuri ni ka: mo rerevaka ga na nomu Kalou; me bula vata kei iko na wekamu. 37 'Mo kakua ni solia vua na nomu i lavo me dua kina na kena na tubu, se solia vua na nomu kakana me vakuria. 38 'Oi au o Jiova na nomudou Kalou, ka kauti kemudou mai na vanua o Ijipita, me solia vei kemudou na vanua o Kenani, me'u nomudou Kalou.

Nai Vakaro Baleti Ira Na Bobula

39 'Ia kevaka sa dravudravua mai na wekamu ni drau a tiko tukuna, a sa volitaki koya vei iko, mo kakua ni caka vua me vaka sa bobula. 40 'Ena tiko ga vei iko me vaka na tamata sa voli na nona cakacaka, se vaka na vulagi; me qaravi iko, ka yacova na Yabaki ni Jiupili. 41 'Me qai lako tani vei iko, o koya, kei iratou vata tukuna na luvena, ka lesu ki na nona mataqali, ia me lesu ki na vanua ka ra taukena na nona qase e liu. 42 'Ni ra sa noqu tamata, ka'u a kauta mai na vanua o Ijipita: me ra kakua ni volitaki me vaka na bobula. 43 'Mo kakua ni valavala vakaukauwa vua; mo rerevaka ga na nomu Kalou. 44 'Ia na nomu tagane bobula, kei na nomu yalewa bobula—o na rawata mai vei ira na veimatanitu era sa tiko voleka vei kemudou, ni sa tara mo dou volia mai kina na tagane bobula kei na yalewa bobula. 45 'E tara talega mo dou volia mai vei ira na luve ni kai tani sa tiko vulagi kei kemudou, ka mai vei ira na nodra mataqali era sa tiko kei kemudou, o ira sa sucu vei ira e na nomudou vanua: ia dou na taukeni ira. 46 'Ia dou na tauri ira me nodra na luvemudou era na taravi kemudou, me ra taukena tiko emuri; era na nomudou bobula ka sega ni mudu: ia vei ira ga na wekamudou na Isireli, dou kakua ni valavala vakaukauwa, e dua vua e dua. 47 'Ia kevaka sa vutuniyau mai na kai tani se na vulagi drau sa tiko tukuna, a sa dravudravua mai na wekamu e rau sa tiko vata tukuna, a sa volitaki koya o koya vua na kai tani, se vua na vulagi drau sa tiko tukuna, se vei ira na kawa ni mataqali era kai tani, 48 'Ni sa volitaki oti, sa tara me voli tale mai; me voli koya tale e dua vei ira na wekana; 49 'E tara me voli koya tale na tamana lailai, se na luvena na tamana lailai; se tara me voli koya tale e dua sa wekana dina sa rau mataqali vata; ia kevaka sa rawata, me sa voli koya tale o koya. 50 'Ia me wilika kei koya sa voli koya mai na yabaki sa volitaki oti vua, me yacova na yabaki ni jupeli: ia nai lavo me kenai voli me na vakatauvatani kei nai wiliwili ni yabaki: ena vaka talega na nona yabaki na tamata sa voli na nona cakacaka. 51 'Kevaka sa vuqa na yabaki sa vo tiko, me solia tale o koya me vakakina nai voli ni nonai sere, mai nai lavo sa voli kina. 52 'Ia kevaka sa vica ga na yabaki sa vo me yacova na yabaki ni jupeli, me rau qai wilika vata tukuna; ka me solia tale o koya nai lavo ni nonai sere me vaka na kena yabaki sa vo. 53 'Ena tiko vata tukuna me vaka na tamata sa voli vakayabaki na nona cakacaka: me kakua ni valavala vakaukauwa vua o koya e matamu. 54 'Ia kevaka sa sega ni voli tale vakakina, ena qai sereki o koya e na Yabaki ni Jiupili—o koya, kei iratou vata tukuna na luvena. 55 'Ni sa noqu tamata o ira na Isireli; era sa noqu tamata, ka'u a kauta mai na vanua o Ijipita: Oi au o Jiova na nomudou Kalou.

Vunau Ni Soro 26

Na Yalayala E Na Vuku Ni Veivakalouvinakataki Kei Na Veisausaumi

1 'Dou kakua ni cakava vei kemudou na kalou lasu, se nai vakatakarakara e ceuceu se vakaduria na matakau, se na vatu sai vakatakarakara, e na nomudou vanua, mo dou cuva kina: ni sai au o Jiova na nomudou Kalou. 2 Dou vakabauta na noqu veiSiga ni Vakacecegu, ka vakarokorokotaka na noqu vale tabu: Oi au o Jiova. 3 'Kevaka dou sa muria na ka ka'u sa lesia, ka vakabauta na noqu vunau, ka cakava, 4 Au na qai vakatauca vei kemudou na uca e na kena vula, ka na vuataka na kena vuata na vanua, ka vuataka na vuana na kau ni veiwere. 5 Ia na nomudou samu sila ena yacova na vula e veti kina na vua ni vaini, ia dou na vetia tiko na vua ni vaini ka yacova na kaburaki sila, ia dou na kania na kemudou me mamau kina, ka tiko vakasautu e na nomudou vanua. 6 Ia ka'u na solia na sautu e na vanua, dou na davo sobu kina ka sega e dua me vakarerei kemudou: au na vakaotia tani talega e na vanua na manumanu ca, ena sega talega ni lakova na nomudou vanua nai seleiwau. 7 Ia dou na vakasavi ira na nomudou meca, a ra na bale e nai seleiwau e na matamudou. 8 Ia e lewe lima vei kemudou ena vakasava rawa na lewe drau, ka dua na drau vei kemudou ena vakasava rawa e lewe tini na udolu: ia era na bale e nai seleiwau na nomudou meca e na matamudou. 9 'Ni'u na golevi kemudou, ka vakaluveataki kemudou, ka vakalewevuqataki kemudou, ka vakataudeitaka vei kemudou na noqu veiyalayalati. 10 Ia dou na kania tiko na ka sa tu dede, ka kauta kituba na ka sa tu dede me vakasosomitaki e na ka vou. 11 Ia ka'u na vakaduria na noqu vale e na kemudou maliwa: ia ena sega ni cati kemudou na yaloqu. 12 Ia ka'u na lako voli e na kemudou maliwa, ia ka'u na nomudou Kalou, ia dou na noqu tamata. 13 Sai au o Jiova na nomudou Kalou, ka'u a kauti kemudou tani mai na vanua o Ijipita, mo dou kakua ni nodra bobula tiko; ia ka'u sa sereka nai vesu dou a vauci kina, ka qisi kemudou mo dou lako vakadodonu. 14 'Ia kevaka dou sa bese ni vakarorogo vei au, ka bese ni kitaka na vunau kecega oqo, 15 Ka sa beca ga na noqui lesilesi, se sa cata na noqu lewa na lomamudou, mo dou kakua kina ni kitaka na noqu vunau kecega, ka sa vakacataka ga na noqu veiyalayalati, 16 Au na qai kitaka na ka oqo vei kemudou; au na vakayacora na domobula, na lila balavu, kei na katakata, me tauvi kemudou, me kania na matamudou, ka vakararawataka na lomamudou: ia ena sega ni yaga ni dou sa kaburaka na nomudou sila, ni ra na kania na nomudou meca. 17 Ia ka'u na rai vakatani vei kemudou, ia dou na vakamatei e na matadra na nomudou meca: a ra na lewai kemudou o ira era sa cati kemudou; ia dou na dro ni sa sega e vakasavi kemudou. 18 'Ia kevaka dou sa bese tiko ni vakarorogo vei au, ni sa yaco na veika oqo, au na qai cudruvi kemudou vakavitu cake e na vuku ni nomudoui valavala ca. 19 Ia ka'u na muduka na kaukauwa dou sa totoka kina; ka cakava na lomalagi me vaka na kaukamea vei kemudou, kei na nomudou qele me vaka na parasa. 20 Ia dou na oca walega: ni na sega ni vakalewe na nomudou vanua, ka sega ni vuataka na vuana na kau ni vanua. 21 'Ia kevaka dou na lako vakatani vei au, ka bese ni vakarorogo vei au; au na qai vakayacora na mate ca vakavitu cake vei kemudou e na vuku ni nomudou i valavala ca. 22 Ia ka'u na vakatala na manumanu sega lasa ki na kemudou maliwa, a ra na butakoca na luvemudou, ka vakamatea na nomudou manumanu e yavai va, ka vakalewelailaitaki kemudou; ia ena sega ni lakovi na nomudou veisalatu. 23 'Ia kevaka dou sa bese tiko ni vakavinakataki mai vei au, ni sa yaco na veika oqo, ka sai valavala vakatani tiko vei au, 24 Ka'u na qai valavala vakatani talega vei kemudou, ia ka'u na cudruvi kemudou vakavitu tale, e na vuku ni nomudoui valavala ca. 25 Ia ka'u na vakayacora vei kemudou nai seleiwau, sa na cudrutaka na veiyalayalati, ka dou na soqoni vata kina e na nomudou loma ni veikoro; ia ka'u na tala na mate ca vei kemudou; ia dou na soli ki na ligadra na meca. 26 Ni'u sa vakaotia na madrai dou sa bula kina, ena qai lewe tini na yalewa sa na vavia na kemudou madrai e na dua na lovo, a ra na vakarautaka na bibi ni kemudou madrai, ni sa bera ni vota; ia dou na kana, ka sega ni mamau. 27 'Ia kevaka dou na sega ni vakarorogo vei au, ni sa yaco na ka kece oqo, kai valavala vakatani tiko vei au, 28 Ka'u na qai valavala vakatani vei kemudou e na cudru rerevaki; ia oi au, ka'u na cudruvi kemudou vakavitu tale, e na vuku ni nomudoui valavala ca. 29 Ia dou na kania na lewedra na luvemudou tagane; kei na lewedra na luvemudou yalewa. 30 Au na vakarusa talega na nomudou veitikina cecere, ka taya sobu na nomudou veimatakau e vaka na mata-ni-siga, ka biuta na yagomudou ni sa mate ki dela ni yagodra na nomudou matakau: ia ena cati kemudou na yaloqu. 31 Ia ka'u na vakalalataka na nomudou veikoro, ka vakarusa na nomudou veivale tabu, ka'u na sega ni boica na nomudoui madrali boi vinaka. 32 Au na vakarusa talega na vanua: a ra na kurabui kina o ira na nomudou meca era tiko kina. 33 Ia ka'u na vakasesei kemudou ki na veimatanitu, ka ucuna nai seleiwau me muri kemudou: ia na nomudou vanua ena lekutu wale, ka na lala na nomudou veikoro. 34 Sa na qai marautaka na veiSiga ni Vakacecegu na vanua, ni sa veikau tu, ni dou sa tiko e na nodra vanua na nomudou meca; sa na qai vakacegu na vanua, ka marautaka na kena Siga ni Vakacecegu. 35 E na gauna kece sa veikau kina, ena vakacegu—ka ni sa sega ni vakacegu e na nomudou gauna ni vakacecegu, ni dou a tiko kina. 36 'Ia ka'u na tala na rere me kania na lomadra era sa vo vei kemudou, e na vanua ni nodra meca; ia na rorogo ni drau-ni-kau sa cagina voli ena vakubutaki ira; a ra na dro, me vaka ni ra drotaka nai seleiwau; a ra na bale ni sa sega e vakasava. 37 A ra na veibaleti, me vaka sa muri ira na i seleiwau, ni sa sega e vakasava: ia ena sega vei kemudou na kaukauwa mo dou tu kina e na matadra na nomudou meca. 38 Ia dou na rusa e na kedra maliwa na veimatanitu, ia ena kani kemudou na nodra vanua na nomudou meca. 39 Ia o ira sa vo vei kemudou, ena waicala yani na yalodra, e na vuku ni nodra i valavala ca, e na nodra vanua na nomudou meca; ia e na vuku ni nodra i valavala ca na nodra qase talega, ena waicala kina na yalodra. 40 'Ka ra na vakatusa na nodra i valavala ca, kei nai valavala ca ni nodra qase, kei na nodra caka cala era sa kitaka vei au, ka ni ra sai valavala vakatani vei au, 41 Ni'u sai valavala vakatani talega vei ira, ka kauti ira ki na vanua ni nodra meca; kevaka sa qai malumalumu mai na lomadra sa sega ni cilivi, a ra sa qai vakadonuya nai sau ni nodra i valavala ca— 42 Au na qai nanuma na noqu veiyalayalati kei Jekope; kei na noqu veiyalayalati talega kei Aisake, kei na noqu veiyalayalati kei Eparaama, ka'u na nanuma; ka'u na nanuma talega na vanua. 43 Era na takali mai na nodra vanua, ia na vanua ena marautaka na kena gauna ni vakacecegu, ni sa veikau mai ni ra sa takali kina: a ra na vakadonuya nai sau ni nodra i valavala ca, ni ra sa beca na noqu lewa, ka sa cata na noqui lesilesi na yalodra. 44 Ia ni sa oti kece na ka oqo, ka ra na tiko e na vanua ni nodra meca, au na sega ni biuti ira laivi, se cati ira me'u vakarusai ira sara, ka me vakacacataka na noqu veiyalayalati kei ira: ni sai au o Jiova na nodra Kalou. 45 Ia e na vukudra ga, ka'u na nanuma na veiyalayalati kei ira na nodra qase, o ira ka'u a kauta tani mai na vanua o Ijipita e na matadra na veimatanitu, me'u nodra Kalou: Oi au o Jiova.'" 46 Oqo nai lesilesi, kei na lewa, kei na vunau, sa cakava o Jiova e na Ulunivanua o Saineai, e na gusu i Mosese, me veiyalayalati kina o koya kei ira na Isireli.

Vunau Ni Soro 27

Voli Lesu Ni Tamata Kei Na Ka E Vakacabori Vua Na Kalou

1 Ia oqo sa vosa vei Mosese o Jiova, ka vaka, 2 "Mo vosa vei ira na Isireli, ka tukuna vei ira: 'Ni dua na tamata sa vakatabuya na bubului me baleta eso na tamata vei Jiova, me vaka o sa lewa me kedra i voli. 3 'Kevaka o na lewa me kena i voli ni tagane mai na yabaki ruasagavulu me yacova sara na onosagavulu, mo na qai lewa me kenai voli e limasagavulu na sikeli siliva, me vaka na sikeli ni tikina tabu. 4 'Kevaka e yalewa, mo qai lewa me tolusagavulu na sikeli na kenai voli; 5 'Iia kevaka mai na yabaki lima me yacova sara na yabaki ruasagavulu, mo qai lewa me ruasagavulu na sikeli me kenai voli na tagane, ka tini na sikeli me kenai voli na yalewa; 6 'Ia kevaka mai na vula dua me yacova sara na yabaki lima, mo qai lewa me lima na sikeli siliva na kenai voli na tagane, ka tolu na sikeli siliva me kenai voli na yalewa; 7 'Ia kevaka mai na yabaki onosagavulu se levu cake, ke tagane, mo qai lewa me tini-ka-lima na sikeli na kenai voli, ka me tini na sikeli me kenai voli na yalewa. 8 'Ia kevaka e dravudravua o koya ka sega ni rawata na ka o sa lewa, me qai lako o koya vua na bete, ka me lewa na kenai voli na bete; me vaka na ka sa rawata o koya sa bubuluitaka, me lewa na kenai voli o koya na bete. 9 'Kevaka e kauta mai na tamata na manumanu yavai va me vakacabori mei soro vei Jiova, sa na tabu na ka kecega sa solia e dua vei Jiova. 10 'Me kakua ni vakaisosomitaka o koya se veisautaka, na ka vinaka kei na ka ca se na ka ca kei na ka vinaka; ia kevaka sa mani veisautaka na manumanu e yavai va, ena qai tabu ruarua na manumanu o ya kei na kenai sosomi talega. 11 'Kevaka e manumanu sega ni savasava ka sega ni dau vakacabori mei soro vei Jiova, me qai vakaraitaka o koya na manumanu e na mata ni bete; 12 'Ka me qai lewa na kenai voli na bete, se ka vinaka se ca; me vaka ni o iko, na bete, mo lewa kina, ena vakabau. 13 'Ia kevaka sa via volia tale o koya, me qai vakaikuritaka na kenai voli e na dua nai kalima. 14 'Ia ni sa vakatabuya na nona vale e dua na tamata me tabu vei Jiova, me qai lewa na kena i voli na bete, se sa vinaka se ca; me vaka sa lewa kina na bete, me sa na vakabau. 15 'Ia kevaka sa via volia tale na nona vale o koya ka vakatabuya, me qai vakaikuritaka e na dua na i kalima nai lavo o sa lewa me kenai voli, ena qai nona tale. 16 'Kevaka e vakatabuya e dua na tamata me nei Jiova e dua nai wase ni nona vanua, mo qai lewa na kenai voli me vaka na levu ni sila me kaburaki kina. E dua na omeri na parile e na kenai voli e limasagavulu na sikeli siliva. 17 'Kevaka e vakatabuya na nona tiki ni vanua mai na Yabaki ni Juvili, ena vakabau me vaka na nomu lewa. 18 'Ia kevaka e vakatabuya na nona tiki ni vanua ni sa oti na Juvili, me qai wilika vua nai lavo o koya na bete me vaka na yabaki sa vo tiko me yacova na Yabaki ni Juvili, ka me na musuki sobu mai na ka o sa lewa me kenai voli. 19 'Ia kevaka sa via volia tale o koya me nona na tiki ni vanua ka vakatabuya, me na qai vakaikuritaka e na dua nai kalima nai lavo o sa lewa me kenai voli, ena qai vakataudeitaki vua. 20 'Ia kevaka sa sega ni via volia o koya me nona tale na tiki ni vanua, se sa volitaka oti vua na tamata tani, ena qai sega ni rawa vakadua ni voli tale; 21 'Ia na tiki ni vanua, ni sa suka e na Juvili, ena tabu me nei Jiova, me vaka na tiki ni vanua vakatabui; ena taukena ga na bete. 22 'Ia kevaka e dua na tamata sa vakatabuya me nei Jiova e dua na tiki ni vanua sa volia o koya, na tiki ni vanua e a sega ni taukena o koya, 23 'Me qai wilika vua o koya na bete na kena i voli me vaka o sa lewa, me yacova na yabaki ni Juvili, ka me na solia o koya na kenai voli me vaka o sa lewa e na siga o ya mei soro tabu me nei Jiova. 24 'E na Yabaki ni Juvili ena suka na tiki ni vanua vua ka volitaka, io vei koya ka taukena e liu na vanua. 25 'Ia nai voli ni ka kecega o sa lewa sa na vaka na sikeli ni tikina tabu: e ruasagavulu na kera ki na dua na sikeli. 26 'Ia na ulumatua ni manumanu ka dodonu me ulumatua nei Jiova, me kakua na tamata me vakatabuya; na bulumakau se sipi, sa nei Jiova. 27 'Ia kevaka e manumanu sega ni savasava, me qai volia tale o koya me vaka na ka o sa lewa me kenai voli, ka me vakalevutaka cake e na dua nai kalima; se kevaka sa sega ni voli tale, me na qai volitaki me vaka na ka o sa lewa me kenai voli. 28 'Ia me kakua ni dua nai madrali e vakatabui e sa vakacabora oti e dua na tamata me nei Jiova mai na ka e taukena, na tamata se manumanu e yavai va, se tiki ni vanua e taukena; nai madrali kecega e vakatabui sa ka tabu sara vei Jiova. 29 'Me kakua ni dua na tamata sa beitaki, ka sa voleka ni vakamatei, me kakua ni voli tale; me na vakamatei vakaidina. 30 'Ia nai katini ni vuata kecega ni vanua, na sila ni vanua se na vua ni kau, sa nei Jiova. Sa tabu me nei Jiova. 31 'Kevaka e dua na tamata sa via volia tale nai katini ni nona ka eso, me vakaikuritaka o koya e na dua na kena i ka lima. 32 'Ia me baleta na kena i katini ni qele ni bulumakau se sipi, io na ka kecega e lako e na ruku ni titoko, o koya na kenai katini, ena tabu me nei Jiova. 33 'Me kakua ni vakaqaqa se ka vinaka se ka ca, me kakua talega ni veisautaka; ia kevaka e mani veisautaka, ena qai tabu ruarua, na ka o ya kei na kenai sosomi talega me rau tabu ruarua; me kakua ni voli tale.'" 34 Oqo nai vakaro e vakarota o Jiova vei Mosese me tukuna vei ira na Isireli, e na Ulunivanua o Saineai.

Na Kedra I Wiliwili 1

Na I Matai Ni Nodra Wiliki Na Isireli

1 Sa qai vosa o Jiova vei Mosese ena Vanua Liwa e Saineai, ena loma ni vale ni veitavaki, e na i matai ni siga ni karua ni vula, e na i karua ni yabaki ni oti na i lakolako mai Ijipita, ka tukuna: 2 "Mo cakava e dua na wili lewenivanua vei ira na Isireli ena veivuvale yadudua, mai na vuvale i tamadra, me vaka na i wiliwili ni vei yaca, kei ira yadudua na tagane, 3 "Mai vei ira na yabaki ruasagavulu ka lako cake—o ira kece era rawa ni lako ki na i valu e Isireli. O iko vata kei Eroni mo drau na wiliki ira mai na loma ni mataivalu era lewena. 4 "O iko kei na dua na turaga mai na veiyavusa yadua, o ira oqo era i liuliu ena loma ni vale ni nodra qase. 5 "Oqo na yacadra na turaga e ra na tucake vata kei iko. Mai na yavusa 'o Rupeni, o Eliesa na luvei Setiuri; 6 "Mai vei Simione, o Selunieli na luvei Surisatai; 7 "Mai vei Juta, o Nasoni na luvei Amenatave; 8 "Mai vei Isakari, o Necaneli na luvei Sua; 9 "Mai vei Sevuloni, o Eliave na luvei Eloni; 10 "Mai vei ira na luvei Joseva; mai vei Ifereimi o Ilisama na luvei Amiuta; mai vei Manasa, o Kamelieli na luvei Vatasari; 11 "Mai vei Penijamini, o Avitani na luvei Kitione; 12 "Mai vei Tani, o Aiesa na luvei Amisatai; 13 "Mai vei Asa, o Pajieli na luvei Okarani; 14 "Mai vei Kata o Iliasafi na luvei Tineli; 15 "Mai vei Navitalai, o Aira na luvei Anani." 16 O ira oqo era sa digitaki mai na loma ni soqosoqo, era i liuliu ena yavusa i tamadra, ka ra veiliutaki talega ena i wasewase lelevu e Isireli. 17 Ia, o Mosese kei Eroni, e rau sa qai tauri ira na turaga oqo o ira sa kacivaki oti na yacadra, 18 Ka vakasoqoni ira vata nai soqosoqo kece e na matai ni siga ni karua ni vula; ka tekivu me vakacavuti ira na tubudra mai liu ena yaca ni nodra vuvale, ena loma ni vale i tamadra me vaka na i wiliwili ni yaca kece, o ira sa sivia na yabaki ruasagavulu, ka me ra wiliki yadudua sara ga. 19 Me vaka sa vakarota o Jiova vei Mosese, e sa mani wiliki ira o koya e na loma ni vanua liwa lala e Saineai. 20 O ira na luvei Rupeni, na qase duadua vei ira na luvei Isireli, na nodra kawa ena nodra veivuvale, ena loma ni vale i tamadra me vaka nai wiliwili ni yacadra, o ira yadudua na turaga, era sa sivia na yabaki ruasagavulu, vei ira kece era sa rawa ni lako kina i valu: 21 O ira sa wiliki rawa mai na yavusa i Rupeni, era lewe vasagavulu ka ono na udolu ka mani lima na drau. 22 Mai vei ira na luvei Simione me vaka nodra vola kawabulataki vakavuvale, mai na vuvale i tamadra, mai vei ira era sa wili oti, o ira na tagane yadudua, ka ra sa sivia na yabaki ruasagavulu, o ira era sa rawa ni lako kina i valu: 23 O ira era sa wiliki e na yavusa i Simione era lewe limasagavulu ka ciwa na udolu ka mani tolu na drau. 24 Mai vei ira na luvei Kata, ena nodra i vola ni kawa bula vakavuvale, mai na vuvale i tamadra, me vaka na i wiliwili ni yacadra, o ira sa sivia na yabaki ruasagavulu ka lako cake, vei ira era sa rawa ni lako kina i valu: 25 O ira era sa wiliki ena yavusa i Kata, era sa lewe vasagavulu ka lima na udolu ono na drau limasagavulu. 26 Mai vei ira na luvei Juta, ena nodra vola kawabulataki vakavuvale, mai vei tamadra, me vaka na i wiliwili ni yacadra, mai na yabaki ruasagavulu ka lako cake, o ira kece era sa rawa ni lako kina i valu: 27 O ira era sa wiliki rawa e na yavusa i Juta, era lewe vitusagavulu ka va na udolu ka mani ono na drau. 28 Mai vei ira na luvei Isakari. Ena nodra vola kawabulataki vakavuvale, mai na vuvale i tamadra, me vaka na i wiliwili ni yacadra, o ira era sa sivia na yabaki ruasagavulu, vei ira era sa rawa ni lako kina i valu: 29 O ira era sa wiliki rawa ena yavusa i Isakari era sa lewe limasagavulu ka va na udolu ka mani va na drau. 30 Mai vei ira na luvei Sevuloni, ena nodra volakawabulataki vakavuvale, mai na vuvale i tamadra, me vaka na i wiliwili ni yacadra, o ira era sa sivia cake na yabaki ruasagavulu, vei ira era sa rawa ni lako kina i valu; 31 O ira era sa wiliki rawa mai na yavusa i Sevuloni, era sa lewe limasagavulu ka vitu na udolu ka mani va na drau. 32 Mai vei ira na luvei Joseva, o ira na luvei Ifereimi, ena nodra volakawabulataki vakavuvale, mai na vuvale i tamadra, me vaka na i wiliwili ni yacadra, o ira era sa sivia cake na yabaki ruasagavulu, vei ira era sa rawa ni lako kina i valu: 33 O ira era sa wiliki rawa e na yavusa i Ifereimi era sa lewe vasagavulu na udolu ka mani lima na drau. 34 Mai vei ira na luve i Manasa, ena nodra volakawabulataki vakavuvale i tamadra, me vaka na i wiliwili ni yacadra, mai vei ira era sa sivia cake na yabaki ruasagavulu, o ira era sa rawa ni lako kina i valu: 35 O ira era sa wiliki rawa ena yavusa i Manasa era sa lewe tolusagavulu karua na udolu ka mani rua na drau. 36 Mai vei ira na luve i Penijamini, ena nodra volakawabulataki vakavuvale, mai na vuvalei tamadra, me vaka na i wiliwili ni yacadra, mai na yabaki ruasagavulu ka lako cake, o ira kece era sa rawa ni lako kina i valu: 37 O ira era sa wiliki rawa ena yavusa i Penijamini era lewe tolusagavulu ka lima na udolu ka mani va na drau. 38 Mai vei ira na luvei Tani, ena nodra volakawabulataki vakavuvale, mai na vuvale i tamadra, me vaka na i wiliwili ni yacadra, o ira era yabaki ruasagavulu ka lako cake, vei ira era sa rawa ni lako kina i valu: 39 O ira era sa wiliki rawa ena yavusa i Tani era sa lewe onosagavulu ka rua na udolu ka mani vitu na drau. 40 Mai vei ira na luvei Aseri, na nodra volakawabulataki vakavuvale, ena loma ni vale i tamadra, me vaka na i wiliwili ni yacadra, o ira era sa yabaki ruasagavulu ka lako cake, vei ira kece era sa rawa ni lako kina i valu: 41 O ira era sa wiliki rawa ena yavusa i Aseri era sa lewe vasagavulu ka dua na udolu ka mani lima na drau. 42 Mai vei ira na luvei Navitalai, ena nodra volakawabulataki vakavuvale, mai na vuvale i tamadra, me vaka na i wiliwili ni yacadra, o ira era sa yabaki ruasagavulu ka lako cake, vei ira era sa rawa ni lako kina i valu: 43 O ira era sa wiliki rawa ena yavusa i Navitalai era lewe limasagavulu ka tolu na udolu ka mani va na drau. 44 Sai ira oqo era sa wiliki rawa mai vei rau o Mosese kei Eroni, kei ira talega na i liuliu e Isireli, e tinikarua na tagane, ka ra dui matataka yadudua na vuvale i tamadra. 45 Ia o ira na luvei Isireli era sa wiliki rawa, me vaka na vuvale i tamadra, o ira era sa yabaki ruasagavulu ka lako cake, o ira era sa rawa ni lako kina i valu e Isireli— 46 O ira kece era sa wiliki rawa era lewe ono na drau ka tolu na udolu lima na drau limasagavulu. 47 O ira ga na Livai era sa sega ni wili vata kei ira ena yavusa i tamadra; 48 Ni sa vosa vakaoqo o Jiova vei Mosese ka tukuna: 49 "O ira na yavusa i Livai me ra kakua ni wiliki, se mo taura na kedra i wiliwili mai vei ira na luvei Isireli; 50 "Ia mo digitaki ira ga na Livai me ra tikoi cake mai na vale vakacevaceva ni vakadinadina me ra tikoi cake mai na kena i yaya kecega era na veiqaravi kina, ka ra na mai vakaitikotiko vakavolivolita na vale ni veitavaki. 51 "Kevaka sa na mani toso ki liu na vale ni veitavaki, o ira ga na Livai mera luvata sobu; ia kevaka ena mani vakaduri cake tale, o ira ga na Livai me ra vakaduria. o ira na tamata mai tuba era na tosova voleka mai, era na vakamatei vakaidina. 52 "O ira na luvei Isireli, era na tara na nodra dui valelaca, ena nodra dui veitikotiko, kei na nodra dui vakatagedegede, me vaka na nodra veimataivalu; 53 "Ia, o ira ga na Livai era na keba vakavolivolita na vale ni veitavaki ni vakadinadina, me kakua kina ni cudruvi na i soqosoqo taucoko ni luvei Isireli; ka ra na vakatulewa duaduaga na Livai ena vale ni veitavaki ni vakadinadina." 54 Era sa vakayacora kece na Isireli; me vaka sara ga na ka sa vakarota o Jiova vei Mosese, era sa cakava vakakina.

Na Kedra I Wiliwili 2

O Ira Na Veiyavusa Kei Na Kedra I Liuliu Vaka I Valu

1 Sa qai vosa o Jiova vei Mosese kei Eroni ka tukuna: 2 "O ira yadudua na luvei Isireli me ra na dui tikoga ena nodra dui vakatagedegede, ka me ra tiko tikiva ga na drotini ni vuvale i tamadra, ka mera toka vakayawa vakalailai mai na vale ni soqo ni veitavaki. 3 "Ena yasa ni tokalau, me donuya na i cadracadra ni siga, o ira era sa okati vata kei na tagede ni mataivalu ia me ra tiko me vaka na nodra i wasewase vaka i valu; ia, o Nasoni na luvei Amenatave e sa na yaco o koya me nodra i liuliu na luvei Juta." 4 Era sa lewe vitusagavulu ka va na udolu ono na drau na i wiliwili taucoko ni nona mataivalu. 5 "Era sa tiko tikivi koya na lewe ni yavusa i Isakari, ka sa mani yaco o Nicanieli na luvei Sua me nodra i liuliu na luvei Isakari," 6 Era sa lewe limasagavulu ka va na udolu va na drau taucoko na i wiliwili ni nona mataivalu. 7 "Era tarava sara mai na yavusa i Sevuloni, ka sa mani yaco oiliave na luvei Eloni me nodra i liuliu na luvei Sevuloni." 8 Era sa lewe limasagavulu ka vitu na udolu va na drau taucoko na i wiliwili ni nona mataivalu. 9 "O ira kece era sa wiliki vakaivalu ena mataivalu i Juta, ka kedra i wiliwili e dua na drau walusagavulu ka ono na udolu va na drau—era na liu me ra lako. 10 "Ena yasa kina ceva sai ira na i wasewase vakaivalu i Rupeni, me vaka na nodra mataivalu, ka sa na yaco o Elisuri na luvei Setiuni me nodra i liuliu na luve i Rupeni." 11 O ira na lewe ni nona mataivalu era sa lewe vasagavulu ka ono na udolu lima na drau na kedra i wiliwili. 12 "Era sa tarava sara mai o ira na yavusa i Simione, ka sa yaco o Selumieli na luvei Surisatai me nodra i liuliu." 13 O ira na lewe ni nona mataivalu era sa lewe limasagavulu ka ciwa na udolu tolu na drau na kedra i wiliwili. 14 "Era tarava sara mai na yavusa i Kata, ka sa yaco o Elisafi na luvei Riueli me nodra i liuliu." 15 Na levu ni kedra i wiliwili kece vakamataivalu e vasagavulu ka lima na udolu ono na drau limasagavulu. 16 "Na levu ni kedra i wiliwili taucoko na i wasewase vakaivalu ni mataivalu i Rupeni era rauta ni dua na drau limasagavulu ka dua na udolu va na drau limasagavulu, o ira oqo era sa na i karua me ra lako. 17 "Na vale ni veitavaki ni veivosaki e rau sa na lako vata tani mai kei na nodra i tikotiko na Livai ena loma donu ni vanua ni keba, e na gauna era keba tiko kina, me ra qai dui toso kina nodra dui tikotiko me vaka na nodra dui tagede. 18 "Ena mua i ra e sa na nodra i wasewase vakaivalu na Ifereimi, me vaka na nodra mataivalu, ka sa na yaco o Elisama na luvei Amiute me nodra i lliuliu na luvei Ifereimi." 19 Era lewe vasagavulu na udolu lima na drau na lewe ni nona mataivalu. 20 "E taravi koya sara mai na yavusa i Manasa, ka sa yaco o Kamelieli na luvei Petasuri me nodra i liuliu." 21 Na levu taucoko ni wiliwili ni nona mataivalu e tolusagavulu ka rua na udolu rua na drau. 22 "Muri tarava sara mai na yavusa i Penijamini, ka sa yaco o Apitani na luvei Kitione me nodra i liuliu." 23 Na levu taucoko ni wiliwili ni nona mataivalu e tolusagavulu ka lima na udolu va na drau. 24 "Na kedra i wiliwili vakaivalu taucoko na mataivalu i Efereimi e dua na drau walusagavulu na udolu ka mani dua na drau—ka ra sa na kena i katolu ni wasewase me ra lako. 25 "Ena vualiku, era sa na tiko vakaivalu mai kina na Tani, me vaka na nodra mataivalu ena yaco kina o Aiesa na luvei Amisatai me nodra i liuliu na luvei Tani." 26 Na i wiliwili taucoko ni nona mataivalu e onosagavulu ka rua na udolu ka mani vitu na drau. 27 "O ira na luvei Aseri era sa tarava sara mai ena nodra tiko tikivi ira, ka nodra i liuliu o Pakieli na luvei Okarani." 28 Na i wiliwili taucoko ni nona mataivalu e rauta tiko ni vasagavulu ka dua na udolu ka mani lima na drau. 29 "Era tarava sara mai na yavusa i Navitalai, ka nodra i liuliu na luvei Navitalai o Aira na luvei Enani." 30 Na i wiliwili taucoko ni nona mataivalu e rauta tiko ni limasagavulu ka tolu na udolu ka mani va na drau. 31 "Ni ra wiliki taucoko na lewe ni mataivalu i Tani, e rauta tiko ni ra lewe ni mataivalu i Tani, e rauta tiko ni ra lewe dua na drau limasagavulu ka vitu na udolu ka mani ono na drau, o ira oqo era na qai i otioti ni wasewase me ra lako me vaka na nodra tagede." 32 Sai ira oqo na luvei Isireli era a wiliki me va ka na veivuvale i tamadra. o ira kece era a wiliki ena i wiliwili vakaivalu me vaka na nodra mataivalu e rauta tiko ni ono na drau ka tolu na udolu lima na drau ka mani limasagavulu. 33 Ia, o ira ga na Livai era sa sega ni wili vata kei ira na luvei Isireli, me vaka ga sa vakaroti Mosese kina o Jiova. 34 Era sa vakayacora taucoko na Isireli na veika kece sa vakarota o Jiova vei Mosese; era sa dui tikoga e na nodra i vakatagedegede ka ra sa dui lako yani me vaka na nodra veivuvale kei na nodra i yatu mai na vuvale i tamadra.

Na Kedra I Wiliwili 3

O Ira Na Luvei Eroni Tagane

1 Sai koya oqo na veika eso e volai me baleti Eroni kei Mosese ena Nona vosa na Kalou vei Mosese e na ulunivanua o Saineai. 2 Oqo na yacadratou na luvei Eroni: O Netapi na ulumatua kei Apiu, o Iliesa kei Icama. 3 Oqo na yacadratou na luvei Eroni na bete ka a lumuti, ka vakacabori koya me dauveiqaravi vakabete. 4 E rau sa mate o Netapi kei Apiu ena mata i Jiova e na nodrau a vakacabora na i soro dukadukali ena matai Jiova ena vanua Liwa mai Saineai; e rau sega ni va kawa kina. E rau sa mani veisosomitaki o Iliesa kei Icama me rau cakava na cakacaka vakabete ena mata i Eroni na tamadrau.

Era Sa Veiqaravi Na Luvei Livai Ena Loma Ni Vale Ni Veitavaki

5 Sa vosa vei Mosese o Jiova, ka vaka; 6 "Mo kauti ira mai vakavoleka na yavusa i Livai ka mai cabori ira ena matai Eroni na bete, me rawa ni ra veiqaravi e matana. 7 "Era na tu vakarau me ra sotava na nona gagadre kei na nodra leqa nai vavakoso taucoko ena vale ni veiqaravi ka me vakayacori kina na cakacaka ni vale ni veitavaki. 8 "E dodonu me rau na raica talega na i yaya kece ni vale ni veitavaki kei na veiqaravi, kei na nodra leqa talega na luvei Isireli, me rau cakava na cakacaka ni vale ni veitavaki. 9 "O iko mo soli ira na Livai ki vei Eroni kei iratou na luvena; ka ratou sa na soli vakadua sara ga vei koya mai vei ira taucoko na gone ni Isireli. 10 "O na lumuti Eroni kei iratou na luvena, ka ratou sa na qarava sara yani na nodratou cakacaka vakabete, ia o ira na tamata tani era na via toso voleka mai era na vakamatei vakaidina." 11 Sa qai vosa vei Mosese o Jiova ka tukuna; 12 "Mo raica oqo, oi Au Vakai Au sa tawasei ira tani na Livai mai vei ira na gone ni Isireli ka sa sega ni o ira na ulumatua ka ra sucu mai e liu vei ira na gone ni Isireli. Ena vuku ni ka oqo, era sa na Noqu vakatabakidua na Liva, 13 "Me vaka ni ra sa Noqu tu na ulumatua kece, ena siga Au a vakamatei ira kece kina na ulumatua ni vanua o Ijipita, Au sa vakasavasavataki ira me Noqu na ulumatua taucoko ni vanua o Isireli, na tamata kei na manumanu. Era sa na Noqu. Oi Au o Jiova."

Sa Vakaroti Me Ra Wiliki Na Livai

14 Sa qai vosa na Kalou vei Mosese e na loma ni vanua Liwa e Saineai ka vaka: 15 "Mo wiliki ira na luvei Livai ena veivuvale i tamadra, kei ira na lewe ni vuvale; ka mo na wiliki na tagane era se qai vuladua ka lako cake." 16 Sa wiliki ira o Mosese me vaka na vosa i Jiova sa vakaroti kina o koya. 17 Sa i koya oqo na yacadratou na luvei Livai, o Kerisoni. o Koaci, kei Merari. 18 Oqo na yacadratou na luvei Kerisoni mai na nodratou veivuvale; o Lipini kei Simei. 19 Kei na luvei Koaci e na nodra veivuvale; o Amirami, Iseari, Epironi kei Usieli. 20 O ira na luvei Merari ena nodra veivuvale; o Mali kei Musi. Sa i ira oqo na lewe ni vuvale i Livai mai na vuvale ni nodra qase. 21 Mai vei Kerisoni e cavutu mai kina na nodra vuvale na Lipinaiti kei na vuvale ni Simeiti; sa i ira oqo era tadu mai vei Kerisoni. 22 O ira era sa wili rawa, me vaka na kedra i wiliwili taucoko na tagane mai vei ira era sa qai vula dua ka lako cake—ka ra sa wili kece e rauta tiko ni ra lewe vitu na udolu ka mani lima na drau. 23 O ira na lewe ni vuvale i Kerisoni e dodonu me ra vakaitikotiko ena daku ni vale ni veitavaki ka me donuya tiko na mua i ra. 24 Ka sa yaco o Eliasava na luvei Laeli me nodra i liuliu na i lawalawa i Kerisoni ka ra cavutu mai na vuvale ni nodra qase. 25 Na nodra i tavi na luvei Kerisoni ena Vale ni Veitavaki ni veivosaki sai koya na vale ni veitavaki sara ga, na vale laca kei na kenai ubi, na i lati ni katuba ni vale ni veitavaki, 26 Nai sulu ni katuba ena raratabu, na veika era lilili tu vavolita na vale ni veitavaki kei na i cabocabo ni soro me vaka ga na cakacaka sa gadrevi vei ira. 27 Mai vei Koaci era cavutu mai kina na vuvale Amirami, na vuvale i Isari, na vuvale i Epironi, kei na vuvale i Usieli, o ira kece oqo era lako mai na vuvale i Koaci. 28 Na kedra i wiliwili taucoko na tagane. o ira era sa vula dua ka lako cake, e rauta tiko ni ra lewe walu na udolu ka mani ono na drau ka ra qarava vakatabakidua na vale ni veitavaki. 29 Na nodra veivuvale na luvei Koaci e dodonu me ra vakaitikotiko ena ceva ni vanua ena vale ni veitavaki. 30 Sa yaco o Elisavani na luvei Usieli me nodra i liuliu na veivuvale ni nodra qase na luvei Koaci. 31 Na nodra i tavi sai koya mera raica na kato, na teveli, i tutu ni cina, i cabocabo ni soro, i yaya e vakayagataki ena veiqaravi, na i latilati kei na veitavi tale eso, sa vakacolati ena usouso ni domodra. 32 Ia, o Iliesa na luvei Eroni na bete, e sai liuliu levu duadua vei ira na Livai ka me wanonovi ira tiko na dauveiqaravi e na loma ni vale ni Kalou. 33 Mai vei Meravi era cavutu mai kina vaka Malite kei ira na vuvale i Musi, sa i ira oqo na lewe ni vuvale i Merari. 34 Ia, o ira era sa wili rawa, me tekivu mai vei ira na tagane ka ra se qai vula dua ka lako cake, e rauta tiko ni ra lewe ono na udolu ka mani rua na drau. 35 Na nodra i liuliu vakaqase ni vuvale vei ira na Merari sai Surieli na luvei Abiaili. o ira oqo me ra vakaitikotiko ena vualiku ni vale ni veitavaki. 36 Oqo na i tavi sa lesi vei ira na luvei Merari na papa ni vale ni Kalou, kei na kena i kolokolo, na kena duru, na kena qara, na kena i yaya kece, kei na cakacaka tale eso e vakakina, 37 Kei na duru sa volita na rara sa vakabai, kei na kedra qara, na kedra i vakadei, kei na dali. 38 Ia o ira sa tiko ena mata ni vale ni Kalou e na tokalau, e na mata ni vale ni veitavaki, sa o Mosese, o Eroni kei rau na luvena me qarava na cakacaka ni vale tabu, me rawa ni sotavi na nodra leqa na Isireli, ia, o ira na tamata tani era na via toso voleka mai era na vakamatei vakaidina. 39 O ira taucoko na Livai era sa wili rawa mai vei rau o Mosese kei Eroni me vaka sa vakarota o Jiova, me vaka na nodra veivuvale, o ira taucoko na tagane era se qai vula dua ka lako cake, era lewe ruasagavulu ka rua na udolu.

Era Sa Vakatabui Na Livai Ka Sega Ni O Ira Na Ulumatua

40 Sa qai vosa vei Mosese o Jiova; "Mo wiliki ira taucoko na ulumatua tagane mai vei ira na luvei Isireli o ira sa yabaki dua ka lako cake, ka taura mai na i wiliwili ni yacadra. 41 "Mo na qai tauri ira na Livai me ra Noqu — Oi Au o Jiova – ka sa na sega o ira na ulumatua mai vei ira na luvei Isireli, kei na nodra manumanu na Livai e sa na vakaisosomitaki kei na ulumatua ni nodra manumanu na luvei Isireli." 42 Sa ia o Mosese me wiliki ira taucoko na ulumatua ni luvei Isireli me vaka sa vakarota vua o Jiova. 43 Ia, o ira na ulumatua tagane taucoko me vaka na dui wiliwili ni yacadra me tekivu mai vei ira era se qai vula dua ka lako cake, vei ira kece era sa wili rawa era lewe ruasagavulu ka rua na udolu rua na drau vitusagavulu ka tolu. 44 Sa vosa vei Mosese o Jiova ka tukuna: 45 "Mo tauri ira na Livai me kedra i sosomi vei ira na ulumatua taucoko ni luvei Isireli, ka vaka talega kina na nodra manumanu na Livai ka sega na nodra o ira, Era sa na Noqu o ira na Livai: Oi Au o Jiova. 46 "O ira sa voli era lewe rua na drau vitusagavulu ka tolu na ulumatua era luvei Isireli, era lewe levu cake na kedra i wiliwili mai vei ira na Livai, 47 "Mo kauta e lima na sikele me ra tauyadua: ka mo kauta me vaka na i lavo sikele ni Vale tabu, na sikele e rauta ni ruasagavulu na keba. 48 "Mo na qai solia na i lavo vei Eroni kei rau na luvena me baleti ira era sa voli o ira sa sivia na kedra i wiliwili." 49 Sa qai taura o Mosese na i lavo ni veivoli mai vei ira era sa sivia ka toka e cake mai vei ira era sa voli vei ira na Livai. 50 Mai vei ira na ulumatua na luvei Isireli, e sa taura mai vei ira o koya na i lavo ka rauta tiko ni dua na udolu tolu na drau onosagavulu ka lima na sikele me vaka sara ga na sikele ni Vale Tabu. 51 Sa mani solia o Mosese na i lavo ni veivoli vei Eroni kei rau na luvena, me vaka na vosa ni Kalou, sa vakarota o Jiova vei Mosese.

Na Kedra I Wiliwili 4

Nodra Cakacaka Na Luvei Koaca Tagane

1 Sa qai vosa o Jiova vei Mosese kei Eroni ka tukuna: 2 "Mo drau wiliki ira na luvei Koacamai vei ira na luvei Livai ena nodra veivuvale kei na vuvale ni nodra qase, 3 "Me tekivu mai vei ira era sa yabaki tolusagavulu ka lako cake, me yaco sara vei ira na yabaki limasagavulu, o ira era curu kina cakacaka e na loma ni vale ni veitavaki. 4 "Sai koya oqo na nodra cakacaka na luvei Koaca e na vale ni Veitavaki ka dusimaki tiko kina na veika eso e vakatabui ka savasava: 5 "Ni ra sa vakarau biubiu na i soqosoqo me ra lako yani, o Eroni kei rau na luvena me ratou lako mai ka luvata sobu na i ubi ka ubia kina na kato ni Vunau. 6 "Me ratou qai ubia ena kuli ni manumanu ni wai ka me ratou qai ubia e cake e dua na i sulu me karakarawa taucoko; ka vakarubeca kina na kena qara. 7 "E na teveli ni madrai dauraici, me ratou qai tevuka vakararaba kina na i sulu karakarawa, mera qai tuva e delana na i yaya ni vakasaqa, na i tavuteke, na beseni, na bilo ni wai, kei na madrai me toka e cake. 8 "Me ratou na qai tevuka kina e dua na i sulu kulakula, ka me ratou na qai ubia talega e na i ubi ni kuli ni me; ka vakacuruma sara kina kena qara. 9 "Me ratou na qai ubia na i tutu ni cina ni rarama e na i sulu karakarawa, na kena vauvau, na tere, kei na qaloni taucoko ni waiwai ka ratou dau cakacaka kina. 10 "Me ratou na qai biuta vata kece kei na i yaya taucoko ni vakasaqa ena i ubi ni kuli ni manivusi ni wai ka me qai biu kina kena i vua. 11 "Ena i cabocabo ni soro koula, me ratou ubia e cake e dua na i sulu karakarawa, ka me ubia na kuli ni manumanu ni wai; ka me vakacurumi sara kina kena qara. 12 "Me ratou na qai kumuna taucoko nai yaya ni vakasaqa ka ratou dau vakayagataka e na loma ni vale ni Kalou, biu e na loma ni dua na i sulu karakarawa, ubi yani e na ubi ni kuli ni manumanu ni wai, ka vakacuruma sara yani kina kena i vua. 13 "Me ratou na qai kauta laivi talega na dravusa mai na i cabocabo ni soro, ka qai ubia yani e delana ena dua na i sulu lokaloka. 14 "Me ratou na qai biuta kece yani e kea na i yaya taucoko ni nodratou cakacaka – na dari ni qilaiso, na i cula ni lewe ni manumanu, na i sivi, na beseni, kei na i yaya kece ni veiqaravi ena i cabocabo ni soro, ka me ratou na qai ubia yani e cake ena i ubi ni kuli ni manumanu ni wai ka me daramaka yani kina kena i vua. 15 "Ni sa mai cava na nodatou ubia na vale ni Kalou o Eroni kei rau na luvena kei na i yaya kece ni veiqaravi ni vale ni Kalou, ena gauna era sa vakarau cavu tu kina na i soqosoqo me ra sa lako, me ra qai lako mai na luvei Koaca me ra colata; me ratou kakua ga ni tara e dua na i yaya savasava tabu, de ratou na mate vakaidina. 16 "Na i tavi sa lesi kina o Iliesa na luvei Eroni na bete sai koya na waiwai ni cina, na i madrali boivinaka vakamai, na madrali laukana, na waiwai ni i lumu me raica ka wanonova taucoko na vale ni Kalou kei na kena i yaya kece." 17 Sa qai vosa vei Mosese kei Eroni o Jiova ka tukuna: 18 "Mo drau kakua ni vakawabokotaka na nodra veivuvale ni yavusa ni luvei Koaca mai vei ira na Livai; 19 "Ia na ka ga oqo mo drau cakava vei ira me vaka kina ni ra vakabulai ka sega ni ra mate ni ra sa torova yani na veika tabu ka savasava: o Eroni kei rau na luvena me ratou na qai lako yani ka lesia yadudua vei ira na i tavi me ra qarava. 20 "Me ratou kakua ga ni curu e loma me ratou la'ki sarava na kena ubi tiko na i yaya tabu ka savasava, de ratou na qai mate vakaidina." Na Nodra i Tavi Na Luvei Keresoni Tagane 21 Sa qai vosa vei Mosese o Jiova, ka vaka: 22 "Mo na wiliki ira talega na luvei Kerisoni, mai na i yatu vei tamadra kei na nodra veivuvale. 23 "O ira era sa yabaki tolusagavulu ka lako cake, ka vaka talega kina o ira sa yabaki limasagavulu, o na wiliki ira kece, o ira era sa curu me ra veiqaravi, ka cakacaka ena loma ni vale ni veitavaki. 24 "Sai koya oqo na nodra cakacaka na luvei Kerisoni ena veiqaravi kei na colacola: 25 "Era na colata na i sulu latilati ni vale ni Kalou kei na i ubi taucoko ni vale ni veitavaki, na i ubi ni kuli ni manumanu ni wai talega e tiko kina, kei na i sogo ni vale ni veitavaki, 26 "Na i sulu sa bai ni rara, kei na i sogo ni katuba ni rara sa vakabai, o koya sa volita na vale ni Kalou kei na i cabocabo ni soro, na kedra dali, na i yaya kece ni nodra veiqaravi, kei na ka era a buli kina, me ra na cakacaka kina. 27 "O Eroni kei rau na luvena me ratou na lesia na i tavi taucoko ni cakacaka me ratou na qarava na luvei Kerisoni, na nodratou cakacaka kece kei na veiqaravi. Mo na qai vota vei iratou, ni cakacaka oqo e nodratoui tavi vakatabakidua. 28 "Sai koya oqo na nodratou cakacaka na vuvale ni luvei Kerisoni ena loma ni vale ni veitavaki. E ratou na cakacaka tiko ena ruku ni nona veiliutaki o Icama na luvei Eroni na bete.

Na Nodra i Tavi Na Luvei Merari Tagane

29 "Mo na wiliki ira talega na luvei Merari ena nodra veivuvale me muria mai na i yatu ni nodra qase. 30 "O ira era sa yacova na yabaki tolusagavulu ka lako cake, kei ira talega era sa yacova na yabaki limasagavulu, mo na wiliki ira, o ira yadudua era sa curu kina veiqaravi me ra cakava na cakacaka ni vale ni veitavaki. 31 "Sai koya oqo na veika me ra na kauta tiko me wili vaka nodra i yaya ni cakacaka e na loma ni vale ni veitavaki; na lalaga ni vale ni Kalou, na kena i tatarovi, na duru, kei na kena i sema, 32 "Na duru ni vale taucoko, na kedra i tatarovi, na kedra i vakadei, na kedra dali, na i yaya kece ni loma ni vale kei na ka e dau caka kina; ka mo na qai cavuta na yacadra ka vota yadudua vei ira na i yaya e dodonu me ra na colata. 33 "Sa i koya oqo na i tavi me ra qarava na vuvale ni luvei Merari, na i tavi taucoko e na loma ni vale ni veitavaki, e na ruku ni nona veiliutaki o Icama na luvei Eroni na bete."

Nodra Wiliki Na Livai

34 Ia, o Mosese, Eroni, kei ira era veiliutaki ena nodra i soqosoqo, era sa qai wiliki ira na luvei Koaci ena nodra veivuvale kei na veivuvale ni nodra qase, 35 O ira era sa yacova na yabaki e tolusagavulu ka lako cake, ka yaco sara kina yabaki limasagavulu, kei ira yadudua era sa cakacaka tiko ena loma ni vale ni veitavaki; 36 O ira oqo era sa wiliki rawa ena nodra veivuvale e rauta tiko ni ra lewe rua na udolu vitu na drau limasagavulu. 37 Sa o ira oqo era sa wiliki rawa ena vuvale i Koaca, o ira era rawa ni veiqaravi ena loma ni vale ni veitavaki, ka rau a wilika o Mosese kei Eroni me vaka na i vakaroi Jiova ena liga i Mosese. 38 Ia, o ira kece sa wiliki rawa ena vuvale i Kerisoni kei ira na nodra qase kei na nodra veivuvale. 39 Vua sa yabaki tolusagavulu ka lako cake, kei ira talega sa yacova na yabaki limasagavulu, o ira yadudua talega era sa curuma na vale ni veitavaki mera veiqaravi kina O 40 O ira kece era sa wiliki mai na nodra veivuvale, kei na veivuvale ni nodra qase e rauta tiko ni ra lewe rua na udolu ono na drau tolusagavulu. 41 Sai ira oqo era a wiliki mai ena nodra veivuvale na luvei Kerisoni, kei ira era rawa ni cakacaka e na vale ni veitavaki, ka rau a wilika o Mosese kei Eroni me vaka na i vakaro i Jiova. 42 O ira na veivuvale i luvei Merari era sa wiliki vaka matavuvale mai na i yatu ni vuvale ni nodra Qase, 43 O ira era sa yabaki tolusagavulu ka lakocake ka yacova sara na yabaki limasagavulu, o ira yadudua era sa curuma na yalava ni cakacaka ni veiqaravi ena loma ni vale ni veitavaki O 44 O ira kece era a wiliki kei na nodra veivuvale e rauta taucoko ni ra lewe tolu na udolu rua na drau. 45 Sai ira kece oqo era a wiliki ena nodra veivuvale na luve i Merari, ka rau a wilika o Mosese kei Eroni me vaka na vosa i Jiova ena liga i Mosese. 46 O ira era a wili rawa mai vei ira na Livai, me vaka e rau a wiliwili kina o Mosese, Eroni, kei ira na veiliutaki e Isireli, e na nodra veivuvale kei na i yatu mai vei ira nodra qase, 47 Mai vei ira sa yacova na yabaki tolusagavulu ka lako cake, kei ira sa yabaki limasagavulu, o ira yadudua era sa lako mai me cakacaka ka veiqaravi kei na i tavi ni kena colati na nodra i colacola bibi, ena loma ni vale ni veitavaki. 48 Na kedra i wiliwili taucoko era sa wili rawa e rauta tiko ni ra lewe walu na udolu lima na drau walusagavulu. 49 Me vaka na i vakaro i Jiova, era sa wiliki rawa e na liga i Mosese, me vaka na nodra dui i tavi kei na cakacaka yadudua; ia, era sa wili rawa ga mai vei koya me vaka sa vakarota o Jiova vei Mosese.

Na Kedra I Wiliwili 5

Na Lawa Vakalotu E Na Nodra Biu Vakatikitiki Na Tamata Dukadukali

5 Sa qai vosa vei Mosese o Jiova ka vaka: 2 "Mo vakaroti ira na luve i Isireli me ra biuti ira laivi na tamata vukavuka mai na nodra i tikotiko, na tauvi vidikoso, kei ira era sa tara na yago ni mate. 3 "Mo biuti ira tani sara ga na tagane se na yalewa; kauti ira vakatikitiki mai na nodra i tikotiko, me ra kakua kina ni vakadukadukalitaka na nodra i tikotiko e na vanua Au sa tiko vata kina kei ira e na kedra maliwa." 4 Era sa qai cakava sara na luve i Isireli na veika o ya ka ra sa biuti ira tani mai na nodra i tikotiko; me vaka sa vakarota o Jiova vei Mosese, era sa vakayacora vakakina.

Na Vakatutusa Kei Na Veivakatikori Lesu

5 Sa qai vosa tale o Jiova vei Mosese ka vaka: 6 "Mo vosa vei ira na luvei Isireli ka tukuna; 'Kevaka sa cakava e dua ga na ka ca e dua na tagane se dua na yalewa e na nona sega ni yalodina vua na Kalou, e sa na beitaki na tamata o ya, 7 'Me na qai vakatusa o koya na ca e sa cakava. Me na qai sauma lesu taucoko tale o koya na ka ca e sa cakava, ka me dua tale na kena i kalima, ka me solia lesu tale vei koya e a caka ca vua. 8 'Ia kevaka sa sega na wekai koya ka dodonu me caka vua na veisausaumi e na vuku ni ka ca ea caka vua, na veisausaumi ni veika ca o ya me na qai kau vua na Kalou ena vukuna na bete mei kuri ni luve ni me, me vakacabori ena vukuna. 9 'Nai soro taucoko e savasava mai vei ira na luvei Isireli ka ra sa kauta mai vua na bete me qai soli kece vua me nona. 10 'Na veika savasava taucoko era taukena na tamata yadudua me soli taucoko me nona; kei na veika kecega era solia vua na bete me qai votai kece me nona.'"

Na Veika Me Baleti Ira Na Yalewa Vakawati Era Sega Ni Yalodina

11 Sa qai vosa na Kalou vei Mosese, ka tukuna, 12 "Mo vosa vei ira na luvei Isireli ka tukuna vei ira: 'Kevaka sa lako tiko vakatani e dua na yalewa vakawati ka sega ni yalodina tiko vei watina tagane, 13 'Ka rau laki veimoceri ka tiko vata sara kei na dua na tagane tani, ka vunitaki koya mai vei watina dina, sa na yaco kina vua me vakadukadukalitaki koya, ka sega ni dua e i vakadinadina vua se me rau kune sara ga — 14 'Kevaka sa yaco mai na yalo ni vuvu vei watina tagane me vuvutaki watina yalewa, baleta ni sa vakadukadukalitaki koya; se sa yaco mai vua na yalo ni vuvu ka mani vuvutaki watina yalewa, dina beka ni se sega ni vakadukadukalitaki koya — 15 'Me qai kauti watina yalewa mai o tagane vua na bete, me qai kauta mai o koya na i soro e gadrevi vei yalewa, me dua na i katini na i vakarau madrai droka; me kakua ni sova kina na waiwai se dua na ka boi vinaka, baleta oqori na i madrali ni veivuvutaki, kai madrali ni veivakananumi, ena kena kau mai na i valavala ca me vakananumi tiko. 16 'Me na qai kauti koya vakavoleka mai na bete, ka vakatikora ena mata i Jiova. 17 'Me na qai taura na bete na wai ni savasava ena dua na beseni, ka kumuna vata e so na qele ena buturara ni loma nivale ni veitavaki ka biuta yani kina na wai. 18 'Na bete me na qai vakaturi koya na yalewa ena mata i Jiova, ka qai ubia na uluna, ka solia ki ligana na i madrali ni veivakananumi, sai koya na madrai droka ni veivuvutaki. Esa na qai tiko e ligana na bete na wai gaga e dau kauta mai na vosa ni veicudruvi. 19 'E sa na qai vakayacora vua na bete me dua na nona vosa ni bubului ka tukuna vua na yalewa, "Kevaka e sega ni davo vata kei iko e dua na tagane, se o sega ni lako sese kina bula dukadukali ni o se vauci tikoga vei watimu tagane, mo galala mai na wai gaga oqo e dau kauta mai na veicudruvi. 20 "Ia kevaka o sa lako tani dina mai ni o se vauci tikoga vei watimu tagane, ka o sa mani vakadukadukalitaki iko e na nomu sa davo vata tale kei na so na tagane e sega ni watimu" — 21 'Me na qai vakatikora na yalewa o koya na bete e na vuku ni vosa ni bubului ni veicudruvi ka me qai tukuna vua na yalewa – "Sa cudruvi iko na Kalou e na bubului kei ira na wekamu, ka me vuca mai na sagamu ka vuce talega na ketemu mai vei Jiova; 22 "Na wai oqo ka tiko kina na cudru e na curu yani ki loma ni ketemu, ka na vakavucea mai, e na vuca talega mai na sagamu." E na qai tukuna na yalewa, " Emeni, me yaco ga me vakakina." 23 'Me qai vola na vosa ni veicudruvi oqo na bete ena dua na i vola, ka basubasuka yani kina loma ni wai gaga. 24 'Me na qai vakavuna vua na yalewa me gunuva na wai gaga ni vosa ni cudru, ena qai curu yani na wai o ya me vagaga na lomana. 25 'Ena qai taura na bete na madrali ni veivuvutaki mai na liga ni yalewa, ka yalovaka nai madrali ena mata i Jiova, ka me qai kauta mai kina i cabocabo ni soro; 26 'Me na qai kumuna vata me qumia e ligana e dua na i wase ni madrali, ka mei vakananumi, me qai va kama ena i cabocabo ni soro, ka me qai solia vua na yalewa me gunuva na wai. 27 'Ni sa vagunuvi koya oti ena wai, ia ni sa na yaco, kevaka e dina ni sa vakadukadukalitaki koya oti ka sega ni yalodina vua na watina, e sa na yaco sara me wiwi vei koya, sa na qai vuce mai kina na ketena, ka tekivu me vuca sara mai na sagana, ka sa yaco o koya me cudruvi e na kedra maliwa na wekana. 28 'Ia, kevaka e dina ni se sega ni vakadukadukalitaki koya na yalewa, ka se savasava tiko, e sa na vagalalataki o koya, ka na rawa me vakawa. 29 'Sa i koya oqo na lawa ni veivuvutaki, ni se vauci tikoga e dua na yalewa vakawati vei watina, ia e mani digidigi me lako tani yani ka vakadukadukalitaki koya, 30 'Se me sa yaco vua e dua na tagane na yalo ni vuvu, me sa vuvutaki watina kina, me qai vakaturi yalewa o koya e na matai Jiova, ka me qai cakava taucoko na bete na lawa oqo vua na yalewa. 31 'Esa na galala kina na tagane mai na ca o ya, ia, na yalewa e sa tauca na ka e beitaki kina.'"

Na Kedra I Wiliwili 6

Na Lawa Me Baleti Ira Sa Tawasei

1 Sa qai vosa na Kalou vei Mosese ka tukuna, 2 "Mo vosa vei ira na luvei Isireli ka vaka: 'Kevaka sa vakacabora e dua na i madrali e dua na tagane se dua na yalewa, me sa vosa bubului kina me sa Tawasei, me tawasei koya kina vua na Kalou, 3 'Me qai tawasei koya mai na gunu waini kei na vei yaqona tale eso, me qai gunuva ga o koya na vakabulagitaki ka caka mai na so tale na gunu; me kakua tale ga ni gunuva na wai wiwi se kania na vua ni vaini sa drokadroka se vakasigani. 4 'Ena veisiga kece e tawasei kina, me kakua sara ga ni kania e dua na ka mai na vua ni vaini, na sorena se na kulina. 5 'Ena veisiga yadudua ni nona bubului me sa tawasei, ena sega ni tara na uluna e dua na i koti ni ulu, me yacova ni sa vakacavari na siga e tawase kina me nona na Kalou, ena savasava o koya. Me qai laiva tikoga na drau ni uluna me tubu tiko me balavu. 6 'Ena veigauna kece e tawase tiko kina o koya me nona na Kalou, me kakua sara ni torova yani e dua na yago ni mate. 7 'Me kakua talega ni vakadukadukalitaki koya e matadrau na nona i tubutubu, ena vukudrau na tacina se ganena, ke rau mani mate, baleta na nona tawase, me nona na Kalou, sa toka sara ga oqori e uluna. 8 'Na veisiga kecega ni nona tawase ena vakatabui me savasava tikoga vua na Kalou. 9 'Ia kevaka e mani mate vakasauri e dua ena yasai koya sa tawase, ka sa mani vakadukara kina na uluna sa tabu tasi, me qai tasia laivi o koya na drau ni uluna ena siga ni nona vakasavasavataki, ena kavitu ni siga me qai tasia laivi kina. 10 'Ena i ka walu ni siga me qai kauta mai e rua na soqe se rua na ruve gone vua na bete, ki na katuba ni vale ni veitavaki; 11 'Me na vakacabora na bete e dua mei soro ni valavala ca kei na kenai karua mei soro e vakamai, ka me vakacabori me baleti koya, ni sai valavala ca o koya e na vuku ni yago ni mate; ka na vakasavasavataka talega na uluna ena siga vata ga o ya. 12 'Ena vakatabuya o koya vei Jiova na veisiga kece e tawase tiko kina, ka me kauta mai e dua na luve ni sipi tagane ka se qai yabaki dua mei soro ni caka cala, ia na veisiga ni nona tawase, me na qai kau mai o koya kina katuba ni vale ni veitavaki. 13 'Sai koya oqo na lawa me baleti ira sa tawasei ira, ni sa mai vakayacori oti na veisiga ni nona tawase, me na qai kau mai o koya ki na katuba ni vale ni veitavaki. 14 'Me na qai mai vakacabora na nonai madrali vei Jiova; dua na luve ni sipi tagane se qai yacova na yabaki dua ka se sega ni ca, mei soro kama, ka dua na sipi yalewa se qai yabaki dua sa sega ni ca mei soro ni valavala ca, ka dua na sipi mei soro ni veivinakati, 15 'Me dua na kato ni madrai ka sega ni vakatubu, na keke e caka ena valawa vulavula makare ka veiwaki kei na waiwai, kei na keke mamare e so ka sega ni vakatubutaki ka lumuti e na waiwai, kei na madrali e laukana kei na kena e liviraki. 16 'Ka na qai kauta mai na bete e na matai Jiova me vakacabora na nona i soro ni valavala ca kei na nona i soro kama; 17 'Me qai vakacabora na sipi yalewa mei madrali ni veivinakati vei Jiova; vata kei na kato ni madrai sega ni vakatubu; ka na vakacabora talega na bete nai madrali laukana kei koya e liviraki. 18 'Ia, o koya sa tawase tu me qai tasia na uluna ka vakatabui tu ena mata ni katuba ni vale ni veitavaki, ka me qai kumuna na drau ni uluna tabu ka biuta yani kina bukawaqa ena ruku ni madrali ni veivinakati. 19 'Me qai taura na bete na vatuvatu ni taba ni sipi sa vakasaqari tu, kei na dua na keke sa sega ni vakatubutaki mai na kena kato, vata kei na dua na keke mamare sega ni vakatubu, ka biuta kina ligai koya sa tawase tu ni sa oti na nona tasia na uluna ka a tabu tu, 20 'Ia, na bete ena qai yalovaka me wili mei soro e yalovaki e na matai Jiova; era na vakatabui ka savasava vua na bete, kei na serena na i soro e yalovaki kei na saga ni madrali e lavelaveti. Ni oti oqo e sa na qai rawa vua sa tawase tu me gunu waini.' 21 "Sai koya oqo na lewa e vauci koya sa tawase tu ka bubului kina vua na Kalou me tawasei koya, kei na veika tale e so, e rawa ni vakaitavi kina na ligana; me vaka na bubului e a cakava, e dodonu kina vua me vakayacora me vaka sara ga na lawa ni nona tawasei."

Na Veivakalouvinakataki Mai Vua Na Bete

22 Sa vosa tale na Kalou vei Mosese ka tukuna; 23 "Mo vosa vei Eroni kei rau na luvena, ka vaka, 'Oqo na i valavala mo dou vosa vakalouvinakataki ira kina na luvei Isireli, Tukuna vei ira: 24 "Me vakalouvinakataki kemuni o Jiova, ka maroroi kemuni; 25 "Me cilavi kemuni nai serau ni mata i Jiova, ka me yalololoma talega vei kemuni; 26 Me laveta cake o Jiova na Nona veivakadonui vei kemuni Ka me vakacegui kemuni."' 27 "Me rawa kina ni ra toqa na Yacaqu ena kedra maliwa na luvei Isireli, ka'u na vakalouvinakataki ira."

Na Kedra I Wiliwili 7

Na I Madrali Me Baleti Ira Na Veiliutaki

1 Sa qai yaco, ena siga sa vakaduria oti kina na vale ni Kalou o Mosese, sa qai lumuta ka vakatabuya na kena i yaya kece, na i cabocabo ni soro kei na i yaya ni vakasaqa; sa lumuti ira ka vakatabui ira. 2 Ia, o ira na i liuliu e Isireli, o ira era veiliutaki mai na veivuvale ni nodra qase, o ira na i liuliu ni nodra veimataqali kei ira kece era sa wiliki oti, era sa qai vakacabo i soro. 3 Era sa qai kauta mai na nodra i madrali vua na Kalou, e ono na qiqi ni yau sa Sinai vutuvutu tu kei na tinikarua na bulumakau, dua na qiqi ni yau e rau vodo kina e rua na liuliu, ka ra tau yadua na bulumakau me dua na i liuliu; era sa qai mai vakacabora e na mata ni vale ni Kalou. 4 Sa qai vosa vei Mosese o Jiova, ka tukuna, 5 "Mo ciqoma mai vei ira na veika oqo, me rawa ni ra vakamatautaki ira ena veiqaravi ni vale ni Kalou; ka mo qai votai ira kina na Livai, Kivei Ira na tagane taucoko me vaka na nodra dui cakacaka." 6 Sa qai kauti ira na qiqi ni yau kei na bulumakau o Mosese ka solia vei ira na Livai. 7 E rua na qiqi ni yau kei na va na bulumakau sa solia o koya vei ira na luvei Kerisoni, me vaka na i tavi era a qarava; 8 O ira na luvei Merari e votai vei ira e va na qiqi ni yau kei na walu na bulumakau me vaka na nodra cakacaka, ena ruku ni lewa i Icama na luvei Eroni na bete. 9 Ia o ira ga na luvei Koaci e sega ni soli vei ira e dua na ka, baleta ni rui savasava na nodra i lesilesi ni cakacaka, ka ra a colata ena vatuvatu ni tabadra. 10 Era sa qai mai vakacabora na vei liuliu na i madrali ni vakacacabo ni cabocabo ni soro ena gauna e sa lumuti oti kina; ka ra sa qai mai cabora o ira na i liuliu ena mata ni cabocabo ni soro. 11 Ni sa tukuna na Kalou vei Mosese, "Era na mai vakacabora na nodra i madrali, dua na i liuliu ena dua na siga, me baleta na kena vakatabui na i cabocabo ni soro." 12 Ka sa kena i matai me mai cabora na nona i madrali e na i matai ni siga o Nasoni na luvei Amenatave, mai na yavusa i Juta. 13 Sa nona i madrali e dua na dari siliva, ka rauta na kena bibi e dua na drau tolusagavulu na sikele, kei na dua na dari siliva ka vitusagavulu na sikele, me vakadina na sikele ni vale ni Kalou, ka rau sinai ruarua, oi rau oqo ena valawa makare e veiwaki vata kei na waiwai mei madrali laukana. 14 E dua na bilo koula e tini na sikele, e sinai vutuvutu e na ka boivinaka; 15 E dua na bulumakau gone, e dua na sipi tagane, kei na dua na luve ni sipi tagane se qai yabaki dua, mei soro kama; 16 E dua na me gone mei soro ni valavala ca; 17 ia na i madrali ni veivinakati; me rua na bulumakau, lima na sipi tagane, lima na luve ni sipi tagane ra se qai yabaki dua. Sa i koya oqo na i madrali nei Nasoni na luvei Amenatave. 18 E na i karua ni siga e sa qai vakacabora o Nacanieli na luvei Sua, ka i liuliu vei ira na Isakari e dua na madrali. 19 E na nona i madrali e a mani vakacabora kina e dua na dari siliva, ka kena bibi e rauta ni dua na drau tolusagavulu na sikele, kei na dua na dari siliva ka rauta ni vitusagavulu na sikele, me vaka na i lavo ni vale ni Kalou, ka rau sinai vutuvutu ruarua ena valawa makare veiwaki kei na waiwai mei madrali laukana; 20 E dua na dari koula e tiko kina e tini na i lavo, sinai ena ka boi vinaka; 21 E dua na bulumakau gone, dua na sipi tagane, kei na dua na luve ni sipi tagane ka se qai yabaki dua, mei soro kama; 22 E dua na me tagane e ka gone, mei soro ni valavala ca; 23 ia, na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ra se qai yabaki dua. Sai koya oqo nai madrali i Nicanieli na luvei Sua. 24 E nai ka tolu ni siga sa qai vakacabora o Iliavi na luvei Eloni, ka nodra i liuliu na luvei Sevuloni e dua na i madrali. 25 Sa nonai soro e dua na dari siliva, ka rauta ni dua na drau tolusagavulu na kena bibi na sikele, kei na dua na dari siliva e tiko kina e vitusagavulu na sikele, me vaka na i lavo ni vale ni Kalou, e rau Sinai vutuvutu ruarua ena valawa makare ka veiwaki vata kei na waiwai mei madrali laukana; 26 E dua na dari koula ka tiko kina e tini na sikele, sinai e na ka boivinaka; 27 E dua na bulumakau gone, e dua na sipi tagane, ka dua na luve ni sipi tagane ka se qai yabaki dua, mei soro kama; 28 E dua na me gone mei soro ni valavala ca; 29 ia na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ka se qai yabaki dua. Sai koya oqo na i madrali i Iliavi na luve i Eloni. 30 Ena i ka va ni siga sa qai vakacabora o Elisuri na luve i Setiuri ka nodra i liuliu na luvei Ruveni e dua na i madrali. 31 Sa nona i madrali e dua na dari siliva, ka kena bibi e dua na drau tolusagavulu na sikele, kei na dua tale na bilo siliva e tiko kina e vitusagavulu na sikele, me vaka ga na i vakarau bibi ni vale ni Kalou, ka rau sinai vutuvutu ruarua ena witi veiwaki vata kei na waiwai kei na i madrali e laukana; 32 E dua na i taki koula e tini na paodi, ka sinai e na ka boivinaka; 33 E dua na bulumakau gone, dua na sipi tagane, dua na luve ni sipi tagane se qai yabaki dua, me i soro kama; 34 E dua na me gone me i soro ni valavala ca; 35 ia na i madrali ni veivinakati; e rua na bulumakau, lima na sipi tagane, lima na me tagane ka lima na luve ni sipi tagane ka ra se qai yabaki dua. Sai koya oqo na i madrali i Elisuri na luvei Setiuri. 36 Ena i ka lima ni siga sa tarava mai o Selumieli na luvei Surisatai kai liuliu vei ira na luvei Simione, sa mai vakacabora e dua na i madrali. 37 Sa nona i madrali e dua na dari siliva, sa kena bibi e dua na drau tolusagavulu na sikele kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau Sinai ruarua ena witi, veiwaki kei na waiwai me i madrali e laukana; 38 E dua na i taki koula e rauta ni tini na paodi, ka Sinai ena ka boivinaka; 39 E dua na bulumakau gone, dua na sipi tagane, ka dua na luve ni sipi tagane ka se qai yabaki dua, me i soro kama. 40 E dua na me gone me i soro ni valavala ca; 41 ia na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ka ra se qai yabaki dua. Sai koya oqo na i madrali i Selumieli na luvei Surisatai. 42 Ena i kaono ni siga o Eliasava na luvei Tineli kai liuliu vei ira na luvei Kata sa mai cabora e dua na i madrali. 43 E nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua ena witi, veiwaki vata kei na waiwai mei madrali laukana. 44 dua na i taki koula e rauta ni tini na paodi, Sinai ena ka boivinaka; 45 dua na bulumakau gone, dua na sipi tagane, ka dua na luve ni sipi tagane se qai yabaki dua, me i soro kama; 46 dua na me gone me i soro ni valavala ca; 47 ia na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Eliasava na luvei Tineli. 48 Ena i ka vitu ni siga o Eliasama na luvei Amiute, kai liuliu vei ira na luvei Ifereimi, sa mai cabora e dua na i madrali. 49 Sa nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua ena witi, veiwaki vata kei na waiwai me i madrali laukana; 50 e dua na i taki koula e tini na sikele, ka sinai ena ka boivinaka; 51 e dua na bulumakau gone mei soro ni valavala ca; 52 dua na me gone me i soro ni valavala ca; 53 ia na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Elisama na luvei Amiute. 54 Ena i ka walu ni siga, o Kamelieli na luvei Petasuri kai liuliu vei ira na luvei Manasa sa mai cabora e dua na i madrali. 55 Sa nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua e na witi, veiwaki vata kei na waiwai me i madrali e laukana; 56 dua na i taki koula e tini na sikele, ka sinai ena ka boivinaka; 57 dua na bulumakau gone, dua na sipi tagane, dua na luve ni sipi tagane ka se qai yabaki dua, me i soro kama; 58 dua na me gone me i soro ni valavala ca; 59 ia na i madrali ni veivinakati; e rua na bulumakau, lima na sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Kamelieli na luvei Petasuri. 60 E nai ka ciwa ni siga o Avitani na luvei Kitioni kai liuliu vei ira na luvei Penijamini, sa mai vakacabora e dua na i madrali. 61 Sa nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua e na witi, veiwaki vata kei na waiwai me i madrali e laukana; 62 dua na i taki koula e tini na sikele, ka sinai e na ka boivinaka; 63 dua na bulumakau gone, dua na sipi tagane, ka dua na luve ni sipi tagane ka se qai yabaki dua, me i soro kama; 64 dua na me gone mei soro ni valavala ca; 65 ia na i madrali ni veivinakati: e rua na bulumakau, lima na sipi tagane, lima na me tagane, ka lima sipi tagane, lima na me tagane, ka lima na luve ni sipi tagane ka ra se qai yabaki dua. Sai koya oqo na i madrali i Avitani na luvei Kitioni. 66 E na i katini ni siga o Aisea na luvei Amisatai, ei liuliu vei ira na luvei Tani sa mai vakacabora e dua na i madrali. 67 Sa nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua e na witi, veiwaki vata kei na waiwai me i madrali e laukana; 68 dua na i taki koula e tini na sikele, ka sinai e na ka boivinaka; 69 dua na bulumakau gone, dua na sipi tagane, ka dua na luve ni sipi tagane ka se qai yabaki dua, me i soro kama; 70 dua na me gone mei soro ni valavala ca; 71 ia na i madrali ni veivinakati: e rua na bulumakau, lima na sipi tagane, lima na me tagane, ka lima sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Aiesa na luvei Amisatai. 72 E na i ka tinikadua ni siga o Pagieli na luvei Okarani, ka i liuliu vei ira na luvei Aseri e sa cabora e dua nai madrali. 73 Sa nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi ena vale ni Kalou, ka rau sinai ruarua e na witi, veiwaki vata kei na waiwai me i madrali e laukana; 74 dua na i taki koula e tini na sikele, ka sinai e na ka boivinaka; 75 dua na bulumakau gone, dua na sipi tagane, ka dua na luve ni sipi tagane ka se qai yabaki dua, me i soro kama; 76 dua na me gone mei soro ni valavala ca; 77 ia na i madrali ni veivinakati: e rua na bulumakau, lima na sipi tagane, lima na me tagane, ka lima sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Pagieli na luvei Okarani. 78 E na i ka tinikarua ni siga o Aira na luvei Anani, kai liuliu vei ira na luvei Navitalai, e sa mai cabora e dua na i madrali. 79 E nona i madrali e dua na dari siliva, ka rauta ni dua na drau tolusagavulu na sikele na kena bibi, kei na dua na bilo siliva e rauta ni vitusagavulu na sikele, me vaka ga na vakarau bibi e na vale ni Kalou, ka rau sinai ruarua e na witi, veiwaki vata kei na waiwai me i madrali e laukana; 80 dua na i taki koula e tini na sikele, ka sinai e na ka boivinaka; 81 dua na bulumakau gone, dua na sipi tagane, ka dua na luve ni sipi tagane ka se qai yabaki dua, me i soro kama; 82 dua na me gone mei soro ni valavala ca; 83 ia na i soro ni veivinakati: e rua na bulumakau, lima na sipi tagane, lima na me tagane, ka lima sipi tagane, lima na me tagane, ka lima na luve ni sipi tagane ka ra se qai yabaki dua. Sa i koya oqo na i madrali i Aira i na luvei Enani. 84 Sai koya oqo nai madrali e a vakacabori e na i cabocabo ni soro mai vei ira na i liuliu e Isireli, ena gauna e lumuti kina, e tinikarua na dari siliva, tinikarua na bilo siliva, ka tinikarua na i taki koula. 85 Na vei dari siliva yadudua e rauta ni dua na drau tolusagavulu na sikele kei na veibilo yadua e vitusagavulu na sikele. Na vei dari siliva kece e rauta taucoko ni rua na udolu va na drau na sikele me vaka ga na vakarau bibi ena vale ni Kalou. 86 Na tinikarua na i taki koula ka sinai kina na ka boivinaka e rauta ni tini na sikele dua na tikina, me vaka ba vakarau bibi ena vale ni Kalou, ia na koula e na i taki kece e rauta ni dua na drau tolusagavulu na sikele na kedra bibi. 87 Na bulumakau kece e cabori me i soro kama e tinikarua na bulumakau gone, tinikarua na sipi tagane, tinikarua na luve ni sipi tagane era ka gone ka ra se qai yabaki dua, kei na nodra i madrali laukana, kei ira na luve ni me gone me i soro ni valavala ca e rauta ni ra lewe tinikarua. 88 O ira na bulumakau kece era a cabori me i madrali ni veivinakati e rauta ni ra lewe ruasagavulu ka va na bulumakau, onosagavulu na sipi tagane, onosagavulu na me tagane, ka onosagavulu talega na luve ni sipi tagane ka ra se qai yabaki dua. Sai koya oqo na i madrali ea vakacabori e na i cabocabo ni soro ena gauna e sa lumuti oti kina. 89 Ena gauna sa lako yani kina o Mosese kina loma ni vale ni Kalou me veivosaki kei Koya, a sa rogoca na domo i Koya ka vosa tiko vua mai na dela ni cabocabo ni loloma ka toka ena Kato ni Vunau, e na loma ni kedrau tadrua na Serafimi, sa vosa kina o Koya vua.

Na Kedra I Wiliwili 8

Nai Tuvatuva Ni Veicina

1 Sa qai vosa na Kalou vei Mosese, ka tukuna: 2 "Mo vosa vei Eroni, ka vaka; 'Ni o sa tuvani iratou na cina, e vitu na cina me ratou vakararamataka na i tutu ni cina.'" 3 Sa cakava vakakina o Eroni; ni sa tuvani iratou na cina me ratou tadrava toka na kenai tutu, me vaka sa vakaroti Mosese kina o Jiova. 4 Na kena caka vakamatau na i tutu ni cina oqo sa caka e na koula sa lautuki mai na tolona kina sena sa tukilaki. Me vaka sara ga na kena i tuvaki ka vakatakila na Kalou vei Mosese, sa vakayacora me vakakina.

Nodra Vakasavasavataki Kei Na Nodra Vakacabori Na Livai

5 Sa qai vosa o Jiova vei Mosese, ka tukuna: 6 "Mo kauti ira na Livai mai vei ira na luvei Isireli ka me muri na i tuvatuva ni veiqaravi me ra vakasavasavataki. 7 "Oqo na i valavala mo cakava mo vakasavasavataki ira kina: mo vakamirika vei ira na wai savasava, ka mo qai laivi ira me ra toroya kece na yagodra, ka me ra qai savata na nodra i sulu, ka me ra rawa ni savasava kina. 8 "Me ra qai kauta e dua na bulumakau gone vata kei na i madrali laukana ka buli e na valawa matailalai sa veiwaki kei na waiwai, ka mo na qai kauta talega e dua na bulumakau gone me i madrali ni valavala ca. 9 "Mo na qai kauti ira mai na Livai kina mata ni vale ni veitavaki, ka mo na qai vakasokumuni ira kece na lewe ni vavakoso i Isireli. 10 "Ka mo na qai kauti ira mai na Livai e na matai Jiova, ia, o ira na luvei Isireli me ra na qai tabaki ira na Livai e na ligadra. 11 "Ia, o Eroni me na qai vakacabori ira na Livai vei Jiova, me vaka na i madrali e yalovaki mai vei ira na Isireli, ka me rawa ni ra cakava kina na cakacaka i Jiova. 12 "Ia o ira na Livai me ra na qai tabaka na uludra na bulumakau gone, ia, mo na qai cabora e dua me i madrali ni valavala ca ka dua tale me i soro kama vei Jiova, me ra sorovaki kina o ira na Livai. 13 "Mo na qai vakaduri ira na Livai e na mata i Eroni kei rau na luvena, ka vakacabori ira me vaka na i madrali e yalovaki vua na Kalou. 14 "Ia mo na tawasei ira vakaoqo na Livai mai vei ira na luvei Isireli, ka ra sa na yaco na Livai me ra Noqu. 15 "Ni oti oqori era sa na lako sara na Livai me ra veiqaravi ena loma ni Vale ni Veitavaki, ia mo na vakasavasavataki ira ka vakacabori ira me vaka nai madrali e yalovaki. 16 "Ni ra sa na soli taucoko sara ga vei Au mai vei ira na gone ni Isireli; Au sa tauri ira sara ga me Noqu ka me rai sosomi vei ira na ulumatua vei ira kece na luvei Isireli. 17 "Ni ra sa Noqu o ira kece na ulumatua mai vei ira na luvei Isireli, ruarua na tamata kei na manumanu; e na siga au a vaqeavutaki ira kina na ulumatua ni vanua oijipita Au sa vakatabui ira kina oqo me ra Noqu. 18 "Au sa tauri ira kina na Livai me kedra i sosomi na ulumatua taucoko e Isireli. 19 "Ka'u sa soli ira kina na Livai vei Eroni me rai solisoli kei rau talega na luvena mai vei ira taucoko na luvei Isireli, me ra veiqaravi ena vukudra na Isireli ena loma ni vale ni Veitavaki, ka me ra vakacaboi soro talega me baleti ira na luvei Isireli, ka me kakua ni ra cudruvi na Isireli ni ra sa torova mai na vale ni Kalou." 20 E rau sa qai cakava o Mosese vata kei Eroni kei ira na i vavakoso taucoko ni luvei Isireli na veika oqo vei ira na Livai; me vaka sara ga e ya vakarota o Jiova vei Mosese me baleti ira na Livai, era sa cakava vakakina na luvei Isireli vei ira. 21 Era sa qai vakasavasavataki ira na Livai ka ra sa savata na nodra i sulu; ia o Eroni sa vakacabori ira me vaka na i madrali e yalovaki vua na Kalou, sa qai vakacaboi soro o Eroni e na vukudra me vakasavasavataki ira. 22 Ni oti oqo, era sa cavutu sara na Livai me ra sa qarava yani na nodra cakacaka e na loma ni vale ni veitavaki ena matai Eroni kei rau na luvena; me vaka ga sa vakarota oti na Kalou vei Mosese baleti ira na Livai, e ratou sa mani kitaka vakakina vei ira. 23 Ia sa vosa o Jiova vei Mosese ka tukuna, 24 "Oqo na ka e baleti ira na Livai: Mai vei ira era sa sivia cake na yabaki ruasagavulu ka lima era sa rawa ni curu me ra veiqaravi ena cakacaka ni vale ni veitavaki; 25 "Ia ni ra sa yacova mai na yabaki limasagavulu sa dodonu me ra cegu mai na cakacaka oqo, ka me ra kakua tale ni veiqaravi. 26 "E rawa ni ra veivuke vei ira na nodra i tokani e na loma ni vale ni veitavaki, me ra tu ka waraki ira era leqa mai, ia era sa na sega ni vakatarai me ra cakava tale na cakacaka. Me vaka sara ga oqo na ka mo cakava vei ira na Livai me baleta na nodra i tavi."

Na Kedra I Wiliwili 9

Na I Karua Ni Kana Vata Ni Lako Sivia

1 Sa vosa na Kalou vei Mosese e na Vanua Liwa e Saineai, e na i matai ni vula e na i karua ni yabaki ni oti na nodra biubiu mai na vanua o Ijipita, ka tukuna: 2 "Mo raica me ra dau vakayacora tikoga na Isireli na Kana vata ni Lako Sivia e na gauna sa lokuci tu. 3 "E na i ka tinikava ni siga ni vula oqo, ena kena kala na matanisiga, mo dou vakayacora e kena gauna sa lokuci. Me vakayacori taucoko me vaka na kena i valavala kei na kena i qaraqaravi sa tuvani oti tu mo dou kitaka kina." 4 Sa mani tukuna vakakina o Mosese vei ira na Isireli me ra dau vakayacora tikoga na kanavata ni Lakosivia. 5 Era sa mani dau vakayacora na kana vata ni Lakosivia e na i ka tini ka va ni siga ni matai ni vula ni kala tiko na siga e na yakavi, ena loma ni Vanua Liwa o Saineai; me vaka na veika kece sa vakarota o Jiova vei Mosese, era sa vakayacora vakakina na Isireli. 6 Sa qai yaco ni so na tamata era sa vakacacani e na yago ni tamata mate, era sa sega ni rawa kina me ra vakananuma na Lakosivia ena siga o ya; ka ra sa lako mai ka mai tu e na mata i Mosese kei Eroni e na siga o ya. 7 Era sa qai mai tukuna vei koya, "Keimami sa vakacacani e na vuku ni yago ni mate, Na cava keimami sa vakatabui kina me keimami vakacabora na i madrali kivei Jiova me vaka na gauna sa lokuci ena kedra maliwa na Isireli?" 8 Sa qai tukuna vei ira o Mosese, "Dou vakadigagalu, me'u vakarogoca mada na veika e na vakarota o Jiova e na vukumudou." 9 Sa qai vosa o Jiova vei Mosese, ka tukuna, 10 "Mo vosa vei ira na Isireli, ka tukuna; 'Kevaka e dua vei kemudou se na nomudou kawa ni mataka e vakadukadukalitaki e na vuku ni yago ni mate, sa lako vakayawa tu e na dua na i lakolako, e se rawa tikoga vua me vakayacora na kana vata ni Lakosivia i Jiova. 11 'E na i ka tini ka va ni siga ni karua ni vula, ni kala sobu na siga, e dodonu me ra vakayacora kina. Me ra kania vata kei na madrai sa sega ni vakatubu kei na taba ni kau gaga. 12 'Me ra kakua ni vakavoca e dua me yacova na mataka, se ra musuka e dua na kena sui. Me vaka na i tuvatuva taucoko ni kana vata ni Lakosivia me ra vakayacora taucoko me vakakina. 13 'Ia na tamata e savasava tiko ka sega ni lako tiko e na dua na i lakolako, sa mai oti talega na nona dau vakayacora na Lakosivia, me na tamusuki laivi mai na tamata o ya vei ira na kainona, baleta nia sega ni kauta mai na i madrali vei Jiova e na gauna sa lokuci tu; e sa na tauca ga na tamata o ya na nona i valavala ca. 14 'Kevaka e tiko e na kemudou maliwa e dua na vulagi, ka mani vakayacora tiko na kana vata ni lako sivia kei na kena i qaraqaravi kece, ka me tiko e dua na i vakaro me caka taucoko vei ira era vulagi kei ira na i taukei ni vanua.'"

Na O Kei Na Bukawaqa

15 Ia ena siga sa vakaduri cake kina na Vale ni Kalou, sa qai ubia na o na Vale ni Kalou, io, na Vale ni Vakadinadina; mai na yakavi kina mataka e sa dei toka ga ena dela ni vale ni Kalou ka sa vaka na bukawaqa na kena i rairai. 16 Sa qai mani yaco; e na siga e vakarurugi e na o, ia, ena bogi e vakarurugi e na bukawaqa. 17 E na gauna e sa dau laveti cake na o mai na dela ni vale ni Kalou, era sa qai tekivutaka na nodra i lakolako na Isireli, ia, e na vanua e sa la'ki toka vakadua kina na o, era sa la'ki tara vale laca talega kina na Isireli. 18 E na i vakaro ni Kalou era sa lako kina na Isireli, ena i vakaro talega ni Kalou era sa mai tu vakadua kina; na kena na dede ga ni kena toka na o e na dela ni vale ni Kalou era sa tiko ga. 19 Ia ni sa tiko bogi vuqa na o e na dela ni vale ni kalou, e ra, sa maroroya nai vakaro ni Kalou na Isireli ka sega ni lako. 20 Ia ni sa tiko bogi vica na o ena dela ni vale ni Kalou, era sa tikoga me vaka na nona i vakaro, ia ni sa vakaroti ira na Kalou me ra sa lako, era sa qai lako. 21 Ia sa qai yaco, ni sa tiko ga na o mai na yakavi ka yacova na mataka; ni sa kau cake na o ena mataka, era sa qai tekivu lako, se ena siga se na bogi, ni sa kau cake ga na o, era sa qai lako. 22 Se ra siga rua se vula dua, se mani yabaki dua na nona dei toka ga na o ena dela ni vale ni Kalou, era sa dei toka talega vaka kina na Isireli ka sega ni lako; ia na gauna ga e sa kau cake kina, era sa qai lako. 23 E na i vakaro i Jiova era sa toka kina, e na i vakaro talega i Jiova era sa cavuti kina; era sa maroroya na i vakaro i Jiova; kei na Nona vosa ena liga i Mosese.

Na Kedra I Wiliwili 10

Na Rua Na Davui Siliva

1 Sa qai vosa o Jiova vei Mosese, ka tukuna: 2 "Mo cakava e rua na davui siliva me nomu; ka mo cakava e na i tukituki; ka o na dau vakayagataka e na nodra kacivi me ra soqoni vata mai na i vavakoso kei na kena dusimaki na nodra veigoleyaki e na i tikotiko. 3 "E na gauna era sa uvuci rau ruarua kina, me ra qai soqoni vata kece mai na lewe ni vavakoso e matamu e na mata ni katuba ni vale ni veitavaki. 4 "Ia kevaka era uvuca ga e dua, me ra qai soqoni mai o ira na liuliu, kei ira era veiliutaki ena vei wasewase e Isireli, mera kumuni vata mai vei iko. 5 "Ni o sa uvuca na toso i liu, o ira na vakaitikotiko ena yasana kina tokalau mera sa tekivu cavutu yani ka lako. 6 "Ni o sa uvuca vakarua na tosoi liu, o ira era vakaitikotiko ena yasana kina ceva me ra sa tekivu cavutu yani ka lako; Me ra rogoca na domo ni kaci ni sa dodonu me ra sa lako yani. 7 "Ia kevaka sa dodonu mera soqoni vata mai, o na uvuca, ia me kua ga ni rogoci na tosoi liu. 8 "Oi rau na luvei Eroni, na bete, me rau uvuca na davui; ia oqo esa na dua na veiyalayalati vei iko kei ira kece na nomu kawa ka sega ni mudu. 9 "Ni o sa cavuta mo lako kina i valu e na nomu vanua mo vala vata kei ira na meca ena vakatotogani iko, mo qai uvuca na davui. Me rawa ni kilai, o na qai nanumi kina mai vei Jiova na nomu Kalou, o na qai rawa ni vakabulai mai vei ira na kemu meca. 10 "E na veisiga talega ni nomu dau marau, e na gauna ni kana vata e so sa lokuci, e na i tekitekivu ni nomu veivula mo na dau uvuca na davui e na i soro kama kei na nomu soro kei na madrali ni veivinakati, ena dau veivakananumi vei iko e na mata ni nomu Kalou."

Na Biubiu Mai Saineai

11 Ia, ni sa yaco mai oqo ena i karuasagavulu ni siga e na i karua ni vula, e na i karua ni yabaki ena gauna e sa kau cake kina na o mai na vale ni Kalou kei na Vakadinadina. 12 E ra sa qai biubiu ka cavuta mai na Isireli mai na vanua liwa e Saineai me ra sa lako; sa qai toka sobu na o ena Vanua Liwa Parana. 13 E na i matai ni gauna e ra sa qai tekivu me ra lako yani me vaka sa vakarota vei ira o Jiova ena liga i Mosese. 14 Na i matai ni wasewase e na nodra tagede me tekivu mera lako yani sai ira na luvei Juta me vaka na nodra i tuvatuva ni mataivalu; e na nodra mataivalu oqo sa liu kina o Nasoni na luvei Amenatave. 15 Vei ira na mataivalu ni yavusa nodra na luvei Isikari oNicanieli na luvei Sua. 16 O ira na mataivalu ena yavusa ni luvei Sevuloni oiliave na luvei Eloni. 17 Sa qai kau sobu mai na vale ni Kalou;era sa qai lako mai na luvei Keresoni kei ira na luvei Merari ka ra sa cola yani na vale ni Kalou. 18 E ra sa tarava yani na i wasewase e na i tikotikoi Ruveni me vaka na nodra mataivalu; sa liutaki ira mai o Elisuri na luvei Setiuri. 19 Ia vei ira na mataivalu ni yavusa ni luvei Simione o Selumieli na luvei Surisatai. 20 O ira na mataivalu e na yavusa ni luvei Kata o Eliesava na luvei Tiueli. 21 Era sa qai lako mai na luvei Koaci, ka ra cola tiko na i yaya savasava.(E sa na vakarau tu na vale ni Kalou ni ra sa yaco mai.) 22 O ira na i wasewase ni nodra i tikotiko na luvei Efereimi era sa lako mai me vaka na nodra mataivalu; ka sa i liuliu vei ira o Elisama na luvei Amiute. 23 O ira na i wasewase ni mataivalu e na yavusa nodra na luvei Manasa o Kamelieli na luvei Petasuri. 24 O ira na mataivalu ni yavusa i Penijamini o Avitani na luvei Kitione. 25 Kei na i wasewase ni tagede vei ira na livei Tani (era yadrava na mua i muri ni veitikotiko kece) era sa lako mai me vaka na nodra mataivalu o Aiesa o Pagieli na luvei Enani. 26 Vei ira na lewe ni matavuvale ena yavusa ni luvei Aseri o Pagieli na luvei Okarani. 27 Vei ira na lewe ni mataivalu ena yavusa ni luvei Navitalai o Aira na luvei Enani. 28 Sai koya oqo na kena tuvani na nodra i lakolako na Isireli, me vaka na nodra veimataivalu, ni sa tekivu me ra cavutu ena nodra i lakolako. 29 Sa qai vosa o Mosese vei Opapi na luvei Riueli na kai Mitiani, na vugoi Mosese, ka vaka: "Keimami sa lako tiko oqo kina vanua e vosa kina na Kalou, 'Au na solia vei iko'. Mo lako vata kei keimami, keimami na maroroi iko vinaka; ni o Jiova e sa yalataka na veika vinaka e Isireli." 30 Sa qai tukuna vei koya, "Au na sega ni lako, ia au sa na lako ga kina noqu vanua vei ra na kai noqu." 31 Sa qai tukuna o Mosese, "Yalovinaka mo kakua ni lako me vaka ni o sa kila ni dodonu me keimami mai tiko ena Vanua Liwa, o iko e rawa ni o na yadravi keimami. 32 "Ia, kevaka e mani yaco mo lako vata kei keimami—au kila ni na vakakina—ia na ka vinaka cava ga e na cakava vei keimami o Jiova, keimami na cakava vaka talega kina vei iko." 33 Era sa qai cavutu me ra biubiu mai na ulunivanua i Jiova ka lako yani me siga tolu na nodra i lakolako, ia na kato ni veiyalayalati i Jiova sa liu tiko vei ira e na siga tolu o ya, me vakasaqara e dua na vanua me ra vakacegu kina. 34 Ia, na duru o i Jiova e sa vakaruguti ira toka ena siga ni ra sa lako tani mai na nodra i tikotiko. 35 Sa mani yaco, ni sa lako mai na Kato, sa tukuna o Mosese; "Ni tucake, Jiova! Me ra dui veiseyaki na Nomuni meca, Kei ira era cati Kemuni me ra dro e Matamuni." 36 Ia, ni sa mai vakacegu, sa tukuna: "Ni lesu mai, I Jiova, Kivei ira na veiudolu e Isireli."

Na Kedra I Wiliwili 11

Era Sa Vosa Kudrukudru Na Tamata

1 E ra sa vosa kudrukudru na tamata, sa sega ni marautaka na Kalou; ni sa rogoca o Jiova na ka o ya, sa qai tubu mai na Nona cudru. Ia na bukawaqa i Jiova sa waqa voli vei ira, ka vakamai ira ka kani ira eso e na i bili ni nodra i tikotiko. 2 Era sa qai tagici Mosese na tamata, ia, ni sa masu o Mosese vei Jiova sa boko sara kina na bukawaqa. 3 Sa mani vakayacana na vanua o ya me o Tapera ni sa kama voli e na kedra maliwa na bukawaqa i Jiova. 4 Ia o ira na lewe vuqa era tiko veiwaki kei ira era sa tagi vakadomoi levu; era sa qai tagi talega na Isireli ka tukuna: "O cei e na solia vei keimami na lewe ni manumanu me keimami kania? 5 "Keimami sa vakananuma na ika keimami a kania wale tu ga mai Ijipita, na kiukaba, meleni, na varasa kei na qaliki; 6 "Ia oqo sa mamaca mai na lomada; sa sega tale ni dua, ka sa tu ga oqo na mana e matada!" 7 Ia na mana sa vaka na sore ni koriada, na kena roka sa vaka na roka ni mataniciwa. 8 Era sa lako na tamata ka la'ki kumuna mai, ka qaqia e na kena qaqi vatu se ra mai tukilaka e na kena sedre, ka vakasaqara ena kuro, ka bulia kina e so na keke, ka sa yaco na kena i kanakana e sa vaka nai kanakana ni poreti caka vata kei na waiwai. 9 Ni sa lutu mai na tegu ki na nodra i tikotiko e na bogi, sa lutu vakatalega kina na mana e delana. 10 Ia, o Mosese e sa rogoci ira na tamata ni ra sa tagi lagalaga e na nodra vei matavuvale, ka ra sa mai duri tu e na mata ni nodra katuba; sa tubu vakaukauwa mai na cudru i Jiova; ia o Mosese e sega talega ni bau marautaka. 11 Sa qai vosa o Mosese vei Jiova, "Na cava o ni sa vakararawataka vakalevu kina na Nomuni tamata? Kei na cava au sa sega ni kune loloma kina e Matamuni, o ni sa vakataqara kina, ki na usouso ni domoqu na nodra leqa kece na tamata oqo? 12 "Au a kunekunetaki ira kece beka li na tamata oqo? Au a vakatuburi ira beka, mo ni tukuna kina vei au, 'Roqoti ira ena lomaseremu, me keveta tiko na luvena e dua na tamata;' ki na vanua o ni sa bubuluitaka vei ira na nodra qase? 13 "Au na kauta beka li mai vei na lewe ni manumanu me'u votai ira kina na tamata oqo? Ni ra sa tagi mai vei au, ka tukuna, 'Mo solia vei keimami na lewe ni manumanu, me keimami kania.' 14 "Esa sega ni rawa vei au me'u colata duadua ga na nodra leqa kece na tamata oqo, ni sa rui sivia na kena bibi na nodra i colacola vei au. 15 "Kevaka Mo ni sa cakava vei au vakaoqo, au kerea Mo ni vakamatei au eke ena gauna sara ga oqo — kevaka me'u kune loloma e Matamuni — ni kua ni vakatara me'u raica na noqu vakaleqai!"

O Ira Na Qase Lewe Vitusagavulu

16 Sa qai vosa o Jiova vei Mosese, "Mo vakasokumuni ira mai vei Au e lewe Vitusagavulu na Qase e Isireli, o ira o kila ni rai liuliu vei ira na tamata ka ra dau veiliutaki vei ira; mo kauti ira mai kina vale ni veitavaki, ka me ra na tu vata kei iko e ke ya. 17 "Ia Au na qai lako sobu mai ka veivosaki kei iko e keya, Au na qai taura na Yalo ka sa tiko vei iko ka vakatikora talega vei ira; era na qai colata vata kei iko na nodra i colacola na lewe vuqa, ka me rawa kina ni o kua ni colata duadua ga vakataki iko. 18 "Mo na qai tukuna vei ira na tamata, 'Ni vakasavasavataki kemuni e na siga ni mataka, o ni na qai kana lewe ni manumanu kina; ni o ni a tagi, ena vuku ni vosa i Jiova ka vaka, "O cei e na solia vei keimami na lewe ni manumanu me keimami kania? Ni keimami a dau kania mai Ijipita." O koya oqo ena solia kina o Jiova na lewe ni manumanu mo ni kania. 19 'O ni na kana tiko, sega walega ni dua na siga, se rua na siga, se lima na siga, se tini na siga, se mani ruasagavulu sara na siga, 20 'Ia ena dua taucoko na vula, me yacova ni ra sa curu mai ena qara ni ucumuni me yacova sara ni sa velavela se vakasisila vei kemuni, ni o ni a beci Jiova ni sa tiko vata kei kemuni, ka tagi e matana, ka tukuna, "Na cava e da a lako tani mai kina e na vanua o Ijipita?"'" 21 Sa qai vosa o Mosese ka tukuna, "Na levu ni tamata au sa tiko maliwai ira oqo e rauta ni ra lewe ono na drau na udolu na tamata e ra taubale e yavadra; ia Koni a tukuna, 'Au na solia vei ira na lewe ni manumanu, me ra na kania tiko ka rauta taucoko ni vuladua.' 22 "Me ra na vakamatei beka na qele ni manumanu vei ira, me rawa ni rauti ira? Se o ira na ika mai waitui me ra kumuni vata mai me kedra, me rawa ni veiraurau vei ira?" 23 Sa qai vosa o Jiova vei Mosese, "E lekaleka beka na liga i Jiova? Ia, o na raica oqo na veika Au a vosa kina vei iko e na yaco beka vei iko se sega." 24 Sa qai curu yani i tuba o Mosese ka tukuna vei ira na tamata na vosa ni Kalou, ka sa qai la'ki vakasokumuni ira mai na nodra qase na tamata ka vakatikori ira me ra wavokita na vale ni Kalou. 25 Sa qai lako sobu mai o Jiova e na o, ka vosa vei koya, ka taura na Yalo sa tiko vua, ka vakatikora talega vei ira na lewe vitusagavulu na qase; sa qai yaco ni sa mai tiko na Yalo oqo vei ira, era sa tekivu me parofisai, ia era sega ga ni vakaruataka. 26 A rau sa tiko ga e lewe rua na turaga e na nodra i tikotiko; a sa yacana e dua o Elitati, ka yacana tale e dua o Metati. A sa yaco talega vei ira e ra a volai, ia, e rau se bera ga ni lako yani kina vale ni Kalou; ka rau sa parofisai ga e na nodra i tikotiko. 27 A sa cici yani e dua na cauravou ka la'ki tukuna vei Mosese, ka vaka: "O Elitati kei Metati e rau sa parofisai tiko e na loma ni nodrau I tikotiko." 28 Ia, o Josua na luvei Nani, nai vukevuke I Mosese, e dua vei ira na nona tamata digitaki, e sauma mai ka vaka; "O Mosese na noqu turaga, e tarovi rau!" 29 Sa qai tukuna vua o Mosese, "O sa rui lomakatakata beka e na vukuqu? Isa, me ra sa parofita kece mada ga na tamata i Jiova ka me rawa kina vei Koya me solia vei ira na Yalona!" 30 A sa qai suka tale o Mosese kina nodra i tikotiko, o koya vata kei ira na qase e Isireli.

O Jiova, Sa Vakatala Mai Na Toa

31 Sa qai vakaliwava mai o Jiova e dua na cagi, ka vakauti ira mai na toa kila mai na waitui ka ra mai cakurobaroba tu volekata na nodra i tikotiko, me vaka na yawa ni lakolako e na dua na siga ena yasana oqo ka vaka talega kina na yasana ka dua, me wavokita na nodra i tikotiko, ka rauta ni rua na kiupiti mai na dela ni qele. 32 Ia, o ira na tamata e ra sa tu ena siga taucoko o ya, kei na bogi talega, e na siga taucoko ka tarava, me ra vakasokumuni ira vata na toa (o koya e kumuna e lailai e kumuna rawa e tini na omeri); ka ra sa tevuki ira yani vakararaba me kedra e na veiyasana ka volita na nodra i tikotiko. 33 Ia, ni ra se covuta tikoga na lewe ni toa e batidra, ni bera ni ra mama, sa tubu mai na cudru i Jiova ena vukudra, a sa vakayacora vei ira na Kalou e dua na mate levu sara. 34 Sa mani vakayacana kina o koya na vanua o ya me o Kipiroci Ataeva, baleta e keya era a buluti kina na tamata era soli ira kina kusikusima. 35 Mai Kipiroci Ataeva era sa lako yani na tamata ki Eseroci ka ra sa la'ki vakaitikotiko mai kina.

Na Kedra I Wiliwili 12

Nodrau Vakaduduile O Eroni Kei Miriama

1 E rau sa qai vosavakacacataki Mosese o Miriama kei Eroni e na vuku ni nona vakawatitaka e dua na yalewa ni Iciopea, ni rau vakawati kei na yalewa ni Iciopea oqo. 2 E rau sa qai tukuna, "Sa vosa duadua beka ga na Kalou vei Mosese? E sega beka ni vosa talega vei keirau?" Sa rogoca o Jiova na veika oqo. 3 (Ia, o Mosese sa tamata yalomalumalumu, vei ira kece na tamata era bula tiko e vuravura). 4 Vakasauri sa vosa o Jiova vei Mosese, Eroni, kei Miriama, "Dou curu mai tuba, oi kemudou na lewe tolu, kina vale ni veitavaki!" E ratou sa curu sara mai na lewe tolu oqo. 5 Sa qai lako sobu mai o Jiova e na duru o ka mai tucake tu ena mata ni katuba ni vale ni Kalou, ka kacivi rau sara o Eroni kei Miriama. E rau sa lako sara mai, 6 Sa vosa o Koya ka vaka; "Drau rogoca na Noqu vosa oqo; Kevaka sa tiko e dua na parofita ena kemudou maliwa, oi Au o Jiova Au na vakatakilai Au vei koya e na raivotu; Au na vosa vua e na tadra, 7 E sega ni vakakina vua na Noqu tamata o Mosese, o koya e yalodina e na Noqu vale taucoko. 8 Au vosa vua ni keirau veirai mata, ena matanavotu, ka sega ga ena vanua buto; Ka sa raica o koya na i yaloyalo ni Kalou. Drau sa sega beka ni rere ena nomudrau vosataka vakaca na Noqu tamata o Mosese?" 9 Sa lako mai na cudru i Jiova vei rau, ka sa mani lako yani o Koya. 10 E na gauna sa tekivu me cavutu na o mai na dela ni vale ni Kalou, sa kabiti Miriama vakasauri na vukavuka, sa vulavula me vaka na wai cevata vulavula. Ni sa vuki yani o Eroni me raici Miriama, sa raici koya, ni sa tauvi vukavuka tu. 11 Sa qai vosa o Eroni vei Mosese, "Isa, noqu turaga! Au kerea vakabibi me kakua ni yaco vei keirau nai valavala ca oqo, o koya keirau sa rui sesewa kina ka keirau sai valavala ca talega kina. 12 "Au kerea me kua ni vaka e dua sa mate o koya, ni sa vakacacani tu mai vakaveimama na yagona e na nona sucu mai na kete i tinana! 13 Sa qai tagi vei Jiova o Mosese, ka tukuna, "Au kerea mo ni vakabulai koya, Na Kalou, ni'u sa masuti Kemuni!" 14 Sa qai vosa o Jiova vei Mosese, "Kevaka me ya kasivita na matana o tamana, e na sega li ni madua kina o koya, me vitu na siga? Me sogolati laivi mada mai na i tikotiko me vitu na siga, ni oti o ya me na qai ciqomi tale o koya." 15 Sa mani sogolati sara o Miriama mai na nodra i tikotiko me vitu na siga, e ra sa sega ni cavuta yani, na tamata me yacova ni sa kau lesu tale mai o Miriama. 16 Ni oti oqo era sa lako mai Eseroci na tamata ka mai tiko e na Vanua Liwa e Parana.

Na Kedra I Wiliwili 13

Era Sa Talai Na Yamata Ki Kenani

1 Sa vosa o Jiova vei Mosese, ka tukuna, 2 "Mo tala yani e so na tamata me ra la'ki raica ka vakadikeva mai na vanua o Kenani, Au sa solia oti tu vei ira na Isireli; mai na veiyavusa ni nodra qase me digitaki mai e dua, o ira era i liuliu ena kedra maliwa." 3 Sa talai ira yani o Mosese mai na Vanua Liwa e Parana me vaka sa vakarota o Jiova, o ira kece oqo erai liuliu mai vei ira na Isireli. 4 Sai koya oqo na yacadra; mai na yavusa i Rupeni, o Samua na luvei Sakuri; 5 Mai na yavusa i Simione, o Safati na luvei Ori; 6 Mai na yavusa i Juta, o Kelepi na luvei Jifune; 7 Mai na yavusa i Isakari, o Igali na luvei Joseva; 8 Mai na yavusa i Ifereimi, o Osea na luvei Nuni; 9 Mai na yavusa i Penijamini, o Palati na luvei Rafu; 10 Mai na yavusa i Sevuloni, o Gadieli na luvei Sodi; 11 Mai na yavusa i Joseva, ka cavutu mai na yavusa i Manasa, o Gadi na luvei Susi; 12 Mai na yavusa i Tani o Amieli na luvei Kemali; 13 Mai na yavusa i A seri, o Seturi na luvei Maikeli; 14 Mai na yavusa i Navitalai, o Nabi na luvei Vofisi; 15 Mai na yavusa i Kata, Geueli na luvei Maki. 16 Sai koya oqo na yacadra na tagane ka talai ira yani o Mosese me ra la'ki vakadikeva mai na vanua. Ia, o Mosese sa vakatokai Osea na luvei Nani, me o Josua. 17 Sa qai talai ira yani o Mosese me ra la'ki vakadikeva mai na vanua o Kenani, ka tukuna vei ira, "Mo ni muri cake ena Ceva ka cabe cake kina veiulunivanua, 18 "Ka raica se vakacava sara tu na vanua; o ira na tamata era tawana tiko era tamata kaukauwa se ra malumalumu, era lewe levu se ra lewe lailai; 19 "Na vanua era taukena e vanua vinaka se vanua ca: kei na veikoro era tiko kina e vaka na i tikotiko se ra vanua ni valu; 20 "Na qele e qele bulabula se qele matemate ka vakatalega kina na veivunikau e tu se sega. Mo dou kaukauwa ka qaqa. Ka mo dou kauta talega mai e so na vua ni kau ni vanua." Oqo e donuya tiko na vula i matua ni vua ni vaini. 21 Era sa qai lako cake me ra vakaraica yani e na vanua mai na Vanua Liwa e Sini me yaco sara i Reopi, volekata na i curucuru i Amaci. 22 Era sa qai muria cake na Ceva ni vanua ka ra yaco sara I Epironi; Aimani, Sesai, kei Talimai, era tiko e keya na luvei Anaki. (Ia o Epironi oqo ea tara sara e liu e na loma ni vitu na yabaki ni bera o Soani e Ijipita.) 23 Era sa yaco sara kina Buca o Esikoli, ka ra mani taya sara e dua nai soso vua ni vaini; era sa mani vakaivuataka yani e na dua na kau. Era sa kauta talega mai e so na pomekaraneti kei na vua ni lolo. 24 Sa vakatokai na vanua o ya me Buca o Esikoli baleta nai soso vua ni kau era a taya sobu e keya na Isireli. 25 Era sa qai lesu mai ni mai cava na nodra vakadikeva na vanua ni oti e vasagavulu na siga. 26 Ni oti oqo, era sa qai cavutu ka lesu tale mai vei Mosese kei Eroni kei ira kece nai vavakoso ni Isireli ena Vanua Liwa e Parana, mai Ketesa; era sa vakauta lesu mai nai tukutuku kivei ira nai vavakoso ka vakatakila vei ira na vuanikau ni vanua. 27 Ka ra sa qai tukutuku vei koya, ka vaka; "Keimami sa lako yani kina vanua o a talai keimami yani kina. E dina ni drodro tu kina na wai ni sucu kei na o ni, ka sa tu oqo na kena vua ni kau. 28 "Ia, o ira na tamata era taukena na vanua era tamata kaukauwa; na koro era vaka bai ka rui raba levu; ka keimami raici ira talega na luvei Anaki e keya. 29 "O ira na Amalekaiti era toka mai na Ceva; o ira na Itaiti, na Jepusaiti, kei na Amoraiti era tiko e veiulunivanua; o ira na kai Kenani e ra toka ena veibaravi kei na bati ni uciwai na Joritani." 30 Sa tukuna vei ira na tamata o Kelepi me ra tiko lo e na matai Mosese, ka vaka, "Me da lako cake ga vakadua me da laki taukena, ni sa rawarawa sara vei keda meda vakamalumalumutaka." 31 Ia, o ira na tamata era a lako cake vata kei koya era sa tukuna, "E sega ni rawa vei keda me da lako cake ka valuti ira na tamata oqo, baleta ni ra sa rui kaukauwa mai vei keda." 32 Era sa qai solia e dua nai tukutuku ca vei ira na luvei Isireli me baleta na vanua era a la'ki vakaraica mai, ka ra tukuna, "Na vanua keimami a la'ki vakaraica mai, era veikanikani mada ga na tiko kina, o ira li na tamata keimami raici ira e keya, era tamata bulicaki lelevu. 33 "Keimami raici ira talega e keya na tuwawa (o ira na luvei Anaki era kawa ni tuwawa); ka keimami sa vaka ga na vodre, oi keimami e matadra."

Na Kedra I Wiliwili 14

Era Sa Bese Ni Curumi Kenani Na Isireli

1 Era sa tabalaka cake na domodra e na tagi nai soqosoqo taucoko, ka ra sa luluvu na tamata e na bogi o ya. 2 Era sa qai vosa kudrukudru na isireli vei rau o Mosese kei Eroni, ka ra sa tukuna vei rau nai soqosoqo taucoko, "Kevaka walega me keimami mate e na vanua o Ijipita! Se me keimami mate e na vanua liwa oqo! 3 "Na cava e kauti keimami mai kina o Jiova kina vanua oqo me keimami mai mate e na seleiwau, ka ra mai vakacacani talega kina o ira na luvei keimami kei na dui wati keimami? E sega beka ni uasivi me keimami lesu tale ki Ijipita." 4 Era sa qai veitukutukunitaka, "Me da digitaka mada e dua na i liuliu ka lesu tale ki Ijipita." 5 E rau sa qai cuva vakatoboicu o Mosese kei Eroni e na matadra taucoko na Isireli. 6 Ia, oi rau o Josua na luvei Nuni kei Kelepi na luvei Jifune, e rau a tomani ira na la'ki vakaraica na vanua, e rau sa basuraka na nodrau i sulu; 7 Ke rau sa vosa sara vei ira kece na i vavakoso e Isireli, ka vaka: "Na vanua keimami a lako curuma me vaka dikeva mai, sa vanua vinaka dina. 8 "Kevaka sa rekitaki keda o Jiova, ena kauti keda yani o Koya ki na vanua o ya ka na solia vei keda, na vanua sa dave kina na wai ni sucu kei na oni.' 9 "Ia, mo ni kua ga ni talaidredre vua na Kalou se mo ni rerevaki ira na tamata ena vanua o ya, ni ra sa keda madrai ga; sa lako tani mai vei ira na nodra kaukauwa, ka sa tiko vata kei keda o Jiova. Ni kakua ni rerevaki ira." 10 Ia, o ira na i soqosoqo taucoko era sa tukuna me ra vakaviriki rau ena vatu. A sa rairai mai na i serau i Jiova kina vale ni veitavaki ena matadra taucoko na Isireli.

Sa Masulaki Ira Na Tamata o Mosese

11 Sa tukuna vei Mosese o Jiova: "Na cava na kena dede me ra vakacudrui Au tiko kina na tamata oqo? Na cava na kena dede me ra sega ni vakabauti Au tikoga kina? Mai na veivakatakilakila kece Au a sa cakava e na kedra maliwa? 12 "Au na yaviti ira e na mate lelevu Ka'u na vakuai ira, ia, Au na vaka matanitulevutaki iko, io, o na kaukauwa ka levu cake mai vei ira." 13 Sa vosa o Mosese vei Jiova, ka tukuna: "Era na rogoca na kai Ijipita e na Nomuni kaukauwa o ni a kauti ira cake mai kina na tamata oqo mai vei ira. 14 "Era na qai tukuna vei ira na i taukei ni vanua oqo. Era a sa rogoca oti ni o Kemuni, Jiova, o ni a maliwai ira mai na tamata oqo, oi Kemuni, Jiova, o ni a veirai mata kei na Nomuni o e ya vakaruguti ira, ka o ni a liutaki ira yani e na duru o ena siga kei na duru bukawaqa ena bogi. 15 "Ia, oqo kevaka Moni sa vakamatei ira me vaka era lewe dua ga, o ira na veimatanitu ka ra a sa rogoci Kemuni kei na Kemuni rogorogo era na tukuna, 16 'Baleta ni sa sega ni rawa vei Jiova me kauti ira yani na tamata oqo kina vanua e yalataka me solia vei ira, sa mai vakamatei ira kina ena Vanua liwa.' 17 "Ia oqo, au sa masu, me yaco na kaukauwa ni noqu Kalou me qaqa, me vaka o Kemuni sa tukuna oti, ka vaka, 18 'Sa dauvosota vakadede o Jiova ka Sinai e na loloma, sa dauvosota na caka cala kei na i valavala ca; ia, o ni na sega ga ni dau vakatara me kua ni cudruvi na i valavala ca, ka cudruvaka na nodra caka ca na qase vei ira na luvedra me yacova nai katolu kei na i ka va ni tabatamata.' 19 "Mo ni kakua mada ni sauma na nodra caka ca na tamata oqo. Au sa masu, me vaka na kena levu ni Nomuni yalololoma, ni Kemuni sa vosoti ira na tamata oqo, me tekivu mai Ijipita ka yacova mai oqo." 20 Sa qai tukuna o Jiova: "Au sa na sega ni sauma vei ira, me vaka na nomu vosa; 21 "Ia, me vaka Au sa bula, e na sinai o vuravura e na i serau i Jiova - 22 "Baleta ni o ira kece na tamata oqo era sa raica oti na Noqu i serau kei na i vakatakilakila e so Au a cakava mai Ijipita kei na vanua liwa, ka ra sa vakatovolei Au vaka ca ga ka sa tini mai oqo na gauna, ka ra sega ni rogoca na Domoqu, 23 "Era sa na sega vakaidina ga ni raica na vanua Au a bubului kina vei ira nodra qase ka vakatalega kina vei ira era a sega ni ciqomi Au era sega talega ni raica. 24 "Ia o Kelepi ga na Noqu tamata, baleta ni sa tiko vua na yalo e dua tani ka sa muri Au dina sara ga, Au sa na kauta kina vanua sa gole kina, ia o ira na nona kawa era na taukena. 25 "Ia o ira na Amalekaiti kei ira na Kenaiti era sa vakoro e na buca; e na mataka mo ni vuki ka lako yani kina vanua liwa e na gaunisala kina Wasa Damudamu."

Totogi Mate Vei Ira Na Dauveisaqasaqa

26 A sa vosa o Jiova vei Mosese kei Eroni ka vaka, 27 "A cava na kena dede me'u vosoti ira tiko nai soqosoqo ni tamata ca ka ra sa veisaqasaqa tikoga vei Au? Au sa rogoca na nodra vosa kudrukudru era cakava tiko na Isireli vei Au. 28 "Tukuna vei ira, 'Me vaka Au sa bula,' sa tukuna o Jiova, 'Me vaka na ka o ni sa vosataka, Au sa rogoca tu, Au sa na cakava vei kemuni: 29 'Na nomuni yago ni mate na dau vosa kudrukudru vei Au, sa na biu tu e na vanua liwa oqo, oi kemuni taucoko o ni a sa wiliki mai na kemuni i wiliwili kece, mai na yabaki ruasagavulu ka lako cake. 30 'Sa rau na vakavo ga o Kelepi na luvei Jifune kei Josua na luvei Nuni, o ni na sega vakadua ni butuka na vanua Au sa vosa bubului oti kina mo ni taukena. 31 'Ia, o ira na luvemuni lalai, o ira o ni a tukuna ni ra na vakaleqai, Au na kauti ira mai, era sa na qai kila na vanua o ni a beca. 32 'Ia, oi kemuni, kei na nomuni yago ni mate era na bale e na vanua liwa. 33 'O ira na luvemudou era na dau vakatawa sipi voli e na vanua liwa me rauta ni vasagavulu na yabaki ka ra na tauca na i sau ni nomudou sega ni yalodina, me yacova ni sa bale na yagomudou e na vanua liwa. 34 'Me vaka na i wiliwili ni siga dou a la'ki vakaraica kina vanua, vasagavulu na siga, e na veisiga yadudua e na beitaki tu na yalomudou me dua na yabaki, ka vakatokai e vasagavulu na yabaki, dou na qai kila kina na Noqu a besetaki kemudou. 35 'Oi Au o Jiova Au sa vosataka na veika oqo. Au na vakayacora vakaidina sara na veika oqo kivei ira na i vavakoso ca oqo era vakasokumuni tiko me ra veisaqasaqa kei Au. E na vanua liwa oqo era na vaqeavutaki, ka ra na mate talega kina.'" 36 Ia, o iratou na tamata ka a talai iratou o Mosese me ratou la'ki vakaraica na vanua, e ratou mai vakavuna talega na nodra vosa kudrukudru na i vavakoso me baleti koya e na nodratou a vakauta mai na i tukutuku ca me baleta na vanua, 37 O iratou sara ga na tamata ca oqo ka ratou kauta mai na i tukutuku ca baleta na vanua, e ratou sa mate e na mate ca e na mata i Jiova. 38 Oi rau ga o Josua na luvei Nuni kei Kelevi na luvei Jefune e rau sa vakabulai, mai vei ira kece na tamata e ra a la'ki vakaraica vuni na vanua. Sa Sega Ni Yaco Na Sasaga Ni Kaba Vakaivalu 39 Sa qai vosataka na veivosa oqo o Mosese vei ira na Isireli, e ra sa qai tagi vakalevu sara kina na tamata. 40 Era sa mani yadra sara kina vakamatakalailai ka ra cabeta cake yani na ulunivanua ka ra tukuna; "Eda sa yaco mai oqo, eda na cabe cake sara kina vanua sa yalataka vei keda o Jiova, ni da sa i valavala ca!" 41 Sa qai tukuna o Mosese, "Ena vuku ni cava o ni sa rui voroka kina nai vakaro i Jiova? Ni na sega ni yaco rawa na veika oqo. 42 "Mo ni kakua ni lako cake, de o ni na qai vakadrukai mai vei ira na nomuni meca ni sa sega ni tiko vata kei kemuni o Jiova. 43 "Ni ra sa tiko e matamuni oqori na Amalekaiti kei ira na kai Kenani, o ni na bale dina e na i seleiwau; baleta ni o ni sa vakanadakuya na Kalou, e na sega ni tiko kina kei kemuni o Jiova." 44 Ia, era sa doudou ga me lako cake kina ulunivanua, ia, o Mosese kei na kato ni veiyalayalati i Jiova e rau sa sega ni biuta na nodra i tikotiko. 45 E rau sa qai siro sobu mai na Amalekaiti kei na Kenanaiti ka rau vaitikotiko e na ulunivanua o ya ka valuti ira, ka cemuri ira me yaco sara i Oma.

Na Kedra I Wiliwili 15

Na Lawa Ni Madrali Laukana Kei Na Ka E Liviraki

1 Sa qai vosa o Jiova vei Mosese, ka tukuna, 2 "Mo vosa vei ia na Isireli, ka tukuna vei ira: 'Ni o ni sa yaco mai kina vanua mo ni taukena sara, Ni'u sa solia vei Kemuni, 3 'Mo dou qai cabora sara e dua na i madrali e na bukawaqa vei Jiova, me dua na i soro kama sei madrali, me vakayacori kina e dua na vosa ni bubului, se na i soro ni yalovinaka, se na nomudou kanavata e so sa lokuci, ka mo dou cakava kina e dua na ka boi vinaka vua na Kalou, mai na nomudou qele ni manumanu, 4 'Me qai kauta mai o koya sa vakacabora na nona i madrali vei Jiova me i madrali e laukana ka rauta ni dua na i katini na i vakarau ni valawa matailalai sara ka me veiwaki vata kei na dua nai ka va na paidi waiwai; 5 'Ka dua nai ka va ni waini mei madrali liviraki, mo qai vakarautaka vata kei na i soro kama se na i soro me yadua na lami. 6 'Se na sipi tagane mo qai vakarautaka me i madrali laukana e rua nai katini na i vakarau ni valawa matailalai ka me veiwaki vata kei na dua nai katolu na paidi na waiwai; 7 'Ia, na i madrali sa liviraki mo qai vakacabora e dua na i katolu na paidi na waini me ka e boivinaka vua na Kalou. 8 'Ni o sa vakarautaka e dua na bulumakau gone mei soro kama, se mai madrali me vakayacori kina e dua na bubului, se mei soro ni veivinakati vei Jiova, 9 'Me na qai vakacabori vata kei na bulumakau gone na i madrali laukana e rauta ni tolu na i katini na i vakarau ni valawa matailalai veiwaki vata kei na dua veimama na paidi waiwai; 10 'Mo na qai kauta mai me vaka e sai madrali liviraki e veimama na paidi waini mei madrali e cabori e na bukawaqa me ka e boivinaka vei Jiova. 11 'Oqo na ka me caka yadua vei ira na bulumakau gone, na vei sipi tagane, se na vei lami se na me gone. 12 'Me vaka nai wiliwili kece ni ka o sa vakarautaka, mo na cakava yadua sara ga vei ira me vaka na kedra veiwiliwili. 13 'O ira kece ga era sucu i taukei era na vakayacori ena kena i valavala vakaoqo, e na nodra cabora e dua na i madrali, me ka e boivinaka vua na Kalou. 14 'Kevaka e tiko vei kemudou e dua na tamata vulagi, se o cei ga e tiko maliwai kemudou e na nomudou veitabatamata kece, ka qai vakacabora e dua na i madrali ena bukawaqa, me ka e boivinaka vei Jiova, me vaka dou dau cakava, me qai vakayacora o koya. 15 'Me dua na veiyalayalati me nomudou e na veisoqosoqo kei koya na vulagi e tiko maliwai kemudou, e na veiyalayalati kecega; me vaka sara ga o kemudou, e ra na vaka talega kina na vulagi e na matai Jiova. 16 'Me dua na lawa kei na dua na i tovo vakavanua me nomudou ka vaka talega kina na vulagi e tiko maliwai kemudou.'" 17 Sa qai vosa tale na Kalou vei Mosese, ka vaka, 18 "Mo vosa vei ira na Isireli, ka tukuna vei ira: 'Ni o ni sa lako mai kina vanua Au sa kauti kemuni kina, 19 'E sa na vakaoqo, e na gauna o ni sa kania kina na madrai ni vanua, mo dou na qai vakacabora e dua nai madrali e lavelaveti vei Jiova. 20 'Dou na qai vakacabora e dua na keke mai na i sevu ni kakana e na qele mei soro e lavelaveti; mei soro e lavelaveti e na rara ni buturaki sila, mo dou qai vakacabora cake. 21 'E nai sevu ni kakana e tubu e na qele mo dou qai vakacabora vei Jiova e dua na i soro e lavelaveti e na nomudou veitabatamata kecega.

Na Lawa Me Baleta Nai Valavala Ca E Sega Ni Nakiti

22 'Kevaka e sega ni nakiti na nomudoui valavala ca, ka sega ni vakayacora na i veivakaro sa vosa kina o Jiova vei Mosese. 23 'Na veika kece sa vakarota o Jiova e na liga i Mosese, me tekivu mai na siga e a soli i vakaro kina o Jiova kei na veisiga veitaravi i liu ena nomudou veitabatamata kecega. 24 'Ia, e na qai vakaoqo, kevaka e sega ni bucini na kena caka, ni ra a sega ni kila nai vavakoso, me ra na qai vakacabora na lewe ni vavakoso, e dua na bulumakau gone me i soro kama, me boiboi vinaka vei Jiova, kei na i madrali e laukana kei na kena e liviraki, me vaka na veiyalayalati, ka me dua talega na luve ni me me i soro ni valavala ca. 25 'Me na qai ia na vakacaboi soro na bete me baleti ira taucoko na lewe ni vavakoso e Isireli, era na qai vosoti kina, baleta ni a sega ni bucini na kena vakayacori; era na kauta mai na nodra i madrali, nai madrali e na bukawaqa vei Jiova, kei na nodra i soro ni valavala ca kina mata i Jiova, me baleta nodra i valavala ca era a sega ni nakita. 26 'Era na qai vosoti kece kina na lewe ni vavakoso e Isireli kei ira na vulagi era tiko maliwai ira, baleta ni ra a cakava kece na tamata na ca o ya ka sega ni ra nakita mada e liu. 27 'Ia, kevaka e sai valavala ca e dua na tamata ka sega ni nakita, me qai kauta mai e dua na me yalewa ka se qai yabaki dua me i soro ni valavala ca. 28 'Me qai sorovaka na bete na tamata ka a sega ni nakita na nonai valavala ca, ni a sega ni nakita me caka ca e na mata i Jiova, me ia na vakacaboi soro e na vukuna; e na qai vosoti kina o koya. 29 'Me na dua ga na lawa me baleti koya e caka ca ka sega ni bucina, vei koya talega e sucu vakai taukei vei ira na Isireli kei koya talega na vulagi e mai tiko maliwai ira.

Na Lawa Me Baleta Nai Valavala Ca E Vakayacori Ena Vakanananu Cala

30 'Ia na tamata e cakava e dua na ka e na i valavala kaukauwa, se sucu i taukei se vulagi, na tamata o ya e na kauta mai na madua e na mata i Jiova, ka sa na biu laivi o koya mai vei ira na kai nona. 31 'Ni a sega ni vakarokorokotaka na vosa i Jiova, ka voroka na Nonai Vakaro, e na tamusuki laivi sara ga vakadua na tamata o ya, ia, na beitaki ni yalona e sa na tu ga vua.'"

Nai Totogi Ni Kena Vakacacani Na Siga Ni Vakacecegu

32 Ia, ni ra sa tiko na Isireli e na loma ni Vanua Liwa, era sa kunea e dua na tamata e caka buka tiko e na Siga ni Vakacecegu. 33 Era sa qai kauti koya mai sa caka buka tiko kivei Mosese kei Eroni, kei ira talega na lewe ni vavakoso. 34 Era sa qai mai yadravi koya tiko, baleta ni se bera ni vakamacalataki rawa na ka me na qai caka vei koya. 35 Sa qai vosa o Jiova vei Mosese, "E sa na vakamatei vakaidina na tamata oqori; ka me ra na vakaviriki koya e na vatu o ira na lewe ni vavakoso e nai bili ni nodra i tikotiko." 36 Ia, me vaka sa vakarota o Jiova vei Mosese, era sa qai kauti koya mai kina i bili ni koro ka vakaviriki koya e na vatu, ka mani mate sara kina.

Nai Ukuuku Ni I Sulu

37 Sa qai vosa tale na Kalou vei Mosese, ka vaka, 38 "Mo vosa vei ira na Isireli: Ka tukuna vei ira me ra cula ena bele ni nodra i sulu na i ukuuku e so ena nodra vei tabatamata kece, ka me ra cula toka e dua na i vau karakarawa e na tutu ni nodra i ukuuku ni i sulu. 39 "Mo na qai taura na i ukuuku ni i sulu, e na gauna o sa na raica kina, o na qai vakananuma na i vakaro taucokoi Jiova ka mo na cakava, mo kakua kina ni vakamuria na i valavala ni dautagane ka dau veivakacalai e na yalomu kei na matamu, 40 "Ka me rawa ni o vakananuma ka cakava taucoko na Noqu i Vakaro, ka mo bula savasava vua na nomu Kalou. 41 "Oi Au o Jiova na nomu Kalou, ka a kauti iko tani mai na vanua o Ijipita, Me'u nomu Kalou: Oi Au o Jiova na nomu Kalou."

Na Kedra I Wiliwili 16

Na Veivorati Vei Mosese Kei Eroni

1 Ia, o Kora na luvei Isari, na luvei Koaca, na luvei Livai, o Tacani kei Avirami na luvei Iliavi, kei Oni na luvei Peleci, ka luvei Rupeni, era sa kauti ira na tamata; 2 era sa qai tucake, me ra saqati Mosese kei na so tale vei ira na Isireli, e ra lewe rua na drau limasagavulu na i liuliu ni veivavakoso, ka ra dui matataka mai na i vavakoso, na tamata era kilai levu. 3 Era sa soqoni vata mera vorati Mosese kei Eroni, ka tukuna vei rau, "E sa rui sivia na ka o drau kumuna ki vei kemudrau, ni ra sa savasava tu na i vavakoso, o ira vakayadua, ka sa tiko vata kei ira o Jiova. Na cava drau sa rui vakalevulevui kemudrau kina mo drau cecere cake mai na i soqosoqo i Jiova?" 4 Ia ni sa rogoca o Mosese, sa cuva vakatoboicu e matana; 5 Ka sa vosa vei Kora kei ira taucoko na nona i lawalawa, ka vaka, "E na mataka ni mataka ena vakatakila o Jiova o cei soti e Nona kei cei e savasava, ka na vakayacori koya me toro voleka mai vei Koya. o koya sa digitaka o Koya e na vakayacora me toro voleka sara mai vei Koya. 6 "Dou cakava oqo: Dou taura e so na miqa ni ka boivinaka, o iko Kora kei ira kece na nomui lawalawa; 7 "Dou biuta e loma na bukawaqa kei na ka boivinaka e na mata i Jiova e na siga ni mataka, ka sa na qai yaco na tamata sa digitaka o Jiova e sa na savasava: Sa rui sivia na ka o ni taura vei kemuni, oi kemuni na Livai!" 8 Sa qai tukuna o Mosese vei Kora, "Dou rogoca oqo, oi kemudou na luvei Livai: 9 "E ka lailai beka vei kemudou ni o koya na Kalou nei Isireli e sa tawasei kemudou mai na i vavakoso e Isireli, me kauti kemudou vakavoleka mai vei Koya, mo dou mai veiqaravi e na vale ni Kalou, ka mo dou tu ena matadra na i vavakoso mo dou qaravi ira; 10 "Ia, sa kauti kemudou vakavoleka mai ki vei Koya, oi kemudou kei ira kece na wekamudou, o ira na luvei Livai, kei kemudou? o dou sa gadreva tale tiko beka ga na i tutu vaka Livai? 11 "Sa kena i balebale o ya ni o iko kei ira na nomu i tokani o ni sa soqoni vata mo ni veivala kei Jiova, o cei beka o Eroni, mo ni vosa kudrukudrutaki koya?" 12 Sa qai talatala o Mosese me rau kacivi mai o Tacani kei Avirami e rau luvei Iliavi, ka rau tukuna, "E rau sa na sega ni lako mai! 13 "E ka lailai beka oqo e na nomu sa kauti keimami cake tani mai na vanua e dave kina na wai ni sucu kei na o ni, mo mai vakamatei keimami kina e na vanua liwa oqo, ka mo sa qai cecere tu vei keimami me vaka e dua na ravouvou? 14 "E se sega mada ga ni o kauti keimami kina vanua e dave kina na wai ni sucu kei na o ni, se mo bau solia vei keimami e so nai votavota ni vanua se na veiwere ni vaini, o na leuta laivi beka na yaloka ni matadra na tamata oqo? Keimami na sega ga ni lako cake!" 15 Sa cudru vakalevu o Mosese, ka mani tukuna vei Jiova, "Mo ni kakua ni doka na nodra i madrali, Au se sega ni bau taura mai vei ira e dua na asa, se me'u bau vakacacana e dua vei ira." 16 Sa qai tukuna o Mosese vei Kora, "E na mataka, o iko kei ira kece na nomu i lawalawa mo ni mai tu e na matai Jiova – o iko kei ira, ka vaka talega kina o Eroni. 17 "Ia me ra kauta yadua na dui nodra miqa na tamata yadua ka biuta kina na ka boivinaka, ka mo ni dui kauta yadua mai na nomuni miqa kina matai Jiova, e rua na drau limasagavulu na miqa; o iko vata kei Eroni, kei na nomudrau dui miqa." 18 Era sa qai kauta yadua na tamata na nodra dui miqa, ka biuta e loma na bukawaqa, ka viritaka kina na ka boi vinaka, ka ra mai tucake tu ena mata ni katuba ni vale ni veitavaki kei rau o Mosese kei Eroni. 19 Ia o Kora sa vakasoqoni ira vata na i vavakosome vosoti rau e na katuba ni vale ni veitavaki; A sa basika mai na i serau i Jiova kivei ira na lewe ni vavakoso kece. 20 Sa qai vosa o Jiova vei Mosese kei Eroni, ka vaka, 21 "Mo drau tawasei kemudrau tani mai vei ira na i vavakoso oqo, me rawa ni'u vakarusai ira walega oqo." 22 A rau sa qai cuva vakatoboicu, ka tukuna, "Oi kemuni na Kalou, o ni sa Kalou ni yalo ni tamata kecega, e na i valavala ca beka e dua na tamata, ka Mo ni qai cudruvi ira e dua na i vavakoso tamata?" 23 Sa qai vosa o Jiova vei Mosese, ka vaka, 24 "Mo vosa vei ira nai vavakoso, ka tukuna, 'Dou lako tani mai na nodra i tikotiko na i lawalawa I Kora, i Tacani, kei Avirami.'" 25 Sa tucake o Mosese ka lako vei Tacani kei Avirami, ka ra sa muri koya yani na qase e Isireli. 26 Sa qai vosa o koya vei ira na i vavakoso, ka vaka, "Mo dou sa tekivu biuta sara ga oqo na nodra i tikotiko na yavu tamata ca oqo! Dou kakua ni tara e dua na nodra i yaya, de dou na qai vakarusai vata kei na nodra i valavala ca." 27 Era sa qai biubiu mai na nodra i tikotiko na luvei Kora, i Tacani, kei Avirami; A rau sa qai curu mai tubu o Avirami kei Tacani ka mai tucake tu e na varada ni nodrau vale laca, kei na dui watidrau, kei na luvedrau, kei ira na luvedrau lalai. 28 Sa qai tukuna o Mosese: "E na vuku ni ka oqo, o ni na kila kina ni sa talai au o Jiova me'u cakava na cakacaka kece oqo, ni'u sa sega ni vakayacora e na noqu lewa ga. 29 "Kevaka era sa mate na tamata oqo me vaka sa mate na tamata kecega, se ra cudruvi me vaka era dau cudruvi na tamata kecega, sa qai sega ni talai au o Jiova. 30 "Ia, kevaka sa bulia o Jiova e dua na ka vou, ka sa dalaga na gusuna na vanua ka tilomi ira kece kei na nodra ka kecega, ka ra sa lutu bulabula yani kina loma ni bulubulu, dou na qai kila kina ni ra sa vakacudrui Jiova na tamata oqo." 31 Ia sa qai yaco, ni sa vosataka oti na vosa kecega oqo, sa qai kasei rua na vanua era tu kina, 32 Sa dalaga na gusuna na vanua ka tilomi ira kece kei na nodra veivuvale kei ira kece era a tiko vata kei Kora, kei na nodra i yaya kece. 33 O ira kei ira kece era tiko vata kei koya era sa lutu sobu bulabula kina loma ni qara, sa tasogo tale na vanua ka ra sa vakarusai mai vei ira na i soqosoqo. 34 Ia, o ira na Isireli era a tiko vakavolivolita na vanua o ya era sa veidroyaki e na nodra tagi, ka ra sa tukuna, "De na lakolako e na qai tilomi keda talega na vanua!" 35 Sa qai lako mai e dua na bukawaqa mai vei Jiova ka kani ira na lewe rua na drau limasagavulu na tamata era vakacabora tiko na ka boi vinaka. 36 Sa qai vosa o Jiova, vei Mosese, ka vaka: 37 "Mo vosa vei Iliesa, na luvei Eroni na bete, me kumuni ira mai na veimiqa mai na vanua era kama kina, ni ra sa ka savasava, ka kaburaki ira tani na buka vakayawa. 38 "Na nodra miqa na tamata oqo era sa vaka i valavalacataka na yalodra, ka me ra sa tukilaki me vaka na veleti mei ubi ni cabocabo ni soro. Baleta ni ra sa vakaraitaki ira e na mata i Jiova, ka ra sa na savasava kina; ka ra sa na i vakatakilakila tiko vei ira na Isireli." 39 Sa kauta o Iliesa na bete na miqa varasa, ka ra a mai vakaraitaka o ira era a sa vakamai, era sa mani tukilaki mei botani ni cabocabo ni soro, 40 Ka mei vakananumi tiko vei ira na Isireli ni sega ni dodonu vua e dua mai tautuba, ka sega ni kawa mai na vuvalei Eroni, e dodonu me toro mai me vakacabora na i soro e na mata i Jiova, me kakua kina ni vakataki Kora kei ira nona i lawalawa, me vaka na ka sa tukuna o Jiova vei koya ena vukui Mosese.

Nodra Vosa Kudrukudru Na Tamata

41 E na siga e tarava era sa vosa kudrukudrutaki rau o Mosese kei Eroni o ira na i vavakoso e Isireli ka vaka, "Drau sa vakamatei ira na tamata i Jiova." 42 Sa qai yaco, ni ra sa vosa kudrukudrutaki rau o Mosese kei Eroni na i vavakoso, era sa vuki yani me donuya na vale ni veitavaki; e vakasauri ka ni sa ubia yani na vale na o, ka sa basika mai nai serau i Jiova. 43 E rau sa qai lako mai o Mosese kei Eroni kina mata ni vale ni veitavaki. 44 Sa qai vosa o Jiova vei Mosese, ka tukuna, 45 "Drau lako tani mai e na kedra maliwa nai vavakoso oqo, ka me rawa ni'u vakarusai ira e na dua ga na gauna oqo." E rau sa qai cuva sara vakatoboicu. 46 Sa qai vosa o Mosese vei Eroni ka vaka, "Mo kauta e dua na miqa ni ka boi vinaka mo biuta kina na buka waqamai na i cabocabo ni soro, biuta tale ga kina na ka boi vinaka ka kauta vakatotolo sara vei ira na lewe ni vavakoso ka vakacabora na nodra i madrali; ni sa lako tani mai na cudru vei Jiova. Sa qai tekivu na vei mate ca eso." 47 Sa qai taura o Eroni me vaka sa vakarota o Mosese ka qai cici yani kina kedra maliwa na i soqosoqo; ka sa tekivu me vakayaco ka na mate ca ena kedra maliwa. Sa qai biuta kina na ka boi vinaka ka ia na vakacaboi soro e na vukudra na tamata. 48 Ka sa mai tucake tu ena kedra tadrua na mate kei na bula; ka sa tarovi sara kina na mate ca. 49 O ira kece era a mate e na mate ca era lewe tini ka va na udolu ka mani vitu na drau, ia era sa sega ni wili vata kei ira era mate e nai lawalawa i Kora. 50 Sa qai lesu tale o Eroni ki vei Mosese e na katuba ni vale ni veitavaki, ni sa qai mai oti na mate ca.

Na Kedra I Wiliwili 17

Sa Tubu Nai Titoko Nei Eroni

1 Sa qai vosa o Jiova vei Mosese, ka vaka: 2 "Mo vosa vei ira na Isireli, ka mo kauta mai vei ira e yadua na i titoko mai na nodra vei mataqali yadua, mai vei ira nodra i liuliu me vaka na veivuvale ni nodra qase — e tinikarua na i titoko. Mo vola na yaca ni tamata yadua e na nona i titoko. 3 "Ka mo vola na yaca i Eroni e na nodra i titoko na Livai. Me na dua na i titoko me baleti ira na i liuliu e na veivuvale ni nodra qase. 4 "Mo na qai vakatikori ira e na loma ni vale ni veitavaki e na mata ni kato ni Vakadinadina, na vanua Au na sota vata kina kei iko. 5 "Ia ena yaco ni na kubu mai na titoko ni tamata Au sa digitaka; ia Au na vakaotia me kua ni rogo tiko vei Au na nodra vosa kudrukudru na Isireli era didivaki kemudrau kina." 6 Sa qai vosa o Mosese vei ira na Isireli, ka ra sa mani solia o ira na nodra dui i liuliu na nodra dui titoko, na veiliuliu kece me vaka na veivuvale ni nodra qase, e tinikarua na i titoko, ka sa maliwai ira na i titoko i Eroni. 7 A sa mai vakatikora o Mosese na vei titoko kece e na matai Jiova e na loma ni vale ni vakadinadina. 8 Ia, ena siga ka tarava ni sa curu yani o Mosese kina loma ni vale ni vakadinadina, ka raica, na i titokoi Eroni mai vei ira na Livai e sa kubu tiko, ka seraka na sena, ka vuataka e so na amodi sa matua. 9 A sa kauti ira mai nai titoko kecega o Mosese mai na mata i Jiova kivei ira na Isireli; era sa raica, ka ra sa dui taura yadua na nodra dui titoko. 10 Sa qai tukuna o Jiova vei Mosese, "Mo kauta lesu tale mai na i titokoi Eroni kina na mata ni Vakadinadina, me maroroi mei vakatakilakila tiko vei ira na tamata era dau veivorati, mo muduka laivi kina vei Au na nodra dau didi, me ra kakua ni mate kina." 11 A sa cakava vakakina o Mosese: me vaka sara ga na ka sa vakaroti koya kina o Jiova, e sa cakava talega kina o koya. 12 Era sa qai vosa vei Mosese na Isireli, ka tukuna, "Raica keimami sa mate, keimami sa kawaboko, keimami sa kawaboko kecega! 13 "O ira kecega era sa toro voleka mai na vale ni Kalou era na mate. Keimami na mate kece beka li?"

Na Kedra I Wiliwili 18

Na Nodra I Tavi Na Bete Kei Na Livai

1 Sa qai vosa o Jiova vei Eroni; "o iko kei ira na luvemu kei na veivuvale ni nomu qase kei iko e sa na tauci vei kemudou na i valavala ca kecega e caka e na ka ni Vale Tabu, ia o iko vata kei ira na luvemu o dou na tarogi e na vuku ni cala sa caka e na nomudou cakacaka vakabete. 2 "Mo na qai kauti ira talega mai kei iko na wekamu e na mataqali i Livai, na mataqali i tamamu, me ra mai tomani iko ka veiqaravi kei iko, baleta ni o iko kei ira na luvemu era sa tiko kei iko e na mata ni vale ni vakadinadina. 3 "Ia, me ra na qarauna na cakacaka o sa lesia kei na ka e gadrevi ena Vale Tabu; ia, me ra kakua ga ni tosova mai na i yaya ni tikina tabu kei na i cabocabo ni soro, me ra kakua ga torova mai na i yaya ni tikina tabu kei na i cabocabo ni soro, me ra kakua kina ni mate – o ira kei iko talega. 4 "Me ra na mai veitomani kei iko ka qarava taucoko na veika era gadrevi e na loma ni vale ni veitavaki, e na cakacaka kece ni vale tabu; ia me kakua ni dua na tamata mai taudaku me torovi kemudou mai. 5 "Dou na qarava na i tavi e na vale tabu kei nai tavi e na i cabocabo ni soro, ka me sa tarovi kina na cudru vei ira na Isireli. 6 "Ka raica, oi Au vakai Au sa tauri ira na wekamu na Livai mai vei ira na Isireli; era sai solisoli vei iko, ka soli mai vei Jiova, me ra cakava na cakacaka ni vale ni veitavaki. 7 "O koya oqo o iko kei ira na luvemu kei iko mo dou qarava na nomudou cakacaka vakabete ena veika kece me baleta nai cabocabo ni soro kei na loma ni lati; dou na veiqaravi, Au solia vei kemudou na cakacaka vakabete me i solisoli ni veiqaravi, ia, o ira na tamata tani era toro voleka mai era na mate."

Nai Soro Me Ra Votai Kina Na Bete

8 Sa vosa o Jiova vei Eroni: "oi Au vakai Au sa solia talega vei iko na cakacaka ni Noqu i soro sa lavelaveti; kei na veisolisoli tabu kece mai vei ira na Isireli; Au sa solia oqo vei iko me nomu i votavota kei ira talega na luvemu, me veiyalayalati ka sega ni mudu. 9 "Era sa na nomu na veika tabu e ra maroroi mai na bukawaqa: na nodra i madrali kece, na i madrali laukana na i madrali kece ni valavala ca kei na i soro ni caka cala era sa solia vei Au, era sa na vakatabui me nomu kei ira na luvemu. 10 "E na tikina tabu sara mo dou qai kania kina; me ra kana talega na tagane yadua, ena yaco me ka e tabu ka savasava vei kemudou. 11 "Oqo talega na ka e nomudou: na nodra i solisoli ni i soro e lavelaveti, kei na i soro e yalovaki mai vei ira na Isireli; Au sa soli ira vei iko kei ira na luvemu tagane kei na yalewa kei iko, me veiyalayalati e sega ni mudu. o ira kecega era sa savasava ena nomudou loma ni vale me ra qai kania. 12 "Na vei tikina vinaka kece ni waiwai, na tikina uasivi ni waini kei na sore ni kau e laukana, na kedra vei sevu taucoko ni vuata ka ra a dau vakacabora vua na Kalou, Au sa solia vei iko. 13 "Na veivuata dreu vou taucoko ni vanua, ka ra dau kauta mai vei Jiova, era na kemudou talega. o ira kece sa savasava era lewe ni nomu vuvale era na vakaivotavota me ra kania. 14 "Na veika kece e vakatabui e Isireli e sa na nomudou. 15 "Kei na ka kecega era ulumatua ka ra vakayagodra, ka ra dau kauta mai vua na Kalou, se tamata se manumanu, era sa na nomudou; ia na ulumatua ga ni tamata mo dou voli ira, kei na ulumatua ni manumanu e sega ni savasava mo volia talega. 16 "Ia na ka sa voli oti, mai na veika e vaka tabui mo voli ira ni ra se qai vula dua tiko, me vaka na nomu vakarautaka, me lima na paudi na siliva, me vaka na paudi ni vale tabu, e rauta ni ruasagavulu na Kera. 17 "Ia na ulumatua ga ni bulumakau, na ulumatua ni sipi, se na ulumatua ni me dou na sega ni volia; ni ra sa savasava. Mo kaburaka kina i cabocabo ni soro na kedra dra, ka vakama na kedra uro me i madrali e vakamai e na bukawaqa me ka e boivinaka vei Jiova. 18 "Me ra kemudou kece na lewedra, kei na serena, ka dou na votai talega ena saga na i matau. 19 "Na i soro kecega e lavelaveti era savasava ka ra a vakacabora vei Jiova o ira na Isireli, Au sa solia vei iko kei ira talega na luvemu tagane kei na luvemu yalewa ka sa veiyalayalati sega ni mudu vei iko; e veiyalayalati ni masima e sega ni mudu vua na Kalou kei iko kei ira na nomu kawa vata kei iko." 20 Sa qai vosa o Jiova vei Eroni: "E na sega ni dua na nomu i votavota e na nodra vanua, se me na dua na tikina me nomu e na kedra maliwa; Au sa nomu i votavota ka nomu tikina ena kedra maliwa na luvei Isireli.

Nai Katini Me Ra Votai Kina Na Livai

21 "Mo dou raica, Ni'u sa solia vei ira na Livai na i katini taucoko e Isireli me nodra i votavota me saumi kina na cakacaka ni veiqaravi e na vale ni veitavaki. 22 "Ia me ra kakua ni torova mai na vale ni veitavaki na Isireli de ra na qai i valavala ca ka mate kina. 23 "O ira ga na Livai me ra qarava na cakacaka ni vale ni veitavaki, ka ra na colata na nodra i valavala ca; ia e nai vakananumi tu me sega ni mudu, ena nomudou veitabatamata kecega, ena kedra maliwa na Isireli e na sega ni dua na nodra i votavota. 24 "Nai katini mai vei ira na Isireli, ka ra a vakacabora cake me i soro e lavelaveti vei Jiova, Au sa solia vei ira na Livai me nodra i votavota; Ni'u sa tukuna oti vei ira, 'E na kedra maliwa na Isireli e na sega na nodra i votavota.'"

Na Nodra I Katini Na Livai

25 Sa qai vosa o Jiova vei Mosese, ka vaka, 26 "Mo vosa o iko vei ira na Livai, ka tukuna vei ira; 'Ni o ni sa taura mai vei ira na Isireli na i katini Au sa solia oti vei kemuni mai vei ira me nomuni votavota, mo ni qai vakacabora cake e dua na i soro e lavelaveti vei Jiova, na i katini ni kena i katini. 27 'Ia na nomuni i soro e lavelaveti me okati vei kemuni, me vaka sa sila mai na vara ni buturaki sila, kei na waini sa Sinai kina na i keli – waini. 28 'Mo dou na vakacabora talega e dua na i soro e lavelaveti vei Jiova mai na nomudou i katini kecega ka dou taura mai vei ira na Isireli, mo na qai solia vei Eroni na bete na i votavota i Jiova mai na i soro e lavelaveti o ya. 29 'Mai na nomudou i solisoli kecega mo dou na dau vakacabora cake vei Jiova na i soro e lavelaveti e dodonu me caka Vua, mai na kena e uasivi duadua, ia na tikina sa tabu.' 30 "Ia mo na qai tukuna vei ira; 'Ni dou sa laveta cake na tikina vinaka duadua, e na qai nanumi vei ira na Livai, me vaka sa sila mai na rara ni buturaki sila kei na waini mai nai keli – waini. 31 'Ena rawa ni dou kania e na dua ga na vanua, o iko kei ira na nomu lewe ni vale, ni sai koya oqori nai sau ni nomudou cakacaka e na vale ni veitavaki. 32 'Ia dou na sega ni cudruvi kina e na i valavala ca, ni dou sa laveta cake na tikina e vinaka duadua. Mo dou kakua ni vosa vakacacataka talega na nodra i solisoli savasava na Isireli, de dou na vakamatei vakaidina.'"

Na Kedra I Wiliwili 19

Na Lawa Ni Veivakasavasavataki

1 "Sa qai vosa o Jiova vei Mosese kei Eroni ka vaka; 2 "Sa i Koya oqo na i valavala ni vunau sa vakarota o Jiova, ka tukuna 'Mo vosa vei ira na Isireli, me ra kauta mai e dua na bulumakau gone e roka damudamu ka se sega talega ni vakataqari e domona e dua na i vua. 3 'Mo qai solia vei Iliesa na bete, me qai kauta o koya kina taudaku ni tikotiko, ka me qai vakamatei e matana; 4 'Me na qai taura o Iliesa na bete e so na tiki ni dra e na nona i qaqaloi liga, ka me qai kaburaka vakavitu e so na tiki ni dra o ya kina mata ni vale ni veitavaki. 5 'Ena vakamai e matana na bulumakau gone o ya; na kulina, na lewena, na kena dra, kei na kena gacagaca me qai vakamai. 6 'Me na qai taura na bete na kau sitari kei na isopi, e damudamu vinaka, ka biuta yani kina loma ni bukawaqa sa kama tiko kina na bulumakau. 7 'Ka me qai savata na nonai sulu na bete, me sisili talega e wai, ni oti o ya me qai lako mai kina loma ni tikotiko; ia e na sega ni savasava na bete ka yacova na yakavi. 8 'Ia o koya e vakama me qai savata na nona i sulu e wai, me sisili talega, ka me sega ni savasava tiko me yacova na yakavi. 9 'Na tamata sa savasava tiko me qai kumuna vata na dravusa ni bulumakau, ka vakotori ira tiko e na taudaku ni tikotiko e na dua na vanua savasava; ka me na maroroi tiko e na vukudra na i vavakoso e Isireli me baleta na wai ni veivakasavasavataki; oqo me veivakabokoci ni valavala ca. 10 'O koya ka kumuna vata na dravusa ni bulumakau me qai savata nona i sulu, ka me sega ni savasava tiko me yacova na yakavi. Oqo me i vakananumi tiko vei ira na Isireli me sega ni mudu vei ira talega na vulagi era tiko veimaliwai kei ira. 11 'O koya e tara na yago ni mate i dua tale, me sega ni savasava tiko ka siga vitu. 12 'Me qai vakasavasavataki koya e na wai e nai katolu ni siga kei na kena i kavitu ni siga; ka na yaco me savasava mai. Ia kevaka e sega ni vakasavasavataki koya e na i katolu ni siga se ena i kavitu ni sega ni savasava o koya. 13 'O cei ga e tara na yago ni tamata mate, ka sega ni vakasavasavataki Koya, sa vakadukadukalitaka na vale ni Kalou. E na tamusuki tani mai vei ira na Isireli na tamata o ya. E na sega tiko ni savasava o koya baleta ni sega ni kaburaki vua na wai ni veivakasavasavataki; ka se toka vinaka vua na nona dukadukali. 14 'Sa i koya oqo na lawa me baleta na tamata e mate e na loma ni vale laca; o ira kece era curu mai kina loma ni vale laca kei ira era tiko e loma era na sega tiko ni savasava ka siga vitu; 15 'Kei na bilo kecega sa dola tu, ka sega tu na kedra i sogo, e na sega talega ni savasava. 16 'O ira era tiko e tautuba kevaka era tara i koya na tamata e samuti e na i seleiwau se na tamata mate, se nai bulubulu, e na sega tiko ni savasava o koya me siga vitu. 17 'Ia me baleti koya na tamata e sega ni savasava me ra taura e so na dravusa ni bulumakau ka vakamai me veivakasavasavataki mai nai valavala ca, ka me qai vakadrodroi yani vei ira na wai dave e na loma ni dua na beseni. 18 'Na tamata e sa savasava me taura na isopi ka tonisua ki loma ni wai, ka kaburaka yani e vale laca, kei na veiyaya kecega, vei ira kece talega era tiko e keya, se o koya e tara na sui mate, o ira na mavoa, na mate, se na i bulubulu. 19 'Na tamata savasava me qai kaburaka vei ira era sega ni savasava e na i katolu kei nai kavitu ni siga me qai vakasavasavataki koya, savata nona i sulu, sisili e wai, ni sa yakavi mai e sa na qai savasava. 20 'Ia na tamata e sega ni savasava ka sega ni vakasavasavataki koya, e na tamusuki tani mai o koya mai na nodra i soqosoqo, baleta ni sa vakadukadukalitaka na vale ni Kalou. E se sega ni kaburaki vei koya na wai ni veivakasavasavataki; ka sa sega kina ni savasava o koya. 21 'Nai vakananumi oqo e na dau vakayacori tikoga vei ira. o koya e sa kaburaka na wai ni veivakasavasavataki e na sega tiko ni savasava me yacova na yakavi. 22 'Na ka kecega e tara o koya e sega ni savasava e sa na yaco me dukadukali; kei koya na tamata talega e tara e sa na yaco me dukadukali me yacova na yakavi.'"

Na Kedra I Wiliwili 20

Na Cala I Mosese Mai Katesi

1 Ia, o ira na Isireli, o ira na lewe ni vavakoso kecega, era sa yaco mai na Vanua Liwa o Sini e nai matai ni vula, ka ra sa mai tiko na tamata e Katesi; a sa mai mate kina o Miriama ka mani bulu talega e keya. 2 Sa qai yaco ni sa sega na medra wainigunu na lewe ni vavakoso; ka ra sa soqoni vata me ra veivorati vei Eroni kei Mosese. 3 Era sa tekivu me veivala kei Mosese ka tukuna: Ulei, na Kalou, "Keimami na mate tale beka ga oi keimami me vakataki ira na wekai keimami era a vakamatei mai vei Jiova! 4 "Na cava o kauti keimami cake mai kina nai soqosoqo i Jiova kina vanua liwa oqo, me keimami mai mate kece kina oi keimami kei na neimami manumanu? 5 "Na cava o kauti keimami tani mai kina e Ijipita, mo kauti keimami mai kina ki na vanua liwa ca oqo? E sega ni vanua ni sore ni kau se na lolo se na veivaini se na pomekaraneti ka sega talega kina na wainigunu." 6 E rau sa qai lako tani mai o Mosese kei Eroni mai vei ira na i vavakoso kina katuba ni vale ni veitavaki, ka rau mani vakacuva sobu na uludrau kina qele. Sa basika mai vei rau na i serau i Jiova. 7 Sa qai vosa o Jiova vei Mosese, ka vaka, 8 "Mo kauta na i titoko: o iko kei na tuakamu o Eroni ka vakasoqoni ira vata na i vavakoso kei na nodra manumanu." 9 Sa taura na i titoko o Mosese e na mata i Jiova me vaka sa vakaroti koya kina o Koya. 10 E rau sa qai vakasoqoni ira vata nai soqosoqo o Mosese kei Eroni e na mata ni vatu; ka tukuna vei ira, "Mo ni rogoca sara oqo, oi kemuni na tamata dau veivorati! Me keirau kauta beka mai na wai e na vatu oqo me memuni?" 11 Sa laveta cake na ligana o Mosese ka samuta vakarua na vatu e na nona i titoko; ka sa dave sara mai kina na wai. 12 Sa qai vosa o Jiova vei Mosese kei Eroni, "Baleta ni drau a sega ni vakabauti Au e na matadra na Isireli, o na sega ni kauti ira kina nai soqosoqo oqo kina vanua Au sa solia vei ira." 13 Sa i koya oqo na wai e Meripa, ni ra a veileti kina na Isireli vata kei Jiova, ka sa mani vakarokorokotaki o Jiova vei ira.

Sa Tarovi Na Nodra Lako Curumi Itomi

14 Sa tala e so na i talaki o Mosese mai Katesi kivei tui Itomi. "Sa tukuna vakaoqo na tacimu o Isireli: 'O sa kila vakavinaka na veidredre sa yacovi keimami mai, 15 'Ni ra a lako sobu ki Ijipita o ira na neimami qase, ka keimami a tiko mai Ijipita e na dua na gaunabalavu sara, era a mani vakacacani keimami kei ira na neimami qase o ira na kai Ijipita. 16 'Ni keimami sa tagi vei Jiova, sa rogoca o Koya na neimami tagi ka tala mai e dua na Agilosi me kauti keimami tani cake mai Ijipita; ia oqo keimami sa mai tiko e Katesi, na koro ka tiko e na tutu ni yalayala ni nomu vanua. 17 'Au kerea mo vakatara me keimami takoso e na loma ni nomuni vanua, Keimami na sega ni lako e loma ni veiwere se veivaini, ka na sega talega ni keimami gunu wai mai na nomuni tobu wai; keimami na muria tikoga na gaunisala levu; keimami na sega talega ni vuki kina i matau se kinai mawi me yacova ni keimami sa lako curuma rawa nai yalayala ni nomuni vanua.' " 18 Sa qai tukuna vei koya o Tui Itomi, "O na sega ni lako curuma na loma ni noqu vanua, de'u na veivala kei iko e na i seleiwau." 19 E ra sa qai tukuna vei koya na Isireli, "Keimami sa na lako ga e na gaunisala, ia kevaka, o au, se o ira na noqu manumanu me ra gunuva na nomu wai, au na sauma vei iko; io, mo vakatarai keimami ga me keimami taubale takoso e na yava i keimami, ka sega tale ni dua na na ka." 20 Sa qai tukuna o koya, "Ena sega ga ni o lako curuma." A sa lako mai o Itomi me vorati ira kei na lewe vuqa tale na tamata ena liga kaukauwa. 21 Sa sega ni vakatara o Itomi me ra takoso na Isireli e nai yalayala ni nona vanua; ka sa mani lako tani mai vei koya o Isireli.

Na Mate Nei Eroni

22 Ia, o ira na Isireli, na lewe ni vavakoso taucoko, era sa qai tekivu lako mai Katesi ka ra sa yaco sara mai na Ulunivanua o Ori. 23 Sa vosa o Jiova vei Mosese kei Eroni mai na Ulunivanua o Ori e na i yalayala ni vanua o Itomi, ka vaka: 24 "O Eroni e na soqoni vata kei ira na nona tamata, ni na sega ni butuka o koya na vanua Au sa solia vei ira na Isireli, baleta ni o talaidredre kina Noqu vosa e na wai o Meripa. 25 "Mo kauti Eroni kei Iliesa na luvena, ka mo kauti rau cake mai kina Ulunivanua o Ori; 26 "Mo qai luvata mai na i sulu i Eroni ka vakadaramaka vei Iliesa na luvena, ni sa lako o Eroni vei ira na wekana ka na mate vakaidina mai keya." 27 Sa cakava o Mosese me vaka sa vakaroti koya kina o Jiova, e rau sa cabe cake kina Ulunivanua o Ori e na matadra taucoko na i vavakoso. 28 Sa luvata o Mosese na i sulu i Eroni ka vakadaramaka vei luvena oiliesa; sa mani mate e keya o Eroni e na dela ni ulunivanua. E rau sa qai lako sobu mai o Mosese kei Iliesa mai na ulunivanua. 29 Ia, ni ra sa raica nai vavakoso ni sa mate o Eroni, e ra sa lolositaki koya na vuvale taucoko e Isireli ka rauta ni tolusagavulu na siga.

Na Kedra I Wiliwili 21

Era Sa Vakadrukai Na Kai Kenani Mai Oma

1 Na tui Arati, e kai Kenani, ka vakaitikotiko e na Ceva, sa rogoca ni ra sa lako tiko mai na Isireli e na gaunisala mai Acarimi. Sa vala vata kei ira na Isireli ka sa tauri ira e so me ra kaivesu. 2 Sa cakava e dua na bubului oisireli vei Jiova, ka vaka, "Kevaka o ni na soli ira na tamata oqo kina ligaqu, au na vaqeavutaka vakadua sara ga na nodra veikoro." 3 Sa rogoca na domo i Isireli o Jiova ka soli ira mai na kai Kenani ka ra sa vakarusai vaka ca sara kei na nodra veikoro. Sa mani vakatokai sara na vanua o ya me o Oma.

Na Gata Varasa

4 E ra sa lako tani mai na vanua o Ori e na Sala vaka ki na Wasawasa Damudamu, ka me ra wavokita na vanua o Itomi; sa yaco, ni ra sa yalolailai mai na tamata e na sala. 5 Era sa vosa vakacacataka na Kalou kei Mosese o ira na tamata; "Na cava o kauti keimami tani mai kina e Ijipita me keimami mai mate tu e na vanua liwa oqo? Ni sa sega mai na kakana kei na wai ka sa cata na lomai keimami na madrai sega ni yaga oqo." 6 A sa tala na gata vakabukawaqa o Jiova ki vei ira na tamata, ka sa katilaki ira, ka sa mani vuqa sara na tamata e Isireli era mate. 7 Era sa qai lako mai vei Mosese na tamata ka tukuna, "Keimami sai valavala ca, ni keimami sa vosavakacacataka na Kalou kei iko;" Ia mo masuti Jiova me kauta tani o Koya na gata vei keimami. 8 Sa qai vosa o Jiova vei Mosese, "Mo cakava tale e dua na gata varasa, ka vakaduria e na dua duru kau; ia e na yaco vei ira sa laukati, ni ra sa rai kina, era na bula." 9 A sa cakava sara o Mosese e dua na gata varasa, ka vauca sara ki na dua na kau; a sa mani yaco, kevaka sa katia na gata e dua, ni raica ga na gata varasa, ena bula.

Mai Na Ulunivanua O Ori Ki Moape

10 Era sa toso tale yani i liu na Isireli ka mai vakaitikotiko e Oboca. 11 Ni ra biubiu oti mai Oboca era sa mai vakaitikotiko sara e Ije Abarimi, e na vanua liwa ka toka e na tokalau kei Moape, me donuya nai cadracadra ni siga. 12 Mai keya era sa cavu tu ka la'ki vakaitikotiko e na Buca mai Sereti. 13 Era sa qai cavu tu mai keya ka la'ki tiko e na tai kadua kei Anoni, ka tiko e na vanua liwa sa dodo mai na nodra i yalayala ni vanua na Amoraiti; ni o Anoni oqo nai yalayala kei Moape, ena kedrau tadrua o Moape kei ira na Amoraiti. 14 Ka sa dau tukuni kina vakaoqo e nai Vola ni Valu i Jiova: "O Waepi e Sufa Na uciwai o Anoni, 15 Na veikikilo ni uciwai Ka yaco sara kina i tikotikoi Ari Ka davo koto e nai yalayala i Moape." 16 Mai keya era sa cavutu ka lako sara i Bia, nai vurevure ni wai ka tukuna kina o Jiova vei Mosese, "Vakasokumuni ira vata na tamata, Au na solia vei ira na wai." 17 Era sa qai lagata kina na Isireli na sere oqo: "Mo vure mai, nai keli wai! Oi kemuni kece mo ni seretaka. 18 Nai keli wai era a kelia nai liuliu Era kelia na tamata turaga ni vanua, Mai vua na daunilewa, kei na nodra i doko." Ia mai na vanua liwa era sa lako yani ka yaco sara i Matana, 19 Mai matana ki Nalieli mai Nalieli ki Bamoci, 20 Ia, mai Bamoci, e na buca ka tiko e na vanua vaka Moape, ki na dela ni vanua o Pisiga ka irova sobu tu na vanua veikau.

Sa Vakadrukai o Tui Sioni

21 Era sa qai vakau i tukutuku na Isireli kivei Sioni na nodra tui na Amoraiti, ka vaka, 22 "Mo ni laivi keimami me keimami lako curuma na nomu vanua. Keimami na sega ni lako kina veiwere se na veivaini; keimami na sega ni gunu wai mai na tobu wai. Keimami na lako tikoga e na sala dodonu me yacova ni keimami lako curuma yani na nomu vanua." 23 Ia o Sioni e sega ni vakatara me ra lako takoso e nona vanua o ira na Isireli. A sa vakasoqoni ira vata na nona tamata o Sioni ka lako yani me veivala kei Isireli e na vanua liwa, ia ni sa yaco mai ki Jeasi sa tekivu sara me ia na i valu kei Isireli. 24 Sa vakadrukai koya o Isireli e na i seleiwau, ka taukena sara na nona vanua me vakatekivu mai Anoni me yaco ki Japoki, me yaco sara yani vei ira na kai Amoni; ni sa vakabai tu na nodra i yalayala na kai Amoni. 25 Sa taura taucoko o Isireli na nodra veikoro, ka sa mai vakaitikotiko o Isireli e na nodra veikoro na Amoraiti, ka veivala taumada kei na tui Moape e liu, ka mani taura taucoko na nodra vanua mai na ligana me yaco sara ki Anoni. 26 Ia, o Esiponi e koroi Sioni na nodra tui na Amoraiti, ka a veivala taumada e liu kei koya na tui Moape, ka mani taura taucoko kina nona vanua mai na ligana me yaco sara i Anoni. 27 O koya oqo o ira era dau vosa e na vosa vakaibalebale era tukuna: "Lako mai ki Esiponi, me tarai cake tale; Me vakavinakataki na koroi Sioni. 28 "Ni sa lako mai Esiponi na bukawaqa, E dua na yameyame ni bukawaqa mai na koro i Sioni; Sa vakamai Ari e Moape Na turaga e na vanua cecere i Anoni. 29 Mo cudruvi o iko Moape! O sa vakarusai, oi kemudou na tamata e Kimosi! Sa soli ira na luvena tagane me ra dro yani, o ira na luvena yalewa me ra vakabobulataki Kivei Sioni na nodra tui na Amoraiti. 30 "Ia, keimami sa vanai ira: Sa vakarusai o Esiponi me yaco sara i Nofa, Ka yaco sara i Metipa." 31 Ia, o Isireli e sa vakoro toka e na nodra vanua na Amoraiti. 32 Sa tala yani e so na tamata o Mosese me ra raici Jaseri; era a mani taura na nodra koro ka vakasevi ira tani na Amoraiti era tiko e keya. Sa Vakadrukai Na Tui O Oki 33 E ra sa vuki ka muria cake na sala i Pasani. Sa veivala kei ira o Oki na tui Pasani, o koya kei ira vakaaduaga na nona tamata, me ra la'ki vala ki Etirei. 34 Sa qai vosa o Jiova vei Mosese, "Mo kakua ni rerevaki koya, Ni'u sa soli koya oti ki ligamu kei ira kecega nona tamata, me yacova ni sa sega tale e dua me bula rawa se vo vei koya; ka ra sa qai mai taura na nodra vanua me nodra." 35 Era sa rawai koya, o ira na luvena, kei ira nona tamata, me yacova ni sa sega tale e dua me bula rawa se vo vei koya; ka ra sa qai mai taura na nodra vanua me nodra.

Na Kedra I Wiliwili 22

Sa Talaki Vei Pelami O Pelaki

1 Era sa cavutu na Isireli, ka ra mai tiko e na veidelana e Moape e na yasa ni Joritani ka takosova na vanua o Jeriko. 2 Ia o Pelaki na luvei Sipori e sa raica oti na veika e cakava o Isireli vei ira na Amoraiti. 3 Sa yacovi Moape kina e dua na rere levu ni sa raica rawa o koya na kedra lewe levu, ka sa bikai kina vakalevu o koya e na taqaya me baleti ira na Isireli. 4 Sa qai vosa o Moape vei ira na qase ni vanua o Mitiani, "O ira nai lawalawa oqo era na domica taucoko na veika ga e ra wavoliti keda, me vaka e domica na co ni vanua na bulumakau." A sa tui tiko vei ira na Moape e na gauna o ya o Pelaki na luvei Sipori. 5 Sa qai tala e so na i talaki vei Pelami na luvei Piori mai Pecori, e voleka toka e na Uciwai e na vanua nodra na wekana, me kacivi koya, ka vaka: "Raica, e dua na yavusa tamata era sa lako mai Ijipita. E ra sa ubia na dela i vuravura, ka ra sa mai tiko tikivi au! 6 "Au kerei iko kina mo vakusakusa mai, ka vosa rukaki ira me ra cudruvi, e na vukuqu, ni ra sa rui kaukauwa sara vei au. De na rawa beka ni'u vakadrukai ira ka vakasevi ira tani e na vanua, ni'u kila deivaki tiko ni o ira o vakalouvinakataki ira era kalouvinaka, ia o ira o cudruvi ira era cudruvi dina." 7 Era sa qai lako na qase ni Moape kei ira na qase ni Mitiani ka taura e ligadra na kenai sau na daurairai, e ra sa lako sara mai vei Pelami ka ra tukuna sara vua na vosa i Pelaki. 8 Sa mani tukuna sara o koya vei ira, "Dou moce e ke ena bogi oqo, au na qai kauta tale mai vei kemudou na vosa, me vaka e na tukuna vei au na Kalou." Era sa mani tiko vata kei Pelami na turaga kilai ni Moape. 9 Sa qai lako mai na Kalou vei Pelami ka tukuna, "O cei o ira na tamata oqo era tiko vata kei iko?" 10 Sa vosa vua na Kalou o Pelami ka vaka, "O Pelaki na luvei Sipori, na tui Moape, sa talaki mai vei au, ka tukuna, 11 'Raica, e dua na yavusa tamata era sa lako tani mai Ijipita, ka ra sa ubia tu na dela i vuravura. 'Mo lako mai, ka mai vosavakaloucataki ira mera cudruvi, ena vukuqu; de na rawa beka ni'u vakamalumalumutaki ira ka vakasevi ira tani.'" 12 Sa vosa na Kalou vei Pelami, "O na sega ni na lako vata kei ira; o na sega ni vosavakaloucataki ira mera cudruvi, ni o ira era kawa ni veivakalouvinakataki." 13 Sa yadra e na mataka o Pelami ka tukuna vei ira na turaga i Pelaki, "Dou lesu tale kina nomudou vanua, ni sa tarovi au na Kalou ka sega ni solia na veivakadonui me'u lako vata kei kemudou." 14 E ra sa tucake na turaga ni Moape ka lako vei Pelaki, ka tukuna, "O Pelami sa bese ni lako vata kei keitou." 15 Sa talai iratou tale na turaga o Pelaki, ka ra sa lewe levu mai ka ra tamata vakaturaga sara ka kilai levu mai vei iratou e liu. 16 E ratou sa lako mai vei Pelami ka mai tukuna vei koya, "Sa vosa vakaoqo o Pelaki, na luvei Sipori: 'Au kerea me kakua ni dua na ka me tarovi iko e na nomu lako mai vei au; 17 'Au sa dokai iko vakaidina, ka'u na cakava talega na ka kecega o na tukuna vei au. Au sa kerei iko ga vakabibi mo lako mai ka vosavakaloucataki ira me ra cudruvi na tamata oqo e na vukuqu.'" 18 Sa qai tukuna o Pelami vei ira nai talaki i Pelaki, "E dina ni na solia vei au o Pelaki na nona vale e sinai tu kina na siliva kei na koula, e sa na sega ga ni rawa ni'u lako sivia na vosa i Jiova na noqu Kalou, me'u cakava vakalailai se vakalevu. 19 "Au sa kerei kemudou kina vakabibi, mo dou na tiko ka moce tale e ke e na bogi oqo, me'u na kila tale mai vua na Kalou na veika e na vosa kina vei au." 20 Sa qai lako mai na Kalou vei Pelami e na bogi ka tukuna vua, "Ke ratou sa lako mai na turaga ka kacivi iko, mo tucake ka lako vata kei iratou; ia na vosa ga Au na vosataka vei iko — mo na qai cakava." 21 Sa yadra e na mataka o Pelami, ka vakarautaka na nona asa, ka lako vata kei ira na turaga ni Moape.

O Pelami, Na Asa, Kei Na Agilosi

22 Sa waqa mai na cudru ni Kalou ni sa lako, sa tu na Agilosi ni Kalou ena Vukuna e na sala me vorati koya. Sa vodoka o koya na asa, ka rau sa tomani koya na nona dauveiqaravi. 23 Sa raica na Agilosi ni Kalou na asa ni sa tucake tu e na sala ka qumia tu na Nona i seleiwau e ligana, a sa lako vakatikitiki na asa ena sala kina veiwere. Sa mokuta na asa o Pelami me vagolei koya tale mai kina sala. 24 Ia, na Agilosi i Jiova sa tucake tu e na sala qiqo e na kedrau tadrua na veiwere ni vaini, kei na dua na bai vatu e na dua na yasana, ka dua tale na bai vatu e na yasana tale e dua. 25 Ia, ni sa raica na Agilosi i Jiova na asa, sa vakabiri koya kina lalaga ni bai vatu ka qaqia na yavai Pelami e na bai vatu; sa baci mokuti koya tale. 26 Sa toso tale i liu na Agilosi i Jiova ka sa la'ki tucake tu e na dua na vanua qiqo sara ka dredre sara kina me vuki kina i matau se kina i mawi. 27 Ia, ni sa raica na Agilosi i Jiova na Asa, sa davo sobu sara e na rukui Pelami; a sa waqa mai kina na cudru i Pelami, ka mani mokuta tale na asa e na nona i titoko. 28 Sa dolava na gusu ni asa o Jiova, ka tukuna yani vei Pelami, "Na cava mada au cakava vei iko, mo mokuti au kina vakatolu?" 29 Sa vosa vua na asa o Pelami, "E na vuku ni nomu vakacacani au, au diva me dua mada ga nai seleiwau me tiko e ligaqu, e na gauna sara ga oqo sa rawa me'u vakamatei iko!" 30 Sa vosa tale na asa vei Pelami, "Au sega beka ni nomu asa o au, o a dau vodoka, me tekivu mai na siga o a taukeni au kina me yacova sara mai oqo? Au a dau kitaka beka vakaoqo vei iko? Sa tukuna, "E sega." 31 Sa dolava na matai Pelami o Jiova, ka sa raica o koya na Agilosi i Jiova ni sa tucake tu e na sala ka qumia tu na Nona i seleiwau e ligana; a sa vakacuva sobu na uluna ka bale sobu vakatoboicu. 32 Sa vosa vua na Agilosi i Jiova, "Na cava o mokuta kina vakatolu na nomu asa? Raica, Au sa lako mai me'u vorati iko, baleta ni sa rui ca na nomu sala e Mataqu. 33 "Na asa e ya raici Au vakatolu ka lako vakatikitiki tani vei Au. Kevaka me a sega ni lako vakatikitiki tani vei Au, Ke'u a sa vakamatei iko talega e na gauna oqo, ka laivi koya me bula." 34 Sa tukuna o Pelami vua na Agilosi i Jiova, "Au sai valavala ca ni'u a sega tiko ni kila ni o Kemuni o ni a tucake tu e na sala ka vorati au. Ia oqo, kevaka au sa ca vei Kemuni, au sa na lesu tale." 35 Sa tukuna na Agilosi i Jiova vei Pelami, "Mo lako vata kei iratou na turaga, ia na vosa ga Au na tukuna vei iko, sai koya ga o ya mo vosataka." A sa mani lako vata kei iratou na turaga i Pelaki o Pelami. 36 Ia ni sa rogoca o Pelaki ni sa lako tiko mai o Pelami, sa lako sara yani me la'ki tavaki koya e na koro o Moape ka toka e na i yalayala ni vanua e Anoni, kina mua ni nodra i tikotiko. 37 Sa mani tukuna o Pelaki vei Pelami, "Au a sega beka ni talatala yani vei iko, ka kacivi iko? Na cava o a sega kina ni lako mai vei au? E sega beka ni'u dokai iko?" 38 Sa tukuna o Pelami vei Pelaki, "Raica, au sa lako mai vei iko! E tiko beka vei au oqo e dua na kaukauwa me'u tukuna e dua na ka? Na vosa sa biuta e gusuqu na Kalou, ka dodonu me'u vosataka." 39 E rau sa lako vata mai o Pelami kei Pelaki, ka rau sa yaco mai Kiriaci Usoci. 40 A sa vakacabora o Pelaki e so na bulumakau kei na sipi, ka vakauta e so ki vei Pelami kei ira na turaga era tiko vata tukuna.

Na I Matai Ni Parofisai Nei Pelami

41 Sa qai yaco, e na siga ka tarava, sa kauti Pelami cake o Pelaki kina vanua cecere i Peali, me rawa ni raica mai keya na levu ni tamata.

Na Kedra I Wiliwili 23

1 Sa qai tukuna o Pelami vei Pelaki, "Mo tara vei au e vitu na i cabocabo ni soro e na vanua oqo, ka vakarautaka vei au e ke e vitu na bulumakau kei na vitu na sipi tagane." 2 Sa cakava o Pelaki me vaka sa tukuna vua o Pelami, ka rau sa vakacabora ruarua o Pelaki kei Pelami na bulumakau kei na sipi tagane e na i cabocabo ni soro kece o ya. 3 Sa tukuna o Pelami vei Pelaki, "Mo tucake tu e na yasa ni nomu i madrali kama, ia au na lako; de dua, e na mai sota vata kei au o Jiova." Ia na ka ga e vakatakila vei au o Koya, au na tukuna vei iko. 4 A rau sa sota na Kalou kei Pelami, a sa tukuna vei Koya, "Au sa vakarautaka oti e vitu na cabocabo ni soro, ka'u sa cabora e na veicabocabo ni soro yadudua e dua na bulumakau kei na dua na sipi tagane." 5 Sa qai biuta o Jiova e dua na vosa kina gusu i Pelami, ka tukuna, "Mo lesu tale vei Pelaki, ka la'ki tukuna vua oqo." 6 A sa lesu tale vei koya, ka sa tucake tikoga o koya e na yasa ni nona i soro, o koya kei ira kece na turaga e Moape. 7 A sa taura cake na nona vosa vakaibalebale ka vaka: "O Pelaki na tui Moape sa kauti au cake mai Arami. Mai na veiulunivanua e na tokalau, 'Mo rukaki Jekope, vei au. Mo lako mai, ka vosacudrutaki Isireli!' 8 "Au na rukaki koya vakacava o koya e sega ni rukaki koya na Kalou? Ka'u na vakacacani koya rawa vakacava o koya e sega ni vakacacani koya na Kalou? 9 Mai na dela ni uluvatu au sa raici koya. Mai na veidelana au sa kunei koya e keya, era sa tiko galili kina e dua na tamata, ka sega ni wiliki ira vata kei na veimatanitu e so. 10 "O cei e rawa ni wilika rawa na kuvu ni sosoi Jekope, se me wilika rawa e dua na i kava ni Isireli? Me'u mate mada e na nodra mate na yalododonu ka me tautauvata kei koya na noqui otioti!" 11 Sa tukuna o Pelaki vei Pelami, "Na cava o sa cakava vei au? Au a kauti iko mo rukaki ira na noqu meca, raica, o sa qai vosa vakalouvinakataki ira tale vakalevu sara!" 12 Sa qai sauma mai o koya ka vaka, "E na sega beka ni'u tu me'u tukuna na ka sa biuta ki gusuqu o Jiova?"

Nai Karua Ni Parofisai Nei Pelami

13 Sa tukuna vua o Pelaki, "Au kerei iko mo lako vata mada kei au kina dua na vanua e rawa ni o na raici ira kina; o na raici ira vakalailai ga, o na sega ni raici ira taucoko; mo rukaki ira e na vukuqu mai keya." 14 Sa qai kauti koya mai kina vanua o Sofimi, kina vanua cecere e Pisika, ka tara sara kina e vitu nai cabocabo ni soro, ka vakacabora sara kina e yadua na bulumakau kei na sipi e na vei cabocabo ni soro kece. 15 Sa qai tukuna o koya vei Pelaki, "Mo tucake tiko e ke kei na nomu i soro kama me'u la'ki sota vata kei Jiova e keya." 16 Sa sota vata kei Jiova o Pelami, a sa biuta e gusuna e dua na vosa, ka vaka; "Mo lesu tale vei Pelaki ka tukuna vua oqo." 17 Sa lako mai vei koya ka sa tu o koya e keya, ka tu tikiva na nonai soro kama, ka ra tiko vata kei koya na turaga ni Moape. Sa vosa o Pelaki ka tukuna vua, "Na cava e sa tukuna mai o Jiova?" 18 Sa cavuta na nona vosa vakaibalebale ka vaka: "Tucake, Pelaki, ka rogoca! Mo vakarogoci au, na luvei Sipori! 19 "Sa sega ni tamata na Kalou me rawa Vua me lasu se me luve ni tamata, me rawa Vua me veivutuni. Sa sega beka ni tukuna, ka na sega beka ni vakayacora? Sa sega beka ni vosa oti, ka na sega beka ni vakavinakataka? 20 Rogoca, Sa soli vei au e dua na i vakaro me'u veivakalouvinakataki; E sa veivakalouvinakataki o Koya, ka sa sega ni rawa vei au me'u vakasuka tale. 21 "Sa sega ni vakaraica o Koya na nodra cala na Jekope. Ka sega talega ni vakadikeva na nodra ca na Isireli. o Jiova na nodra Kalou sa tiko vata kei ira. Kei na kaila ni Tui sa maliwai ira. 22 Na Kalou e kauti ira tani mai Ijipita sa tu vei Koya na kaukauwa e vaka e dua na bulumakau tagane. 23 "Sa sega ni vakadraunikautaki rawa o Jekope se sa sega talega ni tarai rawa oisireli ena kalouvu. Oqo, sa na tukuni ga kina ena vukui Jekope kei Isireli – 'O, na veika ga sa cakava na Kalou!' 24 Raica, sa tucake e dua na kawa tamata me vaka na laione yalewa, ka ra laveti ira cake me vaka na laione. E na sega ni davo sobu me yacova ni sa tilomi ira rawa na kena. Ka gunuva na nodra dra na vakamavoataki." 25 Sa qai vosa o Pelaki vei Pelami, "Kevaka o sa sega ni vosacudrutaki ira, ia mo vosa vakalouvinakataki ira!" 26 Sa qai sauma yani o Pelami vei Pelaki, "E sega li ni'u a tukuna vei iko, ka vaka; 'Na ka kecega e tukuna vei au o Jiova, e dodonu me'u cakava'?"

Na I Katolu Ni Parofisai Nei Pelami

27 Sa qai tukuna o Pelaki vei Pelami, "Au kerei iko sara vakabibi mo lako mai, Au na kauti iko tale kina dua na vanua; de dua e na qai vinaka beka vua na Kalou mo na vosacudrutaki ira mai keya e na vukuqu." 28 A sa kauti Pelami o Pelaki kina delana cecere e Piori, ka raica sobu tu na vanua lala. 29 Sa qai tukuna o Pelami vei Pelaki, "Mo tara vei au eke e vitu na i cabocabo ni soro, ka vakarautaka vei au e vitu na bulumakau kei na vitu na sipi tagane." 30 A sa cakava o Pelaki me vaka sa tukuna vua o Pelami, ka vakacabora sara e yadua na bulumakau kei na sipi tagane e na veicabocabo ni soro kece.

Na Kedra I Wiliwili 24

1 Ia ni sa raica o Pelami ni sa vinaka vei Jiova na nona vakalouvinakataki o Isireli, sa sega ni qai lako tale e na so na gauna, me vakasaqara me vakayagataka na vakadraunikau, a sa vagolea na matana me donuya na vanua liwa. 2 A sa rai yani o Pelami ka raici ira na Isireli ni ra sa tuvani tu me vaka na nodra dui yavusa; sa lako mai vei koya na Yalo ni Kalou. 3 Sa lagata o koya na nona vosa vakaibalebale ka vaka; "Na domo ni vosa i Pelami na luvei Piori, Na domo ni vosa ni tamata sa tadola na matana, 4 Na domo ni vosa i koya e sa rogoca na vosa ni Kalou O koya e raica na raivotu i Koya na Kaukauwa. O koya e bale sobu, ka sa tadola tu na yaloka ni matana: 5 "Sa totoka vakaidina na nomui tikotiko, o iko Jekope! 6 E vaka na veibuca e dodo yani E vaka na veiwere e bati ni uciwai, E vaka na kau ni wai gaga ka teivaki mai vei Jiova. Ka vaka na sitari e na bati ni wai. 7 E na sova mai na wai e na nona vokete Kei na sorena e na tiko e na veiwai lelevu "Na nona tui e na cecere mai vei Ekaki Kei na nona matanitu e na vakalevulevui. 8 "Na Kalou e kauti koya tani mai Ijipita E tiko vua na kaukauwa e vaka e dua na bulumakau kila; E na tilomi ira na veimatanitu, ka ra a kena meca; Ka na cokabasikataki ira e na nona dakai titi. 9 'E cuva sobu, e davo sobu me vaka e dua na laione; Ka vaka na laione me na vakayadrati koya?' "Sa kalouvinaka o koya sa vakalouvinakataki iko, Ka me cudruvi o koya sa via vosa cudrutaki iko." 10 Sa qai waqa mai na cudru i Pelaki vei Pelami, a sa tavia vata na ligana; Sa qai tukuna o Pelaki vei Pelami "Au a kacivi iko mo vosacudrutaki ira na meca, ia raica, o sa qai vosavakalouvinakataki ira vakatolu na gauna me ra vuavuai vinaka sara ka vutuniyau! 11 "Ia oqo, mo cici kina nomu vanua, au a tukuna ni'u na dokai iko vakalevu, ka raica, o Jiova e sa tarovi iko mo dokai." 12 Sa qai tukuna o Pelami vei Pelaki, "Au a sega tale beka ga ni vosa vei iratou na nomui talaki o talai iratou mai vei au, ka vaka, 13 'Kevaka me ya solia vei au o Pelaki na nona vale ka sinai tu e na siliva kei na koula, e na sega ni rawa vei au me'u sivita na Vosa ni Kalou, me'u cakava na ka vinaka se na ka ca e na noqu lewa ga'? 14 "Ia oqo, au sa na lako vakaidina vei ira na wekaqu, Mo lako mai, me'u na vakasalataki iko rawa e na veika era na cakava o ira na tamata oqo kivei ira na nomu tamata e na veisiga mai muri."

Nai Ka Va Ni Parofisai I Pelami

15 Sa qai laveta cake o koya na nona vosa vakaibalebale ka vaka: "Na vosa i Pelami na luvei Piori Na vosa ni tamata e rai tu na matana; 16 Na domo i koya sa rogoca na vosa i Jiova ka kilai Koya deivaki o Koya sa Cecere Sara Ka raica na raivotui Koya sa Kaukauwa, A sa dabe sobu i ra, ka tadola vinaka tu na matana: 17 "Au sa raici Koya, ia ka sega ga e na gauna oqo Au sa raici Koya, ka sega ni voleka sara; Ena lako mai vei Jekope e dua na Kalokalo; E dua na i Titoko e na cadra mai vei Isireli, Ka na yavita na veiyalayala i Moape E na qai vaqeavutaki ira kece na luve ni dauvakacaca. 18 "Ena qai taukeni o Itomi o Sia, na nona meca, e na taukeni talega Ia o Isireli e na qai cakacaka e na qaqa. 19 Mai vei Jekope e na duri mai e dua me vakatulewa Ka na vaqeavutaka nai vovo ni koro." 20 Sa qai vuki me raici Amaleki, sa taura cake nona vakaibalebale ka vaka: "O Amaleki e ya liu mai vei ira na veimatanitu, Ia e na qai i otioti duadua me yacova ni sa vakarusai." 21 Sa qai raici ira na Kenaiti, ka taura cake na nona vakaibalebale ka vaka: "E dei na nomu i tikotiko ka sa viritu e na uluvatu na nomu sova; 22 Ia o Kaini ena vakamai Na cava na kena dede me qai kauti iko vakavesu o Asuri?" 23 Sa qai laveta cake na nona vosa vakaibalebale ka tukuna: "Ulei! o cei e na bula rawa ni sa vakayaco ka na Kalou? 24 Era na lako mai na waqa mai na veibaravi mai Saipurusi, Ka ra na vakararawataki Asuri kei Iperi talega, Ka na yaco talega vei Amaleki, me yacova sara ni sa vakarusai." 25 A sa qai tucake o Pelami me biubiu e keya ka lesu tale yani ki nona vanua; ka sa lako talega e na nona sala o Pelaki.

Na Kedra I Wiliwili 25

Na Nodra Dauyalewa Na Isireli E Moape

1 A ra sa tiko ga mai Akasia Korovi o ira na Isireli ka ra sa tekivu veilasami na tamata kei ira na yalewa ni Moape. 2 Era sa sureti ira na tamata kina vakacaboi soro e caka vei ira na nodra Kalou matakau, ka ra sa kana na tamata ka cuva kina nodra Kalou matakau. 3 Sa mani rau cokovata o Isireli kei Peali Piori, ka sa tubu sara kina na cudru i Jiova vei ira na Isireli. 4 Sa qai tukuna o Jiova vei Mosese, "Mo kauti ira taucoko nai liuliu vei ira na tamata ka me ra kuna o ira sa kitaka na ka ca e na mata i Jiova, me ra qai vakarubeci tu e tuba e na matanisiga, me rawa kina ni seavu na cudru katakata i Jiova vei ira na Isireli." 5 Sa qai vosa o Mosese vei ira na turaga ni lewa e Isireli, "Kivei kemuni kece mo ni qai vakamatei ira na nomuni tamata era semati ira vei Peali Piori." 6 A sa qai yaco, e dua vei ira na Isireli e kauta mai ka mai vakatakila vei ira na wekana, e na matai Mosese, kei na matadra na i vavakoso ni Isireli e dua na yalewa ni Mitiani, e na nodra sa tagi tiko e na katuba ni vale ni veitavaki. 7 Ia ni sa raica o Finiasi na luvei Iliesa, na luvei Eroni na bete, sa tucake mai e na kedra maliwa nai vavakoso ka taura e ligana e dua na moto. 8 A sa muri koya yani na tagane ni Isireli e na loma ni vale laca ka coka basikataki rau ruarua na tagane ni Isireli, kei na yalewa e na yagodrau; A sa muduki kina na mate ca levu vei ira na Isireli. 9 Era sa lewe ruasagavulu ka va na udolu na i wiliwili ni tamata era a mate e na mate ca levu. 10 Sa qai vosa o Jiova vei Mosese, ka tukuna: 11 "O Finiasi na luvei Iliesa, na luvei Eroni na bete, e sa vakasuka lesu tale na Noqu cudru vei ira na Isireli, baleta ni a lomakatakatataka o koya na noqu lomakatakatataki ira, Ka'u sa na sega kina ni vakaleqai ira na Isireli e na Noqu lomakatakata. 12 "Mo qai tukuna kina, 'Raica, Au sa solia vei koya na Noqu veiyalayalati ni veivakacegui; 13 'Vei koya kei ira taucoko na nona kawa era muri koya e dua na veiyalayalati ni bete e sega ni mudu, baleta ni a lomakatakata vua na nona Kalou, ka sorovaki ira talega na Isireli.'" 14 Sai koya oqo na yacai koya na Isireli ka a vakamatei, ka rau a mate vata kei na yalewa ni Mitiani, o Simiri e luve i Salu, e dua na i liuliu mai vei ira na qase ni vuvale i Simione. 15 Na yaca i koya na yalewa ni Mitiani ka vakamatei sai Kosivi na luvena yalewa o Suri; ka liutaki ira tiko e dua na mata tamata ka ra qase ni vuvale e na vanua o Mitiani. 16 A sa vosa o Jiova vei Mosese, ka tuku: 17 "Mo dou vakararawataki ira na kai Mitiani, ka mokuti ira; 18 "Ni ra a vakararawataki kemudou e na nodra i vadi ca e na nodra a vagarogaroi kemudou vei Piori ka vaka talega kina o Kosivi, na luve ni dua na i liuliu e Mitiani, kei na tacidra yalewa, ka mate e na siga ni tauvimate levu ka baleti Piori."

Na Kedra I Wiliwili 26

Nai Karua Ni Nodra Wiliki Na Isireli

1 Ia ni sa yaco sara na kena gauna, e na kena mai cava na veimate ca, sa qai vosa o Jiova vei Mosese kei Iliesa na luvei Eroni na bete, ka vaka: 2 "Mo wiliki ira na i vavakoso taucoko e Isireli mai na yabaki ruasagavulu ka lako cake, mai na veivuvale ni nodra qase, o ira era rawa ni lako kina i valu e Isireli." 3 A sa veivosaki vata kei rau o Mosese kei Iliesa na bete e na ulunivanua o Moape e na yasa ni Joritani, ka takosova toka na vanua o Jeriko, ka vaka: 4 "Mo wiliki ira na tamata mai na yabaki ruasagavulu ka lako cake, me vaka sa vakarota o Jiova vei Mosese vata kei ira na Isireli era a biubiu mai Ijipita." 5 O Rupeni na ulumatua i Isireli. o ira na luvei Rupeni oqo: o Anoki e na vuvale na Anokaiti; o Palu, e na vuvale na Paluaiti; 6 O Esironi, e na vuvale na Esironaiti; o Kami, na vuvale na Kamiaiti. 7 Sai ira oqo na veivuvale mai vei ira na Rupenaiti ka wili rawa vei ira e lewe vasagavulu ka tolu na udolu kamani vitu na drau tolusagavulu. 8 Ia na luvei Palu o Iliavi. 9 O ira na luvei Iliavi o Nemueli, Tacani, kei Apirami. Sai ira oqo na Tacani kei na Apirami, ka ra matataka nai vavakoso, era a veivorati vata kei Mosese kei Eroni ka ra a wili vata talega kei Koya, e na nodra a via vorati Jiova; 10 A sa dalaga na vanua ka tilomi ira vata kei Kora ni ra sa mate na i lawalawa o ya, e na nodra vakamai e na bukawaqa era lewe rua na drau limasagavulu na turaga; ka ra sa yaco mei vakatakilakila. 11 Ia era a sega ni mate na luvei Kora. 12 O ira na luvei Simione me vaka na nodra veivuvale: O Nemueli, mai na vuvale na Nemulaiti; o Jamini, mai na vuvale na Jaminaiti; o Jakini, mai na vuvale na Jakinaiti; 13 o Serai, mai na vuvale na Seraiti: o Saulu, mai na vuvale na Saulaiti. 14 Sa i ira oqo na lewe ni vuvale ni Simionaiti, era lewe ruasagavulu ka rua na udolu rua na drau. 15 O ira na luvei Kata me vaka na nodra veivuvale; o Sefoni, mai na vuvale na Sefonaiti; o Agi, mai na vuvale na Agiaiti; o Suni, mai na vuvale na Sunaiti; 16 O Osini, mai na vuvale na Osinaiti; o Eri, mai na vuvale na Erinaiti; 17 O Aroti, mai na vuvale na Aroaiti; o Areli, mai na vuvale na Arelaiti. 18 Sai ira oqo na lewe ni vuvale mai vei ira na luvei Kata me vaka na kedra i wiliwili taucoko; era lewe vasagavulu na udolu lima na drau. 19 Mai vei ira na luvei Juta o Eri kei Onami; ka rau a mate o Eri kei Onani e na vanua o Kenani. 20 Ia o ira na luvei Juta me vaka na nodra veivuvale: o Sela, mai na vuvale na Selanaite: o Peresi, mai na vuvale na Perisaite; o Sera, mai na vuvale na Seraite. 21 O ira na luvei Peresi; o Esiromi, mai na vuvale na Esironaiti; o Amuli, mai na vuvale na Amulaiti. 22 Sai ira oqo na vuvale i Juta me vaka vei ira era a wiliki rawa; era lewe vitusagavulu ka ono na udolu lima na drau. 23 Mai vei ira na luvei Isakari me vaka na nodra veivuvale; o Tola, mai na vuvale na Tolaite; o Pua mai na vuvale na Punaite. 24 O Jasupi, mai na vuvale na Jasupaiti; o Simironi, mai na vuvale na Simironaiti. 25 Sai ira oqo na lewe ni vuvale i Isakari o ira era sa wiliki rawa mai vei ira; era lewe onosagavulu ka va na udolu tolu na drau. 26 O ira na luvei Sevuloni me vaka na nodra veivuvale, o Sereti, mai na vuvale na Sereaiti; o Eloni, mai na vuvale na Elonaiti, o Jaleili, mai na vuvale na Jalelaiti. 27 Sa i ira oqo mai na vuvale na Sevulonaiti o ira era sa wiliki rawa mai vei ira; era lewe onosagavulu na udolu lima na drau. 28 O ira na luvei Joseva me vaka na nodra veivuvale, mai vei Manasa kei Ifereimi: 29 Oqo na luvei Manasa; o Makiri, mai na vuvale na Makiraiti; ia o Makiri e tamai Kiliati; e Kiliati, ka kawa ni vuvale na Kiliaite. 30 Oqo o ira na luvei Kiliati; o Jeesa, mai na vuvale na Jeesaraiti; o Eleki, mai na vuvale na Elekaiti; 31 O Asirieli, mai na vuvale na Asirelaiti; o Sikemi, mai na vuvale na Sikemaiti; 32 O Semita, mai na vuvale na Semidaiti; o Eferi, mai na vuvale na Eferaiti. 33 Ia o Silofeati na luvei Eferi e sega na luvena tagane, ka vakaluveni yalewa ga; ia na yacadratou na luvena yalewa o Silofeati kei Mala, Noa, Okala, o Milika, kei Tirisa. 34 Sai ira oqo na lewe ni vuvale i Manasa; ia o ira e wili rawa vei ira era lewe limasagavulu ka rua na udolu vitu na drau. 35 Oqo o ira na luvei Ifereimi me vaka na nodra veivuvale: o Sucila, mai na vuvale na Sucilaiti; o Bekeri, mai na vuvale na Bekaraiti; o Taani, mai na vuvale na Taanaiti. 36 Oqo o ira na luvei Sucila; o Erani, mai na vuvale na Eranaiti. 37 Sa o ira oqo na vuvale ka ra luvei Ifereimi o ira era sa wiliki rawa mai vei ira: era lewe tolusagavulu ka rua na udolu lima na drau. O ira oqo na luvei Joseva me vaka na nodra veivuvale. 38 O ira na luvei Penijamini me vaka na nodra veivuvale, o Bela, mai na vuvale na Belalaiti; o Asiveli, mai na vuvale na Asivelaiti; o Airami, mai na vuvale na Airamaiti; 39 O Sufami, mai na vuvale na Sufamaiti; o Ufami, mai na vuvale na Ufamaiti. 40 Ia na luvei Bela o Arati kei Nemani: O Arati, mai na vuvale na Arataiti; o Nemani mai na vuvale na Neamaiti. 41 Sai ira oqo na luvei Penijamini me vaka na nodra veivuvale; ia o ira era wili rawa mai vei ira era lewe vasagavulu ka lima na udolu ono na drau. 42 Sai ira oqo na luvei Tani me vaka na nodra veivuvale: O Suami, mai na vuvale na Suamaiti. Oqo o ira na luvei Tani me vaka na nodra veivuvale. 43 Na veivuvale taucoko vei ira na Suamaiti, mai na kedra i wiliwili kece era sa wiliki rawa era lewe onosagavulu ka va na udolu va na drau. 44 Sa i ira oqo na luvei Aseri me vaka na nodra veivuvale: o Jimina, mai na vuvale na Jiminaiti; o Jesui, mai na vuvale na Jesuiti; o Peria, mai na vuvale na Periaite. 45 Mai vei ira na luvei Peria, o Epa mai na vuvale na Epaiti; o Malikieli, mai na vuvale na Malikieliti. 46 Ia na yaca ni luvei Aseri yalewa o Sera. 47 Sai ira oqo na veivuvale ni luvei Aseri o ira era sa wiliki rawa mai vei ira; era sa lewe limasagavulu ka tolu na udolu va na drau. 48 Oqo o ira na luvei Nafitalai me vaka na nodra veivuvale; o Jasili, mai na vuvale na Jasilaiti; o Quni, mai na vuvale na Qunaiti; 49 o Jeseri, mai na vuvale na Jesiraiti; o Silemi, mai na vuvale na Silemaiti. 50 Sai ira oqo na veivuvale i Nafitalai me vaka na nodra vuvale; ia o ira era sa wili rawa mai vei ira era lewe vasagavulu ka lima na udolu va na drau. 51 Sai ira oqo era sa wiliki rawa mai vei ira na Isireli: era lewe ono na drau na udolu vitu na drau tolusagavulu. 52 Sa qai vosa o Jiova vei Mosese, ka vaka: 53 "Vei ira oqo e sa na votai kece na qele me nodra i votavota, me vaka na i wiliwili ni yacadra. 54 "Vei ira na mataqali era lewe levu mo vota vei ira me levu toka na nodra i votavota, kei ira na mataqali lailai me soli vei ira na i votavota e lailai. Me soli yadua na nona i votavota me vaka na kedra i wiliwili era a wiliki kina. 55 "Ia na vanua me wasewasei e na vakawiri madigi; ka me votai vei ira me vaka na yaca ni nodra veimataqali ni nodra qase. 56 "Me vaka na vakawiri madigi me qai votai vei ira na nodra i votavota o koya e levu o koya talega e lailai." 57 Sai ira oqo era a wiliki mai vei ira na Livai me vaka na nodra veivuvale: o Kerisoni, mai na vuvale na Kerisonaiti; o Koaca, mai na vuvale na Koaciti; o Merari, mai na vuvale na Meraraiti. 58 Oqo na nodra vuvale na Livai; na nodra vuvale na Lipinaiti, na vuvale na Epironaiti, na vuvale na Maliti, na vuvale na Musaiti, kei na vuvale na Koraiti. A sa tamai Amirami o Koaca. 59 Na yaca ni wati Amirami o Jokaveti na luvei Livai, ka a sucu mai vei Livai mai Ijipita; ka ratou sucu mai kina na kawa i Amirami vei koya, o Eroni, Mosese, kei Miriama na ganedrau. 60 O Eroni e sucu mai kina o Netava, kei Apiu, Iliesa kei Icama. 61 E rau a mani mate o Netava kei Apiu e na nodrau cabora na bukawaqa tani e na mata i Jiova. 62 O ira era sa wili rawa vei ira e rauta ni ra lewe ruasagavulu ka tolu na udolu, o ira kece na tagane era se qai vula dua ka lako cake; ka ra a sega ni wili me okati vata kei ira na Isireli, baleta ni a sega ni votai vei ira me dua na nodra i votavota mai vei ira na Isireli. 63 Sa ira oqo era a wiliki mai vei Mosese kei Iliesa na bete, ka rau a wiliki ira na Isireli e na veibuca e Moape e na bati ni Joritani, ka takosovi Jeriko. 64 Mai vei ira kece oqo e sega ni tiko kina e dua na tagane ka ra a wiliki mai vei Mosese kei Eroni na bete e na gauna era a wiliki kina na Isireli mai na Vanua Liwa e Saineai. 65 Ni a sa tukuna mada vei ira o Jiova, "Era na mate vakaidina e na vanua liwa." Sa mani sega tale ni dua vei ira e vo, ka vakavo ga o Kelepi na luvei Jefune kei Josua na luvei Nuni.

Na Kedra I Wiliwili 27

Na Lawa Eso Me Baleta Na Ka E Veivotayaki Me Ra Taukena

1 Era sa lako mai na goneyalewa na luvei Silofeati na luvei Efa, na luvei Kiliati, na luvei Makiri, na luvei Manasa na luvei Joseva; ka sai koya oqo na yacadra na luvena yalewa: o Mala, o Noa, o Kala, Milika kei Tirisa. 2 Era sa qai mai tucake tu e na mata i Mosese, kei Iliesa na bete, e na matadra nai liuliu kei nai vavakoso, e na mata ni katuba ni vale ni veitavaki, ka tukuna: 3 "Era a mate na neimami qase e na loma ni vanua liwa, ia o koya e sega ni maliwai ira na i lawalawa era a tucake me ra veivorati kei Jiova, me ra veitomani kei Kora, ia e sa mate ga e na vuku ni nona i valavala ca ka sega na luvena tagane. 4 "E na vuku ni cava e kau tani mai kina na yacana na tamai keitou mai vei ira nona vuvale baleta beka ni sega ni vakaluveni tagane? Mo solia vei keitou e dua nai votavota mai vei ira na wekadra na neimami qase." 5 A sa kauta mai o Mosese na veika o ya kina mata i Jiova. 6 Sa qai vosa o Jiova vei Mosese, ka vaka: 7 "E ratou sa tukuna na ka dina na goneyalewa na luvei Silofeati; mo solia vakaidina vei ira e dua na nodra i votavota mera taukena e na kedra maliwa na wekai tamadra ka me vakadewataki vei ira. 8 "Mo qai vosa vei ira na Isireli ka tukuna; 'Kevaka sa mate e dua na turaga ka sega na luvena tagane, mo qai vakayacora me vakadewataki na nonai votavota vua na luvena yalewa. 9 'Ia kevaka e sega na luvena yalewa, mo qai solia na nona i votavota vei ira na tuakana se tacina tagane. 10 'Kevaka e sega na tuakana se tacina tagane, mo qai solia nona i votavota kivei ira na weka i tamana. 11 'Kevaka e sega na wekai tamana era tagane, mo qai solia na nona i votavota ki vua na wekana e voleka duadua vua e na nona vuvale, me na taukena o koya.'" Oqo me dei tu vei ira na Isireli e dua nai vakananumi ni lewa, me vaka sa vakarota o Jiova vei Mosese.

O Josua Na Nodra I LiuliuVou Na Isireli

12 Sa vosa o Jiova vei Mosese; "Mo cabe cake kina Ulunivanua o Aparimi, ka raica yani na vanua Au sa solia oti vei ira na Isireli. 13 "Ia ni o sa raica oti, o na toki tale ga yani vei ira na wekamu, kina vanua sa gole oti yani kina na tuakamu o Eroni. 14 "Mai na Vanua liwa e Sini, ni ra sa mai veileti ka tiko yavavala na tamata, o a vorata kina na Noqu lewa mo vakarokorokotaki Au e na wai e na matadra." (Oqo na wai o Meripa, e Ketesa e na Vanua Liwa o Sini.) 15 Sa qai vosa o Mosese vei Jiova, ka vaka: 16 "Me ia o Jiova, na Kalou ni yalo ni tamata kecega, me vakaturacake e dua na tamata me raici ira nai vavakoso, 17 "Me daucuru yani ka daucuru mai vei ira, me dau liutaki ira yani i tuba, ka kauti ira tale mai loma, me ra na yaco na lewe ni vavakoso i Jiova me ra kakua ni vaka tu na sipi e sega tu na kedra i vakatawa." 18 Sa qai tukuna o Jiova vei Mosese: "Mo kauti Josua na luvei Nuni me lako vata kei iko, na tamata sa tiko vei koya na Yalo Tabu, ka mo tabaki koya e ligamu; 19 "Mo vakaturi koya ena matai Iliesa na bete kei na matadra taucoko na lewe ni vavakoso ka mo buli koya e matadra kecega. 20 "Mo qai solia vei koya eso nai tutu ni nomu vakatulewa, ka me rawa ni ra vakarokoroko se talairawarawa kina lewe ni vavakoso taucoko. 21 "Me na tucake o koya ka wavu tu e na matai Iliesa na bete, ka me na qai vakataroga e na mata ni Kalou na veika e baleti koya, e na qai vakavotukanataki mai e na lewa ni Urimi. E na nona vosa era na curu yani kina, o koya kei ira taucoko na Isireli O kei ira talega na lewe ni vavakoso." 22 A sa cakava o Mosese me vaka sa vakarota vua o Jiova. A sa tauri Josua ka vakatura e matai Iliesa na bete kei na matadra kece na lewe ni vavakoso. 23 A sa dodoka vua na ligana ka buli koya, me vaka sa vakarota o Jiova e na ligai Mosese.

Na Kedra I Wiliwili 28

Nai Soro Ni Veisiga

1 Sa qai vosa o Jiova vei Mosese, ka tukuna, 2 "Mo vakaroti ira na Isireli, ka tukuna vei ira, 'Na Noqu i Solisoli, Na Qau kakana me baleta na Noqu i Solisoli ka caka e na bukawaqa me ka e boivinaka vei Au, mo na dau qarauna mo vakacabora vei Au ena kena gauna donu ga sa lokuci.' 3 "Mo na qai tukuna vei ira, 'Sa i koya oqo na soli ka caka e na bukawaqa e dodonu mo dou vakacabora vei Jiova; me rua na lami tagane e ka gonegone ka se qai yabaki dua ka sega vua na ca, ena siga veitaravi, mei soro kama e na dau caka tikoga. 4 'E na dua na lami dou na vakacabora e na mataka, kei na dua tale mo dou cabora e na yakavi, 5 'Kei na dua na i katini na efa na valawa, makare mei madrali laukana ka me veiwaki vata kei na dua nai ka va na waiwai. 6 'Oqo na i soro kama edau caka tikoga ka vakatabui e na Ulunivanua o Saineai me ka e boi vinaka, nai madrali e caka e na bukawaqa vei Jiova. 7 'Na kena i madrali liviraki me dua nai ka va me levu cake kina dua na lami; e na loqi tabu mo na liviraka yani na i madrali vei Jiova. 8 'Na lami tale e dua mo na qai vakacabora e na yakavi; mei madrali laukana e na mataka kei na madrali liviraki, mo na qai vakacabora mei madrali e caka e na bukawaqa, me ka e boivinaka vei Jiova.

Nai Soro Ni Siga Ni Vakacecegu

9 'Ena Siga ni Vakacecegu me rua na lami ka se qai yabaki dua, ka sega vua na ca, ka me rua nai katini na efa ni valawa makare mei madrali laukana, veiwaki vata kei na waiwai, kei nai madrali liviraki — 10 'Sai koya oqo nai soro kama e na vei Siga ni Vakacecegu, ka na dau vakacabori vata kei na soro kama kei nai madrali e liviraki.

Nai Soro Ni Veivula

11 'Ena i matai ni veivula mo ni na cabora e dua na i soro kama vei Jiova; me rua na bulumakau gone, dua na sipi tagane, vitu na luve ni sipi gone era se qai yabaki dua, ka se sega na kedra ca; 12 'Tolu na katini na efa na valawa makare mei madrali laukana, veiwaki vata kei na waiwai, me yadua na sipi; 13 'Me dua nai katini na efa na valawa makare, veiwaki vata kei na waiwai, me i madrali e laukana ka me ra yadua na luve ni sipi gone, mei soro kama ka boi vinaka, me i madrali e vakamai e na bukawaqa vei Jiova. 14 'Na nodra i madrali e liviraki me veimama nai taki na waini vua e dua na bulumakau, dua nai katolu vua na sipi tagane, ka dua na i ka va vua na lami; oqo nai soro kama e na veivula yadudua ka me baleta na veivula kece e na dua na yabaki. 15 'Me dua talega na luve ni me ka me i soro ni valavala ca vei Jiova e dodonu me vakacabori, me okati talega vei rau na i soro kama kei nai madrali e liviraki.

Nai Soro Ni Lako Sivia

16 'E na i ka tini ka va ni siga ni matai ni vula sai koya na siga ni Lako Sivia i Jiova. 17 'E na i ka tini ka lima ni siga ni vula vata oqo na soqo ni kana vata; ka na laukana kina na madrai e sega ni vakatubu me siga vitu. 18 'E na i matai ni siga mo dou cakava e dua nai soqosoqo tabu. o nina sega ni cakava kina e dua na cakacaka. 19 'Mo dou qai vakacabora kina e dua na i madrali e vakamai e na bukawaqa mei soro kama vei Jiova; me rua na bulumakau gone, dua na sipi tagane, ka vitu na lami era se qai yabaki dua, mo raica vinaka me ra kua sara ga ni ra tauvi duka se ca. 20 'Na nodra i madrali laukana na valawa makare ka veiwaki vata kei na waiwai; me tolu nai katini na efa me vakacabori me baleta e dua na bulumakau; ka rua na i katini me baleta na sipi tagane; 21 'Mo qai vakacabora e dua na i katini na efa ka me ra tau yadua kece na lami era lewe vitu; 22 'Me dua talega na me ka mei soro ni valavala ca ka me sorovaki kemudou kina. 23 'Mo dou vakacabora na veika oqo mei kuri ni soro kama e na veimataka, ka mei soro kama e dau caka tikoga. 24 'E na kena i valavala oqo mo dou qai vakacabora na kakana e na bukawaqa e na veisiga ka me vitu na siga, me ka e boivinaka vei Jiova; me qai vakacabori mei kuri ni sorokama kei na kena i madrali e liviraki. 25 'E na i kavitu ni siga me dua na nomudou i soqosoqo tabu. Dou kakua ni cakava kina e dua na cakacaka kaukauwa.

Nai Soro E Na Gauna Ni Kanavata Ni Veimacawa

26 'Ena siga talega sa dau ia kina na i sevu, ni o dou sa kauta mai e dua na i madrali e laukana vei Jiova e na gauna ni Kana Vata ni Veimacawa, me qai dua na nomudou i soqosoqo tabu. Dou kakua ni cakava kina e dua na cakacaka kaukauwa. 27 'Mo dou qai vakacabora e dua nai soro kama me ka e boi vinaka vei Jiova; me rua na bulumakau gone, dua na sipi tagane, ka vitu na lami era se qai yabaki dua, 28 'Kei na kedra i madrali e laukana na valawa makare ka veiwaki vata kei na waiwai; tolu na i katini na efa me tau yadua na bulumakau, ka me rua na i katini me baleta na sipi tagane, 29 'Ka dua nai katini me rauti ira yadua na vitu na lami; 30 'Kei na dua na me gone, mo vakacabori kina o iko. 31 'Mo raica vinaka ni ra se sega ni ca. Mo qai vakacabori ira vata kei na kedra i madrali e liviraki, mei kuri ni soro kama kei na i madrali e laukana.

Na Kedra I Wiliwili 29

Nai Madrali Ni Kana Vata Ni Uvu Davui

1 'E na i kavitu ni vula, e nai matai ni siga ni vula, me vakayacori e dua na nomudou i soqosoqo tabu. Dou kakua ni cakava kina e dua na cakacaka kaukauwa. Vei kemudou, oqori na siga mo dou na uvu davui kina. 2 'Mo dou vakacabora e dua na i soro kama me ka e boivinaka vei Jiova: me dua na bulumakau gone, dua na sipi tagane, ka vitu na lami era se qai yabaki dua, ka ra sega ni takavi ca. 3 'Na kedra i madrali laukana na valawa makare e veiwaki kei na waiwai: tolu na i katini na efa me baleta na bulumakau rua na i katini me baleta na sipi tagane, 4 'Ka me ratou yadua nai katini na lewe vitu na lami; 5 'Me dua talega na luve ni me mei soro ni valavala ca, mo dou sorovaki kina; 6 'Me i kuri ni soro kama kei na i madrali laukana ni Vula Vou, na i soro kama kei na i madrali laukana sa dau cabori tiko mai, na i madrali liviraki, me vaka na ka e veiyalayalatitaki, me ka e boivinaka, na i madrali e na buka waqa vei Jiova.

Na Vakacaboi Soro E Na Siga Ni Veisorovaki

7 'E na i katini ni siga ni kavitu ni vula oqo me qai dua na nomudou i soqosoqo tabu. Mo dou vakamalumalumutaka kina na yalomudou; ka dou kakua talega ni cakava kina e dua na cakacaka. 8 'Mo dou qai vakacabora e dua na i soro kama vei Jiova me boiboi vinaka; me dua na bulumakau gone, dua na sipi tagane, ka vitu na lami era se qai yabaki dua. Mo raica vinaka me ra se sega sara ga ni takavi ca. 9 'Na kedra i madrali laukana na valawa makare ka veiwaki kei na waiwai; me tolu na i katini na efa me baleta na bulumakau, rua na i katini me baleta na sipi tagane, 10 'Ka me dua nai katini vei ira yadua na lewe vitu na lami; 11 'Me dua talega na luve ni me me i soro ni valavala ca, me i kuri ni soro ni valavala ca e na siga ni veisorovaki, nai soro kama sa dau caka tikoga mai kei na i madrali laukana, kei na kedra i madrali e liviraki.

Na Vakacaboi Soro E Na Kana Vata Ni Vale Ni Veitavaki

12 'E na i katini ka lima ni siga ni ka vitu ni vula me dua na nomudou i soqosoqo tabu. Dou na sega ni cakava kina e dua na cakacaka kaukauwa ka dou na vakayacora e dua na kana vata vei Jiova me siga vitu. 13 'Mo dou vakacabora e dua na i soro kama, nai madrali e na bukawaqa me boiboi vinaka vei Jiova; e tini ka tolu na bulumakau gone, rua na sipi tagane, ka tini ka va na lami era se qai yabaki dua. Era se sega taucoko ni ra takavi ca. 14 'Na kedra i madrali laukana na valawa makare e veiwaki kei na waiwai; e tolu na i katini na efa ka me ra tau yadua na tini ka tolu na bulumakau, rua na i katini me rau tau yadua na rua na sipi tagane. 15 'Ka me ra tau yadua nai katini na lami era lewe tini ka va; 16 'Me dua talega na luve ni me mei soro ni valavala ca ka mei kuri ni soro kama sa dau caka tiko mai, na kedra i madrali laukana, kei na i madrali liviraki. 17 'E nai karua ni siga mo dou vakacabora e tini ka rua na bulumakau gone, rua na sipi tagane, tini ka va na lami era se qai yabaki dua ka se sega ni takavi ca, 18 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalatitaki; 19 'Me dua tale ga na luve ni me mei soro ni valavala ca, mei kuri ni soro kama sa dau caka tiko kei na kedra i madrali laukana, kei na i madrali e liviraki. 20 'E na i katolu ni siga mo dou vakacabora e tini ka dua na bulumakau, rua na sipi tagane, tini ka va na lami era se qai yabaki dua ka ra sega ni takavi ca, 21 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalatitaki; 22 'Me dua talega na me me i soro ni valavala ca, me i kuri ni soro kama sa dau caka tiko, kei na i madrali laukana, kei na i madrali e liviraki. 23 'E na i ka va ni siga mo dou vakacabora e tini na bulumakau, rua na sipi tagane, kei na tini ka va na lami era se qai yabaki dua ka sega ni takavi ca, 24 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalatitaki; 25 'Me dua talega na luve ni me me i soro ni valavala ca me i kuri ni soro kama sa dau caka tiko, na kena i madrali laukana, kei na kena i madrali liviraki. 26 'E na i ka lima ni siga mo dou vakacabora e ciwa na bulumakau, rua na sipi tagane, kei na tini ka va na lami era se qai yabaki dua ka sega ni takavi ca, 27 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalati; 28 'Me dua talega na me me i soro ni valavala ca, mei kuri ni soro kama sa dau caka tiko mai, na kena i madrali laukana, kei na kena i madrali liviraki. 29 'E nai ka ono ni siga mo dou vakacabora e walu na bulumakau, rua na sipi tagane, kei na tini ka va na lami era se qai yabaki dua ka sega ni takavi ca; 30 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalatitaki; 31 'Me dua tale ga na me mei soro ni valavala ca, me i kuri ni soro kama sa dau caka tiko mai, na kena i madrali laukana, kei na kena i madrali liviraki, 32 'E na i kavitu ni siga mo dou vakacabora e vitu na bulumakau, rua na sipi tagane, kei na tini ka va na lami era se qai yabaki dua ka sega ni takavi ca, 33 'Kei na kedra i madrali laukana kei na kedra i madrali liviraki me baleta na bulumakau, na sipi tagane, kei na lami, e na kedra i wiliwili, me vaka na ka sa veiyalayalatitaki; 34 'Me dua tale ga na me me i soro ni valavala ca, me i kuri ni soro kama sa dau caka tiko mai, na kena i madrali laukana kei na kena madrali liviraki. 35 'E na i ka walu ni siga me dua na nomudou i soqosoqo tabu. E na sega ni dou cakava kina e dua na cakacaka kaukauwa. 36 'Dou na vakacabora kina e dua na i soro kama, e dua na i madrali ena buka waqa me boiboi vinaka vei Jiova; e dua na bulumakau, dua na sipi tagane, vitu na lami era se qai yabaki dua ka sega ni takavi ca, 37 'Kei na kedra i madrali laukana kei na kedra i madrali liviraki me baleta na bulumakau, na sipi tagane, na lami, e na kedra i wiliwili, me vaka na ka sa veiyalayalatitaki; 38 'Me dua talega na me me i soro ni valavala ca, mei kuri ni soro kama sa dau caka tiko mai, na kena i madrali laukana, kei na kena i madrali liviraki. 39 'Oqo na veika mo dou vakacabora vei Jiova e na veigauna ni nomudou kana vata e sa lokuci (mei kuri ni nomudou i soro ni bubului kei na i soro ni yalovinaka) me nomudoui soro kama kei na i madrali laukana, me nomudou i madrali liviraki kei na i madrali ni veivinakati.'" 40 Sa qai tukuna o Mosese vei ira na Isireli na veika kecega oqo, me vaka sa vakarota o Jiova vei Mosese.

Na Kedra I Wiliwili 30

Na Lawa Me Baleta Na Bubului

1 Sa qai vosa o Mosese vei ira na veiliutaki e na nodra yavusa na Isireli, ka vaka, "Sai koya oqo na veika sa vakarota o Jiova: 2 "Kevaka sa yalayala vei Jiova e dua na turaga me cavuta e dua na vosa ni bubului me vauci koya kina dua na veidinadinati, me kakua ni voroka tale o koya na nona vosa, me cakava kece sara ga me vaka na ka sa talaucaka mai gusuna. 3 "Se me dua na marama e cavuta e dua na vosa ni bubului vei Jiova, ka qai vauci koya kina so na veidinadinati ni se tiko voli ga e na vale i tamana e na nona gauna va goneyalewa, 4 "Ka qai rogoca o tamana na nona bubului kei na veidinadinati e sa vauci koya tiko kina, ka sa galu ga kina o tamana, e na dei tikoga na nona bubului o ya, kei na veidinadinati kece, e sa vauci koya oti tu kina era na dei tikoga. 5 "Ia kevaka sa vakadaroya o tamana e na siga e rogoca kina, e sa na qai sega ni vakadeitaki e dua na nona vosa ni bubului se na veidinadinati e sa vauci koya oti tu kina; e na sereki koya o Jiova, baleta ni sa vakadaroya o tamana. 6 "Ia kevaka e mani taura o koya e dua na watina, ni se vauci tikoga e na nona bubului se me cavuta vakailoa e dua na vosa mai na gusuna e na vuku ni veika e vauci koya tiko kina, 7 "Ka qai rogoca o watina, ka qai galuvi koya e na siga e rogoca kina, e na dei tikoga na nona bubului kei na veidinadinati e vauci koya tu kina e na dei tikoga. 8 "Ia kevaka sa vakadaroya o watina e na siga e rogoca kina, e sa na vakatawayagataka o koya na nona bubului e ya cakava kei na veika e talaucaka e gusuna, ka vauci koya tu kina, e na qai sereki koya o Jiova. 9 "Ia na nona bubului talega na yada se dua na yalewa sa biuta na watina, o koya e ya vauci tu kina, e na tu saqati koya. 10 "Kevaka e sa bubului oti e na vale i tagane, ka vauci koya e na dua na veidinadinati se yalayala, 11 "ka qai rogoca o tagane ka galuvi koya ga qai sega ni vakadaroya, e ra na dei kece tikoga na nona yalayala, kei na veidinadinati kece e sa vauci koya oti tu kina era na dei tikoga. 12 "Ia kevaka me sa vakatawayagataka kece vakaidina o tagane e na siga e rogoca kina, na ka kecega e talaucaka mai gusuna me baleta na nona yalayala se na veidinadinati e vauci koya tu, e na sega ni vakadeitaki, a sa vakadaroya o watina tagane, e na qai sereki koya o Jiova. 13 "Na vei yalayala taucoko kei na vei vosa ni bubului e vakamavoataka na yalona, e na vakadeitaka o tagane, se me vakatawayagataka talega o tagane. 14 "Ia kevaka e sa galu sara kina o tagane e na veisiga e veitaravi, me sa qai vakadeitaka o koya na yalayala kece i yalewa se na veidinadinati ka vauci tu kina, me vakadeitaka o tagane, baleta ni a sega ni tukuna e dua na ka vei yalewa e na siga e ya rogoca kina. 15 "Ia kevaka e sa vakatawayagataka o koya e na gauna e rogoca oti kina, e sa na vakacolati vua na beitaki ni yalona na yalewa." 16 Sai koya oqo na veilesilesi e a vakarota o Jiova vei Mosese, me baleta e dua na tagane kei na watina yalewa, ka vakatalega kina vua e dua na turaga kei na luvena yalewa ni se goneyalewa e na loma ni vuvale i tamana.

Na Kedra I Wiliwili 31

Na Vakacibi I Valu Vei Ira Na Kai Mitiani

1 A sa vosa o Jiova vei Mosese, ka vaka: 2 "Mo cudruvaki ira na kai Mitiani e na vukudra na Isireli. Ni oti o ya o sa na qai toki yani vei ira na wekamu." 3 Sa qai vosa o Mosese vei ira na tamata, ka vaka, "E so vei kemudou me ra vakaiyaragitaki ira kina i valu, ka me ra kaba vakaivalu yani vei ira na kai Mitiani ka ra veisausaumi e na vuku i Jiova vei ira na kai Mitiani. 4 "Me ra tau yadua na udolu mai na veiyavusa kece e Isireli me ra talai yani kina i valu." 5 A ra sa mani digitaki mai na veiwasewase e Isireli era lewe dua na udolu mai na veiyavusa, ka ra sa lewe tinikarua na udolu era sa vakaiyaragi tu kina i valu. 6 A sa talai ira yani o Mosese kina i valu, e ra lewe dua na udolu mai na veiyavusa, sa talai ira yani vata kei Finiasi na luvei Iliesa na bete, kei na vosa ni veidinadinati tabu vata kei na davui ni sikinala e ligana. 7 A ra sa qai ia na veiqedravu e na i valu kei ira na kai Mitiani, me vaka a vakarota o Jiova vei Mosese, ka ra sa vakamatei ira taucoko na tagane. 8 A ra sa vakamatei ira talega na tui ni vanua o Mitiani ka ra wili talega kina o ira era mate e na nodra vakamatei — o Ivi, Rikemi, Suri, Uri, kei Repa, o iratou na lewe lima na tui e Mitiani. o pelami na luvei Piori era sa vakamatei koya talega e nai seleiwau. 9 Ia o ira na Isireli era sa qai vesuki ira bula na yalewa taucoko ni Mitiani, ka ra wili talega kina na gone lalai, ka ra sa kauti ira talega na nodra bulumakau mei toki ni valu, kei na nodra manumanu, kei na veika kecega era taukena. 10 Era sa vakama e na bukawaqa na nodra veikoro era tiko kina, kei na nodra koro vakabai kecega, 11 Era kauta kece nai toki ni valu kei na ka kecega era taukena – na tamata kei na manumanu.

Na Lesu Mai Nai Valu

12 Era sa qai kauti ira na tamata vesu, na nodra i yau, kei nai toki ni valu vei Mosese, kivei Iliesa na bete, kei ira talega na i vavakoso kece e Isireli, kina nodra i tikotiko e na vanua buca levu ni vanua o Moape e na yasa ni Joritani, ka takosovi Jeriko. 13 A sa lako yani o Mosese, o Iliesa na bete, kei ira taucoko nai liuliu e na nodra i vavakoso, me ra la'ki veitata kei ira e na taudaku ni nodra i tikotiko. 14 A sa cudru o Mosese vei ira era vakaitutu e na mataivalu, o ira era kavetani ni yadrau, kara se qai lesu mai e nai valu. 15 A sa tukuna vei ira o Mosese: "O ni sa vakabulai ira kece tikoga na yalewa? 16 "Raica, o ira na yalewa oqo era a vakavuna vei ira na Isireli, e nai vakavuvuli vaka Pelami, me ra caka ca vei Jiova ena veika e yaco vei Piori, sa yaco kina na mate ca e na kedra maliwa na i vavakoso i Jiova. 17 "Ia oqo, mo ni vakamatei ira taucoko na tagane kei ira na gone lalai, ka vakamatei ira kecega na yalewa era sa tiko vata kei na dua na tagane. 18 "Ia mo ni maroroi ira ga me nomudou goneyalewa era se sega ni tiko vata kei na dua na tagane. 19 "Ia oi kemudou, mo dou tiko yani e na taudaku ni tikotiko me vitu na siga; o koya e sa vakamatea oti e dua ga na tamata, se o cei ga e tara e dua e vuetaki, mo dou vakasavasavataki kemudou kei ira era kau vakavesu mai e nai katolu kei nai kavitu ni siga. 20 "Me vakasavasavataki kece nai sulu, na ka kecega era buli e na leca, na veika kece era tali e na vuti ka ni me, kei na ka kecega era buli e na kau." 21 Sa qai vosa oiliesa na bete vei ira taucoko na tagane era a tiko kina i valu me ra la'ki vala, "Sai koya oqo na veiyalayalati ni vunau ka vakarota o Jiova vei Mosese: 22 "Na koula ga, na siliva, na varasa, na kaukamea, na kava, kei na uma, 23 "Na ka kecega e sega ni kama yavu rawa e na bukawaqa, mo dou va kama e na buka, era na qai savasava; me ra na qai sava e na wai ni veivakasavasavataki. Ia na ka kecega era sega ni kama yavu rawa mo na qai biuta i wai. 24 "Mo dou na qai savata na nomudou i sulu e na i ka vitu ni siga ka mo dou savasava, ia ni oti o a mo dou qai curu mai kina i tikotiko."

Na Kena Wasei Na I Tokinivalu

25 A sa vosa o Jiova vei Mosese, ka vaka: 26 "Mo wilika mai na veika era a tokitaki mai – na tamata kei na manumanu - o iko kei Iliesa na bete kei ira na turaga qase ena i soqosoqo; 27 "Ka mo wasea rua na i toki, vei ira era a vakaitavi e na i valu, ka ra a lako mera la'ki vala, kei ira kece na i soqosoqo. 28 "Ka vota nai vakacavacava e nei Jiova kivei ira na tamata i valu ka ra a lako yani me ra la'ki vala; me dua mai na vei ya lima na drau na tamata, na bulumakau, na asa, kei na sipi; 29 "Mo taura mai na kedra veimama, ka solia vei Iliesa na bete mei madrali e lavelaveti vei Jiova. 30 "Mai na nodra veimama na Isireli mo qai taura e dua mai na limasagavulu, kau mai vei ira na tamata, na bulumakau, na asa, kei na sipi, mai na manumanu kece, ka solia vei ira na Livai era vakaraica tiko na vale i Jiova." 31 E rau sa cakava vakakina o Mosese kei Iliesa na bete me vaka sa vakaroti Mosese kina o Jiova. 32 Na vo ni yau ka ra a tokitaki mai ka ra a kauta mai na tamata i valu e ono na drau vitusagavulu ka lima na udolu na sipi, 33 vitusagavulu ka rua na udolu na bulumakau, 34 onosagavulu ka dua na udolu na asa, 35 kei na tolusagavulu ka rua na udolu taucoko na tamata, o ira na yalewa era se sega ni tiko vata kei na tagane. 36 Ia na kena veimama, na nodra i votavota o ira era lako kina i valu, na kedra i wiliwili e tolu na drau tolusagavulu ka vitu na udolu lima na drau na sipi; 37 Ia na ka mei vakacavacava vei Jiova e na sipi e ono na drau vitusagavulu ka lima. 38 Na bulumakau e tolusagavulu ka ono na udolu, ka mani vitusagavulu ka rua e i vakacavacava vei Jiova. 39 Na asa e rauta ni tolusagavulu na udolu, lima na drau ia na i vakacavacava vei Jiova e onosagavulu ka dua. 40 Na tamata era lewe tini ka ono na udolu ka ra i vakacavacava vei Jiova era lewe tolusagavulu ka rua na tamata. 41 A sa solia o Mosese nai vakacavacava e nei Jiova nai soro e lavelaveti ki vei Iliesa na bete, me vaka sa vakaroti Mosese kina o Jiova. 42 Ia mai na kedra veimama ni tamata e Isireli, ka tawasei ira mai o Mosese vei ira na a laki vala - 43 na veimama ka nodra na i soqosoqo e tolu na drau tolusagavulu ka vitu na udolu lima na drau na sipi, 44 Tolusagavulu ka ono na udolu na bulumakau, 45 tolusagavulu na udolu lima na drau na asa, 46 kei na tini ka ono na udolu na tamata - 47 ia mai na kedra veimama na Isireli sa kauta mai o Mosese e dua mai na lewe limisagavulu, mai na tamata kei na manumanu ka solia vei ira na Livai, ka ra qarava tiko na vale i Jiova, me vaka sa vakarota o Jiova vei Mosese. 48 Ia o ira na i liuliu era veiliutaki ena veiudolu ni mataivalu, ka kavetani ni veiudolu kei na kavetani ni yadrau, era sa toro voleka mai vei Mosese; 49 A ra sa tukuna vei Mosese, "Oi keitou na nomu tamata keitou sa wiliki ira oti na tamata i valu ka ra vakarurugi tiko e na ruku ni neitou veiliutaki, ka sega ni dua vei keimami me yali. 50 "Keitou sa mani kauta mai kina oqo e dua na i madrali vei Jiova, na veika kece era sa kunea na tamata yadua na koula totoka, na qato kei na i taube na mama kei na sau ni daliga, me keimami cabora e dua na i madrali vei Jiova." 51 E rau sa ciqoma o Mosese kei Iliesa na bete na koula mai vei ira, kei ira kece na i yau talei e so. 52 Ia na koula taucoko me ra i madrali ka ra vakacabora vei Jiova, mai vei ira na kavetani ni veiudolu kei ira na kavetani ni yadrau, e rauta taucoko ni tini ka ono na udolu vitu na drau limasagavulu na uma i lavo. 53 (o ira na tamata i valu era sa taura nai toki, me dui nodra yadudua.) 54 Ia o Mosese kei Iliesa na bete e rau sa ciqoma na koula mai vei ira na kavetani ni veiudolu kei na veiyadrau, ka rau sa kauta mai kina vale ni veitavaki me kedra i vakananumi na Isireli vei Jiova.

Na Kedra I Wiliwili 32

O ira Na Yavusa Era Sa Vakaitikotiko Ena Tokalau Ni Vanua o Joritani

1 A sa yaco o ira na luvei Rupeni kei ira na luvei Kata era sa taukena e oba vaka oba na manumanu; ia ni ra sa raica na vanua o Jaseri kei na vanua o Kiliati, ni rau sa vanua vinaka dina sara ga ni susu manumanu. 2 O ira na luvei Kata kei ira na luvei Rupeni era sa lako mai ka mai vosa vei Mosese, kei Iliesa na bete, kei ira talega nai liuliu vei ira nai soqosoqo, ka tukuna, 3 "O Ataroci, Tiponi, Jaseri, Nimirai, Esiponi, Iliale, Sepami, Nipo kei Pioni, 4 "Na veimatanitu ka vakadrukai ira o Jiova e na matadra na i vavakoso e Isireli, e vanua ni susu manumanu, ia e sa bini kasauru tu oqo vei keimami na nomu tamata na manumanu." 5 E ra sa mani tukuna, "Kevaka me keimami kune loloma e matamuni, mo ni solia mada na vanua oqo vei ira na nomu tamata me ra taukena. Ni kakua ni kauti keimami ki na tai kadua ni Joritani." 6 A sa tukuna o Mosese vei ira na luvei Kata kei ira na luvei Rupeni: "Me ra lako li kina i valu na wekamu ia o iko mo dabedagese tiko ga eke? 7 "Na cava o vakayalolailaitaka kina na yalodra na Isireli me ra lako yani kina vanua sa solia oti vei ira o Jiova? 8 "Sai koya oqo na ka era a cakava na nomuni qase ena noqu a talai ira mai Ketesa Parinea me ra laki vakaraica na vanua. 9 "E na nodra a lako cake yani kina Buca o Esikoli ka raica na vanua, era sa vakayalolailaitaka na yalodra na Isireli, ka ra a sega ni mani lako rawa sara kina vanua sa solia oti vei ira o Jiova. 10 "A sa waqa mai kina na cudru i Jiova e na siga o ya, ka mani bubului kina o Koya, ka tukuna, 11 'E dina ni na sega ni dua na tamata ka lako cake mai Ijipita, vei ira era sa sivia na yabaki ruasagavulu ka lako cake, me ra na raica na vanua Au sa bubuluitaka oti vei Eparama, Aisake, kei Jekope, baleta ni ra a sega ni vakamuri Au taucoko mai na vu ni yalodra, 12 'E vakavo ga o Kelepi na luvei Jefune, na Kenisaiti, kei Josua na luvei Nuni, ni rau sa vakamuri Jiova dina sara ga.' 13 "A sa waqa na cudru i Jiova vei ira na Isireli, ka sa qai vakayacora me ra lako wavokita tu na vanua liwa me vasagavulu na yabaki, me yacova ni ra sa kawaboko taucoko na kawa tamata era a caka ca e na mata i Jiova. 14 "Ka raica! O ni sa tubu cake mo ni baci sosomitaki ira na nomuni qase, na kawa ni tamata caka ca, ka o ni sa vakalevutaka tikoga na cudru katakata i Jiova vei Isireli. 15 "Kevaka o ni na vuki tani mai na nomuni muri Koya, e na baci biuti ira tale vakadua o Koya e na vanua liwa, ia oi kemuni o ni na vaqeavutaki ira taucoko na tamata oqo." 16 Era sa qai toro voleka mai vei koya ka tukuna: "Keimami na tara e ke e so na bai ni sipi me baleti ira na neimami manumanu, kei na veikoro me baleti ira na luvei keimami, 17 "Ia oi keimami, keimami na vakaiyaragi tu, me keimami liutaki ira yani na Isireli me yacova ni keimami sa kauti ira mai kina nodra vanua; o ira na luvei keimami era na tiko e na veikoro e vakabai baleti ira na i taukei ni vanua o ya. 18 "Keimami na sega ni lesu tale kina neimami vale me yacova ni ra sa rawata taucoko na nodra i votavota o ira na Isireli. 19 "Baleta ni keimami na sega ni votai vata kei ira e na yasana kadua ni Joritani ka tete yani, ni neimami i votavota e sa lutu mai vei keimami e na tokalau ni vanua o Joritani. " 20 Sa qai tukuna vei ira o Mosese: "Kevaka dou na cakava na ka oqo, ka dou vakaiyaragitaki kemudou e na mata i Jiova me baleta na i valu, 21 "Kei ira taucoko na nomudou tamata vakaiyaragi ni ra takosova na Joritani e na mata i Jiova me yacova ni sa vakasavi ira tani na Nona meca o Koya e matana, 22 "Kei na vanua ni sa vakamalumalumutaki e na mata i Jiova, ia, ni sa oti o ya, o ni na qai lesu tale mai ka o ni sa na sega ni cala e na mata i Jiova kei na mata i Isireli; e sa na qai nomuni na vanua oqo e na mata i Jiova. 23 "Ia kevaka o ni na sega ni cakava vakakina, mo ni nanuma oqo, o ni sa i valavala ca vei Jiova; ka mo ni kila ni na talevi kemuni tale na nomuni cala. 24 "Mo ni tara na veikoro me nodra na luvemuni kei na bai me baleta na nomuni sipi, ka mo ni cakava na ka sa vosataka na gusumuni." 25 Ia o ira na luvei Kata kei ira na luvei Rupeni era sa vosa vei Mosese ka tukuna: "Oi keimami na nomuni tamata vakarorogo keimami na cakava na ka sa tukuna vei keimami na neimami turaga i liuliu. 26 "O ira na neimami lalai, na wati keimami, na neimami qele ni sipi, kei ira na neimami manumanu kecega era na tiko mai keya e na veikoro e Kiliati; 27 "Ia oi keimami na nomuni tamata keimami na takoso yani ki tai kadua, o ira kece na tamata era sa vakaiyaragi tu kina i valu, e na mata i Jiova mera vala, me vaka sa tukuna na noqu turaga." 28 Sa qai vakatauca o Mosese na nona lewa me baleti ira kivei Iliesa na bete, vei Josua na luve i Nuni, vata kei ira na qase i liuliu mai na veiyavusa e Isireli. 29 Sa qai tukuna vei ira o Mosese: "Kevaka era sa takosova rawa na Joritani kei kemudou o ira na luvei Kata kei ira na luvei Rupeni, o ira kece era vakaiyaragi tu kina i valu e na mata i Jiova, sa na vakamalumalumutaki na vanua e matamuni, mo ni na qai solia vei ira na vanua o Kiliati me ra taukena. 30 "Ia kevaka era mani sega ni takoso rawa kei kemudou ka vakaiyaragi tu, e na qai so na vanua e na kemudou maliwa me ra taukena e na vanua o Kenani." 31 Era sa qai sauma yani o ira na luve i Kata kei ira na luve i Rupeni, ka vaka: "Me vaka sa vosa o Jiova vua na nona tamata, keimami na kitaka vakakina. 32 "Keimami na takoso yani ka vakaiyaragi tu e na mata i Jiova kina vanua o Kenani, ia na neimami i votavota keimami sa taukena e na yasa ni Joritani oqo e na neimami tikoga." 33 A sa mani solia o Mosese vei ira na luvei Kata, kei ira na luve i Rupeni, kei na veimama ni yavusa i Manasa na luve i Joseva, na matanitu i Sioni na nodra tui na Amoraiti kei na tui o Oki na tui Pasani, na vanua kei na kena veikoro e na i yalayala ni vanua, na veikorokoro ka ra wavolita tu na vanua taucoko. 34 Ia o ira na luve i Kata era sa tarai Tiponi kei Ataroci kei Aroeri, 35 O Atoroci kei Sofani o Jaseri kei Jokabea, 36 Peci Nimira kei Peci Arani, era koro vakabai, ka vei bai ni sipi. 37 O ira na luve i Rupeni era sa tarai Esiponi kei Ilialei kei Kirijaceimi, 38 O Nipo kei Pali Meoni (sa veisautaki na yacadra) kei Sipima; ka ra sa vakatoka tale e so na yaca kina veikoro era sa tara. 39 A ra sa lako na luve i Makiri na luvei Manasa ki Kiliati ka taura, ka vakasavi ira tani na Amoraiti era tiko kina. 40 A sa mani soli Kiliati o Mosese vei Makiri na luvei Manasa, ka sa mani vakaitikotiko kina o koya. 41 A sa lako talega o Jairi na luve i Manasa ka taura e so na koro lalai, ka vakatokai ira me o Avoci Jairi. 42 Sa qai lako yani o Nopa ka tauri Kenaci kei na kena veikoro, ka vakatoka me o Nopa, me rau veiyacani ga.

Na Kedra I Wiliwili 33

Sa Vakadikevi Tale Na I Lakolako Nei Isireli Mai Ijipita

1 Sa vakaoqo na nodra i lakolako mai na Isireli, ka ra a biubiu mai na vanua o Ijipita kei na nodra veimataivalu e na ruku ni liga i Mosese kei Eroni. 2 A sa vola o Mosese na i tekitekivu ni nodra i lakolako me vaka sa vakarota o Jiova. Sa vakaoqo na nodra i lakolako me vaka na kena tekivu mai: 3 Era sa tekivu biubiu mai Ramisese e na i matai ni vula, e na i ka tini ka lima ni siga ni matai ni vula; ni oti e dua na siga ni kana vata ni Lako Sivia e ra sa lako mai na Isireli e na yalododonu e na matadra taucoko na kai Ijipita. 4 O ira na kai Ijipita era se buluti ira tiko na nodra ulumatua, ka a vakamatei ira o Jiova e na kedra maliwa. Ena nodra Kalou talega sa vakatauca vei ira na cudru o Jiova. 5 Era sa qai lako mai na Isireli mai Ramisese ka mai tiko e Sukoci. 6 Era sa biubiu mai Sukoci ka mai tiko e Ecami, ka toka e na mua ni yalayala ni vanua liwa. 7 Era sa lako mai Ecami ka mua lesu tale ki Pi Airoci, ka toka e na tokalau ni vanua o Pali Sifoni; ka ra sa mai toka e Mikitoli. 8 Era sa biubiu tale mai Airoci ka ra lako curuma na loma ni wasawasa kina vanua liwa, ka ra lako tiko me tolu na siga e na Vanua Liwa e Icami, ka mai tiko sara e Mara. 9 Era sa lako sara mai Mara ka yaco sara ki Elimi. Mai Elimi e tiko kina e tinikarua na i vurevure ni wai kei na vitusagavulu na vu ni balabala; ka ra sa mai tiko sara e keya. 10 Era sa toki mai Elimi ka mai tiko e na Wasa Damudamu. 11 Era sa toki mai na Wasa Damudamu ka mai tiko sara e na vanua liwa e Sini. 12 Era sa biubiu mai na Vanua Liwa e Sini ka mai tiko sara e Tofeka. 13 Mai Tofeka era sa la'ki tiko sara ki Alusi. 14 Era sa biubiu mai Alusi ka mai tiko e Refitimi, na vanua e sega kina na wai me ra gunu na tamata. 15 Era sa biubiu mai Refitimi ka mai tiko sara e na Vanua Liwa e Saineai. 16 Era sa biubiu mai na vanua liwa e Saineai ka mai tiko sara e Kipiroci Atava. 17 Era sa biubiu mai Kipiroci Atava ka mai tiko sara e Aseroci. 18 Era sa toki mai Aseroci ka mai tiko sara e Ricima. 19 Era sa toki tale mai Ricima ka mai tiko e Rimoni Peresi. 20 Era sa toki mai Rimoni Peresi ka mai tiko sara e Lipina. 21 Era sa biubiu mai Lipina ka mai tiko e Risa. 22 Era sa toki mai Risa ka mai tiko e Kelaca. 23 Era sa biubiu mai Kelaca ka mai tiko e na Uluni vanua o Sefa. 24 Era sa toki mai na Ulunivanua o Sefa ka mai tiko e Arata. 25 Era sa biubiu mai Arata ka mai tiko e Makeloci. 26 Era sa biubiu mai Makeloci ka mai tiko e Taaca. 27 Era sa biubiu mai Taaca ka mai tiko e Tera. 28 Era sa biubiu mai Tera ka mai tiko e Micika. 29 Era sa biubiu mai Micika ka mai tiko e Asimona. 30 Era sa biubiu mai Asimona ka mai tiko e Mosiroci. 31 Era sa biubiu mai Mosiroci ka mai tiko e Bini Jakani. 32 Era sa biubiu mai Bini Jakani ka mai tiko e Ori Akitikati. 33 Era sa biubiu mai Ori Akitikati ka mai tiko e Jotabaca. 34 Era sa biubiu mai Jotabaca ka mai tiko e Aporona. 35 Era sa biubiu mai Aporona ka mai tiko e Esioni Kepa. 36 Era sa biubiu mai Esioni Kepa ka mai tiko e na Vanua Liwa e Sini, sa i koya na vanua o Katesi. 37 Era sa biubiu mai Katesi ka mai tiko e na Ulunivanua o Ori, e na i yalayala ni vanua e Itomi. 38 A sa lako cake o Eroni na bete ki na ulunivanua o Ori me vaka na i vakaro i Jiova, ka mani mate e keya ni oti e vasagavulu na yabaki na nodra biubiu mai na Isireli i Ijipita, e nai matai ni siga e na i ka lima ni vula. 39 A sa yabaki dua na drau ruasagavulu ka tolu o Eroni ena nona mai mate e na ulunivanua o Ori. 40 Ia na tui o Erati, na Kenanaiti, ka tiko e na Ceva ni vanua o Kenani, sa rogoca ni ra sa lako tiko mai na Isireli. 41 Era sa biubiu sara kina mai na Ulunivanua o Ori ka mai tiko e Salimona. 42 Era sa biubiu tale mai Salimona ka mai tiko e Punoni. 43 Era sa biubiu tale mai Punoni ka mai tiko e Opoci. 44 Era sa biubiu mai Opoci ka mai tiko e Iti Aparimi, ena i yalayala ni vanua o Moape. 45 Era sa biubiu mai Itimi ka mai tiko e Tiponi Kata. 46 Era sa lako mai Tiponi Kata ka mai tiko e Alimoni Tipalacaimi. 47 Era sa toki mai Alimoni Tipalacaimi ka mai tiko e na veiulunivanua e Aparimi, ni bera o Nipo. 48 Era sa biubiu mai na veiulunivanua e Aparimi ka mai tiko e na veidelana e Moape e na yasa ni Joritani, ka takosovi Jeriko toka mai. 49 Era sa mai tiko e na Joritani, mai Peci Jesimoci me yaco sara ki Epeli Akasia Kuruvi e na veidelana e Moape.

Na I Tuvatuva Ni Kena Kabai Vakaivalu o Kenani

50 A sa vosa o Jiova vei Mosese e na veidelana e Moape e na yasa ni Joritani, ka takosovi Jeriko toka, ka tukuna, 51 "Mo vosa vei ira na Isireli, ka tukuna vei ira: 'Ni o ni sa takosova oti na Joritani kina vanua o Kenani, 52 'Mo ni qai vakasavi ira tani taucoko na i taukei ni vanua e matamuni, vaqeavutaka na nodra vatu ceuti, kei na nodra veimatakau, ka vakarusa na veivanua cecere; 53 'Mo ni vakawabokotaki ira taucoko na i taukei ni vanua ka mo ni taukena sara, Ni'u sa solia oti vei kemuni na vanua mo ni taukena. 54 'Ia mo ni qai vota na vanua e na vakawiri madigi me ra votai kina na nomuni vuvale; vei ira era vuvale levu me levu na nodra i votavota, kei ira na vuvale lailai me lailai na nodra i votavota; ena soli yadudua vua na i votavota me vaka sa dusia na vakawiri madigi. Mo dou qai taukena me vaka na veiyavusa nodra na nomuni qase. 55 'Ia kevaka o ni na sega ni vakasavi ira tani na i taukei ni vanua e matamuni, e na qai yaco o ira dou vakabulai ira tiko me ra na voto ni kau e matamudou ka ra na kau votovotoa e na sarisarimudou, ia era na vakararawataki kemudou e na vanua dou sa tiko kina. 56 'E sa na qai yaco Ni'u na cakava vei kemudou na veika Au nanuma tiko Me'u cakava vei ira.'"

Na Kedra I Wiliwili 34

Na I Yalayala Ni Vanua Ka Digitaki E Kenani

1 Sa qai vosa o Jiova vei Mosese, ka tukuna, 2 "Mo vakaroti ira na Isireli, ka tukuna vei ira: 'Ni o ni sa lako mai kina vanua o Kenani, sa i Koya oqo na vanua e sa na lutu vei kemuni mo ni taukena — na vanua o Kenani me yacova na kena i yalayala. 3 'Na nomudou i yalayala mai na ceva e sa tekivu mai na Vanua Liwa e Sini me yaco sara kina i yalayala e Itomi; kei na kena i yalayala kina ceva e na tete yani kina tokalau me yaco sara kina Waitui Masima; 4 'Na nomudou i yalayala e na vuki mai e na yasana kina ceva ni vanua vaka Aseniti Akarapimi, ka yaco sara ki Sini, ka na tiko talega e na ceva kei Ketesa Parinea; ka na toso sara yani ki Asari Atari, ka yaco sara ki Asimoni; 5 'Na kena i yalayala e na vuki mai Asimoni kina Uciwai e Ijipita, ka na mai cava toka e na Wasawasa. 6 'Ia na i yalayala kina mua i ra, e na nomudou na Waitui Levu me kena i yalayala, sa i koya oqo na nomudou i yalayala e na mua i ra. 7 'Sa i koya oqo na nomudou i yalayala e na Vualiku: Mai na Waitui Levu mo dou qai makataka na laini ni nomudou i yalayala me yaco sara kina Uluni vanua o Ori; 8 'Mai na ulunivanua o Ori mo dou qai makataka na nomudou i yalayala kina i curucuru i Amaci; kei na i vakatakilakila ni yalayala e na donui Setati; 9 'Na i yalayala e na toso sara yani ki Sifironi, ka na mai cava e Asari Enani. Oqo na nomudou i yalayala e na vualiku. 10 'Mo dou na qai makataka na nomudou i yalayala e na tokalau me tekivu mai Asari Enani ki Sefami; 11 'Na i yalayala e na lako sobu mai Sefami ki Ripila e na tokalau ni vanua o Aini; na i yalayala e na lako sobu sara me la'ki yaco kina tokalau ni vanua e na Wasawasa o Kinereci; 12 'Na i yalayala e na gole sobu vaka kina Joritani, ka na la'ki cava kina Waitui Masima. Ena nomudou vanua taucoko oqo kei na kena veiyalayala e ra wavolita.'" 13 Sa qai vakaroti ira na Isireli o Mosese, ka vaka: "Sa i koya oqo na vanua mo ni taukena e na vakawiri madigi, na vanua e sa vakarota o Jiova me solia kina ciwa na yavusa kei na veimama-tale ni yavusa. 14 "Na nodra yavusa na luvei Rupeni me vaka na vuvale ni nodra qase, kei na yavusa i Kata me vaka na vuvale ni nodra qase, era sa ciqoma oti na nodra i votavota; kei na veimama ni yavusa i Manasa era sa ciqoma oti talega na nodra i votavota. 15 "Na rua na yavusa kei na veimama ni yavusa era sa ciqoma oti na nodra i votavota e na yasa ni Joritani oqo, me takosova mai na tokalau kei Jeriko, me yaco sara kina i cadracadra ni siga."

Era Sa Digitaki Na I Liuliu Mera Wasewasea Na Vanua

16 Sa qai vosa o Jiova vei Mosese, ka tukuna, 17 "Oqo na yacadra na turaga e na kemudou maliwa me ra wasewasea na vanua me nomudou i votavota: O Iliesa na bete kei Josua na luve i Nani. 18 "Mo dou qai taura na vei liuliu yadudua ena nomudou dui yavusa me ra veivotayaka na vanua mo dou taukena. 19 "Oqo na yacadra na turaga mai na yavusa i Juta, o Kelepi na luvei Jifune; 20 "Mai na nodra yavusa na Simione, o Simueli na luvei Amiute; 21 "Mai na yavusa i Penijamini, o Elitati na luve i Kisiloni; 22 "Na i liuliu mai vei ira na luve i Tani o Puki na luve i Jogili; 23 Mai vei ira na luve i Joseva; e cavutu mai kina na liuliu mai vei ira na luve i Manasa, o Enieli na luvei Efoti, 24 "Na i liuliu mai na yavusa na Ifereimi, o Kemueli na luve i Sifitani; 25 "Na i liuliu mai vei ira na yavusa i Sepuloni, o Elisafani na luve i Parinaki; 26 "Na i liuliu mai vei ira na Isakari, o Palitieli na luvei Asani; 27 "Na i liuliu mai na yavusa i Aseri, o Aiute na luve i Selomi; 28 "Na i liuliu mai na yavusa i Nafitalai, o Petaeli na luve i Amiute." 29 Sa i ira oqo sa vakaroti ira o Jiova me ra wasewasea na i votavota vei ira na Isireli e na vanua o Kenani.

Na Kedra I Wiliwili 35

Na Veikoro Me Nodra Na Livai

1 Sa qai vosa o Jiova vei Mosese e na veidelana e Moape e na yasa ni Joritani ka takosovi Jeriko mai, ka tukuna: 2 "Mo vakaroti ira na Isireli me ra solia vei ira na Livai na veikoro me ra tawana ka me ra taukena kina na nodra i votavota, mo ni qai solia talega vei ira na Livai na vanua veico ka wavolita na koro. 3 "Me tiko na koro mera vakatawana, kei na vanua veico eso me kana kina nodra bulumakau, na manumanu era qeleqeleni vata, kei na nodra manumanu. 4 "Na vanua veico e na koro ni na solia vei ira na Livai e na tete mai na bai ni koro ki tautuba me rauta e dua na udolu na kiupiti vakavolivolita. 5 "Mo vakarautaka na taudaku ni koro me donuya na tokalau me rua na udolu na kiupiti, e na yasa kina ceva me rua na udolu na kiupiti, kina mua i ra me rua na udolu na kiupiti, kei na yasa kina vualiku me rua na udolu na kiupiti. Me tiko e na loma donu na koro. Oqori me nodra kina na vanua veico e na koro. 6 "E na loma ni koro o ni na solia vei ira na Livai mo ni qai digitaka e ono na koro ni drodro, me dro kina o koya e veivakamatei. E ke mo ni qai tomana kina e vasagavulu ka rua na koro. 7 "E na rauta ni vasagavulu ka walu taucoko na koro mo ni na solia vei ira na Livai; ka mo ni qai solia vata vei ira na vanua veico e so. 8 "Na veikoro o ni na solia me lako mai na nodra i votavota na Isireli; me soli vakalevu mai na yavusa lalai. Mo ni qai solia e so na nomuni koro vei ira na Livai, mai na tiki ni nomuni votavota e ya soli yadua vei kemuni."

Na Veikoro Ni Drodro

9 Sa qai vosa o Jiova vei Mosese, ka vaka, 10 "Mo vosa vei ira na Isireli, ka tukuna vei ira: 'E na gauna o ni sa takosova kina na Joritani kina vanua o Kenani, 11 'Mo ni na qai lesia eso na koro mera koro ni drodro vei kemuni, me na dro kina o koya e vakacalakataka na nona mate e dua tale. 12 'Na koro, mera koro ni drodro vei kemuni mai vei koya e via sauma lesu na veivakamatei o ya, me kakua kina ni mate o koya e veivakamatei me yacova ni sa tucake e matadra na i soqosoqo me veilewaitaki. 13 'Ena veikoro eso dou sa solia, me tiko vei kemudou e ono na koro me ra koro ni drodro. 14 'Mo dou lesia e tolu na koro e na tai ni Joritani oqo, ka me tolu talega na koro mo dou lesia e na vanua o Kenani, e ra na koro ni drodro. 15 'Na ono na koro oqo era na i drodro vei ira na Isireli, o ira na vulagi, kei ira era tiko vakalekaleka ga kei ira, kevaka e dua e vakamatea vakacalaka e dua me qai dro e keya. 16 'Ia kevaka e mokuti koya e na dua na kaukamea, ka mani mate kina, e sa na okati o koya me daulaba; ia o koya e laba e sa na vakamatei ga vakaidina. 17 'Kevaka e mokuti koya e na dua na vatu e ligana, ka rawa ni mate kina e dua, ka mani mate vakaidina, e sa na okati o koya me daulaba; o koya e laba e sa na vakamatei ga vakaidina. 18 'Se kevaka o mokuti koya e na dua na i yaragi e buli e na kau, ka rawa ni mate kina e dua, ka mani mate vakaidina, e sa na okati o koya me daulaba; na daulaba e sa na vakamatei ga vakaidina. 19 'O koya e via sauma na dra e na vakamatei koya sara ga na daulaba o ya; ni rau sa na sota, e na vakamatei koya sara ga. 20 'Kevaka e biligi koya tani e na nona cudru se, bikalawataki koya, se viriki koya e na dua na ka ka mani mate kina, 21 'Se na nodrau veimecaki ga qai mani vacuki koya e ligana ka mani mate kina, o koya e vacuki koya e na vakamatei vakaidina. E na daulaba o koya. o koya ka dau sauma na dra e na vakamatei koya dina na daulaba o ya ena gauna rau sota kina. 22 'Ia, kevaka e biligi koya vakasauri ka sega ni rau veimecaki, se viriki koya e na dua na ka e sega ni nakicataka, 23 'Se vakayagataka e dua na vatu, ka rawa ni mate kina e dua, me viriki koya kina ka sega mada ni raici koya, ka mani mate sara kina, ni rau sega mada ni veimecaki se via naki ca vua, 24 'Me ra na qai vakatulewa vei rau na i soqosoqo o koya e veivakamatei kei koya e via sauma na dra me vaka na lewa oqo. 25 'Ia o ira na i soqosoqo mera sereki koya e veivakamatei mai na ligai koya e via sauma na dra, ka mera kauti koya tale na i soqosoqo kina koro ni drodro ka a dro mai kina, ia me tiko ga e keya o koya me yacova sara ni sa mate na bete levu ka lumuti tu e na waiwai savasava. 26 'Ia kevaka ena dua na gauna me lako tani mai o koya e veivakamatei ka sivia na i yalayala ni koro ni drodro ka dro mai kina, 27 'Qai kunei koya o koya e via sauma na dra ni lako sivita na i yalayala ni koro ni drodro, ka mani vakamatei koya sara o koya e via sauma na dra, e na sega ni beitaki o koya e na dave ni dra o ya, 28 'Baleta ni dodonu me ya tikoga o koya e na nona koro ni drodro me yacova nona mate na bete levu. Ia ni sa oti na nona mate na bete levu sa na rawa vua e veivakamatei me lesu tale kina vanua e taukena. 29 'Ia na veika oqo me i vakananumi tiko ni veilewai vei kemudou kei ira kece na nomudou kawa e na vanua kecega dou tiko kina. 30 'O koya e vakamatea tale e dua na tamata, na daulaba o ya e na vakamatei dina e na nodra i tukutuku na i vakadinadina; ia kevaka e lewe dua ga e vakadinadina, e na sega ni veiraurau na nona i tukutuku me baleta e dua na tamata me rawa ni tau kina vua na i totogi mate. 31 'Ia dou kakua ni taura e dua na ka e saumi kina o koya na daulaba ka sa beitaki tu me mate, ni sa na tau dina ga vua na i totogi mate. 32 'Dou kakua ni taura e dua na i sau e na vuku i koya sa dro kina nona koro ni drodro, me rawa vua ni lesu tale mai ka mai tiko e na vanua ni bera ni mate na bete. 33 'Mo dou kakua ni vakadukadukalitaka na vanua dou sa tiko kina; ni sa vakadukadukalitaka na vanua na dra, ka na sega ni dua na ka e na rawa ni sorovaki kina na vanua, e na vuku ni dra sa dave oti kina, ka vakavo ga na dra i koya e ya vakadavea. 34 'E na vuku ni ka oqo dou kua kina ni vakadukadukalitaka na vanua dou sa tawana, e na maliwa ni vanua Au sa tiko kina; ni sa i Au o Jiova Au sa tiko e na kedra maliwa na Isireli.'"

Na Kedra I Wiliwili 36

Nodra Vakawati Na Yalewa Era I Taukei

1 Ia o ira era turaga e na veivuvale ni nodra qase na luvei Kiliati na luve i Makiri, na luve i Manasa, e na vuvale vei ira na luve i Joseva, era sa toro voleka mai ka vosa vei Mosese kei ira na i liuliu, na turaga qase vei ira na Isireli. 2 Era sa tukuna: "O Jiova e sa vakarota vua na noqu turaga o Mosese me solia na vanua me i votavota e na vakawiri madigi vei ira na Isireli, ia o Jiova e sa vakarota na noqu turaga me solia na i votavota i Silofeati na taci keimami kivei ira na luvena yalewa. 3 "Ia kevaka era mani vakawati vata kei ira na luvedra tagane na yavusa tale eso vei ira na Isireli, e sa na yaco na nodra i votavota sa na kau tani mai na nodra i votavota na noda qase, ka na la'ki wili vata kei na nodra i votavota na yavusa era vakawatitaki kina; ka sa na kau tani mai na i wasewase ni neimami i votavota. 4 "Ia ni sa na yaco mai na nodra Jiupili na Isireli, na nodra i votavota e sa na wili vata kei na nodra i votavota na yavusa era vakawatitaki kina; e sa na yaco kina na nodra i votavota me kau tani mai na nodra i votavota na noda qase." 5 Sa qai vakaroti ira na Isireli o Mosese me vaka na vosa i Jiova, ka tukuna: "Na ka era tukuna na luve i Joseva e donu vakavinaka. 6 "Sa i koya oqo na ka e vakarota o Jiova me baleti ira na luve i Silofeati, a sa tukuna, 'Laivi ira ga mera vakawatitaka o koya e donu vua, ia mera vakawati ga e na loma ni vale ni yavusa ni nodra qase.' 7 "Me rawa kina ni kua ni vuki veisau e ligadra na nodra i votavota na Isireli mai na dua na yavusa kina dua tale, me na tudei tikoga na nodra i votavota na Isireli mai vei ira yadudua ka me baleti ira na nodra qase. 8 "Ia o ira yadudua na yalewa era taukena tiko e dua me watina e dua ga na wekana e na vuvale ni nona na i votavota e na yavusa cava ga e Isireli e dodonu qase, me rawa kina vei ira na Isireli me ra taukena tikoga na i votavota ni nona qase. 9 "E na sega kina ni yaco me vuki veisau tiko na i votavota e ligadra mai na dua na yavusa kina dua tale, ka sa na rawa kina vei ira na dui yavusa yadua vei ira na Isireli, mera dui maroroya na nodra i votavota." 10 Era sa cakava vakakina na luve i Silofeati, na veika kecega sa vakarota o Jiova, vei Mosese; 11 Mala, Tirisa, Okalai, Milika, kei Noa, sa i iratou na luve i Silofeati, ka e ratou sa mani vakawati kivei iratou na luvena tagane o tamadratou lailai. 12 E ratou sa vakawati kina vuvale vei ira na luve i Manasa na luve i Joseva, ka sa yaco me tikoga kei ira na i votavota mai na vuvale ni nodra yavusa. 13 Sa i koya oqo na i vakaro kei na lewa i Jiova ka vakaroti ira kina na Isireli e na liga i Mosese e na veidelana ni vanua o Moape e na yasa ni Joritani, ka takosovi Jeriko toka mai.

Vakarua 1

Nai Vakaro Me Sa Curumi o Kenani

1 Oqo na veivosa sa vosa kina o Mosese vei ira kecega na Isireli, ena tai oqo ni Joritani ena vanua liwa, ena buca veibasai kei Sapu ena kedrau veimama o Parana kei Tolefi, Lepani, Asiroci kei Daisabe. 2 Oqo e lakovi me tinikadua na siga mai Orepi vaka ki na ulunivanua o Sia ki Ketesi – Bania. 3 Sa oti oqo, ena i ka vasagavulu ni yabaki ena i kai tinikadua ni vula, ena i matai ni siga ni vula, sa vosa o Mosese vei ira kecega na Isireli me vaka na ka kecega sa tukuna vei koya o Jiova, me vakarota vei ira kecega, 4 Ni sa oti na nona vakamatei Sioni na tui mai Amoraiti, sa tiko mai Esiboni, kei Oki na tui mai Pasani, sa tiko mai Esitaroci mai Adrei. 5 Ena tai oqo ni Joritani, ena vanua o Moapi, sa vakatekivu o Mosese me vakamacalataka nai vunau ka vaka, 6 "Sa vosa vei keda o Jiova na noda Kalou mai Orepi, ka tukuna: 'Sa dede na nomuni tiko ena veiulunivanua oqo. 7 'Dou gole ka muria nai lakolako vaka ki na veiulunivanua nodra na Amoraiti, kei ira talega era sa tiko veivolekati ena buca, ena veiulunivanua ena veiqakilo talega mai na ceva kei na veibaravi talega, ki na nodra vanua talega na kai Kenani, ki Lepanoni sara, vakayawa sara ki na uciwai levu na Uferetisi. 8 'Raica, Au sa vakadavora na vanua e matamudou, dou curu yani ka taukena na vanua sa yalayala kina o Jiova vei ira na tamamudou— vei Eparama, vei Aisake kei Jekope—me solia vei ira kei ira na kena kawa kece sa muri ira.' Sa Digitaki Nai Liuliu Ni Veiyavusa 9 "Au sa vosa vei kemuni ena gauna o ya, ka tukuna, 'Ni'u sa sega ni rawa ni colata duadua, nai colacola oqo. 10 'Na Kalou o Jiova sa vakalewevuqataki kemuni, ena siga oqo o ni sa vaka na kalokalo ni lomalagi na kemuni lewe levu. 11 'O Jiova na Kalou ni nomuni qase sa vakalevutaki kemuni vakaudolu ka vakalouvinakataki kemuni, me vaka ga sa yalataka vei kemuni! 12 'Me'u colata rawa vakacava na nomuni dui leqa, na nomuni dui colacola kei na nomuni dauveibeitaki? 13 'Mo ni digitaka na tamata yalomatua, vuku, ka kila na ka mai vei ira na nomuni dui yavusa, me'u mai cakava, me ra nomuni liuliu.' 14 "O ni sa sauma mai ka vaka, 'na veika o sa tukuna mai sa rui vinaka.' 15 "Au sa qai tauri ira na nomuni i liuliu ni veiyavusa, era sa yalomatua ka vuku ka kila vinaka sara na ka, ka au sa vakatikori ira me liuliu vei kemuni, nai liuliu ni vei ya udolu, nai liuliu ni vei ya drau, nai liuliu ni vei ya sagavulu kei nai liuliu ni vei ya tini, kei ira na dauveiqaravi ni nomuni veiyavusa. 16 "Au sa vakaroti ira na turaganilewa ena gauna o ya, ka tukuna, 'Mo ni rogoca na nodra veibeitaki na tacimuni ka lewa vakadodonu me baleti ira na veitacini se ki vei ira na vulagi. 17 'Mo ni kua ni vakaraitaka na veitotaki ena nomuni vakatulewa; mo ni rogoci ira vinaka na tamata lalai kei ira talega na tamata lelevu; kua ni rerevaka se o cei ga sa tiko me vakarorogo ki na veilewai, ni sa nona ga na vakatulewa na Kalou. Na veibeitaki kece sa dredre vei kemuni, mo ni qai kauta mai vei au, me'u mai rogoca.' 18 "Au sa vakarota vei kemuni ena gauna o ya na veika e dodonu mo ni cakava.

Era Sa Bese Na Isireli Na Curu Ki Na Vanua Sa Yalataki

19 "Keimami sa lako tani e Orepi, ka lakova na vanua liwa sa dredre ka veivakayalolailaitaki, o ni a raica ena sala ki na veiulunivanua nodra na Amoraiti, me vaka sa vakarota vei keda na Kalou o Jiova, Eda sa qai lako mai ki Ketesa – Bania. 20 "Au a tukuna kina veikemuni, 'O ni sa lako mai ki na veiulunivanua nodra na Amoraiti, me vaka sa solia vei keda na Kalou o Jiova. 21 'Mo ni raica, na Kalou o Jiova sa solia vei keda na vanua, mo ni lako cake ka taukena, me vaka sa tukuna veikemuni na Kalou o Jiova ni nomuni qase, mo ni kua ni rere se yalolailai.' 22 "Oi kemuni kece, 'sa lako voleka mai vei au ka tukuna, me da tala mada eso me liu vei keda, me ra raica na vanua ena vukuda, ka kauta lesu mai nai tukutuku ena gaunisala me da muria cake, kei na veikoro cava eda na donuya yani.' 23 "Au sa marautaka nai tuvatuva o ya, au sa qai tala e tinikarua na tagane, yadua mai na veiyavusa. 24 "Era sa lako cake ki na veiulunivanua ka yacova yani na buca mai Esikoli, ka vakaraica vinaka na vanua. 25 "Era sa kauta talega mai e so na vuata ni vanua, ka era sa kauta mai nai tukutuku, ka vaka, 'Sa vanua vinaka na vanua sa solia vei keda na Kalou o Jiova.' 26 "O ni sa sega ni via lako cake, ka sa via veicoqacoqa kei na i vakaro nei Jiova na nomuni Kalou; 27 "O ni sa vosa kudrukudru ena nomuni veivale laca ka tukuna tiko, 'Baleta ni sa cati keda o Jiova, sa kauti keda tani mai na vanua O Ijipita, me mai soli keda vei ira na Amoraiti, me da vakarusai kina. 28 'Me keimami lako cake ki vei? O ira na taci keimami era sa veivakayalolailaitaki, era sa tukuna tiko, "Ni ra sa rui tamata lelevu, na nodra veika, sa yaco ki lomalagi na kena bai-ni-valu, ka vaka uasivi ni ra sa tiko kina na luvei Anaki."' 29 "Au sa tukuna kina vei kemuni, 'Mo ni kua ni taqaya se rere ena vukudra. 30 'Na Kalou o Jiova, o koya sa liu e matamuni, ena vala ena vukumuni, me vaka sa cakava vei kemuni mai Ijipita, o ni a raica kina e matamuni, 31 'Ena vanua liwa, na vanua o ni sa raica kina na nona roqoti kemuni na Kalou me vaka na tamata sa keveta na luvena, ena vanua kecega o ni sa lakova mo ni yaco kina mai ki ke.' 32 "Io, ena ka kece oqo, o ni sa sega ga ni vakabauti Jiova kina na nomuni Kalou, 33 "O koya sa liu vei kemuni ena sala, me vakasaqara e dua na vanua, ena vukumuni me tei kina na nomuni vale laca, me vakatakila talega veikemuni na sala mo ni muria, ena bukawaqa ena bogi kei na o ena siga,

Na I Totogi Ena Vuku Ni Talaidredre

34 "Sa rogoca o Jiova na veika o ni sa cavuta tiko, sa cudru sara kina vakalevu o koya, sa yalayala kina ka tukuna, 35 'E dina, sa na sega ni dua vei ira nai tabatamata ca oqo, me raica na vanua au sa yalataka oti me'u solia vei ira na tamamuni, 36 'Vakavo ga o Kelepi na luvei Jefunea; o koya ena raica, vei koya talega kei ira na luvena, au sa solia vua na vanua sa butuka, baleta ni sa rui taucoko na nona vakarorogo vei Jiova.' 37 "O Jiova talega sa cudruvi au ena vukumuni, ka sa tukuna kina, 'Ni oi au, ena sega ni lako kina. 38 'O Josua na luvei Nuni, o koya sa tucake tu e matamuni, ena lako ki kea. Mo ni valayaloqaqataki koya, ni sai koya ena vakavuna vei Isireli me ra taukena na vanua. 39 'Sa dina, o ira na lalai kei ira na luvemuni, o ira, o ni a tukuna, ni ra na vakaleqai, ni, ena siga oqo, era sa sega ni kila na vinaka se na ca, era na lako kina; au na solia vei ira, ka, era na taukena. 40 'Ia, oi kemuni, mo ni vuki lesu ka gole vaka kina vanua liwa, Sala ki na Wasawasa Damudamu.' 41 "O ni sa sauma ka tukuna mai vei au, 'Keimami sai valavala ca vei Jiova; keimami na lako cake ka vala, me vaka ga sa vakarota vei keimami o Jiova na noda Kalou.' Ena gauna o ni sa vakarautaka kina na nomuni yaragi me vala, mo ni qai lako cake ki na ulunivanua. 42 "Sa vosa vei au o Jiova ka vaka, 'Tukuna vei ira, "Me ra kua ni lako cake ka vala, ni'u sa sega ni tiko vata kei ira, ni o ni na vakadrukai mai vei ira na meca."' 43 "Au sa vosa vei kemuni; o ni sa sega ni via rogoca, o ni sa talaidredre me rogoca nai vakaro ni Kalou, ka o ni sa sega ni dina sara ena nomuni lako cake ki na ulunivanua. 44 "O ira na Amoraiti era sa tiko ena ulunivanua oqori, era sa lako mai ka cemuri kemuni me vaka na o ni ni sa cemuria na tamata, o ni sa cemuri vaka kina mai Sia ki Oma. 45 "O ni sa lesu mai ka tagi vei Jiova, o Jiova sa sega ni via rogoca na domomuni se via solia na daligana vei kemuni. 46 "O ni sa tiko ga mai Ketesi, me vica tale na siga, me vaka ga na siga o ni sa tiko kina mai kea.

Vakarua 2

Na Veiyabaki Ena Vanua Liwa

1 "Era sa vuki lesu o gole ki na vanua liwa ena Sala mai na Wasawasa Damudamu. Me vaka sa vosa vei au o Jiova, keimami sa wavoki tikoga ena ulunivanua o Sia me vica vata na siga. 2 "Sa qai vosa vei au o Jiova ka vaka: 3 'O ni sa tiko ena ulunvanua oqo vakabalavu; mo ni gole vaka kina vualiku. 4 'Mo vakaroti ira na tamata ka vaka, "Sa voleka oqo moni lako curuma yani na nodra vanua na tacimuni – o ira na kawa nei Iso, o koya sa tiko mai ia, era na rerevaki kemuni, o koya mo ni qai qarauni kemuni vakavinaka. 5 "Kua ni o ni siova yani na veika me baleti ira, ni'u na sega ni solia vei kemuni e dua na tiki ni nodra vanua, me kua mada ga na ulunivanua o Sia baleta ni'u sa solia vei Iso me nona. 6 "Mo ni voli kakana mai vei ira ena i lavo, mo ni kana kina, sa vaka talega kina ena wai mo ni gunu kina. 7 "O Jiova na nomuni Kalou sa vakalouvinakataka na cakacaka kecega ni ligamuni. Sa kila vinaka o koya na dredre ni vanua liwa. E vasagavulu na yabaki sa tiko vata kina kei kemuni o Jiova na nomuni Kalou, sa sega na ka mo ni vaqara."' 8 "Ni keimami sa lako sivi ira mai na taci keimami era sa tiko mai Sia, na kawa nei Iso, keimami sa lako vakayawa sara mai na buca, mai Elaca kei Esioni-Qiba, keimami sa gole ka lako sivia na sala vaka ki na vanua liwa mai Moapi. 9 "Sa vosa vei au o Jiova ka vaka: 'Mo ni kua ni vakacacani Moapi se dua na ka ena i valu, ni'u na sega ni solia vei kemuni e dua na tiki ni nona vanua mo ni taukena, baleta Ni'u sa soli Avi oti ki na kawa nei Loti me nodra.'" 10 (O ira na Emimi era sa tiko kina e liu, era sa mataqali tamata vata kei ira na Anakimi, era babalavu, levu ka lewe levu. 11 Era sa kilai talega me tuwawa me vakataki ira ga na Amakimi, ia o ira na Moapi era sa vakatokai ira me, Emimi. 12 O ira na Oraite, era sa tiko e liu e Sia, ia o ira na kawa nei Iso, era qai vakaqeavutaki ira, ka ra sa laki tiko sara ena nodra i tikotiko, me vaka ga vei ira na Isireli, ena nodra la'ki taukena na vanua sa solia vei ira na nodra Kalou.) 13 "'Oqo, mo tucake ka takosova na buca o Sereti.' Keimami sa qai takosova na buca o Sereti. 14 "Mai Ketesa – Banea ki na buca o Sereti e tolusagavulu ka walu na yabaki, me yacova ni ra sa vakaoti kece nai tabatamata ni i valu mai na nodra i tikotiko, me vaka sa lewa vei ira o Jiova. 15 "E dina ni sa tarai ira tiko na liga ni Kalou, me vakaoti ira tiko mai ena loma ni nodra i tikotiko. 16 "Ni ra sa vakaoti kece sara mai vei ira na tamata, 17 "Sa vosa vei au o Jiova ka vaka: 18 'Ena siga oqo mo takosovi Ari mai na nodra yalayala na Moapi. 19 'Ni o sa lako voleka mai vei ira na kai Amoni, kua ni vakacacani ira, ni'u sa sega ni solia vei kemuni e dua na nodra vanua, baleta ni'u sa solia oti vei ira na kawa nei Loti na vanua oqo me ra taukena.'" 20 (Sa kilai talega na vanua oqo, me nodra vanua na tuwawa, ni ra a tiko kina e liu. o ira na Amonaiti sa dau kacivi ira na Samusumimimi, 21 O ira na tamata sa lewe levu ka lelevu qai babalavu me vakataki ira na Anakimi o Jiova sa vakarusai ira e matadra na Amoraiti, ka era sa vuaviritaki ira ka tiko ena nodra vanua, 22 Me vaka sara ga sa vakayacora vei ira na kawa nei Iso o ira na Oraiti era sa tiko mai Sia, na Kalou sa vakarusai ira, ka vuaviritaka ka era sa tiko kina oqo na Iso. 23 O ira na Avimi, era sa tiko ena veikorokoro me yaco sara ki Qasa—o ira na Kapitorimi o koya era sa lako mai Kapitori, sa vakarusai ira ka sa mai tiko ena nodra vanua.) 24 "'Mo ni tucake ka lako, mo ni takosova na uciwai o Amoni, raica, Au sa solia ki na ligamuni, o Saioni na Amoraiti, na tui Esiboni kei na nona vanua. Mo lako sara ga kina oqo ka vakaosoosoi koya ena i valu. 25 'Ni kua, au na tekivu biuta na rere ena veimatanitu kecega ena rukui lomalagi, o ira kecega, sa rogoca na kemuni rogorogo, era sa sautanini ena taqaya ena vukumuni.'

Sa Vakadrukai o Tui Sioni

26 "Au sa talai ira nai talai mai na vanua liwa e Kedimoci ki vei Sioni na tui Esiboni, ena vosa ni veivakacegui ka vaka, 27 'Au na lako curuma yani na nomu vanua; Au na tikoga ena sala ka sega ni gole ki nai mawi se ki nai matau. 28 'Keimami na volia ena i lavo na keimami kakana kei na neimami wai, me keimami gunu kina, mo vakatara ga me keimami lako curuma na nomuni vanua ena sala, 29 'Me vaka ga era sa cakava vei keimami mai Sia kei Ari na kawa nei Iso kei Moape, me yacova sara ni keimami sa takosova na Joritani ki na vanua sa solia vei keimami o Jiova na Neimami Kalou.' 30 "Ia, o Sioni na tui Esiboni sa sega ni vakatara me keimami lako sivia na nona vanua, ni sa vakaukauwataka na yalona na Kalou o Jiova ka sa tarai koya na yaloqu, me rawa kina vua na Kalou me soli koya kina ligamuni, me vaka ena siga oqo. 31 "Sa tukuna vei au o Jiova, 'Raica sa tekivu oqo me'u soli Sioni kei na nona vanua vei Kemuni, mo ni lako ka taukena ka me nomuni votavota na nodra vanua.' 32 "O Sioni kei ira kece na nona, era sa lako mai me veivala kei keimami e Jaesi. 33 "Na Kalou o Jiova, sa soli ira vei keimami, keimami sa vakadrukai ira, o ira na luvena kei ira kecega na nona tamata. 34 "Keimami sa taura kece na veikorokoro ena gauna o ya, keimami sa vakarusai ira kece na tagane, na yalewa kei ira na lalai ena veikoro kece; keimami sa sega ni vakavoca e dua na ka. 35 "Keimami sa kauta ga na veimanumanu susugi me neimami kei nai toki-ni-valu mai na veikoro kecega, keimami sa taura talega. 36 "Mai Aroa ena yasa ni wai na Amoni, mai na veikoro ena veiqakilo me yaco sara ki Kiliati, sa sega tale ni dua na koro me qaqa vei keimami; o Jiova na neimami Kalou sa soli ira kece vei keimami. 37 "Mo ni kua ga ni lako voleka vei ira na Amoni— se voleka ki na uciwai na Jaboki, se na veikoro ni ulunivanua se na veivanua sa sega ni vakatara na Kalou o Jiova me da lako kina.

Vakarua 3

Sa Vakadrukai Na Tui O Oki

1 "Keimami sa gole ka lakova cake na sala ki Basani; o Oki na tui Basani sa lako mai me veivala kei keimami, o koya kei ira kece na nona tamata ena i valu e Idrei. 2 "Sa tukuna vei au o Jiova, 'Mo kua ni rerevaki ira, ni'u sa soli koya, kei ira kece na nona tamata, kei na nona vanua ki na ligamuni; o ni na cakava vei tui Sioni na Amoraiti, o koya sa tiko mai Esiboni.' 3 "Na Kalou o Jiova sa soli Oki na tui Basani talega ki na liga i keimami, kei ira kece na nona tamata, keimami sa valuti ira me yacova sara ni sa sega ni dua e vo. 4 "Keimami sa taura kece na nodra veikoro ena gauna o ya, ka sa sega ni dua na koro e sega ni tauri mai vei ira: e onosagavulu na koro, na vanua taucoko o Akabi, na matanitu o Oki mai Basani. 5 "Na veikoro kece oqo era sa tara cake ka vakabai cecere, na lalaga ni koro, na matamata kei na kena i tatarovi era sa tara cake kece vakaukauwa, vakavo na veikoro lalai ga. 6 "Keimami sa vakarusai ira sara vakaca, me vaka keimami sa vakayacora vei Sioni na tui kei Esiboni, era sa vakarusai kece na tagane, yalewa kecega kei ira kece na gone ena veikorokoro kece. 7 "Na manumanu susu kece kei nai toki ni valu kece ni veikorokoro keimami sa kauta kece. 8 "Ena gauna o ya keimami sa taura na vanua mai na ligadrau na tui e rua ni Amoraiti e rau sa tiko ena tai oqo ni Joritani, mai na uciwai na

Anoni, ki na ulunivanua o Erimoni

9 "(O ira na kai Saitoni era sa vakayacani Erimoni me Sironi, vei ira na Amoraiti o Enivi), 10 "O ira kece na veikorokoro mai na buca, o Kiliati kece kei Pasani kece me yaco sara ki Salika kei Idrei, na koro kece ni matanitu nei Oki e Pasani. 11 "O Oki na tui Pasani duadua ga sa vo vei ira na kawa ni tuwawa. E dina na nona loga ni moce sa caka ena kaukamea. (E sega beka ni tiko mai Raba vei ira na luvei Amoni?) Ciwa na kiupiti na kena balavu ka va na kiupiti na kena raba me vaka na kenai vakarau. Na Vanua Mai Na Tokalai Ni Joritani Sa Wasei 12 "Na vanua oqo, keimami a taukena mai liu sara mai Aroa, o ya mai na uciwai o Anoni, kei na veimama ni veiulunivanua mai Kiliati kei na kena veikoro, Au sa solia vei ira na Rupeni kei ira na Kata. 13 "Na kena vo ni Kiliati kei ira kece na Pasani mai na matanitu nei Oki, au sa solia kivei ira na veimama ni yavusa nei Manasa. (Na vanua kece mai Akobi kei Pasani taucoko era sa vakatokai me vanua ni tuwawa. 14 "O Jairi na luvei Manasa sa taura kece na vanua ko Akobi me yaco sara ki na yalayala nodra na Kesuraite kei na Maekacate ka vakayacani me Pasani, sa vakayacani ga vei koya, o Evori Jairi me yacova na siga oqo.) 15 "Au sa soli Kiliati vei Makiri. 16 "Kivei ira na Rupeni kei na Kata, au sa solia mai Kiliati me yacova sara na Uciwai o Anoni na Uciwai o Jaboki, na nodra yalayala na kai Amoni; 17 "Na buca talega mai na Joritani, sa kena i yalayala, mai Jainareci ka yaco sara vaka ki na tokalau ni Wasawasa o Araba (Waitui Mate) ena ruku ni veiulunivanua mai Pisaki. 18 "Au sa vakaroti iko ena gauna o ya, ka tukuna, 'Na Kalou o Jiova sa solia vei Kemuni na vanua oqo mo ni taukena. Oi Kemuni kece na tamata i valu mo ni takoso ka vakaiyaragi tiko e matadra na tacimuni, na luvei Isireli. 19 'Ia, o ira na watimuni, o ira na lalai, na nomuni manumanu susu (Au kila ni sa levu na manumanu susu) me ra tiko ga ena nomuni veikoro, o koya Au sa solia veikemuni, 20 'Me yacova ni'u sa solia na vakacegu vei ira na tacimuni me vaka vei kemuni, era sa taukena talega na vanua sa solia vei ira o Jiova na nodra Kalou ena tai ka dua ni Joritani. Mo ni qai lesu vakayadua ki na nona i votavota o koya, Au sa solia vei kemuni.' 21 "Au sa vakarota vei Josua ena gauna o ya ka vaka: 'Na matamu sa raica kece na ka sa cakava o Jiova na nomuni Kalou vei rau na tui e rua oqo: Ena vakayacora talega vaka kina o Jiova vei ira kece na veimatanitu o na lako siviti ira. 22 'Mo kua ni rerevaki ira, ni sa na vala ena vukumu o Jiova na nomuni Kalou.'

Sa Vakatabui O Mosese Me Curu Kina Vanua Yalataki

23 "Au sa vakamamasu vei Jiova ena gauna o ya ka vaka: 24 'Na Kalou o Jiova, o ni sa vakatekivu me vakaraitaka vua na nomuni tamata, na Nomuni cecere kei na kaukauwa ni ligamuni, o cei na Kalou sa tiko mai lomalagi se e vuravura me cakava rawa na veika levu ka dredre me vaka o ni sa cakava? 25 'Au sa kerea, me'u takoso mada ga ka la'ki raica na vanua vinaka ena taikadua ni Joritani, na veiulunivanua vivinaka, kei Lepanoni.' 26 "Sa cudruvi au o Jiova ena vukumuni ka sa sega ni via rogoci au. Sa tukuna kina vei au o Jiova: 'Sa rauta oqori! Kua ni vosa tale vei au ena ka oqori. 27 'Mo lako cake ki Pisaki, ka mo rai vaka ki na ra, kina vualiku, ki na ceva, vaka ki na tokalau talega, o na raica walega ka o na sega ni takosova na Joritani. 28 'Ia mo vakaroti Josua ka vakayaloqaqataki koya ka vakaukauwataki koya, ni na liu o koya vei ira na tamata, ena vakavuna o koya me ra taukena na vanua, o koya kona raica oqori.' 29 "Keimami sa qai tiko ena buca veibasai kei Beci – Piori.

Vakarua 4

Sa Vakarota o Mosese Na Talairawarawa

1 "Oqo moni vakarorogo mada na Isireli ki nai lesilesi kei na lewa au sa vakavulica vei kemuni, mo ni cakava, mo ni bula kina, ka lako mo ni taukena na vanua sa solia vei kemuni o Jiova na Kalou ni nomuni qase. 2 "Mo ni kua ni vakaikuritaka na vosa au sa vakarota vei kemuni, se kauta tani e dua na ka mai na ka sa tukuni oti, mo ni maroroya ga nai vakaro kece oqo, sa solia vei kemuni na Kalou o Jiova. 3 "Na matanitu sa raica na ka sa cakava o Jiova vei Peali-Piori; ni o Jiova na nomuni Kalou sa vakarusai ira kece na nomuni sa muri Peali-Piori." 4 "Ia, vei kemuni sa kukube matua vei Jiova na nomuni Kalou, sa bula tiko me yacova na siga oqo. 5 "Sa dina, Au sa vakavulica vei kemuni nai lesilesi kei na lewa, me vaka sa vakarota vei au o Jiova na noqu Kalou, mo ni lako ka bula vaka kina ki na vanua sa solia veikemuni mo ni taukena. 6 "O ira sa rogoca nai vakaro oqo ka tukuna, 'Sa dina, o ira na matanitu oqo era sa tamata vuku ka yalomatua.' 7 "O cei na matanitu levu oqori, me sa rui voleka vei ira na Kalou, me vaka ni sa rui voleka sara vei keda o Jiova, ena cava tale me da sa kacivi koya tikotiko ga? 8 "Na matanitu levu cava sa tiko oqori, me tu vua e dua nai lesilesi kei na lewa dodonu, me vaka sa tu kecega ena i vola ni vunau oqo, au sa biuta oqo ena siga ni kua? 9 "Mo ni qarauni kemuni vakavinaka ga ka maroroi kemuni vakavinaka, de o ni na qai guilecava na veika sa raica na matamuni ka me lako tani mai ki na yalomuni ena veisiga kece ni nomuni bula. Mo ni vakavulica vei ira na luvemuni kei ira na makubumuni, 10 "Vakabibi na siga o ni a tu kina ena matai Jiova mai Orepi, ni sa tukuna kina vei au o Jiova, 'Soqoni ira mai na tamata oqo vei Au, me ra mai rogoca na Noqu vosa, me ra vulica kina, me ra rerevaki Au, ena veisiga kece era sa bula kina e vuravura, ka mera vakavulica talega vei ira na luvedra.' 11 "O ni sa lako voleka mai ka tu ena ruku ni ulunivanua, ka sa kama na ulunivanua ena bukawaqa me yacova na maliwa ni lomalagi kei na o butobuto kei na butobuto vavaku. 12 "O Jiova sa vosa mai veikemuni mai na loma ni bukawaqa. o ni sa rogoca na rorogo ni vosa, o ni sa sega ni raica e dua na ka; o ni sa rogoca ga na domo. 13 "Sa vakaraitaka vei kemuni na nona veiyalayalati sa vakarota veikemuni mo ni cakava, oqori nai vakaro e tini, sa vola ena taba ni vatu e rua. 14 "Sa vakaroti au na Kalou ena gauna koya me'u vakavulica vei kemuni ni lesilesi kei na lewa, mo ni cakava ena vanua o ni sa takosova tiko oqori moni taukena.

Mo Ni Qarauna Na Qaravi Matakau

15 "Mo ni qarauni kemuni vakavinaka, o ni sa sega ni raica e dua na ka ni sa vosa vei kemuni o Jiova mai Orepi ena loma ni bukawaqa, 16 "De o ni qai cakacaka vakatani ka bulia na matakau me tagane se yalewa, 17 "Se me vaka e dua na manumanu levu ni vuravura oqo, se dua na manumanu vakatabana sa vuka voli, 18 "Se me vaka e dua na ka sa qasi voli ena dela ni qele se me vaka e dua na ika sa tiko e loma ni wai ena ruku i vuravura. 19 "Mo ni qarauni kemuni talega de yaco, ni o ni sa rai ki lomalagi ka raica na matanisiga, na vula, na kalokalo, na ka kecega sa tu mai lomalagi, o ni sa vakayavalati me qaravi ira, ka cuva me lotu vei ira, ia na Kalou o Jiova sa solia ga oqori vei kemuni me nomuni votavota. 20 "O Jiova sa tauri kemuni ka kauti kemuni tani mai na kaukamea kama-caucaudre, mai Ijipita, mo ni nona tamata, ka nona i votavota me vaka ena siga oqo. 21 "Sa cudruvi au o Jiova ena vukumuni, ka sa bulubulu kina ni'u na sega ni takosova na Joritani, Oi kemuni ga, ena takoso ka taukena na vanua vinaka sa solia vei kemuni me nomuni votavota. 22 "Oi au o Mosese, au na mate ga ena vanua oqo, au na sega ni takosova na uciwai oqo, au na sega ni curuma na vanua sa solia vei Kemuni, na vanua vinaka oqori. 23 "Mo ni qarauni kemuni vinaka, de o ni guilecava na veiyalayalati ni nomuni Kalou o Jiova o koya sa cakava vei kemuni, de o ni cakava vei kemuni na Kalou ceuti ena liga o koya sa vakatabuya vei kemuni na Kalou o Jiova. 24 "Ni sa bukawaqa daukama o Jiova na nomuni Kalou, ka sa Kalou vuvu. 25 "Ni, o ni sa vakaluveni, ka vakamakobuni, ka sa qase sara mai ena vanua, o ni sa cakacaka vakaveidabui ka cakava na Kalou matakau, ka caka ca ena mata i Jiova na nomuni Kalou, ka vakacudrui koya, 26 "Au sa kacivi lomalagi kei vuravura, me vakadinadina ena siga oqo, ni o ni na tiko oqo mo ni taukena, o ni na sega ni vakabalavutaka na nomuni veisiga ena vanua, o ni na vakarusai vakaidina. 27 "O Jiova ena vakasesei kemuni ena matadra na tamata, ena vakavoca ga e vica vei kemuni ena kedra maliwa na veimatanitu ena vakagolei kemuni kina o Jiova. 28 "Mai kea, o ni na qarava kina na Kalou sa cakacaka ni liga ni tamata, na kau kei na vatu, era sa sega ni rai, se rogoca, se kana, se vakaboboi na ucudra. 29 "Mai kea o ni na vakasaqarai Jiova, o ni na kunei koya, kevaka o ni na vakasaqarai koya ena yalomuni taucoko kei na lomamuni taucoko. 30 "Ena gauna sara ga o ni sa vakasaqaqara bula kina, ni sa lakovi kemuni mai kina na ka kecega oqo, ni o ni sa gole vei Jiova na nomuni Kalou ka muria na nona vosa 31 "Ni sa Kalou dauloloma o Jiova na nomuni Kalou, ena sega ni biuti kemuni se guilecavi kemuni, se guilecava talega na veiyalayalati me baleti ira na nomuni qase, me vaka sa yalataka vei ira. 32 "Mo ni taroga oqo, me baleta na veisiga sa oti, me vaka sa tu oqo e matamuni, mai na siga sa bulia ki na na tamata na Kalou e vuravura, ka taroga mai na yasa i lomalagi ka dua, ki na yasana ka dua, se sa dua na ka vaka oqo sa bau yaco, se sa au rogoci talega e dua na ka vaka oqo. 33 "Sa bau dua mada na tamata me rogoca na domo ni Kalou ni sa vosa tiko mai ena loma ni bukawaqa, me vaka o ni sa rogoca qai bula tikoga? 34 "Se sa bau lako beka na Kalou me la'ki taura e dua na matanitu me Nona ena kedra maliwa na veimatanitu ena veivakatovolei, se ena i vakatakilatakila, se ena cakacaka mana, se ena i valu, se ena liga kaukauwa, se ni sa dodoka na ligana, se ena veivakarerei levu, me vaka ga na ka kece sa cakava na Kalou o Jiova vei kemuni mai Ijipita e matamuni? 35 "Vei kemuni sa vakaraitaki kina, mo ni kila kina ni sa Kalou o Jiova, sa sega tale e dua, sai koya ga. 36 "Mai lomalagi, sa vakatara o Koya mo rogoca na domona, me vakaroti kemuni kina; e vuravura sa vakaraitaka na bukawaqa levu, ka o ni sa rogoca na Nona vosa mai na loma ni bukawaqa. 37 "Baleta ni sa lomani ira na tamamuni, sa digitaka kina o koya na nodra kawa, sa qai kauti ira tani mai Ijipita, ena Nona i serau kei na Nona kaukauwa, 38 "Ka vakasavi ira e matamuni na matanitu lelevu ka kaukauwa cake mai vei Kemuni, me kauti kemuni mai ka solia vei Kemuni na nodra vanua me nomuni votavota, me vaka ena siga oqo. 39 "Mo ni kila ena siga e dai ka vakadeitaka e yalomuni, ni o Jiova vakataki koya sa Kalou mai lomalagi, e cake kei vuravura e ra; sa sega tale e dua. 40 "O koya oqo mo ni maroroya na Nona i lesilesi kei na Nona i vakaro o koya au sa vakarota vei Kemuni e dai, me vinaka kina vei Kemuni kei ira na luvemuni sa muri mai, me rawa ni dede kina na nomuni bula ena vanua sa solia vei Kemuni o Jiova na nomuni Kalou me nomuni vakadua."

Na Koro Ni Drodro Ena Tokalau Ni Joritani

41 Sa biuta vakatikitiki e tolu na koro ena tokalau ni Joritani o Mosese vaka ki nai cadracadra ni siga, 42 Me ra daudro kina o ira na daulaba ka sega ni nakiti, ni a sega ni tiko e dua na veicati e liu, me dro ki na dua na koro oqo me bula kina: 43 O Bese ena vanua liwa ena vanua vakatautauvata me nodra na Rupeni, o Ramoci e Kiliati e nodra na Kata, kei Qalani e Basani me nodra na Manasa.

Sa Vakarogoi Na Vosa ni Kalou

44 Sai koya oqo nai vunau sa biuta e matadra na luvei Isireli o Mosese. 45 Oqo nai tukutuku, nai lesilesi, kei na lewa sa tukuna ka vakatauca o Mosese vei ira na luvei Isireli ena nodra lako tani mai Ijipita, 46 Ena yasana oqo ni Joritani, ena buca veibasai kei Peci-Piori ena vanua nei Sioni na tui kei Amoraiti, o koya sa tiko mai Esiboni, o koya era sa vakdruka ka samuta na Isireli ena nodra lako mai Ijipita. 47 Era sa taura na nona vanua kei na vanua nei Oki na tui Pasani, e rua na tui ni Amoraiti e rau sa tiko ena tai oqo ni Joritani me donuya nai cadracadra ni matanisiga, 48 Mai Aroea, ena bati ni uciwai na Amoni, ki na ulunivanua o Sioni (Erimoni), 49 Kei na veivanua bucabuca kece ena tokalau ni Joritani, me yaco sara ki na waitui levu na Araba ena veiqakilo kei Pisaki.

Vakarua 5

Sa Talevi Tale Na Vunau E Tini

1 Sa kacivi ira na Isireli o Mosese ka tukuna vei ira: "mo ni rogoca na Isireli, nai lesilesi kei na lewa, au sa cavuta mo ni rogoca ena siga oqo, mo ni vulica ka qarauna mo ni cakava. 2 "Na Kalou o Jiova sa cakava na nona veiyalayalati kei keda mai Orepi. 3 "Sa Sega ni cakava na veiyalayalati oqo kei ira na noda qase, kei keda ga, sa tiko oqo ena siga e dai. Oi keda kece sa bula tiko. 4 "Sa veivosaki vata kei kemuni o Jiova ena matana votu ena ulunivanua mai na loma ni bukawaqa. 5 "Au a tucake tu ena kemuni veimama vata kei na Kalou, me'u tukuna vei kemuni na vosa ni Kalou; ni kemuni sa rere sara ena vuku ni bukawaqa yameyame caudre, o ni sa sega ni lako cake ki na ulunivanua, sa tukuna kina na Kalou: 6 'Sai Au na nomudou Kalou o Jiova, Au sa kauti kemudou tani mai na vanua o Ijipita na vale ni veivakabobulataki. 7 'Me kua tale ni dua na nomudou Kalou, oi Au duadua ga. 8 'Me kua ni dua e cakava vua e dua na Kalou ceuti — se dua ga na ka e ceuti me vakatautauvatataki ki na vei ka mai lomalagi e cake, se vuravura era, se ena rukui vuravura; 9 Me kua ni dua e lotu kina se qarava. Ni sai Au o Jiova na Kalou vuvu, sa drodro vakayawa sara na noqu dau sauma na nodra caka cala na tama, me yacova sara na i katolu kei nai ka va ni tabatamata ni nodra era sa cati au, 10 Au na vakaraitaka na Noqu yalololoma ki nai tabatamata e vakaudolu, ki vei ira sa lomani Au ka maroroya na Noqu i vakaro. 11 'Mo ni kakua ni taura vakamamada na yaca ni Kalou o Jiova se vakawaletaka, o Jiova ena beitaki ira sa beca na Kalou kei na yacana. 12 'Mo ni maroroya ka vakatabuya na Siga ni vakacecegu, me vaka sa vakaroti kemuni kina o Jiova. 13 E ono na siga mo ni cakacaka kina, 14 Ia, nai kavitu ni siga, na Siga ni Vakacecegu nei Jiova na nomuni Kalou. Mo ni kua ni cakava kina e dua na cakacaka, oi kemuni se o ira na luvemuni tagane se yalewa, se o ira na nomuni tamata veiqaravi, se o ira na nomuni bulumakau, se na Asa se na manumanu yavai va cava ga, se me dua na vulagi cava ga sa tiko ena nomuni matamata, me ra vakacegu talega na nomuni dauveiqaravi tagane se yalewa me vakataki kemuni. 15 Mo ni nanuma, ni kemuni talega, a bobula tu mai Ijipita, na Kalou o Jiova sa qai kauti kemuni tani mai kea, ena ligana kaukauwa sa dodo tiko yani; o koya oqo sa vakaroti kemuni kina na Kalou, mo ni maroroya na Siga ni Vakacecegu. 16 'Mo ni dokai ira na tamamuni kei ira na tinamuni, me vaka sa vakarota veikemuni na Kalou o Jiova, me balavu kina na nomuni veisiga, me vinaka kina veikemuni ena vanua sa solia o Jiova na nomuni Kalou mo ni taukena. 17 'Mo ni kakua ni laba. 18 'Mo ni kakua ni ia na veibutakoci. 19 'Mo ni kakua ni butako. 20 'Mo ni kakua ni beitaka vakai lasu na wekamuni. 21 'Mo ni kakua ni butakoca se kocova na watina na wekamuni; mo ni kua ni kocova na nona vale se veiteitei se nona dauveiqaravi tagane se yalewa, se nona manumanu susu, se dua ga na ka sa nona na wekamu.' 22 "Na vosa kece i Jiova oqo mo cavuta e matadra kece nai soqosoqo levu, mai na ulunivanua ena loma ni bukawaqa caucaudre mai na o kei na butobuto loaloa kei na domo rogo levu sa qai sega tale ni vakuria. Sa qai vola kece oqori ena rua na vatu raraba, ka solia, mai vei au.

Era Sa Rere Na Tamata Ena Vuku Ni Serau Ni Kalou

23 "Ni o ni sa rogoca na domo mai na loma ni butobuto ni o ni sa tiko ena ulunivanua sa kama caucaudre tiko, mo ni lako mai vei au, oi kemuni kece nai liuliu ni veiyavusa kei ira na qase. 24 "O ni sa tukuna: 'Sa dina sara na Kalou o Jiova sa vakaraitaka vei keimami na nona lagilagi kei na nona cecere, ka keimami sa rogoca na domona mai na loma ni bukawaqa yameyame caucaudre. Keimami sa kila ena siga oqo ni vosa mai na Kalou vei ira na tamata, ia, e se rawa ni na bula ga. 25 'O koya oqo, ena cava me keimami mate kina? Na bukawaqa levu oqo ena kani keimami kevaka keimami sa rogoca na domo ni Kalou o Jiova, ka keimami na mate. 26 'Se, o cei sa tiko ena yago oqori, ni sa rogoca na Kalou ni a vosa mai ena loma ni bukawaqa yameyame caucaudre me vakataki keimami, me qai bula? 27 'Mo ni lako voleka ka rogoca na ka kecega sa via tukuna na Kalou o Jiova ka mai tukuna vei keimami na ka kecega sa tukuna na Kalou o Jiova vei kemuni me keimami rogoca ka cakava.' 28 "O Jiova sa mani rogoca na veika sa tukuna na gusumuni, ni o ni sa vosa mai vei au, sa vosa kina vei au o Jiova: 'Au sa rogoca na domodra na tamata oqo sa vosa tiko vei iko. Sa vinaka ka dodonu taucoko na vei ka era sa tukuna. 29 'Sa dina, sa tiko vei ira oqo na yalo sa rerevaka na Kalou ka sa maroroya tikoga na Noqu i vakaro, ena vinaka vei ira kei ira talega na luvedra me sega ni mudu! 30 'Mo lako ka tukuna vei ira, "mo ni lesu, tale ki na nomuni keba." 31 'Ia, vei iko Mosese, mo tucake tu e yasaqu, Au na qai tukuna vei iko na Noqu i vakaro na Noqu i lesilesi, kei na Noqu lewa, mo na vakavulica vei ira na tamata, me ra muria ena vanua sa soli vei ira me ra taukena.' 32 "O koya oqo mo qarauna vinaka mo cakava me vaka sa vakaroti iko kina o Jiova na nomu Kalou; mo kua ni lako vakatikitiki, se ki nai matau se ki nai mawi. 33 "Mo ni muri ena sala sa vakarota veikemuni o Jiova na nomuni Kalou, mo ni bula kina ka vinaka kina, me dede kina na nomuni bula ena vanua o ni na taukena.

Vakarua 6

Nai Vakaro Levu Duadua

1 "Oqo nai vakaro kei na i lesilesi kei na lewa, sa solia o Jiova na nomuni Kalou mo ni vakavulici kina, mo ni muria ena vanua o ni sa na takosova mo ni taukena, 2 "Mo ni rerevaki Jiova na nomuni Kalou, Mo ni maroroya kecega na Nona i lesilesi kei na Nona i vakaro au sa vakarota vei kemuni kei ira na luvemuni kei ira na makubumuni, ena veisiga kece ni nomuni bula, mo ni na bula vakadede kina. 3 "Oqo mo ni rogoca na Isireli, mo ni qarauna ka muria na vosa ni Kalou, me rawa ni vinaka kina veikemuni, mo ni vakalewevuqataki kina, me vaka sa yalataka oti veikemuni o Jiova na nodra Kalou na nomuni qase – 'Ena vanua sa drodro kina na sucu kei na oni.' 4 "Mo ni rogoca na Isireli, o Jiova na noda Kalou, o Jiova sa dua ga! 5 "Mo ni lomani Jiova na nomuni Kalou ena yalomuni taucoko, ena lomani taucoko kei na nomuni kaukauwa taucoko. 6 "Na vosa au sa vakarota vei kemuni e daidai, me tikoga ena yalomuni. 7 "Mo ni vakavulica sara vakavinaka vei ira na luvemuni, mo ni tukuna tiko vei ira ni o ni sa tiko mai vale, ni o ni sa lako talega ena sala, ni o ni sa davo koto kei na nomuni sa duri cake talega. 8 "Me vesuki talega ena liga me i vakatakitakila ena yadre talega ena maliwa ni mata. 9 "Me volai ena duru ni katuba ni nomuni veivale kei na nomuni matamata talega.

Me Qarauni Na Talaidredre

10 "Ena gauna sa na kauti kemuni kina o Jiova na nomuni Kalou ki na vanua sa solia vei kemuni, na vanua sa yalayala kina vei Eparama, Aisake kei Jekope, me solia vei kemuni na vanua levu ka rairai vinaka na kena veikoro, na veikoro o ni a sega ni tara, 11 "Na veivale sa sinai kina na veika vivinaka o ni a sega ni buno kina, na vei mata ni wai vinaka, o ni a sega ni kelia, na veivaini kei na vei olive o ni a sega ni tea—o ni sa kania ka mamau — 12 "Mo ni qarauna, de o ni qai guilecava na Kalou o Jiova, o koya sa kauti kemuni tani mai Ijipita, mai na vale ni veivakabobulataki. 13 "Mo ni rerevaki Jiova na Nomuni Kalou, ka qaravi koya ka yalayala tiko ena vukuni yacana. 14 "Mo ni kua ni lakovi ira na Kalou tani, na nodra Kalou na tamata era sa tiko vata kei kemuni 15 "(Ni sa Kalou vuvu o Jiova na nomuni Kalou o Koya sa tiko vata kei kemuni), de qai tarai kemuni na cudru ni Kalou o Jiova ka vakarusai kemuni mai na matai vuravura. 16 "Mo ni kakua ni vakatovolei Jiova na nomuni Kalou, me vaka o ni a vakayacora vua mai Masa. 17 "E dodonu mo ni qarauna ka maroroya vakavinaka nai vakaro kece i Jiova na nomuni Kalou, na Nona i tukutuku kei na Nona i lesilesi o koya sa vakaroti veikemuni. 18 "Mo ni cakava talega na veika e dodonu ka vinaka ena matai Jiova, me vinaka kina veikemuni, mo ni lako kina ka taukena na vanua sa yalayala kina o Jiova vei ira na tamamuni, 19 "Me ra cemuri kina na meca kece sa tu e matamuni, me vaka sa vosa kina o Jiova. 20 "Ni ra sa tarogi kemuni o ira na luvemuni ena veisiga mai muri ka vaka: 'Na cava nai balebale ni tukutuku, lesilesi kei na lewa sa vakarota veikemuni na Kalou o Jiova?' 21 "Mo ni qai tukuna vei ira: 'Keimami a bobula nei Fero mai Ijipita, ka sa kauti keimami tani mai kea o Jiova ena ligana kaukauwa; 22 'Sa vakatakila o Jiova nai vakatakilakila ena matai keimami, sa levu ka ca sara ena matadra na kai Ijipita, vei Fero kei na nona vuvale. 23 'Sa kauti keimami tani mai kea, me keimami curu mai ki ke, ka solia vei keimami na vanua sa bubului kina vei ira na neimami qase. 24 'Sa qai vakarota vei keimami o Jiova me keimami muria nai lesilesi kece oqo, me keimami rerevaki Jiova me keimami vinaka kina, me maroroi ka vakabulai keimami tiko, me yacova mai oqo. 25 'Sa dodonu kina vei keda, meda qarauna vakavinaka na noda muria nai vakaro kece oqo ena mata ni Kalou, me vaka sa vakarota vei keda o Koya.'

Vakarua 7

Na Kawa Tamata Digitaki

1 "Ni sa kauti kemuni mai o Jiova na nomuni Kalou ena vanua o ni lakova me taukena, ka sa vakasavi ira na veimatanitu e matamuni, o ira na Itaiti, na Kirikasaiti, na Amoraiti, na Kenanaiti, na Perisaiti, na Ivaiti na Jepusaiti, e vitu na matanitu lelevu ka kaukauwa mai vei kemuni. 2 "Ena gauna sa soli ira kina vei kemuni o Jiova na nomuni Kalou, mo ni valuti ira ka vakarusai ira. Me kua ni dua na veidinadinati kei ira, se, mo ni na vakaraitaka vei ira na yalololoma. 3 "Se mo ni vakawati vata kei ira. Mo ni kua ni solia vei ira na luvemuni yalewa me watidra na luvedra tagane, se o ira na luvedra yalewa me watidra na luvemuni tagane. 4 "Era na vukica na luvemuni tagane, me ra kua ni muri Au, me ra qarauna na Kalou tani, me tubu kina na Nona cudru ka vakarusai kemuni vakasauri. 5 "Ia, mo ni raica oqo: Mo ni vakarusa na nodra i cabocabo ni soro, mo ni vorolaka na nodra veiduru tabu, me vakadavori na nodra matakau kei na veika kece sa ceuti me vakamai. 6 "Ni sai kemuni na kawa ni tamata tabu vua na Kalou o Jiova sa digitaki kemuni, me dua na kawa tamata tabu me Nona, e dua nai yau vuni ka talei, sai kemuni, ena delai vuravura oqo. 7 "O Jiova, sa sega ni lomani kemuni se digitaki kemuni baleta ni o ni sa lewe levu mai vei ira tale eso, o ni sa tiko duadua e ra mai vei ira kece na tamata; 8 "Ia, baleta ni sa lomani kemuni o Jiova, baleta ni sa maroroya tiko ga na nona veiyalayalati kei ira na nomuni qase, o Jiova sa kauti kemuni mai ena ligana kaukauwa, o voli kemuni lesu mai na vale ni veivakabobulataki, mai na liga i Fero na tui Ijipita. 9 "O koya oqo, mo ni kila, na Kalou o Jiova, sa Kalou o Koya, na Kalou dina ka dau dina, o Koya sa maroroya na Nona veiyalayalati me yacova nai tabatamata e udolu, sa vakatalega kina na Nona yalololoma vei ira sa lomani Koya ka dau maroroya na Nona i vakaro kecega; 10 "Sa dau sauma lesu vei ira sa cati Koya ki na matadra sara ga, me vakarusai ira. Ena sega tale ni vakalaiva, vei ira ena matana votu. 11 "O Koya oqo, mo ni maroroya nai vunau, nai lesilesi kei na lewa kecega sa vakaroti vei kemuni ena siga oqo, ka muria.

Na Sautu Ni Talairawarawa

12 "Ena yaco na veika oqo, baleta ni kemuni sa vakarorogo ki na lewa ka maroroya, ka muria me yaco talega kina me maroroya na Kalou o Jiova na Nona veiyalayalati kei na Nona yalololoma sa yalataka vei ira na nomuni qase. 13 "E na lomani kemuni, ka vakasaututaki kemuni, ka vakalewevuqataki kemuni; ena vakalouvinakataka na vua ni ketemuni kei na vuata ni vanua, na sila kei na waini vou, na waiwai, ena vakalevutaka na bulumakau kei na vua ni nomuni manumanu yavai va kecega, ena vanua sa bubului ki na me solia vei kemuni. 14 "O ni na vakalouvinakataki vakalevu cake mai vei ira na tamata kecega; ena sega ni dua na tagane se na yalewa ena yava ena kemudou maliwa, sa vakatalega kina na nomudou manumanu susu. 15 "O Jiova, ena kauta tani mai na kemudou maliwa na mate ca kecega, ena sega ni vakararawataki kemudou e na dua na mate ca mai Ijipita; me vaka ga o ni sa kila, ia ena tala kecega na veika ca oqori vei ira sa cati kemuni. 16 "O ni na vakarusai ira kece na tamata sa solia vei kemuni na Kalou o Jiova; na matamuni ena sega ni lomani ira; se na nodra Kalou mo ni qarava, oqori sa tu ga mei cori se kemuni dai mo ni vesuki kina. 17 "Kevaka o ni sa tukuna e yalomuni, 'Era sa matanitu cecere o ira oqo; me keimami rawai ira vakacava? '– 18 "Mo ni kua ni rerevaki ira, mo ni nanuma ga na cava sa cakava na Kalou o Jiova vei Fero kei ira kece e Ijipita: 19 "Na veivakatovolei levu o koya sa raica na matamuni, na vakatakilakila kei na veika lelevu, na liga kaukauwa sa dau dodo yani, o koya sa kauti kemuni tani mai kina na Kalou o Jiova. Ena cakava talega vakakina na Kalou o Jiova vei ira kece o ni sa dau rerevaka. 20 "Na Kalou o Jiova ena vakatala vei ira na pi, me yacova ni ra sa vakarusai kece o ira sa vo, kei ira sa vunitaki ira. 21 "Mo ni kua sara ni rerevaki ira; ni sa tiko vaka kei kemuni o Jiova na Kalou levu ka vinaka. 22 "Na Kalou o Jiova ena vakasavi ira tani na veimatanitu oqo, e matamuni, vaka lailai eke ka vakalailai mai kea; o ni na sega ni rawa ni cakava ena dua ga na gauna na nodra vakarusai, de ra qai lewe levu mai na manumanu kila ni vanua vei kemuni. 23 "Ia, na Kalou o Jiova ena soli ira vei kemuni, o ni na vakadrukai ira me yacova sara ni ra sa vakarusai. 24 "Ena soli ira talega na nodra tui veikemuni, o ni na vakarusa na yacadra mai na ruku i lomalagi; ena sega tale ni dua e tu rawa e matamuni, me yacova ni kemuni sa vakarusai ira kece. 25 "O ni na vakama na matakau ceuti kecega, o ni na sega ni kocova na koula se na siliva sa tu kina, se mo ni na kauta vei kemuni, de o ni na qai corito ka vesuki kina; ni sa ka ca sara oqo vei Jiova na nomuni Kalou. 26 "Mo ni kakua ni kauta mai e dua na ka vakasisila ena nomuni vale, de o ni na vakagolei ki na rusa me vaka na ka vakasisila; mo ni sa cata sara ka besetaka, ni sa veika oqo sa ia kina veivakarusai.

Vakarua 8

Mo Ni Nanumi Jiova Na Nomuni Kalou

1 "Nai vakaro kece, au sa vakarota vei kemuni e daidai, mo ni qarauna ka muria, me rawa ni o ni bula kina ka tubu me lewevuqa, ka lako mo ni taukena na vanua sa yalataka me solia vei ira na nomuni qase. 2 "Mo ni nanuma talega oqo, ni o Jiova na nomuni Kalou sa liutaki kemuni mai ena sala taucoko oqo mai na vanua liwa, me vakamalumalumutaki kemuni ka vakatovolei kemuni, me kila se sa cava na ka e tiko e yalomuni, se o ni sa via maroroya na nona i vakaro se sega. 3 "Sa vakamalumalumutaki kemuni o Koya, sa vakatara mo ni via kana, ka qai vakani kemuni ena mana, o koya o ni sa sega ni kila se o ira talega na nomuni qase, me rawa kina vua me vakatakila vei kemuni, ni sa sega ni bula na tamata ena madrai duadua ga, mai na vosa ga sa lako mai ena gusu i Jiova. 4 "Sa sega ni madra mai na nomuni i sulu mai na yagomuni, se sa bobota mai na yavamuni ena vasagavulu na yabaki sa oti oqo. 5 "Mo ni kila ga oqo ena yalomuni, o ya kevaka sa kuitataka e dua na tama na luvena, sa cakava vaka kina na Kalou vei kemuni. 6 "O koya oqo, e dodonu moni maroroya nai vakaro nei Jiova na nomuni Kalou, ka lako ena Nona sala ka rerevaki Koya. 7 "Ni o Jiova na nomuni Kalou, sa kauti kemuni mai oqo ki na dua na vanua vinaka, na vanua sa drodro kina na wai, sa vure kina na wai, sa vure tkoga na wai ka drodro yani ki na veibuca, mai na veidelana talega; 8 "Na vanua ni witi kei na parile, na vaini kei na lolo, kei na pamekareneti, na vanua ni waiwai olive kei na oni; 9 "Na vanua o na kana madrai kina ka sa sinai tu ga, na vanua ni mamau; na vanua sa kaukamea na kena vatu, ena kena veidelana sa tu kina na uma varasa. 10 "Ni o ni sa kana ka mamau, e dodonu mo ni vakacaucautaki Jiova na nomuni Kalou ena vuku ni vanua vinaka sa solia vei kemuni. 11 "Mo ni qarauna de o ni guilecavi Jiova na nomuni Kalou, ena nomuni sega ni maroroya na Nona i vakaro, na Nona lewa, na Nona i lesilesi o koya au sa vakarota veikemuni e daidai, 12 "BaletaOni o ni sa kana ka mamau, ka tara na veivale vivinaka o ni sa dui tiko kina; 13 "Ni sa levu tikoga mai na nomuni manumanu susu, sa levu talega na nomuni siliva kei na koula, na nomuni veika kecega ena vakalevutaki; 14 "Sa na yaco mai na dokadoka ka o ni na guilecavi Jiova kina na nomuni Kalou o Koya a kauti kemuni tani mai Ijipita na vanua ni veivakabobulataki; 15 "Sa liutaki kemuni mai ena nomuni curuma na dredre kei na rerevaki ni vanua liwa, na vanua era sa tu kina na gata daukata, na batibasaga gaga, na qele sa via gunu tu ga, qai sega tu na wai; ia na wai qai kacabote mai na veivatu qiwa; 16 "Sa vakani kemuni mai na vanua liwa ena mana, oqo era sa sega ni kila na tamamuni, me rawa kina ni vakamalumalumutaki kemuni ka vakatovolei kemuni, mo ni na vinaka kina e muri. 17 "O ni na qai tukuna kina ena yalomuni, 'Na noqu kaukauwa kei na kaukauwa ni ligaqu au sa rawata kina na veika oqo.' 18 "Mo ni nanumi Jiova na nomuni Kalou, ni sai Koya sa solia veikemuni na kaukauwa mo ni rawata kina nai yau, me na vakadeitaka kina o Koya na Nona veiyalayalati sa yalataka o Koya vei ira na Nomuni qase, me vaka ena siga oqo. 19 "Mo ni qarauna tikoga de qai yaco mo ni guilecavi Jiova na nomuni Kalou ka muri ira na Kalou tani ka qaravi ira ka cuva vei ira, au sa cavuta veikemuni oqo, e ni kua, ni o ni na rusa vakaidina. 20 "Me vaka na veimatanitu sa vakarusai ira o Jiova e matamuni, o ni na rusa vakakina baleta ni o ni sa sega ni talairawarawa ki na domo i Jiova na nomuni Kalou.

Vakarua 9

Sa Vakaraici Lesu Na Nodra Talaidredre Na Isireli

1 "Mo ni rogoca na Isireli: mo ni takosova na Joritani ni kua, oqo ni lako ka valuta me qeavu na veimatanitu lelevu ka kaukauwa vei kemuni, na veikoro lelevu ka cecere sara ki lomalagi, 2 "E so na tamata lelevu qai babalavu, na kawa i Anaki, o ni sa kilai ira oqo, o ira oqo, o ni sa rogoca ni a tukuni kina, 'O cei ena tu rawa ena matadra na kawa i Anaki?' 3 "Mo ni kila oqo, na Kalou o Jiova sai Koya sa liu tiko e matamuni me vaka na bukawaqa caucaudre sa kana voli. Ena vakarusai ira o Koya ka kauti ira sobu mai veikemuni; me rawa ni o ni cemuri ira ka vakarusai ira vakatotolo, me vaka sa tukuna oti veikemuni o Jiova. 4 "Ni kakua ni nanuma ena yalomuni ni sa cakava na veika oqo na Kalou o Jiova baleta ni o ni sa yalododonu ka sa kauti kemuni mai mo ni mai taukena na vanua oqo; baleta ka na nodra dukadukali na veimatanitu oqo sa vakasavi ira kina o Jiova mai matanitu. 5 "Sa sega ni baleta na nomuni yalododonu se na dodonu sara ni yalomuni o ni na lako kina ka taukena na nodra vanua, ia, baleta ga na nodra i valavala vakasisila na veimatanitu oqo sa cemuri ira kina o Jiova na nomuni Kalou mai na matamuni, me rawa ni vakayacora kina na Nona vosa sa yalataka vei Eparama, vei Aisake, vei Jekope na tamamuni. 6 "Mo ni kila ni sa sega ni solia vei kemuni na Kalou o Jiova na vanua vinaka oqo mo ni taukena baleta na nomuni yalododonu, ni sai kemuni na tamata domo qa. 7 "Mo ni nanuma ka kua ni guilecava ena nomuni vakacudrui Jiova na nomuni Kalou ena vanua liwa, tekivu sara ena nomuni biuti Ijipita mai, me yaco sara mai ki ke o ni sa talaidredre tikoga vei Jiova. 8 "Mai Orepi talega o ni sa vakacudrui Jiova vakaca, sara, sa cudru vakaidina kina me vakarusai kemuni. 9 "Ni'u sa lako cake ki na ulunivanua me'u la'ki kauta mai na vatu ni Vunau, na vatu ni veiyalayalati sa cakava vata kei kemuni o Jiova, au a tiko mai na ulunivanua me vasagavulu na siga ka vasagavulu na bogi, au a sega ni kania e dua na madrai se gunuva e dua na wai. 10 "O Jiova sa solia mai vei au e rua na vatu sa solia ena qaqalo ni liga ni Kalou, sa volai kece kina na vosa sa vosataka vei kemuni mai na ulunivanua ena loma ni bukawaqa caucaudre ena siga o ni sa soqoni vata kina. 11 "Sa yaco oqo ni sa oti e vasagavulu na siga kei na vasagavulu na bogi, sa solia vei au o Jiova e rua nai taba ni vatu, na taba vatu ni veiyalayalati. 12 "Sa tukuna vei au o Jiova, 'Tucake lako yani vakatotolo, o ira na nomu tamata o a kauti ira mai Ijipita era sa cakacaka vakaca; e ra sa vuki tani vakatotolo mai na sala Au a vakarota vei ira; e ra sa cakava vei ira na ka e bulia na liga.' 13 "Na Kalou talega sa tukuna mai vei au ka vaka, 'Au sa raici ira na tamata oqo, sa dina, era sa tamata domo qa.' 14 'Laivi Au mada, Me'u vakarusai ira na tamata oqo ka bokoca na yacadra mai na ruku i lomalagi; ka Au na cakava vei iko e dua na matanitu e kaukauwa ka vinaka cake mai vei ira.' 15 "Au sa qai vuki ka gole sobu mai na ulunivanua ka sa kama tu ka yameyame na ulunivanua au sa taura tu e ligaqu na i taba vatu ruarua ni veiyalayalati. 16 "Au a qai rai mai, ka raica ni o ni sa valavala ca tale tiko vei Jiova na nomuni Kalou—o ni sa cakava tale tiko vei Kemuni e dua na bulumakau uma, o ni sa rui vuki tani vakatotolo mai na veika sa vakaroti mai vei Jiova. 17 "Au a qai viritaki mai na vatu ni taba sa tu e ligaqu, ka sa qai ka vorovoro e matamuni. 18 "Au a cuva vakatobuicu e mata i Jiova, me vaka ga e liu, me vasagavulu na siga ka vasagavulu na bogi; au a sega ni kana se gunu baleta na nomuni valavala ca o ni sa cakava ena nomuni cakacaka vakasisila ena mata i Jiova ka vakayavalati Koya me cudru mai. 19 "Au sa rere vakalevu ena cudru, sa cudruvi kemuni kina o Jiova me vakarusai kemuni. Ia o Jiova sa vakarorogo vei au ena gauna o ya. 20 "O Jiova sa cudruvi Eroni vakalevu ka sa dodonu me vakarusai koya, au sa masulaki Eroni ena gauna vata ga o ya. 21 "Au sa taura na nomuni valavala ca, na matakau bulumakau o ni sa bulia, au sa vakama ena bukawaqa ka vurunania me yacova ni ra sa vaka na kuvunisoso, ka au sa qai viritaki, ki na wai drodro sa lako mai na ulunivanua. 22 "Mai Tabera kei Manasa kei Kiboroci Atara o ni sa vakacudruya na Kalou me cudru vakalevu. 23 "Sa vaka kina, ni sa vakatalai kemuni o Jiova mai Ketesa Bania, ka vaka, 'Mo ni lako cake ka taukena na vanua sa soli vei kemuni.' O ni sa qai talaidredre ki nai vakaro i Jiova na nomuni Kalou, o ni sa sega ni vakabauti koya, se, via rogoca na domona. 24 "O ni sa rui talaidredre vei Jiova mai na siga au sa kilai kemuni kina. 25 "Au sa vakararawataki au kina ena mata ni Kalou me vasagavulu na siga kei na vasagavulu na bogi, au sa vakararawataki au tiko kina, ni sa tukuna tiko ga o Jiova, ni na vakarusai kemuni. 26 "Au sa masu vei Jiova ka vaka, 'I Jiova na Kalou mo ni kua ni vakarusai ira na Nomuni tamata na Nomuni votavota, o ira o ni sa voli ira ena nomuni levu vakaidina, o ira, o ni sa kauti ira tani mai Ijipita ena Ligamuni kaukauwa vakaidina. 27 'Mo ni nanumi ira na Nomuni tamata, o Eparama, Aisake kei Jekope; Mo ni kua ni raica na nodra yalo kaukauwa na tamata oqo, na nodra cakacaka vakasisila se na nodra i valavala ca, 28 'De ra qai vosa na vanua o ni sa kauti keimami mai kina ka tukuna, "Baleta ni sa sega ni rawa vua na Kalou me kauti ira ki na vanua sa yalataka vei ira, sa cati ira o Koya ka sa kauti ira mai oqo ki na vanua liwa me vakamatei ira kina." 29 'Ia era sa Nomuni tamata ga era sa Nomuni votavota ga, o ni sa kauti ira mai ena Ligamuni kaukauwa kei na Ligamuni sa dodo tiko ga.'

Vakarua 10

Nai Karua Ni Vatu Ni Vunau

1 "Ena gauna o ya sa vosa vei au o Jiova, 'Cakava mai e rua na vatu ni taba me vaka na kena i matai, ka lako cake mai vei Au ki na ulunivanua ka cakava vei iko e dua na kato kau. 2 'Au na vola ena vatu e rua oqori na veika e a volai ga kina e liu, o a qai voroka, mo qai biuta oqori ki na Kato.' 3 "Au sa cakava sara na kato ena kau Akonia, au sa vakarautaka talega na vatu ni taba e rua me vaka na kena i matai, ka lako cake ki na ulunivanua kei na rua na vatu oqori e ligaqu. 4 "Sa volavola o Jiova ena vatu oqori me vaka ga na ka e a volai kina e liu, nai Vakaro e Tini, o koya e a vosataka vei kemuni o Jiova mai na ulunivanua ena loma ni bukawaqa ena siga ni vakasoqoni vata; ka sa solia mai vei au o Jiova. 5 "Au sa qai lako sobu mai na ulunivanua ka biuta na vatu e rua ena loma ni kato au sa cakava ga; sa yaco ga koya me vaka sa vakarota vei au o Jiova." 6 (O ira na gone ni Isireli era sa lako mai na mata ni wai mai Beni Jakani ki Masera. Oqo na vanua sa qai mai mate kina o Eroni ka bulu kina; eke sa mai veiqaravi kina o Iliesa me vaka na bete levu me kena i sosomi. 7 Mai kea era sa gole sara yani ki Qutiqota, mai Qutiqota ki Jotibaya na vanua ni veiuciwai ni wai. 8 O Jiova ena gauna o ya sa tawasei ira na Livai me ra vakatawa tiko na kato ni veiyalayalati nei Jiova, me ra tucake tu ena mata ni Kalou ka cakacaka vua, ka vakacaucautaka tiko na Yacana me yacova na siga oqo. 9 O Livai sa sega na nona i wasewase ni vanua se nona i votavota mai vei ira na tacina; o Jiova ga sa nona i votavota, me vaka ga sa yalataka vua o Jiova na nona Kalou.) 10 "Me vaka na matai ni gauna, au sa tiko ga mai na ulunivanua me vasagavulu na siga ka vasagavulu na bogi, sa rogoci au talega ena gauna o ya o Jiova me kua ni vakarusai kemuni. 11 "Sa vosa vei au o Jiova ka vaka: 'Mo tucake ka tekivu lako e matadra na tamata, me rawa ni na lako yani ka taukena na vanua au a yalataka vei ira na nodra qase me'u solia vei ira.'

Na Ka Dina Ni Vunau

12 "Oqo oi kemuni na Isireli, na cava sara mada sa vinakata mai vei kemuni o Jiova na nomuni Kalou? Mo ni rerevaki Jiova ga na nomuni Kalou, mo ni lako voli ena nona sala, mo ni lomani koya, mo ni qaravi Jiova na nomuni Kalou ena yalomuni taucoko kei na lomamu kecega, 13 "Ka maroroya nai vakaro kecega i Jiova kei na Nona i lesilesi au sa vakarota vei kemuni e daidai, mo ni vinaka kina? 14 "Sa dina sara, o lomalagi kei lomalagi e cake sara sa Nona na Kalou o Jiova, o vuravura talega kei na ka kecega sa sinai kina. 15 "O Jiova sa marautaki ira ga na tamamuni, me lomani ira; sa digitaki ira na nodra kawa sa muri ira, sai kemuni, mai vei ira kece na tamata, me vaka ena siga oqo. 16 "O koya oqo, mo ni ciliva na mata ni yalomuni ka mo ni kakua ni vakadomoqa tale. 17 "Ni o Jiova na nomuni Kalou, sa Kalou ni Kalou, ka Turaga ni turaga, na Kalou qaqa, cecere ka levu, sa rui totoka, sa sega ni veivakaduiduitaki ka sa sega ni taura na ka ni vei vaqumi. 18 "Sa lewa vakadodonu vei ira na luveniyali kei ira na yada; sa lomani ira na vulagi, sa solia vei koya na kakana kei nai sulu. 19 "O koya oqo, mo ni lomani ira na vulagi, ni o ni a tu vakavulagi mai Ijipita. 20 "Mo ni rerevaki Jiova na nomuni Kalou; mo ni qaravi Koya, sai koya ga mo ni taura matua, ka bubului ga ena yacana. 21 "Sai koya ga na nomuni lagilagi, ka sa nomuni Kalou ga o Koya, sai Koya ga sa cakava vei Kemuni na veika lelevu ka vinaka o koya sa raica oti na matamuni. 22 "Era sa lako sobu ki Ijipita na tamamuni kei na vitusagavulu na tamata, ia oqo sa vakayacora o Koya mo ni vaka na kalokalo ni lomalagi na kemuni lewe levu.

Vakarua 11

Sa Saumi Vakadodonu Na Talairawarawa Kei Na Loloma Dina

1 "O koya oqo mo ni lomani Jiova na nomuni Kalou ka maroroya na Nona i tukutuku, na Nona i lesilesi, na Nona lewa, kei na Nona i vakaro kecega. 2 "Mo ni kila ena siga oqo Ni'u sa sega ni vosa vei ira na luvemuni, o ira sa sega ni kila, era sa sega talega ni raica na Nona veitotogitaki na Kalou o Jiova, na Nona cecere, na Nona qaqa kei na ligana kaukauwa sa dodo tiko yani — 3 "Na Nona mana kei na Nona cakacaka sa cakava mai Ijipita kivei Fero na tui; 4 "Na veika e cakava vei ira na mataivalu ni Ijipita, na nodra ose kei na kena kareti ena Nona cakava na Wasawasa Damudamu me vakaluvuci ira ena nodra sa cicivi kemuni tiko mai, kei na nodra vakarusai; 5 "Na veika e cakava vei kemuni mai na vanua liwa me yacova ni o ni sa tiko oqo; 6 "Kei na veika se cakava vei Decani kei Abirama na luvei Eliapi na luvei Rupeni; ena kena tadola na qele, qai tilota ira na tamata, na nodra kawa, na nodra vale laca kei na ka kece era taukena ena kedra maliwa na Isireli — 7 "Na matamuni sa raica kece na veika lelevu sa cakava o Jiova na Kalou. 8 "O koya mo ni qai maroroya nai vakaro kece au sa vakarota veikemuni ena siga oqo, mo ni kaukauwa kina, ka lako, ka taukena na vanua o ni sa takosova tiko mo ni taukena, 9 "Me rawa ni o ni bula balavu kina ena vanua sa yalayala kina o Jiova me solia vei ira na nomuni qase, ki vei ira kei ira na nodra kawa, na vanua sa drodro kina na sucu kei na oni." 10 "Na vanua o ni sa lakova tiko oqori mo ni taukena, sa sega ni tautauvata kei na vanua o Ijipita o ni a lako mai kina, na vanua o ni a tea kina na sila, ka vakasuasuataka e yavamuni me vaka na veirourou; 11 "Ia, o ni sa takosova oqo mo ni taukena, na vanua sa tu kina na veidelana kei na veibuca, sa gunuva tikoga na wai ni uca mai lomalagi, 12 "Na vanua sa rui kauwaitaka vakalevu na Kalou o Jiova; sa tiko ga kina na matai Jiova na Kalou mai nai vakatekivu ni yabaki me yacova ni sa cava na yabaki. 13 'Ena yaco kevaka o ni sa qarauna mo ni muria ka talairawarawa ki na Noqu vosa ka'u sa vakarota veikemuni e daidai, o ya mo ni lomani Jiova na nomuni Kalou ka qaravi koya ena yalomuni kei na lomamuni taucoko. 14 'Au na solia na uca ena kena gauna dodonu, na uca sa liu kei na uca qai tau e muri, me rawa ni o ni tamusuka kina na sila, na waini kei na waiwai. 15 'Au na vakatubura na co ena nomuni vanua me ra kana kina na manumanu, me rawa ni o ni kana ka mamau tiko.' 16 "Mo ni qarauni kemuni vinaka ga, de qai vakaisini na yalomuni ka vuki tani me qarava na vei ka sa sega ni Kalou, 17 "De na qai tubu na cudru ni Kalou vei kemuni, me sogota na lomalagi me kua ni tau kina na uca, me kua ni solia na qele na vuana, me rawa ki na ni o ni rusa vakatotolo mai na vanua vinaka sa solia veikemuni o Jiova. 18 "Mo ni maroroya sara na vosa oqo ena yalomuni kei na lomamuni, mo ni vauca mei vakatakilakila ena ligamuni, me dua talega me vaka na i ubi e maliwa ni matamuni. 19 "Mo ni vakavulica vei ira na luvemuni, mo ni dauveivosaki kina ni kemuni sa dabe tiko e lomanivale, ni kemuni sa lako tiko ena sala, ni, ni kemuni sa davo tiko, ni kemuni sa duri cake talega. 20 "Mo ni vola talega ena duru ni katuba ni nomuni vale, ena matamata ni nomuni vale talega, 21 "Me vakalevutaki kina na nomuni veisiga kei na nodra veisiga na luvemuni ena vanua sa yalataka vei ira na tamamuni, me solia vei ira, me vaka na veisiga vakalomalagi e vuravura. 22 "Kevaka o ni sa maroroya vakavinaka mai vakaro kece au sa vakarota veikemuni mo ni cakava — mo ni lomani Jiova na nomuni Kalou ka lako e Nona sala ka mo ni kukube matua Vua— 23 "Na Kalou ena cemuri ira kece na veimatanitu mai matamuni, ka o ni na vakasesea na veimatanitu lelevu ka qaqa oqo mai vei kemuni. 24 "Na vanua kece sa butuka na yavamuni sa na nomuni, mai na vanua liwa ki Lepanoni, mai na uciwai levu na Uferetisi, me yaco sara ki na Wasawasa mai na Ra nai yalayala ni nomuni vanua. 25 "E na sega ni dua e tagane me tu rawa e matamuni, na Kalou o Jiova ena biuta na kemuni rogorogo kei na dua na rere levu ena vanua kecega o ni sa butuka, me vaka ga sa vosa kina vei kemuni o Koya. 26 "Au sa tauca e matamuni na kalouvinaka kei na kalouca: 27 "Na kalouvinaka kevaka o ni sa vakarorogo ka muria nai vakaro kece i Jiova na nomuni Kalou, au sa vakarota e daidai; 28 "Na kalouca kevaka o ni sa bese ni talairawarawa ki nai vakaro i Jiova na nomuni Kalou sa tauci veikemuni e daidai ka muria na Kalou tani eso, o ni a sega tu ni kila. 29 "Ena qai yaco ni sa kauti kemuni mai o Jiova na nomuni Kalou kina vanua o ni sa lakova tiko oqori me taukena, mo ni biuta na kalouvinaka ena ulunivanua o Kerisimi kei na kalouca ena ulunivanua o Ipali. 30 "Era sa sega beka ni tiko mai na tai kadua ni Joritani me vaka ki na dromudromu ni matanisiga, ena nodra vanua na kai Kenani era sa tiko ena veibasai ni buca mai Kilikali; ena yasa ni veivunikau mai More? 31 "O ni na takosova na Joritani ka o ni na lako me taukena na vanua sa solia veikemuni o Jiova na nomuni Kalou, o ni na taukena ka tiko kina. 32 "O ni na qarauna kina me maroroya nai lesilesi kece kei na lewa kece, au sa biuta veikemuni ena siga oqo.

Vakarua 12

Na Vanua Vakarautaki Ni Lotu

1 "Oqo nai lesilesi kei na lewa, sa soli tiko mai moni maroroya vakavinaka ena vanua sa solia vei kemuni na Kalou o Jiova ni nomuni qase mo ni taukena, ena veisiga kece o ni sa bula kina e vuravura. 2 "Mo ni vakarusa kece na veivanua era sa dau qaravi Kalou kina na veimatanitu oqo, ena veiulunivanua, ena veidelana se ena ruku ni veivunikau. 3 "Mo ni vakarusa na nodra veicabocabo ni soro, me musuki na nodra veiduru tabu ka vakamai na nodra matakau, me laulauta na nodra veika kece sa ceuti, ka me vakarusai talega na yacadra mai kea. 4 "Mo ni kua ni lotu vei Jiova na nomuni Kalou ena veika oqo. 5 "Mo ni vakasaqara ga na vanua sa digitaka o Jiova, mai na nomuni veiyavusa kece, me biuta kina na Yacana ena Nona i tikotiko, e kea mo ni lako kina. 6 "Mo ni kauta ki kea na nomuni i soro kama kece, nai madrali, nai katini kei nai soro ni vakalavelaveti ena ligamuni, na nomuni yalayala, na soli ka vakayalovinaka kei nai sevu kecega ni nomuni manumanu susu. 7 "Mo ni kana kina ena matai Jiova na nomuni Kalou, mo ni marau kina ena veika sa kauta mai na ligamuni, oi kemuni kei ira na nomuni vuvale, me vaka sa vakasaututaki kemuni kina o Jiova. 8 "Mo ni kua ni cakava me vaka o ni sa cakava tiko oqo – o ya, na tamata yadua sa cakava tiko ga na veika e dodonu e matana – 9 "Me vaka ni o ni se bera ni lako yani ki nai vakavakacegu, ki nai votavota sa solia vei kemuni o Jiova na nomuni Kalou. 10 "Ni o ni sa takosova na Joritani ka tiko ena vanua sa solia veikemuni o Jiova na Kalou mo ni taukena, ka ena solia veikemuni na vakacegu mai vei ira kece na kemuni meca vakavolivoliti kemuni, mo ni tiko vinaka kina, 11 "Me dua kina na vanua sa digitaka na Kalou o Jiova me tiko vakadua kina na yacana, mo ni kauta kece mai kea na nomuni madrali kei nai soro au sa vakarota veikemuni, nai soro kama, nai katini, nai soro ni vakalavelaveti e ligamuni kei nai soro kece o ni sa yalataka vei Jiova. 12 "Mo ni reki tiko ena matai i Jiova na nomuni Kalou, oi kemuni kei ira na luvemuni tagane kei na luvemuni yalewa, kei ira na nomuni dauveiqaravi tagane kei na yalewa, kei ira na Livai era sa tiko ena nomuni lomanibai, ni sa sega na nona i votavota ena kemuni maliwa. 13 "Mo ni qarauni kemuni vinaka, ka me kua na vakacaboi soro kama ena vanua sa rawa o ni sa raica; 14 "Ena vanua ga sa digitaki o Jiova, ena dua ga vei ira na yavusa, mai kea mo ni vakacabora ki na nomuni i soro kama, mai kea mo ni cakava kina na vei ka au sa vakarota vei kemuni. 15 "Io, e rawa ni o ni vakamatea na manumanu ka kania ena loma ni bai, na cava sa gadreva na lomamuni, me vaka na nona veivakalouvinakataki na Kalou o Jiova sa solia vei kemuni; o ira sa savasava kei ira sa sega ni savasava me ra kana kina, na me tagane kei na me kila. 16 Mo ni kua ga ni kania na dra me sova kina qele me vaka na wai. 17 "Mo ni kua ni kania ena loma ni bai na i katini ni sila, se waini, se waiwai, se nai sevu ni nomuni manumanu, se na veika o ni sa yalataka me vakacabora, se dua na solisoli ka ni loloma, se nai madrali sa laveti e ligamuni. 18 "Ia, mo ni kania ga ena matai Jiova na Kalou ena vanua sa digitaka o koya, oi kemuni kei ira na luvemuni tagane kei na yalewa, o ira na nomuni dauveiqaravi, o ira na Livai sa tiko ena nomuni loma ni bai; mo ni marau tiko ena matai Jiova na nomuni Kalou kei na vei ka kecega sa tara na ligamuni. 19 "Mo ni qarauna vakavinaka sara, o ya mo ni kua ni guilecavi se biuti ira na Livai ena veisiga kece o ni sa bula kina ena vanua. 20 "Ni sa vakalevutaka na nomuni yalayala ni vanua, me vaka sa yalayala ki na vei kemuni, o ni na tukuna ki na, me'u kana leweni manumanu mada, baleta ni o ni sa via kana lewe ni manumanu, mo ni kania sara vakalevu na lewe ni manumanu. 21 "Kevaka sa rui yawa veikemuni na vanua sa digitaki me vakatikora kina na yacana, mo ni qai vakamatea na nomuni manumanu sa solia vei kemuni o Jiova, me vaka au sa vakarota vei kemuni, mo ni qai kana ga ena loma ni nomuni bai na kena levu ga o ni via kania. 22 "Me vaka ni sa laukana na me tagane kei na me kila, me ra kana talega na savasava kei na sega savasava. 23 "Mo ni kila deivaki ga ni sa tabu na kana dra, ni sa ka bula na dra, mo ni kua ni kania na bula kei na lewena. 24 "Mo ni sova ki na qele na dra me vaka na wai, ni sa tabu ni laukana. 25 "Mo ni kua ni kania, me vinaka kina vei kemuni kei ira na luvemuni sa muri kemuni, ni o ni sa cakava na veika e dina ka dodonu ena mata i Jiova. 26 "Na veika tabu ga sa tu vei kemuni, kei nai soro ni veika o ni sa yalataka, mo ni taura ka lako ki na vanua sa digitaka o Jiova. 27 "Mo ni vakacabora na nomuni soro kama, na lewe ni manumanu kei na kena dra ena cabocabo ni soro nei Jiova na nomuni Kalou, ka mo ni kania na lewe ni manumanu. 28 "Mo ni vakarorogo ka muria na vosa kecega au sa vakarota vei kemuni, me vinaka kina vei kemuni kei ira na luvemuni me sega ni mudu, ni kemuni sa cakava na veika e vinaka ka dodonu ena matai Jiova na nomuni Kalou.

Me Qarauni Na Vei Kalou Lasu

29 "O Jiova na nomuni Kalou sa musuki ira laivi na veimatanitu mai na matamuni o ni sa lako tiko kina oqori me vakasesea ka vuaviritaka, mo ni taukena ka tiko ena nodra vanua, 30 "Mo ni qarauni kemuni vinaka, mo ni kua ni vesuki me muri ira, ni oti na nodra sa vakarusai mai na matamuni, mo ni kakua ni vakataroga na nodra Kalou ka tukuna, 'Era sa qarava vakacava na nodra Kalou na veimatanitu oqo? Au na cakava talega oi Au.' 31 "Sa tabu ni o ni qaravi Jiova na nomuni Kalou me vaka o ya; sa ka vakasisila kece vei Jiova, ka sa cata talega vakalevu na nodra i valavala ni qaravi Kalou, ni sa yaco me ra sai soro kama na luvedra tagane kei na luvedra yalewa ki na nodra Kalou. 32 "Na veika au sa vakarota vei kemuni moni qarauna ka maroroya, mo ni kua ni vakuria se kauta tani na veika sa tu kina.

Vakarua 13

Na Totogi Ni Vuki Tani

1 "Kevaka sa mani tubu mai veikemuni e dua na parofita se dua na dautadra ka sa vakaraitaka e so na i vakatakilakila se na ka mana, 2 "Ka sa yaco tiko na veika e dautukuna vei kemuni, me qai tukuna, 'Me da lakovi, ira na veikalou oqo' O eda sa sega ni kila O 'Ka me da qaravi ira,' 3 "Mo ni kua ni rogoca na vosa sa tukuna na parofita o ya, se na dautadra oqori, ni sa vakatovolei kemuni tiko na Kalou o Jiova, se, o ni sa lomani koya dina tiko ena yalomuni kei na lomamuni taucoko, se sega. 4 "Mo ni sa muri Jiova dina tiko na nomuni Kalou ka rerevaki Koya, ka maroroya na Nona, vakaro, ka rogoca na domona ka qaravi Koya, ka tauri Koya matua. 5 "Na parofita se na dautadra oqori me vakamatei, baleta ni sa vosa tiko o koya me vukici kemuni tani mai vua na Kalou o Jiova, o Koya sa kauti kemuni tani mai Ijipita ka voli kemuni tani mai na vale ni veivakabobulataki, me vakavulica veikemuni nai valavala vakalou mo ni lako kina. Mo ni biuta tani kina na veika ca mai na kemuni maliwa. 6 "Kevaka, o tacimu na luvei tinamú dina, na luvemu tagane se yalewa, o watimu dina o sa daumarautaka, se dua na nomui tau vinaka sa vecei iko vakavuni ka tukuna, 'Me daru lako mada ka qaravi ira na Kalou tani eso,' o ira na Kalou o ni a sega tu ni kila, oi kemuni kei ira na nomuni qase, 7 "Na nodra Kalou na veitamata era sa tiko volivoliti kemuni, e ra voleka se era sa yawa sara, mai na dua na yasai vuravura ki na dua tale na yasai vuravura, 8 "Mo ni kua ni vaka io vua se rogoci koya se na matamuni me via lomani koya se vosoti koya se via taqomaki koya; 9 "Ia, mo ni vakamatei koya dina; me tau sara ga e liu na ligamuni vei koya me mate kina, ni oti koya na ligadra kece na tamata. 10 "Mo ni vakaviriki koya ena vatu me yacova sara ni sa mate, baleta ni sa vinakata me vecei kemuni mai vei Jiova na nomuni Kalou, o Koya sa kauti kemuni tani mai Ijipita, mai na vale ni veivakabobulataki. 11 "Me rogoca ka rere o Isireli taucoko, me kua tale ni dua e cakava na ka lolovira vaka oqo ena kemuni maliwa. 12 "Kevaka e dua veikemuni sa rogoca e dua ena nomuni veikoro, sa solia veikemuni o Jiova na nomuni Kalou mo ni tiko kina, me tukuna tiko, 13 'Sa so na tamata dauveivakaisini sa lako mai veikemuni ka ra sa lako yani ki na veikorokoro me ra veivecei ka tukuna, "Me da lako yani ka qaravi ira na Kalou tale e so"'O na veikalou o ni a sega tu ni kila. 14 "Mo ni qai vakaqaqa, vakasaqara ka vakataroga, kevaka me sa ka dina ni sa caka ena kemudou maliwa na cakacaka torosobu oqo, 15 "Me sa vakamatei vakaidina na lewenivanua oqo ena i seleiwau – me vakarusai vakaidina, o koya kei na veika e taukena kei na manumanu susu kece sa nona, ena yame ni seleiwau. 16 "Mo ni qai kumuna mai na veika kece sa butakoci mai ki na loma ni sala donu, ka me vakamai vakatabaki dua na koro o ya kei na veika sa butakoci, vei Jiova na nomuni Kalou, me sa benu tu ka sega ni mudu. Me kua ni tarai cake tale, 17 "Me kua ni dua na ka sa vakarusai tu me tiko ena ligamudou, me vakaraitaka tikoga kina o Jiova na Nona yalololoma veikemuni ka sega ni Nona cudru katakata, me lomani kemuni ka vakalewevuqataki kemuni, me vaka sa yalataka vei ira na nomuni qase, 18 "Baleta ni o ni sa vakarorogo ki na domo i Jiova na nomuni Kalou, mo ni maroroya kina na Nona i vakaro, au sa vakarota vei kemuni ena siga oqo, mo ni cakava na k a sa dodonu ena matai Jiova na nomuni Kalou.

Vakarua 14

Na Vakaloloku E Sega Ni Dina

1 "Sai kemuni na luve ni Kalou o Jiova; sa tabu veikemuni na veitarai se tasia na ulumuni ena vukudra na mate. 2 "Ni o ni sa ka tabu vua na Kalou o Jiova, o Jiova sa digitaki kemuni me Nona, ka i yau talei vua na Kalou mai vei ira kece na tamata e vuravura.

Na Kakana E Savasava Kei Na Kakana E Sega Ni

Savasava 3 "Mo ni kakua ni kania e dua na ka sa sega ni taleitaki. 4 "Oqo na veimanumanu mo ni dau kania: na bulumakau tagane, na sipi, na me. 5 "Na dia, na dia ni veikau, na dia lalai, na me kila, na me ni ulunivanua, na dia dravu kei na sipi ni ulunivanua. 6 "Kei na manumanu yavai va sa wasei rua na kena ququ, ka mama vakarua na kena. 7 "Mo ni kua ni kania na manumanu sa mama vakarua na kena ka sa sega wase rua na kena ququ, me vaka na, kameli, na ose; ni ra sa sega ni savasava vei kemuni. 8 "Na vuaka sa sega ni savasava vei kemuni, sa wase rua na kena ququ ia sa sega ni mama vakarua na kena, mo ni kua ni kania na lewena se tara na yagona ni sa mate tu. 9 "Oqo mo ni kania ena vei ka sa tu e wai: na ika kece sa vakatutuna ka vakavarina. 10 "Ia, na ika kece sa sega ni vakatutuna kei na ika kece sa sega ni vakavarina, mo ni kua ni kania, ni sa sega ni savasava vei kemuni. 11 "Na manumanu vuka savasava kece mo ni kania. 12 "Oqo ga mo ni kua ni kania: na ikeli, na kena mataqali kece e tolu, 13 "Na tuivuci levu kei na kena mataqali vata; 14 "Na reveni kei na kena mataqali vata; 15 "Na ositeriti, na lulu kei na kasaqa, na manulevu kei na kena mataqali vata; 16 "Na lulu lalai, na lulu dautagi kei na lulu vulavula, 17 "Na mataqali vata na tuivuci, na mataqali vata na lulu, 18 "Na belo kei na kena mataqali vata kei na beka kecega. 19 "Na veika kecega sa qasi voli sa vakatabana me vuka kina, sa sega ni savasava oqori veikemuni; me ra kakua ni laukana. 20 "Me ra laukana kecega na manumanu vuka savasava. 21 "Mo ni kakua ni kania e dua na ka sa mate oti tu; e rawa ni o ni solia yani vei ira na vulagi era sa tiko voleka vei kemuni, se mo ni volitaka vei ira na kai tani; ni sai kemuni na ka tabu vua na Kalou o Jiova. Mo ni kua ni vakasaqara na me gone ena wainisucu nei tinana.

Nai Valavala Ni Kena Soli Nai Katini

22 "E dodonu moni solia vakaidina nai katini ni nomuni vuata kecega sa solia veikemuni na nomuni veiteitei ena veiyabaki kecega. 23 "Mo ni kana e matai Jiova na nomuni Kalou ena vanua sa digitaka o Koya me tiko kina na yacana, nai katini ni nomuni sila kei na nomuni waini vou kei na nomuni waiwai, na ulumatua ni nomuni bulumakau kei na manumanu kecega ni loma ni bai, mo ni vulica kina na rerevaki Jiova na nomuni Kalou. 24 "Kevaka sa balavu nai lakolako vei kemuni, me sa dredre kina veikemuni na kauta tiko nai katini ni vei ka kecega ena i lakolako, 25 "Mo ni qai veisautaka mei lavo, taura nai lavo e ligamuni ka lako kina vanua sa digitaka o Jiova. 26 "Nai lavo me qai voli kina na veika ga sa vinaka veikemuni, na bulumakau, na sipi, na waini, na veika e vaka kina, mo ni kana ena matai Jiova na nomuni Kalou, mo ni marau kina kei ira na nomuni matavuvale. 27 "Me ra kua ni guilecavi na Livai era sa tiko vata kei Kemuni, ni ra sa sega ni vakaivotavota vata kei kemuni. 28 Ni cava na veiyatolu na yabaki, mo ni qai kauta mai nai katini ni ka kecega me mai biu ki nai lololo. 29 "O ira na Livai, o ira na vulagi, o ira na luveniyali, o ira na yada, o ira oqo sa tiko ena loma ni nomuni bai, me ra lako mai ka kana ka mamau me vakasaututaki kemuni o Jiova ka vakavuavuataka na cakacaka ni ligamuni.

Vakarua 15

Me Boko Nai Dinau Ni Oti E Vitu Na Yabaki

1 "Ni sa mai cava e vitu na yabaki, mo ni qai vakatara me sa boko kece na dinau. 2 "Me vaka oqo na kenai vakarau: o ira kece sa solia na dinau vei ira na wekana me ra solia na veivakagalalataki; me kua tale ni taroga mai vua na wekana se tacina, ni sa vakatokai oqo, na veivakagalalataki i Jiova. 3 "Mai vei ira na vulagi e rawa ni kemuni taura; ia, mai vei ira na tacimuni e dodonu mo vakagalalataki ira, 4 "Vakavo ga, ke sa sega na dravudravua ena kemuni maliwa; ni o Jiova sa veivakasaututaki oti ena vanua sa solia veikemuni mo ni taukena me vaka na nomuni votavota – 5 "Ni kemuni sa vakarorogo vakavinaka ga ki na domo i Jiova na nomuni Kalou, ka qarauna moni maroroya vakavinaka na i vakaro kecega sa vakaroti vei kemuni e daidai. 6 "Na Kalou o Jiova ena vakalouvinakataki kemuni, mo ni vaka sa yalataka vei kemuni; Mo ni dausolia vei ira na veimatanitu, mo ni kua ga ni taura mai vei ira; mo ni lewa vei ira na veimatanitu, me kua ga ni ra lewa mai veikemuni e dua na ka.

Mo Ni Lomasoli Vei Ira Na Dravudravua

7 "Kevaka sa tiko veikemuni e dua na dravudravua mai vei ira na tacimuni ena nomuni tikotiko sa solia vei kemuni o Jiova na nomuni Kalou, mo ni kua ni yalo ca vei ira se bese ni dodoka na ligamuni mai ki vei ira na tacimuni dravudravua oqo, 8 Mo ni dolava ga na ligamuni vakalevu vei ira, ka gadreva vakalevu me vukea na nodra leqa se leqa cava ga. 9 "Mo ni qarauna ga de so na vakanananu ca e lako mai veikemuni mo ni tukuna kina, nai ka vitu ni yabaki na yabaki ni veisereki, ka sa tekivu me ca mai kina na yalomuni vua na tacimuni dravudravua ka sega ni solia vua e dua na ka, sa na qai tagi vua na Kalou o koya ena vukumuni, sa na qai dina kina nai valavala ca ena kemuni maliwa. 10 "E dodonu mo ni solia dina vua, me kua na yaloca mai veikemuni ni o ni sa solia e dua na ka, baleta ena veika kece oqo sa dauveivakalouvinakataki kina o Jiova, ena nomuni cakacaka kei na ka kece sa tara na ligamuni. 11 "Era na sega ni yali na dravudravua mai na vanua; au sa vakarota kina, 'mo ni dolava na ligamuni vei ira na tacimuni, vei ira na dravudravua vei ira talega era gadreva na veivuke ena vanua.'

Nai Vunau Me Baleti Ira Na Dauveiqaravi Sa Vesuki Tu

12 "Kevaka sa dua na tacimuni, yalewa se tagane e Iperiu, sa volitaki veikemuni, ka sa qaravi kemuni me ono na yabaki ena i ka vitu ni yabaki mo ni qai sereki koya me lako ena galala. 13 "Ni kemuni sa sereki koya, me kua ni lako ena liga lala; 14 "Mo ni solia vei koya na veika mai na nomuni loma ni bai, na veika mai na rara ni butu sila, na veika mai na i vurevure ni waini. Na veika sa vakasaututaki kemuni kina na Kalou mo ni solia vakayalovinaka vei ira. 15 "Mo ni kila ga ni o ni a tiko vakabobula mai Ijipita, sa qai voli kemuni lesu mai na Kalou o Jiova; o koya oqo au sa vakarota ki na veikemuni na ka oqo. 16 "Kevaka sa mani yaco me sa tukuna mai, au na sega ni lako tani mai veikemuni baleta ni'u sa lomani kemuni kei na nomuni vale, ni'u sa bula vinaka talega mai vei kemuni. 17 "Mo ni qai cula na daligana me i vakatakilakila ni sa nomuni tamata me Sega ni mudu. Me caka talega vaka o ya vei ira na yalewa. 18 Ena sega ni dredre mo ni vakatalai koya wale tu ga; ni sa vaka tu ga e lewe rua o koya ena loma ni ono na yabaki. Na Kalou ena vakasaututaki iko ena ka kecega o cakava.

Na Lawa Me Baleta Na I Sevu Ni Manumanu Kecega

19 "Na ulumatua ni manumanu kecega e ka tagane me vakatabui vua na Kalou; me kua ni vakacakacakataki se koti na vutidra. 20 "Oi kemuni kei ira na nomuni vuvale mo ni kana tiko ena matani Kalou o Jiova ena yabaki kei na veiyabaki ena vanua sa digitaki oti o Jiova. 21 "Kevaka sa kune kina e dua na ka ca, kevaka sa lokiloki se mataboko se dua sa ca sara kina vakalevu, mo ni qai kua ni vakacabora vei Jiova na Nomuni Kalou. 22 "Mo ni qai kania ga ena loma ni nomuni bai; o ira sa tawasavasava kei na savasava na dia ni veikau lalai se na dia ni vanua. 23 "Mo ni kakua ga ni kania na kena dra; me sova laivi yani ena qele me vaka na wai.

Vakarua 16

Rai Lesuvi Na Lako Sivia

1 "Mo ni maroroya na vula o Epipi ka vakayacora na lako sivia vei Jiova na nomuni Kalou, ni vula o Epipi sa kauti kemuni tani kina mai Ijipita o Jiova na nomuni Kalou ena bogi. 2 "Mo ni qai vakacabora kina na lako sivia vei Jiova na nomuni Kalou na veika mai na nomuni loma ni bai kei na vei sipi mai na qele ni sipi ena vanua sa digitaka o Koya me tiko kina na yavana. 3 "Mo ni kua ni kania na madrai sa tu kina na leveni me vitu na siga mo ni kania kina na madrai sa sega ni vakaleveni kei na madrai ni rarawa, (ni kemuni sa lako tani mai vakatotolo mai Ijipita), mo ni nanuma ena veisiga kecega o ni sa bula kina ena nomuni lako tani mai Ijipita. 4 "Me kua ni dua na ka vakaleveni, me kune ena kemuni maliwa ena loma ni vitu na siga, se me dua na leweni manumanu sa vakacabori mai na matai ni siga, me tiko vulagi me yacova na siga ka tarava. 5 "Mo ni kua ni vakacabora na lako sivia ena nomuni loma ni bai sa solia veikemuni o Jiova na nomuni Kalou; 6 "Ena vanua ga se digitaka o Jiova me tiko kina na yacana, mo ni vakacabora na lako sivia mai kea, ena gauna sa dromu kina na matanisiga, na gauna ka o ni sa lako tani kina mai Ijipita. 7 "Mo ni tavuna ka kania ena vanua sa digitaki o Jiova na Kalou, ena mataka mo ni qai tucake ka dui gole ki na nomuni vale laca. 8 "Me ono na siga mo ni kania na madrai sa sega ni vakaleveni, ena i ka vitu ni siga me qai dua nai soqosoqo tabu ki vua na Kalou. Me kua ni dua e cakacaka kina.

Raici Lesu Na Solevu Ni Veimacawa

9 "Mo ni wilika e vitu na macawa vei kemuni; tekivu ena i ka vitu ni macawa, mai na gauna sa tekivu musuki kina na sila ena i sele takelo. 10 "Mo ni maroroya na Solevu ni veimacawa kivei Jiova na nomuni Kalou me sala vata na soli ka me vaka sa yalomuni kina mai na ligamuni, mo ni na solia me vaka sa vakasaututaki Kemuni kina o Jiova na nomuni Kalou. 11 "Mo ni reki vakalevu tiko ena matai Jiova na nomuni Kalou kei ira na luvemuni tagane kei na yalewa, kei ira na nomuni dau ni veiqaravi tagane kei na yalewa, kei ira na Livai ena nomuni lomanibai, kei ira na vulagi, na sega ni vakatamani kei ira na yada era sa tiko vata kei Kemuni ena vanua sa digitaka na Kalou o Jiova me tiko kina na yacana. 12 "Mo ni kila ka vakananuma ga, ni o ni a tiko vakabobula mai Ijipita, mo ni qarauna kina mo ni maroroya ka qarava nai lesilesi oqo.

Raici Lesu Na Solevu Ni Valevakacevaceva

13 "Mo ni qarava na solevu ni valevakacevaceva me vitu na siga, ni kemuni sa soqona mai na veika mai na vanua ni butu sila kei na veika mai na i vurevure ni waini. 14 "Mo ni rekitaka na solevu oqo kei ira na luvemuni tagane kei na yalewa kei ira na nomuni dauniveiqaravi tagane kei na yalewa, kei ira na Livai na vulagi kei ira sa sega na tamadra kei na yada era sa tiko ena loma ni nomuni bai. 15 "Me vitu na siga mo ni maroroya na solevu tabu oqo ki vua na Kalou o Jiova ena vanua sa digitaka o Koya, baleta ni Kalou o Jiova ena vakasaututaka na nomuni vuata kecega kei na veicakacaka kecega ni ligamuni, mo ni reki dina tiko kina. 16 "Me vakatolu ena dua na yabaki, me ra rairai kece na nomuni tagane ena matai Jiova na nomuni Kalou ena vanua sa digitaka o koya: Ena solevu ni Madrai Sega ni vakaleveni, ena solevu ni Veimacawaena kei na Solevu ni Valevakacevaceva; sa tabu ni dua e lako liga lala mai ena mata ni Kalou. 17 "Me ra solia na tagane yadua me vaka sa rawata o koya, me vaka na veivakasaututaki sa solia vei kemuni o Jiova na nomuni Kalou. Me Soli Na Lewa Ni Cakacaka Vakadodonu 18 "Mo ni digitaka na daunilewa kei ira mera cakacaka vata ena nomuni matamata kece, sa solia vei kemuni o Jiova na nomuni Kalou, me vaka na nomuni dui yavusa ka me ra lewa vei ira na tamata ena lewa dodonu. 19 "Me kua ni vakavevei na lewa, me kua na veitovaki, se me caka tiko na veivakaqumi, na veivakaqumi e vakamatabokotaka na tamata yalomatua, e moica ka vakavevea talega na vosa dina ka dodonu. 20 "Mo ni muria na ka kecega e dina ka dodonu, me rawa ni o ni bula ka taukena na vanua sa solia vei kemuni o Jiova na nomuni Kalou. 21 "Mo ni kua ni tea e dua na vunikau me nomuni, me vaka e dua na kau mei vakarakarakara, volekata nai cabocabo ni soro o ni sa tara vua na Kalou o Jiova me nomuni. 22 "Mo ni kua ni vakaduria e so na duru tabu, me vaka ni sa cata sara na Kalou o Jiova.

Vakarua 17

1 "Mo ni kua ni vakacabora vei Jiova na nomuni Kalou e dua na bulumakau se sipi sa ca tu se sa tauvimate tu, ni sa ka vakasisila sara vei Jiova na nomuni Kalou na veika vakaoqori. 2 "Kevaka sa kune e dua veikemuni ena loma ni nomuni bai sa solia veikemuni o Jiova na nomuni Kalou, e dua na tagane se yalewa sa valavala vakasisila vakalevu ena mata i Jiova na nomuni Kalou ni sa basuka na Nona veiyalayalati, 3 "O koya sa lako me qaravi ira ka lotu vei ira na Kalou tani, se na vula se na matanisiga se dua na ka sa tu mai lomalagi au sa sega ni vakarota, 4 "E sa mai tukuni, ka o ni sa rogoca mo ni qai vakataroga vakavinaka sara, ke vaka sa ka vakaidina ni sa caka na ka vakasisila oqo e Isireli, 5 "Me qai kau mai na tagane se yalewa sa cakava na ka oqo ena matamata ni koro, me qai vakaviriki ena vatu na tamata o ya me mate sara. 6 "O koya sa dodonu sara me mate, me vakamatei sara ni sa tiko nai vakadinadina, me rua se tolu, ia, me kua ni vakamatei kevaka e dua ga nai vakadinadina. 7 "Na ligadra nai vakadinadina me liu sara ga vei koya sa dodonu me vakamatei ka qai muri na ligadra na tamata kecega. Mo ni biuti ira tani na tamata ca mai na kemuni maliwa. 8 "Kevaka sa basika vei kemuni e dua na ka sa dredre mo ni vakatulewa kina, na vakadave dra, na veilewa sa vakatauci oti, se me baleta na veivakatotogitaki, na veika e dauveibataki ena nomuni matamata, mo ni qai tucake ka lako ki na vanua sa digitaka o Jiova na nomuni Kalou, 9 "Mo ni qai lako mai vei ira na bete, na Livai kei ira, era na vakatauca mai na i totogi vakadodonu. 10 "E dodonu mo ni cakava vakakina me vaka na lewa era sa vakatauca ena vanua sa digitaka o Jiova. Mo ni qai cakava vakavinaka me vaka era sa vakatauca vei kemuni. 11 "Me vaka na totogi sa volai ena vunau, o ni sa vakaroti kina, me vaka na lewa sa vakatauci, mo ni cakava ga; mo ni kua ni vuki ki nai matau se ki nai mawi mai nai totogi sa vakatauci vei kemuni. 12 "Na tamata sa cakacaka vakaviavialevu ka sa sega ni via rogoci ira na bete, o ira sa cakacaka ena vuku ni Kalou, se vei ira na daunilewai, me mate na tamata o ya. Mo ni qai kauti ira tani na tamata ca oqori mai Isireli. 13 "Me ra rogoca kece na tamata ka rere ka me kua tale na cakacaka vakaveitalia.

Nai Tuvatuva Me Baleti Ira Na Tui

14 "Ni kemuni sa lako mai ki na vanua sa solia vei kemuni o Jiova na nomuni Kalou ka taukena ka tiko talega kina, o ni qai tukuna, 'Keimami na bulia e dua na tui me vakataki ira na veimatanitu era sa tu oqo.' 15 "Mo ni vakatura vakaidina e dua me tui me vaka e dua sa digitaka o Jiova, e dua ga mai vei ira na tacimuni, mo ni bulia me tui, me kua ni tui e dua na vulagi, o koya sa sega ni tacimu. 16 "Me kua ni dua e dauvakalevutaka ga vakai koya na nona ose, se me dua e kauti ira lesu na tamata ki Ijipita me ra laki vakalevutaki ose mai ni sa tukuna oti vei kemuni o Jiova, 'Ni sa sega ni dodonu mo ni muria tale.' 17 "Sa sega ni dodonu me vakalevutaka vei koya na watina de qai vuki tani na yalona; sa vakatalega kina, me kua ni vakalevutaka vei koya na siliva se koula, de qai vuki tani na yalona. 18 "Ni sa dabe tiko ena i dabedabe vakatui ni nona matanitu, ena qai vola, me nona ga, e dua nai lavelave ni vunau oqo mai na kena sa tiko vei ira na bete kei na Livai. 19 "Me tiko ga vei koya, ka me wilika tiko ena veisiga kece sa bula kina, me rawa ni vulica kina me rerevaka na Kalou o Jiova ka muria na vosa kece ni vunau kei nai lesilesi, 20 "Me kua ni viavialevu kina na yalona mai vei ira na tacina, me kua ni vuki tani mai nai vakaro kece, se ki nai matau se ki nai mawi, me rawa ni balavu kina na nona bula ena nona matanitu, o koya kei ira na luvena ena kedra maliwa na Isireli.

Vakarua 18

Na Nodra I Votavota Na Bete Kei Na Livai

1 "O ira na bete kei ira na Livai, io, o ira na kawa vaka Livai, sa sega na nodra i votavota se na nodra tikina vata kei ira na Isireli; me ra na kania nai madrali sa vakacabori vei Jiova ena bukawaqa kei nai votavota i Jiova. 2 "Sa sega na nodra tikina vei ira na tacidra, o Jiova ga sa nodra tikina ka nodra i votavota, me vaka sa tukuna vei ira o Koya. 3 "Oqo na nodra i votavota na bete mai vei ira na tamata ena nodra vakacabora nai soro, se bulumakau, se sipi, me ra solia na tabana, na babana kei na ketena. 4 "Nai sevu ni nomuni veiteitei kei nai sevu ni nomuni waini kei nai sevu ni waiwai, mo ni solia vei koya nai sevu ni sipi me soli vei koya. 5 "O Jiova na nomuni Kalou sa digitaki koya mai vei ira kece na nomuni yavusa me tucake tu, ka veiqaravi ena yaca i Jiova o koya kei ira na luvena me sega ni mudu. 6 "Kevaka e dua na livai sa lako mai ki vei kemuni, ena nona lako tiko mai vei ira na Isireli, ka sa lako tiko mai ena yalona dina ki na vanua sa digitaka o Jiova, 7 "Me qai veiqaravi, o koya ena yaca i Jiova na nona Kalou, me vaka era sa dau vakayacora na tacina o ira na Livai, o ira sa dau tu ena mata ni Kalou o Jiova. 8 "Me vakatautauvata na kedra i votavota ni ra kana me kuria nai sau ni vei ka era sa dau votai kina.

Me Qarauni Na Veitovo E Ca

9 "Ni o ni sa lako mai ki na vanua sa solia vei kemuni o Jiova na nomuni Kalou, mo ni kua ni muria se vulica me muria na nodra i valavala na veimatanitu oqo. 10 "Me kua ni kune ena kemuni maliwa e dua na luvemuni tagane se yalewa me lako curuma na bukawaqa, se me dua e dauvakatevoro, se dua e muria na parofita vakailasu, se daumuri ira na daurairai, se o ira na daucakaisausau, 11 "Se dua sa muri ira na daulawaki, se dua sa lako vua na daucurumi, se dua sa muria na dauveinita, se dua sa dau taroga na mate. 12 "O ira kece sa cakava na veika oqo era sa ka vakasisila vei Jiova na Kalou, oqo talega na vuna era sa vakasavi tani kina na veimatanitu oqo mai matamuni mai vua na Kalou o Jiova. 13 "Mo ni sega ni cala ena mata ni Kalou o Jiova. 14 "O ira na veimatanitu oqo era sa dau vakarorogo vei ira na lasulasu, vei ira na viavia vakalou, ia oi kemuni, na Kalou o Jiova sa sega ni digitaka na veika vakaoqo vei kemuni.

Na Parofita Vou Me Vakataki Mosese

15 "Na Kalou o Jiova ena vakatubura e dua na Parofita me vakataki au mai na kemuni maliwa, mai vei ira na tacimuni o Koya oqo mo ni qai vakarogoca, 16 "Me vaka na nomuni gadreva na Kalou o Jiova mai Orepi ena siga ni soqoni levu ka tukuna, 'Me keimami kua tale ni rogoca na domo i Jiova, me kakua talega ni raica na bukawaqa levu oqo, de keimami mate kina.' 17 "Sa qai tukuna vei au o Jiova, 'Sa dina na ka era sa tukuna. 18 'Au na vakatubura e dua na Parofita me vakataki iko ena kemuni maliwa, Au na biuta na Noqu Vosa e Gusuna, ena tukuna o Koya vei kemuni, na veika kece Au sa vakarota vua. 19 'Ena yaco o koya sa sega ni via rogoca na Noqu vosa sa lako mai Gusuna ena Yacaqu, Au na taroga mai vua. 20 'Na parofita sa nanuma ni vosa tiko ena Yacaqu, o koya Au sa sega ni vakarota me cavuta, se sa vosa tiko ena vukudra e so tale na Kalou, ena mate vakaidina na parofita o ya.' 21 "Kevaka o ni sa tukuna e lomamuni, 'Keimami na kila vaka cava ni sa sega ni vosa vei keimami o Jiova?' — 22 "Kevaka sa vosa e dua na parofita ena yaca i Jiova, ia sa qai sega ni yaco na veika e tukuna – sa sega ni vosa i Jiova oqori. Sa vosa ga vakaveitalia na tamata oqori ka mo ni kua ni rerevaki koya.

Vakarua 19

Na Koro Ni Drodro E Tolu

1 "Ni sa tamusuka na Kalou o Jiova na veimatanitu, na nodra vanua ena soli vei kemuni, o ni na vakasesei ira ka tiko ena nodra veikoro ena nodra veivale, 2 "Mo ni vakatikitikitaka e tolu na koro vei kemuni ena nomuni vanua o koya sa solia veikemuni na Kalou o Jiova mo ni taukena. 3 "Mo ni vakarautaka na kena gaunisala, ka wasea vakatolu na tikina ena nomuni vanua o koya sa solia veikemuni o Jiova na nomuni Kalou mo ni taukena, o koya sa vakamatea e dua na tamata me dro kina. 4 "Na tamata laba oqo, ena bula kevaka sa veivakamatei ni a sega ni nakita, ni a sega ni cata na wekana oqo e liu. 5 "Me vaka sa lako yani ki veikau e dua na tamata kei na wekana me ta kau, ka sa taura e ligana nai matau me taya na vunikau, qai cadruti mai ligana nai matau qai taya na wekana, ka mani mate saraOni sa dro ki na dua na koro ni drodro oqo, ena bula; 6 "De qai yaco na veisausaumi ena dra ni se tiko na cudru katakata ena vuku ni mate kei na gaunisala talega ni sa rui yawa, sa tobo ka vakamatei na tamata o ya, e dina ga ni a sega ni nakita na nona veivakamatei. 7 "O ni sa vakaroti kina oqo, 'Mo ni wasea e tolu na koro ni drodro vei kemuni.' 8 "Kevaka sa vakalevutaka o Jiova na nomuni Kalou na nomuni yasana, me vaka sa bubuluitaka vei ira na qase, ka solia vei kemuni na vanua sa yalataka me solia vei ira na nomuni qase, 9 "Kevaka o ni sa muria na i vakaro kece ni Kalou ka cakava, me vaka au sa vakarota vei kemuni ena siga oqo, o ya mo ni lomani Jiova na nomuni Kalou, ka lako tikoga ena nona sala, mo ni qai vakuria tale ena tolu na koro ni drodro me kuria na tolu sa tiko rawa, 10 "De na qai vakadavea tikoga na dra sega cala ena vanua sa solia vei Kemuni o Jiova na nomuni Kalou me nomuni votavota ka me beitaki tiko ga vei kemuni na vakadave dra. 11 "Ia, kevaka ga e dua sa cata sara na wekana, ka sa toka vuni me vakamatei koya, ni sa mate oti, qai dro kina dua na koro oqo, 12 "O ira na qase ni koro o ya, me ra qai kauti koya mai kea ka soli koya ki vei ira na wekana o koya sa mate, me vakamatei kina. 13 "Me kua ni vakaloloku na matamuni, mo ni kauta tani e Isireli na yalo sa beitaki ni vakadave dra, me rawa ni vinaka kina vei kemuni.

Nai Yalayala Ni Vanua E Taukeni

14 "Mo ni kua ni tosoya nai yalayala ni vanua o koya era sa biuta tu na qase ena nomuni votavota o koya o ni na taukena ena vanua sa solia o Jiova na nomuni Kalou.

Nai Vunau Me Baleta Nai Vakadinadina

15 "E dua nai vakadinadina me kua ni tucake me beitaka e dua na tamata ena vuku ni caka cala se i valavala ca sa cakava, me rua se tolu nai vakadinadina me vakadeitaka na veibeitaki. 16 "Kevaka sa tucake e dua nai vakadinadina lasu me vakadinadinataka e dua na caka cala, 17 "Me rau qai tucake ruarua e na mata ni Kalou na lewe rua oqo, ena mata ni bete kei na turaga ni lewa talega, o ira sa veiqaravi ena gauna o ya. 18 "Na turaganilewa me cakava e dua na vakatataro vakatotolo, kevaka sa lasu nai vakadinadina, o koya sa solia tiko nai vakadinadina lasu vua na tacina. 19 "Me qai caka vua me vaka sa vinakata o koya me cakava vei tacina, mo ni qai biuta tani kina na tamata ca mai veikemuni. 20 "O ira sa vo tiko me ra rogoca ka rere, me kua tale kina ni dua e cakava na ka ca ena kemuni maliwa. 21 "Me kua ni rai vakalomalomana tiko na matamuni, na bula ki na bula ga, na mata kina mata ga, na bati ki na bati, na liga ki na liga kei na yava ki na yava.

Vakarua 20

Nai Tuvatuva Ni Kena Raici Na I Valu

1 "Ni o ni sa lako me vala kei ira na kemuni meca, ka o ni sa raica ni ra sa lewe levu na nodra ose, na nodra kareti kei ira na kena tamata mai vei kemuni, mo ni kua ni rerevaki ira, ni sa tiko vata kei kemuni o Jiova na nomuni Kalou, o koya sa kauti kemuni cake mai na vanua o Ijipita. 2 "Ni sa yaco me sa voleka mai nai valu me lako mai na bete ka vosa vei ira na tamata, 3 "Me na qai vosa vei ira ka vaka: 'Mo ni rogoca na Isireli, ena siga oqo, sa voleka nai valu kei ira na kemuni meca, mo ni kua ni yalo lailai, mo ni kua ni rere mo ni kua ni sautanini se vakarerei ena vukudra; 4 'Ni sa Kalou o Jiova na nomuni Kalou o Koya sa lako vata tiko kei kemuni, me valuti ira na meca ena vukumuni, me vakabulai kemuni.' 5 "Me ra qai vosa na turaga vei ira na tamata ka vaka: 'O cei sa tiko oqori sa tara e dua na vale vou ka sa sega ni vakacabora vua na Kalou? Me lako o koya ka lesu tale ki nona vale, de qai mai mate ena i valu oqo ka dua tale na tamata e la'ki vakacabora na vale. 6 'O cei talega sa tiko oqori sa tea oti e dua na were ni vaini ka se sega ni kania na vuana? Me lesu tale o koya oqo, de qai lako ki nai valu ka mate me qai dua tale e kania na vaini. 7 'O cei talega sa tiko oqori, sa vosaka oti e dua na goneyalewa ka e se bera ga ni rau vakawati? Me lako o koya ka lesu ki vale, de qai mate e nai valu ka qai dua tale na tagane e veiwatini kei na goneyalewa o ya.' 8 "Me ra qai vosa tale na turaga vei ira na tamata ka vaka: 'O cei sa tiko oqori vei kemuni e sa tamata rerere ka yalolailai, me lesu tale o koya ki na nona vale de qai kabiti ira na kena vo na rere kei na yalolailai.' 9 "Ni ra sa vosa oti na turaga vei ira na tamata, me ra qai digitaka e so nai liuliu me veiliutaki ena i valu. 10 "Ni kemuni sa lako voleka ena dua na koro mo ni valuta, ka sa yaco mai na veiyalayalati ni veivakasaututaki. 11 "Me yaco me vaka na nomuni lewa ni veivakasaututaki, me dolavi vei kemuni, o ira kecega na tamata era sa kune ni ra tiko kina me ra sauma tiko nai vakacavacava vei kemuni ka qaravi kemuni. 12 "Kevaka sa bese na koro oqo me cakava na eisaututaki ka sa vinakata ga nai valu vata kei kemuni, mo ni sa tuva nai valu vei ira. 13 "Ni sa soli ira o Jiova na nomuni Kalou ki na ligamuni, mo ni qai vakamatei ira kece na tagane ena i seleiwau. 14 "O ira na yalewa, na lalai, na manumanu kece kei ira kece sa tiko ena koro kei nai toki ni valu kece mo ni taura vakaukauwa me nomuni mo ni kania talega na veika sa nodra na meca me vaka sa solia vei kemuni o Jiova na Kalou. 15 "Mo ni cakava kece vaka oqo ki vei ira kece na veikorokoro era sa tiko vakayawa mai veikemuni, ka era sa sega ni veikoro ni matanitu kece oqo. 16 "Ia, na veikoro kece ni veimatanitu sa solia vei kemuni o Jiova me nomuni votavota, mo ni kua ni vakavoca e dua na ka sa vakaicegu me bula tiko, 17 "Mo ni vakarusai ira kece: na Ilaiti, na Amoraiti, na Kenanaiti, na Itaiti kei ira na Jepusaiti, me vaka ga sa vakaroti kemuni kina o Jiova na nomuni Kalou, 18 "De ra qai vakavulici kemuni me vaka ga na nodra daucakacaka vakasisila era sa dau cakava vua na nodra Kalou, mo ni na valavala ca kina vua na Kalou o Jiova. 19 "Ni o ni sa tuva i valu ena vuku ni dua na koro, ka valuta tiko me nomuni, mo ni kua ni vakamatea na kena veikau kei na vunikau, me kua ni vakayagataki na i matau, ni kemuni sa kana tiko mai kina, mo ni kua ni musuka, ni ra sa yaga vei ira na tamata na veivunikau ni vanua. 20 "Na veivunikau ga sa sega ni kakana, mo ni qai taya laivi ka vakarusa ka vakayagataka me tara kina nai sasabai vei koya na koro sa via vala vata kei kemuni me yacova ni sa vakamalumalumutaka.

Vakarua 21

Nai Vunau Me Baleta Na Laba E Sega Ni Vakadinadinataki

1 "Kevaka sa kune e dua sa davo matemate tu ena dua na vanua sa solia vei kemuni o Jiova mo ni taukena, ka sa sega ni kilai se mate vakacava, 2 "O ira na nomuni qase kei ira na nomuni turaganilewa, me ra lako yani ka vakarautaka na kena balavu mai na koro voleka ki na vanua sa kune kina na mate. 3 "O ira kece na qase ena koro sa voleka duadua ki na yago ni mate, me ra taura mai e dua na bulumakau gone sara e se bera ni vakacakacakataki, se me sa colata nai vua e domona. 4 "Me ra qai kauta mai na bulumakau oqo o ira na qase ni koro ki na dua na buca sa drodro vinaka kina na wai ka se bera talega ni siviyarataki se tei, me ra qai musuka na domo ni bulumakau gone oqo ena buca o ya. 5 "O ira na bete kei ira na luvei Livai me ra qai lako voleka mai, ni sa digitaki ira na Kalou me ra cakava na cakacaka ni veiqaravi Vua, ka veivakalouvinakataki ena yaca i Jiova, ena nodra vosa, na veibeitaki se dredre kece se veivala kece, sa na vakaoti kina. 6 "O ira kece na qase ena koro sa voleka ki na vanua ni mate me savata na ligadra ena dela ni bulumakau gone sa musuki oti na domona ena buca. 7 "Me ra qai vosa ka vaka: 'Na ligai keimami sa sega ni vakadavea na dra oqo, se sa raica na matai keimami. 8 'Mo ni vakarautaka na veisorosorovi, i Jiova me baleti ira na Nomuni tamata na Isireli, o ira o ni sa volia, mo ni kua ni vakatara na dra sega cala oqo vei ira na Isireli na Nomuni tamata.' E dua nai soro ni veibuluti oqo sa caka tiko ena vukudra, ena vuku ni dra sa vakadavei oti. 9 "Mo ni biuta tani kina na yalo beitaki ena vuku ni dra sega cala o ya mai vei kemuni, ni o ni sa cakava na veika e dodonu ena mata i Jiova.

O Ira Na Yalewa Kaivesu Vakaivalu

10 "Ni kemuni sa lako ka ia nai valu kei ira na meca, ka sa soli ira ki na ligamuni o Jiova na nomuni Kalou, ka era sa nomuni kaivesu, 11 "Ka o sa raica mai vei ira na vesu e dua na yalewa rairai vinaka, ka o sa gadrevi koya ka vinakata me sa watimu, 12 "Mo qai kauti koya mai ki na nomu vale, me qai tasi na uluna ka kotiva nai taukuku ni ligana. 13 "Me qai kau laivi nai sulu ni kaivesu, me qai vakalolokutaki tamana kei tinana me dua na vula; ni oti o ya mo qai moceri koya ka mo sa watina tagane ka me watimu yalewa o koya. 14 "Kevaka o sa mani sega ni taleitaki koya, mo qai sereki koya, mo kua ni volitaki koya ena i lavo; mo kakua ni cakacaka vakaca vei koya, baleta ni o sa vakamalumalumitaki koya.

Na Nona Dodonu Na Ulumatua

15 "Kevaka e dua na tagane sa rua na watina, e dua sa lomani vakalevu ka dua e lomani vakalailai, ka e rau sa vakaluveni ruarua vei koya, kevaka sa sucu na ulumatua mai vua sa lomani vakalailai, 16 "Ni sa yaco na gauna me sa wasei kina nai votavota vei ira na luvena tagane, me kua ni soli nai votavota ni ulumatua vua na luvei na watina sa rui lomana vakalevu. 17 "Me soli ga vua na luvena ulumatua dina mai vua na watina sa lomana ga vakalailai ni sa soli vua e rua nai votavota ena veika kece sa taukena, ni sai koya ga nai tekitekivu ni nona kaukauwa; na dodonu ni ulumatua sa nona ga.

Na Gone Talaidredre

18 "Kevaka e dua na tamata sa dua tiko na luvena e dautalaidredre ka dau vakadrecike. O koya sa dau bese ni rogoca na vosa i tamana, se na domo i tinana, o koya ni sa vunauci qai bese ga ni vakarorogo vei rau, 19 "Me rau qai tauri koya na tamana kei na tinana ka kauti koya mai vei ira na qase ni koro, ena matamata ni koro. 20 "Me rau qai tukuna vei ira na qase ena koro, 'Oqo na luvei keirau sa dau talaidredre ka vakadrecike, sa bese ni via vakarogoca na domo i keirau, sa gone daukana ka daumateni.' 21 "O ira na qase kece ena koro, me ra qai vakaviriki o ya ena vatu me mate sara. Mo ni qai biuta tani kina na tamata ca mai veikemuni, me ra rogoca kece na Isireli ka rere.

Nai Vunau Tale Eso

22 "Kevaka sai valavala ca e dua na tamata e dodonu me vakamatei kina, ka sa vakamatei, ni kemuni sa vakaliligi koya ki na vunikau, 23 "Me kua ni dua na bogi taucoko ena nona lili tu ena vunikau, mo ni buluti koya ga ena siga tikoga o ya, mo ni kua kina ni vakadukadukalitaka na vanua sa solia vei kemuni o Jiova na nomuni Kalou me nomuni votavota; ni o koya sa vakaliligi sa vakaloucataki mai vua na Kalou.

Vakarua 22

1 "Ni kemuni sa raica na nona bulumakau kei na nona sipi na tacimuni ni sa lako sese tiko, ka o ni qai via sega ni kila, mo ni kila ni dodonu mo ni kauta lesu mai vua. 2 "Kevaka sa sega ni tiko voleka veikemuni o tacimuni, se o ni sa sega beka ni kilai koya, mo ni qai kauta mai ki na nomuni vale me tiko ga vei kemuni me yacova ni sa vakasaqara mai o tacimuni, mo ni qai solia lesu vua. 3 "Me vaka talega kina na nona Asa kei na nona i sulu talega. Na veika kecega i tacimuni sa yali, ka o ni sa kunea, mo ni qai vakasuka vua ka kakua ni vunitaka. 4 "Kevaka sa lutu na nona Asa se bulumakau ena sala, ka o ni qai vunitaki kemuni, e dodonu mo ni vukei koya ena kena vakagalalataki. 5 "Sa tabu vua na yalewa me daramaka e dua na ka e vakatakilakilataka na tagane, se me dua na tagane me daramaka e dua nai sulu e vakatakilakilataki ki na na yalewa, o ira kece sa cakava oqo, era sa cakacaka vakasisila vua na Kalou o Jiova. 6 "Kevaka o ni sa mani sotava e dua na sova ni manumanu vuka ena sala, ni sa toka ena vunikau se ena dela ni qele, ka sa sega tiko na yaloka se luvena, ka sa dabe toka e delana na tinana, mo ni kakua ni taura ruarua na tinana kei na luvena; 7 "Mo ni laiva na tinana me lako, ka kauta ga na luvena, me vinaka kina vei kemuni, ka me balavu talega kina na Nomuni bula. 8 "Ni kemuni sa tara e dua na vale vou, mo ni qai cakava nai cavacava tatarovi ena dela ni vale mo ni kua ni beitaki kina ena vakadave dra kevaka e dua sa lutu mai dela ni vale. 9 "Mo ni kua ni cavuraka na nomuni sore ni vaini vata kei soreni kau tale eso, de ra na qai vakacacani na vua ni nomuni vaini. 10 "Mo ni kua ni vakayagataka na siviyara ni rau sa vesu me cakacaka vata e dua na bulumakau kei na dua na asa. 11 "Mo ni kua ni daramaka nai sulu e duidui na kena mataqali, me vaka ni veiwaki na vutinisipi kei na lineni. 12 "Mo ni bukia na tutu ni sulu vava, o ni sa dau ubi kemuni kina.

Nai Vunau Me Baleta Na Veiyacovi

13 "Kevaka e dua na tagane sa taura e dua na yalewa, ka rau sa tiko vata sara ka sa qai cati koya tale. 14 "Ka sa qai beitaka na goneyalewa e nai valavala vakamadua ka vakarogorogocataka na yacana ka tukuna tiko, 'Au sa taura na yalewa oqo, ka keirau sa tiko vata, au sa qai kunea ni sa vakacacani oti tu o koya,' 15 "Oi rau na tamana kei tinana na goneyalewa oqo, e rau sa kauta mai nai vakadinadina ni lasu na veibeitaki o ya vei ira na qase e na matamata ni koro. 16 "Sa vosa vei ira na qase o tama ni goneyalewa ka vaka, au sa solia na luvequ goneyalewa oqo vua na tagane oqo me watina, ia oqo sa qai cati koya ni sa mocera oti. 17 'Oqo sa beitaki na goneyalewa oqo ena i valavala e veimaduataki ka tukuna, "Au sa kunea na luvemu goneyalewa oqo ni sa veikilai oti kei na tagane." Oqo nai vakadinadina ni lasu na tagane na luvequ goneyalewa oqo.' E rau sa qai tevuka nai sulu mei vakadinadina vei ira na qase ni koro. 18 "O ira na qase ni koro o ya, me ra qai kauta na tagane o ya, ka totogitaka; 19 "Me ra totogitaka ena nona sauma e dua na drau na dola vua na tama ni goneyalewa, baleta ni sa vakarogorogocataka e dua na goneyalewa dina ni Isireli. Me taura talega me watina ni nona bula taucoko ka tabu ni solia vua nai vola ni veibiu se veisere. 20 "Kevaka sa dina, ni sa sega ni kune vua na goneyalewa nai vakatakilakila ni se tabu tagane dina, 21 "Me ra qai kauta mai na goneyalewa ki na matanikatuba nei tamana, ka me ra vakaviriki o ya ena vatu o ira na tagane ni koro o ya me mate, baleta ni sa cakava na goneyalewa oqo e dua na ka vakamadua levu e Isireli. Me sa dautagane tiko ena loma ni vale nei tamana, mo ni qai biuta laivi kina na tamata ca mai vei kemuni. 22 "Kevaka sa kune ni dua na tagane ni rau sa veimoceri tiko kei na dua na yalewa vakawati, me rau qai vakamatei ruaruaOo koya na tagane sa mocera na yalewa kei na yalewa sa moceri; me kautani kina na ka ca e Isireli. 23 "Kevaka sa vosaki oti e dua na goneyalewa mai vua e dua na tagane, qai dua tale na tagane e raici koya ena koro ka moceri koya, 24 "Mo ni qai kauti rau tani mai na koro ki na matamata ni koro, mo ni qai vakaviriki rau ena vatu me rau mate sara, na goneyalewa baleta ni sega ni kaila se tagi me kilai e nakoro, na tagane baleta ni vakamalumalumutaka na watina e dua tale na tagane; oqo mo ni qai biuta tani kina na tamata ca vaka oqo mai vei kemuni. 25 "Ia, kevaka ga sa kunea na goneyalewa sa vosaki oti vaka oqo, mai na taudaku ni koro, ka qai vakaukauwataka na goneyalewa ka curumi koya, na tagane duadua ga me vakamatei. 26 "Mo ni kua ni cakava vua na goneyalewa e dua na ka, ni sa sega na ka e tiko vua me beitaki kina me vakamatei, me vaka e dua sa tucake ka vakamatea na tacina, sa vaka kina na tikina oqo. 27 "Ni sa kunei koya na goneyalewa sa qai vosaki tiko mai na taudaku ni koro ka vakaukauwataki koya, sa tagi ka kaila na goneyalewa, ia, sa sega ni dua e raica se rogoca me vakabulai koya. 28 "Kevaka e dua na tagane sa kunea e dua na goneyalewa sa sega ni kila na tagane ka se sega talega ni vosaki, ka sa taura na yalewa o moceri koya ka era sa kila na tamata, 29 "Na tagane sa mocera na goneyalewa oqo me solia vei tama ni yalewa e limasagavulu na dola, ka me qai tauri koya me watina baleta ni sa vakamalumalumutaki koya, ka sa tabu talega ni solia vua nai vola ni veibiu se veisereki ena nona gauna taucoko ni bula. 30 "Sa tabu ni dua na tagane me taura na wati tamana se cega nai davodavo nei tamana.

Vakarua 23

O Ira E Dodonu Me Ra Kautani Mai Nai Soqosoqo Levu

1 "O koya sa sega ni bula na yagona vakatagane ni sa vakalewai vaka ca sara me kua ni tiko e nai soqosoqo levu i Jiova. 2 "Me ra kua talega ni curu mai ki nai soqosoqo i Jiova o ira na luve ni veibutakoci, me yacova nai ka tini ni taba tamata, sa tabu sara ni dua na nona kawa me curu ki nai soqosoqo levu i Jiova. 3 "Me kua ni dua na Amoraiti se Moapaiti me curu mai ki nai soqosoqo levu i Jiova me yacova nai katini ni tabatamata, sa tabu ni dua na nodrau kawa me curu mai ki nai soqosoqo levu i Jiova me sega ni mudu, 4 "Baleta ni ra sa sega ni via sotavi kemuni ena madrai kei na wai ena sala ena nomuni lako tani tiko mai Ijipita, baleta talega ena noda saumi Pelami na luvei Piori mai Mesopotamia me vakaloucataki kemuni. 5 "Na Kalou o Jiova sa sega dina ni via rogoci Pelami, ia, na Kalou o Jiova sa veisautaka na kalouca ki na kalouvinaka vei kemuni baleta ni sa rui lomani kemuni. 6 "Mo ni kua ni goleva na nodra vakacegu se na nodra tiko vinaka ena nomuni bula taucoko. 7 "Mo ni kua ni besetaka e dua na kai Itomi, ni sa tacimuni dina, Mo ni kua ni besetaka talega e dua na kai Ijipita baleta ni o ni a tiko vulagi mai kina. 8 "O ira na luvedra ena i katolu ni taba tamata sa tara vei ira mera curu ki na i soqosoqo ni Kalou.

Na Vakasavasavataki Ni Nodra i Tikotiko

9 "Kevaka era sa lako yani na nomuni mataivalu me sota kei ira na meca, mo ni qai maroroi kemuni mai na ka kecega e vakasisila. 10 "Kevaka sa dua na tagane ena kemuni maliwa sa yaco me dukadukali ena veika sa dauyaco ena bogi, me lako ena taudaku ni nomuni tikotiko; me kua tale ni curu mai ena nomuni tikotiko. 11 "Me yaco, ni sa qai karobo mai, me qai vakasavasavataki koya ena wai, ni sa dromu na matanisiga, me qai lako mai ki na loma ni tikotiko. 12 "Me tiko talega e dua nai tikotiko ena taudaku ni nomuni tikotiko, mo ni dau lako kina; 13 "Me tiko talega e dua nai sivi lailai vata kei na nomuni yaya ni cakacaka,n i veigauna kece mo ni lako kina ka lolo e tautuba, mo ni qai kelia ka buluta tale ena gauna o ni sa benu oti kina. 14 "Ni sa veilakoyaki voli o Jiova ena nomuni tikotiko me vakabulai kemuni ka soli ira na kemuni meca vei kemuni, o koya oqo me savasava ka tabu na nomuni i tikotiko, me kua ni raica kina o Koya e dua na ka dukaduka ena kemuni maliwa, de qai vuki tani o koya mai vei kemuni.

Na Kena Vo Ni Veivunau

15 "Mo ni kakua ni vakalesui ira lesu tale na bobula era sa dro mai vei ira na nodra turaga ki vei kemuni. 16 "Me tiko o koya ena kemuni maliwa, ena vanua sa vinaka vua, mo ni kakua ni vakaocai koya. 17 "Sa tabu me vakacabori e dua me dautagane vei ira na goneyalewa ni Isireli, se me dua na gonetagane ni Isireli me sa vakacacani. 18 "Mo ni kua ni kauta mai ki na vale i Jiova na nomuni Kalou, e dua nai lavo, sai sau ni dua na dautagane se na kena i sau e dua na koli, me i soro ni yalayala, ni rau sa ka vakasisila ruarua ena na mata ni Kalou o Jiova. 19 "Mo ni kakua ni lavaka na tubu vua e dua na tacimuni, na tubu ni i lavo— se kakana, se dua ga na ka o ni sa dau solia yani vakadinau ka me vakatubu lesu mai. 20 "Ki vua e dua na kai tani, e dodonu mo ni lavaka vua na tubu. Ia ki vei ira na tacimuni, sa tabu ni lavalaki na tubu vei ira, me vakalouvinakataki kemuni kina o Jiova na nomuni Kalou ena veika kecega sa tara na ligamuni ena vanua o ni sa lako tiko kina me taukena. 21 "Ni kemuni sa bubului vei Jiova na nomuni Kalou, me kua ni bera na nomuni sauma, ni sa gadreva dina mai veikemuni o Jiova, kevaka sa sega, sai valavala ca oqori. 22 "Kevaka o ni sa sega ni yalataka e dua na ka, sa sega ni valavala ca oqori. 23 "Na veika kece sa lako mai na gusumuni mo ni maroroya ka vakayacora, ni kemuni sa yalayala vakadodonu vei Jiova na Nomuni Kalou ena vei ka o ni sa cavuta ena gusumuni. 24 "Ni kemuni sa lako mai kina nona veiwere na wekamuni, mo ni qai kania vakalevu na vaini, me kua ni dua e biuta e dua na ka ki na nona bola. 25 "Ni kemuni sa lako mai ki na nona veisila na wekamuni, mo ni qai tomitomi ga ena ligamuni, me kua ni dua e vakayagataka nai sele takelo ena veisila e se bera ni tamusuki.

Vakarua 24

Nai Vunau Me Baleta Na Veisere

1 "Ni sa taura e dua na yalewa e dua na tagane me watina ka sa vakamautaka, ka sa qai yaco tale me sega ni taleitaki koya, baleta ni sa raica e so na ka dukadukali mai vua, ka sa vola e dua nai vola ni veisere vua na yalewa, sa biuta sara e ligana ka vakatalai koya tani mai vale, 2 "Ni sa lako tani mai vale o koya, ka sa lako me la'ki watina tale e dua na tagane, 3 "Kevaka sa sega ni taleitaki koya, o koya nai karua ni watina ka sa solia vua nai vola ni veisere ki na ligana ka vakatala tani mai vale, se, kevaka sa mani mate nai karua ni watina, o koya e a kauti koya mai, 4 "O koya na matai ni watina sa tabu ni tauri koya tale, baleta ni sa vakacacani koya oti, oqo e dua na ka tabu ena mata i Jiova, mo ni kua gona kina ni kauta mai nai valavala ca ena vanua sa solia vei kemuni o Jiova na nomuni Kalou me nomuni votavota.

Na Veivunau Tale Eso

5 "Ni sa taura e dua na yalewa e dua na tagane me watina, sa tabu sara me lako ki nai valu, se me soli tale vua e dua na ka me cakava, me vakagalalataki o koya me dua na yabaki, ka me tiko mada ga e vale me vakamarautaka tiko kina na watina ena veisiga. 6 "Sa tabu ni dua e taura na vatu ni qaqi sila me veiyalayalati kina, ni vatu oqori sa nona bula na kena i taukei. 7 "Kevaka sa kune ni dua e taura vakavesu e dua vei ira na tacina na Isireli, qai cakacaka vakaca vua se volitaki koya, me vakamatei na tamata o ya, mo ni qai kauta tani na ka ca o ya ena kemuni maliwa. 8 "Mo ni qarauna na tete ni vukavuka, mo ni qarauna mo ni vakamuria kece ka cakava na veika kecega era sa vakavuvulitaka na bete kei na Livai, me vaka Au sa vakarota vei ira, mo ni qarauna, mo ni muria. 9 "Mo ni nanuma na veika e cakava na Kalou vei Miriama ena sala ena nomuni lako tani tiko mai Ijipita! 10 "Ni kemuni sa solia tiko vei tacimuni e dua na ka, mo ni kua ni lako ki na nona vale me solia mai vei kemuni e dua na yalayala. 11 "Kevaka o ni sa tucake tu e tuba, ka sa lako mai na tamata o ni a soli ka vua, me kauta mai na ka sa yalayala kina vei kemuni. 12 "Kevaka sa dravudravua na tamata o ya, me kua ni tiko vakadede vei kemuni na ka sa yalataka. 13 "Me vakasukai tale vei koya na ka sa yalataka ni se bera ni dromu na matanisiga me moce vata kei na nonai sulu ka vosa vinakataki kemuni, ka ena dodonu kina vei kemuni ena mata ni Kalou o Jiova. 14 "Mo ni kua ni vakaicolacolataki koya e dua na bobula sa voli ni sa dravudravua ka vakaloloma, se sa tacimuni se vulagi sa tiko ena vanua ena loma ni nomuni bai. 15 "Ena veisiga kece, mo ni solia vua na kena i sau, ka me sa soli vua ni bera ni dromu na matanisiga, ni sa dravudravua o koya ka sa vakanamata tuga ki na kena i sau, de qai tagi vua na Kalou o koya, qai wili veikemuni mei valavala ca. 16 "Sa tabu ni vakamatei na tama ena vuku ni luvedra, se o ira na gone ena vuku ni tamadra, ni sa dodonu me mate ga na tamata ena vuku ni nona i valavala ca. 17 "Mo ni kua ni vakatanitaka na lewa ena vukudra na vulagi kei ira na luve ni yali, se mo ni taura na nona i sulu na yada me ia kina na veiyalayalati. 18 "Mo ni nanuma ga ni o ni a bobula tu mai Ijipita, ka qai voli kemuni mai kea na Kalou o Jiova, o ni sa vakaroti kina mo ni cakava oqo. 19 "Ni kemuni sa tamusuka na nomuni were ka guilecava e dua nai binibini mai kea, mo ni kua ni lesuva tale, me sa tu ga me kedra na luveniyali, na yada kei ira na vulagi, me vakasaututaka kina o Jiova na cakacaka kecega ni ligamuni. 20 "Ni kemuni sa tauca na nomuni vei olive, mo ni qai biuta tu na kena vo, me kedra na vulagi, na luveniyali kei ira na yada. 21 "Ni kemuni sa kumuna na nomuni vaini mai na kena were, mo ni kua ni kauta kece, na kena vo me medra na vulagi, na luveniyali kei ira na yada. 22 "Mo ni nanuma ga, ni kemuni a bobula tu mai na vanua o Ijipita; o koya oqo Au sa vakaroti kemuni kina mo ni cakava oqo.

Vakarua 25

1 "Kevaka sa kune e dua na duidui ena kemuni maliwa, ka sa yaco sara ki na mataveilewai, sa rawa ni vakatulewa na turaganilewa, me vaka donui na dodonu ka me vakacalai na cala, 2 "Me sa yaco, kevaka sa dodonu me kuitataki na cala, na turaganilewa me sa lewa me vakadavori na cala ka me kuitataki e matai turaganilewa me vaka na nona beitaki, me vakatau ki nai wiliwili ni kuita. 3 "Sa rauta me kuita vakavasagavulu, ka me kua tale ni sivia, de qai sivia tale, qai yaco me vakamalumalumutaki vaka ca sara e matamuni. 4 "Mo ni kua ni vauca na bulumakau ni sa butu sila tiko.

Nai Vakarau Ni Bula Vakawati Vei Koya Na Tacina Tagane Sa Vo

5 "Kevaka era sa tiko vata na veitacini, ka sa mate e dua vei ira, qai sega tu na luvena tagane, me kua tale ni vakawati ena taudaku ni vuvale na yalewa sa mate o watina, Me lako vua e dua na taci watina ka kauta me watina, ka vakayacora vua na veika e dodonu me cakava o tacina sa mate. 6 "Nai matai ni luvedrau tagane me sa taura ka tosoya na veika e nona o koya na tamana sa mate oti, me kua kina ni bokoci na yacana e Isireli. 7 "Kevaka sa bese na tagane ni taura na wati tacina sa mate, me lako cake na yalewa ena nodra matamata na qase ka tukuna, 'O taci watiqu sa bese ni cakava na cakacaka e dodonu me cakava o tacina sa mate. Sa bese ni vakatubura na yacai tacina sa mate e Isireli.' 8 "Me ra qai kacivi koya o ira na qase ni koro ka vosa vua, ia kevaka sa dei tikoga vei koya ena nona tukuna, 'Au sa sega ni via taura na yalewa oqo,' 9 "Me qai lako mai o wati tacina vei koya ena matadra na qase, ka kauta tani nai vava mai yavana ka kasivita na matana, ka vosa me vaka: 'Me caka vaka kina vei ira vakayadua ena bese ni susuga cake na vale i tacidra sa mate.' 10 "Me qai kacivaki na yacana e Isireli, 'Na yacai koya sa kautani mai yavana na nona i vava.'

Na Veivunau Tale E So

11 "Kevaka e rau sa veivala e rua na tagane ka sa lako mai na watina e dua me vukea na watina mai vei koya tale ka dua, ni sa dodoka yani na ligana me boboka na yagona vakatagane, 12 "Me kua tale ni lomani o koya, ni sa dodonu me musu laivi na ligana. 13 "Me kua ni dautiko ena nomuni bola na veika e bibi kei na veika e mamada. 14 "Me kua ni tiko ena nomuni vale e dua na ka e duidui na kena bibi me levu se lailai. 15 "Me tiko veikemuni nai vakarau e dodonu ka vinaka taucoko, kei na bibi e dodonu ka taucoko, me rawa ni dede kina nomuni bula ena vanua sa solia vei kemuni o Jiova na nomuni Kalou. 16 "O ira sa cakava na veika oqo, o ira kece sa sega ni dodonu na nodra i valavala era sa ka vakasisila ena mata ni Kalou o Jiova.

Me Ra Vakarusai Na Amalakaiti

17 "Mo ni nanuma na veika era cakava veikemuni na Amalakaiti ena nomuni i lakolako lesu mai Ijipita, 18 "Ena nona sotavi kemuni ena sala ka ra valuti kemuni ena veiyasana kecega ni kemuni sa wawale ka malumalumu sara; ka sa sega ni via rerevaka na Kalou o koya. 19 "O koya oqo ni sa solia veikemuni na vakacegu na Kalou o Jiova mai vei ira kece na meca, ena vanua sa solia vei kemuni na Kalou o Jiova me nomuni votavota ka taukena, mo ni qai nanuma mo ni bokoca laivi na kedra i vakananumi na Amalakaiti ena ruku i lomalagi. Mo ni kua ni guilecava na ka oqo.

Vakarua 26

Na Vakacabori Ni Sevu Kei Nai Katini

1 "Me vakayacori oqo, ni kemuni sa lako mai kina vanua sa solia veikemuni o Jiova na Nomuni Kalou mo ni taukena, o ni sa vakaivotavota kina ka tiko kina, 2 "Ka mo ni na taura e so nai sevu ni nomuni veiwere mai na vanua o ni sa tiko kina ka solia veikemuni na Kalou o Jiova moni taukena ka biuta ena sova ka qai lako ki na vanua sa digitaka o Jiova na nomuni Kalou me tiko kina na Yacana. 3 "Mo ni qai lako vua na bete levu ka tukuna vua, 'au sa yalataka ena siga oqo vua na Kalou o Jiova, ni au sa lako mai ki na vanua sa yalayala kina na Kalou ki vei ira na qase me solia vei keimami.' 4 "Me qai taura na sova o koya na bete mai na ligamuni ka biuta e mata ni cabocabo ni soro nei Jiova na nomuni Kalou. 5 "Mo ni qai sauma ka vaka vei Jiova na nomuni Kalou, 'o tamaqu na kai Siria ka sa vakarau tu me rusa, sa qai lako sobu ki Ijipita ka tiko kina, era lewe vica ga, mai kea a sa yaco me matanitu levu, ka era sa lewe levu sara ka tamata qaqa. 6 'O ira na Ijipita era sa i tovo ca vei keimami era sa vakacacani keimami ka era sa vakabobulataki keimami. 7 'Keimami sa qai tagi vei Jiova na nodra Kalou na neimami qase, o Jiova sa rogoci keimami ka raica na neimami vakararawataki, kei na neimami oca kei na neimami vakalolomataki. 8 'O Jiova sa qai kauti keimami tani mai Ijipita ena ligana kaukauwa, ena nona cakava nai vakatakilakila kei na ka e veivakadrukai. 9 'Sa kauti keimami mai ki na vanua oqo ka solia vei keimami na vanua "na vanua sa drodro kina na sucu kei na oni;" 10 'Oqo, keimami sa kauta mai nai sevu ni vuata ni vanua, o koya, kemuni Jiova, o ni sa solia mai,' mo ni qai biuta ena mata i Jiova na nomuni Kalou ka lotu vua. 11 "E dodonu moni rekitaka na veika kecega sa solia veikemuni o Jiova na nomuni Kalou, ki na nomuni vale, oi kemuni kei ira na livai kei ira na vulagi sa tiko kei kemuni. 12 "Ni kemuni sa biuta vakatikitiki na i katini ni nomuni tubu kecega ena i katolu ni yabaki – na yabaki ni katini – ka solia vei ira na livai, na vulagi, na luveniyali kei ira na yada, me ra kana ena nomuni lomanibai ka mamau, 13 "Mo ni qai tukuna kina vei Jiova na nomuni Kalou, 'keimami sa kauta mai nai katini tabu mai na neimami vale ka keimami sa solia vei ira na livai, na vulagi, na luveniyali, kei ira na yada me vaka na nomuni vakaro kecega o ni sa vakaroti keimami kina, keimami sa sega ni lako sivia se guilecava nai vakaro oqo. 14 'Au sa sega ni kania ena gauna ni vakaloloku se au sa vakayagataka ena dua na ka e dukadukali, se vakayagataka vei ira na na mate, ka au sa cakava ga me vaka sa vakarota vei au o Koya. 15 'Mo ni rai sobu mai ena nomuni tikotiko tabu mai lomalagi, ka vakalouvinakataki ira na nomuni tamata na Isireli kei na vanua o ni sa solia veikeimami, me vaka o ni a bubului kina vei ira na neimami qase, na "vanua sa drodro kina na sucu kei na oni."'

O Ira Na Tamata Vakamareqeti Ni Kalou

16 "Na siga oqo, na Kalou o Jiova sa vakaroti kemuni mo ni muria nai lesilesi kei na lewa; o koya oqo mo ni qarauna mo ni muria ena yalomuni taucoko kei na lomamuni kecega. 17 "Ena siga oqo, o ni sa cavuta, ni o Jiova sa nomuni Kalou, o ni na lako ena Nona sala ka maroroya na Nona i lesilesi, na Nona i vakaro kei na Nona lewa, ka o ni na talairawarawa ki na domona. 18 "Ena siga talega oqo, o Jiova sa vakaraitaka ni sai kemuni na Nona tamata vakamareqeti, me vaka sa yalataka vei kemuni, ni sa dodonu mo ni maroroya kece na Nona i vakaro, 19 "Ka ena vakaturi kemuni cake me siviti ira na matanitu kecega sa bulia o Koya, ena yacana kei na Nona dokai talega, mo ni yaco kina mo ni Nona tamata tabu, kivei Jiova na nomuni Kalou, me vaka sara ga sa cavuta o Koya."

Vakarua 27

Sa Volai Ena Vatu Nai Vunau

1 Oqo, o Mosese kei ira na qase ni Isireli sa vakaroti ira na tamata ka vaka: "Mo ni maroroya kece nai vakaro au sa vakarota vei kemuni e daidai. 2 "Me vakayacori oqo, na siga kemuni sa na takosova kina na uciwai na Joritani ki na vanua sa na solia vei kemuni o Jiova na nomuni Kalou, mo ni binia kina veikemuni na vatu lelevu, ka me ra boro ena wai vulavula (lase). 3 "Mo ni vola kina na vosa kece ni vunau, ni kemuni sa takoso, mo ni curu kina ki na vanua sa solia vei kemuni o Jiova nomuni Kalou, 'Na vanua sa drodro kina na sucu kei na oni,' me vaka ga sa yalataka vei kemuni o Jiova na Kalou ni nomuni qase. 4 "O koya oqo, ni kemuni sa takosova na Joritani, ena ulunivanua o Ipati, mo ni tuvana na vatu kece oqo, au sa vakaroti kemuni kina oqo, ka boroya ena wai vulavula (lase). 5 Mai kea talega mo ni tara kina e dua nai cabocabo ni soro vei Jiova na nomuni Kalou, na cabocabo ni soro e vatu, me kua ni tara nai cabocabo ni soro ena dua nai yaya kaukamea. 6 "Me tara ena vatu taucoko nai cabocabo ni soro nei Jiova na nomuni Kalou ka me vakacabori kina nai soro kama ki vei Jiova na nomuni Kalou. 7 "Mo ni vakacabora na i soro ni veivinakati, ka kana mai nai cabocabo ni soro ka reki tiko ena mata i Jiova na nomuni Kalou. 8 "Mo ni vola vakavinaka ka vakamatailevu ena dela ni vatu na vosa kece ni vunau." 9 O Mosese kei ira na bete kei ira na livai era sa vosa vei ira na Isireli ka vaka: "Mo ni qarauni kemuni ka vakarorogo na Isireli; Ena siga oqo, ka mo ni sa nona tamata na Kalou. 10 "O koya oqo, mo ni vakarorogo ka talairawarawa ki na domo i Jiova na nomuni Kalou ka maroroya na nona i vakaro kei na nona i lesilesi au sa vakarota vei kemuni e daidai."

Mai Na Ulu Ni Vanua o Ipali Sa Cavuti Kina Na Kalouca

11 Sa vakaroti ira na tamata o Mosese ena siga o ya ka vaka, 12 "Oqo sa tucake tu ena ulunivanua o Kerisimi ka vakalouvinakataki ira na tamata ni kemuni sa takosova oti na Joritani: o Simione, o Livai, o Juta, o Isakari, o Joseva kei Penijamini; 13 "Ena ulunivanua o Ipali me rukaka (vakaloucataka) na tamata: o Rupeni, o Kata, Esa, Sevuloni, o Taniela kei Navitalai. 14 "O ira na Livai, me ra vosa vakarogolevu, ka vosa vei ira na kece na tagane e Isireli: 15 'Ena kalouca o koya sa cakava e dua na ka sa ceuti se dua na ka sa buli, ka vakasisila vei Jiova na cakacaka ni liga ni tamata, ka vakaduria ena vanua vuni.' "Me ra tukuna na tamata kecega 'Emeni!' 16 'Sa kalouca o koya sa i valavala vakaviavialevu veirau na nona i tubutubu tamana kei tinana.' "Me ra na tukuna na tamata kecega, 'Emeni!' 17 ''Sa kalouca o koya sa vakavuna na nona lako sese na mataboko ena sala.' "Me ra tukuna na tamata kecega, 'Emeni!' 18 Sa kalouca o koya sa vakavuna na nona lako sese na mataboko ena sala. Me ra na tukuna na tamata kecega, 'Emeni!' 19 'Sa kalouca o koya sa vakatanitaka na lewa dodonu me nodra na vulagi, na luveniyali, na yada.' " Me ra na tukuna na tamata kecega, 'Emeni!' 20 'Sa kalouca o koya sa moce vata na wati tamana baleta ni sa cega nai davodavoi tamana.' "Me ra na tukuna na tamata kecega, 'Emeni!' 21 'Sa kalouca o koya sa tiko vata kei na dua na manumanu.' "Me ra na tukuna na tamata kecega, 'Emeni!' 22 'Sa kalouca o koya sa tiko vata kei na ganena na luvei tamana se luvei tinana.' "Me ra na tukuna na tamata kecega, 'Emeni!' 23 'Sa kalouca o koya sa tiko vata kei na tinai waitina.' "Me ra na tukuna na tamata kecega, 'Emeni!' 24 'Sa kalouca o koya sa veivala vuni kei na wekana.' "Me ra na tukuna kecega, 'Emeni!' 25 'Sa kalouca na tamata sa taura vuni nai lavo me vakamatea kina e dua na sega cala.' "Me ra na tukuna kece na tamata kecega, 'Emeni!' 26 'Sa kalouca o koya sa sega ni muria na vosa kece ni vunau oqo. ' "Me ra na tukuna na tamata kecega, 'Emeni!'

Vakarua 28

Na Kalouvinaka Kei Na Sautu Vei Ira Sa Talairawarawa

1 "O koya oqo, kevaka o ni sa vakarorogo vinaka ka talairawarawa ki na domo i Jiova na nomuni Kalou, mo ni vakamuria vinaka na Nona i vakaro kecega, au sa vakarota vei kemuni ena siga oqo, e na laveti kemuni cake kina o Jiova na nomuni Kalou mai vei ira na veimatanitu kecega e vuravura. 2 "Na veivakalouvinakataki kecega oqo era na lakovi kemuni mai, ka lako siviti kemuni, baleta ni o ni sa talairawarawa ki na domo i Jiova na nomuni Kalou: 3 "O ni na kalouvinaka ena koro, o ni na kalouvinaki na vanua. 4 "Ena vakalouvinakataki na vua ni yagomuni, na vua ni nomuni qele, ena tubu na nomuni manumanu ena bai, na nomuni bulumakau kei na manumanu susu kecega. 5 "Ena vakalouvinakataki na nomuni basikete kecega kei na nomudou tere kecega. 6 "O ni na kalouvinaka ena nomuni curu mai kei na nomuni lako yani. 7 "Na Kalou ena vakadrukai ira na kemuni meca e matamuni; era na lako mai ena dua na sala ka na veitau lesu ena vitu tale na sala. 8 "Na Kalou ena vakarota na sautu vei kemuni ena nomuni lololo, ena ka kecega sa tara na ligamuni ka ena vakalouvinakataki ena vanua sa solia vei kemuni na Kalou o Jiova. 9 "Na Kalou o Jiova ena vakataudeitaki kemuni; mo ni tamata tabu vua me vaka sa yalataka vei kemuni. Kevaka o ni sa maroroya na i vakaroi Jiova na nomuni Kalou ka lako ena Nona sala. 10 "O ira na tamata kece e vuravura era na raica ni kemuni sa kacivi ena yaca i Jiova, ka era na rerevaki kemuni. 11 "Na Kalou ena solia vei kemuni na veika vivinaka ena vua ni yagomuni, ena levu ni nomuni manumanu susu, ena vua ni nomuni qele, ena vanua sa yalataka o Jiova na nomuni Kalou vei ira na nomuni qase, me solia vei kemuni. 12 "O Jiova ena dolava vei kemuni na nona lololo kecega mai lomalagi, me solia na uca ki na nomuni vanua ena kena gauna dodonu ka me vakalouvinakataka na cakacaka ni ligamuni. o ni na dau veivuke ki vei ira na veimatanitu ka o ni na sega ni daukerekere. 13 "O Jiova ena cakava mo ni uluna ka sega ni buina, o ni na tiko ga e cake ka sega ni tiko e ra, kevaka o ni sa rogoca nai vakaroi Jiova na nomuni Kalou, au sa vakarota veikemuni ena siga oqo, ka qarauna me muria. 14 "O koya oqo mo ni kua ni vuki tani mai na vosa au sa vakarota vei kemuni ena siga oqo, ki nai mawi se ki nai matau, mo ni muri ira kina na Kalou tale eso ka qaravi ira.

Na Kalouca Ni Talaidredre

15 "Ena yaco oqo kevaka o ni sa sega ni via rogoca na domo i Jiova na nomuni Kalou, ka sega ni via maroroya na Nona i vakaro kecega kei na Nona i lesilesi au sa vakarota vei kemuni ni kua, me lako mai ki na veikemuni na veikalouca kecega oqo, ena toboki kemuni ka siviti kemuni: 16 "O ni na kalouca ena koro, ka kalouca talega ena vanua. 17 "Ena kalouca na nomuni bola kei na nomuni tere. 18 "Ena vakaloucataki na vua ni yagomuni, na vua ni nomuni qele, na nomuni bulumakau kei na nomuni qele ni sipi. 19 "O ni na kalouca ena nomuni curu mai kei na nomuni lako yani. 20 "O Jiova ena tala veikemuni na kalouca, na veilecayaki kei na cudruvi ena veika kecega sa tara na ligamuni, me yacova ni kemuni sa vakarusai, me yacova ni kemuni sa yali yani vakatotolo sara, baleta na ca ni nomuni valavala ni kemuni sa biuta na Kalou. 21 "Na Kalou ena cakava na veimate ca oqo me kabiti kemuni me yacova ni sa kani kemuni kece mai na vanua sa solia vei kemuni mo ni taukena. 22 "O Jiova ena samuti kemuni ena mate ni gacagaca, ena katakata, ena mate dewa, ena tubu na mate cuqa, ena i seleiwau kei katakata sivia kei na mate ni suasua ca, oqo ena cicivi kemuni mai me yacova ni o ni sa vakarusai ka yali yani. 23 "Na lomalagi sa tu oqo ena ulumuni ena varasa mai kei na vuravura sa tu oqori e yavamuni ena kaukamea mai. 24 "Ena veisautaka o Jiova na uca ni nomuni vanua me pauta kei na kuvu ni soso; ka na lako sobu mai lomalagi vei kemuni me yacova ni o ni sa vakarusai kece. 25 "O Jiova ena vakavuna na nomuni vakadrukai mai vei ira na nomuni meca o ni na lako yani ena dua na sala, ka o ni na veidroyaki mai ena sala e vitu mai matadra. o ni na dauvakavu leqa, ki vei ira kece na veimatanitu e vuravura. 26 "Na yagomuni sa mate tu, sa na yaco me kedra na manumanu vuka ni macawa, kei na manumanu yavai va ni vuravura ka na sega e cemuri ira tani. 27 "O Jiova ena samuti kemuni ena bo ni Ijipita, na bo dra, na karokaro kei na milamila, na veika oqo, o ni na sega ni vakabulai rawa kina. 28 "O Jiova ena samuti kemuni ena lialia, ena mataboko kei veilecayaki ni bula. 29 "O ni na vakayayamo ena siga levu, me vaka sa vakayayamo na mataboko ena butobuto, o ni na sega ni tamata yaco ena nomuni lakolako; o ni na vakaocai ka vakacacani tikotiko ga ka sega ni dua e rawa ni vakabulai kemuni. 30 "O ni na vosaka e dua me watimuni, ia, e rau na veimoceri tale kei na dua na tagane tani; o ni na tara e dua na vale, ia, e dua tani tale na mai taukena. O ni na tea e dua na were ni vaini, ia, o ni na sega ni tauca na vuana. 31 "Ena vakamatei e matamuni na bulumakau, ia, o ni na sega ni kana kina, na nomuni asa ena tauri vakaukauwa mai vei kemuni ka ena sega ni vakasosomitaki tale vei kemuni, na nomuni sipi ena soli vei ira na kemuni meca, ka ena sega vei kemuni ena vakabulai ira rawa. 32 "Na luvemuni tagane kei na luvemuni yalewa era na soli vei ira na so tale na tamata, ka ena raica na matamuni ka sega ga ni cakava rawa e dua na ka, ni sa sega na kaukauwa ena ligamuni. 33 "Na veimatanitu o ni sa sega ni kila era na kania na vuata ni nomuni vanua kei na vua ni nomuni cakacaka, o ni na valuti ka vakacacani tikotiko ga. 34 O ni na vakagolei vakalialia baleta na rai sa rai tiko kina na matamuni. 35 "O Jiova ena samuta na durumuni kei na yavamuni ena bo ca sara ka o ni na sega ni vakabulai kina, mai na botoboto ni yavamuni kina buradelamuni. 36 "Ena kauti kemuni mai o Jiova, oi kemuni kei ira na tui o ni sa sega ni kila se me ra kila o ira na nomuni qase, mai kea ki ni na qaravi ira kina na kalouOsa buli ena kau kei na vatu. 37 "O ni na yaco me ka e veivakidacalataki, a i vakabalebale, e ka ga ni veitalanoa vei ira na veimatanitu ena vanua sa vakasevi kemuni kina o Jiova. 38 "O ni na kauta ka cavuraka vakalevu na sila, ia, o ni na kauta ga mai vakalailai, ni ra na kania ga na vodre. 39 "O ni na tea na veivaini ka qarava vinaka, ia o ni sega ga ni gunuva na kena waini se kania na vuana; era na kania ga na vuana na ulo. 40 "O ni na raica na veiolive ena nomuni veiyasana kecega, ia o ni na sega ni lumuta na kena waiwai, baleta ni ra na drodro tani na kena waiwai. 41 "Era na sucu mai vei kemuni na gonetagane kei na goneyalewa, ia era na sega ni wili vei kemuni; baleta ni ra na kau vakabobula 42 "Era na kania kece na nomuni veikau na vodre kei na ka kecega sa tubu mai na qele. 43 "O ira na kai tani era na tubu siviti kemuni, ia, oi kemuni, o ni na lutu sobu tikoga. 44 "Era na solia vei kemuni, ia, o ni na sega ni solia vei ira, era na uluna ka o ni na buina tikoga. 45 "E dina, na kalouca kece oqo era na lakovi kemuni mai, ka cici muri kemuni, ka lako siviti kemuni me yacova ni kemuni sa vakarusai, ni kemuni sa sega ni via rogoca na domo i Jiova na nomuni Kalou, ka maroroya na nona i vakaro kei na nona i lesilesi sa vakarota vei kemuni. 46 "Oqo o ni na vakatakilakilataki tani kina kei ira na nomuni kawa me sega ni mudu. 47 "Baleta ni kemuni sa sega ni qarava na Kalou o Jiova ena reki kei na marau ni yalomuni ni sa levu na veika e sa tu, 48 "O ni na qaravi ira na kemuni meca o ira ena talai ira mai o Jiova ena viakana kei na viagunu kei na luvawale, ka era sa vinakata na ka kecega, ena biuta talega o Jiova e dua nai vua e domomuni me yacova ni sa vakarusai kemuni o koya. 49 "O Jiova ena kauta mai vakayawa e dua na matanitu me vorati kemuni mai na yasai vuravura ka dua, ka na tubu vakatotolo me vaka sa vuka na i keli, e dua na matanitu o ni sa sega ni kila na nodra vosa, 50 "E dua na matanitu sa ca sara, sa sega vei ira na veidokai vei ira na qase se na nodra taleitaki ira na gone. 51 "Era na kania na tubu ni nomuni manumanu kei na vuata ni nomuni vanua, me yacova ni o sa vakarusai, ena sega ni vakavoci vei kemuni na sila, na waini, kei na waiwai kei na veika vivinaka ni nomuni bulumakau na veika vivinaka ni nomuni sipi, me yacova ni o ni sa vakarusai kece. 52 "Era na tagavi kemuni ena nomuni matamata kecega, me yacova ni sa kabasu kecega na nomuni bai ni valu o ni sa dau vakararavi kina, o koya sa solia veikemuni o Jiova na nomuni Kalou. 53 "O ni na kania na vua ni yagomuni na lewedra na luvemuni tagane kei na lewedra na luvemuni yalewa o ira sa solia vei kemuni o Jiova na nomuni Kalou, ni sa buku talega na druadrua ena vuku ni leqa era sa veivakaleqai kina na kemuni meca. 54 "Na tagane ena kemuni maliwa sa dau kidakida ka dau digidigi, ena dua tani na matana vua na wekana, vei koya talega na watina sa daulomana sara, vei ira talega na luvena era sa vo tiko vua, 55 "Ni sa sega ni via solia vei ira na lewei luvena ena kania, baleta ni sa sega tale na ka e vo ena kena buku mai na druadrua o koya era sa veivakaleqai mai kina na meca ena nomuni matamata ni koro. 56 "Na yalewa vinaka ka totoka sa tiko vei kemuni, o ira sa sega mada ga ni via butuka na qele ena yavadra baleta na nodra viavia ga, ena sega ni via solia vei watina dina se vei luvena tagane se luvena yalewa, 57 "Na kato ni gone sa lutu mai na maliwa ni yavana kei na lewe ni ketena dina, o ira sa vakasucuma o koya, ni na kinia lo ga o koya ni sa sega na kakana ena vuku ni veivakaleqai mai kina na meca ena nomuni matamata. 58 "Kevaka o ni sa sega ni qarauna mo ni maroroya na vosa kece ni vunau oqo, sa volai ena i vola oqo, sa volai ena i vola oqo, mo ni rerevaka kina na yaca lagilagi ka talei na yaca I JIOVA NA NOMUNI KALOU, 59 "O Jiova ga ena kauta mai vei kemuni kei ira na nomuni kawa na veimate cacaOna mate lelevu ka vakasisila— kei na veimate lelevu tale eso ka dau tu vakadede. 60 "Ena kauta lesu tale mai vei kemuni o Jiova na veimate caca kece mai Ijipita o ni dau rerevaka, era na kabiti kemuni. 61 "Na vei mate caca kecega sa sega ni volai ena i Vola ni Vunau, ena kauta mai vei kemuni o Jiova, me tarai kemuni me yacova ni kemuni sa rusa kecega. 62 "Ena vo e vica ga veikemuni, me vaka ni kemuni sa vaka na kalokalo ni lomalagi na kemuni lewe levu, baleta ni kemuni sa sega ni via rogoca na domo i Jiova na nomuni Kalou. 63 "Ena yaco ga, me vaka ni sa dau marautaki kemuni o Jiova ka daucakavinaka veikemuni ka dau vakalevutaki kemuni, ena marautaka o Jiova me vakarusai kemuni, ka vakayali kemuni ka mo ni kau tani mai na vanua o ni sa lako tiko yani kina mo ni taukena. 64 "Ena vakasesei kemuni o Jiova ena matadra na tamata kecega, mai na dua na yasana kei vuravura ki na dua tale na yasana, mai kea o ni na qarava kina na Kalou lasu, na Kalou o ni sa sega ni kila se o ira na nomuni qaseOsa buli ena kau kei na vatu. 65 "Ena kedra maliwa na veimatanitu oqori o ni na sega ni kune vakacegu kina, se me vakacegu kina na yavamuni, ia, o Jiova e solia veikemuni mai kea na yalo sa rere tikoga, na mata sa sega ni rai rawa kei na loma sa mosi vakalevu. 66 "Na nomuni bula sa lili tu vakaveimama e matamuni, o ni na rere tikoga, siga kei na bogi, ka sa sega nai vakadei ni bula. 67 "Ena veimataka o ni na tukuna, 'Oqo sa yakavi mai!' Ena veiyakavi o ni na tukuna, 'Ni sa mataka mai oqo!' Baleta na rere sa vakataqayataki kemuni tiko, kei na veika sa raica tiko na matamuni. 68 "O Jiova ena kauti kemudou lesu tale ki Ijipita ena waqa, ena sala e sa tukuni oti veikemuni, 'Ni o ni na sega ni raica tale.' Mai kea o ni na volitaki kina ki vei ira na kemuni meca, me bobula yalewa se bobula tagane, ia, ena sega ni dua e via voli kemuni."

Vakarua 29

Sa Vakavoui Na Veiyalayalati Mai Moape

1 Oqo na vosa ni veiyalayalati sa vakarota o Jiova vei Mosese me cakava vei ira na luvei Isireli ena vanua o Moapi, me kuria na veiyalayalati sa cakava vei ira mai Orepi. 2 O Mosese sa kacivi ira kece na Isireli ka tukuna vei ira: "O ni sa raica kece e matamuni na veika sa cakava o Jiova ena vanua o Ijipita, ki vei Fero ke ira kece na nona tamata, kei na nona vanua kecega— 3 "Na veika lelevu sa raica na matamuni, nai vakatakilakila kei na ka e veivakakurabuitaki. 4 "Ia, na Kalou sa sega tikoga ni solia veikemuni, na yalo me kila, na mata me raica, na daliga me rogoca, me yacova na siga oqo. 5 "Oi Au, sa liutaki kemuni mai oqo me vasagavulu na yabaki ena vanua liwa. Sa sega ni madra mai na nomuni sulu ena yagomuni, se na nomuni vava mai na yavamuni. 6 "O ni sa sega ni kana madrai, o ni sa sega ni gunu waini; mo ni kila kina ni sai Au Jiova na nomuni Kalou. 7 "Ni kemuni sa lako mai ki ke, o Sailo na tui Esiboni kei Oki na tui Pasani era sa lako mai me valuti keimami, ka keimami sa ravuti ira. 8 "Keimami sa taura na nodrau vanua ka solia mei votavota nei Rupeni kei Kata kei na veimama ni yavusa o Manasa. 9 "Mo ni maroroya na vosa ni veiyalayalati oqo, ka muria, mo ni tamata yaco ki na ena veika kece o ni na cakava. 10 "Oi kemuni kece sa tucake tu e daidai ena matai Jiova na nomuni Kalou. Oi kemuni nai liuliu ni veiyavusa, na qase kei ira na vakaitutu, kei ira kece na tagane e Isireli, 11 "O ira na nomuni lalai kei ira na watimuni — o ira na vulagi sa tiko vata kei kemuni, o ira sa daucaka buka vei kemuni kei ira na dautaki wai— 12 "Mo ni mai veiyalayalati vata kei Jiova na nomuni Kalou kei na Nona bubului, sa cakava vei kemuni o Jiova na nomuni Kalou e daidai, 13 "Mo ni vakadeitaki kina mai vei Koya e daidai, mo ni nona tamata, me Kalou kina veikemuni o Koya, me vaka ga sa dau tukuna tiko o Koya veikemuni, me vaka sara ga sa yalataka vei ira na nomuni qase, vei Eparama, vei Aisake, vei Jekope. 14 "Au sa sega ni cakava na veiyalayalati kei na bubului oqo, vei kemuni duadua ga, 15 "Vei koya talega sa tiko eke e daidai ena mata ni Kalou o Jiova, sa vakatalega kina o koya sa sega ni tiko e daidai 16 (Ni o ni sa kila vinaka ni da a tiko mai Ijipita, ka eda sa lako curuma mai na veimatanitu oqo, 17 O ni sa raica na nodra vakasisila kei na nodra matakau sa tiko kei ira – na kau, na vatu, sa siliva kei na koula); 18 "Me yaco kina me kua ni dua veikemuni, se tagane se yalewa se vuvale, se yavusa, me vuki tani na yalona ena siga oqo mai vei Jiova na Kalou, me lako ka qaravi ira na Kalou ni veimatanitu oqo, ka me kua ni dua veikemuni e vakavuna na veiyalocataki se veivakawiwitaki; 19 "Me kua talega ni yaco, kevaka e dua sa rogoca na vosa ni veivakaloucataki oqo, ka vakalouvinakataka ga na yalona ka tukuna tiko, 'Au na tiko vinaka tikoga, veitalia mada ga kevaka au lako tiko ena vakanananu ni yaloqu' — me vaka ga, ni ra sa wili vata na daumateni kei ira na sega ni daumateni. 20 "O Jiova, ena sega ni vosoti koya; ia, na Nona cudru o Jiova kei na Nona ruru ena vakama na tamata koya, kei na ruru kece sa volai ena i Vola oqo ena yaco vua, o Jiova talega ena bokoca laivi na yacana mai na rukui lomalagi. 21 "O Jiova ena vakatikitikitaki koya mai vei ira na yavusa kece ni Isireli, me nona na rarawa me vaka na kalouca kece sa volai ena i Vola ni Vunau oqo, 22 "Ni ra na yaco mai nai tabatamata sa muri kemuni mai, kei ira na vulagi sa lako vakayawa mai, era na tukuna, ni ra sa raica na veikacaca sa yaco ena vanua kei na veimate caca sa biuta kina o Jiova: 23 'Na vanua taucoko sa veivatu-masima ka sa kama tiko; sa sega ni teivaki, sa sega na ka e vua, sa sega na ka e tubu mai, sa vaka ga na Sotoma kei Komora, Adama kei Sepoimi, sa vuaviritaka o Jiova ena Nona cudru kei na cudru katakata.' 24 "Era sa tukuna na veimatanitu kecega, 'Na cava sa cakava kina o Jiova na ka oqo? Na cava na balebale ni cudru katakata oqo?' 25 "Era na tukuna na kena tagane: 'Baleta ni ra sa biuta na veiyalayalati ni nodra Kalou o Jiova, na Kalou ni nodra qase, sa cakava o Koya vata kei ira ena nodra lako tani mai Ijipita; 26 'Ni ra sa lako ka qarava na Kalou tani e so, o koya era a sega ni kila, ia, e se sega ga ni via biuti ira o Koya. 27 'Na cudru i Jiova sa kania na nodra vanua, me kauta mai kina na veikalouca kecega sa volai ena i vola oqo. 28 'O Jiova sa cavuraki ira tani mai na nodra vanua ena cudru levu, ena cudru katakata, era sa vakacudrui Jiova tikoga kina, ka sa ceburaki ira kina ki na dua tale na vanua me vaka ena siga oqo.' 29 "Na veika vuni sa nei Jiova na noda Kalou, na veika sa vakatakilai sa noda kei ira na luveda me sega ni mudu, me rawa ni da bulataka na vosa kece ena i vunau oqo.

Vakarua 30

Na Kalouvinaka Ni Sa Lesu Vua Na Kalou Na Tamata

1 "Ni sa tarai kemuni mai na kalouvinaka kei na kalouca au sa biuta tu oqo e matamuni ka o ni sa vakananuma na veivanua kece sa kauti kemuni kina o Jiova na nomuni Kalou, 2 "O ni qai lesu vei Jiova na nomuni Kalou ka rogoca na Domona me vaka au sa vakarota vei kemuni e daidai, oi kemuni kei ira na luvemuni ena yalomuni taucoko kei na lomamuni taucoko, 3 "Me na kauti kemuni lesu tale mai kina o Jiova na nomuni Kalou mai na vesuki ka sa lomani kemuni tikoga ka sa vakasoqoni kemuni tale mai na veimatanitu sa vakasavi kemuni kina na Kalou o Jiova. 4 "Kevaka sa vakasavi e dua ki na vanua yawa sara ena rukui lomalagi, mai kea ena kauti kemuni tale mai kina na Kalou o Jiova. 5 "O Jiova na nomuni Kalou ena kauti kemuni tale mai ki na vanua era a taukena na nomuni qase, mo ni taukena tale, E na vakatamata yaco taki kemuni ka vakalewevuqataki kemuni mai vei ira na tamamuni o Koya. 6 "O Jiova, na nomuni Kalou ena ciliva na mata ni yalomuni kei na yalodra na nomuni kawa, me ra lomana na Kalou o Jiova ena yalodra taucoko kei na lomadra kecega me ra bula kina. 7 "Na Kalou o Jiova ena biuta na kalouca kece oqo ki vei ira na meca, vei ira talega sa cati kemuni ka daubeitaki kemuni: 8 "O ni na talairawarawa tale kina na domo i Jiova na nomuni Kalou ka cakava na nona i vakaro kecega, me vaka au sa vakarota veikemuni e daidai. 9 "Na Kalou o Jiova ena vakalevutaka na cakacaka ni ligamuni kecega, na vua ni yagomuni, na vua ni nomuni manumanu susu kei na vuata ni nomuni vanua me vinaka cake. o Jiova ena rekitaki kemuni vakalevu cake me vaka sa daurekitaki ira na nomuni qase, 10 "Kevaka o ni sa talairawarawa ki na domo i Jiova na nomuni Kalou, ka maroroya na Nona i vakaro kei na Nona i lesilesi sa volai ena i vola ni vunau, ka gole vua na Kalou o Jiova ena yalomuni kei na lomamuni kecega.

Na Digitaki Ni Bula Kei Na Mate

11 "Nai vakaro oqo, au sa vakarota veikemuni e daidai, sa sega ni dredre se me sa tiko sara vakayawa, 12 "Sa sega ni tiko sara mai lomalagi me tukuni kina, 'O cei ena lako cake me kauta sobu mai vei keda me da mai rogoca ka cakava?' 13 "Se sa tiko mai na wasawasa kadua me tukuni kina, 'O cei me lakova na wasawasa ena vukuda ka kauta mai na vosa ni Kalou me da rogoca ka cakava?' 14 "Sa voleka sara veikemuni na vosa ni Kalou ena gusumuni, ena yalomuni, mo ni bula kina. 15 "Raica au sa biuta e matamuni na bula kei na vinaka, na mate kei na ca, 16 "Ena veika sa vakaroti veikemuni e daidai, mo ni lomani Jiova na nomuni Kalou ka lako ena Nona sala ka maroroya na Nona i vakaro, na Nona i lesilesi, na Nona lewa, mo ni bula kina ka lewe levu, ka mo ni kalouvinaka kina ena vanua o ni sa la'ki taukena. 17 "Kevaka sa vuki tani na yalomuni, mo ni kua kina ni via rogoca ka kau vakatani ka qarava na Kalou tani ka lotu vei ira, 18 "Au sa vakarogotaka veikemuni e daidai, ni kemuni na rusa ena sega ni vakalevutaki na nomuni veisiga ena vanua o ni na takosova kina na Joritani mo ni lako kina ka taukena. 19 "Au sa kacivi lomalagi kei vuravura mei vakadinadina e daidai, ni'u sa tuvana e matamuni na bula kei na mate, na kalouvinaka kei na kalouca; mo ni qai digitaka na bula mo ni bula kina, oi kemuni kei ira na nomuni kawa; 20 "Mo ni lomani Jiova na nomuni Kalou, Mo ni talairawarawa ki na Domona, Mo ni kabiti Koya, ni sa nomuni bula o Koya, ka sa balavu talega kina na nomuni bula, mo ni tiko talega kina ena vanua sa bubului ki na o Jiova vei ira na nomuni qase, kivei Eparama, vei Aisake kei Jekope me solia vei ira."

Vakarua 31

O Josua Nai Liuliu Vou Kei Isireli

1 Sa qai lako o Mosese ka tukuna na veivosa oqo vei ira na Isireli. 2 Sa tukuna vei ira: "Au sa yabaki dua na drau ka ruasagavulu e daidai. Au sa sega ni rawata na lako yani kei na lako mai, sa tukuna talega vei au na Kalou, 'Ni'u na sega ni takosova na Joritani.' 3 "O Jiova na nomuni Kalou vakataki Koya ena takoso e liu ni bera oi kemuni; ena vakarusai ira na veimatanitu oqo ena matamuni, o ni na vakasesei ira. o Josua vakataki koya ena takoso e liu ni bera oi kemuni, me vaka ga sa tukuna o Jiova. 4 "Ena vakayacora vei ira o Jiova me vaka sa cakava vei Sioni kei Oki, na tui ni Amoraiti kei na nodra vanua, ni sa vakarusai ira. 5 "O Jiova ena soli ira vei kemuni, mo ni cakava vei ira me vaka na veivakaro kecega au sa vakarota vei kemuni. 6 "Mo ni kaukauwa ga ka qaqa, mo ni kua ni rere se vakataqayataki ena vukudra, ni sa i Jiova na nomuni Kalou, sai Koya ga sa lako vata kei kemuni. Ena sega ni laivi kemuni se biuti kemuni o koya." 7 Sa qai kacivi Josua o Mosese ena matadra kece na Isireli ka tukuna vua, "Mo kaukauwa ka yaloqaqa, mo lako vata kei ira na tamata oqo ki na vanua sa yalataka o Jiova vei ira na qase me solia vei ira, mo vakavuna na nodra taukena. 8 "O Jiova, sai Koya duadua ga ena lako tiko e liu vei kemuni, ena tiko vata kei kemuni o Koya, ena sega ni biuti kemuni o Koya, se weletaki kemuni, mo ni kua ni rere kina se taqaya."

Me Dau Wiliki Nai Vunau Ena Veiyavitu Na Yabaki

9 Sa vola nai vunau oqo o Mosese ka solia vei ira na bete na luvei Livai, o ira sa dau colata na Kato ni Veiyalayalati i Jiova ki vei ira na qase ni Isireli. 10 Sa vakaroti ira o Mosese ka vaka, "Ni sa mai cava na veiyavitu na yabaki, na gauna sa digitaki me dua na gauna ni veisereki ena solevu ni vale vakacevaceva, 11 "Ni ra sa lako mai na Isireli me ra mai tu ena mata i Jiova na nodra Kalou ena vanua sa digitaka o Koya, mo ni qai wilika nai Vola ni Vunau oqo ena matadra kece na Isireli me ra rogoca. 12 "Vakasoqoni ira mai na tamata kecega, na tagane kei na yalewa, o ira na lalai kei ira na vulagi era sa tiko ena kemuni maliwa, me ra mai rogoca, me ra mai vulica me rerevaki Jiova na nomuni Kalou, ka qarauna me muria na vosa kecega ni vunau oqo, 13 "Me yaco kina vei ira na luvedra era se bera ni kila, me ra rogoca ka vulica me ra rerevaki Jiova na nomuni Kalou ena gauna kece era bula kina ena vanua o ni na takoso kina oqo mo ni taukena."

Sa Yalataki Rawa Na Nodra Talaidredre Na Isireli

14 Sa qai vosa o Jiova vei Mosese, "Sa roro tiko mai na siga o na mate kina, kacivi Josua ka mo ni tiko ena vale vakacevaceva ni veivosaki me'u vakatikori koya kina." E rau sa lako o Mosese kei Josua ki na vanua ni veivosaki. 15 Sa basika na Kalou o Jiova ena vanua ni veivosaki ena duru o, ka sa mai tu ena dela ni katuba ni vale vakacevaceva ni veivosaki. 16 Sa tukuna o Jiova vei Mosese; "O na la'ki vakacegu kei ira na tamamu, o ira oqo era na tucake ka vakaqitora na tamata volitaki kei ira na nodra Kalou na vulagi ena vanua, era sa lako ka tiko vata kei ira, era na qai biuti Au kina, (Kalou o Jiova) ka voroka na noqu veiyalayalati, Au a cakava vata kei ira. 17 "Na Noqu cudru ena tubu baleti ira ena siga o ya, Au na biuti ira, Au na vunitaka na Mataqu vei ira, era na vakayali. Ena levu na ca kei na leqa ena rurugi ira, era na tukuna kina ena siga o ya, 'Sa tarai keda tiko li na dredre oqo baleta ni sa sega ni tiko kei keda o Jiova na noda Kalou?' 18 "Au na vunitaka dina na mataqu ena siga o ya, baleta na ka ca era sa cakava, ena ka oqo era sa vuki kina ki na Kalou tani. 19 "Mo ni vola na sere oqo me nomuni, ka vakavulica vei ira na luvei Isireli; me biu sara ga ki na gusudra, me yaco kina na sere oqo mei vakadinadina ki vei Au ena vukudra na Isireli. 20 "Ni'u sa kauti ira mai ki na vanua sa drodro kina na sucu kei na oni, o koya Au sa yalataka vei ira na nomuni qase, ka era sa kana ka vakasinaiti ira, era sa levulevu, era na vuki ki vei ira na Kalou tani ka qaravi ira; era na vakacudrui Au ka basuka na Noqu veiyalayalati. 21 "Ena yaco, ni sa levu na ka ca kei na leqa era tarai ira, na sere oqo sa tu mei vakadinadina ka beitaki ira, me ra kakua ni guilecavi ena gusudra na nomuni kawa, Ni'u sa kila na lutu sobu ni nodra i tovo e daidai sa vakakina, ni bera ni'u kauti ira mai ki na vanua Au sa yalataka me'u solia vei ira." 22 Sa qai vola o Mosese na sere ena siga o ya ka vakavulica vei ira na luvei Isireli. 23 Sa qai vakatikori Josua o Koya na luvei Nuni ka tukuna, "Mo kaukauwa ka qaqa, ni o na kauti ira na luvei Isireli ki na vanua Au sa yalataka vei ira, ka Au na tiko vata kei iko." 24 Sa qai yaco ni sa vola oti o Mosese nai vunau ena dua nai vola, ni sa oti sara, 25 o Mosese sa vakaroti ira na Livai, o ira sa dau laveta na Kato ni Veiyalayalati i Jiova na nodra Kalou, ka tukuna; 26 "Taura na i Vola ni Vunau oqo ka biuta ena loma ni Kato ni Veiyalayalati, me toka mai kea ka beitaki kemuni tiko; 27 "Ni'u sa kila na nomuni talaidredre ka yaloqa, ni'u se bula vata tiko kei kemuni, o ni sa talaidredre vei Jiova, qai vakacava li kevaka au sa mate? 28 "Me ra soqoni vata mai o ira na qase ni veiyavusa kei ira na vakai lesilesi, me'u vosa vei ira ka rogoca oqo ka kacivi lomalagi kei vuravura me vakadinadina vei ira. 29 "Ni'u sa kila ni sa na ca vakalevu sara na nomuni bula ena gauna au sa na mate oti kina, ka vuki tani mai na sala au sa vakarota oti veikemuni, ka na muri kemuni na veika ca ena veisiga mai muri. Ni o ni na caka ka ca ena mata i Jiova me vakacudrui Koya kina ena cakacaka ni ligamuni."

Na Sere I Mosese

30 Era sa vakarorogo kece na Isireli ni sa vosa o Mosese me tukuna kece na veiqaqa ni nona sere me yacova ni sa oti:

Vakarua 32

1 "Mo vakarorogo o iko lomalagi, au na qai vosa; vakarorogo o iko vuravura ki na vosa ni gusuqu. 2 Na noqu i vakavuvuli me tau me vaka na uca. Na vosa ni gusuqu me lutu me vaka na tegu, me vaka sa tau na uca ena dela ni veico malumu, me vaka na veiuca ena veico. 3 Au sa tukuna tiko na yaca i Jiova: mo ni vakacerecerea, me vakalevulevui na noda Kalou. 4 Sa uluvatu o Koya, sa taucoko na Nona cakacaka; sa dodonu kecega na Nona i valavala. Sa Kalou ni dina ka sa sega vua na i valavala sa sega ni dodonu; sa dodonu ka yalododonu o Koya. 5 "Era sa vakadukadukalitaki ira vakai ira era sa sega ni luve ni Kalou, baleta ni ra sa sega ni vinaka: ai tabatamata sa vuki tani ka tatakelokelo. 6 Sa dua beka na nomuni veidinadinati kei Jiova, oi kemuni na tamata lialia ka yalowai? Sa sega beka ni tamamuni o Koya, ka sa voli kemuni oti? Sa sega beka ni buli kemuni o Koya ka vakadeitaki kemuni? 7 "Mo ni vakananuma mada na veisiga sa oti, na veiyabaki ni veigauna sa oti, taroga na tamamu, ena vakaraitaka vei iko, o ira na nomuni qase, era na tukuna veikemuni: 8 Ena gauna sa wasea kina o Koya sa Cecere Sara na nodra i votavota ki vei ira na veimatanitu, ni sa wasei ira na luvei Atama, sa biuta nai yalayala vei ira na tamata, me vaka nai wiliwili vei ira na luvei Isireli. 9 Ni sa i votavota i Jiova o ira ga na Nona tamata; o Jekope sa vanua ni Nona i votavota. 10 "Sa kunei koya ena vanua dravui-siga kei na vanua sai vovo tu ga ni vanua, na vanua liwa sa lala tu ga; sa vakavolivoliti koya o Jiova ka vakasalataki; sa maroroi koya me vaka na loa ni mata. 11 Me vaka sa vakayavalata na nona sova na ikeli ka vakaraici ira na luvena, sa qai tevuka na tabana ka kauti ira cake mai, ni sa kauti ira tiko mai ena tabana, 12 O Jiova ga sa liutaki koya ka sa sega na Kalou tani vua. 13 "O Jiova sa vakavuna vua me vodoka na veicecere kei vuravura, me kania kina na vuata ni vanua, sa vakavuna na nona kauta mai na oni mai na veilaqa ni vatu, kei na waiwai mai na veivatu qiwa; 14 Na kirimu ni sucu ni bulumakau, na sucu ni sipi na uro ni lami kei na luve ni sipi mai Pasani kei na me, kei na witi digitaki, ka o ni gunuva na waini, na wai dina ni vaini. 15 "Sa levulevu mai o Jesuruni ka caqecaqe, o ni sa levulevu, o ni sa vavaku, o ni ubi ena uro, sa qai guilecava na Kalou o koya sa veibuli, ka sa vakacacani koya na uluvatu ni nona vakabulai. 16 Era sa vakayavalati Koya me vuvutaki ira na Kalou tani, ena ka vakasisila era sa vakayavalati koya me cudru. 17 Era sa vakacaboisoro vua na tevoro ka sega vua na Kalou, vei ira na Kalou era sa sega ni kila, vei ira na Kalou qai basika vou tu ga mai, na vei Kalou era sa sega ni rerevaka o ira na nomuni qase. 18 Ia, na Uluvatu sa vakatuburi kemuni, o ni sa sega ni via kila, ka o ni sa guilecava na Kalou na tamamuni. 19 "Ni sa raica o Jiova na veika oqo, sa qai sega ni taleitaki ira, baleta na veivakacudrui era sa kitaka vua na luvena tagane kei ira na luvena yalewa. 20 Sa qai tukuna o Koya, 'Au na vunitaki Au mai vei ira, Au na via raica na nodra i cavacava, ni ra sa dua nai tabatamata dauvuki tani, era sa gone sega vei ira na vakabauta. 21 Era sa vakacudrui Au, me'u vuvu ena veika sa sega ni Kalou; era sa yavalati Au me'u cudru ena vuku ni nodra matakau lialia. Au na vakayavalati ira talega me na vuvutaki ira sa sega ni dua na matanitu; Au na yavalati ira mera cudru ena vuku ni matanitu lialia. 22 Na Noqu cudru sa vakawaqaca na buka, ka ena kama sobu ki eli, ena kania na vuravura kei na veika sa sinai kina, ka sa kama talega na yavu ni veiulunivanua. 23 'Au na vakatubura ka binia vei ira na veileqa lelevu; Au na vakayagataka na moto ni dakai vei ira. 24 Era na vakatawayagataki ena via kana, ena kani ira na veimate ca kecega kei na veivakarusai sa wiwi sara; Au na tala vei ira na bati gaga ni manumanu kila, na paisoni gaga ni gata mai na soso. 25 Nai seleiwau ena veivakarusai e taudaku; ena basika e loma na veivakarerei vei ira na cauravou, vei ira na goneyalewa, vei ira na gone era mei tiko mai vei ira na turaga era sa ulu sika. 26 Me'u a tukuna kina, "Ni'u na vakadasilataki ira, Au na cakava me ra kua tale ni vakananumi mai vei ira na tamata," 27 Kevaka, Au a sega ni rerevaka na nodra cudru katakata na meca, de ra qai nanuma vakatani na dauveisaqa, me ra na tukuna kina, "Sa qaqa na ligada; sa sega ni cakava o Jiova na veika oqo."' 28 "Ni ra sa dua na matanitu sa sega vei ira nai vakasala, ka sa sega vei ira na kila. 29 Io, era sa yalomatua ni ra sa kila oqo, ni sa dodonu me ra raica ka kila na nodra i cavacava! 30 Me cemuria rawa vakacava na udolu e dua ga na tamata, kei na lewe rua me rau vakavuna na nodra veidroyaki na lewe tini na udolu, vaka vo ga kevaka sa volitaki ira na nodra uluvatu, ka sa soli ira mai o Jiova. 31 Na nodra vatu sa sega ni tautauvata kei na noda uluvatu, o ira mada ga na keda meca era rawa ni vakalewa. 32 Na nodra waini sa waini ga ni Sotoma kei na vanua o Komora; Na kena vaini, sa vaini wiwi ga, sa wiwi talega na kena soso. 33 Na nodra waini sa paisoni ga ni gata kei na cudru gaga ni gata gaga. 34 Sa sega ni bini tiko oqo ena lololo me Noqu, me dregati vata kei na Noqu i yau talei? 35 Sa Noqu na veisausaumi kei na veitotaki, ena tacaqe na yavadra ena gauna dodonu baleta na siga ni nodra rarawa sa tu oqo, kei na veika me lako mai vakatotolo vei ira.' 36 "O Jiova ena lewai ira na Nona tamata ka na lomani ira na Nona dauveiqaravi, ni sa raica o Koya ni sa lako tani na nodra kaukauwa, ka sa sega ni dua e vo, o ira na vesuki se o ira na galala. 37 Ena tukuna o Koya, 'Sa i vei na nodra Kalou, na vatu era sa vakasaqaqara kina me vakarurugi ira? 38 O cei sa kania na uro ni nodra i soro ka gunuva na waini ni nodra i soro lau gunu? Me ra tucake ka vukei kemuni ka me nomuni drodro. 39 'Mo ni raica oqo, oi Au, io, oi Au ga, sai Koya, sa sega tale na Kalou, oi Au ga; Au sa vakamatea, Au sa vakabula; Au sa vakamavoataka, Au sa vakabula tale; sa sega tale e dua me veisereki mai na Ligaqu. 40 Ni'u sa dodoka na Ligaqu ki Lomalagi, ka tukuna, "Ni'u sa bula ka sega ni mudu, 41 Ni'u sa vakagata na Noqu i seleiwau, ka Au sa taura na lewa, Au na sauma vakadodonu vei ira na Kequ meca ka sauma vei ira sa cati Au. 42 Na noqu moto ni dakai ena mateni ena dra, kei na Noqu i sele ena kana lewe, ena nodra dra na vakamatei kei na nodra na vesuki, mai na uludra na veiliutaki vei ira na meca."' 43 "Mo ni reki na kai matanitu tani kei ira na Nona tamata, ni na sauma na nodra dra na Nona dauveiqaravi ka sauma vei ira na Kena meca; ena solia ka vakarautaka na veibuluti kei na veisorovi me baleta na nona vanua kei ira na Nona tamata." 44 Sa lako mai o Mosese kei Josua na luvei Nuni ka vosataka na vosa ni sere oqo ena nodra vakarorogo ka rogoca kece na tamata. 45 Sa qai oti na nona vosataka kei na nona tukuna na veivosa oqo o Mosese vei ira na Isireli, 46 Ka sa vaka oqo: mo ni vagolea na yalomuni ki na veika kece au sa cavuta veikemuni e daidai, "Mo ni vakarota vei ira na luvemuni me ra qarauna sara ka maroroya na veivosa kece ni vunau oqo. 47 "Ni sa sega ni ka wale oqo veikemuni, ni oqo ga na bula veikemuni, na veivosa talega oqo ena vakabalavutaka na nomuni bula ena vanua o ni sa na takosova kina na Joritani mo ni laki taukena." Ena Mate O Mosese Ena Ulunivanua O Nipo 48 Sa qai vosa o Jiova vei Mosese ena siga vata tikoga o ya ka tukuna: 49 "Lako cake ki na veiulunivanua oqo o Eparimi, na ulunivanua o Nipo, ena vanua o Moapi, veibasai kei Jeriko, raica na vanua o Kenani na vanua Au na solia vei ira na gone ni Isireli me ra taukena; 50 "O na mate mai na ulunivanua o sa kabata cake oqori, mo tiko vata mada kei ira na nomu tamata, me vaka sa mate o Eroni na tacimu ena ulunivanua o Ori, ka sa lako yani vei ira na tamata; 51 "Baleta ni o sa cala vei Au ena kedra maliwa na Isireli ena wai mai Meriba e Ketesa, mai na vanua liwa o Sini, ni o sa sega ni vakarokorokotaki Au ena kedra maliwa na Isireli. 52 "O na raica na vanua e matamu, e dina ga ni o na sega ni lako ki kea, na vanua Au sa solia vei ira na luvei Isireli."

Vakarua 33

Nai Otioti Ni Nona Veivakalouvinakataki Vei Ira Na Isireli O Mosese

1 Oqo na veivakalouvinakataki sa vosataka o Mosese na tamata ni Kalou vei ira na Isireli ni bera ni mate. 2 Ka tukuna: "O Jiova sa lako mai Sainiai, ka sa cadra mai Sia vei ira sa lako vata mai e levu mai Parana, ka sa lako vata mai e tini na udolu na nona tamata; ena Ligana i matau sa lako mai kina na i vunau katakata me nodra na Isireli. 3 Io, sa lomani ira na tamata o Koya, o ira kece na Nona tamata era sa tiko ga ena Ligana; era sa dabe ena Yavamuni, era sa taura kece na Nomuni vosa. 4 O Mosese sa vakarota nai Vunau vei keda na nodra i votavota nai soqosoqo levu nei Jekope. 5 Sa Kalou ka Turaga o Koya e Jeserumi ni ra sa soqoni vata mai nai liuliu ni tamata kecega e Isireli. 6 "Me bula o Rupeni, me kua ni mate, me ra kua ni lewe lailai." 7 Sa tukuna oqo ena vuku i Juta: "Mo ni rogoca Jiova, na domo i Juta ka kauti koya mai ki vei ira na nona tamata; me yaga vua na ligana, ka Mo ni veivuke ena vuku ni nodra meca." 8 Vei ira na Livai, sa tukuna kina, "Na Nomuni Cumimi kei na Nomuni Urimi me tiko vata kei ira na Nomuni ka tabu, o ira o ni a vakatovolea mai Masa, o ira o ni a lomavinaka kina ena wai mai Meriba. 9 E a tukuna kina ena vuku i tamana kei tinana, 'Au a sega ni raici rau;' se sa kilai ira na tacina, se kilai ira na luvena dina, Ni ra sa vakarorogo ki na Nomuni vosa ka maroroya na Nomuni veiyalayalati. 10 Era na vakavulici Jekope ena Nomuni lewa, kei Isireli ena Nomuni vunau. Era na biuta na ka boi vinaka e Matamuni kei nai soro taucoko e vakamai ena Nomuni cabocabo ni soro. 11 Jiova mo ni vakalouvinakataka na nona veika kece ka ciqoma na cakacaka kece ni ligana; me kuitataki na toloi koya sa via veimecaki vata kei koya kei ira sa cati koya me ra kua ni tucake tale." 12 Vei Penijamini sa tukuna kina: "O ira sa lomani mai vei Jiova era sa tiko ena Nona veimaroroi, o koya sa veivakarurugi ena siga taucoko; ena tiko o koya ena maliwa ni vatuvatu ni Tabana." 13 Vei Joseva sa tukuna kina: "Na nona vanua sa vakasaututaki mai vei Jiova, ena veika vivinaka mai lomalagi, ena tegu, kei na titobu sa koto e ra, 14 Na veivuata vivinaka ni matanisiga na vuata vinaka ni veivula, 15 Na veika uasivi mai na veiulunivanua e liu kei na veika vivinaka ena veiulunivanua sa Sega ni mudu, 16 Na veika vivinaka ena ka ni vuravura kei na ka sa sinai tu kina, kei na Nona veitokoni o Koya sa tiko mai veikau, me lako mai na veivakalouvinakataki 'Ki na ului Joseva, ena buradelai koya sa tawasei tani mai vei ira na tacina.' 17 Na Nona i ukuuku sa vaka nai matai ni dua na bulumakau tagane, na nona i leu sa vaka nai leu ni bulumakau tagane kila; ruarua oqo sa veibiligi kina o Koya, sa biligi ira na tamata ki nai yalayala kei vuravura; o ira oqo na tini na udolu na Iferaimi kei ira talega na veiudolu ni Manasa." 18 Vei Sevuloni sa tukuna kina: "Mo reki Sevuloni ena nomu lako yani kei Isakari ena loma ni nomu valelaca! 19 Era na kaciva na tamata ki na ulunivanua, mai kea era na vakacabora kina nai soro ni yalododonu; era na vakai votavota ena veika sa sinai kina na wasawasa kei nai yau levu sa vunitaki tu ena veinuku." 20 Vei Kata sa tukuna kina: "Sa kalouvinaka o koya sa vakalevutaki Kata; sa tiko me vaka na laioni ka sa dresuka na ligana kei na buradelana ni uluna. 21 Sa vakarautaka na matai ni tikina me nona ga, baleta na kenai votavota na daunivunau sa maroroi mai kea sa lako vata mai kei ira nai liuliu ni tamata; sa vakatauca na lewa e vakalou kei na Nona lewa e Isireli." 22 Vei Tani sa tukuna kina: "Sa luve ni laioni o tani, sa rika mai Pasani." 23 Ena vuku i Navitalai, sa tukuna kina: "Sa sotavi o Navitalai ena vuku ni veitotaki, ka sa sinai ena veivakalouvinakataki nei Jiova, sa taukena kina na Ra kei na Ceva." 24 Vei Esa sa tukuna kina: "O Esa sa kalouvinaka duadua vei ira na luvena, me ra totaki koya o tacina, me toni sua na yavana ena waiwai. 25 Na nomu i vava sa kaukamea kei na varasa Ena vakakina na nomu kaukauwa ena veisiga. 26 "Sa sega e tautauvata kei na Kalou e Jesuruni, sa vodo mai ena lomalagi me mai vukei iko kei na Nona cecere ena vei o. 27 Na Kalou sega ni mudu oqo sa nomuni drodro, era sa tu kina na ligana sa dodo me Sega ni mudu, ena ceburaki ira na meca e matamuni, ka ena tukuna, 'Na vakarusa!' 28 Ena tiko vinaka o Isireli, nai vurevure kei Jekope, ena vanua ni siliva kei na waini, na Nona lomalagi talega ena vakalutuma mai na tegu. 29 Sa kalouvinaka o iko Isireli! O cei sa tautauvata kei Kemuni, na kawa tamata sa vakabulai mai vei Jiova, na maroroi ni nomuni vukei kei nai seleiwau ni nomuni cecere! Era na cuva vei Kemuni o ira kece na kemuni meca, ka o ni na basuraka na nodra veivanua cecere."

Vakarua 34

Sa Mate o Mosese Ena Ulunivanua O Nipo

1 Sa lako cake mai na vanua o Moapi o Mosese ki na Ulunivanua o Nipo, ki na delana o Pisika, o Jeriko ena tai kadua. Sa vakaraitaka vua o Jiova na vanua o Kiliati me yaco sara ki Tani, 2 O Navitalai kece, na vanua o Ifereimi kei Manasa, na vanua kece o Juta me yaco sara ki na Wasawasa mai na Ra, 3 Mai na Ceva kei na Bucabuca o Jeriko, na koro ni veiniusawa lelevu, me yaco sara ki Soa. 4 Sa qai tukuna vua o Jiova, "Oqo na vanua Au sa yalataka Me'u solia vei Eparama, Aisake kei Jekope ka tukuna, 'Au na solia oqo vei ira na nomu kawa.' Au sa vakavuna oqo mo raica e matamu, o na sega ga ni takoso ki kea." 5 O Mosese na tamata i Jiova sa qai mate ena vanua o Moapi, me vaka na vosa i Jiova. 6 Sa qai buluti koya o Jiova ena dua na qakilo ena vanua o Moapi veibasai kei Peci-piori, sa sega na tamata sa kila na nona i bulubulu me yacova na siga oqo. 7 Sa yabaki dua na drau ka mani ruasagavulu na yabaki i Mosese ena gauna ea mate kina. Sa sega ni malumu na matana se na yagona, e se tu donu sara tu ga na nona bula vakayago ni sa mate. 8 O ira na luvei Isireli era sa tagicaki Mosese me tolusagavulu na siga mai na bucabuca e Moapi, sa qai oti na vakaloloku me baleti Mosese. 9 Oqo o Josua na luvei Nuni sa sinai ena yalo ni vuku kei na yalomatua, ni sa tabaki koya oti o Mosese, era sa vakarorogo vua o ira na Isireli ka cakava me vaka sa vakarota o Jiova vei Mosese. 10 E se sega ni tubu e Isireli ena gauna o ya e dua na parofita me vakataki Mosese, o koya sa veikilai kei Jiova ena matana votu, 11 Ena veivakatakilakila kece kei na veika e yaco kece sa talai koya kina o Jiova me cakava ena vanua o Ijipita, ena matai Fero, ena matadra kece na nona tamata kei na nona vanua taucoko, 12 Ena veika kece oqori, na qaqa kei na veivakarisayate, sa vakayacora o Mosese ena matadra kece na Isireli.

Josua 1

Na Kalou Sa Vakatikori Josua

1 Ni sa oti na mate i Mosese na dauveiqaravi nei Jiova, sa qai yaco ni sa vosa vei Josua na luvei Nuni nai vukevuke i Mosese o Jiova ka vaka oqo: 2 "Sa mate o Mosese na Noqu tamata, mo tucake ka takosova na Joritani oqo, o iko kei ira na tamata kece oqo, ki na vanua Au sa solia vei ira— na luvei Isireli. 3 "Na vanua kece sa butuka na qeteqete ni yavamu, Au sa solia vei iko, me vaka au sa tukuna vei Mosese. 4 "Mai na vanua liwa ni Lepanoni oqo, me yaco sara kina uciwai levu na Uciwai na Uferetisi, ki na Itaiti, me yaco ki na Wasawasa Levu ki nai dromudromu ni matanisiga, ena nomu i yalayala. 5 "Ena sega ni dua na tamata me tu rawa e matamu ena veisiga kece o sa bula kina; me vaka Au sa tiko vata kei Mosese, Au na tiko vata talega kei iko, Au na sega ni biuti iko se laivi iko. 6 "Mo kaukauwa ka doudou, ni o na wasea na nodra i votavota ni vanua na tamata oqo me vaka Au sa bubului kina vei ira na nomuni qase, Me'u solia vei ira. 7 "Mo kaukauwa ga, ka mo tamata doudou sara, mo qarauna mo cakava nai vunau kecega sa vakarota vei kemuni o Mosese na Noqu tamata, mo kakua ni lako tani mai kina, ki nai mawi se ki nai matau, mo tamata yaco kina ena veivanua kecega o lakova. 8 "Nai Vola ni Vunau oqo me kua ni lako tani mai na gusumu, mo vakanananu tiko kina ena siga kei na bogi, mo vakabauta ka cakava me vaka na ka kecega sa volai kina; o na qai tamata yaco a ena nomu i lakolako kecega, ka vuavuai vinaka. 9 "Au sa sega li ni vakarota vei iko? Mo kaukauwa ka doudou sara; mo kua ni dau rere se yalolailai, ni sa tiko vata kei iko o Jiova na nomu Kalou ena vanua kecega o lako kina." Sa Lewai Me Sa Takosovi Na Joritani 10 Sa vakaroti ira na nodra vakailesilesi na tamata o Josua ka vaka, 11 "Mo ni lakova na veitikotiko kece, sa nodra na Isireli ka vakaroti ira na tamata ka tukuna, 'Mo ni vakavakarau me baleti kemuni, ena tolu na siga mai oqo, mo ni takosova kina na Joritani, mo ni lako ka curuma na vanua sa solia vei kemuni o Jiova na nomuni Kalou mo ni taukena.'" 12 Kivei ira na Rupeni, na Kata kei na veimama ni yavusa o Manasa sa vosa kina o Josua ka tukuna, 13 "Mo ni vakananuma na vei vosa kece i Mosese na tamata ni Kalou ni sa vakarota vei kemuni ka tukuna, 'Na Kalou o Jiova sa solia vei kemuni na vakacegu, ka sa solia vei kemuni na vanua oqo.' 14 "O ira na watimuni, o ira na luvemuni, kei ira na nomuni manumanu susugi, me ra na tiko ga ena vanua sa solia vei kemuni o Mosese ena tai oqo ni Joritani, ia oi kemuni mo ni liu vei ira na tacimuni ni kemuni sa vakayaragi tiko, kei ira kece na nomuni tamata qaqa, ka vukei ira, 15 "Me yacova ni sa solia o Jiova na vakacegu vei ira na tacimuni, me vaka sa solia o Koya vei kemuni, ka ra sa taukena talega na vanua sa solia vei ira o Jiova na nomuni Kalou. Mo ni qai lesu ki na vanua sa solia vei kemuni mo ni taukena ka marautaka, o koya sa solia vei kemuni o Mosese na tamata i Jiova ena tai oqo ni Joritani vaka ki na i cadracadra ni siga." 16 Era sa sauma vei Josua ka tukuna, "Keimami na cakava, na ka kecega o ni sa vakarota vei keimami na vanua kece o ni na talai keimami kina, keimami na lakova. 17 "Me vaka ni keimami sa vakarorogo vei Mosese ena ka kecega, keimami na vakarorogo vakakina vei iko, o Jiova na Kalou duadua ga me tiko vata kei iko me vaka Nona tiko vata kei Mosese. 18 "O koya vakayadua sa talaidredre kina nomu i vakaro ka sega ni vakarorogo kina nomu vosa ena ka kecega o sa vakarota, me sa vakamatei o koya. o iko mo kaukauwa ga ka tamata doudou sara."

Josua 2

Sa Vunitaki Rau Na Yamata O Reapi

1 O Josua na luvei Nuni sa vakatala e rua na tagane mai na veikau o Akakaia, me rau yamata vuni ka tukuna, "Drau lako ka vakaraica mada na vanua, vakabibi o Jeriko." E rau sa lako ka curu ki na nona vale o Reapi na yalewa dautagane ka tiko kina. 2 Sa tukuni vua na tui Jeriko ka vaka, "E rau sa lako mai ki ke ena bogi erua na gone ni Isireli, me mai vakadikeva na vanua." 3 Sa talatala na tui Jeriko vei Reapi ka vaka: "Mo kauti rau mai na tagane e rau sa lako mai vei iko ka tiko ena nomu vale, ni rau sa lako tiko mai me mai vakadikeva na vanua." 4 Sa vunitaki rau na tagane oqo, na yalewa ka tukuna, "Io, e rau sa lako mai vei au na tagane, ia, au sa sega ni kila se rau lako mai vei. 5 "Sa qai yaco ni sa sogo na matamata ni sa buto mai, e rau sa qai lako ki tuba na tamata. Na vanua e rau lako kina, au sa sega ni kila, cicivi rau vakatotolo mo ni toboki rau kina." 6 (Ia, sa kauti rau cake o koya kina dela ni vale ka vunitaki rau ena i binibini co madu sa tuva tu ena dela ni vale.) 7 Era sa cicivi rau na sotia ena sala ki na Joritani, ni ra sa lako oti na sotia sa qai sogo na katuba, 8 Ni bera ni rau davo sobu, sa lako cake mai o Reapi kina dela ni vale, 9 Sa vosa vei rau: "Au sa kila ni sa solia na vanua vei kemuni o Jiova, kei na kemuni rogorogo sa vakarerei keimami tiko oqo, ka ra sa yalolailai kecega na tamata ni vanua ena vukumuni. 10 "Keimami sa rogoca na nona vakamaca na wasa damudamu o Jiova vei kemuni, ena nomuni lako tani mai Ijipita kei na veika o ni sa cakava vei rau na tui ni Amoraiti oi rau sa tiko mai na tai kadua ni Joritani, o Sioni kei Oki oi rau oqo o ni sa vakarusa sara vakaca. 11 "Ena gauna keimami sa rogoca kina na veika oqo, sa waicala sara na yaloi keimami; sa sega sara ga ni kune vei keimami na doudou baleti kemuni, ni sai Jiova ga na Kalou, sa Kalou mai lomalagi e cake kei vuravura era. 12 "O koya oqo, au sa kerei kemudrau, mo drau bubului vei au ena Kalou, me vaka ni'u sa vakaraitaka vei kemudrau na vinaka, mo drau vakaraitaka vakatalega kina na vinaka ki na vuvale nei tamaqu, ka mo drau solia vei au na loloma e dina, 13 "Me bula o tamaqu, o tinaqu, o ira na ganequ, o ira na taciqu, kei na ka kece era taukena ka sereki keimami mai na mate." 14 E rau sa sauma vua na yalewa, "Na neirau bula sa nomuni, kevaka sa sega ni dua e tukuna na ka keirau mai cakava. Ena yaco ga, ni sa solia vei keimami o Jiova na vanua oqo, keimami na caka vinaka vakaidina vei iko." 15 Sa qai biuti rau sobu mai katuba leka ena dali, sa vakai tikotiko o Reapi ena veivata ni lalaga ni koro. 16 Sa qai tukuna vei rau, "Drau lako kina ulunivanua, de ra qai toboki kemudrau o ira sa talai yani, drau vuni tiko mai kea me tolu na siga, me yacova ni ra sa lesu tale mai na talai yani me vesuki kemudrau. Drau qai lako yani ena nomudrau sala." 17 E rau sa tukuna na tamata vua na yalewa "Keirau na sega ni cala ena yalayala o koya keirau sa bubului kina, 18 "Mo vesuka nai sulu lokaloka oqo ena nomu katuba leka, o koya keirau sa lako sobu mai kina, ka me ratou tiko kece vei iko na tamamu, tinamu, ratou kece na ganemu kei ira kece na wekamu voleka ena nomu vale. 19 "O koya vakayadua sa curu tale ki tuba mai na katuba ni nomu vale me lako kina sala, sa na tau ga ki uluna na nona dra, ka keimami na sega ni beitaki kina. Sa na bale ga vei keimami ke dua sa mate e loma ni vale. 20 "Kevaka o sa tukuna na veika keirau mai cakava, keirau na galala mai na yalayala o sa cakava me keirau bubului kina." 21 Sa qai tukuna o Reapi, "Me yaco ga me vaka kina na nomudrau vosa." Sa qai vakatalai rau yani ka rau sa lako yani. Sa qai vesuka nai sulu lokaloka o Reapi ena katuba leka. 22 E rau sa lako kina ulunivanua me oti e tolu na siga, ni ra sa lesu tale mai na dau vakasaqaqara ka talai yani. Era sa sega ni kunei rau rawa e dua vei ira sa talai yani me vakasaqaqara. 23 E rau sa lesu yani na yamata ni rau sa siro sobu mai na ulunivanua, ka takoso yani; ka lako mai ki vei Josua na luvei Nuni ka tukuna vua na veika kece sa yaco vei rau. 24 E rau sa tukuna vei Josua, "Sa dina o Jiova sa solia vei keda na vanua kece oqo ni ra sa rere ka yalolailai na tamata kece ena vukuda."

Josua 3

Era Sa Takosova Na Joritani Na Isireli

1 Sa tucake o Josua ena mataka caca; ka era sa lako tani mai na veikau mai Akakaia ka lako mai kina Joritani, o koya kei ira kece na Isireli, ka tiko mai kea ni bera na takoso. 2 Ni sa oti e tolu na siga, era sa lako yani na vakailesilesi ena nodra i tikotiko; 3 Era sa vakaroti ira na tamata ka tukuna, "Ena gauna o ni sa raica kina na kato ni veiyalayalati nei Jiova na nomuni Kalou kei ira na bete, kei na Livai ni ra sa colata tiko, mo ni qai tucake mai na nomuni tikotiko ka muria. 4 "Me dua na maliwa, e rua na udolu na kiupiti na kemuni veiyawaki, mo ni kua ni lako voleka ki na kato, mo ni kila kina na sala mo ni muria, baleta ni o ni se sega ni lako kina e liu." 5 Sa tukuna vei ira na tamata o Josua, "Mo ni vakasavasavataki kemuni, baleta ni mataka, o Jiova, ena cakava na veika lelevu ena kemuni maliwa." 6 Sa tukuna vei ira na bete o Josua, "Mo ni colata na kato ni veiyalayalati ka takoso ena matadra na tamata." Era sa colata na kato ka lako e matadra na tamata. 7 Sa vosa o Jiova vei Josua, "Ena siga oqo Au na laveti iko ena matadra kece na Isireli, me ra na kila kina ni Au a tiko vata kei Mosese, Au na tiko talega vata kei iko. 8 "Mo vakaroti ira na bete, o ira sa colata na kato ni veiyalayalati ka tukuna, 'Ni o ni sa yaco yani ki na bati ni wai ena Joritani, mo ni qai tucake tu ena loma ni Joritani.'" 9 Sa vosa vei ira na luvei Isireli o Josua, "Ni lako mai ki ke, ka rogoca na vosa i Jiova na nomuni Kalou." 10 Sa tukuna o Josua, ena ka oqo, "O ni na kila kina ni sa tiko vata kei kemuni na Kalou bula oqo, ena sega ni vakataratutu ni na cemuri ira na veitamata oqo e matamuni, o ira na kai Kenani, na Itaiti, na Ivaiti, na Perisaiti, na Kirakasaiti, na Amoraiti kei ira na Jepusaiti: 11 "Mo ni raica, sa takoso tiko oqori na kato ni veiyalayalati i Jiova ni vuravura ena Joritani. 12 "Oqo mo taura vei iko e tinikarua mai vei ira na Isireli, dua mai na veiyavusa. 13 "Ena yaco ni ra sa butuka yani na wai o ira na bete era sa colata tiko na kato ni veiyalayalati i Jiova, na Kalou ni vuravura, sa na tu vakadua na wai ena Joritani ka na cavuka na wai drodro tiko mai, ka na tubu cake me lesu tale ka veibinibini cake." 14 Era sa biubiu mai na nodra i tikotiko na tamata me takosova na Joritani ni ra liu tiko na bete ena nodra colata tiko na kato ni veiyalayalati, 15 Ni ra sa yacova mai na Joritani o ira sa colata tiko na kato ni veiyalayalati, ka ra sa butuka yani na wai o ira na bete sa colata tiko na kato, (oqo talega sa dau gauna me sinai kina na Joritani ena wai baleta na tatamusuki), 16 Sa tu vakadua na wai sa drodro sobu tiko mai, ka sa veibinibini cake mai Atama ki Sevitani, na wai sa drodro sobu ki na Waitui Masima, (na Wasawasa Araba) sa tu vakadua ka mamaca; era sa takoso na tamata me donui Jeriko. 17 Era sa tucake tu na bete sa colata tiko na kato ni veiyalayalati ena vanua mamaca ena loma donu ni Joritani, era sa takoso tiko na Isireli ena vanua mamaca me yacova ni ra sa takosova kece na Joritani o ira na tamata.

Josua 4

Na Veivatu Ni Vakananumi

1 Ni sa yaco mera takosova kece na Joritani na tamata, sa vosa o Jiova vei Josua ka vaka: 2 "Mo kauta mai e tinikarua na tagane mai vei ira na tamata, e dua mai na veiyavusa, 3 "Ka vakaroti ira, 'Me ra kauta mai e tinikarua na vatu mai na loma ni uciwai na Joritani ena vanua era sa tu kina na bete, ni ra sa cola tu na kato ena loma donu ni Joritani, mo ni qai kauta mai ka biuta ena vanua o ni sa cegu kina ena bogi oqo.'" 4 Era sa qai digitaki mai o ira na tagane yadua mai na veiyavusa yadua, ka sa kacivi ira mai o Josua; 5 Ka sa tukuna vei ira, "Dou takosova na mata ni kato i Jiova na nomudou Kalou ena loma donu ni Joritani, dou tomika yadua mai na vatu ka colata mai tabamudou me vaka ga nai wiliwili ni yavusa yadua ni Isireli, 6 "Oqo mei vakatakilakila vei kemuni ni ra sa taroga vei kemuni o ira na luvemuni ena veisiga mai muri. 'Se sa cava nai balebale ni veivatu oqo?' 7 "Mo ni qai tukuna vei ira ni a tu vakadua na wai ena Joritani ni sa takoso na kato ni veiyalayalati ni Kalou; oqo na veivatu sa tu me kena i vakananumi vei ira na luvei Isireli me sega ni mudu." 8 Era sa cakava vakakina na Isireli, me vaka nai vakaro i Josua, era sa tomika mai e tinikarua na vatu mai na Joritani me vaka na vosa i Jiova vei Josua, me vaka nai wiliwili ni veiyavusa yadua ni Isireli, era sa colata yani ena vatuvatu ni tabadra ki na vanua era na tiko kina ena bogi koya. 9 Sa biuta talega o Josua e tinikarua na vatu ena loma donu ni Joritani, ena vanua e ratou sa tucake tu kina na bete sa colata tiko na kato mei vakananumi me yacova na siga oqo. 10 Era sa colata tu na kato o ira na bete ena loma donu ni Joritani me yacova ni sa vakayacori oti na veika kece sa vakarota o Jiova vei Josua me tukuna vei ira na tamata, me vaka na ka kecega sa vakarota o Mosese vei Josua; era sa vakatotolo na tamata ka takoso. 11 Sa qai yaco oqo, ni ra sa takoso kece na tamata, era sa qai takoso mai na kato ni veiyalayalati ni Kalou kei ira na bete ena matadra kece na tamata. 12 O ira na tagane mai vei Rupeni kei Kata kei ira na veimama kei Manasa era sa takoso mai kei na nodra i yaragi ni vala ena matadra na Isireli, me vaka sa tukuna o Mosese. 13 E vasagavulu na udolu na tamata i valu vakarautaki oti, era sa takoso ena mata ni Kalou me ia nai valu ena buca mai Jeriko. 14 Ena siga o ya sa laveti Josua o Jiova ena matadra na Isireli kecega; era sa rerevaki Josua ena veisiga kece sa bula kina, me vaka ga na nodra rerevaki Mosese. 15 Sa vosa o Jiova vei Josua ka vaka, 16 "Vakaroti ira na bete, o ira sa colata tiko na Kato ni Vakadinadina me ra lako cake mai na Joritani." 17 Sa qai vakaroti ira na bete o Josua ka vaka: "Mo ni lako tani mai na Joritani." 18 Sa qai yaco ni ra sa lako tani mai na bete sa colata tiko na kato ni veiyalayalati ka butuka na qele mamaca, sa lesu tale na wai ena Joritani me vaka na kena i tutu makawa, ka sa drodro vinaka tale. 19 Era sa lako tani mai na Joritani na tamata ena i katini ni siga ni matai ni vula, ka ra sa mai tiko e Kilikali ena tokalau kei Jeriko. 20 Na veivatu e tinikarua era sa kauta mai na Joritani, sa mai tuva o Josua e Kilikali. 21 Sa qai vosa vei ira na luvei Isireli ka vaka: "Kevaka era sa taro na gone vei tamadra ena veigauna sa na lako mai, 'Na cava na veivatu oqo?' 22 "Mo ni qai tukuna vei ira na luvemuni me ra kila, 'Ni o ira na Isireli era takosova na Joritani ena qele mamaca'; 23" Ni o Jiova na nomuni Kalou sa vakamaca na wai ena Joritani e matamuni me yacova ni o ni sa takoso kece, me vaka sa vakayacora ena Wasawasa Damudamu o Jiova na nomuni Kalou, ni sa vakamamacataka me yacova ni kemuni sa takoso kece, 24 "Me ra kila kina na tamata kecega e vuravura ni sa kaukauwa sara na ligai Jiova na nomuni Kalou, mo ni rerevaka kina na Kalou me sega ni mudu."

Josua 5

Era Sa Cilivi Nai Karua Ni Tabatamata

1 Sa vakaoqo: O ira kece na tui ni Amoraiti ena ra ni wai na Joritani kei ira kece na tui ni Kenani sa tiko voleka ena wasawasa, era sa rogoca ni o Jiova sa vakamaca na wai ena Joritani ena matadra na luvei Isireli, me yacova ni ra sa takoso kece, sa waicala kina na yalodra; ka sa sega ni tu vata kina kei ira na yalodra ena vukudra na luvei Isireli. 2 Ena gauna o ya sa tukuna kina vei Josua o Jiova, "Cakava eso nai sele vatu kaukauwa ka cilivi ira tale na luvei Isireli ena i karua ni gauna." 3 Sa cakava o Josua nai sele ka cilivi ira na luvei Isireli ena sovuna ni kuli ni yagodra. 4 Oqo na vuna sa cilivi ira kina o Josua: o ira kece sa lako mai Ijipita ka tagane, o ira kece na tamata i valu, era sa mate kece ena vanua liwa ena nodra lako tiko mai, ni ra sa lako tani tiko mai Ijipita. 5 O ira kece sa lako tani mai Ijipita, era sa cilivi oti, o ira kecega sa sucu ena vanua liwa ena nodra lako tani mai Ijipita. 6 Ni ra sa lako tiko mai na Isireli me vasagavulu na yabaki ena vanua liwa, me yacova ni ra sa vakayali kece na tamata i valu o ira sa lako mai Ijipita baleta ni ra sa sega ni via rogoca na domo i Jiova— o ira oqo sa yalayala kina na Kalou me solia vei ira na tamadra, "na vanua sa drodro ki na na sucu kei na oni." 7 Sa cilivi ira na dui luvedra o Josua, o ira ga era sa vakatuburi mai vua, era a sega ni cilivi baleta nai lakolako ena sala. 8 Ni ra sa cilivi oti na tamata kecega, era sa tiko ga ena nodra i tikotiko me yacova ni sa maca kece sara na we ni i sele. 9 Sa qai vosa ko Jiova vei Josua ka vaka; ""Ena siga oqo, Au sa vakaqiqica tani kina na ca kece mai Ijipita mai vei iko. O koya oqo sa vakayacani kina na vanua koya o Kilikali me yacova na siga oqo. 10 Era sa tiko ga na luvei Isireli e Kilikali ka maroroya na Lako Sivia e nai ka tinikarua ni siga ni vula ni sa dromu na matanisiga ena buca mai Jeriko. 11 Era sa kania na vua ni qele ena siga sa oti kina na lako sivia, na madrai sega ni vakaleveni, kei na sila ena siga vata ga o ya. 12 Sa mai cegu na mana ena siga era sa kania kina na vua ni qele; o ira na luvei Isireli sa oti vei ira na nodra kania tiko na mana, ka ra sa kania ga na kakana e Kenani ena yabaki o ya.

Nai Liuliu Ni Mataivalu I Jiova

13 Sa yaco ni sa voleka mai ki Jeriko o Josua, ka sa rai cake, sa raica sa tucake tu e dua na Tamata e matana, ka sa taura tu nai sele e ligana. Sa lako Vua o Josua ka taroga, "O sa to vata kei keimami se kei ira na meca?" 14 Sa tukuna mai o Koya, "Sa sega, Au sa Nona na Kalou," Au sa lako mai kina oqo. Sa cuva vakatobuicu kina qele o Josua ka tukuna, "Na cava o Ni sa via tukuna vua na Nomuni tamata?" 15 Sa tukuna mai na Turaga ni mataivalu nei Jiova ka vaka: "Josua, Luvata na nomu i vava, ni sa qele tabu o sa tu kina oqo." Sa vakayacora vakakina o Josua.

Josua 6

Na Vakarusai Kei Jeriko

1 Sa yadravi vakavinaka o Jeriko ena vukudra na Isireli, sa sega e curu ki tuba, sa sega talega e curu mai ki loma. 2 O Jiova sa tukuna vei Josua: "Raica Au sa soli Jeriko kina ligamu, na kena tui talega kei ira na kena tamata qaqa ni valu. 3 "Mo ni lako vakavolivolita na koro, oi kemuni kece na tamata i valu, mo ni lakova vakavolita vakadua na koro. Mo ni cakava oqo me ono na siga. 4 "Me vitu vei ira na bete, me ra taura tiko e vitu na davui caka ena i leu ni sipi tagane ena mata ni kato ni veiyalayalati. E nai kavitu ni siga, mo ni qai lako vakavolivolita na koro vakavitu, ena kena i kavitu mera qai uvuca na davui o ira na bete. 5 "Ena qai yaco, ni ra sa uvuca na davui na bete, ka o ni sa rogoca kece na domo ni davui, mo ni qai kaila ena dua na kaikaila levu, ena qai kabasu na bai ni koro. Era na qai veilakoyaki voli na tamata." 6 Sa qai kacivi ira na bete o Josua ka tukuna vei ira, "Mo ni colata na kato ni veiyalayalati, me vitu na bete me ra taura tiko na davui sa caka ena i leu ni sipi tagane, ka liu tiko ena mata ni kato ni Kalou." 7 Sa qai tukuna vei ira na tamata kece, "Me sa tekivu oqo, mo ni lako vakavolivolita na koro, o koya sa vakayaragi tiko mera sa liu, me qai muri tiko yani na kato ni Kalou." 8 Sa qai yaco ni sa vosa oti o Josua vei ira na tamata, o iratou na bete lewe vitu ka sa taura tiko na davui i leu ni sipi tagane ena mata i Jiova, era sa liu ka uvuca tiko na davui, ka sa qai muri ira yani na kato ni veiyalayalati i Jiova. 9 O ira na cola i yaragi era sa liu tiko vei ira na bete ka ra uvu davui, sa tarava yani na cola kato ni Kalou, o ira na bete era sa toso ni uvu tiko na davui. 10 Sa vakaroti ira na tamata o Josua ka vaka: "Mo ni kua ni kaila se me rorogo mai na domomuni, ka me kua sara ga ni dua e rogo mai e dua na vosa mai na gusuna me yacova ni'u sa tukuna, 'Kaila!' Mo ni qai kaila." 11 Sa qai raica o Josua me wavokitaka na koro na Kato ni Kalou, me wavoki vakadua, era sa qai lesu tale mai me mai cegu ena nodra i tikotiko. 12 Sa tucake vakamatakalailai o Josua, o ira na bete era sa colata na kato ni Kalou. 13 O ira na lewe vitu na bete era sa taura tiko na davui, era sa liu tiko ena mata ni kato ni Kalou ka uvuca tiko na davui. Era sa liu tikoga na tamata vakayaragi ni valu. Era sa muria tale tiko ga yani na kato ni Kalou o ira na vakayaragi ni valu, ni ra sa uvuca tikoga na davui o ira na bete. 14 Ena i karua ni siga era sa lako volivolita na koro vakadua, ka ra sa lesu tale kina koro vakadua, ka ra sa lesu tale kina nodra i tikotiko. Sa caka tiko oqo me ono na siga. 15Sa yaco oqo ena i kavitu ni siga, era sa yadra sara vakamataka lailai ni se qai kida na mataka. 16 Ena kena i kavitu ni gauna, me vaka sa yaco, ni ra sa uvuca tiko na nodra davui o ira na bete, sa tukuna o Josua vei ira na tamata: "Mo ni kaila ni sa solia vei kemuni na koro oqo o Jiova! 17 "Oqo, na koro sa vakarusa o Jiova ena veivakarusai, o Reapi, duaduaga ena bula, o koya kei ira vakayadua sa tiko vata kei koya ena vale, baleta ni sa vunitaki rau nai talai eda sa tala yani. 18 "Koi kemuni, ena nomuni veika kece, mo ni maroroi kemuni mai na veika e dauveivakarusai de ko ni vakarusai ni kemuni sa taura na veika e dauveivakarusai, ka qai vakavuna me vakarusai na nodrai tikotiko na Isireli ka vakacacana sara. 19 "Na siliva kece, na koula kece, nai yaya kece vakavarasa kei na kena e kaukamea, sa vakatabui me nona na Kalou; me ra kau mai ki na nona i lololo na Kalou." 20 Era sa kaila kecega na tamata ni ra sa uvuca na biukila na bete, sa yaco ni ra sa rogoca na tamata na domo ni biukila kei na nodra kaila vakadomoilevu, sa kabasu ka lutu vakadua ki ra na bai lalaga. Era sa curu ki na koro na tamata. Era sa curu yani na tamata yadua ga ka taura na koro. 21 Era sa vakarusa kecega na ka sa tu ena loma ni koro, o ira na qase, na gone, na tagane, na yalewa, na bulumakau, na sipi, na asa ena i seleiwau. 22 O Josua sa tukuna oti vei rau na yamata vuni, "Drau lako ka kauta mai na yalewa dauvolitaki koya, kei ira kecega sa tiko vata kei koya, me vaka ga drau sa yalayala oti kina vei koya." 23 Rau sa lako sara na cauravou oqo ka kauti Reapi mai, o tamana kei tinana, kei ira na ganena vata kei ira kecega sa tiko vata kei koya. E rau sa kauti koya mai kei ira kece na wekana, ka ra sa mai vakai tikotiko ena taudaku ni nodra i tikotiko na Isireli. 24 Era sa qai vakama na koro kei na ka kecega sa tu kina, na siliva ga, na koula kei na veika vaka varasa kei na kaukamea era sa kau mai ka biu ki nai lololo vakalou. 25 Sa vakabulai Reapi o Josua kei na vuvale kece nei tamana kei na veika kece sa nona. Sa tiko e Isireli o koya me yacova na siga oqo, baleta ni sa vakabulai rau na Isireli e rau sa talai yani me yamata ki na vanua. 26 Sa qai lewa vei ira o Josua ena gauna o ya ka tukuna kina, "Ni sa na kalouca na tamata ena matai Jiova o koya sa via tucake me tarai Jeriko cake tale, ena yavu ni koro o ira na nona ulumatua, kei ira na luvena lalai era bini cake me matamata." 27 Sa tiko vata kei Josua o Jiova, ka sa rogovaki na kena i rogorogo ena vei vanua kecega.

Josua 7

Na Druka Mai Ai

1 O ira na luvei Isireli era sa vakayacora e dua na talaidredre levu me baleta tiko na veika e dauveivakarusai, ni o Ekani na luvei Kami, na luvei Sabidi, na luvei Sera mai na yavusa o Juta, sa taura e dua na ka sa dau ia kina na veivakarusai, oqo sa tubu kina na cudru ni Kalou ka waqa vakalevu vei ira na luvei Isireli. 2 O Josua sa tala eso na tagane mai Jeriko ki Ai, na vanua sa voleka ga e Peci-aveni ena tokalau kei Peceli, ka tukuna vei ira, "Dou lako cake ka vakaraica mada na vanua." Era sa lako cake oqo ka vakaraica na vanua o Ai. 3 Era sa lesu mai ka tukutuku vei Josua, "Me ra kua ni lako cake kece na tamata, mera lako cake ga e rua se tolu na udolu na tamata ka kabati Ai. Me ra kua ni vakaocai na tamata, ni ra sa lewe lailai ga." 4 Era sa lako cake e tolu na udolu na tagane mai vei ira na tamata, ia era sa dro mai vei ira na kai Ai. 5 O ira na kai Ai era sa vakamatea e tolusagavulu ka ono na tamata, vei ira na Isireli ni ra sa vakacemuri mai na matamata me yaco sara ki Sebarimi ka ra sa vakamatei oqo ena i sirosiro; o koya oqo sa waicala kina na yalodra na tamata me vaka na wai. 6 Sa dresulaka na nona i sulu o Josua, ka sa cuva vakatoboicu ki na qele ena mata ni kato ni Kalou, me yacova na yakavi, o koya kei ira na qase ni Isireli, era sa boro dravusa ki na uludra. 7 Sa vosa o Josua ka vaka: "I Jiova na Kalou ena cava o Ni sa vakatakosovi ira kina na tamata oqo mai na JoritaniO Mo Ni soli keimami ki na ligadra na Amoraiti me vakarusai keimami? E vinaka cake me keimami tikoga mai na tai ka dua ni Joritani! 8 "I Jiova, na cava me'u tukuna, ni ra sa dro na Isireli mai vei ira na meca? 9 O ira na kai Kenani kei ira kece sa tiko ena vanua era na rogoca ka tu vata mai me vakayalia na yacai keimami mai na delai vuravura. Na cava o Ni sa cakava ena vuku ni yacamuni sa rogovaki yani?"

Nai Valavala Ca I Ekani

10 Sa vosa o Jiova vei Josua ka vaka; "Tucake na cava o sa davo vakatoboicu ka vakanamata tiko kina ki na qele? 11 "Sai valavala ca o Isireli, ka ra sa vakacacana na Noqu veiyalayalati, au sa vakarota vei ira. Sa yaco sara mera taura eso na veika sa dau ia kina na veivakarusai dou sa butakoca ka veivakaisini kina, era sa biuta vata kei na veika sa nodra vakadodonu. 12 "Oqo era sa sega ni tu rawa kina na Isireli ena matadra na kedra meca, era sa dro ga mai vei ira na meca, baleta ni ra sa soli tu mera vakarusai. Au na sega ni tiko vata kei kemuni, vakavo ga kevaka o ni sa na kauta tani na veika ni veivakarusai sa maroroya tiko. 13 "Tucake, vakasavasavataki ira na tamata ka tukuna, 'Mo ni vakasavasavataki kemuni ni mataka, baleta ni sa tukuna o Jiova na Kalou ni Isireli: "E dua na ka ni veivakarusai sa tiko ena kemuni maliwa, kemuni na Isireli, o ni na sega ni tu rawa e matadra na meca vakavo, kevaka sa kau tani na ka e veivakarusai mai na kemuni maliwa." 14 'Ena mataka mo ni lako mai me vaka na nomuni dui yavusa, na yavusa yadua mera lako mai vakaveiwekani e taucoko, na veiwekani e taucoko mera lako mai vakavuvale, na vuvale yadua mera lako yadudua mai na kena tamata. 15 'Ena qai yaco o koya sa taura na ka ni veivakarusai oqo me qai vakamai ena bukawaqa caucaudre, o koya kei na ka kece sa tu vua, baleta ni sa talaidredre ki na veiyalayalati i Jiova, ka ni sa cakava talega o koya e dua na ka veivakamaduataki levu e Isireli.'" 16 Sa tucake vakamataka o Josua ka kauti Isireli mai me vaka na nodra dui yavusa, ka sa tauri na yavusa o Juta. 17 Sa kauta mai na mataqali i Juta ka tauri ira na vuvale nei Sera, sa kauti ira mai vakayadudua na tagane ka sa dusi o Sabidi. 18 Era sa kau mai na tagane vakayadudua ka sa dusi o Ekani na luvei Kami, na luvei Sabidi, na luvei Sera, na luvei Juta. 19 Sa vosa o Josua vei Ekani, "Na luvequ, au kerei iko, solia na vakarokoroko vei Jiova na Kalou ni Isireli, ka cakava na vakatutusa vua, ka tukuna vei au oqo na ka o sa cakava, kua ni vunitaka vei au." 20 Sa sauma vei Josua o Ekani ka vaka: "Sa dina sara, au sai valavala ca vei Jiova na nodra Kalou na Isireli, oqo na veika au sa cakava: 21 "Au sa raica ena kedra maliwa nai toki ni valu e dua nai sulu vakapapiloni, e ruanadrau na sikele siliva, e dua na tiki ni koula sa limasagavulu na sikele. Au sa kocova ka taura me noqu. Sa tu ga oqori, ka vunitaki tu ni sa bulu tu ena loma donu ni vale, sa tiko era na siliva." 22 Sa talai ira na tamata o Josua ki na vale nei Ekani, ka ra sa raica na veika sa vunitaki tu kei na siliva. 23 Era sa kauta mai ki vei Josua ki vei ira kece na luvei Isireli, ka tukuna vei ira ena mata ni Kalou. 24 O Josua kei ira kece na Isireli, era sa tauri Ekani na luvei Sera, na siliva, nai sulu, na tiki ni koula, na luvena tagane kei na yalewa, nona bulumakau, na nona asa, na nona sipi, na nona vale laca kei na veika kece sa tu vua, era sa kauta mai ki na buca o Akori. 25 "Ena cava o sa vakaleqai keimami kina?" Sa taroga o Josua, "O Jiova ena vakaleqai iko ena siga oqo." Era sa vakaviriki koya kece na Isireli ena vatu, ka vakamai iratou kece ena bukawaqa caucaudre, ni ra sa vakaviriki oti ena vatu. 26 Era sa binia vata e dua nai binibini vatu levu me tu ka yacova na siga oqo. Sa qai tamoi mai na nona cudru levu na Kalou mai na ka koya. Sa vakayacani na vanua koya me na Buca o Akori me yacova na siga oqo.

Josua 8

Na Lutu Nei Ai

1 Sa qai vosa vei Josua o Jiova, "Mo kua ni rere se yalolailai, tauri ira kece na tamata i valu oqo, tucake ka lako ki Ai. Au sa solia na tui Ai kina ligamuni, o ira na nona tamata, na nona koro kei na nona vanua. 2 "Mo ni cakava vei Ai kei na kena tui me vaka o ni sa cakava vei Jeriko kei na kena tui, nai drodro ni valu kei na kena bulumakau sa tara mo ni kauta, mo ni lawavaka na koro mai dakuna." 3 Sa tucake o Josua kei ira kece na tamata i valu, me ra sa lakovi cake na kai Ai, sa digitaki ira e tolusagavulu na udolu na tamata i valu o Josua, ka sa vakatalai ira yani ena bogi. 4 Sa vakaroti ira o Josua, mo ni kila, "Mo ni wawa vakavuni ena vuku ni koro mai na daku ni koro. Mo ni kua ni lako vakayawa mai na koro, ia mo ni vakarau kece tu ga. 5 "Oi au kei ira kecega na tamata sa tiko kei au, keimami na torova yani na koro, ena yaco ni ra sa lakovi keimami mai me vaka na kenai matai, keimami na dro e matadra. 6 "Era na cicivi keimami mai me yacova ni ra sa lako kece mai ena taudaku ni koro, ni ra na tukuna, 'Era sa dro e matada me vaka na kena i matai.' Eda na dro kina e matadra. 7 "Mo ni qai tucake mai na nomuni vunivuni ka taura na koro, o Jiova na nomuni Kalou ena soli ira ki na ligamuni. 8 "Ena yaco ni kemuni sa taura na koro, mo ni qai vakama na koro taucoko. Mo ni cakava me vaka nai vakaro kecega i Jiova, mo ni raica au sa vakaroti kemuni." 9 Sa vakatalai ira o Josua, era sa lako ka toka vakavuni, era sa tiko ena kedra maliwa o Peceli kei Ai ena ra kei Ai; ia o Josua sa tiko vata kei ira na tamata ena bogi koya. 10 Sa tucake o Josua ena mataka caca, ka sa tuvai ira na tamata, ka lako cake, o koya kei ira na qase kei Isireli, ena matadra na tamata ki Ai. 11 O ira kece na tamata i valu era sa lako cake mai ka toso voleka mai ena koro, ka mai tiko vakalailai ena yasana e cake kei Ai. Sa dua ga na buca e wasei ira, mai vei Ai. 12 Sa kauta o Josua e lima na udolu na tamata me ra laki toka vuni ena kedrau maliwa o Peceli kei Ai, na yasana ena ra ni koro. 13 Ni ra sa tuva oti na tamata, o ira kece na tamata i valu ena vualiku ni koro kei ira sa tiko e muri ena ra ni koro, sa lako o Josua ena bogi o ya ena loma donu ni buca. 14 Sa qai yaco ni sa raica na tui Ai na veika oqo, o ira na tamata e na koro era sa tucake ena mataka ka lako yani me vala kei ira na Isireli, o koya kei ira na nona tamata, ena vanua sa digitaki ena buca.Era sa sega ni kila ni ra sa tu vakavuni me ra valuti koya ena daku ni koro. 15 O Josua kei ira na Isireli era sa vuki me vaka era sa vakadrukai oti, ka ra sa dro vaka ki na vanua liwa. 16 Era sa kacivi kece mai na tamata mai Ai, me ra cicivi ira, era sa vakayarayarataki tani mai na koro. 17 Sa sega tale ni dua na tagane e vo mai Peceli kei Ai me sega ni cicimuri ira na Isireli. 18 Sa vosa o Jiova vei Josua, "Mo dodoka yani na moto, sa tiko oqori e ligamu vaka ki Ai, Ni'u sa na solia ki na ligamu." Sa qai dodoka yani na moto o Josua sa tiko e ligana vaka ki na koro. 19 O ira sa tiko vakavuni sa lako mai, era sa cici mai vakatotolo ni sa dusivaki yani na moto mai vei Josua. Era sa curu ena koro ka taura ka vakatotolotaka me vakama. 20 Ni ra sa rai vuki mai na kai Ai, era sa raica na kubou ni buka mai na koro sa tarai lomalagi. Sa sega vei ira na kaukauwa me ra dro ki liu se ki muri ni ra sa cici lesu tiko mai na Isireli me valuti ira. 21 Ni ra sa raica na Isireli, ni ra sa taura na koro o ira na tu vakavuni tu kei na kubou sa tubu cake, era sa vuki lesu mai ka samuti ira na kai Ai. 22 O ira era sa lako tani mai na koro era sa mai tao ena kedra maliwa na Isireli, era sa sega ni kila me dro ki vei, vaka se vaka. Era sa vakamatei kece ka sa sega e vakavo me dro bula. 23 Ia, era sa taura bula na tui Ai, ka kauta mai vei Josua. 24 Sa qai yaco ni sa oti na nodra vakamatei na tiko mai Ai vei ira na Isireli ena vanua mai na vanua liwa era sa cemuri kina, ni ra sa mate kecega ena i sele i wau me yacova ni ra sa qeyavu kece, era sa lesu kece na Isireli ki Ai ka vakamatei ira ena i seleiwau. 25 O ira kece sa vakamatei ena siga o ya na tagane kei na yalewa, era lewe tinikarua na udolu – o ira kecega na tagane mai Ai. 26 O Josua sa sega ni vakasuka tale na ligana ni sa dodoka yani na moto, me yacova ni ra sa vakamatei kece na tiko e Ai. 27 Na manumanu susu ga kei nai toki ni valu era sa kauta na Isireli me nodra, me vaka na vosa i Jiova sa vakarota vei Josua. 28 Sa vakamai Ai o Josua ka cakava me bini tu kina na rusa me yacova na siga oqo. 29 Na tui mai Ai sa vakakukunataki ena dua na vunikau ena yakavi ga o ya. Ni sa dromu na siga, sa vakarota o Josua me kau sobu mai na yago mai na vunikau ka viritaki yani ki na matamata ni koro, ka me buluti yani ena vatu me binibini levu me yacova na siga oqo. Sa Vakavouia Na Veiyalayalati o Josua 30 Sa tara cake e dua nai cabocabo ni soro o Josua vua na Kalou o Jiova ni Isireli ena ulunivanua o Ipali, 31 Me vaka sa vakarota o Mosese na tamata ni Kalou vei ira na luvei Isireli, me vaka ena i Vola ni Vunau i Mosese: "Nai cabocabo ni soro sa tara ga ena vatu ka sega na tamata me vakayagataka kina nai tuki se nai vako." Me ra vakacabora kina nai soro kama vei Jiova kei nai madrali ni veivinakati. 32 Mai kea, ena matadra kece na luvei Isireli, sa vola o Josua ena vatu e dua nai lavelave ni vunau i Mosese, sa vola oti o koya. 33 O ira kece na Isireli, o ira na qase, na vakailesilesi, na daunilewa era sa tucake tu ena yasa ni kato ruarua ena matadra na bete kei ira na Livai, o ira sa dau colata na kato ni veiyalayalati ni Kalou, o ira na kaitani, o ira talega sa mai sucu vei ira. E veimama vei ira era sa tiko rawa ena ulunivanua o Kirisimi ka veimama vei ira sa tiko ena ulunivanua o Ipali, me vaka sa vakarota o Mosese na tamata ni Kalou me na dau vosa vakalouvinakataki ira na tamata na Isireli. 34 Sa qai wilika kece vei ira nai vola ni vunau, na kalouvinaka kei na kalouca, me vaka na ka kecega sa volai e nai Vola ni Vunau. 35 Sa sega na vosa sa vakarota o Mosese, me sega ni wilika o Josua ena matadra nai soqosoqo levu ni Isireli, o ira na yalewa kei ira na gone, kei ira na gone lalai, o ira na kaitani sa tiko vata kei ira.

Josua 9

Na Veidinadinati Kei Kipioni

1 Sa qai yaco na gauna, o ira kece na tui era sa tiko ena tai oqo ni Joritani, mai na ulunivanua ki na veibuca, na veibaravi ni wasawasa levu vaka ki Lepanoni O na Itaiti, na Amoraiti, na Kenanaiti, na Perisaiti, na Ivaiti kei ira na Jebusaiti O era sa rogoca, 2 Era sa soqoni vata me veivala kei Josua kei ira na Isireli, ena dua ga na yalo. 3 Ni ra sa rogoca o ira na kai Kipioni na ka oqo, ka ra sa kila na veika sa cakava o Josua vei Jeriko kei Ai, 4 Era sa cakacaka vakaqaseqase, ka ra sa lako mai vakayawa mai vanua tani, sa vodo tu mai ena nodra asa na taga makawa ka tauvi duka, na kato ni waini sa makawa sara ka kakadresudresu, 5 na nodra i vava sa culai vakalevu baleta ni sa rui makawa sara na kena daramaki tu, era sa vakaisulu tu ena i sulu makawa sara kei na kedra madrai sa mamaca ka bulagi vakaca sara. 6 Era sa lako cake vei Josua ki Kilikali, ka tukuna vei koya kei ira kece na Isireli ka vaka: "Keimami sa lako mai ena vanua yawa, oqo meda veiyalayalati mada." 7 Era sa tukuna na Isireli vei ira na Ivaiti, "O ni sa tiko vakadede kei keimami, meda veiyalayalati vakacava?" 8 Era sa tukuna vei Josua, "Keimami sa nomuni dauveiqaravi," sa vosa vei ira o Josua, "O cei oi kemuni, o ni sa lako mai vei?" 9 Era sa sauma, "O ira na nomuni tamata era sa lako mai ena vanua yawa sara, baleta na yaca i Jiova na nomuni Kalou, keimami sa rogoca na kena i rogorogo kei na veika kecega sa cakava mai Ijipita, 10 "kei na ka kecega sa cakava vei rau na tui Amoraiti mai na tai kadua ni Joritani vei Sioni talega na tui Esiboni kei Oki na tui Pasani o koya sa tiko mai Asitaroci. 11 "O ira na neimami qase kei ira kece sa tiko kei keimami era sa mai vosa vei keimami ka vaka: 'Taura nai solisoli kei nai vaqa mo ni lako ka sotavi ira ka tukuna, "Keimami sa nomuni tamata, oqo, me dua na noda veiyalayalati."' 12 "Na madrai oqo, keimami kauta mai ni se katakata me keimami vaqa. Mo ni raica oqo sa mamaca ka bulagi makawa sara. 13 "Na kato ni waini oqo e se ka vou, oqo sa kabasu ka makawa sara, sa vaka kina na neimami vava, sa vuki cula ga ni sa kabasu tikoga ena vuku ni lakolako ni rui yawa sara." 14 Era sa taura nai solisoli o ira na Isireli, io, era se sega ni taroga nai vakasala mai vei Jiova. 15 O Josua sa veiwekani kei ira ka cakava na veiyalayalati mera bula; era sa yalayala kina nai liuliu ni soqosoqo. 16 Ni sa oti e tolu na siga ni veiyalayalati, era sa qai kila, ni ra tamata voleka ga ena vanua era tiko kina. 17 Era sa qai lako mai na Isireli kina vanua era a lako yani kina na kai Kipioni, ka yaco yani ni oti e tolu na siga. Na nodra veikoro o Kipioni, o Kifira. o Pieroci, kei Kiriaci-jiarimi. 18 Era sa sega ni valuti ira o ira na Isireli, baleta ni sa caka oti na veiyalayalati mai vei ira na nodra i liuliu na Isireli ena yaca i Jiova na nodra Kalou. Sa vosa kudrukudru ga o ira nai soqosoqo ena vukudra na veiliutaki. 19 Era sa vosa na veiliutaki vei ira na Isireli, "Keimami sa bubului vei ira ena yaca i Jiova na Kalou ni Isireli; o koya oqo eda na sega ni tarai ira kina. 20 "Oqo eda na cakava vei ira, eda na vakatara mera bula, de qai tarai keda na cudru katakata ni Kalou, baleta na yalayala eda sa bubului kina vei ira." 21 Era sa vosa o ira na veiliutaki ka vaka, "Mera vakabulai, ia, mera sa yaco ga me ra dau taya mai na noda buka ka takiva mai na me da wai me vaka era sa yalataka na veiliutaki." 22 Sa qai kacivi ira na kai Kipioni o Josua ka vosa vei ira ka vaka: "Ena cava o ni sa lasutaki keimami kina ena nomuni tukuna ni 'O ni sa lako mai vakayawa,' ia, na kena dina ga ni o ni sa tiko voleka ga? 23 "Oqo, o ni sa vakakaloucataki kina, ka sega vei kemuni ena sereki mai na nona veivakabobulatakiOme dau ta buka ka dau taki wai ena vale ni noqu Kalou." 24 Era sa sauma vei Josua ka tukuna, "Sa vakaidina ni tukuni vei ira na nomuni tamata, ni o Jiova na nomuni Kalou sa vakarota na nona tamata o Mosese me solia vei kemuni na vanua taucoko oqo, o ni na vakarusai ira kece na tamata ena vanua era sa tu e matamuni; keimami sa rere kina vakalevu baleti kemuni, o ya na vuna keimami sa cakava kina na veika oqo. 25 "Oqo, keimami sa tu e ligamuni, mo ni cakava vei keimami na veika e vinaka ka dodonu vei kemuni, mo ni cakava vei keimami." 26 Sa cakava o koya mera sereki ka vakabulai mai na ligadra na Isireli, ka ra sa sega ni vakamatei. 27 Mai na siga o ya, o Josua sa cakava me ra dau caka buka ka dau cola wai vei ira nai soqosoqo levu ni Kalou kei nai cabocabo ni soro i Jiova, ki na vanua sa digitaka o Koya me yacova na veisiga oqo.

Josua 10

Sa Tu Vakadua Na Matanisiga

1 Sa qai yaco ena gauna sa tui kina e Jerusalemi o Adoni- Sateki, sa rogoca o koya ni sa samuti Ai sara vakaca o Josua—me vaka ga e a vakayacora vei Jeriko kei ira na kena tui kei ira talega na tui Ai—kei na nodra la'ki veiyalayalati na kai Kipioni kei ira na Isireli, 2 Era sa rere vakalevu baleta ni o Kipioni sa rui koro levu me vaka e dua na koro turaga, baleta talega ni sa levu cake mai vei Ai, o ira talega na kena tamata era sa tamata qaqa. 3 O koya oqo sa talatala kina o Adoni-Sateki na tui Jerusalemi, kivei tui Epirani, tui Jamuci, kei Jafia na tui Lakisi kei Debiri na tui Ekiloni, ka tukuna, 4 "Dou lako mada mai vei au ka vukei au, me datou valuti Kipioni mada ni sa ia na veivinakati kei Josua kei ira na luvei Isireli." 5 O koya oqo, o iratou na tui ni Amoraiti, tui Jerusalemi, tui Epirani, tui Jamuci, tui Lakisi kei tui Ekiloni, era sa soqoni vata ka lako cake ka wawa tiko, o ira kece na tamata i valu ena matai Kipioni, me valuti koya. 6 Sa talatala talega o ira na Kipioni vei Josua mai Kilikali ka vaka: "Kakua ni biuti ira na nomuni dauveiqaravi; lako mai vakatotolo vei keimami, vakabulai keimami ka vukei keimami, ni o ira kece na tui ni Amoraiti, o ira sa tiko ena veiulunivanua, era sa soqoni vata me valuti keimami." 7 Sa lako cake mai Kilikali o Josua o koya kei ira kece na tamata i valu kei ira kece na tamata qaqa. 8 Sa vosa o Jiova vei Josua ka vaka: "Mo kakua ni rerevaki ira, Ni'u sa soli ira oti ki na ligamu, ena sega ni dua na tagane vei ira me tu rawa e matamu." 9 Sa basika vakasauri vei ira o Josua, ni se lako mai Kilikali ena bogi. 10 Sa ravuti ira o Jiova ena matadra na Isireli, sa vakamatei ira ena veivakamatei levu mai Kipioni, ka cemuri ira. 11 Sa yaco, ni ra sa dro mai vei ira na Isireli, ka ra lako sobu ki Beci-Oroni, o Jiova sa vakalutuka e dua na cagi uca cevata lelevu mai lomalagi me yaco sara ki Aseka ka ra sa mate kina. Sa levu era sa vakamatei e na cagi uca cevata ka lailai era vakamatei mai vei ira na luvei Isireli ena i seleiwau. 12 Sa vosa o Josua vei Jiova ena siga sa soli ira kina na Amoraiti ena ligadra na luvei Isireli, sa tukuna ena matadra kece na Isireli, "Matanisiga mo tu vakadua e Kipioni, Vula mo tu vakadua ena buca o Aijaloni." 13 Sa tu vakadua na matanisiga kei na vula me yacova ni ra sa valuti oti kece na meca. Sa sega li ni volai oqo ena i vola nei Jasa? Sa tu vakadua na siga mai lomalagi ka sega ni via lako sobu me dua na siga taucoko. 14 Sa sega tale ni dua na gauna vaka o ya sa oti se me muri mai, me rogoca kina o Jiova na domo ni tamata, baleta ni sa vala ena vukui Isireli o Jiova. 15 Era sa lesu kece mai o Josua kei ira na Isireli ka mai tiko tale e Kilikali.

Era Sa Vakamatei Na Tui Ni Amoraiti

16 O ira na tui e lima oqo, era sa dro ka vunitaki ira ena qara mai Makida. 17 Sa tukuni vei Josua, "Ni ratou sa laukune na tui e lima oqo, ni ratou vunitaki iratou tu ena loma ni qara mai Makida." 18 Sa tukuna o Josua, "Dou vakaqiqica tani na vatu mai na gusu ni qara, me ra biu kina eso na sotia me ra yadrava. 19 "Oi kemuni na kena vo mo ni cicivi ira yani na meca ka valuti ira mai liu. Me ra kua ni vakatarai me ra curu yani ki na nodra koro, ni o Jiova na nomuni Kalou sa soli ira oti ki na ligamuni." 20 Sa qai yaco, o Josua kei ira na Isireli, ni ra sa vakaotia na nodra samuti ira na tamata ena veivakamatei levu, o ira sa dro bula era sa curu yani ki na koro ni drodro ni valu. 21 Era sa lesu kece na tamata ki na nodra i tikotiko vei Josua e Makida ena vakacegu sa sega ni dua e via vosa vakaca ena vukudra na Isireli. 22 Sa qai kaci mai o Josua, "Me dolavi na gusu ni qara, ka me ratou kau mai na tui e lima ki vua." 23 Era sa cakava ka kauti iratou mai na tui e lima oqo ki vua mai na qara: Na tui Jerusalemi, na tui Epironi, na tui Jamuci, na tui Lakisi, na tui Ekiloni. 24 Ni ra sa kau mai na tui oqo vei Josua, sa qai kacivi ira kece na Isireli o Josua, ka tukuna vei ira na kavetani ni valu era sa lako vata kei koya, "Mo ni lako voleka mai ka butuka na domodra na tui oqo," era sa lako voleka mai ka butuka na domodra. 25 Sa tukuna vei ira o Josua, "Mo ni kakua ni rere se yalolailai, mo ni kaukauwa ga ka doudou sara, ni na cakava kece vaka oqo na Kalou vei ira kece na kemuni meca o ni sa veivala vata tukuna." 26 Sa qai samuti ira ka vakamatei iratou na tui o Josua ka vakaliligi iratou vaka yadudua ki na vunikau yadua. E ratou sa lili tu me yacova ni sa karobo mai na vanua. 27 Ni sa karobo mai ka lako sobu na siga me vaka na i vakaro i Josua, era sa qai kau sobu mai na vunikau ka biu yani ki na qara era sa vuni tiko kina, ka sogo na gusu ni qara ena dua na vatu levu, ka sa tu ga me yacova na siga oqo.

Na Nodra Valuti Na Vanua Mai Na Ceva

28 Ena siga o ya, o Josua sa tauri Makida ka samuti ira vata na kena tui e nai seleiwau. Sa vakarusai ira sara vakaca – kei ira kece sa tiko kina. Sa sega ni vakavoci e dua. Sa caka vei tui Makida me vaka sa caka vei tui Jeriko. 29 Sa lako tani mai Makida o Josua kei ira kece na Isireli ki Libina ka valuti Libina. 30 O Jiova talega sa soli ira kei na kena tui ki na ligadra na Isireli. Sa samuti ira o koya kei ira na tamata kece sa tiko kina ena i seleiwau. Sa sega ni vakavoci e dua, sa caka vei nodra tui na veika sa caka vei tui Jeriko. 31 Sa lako siviti Libina o Josua kei ira kece na Isireli ki Lakisi. Era sa mai tiko kina ka valuti ira. 32 O Jiova sa soli Lakisi ki na ligadra na Isireli, ni ra sa taura na koro ena i karua ni siga, era sa samuti na tamata kecega era sa tiko kina ena i seleiwau me vaka ga sa vakayacora vei Libina. 33 O Orami na tui Qasa sa lako cake mai me vukei Lakisi, sa samuti koya o Josua kei ira na nona tamata, me yaco ni sa sega ni vo e dua na tamata. 34 Mai Lakisi, sa lako sara ki Ekiloni o Josua, era sa tiko kina ka valuta talega. 35 Era sa taura na koro ena siga o ya ka samuta ena i seleiwau; o ira kece na tamata sa tiko kina era sa samuti ena siga o ya me vaka na ka kecega sa caka mai Lakisi. 36 Sa lako cake mai Ekiloni o Josua kei ira kece na Isireli ki Epironi, ka ra sa vala kei ira. 37 Era sa taura ka samuta ena i seleiwau, na kena tui, na veikoro kei ira kecega sa tiko kina, sa sega ni vakavoci e dua. Me vaka ga sa vakayacori vei Ekiloni, ni sa sega tale na ka e vo, kei ira talega na tamata sa tiko kina. 38 Sa lesu tale mai o Josua kei ira kece sa tiko vata kei koya ki Tipiri, ka ra sa valuta. 39 Sa taura na ka o ya na kena tui, na veikorokoro, era sa samuti ena i seleiwau ka vakarusai ira vakaca na kena tamata era sa tiko kina. Sa sega ni vakavoca o koya e dua me vaka ga sa vakayacora vei Epironi, sa caka vaka kina vei Tipiri kei na kena tui, me vaka sa cakava talega vei Libinai kei na kena tui. 40 Sa ravuta o Josua na vanua taucoko; na veiulunivanua, na ceva na vanua lolovira, na veivanua kece ena vanua liwa kei ira na kena tui, sa sega ni vakavoci e dua. Era sa vakarusa na ka kecega sa tu kina na i cegu me vaka sa vakarota o Jiova na nodra Kalou na Isireli. 41 O Josua sa vakamalumalumutaka na vanua, tekivu mai Ketesa – Bania me yaco sara ki Qasa kei na veivanua kece vaka Koseni me yaco sara ki Kipioni. 42 O ira kece na tui oqo kei na nodra vanua sa taura o Josua ena dua vata tikoga na gauna, baleta ni sa vala o Jiova na nodra Kalou ena vukudra. 43 Sa qai lesu tale o Josua kei ira kece na Isireli ki na nodra i tikotiko mai Kilikali.

Josua 11

Na Nodra Valuti Na Vanua Mai Na Vualiku

1 Sa qai yaco, ni sa rogoca o Jabini na tui Asori na veika oqo, sa qai talatala vei Jobaba na tui Madoni, vei tui Simironi, vei tui Akifasi, 2 Kei ira na vei tui mai na vualiku, mai na veiulunivanua kei na veibuca ni Kineroci ena veivanua e ra, kei na veivanua cecere mai Dori ki na ra, 3 Vei ira na kai Kenani ki na tokalau kei na ra talega, na Amoraiti, na Itaiti, na Perisaiti, na Jepusaiti ena ulunivanua, na Ivaiti ena ruku i Erimoni, e na veivanua vaka Misipa. 4 Era sa lako yani kei ira kece na sotia vata kei ira, na kedra i wiliwili sa vaka na nuku ni matasawa, ka sa levu sara na ose kei na kareti. 5 Ni ra sa sota kece na vei tui oqo, era sa lako mai ka tiko ena mata ni wai mai Meromi, me valuti ira na Isireli. 6 Ia, o Jiova sa vosa vei Josua ka vaka: "Kua ni o rere ena vukudra, ena gauna vata oqo ni mataka. Au na soli ira mera mate kece vei ira na Isireli. o na tuya kece na nodra ose ka vakama kece na nodra kareti ena bukawaqa." 7 O Josua kei ira kece na tamata i valu sa tiko vata kei koya, era sa lako mai vakasauri vei ira na meca mai na wai o Meromi ka samuti ira. 8 O Jiova sa soli ira ki na ligadra era sa druka na meca ka cemuri vaka ki wai mai Saitoni Levu, ki na Mata ni Wai mai Misirepoci kei na buca na Misipa ena tokalau. Era sa samuti me yacova ni sa sega ni dua e vo tale. 9 Sa cakava vei ira o Josua me vaka sa vosa kina vua o Jiova, sa tuya na ucu ni nodra ose, ka vakama na nodra kareti. 10 Sa vuki lesu tale o Josua ka tauri Esori, ka samuta na kena tui e nai seleiwau, ni sai liuliu tiko ni veimatanitu o koya. 11 Era sa samuti na tamata kecega e nai seleiwau ka ra sa vakarusai vaka ca sara. Sa qai vakamai na koro o Esori. 12 O ira kece na veikoro kei na kedra tui, sa tauri ira o Josua ka samuti ira e nai seleiwau. Sa vakarusai ira vakaca sara, me vaka sa vakarota o Mosese na tamata ni Kalou. 13 O ira kece na veikoro sa toka na kena yavu sa vakamai ira o Josua, ia, o Esori ga, era sa vakama na Isireli. 14 Nai toki ni valu mai na veikoro kece oqo, kei na manumanu susu, era sa kauta na Isireli mei toki ni valu, ia, era sa vakamatea na tagane kecega ena i seleiwau me yacova ni ra sa vakamatei kece ka sega tale e cegu rawa. 15 Me vaka sa vakaroti Mosese o Jiova, sa vakaroti Josua vakakina o Mosese, ka sa muria kece o Josua. Sa sega ni vakavoca e dua na ka sa vakarota o Jiova mai vei Mosese.

Na Vakaleleka Ni Nona Kaba Vakaivalu O Josua

16 Sa taura kece o Josua na vanua oqo: Na vanua veiulunivanua, na vanua kece mai na ceva, na vanua kece vaka Koseni, na vanua lolovira kece, na buca kece ena JoritaniOna veiulunivanua e Isireli kei na kena buca, 17 Mai na Ulunivanua o Alaki kei na yasana o Sia, me vaka sara ki Peali Qata ena Buca kei Lepanoni ena rukui Ulunivanua o Erimoni. Sa vuaviritaki ira kece na kena tui, sa samuti ira ka vakamatei ira. 18 Sa dua na gauna balavu sara sa veivala tiko kei ira na tui oqo o Josua. 19 Sa sega ni dua na veikoro oqo sa vinakata me veiyalayalati kei ira na Isireli, o ira na Ivaiti duaduaga era sa tiko mai Kipioni. o ira kece na kena vo, era sa vinakata ga na vala. 20 O Jiova ga sa vakayaloqataki ira, me lako mai kina me valuti Isireli. 21 Ena gauna o ya sa lako mai o Josua ka musuki ira laivi na Anakimi mai na veiulunivanua: Mai Epironi, mai Tapiri, mai Anabi, mai na veiulunivanua talega e Isireli; o Josua sa vakarusai ira kecega kei na nodra veikoro. 22 Sa sega ni vo tale e dua na Anakimi ena nodra vanua na luvei Isireli; era sa tiko ga mai Qasa e Kaca kei Asitoti. 23 Sa ravuta kece ka taura na vanua taucoko o Josua me vaka nai vakaro kece i Jiova vei Mosese; sa solia o Josua me nodra i votavota na Isireli, me vaka nai wasewase ni veiyavusa yadua. Sa qai vakacegui na vanua mai nai valu.

Josua 12

O Ira Na Tui Era Sa Ravuti Mai Vei Mosese

1 O ira oqo na tui ni vanua era sa valuti ka vakadrukai mai vei ira na luvei Isireli, na nodra vanua era sa taukena ena tai ni Joritani donuya nai cadracadra ni matanisiga, mai na Uciwai o Anoniki na vei Ulunivanua mai Erimoni kei na buca kece ena tokalau ni Joritani: 2 O Sioni na tui ni Amoraiti, o koya sa tiko mai Esiboni ka sa lewa tiko na veimama kei Kiliati, mai Aroea ena bati ni Uciwai na Anoni, mai na loma donu ni uciwai, me yaco sara ki na uciwai o Jaboki, na kedra i yalayala na Amoraiti, 3 Ena tokalau ni Joritani ena buca mai na Wai o Kineroci, me yaco sara ki na Wai o Arapa (na waitui masima) na sala ki Beci-Jesimoci, ki na ceva ena ruku ni veiulunivanua mai Piseki. 4 O Oki na tui Pasani kei na nona yalayala o koya sa dua mai vei ira na kawa ni tuwawa, era sa tiko e Esitaroci mai Etirei, 5 Sa lewa mai na veiulunivanua mai Erimoni, mai Salika, mai Pasani, ki na nodra yalayala sara na Kesuraite kei na Maeki-kaite, kei na kedra veimama na Kiliaite, me yacova sara nai yalayala nei Sioni na tui Esiboni. 6 Oqo sa taura o Mosese nai talai nei Jiova kei ira na luvei Isireli, o Mosese nai talai i Jiova sa solia na vanua oqo me ra taukena na Rupeni, Kata kei na veimama ni yavusai Manasa.

O Ira Na Tui Era Sa Ravuti Mai Vei Josua

7 O ira oqo na tui ni vanua sa ravuti ira o Josua ena tai oqo ni Joritani, mai na ra, mai Peali Kadi ena buca mai Lepanoni ki na Ulunivanua mai Alaki kei na veiqakilo mai Sia, sa solia o Josua ki na veiyavusa ni Isireli me ra taukena me vaka na nodra i wasewase, 8 ena veiulunivanua kei na veibuca, na veibuca mai na Joritani kei na veiqakilo, na veivanua liwa mai na ceva – na Itaiti, na Amoraiti, na Kenanaiti, na Perisaiti, na Ivaiti kei ira na Jepusaiti: 9 Na tui Jeriko, e dua, na tui Ai sa volekati Peceli e dua; 10 Na tui Jerusalemi, e dua, na tui Epironi, e dua; 11 Na tui Jamuci, e dua, na tui Lakisi e dua; 12 Na tui Ekiloni, e dua, na tui Qasa, e dua; 13 Na tui Tipiri, e dua, na tui Keteri, e dua; 14 Na tui Oma, e dua, na tui Arati, e dua; 15 Na tui Libina, e dua, na tui Adulama, e dua; 16 Na tui Makida, e dua, na tui Peceli, e dua; 17 Na tui Tapua, e dua, na tui Eteri, e dua; 18 Na tui Eteki, e dua, na tui Leseroni, e dua; 19 Na tui Madoni, e dua, na tui Asori, e dua; 20 Na tui Simironi, Meroni, e dua, na tui Akisafi, e dua; 21 Na tui Tenaki, e dua, na tui Mekito, e dua; 22 Na tui Ketesi, e dua, na tui Jokiniami, e dua mai Kameli; 23 Na tui mai Dori ena veidelana mai Dori e dua, kei na tui mai Kilikali, e dua; 24 Na tui Tirisa, e dua, na kedra i wiliwili kece e tolusagavulu ka dua.

Josua 13

Na Vo Ni Vanua Me Valuti

1 O Josua ni sa qase mai, ka tubu na nona veiyabaki, sa tukuna vua o Jiova: "O sa qase mai, sa levu na nomu veiyabaki, se levu tu ga na vanua me taukeni. 2 "Oqo na veimama se vo tiko; na nodra vanua kece na kai Filisitia, na nodra vanua kece na Kesuraiti, 3 "Mai Siori, ena tokalau mai Ijipita, me yacova sara yani nai yalayala kei Ekironi ena vualiku (sa wili tu ki Kenani); e lima na turaga mai Filisitia O na kai Qasa, na kai Asitoti, na kai Asekeloni, Kitaiti, na kai Ekeroni, kei na Avaiti; 4 "Mai na ceva, na nodra vanua kece na kai Kenani, mai Miera sa nodra na kai Saitoni me yaco sara ki Apeki, kina nodra i yalayala na Amoraiti; 5 "Na vanua sa nodra na Kipali kei Lepanoni taucoko, vaka ki nai cabecabe ni siga, mai Palikati ena rukuni Ulunivanua o Erimoni me yaco sara ki nai curucuru mai Emaci; 6 "O ira sa tiko ena veiulunivanua mai Lepanoni, vaka ki na mataniwai o Mesirifoci kei ira kece mai Saitoni – o ira kece oqo au na vakasevi ira mai na matadra na luvei Isireli; mo vota ga vakaiwasewase vei ira na Isireli me nodra i votavota me vaka Au sa vakarota. 7 "Mo wasea na vanua oqo me nodra i votavota na ciwa na yavusa kei na veimama ni yavusa nei Manasa." Na Vanua Sa Wasei Ena Tokalau Ni Joritani 8 Na veimama tale ni yavusa na Rupeni kei na Kata era sa taura na nodra i votavota me vaka sa solia vei ira o Mosese, ena tokalau ni Joritani, me vaka sa solia vei ira o Mosese na talai ni Kalou: 9 Mai Aroeci ena bati ni Uciwai na Anoni, na koro sa toka ena tadrua kei na buca kece mai Medeba me yaco sara ki Diboni; 10 Na veikoro kece nei tui Sioni na Amoraiti, o koya sa liutaki Esiboni me yacova sara na nodra yalayala na luvei Amoni; 11 O Kiliati, kei nai yalayala vaka Kesuraite, Mekataite, na ulunivanua taucoko o Erimoni, o Pasani taucoko me yaco sara ki Salika; 12 Na matanitu kece o Oki mai Pasani, o koya sa veiliutaki mai Asitaroci kei Edrei, o koya sa tiko vata ga kei ira na tuwawa; ni o Mosese sa vakadrukai ira ka biuti ira laivi. 13 Sa dina ga, o ira na luvei Isireli era sa sega ni vakasavi ira na Kesuraite se na Mekataite, ni ra sa tiko vata kei ira na Isireli na tamata oqo me yacova mai ni kua. 14 Na yavusa Livai ga era sa sega ni wasei ena i votavota vanua; nai soro ga sa vakacabori ena bukawaqa vei Jiova na Kalou ni Isireli sa nodra i votavota, me vaka sa tukuna o Koya vei ira.

Na Vanua Nei Rupeni

15 O Mosese sa solia vei ira na yavusa ni luvei Rupeni nai votavota ena dui nodra vuvale. 16 Na nodra i yalayala sa lako mai na Aroea mai na bati ni Uciwai na Anoni, kei na koro sa tiko ena tadrua kei na buca kece mai Medeba; 17 Mai Esiboni kei ira kece na koro era sa tiko ena buca o Dibani, o Bamoci, o Peali, o Beci-Peali- Meoni, 18 O Jaasa, o Kedemoci, o Mefaca, 19 O Kirijacaimi, o Sibima, o Sareci sara ena ulunivanua mai na buca, 20 O Beci-Piori, na veiqakilo mai Piseki kei Beci- JesimociO 21 O ira kece na veikoro ena buca kei na veimatanitu kece nei Sioni na tui Amoraiti o koya sa lewa tiko mai Esiboni, sai koya sa samuta o Mosese kei koya na turaga ni Mitiani: O Eri, o Rekimi, o Suri, o Uri, kei Reba o ira na turaga ni Sioni era sa tiko ena vanua. 22 O ira na luvei Isireli era sa vakamatei Pelami na luvei Piori ena i seleiwau, na gusunivosa vata kei ira sa vakamatei. 23 Na nodra i yalayala na luvei Rupeni mai na bati ni Joritani. Oqo na nodra i wasewase na luvei Rupeni me vaka na nodra veivuvale na veikoro kei na nodra i tikotiko.

Na Vanua Nei Kata

24 Sa solia talega o Mosese nai votavota ki na yavusa o Kata vei ira na luvei Kata me vaka na nodra dui vuvale. 25 Na nodra yalayala o Jasa kei na veikoro kece e Kiliati, kei na veimama ni vanua o Amoraiti, me yaco sara vaka ki Aroea sa tiko e liu vei Raba, 26 Mai Esiboni ki Raba, Misipa kei Betonimi, mai Maenaimi ki nai yalayala kei Debiri, 27 Ena buca o Beci Arana, o Sakoca kei Safoni, kei na vo ni veimatanitu nei Sioni na tui Esiboni, ka sa kenai yalayala mai na Joritani, ka lako sara yani ki na Wai o Sina reci, ena yasa ka dua tale ni Joritani ena tokalau. 28 Oqo na nodra i wasewase na luvei Kata me vaka na nodra veivuvale, na vei koro kei na veitikotiko.

Na Veimama Ni Yavusa o Manasa (Tokalau)

29 Sa solia talega o Mosese nai votavota ki na veimama ni yavusa Manasa; oqo e veimama ga ni yavusa Manasa me vaka na nodra veivuvale: 30 Na nodra i yalayala sa mai Maenaimi, o Pasani taucoko, na matanitu kece nei Oki na tui Pasani kei na veikoro kece e Jairi era sa tiko e Pasani, e onosagavulu na koro; 31 E veimama o Kiliati kei Asitaroci kei Adrei, na veikoro ni matanitu nei Oki na tui Pasani, me nodra kece na luvei Makiri na luvei Manasa, me veimama na luvei Makiri me vaka na nodra veivuvale. 32 Oqo na veivanua sa wasea o Mosese mei votavota ena vanua o Moapiena tai kadua ni Joritani, mai Jeriko ki na tokalau. 33 Ki na yavusa o Livai, sa sega ni wasea o Mosese nai votavota, o Jiova na Kalou ni Isireli ga sa nodra i votavota, me vaka sa tukuna vei ira o Koya.

Josua 14

Na Vanua Sa Wasei Ena Ra Ni Joritani

1 Oqo na veivanua era sa taukena na luvei Isireli e Kenani, me vaka era sa wasea na luvei Isireli me nodra i votavota mai vei Iliesa na bete levu kei Josua na luvei Nuni kei ira na qase, nai liuliu, na tama ni veiyavusa. 2 Nai votavota oqo sa wasewasei, me vaka sa vakarota o Jiova vei Mosese vei ira na ciwa na yavusa kei na veimama tale na yavusa. 3 O Mosese sa solia talega nai votavota kina rua na yavusa kei na veimama tale na yavusa ena tai ka dua ni Joritani, ki vei ira na Livai sa sega nai votavota. 4 O Joseva sa rua nai votavota, o Manasa kei Ifereimi, sa sega ga nai votavota vei Livai, ni sa tiko ga na nodra i votavota ena veikoro me ra susu manumanu kina kei na veika tale eso me nodra. 5 Me vaka sa vakaroti Mosese o Jiova, era sa cakava vakakina o ira na luvei Isireli ka wasea na vanua.

O Epironi Sa Wili Vei Kelepi

6 Era sa lako mai na luvei Juta ki vei Josua e Kilikali. O Kelepi na luvei Jefune na Kenasaiti sa tukuna vua, "O iko, sa kila na vosa sa cavuta o Jiova vei Mosese na tamata ni Kalou ena vukumu kei na vukuqu talega mai Ketesa– Bania. 7 "Au sa yabaki vasagavulu ena gauna sa veitalai mai kina o Mosese na tamata ni Kalou mai Ketesa–Bania, me'u vakaraica na vanua, au sa kauta lesu mai vua na vosa me vaka sa lako mai yaloqu. 8 "E dina ga ni o ira na taciqu sa lako cake vata kei au, era sa vakavuna na waicala ni yalodra, ia oi au sa muri Jiova ga na noqu Kalou. 9 "Sa yalayala o Mosese ena siga o ya ka vaka: 'io, na vanua sa butuka na yavamu ena nomu kei ira na luvemu me sega ni mudu, baleta ni o sa muri Jiova ena yalomu taucoko.' 10 "Oqo, o Jiova sa vakabulai au tiko, me vaka sa tukuna o koya ena vasagavulu ka lima na yabaki oqo, mai na gauna sa vosataka kina na vosa oqo vei Mosese, ena gauna era se yali tiko kina na Isireli ena vanua liwa; ia, sai au oqo, e daidai, au sa yabaki walusagavulu ka lima. 11 "Oqo, au se kaukauwa tiko e daidai, me vaka ena siga ea talai au kina o Mosese; me vaka na noqu kaukauwa ena gauna o ya, sa vaka kina na noqu kaukauwa oqo me vala, ruarua, na lako yani se na lako mai, ena gauna oqo. 12 "Mo solia vei au na ulunivanua oqo, me vaka sa tukuna o Jiova ena gauna o ya, me vaka ni o a rogoca ena gauna o ya, ena nodra tiko mai kea na Anakimi, ka sa levu na koro ka taqomaki vakavinaka. Me vaka ni sa tiko vata kei au o Jiova, au na vakadrukai ira me vaka sa tukuna o Jiova." 13 Sa vosa vakalouvinakataki koya o Josua ka soli Epironi vei Kelepi na luvei Jefune me nona i votavota. 14 Sa taukeni Epironi o Kelepi na luvei Jefune na Kenasaraite me nona i votavota me yacova na siga oqo, baleta ni sa muri Jiova na Kalou ni Isireli ena yalona taucoko. 15 Na yaca na Epironi e a Kirijaci Araba e liu, o Araba (na tamata qaqa duadua ena kedra maliwa na Anakimi). Sa qai cegu na vanua e nai valu.

Josua 15

Na Vanua Nei Juta

1 Sai koya oqo na nodra i wasewase na luvei Juta me vaka na nodra dui vei vuvale: Nai yalayala kei Itomi ena Vanua Liwa mai Sini ka lako sobu ki na ceva e ra sara nai yalayala. 2 Nai yalayala ena ceva sa tekivu ena matasawa ni Wasawasa Masima, mai na yasana sa donuya na yasana sobu, ki ra. 3 Sa qai lako yani ki na ceva, vaka ki na Delana o Arabarimi me donui Sini kei na ceva kei Ketesi– Bania, siviti Esironi, lako sobu ki Adari ka wavokiti Karika. 4 Mai kea me lako sara ki Asimoni ka lako yani ki na Mataniwai mai Ijipita ka me yaco sara ki na wasawasa. Oqo na nomu yalayala mai na ceva. 5 Nai yalayala ena tokalau sa tekivu ena Wasawasa Masima, mai na gusu sara ni Joritani, ena vualiku sa tekivu ena matasawa ni wasawasa ena gusu ni Joritani. 6 Nai yalayala sa lako cake ki Beci– Okila ka lako cake ki Beci– Araba; nai yalayala sa lako cake ki na vatu o Boani na luvei Rupeni. 7 Sa lako cake nai yalayala me yaco ki Debiri, mai na buca o Akori, ka vuki cake tikoga me donui Kilikali, o koya sa tiko ena mua i cake ni Adumimi o koya sa tiko ena ceva ni veibuca. Nai yalayala sa cici tikoga ki na wai o Eni–Semesi ka yaco sara ki Eni– Rokeli. 8 Nai yalayala sa lako cake vaka ki na buca nei Ininomi me yaco ki na ceva ni nodra veiqakilo na Jepusaiti, sai koya o Jerusalemi. Nai yalayala sa lako cake ki na colo ni veiulunivanua sa vakababa tiko mai me donuya na buca o Refaimi mai cake. 9 Sa lako wavoki nai yalayala mai na colo ni veidelana ki nai vurevure ni wai o Nefitoa, ka toso yani ki na veikoro mai Efironi, nai yalayala sa wavokiti Bala (o Kirijaci Jiarimi) 10 Nai yalayala sa qai gole vaka ki na ra mai Bala ki na veiulunivanua mai Sia, sa toso yani vaka ki na yasa ni ulunivanua o Jiarimi ena vualiku ka gole sobu ki Beci– Semesi ka yacovi Timina sara yani. 11 Sa lako talega yani nai yalayala me tarai Ekiromi yani mai cake. Sa lako wavoki ki Sekironi, me cici muria yani na ulunivanua o Bala, toso sara yani ki Jabinili me yaco sara yani ki na waitui. 12 Na yasayasa vaka ra sa baravi ga ni Wasawasa Levu. Oqo na nodra i wasewase na luvei Juta me vaka na nodra dui veivuvale. O Kelepi Sa Vakatawani Epironi Kei Tepiri 13 O Kelepi na luvei Jefune, sa solia o koya nai votavota vata kei ira na Juta me vaka nai vakaro nei Jiova vei Josua, o Epironi. (Epironi = Araba = tamai Anaki). 14 O Kelepi sa vakasevi iratou na tolu na luvei Anaki mai kea, o Sesai, o Aimani, kei Talemai, o iratou na luvei Anaki. 15 Sa lako cake mai kea o koya ki vei ira sa tawani Tepiri tiko (Kirijaci Sefa). 16 Sa tukuna o Kelepi, "O koya sa valuti Kirijaci Sefa ka kauta ki vei koya ni sa vakamalumalumutaki, au na solia vei koya na luvequ goneyalewa me watina." 17 O Ocanieli na luvei Kanesi na taci Kelepi sa rawata, ka sa soli kina vua o Etasa na luvei Kelepi me watina. 18 Ni sa lako mai o koya vei Ocanieli, sa vakauqeti Ocanieli o Etasa me kerea vei Kelepi na tamana e dua na were. Sa lako sobu mai o Etasa mai na nona asa, sa vosa yani o Kelepi ka vaka: "Na cava o sa vinakata?" 19 Sa tukuna mai o koya, "Mo solia mai vei au e dua na veivakalouvinakataki, o sa solia oti na vanua mai na Ceva, sa solia talega vei au na vurevure ni wai." Sa qai soli talega vua nai vurevure mai cake kei nai vurevure talega e ra.

Na Veikoro Nei Juta

20 Oqo na nodra i votavota na yavusa ni luvei Juta me vaka na nodra dui vei vuvale: 21 Na veikoro e nai yacoyaco ni yavusa nodra na luvei Juta vaka ki nai yalayala kei Itomi ki na ceva, o Kabasili o Ada, o Jakuri, 22 O Kina, Dimona, Adada, 23 O Ketesi, Asari, Itinana, 24 Sipi, Telemi, Beloci, 25 O Asori, Adata, Kerioci, Esironi, (Asari), 26 O Amami, Sima, Molada, 27 O Asari – Katita, Kerioci, Esironi 28 Asari – Suali, Perisepa, Bisijocija, 29 O Bala, Ijimi, Esemi, 30 O Elitoladi, Tesili, Orima, 31 O Sikilaki, Madimana, Sanasanana, 32 O Libaoci, Silimi, Ayini, kei Rimoni, na koro kece sa rusagavulu ka ciwa kece kei na kena veitikotiko lalai. 33 Ena vanua lolovira: o Esetaolo, Sora, kei Asana, 34 O Sanoa, Ena-Qanimi, Tapua, Enama, 35 O Jamuci, Atulama, Soko, Aseka, 36 Saraimi, Aditaimi, Qedera, kei Qederocaimi: e tinikava na veikoro lelevu kei na koro lalai; 37 O Senana, Adasia, Miqiqali – Kata, 38 O Dilini, Misipa, Jokitili, 39 O Lakisi, Bosakaci, Ekiloni, 40 O Kaboni, Lamasi, Kitilisi, 41 Qederoci, Beci – Daqoni, Neama, kei Makeda: e tinikaono na veikoro lelevu kei na veikoro lalai; 42 O Libina, Eca, Asani, 43 O Jipita, Asana, Nesibe, 44 O Keila, Atesibe, Maresa: e ciwa na koro lelevu kei na koro lalai; 45 O Ekironi kei ira kece na kena veikoro lelevu kei na veikoro lalai; 46 Mai Ekironi ki na wasawasa, o ira kece sa tiko voleka e Asitoti kei na kena veikoro; 47 O Asitoti kei na kena veikoro lelevu kei na kena veikoro lalai, o Qasa kei na kena koro lelevu kei na veikoro lalai O me yaco sara ki na Mataniwai mai Ijipita kei na Wasawasa Levu kei na kena matasawa. 48 Mai na veiulunivanua: o Samiri, Jatiri kei Soko, 49 O Dana, Kirijaci, Sana, (Tepiri), 50 O Arabi, Esetomo, Animi, 51 O Koseni, Oloni, kei Qiloni; e tinikadua na koro lelevu kei na koro lalai; 52 O Araba, Duma, Esini, 53 O Janumi, Beci –Tapua, Afeka, 54 O Amuta, Kirijaci – Aba (Epironi) kei Siori e ciwa na koro lelevu kei na koro lalai; 55 O Maoni, Kameli, Sipa, Jutita, 56 O Jesireli, Jokediami, Sanoa, 57 O Kaini, Kipea, Timina; 58 O Aluula, Beci – Suri, Qedori, 59 Maeraci, Beci – Anoci, kei Eletekoni: e ono na koro lelevu kei na koro lalai; 60 O Kirijaci Peali (o Kirijaci Jiarimi) kei Raba: e rua na koro lelevu kei na koro lalai. 61 Ena vanua liwa; o Beci – Araba, Medini kei Sekaka, 62 O Nibisani na Koro ni Masima, kei Eni – Qidi: e ono na koro lelevu kei na koro lalai. 63 Vei ira na Jepusaiti nai taukei kei Jerusalemi, era sa sega ni cemuri tani mai vei Juta, era sa tiko vata ga kei ira na Juta me yacova na siga oqo.

Josua 16

O Iferaimi Kei Ira Na Manasa Ena Ra Ni Vanua

1 Na veivotai sa caka vei ira na luvei Joseva mai na Joritani e Jeriko, mai Jeriko ena tokalau ki na vanua liwa mai Jeriko me lakova yani na veiulunivanua ki Peceli, ka cici muria yani nai yalayala kei Akaiti e Ataroci, 3 ka lako sobu vaka ki na ra ki na i yalayala kei Jafelitaite, me yacova sara yani nai yalayala ni mua i ra ni Beci – Oroni, ki Qasa, ki na waitui sara. 4 O ira na luvei Joseva, o Manasa kei Iferaimi era sa taura na nodra i votavota.

Na Vanua Nei Iferaimi

5 Nai yalayala ni nodra vanua na luvei Iferaimi, me vaka na nodra dui veivuvale sa vaka oqo: Nai yalayala ni nodra i wasewase ena tokalau, o Ataroci Adari, me yaco sara ki Beci – Oroni ena yasana e Cake. 6 Na yasana sa lako yani ki na waitui ena vualiku kei Mekimecaci; sa qai lako wavokita na yasana vaka tokalau nai yalayala ki Tanaci – Sailo ka gole sara yani ki na tokalau kei Janoa. 7 Sa lako sobu mai Janoa ki Ataroci kei Neara, ki Jeriko sara, ka lako ki na Joritani tale. 8 Nai yalayala sa lako mai Tapapua vaka ki na ra ki na Mataniwai mai Kana ka yaco sara yani ki na waitui. Oqo na nodra i votavota na yavusa ni luvei Iferaimi me vaka na nodra dui veivuvale. 9 Na veikoro lelevu me nodra na luvei Iferaimi, sa tiko vata na nodra i votavota na luvei Manasa, na veikoro lelevu kei na veikoro lalai. 10 Era sa sega ni cemuri ira rawa na kai Kenani era sa tiko mai Qasa; o ira na kai Kenani era sa tiko vata ga kei ira na Iferaimi me yacova sara na siga oqo, ka ra sa yaco me dau vakabobulataki.

Josua 17

Dua Tale Na Veimama Ni Yavusa Nei Manasa (Mai Na Ra)

1 Sa tiko talega e dua nai wasewase me nei Manasa, ni sa i koya na ulumatua nei Joseva, ka vakatokai o Makiri na ulumatua i Manasa, na tamai Kiliati, baleta ni sa tamata qaqa ni valu o koya oqo sa soli kina vua o Kiliati kei Pasani. 2 Sa tiko talega nai wasewase me nodra na kena vo ni luvei Manasa, me vaka na nodra dui veivuvale; o ira na luvei Abiesa, na luvei Eliki, na luvei Asireli, na luvei Sekimi, na luvei Epa, kei ira na luvei Semida; o ira oqo na luvei Manasa tagane, na luvei Joseva me vaka na nodra dui veivuvale. 3 Ia, o Selofiadi na luvei Epa, na luvei Kiliati, na luvei Makiri na luvei Manasa, sa sega na luvena tagane, sa vakaluveni yalewa ga. Sai ira oqo na yaca ni luvena yalewa: o Maala, o Noa, o Okila, o Milika, o Tirisa. 4 Era sa lako mai vei Iliesa na bete levu, ena matai Josua na luvei Nuni, ena matadra talega na veiliutaki ka vaka: o Jiova sa vakaroti Mosese me solia vei keimami nai votavota me nodra na ganei keimami. o koya oqo me vaka na i vakaroi Jiova sa solia vei ira nai votavota vata kei ira na taci tamadra. 5 E tini nai wasewase sa gole vei Manasa ena yasa ni vanua mai Kiliati kei Pasani, oi rau sa tiko mai na tai kadua ni Joritani, 6 baleta ni o iratou na luvei Manasa yalewa, e ratou sa vakawasewase talega vata kei ira na luvei Manasa tagane, kei ira na kena vo ni luvena tagane ena vanua o Kiliati. 7 Na vanua nei Manasa sa tekivu mai vei Esa ki Mitimecaci, ena tokalau kei Sikemi, ka sa lako sara nai yalayala ki na ceva ki vei ira sa tiko mai Tapapua. 8 O Manasa sa nona na vanua o Tapapua, ia o Tapapua ena i yalayala kei Manasa sa nodra na luvei Iferaimi. 9 Nai yalayala sa lako sobu ki na Mataniwai mai Kama, lako sobu sara ki na mataniwai. Na veikoro oqo nei Iferaimi sa tiko vata na veikoro nei Manasa. 10 Na ceva sa nei Iferaimi, na vualiku sa nei Manasa ka sa kena i yalayala na waitui. Nai yalayala kei Manasa sa sema vata kei Esa ena vualiku kei Isakari ena tokalau. 11 Mai Isakari kei Esa talega, o Manasa sa nona o Beci-Siani kei na kena veikoro lalai, o ira sa tiko mai Ena –Dori kei na kena veikoro lalai, o ira sa tiko mai Teanaki kei na kena veikoro lalai, kei ira sa tiko mai Mekito kei na kena veikoro lalai, oqo e tolu na vanua vakaveidelana. 12 Ia, o ira na luvei Manasa, era sa sega ni vakasavi ira rawa na vakaitikotiko ena veikoro kece oqori, o ira na kai Kenani era sa gu tikoga vakaukauwa me ra tiko ga ena vanua. 13 Sa qai yaco ni ra sa kaukauwa mai na luvei Isireli, era sa vakayagataki ira na kai Kenani vakabobula ka ra sega ga ni cemuri ira tani. Eso Tale Na Vanua Nei Ifereimi Kei Manasa 14 Era sa vosa na luvei Joseva vei Josua ka vaka: "Ena cava o sa solia kina vei keimami e dua nai wasewase kei na dua nai votavota me keimami taukena, ni keimami sa tamata yaga vakalevu, me vaka ni sa vakalouvinakataki keimami tiko na Kalou me yacova mai oqo?" 15 Sa sauma o Josua ka vaka, "Kevaka o ni sa tamata yaga sara, mo ni lako cake ki na veikau ka samaka na vanua me nomuni ena nodra vanua na Perisaiti kei ira na tuwawa, kevaka sa sega ni rauti kemuni na veiulunivanua o Iferaimi." 16 Ia, o ira na luvei Joseva era sa tukuna, "Na veiulunivanua oqo sa sega ni rauti keimami, o ira kece na Kenani ena vanua kei na veibuca era sa taukeni kareti kaukamea, o ira sa tiko mai Beci – Siani kei na kena veikoro lalai, kei ira sa tiko ena buca o Jesireli." 17 Sa vosa vei ira na Joseva o Josua—I fereimi kei Manasa—ka tukuna vaka oqo, "O ni sa tamata yaga sara ka tamata kaukauwa; ena sega ni dua ga na nomuni votavota, 18 "Na veiulunivanua oqo sa na nomuni vanua. E dina ga ni veikaukau tu, mo ni na taya sobu ga, na kena yawa sa na nomuni ga; o ni na vakasavi ira tani na kai Kenani, veitalia kevaka era sa vaka kareti kaukamea ka tamata kaukauwa."

Josua 18

Na Vo Ni Vanua Sa Wasei

1 Era sa soqoni vata nai soqosoqo levu ni luvei Isireli e Sailo, ka vakaduria na vale vakacevaceva ni bose, ka sa tu na vanua e matadra. 2 Ia, sa vo tiko vei ira na luvei Isireli e vitu na yavusa, era sa bera ni taura na nodra i votavota vanua. 3 Sa tukuna o Josua vei ira na luvei Isireli: "Me cava soti na kena dede, dou wele tiko kina, mo dou lako cake ka taukena na vanua sa solia na Kalou o Jiova ni nomuni qase. 4 "Me digitaki mai e tolu na tagane mai na tolu na yavusa, me'u talai ira; me ra tucake ka lakova na vanua, vakaraica vinaka me vaka na veiwasei sa oti, ka lesu mai vei au. 5 "Me ra qai wasea vakavitu, o Juta me tiko ga mai na ceva kei ira na luvei Joseva me ra tiko ga mai na vualiku. 6 "Mo ni qai vakaraica vinaka na vanua ena kena i wasewase e vitu, ka kauta mai vei au oqori, me'u viritaka kina na madigi eke ena vukumudou vua na noda Kalou o Jiova. 7 "O ira na Livai sa sega ni vakaivotavota vata kei kemuni, sa nodra i votavota ga na cakacaka vakabete vei Jiova. O Kata kei Rupeni kei na veimama ni yavusa o Manasa era sa taura na nodra i votavota ena tai kadua ni Joritani, ena tokalau, me vaka sa solia vei ira o Mosese nai talai ni Kalou." 8 Era sa tucake na tamata ka lako yani; sa vakaroti ira o Josua vei ira na laki yamata ka vaka, "Dou lako, ka laki butuka na vanua, ka vakaraica vinaka, ka lesu mai vei au ka me'u vakawiri madigi ena vukudra ena mata ni Kalou e Sailo." 9 Era sa lako na tamata ka lako curuma na vanua kecega ka vola na ka era sa raica ena i vola wasei vakavitu na kena veikoro lelevu; era sa lesu mai vei Josua ena i tikotiko e Sailo. 10 Sa cakava o Josua na vakawirimadigi ena vukudra e Sailo ena matai Jiova, e kea talega sa wasea kina o Josua na vanua ki vei ira na luvei Isireli me vaka na nodra dui wasewase.

Na Vanua Nei Penijamini

11 Na nodra i wasewase na yavusa ni luvei Penijamini sa lako mai me vaka na nodra veivuvale, na yasana sa wasei, sa tiko ena kedra veimama o Juta kei Joseva. 12 Nai yalayala mai na vualiku, sa tekivu ena Joritani, ka lako cake vaka ki Jeriko, ka lakova cake na veiulunivanua vaka ki na ra: me yacova na Vanua Liwa o Beci – Aveni. 13 Sa lako mai kea nai yalayala ki Lasei kei Peceli ena ceva; sa lako mai kea ki Ataroci Ada, volekata na veidelana sa davo toka mai na ceva kei Beci – Oroni. 14 Sa qai toso tale yani nai yalayala mai na ra ki na ceva, mai na veidelana kei Beci – Oroni mai na ceva; ka laki cava ki Kirijaci Pealina (koya o ya o Kirijaci Jerimi) nodra koro levu na luvei Juta. Oqo ena yasayasa vaka ra. 15 Mai na ceva sa tekivu ena i cavacava kei Kirijaci Peali ena i yalayala toso yani kina ra ka lako sara yani ki na i vurevure ni wai mai Nefatoa. 16 Sa lako sobu mai nai yalayala ena i cavacava ni veidelana sa davo toka ena Buca ni luvei Inomi, na buca sa tiko ena Buca kei Refaimi ena vualiku, ka lako sobu ki na Buca o Inomi, ena yasadra na Jepusaiti na koro ena ceva ka gole sobu ki Ena – Rokeli. 17 Sa lako wavoki mai na vualiku, ka lako yani ki Ena–Semesi ka vakuria me donui Qeliloci sa tiko ena matani Delana o Adumimi ka lako sobu ki na vatu mai Boani na luvei Rupeni tagane. 18 Sa lako sara yani vaka ki na vualiku kei Araba ka lako sobu mai ki Araba. 19 Nai yalayala ni vanua sa cici vaka ki na yasana e cake kei Beci – Okila ka qai mai cava ena yasana e cake ni wasawasa masima, ena yasana sara e ra ni Joritani. Oqo nai yalayala mai na ceva. 20 Sa kenai yalayala na Joritani ena tokalau. Oqo na nodra i votavota na luvei Penijamini, me vaka na kena i wasewase kece, me vaka na nodra veivuvale. 21 Oqo na veikoro lelevu nodra na luvei Penijamini me vaka na nodra veivuvale, o Jeriko, o Beci – Okila, o Ameke – Kesisi, 22 O Beci – Araba, o Semaraimi, o Peceli, 23 O Arimi, Para, Ofara, 24 O Kifa, o Aemoni, o Ofina kei Kaba, e tinikarua na koro lelevu kei na kena lalai; 25 O Kipioni, o Rama, o Bieroci, 26 O Misapa, o Jefira, o Mosa, 27 Rikemi, OIripeli, o Tarala, 28 O Sela, o Elefa, o Jebusu (Jerusalemi) o Kibeaci, kei Kirijaci, e tini ka va na koro lelevu kei na koro lalai. Oqo na nodra i votavota na luvei Penijamini me vaka na nodra veivuvale.

Josua 19

O Simione Sa Vakaivotavota Vata Kei Juta

1 Nai karua ni votavota sa lako mai vei Simione, me nodra na yavusa ni luvei Simione me vaka na nodra veivuvale. Era sa vakaivotavota ena vanua sa vakaivotavota oti kina na luvei Juta. 2 Sa tiko ena nodra i votavota o Perisapa, o Molada, 3 O Esa – Suali, o Bala, o Esemi, 4 Eletolada, o Becule, o Oma, 5 O Sikilaki, o Beci – Mekaboce, o Esa - Susa 6 O Beci- Lebaoce, o Sarueni, e tinikatolu na koro lelevu kei na koro lalai; 7 O Aini, o Rimoni, o Eta, kei Asani, e va na koro lelevu kei na koro lalai; 8 Na veikoro lalai kece sa tiko volita na veikoro lelevu, me yaco sara ki Baleci – Bea, Rama mai na ceva. Oqo na nodra i votavota na yavusa ni luvei Simione me vaka na nodra veivuvale. 9 Na nodra i votavota na luvei Simione sa wili kina nodra i votavota na luvei Juta, ni nodra i votavota na luvei Juta sa rui levu vei ira. o koya oqo, o ira na luvei Simione era sa vakaivotavotataki mai na nodra i votavota na luvei Juta.

Na Vanua Nei Sevuloni

10 Nai katolu ni wasewase sa lako vei ira na luvei Sevuloni me vaka na nodra veivuvale, nai yalayala ni nodra i votavota sa yaco sara ki Sariti. 11 Na nodra i yalayala ki na ra, sa lako vaka ki Marala, ki Dabaseci ka toso sara yani ki na mataniwai e tiko mai na tokalau kei Jokimi. 12 Mai Sariti sa gole vaka kina tokalau me donuya nai cadracadra ni siga, me salavata nai yalayala kei Kisiloco Tabu, ka lako yani ki Dabereci ni lako sivi Jafia. 13 Mai kea sa lako vaka ki na tokalau kei Kaca – Efa, me donui Eci – Kasini ka toso sara yani ki Rimoni sa veiyalayala kei Nea. 14 Nai yalayala sa lako wavoki ki na yasana e cake kei Anaconi ka yaco sara ki na buca mai Jivaca – Ilai. 15 Sa wili kina o Kitaci, Naelala, Simironi, Idala, kei Peceliema; e tinikarua na koro lelevu kei na koro lalai. 16 Oqori nai votavota nodra na luvei Sevuloni me vaka na nodra dui veivuvale, na koro lelevu oqo kei na koro lalai.

Na Vanua Nei Isakari

17 Sa lako mai vei Isakari nai ka va ni wasewase, vei ira na luvei Isakari me vaka na nodra veivuvale yadua. 18 Na nodra vanua sa lako yani ki Jesireli e wili kina o Kesuloca, o Sunemi, 19 O Afaraimi, o Sioni, o Ana raca 20 Rabici, o Kisioni, o Abesi, 21 O Rameci, o Eni – Qanimi, o Eni – Adade kei Beci Pasase. 22 Nai yalayala sa yaco ki Tabori, ki Saesima kei Beci – Semesi; na nodra i yalayala sa yaco ga ki na Joritani, e tinikaono na koro lelevu kei na koro lalai. 23 Oqo na nodra i votavota na yavusa ni luvei Isakari me vaka na nodra dui veivuvale, na veikoro lelevu kei na koro lalai.

Na Vanua Nei Esa

24 Nai kalima ni wasewase sa soli ki na yavusa ni luvei Esa, me vaka na nodra veivuvale. 25 Na nodra vanua sa wili kina o Elikaca, o Alei, o Beteni, o Akisafa, 26 O Alameleci, o Amada, kei Miseli, e yacova sara na ulunivanua o Kameli e na ra, vakamuria na mataniwai na Siori – Libinaca. 27 Sa gole vaka ki nai cabecabe ni siga, ki Beci – Dakoni; ka yacovi Sevuloni yani ki na buca o Jipica – Ilai, ka lako cake me sivi Beci – Emeki, kei Nieli, ka lako sivi Kabulu ena yasana i mawi, 28 Wili talega o Epironi, Reobi, o Amoni kei Kana, me yacovi Saitoni raraba sara yani. 29 Sa gole mai ki Rama nai yalayala kina koro ni valu mai Taia, sa qai gole vaka ki Osa ka yaco sara ki wasawasa ena vanua vaka Akisibe. 30 O Umaki, o Apeki, kei Reabi sa wili tale tiko ga kina: e ruasagavulu na koro lelevu kei na koro lalai. 31 Oqo na nodra i votavota na yavusa ni luvei Esa me vaka na nodra veivuvale; na veikoro lelevu oqo kei na koro lalai.

Na Vanua Nei Navitalai

32 Nai ka ono ni wasewase sa lako mai ki na yavusa ni luvei Navitalai, o ira na luvei Navitalai me vaka na nodra veivuvale. 33 Sa tekivu na nodra i yalayala e Elepi, volekata yani na vanua mai na vunikau terebinici e Saenananimi, o Adami – Nekeba kei Jabinili, vakayawa sara ki Lakumi; ka mai cava ena Joritani. 34 Mai Elepi, sa lako yani nai yalayala vaka ki na ra ki Asonaci Tabori, sa lako tani mai kea, vaka ki Uloki, sa sema yani vei Sevuloni ena yasana e ra kei Esa ena yasana vakara me yaco sara yani ki Juta mai na Joritani kina i cadracadra ni siga. 35 Kei na veikoro ni valu o Sidimi, o Seri, o Amaca, o Rekaci kei Cinareci, 36 O Adama, o Rama, o Asori, 37 Kadesi, o Edrei, o Ena – Asori, 38 O Aironi, o Mikidali – Ilai, o Oremi, o Beci – Anaca, kei Beci – Semesi; e tinikaciwa na veikoro lelevu kei na koro lalai. 39 Oqo na nodra i votavota na yavusa ni luvei Navitalai me vaka na nodra veivuvale.

Na Vanua Nei Tani

40 Nai kavitu ni wasewase sa lako yani ki na yavusa ni luvei Tani me vaka na nodra veivuvale, 41 Na vanua sa nodra i votavota o Sora, o Esitaolo, o Iri – Semesi, 42 O Saelabini, o Aijaloni, Jecila, 43 O Eloni, o Timina, o Ekironi, 44 O Eletekei, o Kibeconi, o Balaci, 45 O Jeuti, o Bene – Bareki, o Kaca – Rimoni, 46 O Me – Jakoni, kei Rakoni kei na veivanua sa volekati Jopa. 47 Na nodra vanua na luvei Tani sa lako sivia yani oqo, baleta ni ra sa lako cake na Tani me vala kei Lesime ka taura na vanua, era sa samuta na vanua e nai seleiwau, taukena na vanua ka tiko kina. Era sa vakayacana me Lesime, Tani, na yacai Tani na tamadra. 48 Oqo na nodra i votavota na luvei Tani me vaka na nodra veivuvale, na veikoro lelevu oqo kei na koro lalai.

Nai Votavota Nei Josua

49 Ni sa mai oti na nodra wasea na vanua me nodra dui votavota me vaka na kena yalayala, o ira na luvei Isireli era sa solia nai votavota mai vei ira ki vei Josua na luvei Nuni. 50 Me vaka na vosa i Jiova, era sa solia vua na korolevu ea kerea, o Timinaca Sera, ena veiulunivanua mai Ifereimi; sa tara na koro ka tiko kina. 51 Oqo na vei votavota sa wasea o Iliesa na bete, o Josua na luvei Nuni, kei ira na veiliuliu ni tama ni veiyavusa ni luvei Isireli me nodra i votavota mai Sailo ena mata i Jiova, ena mata ni katuba ni vale vakacevaceva ni bose. Sa qai oti na nodra wasea na vanua.

Josua 20

Na Veikoro Ni Drodro

1 Sa vosa talega o Jiova vei Josua ka vaka, 2 "Vosa vei ira na luvei Isireli ka tukuna, 'Mo ni digitaka ga vei kemuni eso na koro ni drodro, au a vosa kina vei kemuni vei Mosese, 3 'Baleta ke dua e vakamatea vakacalaka e dua, se, ni sega ni nakita, me qai dro kina, me nona i drodro mai vei koya sa via sauma na vakadave dra. 4 'Kevaka sa dro ki na dua na veikoro oqo, ka la'ki tu cake tu ena matamata ni koro, ka tukuna na nona cala ena nodra vakarorogo na qase ni koro o ya, me na qai tauri koya, me vaka ga e dua vei ira, ka solia vua na tikina me tiko kina, ka me sa tiko vata kei ira. 5 'Kevaka sa cici mai o koya sa via sauma na dra, me kakua ni soli yani o koya, baleta ni a sega ni nakita na nona vakamatei koya, ni a sega ni cati koya e liu. 6 'Me tiko o koya ena koro o ya, me yacova ni sa tu ena matadra nai soqosoqo levu me lewai, ni sa mate sara o koya na bete levu, me qai lesu tale o koya sa veivakamatei ki na nona koro, ki na nona vale, na koro sa dro mai kina o koya.'" 7 Era sa digitaki Kadesi e Kalili, ena veiulunivanua e Navitalai, Sikemi na veiulunivanua e Ifereimi kei Kirijaci – Araba (Epironi) ena veiulunivanua e Juta. 8 Ena tai kadua ni Joritani, ena tokalau kei Jeriko, sa digitaki o Besa ena buca ni vanua liwa, ena yavusa o Rupeni, Ramoci e Kiliati mai na yavusa o Kata kei Qalani e Pasani ena yavusa o Manasa. 9 Oqo na veikoro sa digitaki vei ira na luvei Isireli kei ira na vulagi talega kei ira sa lako tu vata kei ira, ni kevaka sa ia na veivakamatei vakacalaka me ra qai dro kina, ka me kakua ni mate ena ligana sa via sauma na mate o ya, me yacova ni sa tu o koya sa veivakamatei e matadra nai soqosoqo levu.

Josua 21

Na Nodra Veikoro Na Livai

1 Na nodra i liuliu na tamadra na Livai era sa lako voleka mai vei Iliesa na bete, vei Josua na luvei Nuni, kei ira nai liuliu ni tamadra na yavusa ni luvei Isireli. 2 Era sa vosa vei ira mai Sailo ena vanua o Kenani ka vaka: "Sa vakarota o Jiova vei Mosese, me soli vei keimami na veikoro lelevu me keimami tiko kina, kei na kena vanua me susu kina na manumanu laukana." 3 Era sa qai solia na luvei Isireli vei ira na Livai mai na nodra i votavota, me vaka nai vakaro i Jiova, na veikoro lelevu oqo kei na kena vanua: 4 Sa lako nai wasewase ki na vuvale na Koata kei na luvei Eroni na bete mai vei ira na Livai, e tinikatolu na koro lelevu nai wasewase mai na yavusa Juta, mai na yavusa Simione, kei na yavusa Penijamini talega. 5 Na kena vo ni luvei Koata sa nodra e tini na koro lelevu mai vei ira na yavusa Ifereimi, na yavusa Tani, kei na veimama ni yavusa Manasa. 6 O ira na luvei Keresoni sa nodra e tinikatolu na koro lelevu, nai wasewase mai na yavusa Isakari, na yavusa Esa, na yavusa o Navitalai kei na yavusa veimama nei Manasa e Pasani. 7 O ira na luvei Meravi me vaka na nodra dui vuvale, sa nodra e tinikarua na koro lelevu mai na yavusa o Rupeni, na yavusa o Kata kei na yavusa o Sevuloni. 8 O ira na Isireli, era sa solia na veikoro oqo kei na kena vanua vakai wasewase kivei ira na Livai, me vaka sa vakarota o Jiova vei Mosese. 9 Era sa solia mai vei ira na yavusa ni luvei Juta, mai vei ira na yavusa ni luvei Simione, na veikoro oqo sa cavuti e na yacadra, 10 Oqo me nodra na luvei Eroni, na luvei Koata mai vei ira talega na luvei Livai, ni sa nodra nai wasewase sa liu. 11 Sa soli vei ira o Kirijaci Araba, (na tamai Anaki) oqori o Epironi, ena veiulunivanua e Juta kei na kena vanua volivolita. 12 Ia na kena buca kei na kena veikoro lalai sa soli me nei Kelepi na luvei Jefune me nona. 13 Ki vei ira na luvei Eroni na bete, era sa soli Epironi kei na kena vanua (na koro ni drodro nodra na daulaba), o Libina kei na kena vanua, 14 Jatiri kei na kena vanua, 15 O Oloni kei na kena vanua, O Tipiri kei na kena vanua, 16 O Ayini kei na kena vanua, O Jutaya kei na kena vanua, kei Beci – Semesi kei na kena vanua: e ciwa na koro lelevu mai vei rau na yavusa e rua oqo; 17 Mai na yavusa o Penijamini, o Kipioni kei na kena vanua, o Kipa kei na kena vanua, 18 O Anacoci kei na kena vanua, o Alimoni kei na kena vanua: e va na koro lelevu. 19 Na veikoro kece nei Eroni na bete sa tinikatolu na koro lelevu kei na kena vanua. 20 Kei ira na vuvale ni luvei Koata, na Livai, na kena vo ni vuvale o Koata era sa vanakoro lelevu ena nodra i wasewase mai na yavusa o Ifereimi. 21 Sa soli vei ira o Sikemi kei na kena vanua ena veiulunivanua e Ifereimi (na koro ni drodro vei ira na daulaba), o Qasa kei na kena vanua, 22 O Kibisaimi kei na kena vanua kei Beci – Oroni kei na kena vanua: e va na koro lelevu; 23 mai na yavusa o Tani, o Elitekea kei na kena vanua, o Kibeconi kei na kena vanua, 24 O Aijaloni kei na kena vanua kei Kaca – Rimoni kei na kena vanua: e va na koro lelevu; 25 mai na veimama ni yavusa o Manasa, o Tanaca kei na kena vanua kei Kaca – Rimoni kei na kena vanua; e rua na koro lelevu. 26 O ira kece na tini na koro lelevu oqo kei na kena vanua, sa nodra na kena vo ni vuvale ni luvei Koata. 27 Ki vei ira na luvei Keresoni mai na vuvale vaka Livai, mai vei ira tale na veimama ni yavusa Manasa, era sa soli Kolani mai Pesani kei na kena vanua (na koro ni drodro vei ira na daulaba) kei Be - Esitera kei na kena vanua; e rua na koro lelevu; 28 Mai na yavusa o Isakari, o Kisioni kei na kena vanua, o Daberaci kei na kena vanua, 29 O Jamuci kei na kena vanua kei Ena – Qanimi kei na kena vanua; e va na koro lelevu; 30 Mai na yavusa nei Esa, o Miseli kei na kena vanua, o Apitomi kei na kena vanua, 31 O Elikaci kei na kena vanua kei Reobi kei na kena vanua: e va na koro lelevu; 32 Mai na yavusa o Navitalai, Ketesa e Kalili kei na kena vanua, (na koro ni drodro vei ira na dauveivakamatei). O Amoci Dovi kei na kena vanua, o Katani kei na kena vanua, e tolu na koro lelevu. 33 Na veikoro kece nei Keresomi me vaka na nodra veivuvale kece sa tinikatolu na veikoro lelevu kei na kena vanua kece. 34 Ki na vuvale kece ni luvei Meravi, o ira kece na kena vo ni Livai mai na yavusa nei Sevuloni, o Jokenimi kei na kena vanua, kei Karita kei na kena vanua, 35 O Dimina kei na kena vanua kei Naelai kei na kena vanua, e va na koro lelevu; 36 Mai na yavusa o Rupeni, o Besa kei na kena vanua, o Jaeca kei na kena vanua, 37 O Kedemoci kei na kena vanua kei Mepaaci kei na kena vanua, e va na koro lelevu; 38 Mai na yavusa o Kata, o Ramoci e Kiliati kei na kena vanua, (na koro ni drodro nodra na dauveivakamatei), o Maenaimi kei na kena vanua, 39 O Esiboni kei na kena vanua, kei Jasa kei na kena vanua: e va taucoko na koro lelevu. 40 O ira kece na luvei Meravi me vaka na nodra dui vuvale kei na nodra koro, na kena vo ni vuvale vaka Livai, me vaka na nodra i wasewase, e tinikarua na veikoro lelevu. 41 Na koro kece nodra na Livai ena nodra vanua kece na Isireli e vasagavulu ka walu na koro lelevu kei na kena vanua. 42 Na veikoro kece oqo, sa tu ga na kena vanua vakavolivolita, sa vaka kina oqo.

Sa Vakayacori Na Vosa Ni Yalayala

43 O Jiova sa solia ki vei ira na Isireli, na vanua kecega sa bubului kina o koya me solia vei ira na nodra qase, era sa taukena ka tiko kina. 44 Sa solia vei ira o Jiova na vakacegu me vaka sa yalataka vei ira na tamadra. Sa sega na tamata mai vei ira kece na meca me tu rawa e matadra: O Jiova sa soli ira kece na meca ki na ligadra na Isireli. 45 Sa sega ni vo tale e dua na vosa, ni sa cakava kece na ka vinaka vei ira na vuvale ni Isireli o Jiova, me vaka na ka kece sa vosa kina. Sa vakayacori kece.

Josua 22

O Ira Na Yavusa Mai Na Tokalau Era Sa Lesu Tale Ki Na Nodra Vanua

1 O Josua sa kacivi ira na Rupeni, na Kata kei na veimama ni yavusa i Manasa, 2 Ka tukuna vei ira: "O ni sa maroroya na veika kece sa vakarota o Mosese na tamata ni Kalou vei kemuni, o ni sa talairawarawa talega ki nai vakaro au a sa solia vei kemuni. 3 "O ni sa sega ni biuti ira na tacimuni me yacova mai na veisiga oqo, o ni sa maroroya ga nai vakaro i Jiova na nomuni Kalou. 4 "O Jiova na nomuni Kalou sa solia na vakacegu vei ira na tacimuni me vaka sa yalataka vei ira; oqo mo ni lesu tale ki na nomuni vanua sa solia vei kemuni o Mosese na tamata ni Kalou ena tai kadua ni Joritani. 5 "Mo ni maroroya vinaka ga nai vakaro kei nai vunau i Mosese na tamata ni Kalou me vaka sa solia vei kemuni, o koya, mo ni lomani Jiova na nomuni Kalou, mo ni lako ena Nona sala, ka maroroya na Nona i vakaro ka tauri Koya matua tiko, mo ni qaravi Koya ena yalomuni taucoko kei na lomamuni kecega." 6 Sa vakatabui ira ka vakatalai ira yani o Josua, ka ra sa lako yani ki na nodra i tikotiko. 7 Ki vei ira na veimama ni yavusa o Manasa sa soli Pasani vei ira o Josua, na veimama ni yavusa, sa nodra ga mai na tai kadua ni Joritani mai na ra. Ni sa vakatalai ira o Josua, sa vakalouvinakataki ira, 8 Sa vosa vei ira ka tukuna, "Mo ni lesu e nai yau e levu sara ki na nomuni i tikotiko, me levu na manumanu susu, na siliva, na koula, na varasa, na kaukamea, kei nai sulu talega sa levu. Me wasei nai toki ni valu mai vei ira na meca ki vei ira na veitacini." 9 O ira na luvei Rupeni, na luvei Kata, kei na veimama ni yavusa o Manasa era sa lesu yani mai vei ira na luvei Isireli mai Sailo e Kenani, me ra lako ki na vanua o Kiliati, na nodra i votavota, era sa taukena me vaka na vosa i Jiova ena ligai Mosese.

Nai Cabocabo Ni Soro Ena Joritani

10 Ni ra sa lako mai ena Joritani ena vanua o Kenani, o ira na Rupeni, na Kata kei na veimama ni yavusa o Manasa, era sa tara e dua nai cabocabo ni soro ena Joritani O e i cabocabo ni soro levu dina, e rairai totoka ka veirawai. 11 O ira na luvei Isireli era sa rogoca e dua ni sa tukuna tiko, "O ira na luvei Rupeni, na luvei Kata, kei ira na luvedra na veimama ni yavusa Manasa, era sa tara e dua nai cabocabo ni soro ena i yalayala e Kenani donuya na Joritani sa nodra tiko na luvei Isireli." 12 Ni ra sa rogoca na luvei Isireli na veika oqo, sa lomadra nai soqosoqo taucoko me ra soqoni mai e Sailo, ka valuti iratou oqo. 13 Era sa talai Finiasi na luvei Eroni ki vei iratou na rua veimama na yavusa oqori ki na vanua o Kiliati, 14 sa lako vata o iratou e lewe tini nai liuliu ni yavusa vakayadua ni Isireli. 15 Era sa lako mai vei iratou na yavusa e rua veimama oqo ki na vanua o Kiliati ka veivosaki ka vaka, 16 "Era sa tukuna nai soqosoqo taucoko i Jiova, 'Sa dua na vakaduduile levu o ni sa cakava oqo vei Jiova na nodra Kalou na Isireli, ena nomuni sa gole tani mai vei Koya, ka o ni sa cakava tale e dua nai cabocabo ni soro vou, ka sa talai-dredre mai vei Jiova? 17 'Sa sega beka ni rauti keda na talaidredre nei Piori, o koya eda sa sega ni vakasavasavataki mai kina me yacova na siga oqo, e dina ga ni a sa dua na mate ca levu ena i soqosoqo levu i Jiova, 18 'Ia, o ni sa vuki tani mai kina ena siga oqo mai na nomuni muri Jiova? Mo ni kila, kevaka o ni sa vuki tani ena siga oqo mai na nomuni muri Jiova, ena siga ni mataka, ena cudruva o Jiova nai soqosoqo taucoko ni Isireli. 19 'Kevaka sa sega ni savasava na nomuni vanua, mo ni takoso mai ki na vanua sa nei Jiova, ena vanua sa tiko kina na nona vale vakacevaceva ka mai vakaitavi vata kei keimami, mo ni kakua ga ni vuki tani mai vei Jiova, se vuki tani mai vei keimami ena nomuni tara cake tale e dua nai cabocabo ni soro mai nai cabocabo ni soro dina ga i Jiova na noda Kalou. 20 'Sa sega beka ni talaidredre o Ekani na luvei Sira ena nona vakatara na veika e tabu, ka sa qai lutuki ira kina nai soqosoqo taucoko e Isireli na cudru katakata i Jiova? Na tamata o ya sa sega ni mate duadua ga ena vuku ni nona caka cala.'" 21 O ira na Rupeni, na Kata kei ira veimama ni yavusa o Manasa era sa sauma mai vei ira nai liuliu talai mai oqo ka vaka: 22 "O Jiova na Kalou ni veikalou, o Jiova na Kalou ni veikalou, sa kila o koya, ka me kila talega o ira na Isireli, kevaka sa vuki tani oqo, se vakaduduile vei Jiova oqo, mo ni kua ni vakabulai keimami ena siga oqo. 23 "Kevaka keimami sa cakava e dua nai cabocabo ni soro me vuki tani kina mai vei Jiova, kevaka keimami sa vakacabora kina nai soro kama se i soro laukana se i soro ni veivinakati, o Jiova vakataki Koya me na qai tarogi keimami kina. 24 "Keimami sa cakava oqo ena rere, 'Ena i naki levu, o ya kevaka ena gauna mai muri o ira na nomuni kawa era sa veivosaki kei ira na neimami kawa ka vaka, "Na cava oi kemuni vei Jiova na Kalou ni Isireli? 25 "Ni sa cakava o Jiova nai yalayala na Joritani, mai vei kemuni kei keimami, kemuni na luvei Rupeni, na luvei Kata, sa sega na nomuni tikina vei Jiova." O ira na nomuni kawa era na cakava me ra kua ni rerevaki Jiova,' na neimami kawa.' 26 "Oqori keimami sa tukuna kina, 'Me da sa cakava ga vei keda e dua nai cabocabo ni soro, e sega ga ni caka kina nai soro kama se vakacabori kina na manumanu, 27 'Me dua kina nai vakadinadina vei kemuni kei keimami kei ira na neimami kawa ena muri mai, ni keimami na cakava na veiqaravi vei Jiova ena i soro kama, kei nai soro, nai soro ni veivinakati, me ra kua ni tukuna kina o ira na nomuni kawa vei ira na neimami kawa ena veigauna sa bera mai, "Sa sega na nomuni tikina vei Jiova."' 28 "Oqori keimami sa tukuna kina, ni ra sa tukuna oqo vei keimami se ki vei ira nai tabatamata ena lako tiko mai ni keimami sa tukuna, 'Oqo nai vakatakarakara ni cabocabo ni soro i Jiova era sa cakava na tamai keimami, e dina ga ni sega ni cabocabo ni soro kama, se ka ni madrali, ia, oqo nai vakadinadina ga ena keda maliwa, oi kemuni kei keimami.' 29 "Me yawa sara, me tabu sara vei keimami na vuki tani mai vei Jiova, ka lako me qaravi ira na kalou tani ena siga oqo, me tara e dua nai cabocabo ni soro me caka kina nai soro kama, nai soro laukana, nai madrali, mai nai cabocabo ni soro i Jiova na noda Kalou o koya sa tiko ena Nona vale vakacevaceva." 30 Ni ra sa rogoca o Finaisi kei ira nai liuliu ni veiyavusa, kei ira nai liuliu ni wasewase e Isireli na nodra vosa na luvei Rupeni, na luvei Kata kei na veimama ni yavusa o Manasa, era sa loma vinaka kina. 31 O Finaisi na luvei Iliesa na bete sa tukuna vei ira na luvei Rupeni, na luvei Kata, na veimama ni yavusa o Manasa. "Ena siga oqo, keimami sa kila kina ni sa tiko eke o Jiova baleta ni kemuni sa sega ni vuki tani mai vua, oqo o ni sa sereki ira na luvei Isireli mai na liga i Jiova." 32 O Finaisi na luvei Eroni na bete, kei ira na veiliutaki, era sa lesu tani mai vei ira na Rupeni, na Kata, kei ira na veimama ni yavusa o Manasa mai na vanua o Kiliati ki na vanua o Kenani ki vei ira na luvei Isireli; ka kauta lesu mai vei ira na vosa. 33 Era sa loma vinaka na luvei Isireli, ka ra sa vakalouvinakataka na Kalou na luvei Isireli; era sa sega tale ni via cakava e dua na ka me ra veivala kina se via vakarusa na nodra vanua era sa tiko kina. 34 O ira na luvei Rupeni, na luvei Kata era sa vakayacana nai cabocabo ni soro o ya me Vakadinadina, "Ni sa i vakadinadinataka vei keimami ni sa Kalou o Jiova."

Josua 23

Nai Otioti Ni Vosa I Josua

1 Sa qai yaco oqo, ni sa vakacegui ira vakadede na Isireli o Jiova mai vei ira na kedra meca, sa qase mai o Josua, ka sa levu sara na nona veiyabaki. 2 Sa qai kacivi ira kece na Isireli o Josua, o ira na qase, o ira nai liuliu, o ira na daulewa, o ira nai vakailesilesi, ka tukuna vei ira: "Sa levu sara na noqu veiyabaki. 3 "O ni sa raica kece na veika sa cakava o Jiova na nomuni Kalou vei ira kece na matanitu oqo, ena vukumuni, ni sa vala ena vukumuni o Jiova na nomuni Kalou. 4 "Au sa wasea vei kemuni mei votavota na veimatanitu kece oqo. O ni sa vakaivotavotataki vakayavusa mai na Joritani ka yaco sara ki na Wasawasa Levu ki na ra. 5 "Na Kalou o Jiova ena vakasukai ira mai matamuni. Mo ni taukena kina na nodra vanua, me vaka sa yalataka vei kemuni o Jiova na nomuni Kalou, 6 "O koya oqo mo ni qai kaukauwa ka yaloqaqa ena nomuni maroroya ka muria na veika kece sa volai ena i Vola ni Vunau i Mosese, de o ni qai vuki tani mai kina, ki nai mawi se ki nai matau, 7 "Ka lako ki na veivanua oqo sa tiko vata kei kemuni. Mo ni kakua ni cavuta na yaca ni nodra kalou se vakavuna e dua me bubului vei ira, mo ni kua ni qaravi ira se cuva vei ira, 8 "Ia, mo ni kukube matua ga vei Jiova na nomuni Kalou, me vaka o ni sa daucakava me yacova na siga oqo. 9 "Ni o Jiova sa cemuri ira mai matamuni na veimatanitu lelevu ka kaukauwa; ia, oi kemuni, sa sega e dua sa tu rawa e matamuni me yacova na siga oqo. 10 "E dua vei kemuni ena cemuria e udolu vei ira, ni sa vala ena vukumuni na Kalou o Jiova me vaka sa yalataka vei kemuni. 11 "O koya oqo, mo ni raici kemuni vinaka ka lomani Jiova na nomuni Kalou. 12 "De o ni na qai lesu tale me muria na vei vo ni matanitu oqoO o ira sa tiko vata kei kemuni O ka veiwatini kei ira ka lakovi ira, ka me ra lakovi kemuni talega mai, 13 "Mo ni kila ga oqo, ni o Jiova na nomuni Kalou ena sega tale ni vakasavi ira na veimatanitu oqo mai na matamuni. Era na vaka na dai sa biri vei kemuni, era na dau vakatonoki kemuni, era na voto ni moli ena matamuni, me yacova ni o ni sa yali mai na vanua vinaka oqo, sa solia vei kemuni o Jiova na nomuni Kalou. 14 "Mo ni kila ena siga oqo, au sa lakovi vuravura taucoko. O ni sa kila ena yalomuni kei na lomamuni, ni sega tale ni dua na ka vinaka sa vo me sega ni cakava vei kemuni o Jiova na nomuni Kalou, me vaka sa vosataka ena vukumuni. Sa cakava kece o Koya, ka sa sega tale na ka e vo. 15 "Sa na yaco oqo, na veika vivinaka sa lakovi kemuni mai me vaka na nona vosa ni yalayala na Kalou vei kemuni, ena kauta mai vei kemuni na veika caca kecega me yacova ni sa vakarusai kemuni mai na vanua vinaka oqo, sa solia vei kemuni o Jiova na nomuni Kalou. 16 "Ni o ni sa talaidredre ki na vosa ni veiyalayalati i Jiova na nomuni Kalou, o koya sa vakarota vei kemuni, ka lako me qarava na kalou tani ka cuva vei ira, ena qai waqa mai na cudru i Jiova vei kemuni, ka o ni na vakarusai vakatotolo mai na vanua vinaka sa solia vei kemuni o Koya."

Josua 24

Na Veiyalayalati E Sikemi

1 Sa qai vakasoqoni ira kece mai na yavusa Isireli o Josua e Sikemi, ka kacivi ira na qase, nai liuliu, o ira na daunilewa, o ira na vakailesilesi; era sa kauti ira mai ka vakaraitaki ira ena mata i Jiova na nodra Kalou. 2 Sa qai tukuna o Josua vei ira kece na tamata ka vaka: "Sa tukuna vakaoqo o Jiova na nodra Kalou na Isireli; 'Na tamamuni, wili kina o Tira na tamai Eparama kei na tamai Neori, era sa tiko mai na tai kadua ni Uciwai ena veigauna sa oti ka qarava na kalou tani. 3 'Au a qai kauti Eparama na tamamuni mai na tai kadua ni Uciwai, ka kauti koya mai ena vanua o Kenani ka vakavuqataka na nona kawa ka soli Aisake vei koya. 4 'Vei Aisake, Au sa soli Jekope kei Iso. Ki vei Iso Au sa solia vua na ulunivanua o Sia me taukena, ia o Jekope kei ira na luvena sa lako sobu ki Ijipita. 5 'Au sa talai Mosese kei Eroni, Au sa vakararawataki Ijipita ena veika Au sa vakayacora vei ira. Ni oti o ya, Au sa kauti kemuni tani mai. 6 'Au sa kauti ira tani mai na tamamuni mai Ijipita, o ni sa lako mai ki na wasawasa; era sa cicivi kemuni mai na kai Ijipita ena kareti ni valu kei na kena ose ena Wasawasa Damudamu. 7 'Era sa qai tagi vei Jiova, o Jiova sa qai biuta na butobuto ena kemuni maliwa kei ira na Ijipita. Sa qai kauta mai vei ira na waitui ka ubi ira kina. Na matamuni sa raica na veika oqo mai Ijipita. O ni sa tiko ena vanua liwa me dede sara. 8 'Au sa kauti kemuni mai ki na nodra vanua na Amoraiti, era sa tiko mai na tai kadua ni Joritani, era sa vala kei kemuni. Ia Au sa soli ira vei kemuni, mo ni taukena kina na nodra vanua, Au sa vakarusai ira kina e matamuni. 9 'O Pelaki na luvei Sipori na tui Moapi, sa tucake me vala kei Isireli, sa talai Pelani na luvei Peori me rukaki kemuni. 10 'Au sa sega ni vakarorogo vei Pelami, sa vakuria ga o koya me vakalouvinakataki kemuni. Au sa sereki kemuni mai na ligana. 11 'O ni sa qai takosova na Joritani ka lako mai ki Jeriko. Era sa vala kei kemuni na kai Jeriko, o ira talega na Amoraiti, na Perisaiti, na kai Kenani, na Itaiti, na Kirisaqaiti, na Ivaiti kei ira na Jepusaiti. Ia, Au sa soli ira ki na ligamuni. 12 'Au sa tala na o ni me liu vei kemuni, me cemuri ira tani mai vei kemuni, oi rau talega na tui ni Amoraiti, ia ka sega ga ena nomuni i seleiwau se na nomuni dakai titi. 13 'Au sa solia vei kemuni e dua na vanua o ni sa sega ni oca kina, kei na veikoro o ni sa sega ni tara, ka o ni sa tiko kina; o ni sa kana mai na veivaini kei na veiolive o ni a sega ni tea.' 14 "O koya oqo, mo ni rerevaki Jiova, ka qaravi Koya ena yalovinaka kei na yalodina, mo ni biuta tani na kalou era sa qarava na nomuni qase mai na tai kadua ni Uciwai, mai Ijipita talega. Mo ni qaravi Jiova! 15 "Kevaka sa ca vei kemuni, mo ni qaravi Jiova, mo ni qai digitaka e daidai se o cei mo ni qarava, o ira na kalou era sa qarava na nomuni qase mai na tai kadua ni Uciwai, se na nodra kalou na Amoraiti ena vanua o ni sa tiko kina. Ia, oi au kei na noqu vuvale, keitou na qaravi Jiova ga." 16 Era sa sauma lesu kece na tamata ka vaka: "Me yawa sara vei keimami me keimami biuti Jiova ka qarava na kalou tani; 17 "O Jiova na neimami Kalou, sai Koya na Kalou sa kauti keimami mai kei ira na tamai keimami mai na veivakabobulataki mai Ijipita, sai Koya sa cakava na veika lelevu e matai keimami ka maroroi keimami ena sala ka vakavuna na neimami lako siviti ira kece mai sa tu ena sala. 18 "O Jiova sa cemuri ira tani mai na matai keimami, o ira talega na Amoraiti era sa tiko ena vanua. Keimami na qaravi Jiova ga, ni sa neimami Kalou o Koya." 19 O Josua sa tukuna vei ira na tamata, "O ni sa sega ni qaravi Jiova rawa ni sa ka tabu o Koya, sa Kalou vuvu o Koya. Ena sega ni rawa ni vosota na nomuni caka cala kei na nomuni valavala ca. 20 "Kevaka o ni sa biuti Jiova ka qarava na kalou tani, o Jiova ena vuki mai ka tarai kemuni vakaca sara ka vakaqeavutaki kemuni, mai na Nona daucaka vinaka vei kemuni." 21 Era sa sauma lesu vei Josua ka vaka: "E sega keimami na qaravi Jiova ga!" 22 Sa vosa vei ira na tamata o Josua ka vaka: "O ni sa vakadinadinataki kemuni, ni o ni sa digitaki Jiova me nomuni, ka qaravi Koya." Era sa tukuna kece mai, "Keimami sa kenai vakadinadina!" 23 "O koya oqo," sa tukuna o Josua, "Mo ni biuta tani na veikalou tani sa tiko vei kemuni, mo ni vagolea ga na nomuni bula vei Jiova na nodra Kalou na Isireli." 24 Era sa tukuna vei Josua na tamata, "O Jiova na neimami Kalou, keimami na qarava ga!" 25 Sa cakava o Josua na veiyalayalati kei ira na tamata ena siga ga o ya, ka cakava vei ira nai lesilesi kei na lewa mai Sikemi. 26 Sa qai vola o Josua na vosa kece oqo ena i Vola ni Vunau ni Kalou. Sa qai taura e dua na vatu levu ka tuva toka mai kea ena ruku ni oki sa tiko ena yasa ni vale ni Kalou. 27 Sa tukuna o Josua vei ira na tamata kecega, "Na vatu oqo sai vakadinadina vei keda, ni sa keda o Koya. Sai vakadinadina kina vei kemuni, de o ni vakalasuya na Kalou." 28 Sa qai sereki ira o Josua mera dui lako ki na nodra dui votavota.

Na Nodrau Mate O Josua Kei Iliesa

29 Ni sa oti oqo, o Josua na luvei Nuni, na dauveiqaravi i Jiova, sa qai mate, ni sa yabaki dua na drau ka tini. 30 Era sa buluti koya ena i yalayala ni nona vanua mai Timinaca – Sera, ena vei Ulunivanua nei Ifereimi ena vualiku kei Qeasi. 31 O ira na Isireli era sa qaravi Jiova ena gauna taucoko nei Josua kei na nodra gauna na qase, era sa qai mate e muri vei Josua o ira kece sa kila na cakacaka i Jiova sa cakava vei ira na Isireli. 32 Na sui nei Joseva era sa kauta mai na luvei Isireli ena nodra lako mai Ijipita, era sa mai buluta e Sikemi ena vanua sa volia o Jekope mai vei ira na luvei Emori na tamai Sikemi ena dua na drau na tiki ni siliva, sa yaco kina me nodra i votavota na luvei Joseva. 33 O Iliesa na luvei Eroni sa mate; era sa buluti koya ena delana sa nei Finaisi na luvena, sa soli vua mai na veiulunivanua nei Ifereimi.

Turaganilewa 1

Na Ravuti Tikoga Nei Kenani

1 Ni sa mate oti o Josua, sa qai yaco mera taroga na Kalou o ira na Isireli ka vaka: "O cei me liu, me lako cake ka valuti ira na Kenani?" 2 Sa tukuna o Jiova, "Me liu cake o Juta, io, Au sa solia na vanua ki na ligana." 3 Sa tukuna o Juta vei Simione na tacina, "Lako cake vata mai kei au ki na vanua sa soli vei au, me daru vala vata kei ira na kai Kenani; au na qai lako vata kei iko ki na nomu vanua." Sa lako vata kei koya o Simione. 4 Sa lako cake o Juta, ka soli ira na kai Kenani kei ira na Perisaiti o Jiova ki na ligadra; era sa vakamatea e tini na udolu na tamata mai Beseki. 5 Era sa kunei Atonai – Beseki mai Beseki ka valuti Koya; era sa vakadrukai ira na Kenani kei na Perisaiti. 6 Sa dro o Atonai – Beseki, era sa cici muri koya ka toboki koya ka musuka laivi nai dovidovi ni kakana mai na ligana kei na qaqalo ni yavana levu ruarua. 7 Sa vosa mai o Atonai – Beseki ka vaka: "E vitusagavulu na tui sa musu laivi oti na nodra taukuku levu ruarua kei na nodra i dovidovi ni kakana ruarua, era sa dau kumuna na kedra kakana ena ruku ni noqu teveli; me vaka au sa dau lewa me ra cakava, na Kalou sa sauma lesu vei au." Era sa kauti koya mai ki Jerusalemi, ka sa mate mai kea. 8 O ira na luvei Juta era sa valuti Jerusalemi, ka taura. Era sa samuta na koro ena i seleiwau ka vakama. 9 Ni oti oqo, era sa lako sobu na luvei Juta me valuti ira na kai Kenani era sa tiko ena veiulunivanua mai na ceva kei na vanua lolovira. 10 Era sa valuti talega na Kenani era sa tiko mai Epironi o (Kirijaci– Araba). Era sa vakamatei Sesai, Amani, kei Talimai. 11 Mai kea era sa valuti ira nai taukei kei Tepiri. (Na yaca Tepiri e dau kilai me o Kirijaci – Sefa e liu.) 12 Sa tukuna o Kelepi, "O koya sa valuti Kirijasi – Sefa, vua, au na solia na luvequ yalewa me watina." 13 O Ocanieli na luvei Kenasi na taci Kelepi sa gone, sa valuti Kirijaci – Sefa ka sa tauri Akesa na luvei Kelepi me watina. 14 Sa qai yaco, ni sa lako mai o Akesa vei Ocanieli, sa vakauqeti Akesa o Ocanieli me kerea vei Kelepi e dua na vanua. Ni sa lako sobu mai na nona asa sa vodoka tiko, sa taro yani o Kelepi na tamana, "Na cava o sa vinakata?" 15 Sa tukuna yani vua o Akesa, "Mo solia vei au na veivakalouvinakataki, e vaka ni o sa solia oti vei au na vanua mai na ceva, mo solia talega mai vei au e dua na mata ni wai." Sa solia vua o Kelepi na mataniwai mai cake, e ra talega. 16 O ira na gone ni Kenaiti, na momo nei Mosese, sa lako cake mai na Koro ni Veibalabala kei ira na luvei Juta ki na vanua liwa nei Juta, sa tiko ena vanua voleka ki Arada mai na ceva, era sa lako ka tikovata kei ira na tamata. 17 Sa lako cake o Juta kei Simione na tacina, e rau sa valuti ira na kai Kenani, o ira sa tiko mai Sefaci, ka ra sa vakarusai vakaca sara. Sa vakayacani kina na koro o ya me o Oma. 18 O Juta sa tauri Qasa talega kei na veivanua voleka talega, o Asekeloni, kei Ekironi kei na kedra veivanua voleka talega. 19 O Jiova sa tiko vata kei Juta, ka rau sa vakakubutaki ira na tiko ena vanua ni veiulunivanua, ia, era sa sega ga ni rawa ni ra cemuri ira na tiko ena vanua lolovira, baleta ni tiko vei ira na qiqi ni valu kaukamea. 20 Era sa soli Epironi vei Kelepi me vaka sa tukuna o Mosese, Sa vakatalai iratou tani mai keya na luvei Anaki e tolu. 21 O ira na luvei Penijamini era sa sega ni vakatalai ira tani rawa na Jepusaiti, o ira sa tiko e Jerusalemi; era sa tiko vata na Jerupasaiti kei ira na Penijamini e Jerusalemi me yacova na siga oqo. 22 Na vale talega nei Joseva era sa lako cake me valuti Peceli, ni sa tiko vata kei ira o Jiova. 23 Na vale i Joseva sa tala e so me ra vakadikeva na koro o Peceli. (Na yaca ni koro e liu o Lusa.) 24 Ni ratou sa raica na yamata e dua na tamata ni sa lako tani mai na Koro, e ratou sa tukuna vua, "Mo vakaraitaka mada vei keitou nai curucuru ki na koro, keitou na vakaraitaka vei iko na yalololoma." 25 Sa qai vakarautaka o koya nai curucuru, e ratou sa samuta na koro ena i seleiwau; ia, e ratou sa laiva na tamata kei na nona vuvale kece me lako. 26 Sa lako na tamata oqo ki na nodra vanua na Ifaiti, sa tara e dua na koro levu ka vakayacana me o Lusa.

Sa Ravuti Vakavo Na Vanua

27 O Manasa sa sega ni vakasavi ira tani na lewe ni vanua mai Beci-Siana kei na kena veikoro, se o Tanaki kei na kena veikoro se o ira na kai Dovi kei na kena veikoro, o ira sa tiko mai Ibiliemi kei na kena veikoro, o ira sa tiko mai Mekito kei na kena veikoro, ni o ira na kai Kenani era sa gu ga me tiko ena vanua. 28 Sa qai yaco oqo, ni ra sa kaukauwa mai na Isireli, era sa vakamalumalumutaki na Kenani, ia era sa sega ga ni vakasavi tani kece na Kenani mai na vanua. 29 O ira na Efiraimi era sa sega ni vakasavi ira na Kenani era sa tiko mai Kesa era sa tiko vata na Kenani kei ira na Isireli e Kesa. 30 O Sevuloni talega sa sega ni vakasevi ira sa tiko e Kitioni se o ira sa tiko mai Naaloli; o koya oqo era sa tiko ga vata kina kei ira na kai Kenani, sa vakatauci vei ira na kai Kenani me ra soli vakacavacava vei Isireli. 31 O Esa talega sa sega ni vakasavi ira kece na tiko e Ako, o ira na tiko mai Saitani, kei ira mai Alabi, Akisibi, Eleba, Apieki kei Reabi. 32 O ira na Esa, era sa tiko vata kei ira na Kenani nai taukei ni vanua, ni ra sa sega ni vakasavi ira tani rawa. 33 O Navitalai talega sa sega ni vakasavi ira tani rawa na tiko mai Beci-Anaci; era sa tiko vata ga kei ira na Kenani nai taukei ni vanua. O ira nai taukei kei Beci-Semesi kei Beci-Anaci era sa saumi vakacavacava vei ira na Isireli. 34 O ira na Amoraiti era sa biligi ira na Tani ki na veiulunivanua, ni ra sa sega ni vinakata me ra lako mai ki na nodra veibuca; 35 Era sa nakita na Amoraiti me ra tiko ena vei Ulunivanua e Eresi e Aijaloni kei Salibini; ia ni sa kaukauwa mai na ligai Joseva, era sa vakaukauwataki na moraiti me soli vakacavacava vei Isireli. 36 Na nodra yalayala na Amoraiti sa tekivu mai na vanua cecelevu o Akarabimi mai Sela ka cici cake.

Turaganilewa 2

Na Nodra Talaidredre Na Isireli

1 Na agilosi i Jiova sa lako cake mai Kilikali ki Bokimi ka tukuna: "Au a liutaki kemuni mai Ijipita ka kauti kemuni mai ki na vanua Au a yalayala kina vei ira na nomuni qase; ka tukuna, 'Au na sega ni voroka na Noqu veiyalayalati kei kemuni. 2 'Mo ni kua ni cakava e dua na veiyalayalati kei ira sa tiko ena vanua; mo ni vakarusa na nodra i cabocabo ni soro, o ni sa sega tikoga ni talairawarawa ki na Noqu vosa.' Ena cava o ni sa cakava kina oqo? 3 "Au sa tukuna talega, 'Au na sega ni vakasavi ira tani mai matamuni, era na voto ni moli vei kemuni kei na nodra kalou e vaka e dua na dai vei kemuni, mo ni vesuki kina.'" 4 Sa yaco ni sa cavuta na veika oqo na Agilosi i Jiova ki vei ira na luvei Isireli, era sa laveta cake na domodra ka tagi vakalevu vei Jiova. 5 Era sa vakayacana na vanua o ya o Bokimi; mai kea, era sa vakacabora mai kea nai soro vei Jiova. 6 Ni sa vakasukai ira na tamata o Josua, era sa dui lako ga na luvei Isireli ki na nodra dui vanua era sa taukena.

Sa Mate O Josua

7 Era sa qaravi Jiova na tamata ena gauna i Josua kei na nodra gauna na qase era sa bula balavu mai vei Josua, o ira era sa raica kecega na vei ka lelevu sa cakava o Jiova vei ira na Isireli. 8 O Josua na luvei Nuni, na tamata ni Kalou, sa qai mate ni sa yabaki dua na drau ka tini na yabaki. 9 Era sa buluti koya ena i yalayala ni nona vanua mai Timinaca Eresi, ena veiulu ni vanua e Ifereimi, ena vualiku ni Ulunivanua o Qasi. 10 Ni ra sa soqoni yani nai tabatamata kece ki vei ira na nodra qase, sa qai tubu tale mai e dua nai taba tamata era sa sega ni kila na Kalou se na veika sa cakava o Koya vei ira na Isireli.

Na Nodra Sega Ni Yalodina Na Isireli

11 Era sa cakava na ka ca ena mata i Jiova o ira na Isireli ka qaravi Peali; 12 Era sa vuki tani mai vei Jiova na nodra Kalou, o koya sa kauti ira tani mai na vanua o Ijipita; era sa muria na kalou mai vei ra na veikalou ni vanua era sa tiko veimaliwai kina ka cuva vei ira, ka ra sa vakacudrui Jiova na Kalou. 13 Era sa vuki tani mai vei Jiova ka qaravi Peali kei Asitoreci. 14 Na cudru i Jiova sa katakata sara vei ira na Isireli ka sa soli ira ki vei ira na daubutako me ra vakacacani ira, ka ra sa volitaki talega ki na ligadra na kedra meca era sa tiko vakavolivoliti ira, me ra kua ni tucake rawa e matadra na kedra meca. 15 Ena vanua kecega era sa lakova, sa tu mai kina na ligai Jiova me saqati ira me vakacacani ira, me vaka sa tukuna ka yalataka o Jiova. Era sa taqaya vakalevu sara. 16 O Jiova sa vakaturi ira cake na turaganilewa, me sereki ira mai na ligadra sa dau vakalolomataki ira. 17 Ia, era sa sega ni dau via vakarorogo vei ira na turaganilewa, ka era sa dauveibutakoci kei ira na Kalou tani ka cuva vei ira. Sa rui totolo na nodra vuki tani mai na sala era a muria mai na nodra qase ena nodra talairawarawa vei Jiova; oqo era sa sega. 18 Ni sa vakatuburi ira cake na turaganilewa vei ira o Jiova, sa dau sereki ira o Jiova mai na ligadra na meca, ena vukudra na turaganilewa, o Jiova sa dauyavalati ena Nona yalololoma ena vuku ni nodra dautagi yaso, ni ra sa dauvakacacani ka vakararawataki. 19 Sa qai yaco ni sa mate na turaganilewa, era sa dauvuki tale, ka sa ca sara na nodra i valavala mai vei ira na tamadra, ni ra sa muri ira na kalou tani me qaravi ira ka cuva vei ira. Era sa sega ni muduka nai valavala oqo, ni ra sa vakalecalecava tu ga. 20 Sa qai daukatakata ga na cudru i Jiova vei ira na Isireli; ka sa tukuna kina, "Baleta na matanitu oqo sa talaidredre ki na Noqu veiyalayalati Au sa vakarota vei ira na tamadra, ka ra sa sega ni via rogoca na Domoqu, 21 "Oi Au talega, Au na sega ni vakasavi ira tani na veimatanitu sa vo tu ni sa mate o Josua, 22 "Mai vei ira, Au na vakatovolei ira kina na Isireli, se, ena rawa ni ra maroroya na sala i Jiova, me ra lako kina me vaka era sa maroroya na tamadra, se sega." 23 O koya oqo, sa biuti ira tu ga kina na veimatanitu oqo o Jiova, ni sa sega ni vakasavi ira vakatotolo; se me soli ira ki na ligai Josua.

Turaganilewa 3

Na Vo Ni Veimatanitu Era Tiko Ena Vanua

1 Sai ira oqo na vo ni veimatanitu sa tiko ena vanua, me vakatovolei ira kina na Isireli ena vukudra o Jiova, oqo, vei ira kece sa sega ni kila e dua nai valu e Kenani 2 (Oqo me baleti ira nai tabatamata ni luvei Isireli, me ra kila kina na vala vei ira e se bera sara ga ni lakova na i valu), 3 Sai ira oqo: e lima na turaga ni Filisitia, o Kenani kece, o ira na Saitoni, o ira na Ivaiti era sa tiko mai Lepanoni, mai Erimoni ki Amaci. 4 Era sa vakavoca, me vakatovolei ira kina na Isireli, me kilai kina se ra sa talairawarawa ki nai vakaro i Jiova se sega. Nai vakaro era sa vakaroti kina na tamadra mai vei Mosese. 5 Era sa tiko vata na luvei Isireli kei ira na Kenani, na Itaiti, na Amoraiti, na Perisaiti, na Iraiti kei ira na Jepusaiti. 6 Era sa tauri ira na luvedra yalewa me watidra ka soli ira na luvedra yalewa vei ira na nodra cauravou, ka ra sa qarava na nodra kalou.

Ocanieli

7 Era sa caka ca ena matai Jiova o ira na luvei Isireli. Era sa guilecavi Jiova na nodra Kalou ka qaravi Peali kei Aserasi. 8 O koya oqo sa katakata kina na cudrui Jiova vei ira na Isireli, ka sa volitaki ira o Jiova ki na ligai Kusani – Risataimi na tui Mesapotomia; o ira na Isireli era sa qaravi Kusani – Risataimi me walu taucoko na yabaki. 9 Ni ra sa tagi na luvei Isireli vei Jiova, o Jiova ga sa qai vakatubura vei ira e dua na dauveisereki me sereki ira: O Ocanieli na luvei Kenesi, na taci Kelepi ka gone. 10 Sa lako mai vua na Yalo i Jiova, ka sa lewai Isireli o koya. Sa lako yani me ia na vala, o Jiova sa soli tui Mesapotomia ki na ligana, ka sa qaqa na ligana vei Kusani Risataimi. 11 Sa cegu na vanua me vasagavulu na yabaki. Sa qai mate o Ocanieli na luvei Kenesi.

Euti

12 Era sa caka ca tale na luvei Isireli ena mata i Jiova, sa qai vakaukauwataki Ekiloni na tui Moapi o Jiova vei ira na Isireli, baleta ni ra sa cakava na ka ca ena mata i Jiova. 13 Sa kauti ira mai na Amani kei ira na Amaleki vua ka vakadrukai ira na Isireli ka taura vakaukauwa na koro ni veibalabala. 14 O ira na Isireli era sa qaravi Ekiloni na tui Moapi, me tini ka mani walu na yabaki. 15 Era sa qai tagi vei Jiova na luvei Isireli sa qai vakatubura e dua na dau ni veisereki vei ira o Jiova: O Euti na luvei Qera na Penijamini, na Qaqa ligai mawi. O koya, sa vakavuna na nodra kauta na Isireli na ka ni vakarokoroko vei Ekiloni na tui Moapi. 16 O Euti sa vakarautaka vua e dua nai sele leka, (sa gata ruarua na yamena) ka sa vesuka toka e sagana i matau ena ruku ni nona i sulu. 17 Era sa kauta mai na ka ni vakarokoroko vei Ekiloni, na tui Moapi. (O Ekitoni sa rui tamata levulevu.) 18 Ni sa oti na nona vakacabora na veika ni vakarokoroko, sa qai vakatalai ira tani na kauta mai na ka ni vakarokoroko. 19 Ia, o koya sa lesu tale ki na vatu ni vakananumi, sa tu e Kilikali ka tukuna, "Sa tiko vei au, e dua nai tukutuku vuni me baleti kemuni, na tui." Sa qai tukuna o koya, "Mo ni vakagagalu kece!" Era sa lako kece vakatikitiki na dauveiqaravi mai vua na tui. 20 Sa qai lako mai vua na tui o Euti, (sa dabe toka ena tikina e cake ni vanua ni vakabatabata ni tui). Sa tukuna o Euti, "Sa tiko vei au e dua nai tukutuku mai vua na Kalou me baleti kemuni na tui." Sa tucake sara mai na nona idabedabe. 21 Sa taura na nona i sele leka mai na sagana o Euti ka cobaraka yani ena ketei Ekiloni. 22 Nai sele leka kei na kena i tautauri sa curu kece ki na kete i Ekiloni, ka ni sa sega ni rawa ni kau tani tale mai, ni sa ubia kece na uro ni ketena, a sa lako mai ki tuba na nona wawa. 23 O Euti sa curu yani ki tuba ena tikina tani, sogota na katuba ka lokataka ena taba vale e cake. 24 Ni sa lako oti ki tuba, era sa qai lako mai na dauveiqaravi, era sa kurabui ni sa loka tu na katuba, era sa tukuna, "E se vakacegu tiko beka ena vanua ni vakabatabata." 25 Era sa wawa tikoga me yacova ni ra sa madua mai, e se bera tikoga ni dolava na nona katuba na tui. Era sa taura e dua tale na ki ka dolava na katuba. Sa davo matemate tu na nodra turaga ena buturara. 26 O Euti sa dro ena gauna era se waraka tiko kina na nodra turaga, sa lako sivita na vatu ni vakananumi ka dro sara ki Seira. 27 Ni sa yaco kina, sa uvuca na biukila ena veiulunivanua nai Ifereimi, o ira na luvei Isireli era sa lako sobu vata mai kei koya mai na ulunivanua; ka sa liutaki ira. 28 Sa tukuna vei ira "Mo ni muri au mai, ni o Jiova sa soli ira na Moapi na kemuni meca ki na ligamuni." Era sa muri koya sobu, ka taura nai curucuru mai na Jioritani ki vei ira na Moapi, ka ra sa sega ni vakatara e dua me takoso mai. 29 Ena gauna o ya era sa vakamatea e tini na udolu vei ira na Moapi, na tamata qaqa kece ni valu; sa sega e dua me dro rawa. 30 Sa vakamalumalumutaki o Moapi ena ligadra na Isireli, ka sa cegu nai valu me walusagavulu na yabaki.

Samikari

31 Ni oti o Euti sa basika o Samikari na luvei Anaci o koya sa vakamatei ira e ono na drau na tagane mai vei ira na Filisitia ena dua na galelgale ni bulumakau, ka sa vakagalalataki ira talega na Isireli.

Turaganilewa 4

Tepora

1 Ni sa mate o Euti, o ira na luvei Isireli era sa cakava na ka ca ena mata i Jiova. 2 O Jiova sa volitaki ira ki na ligai Jabini na tui Kenani, sa veiliutaki tiko mai Eseri. Nai liuliu ni nona mataivalu o Sisera o koya sa tiko mai Anasieci Akoimi. 3 Era sa tagi vei Jiova o ira na luvei Isireli; sa ciwa na drau na levu ni nona qiqi ni valu kaukamea, ni ena loma ni ruasagavulu na yabaki sa dau vakalolomataki ira tiko na Isireli o koya. 4 O Tepora na parofita yalewa na wati Lepadoci, sa turaga-ni-lewa tiko e Isireli ena gauna o ya. 5 Sa dau dabe tiko ena ruku ni vunibalabala o Tepora, ena kedrau veimama o Roma kei Peceli ena veiulunivanua o Ifereimi.Era sa dau lako cake mai vua na luvei Isireli me lewai mai vei koya. 6 Sa talatala yani me lako mi vei koya o Peraki na luvei Abinoami mai Ketesa e Nafitalai, ka tukuna vua, "Sa sega beka ni vakarota tiko na Kalou o Jiova Nona tukuna tiko, 'Mo ni vakauta na mataivalu kina Ulunivanua o Tepori, "mo kauta e tini na udolu na tagane mai vei Navitalai kei ira na luvei Sevuloni; 7 'Na kemuni meca, au na vakarautaki Sisara na turaga ni valu nei Jabini, kei na nona qiqi ni valu kei ira na nona i valu ena Uciwai o Kisoni; au na soli koya ki na ligamu'?" 8 Sa sauma vua o Peraki, "Kevaka o na lako mai vata kei au, au na lako talega; au na sega ni lako kevaka o sa sega ni lako!" 9 Sa tukuna o Tepora, "Au lako vata kei iko; ena sega na lagilagi vei iko ena i lakolako o sa lako tiko kina oqori, ni o Jiova ena volitaki Sisara kina ligana e dua na yalewa." Sa tucake o Tepora ka lako vata kei Peraki ki Ketesi. 10 O Peraki sa kacivi Sevuloni kei Navitalai ki Ketesi; sa lako cake vata kei ira e tini na udolu na tagane ena ruku ni nona veiliutaki ga, sa lako cake vata kei koya o Tepora. 11 O Epa na kai Kenani, mai vei ira na luvei Obaba na momo nei Mosese, sa tawasei koya tani mai vei ira na kai Kenani, sa mai birika na nona vale laca voleka e Sanaimi e Ketesi ga. 12 Era sa tukuna vei Sisera ni o Peraki na luvei Abinaomi sa lako cake ki na Ulunivanua o Tabori. 13 Sa qai vakasoqona kece o Sisera na nona qiqi ni valu, e ciwa taucoko na drau na qiqi kaukamea, kei ira kece na tamata sa tiko vata kei koya, mai na Ososeci Akoimi kin a Uciwai o Kisoni. 14 Sa tukuna o Tepora vei Peraki, "Tucake oqo na siga sa solia o Jiova mo tauri Sisera kina ena ligamu, sa sega beka ni liu tiko vei iko o Jiova?" Sa qai lako sobu mai na ulunivanua o Tabori kei na tini na udolu na tagane era sa muri koya voli. 15 Sa vakadrukai Sisera o Jiova kei na nona qiqi ni valu kei na nona mataivalu kecega na i seleiwau nei Peraki; o Sisera sa biuta na qiqi ni valu ka dro e yavana. 16 O Peraki sa cici muria na qiqi ni valu kecega me yaco sara ki Aroseci Akoimi, era sa vakamatei kece e na i seleiwau na mataivalu i Sisera; sa sega ni vo tale e dua na tamata. 17 O Sisera sa dro kina vale nei Joeli na wati Epa na kai Kenani; ni sa tiko e dua na veiwekani vinaka vei Jabina na tui Esori kei na vuvale nei Epa na kai Kenani. 18 O Joeli sa lako yani me sotavi Sisera ka tukuna vua, "Mo gole mai vei au, mo gole mai, kua ni rere." Ni rau sa gole kina vale laca, sa ubi koya sara o Joeli, ena dua nai tutuvi. 19 Sa tukuna vei Joeli, "Mo solia vei au na wai me'u gunu mada, ni'u sa via gunu." Sa qai dolava e dua na joke ni sucu ka solia vua me gunu, ka qai ubi koya tale ena i tutuvi. 20 Sa vosa o Sisera vei Joeli ka vaka; "Mo tucake tu ena katuba, kevaka sa lako mai e dua me tarogi iko ka vaka, 'sa tiko beka e ke e dua na tagane?' Mo qai tukuna,'ni sa sega.'" 21 O Joeli na wait Epa, sa taura e dua nai vako ni valelaca kei na dua nai tuki ka lako yani vakamalua ka tukia sobu nai vako ena buradelai Sisera, sa lutu sobu kina qele ni a moce lutu tu. Sa qai mate o Sisera. 22 Ni sa vakasaqarai Sisera tiko mai o Peraki, sa lako mai o Joeli me mai sotavi koya ka vaka, "Lako mai au na vakaraitaka vei iko na tamata o sa vakasaqara tiko." Ni rau sa curu yani kina vale laca nei Joeli, sa davo matemate tu o Sisera kei nai vako e buradelana. 23 Ena siga o ya sa vakamalumalumutaki Jabina kina o Jiova ena matadra na luvei Isireli. 24 Na ligadra na luvei Isireli sa kaukauwa cake tiko ga mai vei Jabini na tui Kenani me yacova ni sa vakarusai vakadua o Jabini na tui Kenani.

Turaganilewa 5

Na Sere Nei Tepora

1 O Tepora kei Peraki na luvei Abinoami e rau sa lagasere ena siga koya ka vaka: 2 "O ira na veiliutaki ni ra sa liutaki Isireli, ni ra sa soli ira mai ena yalo e galala, me vakacaucautaki o Jiova! 3 "Vakarorogo, o iko na tui! Solia mai na daligamu o iko na ravouvou! oi au, io, au na vakavinavinaka kivei Jiova na Kalou ni Isireli. 4 "I Jiova, ni o Ni sa lako tani mai Sia, Ni o ni sa cavu tu mai na buca o Itomi, sa yavavala o vuravura ka tasova mai o lomalagi, era sa sova mai na wai na vei o; 5 Na veiulunivanua sa tacoka mai kina na wai ena mata i Jiova. Na Sainiai oqo ena mata I Jiova na Kalou ni Isireli. 6 "Ena veisiga nei Samikari na luvei Anaci, ena veisiga nei Jaeci, era sa lala na veisalatu, o ira sa veitosoyaki era sa vakayagataka na sala takoso. 7 Sa sega na bula mai nakoro, sa sega e Isireli, me yacova ni'u sa basika mai, oi, au o Tepora, sa tucake e dua na tina e Isireli. 8 Era sa digitaki na veikalou vovou e Isireli; sa qai basika nai valu ena matamata; sa sega nai sasabai se na moto me laukune vei ira na vasagavulu na udolu e Isireli. 9 Na yaloqu sa tiko vata kei ira na veiliutaki e Isireli, vei ira sa soli ira ena galal! 10 "Mo ni vosa, Oi kemuni sa vodoka tiko na asa vulavula vaka daulewa, ka sa lako voli ena sala. 11 Sa yawa sara ni na kedra rorogo na dauvavana,na vanua ni veivakasuasuataki, Mai kea era na vakananuma na cakacaka dodonu i Jiova, na cakacaka dodonu vei ira na nona veikoro e Isireli; era na qai lako sobu na tamata i Jiova kina matamata ni koro. 12 "Mo yadra, mo yadra mai Tepora! Mo yadra, mo yadra, lagata na sere! Mo yadra, Peraki, ka kauti ira tani na bobula, o iko na luvei Apinoami! 13 "Era sa qai lako sobu mai na dro bula, o ira na tamata, era dauveisaqa vei ira na vakaturaga; o Jiova sa lako mai ena vukuqu ka sega ena vukudra na kaukauwa. 14 E Ifereimi sa tiko kina o ira eso era sa vu mai vei ira na Ameleki. O iko talega Penijamini kei ira na nomu tamata, mai Makiri, era sa lako mai kina na veliutaki, mai vei Sevuloni era sa tiko kina na dautaura nai titoko ni veivakacurumi mai. 15 O ira na turaga lalai e Isikari era sa tiko vata kei Tepora, me vakataki Isakari sa vaka kina o Peraki ni sa talai kina buca ena nona veiliutaki; ena kedra maliwa nai wasewase kei Rupeni. Sa veiqaliqali na yalodra. 16 Na cava o sa laki dabe tiko kina ena kedra maliwa na qele ni sipi, mo laki rogoca tiko kina na nodra tagi na sipi? Nai wasewase i Rupeni, sa solia e dua na vakatataro levu ki na yalo. 17 O Kiliati sa tiko mai na tai ka dua ni Joritani, na cava na vuna sa tiko ga kina e waqa o Tani? O Esa sa tiko ga ena veibaravi, ka sa tiko ga ena kena i curucuru. 18 O Sevuloni na tamata era sa dau solia vakarawarawa na nodra bula, ka so, sa voleka sara na mate, o Navitalai talega sa tiko ena vanua cecere ni valu. 19 "Era sa lako mai na tui ka vala, sa vala tale tikoga o tui Kenani, mai Tenaka ena wai mai Mekito; era sa sega ni taura na siliva mei toki ni valu. 20 Era sa vala mai lomalagi, na kalokalo mai na sala sa vala vata kei Sisera. 21 Na kui mai Kisoni sa kuitaki rau! 22 Sa rorogo mai na domo ni yava ni ose, Sa cici mai, sa cici mai na nona ose. 23 'Mo vakalolomataki Merosi,' sa tukuna na agilosi i Jiova, 'Me ra vakalolomataki vakaca sara baleta ni ra sa sega ni lako mai kina veivuke i Jiova, me ra valuti na kaukauwa.' 24 "Sa kalouvinaka duadua vei ira kece na yalewa o Joeli na wati Epa na tui Kenani, sa kalouvinaka o koya ena kedra maliwa na yalewa sa tiko e vale. 25 Sa kerea na wai, ia, sa solia na sucu; sa kauta mai na kirimu ena bilo vakaturaga. 26 Sa dodo yani na ligana ki nai vako ni valelaca, na ligana i matau kina i tuki nodra na daucakacaka; sa tuki Sisera, sa coba nai vako ki uluna, sa wasea ka samuta na buradelana. 27 Sa davo galugalu toka ena ruku ni yavana; ena ruku ni yavana sa lutu ka davo kina; na vanua ga sa lutu kina, sa davo matemate toka kina. 28 "O tinai Sisera sa rai tiko mai ena katuba leka, ka sa tagi lagalaga, 'E na cava sa rui berabera tiko mai kina na kareti? Na cava sa rui berabera tiko mai na rorogo ni kareti?' 29 Sa sauma vua o ira na marama vuku, io, sa sauma sara tiko ga o koya na nona taro, 30 'Era sa sega beka ni kunea ka wasea tiko nai toki ni valu: ki na tagane yadua sa dua se rua na nona goneyalewa, vei Sisera, nai sulu butakoci, e rua na tiki ni sulu sa biu ki na domo i koya sa butakoca?' 31 "Me ra sa rusa kece na meca, I Jiova! Ia o ira kece sa lomani Koya me ra vaka na matanisiga ni sa lako mai ena nodra kaukauwa kece." Sa cegu na vanua me vasagavulu na yabaki.

Turaganilewa 6

O Mitiani Sa Vakabobulataki Ira Na Isireli

1 O ira na luvei Isireli era sa cakava na ka ca ena mata i Jiova. Sa soli ira kina o Jiova ki na liga