1

1 Pagka udwaya linalang ti kalibutan, ti Bagaw daan di. Kaybi ginan kaibahan siya Diyus ag lubus parihu siya sa Diyus. 2 Ginan waya sa kabag-u ti Bagaw daan asan diman sa Diyus. 3 Ginan sa kanya pag binwat Diyus ti tanan pag manga bagay. Sa tanan tanan linalang unman may nabuwat ti Diyus nu ud ginan lang sa kanya. 4 Ti Bagaw ti gimpuunan tutuu pag buhi. Inda pag buhi ti sulu tigpakaun karayawan sa manga tawu. 5 Ti sulu magrayaw sa kadudulman ag unman dinaug kadudulman ti sulu. 6 Sinugu Diyus ti usa ka tawu kay ngaran si Huwan. 7 Nagras-ug siya nagtultul sa manga tawu tungkul sa sulu hampay nu madnugan tanan tawu kay barita, sida sumarig yi. 8 Bukun si Huwan tigpakaun karayawan sa manga tawu. Dapat nagsitay siya hampay ipagbarita niya ti sulu. 9 Tunda ngani ti tutuu gid pag sulu ti nagsitay sa kalibutan hampay kay marayawan ti tanan manga tawu. 10 Sitay yi sa babaw daga ti Bagaw. Madi kay linalang Diyus ti kalibutan ginan sa kanya, unman waydi nakilala siya manga tawu sa kalibutan. 11 Nagsitay siya sa kay sadili daga, dapat kay manga kanasyun unman nagtanggap sa kanya. 12 Ti iba lang nagtanggap ag nagsarig sa kanya. Bag-u sida ti pinakan-an niya karampatan hampay sida manga anak yi Diyus. 13 Sida manga anak yi Diyus dapat balaw parihu sa tawu pag kapanganakan may ama may ina. Ginan sa Diyus pag natanggap nida kanda buhi. 14 Nabilug tawu ti Bagaw, nangulian siya sitay sa kanmi. Mayad yi lang gid kay nabubut-un niya ag lubus ipinakilala niya ti katutuuhanan tungkul sa Diyus. Nakitan nimi kay kadayawan kay tinanggap ginan sa Ama dahil siya ti Bugtung Anak. 15 Itinultul ni Huwan tungkul sa kanya sa manga tawu. Iinalsa niya kay busis magkun, "Inda yi ngani ti pagsabihun niku, may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya." 16 Unman may kinatabwanan ti kaayadan kay ipinapalad sa kanta dahil sa kay lubus mayad nabubut-un. 17 Ti Kasuguan ipinadakit ni Muysis sa kanta. Dapat ginan sa kan Hisu-Kiristu pag naalaman nita ti mayad nabubut-un Diyus hanggan ti katutuuhanan tungkul sa kanya. 18 Kaybi ginan unman may tawu nakakit sa Diyus. Ti Bugtung Anak ti nagpakilala sa manga tawu nu kabitay ti Diyus. Dahil ti Bugtung Anak parihu sa Diyus ag pirmi gid sa kay arani Ama. 19 Ti manga pinunu Hudiyu nagsugu sa manga manug-asiwa balay Diyus hanggan sa manga Libita ginan sa Hirusalim hampay mamaingana sa kan Huwan magkun, "Si unu kawu?" Bag-u inda yi kay itinultul ni Huwan. 20 Balaw may salawahan kay sagut, itinapat yi gid magkun, "Balaw aku ti pinili Diyus Manugribri pag Hari." 21 Pinmaingana maan sida magkun, "Nu katunda, si unu ngani kawu? Kawu yi aw si Ilyas?" Sinagut ni Huwan magkun, "Bukun duy, balaw aku si Ilyas." Magkun sida, "Kawu aw ti Purupita, ti pag-alagdun nimi?" Sinmagut si Huwan magkun, "Balaw aku." 22 Sinabi nida sa kanya magkun, "Si unu gid kawu? Kailangan may isagut kami sa manga nagsugu sa kanmi. Kabitay kanmu masabi tungkul sa kanmu sadili?" 23 Sa kay nagsagut ginamit ni Huwan ti manga isinurat ni Purupita Isayas. Magkun si Huwan, "Aku duy 'ti busis usa ka magtawag sa pangawakawaan magkun, tadlunga niyu ti dalan kay lakawan Panginuun.' " 24 Tunda pag manga sinugu ginan ngani sa manga Parisiyu. 25 Bag-u nagpaingana sida sa kan Huwan magkun, "Hayga kawu magtulbaw nu unman kawu ti pinili Diyus Manugribri pag Hari, bukun diman kawu si Ilyas ag nu unman diman waydi kawu ti Purupita?" 26 Sinmagut si Huwan magkun, "Aku magtulbaw sa danum. Dapat may usa ka tawu matindugan sa kanyu karaw-an unman niyu nakilala. 27 Siya ti dumasun sa kang uryan, dapat unman gid aku may karampatan makalubad kay higut niya manga lapak." 28 Inda tanan nangyari sa banwa Bitanya, baliwa sa butlakan init sapa Hurdan, sa kan Huwan pagtulbawan. 29 Pagka sa usa ka sirang, nakitan ni Huwan si Hisus magpakarani sa kanya. Sinabi ni Huwan magkun, "Tunda yi ti Anak Karanidu kay ihinanda Diyus hampay mapatawad ti kasalanan kalibutan. 30 Imaw yi ngani kang pagsabihun may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya. 31 Unman aku nakaalam nu si unu tunda ti dumasun sa kangku. Dapat nagsitay aku magtulbaw sa manga tawu sa danum hampay ipakilala niku siya sa nasyun Israil." 32 Bag-u nagtultul si Huwan sa manga tawu magkun, "Naki-&tan niku ti Ispiritu ga kalampati magpakababa ginan sa langit bag-u nangulian ti Ispiritu sa kanya. 33 Ati katpung udwaya nakilala niku siya. Dapat Diyus ti nagsugu sa kangku hampay magtulbaw sa danum, imaw diman ti nagsabi sa kangku magkun, 'Makitan nimu aban ti Ispiritu magpakababa tag sa usa ka tawu hampay mangulian sa kanya. Tunda yi ngani pag tawu imaw ti tumulbaw sa manga tawu sa Ispiritu Banal.' " 34 Magkun si Huwan, "Nakitan yi ngani niku tunda pag nangyari. Pag-itultul yi niku sa kanyu tunda pag tawu imaw yi gid ti Anak Diyus." 35 Pagka sa usa ka sirang asan yi maan matindugan si Huwan hanggan kay duwa ka tuludluan. 36 Nakitan niya si Hisus maglawuy. Sinabi ni Huwan magkun, "Tunda yi ti Anak Karanidu kay ihinanda Diyus." 37 Ti duwa ka tuludluan nakadnug sa kay sinabi ni Huwan bag-u kinmuyug sida sa kan Hisus. 38 Nangaliwliw si Hisus. Pagka nakitan niya sida magkuyug, pinmaingana siya sa kanda magkun, "Hintay duy kanyu paghanapun?" Sinmagut sida magkun, "Naan duy kawu pag mag-&uli, Rabi?" (Kay ibug sabihun Maisturu) 39 Sinmagut si Hisus sa kanda magkun, "Atag yi lugud kita hampay makitan niyu kang ulian." Ati katpung manga palis ti init. Kinmuyug ngani sida bag-u nakitan nida kay ulian ni Hisus. Nadugay sida sa kan Hisus hanggan di magkayabi yi. 40 Ti usa sa kanda duwa si Andiris, kay patar-ari ni Simun Pidru. 41 Susun yi hinanap ni Andiris kay patar-ari si Simun. Bag-u kan Andiris sinabi sa kanya magkun, "Nakitan duy nimi ti pinili Diyus Manugribri pag Hari." (Nu sa Giriyigu kay ibug sabihun Kiristu.) 42 Bag-u kan Andiris tinaban si Simun tag sa kan Hisus. Nagbantay si Hisus sa kan Simun bag-u kay sinabi magkun, "Kawu si Simun, kan Huwan anak. Dapat ingarnan kawu Sipas. (Kay usa ka ngaran Pidru. Una Sipas una Pidru parihu kay kahulugan tanang batu daka). 43 Pagka sa usa ka sirang inisip ni Hisus siya atag yi sa Galiliya. Nakitan niya si Pilipi bag-u magkun si Hisus sa kanya, "Pagkuyug duy kawu sa kangku." 44 Taga Bitsayda si Pilipi, parihu sa kanda ni Andiris ni Pidru taga Bitsayda waydi. 45 Nakitan maan ni Pilipi si Natanail. Bag-u sinabi ni Pilipi sa kanya magkun, "Nakabtaan nimi si Hisus taga Nasarit kay anak ni Husi. Imaw ti pagturunuhun ni Muysis sa kay isinurat sa Kasuguan, siya diman waydi hanggan ti pagturunuhun manga Purupita." 46 Nagpaingana si Natanail magkun, "May lumuwang aw lugud kaayadan ginan sa Nasarit?" Sinmagut si Pilipi magkun, "Atag lugud kita, bantayi nimu." 47 Pagka nakitan ni Hisus si Natanail magpakarani sa kanya, sinabi niya tungkul sa kan Natanail magkun, "Tunda pag tawu tutuu gid Israilita. Unman gid siya maradaya." 48 Bag-u pinaingana ni Natanail sa kan Hisus magkun, "Kabitay duy kawu pag nakakilala yi sa kangku?" Sinmagut si Hisus magkun, "Pagka udwaya kawu bin-ul ni Pilipi, daan yi duy kawu nakitan niku kanmu waya sa sirung puun igus." 49 Magkun si Natanail, "Maisturu, kawu yi duy ti Anak Diyus, kawu yi ti Hari nasyun Israil." 50 Sinabi ni Hisus magkun, "Nakan aw duy kawu maniwala dahil sa kang sinabi magkun, nakitan yi niku kawu kanmu waya sa sirung puun igus? Makitan nimu aban ti lalu waya makadululaw." 51 Bag-u sinabi ni Hisus sa kanya magkun, "Ungud gid duy kang pagsabihun sa kanyu, makitan niyu aban nabukasan ti langit, ti manga anghil Diyus may tag sa daga may tag sa langit dahil sa kanda magpasakup sa kapangyarihan Anak Tawu."

2

1 Pagka sa ikatlu pag sirang, may pamasaruhan sa banwa Kana, sa daga Galiliya. Nag-ati diman kay ina ni Hisus. 2 Binan-awan diman sa pamasaruhan si Hisus hanggan kay manga tuludluan. 3 Pagka kinurang yi sida alak sa karan-an, sinabi niya ina sa kan Hisus magkun, "Udyi maaw duy sida may alak." 4 Sinabi ni Hisus sa kanya magkun, "Danga duy, Inang, pagpakialmi nimu kang buwat. Dahil udwaya kainda ti udas hampay ipakilala niku kang buruwatun." 5 Bag-u sinabi niya ina sa manga manugtirindugun magkun, "Sunda duy niyu una hintay kay pagsabihun sa kanyu." 6 May minana ti manga Hudiyu ugali maglumpiyu kanda bilug hanggan kanda manga gamit bag-u makasamba sa Diyus. Nakan siyun pag balay ti may puun pamasaruhan may unum waydi ka tapayan. Kay sukad kada tapayan manga unum ka banga danum. 7 Sinabi ni Hisus sa manga manugtirindugun sa karan-an magkun, "Pun-a duy niyu ti manga tapayan danum." Pagka kanda yi ngani pinunu hanggan sa bibig, 8 sinabi ni Hisus sa kanda, "Kadlui yi niyu danum daran-a tag sa manugkasuniru." Kanda yi ngani dinara. 9 Tinigsiman niya ti danum nagbaliw alak. Unman alam niya nu naan ginan tunda, dapat alam diman manga manugtirindugun nu naan ginan tunda dahil sida diman ti nagkadlu. Bag-u bin-ul kasuniru ti lalaki ipasaru, 10 magkun siya, "Ti un-an mana ihayin kay mayad pag alak. Pagka daka yi ti ininum manga tawu bag-u kay alanganlangan yi pag alak. Bati hayga ipinauryan ngap niyu ti marinu pag kalasi alak?" 11 Tunda kay binwat ni Hisus sa Kana, sa daga Galiliya, imaw ti kabag-u binwat niya pag makapangyarihan pag tanda. Ati katpung pag ipinakakit niya kay kamaskihan bag-u nagsarig yi sa kanya kay manga tuludluan. 12 Bag-u si Hisus, kay ina, kay manga patar-ari hanggan kay manga tuludluan nag-ati sa Kapirnaum. Nadugay sida ati manga usa ka duminggu. 13 Arani yi ti Kapistahan sa Pag-alaala sa Karibrihan. Nakan nag-ati si Hisus sa Hirusalim. 14 Pagka ati siya sa balay Diyus, nakitan niya ti manga magpabili manga baka, manga karanidu hanggan manga kalampati. Siyun diman pag matukawan ti manga manugbalyu kuwarta. 15 May linubid si Hisus pamakul bag-u binugaw niya ginan sa balay Diyus ti tanan hayup, una karanidu una baka. Linikwang niya ti manga burugtangan kuwarta manga manugbalyu, ipinamuhus yi lang niya kanda kuwarta. 16 Sinabihan niya ti manga magpabili kalampati magkun, "Bul-a niyu tunda atay ginan. Danga yi niyu pagbuwata palingkihan ti balay niku Ama." 17 Bag-u naisipan niya manga tuludluan ti pagsabihun sa Banal Kasuratan magkun, "Diyus, ga apuy malabdaban sa kang tagipusuun kang magpahalaga sa kanmu balay." 18 Pagka nakitan manga pinunu Hudiyu kay binwat ni Hisus, pinaingana nida sa kanya magkun, "Hintay pag tanda kanmu ipakakit sa kanmi hampay maalaman nimi may karampatan ngani kawu magbuwat katida." 19 Sinagut ni Hisus magkun, "Gubaa niyu inda pag balay Diyus bag-u ipatindug maan niku sa sulud tulu lang ka sirang." 20 Pinaingana manga Hudiyu magkun, "Ipatindug aw lugud nimu inda sa sulud tulu lang ka sirang? Upatpulu may unum ka timpu kay kadugay kay nagpatindug inda pag balay Diyus." 21 Dapat ti pagkumnun ni Hisus balay Diyus kay yi bilug. 22 Pagka nabuhi uman si Hisus ginan sa kamatayan naalaala niya manga tuludluan inda kay sinabi nakan nagpatutuu ngani sida sa Kasuratan hanggan sa kay manga sinabi ni Hisus. 23 Kay di waya sa Hirusalim si Hisus katpung sa Kapistahan sa Pag-alaala sa Karibrihan, nakitan manga tawu kay binwat manga makapangyarihan pag tanda, nakan mayamu ti nagsarig sa kanya. 24 Dapat unman isinarig niya kay sadili sa kanda dahil kilala di niya ti tanan tawu. 25 Unman kailangan may tumultul sa kanya tungkul sa manga tawu dahil daan alam yi waydi niya kay nalub-anan nida tanan.

3

1 May usa ka Parisiyu, kay ngaran si Nikudimu. Pinunu siya manga Hudiyu. 2 Nag-ati siya sa kan Hisus sa yabi. Bag-u kay sinabi sa kan Hisus magkun, "Maisturu, alam nimi duy kawu sinugu Diyus hampay manugtudlu sa manga tawu. Dahil tunda pag manga tanda kanmu pagbuwatun, mabuwat lang tawu nu sa kanya gid ti Diyus." 3 Sinmagut si Hisus magkun, "Ungud gid inda kang pagsabihun sa kanmu duy, dayu gid makapasakup ti tawu sa kay paghari Diyus, purya lang nu siya ainanak inuman." 4 Pinaingana ni Nikudimu sa kanya magkun, "Kabitay duy pag mianak uman ti tawu nu gurangun yi siya? Dayu gid siya makasulud maan sa tiyan niya ina hampay ianak uman." 5 Sinmagut si Hisus magkun, "Ungud gid duy kang pagsabihun sa kanmu, dayu makapasakup ti tawu sa kay paghari Diyus, purya lang nu siya ainanak sa panab-anan danum hanggan Ispiritu Banal. 6 Pagka ti tawu ainanak niya gurang, may buhi yi kay bilug. Dapat nu ainanak siya Ispiritu Banal, may buhi kay tagipusuun. 7 Danga duy kawu maglingut sa kang sinabi sa kanmu magkun kailangan kamu ianak uman. 8 Maghuyup ti durus una naan ginan kay gustu. Mag-adnugan nimu kay hagunung, dapat unman nimu alam nu naan ginan kay umpisa ag nu naan tag kay turunu. Katunda diman ti kada tawu nu ainanak siya Ispiritu." 9 Sinabi ni Nikudimu magkun, "Kabitay nguna pag mangyari tunda duy?" 10 Sinmagut si Hisus magkun, "Kawu duy kabay manugtudlu sa Israil? Hayga unman magkasalman nimu inda pag manga katutuuhanan? 11 Ungud gid duy kang pagsabihun sa kanmu, ti magkaalaman nimi imaw ti kanmi pagsabihun ag ti kanmi nakitan imaw ti pag-itultul nimi. Dapat unman kamu magpaniwala sa kanmi pag-itultul. 12 Nu kamu unman magpaniwala sa kang itinultul tungkul sa manga mangyari sitay sa babaw daga, kabitay duy kamu pag pumaniwala nu kang itultul sa kanyu tungkul sa manga mangyari sa langit? 13 Unman may tawu nakaati sa langit, purya lang ti Anak Diyus, imaw ti nagsitay ginan sa langit." 14 Kaybi kanda sa pangawakawaan di waya, tinur-ug ni Muysis ti ulay galang tag sa tungud. Katunda diman waydi kailangan ipaabwat ti Anak Tawu, 15 hampay una si unu pag tawu nu sumarig sa Anak Tawu, may tutuu pag buhi unman may katapusan. 16 Daka gid kay pagmahal Diyus sa tanan tawu sa babaw daga, nakan ipinakaun niya kay Bugtung Anak hampay una si unu pag tawu nu sumarig sa kanya, dayu ipadamhak sa kamatayan, bagkus ngap may tutuu pag buhi siya unman may katapusan. 17 Sinugu Diyus kay Anak balaw hampay sintinsiyahan niya ti manga tawu sa kaparusahan, bagkus ngap hampay iribri niya ti manga tawu. 18 Ti tawu nu sumarig sa Anak Diyus, balaw pagsintinsiyahan sa kaparusahan. Dapat ti unman magsarig nasintinsiyahan yi sa kaparusahan, dahil unman siya nagsarig sa kapangyarihan Bugtung Anak Diyus. 19 Kainda kay paraan Diyus magpihu sa daut sa mayad. Nagsitay sa kalibutan ti katutuuhanan ga karayawan ginan sa Diyus. Dapat pinalabi waya manga tawu ti kadudulman sa karayawan, dahil daut kanda manga buwat. 20 Una hintay pag tawu tigbuwat daut magdayu di sa karayawan, unman gid siya magkaibug magpakarani sa marayaw, barang makilala manga iba kay buwat daut. 21 Dapat ti tawu nu nag-ugali siya sa katutuuhanan, pumakarani ngap sa karayawan hampay makilala kay manga buruwatun angay sa kay pakiusa sa Diyus. 22 Bag-u si Hisus hanggan kay manga tuludluan nag-ati sa daga Hudiya. Nadugay siya ati kaibahan nida, nagtulbaw siya sa manga tawu. 23 Si Huwan nagtulbaw diman waydi sa manga tawu ati sa Inum, balaw arayu sa Salim, dahil ati daka pag danum. Nag-ati sa kanya ti manga tawu bag-u kay itinulbaw sida. 24 Dahil ati katpung udwaya pinirisu si Huwan. 25 Kay iba manga tuludluan ni Huwan hanggan ti usa ka Hudiyu nag-aratwan tungkul sa kanda ugali maglumpiyu kanda bilug hanggan kanda manga gamit bag-u makasamba sa Diyus. 26 Bag-u nagpakarani sida sa kan Huwan ag sinabi nida sa kanya magkun, "Maisturu, kaybi pagka kita baliwa sa butlakan pag pangpang sapa Hurdan, may kaibahan kabay kawu usa ka tawu, kanmu diman itinultul sa kanmi. Siya maaw magtulbaw yi waydi kainda, kadamlan ngap tawu ti atag sa kanya." 27 Sinabi ni Huwan sa kanda magkun, "Dayu mangyari ti katida sa tawu, purya lang nu Diyus ti may buwat sa kanya. 28 Nakadnug diman gid kamu sa kang sinabi magkun, balaw aku ti pinili Diyus Manugribri pag Hari. Sinugu lang aku hampay umuna sa kanya. 29 Ti babayi ipasaru sa kay lalaki arasawan-un. Ti iribahun mag-alagad sa lalaki ipasaru. Nakabaya ti manug-iba nu makad-&nug siya sa kay magbagaw lalaki ipasaru. Katunda diman ungud kang magbaya taynguna. 30 Kailangan siya ti may kadayawan, kailangan aku ti sa sirung." 31 Ti ginan sa langit imaw ti makamaskihan man sa tanan tawu. Ti ginan sa babaw daga, imaw ti taga daga yi ngani. Ti taga babaw daga kay baragawun para waydi sa babaw daga. Dapat ti taga langit imaw ti makamaskihan man sa tanan tawu. 32 Pag-itultul niya kay nakitan hanggan kay nadnugan dapat unman may tawu magpaniwala sa kay pag-itultul. 33 Nu ti tawu magpaniwala sa kay pag-itultul, tunda ngani pag tawu tigpuruyba sa kay katutuuhanan Diyus. 34 Ti sinugu Diyus imaw tigbarita manga bagaw ginan sa Diyus dahil pag-ilubus Diyus kay Ispiritu sa kanya. 35 Ti Anak pagmahalun niya Ama nakan ipinasakup Ama ti tanan tanan pag manga bagay sa kapangyarihan niya Anak. 36 Nu ti tawu magsarig sa Anak, may tutuu pag buhi siya unman may katapusan. Dapat nu ti tawu unman magpaniwala sa Anak, dayu siya makatanggap buhi, bagkus ngap udyi madura sa kanya kay parusa Diyus.

4

1 Nabaritaan manga Parisiyu paggaryahun pag-itulbaw ni Hisus lalu mayamu man pag manga tawu balaw lang ga kan Huwan pag itinulbaw. 2 Dapat nu sa ungud unman nagtulbaw si Hisus. Kay di manga tuludluan ti nagtulbaw sa manga tawu. 3 Pagka naalaman ni Hisus ti pagsabihun manga Parisiyu, nighit siya ginan sa Hudiya, binmalik maan siya tag sa Galiliya. 4 Sa kay nag-atag sa Galiliya kailangan siya ati lakaw sa daga Samarya. 5 Pagka sa daga Samarya, linmakaw si Hisus sa usa ka banwa kay ngaran Sikar, balaw arayu sa kan Hakub kaybi waya itinayak pag daga sa kay anak sa kan Husi. 6 Siyun diman kan Hakub kaybi kinali pag bubun. Si Hisus tinaklay sa kay maglakaw, tinmukaw sa kay bibig bubun. Manga karaw-an yi sirang ati katpung. 7 May babayi taga Samarya rinmas-ug siyun manaas. Sinabi ni Hisus sa kanya, "Nai duy danum." 8 Kay manga tuludluan linmakaw nag-ati sa banwa mamili karan-unun. 9 Magkun ti babayi sa kan Hisus, "Hudiyu kawu, aku taga Samarya. Kabitay kawu pag makahagad danum sa kangku?" Dahil ti manga Hudiyu balaw makapaminsan sa manga taga Samarya. 10 Sinmagut si Hisus magkun, "Nu abi maalaman lang nimu nu hintay kay pag-&ipakaun Diyus ag nu si unu ti naghagad kam danum, mahimu kawu ngap mana ti humagad sa kanya, hampay ipakaun niya sa kanmu ti danum imaw ti makapakaun buhi sa tawu." 11 Sinabi babayi sa kanya magkun, "Dapat duy unman may pangadlu kawu, abasad paman ti bubun. Naan pag bul-un nimu tunda pag danum tigpakaun buhi sa tawu? 12 Kanmi ginurang si Hakub ti may pamana kaybi sa kanmi inda pag bubun. Siya, kay manga anak hanggan kay manga hayup nag-inum diman danum ginan sa inda pag bubun. Kanmu aw lugud gustu sabihun kawu makamaskihan man sa kan Hakub?" 13 Sinmagut si Hisus magkun, "Nu ti tawu uminum sa inda pag danum, uwawun di maan siya. 14 Dapat dayi gid uwawun ti tawu una kapira aban nu inmun niya ti danum kang ipakaun sa kanya. Dahil ti danum kang ipakaun sa kanya bumaliw ga bulbugan sa kay tagipusuun may danum magpakaun buhi. Tunda pag danum tigpakaun tutuu pag buhi unman may katapusan." 15 Sinabi babayi sa kanya magkun, "Pakan-i gid duy nimu aku tunda pag danum hampay udyi gid aku uwawun, udyi kailangan aku manaas sitay tag." 16 Bag-u sinabi ni Hisus sa kanya magkun, "Pag-uli dapu kawu duy, bul-a kam asawa bag-u pagsitay maan." 17 Sinmagut ti babayi magkun, "Unman duy aku may asawa." Sinabi ni Hisus sa kanya magkun, "Tama kanmu sinabi unman may asawa kawu. 18 Dahil kaybi lima yi kanmu manga asawa, dapat taynguna asan pag lalaki bukun kanmu asawa. Tutuu ngani kanmu sinabi sa kangku." 19 Sinabi babayi sa kan Hisus magkun, "Purupita maaw duy kawu. 20 Kanmi manga ginurang nagsamba sa Diyus sa inda pag bantud. Dapat pagsabihun niyu pag manga Hudiyu kuntay ati di sa Hirusalim kailangan magsamba sa Diyus ti manga tawu." 21 Sinabi ni Hisus sa babayi magkun, "Kailangan pagpasnu yi kawu duy sa kang pagsabihun sa kanmu. Arani yi ti kaudasan aban balaw yi sa inda pag bantud una paman sa Hirusalim pag sumamba ti manga tawu sa Ama. 22 Kamu tanan pag manga taga Samarya, unman gid niyu nakilala ti kanyu pagsambahan. Nu bay kami manga Hudiyu kilala gid nimi ti kanmi pagsambahan, dahil ginan sa manga Hudiyu pag itinaratu Diyus ti karibrihan. 23 Dapat arani yi gid ti udas, kainda yi ngap, pag-udyukan Ispiritu Diyus ti manga tawu sa kanda magsamba sa Ama dahil siya ti tutuu pag Diyus. Nakan kay paghanapun Ama tunda ngani pag manga tawu ti mangungud sa kanda magsamba sa kanya. 24 Ti Diyus Ispiritu, nakan ti tawu unman ungud makasamba purya lang nu siya udyukan Ispiritu Diyus." 25 Bag-u sinabi babayi sa kan Hisus magkun, "Alam niku duy sumitay ti pinili Diyus Manugribri pag Hari. Sa kay magsitay aban itudlu niya sa kanmi ti tanan tanan bagay." 26 Bag-u sinabi ni Hisus sa kanya magkun, "Aku tigbagaw sa kanmu kainda imaw yi ngani ti kanmu pagkumnun." 27 Pagka sinabi ni Hisus tunda sa babayi, rinmas-ug kay manga tuludluan. Kanda kinadulawan nu hayga siya maghampang sa babayi. Dapat unman may nakabaya nagsabi sa babayi magkun, "Hintay kam kailangan?" aw ngatay sa kan Hisus magkun, "Hayga kawu maghampang sa kanya?" 28 Bag-u tinayakan babayi kay banga punu danum, nag-ati siya sa banwa nagsabi sa manga tawu magkun, 29 "Atag lugud kita duy, bantayi niyu ti usa ka tawu nagsabi sa kangku tanan niku binwat kaybi ginan. Imaw aw nguna tunda ti pinili Diyus Manugribri pag Hari?" 30 Naglinuwas yi ngani ti manga tawu ginan sa banwa nag-ati sa kan Hisus. 31 Kay ati waya sa banwa ti babayi, pagpilitun mana niya manga tuludluan si Hisus magkun, "Maisturu, pagkaun dapu kawu." 32 Dapat sinabi niya sa kanda, "Aku duy may kinaun karan-unun unman niyu magkaalaman." 33 Nakan magha-&rampangan kay manga tuludluan magkun, "May nagtibu aw nguna karan-unun sa kanya?" 34 Magkun si Hisus sa kanda, "Kang pinagkakaran-unun duy kang yi ngani magtupad sa kay kagustuhan niku Ama hanggan sa ud matapus niku ti buruwatun kay iinintirga sa kangku, dahil siya ngani ti nagsugu sa kangku. 35 "May sanglitan kamu magkun, upat waya ka bulan bag-u mangani yi. Dapat pagsabihun niku sa kanyu, bantayi niyu ti manga tanman. Lutu yi, mahimu yi anihun. 36 Ti manug-ani magtanggap yi kay patabig. Pagtipunun niya ti burak atag sa buhi unman may katapusan. Nakan minsan nakabaya ti manug-&pamgas hanggan ti manug-ani. 37 Tutuu ngani ti sanglitan manga tawu magkun, tuhay tigpamgas, tuhay maan tig-ani. 38 Dahil sinugu niku kamu hampay kanyu anihun ti unman binudlayan niyu. Ti binudlayan manga iba, pinakinabangan ngap niyu." 39 Mayamu pag manga tawu taga ati pag banwa sa daga Samarya nagsarig sa kan Hisus dahil sa kay sinabi babayi magkun, "Itinultul niya sa kangku ti tanan niku binwat kaybi ginan." 40 Nakan pagka rinmas-ug ti manga Samaritanu sa kan Hisus, tinawidan nida siya siyun dapu siya sa kanda. Nakan nadugay si Hisus sa kanda duwa ka yabi. 41 Lalu waya mayamu tawu ti nagsarig sa kan Hisus dahil sa kay itinudlu niya. 42 Sinabi nida sa babayi magkun, "Nagsarig kami taynguna sa kan Hisus balaw dahil sa kanmu sinabi sa kanmi. Taynguna kami magsarig dahil sa kanmi nadnugan sa kanya. Nakilala yi waydi nimi siya yi ngani ti Manugribru sa manga tawu taga kalibutan." 43 Pagka nakalawuy duwa ka sirang, ginminan yi si Hisus atabug sa Galiliya. 44 Si Hisus yi waydi ti may sabi magkun, "Ti purupita unman paggalangun manga tawu sa kay sadili banwa." 45 Pagka rinmas-ug siya sa Galiliya, mayad kanda nagtanggap sa kanya ti manga taga ati. Dahil ati diman waydi sida sa Hirusalim katpung sa Kapistahan sa Pag-alaala sa Karibrihan, ag kanda nakitan ti tanan binwat niya ati. 46 Nag-ati maan si Hisus sa banwa Kana sa daga Galiliya. Ati kaybi pinabaliw niya alak ti danum. Ati sa Kapirnaum may tawu mataas kay katungkulan, may sakit kay anak lalaki. 47 Pagka naalaman niya rinmas-ug maan si Hisus sa Galiliya ginan sa Hudiya, nag-ati siya nagpakihampang sa kan Hisus magkun, "Pag-atag dapu kawu sa Kapirnaum, paayada duy kang anak lalaki dahil hirimugtasun yi kay arup." 48 Sinabi ni Hisus sa kanya magkun, "Kamu unman gid magsarig nu ud may mag-&akitan manga makadululaw pag tanda." 49 Sinabi pinunu sa kan Hisus magkun, "Pagkuyug yi gid mana kawu sa kangku duy barang mamatay kang anak." 50 Sinabi ni Hisus magkun, "Pag-&uli yi duy kawu, mayad yi kanmu anak." Sinmarig yi gid ti pinunu sa kan Hisus bingagaw. Nuli yi ngani siya. 51 Pagka sa dalan di waya, sinulang yi siya niya manga panawuhun magkun sida, "Mayad yi duy kam anak." 52 Namaingana ti pinunu nu kabitay ti udas kay nagmayad. Magkun sida, "Kaaldaw ligdas ti init nahumpawan yi siya kay init bilug." 53 Bag-u naalaala ama ati ngap katpung pag udas sinabi ngani ni Hisus, "Mayad yi kam anak." Nakan tunda pag pinunu hanggan kay asawa, kay manga anak nagsarig yi sa kan Hisus. 54 Inda yi ngani kay ikadwa pag makapangyarihan pag tanda kay binwat ni Hisus pagka nuli siya sa Galiliya ginan sa Hudiya.

5

1 Pagka dugay may Kapistahan ti manga Hudiyu nakan nag-ati si Hisus sa Hirusalim. 2 Ati sa Hirusalim sa may puwirtahan palalakawan manga karanidu may daka gid pag tangki. Sa kay palibut tangki may lima ka parat-ungan. Nu sa bagaw Hibriyu tunda pag tangki kay ngaran Bitisda. 3 Ati sa manga parat-ungan maigyaan ti kadamlan may manga dahilan, may manga buta, may pilay, manga lunu. Mag-alagad sida sa tumandug ti danum. 4 Dahil may pangudasun lang kay magras-ug ti usa ka anghil Panginuun bag-u pagkuyikawun niya ti danum sa tangki. Ti un-an nagsugbu pagka natandug ti danum, magkaayadan kay dahilan. 5 May usa ka lalaki diman ati, tatlumpulu may walu yi ka timpu kay sakit. 6 Nakitan siya ni Hisus maigyaan ati. Alam ni Hisus dugay yi pag timpu kay sakit. Sinabi niya sa may sakit magkun, "Magkaibug aw kawu maayadan?" 7 Nagsagut ti lalaki may sakit magkun, "Pagka magkatandug ti danum, unman may tawu magdara sa kangku tag sa tangki. Kang di waya mag-atag, magkaunahan yi aku manga iba." 8 Sinabi ni Hisus sa kanya magkun, "Pagtindug yi duy kawu, daran-a yi kam amak, paglakaw yi." 9 Kadaka nag-ayad yi siya, dinara yi niya kay amak, linmakaw yi rargu. Katpung sa sirang pamahari pag pinaayad ni Hisus tunda pag tawu. 10 Nakan nanamyaw ti manga pinunu Hudiyu sa kanya magkun, "Sirang pamahari taynguna, labag sa Kasuguan nita nu kawu magdara kanmu amak." 11 Dapat sinabi niya sa kanda magkun, "Ti nagpaayad sa kangku imaw ti may sabi sa kangku magkun, 'Daran-a kam amak paglakaw yi.' " 12 Nagpaingana ti manga pinunu Hudiyu sa kanya magkun, "Si unu tunda pag tawu ti nagsabi sa kanmu, 'Daran-a kam amak'?" 13 Dapat unman niya alam nu si unu ti nagpaayad sa kanya. Kadamlan waydi tawu siyun nakan udyi may nakitan siya sa kan Hisus. 14 Bag-u nakitan maan siya ni Hisus sa balay Diyus. Magkun si Hisus sa kanya, "Malu duy, kawu mayad yi. Inda ginan danga yi kawu magkasala, bagay mangyari maan sa kanmu ti lalu daka pag kadautan." 15 Bag-u nag-ati ti tawu, sinabi niya sa manga pinunu Hudiyu si Hisus ti nagpaayad sa kanya. 16 Siyun ginan pag-unuunuhun yi manga Hudiyu si Hisus dahil pinaayad niya tunda pag tawu sa sirang pamahari. 17 Nakan sinabi ni Hisus sa kanda magkun, "Hanggan taynguna unman may kaapasan kang Ama sa kay buwat, nakan una aku magbuwat diman gid." 18 Pagka sinabi ni Hisus tunda lalu waya siya paggayakun manga pinunu Hudiyu, dahil naglabag siya sa pagsabihun sa Kasuguan tungkul sa sirang pamahari, ag pagkumnun waya niya ti Diyus kay gid Ama, kay ibug sabihun pinaparihu niya kay sadili sa Diyus. 19 Bag-u sinabi ni Hisus sa manga pinunu Hudiyu magkun, "Ungud gid inda kang pagsabihun sa kanyu, ti Anak unman may karampatan magbuwat una hintay nu ginan lang sa kay sadili. Ti nakitan Anak sa kay Ama pag buwat imaw diman ti pagbuwatun niya. 20 Dahil ti Anak pagmahalun gid Ama, ag ti tanan buruwatun Ama pag-ipakakit niya sa Anak. May lalu waya makamaskihan pag buwat kay ipakakit Ama sa Anak, balaw lang ga inda pag binwat niya. Pihu kamu lalu gid madulaw aban. 21 Dahil nu kabitay pagbuhiun uman Ama ti manga namatay, katunda diman waydi pagbuhiun uman Anak una hintay pag tawu kay gustu buhiun uman. 22 Unman diman magpihu ti Ama sa una hintay pag tawu nu daut nu mayad. Iinintirga niya sa Anak ti karampatan hampay makapihu sa manga tawu nu daut nu mayad, 23 hampay ti tanan tawu gumalang sa Anak parihu sa kanda maggalang sa Ama. Nu ti tawu unman maggalang sa Anak, unman diman waydi paggalangun niya ti Ama ti nagsugu sa Anak. 24 "Ungud gid inda kang pagsabihun sa kanyu, nu ti tawu magtanggap sa kang bagaw ag magsarig sa Diyus sa nagsugu sa kangku, tunda pag tawu may tutuu pag buhi unman may katapusan. Balaw yi sakup siya sa sintinsiya aban. Kay patabgan balaw yi kamatayan, bagkus ngap buhi kay patabgan. 25 Tutuu gid kang pagsabihun sa kanyu, arani yi ti udas, kainda yi ngapu, ti manga tawu ga tigbak makadnug sa kay magbagaw Anak Diyus bag-u makatanggap sida buhi. 26 Nu kabitay ti Ama may gimpuunan buhi, katunda diman ipinakaun niya sa Anak ti karampatan hampay may gimpuunan siya buhi. 27 Pinakan-an niya ti Anak karampatan makapihu sa tawu nu daut nu mayad, dahil siya ti Anak Tawu. 28 Danga kamu magkadulaw, dahil udyi dugay aban makadnug ti tanan manga namatay sa kang magbagaw. 29 Bag-u sida lumuwang ginan sa kalubngan. Ti manga nagbuwat mayad buhiun uman hampay may buhi unman may katapusan. Ti manga nagbuwat daut buhiun uman bag-u sintinsiyahan sida sa kaparusahan." 30 Sinabi ni Hisus magkun, "Unman aku may karampatan magbuwat una hintay nu ginan lang sa kang sadili. Angay lang sa kang nadnugan ginan sa Ama pag makapihu aku sa tawu nu daut nu mayad. Nakan aku balaw magsalan sa kang magpihu sa tawu, dahil aku unman magsunud sa kang sadili lang kagustuhan. Bagkus ngap kang pagsundan ti kagustuhan Ama, imaw ti nagsugu sa kangku. 31 "Nu aku lang tigtultul tungkul sa kang sadili, barang pahimudilun manga tawu. 32 Dapat hanggan ti Ama magpakilala diman nu si unu aku ag alam niku tutuu ti pagsabihun niya tungkul sa kangku. 33 Nagpasugu kamu atag sa kan Huwan bag-u ipinakilala diman niya ti katutuuhanan. 34 Balaw kuntay aku may kailangan sa manga pagsabihun tawu tungkul sa kangku. Nakan lang kang pagsabihun tungkul sa kan Huwan binagaw, hampay mana kamu may karibrihan. 35 Sa kay magtudlu si Huwan parihu ga sulu nasul-an rinmayaw. Naibug diman kamu nakabaya ngalay ngalay sa kay pag-itudlu ga sa marayaw. 36 Dapat sa kang manga pagbuwatun pag makilala gid nu si unu aku, balaw lang ga sa kan Huwan itinultul tungkul sa kangku. Pagbuwatun niku ti iinintirga Ama pag buruwatun sa kangku. Nakan tunda ngani pag buruwatun tigpakilala nu si unu aku. Sa kang manga buruwatun pag makitan diman niyu aku sinugu Ama. 37 Hanggan ngap ti Ama ti nagsugu sa kangku tigpakilala waydi nu si unu aku. Una kaybi ginan kamu unman nakadnug kay magbagaw, unman diman kamu nakakit sa kay pinagkabilug. 38 Pag-ipalawuy lang niyu kay manga bagaw sa kanyu naisipan, dahil unman kamu magsarig sa kangku, sa kay sinugu Ama. 39 Pirmi diman pag-adalun niyu ti manga Banal Kasuratan dahil kanyu pag-isipun siyun kamu pag makakit buhi unman may katapusan. Tunda pag manga Banal Kasuratan tigpakilala nu si unu aku. 40 Dapat unman kamu magkaibug magtanggap sa kangku nakan unman diman waydi matanggap niyu ti tutuu pag buhi. 41 "Balaw kang turunu para aku dayawun manga tawu. 42 Dapat kilala niku kamu. Alam niku kamu unman madunung magmahal sa Diyus. 43 Nagsitay aku may karampatan ginan sa kang Ama dapat unman pagtanggapun niyu aku. Nu iba bay ti sumitay magsarig sa kay lang sadili kapangyarihan, kanyu ngap tanggapun. 44 Magbaya kamu nu kamu magdarayawan sa usa kag sa usa, dapat unman kamu magmasigasid hampay makadayaw sa kanyu ti tutuu Diyus. Nu katunda kamu, kabitay lugud kamu pag pumaniwala sa kangku? 45 Danga niyu isipun kuntay aku ti sumumbung sa Ama laban sa kanyu. Si Muysis ti pagsarigan niyu, imaw ngap ti sumumbung laban sa kanyu. 46 Nu ungud pagpaniwalaan niyu si Muysis, paniwalaan diman waydi mana aku dahil nagsurat siya tungkul sa kangku. 47 Dapat nu unman pagpaniwalaan niyu ti manga isinurat ni Muysis, kabitay pag paniwalaan niyu kang manga pagsabihun?"

6

1 Bag-u nagdipay si Hisus sa danaw Galiliya, kay usa ka ngaran danaw Tibiryas. 2 Kadamlan tawu ti nagkuyug sa kan Hisus, dahil nakitan nida kay makapangyarihan pag manga tanda sa kay magpaayad sa may manga sakit. 3 Nagtukad si Hisus sa usa ka bantud kaibahan niya kay manga tuludluan bag-u siya tinmukaw ati. 4 Ati katpung arani yi ti Kapistahan manga Hudiyu sa Pag-alaala sa Karibrihan. 5 Pagka nagbantay si Hisus, nakitan niya ti kadamlan tawu magpakarani sa kanya. Nakan pinmaingana siya sa kan Pilipi magkun, "Naan pag makabili kita karan-unun kang-ud hampay ipakaun sa tunda pag manga tawu tanan tanan?" 6 Inda kay sinabi sa kan Pilipi bilang kay lang subuk dahil daan alam ni Hisus nu hintay kay buwatun sab. 7 Nagsagut si Pilipi magkun, "Nu duwa lang ka gatus pisus kanta ibili karan-unun, balaw kumang-ud, dayu tumurupud sa kada usa una lang dariit." 8 Ti usa ka tuludluan niya, si Andiris, kan Simun Pidru patar-ari, nagsabi sa kan Hisus magkun, 9 "May anak lalaki atay may balun lima ka tinapay arina sibada ag duwa ka isda. Dapat kabitay lang pag kumang-ud tunda sa kainda kay kayamu pag, manga tawu?" 10 Sinabi ni Hisus magkun, "Sabiha niyu ti manga tawu pagtukaw sida." Mapadang ngani ati pag rugar. Nakan tinmukaw ti manga tawu. May manga lima ka libu ka lalaki siyun. 11 Bin-ul ni Hisus ti manga tinapay, nagpasalamat siya sa Diyus, bag-u kay inayaw-ayaw sa manga tawu matukawan ati. Kumun diman kay binwat sa manga isda. Pinasugtan kanda gustu sa kaun. 12 Pagka nabsug sida tanan, sinabi ni Hisus sa kay manga tuludluan magkun, "Tipuna duy niyu ti nasawad manga pinikapika tinapay hampay balaw mauyang una lang diit." 13 Nakan kanda tinipun ti manga pinikapika pag tinapay arina sibada. Kanda sawad nagkan-an sampulu may duwa ka luwak punu. 14 Pagka nakitan manga tawu tunda pag tanda kay binwat ni Hisus, sinabi nida magkun, "Inda yi ngani ti Purupita ti itinaratu kaybi ti sumitay." 15 Alam di ni Hisus kanda gayak magpakarani sa kanya bag-u siya bul-un sa pilitan buwatun hari. Nakan linmakaw siya usa usa atag maan sa bantud. 16 Pagka malambung yi nag-ati ti manga tuludluan ni Hisus atag sa danaw. 17 Nagsakay sida sa usa ka duunduun hampay dumipay maan atag sa Kapirnaum. Yabi yi ag udwaya rinmas-ug si Hisus sa kanda. 18 Daraka paman ti humbak sa danaw dahil mabisug ti bagyu. 19 Nakabugsay yi ti manga tuludluan manga lima aw ngatay unum ka kilumitru ginan sa saruy bag-u nakitan nida si Hisus maglakaw sa babaw danum, magpakarani sa duunduun. Nadala gid sida masyadu. 20 Dapat sinabi niya sa kanda, "Aku di, danga kamu magkadala." 21 Nagbaya sida nagpasakay sa kan Hisus sa duunduun. Susun rinmas-ug ngap ti duunduun sa baybay kanda pagtuyuun. 22 Pagka surip siyun waya ti kadamlan tawu natayak sa baliw dipay danaw. Kaaldaw usa usa lang ka duunduun kanda nakitan ag alam nida si Hisus unman kinmuyug sa kay manga tuludluan sa duunduun. Sida lang ti nagsakay. 23 Dapat may manga duunduun rinmas-ug ginan sa Tibiryas sa arani nida kinan-an tinapay pag rugar sa katpung nagpasalamat ti Panginuun. 24 Pagka nakitan manga tawu udyi siyun si Hisus una hanggan kay manga tuludluan, nagsakay ti manga tawu sa manga duunduun nag-ati sida sa Kapirnaum hampay hanapun si Hisus. 25 Pagka nakadipay ti manga tawu sa danaw, nakitan ngani nida si Hisus. Bag-u pinmaingana sida sa kanya magkun, "Maisturu, kapira kawu pag rinmas-ug sitay?" 26 Sinmagut si Hisus magkun, "Ungud gid duy kang pagsabihun sa kanyu, nakan lang kamu maghanap sa kangku dahil kamu nabsug sa kanyu nangaun tinapay, balaw dahil naintindihan niyu kang binwat manga tanda. 27 Danga kamu magbudlay tungkul lang sa karan-&unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama." 28 Bag-u pinmaingana maan ti manga tawu sa kan Hisus magkun, "Hintay nguna ti dapat nimi buwatun hampay magtupad kami sa buruwatun angay sa kay kagustuhan Diyus?" 29 Sinmagut si Hisus magkun, "Inda ngani kay gustu Diyus kanyu buwatun, pagsarig kamu sa kay sinugu Diyus." 30 Sinabi nida sa kan Hisus, "Hintay pag tanda kanmu buwatun hampay maghiling kami bag-u kami sumarig sa kanmu. Hintay kanmu buwatun? 31 Kanda sa pangawakawaan, kanmi manga ginurang kaybi may kinaun mana pag karan-unun, parihu sa isinurat sa Banal Kasuratan magkun, 'Pinakan-an niya sida karan-unun ginan sa langit.' " 32 Bag-u sinmagut si Hisus magkun, "Ungud gid kang pagsabihun sa kanyu, balaw duy si Muysis ti nagpakaun karan-&unun ginan sa langit. Kang Ama di ngap tigpakaun tutuu pag karan-unun ginan sa langit sa kanyu. 33 Dahil ti karan-unun pag-ipakaun Diyus imaw ngani tigpakababa ginan sa langit magpakaun tutuu pag buhi sa manga tawu sa babaw daga." 34 Sinabi maan nida sa kan Hisus magkun, "Pirmi duy kami pagpakan-i nimu tunda pag karan-unun." 35 Bag-u sinabi ni Hisus sa kanda magkun, "Aku ti ga karan-unun makapakaun buhi sa manga tawu. Tigpasakup sa kangku balaw yi lun-usun, tigsarig sa kangku dayi uwawun una hanggan aban. 36 "Dapat sinabi yi niku sa kanyu, madi nakitan yi niyu aku, unman kamu nagsarig. 37 Una si unu pag tawu nu iinintirga Ama sa kangku, pumasakup ngani tunda sa kangku. Ti tawu nu pumasakup sa kangku balaw kang dayuun. 38 Dahil aku nagsitay ginan sa langit balaw hampay masunud niku kang sadili kagustuhan, bagkus ngap hampay tupadun niku ti kagustuhan Diyus imaw ti nagsugu sa kangku. 39 Diyus ti nagsugu sa kangku hampay tupadun niku inda pag kagustuhan niya magkun, danga pagduraa niku una lang usa sa tanan manga tawu iinintirga niya sa kangku. Kailangan buhiun niku sida uman sa katapusan panahun aban. 40 Dahil inda yi ngani ti kagustuhan niku Ama hampay una si unu pag tawu ti nakakit sa Anak bag-u nagsarig sa kanya, makatanggap tutuu pag buhi unman may katapusan. Buhiun niku siya uman sa katapusan panahun aban." 41 Bag-u nagharampangan ti manga Hudiyu naglibak tungkul sa kan Hisus dahil sa kay sinabi magkun, "Aku ti ga karan- unun nagsitay sa babaw daga ginan sa langit." 42 Sinabi nida magkun, "Unman aw lugud inda pag tawu si Hisus, kay anak ni Husi? Kilala nita kay ama hanggan kay ina. Kabitay lugud pag masabi niya kuntay siya nagsitay ginan sa langit?" 43 Nagsagut si Hisus magkun, "Danga yi duy kamu magpakaharampangan sa libak. 44 Unman may tawu makapasakup sa kangku purya lang nu siya butungun niku Ama, imaw ti nagsugu sa kangku. Bag-u buhiun niku siya uman sa katapusan panahun aban. 45 "Isinurat sa Ribru manga Purupita magkun, 'Sida tanan tanan tudluan Diyus.' Una hintay pag tawu nakadnug ag nagpatudlu sa Ama, pumasakup sa kangku. 46 Balaw kuntay may tawu nakakit sa Diyus, purya lang ti nagsitay ginan sa Diyus. Siya lang ti nakakit sa Ama. 47 "Ungud gid kang pagsabihun sa kanyu, una hintay pag tawu nu sumarig, may tutuu pag buhi unman may katapusan. 48 Aku ti ga karan-unun makapakaun buhi sa manga tawu. 49 Kanyu manga ginurang kaybi nagkaun mana pag karan-unun kanda sa pangawakawaan dapat sida nagkaramatay diman. 50 Dapat tuhay ti karan-unun magsitay ginan sa langit. Nu kan-un tawu inda pag karan-unun, balaw yi siya mamatay. 51 Aku ti nagsitay ginan sa langit ga karan-unun makapakaun buhi. Nu kan-un tawu inda pag karan-unun, may tutuu pag buhi siya unman may katapusan. Ti karan-unun kang ipakaun imaw yi kang bilug sa ikabuhi manga tawu sa babaw daga." 52 Nakan magpirirdihan ti manga Hudiyu magkun, "Kabitay lugud pag mipakaun inda pag tawu kay bilug hampay kanta kan-&un?" 53 Sinabi ni Hisus sa kanda magkun, "Ungud gid kang pagsabihun sa kanyu, unman kamu may tutuu pag buhi purya lang nu kan-un niyu kay bilug Anak Tawu ag nu inmun niyu kay dugu. 54 Una si unu pag tawu nu kan-un niya kang bilug, inmun kang dugu, may tutuu pag buhi unman may katapusan. Buhiun niku siya uman sa katapusan panahun aban. 55 Dahil kang bilug ungud gid karan-unun, kang dugu ungud gid irinmun. 56 Nu ti tawu magkaun kang bilug, mag-inum kang dugu nipausa siya sa kangku, aku nipausa waydi sa kanya. 57 "Ti Ama ti may gimpuunan buhi. Siya ti nagsugu sa kangku. Dahil sa Ama aku hanggan may gimpuunan buhi. Katunda diman waydi ti tawu nu magkaun siya kang bilug may tutuu siya pag buhi dahil sa kangku. 58 Inda yi ngani ti karan-&unun nagsitay ginan sa langit. Balaw parihu sa karan-unun kinaun kaybi niyu manga ginurang, bag-u pagka dugay namatay diman sida. Nu bay inda pag karan-unun ti kan-un tawu, may tutuu pag buhi siya unman may katapusan." 59 Inda kay sinabi ni Hisus sa kay magtudlu sa manga tawu sa balay tiripnan manga Hudiyu sa banwa Kapirnaum. 60 Pagka nadnugan nida kay manga itinudlu ni Hisus, mayamu tuludluan nagsabi magkun, "Madalum maaw inda pag manga itinudlu niya. Hintay ti may mananggap tunda?" 61 Madi unman may nagtultul, alam di waydi ni Hisus magharampangan kay manga tuludluan maglibak sa kanya. Nakan sinabi niya sa kanda magkun, "Mag-alinlangan aw kamu dahil sa kang manga sinabi sa kanyu? 62 Kabitay nguna kamu nu makitan niyu aban ti Anak Tawu muli maan tag tungud sa kay ulian kaybi? 63 Ispiritu Diyus ti may gimpuunan buhi. Nu tawu lang unman makapakaun buhi. Nu tanggapun niyu kang manga bagaw, matanggap waydi niyu ti Ispiritu imaw ti makapakaun buhi sa kanyu. 64 Dapat ti iba sa kanyu unman magsarig." Dahil ginan waya sa umpisa niya magtudlu, alam di ni Hisus nu hintay pag manga tawu ti unman magsarig ag nu si unu ti pumakampi sa kay manga kalaban. 65 Sinabi ni Hisus magkun, "Nakan ngani sinabi yi niku sa kanyu, unman may tawu pumasakup sa kangku purya lang nu kay kagustuhan niku Ama." 66 Siyun ginan mayamu pag tuludluan nag-urung yi, udyi nagkuyug sa kanya. 67 Bag-u nagpaingana si Hisus sa kay sampulu may duwa ka tuludluan magkun, "Kabitay kamu, magkaibug aw diman kamu mag-urung yi?" 68 Sinmagut si Simun Pidru, magkun, "Panginuun, hintay waya gid kanmi dangpan? Kanmu sinabi pag manga bagaw ti makapakaun tutuu pag buhi unman may katapusan sa manga tawu. 69 Nagsarig duy kami sa kanmu, dahil nakilala nimi kawu ti Banal pag Anak Diyus." 70 Sinabi ni Hisus magkun, "Kamu yi ngani ungud sampulu may duwa ka tuludluan kang pinili. Dapat ti usa sa kanyu takinan ngap manga labang." 71 Kay pagtukyun ni Hisus si Hudas, kay anak si Simun Iskariyuti. Dahil madi si Hudas kabilang sa sampulu may duwa ka tuludluan, pumakampi siya sa kalaban hampay kay itudlu niya si Hisus sa kanda.

7

1 Bag-u namalibutan nanudlu si Hisus sa daga Galiliya. Unman siya may gustu mamalibutan sa manga banwa sa daga Hudiya, dahil ti manga pinunu Hudiyu maghanap yi paraan hampay siya kanda matyun. 2 Ati katpung arani yi ti Kapistahan manga Hudiyu, ti Kapistahan sa manga Payag. 3 Nakan sinabi niya manga patar-ari sa kan Hisus magkun, "Pag-ighit yi duy atay ginan pag daga, pag-ati kawu sa Hudiya, hampay makitan nimu manga tuludluan ati kanmu manga pagbuwatun. 4 Unman may tawu mataguan kay buwat nu gustu dayawun siya tanan tawu. Nu kanmu yi lang waydi pagbuwatun inda pag manga bagay, pakakitan yi lang nimu sa manga tawu." 5 Dahil una kay manga patar-ari unman diman nagsarig sa kanya. 6 Nakan sinabi ni Hisus sa kanda magkun, "Udwaya kainda kang taning pag udas, dapat nu para sa kanyu una kapira pag udas mahimu di. 7 Ti manga tawu taga kalibutan unman may pag-ikadaut sa kanyu. Dapat aku kanda pagkadat-an, dahil pirmi pag-ipaburayhaw niku kanda manga buwat daut. 8 Kamu yi ngani ti pag-ati sa Kapistahan. Balaw aku atag, dahil udwaya rinmas-ug kainda kang taning pag udas." 9 Pagka sinabi niya tunda sa kay manga patar-ari napatayak waya siya sa Galiliya. 10 Pagka nag-ati yi sa Kapistahan kay manga patar-ari, si Hisus nag-ati waydi sa Hirusalim dapat balaw siya nag-ati sa hayagan. Naglihus siya hampay unman makilala manga tawu. 11 Paghanapun siya manga pinunu Hudiyu ati sa Kapistahan. Magkun sida, "Naan yi nguna tunda pag tawu?" 12 Paglibakun yi siya mayamu tawu. Magkun ti manga iba, "Mayad gid pag tawu siya." Ti iba magkun, "Bukun ngap mayad tunda, pagpatalangun ngap niya ti kayamuan tawu." 13 Dapat kanda pagsabihun tungkul sa kan Hisus unman pag-ipadnug nida sa manga iba dahil magkadala sida sa manga pinunu Hudiyu. 14 Pagka magpanungatunga yi kay kasirangan Kapistahan, nag-ati si Hisus sa balay Diyus bag-u nanudlu siya sa manga tawu ati. 15 Naglingut gid ti manga pinunu magkun, "Kabitay pag nakatau inda pag tawu kadunungan, madi unman may nanudlu sa kanya?" 16 Nagsagut si Hisus magkun, "Kang pag-itudlu balaw kang sadili pag kadunungan. Kang pag-itudlu ginan ngap sa Diyus sa nagsugu sa kangku. 17 Una hintay pag tawu nu handa siya magtupad sa kagustuhan Diyus, makilala niya kang pag-itudlu nu ngatay ginan sa Diyus aw ngatay magbagaw aku ginan lang sa kang sadili. 18 Nu kay pagbagawun tawu ginan lang sa kay sadili naisipan, kay gustu siya ti dayawa manga tawu. Dapat nu kay gustu manugtudlu hampay dayawun ngap manga tawu ti nagsugu sa kanya, pihu gid pag-itudlu niya ti katutuuhanan unman may pabalhingu. 19 Sinabi ni Hisus magkun, "Unman aw ipinakaun ni Muysis sa kanyu ti Kasuguan? Dapat sa kanyu tanan unman may magtupad sa Kasuguan una di usa. Hayga aku kanyu pagkaibgan matyun?" 20 Nagsagut ti manga tawu, "Inapuan baga kawu labang. Hintay pag tawu tigkaibug magmatay sa kanmu?" 21 Sinabi maan ni Hisus magkun, "Pagka usa di waya ka makadululaw kang binwat, naglingut gid kamu tanan. 22 May bilin si Muysis sa kanyu kailangan turiun niyu kanyu manga anak. Nu sa ungud balaw tunda ginan sa kan Muysis. Daan di tunda pag ugali inumpisahan kaybi di waya manga ginurang. Nakan pagturiun niyu ti manga anak lalaki una sa sirang pamahari. 23 Nu kanyu pagturiun ti usa ka anak una sa sirang pamahari hampay tupadun niyu kan Muysis Kasuguan, bati hayga magkagalit kamu sa kangku dahil lubus pinaayad niku ti usa ka tawu sa sirang pamahari? 24 Danga yi pagpihua niyu ti daut ti mayad angay lang sa kanyu makitan sa mata. Pihua niyu ti daut ti mayad angay sa katutuuhanan." 25 Ti iba manga taga Hirusalim magkun, "Unman aw lugud tunda yi ngani pag tawu ti kanda pagkaibgan matyun? 26 Dapat malu, maghampang diman siya sa atubangan kayamuan tawu ag unman may pagsabihun ti manga pinunu sa kanya. Magkakilala yi aw nguna ungud manga pinunu kuntay siya yi ti pinili Diyus Manugribri pag Hari? 27 Dapat nu rumas-ug aban ti pinili Diyus Manugribri pag Hari unman may tawu makaalam nu taga naan siya. Inda bay pag tawu alam nita tanan nu taga naan siya." 28 Nakan sa kay magtudlu sa manga tawu sa balay Diyus, nagbagaw si Hisus daraka buka magkun, "Kilala aw gid niyu aku? Alam aw niyu nu taga naan aku? Unman aku nagsitay sa sadili lang niku kagustuhan. Dapat masarigan gid ti Ama ti nagsugu sa kangku. Unman lang nakilala niyu siya. 29 Kilala gid niku siya, dahil aku ginan sa kanya ag siya diman ti nagsugu sa kangku." 30 May manga tawu kanda mana pagkaibgan dakpun si Hisus, dapat unman may makadakup sa kanya dahil udwaya rinmas-ug kay taning pag udas. 31 Dapat sa kayamuan tawu mayamu ti nagsarig sa kanya magkun, "Nu rumas-ug ti pinili Diyus Manugribri pag Hari, buwatun aw lugud niya lalu waya mayamu pag tanda bukun lang ga tunda pag tawu kay binwat? Dayu ngap mahimu." 32 Naalaman manga Parisiyu inda kanda sarabihun manga tawu tungkul sa kan Hisus. Nakan sida hanggan ti manga pangulu manug-asiwa balay Diyus nagpasugu sa manga pulis nida hampay kanda dakpun si Hisus. 33 Nakan sinabi ni Hisus magkun, "Kaibahan waya niyu aku dapat balaw yi dugay aban bag-u umighit yi aku sitay ginan atabug sa Ama sa nagsugu sa kangku. 34 Hanapun niyu aku aban, dapat unman niyu makitan. Dahil unman kamu makaati sa kang ulian aban." 35 Bag-u nagharampangan ti manga pinunu Hudiyu magkun, "Naan tag nguna inda pag tawu kay gayak nakan unman makitan nita siya? Barang siya atag sa luwas daga Israil sa manga Hudiyu mag-uli sa manga banwa manga balaw Hudiyu bag-u manudlu sa manga balaw Hudiyu. 36 Magkun kabay siya kita kunu humanap sa kanya dapat dayu kunu makitan nita siya. Unman diman makaati kita kunu sa kay ulian aban. Hintay nguna kay ibug sabihun." 37 Pagka sa katapusan yi pag sirang Kapistahan imaw yi ti pinakamahalaga pag sirang, ati katpung tinmindug si Hisus bag-u sinabi niya sa daraka buka magkun, "Una hintay pag tawu nu magkauwaw, pagsitay siya sa kangku, pag-inum. 38 Parihu sa isinurat sa Banal Kasuratan, nu ti tawu magsarig sa kangku, bumulus ginan sa kay tagipusuun ti danum makapakaun tutuu pag buhi sa manga tawu." 39 Kay pagtukyun ni Hisus ti Ispiritu ti matanggap manga tawu nu sida magsarig sa kanya. Ati katpung udwaya ipinakaun ti Ispiritu dahil udwaya nangyari una kay pagkamatay ni Hisus una kay pagkabuhi uman may kadayawan. 40 Pagka nadnugan manga iba sa kayamuan inda pag manga bagaw ni Hisus sinabi nida magkun, "Tutuu katna inda yi ti Purupita kanta pag-alagdun." 41 Sinabi manga iba magkun, "Siya yi ngani ti pinili Diyus Manugribri pag Hari." Dapat magkun maan ti manga iba, "Ti pinili Diyus Manugribri pag Hari balaw sumitay ginan sa Galiliya. 42 Isinurat kabay sa Banal Kasuratan ti pinili Diyus Manugribri pag Hari aban linahi ni Hari Dabid, ianak siya sa banwa Bitlihim, sa kay inulian kaybi ni Dabid." 43 Nakan magkabululag ti kayamuan kay naisipan dahil sa kan Hisus. 44 May manga tawu ati kanda gustu siya dakpun yi, dapat unman may tawu nakadakup sa kanya. 45 Nagbalik maan ti manga pulis tag sa manga pangulu manug-asiwa balay Diyus hanggan sa manga Parisiyu. Pinmaingana sida sa manga pulis magkun, "Hayga duy unman dinara niyu siya?" 46 Sinmagut ti manga pulis magkun, "Una kaybi ginan unman may tawu magbagaw katida kay kaayad." 47 Nagsabi maan ti manga Parisiyu magkun, "Kamu barang pinatalang yi waydi niya. 48 Kabay una sa manga pinunu una sa manga Parisiyu unman may magsarig sa kanya una di usa. 49 Tunda lang pag manga tawu ti unman makaalam sa Kasuguan ti magsarig sa kanya, pihu sida ipadamhak sa kaparusahan." 50 Ati diman sa kanda ti usa ka Parisiyu si Nikudimu, imaw ti nag-ati sa kan Hisus kaybi. Sinabi ni Nikudimu sa kanda magkun, 51 "Nu angay sa Kasuguan nita, dayu gid mahimu sintinsiyahan nita ti usa ka tawu nu udwaya nadnugan nita kay pagsabihun ag nu udwaya inusisa nita kay manga pagbuwatun." 52 Magkun ti manga iba sa kan Nikudimu, "Kawu lugud taga Galiliya diman aw waydi? Suyasida gid nimu ti Banal Kasuratan, bag-u maalaman nimu unman may purupita lumuwang ginan sa Galiliya."

8

1 Bag-u nuli ti kada tawu tabug sa kanda manga balay. Dapat si Hisus nag-ati sa bantud Ulibu. 2 Pagka surip, nagbalik maan siya sa balay Diyus bag-u nagpakarani sa kanya ti kayamuan tawu. Nakan tinmukaw si Hisus bag-u nanudlu siya sa kanda. 3 Bag-u may nagluwang diman manga Manugtudlu Kasuguan hanggan manga Parisiyu may dara usa ka babayi dinakup katpung kay magpanlalaki, kanda ipinaatubang sa manga tawu. 4 Sinabi nida sa kan Hisus magkun, "Maisturu, inda pag babayi dinakup katpung siya magpanlalaki. 5 Nu angay sa Kasuguan may bilin si Muysis sa kanta, kailangan batuhun matyun ti manga babayi katunda kay buwat. Nu sa kanmu, hintay nguna kanmu masabi?" 6 Katida kanda ipinaingana sa kan Hisus hampay pasalanun siya sa kay bagaw para may misumbung sida laban sa kanya. Nagtiyundug si Hisus kay isinurat kay ituturu sa daga. 7 Dapat unman mag-apas kanda paingana sa kanya, nakan tinmindug siya bag-u kay sinabi magkun, "Una si unu sa kanyu ti unman may kasalanan, imaw ti kiuna bumintuk sa babayi." 8 Bag-u nagtiyundug maan si Hisus, kay isinurat maan kay ituturu sa daga. 9 Pagka nadnugan nida kay sinabi ni Hisus, linmakaw sida tigus-a tigus-a, ti maidad ti nag-una. Pagka dugay udyi may tawu nu ud si Hisus hanggan ti babayi matindugan sa kay atubangan. 10 Bag-u tinmindug si Hisus magkun, "Naan yi duy sida? Unman aw may nagsintinsiya sa kanmu?" 11 Magkun ti babayi, "Unman yi duy." Sinabi ni Hisus magkun, "Una aku balaw manintinsiya sa kanmu. Pag-uli yi duy, inda ginan danga yi kawu magkasala." 12 Nagbagaw maan si Hisus sa manga Parisiyu magkun, "Aku tigpakaun karayawan sa manga tawu sa kalibutan. Nu ti tawu nagpasakup sa kangku, sa kanya yi ti karayawan tigpakaun buhi ag balaw yi siya lumakaw sa madlum." 13 Bag-u sinabi manga Parisiyu sa kanya magkun, "Magpatutuu lang kawu tungkul sa kam sadili. Mahimu pagpahimudilun kanmu pagsabihun." 14 Magkun si Hisus, "Una aku magpatutuu tungkul sa kang sadili, tutuu gid kang pagsabihun, dahil alam niku nu naan ginan aku ag nu naan tabug. Dapat unman niyu alam nu naan ginan aku ag nu naan tabug aku. 15 Pagpihuun niyu ti daut ti mayad angay lang sa ugali tawu naisipan. Aku balaw magsintinsiya una sa kantapu. 16 Dapat nu abi aku ti pumihu sa daut sa mayad, balaw aku sumalan dahil balaw lang aku usa usa, minsan diman sa kangku ti Ama ti nagsugu sa kangku. 17 May nisurat sa kanyu Kasuguan magkun, 'Nu ti duwa ka tawu urusa kanda patutuu, danga yi pagpahimudila kanda pagsabihun.' 18 Aku magpatutuu sa kang sadili hanggan kang Ama ti nagsugu sa kangku, magpatutuu diman sa kangku." 19 Nagpaingana ti manga Parisiyu sa kanya magkun, "Naan yi kanmu Ama?" Sinmagut si Hisus magkun, "Unman gid nakilala niyu una aku una kang Ama. Nu abi nakilala niyu aku, nakilala yi waydi mana niyu kang Ama." 20 Inda tanan kay sinabi ni Hisus sa kay magtudlu sa manga tawu sa balay Diyus sa arani manga kaban surukadan ambagan. Ag unman may nagdakup sa kanya dahil udwaya rinmas-ug kay taning pag udas. 21 Sinabi maan ni Hisus sa kanda magkun, "Umighit yi aku aban bag-u kanyu gid hanapun aku, dapat mamatay yi lang kamu dahil sa kanyu magpadayun sa kasalanan. Dayu kamu makaati sa kang atihan aban." 22 Nakan nagharampangan ti manga pinunu Hudiyu magkun, "Ngatay kay gayak siya magpakamatay, nakan barang kay sinabi kita kunu unman makaati sa kay atihan aban." 23 Sinmagut si Hisus magkun, "Kamu taga sitay sa babaw daga, aku bay taga langit. Kamu manga taga kalibutan, dapat aku balaw taga sitay sa kalibutan. 24 Nakan sinabi ngani niku sa kanyu, mamatay kamu aban dahil sa kanyu magpadayun sa kasalanan. Nu dayu kamu maniwala kuntay aku si Aku Ngani, pihu ngap kamu mamatay dahil sa kanyu magpadayun sa kasalanan." 25 Pinmaingana sida sa kanya magkun, "Si unu lugud kawu?" Sinmagut si Hisus magkun, "Aku inda imaw diman ga kang sinabi yi ginan sa kabag-u. 26 Mayamu mana kang masabi tungkul sa kanyu, mayamu kang magkaalaman hampay mana mapihu niku kanyu kadautan. Dapat masarigan gid ti nagsugu sa kangku. Pag-itultul lang waydi niku sa manga tawu ti nadnugan niku ginan sa kanya." 27 Unman naintindihan nida kuntay inda kay pagsabihun ni Hisus sa kanda tungkul ngap sa Ama. 28 Nakan sinabi ni Hisus magkun, "Nu ipaabwat niyu aban ti Anak Tawu bag-u makilala niyu kuntay aku si Aku Ngani. Ati katpung maalaman niyu unman aku magbuwat una hintay nu ginan lang sa kang sadili. Pagsabihun lang niku ti itinudlu Ama sa kangku. 29 Ti nagsugu sa kangku pirmi magpakiusa sa kangku. Balaw gid pinabay-anan niya aku, dahil pirmi pagbuwatun niku ti sa ikabaya niya." 30 Pagka sinabi ni Hisus inda, mayamu pag tawu ti nagsarig sa kanya. 31 Nakan sinabi ni Hisus sa manga Hudiyu nagsarig sa kanya magkun, "Nu kamu magtupad sa kang pag-itudlu sa kanyu, tutuu gid tuludluan niku kamu. 32 Makilala niyu ti katutuuhanan bag-u ti katutuuhanan ti makaribri sa kanyu ginan sa kanyu pagkapanawuhun." 33 Sinabi nida sa kan Hisus magkun, "Linahi kami ni Abraham. Una kaybi ginan kami balaw duy panawuhun. Kabitay kanmu masabi kuntay kami iribri?" 34 Sinabi ni Hisus sa kanda magkun, "Ungud gid kang pagsabihun sa kanyu, panawuhun ngap kasalanan ti kada tawu magbuwat kasalanan. 35 Ti panawuhun balaw miminsan sa magtal-anakan niya amu hanggan di. Dapat ti anak minsan di ngapu sa kay ama hanggan aban. 36 Nakan ngani nu ti Anak Diyus ti nagparibri sa kanyu, tutuu ribri kamu sa kanyu pagkapanawuhun. 37 Alam niku kamu linahi ni Abraham, dapat pagkaibgan diman niyu aku matyun dahil dayu niyu tanggapun kang pag-itudlu sa kanyu. 38 Ti ipinakakit niku Ama sa kangku, imaw kang maan pag-itultul. Kamu bay, ti pagbuwatun niyu imaw ti kanyu nadnugan sa kanyu ama." 39 Sinabi nida sa kan Hisus magkun, "Si Abraham di kanmi ginurang." Sinabi ni Hisus magkun, "Nu abi tutuu kamu kay linahi ni Abraham, mag-ugali mana kamu parihu sa kay ugali ni Abraham kaybi. 40 Madi kang pag-isalaysay sa kanyu ti katutuuhanan kang nadnugan sa Diyus, kanyu ngap pagkaibgan matyun aku. Balaw katida kay binwat ni Abraham. 41 Dapat kanyu ngap pagbuwatun ti buwat niyu ama." Sinabi nida sa kanya magkun, "Balaw kami iinanak sa kalyag. Usa usa lang gid kanmi ama, ti Diyus yi ngani." 42 Sinabi ni Hisus sa kanda magkun, "Nu abi ti Diyus gid kanyu ama, pihu mana aku kanyu pagmahalun. Nakan aku nagsitay ginan sa Diyus. Unman aku nagsitay sa sadili lang niku kagustuhan, dapat kang Ama ti nagsugu sa kangku. 43 Nakan unman magkasalman niyu kang pagsabihun sa kanyu, dahil unman kamu madunung magtanggap sa kang pag-itudlu sa kanyu. 44 Parihu kamu sa kanyu ama, sa diyablu. Gustu diman niyu buwatun ti kagustuhan niyu ama. Kaybi ginan waya sa kabag-u usa ka manlilibun tawu tunda. Unman gid siya magpakampi baliwa sa katutuuhanan dahil unman may makitan katutuuhanan sa kanya. Nu magbagaw siya kapudilan, tida kay yi gid yahunan. Dahil tutuu gid pudilun siya. Sa kanya ngap ginan ti gimpuunan kapudilan. 45 Dapat aku unman pagpaniwalaan niyu dahil katutuuhanan kang pagsabihun sa kanyu. 46 Si unu sa kanyu ti makapakaun puruyba kuntay aku may kasalanan? Nu kang pagsabihun ti katutuuhanan, hayga unman pagpaniwalaan niyu aku? 47 Nu ti tawu anak yi Diyus, tanggapun niya kay manga bagaw Diyus. Nakan unman pagtanggapun niyu kang pag-itudlu, dahil unman kamu manga anak Diyus." 48 Sinabi manga Hudiyu sa kan Hisus magkun, "Bukun ngap salan kanmi pagkumnun kawu Samaritanu, inapuan paman labang." 49 Sinabi ni Hisus magkun, "Aku duy unman inapuan labang. Pagpahalagaan niku kang Ama, dapat aku kanyu pagpuyaan. 50 Balaw maghanap aku sa dayawun aku manga tawu. May maghanda di kang kadayawan. Siya diman waydi ti makapihu sa daut sa mayad. 51 Ungud gid kang pagsabihun sa kanyu, una hintay pag tawu nu mag-ugali siya angay sa kang pag-itudlu, dayu gid mamatay hanggan aban." 52 Sinabi manga Hudiyu sa kanya magkun, "Taynguna alam nimi pihu kawu inapuan labang. Si Abraham namatay, hanggan ti manga Purupita namatay diman. Bag-u kanmu pagsabihun taynguna, una hintay pag tawu nu mag-ugali siya angay sa kanmu pag-itudlu, dayu gid mamatay hanggan aban. 53 Kanmi ginurang si Abraham namatay di. Balaw nguna kanmu gustu sabihun kawu mamaski man sa kan Abraham? Ti manga Purupita namatay diman waydi. Naan kanmu ipaparihu sa kanmu sadili?" 54 Sinmagut si Hisus magkun, "Nu pagdayawun niku kang sadili, unman may pulus kang kadayawan. Kang Ama di ngap tigdayaw sa kangku, imaw ti pagkumnun niyu kuntay kanyu Diyus. 55 Unman nakilala duy niyu siya, dapat kilala ngap niku siya. Nu abi sabihun niku unman kilala niku siya, aku parihu ga kanyu pudilun. Dapat kilala gid niku siya, ag pagtupadun niku kay bagaw. 56 Kanyu ginurang si Abraham nakabaya gid dahil nakitan niya ti kaudasan niku pagras-ug. Pagka nakitan ngani niya tutuu siya nakabaya." 57 Sinabi maan nida sa kanya magkun, "Kanmu idad udwaya duy limampulu ka timpu. Kabitay lugud kawu nakakit sa kan Abraham?" 58 Sinmagut si Hisus magkun, "Ungud gid kang pagsabihun sa kanyu, pagka udwaya nianak si Abraham, daan di aku ngani." 59 Nagpunpun ti manga Hudiyu manga batu hampay kanda ibintuk sa kan Hisus. Dapat napatagu si Hisus bag-u nagluwas siya sa balay Diyus.

9

1 Sa kay maglakaw ni Hisus, may nakitan siya usa ka lalaki buta. Ginan waya sa kay pagkaanak daan buta siya. 2 Pinmaingana kay manga tuludluan magkun, "Maisturu, si unu nguna ti nagkasala nakan iinanak siya buta, ngatay siya ti nagkasala aw ngatay kay gurang?" 3 Sinmagut si Hisus magkun, "Balaw sa nagkasala duy una inda pag tawu una kay gurang. Nakan siya iinanak buta hampay mipaburayhaw ngap sa kanya ti buwat Diyus. 4 Ti Ama ti nagsugu sa kangku, nakan hanggan may sirang waya kailangan tupadun nita ti buruwatun niya. Nu bay yabi yi aban, udyi may makabuwat una si unu pag tawu. 5 Nu aku sitay waya sa babaw daga, aku tigpakaun karayawan sa manga tawu sa kalibutan." 6 Pagka sinabi niya katida, nagbuga siya sa daga, pinalutuk niya ti buga bag-u kay ipinayid sa mata tawu buta. 7 Bag-u kay sinabi niya magkun, "Pag-ati duy kawu pag-iram-us sa tangki Siluam. (Tunda pag bagaw Siluam kay kahulugan sinugu). Nag-ati ngani ti tawu buta nangiram-us. Pagka siya binmalik, maghiling yi siya. 8 Nakan naglingut gid kay manga kamalay hanggan ti manga tawu nakakit sa kanya kaybi maghagad kay pangailangan. Magkun sida, "Balaw aw inda pag tawu ti matukawan kaybi magpakahagad kay pangailangan?" 9 Sinabi manga iba magkun, "Imaw yi ngani." Magkun ti manga iba, "Bukun imaw, nagkaparihu lang sa kanya kay uyahun." Bag-u sinabi niya magkun, "Aku yi ngani ti buta kaybi." 10 Pinmaingana sida sa kanya magkun, "Kabitay duy ti nangyari nakan maghiling yi taynguna kanmu mata?" 11 Sinmagut siya magkun, "Ti tawu kanda pagkumnun si Hisus nagbuwat lutuk bag-u kay ipinayid sa kang manga mata bag-u sinabi niya sa kangku, 'Pag-ati duy kawu sa Siluam, pag-iram-us kawu.' Inmati ngani aku nag-iram-&us. Pagka aku nakairam-us, naghiling yi kang mata." 12 Pinmaingana ti manga tawu sa tawu buta kaybi magkun, "Naan tag ati si Hisus?" Sinmagut siya magkun, "Tau duy nu naan tag siya." 13 Bag-u kanda dinara atag sa manga Parisiyu tunda pag tawu buta kaybi. 14 Sa sirang pamahari pag nagbuwat lutuk si Hisus kay nagpaayad sa tawu buta. 15 Nakan nagpaingana waydi ti manga Parisiyu sa kanya nu kabitay hinmiling kay mata. Bag-u itinultul niya sa kanda magkun, "Binugtangan niya lutuk kang babaw mata, bag-u aku nangiram-us. Pagka aku nakairam-us, maghiling yi aku." 16 Ti iba Parisiyu magkun, "Balaw ginan sa Diyus tunda pag tawu ti nagbuwat katida, dahil maglabag siya sa Kasuguan tungkul sa sirang pamahari." Dapat sinabi maan manga iba magkun, "Kabitay pag makabuwat ti tawu katunda pag manga makadululaw, nu siya makasalanan?" Nakan magkabululag ti manga tawu kanda naisipan tungkul sa kan Hisus. 17 Nakan namaingana maan ti manga Parisiyu sa tawu buta kaybi magkun, "Kanmu sabi siya ti nagpaayad sa kanmu mata. Kabitay kanmu magkilala sa kanya?" Sinmagut ti tawu magkun, "Purupita duy siya." 18 Ti manga pinunu Hudiyu unman naniwala kuntay tunda pag tawu kaybi buta bag-u siya pinaayad sa kay pagkabuta. Pagka dugay nagpasugu sida hampay bul-un kay manga gurang tunda pag tawu. 19 Bag-u pinmaingana sida sa kay manga gurang magkun, "Inda aw duy kanyu anak ti kanyu pagsabihun iinanak buta? Kabitay duy pag maghiling siya taynguna?" 20 Nagsagut kay manga gurang magkun, "Alam duy nimi inda kanmi ngani anak. Tutuu gid siya iinanak buta. 21 Dapat unman nimi alam nu kabitay pag maghiling siya taynguna. Unman diman nimi alam nu si unu pag tawu ti nagpaayad sa kay mata. Paingan-a duy niyu siya. May idad yi siya, bahala siya magsagut." 22 Nakan katida ti binagaw manga gurang niya, dahil magkadala sida sa manga pinunu magkun nu may tawu magsabi si Hisus ti pinili Diyus Manugribri pag Hari, siya ipalwas ginan sa balay tiripnan. 23 Nakan ngani sinabi manga gurang tawu buta kaybi magkun, "May idad yi siya, siya ti paingan-a niyu." 24 Bin-ul maan nida kadwa ginan ti tawu buta kaybi. Bag-u sinabi nida sa kanya magkun, "Sabiha yi nimu ti katutuuhanan sa atubangan Diyus, alam gid nimi makasalanan tunda pag tawu ti nagpaayad sa kanmu." 25 Nagsabi siya magkun, "Unman duy niku alam nu ngatay makasalanan siya. Inda lang ti magkaalaman niku, madi kaybi aku buta, taynguna maghiling yi aku." 26 Nagpaingana maan sida magkun, "Hintay kay binwat niya sa kanmu? Kabitay pag pinaayad niya kawu sa kanmu pagkabuta?" 27 Sinmagut maan siya magkun, "Itinultul yi niku tunda sa kanyu, dapat unman kamu naniwala. Hayga gustu maan niyu maalaman nu hintay ti nangyari? Gustu aw lugud kamu tuludluan waydi niya?" 28 Pagka katida kay sinabi tawu buta kaybi, pinuya siya manga pinunu Hudiyu. Sinabi nida sa kanya magkun, "Kawu baga kay tuludluan yi ngap tunda pag tawu. Kami bay tuludluan di ni Muysis. 29 Alam nimi ti Diyus nagbagaw sa kan Muysis. Dapat nu tunda bay pag tawu si Hisus unman nimi alam nu taga naan pag banwa siya." 30 Sinabi tawu buta kaybi magkun, "Nakan aku maglingut sa kanyu, unman niyu alam nu taga naan siya, dapat siya ngapu ti nagpaayad sa kang buta. 31 Alam nita ti Diyus unman magpatingi sa darangin tawu nu siya makasalanan. Dapat nu ti tawu magsamba sa Diyus ag magtupad sa kay kagustuhan niya, pihu patingihan Diyus kay darangin. 32 Ginan waya sa pagkalalang kalibutan unman may naalaman kuntay may tawu pinmaayad sa tawu iinanak buta. Unman diman may mabuwat tunda pag tawu purya lang nu siya ginan sa Diyus." 33 Sinabi maan manga pinunu sa kanya magkun, 34 "Lubus yi lang kawu makasalanan ginan waya sa kanmu bag-u nilusad, bag-u kawu aw lugud ti tumudlu waya sa kanmi?" Bag-u kanda tinulak siya ginan sa balay nida tiripnan. 35 Nabaritaan ni Hisus tinulak ngani manga pinunu Hudiyu ti tawu buta kaybi ginan sa kanda balay tiripnan. Nakan hinanap siya ni Hisus. Bag-u pinmaingana si Hisus sa kanya magkun, "Magsarig yi aw kawu sa Anak Tawu?" 36 Sinmagut siya magkun, "Sabiha duy nimu nu si unu siya hampay aku sumarig sa kanya." 37 Sinabi ni Hisus sa kanya magkun, "Nakitan yi duy nimu siya, dahil aku ngani tigbagaw sa kanmu kainda imaw yi ngani ti Anak Tawu." 38 Sinabi niya sa kan Hisus magkun, "Magsarig aku duy, Panginuun." Bag-u siya nagluhud sa atubangan ni Hisus. 39 Sinabi ni Hisus magkun, "Nagsitay aku sa kalibutan para ipaburayhaw niku ti kasalanan manga tawu, hampay ti manga buta humiling yi, ag ti manga maghiling bumaliw ngap ga buta." 40 May manga Parisiyu diman ati sa kan Hisus nakadnug diman sa kay binagaw. Pinmaingana sida sa kanya magkun, "Balaw nguna kanmu gustu sabihun kuntay kami hanggan buta?" 41 Sinmagut si Hisus magkun, "Nu abi kamu manga buta unman mana kamu may kasalanan. Dapat taynguna kanyu pagsabihun magkun, 'Kami maghiling', nakan unman mab-ul kanyu kasalanan."

10

1 Sinabi ni Hisus magkun, "Ungud duy kang pagsabihun sa kanyu, nu may tawu sumulud sa tudir manga karanidu balaw lakaw sa kay puwirtahan, nu abi dumayik sa kay alad, tunda pag tawu mananakaw ag tulisan. 2 Ti tawu nu sumulud sa tudir lakaw sa kay puwirtahan, tunda pag tawu imaw ti manug-alaga sa karanidu. 3 Pagbukasan siya purtiru tudir. Ti manga karanidu magdungug sa kay magbagaw manug-alaga. Pagtawagun pag-ingarnan gid niya kay sadili manga karanidu bag-u kay pagtabanun niya sida tag sa luwas tudir. 4 Pagka nipalwas yi niya sida tanan, umuna siya bag-u kay manga karanidu kumuyug sa kay uryan, dahil kilala nida kay busis. 5 Dayu gid kumuyug ti manga karanidu sa iba, bagkus ngap pumalagiw ginan sa kanya, dahil unman kilala nida nu manga iba tigbagaw, bukun kanda manug-alaga." 6 Inda pag pahalimbawa kay itinultul ni Hisus sa manga tawu, dapat unman nasalman nida kay gustu niya sabihun. 7 Sinabi maan ni Hisus sa kanda magkun, "Ungud duy kang pagsabihun sa kanyu, aku ti puwirtahan manga karanidu. 8 Ti un-an nakasitay nakauna sa kangku imaw yi ti manga mananakaw ag tulisan tunda. Dapat unman sida binati manga karanidu. 9 Aku ti puwirtahan. Una hintay pag tawu nu sumulud lakaw sa kangku, siya maribri. Sumulud siya lumuwas ag makakit siya karan-unun. 10 Unman sumitay tag ti mananakaw purya lang hampay manakaw, manmatay hanggan mamapas. Aku nagsitay hampay kang manga karanidu kumakit tutuu pag buhi udyi may kakurangan. 11 "Aku ti mayad pag manug-alaga sa karanidu. Ti mayad pag manug-alaga handa diman mamatay tungkul sa kay manga karanidu. 12 Tuhay ti inupahan lang, unman siya ti tutuu pag manug-alaga sa karanidu ag bukun waydi siya kay apu. Nakan nu makitan niya may simarun idu magpakarani sa manga karanidu, pabay-anan lang niya ti manga karanidu, pumalagiw yi lang siya. Pagka tinkub simarun idu ti karanidu, namululagan yi lang kay iba. 13 Ti inupahan magpalagiw lang nu may madala dahil magpakiupa lang waydi siya, unman pagpahalgaan niya ti manga karanidu. 14 Aku ngani ti mayad pag manug-alaga sa karanidu. Kilala di gid niku kang sadili manga karanidu, sida magkilala di gid waydi sa kangku, 15 parihu diman sa kay magkilala niku Ama sa kangku ag kang diman magkilala sa kang Ama. Handa diman aku mamatay tungkul sa kang manga karanidu. 16 May imaw waya gid aku tuhay pag manga karanidu, unman minsan sa inda pag tudir. Kailangan tabanun diman niku tunda pag manga karanidu, dumungug sida sa kang magbagaw usahun gid sida ka manada, usa lang ka manug-alaga. 17 "Pagmahalun aku niku Ama dahil handa aku mamatay hampay tanggapun dimaan niku kang buhi. 18 Unman may tawu bum-ul kang buhi, buluntadan ngap kang ipakaun. May kapangyarihan aku mamatay, may kapangyarihan diman aku hampay mabuhi uman. Inda yi ngani kay ibinilin niku Ama sa kangku hampay kang tupadun." 19 Kas-a yi maan namululagan ti manga pinunu Hudiyu kay naisipan dahil sa kay binagaw ni Hisus. 20 Mayamu sa kanda ti nagsabi magkun, "Inapuan siya labang, paung gid siya. Hayga pagpatingihan waya niyu siya?" 21 Dapat sinabi manga iba magkun, "Nu ti tawu inapuan labang balaw katida duy kay pagbagawun. Mahimu aw lugud makapaayad sa buta ti labang?" 22 Pagka dugay may Kapistahan sa Hirusalim tungkul sa Pag-&alaala sa kanda nag-intirga balay Diyus. Ati katpung sa udas amihanun. 23 Namasyar si Hisus sa pagkumnun manga tawu kan Sulumun parat-ungan ati sa balay Diyus. 24 Pagka dugay nagtipun sa kay palibut ti manga pinunu Hudiyu. Sinabi nida sa kan Hisus magkun, "Kabitay waya kadugay duy pagpatalinduwahun nimu kami? Pagtapata yi nimu nu kawu ti pinili Diyus Manugribri pag Hari." 25 Sinmagut si Hisus sa kanda magkun, "Sinabi yi niku sa kanyu dapat unman maniwala kamu. Pagtupadun niku kang buruwatun sa kapangyarihan niku Ama. Tunda ngani pag buruwatun niku ti puruyba tungkul sa kangku. 26 Dapat kamu unman magpaniwala dahil balaw kamu minsan sa kang manga karanidu. 27 Kang manga karanidu magdungug sa kang magbagaw. Kilala niku sida ag sida magkuyug sa kangku. 28 Ti manga magpaminsan sa kangku pagpakan-an niku tutuu pag buhi unman may katapusan. Hanggan waya aban dayu gid sida ipadamhak sa kamatayan. Unman may umagaw sa kanda ginan sa kang kamang. 29 Sida ipinakaun niku Ama sa kangku. Kang Ama lalu makapangyarihan sa tanan, unman may umagaw ginan sa kamang niku Ama. 30 Aku hanggan ti Ama urusa kami." 31 Nagpunpun yi gid maan manga batu ti manga pinunu Hudiyu hampay ibintuk sa kan Hisus. 32 Sinabi ni Hisus sa kanda magkun, "Mayamu pag manga mayad buwat kang ipinakakit sa kanyu angay sa kay ibinilin Ama sa kangku. Naan sa kang manga buwat ti pag-ikabatu niyu sa kangku?" 33 Sinmagut sida magkun, "Balaw sa kanmu manga mayad buwat ti pag-ikabatu nimi sa kanmu dapat dahil sa kanmu magbagaw kalukuhan laban sa Diyus. Magpadiyusdiyusan kawu, madi tawu lang waydi." 34 Sinabi ni Hisus magkun, "Nisurat kabay sa kanyu Kasuguan magkun ti Diyus, 'Kamu manga diyus.' 35 Alam nita ti pagsabihun Banal Kasuratan unman may pudil hanggan aban. Diyus ngap ti nag-ingaran sa tunda pag manga tawu kuntay sida manga diyus, imaw yi ngani pag manga tawu ti nakatanggap sa kay bagaw Diyus. 36 Ti Ama ti nagpili nagsugu sa kangku sitay tag sa kalibutan. Kabitay lugud masabi niyu aku magbagaw kalukuhan laban sa Diyus nu pagsabihun niku aku ti Anak Diyus? 37 Nu unman pagtupadun niku ti buruwatun niku Ama, danga kamu magpaniwala sa kangku. 38 Dapat ay nu pagtupadun niku ti buruwatun niku Ama, kailangan pagpaniwala kamu sa kang buwat, una abi kamu unman magpaniwala sa kangku. Nu kamu magpaniwala sa kang pagbuwatun, maintindihan niyu kuntay ti Ama minsan sa kangku, aku minsan sa Ama." 39 Pagkaibgan maan nida dakpun si Hisus dapat siya nalagiw ginan sa kanda atubangan. 40 Nag-atag maan si Hisus sa dipay sapa Hurdan, sa kay nagtulbawan kaybi ni Huwan. Pagka si Hisus nadugay ati, 41 mayamu tawu nagpakarani sa kanya. Magharampangan ti manga tawu magkun, "Unman may nabuwat si Huwan manga makadululaw, dapat ti tanan manga sinabi niya tungkul sa inda pag tawu tutuu gid unman may pudil." 42 Ati sa dipay sapa Hurdan mayamu pag tawu sinmarig sa kan Hisus.

11

1 Ati sa baryu Bitanya may mag-uli usa ka tawu kay ngaran si Lasaru. Pagka dugay nasakit si Lasaru. Siyun diman sa Bitanya pag mag-uli kay manga patar-ari sida ni Marya ni Marta. 2 Imaw yi ngani pag Marya ti nagbuhus pamanglu sa kay manga lulud Panginuun bag-u kay pinayid niya buhuk. Kan Marya patar-ari pag Lasaru ti may sakit. 3 Nakan nagpasugu kay manga patar-ari babayi atag sa kan Hisus magkun, "Panginuun, ti kanmu pagbayaun pag tawu may sakit." 4 Pagka naalaman ni Hisus ti barita, sinabi niya magkun, "Tunda pag sakit balaw sa ikamatay. Nakan nangyari tunda hampay lalu makitan ti kadayawan Diyus. Ginan sa tunda pag sakit ni Lasaru madayaw aban ti Anak Diyus." 5 Pagmahalun ngani ni Hisus si Marta hanggan kay patar-ari babayi hanggan si Lasaru. 6 Madi alam ni Hisus magkasakit si Lasaru, nagpadugay waya siya duwa waya ka yabi ati sa dipay Hurdan. 7 Bag-u sinabi niya sa kay manga tuludluan magkun, "Pagbalik yi maan kita sa Hudiya." 8 Sinabi niya manga tuludluan magkun, "Udwaya dugay pagkaibgan yi manga Hudiyu kawu batuhun. Hayga duy kawu bumalik maan atag?" 9 Sinmagut si Hisus magkun, "Unman aw ti sirang dugay waydi kay rayaw? Nu ti tawu maglakaw sa marayaw dayu siya madayaan, dahil mag-akitan niya tigpakaun rayaw sitay sa babaw daga. 10 Dapat ti tawu nu maglakaw sa madlum madayaan gid, dahil unman may marayaw sa kanya." 11 Pagka sinabi ni Hisus tunda bag-u magkun waya siya, "Kanta pagmahalun pag tawu si Lasaru turug yi. Dapat aku umatag hampay siya kang pulawun." 12 Nakan sinabi niya manga tuludluan sa kan Hisus magkun, "Panginuun, nu turug si Lasaru, maayadan di siya." 13 Kay gustu sabihun ni Hisus namatay yi si Lasaru, dapat kanda isip kan Hisus pagtukyun ungud yi lang turug. 14 Nakan sinabi ni Hisus sa malinaw magkun, "Namatay yi duy si Lasaru. 15 Dapat alang alang sa kanyu, nakabaya aku unman aku ati sa kay magkamatay ni Lasaru hampay kamu sumarig sa kangku. Atag yi kita sa kanya." 16 Si Tumas, imaw ti binansagan Siing, nagsabi sa kay kaparihu tuludluan magkun, "Pagkuyug waydi kita sa kanta Maisturu hampay minsan diman sa kanya kita pag mamatay." 17 Pagka rinmas-ug si Hisus sa Bitanya naalman niya upat yi ka sirang kay nilubung si Lasaru. 18 Ti baryu Bitanya arani lang sa Hirusalim, manga usa ka tamaan ginatung kay karayu. 19 Mayamu pag manga Hudiyu nagsabang sa kanda ni Marta ni Marya hampay magpasaya sa kanda karukuan tungkul sa kanda patar-ari. 20 Pagka naalaman ni Marta si Hisus magkaras-ug yi, linmakaw siya hampay magsulang sa kan Hisus sa dalan. Dapat si Marya natayak matukawan sa balay. 21 Sinabi ni Marta sa kan Hisus magkun, "Nu sitay lang kawu duy, Panginuun, unman mana namatay kang patar-ari. 22 Dapat una kainda, alam diman niku una hintay kanmu hagadun sa Diyus ipakaun diman niya sa kanmu." 23 Sinabi ni Hisus sa kan Marta magkun, "Mabuhi di maan kanmu patar-ari." 24 Sinabi ni Marta magkun, "Alam duy niku siya mabuhi maan aban nu ti manga namatay buhiun maan sa katpung katapusan pag panahun." 25 Bag-u sinabi ni Hisus sa kanya magkun, "Sa kangku gid ginan duy pag mabuhi uman ti tawu. Aku diman ti gimpuunan buhi. Una abi mamatay ti tawu, nu siya magsarig sa kangku, balaw maduraan siya buhi. 26 Ti tawu nu may tutuu pag buhi siya ag nu siya magsarig sa kangku, dayu gid siya ipadamhak sa kamatayan. Pagpaniwalaan aw nimu inda?" 27 Sinmagut si Marta magkun, "Hu ngani Panginuun, naniwala yi aku kawu ti pinili Diyus Manugribri pag Hari, ti Anak Diyus, ti ipinangaku Diyus kuntay sumitay sa kalibutan." 28 Pagka sinabi ni Marta tunda, nuli dapu siya hampay kay bul-un si Marya. Yinansan niya kay patar-ari magkun, "Rinmas-&ug yi duy kanta Maisturu, ipinab-ul niya kawu." 29 Pagka nadnugan ni Marya tunda, tinmindug siya madali atag sa kan Hisus. 30 Udwaya rinmas-ug si Hisus sa baryu, ati di waya siya sa dalan sa kay nagsulangan ni Marta. 31 May manga tawu waya sa balay magsabang sa kan Marya magpasaya sa kay karukuan. Dapat pagka nakitan nida si Marya tinmindug bag-u nagluwas madali, kinmuyug waydi sida sa kanya dahil kanda hantup atag siya sa lubung hampay manlumi ati. 32 Dapat nag-ati ngani si Marya sa kay mapat-ungan ni Hisus. Pagka nakitan niya si Hisus, napayuk-ub siya sa kay atubangan magkun, "Nu sitay lang kawu duy, Panginuun, unman mana namatay kang patar-ari." 33 Nakitan ni Hisus si Marya magnguynguy hanggan kan Marya kaibahan pag manga tawu lunsay magnguruynguyan diman. Nakan magkabuyat yi kay naisipan naglumi kay tagipusuun. 34 Bag-u pinmaingana siya magkun, "Naan kanyu pag ipinauli siya?" Sinmagut sida ni Marta magkun, "Atag yi kita Panginuun, bantayi nimu." 35 Naglumi si Hisus. 36 Sinabi manga tawu magkun, "Bantayi niyu nu kabitay kay pagmahal niya sa kan Lasaru." 37 Dapat sinabi manga iba magkun, "Nagpaayad siya sa tawu buta. Hayga unman inampara niya kan Lasaru kamatayan?" 38 Nagmaruku maan masyadu si Hisus sa kay nag-atag sa kanda pinaulian bangkay pag lukib. Tunda pag lukib tinalakpan batu. 39 Bag-u sinabi ni Hisus magkun, "Bul-a duy niyu tunda pag itinalakup pag batu." Kan Marta ngani patar-ari ti namatay. Nakan magkun si Marta sa kan Hisus, "Panginuun, mabawu yi ay buyuk kay bangkay. Upat yi ka yabi kay namatay." 40 Sinabi ni Hisus sa kan Marta magkun, "Unman aw sinabi niku sa kanmu nu kawu sumarig, mag-akitan nimu ti kadayawan Diyus?" 41 Bin-ul ngani nida ti batu. Nagtangda si Hisus magkun, "Magpasalamat aku, Amang, sa kanmu dahil nadnugan nimu aku. 42 Alam niku pirmi gid mag-adnugan nimu aku. Dapat nakan kang sinabi inda sa kanmu dahil sa kayamuan tawu sa kang palibut hampay sida maniwala kuntay kawu yi ngani ti nagsugu sa kangku." 43 Pagka sinabi ni Hisus katida, ainalsa niya kay busis magkun, "Lasaru, pagluwas yi kawu." 44 Madi siya sitay namatay nagluwas siya nabuhi maan. Mabudbudan di waya ti rutay panlubung sa kay kamang hanggan sa kay manga lubud. Hanggan kay uyahun may budbud di waya panyu. Bag-u sinabi ni Hisus sa kanda magkun, "Bul-a yi niyu kay manga rutay mabudbudan hampay siya makalakaw maan." 45 Mayamu sa manga nansabang sa kan Marya, pagka nakitan nida kan Hisus binwat, sinmarig yi ngap sida sa kanya. 46 Dapat ti iba sa kanda nag-ati sa manga Parisiyu bag-u kanda itinultul kan Hisus binwat. 47 Nakan nagtiripun ti manga Parisiyu, ti manga pangulu manug-asiwa balay Diyus hanggan ti manga Pinunu nasyun Hudiyu bag-u sida nagpululungan magkun, "Hintay kanta buwatun? Dahil mayamu pag manga makapangyarihan pag tanda kay pagbuwatun tunda pag tawu. 48 Nu kanta lang pabay-anan kay manga buwat katida, ti tanan tawu sumarig sa kanya. Bag-u sumitay ti manga taga Ruma bag-u dautun nida ti balay Diyus ag daugun nida ti nasyun manga Hudiyu." 49 Ati katpung pag timpu si Kaipas ti Pangulu Manug-asiwa balay Diyus. Magkun si Kaipas, "Ud may intindi maaw kamu. 50 Unman maaw kamu madunung magkilala kuntay nu para sa kanyu mayad waya nu mamatay ti usa ka tawu hampay dayu mapapas ti buu nasyun manga Hudiyu." 51 Inda kan Kaipas sinabi bukun ginan sa kay lang sadili naisipan. Ati katpung pag timpu siya ti Pangulu Manug-asiwa balay Diyus, nakan ipinurupita niya mamatay si Hisus hampay iribri ti nasyun Hudiyu. 52 Ag balaw lang para sa nasyun Hudiyu. Mamatay diman si Hisus hampay tipunun niya ipaminsan ti manga anak Diyus nangalatkalat sa buu kalibutan. 53 Nakan ngani tunda ginan pag sirang paggayakun yi manga pinunu Hudiyu ipamatay si Hisus. 54 Nakan si Hisus udyi pirmi naglakaw sa Hudiya, udyi nagpasampak siya sa manga Hudiyu. Nighit siya siti ginan nag-&ati siya sa usa ka rugar arani sa pangawakawaan, sa usa ka banwa kay ngaran Ipraim. Ati siya pag napadugay kaibahan niya kay manga tuludluan. 55 Ati katpung arani yi ti Kapistahan sa Pag-alaala sa Karibrihan. Una naan ginan pag manga rugar mayamu tawu nag-&ati sa Hirusalim hampay tupadun nida ti manga ibinilin sa Kasuguan agud malumpiyu sida sa kay magbantay Diyus bag-u magpista. 56 Pagka ati sa Hirusalim, paghanapun nida si Hisus. Pagka nagtipun ti manga tawu sa balay Diyus, magharampangan magparaingan-an sida magkun, "Kabitay kanyu pag-iisip? Sumitay aw nguna siya sa Kapistahan, aw ngatay dayu?" 57 Ti manga pangulu manug-asiwa balay Diyus hanggan ti manga Parisiyu nagbilin sa manga tawu magkun, "Nu may tawu nakaalam nu naan si Hisus, kailangan itudlu niya sa kanmi hampay kanmi dakpun siya."

12

1 Unum wadi ka sirang bag-u Kapistahan yi sa Pag-alaala sa Karibrihan. Ati katpung pag sirang nag-atag si Hisus sa Bitanya, sa kay ulian ni Lasaru, imaw yi ngani pag Lasaru kay binuhi uman ginan sa kamatayan. 2 Pinayapunan nida si Hisus ati, si Marta ti nag-asikasu sa hayin. Si Lasaru matukawan minsan sa manga magkaun sa kay kasaru ni Hisus. 3 Bag-u binulwat ni Marya ti tunga sa kilu pag pamanglu. Tunda pag pamanglu bin-&ul ginan sa usa ka kayu kay ngaran nardu. Tutuu daka kay halaga tunda pag pamanglu. Kan Marya ibinuhus tunda sa kay lulud ni Hisus bag-u pinayid niya buhuk. Napnu gid ti usa ka balay sa hungaw pamanglu. 4 Siyun diman si Hudas Iskariyuti, usa diman ka tuludluan, imaw ti pumakampi sa kalaban ni Hisus. 5 Sinabi ni Hudas, "Mayad waya nu ipinabili yi lang tunda pag pamanglu sa halaga tawu tinarabahuan sa sulud sampulu ka bulan, bag-u abi ipakaun kay kabilyanan sa manga pugri." 6 Katida kay binagaw ni Hudas balaw kuntay sa magpasunaid siya sa manga pugri. Nakan sinabi niya katunda dahil siya mananakaw. Siya ti manughiyaput kanda kuwarta, bag-u paggawhinun niya kay iba. 7 Sinmagut si Hisus magkun, "Pabay-&ani niyu ti babayi. Inda kay yi ihinanda daan tungkul sa udas aban kanda maglubung sa kangku. 8 Dahil pirmi di sa kanyu ti manga pugri, dapat aku aban udyi dugay kaibahan niyu." 9 Mayamu pag manga Hudiyu nakaalam yi kuntay si Hisus ati sa Bitanya. Nakan nag-ati sida dahil asan si Hisus ag lalu kanda gustu makitan si Lasaru, ti binuhi maan ni Hisus ginan sa kamatayan. 10 Nakan namululungan ti manga pangulu manug-&asiwa balay Diyus hampay kanda ipamatay diman si Lasaru. 11 Dahil ginan sa nangyari sa kan Lasaru, mayamu pag manga Hudiyu balaw yi napasakup sa kanda manga pinunu, sinmarig yi sida sa kan Hisus. 12 Sa usa ka sirang kayamuan gid tawu nag-ati sa Kapistahan sa Pag-alaala sa Karibrihan. Pagka naalaman nida si Hisus arani yi magkaras-ug yi sa Hirusalim, 13 nam-ul sida manga paklang bag-u linmakaw sida nagsulang sa kan Hisus sa dalan. Nanarawagan ti manga tawu magkun, "Dayawun nita ti Diyus. Papaladan Diyus ti sumitay sa ngaran Panginuun. Papaladan Diyus ti Hari Israil." 14 Pagka nakitan ni Hisus ti usa ka anak asnu, sinmakay siya, angay sa isinurat sa Banal Kasuratan magkun, 15 "Danga kawu magkadala, Banwa Siun. Malu atay tag yi kanmu Hari nakasakay sa anak asnu." 16 Ati katpung unman naintindihan manga tuludluan ni Hisus kay kahulugan tunda pag manga nangyari. Dapat pagka si Hisus binuhi maan may kadayawan bag-u di naalaala nida inda ti isinurat sa Banal Kasuratan tungkul sa kanya ag katunda diman ti binwat manga tawu sa kan Hisus. 17 Pagka si Lasaru tinawagan ni Hisus ginan sa basad lukib ag siya binuhi maan, mayamu pag manga tawu siyun diman sa kan Hisus arani ti nakakit sa kay binwat. Bag-u itinultul nida sa manga iba nu hintay ti nangyari. 18 Nakan mayamu pag tawu ti nagsulang sa kan Hisus sa dalan, dahil naalaman nida kan Hisus binwat tunda pag makadululaw pag tanda. 19 Nakan nagharampangan ti manga Parisiyu magkun, "Bantayi duy niyu, udyi gid may mabuwat kita. Malu, ti tanan tawu napaminsan ngap sa kanya." 20 May manga Giriyigu pag tawu nag-ati diman sa Hirusalim hampay magsamba sa Diyus katpung sa Kapistahan sa Pag-alaala sa Karibrihan. 21 Nagpakarani sida sa kan Pilipi taga Bitsayda sakup sa daga Galiliya. Sinabi nida sa kan Pilipi, "Duy gustu mana nimi maghampang sa kan Hisus." 22 Nag-ati si Pilipi nagsabi sa kan Andiris. Bag-u sida maan ni Andiris ni Pilipi nag-ati sa kan Hisus kanda itinultul sa kanya ti sinabi manga Giriyigu. 23 Sinabi ni Hisus sa kanda magkun, "Arani yi ti taning pag kaudasan hampay ipaburayhaw ti kadayawan Anak Tawu. 24 Ungud gid duy kang pagsabihun sa kanyu, ti pasi tirigu nu unman malagpak sa daga hampay mamatay, balaw yi may samilya. Dapat ay nu mamatay ngani tunda pag pasi tirigu, lalu ngap mamurak siya mayamu. 25 Nu pagpahalgaan tawu kay sadili buhi, maduraan ngap siya buhi. Dapat nu unman pagpahalgaan tawu kay buhi sitay sa babaw daga, dayu ngap siya maduraan buhi hanggan aban. 26 Nu ti tawu magkaibug magbuwat kang buruwatun, kailangan siya pagkuyug sa kangku hampay una naan aku, siyun diman sa kangku kang suruguun. Una hintay pag tawu nu tumupad siya sa kang buruwatun, dayawun siya niku Ama." 27 Sinabi ni Hisus magkun, "Taynguna magkaaburidu kang tagipusuun. Hintay nguna kang sabihun? Ngatay kang sabihun, Amang, paiwasan nimu aku sa inda aban pag kakurian? Dapat ay nakan aku nagsitay sa kalibutan hampay malakawan ngapu niku inda pag kakurian aban. 28 Amang, ipaburayhaw duy nimu ti kadayawan nimu ngaran." Bag-u may nagbagaw ginan sa langit magkun, "Ipinaburayhaw yi duy niku ti kadayawan niku ngaran, dapat una aban ipaburayhaw waya gid maan niku." 29 Nadnugan kayamuan tawu may nagbagaw. Sinabi manga iba magkun, "Maglinti maaw." Magkun ti manga iba, "Anghil ti naghampang sa kanya." 30 Dapat sinabi ni Hisus magkun, "Tunda ngani pag busis kanyu nadnugan balaw nagbagaw para sa kangku nu ud para ngap sa kanyu. 31 Taynguna yi ti kaudasan hampay pihuun Diyus ti manga tawu sa babaw daga nu daut nu mayad. Taynguna tulakun yi tag sa luwas ti pangulu inda pag kalibutan. 32 Nu ipaabwat yi aku ginan sa daga, butungun niku ti tanan tawu hampay sida pumakarani sa kangku." 33 Inda kay sinabi ni Hisus hampay ipaalam nu kabitay pag kamatayan kay malakawan aban. 34 Nagsabi ti kayamuan tawu sa kanya magkun, "Naalaman nimi sa kanmi Kasuguan magkun, ti pinili Diyus Manugribri pag Hari unman gid mamatay hanggan aban. Kabitay duy kanmu pagsabihun kuntay kailangan ipaabwat ti Anak Tawu? Si unu nguna tunda pag Anak Tawu?" 35 Sinmagut si Hisus magkun, "Udyi madugay aban sa kanyu ti sulu. Paglakaw yi kamu hanggan sa kanyu waya ti sulu hampay balaw kamu matakdan dulum. Dahil nu ti tawu maglakaw sa madlum, unman niya alam kay patabgan. 36 Pagsarig yi kamu sa sulu hanggan sa udwaya mab-&ul ginan sa kanyu hampay kamu manga sakup yi sa karayawan." Pagka sinabi ni Hisus tunda, nighit siya ati ginan, napaiwas-&iwas siya sa manga tawu. 37 Unman sida nagsarig sa kanya, madi katunda kay kayamu pag manga tanda kay binwat niya sa kanda atubangan. 38 Inda tanan tanan nangyari hampay matupad kay sinabi kaybi ni Purupita Isayas magkun, "Panginuun, si unu ti naniwala sa kanmi sinabi? Sa kantapu pag ipinakilala Panginuun kay kapangyarihan?" 39 Nakan unman sida nakahimu magsarig dahil kay sinabi ni Isayas magkun, 40 "Binuta Diyus kanda manga mata. Pinaganit Diyus kanda tagipusuun Hampay unman kumakit kanda mata Ag hampay unman makaintindi kanda tagipusuun. Sinabi Diyus magkun, nakan katida kang binwat sa kanda hampay sida unman bumalik tag sa kangku. Dayu waydi paayadun niku sida." 41 Inda kay sinabi ni Isayas dahil ipinakakit Diyus sa kanya kay kadayawan aban ni Hisus ag kay binagaw ni Isayas tungkul ngani sa kan Hisus. 42 Una sa manga pinunu Hudiyu mayamu ti nagsarig sa kan Hisus. Dapat sida magkadala sa manga Parisiyu nakan unman kanda ipinamalay sa manga tawu barang ipalwas sida ginan sa balay tiripnan. 43 Unman mahalaga sa kanda nu sida pagbayaun Diyus. Ti mahalaga lang sa kanda basta sida pagbayaun manga tawu. 44 Ainalsa ni Hisus kay busis magkun, "Ti tawu nu magsarig sa kangku balaw lang sa kangku pag magsarig, nu unman hanggan sa nagsugu sa kangku. 45 Ti tawu nu nakakit sa kangku, nakakit diman waydi siya sa nagsugu sa kangku. 46 Nagsitay aku ga sulu sa kalibutan hampay una hintay pag tawu nu sumarig sa kangku, balaw yi siya sa kadudulman. 47 Una hintay pag tawu nu magpatingi sa kang pagbagawun bag-u unman niya pagpaniwalaan, balaw aku ti pumihu sa kanya nu daut nu mayad. Dahil aku unman nagsitay hampay kang pihuun ti taga kalibutan nu daut nu mayad. Nakan aku nagsitay hampay ngap iribri ti taga kalibutan. 48 Dapat may sumintinsiya sa tawu nu siya magdayu sa kangku ag nu unman siya magpaniwala sa kang pagbagawun. Kang ngap manga binagaw imaw ti sumintinsiya sa kanya sa katapusan panahun aban. 49 Nakan katida ti mangyari dahil unman aku nagtultul ginan lang sa kang sadili. Ti Ama ti nagsugu sa kangku imaw ti may bilin sa kangku nu hintay ti kailangan niku sabihun ag nu hintay ti dapat niku itultul. 50 Alam niku kay ibinilin niya imaw ti pumakaun tutuu pag buhi unman may katapusan sa tawu. Nakan ngani ti ibinilin niku Ama sa kangku imaw kang pagbagawun."

13

1 Ati katpung usa wadi ka sirang bag-u Kapistahan yi sa Pag-alaala sa Karibrihan. Alam yi ni Hisus inda yi ngani pag kaudasan siya umighit ginan sa kalibutan atag sa Ama. Daan minayad gid niya ti manga napasakup sa kanya sitay sa babaw daga, ag kay minayad niya sida hanggan sa katapusan niya buhi. 2 Ati katpung si Hisus hanggan kay manga tuludluan magyapun. Daan inudyukan diyablu si Hudas, kan Simun Iskariyuti anak, hampay pumakampi siya sa kay kalaban ni Hisus agud siya kay itudlu sa kanda. 3 Daan alam di ni Hisus ipinakaun Ama sa kanya ti tanan pag kamaskihan. Alam diman waydi ni Hisus siya ginan sa Diyus ag siya umighit sitay ginan atabug maan sa Diyus. 4 Sa kanda magkaun waya, tinmindug si Hisus bag-u linkas niya kay pamaunib balukas sadsad. Nagbuul siya tualya kay ihinuragkus dapu sa kay awak. 5 Pagka tinmigis danum atag sa palanggana, inugasan niya ti lulud niya manga tuludluan bag-u kay pinayid tualya mahuragkusan sa kay awak. 6 Pagka siya nagpakarani sa kan Simun Pidru, pinmaingana si Pidru sa kanya magkun, "Panginuun, kawu aw ti umugas kang manga lulud?" 7 Sinmagut si Hisus magkun, "Udwaya magkasalman nimu taynguna kang pagbuwatun, dapat masalman di nimu aban." 8 Magkun si Pidru, "Una kapira aban danga gid kawu ti mag-ugas kang manga lulud." Sinabi ni Hisus sa kanya magkun, "Nu unman kang ugasan kanmu manga lulud, dayu kawu makapaminsan sa kangku." 9 Bag-u sinabi ni Pidru magkun, "Nu katunda Panginuun, danga kang manga lulud lang. Ugasi duy nimu kang kamang hanggan kang ulu." 10 Sinabi ni Hisus sa kanya magkun, "Ti tawu nu nakaparigus yi udyi kailangan mag-ugas waya nu ud kay lang lulud dahil malumpiyu yi kay bilug. Kamu duy manga malumpiyu yi, dapat balaw kamu tanan." 11 Nakan katida kay sinabi ni Hisus magkun, balaw kamu tanan manga malumpiyu, dahil alam di niya nu si unu ti pumakampi sa kay kalaban hampay siya kay itudlu sa kanda. 12 Pagka inugasan ni Hisus kanda manga lulud, kay pamaunib balukas sadsad kay maan isinlung bag-u tinmukaw maan siya. Bag-u pinmaingana siya sa kanda magkun, "Magkasalman aw niyu kang binwat sa kanyu kis-ab? 13 Kanyu pagsabihun aku kanyu Maisturu ag kanyu Panginuun. Tama ngani kanyu pagsabihun katida, dahil tutuu gid aku kanyu Maisturu ag kanyu Panginuun. 14 Taynguna aku kanyu ngani Panginuun ag kanyu Maisturu, ti nag-ugas kis-ab kanyu manga lulud. Nakan kamu hanggan kailangan mag-urugasan kanyu manga lulud sa usa kag sa usa. 15 Dahil kamu kang pinakakitan usa ka mustara hampay kanyu buwatun sa usa kag sa usa parihu diman ga kang binwat sa kanyu taynguna. 16 Ungud gid kang pagsabihun sa kanyu duy, unman may panawuhun mataas man sa kay amu. Ag unman may sinugu mataas man sa nagsugu sa kanya. 17 Nu naintindihan yi niyu inda pag manga katutuuhanan, masulung kamu nu kanyu tupadun. 18 "Inda kang manga pagsabihun bukun tungkul sa kanyu tanan. Kilala di niku daan nu hintay pag manga tawu kang pinili. Dapat kailangan tupadun ti pagsabihun sa Banal Kasuratan magkun, 'Tunda pag tawu ti kasaru niku sa lamak, imaw yi ngap ti nagdayi sa kangku.' 19 Taynguna pagka udwaya nangyari tunda, pag-itultul yi niku daan sa kanyu hampay nu mangyari yi, sumarig yi kamu kuntay aku si Aku Ngani. 20 Ungud gid kang pagsabihun sa kanyu, tigtanggap sa una hintay pag tawu kang sinugu, magtanggap diman sa kangku. Tigtanggap sa kangku, kay tanggapun diman niya ti nagsugu sa kangku." 21 Pagka sinabi ni Hisus tunda, naaburidu gid siya sa kay tagipusuun. Bag-u itinultul niya sa kanda sa malinaw magkun, "Ungud gid duy kang pagsabihun sa kanyu, ti usa sa kanyu pumakampi sa kang kalaban hampay aku kay itudlu sa kanda." 22 Ti manga tuludluan namarantayan sa usa kag sa usa. Unman gid nida alam nu si unu nguna kay pagtukyun ni Hisus. 23 Sa kanda magkaun ti matukawan sa kay arani ni Hisus imaw yi ngani ti pagmahalun ni Hisus pag tuludluan. 24 Pinaamanan siya ni Simun Pidru magkun, "Paingan-a nimu nu si unu kay pagtukyun niya." 25 Nakan tunda pag tuludluan inmisdug waya atag sa kan Hisus arani bag-u pinmaingana siya magkun, "Panginuun, si unu nguna tunda pag tawu?" 26 Sinmagut si Hisus magkun, "Nu hintay ti tunghulan niku sab tinapay kang isinawsaw sa sabakan, tunda pag tawu imaw yi kang pagtukyun." Nakan pagka isinawsaw ni Hisus ti tinapay sa sabakan, kay bin-&ul ginan sa taya bag-u kay itinunghul tag sa kan Hudas, kan Simun Iskariyuti anak. 27 Pagka nagamit ni Hudas ti tinapay, susun inapuan siya ni Satanas. Bag-u kan Hisus sinabi sa kan Hudas magkun, "Ti kanmu buwatun, buwata yi nimu kadali." 28 Unman alam nida tanan manga kasaru ni Hisus nu hintay nguna kay kahulugan kay binagaw sa kan Hudas. 29 Si Hudas ti manugkurpa kuwarta. Nakan kanda hantup manga iba tuludluan barang sinugu ni Hisus si Hudas hampay bilihun niya kanda manga pangailangan sa Kapistahan, aw ngatay hampay pumakaun siya kuwarta sa manga pugri. 30 Pagka nagamit ngani ni Hudas ti tinapay, susun yi siya napalwas. Yabi yi ati. 31 Pagka napalwas yi si Hudas, sinabi ni Hisus magkun, "Taynguna ipaburayhaw yi ti kadayawan Anak Tawu. Ag ginan sa kanya pag ipaburayhaw diman ti kadayawan Diyus. 32 Nu ipinaburayhaw yi ti kadayawan Diyus ginan sa Anak Tawu, susun Diyus yi gid ti pumaburayhaw sa kadayawan Anak Tawu. 33 Kamu duy pag manga mahal niku pag kaibahan, aku balaw yi dumugay sa kanyu. Hanapun gid niyu aku aban. Dapat pagsabihun niku taynguna parihu diman sa kang sinabi sitay sa manga pinunu Hudiyu magkun, kamu dayu makaati sa atihan niku. 34 Aku duy may bag-u pag bilin sa kanyu magkun, pagmalahalan kamu sa usa kag sa usa. Nu kabitay kang nagmahal sa kanyu, pagkatunda diman waydi kamu pagmalahalan sa usa kag sa usa. 35 Nu kamu may pagmahal sa usa kag sa usa, makilala tanan manga tawu kamu kang manga tuludluan." 36 Bag-u pinmaingana si Simun Pidru sa kan Hisus magkun, "Panginuun, naan tabug kawu?" Sinmagut si Hisus magkun, "Sa kang atihan kawu balaw makakuyug sa kangku taynguna, dapat aban kawu dumasun di sa kangku." 37 Sinabi ni Pidru magkun, "Panginuun, hayga aku balaw makakuyug sa kanmu taynguna? Handa diman aku mamatay alang alang sa kanmu." 38 Sinabi ni Hisus magkun, "Tutuu gid aw handa kawu mamatay alang alang sa kangku? Ungud gid kang pagsabihun sa kanmu, udwaya tumarauk ti manuk, itanggi nimu aku katlu ginan."

14

1 Bag-u sinabi ni Hisus sa kay manga tuludluan magkun, "Danga magkaaburidu kamu sa kanyu tagipusuun. May sarig kamu sa Diyus, pagsarig diman waydi sa kangku. 2 Sa balay niku Ama mayamu pag ulian. Umati aku hampay maghanda yi kanyu ulian. Unman mana itinultul niku inda sa kanyu nu abi balaw tutuu. 3 Nu aku makaati makahanda yi kanyu ulian, bag-u bumalik maan aku, kamu kang yi bul-un hampay minsan kamu sa kang ulian. 4 Alam yi niyu ti dalan atag sa rugar kang atihan." 5 Sinabi ni Tumas magkun, "Panginuun, unman nimi alam nu naan tag kawu. Kabitay pag maalaman nimi ti dalan?" 6 Sinmagut si Hisus sa kanya magkun, "Aku ti dalan, ti katutuuhanan, ti buhi. Ginan lang sa kangku pag makaati ti tawu sa Ama." 7 Magkun si Hisus sa kanda, "Nu nakilala yi niyu aku, nakilala yi waydi niyu hanggan kang Ama. Taynguna ginan nakilala yi niyu siya ag kanyu yi nakitan." 8 Sinabi ni Pilipi sa kan Hisus magkun, "Panginuun, ipakakit nimu sa kanmi ti Ama. Tida lang mana duy kanmi kailangan." 9 Sinabi ni Hisus sa kanya magkun, "Dugay yi aku pag kaibahan niyu. Udwaya aw lugud nakilala nimu aku, Pilipi? Ti tawu nu nakakit sa kangku, nakitan yi niya hanggan ti Ama. Hayga duy pagsabihun nimu magkun, 'Ipakakit nimu sa kanmi ti Ama'? 10 Unman aw duy maniwala kawu kuntay aku minsan sa Ama ag ti Ama minsan sa kangku? Ti manga bagaw kang pag-&itultul sa kanyu balaw ginan lang sa kang sadili. Ti Ama ti nangulian sa kangku imaw tigtupad kay buruwatun. 11 Pagpaniwala yi duy kamu sa kang pagsabihun magkun, aku minsan sa Ama ag ti Ama minsan sa kangku. Dapat nu unman magpaniwala kamu dahil sa kang pagsabihun, pagpaniwala yi gid kamu dahil sa kang manga binwat. 12 Ungud gid kang pagsabihun sa kanyu, ti tawu nu nagsarig siya sa kangku, buwatun diman niya ti manga makadululaw ga kang diman binwat. Lalu waya paman makadululaw kay buwatun, dahil aku umati yi sa Ama. 13 Una hintay kanyu hagadun sa kangku dahil kamu napasakup sa kangku, kang gid buwatun hampay ipaburayhaw niku ti kadayawan niku Ama. 14 Nu paghagadun niyu una hintay sa kangku dahil kamu napasakup sa kangku, kang gid buwatun tunda." 15 Sinabi ni Hisus magkun, "Nu pagmahalun gid niyu aku, tupadun waydi niyu kang manga ibinilin sa kanyu. 16 Humagad aku sa Ama bag-u pakan-an niya kamu tuhay pag Manug-awat hampay siya kanyu yi kaibahan hanggan waya aban. 17 Tunda pag Manug-awat imaw yi ti Ispiritu tigtudlu katutuuhanan tungkul sa Diyus. Dayu mahimu makapasakup sa Ispiritu ti manga taga kalibutan, dahil unman mag-akitan nida siya, unman diman kanda nakilala. Dapat kamu duy nakakilala yi sa kanya, dahil siya kanyu yi kaibahan ag aban mangulian yi siya sa kanyu tagipusuun. 18 "Dayu pabay-anan lang niku kamu unman may Manug-&awat. Bumalik maan aku sa kanyu. 19 Udyi dugay aban bag-u dayi gid kumakit sa kangku ti manga taga kalibutan. Dapat kamu kumakit di sa kangku. May tutuu gid pag buhi aku, nakan una kamu may tutuu gid pag buhi. 20 Sa ati katpung pag sirang aban makilala niyu kuntay aku minsan sa Ama ag kamu minsan sa kangku, aku minsan diman sa kanyu. 21 "Una hintay pag tawu nu tinanggap niya kang manga bilin bag-u kay tupadun, tunda yi ngani pag tawu tigmahal sa kangku. Mahalun diman niku Ama una hintay pag tawu nu magmahal sa kangku. Ag ipakilala niku kang sadili sa kanya." 22 Bag-u si Hudas (bukun si Hudas Iskariyuti) pinmaingana sa kan Hisus magkun, "Panginuun, kabitay duy pag ipakilala nimu kanmu sadili sa kanmi lang ag unman hanggan sa manga taga kalibutan?" 23 Sinmagut si Hisus magkun, "Una hintay pag tawu nu magmahal siya sa kangku, tumupad siya sa kang manga bilin bag-u mahalun gid siya niku Ama. Bag-u kang Ama hanggan aku umasan yi mangulian yi sa kanya. 24 Dayu waydi tumupad ti tawu sa kang manga bilin nu unman pagmahalun niya aku. Ti manga itinudlu niku kanyu nadnugan balaw ginan lang sa kang sadili isip. Tunda pag manga bagaw ginan di sa Ama sa nagsugu sa kangku. 25 "Inda pag manga bagaw kang itinultul sa kanyu kang sitay waya sa kanyu. 26 Dapat suguun Ama ti Manug-awat ti Ispiritu ngani Banal sa kanyu sa manga napasakup sa kangku. Itudlu niya sa kanyu ti tanan pag manga bagay. Umawat siya sa kanyu hampay balaw malimtan niyu ti tanan manga itinudlu niku sa kanyu. 27 "Kahusayan kang ipatayak sa kanyu. Kang kahusayan kang diman gid ipakaun sa kanyu. Kang magpakaun kahusayan sa kanyu balaw parihu sa paraan kalibutan. Danga kamu magkaaburidu sa kanyu tagipusuun ag danga kamu magkadala. 28 Nadnugan yi niyu kang sinabi sa kanyu magkun, umighit yi aku dapat bumalik maan aku sitay tag sa kanyu. Nu tutuu gid aku kanyu pagmahalun, kamu mana magbaya nu umati aku sa Ama, dahil ti Ama mataas man sa kangku. 29 Taynguna pagka udwaya nangyari inda, pag-itultul yi niku daan sa kanyu hampay nu mangyari yi pumatutuu yi kamu sa kang sinabi. 30 Udyi aku may rugar hampay maghampang waya sa kanyu dugay, dahil sab arani yi ti pangulu kalibutan. Unman may mabuwat siya sa kangku nu unman pahintulutan Ama. 31 Dapat kailangan maintindihan manga tawu sa kalibutan kuntay pagmahalun gid niku kang Ama, nakan pagtupadun niku kay manga ibinilin niya sa kangku. Atag yi kita duy, tag yi sa luwas."

15

1 Bag-u sinabi ni Hisus magkun, "Aku ti tutuu pag puun ubas. Kang Ama tig-alaga. 2 Nu may manga sanga sa kangku unman magburak, kay pungpungun niya. Ti kada sanga magburak puldan niya kay baliw hampay lalu mamurak. 3 Kamu linumpiyu yi dahil sa manga itinudlu niku sa kanyu. 4 Dagpablag kamu sa kangku, ga kang diman napaminsan sa kanyu. Dayu bumurak ti sanga nu napablag yi sa kay puun. Ti sanga ubas bumurak lang nu angut ginan sa kay puun. Katunda diman waydi kamu unman may mabuwat nu napablag kamu sa kangku. 5 "Aku ti puun ubas, kamu ti manga sanga. Ti tawu nu napaminsan di sa kangku ag aku napaminsan di sa kanya, pihu may pakinabang ti mayamu buwat niya. Dahil nu napablag kamu sa kangku unman kamu may mabuwat. 6 Nu ti tawu napablag yi sa kangku, iyamut siya malayung bag-u parihu diman ga manga sanga tipunun siya, bag-u isawug sa apuy hampay sunugun. 7 Nu kamu minsan di sa kangku ag kang manga bagaw balaw madura sa kanyu, mahimu hagadun niyu sa darangin una hintay kanyu magustuhan, pihu ipakaun Diyus sa kanyu. 8 Pag-&ipaburayhaw ti kadayawan niku Ama nu makinabangan ti mayamu niyu buwat kay puruyba kamu kang yi manga tuludluan. 9 "Kamu kang pagmahalun, parihu sa kay magmahal Ama sa kangku. Aku magmahal sa kanyu, nakan danga magpablag kamu sa kangku. 10 Nu tupadun niyu kang manga bilin, balaw yi kamu miblag sa kang pagmahal sa kanyu. Parihu diman ga kang magtupad sa manga bilin niku Ama, unman diman aku miblag sa kay pagmahal sa kangku. 11 "Inda tanan duy kang itinultul sa kanyu hampay magbaya kamu parihu sa kang magbaya ag hampay lubus yi lang gid magbaya kanyu tagipusuun. 12 Inda yi ngani kang pag-ibilin sa kanyu magkun, pagmalahalan yi gid kamu sa usa kag sa usa, parihu diman sa kang magmahal sa kanyu. 13 Unman may pagmahal lalu waya daka sa inda nu balaw inirangan usa ka tawu kay buhi sa kay pagmahalun pag manga tawu. 14 Nu kanyu tupadun kang pag-ibilin sa kanyu, kamu kang yi pagmayadun pag manga tawu. 15 Balaw yi pag-ingarnan niku kamu manga panawuhun, dahil unman alam panawuhun ti buruwatun niya amu. Ga kang diman sinabi kis-ab, kamu kang pagmayadun pag manga tawu dahil ti tanan itinultul Ama sa kangku, kang itinultul maan sa kanyu. 16 Balaw duy kamu ti nagpili sa kangku. Aku ngap ti pinmili sa kanyu, kang ipinablag kamu ginan sa kalibutan hampay kamu umatag tumupad sa buruwatun ag hampay udyi madura hanggan aban ti pakinabang niyu manga binudlayan. Bag-u ipakaun Ama sa kanyu una hintay kanyu hagadun sa kanya dahil kamu napasakup sa kangku. 17 Inda yi ngani kang pag-ibilin sa kanyu magkun, pagmalahalan kamu sa usa kag sa usa." 18 Sinabi ni Hisus magkun, "Nu kamu pagkagalitan manga taga kalibutan, kailangan alalahanun niyu aku un-an man sa kanyu kinagalitan nida. 19 Nu abi kamu manga taga kalibutan, pagmahalun mana kamu manga taga kalibutan dahil minsan kamu sa kanda. Dapat ay kamu kang yi pinili ipinablag ginan sa kalibutan, nakan kamu pagkagalitan manga taga kalibutan dahil udyi kamu minsan sa kanda. 20 Alalahana di gid niyu kang binagaw sa kanyu magkun, unman may panawuhun mataas man sa kay amu. Nu aku kanda inunuunu, unuunuhun diman nida kamu. Nu sida naniwala sa kang manga itinudlu, paniwalaan diman nida kanyu manga pag-itudlu sa kanda. 21 Pagkadat-an nida kamu dahil kamu napasakup sa kangku ag unman nakilala nida ti Ama ti nagsugu sa kangku. 22 Balaw mana sida may saragtun tungkul sa kanda manga buwat, nu abi aku unman nagsitay nanudlu sa kanda. Dapat taynguna udyi may idingkilan sida sa kanda kasalanan. 23 Nu ti tawu magkagalit sa kangku, pagkagalitan diman niya hanggan kang Ama. 24 Nakan may saragtun gid sida sa kanda manga kasalanan, dahil nakitan gid nida ti makadululaw pag binwat niku unman mabuwat una sitapu pag tawu. Kanda gid nakitan tunda, bag-u kanda ngap kinagalitan aku hanggan ti Ama. 25 Dapat nakan katida ti nangyari hampay matupad ti bagaw isinurat sa kanda Kasuguan, magkun, 'Kinagalitan nida aku madi unman may ikasabi.' 26 "Sumitay ti Manug-awat ginan sa Ama tag sa kanyu, ti Ispiritu ngani imaw tigtudlu katutuuhanan tungkul sa Diyus. Suguun niku siya ginan sa Ama bag-u itultul niya sa kanyu ti tungkul sa kangku. 27 Bag-u kamu tumultul diman tungkul sa kangku sa manga tawu, dahil kamu manga kaibahan niku ginan waya sa kabag-u kang nanudlu.

16

1 "Inda pag manga bagay kang itinultul sa kanyu hampay kamu dayu umalinlangan sa kanyu pagsarig. 2 Ipalwas kamu aban manga Hudiyu ginan sa kanda manga balay tiripnan. Aban humantup ti manga tawu tinupad nida ti buruwatun Diyus nu kamu kanda minatay. 3 Nakan katida kanda buwatun sa kanyu dahil unman nakilala nida una ti Ama una aku. 4 Nakan kang yi itinultul hampay nu udas yi mangyari yi tunda aban, alalahanun di niyu inda yi ngani kang itinultul." Magkun si Hisus, "Inda pag manga bagay unman itinultul niku sa kanyu ginan sa kabag-u, dahil aku atay waya waydi sa kanyu. 5 Dapat taynguna aku mighit yi atabug sa nagsugu sa kangku. Una di usa sa kanyu unman may magpaingana sa kangku nu naan tabug aku. 6 Dapat lubus gid kamu maruku kanyu tagipusuun dahil sa kang sinabi sa kanyu. 7 Dapat tutuu gid inda kang pagsabihun sa kanyu, kanyu ikamayad nu aku mighit yi. Dahil nu unman aku mighit, dayu mahimu sumitay sa kanyu ti Manug-awat. Dapat nu mighit aku suguun niku siya sitay tabug sa kanyu. 8 Nu sumitay ti Ispiritu Banal, ipakilala niya sa manga taga kalibutan balaw tama kanda pag-intindi sa kahulugan kasalanan, una sa katadlungan, una hanggan sa sintinsiya. 9 Magsalan sida sa kanda pag-intindi sa kahulugan kasalanan, dahil sida unman magsarig sa kangku. 10 Magsalan sida sa kanda pag-intindi sa katadlungan dahil aku atabug yi sa Ama ag dayi makitan niyu aku. 11 Magsalan sida sa kanda pag-intindi tungkul sa sintinsiya, dahil nasintinsiyahan yi ti pangulu kalibutan. 12 "Mayamu waya mana kang sarabihun sa kanyu, dapat makuri intindihun niyu kainda. 13 Nu rumas-ug ti Ispiritu, siya ti tumudlu katutuuhanan tungkul sa Diyus, tudluan diman niya kamu sa tanan katutuuhanan ginan sa Diyus. Unman siya bumagaw nu ginan lang sa kay sadili. Ipadakit niya kay manga nadnugan ag ipaalam niya sa kanyu ti manga mangyari aban. 14 Ipakilala niya sa kanyu kang kadayawan, dahil ginan diman sa kangku pag kaayadan ti ipadakit niya tag sa kanyu. 15 Una hintay pag kaayadan sa kang Ama kangku diman. Nakan sinabi niku sa kanyu magkun, tanggapun Ispiritu kang kaayadan bag-u kay ipadakit maan niya sa kanyu." 16 Magkun waya si Hisus, "Udyi dumugay duy bag-u udyi makitan niyu aku. Bag-u unman maan dumugay makitan di maan niyu aku." 17 Kay iba tuludluan namaraingan-an sa usa kag sa usa magkun, "Hintay nguna tunda kay sinabi niya sa kanta magkun, 'Udyi dumugay bag-u udyi makitan niyu aku. Bag-u unman maan dumugay, makitan di maan niyu aku.' Sinabi waya niya magkun, 'Nakan katida dahil aku atabug yi sa Ama.' " 18 Sinabi nida, "Hintay nguna kay pagkumnun 'Udyi dumugay'? Unman magkasalman nita kay pagsabihun." 19 Alam di ni Hisus magkaibug sida pumaingana sa kanya. Nakan sinabi niya sa kanda magkun, "Magparaingan-an aw kamu sa usa kag sa usa dahil sa kang sinabi magkun, udyi dumugay bag-u udyi makitan niyu aku bag-u unman maan dumugay makitan di maan niyu aku. 20 Ungud duy kang pagsabihun sa kanyu, kamu manlumi aban ag mannguruynguyan, dapat ti manga taga kalibutan makabaya ngap. Kamu aban may karukuan, dapat kanyu karukuan matulsan di kabayaan. 21 Maruku ti babayi nu magpanamdam yi dahil rinmas-&ug yi ti udas niya kakurian. Nu bay nakalawuy yi ti anak udyi magkadumduman babayi kay nalakawan pag kakurian. Magbaya ngap siya dahil nilusad yi ti usa ka lapsag. 22 Katunda diman kamu. Taynguna kamu maruku, dapat makitan maan niku kamu aban bag-u makabaya gid kanyu tagipusuun ag udyi may tawu bum-ul kanyu kabayaan sa tagipusuun. 23 Sa ati katpung pag udas aban, udyi kamu mamaingana sa kangku. "Ungud gid duy kang pagsabihun sa kanyu, una hintay kanyu hagadun sa Ama, dahil kamu napasakup sa kangku, pihu gid kay ipakaun niya sa kanyu. 24 Hanggan taynguna tugka udwaya kamu may hinagad sa kanya madi kamu napasakup sa kangku. Paghagad kamu bag-u kamu may matanggap hampay lubus udyi may kurang kanyu kabayaan." 25 Magkun si Hisus, "Sa kang magtudlu sa kanyu inda tanan, ginamit niku ti manga pahalimbawa. Dapat aban udyi aku humampang sa kanyu sa manga pahalimbawa. Ati katpung itultul niku sa kanyu sa malinaw pag bagaw tungkul sa Ama. 26 Ati katpung makahagad kamu sa kanya dahil kamu napasakup sa kangku. Balaw aku ti humagad sa kanya para sa kanyu. 27 Dahil pagmahalun yi gid kamu Ama. Nakan kamu kay pagmahalun dahil sa kanyu pagmahal sa kangku ag dahil kamu naniwala kuntay aku nagsitay ginan sa Diyus. 28 Ginan aku sa Ama nagsitay sa kalibutan. Bag-u tayakan maan niku ti kalibutan, atabug maan sa Ama." 29 Bag-u sinabi niya manga tuludluan magkun, "Taynguna duy malinaw ngani kanmu pagsabihun, udyi sa manga pahalimbawa pag bagaw. 30 Taynguna alam nimi kuntay magkaalaman nimu ti tanan tanan ag unman yi kailangan may pumaingana waya sa kanmu. Nakan ngani kami maniwala kuntay kawu ginan sa Diyus." 31 Sinabi ni Hisus magkun, "Ungud gid aw kamu maniwala taynguna? 32 Dapat malu, udyi gid dumugay, kainda yi ngap sab, kamu mamululagan yi, ti kada tawu tabug sa kay sadili balay bag-u tayakan niyu aku usa usa wadi. Dapat balaw waydi aku usa usa, dahil ti Ama sa kangku di. 33 Itinultul niku inda tanan tanan sa kanyu, hampay may kahusayan kanyu naisipan dahil sa kanyu magpakiusa sa kangku. Sitay sa babaw daga may malakawan kamu kakurian. Dapat pagmatutum duy kanyu naisipan. Tinalu yi niku ti kapangyarihan kalibutan."

17

1 Pagka sinabi ni Hisus tunda, nagtangda siya sa langit bag-u sinabi niya magkun, "Amang, inda yi ngani ti taning pag kaudasan. Ipaburayhaw nimu ti kadayawan nimu Anak hampay kanmu Anak pumaburayhaw waydi kanmu pag kadayawan. 2 Dahil ipinasirung nimu ti tanan tanan sa kapangyarihan Anak hampay pakan-an niya tutuu pag buhi unman may katapusan ti tanan tawu kanmu iinintirga sa kanya. 3 Inda yi ngani ti ibug sabihun buhi unman may katapusan nu kilalan-un tawu kawu lang ti tutuu gid pag Diyus ag nu kilalan-un niya si Hisu-Kiristu, ti sinugu nimu. 4 Ipinaburayhaw niku kanmu kadayawan sa kang magtupad sa buruwatun kanmu iinintirga sa kangku. 5 Amang, taynguna kailangan pakan-an nimu aku kadayawan sa kanmu atubangan ga kaybi diman kang kadayawan asan sa kanmu, pagka udwaya nalalang ti kalibutan. 6 "Ipinakilala niku kawu sa manga tawu kanmu iinintirga sa kangku ginan sa kalibutan. Daan sida manga sakup nimu bag-u kanmu iinintirga sida sa kangku ag tinupad nida kanmu bagaw. 7 Kainda naintindihan nida kuntay ti tanan pag manga bagay kanmu ipinakaun sa kangku ginan diman waydi sa kanmu. 8 Ti bagaw kanmu iinintirga sa kangku, kang diman waydi ipinadakit sa kanda, kanda diman waydi tinanggap. Magpatutuu diman sida aku nagsitay ginan sa kanmu. Naniwala diman sida kuntay kawu ti nagsugu sa kangku. 9 "Bukun pag-idarangin niku ti manga taga kalibutan. Pag-&idarangin niku tunda pag manga tawu kanmu iinintirga sa kangku, dahil sida kanmu manga sakup. 10 Tanan pag manga tawu nu napasakup sa kangku, napasakup diman sa kanmu. Ti tanan manga napasakup sa kanmu napasakup diman sa kangku. Ipinaburayhaw nida kang kadayawan. 11 Taynguna aku asan tag yi sa kanmu bag-u udyi aku sitay sa babaw daga. Dapat sida sitay di sa babaw daga. Amang, kawu yi ngani ti dapat sambahun. Kailangan kanmu makapangyarihan pag ngaran ti umingat sa kanda, imaw diman pag ngaran kanmu ipinakaun sa kangku. Ingatan nimu sida hampay sida magkausa, parihu ga kantam urusa diman. 12 Pagka aku sa kanda di waya, iningatan niku sida sa kapangyarihan nimu ngaran, imaw diman pag ngaran kanmu ipinakaun sa kangku. Unman may nidamhak sa kanda purya lang tunda pag usa ka tawu ti daan ihinanda para tabug sa kadamhakan hampay matupad ti isinurat sa Banal Kasuratan. 13 "Taynguna aku asan yi tabug sa kanmu. Inda kang pagsabihun sitay waya sa babaw daga hampay lubus yi lang gid bumaya kanda tagipusuun parihu ga kang magbaya. 14 Ipinakaun niku sa kanda kanmu ngani bagaw bag-u kinagalitan sida manga taga kalibutan dahil sida unman minsan sa manga taga kalibutan parihu sa kangku balaw minsan sa taga kalibutan. 15 Unman aku magdarangin hampay bul-un nimu sida ginan sa babaw daga. Dapat kang pag-idarangin sida hampay kanmu iribri sida sa Puun Kadautan. 16 Parihu sa kangku balaw minsan sa manga taga kalibutan, katunda diman sida unman minsan sa manga taga kalibutan. 17 Sadilihun nimu sida sa panab-anan katutuuhanan. Kanmu bagaw imaw ti katutuuhanan. 18 Kang sinugu sida tag sa kalibutan, parihu diman ga kanmu nagsugu sa kangku atag sa kalibutan. 19 Pag-ilubus niku pag-ipakaun kang sadili sa kanmu hampay ilubus waydi ipakaun nida kanda sadili sa kanmu. 20 "Balaw lang waydi sida kang pag-idarangin. Pag-idarangin diman niku tunda pag manga tawu ti sumarig sa kangku nu makadnug sida barita niku manga sinugu. 21 Pag-idarangin niku sida hampay mirinsan sida tanan. Amang, pagminsan sida sa kanta parihu sa kanmu minsan sa kangku ag parihu sa kangku minsan sa kanmu. Pagmirinsanan sida hampay maniwala ti manga taga kalibutan kuntay kawu ti nagsugu sa kangku. 22 Ipinakaun niku sa kanda ti kadayawan kanmu ipinakaun sa kangku hampay sida mirinsan parihu diman sa kanta urusa. 23 Aku minsan sa kanda ag kawu minsan sa kangku hampay sida lubus mirinsan bag-u masalman manga taga kalibutan kawu ti nagsugu sa kangku ag kawu tigmahal sa manga napasakup sa kangku parihu ga kanmu magmahal sa kangku. 24 "Amang, iinintirga nimu sida sa kangku. Kang gustu nu naan aku, pagsiyun diman sida sa kangku hampay makitan nida kang kadayawan kanmu ipinakaun sa kangku. Dahil pagka udwaya linalang ti kalibutan daan di kawu nagmahal sa kangku. 25 Amang, kawu ti matadlung. Unman kawu nakilala manga taga kalibutan. Dapat aku magkilala di sa kanmu. Ag inda pag manga iinintirga nimu sa kangku nakakilala waydi kuntay kawu ti nagsugu sa kangku. 26 Ipinakilala yi niku kanmu ngaran sa kanda ag ipakilala diman gid niku sa kanda hampay sida magmalahalan sa usa kag sa usa parihu sa kanmu magmahal sa kangku bag-u aku minsan sa kanda."

18

1 Pagka nakadarangin si Hisus katida, linmakaw yi siya hanggan kay manga tuludluan, nagdipay sida sa laad Kidrun. Sa ati pag rugar may halamanan. Sinmulud si Hisus hanggan kay manga tuludluan sa tunda pag halamanan. 2 Una si Hudas, ti napakampi sa kay kalaban ni Hisus, alam di niya tunda pag rugar, dahil pirmi mag-ati si Hisus kaibahan niya kay manga tuludluan. 3 Nakan nag-ati sa halamanan si Hudas may taban usa ka gurupu sundalu taga Ruma, hanggan manga pulis may dara manga armas, manga patay hanggan lamparilya. Tunda pag manga pulis sinugu ginan sa manga pangulu manug-asiwa balay Diyus hanggan sa manga Parisiyu. 4 Daan alam di ni Hisus ti tanan niya malakawan, nakan sinulang niya sida ni Hudas bag-u kay pinaingana magkun, "Si unu kanyu paghanapun?" 5 Sinmagut sida magkun, "Si Hisus taga Nasarit." Bag-u sinabi ni Hisus magkun, "Aku yi ngani." Siyun diman matindugan kaibahan nida si Hudas, ti napakampi sa kalaban bag-u kay itinudlu sa kanda si Hisus. 6 Pagka sinabi ni Hisus magkun, "Aku yi ngani," inmurung sida ningilugmuk sa daga. 7 Pinmaingana maan si Hisus sa kanda magkun, "Si unu gid kanyu paghanapun?" 8 Sinmagut sida magkun, "Si Hisus taga Nasarit." Magkun si Hisus, "Sinabi yi niku sa kanyu aku yi ngani. Nakan nu aku ti kanyu paghanapun, pabay-ani lang niyu inda pag manga kaibahan niku." 9 Inda kay sinabi ni Hisus hampay matupad ti binagaw niya magkun, "Amang, unman may nidamhak ginan sa kang kamang una di usa sa manga linintirga nimu sa kangku." 10 Bag-u ginmabut kay baladaw si Simun Pidru, tinigbas niya ti panawuhun Pangulu Manug-asiwa balay Diyus, napungus kay sikun pag tuli. Kay ngaran tunda pag panawuhun si Malku. 11 Sinabi ni Hisus sa kan Pidru magkun, "Suulan yi duy nimu kanmu baladaw. Dayuun aw lugud inmun niku inda pag ungut may kakurian kay ipinakaun Ama sa kangku?" 12 Bag-u ti manga sundalu hanggan kanda kapitan nangawat sa manga pulis Hudiyu sa kanda magdakup sa kan Hisus. Kanda ginapus, 13 bag-u kanda dinara siya tag sa kan Anas dapu, kan Kaipas manugang. Si Kaipas ti Pangulu Manug-asiwa balay Diyus ati katpung pag timpu. 14 Si Kaipas ngani ti nagpaanyu sa manga Hudiyu magkun nu para sa kanda mayad waya nu mamatay ti usa ka tawu alang alang sa buu nasyun. 15 Pagka kanda dinara yi si Hisus, dinmasun sa kay uryan si Simun Pidru hanggan kay usa waya ka tuludluan. Kilala di Pangulu Manug-asiwa balay Diyus tunda pag tuludluan, nakan siya nagkuyug sa kan Hisus sinmulud sa diskansuhan balay Pangulu Manug-asiwa. 16 Dapat si Pidru matindugan di waya sa luwas puwirtahan. Nakan tunda pag tuludluan ti kilala Pangulu Manug-asiwa balay Diyus, nagluwas maan, kay hinampang niya ti babayi manugbantay sa puwirtahan bag-u ipinaslud niya si Pidru. 17 Bag-u tunda pag daraga bantay sa puwirtahan nagsabi sa kan Pidru magkun, "Unman aw kawu hanggan tuludluan diman tunda pag tawu?" Sinmagut si Pidru magkun, "Unman gid duy aku." 18 Ati katpung maramig nakan ti manga suruguun hanggan ti manga pulis nagpamakut apuy sa uring bag-u sida matindugan sa arani apuy magpanarang. Hanggan si Pidru siyun diman matindugan magpanarang. 19 Pinmaingana ti Pangulu Manug-asiwa balay Diyus sa kan Hisus magkun, "Si unu kanmu manga tuludluan ag hintay kanmu pag-itudlu?" 20 Sinmagut si Hisus magkun, "Sa pagkaburayhawan aku pag naghampang sa kayamuan tawu. Pirmi aku magtudlu sa manga balay tiripnan manga Hudiyu hanggan sa balay Diyus. Unman aku nagtultul sa lihiman. 21 Hayga kamu magpaingana waya sa kangku? Paingan-a niyu ti manga tawu nagpatingi sa kangku nu hintay kang itinudlu. Alam nida kang manga itinultul." 22 Pagka sinabi ni Hisus tunda, sinampal siya usa ka pulis matindugan siyun. Sinabi pulis magkun, "Katida aw lugud kanmu isagut sa Pangulu Manug-asiwa balay Diyus?" 23 Sinmagut si Hisus sa kanya magkun, "Nu daut kang binagaw, itultul nimu sa tanan manga tawu atay kang sinabi salan. Dapat nu tama kang binagaw, hayga aku kanmu sinampal?" 24 Bag-u ipinadara ni Anas si Hisus gapus di waya atag sa kan Kaipas dahil siya ti Pangulu Manug-asiwa balay Diyus. 25 Matindugan waya siyun si Pidru magpanarang bag-u sinabi manga iba sa kanya magkun, "Unman aw kawu hanggan usa diman ka tuludluan tunda pag tawu?" Dapat nananggi si Pidru magkun, "Unman duy." 26 May panawuhun diman Pangulu Manug-asiwa balay Diyus siyun. Tunda pag panawuhun balaw iba tawu sa lalaki kan Pidru tinigbas napungus kay tuli. Imaw ngani pag panawuhun ti nagsabi sa kan Pidru magkun, "Unman aw nakitan diman niku kawu kaibahan niya sa halamanan?" 27 Nagtanggi maan si Pidru. Bag-u kadaka yi nanarauk ti manuk. 28 Pagka surip yi dinara nida si Hisus ginan sa kan Kaipas balay tag sa balay gubirnadur. Ti manga pinunu Hudiyu unman nagsaka, dahil daut sa kanda tun-anun nu sumaka sa balay balaw Hudiyu, barang unman sida mahimu makakaun sa karan-an sa Pag-alaala sa Karibrihan. 29 Nakan nagluwas si Pilatu atag sa kanda bag-u nagpaingana siya magkun, "Hintay kanyu dimanda laban sa inda pag tawu?" 30 Sinmagut sida magkun, "Nu abi inda pag tawu unman nagbuwat daut, balaw mana daran-un nimi sitay tag sa kanmu." 31 Bag-u sinabi ni Pilatu sa kanda magkun, "Bul-a yi lang niyu siya. Bahala kamu magbista magsintinsiya sa kanya angay sa kanyu Kasuguan." Sinabi manga pinunu Hudiyu magkun, "Ti gubirnu taga Ruma unman magpahintulut sa kanmi magmatay una sa kantapu pag tawu." 32 Katida ti nangyari hampay matupad kan Hisus sinabi pagka ipinaalam niya nu sa kabitay pag kamatayan kay malakawan niya aban. 33 Napaslud maan si Pilatu sa kay balay ipinab-ul niya si Hisus bag-u kay pinaingana magkun, "Kawu aw ti hari manga Hudiyu?" 34 Sinmagut si Hisus magkun, "Tunda aw ginan sa kanmu basad naisipan aw ngatay may nagsabi waya manga iba sa kanmu tungkul sa kangku?" 35 Sinmagut si Pilatu magkun, "Aku lugud Hudiyu aw? Kanmu manga kaparihu Hudiyu hanggan ti manga pangulu manug-asiwa balay Diyus ti nagdara sa kanmu sitay tag sa kangku. Hintay kanmu binwat?" 36 Sinmagut si Hisus magkun, "Kang karampatan sa maghari balaw sitay ginan sa babaw daga. Nu abi sitay ginan sa babaw daga kang maghari, lumaban mana kang manga nasakupan baliwa sa kangku hampay unman aku ipabahala sa manga pinunu Hudiyu. Unman duy, kang karampatan sa maghari balaw sitay ginan." 37 Pinmaingana maan si Pilatu magkun, "Nu katunda hari aw gid kawu?" Sinmagut si Hisus magkun, "Hu, tama kanmu pagsabihun kuntay aku hari. Nakan nagsitay aku iinanak sa babaw daga inda lang kang turunu hampay itultul niku ti katutuuhanan sa manga tawu. Nu ti tawu napasakup sa katutuuhanan, pumatingi siya sa kang manga pagsabihun." 38 Bag-u sinabi ni Pilatu magkun, "Hintay nguna ti katutuuhanan?" Bag-u napalwas maan si Pilatu tabug sa manga tawu sa sugkadan. Sinabi ni Pilatu magkun, "Unman aku may mag-akitan dapat ikaparusa sa kanya. 39 Dapat angay sa ugali niyu timpu timpu nu Kapistahan sa Pag-alaala sa Karibrihan pagpalpasan niku ti usa ka pirisu para sa kanyu. Gustu aw niyu kang palpasan ti Hari manga Hudiyu?" 40 Bag-u irininggit nida magkun, "Danga tunda pag tawu. Si Barabas ti palpasi." Si Barabas usa ka tulisan.

19

1 Nakan ipinab-ul ni Pilatu si Hisus sa kay manga sundalu hampay kanda garutihun. 2 Bag-u sinulapid nida ti dugihan kanda ipinasangbaw sa kay ulu ni Hisus ga sangbaw hari bag-u kanda pinakulimpayan waya rutay marara. 3 Paulit-ulit nagpakarani sida sa kanya magkun, "Pagmasulung kawu, Hari manga Hudiyu." Bag-u kanda pagpakahampakun. 4 Nagluwas maan si Pilatu bag-u kay sinabi sa manga tawu magkun, "Malu duy, pag-ipalwang maan niku siya tag sa kanyu hampay maalaman niyu unman aku may nakitan dapat ikaparusa sa kanya." 5 Linmuwang ngani si Hisus may sangbaw dugi ag may kulimpay marara. Bag-u sinabi ni Pilatu sa manga tawu magkun, "Inda yi ti tawu." 6 Pagka ti manga pangulu manug-&asiwa balay Diyus hanggan ti manga pulis nakakit sa kan Hisus, nagringgit sida magkun, "Ipaku siya sa kurus, ipaku siya sa kurus." Sinabi ni Pilatu sa kanda magkun, "Bul-a niyu siya, kamu ti bahala magpaku sa kanya dahil aku unman may nakitan kasalanan sa kanya." 7 Sinmagut ti manga Hudiyu magkun, "May Kasuguan kami ag angay sa tunda pag Kasuguan kailangan siya matyun dahil inaku niya siya kunu ti Anak Diyus." 8 Pagka nadnugan ni Pilatu kanda sinabi, lalu waya nadala siya. 9 Nagsulud maan siya sa kay balay, pinmaingana siya sa kan Hisus magkun, "Taga naan kawu?" Dapat unman sinagut ni Hisus kay paingana. 10 Sinabi ni Pilatu, "Hayga duy kawu dayu magbagaw sa kangku? Unman aw nimu alam may karampatan aku magpalpas sa kanmu ag may karampatan diman waydi aku hampay ipapaku niku kawu sa kurus?" 11 Sinmagut si Hisus magkun, "Nakan lang kawu may karampatan magbuwat katida sa kangku, dahil Diyus ti may pahintulut tunda sa kanmu. Nakan mabuyat man ti kasalanan tunda pag tawu ti nag-intirga sa kangku sa kanmu kamang." 12 Pagka nadnugan ni Pilatu kan Hisus binagaw naghanap siya paraan hampay sa mipalpas ngani niya si Hisus. Dapat nagringgit maan ti manga Hudiyu magkun, "Nu kanmu palpasan tunda pag tawu, udyi masabi kawu kay ampud ni Pangulu Hari. Una hintay pag tawu nu mag-aku kuntay siya hari, kalaban siya ni Pangulu Hari." 13 Pagka nadnugan ni Pilatu tunda pag manga bagaw, ipinaluwang niya si Hisus ginan sa sulud balay. Bag-u tinmukaw si Pilatu sa kay tukawan biristahan. Tunda pag tukawan asan sa babaw batu pinantay. Nu sa bagaw Hibriyu kay ngaran tunda pag batu pinantay Gabata. 14 Ati katpung pag sirang kanda pangalistu sa Kapistahan, arani yi umudtu yi ti init. Sinabi ni Pilatu sa manga Hudiyu magkun, "Inda yi ngani kanyu hari." 15 Nanriringgitan sida magkun, "Bul-a, bul-a, papakuan nimu siya sa kurus." Pinmaingana si Pilatu sa kanda magkun, "Ipapaku aw niku sa kurus kanyu hari?" Sinmagut maan ti manga pangulu manug-&asiwa balay Diyus magkun, "Unman kami may hari nu ud si Pangulu Hari lang." 16 Bag-u ipinakaun ni Pilatu si Hisus sa kanda hampay siya ipaku sa kurus. 17 Dinara yi ngani manga sundalu si Hisus. Nagpas-an siya kay kurus sa kay maglakaw atag sa luwas banwa atabug sa rugar kay ngaran Ga But-ul Ulu Tawu. (Nu sa pamagaw Hibriyu tunda pag rugar kay ngaran Gulguta.) 18 Pagka rinmas-ug sida ati, kanda yi ipinaku siya sa kurus. Ati katpung may duwa waya ka tawu kanda ipinaku sa manga kurus, ti usa sa wala baliwa pag kurus, ti usa sa sikun baliwa, si Hisus sa karaw-an. 19 May surat diman si Pilatu bag-u kanda ipinauli sa kurus. Ti isinurat niya magkun, "Si Hisus taga Nasarit, ti Hari manga Hudiyu." 20 Mayamu pag manga Hudiyu ti nakabasa tunda pag kasuratan dahil kay nagkapakuan ni Hisus arani lang sa banwa. Isinurat paman sa pamagaw Hibriyu, sa pamagaw Latin hanggan sa pamagaw Giriyigu. 21 Nakan sinabi manga pangulu manug-asiwa balay Diyus sa kan Pilatu magkun, "Danga nimu isurat magkun, 'Hari manga Hudiyu.' Inda di ti kailangan nimu isurat magkun, 'Inda pag tawu nag-aku kuntay siya ti Hari manga Hudiyu.' " 22 Sinabi ni Pilatu sa kanda magkun, "Ti kang isinurat imaw yi ti isinurat niku, balaw yi umanun." 23 Pagka si Hisus ipinaku yi manga sundalu sa kurus, bin-ul nida kay manga rutay, inupat nida ka parti, sa kada usa ka sundalu inayaw-ayaw. Bin-ul diman nida hanggan kay pamaunib balukas sadsad. Tunda pag balukas minsan lang hinabul ginan sa tungud sadsad sa sirung, unman may kadugpak. 24 Nanharampangan ngani ti manga sundalu magkun, "Danga duy nita paggitasa. Kanta ilaban sa lunggungan nu sa kantapu tag inda." Tida ti nangyari hampay matupad ti isinurat sa Banal Kasuratan magkun, "Inayaw-ayaw nida kang manga rutay. Ilinaban nida sa lunggungan kang balukas sadsad." Katida ngani ti binwat manga sundalu. 25 Siyun diman arani sa kay kurus ni Hisus may matindugan manga babayi. Kay ina ngani ni Hisus hanggan ti patar-ari babayi niya ina hanggan si Marya kan Kulupas asawa hanggan si Marya Magdalina. 26 Nakitan ni Hisus kay ina hanggan kay pagmahalun niya pag tuludluan matindugan siyun. 27 Bag-u sinabi ni Hisus sa kay ina magkun, "Tunda yi duy kanmu pinagkaanak." Bag-u sinabi niya sa kay tuludluan magkun, "Siya yi duy kanmu pinagkaina." Nakan ginan sa ati katpung tinaban ngani tuludluan kay ina ni Hisus hampay magpasunu sa kay balay. 28 Pagkatapus tunda, alam ni Hisus tinapus niya ti tanan niya buruwatun. Bag-u sinabi niya magkun, "Magkauwaw aku." Tunda kay sinabi hampay lubus matupad ti isinurat sa Banal Kasuratan. 29 May usa ka sukadan ati punu maaslum pag alak. Binasa nida maaslum pag alak ti usa ka ispungha bag-u kanda ipinauli sa pudpud ga anyamu bag-u itinur-ug nida tag sa kay bibig ni Hisus. 30 Pagka sinupsup ni Hisus ti maaslum pag alak, sinabi niya magkun, "Taynguna tapus yi." Bag-u nisug-uk yi kay ulu, naugtasan yi arup. 31 Ati katpung sirang biyirnis, kanda pangalistu sa sirang pamahari. Unman pagpahintulutan manga pinunu Hudiyu nu pabay-anan lang ti manga bangkay sa manga kurus sa sirang pamahari dahil tutuu mahalaga tunda pag sirang pamahari. Nakan nag-ati sida sa kan Pilatu kanda sinabi magkun, "Pahintuluti nimu hampay bariun ti lulud manga tawu ipinaku sa kurus bag-u kanmi yi bul-un ti manga bangkay." 32 Nakan nag-ati ngani ti manga sundalu, binari nida ti manga lulud kay usa ka tawu bag-u hanggan kay usa maan manga ipinadungan sa kan Hisus ipinaku sa kurus. 33 Pagka ti manga sundalu nagpakarani sa kan Hisus, nakitan nida siya namatay yi. Nakan balaw yi nabari nida kay manga lulud. 34 Dapat binunu waya bangkaw usa ka sundalu kay habig ni Hisus. Susun binmulus ti dugu hanggan danum. 35 Ti nakakit gid sa tunda pag nangyari imaw diman ti nagtultul hampay kamu hanggan sumarig. Dahil tutuu gid kay itinultul, alam niya balaw pudil kay pagsabihun. 36 Tunda ngani kanda binwat sa kan Hisus hampay matupad ti isinurat sa Banal Kasuratan magkun, "Una di usa ka but-ul niya dayu bariun." 37 Ag inda waya ti isinurat sa Banal Kasuratan magkun, "Makitan di nida mata ti kanda binunu." 38 Bag-u si Husi taga Arimatiya naghagad pahintulut sa kan Pilatu hampay mab-ul niya ti bangkay ni Hisus. Tuludluan diman waydi ni Hisus si Husi, dapat sa lihim lang, dahil magkadala siya sa manga pinunu Hudiyu. Pagka nagpasnu si Pilatu, nag-ati ngani si Husi, bag-u bin-ul niya ti bangkay. 39 Nag-ati diman si Nikudimu, imaw ngani pag tawu ti nanabang kaybi sa kan Hisus sa yabi. May dara si Nikudimu limampulu ka kilu pamanglu mira may libug aluwi. 40 Pagka bin-ul nida kay bangkay ni Hisus ginan sa kurus, kanda sinaput sa pisahan linu pag rutay may manga pamanglu, angay sa ugali manga Hudiyu sa kanda maglubung. 41 Sa kay arani nagkapakuan ni Hisus may manga bulaklak. Ati sa may mabulaklak may handa tinaguktukan batu, udwaya napaulian bangkay. 42 Balaw arayu tunda pag tinaguktukan batu, nakan ati ngani kanda ipinauli nida kay bangkay ni Hisus. Dahil ati katpung pag sirang kanda pangalistu sa sirang pamahari.

20

1 Namanlum sa sirang duminggu nag-atag si Marya Magdalina sa tinaguktukan batu. Pagka ati nakitan niya malilidan yi ti talakup batu ginan sa sabian. 2 Bag-u nalagiw siya atag sa kan Simun Pidru hanggan sa tunda pag tuludluan kay pagmahalun ni Hisus. Sinabi ni Marya sa kanda magkun, "Bin-ul duy nida ti Panginuun ginan sa tinaguktukan batu ag unman nimi alam nu naan kanda ipinauli." 3 Nakan naglakaw ngani si Pidru hanggan tunda pag usa ka tuludluan nag-atag sa tinaguktukan batu. 4 Nalagiw gid sida duwa dapat tunda pag usa ka tuludluan mabisug man sa kan Pidru kay magpalagiw nakan un-an man siya nakaras-ug sa tinaguktukan batu. 5 Nagpasirang siya tag sa sulud, nakitan niya siyun di ti pisahan linu pag rutay. Dapat unman siya nagsulud. 6 Bag-u nagras-ug waydi si Pidru nagdasun sa kanya. Nagsulud si Pidru, nakitan niya ti pisahan linu pag rutay siyun di, 7 hanggan kay taung sa ulu, dapat balaw minsan tunda sa pisahan linu pag rutay. Nituhay ti taung natipig sa saruy. 8 Bag-u nagsulud diman waydi tunda pag usa ka tuludluan ti un-an rinmas-ug sa tinaguktukan batu. Pagka siya sinmulud, nakitan niya ti manga rutay bag-u naniwala ngani siya nabuhi maan si Hisus. 9 Dahil ati katpung udwaya nasalman nida ti Banal Kasuratan kuntay kailangan siya mabuhi maan ginan sa kamatayan. 10 Bag-u nuli maan sida tag sa kanda ulian. 11 Dapat siyun di waya sa luwas tinaguktukan batu si Marya Magdalina matindugan maglumi. Sa kay maglumi waya nagpasirang siya tag sa sulud. 12 Bag-u may nakitan siya duwa ka anghil malagti kay manga rutay, matukawan kay usa sa uluhan, kay usa sa aluludan sa nagkabugtangan bangkay ni Hisus. 13 Pinmaingana sida sa kan Marya magkun, "Kawu duy hayga magpakalumi?" Sinmagut si Marya magkun, "Dahil bin-ul nida kang Panginuun ag unman niku alam nu naan kanda pag ipinauli." 14 Pagka nasabi niya katida, nangaliwliw siya bag-u nakitan niya si Hisus matindugan dapat unman nakilala niya kuntay si Hisus. 15 Pinmaingana si Hisus sa kan Marya magkun, "Kawu duy hayga magpakalumi? Hintay kanmu paghanapun?" Kay hantup ni Marya siya ti manug-alaga manga bulaklak. Nakan sinabi niya magkun, "Nu kawu duy ti nagbuul sa kang Panginuun, sabiha nimu sa kangku nu naan kanmu pag ipinauli siya hampay kang bul-un." 16 Bag-u sinabi ni Hisus sa kanya magkun, "Marya." Napasrangu si Marya sa kanya bag-u kay sinabi sa bagaw Hibriyu magkun, "Rabuni" (kay ibug sabihun Maisturu). 17 Sinabi ni Hisus sa kanya magkun, "Danga duy paghiyapti nimu aku, dahil aku udwaya nakauli sa Ama sa langit. Dapat pag-ati kawu sa kang manga patar-ari, pagsabi sa kanda magkun, umuli yi aku sa kang Ama kanyu diman Ama, sa kang Diyus kanyu diman Diyus." 18 Nag-ati si Marya sa kay manga tuludluan ni Hisus, sinabi niya sa kanda magkun, "Nakitan niku ti Panginuun." Bag-u itinultul niya kay manga sinabi ni Hisus sa kanya. 19 Pagka malambung yi ati pag sirang duminggu, nagtipun ti manga tuludluan. Tinalakpan inagad nida ti sabian dahil magkadala gid sida sa manga pinunu Hudiyu. Bag-u linmuwang si Hisus, tinmindug siya sa kanda karaw-an bag-u kay sinabi magkun, "Pagmay kahusayan duy kamu." 20 Pagka sinabi niya tunda, ipinakakit niya sa kanda kay manga kamang hanggan kay habig. Pagka nakitan manga tuludluan ti Panginuun, nagbaya gid sida. 21 Sinabi maan ni Hisus sa kanda magkun, "Pagmay kahusayan duy kamu. Parihu sa kay nagsugu Ama sa kangku, katunda diman waydi pagsuguun niku kamu tabug sa manga tawu taga kalibutan." 22 Pagka sinabi niya tunda, kay inarupan niya sida bag-u magkun siya, " Tanggapa niyu ti Ispiritu Banal. 23 Nu patawadun niyu ti manga tawu sa kanda manga kasalanan, may kapatawadan sida ginan sa Diyus. Nu unman patawadun niyu sida, unman waydi sida may kapatawadan ginan sa Diyus." 24 Dapat pagka linmuwang si Hisus sa kanda, unman siyun si Tumas, ti binansagan Siing, kabilang diman sa sampulu may duwa ka tuludluan ni Hisus. 25 Nakan nagtultul sa kanya ti manga iba tuludluan magkun, "Nakitan duy nimi ti Panginuun." Dapat sinabi ni Tumas sa kanda magkun, "Udwaya aku maniwala nu udwaya makitan niku ti manga buslut paku sa kay kamang ag nu udwaya mitulsuk kang ituturu sa manga buslut paku ag nu udwaya mikuut niku kang kamang sa kay habig." 26 Pagka sa usa maan ka sirang duminggu, ati maan ti manga tuludluan sa sulud balay, hanggan si Tumas kaibahan nida siyun. Nagluwang si Hisus madi inagad ti manga talakup sabian, nagtindug siya sa kanda karaw-an sinabi niya magkun, "Pagmay kahusayan sa kanyu." 27 Bag-u sinabi niya sa kan Tumas magkun, "Ipad-ut nimu kanmu ituturu atay, bantayi nimu kang manga kamang. Sitay tag kanmu kamang, ikuut nimu sa kang habig. Tubay yi duy kanmu alinlangan, pagpaniwala yi gid kawu." 28 Sinabi ni Tumas sa kan Hisus magkun, "Kawu duy kang Panginuun hanggan kang Diyus." 29 Sinabi ni Hisus sa kanya magkun, "Nakan aw kawu maniwala yi dahil nakitan nimu aku? Masulung gid ti manga magpaniwala una unman mag-akitan nida aku." 30 Mayamu waya pag manga tanda ti binwat ni Hisus sa atubangan niya manga tuludluan, unman isinurat sa inda pag ribru. 31 Dapat inda kang isinurat hampay kamu magpaniwala si Hisus yi ngani ti pinili Diyus Manugribri pag Hari, ti Anak Diyus. Dahil nu katunda kanyu pagsarig, kamu may tutuu pag buhi sa kanyu magpakiusa sa kanya.

21

1 Pagka dugay kas-a maan napakakit si Hisus sa kay manga tuludluan ati sa saruy danaw Tibiryas. Inda ti nangyari. 2 Ati katpung mirinsan sida ni Simun Pidru, ni Tumas kay bansag Siing, si Natanail taga Kana sa Galiliya, hanggan kay manga anak ni Sibidiyu bag-u may duwa waya ka tuludluan ni Hisus siyun. 3 Sinabi ni Simun Pidru sa manga iba magkun, "Atag yi duy aku manarap." Sinabi nida sa kanya magkun, "Kami hanggan kumuyug diman sa kanmu manarap waydi." Linmakaw ngani sida bag-u sinmakay sa duunduun. Dapat ati katpung pag yabi sida ud may nab-ul una di. 4 Pagka magbutlak yi ti init, si Hisus matindugan sa saruy danaw, dapat unman nakilala niya manga tuludluan kuntay si Hisus maaw. 5 Pinmaingana si Hisus magkun, "Unman aw kamu may nablay isda?" Sinmagut sida magkun, "Unman ngani duy." 6 Sinabi ni Hisus sa kanda magkun, "Itaktak maan niyu ti sarap sa sikun baliwa pag habig duunduun bag-u may mab-ul kamu." Itinaktak ngani nida kanda sarap. Udyi makaraug sida sa butung dahil masyadu mayamu pag isda. 7 Siyun diman tunda pag tuludluan kay pagmahalun ni Hisus. Sinabi niya sa kan Pidru magkun, "Ti Panginuun yi ngani maaw." Pagka naalaman ni Simun Pidru tida yi maaw ti Panginuun, namalukas siya, dahil daan kay linukas kay balukas bag-u linmuksu siya sa danum rargu linmanguy. 8 Ti iba manga tuludluan nakaaput sa saruy sa kanda duunduun, pagbutungun nida ti sarap punu isda. Balaw waydi arayu sida sa saruy, manga duwa lang ka gatus ka luk-an siku kay karayu. 9 Pagka dinmugsun sida ginan sa duunduun, nakitan nida may baragahan apuy, isda ti masugbahan hanggan tinapay. 10 Bag-u sinabi ni Hisus sa kanda magkun, "Daran-a duy sitay tag kanyu nab-ul isda kis-ab." 11 Sinmakay maan si Pidru sa duunduun bag-u kay binutung niya ti sarap tag sa saruy, punu gid lalaun isda usa ka gatus may limampulu may tulu. Madi katunda yi kay kayamu, unman nagisi ti sarap. 12 Sinabi ni Hisus sa kanda magkun, "Abala duy, pamahaw yi kamu." Una di usa sa manga tuludluan unman may nakabaya nakapaingana magkun, "Si unu kawu?" Dahil alam nida ti Panginuun tunda. 13 Nagpakarani si Hisus sa apuy, bin-ul niya ti tinapay bag-u kay itinunghul sa kanda, katida diman kay binwat sa isda. 14 Inda kay ikatlu pag napakakit ni Hisus sa kay manga tuludluan ginan sa kay nabuhi maan. 15 Pagka sida nakabahaw yi, namaingana si Hisus sa kan Pidru magkun, "Simun, anak ni Huwan, pagmahalun aw nimu aku subra man sa inda pag manga bagay?" Sinmagut si Pidru magkun, "Hu ngani, Panginuun, alam yi nimu aku magmahal gid sa kanmu." Sinabi ni Hisus sa kanya magkun, "Alagai duy nimu kang manga anak karanidu." 16 Pinmaingana maan si Hisus sa kanya magkun, "Simun, anak ni Huwan, pagmahalun aw gid nimu aku?" Sinmagut si Pidru magkun, "Hu ngani Panginuun, alam yi nimu aku magmahal gid sa kanmu." Sinabi ni Hisus sa kanya magkun, "Alagai duy nimu kang manga karanidu." 17 Sa pakatlu pag pinmaingana si Hisus magkun, "Simun, anak ni Huwan, pagmahalun aw nimu aku?" Nagmaruku yi si Pidru dahil sa kay paingana ni Hisus katlu gin magkun, "Pagmahalun aw nimu aku?" Nakan sinabi ni Pidru magkun, "Panginuun, alam duy nimu ti tanan tanan pag manga bagay. Alam diman nimu kawu kang gid pagmahalun." Bag-u kay sinabi ni Hisus sa kanya magkun, "Alagai duy nimu kang manga karanidu. 18 Ungud gid kang pagsabihun sa kanmu, nu udwaya kawu gurangun magsulung kawu kanmu rutay maglakaw una naan tag kanmu gustu. Dapat nu gurangun yi aban kawu, ihunat nimu kanmu kamang bag-u kawu gapusun manga iba, darahun kawu sa balaw kanmu kagustuhan." 19 Inda kay sinabi ni Hisus hampay ipakilala niya nu kabitay pag kamatayan ti malakawan aban ni Pidru sa ikadayaw sa Diyus. Bag-u sinabi ni Hisus sa kanya magkun, "Pagpasakup kawu lubus sa kangku." 20 Namantay si Pidru sa kay magkaaday-an bag-u nakitan niya sa kay arani tunda pag usa ka tuludluan kay pagmahalun ni Hisus. Imaw yi pag tuludluan ti inmisdug kaybi atag sa kan Hisus arani katpung kanda magyapun bag-u nagpaingana sa kan Hisus magkun, "Panginuun, si unu ti pumakampi sa kanmu manga kalaban?" 21 Pagka nakitan ni Pidru tunda pag tuludluan, pinmaingana siya sa kan Hisus magkun, "Panginuun, kabitay siya?" 22 Sinmagut si Hisus magkun, "Nu abi kang gustu siya sitay diman pag mabuhi hanggan sa ud rumas-ug aku atay tag, hintay nangus tunda sa kanmu? Kawu duy pagpasakup yi lubus sa kangku." 23 Nakan nilantag ngani inda pag barita sa manga patar-ari unman kunu mamatay tunda pag tuludluan. Dapat balaw kay sinabi ni Hisus kuntay unman mamatay tunda pag tuludluan. Kay sinabi lang ni Hisus magkun, "Nu abi kang gustu siya sitay diman pag mabuhi hanggan sa ud rumas-ug aku atay tag, hintay nangus tunda sa kanmu?" 24 Imaw diman tunda pag tuludluan ti nanultul inda tanan tanan, siya diman waydi ti nanurat inda. Alam nimi tutuu gid ti manga itinultul niya. 25 Mayamu waya gid kay binwat ni Hisus. Nu abi tunda tanan tabuhun isurat tinigus-a sa manga ribru, kang hantup dayu mitabu sitay sa babaw daga tunda pag manga ribru tanan tanan.