The New Testament of our Lord and Saviour Jesus Christ
1 Inda ti listahan gimpuunan lahi ni Hisu-Kiristu, ginan sa linahi ni Dabid, ginan diman waydi sa linahi ni Abraham. 2 Kay anak ni Abraham si Isaak, kay anak ni Isaak si Hakub, kay anak ni Hakub si Huda hanggan kay manga patar-ari. 3 Kay manga anak ni Huda sa kan Tamar sida ni Piris, ni Sira. Kay anak ni Piris si Isrun, kay anak ni Isrun si Aram. 4 Kay anak ni Aram si Aminadab, kay anak ni Aminadab si Naasun, kay anak ni Naasun si Salmun. 5 Kan Salmun anak sa kan Rahab si Buus, kan Buus anak sa kan Rut si Ubid, kay anak ni Ubid si Isai. 6 Kay anak ni Isai si Hari Dabid. Kay anak maan ni Dabid si Sulumun sa kay asawa ni Uryas pag babayi. 7 Kay anak ni Sulumun si Rubuam, kay anak ni Rubuam si Abyas, kay anak ni Abyas si Asap. 8 Kay anak ni Asap si Husapat, kay anak ni Husapat si Huram, kay anak ni Huram si Usyas. 9 Kay anak ni Usyas si Hutam, kay anak ni Hutam si Akas. Kay anak ni Akas si Isikyas. 10 Kay anak ni Isikyas si Manasis, kay anak ni Manasis si Amus, kay anak ni Amus si Husyas. 11 Kay anak ni Husyas si Hikunyas hanggan kay manga patar-ari. Ati katpung kaybi pag udas nadara bihag ti manga Israilita tag sa Babilunya. 12 Pagka dinara yi bihag sida tag sa Babilunya, may anak si Hikunyas si Salatyil, kan Salatyil anak si Surubabil. 13 Kan Surubabil anak si Abyud, kan Abyud anak si Ilyakim, kan Ilyakim anak si Asur. 14 Kan Asur anak si Saduk, kan Saduk anak si Akim, kan Akim anak si Ilyud. 15 Kan Ilyud anak si Iliyasar, kan Iliyasar anak si Matan, kan Matan anak si Hakub. 16 Kay anak ni Hakub si Husi, kay yi ngani asawa ni Marya kay ina ni Hisus, imaw yi ti pag-ingarnan pinili Diyus Manugribri pag Hari. 17 Nakan ngani may sampulu may upat gid ka sinulput tawu ginan sa kan Abraham hanggan tugka sa kan Dabid. Ginan sa kan Dabid sampulu may upat maan ka sinulput tawu hanggan tugka sa pagkadara bihag tag sa Babilunya. Ginan sa pagkadara bihag tag sa Babilunya sampulu may upat waydi maan ka sinulput tawu tugka sa pinili Diyus Manugribri pag Hari. 18 Kainda kay ipinanganak ni Hisu-Kiristu. Kay ina si Marya patabug sa kan Husi, dapat udwaya sida mag-aramtan, nakitan si Marya magbuduy yi maaw ginan sa Ispiritu Banal. 19 Si Husi ngani kay aguman lalaki. Matadlung pag lalaki siya, dapat dayu mamaalam siya sa manga iba balaw mana pakay-ahun niya si Marya. Nakan nag-isip siya magpalalbadan yi sida sa lihim. 20 Dapat pagka kay pag-isip-isipun waya tunda, ti usa ka anghil Panginuun nagpakakit sa kanya sa kay tagin-up. Magkun ti anghil, "Husi, kawu linahi ni Dabid, danga kawu magkadala, tanggapa nimu si Marya kanmu yi asawa, dahil kay buduy ginan sa Ispiritu Banal. 21 Siya manganak anak lalaki aban. Kay ngaran kanmu ipaingaran si Hisus. Dahil iribri niya kay nasyun sa kanda manga kasalanan." 22 Nangyari ngani inda tanan tanan hampay matupad kay bagaw Panginuun ipinadakit purupita magkun, 23 "Ti daraga magkabuduy yi ag manganak aban anak lalaki. Kay ngaran kanda ipaingaran sa kanya si Imanuil." (Kay ibug sabihun, sa kanta ti Diyus.) 24 Pagka nagbangun si Husi ginan sa katurugan, binwat niya ti angay sa kay sugu anghil Panginuun ag tinanggap niya si Marya kay yi asawa. 25 Udwaya mirinsanan sida ni Husi ni Marya hanggan sa udwaya nianak kay anak lalaki. Ag iningarnan niya kay ngaran si Hisus.
1 Pagka nilusad yi si Hisus sa banwa Bitlihim sa daga Hudiya sa katpung hari si Hirudis, may manga madunung pag tawu nagras-ug sa Hirusalim ginan sa butlakan init. 2 Nagsabi sida, "Naan nguna ti iinanak aban pag humari sa manga Hudiyu? Dahil nakitan nimi kay pamgasan ginan sa butlakan init. Nakan nagsitay kami hampay manamba sa kanya." 3 Pagka nadnugan ni Hari Hirudis, magkaaburidu yi siya hanggan ti buu Hirusalim. 4 Nakan tinipun niya ti tanan manga pangulu manug-asiwa balay Diyus hanggan ti manga Manugtudlu Kasuguan bag-u pinaingana niya sa kanda nu naan pag ianak ti pinili Diyus Manugribri pag Hari. 5 Sinabi nida sa kanya magkun, "Sa Bitlihim sa daga Hudiya, dahil kainda kay isinurat purupita magkun, 6 'Bitlihim sa daga Huda, kawu ti mahalaga pag takinan sa manga banwa sa Huda. Dahil lumuwang aban ginan sa kanmu ti usa ka takinan. Siya yi ti pumangulu sa kang nasyun Israil.' " 7 Pagka nadnugan ni Hirudis tunda, pinatawag niya sa lihim ti madunung pag manga lalaki bag-u pinaingana niya sa kanda mayad mayad nu kapira ginan pag nakitan nida ti pamgasan. 8 Bag-u pinaatag niya sida sa Bitlihim. Kay waya binilinan magkun, "Pag-ati kamu, paingan-a niyu kaayad tungkul sa anak. Nu makitan niyu siya, pagpaalam waya sa kangku hampay aku makaatag waydi magsamba sa kanya." 9 Pagka nakadnug sida sa binagaw hari, linmakaw yi ngani sida. Ti pamgasan kanda diman nakitan ginan sa butlakan init, kanda maan giyahan hanggan sa ud Rumas-ug sa kay ulian anak. Bag-u di nagpat-ung ti pamgasan sa katpungan tungud ulian anak. 10 Pagka nakitan ngani nida ti pamgasan, magbaya gid masyadu sida. 11 Pagka nagsaka sida sa balay, nakitan nida ti anak hanggan kay ina si Marya. Nagyuk-ub sida nagsamba sa anak. Pagka binukasan nida kanda kayamanan, ipinakaun nida sa kanya kanda dara gintu, kamangyan hanggan mira. 12 Sinabihan sida Diyus sa tagin-up, danga mag-ati lakaw sa kan Hirudis. Nakan sa kanda nuli sa kanda ulian lakaw yi sa usa yi ka dalan. 13 Pagka ginminan yi tunda pag manga tawu madunung, may anghil Panginuun napakakit sa kan Husi sa kay tagin-up magsabi, "Pagbangun kawu, daran-a yi ti anak hanggan kay ina, pagpalagiw yi kamu tag sa Ihiptu. Pagsiyun dapu kamu hanggan sa ud sumabi maan aku sa kanmu, dahil hanapun ni Hirudis ti anak hampay kay matyun." 14 Nagbangun si Husi yabi waya kay dinara ngani ti anak hanggan kay ina nag-atag sa Ihiptu. 15 Ati di sida sa Ihiptu hanggan sa udwaya namatay si Hirudis. Nangyari tunda hampay matupad kay bagaw Panginuun ipinadakit purupita magkun, "Tinawag niku kang anak ginan sa Ihiptu." 16 Pagka naalaman ni Hirudis siya maaw pinudilan manga madunung pag tawu, nagalit siya masyadu. Nagsugu siya manga sundalu kay ipinamatay ti tanan manga anak lalaki sa banwa Bitlihim hanggan kay manga kalibut ginan sa lapsag hanggan sa duwa tugka ka timpu angay sa udas kay pinaingana sa manga madunung pag tawu. 17 Nangyari tunda hampay matupad yi ti bagaw ipinadakit ni Purupita Hirimyas magkun, 18 "May nadnugan sa banwa Rama Maglulumian may magtarayagan. Paglumian ni Rakil kay manga anak, Dayi malibang kay isip dahil udyi kay manga anak." 19 Pagka namatay si Hirudis, ti usa ka anghil Panginuun napakakit sa kan Husi sa kay tagin-up ati sa Ihiptu. 20 Magkun ti anghil, "Pagbangun kawu, daran-a nimu ti anak hanggan kay ina, pag-uli maan kamu sa daga Israil, dahil tigbak yi ti manga magkaibug mumatay sa anak." 21 Binmangun ngani si Husi bag-u dinara niya ti anak hanggan kay ina atag maan sa daga Israil. 22 Dapat ay pagka naalaman niya si Arkilaw maan ti maghari sa Hudiya kay ilis niya ama ni Hirudis, nadala si Husi nakan balaw napatarus tag sa Hudiya. Pagka sinabihan maan siya Diyus sa kay tagin-up, nag-atag siya sa daga Galiliya. 23 Pagka rinmas-ug ati sida nangulian sa banwa Nasarit, hampay matupad ti bagaw ipinadakit manga purupita magkun, "Siya aban ingarnan Nasarinu."
1 Ati katpung pag manga sirang nagras-ug si Huwan Manugtulbaw sa pangawakawaan sa Hudiya. Nanudlu siya magkun, 2 "Iampu yi niyu kanyu kasalanan, dahil udyi dugay Rumas-ug yi ti kaharian langit." 3 Inda yi ngani ti ipinadakit ni Purupita Isayas magkun, "May magtawag sa pangawakawaan kay sabi 'Ialistu niyu ti dalan Panginuun, Tadlunga gid ti dalan kay lakawan.' " 4 Si Huwan ngani may sulung rutay bulbul kamilyu may hawud paknul. Kay karan-unun manga apan manga daykut putyukan. 5 Nagdulud sa kanya ti manga tawu taga Hirusalim, una hanggan ginan sa Hudiya hanggan ginan sa libut Hurdan pag sapa. 6 Pagka inaku nida kanda manga kasalanan, kay itinulbaw sida sa sapa Hurdan. 7 Pagka nakitan ni Huwan aduk pag manga Parisiyu hanggan Sadusiyu nagdulud diman sa kay magtulbaw, magkun siya sa kanda, "Kamu ga lahi manga ulay. Si unu ti nag-udyuk sa kanyu hampay malagiw sa kay sintinsiya Diyus aban? 8 Nu kanyu ainampu yi kanyu manga kasalanan, pagtupada yi ngani niyu ti kaayadan, ipakakit kay puruyba sa kanyu nag-ampu yi sa kanyu kasalanan. 9 Danga yi pagsabiha sa kanyu sadili una sa kanyu naisipan kuntay si Abraham kanyu ginurang. Dahil pagsabihun niku sa kanyu, inda pag manga batu mahimu buwatun Diyus manga tawu itulus sa kan Abraham linahi. 10 Taynguna ahinanda yi ti wasay sa maga dalid kayu. Ti kada puun kayu nu unman magburak mayad, pukanun bag-u iyamut sa apuy. 11 Tutuu kamu kang pag-itulbaw sa danum ga tanda sa kanyu nag-ampu sa kasalanan. Dapat ay may dumasun sa kang uryan lalu man makamaskihan sa kangku. Unman aku may karampatan magdara kay lapak. Siya di ti tumulbaw sa kanyu sa Ispiritu Banal hanggan sa apuy. 12 Sa kay yi kamang ti pangayat paruk hampay kay rayawan ti girik-an. Tipunun niya kay tirigu sa kay burugtangan dapat kay dayami sunugun niya sa unman magkapsa pag apu." 13 Pagka dugay linmakaw si Hisus ginan sa Galiliya, nag-ati sa kan Huwan sa sapa Hurdan hampay siya itulbaw ni Huwan. 14 Dapat unman mana nagpasnu si Huwan. Magkun siya sa kan Hisus, "Aku kailangan itulbaw mana nimu, bati kawu ngap nagsitay sa kangku?" 15 Dapat sinmagut si Hisus magkun sa kanya, "Pasnuan lang duy nimu taynguna, dahil katida ngani ti mayad buwat sa kanta hampay tupadun nita ti buu kagustuhan Diyus." Bag-u pinasnuan ngani siya ni Huwan. 16 Pagka itinulbaw si Hisus, napatakas maan siya ginan sa danum bag-u nabukasan ti manga langit sa kanya ag nakitan ni Huwan ti Ispiritu Diyus ga histuda kalampati nagpakababa bag-u nangulian sa kan Hisus. 17 Bag-u may nagbagaw ginan sa manga langit magkun, "Inda kang pagmayadun gid pag anak, siya lubus kang pagkaawaan."
1 Bag-u itinibu Ispiritu Banal si Hisus atabug sa pangawakawaan hampay tuksuhun siya diyablu. 2 Unman siya naghandum karan-unun sulud upatpulu ka sirang may upatpulu ka yabi. Pagka lawuy upatpulu ka sirang siya linun-us. 3 Nagpakarani yi ti manugtuksu, magkun sa kan Hisus, "Nu kawu ti Anak Diyus, bagawi tunda pag manga batu hampay bumaliw tinapay." 4 Dapat sinmagut si Hisus magkun, "Isinurat sa Banal Kasuratan magkun, 'Balaw lang sa karan-unun pag mabuhi ti tawu nu unman sa kada sinabi Diyus.' " 5 Bag-u dinara siya diyablu tag sa nasakup Diyus pag banwa, ipinauli sa babaw bubung balay Diyus. 6 Sinabi ni Satanas sa kanya, "Nu kawu ti Anak Diyus, palagpak kawu ginan sa tungud atag sa sirung. Dahil nisurat sa Banal Kasuratan magkun, 'Bilinan Diyus kay manga anghil tungkul sa kanmu, hampay kawu kanda alagaan.' May sabi waya inda magkun, 'Sambutun kawu nida kamang barang kawu madayaan sa batu.' " 7 Sinabi maan ni Hisus sa kanya, "Nisurat diman sa Banal Kasuratan magkun, 'Danga pagsubuki nimu ti Diyus imaw kanmu Panginuun.' " 8 Dinana maan siya diyablu tag sa usa ka bantud abwat gid, pinausdung siya nakitan niya ti tanan manga kaharian tawu sa babaw daga hanggan kanda kadayawan. 9 Sinabi diyablu sa kan Hisus, "Ti tanan tunda kanmu nakitan kang ipakaun sa kanmu, nu kawu lumuhud sumamba sa kangku." 10 Bag-u sinabi ni Hisus sa kanya, "Pagpakarayu yi kawu, Satanas, dahil nisurat sa Banal Kasuratan, 'Sambahun nimu ti Diyus, imaw kanmu Panginuun, Siya lang kanmu sirbihan.' " 11 Bag-u tinayakan diyablu si Hisus bag-u nagras-ug ti manga anghil kanda inalagaan siya. 12 Pagka nadnugan ni Hisus si Huwan dinakup yi, nag-ati siya atag sa Galiliya. 13 Nighit siya ginan sa Nasarit bag-u atag siya sa banwa Kapirnaum pag nangulian. Ti banwa Kapirnaum sa saruy danaw Galiliya sakup manga daga Sabulun hanggan Naptali. 14 Nangyari tunda hampay matupad ti bagaw ipinadakit ni Purupita Isayas magkun, 15 "Ti daga Sabulun hanggan ti daga Naptali sa arani dagat, ati waya baliwa Hurdan, imaw ti Galiliya pagulian manga balaw Hudiyu. 16 Ti nasyun tawu nitukmud sa basad kaduluman may makitan aban daka pag rayaw. Ti manga lunsay sirung kapangyarihan kamatayan pakan-an ngap karayawan." 17 Siyun ginan nag-umpisa si Hisus nagtudlu magkun, "Iampu yi niyu kanyu manga kasalanan, dahil udyi dugay Rumas-ug yi ti kaharian langit." 18 Sa kay maglakaw sa saruy danaw Galiliya, nakitan ni Hisus si Simun, imaw ti pagkumnun si Pidru, hanggan kay patar-ari si Andiris. Mangingisda sida. Pag-itaplak nida kanda laya sa danaw. 19 Sinabi niya sa kanda, "Pagkuyug kamu sa kangku bag-u buwatun niku kamu manugtaban sa tawu." 20 Kadaka kanda tinayakan kanda manga laya bag-u nagkuyug ngani sida sa kanya. 21 Sa kay naglakaw maan ni Hisus, nakitan niya ti duwa waya ka magtar-ari, si Santiyagu kan Sibidiyu anak hanggan kay patar-ari si Huwan. Sa duunduun sida kay kaibahan hanggan kay ama si Sibidiyu, pagputikan nida kanda manga sarap. Tinawagan waydi ni Hisus sida. 22 Kadaka tinayakan nida kanda duunduun hanggan kanda ama bag-u kinmuyug sida sa kan Hisus. 23 Pinalibut ni Hisus ti buu daga Galiliya, magtudlu sa kanda manga balay tiripnan, pag-itultul niya ti Mayad pag Barita tungkul sa kay paghari Diyus. Nagpaayad siya sa tuhay tuhay pag manga sakit hanggan sa tanan manga mag-adnugan manga tawu. 24 Pagka ilinantag ti barita tungkul sa kanya sa buu daga Sirya, dinara manga taga Sirya tag sa kanya ti tanan may manga mag-adnugan, ti manga magkakuri sa kanda manga sakit tuhay tuhay hanggan ti inapuan manga labang, ti manga magkatigbak hanggan ti manga lunu bag-u kay pinaayad sida. 25 May nagkuyug sa kanya lubus kagadhan tawu ginan sa Galiliya, ginan sa Dikapulis, ginan sa Hirusalim hanggan ginan sa Hudiya, hanggan ginan waya sa dipay sapa Hurdan.
1 Pagka nakitan ni Hisus ti kadamlan tawu, nag-atag siya sa bungtud. Siyun pag tinmukaw siya bag-u nagpakarani sa kanya kay manga tuludluan. 2 Bag-u tinudluan niya sida magkun, 3 "Papaladan Diyus ti manga tawu nu udyi may pagsarigan sa kanda sadili, dahil harian sida aban Diyus. 4 "Papaladan Diyus ti manga may karukuan dahil sida pakan-an di niya kahusayan. 5 "Papaladan Diyus ti magpanagunsirung, dahil makamana sida sa tanan niya apinangaku. 6 "Papaladan Diyus ti tawu nu ga magkalun-us ag magkauwaw kay magpatigagad makatupad sa kagustuhan Diyus, dahil ipakaun sa kanda ti kanda paggagadun. 7 "Papaladan Diyus ti manga maawaun, dahil sida aban ti kaawaan Diyus. 8 "Papaladan Diyus ti manga malumpiyu kay tagipusuun, dahil makitan nida aban ti Diyus. 9 "Papaladan Diyus ti manga tawu madunung magpnabanan sa mayad pa kasundan, dahil sida ingarnan gid manga anak yi Diyus. 10 "Papaladan Diyus ti manga tawu pag-unuunuhun dahil sa kanda pagtupad sa kay kagustuhan Diyus, dahil harian sida aban Diyus. 11 "Papaladan kamu Diyus nu pagmuransahun una hanggan pag-unuunuhun, una pagbagawan kamu una lang hintay pag daut pasay kapudilan dahil sa kanyu magpasakup sa kangku. 12 "Pagbaya gid ungud kamu pagmasulung kanyu naisipan, daka nakan kay pirimyu aban sa kanyu ati sa langit. Dahil katunda diman waydi kanda nag-unuunu kaybi sa manga purupita, sa manga un-an man sa kanyu. 13 "Kamu yi ngani ti ga asin sa kalibutan. Dapat ti asin nu tumab-ang, udyi may paraan hampay bumalik maan kay pagkamaasin. Udyi gid may kabuluhan tunda nu unman iyamut yi lang hampay tat-an manga tawu. 14 "Kamu ti ga sulu sa kalibutan. Ti banwa nu nikana sa babaw bantud balaw mitagu. 15 Unman may nagsulu sulul-an bag-u ipauli sa sirung salupan, nu unman sa kay gid palaulian sulul-an hampay marayawan ti tanan tawu sa basad balay. 16 Katunda diman waydi iparayaw niyu kanyu sulu sa atubangan tanan tawu hampay makitan nida kanyu manga mayad buwat bag-u kanda dayawun kanyu Ama sa langit." 17 Magkun si Hisus, "Danga isipun niyu aku nagsitay hampay bul-un niku ti Kasuguan ni Muysis, una ti tudlu manga Kasuratan Purupita. Balaw aku nagsitay hampay bul-un niku tunda, nu unman bagkus ngap hampay kang tupadun. 18 Tandai niyu inda kang pagsabihun, madura di ti langit hanggan ti daga, dapat una lang usa ka pinakadiit pag bahagi Kasuguan ud madura hanggan sa ud matupad ti tanan tanan manga isinurat siti. 19 Nakan una hintay tigpasipala sa una lang diit pag sugu inda bag-u nu magtudlu waya siya magkun dag paniwala sa sugu, kilalan-un siya unman may kabuluhan pag tawu nu ati yi sa kaharian langit. Dapat una si unu ti magtupad sa Kasuguan bag-u kay pag-itudlu sa manga tawu, siya ingarnan mahalaga pag tawu nu sa kaharian langit. 20 Nakan kang pagsabihun sa kanyu, nu kanyu magtupad sa kagustuhan Diyus parihu lang sa kanda magtupad manga Manugtudlu Kasuguan hanggan manga Parisiyu, dayu kamu makapasakup sa kaharian langit." 21 Magkun si Hisus, "Nadnugan yi niyu ti ibinilin sa kanta manga ginurang magkun, 'Danga kawu maglibun sa kanmu kaparihu. Una si unu ti maglibun sa kay kaparihu, daka kay saragtun sa atubangan husgadu.' 22 Dapat kang pagsabihun sa kanyu, ti kada magkutub daut sa kay patar-ari, daka kay saragtun sa atubangan husgadu. Una si unu ti magpauyauya sa kay patar-ari, daka kay saragtun sa atubangan Katipunan manga Pinunu nasyun Hudiyu. Una hintay ti magsabi sa kay patar-ari, 'Buang kawu' madala kay patabgan sa impirnu pag apuy. 23 Nakan ngani nu magtibu kawu kanmu panagda tag sa surunugan manga panagda sa Diyus bag-u maalaala nimu may daut naisipan kanmu patar-ari sa kanmu, 24 tayaki dapu nimu kanmu panagda sa arani surunugan manga panagda sa Diyus, pag-ati dapu sa kanmu patar-ari pagpakihampang sa kanya. Bag-u pagbalik maan kawu, bag-u di magsagda sa Diyus. 25 "Nu may magdimanda laban sa kanmu sa atubangan husgadu, paghurusayan dapu kamu mintaras may rugar waya hanggan sa udwaya nakaaput sa husgadu. Nu bay unman maghurusayan kamu, ipabahala kawu sa husgadu. Siya tig-&intirga man sa kanmu sa guwardiya ag kawu ipapirisu. 26 Kang pagsabihun sa kanmu, dayi kawu makaluwang ati ginan hanggan sa unman matabwan gid mabayadan nimu kanmu inutang." 27 Magkun si Hisus, "Nadnugan niyu may ibinilin sa manga tawu kaybi magkun, 'Danga kawu mag-uragin.' 28 Dapat pagsabihun niku sa kanyu, ti kada magsinuk sa usa ka babayi may tapil yi ibug, nagkasala yi ngap siya nag-uragin yi sa kay tagipusuun. 29 Nu kanmu sikun mata ti magpatalang sa kanmu naisipan atag sa kasalanan, luwata nimu bag-u yamtan. Dahil mayad waya ti madura kanmu usa ka gamit bilug, danga lang ngap kanmu buu bilug ti miyamut sa impirnu. 30 Nu kanmu sikun kamang waydi ti magpatalang sa kanmu tag sa kasalanan, pulda yi lang bag-u yamtan. Dahil mayad waya ti madura kanmu usa ka gamit bilug, danga lang kanmu buu bilug ti miyamut sa impirnu." 31 Magkun si Hisus, "May ibinilin diman waydi magkun 'Nu pagtulakun yi lalaki kay asawa babayi, kailangan pakan-an kasuratan ti babayi tungkul sa kanda magtarayakan.' 32 Dapat ay kang gid pagsabihun sa kanyu, nu tinulak niya kay asawa babayi balaw waydi ginan sa panlalaki, itinulak niya kay asawa tag ngap sa panguragin nu umasawa maan uman sa iba. Ag una si unu ti umasawa sa tunda pag babayi ginan yi sa asawahan, tunda pag lalaki nagkasala sa magpanguragin." 33 Magkun si Hisus, "Kanyu diman waydi nadnugan may ibinilin kaybi sa manga ginurang magkun, 'Danga kawu magsumpa sa unman may tutuu. Kailangan tupadun nimu kanmu sinumpaan sa Panginuun.' 34 Dapat ay kang gid pagsabihun sa kanyu, danga yi lang kamu magsumpa nu magpangaku. Danga paghi-&nangbita ti langit, dahil imaw ti ulian Diyus. 35 Danga paghi-&nangbita ti daga dahil imaw ti tarat-an niya manga lulud. Danga waydi paghinangbita ti Hirusalim dahil imaw ti banwa makapangyarihan pag Hari. 36 Danga waydi pagsabiha magkun, 'Matay waya', dahil una lang usa ka buhuk sa kanmu ulu balaw kawu pumalagti una pumabiru. 37 Dapat ay kang-ud yi ti sabihun nimu 'Hu ngani' nu hu. Sabihun nimu 'Unman' nu unman waydi. Ti lumabis siti ginan yi gid sa kan Satanas pag kadautan." 38 Magkun si Hisus, "Nadnugan niyu may ibinilin magkun, 'Nu mata, kay balus mata waydi. Nu ngipun, kay balus ngipun waydi.' 39 Dapat kainda kang pagsabihun sa kanyu, danga niyu paglabani ti daut pag tawu. Nu sampalun tawu kanmu sikun pingi, iatubang maan nimu kay baliw pingi. 40 Nu kawu ipaatubang tawu sa husgadu hampay mab-ul niya kanmu baLukas, ipakaun yi lang nimu hanggan kanmu pamaunib. 41 Nu pagpilitun kawu tawu pas-ana yi kunu nimu kay dara tugka sa usa ka kilumitru, pas-ana waya gid nimu tugka ngap duwa ka kilumitru. 42 Nu may manhagad sa kanmu, pagpakan-i nimu. Nu may mag-&udam sa kanmu, danga pag-irangi." 43 Magkun si Hisus, "Nadnugan yi niyu may ibinilin magkun, 'Mahala nimu ti kanmu pagbayaun pag tawu ag kagalitan nimu kanmu kalaban.' 44 Dapat kainda maan kang pagsabihun, mahalun niyu kanyu manga kalaban, idarangin gid niyu ti mag-&unuunu sa kanyu, 45 hampay kamu tutuu gid manga anak niyu Ama sa langit. Dahil pag-ipabutlak niya ti init sa daut ag sa manga mayad. Pagpakan-an diman niya uran ti manga matadlung hanggan ti manga makasalanan. 46 Nu madunung kamu magmahal lang sa manga magmahal waydi sa kanyu, hintay waya pag pirimyu kanyu matanggap? Unman aw katida diman ti pagbuwatun manga manunukut buhis? 47 Nu ti magtar-arian lang tigparaingan-an, hintay ti nabuwat niyu balaw lang ga iba? Una ti manga unman magpasakup sa Diyus magbuwat diman katida. 48 Nakan ngani kailangan ilubus niyu kanyu kaayadan parihu sa kanyu Ama sa langit."
1 Magkun si Hisus, "Pag-ingat kamu, danga magpakakitkakit lang sa atubangan manga tawu kanyu buwat mayad. Nu katunda kanyu buwat unman kamu may matanggap pirimyu ginan sa kanyu Ama sa langit. 2 "Nakan ngani nu kamu magpakaun kuwarta sa manga makuri danga niyu ipabantug tunda danga parihu sa pagbuwatun manga tawu magpabalhinguun kuntay mayad ati sa balay tiripnan hanggan sa manga baklayan. Pagbuwatun nida tunda sa dayawun sida manga tawu. Kang pagsabihun sa kanyu, natanggap yi nida kanda pirimyu. 3 Dapat nu kawu magpakaun danga nimu ipamalay sa kanmu wala kamang ti pagbuwatun nimu sikun kamang, 4 hampay unman maalaman kanmu nagpakaun. Gantihan kawu nimu Ama dahil siya ti nakakit sa kanmu buwat mayad unman ipinasulay nimu sa manga iba." 5 Magkun si Hisus, "Nu magdarangin kamu, danga kamu maghuwad sa manga magpabalhinguun kuntay mayad. Maraibgun sida magdarangin matindugan sa manga balay tiripnan una sa pagsangahan baklayan hampay makitan sida manga tawu. Kang pagsabihun sa kanyu, natanggap yi nida kanda pirimyu. 6 Dapat nu tabug mandarangin kawu, paslud kawu sa kam suludsulud, talakpan nimu kanmu sabian bag-u kawu mandarangin sa kanmu Ama, sa unman mag-akitan sa mata. Gantihan kawu nimu Ama, dahil siya ti nakakit sa kanmu buwat mayad unman ipinasulay nimu sa manga iba. 7 "Nu magdarangin kamu danga kayamu pag bagaw, danga parihu sa ugali manga unman magpasakup sa Diyus. Kanda isip barang patingihan sida Diyus dahil sa kayamuan nida pagbagawun imaw diman imaw diman. 8 Danga maghuwad sa kanda. Dahil daan alam yi niyu Ama kanyu pagkailanganun una udwaya hinagad niyu sa kanya. 9 Kainda kamu nu magdarangin magkun, 'Kanmi Ama sa langit, Kailangan dayawun manga tawu kanmu ngaran, 10 Kawu kailangan ti maghari sitay sa babaw daga. Kailangan tupadun kanmu kagustuhan sitay sa babaw daga parihu sa langit. 11 Ipakaun nimu sa kanmi ti karan-unun kanmi kailangan taynguna pag sirang. 12 Patawada nimu kanmi manga kasalanan, Parihu sa kanmi magpatawad sa manga nagkasala sa kanmi. 13 Danga ipalakaw nimu kami sa mahigpit pag subuk, Dapat ingatan nimu kami sa May Puun Kadautan. Dahil kawu yi ngani tighari may kamaskihan hanggan kadayawan hanggan waya aban. Amin.' 14 Dahil nu kanyu pagpatawadun ti manga tawu nagkasala sa kanyu, patawadun diman waydi kamu niyu Ama sa langit. 15 Dapat nu unman pagpatawadun niyu ti manga tawu may kasalanan sa kanyu, dayu waydi kamu patawadun niyu Ama." 16 Magkun si Hisus, "Nu kamu unman maghandum karan-unun, kanyu manga uyahun danga magmarukumaruku, danga kamu parihu sa manga magpabalhinguun kuntay mayad. Unman sida maghigus kanda bilug hampay makitan manga tawu sida unman maghandum karan-unun. Pagsabihun niku sa kanyu, natanggap yi nida kanda pirimyu. 17 Nu kawu unman maghandum karan-unun, paghigus dapu kanmu buhuk, pag-iram-us hanggan, 18 hampay balaw mahantup manga tawu kawu unman maghandum karan-unun. Kanmu Ama lang ti unman mag-akitan nimu mata ti makaalam. Siya diman ti makakit sa mayad nimu buwat unman ipinasulay nimu sa manga iba, siya ti makabalus mayad sa kanmu." 19 Magkun si Hisus, "Danga magtipun kanyu kayamanan sitay sa babaw daga. Sitay may magdaut manga talagkumang manga tayan, may magsulud manga mananakaw. 20 Ti mayad ngapu nu magtipun kamu kanyu kayamanan sa langit. Ati unman may magkaun talagkumang una tayan. Unman waydi may magsulud manga mananakaw hampay magtakaw. 21 Dahil nu naan kanmu kayamanan ati diman kanmu isip." 22 Magkun si Hisus, "Kanmu mata ti pinagkasulu nimu bilug. Nakan ngani nu marayaw kanmu mata, marayawan ti buu nimu ginhawa. 23 Dapat ay nu madlum kanmu mata, madulman ti buu nimu ginhawa. Nakan nu ti rayaw sa kanmu nagbaliw madulum, pingit yi pag dulum." 24 Sinabi ni Hisus magkun, "Unman may makasirbi sa duwa ka amu. Dahil dayuun niya ti usa, ti usa kay adiun. Sirbihan niya mayad ti usa ka amu, pabay-anan lang ti usa ka amu. Dayu masirbihan niyu dungan ti Diyus hanggan ti kayamanan. 25 "Nakan pagsabihun niku sa kanyu, danga kamu magkaarimputu tungkul sa karan-unun ag sa manga danum kanyu kailangan sa ikabuhi niyu, hanggan sa rutay para sa kanyu manga bilug. Unman aw ti buhi tawu mahalga man sa manga karan-unun, ag ti bilug mahalga man sa rutay? 26 Bantayan niyu ti manga manuk, unman sida magpamgas ag unman diman sida mag-ani, unman sida may tinipun sa burugtangan. Dapat pagpakan-an sida niyu Ama sa langit. Unman aw kamu mahalga man sa manga manuk? 27 Si unu lugud sa kanyu makapadugay kanyu buhi una lang usa ka udas sa kanyu arimputu naisipan? 28 "Hayga kamu magkaarimputu tungkul sa kanyu manga rutay? Isipa dapu nu kabitay ti ilamnun magbusang sa makugun. Unman sida magtarabahu, unman waydi maghabul. 29 Dapat kang pagsabihun sa kanyu, una paman si Sulumun unman nakasulung magilanggilang parihu sa busang ilamnun madi masyadu marinu kay manga rutay niya. 30 Ti manga ilamnun sa bantud ga pinasulungan Diyus rutay malatuy. Tunda pag ilamnun buhi taynguna, aldaw bay ipagba. Unman aw nguna lalu kamu pag-&alagaan niya? Masyadu maaw diit kanyu pagsarig sa kanya. 31 Nakan danga kamu magkaarimputu sa kanyu kan-un, sa kanyu danum una sa kanyu panrutay. 32 Dahil tunda pag manga bagay pagkaaburiduhan manga tawu udwaya magpasakup sa Diyus. Magkaalaman kabay niyu Ama sa langit kamu may kailangan tunda tanan pag manga bagay. 33 Dapat una sa tanan hugudan niyu hampay kamu harian Diyus ag hampay mag-ugali angay sa kay kagustuhan bag-u ipakaun niya sa kanyu ti tanan niyu pangangailangan. 34 Nakan ngani danga niyu ikaarimputu ti tungkul sa aldaw pag sirang, bag-u yi niyu isipun nu kainda ay yi. Natuman yi sa kada sirang kay kakurian."
1 Sinabi ni Hisus, "Danga pagpihua niyu ti daut ti mayad niyu kaparihu hampay unman waydi kamu pihuun Diyus nu daut nu mayad. 2 Dahil pihuun kamu Diyus angay sa kanyu magpihu sa iba nu daut nu mayad. Kanyu gamitun pag panukat sa iba imaw diman pag panukat ti gamitun Diyus sa kanyu. 3 Hayga mag-akitan nimu ti paruk sa mata nimu patar-ari dapat unman pagbatiun nimu ti batang sa kanmu sadili mata? 4 Kabitay pag masabi nimu sa kanmu patar-ari, 'Abala duy kang bul-un ti paruk sa kanmu mata', bag-u may batang diman ngapu kanmu mata. 5 Magpabalhinguun yi lang kawu kuntay mayad. Bul-a dapu ti batang sa kanmu mata, bag-u humiling yi kawu mayad hampay mab-ul nimu kanmu patar-ari paruk. 6 "Danga niyu ipakaun sa idu ti manga bagay ibinukud para sa Diyus. Danga waydi niyu iyamut tag sa babuy kanyu bulawan kadaan, dahil tatatataan lang nida bag-u pabalikan kamu banahutun sa kagat." 7 Magkun si Hisus, "Panhagad kamu hampay pakan-an. Paghanap kamu hampay kamu makakit. Pagbukasan ti sabian sa una hintay tigtaragham. 8 Dahil ti tawu nu maghagad pakan-an, ti tawu nu maghanap may makitan siya. Nu may tawu magtaragham, bukasan ti sabian. 9 Pakan-an aw niyu batu kanyu anak nu maghagad tinapay? 10 Pakan-an aw niyu lugud siya ulay nu maghagad isda? 11 Madi kamu manga makasalanan, madunung diman kamu magpakaun mayad pag pakaun sa kanyu manga anak. Lalu waya kanyu Ama sa langit madunung gid. Ipakaun niya ti manga marinu pag pakaun sa manga maghagad sa kanya. 12 "Nakan ngani buwatun niyu sa kanyu kaparihu ti kanyu gustu kanda buwatun sa kanyu. Inda yi ngani ti kahulugan Kasuguan ni Muysis ag ti kahulugan tudlu manga Purupita." 13 Magkun si Hisus, "Pagsaka kamu sa diit pag sabian. Dahil daka ti sabian ag laun pagka dalan atabug sa kadamhakan. Tunda ti paglakawan mayamu tawu. 14 Dapat diit lang ti sabian ag makuri pag dalan tabug sa buhi, balaw mayamu pag tawu ti nakalakaw siti pag dalan." 15 Magkun si Hisus, "Pag-aman kamu sa manga pudilun pag purupita. Magpakarani sida sa kanyu ga bilang karanidu kanda histuda dapat nu sa kay tutuu sida ga manga maisug pag simarun idu. 16 Makilala niyu sida sa kanda manga buwat. May maputi aw lugud burak ubas ginan sa puun dugihan? Aw ngatay may mab-ul burak igus ginan sa puun tanulung? 17 Nu mahal pag kayu, pihu marinu waydi kay burak. Dapat nu alangan ti puun kayu, alangan diman waydi kay burak. 18 Dayu mahimu magburak daut nu mayad pag puun kayu. Nu daut kay puun kayu dayu waydi bumurak mayad. 19 Ti kada puun kayu nu unman magburak mayad, pukanun yi lang bag-u iyamut sa apuy. 20 Nakan ngani makilala diman waydi niyu ti manga pudilun pag purupita sa kanda manga buwat." 21 Magkun si Hisus, "Unman tanan tanan tig-ingaran sa kangku magkun, 'Panginuun Panginuun', Rumas-ug sa kaharian langit, nu unman tunda lang pag manga tawu ti magtupad sa kagustuhan niku Ama sa langit. 22 Sa ati katpung aban pag kaudasan mayamu ti sumabi sa Kangku magkun, 'Panginuun, Panginuun, unman aw sa kanmu ngaran kami nagpurupita? Sa kanmu diman ngaran pag nagpalwas kami manga labang ag nagbuwat kami mayamu makadululaw.' 23 Bag-u sabihun niku sa kanda magkun, 'Una ginan sa kabag-u unman nakilala niku kamu. Pagpakarayu kamu ginan sa kangku, kamu manga magbuwat daut.' " 24 Sinabi ni Hisus, "Nakan ngani ti kada tawu nu magpatingi ag magtupad sa kang manga bagaw inda, parihu siya ga usa ka tawu madunung gid, nagbungsud kay balay sa babaw batu. 25 Nag-uran daka, nagbaha, hinampak mabisug pag bagyu ti balay, dapat unman nagba dahil nakabungsud sa babaw batu. 26 Ti kada tawu magpatingi sa kang bagaw bag-u unman pagtupadun niya, parihu siya ga tawu kurang kay buut, nagbungsud kay balay sa baras. 27 Nag-uran daka nagbaha, hinampak mabisug pag bagyu ti balay, ag nagpu yi bag-u rargu nawayak." 28 Pagka tinabu itinudlu ni Hisus inda pag manga bagaw, nadulaw ti manga tawu sa kay tudlu. 29 Dahil nagtudlu siya ga usa ka tawu may karampatan, balaw ga manga Manugtudlu Kasuguan.
1 Pagka naglus-ug si Hisus ginan sa bungtud, nagkuyug sa kanya ti kayamuan tawu. 2 Nagpakarani sa kanya ti usa ka tawu may batas, nagluhud sa kay atubangan magkun, "Duy, nu gustu nimu mapaayad nimu aku sa kang batas." 3 Nagkupa si Hisus sa kanya, magkun, "Gustu gid niku. Pagmaayadan yi kawu." Susun yi nadura kay batas. 4 Binilinan siya ni Hisus magkun, "Danga pagsabiha nimu inda una sa kantapu pag tawu. Pag-atag kawu, pagpakakit kawu sa manug-asiwa balay Diyus. Bag-u pagpakaun kawu panagda sa Diyus angay sa kay ibinilin ni Muysis, bilang usa ka puruyba sa manga tawu nag-ayad yi kawu." 5 Pagka nakaras-ug si Hisus sa banwa Kapirnaum, napakarani sa kanya ti usa ka kapitan manga sundalu taga Ruma, nagpakihampang sa kanya magkun, 6 "Duy, kang suruguun naglumpug sa sakit, mahuwayan siya sa kanmi balay, masyadu yi ngap magkakurian." 7 Magkun si Hisus, "Asan tag duy aku sa kanyu ag siya kang paayadun." 8 Dapat ay nagsagut ti kapitan magkun, "Duy, unman aku may karampatan magpaati sa kanmu atag sa kang balay. Bagawa yi lang nimu bag-u umayad yi kang suruguun. 9 Alam niku dahil aku sa sirung karampatan manga pinunu ag aku diman hanggan may manga sundalu sa sirung niku karampatan. Nu pagsabihun niku sa usa ka sundalu, 'Pag-ati kawu', umati ngani siya. Nu pagsabihun niku sa usa, 'Abala kawu', siya magpakarani. Nu kang pagsabihun sa kang panawuhun, 'Buwata nimu inda', buwatun yi niya." 10 Nadulaw si Hisus pagka nadnugan niya ti bagaw kapitan ag sinabi niya sa manga tawu magkuyug sa kanya magkun, "Pagsabihun niku sa kanyu, unman aku may nakitan kainda kadaka kay pagsarig una paman sa nasyun Israil. 11 Tandai niyu mayamu waya ti Rumas-&ug ginan sa butlakan hanggan ginan sa isalpan hampay dumulud atag sa karan-an kasaru nida ni Abraham, ni Isaak hanggan ni Hakub sa kaharian langit. 12 Dapat mayamu sa manga linahi ni Israil manga sakup mana sa kaharian Diyus tulakun ngap tag sa luwas sa kaduluman. Ati aban sida mannguynguy ag mangubut kanda manga ngipun." 13 Magkun si Hisus sa kapitan, "Pag-uli yi kawu. Angay sa kanmu pagsarig mangyari diman tunda kanmu paghagadun." Ati diman katpung nag-ayad ti suruguun kapitan. 14 Nag-atag si Hisus sa kay balay ni Pidru. Nakitan niya ati kay manugang ni Pidru maigyaan ga baragahan apuy yi kay bilug. 15 Hiniyaptan ni Hisus kay kamang babayi bag-u nahumpawan kay init bilug. Pagka nahumpawan, nagbangun siya ag nagsirbi sa kan Hisus. 16 Tunda pag yabi dinara nida tag sa kan Hisus ti mayamu tawu sinuldan manga labang. Usa lang ka pagbabaw ni Hisus, nagluwas yi ti manga labang. Pinaayad niya ti tanan may mag-&adnugan sa kay bilug. 17 Binwat niya tunda hampay matupad ti bagaw ipinadakit ni Purupita Isayas magkun, "Bin-ul niya kanta manga kalumuyan, Tiniis niya kanta manga mag-adnugan." 18 Pagka nakitan ni Hisus ti manga kayamuan tawu sa kay palibut, isinugu niya sa kay manga kaibahan pag-alistu, sida dumipay atag sa baliw pangpang. 19 May nagpakarani sa kanya usa ka Manugtudlu Kasuguan magkun sa kanya, "Maisturu, kumuyug aku sa kanmu una kawu naan tabug." 20 Magkun si Hisus sa kanya, "May ulian ti manga simarun idu sa manga basad lukib, may pugad ti manga manuk, dapat ti Anak Tawu unman may paraharyan." 21 Usa maan ka tuludluan magkun sa kan Hisus, "Panginuun, mahimu aw mag-uli dap maan aku hampay manlubung waya aban aku sa kang ama nu mamatay?" 22 Dapat magkun si Hisus sa kanya, "Pagkuyug kawu sa kangku, ipiyar nimu sa unman may manga buhi ti lumubung sa manga namatay." 23 Sinmakay si Hisus sa duunduun, kaibahan niya kay manga tuludluan. 24 Bag-u bigla naghuyup ti mabisug pag untug sa danaw, diit wadi mapnuan danum kanda duunduun. Dapat si Hisus turug di. 25 Nagpakarani sida sa kan Hisus bag-u kanda pinulaw magkun, "Panginuun, iribri nimu kami, malunud yi ay duy kita." 26 Magkun si Hisus sa kanda, "Hayga lugud kamu magkadala, diit maaw kanyu pagsarig." Bag-u tinmindug si Hisus ag nagbagaw kay inampara ti untug hanggan ti humbak danaw. Bigla nagkalma. 27 Naglingut kay manga kaibahan magkun, "Hintay nguna pag tawu inda, hayga magpaniwala sa kanya una ti untug una ti humbak danum?" 28 Pagka rinmas-ug si Hisus sa baliw dipay danaw, sa daga manga Gadarinu, sinulang siya duwa ka tawu inapuan manga labang. Ginan sida sa kanda ulian sa kalubngan. Masyadu paman sida maisug pag manga tawu, nakan udyi may makalakaw siyun pag dalan. 29 Nagringgit sida magkun, "Hintay kanmu labut sa kanmi, kawu pag Anak Diyus? Nagsitay aw lugud kawu hampay kami kanmu pakurian una udwaya udas sintinsiya?" 30 Sa kanda luwas may maglingaun kadamlan babuy. 31 Nanuyu sa kanya ti manga labang magkun, "Nu kami kanmu pag-ipalwas, pahintuluti nimu kami mangulian sa kadamlan babuy." 32 Sinabi ni Hisus sa kanda, "Pag-ati kamu." Nakan nagluwas ngani sida sa tawu, nag-atag sida sa manga babuy bag-u nangras ti manga babuy sa palagiw naglinuksu sa yangpas danaw nagkalalimus sa danum. 33 Nagpinalagiw kay manug-alaga sa babuy. Pagka rinmas-ug sida sa banwa, itinultul nida ti tanan nangyari sa manga babuy hanggan sa duwa ka tawu sinuldan labang. 34 Naglinuwang ti tanan taga banwa nagsulang sa kan Hisus. Pagka nakitan nida si Hisus, pinakihampangan nida siya magkun, "Pag-ighit yi kawu sitay pag daga."
1 Sinmakay si Hisus sa duunduun, nagdipay atag sa baliw pangpang danaw naparargu tag sa kay sadili banwa. 2 Yinayung manga tawu tag sa kan Hisus ti usa ka lunu mahuwayan sa kay igyaan. Pagka nakitan ni Hisus kanda daka pag sarig, sinabi niya sa tawu lunu, "Pagmatutum kanmu naisipan duy. Pinatawad yi kanmu manga kasalanan." 3 May manga Manugtudlu Kasuguan ati. Ikinutub nida sa kanda tagipusuun magkun, "Palabilabihun inda pag tawu laban sa Diyus." 4 Dapat alam di ni Hisus kanda pagkutubun, nakan sinabi niya magkun, "Hayga kamu magkutub daut? 5 Hintay nguna ti malpus sabihun, ngatay pinatawad yi kanmu manga kasalanan, aw ngatay sabihun pagtindug yi kawu paglakaw yi. 6 Ipakakit niku ti puruyba sa kanyu may karampatan sitay sa babaw daga ti Anak Tawu magpatawad sa kasalanan manga tawu." Bag-u sinabi niya sa tawu lunu, "Pagtindug yi kawu daran-a yi kanmu igyaan, pag-uli yi kawu." 7 Nagtindug ngani tunda pag tawu bag-u nuli yi tag sa kay balay. 8 Pagka nakitan manga tawu tunda, sida nadala ag nagdayaw sa Diyus sa nagpakaun katunda pag karampatan sa manga tawu. 9 Nighit si Hisus siyun ginan pag rugar. Sa kay maglakaw nakitan niya ti usa ka tawu kay ngaran si Matiyu, matukawan sa panukutan buhis. Magkun si Hisus sa kanya, "Pagkuyug kawu sa kangku." Nagtindug si Matiyu bag-u kinmuyug yi ngani sa kan Hisus. 10 Pagka sa kan Matiyu balay si Hisus hanggan kay manga tuludluan magkaun, linmuwang diman ti mayamu pag manga manunukut buhis hanggan ti manga makasalanan, nagsaru sa karan-an. 11 Pagka nakitan manga Parisiyu kanda magsara-&ruhan, pinaingana nida kay manga tuludluan ni Hisus magkun, "Hayga magsaru kanyu maisturu sa manga manunukut buhis hanggan sa manga makasalanan?" 12 Nadnugan ni Hisus kanda paingana, nagsagut siya magkun, "Ti may sakit imaw ti may kailangan sa manugbulung. Nu unman may sakit unman diman waydi may kailangan sa manugbulung. 13 Paglakaw yi kamu, saladsadun niyu inda kay pagkumnun Diyus, 'Kang gustu pagmaawaun kamu ag balaw kailangan niku kanyu hayup kanyu pag-isagda sa kangku.' Nagsitay aku hampay butungun ti manga makasalanan, balaw ti manga matadlung." 14 Nagras-ug sa kan Hisus kan Huwan Manugtulbaw pag manga tuludluan. Magkun sida, "Hayga duy may ugali kami hanggan ti manga Parisiyu unman maghandum karan-unun. Bati kanmu manga tuludluan unman may ugali katida?" 15 Sinmagut si Hisus magkun, "Mahimu aw nguna maruku ti binan-awan sa pamasaruhan nu kaibahan waya nida ti lalaki ipinasaru. Dapat aban bul-un siya ginan sa kanda. Nu udyi siya sa kanda bag-u di unman manhandum karan-unun sida. 16 "Uman may tawu maglupun bag-u rutay sa daan pag rutay. Barang ti bag-u pag lupun gumisi ngap sa kay daan pag rutay linupnan bag-u umamat dumaka kay gisi. 17 Unman may magsukad bag-u alak ubas sa daan pag manga paknul pag sukadan. Nu abi katunda ti buwatun, mabusni ti manga paknul, mauyang ti alak ubas ag madaut yi lang ti manga sukadan. Ti mayad isukad ti bag-u alak ubas sa bag-u pag manga paknul pag sukadan agud parihu kay kadugay." 18 Magbagaw waya si Hisus sa manga tawu, may rinmas-ug usa ka pinunu manga Hudiyu. Nanluhud siya sa atubangan ni Hisus magkun, "Diit wadi duy magkaugtas kang anak babayi. Dapat pagkuyug mana kawu sa kangku. Nu kup-an nimu kamang pihu siya maayadan." 19 Nagtindug si Hisus, nagkuyug ngani siya hanggan kay manga tuludluan. 20 Nagdasun sa kay uryan ti usa ka babayi. Sulud sampulu may duwa yi ka timpu kay pagsulgan. Nagdulud sa kay aday-an nag-igpil sa kay sidsid rutay ni Hisus. 21 Dahil pag-isipun niya, nu maigpilan lang niku kay rutay pihu gid aku maayadan. 22 Napalisud si Hisus. Pagka nakakit sa babayi magkun siya, "Pagmatutum kam naisipan duy, pinaayad yi kawu nimu sarig." Susun nag-ayad yi ngani ti babayi. 23 Pagka rinmas-ug si Hisus sa balay pinunu, nakitan niya ti manga manugpalawta hanggan ti kayamuan tawu mag-iringayan. 24 Magkun siya, "Pagluwas yi kamu. Balaw tigbak ti anak, turug lang." Kanda lang pagkasarin-an si Hisus. 25 Dapat ay pagka linmuwas ti manga tawu, nagsaka siya hiniyaptan niya ti anak sa kay kamang bag-u binmangun tunda. 26 Sa tanan rugar sa kay palibut nibantug ti barita tungkul sa nangyari ati katpung. 27 Pagka nighit maan si Hisus siyun ginan pag rugar, may nagkuyug sa kanya duwa ka lalaki buta kay manga mata. Magtawag sida magkun, "Kawu duy ti linahi ni Dabid, kaawai nimu kami." 28 Pagka sinmaka yi si Hisus sa balay, nagpakarani sa kanya ti manga buta. Pinaingana sida ni Hisus magkun, "Magpaniwala aw kamu mabwat niku inda?" Kanda sagut magkun, "Hu ngani duy, magpaniwala gid kami." 29 Hinikap niya kanda manga mata bag-u kay sabi magkun, "Pagmangyari sa kanyu angay sa kanyu pagsarig." 30 Bag-u maghiling yi ngapu sida. Mahigpit kay binilinan sida magkun, "Danga pagsabiha niyu una sa kantapu pag tawu." 31 Dapat ay pagka sida siyun ginan linmakaw, nagtultul ngap sida sa manga tawu sa tanan manga rugar tungkul sa kan Hisus. 32 Pagka linmakaw maan tunda pag duwa ka lalaki, dinara manga tawu tag sa kan Hisus ti usa ka buyun inapuan labang. 33 Pagka ipinalwas niya ti labang, nagbagaw yi ti tawu ag sinabi nida, "Una kaybi ginan unman may nakitan katida sa Israil." 34 Dapat sinabi manga Parisiyu, "Takinan manga labang ti nagpakaun kapangyarihan sa kanya hampay makapalwas sa manga labang." 35 Pinalibut ni Hisus ti manga banwa hanggan ti manga baryu, nanudlu sa manga balay tiripnan. Itinudlu niya ti Mayad pag Barita tungkul sa kay maghari Diyus. Pinaayad niya ti manga tawu una hintay pag sakit kanda mag-adnugan sa kanda ginhawa. 36 Pagka nakitan niya ti duru gid pag manga tawu, naawa siya sa kanda dahil sida magkaaburidu unman may manuggiya, ga manga karanidu unman may manug-alaga. 37 Nakan sinabi niya sa kay manga tuludluan magkun, "Abunda ti aranyun, dapat kurang ti manga manug-ani. 38 Idarangin niyu sa May Puun aranyun, hampay suguun niya ti manga manug-ani sa kay aranyun."
1 Tinipun ni Hisus kay sampulu may duwa ka tuludluan, pinakan-an niya sida karampatan hampay pumalwas manga labang ag hampay pumaayad sa manga tawu una hintay pag sakit kanda mag-adnugan sa kanda ginhawa. 2 Inda ti sampulu may duwa ka Apustul kanda manga ngaran. Un-an si Simun imaw yi ti pagkumnun si Pidru bag-u si Andiris kay patar-ari ni Simun bag-u kay anak ni Sibidiyu si Santiyagu hanggan kay patar-ari si Huwan, 3 bag-u sida ni Pilipi ni Bartulumi bag-u si Tumas bag-u si Matiyu ti manunukut buhis bag-u si Santiyagu kan Alpiyu anak bag-u si Tadiyu, 4 bag-u si Simun ti pagsabihun masipag sa nasyun Israil, hanggan si Hudas Iskariyuti imaw ti nagpakampi sa kay kalaban ni Hisus. 5 Sinugu ni Hisus tunda pag sampulu may duwa ka tuludluan kay binilinan magkun, "Danga kamu mag-ati sa daga manga balaw Hudiyu, danga waydi magsulud sa banwa manga Samaritanu. 6 Lalu kailangan hanapun niyu ti manga tawu sa nasyun Israil manga nalyam ga manga karanidu. 7 Pag-ati kamu pagtultul sa manga tawu magkun, 'Arani yi ti kaharian langit.' 8 Paayadun niyu ti may manga sakit, buhiun niyu ti manga namatay. Paayadun diman niyu ti may batas, ipalwas niyu ti manga labang. Nagtanggap yi kamu unman may bayad, pagpakaun kamu balaw waydi may bayad. 9 Danga kamu magdara kuwarta, danga magdara kamu una gintu, una pilak, una galang sa kanyu manga hagkus. 10 Danga kamu magdara pustal sa kanyu maglakaw, una ililsan, una lapak una sugkud. Dahil ti manugtarabahu kailangan pakan-an kay pangabuhi. 11 "Una naan pag banwa hanggan baryu kamu pag umaput, pagligaw kamu kanyu mayad pag ras-ugan pag tawu. Siti kamu pag mangulian pag balay hanggan sa udwaya kamu umighit siyun ginan pag rugar. 12 Pagka sumaka kamu sa balay pagkun kamu, 'Paghari sa inda pag balay ti kahusayan ginan sa Panginuun.' 13 Nu mayad tunda pag manga tawu kanda ugali, kailangan pagsa kanda yi ti kahusayan Panginuun. Dapat nu unman mayad, bawia di niyu tunda. 14 Nu dayu kamu tanggapun una patingihan sa usa ka balay aw ngatay banwa, pag-ighit yi kamu siyun ginan. Pagpagun niyu kanyu galbuk sa kanyu raprapa. 15 Pagsabihun niku sa kanyu, nu sa udas pagsintinsiya aban, subra waya pag kaparusahan ti malakawan manga tawu sa ati pag banwa balaw lang ga kanda nalakawan manga taga Suduma, taga Gumura." 16 Magkun si Hisus, "Pagsuguun niku kamu taynguna parihu ga manga karanidu tabug sa karaw-an manga simarun idu. Pagmadunung kamu parihu ga manga amu, pagmabuut kamu parihu sa kalampati. 17 Pag-aman kamu, dahil dakpun kamu manga tawu bag-u darahun tag sa Katipunan manga Pinunu nasyun Israil. Litusun nida kamu sa manga balay tiripnan. 18 Dahil sa kanyu magpasakup sa kangku, ipaatubang kamu sa manga gubirnadur hanggan sa manga hari hampay tumultul kamu tungkul sa kangku sa atubangan nida hanggan sa manga balaw Hudiyu. 19 Pagka kamu ipabahala nida sa hustisya, danga kamu magkakuri sa kanyu sarabihun nu kabitay kanyu bagawun. Pagka ati katpung pag udas, itudlu yi waydi sa kanyu ti dapat niyu sabihun. 20 Dahil balaw kamu ti bumagaw, nu unman ti Ispiritu niyu Ama ti pumabagaw sa kanyu. 21 "Patar-ari diman waydi ti tumudlu sa patar-ari tabug sa kay kalaban hampay kanda matyun. Katunda diman ti buwatun aban ama sa kay anak. Labanan manga anak kanda manga gurangun kanda ipamatay. 22 Kagalitan aban kamu tanan tawu dahil sa kanyu pakiusa sa kangku. Dapat tigpakarig-un hanggan tugka sa katapusan imaw ti maribri. 23 Nu unuunuhun kamu manga tawu sa usa ka banwa, pagpalagiw yi kamu tag sa usa maan ka banwa. Pagsabihun niku sa kanyu unman waya napalibut niyu ti tanan pag manga banwa sa Israil, Rumas-ug yi ti Anak Tawu. 24 "Unman may tuludluan mataas man sa kay maisturu, unman may panawuhun mataas man sa kay amu. 25 Makabaya ti tuludluan nu pumarihu sa kay maisturu, makabaya diman ti panawuhun nu pumarihu siya sa kay amu. Nu ti puun magtal-&anakan kanda pag-ingarnan biilsibul, lalu waya kanda pagmuransahun kay manga kasunu." 26 Magkun si Hisus, "Nakan ngani danga magkadala sa kanda. Unman may maitagu nu unman makitan gid aban. Unman may mailihim nu unman miburayhaw aban. 27 Ti kang pagsabihun sa kanyu sa madulum, itultul maan niyu sa marayaw. Ti iyinanas sa kanyu kailangan kanyu maan ipahayag hampay mag-adnugan tanan tawu. 28 Danga niyu kadalai ti magmatay sa bilug balaw makamatay sa karadwa. Lalu dapat niyu kadalaan ti makamatay sa karadwa hanggan bilug sa impirnu. 29 Unman aw pag-ipabili ti duwa ka maya sa usa lang ka sintimus? Dapat una di usa sa kanda unman magkalagpak sa daga nu unman kagustuhan niyu Ama. 30 Una paman kanyu buhuk nabilang yi tanan. 31 Nakan ngani danga kamu magkadala. Kamu mahalga man sa mayamu pag maya." 32 Sinabi ni Hisus magkun, "Una si unu ti magkilala sa kangku sa atubangan manga tawu, kilalan-un diman waydi niku sa atubangan niku Ama sa langit. 33 Dapat ti magtanggi sa kangku sa atubangan manga tawu, itanggi diman niku sa atubangan niku Ama sa langit." 34 Magkun si Hisus, "Danga niyu isipun aku nagsitay hampay magpakaun kahusayan sitay sa babaw daga. Nagsitay aku hampay magdara away balaw kahusayan. 35 Nakan aku nagsitay hampay palabanun ti anak lalaki sa kay ama, ti anak babayi sa kay ina, ti umagad babayi sa kay sinakahan. 36 Kay kalaban tawu ginan ngap sa kay kasunu balay. 37 "Nu ti tawu magbaya sa kay ama hanggan sa kay ina balaw lang ga kay magbaya sa kangku, unman mahimu siya magpakiusa sa kangku. Nu ti tawu magbaya sa kay anak lalaki una anak babayi balaw lang ga kay magbaya sa kangku, unman mahimu siya magpakiusa sa kangku. 38 Nu ti tawu unman magpas-an kay kurus ag magkuyug sa kangku, unman mahimu siya magpakiusa sa kangku. 39 Ti mag-ingat sa kay sadili buhi, maduraan ngap buhi. Ti nabul-an buhi sa kay magsunud sa kangku, imaw ngap ti kumakit buhi." 40 Magkun si Hisus, "Tigtanggap sa kanyu magtanggap diman sa kangku. Tigtanggap sa kangku kay tanggapun diman niya ti nagsugu sa kangku. 41 Tigtanggap sa usa ka purupita dahil siya kay kangaranan purupita, ay pakan-an diman pirimyu ga purupita diman pag pirimyu. Tigtanggap sa tawu matadlung dahil siya matadlung pag tawu ay pakan-an pirimyu ga tawu matadlung diman pag pirimyu. 42 Una si unu ti pumakaun una lang usa ka ungut danum maramig sa usa sa manga mapinakumbabaun inda dahil siya tuludluan niku, kang pagsabihun sa kanyu, pihu gid pakan-an siya pirimyu."
1 Pagka nakatapus bilin sa kay sampulu may duwa ka tuludluan, nighit si Hisus hampay manudlu hanggan magbarita sa tawu sa manga banwa arani ati. 2 Nabaritaan ni Huwan Manugtulbaw sa basad pirisuhan kay manga pagbuwatun ni Kiristu. Nakan ngani nagsugu si Huwan sa kay manga tuludluan, 3 hampay mamaingana sa kan Hisus magkun, "Kawu yi aw nguna duy ti ipinangaku kuntay sumitay, aw ngatay kami may pag-alagdun waya iba?" 4 Magkun si Hisus, "Pag-uli maan kamu sa kan Huwan bag-u sabiha maan sa kanya ti kanyu nadnugan ag nakitan. 5 Maghiling yi ti manga buta, maglakaw yi maan ti manga pilay, naayadan ti may manga batas, magdungug yi ti manga bungul, nabuhi maan ti manga namatay. Pag-itudlu sa manga pugri ti Mayad pag Barita. 6 Papaladan Diyus ti tawu nu unman siya mag-alinlangan sa kangku." 7 Pagka nuli kay manga tuludluan ni Huwan, magbagaw si Hisus tag sa manga tawu tungkul sa kan Huwan magkun, "Kanyu nag-ati sa pangawakawaan hintay kanyu hinanap? Usa ka bahi aynu aw pagtandugun durus? 8 Hintay ngani kanyu hinanap? Nanduaw lang aw kamu sa tawu marinu kay rutay? Ti may manga rutay marinu kabay sa ulian di manga hari. 9 Dapat hintay ungud kanyu hinanap? Usa aw ka purupita? Hu ngani duy. Dapat kang pagsabihun sa kanyu balaw lang purupita siya. 10 Dahil may sinabi sa Banal Kasuratan tungkul sa kan Huwan magkun, 'Inda yi kang sinugu ipinauna sa kanmu, Ialistu niya kanmu lakawan. 11 "Pagsabihun niku sa kanyu, sa tanan nianak unman waya may linmuwang lalu waya mahalga sa kan Huwan Manugtulbaw. Dapat ay ti pinakaababa pag tawu nu pagharian siya Diyus mataas man siya sa kan Huwan Manugtulbaw. 12 Ginan waya sa kay nagtudlu ni Huwan Manugtulbaw hanggan taynguna tugka, ti kaharian langit paggahusgahusun, pag-agawun manga maggahusgahus. 13 Dahil hanggan sa udwaya rinmas-ug si Huwan ti tanan manga purupita hanggan ti Kasuguan nagpurupita tungkul sa manga mangyari aban sa kaharian langit. 14 Nu gustu niyu maniwala, siya diman si Ilyas ti pagsabihun kuntay Rumas-ug. 15 Ti may tuli kailangan pagpatingi. 16 "Naan pag ipaparihu niku ti manga tawu taynguna? Parihu sida ga manga anak matukawan sa palingkihan magtawag sa kanda manga kaparihu magkun, 17 'Nagpalawta kami sa kanyu, dapat unman kamu nagtaruk. Nag-ambahan yi kami pabilin, dapat unman kamu nanlumi.' 18 "Dahil si Huwan nagsitay, unman maghandum siya karan-unun, unman diman siya mag-inum maisug pag irinmun bag-u magkun sida, 'Inapuan siya labang.' 19 Pagka nagsitay ti Anak Tawu magkaun mag-inum diman bag-u pagkumnun nida, 'Malu tunda pag tawu dalukdaluk maglangu, mag-ampud siya sa manga manunukut buhis, sa manga makasalanan.' Ti pagbuwatun kadunungan Diyus imaw ti puruyba sa katutuuhanan." 20 Bag-u sinungyaw ni Hisus ti manga banwa pinakakitan niya manga buwat makadululaw dahil balaw sida nag-ampu nagpatawad sa kanda manga kasalanan. 21 Sinabi ni Hisus, "Kaawaawa kawu pag banwa Kurasin, kaawaawa kawu hanggan pag banwa Bitsayda, dahil nu abi sa banwa Tiru una sa banwa Sidun pag nabuwat ti manga makadululaw kang binwat sitay sa kanyu, dugay yi mana nanrutay rutay daan, nagtukaw sa dapug ti manga taga ati, hampay ipakilala nida kanda nag-ampu nagpatawad yi sa kanda kasalanan. 22 Dapat kang pagsabihun sa kanyu, nu kaudasan yi sintinsiya aban lalu waya mabuyat kay sintinsiya Diyus sa kanyu balaw lang ga sa manga taga Tiru ag taga Sidun. 23 Kawu pag banwa Kapirnaum, Gustu aw nimu pumaabwat hanggan tugka sa langit? Idugsak baga kawu sa ulian manga namatay. "Dahil nu abi sa Suduma pag nabuwat ti manga makadululaw kang binwat sitay sa kanyu, hanggan taynguna tugka balaw waya mana mawasak tunda. 24 Dapat kang pagsabihun sa kanyu, nu kaudasan yi sintinsiya aban, lalu ngap mabuyat kay sintinsiya Diyus sa kanyu, balaw lang ga sa manga taga Suduma." 25 Sa ati katpung magkun si Hisus, "Magpasalamat aku sa kanmu, Amang, kawu ti Panginuun sa langit hanggan sa manga daga. Magpasalamat aku dahil unman ipinaalam nimu inda pag manga bagay sa manga madunung ag sa manga mapininsarun, ipinakilala ngapu nimu sa manga tawu ga anak kay tagipusuun. 26 Hu ngani duy Amang, dahil katunda yi kanmu kagustuhan. 27 "Ti tanan bagay ipinabahala niku Ama sa kangku. Unman may nakakilala sa Anak nu unman ti Ama. Ag unman may nakakilala sa Ama nu unman ti Anak ag una hintay ti piliun Anak hampay ipakilala sa kanya ti Ama. 28 "Pagsitay tag kamu sa kangku, kamu tanan manga purus sa kanyu tarabahu ag sa kanyu dara mabuyat, kamu kang paalwanun. 29 Paulian niyu sa kanyu liug kang singkaw, pagpatudlu kamu sa kangku, dahil maalumanay aku ag mapinakumbabaun pag tawu bag-u makakit kamu kahusayan sa kanyu buhi. 30 Dahil mayad kadara kang singkaw ag balaw mabuyat kang ipagpadara sa kanyu."
1 Sa usa ka sirang pamahari naglakaw si Hisus sa matiriguhan. Linun-us kay manga tuludluan, nakan naggutul sida uhay tirigu bag-u kinaun nida kay butir. 2 Pagka nakitan manga Parisiyu magkun sida sa kanya, "Bantayan nimu duy ti pagbuwatun nimu manga tuludluan. Bawal tunda sa sirang pamahari." 3 Sinabi ni Hisus sa kanda magkun, "Unman aw lugud binasa niyu ti binwat ni Dabid pagka linun-us siya hanggan kay manga kaibahan? 4 Nagsaka siya sa balay Diyus nagkaun siya hanggan kay manga kaibahan tunda pag tinapay ti ibinugtang ipinakaun sa atubangan Diyus. Bawal sa Kasuguan nu kan-un nida tunda pag tinapay dahil ti manga manug-asiwa lang balay Diyus ti kailangan makakaun tunda. 5 Ag unman waya aw lugud niyu nabasa sa Kasuguan ni Muysis kuntay sa kada sirang pamahari ti manga manug-asiwa sa balay Diyus maglabag sa Kasuguan tungkul sa sirang pamahari, madi unman may magsabi kasalanan tunda. 6 Pagsabihun niku sa kanyu may lalu waya mahalaga man sitay balaw lang ga balay Diyus. 7 Nu maintindihan lang niyu inda pag Bagaw Diyus magkun, 'Kang gustu pagmaawaun kamu, ag balaw kailangan niku kanyu hayup kanyu matyun isagda sa kangku.' Nu katunda balaw mana niyu sabihun may kasalanan ti unman nagkasala. 8 Dahil ti sirang pamahari sa sirung kapangyarihan Anak Tawu." 9 Nighit si Hisus nag-ati sa balay tiripnan. 10 May usa ka tawu ati pilay kay kamang. May manga tawu diman siyun kanda gustu tiidan si Hisus. Nakan pinaingana nida siya sa pahaluksu magkun, "Angay aw sa Kasuguan ti magpaayad nu sirang pamahari?" 11 Nagsagut si Hisus magkun, "Una si unu sa kanyu ti may karanidu usa ka bilug bag-u nu nalagpak tunda atag sa bubun nu sa sirang pamahari unman aw lugud kay bawiun? 12 Lalu mahalaga man ti usa ka tawu sa karanidu. Nakan ngani angay ngap sa Kasuguan ti magbuwat mayad nu sa sirang pamahari." 13 Bag-u ngani kay sinabi ni Hisus atag sa tawu magkun, "Hunatan duy kanmu kamang." Kay ngani ihinunat kay kamang, nag-ayad yi ngap parihu maan sa kay usa. 14 Nagluwas ti manga Parisiyu ginan sa balay tiripnan, nagpululungan sida nu kabitay pag ipamatay nida si Hisus. 15 Alam di ni Hisus kanda gayak nakan nighit siya siyun ginan. Aduk pag tawu ti kinmuyug sa kanya. Kay pinaayad niya ti tanan may manga sakit. 16 Dapat kay ibinandu niya mahigpit sa manga tawu kay pinaayad magkun, "Danga bayaan alaman tungkul sa kangku." 17 Nagyari tunda hampay matupad ti Bagaw Diyus kay ipinadakit ni Purupita Isayas magkun, 18 "Inda yi kang suruguun, siya kang gid pinili, Kang gid pagmahalun, lubus kang pagbayaun. Ilubus niku sa kanya kang Ispiritu Banal, pihuun niya ti tanan nasyun tawu nu daut nu mayad. 19 Unman siya paradibati. Maalumanay siya humampang, unman mag-adnugan sa manga dalan kay magbagaw, 20 Unman niya puldun ti tigbi nu nahapay. Unman diman pus-an niya ti sulu una magrapyung, hanggan sa udwaya manalu kay katadlungan. 21 Ag siya gid ti sarigan manga nasyun tawu." 22 Ati katpung dinara nida atag sa kan Hisus ti usa ka lalaki buta buyun waya paman, inapuan labang. Pinaayad ni Hisus tunda pag tawu, magbagaw yi maghiling. 23 Nadulaw ti tanan tawu magkun, "Inda yi aw nguna kay linahi ni Dabid?" 24 Dapat ay pagka nadnugan manga Parisiyu, magkun sida, "Nakan makapalwas manga labang tunda pag tawu, dahil may kapangyarihan siya ginan sa kan Biilsibul, ginan sa hari manga labang." 25 Alam di ni Hisus kanda pag-isipun, nakan kay sinabi sa kanda magkun, "Marangga ti kada kaharian nu udyi magkarausa maglalabanan wadi. Mawayak yi ti banwa una ti magtal-anakan nu udyi magkarasunduan kay manga tawu sa kanda ginan nangarawayan. 26 Nu abi si Satanas magpalwas sa kan Satanas diman, linabanan niya kay sadili, pihu mawayak kay kaharian. 27 Nu abi aku magpalwas manga labang sa kapangyarihan ni Biilsibul, si unu lugud ti nagpakaun kapangyarihan sa kanyu manga tuludluan hampay makapalwas manga labang? Kanda ngap pagbuwatun imaw ti puruyba kuntay kamu salan. 28 Nu bay Ispiritu Diyus ti nagpakaun kapangyarihan sa kangku hampay magpalwas manga labang, kay ibug sabihun rinmas-ug yi sa kanyu kay maghari Diyus. 29 "Nu mabisug pag tawu ti may puun balay, kabitay may makasaka sa siti pag balay hampay umagaw kay butang nu unman gapusun dapu niya kay apu mabisug, bag-u mahimu siya sumaka umagaw kay butang. 30 "Ti unman pabliwa sa kangku, kalaban yi ngap niku. Ti unman umawat sa kangku sa kang magpatipun, imaw ti magwatak. 31 Nakan ngani kang pagsabihun sa kanyu, patawadun di Diyus ti manga tawu una hintay kanda kasalanan una kanda magmuransa, dapat unman patawadun ti tawu magmuransa sa Ispiritu Banal. 32 Una si unu ti bumagaw laban sa Anak Tawu may patawad di dapat ti tawu nu magbagaw laban sa Ispiritu Banal udyi patawadun, una sa kainda katpung pag panahun una hanggan waya aban." 33 Magkun si Hisus, "Nu isipun niyu ti puun kayu mayad hanggan kay burak mayad diman. Nu bay isipun niyu alangan ti puun kayu, daut diman hanggan kay burak. Dahil ginan sa burak pag makilala kay puun nu daut nu mayad. 34 Kamu ga linahi manga udtu adlaw. Kabitay pag masabi niyu ti mayad pag manga baragawun nu kamu ngap daut. Dahil nu hintay ti hinamnu tawu sa kay tagipusuun imaw diman kay pagbagawun. 35 Nu mayad pag tawu mayad diman pag hampang kay pagbulwatun dahil punu kaayadan kay tagipusuun. Nu daut pag tawu, daut waydi kay pagbagawun dahil punu kadautan kay tagipusuun. 36 "Pagsabihun niku sa kanyu nu kaudasan sintinsiya aban may kapanagutan ti manga tawu sa kada bagaw kay binagaw unman may kabuluhan. 37 Dahil ginan sa kanmu bagaw pag makilala kawu unman may kasalanan. Ginan diman sa kanmu bagaw pag mapihu kanmu kadautan." 38 May manga Manugtudlu Kasuguan ag manga Parisiyu magkun sa kan Hisus, "Maisturu, mahimu aw pakakiti nimu kami usa ka tanda ?" 39 Magkun si Hisus, "Daut kamu pag manga tawu unman magtupad sa Diyus. Maghanap kamu tanda dapat unman pakakitan tanda purya lang sa nangyari ati katpung sa kan Purupita Hunas. 40 Nu kabitay si Hunas sa sulud tulu kay yabi tulu ka sirang sa basad tiyan laun pag isda, katunda diman ti Anak Tawu aban sa basad daga sa sulud tulu ka yabi tulu waydi ka sirang. 41 Pagka kaudasan sintinsiya aban kumastigus ti manga taga Ninibi laban sa kanyu. Dahil ti manga taga Ninibi nag-ampu nagpatawad sa kanda manga kasalanan pagka sida nakadnug kan Hunas itinudlu, dapat balaw di ga kan Hunas ti nagsitay kainda sa kanyu. 42 Sa ati katpung pag udas aban ti Rayna ginan sa salatan baliwa kumastigus laban sa kanyu, dahil nagluwang siya ginan sa puun langit hampay patingihan kay kadunungan ni Sulumun. Dapat balaw di ga kan Sulumun ti nagsitay kainda sa kanyu." 43 Magkun si Hisus, "Pagka linmuwas ginan sa usa ka tawu ti labang, maglakaw siya sa manga tigangan daga maghanap kay paraharyan. Nu unman may makitan, 44 mag-isip siya sa kay sadili magkun, mag-uli yi maan aku sa balay niku inighitan. Sa kay pagras-ug niya nakitan niya unman maaw may apu, pinarisan marayaw ti balay. 45 Nakan mag-ati siya magtaban pitu waya maan ka labang daut man sa kanya. Magsulud sida mangulian ati. Nakan ngani makuri man masyadu balaw lang ga kaybi kay uryan pag kahamtangan tunda pag tawu kay inapuan. Katunda diman ti mangyari aban sa daut pag lahi inda." 46 Magbagaw waya si Hisus sa kayamuan tawu, nagras-ug kay ina, kay manga patar-ari. Mag-alagad sida sa luwas balay, gustu nida mihampang sa kanya. 47 May nagsabi sa kanya magkun, "Asan duy sa luwas balay kanmu ina hanggan kanmu manga patar-ari, gustu nida mihampang sa kanmu." 48 Dapat sinabi ni Hisus sa nagbarita sa kanya magkun, "Hintay nguna kang ina, si unu nguna kang manga patar-ari?" 49 Itinudlu niya kay manga tuludluan magkun, "Inda yi ngani kang ina, kang manga patar-ari. 50 Dahil una hintay pag tawu ti magtupad sa kagustuhan niku Ama sa langit, siya gid kang patar-ari lalaki, kang patar-ari babayi, kang ina."
1 Ati katpung pag sirang, nagluwas si Hisus sa balay, tinmukaw sa pangpang danaw. 2 Pagka siniut siya kayamuan tawu, sinmakay siya tinmukaw sa usa ka duunduun maltawan sa danum sa arani saruy, ti manga tawu bay sa saruy di danaw. 3 Bag-u mayamu pag bagay kay itinudlu sa kanda sa manga pahalimbawa. Magkun si Hisus, "May usa ka tawu manugtanman linmakaw hampay mamamgas. 4 Sa kay magpamgas may binhi sinmamad sa saruy dalan. Linmuwang ti manga manuk tinabu tininduk nida tunda pag binhi sinmamad sa saruy dalan. 5 Kay iba nipamgas maaw sa babaw batu sa manipis pag daga. Madali nagtubu tunda dahil manipis lang pag daga. 6 Dapat pagka nasinggitan masyadu yi gid pag init, nalayung yi tunda dahil unman may gamut aba. 7 Kay iba binhi nipamgas sa basad kadugihan. Pagka linmangba ti manga dugi, pinil-it yi ti binhi. 8 Dapat ay ti binhi nipamgas sa mayad pag daga nanguhay, kay butir sa kada uhay may tigmananggatus, may tig-unumpulu ka butir, may tigtatlumpulu. 9 Ti may tuli kailangan pagpatingi." 10 Nagpakarani kay manga tuludluan sa kan Hisus nagpaingana magkun, "Hayga duy pag-ilakaw waya nimu sa pahalimbawa kanmu magpaliwanag sa manga tawu?" 11 Sinmagut si Hisus, "Ipinahintulut sa kanyu ti makatau sa manga katutuuhanan unman nihayag tungkul sa kaharian langit, dapat unman ipinahintulut inda sa kanda. 12 Dahil ti may imaw pakan-an waya lalu waya abunda. Dapat ti unman may imaw, una diit wadi ti sa kanya tabuhun waya bul-un. 13 Magbagaw aku sa kanda sa manga pahalimbawa dahil una magbantay sida unman waydi kumakit. Una magpatingi sida unman diman makadnug ag unman diman waydi makaintindi. 14 Nakan natupad ngani sa kanda ti ipinurupita ni Isayas magkun, 'Magkun ti Panginuun, Una kamu magpakapatingi, unman diman kamu umintindi. Una kamu magpakabantay, unman diman kamu kumakit. 15 Dahil mapuru ti tagipusuun inda pag manga tawu, Makuri makadungug kanda manga tuli, Kanda ipinusik kanda manga mata, Dahil dayu nida ibantay kanda manga mata, Dayu diman ipakidnug kanda manga tuli, Dayu diman waydi nida ipag-intindi kanda pag-iisip. Dayu diman ibalik nida kanda naisipan tag sa kangku hampay mana kang paayadun.' 16 "Pinapaladan kamu Diyus, dahil maghiling yi kanyu manga mata, magdungug kanyu manga tuli. 17 Kang pagsabihun sa kanyu, aduk pag manga purupita hanggan manga matadlung pag manga tawu kaybi magkaibug mana makakit sa kanyu nakitan, dapat unman nakitan nida. Magkaibug sida mana makadnug sa kanyu mag-adnugan, dapat unman nida nadnugan." 18 Magkun si Hisus, "Patingihi niyu ti kahulugan pahalimbawa tungkul sa manugpamgas. 19 Ti manga magpatingi sa tudlu tungkul sa kay paghari Diyus bag-u unman diman kanda naintindihan parihu sida ga manga binhi sinmamad sa saruy dalan. Pagka rinmas-ug si Satanas pag-agawun niya ti ipinamgas ginan sa kanda tagipusuun. 20 Ti waydi ipinahalimbawa sa binhi nipamgas sa babaw batu sa manipis pag daga, tunda ngani ti manga nagpatingi sa Bagaw Diyus bag-u masulung mana kanda naisipan susun yi kanda tinanggap. 21 Dapat maaw unman nidna tunda sa kanda tagipusuun, nakan unman sida dinmugay. Pagka rinmas-ug ti manga kakurian, ti manga pag-unuunu dahil sa Bagaw Diyus, bigla lang inmalinlangan. 22 Tunda waydi pag nipamgas sa madugihan ipinahalimbawa sa tawu magpatingi sa Bagaw Diyus dapat naabala siya sa manga bagay sa babaw daga, mairibgun yi siya sa manga kayamanan, nakan ti Bagaw Diyus udyi may rugar sa kay tagipusuun, udyi binmurak. 23 Ti nipamgas sa mayad pag daga ipinahalimbawa sa manga magpatingi sa Bagaw Diyus bag-u kanda naintindihan. Nagburak sida may tigmananggatus, may tig-unumpulu, may tigtatlumpulu." 24 Itinultul diman ni Hisus inda pag pahalimbawa sa kanda magkun, "Ti kaharian langit kainda nangus. May tawu nagpamgas mayad pag binhi sa kay tanman. 25 Pagka sa yabi naturug ti manga tawu, rinmas-ug kay kalaban, sinabugan niya daut pag ilamnun ti tanman bag-u linmakaw. 26 Pagka tinmubu ti tirigu namurak yi, nabuhi hanggan ti daut pag ilamnun. 27 Nakan nagpakarani ti manga panawuhun sa may puun balay magkun sa kanya, 'Unman aw duy mayad pag binhi kanmu ipinamgas sa kanmu tanman? Bati hayga duy may ilamnun kainda?' 28 Nagsagut kanda amu magkun, 'Usa ka kalaban ti may buwat tunda.' Pinaingana siya niya manga panawuhun magkun, 'Kanmu aw gustu duy ayitun nimi ti ilamnun?' 29 Kay sagut niya, 'Danga duy barang maayit hanggan tirigu. 30 Bay-ani yi lang niyu parihu magdaka hanggan sa ud tig-arani. Sa udas tig-arani aban sabihun niku sa manga manug-ani, 'Tumpuka dap niyu ti manga ilamnun bag-u bugkusa niyu hampay sunugun sa apuy. Bag-u tipuna niyu ti tirigu sa kang palaulian.' " 31 Usa waya ka pahalimbawa kay itinultul ni Hisus sa kanda magkun, "Ti kaharian langit ga butir mutsasa. May tawu nagtanum usa ka butir mutsasa sa kay tanman. 32 Pinakadiit gid tunda sa tanan binhi. Dapat ay pagka dugay ti mutsasa linmangba pinakaabwat sa tanan pag urupiun. Pagka dugay binmaliw ngap ga puun kayu, bag-u mag-apun ti manga manuk sa magkahamyan pag sanga." 33 Nagtultul si Hisus usa maan ka pahalimbawa magkun, "Ti kaharian langit parihu ga pamadaka sa tinapay ilinahuk babayi sa tulu ka pulak arina bag-u naglabtug kay buu pinkul arina." 34 Inda tanan kay itinudlu ni Hisus sa manga tawu. Tanan tanan kay tudlu sa kanda pasay pahalimbawa. 35 Katunda kay binwat niya hampay matupad ti Bagaw Diyus kay ipinadakit purupita magkun, "Bumagaw aku sa kanda sa manga pahalimbawa, Ipakilala niku sa kanda ti manga unman ipinaburayhaw ginan waya sa pagkalalang kalibutan." 36 Bag-u pinauli ni Hisus ti kayamuan tawu. Pagka nagsaka siya sa kay balay, nagpakarani kay manga tuludluan magkun sa kanya, "Ipaliwanag duy nimu sa kanmi kay kahulugan pahalimbawa tungkul sa daut pag ilamnun sa tanman." 37 Sinabi ni Hisus magkun, "Ti magpamgas mayad pag binhi imaw ti Anak Tawu. 38 Ti tanman imaw yi ti kalibutan. Ti mayad pag binhi imaw yi ti manga tawu pagharian Diyus. Ti daut pag ilamnun imaw waydi ti manga tawu pagharian diyablu. 39 Tunda ngani pag kalaban ti nagsabug ilamnun imaw yi ti diyablu. Ti udas tig-arani imaw yi ti katapusan kalibutan. Ti manga anghil ti umani. 40 Nu kabitay pag tipunun ti manga ilamnun bag-u sunugun, katunda ti mangyari aban katpung katapusan kalibutan. 41 Suguun gid Anak Tawu kay manga anghil hampay tipunun nida ginan sa kay pagharian ti tanan magpaturun sa manga iba tabug sa kasalanan hanggan ti tanan magbuwat kadautan, 42 bag-u iyamut sida sa labdaban pag apuy. Ati sida pag man-&nguruynguyan ag mangubut kanda manga ngipun. 43 Ti manga matadlung Rumayaw ga init sa kaharian nida Ama. Ti may tuli kailangan pagpatingi." 44 Magkun si Hisus, "Ti kaharian langit parihu sa yaman nakalubung sa usa ka tanman. Nakutkut tunda usa ka tawu bag-u kay dap maan tinakluban. Sa daka pag kabayaan niya nag-ati siya ipinabili niya ti tanan niya pag kasiyunan bag-u kay binili tunda pag tanman." 45 Magkun si Hisus, "Kumun diman ti kaharian langit parihu sa usa ka manugnigusyu maghanap sa manga mahalaga pag manga batu sa manlut. 46 Pagka nakakit siya usa ka batu sa manlut subra gid kay halaga, nag-ati siya ipinabili niya ti tanan niya pag kasiyunan bag-u kay binili tunda pag batu sa manlut." 47 Magkun si Hisus, "Ti kaharian langit parihu diman sa usa ka daka pag sarap tinaktak sa dagat, nakablay tuhay tuhay pag isda. 48 Pagka napnu kanda ginuyud tag sa saruy. Nanurukaw ti manga tawu hampay piliun ti manga isda. Ti manga mayad pag isda isinukad nida sa buyug, dapat ayinmut nida ti unman may kabuluhan. 49 Katunda diman ti mangyari aban pagka katapusan yi kalibutan. Rumas-ug ti manga anghil, ipablag nida ti manga makasalanan sa manga magpasakup sa Diyus. 50 Bag-u iyamut nida ti manga makasalanan sa labdaban pag apuy. Ati sida pag mannguruynguyan ag mangubut kanda manga ngipun." 51 Kay pinaingana ni Hisus magkun, "Naintindihan yi aw niyu inda kay kahulugan tanan tanan?" Magkun sida, "Hu ngani duy, naintindihan nimi." 52 Magkun siya sa kanda, "Nakan ngani ti kada Manugtudlu Kasuguan nu tuludluan siya sa kaharian langit, parihu siya sa usa ka may puun balay bumulwat manga bag-u pag bagay may daan ginan sa kay hamnuan." 53 Pagka tinultul ni Hisus tunda pag manga pahalimbawa, nighit siya ati ginan. 54 Nag-ati siya sa kay kinadak-anan pag banwa, bag-u nanudlu siya sa kanda balay tiripnan. Naglingut ti manga tawu pagka nakadnug sa kanya. Magkun sida, "Naan ginan pag nakatau inda pag tawu kay kadunungan? Kabitay pagbuwatun niya inda pag makadululaw? 55 Unman aw siya kay anak ni Panday? Unman aw kay ngaran niya ina si Marya? Unman aw sida ni Santiyagu, ni Husi, ni Simun, ni Hudas kay manga patar-ari lalaki? 56 Unman aw sitay diman pag mag-uli kay manga patar-ari babayi? Naan ginan pag bin-ul niya inda pag kapangyarihan?" 57 Nag-alinlangan sida sa kanya. Nakan sinabi ni Hisus sa kanda, "Ti purupita paggalangun di una naan, purya lang sa kay sadili banwa hanggan sa kay manga katawuhan." 58 Unman siya may nabuwat ati mayamu pag manga makadululaw dahil sa unman sida magpaniwala.
1 Ati katpung nakaras-ug sa kan Hari Hirudis ti manga barita tungkul sa kan Hisus. 2 Kay sinabi sa kay manga suruguun magkun, "Tunda pag tawu imaw yi si Huwan Manugtulbaw binuhi uman nakan may kamaskihan siya magbuwat manga makadululaw." 3 Dahil si Hirudis ngani ti nagpadakup, nagpagapus ag nagpapirisu sa kan Huwan dahil sa kan Hirudiyas, kay asawa ni Pilipi kan Hirudis patar-ari. 4 Sinabi nakan ni Huwan sa kan Hirudis, "Unman mahimu umagaw kawu sa asawa nimu patar-ari." 5 Nakan gustu mana ni Hirudis ipamatay si Huwan, dapat magkadala siya sa manga kayamuan Hudiyu, dahil kilala nida purupita si Huwan Manugtulbaw. 6 Pagka nagras-ug ti sirang kay pag-alalahanun ni Hirudis ka kapanganakan, nagsayaw sa atubangan manga bisita ti anak babayi ni Hirudiyas. Binaya gid ni Hirudis ti daraga. 7 Nakan isinumpa niya ipakaun niya sa daraga una hintay kay hagadun. 8 Sa udyuk niya ina sinabi daraga, "Gustu niku taynguna yi kanmu ipakaun duy sa kangku kay ulu ni Huwan Manugtulbaw sa basad pinggan." 9 Nagruku gid ti hari, dapat dahil kay sumpa nadnugan niya manga bisita, nagsugu siya hampay ipakaun sa daraga kay hinagad. 10 Nakan pinlud nida kay liug ni Huwan Manugtulbaw sa pirisuhan. 11 Isinukad nida sa pinggan ti ulu bag-u ipinakaun sa daraga. Dinara maan daraga tag sa kay ina. 12 Pagka rinmas-ug kay manga tuludluan ni Huwan, bin-ul nida kay bangkay, kanda ilinbung. Bag-u nag-ati sida sa kan Hisus ibinarita nida ti nangyari. 13 Pagka nakadnug si Hisus kanda barita, nagsakay siya sa duunduun nag-ati siya usa usa atag sa pangawakawaan. Pagka naalaman manga tawu, naglakaw sida ginan sa manga banwa, nag-usig sida sa kanya. 14 Pagka dinmugsun si Hisus sa duunduun ati sa baybay, nakitan niya ti kayamuan tawu. Naawa gid siya sa kanda, pinaayad niya ti may manga sakit sa kanda. 15 Pagka malambung yi, nagpakarani sa kan Hisus kay manga tuludluan magkun, "Pangawakawaan duy inda pag rugar ag arani yi magkapsa ti init. Suguun duy nimu ti manga tawu atag sa manga baryu hampay makabili sida kanda karan-unun." 16 Sinabi ni Hisus, "Unman duy kailangan sida umatag. Kamu yi ngap ti pagpakaun karan-unun sa kanda." 17 Magkun sida, "Unman may karan-unun kita sitay nu unman lima lang ka bilug tinapay, duwa lang ka isda." 18 Sinabi ni Hisus, "Daran-a niyu sitay tag." 19 Pagka pinatukaw niya ti kayamuan tawu sa babaw ilamnun, bin-ul niya ti lima ka tinapay ag ti duwa ka isda. Nagtangda siya sa langit, nagpasalamat sa Diyus. Bag-u pinikapika niya ti manga tinapay bag-u ipinakaun niya sa manga tuludluan, kanda maan ipinakaun sa manga tawu. 20 Nagkaun sida tanan tanan nangabsug. Bag-u tinipun niya manga tuludluan kay subra, kanda isinukad sa luwak, sampulu may duwa waya ka luwak punu manga pinikapika tinapay. 21 Manga lima ka libu ka lalaki ti nagkaun tuhay waya ti manga babayi manga anak. 22 Kadaka dinalidali ipinasakay ni Hisus kay manga tuludluan sa duunduun ag ipinauna tag sa baliw dipay danaw bag-u pinauli niya ti kadamlan tawu. 23 Pagka nuli yi ti manga tawu, usa usa wadi si Hisus nag-ati sa bantud hampay mandarangin. Hanggan di yabi siya usa usa ati sa bantud. 24 Dapat ay ti duunduun sa karaw-an danaw pagpa-&kahampakun balud, dahil pagsarungsungun bagyu. 25 Pagka tag yi magkasurip, inusig sida ni Hisus lakaw sa babaw danum. 26 Pagka nakitan nida siya maglakaw sa babaw danum nagkaraaburiduhan sida magkun, "Hilum mamaw." Nanwarawawan sida sa dala. 27 Dapat kadaka binmagaw si Hisus sa kanda, "Pagmatutum kanyu naisipan, aku di. Danga magkadala kamu." 28 Nagsagut si Pidru, "Panginuun, nu tutuu kawu yi gid asan, paasantaga aku sa kanmu sa babaw danum." 29 Magkun si Hisus, "Abala kawu." Dinmugsun si Pidru ginan sa duunduun linmakaw ngani sa babaw danum atag sa kan Hisus. 30 Dapat pagka nakitan niya mabisug ti bagyu, nadala siya. Pagka siya mag-&italnud yi sa danum, nagtawag siya magkun, "Panginuun, bawia nimu aku." 31 Bag-u ihinunat ni Hisus kay kamang ag hiniyaptan niya si Pidru. Magkun si Hisus, "Kawu duy diit lang maaw kanmu sarig. Hayga kawu nag-alinlangan?" 32 Pagka sinmakay sida sa duunduun, hinmubung yi ti durus. 33 Nagdayaw sa kanya ti manga tawu sa duunduun magkun, "Tutuu kawu yi ngani ti Anak Diyus." 34 Pagka sida nagdipay yi sa danaw, nagdugsun sida sa duunduun ati sa daga Ginisarit. 35 Ti taga ati pag manga tawu magkilala yi sa kan Hisus. Susun yi ibinarita nida sa manga tawu sa kanda palitut pag manga rugar kay pagras-ug ni Hisus nakan dinara nida atag sa kanya ti tanan may manga sakit. 36 Nanhagad sida pahintulut sa kanya hampay makahikap lang ti may manga sakit sa sidsid niya pamaunib baLukas sadsad. Ti tanan nakahikap naayadan yi.
1 Pagka dugay may nagluwang tag sa kan Hisus manga Parisiyu hanggan manga Manugtudlu Kasuguan ginan sa Hirusalim. Kanda pinaingana si Hisus magkun. 2 "Hayga unman pagtupadun nimu manga tuludluan ti patayak layi nita manga kaumputan? Magkaun sida udwaya nakaugas kanda, kamang angay sa ibinilin nita kaumputan." 3 Nagsagut si Hisus magkun, "Kamu bay hayga unman magtupad sa kay sugu Diyus? Kanyu ngap pagpahalgaan ti manga patayak layi niyu kaumputan. 4 Sinabi Diyus galanga nimu kanmu ama kanmu ina. Tigmuransa sa kay manga ama manga ina kailangan matyun gid. 5 Dapat ay kanyu ngap pagsabihun nu may tawu magkun sa kay ama sa kay ina, 'Una hintay ti iawat mana niku sa kanmu kang yi ipinakaun sa Diyus', 6 udyi kailangan siya maggalang sa kay ama sa kay ina. Dahil sa kanyu minana patayak layi kaumputan, unman yi ngap pagpahalgaan niyu ti Bagaw Diyus. 7 Manga magpabalhinguun lang kamu. Bukun ngap salan kay ipinurupita ni Isayas tungkul sa kanyu magkun, 'Magkun ti Diyus, 8 Inda pag nasyun tugka lang sa bagaw kanda maggalang sa kangku, kanda tagipusuun arayu di sa kangku. 9 Kanda magsamba sa kangku unman may kabuluhan, Dahil ti bilin tawu kanda pag-itudlu kuntay bilin Diyus.' " 10 Ipinakarani ni Hisus ti manga tawu sa kanya, bag-u sinabi niya sa kanda, "Pagpatingi kamu, intindiha kang pagsabihun. 11 Balaw ti ipagsubu sa bibig tawu ti mag-uring sa kanya sa kay magbantay Diyus, nu ud tigluwang ngap ginan sa kay bibig imaw tig-uring sa kanya." 12 Nagpakarani kay manga tuludluan, magkun sida sa kanya, "Alam aw nimu duy, nahaplitan ti manga Parisiyu sa kanmu sinabi." 13 Sinmagut siya magkun, "Ayitun ti kada halaman balaw itinanum niku Ama sa langit. 14 Pabay-ani niyu sida, buta pag manga manug-abat sida. Nu ti buta umabat sa kay kaparihu buta, minsan sida malagpak sa abwat." 15 Magkun si Pidru sa kanya, "Ipaliwanag duy nimu sa kanmi ti pahalimbawa." 16 Sinabi ni Hisus, "Kamu hanggan aw lugud unman mag-intindi? 17 Unman aw alam niyu una hintay ti ipagsubu sa bibig dayun sa tiyan ipag-ugat. 18 Dapat ay ti magluwang sa bibig ginan ngap sa tagipusuun. Tunda yi ngani tig-uring sa tawu. 19 Dahil ginan ngani sa tagipusuun ti manga daut pag naisipan, ti maglibun sa tawu, ti mag-uragin, ti magpamabayi, ti magpanlalaki, ti magtakaw, ti magkastigus sa bukun tutuu, ti magmuransa. 20 Tunda yi ngani ti mag-uring sa tawu sa kay magbantay Diyus. Dapat nu magkaun unman nakaugas kamang angay sa patayak layi kaumputan, balaw duy makauring tunda sa tawu sa kay magbantay Diyus." 21 Nighit si Hisus ati ginan, nag-atag siya sa rugar arani sa Tiru hanggan Sidun. 22 May usa ka babayi taga Kanaan, siyun waydi pag mag-uli. Nagluwang siya nagtawag daka sa kan Hisus magkun, "Kawu duy ti linahi ni Dabid, kaawai nimu aku. Kang anak babayi inapuan labang, masyadu gid siya pagpakurian." 23 Dapat unman gid nagsagut si Hisus. Nagpakarani kay manga tuludluan magkun sa kanya, "Sabihi duy nimu siya danga yi siya sitay, maingay." 24 Magkun si Hisus, "Sinugu aku para lang sa manga karanidu naliyam sa nasyun Israil." 25 Dapat dinmulud ti babayi linmuhud sa kay atubangan ni Hisus magkun, "Awati gid duy aku." 26 Magkun si Hisus, "Unman kailangan bul-un ti karan-unun manga anak hampay ibahug sa idu." 27 Magkun ti babayi, "Ungud gid duy. Dapat una manga ugbun magkaun diman manga rukruk nalagpak sa magkaun nida apu." 28 Nakan sinabi ni Hisus sa kanya, "Daka gid maaw duy kanmu pagsarig. Matupad yi ngapu kanmu paghagadun." Siyun yi katpung pag udas inmayad nagap kay anak. 29 Nighit si Hisus ati ginan pag daga bag-u binmalik maan siya tag sa baybay danaw Galiliya. Nag-ati siya sa bantud bag-u tinmukaw siya. 30 Naglinuwang ti masyadu mayamu tawu may taban manga pilay, manga buta, manga pungkul, manga buyun, mayamu waya ti may manga sakit. Pagka ipinakarani nida sa atubangan ni Hisus ti may dahilan kay pinaayad sida. 31 Nadulaw gid ti manga tawu, pagka nakitan nida magbagaw ti manga buyun, naayadan yi ti manga pungkul, maglakaw yi una ti manga pilay, maghiling yi ti manga buta. Nakan nagdayaw sida sa Diyus manga taga Israil. 32 Tinawag ni Hisus kay manga tuludluan, kay sinabi, "Magkaawa aku sa manga tawu inda, dahil tulu yi ka sirang taynguna tugka kaibahan niku sida. Udyi sida may makaun. Dayu niku sida paulian magkalun-us, barang nu sa dalan magpandulum yi ti mata sa lun-us." 33 Magkun ti manga tuludluan, "Naan duy kita sitay sa pangawakawaan pag may mab-&ul karan-unun kumang-ud sa kainda kay kayamu pag manga tawu?" 34 Kay paingana sa kanda, "Pira ka bilug kanyu tinapay asan?" Kay sagut nida, "Pitu duy ka bilug may manga dariit pag isda pira pira." 35 Pinatukaw ni Hisus ti manga tawu sa daga. 36 Bin-ul niya ti pitu ka tinapay hanggan ti manga isda. Pagka nakapasalamat siya sa Diyus, kay pinikapika tunda bag-u kay ipinakaun sa kay manga tuludluan. Kanda maan ipinakaun sa manga tawu. 37 Nagkaun sida tanan nangabsug. Pagka kanda tinipun ti nasawad pinikapika tinapay punu ti pitu ka luwak daraka. 38 Upat ka libu ka lalaki ti nagkaun purya lang sa manga babayi hanggan manga anak. 39 Bag-u di pinauli ni Hisus ti manga tawu, bag-u siya sinmakay sa duunduun atag sa daga Magadan.
1 May nagpakarani sa kan Hisus manga Parisiyu hanggan Sadusiyu. Gustu nida pasalanun si Hisus nakan hinagadan nida siya magpakakit tanda ginan sa langit. 2 Dapat sinabi ni Hisus magkun, "Pagka malambung yi magkun kamu, 'Magpandangga ti langit, uminit aldaw.' 3 Pagka surip surip kanyu pagsabihun, 'Umuran taynguna dahil mag-aguhum maan ti langit.' Magkakilala di niyu ti lakaw panahun, dapat unman maaw niyu makilala ti manga tanda taynguna pag udas. 4 Daut kamu pag manga tawu, unman matinupadun sa Diyus. Maghanap aw kamu tanda? Dapat unman pakakitan kamu tanda purya lang sa nangyari sa kan Hunas." Bag-u kay tinayakan yi lang sida siyun. 5 Pagka nagdipay sa danaw ti manga tuludluan, nalimtan nida kanda balun. 6 Magkun si Hisus sa kanda, "Pag-aman kamu sa pamadaka sa tinapay manga Parisiyu manga Sadusiyu." 7 Bag-u nagharampangan ti manga tuluduan magkun, "Unman kita may dara kanta balun nakan sinabi niya tunda." 8 Alam di ni Hisus nakan pinaingana niya sida, "Hayga kamu magharampangan unman may balun? Kurang maaw kanyu sarig. 9 Udwaya aw lugud kamu nakaintindi? Nalimtan aw lugud niyu sa kang nagpikapika lima ka tinapay hampay pakan-an ti lima ka libu tawu. Pira ka luwak tinapay kay subra kanyu tinipun? 10 Katunda diman ti pitu ka tinapay para sa upat ka libu tawu. Pira ka luwak daraka punu manga tinapay ti sinmubra kanyu tinipun? 11 Unman aw lugud niyu naintindihan kang pagsabihun bukun tungkul sa tinapay. Pag-aman baga kamu sa pamadaka sa tinapay manga Parisiyu manga Sadusiyu." 12 Bag-u naintindihan nida kay pagsabihan maaw sida pag-aman sa tudlu manga Parisiyu hanggan manga Sadusiyu ag bukun sa pamadaka lang sa tinapay. 13 Sa kay pagras-ug ni Hisus sa arani banwa Sisariya Pilipi, pinaingana niya kay manga tuludluan magkun, "Hintay ti hantup manga tawu nu si unu ti Anak Tawu?" 14 Nagsagut sida, "Magkun ti iba sa kanda kawu si Huwan Manugtulbaw. Magkun maan ti manga iba, si Ilyas kawu. May magsabi waya kawu si Hirimyas, aw ngatay usa sa manga purupita." 15 Nagpaingana si Hisus sa kanda, "Nu sa kanyu waydi, hintay kanyu isip nu si unu aku?" 16 Sinmagut si Simun Pidru magkun, "Kawu duy ti pinili Diyus Manugribri pag Hari, ti Anak Diyus buhi." 17 Nagsabi si Hisus sa kanya, "Pinapaladan kawu duy, Simun anak ni Hunas, dahil inda pag katutuuhanan unman tawu ti nagpakilala sa kanmu nu unman kang Ama sa langit. 18 Kang pagsabihun sa kanmu, kawu si Pidru, kay ibug sabihun batu. Sa babaw inda pag batu ipatindug niku kang iglisya. Una ti kapangyarihan kamatayan unman makapanalu sa iglisya niku. 19 Ipakaun niku sa kanmu ti manga susi pamukas sa kaharian sa langit. Ti kanmu ginapus sa babaw daga, gapusun diman sa langit. Ti kanmu linbadan sa babaw daga, lubadan diman waydi sa langit." 20 Bag-u mahigpit gid binilinan ni Hisus kay manga tuludluan danga pagsabiha una sa kantapu kuntay siya ti pinili Diyus Manugribri pag Hari. 21 Siyun ginan nagpaalam yi si Hisus sa kay manga tuludluan kailangan siya umati sa Hirusalim. Pagka ati pakurian siya masyadu manga paggurangunun sa nasyun, manga pangulu manug-&asiwa balay Diyus hanggan manga Manugtudlu Kasuguan bag-u kanda ipamatay siya. Dapat sa ikatlu pag sirang mabuhi maan siya uman. 22 Magkun si Pidru sa kan Hisus, "Abala dapu duy kawu." Bag-u tinamyaw niya si Hisus magkun, "Danga mana ipahintulut Diyus tunda. Panginuun, dayu gid mangyari tunda sa kanmu." 23 Napasrangu si Hisus sa kan Pidru magkun, "Pagpakarayu yi kawu, Satanas. Mag-ampara kawu sa kang turunu. Ti kanmu pag-isipun bukun angay sa Diyus nu unman angay lang sa tawu." 24 Bag-u sinabi ni Hisus sa kay manga tuludluan, "Nu may tawu magkaibug magkuyug sa kangku, paglimti niya ti angay sa kay sadili, pas-ana kay kurus bag-u pagkuyug sa kangku. 25 Nu ti tawu magkaibug magpakalawig kay kinabuhi, maduraan ngap siya buhi. Dapat ay una hintay ti nabul-an kay kinabuhi dahil sa kangku, siya yi ngapu makamana buhi. 26 Hintay lugud ti makinabangan tawu una maapu niya ti bilug kalibutan, nu kay kinabuhi ti kabaydanan? Hintay ti ibayad tawu hampay bawiun maan niya kay buhi? 27 Dahil udyi dugay Rumas-ug yi ti Anak Tawu may mamaski pag kapangyarihan niya Ama, kaibahan niya kay manga anghil. Ati katpung pag udas gantihan niya ti kada tawu angay sa kay binwat. 28 Kang pagsabihun sa kanyu, ti iba sa kanyu sitay dayu mamatay hanggan sa udwaya makitan nida ti Anak Tawu humiyaput yi sa kay karampatan maghari.
1 Pagka nakalawuy manga unum ka sirang, tinaban ni Hisus si Pidru hanggan sida ni Santiyagu ni Huwan magtar-ari. Sida upat nag-atag sa bantud abwat. 2 Pagka sida siyun nakitan nida nagtuhay gid kay histuda ni Hisus. Kay uyahun nagsinglaw ga init, kay manga rutay ga magsiriaksiak yi sa kay kalagti. 3 Bigla nakitan nida sida ni Muysis ni Ilyas maghampang sa kan Hisus. 4 Nakan ngani magkun si Pidru tabug sa kan Hisus, "Panginuun, mayad gid maaw duy kita sitay. Nu kanmu gustu, bumuwat aku tulu ka payag sitay, kay usa sa kanmu, kay usa sa kan Muysis, kay usa sa kan Ilyas." 5 Sa kay di waya magbagaw hinamuyan sida masinay pag rurum. May nagbagaw ati ginan sa rurum magkun, "Inda kang pagmahalun pag Anak, siya lubus kang pagkaawaan. Patingihi gid niyu siya." 6 Pagka nakadnug ti manga tuludluan tunda pag bagaw, napadapa sida sa daga ag lubus sida nadala. 7 Dapat nagpakarani si Hisus sa kanda bag-u kay kinumit magkun, "Pagtindug duy kamu. Danga kamu magkadala." 8 Pagka nagbantay sida udyi may nakitan sida nu ud si Hisus lang. 9 Sa kanda maglus-ug ginan sa bantud sinabi ni Hisus sa kanda magkun, "Danga dapu sabihun niyu una sa kantapu ti kanyu nakitan hanggan sa udwaya mabuhi uman ti Anak Tawu." 10 Pinaingana siya niya manga tuludluan magkun, "Hayga duy pagkumnun manga Manugtudlu Kasuguan kuntay kailangan dapu sumitay si Ilyas?" 11 Sinmagut si Hisus, "Sumitay ngani si Ilyas hampay kay ialistu ti tanan manga bagay. 12 Dapat kang pagsabihun sa kanyu, nagsitay yi ginan si Ilyas, dapat unman nakilala siya manga tawu. Kanda binwat sa kanya ti nagustuhan nida. Katunda diman waydi pakurian nida aban ti Anak Tawu." 13 Bag-u nasalman niya manga tuludluan si Huwan Manugtulbaw ti pagturunuhun ni Hisus. 14 Pagka sa lawud yi maan sida, kanda rinas-ugan mayamu gid pag tawu. Nagpakarani sa kan Hisus ti usa ka lalaki nagluhud sa kay atubangan magkun, 15 "Duy, kaawai gid nimu kang anak lalaki. Magkatigbak siya, masyadu magkakurian, dahil nu kas-a siya magkagpu atag sa apuy. Nu kas-a magkalagpak atag sa basad danum. 16 Kang yi dinara siya atag sa kanmu manga tuludluan, dapat unman nakaya nida paayadun." 17 Sinabi ni Hisus magkun, "Kamu supakil pag manga tawu, manga unman may pagsarig. Kabitay kadugay kailangan aku kanyu kaibahan? Kabitay waya lugud kadugay kamu kang pagtiisan? Daraha niyu ti anak sitay tag." 18 Pagka binagawan ni Hisus ti anak, nagluwas ginan sa kanya ti labang. Susun naayadan yi ti anak. 19 Pagka naayadan yi ti anak, nagpakarani ti manga tuludluan sa kan Hisus, nagpaingana sa kanya pagka unman may nakadnug iba, magkun, "Hayga nguna duy unman nakaya nimi nipalwas ti labang?" 20 Nagsagut siya magkun, "Dahil kurang duy kanyu sarig. Pagsabihun niku sa kanyu, nu kanyu sarig ga butir mutsasa lang mana kay kadaka, mahimu sabihun niyu sa inda pag bantud, 'Pag-ighit kawu sitay ginan', bag-u umighit yi ngani. Nu katunda, ti tanan bagay makaya niyu mabuwat. 21 Dapat inda pag kalasi labang unman mipalwas nu unman sa panab-anan darangin ag sa unman maghandum karan-unun." 22 Pagka nagtipun sa Galiliya ti manga tuludluan, magkun si Hisus sa kanda, "Udyi dugay ti Anak Tawu ipabahala yi sa manga tawu, 23 bag-u kanda matyun siya, dapat mabuhi maan siya sa ikatlu pag sirang." Pagka nadnugan nida tunda, masyadu sida nagruku. 24 Pagka rinmas-ug sida ni Hisus sa Kapirnaum, nagpakarani sa kan Pidru ti manga manunukut buhis tungkul sa balay Diyus. Pinaingana si Pidru, "Unman aw magbayad buhis atag sa balay Diyus kanmu maisturu?" Magkun si Pidru, 25 "Magbayad ay." Pagka nagsaka siya sa balay, susun pinaingana siya ni Hisus magkun, "Hintay nguna sa kanmu isip, Simun, sa kantapu nguna pag magsukut bayad sa manga lisinsya ag manga buhis ti manga hari sa babaw daga? Ngatay sa kanda manga anak aw ngatay sa manga iba tawu?" Nagsagut si Pidru, 26 "Sa manga iba tawu duy." Magkun si Hisus, "Nu katunda unman pagsuktan bayad kay manga anak. 27 Dapat ay una katida, pag-atag kawu sa danaw, itaplik nimu kanmu banwit. Bul-a nimu ti kabag-u nimu bulay pag isda, pangangaha nimu kay bibig bag-u may makitan kawu usa ka kuwarta pilak. Bul-a nimu tunda ibayad nimu sa buhis nita duwa hampay unman sida may ikadaut sa kanta."
1 Ati katpung nagpakarani sa kan Hisus kay manga tuludluan pinmaingana magkun, "Si unu nguna duy ti pinakamataas sa kaharian langit?" 2 Kan Hisus tinawag ti usa ka anak kay ipinatindug sa kanda atubangan. 3 Magkun siya, "Kang pagsabihun sa kanyu inda, nu unman umanun kanyu buut ag pumarihu sa manga anak, unman gid makapasakup kamu sa kaharian langit. 4 Nakan ti tawu nu magpakumbaba parihu sa inda pag anak, siya yi ngani ti pinakamataas sa kaharian langit. 5 Una hintay tigtanggap sa tawu mapinakumbabaun ga anak dahil sa kangku, aku yi ngap kay tinanggap." 6 Sinabi ni Hisus, "Ti mayad waya pag tawu nu higtan bitinan galingan pag batu kay liug bag-u ilagpak sa abasad pag dagat, sa ud pumaturun siya atag sa kasalanan sa usa sa inda pag manga mapinakumbabaun magsarig sa kangku. 7 Masyadu makuri ti kahamtangan sitay sa babaw daga dahil sa paturun sa manga tawu tag sa kasalanan. Balaw madura hanggan aban ti manga paturun tag sa kasalanan dapat madala gid masyadu kay patabgan tawu nu siya ti nagpaturun atag sa kasalanan. 8 "Nu kanmu kamang una lulud tigpaturun sa kanmu tabug sa kasalanan, pulda yi nimu tunda yamtan yi. Mayad waya nu Rumas-ug kawu sa langit may pulud ngatay kamang ngatay lulud, sayang waya nu kawu may duwa ka kamang, may duwa ka lulud bag-u iyamut sa udyi magkapsa pag apuy hanggan waya aban. 9 Nu waydi kanmu mata tigpaturun sa kanmu tabug sa kasalanan, luwata nimu yamtan yi. Mayad waya nu kawu Rumas-ug sa langit bulag kanmu usa ka mata. Sayang waya nu kawu may duwa ka mata bag-u iyamut sa udyi magkapsa pag apuy hanggan waya aban." 10 Sinabi ni Hisus magkun, "Ingatan niyu sa danga niyu ipasipala una lang usa sa manga mapinakumbabaun inda. Kang pagsabihun gid sa kanyu, ati sa langit kanda manga anghil pirmi sa atubangan niku Ama sa langit. 11 Dahil nagsitay ti Anak Tawu hampay kay iribri ti manga nadura. 12 "Hintay nguna sa kanyu isip ti buwatun usa ka tawu may usa ka gatus karanidu, nu nagtalang kay usa? Unman aw lugud kay lang tayakan ti siyampulu may siyam ka bilug karanidu magharab sa kabantudan hampay kay ligawun ti nagtalang? 13 Kang gid pagsabihun sa kanyu, pagka nakitan niya tunda, subra gid kay kabayaan sa tunda pag usa ka bilug karanidu, balaw lang ga sa siyampulu may siyam ka bilug unman nagtalang. 14 Katunda diman balaw gustu niku Ama sa langit midamhak una lang usa sa inda pag manga mapinakumbabaun." 15 Sinabi ni Hisus magkun, "Nu kanmu patar-ari magbuwat kasalanan sa kanmu, pag-ati kawu sa kanya, hampangun nimu siya kamu lang duwa. Nu magpaniwala siya sa kanmu, nabawi nimu kanmu patar-ari. 16 Dapat nu unman siya magpaniwala sa kanmu, tumaban waya kawu usa una duwa ka tawu hampay ti tanan hinampangan niyu balaw mapahimudil nu duwa ngatay tulu ti nakadnug. 17 Nu unman siya maniwala sa kanda, sabiha yi nimu sa iglisya. Nu unman gid siya maniwala sa iglisya, ipaparihu nimu siya sa manga unman magsarig sa Diyus ag sa manga manunukut buhis. 18 "Kang pagsabihun sa kanyu, ti ginapus niyu sitay sa babaw daga, gapusun hanggan sa langit. Ti linbadan niyu sitay sa babaw daga, lubadan hanggan sa langit. 19 "Kang pagsabihun waya sa kanyu nu ti duwa sa kanyu sitay sa babaw daga magkausa sa una hintay pag bagay kanyu idarangin, tupadun tunda sa kanyu niku Ama sa langit. 20 Dahil una naan nu may duwa una tulu ka tawu magtiripun ag magpasakup sa kangku, siyun diman aku kaibahan nida." 21 Sa ati katpung nagpakarani si Pidru nagpaingana sa kan Hisus magkun, "Panginuun, manga pira ka pagpatawad niku sa kang patar-ari nu paulit-ulit siya magkasala sa kangku? Pitu aw duy ka pagpatawad?" 22 Nagsagut si Hisus magkun, "Balaw kang pagkumnun tugka lang sa pitu, nu unman pitumpulu ka pitu ngap ka pagpatawad. 23 Dahil ti kaharian langit kainda nangus. Inisip usa ka hari pabayadun niya kay manga panawuhun may utang sa kanya. 24 Kay kabag-u dinara tag sa kanya ti usa ka tawu may utang sampulu ka milyun pisus. 25 Pagka siya unman may ibayad, nagbilin kay amu ipabili siya hanggan kay manga asawa, manga anak hanggan ti tanan nida kasiyunan hampay makabayad sa kay utang. 26 Napadapa nanuyu pag tawu sa atubangan niya amu magkun, 'Pakan-i waya duy aku rugar. Bayadan di niku ti tanan inutang niku sa kanmu.' 27 Naawa gid kay amu sa tunda pag panawuhun nakan pinauli yi siya sa kay balay, ag pinatawad siya sa kay manga utang. 28 "Dapat ay sa kay mag-uli tunda pag panawuhun nagkabta sa kay kaparihu panawuhun may utang sa kanya lima ka gatus pisus. Dinusmugan niya tunda pag tawu kinuga kay tubug dungan kay bagaw magkun, 'Pagbayad kawu kanmu utang.' 29 Napadapa nanuyu siya sa atubangan niya kaparihu panawuhun magkun, 'Pakan-i duy nimu aku rugar, bayadan di niku ti tanan inutang niku sa kanmu.' 30 Dapat unman nagpayag kay kinautangan. Bagkus ngap ipinapirisu niya hanggan sa ud makabayad. 31 "Pagka nakitan niya manga kaparihu panawuhun ti nangyari, masyadu sida nagruku. Nag-ati sida sa kanda amu, kanda isinumbung ti tanan nangyari. 32 Nakan ipinab-ul siya niya amu. Magkun kay amu, 'Kawu luku gid maaw pag panawuhun. Pinatawad yi niku kanmu utang tanan tanan dahil kawu nanuyu sa kangku. 33 Unman aw lugud kailangan maawa diman kawu sa kanmu kaparihu panawuhun ga kang diman naawa sa kanmu?' 34 Nagalit gid kay amu, nakan ipinapirisu ti panawuhun hampay pakurian siya hanggan sa ud mabayadan niya kay utang. 35 Katunda diman waydi kay buwatun sa kanyu niku Ama sa langit nu balaw lubusan patawadun niyu kanyu patar-ari."
1 Pagka nakatapus si Hisus tunda pag manga paliwanag, nighit siya ginan sa Galiliya, nag-ati tabug sa daga Hudiya, dipay sapa Hurdan. 2 Dinasun siya kayamuan tawu, nakan pinaayad niya ati ti may manga sakit. 3 May manga Parisiyu nagpakarani sa kan Hisus, pinaingana nida sa pahaluksu magkun, "Angay aw nguna sa Kasuguan ni Muysis nu tayakan lalaki kay asawa babayi una diit daka pag kabagayan?" 4 Nagsagut si Hisus, "Unman aw lugud magkabasa niyu sa Kasuratan magkun, 'Sa kabag-u linalang sida Diyus lalaki ag babayi.' 5 Magkun ti Diyus, 'Nakan tayakan lalaki kay ina kay ama, magpausa siya sa kay asawa babayi bag-u sida usa lang ka nayi.' 6 Nakan sida balaw yi duwa, nu unman usa yi lang. Nakan ti pinausa Diyus, danga pagbulaga tawu." 7 Pinaingana maan siya manga Parisiyu, "Bati hayga may bilin si Muysis pakan-an lalaki kay asawa babayi kasuratan sa kanda magtarayakan, nu tulakun yi ti babayi." 8 Magkun si Hisus, "Dahil sa maganit gid waydi kanyu tagipusuun, nakan pinasibut-an lang waydi ni Muysis tulakun niyu kanyu asawa babayi. Dapat balaw katida ginan sa kabag-u pagka linalang Diyus ti tawu. 9 Nakan ngani kang pagkumnun sa kanyu, una si unu pag lalaki ti magtulak sa kay asawa nu unman ginan sa panlalaki bag-u mangasawa uman sa iba, nanguragin yi siya. Manguragin diman ti lalaki nu mangasawa sa babayi ginan yi sa asawahan." 10 Sinabi niya manga tuludluan sa kanya, "Nu katunda ti kahamtangan lalaki sa kay asawa babayi, mayad yi lang nu udyi nag-asawa." 11 Nagsagut si Hisus, "Unman tanan makatanggap tunda, nu unman tunda lang pag manga tawu ti ihinanda Diyus. 12 Dahil may tuhay tuhay pag dahilan nu hagya may manga lalaki unman makaasawa. Kay iba dahil sa kanda kaugalian pagkatawu. Kay iba dahil sa binwat iba tawu sa kanda, nakan sida unman makaasawa. May manga tawu diman nanlangdayan angay sa kanda pagsirbi sa kaharian langit. Ti tawu nu makatanggap tunda kailangan tanggapa, niya." 13 May manga nagdara manga anak tabug sa kan Hisus hampay nangus kup-an sida niya kamang kay idarangin. Dapat sinungyaw sida niya tuludluan. 14 Dapat ay magkun si Hisus, "Pabay-ani duy niyu ti manga anak magpakarani sa kangku, danga yi niyu pag-irangi. Dahil ti ga manga anak imaw ti pagharian Diyus." 15 Kinup-an ngani niya kamang ti manga anak. Bag-u nighit siya. 16 May lalaki napakarani sa kan Hisus namaingana magkun, "Maisturu, hintay nguna duy pag kaayadan kang buwatun hampay makatanggap aku buhi unman may katapusan?" 17 Nagsagut si Hisus magkun, "Hayga aku kanmu pagpaingan-un nu hintay ti mayad? Usa lang ti mayad. Nu gustu nimu makatanggap buhi, tupada nimu ti Kasuguan." 18 Nagpaingana siya, "Hintay gid nguna pag manga kasuguan?" Nagsagut si Hisus magkun, "Danga kawu maglibun sa kanmu kaparihu, danga kawu magpanguragin, danga kawu magtakaw, danga kawu magpudil sa kanmu magkastigus. 19 Galanga nimu kanmu ama kanmu ina. Mahala nimu kanmu kaparihu tawu ga kanmu diman pagmahal sa kanmu sadili." 20 Magkun ti lalaki, "Nasunud yi duy niku tunda tanan tanan." 21 Magkun maan si Hisus, "Nu kanmu gustu udyi kawu may kakurangan sa kay magbantay Diyus, pag-ati kawu pabilihan nimu kanmu kasiyunan bag-u ayaw-ayawa nimu kay kabilyanan matupad nimu tunda, pagsitay maan kawu pagkuyug sa kangku." 22 Pagka kay nadnugan lalaki inda pag bagaw, maruku kay nighit dahil masyadu gid siya mayaman. 23 Magkun si Hisus sa kay manga tuludluan, "Pagsabihun niku sa kanyu, makuri gid pumasakup ti manga mayaman sa kaharian langit. 24 Kang waya pagsabihun sa kanyu, malpus waya ti kamilyu sumuyuk sa sulat dayum, makuri man ti mayaman magpasakup sa kay maghari Diyus." 25 Pagka nasaydan nida inda, lalu nadulaw kay manga tuludluan, nakan nagpaingana sida magkun, "Nu katida si unu nguna ti makaribri?" 26 Tinurun sida ni Hisus bag-u kay sinabi magkun, "Dayu ngani inda mabuwat tawu, dapat mabuwat di Diyus ti tanan kabagayan." 27 Bag-u magkun si Pidru, "Malu duy kami inda, tinayakan yi nimi kanmi ulian bag-u kami kinmuyug sa kanmu. Hintay nguna kanmi matanggap?" 28 Sinabi ni Hisus sa kanda magkun, "Tandai yi niyu inda. Nu ti Anak Tawu humiyaput yi aban sa karampatan maghari sa bag-u pag daga, kamu pag sampulu may duwa ti nagkuyug sa kangku, makahiyaput diman waydi sa karampatan hampay makapihu sa sampulu may duwa ka linahi Israil nu daut nu mayad. 29 Una si unu ti magtiis magtayak sa kay ulian, sa kay manga patar-ari lalaki, sa kay patar-ari babayi, sa ama sa ina, sa kay manga anak una sa kay daga dahil sa kay magpasakup sa kangku, makatanggap siya usa ka gatus maan kay tulus, makamana waya siya tutuu pag buhi unman may katapusan. 30 Dapat mayamu ti nag-una mauryan. Mayamu ti nauryan umuna."
1 Sinabi ni Hisus magkun, "Ti kaharian langit parihu sa usa ka may puun balay linmakaw nanurip hampay maghanap manugtarabahu sa kay ubasan. 2 Pagka nagkasunduan yi sida sa halaga lima ka pisus kay suhul sa usa ka sirang, sinugu niya sida sa kay tarabahuan sa ubasan. 3 Pagka abwat yi ti init linmakaw maan ti may puun ubasan, nakitan niya may manga matindugan sa palingki unman may buwat. 4 Sinabi niya sa kanda magkun, 'Pag-atag diman kamu sa ubasan, pakan-an diman kamu niku sab sa katamtaman.' 5 Nag-ati ngani sida sa ubasan. Linmakaw maan siya pagka karaw-an yi sirang, kas-a maan pagka palis yi ti init. Katunda diman kay binwat pagdugangan di niya kay manga magtarabahu. 6 Pagka arani yi malambung yi, linmakaw maan siya. Nakitan niya may manga matindugan waya. Magkun siya sa kanda, 'Hayga kamu matindugan lang sitay usa ka sirang ud may buwat?' 7 Sinabi nida sa kanya magkun, 'Dahil unman may pinmatarabahu sa kanmi.' Sinabi niya sa kanda magkun, 'Pag-atag diman kamu sa ubasan.' 8 "Pagka malambung yi, magsabi ti may apu ubasan sa kay ingkargadu, 'Pasitaya nimu ti manga nagtarabahu, pakan-an nimu sida kanda suhul. Pakan-an dap nimu ti manga nauryan bag-u ti manga un-an.' 9 Nagpakarani ngani ti manga inupahan pagka malambung yi, ti kada tawu tinmanggap tiglimalima ka pisus. 10 Pagka nagpakarani ti manga un-an kanda hantup barang tumanggap subra. Dapat sida pinakan-an diman tiglimalima ka pisus. 11 Pagka kanda tinanggap, naghampang sida laban sa may puun balay, 12 magkun, 'Inda pag manga nauryan usa lang ka tamaan ginatung kay kadugay kanda tarabahu, bati hayga ipinaparihu nimu kay upa sa kanmi? Inagwanta nimi ginan surip ti init hanggan malambung, madala yi mapali kanmi dayu.' 13 Dapat sinmagut ti may puun balay magkun sa usa sa kanda, 'Duy, balaw linugi kawu niku. Unman aw pinagkasunduan nita kis-ab surip ti lima ka pisus? 14 Bul-a yi nimu kam upa pag-&uli yi. Gustu niku pakan-an ti manga nauryan parihu sa kanmu diman. 15 Unman aw aku madunung diman kang kagustuhan tungkul kang sadili kasiyunan? Maghirak aw kawu sa kanmu magbantay sa kangku dahil aku balaw mairang?' 16 Nakan ngani ti manga nauryan umuna, ti manga nag-una mauryan." 17 Sa kay maglakaw ni Hisus tabug sa Hirusalim, ipinablag niya kay sampulu may duwa ka tuludluan, bag-u magkun siya sa kanda, 18 "Malu duy, kita sa dalan yi tag babaw, tag sa banwa Hirusalim. Nu ati yi kita, ipabahala ti Anak Tawu sa manga pangulu manug-asiwa balay Diyus hanggan sa manga Manugtudlu Kasuguan, bag-u kanda sintinsiyahan siya sa kamatayan. 19 Bag-u kanda ipabahala siya sa manga balaw Hudiyu, hampay kanda muransahun, hampakun, bag-u ipaku yi nida sa kurus. Bag-u sa ikatlu pag sirang mabuhi maan siya uman." 20 Bag-u nagpakarani sa kan Hisus kan Sibidiyu asawa hanggan kay manga anak lalaki, sida ni Huwan ni Santiyagu. Nagluhud ti babayi sa atubangan ni Hisus, may pagpamuhunun siya sa kan Hisus. 21 Magkun si Hisus sa kanya, "Hintay duy kanmu kailangan?" Sinabi babayi sa kanya, "Nu kawu humari yi, pahintuluti duy nimu sa kang duwa ka anak makatukaw ti usa sa kanmu sikun, ti usa sa kanmu wala." 22 Dapat ay sinabi ni Hisus sa kanda ni Huwan ni Santiyagu magkun, "Unman niyu naintindihan ti kanyu pagpamuhunun. Kaya aw mainman niyu ti ungut may kakurian arani yi kang inman aban?" Magkun sida sa kanya, "Kaya duy nimi mainman." 23 Sinabi ni Hisus sa kanda, "Ungud gid inman niyu aban kang ungut may kakurian. Dapat balaw aku ti bahala magpakaun karampatan sa tawu hampay makatukaw siya sa kang sikun una sa kang wala. Tunda para sa manga inalistuhan niku Ama." 24 Pagka ti sampulu ka tuludluan nakadnug tunda, magkagalit sida sa kanda duwa magtar-ari. 25 Dapat sinabi ni Hisus sa kanda, "Abala duy dapu kamu." Bag-u magkun siya, "Nadnugan niyu ti manga pinunu manga unman magpasakup sa Diyus magpalabilabi sa kanda manga sakup. Ti may manga kangaranan sa kanda maggamit waydi kanda karampatan. 26 Nu bay sa kanyu balaw mana katida. Nu si unu sa kanyu tigkaibug katungkulan, kailangan siya maghanda yi kay naisipan hampay siya ngap ti manugsirbi sa kanyu. 27 Una hintay tigkaibug magpangulu sa kanyu, kailangan siya alistu una panawuhun niyu. 28 Katunda diman ti Anak Tawu nagsitay balaw hampay sirbihan nu unman hampay siya magsirbi ag hampay ipakaun niya kay buhi sa kamatayan agud mayamu ti malukat." 29 Pagka sida ni Hisus magginan yi sa banwa Hiriku, lalu mayamu tawu nagkuyug sa kanya. 30 Sa saruy dalan may matukawan duwa ka lalaki buta. Pagka nadnugan nida si Hisus maglawuy siyun sa kanda arani, nagtawag sida magkun, "Panginuun, kaawai duy nimu kami, kawu ti linahi ni Dabid." 31 Sinungyaw sida manga tawu magkun, "Danga kamu maingay." Dapat lalu ngap sida nagtawag magkun, "Panginuun, kaawai nimu kami, kawu ti linahi ni Dabid." 32 Nagpat-ung si Hisus, tinawagan niya sida tag sa kay arani, bag-u pinmaingana siya sa kanda magkun, "Hintay duy kanyu gustu kang buwatun sa kanyu?" 33 Sinabi nida sa kanya, "Panginuun, sa makakit gid duy kanmi manga mata." 34 Sa kay pangaawa ni Hisus sa kanda, inayuhap niya kanda manga mata bag-u kadaka yi makakit kanda manga mata, nagkuyug sida sa kan Hisus.
1 Pagka dugay arani yi sida ni Hisus sa banwa Hirusalim. Pagka nagras-ug sida sa baryu Bitpagi sa bantud Ulibu, sinugu ni Hisus kay duwa ka tuludluan. 2 Sinabi niya sa kanda, "Pag-ati kamu sa usa waya ka baryu. Susun makitan niyu ati ti usa ka inaan asnu mahigtan hanggan kay anak. Lubada niyu tunda bag-u daran-a sitay tag sa kangku. 3 Ag nu may magpaingana sa kanyu, pagkumun, 'Pagkailanganun duy Panginuun.' Bag-u balaw yi irangan niya." 4 Nangyari ngani tunda hampay matupad ti bagaw ipinadakit purupita magkun, 5 "Sabiha niyu sa banwa Siun, Malu atay tag yi kanmu Hari, maawaun siya. Nakasakay sa asnu, sa anak asnu pag masakyan." 6 Nag-ati yi ngani ti manga tuludluan, binwat nida ti angay sa kay isinugu ni Hisus sa kanda. 7 Kanda dinara ti inaan asnu hanggan kay anak. Pagka ihinampilu nida kanda manga rutay sa duwa ka asnu, sinakyan ni Hisus ti usa. 8 Sinagmakan manga tawu nida manga rutay ti dalan, ti iba nagbuul labung kayu kanda ilinatag sa dalan. 9 Kayamuan tawu ti nagkuyug sa kanya, ti iba mag-una, ti iba magdasun. Nanarawagan sida magkun, "Dayawun ti linahi ni Dabid, Dayawun ti magsitay sa ngaran Panginuun. Dayawun siya una ati sa langit." 10 Pagka rinmas-ug sa Hirusalim si Hisus, nagkaraguluhan ti banwa. Namaraingan-an ti manga tawu magkun, "Si unu nguna tunda pag tawu?" 11 Sinabi kayamuan, "Inda yi ti purupita si Hisus taga Nasarit sa daga Galiliya." 12 Sinmaka si Hisus sa balay Diyus. Tinulak niya sa karagasyun ti manga magbili manga magpabili sa sulud balay Diyus. Linikwang niya ti manga burugtangan kuwarta manga manugbalyu hanggan ti manga tukawan manugtinda kalampati. 13 Sinabi ni Hisus sa kanda, "Nisurat sa Banal Kasuratan magkun, 'Kang balay ingarnan balay dararanginan, Dapat binwat ngap niyu paratag-an manga mananakaw.' " 14 Nagpakarani sa kan Hisus sa balay Diyus ti manga buta hanggan pilay bag-u sida kay pinaayad. 15 Dapat nagalit ti manga pangulu manug-asiwa balay Diyus hanggan ti manga Manugtudlu Kasuguan dahil nakitan nida kay manga binwat makadululaw ag dahil nadnugan nida ti manga anak sa balay Diyus nanarawagan magkun, "Dayawun ti linahi ni Dabid." 16 Nakan ti manga pangulu manug-asiwa balay Diyus hanggan ti manga Manugtudlu Kasuguan magkun sa kan Hisus, "Nadnugan aw nimu ti manga pagsabihun tida?" Magkun si Hisus sa kanda, "Hu Unman waya aw lugud kanyu binasa ti isinurat magkun, 'Ginan sa bibig manga lapsag hanggan magsusu waya pag manga anak kinamhan nimu ti pagdayaw sa kanmu.' " 17 Bag-u nagpatawas si Hisus sa kanda, linmakaw siya tag sa luwas banwa tabug sa baryu Bitanya, ati siya pag nigya. 18 Pagka surip linmakaw maan si Hisus tabug sa banwa, linun-us siya sa dalan. 19 Pagka nakitan niya ti usa ka puun igus sa saruy dalan kay dinuawan, dapat ud may nakitan siya burak, nu ud manga labung lang. Sinmabi siya sa igus, "Kainda ginan danga yi lang kawu magburak una hanggan aban." Susun nalayung yi ngap ti puun igus. 20 Pagka nakitan manga tuludluan, naglingut gid sida magkun, "Hintay tunda? Hayga kadaka nalayung ti puun igus?" 21 Sinmagut si Hisus magkun, "Kang pagsabihun sa kanyu, nu kamu may sarig ag unman mag-alinlangan, kanyu mabuwat balaw lang ga nangyari sa puun igus. Nu kanyu sabihun sa bantud inda, 'Pag-ighit yi kawu, ati pag kitugpa yi sa dagat', mangyari yi tunda. 22 Ag nu kamu may sarig, una hintay kanyu hagadun sa kanyu darangin, pihu matanggap niyu." 23 Pagka sinmaka si Hisus sa balay Diyus, nagpakarani sa kanya ti manga pangulu manug-asiwa balay Diyus hanggan ti manga paggurangunun sa nasyun sa kay katpung magtudlu. Sinabi nida sa kanya magkun, "Naan ginan kanmu karampatan nakan kanmu pagbuwatun inda pag manga bagay? Hintay ti nagpakaun karampatan sa kanmu?" 24 Sinmagut si Hisus magkun, "Paingan-un waydi niku kamu usa ka paingana. Nu kanyu sabihun sa kangku, sabihun diman waydi niku sa kanyu nu naan ginan kang karampatan hampay mabuwat niku inda pag manga bagay. 25 Naan ginan nguna kan Huwan tulbaw? Ginan aw sa langit aw ngatay sa manga tawu?" Nagharampangan dapu sida magkun, "Nu sabihun nita, ginan sa langit, sabihun niya sa kanta, 'Hayga unman naniwala kamu sa kanya?' 26 Dapat nu sabihun nita, ginan sa manga tawu, magkadala kita sa kayamuan, dahil nakilala tanan tawu si Huwan purupita." 27 Nakan nagsagut sida sa kan Hisus magkun, "Unman ngani nimi alam nu naan ginan kan Huwan tulbaw." Sinabi ni Hisus sa kanda, "Unman diman niku sabihun sa kanyu nu naan ginan kang karampatan hampay mabuwat niku inda pag manga bagay." 28 Sinabi ni Hisus magkun, "Hintay nguna kanyu isip? May tawu duwa kay anak lalaki. Nagpakarani siya sa kay usa ka anak bag-u kay sinabi magkun, 'Anak, pag-atag kawu pagtarabahu taynguna sa ubasan.' 29 Sinmagut kay anak, 'Dayu duy.' Dapat pagka dugay nag-isip ti anak, atag yi lang aku. Bag-u nag-ati diman. 30 Bag-u kanda ama nagpakarani sa ikadwa pag anak, katunda diman kay sinabi. Sinmagut kay anak magkun, 'Aku duy Amang, atag.' Bag-u unman ngap siya nag-atag. 31 Naan sa duwa ka anak ti nagtupad sa kagustuhan niya ama?" Sinabi manga manugpatingi magkun, "Ti un-an." Sinabi ni Hisus sa kanda, "Tutuu kang pagsabihun sa kanyu, ti manga manunukut buhis ag ti manga uragin umuna waya sa kanyu pumasakup sa kay paghari Diyus. 32 Dahil nagsitay si Huwan sa kanyu, ipinakilala niya ti matadlung pag ugali, dapat unman kanyu pinaniwalaan. Dapat pinaniwalaan ngap siya manga manunukut buhis hanggan manga uragin. Pagka nakitan niyu tunda, unman diman kamu nagbag-u kanyu pag-iisip, hampay mana kamu magpaniwala waydi sa kan Huwan." 33 Magkun si Hisus, "Patingihi niyu inda may usa waya ka pahalimbawa. May usa ka may puun balay, nagtanum ubas, inaladan niya bag-u nagbuwat siya pirisian ubas. Nagpatindug waya siya usa ka balay abwat hampay bantayan kay ubasan. Bag-u iinintirga niya ti ubasan sa kay manga manugtarabahu bag-u napaiba siya rugar. 34 Pagka arani yi tigpuruti, sinugu niya kay manga panawuhun tabug sa kay manga manugtarabahu hampay bul-un yi kay kaparti burak ubas. 35 Dapat ay dinuksulan manga manugtarabahu kay manga panawuhun, binakul nida kay usa, minatay kay usa, kay ikatlu binatu nida. 36 Bag-u sinugu maan niya kay iba maan pag manga panawuhun, balaw lang ga kay kabag-u sinugu kay kaaduk. Dapat katida diman waydi ti binwat manga manugtarabahu. 37 Pagka dugay kay sinugu niya kay anak lalaki tag sa kanda. Magkun siya, 'Pihu galangun nida kang anak.' 38 Dapat pagka nakitan manga manugtarabahu ti anak nida amu, nagharampangan sida magkun, 'Inda aban ti mumana ubasan, kanta yi matyun hampay kanta yi apuun kay ama pamana.' 39 Nakan kanda dinakup siya, bag-u kanda dinara tag sa luwas ubasan ag kanda yi ngani minatay. 40 "Nu Rumas-ug kay apu ubasan, hintay nguna kay buwatun sa tunda pag manga manugtarabahu?" 41 Sinabi manga manugpatingi sa kan Hisus, "Papasun unman may awa tunda pag manga tawu daut, bag-u iintirga maan niya ti ubasan sa iba pag manga manugtarabahu, sa manga magpakaun sa kay apu nu udas tigbururak." 42 Kay sabi ni Hisus sa kanda, "Udwaya aw gid nabasa niyu sa Banal Kasuratan magkun, 'Ti batu dinayu manga manugbuwat balay, Binwat ngap ti mahalaga pag kalap. Panginuun ti may buwat tunda, Tutuu ungud makadululaw.' 43 "Nakan ngani kang sabi sa kanyu, bul-un ginan sa kanyu ti kaharian Diyus bag-u ipakaun sa usa ka nasyun tawu magtupad sa kagustuhan Diyus. 44 Una si unu nu malagpak tag sa babaw batu inda, marunut gid. Dapat una waydi hintay ti madugsakan mapisi." 45 Pagka nakadnug ti manga manug-asiwa balay Diyus hanggan ti manga Parisiyu kay manga halimbawa ni Hisus, kanda naintindihan sida yi ti tinamaan niya bagaw. 46 Naghanap sida paraan hampay madakup si Hisus, dapat nadala sida sa kayamuan tawu dahil kanda pagkilalan-un si Hisus purupita.
1 Nagbagaw maan si Hisus sa kanda sa manga pahalimbawa magkun, 2 "Ti kaharian langit parihu ga sa usa ka hari naghanda pamasaruhan niya anak lalaki. 3 Sinugu niya kay manga panawuhun hampay kanda ban-awan yi tag sa pamasaruhan ti manga pinaalaman niya sa kabag-u. Dapat sida dayu magluwang. 4 Nagpasugu maan uman ti hari sa kay manga panawuhun magkun, 'Sabiha niyu sa kang manga pinaalaman, malu ihinanda yi niku ti manga karan-unun, iniyaw yi niku kang manga tudu baka hanggan ti pinatabul pag ibun baka. Pagluwang yi kamu sitay sa pamasaruhan.' 5 "Dapat balaw sida nagsunud sa manga panawuhun. Sida ngap naglinakaw, ti usa tag sa kay tanman, ti usa nangasikasu di sa kay manga nigusyu. 6 Dinakup di ngap manga iba ti manga panawuhun hari kanda inunuunu rargu ngap minatay nida. 7 Nakan nagalit ti hari. Sinugu niya ti usa ka panung sundalu, tinudas tunda pag manga manugmatay tawu bag-u kanda tinutdan kanda banwa. 8 Bag-u sinabi hari sa kay manga panawuhun, 'Alistu yi mana ti pamasaruhan dapat unman may karampatan ti manga pinaalaman sa kabag-u. 9 Pag-ati maan kamu sa karsada, tabanun niyu ti tanan tawu kanyu nakitan sitay tag sa pamasaruhan.' 10 "Bag-u nag-ati yi ngani ti manga panawuhun sa manga karsada. Kanda tinipun ti tanan tanan nida nakitan, una daut una mayad pag tawu. Nakan napnu tawu ti balay may apu pamasaruhan. 11 Dapat pagka nanduaw ti hari sa manga tawu nagluwang sa pamasaruhan, may nakitan siya ati usa ka tawu kay sulung pag rutay balaw angay sa pamasaruhan. 12 Magkun ti hari sa kanya, 'Duy, hayga kawu nagsaka sitay balaw may sulung rutay angay sa pamasaruhan?' Unman siya may isagut. 13 Bag-u sinabi hari sa manga manugtindug magkun, 'Gapusa niyu kay manga lulud hanggan kamang bag-u iyamut niyu siya tag sa madlum sa luwas. Ati sida magnguruynguyan ag mangubut kanda manga ngipun.' " 14 Tinapus ni Hisus kay pahalimbawa magkun, "Mayamu ti manga pinaalaman, dapat pira pira lang ti manga napili." 15 Bag-u nag-ati ti manga Parisiyu nagpululungan sida nu kabitay nida mapasalan si Hisus sa kay bagaw. 16 Nakan sinugu nida kanda manga tuludluan hanggan manga napakampi sa kan Hirudis, sinabi nida sa kan Hisus, "Maisturu, alam nimi kawu matinupadun. Pag-itudlu nimu ti buu katutuuhanan hampay tupadun manga tawu ti kagustuhan Diyus. Unman kawu magkadala una sa kantapu pag tawu, dahil kawu balaw may pag-apihun. 17 Sabiha duy nimu sa kanmi, hintay sa kanmu mag-isip ti mayad nu bumuhis sa Pangulu Hari aw ngatay unman." 18 Dapat alam di ni Hisus kanda turunu daut, nakan sinabi niya sa kanda, "Hayga aku kanyu pagsubukan, kamu pag manga magpabalhinguun. 19 Anti manhimalad aku kanyu pamuhis kuwarta." Binulwat ngani nida sa kanya ti usa ka dinaryu. 20 Bag-u sinabi niya sa kanda, "Kantapu pag uyahun ti mapalatan sa inda pag kuwarta, kantapu pag ngaran ti ipinirma?" 21 Sinmagut sida sa kanya magkun, "Sa Pangulu Hari duy inda." Bag-u magkun si Hisus sa kanda, "Nakan ngani ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus." 22 Pagka nadnugan nida kay sagut ni Hisus, naglingut gid sida, napatawas yi lang sida. 23 Ati katpung pag sirang may nagpakarani sa kan Hisus manga Sadusiyu. Kanda paniwala basta namatay yi ti tawu balaw yi mabuhi uman. Magkun sida sa kan Hisus, 24 "Maisturu, itinudlu ni Muysis, nu mamatay ti usa ka lalaki balaw may anak, kay patar-ari kailangan mag-asawa sa buranday hampay may anak sida imaw ti makamana sa kay pinagkagurang kayamanan. 25 Kaybi may pitu ka magtar-ari lalaki sitay sa kanmi. Nag-&asawa ti panganay. Pagka dugay namatay siya unman may anak. 26 Nakan ngani nag-asawa maan sa buranday ti ikadwa. Katida diman ti nangyari sa ikadwa, hanggan sa kay ikatlu, hanggan waya sa ikapitu. 27 Pagka tabu namatay ti pitu ka lalaki hanggan ti babayi namatay diman waydi. 28 Nu sa pagkabuhi uman aban kantapu asawa ti babayi? Kabay inasawa niya tanan tanan tunda pag pitu ka lalaki." 29 Magkun maan si Hisus, "Unman gid duy tama kanyu pagbagawun, sapagka unman niyu magkasalman ti Banal Kasuratan hanggan kay kapangyarihan Diyus. 30 Dahil sa pagkabuhi uman ti manga tawu unman yi mangasawa. Parihu sida sa manga anghil sa langit. 31 Tungkul bay sa pagkabuhi uman manga namatay, unman aw waya lugud magkabasa niyu sa Kasuratan kay sinabi Diyus sa kanyu? Sinabi niya, 32 'Aku ngani ti Diyus ni Abraham, Diyus ni Isaak ag Diyus ni Hakub.' Ti Diyus balaw Diyus manga namatay nu unman Diyus ngap manga tawu may buhi." 33 Pagka nadnugan manga tawu inda nadulaw sida sa kay manga tudlu ni Hisus. 34 Pagka nabaritaan manga Parisiyu udyi may iningay ti manga Sadusiyu sa kan Hisus sinabi, naniripnan sida. 35 Bag-u ti usa ka Parisiyu madunung gid sa Kasuguan ni Muysis namaingana sa kan Hisus magkun, 36 "Maisturu, sa buu Kasuguan hintay ti pinakamahalaga pag sugu?" 37 Sinmagut si Hisus, "Ilubus nimu kanmu tagipusuun, kanmu karadwa hanggan kanmu pag-iisip sa kanmu pagmahal sa kanmu Panginuun Diyus. 38 Inda ti pinakamahalaga pag sugu. 39 Kay pangadwa magkaparihu diman sa siti, mahala nimu kanmu kaparihu tawu ga kanmu sadili. 40 Inda pag duwa ka sugu imaw tigsakup sa buu Kasuguan ni Muysis hanggan sa pag-itudlu manga Purupita." 41 Tiripun di waya ti manga Parisiyu, pinaingana sida ni Hisus magkun, 42 "Hintay kanyu magkaalaman tungkul sa pinili Diyus Manugribri pag Hari? Naan ginan pag linahi siya?" Kanda sagut magkun, "Sa kan Dabid ginan duy." 43 Magkun si Hisus, "Nu katida hayga mag-ingaran si Dabid sa kanya magkun Panginuun. Angay sa udyuk Ispiritu Banal sinabi kabay ni Dabid magkun, 44 'Sinabi Panginuun sa kang Panginuun, Pagtukaw kawu sitay baliwa sa kang sikun. Pagpaminsan sa kang karampatan hanggan sa udwaya mabuwat niku kanmu manga kalaban ga tarat-an lang nimu manga lulud.' 45 "Nakan nu si Dabid yi waydi ti nag-ingaran sa kanya magkun, Panginuun, kabitay pag masabi ti pinili Diyus Manugribri pag Hari kay linahi ni Dabid?" 46 Una di usa ud may nakasagut sa kan Hisus paingana. Tunda di ginan udyi may nakabaya nakapaingana sa kanya.
1 Pagka dugay sinabi ni Hisus sa manga tawu hanggan sa kay manga tuludluan, 2 magkun, "Ti manga Manugtudlu Kasuguan hanggan ti manga Parisiyu imaw ti pagsarigan pag manga manugpaliwanag tungkul sa Kasuguan ni Muysis. 3 Nakan buwata niyu kanda pag-itudlu, tupada kanda manga pag-isugu. Dapat danga niyu paghuwada kanda ugali dahil unman kanda pagtupadun kanda pag-itudlu. 4 Magbagkung sida manga mabuyat dararan-un bag-u kanda pag-ipapas-an sa manga tawu dapat una lang kanda ituturu unman pag-iantabay nida sa manga mabuyat pag dara. 5 Lunsay pakakitkakit lang sa manga tawu kanda buwat. Paglapadun nida kanda kulimpay pandarangin, pag-&ipaaba nida kay parawayraway sa sidsid nida kulimpay. 6 Nu may karan-an kanda gustu makatukaw sa marinu pag tukawan, ag nu sa balay tiripnan kanda gustu tumukaw sa tukawan ahinanda sa may kangaranan. 7 Kay gustu nida paggalangun sida manga tawu nu maglakaw sa palingkihan. Kanda gustu pag-&ingarnan sida magkun, 'Maisturu.' 8 "Dapat kamu danga pagpaingarni maisturu. Dahil usa usa lang kanyu Maisturu, kamu tanan magtar-arian. 9 Danga yi pag-&ingarni 'Ama' una si unu pag tawu sitay sa babaw daga dahil usa lang kanyu Ama, imaw yi ti Ama sa langit. 10 Danga kamu pagpaingarni pangulu dahil usa lang kanyu pangulu imaw yi ti pinili Diyus Manugribri pag Hari. 11 Ti lalu mataas sa kanyu imaw ngap ti sumirbi sa kanyu. 12 Una si unu nu magpa-&labawlabaw ipaababa, dapat ay tigpakumbaba imaw ti pahalgaan." 13 Sinabi ni Hisus, "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Bilang ga tinalakpan niyu ti sabian hampay ti manga tawu dayu makasulud sa kaharian langit. Kamu dayu magsulud sa kaharian langit bag-u kanyu waya pag-amparahun ti manga magkaibug magsulud ati. 14 "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Pagtabuhun niyu ti kasiyunan manga buranday dapat magpadayawdayaw diman kamu sa kanyu magdarangin araba. Dahil sa katida lalu waya mabuyat aban pag parusa sa kanyu. 15 "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Magsakay kamu sa sarakyan sa dagat magpalibutlibut kamu sa bilug kalibutan hampay magpanggarya kamu sa una lang usa ka balaw Hudiyu tabug sa surundanun Hudiyu. Pagka nagarya yi niyu lalu ngap kanyu pagpabuywun tag sa kadautan sa impirnu. 16 "Kaawaawa kamu buta pag manga manug-abat. Pag-itudlu niyu nu sa kay magsumpa paghinangbitun tawu ti balay Diyus unman may pulus kay sumpa. Dapat nu paghinangbitun niya ti gintu sa balay Diyus kailangan tupadun gid niya kay isinumpa. 17 Manga buta kamu, manga lukuluku. Hintay ti lalu mahalaga, ngatay ti gintu aw ngatay ngap ti balay Diyus kay haramnuan gintu para sa Diyus. 18 Pagsabihun diman niyu nu sa kay magsumpa paghinangbitun tawu ti surunugan manga pag-isagda tabug sa Diyus unman may pulus kay sumpa. Dapat kailangan tupadun gid niya kay isinumpa nu paghinangbitun niya ti pag-&isagda sunugun sa surunugan tabug sa Diyus. 19 Manga buta kamu, hintay nguna ti lalu mahalaga, ngatay ti panagda, aw ngatay ti surunugan ngap tigpakilala kahulugan manga pag-&isagda tabug sa Diyus. 20 Nakan ngani, nu hininangbit tawu ti surunugan, hininangbit niya hanggan ti manga pag-isagda sa Diyus pagsunugun siti. 21 Nu paghinangbitun tawu ti balay Diyus, hininangbit niya ti balay hanggan ti mag-uli siyun. 22 Nu paghinangbitun tawu ti langit, hininangbit niya ti kaharian Diyus hanggan tighari. 23 "Kawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Dahil kamu magpakaun ikasampulu manga pamanglu sa upi hanggan tanan manga urupiun dapat kinalimtan ngap niyu ti lalu waya mahalaga pag buruwatun angay sa Kasuguan. Dahil magpakampi kamu sa kadautan, unman kamu maawaun, unman diman matinupadun. Balaw salan kamu sa kanyu magpakaun ikasampulu, dapat danga waydi niyu paglimti pagtupada di niyu ti iba. 24 Kamu duy buta pag manga manug-abat. Pagsaraun niyu ti alukhuk sa kanyu irinmun dapat pagtulnun lang niyu ti kamilyu. 25 "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Paglumpiyuhun niyu ti manga dayu habig ungut hanggan taya, dapat ti sa sulud punu kayagtingan, dahil sa kanyu maramuun ag kanyu daut naisipan. 26 Kawu buta pag Parisiyu, lumpiyuha dapu nimu ti sa sulud ungut hampay malumpiyu diman waydi hanggan kay habig. 27 "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Kamu ga manga lubung pininturahan malagti, marinu mana sa luwas dapat ti sa sulud punu ngap but-ul manga namatay hanggan kayagtingan. 28 Katida ngani kamu, sa magbantay lang tawu manga mayad yi gid kamu, dapat nu sa ungud pasay yi kamu magpabalhinguun lang, manga labag ngap kamu sa Kasuguan." 29 Sinabi ni Hisus magkun, "Kaawaawa kamu pag manga Manugtudlu Kasuguan hanggan manga Parisiyu, magpabalhinguun lang kamu. Pag-ipatindug niyu ti manga balay kalubngan manga purupita, kanyu pagparinuun maan ti kalubngan manga tawu matadlung kanda ugali kaybi. 30 Magkun kamu, 'Nu abi kami buhi lang ati katpung sa kaapuapuhan, balaw nimi inawatan sida sa kanda magmatay sa manga purupita.' 31 Sa kanyu sinabi tunda, pag-akuun ngap niyu kamu linahi manga nagmatay sa manga purupita. 32 Hala, tapusa yi lang niyu ti inumpisahan niyu kaapuapuhan kaybi. 33 "Kamu ga manga ulay, linahi manga udtu adlaw. Kabitay kamu pag makaiwas sa sintinsiya tabug sa impirnu? 34 Nakan ngani magsugu aku manga purupita atabug sa kanyu, manga madunung pag tawu hanggan manga manugtudlu. Matyun niyu aban ti iba, kay iba ipaku niyu sa kurus, kay iba garutihun niyu aban sa kanyu manga balay tiripnan, kanyu unuunuhun sa kabanwabanwahan. 35 Nakan ngani mitama gid sa kanyu ti kaparusahan sa nagmatay sa manga matadlung pag manga tawu sa bilug kalibutan ginan waya sa nanmatay sa kan Abil hanggan sa nanmatay sa kan Sakaryas, kan Barakyas anak, kanyu minatay sa tab-anan balay Diyus ag surunugan hayup panagda tabug sa Diyus. 36 Pagsabihun niku sa kanyu, ti parusa sa tanan inda mitama sa inda pag manga tinubu tawu." 37 Sinabi ni Hisus, "Hirusalim, Hirusalim, pagpanmatyun nimu ti manga purupita, pagbatuhun nimu ti manga sinugu Diyus tabug sa kanmu. Kapira yi ginan kang hinanap ti manga mag-uli sa kanmu sulud, hampay kang likumun, parihu ga inaan manuk mag-&ukub sa kay manga butu, dapat dayu di ngap kamu. 38 Bantayi niyu ti balay Diyus asan tinayakan yi, udyi mag-uli asan kay apu. 39 Pagsabihun niku sa kanyu udyi gid niyu aku makitan hanggan sa ud waya Rumas-ug pag udas nu kanyu sabihun magkun, 'Dayawun ti magras-ug sa ngaran Panginuun.' "
1 Nagluwas si Hisus sa balay Diyus. Paraginanun yi siya nagpakarani sa kanya kay manga tuludluan, pag-itudlu nida sa kanya kay pinangalap balay Diyus. 2 Dapat magkun siya, "Makitan aw niyu ti pinangalap tunda? Tandai niyu, nu Rumas-&ug ti kaudasan, unman may masawad batu sa kay kaparihu babaw batu, tanan tanan magkarapugdak yi lang." 3 Si Hisus ati sa bantud Ulibu. Sa kay matukawan siyun pagka unman may nakadnug iba, pinaingana siya niya manga tuludluan magkun, "Pagtultul duy kawu sa kanmi nu kapira nguna tunda pag mangyari. Hintay kay tanda aban nu arani yi kanmu pagbalik hanggan kay katapusan kalibutan?" 4 Nagsagut si Hisus magkun, "Pag-aman gid kamu hampay kamu balaw mapatalang una hintay pag tawu. 5 Dahil mayamu ti sumitay mag-apu kang ngaran magsabi, 'Aku ti pinili Diyus Manugribri pag Hari.' Mayamu kanda patalangun aban. 6 May madnugan kamu aban manga barita tungkul sa gira una sa arani una sa arayu. Dapat danga kamu magkaaburidu. Pihu mangyari tunda, dapat balaw waya tunda ti katapusan. 7 Dahil manlalabanan ti parihu banwa, hanggan ti parihu kaharian. May lun-us, may manga linug sa tuhay tuhay pag rugar. 8 Ti tanan tunda imaw yi ti umpisa manga kakurian. 9 "Siyun katpung pag panahun aban kamu dakpun hampay pakurian ag matyun. Kagalitan kamu tanan tawu dahil sa kanyu pakiusa sa kangku. 10 Mayamu ti umalinlangan sa kanda pagsarig bag-u mangalagalitan sa usa kag sa usa. Pumakampi ti iba sa kalaban bag-u itudlu ngap nida kanda kaparihu. 11 Mayamu aban ti pumabalhinguun kuntay purupita bag-u patalangun nida ti kayamuan. 12 Yumamu gid aban ti kadautan nakan ti kayamuan tawu manramig kay pagmahal. 13 Dapat tigpakarig-un hanggan tugka sa katapusan imaw ti maribri. 14 Itudlu dapu sa bilug kalibutan ti Mayad pag Barita tungkul sa kay paghari Diyus hampay lalu maalaman tanan nasyun. Bag-u di Rumas-ug ti katapusan." 15 Magkun si Hisus, "Makitan niyu aban mangyari sa sakup Diyus pag banwa ti lapastangan unman may pumarihu imaw ti pagsabihun ni Purupita Danyil. (Kailangan intindihun manga manugbasa). 16 Pagka mangyari tunda, ti manga tawu sa Hudiya pagpalagiw yi tabug sa bantud. 17 Una ti manga sa ikadwa pag ugpu salug danga yi magkalibangan danga yi mag-isip mam-ul waya una lang hintay pag kagamitan ginan sa basad balay. 18 Ti sa tanman danga yi mag-isip muli waya mam-ul kulimpay. 19 Kaawaawa ti manga magbuduy hanggan magpasusu sa anak ati katpung pag kaudasan. 20 Pagdarangin kamu hampay sa kanyu katpung magpalagiw balaw mitama sa tigraramig hanggan sirang pamahari. 21 Dahil ati katpung aban ti manga tawu makalakaw sa subra yi gid pag kakurian unman waya nalakawan manga tawu ginan waya sa pagkalalang kalibutan hanggan waya taynguna tugka, dayi malakawan maan hanggan waya aban. 22 Nu unman padag-udun di Diyus aban tunda pag udas kakurian, unman may tawu maribri. Dapat dahil ngani sa manga pinili, padag-udun Diyus tunda pag udas kakurian. 23 "Nu may magsabi sa kanyu magkun, 'Inda yi ngani ti pinili Diyus Manugribri pag Hari', aw ngatay, 'Asan ngap siya', danga kamu magpaniwala. 24 Dahil may pumabalhinguun aban kuntay siya yi ngani ti pinili Diyus Manugribri pag Hari. May lumuwang manga pudilun pag purupita. Pumakakit sida manga makadululaw pag tanda hanggan manga lilingutan pag manga buwat hampay nu mahimu lang, patalangun nida hanggan ti manga pinili Diyus. 25 Tandai gid niyu, dahil udwaya nangyari tunda, ipinasandam yi niku daan sa kanyu. 26 "Nakan ngani nu sabihun nida sa kanyu, 'Ati siya sa pangawakawaan', danga kamu mag-ati. Nu sabihun nida, 'Ati siya sa suludsulud', danga kamu magpaniwala. 27 Nu kabitay ti kilat kay kabisug kay magbalagit ginan sa butlakan hanggan isalpan, katunda diman waydi kay pagsitay Anak Tawu. 28 "Nu naan ti may buyuk, ati diman waydi pag magkatigsun ti manga uwak." 29 Sinabi ni Hisus magkun, "Ati katpung aban nu nakalawuy yi tunda pag kakurian, 'Susun dumulum ti init, dayi maninggit ti bulan, Mangalagpak ginan sa langit ti manga pamgasan, Matandug aban ti manga kapangyarihan sa panungaan langit daga.' 30 "Bag-u makitan nida sa langit ti tanda Anak Tawu. Manrukuan di ti tanan nasyun sa babaw daga nu makitan nida ti Anak Tawu Rumas-ug napadara sa rurum ginan sa langit may kapangyarihan hanggan daka pag kadayawan. 31 Suguun niya kay manga anghil may budyung daka hampay tipunun nida ti manga pinili Diyus ginan sa upat ka puun durus, ginan sa bilug kalibutan." 32 Sinabi ni Hisus magkun, "Intindiha niyu kang ipag-adal tungkul sa puun igus. Pagka nanugbuk nanlabung kay manga sanga, alam niyu arani yi ti abagat. 33 Katunda diman waydi nu makitan niyu tunda pag manga mangyari tanan tanan, alam yi niyu udyi dugay ti kaudasan pagras-ug niya, arani yi gid. 34 Kang pagsabihun sa kanyu dayu mamatay inda pag manga tinubu tawu hanggan sa ud matupad inda tanan tanan kang sinabi. 35 Madura di aban ti langit hanggan ti daga, dapat kang manga bagaw dayu pumalya." 36 Sinabi ni Hisus magkun, "Dapat unman may tawu umalam nu kapira tunda pag mangyari aban una kay sirang una kay udas. Unman may makaalam una manga anghil sa langit una paman ti Anak. Ti Ama lang ti makaalam tunda. 37 Kay pagras-ug Anak Tawu parihu aban sa kay nangyari sa nagkagunaw kaybi sa ati katpung sa kan Nuwi. 38 Ati katpung magkaun mag-inum diman ti manga tawu, magpangarasawa ag pag-ipaasawa hanggan sa udwaya nagsakay si Nuwi sa kay sakayan. 39 Nagras-ug ti gunaw unman nida namalayan, inanud sida tanan tanan. Katunda diman ti mangyari aban sa kay pagras-ug Anak Tawu. 40 Ati katpung aban may duwa ka lalaki magtarabahu sa tanman, bul-un kay usa, tayakan kay usa. 41 May duwa ka babayi mag-arawatan sa maggaling, bul-un kay usa, tayakan kay usa. 42 Nakan paghanda yi kamu lagi, dahil unman niyu alam nu hintay pag sirang pag Rumas-ug kanyu Panginuun. 43 Tandai gid niyu inda, nu alam lang may puun balay nu kabitay ti yabi kay pagras-ug mananakaw, umulug mana siya hampay balaw pabay-anan niya kay balay suldun mananakaw. 44 Nakan ngani kailangan pirmi kamu alistu dahil Rumas-ug ti Anak Tawu pagka udyi kanyu pag-isipun." 45 Sinabi ni Hisus magkun, "Ti panawuhun nu matinupadun ag mapininsarun imaw ti pagpiyaran niya amu hampay pakan-an niya karan-unun kay kaparihu manga panawuhun, may bahaw, may yabas, may yapun. 46 Masulung tunda pag panawuhun nu maras-ugan siya magtupad sa kay buruwatun sa kay pagbalik niya amu. 47 Kang pagsabihun sa kanyu, iintirga niya amu sa kanya ti tanan kasiyunan. 48 Dapat nu alangan tunda pag panawuhun, mag-isip yi siya sa kay sadili, dugay waya bag-u bumalik kang amu. 49 Bag-u binakul yi niya kay kaparihu manga panawuhun. Bin-ul niya kay manga ampud bag-u nanginuman may sumsuman sida. 50 Bumalik kay amu tag sa tunda pag panawuhun sa sirang unman pag-isipun niya kuntay Rumas-ug kay amu ati katpung ag sa udas unman niya naalaman. 51 Barian yi siya sa parusa niya amu, iminsan yi sa manga magpabalhinguun. Ati sida mag-&nguruynguyan ag mangubut kanda manga ngipun."
1 Sinabi ni Hisus magkun, "Ti kaharian langit ipaparihu sa sampulu ka daraga. May sampulu ka daraga linmakaw hampay manulang sa lalaki ipasaru. Masigdara sida sulul-an. 2 Ti lima kurang kay intindi, kay lima bay mapininsarun. 3 Ti manga kurang kay intindi may dara diman sulul-an dapat unman may balun lana. 4 Dapat ti manga mapininsarun may dara lana tuhay waya sa kay manga sulul-an. 5 Naabala kay pagras-ug ti lalaki ipasaru nakan pinuyat sida tanan mangaturug. 6 "Dapat pagka karaw-an yi yabi may nagtawag, 'Inda yi ngani ti lalaki ipasaru. Sulanga yi niyu siya.' 7 Bigla nag-&bangun ti sampulu ka daraga, inalistu nida kanda manga sulul-&an. 8 Magkun ti manga kurang kay intindi sa manga mapininsarun, 'Pakan-i waydi kanyu lana una lang diit. Magkapsakapsa yi kanmi manga sulu.' 9 Magkun ti manga mapininsarun, 'Barang dayu kumang-ud inda pag lana sa kanta tanan. Mayad waya nu kamu umati sa manugtinda lana, pagbili kamu para sa kanyu.' 10 Nakan linmakaw yi ngani ti lima ka daraga kurang kay intindi. Sa kanda magbili di waya, rinmas-ug yi ngap ti lalaki ipasaru. Tunda pag lima ka daraga alistu yi kaibahan niya nagsaka sa balay pamasaruhan. Bag-u siniradu inagadan waya kay sabian. 11 "Pagka dugay rinmas-ug diman tunda pag lima ka daraga kurang kay intindi. Magtawag sida magkun, 'Panginuun Panginuun, pasakaha duy nimu kami.' 12 Dapat sinabi niya, 'Pagsabihun niku sa kanyu, unman niku kamu kilala.' " 13 Magkun si Hisus, "Nakan ngani paghanda yi kamu lagi, dahil unman niyu alam kay udas nu kapira pag sirang kay pagras-ug Panginuun." 14 Sinabi ni Hisus magkun, "Parihu abi sa tawu magkalakaw yi. Pagka siya lumakaw yi, tinawag niya kay manga panawuhun bag-u ipiniyar niya sa kanda kay kasiyunan. 15 Pinakan-an niya kuwarta ti kada usa sa kanda angay sa kanda kakayahan kadunungan. Pinakan-an niya ti usa lima ka libu ka pisus, ti usa duwa ka libu ka pisus, ti usa usa ka libu. Bag-u nighit yi ngani siya. 16 Ti panawuhun nakatanggap lima ka libu susun yi linmakaw nanigusyu. Pagka dugay nakatubu siya lima waydi ka libu. 17 Katunda diman hanggan ti nakatanggap duwa ka libu, nakatubu diman siya duwa waydi ka libu. 18 Dapat ti nakatanggap usa ka libu linmakaw bag-u ilinbung niya sa daga ti kuwarta niya amu. 19 "Pagka dugay pag timpu nagluwang maan kay amu tunda pag manga panawuhun bag-u kay inusisa ti kuwarta sa kanda. 20 Nagpakarani ti nakatanggap lima ka libu. Magkun siya, 'Amu, inda duy ti lima ka libu kanmu ipiniyar sa kangku. Inda waya gid ti lima ka libu kay tubu.' 21 Magkun kay amu, 'Bali duy, matinupadun ag mayad kawu pag panawuhun. Dahil kawu matinupadun sa diit pag halaga, piyaran niku kawu daka pag halaga. Miusa kawu sa kang kabayaan.' 22 Nagpakarani waydi ti nakatanggap duwa ka libu magkun, 'Amu, inda yi duy kanmu ipiniyar pag duwa ka libu. Ag inda waya ti duwa ka libu kay tubu.' 23 Sinabi niya amu, 'Bali duy, matinupadun ag mayad kawu pag panawuhun. Dahil kawu matinupadun sa diit pag halaga, piyaran niku kawu daka pag halaga. Miusa kawu sa kang kabayaan.' 24 Nagpakarani waydi ti panawuhun nakatanggap usa ka libu. Magkun siya, 'Alam niku duy kawu mahigpit pag amu. Maggarab kawu una balaw kanmu pag binudlayan. Una kawu unman nagpamgas paghanapun waya nimu kay ani. 25 Magkadala aku nakan kang itinagu kanmu kuwarta sa daga. Inda yi duy kanmu usa ka libu.' 26 Magkun kay amu, 'Daut bugyahin waya kawu pag panawuhun. Alam diman maaw nimu aku maggarab una balaw kang binudlayan ag una aku unman nagpamgas, paghanapun niku kay ani. 27 Bati hayga unman nimu ihinulug sa bangku? Aku mana kis-ab may mab-ul waya tubu.' 28 Nakan bul-a yi niyu sa kanya ti usa ka libu bag-u ipakaun atag sa may sampulu ka libu. 29 Dahil ti may imaw pirmi pakan-an waya hampay siya abunda. Dapat ti unman may imaw bul-an waya una diit wadi ti sa kanya. 30 Iyamut niyu atag sa luwas atag sa kaduluman ti panawuhun unman may kasanyugan. Ati sida magnguruynguyan ag mangubut kanda manga ngipun." 31 Sinabi ni Hisus magkun, "Rumas-ug ti Anak Tawu aban hampay maghari, kaibahan niya ti tanan manga anghil bag-u gamitun niya kay karampatan sa pagkahari may kadayawan. 32 Ati katpung aban tipunun sa kay atubangan ti tanan tawu. Sida duwahun niya ka gurupu ga kay buwat manug-alaga karanidu, pag-ibukud waydi niya ti manga kambing sa kay manga karanidu. 33 Ipauli sa sikun baliwa ti manga karanidu, ti manga kambing sa wala. 34 Kumumun ti Hari sa manga tawu sa sikun baliwa, 'Abala duy kamu, kamu pinapaladan niku Ama. Pagsulud yi kamu, mangulian yi kamu sa kaharian inalistu para sa kanyu ginan waya sa kabag-u pagkalalang kalibutan. 35 Dahil pagka linun-us aku kanyu pinakan-an aku karan-unun. Pagka inuwaw aku, kanyu pinainman danum. Pagka aku usa ka taga iba daga, pinadayun niyu aku sa kanyu balay. 36 Pagka aku unman may misulung rutay, kanyu pinarutayan. Pagka aku may sakit kanyu dinuawan. Pagka aku napirisu, kanyu sinabang.' 37 Sumabi ti manga tawu matadlung magkun, 'Panginuun, kapira duy kawu kanmi nakitan linun-us ag kanmi pinakaun, inuwaw ag kanmi pinainum? 38 Kapira duy kawu taga iba daga kanmi pinadayun sa kanmi balay? Kapira duy kawu unman may misulung bag-u kanmi pinarutayan? 39 Kapira duy kawu nakitan nimi may sakit, una sa pirisuhan bag-u kanmi sinabang?' 40 Sabihun Hari magkun, 'Kang pagsabihun sa kanyu, pagka binwat niyu inda sa usa sa manga patar-ari niku mapinakumbabaun, sa kangku yi ngap pag binwat niyu tunda pag mayad.' 41 "Kumumun maan ti Hari sa manga tawu sa wala baliwa, 'Pagpakarayu kamu sa kangku ginan kamu ti manga sinaadan, pag-ati kamu sa apuy unman magkapsa inalistu para sa diyablu hanggan sa kay manga anghil. 42 Dahil pagka aku linun-us, unman kanyu pinakan-an karan-unun. Aku inuwaw, unman kanyu pinainman danum. 43 Aku usa ka taga iba daga ag unman kanyu pinadayun sa kanyu balay. Aku nawad-an rutay ag unman kanyu pinarutayan. Aku may sakit ag sa pirisuhan ag unman kanyu dinuawan.' 44 Sumabi diman sida, 'Panginuun, kapira duy kanmi nakitan kawu linun-us, inuwaw, ngatay kawu taga iba daga, ngatay nawad-an rutay, ngatay may sakit kawu, ngatay sa pirisuhan ag unman kawu kanmi inasikasu?' 45 Kumumun ti Hari sa kanda, 'Pagsabihun niku sa kanyu, pagka inirangan niyu kanyu pangawat sa usa sa manga mapinakumbabaun inda, aku ngap ti kanyu pinabay-anan.' 46 Tulakun sida tabug sa kaparusahan unman may katapusan. Dapat ti manga matadlung tumanggap tutuu pag buhi unman may katapusan."
1 Pagka natapus nitudlu ni Hisus inda tanan, sinabi niya sa kay manga tuludluan magkun, 2 "Alam yi niyu, duwa wadi ka sirang bag-u Kapistahan yi sa Pag-alaala sa Karibrihan. Ipahintulut yi ti Anak Tawu sa manga kalaban hampay ipaku siya sa kurus." 3 Ti manga pangulu manug-asiwa balay Diyus hanggan ti manga paggurangunun sa nasyun nagtiripun ati katpung sa ulian ni Kaipas imaw ti Pangulu Manug-asiwa balay Diyus. 4 Ginayak nida ipadakup si Hisus sa daya bag-u kanda ipamatay. 5 Dapat ay sinabi nida magkun, "Danga nita ipadakup katpung sa Kapistahan, barang magulu ti manga tawu." 6 Ati katpung si Hisus sa balay ni Simun sa baryu Bitanya. Tunda pag Simun kaybi batasin. 7 Kan Hisus katpung magkaun napakarani sa kanya ti usa ka babayi may dara alabasturu pag batu ti binwat sukadan punu mahalaga pag pamanglu bag-u kay ibinuhus kay pamanglu sa kay ulu ni Hisus. 8 Pagka nakitan manga tuludluan tunda, nangisug sida magkun, "Hayga duy inuyang lang tunda pag pamanglu? 9 Mayad waya abi nu ipinabili kis-ab daka paman kay bayad bag-u ipakaun sa manga pugri kay kabilyanan." 10 Alam di ni Hisus kanda pagsabihun nakan magkun siya, "Hayga duy kanyu pagpakialman ti babayi? Mayad inda kay binwat sa kangku. 11 Pirmi di sa kanyu ti manga pugri, dapat aku aban udyi dugay kaibahan niyu. 12 Binuhusan yi niya pamanglu kang bilug bilang ga alistu yi sa udas aban kanda maglubung sa kangku. 13 Kang pagsabihun gid sa kanyu, una naan pag itudlu ti Mayad pag Barita inda sa bilug kalibutan, hanggan ti binwat babayi inda matultul diman hampay balaw malimtan." 14 Sa sampulu may duwa ka tuludluan ti usa kay ngaran si Hudas Iskariyuti. Nag-ati si Hudas sa manga pangulu manugasiwa balay Diyus, 15 magkun, "Hintay duy kanyu gustu ipakaun sa kangku nu awatan niku kamu agud madakup si Hisus?" Bag-u binilangan nida si Hudas tatlumpulu ka kuwarta pilak. 16 Siyun ginan naghanap paraan si Hudas hampay itudlu niya si Hisus sa kalaban. 17 Rinmas-ug ti un-an pag sirang Kapistahan manga Tinapay unman may Pamadaka. Nagpakarani kay manga tuludluan sa kan Hisus namaingana magkun, "Naan duy kanmu gustu ihanda nimi kanmu yapun sa Pag-alaala sa Karibrihan?" 18 Nagsagut siya, "Pag-ati kamu sa banwa hanapa niyu tunda pag tawu sabiha sa kanya, kainda kay pagsabihun Maisturu, 'Arani yi kang udas. Aku hanggan kang manga tuludluan sa kanmu balay pag kumaun kanmi yapun sa Pag-alaala sa Karibrihan.' " 19 Tinupad manga tuludluan kay bilin ni Hisus. Ihinanda yi ngani nida ti yapun sa Pag-alaala sa Karibrihan. 20 Ati katpung pag yabi nagpakarani si Hisus sa lamak kaibahan niya ti sampulu may duwa ka tuludluan. 21 Sa kanda magkaun magkun si Hisus, "Pagsabihun niku sa kanyu, ti usa sa kanyu pumakampi sa kalaban hampay aku kay itudlu." 22 Nanruku masyadu ti manga tuludluan, ti kada usa namaingana sa kanya magkun, "Aku aw nguna Panginuun?" 23 Nagsagut si Hisus, "Ti kadungan niku sumawsaw sa taya imaw yi ti pumakampi sa kalaban hampay aku kay itudlu. 24 Mamatay gid ti Anak Tawu angay sa isinurat sa Banal Kasuratan, dapat kaawaawa duy tunda pag tawu ti pumakampi sa kalaban agud kay itudlu ti Anak Tawu. Mayad waya nu unman nianak siya pag tawu." 25 Pagka sinabi ni Hisus tunda, nagpaingana diman si Hudas, imaw ti magpakampi sa kalaban, magkun, "Maisturu, aku aw nguna?" Magkun si Hisus, "Kawu yi ngani." 26 Pagka sida magkakaun yi, nagpunpun si Hisus tinapay ginan sa lamak. Pagka nakapasalamat siya sa Diyus, pinikapika niya ti tinapay bag-u kay ipinakaun sa kay manga tuludluan. Magkun siya, "Tanggapa niyu inda kan-a. Inda kang bilug." 27 Binitbit niya ti ungut, nagpasalamat siya sa Diyus bag-u itinunghul niya sa kanda, magkun siya, "Pag-inum kamu tanan inda. 28 Dahil inda kang dugu itinalaghut Diyus sa taratu. Ibuhus kang dugu sa ikapatawad manga kasalanan mayamu tawu. 29 Kang pagsabihun sa kanyu, dayi aku uminum inda pag alak ubas hanggan sa udwaya inmun niku ti bag-u alak ubas kasaru niku kamu sa kaharian niku Ama." 30 Pagka sida kinmanta kanda dayaw sa Diyus, nag-atag sida sa bantud Ulibu. 31 Sinabi ni Hisus sa kanda magkun, "Taynguna pag yabi kamu tanan umalinlangan sa kangku parihu sa pagsabihun Diyus sa Banal Kasuratan magkun, 'Matyun niku ti manug-alaga karanidu, bag-u mangalat ti manga karanidu.' 32 "Dapat nu aku mabuhi uman, umuna aku sa kanyu atag sa Galiliya." 33 Sinmabi si Pidru magkun, "Una duy umalinlangan sida tanan sa kanmu, aku dayu gid umalinlangan sa kanmu." 34 Sinabi ni Hisus sa kanya, "Kang pagsabihun sa kanmu, taynguna yi gid pag yabi udwaya tumarauk ti manuk, itanggi nimu aku katlu ginan." 35 Dapat sinabi gid ni Pidru sa kanya, "Una waya sa kamatayan damayan gid niku kawu, balaw gid niku kawu itanggi." Katunda diman ti sinabi tanan manga tuludluan. 36 Bag-u kay tinaban ni Hisus kay manga tuludluan atag sa usa ka rugar kay ngaran Gitsimani. Sinabi niya sa kanda, "Pagtukaw dapu kamu sitay. Mandarangin aku ati sa un-an." 37 Dapat tinaban niya si Pidru hanggan kay duwa ka anak ni Sibidiyu sida ni Huwan ni Santiyagu. Bag-u nanruku siya ag naarimputu sa kay tagipusuun. 38 Sinabi niya sa kanda, "Kang tagipusuun mas-ut yi sa karukuan, harus ga mamatay yi aku. Pag-alagad kamu sitay, abayi di niyu aku sa kang maimatahan." 39 Pagka napakarayu siya diit, napadapa siya nagdarangin magkun, "Amang, nu mahimu ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud nu unman kanmu di gid ti kailangan masunud." 40 Nagbalik siya, naras-ugan niya turug kay tulu ka tuludluan. Sinabi niya sa kan Pidru, "Ungud aw gid unman makaabay kamu sa kang maimatahan una lang usa ka udas? 41 Pagmaimatahan kamu, pagdarangin gid hampay kamu balaw madara sa tuksu. Ti naisipan mana alistu, dapat ay ti bilug malumuy." 42 Nagpakarayu maan siya nandarangin magkun, "Amang nu ud mab-ul inda pag ungut may kakurian nu unman kang inman, kailangan kanmu di pag kagustuhan ti masunud." 43 Nagbalik maan siya naras-ugan maan niya sida manga maturugan dahil tinalu yi sida puyat. 44 Nakan kas-a waya kay tinayakan sida nandarangin siya maan pakatlu imaw diman kay sinabi. 45 Bag-u nagbalik maan siya sa kay manga tuludluan magkun siya sa kanda, "Magkaturug aw waya kamu, magpahari aw waya? Inda yi ti udas. Taynguna itudlu ti Anak Tawu sa manga makasalanan ag ipabahala yi siya sa kanda. 46 Pagbangun yi kamu, atag yi kita, inda yi ti tumudlu sakangku atag sa manga makasalanan." 47 Magbagaw di waya si Hisus, nagras-ug yi si Hudas, usa sa sampulu may duwa. May kaibahan siya mayamu tawu may dara manga baladaw, manga pamakul. Sinugu sida manga pangulu manug-asiwa balay Diyus hanggan manga paggurangunun sa nasyun. 48 Udwaya sida rinmas-ug ati, magkun si Hudas sa kay manga kaibahan, "Inda kanta hugyatan, nu hintay sab kang arkan imaw yi ngap pag tawu. Dakpa yi niyu siya." 49 Nakan dinmulud si Hudas sa kan Hisus magkun, "Maisturu." Bag-u kay inarkan. 50 Sinabi ni Hisus sa kanya, "Duy, kainda yi buwata kanmu gayak." Bag-u hiniyaptan manga tawu si Hisus, kanda yi dinakup. 51 Ginmabut kay baladaw ti usa ka kaibahan ni Hisus, tinigbas niya ti panawuhun Pangulu Manug-asiwa balay Diyus, napungus kay tuli. 52 Bag-u sinabi ni Hisus sa kanya magkun, "Suulan yi duy kanmu baladaw. Ti manga tawu nu itigbas kay baladaw, tigbasun matyun waydi sida baladaw. 53 Unman aw lugud nimu alam aku makahimu manhagad sa kang Ama bag-u susun padaran-an niya aku subra waya sa sampulu may duwa ka kagadhan anghil. 54 Dapat nu abi katida, kabitay pag matupad ti sinabi sa Kasuratan kailangan mangyari gid inda." 55 Bag-u napasrangu siya atag sa manga tawu magkun, "Aku lugud tulisan aw, nakan nagsitay kamu may dara baladaw manga pamakul hampay dakpun aku? Sirang sirang diman waydi magtukaw aku sa balay Diyus magtudlu, bati unman waydi niyu dinakup? 56 Dapat nakan nangyari inda tanan hampay matupad ti isinarat manga purupita." Bag-u naglinayas yi ti manga tuludluan, tinayakan yi lang usa usa si Hisus. 57 Pagka dinakup nida si Hisus, kanda dinara siya tabug sa balay ni Kaipas, imaw ti Pangulu Manug-asiwa balay Diyus. Nagtiripun ati ti manga Manugtudlu Kasuguan hanggan ti manga paggurangunun sa nasyun. 58 Dinmasun diman si Pidru dapat ay balaw napasuud. Pagka rinmas-ug si Pidru sa balay Pangulu Manug-asiwa, napasirung siya sa parat-ungan. Tinmukaw siya siyun kaibahan niya ti manga suruguun hampay makitan nu hintay ti mangyari. 59 Ti manga pangulu manug-asiwa balay Diyus hanggan ti buu Katipunan manga Pinunu naghanap manga kastigus pudilun laban sa kan Hisus hampay masintinsiyahan siya sa kamatayan. 60 Dapat unman sida may mag-akitan, madi mayamu ti nag- atubang nagbagaw kapudilan laban sa kan Hisus. Sa katapusan may duwa ka tawu nag-atubang magkun, 61 "Kay sabi inda pag tawu magkun, 'Kaya niku gubaun ti balay Diyus bag-u ipatindug maan sa sulud tulu ka sirang.' " 62 Tinmingug ti Pangulu Manug-asiwa balay Diyus, bag-u kay sinabi sa kan Hisus magkun, "Unman yi aw kawu may isagut sa inda pag dimanda nida laban sa kanmu?" 63 Dapat unman nag-&ingay si Hisus. Bag-u magkun ti Pangulu Manug-asiwa balay Diyus sa kan Hisus, "Sa ngaran Diyus buhi, kang pag-ibilin sa kanmu, sabiha nimu sa kanmi, nu tutuu kawu ti pinili Diyus Manugribri pag Hari, ti Anak Diyus." 64 Sinmagut si Hisus, "Tutuu yi ngap kanmu pagbagawun. Dapat kang pagsabihun sa kanyu, 'Kainda ginan makitan niyu ti Anak Tawu matukawan baliwa sa kay sikun Diyus minsan sa karampatan Diyus makapangyarihan. Rumas-ug siya aban padara sa rurum ginan sa langit.' " 65 Pagka nakadnug ti Pangulu Manug-asiwa sa kay sinabi ni Hisus, ginisi niya kay sadili rutay magkun, "Inda ay lapastangan yi laban sa Diyus. Unman yi kailangan nita ti manga kastigus. Kamu yi ngani ti nakadnug taynguna kay lapastangan laban sa Diyus. 66 Kabitay lugud kanyu magkilala?" Sinmagut sida, "Kailangan siya mamatay." 67 Bag-u binug-anan nida siya sa kay uyahun bag-u kanda sinuntuk. Sinampal waya siya manga iba magkun, 68 "Kawu ti pinili Diyus Manugribri pag Hari, pintua nimu nu si unu ti nagsampal sa kanmu." 69 Pagka si Hisus siyun sa atubangan Katipunan manga Pinunu, si Pidru matukawan sa parat-ungan. Napakarani sa kanya ti usa ka suruguun pag babayi magkun sa kanya, "Kaibahan diman waydi kawu ni Hisus taga Galiliya, unman aw?" 70 Dapat ay nagtanggi si Pidru tunda sa mag-adnugan nida tanan. Magkun si Pidru, "Unman niku magkaalaman kanmu pagsabihun." 71 Inmati siya sa may sabian parat-ungan. Nakitan siya tuhay maan pag suruguun pag babayi, sinabi niya siyun sa manga tawu, "Inda pag lalaki kaibahan diman ni Hisus taga Nasarit." 72 Tinmanggi di gid maan si Pidru uman magkun, "Matay waya, unman niku magkakilala tunda pag tawu." 73 Lagat lagat waya bag-u pinmakarani sa kan Pidru ti manga tawu siyun magkun, "Kaibahan gid ngap kawu nida. Magkakilala sa kanmu pamagaw." 74 Sinmagut si Pidru, "Una waya matyun aku, balaw gid ungud magkakilala niku tunda pag tawu." Susun nanarauk yi ngani ti manuk. 75 Bag-u naisipan ni Pidru kay sinabi ni Hisus magkun, "Udwaya tumarauk ti manuk, itanggi nimu aku katlu ginan." Napalwas si Pidru ga magutsan sa lumi.
1 Pagka surip, nagpululungan ti tanan manga pangulu manug-&asiwa balay Diyus hanggan ti manga paggurangunun sa nasyun laban sa kan Hisus hampay siya matyun. 2 Kanda pinagapus siya bag-u kanda dinara hampay ipabahala siya sa kan Gubirnadur Pilatu. 3 Pagka nakitan ni Hudas kanda nasintinsiyahan si Hisus sa kamatayan, nanisi siya sa kay nagpakampi sa kalaban. Inuli niya ti tatlumpulu ka kuwarta pilak sa manga pangulu manug-asiwa balay Diyus hanggan sa manga paggurangunun sa nasyun. 4 Sinabi ni Hudas sa kanda, "Nagkasala gid aku. Itinudlu niku sa kalaban ti tawu hampay siya matyun madi unman may kasalanan." Magkun sida, "Hintay kanmi labut, bahala kawu asan." 5 Sinarwag yi lang ni Hudas ti manga kuwarta pilak tag sa sulud balay Diyus. Bag-u linmakaw siya rargu nangugut. 6 Pinamunpun manga pangulu manug-asiwa balay Diyus ti manga kuwarta pilak bag-u magkun sida, "Bawal sa Kasuguan ipauli inda pag kuwarta sa surukadan kuwarta sa balay Diyus. Inda nakan kabaydanan sa usa ka buhi tawu." 7 Pinagkasunduan nida tunda pag kuwarta ti ibili sa daga manugpanday anglit hampay kanda buwatun tunda pag daga lulubngan manga day-uhan. 8 Nakan ngani iningarnan nida Madugu pag Daga, hanggan taynguna tugka. 9 Pagka nangyari tida natupad ti bagaw ipinadakit ni Purupita Hirimyas magkun, "Bin-ul nida ti tatlumpulu ka kuwarta pilak ti kabaydanan sa usa ka buhi tawu dahil imaw kanda pahalaga manga Israilita sa kanya. 10 Bag-u ibinili nida sa daga manugpanday anglit, angay sa kay isinugu Panginuun sa kangku." 11 Pinaatubang si Hisus sa kan Gubirnadur Pilatu. Nagpaingana ti gubirnadur sa kan Hisus magkun, "Kawu yi aw ngani ti Hari manga Hudiyu?" Nagsagut si Hisus magkun, "Hu. Tutuu ngap kanmu pagbagawun." 12 Dapat pagka siya idinimanda manga pangulu manug-asiwa balay Diyus hanggan manga paggurangunun sa nasyun, udyi lang siya nangingay. 13 Nakan ngani sinabi ni Pilatu sa kanya, "Unman aw nimu mag-adnugan kanda manga dimanda laban sa kanmu?" 14 Dapat unman nagsagut si Hisus una di. Nakan ngani lalu naglingut ti gubirnadur. 15 Kada Kapistahan sa Pag-alaala sa Karibrihan kay ugali gubirnadur pagpalpasan niya ti usa ka pirisu una hintay pag pirisu ti hagadun manga tawu. 16 Ati katpung may usa ka pirisu kilala tanan tawu. Kay ngaran si Hisus Barabas. 17 Nakan pagka natipun ti manga tawu, pinaingana sida ni Pilatu magkun, "Si unu ti gustu niyu palpasan niku, ngatay si Hisus Barabas aw ngatay si Hisus ti pagkumnun pinili Diyus Manugribri pag Hari?" 18 Dahil alam ni Pilatu maghirak sida, nakan kanda ipinabahala si Hisus sa kanya. 19 Pagka si Pilatu nakatukaw sa kay tukawan biristahan, nagpasabi kay asawa atag sa kanya magkun, "Danga kawu maglabut siyun pag tawu unman may kasalanan, dahil kis-ab yabi nakurian aku sa kang tagin-up tungkul sa kanya." 20 Ti kayamuan tawu waydi pagpakaudyukan manga pangulu manug-asiwa balay Diyus hanggan manga paggurangunun sa nasyun hampay pamuhunun sa kan Pilatu si Barabas ti ipalpas ag si Hisus ti ipamatay. 21 Kas-a waya sida pinaingana gubirnadur, "Hintay kanyu gustu siyun sa duwa ti palpasan?" Kanda sagut, "Si Barabas duy." 22 Sinabi ni Pilatu sa kanda, "Nu katunda, hintay ti buwatun sa kan Hisus sa pagkumnun pinili Diyus Manugribri pag Hari?" Sinmagut sida tanan, "Papakuan nimu sa kurus." 23 Nagpaingana maan si Pilatu, "Hayga, hintay pag kadautan kay binwat niya?" Dapat lalu waya gid kanda irininggit, "Ipaku siya sa kurus." 24 Pagka naintindihan ni Pilatu udyi siya may mabuwat, bagay lalu ngap magulu ti manga tawu, namab-ul siya danum, nangugas kay kamang sa atubangan manga tawu magkun, "Unman aku may saragtun sa kay kamatayan inda pag tawu. Bahala duy kamu." 25 Sinmabi di gid maan ti manga tawu, "Saragtun nimi hanggan nimi manga anak kay kamatayan niya." 26 Bag-u pinalpasan ni Pilatu si Barabas, dapat ipinagaruti niya si Hisus, bag-u ipinakaun sa kanda hampay ipaku sa kurus. 27 Bag-u dinara manga sundalu gubirnadur si Hisus tabug sa barak, tinipun nida ti kayamuan sundalu sa kay libut ni Hisus. 28 Linkasan siya bag-u kanda pinakulimpayan rutay marara. 29 Sinulapid nida ti dugihan bag-u kanda ipinasangbaw sa kay ulu ni Hisus ga sangbaw hari, ipinahiyaput nida ti bahi anyamu sa kay sikun pag kamang. Bag-u ti kada usa sa kanda nagluhud sa atubangan ni Hisus, kanda sinabi, "Pagmasulung kawu, Hari manga Hudiyu." 30 Ag kanda pinamug-anan siya. Bin-ul nida ti anyamu ginan sa kay kamang bag-u kanda ibinakul sa kay ulu. 31 Pagka nakatapus kanda mag-away, bin-ul maan nida ti kulimpay marara, pinasulungan nida kay sadili rutay bag-u kanda yi ipinalwas hampay ipaku sa kurus. 32 Pagka nakaluwas sida sa banwa, nakitan nida ti usa ka lalaki kay ngaran si Simun taga Sirini. Ipinalugus nida ipinapas-&an sa kanya kay kurus ni Hisus. 33 Rinmas-ug sida sa daga kay ngaran Gulguta (kay kahulugan, ga but-ul ulu pag rugar.) 34 Bag-u pinakan-an nida si Hisus alak may libug apdu. Dapat pagka natigsiman niya balaw nanginum siya. 35 Pagka kanda ipinaku siya sa kurus, inayaw-ayaw nida kay manga rutay alinaban waya nida sa lunggungan. 36 Bag-u tinmukaw sida siyun hampay kanda bantayan si Hisus. 37 Isinurat sa kay tungud ulu ti dimanda laban sa kanya magkun, "Inda si Hisus ti Hari manga Hudiyu." 38 Ati katpung duwa ka tulisan kay kadungan ni Hisus ipinaku waydi sa kurus, ti usa sa sikun baliwa pag kurus, kay usa sa wala baliwa pag kurus. 39 Ti manga maglawuy siyun nagmuransa diman waydi sa kan Hisus, nagtuknatukna kanda ulu, 40 magkun, "Unman aw kawu ti mangguba balay Diyus bag-u ipatindug uman sa sulud tulu ka sirang? Nu kawu ngani ti Anak Diyus ribrihan nimu taynguna kanmu sadili bilug. Pagdugsun yi ginan sa kurus." 41 Hina-ngalhangal diman siya manga pangulu manug-asiwa balay Diyus, manga Manugtudlu Kasuguan hanggan manga paggurangunun sa nasyun. Kay sabi nida, 42 "Irinibri niya ti iba dapat unman kaya niya iribri kay sadili. Bukun aw siya ti Hari Israil? Pagdugsun lang siya taynguna sa kurus bag-u maniwala kami sa kanya. 43 Magsarig siya sa Diyus. Nu tutuu siya pagbayaun Diyus kailangan iribri niya siya. Sinabi niya kabay kuntay siya Anak Diyus." 44 Kumun diman ti ihinangalhangal sa kanya manga tulisan kay kadungan niya ipinaku sa kurus. 45 Bag-u nagdulum ti init sa bilug kalibutan ginan sa karaw-&an sirang hanggan tugka palis ti init. 46 Pagka arani yi palis ti init, nagtawag si Hisus magkun, "Ili, Ili, lima sabaktani?" Kay ibug sabihun, "Diyus niku, Diyus niku, hayga pinabay-anan nimu aku?" 47 Manga matindugan siyun nakadnug sa kay bagaw ni Hisus. Magkun sida, "Magtawag maaw siya sa kan Ilyas." 48 Madali nalagiw ti usa sa kanda bag-u binmuul siya ispungha kay binasa maaslum pag alak bag-u ipinauli sa pudpud anyamu bag-u pinasupsup sa kan Hisus. 49 Dapat sinabi manga iba, "Pag-alagad dapu, bantayan nita nu ngatay lumuwang si Ilyas hampay iribri siya." 50 Nagtawag maan daka si Hisus bag-u naugtasan arup. 51 Bigla nagisi sa karaw-an ti limbun rutay sa balay Diyus ginan sa tungud sadsad sa sirung. Naglinug, nangirini ti manga batu. 52 Nabukasan ti manga lubung. Nabuhi maan uman ti mayamu manga matadlung ginan sa kamatayan. 53 Napalwas sida ginan sa kalubngan. Pagka nabuhi uman si Hisus sinmulud sida sa sakup sa Diyus pag banwa. Mayamu tawu ati ti nakakit sa kanda. 54 Pagka nadnugan nida ti linug ag pagka nakitan nida ti nangyari, nadala masyadu ti kapitan hanggan ti manga sundalu kaibahan niya magbantay sa kan Hisus. Magkun sida, "Tutuu ungud Anak Diyus inda." 55 Siyun diman ti mayamu pag babayi magbantay ginan sa arayu. Ginan waya sa Galiliya nagkuyug sida sa kan Hisus nagsirbi sa kanya. 56 Minsan sa kanda si Marya Magdalina hanggan si Marya kay ina nida ni Santiyagu, ni Husi hanggan kay ina nida ni Huwan ni Santiyagu. 57 Pagka maghugut marukirum, rinmas-ug ti usa ka mayaman taga Arimatiya kay ngaran si Husi, tuludluan diman ni Hisus. 58 Nag-ati siya sa kan Pilatu bag-u hinagad niya ti bangkay ni Hisus. Nakan ibinilin ni Pilatu magkun pakan-an ti bangkay sa kan Hisus. 59 Bin-ul Husi ti bangkay, kay sinaput sa pisahan rutay, 60 bag-u ipinauli niya sa kay bag-u ipinabuwat pag tinaguktukan batu. Pagka nipauli yi niya bag-u ipinaligid niya ti usa ka laun pag batu tag sa kay sabian, bag-u siya nuli. 61 Siyun diman si Marya Magdalina hanggan ti usa waya ka Marya matukawan sa kay tupad tinaguktukan batu. 62 Pagka nasurip sirang yi magdasun sa sirang nida maghanda sa Kapistahan, nagminsan ti manga pangulu manug-asiwa balay Diyus hanggan ti manga Parisiyu nag-ati sa kan Pilatu. 63 Sinabi nida, "Naalaala duy nimi pagka siya buhi waya, sinabi tunda pag magpanaguabi magkun, nu lawuy tulu ka sirang mabuhi siya uman. 64 Pabantayi duy kaayad-ayad ti tinaguktukan batu hanggan sa ikatlu pag sirang. Barang umati kay manga tuludluan, barang kanda takawun kay bangkay bag-u kanda sabihun sa manga tawu magkun, 'Nabuhi uman siya.' Inda abi pag daya subra waya sa kabag-u." 65 Nagsabi si Pilatu sa kanda, "Pagbuul kamu manga guwardiya, pabantayi niyu kaayad-&ayad ti tinaguktukan batu angay sa kanyu kaya." 66 Nakan ngani nag-ati sida sa tinaguktukan batu, bag-u sa magbantay manga guwardiya siniradu nida ti sabian hampay pihu unman may gumaraw.
1 Pagka nakalawuy ti sirang pamahari, pagka magpan-&hanaghanag yi sa sirang duminggu, nag-ati si Marya Magdalina hanggan ti usa ka Marya hampay duawan ti tinaguktukan batu. 2 Bigla naglinug mabisug. Dahil linmuwang ginan sa langit ti usa ka anghil Panginuun, nag-ati sa tinaguktukan batu bag-u ipinaligid niya kay talakup ginan sa sabian tinaguktukan batu. Pagka binukasan yi, siti yi ngap pag tinmukaw siya sa babaw talakup batu. 3 Kay histuda bilang ga kilat kay pagkasilaw, kay rutay ga burak kay pagkalagti. 4 Sa subra pag dala sa anghil tinakigan ti manga guwardiya, ga namatay yi sida sa babaw daga. 5 Magkun ti anghil sa manga babayi, "Kamu duy danga magkadala, dahil alam niku paghanapun niyu si Hisus ti ipinaku sa kurus. 6 Unman siya sitay dahil siya nabuhi yi uman parihu diman sa kay sinabi. Abala kamu pagbantay ngani kamu sa kay nagpaulian. 7 Pag-ati kamu kadali sabiha niyu sa kay manga tuludluan magkun, siya nabuhi uman ginan sa kamatayan. Siya umuna sa kanyu tabug sa Galiliya. Makitan niyu siya ati. Imaw di tugka kang sarabihun sa kanyu." 8 Ginminan ti manga babayi madali gid sa tinaguktukan batu may kadalaan may daka waydi pag kabayaan. Nagpalalagiwan sida hampay kanda itultul sa kay manga tuludluan. 9 Bag-u bigla nasulang ngap manga babayi si Hisus. Nagsabi siya sa kanda, "Pagmasulung gid duy kamu." Nagpakarani sida sa kanya hiniyaptan nida kay manga lulud kanda sinamba siya. 10 Bag-u sinabi ni Hisus sa kanda, "Danga duy kamu magkadala, pag-ati yi kamu sabihi niyu kang manga patar-ari, pag-atag sida sa Galiliya, ati pag makitan nida aku." 11 Pagka linmakaw ngani ti manga babayi, ti iba guwardiya nag-ati sa banwa, itinultul nida sa manga pangulu manug-asiwa balay Diyus ti tanan manga nangyari. 12 Nakan pagka tinipun nida ti manga paggurangunun sa nasyun Hudiyu namululungan sida bag-u nagpakaun sida daka pagka kuwarta sa manga sundalu nagguwardiya. 13 Bag-u kanda binilinan sida magkun, "Sabihun lang niyu, 'Pagka yabi kami naturug nagluwang kay manga tuludluan, kanda tinakaw kay bangkay ni Hisus.' 14 Nu abi maalaman gubirnadur, bahala kami maghampang sa kanya hampay kamu balaw maisugan niya." 15 Nakan tinanggap manga guwardiya ti kuwarta, kanda tinupad ti manga itinudlu sa kanda. Tunda pag barita naalaman ngani tanan manga Hudiyu hanggan taynguna tugka. 16 Ti sampulu may usa ka tuludluan nag-atag sa Galiliya sa bantud kay itinudlu ni Hisus sa kanda. 17 Pagka nakitan nida si Hisus nagyuk-ub sida nagsamba sa kanya, madi ti iba magsalawahan di. 18 Nagpakarani si Hisus bag-u sinabi niya sa kanda magkun, "Ipinakaun yi sa kangku ti tanan karampatan sa langit hanggan sa babaw daga. 19 Nakan pag-ati kamu buwata niyu tuludluan niku ti tanan manga nasyun tawu. Itulbaw niyu sida ipasakup sa ngaran Ama, Anak, hanggan Ispiritu Banal. 20 Tudluan niyu sida hampay tumupad sa tanan manga isinugu niku sa kanyu. Danga kalimtan niyu aku pirmi kaibahan niyu hanggan waya sa katapusan panahun."
1 Inda ti Mayad pag Barita ni Hisu-Kiristu kay Anak Diyus. 2 Isinurat sa ribru ni Purupita Isayas magkun, "Inda yi kang suruguun kang ipauna sa kanmu, Siya yi tig-alistu kanmu dalan. 3 May magtawag sa pangawakawaan magkun, Ialistu niyu ti dalan Panginuun, Tadlunga gid ti dalan kay lakawan." 4 Nakan ngani rinmas-ug si Huwan sa pangawakawaan, nanudlu siya sa manga tawu magkun, "Pag-ampu yi kamu sa kanyu manga kasalanan ag pagpatulbaw yi bag-u patawadun yi Diyus kanyu manga kasalanan." 5 Naglinuwang ti manga tawu ginan sa kabuuhan daga Hudiya hanggan ginan sa banwa Hirusalim, nag-ati sida tag sa kan Huwan. Itinulbaw sida ni Huwan sa sapa Hurdan, isinabi nida kanda tanan kasalanan. 6 Si Huwan may sulung rutay bulbul kamilyu, may hawud paknul. Kay karan-unun manga apan, manga daykut putyukan. 7 Nanudlu siya magkun, "Dumasun sa kang uryan ti lalu makamaskihan sa kangku. Unman aku may karampatan magyungdu maglubad kay higut niya manga lapak. 8 Aku magtulbaw ngani sa kanyu sa danum. Siya bay tumulbaw sa kanyu sa Ispiritu Banal." 9 Ati katpung nagluwang si Hisus ginan sa Nasarit sa sakup Galiliya bag-u itinulbaw siya ni Huwan sa Hurdan. 10 Pagka napatakas si Hisus ginan sa danum, kadaka nakitan niya bigla nabukasan ti manga langit ag ti Ispiritu ga histuda kalampati nagpakababa atag sa kanya. 11 May nagbagaw ginan sa langit magkun, "Kawu kang pagmayadun pag Anak, sa kanmu aku lubus pag magbaya." 12 Bag-u nagsugu ti Ispiritu Banal sa kan Hisus tabug sa pangawakawaan. 13 Ati siya sa pangawakawaan sulud upatpulu ka sirang, pagtuksuhun mana ni Satanas. Nangulian si Hisus sa basad masimarun hayup. Dapat inalagaan siya manga anghil. 14 Pagka dinakup si Huwan, nag-ati maan si Hisus tag sa Galiliya, kay itinudlu ti Mayad pag Barita Diyus magkun, 15 "Natupad yi ti kaudasan, udyi dugay Rumas-ug yi kay paghari Diyus. Iampu yi niyu kanyu kasalanan, pagpaniwala sa Mayad pag Barita." 16 Sa kay maglakaw sa saruy danaw Galiliya, nakitan ni Hisus si Simun hanggan kay patar-ari si Andiris. Pag-itaplak nida kanda laya sa danaw, dahil manga manug-isda sida. 17 Sinabi ni Hisus sa kanda, "Pagkuyug duy kamu sa kangku ag buwatun niku kamu manga manugtaban yi sa manga tawu." 18 Kadaka tinayakan nida kanda manga laya, bag-u nagkuyug sida sa kan Hisus. 19 Sa kay maglakaw maan ni Hisus balaw arayu, may nakitan siya duwa maan magtar-ari, si Santiyagu hanggan si Huwan kay manga anak ni Sibidiyu. Sa duunduun sida, pagputikan nida kanda manga sarap. 20 Kadaka tinawagan niya sida bag-u kanda tinayakan sa duunduun kanda ama si Sibidiyu hanggan ti manga suruguun suruhulan bag-u nagkuyug ngani sida sa kan Hisus. 21 Pagka rinmas-ug sida ni Hisus ati sa Kapirnaum pag banwa, nagsaka siya sa balay tiripnan sa sirang pamahari ag nanudlu sa manga tawu. 22 Naglingut ti manga tawu sa kay tudlu, dahil nanudlu siya sa kanda bilang may karampatan, balaw parihu sa manga Manugtudlu Kasuguan. 23 Bigla may nagsaka sa kanda balay tiripnan usa ka tawu inapuan labang. Nagringgit siya 24 magkun, "Hintay kanmu pakialam sa kanmi, Hisus taga Nasarit? Nakan aw kawu nagsitay hampay kami kanmu wasakun? Nakilala yi gid niku kawu yi gid ti Banal pag Anak Diyus." 25 Sinungyaw ni Hisus ti labang magkun, "Danga mag-ingay, pagluwas yi kawu ginan sa kanya." 26 Dapat pinatigbak waya labang ti tawu, namagrit daka bag-u nagluwas ti labang ginan sa kanya. 27 Nadulaw gid ti manga tawu tanan tanan namaraingan-&an magkun, "Hintay nguna inda? Usa ka bag-u pag tudlu inda. May kamaskihan siya magsugu una sa manga labang, magpaniwala gid sida sa kanya." 28 Kadaka nibantug ti barita tungkul sa kan Hisus sa kabuuhan daga Galiliya. 29 Pagka sida ni Hisus ginan sa balay tiripnan, sinmaka sida sa balay nida ni Simun ni Andiris, kuyug hanggan sida ni Santiyagu ni Huwan. 30 Maigyaan pagramigan kay manugang babayi ni Simun. Nakan naghampang sida sa kan Hisus tungkul sa kanya. 31 Dinulud ni Hisus ti babayi kay hiniyaptan sa kamang bag-u kay atinindug. Rargu nahumpawan yi kay ramig. Bag-u nangapuy yi siya kanda karan-unun. 32 Tunda pag malambung, pagka nisalup yi ti init kanda dinara tag sa kan Hisus ti tanan may manga sakit hanggan ti manga inapuan labang. 33 Ti tanan tawu banwa nagtipun sa sugkadan balay. 34 Nagpaayad si Hisus sa mayamu pag tawu may mag-adnugan tuhay tuhay pag sakit, mayamu diman pag manga labang kay ipinalwas ginan sa manga tawu. Unman pinahintulutan niya ti manga labang magbagaw, dahil nakilala nida siya. 35 Nagbangun si Hisus abasad waya ti yabi, nagluwas siya sa balay, nag-atag sa rugar pangawakawaan tawu hampay magdarangin. 36 Pagka dugay inusig siya nida ni Simun. 37 Pagka kanda nakitan siya, magkun sida sa kanya, "Ti tanan pag manga tawu maghanap yi sa kanmu." 38 Sinabi ni Hisus sa kanda, "Pag-ati yi duy kita sa manga banwa, sa manga baryu sitay sa kanta palibut hampay aku magtudlu diman ati. Dahil imaw kang turunu nakan aku nagsitay." 39 Nag-ati si Hisus sa tanan rugar sa kabuuhan daga Galiliya, nanudlu siya sa manga tawu sa manga balay tiripnan, ag ipinalwas niya ti manga labang. 40 Nagpakarani sa kan Hisus ti usa ka tawu may batas, linmuhud sa kay atubangan bag-u nagpakihampang sa kanya magkun, "Duy nu gustu nimu, mapaayad nimu aku sa kang batas." 41 Kay kinaawaan ni Hisus ti tawu, nakan kay kinup-an niya kamang magkun sa kanya, "Gustu ngani niku duy. Pagmaayadan yi kawu sa kanmu batas." 42 Kadaka siya nabul-an batas, naayadan yi siya. 43 Binilinan siya ni Hisus mayad mayad magkun, 44 "Danga pagsabiha nimu inda una sa kantapu pag tawu. Pag-atag kawu pagpakakit kawu sa manug-asiwa balay Diyus. Bag-u pagsagda kawu sa Diyus usa ka hayup minatay angay sa kay ibinilin ni Muysis, bilang usa ka puruyba sa manga tawu nag-ayad yi kawu." 45 Dapat ay pagka siya linmakaw yi, lalu ngap ibinarita niya itinultul sa mayamu pag tawu nu kabitay siya pag pinaayad ni Hisus. Nakan unman yi makasulud si Hisus sa banwa nu sirang, ati lang siya sa luwas banwa sa manga rugar pangawakawaan tawu. Nag-ati diman ti manga tawu sa kan Hisus una ginan sa arayu una ginan sa arani.
1 Pagka lawuy pira ka sirang, nagsiyun yi maan si Hisus sa Kapirnaum. Pagka nabaritaan manga tawu siya sa balay, 2 mayamu ti nagtiripun hanggan di udyi mag-itabu sa balay una sa sugkadan. Itinudlu ni Hisus sa kanda ti Bagaw Diyus. 3 Pagka dugay may rinmas-ug upat ka tawu magyayung tawu lunu. 4 Pagka unman sida makapakarani sa kan Hisus dahil sa kayamuan tawu, linukaban nida ti atup sa kay tungud ni Hisus. Pagka linukaban yi bag-u kanda itinuntun ti tawu lunu sa basad duyan. 5 Pagka nakitan ni Hisus kanda pagsarig, sinabi niya sa tawu lunu, "Pinatawad yi duy kanmu manga kasalanan." 6 May matukawan ati manga Manugtudlu Kasuguan, pag-isipun nida sa kanda sadili magkun, 7 "Hayga nguna magbagaw inda pag tawu kumun? Magpalabilabi siya sa Diyus. Hintay ti may kapangyarihan makapatawad manga kasalanan tawu nu unman ti Diyus lang?" 8 Pagka naalaman ni Hisus sa kay tagipusuun may pag-isipun sida sa kanda sadili, sinabi niya sa kanda, "Hayga kanyu pagpakaisip-isipun tunda pag manga bagay sa kanyu sadili? 9 Hintay nguna ti lalu malpus sabihun sa tawu lunu, ngatay 'Ipinatawad yi kanmu manga kasalanan', aw ngatay 'Pagtindug yi kawu, luhuta kanmu amak, paglakaw yi kawu'? 10 Dapat ay hampay maalaman niyu ti Anak Tawu may kamaskihan sa babaw daga hampay magpatawad sa manga kasalanan tawu," sinabi ni Hisus sa tawu lunu, 11 "Pagsabihun niku sa kanmu, pagtindug yi kawu duy, luhuta yi kanmu amak, pag-uli yi sa kanmu balay." 12 Kadaka siya nagtindug sa kanda atubangan, linuhut yi kay amak, rargu yi nuli sa kay balay. Nakan nadulaw sida tanan, dinayaw nida ti Diyus magkun, "Una kaybi ginan ud may nakitan katida." 13 Linmakaw maan si Hisus nag-atag sa saruy danaw. Pagka nagpakarani sa kanya ti kadamlan tawu, nanudlu maan siya sa kanda. 14 Sa kay naglakaw nakitan niya si Libi kan Alpiyu anak matukawan sa suruktan buhis. Magkun si Hisus sa kanya, "Pagkuyug duy kawu sa kangku." Nagtindug si Libi nagkuyug ngani sa kan Hisus. 15 Pagka dugay magkaun si Hisus hanggan kay manga tuludluan sa kan Libi balay. Nagsaru diman sa kan Hisus ti mayamu pag manga manunukut buhis hanggan manga makasalanan pag tawu. Dahil mayamu ti nagkuyug sa kanya. 16 May manga Parisiyu ati, manga Manugtudlu ngani Kasuguan. Pagka nakitan nida si Hisus magkaun kay kasaru manga makasalanan hanggan manga manunukut buhis, sinabi nida sa kay tuludluan magkun, "Magkaun mag-inum aw siya kay kasaru manga manunukut buhis ag manga makasalanan?" 17 Pagka nadnugan ni Hisus tunda, sinabi niya sa manga Manugtudlu Kasuguan, "Unman may kailangan sa manugbulung ti balaw may manga sakit, ti may manga sakit lang ti may kailangan. Unman aku nagsitay hampay magtaban sa manga matadlung, nu unman sa manga makasalanan ngap." 18 Ati katpung unman maghandum karan-unun kay manga tuludluan ni Huwan hanggan ti manga Parisiyu. Bag-u may nagpakarani sa kan Hisus magkun, "Hayga duy may ugali unman maghandum karan-unun kay manga tuludluan ni Huwan hanggan ti manga tuludluan manga Parisiyu, dapat unman may ugali katida kanmu manga tuludluan?" 19 Sinabi ni Hisus sa kanda magkun, "Mahimu aw lugud unman maghandum karan-unun ti manga binan-awan sa pamasaruhan nu kaibahan waya nida ti lalaki ipinasaru? Nu kaibahan waya nida ti lalaki ipinasaru, dayu waydi mahimu nu unman kumaun di gid sida. 20 Dapat nu aban bul-un yi siya ginan sa kanda, bag-u di unman sida humandum karan-unun, nu udyi siya sa kanda. 21 "Unman may tawu maglupun bag-u rutay sa daan pag rutay. Nu bag-u pag lupun gumisi ngap sa kay daan pag rutay linupnan bag-u umamat dumaka kay gisi. 22 Unman diman may tawu magsukad bag-u alak ubas sa daan pag manga paknul pag sukadan. Nu abi katunda ti buwatun mabusni ti paknul. Mabuhus yi lang ti alak ubas ag madaut yi lang ti manga sukadan. Ti mayad nu isukad ti bag-u alak ubas sa bag-u pag manga paknul pag sukadan." 23 Pagka dugay sa katpung sirang pamahari nakasabuk si Hisus sa tawu tanman tiriguhan. Sa kanda ngani maglakaw, nag-&umpisa kay manga tuludluan maggutul manga uhay. 24 Magkun ti manga Parisiyu sa kan Hisus, "Malu duy, hayga pagbuwatun nimu manga tuludluan sa sirang pamahari ti labag sa Kasuguan?" 25 Magkun si Hisus sa kanda, "Udwaya aw lugud nabasa niyu kay binwat ni Dabid, pagka siya hanggan kay manga kaibahan magkalun-us yi ag unman may karan-unun? 26 Nagsaka kabay si Dabid sa balay Diyus katpung Pangulu Manug-asiwa si Abiyatar. Kinaun ni Dabid ti tinapay ti ibinugtang ipinakaun sa atubangan Diyus. Tunda pag tinapay unman mana may makakaun iba nu unman ti manga manug-asiwa lang balay Diyus. Dapat kinaun ngap ni Dabid tunda pag tinapay bag-u pinakan-an niya hanggan kay manga kaibahan." 27 Sinabi maan ni Hisus sa kanda, "Ti sirang pamahari binwat para sa tawu, balaw tawu ti binwat para sa sirang pamahari. Nakan una ti sirang pamahari sa sirung di kapangyarihan Anak Tawu."
1 Pagka dugay nag-ati maan si Hisus sa balay tiripnan. May tawu ati pilay kay kamang. 2 Tiniidan manga tawu si Hisus nu ngatay paayadun niya sa sirang pamahari hampay kanda mana isumbung siya. 3 Sinabi ni Hisus sa tawu pilay kay kamang, "Abala duy kawu, pagtindug sitay." 4 Bag-u magkun si Hisus sa manga tawu, "Hintay nguna ti angay sa Kasuguan ni Muysis katpung sirang pamahari, ngatay tigbuwat ikaayad sa kaparihu, aw ngatay tigbuwat ikadaut? Ngatay tigbawi buhi tawu, aw ngatay tigpahamak buhi tawu?" Dapat ay sida unman nag-ingay. 5 Namarantayun si Hisus magkagalit sa kanda dahil pag-iruku niya ti kaganitan nida tagipusuun. Bag-u sinabi niya sa lalaki, "Hunatan duy kanmu kamang." Kay ngani ihinunat kay kamang bag-u nag-ayad yi ngap. 6 Nagluwas yi sa balay tiripnan ti manga Parisiyu. Kadaka nagpululungan sida sa manga nagpakampi sa kan Hirudis, nu kabitay kanda ipamatay si Hisus. 7 Si Hisus hanggan kay manga tuludluan napablag yi ginan sa kayamuan tawu nag-ati sa saruy danaw. Nagkuyug sa kanya ti lalu mayamu pag manga tawu ginan sa Galiliya. Nag-ati diman sa kanya ti manga tawu ginan sa Hudiya, 8 ginan sa Hirusalim, ginan sa Idumiya, ginan sa rugar dipay sapa Hurdan, ginan sa libut Tiru hanggan Sidun. Lalu mayamu pag tawu nag-ati sa kanya dahil nabaritaan nida ti tanan kay pagbuwatun. 9 Sinabi niya sa kay manga tuludluan magkun, "Ihanda niyu sa kangku ti usa ka duunduun dahil sa kayamuan tawu, bagay aku kanda siutun." 10 Dahil magpaayad siya sa mayamu tawu. Nakan magdurutdutan ti tanan manga may dahilan hampay siya maigpilan nida. 11 Pagka nakitan si Hisus manga labang, napadapa sida sa kay atubangan, nagringgit magkun, "Kawu ti Anak Diyus." 12 Binawalan ni Hisus ti manga labang magkun, "Danga pag-ingarni niyu kang ngaran." 13 Pagka dugay nagtukad si Hisus sa bantud ag tinawagan niya ti manga tawu kay pagkailanganun. Nagluwang ngani sida tag sa kanya. 14 Bag-u nagpili siya sampulu may duwa ka tawu, (kay iningarnan manga Apustul) hampay sida kay yi gid manga kaibahan niya ag hampay sida paatagun niya manudlu, 15 may kamaskihan diman hampay magpalwas manga labang. 16 Inda ngani ti sampulu may duwa ka tawu kay pinili, si Simun, kay binansagan si Pidru, 17 si Santiyagu anak ni Sibidiyu, hanggan kay patar-ari ni Santiyagu si Huwan. Sida kay binansagan ni Hisus Buanirgis, ibug sabihun manga mabisug pag tawu parihu sa linti. 18 Bag-u si Andiris, si Pilipi, si Bartulumi, si Matiyu, si Tumas, si Santiyagu kan Alpiyu anak, si Tadiyu, si Simun ti pagsabihun masipag sa nasyun Israil, 19 hanggan si Hudas Iskariyuti, imaw ti nagpakampi sa kalaban ni Hisus. 20 Pagka nagsaka si Hisus sa balay, nagtipun maan ti mayamu pag tawu siyun, nakan udyi makahimu kaun sida ni Hisus. 21 Pagka nabaritaan niya manga katawuhan, naglinuwang sida hampay siya kanda dakpun, dahil magkun sida paung si Hisus. 22 Bag-u may manga Manugtudlu Kasuguan naglus-ug ginan sa Hirusalim magkun, "Inapuan siya ni Biilsibul. Hari manga labang ti nagpakaun kapangyarihan sa kanya hampay makapalwas manga labang." 23 Nakan ipinakarani ni Hisus ti manga tawu sa kanya bag-u magkun siya sa kanda sa manga pahalimbawa, "Kabitay pag pumalwas si Satanas sa kan Satanas? 24 Dahil nu maglalabanan ti manga sakup kaharian, pihu marangga aban tunda pag kaharian. 25 Mawayak ti magtal-akan nu udyi magkarasunduan sida sa kanda ginan nangarawayan. 26 Nu abi labanan ni Satanas kay sadili ag udyi magkarausa kay manga sakup, mawasak yi kay kamaskihan, arani yi kay katapusan. 27 Dapat nu mabisug pag tawu ti may puun balay, unman may makasaka sa siti pag balay hampay umagaw kay manga butang nu unman gapusun dapu niya kay apu mabisug. Bag-u mahimu siya sumaka umagaw kay butang. 28 "Tandai gid niyu inda kang pagsabihun sa kanyu. Patawadun di Diyus ti manga tawu una hintay kanda manga kasalanan, una waya sida nagmuransa laban sa Diyus. 29 Nu bay pagmuransahun tawu ti Ispiritu Banal, unman gid patawadun siya hanggan aban. Tunda pag kasalanan niya unman mab-ul hanggan aban." 30 Tunda kay sinabi ni Hisus dahil nagsabi ti manga tawu kuntay inapuan siya labang. 31 Nag-ati sa kan Hisus kay ina hanggan kay manga patar-&ari. Mag-alagad sida sa luwas balay nagpasugu hampay siya bul-un. 32 Kayamuan tawu ti matukawan sa libut niya. Magkun sida sa kanya, "Asan duy kanmu ina kanmu manga patar-ari sa luwas balay, kanda gustu maghampang sa kanmu." 33 Magkun si Hisus, "Hintay nguna kang ina, si unu nguna kang manga patar-&ari?" 34 Namarantayun siya sa manga tawu matukawan sa kay libut niya, bag-u magkun siya, "Inda yi ngani kang ina kang manga patar-ari. 35 Una hintay pag tawu ti magtupad sa kagustuhan Diyus imaw kang patar-ari lalaki, kang patar-ari babayi, kang ina."
1 Pagka dugay nanudlu maan si Hisus sa manga tawu sa saruy danaw Galiliya. Pagka siniut siya kayamuan tawu, sinmakay siya tinmukaw sa usa ka duunduun sa arani baybay. Ti kayamuan tawu bay sa saruy di danaw. 2 Bag-u mayamu pag bagay kay itinudlu sa kanda sa manga pahalimbawa. Sa kay magtudlu magkun siya, 3 "Pagpatingi kamu. May usa ka tawu manugtanman linmakaw hampay mamamgas. 4 Sa kay magpamgas may binhi sinmamad sa saruy dalan. Linmuwang ti manga manuk, bag-u tinabu tininduk nida tunda pag binhi. 5 Kay iba nipamgas maaw sa babaw batu, sa manipis pag daga. Madali nagtubu tunda dahil manipis lang pag daga. 6 Dapat pagka nasinggitan masyadu gid pag init, nalayung yi tunda dahil unman may gamut aba. 7 Kay iba binhi nipamgas sa basad kadugihan. Pagka linmangba ti manga dugi, pinil-it yi ti binhi, udyi namurak. 8 Dapat ay ti binhi nipamgas sa mayad pag daga nag-abwat, nanlagbak, nanguhay. Kay butir sa kada uhay may tigtatlumpulu kay butir, may tig-unumpulu, may tigmananggatus." 9 Magkun si Hisus, "Ti may tuli kailangan pagpatingi." 10 Pagka nuli yi ti kayamuan tawu, kay sampulu may duwa ka tuludluan hanggan manga iba waya nagpaingana sa kan Hisus tungkul sa manga pahalimbawa. 11 Bag-u magkun siya sa kanda, "Sa kanyu pag iinintirga ti katutuuhanan unman waya niburayhaw tungkul sa kaharian Diyus. Dapat sa manga sa luwas paggamitun niku ti manga pahalimbawa sa kang magtudlu, 12 hampay angay sa isinurat sa Banal Kasuran magkun, 'Una sida magpakabantay, unman may mag-akitan, Una sida magpakapatingi, unman diman may naintindihan. Nu bukun katida barang bumalik sida sa Diyus ag patawadun sida.' " 13 Magkun si Hisus sa kay manga tuludluan, "Unman aw naintindihan niyu inda pag pahalimbawa? Kabitay pag masalman niyu ti tanan pag manga pahalimbawa? 14 Ti pag-ipamgas imaw ti Bagaw Diyus. 15 Tunda yi ngani manga sa saruy dalan imaw ti manga manugpatingi. Pagka ipinamgas ti Bagaw sa kanda manga tagipusuun ag kanda napatingihan, kadaka nagras-ug si Satanas, pagpalimutun niya ti Bagaw Diyus ipinamgas sa kanda manga tagipusuun. 16 Ti iba parihu sa nipamgas sa babaw batu. Nagpatingi sida sa Bagaw. Diyus masulung mana kanda naisipan, susun yi kanda tinanggap. 17 Dapat maaw unman nidna tunda sa kanda tagipusuun, nakan unman sida dinmugay. Pagka rinmas-ug ti manga kakurian, ti manga pag-unuunu dahil sa Bagaw Diyus, bigla lang inmalinlangan. 18 Tuhay maan ti nipamgas sa basad kadugihan. Nagpatingi sida sa Bagaw Diyus. 19 Dapat pagka dugay naabala sida sa manga bagay sa babaw daga. Mairibgun yi sida sa kayamanan, maghangad waya sa iba manga bagay. Nakan ti Bagaw Diyus udyi may rugar sa kanda tagipusuun, udyi binmurak. 20 Ti iba imaw ti nipamgas sa mayad pag daga. Magpatingi sida sa Bagaw Diyus kanda gid pagtanggapun, mamurak sida may tigtatlumpulu, may tig-unumpulu, may tigmananggatus." 21 Sinabi ni Hisus sa kanda magkun, "Pagsul-an aw lugud tawu kay sulu hampay itagu tunda sa basad salupan, aw sa sirung laming? Unman aw pagsul-an ti sulu hampay ibugtang tunda sa dapat bugtangan sulu? 22 Dahil unman may mitagu, miburayhaw di gid aban ti tanan tanan. Una hintay ti nilihim taynguna pihu miburayhaw aban. 23 Ti may tuli kailangan pagpatingi." 24 Bag-u magkun si Hisus sa kanda, "Isipa niyu nu kabitay sa kanyu magpatingi. Kanyu gamitun pag panukat sa iba imaw diman pag panukat ti gamitun Diyus sa kanyu. Ag subra waya sa kanyu ti ipakaun. 25 Dahil ti may imaw pakan-an waya lalu waya abunda. Dapat ti unman may imaw, una dii@ wadi ti sa kanya tabuhun bul-un." 26 Magkun si Hisus, "Kay paghari Diyus kainda nangus. May tawu magpamgas binhi sa kay tanman. 27 Bag-u magparargu siya sa kay buruwatun sirang sirang ag magtubu magdaka ti binhi unman niya magkaalaman nu kabitay. 28 Sa daga pag tinmubu bag-u binmurak ti tanum. Sa kabag-u tubu dapu bag-u uhay bag-u pasi tigpabuyat sa kay uhay. 29 Pagka lutu yi susun yi ipaani dahil yi aranyun." 30 Magkun si Hisus, "Naan nguna nita pag ipaparihu ti kaharian Diyus ag sa hintay pag pahalimbawa pag ipaliwanag nita inda? 31 Kay paghari Diyus parihu sa butir mutsasa. Pagka isabug tunda, imaw ti pinakadiit sa tanan binhi sa babaw daga. 32 Dapat nu isinabug yi, mag-abwat, magdaka man sa tanan pag manga puun urupiun. Magsanga daraka bag-u mag-apun ti manga manuk sa magkahamyan pag sanga." 33 Sa kay magtudlu ni Hisus Mayad pag Barita sa manga tawu ginamit niya ti mayamu pahalimbawa parihu sa kainda angay sa kanda kaya intindi. 34 Kada magtudlu siya sa kanda pirmi paggamitun niya ti manga pahalimbawa. Dapat nu sa kay sadili tuludluan pag-ipaliwanag niya ti tanan manga bagay. 35 Pagka yabi yi, sinabi ni Hisus sa kay manga tuludluan magkun, "Pagdipay duy kita sa baliw dipay danaw." 36 Tinayakan nida ti kayamuan. Inibahan nida siya sa duunduun kay sinakyan kis-ab. May kaibahan waya waydi manga iba duunduun. 37 Pagka sida sa karaw-an danaw, bigla sida natakdan untug. Nasipwakan balud ti duunduun harus mapnu yi lang danum. 38 Si Hisus bay maturugan sa duunduun sa ulin baliwa, sa kay sangdayan di kay ulu. Bag-u pinulaw nida siya magkun, "Maisturu, unman aw may daut sa kanmu nu mabagbag sab kita?" 39 Nagbangun si Hisus, tinamyaw niya ti bagyu ag sinabi niya sa danaw magkun, "Paghubung yi, danga yi magpaywas pag danum." Naghubung yi ngani ti untug, bigla inmapas yi ti danum. 40 Sinabi niya sa kay manga tuludluan, "Hayga lugud kamu manga madalaun? Udwaya aw lugud kamu may pagsarig?" 41 Masyadu gid sida nadala ag nadulaw. Magharampangan sida magkun, "Hayga nguna katida pag tawu. Hayga magpaniwala sa kanya una ti bagyu una ti paywas danum?"
1 Pagka nakadipay yi sa danaw sida ni Hisus, rinmas-ug kanda duunduun sa daga manga Girasinu. 2 Pagka nagdugsun si Hisus sa duunduun may usa ka lalaki inapuan labang nagsulang sa kanya ginan sa kalubngan. 3 Kay ulian pag tawu ati lang sa kalubngan. Unman magkagapus dugay, una waya tarikada ti ipagapus sa kanya. 4 Dahil pirmi yi ginapus siya manga pusas, manga tarikada. Pinamugtas lang niya ti manga tarikada ag pagpanipuun lang niya ti manga pusas. Unman may tawu makalaban sa kanya. 5 Yabi sirang magpakawawaw lang siya sa kalubngan ag sa manga kabantudan. Pagpakabiyagan waya niya kay sadili bilug batu. 6 Pagka nakakit sa kan Hisus ginan sa arayu, nalagiw siya nagluhud sa kay atubangan. 7 Kay irininggit daka magkun, "Hintay kanmu labut sa kangku, Hisus, kawu ti Anak Diyus makamaskihan sa tanan. Alang alang sa Diyus, danga pakurian nimu aku." 8 Dahil sinabi yi ni Hisus sa labang, "Kawu pag labang, pagluwas yi kawu sa inda pag tawu." 9 Bag-u pinaingana siya ni Hisus, "Hintay kanmu ngaran?" Nagsagut siya magkun, "Kayamuan kang ngaran. Dahil mayamu kami." 10 Bag-u nanuyu ti labang sa kan Hisus danga sida paighitun ati ginan pag daga. 11 Ati sa bantud may maglingaun kadamlan babuy. 12 Nanuyu ti manga labang sa kan Hisus magkun, "Sugua nimu kami atag sa manga babuy hampay kami magsulud sa kanda." 13 Pinahintulutan ngani niya. Pagka nagluwas ti manga labang ginan sa tawu, sinmulud yi ngani sida sa manga babuy. Bag-u nangras sa palagiw ti kagadhan babuy manga duwa ka libu, naglinuksu sa yangpas danaw nagkalalimus sa danum. 14 Pagka nakitan manga manug-alaga babuy may nangyari gid, nalagiw sida, kanda itinultul sa banwa hanggan sa manga baryu. Bag-u naglinuwang ti manga tawu hampay makitan ti nangyari nu kabitay. 15 Pagka nagpakarani sida sa kan Hisus, nakitan nida ti tawu pinalwasan labang. Matukawan siya, may rutay yi, mahusay yi kay naisipan, madi inapuan siya kayamuan labang sa kabag-u. Nakan nadala ti manga tawu. 16 Ti manga nakakit nanultul sa manga iba nu kabitay kay nangyari sa tawu inapuan labang ag tungkul sa manga babuy. 17 Nakan nagpakihampang ti manga tawu sa kan Hisus, pag-ighit yi siya sa kanda rugar. 18 Pagka siya magsakay yi sa duunduun, nagpakihampang ti tawu pinalwasan labang sa kanya magkun kumuyug yi mana sa kan Hisus. 19 Dapat unman pinahintulutan ni Hisus. Magkun si Hisus sa kanya, "Pag-uli yi duy sa kanmu balay, sa kanmu manga katawuhan. Itultul nimu sa kanda nu kabitay kay kadaka ti binwat Panginuun sa kanmu ag nu kabitay kawu kay kinaawaan niya." 20 Nuli yi ngani siya, nag-umpisa nagbarita sa Dikapulis pag daga nu kabitay kay kadaka ti binwat ni Hisus sa kanya. Nadulaw gid ngani ungud ti tanan manga tawu. 21 Bag-u nagsakay maan si Hisus sa duunduun. Pagka rinmas-ug siya sa baliw dipay danaw sa baybay waya, tinaripunpunan yi siya mayamu tawu. 22 Linmuwang si Hairu. Siya ti pangulu balay tiripnan. Pagka nakitan niya si Hisus napayuk-ub siya sa kay atubangan, 23 nagpakihampang gid sa kanya magkun, "Diit wadi duy magkaugtas kang anak babayi. Pagkuyug mana kawu sa kangku kup-an nimu manga kamang kang anak hampay maayadan di siya ag balaw mamatay." 24 Kinmuyug ngani si Hisus, hanggan ti kayamuan tawu kinmuyug waydi, sirit-&an yi sa kay sangput ni Hisus. 25 May usa ka babayi sulud sampulu may duwa yi ka timpu kay pagsulgan. 26 Masyadu siya pinakurianan sa mayamu pag manugbulung ag iginastus yi niya ti tanan niya kasiyunan dapat unman diman nag-ayad una lang diit, lalu ngap inmamat di kay dahilan. 27 Pagka naalaman niya ti manga barita tungkul sa kan Hisus, napaminsan siya sa kayamuan tawu, nagpakarani sa kan Hisus aday-an bag-u nag-igpil sa kay rutay. 28 Dahil pag-&isipun niya, nu maigpilan lang niku kay rutay, pihu gid maayadan aku. 29 Susun ngani nap-ut kay pagsulgan ag naasaydan niya sa kay bilug naayadan yi siya sa kay kakurian. 30 Pagka naalaman ni Hisus may ginmamit kay kamaskihan, kadaka napasrangu siya tag sa manga tawu magkun, 31 "Si unu nguna ti nag-igpil sa kang rutay?" Magkun kay manga tuludluan, "Kawu maghiling di waydi pagsiutun kawu kayamuan, hayga magpaingana waya kawu, 'Si unu nguna ti nag-igpil sa kangku?' " 32 Namarantayun si Hisus sa kay libut hampay makitan niya nu si unu nguna ti nag-igpil sa kanya. 33 Magkadala yi ti babayi pagtakigan sa dala dahil naalaman yi waydi niya nu hintay ti nangyari sa kanya. Nakan nagpakarani siya sa kan Hisus napayuk-ub sa kay atubangan bag-u itinultul niya ti buu katutuuhanan. 34 Bag-u sinabi ni Hisus sa kanya, "Kawu duy pinaayad yi dahil sa kanmu magsarig. Pag-uli yi duy kawu, danga yi magkaaburidu, mayad yi kawu, udyi kanmu kakurian." 35 Magbagaw waya si Hisus, may rinmas-ug manga tawu ginan sa ulian pangulu balay tiripnan. Magkun sida sa kan Hairu, "Udyi duy kanmu anak babayi. Danga yi lang magbalag kawu sa Maisturu." 36 Pagka naalaman ni Hisus kanda barita, sinabi niya sa pangulu balay tiripnan, "Danga duy kawu magkadala. Pagsarig lang kawu." 37 Unman pinasnuan ni Hisus una hintay ti kumuyug sa kanya nu ud sida lang ni Pidru ni Santiyagu hanggan kan Santiyagu patar-ari si Huwan. 38 Pagka sida napatangad sa balay pangulu balay tiripnan, nakitan ni Hisus ti magkalaguluhan, may maglumi, may magnguynguy. 39 Pagka nagsaka yi siya kay sinabi sa kanda, "Hayga kamu magkalaguluhan ag maglumi? Balaw tigbak ti anak. Turug lang siya." 40 Kanda lang kinasarin-an siya. Dapat ay pagka ipinalwas yi niya sida tanan, iniba niya kay ama kay ina anak hanggan kay manga tuludluan bag-u nagpakarani siya sa igyaan anak mabangkayan. 41 Pagka hiniyaptan niya ti anak, sinabi niya sa kanya magkun, "Talita kumi." Kay ibug sabihun, Anak, pagsabihun niku sa kanmu, pagbangun yi kawu. 42 Kadaka nagbangun yi ngani ti anak ag naglakaw. Sampulu may duwa yi waydi ka timpu kay idad. Masyadu gid pag naglingut kay manga kaibahan ni Hisus. 43 Bag-u kay binilinan ni Hisus sida mahigpit danga sabiha una sa kantapu inda ti nangyari. Bag-u magkun siya pakan-i yi karan-unun ti anak.
1 Nighit si Hisus siyun ginan nag-atag sa kay kinadak-anan pag banwa. Nagkuyug diman sa kanya kay manga tuludluan. 2 Pagka sirang yi pamahari nanudlu siya sa balay tiripnan. Mayamu tawu nagpatingi sa kanya. Naglingut gid sida magkun, "Naan ginan pag bin-ul niya inda pag kapangyarihan? Hintay pag kalasi kadunungan inda ti ipinakaun sa kanya? Kabitay kay magbuwat pag makamaskihan buwat inda? 3 Unman aw siya patar-ari nida ni Santiyagu, ni Husi, ni Hudas ag ni Simun? Ag unman aw sitay sa kanta diman kay manga patar-ari babayi?" Nag-alinlangan yi ti manga tawu sa kanya. 4 Nakan sinabi ni Hisus sa kanda magkun, "Ti purupita paggalangun di purya lang sa kay sadili banwa, sa kay manga katawuhan niya ag sa kay sadili balay." 5 Unman siya nakahimu nakabuwat ati una hintay pag makamaskihan buwat. Kinup-an lang niya kamang ti iba ti may manga sakit kay pinaayad. 6 Naglingut siya sa kanda dahil unman sida may sarig. Inatihan ni Hisus ti manga baryu sa kay kalibut hampay manudlu sa manga tawu. 7 Tinipun ni Hisus kay sampulu may duwa ka tuludluan bag-u kay sinugu sida tinigudwa ka tawu ag pinakan-an niya sida kamaskihan laban sa manga labang. 8 Bag-u binilinan niya sida magkun, danga sida magbalun una lang hintay sa kanda maglakaw, una karan-unun, una bay-ung, una kuwarta sa kanda hagkus. Pagmay dara sugkud. 9 Pagmay lapak dapat danga magsulung duwa ka baLukas. 10 Sinabi niya sa kanda, "Una naan pag balay kamu pag sumaka, siyun yi waydi kamu pag kidayun hanggan sa udwaya kamu umighit siti ginan pag banwa. 11 Ag una naan pag banwa nu dayu kamu tanggapun hanggan patingihan, pag-ighit yi kamu siyun ginan, pagpaga ti galbuk ginan sa kanyu raprapa bilang puruyba sa kanda magdayu sa Diyus." 12 Pagka nakatapus yi kan Hisus bilin sa kay manga tuludluan, linmakaw yi sida, itinudlu nida sa manga tawu pagpatawad sida sa kanda manga kasalanan. 13 Mayamu pag labang kanda apinaluwas ginan sa manga tawu, ti mayamu pag may manga sakit kanda pinayidan lana, pinaayad sida. 14 Nakaras-ug waydi sa kan Hari Hirudis ti barita tungkul sa kan Hisus, dahil nibantug kay ngaran niya. Magkun ti manga tawu, "Si Huwan Manugtulbaw tunda. Binuhi siya uman, nakan may kamaskihan siya magbuwat manga makadululaw." 15 Magkun ti manga iba, "Si Ilyas yi tunda." Magkun maan ti manga iba, "Siya usa ka purupita parihu sa manga purupita kaybi." 16 Pagka naalaman ni Hirudis sinabi niya magkun, "Ipinaplud niku kay liug ni Huwan, siya maaw nabuhi uman." 17 Dahil si Hirudis ngani ti nagpadakup, nagpagapus ag nagpapirisu sa kan Huwan, dahil sa kan Hirudiyas, kay asawa ni Pilipi kan Hirudis patar-ari. Inagaw nakan ni Hirudis si Hirudiyas ginan sa kan Pilipi. 18 Bag-u sinabi ni Huwan sa kan Hirudis, "Unman mahimu umagaw kawu sa asawa nimu patar-ari." 19 Itinuduk kay galit ni Hirudiyas ag gustu mana niya matyun si Huwan dapat unman niya mabuwat. 20 Dahil magkadala si Hirudis sa kan Huwan. Alam yi waydi niya si Huwan lalaki matadlung ag lubus sakup sa Diyus. Nakan pinabantayan niya si Huwan. Pirmi pagpatingihan ni Hirudis kay bagaw ni Huwan bag-u pagduwaduwahun niya kay isip dapat magbaya gid siya magpatingi. 21 Pagka dugay nakakit waydi si Hirudiyas kay paraan. Ati katpung pag-alalahanun ni Hirudis kay kapanganakan. Nagbuwat siya karan-an sa kay nasakupan may katungkulan, sa manga takinan sundalu ag sa may manga kangaranan sa Galiliya. 22 Nagsiyun waydi kay anak babayi ni Hirudiyas ag nagsayaw. Pagka siya nagsayaw, binaya gid siya ni Hirudis hanggan niya manga kasaru. Nakan sinabi hari sa daraga, "Hagada nimu sa kangku una hintay ti magustuhan nimu ag ipakaun niku sa kanmu." 23 Sinmumpa waya sa kay magtaratu magkun, "Una hintay kanmu hagadun ipakaun niku sa kanmu, una kang katunga kaharian." 24 Nagluwas ti daraga nagsabi sa kay ina magkun, "Hintay nguna kang hagadun?" Sinabi niya ina, "Kay ulu ni Huwan Manugtulbaw." 25 Madali maan pag nagpakarani ti anak sa hari bag-u sinabi niya kay kailangan magkun, "Gustu niku taynguna yi kanmu ipakaun sa kangku kan Huwan Manugtulbaw ulu sa basad pinggan." 26 Nagruku gid ti hari. Dapat dahil kay sumpa nadnugan niya manga bisita, nakan dayu waydi siya umirang. 27 Sinugu hari ti usa sa kay manga bantay pag sundalu kay sinabi, daran-a sa kanya kay ulu ni Huwan. Bag-u nag-ati ti sundalu, pinlud niya kay liug ni Huwan sa pirisuhan. 28 Bag-u dinara niya ti ulu sa basad pinggan, kay ipinakaun sa daraga bag-u ipinakaun maan daraga sa kay ina. 29 Pagka nabaritaan kan Huwan manga tuludluan, nag-ati sida, bin-ul nida ti bangkay ag kanda ipinauli sa tinaguktukan batu. 30 Pagka nuli maan kay manga Apustul ni Hisus, itinultul nida sa kanya ti tanan kanda binwat ag itinudlu. 31 Bag-u sinabi niya sa kanda, "Atag yi duy kita sa pangawakawaan. Pagpahari dapu kamu." Dahil mayamu tawu tigsaka tigdugsun ag unman sida makahimu kaun. 32 Nagsakay sida ni Hisus sa duunduun atag sa pangawakawaan tawu. 33 Dapat ay sa kanda magginan nakitan ag nakilala sida mayamu tawu. Nakan nag-atag waydi ti manga tawu ginan sa tanan manga banwa naglakaw madali napaagap man sa kanda ni Hisus. 34 Pagka nagdugsun si Hisus ginan sa duunduun, nakitan niya ti lalu mayamu tawu. Naawa gid siya sa kanda, dahil sida parihu ga manga karanidu unman may manug-alaga. Bag-u mayamu maan kay itinudlu ni Hisus sa kanda. 35 Pagka magkayabi yi napakarani sa kanya kay manga tuludluan magkun, "Pangawakawaan duy inda pag rugar ag magkayabi yi. 36 Suguun duy nimu ti manga tawu atag sa manga tawu balay ag sa manga baryu sa palibut hampay makabili sida kanda makaun." 37 Dapat nagsagut siya magkun, "Kamu yi ngap duy ti pagpakaun karan-unun sa kanda." Sinabi nida sa kanya, "Umati aw kami bumili karan-unun halaga duwa ka gatus ka dinaryu hampay ipakaun sa kanda?" 38 Sinabi niya sa kanda, "Pira ka bilug kanyu tinapay? Duawi dapu niyu nu pira." Pagka dinuawan nida magkun sida, "Lima duy ka bilug ag duwa ka isda." 39 Bag-u binilinan niya kay manga tuludluan magkun, "Sabiha sa manga tawu pagtukaw sida tanan purupuruun sa babaw ilamnun." 40 Tinmukaw ngani ti manga tawu pinurupuru tigus-a ka gatus, may tiglimangpulu. 41 Bag-u bin-ul ni Hisus ti lima ka tinapay hanggan ti duwa ka isda. Nagtangda siya sa langit, nagpasalamat sa Diyus bag-u pinikapika niya ti manga tinapay bag-u ipinakaun niya sa kay manga tuludluan hampay ihayin nida sa manga tawu. Hinurayhuray niya ti duwa ka isda sa kanda tanan. 42 Nagkaun sida tanan tanan nangabsug. 43 Bag-u tinipun maan manga tuludluan ti nasawad manga pinikapika tinapay sampulu may duwa ka luwak punu hanggan ti nasawad sa manga isda. 44 Lima ka libu ka lalaki ti nagkaun. 45 Kadaka ipinasakay ni Hisus kay manga tuludluan sa duunduun ag ipinauna yi tag sa baliw dipay danaw, tag sa Bitsayda. Bag-u pinauli niya ti kadamlan tawu. 46 Pagka pinauli niya ti manga tawu, nag-ati siya sa bantud hampay mandarangin. 47 Pagka yabi yi, ti duunduun sa karaw-an danaw ag si Hisus usa usa sa daga. 48 Pagka tag yi magkasurip, nakitan niya sida purus yi gid sa pagbugsay dahil pagsarungsungun sida durus. Bag-u sida inusig ni Hisus lakaw sa babaw danum. Lumawuy yi mana siya sa kanda. 49 Dapat ay pagka nakitan nida siya maglakaw sa babaw danum, kanda hantup mamaw, nanwarawawan sida. 50 Dahil nakitan siya nida tanan ag nagkaradala gid sida. Dapat ay kadaka nagbagaw siya sa kanda magkun, "Pagmatutum kanyu naisipan, aku ngani. Danga kamu magkadala." 51 Nagsakay siya sa duunduun napaminsan sa kanda. Bag-u naghubung yi ti durus. Masyadu yi gid sida nadulaw. 52 Dahil udwaya waydi nida naintindihan ti nangyari sa manga tinapay, udwaya nidna sa kanda manga tagipusuun. 53 Pagka nakadipay yi sida sa danaw, nagras-ug sida sa daga Ginisarit. Ipinadagsa nida ti duunduun sa baybay. 54 Pagka nagdugsun sida sa duunduun, nakilala yi si Hisus manga tawu. 55 Susun yi ibinarita nida sa manga tawu sa kanda kalibut pag manga rugar kay pagras-ug ni Hisus. Nakan dinara nida atag sa kanya ti may manga sakit maigyaan sa amak, una naan tag nu magkaalaman nida siyun siya. 56 Una naan tag kay lakaw ni Hisus, una atag sa manga baryu, una atag sa manga banwa, una sa manga kalatkalat pag manga balay, abinugtang nida sa sugkadan balay ti may manga sakit, nagpakihampang sida sa kanya hampay makaigpil lang sa sidsid niya baLukas sadsad. Ti tanan nakaigpil naayadan yi ngani.
1 Pagka dugay may nagluwang tag sa kan Hisus manga Parisiyu hanggan manga Manugtudlu Kasuguan ginan sa Hirusalim. 2 Nakitan nida kay iba manga tuludluan ni Hisus magkaun yi una unman dapu inugasan nida kanda kamang angay sa ibinilin kaumputan. 3 Ti manga Hudiyu lalu ti manga Parisiyu pag Hudiyu, balaw kadaka sida magkaun nu unman mangugas dapu kanda manga kamang angay sa ibinilin nida manga kaumputan. 4 Unman diman sida mangaun una hintay pag karan-unun kanda binili sa palingki nu unman dapu waya maugasan. Aduk waya pag manga turun-anun kanda minana sa kanda manga ginurang, halimbawa tungkul nu kabitay kailangan lumpiyuhun nida kanda manga irinman, manga garapun hanggan kanda kardiru galang. 5 Nakan nagpaingana ti manga Parisiyu hanggan manga Manugtudlu Kasuguan sa kan Hisus magkun, "Hayga unman pagtupadun nimu manga tuludluan ti patayak layi nita manga kaumputan? Hayga sida kadaka magkaun, unman nakaugas dapu kanda manga kamang angay sa ibinilin nita kaumputan?" 6 Nagsagut si Hisus magkun, "Kamu magpabalhinguun lang. Bukun ngap salan ti ipinurupita ni Isayas tungkul sa kanyu, angay sa asinurat sa Banal Kasuratan. Magkun ti Diyus, 'Inda pag nasyun tugka lang sa bagaw kanda maggalang sa kangku, kanda bay tagipusuun arayu di sa kangku. 7 Kanda magsamba sa kangku unman may kabuluhan, dahil ti bilin tawu kanda pag-itudlu bilin Diyus kunu.' 8 "Dinayu niyu kay bilin Diyus bag-u kanyu ngap pagsundan ti patayak layi tawu." 9 Bag-u sinabi waya ni Hisus sa kanda magkun, "Madunung maaw kamu. Dinayu niyu kay bilin Diyus hampay kanyu tupadun ti patayak layi tawu. 10 Dahil sinabi ni Muysis magkun, 'Galangun nimu kanmu ama kanmu ina' ag 'Tigmuransa sa kay manga ina manga ama kailangan matyun gid.' 11 Dapat ay kanyu ngap pagsabihun, nu may tawu magkun sa kay ama sa kay ina, 'Una hintay ti iawat mana niku sa kanyu kurban yi, kay ibug sabihun kang yi ipinakaun sa Diyus', 12 nu katunda udyi niyu pagpahintulutan siya mag-awat waya sa kay ama hanggan sa kay ina. 13 Udyi pagpahalgaan niyu ti Bagaw Diyus dahil sa kanyu minana patayak layi kaumputan. Mayamu waya kanyu buwat parihu sa katida." 14 Ipinakarani ni Hisus ti kayamuan sa kanya bag-u sinabi niya sa kanda, "Pagpatingi kamu tanan tanan, intindiha kang pagsabihun sa kanyu. 15 Balaw ti ipagsubu sa bibig tawu ti makapauring@ sa kanya sa kay magbantay Diyus. Bagkus ngap tigluwang ginan sa kay bibig imaw tigpauring sa kanya. 16 Ti may tuli kailangan pagpatingi." 17 Pagka tinayakan niya ti manga tawu, nagsaka siya sa balay bag-u pinaingana siya niya tuludluan tungkul sa pahalimbawa. 18 Sinabi niya sa kanda, "Kamu hanggan aw lugud unman waya may intindi? Unman aw niyu alam una hintay ti ipagsubu sa bibig tawu ginan sa luwas unman makahimu magpauring sa kanya sa kay magbantay Diyus. 19 Dahil unman magsulud sa kay tagipusuun nu unman sa kay tiyan bag-u ipag-&ugat." Kay ibug sabihun unman may karan-unun makapauring sa tawu sa kay magbantay Diyus. 20 Sinabi ni Hisus, "Ti magluwang ginan sa tawu imaw tigpauring sa kanya. 21 Dahil ginan sa tagipusuun tawu pag magluwang ti manga daut pag naisipan, ti mag-uragin, ti magtakaw, ti maglibun sa kaparihu tawu, 22 ti magpamabayi, ti magpanlalaki, ti maghirak, ti manga kadautan, ti magdaya, ti pasay daut pag kagustuhan, ti daut pag naisipan ginan sa kahirakan, ti manga magmuransa, ti palabilabihun, ti kalukuhan. 23 Ti tanan pag manga kadautan tunda ginan sa tagipusuun tawu imaw tigpauring ngani sa kanya sa kay magbantay Diyus." 24 Nighit si Hisus ati ginan, nag-atag siya sa manga daga sa kay manga kalibut banwa Tiru. Nagdayun siya sa usa ka balay ati. Kay gustu mana danga maalaman manga tawu siya rinmas-ug. Dapat balaw makapatagu siya. 25 Ati may usa ka babayi kay diit anak babayi inapuan labang. Pagka nabaritaan niya, kadaka nagpakarani ag napadapa sa kay atubangan ni Hisus. 26 Tunda pag babayi Giriyigu, taga Sirupunisiya kay ginurang. Nagpakihampang siya sa kan Hisus hampay ipalwas niya ti labang ginan sa kay anak. 27 Dapat sinabi ni Hisus sa kanya magkun, "Pabay-ani nimu dapu ti manga anak hampay mabsug. Unman kailangan bul-un ti karan-unun manga anak bag-u ibahug sa manga idu." 28 Dapat ay nagsagut ti babayi magkun, "Ungud gid duy dapat una manga ugbun magkaun diman manga rukruk nalagpak sa magkaun manga anak." 29 Magkun si Hisus sa kanya, "Dahil sa kanmu sinabi inda, mahimu kawu pag-uli yi. Nighit yi duy ti labang ginan sa kanmu anak." 30 Nuli ngani ti babayi. Pagka nagras-ug siya sa kay balay, maigyaan ti anak sa kay amak. Linmuwas yi ngani ti labang. 31 Nighit si Hisus maan ginan sa kalibut banwa Tiru, sinarak niya ti banwa Sidun, linakawan niya ti daga Dikapulis bag-u nag-atag siya sa danaw Galiliya. 32 Dinara nida tag sa kan Hisus usa ka lalaki bungul ag buyun waya. Nagpakihampang sida sa kan Hisus hampay kup-an niya kamang ti may dahilan. 33 Tinaban siya ni Hisus tag sa luwas kayamuan. Itinumbak ni Hisus kay ituturu sa baliw baliw tuli tawu. Pagka nakabuga si Hisus, bag-u inigpilan niya kay dila tawu dahil bungul ag buyun waya siya. 34 Pagka nagtangda si Hisus sa langit, naghangus siya bag-u sinabi niya, "Ipata", kay ibug sabihun pagmabukasan. 35 Bag-u nakadnug yi kay tuli, udyi siya buyun, makabagaw yi mayad. 36 Kay sinabi ni Hisus sa manga tawu danga pagsabiha nida una sa kantapu. Dapat madi abinandu niya sa kanda, lalu ngap itinultul nida sa manga iba. 37 Masyadu yi gid sida magkadulaw magkun, "Kay pagkaayad tanan kay binwat niya. Magpaayad siya sa manga bungul, magpaayad waydi sa manga buyun."
1 Sa ati pag sirang, pagka mayamu maan ti manga tawu ag unman sida may kan-un, tinawag ni Hisus kay manga tuludluan kay sinabi, 2 "Magkaawa aku sa manga tawu inda, dahil tulu yi ka sirang taynguna tugka kaibahan niku sida. Udyi sida may makaun. 3 Nu pauliun niku sida sa kanda manga balay, barang nu sa dalan magpandulum yi ti mata sa lun-us. Ginan paman sa arayu ti manga iba." 4 Magkun ti manga tuludluan, "Kabitay duy kita pag makakit karan-unun kumang-ud sa kainda kay kayamu pag manga tawu sitay sa pangawakawaan?" 5 Nagpaingana si Hisus sa kanda magkun, "Pira ka bilug kanyu tinapay asan?" Kay sagut nida, "Pitu duy ka bilug." 6 Pinatukaw ni Hisus ti manga tawu sa babaw daga. Bag-u bin-ul niya ti pitu ka tinapay. Pagka nakapasalamat siya sa Diyus, kay pinikapika tunda bag-u kay apinakaun sa kay manga tuludluan hampay kanda ihayin sa manga tawu. Ihinayin ngani nida sa kayamuan. 7 May dariit waya sida pag manga isda pira pira ka bilug. Pagka nakapasalamat maan si Hisus sa Diyus bag-u ipinahayin diman niya tunda sa kay manga tuludluan. 8 Nagkaun ti manga tawu nangabsug. Pagka kanda tinipun kay sawad pinikapika tinapay, punu ti pitu ka luwak daraka. 9 Manga upat ka libu ka tawu ati. Bag-u di pinauli ni Hisus ti manga tawu. 10 Pagka nuli ti manga tawu, nagsakay si Hisus hanggan kay manga tuludluan sa duunduun, nag-atag sa Dalmanuta pag daga. 11 Nagluwang ti manga Parisiyu nagdibati sa kan Hisus. Gustu nida pasalanun siya nakan hinagadan nida siya tanda ginan sa langit. 12 Nanhangus si Hisus bag-u sinabi niya, "Hayga maghanap tanda inda pag manga tinubu tawu? Tutuu kang pagsabihun sa kanyu, unman gid may tanda ipakaun taynguna sa manga tawu sa bagaw daga." 13 Bag-u pagka tinayakan niya sida ati, nagdipay siya tag sa baliw dipay danaw. 14 Nalimtan niya manga tuludluan kanda balun. Unman may dara nu ud usa usa lang ka tinapay sa duunduun. 15 Nagbilin si Hisus sa kanda magkun, "Pag-aman gid kamu sa pamadaka sa tinapay manga Parisiyu ag sa kan Hirudis pag pamadaka sa tinapay." 16 Bag-u nagharampangan kay manga tuludluan magkun sida, "Unman kita may dara kanta balun, nakan sinabi niya tunda." 17 Alam di ni Hisus kanda pag-isipun nakan pinaingana niya sida, "Hayga kamu magkaaburidu dahil unman kita may dara balun? Udwaya aw niyu nasalman, udwaya aw niyu naintindihan? Udwaya aw nidna sa kanyu naisipan? 18 May manga mata kamu, unman aw kamu makakit? May manga tuli kamu, unman aw kamu makadnug? Nalimtan aw lugud niyu 19 sa kang nagpikapika lima ka tinapay hampay pakan-an ti lima ka libu ka tawu? Pira ka luwak ti napnu manga pinikapika kanyu maan bin-ul?" Magkun sida, "Sampulu may duwa ka luwak duy." 20 Sinabi maan ni Hisus, "Pagka pinikapika niku ti pitu ka tinapay hampay pakan-an ti upat ka libu ka tawu, pira ka luwak ti napnu manga pinikapika kanyu maan bin-ul?" Magkun sida, "Pitu ka luwak duy." 21 Bag-u sinabi niya sa kanda, "Nabi, udwaya aw niyu naintindihan?" 22 Pagka rinmas-ug sida ni Hisus sa Bitsayda pag banwa, dinara nida tag sa kan Hisus ti usa ka tawu buta kay mata, nagpakihampang sa kan Hisus hampay kay kup-an kamang. 23 Inabat ni Hisus ti buta sa kamang atag sa luwas banwa. Binug-anan niya kay manga mata, bag-u kinup-an niya manga kamang. Kay pinaingana ni Hisus magkun, "Makakit yi aw kanmu mata?" 24 Binmantay ti lalaki nagsabi, "Maghiling yi aku sa manga tawu maglakaw, dapat ay anyu ga manga puun kayu." 25 Kas-a maan ginan hinikap ni Hisus ti manga mata buta. Binmantay maan siya mayad. Naayadan yi kay mata, mayad yi kay magbantay. 26 Nagsabi si Hisus sa kanya, "Pag-uli yi kawu, danga yi lakaw sa banwa." 27 Nag-atag si Hisus hanggan kay manga tuludluan sa manga baryu sa kay kalibut banwa Sisariya Pilipi. Pagka sa dalan waya sida, pinaingana niya kay manga tuludluan magkun, "Hintay ti hantup manga tawu nu si unu aku?" 28 Nagsagut sida, "Magkun ti iba sa kanda kawu kunu si Huwan Manugtulbaw. Magkun maan ti manga iba si Ilyas kawu. May magsabi waya kawu usa sa manga purupita." 29 Nagpaingana siya sa kanda, "Nu sa kanyu waydi, hintay kanyu isip nu si unu aku?" Sinmagut si Pidru magkun, "Kawu duy ti pinili Diyus Manugribri pag Hari." 30 Bag-u mahigpit pag binilinan niya sida danga pagsabiha una sa kantapu tungkul sa kanya. 31 Siyun ginan nag-umpisa magtudlu si Hisus sa kay manga tuludluan magkun, ti Anak tawu kailangan mag-agwanta mayamu pag kakurian. Dayuun siya aban manga paggurangunun sa nasyun, manga pangulu manug-asiwa balay Diyus hanggan manga Manugtudlu Kasuguan bag-u kanda ipamatay siya. Dapat ay pagka lawuy yi tulu ka sirang, mabuhi maan siya uman. 32 Kay yi gid itinapat pag bagaw. Bag-u magkun si Pidru sa kanya, "Abala dapu duy kawu." Bag-u sinungyaw niya si Hisus. 33 Dapat ay napasrangu si Hisus sa kay manga tuludluan bag-u sinungyaw niya si Pidru magkun, "Pagpakarayu yi kawu, Satanas, danga yi kawu sa kang aday-an. Ti kanmu pag-isipun bukun angay sa Diyus nu unman angay lang sa tawu." 34 Ipinakarani niya sa kanya ti manga tawu hanggan kay manga tuludluan bag-u sinabi niya sa kanda, "Nu may tawu magkaibug magkuyug sa kangku, paglimti niya ti angay sa kay sadili, pas-ana kay kurus bag-u pagkuyug sa kangku. 35 Dahil ti tawu nu magkaibug magpakalawig kay kinabuhi, maduraan ngap siya buhi. Dapat ay una hintay pag tawu ti nabul-an kay kinabuhi dahil sa Mayad pag Barita, ribri yi siya. 36 Hintay ti makinabangan tawu una maapu niya ti bilug kalibutan nu kay kinabuhi ti kabaydanan? 37 Hintay ti ibayad tawu hampay bawiun maan niya kay buhi? 38 Dahil una hintay pag tawu sa manga uragin ag manga makasalanan pag tawu sa babaw daga nu ipaulam kay nagkilala sa kangku hanggan sa kang bagaw, ipaulam diman waydi Anak Tawu kay nagkilala sa kanya nu Rumas-ug siya aban may mamaski pag kapangyarihan niya Ama, kaibahan niya ti manga anghil Diyus."
1 Bag-u magkun si Hisus sa kanda, "Kang pagsabihun sa kanyu, ti iba sa kanyu sitay dayu mamatay hanggan sa udwaya makitan nida Rumas-ug kay paghari Diyus may kamaskihan." 2 Pagka nakalawuy unum ka sirang, tinaban ni Hisus si Pidru hanggan sida ni Santiyagu ni Huwan. Sida upat nag-atag sa bantud abwat. Pagka sida siyun nakitan nida nagtuhay kay histuda ni Hisus. 3 Kay manga rutay pasay marakintab, malagti gid masyadu. Una hintay tigpalagti kay rutay sitay sa babaw daga udyi may humuwad katida kay kalagti. 4 Bag-u bigla napakakit sa kanda ni Pidru si Ilyas hanggan si Muysis maghampang sa kan Hisus. 5 Nakan ngani magkun si Pidru tabug sa kan Hisus, "Maisturu, mayad gid duy kita sitay. Bumuwat kami tulu ka payag, kay usa sa kanmu, kay usa kan Muysis, kay usa kan Ilyas." 6 Unman magkaalaman ni Pidru kay pagsabihun. Subra yi gid masyadu kanda dala. 7 Bag-u may rurum hinmamuy sa kanda, may nagbagaw ginan sa rurum magkun, "Inda kang pagmayadun pag Anak, patingihi gid niyu siya." 8 Bag-u kadaka namarantayun kay manga tuludluan ni Hisus, unman yi sida may nakitan tawu nu unman si Hisus lang kanda kaibahan. 9 Sa kanda maglus-ug ginan sa bantud, sinabi ni Hisus sa kanda magkun, "Danga dapu sabihun niyu una sa kantapu ti kanyu nakitan hanggan sa udwaya mabuhi uman ti Anak Tawu." 10 Hinamnu nida tunda pag binagaw ni Hisus. Dapat magparaingan-an sida nu hintay kay gustu sabihun sa kay pagkabuhi uman. 11 Pinaingana siya niya manga tuludluan magkun, "Hayga duy pagsabihun manga Manugtudlu Kasuguan kailangan sumitay dapu si Ilyas?" 12 Sinmagut si Hisus magkun, "Sumitay ngani dapu si Ilyas hampay kay ialistu ti tanan manga bagay. Nu katunda hayga pagsabihun Banal Kasuratan magkun aban ti Anak Tawu kailangan umagwanta waydi sa mayamu kakurian ag dayuun siya manga tawu. 13 Dapat kang pagsabihun sa kanyu, nagsitay yi ginan si Ilyas ag binwat yi manga tawu sa kanya ti nagustuhan nida angay sa isinurat sa Banal Kasuratan tungkul sa kanya." 14 Pagka sida ni Hisus rinmas-ug maan sa lawud, nakitan nida kay iba manga tuludluan linibut kayamuan tawu paglabanan sida manga Manugtudlu Kasuguan. 15 Pagka nakitan manga tawu si Hisus, nadulaw gid sida masyadu. Nalagiw sida tanan tanan atag sa kanya nagbaya sa kanya. 16 Bag-u pinaingana niya sida magkun, "Hintay kanyu pag-ikadaut sa kanda?" 17 Ti usa ka tawu sa kayamuan nagsagut sa kanya magkun, "Maisturu, dinara niku sa kanmu kang anak lalaki inapuan labang magpabuyun sa kanya. 18 Kada siya pagsuldun, pagpagpuun siya labang, magbura kay bibig, magngarut kay manga ngipun ag lagat lagat magpan-gaw gid. Sinabi niku sa kanmu manga tuludluan, ipalwas mana nida ti labang. Dapat unman nakaya nida." 19 Nagsagut si Hisus magkun, "Kamu katna pag manga tawu unman may pagsarig. Kabitay kadugay kailangan aku kanyu kaibahan? Kabitay waya lugud kadugay kamu kang pastiisan? Daraha niyu ti anak sitay tag." 20 Dinara ngani nida ti anak tag sa kan Hisus. Pagka nakitan niya si Hisus, kadaka pinatigbak labang ti anak ag siya nilugmuk sa daga, napalilidlilid waya magbura kay bibig. 21 Pinaingana ni Hisus kay ama magkun, "Kapira di waya pag inapuan siya labang?" Sinabi niya ama, "Ginan sa kay diit waya daan di. 22 Pirmi yi ti anak pag-ipalugmuk sa apuy, pag-italgub sa danum hampay siya matyun. Dapat nu may mabuwat kawu, kaawai duy nimu kami awati." 23 Sinabi ni Hisus sa kanya, "Hayga kanmu sabi, 'Nu may mabuwat kawu'? Ti tanan pag manga bagay kaya mabuwat Diyus sa tawu nu siya magsarig." 24 Kadaka nagtawag ti ama anak magkun, "Magsarig duy aku. Awati nimu aku, kurang waya kang sarig." 25 Pagka nakitan ni Hisus ti kayamuan tawu nandurunganan nalagiw atag sa kanya, sinungyaw niya ti labang magkun, "Kawu pag labang tigpabungul magpabuyun, pagsuguun niku kawu pagluwas yi kawu ginan sa kanya ag danga yi kawu magsulud uman sa kanya." 26 Nag-aris ti labang, pinatigbak niya gid masyadu ti anak bag-u nagluwas siya. Ag ti anak bilang ga namatay yi. Nakan mayamu ti nagsabi, "Siya tigbak yi." 27 Dapat hiniyaptan ni Hisus kay kamang bag-u kay binangun. Bag-u nagtindug yi ti anak. 28 Pagka nagsulud maan si Hisus sa balay, nagpaingana kay manga tuludluan sa unman may magdungug iba magkun, "Hayga nguna duy unman nakaya nimi nipalwas tunda pag labang?" 29 Nagsagut si Hisus magkun, "Inda pag kalasi labang unman mipalwas nu unman sa panab-anan lang darangin." 30 Nighit sida ati bag-u pinalibut nida ti daga Galiliya. Kay gustu mana danga maalaman manga tawu siya sitay. 31 Dahil nagtudlu siya sa kay manga tuludluan magkun, "Aban ti Anak Tawu ipahintulut yi sa manga tawu bag-u kanda matyun siya. Pagka minatay yi siya, nu makalawuy yi tulu ka sirang, mabuhi maan siya uman." 32 Dapat ay unman magkaintindihan nida tunda pag hampang, magkadala sida magpaingana sa kanya kay ibug sabihun. 33 Rinmas-ug sida ni Hisus sa Kapirnaum. Pagka sa balay yi, nagpaingana si Hisus sa kay manga tuludluan magkun, "Hintay kanyu birirbahan kis-ab sa dalan?" 34 Dapat unman sida nag-&ingay. Dahil sida nagparadayawan sa dalan nu hintay sa kanda ti mataas. 35 Tinmukaw si Hisus bag-u tinawag niya kay sampulu may duwa ka tuludluan. Sinabi niya sa kanda, "Una hintay tigkaibug magpangulu sa kanyu, kailangan siya ngap ti sa uryan ag ti manugsirbi sa tanan." 36 Bag-u bin-ul niya ti usa ka diit pag anak, kay ipinatindug sa kanda karaw-an bag-u kay hinagkung. Magkun siya sa kanda, 37 "Una si unu pag tawu ti magsunud sa kangku ag pakan-an niya halaga ti usa sa manga kainda pag diit anak, aku di ngap kay pinakan-an halaga. Una si unu pag tawu nu pakan-an niya halaga aku, balaw aku kay pinakan-an halaga nu unman ti nagsugu ngap sa kangku." 38 Sinabi ni Huwan, "Maisturu, kami may nakitan tawu magpalwas labang ginan sa tawu sa kanmu ngaran. Kanmi inirangan siya, dahil siya unman magkuyug sa kanta." 39 Dapat sinabi ni Hisus, "Danga pag-irangi. Dahil ti tawu nu magbuwat makamaskihan buwat sa ngaran niku, dayu kadaka magbagaw daut laban sa kangku. 40 Dahil ti unman maglaban sa kanta, kakampi diman nita. 41 Kang pagsabihun sa kanyu una si unu tigpainum danum sa kanyu dahil kamu sakup sa pinili Diyus Manugribri pag Hari, pihu gid siya gantihan mayad." 42 Sinabi ni Hisus magkun, "Mayad waya pag tawu nu higtan bitinan galingan batu kay liug bag-u iyamut sa dagat sa ud pumaturun siya atag sa kasalanan sa usa sa inda pag manga mapinakumbabaun magsarig sa kangku. 43 Nu kanmu kamang tigpaturun sa kanmu tabug sa kasalanan, pulda yi nimu tunda. Mayad waya nu Rumas-ug kawu sa langit usa lang kanmu kamang, sayang waya nu kawu may duwa ka kamang bag-u kawu atag sa impirnu, sa udyi magkapsa pag apuy. 44 Ati unman mamatay kanda sapat ag unman magkapsa ti apuy. 45 Nu kanmu lulud tigpaturun sa kanmu tabug sa kasalanan, pulda yi nimu tunda. Mayad waya nu Rumas-ug kawu sa langit usa lang kanmu lulud, sayang waya nu kawu may duwa ka lulud bag-u iyamut sa impirnu. 46 Ati unman mamatay kanda sapat ag unman magkapsa ti apuy. 47 Nu kanmu mata tigpaturun sa kanmu tabug sa kasalanan, luwata yi nimu. Mayad waya nu sumulud kawu sa kaharian Diyus bulag kanmu usa ka mata, sayang waya nu kawu may duwa ka mata bag-u iyamut sa impirnu. 48 Ati unman mamatay kanda sapat ag unman magkapsa ti apuy. 49 "Dahil ti kada usa paulian apuy ga karan-unun inasinan. 50 Mayad ti asin dapat ay nu manab-ang ti asin hintay waya kanyu itimpala? Pagmay ga asin kamu sa kanyu sadili, ag kamu pagmahusay sa usa kag sa usa."
1 Pagka nighit si Hisus ati ginan, nag-atag siya sa daga Hudiya hanggan sa dipay sapa Hurdan. Pagka ati yi pinabusul maan siya kayamuan tawu. Tinudluan maan niya sida angay sa kay ugali. 2 May manga Parisiyu nagpakarani sa kan Hisus, pinaingana nida sa pahaluksu magkun, "Angay aw nguna sa Kasuguan ni Muysis nu tayakan lalaki kay asawa babayi?" 3 Nagsagut si Hisus magkun, "Hintay kay bilin ni Muysis sa kanyu?" 4 Sinabi nida, "Kay bilin ni Muysis kailangan pakan-an kunu lalaki kay asawa babayi kasuratan sa kanda magtarayakan nu tulakun yi niya ti babayi." 5 Magkun si Hisus sa kanda, "Dahil sa maganit gid waydi kanyu tagipusuun nakan katida kay bilin ni Muysis sa kanyu. 6 Dapat ginan sa kabag-u, pagka linalang Diyus ti kalibutan, 'Linalang niya sida may lalaki may babayi. 7 Nakan ngani tayakan lalaki kay ama kay ina hampay magpausa sa kay asawa. 8 Bag-u sida usa yi lang ka nayi.' Nakan sida balaw yi duwa, nu unman usa yi lang. 9 Ti pinausa Diyus, danga pagbulaga tawu." 10 Pagka sa balay yi maan, pinaingana si Hisus niya manga tuludluan tungkul tunda. 11 Sinabi niya sa kanda, "Una hintay pag lalaki nu tumayak sa kay asawa bag-u umasawa sa iba, magkasala sa pamabayi sa kay un-an asawa. 12 Ag ti babayi nu tinayakan niya asawa bag-u mangasawa sa iba lalaki, magkasala waydi tunda pag babayi sa panlalaki." 13 May manga nagtaban kanda manga anak tabug sa kan Hisus hampay nangus kup-an niya kamang. Dapat sinungyaw sida niya tuludluan. 14 Pagka nakitan ni Hisus, nag-isug siya. Sinabi niya sa manga tuludluan, "Pabay-ani niyu ti manga anak magpakarani sa kangku. Danga yi niyu pag-irangi. Dahil ti ga anak imaw ti pagharian Diyus. 15 Ungud kang pagsabihun sa kanyu, una hintay pag tawu ti unman ga anak kay magpasakup sa kay paghari Diyus, balaw kabilang sa manga tawu pagharian Diyus." 16 Bag-u kay hinagkung ti manga anak, kinup-an niya manga kamang bag-u kay pinapaladan sida. 17 Pagka magkalakaw yi maan si Hisus, may usa ka tawu nalagiw tag sa kanya, nagluhud sa kay atubangan bag-u namaingana sa kan Hisus magkun, "Mayad pag Maisturu, hintay nguna kang buwatun hampay matanggap niku ti buhi unman may katapusan?" 18 Nagsagut si Hisus sa kanya, "Hayga aku pagsabihun nimu mayad? Unman may mayad nu unman ti Diyus lang. 19 Alam yi nimu ti Kasuguan magkun, 'Danga kawu maglibun sa kanmu kaparihu, danga kawu magpanguragin, danga kawu magtakaw, danga kawu magpudil sa kanmu magkastigus, danga kawu magdaya. Galanga nimu kanmu ama kanmu ina.' " 20 Sinabi lalaki sa kan Hisus, "Maisturu, ginan di waya sa kang diit tinupad niku tunda tanan." 21 Nagturun si Hisus sa kanya may pagmahal bag-u sinabi niya sa kanya, "Usa waya ka bagay ti kurang sa kanmu. Pag-ati kawu, pabilihan nimu ti tanan nimu kasiyunan. Ayaw-ayawa kay kabilyanan sa manga pugri hampay matanggap kawu kayamanan sa langit. Bag-u pagsitay maan kawu pagkuyug sa kangku." 22 Magkabayung ti lalaki sa kay sinabi ni Hisus, maruku maruku kay nighit, dahil masyadu gid siya mayaman. 23 Namarantayun si Hisus sa kay manga tuludluan bag-u sinabi niya sa kanda, "Ungud kang pagsabihun sa kanyu, masyadu makuri ti manga mayaman magpasakup sa kay paghari Diyus." 24 Nadulaw kay manga tuludluan sa kay sinabi niya. Sinabi maan ni Hisus sa kanda magkun, "Duy, makuri masyadu ti tawu pumasakup sa kay paghari Diyus nu mayamu ampara. 25 Malpus waya ti kamilyu sumuyuk sa sulat dayum, makuri man ti mayaman magpasakup sa kay paghari Diyus." 26 Lalu naglingut kay manga tuludluan, nakan nagpaingana sida magkun, "Nu katida duy si unu nguna ti makaribri?" 27 Tinurun sida ni Hisus, sinabi niya, "Dayu ngani inda mabuwat tawu. Dapat nu sa Diyus balaw katida, dahil mabuwat di Diyus ti tanan kabagayan." 28 Bag-u nagsabi si Pidru magkun, "Malu duy kami inda, kanmi tinayakan yi kanmi ulian bag-u kami kinmuyug ngani sa kanmu." 29 Sinabi ni Hisus sa kanda, "Tandai niyu inda, una si unu nu magtiis magtayak sa kay ulian, sa kay manga patar-ari lalaki, sa patar-ari babayi, sa ina, sa ama, sa kay manga anak una sa kay manga daga dahil sa kangku ag dahil sa Mayad pag Barita, 30 makatanggap siya usa ka gatus maan kay tulus sitay sa babaw daga, manga ulian, manga patar-ari lalaki, patar-ari babayi, manga ina, manga anak, manga daga, may patapil waya manga pag-unuunu. Ag aban makatanggap siya buhi unman may katapusan. 31 Dapat mayamu ti inmuna miuryan. Mayamu ti nauryan umuna ngap." 32 Sida ni Hisus sa dalan magtukad tabug sa Hirusalim. Si Hisus ti mag-una. Magkadulaw kay manga tuludluan. Ag ti manga tawu magdasun sa kanda magkadala. Apinablag niya kay sampulu may duwa ka tuludluan bag-u itinultul ni Hisus sa kanda ti manga mangyari sa kanya udyi dumugay. 33 Magkun siya, "Malu duy kita sa dalan yi tag babaw, tag sa banwa Hirusalim. Nu ati yi, ipahintulut ti Anak Tawu sa manga pangulu manug-asiwa balay Diyus hanggan manga Manugtudlu Kasuguan. Bag-u kanda sintinsiyahan siya sa kamatayan. Bag-u kanda ipabahala siya sa manga balaw Hudiyu, 34 hampay kanda muransahun, bug-anan, hampakun bag-u matyun. Bag-u nu makalawuy yi tulu ka sirang mabuhi maan siya uman." 35 Nagpakarani sa kan Hisus sida ni Santiyagu ni Huwan kay manga anak ni Sibidiyu. Sinabi nida sa kan Hisus, "Maisturu, may kailangan mana kami sa kanmu." 36 Sinabi ni Hisus magkun, "Hintay duy kanyu kailangan kang buwatun?" 37 Sinabi nida sa kanya, "Pakan-an nimu kami karampatan hampay makatukaw ti usa sa kanmu sikun, ti usa sa kanmu wala nu kawu humari yi." 38 Dapat sinabi ni Hisus sa kanda, "Unman niyu naintindihan ti kanyu pagpamuhunun. Kaya aw mainman niyu ti ungut may kakurian kang inman? Kaya aw kamu pumatulbaw sa kang patulbawan?" 39 Sinabi nida sa kanya, "Kaya duy nimi." Bag-u sinabi ni Hisus sa kanda, "Inman diman ngani niyu ti ungut may kakurian kang inman. Sa kang patulbawan aban itulbaw kamu ati. 40 Dapat balaw aku ti bahala magpakaun karampatan sa tawu hampay makatukaw sa kang sikun sa kang wala. Tunda para sa manga inalistuhan yi." 41 Pagka ti sampulu ka tuludluan nakadnug tunda, magkagalit sida sa kanda ni Santiyagu ni Huwan. 42 Nakan sinabi ni Hisus sa kanda, "Abala duy dapu kamu." Bag-u kay sinabi sa kanda magkun, "Nadnugan niyu ti manga pinunu manga unman magpasakup sa Diyus magpalabilabi sa kanda manga sakup. Ti may manga kangaranan sa kanda maggamit waydi kanda karampatan. 43 Nu bay sa kanyu balaw katida. Una si unu sa kanyu tigkaibug katungkulan, kailangan siya ngap ti manugsirbi sa kanyu. 44 Ag una hintay tigkaibug magpangulu sa kanyu, kailangan siya alistu hampay panawuhun niyu tanan. 45 Katunda diman ti Anak Tawu nagsitay balaw hampay sirbihan nu unman hampay siya magsirbi ngap ag hampay ipakaun niya kay buhi sa kamatayan agud mayamu ti malukat." 46 Nagras-ug sa banwa Hiriku sida ni Hisus. Pagka si Hisus, kay manga tuludluan hanggan ti lalu mayamu pag tawu magginan maan sa Hiriku, may lalaki buta matukawan sa saruy dalan maghagad kuwarta. Kay ngaran pag tawu si Bartimiyu, kan Timiyu anak. 47 Pagka nadnugan niya si Hisus taga Nasarit ti maglawuy, inmumpisa siya tinmawag magkun, "Hisus, kawu ti linahi ni Dabid, kaawai duy nimu aku." 48 Sinabihan siya mayamu tawu danga yi siya mag-ingay. Dapat lalu ngap siya nagtawag magkun, "Kawu ti linahi ni Dabid, kaawai duy aku." 49 Bag-u nagpat-ung ngani si Hisus ag sinabi niya, "Tawagi niyu siya." Tinawagan ngani nida ti lalaki buta, magkun sida sa kanya, "Danga yi kawu maruku kanmu naisipan, pagtindug yi, dahil pagtawagan yi kawu ni Hisus." 50 Tinayakan ni Bartimiyu kay kulimpay, tinmindug madali ag nag-atag sa kan Hisus. 51 Nagpaingana si Hisus sa kanya, magkun, "Hintay duy kanmu gustu kang buwatun sa kanmu?" Nagsagut ti lalaki buta, "Maisturu, kang gustu mana kang mata balaw yi buta." 52 Sinabi ni Hisus sa kanya, "Pag-atag yi duy kawu. Pinaayad yi kawu dahil kawu nagsarig sa kangku." Susun maghiling yi siya bag-u nagkuyug siya sa kan Hisus sa dalan.
1 Pagka dugay arani yi sida ni Hisus sa banwa Hirusalim. Pagka nagras-ug yi sida sa baryu Bitpagi ag sa baryu Bitanya, sugkad Bantud Ulibu, sinugu ni Hisus kay duwa ka tuludluan magkun, 2 "Pag-ati kamu sa usa waya ka baryu. Nu kamu magsulud yi sa baryu sab, susun makakit kamu anak asnu mahigtan, udwaya sinakyan tawu. Lubada niyu tunda, daran-a sitay tag. 3 Nu may pumaingana sa kanyu magkun, 'Hayga duy paglubadun niyu tunda?' kainda kanyu sabihun, 'Pagkailanganun duy Panginuun, balaw dugay iuli maan sitay tag.' " 4 Linmakaw yi ngani sida bag-u nakitan nida ti anak asnu mahigtan karaw-&an sugkadan katpungan sabian balay. Kanda yi ngani linbadan. 5 May manga matindugan siyun magpaingana sa kanda, "Hintay tunda? Hayga duy paglubadun niyu ti anak asnu?" 6 Nagsagut ti manga tuludluan angay sa kay itinudlu ni Hisus sa kanda, bag-u pinahintulutan ngani sida. 7 Bag-u dinara nida ti anak asnu sa kan Hisus. Pagka ahinampilu nida kanda manga rutay sa asnu bag-u sinmakay si Hisus. 8 Sinagmakan manga tawu rutay ti dalan. Ti iba nagbuul labung kayu sa saruy dalan, kanda ilinatag sa dalan. 9 Ti manga tawu mag-una sa kan Hisus ag ti manga sa uriyan nanarawagan magkun, "Pagdayawun ti Diyus. Papaladan Diyus ti magsitay sa ngaran Panginuun. 10 Papaladan Diyus ti humari maan sa kaharian nita ginurang, ni Dabid. Pagdayawun ti Diyus sa langit." 11 Pagka nagras-ug si Hisus sa Hirusalim, sinmaka siya sa balay Diyus. Binantayan niya ti tanan manga pagbuwatun tawu ati. Malambung yi ati, nakan nag-atag si Hisus hanggan kay sampulu may duwa ka tuludluan tabug sa baryu Bitanya. 12 Pagka sa surip, linmakaw dapu maan sida ginan sa Bitanya. Linun-us si Hisus sa dalan. 13 Pagka nakitan niya sa un-an may puun igus may manga labung, kay dinuawan nu ngatay may burak. Dapat ay pagka nagpakarani siya ud may nakitan siya burak nu ud manga labung lang. Dahil balaw udas pamurakun manga igus. 14 Bag-u sinabi ni Hisus sa puun igus, magkun, "Kainda ginan danga yi may makakaun kanmu burak hanggan aban." Nadnugan diman niya manga tuludluan kay binagaw tunda. 15 Pagka rinmas-ug sida sa Hirusalim, nagsaka si Hisus sa balay Diyus. Bag-u tinulak niya sa karagasyun ti manga magpabili manga magbili ginan sa sulud balay Diyus. Linakwang niya ti manga burugtangan kuwarta manga manugbalyu hanggan ti manga tukawan manga manugtinda kalampati. 16 Unman pinayagan niya ti tawu lumapus lakaw sa basad balay Diyus may dara manga bab-an. 17 Bag-u nanudlu siya sa manga tawu magkun, "Unman aw nisurat sa Banal Kasuratan magkun, 'Kang balay ingarnan balay dararanginan tanan manga nasyun.' Dapat binwat ngap niyu paratag-an manga mananakaw." 18 Nadnugan diman tunda manga pangulu manug-asiwa balay Diyus hanggan manga Manugtudlu Kasuguan. Siyun ginan naghanap sida paraan hampay kanda ipamatay si Hisus. Magkadala sida sa kanya dahil ti tanan tawu nadulaw sa kay adal. 19 Pagka yabi yi nagluwas maan sa banwa sida ni Hisus. 20 Sa maglakaw nida ni Hisus sa surip, nakitan nida ti puun igus nalayung yi ginan sa kay gamut hanggan tugka sa kay suru. 21 Naisipan ni Pidru ti nangyari nakan sinabi niya sa kan Hisus magkun, "Malu duy Maisturu, nalayung yi maaw ti puun igus kanmu sinaadan kaaldaw." 22 Sinabi ni Hisus magkun, "Pagsarig kamu sa Diyus. 23 Kang gid pagsabihun sa kanyu, nu abi may magsabi sa bantud inda, 'Pag-ighit yi kawu, ati kawu pag kipadna sa dagat', pihu mangyari tunda nu unman siya mag-&alinlangan sa kay tagipusuun, nu magsarig siya kuntay mitupad kay pagbagawun. 24 "Nakan ngani kang pagsabihun sa kanyu, una hintay kanyu hagadun sa kanyu magdarangin, pihu mangyari sa kanyu nu kamu magsarig kuntay natupad tunda sa kanyu. 25 Nu kamu magdarangin bag-u nu may pag-ikadaut kamu sa iba, patawadun dapu niyu siya hampay kamu patawadun waydi niyu Ama sa langit nu kamu nagkasala sa kanya. 26 Dapat nu unman pagpatawadun niyu ti manga tawu, dayu waydi kamu patawadun niyu Ama sa langit." 27 Nag-ati maan sida ni Hisus sa Hirusalim. Pagka si Hisus maglakawlakaw sa basad balay Diyus, nagpakarani sa kanya ti manga pangulu manug-asiwa balay Diyus, ti manga Manugtudlu Kasuguan hanggan ti manga paggurangunun sa nasyun. 28 Sinabi nida sa kanya, "Naan ginan kanmu karampatan? Hintay ti may pakaun karampatan sa kanmu nakan kanmu pagbuwatun inda pag manga bagay?" 29 Sinmagut si Hisus magkun, "Paingan-un waydi niku kamu usa ka paingana. Nu kanyu sabihun sa kangku, sabihun diman waydi niku sa kanyu nu naan ginan kang karampatan hampay mabuwat niku inda pag manga bagay. 30 Ti tulbaw ni Huwan ngatay ginan sa Diyus, aw ngatay ginan sa tawu? Kamu pagsagut." 31 Nagharampangan dapu sida magkun, "Nu sabihun nita, ginan sa Diyus, sabihun niya sa kanta, bati hayga unman naniwala kamu sa kanya? 32 Sabihun aw nguna nita, ginan sa manga tawu?" Magkadala sida barang nu hintay ti buwatun manga tawu sa kanda, dahil nakilala tanan tawu si Huwan purupita. 33 Nakan nagsagut sida sa kan Hisus magkun, "Unman nimi alam nu naan ginan kan Huwan tulbaw." Sinabi diman ni Hisus sa kanda magkun, "Unman diman sabihun niku sa kanyu nu naan ginan kang karampatan hampay mabuwat niku inda pag manga bagay."
1 Nagbagaw maan si Hisus sa kanda sa pahalimbawa magkun, "May tawu nagtanum ubas sa kay ubasan. Inaladan niya bag-u nagbuwat siya pirisian ubas. Nagpatindug siya usa ka balay abwat hampay bantayan kay ubasan. Bag-u iinintirga niya kay ubasan sa kay manga manugtarabahu. Bag-u siya linmakaw tag sa iba rugar. 2 Pagka udas tigpuruti sinugu niya kay usa ka panawuhun tabug sa manga manugtarabahu hampay matanggap ginan sa kanda kay kahuray burak ubasan. 3 Dapat bin-ul nida ti panawuhun, kanda binakul bag-u pinauli ud may dara. 4 Tuhay maan pag panawuhun ti sinugu may apu ubasan tabug sa kay manga manugtarabahu. Dapat ay kanda maan binakul sa ulu, kanda minuransa waya. 5 Tuhay maan pag panawuhun ti sinugu may apu ubasan. Dapat kanda minatay tunda. Nagsugu waya maan siya mayamu panawuhun, ti iba kanda binakul, ti iba kanda minatay. 6 Usa wadi ti nasawad sa may apu ubasan, kay ngani pagmayadun pag anak lalaki. Imaw kay sinugu niya sa katapusan atag sa kanda. Magkun siya, 'Pihu galangun nida kang anak.' 7 Dapat ay nanharampangan tunda pag manga manugtarabahu magkun, 'Inda aban ti mumana ubasan. Abala kamu, kanta yi matyun hampay kanta yi apuun kay ama pamana.' 8 Nakan kanda dinakup siya kanda minatay bag-u ayinmut atag sa luwas ubasan. 9 "Hintay nguna ti buwatun may apu ubasan? Atihan niya hampay tunda pag manga manugtarabahu kay matyun bag-u iintirga maan sa manga iba kay ubasan. 10 Unman aw nabasa niyu sa Banal Kasuratan magkun, 'Ti batu dinayu manga manugbuwat balay, imaw ngap ti binwat mahalaga pag kalap. 11 Panginuun ti may buwat inda. Tutuu gid makadululaw sa kanta magbantay.' " 12 Naintindihan manga pinunu Hudiyu sida ti pinatamaan pahalimbawa ni Hisus. Nakan naghanap sida paraan hampay madakup siya dapat nadala sida sa kayamuan tawu. Nakan siya kanda yi lang pinatawasan. 13 Bag-u kanda sinugu atag sa kan Hisus manga Parisiyu hanggan manga napakampi sa kan Hirudis hampay pasalanun siya sa kay bagaw. 14 Nag-ati sida sa kan Hisus bag-u kanda sinabi sa kanya, "Maisturu, alam nimi kawu matinupadun. Unman kawu magkadala una sa kantapu pag tawu dahil kawu balaw may pag-&apihun. Alam nimi pag-itudlu nimu ti buu katutuuhanan hampay pagtupadun manga tawu ti kagustuhan Diyus. Angay aw nguna sa Kasuguan Diyus nu bumuhis ti tawu sa Pangulu Hari aw ngatay unman? Ngatay kailangan mamuhis kami, aw ngatay unman?" 15 Dapat alam di ni Hisus kanda magpabalhinguun, nakan nagsabi siya sa kanda, "Hayga aku kanyu pagsubukan? Anti kanyu dinaryu." 16 Binulwat ngani nida. Bag-u sinabi ni Hisus sa kanda, "Kantapu pag uyahun ti mapalatan sa inda pag kuwarta, kantapu pag ngaran ti ipinirma?" Ag sinabi nida sa kanya, "Sa Pangulu Hari duy inda." 17 Bag-u magkun si Hisus, "Nakan ngani ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus." Pagka nadnugan nida kay sagut ni Hisus, naglingut gid masyadu sida sa kanya. 18 May nagpakarani sa kan Hisus manga Sadusiyu. Kanda paniwala basta namatay yi ti tawu balaw yi mabuhi uman. Magkun sida sa kan Hisus, 19 "Maisturu, nagsurat si Muysis bilin sa kanmi magkun, 'Ti magtar-ari lalaki nu ti usa mamatay natayak kay asawa babayi dapat unman may anak, kay patar-ari kailangan mag-asawa sa buranday hampay may anak sida imaw ti makamana sa kay pinagkagurang kayamanan.' 20 Kaybi may pitu ka magtar-ari lalaki. Nag-asawa ti panganay. Pagka dugay namatay siya unman may anak. 21 Nag-asawa maan sa buranday ti ikadwa. Pagka dugay namatay waydi unman may anak. Katunda waydi ti nangyari sa ikatlu, 22 hanggan sa ikapitu. Kada usa @ag asawa sa babayi. Namatay sida ud nagkaanak. Pagka tabu namatay ti pitu ka lalaki hanggan kay babayi namatay diman waydi. 23 Nu sa pagkabuhi uman aban kantapu asawa ti babayi? Kabay inasawa niya tunda pag pitu ka lalaki." 24 Sinabi ni Hisus sa kanda, "Unman gid duy tama kanyu pagbagawun, dahil unman niyu magkasalman ti Banal Kasuratan una kay kapangyarihan Diyus. 25 Dahil nu sa pagkabuhi uman ti manga tawu udyi umasawa, udyi paasawan-un. Parihu yi sida sa manga anghil sa langit. 26 Tungkul bay sa pagkabuhi uman manga namatay, unman aw magkabasa niyu sa ribru ni Muysis tungkul sa kayu minaktan apuy. Ati kabay nagsabi ti Diyus sa kanya magkun, 'Aku ti Diyus ni Abraham, Diyus ni Isaak, Diyus ni Hakub.' 27 Ti Diyus balaw Diyus manga namatay nu unman Diyus ngap manga tawu may buhi. Ungud duy balaw yi tama ti kanyu pagsabihun." 28 Siyun diman ti usa ka Manugtudlu Kasuguan. Nadnugan niya kanda magdiribatihan. Nasaydan niya mahusay kay nagsagut ni Hisus sa manga Sadusiyu. Nakan ngani nagpakarani siya sa kan Hisus nagpaingana magkun, "Hintay duy pag sugu ti pinakamahalaga?" 29 Kay sagut ni Hisus magkun, "Inda ti pinakamahalaga pag sugu magkun, 'Pagpatingi kamu pag nasyun Israil. Ti Panginuun imaw yi kanta Diyus. Siya yi lang gid ti Panginuun. 30 Ilubus nimu kanmu tagipusuun, kanmu karadwa, kanmu pag-iisip hanggan kanmu kabisugan sa kanmu pagmahal sa kanmu Panginuun Diyus.' 31 Bag-u inda pag sugu kay pangadwa, 'Mahala nimu kanmu kaparihu tawu ga kanmu diman magmahal sa kanmu sadili.' Udyi may iba sugu mahalaga man sa sitay." 32 Magkun ti Manugtudlu Kasuguan, "Tama duy, Maisturu. Tutuu gid kanmu sinabi. Usa usa di gid ti Diyus, udyi may iba nu ud siya lang. 33 Nu ilubus tawu kay tagipusuun, kay pag-&iisip hanggan kay kabisugan sa kay pagmahal sa Panginuun ag nu ti tawu may pagmahal sa kay kaparihu tawu ga kay diman pagmahal sa kay sadili, tunda subra man mahalaga sa tanan hayup pagsunugun pag-isagda sa Panginuun ag sa iba waya manga panagda sa Diyus." 34 Nadnugan ni Hisus mayad kay sagut Manugtudlu Kasuguan, nakan magkun siya, "Arani yi kawu mipaminsan sa manga tawu pagharian Diyus." Tunda di ginan udyi may nakabaya nakapaingana sa kanya. 35 Nagtudlu si Hisus sa manga tawu ati sa balay Diyus. Magkun siya, "Kabitay pag masabi manga Manugtudlu Kasuguan linahi ni Dabid ti pinili Diyus Manugribri pag Hari? 36 Inudyukan Ispiritu Banal si Dabid nakan sinabi niya magkun, 'Sinabi Panginuun sa kang Panginuun, Pagtukaw kawu sitay baliwa sa kang sikun, Pagpaminsan sa kang karampatan hanggan sa udwaya mabuwat niku kanmu manga kalaban ga tarat-an lang nimu manga lulud.' 37 Si Dabid yi waydi ti nag-ingaran sa pinili Diyus Manugribri pag Hari magkun, 'Panginuun.' Nu katida kabitay pag masabi ti pinili Diyus Manugribri pag Hari kay linahi ni Dabid?" Magbaya gid ti manga tawu magpatingi sa kan Hisus manga adal. 38 Nanudlu maan si Hisus sa manga tawu magkun, "Pag-aman kamu sa manga Manugtudlu Kasuguan, magkaibug mamasyar sadsad kay rutay, masulungun sida paggalangun, magpabayabaya sa manga luwas balay. Nu sa balay tiripnan kanda gustu tumukaw sa tukawan ahinanda sa may kangaranan. 39 Ag nu may karan-&an kanda gustu makatukaw sa marinu pag tukawan. 40 Pagtabuhun nida ti kasiyunan manga buranday, dapat magpadayawdayaw diman sa kanda magdarangin araba. Lalu waya mabuyat aban pag parusa sa kanda." 41 Pagka ati sa balay Diyus, tinmukaw si Hisus sa arani sukadan kuwarta pakaun sa Panginuun. Binantayan niya ti manga tawu magsukad kuwarta. Mayamu diman ti manga mayaman ti nagsukad daka pag kuwarta. 42 Nagpakarani waydi diman ti babayi buranday nagsukad duwa ka singku, kay halaga usa ka diyis. 43 Tinawag ni Hisus kay manga tuludluan kay sinabi, "Kang pagsabihun sa kanyu, ti pugri pag buranday nagpakaun subra man sa kanda tanan pag pakaun. 44 Dahil ti iba nagpakaun kay lang baliw udyi kailanganun nida. Dapat inda pag pugri buranday itinabu ipinakaun kay pamili."
1 Paraginanun yi si Hisus ginan sa balay Diyus, may usa ka tuludluan nagsabi sa kanya, "Maisturu, pagbantay kawu, pagkaraayad pag manga batu, pagkaraayad pag manga balay." 2 Sinabi ni Hisus sa kanya, "Mag-akitan aw nimu ti daraka balay inda? Unman may masawad aban batu sa kay kaparihu babaw batu, tanan tanan magkarapugdak yi lang." 3 Ati si Hisus sa bantud Ulibu. Sa kay matukawan siyun sa kay dipay balay Diyus, pagka unman may magdungug iba, nagpaingana sa kan Hisus sida ni Pidru, ni Santiyagu, ni Huwan ag ni Andiris magkun sida, 4 "Pagtultul duy kawu sa kanmi nu kapira tunda pag mangyari aban. Hintay nguna kay tanda nu arani yi mangyari tunda tanan tanan?" 5 Bag-u nagsabi si Hisus sa kanda magkun, "Pag-aman kamu hampay kamu balaw patalangun una hintay pag tawu. 6 Mayamu ti sumitay mag-apu kang ngaran magkun, 'Aku ti pinili Diyus Manugribri pag Hari'. Mayamu kanda patalangun. 7 Madnugan aban niyu ti manga barita sa gira una sa arani una sa arayu. Danga kamu magkakulbaan. Pihu gid kailangan mangyari tunda. Dapat balaw waya tunda ti katapusan kalibutan. 8 Dahil manlalabanan aban ti parihu nasyun, manlalabanan aban ti parihu kaharian. May linug aban sa tuhay tuhay pag rugar. May lun-&us aban. Ti tanan tunda imaw ti umpisa kakurian. 9 "Pagpakarig-un kamu. Dahil kamu ipasintinsiya aban sa husgadu. Kamu kanda hampakun sa manga balay tiripnan. Ipaatubang kamu sa manga gubirnadur hanggan sa manga hari dahil sa kangku hampay kamu tumultul tungkul sa kangku sa kanda atubangan. 10 Kailangan gid dapu itudlu ti Mayad pag Barita sa tanan nasyun bag-u di Rumas-ug ti katapusan. 11 Pagka kamu kanda yi dinakup hampay bistigahun, danga kamu maaburidu nu hintay kanyu isagut. Sa siyun katpung pag udas sabiha niyu ti inudyuk sa kanyu. Nakan balaw kamu ti bumagaw nu unman ti Ispiritu Banal. 12 May tawu pumakampi sa kalaban bag-u itudlu kay patar-ari hampay matyun. Katunda diman ti buwatun ama sa kay anak. Labanan waydi manga anak kanda manga gurang, kanda diman waydi ipamatay. 13 Kagalitan kamu tanan tawu dahil sa kanyu pakiusa sa kangku. Dapat tigpakarig-un hanggan tugka sa katapusan imaw ti maribri. 14 Magkun si Hisus, "Makitan niyu aban ti lapastangan ud may pumarihu mag-apu sa rugar balaw dapat ulian niya (kailangan intindihun manga manugbasa). Nu mangyari tunda ti manga tawu sa Hudiya pagpalagiw yi tabug sa bantud. 15 Una ti manga sa ikadwa pag ugpu salug danga yi magkalibangan danga yi mag-isip mam-ul waya una lang hintay pag kagamitan ginan sa basad balay. 16 Ti sa tanman danga yi mag-isip muli waya mam-ul kulimpay. 17 Kaawaawa gid ti manga magbuduy hanggan ti manga magpasusu sa anak ati katpung pag udas. 18 Pagdarangin kamu hampay balaw mitama tunda sa tigraramig. 19 Dahil ati katpung aban ti manga tawu makalakaw sa subra yi gid pag kakurian unman waya nalakawan manga tawu ginan waya sa kay pagkalalang Diyus sa kalibutan hanggan waya taynguna tugka ag dayi malakawan maan hanggan waya aban. 20 Nu abi unman padag-udun Panginuun aban tunda pag udas kakurian, unman may tawu maribri. Dapat ay dahil ngani sa manga pinili, padag-udun Panginuun tunda pag udas kakurian. 21 "Nu may magsabi sa kanyu magkun, 'Inda yi ngani ti pinili Diyus Manugribri pag Hari', aw ngatay may magsabi, 'Asan ngap siya', danga kamu magpaniwala. 22 Dahil may manga pumabalhinguun aban kuntay siya yi ngani ti pinili Diyus Manugribri pag Hari ag may lumuwang manga pudilun pag purupita. Pumakakit sida manga makadululaw pag tanda hampay nu mahimu lang patalangun nida hanggan ti manga pinili Diyus. 23 Tandai gid niyu dahil ud waya nangyari tunda, ipinasandam yi niku daan sa kanyu." 24 Magkun si Hisus, "Dapat ati katpung aban nu nakalawuy yi tunda pag kakurian, 'Dumulum ti init, dayi maninggit ti bulan, 25 Mangalagpak ti manga pamgasan ginan sa langit, ag matandug aban ti manga kapangyarihan sa panungaan langit daga.' 26 "Bag-u makitan nida ti Anak Tawu Rumas-ug padara sa rurum may daka pag kapangyarihan hanggan kadayawan. 27 Nu sumitay siya, suguun niya kay manga anghil hampay kanda tipunun ti manga pinili Diyus ginan sa upat ka puun durus, ginan sa bilug kalibutan." 28 Magkun si Hisus, "Intindiha niyu kang ipag-adal tungkul sa puun igus. Pagka nanugbuk nanlabung kay manga sanga alam niyu arani yi ti abagat. 29 Katunda diman waydi nu makitan niyu tunda pag manga mangyari, alam yi niyu udyi dugay ti kaudasan pagras-ug niya, arani yi gid. 30 Kang pagsabihun sa kanyu, dayu mamatay inda pag tinubu tawu hanggan sa ud matupad inda tanan tanan kang sinabi. 31 Madura di aban ti langit ag ti daga, dapat kang manga bagaw dayu pumalya." 32 Magkun si Hisus, "Dapat unman may tawu umalam nu kapira tunda pag mangyari aban una kay sirang una kay udas. Unman may makaalam una manga anghil sa langit, una paman ti Anak. Ti Ama lang ti makaalam tunda. 33 Pag-aman kamu paglagi handa kamu dahil unman niyu alam nu kapira pag mangyari tunda. 34 Parihu sa usa ka tawu linmakaw tag sa iba rugar. Pagka magkalakaw yi siya, ainintirga dapu niya kay ulian sa kay manga panawuhun ag sa kada usa kay buruwatun. Nagbilin waydi sa manug-alaga sabian magkun, 'Pagpirmi kawu alistu.' 35 Paglagi handa kamu dahil unman niyu alam nu kapira pag Rumas-ug ti may apu balay, nu ngatay malambung baliwa, nu ngatay karaw-an yabi, nu ngatay sa pagpamintu manuk, aw nu sa surip. 36 Barang nu bigla Rumas-ug siya, kamu maras-ugan maturugan. 37 Ti kang pagsabihun sa kanyu, imaw diman kang pagsabihun sa tanan, kailangan kamu paglagi handa gid."
1 Duwa wadi ka sirang bag-u Kapistahan yi sa Pag-alaala sa Karibrihan hanggan Kapistahan manga Tinapay unman may Pamadaka. Pag-isipun yi manga pangulu manug-asiwa balay Diyus hanggan manga Manugtudlu Kasuguan nu kabitay kanda ipadakup si Hisus sa lihim bag-u ipamatay. 2 Dahil magkun sida, "Danga nita ipadakup katpung sa Kapistahan, barang magulu ti manga tawu." 3 Ati katpung si Hisus sa balay ni Simun sa baryu Bitanya. Tunda pag Simun kaybi batasin. Sa kay magkaun ni Hisus, nagpakarani sa kanya ti usa ka babayi may dara alabasturu pag batu ti binwat sukadan punu mahalaga pag pamanglu nardu. Binuung niya ti sukadan bag-u kay ibinuhus kay pamanglu sa kay ulu ni Hisus. 4 Dapat nag-isug ti iba magkun, "Hayga inuyang lang tunda? 5 Mayad waya nu ipinabili kis-ab sa tulu ka gatus dinaryu bag-u nu ipinakaun sa manga pugri kay kabilyanan." Bag-u tinamyaw nida ti babayi. 6 Dapat magkun si Hisus, "Pabay-ani niyu siya. Hayga duy kanyu pagpakialman siya. Mayad ngap inda kay binwat sa kangku. 7 Pirmi di sa kanyu ti manga pugri. Una kapira nu gustu niyu, mahimu niyu mabwatan sida mayad, dapat aku aban udyi dugay kaibahan niyu. 8 Binwat babayi kay nakaya. Binuhusan yi niya pamanglu kang bilug bilang ga alistu yi sa udas aban kanda maglubung sa kangku. 9 Kang pagsabihun gid sa kanyu, una naan pag itudlu ti Mayad pag Barita sa buu kalibutan, hanggan ti binwat babayi matultul diman bilang ga pag-alaala sa kanya." 10 Sa sampulu may duwa ka tuludluan ni Hisus ti usa kay ngaran si Hudas Iskariyuti. Nag-ati si Hudas sa manga pangulu manug-asiwa balay Diyus hampay itudlu niya si Hisus sa kanda. 11 Pagka naalaman nida nakabaya sida ag nangaku nida siya pakan-an kuwarta. Siyun ginan naghanap paraan si Hudas hampay itudlu niya si Hisus sa kalaban. 12 Rinmas-ug ti umpisa pag sirang Kapistahan manga Tinapay unman may Pamadaka. Sa ati pag sirang kanda ugali mag-iyaw anak karanidu sa Pag-alaala sa Karibrihan. Sinabi niya manga tuludluan sa kan Hisus, "Naan duy kanmu gustu ihanda nimi kanmu yapun sa Pag-alaala sa Karibrihan?" 13 Sinugu niya kay duwa ka tuludluan sinabi niya sa kanda, "Pag-atag kamu sa banwa, ati may masulang kamu usa ka lalaki may sungguy usa ka banga danum. Kuyuga niyu siya. 14 Nu naan siya pag sumaka pag balay, sabiha niyu sa may puun balay, 'Magkun ti Maisturu, naan ti mahal mahayinan niku kanmi yapun tungkul sa Pag-&alaala sa Karibrihan, kasaru niku kang manga tuludluan?' 15 Itudlu niya sa kanyu ti daka pag suludsulud sa ikadwa pag ugpu, alistu yi kay gamit. Ati kamu paghiwat kanta karan-an." 16 Nag-ati ti manga tuludluan. Pagka sida rinmas-ug sa banwa, nakitan nida ti angay sa sinabi ni Hisus sa kanda. Bag-u ihinanda nida ti yapun sa Pag-alaala sa Karibrihan. 17 Pagka yabi yi, nag-ati ngani si Hisus hanggan kay sampulu may duwa ka tuludluan. 18 Pagka sida tinmukaw yi magkaun yi, sinabi ni Hisus sa kanda, "Pagsabihun niku sa kanyu, ti usa sa kanyu kasaru diman niku, pumakampi sa kalaban hampay aku kay itudlu." 19 Nanruku gid ti manga tuludluan, ti kada usa namaingana sa kan Hisus magkun, 'Aku aw nguna duy?" 20 Nagsagut si Hisus, "Ti usa kabilang waydi sa sampulu may duwa ka tuludluan niku ti kadungan niku sumawsaw sa taya, imaw yi ngani. 21 Mamatay gid ti Anak Tawu angay sa isinurat sa Banal Kasuratan tungkul sa kanya. Dapat kaawaawa duy tunda pag tawu ti pumakampi sa kalaban hampay itudlu ti Anak Tawu. Mayad waya nu unman siya nianak pag tawu." 22 Pagka sida magkaun yi, nagpunpun si Hisus tinapay ginan sa lamak. Pagka siya nakapasalamat sa Diyus, pinikapika niya ti tinapay bag-u kay ipinakaun sa kay manga tuludluan magkun siya, "Tanggapa niyu inda. Inda kang bilug." 23 Binitbit niya ti ungut, nagpasalamat siya sa Diyus bag-u itinunghul niya sa kanda, sida tanan nag-inum sa ungut. 24 Bag-u sinabi niya sa kanda, "Inda kang dugu itinalaghut Diyus sa taratu. Ibuhus kang dugu alang alang sa mayamu tawu. 25 Kang pagsabihun sa kanyu, dayi aku uminum inda pag alak ubas hanggan sa udwaya kaudasan aban nu inmun niku ti bag-u alak ubas sa kaharian Diyus." 26 Pagka sida kinmanta kanda dayaw sa Diyus, nag-atag sida sa Bantud Ulibu. 27 Sinabi ni Hisus sa kay manga tuludluan magkun, "Sab kamu tanan umalinlangan sa kangku, parihu sa pagsabihun Diyus sa Banal Kasuratan magkun, 'Matyun niku ti manug-alaga karanidu, bag-u mangalat ti manga karanidu.' 28 Dapat nu aku mabuhi uman, umuna aku sa kanyu atag sa Galiliya." 29 Dapat sinabi ni Pidru sa kanya magkun, "Una duy umalinlangan sida tanan sa kanmu, aku dayu umalinlangan." 30 Sinabi ni Hisus sa kanya, "Kang pagsabihun sa kanmu, taynguna yi gid pag yabi inda, udwaya tumarauk ti manuk pakadwa, itanggi nimu aku katlu ginan." 31 Dapat lalu inungud ni Pidru kay sinabi, "Una waya sa kamatayan damayan gid niku kawu, balaw gid niku kawu itanggi." Katunda diman ti sinabi nida tanan. 32 Pagka rinmas-ug sida ni Hisus sa usa ka rugar kay ngaran Gitsimani, sinabi niya sa kay manga tuludluan magkun, "Pagtukaw dapu kamu sitay, mandarangin aku." 33 Bag-u tinaban niya sida ni Pidru, ni Santiyagu, ni Huwan. Bag-u nanruku siya ag naarimputu sa kay tagipusuun. 34 Sinabi niya sa kanda, "Kang tagipusuun mas-ut yi sa karukuan harus ga mamatay yi aku. Pag-alagad kamu sitay. Pagmaimatahan kamu." 35 Pagka nagpakarayu siya diit, napadapa siya sa daga, nagdarangin hampay nu mahimu unman mana malakawan niya kay udas kakurian. 36 Sinabi niya, "Amang duy, kaya nimu mabuwat ti tanan bagay. Ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud nu unman kanmu di gid ti masunud." 37 Nagbalik siya, naras-ugan niya turug kay tulu ka tuludluan. Sinabi niya sa kan Pidru, "Simun, turug aw kawu? Unman aw kawu nakahimu maimatahan usa lang ka udas? 38 Pagmaimatahan kamu pagdarangin hampay kamu balaw madara sa tuksu. Ti naisipan mana alistu, dapat ay ti bilug malumuy." 39 Nagpakarayu maan siya nagdarangin, kay sinabi imaw diman pag manga bagaw ga kis-ab. 40 Nagbalik maan siya naras-ugan maan niya sida manga maturugan, dahil tinalu yi sida puyat. Unman nida alam nu hintay ti isagut sa kanya. 41 Pagka sa kay ikatlu yi pagbalik niya sa kanda magkun si Hisus, "Magkaturug aw waya kamu, magpahari aw waya? Hustu yi. Inda yi ti kaudasan. Malu, itudlu yi ti Anak Tawu sa manga makasalanan, ipahintulut yi sa kanda. 42 Pagbangun yi @amu, atag yi kita. Inda yi ti tumudlu sa kangku atag sa manga makasalanan." 43 Magbagaw di waya si Hisus, nagras-ug yi ngap si Hudas, usa sa sampulu may duwa. May kaibahan siya mayamu tawu may dara manga baladaw, manga pamakul. Sinugu sida manga manug-&asiwa balay Diyus, manga Manugtudlu Kasuguan hanggan manga paggurangunun sa nasyun. 44 Udwaya sida rinmas-ug ati, magkun si Hudas sa kay manga kaibahan, "Inda kanta kundisyunan, nu hintay sab kang arkan imaw yi ngap pag tawu. Dakpa yi niyu, daran-a niyu siya kaayad." 45 Pagka nagras-ug yi kadaka dinmulud si Hudas sa kan Hisus magkun, "Maisturu", bag-u kay inarkan. 46 Bag-u hiniyaptan yi manga tawu si Hisus kanda yi dinakup. 47 Dapat ay ginmabut kay baladaw ti usa ka kaibahan ni Hisus, tinigbas niya ti panawuhun Pangulu Manug-asiwa balay Diyus, napungus kay tuli. 48 Sinabi ni Hisus sa kanda, "Aku lugud tulisan aw, nakan nagsitay kamu may dara baladaw, manga pamakul hampay dakpun aku? 49 Sirang sirang asan diman waydi aku sa balay Diyus pag magtudlu. Bati unman waydi niyu dinakup aku. Nakan nangyari inda hampay matupad ti manga Kasuratan." 50 Bag-u naglinayas yi ti manga tuludluan tanan tanan, tinayakan yi lang usa usa si Hisus. 51 Kinmuyug sa kan Hisus ti usa ka kan-akan unman may lambung nu unman kulimpay lang rutay katsa. Hiniyaptan siya manga tawu. 52 Dapat ay kay binuhian kay kulimpay, nalagiw siya udyi may karutayrutay. 53 Bag-u dinara nida si Hisus tabug sa Pangulu Manug-asiwa balay Diyus. Nagtiripun ati ti tanan manga pangulu manug-asiwa balay Diyus, ti manga paggurangunun sa nasyun hanggan ti manga Manugtudlu Kasuguan. 54 Dinmasun diman si Pidru sa kan Hisus dapat ay balaw napasuud. Pagka rinmas-ug sida sa balay Pangulu Manug-asiwa balay Diyus napasirung si Pidru sa parat-&ungan, tinmukaw siya siyun, kaibahan niya ti manga suruguun magpanarang sa apuy. 55 Ti manga pangulu manug-asiwa balay Diyus hanggan ti buu Katipunan manga Pinunu naghanap kastigus laban sa kan Hisus hampay sintinsiyahan siya sa kamatayan. Dapat unman sida may mag-akitan. 56 Dahil mayamu mana ti nagkastigus kapudilan laban sa kanya, dapat kanda manga pagsabihun unman magkaparihu. 57 Bag-u may manga tawu nag-atubang magbagaw kapudilan laban sa kan Hisus magkun, 58 "Nadnugan nimi kay sinabi magkun, 'Kang gubaun ti balay Diyus binwat tawu kamang bag-u sa sulud tulu ka sirang pumatindug tuhay pag balay Diyus balaw buwat tawu kamang.' " 59 Dapat unman diman magkaparihu ti pagsabihun manga kastigus. 60 Bag-u tinmindug sa kanda atubangan ti Pangulu Manug-&asiwa balay Diyus, pinaingana niya si Hisus magkun, "Unman yi aw kawu may isagut sa inda pag dimanda nida laban sa kanmu?" 61 Dapat unman nag-ingay si Hisus, unman gid siya nagsagut. Pinmaingana maan ti Pangulu Manug-asiwa balay Diyus magkun, "Kawu aw ti pinili Diyus Manugribri pag Hari, ti Anak Diyus makapangyarihan sa tanan?" 62 Sinabi ni Hisus, "Aku ngani. Kainda ginan makitan niyu ti Anak Tawu matukawan baliwa sa kay sikun Diyus minsan sa karampatan Diyus makapangyarihan. Rumas-ug siya padara sa rurum ginan sa langit." 63 Pagka nakadnug Pangulu Manug-asiwa balay Diyus sa kay sinabi ni Hisus, ginisi niya kay sadili rutay magkun, "Udyi kailangan nita ti manga kastigus. 64 Kamu yi ngani ti nakadnug taynguna kay lapastangan laban sa Diyus. Kabitay lugud kanyu magkilala?" Bag-u sida tanan nagsintinsiya sa kan Hisus sa kamatayan. 65 Bag-u kanda binug-anan siya, tinakluban nida kay mata bag-u kanda sinuntuk siya magkun, "Pagpurupita kawu." Pagka iinintirga yi si Hisus sa manga bantay, nagsuntuk diman waydi sida sa kanya. 66 Siyun di si Pidru sa sirung, sa parat-ungan. Nagpakarani ti usa ka suruguun babayi Pangulu Manug-asiwa. 67 Pagka nakitan babayi si Pidru magpanarang sa apuy, binantayan niya siya bag-u kay sinabi, "Kaibahan diman kawu ni Hisus taga Nasarit, unman aw?" 68 Dapat ay nagtanggi si Pidru magkun, "Tau duy, unman niku magkaalaman kanmu pagsabihun." Inmati si Pidru sa may sabian parat-ungan. Nanarauk yi ti manuk. 69 Pagka nakakit sa kanya ti suruguun babayi magkun maan siya sa manga tawu siyun, "Inda pag lalaki kaibahan diman nida." 70 Tinmanggi di gid maan si Pidru. Lagat lagat waya bag-u ti manga tawu siyun nagsabi maan sa kan Pidru, "Kaibahan gid ngap kawu nida, dahil taga Galiliya diman kawu." 71 Sinmagut si Pidru, "Una waya matyun aku, balaw gid ungud magkakilala niku tunda pag tawu kanyu pagsabihun." 72 Susun nanarauk yi ngani ti manuk pakadwa. Bag-u naisipan ni Pidru kay sinabi ni Hisus sa kanya magkun, "Udwaya tumarauk ti manuk pakadwa, itanggi nimu aku katlu ginan." Pagka naisipan niya tunda, nanlumi gid si Pidru.
1 Pagka surip, nagpululungan dapu ti manga pangulu manug-&asiwa balay Diyus, ti manga paggurangunun sa nasyun, ti manga Manugtudlu Kasuguan hanggan ti Katipunan manga Pinunu bag-u kanda pinagapus si Hisus, kanda dinara, ipinabahala yi sa kan Pilatu. 2 Nagpaingana si Pilatu sa kan Hisus magkun, "Kawu aw ti Hari manga Hudiyu?" Magsagut si Hisus, "Hu, tutuu yi ngap kanmu pagsabihun." 3 Bag-u idinimanda siya manga pangulu manug-asiwa balay Diyus tungkul sa mayamu bagay. 4 Nakan nagpaingana maan si Pilatu sa kan Hisus, "Unman aw kawu may isagut? Mayamu kanda manga dimanda laban sa kanmu." 5 Dapat unman nagsagut si Hisus una di. Nakan lalu naglingut si Pilatu. 6 Kada Kapistahan sa Pag-alaala sa Karibrihan pagpalpasan gubirnadur ti usa ka pirisu, una hintay pag pirisu ti hagadun manga tawu. 7 Ati katpung may usa ka tawu kay ngaran si Barabas. Napirisu siya minsan sa kay manga kaibahan nag-&arburutu, sa katpung nida nagguluhan may minatay paman. 8 Nagpakarani ti manga tawu sa kan Pilatu nagpakihampang sa kanya hampay palpasan niya ti usa ka pirisu angay sa kay ugali buwat kada Kapistahan. 9 Magkun si Pilatu sa kanda, "Gustu aw niyu kang palpasan ti Hari manga Hudiyu?" 10 Dahil alam ni Pilatu maghirak ti manga pangulu manug-asiwa balay Diyus nakan kanda ipinabahala si Hisus sa kanya. 11 Dapat pagpakaudyukan manga pangulu manug-asiwa ti kayamuan tawu hampay kanda pamuhunun sa kan Pilatu si Barabas ngap ti palpasan. 12 Nagsagut maan si Pilatu magkun, "Nu katunda, hintay ti buwatun niku sa kanyu pagkumnun Hari manga Hudiyu?" 13 Irininggit maan nida. "Papakuan nimu sa kurus." 14 Sinabi ni Pilatu sa kanda, "Hayga duy, hintay pag kadautan kay binwat niya?" Dapat lalu waya kanda irininggit, "Ipaku siya sa kurus." 15 Sa kay gustu ni Pilatu pasibut-an ti manga kagustuhan tawu, nakan pinalpasan niya si Barabas. Dapat ipinagaruti niya si Hisus bag-u ipinakaun niya sa kanda hampay ipaku sa kurus. 16 Bag-u dinara manga sundalu si Hisus ipinaslud sa sugkadan balay ni Pilatu. Tinipun nida siyun ti kayamuan sundalu. 17 Pinakulimpayan nida si Hisus rutay marara. Sinulapid nida ti dugihan bag-u kanda ipinasangbaw sa kay ulu ni Hisus ga sangbaw hari. 18 Bag-u kanda ginalang magkun, "Pagmasulung kawu, Hari manga Hudiyu." 19 Bag-u binakul nida kay ulu usa ka bahi anyamu, kanda waya binug-anan. Bag-u nagluhud sida bilang kanda ginalang si Hisus. 20 Pagka nakatapus kanda mag-away, bin-ul maan nida ti kulimpay marara, pinasulungan maan nida kay sadili rutay bag-u kanda yi ipinalwas hampay kanda yi ipaku sa kurus. 21 May nasulang sida usa ka tawu ginan sa kay tanman, si Simun taga Sirini, kay ama nida ni Alihanduru ni Rupu. Ipinalugus nida ipinas-an sa kanya kay kurus ni Hisus. 22 Kanda dinara si Hisus tag sa daga kay ngaran Gulguta, kay ibug sabihun ga but-ul ulu pag rugar. 23 Pinakan-an nida si Hisus alak may libug pamakimay kay ngaran mira, dapat unman siya nanginum. 24 Pagka kanda ipinaku siya sa kurus, bag-u inayaw-ayaw@ nida kay manga rutay, alinaban waya nida sa lunggungan. 25 Ati katpung alas nuwibi ti udas kanda nagpaku sa kurus. 26 Isinurat nida ti dimanda laban sa kanya magkun, "Ti Hari manga Hudiyu." 27 May duwa ka tulisan kay kadungan ni Hisus ipinaku waydi sa kurus, ti usa sa sikun baliwa pag kurus, kay usa sa wala baliwa pag kurus. 28 Tinupad yi ti Kasuratan magkun, "Nibilang siya sa manga makasalanan." 29 Ti manga maglawuy siyun nagmuransa diman waydi sa kan Hisus. Nagtuknatukna kanda ulu magkun, "Malu ngani tunda, unman aw kawu ti mangguba balay Diyus bag-u ipatindug uman sa sulud tulu ka sirang? 30 Ribrihan yi nimu kanmu sadili bilug. Pagdugsun yi ginan sa kurus." 31 Katunda diman pag hinangalhangal siya manga pangulu manug-asiwa balay Diyus hanggan manga Manugtudlu Kasuguan. Kay sabi nida, "Irinibri niya ti iba, dapat unman kaya niya iribri kay sadili. 32 Pagdugsun yi taynguna ginan sa kurus ti pinili Diyus Manugribri pag Hari, ti Hari Israil hampay makitan nimi bag-u kami maniwala sa kanya." Hinangalhangal diman si Hisus manga tulisan kadungan niya ipinaku sa kurus. 33 Pagka karaw-an yi sirang nagdulum ti init sa bilug kabilutan hanggan palis ti init. 34 Pagka palis ti init, nagtawag laun si Hisus magkun, "Ilui, Ilui, lima sabaktani?" Kay ibug sabihun, "Diyus niku, Diyus niku, hayga pinabay-anan nimu aku?" 35 May manga matindugan siyun nakadnug sa kay bagaw ni Hisus. Magkun sida, "Malu magtawag maaw siya sa kan Ilyas." 36 Madali nalagiw ti usa, binasa niya maaslum pag alak ti ispungha bag-u ipinauli sa pudpud anyamu bag-u pinasupsup sa kan Hisus magkun, "Pag-alagad dapu, bantayan nita nu ngatay lumuwang si Ilyas hampay ipadugsun siya ginan sa kurus." 37 Nagtawag maan daka si Hisus bag-u naugtasan arup. 38 Bag-u nagisi sa karaw-an ti limbun rutay sa balay Diyus ginan sa tungud sadsad sa sirung. 39 May matindugan sa sirung kurus usa ka kapitan sundalu. Pagka nakitan niya nu kabitay kay namatay ni Hisus, sinabi niya magkun, "Tutuu inda pag tawu imaw gid ti Anak Diyus." 40 May manga babayi diman siyun magbantay ginan sa arayu. Minsan sa kanda si Marya Magdalina hanggan si Marya kay ina nida magtar-ari ni Husi ni Santiyagu, hanggan si Salumi siyun diman. 41 Tunda pag manga babayi nagkuyug sa kan Hisus kay di waya sa Galiliya, nangawat sida sa kanya sa tanan niya pangailangan. Ag mayamu waya manga babayi nagkuyug waydi sa kan Hisus tabug sa Hirusalim. 42 Maghugut yi marukirum. Ati pag sirang kanda pangalistu sa Kapistahan bag-u aldaw sirang pamahari yi. 43 Rinmas-ug si Husi taga Arimatiya. Inda pag usa ka pinunu paggalangun manga tawu. Magpatigagad siya sa kay paghari Diyus. Nagpanghas siya sa kay sadili nagpakarani sa kan Pilatu bag-u kay hinagad kay bangkay ni Hisus. 44 Pagka naalaman ni Pilatu tigbak yi si Hisus, naglingut siya. Nakan ngani ipinab-ul niya ti kapitan manga sundalu kay pinaingana nu ngatay kumun. 45 Pagka naalaman ni Pilatu sa kapitan kuntay tutuu tigbak yi si Hisus, pinasibut-an niya si Husi bul-a yi ti bangkay. 46 Binili ni Husi ti usa ka pisahan katsa. Pagka bin-ul niya ti bangkay ginan sa kurus, kay yi ngani sinaput sa katsa bag-u ipinauli niya sa tinaguktukan batu. Bag-u ilinigid niya ti usa ka daka pag batu itinalakup sa sabian tinaguktukan batu. 47 Nagbantay diman waydi si Marya Magdalina hanggan si Marya kay ina ni Husi, nakitan nida nu naan pag ipinauli kay bangkay ni Hisus.
1 Pagka lawuy yi ti sirang pamahari, sida ni Marya Magdalina, ni Marya kay ina ni Santiyagu hanggan si Salumi namili manga pamanglu hampay kanda ihaplas sa bangkay ni Hisus. 2 Sa surip duminggu sinminggit yi ti init, nag-ati sida sa tinaguktukan batu. 3 Nagharampangan sida sa kanda maglakaw magkun, "Hintay nguna kanta masugu hampay pumaligid batu hampay mabukasan ti sabian tinaguktukan batu?" 4 Dapat pagka binantayan nida ti tinaguktukan batu, nakitan nida ilinigid yi maaw ti batu. Daka gid tunda pag batu. 5 Pagka sinmulud sida sa tinaguktukan batu, nakitan nida may matukawan baliwa sa sikun usa ka lalaki may sulung rutay malagti sadsad sa daga. Naglingut gid ti manga babayi. 6 Magkun ti lalaki, "Danga magkadala kamu. Paghanapun niyu si Hisus taga Nasarit, ti ipinaku sa kurus. Nabuhi siya uman. Udyi siya sitay. Bantayi niyu, asan kay nagkabugtangan niya. 7 Nakan ngani pag-atag yi kamu sabihi yi niyu sa manga tuludluan, lalu ngap sa kan Pidru, si Hisus umuna sa kanyu tag sa Galiliya. Makitan niyu siya ati, parihu sa kay sinabi sa kanyu." 8 Nagluwas ginan sa tinaguktukan batu ti manga babayi, nalagiw sida dahil masyadu sida nakulbaan. Sa subra nida pag dala unman sida may itinultul una sa kantapu. ABA PAG PANGATAPUSAN TULTULANUN 9 Nag-ati ti manga babayi sa kan Pidru hanggan sa kay manga kaibahan, itinultul nida ti tanan isinabi lalaki sa tinaguktukan batu. 10 Bag-u sinugu ni Hisus kay manga tuludluan atag sa tanan pag manga tawu una arani una arayu. Itinudlu nida ti barita tungkul sa karibrihan unman may katapusan. Tunda pag barita sakup sa Diyus ag unman pumalya hanggan aban. Amin. 11 Dapat unman sida naniwala sa kay sinabi ni Marya kuntay nabuhi uman si Hisus ag napakakit sa kanya. 12 Napakakit diman si Hisus sa duwa ka tuludluan sa kanda maglakaw tabug sa baryu. Dapat tuhay kay histuda. 13 Pagka nakitan nida si Hisus, nagpabalik sida duwa tag sa Hirusalim. Kanda ibinarita sa kanda manga kaibahan ti nangyari, dapat sida unman diman waydi pinaniwalaan. 14 Bag-u napakakit si Hisus sa sampulu may usa ka tuludluan sa kanda magkinaun. Binagawan niya sida dahil sa unman magsarig sa kanya ag maganit waya kanda tagipusuun, sapagka unman naniwala sida sa manga nakakit sa kanya sa kay pagkabuhi uman. 15 Sinabi ni Hisus sa kanda magkun, "Pag-ati kamu sa tanan rugar sitay sa babaw daga, itudlu niyu ti Mayad pag Barita sa tanan manga tawu. 16 Ti tawu nu sumarig sa kangku bag-u itulbaw, may karibrihan. Dapat ti tawu nu unman magsarig, sintinsiyahan siya ngapu aban sa kaparusahan. 17 Ti manga tawu nu magsarig may makitan inda pag manga tanda tungkul sa kamaskihan, sa ngaran niku pag ipalwas nida ti manga labang, ag bumagaw sida sa tuhay tuhay pag pamagaw. 18 Balaw sida maunu una humiyaput sa ulay, una uminum sa makahilu. Umayad ti may manga sakit nu kup-an nida manga kamang. 19 Pagka nakatapus kay bagaw sa kanda, dinara yi ti Panginuun Hisus atag sa langit. Tinmukaw siya sa sikun baliwa Diyus napaminsan sa kay karampatan. 20 Bag-u nag-ati ngani kay manga tuludluan nanudlu Mayad pag Barita. Nagbuwat ti Panginuun manga tanda imaw yi ngap ti puruyba sa kanda bagaw. DAG-UD PAG PANGATAPUSAN TULTULANUN
1 Kagalanggalang Tiyupilu, mayamu tawu nanipag sa surat manga tultulanun tungkul sa tanan manga nangyari sa kanta karaw-an. 2 Sinurat nida ga kanta diman nadnugan sa manga manugtudlu Bagaw Diyus, ag sa manga nakakit sa manga nangyari ginan sa kabag-u. 3 Inadalan niku mayad sa kadugayun panahun ti tanan tanan manga itinultul nida. Bag-u di magaan yi kang isip sumurat usa ka tultulanun malinaw para sa kanmu, duy, 4 hampay maalaman nimu ti katutuuhanan tungkul sa manga bagay itinudlu sa kanmu. 5 Sa kapanahunan hari si Hirudis sa Hudiya, may usa ka manug-asiwa balay Diyus kay ngaran si Sakaryas sa gurupu ni Abyas. Kan Sakaryas inasawa si Ilisabit, linahi ni Aarun. 6 Parihu sida usa kanda naisipan sa Diyus, unman may ikasabi sa kanda buhi, angay gid sa kay Kasuguan Panginuun hanggan sa kay ibinilin. 7 Unman sida may anak dahil unman nagkaanak si Ilisabit, ag parihu yi gurangun. 8 Pagka may katungkulan kay gurupu ni Sakaryas, nag-asikasu siya sa kay buruwatun sa atubangan Diyus dahil siya ti manug-asiwa balay Diyus. 9 Angay sa ugali manga manug-asiwa balay Diyus naglunggungan sida nakatama si Sakaryas. Siya yi ngani ti makasaka sa balay Diyus hampay magtuub kamangyan. 10 Sa udas sa kan Sakaryas katpung magtuub kamangyan ati nagtiripun ag nagdarangin ti kadamlan tawu sa sugkadan balay Diyus. 11 Bag-u napakakit sa kan Sakaryas ti usa ka anghil Panginuun matindugan sa sikun baliwa turuuban kamangyan. 12 Pagka nakitan ni Sakaryas ti anghil naaburidu nadala gid siya. 13 Dapat sinabi anghil sa kanya, "Sakaryas, danga magkadala duy, dahil nadnugan Diyus kanmu darangin. Kanmu asawa si Ilisabit aban manganak gid duy anak lalaki, ag siya kanmu paingarnan Huwan." 14 Magkun waya ti anghil, "Kawu aban masulung gid lubus magbaya, ag mayamu pag tawu ti makabaya sa kay pagkalusad. 15 Dahil may kamaskihan siya aban sa atubangan Panginuun. Danga uminum siya alak, una hintay pag manga makalangu pag irinmun. Ginan sa kay pagkalusad suldan siya Ispiritu Banal." 16 Magkun ti anghil, "Mayamu sa linahi Israil ti pabalikun niya tag sa Panginuun Diyus nida. 17 Umuna siya sa Panginuun parihu ga kan Ilyas diman dahil sa kapangyarihan Ispiritu Banal. Pabalikun niya ti naisipan manga gurangun sa ikaayad nida manga anak. Tudluan niya ti manga makasalanan agud sida madunung magtupad sa kagustuhan Diyus. Ialistu niya para sa Panginuun usa ka nasyun handa yi." 18 Sinabi ni Sakaryas sa anghil magkun, "Kabitay gid pag maalaman niku inda ti mangyari, madi aku gurangun yi ag lalu waya gurangun kang asawa?" 19 Nagsagut ti anghil, "Aku si Gabriyil nakatindug sa atubangan Diyus. Sinugu aku taynguna hampay magbagaw sa kanmu ag hampay ipadakit sa kanmu ti mayad pag barita inda. 20 Malu, taynguna ginan kawu buyun yi unman kawu makabagaw, hanggan sa udwaya mamhan kang manga binagaw sa kanmu, dahil unman kawu naniwala sa kang binagaw, madi pihu matupad aban sa kay taning pag kaudasan." 21 Nag-alagad ti manga tawu sa kan Sakaryas, naglingut sida hayga dugay siya ati sa basad balay Diyus. 22 Pagka siya nagluwas, unman yi siya makabagaw sa kanda nakan naintindihan nida may Ipinakakit maaw ti Diyus sa kanya ati sa sulud balay Diyus. Pinaamanan yi lang niya sida, udyi siya nakabagaw. 23 Pagka lawuy kay udas niya panirbi, nuli yi si Sakaryas sa kay ulian. 24 Pagka dugay magbuduy kay asawa si Ilisabit. Sa sulud lima ka bulan siya pirmi yi lang nagpatagu sa balay. Magkun siya, 25 "Taynguna aku binaya Panginuun. Binwat niya inda hampay balaw yi pagpayhinpayhinun aku manga tawu." 26 Pagka unum yi ka bulan, sinugu Diyus ti anghil Gabriyil atag sa usa ka banwa sa Galiliya, imaw ti pagsabihun Nasarit. 27 Sinugu si Gabriyil atag sa usa ka daraga kay arasawan-un pag lalaki si Husi kay ngaran. Si Husi linahi ni Dabid. Kay ngaran pag daraga si Marya. 28 Nagpakarani ti anghil sa kan Marya magkun, "Pagmasulung duy kawu, kawu ti pinili Diyus pag daraga, sa kanmu gid ti Panginuun. Sa tanan babayi kawu ti pinapaladan." 29 Dapat masyadu naaburidu si Marya sa sinabi anghil sa kanya, pagpakaisip-isipun niya nu hintay nguna kay kahulugan tunda. 30 Magkun ti anghil sa kanya, "Danga kawu magkadala duy, Marya. Dahil kinaawaan kawu Diyus. 31 Pagpatingi duy kawu, mamuduy kawu aban manganak lalaki, siya ingarnan nimu si Hisus." 32 Magkun waya si Gabriyil, "May kadayawan aban siya ag ingarnan aban siya Anak Diyus makamaskihan sa tanan. Pakan-an siya aban Panginuun Diyus karampatan maghari ga kay ginurang diman ga kan Dabid. 33 Humari siya sa linahi ni Hakub hanggan aban. Ag unman may katapusan kay paghari." 34 Sinabi ni Marya sa anghil magkun, "Kabitay inda duy, aku unman may asawa?" 35 Sinmagut ti anghil magkun, "Pumakababa tag sa kanmu ti Ispiritu Banal, humamuy sa kanmu ti kapangyarihan Diyus, nakan ti anak ianak aban pagsabihun banal, ti Anak Diyus. 36 Malu, kanmu katawuhan si Ilisabit magbuduy diman anak lalaki, madi gurangun yi. Ag taynguna unum yi ka bulan siya, madi kaybi pagsabihun balaw manganak. 37 Unman may dayu mabuwat ti Diyus." 38 Magkun si Marya, "Inda duy aku suruguun Panginuun, pagmangyari gid sa kangku angay sa kanmu binagaw." Bag-u tinayakan yi siya anghil. 39 Pagka dugay linmakaw si Marya madali kay lakaw tag sa bantud, tag sa usa ka banwa sa daga Huda. 40 Nagsaka siya sa kan Sakaryas balay, nanlitau sa kan Ilisabit. 41 Pagka nadnugan ni Ilisabit kay magbagaw ni Marya, namurag ti lapsag sa kan Ilisabit tiyan. Ag lubus sinuldan Ispiritu Banal si Ilisabit. 42 Ainalsa niya kay bagaw magkun, "Kawu yi duy, Marya, ti pinapaladan Diyus sa tanan babayi, hanggan ti lapsag sa kanmu tiyan pinapaladan Diyus. 43 Salamat duy, nagsitay maaw kawu, ti ina niku Panginuun. 44 Dahil malu, pagka nadnugan niku kisab kanmu magbagaw, binmaya namurag ti lapsag sa kang tiyan. 45 Pinapaladan kawu dahil magsarig kawu matupad ti manga binagaw sa kanmu ginan sa Panginuun." 46 Kay sinabi ni Marya, "Pagdayawun niku ti Panginuun sa kang tagipusuun. 47 Nakabaya kang tagipusuun sa Diyus sa kang Manugribri. 48 Dahil pag-isipun di ngap maaw niya aku, madi ababa kang kahamtangan pag suruguun niya. Dahil, malu taynguna ginan ti tanan pag manga sinulput tawu aban sumabi magkun, mapalad si Marya. 49 Dahil ti Diyus makapangyarihan may binwat daka pag manga bagay sa kangku. Banal kay ngaran. 50 Kay pagkaawaan niya ti manga maggalang sa kanya, Hanggan waya may sinulput. 51 Ipinakilala niya kay kabisugan hanggan kay kamaskihan. Kinalatkalat niya ti manga palabilabihun, ti may gayak kadautan sa kanda tagipusuun. 52 Kay binahasan katungkulan ti manga hari, Ag itinaas ti manga unman may kangaranan. 53 Binsug niya ti manga magkalun-us sa manga mayad pag kabagayan. Tinulak niya ti manga mayaman, unman pinakan-an una lang hintay. 54 Inawatan niya kay manga suruguun, ti manga taga Israil. Unman nalimtan niya kay pangaawa 55 Sa kan Abraham hanggan sa kay manga linahi hanggan waya aban, ga kay sinabi sa kanta manga ginurang." 56 Nagdugay tulu ka bulan si Marya ati sa kan Ilisabit bag-u nuli yi siya. 57 Pagka udas yi, si Ilisabit nanganak usa ka lalaki. 58 Pagka naalaman niya manga kamalay hanggan niya manga katawuhan kuntay pinapaladan gid Panginuun si Ilisabit nakabaya sida sa kanya. 59 Pagka usa ka duminggu yi kay nianak, nagrinas-ug sida hampay turiun ti lapsag. Kanda mana ingarnan si Sakaryas parihu sa kay ngaran niya ama. 60 Dapat sinabi niya ina, "Danga imaw nu unman kanta ingarnan siya si Huwan." 61 Magkun sida, "Hayga? Unman, may katawuhan kawu si Huwan kay ngaran." 62 Pinaamanan nida ti ama lapsag nu hintay kay gustu ipaingaran sa kay anak. 63 Hinmagad si Sakaryas sururatan, bag-u sinmurat magkun, "Kay ngaran si Huwan." Sida tanan linmingut gid. 64 Kadaka ngap binmagaw si Sakaryas nang-at kay bibig hanggan dila, binmagaw siya dinayaw niya ti Diyus. 65 Sinindakan dala ti tanan tawu mag-uli sa kanda kalibut. Ti barita tungkul tanan manga nangyari sa kanda ni Sakaryas ikinalat sa tanan bantud daga Hudiya. 66 Ti tanan manga nakadnug tunda ihinamnu nida sa kanda tagipusuun ti manga barita magkun, "Hintay nguna aban pag kalasi tawu inda pag anak?" Dahil siya sakup sa kapangyarihan Panginuun. 67 Si Sakaryas kay ama ni Huwan, lubus sinuldan Ispiritu Banal bag-u nagpurupita siya magkun, 68 "Dayawun nita ti Panginuun ti Diyus Israil, Dahil kay inawatan ag linkat niya kay nasyun. 69 Sinugu niya ti makamaskihan pag Manugribri sa kanta Ginan sa linahi niya suruguun ni Hari Dabid. 70 Kaybi di waya inudyukan Diyus ti manga purupita napasakup sa kanya, bag-u ipinadakit diman nida kay pangaku Diyus, 71 Hampay iribri niya kita sa kanta manga kalaban Hanggan sa kamang manga magkagalit sa kanta. 72 Ag hampay ipakilala niya kay pangaawa sa kay magbuwat mayad sa kanta manga ginurang, ag alalahanun niya kay banal pag taratu. 73 Mahigpit gid kay pangaku kay isinumpa sa kanta ginurang sa kan Abraham magkun, 74 Nu iribri niya kita sa kamang nita manga kalaban, Buwatan niya paraan kita hampay masirbihan nita siya ag unman magkadala. 75 Ipinasaman niya kita ginan sa kalibutan hampay matadlung sa kay magbantay, hanggan waya kita magkabuhi. 76 Kawu duy anak lapsag, turanun kawu purupita Diyus makamaskihan sa tanan. Sapagka kawu ti un-an umuna bag-u ti Panginuun dumasun sa kanmu. Kawu nakan ti humanda dalan Panginuun. 77 Ipaalam nimu ti karibrihan Panginuun sa kay nasyun, Nu patawadun yi niya kanda manga kasalanan. 78 Sa mahal pangaawa Diyus nita, lumuwang ti karayawan kaliktasan ginan sa langit, 79 Hampay marayawan ti manga tawu nangulian sa lubus kadudulman ag hinarian kamatayan, Hampay ilakaw kanta raprapa sa dalan kahusayan." 80 Dinmaka ti anak, ag nagbisug kay tagipusuun. Sa pangawakawaan manga tawu kay ulian hanggan sa udwaya napakakit siya magtudlu sa manga taga Israil.
1 Sa ati katpung nagras-ug kay bilin ni Pangulu Hari Agustu magkun, kailangan sinsuhun ti tanan tawu sa bilug kalibutan. 2 Inda ti kabag-u pag sinsu natupad katpung gubirnadur sa daga Sirya si Kirinyu. 3 Nakan nag-atag maan ti tanan manga tawu sa linahi nida pag banwa hampay magpalista. 4 Hanggan si Husi linmakaw ginan sa banwa Nasarit sa daga Galiliya atag sa kay naglusadan ni Dabid, sa banwa Bitlihim, sakup daga Hudiya. Dahil si Husi minamat ni Dabid. 5 Nag-ati ngani si Husi hanggan si Marya kay aguman babayi, hampay magpalista. Si Marya kainda magbuduy. 6 Pagka ati sida sa Bitlihim, magpanamdam si Marya arani yi manganak. 7 Ag kay inanak kay akaan anak lalaki bag-u kay pinulhut sa kumut ag ibinugtang sa labangan hayup, dahil udyi gid may madayunan sida sa kanda rinas-ugan pag balay. 8 May manga manug-alaga karanidu sa pasturan arani banwa Bitlihim. Magbantay sida sa yabi sa kanda manada hayup. 9 Nagluwang ti usa ka anghil Panginuun tag sa kanda arani ag rinmayaw ti kadayawan Panginuun sa kanda palibut. Masyadu gid nadala sida. 10 Magkun ti anghil sa kanda, "Kamu duy, danga magkadala, dahil malu, may dara aku sa kanyu tabug usa ka mayad gid pag barita may daka pag kabayaan sa tanan tawu. 11 Dahil inanak yi taynguna sa banwa ni Dabid ti Manugribri niyu, imaw ti pinili Diyus Manugribri pag Hari, ti Panginuun. 12 Inda yi ngani ti puruyba sa kanyu. Sab makitan yi niyu ti usa ka lapsag mapulhutan sa kumut, ibinugtang sa usa ka labangan hayup." 13 Kadaka linmuwang atag sa anghil kay manga kaibahan kadamlan ginan sa langit, manga magdayaw sa Diyus, magkun, 14 "Dayawun nita ti Diyus sa manga langit, Sa babaw daga may kahusayan yi sa manga tawu kay pagbayaun Diyus." 15 Pagka nuli maan ti manga anghil tabug sa langit, ti manga manug-alaga karanidu nagharampangan magkun, "Atag yi lugud kita sa Bitlihim kainda, kanta duawan ti nangyari ati kay ipinaalam Panginuun sa kanta." 16 Dinmali inmatag sida, nakitan ngani nida sida ni Marya, ni Husi bag-u siyun diman hanggan ti lapsag maigyaan sa labangan hayup. 17 Pagka nakitan nida itinultul nida ti manga sinabi anghil sa kanda tungkul sa lapsag inda. 18 Ti tanan nakadnug inda nadulaw sa itinultul manga manug-alaga karanidu. 19 Dapat itinuduk ni Marya sa kay tagipusuun ti tanan tanan sinabi nida, kay pagpakaisip-isipun sa kay sadili. 20 Nuli maan ti manga manug-alaga karanidu. Pagdayawun nida lubus ti Diyus dahil sa tanan bagay kanda nadnugan ag nakitan angay gid sa kay sinabi anghil sa kanda. 21 Pagka nakalawuy usa ka duminggu tinuri yi nida ti anak, iningarnan nida si Hisus, imaw diman pag ngaran ti ipinaalam anghil sa kan Marya kay udwaya magbuduy. 22 Pagka nakalawuy ti manga sirang tungkul sa maglumpiyu angay sa Kasuguan ni Muysis, nag-ati sida ni Marya ni Husi tabug sa Hirusalim, binaba nida si Hisus, hampay ipaatubang siya sa Panginuun. 23 Angay sa isinurat sa Kasuguan Panginuun magkun, "Kada panganay lalaki pagsabihun Panginuun, kangku di." 24 Nakan nag-ati ngani sida sa Hirusalim hampay kanda isagda sa Panginuun ti angay sa isinurat sa Kasuguan Panginuun magkun, duwa ka bilug kurkuru ngatay duwa ka bilug kalampati. 25 May usa ka lalaki sa Hirusalim kay ngaran si Simyun. Mahal gid siya pag tawu, marasarig sa Diyus, magpatigagad yi gid sa karibrihan manga taga Israil. Nangulian sa kanya ti Ispiritu Banal. 26 Pinaalman siya Ispiritu Banal magkun, unman makitan niya kay kamatayun hanggan sa udwaya nakitan niya ti pinili Diyus Manugribri pag Hari. 27 Nag-ati si Simyun sa balay Diyus dahil sa udyuk Ispiritu. Nagsaka sida ni Marya ni Husi sa balay Diyus may sabibi kanda anak lapsag si Hisus, hampay kanda tupadun ti pagsabihun sa Kasuguan Diyus tungkul sa manga panganay. 28 Bin-ul ni Simyun ti lapsag ginan sa kay ina, sinalapnay niya, bag-u nagdayaw siya sa Diyus magkun, 29 "Taynguna bay, Panginuun, natupad yi ngani nimu kam taratu. Una bul-un yi nimu kang buhi. Aku inda kanmu suruguun, may kahusayan yi sa kang naisipan. 30 Dahil nakitan yi niku manga mata kanmu karibrihan, 31 Kanmu inalistu sa atubangan manga tawu, 32 Usa ka sulu hampay marayawan ti manga balaw Hudiyu, ag hampay ipakilala ti kadayawan nimu nasyun Israil." 33 Kay ina kay ama naglingut sa tanan pagsabihun ni Simyun tungkul sa kanda anak. 34 Nandarangin si Simyun sa kanda hampay sida papaladan Diyus, bag-u sinabi niya sa kay ina sa kan Marya, magkun, "Inda pag anak ihinanda Diyus sa ikadamhak ag sa ikaribri mayamu tawu taga Israil. Madi siya ti tanda ginan sa Diyus, labanan di ngap siya aban, 35 hampay mipakilala ti pag-iisip mayamu tawu. Duy Marya, kanmu karukuan aban ga utak matarum magbiyag sa kanmu tagipusuun." 36 Siyun diman ti usa ka purupita si Ana, kay anak babayi ni Panwil, kay linahi ni Asir. Siya masyadu yi gid gurangun. Pitu lang ka timpu kanda nag-amut mag-asawa namatay yi kay lalaki. 37 Walumpulu may upat ka timpu siya buranday yi. Siyun yi gid sa balay Diyus kay ulian. Pirmi gid magsamba sirang yabi, udyi maghandum karan-unun sa kay magdarangin. 38 Pagka ati katpung sa balay Diyus sida ni Marya ni Husi, pinmakarani si Ana, nagpasalamat siya sa Diyus, bag-u nagtultul siya tungkul sa lapsag sa tanan tawu magpatigagad sa karibrihan Hirusalim. 39 Pagka natupad yi nida ni Marya ni Husi ti tanan bagay angay sa Kasuguan Panginuun, nuli sida tag sa Galiliya, sa kanda ulian sa banwa Nasarit. 40 Pagka nagdaka ti anak, nagmabisug, napnu kadunungan kay tagipusuun, nangulian yi gid sa kanya ti kaayadan Diyus. 41 Timpu timpu nag-ati kay manga gurang tag sa banwa Hirusalim sa Kapistahan sa Pag-alaala sa Karibrihan. 42 Pagka may sampulu yi may duwa ka timpu kay idad ni Hisus, nagtukad maan sida tag sa Hirusalim, ga kanda diman ugali tag sa Kapistahan. 43 Pagka nakalawuy yi ti Kapistahan, nuli yi sida. Unman nida alam maaw ti anak si Hisus napatayak sa Hirusalim. 44 Kanda hantup barang nagkuyug siya sa kay manga kaibahan, nakan naglakaw yi sida, usa gid ka sirang kanda lakaw bag-u kanda hinanap ti anak sa kanda manga katawuhan hanggan kakilala. 45 Pagka unman nakitan nida, nagbalik maan sida sa Hirusalim hampay hanapun siya kaayad. 46 Sa ikatlu pag sirang, bag-u di kanda nakitan si Hisus sa balay Diyus, matukawan sa karaw-an manga Manugtudlu Kasuguan. Magpatingi siya sa kanda, magpaingana waya. 47 Ti tanan nakadnug sa kanya masyadu gid naglingut sa kay manga sagut dahil matinudukun gid siya. 48 Pagka siya nakitan nida ni Marya naglingut sida sa kanya. Bag-u sinabi niya ina magkun, "Kawu duy pag anak, hayga binwat nimu sa kanmi ti katida? Kami kanmu manga ina manga ama maruku yi, dugay kawu nakitan nimi." 49 Magkun si Hisus sa kanda, "Hayga duy aku kanyu paghanapun? Unman aw niyu alam aku may buruwatun sa balay niku Ama?" 50 Unman naintindihan nida kan Hisus binagaw sa kanda. 51 Nagkuyug si Hisus sa kay gurang atag lawud, tag sa Nasarit. Napasakup sa kay gurang. Itinuduk niya ina sa kay tagipusuun ti tanan nadnugan niya. 52 Magdaka kay bilug ni Hisus, hanggan kay kadunungan magdaka waydi. Lalu siya pagbayaun Diyus hanggan manga tawu.
1 Pagka sampulu may lima ka timpu kay paghari ni Tibiryu, ati katpung gubirnadur si Punsiyu Pilatu sa Hudiya, si Hirudis pangulu sa Galiliya ag kay patar-ari si Pilipi pangulu sa daga Ituriya ag Tarakuniti. Si Lisanyas pangulu diman waydi sa Abilinya pag daga. 2 Sida ni Anas ni Kaipas manga Pangulu Manug-asiwa balay Diyus. Ati katpung nagbagaw ti Diyus sa kan Huwan sa kan Sakaryas anak ati sa pangawakawaan. 3 Bag-u nag-ati si Huwan namalibut baliw baliw dipay sapa Hurdan. Nanudlu siya sa manga tawu, magkun, "Pag-ampu yi kamu sa kanyu manga kasalanan, ag pagpatulbaw yi kamu, bag-u patawadun yi Diyus kanyu manga kasalanan." 4 Nakan natupad yi ti isinurat sa ribru ni Purupita Isayas magkun, "May magtawag sa pangawakawaan kay sabi, Alistuhan niyu ti dalan Panginuun, Tadlunga gid ti dalan kay lakawan. 5 Tanan tanan luung tambakan aban, Pakababaun ti kada bantud hanggan bungtud, Una liku tul-idun. Ti manga dalan nangunhakunha Rumatag aban. 6 Makitan tanan tawu ti karibrihan ginan sa Diyus." 7 Naglinuwang ti kadamlan manga tawu hampay patulbaw sa kan Huwan. Magkun siya sa kanda, "Kamu magpalagiw ga ulay, hintay ti nag-udyuk sa kanyu hampay malagiw kamu sa sintinsiya Diyus aban? 8 Kamu pagbuwat yi bag-u buruwatun. Kanyu manga ainampu manga kasalanan danga yi pagsublia. Taynguna ginan danga yi kamu magsarabihan kuntay kanyu ginurang si Abraham. Dahil pagsabihun niku sa kanyu, inda pag manga batu mahimu buwatun Diyus manga tawu itulus sa kan Abraham linahi. 9 Kaati nakahanda yi ti wasay sa puun kayu. Ti kada puun kayu nu unman magburak marinu, pukanun yi lang bag-u iyamut sa apuy." 10 Pinaingana siya manga tawu magkun, "Hintay nguna ti dapat nimi buwatun?" 11 Nagsagut si Huwan magkun, "Ti may duwa ka baLukas kailangan magpakaun kay usa sa unman may imaw. Hanggan ti may karan-unun katida diman ti buwatun pumakaun sa unman may karan-unun." 12 Rinmas-ug ti manga manunukut buhis hampay magpatulbaw waydi. Magkun sida sa kan Huwan, "Maisturu hintay nguna ti dapat nimi buwatun?" 13 Sinabi niya sa kanda, "Danga yi kamu magsukut subra sa bilin gubirnu sa kanyu." 14 Pinaingana siya manga sundalu magkun, "Ag kami, hintay ti kailangan buwatun nimi?" Magkun si Huwan sa kanda, "Danga magbuul tawu kuwarta sa karagasyun, danga magparhug sa tawu. Pagmasulung kamu sa kanyu suhul kang-ud." 15 Laganap sa tanan tawu ti magpatigagad sa kay pagras-ug pinili Diyus Manugribri pag Hari. Ti hantup kayamuan tawu si Huwan yi ngani ti pinili Diyus Manugribri pag Hari. 16 Sinabi ni Huwan sa kanda tanan magkun, "Ungud ngani kamu kang pag-itulbaw sa danum. Dapat may Rumas-ug makamaskihan man sa kangku. Unman may karampatan aku maglubad panhigut niya manga lapak. Itulbaw niya kamu aban sa Ispiritu Banal hanggan sa apuy. 17 Sa kay yi kamang ti pangayat paruk hampay rayawan niya kay girik-an. Tipunun ti tirigu sa kay butangan. Dapat ti dayami isawug niya sa unman nagkapsa pag apuy." 18 Mayamu waya kan Huwan manga paanyu sa manga tawu, itinudlu niya sa kanda ti Mayad pag Barita. 19 Tinamyaw diman ni Huwan si Gubirnadur Hirudis, dahil inagaw niya kay patar-ari asawa si Hirudyas ag dahil sa tanan kay binwat daut ni Hirudis. 20 Dinagdagan waya ngap kay kasalanan, pagka ipinaslud niya si Huwan sa pirisuhan. 21 Katpung itinulbaw ti tanan tawu, hanggan si Hisus napatulbaw diman. Pagka magdarangin waya si Hisus, nabukasan ti langit. 22 Nagpakababa sa kanya ti Ispiritu Banal ga histuda kalampati. Bag-u may magbagaw ginan sa langit magkun, "Kawu kang pagmahalun pag Anak, kawu lubus kang pagbayaun." 23 Pagka tatlumpulu ka timpu kay idad ni Hisus, nag-umpisa yi siya magtudlu. Paghantupun manga tawu si Hisus kay anak ni Husi. Si Husi anak ni Ili. 24 Si Ili anak ni Matat. Si Matat anak ni Libi. Si Libi anak ni Milki. Si Milki anak ni Hanay. Si Hanay anak ni Husi. 25 Si Husi anak ni Matatyas. Si Matatyas anak ni Amus. Si Amus anak ni Nahum. Si Nahum anak ni Isli. Si Isli anak ni Nagay. 26 Si Nagay anak ni Maat. Si Maat anak ni Matatyas. Si Matatyas anak ni Simiin. Si Simiin anak ni Husik. Si Husik anak ni Huda. 27 Si Huda anak ni Huanan. Si Huanan anak ni Risa. Si Risa anak ni Surubabil. Si Surubabil anak ni Salatyil. Si Salatyil anak ni Niri. 28 Si Niri anak ni Milki. Si Milki anak ni Adi. Si Adi anak ni Kusam. Si Kusam anak ni Ilmadam. Si Ilmadam anak ni Ir. 29 Si Ir anak ni Huswi. Si Huswi anak ni Iliyisir. Si Iliyisir anak ni Hurim. Si Hurim anak ni Matat. Si Matat anak ni Libi. 30 Si Libi anak ni Simyun. Si Simyun anak ni Huda. Si Huda anak ni Husi. Si Husi anak ni Hunam. Si Hunam anak ni Ilyakim. 31 Si Ilyakim anak ni Miliya. Si Miliya anak ni Mina. Si Mina anak ni Matata. Si Matata anak ni Nathan. Si Nathan anak ni Dabid. 32 Si Dabid anak ni Hisi. Si Hisi anak ni Ubid. Si Ubid anak ni Buus. Si Buus anak ni Salmun. Si Salmun anak ni Naasun. 33 Si Naasun anak ni Aminadab. Si Aminadab anak ni Admin. Si Admin anak ni Arni. Si Arni anak ni Isrum. Si Isrum anak ni Paris. Si Paris anak ni Huda. 34 Si Huda anak ni Hakub. Si Hakub anak ni Isaak. Si Isaak anak ni Abraham. Si Abraham anak ni Tara. Si Tara anak ni Nakur. 35 Si Nakur anak ni Siruk. Si Siruk anak ni Ragaw. Si Ragaw anak ni Palik. Si Palik anak ni Ibir. Si Ibir anak ni Sala. 36 Si Sala anak ni Kainan. Si Kainan anak ni Arpahad. Si Arpahad anak ni Sim. Si Sim anak ni Nuwi. Si Nuwi anak ni Lamik. 37 Si Lamik anak ni Matusalim. Si Matusalim anak ni Inuk. Si Inuk anak ni Harit. Si Harit anak ni Mahalaliil. Si Mahalaliil anak ni Kainan. 38 Si Kainan anak ni Inus. Si Inus anak ni Sit. Si Sit anak ni Adam. Si Adam anak Diyus.
1 Pagka itinulbaw si Hisus, lubus sa kanya ti Ispiritu Banal, bag-u linmakaw siya ginan sa sapa Hurdan. Bag-u itinibu siya Ispiritu tabug sa pangawakawaan. 2 Sulud upatpulu ka sirang pagtuksuhun mana siya diyablu. Sa sulud upatpulu ka sirang unman siya may kinaun una hintay pag karan-unun. Pagka lawuy upatpulu ka sirang siya linun-us. 3 Bag-u sinabi diyablu sa kan Hisus, "Nu kawu ungud ti Anak Diyus, bagawi tunda pag manga batu, hampay bumaliw tinapay." 4 Sinabi ni Hisus, "Nakasurat sa Banal Kasuratan magkun, 'Balaw lang sa karan-unun pag mabuhi ti tawu.' " 5 Bag-u kay dinara diyablu si Hisus sa abwat pag bantud ag pinausdung siya nakitan niya sa ngalay ngalay lang ti tanan tanan kaharian tawu sa babaw daga. 6 Bag-u sinabi diyablu sa kanya, "Ipakaun niku sa kanmu ti tanan kapangyarihan tunda hanggan kay kadayawan, dahil ipinakaun tunda sa kangku. Kang maan ipakaun una sa kantapu kang magustuhan. 7 Nakan ngani nu kawu sumamba sa kangku, sa kanmu yi tabug tanan tanan tunda." 8 Sinabi ni Hisus, "Nakasurat sa Banal Kasuratan magkun, 'Sambahan nimu ti Diyus, imaw kanmu Panginuun, siya lang ti dapat nimu sirbihan.' " 9 Bag-u dinara diyablu si Hisus tabug sa Hirusalim ipinauli sa babaw bubung balay Diyus. Magkun ti diyablu sa kanya, "Nu kawu ti Anak Diyus, palagpak kawu ginan sa tungud atag sa sirung. 10 Dahil nakasurat sa Banal Kasuratan magkun, 'Bilinan Diyus kay manga anghil tungkul sa kanmu agud kawu kanda alagaan.' 11 May sabi waya inda magkun, 'Sambutun kawu nida kamang barang madayaan kawu sa batu.' " 12 Sinabi maan ni Hisus magkun, "Nagsabi diman ti Diyus, 'Danga pagsubuki nimu ti Diyus, imaw kanmu Panginuun.' " 13 Pagka natapus diyablu tanan tanan tuksu, kay tinayakan dapu si Hisus hanggan sa taning pag udas. 14 Binmalik maan si Hisus sa Galiliya lubus sakup sa kapangyarihan Ispiritu. Nibantug siya sa tanan rugar. 15 Nagtudlu siya sa manga tawu sa manga balay tiripnan, pagdayawun nida tanan. 16 Nag-ati diman si Hisus sa Nasarit sa kay kinadak-anan pag banwa. Ga kay diman ugali nu sa sirang pamahari, sinmaka siya sa balay tiripnan. Nagtindug siya hampay mamasa Banal Kasuratan. 17 Itinunghul sa kanya ti ribru ni Purupita Isayas. Pagka binuklad niya ti ribru, hinanap niya ti bagaw ginan sa Banal Kasuratan magkun, 18 "Ti Ispiritu Panginuun nangulian sa kangku dahil pinili niya aku hampay magtudlu Mayad pag Barita sa manga pugri, Sinugu niya aku hampay ibarita sa manga sa pirisuhan sida makaribri, hanggan sa manga buta sida humiling, ag hampay iribri ti manga naapi. 19 Hampay ipahayag ti kaudasan kay magparibri Panginuun sa kay nasyun." 20 Bag-u linulun ni Hisus ti ribru balunbun, kay maan inuli sa manug-asikasu, bag-u siya tinmukaw hampay mamaliwanag. Ti tanan tawu sa basad balay tiripnan maggagad yi sa kay paliwanag. 21 Bag-u nagtultul siya sa kanda magkun, "Taynguna sa kanyu magpatingi natupad yi inda pag Kasuratan." 22 Sida tanan nagdayaw gid sa kanya, naglingut dahil marinu gid kay binagaw. Magkun sida, "Bukun aw lugud inda kan Husi pag anak?" 23 Magkun siya sa kanda, "Pihu gid sumabi kamu sa kangku inda pag pahalimbawa, 'Manugbulung, bulunga duy nimu kanmu sadili bilug.' Sumabi waydi kamu sa kangku, 'Una hintay kanmi nadnugan kanmu binwat ati sa Kapirnaum, buwata diman nimu sitay sa kanmu sadili banwa.' " 24 Magkun si Hisus, "Balaw duy hakut kang pagsabihun sa kanyu, unman may purupita pagbayaun sa kay nagkalusadan pag daga. 25 Dapat tutuu kang pagkumnun sa kanyu, sa kay di waya purupita si Ilyas nangulian sa Israil, katpung unman inmuran sulud tulu ka timpu may tunga, mayamu diman ti manga babayi buranday katpung masyadu ti lun-us sa usa ka nasyun. 26 Balaw sinugu Diyus si Ilyas una sa kantapu sa manga buranday sa Israil nu unman ati waya ngap tag sa usa ka babayi buranday sa banwa Saripta sa daga Sidun. 27 Pagka purupita si Ilisyu mayamu pag tawu ti batasin sa Israil. Dapat sa kanda tanan unman gid may nabul-an batas. Ti taga Sirya bay si Naaman ti nabul-an batas." 28 Pagka nadnugan nida inda pag bagaw, lubus yi nangisug gid ti tanan tawu basad balay tiripnan. 29 Tinmindug sida ginuyud lang nida si Hisus tag sa luwas banwa. Dinara siya tag sa babaw bungtud nagkabugtangan nida banwa hampay ipabalintuk siya tag sa yangpas. 30 Dapat linmakaw maan siya sa kanda panungaan nighit yi ati ginan. 31 Pagka nagras-ug si Hisus ati sa banwa Kapirnaum sakup sa Galiliya, tinudluan niya ti manga tawu sa sirang pamahari. 32 Nadulaw sida sa kay tudlu dahil may kamaskihan kay bagaw. 33 Ati sa balay tiripnan may usa ka lalaki inapuan labang. Nagringgit siya magkun, 34 "Hintay kanmu pakialam sa kanmi, Hisus taga Nasarit. Nakan aw kawu nagsitay hampay kami kanmu wasakun? Nakilala kawu niku, kawu ti Banal pag Suruguun Diyus." 35 Bag-u sinabi ni Hisus sa kanya magkun, "Danga mag-ingay, pagluwas yi kawu sa kanya ginan." Ilinusgu waya ti inapuan labang sa atubangan kadamlan tawu bag-u nagluwas yi ti labang, dapat unman naunu ti tawu. 36 Nadulaw sida tanan tanan. Nanharampangan sida magkun, "Hintay nguna pag tudlu inda? Dahil may karampatan siya hanggan kamaskihan hampay magpalwas sa manga labang, naglinuwas yi lang sida." 37 Nibantug yi ti barita tungkul sa kan Hisus sa tanan rugar una arani una arayu. 38 Pagka si Hisus ati ginan sa balay tiripnan, sinmaka siya sa kan Simun balay. Pagramigan masyadu kay manugang babayi ni Simun. Pinaduaw nida sa kan Hisus. 39 Dinulud ni Hisus ti babayi, sinungyaw niya ti ramig, rargu nahumpawan yi siya ramig. Pagka nahumpawan yi kay ramig, nagbangun siya, rargu nangapuy kanda karan-unun. 40 Pagka nisalup yi ti init, dinara nida sa kanya ti tanan may pagdungugun tuhay tuhay pag sakit. Tinalapud sida kinup-an niya kamang pinaayad sida tanan. 41 Nanlinuwas diman ti manga labang sa mayamu tawu, nanringgit magkun, "Kawu ti Anak Diyus." Sinabihan maan niya ti manga labang danga yi mag-ingay, dahil alam nida siya ti pinili Diyus Manugribri pag Hari. 42 Pagka surip yi maan, nagluwas si Hisus nag-ati siya sa pangawakawaan. Pagka ati siya sa pangawakawaan paghanapun siya manga kadamlan tawu, nag-usig sa kanya, pilit nida tinawidan mana siya danga pagtayaki sida. 43 Dapat ay sinabi niya sa kanda, "Kailangan diman iadal niku sa manga iba banwa ti Mayad pag Barita tungkul sa paghari Diyus, dahil imaw ti isinugu Ama sa kangku." 44 Nakan nagtudlu diman siya sa manga tawu sa manga balay tiripnan sa daga Hudiya.
1 Pagka matindugan si Hisus sa saruy danaw Ginisarit, pagsiutun siya kayamuan tawu, pagpatingihan nida ti Bagaw Diyus. 2 May nakitan siya duwa ka duunduun ati sa saruy danaw. Dapat nagdugsun yi ti manga manugdagat, pag-ugasan yi nida kanda manga sarap. 3 Nagsakay si Hisus sa kan Simun duunduun, bag-u sinabi niya sa kan Simun, "Pakatangkatang duy diit ginan sa saruy." Tinmukaw si Hisus sa duunduun bag-u nagtudlu siya sa kayamuan tawu. 4 Pagka nap-ut kay tudlu, sinabi niya sa kan Simun, "Pag-ati duy kamu sa lawud, sa karaw-an danaw, ilagpak yi niyu kanyu manga sarap, hampay makab-ul kamu." 5 Nagsagut si Simun magkun, "Maisturu, usa ka yabi kanmi pabudlay unman may nab-ul kami. Dapat dahil sa kanmu bagaw ilagpak niku ti manga sarap." 6 Pagka ilinagpak nida kanda manga sarap, nakablay sida kaduruhan isda, magkagitas yi kanda manga sarap. 7 Pinaypayan nida kanda manga kaibahan sa usa ka duunduun, hampay duludun sida awatan. Nagpakarani ngani sida, napnu ti duwa ka duunduun nagliing yi sa buyat isda. 8 Dapat pagka nakitan ni Simun Pidru ti nangyari, nagluhud siya sa atubangan ni Hisus, magkun, "Pagpakarayu duy kawu Panginuun sa kangku ginan, dahil aku usa ka makasalanan." 9 Siya hanggan kay tanan manga kaibahan naglingut yi ngani dahil masyadu mayamu kanda nablay isda. 10 Katunda diman hanggan kay manga anak ni Sibidiyu sida ni Santiyagu ni Huwan nadulaw diman sida. Sinabi ni Hisus sa kan Simun, "Danga magkadala kawu, dahil taynguna ginan manugtaban yi kawu sa manga tawu." 11 Pagka ipinadagsa yi nida kanda manga duunduun sa baybay, tinayakan nida ti tanan nida kagamitan, bag-u nagkuyug ngani sida sa kan Hisus. 12 Pagka sa usa ka banwa si Hisus, may nakitan siya usa ka lalaki tupus batas kay bilug. Pagka nakitan niya si Hisus napadapa siya nagpakihampang sa kanya magkun, "Duy, nu gustu nimu, mapaayad nimu aku sa kang batas." 13 Ikinupa ni Hisus kay kamang sa kanya, magkun, "Gustu ngani niku, pagmaayadan yi kawu sa kanmu batas." Kadaka nabul-an siya batas. 14 Nagbilin si Hisus sa kanya, "Danga pagsabiha nimu inda una sa kantapu pag tawu. Pag-ati kawu pagpakakit kawu sa manug-asiwa balay Diyus. Bag-u pagdara kawu hayup panagda sa Diyus angay sa kay bilin ni Muysis, bilang usa ka puruyba sa manga tawu nag-ayad yi kawu." 15 Dapat lalu nilantag ti barita tungkul sa kan Hisus. Nakan lalu nagtipun ti mayamu pag tawu hampay makadnug, ag hampay paayadun niya kanda manga sakit. 16 Dapat pirmi mag-ati si Hisus sa pangawakawaan hampay magdarangin. 17 Pagka dugay nagtudlu maan si Hisus. May manga matukawan ati manga Parisiyu hanggan manga Manugtudlu Kasuguan, nagluwang sida ginan sa kada banwa sa Galiliya hanggan Hudiya ag hanggan ginan sa Hirusalim. Ti kapang-yarihan Panginuun lubus sa kan Hisus hampay paayadun ti may manga sakit. 18 Dinara manga tawu ti usa ka lalaki lunu sa kay igyaan. Pinilit mana nida ipasaka siya sa balay, ibugtang mana sa atubangan ni Hisus. 19 Sa unman may nakitan sida lakawan dahil sa kayamuan tawu, bag-u sida nagdayik sa atup linukaban nida diit bag-u itinuntun nida ti lunu sa basad duyan, bag-u pinadna siya sa karaw-an manga tawu sa atubangan ni Hisus. 20 Pagka nakitan ni Hisus kanda pagsarig, sinabi niya sa lunu magkun, "Pinatawad yi duy kanmu manga kasalanan." 21 Dapat ti manga Manugtudlu Kasuguan hanggan ti manga Parisiyu nanharampangan yi magkun, "Hintay nguna inda pag tawu, hayga palabilabihun siya sa Diyus? Unman may makapatawad sa kasalanan nu unman ti Diyus lang." 22 Alam di ni Hisus kanda pagkutubun, nakan sinabi niya sa kanda, "Hayga lugud kamu maglingut sa kangku kanyu naisipan? 23 Hintay nguna ti lalu malpus sabihun ngatay, 'Ipinatawad yi kanmu manga kasalanan', aw ngatay 'Pagtindug kawu paglakaw yi.' 24 Ipakakit niku sa kanyu ti puruyba hampay maalaman niyu ti Anak Tawu may kamaskihan sitay sa babaw daga makapatawad sa tawu may kasalanan." Bag-u sinabi niya sa tawu lunu magkun, "Pagsabihun niku sa kanmu, pagtindug yi duy kawu, daran-a kanmu igyaan, pag-uli yi kawu sa kanmu balay." 25 Kadaka tinmindug ti lunu sa kanda magbantay, dinara yi ngani kay amak. Nuli siya sa kay balay magdayaw sa Diyus. 26 Nadulaw gid masyadu ti manga tawu. Nadala sida, nagdayaw gid sa Diyus magkun, "Taynguna nakitan gid nimi ti makadululaw pag manga buwat." 27 Pagka dugay nagluwas si Hisus sa kay balay, nakitan niya si Libi pag manunukut buhis matukawan sa suruktan buhis. Sinabi ni Hisus sa kanya magkun, "Pagkuyug duy kawu sa kangku." 28 Tinmindug si Libi tinayakan niya ti tanan niya buruwatun bag-u kinmuyug ngani sa kan Hisus. 29 Binulwatan siya ni Libi daka pagka karan-an sa kay balay. Mayamu pag manga manunukut buhis ag manga iba waya tawu nagkaminsan sa karan-an. 30 Ti manga Parisiyu hanggan manga Manugtudlu Kasuguan nagsungyaw sa kay manga tuludluan ni Hisus magkun, "Hayga duy kamu magkaun mag-inum minsan sa manga manunukut buhis hanggan sa manga makasalanan?" 31 Dapat si Hisus ngap ti sinmagut magkun, "Unman may kailangan sa manugbulung ti balaw may manga sakit, ti may manga sakit lang ti may kailangan. 32 Unman aku nagsitay hampay magtaban sa manga matadlung tabug sa pag-ampu sa kasalanan. Nakan aku nagsitay hampay manaban sa manga makasalanan tabug sa pag-ampu sa kanda manga magbuwat daut." 33 Sinabi nida sa kan Hisus, "Ti manga tuludluan ni Huwan malagat unman maghandug karan-unun kanda magdarangin sa Diyus. Katunda diman ti manga tuludluan manga Parisiyu. Bati kanmu manga tuludluan magkaun diman mag-inum." 34 Nagsagut si Hisus, "Mahimu aw nguna unman maghandum karan-unun ti manga binan-awan sa pamasaruhan nu kaibahan waya nida ti lalaki ipinasaru? 35 Dapat aban bul-un siya ginan sa kanda. Nu udyi siya sa kanda bag-u di sida unman humandum karan-unun." 36 Itinultul ni Hisus inda pag pahalimbawa magkun, "Unman may maggitas bag-u lambung ilupun sa daan, dahil nu tida kay buwatun, dinaut niya kay bag-u lambung. Ti bag-u panlupun dayu diman umangay sa daan. 37 Unman may magsukad bag-u alak ubas sa daan pag manga paknul pag sukadan. Nu abi katunda ti buwatun, mabusni bag-u alak ti daan paknul. Mauyang ti alak ubas ag madaut yi lang ti manga sukadan. 38 Nu bag-u alak ubas kailangan sa bag-u waydi pag sukadan. 39 Unman waydi may tawu nu nakainum siya hinamnu pag alak, magkasulung waya sa kay bag-u. Kumumun siya, 'Mahal waya ti hinamnu.' "
1 Sa usa ka sirang pamahari nakasabuk si Hisus sa tawu tanman tiriguhan. Naggutul uhay tirigu kay manga tuludluan ni Hisus, inayipis nida sa kanda babaw dalukap bag-u kinaun nida. 2 Dapat may manga Parisiyu nagpaingana sa kanda, "Hayga nagbunggu kamu tirigu sa sirang pamahari? Labag sa Kasuguan tunda." 3 Nagsagut si Hisus magkun, "Udwaya aw lugud kamu nakabasa tungkul sa kay binwat ni Hari Dabid pagka linun-us siya hanggan kay manga kaibahan? 4 Nagsaka kabay si Dabid sa balay Diyus, binmuul siya tinapay, tunda ngani pag tinapay ti binwat para ibugtang ipakaun sa atubangan Diyus, kinmaun siya pinakan-an niya hanggan kay manga kaibahan. Tunda pag tinapay unman mana may makakaun iba nu unman ti manga manug-asiwa balay Diyus lang." 5 Sinabi ni Hisus sa kanda, "Ti sirang pamahari sa sirung di karampatan Anak Tawu." 6 Pagka dugay, sinmaka sa balay tiripnan si Hisus katpung sirang pamahari nanudlu. May usa ka tawu ati pilay kay sikun pag kamang. 7 Tiniidan si Hisus manga Manugtudlu Kasuguan hanggan manga Parisiyu nu ngatay paayadun niya sa sirang pamahari, hampay nu may makitan puruyba laban sa kanya, isumbung yi siya. 8 Dapat alam di ni Hisus kanda manga isip ag sinabi niya sa tawu pilay kay kamang, "Abala kawu, pagtindug sitay." Nagtindug siya nagpakarani yi sa kan Hisus. 9 Bag-u sinabi ni Hisus sa manga tawu magkun, "Aku may paingana inda sa kanyu, hintay nguna ti angay sa Kasuguan katpung sirang pamahari, ngatay tigbuwat ikaayad sa kaparihu, ngatay tigbuwat ikadaut? Ngatay tigbawi buhi tawu ngatay tigpahamak buhi tawu?" 10 Namarantayun si Hisus sa kanda tanan bag-u sinabi niya sa tawu pilay, "Hunatan duy kanmu kamang." Pagka ihinunat ngani niya kay kamang, mayad yi ngap. 11 Dapat lalu sida nagalit, nakan nagpululungan sida nu hintay ti buwatun nida laban sa kan Hisus. 12 Sa manga sirang ati, nag-atag si Hisus sa bantud hampay mandarangin. Usa ka yabi sadsad surip nagparargu kay darangin sa Diyus. 13 Pagka surip yi, bin-ul niya kay manga tuludluan, nagpili siya sampulu may duwa, iningarnan niya manga Apustul. 14 Inda ngani ti manga pinili niya, Si Simun, binansagan niya Pidru, si Andiris, patar-ari ni Simun, sida ni Santiyagu ni Huwan, si Pilipi, si Bartulumi, 15 si Matiyu, si Tumas, si Santiyagu kan Alpiyu anak, si Simun imaw ti pagsabihun masipag sa nasyun Israil, 16 si Hudas anak ni Santiyagu, hanggan si Hudas Iskaryuti, imaw ti nagpakampi sa kalaban ni Hisus. 17 Naglus-ug maan si Hisus sa bantud kaibahan niya ti manga Apustul. Pagka rinmas-ug sida sa ratag, napaminsan sa kanya ti lalu mayamu tuludluan niya. Nagluwang hanggan ti kayamuan tawu ginan sa bilug Hudiya hanggan sa Hirusalim hanggan manga taga Tiru ag Sidun sa baybay dagat. Nag-atag sida sa kan Hisus hampay mamatingi, ag hampay paayadun niya kanda manga sakit. 18 Pinaayad diman ti manga pinakurian labang. 19 Nandurutdutan ti kayamuan tawu hampay makakumit sida sa kan Hisus dahil may kapangyarihan ginan sa kanya magpaayad sa kanda tanan. 20 Nagbantay si Hisus sa kay manga tuludluan, bag-u sinabi niya magkun, "Papaladan Diyus kamu pag manga pugri, dahil kamu pagharian Diyus. 21 Papaladan Diyus kamu ti manga magkalun-us taynguna, dahil mabsug kamu aban. 22 Papaladan Diyus kamu nu pagkagalitan manga tawu nu pagdayuun ag pagmuransahun, nu pag-ikadaut kamu dahil sa kanyu pakiusa sa Anak Tawu. 23 Pagbaya kamu nu katida ti mangyari sa kanyu, pag-utbaw waya sa kanyu kabayaan, dahil daka pag pirimyu aban sa kanyu ati sa langit. Dahil katida waydi ti binwat nida manga ginurang sa manga purupita. 24 Dapat kaawaawa kamu pag manga mayaman dahil nakarubtan yi niyu ti kanyu pagbayaun. 25 Kaawaawa kamu pag manga busug yi kainda dahil kamu lun-usun aban. Kaawaawa kamu pag manga magkasari kainda dahil manruku aban ag manlumi kamu. 26 Kaawaawa kamu nu pagbayaun kamu tanan tawu dahil katida waydi binaya nida manga ginurang ti manga pudilun pag purupita." 27 Magkun si Hisus, "Kang pagsabihun sa kanyu sa magpatingi, mahala niyu kanyu manga kalaban, ti manga magkagalit sa kanyu balusan di ngap niyu mayad. 28 Idarangin niyu ti manga magsaad sa kanyu hampay papaladan sida Panginuun. Idarangin niyu ti manga mag-unuunu sa kanyu. 29 Nu sampalun tawu kanmu pingi, kay baliw iatubang waydi. Ti magbuul kanmu kulimpay pakan-an yi lang nimu hanggan kanmu baLukas. 30 Pakan-an nimu ti kada maghagad sa kanmu. Nu bin-ul kanmu butang danga yi pagbawia. 31 Nu kabitay kanyu ibug buwatun manga tawu tabug sa kanyu, pagkatunda diman kanyu buwatun sa kanda. 32 "Nu kamu magmahal lang sa manga magmahal sa kanyu, hintay waya pag pirimyu kanyu matanggap? Dahil ti manga taga kalibutan magmahal waydi sa manga magmahal sa kanda. 33 Nu kamu magbuwat lang mayad sa manga magbuwat mayad sa kanyu, hintay waya pag pirimyu kanyu matanggap? Dahil katida diman ti pagbuwatun manga taga kalibutan. 34 Nu kamu magpaudam lang sa tawu kanyu pagsarigan may iuli maan sa kanyu, hintay waya pag pirimyu kanyu matanggap? Dahil ti manga taga kalibutan magpaudam diman sa kaparihu taga kalibutan hampay iuli maan sa kanda ti kanda ipinad-am. 35 Dapat mahala niyu kanyu manga kalaban, pakan-an niyu sida mayad, pagpaudam kamu danga yi magsarig kuntay ipauli sa kanyu. Daka ti ganti kaayadan Panginuun aban sa kanyu, ag kamu aban manga anak Diyus makamaskihan sa tanan. Dahil magbaya diman siya sa manga unman mag-isip sa kanya, hanggan sa manga makasalanan. 36 Pagmaawaun kamu, parihu sa kanyu Ama maawaun diman." 37 Sinabi ni Hisus magkun, "Danga pagpihua niyu ti daut ti mayad niyu kaparihu hampay unman waydi kamu pihuun Diyus nu daut nu mayad. Danga kamu magpasipala sa kanyu kaparihu, hampay balaw kamu ipasipala Diyus. Pagmapinatawadun kamu, hampay patawadun waydi kamu Diyus. 38 Pagmarapakaun kamu sa iba hampay pakan-an waydi kamu Diyus. Kang-ud pag pulak dinutdut, sininu waya hanggan sa nag-awas pagamitan sa kanyu kamang. Dahil angay sa kanyu magpakaun pinulak pakan-an waydi kamu sumpung pag pulak." 39 Nagtultul si Hisus usa ka pahalimbawa sa kanda magkun, "Makaabat aw ti buta sa kay kaparihu niya buta? Unman aw nguna sida parihu malagpak sa abwat? 40 Balaw mataas sa kay maisturu ti tuludluan. Dapat ti kada usa nu tinudluan yi lubus, siya aban parihu yi sa kay maisturu. 41 "Hayga mag-akitan nimu ti paruk sa mata nimu patar-ari dapat unman kanmu pagbatiun ti batang sa kanmu sadili mata? 42 Kabitay kawu pag sumabi sa kanmu patar-ari, 'Tar-ari, mahimu aw aku bum-ul kanmu paruk sa kanmu mata,' nu unman nimu nakitan ti batang sa kanmu sadili mata? Kawu duy magpabalhinguun lang. Bul-a dap ti batang sa kam sadili mata, bag-u makakit mayad kawu hampay mab-ul nimu ti paruk sa kanmu patar-ari mata." 43 Sinabi ni Hisus magkun, "Dayu mahimu magburak daut nu mayad pag puun kayu. Nu daut kay puun kayu dayu waydi bumurak mayad. 44 Magkakilala nita ti kada puun kayu sa kay burak nu mayad nu daut. Unman pagputihun ti burak igus ginan sa dugihan. Unman diman paggutlun ti ubas ginan sa puun tanulung. 45 Ti mayad pag tawu magbulwat mayad pag naisipan ginan sa kay hinamnu kaayadan sa kay tagipusuun. Dapat ti daut pag tawu magbulwat daut pag naisipan ginan sa kay hinamnu kadautan sa kay tagipusuun. Dahil nu hintay ti pagbagawun bibig, imaw kay sukad sa kay tagipusuun." 46 Sinabi ni Hisus magkun, "Hayga lugud aku kanyu pagpakaingarnan Panginuun, Panginuun, bag-u unman diman kanyu pagtupadun kang pagbagawun sa kanyu? 47 Ti kada magpakarani sa kangku ag magpatingi sa kang manga bagaw bag-u siya magtupad sa kay nadnugan, malu, ipakilala niku sa kanyu sa pahalimbawa nu kabitay pag tawu siya. 48 Siya ga usa ka tawu magbuwat kay balay kinmali abasad tugka sa batu bag-u ibinungsud niya kay tulduk. Pagka binmaha binmalusbus ti baha tag yi sa balay, dapat ud natandug dahil marig-un kay nabungsudan tunda. 49 Dapat ti magdungug sa kang manga bagaw, bag-u unman niya pagtupadun, parihu siya sa usa ka tawu nagbungsud balay sa babaw lang daga, balaw yi ikinali. Binalusbusan baha, kadaka nagpu gid, lubus yi nadaut tunda pag balay."
1 Pagka natapus ni Hisus kay tanan pag paliwanag sa manga tawu magpatingi, nag-atag yi siya sa banwa Kapirnaum. 2 May usa ka kapitan, siya may panawuhun pagmahalun gid niya ag ti panawuhun may sakit, diit yi lang siya mamatay. 3 Pagka nadnugan kapitan si Hisus asan yi, pinmasugu siya manga gurangun Hudiyu tag kan Hisus hampay tabanun nida siya hampay paayadun ni Hisus ti panawuhun. 4 Pagka nagras-ug sida sa kan Hisus, hinampang nida mayad si Hisus magkun, "Kailangan gid kawu kumuyug yi sa kanmi. 5 Inda duy pag kapitan magmayad siya sa kanta nasyun, nagpabuwat siya kanta balay tiripnan." 6 Kinmuyug yi si Hisus sa kanda. Pagka balaw yi masyadu arayu siya sa balay, pinmasugu yi maan ti kapitan sa kay manga mahal pag kakilala magkun, "Sabiha niyu, 'Kagalanggalang Panginuun, danga yi lang duy kawu magpakibudlay, dahil unman aku may karampatan magpasaka sa kanmu sa kang balay. 7 Unman diman waydi may karampatan aku mag-atubang sa kanmu. Dapat bagawa lang nimu bag-u umayad yi kang suruguun. 8 Dahil aku usa ka tawu sa sirung makapangyarihan. May manga sundalu waydi sa sirung niku kapangyarihan. Pagka sumabi aku sa usa, "Pag-ati kawu," umati siya. Magkun aku sa usa, "Abala", ag pumakarani yi ngani siya. Magkun aku sa kang panawuhun, "Buwatun nimu inda," binwat yi ngani niya.' " 9 Pagka nadnugan ni Hisus inda, naglingut siya sa kapitan. Napasrangu siya tabug sa kay uryan sa kayamuan tawu magkuyug sa kanya magkun siya, "Pagsabihun niku sa kanyu una sa Israil unman aku may nakitan kainda pagsarig ga kapitan kay kadaka." 10 Pagka nuli maan sa balay ti manga sinugu kapitan naras-ugan nida naayadan yi ti panawuhun. 11 Udyi dugay, linmakaw si Hisus tag sa Nain pag banwa. Nagkuyug sa kanya kay manga tuludluan hanggan ti lalu mayamu pag manga tawu. 12 Pagka arani yi siya sa sanggaan banwa, nasulang niya ti babayi buranday manlubung sa kay usa usa lang ka anak lalaki namatay. Mayamu ti nagkuyug manuglubung. 13 Pagka nakitan siya Panginuun, kinaawan niya ti babayi. Magkun si Hisus, "Danga maglumi duy kawu." 14 Nagpakarani si Hisus, kinup-an niya ti saputan bangkay, pinmat-ung ti manga manugyayung. Bag-u sinabi ni Hisus, "Kawu pag anak, kang pagsabihun sa kanmu, pagbangun yi kawu." 15 Tinmukaw yi ngani ti namatay, magbagaw yi maan. Bag-u ipinakaun maan siya ni Hisus sa kay ina. 16 Nadala gid sida tanan. Dinayaw nida ti Diyus magkun, "Nagsitay sa kanta karaw-an ti mamaski pag purupita. Nagsitay ti Diyus hampay iribri niya kay nasyun." 17 Nibantug inda pag barita tungkul sa kan Hisus sa bilug daga Hudiya hanggan sa kay manga kalibut pag daga. 18 Kan Huwan manga tuludluan nagbarita sa kanya tungkul sa tanan manga pagbuwatun ni Hisus. Pinab-ul ni Huwan ti duwa ka tuludluan niya, 19 bag-u kay sinugu sida atag sa Panginuun magkun, "Sabiha niyu sa kan Hisus, kawu aw ngani ti pagsabihun manga purupita kuntay sumitay, aw ngatay mag-alagad waya kami sa iba?" 20 Pagka nagras-ug yi sa kan Hisus ti manga sinugu ni Huwan sinabi nida, "Si Huwan Manugtulbaw ti nagsugu sa kanmi tag sa kanmu hampay kami mamaingana sa kanmu, kawu aw ngani ti pagsabihun manga purupita kuntay sumitay aw ngatay mag-alagad waya kami sa iba?" 21 Ati katpung nagpaayad si Hisus sa mayamu may makuri pag sakit, sa manga pinakurian labang. Pinaayad diman hanggan niya ti kayamuan manga buta. 22 Nagsagut si Hisus sa manga sinugu ni Huwan magkun, "Pag-uli yi kamu, sabiha niyu sa kan Huwan ti kanyu nakitan ag nadnugan. Maghiling yi ti manga buta, maglakaw yi ti manga pilay, naayadan yi ti may batas, magdungug yi ti manga bungul, nabuhi maan ti manga namatay, pag-iadal sa manga pugri ti Mayad pag Barita." 23 Magkun si Hisus, "Papaladan Diyus ti tawu nu unman mag-alinlangan siya sa kangku." 24 Pagka nuli yi kay manga sinugu ni Huwan, nag-umpisa magbagaw si Hisus sa kayamuan tawu tungkul sa kan Huwan magkun, "Kanyu nag-ati sa pangawakawaan tag sa kan Huwan hintay kanyu hinanap? Usa ka bahi aynu aw pagtandugun durus? 25 Kanyu nag-ati hintay ngani kanyu hinanap? Nanduaw lang aw kamu sa tawu marinu kay rutay? Ti manga may rutay marinu, kay kahamtangan masyadu aduk gid, ati kabay sida pag mag-uli sa balay manga hari. 26 Kanyu ngani nag-ati hintay kanyu hinanap? Purupita aw? Hu ngani duy. Dapat kang pagsabihun sa kanyu, balaw lang purupita siya. 27 Dahil may nisurat sa Banal Kasuratan tungkul sa kanya magkun, 'Inda yi kang sinugu ipinauna sa kanmu, Ialistu niya kanmu lakawan.' 28 Magkun si Hisus, "Kang pagsabihun sa kanyu, si Huwan lalu mahalaga man sa tanan tawu nianak sa babaw daga. Dapat ay ti pinakamababa pag tawu nu pagharian siya Diyus lalu man mahalga sa kan Huwan." 29 Ti kayamuan tawu una manga manunukut buhis namatingi gid sa kan Hisus adal. Tinupad waydi nida ti kagustuhan Diyus pagka sida napatulbaw sa kan Huwan. 30 Dapat ti manga Parisiyu hanggan ti manga Manugtudlu Kasuguan nagpalamada lang sa turunu Diyus, unman napatulbaw sa kan Huwan. 31 Magkun si Hisus, "Naan pag ipaparihu niku ti manga tawu taynguna, kabitay pag misunu sa kanda? 32 Sida ga manga anak matukawan sa palingkihan, magtarawagan magkun, 'Nagpalawta kami sa kanyu, Dapat unman kamu nagtaruk. Nag-ambahan yi kami pabilin, Dapat unman kamu nanlumi.' 33 Dahil si Huwan Manugtulbaw nagsitay, unman maghandum karan-unun, unman diman mag-inum siya maisug pag irinmun. Dapat pagbangdanan niyu inapuan siya labang. 34 Ti Anak Tawu nagsitay magkaun di mag-inum, dapat kanyu pagbangdanan mahugud sa karan-an palalangu, mag-ampud siya sa manga manunukut buhis, sa manga makasalanan. 35 Dapat ti kadunungan Diyus pagpatutuuhanan tanan manga magpasakup sa kanya." 36 Bin-ul si Hisus usa ka Parisiyu hampay mangaun. Nag-ati ngani si Hisus sa balay Parisiyu ag nagpakarani sa lamak. 37 Ati sa banwa may babayi makasalanan. Naalaman niya si Hisus nag-ati sa balay Parisiyu hampay magkaun. Nagluwang ti babayi may dara pamanglu isinukad sa garapa. Alabasturu pag batu ti binwat garapa. 38 Tinmindug ti babayi sa aday-an ni Hisus, arani sa kay lulud, maglumi siya. Binasa luwa kay manga lulud ni Hisus bag-u pinayid niya buhuk bag-u inarkan niya kay lulud ni Hisus bag-u pinayid waya niya pamanglu. 39 Siyun diman ti Parisiyu ti nagbuul sa kan Hisus. Pagka nakitan niya ti binwat babayi, inisip niya, "Nu tutuu purupita inda pag tawu, alam gid mana niya nu si unu ag nu hintay pag kalasi babayi siya tigpayid sa kay lulud, dahil makasalanan pag babayi siya." 40 Sinmabi si Hisus magkun, "Simun, may isabi aku sa kanmu." Magkun si Simun, "Sabiha yi nimu duy, Maisturu." 41 Sinabi ni Hisus, "May usa ka nagpautang duwa ti nangutang sa kanya. Kay usa nag-utang lima ka gatus pisus, kay usa bay limampulu ka pisus. 42 Pagka udyi makabayad sida, parihu pinatawad yi lang niya sida. Taynguna, hintay sa kanda duwa ti lalu magmahal sa kanya?" 43 Sinmagut si Simun magkun, "Sa kang isip duy, ti may utang daka pinatawad yi." Sinabi ni Hisus sa kan Simun, "Tama duy kanmu sinabi." 44 Nag-aliwliw si Hisus sa babayi bag-u sinabi niya sa kan Simun magkun, "Mag-akitan aw nimu inda pag babayi? Nagsaka aku sa kanmu balay, unman tinigan-an nimu aku danum para maiugas kang ulud. Bati ti babayi binasa niya luwa kang lulud, bag-u pinunas niya buhuk. 45 Unman inarkan nimu aku. Inda bay pag babayi ginan sa kang nagsaka ud nag-apas kay aruk sa kang manga lulud. 46 Unman pinayidan nimu hanggan kang ulu lana. Dapat pinayidan ngapu niya pamanglu kang lulud. 47 Kang pagsabihun duy sa kanmu, pinatawad yi kay manga kasalanan una mayamu, nakan daka gid ngani kay pagmahal. Dapat nu diit lang ti pinatawad, diit waydi kay pagmahal." 48 Bag-u sinabi ni Hisus sa babayi, "Pinatawad yi duy kanmu manga kasalanan." 49 Kay manga kaibahan sa karan-an nag-isip-isip yi sa kanda sadili, "Hintay inda pag tawu hayga makapatawad diman siya manga kasalanan?" 50 Sinabi ni Hisus sa babayi, "Ribri yi kawu dahil sa kanmu pagsarig. Danga yi magkaaburidu, pag-uli yi kawu."
1 Pagka dugay naglakaw si Hisus naglibut sa manga kabanwabanwahan ag sa manga baryu, kaibahan niya ti sampulu may duwa ka tuludluan niya. Itinudlu niya ti Mayad pag Barita sa manga tawu magkun, "Diyus tighari sa tanan linalang." 2 May manga babayi diman nagkuyug sa kan Hisus. Sida pinalwasan labang ag pinaayad kanda manga sakit. Hanggan si Marya kay bansag Magdalina pagka pinalwasan siya pitu ka labang nagkuyug diman sa kan Hisus. 3 Hanggan si Huwana, kay asawa ni Kusa, kay katiwala ni Hirudis. Hanggan si Susana ag mayamu waya ti iba babayi siyun ti nag-asikasu sa kanda ni Hisus, kanda ginamit kanda sadili kasiyunan. 4 Nagtiripun ti kagadhan tawu ag ginan sa kada banwa may manga nagsulang tabug sa kan Hisus. Nagtultul yi ngani siya usa ka halimbawa sa kanda magkun, 5 "May usa ka manugtanman linmakaw hampay mamamgas. Sa kay magpamgas may binhi sinmamad sa saruy dalan, natat-an manga tawu bag-u tininduk manga manuk. 6 Kay iba nipamgas sa babaw batu. Pagka tinmubu, nalayung ngapu dahil manipis lang pag daga. 7 Kay iba binhi nipamgas sa basad kadugihan. Dungan nagtubu ti dugi hanggan tirigu. Kinisut dugi ti tirigu. 8 Dapat ay ti iba binhi nipamgas sa mayad pag daga. Pagka nagtubu, namurak tigus-a ka gatus." Pagka itinultul ni Hisus inda pag pahalimbawa, inalsa niya kay busis magkun, "Ti may tuli kailangan pagpatingi." 9 Pinaingana niya manga tuludluan magkun, "Hintay inda pag halimbawa kay kahulugan?" 10 Magkun si Hisus, "Ipinakaun Diyus sa kanyu hampay masalman niyu ti madalum pag katutuuhanan udwaya niburayhaw tungkul sa kay paghari Diyus. Dapat sa manga iba pag-itudlu niku sa manga pahalimbawa hampay Una sida magpakabantay, unman sida makasalum, Una sida magpakapatingi, unman nida maintindihan." 11 Magkun si Hisus, "Inda yi ngani kay kahulugan pag pahalimbawa. Ti binhi imaw ti Bagaw Diyus. 12 Tunda yi ngani manga sa saruy dalan imaw ti manga manugpatingi. Bag-u magras-ug ti diyablu, pagpalimutun niya ti Bagaw Diyus ginan sa kanda naisipan hampay sida balaw sumarig sa Diyus ag dayu diman maribri. 13 Tunda sa mabatu, imaw ti nakadnug lang nagtanggap yi sida magbaya sa Bagaw Diyus. Dapat unman ngap inmaba kay gamut. Sida ngap ud nadugay kanda sarig. Pagka rinmas-ug ti tuksu nagbul-iw sida sa Diyus. 14 Ti nalagpak sa dugihan tunda imaw ti nakadnug, dapat amat amat pagkisutun sida sa kaaburiduhan naisipan hanggan sa kayamanan hanggan sa daut pag kagustuhan sitay sa babaw daga. Nakan unman magkamhan kay burak. 15 Ti sa mayad pag daga, tunda imaw ti manga mayad pag itinuduk sa kay tagipusuun, inalagaan nida ti Bagaw Diyus kanda nadnugan. Nakan magburak mayamu, balaw mag-urung una makuri." 16 Sinabi ni Hisus magkun, "Una hintay pag tawu tigsulu kay duag, unman pagtakluban niya anglit, unman diman pag-itagu niya sirung laming, nu unman pag-ibugtang sa kay bugtangan hampay makitan manga manugsaka kay rayaw. 17 Dahil unman may mitagu nu unman mahayag gid aban. Unman may milihim nu unman makilala ag bulwatun sa marayaw aban. 18 Isipa niyu nu kabitay kanyu magpatingi. Dahil una hintay pag tawu ti may imaw dagdagan waya. Una hintay pag tawu ti unman may imaw, una ti pagsarigan mana niya bul-un diman gid aban ginan sa kanya." 19 Nag-ati sa kan Hisus kay ina hanggan kay manga patar-ari lalaki, dapat sida unman makapakarani sa kanya dahil sa kadamlan tawu. 20 May usa ka tawu nagsabi sa kanya, "Kanmu ina hanggan kanmu manga patar-ari asan sa luwas balay, kanda mana gustu maghampang sa kanmu." 21 Dapat sinabi ni Hisus magkun, "Inda yi ngani kang ina, kang manga patar-ari ti manga magpatingi sa Bagaw Diyus bag-u kanda pagtupadun." 22 Pagka dugay nagsakay si Hisus sa duunduun hanggan kay manga tuludluan. Magkun siya sa kanda, "Dumipay duy kita tag sa baliw pangpang danaw." Nagtukun sida ginan sa saruy. 23 Sa paglakaw duunduun naturug si Hisus. Bag-u dinuksulan untug sida sa danaw. Nasukadan danum ti duunduun. Madala yi malunud. 24 Sida nagpakarani sa kan Hisus, bag-u kanda pinulaw magkun, "Maisturu, Maisturu, kita inda mamatay yi ay." Pagka nag-imata siya tinamyaw niya ti bagyu hanggan ti mabisug pag humbak. Pagka tinamyaw nagpat-ung yi ag nagkalma. 25 Magkun siya sa kanda, "Kabitay duy lugud kanyu sarig?" Nadala sida nadulaw. Magharampangan sida magkun, "Hayga nguna katida pag tawu? Magbilin una sa bagyu una sa danum bag-u magpaniwala ti manga bagyu sa kanya." 26 Nagras-ug sida sa daga manga Girasinu, sa katpungan daga Galiliya. 27 Pagka dinmugsun si Hisus ginan sa duunduun, may nagsulang sa kanya usa ka tawu taga banwa inapuan manga labang. Dugay yi pag timpu siya unman yi magrutay pag tawu, udyi mag-uli sa kay balay, siyun yi kay ulian sa kalubngan lang. 28 Pagka nakakit sa kan Hisus naghuyaw siya napadapa sa kay sarangwan kay irininggit daka magkun, "Hisus duy, hintay kang labut sa kanmu? Kawu ti Anak Diyus makapangyarihan sa tanan. Manuyu aku sa kanmu danga pakurian nimu aku." 29 Dahil sinabihan yi ni Hisus ti labang pagluwas yi sa tawu ginan. Dahil pirmi siya pagdarahun labang nakan kanda pagpakagapusun tarikada hanggan pusas sa lulud para kanda bantayan. Dapat pagka pinuklut maan niya kay manga gapus pagpakatabanun siya labang atag sa pangawakawaan tawu. 30 Nagpaingana si Hisus sa kanya, "Hintay kanmu ngaran?" Kay sagut niya, "Kadamlan." Dahil aduk pag labang ti nagsulud sa tunda pag tawu. 31 Bag-u ti manga labang nanuyu sa kan Hisus danga sida pagsugua tag sa kaabasadbasadan. 32 Ati sa bantud may maglingaun kadamlan babuy. Nanuyu ti manga labang sa kan Hisus, pahintuluti sida sumulud sa babuy. Pinasnuan ngani niya sida. 33 Nagluwas ti manga labang sa tawu bag-u sa manga babuy pag sinmulud. Bag-u nangras sa palagiw ti kagadhan babuy naglinuksu sa yangpas danaw, nagkalalimus sida sa danum. 34 Pagka nakitan manga manug-alaga babuy may nangyari, nalagiw sida, kanda itinultul sa banwa hanggan sa manga baryu. 35 Bag-u naglinuwang ti manga tawu hampay makitan ti nangyari nu kabitay. Pagka nagpakarani sida sa kan Hisus nakitan nida sa kan Hisus atubangan ti tawu pinalwasan manga labang. Matukawan siya may rutay yi, mahusay yi kay naisipan. Nakan sida tanan nadala gid. 36 Nagtultul sa kanda ti manga nakakit nu kabitay kay pinaayad ni Hisus ti inapuan manga labang. 37 Bag-u ti tanan tawu mag-uli sa daga manga Girasinu nagsabi sa kan Hisus, "Danga yi mana kawu sitay sa kanmi." Dahil kinulbaan sida, daka kanda kadalaan. Nagsakay si Hisus sa duunduun, nuli yi siya. 38 Dapat nagpakihampang sa kanya ti tawu pinalwasan labang magkun, "Aku duy mana kumuyug sa kanmu." Dapat siya pinauli ni Hisus magkun, 39 "Pag-uli yi lang kawu duy tag sa kam balay. Itultul nimu nu kabitay kay kadaka ti kaayadan kay binwat Diyus sa kanmu." Nuli yi ngani siya, itinultul niya sa tanan tawu nu kabitay kay kadaka ti binwat ni Hisus sa kanya. 40 Pagka binmalik maan si Hisus sa baliw dipay danaw, masulung ti kayamuan tawu nagsulang sa kanya. Dahil nagpatigagad sida tanan sa kanya. 41 Bag-u may usa ka lalaki nagpakarani sa kan Hisus, kay ngaran si Hairu. Siya pangulu sa balay tiripnan. Napayuk-ub siya sa atubangan ni Hisus magkun, "Pag-ati duy mana kawu sa kang balay." 42 Dahil may bugtung anak babayi siya sampulu may duwa ka timpu kay idad ag hirimugtasun yi kay arup. Dapat sa kay maglakaw ni Hisus atag sa kan Hairu balay, nandurutdutan ti kayamuan tawu sa kanya. 43 May usa ka babayi sulud sampulu may duwa ka timpu kay pagsulgan. Hinirut kay panggastus sa manga manugbulung, una sitapu unman may nakapaayad sa kanya. 44 Tunda pag babayi nagpakarani sa kan Hisus aday-an nag-igpil sa kay sidsid rutay. Susun ngani nap-ut kay pagsulgan. 45 Sinabi ni Hisus, "Si unu nguna ti nag-igpil sa kangku?" Pagka nagtanggi sida tanan, magkun si Pidru, "Maisturu, ipinabusul kawu kayamuan." 46 Dapat sinabi ni Hisus, "May inmigpil sa kangku, dahil naungdan niku may ginmamit kang kamaskihan." 47 Pagka naintindihan babayi balaw maaw milihim kay binwat, nagpakarani siya tinakigan sa dala. Nagyuk-ub siya sa atubangan ni Hisus bag-u isinabi niya sa atubangan tanan tawu nu hayga inigpilan niya si Hisus ag nu kabitay susun naayadan yi siya. 48 Magkun si Hisus sa kanya, "Kawu duy pinaayad yi dahil sa kanmu pagsarig. Pag-uli yi duy kawu, danga yi magkaaburidu." 49 Pagka magbagaw waya si Hisus, rinmas-ug yi ti usa ka lalaki ginan sa ulian pangulu balay tiripnan, nagsabi sa kanya, "Udyi duy kanmu anak babayi, danga yi duy magbalag sa Maisturu." 50 Pagka naalaman ni Hisus, sinabi niya sa kan Hairu, "Danga duy kawu magkadala. Pagsarig lang kawu, umayad di siya." 51 Pagka rinmas-ug si Hisus sa balay, unman pinasnuan niya una hintay ti sumaka kaibahan niya nu unman sida lang ni Pidru ni Huwan ni Santiyagu hanggan kay manga ama ina anak babayi. 52 Nanlulumian ti tanan tawu nagkarabayngan dahil sa anak babayi. Dapat ay sinabi ni Hisus, "Danga yi kamu maglumi, dahil siya balaw tigbak, maturugan lang siya." 53 Kinasarin-an nida siya. Alam nida tigbak yi tunda. 54 Pagka nahiyaptan niya kay kamang anak nagtawag si Hisus magkun, "Duy anak, pagbangun yi kawu." 55 Pagka binmalik kay arup, rargu nagbangun siya. Magkun si Hisus, "Pakan-i yi duy niyu ti anak karan-unun." 56 Naglingut kay manga ama hanggan kay ina, dapat binilinan sida ni Hisus danga sabiha una sa kantapu inda ti nangyari.
1 Tinipun ni Hisus kay sampulu may duwa ka tuludluan, bag-u kay pinakan-an kapangyarihan hanggan panalu laban sa manga labang ag hampay makapaayad sa may manga sakit. 2 Bag-u sinugu niya sida hampay kanda itudlu magkun, "Diyus ti maghari sa tanan bagay." Ag hampay magpaayad sida sa may manga sakit. 3 Binilinan niya sida magkun, "Danga magdara una hintay sa kanyu maglakaw, una sugkud, una sukadan karan-unun, una karan-unun, una kuwarta. Danga kamu magdara kanyu ililsan. 4 Una naan pag balay kamu pag sumaka, siyun yi waydi kamu pag kidayun hanggan sa udwaya kamu umighit siti ginan pag banwa. 5 Una naan pag banwa nu unman pagtanggapun kamu manga tawu, pag-ighit yi kamu siyun ginan, pagpaga niyu ti galbuk ginan sa kanyu manga lulud bilang puruyba sa kanda magdayu sa Diyus." 6 Pagka nakatapus yi kan Hisus bilin sa kay manga tuludluan, linmakaw yi sida. Nag-ati sida sa tanan pag manga rugar, itinudlu nida ti Mayad pag Barita ag nagpaayad sida sa may manga sakit sa tuhay tuhay pag rugar. 7 Ati katpung si Hirudis ti hari sa Galiliya. Pagka naalaman niya ti tanan buwat nida ni Hisus, siya tutuu naglingut. Dahil magsabi ti manga iba si Huwan nabuhi uman ginan sa kay pagkamatay. 8 Ti iba magkun, si Ilyas linmuwang. Magkun ti iba, nabuhi uman ti usa sa manga un-an pag manga purupita. 9 Sinabi ni Hirudis, "Ipinaplud niku kay liug ni Huwan, dapat si unu nguna inda? Dahil naalaman niku kay manga makamaskihan buwat." Nakan magtagakakiti si Hirudis sa kan Hisus. 10 Pagka nuli maan kay manga Apustul ni Hisus, itinultul nida sa kanya nu hintay kanda binwat. Bag-u sida iniba niya napablag tag sa usa ka banwa kay ngaran Bitsayda. 11 Dapat pagka naalaman kayamuan tawu, nag-usig ngap sida sa kanya. Nagbaya siya sa kayamuan pagka sida rinmas-ug bag-u kay itinudlu sa kanda magkun, "Diyus ti maghari sa tanan bagay." Pinaayad diman niya ti kailangan bulungun. 12 Pagka mag-isangday yi ti init, nagpakarani sa kan Hisus kay sampulu may duwa ka tuludluan magkun, "Paataga duy nimu ti manga kayamuan tawu hampay sida umati sa manga baryu, sa manga tawu balay sitay sa palibut. Ati sida pag magdayun, manhagad karan-unun. Dahil kita sitay sa pangawakawaan tawu." 13 Dapat sinabi ni Hisus sa kanda, "Kamu yi ti pagpakaun karan-unun sa kanda." Magkun sida, "Unman kita may karan-unun duy, nu unman lima lang ka tinapay ag duwa ka isda. Kanmu aw gustu kami umati mamili karan-unun hampay ipakaun sa tanan pag manga tawu sitay?" 14 Dahil sida manga lima ka libu lalaki. Sinabi ni Hisus sa kay manga tuludluan, "Patukawun niyu sida purupuruun tiglimangpulu ka tawu." 15 Katida ngani kanda binuwat, pinatukaw sida tanan. 16 Bin-ul ni Hisus ti lima ka tinapay ag ti duwa ka isda, nagtangda siya sa langit nagpasalamat sa Diyus sa inda pag karan-unun bag-u pinikapika niya. Bag-u ipinakaun yi niya sa kay manga tuludluan hampay ihayin nida sa kadamlan tawu. 17 Nangaun sida tanan nagkarabsug. Kanda sawad nagkan-an pinikapika tinapay hanggan isda kanda maan pinunpun. Sampulu may duwa ka luwak waya kanda sawad. 18 Pagka si Hisus napablag nagdarangin, nagdulud kay manga tuludluan. Bag-u pinaingana niya sida magkun, "Kabitay ti pagsabihun kayamuan tawu nu si unu aku?" 19 Sinabi nida, "Si Huwan Manugtulbaw kunu, dapat magsabi ti iba kawu si Ilyas, magkumun ti iba usa sa manga un-an pag purupita nabuhi uman ginan sa kay pagkamatay." 20 Bag-u kay sinabi ni Hisus sa kanda magkun, "Dapat kamu duy, kabitay kanyu pag magkilala sa kangku nu si unu aku?" Kay sagut ni Pidru, "Kawu duy, ti pinili Diyus Manugribri pag Hari." 21 Dapat ibinilin ni Hisus mahigpit magkun danga sabihun nida inda una sa kantapu pag tawu. 22 Magkun waya siya sa kanda, "Dahil kailangan mag-agwanta ti Anak Tawu sa mayamu pag kakurian. Dayuun siya aban manga paggurangunun sa nasyun hanggan manga pangulu manug-asiwa balay Diyus hanggan manga Manugtudlu Kasuguan. Kailangan siya kanda pagmatyun bag-u mabuhi maan uman sa ikatlu pag sirang." 23 Sinabi waya ni Hisus sa kanda tanan magkun, "Una hintay pag tawu nu magkaibug kumuyug sa kangku pagdayu sa kay sadili kagustuhan, pas-ana kay kurus sirang sirang, pagkuyug sa kangku. 24 Dahil una hintay pag tawu tigkaibug alagaan kay buhi, maduraan ngap siya buhi. Dapat una hintay pag tawu ti nabul-an kay buhi dahil sa kangku, balaw ngap maduraan buhi. 25 Dahil hintay ti makinabangan tawu una maapu niya ti bilug kalibutan nu kay kinabuhi ti kabaydanan. 26 Una hintay pag tawu tigpaulam kay nakakilala sa kangku hanggan sa kang manga bagaw, ipaulam waydi diman siya aban Anak Tawu sa kay pagbalik niya sitay aban may kadayawan hanggan kadayawan Ama, kaibahan niya ti manga anghil ginan langit. 27 Dapat tutuu kang pagsabihun sa kanyu, ti iba sitay dayu mamatay hanggan sa udwaya makitan nida kay paghari Diyus." 28 Pagka nakalawuy manga unum ka sirang ginan sa kay nagbagaw tunda, tinaban ni Hisus sida ni Pidru ni Huwan ni Santiyagu, nagtukad sa bantud hampay mandarangin. 29 Pagka siya magdarangin di waya nagtuhay yi kay kalasi uyahun, kay rutay masilaw kay kalagti. 30 Bag-u kadaka may duwa ka lalaki nagluwang, sida ni Muysis ni Ilyas naghampang sa kanya. 31 Napakakit kanda kadayawan taga langit. Magharampangan sida tungkul sa kan Hisus pag-ighit ginan sa daga aban arani yi tupadun niya sa Hirusalim. 32 Si Pidru hanggan kay manga kaibahan turug. Dapat pagka sida nimata yi mayad, nakitan nida kay kadayawan ni Hisus hanggan ti duwa ka lalaki nakatindug sa kay arani. 33 Pagka magkaginan yi sida ni Muysis ni Ilyas magkun si Pidru sa kan Hisus, "Maisturu, mayad maaw kita nagsitay. Mamwat kami tulu ka payag ayaw ayaw kamu payag ni Muysis ni Ilyas." Unman magkaalaman ni Pidru kay pagsabihun. 34 Pagka magbagaw waya si Pidru, rinmas-ug ti usa ka rurum hinmamuy sa kanda. Nadala sida pagka nadulman rurum. 35 May nagbagaw ginan sa rurum magkun, "Inda kang Anak, kang pinili, siya ti kanyu patingihi." 36 Pagka nadnugan nida tigbagaw, nakitan nida si Hisus usa usa wadi. Unman yi sida nangingay. Unman waya dapu itinultul nida una sa kantapu pag tawu kanda nakitan sa bantud. 37 Pagka surip naglus-ug sida ni Hisus ginan sa bantud, sinulang siya lalu mayamu pag tawu. 38 May usa ka lalaki sa kayamuan nagtawag magkun, "Maisturu, aku mana may kailangan sa kanmu. Duawan nimu kang anak lalaki dahil usa usa lang kang anak. 39 Ag inapuan labang inda pag anak. Bigla siya magpakahuyaw, magkidkiriw, magbura kay bibig. Bihira yi pagta-yakan labang ti anak. Tutuu siya pagsaktan. 40 Gustu mana niku ipaluwas nimu manga tuludluan ti labang dapat unman nida nakaya." 41 Nagsagut si Hisus magkun, "Kamu katna pag manga tawu unman may sarig, manga supakil. Kabitay waya kadugay kaibahan niyu aku ag magtiis waya sa kanyu? Daran-a nimu sitay tag sa kangku kanmu anak." 42 Pagka magpakarani ti anak sa kan Hisus itinlang waya labang rargu nangidkiriw maan ti anak masyadu. Dapat binagawan ni Hisus ti labang, pinaayad niya ti anak bag-u inuli siya sa kay ama. 43 Sida tanan nagdayaw sa daka pag kamaskihan Diyus. Sida tanan naglingut waya sa tanan pagbuwatun niya bag-u sinabi ni Hisus sa kay manga tuludluan, 44 "Pasuldan gid mayad sa kanyu tuli inda kang sabi sa kanyu, ti Anak Tawu ipahintulut aban sa manga tawu." 45 Dapat unman naintindihan niya manga tuludluan pag bagaw inda. Madalum pag hampang nakan unman magkaintindihan nida. Magkadala sida magpaingana sa kanya kay ibug sabihun. 46 Nagparadayawan kan Hisus tuludluan nu hintay sa kanda ti mataas. 47 Dapat pagka naalaman ni Hisus kanda pag-isipun, nagbuul siya usa ka anak diit tag sa kay arani. 48 Sinabi niya sa kanda, "Una si unu pag tawu ti magsunud sa kangku ag pakan-an niya halaga inda pag diit anak, aku di ngap kay pinakan-an halaga. Una si unu pag tawu nu pakan-an halaga niya aku, napakan-an waydi niya halaga ti nagsugu sa kangku. Dahil ti pinakaababa sa kanyu tanan imaw yi ngap ti pinakamataas. 49 Sinabi ni Huwan, "Maisturu, kami may nakitan tawu magpalwas labang ginan sa usa ka tawu sa ngaran nimu. Kanmi inirangan siya dahil siya unman magkuyug sa kanta." 50 Dapat sinabi ni Hisus sa kanda, "Danga pag-irangi dahil ti unman maglaban sa kanyu, kakampi diman niyu." 51 Pagka arani yi kay kaudasan tanggapun si Hisus sa langit, udyi natalinduwa kay naisipan, linmakaw siya atag sa Hirusalim. 52 Ipinauna ni Hisus ti iba hampay maghanap kanda dayunan. Nag-una sida ag nagras-ug sida sa usa ka baryu manga taga Samarya hampay maghanda dayunan. 53 Dapat unman tinanggap si Hisus manga taga Samarya dahil naalaman nida rargu siya atag sa Hirusalim. 54 Pagka naalaman inda niya manga tuludluan nida ni Santiyagu ni Huwan, magkun sida, "Panginuun, kanmu aw gustu lagpakan nita sida apuy ginan sa langit ag sida tudasun?" 55 Dapat nagpasrangu si Hisus ag tinamyaw niya kay tuludluan. 56 Bag-u nag-atag maan sida sa iba baryu. 57 Sa kanda maglakaw may nagsabi sa kan Hisus magkun, "Kumuyug aku duy sa kanmu una kawu naan tag." 58 Sinabi ni Hisus sa kanya, "Sa ukang kayu ti singgalung kay lukuban, ti manga manuk may pugad, dapat ti Anak Tawu unman may paraharyan." 59 Sinabi ni Hisus sa usa, "Pagkuyug kawu sa kangku." Dapat sinabi niya magkun, "Panginuun, pahintuluti dap aku mag-uli manlubung waya aban sa kang ama nu mamatay." 60 Dapat sinabi ni Hisus sa kanya, "Ipiyar nimu sa unman may manga buhi ti lumubung sa manga namatay. Dapat pag-ati kawu, ibarita nimu sa manga tawu magkun, Diyus ti maghari sa tanan bagay." 61 Nagsabi ti usa, "Kumuyug aku sa kanmu, Panginuun, dapat pahintuluti dapu nimu aku pumaalam waya sa kang manga kasunu balay." 62 Magkun si Hisus sa kanya, "Ti tawu nu maghiyaput aradu bag-u mag-aliwliw waya sa kay uryan, unman masarigan sa buruwatun kaharian Diyus."
1 Bag-u nagpili waya ti Panginuun pitumpulu may duwa ka tawu. Sinugu niya sida tigudwa tigudwa hampay mag-una sa kanya atag sa kada banwa hanggan kada pinuru tawu kay gayak diman atihan. 2 Sinabi niya sa kanda, "Mayamu duy pag aranyun, dapat kurang ti manug-ani. Nakan pagdarangin waya kamu sa Panginuun imaw ti may puun aranyun hampay sumugu waya manug-ani sa kay aranyun. 3 Paglakaw yi gid kamu, malu pagsuguun niku kamu ga manga anak karanidu tag sa karaw-an masimarun idu. 4 Danga kamu magdara una bay-ung, una sukadan karan-unun, una lapak. Dagkahilig sa harampangan una sa kantapu sa dalan. 5 Una naan pag balay kanyu sakahan sabiha dap sa kanda, 'Pagmay kahusayan ti may apu inda pag balay.' 6 Nu ati may magbaya sa kahusayan, nangulian yi sa kanya kanyu kahusayan, dapat nu unman waydi unman matanggap niya ti kahusayan. 7 Pagsiyun dapu kamu sa balay tunda, pagkaun pag-inum una hintay kanda ihayin sa kanyu, dahil kailangan suhulan ti manugbuwat. Danga kamu pahalinhalin sa usa ka balay tag sa usa ka balay. 8 Nu kamu magsulud sa usa ka banwa nu kanda tanggapun kamu, kan-a niyu una hintay kanda ihayin sa kanyu. 9 Paayada niyu ti may manga sakit ati ag kanyu sabihun sa kanda, 'Nagpakarani yi sa kanyu kay paghari Diyus.' 10 "Dapat nu kamu magsulud sa usa ka banwa nu unman kamu tanggapun nida, pag-ati kamu sa manga karsada nida pagkun kamu, 11 'Uninawun niyu inda arani yi kay paghari Diyus sa kanyu. Kami balaw madamay sa kay sintinsiya Diyus aban sa kanyu, nakan una ti galbuk niyu banwa nakahuput sa kanmi raprapa pagpagun yi nimi bilang ga puruyba sa kanyu magdayu sa Diyus.' 12 Kang pagsabihun sa kanyu nu kaudasan pagsintinsiya Diyus aban lalu waya makuri kay kaparusahan malakawan tawu siyun pag banwa balaw lang ga sa manga taga Suduma." 13 Sinabi ni Hisus magkun, "Kaawaawa kamu pag manga taga Kurasin, kaawaawa kamu hanggan pag manga taga Bitsayda, dahil nu abi sa banwa Tiru una sa banwa Sidun pag nabuwat ti manga makadululaw kang binwat sitay sa kanyu, dugay yi mana nanrutay rutay daan, nagtukaw sa dapug ti manga taga ati hampay ipakilala kanda nag-ampu nagpatawad yi sa kanda kasalanan. 14 Dapat kang pagsabihun sa kanyu, nu kaudasan yi sintinsiya aban, lalu waya mabuyat kay sintinsiya Diyus sa kanyu balaw lang ga manga taga Tiru ag Sidun. 15 Kawu pag banwa Kapirnaum, Gustu aw nimu pumaabwat hanggan tugka sa langit? Idugsak baga kawu sa ulian manga namatay." 16 Sinabi ni Hisus sa kay tuludluan magkun, "Ti magpatingi sa kanyu, magpatingi diman waydi sa kangku. Ti magdayu sa kanyu, nagdayu diman waydi sa kangku. Ti magdayu sa kangku, nagdayu diman waydi sa nagsugu sa kangku." 17 Nuli yi maan ti pitumpulu may duwa ka tuludluan. Magbaya gid sida magkun, "Panginuun, una ti manga labang nagpaniwala sa kanmi pagka sinugu nimi sa kanmu ngaran." 18 Sinabi ni Hisus sa kanda, "Nakitan niku si Satanas nalagpak ginan sa langit parihu sa kilat. 19 Malu, inintirga yi niku kang kamaskihan sa kanyu hampay tat-an niyu ti manga ulay hanggan alutatip, hampay manalu kamu sa tanan kamaskihan ni Satanas ag unman may makadisgarasya sa kanyu. 20 Dapat duy danga kamu magbaya dahil ti manga labang magpaniwala sa kanyu. Lalu ngap kamu pagbaya dahil kanyu manga ngaran ilinista yi Diyus sa langit." 21 Ati katpung pinakan-an si Hisus lubus pag kabayaan Ispiritu Banal. Kay sinabi, "Magpasalamat aku sa kanmu, Amang, kawu ti Panginuun sa langit hanggan sa daga. Magpasalamat aku dahil unman ipinaalam nimu inda pag manga bagay sa manga madunung ag sa manga mapininsarun, dapat ipinakilala ngapu nimu sa manga tawu ga anak kay tagipusuun. Hu ngani duy Amang, dahil katunda yi kanmu kagustuhan. 22 Ipinabahala niku Ama sa kangku ti tanan manga bagay. Unman may nakakilala sa Anak nu unman ti Ama lang. Unman waydi may nakakilala sa Ama nu unman ti Anak lang, hanggan una hintay ti piliun Anak hampay ipakilala sa kanya ti Ama." 23 Nagpasrangu si Hisus naghampang sa kay lang manga tuludluan magkun, "Pinapaladan kamu Diyus dahil kanyu mag-akitan kay makamaskihan buwat niya. 24 Dahil kang gid pagsabihun sa kanyu, mayamu pag manga purupita hanggan manga hari ti naggagad sa kanyu mag-akitan mata dapat sida udyi nakakit, kanda mana gustu sida makadnug dapat udyi sida nakadnug." 25 Bag-u nagpakarani ti usa ka Manugtudlu Kasuguan, kay pagsubukan niya si Hisus magkun, "Maisturu, hintay kang buwatun hampay makatanggap aku buhi unman may katapusan?" 26 Magkun si Hisus sa kanya, "Hintay ti isinurat sa Kasuguan, kabitay lugud pag nabasa nimu asan?" 27 Sinmagut siya magkun, "Ilubus nimu kanmu tagipusuun, kanmu karadwa, kanmu kabisugan hanggan kanmu pag-iisip sa kanmu pagmahal sa kanmu Panginuun Diyus. Mahala nimu kanmu kaparihu tawu ga kanmu diman pagmahal sa kanmu sadili." 28 Magkun si Hisus sa kanya, "Tama duy kanmu sagut. Tupada yi ngani nimu tunda hampay may buhi kawu unman may katapusan." 29 Balaw may gustu ti Manugtudlu Kasuguan mahantup kuntay salan kay paingana nakan magkun siya sa kan Hisus, "Si unu nguna kang kaparihu tawu?" 30 Sinmagut maan si Hisus magkun, "May usa ka tawu maglus-ug ginan sa Hirusalim tag sa Hiriku. Pagka sa dalan pinuutan siya manga tulisan. Kanda inagaw kay manga dara bag-u sinaktan, kanda magtayak magkamatay yi. 31 Nakalakaw diman siyun lakaw pag dalan ti usa ka manug-asiwa balay Diyus. Pagka nakitan niya tunda pag tawu, nag_ibay siya. 32 Hanggan ti usa ka Libita nakalakaw waydi ati pag dalan. Pagka nakaduaw siya siyun pag tawu, naparargu siya kay lakaw. 33 "Dapat may tawu taga Samarya. Sa kay paglakaw ati pag dalan, nakaras-ug siya ati sa tawu mabugtangan. Pagka nakitan niya naawa gid siya sa may kakurian. 34 Nagpakarani siya, binuhusan niya lana hanggan alak ti manga biyag bag-u kay tinalapisan. Bag-u kay ipinasakay sa kay sadili hayup. Dinara niya siya tag sa balay dayunan. Pagka ati siya inalagaan niya mayad. 35 Pagka surip naghakwat ti taga Samarya kay kuwarta duwa ka pisus, ipinakaun sa may puun balay dayunan magkun, 'Alagai duy nimu inda pag may sakit. Inda pag kuwarta nu kurang waya kanmu igastus, dugangan niku aban sa kang pagbalik maan sitay.' " 36 Magkun si Hisus, "Kanmu isip hintay sa kanda tulu ti nakapag-alaala sa kay kaparihu tawu pinuutan manga tulisan sa dalan?" 37 Magkun ti Manugtudlu Kasuguan, "Tunda yi ngani ti nagkaawa nangawat sa tawu sinaktan." Magkun si Hisus sa kanya, "Ta, katunda yi ngani buwata nimu." 38 Sa kanda naglakaw, rinmas-ug si Hisus sa usa ka baryu. May babayi siyun pag baryu, kay ngaran si Marta. Ipinasaka niya si Hisus sa kay balay. 39 Kan Marta ari si Marya, ag si Marya matukawan sa arani Panginuun magpatingi sa kay bagaw. 40 Magkaaburidu yi gid si Marta sa kay mag-alistu manga karan-unun dahil mayamu kay buruwatun. Dinmulud siya sa kan Hisus magkun, "Panginuun hayga aku usa lang ti mag-asikasu, pagpabay-anan lang aku ni Marya. Kabitay nguna tida sa kanmu? Sabihi ngani nimu aku awati." 41 Sinabi Panginuun magkun, "Marta duy, hayga magkakuri kawu, magkaaburidu gid kawu sa mayamu pag irisipun nimu? 42 Usa lang ka bagay gid ti kailangan niyu, kan Marya pinili ti mayad gid, balaw bul-un ginan sa kanya."
1 Pagka dugay nandarangin si Hisus sa usa ka rugar. Pagka nakatapus kay darangin magkun ti usa ka tuludluan sa kanya, "Panginuun, tudlui nimu kami darangin parihu sa kan Huwan nanudlu sa kay manga tuludluan." 2 Magkun siya sa kanda, "Kainda kamu nu magdarangin magkun, Amang, kailangan dayawun manga tawu kanmu ngaran, Kailangan kawu ti maghari sitay sa babaw daga. 3 Ipakaun nimu sa kanmi ti karan-unun kanmi kailangan sirang sirang. 4 Patawada nimu kanmi manga kasalanan dahil pinmatawad waydi kami sa kada tawu may kasalanan sa kanmi. Danga ipalakaw nimu kami sa mahigpit pag subuk." 5 Sinabi ni Hisus sa kanda, "Abi nangus kawu may kakilala, umati kawu sa kanya karaw-an yabi sumabi sa kanya, 'Duy, paudama kanmu karan-unun, 6 dahil rinmas-ug sa kangku kang usa ka kakilala sa arayu ginan, udyi aku may itanyag sa kanya.' 7 Sumagut aw lugud siya gin bad balay, 'Danga masamuk. May talakup yi ti sabian, kaibahan niku kang manga anak sa igyaan. Unman aku makabangun ag makapakaun sa kanmu.' " 8 Magkun si Hisus, "Pagsabihun niku sa kanyu, una unman siya bumangun magpakaun sa kanmu dahil kay yi waydi kakilala kawu, bumangun yi lang ag pumakaun una hintay kanmu kailangan, dahil pag-aringun nimu siya. 9 Kang gid pagsabihun sa kanyu, panhagad kamu hampay kamu pakan-an, panhanap kamu hampay makakit kamu. Pagtaragham kamu ginan sa luwas bag-u bukasan ti sabian. 10 Dahil ti tawu nu maghagad pakan-an, ti tawu nu maghanap may makitan siya, tigtaragham ginan sa luwas bukasan sa kanya ti sabian. 11 "Kamu pag manga ama, nu maghagad ti anak tinapay, kanyu aw lugud pakan-an batu? Nu abi humagad ti anak isda, ulay aw lugud ti ipakaun, bukun aw isda? 12 Nu maghagad ti anak itlug, pakan-an aw lugud niyu siya alutatip? 13 Madi kamu manga makasalanan, madunung diman kamu magpakaun mayad pag pakaun sa kanyu manga anak. Lalu ipakaun niyu Ama sa langit ti Ispiritu Banal sa tawu nu maghagad sa kanya." 14 Pagka dugay may ipinalwas si Hisus labang magpabuyun ginan sa tawu. Pagka linmuwas ti labang, binmagaw yi ti tawu. Nadulaw gid ti kayamuan tawu. 15 Dapat magkun ti iba, "Nakan makapalwas tunda pag tawu manga labang, dahil may kapangyarihan siya ginan sa kan Biilsibul sa hari manga labang." 16 Pagsulayun manga iba si Hisus, hinanapan siya makadululaw pag manga tanda, nu ngatay siya ginan sa Diyus. 17 Dapat alam di ni Hisus kanda pag-isipun. Magkun siya sa kanda, "Marangga ti kada kaharian nu udyi magkarausa, nu magpakalabanan wadi sida. Nu ti usa ka magtal-anakan mag-arawayan mabugtas yi ti magmalahalan. 18 Nu abi labanan ni Satanas kay sadili udyi gid dumugay kay kapangyarihan, mawasak yi. Pagsabihun niyu aku magpalwas manga labang dahil may kabisugan ginan sa kan Biilsibul. 19 Si unu lugud ti nagpakaun kapangyarihan sa kanyu manga tuludluan hampay makapalwas manga labang. Nakan kanda ngap pagbuwatun imaw ti puruyba kuntay kamu manga salan. 20 Dapat nu ginan sa Diyus kang kapangyarihan hampay magpalwas manga labang, ibug sabihun rinmas-ug yi ngap sa kanyu ti paghari Diyus. 21 "Nu ti mabisug pag tawu armadu magbantay sa kay balay, unman may makagaraw kay manga butang. 22 Dapat nu labanan siya lalu mabisug pag tawu, talu siya, bag-u bul-un sa kanya ti armas kay pagsarigan hanggan kay naagaw pag manga butang paghurayhurayun. 23 Ti unman pabliwa sa kangku, kalaban niku. Ti unman umawat sa kangku sa kang magpatipun, imaw ti magwatak." 24 Magkun si Hisus, "Pagka linmuwas ginan sa usa ka tawu ti labang, maglakaw siya sa manga tigangan daga, maghanap kay paraharyan. Nu ud may makitan, mag-isip siya sa kay sadili magkun, mag-uli yi maan aku sa balay kang inighitan. 25 Sa kay pagras-ug niya nakitan niya pinarisan marayaw yi ti balay. 26 Nakan mag-ati siya manaban pitu waya maan ka labang daut man sa kanya. Magsulud sida mangulian ati. Nakan ngani makuri man masyadu balaw lang ga kaybi kay uryan pag kahamtangan tunda pag tawu kay inapuan." 27 Magbagaw waya si Hisus, may usa ka babayi ati sa kayamuan tawu nagbagaw daka magkun sa kanya, "Pinapaladan Diyus ti babayi nag-anak sa kanmu ag nagpasusu sa kanmu." 28 Dapat sinabi ni Hisus, "Lalu waya papaladan Diyus ti manga tawu nu magpatingi sa kay Bagaw bag-u kanda pagtupadun." 29 Pagka nag-amat nagyamu ti tawu nagpakarani sa kanya, magkun si Hisus, "Daut gid ti manga tawu kainda, maghanap sida tanda, dapat unman pakakitan tanda purya lang sa nangyari ati katpung sa kan Purupita Hunas. 30 Dahil nu kabitay si Hunas kaybi usa ka tanda sa manga tawu taga Ninibi, katunda diman ti Anak Tawu aban usa ka tanda sa manga linahi taynguna. 31 Sa ati katpung pag udas aban ti Rayna ginan sa salatan baliwa kumastigus laban sa kanyu, dahil nagluwang ti Rayna ginan sa puun langit hampay patingihan kay kadunungan ni Sulumun. Dapat balaw di ga kan Sulumun ti nagsitay kainda sa kanyu. 32 Pagka kaudasan sintinsiya aban kumastigus ti manga taga Ninibi laban sa kanyu. Dahil pagka sida nakadnug kan Hunas ibinarita, ti manga taga Ninibi nag-ampu nagpatawad sa kanda manga kasalanan. Dapat balaw di ga kan Hunas ti nagsitay kainda sa kanyu." 33 Sinabi ni Hisus magkun, "Unman may magsulu kay duag bag-u itagu sa unman mag-akitan, una abi sa sirung salupan, nu unman isalingat ngap sa sag-angan hampay ti manga magsaka maghiling marayaw. 34 Kanmu mata ti pinagkasulu sa kanmu bilug. Nu malinaw kanmu pamantay lubus marayaw ti buu nimu bilug. Dapat nu madulum kanmu pamantay, lubus madulum ti buu nimu bilug. 35 Nakan ngani pag-aman kawu barang kanmu pagsarigan pag karayawan tunda ngap madlum. 36 Nakan nu lubus marayaw ti buu nimu bilug ag udyi may patakip lunsay yi marayaw gid, parihu kawu ga sa atubangan sulu magkarayawan." 37 Pagka nag-apas si Hisus kay paliwanag, tinaban siya usa ka Parisiyu manyabas yi sida. Nakan nagsaka siya tinmukaw sa puun lamak. 38 Pagka nakitan Parisiyu unman nangugas kamang si Hisus bag-u magkaun, nadulaw siya. 39 Sinabi Panginuun sa kanya, "Kamu pag manga Parisiyu kanyu pag-ugasan ti habig lang taya manga ungut. Dapat sa kanyu sulud bilug punu kamu kalukuhan kadautan. 40 Ga ud may namuangan baga kamu. Unman aw Diyus ti nagbuwat kay bilug hanggan sa sulud bilug? 41 Kailangan ipakaun niyu sa manga pugri kay sukad niyu manga taya bag-u udyi may daut sa kanyu surundanun. 42 "Dapat anung kaawaawa kamu pag manga Parisiyu, dahil kamu magpakaun ikasampulu manga pamanglu sa upi hanggan tanan manga urupiun, dapat kanyu kinalimtan ngap ti katadlungan hanggan ti pagmahal sa Diyus. Kailangan kanyu tupadun ti katadlungan hanggan ti pagmahal sa Diyus, dapat danga waydi paglimti ti manga ikasampulu, pagpakaun di. 43 "Anung kaawaawa kamu pag manga Parisiyu. Dahil kanyu pagkaibgan ti manga marinu gid pag tukawan sa sulud balay tiripnan ag kanyu diman gustu kamu paggalangun manga tawu sa palingki. 44 Anung kaawaawa kamu, dahil kamu parihu sa manga lubung unman may tanda. Pagtat-an manga tawu unman nida alam lubung maaw." 45 Ti usa ka Manugtudlu Kasuguan nagsabi sa kan Hisus magkun, "Maisturu, sa kanmu sinabi kis-ab duy kami hanggan nahaplitan." 46 Magkun si Hisus, "Anung kaawaawa kamu diman pag manga Manugtudlu Kasuguan, dahil ipagpapas-an niyu sa manga tawu ti manga mabuyat pag dararan-un udyi maraug. Dapat una kanyu ituturu unman niyu pag-iantabay sa manga mabuyat dararan-un. 47 Kaawaawa kamu dahil kamu tigparinu sa manga lubung purupita minatay niyu manga ginurang. 48 Siti pag mag-akitan kamu magpaangay diman waydi sa binwat daut niyu manga ginurang. Dahil kanda minatay ti manga purupita ati kaybi bag-u kamu tigbuwat parinu sa kanda manga lubung. 49 Nakan ngani magkun ti kadunungan Diyus, 'Sumugu aku manga purupita, manga manugtudlu sa kanda. Ti iba kanda matyun, kay iba unuunuhun.' 50 "Nakan mitama gid sa inda pag manga tinubu tawu ti kaparusahan tungkul sa tanan purupita minatay ginan waya sa kabag-u pagkalalang kalibutan, 51 ginan sa pagkamatay ni Abil hanggan waya sa pagkamatay ni Sakaryas. Minatay si Sakaryas karaw-an sugkadan balay Diyus arani sa surunugan panagda tag sa Diyus. Ungud duy kang sinabi sa kanyu mitama gid tunda sa inda pag manga tinubu tawu. 52 "Kaawaawa kamu, ti pinakamadunung sa Kasuguan, dahil inirangan niyu ti susi ti magbukas sa kadunungan, kamu dayu magsulud, kanyu pag-amparahun waya ti manga magkaibug magsulud." 53 Naglakaw si Hisus siyun gin pag balay. Ati ginan ti manga Manugtudlu Kasuguan hanggan manga Parisiyu magkadaut yi masyadu mag-away sa kanya. Mayamu kanda manga paingana sa kanya. 54 Kanda yi mana pagpasalanun sa kay magsagut.
1 Nagtiripun ti mayamu pag linibu tawu, nanarat-an yi dahil sa kayamuan. Nag-umpisa si Hisus magbagaw sa kay manga tuludluan dapu magkun, "Pag-aman kamu sa magpabalhinguun manga Parisiyu, parihu ga pamadaka sa tinapay kay ugali. 2 Unman may bagay milihim nu unman mihayag di gid aban. Unman may bagay mitagu nu unman mabulwat di aban. 3 Nakan ngani una hintay kanyu sinabi sa basad madlum madnugan di aban sa marayaw. Ti manga iyinanas niyu sa suludsulud itawag aban gin sa maalantaw." 4 Magkun si Hisus, "Pagsabihun niku sa kanyu duy sa manga kaibahan niku, danga niyu kadalai ti manga magmatay sa bilug. Nu sida nakamatay yi, udyi sida may mabuwat. 5 Dapat kang ipakilala sa kanyu nu sitapu ti kanyu kailangan pagkadalaan. Ti kanyu kadalaan ti Diyus gid. Dahil nu minatay niya ti usa ka tawu, may kapangyarihan siya hampay kay iyamut waya sa impirnu. Tutuu kang pagsabihun sa kanyu kailangan kamu pagkadala gid sa kanya. 6 "Unman aw ipagpabili nida ti lima ka maya sa duwa ka sintimus? Dapat una lang usa ka maya balaw malimtan, mag-akitan di Diyus. 7 Una paman kanyu buhuk nabilang yi tanan. Nakan ngani danga kamu magkadala. Kamu mahalaga man sa mayamu pag maya." 8 Sinabi ni Hisus magkun, "Dapat pagsabihun niku sa kanyu, una si unu ti maggalang sa kangku sa atubangan manga tawu, kilalan-un diman siya Anak Tawu sa atubangan manga anghil Diyus. 9 Dapat ti magtanggi sa kangku sa atubangan manga tawu, itanggi diman waydi siya Anak Tawu sa atubangan manga anghil Diyus. 10 "Una si unu ti bumagaw laban sa Anak Tawu may patawad di. Dapat ti tawu nu maglapastangan laban sa Ispiritu Banal balaw yi patawadun. 11 Nu kamu darahun sa balay tiripnan hampay bistahun una sa atubangan manga Pinunu una sa atubangan manga gubirnadur, danga kamu magkakuri nu kabitay ti isagut, nu hintay kanyu sabihun. 12 Dahil itudlu Ispiritu Banal sa kanyu sa ati katpung ti dapat niyu sabihun." 13 May usa ka tawu sa kayamuan naghampang sa kan Hisus magkun, "Maisturu, paanyua duy nimu kang patar-ari aku hurayi kanmi ama yaman." 14 Dapat sinabi ni Hisus sa kanya, "Duy, si unu nguna ti nagpakaun karampatan sa kangku hampay magpaanyu mag-ayaw-ayaw kanyu ginurang sangkap?" 15 Bag-u sinabi niya sa kanda, "Pag-ingat gid kamu, pag-aman kamu agud kanyu tagipusuun unman maramuun. Dahil ti tawu balaw kumakit buhi nu sa abunda lang pag kasiyunan." 16 Itinultul ni Hisus sa kanda ti usa ka pahalimbawa magkun, "May tawu mayaman daka gid kay tubas. 17 Inisip niya sa kay sadili, hintay kang buwatun, dahil unman yi may paulian aku kang inani. 18 Bag-u magkun siya, kainda kang buwatun, dautun yi lang niku kang manga daan balay butangan bag-u buwatun niku utru manga daka man sa siti. Ti tanan niku inani isukad maan niku siti hanggan kang manga butang. 19 Bag-u sumabi sa kang sadili bilug, mayamu yi kang kasiyunan kinarinu sa kang butangan, kang-ud sa mayamu pag timpu. Magpahari aku kang bilug, kumaun, uminum, magbaya waya aku. 20 Dapat kay sabi Diyus sa kanya, 'Kawu pag tawu ga ud may namuangan. Sab yabi bul-un yi niku kam buhi. Kanmu itinigana hamnu kantapu yi nguna aban tida?' " 21 Magkun si Hisus, "Katunda ngani ti mangyari sa tawu nu magpakatipun kayamanan sa kay lang sadili bag-u nu sa kay magbantay Diyus ga pugri lang pag tawu." 22 Sinabi ni Hisus sa kay manga tuludluan magkun, "Nakan ngani magkun aku sa kanyu, danga kamu magkaaburidu sa kanyu pangabuhi nu hintay kanyu kan-un, una sa kanyu bilug nu hintay kanyu irutay. 23 Dahil ti buhi balaw lang ga sa karan-unun, ti bilug balaw lang ga rutay kay kahalaga. 24 Isipa niyu ti manga uwak. Unman sida magpamgas, unman mag-ilamun, unman may muug, una balay haramnuan. Dapat sida pag-alagaan Diyus. Kamu lalu mahalaga man sa manuk. 25 Una magpakaaburidu ti tawu unman makapadugay kay buhi una lang usa ka udas. 26 Una diit lang pag bagay nu dayu mabuwat niyu, hayga lugud aburidu kamu sa manga iba bagay? 27 Isipa niyu ti manga bulaklak nu kabitay kay magdaka, unman sida magka-budlay, unman diman magtahi kanda rutay. Dapat kang pagsabihun sa kanyu, una paman si Sulumun unman makasulung magilanggilang parihu sa busang ilamnun madi masyadu marinu kay manga rutay niya. 28 Ti kugun pinasulungan Diyus ga rutay malatuy. Nu kainda ay buhi sa bantud, aldaw bay ipagba yi sa sapyaan. Unman aw lalu gid pihu kamu pakan-an niya rutay. Hayga lugud diit lang kanyu pagsarig sa Diyus? 29 Danga magkaaburidu kanyu naisipan sa kanyu paghanap karan-unun hanggan kanyu danum. 30 Dahil tunda pag manga bagay pagkaaburiduhan manga tawu unman magpasakup sa Diyus. Magkaalaman kabay niyu Ama kamu may kailangan tunda pag manga bagay. 31 Una una sa tanan, pag-ipilit niyu kanyu sadili ipasakup lubus sa kay paghari Diyus, bag-u kanyu pangangailangan ipakaun niya sa kanyu." 32 Sinabi ni Hisus magkun, "Danga kamu magkadala una kamu ga balaw mayamu, dahil kay ibug ngapu niyu Ama iintirga sa kanyu ti kaharian. 33 Ipabili niyu kanyu manga kasiyunan bag-u pagpakaun sa manga pugri kay kabilyanan. Pag-alistu kamu kanyu sukluban balaw magkadaut, tipunun niyu kanyu kayamanan sa langit. Ati unman mabawas ti kayamanan, una mananakaw, una tipakung dayu gumaraw. 34 Dahil nu naan kanyu kayamanan, ati diman waydi kanyu isip." 35 Magkun si Hisus, "Paghawuda kanyu rutay sa unman masambur sa magtarabahu, pagmasnag kanyu manga sulu. 36 Parihu sa manga tawu mag-alagad sa kanda amu mag-uli ginan sa karan-an sa pamasaruhan. Nu Rumas-ug siya tuma-ragham lang, rargu bukasan nida ti sabian. 37 Mahal ti manga panawuhun naras-ugan nida amu, nu maimatahan di sida mag-alagad. Ungud gid kang sabi sa kanyu, humawud ngap kanda amu kay rutay sa unman masambur bag-u pagtabanun niya sida sa lamak, siya yi ti manugbasiyu. 38 Masulung tunda pag manga panawuhun nu sida ras-ugan nida amu maimatahan di mag-alagad una karaw-an yabi, una tag magkasurip. 39 "Dapat isipun niyu inda, nu abi naalaman lang may puun balay nu kapira pag Rumas-ug ti mananakaw, balaw mana pabay-anan niya ipatakaw kay butang sa balay. 40 Nakan ngani kailangan pirmi kamu alistu dahil Rumas-ug ti Anak Tawu nu katpung udyi kanyu pag-isipun." 41 Sinabi ni Pidru magkun, "Panginuun, ti kanmu binagaw pahalimbawa ngatay sa kanmi lang ngatay sa tanan tawu?" 42 Sinmagut ti Panginuun magkun, "Ti panawuhun nu matinupadun ag mapininsaran imaw ti pagpiyaran niya amu hampay pakan-an niya karan-unun kay kaparihu manga panawuhun may bahaw may yabas may yapun. 43 Masulung tunda pag panawuhun pagka naras-ugan siya magtupad sa kay buruwatun sa kay pagbalik niya amu. 44 Kang pagsabihun sa kanyu, iintirga niya amu sa kanya ti tanan kasiyunan. 45 Dapat nu alangan tunda pag panawuhun umisip siya sa kay sadili, dugay waya bag-u bumalik kang amu. Bag-u binakul yi niya ti manga panawuhun lalaki hanggan babayi bag-u nanginum may sumsuman siya. 46 Bumalik kay amu tag sa tunda pag panawuhun sa sirang unman pag-isipun niya kuntay Rumas-ug kay amu ati katpung ag sa udas unman niya naalaman. Bag-u barian yi siya sa parusa niya amu, iminsan lang siya sa unman manga masurundun. 47 Dahil ati pag panawuhun nakaalam sa kay amu daan bilin, dapat ay unman nag-alistu, unman diman naniwala sa kay bilin, nakan duru yi pagkabakul sa kanya. 48 Dapat ti unman nakaalam sa kay amu daan bilin, bag-u bumuwat siya daut kailangan siya bakulun, dapat balaw masyadu waydi kay bakul sa kanya. Nu mayamu ti ipinakaun sa usa ka tawu mayamu diman ti paghanapun sa kanya. Nu maslalu mayamu ti inintirga sa kanya, lalu diman ngap ti paghanapun sa kanya." 49 Magkun si Hisus, "Nagsitay aku hampay magdara apuy sitay tag sa daga, kang gustu lumabdab yi mana. 50 May paglakawan waya aku aban usa ka tulbaw. May kabuyatan gid aku sa kang tagipusuun hanggan sa udwaya matupad kang tulbaw. 51 Kanyu aw lugud pag-isipun aku nagsitay hampay magpakaun kahusayan sa babaw daga? Kang gid pagsabihun sa kanyu, bukun kahusayan, unman ngap, udyi magkarausa ti manga tawu. 52 Dahil taynguna ginan halimbawa sa usa ka magtal-anakan sida lima ka tawu udyi magkarausa, tulu lumaban sa duwa ag duwa lumaban waydi sa tulu. 53 Udyi sida magkarausa, ti ama lumaban sa anak lalaki, ti anak lalaki lumaban waydi sa kay ama. Ti ina lumaban sa kay anak babayi, ti anak babayi lumaban waydi sa kay ina. Ti manugang babayi lumaban sa kay umagad babayi, ti umagad babayi lumaban waydi sa kay rinas-ugan babayi." 54 Sinabi diman ni Hisus sa manga kayamuan magkun, "Nu makitan niyu ti rurum magtunggur sa abagatnan sumabi yi kamu, 'Magkauran yi,' ag dumayun ngap. 55 Nu makitan niyu ti durus maghuyup ginan sa salatan, sumabi kamu, 'Magbadbaray yi aban ti init,' ag dumayun ngap. 56 Mapinabalhinguun lang kamu. Madunung kamu magkilala sa manga histuda langit ag daga. Bati unman kamu nakaisip kay halaga kainda pag kaudasan." 57 Sinabi ni Hisus magkun, "Hayga unman kamu madunung magpili sa kanyu sadili buruwatun sa daut sa mayad? 58 Halimbawa nu may magdimanda laban sa kanmu sa atubangan husgadu, paghurusayan dapu kamu mintaras may rugar waya hanggan sa udwaya nakaaput sa husgadu. Barang karudkudun kawu nimu kalaban atag sa huwis, ipabahala kawu huwis atag sa pulis, bag-u pirisuhun kawu pulis. 59 Kang gid pagsabihun sa kanmu, unman gid kawu makalpas hanggan sa unman waya matabwan mabayadan nimu kam utang."
1 Ati katpung pag panahun may manga tawu siyun nagbarita sa kan Hisus tungkul sa manga taga Galiliya kan Pilatu lang linibun sa kanda katpung magsagda hayup minatay sa Diyus. 2 Bag-u sinabi ni Hisus magkun, "Barang kanyu isip nakan linibun sida dahil daka man kanda kasalanan sa tanan kaparihu nida ati sa Galiliya. 3 Bukun ay duy katida, dapat kang pagsabihun sa kanyu, nu unman iampu niyu kanyu manga kasalanan, ipapatawad sa Diyus, pihu midamhak diman waydi gid kamu tanan. 4 Hanggan ati pag sampulu may walu ka tawu nagpuan balay sa Silui namatay, barang kanyu isip daka man kanda kasalanan sa tanan kaparihu nida mag-uli sa Hirusalim. 5 Bukun ay duy, dapat pagsabihun niku sa kanyu, nu unman iampu niyu kanyu manga kasalanan, ipapatawad sa Diyus, pihu midamhak diman waydi gid kamu tanan." 6 Itinultul ni Hisus inda pag halimbawa magkun, "May tawu nagtanum usa ka puun igus ati sa kay ubasan. Pagka dugay kay dinuawan maghanap mana kay burak, dapat unman may nakitan. 7 Magkun kay apu tag sa manug-alaga ubasan, 'Malu ungud duy aku sa tulu ka timpu magpakasitay magpakahanap kay burak inda pag puun igus, dapat unman may mag-akitan. Pukana yi lang nimu. Sayang lang inda pag daga unman may pakinabang.' 8 Dapat magkun ti manug-alaga, 'Danga dapu duy taynguna pag timpu hanggan sa udwaya makalihan niku kay libut bag-u mapaulian abunu. 9 Nu mamurak inda aban sa usa ka timpu, mayad gid. Dapat nu unman bumurak mapukan diman ngani nimu inda.' " 10 Nagtudlu si Hisus ati sa usa ka balay tiripnan sa sirang pamahari. 11 Ati may usa ka babayi pinasakit labang kay awak dugay yi, sampulu may walu yi ka timpu. Baruktut siya unman makahunat kay awak. 12 Pagka nakitan ni Hisus, tinawagan siya ag sinabi ni Hisus sa kanya, "Linbadan yi duy kawu sa kanmu sakit." 13 Bag-u kinup-an niya manga kamang ti babayi, kadaka naghunat kay awak. Bag-u dinmayaw gid ti babayi sa Diyus. 14 Dapat ti manug-asikasu sa balay tiripnan nagalit ngap, dahil nagpaayad si Hisus katpung sirang pamahari. Kainda kay bilin manug-asikasu sa manga tawu magkun, "Sa sulud unum ka sirang kailangan magtarabahu ti manga tawu. Pagluwang kamu sa tunda pag manga sirang hampay kamu paayadun, danga gid sa sirang pamahari." 15 Dapat sinabi ngap Panginuun sa kanya magkun, "Kamu katna manga magpabalhinguun lang. Nu sirang pamahari unman aw ti kada usa sa kanyu maglubad kanyu manga higut baka una nangus asnu ginan sa kurumpayan hampay kanyu pagguyudun ipagpaslup sa danum? 16 Unman aw kailangan lugud sa sirang pamahari lubadan inda pag babayi kan Abraham linahi? Ginapus siya ni Satanas sa sulud sampulu may walu ka timpu kay kadugay." 17 Pagka sinabi niya inda nangay-a lang ti tanan niya manga kalaban. Nagbaya gid ti tanan tawu sa tanan pag makamaskihan binwat ni Hisus. 18 Sinabi ni Hisus, "Hintay ti kaparihu sa paghari Diyus, ag sa unu ipaparihu niku inda? 19 Kay paghari Diyus parihu sa usa ka butir mutsasa kay bin-ul usa ka tawu bag-u kay sinabug sa kay namay. Tinmubu ti butir mutsasa. Pagka dugay nagdaka nagbaliw ga puun kayu bag-u mag-apun ti manga manuk sa magkahamyan pag sanga." 20 Nagsabi di gid maan si Hisus, "Sa unu ipaparihu niku ti paghari Diyus? 21 Ti paghari Diyus parihu sa pamadaka sa tinapay, ilinahuk babayi sa tulu ka pulak arina bag-u naglabtug kay buu pinkul arina." 22 Nagparargu si Hisus sa kay lakaw atabug sa Hirusalim. Nanhapithapit nanudlu siya sa manga tawu sa manga banwa, sa manga baryu. 23 May tawu nagpaingana sa kanya, "Panginuun, pira pira lang aw ti maribri?" Sinabi ni Hisus sa kanda, 24 "Pagpilit kamu sa kanyu sadili hampay makaslud lakaw sa diit pag sabian. Dahil ungud gid kang pagsabihun sa kanyu, mayamu ti sumamit hampay sumulud dapat unman sida makaslud. 25 "Bigla tumindug ti may apu balay bag-u kay talakpan ti sabian, kamu bay matindugan lang sa luwas sabian mag-ayawun tag sa sulud magkun, 'Panginuun, bukasi yi duy ti sabian.' Sumabi siya sa kanyu, 'Unman aku magkilala sa kanyu nu taga naan kamu.' 26 Bag-u sumabi kamu, 'Nagkaun nag-inum kami sa kanmu atubangan. Nagtudlu kawu sa manga tawu sa kanmi manga karsada.' 27 Dapat sumabi dimaan gid siya, 'Kang pagsabihun sa kanyu unman aku magkilala sa kanyu nu taga naan kamu. Danga yi kamu sitay, pagpakarayu yi kamu sa kangku, kamu tanan pag manga manugbuwat kasalanan.' 28 Ati mamiyak kamu aban, mangubut gid kanyu manga ngipun, nu makakit kamu sa kanda ni Abraham, ni Isaak, ni Hakub hanggan ti tanan manga purupita ati sa kaharian Diyus, kamu bay anung sa luwas di. 29 Rumas-ug ti manga tawu ginan sa butlakan init hanggan isalpan init, ginan sa salatan hanggan sa kanaway, dumulud sa karan-an sa kaharian Diyus. 30 Malu, may manga natayak umuna ngap ag may manga nag-una matayak ngap." 31 Ati katpung pag udas may rinmas-ug manga Parisiyu nagsabi sa kan Hisus magkun, "Pag-ighit yi kawu sitay ginan, dahil pagkaibgan ni Hirudis kawu kay matyun." 32 Sinabi ni Hisus magkun, "Si Hirudis katna ga simarun idu kay ugali. Pag-ati kamu sa kanya sabihun niyu, magpaluwas aku manga labang, magpaayad aku taynguna hanggan aldaw sa may manga sakit, makadwa bay tapusun yi niku kang tarabahu. 33 Dapat kailangan magparargu kang lakaw kainda ginan hanggan aldaw tugka sa makadwa dahil balaw mahimu ti usa ka purupita matyun nu unman sa banwa gid Hirusalim. 34 "Hirusalim, Hirusalim, pagpanmatyun nimu ti manga purupita, pagbatuhun pagmatyun nimu ti manga sinugu Diyus tag sa kanmu. Kapira yi ginan kang hinanap ti manga mag-uli asan hampay kang tipunun parihu ga inaan manuk mag-ukub sa kay butu, dapat dayu di ngap kamu. 35 Bantayi niyu ti balay Diyus asan tinayakan yi, udyi mag-uli asan kay apu. Pagsabihun niku sa kanyu udyi gid niyu aku makitan hanggan sa udwaya Rumas-ug pag udas nu kanyu sabihun magkun, 'Dayawun ti magras-ug sa ngaran Panginuun.' "
1 Pagka sa sirang pamahari bin-ul si Hisus usa ka pinunu manga Pasiriyu hampay mangaun. Pagka sinmaka siya sa balay kanda pagsulayun. 2 May nagluwang tag sa kan Hisus usa ka lalaki magkarabaga kay kamang kay manga lulud. 3 Nagpaingana si Hisus sa manga Manugtudlu Kasuguan hanggan sa manga Parisiyu magkun, "Angay aw sa Kasuguan aw ngatay unman nu magpaayad sa may manga sakit nu sirang pamahari?" 4 Dapat sida udyi ngap inmingay. Nakan hiniyaptan ni Hisus ti may sakit ag pinaayad niya. Bag-u sinbi ni Hisus sa kanya, "Ta duy, pag-uli yi kawu." 5 Bag-u sinabi ni Hisus sa kanda, "Si unu nguna sa kanyu ti balaw mamawi sa kay anak lalaki una sa kay tudu baka nu abi nalagpak sa kali nu sirang pamahari?" 6 Udyi nakasagut sida. 7 May tinaban waya iba tunda pag Parisiyu tag sa kay balay hampay mangaun. Pagka nakitan ni Hisus kanda pagpiliun ti manga mahal pag tukawan, itinultul niya sa kanda ti usa ka pahalimbawa magkun, 8 "Nu ban-awun kawu una hintay pag tawu atag sa pamasaruhan, danga kamu magtukaw sa mayad pag tukawan, barang may binan-awan waya siya lalu man mataas sa kanmu. 9 Dumulud ti apu may pamasaruhan tag sa kanmu hanggan tag sa kanya bag-u sumabi siya sa kanmu magkun, 'Pagtindug duy kawu hampay siya maan ti tumukaw sitay.' Bag-u mangay-a yi lang kawu, miuli kawu sa basta basta pag tukawan. 10 Nu kawu ban-awun tag sa karan-an, pag-ati yi kawu pagtukaw sa basta basta pag tukawan hampay nu Rumas-ug sab ti nagban-aw sa kanmu, sumabi siya sa kanmu magkun, 'Sitay duy kawu sa mayad pag tukawan.' Nu katida may kadayawan yi kawu sa atubangan tanan manga kasaru nimu sa karan-an. 11 Dahil ti kada magpalabawlabaw miuli sa unman may kabuluhan. Ag ti magpakumbaba siya yi ngap ti pagkilalan-un kuntay mayad siya pag tawu." 12 Sinabi diman ni Hisus sa nagban-aw sa kanya pag Parisiyu magkun, "Nu kawu mag-alistu yabas, ngatay yapun, danga ban-awun nimu tag sa karan-an kanmu manga kakilala, una kanmu manga patar-ari, una kanmu manga katawuhan, una kanmu kamalay manga mayaman. Barang kawu maan ti ban-awun nida ag balusan kawu karan-an. 13 Dapat nu maghanda kawu karan-an, ban-awun nimu ti manga pugri, ti manga may pungkul, ti manga pilay hanggan ti manga buta. 14 Kawu papaladan gid Diyus dahil unman sida may kang-ud ibalus sa kanmu. Balusan kawu aban Diyus sa katpung pagkabuhi uman manga magpasakup sa kanya." 15 Pagka nadnugan inda usa ka kasaru ni Hisus sa karan-an, magkun siya sa kan Hisus, "Masulung ti manga kumaun sa karan-an sa kaharian Diyus." 16 Bag-u sinabi ni Hisus sa kanya magkun, "May usa ka tawu naghanda daka pagka yapun. Mayamu kay pinaalaman. 17 Pagka katpung yi manyapun sinugu niya kay panawuhun hampay ban-awan ti manga pinaalaman magkun, 'Kamu pagluwang yi, dahil manhayin yi.' 18 Dapat sida tanan bilang ga nagkaraminsan kanda naisipan naningyanan. Ti usa nagsabi sa panawuhun magkun, 'May binili aku daga, kailangan aku umatag kang duawan. Una aku balaw asan, bukun may daut.' 19 Magkun maan ti usa ka tawu, 'May binili aku sampulu ka tudu baka, atabug dapu aku hampay samitan iaradu. Una aku balaw asan, bukun may daut.' 20 Magkun ti usa, 'Bag-u waya aku nangasawa, nakan ngani balaw aku makaasan tag.' 21 Nuli maan ti panawuhun itinultul sa kay amu kanda manga singyanan. Bag-u nadaut gid ti may puun balay, magkun sa kay panawuhun, 'Pag-ati kawu kadali sa manga karsada hanggan sa manga dalan dariit sa banwa, tabana nimu sitay tag ti manga pugri, ti manga may pungkul, ti manga buta hanggan ti manga pilay.' 22 Pagka nuli maan ti panawuhun magkun siya, 'Duy, binwat yi niku kanmu sinabi dapat may imaw waya udwaya naaduhan.' 23 Sinabi niya amu sa kay panawuhun, 'Pag-atag kawu sa dalan hanggan sa manga sugkadan balay, pilita gid ti manga tawu pagsaka gid sida hampay mapnu kang balay. 24 Dahil pagsabihun niku sa kanyu, ti tanan tawu kang pinaalaman sa kabag-u unman nagluwang, unman makasamit kang yapun.' " 25 Kinmuyug sa kan Hisus ti lalu mayamu pag tawu. Bag-u napasrangu siya atag sa kay manga kaibahan magkun, 26 "Una si unu pag tawu ti pumakarani sa kangku dayu mahimu kang tuludluan, nu ipalabi niya kay ina hanggan kay ama, kay asawa, kay manga anak hanggan kay patar-ari lalaki, manga patar-ari babayi, una kay sadili kagustuhan. 27 Nu ti tawu unman magpas-an kay sadili pag kurus ag kumuyug sa kangku, balaw mahimu tuludluan niku. 28 "Nu ti usa sa kanyu may gustu magbuwat balay daka, tumukaw dapu siya isipun niya ngatay kumang-ud kay panggastus hanggan tugka sa mamhan kay balay. 29 Barang nu inalistu niya ti paratukawan tulduk bag-u unman mamhan ti balay, ti tanan nakakit maglibak yi sa kanya, 30 magkun, 'Nag-umpisa nagbuwat siya balay dapat unman nakakamhan siya, kurang yi sa gastus.' 31 Una hintay pag hari nu sumulang dumugma sa gira sa kaparihu hari, tumukaw dap bag-u kay karkulahun ngatay makaatubang siya may sampulu ka libu sundalu sa kalaban niya nu umaput may duwapulu ka libu. 32 Nu unman siya pumanghas, pumasugu siya atag sa kalaban nu arayu waya hampay magkarasunduan lang sida. 33 Katunda diman una si unu sa kanyu balaw mahimu kang tuludluan nu pagpahalgaan waya niya ti tanan niya kahamtangan." 34 Magkun si Hisus, "Mayad ti asin, dapat nu tumab-ang ti asin, unman yi may ipapait, 35 udyi may gana una sa daga una sa rayamtan yagting bulul-an abunu, nakan iyamut yi lang sa luwas. Ti may tuli kailangan pagpatingi."
1 Nagpakarani sa kan Hisus ti manga manunukut buhis hanggan manga makasalanan pag tawu hampay mamatingi sa kay bagaw. 2 Ti manga Parisiyu hanggan manga Manugtudlu Kasuguan nanrayansan magkun, "Inda pag tawu maaw matinanggapun sa manga makasalanan ag magsaru sa kanda." 3 Nakan nagbagaw si Hisus pinaanyuan sida sa palimbayan pag tultulanun. 4 Magkun si Hisus, "Halimbawa ti usa sa kanyu may karanidu usa ka gatus bag-u naparaw kay usa ka bilug. Unman aw lugud tayakan niya ti siyampulu may siyam ka karanidu sa pangawakawaan hampay hanapun niya tunda pag nadura hanggan sa ud makitan? 5 Pagka nakitan niya, kay pinas-an sa kay labay, magbaya gid siya sa kay naisipan, nakitan maan niya kay hayup. 6 Pagka nuli siya sa kay ulian, kay tipunun niya kay manga kakilala hanggan kay manga kamalay magkun sa kanda, 'Pagmasulung gid duy kita tanan, dahil nakitan niku kang karanidu nalyam, inda yi maan.' " 7 Magkun si Hisus, "Kang sabi sa kanyu, katunda diman may magbaya sa langit nu may usa ka tawu nag-ampu kay kasalanan bag-u naghagad kapatawadan sa Diyus. Lalu pagbayaun tunda sa siyampulu may siyam ka tawu kanda hantup unman may kasalanan sida iampu sa Diyus." 8 Sinabi maan ni Hisus, "Ti babayi nu may sampulu ka bilug unsita bag-u nu may nadura usa ka bilug, pihu sumulu siya kay duag bag-u parisun gid kay balay ligawun gid niya mayad kay unsita hanggan sa ud makitan. 9 Pagka nakitan niya, kay tipunun niya kay manga kakilala hanggan kay manga kamalay magkun sa kanda, 'Pagpaminsan dapu kamu sa kangku pagbaya gid kita tanan dahil nakitan yi maan niku ti usa ka bilug unsita nalyam.' " 10 Magkun si Hisus, "Kang sabi sa kanyu katunda diman waydi magbaya ti manga anghil Diyus nu may usa ka tawu nag-ampu kay kasalanan bag-u naghagad kapatawadan sa Diyus." 11 Sinabi ni Hisus magkun, "May usa ka tawu duwa kay anak lalaki. 12 Magkun ti kap-usan sa kay ama, 'Amang, pakan-i duy yi nimu aku kainda yi ti para sa kangku pag bahagi nimu kayamanan.' Binahagi yi ngani nida ama sa kanda kay kasiyunan. 13 "Balaw yi dinmugay, tunda pag anak kap-usan nagpabili kay daga bag-u tinabu dinara kay kayamanan, rargu yi naglakaw tag sa arayu pag daga. Pagka ati ginastus lang niya kay kuwarta sa unman may kabuluhan. 14 Pagka tinabu ginastus yi niya tanan tanan, malun-us paman masyadu ati pag daga bag-u nagipit siya masyadu. 15 Nag-atag siya napasakup sa usa ka tawu taga siyun pag daga. Bag-u sinugu yi ngani siya tag sa kugun hampay mangalaga babuy ati. 16 Kay gustu mana mabsug kay tiyan manga burak kayu pamahug babuy. Dapat unman may namakaun sa kanya. 17 "Dapat pagka siya nakaimatuun sa kay kahamtangan, kay inisip sa kay sadili magkun, makuri inda. Malu, mayamu pag suruguun suluhulan niku ama ati may kang-ud, subra waya kanda karan-unun, aku bay ga masbuk yi sitay sa lun-us. 18 Tumindug yi aku tag yi sa kang ama. Nu ati yi sumabi aku sa kanya, Amang, aku nagkasala laban sa Diyus hanggan sa kanmu atubangan. 19 Kumumun aku, danga yi aku pagsabiha anak, nu unman ipaparihu yi lang nimu aku sa kanmu iba manga suruguun. 20 "Linmakaw yi ngani siya nag-ati sa kay ama. Pagka arayu waya nabantay yi siya niya ama. Pagka nabantay naawa gid kay ama, sinulang niya kay anak palagiw gid, kay hinagkung bag-u kay inarkan. 21 Magkun ti anak sa kay ama, 'Amang, aku duy nagkasala laban sa Diyus hanggan sa kanmu atubangan. Danga yi duy aku pagsabiha anak nimu.' 22 Dapat magkun kay ama sa kay manga panawuhun, 'Dali bul-a ati pag rutay ti mayad gid sa tanan kanyu ipasulunug sa kanya bag-u bugtangi singsing kay kamang hanggan manga lapak sa kay lulud. 23 Bul-a niyu kanta pinatabul pag ibun baka iyawa niyu bag-u kita mangaun hampay masulung gid. 24 Dahil sitay kang anak tigbak, dapat nabuhi uman. Kabag-u nadura, dapat nakitan maan.' Nakan nagbaya gid sida. 25 "Ati katpung kay anak panganay ati di sa kay tanman. Sa kay mag-uli pagka arani yi sa balay, nadnugan niya kanda manga giritarahan hanggan sayawan. 26 Pagka nakitan niya ti usa ka panawuhun, magkun siya, 'Abala dapu.' Bag-u pinaingana niya nu hayga masulung asan. 27 Sinabi panawuhun sa kanya magkun, 'Nakan masulung, nuli yi duy kam ari. Iniyaw nimu ama tunda pag pinatabul pag ibun baka, dahil tinanggap yi maan niya kay anak balaw may hintay mayad diman siya.' 28 "Pagka naalaman panganay, nagalit siya, dayu gid sumaka. Nagluwas ngap kay ama hampay maghampang sa kay anak panganay. 29 Dapat sinabi niya anak magkun, 'Malu, dugay yi pag timpu aku magsirbi sa kanmu ag una kapira aku unman naglaban sa kanmu manga sugu, dapat aku unman pinakan-an nimu una lang usa ka anak kambing hampay mana masulung nu may iyaw aku hanggan kang manga kakilala. 30 Dapat taynguna nuli yi kam anak, imaw yi ti nagtabu kanmu manga kasiyunan, ginastus sa manga panguragin unman may kabuluhan, hayga waya gid kanmu iniyawan pinatabul pag ibun baka?' 31 "Magkun kay ama sa kanya, 'Anak, kawu pirmi diman sa kangku pag mag-uli. Inda pag kasiyunan kanmu yi pag kabahagi tanan tanan. 32 Dapat kailangan kita magbaya gid ag masulung lubus, dahil sitay tigbak kanmu ari ag taynguna buhi yi maan. Sitay nadura ag kainda nakitan maan.' "
1 Sinabi maan ni Hisus sa kay manga tuludluan, "May usa ka tawu mayaman, inintirga niya kay kayamanan sa usa ka katiwala. Pagka dugay nagras-ug sa kay amu ti sumbung maparasipalahun kunu pag katiwala. 2 Tinawag niya amu kay katiwala bag-u kay pinaingana, 'Hintay inda duy kang nabaritaan tungkul sa kanmu? Tultula mayad mayad kanta kayamanan naan yi duy, dahil udyi kawu mahimu mag-alaga.' 3 "Nag-isip ti katiwala sa kay sadili bilug magkun, hintay nguna kang buwatun, dahil bul-un yi niku amu taynguna sa kangku ginan kang katungkulan. Aku unman may kaya magkali manga kanal. Magkay-a waydi aku maghagad maghagad. 4 Alam yi niku kang buwatun hampay tanggapun aku manga tawu sa kanda manga balay nu udyi aku katiwala. 5 Nakan tinawag niya tigus-a tigus-a ti manga may utang sa kay amu. Pinaingana niya sa tawu un-an nagluwang magkun, 'Kabitay kay kadaka kanmu utang sa kang amu?' 6 Magkun siya, 'Usa ka gatus pulak langis duy.' Sinabi katiwala sa kanya, 'Inda ti risibu nimu utang, dali pagtukaw kawu, isurat nimu, limangpulu ka pulak.' 7 Sinabi maan katiwala sa kay ikadwa magkun, 'Pira waydi duy kanmu pag utang?' Magkun siya, 'Usa ka gatus ka pasung tirigu.' Sinabi katiwala magkun, 'Inda duy ti risibu nimu utang, isurat nimu walumpulu ka pasung.' 8 "Nagdayaw kay amu sa tunda pag katiwala maradaya, dahil madunung siya sa paraan. Dahil ti manga tawu taga kalibutan masyadu gid madunung magparaan sa kanda magpasundu sa kanda manga kaparihu, subra man sida madunung sa manga tawu narayawan Panginuun." 9 Magkun si Hisus, "Pagsabihun gid niku sa kanyu, gamitun niyu kanyu kayamanan sitay sa babaw daga hampay kamu may kakilala mayad. Nu tabu yi kanyu kayamanan, tanggapun di nida kamu sa ulian unman may katapusan. 10 "Ti tawu nu unman mapinasipalahun sa manga diit pag bagay, lalu yi sa daka pag bagay balaw ngap pumasipala. Nu siya maradaya sa diit pag bagay, dumaya diman siya una sa daka pag bagay. 11 Nakan nu kamu mapinasipalahun sa kayamanan sitay sa babaw daga, hintay ti pumaintirga sa kanyu tutuu pag kayamanan? 12 Nu kamu mapinasipalahun sa tawu kasiyunan, hintay waya ti mamarti sa kanyu? 13 "Unman may panawuhun makasirbi sa duwa ka amu, dahil kagalitan niya ti usa ag mahalun kay ikadwa. Masurundun siya sa kay usa ka amu, pabayabaya siya sa usa ka amu. Dayu madungan masirbihan niyu ti Diyus hanggan kayamanan." 14 Inda pag manga adal tanan tanan nadnugan manga Parisiyu manga maraibgun sa kuwarta. Nakan linibak nida si Hisus. 15 Dapat sinabi ni Hisus sa kanda magkun, "Kamu magpabalhinguun lang sa atubangan manga tawu, dapat alam di gid Diyus kanyu manga tagipusuun. Dahil ti pagpahalgahan manga tawu, masyadu ngap minus nu sa kay magbantay Diyus. 16 "Ti Kasuguan ni Muysis hanggan ti Kasuratan manga Purupita tugka lang sa kan Huwan Manugtulbaw. Siyun ginan pag-itudlu yi ti Mayad pag Barita tungkul sa kay paghari Diyus. Magpilit ti kada tawu hampay makapasakup siya sa kay paghari Diyus. 17 Dapat ti Kasuguan marig-un man sa inda pag langit ag daga, dayu maduraan kabuluhan una di usa ka kudlit Kasuguan. 18 "Ti kada lalaki nu tumayak sa kay asawa bag-u umasawa sa iba, siya magpanguragin. Ag ti mangasawa sa babayi tinayakan lalaki, siya diman magpanguragin waydi." 19 Sinabi ni Hisus magkun, "May usa ngani ka tawu mayaman, kay rutay parihu sa rutay manga hari kay pagkarinu, masyadu gid marinu. Subra gid sa kanya kay karan-unun sirang sirang. 20 May usa waydi ka tawu kay ngaran si Lasaru, pasay garisgarisun kay bilug, ipagpauli sirang sirang ati sa puun sabian balay mayaman hampay manhagad kay pangailangan ati. 21 Magkaibug mangaun siya tunda pag manga inuyang ginan sa nagkan-an mayaman. Siyun diman ti manga idu sa kay arani maghimud sa kay manga garis. 22 "Pagka dugay namatay yi ngani ti may kakurian pag tawu si Lasaru bag-u siya dinara manga anghil tag sa kan Abraham arani. 23 Hanggan ti mayaman namatay waydi, nag-agwanta siya sa masyadu pag kakurian. Bag-u nagbantay siya, nakitan niya ati sa arayu si Abraham hanggan si Lasaru sa kan Abraham arani. 24 Nagtawag siya magkun, 'Amang Abraham, kaawai yi aku, sugua nimu si Lasaru hampay itulsuk kay suru ituturu sa danum isubu sa kang dila agud Rumamig, dahil aku magkakuri sitay sa karaw-an apuy.' 25 "Dapat magkun si Abraham, 'Anak, isipa dapu nimu. Kawu nu sa babaw waya daga, kanmu nakitan kanmu hinanap pag manga kaayadan. Si Lasaru nu sa babaw waya daga nalakawan yi niya ti kakurian sa kay bilug. Dapat taynguna pinakan-an siya kaayadan sitay, kawu maan ti sa makuri. 26 May yangpas paman daka sa kanta tab-anan ginan sa kanmi tag sa kanyu. Nakan una may magkaibug mana dumipay dayu mahimu, una sitay ginan asan tabug, una asan ginan sitay tabug.' 27 "Magkun maan ti mayaman, 'Magsuyu maan aku sa kanmu, Amang, sugua nimu si Lasaru tag sa balay niku ama. 28 Dahil may lima waya ka patar-ari lalaki. Sabihi niya sida tungkul sa kanmi kahamtangan atay, barang sida sitay tabug waydi sa rugar kakurian.' 29 Dapat magkun si Abraham, 'Sa kanda diman ti Kasuratan ni Muysis hanggan manga purupita. Bahala yi sida magpaniwala ati.' 30 Magkun ti mayaman, 'Balaw Amang Abraham, dapat umampu gid sida sa kanda manga kasalanan sa Diyus nu may mabuhi maan ginan sa kamatayan bag-u umati sa kanda.' 31 Magkun si Abraham sa kanya, 'Nu unman nida paniwalaan ti Kasuratan ni Muysis hanggan manga purupita, dayu diman sida maniwala una may mabuhi uman ginan sa kamatayan.' "
1 Sinabi ni Hisus sa kay tuludluan magkun, "Pihu gid mangyari tigpaturun tag sa kasalanan dapat madala gid masyadu kay patabgan tawu nu siya ti nagpaturun tag sa kasalanan. 2 Ti mayad waya pag tawu nu higtan bitinan galingan batu kay liug bag-u ilagpak sa abasad pag dagat, sa ud pumaturun siya atag sa kasalanan sa usa sa inda pag manga mapinakumbabaun magsarig sa kangku. 3 Pagdahan kamu. "Nu magkasala kanmu patar-ari tamyawa siya bag-u nu iampu niya kay kasalanan, patawadun nimu siya. 4 Nu magbuwat siya kasalanan sa kanmu pitu ka pag-ulit sa sulud usa ka sirang bag-u magpakarani siya sa kanmu pitu ka pagbalik magkun, 'Nag-ampu aku sa kang binwat kasalanan', kailangan gid duy patawadun nimu siya." 5 Sinabi manga tuludluan sa Panginuun magkun, "Dagdagan duy nimu kanmi sarig." 6 Sinabi maan Panginuun, "Nu kamu may sarig yi una di ga butir mutsasa kay kadaka, mahimu kamu magsabi sa inda pag puun sikumuru, 'Ayita nimu kanmu gamut sa daga bag-u pagpahalin tag sa dagat.' Pihu gid ti puun sikumuru pumaniwala sa kanyu bilin. 7 Sinabi ni Hisus, "Nu abi kamu may panawuhun mag-aradu ngatay mag-alaga sa manga karanidu, kamu dayu sumabi sa kanya pagka siya nuli ginan sa tanman, 'Abala yi kawu, mangaun yi.' 8 Bagkus ngap sabihun niyu sa kanya, 'Paggatung yi kawu kang yapun. Nu tama yi pag-ilis yi kawu, tawuha nimu hanggan sa udwaya aku makakaun makainum. Nu makatapus aku bag-u kawu maan ti pangaun pag-inum.' 9 Dayu waydi sumabi ti amu sa panawuhun, 'Salamat duy dahil binwat nimu ti tanan isinugu niku sa kanmu.' 10 Nakan katunda diman kamu nu tinabu sinunud yi niyu ti tanan pag isinugu sa kanyu, sabiha niyu, 'Unman nimu mapakinabangan kami pag manga panawuhun, dahil natupad lang waydi nimi ti dapat nimi buwatun.' " 11 Sa kay pag-atag ni Hisus sa Hirusalim nanunsun siya sa tab-anan Samarya manga Galiliya. 12 Sa kay magkaaput sa usa ka baryu, sinulang siya sampulu ka tawu may batas. Arayu waya si Hisus, nagpat-ung yi sida. 13 Nanawag sida daka magkun, "Hisus, Maisturu, ay duy kaawai gid nimu kami." 14 Pagka nakitan niya sida, sinabi ni Hisus sa kanda, "Pag-ati yi kamu pakakit sa manga manug-asiwa balay Diyus." Maglakaw di waya sida rargu naayadan kanda batas. 15 Ti usa sa kanda, pagka nakitan niya mayad yi maaw siya, nagbalik siya ainalsa kay dayaw sa Diyus. 16 Napadapa siya sa atubangan ni Hisus magpasalamat sa kanya. Usa ka taga Samarya siya pag tawu. 17 Sinabi ni Hisus magkun, "Unman aw sampulu ti naayadan kay batas? Dapat naan yi duy kay siyam? 18 Una di usa udyi aw may nagbalik nagdayaw sa Diyus nu ud ngap inda pag ginan sa iba daga?" 19 Magkun si Hisus sa kanya, "Pagtindug duy kawu, paglakaw yi lang. Naayadan kawu dahil sa kanmu pagsarig sa kangku." 20 Nagpaingana ti manga Parisiyu sa kan Hisus magkun, "Kapira nguna pag Rumas-ug ti kaharian Diyus?" Sinmagut siya magkun, "Ti kaharian Diyus balaw mag-akitan sa mata kay pagras-ug. 21 Unman masabi manga tawu, 'Tunda ay ngani', ngatay 'Ati ay'. Dahil nu sa ungud nag-umpisa yi naghari yi gid ti Diyus sa kanyu karaw-an." 22 Bag-u sinabi ni Hisus sa kay manga tuludluan magkun, "Aban pumatigagad yi gid kamu sa Anak Tawu hampay makitan niyu kay kaudasan. 23 Kanda aban sabihun sa kanyu, 'Tunda ay ngani,' ngatay, 'Ati ay.' Danga kamu umati, danga kamu magpaniwala sa kanda. 24 Dahil nu magkilat kabay magkarayawan ti langit baliw baliw. Katida waydi ti Anak Tawu sa kay kaudasan niya pagras-ug aban. 25 Dapat kailangan dapu mag-agwanta siya sa mayamu pag kakurian, ag pagdayuun siya niya kadungan pag manga tawu. 26 "Nu kabitay ti nangyari kaybi sa ati katpung sa kan Nuwi katunda waydi aban sa kaudasan pagbalik Anak Tawu. 27 Nagkaun ti manga tawu nag-inum Nagpangasawa sida ag ipinaasawa hanggan sa ati katpung pag sirang pagka sinmaka si Nuwi sa kay sakayan ag binmaha daka napapas sida tanan. 28 Katunda diman ti nangyari ati katpung pagka si Lut sa Suduma. Nagkaun ti manga tawu nag-inum, nagbili nagpabili, nagtanum sida, nagbuwat balay. 29 Dapat pagka nighit lang sa Suduma si Lut, ati katpung pag sirang nalagpak ginan sa langit ti apuy hanggan asupri ga manga uran ag natabu yi lang namatay ti tanan tawu sa banwa Suduma. 30 Katunda diman nu miburayhaw yi aban ti Anak Tawu. 31 "Ati katpung aban ti matukawan sa kay babaw atup danga yi magdugsun hampay mam-ul kay butang ginan sa sulud balay. Una ti sa tanman danga yi mag-uli sa kay balay. 32 Isipa niyu kan Lut asawa. 33 Una si unu ti masipag maghanap paraan hampay iribri kay kinabuhi, siya ngap ti mabul-an kay buhi. Dapat una si unu ti maduraan kay kinabuhi, siya ngap ti makaribri. 34 Kang pagsabihun sa kanyu, sa ati katpung pag yabi aban may duwa ka lalaki minsan sa igyaan, bul-un kay usa, tayakan kay usa. 35 May duwa ka babayi mag-arawatan sa galing, bul-un kay usa, tayakan kay usa. 36 May duwa ka lalaki sa tanman, bul-un kay usa, tayakan kay usa." 37 Pinma-ingana kay manga tuludluan magkun, "Naan duy, Panginuun?" Nagsagut si Hisus, "Nu naan ti may buyuk asan pag magkatigsun ti manga uwak."
1 Itinultul ni Hisus ti usa ka halimbawa, kay gustu sabihun kailangan sida magdarangin pirmi,danga maglubay kanda naisipan. 2 Magkun siya, "Ati sa usa ka banwa may huwis uman siya maggalang sa Diyus, unman diman waydi maggalang sa tawu. 3 Sa ati pag banwa may babayi buranday magpakasabangsabang sa huwis, magpakasabisabi, 'Awati duy nimu aku hampay may matarung aku laban sa kang manga kaaway.' 4 "Sa kabag-u nagbugya ti huwis, dapat sa kadugayan panahun magkun siya sa kay sadili, madi aku unman maggalang sa Diyus, unman diman waydi maggalang sa tawu, 5 kailangan awatan yi lang niku inda pag babayi buranday hampay may matarung, dahil magkaaburidu yi aku sa kanya, magkauyamut yi aku sa kay magpakasitay." 6 Magkun ti Panginuun, "Tunda pag huwis balaw matadlung dapat malu tandai niyu kay manga hampang. 7 Unman aw lugud awatan Diyus kay manga pinili hampay may matarung sida dahil magdangup sida sa kanya yabi sirang? 8 Pagsabihun niku sa kanyu, madali gid siya umawat sa kanda hampay may matarung. Dapat nu bumalik aban ti Anak Tawu may mag-akitan aw nguna siya aban manga tawu magsarig sa kanya sitay sa babaw daga?" 9 Itinultul diman ni Hisus inda pag halimbawa sa manga magsarig sa kanda sadili kuntay sida matadlung dapat kanda pagpiinpiinun ti manga iba. 10 Magkun si Hisus, "May duwa ka lalaki nag-ati sa balay Diyus hampay magdarangin. Parisiyu kay usa, kay usa manunukut buhis. 11 Matindugan ti Parisiyu magdarangin sa kay sadili bilug magkun, 'Diyus, magpasalamat aku sa kanmu, dahil balaw aku ga iba pag tawu, balaw aku magtakaw, balaw aku maradaya, balaw aku marauragin, balaw diman aku ga tunda pag manunukut buhis. 12 Kada usa ka sulud duminggu kadwa ginan aku unman maghandum karan-unun. Magpakaun aku ikasampulu tanan niku mag-akitan.' 13 "Dapat ti manunukut buhis matindugan sa arayu. Unman siya nagpanghas nagtangda sa langit, tinaptap niya kay dubdub sa kay karukuan, magkun siya, 'Kaawai duy aku, Diyus, dahil aku usa ka makasalanan.' " 14 Magkun si Hisus, "Pagsabihun niku sa kanyu, nuli yi inda pag lalaki pinakan-an siya kahusayan sa atubangan Diyus, dapat tunda pag Parisiyu unman. Dahil ti kada magpalabawlabaw ipaababa. Dapat tigpakumbaba, ipaabwat ngap Diyus." 15 May manga nagdara sa kanda manga anak dariit tabug sa kan Hisus hampay kup-an niya kamang. Pagka nakitan niya manga tuludluan, sinungyaw nida tunda pag manga tawu. 16 Dapat binagawan ni Hisus kay manga tuludluan magkun, "Pabay-ani lang niyu duy ti manga anak magpakarani sa kangku, danga yi sida pag-irangi, dahil ti ga anak imaw ti pagharian Diyus. 17 Ungud kang pagsabihun sa kanyu una hintay pag tawu ti unman ga anak kay magpasakup sa kay paghari Diyus, balaw kabilang sa manga tawu pagharian niya." 18 May usa ka pinunu nagpaingana sa kan Hisus magkun, "Mayad pag Maisturu, hintay nguna kang buwatun hampay matanggap niku ti buhi unman may katapusan?" 19 Nagsagut si Hisus sa kanya magkun, "Hayga duy aku kanmu pagsabihun mayad? Unman may mayad nu unman ti Diyus lang. 20 Aam yi nimu ti Kasuguan magkun, 'Danga kawu magpanguragin, danga kawu maglibun sa kanmu kaparihu, danga kawu magtakaw, danga kawu magpudil sa kanmu magkastigus, galanga nimu kanmu ama kanmu ina.' " 21 Bag-u nagsabi tunda pag tawu magkun, "Ginan di waya sa kang diit tinupad niku tunda tanan." 22 Pagka nadnugan ni Hisus inda, sinabi niya sa lalaki magkun, "Usa waya ka bagay ti kurang sa kanmu. Pabilyan nimu ti tanan nimu kasiyunan. Nu nipabili yi ayaw-ayawa kay kabilyanan sa manga pugri hampay makatanggap kawu kayamanan sa langit. Bag-u pagsitay maan kawu pagkuyug yi sa kangku." 23 Dapat magkabayung ti lalaki sa kay sinabi ni Hisus dahil masyadu gid siya mayaman. 24 Nagbantay si Hisus sa kanya bag-u sinabi niya, "Makuri masyadu ti mayaman magpasakup sa kay paghari Diyus. 25 Malpus waya ti kamilyu sumuyuk sa sulat dayum." 26 Ti manga nakadnug sa kay sinabi ni Hisus, namaingana sa kanya magkun, "Nu katunda duy si unu nguna ti makaribri?" 27 Dapat nagsagut si Hisus magkun, "Ti unman mabuwat manga tawu mabuwat di Diyus." 28 Sinabi ni Pidru, "Malu duy kami inda, tinayakan yi nimi kanmi manga ulian bag-u nagkuyug ngani kami sa kanmu." 29 Sinabi ni Hisus sa kanda, "Ungud kang pagsabihun sa kanyu, una hintay pag tawu nu magtayak sa kay ulian, sa kay asawa, sa kay manga patar-ari, sa kay gurang, sa kay manga anak, dahil sa kay magpasakup sa kay paghari Diyus, 30 maslalu mayamu waya ti ipakaun maan sa kanya sitay sa babaw daga, ag aban buhi unman may katapusan." 31 Pagka ipinablag ni Hisus kay sampulu may duwa ka tuludluan, sinabi niya sa kanda magkun, "Pagpatingi duy kamu, kita sa dalan yi tag babaw tag sa banwa Hirusalim. Nu ati yi kita tupadun gid ti tanan isinurat manga purupita tungkul sa Anak Tawu. 32 Dahil ipabahala siya sa manga balaw Hudiyu, surugun, pauyaun, bug-anan siya, 33 ag hampakun nida siya bag-u matyun. Dapat sa ikatlu pag sirang mabuhi siya uman." 34 Dapat unman naintindihan niya tuludluan tunda. Unman may kalinawan sida sa kay sinabi ni Hisus, unman nida alam nu hintay kay pagturunuhun. 35 Pagka arani yi sida ni Hisus sa banwa Hiriku, may lalaki buta matukawan sa saruy dalan maghagad kuwarta. 36 Pagka nadnugan niya ti kadamlan tawu maglawuy, nagpaingana siya magkun, "Hintay nguna tunda?" 37 Sinabi nida sa kanya, "Maglawuy yi duy si Hisus taga Nasarit." 38 Bag-u nanawag ti buta magkun, "Hisus, kawu linahi ni Dabid, kaawai duy nimu aku." 39 Sinabihan siya manga tawu manga nag-una sa kan Hisus magkun, "Danga mag-ingay." Dapat lalu waya gid ngapu nanawag siya magkun, "Kawu duy linahi ni Dabid, kaawai nimu aku." 40 Nagpat-ung si Hisus, tinawagan niya ti buta. Pagka nagpakarani ti buta sa kanya, nagpaingana si Hisus magkun, 41 "Hintay duy kanmu gustu kang buwatun sa kanmu?" Nagsagut siya, "Kang gustu duy, Panginuun, sa makakit gid kang mata." 42 Sinabi ni Hisus sa kanya, "Makakit yi kawu, pinaayad kawu dahil kawu nagsarig sa kangku." 43 Susun maghiling yi siya, nagkuyug sa kan Hisus, pagdayawun niya ti Diyus. Pagka nakitan manga tawu ti buta maghiling yi, nagdayaw sida tanan sa Diyus.
1 Maglakaw si Hisus sa banwa Hiriku. 2 Asan may usa ka lalaki kay ngaran si Sakiyu, takinan manga manunukut buhis. Siya usa ka mayaman. 3 Magtagahilingi kay gustu sa kan Hisus nu hintay ti pagsabihun si Hisus. Dapat unman mahimu dahil sa kadamlan tawu ag siya ababa pag tawu. 4 Nag-ambang siya sa kan Hisus, dinmayik sa kayu sikumuru hampay makitan niya si Hisus, dahil siya lumakaw ati pag dalan. 5 Pagka nagras-ug si Hisus siyun, nagtangda siya magkun, "Dag abala duy, Sakiyu, pagdugsun yi kawu, dahil taynguna kailangan aku manhapit waya sa kanmu balay." 6 Madali dinmugsun siya nagbaya siya ipinasaka niya si Hisus sa kay balay. 7 Pagka nakitan manga tawu si Hisus sinmaka sa kan Sakiyu balay, naglibak sida magkun, "Siya maaw manhapit waya sa balay makasalanan." 8 Tinmindug si Sakiyu sinmabi sa Panginuun, "Panginuun, kay katunga niku kasiyunan kang ipakaun sa manga pugri. Nu nakasukut aku nagdaya una sa kantapu pag tawu, iuli maan niku durugan tulu." 9 Sinabi ni Hisus sa kan Sakiyu, "Nagras-ug taynguna ti kaliktasan sa inda pag magtal-anakan. Dahil inda pag tawu linahi diman ni Abraham. 10 Dahil ti Anak Tawu nagsitay hampay hanapun ag iribri ti nadura." 11 Magpatingi waya ti manga tawu sa kay manga pagsabihun ni Hisus, rargu itinultul niya usa ka halimbawa, dahil arani yi siya sa Hirusalim ag dahil nahantup manga tawu udyi dugay ipaburayhaw yi kay paghari Diyus. 12 Nakan ngani sinabi ni Hisus magkun, "May usa ka tawu mataas kay katungkulan, lumakaw yi siya sa arayu pag rugar hampay pakan-an siya karampatan agud siya yi ti humari bag-u siya bumalik. 13 Dapat bag-u siya linmakaw, tinawag dapu niya kay sampulu ka panawuhun. Piniyaran niya sida ayaw ayaw usa ka gatus pisus, sinabi niya sa kanda, 'Inigusyu niyu inda pag kuwarta hanggan sa udwaya aku bumalik.' 14 "Dapat kinagalitan siya niya manga kasimanwa pinausigan siya nida manga diligadu pinakihampang magkun, 'Unman nimi ibug inda pag tawu ti humari sa kanmi.' 15 Dapat tinanggap diman tunda pag tawu karampatan hampay maghari. Pagka dugay nuli maan siya. Tinawag niya kay manga panawuhun hampay maalaman niya nu pira kay tubu kuwarta kay ipinakaun sa kanda, kanda ininigusyu. 16 "Nagpakarani dapu sa kanya ti usa magkun, 'Duy, ti usa ka gatus pisus kanmu ipinakaun sa kangku nagtubu waya usa ka libu pisus.' 17 Bag-u sinabi niya sa panawuhun, 'Mayad duy, mayad kawu pag panawuhun. Kawu maratupad sa diit pag bagay, nakan kawu kang buwatun pangulu sa sampulu ka banwa.' 18 Bag-u nagpakarani kay ikadwa pag panawuhun magkun, 'Duy, ti usa ka gatus pisus kanmu ipinakaun sa kangku nagtubu waya lima ka gatus pisus.' 19 Sinabi hari sa kay panawuhun, 'Pagpamahala kawu sa lima ka banwa.' 20 "May usa waya ka panawuhun nagpakarani sa kanya magkun, 'Inda duy kanmu kuwarta, kang sinaput sa kang panyu. 21 Magkadala aku sa kanmu, dahil mahigpit kawu pag tawu, kawu mag-apu bukun kanmu. Madi balaw kawu ti nagpamgas, paghanapun di nimu kay tubas.' 22 Sinabi hari sa kanya, 'Kawu minus pag panawuhun, pihuun yi ngap niku kawu ginan sa kam sinabi. Alam maaw nimu aku mahigpit pag tawu, mag-apu bukun kangku, paghanapun maaw niku kay tubas madi balaw aku ti nagpamgas. 23 Hayga unman hinulug nimu sa bangku kang kuwarta hampay sa kang pagbalik pagsuktun mana niku hanggan kay tubu.' 24 "Sinabi hari sa manga manugpatingi magkun, 'Bul-a niyu ti kuwarta ginan sa kanya ag ipakaun niyu sa may usa ka libu pisus.' 25 Sinabi nida sa kanya, 'Hayga duy, may usa ka libu pisus yi siya.' 26 Magkun ti hari, 'Pagsabihun niku sa kanyu, ti may imaw pakan-an waya, dapat ti udyi gid may imaw, bul-an waya una diit wadi sa kanya. 27 Nu bay kang manga kalaban tunda, daran-a niyu sitay tag sa kangku matya sa kang atubangan dahil sa dayu sida aku makahari sa kanda.' " 28 Pagka itinultul ni Hisus inda pag pahalimbawa, nag-una siya nagtukad atag sa Hirusalim. 29 Pagka siya arani yi sa baryu Bitpagi ag sa baryu Bitanya sugkad Bantud Ulibu, sinugu niya kay duwa ka tuludluan 30 magkun, "Pag-ati kamu sa usa waya ka baryu. Nu kamu magsulud yi sa baryu sab, susun makakit kamu anak asnu mahigtan udwaya sinakyan tawu. Lubada niyu tunda, daran-a sitay tag. 31 Nu may pumaingana sa kanyu, 'Hayga duy niyu paglubadun?' kainda kanyu sabihun, 'Pagkailanganun ay duy Panginuun.' " 32 Nakan nag-atag kay manga sinugu ag nakitan nida parihu sa kay sinabi ni Hisus. 33 Pagka paglubadun waya nida ti anak asnu, pinmaingana sa kanda ti manga apu asnu magkun, "Hayga duy paglubadun niyu ti anak asnu?" 34 Nagsagut sida magkun, "Pagkailanganun ay duy Panginuun." 35 Bag-u dinara nida ti anak asnu tag sa kan Hisus. Pagka ihinampilu nida kanda manga rutay sa anak asnu, kanda yi ipinasakay si Hisus. 36 Hanggan masakyan waya siya atabug sa Hirusalim sinagmakan nida rutay ti dalan. 37 Pagka arani yi siya sa banwa Hirusalim maglus-ug yi siya sa bantud Ulibu bag-u ti bilug kayamuan tuludluan nag-umpisa magbaya magdayaw sa Diyus ainalsa kanda busis, dahil sa tanan makamaskihan buwat kanda nakitan. 38 Magkun sida, "Pagdayawun nita ti Hari ti magras-ug sa ngaran Panginuun. Kahusayan yi sa langit. Pagdayawun ti Diyus sa langit." 39 May manga Parisiyu diman sa kayamuan. Magkun sida sa kan Hisus, "Maisturu, sungyawa yi duy nimu kanmu manga tuludluan." 40 Sinabi ni Hisus sa kanda magkun, "Pagsabihun niku sa kanyu nu map-ut kanda dayaw, batu maan ti pumagrit." 41 Pagka arani yi si Hisus ag magkaantaw niya ti banwa Hirusalim, linumian niya ti banwa, 42 magkun, "Nu nasalman lang nimu taynguna nu hintay kanmu kailangan hampay may kahusayan. Dapat taynguna unman ngap nakilala nimu. 43 Dahil aban pag manga udas sangputun gid kawu nimu manga kalaban. Kulungun yi kawu, apikihun kawu sa baliw baliw. 44 Wasakun gid nida kawu ag lipulun nida ti manga tawu mag-uli sulud nimu alad batu. Unman nida sawadan una di usa ka batu sa kaparihu babaw batu, dahil unman nimu nakilala kay kaudasan pagka nagluwang ti Diyus hampay kawu mana kay iribri." 45 Bag-u pagka sinmaka si Hisus sa balay Diyus, tinulak niya sa karagasyun ti manga magbili manga magpabili. 46 Sinabi niya sa kanda magkun, "Sinurat sa Banal Kasuratan magkun, 'Kang balay pag-ingarnan balay dararanginan, dapat binwat ngap niyu paratag-an manga mananakaw.' " 47 Nagtudlu diman gid siya sirang sirang sa sulud balay Diyus. Paggayakun siya matyun manga pangulu manug-asiwa balay Diyus, manga Manugtudlu Kasuguan hanggan manga takinan nasyun. 48 Dapat unman diman may mag-akitan sida paraan dahil lalu mahal kay magpatingi tanan tawu sa kay manga pagsabihun.
1 Nanudlu maan si Hisus ag ipinaliwanag niya ti Mayad pag Barita sa manga tawu sa sulud balay Diyus. Bag-u nagpakarani ti manga pangulu manug-asiwa balay Diyus, ti manga Manugtudlu Kasuguan hanggan manga paggurangunun sa nasyun, 2 bag-u nagpaingana sida sa kanya, "Sabiha nimu sa kanmi, hintay kanmu karampatan nakan pagbuwatun nimu inda pag manga bagay? Hintay ti may pakaun inda pag karampatan sa kanmu?" 3 Nagsagut si Hisus sa kanda, "May ipaingana waydi aku sa kanyu. Taynguna sabihun niyu sa kangku, 4 hintay ti may pakaun karampatan sa kan Huwan hampay magtulbaw, ngatay Diyus, ngatay tawu?" 5 Nanharampangan dapu sida sida lang magkun, "Nu kanta sabihun, Diyus ti may pakaun, kumumun siya, hayga unman kamu naniwala sa kanya? 6 Dapat nu sabihun nita tawu ti may pakaun, barang bintukun kita batu manga tawu. Dahil magpaniwala gid sida si Huwan purupita." 7 Nakan sinmagut sida, "Unman nimi alam nu naan ginan kay karampatan ni Huwan hampay magtulbaw." 8 Magkun si Hisus sa kanda, "Balaw diman sabihun niku sa kanyu nu naan ginan kang karampatan hampay magbuwat inda pag manga bagay." 9 Bag-u itinultul ni Hisus inda pag halimbawa sa manga tawu magkun, "May tawu nagtanum ubas sa kay ubasan bag-u iinintirga niya sa manga manugtarabahu bag-u napaiba rugar, nadugay ati. 10 Pagka udas tigpuruti sinugu niya kay usa ka panawuhun tabug sa manga manugtarabahu hampay padarahan nida kay kahuray burak ubas. Dapat binakul siya manga manugtarabahu ipinauli ud may dara. 11 Sinugu maan niya kay usa ka panawuhun. Binakul maan nida minuransa waya bag-u ipinauli ud may dara. 12 Pinmakatlu maan sinmugu siya. Biniyagan nida bag-u tinulak. 13 Sinabi may puun ubasan, 'Hintay nguna kang buwatun inda? Kang suguun ti pagmahalun niku pag anak, pihu galangun nida siya.' 14 Dapat pagka nakitan siya manga manugtarabahu, nanharampangan sida magkun, 'Inda aban ti mumana ubasan, kanta yi matyun hampay kanta yi apuun kay ama pamana.' 15 Kanda tinulak tabug sa luwas ubasan bag-u kanda yi ngani minatay. Hintay nguna ti buwatun may apu ubasan sa kanda? 16 Atihan niya hampay matyun tunda pag manga manugtarabahu bag-u iintirga maan sa manga iba kay ubasan." Pagka nakadnug ti manga manugpatingi sa kan Hisus tultulanun sinabi nida magkun, "Danga maniring mana sa ati pag tultulanun." 17 Dapat binmantay si Hisus sa kanda ag namaingana, "Hintay nguna kay sabi sa Kasuratan magkun, 'Ti batu dinayu manga manugbuwat balay, binwat ngap ti mahalaga pag kalap.' 18 Una si unu nu malagpak tag sa babaw batu inda marunut gid ag una waydi hintay ti madugsakan, mapisi." 19 Ti manga Manugtudlu Kasuguan hanggan ti manga pangulu manug-asiwa balay Diyus naghanap paraan hampay madakup si Hisus ati katpung, dahil nasalman nida sida ti pinatamaan sa kay pahalimbawa niya. Dapat nadala sida sa manga tawu. 20 Nakan nag-alagad waya sida. Sinugu nida manga tawu kanda inupahan hampay mamabalhinguun pag paingana sa kan Hisus hampay pasalanun siya sa kay bagaw bag-u ipabahala nida siya sa kapangyarihan gubirnadur. 21 Ipinaingana nida sa kanya, "Maisturu, alam nimi kanmu bagaw hanggan tudlu tama gid ag unman kawu may pag-apihun. Pag-itudlu nimu ti katutuuhanan hampay pagtupadun manga tawu ti kagustuhan Diyus. 22 Angay aw nguna sa Kasuguan Diyus nu bumuhis ti tawu sa Pangulu Hari, aw ngatay unman?" 23 Dapat alam di ni Hisus kanda magpabalhinguun nakan nagsabi siya sa kanda, 24 "Anti duy kam dinaryu, manhimalad aku. Kantapu pag uyahun ti mapalatan sa inda pag kuwarta? Kantapu pag ngaran ti ipinirma?" Magkun sida, "Sa Pangulu Hari duy inda." 25 Bag-u sinabi ni Hisus sa kanda magkun, "Nakan ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus." 26 Dayu siya mapasalan nida sa kay bagaw sa atubangan manga tawu. Naglingut gid sida sa kay sagut, udyi sida nag-ingay. 27 May manga Sadusiyu nagpakarani sa kan Hisus. Kanda paniwala basta namatay yi ti tawu balaw yi mabuhi uman. Sinabi nida sa kanya magkun, 28 "Maisturu, nagsurat si Muysis bilin sa kanmi magkun, 'Ti magtar-ari lalaki nu ti usa namatay natayak kay asawa babayi dapat unman may anak, kay patar-ari kailangan mag-asawa sa buranday hampay nu may anak sida imaw ti makamana sa kay pinagkagurang kayamanan. 29 Kaybi may pitu ka magtar-ari lalaki. Nangasawa ti usa. Pagka dugay namatay siya unman may anak. 30 Nag-asawa maan sa buranday ti ikadwa, pagka dugay namatay waydi. 31 Katunda diman ti nangyari sa ikatlu hanggan sa ikapitu kada usa nag-asawa sa babayi, namatay sida ud nagkaanak. 32 Pagka dugay namatay diman ti babayi. 33 Nu sa pagkabuhi uman aban, kantapu asawa ti babayi? Kabay inasawa niya tunda pag pitu ka lalaki." 34 Sinabi ni Hisus sa kanda, "Ti manga lalaki ag ti manga babayi sitay sa babaw daga mangasawa ngani. 35 Dapat tunda pag manga tawu ti pinakan-an Diyus karampatan hampay makalakaw sa pagkabuhi uman ginan sa kamatayan ag makaaput sa bag-u buhi, sida udyi umasawa udyi paasawan-un. 36 Parihu yi sida sa manga anghil. Udyi mahimu sida mamatay, manga anak yi sida Diyus, dahil sida binuhi yi uman ginan sa kamatayan. 37 "Dapat sa tultulanun tungkul sa kayu minaktan apuy ipinakilala diman ni Muysis pagbuhiun uman ti manga namatay. Iningarnan niya ti Panginuun kuntay siya ti Diyus ni Abraham, Diyus ni Isaak ag Diyus ni Hakub. 38 Ti Diyus balaw Diyus manga namatay nu unman Diyus ngap manga tawu may buhi, dahil sa kanya pag magkabuhi ti tanan tawu." 39 Nagsabi ti iba manga Manugtudlu Kasuguan magkun, "Maisturu, mayad duy kanmu pag magkasabi." 40 Dahil unman yi ngani nagpanghas sida magpaingana waya sa kanya. 41 Bag-u nagpaingana si Hisus sa kanda magkun, "Kabitay masabi nida linahi ni Dabid ti pinili Diyus Manugribri pag Hari? 42 Dahil si Dabid diman ti may sabi sa ribru Manga Kanta magkun, 'Sinabi Panginuun sa kang Panginuun, Pagtukaw kawu sitay baliwa sa kang sikun, Pagpaminsan sa kang karampatan 43 Hanggan sa udwaya mabuwat niku kanmu manga kalaban ga tarat-an lang nimu manga lulud.' 44 Si Dabid yi waydi ti nag-ingaran sa kay pinili Diyus Manugribri pag Hari magkun Panginuun. Nu katida kabitay pag masabi ti pinili Diyus Manugribri pag Hari kay linahi ni Dabid?" 45 Nagpatingi sa kan Hisus ti tanan manga tawu bag-u sinabi niya sa kay manga tuludluan, 46 "Pag-aman kamu sa manga Manugtudlu Kasuguan. Magkaibug sida mamasyar sadsad kay rutay, masulungun sida paggalangun, magpabayabaya sa manga luwas balay. Nu sa balay tiripnan kanda gustu tumukaw sa tukawan inihanda sa may kangaranan. Nu may karan-an kanda gustu makatukaw sa marinu pag tukawan. 47 Dapat pagtabuhun nida ti kasiyunan manga buranday bag-u magpadayawdayaw diman sa kanda magdarangin araba. Lalu waya mabuyat aban pag parusa sa kanda."
1 Nagbantay si Hisus sa kay libut. Bag-u nakitan niya ti manga tawu mayaman maghulug kanda ambag sa sukadan kuwarta Panginuun. 2 Nakitan diman niya ti usa ka babayi buranday pugri maghulug ati duwa ka singku. 3 Sinabi ni Hisus, "Tutuu kang pagsabihun sa kanyu, tunda pag babayi buranday pugri naghulug siya subra man sa kanda tanan pag pakaun. 4 Dahil sida ati tanan naghulug kuwarta kanda wadi sawad nagbilyan. Dapat ti buranday unman nag-isip sa kay kagipitan. Itinabu ipinakaun kay pamili." 5 Ti iba tuludluan niya magharampangan tungkul sa balay Diyus, marinu gid nu pagbantayan, marinu pag lingub batu hanggan kay pakislap lingub ti ipinakaun manga tawu. 6 Sinabi ni Hisus magkun, "Nu Rumas-ug ti kaudasan, unman may masawad sitay una lang usa ka bilug batu sa kaparihu babaw batu, tanan tanan magkarapugdak, madi taynguna kanyu pagbayaun sa kanyu magbantay." 7 Nagpaingana sida sa kan Hisus, "Maisturu, kapira waya pag mangyari tunda? Hintay nguna duy kay tanda nu arani yi mangyari tunda tanan?" 8 Bag-u nagsabi si Hisus magkun, "Pag-aman gid kamu sa unman gid kamu patalangun dahil mayamu ti sumitay mag-apu kang ngaran magkun, 'Aku yi ngani. Inda yi ti kaudasan' Danga kamu magsunud sa kanda. 9 Una kamu makadnug manga barita sa gira manga kaguluhan danga kamu magkakulbaan. Dahil kailangan mangyari gid dapu tunda, dapat udwaya kadaka mangyari ti katapusan." 10 Bag-u sinabi waya niya sa kanda, "Manlalabanan aban ti parihu nasyun. Manlalabanan aban ti parihu kaharian. 11 May manga linug mabisug aban ag una naan pag rugar aban may manga lun-us, manga sarut sakit. Ati katpung aban makitan ti karadalaun, kanda dayawun aban manga tawu ti makadululaw pag manga tanda ginan sa langit. 12 "Dapat bag-u mangyari tunda, dakpun kamu ag unuunuhun bistahun kamu sa manga balay tiripnan bag-u pirisuhun. Daran-un kamu sa atubangan manga hari, manga gubirnadur dahil sa kanyu pakiusa sa kangku. 13 Bag-u mahimu yi kamu magtultul Mayad pag Barita sa kanda. 14 "Pagkarig-un kanyu naisipan, danga dapu isipun niyu nu kabitay kanyu isagut. 15 Dahil pakan-an niku kamu bagaw pananagut hanggan kadunungan hampay udyi makalaban udyi waydi tumanggi kanyu tanan manga kaaway. 16 Dapat una kanyu manga gurang, una manga patar-ari, una manga katawuhan, una manga mayad pag kakilala pumakampi ngap sa kalaban bag-u kamu kanda itudlu. Ti iba sa kanyu ipamatay nida. 17 Kamu kagalitan tanan tawu dahil sa kanyu pakiusa sa kangku. 18 Dapat unman midamhak una di usa ka buhuk sa kanyu ulu. 19 Nu kamu magpakarig-un hanggan tugka sa katapusan, maribri di kamu." 20 Magkun waya si Hisus, "Nu makitan niyu aban ti Hirusalim linibut yi kayamuan sundalu, pagkilala gid kamu arani yi wasakun ti banwa Hirusalim. 21 Nu katunda palagiw yi ti manga tawu sa Hudiya tabug sa bantud. Ti manga tawu sa sulud banwa pagpalagiw yi. Ti manga sa luwas banwa danga yi mag-atag. 22 Dahil tunda yi ti kaudasan kaparusahan hampay matupad ti tanan manga bagay isinurat sa Banal Kasuratan. 23 Kaawaawa ti manga magbuduy hanggan ti may anak diing diing ati katpung. Mangyari ti daka gid pag kakurian sa inda pag daga ag pagkagalitan Diyus inda pag nasyun. 24 Matyun sida manga sundalu may armas baladaw, kay iba bihagun darahun tag sa una naan pag nasyun. Tasakan manga balaw Hudiyu ti Hirusalim hanggan sa udwaya lumawuy ti kaudasan kapangyarihan manga balaw Hudiyu." 25 Sinabi diman ni Hisus, "May manga tanda aban sa init, sa bulan hanggan sa manga pamgasan. Sa babaw daga magkadiklahan ti manga nasyun, magkadala gid sida sa paywas dagat hanggan sa dagmuk taub. 26 Manlubay yi lang gid aban ti manga tawu sa dala hanggan sa mag-alagad sa manga mangyari waya sa bilug kalibutan. Matandug ti manga pamgasan. Ti kuramnag ag ti malambungun magkaradura sa kanda lakawan. 27 Ati katpung aban makitan nida ti Anak Tawu Rumas-ug padara sa rurum, may kamaskihan hanggan daka pag kadayawan. 28 Dapat nu mag-umpisa mangyari inda pag manga bagay, ipaatngaw gid kanyu manga ulu pagbantay kamu dahil arani yi kamu iribri yi." 29 Itinultul ni Hisus sa kanda ti usa ka pahalimbawa magkun, "Bantayan niyu ti puun igus ag ti tanan manga iba puun kayu. 30 Pagka nakitan ti manga puun kayu nanlangba yi, maalaman niyu arani yi ti abagat. 31 Katunda diman pagka makitan niyu mangyari pag manga bagay tunda, intindihun niyu arani yi ipaburayhaw Diyus kay paghari may kadayawan. 32 Tutuu gid kang pagsabihun sa kanyu, dayu mamatay inda pag sinulput tawu hanggan sa ud matupad inda pag manga bagaw. 33 Ti langit hanggan ti daga may katapusan di, dapat kang bagaw balaw pumalya hanggan aban. 34 "Dapat pag-aman kamu barang mawili kamu sa mayad pag karan-unun, sa manga maglangu una sa kanyu magbudlay tungkul sa kanyu kahamtangan sitay sa babaw daga. Barang bigla Rumas-ug sa kanyu tunda pag kaudasan kamu unman alistu. 35 Dahil ga sudkun sida tanan ti manga mag-uli sitay sa babaw daga. 36 Pagmaimatahan gid kamu. Pagdarangin pirmi hampay una kamu lumakaw sa tunda pag kakurian, lumapus di kamu ag makatindug sa atubangan Anak Tawu." 37 Sirang sirang nagtudlu si Hisus sa balay Diyus. Yabi yabi nag-ati siya nag-igya sa bantud Ulibu. 38 Kada masurip ti bug-us banwa nag-ati sa balay Diyus namatingi sa kanya.
1 Arani yi ti Kapistahan sa manga Tinapay unman may Pamadaka, kay ngaran Kapistahan sa Pag-alaala sa Karibrihan. 2 Pag-isipan yi manga pangulu manug-asiwa balay Diyus hanggan manga Manugtudlu Kasuguan nu kabitay kanda mipamatay si Hisus. Dahil magkadala sida sa manga tawu. 3 Bag-u sinuldan ni Satanas si Hudas kay palayaw Iskiriyuti, kabilang sa sampulu may duwa ka tuludluan. 4 Nag-ati siya naghampang sa manga pangulu manug-asiwa balay Diyus hanggan sa manga kapitan pulis nu kabitay pag maawatan niya sida hampay madakup nida si Hisus. 5 Nakabaya sida pinagkausahan pakan-an kuwarta si Hudas. 6 Nagpasnu siya. Siyun ginan naghanap paraan si Hudas hampay itudlu niya si Hisus sa kalaban, ilihim sa kayamuan tawu. 7 Pagka sa Kapistahan sa manga Tinapay unman may Pamadaka, nagras-ug ti taning sirang kanda pag-iyawun ti manga anak karanidu sa Pag-alaala sa Karibrihan. 8 Sinugu ni Hisus sida ni Pidru ni Huwan, sinabi niya sa kanda magkun, "Paglakaw yi duy kamu, paghanda yi kamu kanta yapun tungkul sa Pag-alaala sa Karibrihan hampay kita mangaun." 9 Nagpaingana sida sa kan Hisus, "Naan duy kanmu gustu pag ihanda nimi kanta yapun?" 10 Magkun siya sa kanda, "Malu, kamu pagpatingi. Nu kamu magsulud sab sa banwa may masulang kamu usa ka lalaki may sungguy usa ka banga danum. Kuyuga niyu siya hanggan tugka sa kay sakahan pag balay. 11 Sabiha niyu sa may puun balay, 'Magkun ti Maisturu sa kanmu, naan ti mahal pag humayin aku kanmi yapun tungkul sa Pag-alaala sa Karibrihan, kasaru niku kang manga tuludluan?' 12 Bag-u itudlu niya sa kanyu ti daka pag suludsulud sa ikadwa pag ugpu salug, alistu yi kay gamit. Ati kamu paghiwat kanta karan-an." 13 Nag-ati sida. Nakitan nida ga kay diman sinabi ni Hisus. Kanda yi hiniwat kanda yapun tungkul sa Pag-alaala sa Karibrihan. 14 Pagka udas mangaun, tinmukaw si Hisus sa arani lamak kasaru niya kay manga tuludluan. 15 Sinabi niya sa kanda, "Dugay yi aku naggagad magkaun yapun tungkul sa Pag-alaala sa Karibrihan kasaru kamu niku bag-u malakawan niku ti kakurian. 16 Dahil kang pagsabihun sa kanyu, udyi umuman aku kumaun inda hanggan sa udwaya matupad inda sa kaharian Diyus." 17 Bag-u binitbit ni Hisus ti ungut, nagpasalamat siya sa Diyus bag-u kay sinabi magkun, "Tanggapun niyu inda, ayaw ayaw kamu pag-inum. 18 Dahil pagsabihun niku sa kanyu, dayi manginum aku kainda ginan danum ubas hanggan sa udwaya Rumas-ug sitay ti paghari Diyus." 19 Nagpunpun siya tinapay, kanya dap ipinasalamat sa Diyus bag-u pinikapika bag-u ipinakaun sa kanda. Kay sinabi, "Inda kang bilug pag-ipakaun dahil sa kanyu. Buwata niyu inda sa pag-alaala sa kangku." 20 Pagka nakayapun yi sida, itinunghul niya ti ungut sa kanda bag-u kay sinabi, "Inda pag ungut kay kahulugan imaw ti bag-u taratu Diyus. Kang dugu ti ibuhus dahil sa kanyu, imaw ti itinalaghut Diyus sa taratu. 21 "Dapat malu, kasaru diman niku kainda sa karan-an tigpakampi sa kang kalaban hampay aku kay itudlu. 22 Dahil ti Anak Tawu mamatay gid ngani angay sa kay gayak Diyus, dapat anung kaawaawa tunda pag tawu ti nagpakampi sa kay kalaban hampay siya kay itudlu." 23 Bag-u nagparaingan-an kay manga tuludluan nu hintay nguna sa kanda tigpakampi sa kalaban ni Hisus. 24 Pagka dugay magpirirdihan yi kay manga tuludluan sa kanda harampangan, nu hintay sa kanda ti pag-isipun mataas man sa tanan. 25 Nakan kay sinabi ni Hisus sa kanda magkun, "Ti manga hari sitay sa babaw daga may kapangyarihan sa kay manga nasakupan. Kanda manga pinunu pag-ingarnan manga manugpakaun kahusayan. 26 Dapat nu sa kanyu balaw katida. Bagkus ngap ti lalu mataas sa kanyu kailangan lalu magpakumbaba. Ti pinunu kailangan parihu sa manugsirbi. 27 Dahil si unu ti lalu mataas ngatay ti matukawan sa puun lamak, aw ngatay ti manugtindug? Unman aw ti matukawan sa puun lamak? Dapat aku sa kanyu karaw-an parihu sa manugtindug. 28 "Kamu ti balaw nagpablag sa kangku madi mayamu ti linakawan niku pag subuk. 29 Nakan kamu kang pakan-an karampatan hampay maghari aban parihu sa ipinakaun Ama sa kangku karampatan hampay maghari. 30 Nu maghari yi aban aku kamu kumaun sa kang lamak uminum. Kamu aban tumukaw sa manga tukawan hari bistahun niyu ti sampulu may duwa ka linahi ni Israil." 31 Sinabi ni Hisus, "Malu duy Simun, hinagad kamu ni Satanas hampay subukan niya kamu taphun ga paray ipayag kay upa. 32 Dapat Simun, kawu kan idinarangin sa unman lumumuy kanmu pagsarig. Nu umimbung maan aban kanmu pagsarig, parig-una yi nimu kanmu manga patar-ari." 33 Sinabi ni Pidru sa kanya, "Panginuun, handa aku kumuyug sa kanmu sa pirisuhan una sa kamatayan." 34 Magkun si Hisus, "Kang pagsabihun sa kanmu, Pidru, taynguna yi gid pag yabi inda udwaya tumarauk ti manuk, itanggi nimu kanmu magkilala sa kangku katlu ginan." 35 Sinabi ni Hisus sa kanda, "Pagka sinugu niku kamu kaybi balaw may dara sukadan kuwarta, una sukadan karan-unun, una lapak, kinurang aw kamu una hintay?" Kanda sagut, "Unman duy, unman kinurang." 36 Sinabi niya sa kanda, "Dapat taynguna nu may sukadan kuwarta suribayan di niyu hanggan kanyu sukadan karan-unun. Nu unman kamu may baladaw, pabilyan kanyu rutay hampay may ibili sa baladaw. 37 Dahil pagsabihun niku sa kanyu kailangan matupad tungkul sa kangku inda pag Kasuratan magkun, 'Imininsan siya sa bilang sa manga makasalanan pag tawu.' Dahil ti isinurat tungkul sa kangku pihu mangyari aban." 38 Sinabi nida, "Panginuun, inda duy ti duwa ka baladaw." Sinabi niya, "Igu yi duy." 39 Naglakaw yi si Hisus tabug sa bantud Ulibu ga kay diman ugali. Nagkuyug kay manga tuludluan. 40 Pagka siya nagras-ug ati sa bantud, sinabi niya sa kanda, "Pagdarangin kamu sa unman madara kamu sa tuksu." 41 Nagpablag siya sa kanda ga bintukan lang batu kay karayu. Pagka ati siya nagluhud nagdarangin, 42 magkun, "Amang, nu gustu nimu ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud, nu unman kanmu di gid ti masunud." 43 Napakakit sa kanya ti usa ka anghil ginan sa langit, nagpabisug sa kanya. 44 Pagka udyi makapaunuunu kay isip, nagdarangin siya lalu mabisug. Kay hulas nagbaliw ga tiktik dugu kay bulus tag sa daga. 45 Pagkatapus kay darangin nagtindug siya nagpakarani siya sa kay manga tuludluan. Naras-ugan sida turug dahil sa karukuan. 46 Sinabi ni Hisus sa kanda, "Hayga kamu turug? Pagbangun yi kamu, pagdarangin hampay unman madara kamu sa tuksu." 47 Magbagaw di waya si Hisus, inda yi ti kadamlan tawu. Ti usa sa sampulu may duwa ka tuludluan, si Hudas ngani ti nag-iba sa kanda. Nagpakarani si Hudas sa kan Hisus hampay kay arkan. 48 Sinabi ni Hisus sa kanya, "Hudas, inda kanmu mag-aruk ipagtudlu yi aw nimu ti Anak Tawu sa kalaban?" 49 Pagka nasalman manga tuludluan kaibahan ni Hisus nu hintay ti mangyari sab, sinabi nida, "Panginuun, manigbas yi aw kami baladaw?" 50 Ti usa ka tuludluan nagtigbas ngap sa panawuhun Pangulu Manug-asiwa balay Diyus napungus kay tuli baliwa sa sikun. 51 Dapat sinabi ni Hisus magkun, "Tuman yi duy." Hinikap niya ti tuli panawuhun, pinaayad yi maan. 52 Ti manga pangulu manug-asiwa balay Diyus, ti manga kapitan pulis balay Diyus hanggan ti manga paggurangunun sa nasyun nagrinas-ug mandakup sa kanya. Sinabi ni Hisus sa kanda, "Nagluwang aw kamu bilang ga manlaban sa tulisan, may dara manga baladaw, manga pamakul? 53 Pagka aku kaibahan waya niyu sa balay Diyus sirang sirang, hayga unman aku kanyu dinakup? Dapat taynguna kamu hanggan ti kapangyarihan kadudulman pinakan-an yi rugar hampay magdakup sa kangku." 54 Pagka kanda yi ngani dinakup si Hisus, kanda dinara ipinaslud sa balay Pangulu Manug-asiwa balay Diyus. Nag-usig si Pidru napatayaktayak. 55 Namagba sida apuy sa karaw-an sugkadan. Pagka tinmukaw sida, nagdulud si Pidru. 56 Nakitan suruguun babayi si Pidru matukawan sa makad-agan apuy. Pagka hinimaladan niya si Pidru bag-u sinabi niya magkun, "Hanggan inda pag tawu kaibahan waydi niya." 57 Dapat nagpaulam si Pidru magkun, "Duy, unman kilala niku tunda pag tawu." 58 Pagka lagatlagat, nakitan maan siya usa ka lalaki sinabi sa kanya, "Kawu hanggan kaibahan maaw nida." Dapat magkun si Pidru, "Unman gid duy aku." 59 Pagka lawuy usa ka tamaan ginatung pag-ipalugus waya usa magkun, "Ungud gid inda pag tawu kaibahan diman niya, dahil taga Galiliya waydi siya." 60 Dapat sinabi ni Pidru, "Unman gid duy ungud naintindihan niku ti pagsabihun nimu." Nagbagaw waya si Pidru kadaka tinmarauk ti manuk. 61 Bag-u nag-aliwliw ti Panginuun, tinurun niya si Pidru. Bag-u naisipan ni Pidru kay bagaw Panginuun nu kabitay kay sinabi sa kanya magkun, "Udwaya tumarauk ti manuk itanggi yi nimu aku katlu ginan." 62 Napalwas si Pidru, namurus gid sa lumi siya. 63 Hinangalhangal si Hisus manga bantay, kanda sinaktan. 64 Tinakluban nida kay mata bag-u pinaingana nida siya, "Pintua nimu hintay ti nagbakul sa kanmu?" 65 Mayamu waya ti sinabi nida pag lapastangan sa kanya ag minuransa waya nida. 66 Pagka nasirang yi nagtiripun ti manga paggurangunun sa nasyun hanggan ti manga pangulu manug-asiwa balay Diyus hanggan ti manga Manugtudlu Kasuguan. Bag-u apinaatubang nida si Hisus ati sa kanda Katipunan. 67 Magsabi sida sa kan Hisus, "Nu kawu yi ti pinili Diyus Manugribri pag Hari, sabiha nimu sa kanmi." Dapat sinabi niya sa kanda, "Nu sabihun niku sa kanyu ti katutuuhanan, unman waydi niyu paniwalaan. 68 Ag nu kamu kang paingan-un unman diman waydi kamu magsagut. 69 Dapat sa taynguna ginan matukawan yi ti Anak Tawu baliwa sa kay sikun Diyus minsan sa karampatan Diyus makapangyarihan." 70 Bag-u sinabi nida tanan, "Nu katunda kawu aw ti Anak Diyus?" Bag-u sinabi niya sa kanda, "Hu, tutuu kanyu pagsabihun kuntay aku yi ngani." 71 Bag-u sinabi nida, "Hintay waya pag manga kastigus kanyu paghanapun? Dahil kita duy nakadnug yi waydi sa kay binagaw."
1 Pagka nakatapus kanda pululungan nagtindug sida tanan tanan, dinara nida si Hisus sa atubangan ni Gubirnadur Pilatu. 2 Bag-u sida nagsumbung sa kan Hisus magkun, "Naalaman nimi inda pag tawu magpan-gulu sa kanmi nasyun. Magbawal siya sa magbayad buhis tag sa Pangulu Hari. Pagsabihun niya siya yi ngani ti pinili Diyus Manugribri pag Hari." 3 Pinaingana siya ni Pilatu magkun, "Kawu aw ti Hari manga Hudiyu?" Sinmagut si Hisus, "Hu, tutuu kanmu pagsabihun." 4 Sinabi ni Pilatu sa manga pangulu manug-asiwa balay Diyus hanggan sa kayamuan tawu siyun magkun, "Unman may nakitan aku kasalanan sa inda pag tawu." 5 Dapat lalu ngap pag-ipalugus nida kanda sumbung sa kan Pilatu magkun, "Magpan-gulu kay tudlu sa bilug nasyun Hudiyu, ginan sa Galiliya hanggan sitay tugka sa Hirusalim." 6 Pagka nadnugan ni Pilatu pinaingana niya ngatay taga Galiliya inda pag tawu. 7 Pagka naintindihan ni Pilatu kan Hirudis nasakupan si Hisus, ipinadara niya si Hisus sa kan Hirudis. Ati katpung pag panahun siyun diman waydi sa Hirusalim si Hirudis. 8 Pagka nakitan ngani ni Hirudis si Hisus lalu gid nagbaya siya. Dahil dugay yi magtagakabtai siya sa kan Hisus. Dahil nakaalam si Hirudis sa kan Hisus ag maggagad siya sa makitan niya ti manga makadululaw pag buwat niya. 9 Mayamu kan Hirudis paingana sa kan Hisus dapat siya unman nagsagut una di. 10 Ti manga pangulu manug-asiwa balay Diyus ag ti manga Manugtudlu Kasuguan nagtindug bag-u mahigpit masyadu kanda pagsumbung sa kan Hisus. 11 Minsan sa kan Hirudis kay manga sundalu inurug nida si Hisus, kanda hinangalhangal. Kanda pinabistihan marinu pagka rutay bag-u ipinabalik siya tag kan Pilatu. 12 Tunda ginan pag sirang nagmalahalan yi sida ni Hirudis ni Pilatu. Dahil kaybi ginan daan di sida magkalagalitan. 13 Pinatipun ni Pilatu ti manga pangulu manug-asiwa balay Diyus, ti manga pinunu hanggan tanan banwa Hirusalim. 14 Sinabi niya sa kanda magkun, "Ipinabahala niyu inda pag tawu sa kangku, idinimanda niyu sa kangku kuntay siya magpan-gulu sa nasyun Hudiyu. Pagka hinudsud niku siya sa kanyu atubangan, unman may mag-akitan aku kasalanan sa kanya tungkul sa kanyu manga dimanda laban sa kanya. 15 Unman gid, una waya si Hirudis unman may nakitan kasalanan sa kan Hisus. Dahil pinabalik maan siya ni Hirudis tag sa kanta. Unman duy dapat siya matyun, unman may kasalanan. 16 Siya kang lang ipagaruti bag-u kang palpasan maan." 17 Sa katpung Kapistahan sa Pag-alaala sa Karibrihan kailangan ngani kay usa ka pirisu ipalpas ni Pilatu. 18 Dapat sida tanan tanan namaragritan ngapu magkun, "Matya yi gid tunda. Si Barabas ti palpasi lang nimu." 19 Pinirisu si Barabas dahil siya ti nag-arburutu laban sa gubirnu, naglibun waya siya tawu. 20 Nagbagaw maan si Pilatu sa kayamuan dahil kay gustu mana palpasan si Hisus. 21 Dapat sida nanriringgitan magkun, "Ipaku sa kurus. Ipaku siya sa kurus." 22 Katlu ginan namaingana si Pilatu sa kanda, "Hayga duy hintay pag kadautan ti binwat inda pag tawu? Unman aku may nakitan kasalanan sa kanya sa ikamatay niya. Ipagaruti niku siya bag-u kang palpasan." 23 Dapat unman nag-apas kanda paragritan, kanda gustu ipaku gid si Hisus sa kurus. Daug si Pilatu sa paragritan kayamuan tawu. 24 Pinasibut-an yi lang niya ti kagustuhan nida. 25 Pinalpasan yi ngani niya si Barabas imaw kanda hinagad pag pirisu. Pinirisu dahil sa pag-arburutu hanggan sa kay naglibun tawu. Dapat ipinabahala ni Pilatu si Hisus sa kanda hampay una hintay kanda gustu buwatun sa kanya. 26 Dinara nida si Hisus hampay siya ipaku sa kurus. Nasulang nida ti usa ka tawu kay ngaran si Simun taga Sirini. Kanda tinawidan bag-u ipinapas-an sa kanya ti kurus hampay daran-un sa kan Hisus uryan. 27 Nagkuyug sa kan Hisus ti kadamlan tawu ginan sa banwa hanggan manga babayi maglulumian magwarawawan dahil sa kanya. 28 Dapat nag-aliwliw si Hisus sa kanda bag-u magkun, "Kamu pag manga babayi taga Hirusalim danga aku kanyu lumian. Kailangan kanyu lumian ngap kanyu sadili hanggan kanyu manga anak. 29 Dahil Rumas-ug aban ti sirang kanda sabihun, 'Mayad waya ti manga babayi unman nagkaanak, ti unman nakaagi panhinganak, ti manga unman may pag-alagaan lapsag.' 30 Ati katpung pag manga sirang sumabi ti manga tawu sa manga bantud, 'Pagkarup-ag yi kawu pag bantud sa kanmi.' Sumabi sa manga bungtud, 'Tap-uki yi kami.' 31 Dahil nu inda kanda pagbuwatun sa puun kayu buhi unman aw maslalu makuri ti mangyari sa manga nalayung?" 32 Dinara yi ngani nida si Hisus hanggan ti duwa ka tulisan hampay matyun. 33 Pagka rinmas-ug sa bungtud kay ngaran Barut Ulu, kanda ipinaku siya ati sa kurus, bag-u ipinaku waydi ti manga tulisan, ti usa sa wala baliwa pag kurus, ti usa sa sikun baliwa. 34 Sinabi ni Hisus, "Amang, patawada duy nimu sida, dahil unman nida alam kanda pagbuwatun." Bag-u kanda inayaw-ayaw kay manga rutay ni Hisus, kanda waya alinaban sa lunggungan. 35 Matindugan magbantay ti tanan tawu taga banwa. Paghangalhangalun siya manga pinunu magkun, "Irinibri niya ti manga iba, kailangan iribri waydi niya kay sadili bilug, nu ungud siya ti pinili Diyus Manugribri pag Hari." 36 Pagsurugun diman siya manga sundalu, nagpakarani sida sa kanya, binwatan lawganan tinur-ug tabug sa tungud pinasupsup sa kan Hisus ti bahal alak. 37 Magkun sida, "Nu kawu ungud ti Hari manga Hudiyu, iribri nimu kanmu sadili bilug." 38 Sa kay tungud ulu may surat magkun, "Inda ti Hari manga Hudiyu." 39 Pinuyaan diman siya usa ka tulisan mabitinan sa kurus magkun, "Kuntay kawu yi ngani ti pinili Diyus Manugribri pag Hari, ribrihan yi nimu kanmu sadili hanggan kami." 40 Dapat sinmungyaw kay usa ka tulisan magkun, "Unman aw waya lugud kawu maggalang sa Diyus? Parihu kita nasintinsiyahan. 41 Nu sa ungud tama inda pag sintinsiya sa kanta kasalanan. Inda kita magbayad yi lang sa kanta binwat. Dapat inda pag tawu unman may binwat una hintay pag kadautan." 42 Bag-u sinabi niya magkun, "Alaalaha nimu aku, Hisus, nu kawu bumalik aban maghari yi." 43 Magkun si Hisus sa kanya, "Ungud gid kang pagsabihun sa kanmu, taynguna yi ngap pag sirang sab kawu kang kaibahan sa ulian manga may buhi unman may katapusan." 44 Pagka udtu yi ti init nagdulum sa bilug kalibutan hanggan tugka palis ti init. 45 Nagisi sa karaw-an ti limbun rutay sa balay Diyus. 46 Nagtawag laun si Hisus magkun, "Amang iintirga yi niku kang buhi sa kanmu kamang." Pagka sinabi niya katida, naugtasan siya arup. 47 Pagka nakitan kapitan sundalu ti nangyari, dinayaw gid niya ti Diyus, magkun, "Tutuu mahal gid inda pag tawu." 48 Ti manga kayamuan tawu nagtiripun gid nanuud. Pagka nakitan nida ti manga nangyari, nuli sida nagtaptap sa kanda dubdub dahil sa kanda karukuan. 49 Tanan manga kakilala ni Hisus hanggan ti manga babayi kay kaibahan ginan sa Galiliya, nagtindug ginan sa arayu namantay sa nangyari sa kan Hisus. 50 May usa ka lalaki kay ngaran si Husi taga Arimatiya, banwa manga Hudiyu. Mayad siya paggalangun manga tawu. Madi siya usa waydi ka pinunu unman siya nagpasnu sa harampangan Katipunan manga Pinunu hanggan sa kanda binwat sa kan Hisus. 52 Nag-ati si Husi tag sa kan Pilatu, hinagad niya ti bangkay ni Hisus. 53 Bin-ul niya kay bangkay ni Hisus ginan sa kurus bag-u kay sinaput sa pisahan rutay bag-u kay ipinauli sa tinaguktukan batu udwaya napaulian bangkay. 54 Ati katpung sa Biyirnis pag sirang, arani yi sirang pamahari. 55 Ti manga babayi ti nagkuyug sa kan Hisus ginan sa Galiliya, nagkuyug sa kan Husi nanduaw sa tinaguktukan batu, nu kabitay pag ipinauli ti bangkay. 56 Nuli maan sida nag-alistu manga pamanglu, kay iba hampay iwaswas sa kay bangkay ni Hisus, kay iba hampay ihaplas. Nagpahari sida sa sirang Sabadu angay sa Kasuguan.
1 Madlum surip sirang Duminggu nag-ati ti manga babayi sa tinaguktukan batu, may dara sida manga pamanglu kanda inalistu. 2 Pagka sida rinmas-ug, nakitan nida ilinigid yi maaw ti batu ginan sa sabian tinaguktukan batu. 3 Nagsulud yi sida ati, dapat unman sida may nakitan bangkay Panginuun Hisus. 4 Pagka mag-isip waya sida nu hayga udyi sitay, malu, nilpat lang kanda mata inda yi sa kanda arani matindugan ti duwa ka lalaki masinglaw kanda manga rutay. 5 Nadala ngap ti manga babayi, napayuk-ub sida sa daga. Sinabi manga lalaki sa kanda, "Hayga paghanapun niyu sitay sa ulian manga namatay ti nabuhi yi? 6 Unman yi siya sitay, nabuhi yi maan. Pag-isipa di niyu kay manga sinabi sa kanyu nu ati di waya sa Galiliya, 7 magkun, 'Kailangan ipahintulut ti Anak Tawu sa manga tawu makasalanan hampay ipaku sa kurus, bag-u mabuhi maan siya sa ikatlu pag sirang.' " 8 Bag-u di nakaisip maan sida kay manga sinabi ni Hisus sa kanda. 9 Nuli yi maan sida ginan sa tinaguktukan batu, ibinarita nida kanda manga nakitan hanggan nadnugan sa sampulu may usa ka tuludluan ni Hisus hanggan sa manga iba. 10 Sida ngani ni Marya Magdalina, ni Huwana, ni Marya kay ina ni Santiyagu ag may iba waya pag manga babayi kaibahan nida ti nagbarita inda sa manga Apustul ni Hisus. 11 Dapat kanda inisip ti barita manga babayi unman may tutuu. Unman sida naniwala. 12 Dapat si Pidru nagtindug nagpalagiw tag sa tinaguktukan batu, nagpasirang atag sa sulud, nakitan niya kay nagsaputan bangkay nadmay yi. Nuli maan si Pidru, maglingut waya siya nu hintay nguna ti nangyari. 13 Ati katpung pag sirang duwa ka tuludluan nag-ati sa usa ka baryu kay ngaran Imaus, sampulu may usa ka kilumitru kay karayu ginan sa Hirusalim. 14 Magharampangan sida sa tanan manga nangyari. 15 Sa kanda magharampangan ag magparaingan-an si Hisus ngap nagpakarani napaminsan sa kanda. 16 Dapat unman nakakilala kanda mata kuntay si Hisus yi inda. 17 Sinabi niya sa kanda magkun, "Hintay duy asan kanyu harampangan sa kanyu maglakaw?" Nagpat-ung sida sa kanda lakaw, maruku kanda uyahun. 18 Ti usa, kay ngaran si Kaliyupas, nagsagut magkun, "Usa lang aw kawu ti pandayuhan sa Hirusalim? Unman aw lugud nimu alam nu hintay ti manga nangyari ati nakadwa lang ginan hanggan sa taynguna tugka?" 19 Magkun si Hisus sa kanda, "Hintay duy pag nangyari?" Sinabi nida sa kanya, "Ti nangyari kabay sa kan Hisus taga Nasarit. Usa ka purupita makapangyarihan sa buwat hanggan sa bagaw, sa atubangan Diyus hanggan tanan manga tawu. 20 Idinimanda siya manga pangulu manug-asiwa balay Diyus hanggan manga pinunu hampay sintinsiyahan matyun. Kanda ipinaku siya sa kurus. 21 Dapat siya mana kanmi pag-asahan manuglukat sa nasyun Israil. Taynguna ikatlu paman pag sirang ati ginan pag nangyari. 22 "May manga kaibahan diman kami manga babayi Ti iba sa kanda nag-ati nanurip tag sa tinaguktukan batu. Naglingut gid kami sa kanda. 23 Pagka udyi may nakitan kay bangkay nuli maan sida nagsabi sida, 'May nakitan kami balaw pangakakitun pag manga anghil.' Nagsabi kunu ti manga anghil, 'Nabuhi si Hisus.' 24 Nag-ati maan sa tinaguktukan batu kanmi kaparihu tuludluan. Nakitan nida ti tinaguktukan batu parihu sa barita manga babayi. Dapat unman nakitan nida si Hisus." 25 Sinabi ni Hisus sa kanda ni Kaliyupas magkun, "Kamu duy katna kurang kanyu manga isip. Talaga kamu maganitganit waya kanyu tagipusuun. Hayga lugud kamu unman magpaniwala sa tanan isinurat manga purupita? 26 Unman aw lugud kailangan ngani ti pinili Diyus Manugribri pag Hari makalakaw inda pag kakurian bag-u makarubtan niya ti kadayawan?" 27 Bag-u ipinaliwanag ni Hisus sa kanda ti manga bagaw tungkul sa kanya sa tanan Banal Kasuratan ginan sa kan Muysis hanggan waya sa manga Purupita. 28 Pagka arani yi sida sa kanda ras-ugan pag baryu, ga anyu bilang ga magkalawuy di si Hisus. 29 Dapat ay kanda tinawidan siya magkun, "Pag-igya yi lang kawu sa kanmi, yabi yi duy, mag-agaw yi yabi sirang." Nagsaka yi ngani si Hisus nanhapit sa kanda. 30 Pagka nagpakarani siya sa lamak, binitbit niya ti tinapay bag-u ipinasalamat niya sa Diyus bag-u pinikapika bag-u ipinakaun sa kanda. 31 Bigla nakilala nida siya, si Hisus maaw inda. Pagka bigla nakilala siya, anung naparaw ngap siya, udyi may nakitan sida. 32 Pagka sida sida wadi, nagparaingan-an magkun, "Unman aw ga inawhawan kanta tagipusuun hanggan maghampang waya siya sa kanta sa dalan, magpaliwanag Banal Kasuratan?" 33 Linmakaw yi sida rargu nagbalik maan tag sa Hirusalim, kanda naras-ugan tipun yi ti sampulu may usa ka tuludluan hanggan kanda manga kaibahan. 34 Nagtultul sida magkun, "Tutuu ungud nabuhi uman kanta Panginuun, napakakit sa kan Simun." 35 Sida ni Kaliyupas nagsabi waydi tungkul kanda nakitan sa dalan, ag nu kabitay ti Panginuun nakilala nida sa kay magpikapika tinapay. 36 Paghampangan waya nida ti manga nangyari, kadaka si Hisus ngapu matindugan sa kanda karaw-an maghampang sa kanda. 37 Dapat sida kinulbaan di ngap ag nadala, kanda hantup barang mamaw. 38 Sinabi ni Hisus sa kanda, "Hayga kamu magkaaburidu? Hayga magtalinduwa waya sa kanyu naisipan? 39 Bantayi niyu kang manga dalukap, kang manga lulud, aku yi ngani. Hikapa niyu aku, bantayi dahil ti mamaw unman may nayi, unman may but-ul. Dapat malu aku may but-ul di may manga nayi." 40 Pagka sinabi niya tida, ipinahimalad kay manga dalukap kay manga lulud. 41 Udwaya sida makahimu makapaniwala dahil daka kanda magbaya ag maglingut waya sida. Nakan sinabi niya sa kanda, "May karan-unun aw kamu atay?" 42 Pinakan-an nida siya usa ka pulud isda sinugba. 43 Ginamit niya bag-u kay kinaun sa kanda atubangan. 44 Sinabi niya sa kanda, "Inda imaw yi kang pagsabihun sa kanyu kaybi kang di waya sa kanyu. Sinabi kabay niku kailangan tupadun ti tanan nakasurat tungkul sa kangku sa Kasuratan ni Muysis hanggan sa Surat manga Purupita hanggan sa Ribru Manga Kanta." 45 Bag-u binukasan niya kanda manga naisipan hampay maintindihan nida ti manga Kasuratan. 46 Magkun siya sa kanda, "Katunda ngani ti isinurat kailangan maglakaw kakurian ti pinili Diyus Manugribri pag Hari bag-u sa ikatlu pag sirang mabuhi siya uman ginan sa kay pagkamatay. 47 Dahil sa makamaskihan pag karampatan niya, ti umpisa tudlu ginan sa Hirusalim bag-u sa tanan nasyun magkun, pag-ampu ti manga tawu sa kanda kasalanan pagpapatawad hampay patawadun Diyus." 48 Magkun si Hisus sa kanda, "Kamu yi ngani ti manga manugpadakit inda pag barita. 49 Dapat ay ipakaun dapu niku sa kanyu ti ipinangaku niku Ama. Pag-alagad waya kamu sitay sa banwa Hirusalim hanggan sa udwaya kamu maras-ugan kapangyarihan ginan sa langit." 50 Tinaban sida ni Hisus tag sa luwas banwa sa may baryu Bitanya. Ahinunat niya kay manga kamang sa kanda tungud ulu, pinapaladan niya sida. 51 Pagka pagpapaladan waya niya sida, tinayakan yi niya sida, dinara yi tag sa langit. 52 Kanda waya sinambahan siya. Bag-u nagbalik sida sa Hirusalim, lubus gid nagbaya. 53 Pirmi sida nagtiripun sa balay Diyus magdayaw sa kanya.
1 Pagka udwaya linalang ti kalibutan, ti Bagaw daan di. Kaybi ginan kaibahan siya Diyus ag lubus parihu siya sa Diyus. 2 Ginan waya sa kabag-u ti Bagaw daan asan diman sa Diyus. 3 Ginan sa kanya pag binwat Diyus ti tanan pag manga bagay. Sa tanan tanan linalang unman may nabuwat ti Diyus nu ud ginan lang sa kanya. 4 Ti Bagaw ti gimpuunan tutuu pag buhi. Inda pag buhi ti sulu tigpakaun karayawan sa manga tawu. 5 Ti sulu magrayaw sa kadudulman ag unman dinaug kadudulman ti sulu. 6 Sinugu Diyus ti usa ka tawu kay ngaran si Huwan. 7 Nagras-ug siya nagtultul sa manga tawu tungkul sa sulu hampay nu madnugan tanan tawu kay barita, sida sumarig yi. 8 Bukun si Huwan tigpakaun karayawan sa manga tawu. Dapat nagsitay siya hampay ipagbarita niya ti sulu. 9 Tunda ngani ti tutuu gid pag sulu ti nagsitay sa kalibutan hampay kay marayawan ti tanan manga tawu. 10 Sitay yi sa babaw daga ti Bagaw. Madi kay linalang Diyus ti kalibutan ginan sa kanya, unman waydi nakilala siya manga tawu sa kalibutan. 11 Nagsitay siya sa kay sadili daga, dapat kay manga kanasyun unman nagtanggap sa kanya. 12 Ti iba lang nagtanggap ag nagsarig sa kanya. Bag-u sida ti pinakan-an niya karampatan hampay sida manga anak yi Diyus. 13 Sida manga anak yi Diyus dapat balaw parihu sa tawu pag kapanganakan may ama may ina. Ginan sa Diyus pag natanggap nida kanda buhi. 14 Nabilug tawu ti Bagaw, nangulian siya sitay sa kanmi. Mayad yi lang gid kay nabubut-un niya ag lubus ipinakilala niya ti katutuuhanan tungkul sa Diyus. Nakitan nimi kay kadayawan kay tinanggap ginan sa Ama dahil siya ti Bugtung Anak. 15 Itinultul ni Huwan tungkul sa kanya sa manga tawu. Iinalsa niya kay busis magkun, "Inda yi ngani ti pagsabihun niku, may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya." 16 Unman may kinatabwanan ti kaayadan kay ipinapalad sa kanta dahil sa kay lubus mayad nabubut-un. 17 Ti Kasuguan ipinadakit ni Muysis sa kanta. Dapat ginan sa kan Hisu-Kiristu pag naalaman nita ti mayad nabubut-un Diyus hanggan ti katutuuhanan tungkul sa kanya. 18 Kaybi ginan unman may tawu nakakit sa Diyus. Ti Bugtung Anak ti nagpakilala sa manga tawu nu kabitay ti Diyus. Dahil ti Bugtung Anak parihu sa Diyus ag pirmi gid sa kay arani Ama. 19 Ti manga pinunu Hudiyu nagsugu sa manga manug-asiwa balay Diyus hanggan sa manga Libita ginan sa Hirusalim hampay mamaingana sa kan Huwan magkun, "Si unu kawu?" Bag-u inda yi kay itinultul ni Huwan. 20 Balaw may salawahan kay sagut, itinapat yi gid magkun, "Balaw aku ti pinili Diyus Manugribri pag Hari." 21 Pinmaingana maan sida magkun, "Nu katunda, si unu ngani kawu? Kawu yi aw si Ilyas?" Sinagut ni Huwan magkun, "Bukun duy, balaw aku si Ilyas." Magkun sida, "Kawu aw ti Purupita, ti pag-alagdun nimi?" Sinmagut si Huwan magkun, "Balaw aku." 22 Sinabi nida sa kanya magkun, "Si unu gid kawu? Kailangan may isagut kami sa manga nagsugu sa kanmi. Kabitay kanmu masabi tungkul sa kanmu sadili?" 23 Sa kay nagsagut ginamit ni Huwan ti manga isinurat ni Purupita Isayas. Magkun si Huwan, "Aku duy 'ti busis usa ka magtawag sa pangawakawaan magkun, tadlunga niyu ti dalan kay lakawan Panginuun.' " 24 Tunda pag manga sinugu ginan ngani sa manga Parisiyu. 25 Bag-u nagpaingana sida sa kan Huwan magkun, "Hayga kawu magtulbaw nu unman kawu ti pinili Diyus Manugribri pag Hari, bukun diman kawu si Ilyas ag nu unman diman waydi kawu ti Purupita?" 26 Sinmagut si Huwan magkun, "Aku magtulbaw sa danum. Dapat may usa ka tawu matindugan sa kanyu karaw-an unman niyu nakilala. 27 Siya ti dumasun sa kang uryan, dapat unman gid aku may karampatan makalubad kay higut niya manga lapak." 28 Inda tanan nangyari sa banwa Bitanya, baliwa sa butlakan init sapa Hurdan, sa kan Huwan pagtulbawan. 29 Pagka sa usa ka sirang, nakitan ni Huwan si Hisus magpakarani sa kanya. Sinabi ni Huwan magkun, "Tunda yi ti Anak Karanidu kay ihinanda Diyus hampay mapatawad ti kasalanan kalibutan. 30 Imaw yi ngani kang pagsabihun may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya. 31 Unman aku nakaalam nu si unu tunda ti dumasun sa kangku. Dapat nagsitay aku magtulbaw sa manga tawu sa danum hampay ipakilala niku siya sa nasyun Israil." 32 Bag-u nagtultul si Huwan sa manga tawu magkun, "Naki-&tan niku ti Ispiritu ga kalampati magpakababa ginan sa langit bag-u nangulian ti Ispiritu sa kanya. 33 Ati katpung udwaya nakilala niku siya. Dapat Diyus ti nagsugu sa kangku hampay magtulbaw sa danum, imaw diman ti nagsabi sa kangku magkun, 'Makitan nimu aban ti Ispiritu magpakababa tag sa usa ka tawu hampay mangulian sa kanya. Tunda yi ngani pag tawu imaw ti tumulbaw sa manga tawu sa Ispiritu Banal.' " 34 Magkun si Huwan, "Nakitan yi ngani niku tunda pag nangyari. Pag-itultul yi niku sa kanyu tunda pag tawu imaw yi gid ti Anak Diyus." 35 Pagka sa usa ka sirang asan yi maan matindugan si Huwan hanggan kay duwa ka tuludluan. 36 Nakitan niya si Hisus maglawuy. Sinabi ni Huwan magkun, "Tunda yi ti Anak Karanidu kay ihinanda Diyus." 37 Ti duwa ka tuludluan nakadnug sa kay sinabi ni Huwan bag-u kinmuyug sida sa kan Hisus. 38 Nangaliwliw si Hisus. Pagka nakitan niya sida magkuyug, pinmaingana siya sa kanda magkun, "Hintay duy kanyu paghanapun?" Sinmagut sida magkun, "Naan duy kawu pag mag-&uli, Rabi?" (Kay ibug sabihun Maisturu) 39 Sinmagut si Hisus sa kanda magkun, "Atag yi lugud kita hampay makitan niyu kang ulian." Ati katpung manga palis ti init. Kinmuyug ngani sida bag-u nakitan nida kay ulian ni Hisus. Nadugay sida sa kan Hisus hanggan di magkayabi yi. 40 Ti usa sa kanda duwa si Andiris, kay patar-ari ni Simun Pidru. 41 Susun yi hinanap ni Andiris kay patar-ari si Simun. Bag-u kan Andiris sinabi sa kanya magkun, "Nakitan duy nimi ti pinili Diyus Manugribri pag Hari." (Nu sa Giriyigu kay ibug sabihun Kiristu.) 42 Bag-u kan Andiris tinaban si Simun tag sa kan Hisus. Nagbantay si Hisus sa kan Simun bag-u kay sinabi magkun, "Kawu si Simun, kan Huwan anak. Dapat ingarnan kawu Sipas. (Kay usa ka ngaran Pidru. Una Sipas una Pidru parihu kay kahulugan tanang batu daka). 43 Pagka sa usa ka sirang inisip ni Hisus siya atag yi sa Galiliya. Nakitan niya si Pilipi bag-u magkun si Hisus sa kanya, "Pagkuyug duy kawu sa kangku." 44 Taga Bitsayda si Pilipi, parihu sa kanda ni Andiris ni Pidru taga Bitsayda waydi. 45 Nakitan maan ni Pilipi si Natanail. Bag-u sinabi ni Pilipi sa kanya magkun, "Nakabtaan nimi si Hisus taga Nasarit kay anak ni Husi. Imaw ti pagturunuhun ni Muysis sa kay isinurat sa Kasuguan, siya diman waydi hanggan ti pagturunuhun manga Purupita." 46 Nagpaingana si Natanail magkun, "May lumuwang aw lugud kaayadan ginan sa Nasarit?" Sinmagut si Pilipi magkun, "Atag lugud kita, bantayi nimu." 47 Pagka nakitan ni Hisus si Natanail magpakarani sa kanya, sinabi niya tungkul sa kan Natanail magkun, "Tunda pag tawu tutuu gid Israilita. Unman gid siya maradaya." 48 Bag-u pinaingana ni Natanail sa kan Hisus magkun, "Kabitay duy kawu pag nakakilala yi sa kangku?" Sinmagut si Hisus magkun, "Pagka udwaya kawu bin-ul ni Pilipi, daan yi duy kawu nakitan niku kanmu waya sa sirung puun igus." 49 Magkun si Natanail, "Maisturu, kawu yi duy ti Anak Diyus, kawu yi ti Hari nasyun Israil." 50 Sinabi ni Hisus magkun, "Nakan aw duy kawu maniwala dahil sa kang sinabi magkun, nakitan yi niku kawu kanmu waya sa sirung puun igus? Makitan nimu aban ti lalu waya makadululaw." 51 Bag-u sinabi ni Hisus sa kanya magkun, "Ungud gid duy kang pagsabihun sa kanyu, makitan niyu aban nabukasan ti langit, ti manga anghil Diyus may tag sa daga may tag sa langit dahil sa kanda magpasakup sa kapangyarihan Anak Tawu."
1 Pagka sa ikatlu pag sirang, may pamasaruhan sa banwa Kana, sa daga Galiliya. Nag-ati diman kay ina ni Hisus. 2 Binan-awan diman sa pamasaruhan si Hisus hanggan kay manga tuludluan. 3 Pagka kinurang yi sida alak sa karan-an, sinabi niya ina sa kan Hisus magkun, "Udyi maaw duy sida may alak." 4 Sinabi ni Hisus sa kanya magkun, "Danga duy, Inang, pagpakialmi nimu kang buwat. Dahil udwaya kainda ti udas hampay ipakilala niku kang buruwatun." 5 Bag-u sinabi niya ina sa manga manugtirindugun magkun, "Sunda duy niyu una hintay kay pagsabihun sa kanyu." 6 May minana ti manga Hudiyu ugali maglumpiyu kanda bilug hanggan kanda manga gamit bag-u makasamba sa Diyus. Nakan siyun pag balay ti may puun pamasaruhan may unum waydi ka tapayan. Kay sukad kada tapayan manga unum ka banga danum. 7 Sinabi ni Hisus sa manga manugtirindugun sa karan-an magkun, "Pun-a duy niyu ti manga tapayan danum." Pagka kanda yi ngani pinunu hanggan sa bibig, 8 sinabi ni Hisus sa kanda, "Kadlui yi niyu danum daran-a tag sa manugkasuniru." Kanda yi ngani dinara. 9 Tinigsiman niya ti danum nagbaliw alak. Unman alam niya nu naan ginan tunda, dapat alam diman manga manugtirindugun nu naan ginan tunda dahil sida diman ti nagkadlu. Bag-u bin-ul kasuniru ti lalaki ipasaru, 10 magkun siya, "Ti un-an mana ihayin kay mayad pag alak. Pagka daka yi ti ininum manga tawu bag-u kay alanganlangan yi pag alak. Bati hayga ipinauryan ngap niyu ti marinu pag kalasi alak?" 11 Tunda kay binwat ni Hisus sa Kana, sa daga Galiliya, imaw ti kabag-u binwat niya pag makapangyarihan pag tanda. Ati katpung pag Ipinakakit niya kay kamaskihan bag-u nagsarig yi sa kanya kay manga tuludluan. 12 Bag-u si Hisus, kay ina, kay manga patar-ari hanggan kay manga tuludluan nag-ati sa Kapirnaum. Nadugay sida ati manga usa ka duminggu. 13 Arani yi ti Kapistahan sa Pag-alaala sa Karibrihan. Nakan nag-ati si Hisus sa Hirusalim. 14 Pagka ati siya sa balay Diyus, nakitan niya ti manga magpabili manga baka, manga karanidu hanggan manga kalampati. Siyun diman pag matukawan ti manga manugbalyu kuwarta. 15 May linubid si Hisus pamakul bag-u binugaw niya ginan sa balay Diyus ti tanan hayup, una karanidu una baka. Linikwang niya ti manga burugtangan kuwarta manga manugbalyu, ipinamuhus yi lang niya kanda kuwarta. 16 Sinabihan niya ti manga magpabili kalampati magkun, "Bul-a niyu tunda atay ginan. Danga yi niyu pagbuwata palingkihan ti balay niku Ama." 17 Bag-u naisipan niya manga tuludluan ti pagsabihun sa Banal Kasuratan magkun, "Diyus, ga apuy malabdaban sa kang tagipusuun kang magpahalaga sa kanmu balay." 18 Pagka nakitan manga pinunu Hudiyu kay binwat ni Hisus, pinaingana nida sa kanya magkun, "Hintay pag tanda kanmu ipakakit sa kanmi hampay maalaman nimi may karampatan ngani kawu magbuwat katida." 19 Sinagut ni Hisus magkun, "Gubaa niyu inda pag balay Diyus bag-u ipatindug maan niku sa sulud tulu lang ka sirang." 20 Pinaingana manga Hudiyu magkun, "Ipatindug aw lugud nimu inda sa sulud tulu lang ka sirang? Upatpulu may unum ka timpu kay kadugay kay nagpatindug inda pag balay Diyus." 21 Dapat ti pagkumnun ni Hisus balay Diyus kay yi bilug. 22 Pagka nabuhi uman si Hisus ginan sa kamatayan naalaala niya manga tuludluan inda kay sinabi nakan nagpatutuu ngani sida sa Kasuratan hanggan sa kay manga sinabi ni Hisus. 23 Kay di waya sa Hirusalim si Hisus katpung sa Kapistahan sa Pag-alaala sa Karibrihan, nakitan manga tawu kay binwat manga makapangyarihan pag tanda, nakan mayamu ti nagsarig sa kanya. 24 Dapat unman isinarig niya kay sadili sa kanda dahil kilala di niya ti tanan tawu. 25 Unman kailangan may tumultul sa kanya tungkul sa manga tawu dahil daan alam yi waydi niya kay nalub-anan nida tanan.
1 May usa ka Parisiyu, kay ngaran si Nikudimu. Pinunu siya manga Hudiyu. 2 Nag-ati siya sa kan Hisus sa yabi. Bag-u kay sinabi sa kan Hisus magkun, "Maisturu, alam nimi duy kawu sinugu Diyus hampay manugtudlu sa manga tawu. Dahil tunda pag manga tanda kanmu pagbuwatun, mabuwat lang tawu nu sa kanya gid ti Diyus." 3 Sinmagut si Hisus magkun, "Ungud gid inda kang pagsabihun sa kanmu duy, dayu gid makapasakup ti tawu sa kay paghari Diyus, purya lang nu siya ainanak inuman." 4 Pinaingana ni Nikudimu sa kanya magkun, "Kabitay duy pag mianak uman ti tawu nu gurangun yi siya? Dayu gid siya makasulud maan sa tiyan niya ina hampay ianak uman." 5 Sinmagut si Hisus magkun, "Ungud gid duy kang pagsabihun sa kanmu, dayu makapasakup ti tawu sa kay paghari Diyus, purya lang nu siya ainanak sa panab-anan danum hanggan Ispiritu Banal. 6 Pagka ti tawu ainanak niya gurang, may buhi yi kay bilug. Dapat nu ainanak siya Ispiritu Banal, may buhi kay tagipusuun. 7 Danga duy kawu maglingut sa kang sinabi sa kanmu magkun kailangan kamu ianak uman. 8 Maghuyup ti durus una naan ginan kay gustu. Mag-adnugan nimu kay hagunung, dapat unman nimu alam nu naan ginan kay umpisa ag nu naan tag kay turunu. Katunda diman ti kada tawu nu ainanak siya Ispiritu." 9 Sinabi ni Nikudimu magkun, "Kabitay nguna pag mangyari tunda duy?" 10 Sinmagut si Hisus magkun, "Kawu duy kabay manugtudlu sa Israil? Hayga unman magkasalman nimu inda pag manga katutuuhanan? 11 Ungud gid duy kang pagsabihun sa kanmu, ti magkaalaman nimi imaw ti kanmi pagsabihun ag ti kanmi nakitan imaw ti pag-itultul nimi. Dapat unman kamu magpaniwala sa kanmi pag-itultul. 12 Nu kamu unman magpaniwala sa kang itinultul tungkul sa manga mangyari sitay sa babaw daga, kabitay duy kamu pag pumaniwala nu kang itultul sa kanyu tungkul sa manga mangyari sa langit? 13 Unman may tawu nakaati sa langit, purya lang ti Anak Diyus, imaw ti nagsitay ginan sa langit." 14 Kaybi kanda sa pangawakawaan di waya, tinur-ug ni Muysis ti ulay galang tag sa tungud. Katunda diman waydi kailangan ipaabwat ti Anak Tawu, 15 hampay una si unu pag tawu nu sumarig sa Anak Tawu, may tutuu pag buhi unman may katapusan. 16 Daka gid kay pagmahal Diyus sa tanan tawu sa babaw daga, nakan ipinakaun niya kay Bugtung Anak hampay una si unu pag tawu nu sumarig sa kanya, dayu ipadamhak sa kamatayan, bagkus ngap may tutuu pag buhi siya unman may katapusan. 17 Sinugu Diyus kay Anak balaw hampay sintinsiyahan niya ti manga tawu sa kaparusahan, bagkus ngap hampay iribri niya ti manga tawu. 18 Ti tawu nu sumarig sa Anak Diyus, balaw pagsintinsiyahan sa kaparusahan. Dapat ti unman magsarig nasintinsiyahan yi sa kaparusahan, dahil unman siya nagsarig sa kapangyarihan Bugtung Anak Diyus. 19 Kainda kay paraan Diyus magpihu sa daut sa mayad. Nagsitay sa kalibutan ti katutuuhanan ga karayawan ginan sa Diyus. Dapat pinalabi waya manga tawu ti kadudulman sa karayawan, dahil daut kanda manga buwat. 20 Una hintay pag tawu tigbuwat daut magdayu di sa karayawan, unman gid siya magkaibug magpakarani sa marayaw, barang makilala manga iba kay buwat daut. 21 Dapat ti tawu nu nag-ugali siya sa katutuuhanan, pumakarani ngap sa karayawan hampay makilala kay manga buruwatun angay sa kay pakiusa sa Diyus. 22 Bag-u si Hisus hanggan kay manga tuludluan nag-ati sa daga Hudiya. Nadugay siya ati kaibahan nida, nagtulbaw siya sa manga tawu. 23 Si Huwan nagtulbaw diman waydi sa manga tawu ati sa Inum, balaw arayu sa Salim, dahil ati daka pag danum. Nag-ati sa kanya ti manga tawu bag-u kay itinulbaw sida. 24 Dahil ati katpung udwaya pinirisu si Huwan. 25 Kay iba manga tuludluan ni Huwan hanggan ti usa ka Hudiyu nag-aratwan tungkul sa kanda ugali maglumpiyu kanda bilug hanggan kanda manga gamit bag-u makasamba sa Diyus. 26 Bag-u nagpakarani sida sa kan Huwan ag sinabi nida sa kanya magkun, "Maisturu, kaybi pagka kita baliwa sa butlakan pag pangpang sapa Hurdan, may kaibahan kabay kawu usa ka tawu, kanmu diman itinultul sa kanmi. Siya maaw magtulbaw yi waydi kainda, kadamlan ngap tawu ti atag sa kanya." 27 Sinabi ni Huwan sa kanda magkun, "Dayu mangyari ti katida sa tawu, purya lang nu Diyus ti may buwat sa kanya. 28 Nakadnug diman gid kamu sa kang sinabi magkun, balaw aku ti pinili Diyus Manugribri pag Hari. Sinugu lang aku hampay umuna sa kanya. 29 Ti babayi ipasaru sa kay lalaki arasawan-un. Ti iribahun mag-alagad sa lalaki ipasaru. Nakabaya ti manug-iba nu makad-&nug siya sa kay magbagaw lalaki ipasaru. Katunda diman ungud kang magbaya taynguna. 30 Kailangan siya ti may kadayawan, kailangan aku ti sa sirung." 31 Ti ginan sa langit imaw ti makamaskihan man sa tanan tawu. Ti ginan sa babaw daga, imaw ti taga daga yi ngani. Ti taga babaw daga kay baragawun para waydi sa babaw daga. Dapat ti taga langit imaw ti makamaskihan man sa tanan tawu. 32 Pag-itultul niya kay nakitan hanggan kay nadnugan dapat unman may tawu magpaniwala sa kay pag-itultul. 33 Nu ti tawu magpaniwala sa kay pag-itultul, tunda ngani pag tawu tigpuruyba sa kay katutuuhanan Diyus. 34 Ti sinugu Diyus imaw tigbarita manga bagaw ginan sa Diyus dahil pag-ilubus Diyus kay Ispiritu sa kanya. 35 Ti Anak pagmahalun niya Ama nakan ipinasakup Ama ti tanan tanan pag manga bagay sa kapangyarihan niya Anak. 36 Nu ti tawu magsarig sa Anak, may tutuu pag buhi siya unman may katapusan. Dapat nu ti tawu unman magpaniwala sa Anak, dayu siya makatanggap buhi, bagkus ngap udyi madura sa kanya kay parusa Diyus.
1 Nabaritaan manga Parisiyu paggaryahun pag-itulbaw ni Hisus lalu mayamu man pag manga tawu balaw lang ga kan Huwan pag itinulbaw. 2 Dapat nu sa ungud unman nagtulbaw si Hisus. Kay di manga tuludluan ti nagtulbaw sa manga tawu. 3 Pagka naalaman ni Hisus ti pagsabihun manga Parisiyu, nighit siya ginan sa Hudiya, binmalik maan siya tag sa Galiliya. 4 Sa kay nag-atag sa Galiliya kailangan siya ati lakaw sa daga Samarya. 5 Pagka sa daga Samarya, linmakaw si Hisus sa usa ka banwa kay ngaran Sikar, balaw arayu sa kan Hakub kaybi waya itinayak pag daga sa kay anak sa kan Husi. 6 Siyun diman kan Hakub kaybi kinali pag bubun. Si Hisus tinaklay sa kay maglakaw, tinmukaw sa kay bibig bubun. Manga karaw-an yi sirang ati katpung. 7 May babayi taga Samarya rinmas-ug siyun manaas. Sinabi ni Hisus sa kanya, "Nai duy danum." 8 Kay manga tuludluan linmakaw nag-ati sa banwa mamili karan-unun. 9 Magkun ti babayi sa kan Hisus, "Hudiyu kawu, aku taga Samarya. Kabitay kawu pag makahagad danum sa kangku?" Dahil ti manga Hudiyu balaw makapaminsan sa manga taga Samarya. 10 Sinmagut si Hisus magkun, "Nu abi maalaman lang nimu nu hintay kay pag-&ipakaun Diyus ag nu si unu ti naghagad kam danum, mahimu kawu ngap mana ti humagad sa kanya, hampay ipakaun niya sa kanmu ti danum imaw ti makapakaun buhi sa tawu." 11 Sinabi babayi sa kanya magkun, "Dapat duy unman may pangadlu kawu, abasad paman ti bubun. Naan pag bul-un nimu tunda pag danum tigpakaun buhi sa tawu? 12 Kanmi ginurang si Hakub ti may pamana kaybi sa kanmi inda pag bubun. Siya, kay manga anak hanggan kay manga hayup nag-inum diman danum ginan sa inda pag bubun. Kanmu aw lugud gustu sabihun kawu makamaskihan man sa kan Hakub?" 13 Sinmagut si Hisus magkun, "Nu ti tawu uminum sa inda pag danum, uwawun di maan siya. 14 Dapat dayi gid uwawun ti tawu una kapira aban nu inmun niya ti danum kang ipakaun sa kanya. Dahil ti danum kang ipakaun sa kanya bumaliw ga bulbugan sa kay tagipusuun may danum magpakaun buhi. Tunda pag danum tigpakaun tutuu pag buhi unman may katapusan." 15 Sinabi babayi sa kanya magkun, "Pakan-i gid duy nimu aku tunda pag danum hampay udyi gid aku uwawun, udyi kailangan aku manaas sitay tag." 16 Bag-u sinabi ni Hisus sa kanya magkun, "Pag-uli dapu kawu duy, bul-a kam asawa bag-u pagsitay maan." 17 Sinmagut ti babayi magkun, "Unman duy aku may asawa." Sinabi ni Hisus sa kanya magkun, "Tama kanmu sinabi unman may asawa kawu. 18 Dahil kaybi lima yi kanmu manga asawa, dapat taynguna asan pag lalaki bukun kanmu asawa. Tutuu ngani kanmu sinabi sa kangku." 19 Sinabi babayi sa kan Hisus magkun, "Purupita maaw duy kawu. 20 Kanmi manga ginurang nagsamba sa Diyus sa inda pag bantud. Dapat pagsabihun niyu pag manga Hudiyu kuntay ati di sa Hirusalim kailangan magsamba sa Diyus ti manga tawu." 21 Sinabi ni Hisus sa babayi magkun, "Kailangan pagpasnu yi kawu duy sa kang pagsabihun sa kanmu. Arani yi ti kaudasan aban balaw yi sa inda pag bantud una paman sa Hirusalim pag sumamba ti manga tawu sa Ama. 22 Kamu tanan pag manga taga Samarya, unman gid niyu nakilala ti kanyu pagsambahan. Nu bay kami manga Hudiyu kilala gid nimi ti kanmi pagsambahan, dahil ginan sa manga Hudiyu pag itinaratu Diyus ti karibrihan. 23 Dapat arani yi gid ti udas, kainda yi ngap, pag-udyukan Ispiritu Diyus ti manga tawu sa kanda magsamba sa Ama dahil siya ti tutuu pag Diyus. Nakan kay paghanapun Ama tunda ngani pag manga tawu ti mangungud sa kanda magsamba sa kanya. 24 Ti Diyus Ispiritu, nakan ti tawu unman ungud makasamba purya lang nu siya udyukan Ispiritu Diyus." 25 Bag-u sinabi babayi sa kan Hisus magkun, "Alam niku duy sumitay ti pinili Diyus Manugribri pag Hari. Sa kay magsitay aban itudlu niya sa kanmi ti tanan tanan bagay." 26 Bag-u sinabi ni Hisus sa kanya magkun, "Aku tigbagaw sa kanmu kainda imaw yi ngani ti kanmu pagkumnun." 27 Pagka sinabi ni Hisus tunda sa babayi, rinmas-ug kay manga tuludluan. Kanda kinadulawan nu hayga siya maghampang sa babayi. Dapat unman may nakabaya nagsabi sa babayi magkun, "Hintay kam kailangan?" aw ngatay sa kan Hisus magkun, "Hayga kawu maghampang sa kanya?" 28 Bag-u tinayakan babayi kay banga punu danum, nag-ati siya sa banwa nagsabi sa manga tawu magkun, 29 "Atag lugud kita duy, bantayi niyu ti usa ka tawu nagsabi sa kangku tanan niku binwat kaybi ginan. Imaw aw nguna tunda ti pinili Diyus Manugribri pag Hari?" 30 Naglinuwas yi ngani ti manga tawu ginan sa banwa nag-ati sa kan Hisus. 31 Kay ati waya sa banwa ti babayi, pagpilitun mana niya manga tuludluan si Hisus magkun, "Maisturu, pagkaun dapu kawu." 32 Dapat sinabi niya sa kanda, "Aku duy may kinaun karan-unun unman niyu magkaalaman." 33 Nakan magha-&rampangan kay manga tuludluan magkun, "May nagtibu aw nguna karan-unun sa kanya?" 34 Magkun si Hisus sa kanda, "Kang pinagkakaran-unun duy kang yi ngani magtupad sa kay kagustuhan niku Ama hanggan sa ud matapus niku ti buruwatun kay iinintirga sa kangku, dahil siya ngani ti nagsugu sa kangku. 35 "May sanglitan kamu magkun, upat waya ka bulan bag-u mangani yi. Dapat pagsabihun niku sa kanyu, bantayi niyu ti manga tanman. Lutu yi, mahimu yi anihun. 36 Ti manug-ani magtanggap yi kay patabig. Pagtipunun niya ti burak atag sa buhi unman may katapusan. Nakan minsan nakabaya ti manug-&pamgas hanggan ti manug-ani. 37 Tutuu ngani ti sanglitan manga tawu magkun, tuhay tigpamgas, tuhay maan tig-ani. 38 Dahil sinugu niku kamu hampay kanyu anihun ti unman binudlayan niyu. Ti binudlayan manga iba, pinakinabangan ngap niyu." 39 Mayamu pag manga tawu taga ati pag banwa sa daga Samarya nagsarig sa kan Hisus dahil sa kay sinabi babayi magkun, "Itinultul niya sa kangku ti tanan niku binwat kaybi ginan." 40 Nakan pagka rinmas-ug ti manga Samaritanu sa kan Hisus, tinawidan nida siya siyun dapu siya sa kanda. Nakan nadugay si Hisus sa kanda duwa ka yabi. 41 Lalu waya mayamu tawu ti nagsarig sa kan Hisus dahil sa kay itinudlu niya. 42 Sinabi nida sa babayi magkun, "Nagsarig kami taynguna sa kan Hisus balaw dahil sa kanmu sinabi sa kanmi. Taynguna kami magsarig dahil sa kanmi nadnugan sa kanya. Nakilala yi waydi nimi siya yi ngani ti Manugribru sa manga tawu taga kalibutan." 43 Pagka nakalawuy duwa ka sirang, ginminan yi si Hisus atabug sa Galiliya. 44 Si Hisus yi waydi ti may sabi magkun, "Ti purupita unman paggalangun manga tawu sa kay sadili banwa." 45 Pagka rinmas-ug siya sa Galiliya, mayad kanda nagtanggap sa kanya ti manga taga ati. Dahil ati diman waydi sida sa Hirusalim katpung sa Kapistahan sa Pag-alaala sa Karibrihan, ag kanda nakitan ti tanan binwat niya ati. 46 Nag-ati maan si Hisus sa banwa Kana sa daga Galiliya. Ati kaybi pinabaliw niya alak ti danum. Ati sa Kapirnaum may tawu mataas kay katungkulan, may sakit kay anak lalaki. 47 Pagka naalaman niya rinmas-ug maan si Hisus sa Galiliya ginan sa Hudiya, nag-ati siya nagpakihampang sa kan Hisus magkun, "Pag-atag dapu kawu sa Kapirnaum, paayada duy kang anak lalaki dahil hirimugtasun yi kay arup." 48 Sinabi ni Hisus sa kanya magkun, "Kamu unman gid magsarig nu ud may mag-&akitan manga makadululaw pag tanda." 49 Sinabi pinunu sa kan Hisus magkun, "Pagkuyug yi gid mana kawu sa kangku duy barang mamatay kang anak." 50 Sinabi ni Hisus magkun, "Pag-&uli yi duy kawu, mayad yi kanmu anak." Sinmarig yi gid ti pinunu sa kan Hisus bingagaw. Nuli yi ngani siya. 51 Pagka sa dalan di waya, sinulang yi siya niya manga panawuhun magkun sida, "Mayad yi duy kam anak." 52 Namaingana ti pinunu nu kabitay ti udas kay nagmayad. Magkun sida, "Kaaldaw ligdas ti init nahumpawan yi siya kay init bilug." 53 Bag-u naalaala ama ati ngap katpung pag udas sinabi ngani ni Hisus, "Mayad yi kam anak." Nakan tunda pag pinunu hanggan kay asawa, kay manga anak nagsarig yi sa kan Hisus. 54 Inda yi ngani kay ikadwa pag makapangyarihan pag tanda kay binwat ni Hisus pagka nuli siya sa Galiliya ginan sa Hudiya.
1 Pagka dugay may Kapistahan ti manga Hudiyu nakan nag-ati si Hisus sa Hirusalim. 2 Ati sa Hirusalim sa may puwirtahan palalakawan manga karanidu may daka gid pag tangki. Sa kay palibut tangki may lima ka parat-ungan. Nu sa bagaw Hibriyu tunda pag tangki kay ngaran Bitisda. 3 Ati sa manga parat-ungan maigyaan ti kadamlan may manga dahilan, may manga buta, may pilay, manga lunu. Mag-alagad sida sa tumandug ti danum. 4 Dahil may pangudasun lang kay magras-ug ti usa ka anghil Panginuun bag-u pagkuyikawun niya ti danum sa tangki. Ti un-an nagsugbu pagka natandug ti danum, magkaayadan kay dahilan. 5 May usa ka lalaki diman ati, tatlumpulu may walu yi ka timpu kay sakit. 6 Nakitan siya ni Hisus maigyaan ati. Alam ni Hisus dugay yi pag timpu kay sakit. Sinabi niya sa may sakit magkun, "Magkaibug aw kawu maayadan?" 7 Nagsagut ti lalaki may sakit magkun, "Pagka magkatandug ti danum, unman may tawu magdara sa kangku tag sa tangki. Kang di waya mag-atag, magkaunahan yi aku manga iba." 8 Sinabi ni Hisus sa kanya magkun, "Pagtindug yi duy kawu, daran-a yi kam amak, paglakaw yi." 9 Kadaka nag-ayad yi siya, dinara yi niya kay amak, linmakaw yi rargu. Katpung sa sirang pamahari pag pinaayad ni Hisus tunda pag tawu. 10 Nakan nanamyaw ti manga pinunu Hudiyu sa kanya magkun, "Sirang pamahari taynguna, labag sa Kasuguan nita nu kawu magdara kanmu amak." 11 Dapat sinabi niya sa kanda magkun, "Ti nagpaayad sa kangku imaw ti may sabi sa kangku magkun, 'Daran-a kam amak paglakaw yi.' " 12 Nagpaingana ti manga pinunu Hudiyu sa kanya magkun, "Si unu tunda pag tawu ti nagsabi sa kanmu, 'Daran-a kam amak'?" 13 Dapat unman niya alam nu si unu ti nagpaayad sa kanya. Kadamlan waydi tawu siyun nakan udyi may nakitan siya sa kan Hisus. 14 Bag-u nakitan maan siya ni Hisus sa balay Diyus. Magkun si Hisus sa kanya, "Malu duy, kawu mayad yi. Inda ginan danga yi kawu magkasala, bagay mangyari maan sa kanmu ti lalu daka pag kadautan." 15 Bag-u nag-ati ti tawu, sinabi niya sa manga pinunu Hudiyu si Hisus ti nagpaayad sa kanya. 16 Siyun ginan pag-unuunuhun yi manga Hudiyu si Hisus dahil pinaayad niya tunda pag tawu sa sirang pamahari. 17 Nakan sinabi ni Hisus sa kanda magkun, "Hanggan taynguna unman may kaapasan kang Ama sa kay buwat, nakan una aku magbuwat diman gid." 18 Pagka sinabi ni Hisus tunda lalu waya siya paggayakun manga pinunu Hudiyu, dahil naglabag siya sa pagsabihun sa Kasuguan tungkul sa sirang pamahari, ag pagkumnun waya niya ti Diyus kay gid Ama, kay ibug sabihun pinaparihu niya kay sadili sa Diyus. 19 Bag-u sinabi ni Hisus sa manga pinunu Hudiyu magkun, "Ungud gid inda kang pagsabihun sa kanyu, ti Anak unman may karampatan magbuwat una hintay nu ginan lang sa kay sadili. Ti nakitan Anak sa kay Ama pag buwat imaw diman ti pagbuwatun niya. 20 Dahil ti Anak pagmahalun gid Ama, ag ti tanan buruwatun Ama pag-ipakakit niya sa Anak. May lalu waya makamaskihan pag buwat kay ipakakit Ama sa Anak, balaw lang ga inda pag binwat niya. Pihu kamu lalu gid madulaw aban. 21 Dahil nu kabitay pagbuhiun uman Ama ti manga namatay, katunda diman waydi pagbuhiun uman Anak una hintay pag tawu kay gustu buhiun uman. 22 Unman diman magpihu ti Ama sa una hintay pag tawu nu daut nu mayad. Iinintirga niya sa Anak ti karampatan hampay makapihu sa manga tawu nu daut nu mayad, 23 hampay ti tanan tawu gumalang sa Anak parihu sa kanda maggalang sa Ama. Nu ti tawu unman maggalang sa Anak, unman diman waydi paggalangun niya ti Ama ti nagsugu sa Anak. 24 "Ungud gid inda kang pagsabihun sa kanyu, nu ti tawu magtanggap sa kang bagaw ag magsarig sa Diyus sa nagsugu sa kangku, tunda pag tawu may tutuu pag buhi unman may katapusan. Balaw yi sakup siya sa sintinsiya aban. Kay patabgan balaw yi kamatayan, bagkus ngap buhi kay patabgan. 25 Tutuu gid kang pagsabihun sa kanyu, arani yi ti udas, kainda yi ngapu, ti manga tawu ga tigbak makadnug sa kay magbagaw Anak Diyus bag-u makatanggap sida buhi. 26 Nu kabitay ti Ama may gimpuunan buhi, katunda diman ipinakaun niya sa Anak ti karampatan hampay may gimpuunan siya buhi. 27 Pinakan-an niya ti Anak karampatan makapihu sa tawu nu daut nu mayad, dahil siya ti Anak Tawu. 28 Danga kamu magkadulaw, dahil udyi dugay aban makadnug ti tanan manga namatay sa kang magbagaw. 29 Bag-u sida lumuwang ginan sa kalubngan. Ti manga nagbuwat mayad buhiun uman hampay may buhi unman may katapusan. Ti manga nagbuwat daut buhiun uman bag-u sintinsiyahan sida sa kaparusahan." 30 Sinabi ni Hisus magkun, "Unman aku may karampatan magbuwat una hintay nu ginan lang sa kang sadili. Angay lang sa kang nadnugan ginan sa Ama pag makapihu aku sa tawu nu daut nu mayad. Nakan aku balaw magsalan sa kang magpihu sa tawu, dahil aku unman magsunud sa kang sadili lang kagustuhan. Bagkus ngap kang pagsundan ti kagustuhan Ama, imaw ti nagsugu sa kangku. 31 "Nu aku lang tigtultul tungkul sa kang sadili, barang pahimudilun manga tawu. 32 Dapat hanggan ti Ama magpakilala diman nu si unu aku ag alam niku tutuu ti pagsabihun niya tungkul sa kangku. 33 Nagpasugu kamu atag sa kan Huwan bag-u ipinakilala diman niya ti katutuuhanan. 34 Balaw kuntay aku may kailangan sa manga pagsabihun tawu tungkul sa kangku. Nakan lang kang pagsabihun tungkul sa kan Huwan binagaw, hampay mana kamu may karibrihan. 35 Sa kay magtudlu si Huwan parihu ga sulu nasul-an rinmayaw. Naibug diman kamu nakabaya ngalay ngalay sa kay pag-itudlu ga sa marayaw. 36 Dapat sa kang manga pagbuwatun pag makilala gid nu si unu aku, balaw lang ga sa kan Huwan itinultul tungkul sa kangku. Pagbuwatun niku ti iinintirga Ama pag buruwatun sa kangku. Nakan tunda ngani pag buruwatun tigpakilala nu si unu aku. Sa kang manga buruwatun pag makitan diman niyu aku sinugu Ama. 37 Hanggan ngap ti Ama ti nagsugu sa kangku tigpakilala waydi nu si unu aku. Una kaybi ginan kamu unman nakadnug kay magbagaw, unman diman kamu nakakit sa kay pinagkabilug. 38 Pag-ipalawuy lang niyu kay manga bagaw sa kanyu naisipan, dahil unman kamu magsarig sa kangku, sa kay sinugu Ama. 39 Pirmi diman pag-adalun niyu ti manga Banal Kasuratan dahil kanyu pag-isipun siyun kamu pag makakit buhi unman may katapusan. Tunda pag manga Banal Kasuratan tigpakilala nu si unu aku. 40 Dapat unman kamu magkaibug magtanggap sa kangku nakan unman diman waydi matanggap niyu ti tutuu pag buhi. 41 "Balaw kang turunu para aku dayawun manga tawu. 42 Dapat kilala niku kamu. Alam niku kamu unman madunung magmahal sa Diyus. 43 Nagsitay aku may karampatan ginan sa kang Ama dapat unman pagtanggapun niyu aku. Nu iba bay ti sumitay magsarig sa kay lang sadili kapangyarihan, kanyu ngap tanggapun. 44 Magbaya kamu nu kamu magdarayawan sa usa kag sa usa, dapat unman kamu magmasigasid hampay makadayaw sa kanyu ti tutuu Diyus. Nu katunda kamu, kabitay lugud kamu pag pumaniwala sa kangku? 45 Danga niyu isipun kuntay aku ti sumumbung sa Ama laban sa kanyu. Si Muysis ti pagsarigan niyu, imaw ngap ti sumumbung laban sa kanyu. 46 Nu ungud pagpaniwalaan niyu si Muysis, paniwalaan diman waydi mana aku dahil nagsurat siya tungkul sa kangku. 47 Dapat nu unman pagpaniwalaan niyu ti manga isinurat ni Muysis, kabitay pag paniwalaan niyu kang manga pagsabihun?"
1 Bag-u nagdipay si Hisus sa danaw Galiliya, kay usa ka ngaran danaw Tibiryas. 2 Kadamlan tawu ti nagkuyug sa kan Hisus, dahil nakitan nida kay makapangyarihan pag manga tanda sa kay magpaayad sa may manga sakit. 3 Nagtukad si Hisus sa usa ka bantud kaibahan niya kay manga tuludluan bag-u siya tinmukaw ati. 4 Ati katpung arani yi ti Kapistahan manga Hudiyu sa Pag-alaala sa Karibrihan. 5 Pagka nagbantay si Hisus, nakitan niya ti kadamlan tawu magpakarani sa kanya. Nakan pinmaingana siya sa kan Pilipi magkun, "Naan pag makabili kita karan-unun kang-ud hampay ipakaun sa tunda pag manga tawu tanan tanan?" 6 Inda kay sinabi sa kan Pilipi bilang kay lang subuk dahil daan alam ni Hisus nu hintay kay buwatun sab. 7 Nagsagut si Pilipi magkun, "Nu duwa lang ka gatus pisus kanta ibili karan-unun, balaw kumang-ud, dayu tumurupud sa kada usa una lang dariit." 8 Ti usa ka tuludluan niya, si Andiris, kan Simun Pidru patar-ari, nagsabi sa kan Hisus magkun, 9 "May anak lalaki atay may balun lima ka tinapay arina sibada ag duwa ka isda. Dapat kabitay lang pag kumang-ud tunda sa kainda kay kayamu pag, manga tawu?" 10 Sinabi ni Hisus magkun, "Sabiha niyu ti manga tawu pagtukaw sida." Mapadang ngani ati pag rugar. Nakan tinmukaw ti manga tawu. May manga lima ka libu ka lalaki siyun. 11 Bin-ul ni Hisus ti manga tinapay, nagpasalamat siya sa Diyus, bag-u kay inayaw-ayaw sa manga tawu matukawan ati. Kumun diman kay binwat sa manga isda. Pinasugtan kanda gustu sa kaun. 12 Pagka nabsug sida tanan, sinabi ni Hisus sa kay manga tuludluan magkun, "Tipuna duy niyu ti nasawad manga pinikapika tinapay hampay balaw mauyang una lang diit." 13 Nakan kanda tinipun ti manga pinikapika pag tinapay arina sibada. Kanda sawad nagkan-an sampulu may duwa ka luwak punu. 14 Pagka nakitan manga tawu tunda pag tanda kay binwat ni Hisus, sinabi nida magkun, "Inda yi ngani ti Purupita ti itinaratu kaybi ti sumitay." 15 Alam di ni Hisus kanda gayak magpakarani sa kanya bag-u siya bul-un sa pilitan buwatun hari. Nakan linmakaw siya usa usa atag maan sa bantud. 16 Pagka malambung yi nag-ati ti manga tuludluan ni Hisus atag sa danaw. 17 Nagsakay sida sa usa ka duunduun hampay dumipay maan atag sa Kapirnaum. Yabi yi ag udwaya rinmas-ug si Hisus sa kanda. 18 Daraka paman ti humbak sa danaw dahil mabisug ti bagyu. 19 Nakabugsay yi ti manga tuludluan manga lima aw ngatay unum ka kilumitru ginan sa saruy bag-u nakitan nida si Hisus maglakaw sa babaw danum, magpakarani sa duunduun. Nadala gid sida masyadu. 20 Dapat sinabi niya sa kanda, "Aku di, danga kamu magkadala." 21 Nagbaya sida nagpasakay sa kan Hisus sa duunduun. Susun rinmas-ug ngap ti duunduun sa baybay kanda pagtuyuun. 22 Pagka surip siyun waya ti kadamlan tawu natayak sa baliw dipay danaw. Kaaldaw usa usa lang ka duunduun kanda nakitan ag alam nida si Hisus unman kinmuyug sa kay manga tuludluan sa duunduun. Sida lang ti nagsakay. 23 Dapat may manga duunduun rinmas-ug ginan sa Tibiryas sa arani nida kinan-an tinapay pag rugar sa katpung nagpasalamat ti Panginuun. 24 Pagka nakitan manga tawu udyi siyun si Hisus una hanggan kay manga tuludluan, nagsakay ti manga tawu sa manga duunduun nag-ati sida sa Kapirnaum hampay hanapun si Hisus. 25 Pagka nakadipay ti manga tawu sa danaw, nakitan ngani nida si Hisus. Bag-u pinmaingana sida sa kanya magkun, "Maisturu, kapira kawu pag rinmas-ug sitay?" 26 Sinmagut si Hisus magkun, "Ungud gid duy kang pagsabihun sa kanyu, nakan lang kamu maghanap sa kangku dahil kamu nabsug sa kanyu nangaun tinapay, balaw dahil naintindihan niyu kang binwat manga tanda. 27 Danga kamu magbudlay tungkul lang sa karan-&unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama." 28 Bag-u pinmaingana maan ti manga tawu sa kan Hisus magkun, "Hintay nguna ti dapat nimi buwatun hampay magtupad kami sa buruwatun angay sa kay kagustuhan Diyus?" 29 Sinmagut si Hisus magkun, "Inda ngani kay gustu Diyus kanyu buwatun, pagsarig kamu sa kay sinugu Diyus." 30 Sinabi nida sa kan Hisus, "Hintay pag tanda kanmu buwatun hampay maghiling kami bag-u kami sumarig sa kanmu. Hintay kanmu buwatun? 31 Kanda sa pangawakawaan, kanmi manga ginurang kaybi may kinaun mana pag karan-unun, parihu sa isinurat sa Banal Kasuratan magkun, 'Pinakan-an niya sida karan-unun ginan sa langit.' " 32 Bag-u sinmagut si Hisus magkun, "Ungud gid kang pagsabihun sa kanyu, balaw duy si Muysis ti nagpakaun karan-&unun ginan sa langit. Kang Ama di ngap tigpakaun tutuu pag karan-unun ginan sa langit sa kanyu. 33 Dahil ti karan-unun pag-ipakaun Diyus imaw ngani tigpakababa ginan sa langit magpakaun tutuu pag buhi sa manga tawu sa babaw daga." 34 Sinabi maan nida sa kan Hisus magkun, "Pirmi duy kami pagpakan-i nimu tunda pag karan-unun." 35 Bag-u sinabi ni Hisus sa kanda magkun, "Aku ti ga karan-unun makapakaun buhi sa manga tawu. Tigpasakup sa kangku balaw yi lun-usun, tigsarig sa kangku dayi uwawun una hanggan aban. 36 "Dapat sinabi yi niku sa kanyu, madi nakitan yi niyu aku, unman kamu nagsarig. 37 Una si unu pag tawu nu iinintirga Ama sa kangku, pumasakup ngani tunda sa kangku. Ti tawu nu pumasakup sa kangku balaw kang dayuun. 38 Dahil aku nagsitay ginan sa langit balaw hampay masunud niku kang sadili kagustuhan, bagkus ngap hampay tupadun niku ti kagustuhan Diyus imaw ti nagsugu sa kangku. 39 Diyus ti nagsugu sa kangku hampay tupadun niku inda pag kagustuhan niya magkun, danga pagduraa niku una lang usa sa tanan manga tawu iinintirga niya sa kangku. Kailangan buhiun niku sida uman sa katapusan panahun aban. 40 Dahil inda yi ngani ti kagustuhan niku Ama hampay una si unu pag tawu ti nakakit sa Anak bag-u nagsarig sa kanya, makatanggap tutuu pag buhi unman may katapusan. Buhiun niku siya uman sa katapusan panahun aban." 41 Bag-u nagharampangan ti manga Hudiyu naglibak tungkul sa kan Hisus dahil sa kay sinabi magkun, "Aku ti ga karan- unun nagsitay sa babaw daga ginan sa langit." 42 Sinabi nida magkun, "Unman aw lugud inda pag tawu si Hisus, kay anak ni Husi? Kilala nita kay ama hanggan kay ina. Kabitay lugud pag masabi niya kuntay siya nagsitay ginan sa langit?" 43 Nagsagut si Hisus magkun, "Danga yi duy kamu magpakaharampangan sa libak. 44 Unman may tawu makapasakup sa kangku purya lang nu siya butungun niku Ama, imaw ti nagsugu sa kangku. Bag-u buhiun niku siya uman sa katapusan panahun aban. 45 "Isinurat sa Ribru manga Purupita magkun, 'Sida tanan tanan tudluan Diyus.' Una hintay pag tawu nakadnug ag nagpatudlu sa Ama, pumasakup sa kangku. 46 Balaw kuntay may tawu nakakit sa Diyus, purya lang ti nagsitay ginan sa Diyus. Siya lang ti nakakit sa Ama. 47 "Ungud gid kang pagsabihun sa kanyu, una hintay pag tawu nu sumarig, may tutuu pag buhi unman may katapusan. 48 Aku ti ga karan-unun makapakaun buhi sa manga tawu. 49 Kanyu manga ginurang kaybi nagkaun mana pag karan-unun kanda sa pangawakawaan dapat sida nagkaramatay diman. 50 Dapat tuhay ti karan-unun magsitay ginan sa langit. Nu kan-un tawu inda pag karan-unun, balaw yi siya mamatay. 51 Aku ti nagsitay ginan sa langit ga karan-unun makapakaun buhi. Nu kan-un tawu inda pag karan-unun, may tutuu pag buhi siya unman may katapusan. Ti karan-unun kang ipakaun imaw yi kang bilug sa ikabuhi manga tawu sa babaw daga." 52 Nakan magpirirdihan ti manga Hudiyu magkun, "Kabitay lugud pag mipakaun inda pag tawu kay bilug hampay kanta kan-&un?" 53 Sinabi ni Hisus sa kanda magkun, "Ungud gid kang pagsabihun sa kanyu, unman kamu may tutuu pag buhi purya lang nu kan-un niyu kay bilug Anak Tawu ag nu inmun niyu kay dugu. 54 Una si unu pag tawu nu kan-un niya kang bilug, inmun kang dugu, may tutuu pag buhi unman may katapusan. Buhiun niku siya uman sa katapusan panahun aban. 55 Dahil kang bilug ungud gid karan-unun, kang dugu ungud gid irinmun. 56 Nu ti tawu magkaun kang bilug, mag-inum kang dugu nipausa siya sa kangku, aku nipausa waydi sa kanya. 57 "Ti Ama ti may gimpuunan buhi. Siya ti nagsugu sa kangku. Dahil sa Ama aku hanggan may gimpuunan buhi. Katunda diman waydi ti tawu nu magkaun siya kang bilug may tutuu siya pag buhi dahil sa kangku. 58 Inda yi ngani ti karan-&unun nagsitay ginan sa langit. Balaw parihu sa karan-unun kinaun kaybi niyu manga ginurang, bag-u pagka dugay namatay diman sida. Nu bay inda pag karan-unun ti kan-un tawu, may tutuu pag buhi siya unman may katapusan." 59 Inda kay sinabi ni Hisus sa kay magtudlu sa manga tawu sa balay tiripnan manga Hudiyu sa banwa Kapirnaum. 60 Pagka nadnugan nida kay manga itinudlu ni Hisus, mayamu tuludluan nagsabi magkun, "Madalum maaw inda pag manga itinudlu niya. Hintay ti may mananggap tunda?" 61 Madi unman may nagtultul, alam di waydi ni Hisus magharampangan kay manga tuludluan maglibak sa kanya. Nakan sinabi niya sa kanda magkun, "Mag-alinlangan aw kamu dahil sa kang manga sinabi sa kanyu? 62 Kabitay nguna kamu nu makitan niyu aban ti Anak Tawu muli maan tag tungud sa kay ulian kaybi? 63 Ispiritu Diyus ti may gimpuunan buhi. Nu tawu lang unman makapakaun buhi. Nu tanggapun niyu kang manga bagaw, matanggap waydi niyu ti Ispiritu imaw ti makapakaun buhi sa kanyu. 64 Dapat ti iba sa kanyu unman magsarig." Dahil ginan waya sa umpisa niya magtudlu, alam di ni Hisus nu hintay pag manga tawu ti unman magsarig ag nu si unu ti pumakampi sa kay manga kalaban. 65 Sinabi ni Hisus magkun, "Nakan ngani sinabi yi niku sa kanyu, unman may tawu pumasakup sa kangku purya lang nu kay kagustuhan niku Ama." 66 Siyun ginan mayamu pag tuludluan nag-urung yi, udyi nagkuyug sa kanya. 67 Bag-u nagpaingana si Hisus sa kay sampulu may duwa ka tuludluan magkun, "Kabitay kamu, magkaibug aw diman kamu mag-urung yi?" 68 Sinmagut si Simun Pidru, magkun, "Panginuun, hintay waya gid kanmi dangpan? Kanmu sinabi pag manga bagaw ti makapakaun tutuu pag buhi unman may katapusan sa manga tawu. 69 Nagsarig duy kami sa kanmu, dahil nakilala nimi kawu ti Banal pag Anak Diyus." 70 Sinabi ni Hisus magkun, "Kamu yi ngani ungud sampulu may duwa ka tuludluan kang pinili. Dapat ti usa sa kanyu takinan ngap manga labang." 71 Kay pagtukyun ni Hisus si Hudas, kay anak si Simun Iskariyuti. Dahil madi si Hudas kabilang sa sampulu may duwa ka tuludluan, pumakampi siya sa kalaban hampay kay itudlu niya si Hisus sa kanda.
1 Bag-u namalibutan nanudlu si Hisus sa daga Galiliya. Unman siya may gustu mamalibutan sa manga banwa sa daga Hudiya, dahil ti manga pinunu Hudiyu maghanap yi paraan hampay siya kanda matyun. 2 Ati katpung arani yi ti Kapistahan manga Hudiyu, ti Kapistahan sa manga Payag. 3 Nakan sinabi niya manga patar-ari sa kan Hisus magkun, "Pag-ighit yi duy atay ginan pag daga, pag-ati kawu sa Hudiya, hampay makitan nimu manga tuludluan ati kanmu manga pagbuwatun. 4 Unman may tawu mataguan kay buwat nu gustu dayawun siya tanan tawu. Nu kanmu yi lang waydi pagbuwatun inda pag manga bagay, pakakitan yi lang nimu sa manga tawu." 5 Dahil una kay manga patar-ari unman diman nagsarig sa kanya. 6 Nakan sinabi ni Hisus sa kanda magkun, "Udwaya kainda kang taning pag udas, dapat nu para sa kanyu una kapira pag udas mahimu di. 7 Ti manga tawu taga kalibutan unman may pag-ikadaut sa kanyu. Dapat aku kanda pagkadat-an, dahil pirmi pag-ipaburayhaw niku kanda manga buwat daut. 8 Kamu yi ngani ti pag-ati sa Kapistahan. Balaw aku atag, dahil udwaya rinmas-ug kainda kang taning pag udas." 9 Pagka sinabi niya tunda sa kay manga patar-ari napatayak waya siya sa Galiliya. 10 Pagka nag-ati yi sa Kapistahan kay manga patar-ari, si Hisus nag-ati waydi sa Hirusalim dapat balaw siya nag-ati sa hayagan. Naglihus siya hampay unman makilala manga tawu. 11 Paghanapun siya manga pinunu Hudiyu ati sa Kapistahan. Magkun sida, "Naan yi nguna tunda pag tawu?" 12 Paglibakun yi siya mayamu tawu. Magkun ti manga iba, "Mayad gid pag tawu siya." Ti iba magkun, "Bukun ngap mayad tunda, pagpatalangun ngap niya ti kayamuan tawu." 13 Dapat kanda pagsabihun tungkul sa kan Hisus unman pag-ipadnug nida sa manga iba dahil magkadala sida sa manga pinunu Hudiyu. 14 Pagka magpanungatunga yi kay kasirangan Kapistahan, nag-ati si Hisus sa balay Diyus bag-u nanudlu siya sa manga tawu ati. 15 Naglingut gid ti manga pinunu magkun, "Kabitay pag nakatau inda pag tawu kadunungan, madi unman may nanudlu sa kanya?" 16 Nagsagut si Hisus magkun, "Kang pag-itudlu balaw kang sadili pag kadunungan. Kang pag-itudlu ginan ngap sa Diyus sa nagsugu sa kangku. 17 Una hintay pag tawu nu handa siya magtupad sa kagustuhan Diyus, makilala niya kang pag-itudlu nu ngatay ginan sa Diyus aw ngatay magbagaw aku ginan lang sa kang sadili. 18 Nu kay pagbagawun tawu ginan lang sa kay sadili naisipan, kay gustu siya ti dayawa manga tawu. Dapat nu kay gustu manugtudlu hampay dayawun ngap manga tawu ti nagsugu sa kanya, pihu gid pag-itudlu niya ti katutuuhanan unman may pabalhingu. 19 Sinabi ni Hisus magkun, "Unman aw ipinakaun ni Muysis sa kanyu ti Kasuguan? Dapat sa kanyu tanan unman may magtupad sa Kasuguan una di usa. Hayga aku kanyu pagkaibgan matyun?" 20 Nagsagut ti manga tawu, "Inapuan baga kawu labang. Hintay pag tawu tigkaibug magmatay sa kanmu?" 21 Sinabi maan ni Hisus magkun, "Pagka usa di waya ka makadululaw kang binwat, naglingut gid kamu tanan. 22 May bilin si Muysis sa kanyu kailangan turiun niyu kanyu manga anak. Nu sa ungud balaw tunda ginan sa kan Muysis. Daan di tunda pag ugali inumpisahan kaybi di waya manga ginurang. Nakan pagturiun niyu ti manga anak lalaki una sa sirang pamahari. 23 Nu kanyu pagturiun ti usa ka anak una sa sirang pamahari hampay tupadun niyu kan Muysis Kasuguan, bati hayga magkagalit kamu sa kangku dahil lubus pinaayad niku ti usa ka tawu sa sirang pamahari? 24 Danga yi pagpihua niyu ti daut ti mayad angay lang sa kanyu makitan sa mata. Pihua niyu ti daut ti mayad angay sa katutuuhanan." 25 Ti iba manga taga Hirusalim magkun, "Unman aw lugud tunda yi ngani pag tawu ti kanda pagkaibgan matyun? 26 Dapat malu, maghampang diman siya sa atubangan kayamuan tawu ag unman may pagsabihun ti manga pinunu sa kanya. Magkakilala yi aw nguna ungud manga pinunu kuntay siya yi ti pinili Diyus Manugribri pag Hari? 27 Dapat nu Rumas-ug aban ti pinili Diyus Manugribri pag Hari unman may tawu makaalam nu taga naan siya. Inda bay pag tawu alam nita tanan nu taga naan siya." 28 Nakan sa kay magtudlu sa manga tawu sa balay Diyus, nagbagaw si Hisus daraka buka magkun, "Kilala aw gid niyu aku? Alam aw niyu nu taga naan aku? Unman aku nagsitay sa sadili lang niku kagustuhan. Dapat masarigan gid ti Ama ti nagsugu sa kangku. Unman lang nakilala niyu siya. 29 Kilala gid niku siya, dahil aku ginan sa kanya ag siya diman ti nagsugu sa kangku." 30 May manga tawu kanda mana pagkaibgan dakpun si Hisus, dapat unman may makadakup sa kanya dahil udwaya rinmas-ug kay taning pag udas. 31 Dapat sa kayamuan tawu mayamu ti nagsarig sa kanya magkun, "Nu Rumas-ug ti pinili Diyus Manugribri pag Hari, buwatun aw lugud niya lalu waya mayamu pag tanda bukun lang ga tunda pag tawu kay binwat? Dayu ngap mahimu." 32 Naalaman manga Parisiyu inda kanda sarabihun manga tawu tungkul sa kan Hisus. Nakan sida hanggan ti manga pangulu manug-asiwa balay Diyus nagpasugu sa manga pulis nida hampay kanda dakpun si Hisus. 33 Nakan sinabi ni Hisus magkun, "Kaibahan waya niyu aku dapat balaw yi dugay aban bag-u umighit yi aku sitay ginan atabug sa Ama sa nagsugu sa kangku. 34 Hanapun niyu aku aban, dapat unman niyu makitan. Dahil unman kamu makaati sa kang ulian aban." 35 Bag-u nagharampangan ti manga pinunu Hudiyu magkun, "Naan tag nguna inda pag tawu kay gayak nakan unman makitan nita siya? Barang siya atag sa luwas daga Israil sa manga Hudiyu mag-uli sa manga banwa manga balaw Hudiyu bag-u manudlu sa manga balaw Hudiyu. 36 Magkun kabay siya kita kunu humanap sa kanya dapat dayu kunu makitan nita siya. Unman diman makaati kita kunu sa kay ulian aban. Hintay nguna kay ibug sabihun." 37 Pagka sa katapusan yi pag sirang Kapistahan imaw yi ti pinakamahalaga pag sirang, ati katpung tinmindug si Hisus bag-u sinabi niya sa daraka buka magkun, "Una hintay pag tawu nu magkauwaw, pagsitay siya sa kangku, pag-inum. 38 Parihu sa isinurat sa Banal Kasuratan, nu ti tawu magsarig sa kangku, bumulus ginan sa kay tagipusuun ti danum makapakaun tutuu pag buhi sa manga tawu." 39 Kay pagtukyun ni Hisus ti Ispiritu ti matanggap manga tawu nu sida magsarig sa kanya. Ati katpung udwaya ipinakaun ti Ispiritu dahil udwaya nangyari una kay pagkamatay ni Hisus una kay pagkabuhi uman may kadayawan. 40 Pagka nadnugan manga iba sa kayamuan inda pag manga bagaw ni Hisus sinabi nida magkun, "Tutuu katna inda yi ti Purupita kanta pag-alagdun." 41 Sinabi manga iba magkun, "Siya yi ngani ti pinili Diyus Manugribri pag Hari." Dapat magkun maan ti manga iba, "Ti pinili Diyus Manugribri pag Hari balaw sumitay ginan sa Galiliya. 42 Isinurat kabay sa Banal Kasuratan ti pinili Diyus Manugribri pag Hari aban linahi ni Hari Dabid, ianak siya sa banwa Bitlihim, sa kay inulian kaybi ni Dabid." 43 Nakan magkabululag ti kayamuan kay naisipan dahil sa kan Hisus. 44 May manga tawu ati kanda gustu siya dakpun yi, dapat unman may tawu nakadakup sa kanya. 45 Nagbalik maan ti manga pulis tag sa manga pangulu manug-asiwa balay Diyus hanggan sa manga Parisiyu. Pinmaingana sida sa manga pulis magkun, "Hayga duy unman dinara niyu siya?" 46 Sinmagut ti manga pulis magkun, "Una kaybi ginan unman may tawu magbagaw katida kay kaayad." 47 Nagsabi maan ti manga Parisiyu magkun, "Kamu barang pinatalang yi waydi niya. 48 Kabay una sa manga pinunu una sa manga Parisiyu unman may magsarig sa kanya una di usa. 49 Tunda lang pag manga tawu ti unman makaalam sa Kasuguan ti magsarig sa kanya, pihu sida ipadamhak sa kaparusahan." 50 Ati diman sa kanda ti usa ka Parisiyu si Nikudimu, imaw ti nag-ati sa kan Hisus kaybi. Sinabi ni Nikudimu sa kanda magkun, 51 "Nu angay sa Kasuguan nita, dayu gid mahimu sintinsiyahan nita ti usa ka tawu nu udwaya nadnugan nita kay pagsabihun ag nu udwaya inusisa nita kay manga pagbuwatun." 52 Magkun ti manga iba sa kan Nikudimu, "Kawu lugud taga Galiliya diman aw waydi? Suyasida gid nimu ti Banal Kasuratan, bag-u maalaman nimu unman may purupita lumuwang ginan sa Galiliya."
1 Bag-u nuli ti kada tawu tabug sa kanda manga balay. Dapat si Hisus nag-ati sa bantud Ulibu. 2 Pagka surip, nagbalik maan siya sa balay Diyus bag-u nagpakarani sa kanya ti kayamuan tawu. Nakan tinmukaw si Hisus bag-u nanudlu siya sa kanda. 3 Bag-u may nagluwang diman manga Manugtudlu Kasuguan hanggan manga Parisiyu may dara usa ka babayi dinakup katpung kay magpanlalaki, kanda ipinaatubang sa manga tawu. 4 Sinabi nida sa kan Hisus magkun, "Maisturu, inda pag babayi dinakup katpung siya magpanlalaki. 5 Nu angay sa Kasuguan may bilin si Muysis sa kanta, kailangan batuhun matyun ti manga babayi katunda kay buwat. Nu sa kanmu, hintay nguna kanmu masabi?" 6 Katida kanda ipinaingana sa kan Hisus hampay pasalanun siya sa kay bagaw para may misumbung sida laban sa kanya. Nagtiyundug si Hisus kay isinurat kay ituturu sa daga. 7 Dapat unman mag-apas kanda paingana sa kanya, nakan tinmindug siya bag-u kay sinabi magkun, "Una si unu sa kanyu ti unman may kasalanan, imaw ti kiuna bumintuk sa babayi." 8 Bag-u nagtiyundug maan si Hisus, kay isinurat maan kay ituturu sa daga. 9 Pagka nadnugan nida kay sinabi ni Hisus, linmakaw sida tigus-a tigus-a, ti maidad ti nag-una. Pagka dugay udyi may tawu nu ud si Hisus hanggan ti babayi matindugan sa kay atubangan. 10 Bag-u tinmindug si Hisus magkun, "Naan yi duy sida? Unman aw may nagsintinsiya sa kanmu?" 11 Magkun ti babayi, "Unman yi duy." Sinabi ni Hisus magkun, "Una aku balaw manintinsiya sa kanmu. Pag-uli yi duy, inda ginan danga yi kawu magkasala." 12 Nagbagaw maan si Hisus sa manga Parisiyu magkun, "Aku tigpakaun karayawan sa manga tawu sa kalibutan. Nu ti tawu nagpasakup sa kangku, sa kanya yi ti karayawan tigpakaun buhi ag balaw yi siya lumakaw sa madlum." 13 Bag-u sinabi manga Parisiyu sa kanya magkun, "Magpatutuu lang kawu tungkul sa kam sadili. Mahimu pagpahimudilun kanmu pagsabihun." 14 Magkun si Hisus, "Una aku magpatutuu tungkul sa kang sadili, tutuu gid kang pagsabihun, dahil alam niku nu naan ginan aku ag nu naan tabug. Dapat unman niyu alam nu naan ginan aku ag nu naan tabug aku. 15 Pagpihuun niyu ti daut ti mayad angay lang sa ugali tawu naisipan. Aku balaw magsintinsiya una sa kantapu. 16 Dapat nu abi aku ti pumihu sa daut sa mayad, balaw aku sumalan dahil balaw lang aku usa usa, minsan diman sa kangku ti Ama ti nagsugu sa kangku. 17 May nisurat sa kanyu Kasuguan magkun, 'Nu ti duwa ka tawu urusa kanda patutuu, danga yi pagpahimudila kanda pagsabihun.' 18 Aku magpatutuu sa kang sadili hanggan kang Ama ti nagsugu sa kangku, magpatutuu diman sa kangku." 19 Nagpaingana ti manga Parisiyu sa kanya magkun, "Naan yi kanmu Ama?" Sinmagut si Hisus magkun, "Unman gid nakilala niyu una aku una kang Ama. Nu abi nakilala niyu aku, nakilala yi waydi mana niyu kang Ama." 20 Inda tanan kay sinabi ni Hisus sa kay magtudlu sa manga tawu sa balay Diyus sa arani manga kaban surukadan ambagan. Ag unman may nagdakup sa kanya dahil udwaya rinmas-ug kay taning pag udas. 21 Sinabi maan ni Hisus sa kanda magkun, "Umighit yi aku aban bag-u kanyu gid hanapun aku, dapat mamatay yi lang kamu dahil sa kanyu magpadayun sa kasalanan. Dayu kamu makaati sa kang atihan aban." 22 Nakan nagharampangan ti manga pinunu Hudiyu magkun, "Ngatay kay gayak siya magpakamatay, nakan barang kay sinabi kita kunu unman makaati sa kay atihan aban." 23 Sinmagut si Hisus magkun, "Kamu taga sitay sa babaw daga, aku bay taga langit. Kamu manga taga kalibutan, dapat aku balaw taga sitay sa kalibutan. 24 Nakan sinabi ngani niku sa kanyu, mamatay kamu aban dahil sa kanyu magpadayun sa kasalanan. Nu dayu kamu maniwala kuntay aku si Aku Ngani, pihu ngap kamu mamatay dahil sa kanyu magpadayun sa kasalanan." 25 Pinmaingana sida sa kanya magkun, "Si unu lugud kawu?" Sinmagut si Hisus magkun, "Aku inda imaw diman ga kang sinabi yi ginan sa kabag-u. 26 Mayamu mana kang masabi tungkul sa kanyu, mayamu kang magkaalaman hampay mana mapihu niku kanyu kadautan. Dapat masarigan gid ti nagsugu sa kangku. Pag-itultul lang waydi niku sa manga tawu ti nadnugan niku ginan sa kanya." 27 Unman naintindihan nida kuntay inda kay pagsabihun ni Hisus sa kanda tungkul ngap sa Ama. 28 Nakan sinabi ni Hisus magkun, "Nu ipaabwat niyu aban ti Anak Tawu bag-u makilala niyu kuntay aku si Aku Ngani. Ati katpung maalaman niyu unman aku magbuwat una hintay nu ginan lang sa kang sadili. Pagsabihun lang niku ti itinudlu Ama sa kangku. 29 Ti nagsugu sa kangku pirmi magpakiusa sa kangku. Balaw gid pinabay-anan niya aku, dahil pirmi pagbuwatun niku ti sa ikabaya niya." 30 Pagka sinabi ni Hisus inda, mayamu pag tawu ti nagsarig sa kanya. 31 Nakan sinabi ni Hisus sa manga Hudiyu nagsarig sa kanya magkun, "Nu kamu magtupad sa kang pag-itudlu sa kanyu, tutuu gid tuludluan niku kamu. 32 Makilala niyu ti katutuuhanan bag-u ti katutuuhanan ti makaribri sa kanyu ginan sa kanyu pagkapanawuhun." 33 Sinabi nida sa kan Hisus magkun, "Linahi kami ni Abraham. Una kaybi ginan kami balaw duy panawuhun. Kabitay kanmu masabi kuntay kami iribri?" 34 Sinabi ni Hisus sa kanda magkun, "Ungud gid kang pagsabihun sa kanyu, panawuhun ngap kasalanan ti kada tawu magbuwat kasalanan. 35 Ti panawuhun balaw miminsan sa magtal-anakan niya amu hanggan di. Dapat ti anak minsan di ngapu sa kay ama hanggan aban. 36 Nakan ngani nu ti Anak Diyus ti nagparibri sa kanyu, tutuu ribri kamu sa kanyu pagkapanawuhun. 37 Alam niku kamu linahi ni Abraham, dapat pagkaibgan diman niyu aku matyun dahil dayu niyu tanggapun kang pag-itudlu sa kanyu. 38 Ti Ipinakakit niku Ama sa kangku, imaw kang maan pag-itultul. Kamu bay, ti pagbuwatun niyu imaw ti kanyu nadnugan sa kanyu ama." 39 Sinabi nida sa kan Hisus magkun, "Si Abraham di kanmi ginurang." Sinabi ni Hisus magkun, "Nu abi tutuu kamu kay linahi ni Abraham, mag-ugali mana kamu parihu sa kay ugali ni Abraham kaybi. 40 Madi kang pag-isalaysay sa kanyu ti katutuuhanan kang nadnugan sa Diyus, kanyu ngap pagkaibgan matyun aku. Balaw katida kay binwat ni Abraham. 41 Dapat kanyu ngap pagbuwatun ti buwat niyu ama." Sinabi nida sa kanya magkun, "Balaw kami iinanak sa kalyag. Usa usa lang gid kanmi ama, ti Diyus yi ngani." 42 Sinabi ni Hisus sa kanda magkun, "Nu abi ti Diyus gid kanyu ama, pihu mana aku kanyu pagmahalun. Nakan aku nagsitay ginan sa Diyus. Unman aku nagsitay sa sadili lang niku kagustuhan, dapat kang Ama ti nagsugu sa kangku. 43 Nakan unman magkasalman niyu kang pagsabihun sa kanyu, dahil unman kamu madunung magtanggap sa kang pag-itudlu sa kanyu. 44 Parihu kamu sa kanyu ama, sa diyablu. Gustu diman niyu buwatun ti kagustuhan niyu ama. Kaybi ginan waya sa kabag-u usa ka manlilibun tawu tunda. Unman gid siya magpakampi baliwa sa katutuuhanan dahil unman may makitan katutuuhanan sa kanya. Nu magbagaw siya kapudilan, tida kay yi gid yahunan. Dahil tutuu gid pudilun siya. Sa kanya ngap ginan ti gimpuunan kapudilan. 45 Dapat aku unman pagpaniwalaan niyu dahil katutuuhanan kang pagsabihun sa kanyu. 46 Si unu sa kanyu ti makapakaun puruyba kuntay aku may kasalanan? Nu kang pagsabihun ti katutuuhanan, hayga unman pagpaniwalaan niyu aku? 47 Nu ti tawu anak yi Diyus, tanggapun niya kay manga bagaw Diyus. Nakan unman pagtanggapun niyu kang pag-itudlu, dahil unman kamu manga anak Diyus." 48 Sinabi manga Hudiyu sa kan Hisus magkun, "Bukun ngap salan kanmi pagkumnun kawu Samaritanu, inapuan paman labang." 49 Sinabi ni Hisus magkun, "Aku duy unman inapuan labang. Pagpahalagaan niku kang Ama, dapat aku kanyu pagpuyaan. 50 Balaw maghanap aku sa dayawun aku manga tawu. May maghanda di kang kadayawan. Siya diman waydi ti makapihu sa daut sa mayad. 51 Ungud gid kang pagsabihun sa kanyu, una hintay pag tawu nu mag-ugali siya angay sa kang pag-itudlu, dayu gid mamatay hanggan aban." 52 Sinabi manga Hudiyu sa kanya magkun, "Taynguna alam nimi pihu kawu inapuan labang. Si Abraham namatay, hanggan ti manga Purupita namatay diman. Bag-u kanmu pagsabihun taynguna, una hintay pag tawu nu mag-ugali siya angay sa kanmu pag-itudlu, dayu gid mamatay hanggan aban. 53 Kanmi ginurang si Abraham namatay di. Balaw nguna kanmu gustu sabihun kawu mamaski man sa kan Abraham? Ti manga Purupita namatay diman waydi. Naan kanmu ipaparihu sa kanmu sadili?" 54 Sinmagut si Hisus magkun, "Nu pagdayawun niku kang sadili, unman may pulus kang kadayawan. Kang Ama di ngap tigdayaw sa kangku, imaw ti pagkumnun niyu kuntay kanyu Diyus. 55 Unman nakilala duy niyu siya, dapat kilala ngap niku siya. Nu abi sabihun niku unman kilala niku siya, aku parihu ga kanyu pudilun. Dapat kilala gid niku siya, ag pagtupadun niku kay bagaw. 56 Kanyu ginurang si Abraham nakabaya gid dahil nakitan niya ti kaudasan niku pagras-ug. Pagka nakitan ngani niya tutuu siya nakabaya." 57 Sinabi maan nida sa kanya magkun, "Kanmu idad udwaya duy limampulu ka timpu. Kabitay lugud kawu nakakit sa kan Abraham?" 58 Sinmagut si Hisus magkun, "Ungud gid kang pagsabihun sa kanyu, pagka udwaya nianak si Abraham, daan di aku ngani." 59 Nagpunpun ti manga Hudiyu manga batu hampay kanda ibintuk sa kan Hisus. Dapat napatagu si Hisus bag-u nagluwas siya sa balay Diyus.
1 Sa kay maglakaw ni Hisus, may nakitan siya usa ka lalaki buta. Ginan waya sa kay pagkaanak daan buta siya. 2 Pinmaingana kay manga tuludluan magkun, "Maisturu, si unu nguna ti nagkasala nakan iinanak siya buta, ngatay siya ti nagkasala aw ngatay kay gurang?" 3 Sinmagut si Hisus magkun, "Balaw sa nagkasala duy una inda pag tawu una kay gurang. Nakan siya iinanak buta hampay mipaburayhaw ngap sa kanya ti buwat Diyus. 4 Ti Ama ti nagsugu sa kangku, nakan hanggan may sirang waya kailangan tupadun nita ti buruwatun niya. Nu bay yabi yi aban, udyi may makabuwat una si unu pag tawu. 5 Nu aku sitay waya sa babaw daga, aku tigpakaun karayawan sa manga tawu sa kalibutan." 6 Pagka sinabi niya katida, nagbuga siya sa daga, pinalutuk niya ti buga bag-u kay ipinayid sa mata tawu buta. 7 Bag-u kay sinabi niya magkun, "Pag-ati duy kawu pag-iram-us sa tangki Siluam. (Tunda pag bagaw Siluam kay kahulugan sinugu). Nag-ati ngani ti tawu buta nangiram-us. Pagka siya binmalik, maghiling yi siya. 8 Nakan naglingut gid kay manga kamalay hanggan ti manga tawu nakakit sa kanya kaybi maghagad kay pangailangan. Magkun sida, "Balaw aw inda pag tawu ti matukawan kaybi magpakahagad kay pangailangan?" 9 Sinabi manga iba magkun, "Imaw yi ngani." Magkun ti manga iba, "Bukun imaw, nagkaparihu lang sa kanya kay uyahun." Bag-u sinabi niya magkun, "Aku yi ngani ti buta kaybi." 10 Pinmaingana sida sa kanya magkun, "Kabitay duy ti nangyari nakan maghiling yi taynguna kanmu mata?" 11 Sinmagut siya magkun, "Ti tawu kanda pagkumnun si Hisus nagbuwat lutuk bag-u kay ipinayid sa kang manga mata bag-u sinabi niya sa kangku, 'Pag-ati duy kawu sa Siluam, pag-iram-us kawu.' Inmati ngani aku nag-iram-&us. Pagka aku nakairam-us, naghiling yi kang mata." 12 Pinmaingana ti manga tawu sa tawu buta kaybi magkun, "Naan tag ati si Hisus?" Sinmagut siya magkun, "Tau duy nu naan tag siya." 13 Bag-u kanda dinara atag sa manga Parisiyu tunda pag tawu buta kaybi. 14 Sa sirang pamahari pag nagbuwat lutuk si Hisus kay nagpaayad sa tawu buta. 15 Nakan nagpaingana waydi ti manga Parisiyu sa kanya nu kabitay hinmiling kay mata. Bag-u itinultul niya sa kanda magkun, "Binugtangan niya lutuk kang babaw mata, bag-u aku nangiram-us. Pagka aku nakairam-us, maghiling yi aku." 16 Ti iba Parisiyu magkun, "Balaw ginan sa Diyus tunda pag tawu ti nagbuwat katida, dahil maglabag siya sa Kasuguan tungkul sa sirang pamahari." Dapat sinabi maan manga iba magkun, "Kabitay pag makabuwat ti tawu katunda pag manga makadululaw, nu siya makasalanan?" Nakan magkabululag ti manga tawu kanda naisipan tungkul sa kan Hisus. 17 Nakan namaingana maan ti manga Parisiyu sa tawu buta kaybi magkun, "Kanmu sabi siya ti nagpaayad sa kanmu mata. Kabitay kanmu magkilala sa kanya?" Sinmagut ti tawu magkun, "Purupita duy siya." 18 Ti manga pinunu Hudiyu unman naniwala kuntay tunda pag tawu kaybi buta bag-u siya pinaayad sa kay pagkabuta. Pagka dugay nagpasugu sida hampay bul-un kay manga gurang tunda pag tawu. 19 Bag-u pinmaingana sida sa kay manga gurang magkun, "Inda aw duy kanyu anak ti kanyu pagsabihun iinanak buta? Kabitay duy pag maghiling siya taynguna?" 20 Nagsagut kay manga gurang magkun, "Alam duy nimi inda kanmi ngani anak. Tutuu gid siya iinanak buta. 21 Dapat unman nimi alam nu kabitay pag maghiling siya taynguna. Unman diman nimi alam nu si unu pag tawu ti nagpaayad sa kay mata. Paingan-a duy niyu siya. May idad yi siya, bahala siya magsagut." 22 Nakan katida ti binagaw manga gurang niya, dahil magkadala sida sa manga pinunu magkun nu may tawu magsabi si Hisus ti pinili Diyus Manugribri pag Hari, siya ipalwas ginan sa balay tiripnan. 23 Nakan ngani sinabi manga gurang tawu buta kaybi magkun, "May idad yi siya, siya ti paingan-a niyu." 24 Bin-ul maan nida kadwa ginan ti tawu buta kaybi. Bag-u sinabi nida sa kanya magkun, "Sabiha yi nimu ti katutuuhanan sa atubangan Diyus, alam gid nimi makasalanan tunda pag tawu ti nagpaayad sa kanmu." 25 Nagsabi siya magkun, "Unman duy niku alam nu ngatay makasalanan siya. Inda lang ti magkaalaman niku, madi kaybi aku buta, taynguna maghiling yi aku." 26 Nagpaingana maan sida magkun, "Hintay kay binwat niya sa kanmu? Kabitay pag pinaayad niya kawu sa kanmu pagkabuta?" 27 Sinmagut maan siya magkun, "Itinultul yi niku tunda sa kanyu, dapat unman kamu naniwala. Hayga gustu maan niyu maalaman nu hintay ti nangyari? Gustu aw lugud kamu tuludluan waydi niya?" 28 Pagka katida kay sinabi tawu buta kaybi, pinuya siya manga pinunu Hudiyu. Sinabi nida sa kanya magkun, "Kawu baga kay tuludluan yi ngap tunda pag tawu. Kami bay tuludluan di ni Muysis. 29 Alam nimi ti Diyus nagbagaw sa kan Muysis. Dapat nu tunda bay pag tawu si Hisus unman nimi alam nu taga naan pag banwa siya." 30 Sinabi tawu buta kaybi magkun, "Nakan aku maglingut sa kanyu, unman niyu alam nu taga naan siya, dapat siya ngapu ti nagpaayad sa kang buta. 31 Alam nita ti Diyus unman magpatingi sa darangin tawu nu siya makasalanan. Dapat nu ti tawu magsamba sa Diyus ag magtupad sa kay kagustuhan niya, pihu patingihan Diyus kay darangin. 32 Ginan waya sa pagkalalang kalibutan unman may naalaman kuntay may tawu pinmaayad sa tawu iinanak buta. Unman diman may mabuwat tunda pag tawu purya lang nu siya ginan sa Diyus." 33 Sinabi maan manga pinunu sa kanya magkun, 34 "Lubus yi lang kawu makasalanan ginan waya sa kanmu bag-u nilusad, bag-u kawu aw lugud ti tumudlu waya sa kanmi?" Bag-u kanda tinulak siya ginan sa balay nida tiripnan. 35 Nabaritaan ni Hisus tinulak ngani manga pinunu Hudiyu ti tawu buta kaybi ginan sa kanda balay tiripnan. Nakan hinanap siya ni Hisus. Bag-u pinmaingana si Hisus sa kanya magkun, "Magsarig yi aw kawu sa Anak Tawu?" 36 Sinmagut siya magkun, "Sabiha duy nimu nu si unu siya hampay aku sumarig sa kanya." 37 Sinabi ni Hisus sa kanya magkun, "Nakitan yi duy nimu siya, dahil aku ngani tigbagaw sa kanmu kainda imaw yi ngani ti Anak Tawu." 38 Sinabi niya sa kan Hisus magkun, "Magsarig aku duy, Panginuun." Bag-u siya nagluhud sa atubangan ni Hisus. 39 Sinabi ni Hisus magkun, "Nagsitay aku sa kalibutan para ipaburayhaw niku ti kasalanan manga tawu, hampay ti manga buta humiling yi, ag ti manga maghiling bumaliw ngap ga buta." 40 May manga Parisiyu diman ati sa kan Hisus nakadnug diman sa kay binagaw. Pinmaingana sida sa kanya magkun, "Balaw nguna kanmu gustu sabihun kuntay kami hanggan buta?" 41 Sinmagut si Hisus magkun, "Nu abi kamu manga buta unman mana kamu may kasalanan. Dapat taynguna kanyu pagsabihun magkun, 'Kami maghiling', nakan unman mab-ul kanyu kasalanan."
1 Sinabi ni Hisus magkun, "Ungud duy kang pagsabihun sa kanyu, nu may tawu sumulud sa tudir manga karanidu balaw lakaw sa kay puwirtahan, nu abi dumayik sa kay alad, tunda pag tawu mananakaw ag tulisan. 2 Ti tawu nu sumulud sa tudir lakaw sa kay puwirtahan, tunda pag tawu imaw ti manug-alaga sa karanidu. 3 Pagbukasan siya purtiru tudir. Ti manga karanidu magdungug sa kay magbagaw manug-alaga. Pagtawagun pag-ingarnan gid niya kay sadili manga karanidu bag-u kay pagtabanun niya sida tag sa luwas tudir. 4 Pagka nipalwas yi niya sida tanan, umuna siya bag-u kay manga karanidu kumuyug sa kay uryan, dahil kilala nida kay busis. 5 Dayu gid kumuyug ti manga karanidu sa iba, bagkus ngap pumalagiw ginan sa kanya, dahil unman kilala nida nu manga iba tigbagaw, bukun kanda manug-alaga." 6 Inda pag pahalimbawa kay itinultul ni Hisus sa manga tawu, dapat unman nasalman nida kay gustu niya sabihun. 7 Sinabi maan ni Hisus sa kanda magkun, "Ungud duy kang pagsabihun sa kanyu, aku ti puwirtahan manga karanidu. 8 Ti un-an nakasitay nakauna sa kangku imaw yi ti manga mananakaw ag tulisan tunda. Dapat unman sida binati manga karanidu. 9 Aku ti puwirtahan. Una hintay pag tawu nu sumulud lakaw sa kangku, siya maribri. Sumulud siya lumuwas ag makakit siya karan-unun. 10 Unman sumitay tag ti mananakaw purya lang hampay manakaw, manmatay hanggan mamapas. Aku nagsitay hampay kang manga karanidu kumakit tutuu pag buhi udyi may kakurangan. 11 "Aku ti mayad pag manug-alaga sa karanidu. Ti mayad pag manug-alaga handa diman mamatay tungkul sa kay manga karanidu. 12 Tuhay ti inupahan lang, unman siya ti tutuu pag manug-alaga sa karanidu ag bukun waydi siya kay apu. Nakan nu makitan niya may simarun idu magpakarani sa manga karanidu, pabay-anan lang niya ti manga karanidu, pumalagiw yi lang siya. Pagka tinkub simarun idu ti karanidu, namululagan yi lang kay iba. 13 Ti inupahan magpalagiw lang nu may madala dahil magpakiupa lang waydi siya, unman pagpahalgaan niya ti manga karanidu. 14 Aku ngani ti mayad pag manug-alaga sa karanidu. Kilala di gid niku kang sadili manga karanidu, sida magkilala di gid waydi sa kangku, 15 parihu diman sa kay magkilala niku Ama sa kangku ag kang diman magkilala sa kang Ama. Handa diman aku mamatay tungkul sa kang manga karanidu. 16 May imaw waya gid aku tuhay pag manga karanidu, unman minsan sa inda pag tudir. Kailangan tabanun diman niku tunda pag manga karanidu, dumungug sida sa kang magbagaw usahun gid sida ka manada, usa lang ka manug-alaga. 17 "Pagmahalun aku niku Ama dahil handa aku mamatay hampay tanggapun dimaan niku kang buhi. 18 Unman may tawu bum-ul kang buhi, buluntadan ngap kang ipakaun. May kapangyarihan aku mamatay, may kapangyarihan diman aku hampay mabuhi uman. Inda yi ngani kay ibinilin niku Ama sa kangku hampay kang tupadun." 19 Kas-a yi maan namululagan ti manga pinunu Hudiyu kay naisipan dahil sa kay binagaw ni Hisus. 20 Mayamu sa kanda ti nagsabi magkun, "Inapuan siya labang, paung gid siya. Hayga pagpatingihan waya niyu siya?" 21 Dapat sinabi manga iba magkun, "Nu ti tawu inapuan labang balaw katida duy kay pagbagawun. Mahimu aw lugud makapaayad sa buta ti labang?" 22 Pagka dugay may Kapistahan sa Hirusalim tungkul sa Pag-&alaala sa kanda nag-intirga balay Diyus. Ati katpung sa udas amihanun. 23 Namasyar si Hisus sa pagkumnun manga tawu kan Sulumun parat-ungan ati sa balay Diyus. 24 Pagka dugay nagtipun sa kay palibut ti manga pinunu Hudiyu. Sinabi nida sa kan Hisus magkun, "Kabitay waya kadugay duy pagpatalinduwahun nimu kami? Pagtapata yi nimu nu kawu ti pinili Diyus Manugribri pag Hari." 25 Sinmagut si Hisus sa kanda magkun, "Sinabi yi niku sa kanyu dapat unman maniwala kamu. Pagtupadun niku kang buruwatun sa kapangyarihan niku Ama. Tunda ngani pag buruwatun niku ti puruyba tungkul sa kangku. 26 Dapat kamu unman magpaniwala dahil balaw kamu minsan sa kang manga karanidu. 27 Kang manga karanidu magdungug sa kang magbagaw. Kilala niku sida ag sida magkuyug sa kangku. 28 Ti manga magpaminsan sa kangku pagpakan-an niku tutuu pag buhi unman may katapusan. Hanggan waya aban dayu gid sida ipadamhak sa kamatayan. Unman may umagaw sa kanda ginan sa kang kamang. 29 Sida ipinakaun niku Ama sa kangku. Kang Ama lalu makapangyarihan sa tanan, unman may umagaw ginan sa kamang niku Ama. 30 Aku hanggan ti Ama urusa kami." 31 Nagpunpun yi gid maan manga batu ti manga pinunu Hudiyu hampay ibintuk sa kan Hisus. 32 Sinabi ni Hisus sa kanda magkun, "Mayamu pag manga mayad buwat kang Ipinakakit sa kanyu angay sa kay ibinilin Ama sa kangku. Naan sa kang manga buwat ti pag-ikabatu niyu sa kangku?" 33 Sinmagut sida magkun, "Balaw sa kanmu manga mayad buwat ti pag-ikabatu nimi sa kanmu dapat dahil sa kanmu magbagaw kalukuhan laban sa Diyus. Magpadiyusdiyusan kawu, madi tawu lang waydi." 34 Sinabi ni Hisus magkun, "Nisurat kabay sa kanyu Kasuguan magkun ti Diyus, 'Kamu manga diyus.' 35 Alam nita ti pagsabihun Banal Kasuratan unman may pudil hanggan aban. Diyus ngap ti nag-ingaran sa tunda pag manga tawu kuntay sida manga diyus, imaw yi ngani pag manga tawu ti nakatanggap sa kay bagaw Diyus. 36 Ti Ama ti nagpili nagsugu sa kangku sitay tag sa kalibutan. Kabitay lugud masabi niyu aku magbagaw kalukuhan laban sa Diyus nu pagsabihun niku aku ti Anak Diyus? 37 Nu unman pagtupadun niku ti buruwatun niku Ama, danga kamu magpaniwala sa kangku. 38 Dapat ay nu pagtupadun niku ti buruwatun niku Ama, kailangan pagpaniwala kamu sa kang buwat, una abi kamu unman magpaniwala sa kangku. Nu kamu magpaniwala sa kang pagbuwatun, maintindihan niyu kuntay ti Ama minsan sa kangku, aku minsan sa Ama." 39 Pagkaibgan maan nida dakpun si Hisus dapat siya nalagiw ginan sa kanda atubangan. 40 Nag-atag maan si Hisus sa dipay sapa Hurdan, sa kay nagtulbawan kaybi ni Huwan. Pagka si Hisus nadugay ati, 41 mayamu tawu nagpakarani sa kanya. Magharampangan ti manga tawu magkun, "Unman may nabuwat si Huwan manga makadululaw, dapat ti tanan manga sinabi niya tungkul sa inda pag tawu tutuu gid unman may pudil." 42 Ati sa dipay sapa Hurdan mayamu pag tawu sinmarig sa kan Hisus.
1 Ati sa baryu Bitanya may mag-uli usa ka tawu kay ngaran si Lasaru. Pagka dugay nasakit si Lasaru. Siyun diman sa Bitanya pag mag-uli kay manga patar-ari sida ni Marya ni Marta. 2 Imaw yi ngani pag Marya ti nagbuhus pamanglu sa kay manga lulud Panginuun bag-u kay pinayid niya buhuk. Kan Marya patar-ari pag Lasaru ti may sakit. 3 Nakan nagpasugu kay manga patar-ari babayi atag sa kan Hisus magkun, "Panginuun, ti kanmu pagbayaun pag tawu may sakit." 4 Pagka naalaman ni Hisus ti barita, sinabi niya magkun, "Tunda pag sakit balaw sa ikamatay. Nakan nangyari tunda hampay lalu makitan ti kadayawan Diyus. Ginan sa tunda pag sakit ni Lasaru madayaw aban ti Anak Diyus." 5 Pagmahalun ngani ni Hisus si Marta hanggan kay patar-ari babayi hanggan si Lasaru. 6 Madi alam ni Hisus magkasakit si Lasaru, nagpadugay waya siya duwa waya ka yabi ati sa dipay Hurdan. 7 Bag-u sinabi niya sa kay manga tuludluan magkun, "Pagbalik yi maan kita sa Hudiya." 8 Sinabi niya manga tuludluan magkun, "Udwaya dugay pagkaibgan yi manga Hudiyu kawu batuhun. Hayga duy kawu bumalik maan atag?" 9 Sinmagut si Hisus magkun, "Unman aw ti sirang dugay waydi kay rayaw? Nu ti tawu maglakaw sa marayaw dayu siya madayaan, dahil mag-akitan niya tigpakaun rayaw sitay sa babaw daga. 10 Dapat ti tawu nu maglakaw sa madlum madayaan gid, dahil unman may marayaw sa kanya." 11 Pagka sinabi ni Hisus tunda bag-u magkun waya siya, "Kanta pagmahalun pag tawu si Lasaru turug yi. Dapat aku umatag hampay siya kang pulawun." 12 Nakan sinabi niya manga tuludluan sa kan Hisus magkun, "Panginuun, nu turug si Lasaru, maayadan di siya." 13 Kay gustu sabihun ni Hisus namatay yi si Lasaru, dapat kanda isip kan Hisus pagtukyun ungud yi lang turug. 14 Nakan sinabi ni Hisus sa malinaw magkun, "Namatay yi duy si Lasaru. 15 Dapat alang alang sa kanyu, nakabaya aku unman aku ati sa kay magkamatay ni Lasaru hampay kamu sumarig sa kangku. Atag yi kita sa kanya." 16 Si Tumas, imaw ti binansagan Siing, nagsabi sa kay kaparihu tuludluan magkun, "Pagkuyug waydi kita sa kanta Maisturu hampay minsan diman sa kanya kita pag mamatay." 17 Pagka rinmas-ug si Hisus sa Bitanya naalman niya upat yi ka sirang kay nilubung si Lasaru. 18 Ti baryu Bitanya arani lang sa Hirusalim, manga usa ka tamaan ginatung kay karayu. 19 Mayamu pag manga Hudiyu nagsabang sa kanda ni Marta ni Marya hampay magpasaya sa kanda karukuan tungkul sa kanda patar-ari. 20 Pagka naalaman ni Marta si Hisus magkaras-ug yi, linmakaw siya hampay magsulang sa kan Hisus sa dalan. Dapat si Marya natayak matukawan sa balay. 21 Sinabi ni Marta sa kan Hisus magkun, "Nu sitay lang kawu duy, Panginuun, unman mana namatay kang patar-ari. 22 Dapat una kainda, alam diman niku una hintay kanmu hagadun sa Diyus ipakaun diman niya sa kanmu." 23 Sinabi ni Hisus sa kan Marta magkun, "Mabuhi di maan kanmu patar-ari." 24 Sinabi ni Marta magkun, "Alam duy niku siya mabuhi maan aban nu ti manga namatay buhiun maan sa katpung katapusan pag panahun." 25 Bag-u sinabi ni Hisus sa kanya magkun, "Sa kangku gid ginan duy pag mabuhi uman ti tawu. Aku diman ti gimpuunan buhi. Una abi mamatay ti tawu, nu siya magsarig sa kangku, balaw maduraan siya buhi. 26 Ti tawu nu may tutuu pag buhi siya ag nu siya magsarig sa kangku, dayu gid siya ipadamhak sa kamatayan. Pagpaniwalaan aw nimu inda?" 27 Sinmagut si Marta magkun, "Hu ngani Panginuun, naniwala yi aku kawu ti pinili Diyus Manugribri pag Hari, ti Anak Diyus, ti ipinangaku Diyus kuntay sumitay sa kalibutan." 28 Pagka sinabi ni Marta tunda, nuli dapu siya hampay kay bul-un si Marya. Yinansan niya kay patar-ari magkun, "Rinmas-&ug yi duy kanta Maisturu, ipinab-ul niya kawu." 29 Pagka nadnugan ni Marya tunda, tinmindug siya madali atag sa kan Hisus. 30 Udwaya rinmas-ug si Hisus sa baryu, ati di waya siya sa dalan sa kay nagsulangan ni Marta. 31 May manga tawu waya sa balay magsabang sa kan Marya magpasaya sa kay karukuan. Dapat pagka nakitan nida si Marya tinmindug bag-u nagluwas madali, kinmuyug waydi sida sa kanya dahil kanda hantup atag siya sa lubung hampay manlumi ati. 32 Dapat nag-ati ngani si Marya sa kay mapat-ungan ni Hisus. Pagka nakitan niya si Hisus, napayuk-ub siya sa kay atubangan magkun, "Nu sitay lang kawu duy, Panginuun, unman mana namatay kang patar-ari." 33 Nakitan ni Hisus si Marya magnguynguy hanggan kan Marya kaibahan pag manga tawu lunsay magnguruynguyan diman. Nakan magkabuyat yi kay naisipan naglumi kay tagipusuun. 34 Bag-u pinmaingana siya magkun, "Naan kanyu pag ipinauli siya?" Sinmagut sida ni Marta magkun, "Atag yi kita Panginuun, bantayi nimu." 35 Naglumi si Hisus. 36 Sinabi manga tawu magkun, "Bantayi niyu nu kabitay kay pagmahal niya sa kan Lasaru." 37 Dapat sinabi manga iba magkun, "Nagpaayad siya sa tawu buta. Hayga unman inampara niya kan Lasaru kamatayan?" 38 Nagmaruku maan masyadu si Hisus sa kay nag-atag sa kanda pinaulian bangkay pag lukib. Tunda pag lukib tinalakpan batu. 39 Bag-u sinabi ni Hisus magkun, "Bul-a duy niyu tunda pag itinalakup pag batu." Kan Marta ngani patar-ari ti namatay. Nakan magkun si Marta sa kan Hisus, "Panginuun, mabawu yi ay buyuk kay bangkay. Upat yi ka yabi kay namatay." 40 Sinabi ni Hisus sa kan Marta magkun, "Unman aw sinabi niku sa kanmu nu kawu sumarig, mag-akitan nimu ti kadayawan Diyus?" 41 Bin-ul ngani nida ti batu. Nagtangda si Hisus magkun, "Magpasalamat aku, Amang, sa kanmu dahil nadnugan nimu aku. 42 Alam niku pirmi gid mag-adnugan nimu aku. Dapat nakan kang sinabi inda sa kanmu dahil sa kayamuan tawu sa kang palibut hampay sida maniwala kuntay kawu yi ngani ti nagsugu sa kangku." 43 Pagka sinabi ni Hisus katida, ainalsa niya kay busis magkun, "Lasaru, pagluwas yi kawu." 44 Madi siya sitay namatay nagluwas siya nabuhi maan. Mabudbudan di waya ti rutay panlubung sa kay kamang hanggan sa kay manga lubud. Hanggan kay uyahun may budbud di waya panyu. Bag-u sinabi ni Hisus sa kanda magkun, "Bul-a yi niyu kay manga rutay mabudbudan hampay siya makalakaw maan." 45 Mayamu sa manga nansabang sa kan Marya, pagka nakitan nida kan Hisus binwat, sinmarig yi ngap sida sa kanya. 46 Dapat ti iba sa kanda nag-ati sa manga Parisiyu bag-u kanda itinultul kan Hisus binwat. 47 Nakan nagtiripun ti manga Parisiyu, ti manga pangulu manug-asiwa balay Diyus hanggan ti manga Pinunu nasyun Hudiyu bag-u sida nagpululungan magkun, "Hintay kanta buwatun? Dahil mayamu pag manga makapangyarihan pag tanda kay pagbuwatun tunda pag tawu. 48 Nu kanta lang pabay-anan kay manga buwat katida, ti tanan tawu sumarig sa kanya. Bag-u sumitay ti manga taga Ruma bag-u dautun nida ti balay Diyus ag daugun nida ti nasyun manga Hudiyu." 49 Ati katpung pag timpu si Kaipas ti Pangulu Manug-asiwa balay Diyus. Magkun si Kaipas, "Ud may intindi maaw kamu. 50 Unman maaw kamu madunung magkilala kuntay nu para sa kanyu mayad waya nu mamatay ti usa ka tawu hampay dayu mapapas ti buu nasyun manga Hudiyu." 51 Inda kan Kaipas sinabi bukun ginan sa kay lang sadili naisipan. Ati katpung pag timpu siya ti Pangulu Manug-asiwa balay Diyus, nakan ipinurupita niya mamatay si Hisus hampay iribri ti nasyun Hudiyu. 52 Ag balaw lang para sa nasyun Hudiyu. Mamatay diman si Hisus hampay tipunun niya ipaminsan ti manga anak Diyus nangalatkalat sa buu kalibutan. 53 Nakan ngani tunda ginan pag sirang paggayakun yi manga pinunu Hudiyu ipamatay si Hisus. 54 Nakan si Hisus udyi pirmi naglakaw sa Hudiya, udyi nagpasampak siya sa manga Hudiyu. Nighit siya siti ginan nag-&ati siya sa usa ka rugar arani sa pangawakawaan, sa usa ka banwa kay ngaran Ipraim. Ati siya pag napadugay kaibahan niya kay manga tuludluan. 55 Ati katpung arani yi ti Kapistahan sa Pag-alaala sa Karibrihan. Una naan ginan pag manga rugar mayamu tawu nag-&ati sa Hirusalim hampay tupadun nida ti manga ibinilin sa Kasuguan agud malumpiyu sida sa kay magbantay Diyus bag-u magpista. 56 Pagka ati sa Hirusalim, paghanapun nida si Hisus. Pagka nagtipun ti manga tawu sa balay Diyus, magharampangan magparaingan-an sida magkun, "Kabitay kanyu pag-iisip? Sumitay aw nguna siya sa Kapistahan, aw ngatay dayu?" 57 Ti manga pangulu manug-asiwa balay Diyus hanggan ti manga Parisiyu nagbilin sa manga tawu magkun, "Nu may tawu nakaalam nu naan si Hisus, kailangan itudlu niya sa kanmi hampay kanmi dakpun siya."
1 Unum wadi ka sirang bag-u Kapistahan yi sa Pag-alaala sa Karibrihan. Ati katpung pag sirang nag-atag si Hisus sa Bitanya, sa kay ulian ni Lasaru, imaw yi ngani pag Lasaru kay binuhi uman ginan sa kamatayan. 2 Pinayapunan nida si Hisus ati, si Marta ti nag-asikasu sa hayin. Si Lasaru matukawan minsan sa manga magkaun sa kay kasaru ni Hisus. 3 Bag-u binulwat ni Marya ti tunga sa kilu pag pamanglu. Tunda pag pamanglu bin-&ul ginan sa usa ka kayu kay ngaran nardu. Tutuu daka kay halaga tunda pag pamanglu. Kan Marya ibinuhus tunda sa kay lulud ni Hisus bag-u pinayid niya buhuk. Napnu gid ti usa ka balay sa hungaw pamanglu. 4 Siyun diman si Hudas Iskariyuti, usa diman ka tuludluan, imaw ti pumakampi sa kalaban ni Hisus. 5 Sinabi ni Hudas, "Mayad waya nu ipinabili yi lang tunda pag pamanglu sa halaga tawu tinarabahuan sa sulud sampulu ka bulan, bag-u abi ipakaun kay kabilyanan sa manga pugri." 6 Katida kay binagaw ni Hudas balaw kuntay sa magpasunaid siya sa manga pugri. Nakan sinabi niya katunda dahil siya mananakaw. Siya ti manughiyaput kanda kuwarta, bag-u paggawhinun niya kay iba. 7 Sinmagut si Hisus magkun, "Pabay-&ani niyu ti babayi. Inda kay yi ihinanda daan tungkul sa udas aban kanda maglubung sa kangku. 8 Dahil pirmi di sa kanyu ti manga pugri, dapat aku aban udyi dugay kaibahan niyu." 9 Mayamu pag manga Hudiyu nakaalam yi kuntay si Hisus ati sa Bitanya. Nakan nag-ati sida dahil asan si Hisus ag lalu kanda gustu makitan si Lasaru, ti binuhi maan ni Hisus ginan sa kamatayan. 10 Nakan namululungan ti manga pangulu manug-&asiwa balay Diyus hampay kanda ipamatay diman si Lasaru. 11 Dahil ginan sa nangyari sa kan Lasaru, mayamu pag manga Hudiyu balaw yi napasakup sa kanda manga pinunu, sinmarig yi sida sa kan Hisus. 12 Sa usa ka sirang kayamuan gid tawu nag-ati sa Kapistahan sa Pag-alaala sa Karibrihan. Pagka naalaman nida si Hisus arani yi magkaras-ug yi sa Hirusalim, 13 nam-ul sida manga paklang bag-u linmakaw sida nagsulang sa kan Hisus sa dalan. Nanarawagan ti manga tawu magkun, "Dayawun nita ti Diyus. Papaladan Diyus ti sumitay sa ngaran Panginuun. Papaladan Diyus ti Hari Israil." 14 Pagka nakitan ni Hisus ti usa ka anak asnu, sinmakay siya, angay sa isinurat sa Banal Kasuratan magkun, 15 "Danga kawu magkadala, Banwa Siun. Malu atay tag yi kanmu Hari nakasakay sa anak asnu." 16 Ati katpung unman naintindihan manga tuludluan ni Hisus kay kahulugan tunda pag manga nangyari. Dapat pagka si Hisus binuhi maan may kadayawan bag-u di naalaala nida inda ti isinurat sa Banal Kasuratan tungkul sa kanya ag katunda diman ti binwat manga tawu sa kan Hisus. 17 Pagka si Lasaru tinawagan ni Hisus ginan sa basad lukib ag siya binuhi maan, mayamu pag manga tawu siyun diman sa kan Hisus arani ti nakakit sa kay binwat. Bag-u itinultul nida sa manga iba nu hintay ti nangyari. 18 Nakan mayamu pag tawu ti nagsulang sa kan Hisus sa dalan, dahil naalaman nida kan Hisus binwat tunda pag makadululaw pag tanda. 19 Nakan nagharampangan ti manga Parisiyu magkun, "Bantayi duy niyu, udyi gid may mabuwat kita. Malu, ti tanan tawu napaminsan ngap sa kanya." 20 May manga Giriyigu pag tawu nag-ati diman sa Hirusalim hampay magsamba sa Diyus katpung sa Kapistahan sa Pag-alaala sa Karibrihan. 21 Nagpakarani sida sa kan Pilipi taga Bitsayda sakup sa daga Galiliya. Sinabi nida sa kan Pilipi, "Duy gustu mana nimi maghampang sa kan Hisus." 22 Nag-ati si Pilipi nagsabi sa kan Andiris. Bag-u sida maan ni Andiris ni Pilipi nag-ati sa kan Hisus kanda itinultul sa kanya ti sinabi manga Giriyigu. 23 Sinabi ni Hisus sa kanda magkun, "Arani yi ti taning pag kaudasan hampay ipaburayhaw ti kadayawan Anak Tawu. 24 Ungud gid duy kang pagsabihun sa kanyu, ti pasi tirigu nu unman malagpak sa daga hampay mamatay, balaw yi may samilya. Dapat ay nu mamatay ngani tunda pag pasi tirigu, lalu ngap mamurak siya mayamu. 25 Nu pagpahalgaan tawu kay sadili buhi, maduraan ngap siya buhi. Dapat nu unman pagpahalgaan tawu kay buhi sitay sa babaw daga, dayu ngap siya maduraan buhi hanggan aban. 26 Nu ti tawu magkaibug magbuwat kang buruwatun, kailangan siya pagkuyug sa kangku hampay una naan aku, siyun diman sa kangku kang suruguun. Una hintay pag tawu nu tumupad siya sa kang buruwatun, dayawun siya niku Ama." 27 Sinabi ni Hisus magkun, "Taynguna magkaaburidu kang tagipusuun. Hintay nguna kang sabihun? Ngatay kang sabihun, Amang, paiwasan nimu aku sa inda aban pag kakurian? Dapat ay nakan aku nagsitay sa kalibutan hampay malakawan ngapu niku inda pag kakurian aban. 28 Amang, ipaburayhaw duy nimu ti kadayawan nimu ngaran." Bag-u may nagbagaw ginan sa langit magkun, "Ipinaburayhaw yi duy niku ti kadayawan niku ngaran, dapat una aban ipaburayhaw waya gid maan niku." 29 Nadnugan kayamuan tawu may nagbagaw. Sinabi manga iba magkun, "Maglinti maaw." Magkun ti manga iba, "Anghil ti naghampang sa kanya." 30 Dapat sinabi ni Hisus magkun, "Tunda ngani pag busis kanyu nadnugan balaw nagbagaw para sa kangku nu ud para ngap sa kanyu. 31 Taynguna yi ti kaudasan hampay pihuun Diyus ti manga tawu sa babaw daga nu daut nu mayad. Taynguna tulakun yi tag sa luwas ti pangulu inda pag kalibutan. 32 Nu ipaabwat yi aku ginan sa daga, butungun niku ti tanan tawu hampay sida pumakarani sa kangku." 33 Inda kay sinabi ni Hisus hampay ipaalam nu kabitay pag kamatayan kay malakawan aban. 34 Nagsabi ti kayamuan tawu sa kanya magkun, "Naalaman nimi sa kanmi Kasuguan magkun, ti pinili Diyus Manugribri pag Hari unman gid mamatay hanggan aban. Kabitay duy kanmu pagsabihun kuntay kailangan ipaabwat ti Anak Tawu? Si unu nguna tunda pag Anak Tawu?" 35 Sinmagut si Hisus magkun, "Udyi madugay aban sa kanyu ti sulu. Paglakaw yi kamu hanggan sa kanyu waya ti sulu hampay balaw kamu matakdan dulum. Dahil nu ti tawu maglakaw sa madlum, unman niya alam kay patabgan. 36 Pagsarig yi kamu sa sulu hanggan sa udwaya mab-&ul ginan sa kanyu hampay kamu manga sakup yi sa karayawan." Pagka sinabi ni Hisus tunda, nighit siya ati ginan, napaiwas-&iwas siya sa manga tawu. 37 Unman sida nagsarig sa kanya, madi katunda kay kayamu pag manga tanda kay binwat niya sa kanda atubangan. 38 Inda tanan tanan nangyari hampay matupad kay sinabi kaybi ni Purupita Isayas magkun, "Panginuun, si unu ti naniwala sa kanmi sinabi? Sa kantapu pag ipinakilala Panginuun kay kapangyarihan?" 39 Nakan unman sida nakahimu magsarig dahil kay sinabi ni Isayas magkun, 40 "Binuta Diyus kanda manga mata. Pinaganit Diyus kanda tagipusuun Hampay unman kumakit kanda mata Ag hampay unman makaintindi kanda tagipusuun. Sinabi Diyus magkun, nakan katida kang binwat sa kanda hampay sida unman bumalik tag sa kangku. Dayu waydi paayadun niku sida." 41 Inda kay sinabi ni Isayas dahil Ipinakakit Diyus sa kanya kay kadayawan aban ni Hisus ag kay binagaw ni Isayas tungkul ngani sa kan Hisus. 42 Una sa manga pinunu Hudiyu mayamu ti nagsarig sa kan Hisus. Dapat sida magkadala sa manga Parisiyu nakan unman kanda ipinamalay sa manga tawu barang ipalwas sida ginan sa balay tiripnan. 43 Unman mahalaga sa kanda nu sida pagbayaun Diyus. Ti mahalaga lang sa kanda basta sida pagbayaun manga tawu. 44 Ainalsa ni Hisus kay busis magkun, "Ti tawu nu magsarig sa kangku balaw lang sa kangku pag magsarig, nu unman hanggan sa nagsugu sa kangku. 45 Ti tawu nu nakakit sa kangku, nakakit diman waydi siya sa nagsugu sa kangku. 46 Nagsitay aku ga sulu sa kalibutan hampay una hintay pag tawu nu sumarig sa kangku, balaw yi siya sa kadudulman. 47 Una hintay pag tawu nu magpatingi sa kang pagbagawun bag-u unman niya pagpaniwalaan, balaw aku ti pumihu sa kanya nu daut nu mayad. Dahil aku unman nagsitay hampay kang pihuun ti taga kalibutan nu daut nu mayad. Nakan aku nagsitay hampay ngap iribri ti taga kalibutan. 48 Dapat may sumintinsiya sa tawu nu siya magdayu sa kangku ag nu unman siya magpaniwala sa kang pagbagawun. Kang ngap manga binagaw imaw ti sumintinsiya sa kanya sa katapusan panahun aban. 49 Nakan katida ti mangyari dahil unman aku nagtultul ginan lang sa kang sadili. Ti Ama ti nagsugu sa kangku imaw ti may bilin sa kangku nu hintay ti kailangan niku sabihun ag nu hintay ti dapat niku itultul. 50 Alam niku kay ibinilin niya imaw ti pumakaun tutuu pag buhi unman may katapusan sa tawu. Nakan ngani ti ibinilin niku Ama sa kangku imaw kang pagbagawun."
1 Ati katpung usa wadi ka sirang bag-u Kapistahan yi sa Pag-alaala sa Karibrihan. Alam yi ni Hisus inda yi ngani pag kaudasan siya umighit ginan sa kalibutan atag sa Ama. Daan minayad gid niya ti manga napasakup sa kanya sitay sa babaw daga, ag kay minayad niya sida hanggan sa katapusan niya buhi. 2 Ati katpung si Hisus hanggan kay manga tuludluan magyapun. Daan inudyukan diyablu si Hudas, kan Simun Iskariyuti anak, hampay pumakampi siya sa kay kalaban ni Hisus agud siya kay itudlu sa kanda. 3 Daan alam di ni Hisus ipinakaun Ama sa kanya ti tanan pag kamaskihan. Alam diman waydi ni Hisus siya ginan sa Diyus ag siya umighit sitay ginan atabug maan sa Diyus. 4 Sa kanda magkaun waya, tinmindug si Hisus bag-u linkas niya kay pamaunib baLukas sadsad. Nagbuul siya tualya kay ihinuragkus dapu sa kay awak. 5 Pagka tinmigis danum atag sa palanggana, inugasan niya ti lulud niya manga tuludluan bag-u kay pinayid tualya mahuragkusan sa kay awak. 6 Pagka siya nagpakarani sa kan Simun Pidru, pinmaingana si Pidru sa kanya magkun, "Panginuun, kawu aw ti umugas kang manga lulud?" 7 Sinmagut si Hisus magkun, "Udwaya magkasalman nimu taynguna kang pagbuwatun, dapat masalman di nimu aban." 8 Magkun si Pidru, "Una kapira aban danga gid kawu ti mag-ugas kang manga lulud." Sinabi ni Hisus sa kanya magkun, "Nu unman kang ugasan kanmu manga lulud, dayu kawu makapaminsan sa kangku." 9 Bag-u sinabi ni Pidru magkun, "Nu katunda Panginuun, danga kang manga lulud lang. Ugasi duy nimu kang kamang hanggan kang ulu." 10 Sinabi ni Hisus sa kanya magkun, "Ti tawu nu nakaparigus yi udyi kailangan mag-ugas waya nu ud kay lang lulud dahil malumpiyu yi kay bilug. Kamu duy manga malumpiyu yi, dapat balaw kamu tanan." 11 Nakan katida kay sinabi ni Hisus magkun, balaw kamu tanan manga malumpiyu, dahil alam di niya nu si unu ti pumakampi sa kay kalaban hampay siya kay itudlu sa kanda. 12 Pagka inugasan ni Hisus kanda manga lulud, kay pamaunib baLukas sadsad kay maan isinlung bag-u tinmukaw maan siya. Bag-u pinmaingana siya sa kanda magkun, "Magkasalman aw niyu kang binwat sa kanyu kis-ab? 13 Kanyu pagsabihun aku kanyu Maisturu ag kanyu Panginuun. Tama ngani kanyu pagsabihun katida, dahil tutuu gid aku kanyu Maisturu ag kanyu Panginuun. 14 Taynguna aku kanyu ngani Panginuun ag kanyu Maisturu, ti nag-ugas kis-ab kanyu manga lulud. Nakan kamu hanggan kailangan mag-urugasan kanyu manga lulud sa usa kag sa usa. 15 Dahil kamu kang pinakakitan usa ka mustara hampay kanyu buwatun sa usa kag sa usa parihu diman ga kang binwat sa kanyu taynguna. 16 Ungud gid kang pagsabihun sa kanyu duy, unman may panawuhun mataas man sa kay amu. Ag unman may sinugu mataas man sa nagsugu sa kanya. 17 Nu naintindihan yi niyu inda pag manga katutuuhanan, masulung kamu nu kanyu tupadun. 18 "Inda kang manga pagsabihun bukun tungkul sa kanyu tanan. Kilala di niku daan nu hintay pag manga tawu kang pinili. Dapat kailangan tupadun ti pagsabihun sa Banal Kasuratan magkun, 'Tunda pag tawu ti kasaru niku sa lamak, imaw yi ngap ti nagdayi sa kangku.' 19 Taynguna pagka udwaya nangyari tunda, pag-itultul yi niku daan sa kanyu hampay nu mangyari yi, sumarig yi kamu kuntay aku si Aku Ngani. 20 Ungud gid kang pagsabihun sa kanyu, tigtanggap sa una hintay pag tawu kang sinugu, magtanggap diman sa kangku. Tigtanggap sa kangku, kay tanggapun diman niya ti nagsugu sa kangku." 21 Pagka sinabi ni Hisus tunda, naaburidu gid siya sa kay tagipusuun. Bag-u itinultul niya sa kanda sa malinaw magkun, "Ungud gid duy kang pagsabihun sa kanyu, ti usa sa kanyu pumakampi sa kang kalaban hampay aku kay itudlu sa kanda." 22 Ti manga tuludluan namarantayan sa usa kag sa usa. Unman gid nida alam nu si unu nguna kay pagtukyun ni Hisus. 23 Sa kanda magkaun ti matukawan sa kay arani ni Hisus imaw yi ngani ti pagmahalun ni Hisus pag tuludluan. 24 Pinaamanan siya ni Simun Pidru magkun, "Paingan-a nimu nu si unu kay pagtukyun niya." 25 Nakan tunda pag tuludluan inmisdug waya atag sa kan Hisus arani bag-u pinmaingana siya magkun, "Panginuun, si unu nguna tunda pag tawu?" 26 Sinmagut si Hisus magkun, "Nu hintay ti tunghulan niku sab tinapay kang isinawsaw sa sabakan, tunda pag tawu imaw yi kang pagtukyun." Nakan pagka isinawsaw ni Hisus ti tinapay sa sabakan, kay bin-&ul ginan sa taya bag-u kay itinunghul tag sa kan Hudas, kan Simun Iskariyuti anak. 27 Pagka nagamit ni Hudas ti tinapay, susun inapuan siya ni Satanas. Bag-u kan Hisus sinabi sa kan Hudas magkun, "Ti kanmu buwatun, buwata yi nimu kadali." 28 Unman alam nida tanan manga kasaru ni Hisus nu hintay nguna kay kahulugan kay binagaw sa kan Hudas. 29 Si Hudas ti manugkurpa kuwarta. Nakan kanda hantup manga iba tuludluan barang sinugu ni Hisus si Hudas hampay bilihun niya kanda manga pangailangan sa Kapistahan, aw ngatay hampay pumakaun siya kuwarta sa manga pugri. 30 Pagka nagamit ngani ni Hudas ti tinapay, susun yi siya napalwas. Yabi yi ati. 31 Pagka napalwas yi si Hudas, sinabi ni Hisus magkun, "Taynguna ipaburayhaw yi ti kadayawan Anak Tawu. Ag ginan sa kanya pag ipaburayhaw diman ti kadayawan Diyus. 32 Nu ipinaburayhaw yi ti kadayawan Diyus ginan sa Anak Tawu, susun Diyus yi gid ti pumaburayhaw sa kadayawan Anak Tawu. 33 Kamu duy pag manga mahal niku pag kaibahan, aku balaw yi dumugay sa kanyu. Hanapun gid niyu aku aban. Dapat pagsabihun niku taynguna parihu diman sa kang sinabi sitay sa manga pinunu Hudiyu magkun, kamu dayu makaati sa atihan niku. 34 Aku duy may bag-u pag bilin sa kanyu magkun, pagmalahalan kamu sa usa kag sa usa. Nu kabitay kang nagmahal sa kanyu, pagkatunda diman waydi kamu pagmalahalan sa usa kag sa usa. 35 Nu kamu may pagmahal sa usa kag sa usa, makilala tanan manga tawu kamu kang manga tuludluan." 36 Bag-u pinmaingana si Simun Pidru sa kan Hisus magkun, "Panginuun, naan tabug kawu?" Sinmagut si Hisus magkun, "Sa kang atihan kawu balaw makakuyug sa kangku taynguna, dapat aban kawu dumasun di sa kangku." 37 Sinabi ni Pidru magkun, "Panginuun, hayga aku balaw makakuyug sa kanmu taynguna? Handa diman aku mamatay alang alang sa kanmu." 38 Sinabi ni Hisus magkun, "Tutuu gid aw handa kawu mamatay alang alang sa kangku? Ungud gid kang pagsabihun sa kanmu, udwaya tumarauk ti manuk, itanggi nimu aku katlu ginan."
1 Bag-u sinabi ni Hisus sa kay manga tuludluan magkun, "Danga magkaaburidu kamu sa kanyu tagipusuun. May sarig kamu sa Diyus, pagsarig diman waydi sa kangku. 2 Sa balay niku Ama mayamu pag ulian. Umati aku hampay maghanda yi kanyu ulian. Unman mana itinultul niku inda sa kanyu nu abi balaw tutuu. 3 Nu aku makaati makahanda yi kanyu ulian, bag-u bumalik maan aku, kamu kang yi bul-un hampay minsan kamu sa kang ulian. 4 Alam yi niyu ti dalan atag sa rugar kang atihan." 5 Sinabi ni Tumas magkun, "Panginuun, unman nimi alam nu naan tag kawu. Kabitay pag maalaman nimi ti dalan?" 6 Sinmagut si Hisus sa kanya magkun, "Aku ti dalan, ti katutuuhanan, ti buhi. Ginan lang sa kangku pag makaati ti tawu sa Ama." 7 Magkun si Hisus sa kanda, "Nu nakilala yi niyu aku, nakilala yi waydi niyu hanggan kang Ama. Taynguna ginan nakilala yi niyu siya ag kanyu yi nakitan." 8 Sinabi ni Pilipi sa kan Hisus magkun, "Panginuun, ipakakit nimu sa kanmi ti Ama. Tida lang mana duy kanmi kailangan." 9 Sinabi ni Hisus sa kanya magkun, "Dugay yi aku pag kaibahan niyu. Udwaya aw lugud nakilala nimu aku, Pilipi? Ti tawu nu nakakit sa kangku, nakitan yi niya hanggan ti Ama. Hayga duy pagsabihun nimu magkun, 'Ipakakit nimu sa kanmi ti Ama'? 10 Unman aw duy maniwala kawu kuntay aku minsan sa Ama ag ti Ama minsan sa kangku? Ti manga bagaw kang pag-&itultul sa kanyu balaw ginan lang sa kang sadili. Ti Ama ti nangulian sa kangku imaw tigtupad kay buruwatun. 11 Pagpaniwala yi duy kamu sa kang pagsabihun magkun, aku minsan sa Ama ag ti Ama minsan sa kangku. Dapat nu unman magpaniwala kamu dahil sa kang pagsabihun, pagpaniwala yi gid kamu dahil sa kang manga binwat. 12 Ungud gid kang pagsabihun sa kanyu, ti tawu nu nagsarig siya sa kangku, buwatun diman niya ti manga makadululaw ga kang diman binwat. Lalu waya paman makadululaw kay buwatun, dahil aku umati yi sa Ama. 13 Una hintay kanyu hagadun sa kangku dahil kamu napasakup sa kangku, kang gid buwatun hampay ipaburayhaw niku ti kadayawan niku Ama. 14 Nu paghagadun niyu una hintay sa kangku dahil kamu napasakup sa kangku, kang gid buwatun tunda." 15 Sinabi ni Hisus magkun, "Nu pagmahalun gid niyu aku, tupadun waydi niyu kang manga ibinilin sa kanyu. 16 Humagad aku sa Ama bag-u pakan-an niya kamu tuhay pag Manug-awat hampay siya kanyu yi kaibahan hanggan waya aban. 17 Tunda pag Manug-awat imaw yi ti Ispiritu tigtudlu katutuuhanan tungkul sa Diyus. Dayu mahimu makapasakup sa Ispiritu ti manga taga kalibutan, dahil unman mag-akitan nida siya, unman diman kanda nakilala. Dapat kamu duy nakakilala yi sa kanya, dahil siya kanyu yi kaibahan ag aban mangulian yi siya sa kanyu tagipusuun. 18 "Dayu pabay-anan lang niku kamu unman may Manug-&awat. Bumalik maan aku sa kanyu. 19 Udyi dugay aban bag-u dayi gid kumakit sa kangku ti manga taga kalibutan. Dapat kamu kumakit di sa kangku. May tutuu gid pag buhi aku, nakan una kamu may tutuu gid pag buhi. 20 Sa ati katpung pag sirang aban makilala niyu kuntay aku minsan sa Ama ag kamu minsan sa kangku, aku minsan diman sa kanyu. 21 "Una hintay pag tawu nu tinanggap niya kang manga bilin bag-u kay tupadun, tunda yi ngani pag tawu tigmahal sa kangku. Mahalun diman niku Ama una hintay pag tawu nu magmahal sa kangku. Ag ipakilala niku kang sadili sa kanya." 22 Bag-u si Hudas (bukun si Hudas Iskariyuti) pinmaingana sa kan Hisus magkun, "Panginuun, kabitay duy pag ipakilala nimu kanmu sadili sa kanmi lang ag unman hanggan sa manga taga kalibutan?" 23 Sinmagut si Hisus magkun, "Una hintay pag tawu nu magmahal siya sa kangku, tumupad siya sa kang manga bilin bag-u mahalun gid siya niku Ama. Bag-u kang Ama hanggan aku umasan yi mangulian yi sa kanya. 24 Dayu waydi tumupad ti tawu sa kang manga bilin nu unman pagmahalun niya aku. Ti manga itinudlu niku kanyu nadnugan balaw ginan lang sa kang sadili isip. Tunda pag manga bagaw ginan di sa Ama sa nagsugu sa kangku. 25 "Inda pag manga bagaw kang itinultul sa kanyu kang sitay waya sa kanyu. 26 Dapat suguun Ama ti Manug-awat ti Ispiritu ngani Banal sa kanyu sa manga napasakup sa kangku. Itudlu niya sa kanyu ti tanan pag manga bagay. Umawat siya sa kanyu hampay balaw malimtan niyu ti tanan manga itinudlu niku sa kanyu. 27 "Kahusayan kang ipatayak sa kanyu. Kang kahusayan kang diman gid ipakaun sa kanyu. Kang magpakaun kahusayan sa kanyu balaw parihu sa paraan kalibutan. Danga kamu magkaaburidu sa kanyu tagipusuun ag danga kamu magkadala. 28 Nadnugan yi niyu kang sinabi sa kanyu magkun, umighit yi aku dapat bumalik maan aku sitay tag sa kanyu. Nu tutuu gid aku kanyu pagmahalun, kamu mana magbaya nu umati aku sa Ama, dahil ti Ama mataas man sa kangku. 29 Taynguna pagka udwaya nangyari inda, pag-itultul yi niku daan sa kanyu hampay nu mangyari yi pumatutuu yi kamu sa kang sinabi. 30 Udyi aku may rugar hampay maghampang waya sa kanyu dugay, dahil sab arani yi ti pangulu kalibutan. Unman may mabuwat siya sa kangku nu unman pahintulutan Ama. 31 Dapat kailangan maintindihan manga tawu sa kalibutan kuntay pagmahalun gid niku kang Ama, nakan pagtupadun niku kay manga ibinilin niya sa kangku. Atag yi kita duy, tag yi sa luwas."
1 Bag-u sinabi ni Hisus magkun, "Aku ti tutuu pag puun ubas. Kang Ama tig-alaga. 2 Nu may manga sanga sa kangku unman magburak, kay pungpungun niya. Ti kada sanga magburak puldan niya kay baliw hampay lalu mamurak. 3 Kamu linumpiyu yi dahil sa manga itinudlu niku sa kanyu. 4 Dagpablag kamu sa kangku, ga kang diman napaminsan sa kanyu. Dayu bumurak ti sanga nu napablag yi sa kay puun. Ti sanga ubas bumurak lang nu angut ginan sa kay puun. Katunda diman waydi kamu unman may mabuwat nu napablag kamu sa kangku. 5 "Aku ti puun ubas, kamu ti manga sanga. Ti tawu nu napaminsan di sa kangku ag aku napaminsan di sa kanya, pihu may pakinabang ti mayamu buwat niya. Dahil nu napablag kamu sa kangku unman kamu may mabuwat. 6 Nu ti tawu napablag yi sa kangku, iyamut siya malayung bag-u parihu diman ga manga sanga tipunun siya, bag-u isawug sa apuy hampay sunugun. 7 Nu kamu minsan di sa kangku ag kang manga bagaw balaw madura sa kanyu, mahimu hagadun niyu sa darangin una hintay kanyu magustuhan, pihu ipakaun Diyus sa kanyu. 8 Pag-&ipaburayhaw ti kadayawan niku Ama nu makinabangan ti mayamu niyu buwat kay puruyba kamu kang yi manga tuludluan. 9 "Kamu kang pagmahalun, parihu sa kay magmahal Ama sa kangku. Aku magmahal sa kanyu, nakan danga magpablag kamu sa kangku. 10 Nu tupadun niyu kang manga bilin, balaw yi kamu miblag sa kang pagmahal sa kanyu. Parihu diman ga kang magtupad sa manga bilin niku Ama, unman diman aku miblag sa kay pagmahal sa kangku. 11 "Inda tanan duy kang itinultul sa kanyu hampay magbaya kamu parihu sa kang magbaya ag hampay lubus yi lang gid magbaya kanyu tagipusuun. 12 Inda yi ngani kang pag-ibilin sa kanyu magkun, pagmalahalan yi gid kamu sa usa kag sa usa, parihu diman sa kang magmahal sa kanyu. 13 Unman may pagmahal lalu waya daka sa inda nu balaw inirangan usa ka tawu kay buhi sa kay pagmahalun pag manga tawu. 14 Nu kanyu tupadun kang pag-ibilin sa kanyu, kamu kang yi pagmayadun pag manga tawu. 15 Balaw yi pag-ingarnan niku kamu manga panawuhun, dahil unman alam panawuhun ti buruwatun niya amu. Ga kang diman sinabi kis-ab, kamu kang pagmayadun pag manga tawu dahil ti tanan itinultul Ama sa kangku, kang itinultul maan sa kanyu. 16 Balaw duy kamu ti nagpili sa kangku. Aku ngap ti pinmili sa kanyu, kang ipinablag kamu ginan sa kalibutan hampay kamu umatag tumupad sa buruwatun ag hampay udyi madura hanggan aban ti pakinabang niyu manga binudlayan. Bag-u ipakaun Ama sa kanyu una hintay kanyu hagadun sa kanya dahil kamu napasakup sa kangku. 17 Inda yi ngani kang pag-ibilin sa kanyu magkun, pagmalahalan kamu sa usa kag sa usa." 18 Sinabi ni Hisus magkun, "Nu kamu pagkagalitan manga taga kalibutan, kailangan alalahanun niyu aku un-an man sa kanyu kinagalitan nida. 19 Nu abi kamu manga taga kalibutan, pagmahalun mana kamu manga taga kalibutan dahil minsan kamu sa kanda. Dapat ay kamu kang yi pinili ipinablag ginan sa kalibutan, nakan kamu pagkagalitan manga taga kalibutan dahil udyi kamu minsan sa kanda. 20 Alalahana di gid niyu kang binagaw sa kanyu magkun, unman may panawuhun mataas man sa kay amu. Nu aku kanda inunuunu, unuunuhun diman nida kamu. Nu sida naniwala sa kang manga itinudlu, paniwalaan diman nida kanyu manga pag-itudlu sa kanda. 21 Pagkadat-an nida kamu dahil kamu napasakup sa kangku ag unman nakilala nida ti Ama ti nagsugu sa kangku. 22 Balaw mana sida may saragtun tungkul sa kanda manga buwat, nu abi aku unman nagsitay nanudlu sa kanda. Dapat taynguna udyi may idingkilan sida sa kanda kasalanan. 23 Nu ti tawu magkagalit sa kangku, pagkagalitan diman niya hanggan kang Ama. 24 Nakan may saragtun gid sida sa kanda manga kasalanan, dahil nakitan gid nida ti makadululaw pag binwat niku unman mabuwat una sitapu pag tawu. Kanda gid nakitan tunda, bag-u kanda ngap kinagalitan aku hanggan ti Ama. 25 Dapat nakan katida ti nangyari hampay matupad ti bagaw isinurat sa kanda Kasuguan, magkun, 'Kinagalitan nida aku madi unman may ikasabi.' 26 "Sumitay ti Manug-awat ginan sa Ama tag sa kanyu, ti Ispiritu ngani imaw tigtudlu katutuuhanan tungkul sa Diyus. Suguun niku siya ginan sa Ama bag-u itultul niya sa kanyu ti tungkul sa kangku. 27 Bag-u kamu tumultul diman tungkul sa kangku sa manga tawu, dahil kamu manga kaibahan niku ginan waya sa kabag-u kang nanudlu.
1 "Inda pag manga bagay kang itinultul sa kanyu hampay kamu dayu umalinlangan sa kanyu pagsarig. 2 Ipalwas kamu aban manga Hudiyu ginan sa kanda manga balay tiripnan. Aban humantup ti manga tawu tinupad nida ti buruwatun Diyus nu kamu kanda minatay. 3 Nakan katida kanda buwatun sa kanyu dahil unman nakilala nida una ti Ama una aku. 4 Nakan kang yi itinultul hampay nu udas yi mangyari yi tunda aban, alalahanun di niyu inda yi ngani kang itinultul." Magkun si Hisus, "Inda pag manga bagay unman itinultul niku sa kanyu ginan sa kabag-u, dahil aku atay waya waydi sa kanyu. 5 Dapat taynguna aku mighit yi atabug sa nagsugu sa kangku. Una di usa sa kanyu unman may magpaingana sa kangku nu naan tabug aku. 6 Dapat lubus gid kamu maruku kanyu tagipusuun dahil sa kang sinabi sa kanyu. 7 Dapat tutuu gid inda kang pagsabihun sa kanyu, kanyu ikamayad nu aku mighit yi. Dahil nu unman aku mighit, dayu mahimu sumitay sa kanyu ti Manug-awat. Dapat nu mighit aku suguun niku siya sitay tabug sa kanyu. 8 Nu sumitay ti Ispiritu Banal, ipakilala niya sa manga taga kalibutan balaw tama kanda pag-intindi sa kahulugan kasalanan, una sa katadlungan, una hanggan sa sintinsiya. 9 Magsalan sida sa kanda pag-intindi sa kahulugan kasalanan, dahil sida unman magsarig sa kangku. 10 Magsalan sida sa kanda pag-intindi sa katadlungan dahil aku atabug yi sa Ama ag dayi makitan niyu aku. 11 Magsalan sida sa kanda pag-intindi tungkul sa sintinsiya, dahil nasintinsiyahan yi ti pangulu kalibutan. 12 "Mayamu waya mana kang sarabihun sa kanyu, dapat makuri intindihun niyu kainda. 13 Nu Rumas-ug ti Ispiritu, siya ti tumudlu katutuuhanan tungkul sa Diyus, tudluan diman niya kamu sa tanan katutuuhanan ginan sa Diyus. Unman siya bumagaw nu ginan lang sa kay sadili. Ipadakit niya kay manga nadnugan ag ipaalam niya sa kanyu ti manga mangyari aban. 14 Ipakilala niya sa kanyu kang kadayawan, dahil ginan diman sa kangku pag kaayadan ti ipadakit niya tag sa kanyu. 15 Una hintay pag kaayadan sa kang Ama kangku diman. Nakan sinabi niku sa kanyu magkun, tanggapun Ispiritu kang kaayadan bag-u kay ipadakit maan niya sa kanyu." 16 Magkun waya si Hisus, "Udyi dumugay duy bag-u udyi makitan niyu aku. Bag-u unman maan dumugay makitan di maan niyu aku." 17 Kay iba tuludluan namaraingan-an sa usa kag sa usa magkun, "Hintay nguna tunda kay sinabi niya sa kanta magkun, 'Udyi dumugay bag-u udyi makitan niyu aku. Bag-u unman maan dumugay, makitan di maan niyu aku.' Sinabi waya niya magkun, 'Nakan katida dahil aku atabug yi sa Ama.' " 18 Sinabi nida, "Hintay nguna kay pagkumnun 'Udyi dumugay'? Unman magkasalman nita kay pagsabihun." 19 Alam di ni Hisus magkaibug sida pumaingana sa kanya. Nakan sinabi niya sa kanda magkun, "Magparaingan-an aw kamu sa usa kag sa usa dahil sa kang sinabi magkun, udyi dumugay bag-u udyi makitan niyu aku bag-u unman maan dumugay makitan di maan niyu aku. 20 Ungud duy kang pagsabihun sa kanyu, kamu manlumi aban ag mannguruynguyan, dapat ti manga taga kalibutan makabaya ngap. Kamu aban may karukuan, dapat kanyu karukuan matulsan di kabayaan. 21 Maruku ti babayi nu magpanamdam yi dahil rinmas-&ug yi ti udas niya kakurian. Nu bay nakalawuy yi ti anak udyi magkadumduman babayi kay nalakawan pag kakurian. Magbaya ngap siya dahil nilusad yi ti usa ka lapsag. 22 Katunda diman kamu. Taynguna kamu maruku, dapat makitan maan niku kamu aban bag-u makabaya gid kanyu tagipusuun ag udyi may tawu bum-ul kanyu kabayaan sa tagipusuun. 23 Sa ati katpung pag udas aban, udyi kamu mamaingana sa kangku. "Ungud gid duy kang pagsabihun sa kanyu, una hintay kanyu hagadun sa Ama, dahil kamu napasakup sa kangku, pihu gid kay ipakaun niya sa kanyu. 24 Hanggan taynguna tugka udwaya kamu may hinagad sa kanya madi kamu napasakup sa kangku. Paghagad kamu bag-u kamu may matanggap hampay lubus udyi may kurang kanyu kabayaan." 25 Magkun si Hisus, "Sa kang magtudlu sa kanyu inda tanan, ginamit niku ti manga pahalimbawa. Dapat aban udyi aku humampang sa kanyu sa manga pahalimbawa. Ati katpung itultul niku sa kanyu sa malinaw pag bagaw tungkul sa Ama. 26 Ati katpung makahagad kamu sa kanya dahil kamu napasakup sa kangku. Balaw aku ti humagad sa kanya para sa kanyu. 27 Dahil pagmahalun yi gid kamu Ama. Nakan kamu kay pagmahalun dahil sa kanyu pagmahal sa kangku ag dahil kamu naniwala kuntay aku nagsitay ginan sa Diyus. 28 Ginan aku sa Ama nagsitay sa kalibutan. Bag-u tayakan maan niku ti kalibutan, atabug maan sa Ama." 29 Bag-u sinabi niya manga tuludluan magkun, "Taynguna duy malinaw ngani kanmu pagsabihun, udyi sa manga pahalimbawa pag bagaw. 30 Taynguna alam nimi kuntay magkaalaman nimu ti tanan tanan ag unman yi kailangan may pumaingana waya sa kanmu. Nakan ngani kami maniwala kuntay kawu ginan sa Diyus." 31 Sinabi ni Hisus magkun, "Ungud gid aw kamu maniwala taynguna? 32 Dapat malu, udyi gid dumugay, kainda yi ngap sab, kamu mamululagan yi, ti kada tawu tabug sa kay sadili balay bag-u tayakan niyu aku usa usa wadi. Dapat balaw waydi aku usa usa, dahil ti Ama sa kangku di. 33 Itinultul niku inda tanan tanan sa kanyu, hampay may kahusayan kanyu naisipan dahil sa kanyu magpakiusa sa kangku. Sitay sa babaw daga may malakawan kamu kakurian. Dapat pagmatutum duy kanyu naisipan. Tinalu yi niku ti kapangyarihan kalibutan."
1 Pagka sinabi ni Hisus tunda, nagtangda siya sa langit bag-u sinabi niya magkun, "Amang, inda yi ngani ti taning pag kaudasan. Ipaburayhaw nimu ti kadayawan nimu Anak hampay kanmu Anak pumaburayhaw waydi kanmu pag kadayawan. 2 Dahil ipinasirung nimu ti tanan tanan sa kapangyarihan Anak hampay pakan-an niya tutuu pag buhi unman may katapusan ti tanan tawu kanmu iinintirga sa kanya. 3 Inda yi ngani ti ibug sabihun buhi unman may katapusan nu kilalan-un tawu kawu lang ti tutuu gid pag Diyus ag nu kilalan-un niya si Hisu-Kiristu, ti sinugu nimu. 4 Ipinaburayhaw niku kanmu kadayawan sa kang magtupad sa buruwatun kanmu iinintirga sa kangku. 5 Amang, taynguna kailangan pakan-an nimu aku kadayawan sa kanmu atubangan ga kaybi diman kang kadayawan asan sa kanmu, pagka udwaya nalalang ti kalibutan. 6 "Ipinakilala niku kawu sa manga tawu kanmu iinintirga sa kangku ginan sa kalibutan. Daan sida manga sakup nimu bag-u kanmu iinintirga sida sa kangku ag tinupad nida kanmu bagaw. 7 Kainda naintindihan nida kuntay ti tanan pag manga bagay kanmu ipinakaun sa kangku ginan diman waydi sa kanmu. 8 Ti bagaw kanmu iinintirga sa kangku, kang diman waydi ipinadakit sa kanda, kanda diman waydi tinanggap. Magpatutuu diman sida aku nagsitay ginan sa kanmu. Naniwala diman sida kuntay kawu ti nagsugu sa kangku. 9 "Bukun pag-idarangin niku ti manga taga kalibutan. Pag-&idarangin niku tunda pag manga tawu kanmu iinintirga sa kangku, dahil sida kanmu manga sakup. 10 Tanan pag manga tawu nu napasakup sa kangku, napasakup diman sa kanmu. Ti tanan manga napasakup sa kanmu napasakup diman sa kangku. Ipinaburayhaw nida kang kadayawan. 11 Taynguna aku asan tag yi sa kanmu bag-u udyi aku sitay sa babaw daga. Dapat sida sitay di sa babaw daga. Amang, kawu yi ngani ti dapat sambahun. Kailangan kanmu makapangyarihan pag ngaran ti umingat sa kanda, imaw diman pag ngaran kanmu ipinakaun sa kangku. Ingatan nimu sida hampay sida magkausa, parihu ga kantam urusa diman. 12 Pagka aku sa kanda di waya, iningatan niku sida sa kapangyarihan nimu ngaran, imaw diman pag ngaran kanmu ipinakaun sa kangku. Unman may nidamhak sa kanda purya lang tunda pag usa ka tawu ti daan ihinanda para tabug sa kadamhakan hampay matupad ti isinurat sa Banal Kasuratan. 13 "Taynguna aku asan yi tabug sa kanmu. Inda kang pagsabihun sitay waya sa babaw daga hampay lubus yi lang gid bumaya kanda tagipusuun parihu ga kang magbaya. 14 Ipinakaun niku sa kanda kanmu ngani bagaw bag-u kinagalitan sida manga taga kalibutan dahil sida unman minsan sa manga taga kalibutan parihu sa kangku balaw minsan sa taga kalibutan. 15 Unman aku magdarangin hampay bul-un nimu sida ginan sa babaw daga. Dapat kang pag-idarangin sida hampay kanmu iribri sida sa Puun Kadautan. 16 Parihu sa kangku balaw minsan sa manga taga kalibutan, katunda diman sida unman minsan sa manga taga kalibutan. 17 Sadilihun nimu sida sa panab-anan katutuuhanan. Kanmu bagaw imaw ti katutuuhanan. 18 Kang sinugu sida tag sa kalibutan, parihu diman ga kanmu nagsugu sa kangku atag sa kalibutan. 19 Pag-ilubus niku pag-ipakaun kang sadili sa kanmu hampay ilubus waydi ipakaun nida kanda sadili sa kanmu. 20 "Balaw lang waydi sida kang pag-idarangin. Pag-idarangin diman niku tunda pag manga tawu ti sumarig sa kangku nu makadnug sida barita niku manga sinugu. 21 Pag-idarangin niku sida hampay mirinsan sida tanan. Amang, pagminsan sida sa kanta parihu sa kanmu minsan sa kangku ag parihu sa kangku minsan sa kanmu. Pagmirinsanan sida hampay maniwala ti manga taga kalibutan kuntay kawu ti nagsugu sa kangku. 22 Ipinakaun niku sa kanda ti kadayawan kanmu ipinakaun sa kangku hampay sida mirinsan parihu diman sa kanta urusa. 23 Aku minsan sa kanda ag kawu minsan sa kangku hampay sida lubus mirinsan bag-u masalman manga taga kalibutan kawu ti nagsugu sa kangku ag kawu tigmahal sa manga napasakup sa kangku parihu ga kanmu magmahal sa kangku. 24 "Amang, iinintirga nimu sida sa kangku. Kang gustu nu naan aku, pagsiyun diman sida sa kangku hampay makitan nida kang kadayawan kanmu ipinakaun sa kangku. Dahil pagka udwaya linalang ti kalibutan daan di kawu nagmahal sa kangku. 25 Amang, kawu ti matadlung. Unman kawu nakilala manga taga kalibutan. Dapat aku magkilala di sa kanmu. Ag inda pag manga iinintirga nimu sa kangku nakakilala waydi kuntay kawu ti nagsugu sa kangku. 26 Ipinakilala yi niku kanmu ngaran sa kanda ag ipakilala diman gid niku sa kanda hampay sida magmalahalan sa usa kag sa usa parihu sa kanmu magmahal sa kangku bag-u aku minsan sa kanda."
1 Pagka nakadarangin si Hisus katida, linmakaw yi siya hanggan kay manga tuludluan, nagdipay sida sa laad Kidrun. Sa ati pag rugar may halamanan. Sinmulud si Hisus hanggan kay manga tuludluan sa tunda pag halamanan. 2 Una si Hudas, ti napakampi sa kay kalaban ni Hisus, alam di niya tunda pag rugar, dahil pirmi mag-ati si Hisus kaibahan niya kay manga tuludluan. 3 Nakan nag-ati sa halamanan si Hudas may taban usa ka gurupu sundalu taga Ruma, hanggan manga pulis may dara manga armas, manga patay hanggan lamparilya. Tunda pag manga pulis sinugu ginan sa manga pangulu manug-asiwa balay Diyus hanggan sa manga Parisiyu. 4 Daan alam di ni Hisus ti tanan niya malakawan, nakan sinulang niya sida ni Hudas bag-u kay pinaingana magkun, "Si unu kanyu paghanapun?" 5 Sinmagut sida magkun, "Si Hisus taga Nasarit." Bag-u sinabi ni Hisus magkun, "Aku yi ngani." Siyun diman matindugan kaibahan nida si Hudas, ti napakampi sa kalaban bag-u kay itinudlu sa kanda si Hisus. 6 Pagka sinabi ni Hisus magkun, "Aku yi ngani," inmurung sida ningilugmuk sa daga. 7 Pinmaingana maan si Hisus sa kanda magkun, "Si unu gid kanyu paghanapun?" 8 Sinmagut sida magkun, "Si Hisus taga Nasarit." Magkun si Hisus, "Sinabi yi niku sa kanyu aku yi ngani. Nakan nu aku ti kanyu paghanapun, pabay-ani lang niyu inda pag manga kaibahan niku." 9 Inda kay sinabi ni Hisus hampay matupad ti binagaw niya magkun, "Amang, unman may nidamhak ginan sa kang kamang una di usa sa manga linintirga nimu sa kangku." 10 Bag-u ginmabut kay baladaw si Simun Pidru, tinigbas niya ti panawuhun Pangulu Manug-asiwa balay Diyus, napungus kay sikun pag tuli. Kay ngaran tunda pag panawuhun si Malku. 11 Sinabi ni Hisus sa kan Pidru magkun, "Suulan yi duy nimu kanmu baladaw. Dayuun aw lugud inmun niku inda pag ungut may kakurian kay ipinakaun Ama sa kangku?" 12 Bag-u ti manga sundalu hanggan kanda kapitan nangawat sa manga pulis Hudiyu sa kanda magdakup sa kan Hisus. Kanda ginapus, 13 bag-u kanda dinara siya tag sa kan Anas dapu, kan Kaipas manugang. Si Kaipas ti Pangulu Manug-asiwa balay Diyus ati katpung pag timpu. 14 Si Kaipas ngani ti nagpaanyu sa manga Hudiyu magkun nu para sa kanda mayad waya nu mamatay ti usa ka tawu alang alang sa buu nasyun. 15 Pagka kanda dinara yi si Hisus, dinmasun sa kay uryan si Simun Pidru hanggan kay usa waya ka tuludluan. Kilala di Pangulu Manug-asiwa balay Diyus tunda pag tuludluan, nakan siya nagkuyug sa kan Hisus sinmulud sa diskansuhan balay Pangulu Manug-asiwa. 16 Dapat si Pidru matindugan di waya sa luwas puwirtahan. Nakan tunda pag tuludluan ti kilala Pangulu Manug-asiwa balay Diyus, nagluwas maan, kay hinampang niya ti babayi manugbantay sa puwirtahan bag-u ipinaslud niya si Pidru. 17 Bag-u tunda pag daraga bantay sa puwirtahan nagsabi sa kan Pidru magkun, "Unman aw kawu hanggan tuludluan diman tunda pag tawu?" Sinmagut si Pidru magkun, "Unman gid duy aku." 18 Ati katpung maramig nakan ti manga suruguun hanggan ti manga pulis nagpamakut apuy sa uring bag-u sida matindugan sa arani apuy magpanarang. Hanggan si Pidru siyun diman matindugan magpanarang. 19 Pinmaingana ti Pangulu Manug-asiwa balay Diyus sa kan Hisus magkun, "Si unu kanmu manga tuludluan ag hintay kanmu pag-itudlu?" 20 Sinmagut si Hisus magkun, "Sa pagkaburayhawan aku pag naghampang sa kayamuan tawu. Pirmi aku magtudlu sa manga balay tiripnan manga Hudiyu hanggan sa balay Diyus. Unman aku nagtultul sa lihiman. 21 Hayga kamu magpaingana waya sa kangku? Paingan-a niyu ti manga tawu nagpatingi sa kangku nu hintay kang itinudlu. Alam nida kang manga itinultul." 22 Pagka sinabi ni Hisus tunda, sinampal siya usa ka pulis matindugan siyun. Sinabi pulis magkun, "Katida aw lugud kanmu isagut sa Pangulu Manug-asiwa balay Diyus?" 23 Sinmagut si Hisus sa kanya magkun, "Nu daut kang binagaw, itultul nimu sa tanan manga tawu atay kang sinabi salan. Dapat nu tama kang binagaw, hayga aku kanmu sinampal?" 24 Bag-u ipinadara ni Anas si Hisus gapus di waya atag sa kan Kaipas dahil siya ti Pangulu Manug-asiwa balay Diyus. 25 Matindugan waya siyun si Pidru magpanarang bag-u sinabi manga iba sa kanya magkun, "Unman aw kawu hanggan usa diman ka tuludluan tunda pag tawu?" Dapat nananggi si Pidru magkun, "Unman duy." 26 May panawuhun diman Pangulu Manug-asiwa balay Diyus siyun. Tunda pag panawuhun balaw iba tawu sa lalaki kan Pidru tinigbas napungus kay tuli. Imaw ngani pag panawuhun ti nagsabi sa kan Pidru magkun, "Unman aw nakitan diman niku kawu kaibahan niya sa halamanan?" 27 Nagtanggi maan si Pidru. Bag-u kadaka yi nanarauk ti manuk. 28 Pagka surip yi dinara nida si Hisus ginan sa kan Kaipas balay tag sa balay gubirnadur. Ti manga pinunu Hudiyu unman nagsaka, dahil daut sa kanda tun-anun nu sumaka sa balay balaw Hudiyu, barang unman sida mahimu makakaun sa karan-an sa Pag-alaala sa Karibrihan. 29 Nakan nagluwas si Pilatu atag sa kanda bag-u nagpaingana siya magkun, "Hintay kanyu dimanda laban sa inda pag tawu?" 30 Sinmagut sida magkun, "Nu abi inda pag tawu unman nagbuwat daut, balaw mana daran-un nimi sitay tag sa kanmu." 31 Bag-u sinabi ni Pilatu sa kanda magkun, "Bul-a yi lang niyu siya. Bahala kamu magbista magsintinsiya sa kanya angay sa kanyu Kasuguan." Sinabi manga pinunu Hudiyu magkun, "Ti gubirnu taga Ruma unman magpahintulut sa kanmi magmatay una sa kantapu pag tawu." 32 Katida ti nangyari hampay matupad kan Hisus sinabi pagka ipinaalam niya nu sa kabitay pag kamatayan kay malakawan niya aban. 33 Napaslud maan si Pilatu sa kay balay ipinab-ul niya si Hisus bag-u kay pinaingana magkun, "Kawu aw ti hari manga Hudiyu?" 34 Sinmagut si Hisus magkun, "Tunda aw ginan sa kanmu basad naisipan aw ngatay may nagsabi waya manga iba sa kanmu tungkul sa kangku?" 35 Sinmagut si Pilatu magkun, "Aku lugud Hudiyu aw? Kanmu manga kaparihu Hudiyu hanggan ti manga pangulu manug-asiwa balay Diyus ti nagdara sa kanmu sitay tag sa kangku. Hintay kanmu binwat?" 36 Sinmagut si Hisus magkun, "Kang karampatan sa maghari balaw sitay ginan sa babaw daga. Nu abi sitay ginan sa babaw daga kang maghari, lumaban mana kang manga nasakupan baliwa sa kangku hampay unman aku ipabahala sa manga pinunu Hudiyu. Unman duy, kang karampatan sa maghari balaw sitay ginan." 37 Pinmaingana maan si Pilatu magkun, "Nu katunda hari aw gid kawu?" Sinmagut si Hisus magkun, "Hu, tama kanmu pagsabihun kuntay aku hari. Nakan nagsitay aku iinanak sa babaw daga inda lang kang turunu hampay itultul niku ti katutuuhanan sa manga tawu. Nu ti tawu napasakup sa katutuuhanan, pumatingi siya sa kang manga pagsabihun." 38 Bag-u sinabi ni Pilatu magkun, "Hintay nguna ti katutuuhanan?" Bag-u napalwas maan si Pilatu tabug sa manga tawu sa sugkadan. Sinabi ni Pilatu magkun, "Unman aku may mag-akitan dapat ikaparusa sa kanya. 39 Dapat angay sa ugali niyu timpu timpu nu Kapistahan sa Pag-alaala sa Karibrihan pagpalpasan niku ti usa ka pirisu para sa kanyu. Gustu aw niyu kang palpasan ti Hari manga Hudiyu?" 40 Bag-u irininggit nida magkun, "Danga tunda pag tawu. Si Barabas ti palpasi." Si Barabas usa ka tulisan.
1 Nakan ipinab-ul ni Pilatu si Hisus sa kay manga sundalu hampay kanda garutihun. 2 Bag-u sinulapid nida ti dugihan kanda ipinasangbaw sa kay ulu ni Hisus ga sangbaw hari bag-u kanda pinakulimpayan waya rutay marara. 3 Paulit-ulit nagpakarani sida sa kanya magkun, "Pagmasulung kawu, Hari manga Hudiyu." Bag-u kanda pagpakahampakun. 4 Nagluwas maan si Pilatu bag-u kay sinabi sa manga tawu magkun, "Malu duy, pag-ipalwang maan niku siya tag sa kanyu hampay maalaman niyu unman aku may nakitan dapat ikaparusa sa kanya." 5 Linmuwang ngani si Hisus may sangbaw dugi ag may kulimpay marara. Bag-u sinabi ni Pilatu sa manga tawu magkun, "Inda yi ti tawu." 6 Pagka ti manga pangulu manug-&asiwa balay Diyus hanggan ti manga pulis nakakit sa kan Hisus, nagringgit sida magkun, "Ipaku siya sa kurus, ipaku siya sa kurus." Sinabi ni Pilatu sa kanda magkun, "Bul-a niyu siya, kamu ti bahala magpaku sa kanya dahil aku unman may nakitan kasalanan sa kanya." 7 Sinmagut ti manga Hudiyu magkun, "May Kasuguan kami ag angay sa tunda pag Kasuguan kailangan siya matyun dahil inaku niya siya kunu ti Anak Diyus." 8 Pagka nadnugan ni Pilatu kanda sinabi, lalu waya nadala siya. 9 Nagsulud maan siya sa kay balay, pinmaingana siya sa kan Hisus magkun, "Taga naan kawu?" Dapat unman sinagut ni Hisus kay paingana. 10 Sinabi ni Pilatu, "Hayga duy kawu dayu magbagaw sa kangku? Unman aw nimu alam may karampatan aku magpalpas sa kanmu ag may karampatan diman waydi aku hampay ipapaku niku kawu sa kurus?" 11 Sinmagut si Hisus magkun, "Nakan lang kawu may karampatan magbuwat katida sa kangku, dahil Diyus ti may pahintulut tunda sa kanmu. Nakan mabuyat man ti kasalanan tunda pag tawu ti nag-intirga sa kangku sa kanmu kamang." 12 Pagka nadnugan ni Pilatu kan Hisus binagaw naghanap siya paraan hampay sa mipalpas ngani niya si Hisus. Dapat nagringgit maan ti manga Hudiyu magkun, "Nu kanmu palpasan tunda pag tawu, udyi masabi kawu kay ampud ni Pangulu Hari. Una hintay pag tawu nu mag-aku kuntay siya hari, kalaban siya ni Pangulu Hari." 13 Pagka nadnugan ni Pilatu tunda pag manga bagaw, ipinaluwang niya si Hisus ginan sa sulud balay. Bag-u tinmukaw si Pilatu sa kay tukawan biristahan. Tunda pag tukawan asan sa babaw batu pinantay. Nu sa bagaw Hibriyu kay ngaran tunda pag batu pinantay Gabata. 14 Ati katpung pag sirang kanda pangalistu sa Kapistahan, arani yi umudtu yi ti init. Sinabi ni Pilatu sa manga Hudiyu magkun, "Inda yi ngani kanyu hari." 15 Nanriringgitan sida magkun, "Bul-a, bul-a, papakuan nimu siya sa kurus." Pinmaingana si Pilatu sa kanda magkun, "Ipapaku aw niku sa kurus kanyu hari?" Sinmagut maan ti manga pangulu manug-&asiwa balay Diyus magkun, "Unman kami may hari nu ud si Pangulu Hari lang." 16 Bag-u ipinakaun ni Pilatu si Hisus sa kanda hampay siya ipaku sa kurus. 17 Dinara yi ngani manga sundalu si Hisus. Nagpas-an siya kay kurus sa kay maglakaw atag sa luwas banwa atabug sa rugar kay ngaran Ga But-ul Ulu Tawu. (Nu sa pamagaw Hibriyu tunda pag rugar kay ngaran Gulguta.) 18 Pagka rinmas-ug sida ati, kanda yi ipinaku siya sa kurus. Ati katpung may duwa waya ka tawu kanda ipinaku sa manga kurus, ti usa sa wala baliwa pag kurus, ti usa sa sikun baliwa, si Hisus sa karaw-an. 19 May surat diman si Pilatu bag-u kanda ipinauli sa kurus. Ti isinurat niya magkun, "Si Hisus taga Nasarit, ti Hari manga Hudiyu." 20 Mayamu pag manga Hudiyu ti nakabasa tunda pag kasuratan dahil kay nagkapakuan ni Hisus arani lang sa banwa. Isinurat paman sa pamagaw Hibriyu, sa pamagaw Latin hanggan sa pamagaw Giriyigu. 21 Nakan sinabi manga pangulu manug-asiwa balay Diyus sa kan Pilatu magkun, "Danga nimu isurat magkun, 'Hari manga Hudiyu.' Inda di ti kailangan nimu isurat magkun, 'Inda pag tawu nag-aku kuntay siya ti Hari manga Hudiyu.' " 22 Sinabi ni Pilatu sa kanda magkun, "Ti kang isinurat imaw yi ti isinurat niku, balaw yi umanun." 23 Pagka si Hisus ipinaku yi manga sundalu sa kurus, bin-ul nida kay manga rutay, inupat nida ka parti, sa kada usa ka sundalu inayaw-ayaw. Bin-ul diman nida hanggan kay pamaunib baLukas sadsad. Tunda pag baLukas minsan lang hinabul ginan sa tungud sadsad sa sirung, unman may kadugpak. 24 Nanharampangan ngani ti manga sundalu magkun, "Danga duy nita paggitasa. Kanta ilaban sa lunggungan nu sa kantapu tag inda." Tida ti nangyari hampay matupad ti isinurat sa Banal Kasuratan magkun, "Inayaw-ayaw nida kang manga rutay. Ilinaban nida sa lunggungan kang baLukas sadsad." Katida ngani ti binwat manga sundalu. 25 Siyun diman arani sa kay kurus ni Hisus may matindugan manga babayi. Kay ina ngani ni Hisus hanggan ti patar-ari babayi niya ina hanggan si Marya kan Kulupas asawa hanggan si Marya Magdalina. 26 Nakitan ni Hisus kay ina hanggan kay pagmahalun niya pag tuludluan matindugan siyun. 27 Bag-u sinabi ni Hisus sa kay ina magkun, "Tunda yi duy kanmu pinagkaanak." Bag-u sinabi niya sa kay tuludluan magkun, "Siya yi duy kanmu pinagkaina." Nakan ginan sa ati katpung tinaban ngani tuludluan kay ina ni Hisus hampay magpasunu sa kay balay. 28 Pagkatapus tunda, alam ni Hisus tinapus niya ti tanan niya buruwatun. Bag-u sinabi niya magkun, "Magkauwaw aku." Tunda kay sinabi hampay lubus matupad ti isinurat sa Banal Kasuratan. 29 May usa ka sukadan ati punu maaslum pag alak. Binasa nida maaslum pag alak ti usa ka ispungha bag-u kanda ipinauli sa pudpud ga anyamu bag-u itinur-ug nida tag sa kay bibig ni Hisus. 30 Pagka sinupsup ni Hisus ti maaslum pag alak, sinabi niya magkun, "Taynguna tapus yi." Bag-u nisug-uk yi kay ulu, naugtasan yi arup. 31 Ati katpung sirang biyirnis, kanda pangalistu sa sirang pamahari. Unman pagpahintulutan manga pinunu Hudiyu nu pabay-anan lang ti manga bangkay sa manga kurus sa sirang pamahari dahil tutuu mahalaga tunda pag sirang pamahari. Nakan nag-ati sida sa kan Pilatu kanda sinabi magkun, "Pahintuluti nimu hampay bariun ti lulud manga tawu ipinaku sa kurus bag-u kanmi yi bul-un ti manga bangkay." 32 Nakan nag-ati ngani ti manga sundalu, binari nida ti manga lulud kay usa ka tawu bag-u hanggan kay usa maan manga ipinadungan sa kan Hisus ipinaku sa kurus. 33 Pagka ti manga sundalu nagpakarani sa kan Hisus, nakitan nida siya namatay yi. Nakan balaw yi nabari nida kay manga lulud. 34 Dapat binunu waya bangkaw usa ka sundalu kay habig ni Hisus. Susun binmulus ti dugu hanggan danum. 35 Ti nakakit gid sa tunda pag nangyari imaw diman ti nagtultul hampay kamu hanggan sumarig. Dahil tutuu gid kay itinultul, alam niya balaw pudil kay pagsabihun. 36 Tunda ngani kanda binwat sa kan Hisus hampay matupad ti isinurat sa Banal Kasuratan magkun, "Una di usa ka but-ul niya dayu bariun." 37 Ag inda waya ti isinurat sa Banal Kasuratan magkun, "Makitan di nida mata ti kanda binunu." 38 Bag-u si Husi taga Arimatiya naghagad pahintulut sa kan Pilatu hampay mab-ul niya ti bangkay ni Hisus. Tuludluan diman waydi ni Hisus si Husi, dapat sa lihim lang, dahil magkadala siya sa manga pinunu Hudiyu. Pagka nagpasnu si Pilatu, nag-ati ngani si Husi, bag-u bin-ul niya ti bangkay. 39 Nag-ati diman si Nikudimu, imaw ngani pag tawu ti nanabang kaybi sa kan Hisus sa yabi. May dara si Nikudimu limampulu ka kilu pamanglu mira may libug aluwi. 40 Pagka bin-ul nida kay bangkay ni Hisus ginan sa kurus, kanda sinaput sa pisahan linu pag rutay may manga pamanglu, angay sa ugali manga Hudiyu sa kanda maglubung. 41 Sa kay arani nagkapakuan ni Hisus may manga bulaklak. Ati sa may mabulaklak may handa tinaguktukan batu, udwaya napaulian bangkay. 42 Balaw arayu tunda pag tinaguktukan batu, nakan ati ngani kanda ipinauli nida kay bangkay ni Hisus. Dahil ati katpung pag sirang kanda pangalistu sa sirang pamahari.
1 Namanlum sa sirang duminggu nag-atag si Marya Magdalina sa tinaguktukan batu. Pagka ati nakitan niya malilidan yi ti talakup batu ginan sa sabian. 2 Bag-u nalagiw siya atag sa kan Simun Pidru hanggan sa tunda pag tuludluan kay pagmahalun ni Hisus. Sinabi ni Marya sa kanda magkun, "Bin-ul duy nida ti Panginuun ginan sa tinaguktukan batu ag unman nimi alam nu naan kanda ipinauli." 3 Nakan naglakaw ngani si Pidru hanggan tunda pag usa ka tuludluan nag-atag sa tinaguktukan batu. 4 Nalagiw gid sida duwa dapat tunda pag usa ka tuludluan mabisug man sa kan Pidru kay magpalagiw nakan un-an man siya nakaras-ug sa tinaguktukan batu. 5 Nagpasirang siya tag sa sulud, nakitan niya siyun di ti pisahan linu pag rutay. Dapat unman siya nagsulud. 6 Bag-u nagras-ug waydi si Pidru nagdasun sa kanya. Nagsulud si Pidru, nakitan niya ti pisahan linu pag rutay siyun di, 7 hanggan kay taung sa ulu, dapat balaw minsan tunda sa pisahan linu pag rutay. Nituhay ti taung natipig sa saruy. 8 Bag-u nagsulud diman waydi tunda pag usa ka tuludluan ti un-an rinmas-ug sa tinaguktukan batu. Pagka siya sinmulud, nakitan niya ti manga rutay bag-u naniwala ngani siya nabuhi maan si Hisus. 9 Dahil ati katpung udwaya nasalman nida ti Banal Kasuratan kuntay kailangan siya mabuhi maan ginan sa kamatayan. 10 Bag-u nuli maan sida tag sa kanda ulian. 11 Dapat siyun di waya sa luwas tinaguktukan batu si Marya Magdalina matindugan maglumi. Sa kay maglumi waya nagpasirang siya tag sa sulud. 12 Bag-u may nakitan siya duwa ka anghil malagti kay manga rutay, matukawan kay usa sa uluhan, kay usa sa aluludan sa nagkabugtangan bangkay ni Hisus. 13 Pinmaingana sida sa kan Marya magkun, "Kawu duy hayga magpakalumi?" Sinmagut si Marya magkun, "Dahil bin-ul nida kang Panginuun ag unman niku alam nu naan kanda pag ipinauli." 14 Pagka nasabi niya katida, nangaliwliw siya bag-u nakitan niya si Hisus matindugan dapat unman nakilala niya kuntay si Hisus. 15 Pinmaingana si Hisus sa kan Marya magkun, "Kawu duy hayga magpakalumi? Hintay kanmu paghanapun?" Kay hantup ni Marya siya ti manug-alaga manga bulaklak. Nakan sinabi niya magkun, "Nu kawu duy ti nagbuul sa kang Panginuun, sabiha nimu sa kangku nu naan kanmu pag ipinauli siya hampay kang bul-un." 16 Bag-u sinabi ni Hisus sa kanya magkun, "Marya." Napasrangu si Marya sa kanya bag-u kay sinabi sa bagaw Hibriyu magkun, "Rabuni" (kay ibug sabihun Maisturu). 17 Sinabi ni Hisus sa kanya magkun, "Danga duy paghiyapti nimu aku, dahil aku udwaya nakauli sa Ama sa langit. Dapat pag-ati kawu sa kang manga patar-ari, pagsabi sa kanda magkun, umuli yi aku sa kang Ama kanyu diman Ama, sa kang Diyus kanyu diman Diyus." 18 Nag-ati si Marya sa kay manga tuludluan ni Hisus, sinabi niya sa kanda magkun, "Nakitan niku ti Panginuun." Bag-u itinultul niya kay manga sinabi ni Hisus sa kanya. 19 Pagka malambung yi ati pag sirang duminggu, nagtipun ti manga tuludluan. Tinalakpan inagad nida ti sabian dahil magkadala gid sida sa manga pinunu Hudiyu. Bag-u linmuwang si Hisus, tinmindug siya sa kanda karaw-an bag-u kay sinabi magkun, "Pagmay kahusayan duy kamu." 20 Pagka sinabi niya tunda, Ipinakakit niya sa kanda kay manga kamang hanggan kay habig. Pagka nakitan manga tuludluan ti Panginuun, nagbaya gid sida. 21 Sinabi maan ni Hisus sa kanda magkun, "Pagmay kahusayan duy kamu. Parihu sa kay nagsugu Ama sa kangku, katunda diman waydi pagsuguun niku kamu tabug sa manga tawu taga kalibutan." 22 Pagka sinabi niya tunda, kay inarupan niya sida bag-u magkun siya, " Tanggapa niyu ti Ispiritu Banal. 23 Nu patawadun niyu ti manga tawu sa kanda manga kasalanan, may kapatawadan sida ginan sa Diyus. Nu unman patawadun niyu sida, unman waydi sida may kapatawadan ginan sa Diyus." 24 Dapat pagka linmuwang si Hisus sa kanda, unman siyun si Tumas, ti binansagan Siing, kabilang diman sa sampulu may duwa ka tuludluan ni Hisus. 25 Nakan nagtultul sa kanya ti manga iba tuludluan magkun, "Nakitan duy nimi ti Panginuun." Dapat sinabi ni Tumas sa kanda magkun, "Udwaya aku maniwala nu udwaya makitan niku ti manga buslut paku sa kay kamang ag nu udwaya mitulsuk kang ituturu sa manga buslut paku ag nu udwaya mikuut niku kang kamang sa kay habig." 26 Pagka sa usa maan ka sirang duminggu, ati maan ti manga tuludluan sa sulud balay, hanggan si Tumas kaibahan nida siyun. Nagluwang si Hisus madi inagad ti manga talakup sabian, nagtindug siya sa kanda karaw-an sinabi niya magkun, "Pagmay kahusayan sa kanyu." 27 Bag-u sinabi niya sa kan Tumas magkun, "Ipad-ut nimu kanmu ituturu atay, bantayi nimu kang manga kamang. Sitay tag kanmu kamang, ikuut nimu sa kang habig. Tubay yi duy kanmu alinlangan, pagpaniwala yi gid kawu." 28 Sinabi ni Tumas sa kan Hisus magkun, "Kawu duy kang Panginuun hanggan kang Diyus." 29 Sinabi ni Hisus sa kanya magkun, "Nakan aw kawu maniwala yi dahil nakitan nimu aku? Masulung gid ti manga magpaniwala una unman mag-akitan nida aku." 30 Mayamu waya pag manga tanda ti binwat ni Hisus sa atubangan niya manga tuludluan, unman isinurat sa inda pag ribru. 31 Dapat inda kang isinurat hampay kamu magpaniwala si Hisus yi ngani ti pinili Diyus Manugribri pag Hari, ti Anak Diyus. Dahil nu katunda kanyu pagsarig, kamu may tutuu pag buhi sa kanyu magpakiusa sa kanya.
1 Pagka dugay kas-a maan napakakit si Hisus sa kay manga tuludluan ati sa saruy danaw Tibiryas. Inda ti nangyari. 2 Ati katpung mirinsan sida ni Simun Pidru, ni Tumas kay bansag Siing, si Natanail taga Kana sa Galiliya, hanggan kay manga anak ni Sibidiyu bag-u may duwa waya ka tuludluan ni Hisus siyun. 3 Sinabi ni Simun Pidru sa manga iba magkun, "Atag yi duy aku manarap." Sinabi nida sa kanya magkun, "Kami hanggan kumuyug diman sa kanmu manarap waydi." Linmakaw ngani sida bag-u sinmakay sa duunduun. Dapat ati katpung pag yabi sida ud may nab-ul una di. 4 Pagka magbutlak yi ti init, si Hisus matindugan sa saruy danaw, dapat unman nakilala niya manga tuludluan kuntay si Hisus maaw. 5 Pinmaingana si Hisus magkun, "Unman aw kamu may nablay isda?" Sinmagut sida magkun, "Unman ngani duy." 6 Sinabi ni Hisus sa kanda magkun, "Itaktak maan niyu ti sarap sa sikun baliwa pag habig duunduun bag-u may mab-ul kamu." Itinaktak ngani nida kanda sarap. Udyi makaraug sida sa butung dahil masyadu mayamu pag isda. 7 Siyun diman tunda pag tuludluan kay pagmahalun ni Hisus. Sinabi niya sa kan Pidru magkun, "Ti Panginuun yi ngani maaw." Pagka naalaman ni Simun Pidru tida yi maaw ti Panginuun, namaLukas siya, dahil daan kay linukas kay baLukas bag-u linmuksu siya sa danum rargu linmanguy. 8 Ti iba manga tuludluan nakaaput sa saruy sa kanda duunduun, pagbutungun nida ti sarap punu isda. Balaw waydi arayu sida sa saruy, manga duwa lang ka gatus ka luk-an siku kay karayu. 9 Pagka dinmugsun sida ginan sa duunduun, nakitan nida may baragahan apuy, isda ti masugbahan hanggan tinapay. 10 Bag-u sinabi ni Hisus sa kanda magkun, "Daran-a duy sitay tag kanyu nab-ul isda kis-ab." 11 Sinmakay maan si Pidru sa duunduun bag-u kay binutung niya ti sarap tag sa saruy, punu gid lalaun isda usa ka gatus may limampulu may tulu. Madi katunda yi kay kayamu, unman nagisi ti sarap. 12 Sinabi ni Hisus sa kanda magkun, "Abala duy, pamahaw yi kamu." Una di usa sa manga tuludluan unman may nakabaya nakapaingana magkun, "Si unu kawu?" Dahil alam nida ti Panginuun tunda. 13 Nagpakarani si Hisus sa apuy, bin-ul niya ti tinapay bag-u kay itinunghul sa kanda, katida diman kay binwat sa isda. 14 Inda kay ikatlu pag napakakit ni Hisus sa kay manga tuludluan ginan sa kay nabuhi maan. 15 Pagka sida nakabahaw yi, namaingana si Hisus sa kan Pidru magkun, "Simun, anak ni Huwan, pagmahalun aw nimu aku subra man sa inda pag manga bagay?" Sinmagut si Pidru magkun, "Hu ngani, Panginuun, alam yi nimu aku magmahal gid sa kanmu." Sinabi ni Hisus sa kanya magkun, "Alagai duy nimu kang manga anak karanidu." 16 Pinmaingana maan si Hisus sa kanya magkun, "Simun, anak ni Huwan, pagmahalun aw gid nimu aku?" Sinmagut si Pidru magkun, "Hu ngani Panginuun, alam yi nimu aku magmahal gid sa kanmu." Sinabi ni Hisus sa kanya magkun, "Alagai duy nimu kang manga karanidu." 17 Sa pakatlu pag pinmaingana si Hisus magkun, "Simun, anak ni Huwan, pagmahalun aw nimu aku?" Nagmaruku yi si Pidru dahil sa kay paingana ni Hisus katlu gin magkun, "Pagmahalun aw nimu aku?" Nakan sinabi ni Pidru magkun, "Panginuun, alam duy nimu ti tanan tanan pag manga bagay. Alam diman nimu kawu kang gid pagmahalun." Bag-u kay sinabi ni Hisus sa kanya magkun, "Alagai duy nimu kang manga karanidu. 18 Ungud gid kang pagsabihun sa kanmu, nu udwaya kawu gurangun magsulung kawu kanmu rutay maglakaw una naan tag kanmu gustu. Dapat nu gurangun yi aban kawu, ihunat nimu kanmu kamang bag-u kawu gapusun manga iba, darahun kawu sa balaw kanmu kagustuhan." 19 Inda kay sinabi ni Hisus hampay ipakilala niya nu kabitay pag kamatayan ti malakawan aban ni Pidru sa ikadayaw sa Diyus. Bag-u sinabi ni Hisus sa kanya magkun, "Pagpasakup kawu lubus sa kangku." 20 Namantay si Pidru sa kay magkaaday-an bag-u nakitan niya sa kay arani tunda pag usa ka tuludluan kay pagmahalun ni Hisus. Imaw yi pag tuludluan ti inmisdug kaybi atag sa kan Hisus arani katpung kanda magyapun bag-u nagpaingana sa kan Hisus magkun, "Panginuun, si unu ti pumakampi sa kanmu manga kalaban?" 21 Pagka nakitan ni Pidru tunda pag tuludluan, pinmaingana siya sa kan Hisus magkun, "Panginuun, kabitay siya?" 22 Sinmagut si Hisus magkun, "Nu abi kang gustu siya sitay diman pag mabuhi hanggan sa ud Rumas-ug aku atay tag, hintay nangus tunda sa kanmu? Kawu duy pagpasakup yi lubus sa kangku." 23 Nakan nilantag ngani inda pag barita sa manga patar-ari unman kunu mamatay tunda pag tuludluan. Dapat balaw kay sinabi ni Hisus kuntay unman mamatay tunda pag tuludluan. Kay sinabi lang ni Hisus magkun, "Nu abi kang gustu siya sitay diman pag mabuhi hanggan sa ud Rumas-ug aku atay tag, hintay nangus tunda sa kanmu?" 24 Imaw diman tunda pag tuludluan ti nanultul inda tanan tanan, siya diman waydi ti nanurat inda. Alam nimi tutuu gid ti manga itinultul niya. 25 Mayamu waya gid kay binwat ni Hisus. Nu abi tunda tanan tabuhun isurat tinigus-a sa manga ribru, kang hantup dayu mitabu sitay sa babaw daga tunda pag manga ribru tanan tanan.
1 Kaybi duy Tiyupilu, isinurat yi niku sa kang kabag-u pag ribru ti tanan manga binwat ag itinudlu ni Hisus ginan waya sa umpisa, 2 hanggan tugka sa udas pagka bin-ul siya atag sa langit. Kay udwaya nag-ati sa langit inudyukan siya Ispiritu Banal, binilinan niya ti manga Apustul kay napili niya. 3 Kabay pagka namatay yi si Hisus sa kurus, pirmi napakakit siya sa kanda ginan sa kay pagkabuhi uman. Pagka katida nakitan ti puruyba siya buhi dimaan. Napakakit ngani siya sa kanda sa sulud upatpulu ka sirang ag nagtultul siya tungkul sa kay paghari Diyus. 4 Kay di waya sa kanda binilinan niya sida magkun, "Dag-ighit kamu ginan sa Hirusalim. Alagda gid niyu ti ipinangaku ipakaun Ama sa kanyu imaw yi ti sinabi niku daan sa kanyu. 5 Si Huwan nagtulbaw sa danum dapat ay balaw yi dumugay kamu itulbaw yi sa Ispiritu Banal." 6 Nakan ngani pagka nagtiripun sida ni Hisus hanggan kay manga Apustul, nagpaingana sida sa kanya magkun, "Panginuun, kainda aw ipakaun maan nimu sa nasyun Israil ti karampatan hampay maghari?" 7 Nagsagut si Hisus magkun, "Lubus yi lang kang Ama ti bahala magpili kay taning pag kaudasan. Unman kailangan maalaman niyu nu kapira aban pag mangyari tunda. 8 Dapat makatanggap kamu kapangyarihan nu lubus kamu suldan Ispiritu Banal. Bag-u kamu yi gid ti manga manugpadakit magtudlu tungkul sa kangku sa Hirusalim una sa bilug Hudiya hanggan sa Samarya, hanggan waya sa katugkaan daga." 9 Pagka sinabi ni Hisus tunda, sa kanda gin atubangan dinara siya atag tungud, nakublian siya rurum udyi mag-akitan nida mata. 10 Sa kay mag-atag tungud, magpakaturun kay manga Apustul sa langit. Bigla may matindugan duwa ka lalaki sa kanda arani malagti kay manga rutay. 11 Magkun sida sa manga Apustul, "Kamu pag manga lalaki taga Galiliya, hayga kamu matindugan diman mabantayan atag sa langit? Inda pag Hisus ti dinara ginan sa kanyu atag sa langit, sumitay maan parihu sa kanyu nakitan sa kay nag-atag sa langit." 12 Bag-u nagbalik maan ti manga Apustul sa Hirusalim ginan sa pagsabihun pag bantud Ulibu, udyi magkausa ka tamaan ginatung kay karayu. 13 Pagka rinmas-ug yi sida sa banwa Hirusalim, nagsaka sida sa kanda dinayunan pag balay sa suludsulud sa ikadwa pag ugpu salug. Sida ngani ni Pidru ni Huwan ni Santiyagu ni Andiris hanggan sida ni Pilipi ni Tumas, sida ni Bartulumi, ni Matiyu hanggan si Santiyagu kan Alpiyu anak, si Simun imaw ti pagsabihun masipag sa nasyun Israil, hanggan si Hudas kan Santiyagu anak. 14 Pirmi sida tanan magtiripun sa darangin. Una manga babayi napaminsan sa kanda hanggan si Marya kay ina ni Hisus hanggan kay manga patar-ari lalaki. 15 Pagka ati katpung nagtiripun maan ti manga patar-ari, manga usa ka gatus may duwapulu. Tinmindug si Pidru sa kanda karaw-an bag-u sinabi niya sa kanda magkun, 16 "Manga patar-ari, kailangan tupadun ti nisurat sa Banal Kasuratan kay iinudyuk Ispiritu Banal sa kan Dabid tungkul sa kan Hudas, imaw ti nag-iba sa manga manugdakup sa kan Hisus. 17 Kanmi diman waydi kaibahan siya dahil pinili siya ni Hisus hampay minsan diman siya sa kanmi sa buruwatun Panginuun." 18 Kabay may binili si Hudas daga, ibinayad niya tunda ngani pag kuwarta kay tinanggap suhul sa kay binwat kadautan. Nidusmu siya ag nanluput kay tiyan nagluwang kay bituka hanggan kay puna. 19 Tunda pag manga nangyari naalaman tanan tawu mag-uli sa Hirusalim. Nakan tunda pag daga kanda iningarnan sa kanda sadili pamagaw Akildama, kay gustu sabihun Madugu pag daga. 20 Magkun si Pidru, "Isinurat ngani sa Ribru manga Kanta magkun, 'Danga yi may mag-uli sa kay balay, Danga yi mag-uli ati una hintay pag manga tawu. Isinurat waya, 'Iba maan ti tumanggap sa kay katungkulan.' 21 Nakan ngani kailangan kita magpili kaawat nimi sa magpadakit barita tungkul sa kay pagkabuhi uman ni Hisus. Kailangan tunda pag tawu daan di kaibahan nimi sa kay sitay di waya sa kanta ti Panginuun Hisus, ginan sa kay napatulbaw sa kan Huwan hanggan sa kay udwaya nag-atag sa langit." 23 Nakan ti manga patar-ari nagpili duwa ka lalaki, si Matyas hanggan si Husi kay usa ka ngaran Barsabas, binansagan diman Hustu. 24 Nandarangin sida magkun, "Panginuun, kawu ngani ti makaalam tagipusuun tanan manga tawu. Ipakilala nimu sa kanmi nu naan sa duwa inda ti kanmu pinili, 25 hampay siya yi ti kailis sa katungkulan sa pagka-Apustul kay tinayakan ni Hudas, pagka siya atag sa rugar pararusahan." 26 Bag-u naglunggungan sida atag sa kanda ni Barsabas, nakatama si Matyas. Adinugang siya sa sampulu may usa ka Apustul.
1 Pagka udas yi Pintikustis, ti tanan manga patar-ari nagkaminsan sa usa ka balay. 2 Bigla may naghagunung ginan sa langit parihu ga usa ka untug, nas-ub ti balay kanda tinukawan. 3 Bag-u may nakitan sida manga ga labdab apuy magbululagan nagtugpu sa kada usa sa kanda. 4 Sida tanan lubus sinuldan Ispiritu Banal bag-u nag-umpisa sida nagbagaw sa tuhay tuhay pag pamagaw sigun sa kay pakaun Ispiritu pag kadunungan sa kanda. 5 Ati sa Hirusalim may mag-uli manga makidiyus pag Hudiyu ginan sa kada nasyun sa sirung langit. 6 Pagka nadnugan nida ti ingay, nagtiripun ti kayamuan tawu. Naglingut gid sida dahil ti kada usa sa kanda nakadnug kanda sadili pamagaw pagbagawun manga patar-ari. 7 Nadulaw gid ti manga tawu, naglingut sida magkun, "Unman aw lunsay taga Galiliya tunda pag manga tawu tigbagaw? 8 Hayga mag-adnugan yi nita ti kinadak-anan nita pag pamagaw kanda pagbagawun? 9 Kita manga taga Partiya, manga taga Midya, manga taga Ilam, manga mag-uli sa Misuputamya, sa Hudiya, sa Kapadusya, sa Puntu ag sa Asya, 10 sa Pirigya ag sa Pampilya, sa Ihiptu ag sa manga daga sa Libya arani banwa Sirini. Ti iba sa kanta manga taga Ruma nangagum sitay sa Hirusalim. Ti iba sa kanta manga Hudiyu, ti iba manga balaw Hudiyu manga niabay sa surundanun Hudiyu, 11 manga taga Kiriti, manga taga Arabya. Dapat nadnugan nita sida magbagaw sa kanta sadili manga pamagaw tungkul sa manga makadululaw pag buwat Diyus." 12 Nakan sida tanan nadulaw ag naaburidu sa nangyari. Magparaingan-an sida magkun, "Hintay nguna kay kahulugan inda?" 13 Dapat ti manga iba naghangalhangal magkun, "Magkalangu banta sida." 14 Tinmindug si Pidru hanggan ti sampulu may usa ka kaibahan niya manga Apustul. Ainalsa ni Pidru kay busis sa kay magpaliwanag sa kayamuan tawu magkun, "Kamu pag manga kaparihu niku Hudiyu hanggan kamu manga mag-uli sa Hirusalim, pag-isipa niyu inda, kamu pagpatingi mayad, dahil aku may itultul sa kanyu. 15 Kanyu hantup kami manga langu, dapat ay balaw langu inda pag manga tawu dahil magpamalayan di waya ti init. 16 Inda imaw yi ngani ti sinabi ni Purupita Huil magkun, 17 'Magkun ti Diyus, inda aban kang buwatun sa katapusan panahun. Ibuhus niku kang Ispiritu sa tanan tawu. Bag-u pumurupita kanyu manga anak una lalaki una babayi. Bukasan niku ti naisipan niyu manga kan-akan bag-u aku may ipakakit sa kanda. Ag kanyu manga gurangun lalaki tumagin-up. 18 Ati katpung pag udas ibuhus niku kang Ispiritu sa kang manga panawuhun una lalaki una babayi bag-u pumurupita yi sida. 19 Pumakakit aban aku manga makadululaw sa langit ati sa tungud ag manga tanda sa sirung langit sa babaw daga, dugu ngani, apuy ag magtalimbuuk pag anus. 20 Dumulum ti init ag bumaliw ga dugu kay karara ti bulan bag-u Rumas-ug kay kaudasan Panginuun, ti masilaw ag pagdayawun pag kaudasan. 21 Nu mangyari aban tida maribri ti kada tawu nu magdangup sa kay ngaran Panginuun.' " 22 Magkun maan si Pidru, "Kamu pag manga kaparihu niku lalaki Israilita, pamatingi kamu. Udyi kamu pumahimudil sa kan Hisus taga Nasarit, dahil may nakitan yi waydi kamu puruyba. Binwat yi ni Hisus sa kanyu atubangan ti manga makamaskihan hanggan makadululaw pag tanda dahil sa kay kapangyarihan Diyus. Tunda balaw yi ngap nilihim sa kanyu. 23 Dapat si Hisus ngani pag tawu ipinahintulut sa kanyu angay sa kay nalub-anan gayak Diyus. Bag-u kanyu apinapaku sa kurus ipinamatay sa manga tawu balaw Hudiyu. 24 Dapat ay pinalapus di siya Diyus sa kakurian kamatayan ag binuhi di maan siya uman. 25 Sinabi yi ni Dabid tungkul sa kan Hisus magkun, 'Daan nakitan niku ti Panginuun sa kang atubangan. Siya sa kang arani handa gid umawat, nakan balaw aku maanggihut. 26 Nakan magbaya gid aku sa kang naisipan, Pirmi gid magbagaw sa masulung kang bibig, hanggan kang bilug may maariwaya yi dahil sa kang pag-asa. 27 Dahil dayu aku pabay-anan nimu sa ulian manga namatay. Unman pahintulutan nimu ti bangkay nimu matinupadun pag suruguun makalakaw karunutan. 28 Itinudlu nimu sa kangku ti dalan atag sa buhi unman may katapusan. Kawu ti kang kaibahan nakan aku mapnu yi gid kabayaan.' " 29 Magkun si Pidru, "Kamu duy pag manga kaparihu niku Hudiyu, tungkul sa kanta ginurang sa kan Dabid kang yi gid pagsabihun ti katutuuhanan, siya namatay ag ilinbung. Hanggan taynguna alam di nita kay naglubngan. 30 Siya purupita nakan naalaman niya may marig-un pag pangaku ti Diyus sa kanya magkun, ginan sa kay linahi usa aban ti humari parihu sa kanya. 31 Madi udwaya nangyari, daan nakitan ag ipinurupita ni Dabid tungkul sa pagkabuhi uman pinili Diyus Manugribri pag Hari. Sinabi ni Dabid magkun, 'Unman siya pinabay-anan Diyus sa ulian manga namatay, ag unman ipinahintulut kay bangkay makalakaw karunutan.' 32 "Imaw yi ngani pag Hisus ti binuhi uman Diyus. Nakitan gid nimi tanan kay yi nabuhi uman. 33 Dinara siya tabug sa langit ipinatukaw siya Diyus sa kay sikun baliwa minsan sa kay karampatan maghari. Tinanggap niya angay sa itinaratu Diyus ti Ispiritu Banal ginan sa Ama. Bag-u ilinubus niya ipinakaun ti Ispiritu Banal sa kanmi ga kanyu nakitan ag nadnugan taynguna. 34 Dahil balaw parihu sa kan Hisus pag nag-atag sa langit si Dabid. Dapat si Dabid waydi ti may sabi, 'Sinabi Diyus Ama tabug sa kang Panginuun, Pagtukaw kawu sa kang sikun baliwa paminsan sa kang karampatan maghari, 35 Hanggan sa ud mabuwat niku tarat-an nimu manga lulud kanmu manga kalaban.' 36 "Nakan ngani kamu ti buu nasyun Israil, pagpasnui yi niyu kuntay tunda pag Hisus kanyu ipinaku sa kurus imaw ngap ti binwat Diyus Panginuun. Siya yi ti pinili Diyus Manugribri pag Hari." 37 Pagka nadnugan manga tawu kan Pidru paliwanag, naaburidu kanda naisipan. Namaingana sida sa kan Pidru hanggan sa iba manga Apustul magkun, "Manga patar-ari, kabitay wadi duy kami inda?" 38 Nagsagut si Pidru magkun, "Ampuan niyu kanyu kasalanan, paghagad kapatawadan sa Diyus, pagpatulbaw kamu pagpasakup sa ngaran ni Hisu-Kiristu hampay patawadun yi kanyu manga kasalanan. Bag-u ipakaun Diyus sa kanyu ti Ispiritu Banal. 39 Dahil sa kanyu diman pag ipinangaku Diyus tunda hanggan sa kanyu manga anak una hanggan sa manga iba nasyun, sa kada tawu pinili nita Panginuun Diyus." 40 Mayamu waya kay ipinaliwanag ni Pidru sa manga tawu magkun, "Pagpasaman kamu sa manga tawu magbuwat daut hampay kamu makaribri." 41 Nakan ti manga tawu nagpaniwala sa kay paliwanag ni Pidru napatulbaw yi. Ati katpung pag sirang tulu ka libu tawu ti dinmagdag sa kanda. 42 Unman pagkalimtan nida ti itinudlu manga Apustul, ti pagkarausa magtar-arian, ti magmirinsanan magkaun hanggan ti magmirinsanan sa darangin. 43 Pirmi nagbuwat ti manga Apustul manga makadululaw pag tanda dahil sa kapangyarihan kanda tinanggap ginan sa Diyus. Nakan lubus naglingut ag magkadala ti tanan tawu. 44 Ti tanan manga nagsarig sa kan Kiristu nagkarausa ag nanhururayan kanda kasiyunan. 45 Nu kas-a ginan ipinabili nida kanda daga hanggan kanda kasiyunan bag-u nanhururayan ngani sida kay kuwarta angay sa pangailangan sa kada usa. 46 Kanda ugali sirang sirang magtiripun sa balay Diyus ag magmirinsanan magkaun sa balay manga patar-ari, masulung kanda tagipusuun sa kanda magkaun. 47 Magdayaw sida sa Diyus. Ag ti tanan tawu nagbaya gid sa manga patar-ari. Sirang sirang may idinagdag maan sa kanda ti Panginuun manga tawu kay irinibri.
1 Pagka dugay sa udas nida pandarangin, manga palis ngani ti init, sida ni Pidru ni Huwan nag-ati maan sa balay Diyus. 2 Pagka sida rinmas-ug sa balay Diyus, sa pagkumnun Marinu pag Sabian, may nakitan sida usa ka lalaki lunu. Ginan sa kay inanak daan lunu tunda pag tawu. Sirang sirang pagbab-un siya bag-u pag-ibugtang sa puun sabian balay Diyus hampay manhagad kay pangailangan sa manga magsulud ati. 3 Pagka nakitan niya sida ni Pidru ni Huwan magsaka sa balay Diyus, nanhagad siya sa kanda kay pangailangan. 4 Tinurun siya nida ni Pidru ni Huwan bag-u magkun si Pidru, "Bantayi nimu kami." 5 Nagbantay ngani siya sa kanda, kay isip barang siya pakan-an. 6 Bag-u magkun si Pidru, "Unman aku may kuwarta una di. Dapat may tuhay pag kaayadan aku, kang ngap ipakaun sa kanmu. Sa ngaran ni Hisu-Kiristu taga Nasarit aku magbilin sa kanmu taynguna, kawu duy paglakaw yi." 7 Kay hiniyaptan ti lalaki sa kay sikun pag kamang bag-u kay itinindug ag susun nagbisug kay manga lulud hanggan burubuku. 8 Tinmindug siya rargu nag-utbaw bag-u naglakawlakaw. Mag-utbaw-utbaw gid siya kay magsaka tag sa balay Diyus kaibahan nida ni Pidru, masulung magdayaw sa Diyus. 9 Nakitan diman tanan tawu siya maglakaw magdayaw sa Diyus. 10 Bag-u nakilala nida siya yi ngani maaw ti matukawan sa pagkumnun Marinu pag Sabian balay Diyus manhagad kay pangailangan. Nakan sida masyadu yi lang gid nadulaw. 11 Paghiyaptan waya lalaki sida ni Pidru ni Huwan, ti tanan manga tawu ungud naglingut masyadu, nakan minsan namalalagiwan sida nagpakarani sa kanda ni Pidru ati sa pagkumnun kan Sulumun pag parat-ungan. 12 Pagka nakitan ni Pidru ti kayamuan tawu, sinabi niya sa kanda magkun, "Kamu pag manga Israilita, hayga nadulaw kamu masyadu sa inda pag nangyari? Hayga kamu magpakaturun sa kanmi? Kanyu aw lugud hantup pinalakaw nimi siya dahil sa kanmi sadili kamaskihan, aw ngatay dahil kami manga makidiyus? 13 Bukun duy katida. Ti Diyus ni Abraham, ni Isaak, ni Hakub, ti Diyus diman nita manga ginurang imaw ti nagpakakit kay daka gid pag kamaskihan ni Hisus kay Suruguun Diyus. Dapat kanyu ngap ipinabahala siya sa manga pinunu Hudiyu bag-u kanyu dinayu sa atubangan ni Pilatu, madi kay mana gustu palpasan di si Hisus. 14 Si Hisus lubus maparasakpun sa Diyus ag matadlung. Dapat kanyu ngap dinayu. Bag-u hinagad ngap niyu ti manlilibun tawu hampay siya ti ipalpas. 15 Kanyu minatay si Hisus ti gimpuunan buhi. Bag-u binuhi maan siya Diyus ginan sa kamatayan. Nakitan gid nimi tunda. 16 Kay kapangyarihan ni Hisus ti nagpakaun kabisugan sa inda pag tawu. Nangyari tunda dahil sa pagsarig sa kay ngaran ni Hisus. Ti pagsarig sa kan Hisus ti lubus nagpaayad sa kanya ga kanyu diman waydi nakitan taynguna. 17 "Alam diman waydi niku duy, manga kaparihu niku Hudiyu, unman niyu nasalman kanyu binwat ati katpung, parihu diman ga kanyu manga pinunu unman diman sida nakasalum kanda binwat. 18 Dapat sa kanyu binwat tunda, natupad yi ti dugay yi pag ipinaalam Diyus sa panab-anan manga purupita magkun, kailangan umagwanta ti pinili Diyus Manugribri pag Hari hanggan sa kamatayan. 19 "Nakan duy patlikudi yi niyu kanyu manga kasalanan bag-u pag-atubang yi sa Diyus hampay duraun yi niya kanyu kasalanan, 20 ag pakan-an kamu rugar hampay maariwaya kanyu naisipan. Suguun niya sa kanyu tabug si Hisus, imaw ti pinili Diyus Manugribri pag Hari. 21 Kailangan mag-alagad dap si Hisus sa langit hanggan sa udwaya bag-uhun Diyus ti tanan pag manga bagay. Imaw ngani kay binagaw Diyus kaybi di waya ipinadakit yi manga purupita. Tunda pag manga purupita lubus sakup sa Diyus. 22 Sinabi yi kabay ni Muysis magkun, 'Aban suguun Panginuun Diyus sa kanyu ti usa ka purupita kanyu diman kalahi, parihu diman sa kay nagsugu sa kangku. Kailangan paniwalaan gid niyu siya una hintay kay sabihun sa kanyu. 23 Una si unu pag tawu nu unman magpaniwala sa tunda pag purupita, udyi siya sakup sa nasyun Diyus, pihu matyun.' 24 Tunda pag manga purupita ti may iinadal ginan sa Diyus. Tanan tanan ginan waya sa kan Samwil hanggan manga nagdasun sa kanya, nagpaalam yi sida daan tungkul sa manga mangyari taynguna. 25 Sa kanyu ngani tabug ti manga pangaku Diyus ipinadakit manga purupita ag kamu nasakup sa kay taratu tinalaghut Diyus sa kanyu manga kaapuapuhan pagka sinabi niya sa kan Abraham magkun, 'Ginan sa kanmu minamat papaladan niku ti tanan manga nasyun sa babaw daga.' 26 Nakan pinili Diyus kay Suruguun si Hisus bag-u un-an sinugu siya tabug ngap sa kanyu hampay papaladan kamu ag hampay awatan kamu pumatlikud sa kanyu daut ugali."
1 Magbagaw waya sida ni Pidru ni Huwan sa manga tawu, nagpakarani ngap sa kanda ti manga manug-asiwa balay Diyus, ti kapitan manga pulis hanggan ti manga Sadusiyu. 2 Magkagalit sida sa kanda ni Pidru ni Huwan dahil pag-itudlu nida sa manga tawu si Hisus nabuhi uman, imaw ti puruyba kuntay buhiun diman uman ti manga namatay. 3 Nakan dinakup nida sida ni Pidru ni Huwan bag-u kanda ipinaslud sa pirisuhan tugka surip, dahil magkayabi yi ati katpung. 4 Dapat sa manga tawu nakadnug sa kanda ni Pidru paliwanag mayamu ngap ti nagsarig sa Panginuun. Kay kabuuhan manga nagsarig sa Panginuun manga lima yi ka libu tawu kay kayamu. 5 Pagka surip nagtiripun sa Hirusalim ti manga Pinunu, ti manga paggurangunun sa nasyun hanggan ti manga Manugtudlu Kasuguan. 6 Siyun diman si Anas, ti Pangulu Manug-asiwa balay Diyus, hanggan sida ni Kaipas, ni Huwan, ni Alihanduru hanggan ti tanan manga katawuhan Pangulu Manug-asiwa. 7 Pagka bin-ul ginan sa pirisuhan sida ni Pidru ni Huwan, ipinaatubang sida sa Katipunan manga Pinunu bag-u pinaingana nida magkun, "Sa hintay pag kamaskihan pag pinaayad niyu tunda pag tawu? Kantapu pag ngaran kanyu sinampit?" 8 Nakan si Pidru, lubus sinuldan Ispiritu Banal, nagsagut sa kanda magkun, "Kamu duy pag manga Pinunu ag manga paggurangunun sa nasyun, 9 taynguna kanyu pagsuyasidun kami tungkul sa kamayadan binwat sa tawu lunu, nu kabitay siya pag pinaayad. 10 Nakan kailangan alamun yi niyu hanggan tanan Israilita, inda pag tawu taynguna matindugan sa kanyu atubangan dahil ti kamaskihan ngaran ni Hisu-Kiristu taga Nasarit ti nagpaayad sa kanya. Imaw diman pag Hisus kanyu ipinaku sa kurus dapat siya binuhi uman Diyus. 11 Siya yi ngani ti pagkumnun sa Banal Kasuratan, 'Ti batu kanyu dinayu sa kanyu magbuwat balay, dapat imaw yi ngap ti mahalaga sa tanan pag kalap.' 12 "Udyi may iba hanapan karibrihan nu unman si Hisus lang. Dahil unman may iba ngaran sa sirung langit ipinakaun sa manga tawu hampay magribri sa kanta." 13 Pagka nadnugan manga Pinunu kanda ni Pidru ni Huwan pagbagawun matutum kanda naisipan, naglingut gid sida dahil alam diman nida unman masyadu kay inadalan nida ni Pidru nu unman kasarangan lang kay kadunungan pag manga tawu. Kilala diman manga Pinunu sida ni Pidru ni Huwan kay iribahun ni Hisus kaybi sa kay buhi di waya. 14 Dapat unman yi sida may sabihun laban sa kanda ni Pidru ni Huwan dahil nakitan yi waydi nida ti tawu pinaayad sa kay pagkalunu siyun matindugan sa kanda arani. 15 Sinabi manga Pinunu sa kanda ni Pidru magkun, "Palwas dapu kamu." Bag-u nagharampangan ti manga Pinunu magkun, "Hintay nguna kanta buwatun sa inda pag manga tawu? 16 Dahil magkaalaman yi waydi tanan manga tawu banwa Hirusalim inda pag makadululaw gid pag tanda binwat nida ni Pidru ni Huwan. Ag dayi kita makapahimudil. 17 Dapat ay kailangan sabihan nita sida danga yi gid sida magbagaw una sa kantapu tungkul sa kapangyarihan ni Hisus hampay inda pag barita unman milantag sa tanan tawu." 18 Nakan pagka kanda pinaslud maan sida ni Pidru ni Huwan, kanda sinabihan magkun, "Inda ginan danga yi gid kamu magbagaw una magtudlu tungkul sa kan Hisus." 19 Dapat ay nagsagut sida ni Pidru ni Huwan magkun, "Bahala kamu magkilala nu naan ti tama sa atubangan Diyus, nu kamu aw ngatay Diyus ngap ti dapat paniwalaan. 20 Nu kami bay duy, dayu gid kami umapas kanmi magtultul tungkul sa kanmi nakitan ag kanmi nadnugan." 21 Lalu waya ngap sida hinigpitan manga Pinunu bag-u sida pinalpasan. Unman may nakitan sida kadautan sa kanda ni Pidru hampay sa maparusahan sida, dahil ti tanan manga tawu nagdayaw gid sa Diyus tungkul sa nangyari. 22 Subra yi upatpulu ka timpu kay idad tunda pag tawu, ti binwatan tunda pag makadululaw pag tanda ag siya pinaayad sa pagkalunu. 23 Pagka pinalpasan yi ngani sida ni Pidru ni Huwan, nag-ati sida sa kanda manga kaibahan bag-u itinultul nida sa kanda ti tanan sinabi manga pangulu manug-asiwa balay Diyus hanggan manga paggurangunun sa nasyun. 24 Pagka nadnugan manga patar-ari tunda pag manga barita, nagkarausa kanda manga tagipusuun, nagdarangin sida naghampang sa Diyus magkun, "Kawu duy Panginuun, ti naglalang langit, daga, dagat hanggan una wadi hintay pag bagay. 25 Pagka inudyukan Ispiritu Banal kanmu suruguun si Dabid, kanmi waydi ginurang, ipinadakit niya kanmu bagaw magkun, 'Hayga tinalung sa isug ti manga balaw Hudiyu? Hayga ngani naggayak tunda pag manga nasyun tawu kanda turunu unman may pulus? 26 Ti manga hari sa babaw daga nag-alistu yi hampay gumira. Nagkaminsan ti manga pinunu laban sa Panginuun Diyus ag laban sa kay pinili Manugribri pag Hari.' 27 "Dahil tutuu ngani nagkabuu sida ni Hirudis ni Punsiyu Pilatu hanggan ti manga balaw Hudiyu ag ti nasyun Israil sitay sa banwa Hirusalim hampay labanan nida kanmu mahal pag Suruguun si Hisus, imaw ti kanmu pinili Manugribri pag Hari. 28 Nagkabuu sida hampay buwatun nida ti daan ihinanda nimu pag turunu, angay sa kanmu kapangyarihan ag angay sa kanmu nalub-anan gayak. 29 Taynguna Panginuun, alalahana nimu nu kabitay sida nangungud ngap sa higpit sa kanmi. Kailangan pabisugun nimu kami kanmu manga suruguun hampay unman gid kami magkadala magtudlu kanmu Bagaw sa manga tawu. 30 Ipakakit nimu kanmu kapangyarihan sa kanmu magpaayad sa may manga sakit. Pagsa kanmi ti kapangyarihan ngaran ni Hisus kanmu mayad pag Suruguun hampay makabuwat kami manga makadululaw pag tanda." 31 Pagka nakadarangin yi sida nauyug ti balay kanda tinipunan, sida tanan lubus sinuldan Ispiritu Banal ag matutum kanda naisipan nanudlu sida Bagaw Diyus. 32 Nagkabilug ti manga nagsarig sa Panginuun nagkausa sida sa tagipusuun hanggan sa naisipan. Unman sida nag-araminan kanda kasiyunan, kanda ngap inusa tanan. 33 May daka pag kapangyarihan kay tudlu manga Apustul tungkul sa kay pagkabuhi uman Panginuun Hisus. Ilinubus Diyus kay papalad sa kanda tanan. 34 Kang-ud di sida tanan tanan sa kanda manga kailangan dahil kanda pag-ipabili kanda daga hanggan balay. 35 Bag-u kay kabilyanan pag-ipaintirga nida sa manga Apustul. Bag-u pag-ihuray maan manga Apustul sa kada usa angay sa kay pangailangan. 36 Katunda diman waydi hanggan kay binwat ni Husi, usa ka Libita taga Sipru. Binansagan siya manga Apustul Birnabi, kay ibug sabihun Manugparig-un. 37 May tanman ngani si Husi kay ipinabili bag-u dinara niya ti kabilyanan kay iinintirga sa manga Apustul.
1 Ati katpung may usa ka mag-asawa, kay ngaran lalaki si Ananiyas, kay asawa babayi si Sapira. May ipinabili diman siya kasiyunan. Bag-u nag-ati si Ananiyas tag sa manga Apustul, iinintirga niya sa kanda ti kabilyanan kay lang iba. 2 Alam diman waydi niya asawa kay iba kabilyanan tinawidan di ni Ananiyas. 3 Pagka ati si Ananiyas, sinabi ni Pidru sa kanya magkun, "Ananiyas, hayga duy sinakup ni Satanas kanmu tagipusuun hampay kawu mandaya yi sa Ispiritu Banal sa kanmu nagtawid kay iba kabilyanan niyu daga? 4 Kay udwaya nipabili, unman aw kanmu tunda pag daga? Pagka ipinabili yi nimu, unman aw kawu diman ti bahala sa kay kabilyanan? Hayga lugud, Ananiyas, inisip nimu ti katida pag buwat? Balaw tawu nu unman Diyus ngap ti kanmu dinaya." 5 Pagka nakadnug si Ananiyas sa kan Pidru sinabi, naplid lang siya rargu naugtas kay arup. Masyadu yi lang gid nadala ti tanan tawu nakadnug sa nangyari ati. 6 Nam-ul ti manga lalaki amak, sinaput nida ti bangkay bag-u kanda yi ilinbung. 7 Pagka lawuy upat ka tamaan ginatung kay kadugay, rinmas-ug waydi kan Ananiyas asawa. Dapat unman niya alam may nangyari. 8 Nagpaingana si Pidru sa kan Sapira magkun, "Sabiha duy nimu sa kangku, imaw lang aw inda kay halaga kanyu tinanggap sa kanyu nagpabili kanyu daga?" Nagsagut si Sapira magkun, "Hu duy, imaw lang waydi tunda." 9 Bag-u sinabi ni Pidru sa kanya magkun, "Hayga pinagkamhanan niyu subukan ti Ispiritu Panginuun nu ngatay siya humiling sa kanyu kasalanan? Pagpatingi kawu, sa ugsadan, yi ti manga tawu naglubung sa kanmu asawa ag kawu maan ti daran-un nida tag sa luwas." 10 Kadaka naplid si Sapira sa kan Pidru atubangan rargu naugtasan arup. Sinmaka maan ti manga lalaki. Pagka nakitan nida tigbak si Sapira, dinara nida siya tag sa luwas, ilinbung sa kay arani niya asawa. 11 Masyadu yi gid nadala ti tanan manga patar-ari hanggan ti tanan tawu nakadnug sa nangyari sa kanda duwa mag-asawa. 12 Pinakan-an Panginuun kapangyarihan ti manga Apustul hampay magbuwat sida mayamu pag makadululaw pag tanda sa atubangan manga tawu. Pirmi magtiripun ati sa parat-ungan ni Sulumun ti tanan manga nagsarig sa kan Hisus. 13 Madi ti manga iba unman nagpanghas magpanuud sa kanda manga tiripun, ti tawu sa luwas iglisya nagbaya di gid sa manga patar-ari. 14 Mayamu ngap ti manga bag-u nagsarig sa Panginuun una lalaki una babayi napadagdag sa iglisya. 15 Pagka naalaman manga tawu ti manga makadululaw pag buwat manga Apustul, dinara nida ti may manga sakit atag sa luwas, kanda ibinugtang sa manga papag, ti iba sa manga amak siti sa puun dalan hampay nu si Pidru lumawuy siyun, una lang maaninwan niya kay iba. 16 Linmuwang diman ti mayamu tawu ginan sa manga baryu sa libut Hirusalim, dinara waydi nida ti may manga sakit ag ti manga pinakurian manga labang. Ag sida tanan tanan pinaayad. 17 Pagka dugay magkadaut yi gid sa manga Apustul ti Pangulu Manug-asiwa balay Diyus hanggan tanan manga kaibahan niya, ti manga napaminsan sa manga Sadusiyu siti sa banwa Hirusalim. 18 Nakan ngani sida nangalistu yi bag-u ipinadakup yi nida ti manga Apustul kanda ipinaslud sa pirisuhan sa banwa. 19 Dapat ay pagka yabi yi binukasan anghil Panginuun ti manga sabian kay ipinalwas sida ginan sa pirisuhan. Bag-u sinabi niya sa kanda magkun, 20 "Pag-ati kamu sa balay Diyus, itudlu gid niyu sa manga tawu ti tanan tanan tungkul sa inda pag bag-u ugali." 21 Nagpaniwala ti manga Apustul sa bilin anghil, nakan surip surip nag-ati yi sida sa balay Diyus hampay manudlu. Pagka rinmas-ug ti Pangulu Manug-asiwa balay Diyus hanggan kay manga kaibahan, pinasuguan nida ti tanan paggurangunun sa nasyun Israil hampay tiripun yi ti tanan manga pinunu. Bag-u kanda ipinab-ul ginan sa pirisuhan ti manga Apustul. 22 Dapat ay pagka dinuawan ngani manga pulis, unman yi siyun ti manga Apustul sa sulud pirisuhan. Nakan nagbalik maan sa manga pinunu ti manga pulis, kanda sinabi magkun, 23 "Pagka kami rinmas-ug sa pirisuhan, nakitan nimi may susi di mayad ti pirisuhan, matindugan diman ti manga bantay sa puun sabian. Dapat pagka binukasan nimi ti sabian, udyi maaw lagan ti tawu sa sulud." 24 Pagka naalaman nida inda, magkaaburidu ti kapitan manga pulis hanggan ti manga pangulu manug-asiwa balay Diyus. Naglingut gid sida nu hintay ti nangyari sa manga Apustul. 25 Bag-u may tawu linmuwang nagbarita sa kanda magkun, "Tunda ngani pag manga tawu kanyu ipinaslud sa pirisuhan, malu ati sida kainda sa balay Diyus magtudlu sa manga tawu." 26 Nakan nag-ati sa balay Diyus ti kapitan hanggan kay manga pulis bag-u kanda bin-ul ti manga Apustul dapat unman kanda kinaragasyun. Magkadala waydi ti manga pulis barang sida batuhan kayamuan tawu. 27 Pagka bin-ul yi manga pulis ti manga Apustul, kanda ipinaatubang sida sa Katipunan manga Pinunu. Bag-u sinuyasid sida Pangulu Manug-asiwa balay Diyus magkun, 28 "Hinigpitan yi nimi kamu magkun danga yi gid kamu magtudlu tungkul sa kapangyarihan ni Hisus. Dapat malu, hintay ngap kanyu binwat? Sa buu banwa Hirusalim tanan tanan tawu nakadnug yi gid kanyu tudlu. Gustu waya niyu kami pakan-an saragtun tungkul sa kamatayan siyun pag tawu." 29 Bag-u nagsagut si Pidru hanggan ti iba manga Apustul magkun, "Kailangan nimi tupadun ti manga bilin Diyus, balaw ti bilin tawu. 30 Ti Diyus nita kaapuapuhan imaw ti nagbuhi uman sa kan Hisus kanyu ipinapaku sa kurus ipinamatay. 31 Pinakan-an si Hisus kadayawan, ipinatukaw siya Diyus sa kay sikun baliwa minsan sa kay karampatan maghari. Nakan si Hisus yi ngani ti Manugkarubut hanggan Manugribri hampay pakan-an rugar ti nasyun Israil makaampu sa kanda manga kasalanan ag makahagad kapatawadan sa Diyus, agud sida patawadun. 32 Kami yi ngani ti may katungkulan magbarita tungkul sa manga nangyari. Magtudlu diman hanggan ti Ispiritu Banal ti ipinakaun Diyus sa manga tawu masurundun sa kanya." 33 Pagka nadnugan manga pinunu inda pag manga bagaw, masyadu yi lang gid sida nagalit nakan kanda gid gustu ipamatay yi ti manga Apustul. 34 Dapat may Parisiyu siyun, usa diman ka Pinunu, kay ngaran si Gamalyil. Manugtudlu siya Kasuguan, paggalangun tanan manga tawu. Nagsabi si Gamalyil palwasan dapu ti manga Apustul. 35 Bag-u sinabi niya sa manga Pinunu, "Kamu duy pag manga kaparihu niku Israilita, isipa gid niyu kaayad-ayad nu hintay kanyu buwatun sa inda pag manga tawu. 36 Dahil udwaya waydi dugay kadaka kabay nagluwang si Tiyudas magkun, siya yi ngani kunu ti pangulu may kapangyarihan. Bag-u upat ka gatus lalaki napausa ngani sa kanya. Dapat ay pagka minatay si Tiyudas, nanarigwasak yi lang kay manga kaibahan ag taynguna udyi may naalaman. 37 Pagka katpung tigsirinsu, nagluwang si Huda taga Galiliya. Mayamu maan tawu ti napausa sa kanya. Dapat ay pagka siya minatay, nanarigwasak diman waydi ti manga nagsunud sa kanya. 38 Nakan kang pagsabihun sa kanyu, danga paglabuta niyu inda pag manga tawu, pabay-ani niyu sida. Dahil nu pinathaw lang tawu kanda turunu hanggan kanda buruwatun, mabuyu yi lang tunda. 39 Nu bay inda ginan sa Diyus, dayi ngap niyu maampara, barang ngap kamu laban yi sa Diyus." Nagpasnu ti manga Pinunu sa kan Gamalyil sinabi. 40 Pagka ipinaslud maan nida ti manga Apustul, kanda ipinahampak bag-u kanda sinabihan magkun, "Danga yi kamu magtudlu tungkul sa kapangyarihan ni Hisus." Bag-u kanda pinalpasan. 41 Pagka ginan sa atubangan Katipunan manga Pinunu, nuli maan ti manga Apustul. Nakabaya gid ungud sida, dahil pinakan-an sida karampatan hampay mag-agwanta parusa dahil ngani sa kan Hisus. 42 Sirang sirang una sa balay Diyus una sa manga balay tawu unman sida mag-apas kanda magpanudlu. Itinudlu nida ti Mayad pag Barita magkun, "Si Hisus yi ngani ti pinili Diyus Manugribri pag Hari."
1 Ati katpung pagka amat amat mayamu yi ti manga nagsarig sa kan Hisus nagdiklamu ti manga Hilinista pag Hudiyu laban sa manga Hibriyu pag Hudiyu. Magkun sida ti manga Hilinista pag babayi buranday pagpabay-anan kunu unman pagpakan-an kanda pangailangan sa udas maghururayan sirang sirang. 2 Nakan tinipun sampulu may duwa ka Apustul ti tanan manga patar-ari bag-u kanda sinabi magkun, "Unman duy mana kailangan pabay-anan nimi kanmi tudlu Bagaw Diyus hampay makaasikasu sa maghururayan pangailangan sa manga buranday. 3 Nakan manga patar-ari, pagpili kamu ginan sa kanyu sa manga patar-ari pitu ka lalaki tunda manga magkaalaman yi waydi kuntay mabuut ag lubus sinuldan Ispiritu Banal. Bag-u sida ti pakan-an nimi inda pag katungkulan sa mag-asikasu sa maghururayan pangailangan sa manga buranday. 4 Nu katida ti buwatun nita, matupad diman waydi nimi kanmi pag katungkulan sa magdarangin ag sa magtudlu Bagaw Diyus." 5 Ti tanan manga patar-ari nagbaya sa sinabi manga Apustul. Nakan pinili ngani nida si Istiban, marig-un siya sa kay pagsarig sa Diyus ag lubus sinuldan Ispiritu Banal. Bag-u kanda waya pinili sida ni Pilipi, ni Puruku, ni Nikanur, ni Timun, ni Parminas hanggan si Nikulas taga Antiyukya. Siya balaw Hudiyu dapat kaybi niabay siya sa surundanun Hudiyu. 6 Pagka napili nida inda pag pitu ka tawu, kanda ipinaatubang sa manga Apustul bag-u sida idinarangin ag kinup-an kamang manga Apustul. 7 Pag-amat-amatan di nida kanda pagtudlu Bagaw Diyus una naan katpung pag manga rugar. Nagyamu di ti manga nagsarig sa kan Hisus ati sa Hirusalim. Una paman sa manga manug-asiwa balay Diyus mayamu ngap ti nagtanggap sa Mayad pag Barita. 8 Lubus pinapaladan Diyus si Istiban ag pinakan-an siya kamaskihan hampay makabuwat makadululaw gid pag manga tanda sa atubangan manga tawu. 9 May manga Hudiyu taga Sirini ag taga Alihandirya, ati sida pag magsamba sa balay tiripnan manga pinalpasan sa pagkapanawuhun. Pagka dugay ti iba sa kanda napaminsan sa manga Hudiyu taga Silisya hanggan taga Asya sa kanda maglaban sa kan Istiban sa bagaw. 10 Dapat mahal ngap pag kadunungan kay ipinakaun Ispiritu Banal sa kan Istiban nakan unman gid kaya nida taluhun siya. 11 Nakan ngani may tinudluan sida manga tawu magkun, "Kainda kanyu sabihun, 'Nadnugan nimi siya nagbagaw kalukuhan laban sa kan Muysis hanggan laban sa Diyus.' " 12 Isinumbung nida si Istiban sa manga tawu, sa manga paggurangunun sa nasyun hanggan sa manga Manugtudlu Kasuguan. Bag-u kanda dinusmugan si Istiban, kanda dinara tag sa atubangan Katipunan manga Pinunu. 13 Bag-u may bin-ul sida manga tawu magbintang sa kan Istiban magkun, "Inda pag tawu unman mag-apas sa kay sarabihun laban sa banal pag balay Diyus ag laban sa Kasuguan ni Muysis. 14 Nadnugan gid nimi kay magsabi magkun, tunda pag tawu si Hisus taga Nasarit tulagun niya aban ti balay Diyus ag ilsan niya ti manga ugali kanta minana ginan sa kan Muysis." 15 Tinurun gid si Istiban tanan manga Pinunu matukawan siyun. Nakitan gid nida kay uyahun bilang parihu ga uyahun anghil.
1 Bag-u nagpaingana ti Pangulu Manug-asiwa balay Diyus sa kan Istiban magkun, "Tutuu aw tida?" 2 Bag-u nagsagut si Istiban magkun, "Kamu duy pag manga kaparihu niku Hudiyu ag manga paggurangunun sa nasyun, pagpatingi kamu. Ti Diyus makapangyarihan sa tanan napakakit sa kanta ginurang sa kan Abraham kay di waya sa Misuputamya ag udwaya nangulian sa banwa Haran. 3 Ati katpung sinabi kabay Diyus sa kan Abraham magkun, 'Kawu pag-ighit yi ginan sa kanmu daga, ginan sa kanmu manga katawuhan. Pag-ati yi kawu sa daga kang itudlu sa kanmu.' 4 Nakan nighit si Abraham ginan sa daga manga Kaldiyu ag nangulian siya sa Haran. Pagka namatay yi kay ama, ipinatalad siya Diyus sitay tag pag daga, sa kanyu pag-ulian taynguna. 5 Madi katida, unman siya pinakan-an Diyus daga ati katpung una di ga raprapa lang kay kadaka. Dapat ipinangaku ngap Diyus sa kan Abraham inda pag daga ipakaun ngani sa kanya hampay kanya yi hanggan sa kay manga minamat una bukun yi siya. Dapat ati katpung udwaya may anak si Abraham. 6 "Inda ti sinabi Diyus magkun, 'Kanmu minamat aban tabug sa iba daga hampay umistar ati. Baliwun gid ngap sida panawuhun manga tawu ati pag daga. Pakurian sida ati sa sulud upat ka gatus timpu. 7 Ati pag nasyun kanda sirbihan, kang waydi pakan-an aban daka pag kakurian.' Bag-u sinabi Diyus, 'Pagka dugay umighit sida ati ginan pag daga bag-u sumamba sida sa kangku sitay sa inda pag rugar.' 8 Tinalaghut Diyus kay taratu sa kan Abraham. Ti pagturi kay tanda sa taratu. Nakan pagka inanak yi kan Abraham anak si Isaak, tinuri niya ti anak sa ikawalu pag sirang. Kumun diman kay binwat ni Isaak sa kay anak sa kan Hakub. Katunda diman waydi kay binwat ni Hakub sa kay sampulu may duwa ka anak lalaki, imaw yi ngani kanta kaapuapuhan. 9 "Pagka dugay nainggit kanta manga kaapuapuhan sa kanda patar-ari sa kan Husi, nakan kanda ipinabili siya hampay panawuhun yi siya ati sa daga Ihiptu. Dapat balaw siya pinabay-anan Diyus. 10 Binawi di niya si Husi ginan sa tanan niya kakurian ag pinakan-an siya kadunungan hanggan mabuut pag ugali sa atubangan ni Paraun, hari manga taga Ihiptu. Nakabaya gid si Paraun sa kan Husi, nakan pinili niya si Husi hampay gubirnadur siya sa Ihiptu hanggan sa tanan niya kasiyunan hari. 11 Pagka dugay nakurian gid ti manga tawu dahil sa lun-us una sa daga Ihiptu una hanggan sa Kanaan. Udyi may mag-akitan karan-unun kanta manga kaapuapuhan. 12 Nakan ngani pagka nabaritaan ni Hakub may tirigu maaw pag karan-unun ati sa Ihiptu, sinugu niya ati tabug kanta manga ginurang. 13 Pagka sa ikadwa nida pagbalik ati sa Ihiptu, nagpakilala si Husi sa kay manga patar-ari bag-u naalaman yi waydi ni Paraun tungkul sa kan Husi manga ama manga patar-ari. 14 Nagpasugu si Husi ipinabuul niya kay ama si Hakub hanggan kay manga katawuhan atag sa Ihiptu. Pitumpulu may lima ka tawu sida sa tanan. 15 Nag-ati ngani sida ni Hakub tabug sa Ihiptu. Ati pag namatay si Hakub hanggan ti iba nita manga kaapuapuhan. 16 Bag-u kanda dinara ti manga bangkay tabug sa Sikim, kanda ilinbung sa kalubngan kan Abraham binili sa manga linahi ni Hamur. 17 "Pagka arani yi ti taning pag kaudasan hampay tupadun Diyus kay ipinangaku sa kan Abraham, nagyamu masyadu ti manga Israilita sa daga Ihiptu. 18 Pagka dugay may tuhay yi pag hari sa Ihiptu. Unman siya nakaalam tungkul sa kan Husi. 19 Dinayu niya kanta linahi. Binilinan niya kanta manga ginurang uyanga kunu nida kanda manga anak hampay balaw mabuhi. 20 Ati katpung sa kay taning pag kaudasan iinanak ngap si Muysis. Marinu gid pag anak, pagbayaun Panginuun. Tulu ka bulan kanda inalagaan ti anak siyun di gid sa balay niya gurang. 21 Pagka kanda yi mana inuyang, binawi ngap siya anak babayi ni Paraun. Kay inalagaan ga kay diman sadili anak. 22 Tinudluan nida si Muysis sa tanan kadunungan manga taga Ihiptu. Makapangyarihan yi siya una sa kay bagaw una sa kay buwat. 23 "Pagka upatpulu yi ka timpu kay idad, inisip ni Muysis manduaw sa kay manga kaparihu Israilita. 24 Pagka siyun, may nakitan siya usa ka Israilita paglitusun tawu taga Ihiptu. Nanginapin si Muysis sa Israilita, ginantihan niya ti taga Ihiptu, rargu minatay. 25 Kay hantup ni Muysis barang naintindihan yi waydi niya manga kaparihu Israilita kuntay siya yi ngani ti pinili Diyus hampay iribri niya sida aban ginan sa kakurian sa Ihiptu. Dapat unman ngap naintindihan nida tunda. 26 Pagka sa usa maan ka sirang nakitan ni Muysis duwa ka Israilita mag-arawayan. Gustu niya husayun sida magkun, 'Hayga duy kamu mag-arawayan? Parihu kabay kamu Israilita?' 27 Dapat ay tunda pag tawu ti mag-away sa kay kaparihu, nangulahig sa kan Muysis magkun, 'Si unu lugud ti may pakaun katungkulan sa kanmu hampay magpangulu ag maghusay sa kanmi? 28 Banta gustu nimu aku matyun ga kaaldaw kanmu diman waydi minatay ti taga Ihiptu.' 29 Pagka nadnugan ni Muysis tunda pag hampang, naglayas siya, napaiba banwa tabug sa Midyan pag daga. Ati pag nianak kay duwa ka anak lalaki. 30 "Pagka nakalawuy upatpulu ka timpu, may napakakit sa kan Muysis usa ka anghil sa basad labdaban apuy sa ababa pag kayu ati sa pangawakawaan sa sugkad bantud Sinai. 31 Pagka nakitan ni Muysis tunda, naglingut gid siya. Nakan nagpakarani siya hampay kay gid duawan bag-u nakadnug siya sa kay magbagaw Panginuun magkun, 32 'Aku ti Diyus nimu manga ginurang, ti Diyus nida ni Abraham, ni Isaak hanggan ni Hakub.' Tinakigan gid sa dala si Muysis, udyi siya makasumbung. 33 Sinabi Panginuun sa kanya magkun, 'Bul-a nimu kanmu lapak ginan sa kanmu raprapa, dahil sakup para sa kangku tunda pag daga kanmu pagtindugan. 34 Nakitan gid ngani niku kanda mag-&unuunu manga taga Ihiptu sa kang nasyun pag tawu. Nadnugan diman waydi niku kanda magpabawi. Nakan aku ginan sa langit nagsitay tag sa babaw daga hampay bawiun sida ginan sa kanda kakurian. Taynguna abala duy, hampay kawu yi kang suguun tabug sa Ihiptu.' " 35 Sigi waya kay paliwanag ni Istiban sa Katipunan manga Pinunu magkun, "Sa kabag-u dinayu manga Israilita si Muysis magkun kabay sida, 'Si unu lugud ti may pakaun katungkulan sa kanmu hampay magpangulu ag maghusay sa kanmi?' Dapat pagka napakakit sa kan Muysis ti anghil ati sa ababa pag kayu, nagpadakit siya sa kan Muysis kuntay siya yi ngap pag tawu ti pinatukahan Diyus manugpangulu hanggan manugbawi. 36 Sa kay nagbawi sa kanda ginan sa kakurian nagbuwat siya manga makadululaw pag tanda sa Ihiptu, sa Dagat Marara hanggan sa pangawakawaan sa sulud upatpulu ka timpu. 37 "Si Muysis diman waydi ti nagsabi sa manga Israilita magkun, 'Aban ipakaun Panginuun Diyus sa kanyu ti usa ka purupita kanyu diman kalahi, parihu diman ga kangku sinugu Panginuun.' 38 Kaibahan diman manga Israilita si Muysis sa kanda magmirinsanan sa pangawakawaan. Siya diman ti naghampang sa anghil pagka nagbagaw ti anghil sa kanya hanggan sa kanta manga ginurang ati sa bantud Sinai. Siya diman ti pinakan-an manga bagaw may kabuhian hampay kay maan ipadakit sa kanta. 39 "Dapat kanta manga ginurang unman naniwala sa kan Muysis. Bagkus ngap kanda yi lang gid dinayu. Nakadumdum di sida sa kanda ulian kaybi sa Ihiptu. 40 Sinabi nida sa kan Aarun magkun, 'Buwati nimu kami manga diyusdiyusan hampay maggiya sa kanmi. Dahil udyi nimi magkaalaman nu hintay lang ti nangyari sa tunda pag tawu sa kan Muysis, imaw ti nagpalwas sa kanmi ginan sa daga Ihiptu.' 41 Ati katpung binwat ngani nida kanda diyusdiyusan ga histuda ibun baka bag-u kanda ngani sinagdahan. May manga kapistahan sida hampay sambahan nida tunda pag diyusdiyusan imaw yi ngani kanda binwat. 42 Nakan pinatlikudan sida Diyus, pinasibut-an yi lang niya sida magsamba sa manga pamgasan sa langit parihu sa isinurat sa ribru manga Purupita magkun, 'Kamu pag nasyun Israil, balaw gid ungud sa kangku pag isinagda niyu kanyu manga hayup minatay, kanyu di waya sa pangawakawaan sa sulud upatpulu ka timpu. 43 Unman magkalimtan niyu ti payag niyu diyusdiyusan ni Muluk, dinaradara diman niyu ti larawan pamgasan niyu diyusdiyusan ni Ripan. Manga diyusdiyusan tunda tinarabahu niyu kamang, hampay sambahan. Nakan kang tulakun kamu tabug sa arayu, sa un-an waya Babilunya pag daga.' 44 "Kanda sa pangawakaan waya, siyun diman ti Balay Turda Panginuun sa kanta manga ginurang. Tunda pag Balay Turda binwat angay gid sa kay bilin Diyus ag angay sa mustara Ipinakakit Diyus sa kan Muysis. 45 Minana nida manga anak ti Turda, kanda ngani dinara pagka si Huswi maan kanda kaibahan sa kanda nagsakup daga Kanaan, sa katpung tinulak Diyus ti manga nasyun ginan sa daga Kanaan. Tunda pag Balay Turda unman nadura sa kanda hanggan sa udwaya naghari si Dabid. 46 Lubus pagbayaun Diyus si Dabid. Nakan nagpamuhun si Dabid sa Diyus hampay pumatindug mana siya balay para sa kanya, sa Diyus ngani ni Hakub. 47 Dapat si Sulumun ti nagpatindug tunda pag balay. 48 "Dapat ay ti Diyus, ti Makamaskihan sa tanan, unman mag-uli sa manga balay binwat manga tawu. Parihu sa kay sinabi purupita magkun, 49 'Sinabi Panginuun, sa langit aku pag matukawan hampay maghari. Ti daga waydi tarat-an niku manga lulud. Kabitay waya pag kalasi balay kanyu mipatindug hampay kang ulian, aw ngatay kang paraharyan? 50 Dahil aku diman ngapu ti may buwat tanan tanan manga bagay.' " 51 Sigi waya gid kan Istiban paalaala sa Katipunan manga Pinunu magkun, "Tutuu maganit kanyu manga ulu. Kanyu tagipusuun parihu lang ga tawu unman nagsarig sa Diyus. Unman niyu pagpatingihan ti katutuuhanan. Unman waydi kamu magpaniwala sa pagsabihun Ispiritu Banal. Parihu yi lang gid kamu ga kanyu manga ginurang. 52 Unman gid may purupita nu unman inunuunu niyu manga ginurang. Minatay niyu manga ginurang ti manga nagpurupita tungkul sa kay pagras-ug Matadlung pag Suruguun Diyus. Pagka siya rinmas-ug ngani, nagpakampi ngap kamu baliwa sa kalaban ag kanyu minatay siya. 53 Madi tinanggap niyu ti Kasuguan Diyus ipinadakit manga anghil, dapat unman ngap kanyu pagtupadun." 54 Pagka nadnugan manga Pinunu kan Istiban binagaw, nangubut yi gid kanda manga bibig sa isug. 55 Dapat ay si Istiban lubus sinuldan Ispiritu Banal nagtangda sa langit. Nakitan niya ti masyadu masilaw pag rayaw sa kay libut Diyus hanggan si Hisus matindugan baliwa sa sikun Diyus. 56 Sinabi ni Istiban magkun, "Mag-akitan yi niku ti langit nabukasan hanggan ti Anak Tawu matindugan baliwa sa sikun Diyus." 57 Dapat pinuputan di ngap manga Pinunu kanda manga tuli bag-u nanmaragritan. Bag-u nandurunganan sida nandalada sa kan Istiban, 58 kanda kinarudkud tabug sa luwas banwa hampay siya batuhun. Linkas dap manga kastigus kanda manga baLukas kanda iinintirga sa usa ka kan-akan kay ngaran si Saulu. 59 Sa katpung pagbatuhun waya nida si Istiban, nandarangin siya magkun, "Panginuun Hisus, tanggapa gid nimu kang karadwa." 60 Nagluhud siya bag-u nanawag daka magkun, "Panginuun, danga ipakaun nimu sa kanda inda pag kasalanan nida." Pagka sinabi niya katida, naugtasan yi siya arup.
1 Pinasnuan yi waydi ni Saulu hampay matyun yi ngani si Istiban. Ati katpung pag sirang nag-umpisa ti mahigpit pag-unuunu laban sa iglisya sa Hirusalim. Purya lang ti manga Apustul, ti tanan manga nagsarig sa kan Hisus nangalat yi sa tanan rugar sa Hudiya hanggan sa Samarya. 2 May manga tawu makidiyus imaw ti naglubung sa kan Istiban, masyadu gid sida namung-aw sa kanya. 3 Dapat ay pinakurian di gid ni Saulu ti iglisya. Sinaka niya ti kada balay bag-u kinarudkud niya ti manga nagsarig sa kan Hisus, una lalaki una babayi bag-u kay ipinapirisu. 4 Pagka nangalat yi ti manga nagsarig sa kan Hisus, itinudlu ngap nida ti Bagaw Diyus una naan sida pag nakalakaw. 5 Si Pilipi nag-ati sa banwa Samarya bag-u nagtudlu siya tungkul sa kan Kiristu sa manga tawu ati. 6 Pagka naalaman manga tawu kan Pilipi manga adal ag pagka nakitan waydi nida ti manga makadululaw pag buwat niya, lalu gid nagpatingi sida tanan sa kay manga pagsabihun. 7 Dahil nagluwas namagrit daka ti manga labang ginan sa mayamu tawu kanda inapuan. Mayamu diman pag manga tawu lunu una pilay pinaayad waydi. 8 Nakan nakabaya gid ungud ti manga tawu ati pag banwa. 9 May usa ka lalaki kay ngaran si Simun. Kaybi waya ginan nagpadulawdulaw siya sa manga taga Samarya dahil sa kay salumangka. Pag-akuun niya siya may dunung. 10 Pinakidnugan siya tanan tanan tawu, una may kangaranan una unman, magkun sida, "Inda pag lalaki ti pagsabihun daka kay kapangyarihan, kapangyarihan ngap Diyus." 11 Dugay yi pag timpu nagpadulawdulaw siya sa manga tawu dahil sa kay salumangka nakan ngani namatingi gid mayad sida sa kanya. 12 Dapat ay pagka itinudlu ngani ni Pilipi ti Mayad pag Barita tungkul sa kay paghari Diyus, hanggan tungkul sa kay kapangyarihan ni Hisu-Kiristu, nagsarig yi ngap ti manga tawu sa kan Kiristu bag-u sida itinulbaw una lalaki una babayi. 13 Hanggan si Simun nagsarig waydi sa Panginuun. Pagka siya itinulbaw yi, pirmi siya magkuyug sa kan Pilipi. Naglingut gid siya sa manga tanda hanggan sa manga makadululaw buwat ni Pilipi. 14 Naalaman manga Apustul ati sa Hirusalim ti manga tawu taga Samarya nagtanggap sa Bagaw Diyus. Nakan sinugu nida sida ni Pidru ni Huwan atag sa Samarya. 15 Pagka rinmas-ug sa Samarya sida ni Pidru ni Huwan, idinarangin nida ti manga nagsarig sa kan Hisus hampay matanggap waydi nida ti Ispiritu Banal. 16 Dahil sida tanan udwaya sinuldan Ispiritu Banal. Itinulbaw di waya sa danum ipinasakup sa ngaran Panginuun Hisus. 17 Dapat pagka kinup-an sida kamang nida ni Pidru ni Huwan, tinanggap ngapu nida ti Ispiritu Banal. 18 Nakitan diman ni Simun, pag-ipakaun maaw ti Ispiritu sa tawu nu siya kinup-an kamang manga Apustul. Nakan magkaibug yi mana siya magpakaun kuwarta sa kanda ni Pidru. 19 Magkun siya, "Pakan-i waydi niyu aku tunda pag kamaskihan hampay nu kup-an niku kamang una hintay pag tawu, makatanggap diman siya sa Ispiritu Banal." 20 Sinabi ni Pidru sa kanya magkun, "Kailangan ipadamhak sa kamatayan kanmu kuwarta hanggan kawu, dahil kanmu banta hantup kuntay mabalyuhan kuwarta inda pag karampatan kay pakaun Diyus. 21 Unman kawu may karampatan makaawat sa inda pag buruwatun, dahil kanmu tagipusuun unman malumpiyu sa kay magbantay Diyus. 22 Nakan ngani kailangan iampu nimu inda pag kadautan. Pagdarangin duy kawu sa Panginuun hampay patawadun niya kawu sa inda pag daut kagustuhan nimu naisipan. 23 Dahil mag-akitan niku subra masyadu kanmu maghirak, ga pirisu kawu ginapus nimu kasalanan." 24 Bag-u sinabi ni Simun sa kanda ni Pidru ni Huwan magkun, "Idarangin duy niyu aku sa Panginuun hampay balaw mana mangyari sa kangku ti kanyu sinabi kuntay midamhak aku." 25 Pinaanyuan waya nida ni Pidru ti manga patar-ari ati sa banwa, itinudlu waya nida ti Bagaw Panginuun sa kanda. Bag-u sida nighit, nuli maan tabug sa Hirusalim. Sa kanda maglakaw, itinultul waya nida ti Mayad pag Barita sa manga tawu sa mayamu pag manga baryu sa daga Samarya. 26 Bag-u sinabi usa ka anghil Panginuun sa kan Pilipi magkun, "Paghiwat yi duy pag-ati kawu sa salatan baliwa. Nu Rumas-ug kawu sa pagsalakan ginan sa Hirusalim tabug sa banwa Gasa, pagsunsun kawu siti pag dalan." Sa pangawakawaan tunda pag dalan. 27 Linmakaw yi ngani si Pilipi. May tawu ngani ati sa dalan, usa ka pinunu taga Itiyupya. Manug-asikasu siya tanan kasiyunan ni Kandasi, ibug sabihun ni Rayna taga Itiyupya. Nag-ati tunda pag pinunu tag sa Hirusalim hampay magsamba sa Diyus. 28 Nakitan siya ni Pilipi sa dalan, sa katpung mag-uli yi maan siya atabug sa Itiyupya, masakyan sa kay karusa. Magbasa siya sa Ribru ni Purupita Isayas. 29 Bag-u sinabi Ispiritu sa kan Pilipi, "Pagpakarani pagkuyug kawu sa tunda pag karusa." 30 Nakan nalagiw si Pilipi kay tinakud ti karusa bag-u nadnugan niya ti pinunu magbasa sa Ribru ni Purupita Isayas. Bag-u namaingana si Pilipi sa pinunu magkun, "Magkasalman aw nimu ti kahulugan tungkul sa kanmu pagbasahun asan?" 31 Nagsagut ti pinunu magkun, "Kabitay pag masalman niku inda nu unman may tawu magpaliwanag sa kangku?" Bag-u ipinasakay niya si Pilipi sa kay karusa, pinatukaw sa kay arani. 32 Inda ngani ti bahagi sa Banal Kasuratan kay pagbasahun magkun, "Parihu ga karanidu unman mag-ingay nu darahun tag sa kay maratyan, una ga anak karanidu unman mag-ingay sa atubangan manga manug-uguy, katunda diman siya, unman gid siya nag-ingay. 33 Binul-an yi lang siya halaga udyi may nagpabliwa sa kanya. Unman may mitultul tungkul sa kay linahi, dahil binugtas kay kinabuhi sitay sa babaw daga." 34 Bag-u namaingana ti pinunu sa kan Pilipi magkun, "Kang gustu mana maalaman sa kanmu, si unu nguna ti pagturunuhun ni Purupita Isayas, ngatay kay sadili aw ngatay iba tawu?" 35 Bag-u ginan sa inda ngani pag bahagi Banal Kasuratan itinultul ni Pilipi sa pinunu ti Mayad pag Barita tungkul sa kan Hisus. 36 Sigi di gid kanda lakaw sa karusa. Pagka dugay nakaras-ug sida sa may danum. Nakan sinabi pinunu sa kan Pilipi magkun, "May danum atay. Udyi nguna may ampara sa kang magpatulbaw." 37 Magkun si Pilipi, "Mahimu gid nu ilinubus nimu kanmu tagipusuun sa kanmu pagsarig sa Panginuun." Sinabi pinunu magkun, "Magsarig aku sa kan Hisu-Kiristu, siya yi ti Anak Diyus." 38 Pinat-ung pinunu ti karusa bag-u nagdugsun sida duwa ginan sa karusa atag sa danum bag-u itinulbaw siya ni Pilipi. 39 Pagka napatakas sida ginan sa danum, bin-ul Ispiritu Banal si Pilipi. Madi udyi mag-akitan si Pilipi magbaya di gid ti pinunu, nagparargu gid kay lakaw. 40 Dapat ay kay napatangad ni Pilipi sa banwa Asdud. Sa kay maglakaw ati, itinudlu niya ti Mayad pag Barita sa tanan manga banwa hanggan sa ud nakaras-ug sa Sisariya.
1 Dapat ay si Saulu tinalung sa isug waya, kay gid gustu matyun ti manga magsarig sa Panginuun. Nakan nag-ati siya sa Pangulu Manug-asiwa balay Diyus. 2 Nanhagad siya manga surat hampay ipakilala siya sa manga pangulu sa manga balay tiripnan manga Hudiyu ati sa banwa Damasku. Bag-u nu ati yi siya ag nu may makitan siya manga tawu, una lalaki una babayi magsunud sa bag-u ugali itinudlu Panginuun, mahimu kay dakpun bag-u darahun tag sa Hirusalim. 3 Nighit yi ngani si Saulu atag sa Damasku. Pagka udyi arayu ti banwa Damasku, bigla may nagrayaw ginan sa langit sa kay libut ni Saulu. 4 Nisubsub siya sa daga bag-u nakadnug siya may magbagaw sa kanya magkun, "Saulu, Saulu, hayga pag-unuunuhun nimu aku?" 5 Nagpaingana si Saulu, "Si unu kawu, Panginuun?" Bag-u may sinmagut sa kanya magkun, "Aku si Hisus kanmu pag-unuunuhun. 6 Pagbangun yi kawu, pag-ati kawu sa banwa bag-u may sumabi ati sa kanmu tungkul sa kanmu kailangan buwatun." 7 Kan Saulu manga kaibahan mapat-&ungan lang unman nag-ingay dahil nadnugan nida may magbagaw, dapat unman sida may nakitan una hintay. 8 Nagbangun ngani si Saulu. Pagka nagmuklat kay mata, unman maghiling. Nakan inabat nida siya atag sa banwa Damasku. 9 Sulud tulu ka sirang unman maghiling kay mata ag unman siya nagkaun nag-inum. 10 Ati sa Damasku may usa ka tawu nagsarig diman sa kan Hisus, kay ngaran si Ananiyas. Napakakit ti Panginuun sa kanya bag-u kay sinabi magkun, "Ananiyas." Sinmagut si Ananiyas magkun, "Inda di aku, Panginuun." 11 Sinabi Panginuun sa kanya, "Pag-ati kawu tag sa karsada Matadlung ag paingan-a nimu sa balay ni Hudas ti usa ka lalaki taga Tarsu kay ngaran si Saulu. Magdarangin siya kainda. 12 May Ipinakakit aku sa kanya may nagsaka usa ka tawu kay ngaran si Ananiyas, nagkupa kay kamang sa kanya hampay humiling maan kay mata." 13 Dapat nagsabi si Ananiyas magkun, "Panginuun, mayamu yi tawu nagtultul sa kangku tungkul sa tunda pag tawu. Mayamu gid pag kadautan ti binwat niya kunu laban sa manga magpasakup sa kanmu ati sa Hirusalim. 14 Taynguna nagsitay siya sa Damasku, may karampatan siya ginan sa manga pangulu manug-asiwa balay Diyus hampay dakpun niya ti tanan manga magsamba sa kanmu." 15 Magkun maan ti Panginuun sa kan Ananiyas, "Pag-ati duy kawu, dahil pinili ngap niku si Saulu hampay siya sumirbi sa kangku hampay ipakilala niya kang kapangyarihan sa manga balaw Hudiyu, sa manga hari hanggan sa nasyun Israil. 16 Ipaalam diman waydi niku sa kanya ti tanan niya kailangan tiisun sa kay magpakilala sa kangku sa manga tawu." 17 Nag-ati ngani si Ananiyas. Pagka siya sinmaka yi sa balay, kinup-an niya kamang si Saulu, magkun, "Patar-ari Saulu, ti Panginuun ti nagsugu sa kangku, si Hisus yi ngani, imaw ti napakakit sa kanmu sa kanmu maglakaw sitay tabug. Nakan sinugu niya aku sitay tag sa kanmu hampay humiling maan kanmu mata ag hampay kawu lubus suldan Ispiritu Banal." 18 Susun may ga nalkab ginan sa kan Saulu mata bag-u maghiling yi siya. Linmakaw siya rargu napatulbaw. 19 Bag-u siya nagkaun nagbisug maan kay bilug. Dinmayun dapu si Saulu balaw dugay sa manga patar-ari siyun sa Damasku. 20 Susun nagsaka siya sa manga balay tiripnan manga Hudiyu, nanudlu siya tungkul sa kan Hisus magkun, "Siya yi ngani ti Anak Diyus." 21 Ti tanan tawu nakadnug sa kanya naglingut gid. Magkun sida, "Unman aw lugud inda yi ngani pag tawu ti namapas sa manga magsamba sa kan Hisus sa Hirusalim? Nagsitay ngani kabay siya hampay dakpun niya tunda pag manga tawu bag-u darahun tabug sa manga pangulu manug-asiwa balay Diyus." 22 Dapat ay amat amat lalu waya malinaw kan Saulu paliwanag. Naglingut ti manga Hudiyu nangulian sa Damasku dahil marig-un kay nagtultul tungkul sa kan Hisus siya yi ti pinili Diyus Manugribri pag Hari. 23 Pagka dugay namululungan yi ti manga Hudiyu hampay matyun si Saulu, 24 dapat naalaman niya kanda paggayakun. Sirang yabi pagpuutan nida siya sa manga puwirtahan alad batu banwa hampay siya kanda mana matyun. 25 Nakan pagka yabi yi napasukad siya sa basad balulang bag-u itinuntun siya niya manga tuludluan atag sa luwas alad batu. 26 Pagka rinmas-ug si Saulu sa Hirusalim, kay mana gustu magpaminsan sa manga napasakup sa kan Kiristu. Dapat magkadala sida sa kanya. Unman sida naniwala kuntay si Saulu usa yi waydi ka nakapasakup sa kan Hisus. 27 Bag-u inawatan siya ni Birnabi, inibahan niya si Saulu tag sa manga Apustul bag-u itinultul ni Birnabi nu kabitay ti Panginuun napakakit sa kan Saulu ag naghampang sa kanya sa kay katpung maglakaw atag sa Damasku. Magkun waya si Birnabi, "Unman paman magkadala si Saulu, nanudlu ngap siya tungkul sa kapangyarihan ni Hisus ati sa Damasku." 28 Nakan si Saulu napaminsan gid sa manga patar-ari sa Hirusalim sa tanan nida buruwatun. Unman gid siya magkadala, nanudlu di siya tungkul sa kapangyarihan Panginuun. 29 Naghampang diman siya sa manga Hilinista pag Hudiyu, nagdibati siya sa kanda. Dapat ay naghanap yi sida paraan hampay kanda matyun si Saulu. 30 Pagka naalaman manga patar-ari ti gayak manga Hudiyu, itinibu nida si Saulu atag sa Sisariya. Magkun sida sa kanya, "Pag-uli dapu duy kawu sa Tarsu." 31 Nakan ngani may kahusayan maan dapu ti iglisya sa buu daga Hudiya, sa Galiliya hanggan sa Samarya. Pinarig-un Ispiritu Banal ti iglisya. Nagyamu ti manga nagsarig sa kan Hisus. Mag-ugali sida maggalang sa Panginuun. 32 Ati katpung namalibutan si Pidru sa tanan rugar hampay magduaw sa manga nagsarig sa kan Hisus. Nag-ati diman siya sa manga patar-ari sa banwa Lida. 33 Pagka ati si Pidru sa Lida, may nakitan siya usa ka lalaki kay ngaran si Iniyas. Pilay tunda pag tawu. Sulud walu yi ka timpu maigyaan siya sa amak. 34 Bag-u sinabi ni Pidru sa kanya, "Iniyas, pagpaayadun yi kawu kainda ni Hisu-Kiristu. Pagbangun yi kawu, luhuta yi kanmu amak." Susun tinmindug yi ngani si Iniyas. 35 Nakitan gid siya tanan tawu mag-uli sa banwa Lida hanggan sa Sarun, nakan nagsarig diman sida sa Panginuun. 36 Sa Hupi may usa ka babayi sakup diman sa kan Hisus. Kay ngaran si Tabita. Nu sa Giriyigu kay ngaran si Durkas, ti ibug sabihun karasyaw. Masipag gid ungud siya sa magbuwat mayad, pirmi diman siya mag-awat sa manga makuri. 37 Pagka dugay nasakit si Tabita rargu namatay. Pagka kanda dinamay yi danum, ibinugtang nida ti bangkay sa suludsulud sa ikadwa pag ugpu salug. 38 Arani lang ti Lida sa Hupi pag banwa. Nakan, pagka naalaman manga patar-ari ati sa Hupi si Pidru, nagsugu sida duwa ka tawu tag sa kan Pidru may bilin magkun, "Pagsitay yi duy kawu sa kanmi kadali." 39 Nagkuyug ngani si Pidru sa kanda. Pagka rinmas-ug siya sa Lida, dinara nida siya atag sa suludsulud sa ikadwa pag ugpu salug. Nagpakarani diman sa kan Pidru ti tanan manga babayi buranday, Ipinakakit nida sa kanya ti manga subun, manga rutay kay ipinaalu ni Durkas sa kanda kay di waya buhi. 40 Ipinalwas dapu ni Pidru sida tanan bag-u siya linmuhud nandarangin. Bag-u nag-atubang siya sa bangkay kay sinabi magkun, "Tabita, pagbangun yi duy kawu." Minmuklat yi ngani kan Tabita manga mata. Pagka nakitan niya si Pidru, siya tinmukaw. 41 Hiniyaptan ni Pidru kay kamang bag-u kay inawatan si Tabita kay ipinatindug. Bag-u tinawag niya ti manga patar-ari lalu hanggan ti manga babayi buranday, Ipinakakit niya sa kanda si Durkas nabuhi yi maan. 42 Inda pag nangyari sa kan Durkas nibantug sa buu banwa Hupi nakan mayamu tawu nagsarig diman sa Panginuun. 43 Nadugay waya si Pidru ati sa Hupi nagdayun siya sa balay usa ka manugtimpala sa paknul, kay ngaran si Simun.
1 Ati katpung may usa ka tawu sa banwa Sisariya, kay ngaran si Kurnilyu. Kapitan siya manga sundalu taga Ruma sakup sa panung sundalu taga Italya. 2 Si Kurnilyu hanggan kay manga kasunu balay niabay sa surundanun manga Hudiyu, masipag sida magsamba sa Diyus. Magpakaun diman gid si Kurnilyu kuwarta sa manga Hudiyu nu may kakurian, pirmi diman siya magdarangin sa Diyus. 3 Pagka dugay, pagka palis ti init, may Ipinakakit ti Panginuun sa kanya. Malinaw gid pag nakitan ni Kurnilyu may usa ka anghil Diyus nagsulud sa kay balay. Magkun ti anghil sa kanya, "Kurnilyu." 4 Kinulbaan kay tinmurun sa anghil bag-u sinabi niya, "Hintay duy asan?" Nagsagut ti anghil magkun, "Pagbayaun Diyus kanmu manga darangin hanggan kanmu awat sa manga makuri. Nakan pirmi kawu kay pag-alalahanun. 5 Pagpasugu kawu taynguna manga lalaki atag sa banwa Hupi, bul-a nida ti usa ka tawu kay buu ngaran si Simun Pidru. 6 Magdayun siya sa balay ni Simun manugtimpala sa paknul, ati sa baybay dagat." 7 Pagka nakatapus kay hampang sa kan Kurnilyu, nighit maan ti anghil. Bag-u bin-ul ni Kurnilyu ti duwa ka masarigan gid niya pag panawuhun hanggan ti usa ka suruguun niya pag sundalu. Tunda pag sundalu parihu ga kan Kurnilyu niabay waydi sa surundanun manga Hudiyu. 8 Itinultul dapu niya sa kanda ti tanan manga nangyari bag-u sinugu niya sida atag sa banwa Hupi. 9 Pagka sa usa ka sirang maglakaw waya tunda pag manga sinugu ni Kurnilyu sa dalan atag sa banwa Hupi. Ati katpung dinmayik si Pidru atag sa atup balay hampay mandarangin. Pagka magkakaraw-an yi sirang, 10 magkalun-us yi siya, dapat udwaya tama ti karan-unun. Pagka dugay nabul-an siya isip, 11 bag-u nakitan niya nabukasan yi ti langit. Bag-u may ga kumut daka hinigtan kay upat ka yungu itinuntun tag sa daga. 12 May sukad tuhay tuhay kalasi hayup, manga iyay hanggan manga manuk 13 Bag-u nadnugan ni Pidru may magbagaw magkun, "Pagtindug yi kawu Pidru, pag-iyaw yi kawu, pagkaun." 14 Dapat sinmagut si Pidru, "Dayu gid duy, Panginuun. Una kaybi ginan unman gid aku nagkaun una hintay nu daut sa kang turun-anun." 15 May nagbagaw maan sa kanya magkun, "Danga nimu pagsabiha daut sa kanmu turun-anun ti ipinakaun Diyus hampay karan-unun." 16 Katlu ginan tunda pag nangyari bag-u binatak maan tag sa tungud tunda pag bilang ga kumut. 17 Magpakaisip waya si Pidru nu hintay nguna kay kahulugan ti Ipinakakit Panginuun sa kanya, naras-ugan yi ngap siya manga suruguun ni Kurnilyu. Pagka nagpatudlu sida sa manga tawu nu naan kan Simun balay, nag-ati ngani sida, 18 bag-u nagtawag sida ginan sa luwas balay magkun, "May magdayun aw nguna atay tawu kay ngaran si Simun Pidru?" 19 Pagpakaisip-isipun gid waya ni Pidru ti Ipinakakit Panginuun sa kanya, magkun ngap ti Ispiritu sa kanya, "May tulu ka lalaki maghanap sa kanmu. 20 Pagdugsun kawu pagkuyug gid sa kanda danga yi kawu mag-&alaala, dahil aku ngap ti nagsugu sa kanda sitay tag." 21 Nakan nagdugsun ngani si Pidru ginan sa atup bag-u sinabi niya sa kanda magkun, "Aku ngani ti kanyu paghanapun pag tawu. Hintay nguna kanyu kailangan nakan nagsitay kamu?" 22 Sinmagut sida magkun, "Kami duy sinugu ngani ni Kapitan Kurnilyu. Mayad siya pag tawu, niabay yi sa surundanun manga Hudiyu. Paggalangun diman siya tanan manga Hudiyu. Sinabihan siya anghil Diyus kawu yi ngani kunu ti ipabuul niya atag sa kay balay hampay makapatingi siya sa kanmu manga pagsabihun." 23 Bag-u kan Pidru pinasaka sida sa balay magkun, "Pag-igya waya kamu sitay." Pagka surip nag-alistu si Pidru bag-u kinmuyug siya sa kanda. May kaibahan waya siya manga patar-ari taga Hupi. 24 Pagka sa usa ka sirang rinmas-ug yi sida sa banwa Sisariya. Pag-alagdun yi sida ni Kurnilyu. Tinipun ni Kurnilyu kay manga katawuhan hanggan kay pagmayadun pag manga kakilala. Tanan tanan sida mag-alagad yi sa kanda ni Pidru. 25 Pagka rinmas-ug yi si Pidru, sinalubung siya ni Kurnilyu. Bag-u napadapa si Kurnilyu sa kan Pidru atubangan, kay sinamba. 26 Dapat ay itinindug siya ni Pidru magkun, "Pagtindug yi duy kawu, dahil aku tawu lang waydi." 27 Maghampang waya si Pidru sa kan Kurnilyu, nagsaka yi sida sa balay. Pagka sinmaka yi si Pidru, nakitan niya mayamu tawu ti nagtiripun siyun. 28 Bag-u sinabi ni Pidru sa kanda magkun, "Magkaalaman diman waydi niyu nu angay sa surundanun manga Hudiyu bawal gid ti usa ka Hudiyu magsabang una magpaminsan sa manga balaw Hudiyu. Dapat ipinakilala Diyus sa kangku danga yi kunu pagsabiha niku may turun-anun waya aku una sa kantapu pag tawu. 29 Nakan ngani pagka ipinabuul niyu aku, udyi aku may pag-alalahanun, kinmuyug yi lang aku. Taynguna kang paingana sa kanyu, hayga nguna aku kanyu bin-ul?" 30 Sinmagut si Kurnilyu magkun, "Nakatlu waya duy, manga kainda ngani palis ti init, aku nagdarangin sa kang balay. Bigla may tinmindug sa kang atubangan usa ka lalaki masilaw kay rutay. 31 Magkun siya sa kangku, 'Kurnilyu, nadnugan Diyus kanmu manga darangin. Pagbayaun niya kanmu awat sa manga makuri. 32 Nakan ngani pagpasugu kawu atag sa banwa Hupi hampay bul-un nida ti usa ka tawu kay buu ngaran si Simun Pidru. Magdayun siya sa balay ni Simun manugtimpala sa paknul, ati sa baybay dagat.' 33 Susun pinasuguan yi ngani niku kawu. Mayad ungud duy kanmu nalub-anan nakan kawu nagsitay. Taynguna kami tanan nagtiripun handa sa atubangan Diyus hampay magpatingi sa tanan nimu sarabihun angay sa kay ibinilin Panginuun sa kanmu." 34 Bag-u nagpaliwanag si Pidru magkun, "Taynguna duy lubus naintindihan niku unman gid mag-api ti Diyus. 35 Unman may pagpiliun siya una tawu una nasyun. Kay di pagbayaun ti tawu nu maggalang sa kanya ag nu magbuwat mayad. 36 Inda yi ngani ti barita kay ipinaalam Diyus kaybi sa nasyun Israil, ti Mayad ngani pag Barita tungkul sa kahusayan ginan sa kan Hisu-Kiristu dahil siya tighari sa tanan tawu. 37 "Alam yi niyu nu hintay ti nangyari sa bilug daga Hudiya. Nag-umpisa tunda sa Galiliya pagka itinulbaw yi si Hisus angay sa kay manga itinudlu ni Huwan. 38 Naalaman yi waydi niyu tungkul sa kan Hisus taga Nasarit. Siya diman waydi ti pinili Diyus nakan ipinakaun Diyus sa kanya ti Ispiritu Banal hanggan kapangyarihan. Namalibutan siya una naan tag, nagbuwat siya mayad. Ti tanan tawu inapuan diyablu kay diman pinaayad, dahil sa kanya gid ti Diyus. 39 Nakitan gid duy nimi ti tanan niya manga binwat sa daga manga Hudiyu hanggan sa Hirusalim. Bag-u kanda ipinaku siya sa kurus, kanda minatay. 40 Dapat ay pagka sa ikatlu pag sirang siya binuhi maan Diyus bag-u Ipinakakit dimaan siya Diyus, 41 dapat balaw sa tanan tawu. Sa kanmi lang pag Ipinakakit siya, dahil kami ngani ti daan pinili Diyus manga manugpadakit sa inda pag manga nangyari. Pagka nabuhi maan si Hisus, kaibahan dimaan niya kami kasaru diman niya sa karan-an. 42 Ibinilin niya sa kanmi hampay manudlu sa manga tawu ag magbarita magkun, si Hisus yi ngani ti pinili Diyus pag Manugpihu aban sa tanan tawu nu daut nu mayad, una sa manga buhi di waya ag sa manga namatay yi. 43 Ti tanan purupita nagbarita diman waydi tungkul sa kan Hisus magkun, una hintay pag tawu nu sumarig sa kanya, patawadun Diyus kay manga kasalanan dahil sa kapangyarihan niya." 44 Udwaya magkatapus kan Pidru paliwanag, kadaka lubus sinuldan ngap Ispiritu Banal ti tanan manga tawu siyun magpatingi sa Mayad pag Barita. 45 Nadulaw gid kan Pidru kaibahan pag manga patar-ari Hudiyu. Una maaw sa manga balaw Hudiyu ipinakaun Diyus ti Ispiritu Banal. 46 Dahil nadnugan nida ti manga balaw Hudiyu magbagaw yi sa unman magkasalman pag pamagaw magdayaw sa kamaskihan Diyus. Nakan magkun si Pidru, 47 "Ipinakaun Diyus ti Ispiritu Banal sa inda pag manga tawu, parihu diman ga sa kanta. Udyi nguna may umampara sa inda pag manga tawu hampay itulbaw sa danum." 48 Nakan sinabi ni Pidru, "Kailangan itulbaw yi sida ipasakup sa ngaran ni Hisu-Kiristu." Pagka sida itinulbaw yi, tinawidan waya nida si Pidru manga tulu upat waya ka sirang.
1 Nabaritaan manga iba Apustul hanggan manga patar-ari sa bilug daga Hudiya may manga balaw Hudiyu naniwala diman sa Bagaw Diyus. 2 Ati sa Hirusalim may manga patar-ari Hudiyu magtuun waya sa Kasuguan ni Muysis. Nakan pagka rinmas-ug si Pidru sa Hirusalim, sinungyaw nida siya magkun, 3 "Nagdayun maaw kawu sa balay manga balaw Hudiyu, nagsaru paman kawu sa kanda." 4 Nakan itinultul ngani ni Pidru sa kanda nu hintay ti nangyari tanan tanan ginan sa kabag-u. 5 Magkun siya sa kanda, "Aku duy ati katpung sa banwa Hupi. Sa kang magdarangin, nabul-an aku isip bag-u may Ipinakakit ti Panginuun sa kangku. May ga kumut daka hinigtan kay upat ka yungu, itinuntun ginan sa langit tag sa kang arani. 6 Dinuawan gid niku kay sukad bag-u nakitan niku may manga hayup, manga simarun, manga iyay hanggan manga manuk. 7 Bag-u nadnugan niku may magbagaw magkun, 'Pagtindug yi kawu Pidru, pag-iyaw yi kawu, pagkaun.' 8 Dapat sinmagut aku magkun, 'Dayu gid duy Panginuun, una kaybi ginan unman gid aku nagkaun una hintay nu daut sa kang turun-anun.' 9 Nadnugan maan niku may binmagaw ginan sa langit magkun, 'Danga nimu pagsabiha daut sa kanmu turun-anun ti ipinakaun Diyus hampay karan-unun.' 10 Katlu ginan tunda pag nangyari bag-u binatak maan tag sa tungud tag sa langit tunda pag bilang ga kumut. 11 "Ati diman gid katpung rinmas-ug ngap sa kang pagdayunan pag balay ti tulu ka tawu sinugu tag sa kangku ginan sa Sisariya. 12 Sinabi Ispiritu sa kangku danga kunu mag-&alaala, pagkuyug yi lang aku sa kanda. Inda pag unum ka patar-ari taga Hupi nagkuyug diman sa kangku tabug sa Sisariya. Pagka kami rinmas-ug, nagsaka ngani kami sa balay ni Kurnilyu. 13 Bag-u itinultul niya sa kanmi kay nakakit sa anghil matindugan sa kay balay. Sinabi kunu anghil sa kanya magkun, 'Pagpasugu kawu tag sa Hupi bul-a nida ti usa ka tawu kay buu ngaran si Simun Pidru. 14 Itudlu niya sa kanmu ti Mayad pag Barita hampay miribri kawu hanggan kanmu manga kasunu balay.' " 15 Magkun si Pidru, "Kang diway nag-umpisa nagbagaw sa kanda, kadaka sinuldan sida lubus Ispiritu Banal, parihu diman ga nangyari sa kanta sa kabag-u. 16 Bag-u naisipan diman niku kay sinabi Panginuun kaybi magkun, 'Si Huwan magtulbaw sa danum, dapat kamu itulbaw sa Ispiritu Banal.' 17 Ipinakaun yi ngani Diyus sa kanda ti Ispiritu Banal parihu ga kay diman ipinakaun sa kanta sa kanta nagsarig sa Panginuun Hisu-Kiristu. Kabitay aku? May karampatan aw lugud aku makaampara sa Diyus?" 18 Pagka nadnugan manga patar-ari inda pag manga sinabi ni Pidru, udyi sida may pagsabihun sa kan Pidru. Bagkus ngap nagdayaw sida sa Diyus magkun, "Nu katunda maaw, ipinakaun diman Diyus sa manga balaw Hudiyu hampay makaampu sida sa kanda kasalanan ag makatanggap buhi." 19 Ginan sa minatay si Istiban nag-umpisa ti pag-unuunu, nakan nangalatkalat yi ti manga nagsarig sa kan Hisus. Ti iba nakaaput sa daga Pinisya, sa Sipru pag puru sa karaw-an dagat hanggan sa banwa Antiyukya. Una naan kanda lakaw itinudlu nida ti Barita tungkul sa kan Hisus sa manga Hudiyu lang. 20 Dapat ti iba sa kanda manga taga Sipru hanggan taga Sirini pag manga tawu. Pagka rinmas-ug sida sa Antiyukya, itinudlu ngap nida sa manga balaw Hudiyu ti Mayad pag Barita tungkul sa Panginuun Hisus. 21 Sa kanda gid ti kamaskihan Panginuun, nakan mayamu ti nagpaniwala sa barita ag nagpasakup sa Panginuun. 22 Pagka naalaman manga patar-ari sa iglisya sa Hirusalim nu hintay ti nangyari sa Antiyukya, sinugu nida si Birnabi atabug sa Antiyukya. 23 Pagka siya rinmas-ug ati, nakitan niya kay papalad Diyus sa kanda. Nakan nakabaya gid siya. Kay pinaanyuan sida magkun pangungud sida pagmatinupadun sa Panginuun, danga sida magbul-iw. 24 Mayad gid pag tawu si Birnabi. Lubus siya sinuldan Ispiritu Banal, marig-un kay pagsarig. Mayamu tawu ti binutung tag sa Panginuun. 25 Pagka dugay nag-ati si Birnabi tag sa banwa Tarsu hampay hanapun si Saulu. 26 Pagka nakitan niya si Saulu, tinaban niya siya atag sa Antiyukya. Ati sida duwa sa sulud usa gid ka timpu magpakiusa sa iglisya. Mayamu tawu kanda tinudluan. Ati diman sa Antiyukya pag inumpisahan iningarnan Kiristiyanu ti manga napasakup sa kan Kiristu. 27 Ati katpung pag panahun may rinmas-ug sa Antiyukya manga purupita ginan sa Hirusalim. 28 Tinmindug ti usa, kay ngaran si Agabu. Bag-u siya nagpurupita angay sa kapangyarihan Ispiritu Banal. Magkun siya, "Masyadu aban ti lun-us sa bilug kalibutan." Nangyari yi ngani tunda sa katpung Pangulu Hari si Kalaudyu. 29 Nakan nagharampangan ti manga patar-ari hampay angay sa kanda kaya sa kada usa pumadara sida pakaun tabug sa manga patar-ari nangulian sa Hudiya. 30 Katunda yi ngani kanda binwat. Ipinabahala nida kanda pakaun sa kanda ni Birnabi ni Saulu imaw ti nagtibu atag sa manga manug-asiwa iglisya ati sa Hudiya.
1 Bag-u pagka dugay inumpisahan inunuunu ni Hari Hirudis ti iba manga sakup iglisya. 2 Ipinalibun niya kan Huwan patar-ari si Santiyagu. 3 Pagka naalaman ni Hirudis nakabaya ti manga Hudiyu dahil minatay yi si Santiyagu, ipinadakup diman niya si Pidru, sa katpung Kapistahan tungkul sa Tinapay unman may Pamadaka. 4 Pagka dinakup si Pidru, ipinaslud siya sa pirisuhan bag-u ipinatanud sa kanya ti sampulu may unum ka sundalu bag-u mag-ulublusan sida tigup-at tigup-at ka tawu. Kay gayak ni Hirudis nu lawuy yi ti Kapistahan sa Pag-alaala sa Karibrihan ipaatubang niya si Pidru sa manga tawu, hampay sintinsiyahan siya sa kamatayan. 5 Nakan siti dapu si Pidru sa pirisuhan. Dapat ay nangungud ngap ti iglisya sa darangin tungkul sa kanya. 6 Sa ati pag yabi turug si Pidru, ginapus kay baliw baliw kamang tarikada ibiningkit sa duwa ka sundalu ag may manga sundalu sa puun sabian maulugan. Aldaw nangus ipaatubang yi siya ni Hirudis sa kayamuan tawu. 7 Kadaka linmuwang ngapu ti usa ka anghil Panginuun, rinmayaw gid sa sulud pirisuhan. Tinaptap niya kay habig ni Pidru, pinulaw niya magkun, "Bangun duy kadali." Nalagpak ti manga tarikada ginan sa kay manga kamang ni Pidru. 8 Sinabi anghil sa kanya, "Paghuragkus duy, paglapak yi." Katida ngani kay binwat ni Pidru. Bag-u magkun ti anghil, "Pagsulung waya kanmu pamaunib baLukas sadsad, pagkuyug yi sa kangku." 9 Nagkuyug ngani si Pidru sa anghil tag yi sa luwas pirisuhan. Dapat unman naalaman ni Pidru kuntay ungud gid inda pag nangyari sa kanya. Kay hantup barang may Ipinakakit lang ti Panginuun sa kanya. 10 Pagka nakalawuy yi sida sa usa ka bantay hanggan sa kay ikadwa pag bantay, aput yi sida sa sabian may talakup baul. Lumuwas lang sabian banwa yi. Buluntad nabukasan sa kanda ti sabian bag-u nagluwas yi sida. Sinmunsun sida karsada bag-u kadaka tinayakan siya anghil. 11 Bag-u nahinawhinawan si Pidru magkun, "Taynguna alam niku tutuu maaw inda pag nangyari sa kangku. Sinugu Panginuun kay anghil hampay bawiun aku ginan sa kamang ni Hirudis hanggan ginan sa tanan pag-isipun manga Hudiyu kanda buwatun mana sa kangku." 12 Pagka naintindihan ni Pidru inda, nag-ati siya sa balay ni Marya, kay ina ni Huwan Markus. Mayamu patar-ari nagtiripun ati magdarangin. 13 Pagka nagtariktik si Pidru sa talakup sabian, nagluwang ti usa ka suruguun babayi kay ngaran si Ruda, hampay duawan nu si unu ti nagtariktik. 14 Nakilala niya si Pidru maaw tigbagaw. Dapat ay sa kay yi gid kabayaan niya, ud ngap binukasan niya ti talakup sabian. Nandalandanan ngap maan siya tag sa sulud, magkun siya sa manga iba si Pidru maaw ti matindugan ati sa luwas sabian. 15 Magkun sida, "Paung duy kawu." Dapat balaw nagpatalu si Ruda, ungud gid imaw. Nakan sinabi nida magkun, "Kay nguna anghil ni Pidru tunda." 16 Si Pidru bay sigi di gid kay magtariktik sa talakup. Pagka dugay binukasan nida ti sabian, nakitan nida siya yi ngani maaw. Naglingut gid sida masyadu. 17 Pinaamanan niya sida danga maingay bag-u kay itinultul sa kanda nu kabitay siya pag ipinalwas Panginuun ginan sa pirisuhan. Binilinan niya sida magkun, "Ibarita niyu inda sa kan Santiyagu hanggan sa manga patar-ari." Bag-u nighit si Pidru tag sa iba rugar. 18 Pagka nasurip yi, balaw basta gid pag naaburidu ti manga sundalu nu hintay nguna ti nangyari sa kan Pidru. 19 Ipinahanap siya ni Hirudis. Pagka unman gid siya nakitan, hinigpitan gid niya sa paingana ti manga sundalu bag-u kay ipinamatay. Bag-u naglus-ug si Hirudis ginan sa Hudiya tag sa banwa Sisariya. Nadugay waya ati siya. 20 Pusuk gid kay isug ni Hari Hirudis sa manga taga Tiru hanggan taga Sidun. Nakan nagkaban sida nag-ati sa hari. Nagpakihampang dapu sida sa kan Balastu, imaw tig-asikasu sa tanan kasiyunan ni Hirudis. Bag-u nagpakarani sida sa kan Hirudis nagsuyu sa kanya hampay danga yi sida kagalitan niya dahil ti karabuhian sa kanda banwa ginan sa banwa hari. 21 Pagka sa taning pag sirang, nagsulung si Hirudis panrutayun hari, bag-u tinmukaw siya sa kay tukawan pangatungkulan bag-u siya nagpahayag tag sa manga tawu. 22 Pagka nadnugan nida kay binagaw, nanriringgitan ti manga tawu magkun, "Nagbagaw siya ga anyu bagaw usa ka diyus, tunda bukun yi bagaw tawu." 23 Susun yi pinarusahan siya anghil Panginuun dahil unman sinabi niya sa manga tawu siya tawu lang, balaw Diyus. Sinapatan dapu siya bag-u namatay. 24 Nilantag ti Bagaw Diyus, nag-amat yinmamu ti manga tawu sinmarig sa kan Hisus. 25 Pagka inintirga yi nida ti kuwarta sa manga manug-asiwa iglisya sa Hirusalim, nagbalik maan sida ni Birnabi ni Saulu tabug sa Antiyukya, kanda iniba si Huwan Markus.
1 Sa iglisya sa Antiyukya may manga purupita hanggan manga manugtudlu Bagaw Diyus. Sida ngani ni Birnabi, ni Simyun kay palayaw si Nigir, si Lusyu taga Sirini, si Manain patar-ari sa tabid ni Gubirnadur Hirudis hanggan si Saulu. 2 Sa kanda magpauray sa samba nida sa Panginuun, sinabi Ispiritu Banal sa kanda magkun, "Ipablag niyu sida ni Birnabi ni Saulu dahil sida kang pinili hampay tumupad sida sa kang buruwatun kang ihinanda para sa kanda." 3 Pagka nagpauray waya gid sida sa darangin, kinup-an nida kamang sida ni Birnabi ni Saulu bag-u kanda sinugu tag sa buruwatun. 4 Nakan ngani pagka sida sinugu Ispiritu Banal, nag-ati sida ni Birnabi ni Saulu atag sa lawud sa banwa Silusya sa baybay dagat. Bag-u siyun ginan nagsakay sida nagdipay atag sa Sipru pag puru sa karaw-an dagat. 5 Pagka sida rinmas-ug sa banwa Salamina, itinudlu nida ti Bagaw Diyus sa manga tawu sa manga balay tiripnan manga Hudiyu. Kaibahan nida kanda kaawat si Huwan Markus. 6 Ginan sa Salamina ras-ug sida sa banwa Papus. Pagka sida sa Papus, nakitan nida ti usa ka tawu may salumangka. Pag-akuun niya siya kunu purupita, kay ngaran tunda pag tawu si Bar-Hisus. 7 Kaibahan siya ni Gubirnadur Sirhiyu Paulu, matinudukun tunda pag gubirnadur. Ipinab-ul ni Gubirnadur sida ni Birnabi ni Saulu hampay mamatingi siya sa Bagaw Diyus. 8 Tunda pag manugsalumangka nu sa bagaw Giriyigu kay palayaw si Ilimas. Sinangsala ni Ilimas sida ni Birnabi hampay balaw sumarig sa kan Hisus ti gubirnadur. 9 Lubus sinuldan Ispiritu Banal si Saulu, kay usa ka ngaran si Pablu. Tinurun gid ni Pablu si Ilimas, 10 bag-u kay sinabi magkun, "Kawu parihu sa diyablu kanmu ugali. Maglaban kawu sa tanan kaayadan, pasay yi sa kadayaan hanggan sa kalukuhan. Hayga lugud pirmi gustu nimu pagbaliwun kapudilan ti katutuuhanan tungkul sa Panginuun? 11 Taynguna kawu parusahan yi Panginuun. Nakan mabuta yi kanmu manga mata, dugay gid bag-u kawu kumakit maan sa marayaw." Pagka sinabi ni Pablu tunda, susun yi nasaydan ni Ilimas nagdulum kay mata, napsa yi, bag-u nan-garapgap kay kamang hampay may umabat sa kanya. 12 Pagka nakitan gubirnadur tunda, sinmarig yi ngani siya sa kan Hisus. Naglingut siya sa kanda ni Pablu itinudlu tungkul sa Panginuun. 13 Bag-u ginminan sinmakay sida ni Pablu ginan sa banwa Papus, nagdipay atag sa banwa Pirga sa Pampilya pag daga. Pagka sa Pirga napablag sa kanda si Huwan Markus, nuli yi maan siya sa Hirusalim. 14 Ginan sa Pirga napadayun sida ni Pablu kanda lakaw bag-u nakaras-ug sida sa banwa Antiyukya sa daga Pisidya. Pagka sa sirang pamahari, sinmaka sida sa balay tiripnan manga Hudiyu bag-u tinmukaw. 15 Pagka binasa usa ka tawu ginan sa Kasuguan ni Muysis hanggan ginan sa Kasuratan manga Purupita, nagsabi ti pangulu balay tiripnan sa usa ka tawu, sabihi sida ni Pablu magkun, "Manga kaparihu nimi Hudiyu, nu kamu may iadal sa ikarig-un manga tawu, tultula yi niyu." 16 Nakan tinmindug si Pablu, pinaamanan niya ti manga tawu danga sida umingay bag-u namaliwanag siya magkun, "Kamu duy pag manga kaparihu niku Israilita hanggan kamu pag manga balaw Hudiyu manga niabay yi sa surundanun Hudiyu, kamu tanan pagpatingi sa kang paliwanag. 17 Pinili Diyus ti kaapuapuhan nasyun Israil kanda nanday-uhan ati sa Ihiptu. Pinayamu niya sida, binwat usa ka daka pag nasyun. Bag-u sa kay gid daka pag kamaskihan ipinalwas niya sida ginan sa kanda nanday-uhan sa Ihiptu. 18 Bag-u sa sulud upatpulu ka timpu tiniis yi lang Diyus kanda magbugya magsunud sa kanya. 19 Ipinadaug niya sa kanda ti pitu ka nasyun tawu sa daga Kanaan, 20 bag-u ipinakaun yi niya ti daga sa kanda, sa kay pinili pag nasyun. "Bag-u may pinili ti Diyus sa nasyun Israil manga manughusay tugka sa udas ni Purupita Samwil bag-u siya maan ti nagpangulu sa kanda. 21 Pagka sida nanhagad hari, ipinakaun Diyus sa kanda si Saul, kan Kis anak, kan Binhamin linahi hampay siya maghari sa kanda sa sulud upatpulu ka timpu. 22 Pagka binahasan yi siya Diyus, si Dabid maan ti pinili Diyus hampay kanda hari. Nagpasnu ti Diyus sa kan Dabid magkun, 'Nakitan niku kan Hisi anak si Dabid, imaw yi gid kang pagbayaun pag tawu, masurundun siya sa tanan niku nagustuhan.' 23 Ginan sa kay manga linahi ni Dabid, pinili Diyus si Hisus hampay siya ti Manugribri nasyun Israil angay sa kay ipinangaku Diyus kaybi di waya. 24 Udwaya nakaumpisa si Hisus kay buruwatun, daan itinudlu yi ni Huwan sa buu nasyun Israil hampay iampu nida kanda manga kasalanan bag-u itulbaw. 25 Pagka arani yi matapus kan Huwan buruwatun, sinabi niya sa manga tawu magkun, 'Kanyu hantup si unu nguna aku? Balaw aku ti kanyu paggagadun. Rumas-ug siya sa kang uryan. Unman aku may karampatan makalubad kay higut niya lapak.' 26 Magkun si Pablu, "Manga kaparihu niku Hudiyu, manga linahi ni Abraham hanggan kamu pag manga balaw Hudiyu manga niabay sa surundanun Hudiyu, kita yi duy ti pinadakitan barita tungkul sa inda pag karibrihan. 27 Ti manga taga Hirusalim hanggan kanda manga pinunu unman nakakilala sa kanya kuntay siya yi ti Manugribri. Unman diman naunawaan nida ti isinurat manga purupita kanda pagbasahun kada sirang pamahari. Dapat sida ngap ti nagtupad sa manga binagaw purupita sa kanda magsintinsiya sa kan Hisus sa kamatayan. 28 Madi sida unman may nakitan sa kanya dapat ikasintinsiya sa kamatayan, dapat kanda ngap hinagad sa kan Pilatu hampay siya ipamatay. 29 Pagka tinupad nida ti tanan isinurat tungkul sa kanya, bin-ul nida siya ginan sa kurus bag-u kanda ipinauli sa tinaguktukan batu. 30 "Dapat siya binuhi maan Diyus. 31 Bag-u sa sulud dugay pag udas pirmi napakakit siya sa manga nagkuyug sa kanya kaybi sa kay nag-ati sa Hirusalim ginan sa Galiliya. Taynguna tunda yi ngani pag manga tawu ti manugbarita tungkul sa kan Hisus sa manga Israilita. 32 Nakan kami nagsitay hampay itultul sa kanyu ti Mayad pag Barita magkun, ti manga ipinangaku Diyus kaybi sa manga kaapuapuhan manga Hudiyu, tinupad yi niya taynguna para sa kanta, una sa kanda manga linahi una sa manga balaw Hudiyu, dahil binuhi niya maan si Hisus. Parihu sa isinurat sa ikadwa pag Kanta magkun, 'Kawu kang anak, taynguna aku kanmu yi Ama.' 34 "Tungkul sa kay nagbuhi maan niya sa kan Hisus hampay dayu makalakaw karunutan hanggan aban, inda kay sinabi Diyus magkun, 'Pihu gid pakan-an niku kamu kaayadan angay sa kang pakiusa sa kanyu, ga kang diman ipinangaku sa kan Dabid.' 35 "Bag-u sinabi waya Diyus sa iba Kasuratan, 'Unman pahintulutan nimu ti bangkay nimu matinupadun pag Suruguun makalakaw karunutan.' 36 "Pagka natupad ni Dabid ti kagustuhan Diyus sa ati katpung pag manga tawu, namatay siya bag-u siya ilinbung kataid sa kay manga gurang, nakalakaw karunutan kay bangkay. 37 Dapat si Hisus ti binuhi maan Diyus, unman siya nakalakaw karunutan. 38 Nakan ngani duy, kailangan maalaman niyu tanan kuntay ginan sa nangyari sa kan Hisus pag-itudlu sa kanyu ti kapatawadan sa kanyu manga kasalanan. Pagmaalaman yi gid niyu, ti kada tawu nu magsarig sa kan Hisus, siya iribri sa tanan niya kasalanan. Dapat nu siya magsarig sa kay pagtupad sa Kasuguan ni Muysis unman siya may kapatawadan sa kay manga kasalanan. 40 Nakan ngani pag-aman gid kamu duy sa unman mangyari sa kanyu ti isinurat sa Kasuratan manga Purupita magkun, 41 'Pagbantay kamu, kamu pag manga manuglapastangan, Palingutlingut lang kamu midamhak. Dahil ti kang buwatun sa kanyu kaudasan unman gid niyu pagpaniwalaan, Una may magpaliwanag sa kanyu.' " 42 Pagka magluwas yi sa balay tiripnan sida ni Pablu ni Birnabi, sinabi manga tawu sa kanda magkun, "Kailangan duy pagpaliwanag maan kamu sa kanmi tungkul sa inda pag manga katutuuhanan sa atubangan pag sirang pamahari." 43 Pagka ginminan sida sa balay tiripnan mayamu tawu kinmuyug sa kanda ni Pablu ni Birnabi, una manga Hudiyu una manga balaw Hudiyu manga niabay sa surundanun Hudiyu. Bag-u pinaliwanagan waya sida ni Pablu magkun, "Pagparargu kamu sa kanyu pagsarig sa kay kaayadan Diyus." 44 Pagka sa usa maan ka sirang pamahari, harus nagtipun ti tawu banwa hampay magpatingi sa Bagaw Diyus. 45 Dapat ay pagka nakitan manga Hudiyu ti kayamuan gid tawu, naghirak gid sida nakan pinahimudil lang nida kay manga pagsabihun ni Pablu, minura waya nida siya. 46 Dapat matutum di kanda naisipan nida ni Pablu ni Birnabi magkun, "Sa kanyu dapu kailangan pag-itultul ti Bagaw Diyus. Dapat ay kainda ginan kami dayi sa kanyu. Ati yi kami sa manga balaw Hudiyu. Dahil ipinurya niyu ti Bagaw Diyus ag pinasnuan niyu kanyu sadili kuntay unman may karampatan kamu sa tutuu pag buhi unman may katapusan. 47 Dahil kainda kay isinugu Panginuun sa kanmi magkun, 'Ipinakana niku kawu ga sulu sa manga balaw Hudiyu hampay ibarita nimu ti karibrihan sa tanan tawu sa bilug kalibutan.' " 48 Pagka nadnugan manga balaw Hudiyu kay manga sinabi ni Pablu, nakabaya gid sida nagdayaw gid sida sa kay Bagaw Panginuun. Tunda pag manga tawu kay pinili Diyus hampay makatanggap tutuu pag buhi unman may katapusan nagsarig ngani sa kan Hisus. 49 Nakan ngani nilantag yi ti Bagaw Panginuun sa tanan manga rugar ati. 50 Dapat ay nag-udyuk ti manga Hudiyu sa manga mayaman pag babayi manga niabay sa surundanun Hudiyu hanggan sa manga lalaki may kangaranan sa banwa hampay unuunuhun nida sida ni Pablu ni Birnabi. Bag-u tinulak ngani sida siyun ginan pag manga rugar. 51 Nakan pinagpag nida duwa ti galbuk ginan sa kanda lulud ga tanda laban sa manga tawu nag-unuunu sa kanda, bag-u nag-atag sida ni Pablu sa banwa Ikunyu. 52 Dapat ti manga nagsarig sa kan Hisus sa Antiyukya may kabayaan gid sa kanda tagipusuun, lubus sida sinuldan Ispiritu Banal.
1 Katunda diman ti nangyari sa Ikunyu. Nag-ati sida ni Pablu ni Birnabi sa balay tiripnan manga Hudiyu. Mahal gid kanda itinudlu sa manga tawu, nakan mayamu gid ti nagsarig sa kan Hisus una Hudiyu una balaw Hudiyu. 2 Dapat may manga Hudiyu nagdayu sumarig sa kan Hisus. Pagka dugay inudyukan nida ti manga balaw Hudiyu hampay lumaban sa manga patar-ari. 3 Nadugay waya waydi siyun sa Ikunyu sida ni Pablu ni Birnabi, matutum kanda naisipan kanda nanudlu sa manga tawu tungkul sa Panginuun. Pinakan-an sida Panginuun kamaskihan hampay makabuwat makadululaw pag manga tanda kay puruyba kuntay tutuu gid kanda manga tudlu tungkul sa kay mayad nalub-anan Diyus. 4 Nakan ngani ti manga tawu sa banwa napabliwa ti iba sa manga Hudiyu, ti iba sa manga Apustul. 5 Bag-u pinagkausahan manga balaw Hudiyu hanggan manga Hudiyu kaibahan kanda manga pinunu hampay lumaban sa manga Apustul. Kanda gayak batuhun matyun sida ni Pablu. 6 Dapat ay pagka naalaman manga Apustul sida paggayakun yi, nagpalagiw sida ginan sa Ikunyu, nag-ati sa banwa Listara hanggan banwa Dirbi, sakup sa Likaunya pag daga. Nag-ati diman sida sa manga rugar sa palibut. 7 Itinudlu nida sa manga tawu ati ti Mayad pag Barita. 8 Ati sa Listara may usa ka tawu unman makakusug kay manga lulud. Ginan sa kay nianak lunu siya, unman nakalakaw kaybi ginan. 9 Matukawan siya namatingi sa kan Pablu paliwanag. Pagka naintindihan ni Pablu tunda pag tawu lunu may pagsarig hampay siya mapaayad, tinmurun si Pablu sa kanya bag-u kay sinabi magkun, 10 "Pagtindug yi duy kawu kalawis." Tinmindug siya, rargu nag-utbaw bag-u naglakawlakaw. 11 Pagka nakitan kayamuan tawu ti binwat ni Pablu, bigla nagbagaw sida sa daraka buka sa kanda pamagaw Likaunya magkun, "Nagsitay tag sa kanta ti manga diyus ginan sa langit ga histuda tawu." 12 Si Birnabi kanda iningarnan si Hupitir ag si Pablu kanda iningarnan si Mirkuryu, dahil siya ti manugpaliwanag. 13 Sa itangadan banwa may balay simbahan diyusdiyusan Hupitir. Pagka naalaman manug-asiwa sa balay simbahan nu hintay ti nangyari, nagbuul siya manga tudu baka kay pinaunuan manga busang kayu kay dinara tabug sa puun sabian, kay mana iyawun isagda nida tanan bilang kanda pinagkasamba sa manga Apustul. 14 Pagka naalaman nida ni Pablu ni Birnabi ti gayak manga tawu, ginisi nida kanda sadili rutay bilang ga mustara sa kanda unman magpasnu sa pagbuwatun manga tawu. Nagdali sida atag sa kayamuan tawu bag-u sinabi nida sa daraka buka, 15 magkun, "Danga duy buwatun niyu tunda. Kami manga tawu lang waydi parihu ga kanyu. Pag-itudlu nimi sa kanyu ti Mayad pag Barita tungkul sa kan Hisus hampay ipatlikud nimi kamu sa tunda pag manga buwat unman may kabuluhan ag hampay tudluan nimi kamu magsamba sa Diyus buhi. Siya ti naglalang sa manga langit, daga, dagat hanggan sa tanan tanan bagay. 16 Kaybi waya ginan pinasibut-an Diyus ti tanan nasyun tawu sa kanda lang sadili kagustuhan. 17 Madi katida kang-ud mana pag puruyba kay mayad niya buwat sa kanyu hampay makilala niyu siya. Kabay pinakan-an niya kamu uran ginan sa tungud hanggan abunda pag ani sa kay udas katpung. Pagpakan-an diman niya kamu kang-ud pag karan-unun hanggan kabayaan sa kanyu tagipusuun." 18 Madi mahal kanda ni Pablu ni Birnabi paliwanag, diit wadi udyi naampara nida ti manga tawu mag-iyaw kanda hayup hampay pag-isagda sa kanda. 19 Dapat ay may rinmas-ug ati sa Listara manga Hudiyu ginan sa Antiyukya hanggan ginan sa Ikunyu. Inudyukan nida ti manga tawu laban sa kan Pablu bag-u kanda binatu siya. Pagka kanda hantup tigbak yi si Pablu, kanda kinarudkud tag sa luwas banwa. 20 Dapat pagka nagtirindug sa kay palibut ti manga magsarig sa kan Hisus, tinmindug si Pablu bag-u nagbalik maan tag sa banwa. Pagka surip nag-ati sida ni Pablu ni Birnabi sa banwa Dirbi. 21 Itinudlu nida ni Pablu ni Birnabi ti Mayad pag Barita sa banwa Dirbi. Mayamu tawu ati kanda binutung sa magsarig sa kan Hisus. Bag-u binmalik maan sida tag sa Listara, sa Ikunyu hanggan sa Antiyukya. 22 Pinarig-un nida ti manga patar-ari, pinaanyuan danga sida umurung sa kanda pagsarig sa Panginuun. Nanudlu waya sida sa manga patar-ari magkun, "Dayu maiwasan nita ti mayamu pag kakurian bag-u kita makapasakup sa kay paghari Diyus aban." 23 Sa kada iglisya nagpili sida ni Pablu manga manug-asiwa para sa kanda. Bag-u nagpauray sida sa darangin, kanda iinintirga ti manga manug-asiwa sa Panginuun imaw kanda pagsarigan. 24 Sinarak nida ni Pablu ti daga Pisidya bag-u rinmas-ug sida sa daga Pampilya. 25 Pagka itinudlu nida ti Bagaw Diyus sa banwa Pirga, nag-atag sida sa lawud sa banwa Atalya sa baybay dagat. 26 Siyun ginan nagsakay sida nagdipay nuli maan atag sa banwa Antiyukya. Siyun diman kabay sa Antiyukya pag iinintirga kaybi sida ni Pablu ni Birnabi sa Diyus hampay kay papaladan sa buruwatun. Angay sa kay papalad Diyus kanda yi ngani tinupad ti buruwatun. 27 Pagka rinmas-ug sida sa Antiyukya, tinipun nida ti iglisya bag-u itinultul nida sa manga patar-ari nu kabitay sida ginamit Diyus sa tanan niya buruwatun ag nu kabitay ti Diyus nagbuwat paraan sa manga balaw Hudiyu hampay sida makasarig sa kan Hisus. 28 Nadugay waya sida ni Pablu ni Birnabi sa manga patar-ari sa Antiyukya.
1 May manga tawu nagluwang sa Antiyukya ginan sa Hudiya. Kanda tudlu sa manga patar-ari magkun, "Dayu mahimu kamu maribri nu unman kamu turiun dapu angay sa Kasuguan ni Muysis." 2 Sida ni Pablu ni Birnabi balaw napatalu sa mahigpit pag kalatadlunganan sa kanda. Nakan pagka dugay pinagkausahan nida kailangan umati sa Hirusalim sida ni Pablu ni Birnabi may kumuyug manga patar-ari taga Antiyukya hampay manhampang sa manga Apustul hanggan sa manga manug-asiwa iglisya tungkul sa inda pag kakurian. 3 Nakan sinugu ngani sida iglisya. Sa kanda maglakaw sa daga Pinisya hanggan sa Samarya itinultul nida nu kabitay ti manga balaw Hudiyu nagsarig yi waydi sa Diyus. Pagka nadnugan manga patar-ari inda pag manga barita, nakabaya gid ungud sida tanan. 4 Pagka rinmas-ug sa Hirusalim sida ni Pablu ni Birnabi hanggan kanda manga kaibahan, tinanggap sida iglisya hanggan manga Apustul hanggan manga manug-asiwa iglisya bag-u itinultul nida ni Pablu sa kanda nu kabitay sida ginamit Diyus sa tanan niya buruwatun. 5 Dapat may manga patar-ari diman sa kan Kiristu siyun manga napasakup sa surundanun manga Parisiyu. Tinmindug sida bag-u sinabi nida magkun, "Ti manga balaw Hudiyu nu nagsarig sa kan Hisus kailangan magpaturi. Kailangan diman sida tudluan hampay kanda tupadun ti Kasuguan ni Muysis." 6 Nagharampangan ti manga Apustul hanggan ti manga manug-asiwa iglisya hampay kanda pag-adalan inda pag kakurian. 7 Pagka dugay yi kanda mag-aragawan ayad, tinmindug si Pidru bag-u kay sinabi magkun, "Manga patar-ari, alam niyu kaybi sa kanta tanan aku ti napili Diyus manugpadakit Mayad pag Barita sa manga balaw Hudiyu hampay makadnug waydi sida ag makasarig diman sa kan Hisus. 8 Diyus lang ti makausisa sa tagipusuun tawu. Ipinakaun niya ti Ispiritu Banal sa kanda parihu diman sa kanta, imaw yi kay puruyba Diyus kuntay kay tinanggap sida. 9 Parihu lang kay magbantay Diyus una sa kanda una sa kanta. Pagka sida nagsarig sa kan Hisu-Kiristu, linumpiyu diman Diyus kanda tagipusuun sa kanda nagbuwat kasalanan. 10 Hayga kanyu pagsubukan ti Diyus? Hayga kanyu pagpakan-an ti manga patar-ari kakurian ga baba mabuyat, unman diman nakaya nita una nita manga gurang. 11 Danga duy katida. Kita nagsarig sa kan Hisus bag-u kita irinibri dahil sa kay mayad nabubut-un Panginuun Hisus. Katunda diman ti manga balaw Hudiyu nu magsarig sida sa kan Hisus." 12 Udyi nag-ingay sida tanan. Bag-u namatingi sida sa kanda ni Birnabi ni Pablu nanultul nu kabitay sida pinakan-an kamaskihan Diyus hampay makabuwat manga makadululaw pag tanda sa karaw-an manga balaw Hudiyu. 13 Pagka natapus kanda ni Birnabi ni Pablu tultulanun, si Santiyagu maan ti nagbagaw magkun, "Manga patar-ari, pagpatingi kamu sa kangku. 14 Kis-ab itinultul ni Simun kay pangaawa Diyus sa manga balaw Hudiyu, nakan sa kabag-u kay pinili sida hampay sida hanggan kay yi waydi nasyun. 15 Inda angay diman sa kay manga sinabi manga purupita. Inda ti isinurat magkun, 16 'Kay sabi Panginuun magkun, Aban aku bumalik, bag-u ibungsud maan niku kan Dabid balay dahil nagpu yi. Una nawasak yi, ipatindug maan niku kay balay, 17 Hampay ti tanan manga iba nasyun humanap waydi sa Panginuun, Ti manga balaw Hudiyu kang pinili hampay pumasakup sa kangku. 18 Inda kay sinabi ngani Panginuun imaw ti nagpasandam inda kaybi waya ginan.' " 19 Magkun si Santiyagu, "Nakan ngani nu para sa kangku pag isip, danga pakurianan nita ti manga balaw Hudiyu sa kanda magpakarani sa Diyus. 20 Dapat ay suratan nita sida sa danga sida kumaun karan-unun isinagda sa diyusdiyusan, danga sida magpamabayi magpanlalaki, danga sida kumaun taguban hayup nu in-gut unman nakaluwang kay dugu ag danga waydi sida kumaun dugu. 21 Dahil dugay yi pag timpu pagbasahun ti Kasuguan ni Muysis sa manga balay tiripnan kada sirang pamahari ag sa kada banwa pag-itudlu diman kay manga binagaw." 22 Nakan ngani pinagkausahan manga Apustul, manga manug-asiwa iglisya hanggan buu iglisya hampay pumili sida ginan sa kanda gurupu manga masugu nida tabug sa Antiyukya, kaibahan nida ni Pablu ni Birnabi. Bag-u pinili ngani nida si Hudas, kay usa ka ngaran si Barsabas, hanggan si Silas, parihu sida takinan manga patar-ari sa Panginuun. 23 Ipinadara nida kanda isinurat sa kanda ni Silas tabug sa Antiyukya. Kainda gid ngani kay basad pag surat magkun, "Kami duy, ti manga Apustul hanggan ti manga manug-asiwa iglisya magkamusta sa kanyu sa manga patar-ari balaw Hudiyu sa banwa Antiyukya, sa daga Sirya ag sa daga Silisya. 24 Nabaritaan nimi may manga tawu sitay ginan sa kanmi gurupu nag-asan sa kanyu, madi sida unman nimi sinugu. Nagpaaburidu kunu sida sa kanyu ag kanda manga adal nan-gulu sa kanyu. 25 Nakan pinagkausahan nimi pumili kami manga masugu tabug sa kanyu, ipakuyug sa kanda ni Birnabi ni Pablu, kanta pagmayadun pag manga patar-ari, 26 dahil ilinubus nida kanda sadili bilug hanggan naisipan sa buruwatun nita Panginuun Hisu-Kiristu. 27 Nakan ngani sinugu nimi tag sa kanyu sida ni Hudas ni Silas, hampay itultul nida sa kanyu ti kanmi isinurat sa inda pag surat. 28 Dahil angay sa udyuk Ispiritu Banal pinagkausahan nimi sa danga yi kamu pakurianan sa mabuyat pag manga bilin, nu ud inda lang ti dapat niyu tupadun, 29 danga kamu kumaun una hintay pag karan-unun isinagda sa manga diyusdiyusan, danga kamu kumaun dugu, una taguban hayup in-gut unman nakaluwang kay dugu ag danga kamu magpanlalaki magpamabayi. Inda pag manga bagay kailangan niyu iwasan hampay kamu maslalu waya rumig-un. Imaw lang tugka kanmi surat." 30 Bag-u linmakaw yi sida ni Hudas ni Silas. Pagka sida rinmas-ug sa Antiyukya, tinipun nida ti manga patar-ari bag-u ipinakaun nida ti surat sa kanda. 31 Pagka binasa nida ti surat, nakabaya gid ti manga tawu dahil pinarig-un maan sida sa kanda pagsarig. 32 Sida ni Hudas ni Silas manga purupita diman waydi, nakan nadugay waya sida ati nanudlu sa manga patar-ari hampay pagpabisugun kanda naisipan ag pagparig-unun kanda pagsarig. 33 Nagdugay waya sida ni Hudas ni Silas sa Antiyukya bag-u pagka magkauli yi, idinarangin sida manga patar-ari hampay sa kanda ti kahusayan Diyus bag-u pinauli ngani sida tag sa Hirusalim, tag sa manga nagsugu sa kanda. 34 Si Silas bay napatayak ati sa Antiyukya. 35 Siyun di gid sa Antiyukya sida ni Pablu ni Birnabi. Sida hanggan manga iba waya patar-ari nanudlu ag nagpaliwanag Bagaw Panginuun. 36 Pagka dugay sinabi ni Pablu sa kan Birnabi, magkun, "Pagbalik duy kita sa kanta uryan hampay sabangun nita ti manga patar-ari sa kada banwa kanta tinudluan Bagaw Panginuun. Duawan nita nu kabitay kanda pagsarig sa kan Kiristu." 37 Kan Birnabi gustu tabanun maan nida si Huwan, kay usa ka ngaran si Markus. 38 Dapat unman nagpasnu si Pablu, dahil napaminsan dapu si Markus sa kanda dapat ud napatapus sa buruwatun. Binmulag kabay si Markus sa kanda ati sa daga Pampilya. 39 Nagtalaluhan gid sida ni Pablu ni Birnabi. Pagka unman gid sida nagparasnuan, nagbululagan yi sida. Tinaban ni Birnabi si Markus. Sida nagsakay nagdipay atag sa Sipru pag puru sa karaw-an dagat. 40 Kan Pablu tinaban si Silas. Pagka sida magkalakaw yi, idinarangin sida manga patar-ari hampay papaladan sida Panginuun. 41 Bag-u linmakaw si Pablu kaibahan niya si Silas, namalibutan sida sa daga Sirya hanggan daga Silisya, pinarig-un niya ti manga iglisya.
1 Nag-ati diman si Pablu sa banwa Dirbi hanggan sa banwa Listara. May usa ka tawu ati sinmarig diman sa kan Hisus, kay ngaran si Timutiyu. Kay ina ni Timutiyu Hudiyu, napasakup diman sa kan Hisus. Kay ama Giriyigu. 2 Ti manga patar-ari sa Listara ag sa Ikunyu sa kanda magkilala sa kan Timutiyu siya kunu mayad pag tawu. 3 Kay gustu mana ni Pablu pagkuyug waydi sa kanya si Timutiyu. Nakan tinuri niya si Timutiyu, dahil alam tanan manga Hudiyu sa ati pag manga banwa kay ama ni Timutiyu Giriyigu. 4 Sa kanda maglakaw nida ni Pablu sa manga banwa ipinadakit nida sa manga patar-ari ti manga paanyu ginan sa manga Apustul hanggan ginan sa manga manug-asiwa iglisya sa Hirusalim. Bag-u sinabihan waya nida ti manga patar-ari kailangan kanda tupadun tunda pag manga paanyu. 5 Nakan nagmarig-un ti manga iglisya. Sirang sirang nagyamu maan ti manga magsarig sa kan Hisus. 6 Sinarak nida ni Pablu ti daga Pirigya hanggan ti daga Galasya, dahil unman pinahintulutan sida Ispiritu Banal hampay manudlu sa daga Asya. 7 Pagka rinmas-ug sida sa katpadan daga Misya, kanda mana gayak lumakaw sa daga Bitinya, dapat unman sida pinasibut-an Ispiritu ni Hisus. 8 Pagka nakalawuy yi sida sa daga Misya, naglus-ug sida atag sa banwa Turuwas sa baybay dagat. 9 Ati katpung pag yabi may Ipinakakit ti Panginuun sa kan Pablu. May usa ka lalaki taga Masidunya nakatindug nagdangup sa kan Pablu magkun, "Pagluwang duy kawu atag sa Masidunya, awati nimu kami." 10 Pagka naalaman ni Pablu ti Ipinakakit Panginuun sa kanya, susun naghiwat yi kami hampay magdipay atag sa Masidunya, dahil nasalman nimi kami yi ngani kay pagsuguun Diyus hampay itudlu nimi ti Mayad pag Barita sa Masidunya. 11 Nagsakay kami ginan sa Turuwas rargu tag sa Samutrasi pag puru sa karaw-an dagat. Pagka sa usa maan ka sirang rinmas-ug kami sa banwa Niyapulis. 12 Ginan sa Niyapulis kami linmakaw tabug sa banwa Pilipus, sakup diman sa bahagi daga Masidunya. Ti banwa Pilipus ulian manga taga Ruma. Siyun kami manga usa ka duminggu. 13 Pagka sa sirang pamahari nagluwas kami sa banwa, nag-ati kami sa pangpang sapa, kanmi isip barang ati may rugar dararanginan manga Hudiyu. Tinmukaw kami naghampang sa manga babayi nagtiripun ati. 14 May usa ka babayi namatingi diman sa kanmi kay ngaran si Lidya taga Tiyatira. Magtinda siya manga pisahan kundiman. Balaw Hudiyu si Lidya dapat niabay siya sa surundanun Hudiyu. Pinalug-ud Panginuun kay tagipusuun hampay maniwala siya sa kay itinudlu ni Pablu. 15 Napatulbaw siya hanggan kay manga kasunu balay Pagka itinulbaw siya tinaban niya kami magkun, "Nu sa kanyu magkilala sa kangku aku tutuu nagsarig sa Panginuun, kidayun duy kamu sa kang balay." Linugus kami tinaban niya nakan kami balaw yi binmugya. 16 Pagka kami mag-atag maan sa rugar dararanginan, nasulang kami usa ka anak babayi inapuan labang manughula. Panawuhun tawu siya ag daka pag kuwarta ti pagtanggapun niya manga amu dahil sa kay maghula. 17 Magpakadasun tunda pag anak sa kanmi ni Pablu magpakatawag magkun, "Inda pag manga tawu ti suruguun Diyus makapangyarihan sa tanan. Tumudlu sida sa kanyu nu kabitay kamu pag makakit karibrihan." 18 Imaw imaw diman kay buwat tunda pag anak babayi sirang sirang. Pagka dugay nauyamut si Pablu, nakan napasrangu siya tag sa anak bag-u sinabi niya sa labang magkun, "Sa kapangyarihan ngaran ni Hisu-Kiristu, kang pagsuguun kawu pagluwas yi kawu ginan sa inda pag babayi." Susun yi ngani nagluwas ti labang ginan sa anak babayi. 19 Pagka naalaman niya manga amu udyi masarigan mapakinabangan tunda pag anak, dinuksulan nida sida ni Pablu ni Silas, kanda kinarudkud atag sa palasa kanda ipinaatubang sa manga pinunu. 20 Idinimanda nida sida ni Pablu sa atubangan manga husgadu taga Ruma magkun, "Inda pag manga tawu Hudiyu. Magpan-gulu sida sa kanta banwa. 21 Ti manga ugali kanda pag-itudlu unman mahimu kanta patingihan una sundun, dahil kita manga taga Ruma." 22 Hanggan ti kayamuan tawu hinmampak yi waydi sa kanda ni Pablu ni Silas. Pinanggisi lang manga pinunu sa kanda magLukas kay rutay nida ni Pablu bag-u rargu ipinahampak nida sida. 23 Pagka sida ni Pablu ni Silas nasaktan yi gid sa bakul, pinirisu yi sida, pinaguwardiyahan mayad. 24 Pagka nadnugan bantay pirisuhan tunda pag bilin, isinulud niya sida sa sulud sulud gid pirisuhan, pinangaw niya kanda manga lulud. 25 Pagka karaw-an yi yabi magdarangin sida ni Pablu ni Silas, magkanta magdayaw sa Diyus. Magdungug diman ti iba manga pirisu. 26 Bag-u bigla gid linminug mabisug gid, natandug hanggan kay nabungsudan pirisuhan. Kadaka nabukasan ti tanan manga sabian, natangkas ti manga tarikada tanan manga pirisu. 27 Nimata ti bantay pirisuhan. Pagka nakitan niya bukas yi maaw ti manga sabian pirisuhan, ginabut niya kay baladaw, magpakimatay yi. 28 Dapat ay si Pablu nagbagaw gid daka magkun, "Danga duy nimu pagsakti kanmu sadili bilug. Kami inda di tanan tanan." 29 Ipinab-ul bantay ti manga sulu, bag-u nalagiw siya tag sa sulud pirisuhan, napadapa siya pagtakigan sa dala sa atubangan nida ni Pablu ni Silas. 30 Ipinaluwas niya sida sa pirisuhan, bag-u kay sinabi sa kanda magkun, "Hintay nguna duy kang kailangan buwatun hampay aku maribri?" 31 Nagsagut sida magkun, "Pagsarig duy kawu sa Panginuun Hisus bag-u maribri kawu hanggan kanmu manga kasunu balay." 32 Itinudlu nida ni Pablu ni Silas ti Bagaw Panginuun sa bantay pirisuhan hanggan sa kay manga kasunu balay. 33 Ati katpung diman pag yabi tinaban niya sida inugasan niya kanda manga biyag. Bag-u rargu siya hanggan kay manga kasunu balay napatulbaw. 34 Pagka nitulbaw yi, tinaban niya sida ni Pablu tag sa kay balay, bag-u kay hinayinan karan-unun. Lubus gid nakabaya ti bantay pirisuhan hanggan kay manga kasunu balay, dahil sida tinudluan ngani hampay sumarig sa Diyus. 35 Pagka surip sinugu manga pinunu kanda manga pulis tabug sa bantay pirisuhan pinadaran-an bilin magkun, "Palpasi yi nimu tunda pag manga tawu." 36 Ipinadakit maan bantay pirisuhan inda pag manga bagaw sa kanda ni Pablu magkun, "Nagbilin ti manga pinunu kamu kunu kailangan palpasan yi. Nakan duy mahimu kamu mighit yi, udyi kamu may pagkadalaan." 37 Dapat ay, sinabi ni Pablu sa manga pulis magkun, "Unman may nakitan sida buwat daut sa kanmi, dapat kanda ipinahampak kami sa atubangan kayamuan tawu bag-u kanda waya ipinapirisu kami. Manga nasakupan paman kami Ruma. Bag-u aw lugud kami ipalpas sa lihim? Dayu gid mahimu. Kailangan sida ti pagsitay hampay sida ti kipalpas sa kanmi." 38 Ipinadakit manga pulis inda pag manga bagaw ni Pablu sa manga pinunu. Nadala ti manga pinunu pagka naalaman nida nasakupan maaw Ruma sida ni Pabu ni Silas. 39 Nakan nag-ati ngani sida naghagad patawad sa kanda ni Pablu, bag-u kanda pinalpasan ginan sa pirisuhan. Nagpakihampang waya ti manga pinunu sa kanda ni Pablu hampay sida mana umighit yi ginan sa Pilipus. 40 Pagka sida ni Pablu nagluwas yi ginan sa pirisuhan, inmati maan gid sida sa balay ni Lidya. Kanda naras-ugan ati ti manga patar-ari. Kanda binilinan sida magkun, "Pagpakarig-un kanyu pagsarig sa Panginuun." Bag-u nighit sida ni Pablu ni Silas.
1 Pagka nakasarak sida ni Pablu sa banwa Ampipulis ag sa banwa Apulunya, rinmas-ug sida sa banwa Tisalunika. May balay tiripnan ti manga Hudiyu sa Tisalunika. 2 Angay sa kan Pablu ugali, nag-ati siya sa balay tiripnan. Tulu ka sirang pamahari nangatadlungan siya sa kanda ginan sa Banal Kasuratan. 3 Ipinaliwanag niya ti pagsabihun sa Banal Kasuratan. Itinultul niya kailangan mag-agwanta ti pinili Diyus Manugribri pag Hari bag-u buhiun maan ginan sa kamatayan. Magkun siya, "Inda pag Hisus kang pag-itudlu sa kanyu imaw yi ngani ti pinili Diyus Manugribri pag Hari." 4 Ti iba manga manugpatingi nagarya, napaminsan sa kanda ni Pablu ni Silas. Kumun diman ti mayamu manga Giriyigu manga niabay sa surundanun manga Hudiyu hanggan ti manga mayaman pag babayi balaw di pira napaminsan waydi sa kanda. 5 Dapat ti manga Hudiyu magkadaut nakan kanda tinipun ti manga tawu unman masyadu may kabuluhan bag-u kanda ginulu ti banwa. Bag-u dinugma nida kan Hasun balay sa kanda magpakahanap gid sa kanda ni Pablu ni Silas hampay nu makitan yi, ipaatubang nida sa tawu banwa. 6 Pagka unman nakitan nida sida ni Pablu ni Silas, kinarudkud nida si Hasun ag may iba waya pag manga patar-ari atag sa atubangan manga pinunu banwa bag-u kanda irininggit magkun, "Kanta banwa sinulud manga tawu magpan-gulu una lang naan pag Rumas-ug sida. 7 Kan Hasun pinasaka sida sa kay balay. Sida tanan maglabag sa manga batas ni Pangulu Hari, dahil pagsabihun nida may hari waya tuhay, kay ngaran si Hisus." 8 Pagka nadnugan manga tawu banwa hanggan kanda manga pinunu inda pag manga barita, nagulu yi lang gid sida tanan tanan. 9 Pagka si Hasun hanggan kay manga kaibahan binul-an nida kuwarta, kanda maan pinalpasan. 10 Ati katpung pag yabi pinaighit manga patar-ari sida ni Pablu ni Silas ginan sa Tisalunika atag sa banwa Biriya. Pagka sida rinmas-ug sa Biriya, sinmaka sida sa balay tiripnan manga Hudiyu. 11 Lalu waya mayad kahampang ti manga Hudiyu sa Biriya balaw lang ga sa Tisalunika. Lubus paggustuhan nida magpatingi sa kan Pablu tudlu. Sirang sirang pag-usisahun gid nida ti Banal Kasuratan hampay maalaman nida nu ngatay tutuu kan Pablu pagsabihun nu ngatay unman. 12 Mayamu tawu ati nagsarig sa kan Hisus. May manga mayaman pag babayi Giriyigu diman hanggan manga lalaki Giriyigu. 13 Dapat ay pagka nabaritaan manga Hudiyu sa Tisalunika kuntay itinudlu diman ni Pablu sa Biriya ti Bagaw Diyus, nag-ati sida inudyukan nida ti manga tawu banwa hampay magbuwat kaguluhan. 14 Nakan susun pinaighit manga patar-ari si Pablu atag sa baybay dagat. Dapat sida ni Silas ni Timutiyu siyun di sa Biriya. 15 Ti manga nagtibu sa kan Pablu kinmuyug sa kanya hanggan tugka sa banwa Atinas. Bag-u nuli maan sida tag sa Biriya may padakit bilin ginan sa kan Pablu atag sa kanda ni Silas ni Timutiyu, pag-usig kunu sida sa kanya dag yi dugay. 16 Sa kay mag-alagad waya ni Pablu sa kanda ni Silas ni Timutiyu sa Atinas, naaburidu gid kay tagipusuun dahil nakitan niya pasay yi may diyusdiyusan sa banwa. 17 Nakan pagka siya sa sulud balay tiripnan manga Hudiyu, nangatadlungan siya sa kanda hanggan sa manga balaw Hudiyu manga niabay sa surundanun manga Hudiyu. Kumun diman kay buwat sirang sirang sa manga tawu maglakawlakaw sa basad palingkihan. 18 May manga manugtudlu sa Ipikuryu hanggan sa Istuiku pag kalasi adal, nangatadlungan sida sa kan Pablu. Sinabi manga iba, "Hintay nguna kay ibug sabihun tunda pag magpadunungun pag tawu?" Magkun maan ti manga iba, "Magtudlu banta siya tungkul sa manga diyus sa iba pag manga nasyun." Nakan katida kanda pagsabihun, dahil pag-itudlu ni Pablu tungkul sa kan Hisus hanggan tungkul sa pagkabuhi uman. 19 Nakan tinaban nida si Pablu kanda dinara atag sa pulung manga kunsihal sa Ariyupagu bag-u kanda sinabi magkun, "Mahimu aw nguna maalaman nimi nu hintay pag bag-u adal inda ti kanmu pag-itudlu? 20 Udwaya aradnuganun nimi ti kanmu pagsabihun, nakan gustu mana nimi maalaman kay kahulugan." 21 Dahil ti tanan manga tawu taga Atinas hanggan ti manga magpanday-uhan, sirang sirang kanda buwat magtulultulan lang magparatingihan tungkul sa una hintay kanda paglingutan. 22 Nakan tinmindug si Pablu sa atubangan manga kunsihal sa Ariyupagu bag-u nagbagaw siya sa manga tawu taga Atinas tinipun siyun magkun, "Nakitan niku kamu maaw duy parasimba gid sa mayamu niyu pag manga diyus. 23 Sa kang maglakaw sa banwa, binantayan niku kanyu manga simbahan. Bag-u may nakitan aku usa ka bugtangan panagda may surat magkun, 'Sa unman magkakilala pag diyus.' Tunda yi pag Diyus ti kanyu pagsambahan madi unman kilala niyu siya, imaw yi ngani pag Diyus kang pag-itudlu sa kanyu. 24 Diyus ti naglalang sa daga hanggan sa tanan tanan bagay sa babaw daga. Siya yi tighari sa langit una sa daga, nakan unman siya nangulian sa manga balay simbahan binwat tawu kamang. 25 Una siya pagsirbihan tawu, ti Diyus unman magkaibug kanda manga panagda, dahil siya ngani tigpakaun kinabuhi, arup hanggan karabuhian sa tanan tawu. 26 Magkun si Pablu, "Kay linalang Diyus ti usa ka tawu hampay siya ti kinalahian tanan nasyun tawu nangulian sa babaw daga. Pagka udwaya linalang Diyus ti tawu, daan inisip Diyus ti kada tawu kay kaudasan niya buhi hanggan kay ulian pag daga. 27 Kay linalang Diyus ti manga tawu hampay hanapun nida siya, barang sa kanda maggarapgap mahiyaptan ngap nida siya. Nu sa ungud siya balaw arayu sa kanta sa kada usa, 28 dahil, 'Siya ti gimpuunan nita arup, nita kabisugan bilug hanggan nita kinabuhi sitay sa babaw daga.' Parihu sa sinabi niyu manga magpinangawat ambahan magkun, 'Kita tanan kay manga anak niya.' 29 "Kita ngani manga anak Diyus. Nakan danga nita isipun ti Diyus parihu sa gintu, una pilak, una batu binwat diyusdiyusan, lunsay pinathaw lang isip tawu bag-u binwat niya kamang. 30 Dugay pag kapanahunan balaw pag-alintanahun Diyus kay unman magkilala tawu sa Diyus. Dapat taynguna ibinilin Diyus sa tanan tawu sa una naan pag rugar patlikudi yi iampu kanda daut ugali. 31 May itinaning yi siya kaudasan hampay pihuun ti daut ti mayad. Tunda pag buruwatun kay iinintirga sa kay matadlung niya pag pinili. Kay pinatutuuhanan Diyus inda pagka kay binuhi maan tunda pag tawu." 32 Pagka nadnugan nida kan Pablu tudlu tungkul sa pagkabuhi maan manga namatay, nag-ayupaka ti iba. Dapat sinabi manga iba magkun, "Magkaibug waya kami mamatingi aban sa kanmu tudlu tungkul sa kanmu sinabi taynguna." 33 Nakan linmakaw yi si Pablu ginan sa kanda karaw-an. 34 May manga napaminsan sa kan Pablu, manga nagsarig sa Diyus. Nadara yi sa bilang si Diyunisyu, usa ka kunsihal sa Ariyupagu. May usa waydi ka babayi kay ngaran si Damaris ag may manga iba waya.
1 Pagka nakapaliwanag yi si Pablu sa manga kunsihal sa Ariyupagu, nighit siya ginan sa Atinas, nag-ati sa banwa Kurintu. 2 Pagka siyun sa Kurintu nisampak siya sa usa ka Hudiyu kay ngaran si Akila, taga Puntu. Bag-u lang nakaras-ug siya ginan sa Italya kaibahan kay asawa si Pirisila, dahil pinaighit ni Pangulu Hari Kalaudyu ti tanan manga Hudiyu ginan sa Ruma. Nansabang si Pablu sa kanda ni Akila, 3 bag-u nagdayun ngap siya sa kanda dahil parihu sida manugbuwat turda una si Pablu una sida ni Akila. 4 Sa kada sirang pamahari magpangatadlungan siya sa manga tawu sa balay tiripnan manga Hudiyu, magpan-garya sa manga Hudiyu una sa manga balaw Hudiyu hampay makapasakup sa kan Hisus. 5 Pagka rinmas-ug sida ni Silas ni Timutiyu ginan sa Masidunya, purus yi si Pablu sirang sirang sa kay magtudlu Mayad pag Barita. Pag-itultul niya sa manga Hudiyu si Hisus imaw yi ti pinili Diyus Manugribri pag Hari. 6 Pagka dugay naglaban yi sida sa kanya naglibak hanggan. Nakan winagwag ni Pablu ti galbuk sa kay rutay kay tanda laban sa kanda, magkun, "Kanyu yi sadili kasalanan nu kamu midamhak sa kaparusahan. Unman yi aku may saragtun. Taynguna ginan aku atag yi sa manga balaw Hudiyu." 7 Tinayakan ngani niya ti manga Hudiyu, nag-ati siya sa balay usa ka balaw Hudiyu niabay sa surundanun Hudiyu, kay ngaran si Tisyu Hustu. Ati pag nagdayun si Pablu. Kay balay ni Tisyu mataidan sa balay tiripnan manga Hudiyu. 8 Si Kirispu ti pangulu sa balay tiripnan. Siya hanggan kay manga kasunu balay nagsarig sa Panginuun. Mayamu manga tawu taga Kurintu namatingi diman sa kan Pablu. Pagka nagsarig sida sa kan Hisus, napatulbaw sida. 9 Pagka dugay napakakit ti Panginuun sa kan Pablu sa yabi. Magkun ti Panginuun, "Danga duy kawu magkadala. Sigi lang kawu sa kanmu magtudlu, danga gid mag-apas, 10 dahil aku sa kanmu di. Unman may umunuunu sa kanmu, dahil mayamu kang manga sakup sa inda pag banwa." 11 Nakan nadugay si Pablu sa Kurintu sa sulud usa ka timpu may unum ka bulan, nanudlu siya Bagaw Diyus sa manga tawu. 12 Pagka si Galyun pinatukaan sa pagkagubirnadur sa Akaya, nagkausa ti manga Hudiyu, dinakup nida si Pablu bag-u kanda ipinaatubang sa husgadu. 13 Sinabi nida sa kan Galyun magkun, "Inda pag tawu maggarya sa manga tawu hampay sida sumamba sa Diyus balaw angay sa batas." 14 Bumagaw yi mana si Pablu. Dapat sinabi ngap ni Galyun sa manga Hudiyu magkun, "Nu abi kanyu dimanda inda tungkul sa daut pag buwat aw ngatay tungkul sa mabuyat pag kasalanan laban sa batas, kailangan gid aku mamatingi mayad sa kanyu. 15 Dapat kanyu dimanda maaw tungkul lang sa manga bagaw, manga ngaran hanggan tungkul sa manga Kasuguan sa kanyu sa manga Hudiyu. Nakan aku dayu maghusay sa kanyu sa katunda pag harampangan. Pagbahala yi kamu." 16 Bag-u kay tinulak sida ginan sa balay hurusayan. 17 Pagka sa luwas yi, kanda dinuksulan si Sustinis ti manug-asiwa balay tiripnan nida, bag-u kanda pinulpug sa sugkadan balay hurusayan. Dapat udyi nagbati si Galyun. 18 Nadugay waya si Pablu sa manga patar-ari sa Kurintu. Bag-u siya namaalam sa kanda. Pagka siya rinmas-ug sa Sinkiriya napauguy yi kay buhuk, dahil nakatupad yi sa kay pangaku. Bag-u sinmakay siya nagdipay atag sa Sirya pag daga, kay kaibahan sida ni Pirisila ni Akila pag mag-asawa. 19 Pagka sida rinmas-ug sa banwa Ipisu, tinayakan ni Pablu sida ni Pirisila ni Akila siyun. Bag-u sinmaka siya sa balay tiripnan manga Hudiyu, nangatadlungan siya sa manga tawu siyun. 20 Kanda mana tinawidan si Pablu hampay dumugay waya sa kanda dapat unman siya nagpasnu. 21 Dapat ay pagka siya magkaginan yi, sinabi niya sa kanda, "Nu kay gustu Diyus, bumalik maan aku sitay tag sa kanyu." Bag-u siya nighit ginan sa Ipisu, nagsakay siya sa bangka 22 Pagka inmaput siya sa Sisariya, nagdugsun siya sa bangka bag-u linmakaw siya tabug sa Hirusalim. Pagka nanabang nagkamusta sa manga patar-ari sa Hirusalim, linmakaw maan siya tag sa Antiyukya. 23 Pagka siya nadugaydugay diit ati sa Antiyukya, nighit yi maan siya. Namalibutan siya sa manga kabanwabanwahan sa daga Galasya hanggan sa daga Pirigya, kay pinarig-un ti manga patar-ari sa kanda pagsarig. 24 May rinmas-ug sa Ipisu usa ka Hudiyu taga Alihandirya, kay ngaran si Apulus. Mahusay siya pag magtultulanun, mayamu diman kay magkaalaman sa Banal Kasuratan. 25 Natudluan siya mayad mayad tungkul sa ugali buhi kay itinudlu Panginuun. Masipag gid siya manudlu. Tama diman gid kay pag-itudlu tungkul sa kan Hisus. Dapat ay ti magkaalaman lang niya pag tulbaw imaw ti kan Huwan itinudlu. 26 Una sa balay tiripnan manga Hudiyu unman magkadala si Apulus magpaliwanag sa manga tawu. Pagka nadnugan nida ni Pirisila ni Akila kay paliwanag ni Apulus, tinaban nida siya tag sa kanda balay bag-u lalu waya malinaw pag ipinaliwanag nida sa kanya tungkul sa ugali buhi kay itinudlu Panginuun. 27 Pagka kay gustu ni Apulus dumipay atag sa Akaya, inawatan siya manga patar-ari sa Ipisu. Pinmadara sida surat tabug sa manga patar-ari sa Akaya hampay kanda gid tanggapun si Apulus. Pagka rinmas-ug si Apulus sa Akaya, mayad gid kay pinarig-un niya ti manga nagsarig sa kan Hisus dahil sa kay mayad nabubut-un Diyus. 28 Dahil udyi may sagut ti manga Hudiyu sa kay nangatadlungan ni Apulus sa kanda sa atubangan mayamu tawu. Ginan sa Banal Kasuratan itinultul niya si Hisus imaw ti pinili Diyus Manugribri pag Hari.
1 Sa katpung si Apulus sa Kurintu waya, rinmas-ug maan si Pablu sa Ipisu, lakaw sa babaw pag dalan. Pagka siyun sa Ipisu, nikabta siya sa manga nagsarig sa kan Hisus. 2 Bag-u kay pinaingana magkun, "Pagka kamu nagsarig sa kan Hisus, napasakup yi aw kamu sa Ispiritu Banal?" Nagsagut sida magkun, "Unman duy. Unman nimi naalaman kuntay may Ispiritu Banal." 3 Namaingana maan si Pablu magkun, "Nu katunda hintay pag tulbaw kanyu pinatulbawan?" Magkun maan sida, "Sa tulbaw duy ni Huwan." 4 Bag-u kay sinabi ni Pablu magkun, "Kan Huwan itinudlu pag tulbaw kay kahulugan tanda sa manga nag-ampu sa kanda manga kasalanan. Sinabi ni Huwan sa manga Israilita, kailangan sida sumarig sa Rumas-ug dumasun sa kanya, kay ibug sabihun sa kan Hisus yi ngani." 5 Pagka tunda ngani pag manga patar-ari sa Ipisu nakadnug sa kan Pablu paliwanag, napatulbaw yi ngani sida napasakup sa kay ngaran Panginuun Hisus. 6 Ikinupa ni Pablu kay kamang sa kanda bag-u sida lubus sinuldan Ispiritu Banal. Nagbagaw sida sa unman magkasalman pag pamagaw ag nagpurupita sida. 7 Manga sampulu may duwa sida ka tawu. 8 Sa sulud tulu ka bulan pirmi nag-ati si Pablu sa balay tiripnan manga Hudiyu, unman siya magkadala nanudlu gid sa kanda, magpangatadlungan sa kanda hampay tumanggap mana sida sa katutuuhanan tungkul sa kay paghari Diyus. 9 Dapat ti iba sa kanda maganit gid kanda tagipusuun, nagbugya sida maniwala. Sa atubangan kayamuan tawu nagbagaw waya sida daut tungkul sa ugali buhi kay itinudlu Panginuun. Nakan tinayakan yi lang sida ni Pablu. Tinaban niya ti manga nagsarig sa kan Hisus bag-u ati sa balay gadayan ni Tiranu nagpaliwanag siya sa manga tawu sirang sirang. 10 Balaw gid nag-apas si Pablu sa kay magpanudlu sa sulud duwa ka timpu. Nakan ti tanan tawu nangulian sa daga Asya nakadnug gid sa Bagaw Panginuun, una manga Hudiyu, una manga balaw Hudiyu. 11 Pinakan-an Diyus si Pablu kamaskihan hampay makabuwat siya balaw basta pag manga makadululaw. 12 Una kan Pablu panyu, una kay pamaunib pag rutay kanda dinara tabug sa may manga sakit. Bag-u nadura ti manga dahilan ag naglinuwas diman ti manga labang ginan sa tawu. 13 May manga Hudiyu magpalibutlibut magpalwas diman manga labang. Pinanghasan nida sampitun kay ngaran Panginuun Hisus sa manga inapuan labang. Sinabi nida sa manga labang magkun, "Dahil sa kan Pablu pag-itudlu pag makapangyarihan pag ngaran ni Hisus, kang pagsabihan kamu, pagluwas yi kamu ginan sa tawu." 14 May usa ka Hudiyu kay ngaran si Isiba. Pangulu manug-asiwa balay Diyus siya. May pitu ka anak lalaki si Isiba. Sida magpalwas diman manga labang. 15 Dapat sinagut sida labang magkun, "Alam niku si Hisus, nakadnug yi waydi aku tungkul sa kan Pablu, dapat si unu lugud kamu?" 16 Bag-u dinuksulan sida tawu inapuan labang, nangaragpu talu sida. Nalkas kanda manga rutay, nangabiyagan sida nalagiw ati ginan pag balay. 17 Nabaritaan inda tanan manga tawu sa banwa Ipisu, una manga Hudiyu una manga balaw Hudiyu. Nadala gid ungud sida tanan, lalu nagdayaw gid sida sa makapangyarihan pag ngaran Panginuun Hisus. 18 Mayamu manga patar-ari nagtapat sa atubangan kadamlan tawu magkun, sida nagbuwat diman waydi katunda. 19 Tinipun manga panhirian, manga may ingkantu, manga may dunungin kanda manga ribru tungkul sa kanda manga dunung bag-u kanda sinunug sa atubangan kayamuan manga tawu. Kanda binilang kay halaga ati pag manga ribru aput maaw sa limampulu ka libu ka pisus. 20 Nakan ngani, dahil sa kay makamaskihan buwat Panginuun, lalu waya gid mayamu tawu ti nakadnug sa barita tungkul sa kan Hisus. 21 Pagka nakalawuy tunda pag manga nangyari, inudyukan si Pablu Ispiritu Banal, kailangan siya lumakaw sa daga Masidunya, hanggan sa daga Akaya bag-u umati siya sa Hirusalim. Nagsabi siya magkun, "Nu aku makaati ginan sa Hirusalim, kailangan umati diman aku sa banwa Ruma." 22 Ipinauna yi niya tag sa Masidunya sida ni Timutiyu ni Irastu, duwa ka kaibahan niya sa buruwatun. Si Pablu napatayak waya dapu sa Asya. 23 Ati katpung balaw basta pag nagkalaguluhan ti manga tawu sa banwa Ipisu tungkul sa ugali buhi kay itinudlu Panginuun. 24 May usa ka manugpanday pilak ati, kay ngaran si Dimitriyu. Magpanday siya manga diit pag mustara balay simbahan ni Diyusdiyusan Artimis. Si Dimitriyu hanggan kay manga kaawat may pagtanggapun daka pag kuwarta sa tunda pag tarabahu. 25 Tinipun ni Dimitriyu kay manga kaawat hanggan ti iba waya manga manugpanday pilak siyun. Sinabi niya sa kanda magkun, "Alam diman niyu duy, ginan sa inda pag tarabahu nita pag binmalaybalay yi kanta kahamtangan. 26 Taynguna tandai niyu ti kanyu nakitan ag nadnugan. Dahil tunda ngani pag tawu si Pablu magtudlu sa manga tawu magkun, 'Ti manga diyusdiyusan binwat tawu kamang balaw ungud manga diyus, unman may kapangyarihan.' Masyadu mayamu yi tawu ginarya yi ni Pablu, naniwala sida sa kay pagsabihun, una sitay sa banwa Ipisu una sa harus tanan rugar sa buu daga Asya. 27 Nu katunda barang aban udyi pagbayaun manga tawu kanta buruwatun. Barang udyi paman pagpahalagaan aban manga tawu una kay balay simbahan ni Diyusdiyusan Artimis ag barang una hanggan si Diyusdiyusan Artimis udyi galangun aban manga tawu, madi imaw ti pagsambahun tanan taga Asya hanggan tanan tawu sa buu kalibutan." 28 Pagka nadnugan kayamuan tawu kay manga binagaw ni Dimitriyu, bigla sida masyadu nangisug nanriringgitan sida magkun, "Mamaski si Artimis manga taga Ipisu." 29 Nakan pagka dugay pasay yi kaguluhan ti banwa. Dinakup manga tawu sida ni Gayu ni Aristarku, kan Pablu manga kaibahan taga Masidunya. Bag-u mirinsanan nandaray-u ti kayamuan tawu atag sa lig-ung tiripnan paranuudan. 30 Magkaibug mana si Pablu umati waydi hampay umatubang sa kayamuan tawu, dapat inampara siya manga patar-ari. 31 Ti iba manga pinunu Asya manga mayad pag kakilala ni Pablu. Sida may sinugu atag sa kan Pablu pinaanyuan gid nida siya, danga gid umatag sa lig-ung tiripnan paranuudan. 32 Masyadu yi lang gid magulu kanda nagtiripun ati. Tuhay tuhay ti pag-iringgit manga tawu magsaragbangan, dahil unman diman alam ti kayamuan tawu nu hayga sida nagtiripun. 33 Pagka si Alihanduru ipinaatubang mana manga Hudiyu sa kayamuan tawu, naghantup ti iba barang may pagsabihun si Alihanduru, nakan sida nagtiripun. Pinaamanan niya ti manga tawu danga yi maingay hampay makapaliwanag siya mana sa kanda siya hanggan kay manga kaparihu Hudiyu unman may kasalanan. 34 Dapat ay pagka nakitan kayamuan tawu siya Hudiyu, lalu gid sida nanaragbangan namaragritan sa sulud duwa gid ka udas magkun, "Mamaski si Artimis pag diyusdiyusan manga taga Ipisu." 35 Pagka dugay ipinap-ut miyur banwa ti ingay kayamuan bag-u sinabi niya magkun, "Kamu duy pag manga taga Ipisu, pagpatingi sa kangku. Magkaalaman gid tanan tanan tawu ti banwa Ipisu ti namahala sa balay simbahan ni Artimis pag makamaskihan pag diyusdiyusan hanggan sa kanda pagsambahun pag batu nalagpak ginan sa langit. 36 Unman may tawu makapahimudil tunda. Nakan kailangan danga yi kamu magulu. Danga waydi kamu dalukdaluk. 37 Dahil inda pag manga tawu kanyu dinara sitay tag, unman sida may tinakaw ginan sa balay sambahan, unman diman sida mag-away sa kanta diyusdiyusan sa kan Artimis. 38 Nu sida ni Dimitriyu hanggan kay manga kaawat manugpanday may idimanda laban una sa kantapu pag tawu, bukas diman ti balay hurusayan, may manga pinunu diman. Kailangan pagdimanda ngani nu may idimanda hampay magharampangan sida. 39 Dapat nu may pagsabihun waya kamu, mahimu kanta paghampangan tunda angay sa batas nita. 40 Madala pag kahulugan. Nu kita idimanda sa inda pag kaguluhan taynguna pag sirang, kita ud may isagut dahil ud may pulus inda pag kaguluhan." 41 Pagkatapus kan Miyur sinabi tunda, pinauli niya ti manga tawu tag sa kanda manga balay.
1 Pagka nakalawuy ti kaguluhan, pinatipun ni Pablu ti manga patar-ari, pinarig-un niya kanda pagsarig sa kan Hisus. Bag-u siya namaalam sa kanda, nag-ati tabug sa Masidunya. 2 Pagka ati siya lakaw sa daga Masidunya, nansabang siya sa manga patar-ari. Mayamu kay itinudlu sa kanda hampay parig-unun kanda pagsarig. Bag-u siya nag-ati sa Akaya pag daga. 3 Nadugay siya sa Akaya tulu ka bulan. Bag-u inisip mana niya sumakay dumipay atag sa daga Sirya. Dapat ay nabaritaan niya siya paggayakun manga Hudiyu. Nakan ati maan siya lakaw sa kay uryan sinmarak sa daga Masidunya. 4 Kinmuyug diman sa kan Pablu kan Piru anak si Supatir taga Biriya, sida ni Aristarku, ni Sigundu taga Tisalunika, si Gayu taga Dirbi, hanggan sida ni Timutiyu, ni Titiku, ni Turupimu, lunsay manga taga Asya. 5 Nag-una ti manga iba sa kanmi bag-u kanda inalagad kami sa banwa Turuwas. 6 Pagka lawuy ti Kapistahan tungkul sa Tinapay unman may Pamadaka, sinmakay kami sa Pilipus bag-u kami dinmipay. Pagka sa ikalima pag sirang rinmas-ug kami sa banwa Turuwas, napaminsan maan kami sa manga iba ati. Nadugay kami sa Turuwas pitu ka yabi. 7 Pagka sa malambung duminggu, nagtiripun kami hampay magpakiusa sa karan-an. Bag-u nanudlu si Pablu sa manga tawu, pinalawig niya kay paliwanag hanggan karaw-an yabi, dahil kay gayak nu aldaw yi lumakaw yi siya. 8 Mayamu pag manga sulu siyun sa kanmi tiripnan pag suludsulud ati sa tungud pag ugpu salug. 9 May tinmukaw sa gaha usa kan kan-akan kay ngaran si Utiku. Pagka dugay yi kan Pablu paliwanag, masyadu yi magkatungka si Utiku. Pagka tinalu yi siya puyat, nalagpak ngap siya ginan sa ikatlu pag ugpu tag sa daga. Pagka kanda binahit, tigbak yi siya. 10 Dinmugsun si Pablu tag sa sirung bag-u napadapa siya sa kan Utiku babaw, kay hinagkung. Bag-u magkun si Pablu, "Danga duy kamu magkataranta. Buhi di siya." 11 Sinmaka maan si Pablu, nagpakiusa siya sa manga patar-ari sa karan-an, sinmaru diman siya sa Banal pag Yapun. Bag-u naghampang waya siya sa kanda dugay hanggan sa magkasurip bag-u siya linmakaw. 12 Inibahan nida ti kan-akan tag sa kay balay balaw yi may hintay, nakan lubus masulung maan kanda naisipan. 13 Inmuna kami sinmakay sa bangka atag sa banwa Asun hampay nu kami umaput yi sa Asun, ipasakay diman nimi si Pablu. Dahil inisip ni Pablu kay gustu lumakaw lang tugka sa Asun. 14 Sinulang niya kami sa Asun. Pagka nagsakay diman siya, minsan kami tanan nag-ati tag sa Mitilini. 15 Pagka ginmihit maan kami ginan sa Mitilini, nakaaput kami sa usa maan ka sirang sa Kiyu pag puru sa karaw-an dagat. Pagka sa ikadwa pag sirang nakaaput kami sa Samu pag puru sa karaw-an dagat. Bag-u sa ikatlu yi pag sirang rinmas-ug yi kami sa banwa Militu. 16 Dahil inisip ni Pablu udyi siya humapit sa banwa Ipisu hampay balaw yi mana siya dumugay sa Asya pag daga. Nagdali yi ngani siya hampay mana nu sa sirang Pintikustis pagsa Hirusalim yi siya. 17 Pagka siyun kami sa Militu, pinmasugu si Pablu tag sa Ipisu hampay kanda bul-un ti manga manug-asiwa iglisya ati. 18 Pagka sida rinmas-ug, sinabi ni Pablu sa kanda magkun, "Alam yi waydi niyu duy, nu kabitay kang ugali buhi kang di waya sa kanyu, ginan waya sa sirang kang kabag-u rinmas-ug sa Asya. 19 Lubus yi gid sa pakumbaba aku nagtupad sa buruwatun Panginuun, nanlumi aku sa kang tagipusuun, nag-agwanta sa aduk pag subuk, dahil pirmi paggayakun aku matyun manga Hudiyu. 20 Alam waydi niyu unman inirangan niku una hintay pag ikaayad niyu, bagkus ngap kang itinultul ag itinudlu sa kanyu una sa tiripun una sa kang magsabang sa kanyu manga balay sa kada usa. 21 Nangungud gid aku sa kang magpaliwanag sa manga Hudiyu una sa manga balaw Hudiyu, magkun kailangan gid sida pag-ampu sa kanda kasalanan sa atubangan Diyus, pagsarig sa kanta Panginuun Hisu-Kiristu. 22 "Taynguna, manga patar-ari, aku atag sa Hirusalim, magpasakup yi lang gid aku sa kay udyuk Ispiritu, madi ud alam niku nu hintay ti mangyari sa kangku ati sa Hirusalim. 23 Inda lang kang magkaalaman, sa kada banwa may ipinasandam gid ti Ispiritu Banal sa kangku kang patabgan ati sa pirisuhan hanggan mahigpit pag kakurian. 24 Dapat unman pagpahalgaan niku kang buhi, nu matupad lang niku kang katungkulan ag nu matapus lang ti buruwatun kay ipinakaun Panginuun Hisus sa kangku, kang pagtudlu ngani Mayad pag Barita tungkul sa kay mayad nabubut-un Diyus. 25 Magkun si Pablu, "Namatalapudan aku sa kanyu tanan ag nanudlu aku tungkul sa kay paghari Diyus. Dapat alam niku taynguna ginan udyi makitan niyu kang uyahun. 26 Nakan ngani taynguna pag sirang kang gid pagsabihun sa kanyu, unman aku may saragtun tungkul una sa kantapu sa kanyu, nu abi midamhak sa kaparusahan. 27 Dahil tinabu gid itinudlu niku ti tanan tanan ihinanda Diyus sa kanyu, unman gid may inirangan aku sa kanyu una di. 28 Ingatan duy niyu kanyu sadili hanggan ti iglisya dahil sida iinintirga Ispiritu Banal sa kanyu. Pangalagaan niyu ti iglisya Diyus kay sinakup niya pagka ibinuhus ti dugu niya Anak sa kay kamatayan. 29 Alam niku duy, nu sa kang uryan may Rumas-ug sa kanyu karaw-an manga tawu kanda ugali ga manga maisug pag simarun, unman may pangaawa. Dautun gid nida ti iglisya. 30 Una ginan diman sa kanyu sadili iglisya may manga tawu aban manudlu kapudilan sa manga patar-ari hampay kanda pasunudun tag yi sa patalang. 31 Nakan ngani, manga patar-ari, pag-ingat kamu, danga niyu malimtan kang nagtudlu sa kanyu yabi sirang sa sulud tulu ka timpu, tiniis niku ti mayamu pag kakurian. 32 "Taynguna duy pag-iintirga niku kamu sa Panginuun hampay ingatan niya kamu. Hanggan ti Bagaw tungkul sa kay mayad nabubut-un Diyus umingat waydi sa kanyu. Kay Bagaw Diyus ti makaparig-un sa kanyu. Imaw gid ti pumapalad sa kanyu kay kaayadan kay ihinanda Diyus sa manga tawu magpasakup sa kanya. 33 Unman aku may hinirak una kantapu pag gintu, pilak, una rutay. 34 Alam diman waydi niyu unman inirangan niku kang budlay hampay maghanap sa pangailangan niku hanggan sa pangailangan niku manga kaibahan. 35 Sa tanan niku binwat pinakakitan niku kamu usa ka mustara. Pagkatida diman kamu pagbudlay hampay awatan niyu ti manga malumuy. Danga malimtan ti binagaw Panginuun Hisus magkun, 'Lalu masulung ti magpakaun, balaw lang ga pinakan-an.' " 36 Pagka nakatapus kan Pablu manga sinabi linmuhud siya, nandarangin siya hanggan sida tanan. 37 Nanlumi gid sida tanan kanda hinagkung kinaawaan si Pablu. 38 Lalu gid ungud sida rinmuku dahil sa kay sinabi magkun, udyi makitan nida siya aban. Bag-u kanda itinibu siya tag sa bangka.
1 Pagka namaalam kami sa manga patar-ari sa Militu, nagsakay ngani kami, rargu nagdipay tabug sa Kus pag puru sa karaw-an dagat. Pagka sa usa ka sirang nakaaput kami sa Rudus pag puru. Siyun ginan dinmipay maan kami tag sa banwa Patara. 2 Pagka kami sa Patara, may nakitan kami bangka atabug sa daga Pinisya, nakan sinmakay kami ginan sa Patara. 3 Pagka dugay nagpakarani kami sa Sipru pag puru sa karaw-an dagat, kanmi linawyan, nakitan nimi baliwa sa wala. Nagparargu kanmi lakaw hanggan tugka sa daga Sirya. Pagka rinmas-ug sa banwa Tiru, dinmugsun kami ginan sa bangka, dahil ipadugsun waya nida kanda pangarga ati sa Tiru. 4 Ati sa banwa Tiru hinanap nimi ti manga patar-ari. Pagka nakitan nimi sida, dinmayun kami sa kanda pitu ka yabi. Inudyukan sida Ispiritu Banal, bag-u kanda sinabi sa kan Pablu magkun, "Danga kawu mag-atag sa Hirusalim." 5 Pagka lawuy pitu ka yabi, nighit maan kami siyun ginan naparargu di kanmi lakaw. Itinibu kami nida tanan, hanggan kanda manga asawa manga anak, tabug sa luwas banwa. Pagka sa baybay yi, linmuhud kami tanan nandarangin. 6 Pagka kami namaalam sa kanda, sinmakay maan kami sa bangka ag nuli maan sida tag sa kanda manga balay. 7 Ginminan ngani kami sa Tiru bag-u pagka dugay inmaput kami sa banwa Tulimaida. Nansabang kami sa manga patar-ari, nigya usa ka yabi. 8 Pagka sa usa ka sirang linmakaw maan kami ginan sa Tulimaida atabug sa banwa Sisariya. Ati sa Sisariya dinmayun kami sa balay ni Pilipi. Si Pilipi manugpadakit waydi sa Mayad pag Barita, kabilang siya sa pitu ka lalaki manga pinili kaybi sa Hirusalim. 9 Kan Pilipi manga anak upat ka daraga lunsay manga magpurupita. 10 Sa kanmi magdayun sa kanda ni Pilipi manga pira ka sirang, may rinmas-ug ginan sa Hudiya usa ka purupita kay ngaran si Agabu. 11 Pagka nag-ati siya sa kanmi, bin-ul niya kan Pablu huragkus bag-u ginapus niya kay sadili lulud hanggan kamang bag-u kay sinabi magkun, "Inda kay pagsabihun Ispiritu Banal magkun, 'Kainda waydi gapusun aban manga Hudiyu sa Hirusalim ti may apu inda pag huragkus bag-u kanda ipabahala siya sa manga balaw Hudiyu.' " 12 Pagka nadnugan nimi tunda, kami hanggan ti manga patar-ari taga Sisariya nagpakihampang mayad mayad sa kan Pablu danga gid mag-atag sa Hirusalim. 13 Dapat sinabi ni Pablu magkun, "Hayga katida kamu? Hayga kamu maglumi ag magparuku diman sa kang tagipusuun? Dahil una aku kanda gapusun una mamatay waya aku, handa gid aku dahil sa kang magpasakup sa Panginuun Hisus." 14 Pagka unman siya napatalu, udyi lang kami nag-ingay. Sinabi lang nimi, "Pagmasunud gid ti kagustuhan Panginuun." 15 Pagka nakalawuy pira ka sirang, naggayak yi kami bag-u linmakaw atag sa Hirusalim. 16 May kinmuyug sa kanmi manga patar-ari taga Sisariya. Dinara nida kami sa balay ni Manasun taga Sipru. Siyun kami pag dinmayun. Dugay yi pag timpu daan di si Manasun nagsarig sa kan Hisus. 17 Pagka kami rinmas-ug sa Hirusalim, masulung gid ti manga patar-ari kanda nagtanggap sa kanmi. 18 Pagka sa usa ka sirang, nansabang kami ni Pablu sa kan Santiyagu. Siyun diman hanggan ti manga manug-asiwa iglisya. 19 Pagka sida kinamusta ni Pablu, tinaluktukud itinultul niya sa kanda ti tanan binwat Diyus sa manga balaw Hudiyu dahil sa kay magsirbi sa buruwatun Panginuun. 20 Pagka nadnugan nida kan Pablu manga tultulanun, nagdayaw gid sida sa Diyus. Bag-u kanda sinabi sa kan Pablu magkun, "Alam diman nimu, patar-ari, balaw di pira ka libu ka Hudiyu nagsarig sa kan Hisus. Sida tanan mahigpit gid pag magtuun sa Kasuguan ni Muysis. 21 May nagbarita sa kanda kanmu kunu pag-itudlu sa manga Hudiyu ati sa manga banwa manga balaw Hudiyu, kailangan paglimtan yi nida ti Kasuguan ni Muysis. Pagsabihan kunu nimu sida danga yi turia kanda manga anak, danga yi sida mag-ugali angay sa ugali manga Hudiyu. 22 Hintay nguna ti kailangan nita buwatun? Dahil pihu gid naalaman yi nida kawu rinmas-ug sitay. 23 Sunda duy nimu ti kanmi pagsabihun sa kanmu. May upat ka lalaki sitay sa kanmi nagpangaku sa atubangan Diyus. 24 Pagpaminsan kawu sa kanda, tupada niyu ti manga ibinilin sa Kasuguan hampay malumpiyu kamu sa kay magbantay Diyus. Pagsakup kawu sa kanda manga gastus hampay makapauguy yi sida kanda buhuk. Nu katunda kanmu buwatun, maalaman tanan tawu unman maaw tutuu ti manga ibinarita manga iba tungkul sa kanmu. Bagkus ngap kanmu ugali angay diman waydi sa Kasuguan ni Muysis. 25 Nu bay tungkul sa manga balaw Hudiyu manga nagsarig sa kan Hisus, pinasuratan yi nimi sida tungkul sa kanmi pag-isipun, kailangan sida danga kumaun manga karan-unun isinagda sa diyusdiyusan, danga sida kumaun dugu, danga sida kumaun taguban hayup nu in-gut unman nakaluwang kay dugu, ag danga sida magpamabayi, magpanlalaki." 26 Nakan pagka sa usa ka sirang, tinaban ni Pablu tunda pag manga lalaki bag-u tinupad nida ti kailangan buwatun hampay malumpiyu sida sa kay magbantay Diyus. Pagka nitupad yi ni Pablu tunda bag-u sinmaka siya sa balay Diyus hampay magpaalam nu kapira pag matapus ti taning pag udas sa paglumpiyu bag-u isagda yi nida sa Diyus kanda manga hayup matyun sunugun tungkul sa kada usa sa kanda. 27 Pagka arani yi matapus ti pitu ka sirang, may manga Hudiyu taga Asya nakakit sa kan Pablu ati sa balay Diyus. Ginulu nida ti kayamuan tawu bag-u kanda dinakup si Pablu. 28 Namagrit sida magkun, "Kamu duy pag manga Israilita, awati niyu kami. Inda yi ngani pag tawu tigtudlu sa tanan manga tawu una naan pag rugar laban sa nasyun Israil, laban sa Kasuguan ni Muysis ag laban diman sa inda pag balay Diyus. Tuhay waya siti, nagtaban waya siya manga balaw Hudiyu atag sa sulud balay Diyus. Nilapastangan niya inda pag sakup Diyus pag balay." 29 Nakan katida kanda sinabi, dahil nakitan nida si Pablu sa banwa kay kaibahan si Turupimu taga Ipisu. Kanda hantup dinara ni Pablu si Turupimu tag sa sulud balay Diyus. 30 Nagulu yi gid ti tawu banwa. Namalalagiwan minsan ti tanan tawu tag sa kan Pablu bag-u kanda dinusmugan, kanda kinarudkud atag sa luwas balay Diyus, susun yi kanda tinalakpan ti manga sabian. 31 Kanda mana matyun yi si Pablu. Dapat may tawu nagpaalam sa kumandir manga sundalu magkun, "Magulu yi ti tawu banwa Hirusalim." 32 Susun bin-ul kumandir kay manga kapitan hanggan manga sundalu, nalagiw sida tanan atag sa kayamuan tawu. Pagka nakitan manga tawu ti kumandir hanggan kay manga sundalu, inapasan nida kanda magpulpug sa kan Pablu. 33 Nagpakarani ti kumandir bag-u kay dinakup si Pablu, kay ipinagapus duwa ka tarikada. Nagpaingana ti kumandir magkun, "Si unu inda pag tawu, hintay lugud kay binwat?" 34 Dapat tuhay tuhay ti irininggit manga tawu. Udyi magkaalaman kumandir nu hintay ti nangyari, dahil masyadu yi pag kaguluhan. Nakan sinabihan niya kay manga sundalu, daran-a yi nida si Pablu tag sa barak. 35 Pagka sida rinmas-ug sa may agdan, kinabyaw ngap manga sundalu si Pablu, dahil masyadu maisug ti kayamuan tawu. 36 Dahil nagdinasun ti kayamuan tawu nanriringgitan magkun, "Matya yi siya." 37 Pagka pag-ipasaka yi manga sundalu si Pablu sa barak, sinabi niya sa kumandir magkun, "Mahimu aw duy aku magpakihampang sa kanmu?" Magkun ti kumandir, "Madunung aw kawu maggiriyigu? 38 Unman aw kawu taga Ihiptu? Unman aw lugud kawu tunda pag takinan manga naglaban sa gubirnu udwaya dugay nanaban upat ka libu ka lalaki tag sa pangawakawaan lunsay armadu?" 39 Nagsagut si Pablu magkun, "Bukun duy imaw. Aku Hudiyu, taga Tarsu sa daga Silisya. Ati gid kang ulian sa tunda pag mahalaga pag banwa. Pahintuluti duy nimu aku humampang sa inda pag kayamuan tawu." 40 Pinayagan ngani siya kumandir. Nakan tinmindug si Pablu sa katapusan pag halintang bag-u pinaamanan niya ti manga tawu hampay danga yi sida maingay. Pagka nap-ut kanda magriringgitan, nagbagaw ngani si Pablu sa kanda sa bagaw Hibriyu.
1 Magkun si Pablu, "Kamu duy pag manga katubu niku hanggan manga gurangun, pagpatingi sa kang paliwanag hampay maalaman niyu aku unman may kasalanan." 2 Pagka nadnugan nida kay nagbagaw sa kanda sa pamagaw Hibriyu, lalu sida udyi nag-ingay. Bag-u sinabi ni Pablu magkun, 3 "Aku duy Hudiyu taga Tarsu sa daga Silisya. Dapat atay sa banwa Hirusalim aku pag nagdaka. Sitay diman aku pag nag-&adal, si Gamalyil kang maisturu. Tinudluan niya aku mayad mayad sa pagtupad sa Kasuguan kanta minana ginan sa kanta manga ginurang. Ati katpung masipag gid aku sa kang katungkulan sa Diyus, parihu diman sa kanyu manga masipag gid taynguna. 4 Inunuunu niku ti manga magsunud sa inda pag bag-u ugali buhi, kang waya pinanmatay. Ipinapirisu niku sida una lalaki una babayi. 5 Una ti Pangulu Manug-asiwa balay Diyus una ti tanan manga paggurangunun sa nasyun makapatutuu diman sa kang pagsabihun kainda. Pinakan-an waya nida aku manga surat hampay kang darahun atag sa kanta manga kaparihu Hudiyu sa Damasku. Linmakaw ngani aku atabug sa Damasku hampay dakpun niku tunda ngani pag manga tawu magsunud sa bag-u ugali, bag-u kang mana darahun sida may pusas kay kamang sitay tag sa Hirusalim agud parusahan." 6 Magkun si Pablu, "Kang sa dalan di waya aranirani yi sa Damasku, tag kumaraw-an sirang katpung, bigla may rinmayaw sa kangku ginan sa langit masilaw masyadu. 7 Nisubsub aku sa daga bag-u nakadnug aku may nagbagaw sa kangku magkun, 'Saulu, Saulu, hayga pag-unuunuhun nimu aku?' 8 Pinmaingana aku magkun, 'Si unu kawu duy, Panginuun?' Sinmagut siya magkun, 'Aku si Hisus taga Nasarit, ti kanmu pag-unuunuhun.' 9 Nakitan diman niku manga kaibahan ti rayaw dapat unman nadnugan nida kay bagaw sa kangku. 10 Bag-u aku pinmaingana sa kanya magkun, 'Hintay duy Panginuun, ti dapat niku buwatun?' Sinabi maan Panginuun sa kangku magkun, 'Pagbangun yi kawu, pag-ati kawu sa Damasku bag-u may sumabi ati sa kanmu tungkul sa tanan niku ihinanda hampay buruwatun nimu.' 11 Pagka aku binmangun, unman maghiling kang mata dahil sa masyadu gid masilaw pag rayaw. Nakan inabat aku niku manga kaibahan atag sa sulud banwa Damasku. 12 "Ati sa Damasku may usa ka lalaki kay ngaran si Ananiyas. Masipag siya magsamba sa Diyus angay sa Kasuguan ni Muysis. Pagbayaun siya tanan manga Hudiyu mag-uli sa ati pag banwa. 13 Nag-ati siya sa kangku, tinmindug sa kang arani bag-u sinabi niya magkun, 'Patar-ari Saulu, pagmaghiling maan duy kanmu manga mata.' Susun yi ngani naghiling yi maan kang manga mata ag nakitan niku siya. 14 Bag-u kay sinabi ni Ananiyas sa kangku magkun, 'Kawu duy ti pinili Diyus nita ginurang hampay maalaman nimu kay kagustuhan niya, hampay makitan nimu kay matadlung pag Suruguun niya ag hampay madnugan nimu kay magbagaw. 15 Dahil kawu yi ngani kay manugpadakit aban hampay itultul nimu sa tanan tawu ti kanmu nakitan ag nadnugan. 16 Taynguna duy, danga magkatalinduwa. Pagtindug yi. Pagsampit sa kay ngaran Panginuun ag pagpatulbaw hampay lumpiyuhun kawu sa kanmu manga kasalanan.' " 17 Sigi waya kay paliwanag ni Pablu sa manga tawu magkun, "Nuli maan aku tag sa Hirusalim. Sa kang magdarangin sa balay Diyus, may Ipinakakit ti Panginuun sa kangku. 18 Nakitan niku ti Panginuun bag-u sinabi niya sa kangku magkun, 'Dag yi dugay kawu, pag-ighit yi kadali sitay ginan sa Hirusalim, dahil ti manga tawu sitay dayu maniwala sa kanmu pag-itultul tungkul sa kangku.' 19 Sinabi niku sa kanya magkun, 'Panginuun, alam yi gid waydi nida nu kabitay nanalapudan aku sa manga balay tiripnan hampay ipapirisu, ipasakit ti manga nagsarig sa kanmu. 20 Sa katpung minatay kanmu manugpadakit si Istiban, siyun diman aku. Nagpasnu diman gid aku sa kanda nagmatay sa kanya. Binantayan waya niku ti manga baLukas linkas manga tawu nagmatay sa kanya.' 21 Bag-u sinabi maan Panginuun sa kangku magkun, 'Pag-ighit yi duy kawu dahil kang suguun kawu tag sa arayu pag manga daga, tabug sa manga balaw Hudiyu."' 22 Siti tugka namatingi gid ti manga tawu sa kan Pablu pagsabihun. Dapat ay pagka sinabi niya siya sinugu Panginuun tabug sa manga balaw Hudiyu, nanriringgitan ti kayamuan tawu magkun, "Matya yi gid duy siya. Udyi kailangan siya mabuhi waya." 23 Sa kanda magriringgitan, magwasawas sida kanda manga rutay, magsarwag waya sida taypuk. 24 Nakan sinabihan kumandir kay manga sundalu, daran-a yi nida si Pablu tag sa sulud barak, hampaka gid siya hampay maalaman nu hayga masyadu siya pagringgitan manga Hudiyu. 25 Dapat pagka nagapus yi nida si Pablu ihinigut tag tungud, sinabi niya sa kapitan matindugan siyun magkun, "Angay aw lugud sa batas nu hampakun niyu ti usa ka tawu nu nasakupan siya Ruma ag udwaya paman nasintinsiyahan husgadu?" 26 Pagka nadnugan kapitan tunda, nag-ati siya sa kumandir bag-u sinabi niya, "Hintay kanmu buwatun? Nasakupan maaw Ruma tunda pag tawu." 27 Nakan nagpakarani ti kumandir nagpaingana sa kan Pablu magkun, "Ungud aw kawu nasakupan Ruma?" Nagsagut si Pablu, "Imaw ngani." 28 Bag-u magkun ti kumandir, "Daka pag kuwarta kang iginastus hampay aku nasakupan yi Ruma." Sinabi ni Pablu sa kanya, "Aku bay daan di nasakupan Ruma, sapagka hanggan kang manga gurang nasakupan diman Ruma." 29 Susun nagpakarayu yi ti manga manugbistiga sa kanya. Nadala diman ti kumandir, dahil nipagapus niya si Pablu, madi nasakupan siya Ruma. 30 Gustu gid maalaman kumandir nu hintay ti pag-idimanda manga Hudiyu laban sa kan Pablu. Nakan pagka sa usa ka sirang pinatipun niya ti manga pangulu manug-asiwa balay Diyus hanggan ti tanan manga Pinunu Hudiyu bag-u linbadan niya si Pablu kay pusas, ipinadugsun siya bag-u ipinaatubang sa Katipunan manga Pinunu.
1 Nagturun si Pablu sa buu Katipunan manga Pinunu Hudiyu bag-u kay sinabi magkun, "Manga kaparihu niku Hudiyu, kaybi ginan hanggan taynguna tugka nag-ugali aku sa malumpiyu kang tagipusuun hanggan naisipan sa atubangan Diyus." 2 Pagka si Ananiyas, ti Pangulu Manug-asiwa balay Diyus nakadnug sa kan Pablu binagaw, sinabihan niya ti manga nakatindug sa kan Pablu arani sampala siya sa bibig. 3 Bag-u sinabi ni Pablu sa kanya magkun, "Pihu kawu sampalun waydi Diyus, kawu ga lingub binarnisan malagti. Matukawan kawu asan pumihu mana sa kasalanan niku angay sa Kasuguan. Bati ipinasampal nimu aku, madi labag tunda sa Kasuguan?" 4 Sinabi manga matindugan siyun magkun, "Pagmurahun nimu ti pinili Panginuun pag Pangulu Manug-asiwa balay Diyus." 5 Magkun si Pablu, "Manga kaparihu niku Hudiyu, unman niku naalaman siya maaw ti Pangulu Manug-asiwa balay Diyus. Nisurat paman sa Banal Kasuratan magkun, 'Danga kawu magbagaw daut sa pinunu nimu nasyun.' " 6 Alam ni Pablu ti iba Pinunu manga Sadusiyu, ti iba Parisiyu, nakan iinalsa niya kay magbagaw sa kanda Katipunan magkun, "Manga kaparihu niku Hudiyu, aku Parisiyu, kang manga gurang Parisiyu diman waydi. Taynguna aku idinimanda dahil sa kang mag-asa mabuhi maan ti manga namatay." 7 Pagka nadnugan nida kan Pablu sinabi, nagtalaluhan ti manga Parisiyu hanggan ti manga Sadusiyu, nadwa yi ti Katipunan. Dahil magkun ti manga Sadusiyu unman magkabuhi maan ti manga namatay, unman kunu may manga anghil, unman diman may manga ispiritu. 8 Ti manga Parisiyu bay magpatutuu di sa pagkabuhi uman manga namatay hanggan sa manga anghil hanggan sa manga ispiritu. 9 Nakan nanriringgitan yi gid sida. Pagka dugay may tinmindug manga Manugtudlu Kasuguan, manga Parisiyu waydi. Mahigpit sida nangatadlungan magkun, "Unman gid may nakitan kami kasalanan sa inda pag tawu. Barang ungud may nagbagaw sa kanya una anghil una ispiritu." 10 Nag-amat di gid maan kanda magtalaluhan, nakan magkadala ti kumandir barang sab sangsangun nida si Pablu. Nakan sinugu niya kay manga sundalu atag sa kanda hampay bul-un nida si Pablu ginan sa kanda karaw-an bag-u darahun ipaslud maan sa barak. 11 Ati katpung pag yabi tinmindug ti Panginuun sa kan Pablu arani magkun, "Pagmatutum duy kanmu naisipan. Nagtultul kawu tungkul sa kangku sa atubangan manga tawu sitay sa Hirusalim. Katunda diman kailangan tumultul kawu tungkul sa kangku sa banwa Ruma." 12 Pagka surip nagpululungan ti manga Hudiyu, nagpangaku sida sa Diyus dayu sida mangaun manginum hanggan sa udwaya malibun nida si Pablu. 13 Mayamu sida ti may pangaku katida, balaw lang upatpulu ka tawu. 14 Bag-u nag-ati sida sa manga pangulu manug-asiwa balay Diyus hanggan sa manga paggurangunun sa nasyun, magkun sida, "Mahigpit duy kanmi ipinangaku sa atubangan Diyus, dayu gid kami manamit karan-unun hanggan sa ud malibun nimi si Pablu. 15 Nakan duy kamu hanggan ti Katipunan manga Pinunu pagpaabisu sa kumandir pagkun kailangan daran-un niya si Pablu sitay tag, kay singyanan hampay paingan-un waya gid niyu siya tungkul sa kay binwat. Alistu kami pumuut sa dalan hampay matyun siya." 16 Kan Pablu ari babayi may anak lalaki. Pagka nakadnug siya tungkul sa kanda magpuut sa dalan, nag-ati siya sinmaka sa barak bag-u itinultul niya sa kan Pablu kay nadnugan. 17 Tinawag ni Pablu ti usa ka kapitan bag-u kay sinabi sa kanya magkun, "Ibahi duy nimu inda pag kan-akan tag sa kumandir, may itultul siya sa kumandir." 18 Nakan inibahan ngani siya kapitan atag sa kumandir. Magkun ti kapitan, "Ti pirisu si Pablu nagtawag sa kangku, ibahi kunu niku inda pag kan-akan sitay tag sa kanmu, dahil may isabi kunu siya sa kanmu." 19 Inabat kumandir kan Pablu bapa tag sa un-an sa unman may magdungug, bag-u namaingana siya magkun, "Hintay duy ti kanmu isabi sa kangku?" 20 Sinmagut ti kan-akan magkun, "Nagkarasunduan ti manga Hudiyu hampay sabihan nida kawu nu mahimu ipadara si Pablu aldaw surip agud ipaatubang sa Katipunan manga Pinunu. Kay singyanan hampay paingan-un waya gid siya tungkul sa kay binwat. 21 Dapat danga kawu magpasnu sa kanda, dahil subra upatpulu ka tawu tigpuut sa dalan. Nagpangaku gid sida sa Diyus dayu kunu sida mangaun manginum hanggan sa ud malibun nida si Pablu. Una kainda handa yi sida mag-alagad sida sa kanmu sagut." 22 Sinabi kumandir sa kan-akan, "Pag-uli yi duy kawu. Danga mag-alaman una sa kantapu tungkul sa kanmu itinultul inda sa kangku." 23 Tinawag kumandir kay duwa ka kapitan bag-u kay sinabi sa kanda magkun, "Paghanda kamu duwa ka gatus sundalu, may pitumpulu waya ka sundalu lunsay masakyan sa manga kabayu ag may duwa waya ga gatus sundalu may bangkaw. Pag-alistu yi kamu hampay umatag sa Sisariya sab yabi pagka nakalawuy yapun. 24 Alistuhi diman niyu si Pablu kay manga sarakyan pag kabayu. Itibu niyu siya atag sa kan Gubirnadur Pilik. Ingatan niyu siya kaayad." 25 Bag-u may padara waya surat ti kumandir. Inda kay isinurat magkun, 26 "Aku si Kalaudyu Lisyas ti may surat tabug sa kanmu duy, kagalanggalang Gubirnadur Pilik. 27 Inda pag tawu dinakup manga Hudiyu kanda yi mana matyun yi. Pagka naalaman niku siya nasakupan Ruma, nag-ati aku kaibahan kang manga sundalu bag-u kang binawi siya. 28 Gustu niku maalaman nu hintay kanda dimanda laban sa kanya, nakan ipinadara niku siya tag sa Katipunan manga Pinunu nida. 29 Ati pag naalaman niku kanda dimanda laban sa kanya tungkul sa manga kakurian sa kanda Kasuguan. Dapat unman may idinimanda sida laban sa kanya kang-ud sa ikamatay una ikapirisu niya. 30 Pagka naalaman niku siya paggayakun yi matyun manga Hudiyu, susun ipinadara niku atag sa kanmu. Sinabihan niku kay manga kalaban kailangan sida pag-atubang sa kanmu hampay ipadnug nida kanda manga dimanda laban sa kanya." 31 Nakan bin-ul ngani manga sundalu si Pablu angay sa isinugu kumandir sa kanda bag-u pagka yabi yi kanda dinara siya sa banwa Antipatris. 32 Pagka surip binmalik maan tag sa barak ti manga sundalu, tinayakan nida ti masakyan sa kabayu pag manga sundalu hampay umiba sa kan Pablu. 33 Pagka sida rinmas-ug sa banwa Sisariya, ipinakaun nida ti surat sa gubirnadur bag-u kanda iinintirga si Pablu sa kanya. 34 Pagka binasa gubirnadur ti surat, pinaingana niya sa kan Pablu nu taga naan siya. Pagka naalaman niya siya taga Silisya, 35 sinabi gubirnadur magkun, "Patingihan duy niku kanmu kasu nu Rumas-ug ti manga magdimanda sa kanmu." Bag-u kay sinugu gubirnadur kay manga sundalu hampay kanda bantayan si Pablu sa balay kay nag-ulian kaybi ni Hari Hirudis.
1 Pagka nakalawuy lima ka sirang, rinmas-ug sa banwa Sisariya si Ananiyas imaw ti Pangulu Manug-asiwa balay Diyus, may kaibahan siya manga paggurangunun sa nasyun hanggan usa ka abugadu kay ngaran si Tirtulu. Pagka sida sa atubangan ni Gubirnadur Pilik, idinimanda nida si Pablu. 2 Pagka bin-ul yi si Pablu, binmagaw si Tirtulu. Itinultul niya nu hintay kanda dimanda laban sa kan Pablu. Magkun si Tirtulu, "Kagalanggalang Gubirnadur Pilik, dahil lang sa kanmu mahusay pag pangatungkulan, dugay yi nakitan nimi ti mayad gid pag kahusayan, mayamu diman kanmu binag-u angay sa ikaayad inda pag nasyun. 3 Pagbayaun gid nimi tunda, nakan kami magpasalamat gid sa kanmu una kapira una naan. 4 Dapat ay hampay balaw kawu kang abalahun, patingihan dapu nimu kami. 5 Dahil naintindihan nimi inda pag tawu magpangulu. Pagguluhun niya ti manga Hudiyu una naan pag Rumas-ug siya. Takinan siya manga tawu magsunud sa surundanun Nasarinu. 6 May gayak mana waya siya para maglapastangan sa balay Diyus, nakan kanmi dinakup siya. Sintinsiyahan mana nimi siya angay sa kanmi Kasuguan, 7 dapat ay rinmas-ug si Kumandir Lisyas bag-u kay inagaw siya ginan sa kanmi. 8 Sinabi ni Lisyas sa kanmi kailangan idimanda nimi siya sa kanmu. Pagka mabista nimu siya, maalaman diman nimu ti tanan nimi isinumbung laban sa kanya." 9 Nagkausa ti manga Hudiyu sa kan Tirtulu. Pinatutuuhanan nida ti tanan kay sinabi niya. 10 Pagka pinaamanan gubirnadur si Pablu hampay siya maan ti bumagaw, sinabi niya magkun, "Alam niku duy kawu dugay yi pag timpu ti maghusay sa inda pag nasyun. Nakan magbaya diman aku magsagut sa kanmu atubangan sa kanda manga dimanda laban sa kangku. 11 Udwaya sampulu may duwa ka sirang taynguna tugka aku rinmas-ug sa Hirusalim hampay manamba ati. Tutuu inda una paingan-un nimu sa manga iba. 12 Unman gid nakitan nida aku magdibati una sa kantapu sa balay Diyus. Unman diman nakitan nida aku magpangulu sa manga tawu sa manga balay tiripnan una sa banwa. 13 Unman diman sida may puruyba tungkul sa kanda manga dimanda laban sa kangku. 14 Unman duy pag-itanggi niku kang magsamba sa Diyus nimi manga ginurang angay ngani sa surundanun kanda pagkumnun salan. Dapat ay magpatutuu diman aku sa tanan nipalat sa Kasuguan ni Muysis hanggan sa tanan isinurat sa Ribru manga Purupita. 15 Parihu diman sa kanda mag-asa aku sa Diyus buhiun maan niya ti tanan tawu, ti manga matadlung hanggan ti manga unman matadlung. 16 Nakan pirmi aku mag-ugali sa mayad hampay malumpiyu kang tagipusuun hanggan kang naisipan sa atubangan Diyus una sa atubangan tawu. 17 "May manga pira ka timpu aku balaw sa Hirusalim bag-u binmalik maan aku ati hampay magtibu manga pakaun kuwarta sa kang manga kaparihu Hudiyu ag hampay magpakaun diman sa Diyus. 18 Katpung kanda nakakit sa kangku sa balay Diyus imaw ngap kang pagbuwatun. Nakatupad aku sa manga ibinilin sa Kasuguan hampay aku malumpiyu sa kay magbantay Diyus. Unman may mayamu tawu, unman diman may magulu. 19 Ti tawu lang siyun tunda ngani pag manga Hudiyu taga Asya. Mayad mana nu sida abi ti nakasitay hampay magdimanda sa atubangan husgadu nu may isumbung sida laban sa kangku. 20 Dapat inda ngani ti nakasitay, pagsabi sida nu hintay pag kasalanan kanda nakitan sa kangku sa kanda magbista sa kangku sa atubangan nida Katipunan manga Pinunu. 21 Barang masabi nida aku nagsalan sa kang binagaw sa kanda atubangan magkun, 'Taynguna aku idinimanda sa atubangan niyu dahil aku mag-asa buhiun maan Diyus ti manga namatay.' " 22 Kang-ud yi kay magkaalaman ni Pilik tungkul sa bag-u ugali kay itinudlu Panginuun. Nakan inapasan dapu niya ti bistahan. Magkun siya sa kan Pablu, "Aban nu Rumas-ug yi si Kumandir Lisyas, tapusun niku kanmu kasu." 23 Bag-u sinabihan niya kay kapitan magkun, "Guwardiyahi nimu si Pablu sa pirisuhan, dapat danga paghigpiti nimu. Danga pag-irangi kay manga manug-awat magsabang sa kanya." 24 Pagka nakalawuy pira ka sirang, linmuwang si Pilik kaibahan niya kay asawa si Durusila, usa ka babayi Hudiyu. Ipinab-ul ni Pilik si Pablu bag-u kay pinatingihan niya kan Pablu paliwanag tungkul sa pagsarig sa kan Kiristu Hisus. 25 Dapat ay pagka nagbagaw si Pablu tungkul sa mag-ugali sa mayad, tungkul sa magpigil sa sadili ag tungkul sa kaudasan kay magsintinsiya Diyus aban sa kalibutan, nadala si Pilik. Magkun siya sa kan Pablu, "Pag-atag dap maan kawu sa pirisuhan. Nu may rugar maan aku ipab-ul maan duy niku kawu." 26 Pirmi ngani pag-ipab-ul ni Pilik si Pablu bag-u kay paghampangun, dahil magsarig siya barang may ipakaun kuwarta si Pablu. 27 Pagka nakalawuy duwa ka timpu, si Pilik inublusan maan ni Pursiyu Pistu. Kay gustu ni Pilik siya di ti bayaun manga Hudiyu, nakan pinabay-anan niya si Pablu sa pirisuhan.
1 Tinanggap ngani ni Pistu kay katungkulan sa pagkagubirnadur sa daga Israil. Pagka nakalawuy tulu ka sirang, nag-atag siya sa Hirusalim ginan sa Sisariya. 2 Pagka ati siya sa Hirusalim ti manga pangulu manug-asiwa balay Diyus hanggan ti manga Pinunu manga Hudiyu nagdimanda laban sa kan Pablu. Pinakihampangan nida si Pistu, 3 hampay nu mahimu sa kanya, ipadara niya si Pablu atag sa Hirusalim. Nakan kanda mana kailangan si Pablu atag sa Hirusalim, dahil kanda paggayakun puutan siya sa dalan. 4 Sinmagut si Pistu magkun, "Ati di sa Sisariya pag napirisu si Pablu. Umati aku maan udyi dugay. 5 Nakan pagkuyug yi lang sa kangku kanyu manga Pinunu hampay idimanda nida tunda pag tawu nu siya may binwat kasalanan." 6 Nadugay waya si Pistu sa Hirusalim manga walu ka yabi hanggan tugka sa sampulu bag-u binmalik maan siya tag sa Sisariya. Pagka sa usa ka sirang tinmukaw siya sa balay hurusayan bag-u ipinab-ul niya si Pablu. 7 Pagka rinmas-ug ngani si Pablu, susun linibutan siya manga Hudiyu ginan sa Hirusalim. Mayamu pag manga sumbung mabuyat kanda binulwat laban sa kanya, dapat unman sida may puruyba kuntay tutuu kanda sumbung. 8 Bag-u sinmagut si Pablu sa kanda dimanda magkun, "Unman aku may binwat kasalanan laban sa Kasuguan manga Hudiyu, una laban sa balay Diyus, una laban sa Pangulu Hari." 9 Magkaibug si Pistu siya ti bayaun manga Hudiyu, nakan nagpaingana siya sa kan Pablu magkun, "Gustu aw nimu atag sa Hirusalim hampay husayun niku kamu ati?" 10 Sinmagut si Pablu magkun, "Atay aku sa atubangan husgadu ni Pangulu Hari. Kailangan sitay pag husayun kang kasu. Unman gid aku may binwat kasalanan sa manga Hudiyu, alam yi waydi nimu tunda. 11 Nu abi aku naglabag sa batas aw ngatay nu abi aku may binwat kadautan para kang ikamatay, unman diman kang iwasan tunda. Dapat nu unman waydi may pulus kanda manga dimanda laban sa kangku, unman diman kailangan aku ipabahala sa kanda. Kang gustu ipahusay niku kang kasu sa Pangulu Hari." 12 Naghampang dapu si Pistu sa kay manga kunsihal bag-u sinabi niya sa kan Pablu magkun, "Kanmu sinabi ipahusay nimu kanmu kasu sa Pangulu Hari. Nakan duy darahun ngani kawu atag sa Pangulu Hari." 13 Pagka dugay rinmas-ug sa Sisariya sida ni Hari Agripa ni Birnisi hampay mansabang sa kan Pistu dahil siya ti bag-u pag gubirnadur. 14 Sa kanda nanabang sa kan Pistu, itinultul niya sa hari tungkul sa kan Pablu kakurian. Magkun si Pistu, "Pagka si Pilik nighit sitay ginan, may tinayakan siya usa ka tawu atay sa pirisuhan. 15 Pagka aku sa Hirusalim, ti manga pangulu manug-asiwa balay Diyus hanggan ti manga paggurangunun manga Hudiyu nagpakarani sa kangku kanda idinimanda tunda pag tawu, kanda mana gustu kang sintinsiyahan yi. 16 Sinabi niku sa kanda magkun, angay sa batas manga taga Ruma nu may isinumbung, kailangan umatubang dapu tunda pag tawu sa manga nagdimanda laban sa kanya hampay pakan-an siya rugar makasagut sa kanda dimanda. Bag-u di nu malinaw kay kasalanan mahimu siya sintinsiyahan. 17 Nakan ngani, pagka nagluwang ti manga magdimanda sitay tabug, balaw yi aku nagpadugaydugay. Pagka sa usa ka sirang tinmukaw aku sa balay hurusayan bag-u kang ipinab-ul tunda pag tawu. 18 Pagka tinmindug kay manga kalaban, kang hantup barang mabuyat kay kasalanan nakan kanda pag-idimanda siya, dapat unman waydi. 19 Nagtalaluhan lang sida tungkul sa kanda surundanun ag tungkul sa usa ka tawu kay ngaran si Hisus. Namatay yi siya dapat kan Pablu pagkumnun buhi di siya. 20 Unman duy niku alam nu kabitay kang lutasun inda pag kasu. Nakan nagpaingana aku sa kan Pablu nu siya magkaibug atag sa Hirusalim hampay husayun niku sida ati. 21 Dapat ay sinabi ni Pablu kay gustu ipahusay kay kasu sa Pangulu Hari. Nakan pinabantayan niku siya sa pirisuhan hanggan sa ud maipadara niku siya atag sa Pangulu Hari." 22 Sinabi ni Agripa sa kan Pistu magkun, "Magkaibug diman aku mamatingi sa manga pagsabihun tunda pag tawu." Magkun si Pistu, "Mahimu duy patingihan nimu siya aldaw." 23 Sa usa ka sirang, linmuwang sida ni Agripa ni Birnisi, kaibahan nida ti manga kumandir hanggan ti manga pinunu banwa. Pagka sinmaka sida sa balay hurusayan, ginalang gid sida manga tawu. Bag-u sinugu ni Pistu kay sundalu hampay bul-un si Pablu. 24 Pagka siyun yi si Pablu, sinabi ni Pistu magkun, "Malu duy, Hari Agripa ag kamu tanan manga nagsitay tag sa kanmi, inda yi ngani pag tawu ti idinimanda tanan manga Hudiyu sa kangku, una sitay sa Sisariya una ati sa Hirusalim. Nagriringgitan sida danga yi kunu siya mabuhi. 25 Dapat ay pagka inusisa niku kay kasu, unman aku may nakitan kasalanan sa kanya hampay siya sintinsiyahan sa kamatayan. Pagka sinabi niya kay gustu ipahusay niya kay kasu sa Pangulu Hari, inisip niku siya ipadara yi ngani tabug sa Pangulu Hari. 26 Unman lang niku alam nu hintay kang ibugtang sa kang surat tabug sa Pangulu Hari tungkul sa inda pag tawu. Nakan ngani kang ipinaatubang siya sa kanyu, lalu sa kanmu duy, Hari Agripa, hampay nu masuyasid nita siya maalaman niku nu hintay kang isurat. 27 Dahil bilang balaw mayad sa kangku nu kang ipadara ti usa ka pirisu tabug sa Pangulu Hari, nu unman may kasuratan tungkul sa manga dimanda laban sa kanya."
1 Sinabi ni Agripa sa kan Pablu magkun, "Mahimu yi kawu magbagaw, mamatingi kami nu kabitay kanmu rasun." Pinaamanan ni Pablu ti manga magpatingi bag-u magbagaw siya, sinagut niya ti sumbung sa kanya. 2 Magkun si Pablu, "Salamat duy Hari Agripa kanmu pinakan-an aku rugar taynguna hampay sumagut sa kanmu atubangan sa tanan manga sumbung manga Hudiyu laban sa kangku. 3 Lalu aku magbaya dahil alam yi gid nimu ti ugali manga Hudiyu hanggan kanda unman magparasnuan tungkul sa kanda surundanun. Nakan duy pagpatingi gid kawu una aba kang tultulanun. 4 "Magkaalaman tanan manga Hudiyu kang ugali ginan sa kang diit di waya hanggan taynguna tugka, una sa kang sadili banwa una sa Hirusalim. 5 Daan talaga alam nida ag mahimu kanda patutuuhanan nu sida may gustu lang, kang ugali kaybi ginan angay sa masyadu mahigpit pag panudlu nita surundanun, angay ngani sa panudlu manga Parisiyu. 6 Bag-u taynguna aku pagbistahun dahil sa kang pagsarig sa kay pangaku Diyus sa kanta manga ginurang kaybi. 7 Imaw diman pag pangaku ti pag-asahan sampulu may duwa ka linahi nita nasyun, nakan sida masipag gid sa kanda magsamba sa Diyus yabi sirang. Dahil sa kang mag-asa, Hari Agripa, sa tunda pag pangaku, nakan aku idinimanda ngap manga Hudiyu. 8 Hayga lugud kamu pag manga Hudiyu magsabi dayu mahimu buhiun maan Diyus ti manga namatay? 9 "Inisip diman niku kaybi kailangan labanan niku sa mayamu paraan kay ngaran ni Hisus taga Nasarit. 10 Imaw yi ngani kang binwat sa Hirusalim. Pagka may tinanggap aku karampatan ginan sa manga pangulu manug-asiwa balay Diyus, mayamu pag manga napasakup sa kan Hisus kang ipinapirisu. Nagpasnu diman gid aku nu sida sintinsiyahan yi sa kamatayan. 11 Nanalapudan aku sa manga balay tiripnan manga Hudiyu. Nu may nakitan aku manga napasakup sa kan Hisus, pinarusahan niku sida hampay pabul-&iwun sida sa kanda pagsarig sa Panginuun. Sa mahigpit niku pangagalit sa kanda, nag-ati diman aku sa manga banwa luwas yi nita nasyun Israil hampay pag-unuunuhun di gid niku ti manga napasakup sa kan Hisus ati. 12 "Nakan ngani sinugu aku manga pangulu manug-asiwa balay Diyus tabug sa Damasku may karampatan hampay unuunuhun niku ti manga napasakup sa kan Hisus. 13 Pagka karaw-an yi sirang kami sa dalan waya, Hari Agripa, may nakitan aku masyadu gid pag marayaw ginan sa langit, balaw di ga init kay pagkasilaw. Narayawan duy aku hanggan kang manga kaibahan. 14 Nag-irisubsub kami tanan sa daga bag-u nakadnug aku may magbagaw sa kangku sa bagaw Hibriyu magkun, 'Saulu, Saulu, hayga aku kanmu pag-unuunuhun? Masaktan kawu nu kawu maglaban ga baka magtindas sa matarum.' 15 Pinmaingana aku magkun, 'Si unu kawu, Panginuun?' Sinmagut ti Panginuun magkun, 'Aku si Hisus, ti kanmu pag-unuunuhun. 16 Dapat pagtindug yi kawu. Napakakit aku sa kanmu dahil kawu kang pinili hampay kang yi suruguun. Kailangan tultulan nimu sa manga iba tungkul sa kanmu nakakit sa kangku taynguna hanggan tungkul sa kang ipakakit waya sa kanmu aban. 17 Bawiun niku kawu ginan sa kamang manga taga Israil hanggan ginan sa kamang manga balaw Hudiyu. Dahil suguun niku kawu atag sa manga balaw Hudiyu. 18 Kailangan pamuklatun nimu kanda manga mata, kailangan bawiun nimu sida ginan sa kadudulman atag sa marayaw, ginan sa kapangyarihan ni Satanas tabug ngap sa Diyus, hampay nu sida sumarig sa kangku, patawadun kanda manga kasalanan hampay mipaminsan sida sa manga tawu napasakup sa Diyus.' 19 "Nakan duy Hari Agripa, lubus aku naniwala sa kay Ipinakakit Panginuun ginan sa langit. 20 Nanudlu aku sa Damasku dapu bag-u sa Hirusalim bag-u sa bilug daga Hudiya hanggan sa manga balaw Hudiyu. Namaliwanag aku sa manga tawu kailangan sida mag-ampu sa kanda manga kasalanan ag magpakarani sa Diyus. Bag-u ginan sa kanda mayad pag manga buwat kailangan makitan kanda nag-ampu yi sa kanda manga kasalanan. 21 Dahil ngani sa kang itinudlu katida, nakan aku dinakup manga Hudiyu kang sa balay Diyus, kanda mana gayak aku matyun yi. 22 Dapat ay hanggan taynguna tugka unman gid aku pinabay-anan Diyus. Nakan matindugan aku taynguna hampay itultul una sa may manga kangaranan una sa unman may kangaranan kang nadnugan ginan sa Panginuun. Kang pag-itudlu imaw yi ti ipinurupita manga Purupita hanggan ni Muysis. 23 Sinabi kabay nida magkun, kailangan mamatay ti pinili Diyus Manugribri pag Hari bag-u un-an gid sa tanan tawu siya ti buhiun maan hampay ipakilala niya sa manga Hudiyu hanggan sa manga balaw Hudiyu nu kabitay sida maribri agud sida sa marayaw yi." 24 Magbagaw waya si Pablu magsagut waya sa dimanda manga Hudiyu, nagbagaw ngap si Pistu daraka buka magkun, "Paung duy kawu, Pablu. Napaung baga kawu, dahil subra yi kanmu inadalan." 25 Dapat sinabi ni Pablu magkun, "Aku duy, kagalanggalang Pistu, bukun ay paung. Ti kang pagsabihun lunsay katutuuhanan balaw may salan. 26 Unman aku kailangan magkadala maghampang sa kanmu duy, Hari Agripa, dahil magkaalaman yi waydi nimu inda tanan tanan. Pihu gid nabaritaan nimu daan inda pag manga itinultul niku taynguna, dahil inda nangyari balaw sa lihim, unman diman sa arayu pag rugar. 27 Alam gid niku duy, Hari Agripa, kawu maniwala diman gid sa isinurat manga Purupita." 28 Sinabi ni Agripa sa kan Pablu magkun, "Sab lagatlagat aku banta kanmu yi gid buwatun Kiristiyanu." 29 Sinmagut si Pablu magkun, "Kawu hanggan ti tanan nakadnug sa kang binagaw taynguna kang gid pag-idarangin sa Diyus hampay una dugay una ngalay kamu pagga kangku waydi, purya lang inda pag manga tarikada." 30 Bag-u tinmindug ti hari, ti gubirnadur, si Birnisi hanggan tanan kay manga kaibahan. 31 Pagka sida linmuwas yi sa balay hurusayan, nagharampangan sida magkun, "Unman may binwat kasalanan tunda pag tawu una sa ikamatay niya una paman sa ikapirisu." 32 Sinabi ni Agripa sa kan Pistu magkun, "Nu abi unman lang gustu tunda pag tawu ipahusay kay kasu sa kan Pangulu Hari, mahimu yi mana siya palpasan kainda."
1 Pagka inisip nida kailangan kami sumakay yi atabug sa Italya, iinintirga nida si Pablu hanggan manga iba waya pirisu sa kan Hulyu. Si Hulyu kapitan manga sundalu sakup ni Pangulu Hari. 2 Sinmakay kami sa usa ka bangka taga Adramityu atabug sa manga banwa sa baybay dagat sa daga Asya. Pagka kami nakasakay, nighit yi kami kaibahan diman nimi si Aristarku taga Tisalunika sakup daga Masidunya. 3 Pagka sa usa ka sirang nakaaput yi kami sa banwa Sidun. Mayad kay nalub-anan isip ni Hulyu atag sa kan Pablu, nakan kay pinayagan niya si Pablu magsabang sa kay manga kakilala ati hampay awatan diman nida siya tungkul sa kay manga pangailangan. 4 Nighit maan kami ginan sa Sidun. Pagsarungsungun kami durus nakan ipinalakaw nida ti bangka arani sa Sipru pag puru hampay magpakubli. 5 Bag-u pagka nagdipay kami sa dagat sa katpadan manga daga Silisya hanggan Pampilya, nakaaput kami sa banwa Mira, sakup sa daga Lisya. 6 Ati sa Mira hinanap kapitan ti usa ka bangka taga Alihandirya kay turunu atabug sa Italya. Bag-u pinasakay maan kami siti. 7 Mabuyan gid kanmi lakaw sa sulud manga pira ka sirang, dahil pagsarungsungun kami durus. Nakurian gid kami. Pagka dugay nakaaput kami sa katpadan banwa Kinidu. Siyun ginan udyi nakahimu naparargu kanmi lakaw, dahil mabisug ti durus. Nakan nag-alibud kami napakubli sa Kirita pag puru, naglawuy kami sa katpadan Salmun pag rungus baybay. 8 Nakurian gid kami sa kanmi mag-alubaybay sa saruy hanggan sa udwaya nakaras-ug sa rugar kay ngaran Mayad pag Punduhan balaw arayu sa banwa Lasiya. 9 Nadugayan yi kami sa kanmi lakaw, nakalawuy yi paman ti Kasirangan Paglukat. Dilikadu yi gid nu lumakaw waya ti bangka. 10 Nakan kan Pablu pinaalalahanan sida magkun, "Mag-akitan yi niku duy, madala gid kanta lakaw sitay ginan. Pihu may malakawan kita disgarasya una sa karga una sa bangka, dilikadu hanggan kanta buhi." 11 Dapat ti kapitan naniwala sa manugtimun hanggan sa may apu bangka, balaw ngap pinaniwalaan niya kan Pablu sinabi. 12 Tunda pag punduhan unman mapakublihan sa amihan. Nakan ti kayamuan tawu sa bangka magkaibug mighit siti ginan pag punduhan tag sa kalalawdan hampay nu mahimu lang makaaput waya mana sida sa Pinisi pag punduhan sa baybay diman Kirita pag puru, kay sanggaan baliwa sa isalpan kanaway, nakan mayad pag parasan-&iban sa katpung amihanun. 13 Pagka naghuyuphuyup ti durus ginan sa salatan, nakabaya yi sida kanda isip mahimu yi ngani ipatarus nida kanda lakaw. Binatak nida kay pundu bag-u nag-agubay sida arani sa baybay Kirita. 14 Dapat ay balaw nadugay hinmampak ngap ti bagyu amihan ginan sa daga Kirita. 15 Pagka natamaan bagyu ti bangka, unman makasarungsung sa durus. Udyi kami may mabuwat, rargu ipinadpad yi lang durus. 16 Sa kanmi nipadpad, napakubli waya kami ngalay ngalay sa Kawda pag puru. Madi makuri gid, kanmi waya nabawi kanmi balutu. 17 Pagka nikarga yi nimi ti balutu, binugkus waya nida kalat ti bangka sa unman madaut ngani sa humbak. Nadala sida barang sumayad ti bangka sa bungtud sa arani baybay daga Libya, nakan bin-ul dapu nida kay layag napaanud yi lang sida sa durus. 18 Rargu di gid kay paguspus bagyu, nakan pagka sa usa maan ka sirang iyinmut nida sa dagat kanda karga. 19 Sa ikatlu pag sirang iyinmut yi nida ti manga gamit bangka, sida diman waydi ti nagyamut kay apu. 20 Dugay gid kami unman nakakit sa init una pamgasan. Unman diman gid naghubung ti bagyu. Nakan udyi nagsarig kuntay makaribri waya kami. 21 Dugay yi ti manga tawu sa bangka unman may kinaun, nakan tinmindug si Pablu sa kanda karaw-an nagsabi magkun, "Nu abi kamu duy nagpasnu lang mana sa kangku ag balaw nighit ginan sa Kirita, naiwasan niyu inda pag kakurian ag unman mana narangga ti bangka, unman diman nalugi kamu sa kanyu karga. 22 Dapat taynguna duy kang pagsabihan kamu pagmatutum kanyu naisipan, dahil balaw maunu kamu tanan. Ti bangka lang pihu gid madaut. 23 Dahil kis-ab yabi may napakakit sa kangku ti usa ka anghil Diyus. Sa tunda pag Diyus aku pag napasakup hanggan magsamba. 24 Nagsabi ti anghil magkun, 'Danga kawu magkadala, Pablu. Kailangan kawu umatubang sa Pangulu Hari. Mayad kay nabubut-un Diyus sa kanmu nakan iribri diman niya ti tanan manga kaibahan nimu sa bangka.' " 25 Magkun si Pablu, "Nakan ngani duy pagmatutum yi lang kanyu naisipan. Dahil aku magsarig sa Diyus pihu mangyari ti tanan niya sinabi sa kangku. 26 Dapat ay kailangan ipadpad kita durus midunggu sa usa ka puru sa karaw-an dagat." 27 Pagka sa ikasampulu may upat yi pag yabi, pag-ipadpad yi kami durus atabug sa dagat Adriyatiku. Pagka sa magkakaraw-an yi yabi, magkaungdan manga may apu bangka, bilang ga magpakarani yi kami sa hunasan. 28 Nakan tinuntunan nida lubid may pamatu, hampay maalaman nu kabitay kay kaabasad. Nakitan nida duwapulu waya ka dupa kay kaabasad. Pagka lagatlagat waya kanda maan tinuntunan, kanda nakitan sampulu may lima wadi ka dupa kay kaabasad. 29 Magkadala sida barang midunggu ti bangka sa mabatu nakan kanda itinuntun ti upat ka pundu sa buli baliwa bangka, bag-u nagdarangin sida hampay udyi mana dugay ti sirang. 30 Paggayakun manga may apu bangka lumayas yi ginan sa bangka, nakan itinuntun nida ti balutu tag sa dagat, magpabalhinguun sida kanda dap ilagpak kunu ti manga pundu sa dulung baliwa bangka. 31 Dapat sinabi ni Pablu sa kapitan hanggan sa manga sundalu magkun, "Nu lumayas ti manga may apu bangka, pihu duy kamu dayu maribri." 32 Nakan pinlud yi lang manga sundalu ti manga kalat balutu, kanda yi lang ipinaanud. 33 Pagka madlum surip yi, pagsagdahun ni Pablu sida tanan hampay mangaun magkun, "Taynguna sampulu may upat yi ka sirang kamu ud may kinaun sa kanyu mag-alagad sa kalma. 34 Nakan duy, kang pagsabihun sa kanyu, pagkaun yi baga. Kailangan niyu ti karan-unun hampay balaw masbuk. Ud may madura una lang usa ka buhuk sa kanyu ulu ginan." 35 Pagka sinabi niya tunda, pinunpun niya ti usa ka tinapay sa lamak. Pagka nakapasalamat siya sa Diyus sa atubangan nida tanan, pinikapika niya ti tinapay bag-u nangaun siya. 36 Nagmatutum kanda naisipan tanan bag-u nangaun diman sida. 37 Kami tanan ti nakasakay sa bangka duwa ka gatus may pitumpulu may unum ka tawu. 38 Pagka nabsug yi sida bag-u iyinmut nida ti tirigu sa dagat hampay gumaan ti bangka. 39 Pagka surip yi may nabantay sida daga, dapat unman nakilala nida nu hintay pag daga tunda. Dapat nakitan nida ti usa ka lihud baybay. Kanda ginayak nu mabuwat mana nida, ipaduung ti bangka atag sa basad lihud. 40 Nakan pinlud nida ti manga higut sa pundu, kanda ilinagpak sa dagat bag-u linbad diman nida ti manga higut sa timun. Binatak nida kay layag baliwa sa dulung hampay samburun durus ag darahun ti bangka atabug sa baybay. 41 Dapat ay pagka sa ababaw yi nisadsad ti bangka nilbung yi dayun kay dulung, udyi nakaighit. Nabasag yi kay ulin baliwa dahil sa mabisug pag humbak. 42 Naggayak ti manga sundalu matyun yi nida ti manga pirisu hampay unman may lumanguy rargu lumayas. 43 Dapat kay gustu kapitan danga nida matyun si Pablu, nakan inampara niya kanda gayak. Bag-u sinabihan kapitan ti manga tawu madunung maglanguy, pag-una sida pagluksu, pagtakas yi atag sa baybay. 44 Ti manga iba sinugu niya pagbuul tabla, manga gipak bangka kanda paragabayan. Kami tanan nakaras-ug di sa baybay.
1 Pagka kami nakaribri yi nakaras-ug yi sa daga, naalaman nimi tunda pag puru sa karaw-an dagat kay ngaran Malta. 2 Mayad yi lang gid ungud kanda nabubut-un manga tawu ati pag daga sa kanmi. Pinmadna ti uran maramig, nakan namagba sida apuy inalagaan gid kami mayad. 3 Nagbuul si Pablu kayu kay pinagba sa apuy. Dahil sa init may linmuwang udtu adlaw, nagkagat sa kan Pablu kamang udyi binmul-iw. 4 Pagka ti manga tawu taga ati pag rugar nakakit sa iyay mabitinan sa kan Pablu kamang, sinabi nida sa usa kag sa usa magkun, "Pihu gid maaw inda pag lalaki magpanlibun sa tawu. Una siya nakaribri sa dagat, udyi pag-ipahintulut ni Diyusdiyusan Suwirti siya mabuhi waya." 5 Dapat ay pinagpag ni Pablu ti ulay tag sa apuy, unman siya naunu. 6 Maghantup yi ti manga tawu kanda isip bumaga yi kay bilug ni Pablu, aw barang gulpi maplid siya mamatay. Dapat ay pagka dugay yi kanda magturun ag unman diman may nakitan sida may makuri nangyari sa kan Pablu, nagbag-u yi sida kanda isip, magkun sida, "Siya maaw usa ka diyus." 7 Sa kay karani ati pag rugar kan Publiyu pag manga daga, imaw ti pinunu siyun pag puru sa karaw-an dagat. Mayad gid kay tinanggap niya kami sa kay balay. Ati kami pag nangagum sa sulud tulu ka yabi. 8 Ati katpung kay ama ni Publiyu maigyaan, dahil pagramigan siya mag-iput. Nakan dinuawan siya ni Pablu sa kay suludsulud. Pagka kan Pablu idinarangin ti gurangun ag kinup-an kamang, pinaayad yi ngani siya. 9 Pagka kan Pablu pinaayad kay ama ni Publiyu, ti tanan tawu taga ati pag daga Malta, nu may mag-adnugan manga sakit, nagdinulud tag sa kan Pablu bag-u kay diman pinaayad. 10 Nakan pinakan-an nida kami mayamu pag kagamitan bilang kanda pasalamat sa kanmi. Pagka kami umighit yi ikinarga waya nida sa bangka una hintay kanmi kailangan balalunun. 11 Pagka nakalawuy tulu ka bulan, nagsakay kami sa usa ka bangka, kay ngaran "Siing." Tunda ngani pag bangka taga Alihandirya, nadugay diman sa Malta hampay magpalipas sa manga bulan mabagyu. 12 Pagka nighit kami ginan sa Malta pagka dugay nakaaput kami sa banwa Sirakusa. Nadugay kami siyun tulu ka yabi. 13 Siyun ginan naparargu maan kanmi lakaw bag-u nakaaput kami sa Rigyu pag banwa. Pagka sa usa maan ka sirang naghuyup ti durus ginan sa salatan. Sa sulud duwa ka sirang rinmas-ug yi kami sa banwa Putiuli. 14 Pagka ati may nakitan kami manga patar-ari, tinanggap nida kami sa kanda balay. Nakan nansabang kami sa kanda sa sulud usa ka duminggu. Pagka siyun ginan naglakaw ngani kami atag sa Ruma. 15 Pagka naalaman manga patar-ari sa Ruma tungkul sa kanmi lakaw, nag-atag sida ti iba tugka sa Palingkihan Apyu, ti iba tugka sa may Tulu ka Darayunan hampay magsulang sa kanmi sa dalan. Pagka nakitan ni Pablu ti manga patar-ari nagpasalamat siya sa Diyus, nagmabisug maan kay naisipan. 16 Pagka kami rinmas-ug sa Ruma, pinahintulutan nida si Pablu mag-istar sa usa ka balay, balaw sa pirisuhan, pagtandan siya usa ka sundalu. 17 Pagka nakalawuy tulu ka sirang, pinab-ul ni Pablu ti manga takinan manga Hudiyu sa Ruma hampay sida manharampangan. Pagka nagtipun yi sida, sinabi niya sa kanda magkun, "Manga kaparihu niku Hudiyu, madi unman gid aku may binwat kasalanan laban sa kanta nasyun hanggan laban sa patayak ugali nita manga ginurang, pinirisu aku sa Hirusalim bag-u kanda ipinabahala aku sa manga taga Ruma. 18 Pagka nag-usisa sa kangku ti manga husgadu taga Ruma, unman sida may nakitan kasalanan sa kangku hampay aku sintinsiyahan sa kamatayan, nakan kanda yi mana palpasan aku. 19 Dapat ay unman gid nagpasnu ti manga Hudiyu. Nakan udyi aku may nakitan iba paraan nu ud ipahusay yi lang niku kang kasu sa Pangulu Hari, madi aku unman gid may idimanda laban sa kanta kaparihu Hudiyu. 20 Nakan hinigtan inda aku tarikada dahil sa kanya, sa pag-asahan nasyun Israil. Nakan ngani kang gustu magkarahampang kita." 21 Sinmagut ti manga pinunu Hudiyu sa kanya magkun, "Unman duy kami may tinanggap manga surat ginan sa Hudiya tungkul sa kanmu. Pagka nagras-ug sitay kanta manga kaparihu Hudiyu, unman diman sida may ibinarita una sinabi laban sa kanmu. 22 Dapat gustu diman gid nimi pakidnugan nu kabitay kanmu manga sarabihun, dahil magkaalaman yi waydi nimi inda pag surundanun niyu paglabanan manga tawu una naan pag rugar." 23 Nakan nagtararatuhan sida sa iba sirang. Pagka ati katpung pag sirang, lalu waya mayamu tawu ti naglinuwang tag sa kan Pablu pagdayunan pag balay. Ginan surip hanggan yabi malinaw gid kay itinultul niya sa kanda tungkul sa kay paghari Diyus. Ginamit niya ti Kasuguan ni Muysis hanggan ti Kasuratan manga Purupita hampay maintindihan nida ti katutuuhanan tungkul sa kan Hisus. 24 Ti manga iba nagpasnu ngani sa kan Pablu pagsabihun, dapat ti manga iba unman gid naniwala. 25 Nakan unman magkabuu kanda naisipan. Pagka sida magkaginan yi, inda wadi kan Pablu sinabi sa kanda magkun, "Tama gid duy kay ipinabagaw Ispiritu Banal sa kan Purupita Isayas tag sa kanyu manga ginurang, magkun, 26 'Pag-ati kawu pagsabi sa inda pag nasyun manga taga Israil magkun, Magpakapatingi lang kamu, dapat unman diman kamu makasalum. Magpakabantay lang kamu, dapat unman diman kamu kumilala. 27 Dahil maganit yi kay tagipusuun inda pag manga tawu. Pinuputan nida kanda manga tuli. Ipinikat nida kanda manga mata, Hampay unman makakit kanda manga mata, Ag unman makadnug kanda manga tuli, Ag hampay unman diman umintindi kanda tagipusuun. Magkun ti Diyus, nakan katida hampay sida unman bumalik sa kangku. Dayu waydi paayadun niku sida.' " 28 Bag-u sinabi waya ni Pablu magkun, "Kailangan pagmaalaman yi gid niyu, duy, inda pag barita ginan sa Diyus tungkul sa karibrihan ipadakit sa manga balaw Hudiyu. Nu bay sida gid pihu mamatingi." 29 Pagka katida kay binagaw ni Pablu, nuli yi ti manga Hudiyu, magdarag-an sida sa kanda harampangan. 30 Sa sulud duwa ka timpu nangulian ati sa Ruma si Pablu sa kay pagpilitihan pag balay. Tinanggap niya ti tanan tawu nagsabang sa kanya. 31 Ipinaliwanag niya tungkul sa kay paghari Diyus ag itinudlu niya tungkul sa Panginuun Hisu-Kiristu. Matutum kay naisipan ni Pablu sa kay magtudlu ag unman may nag-ampara sa kanya.
1 Inda ti may surat si Pablu kay panawuhun ni Kiristu Hisus. Kay pinili aku Diyus hampay kay Apustul, kay gid ibinukud hampay manudlu sa kay Mayad pag Barita Diyus. 2 Ti Mayad pag Barita inda kay ipinangaku Diyus kaybi di waya ginan, itinultul niya manga Purupita bag-u kanda isinurat sa Banal Kasuratan. 3 Inda pag Mayad pag Barita tungkul ngani sa kay Anak, sa kanta Panginuun Hisu-Kiristu. Nu angay sa kay pagkatawu si Hisus inanak ginan sa kay linahi ni Dabid. 4 Dapat ay nu angay sa kay pagka-Diyus, ipinakilala siya yi ngap ti Anak Diyus may kamaskihan, pagka siya nabuhi uman ginan sa kamatayan. 5 Tinanggap nimi ginan sa kanya ti karampatan hampay kami Apustul agud ti tanan nasyun butungun nimi sa pagsarig hanggan pagsunud sa kanya. 6 Kabilang diman waydi kamu sa manga nasyun kay pinili Diyus hampay kay manga nasakup ni Hisu-Kiristu. 7 Inda kang surat tabug sa kanyu tanan sa manga pagmahalun Diyus asan sa banwa Ruma, kamu kay pinili hampay manga sakup yi niya. Pag-idarangin nimi kamu hampay kamu kaawaan nita Diyus Ama hanggan nita Panginuun Hisu-Kiristu ag hampay pakan-an kamu kahusayan. 8 Una sa tanan magpasalamat aku sa kang Diyus sa panab-anan ni Hisu-Kiristu dahil sa kanyu tanan, dahil ngani kanyu pagsarig sa kan Kiristu nibantug sa buu kalibutan. 9 Pirmi diman kamu kang pag-idarangin. Inda alam di gid Diyus imaw kang pagsirbihan buu niku tagipusuun sa kang magtudlu sa Mayad pag Barita tungkul sa kay Anak. 10 Pirmi maghagad aku rugar sa Diyus nu kagustuhan niya, pagkainda yi mana makaatag aku sa kanyu. 11 Magdumdum yi gid aku magtagasampaki sa kanyu hampay maayawan niku kamu manga pakaun Ispiritu pag kaayadan sa ikarig-un niyu. 12 Ti gustu mana niku sabihun, hampay mag-arawatan kita sa ikarig-un nita sa kada usa dahil sa kanta pagsarig sa Diyus, una kangku, una kanyu. 13 Manga patar-ari, gustu niku maalaman niyu, balaw di pira ka pag-ulit kang gayak asan tag diman sa kanyu, dapat hanggan taynguna tugka pag-amparahun waya aku. Kang gustu diman bumutung sa manga tawu asan hampay sida sumarig waydi sa kan Kiristu, parihu diman sa kang binwat sa manga iba balaw Hudiyu. 14 May kapanagutan aku nu unman manudlu aku sa tanan tawu una sa manga Giriyigu, una sa manga Barbaru, sa manga may inadalan, una sa manga unman may inadalan. 15 Nakan ngani masyadu yi gid gustu niku iadal ti Mayad pag Barita asan diman sa kanyu sa banwa Ruma. 16 Balaw gid niku pag-ikakay-a ti Mayad pag Barita, dahil imaw yi ti kapangyarihan Diyus sa ikaribri kada tawu nu sumarig, una sa tanan sa manga Hudiyu, bag-u hanggan sa manga balaw Hudiyu. 17 Ginan sa Mayad pag Barita pag maalaman nita nu kabitay pag kilalan-un Diyus ti manga tawu kuntay manga matadlung nu sida may pagsarig. Ginan diman sa kanda pagsarig lang pag mamhan lubus kanda katadlungan. Angay sa nisurat sa Banal Kasuratan magkun, "Ti tawu may buhi nu pagkilalan-un siya Diyus kuntay matadlung dahil sa kay pagsarig sa Diyus." 18 Niburayhaw ti pangagalit Diyus ginan sa langit laban sa tanan kalapastanganan hanggan kadautan manga tawu. Kanda magbuwat kadautan imaw tig-ampara sa manga iba, nakan unman makakilala sa katutuuhanan. 19 Malinaw mana pag maalaman nida tungkul sa Diyus, dahil kay ipinakilala niya sa kanda. 20 Kay unman may katapusan pag kapangyarihan hanggan kay pagka-Diyus pag-ipakilala malinaw ginan sa manga bagay kay binwat niya ginan waya sa pagkalalang niya sa kalibutan. Nakan ngani unman yi may isingyanan tunda pag manga tawu magbuwat kadautan. 21 Madi kilala nida ti Diyus, unman waydi kanda pagdayawun madi siya Diyus, unman diman nida pinasalamatan. Bagkus ngap pinamintuhu nida ti manga bagay unman may kabuluhan, nadluman yi lang sa kanda kurang pag naisipan. 22 Magpanaguabi sida kuntay madunung, dapat ay unman ngap may kabuluhan kanda kadunungan. 23 Tinalikdan nida ti mamaski pag Diyus unman may kamatayan, kanda ngap pagsambahun ti manga ilinarawan pag manga tawu may kamatayan, manga manuk, manga hayup, manga iyay magyapang. 24 Nakan ngani pinasibut-an waydi sida Diyus sa kanda mayagting pag kagustuhan naisipan, bag-u nagumun yi sida sa magbuwat mahalay sa usa kag sa usa. 25 Dahil sa kanda nagpatlikud sa katutuuhanan tungkul sa Diyus, inadi ngap nida ti kapudilan. Sinambahan nida ti manga linalang Diyus ag kanda sinirbihan. Dinayu di ngap nida ti Diyus madi imaw ti naglalang. Siya ngap ti dapat nita pagdayawun hanggan aban. Amin. 26 Nakan pinasibut-an sida Diyus sa mahalay pag kagustuhan nida naisipan. Una manga babayi nagdayu yi sa natural pag malahalan sa lalaki tag sa babayi bag-u kaparihu ngap babayi tigkaraibgan. 27 Tinayakan diman manga lalaki ti natural pag malahalan sa lalaki tag sa babayi, inmamat ngap kanda mayagting pag kagustuhan naisipan sa usa kag sa usa. Magbuwat mahalay ti manga lalaki sa kay kaparihu lalaki. Nakan ngani ti kada usa sa kanda parusahan Diyus sa kanda sadili bilug angay sa kanda buwat kasalanan. 28 Unman inisip nida mahalaga ti pagkilala sa Diyus, nakan pinasibut-an sida Diyus sa kanda daut pag-iisip hampay balaw yi maangay kanda ugali. 29 Nasakup yi sida tanan kalasi kadautan, kalukuhan, maramuun, daut pag naisipan. Punu sida kainggitan ginan sa hirak. Nag-ugali sida sa maglibun tawu, sa mag-&talaluhan, sa magdaya hanggan sa maglupig. Sida maglibak daut, 30 magpamauyauya, magkadaut sa Diyus, udyi may painuinu, palabilabihun, parayabang, parapathaw sa kadautan, manga maglaban sa gurang, 31 manga hangalhangalin, manga parahimudilun, udyi may awa, udyi sida may pasunaid sa kanda kaparihu. 32 Naalaman diman nida ti ibinilin Diyus magkun, kailangan matyun ti magbuwat katunda. Dapat ay magparargu di ngap sida sa pagbuwat daut. Magbaya waya sida nu maghiling sida sa manga iba magbuwat katunda waydi.
1 Nakan ngani una si unu kawu ti parapihu sa kasalanan manga iba, udyi ngap kawu may idahilan. Dahil sa kanmu magpihu sa manga iba, pagpihuun diman waydi nimu kanmu sadili kasalanan. Kawu magpihu sa kasalanan manga iba, dapat kumun diman waydi kanmu pagbuwatun. 2 Alam diman nita kay sintinsiya Diyus balaw magsalan laban sa manga tawu magbuwat katida. 3 Kanmu aw isip makaiwas kawu sa sintinsiya Diyus nu pihuun nimu ti daut buruwatun manga iba, kanmu diman waydi pagbuwatun? 4 Aw ngatay barang udyi pagpahalgaan nimu ti Diyus dahil siya ti pinakamayad, mapinigilun ag matugwayan. Unman aw lugud alam nimu kay pagmahal Diyus sa kanmu tigpakaun rugar hampay umampu kawu sa kanmu kasalanan? 5 Dapat ay sa kaganitan nimu tagipusuun ud waydi mag-ampu sa kanmu kasalanan, pagpakadagdagan nimu ti parusa kay ganti Diyus sa kanmu nu ipaburayhaw kay galit Diyus aban sa kaudasan niya matadlung pag sintinsiya. 6 Dahil ti Diyus gumanti sa tanan tawu angay sa kanda binwat. 7 Ti manga iba magparargu sa magbuwat mayad dahil sa kanda maghangad kadayawan hanggan sa unman may kamatayan. Sida pakan-an Diyus buhi unman may katapusan. 8 Dapat mahigpit pag galit kay ganti Diyus sa manga magbuwat kaguluhan, sa manga dayu magpaniwala sa katutuuhanan, bagkus naniwala di ngap sa kadautan. 9 Masyadu pag kakurian ti malakawan kada tawu magbuwat daut, ti manga Hudiyu dapu bag-u kumun diman ti manga balaw Hudiyu. 10 Dapat ti kada tawu nu magbuwat mayad tumanggap kadayawan hanggan kahusayan, ti manga Hudiyu dapu bag-u hanggan ti manga balaw Hudiyu. 11 Dahil ti Diyus balaw may pag-apihun. 12 Ti manga balaw Hudiyu unman sakup sa Kasuguan ni Muysis. Nu magbuwat sida kasalanan, ipadamhak sida dapat unman angay sa isinurat sa Kasuguan. Ti tanan manga Hudiyu manga nasakup sa Kasuguan. Nu sida magkasala, sintinsiyahan sida angay sa isinurat sa Kasuguan. 13 Dahil unman ti manga magpatingi lang sa Kasuguan, nu unman ti manga magtupad sa Kasuguan imaw ti pagkilalan-un Diyus kuntay matadlung. 14 Ti manga balaw Hudiyu balaw nasakup sa Kasuguan. Nu bumuwat sida angay sa pagsabihun Kasuguan dahil lang sa kanda sadili buut naisipan, tunda ga Kasuguan yi ngap sa kanda. 15 Kanda yi buwat tigpakilala kuntay ti pagsabihun Kasuguan nisurat yi sa kanda manga tagipusuun. Pagpatutuuhanan diman inda nida naisipan, dahil nu kas-a ginan pagtamyawun sida nida naisipan ag nu kas-a ginan kanda diman sadili naisipan tigpatutuu kuntay unman nagbuwat kasalanan. 16 Angay sa Mayad pag Barita kang pag-itudlu, mangyari gid tunda nu sa kaudasan aban ti manga ilinihim manga tawu sa kanda tagipusuun pihuun Diyus nu daut nu mayad sa panab-anan ni Kiristu Hisus. 17 Dapat pagsabihun nimu kawu Hudiyu magsarig sa Kasuguan ni Muysis, kanmu pag-ipadayawdayaw kanmu pakiusa sa Diyus. 18 Alam nimu kay kagustuhan, nakilala diman nimu nu hintay ti mayad, dahil imaw ti itinudlu Kasuguan sa kanmu. 19 Kanmu isip kawu yi ngani ti manug-abat sa buta, tigrayaw sa manga tawu sa kadudulman, 20 manugpaanyu sa manga unman madunung, manugtudlu diman sa manga anak, dahil kanmu isip ti Kasuguan yi ngani ti buu kadunungan hanggan katutuuhanan. 21 Magtudlu ngani kawu sa manga iba. Bati hayga unman pagtudluan nimu kanmu sadili? Magtudlu kawu magkun, "Danga magtakaw", bati hayga kawu magtakaw? 22 Kanmu pagsabihun magkun, "Danga mag-uragin", dapat bati kawu diman magpanguragin? Magkadaut kawu sa manga diyusdiyusan, bati kawu magsaka sa manga balay diyusdiyusan agud manakaw? 23 Magdayaw kawu sa Kasuguan, dapat sa kanmu maglabag sa Kasuguan unman ngap paggalangun nimu ti Diyus. 24 Nakan ngani nisurat sa Kasuratan magkun, "Ti ngaran Diyus pagpuyaan manga balaw Hudiyu dahil sa kanyu." 25 Nu kawu napaturi mahalaga lang tunda nu tupadun nimu ti Kasuguan ni Muysis. Dapat nu paglabagun diman nimu ti Kasuguan, bilang ga unman diman kawu tinuri. 26 Ti tawu unman tinuri nu magbuwat angay sa pagsabihun sa Kasuguan, unman aw siya parihu diman ga tinuri? 27 Nakan ngani kamu ti manga tinuri sintinsiyahan aban manga balaw tinuri. Dahil sida magtupad sa Kasuguan, dapat kamu madi may isinurat pag Kasuguan, maglabag diman ngap kamu sa tunda pag Kasuguan. 28 Ti usa ka tawu balaw masabi tutuu Hudiyu, una paman Hudiyu kay manga gurang una waya tinuri siya. 29 Ti tawu nu binag-u yi sa kay tagipusuun hanggan naisipan angay sa Ispiritu balaw lang angay sa nisurat pag Kasuguan, tunda yi ti tutuu Hudiyu. Balaw tawu nu unman Diyus ngap ti dumayaw sa kanya.
1 Hintay ti mahalaga sa ngaran Hudiyu may sa balaw Hudiyu? Hintay kay pakinabang nu tinuri ti tawu? 2 Daka gid duy. Un-an gid sa tanan, ti manga Hudiyu ti pinaintirgahan manga katutuuhanan ipinakilala Diyus. 3 Kabitay nu ti iba manga Hudiyu balaw yi matinupadun? Ibug aw lugud sabihun kanda balaw matinupadun ti nagrangga sa kay pagtupad Diyus? 4 Bukun ay sa katida. Ti Diyus sa katutuuhanan, una ti kada tawu pudilun, angay sa isinurat sa Kasuratan magkun tag sa Diyus, "Hampay kawu kilalan-un kuntay matadlung sa kanmu manga sinabi ag manalu kawu nu pihuun nida kawu sa daut sa mayad." 5 Dapat nu kanta kadautan tigpakilala ngap sa kay katadlungan Diyus, unman aw lugud masabi nita ti Diyus salan kay sintinsiya nu kita pagparusahan niya? Katunda ngani ti tawu kay pamagawan. 6 Dapat bukun ay sa katida. Nu abi ti Diyus balaw matadlung, kabitay pag mapihu niya ti manga tawu taga kalibutan nu mayad nu daut? 7 Dapat nu abi ginan sa kang kapudilan lalu lumutaw ti katutuuhanan Diyus, dahil pag-ipakakit kay katupadan, matadlung aw nguna siya nu parusahan niya aku bilang ga usa ka makasalanan? 8 Hayga unman nita masabi magkun, "Pagbuwat yi lang kita daut hampay lalu miburayhaw ti kaayadan?" Magkun ti manga magpauya sa kangku, katunda kunu kang pag-itudlu. Parusahan sida aban Diyus, tunda yi ngani ti kailangan sa kanda. 9 Kabitay nguna tunda? Kita manga Hudiyu mayad man aw lugud kanta kahamtangan sa manga balaw Hudiyu? Bukun ay duy. Dahil kanmi pinatutuuhanan yi kuntay sinakup kapangyarihan kasalanan ti tanan manga tawu una Hudiyu una balaw Hudiyu. 10 Angay sa nisurat sa Kasuratan magkun, "Ud gid may matadlung, una di usa ka tawu. 11 Unman may nakaintindi, ud may maghanap sa Diyus. 12 Ti tanan nagsimray sa dalan, nagpakadaut yi. Unman may magbuwat mayad, una di usa. 13 Kanda tululnan parihu ga lubung nabukasan, Dahil kanda manga bibig paggamitun sa magdaya. Kanda dila may dalit ga ulay udtu adlaw. 14 Kanda bibig marasuy-aw, masakit kanda pinamagawan. 15 Madali gid sida nu kanda turunu manlibun tawu. 16 Lunsay kadautan ag karukuan sa kanda uryan. 17 Unman nida alam ti dalan kahusayan. 18 Unman nida pagpakan-an rugar sa kanda tagipusuun ti magkadala sa Diyus." 19 Alam yi nita una hintay ti pagsabihun sa Kasuguan, sinabi yi ngani sa manga napasakup sa Kasuguan, hampay una si unu pag tawu balaw yi may isingyanan ag ti tanan tanan tawu may kapanagutan nu sa kaudasan sintinsiya Diyus. 20 Dahil unman gid may tawu pagkilalan-un Diyus kuntay siya matadlung nu dahil lang sa kay pagtupad sa Kasuguan. Kabay ginan ngap sa Kasuguan pag makilala ti kasalanan. 21 Taynguna bay niburayhaw yi nu kabitay pagkilalan-un Diyus ti manga tawu kuntay sida manga matadlung bukud sa Kasuguan, ag balaw sa pagtupad nida sa Kasuguan ni Muysis. Pinatutuuhanan diman gid tunda sa manga ribru Kasuguan hanggan manga Purupita. 22 Una si unu lang pag tawu nu sumarig siya sa kan Hisu-Kiristu, pagkilanlan-un siya Diyus kuntay matadlung, dahil lang sa kay magsarig sa kan Hisus, una manga Hudiyu una manga balaw Hudiyu. 23 Dahil nagkasala ti tanan tawu. Nu sa kay magbantay Diyus kurang gid kanda sadili katadlungan sa kanda daan pagkatawu. 24 Dahil lang sa kay daka mayad pag nabubut-un Diyus nakan nakilala niya sida kuntay matadlung, dahil sa kay nanab-anan ni Kiristu Hisus, imaw ti nagribri sa kanda. 25 Si Hisus ngani ti ihinanda Diyus hampay ipakaun niya kay buhi ag hampay sa pagkabuhus niya dugu may kapatawadan ti manga tawu sa kanda manga kasalanan, nu sida magsarig sa kanya. Kay binwat Diyus tunda hampay ipakilala kay katadlungan. Dahil nu sa kaybi, pinakan-an niya rugar ti manga tawu, pinasinsiya niya kanda manga kasalanan. 26 Taynguna bay nakilala Diyus kuntay matadlung ti manga magsarig sa kan Hisus hampay patutuuhanan siya matadlung. 27 Hintay nangus kanta ipadayawdayaw? Unman duy may ipadayawdayaw kita. Hayga unman? Dahil lang aw nguna sa kanta nagtupad sa Kasuguan? Bukun ay, nu unman dahil sa kanta pagsarig sa kan Kiristu. 28 Dahil naintindihan yi nita isip, ti tawu kinilala Diyus kuntay siya matadlung dahil sa kay sarig sa kan Kiristu, bukun dahil sa kay nagtupad sa Kasuguan. 29 Ti Diyus lugud Diyus lang aw manga Hudiyu? Unman aw lugud siya Diyus diman manga balaw Hudiyu? Balaw unman, Diyus diman ngap siya manga balaw Hudiyu. 30 Kabay usa usa ti Diyus. Una ti manga Hudiyu una ti manga balaw Hudiyu, nu sida sumarig sa kan Kiristu, pagkilalan-un yi sida Diyus kuntay sida manga matadlung. 31 Nu katida ibug aw sabihun udyi pagpahalgaan nimi ti Kasuguan? Bukun sa katida. Kanmi di ngap pagpahalgaan.
1 Hintay nguna ti masabi nita tungkul sa kanta ginurang sa kan Abraham? Hintay nangus kay nalakawan niya? 2 Nu abi siya kinilala Diyus kuntay matadlung dahil sa kay manga binwat, may ipadayawdayaw mana siya. Dapat balaw siya may ipadayawdayaw sa kay magbantay Diyus. 3 Dahil ngani pagsabihun sa Banal Kasuratan magkun, "Nagsarig sa Diyus si Abraham, nakan siya kinilala Diyus kuntay matadlung." 4 Ti ipagpakaun sa manugtarabahu bukun magkasabi pakaun nu unman suhul yi ngap. 5 Dapat ti tawu nu balaw magsarig sa sadili niya buwat mayad, nu kay sarig ngap sa Diyus sa magkilala sa manga tawu makasalanan kuntay sida matadlung, tunda pag tawu kinilala yi Diyus kuntay matadlung ngani dahil sa kay pagsarig. 6 Inda imaw yi ngani kay sinabi ni Dabid magkun, pinapaladan Diyus ti tawu nu kinilala siya Diyus kuntay matadlung balaw dahil sa kay manga binwat mayad. 7 "Pinapaladan Diyus ti tawu nu kay paglaban ipinatawad yi niya, ag nu kay manga kasalanan natakluban yi. 8 Pinapaladan Diyus ti tawu nu kay manga kasalanan udyi pag-alalahanun Diyus." 9 Inda pag manga papalad para lang aw sa manga tinuri? Bukun lang. Inda duy hanggan diman para sa manga balaw tinuri. Pagsabihun kabay nita angay sa Banal Kasuratan magkun, "Pagkilalan-un Diyus si Abraham kuntay siya matadlung dahil sa kay pagsarig." 10 Kapira inda pag nangyari? Kay aw udwaya tinuri aw ngatay tinuri dapu siya? Kay udwaya kabay tinuri, daan yi siya kinilala Diyus kuntay matadlung. 11 Tinuri siya bilang pinagkatanda sa kay pagkilala Diyus sa kanya kuntay matadlung siya dahil sa kay pagsarig una udwaya siya tinuri. Nakan siya yi ti pinagkagurang tanan tawu magsarig sa Diyus. Siyun ginan sida kinilala waydi Diyus kuntay manga matadlung una manga balaw tinuri. 12 Katunda diman si Abraham ti pinagkagurang manga tinuri bukun lang dahil sida tinuri nu unman dahil sida magsarig parihu sa kanta ginurang nagsarig una udwaya tinuri. 13 Itinaratu Diyus sa kan Abraham hanggan sa kay manga linahi manahun nida ti kalibutan, bukun dahil si Abraham nagtupad sa Kasuguan nu unman dahil sa kay pagsarig sa Diyus nakan siya kinilala Diyus kuntay matadlung. 14 Nu abi ti manga magtupad lang sa Kasuguan ti mumana sa kay ipinangaku Diyus, unman may kabuluhan kay pagsarig tawu una hanggan ti taratu Diyus. 15 Ti Kasuguan imaw yi ti dahilan sa kay pagkagalit Diyus. Nu unman may Kasuguan, unman diman may malabag. 16 Nakan ngani ti taratu sigun sa pagsarig hampay ipakaun yi Diyus kay itinaratu sa kay linahi ni Abraham, balaw sa manga magtupad sa Kasuguan nu unman sa tanan manga magsarig sa Diyus parihu sa kan Abraham. Siya kabay kanta pinagkagurang nu angay sa pagsarig. 17 Kainda ti isinurat sa Banal Kasuratan magkun, "Binwat niku kawu ti pinagkagurang mayamu nasyun." Inda pag taratu may kahulugan sa atubangan Diyus dahil sinarigan ni Abraham ti Diyus imaw tigpakaun buhi sa manga namatay, imaw diman ti naglalang sa tanan bagay. 18 Madi udyi may pag-asa si Abraham kuntay manganak waya dapat siya nagsarig di gid, siya di gid aban ti pinagkagurang mayamu nasyun angay sa kay sinabi Diyus sa kanya magkun, "Parihu sa pamgasan kay kayamu kanmu manga linahi aban." 19 Ati katpung arani yi usa ka gatus ka timpu kay idad ni Abraham ag yukung yi siya. Kay asawa si Sara unman paman mag-anak pag tawu. Madi katida unman naglumuy kay pagsarig ni Abraham. 20 Unman siya nagtalinduwa sa kay taratu Diyus. Lalu ngap nagrig-un kay pagsarig sa kay magdayaw sa Diyus. 21 Lubus siya nagsarig tupadun di gid Diyus kay taratu. 22 Nakan ngani kinilala Diyus si Abraham kuntay siya matadlung dahil sa kay sarig. 23 Dapat ay ti pagkumnun 'pagkilalan-un Diyus kuntay matadlung' balaw para lang sa kan Abraham, 24 nu unman para diman sa kanta. Kita diman kinilala Diyus kuntay manga matadlung dahil sa kanta magsarig sa kanya, sa binmuhi maan sa kanta Panginuun Hisus. 25 Nagpakamatay si Hisus dahil sa kanta manga kasalanan, binuhi maan uman hampay kita mahimu kilalan-un Diyus kuntay manga matadlung.
1 Nakilala yi ngani kita Diyus kuntay manga matadlung dahil sa kanta sarig sa kanta Panginuun Hisu-Kiristu. Nakan ginan diman sa kanta pagsarig sa kan Kiristu pinaunyun kita atag sa Diyus. 2 Ginan diman sa kan Kiristu pag nakarubtan yi nita kay mayad pag nabubut-un Diyus kanta yi napunduhan. Lubus kita masulung sa kanta mag-asa miusa di kita aban sa Diyus sa kay kadayawan. 3 Bukun lang tunda. Magbaya yi ngap kita sa kanta manga pag-agwantahun, dahil magkaalaman diman nita nu kita may pag-agwantahun amat amat kita magmatiniisun. 4 Ti matiniisun kay burak maan karig-unan. Ti karig-unun kay burak maan pag-asa. 5 Dayu kita mibuyu sa kanta pag-asa, dahil kay pagmahal Diyus ilinubus yi sa kanta manga tagipusuun sa panab-anan Ispiritu Banal, imaw ti ipinakaun Diyus sa kanta. 6 Dahil sa kay taning pag kaudasan, pagka unman kakayakaya waya kita, si Kiristu namatay hampay mabawi niya ti manga makasalanan. 7 Bihira gid may tawu pumakaun kay buhi hampay mabawi niya ti usa ka tawu matadlung. Dapat barang mangyari may tawu magpanghas magpakaun kay buhi hampay mabawi niya ti usa ka mayad pag tawu. 8 Dapat nagbuwat ti Diyus usa ka puruyba tungkul sa kay pagmahal sa kanta, pagka si Kiristu namatay para sa kanta, katpung kita makasalanan waya. 9 Taynguna kita kinilala Diyus kuntay manga matadlung ginan sa kan Kiristu dugu. Lalu waya pihu kita miribri ginan sa kay pangagalit Diyus sa panab-anan buhi ni Kiristu. 10 Kaybi di waya kita manga kalaban Diyus. Dapat ay taynguna kita pinaunyun niya atag sa kay sadili sa panab-anan pagkamatay niya Anak. Nakan ngani lalu gid kita iribri dahil buhi di si Kiristu. 11 Bukun lang tunda. Magbaya kita magdayaw sa Diyus sa panab-anan nita Panginuun Hisu-Kiristu. Dahil ginan sa kanya pinaunyun kita Diyus atag sa kay sadili. 12 Usa ka tawu ti pinun-an kasalanan sa kalibutan bag-u ti kasalanan pinun-an maan kamatayan. Siyun ginan ti kamatayan magkalakawan tanan pag manga tawu dahil nagkasala ti tanan tawu. 13 Dahil udwaya ipinakaun ti Kasuguan daan di sa kalibutan ti kasalanan. Dapat ay lang nu unman may Kasuguan unman may saragtun ti tawu tungkul sa kay kasalanan. 14 Madi katida, hinmari diman waydi ti kamatayan sa tanan manga tawu ginan sa kan Adam pag kaudasan hanggan tugka sa kan Muysis pag kaudasan, madi kanda kasalanan balaw parihu sa kan Adam pag binwat kasalanan. Si Adam kay pinagkaaninu sa kay pagras-ug ni Kiristu. 15 Dapat ay balaw pararihu inda pag duwa, dahil kay mayad pag pakaun Diyus subra gid daka kay pinakamayad, balaw di ga kay kasalanan ni Adam. Madi kay kasalanan ni Adam dinmamay sa mayamu tawu tag sa kamatayan, subra man daka kay mayad pag nabubut-un Diyus hanggan kay ipinakaun pag kaayadan rinmas-&ug sa kayamuan tawu sa panab-anan usa ka tawu, sa panab-anan ni Hisu-Kiristu ngani. 16 Ti pakaun Diyus pag kaayadan subra higit balaw parihu sa kay nangyari ginan sa kay kasalanan ni Adam. Kay kasalanan dinmamay sa kayamuan tawu atag sa sintinsiya. Dapat ay pagka duru ti kasalanan sa Diyus, rinmas-&ug ti pakaun kaayadan imaw ngap ti pinun-an kapatawadan. 17 Ginan sa usa ka tawu, sa kan Adam, hinmari ti kamatayan dahil sa kay kasalanan. Dapat ay ginan diman sa usa ka tawu, sa kan Hisu-Kiristu, lalu gid subra ti nakarubtan manga tawu lubus kinaawaan Diyus, dahil nakilala yi sida Diyus kuntay manga matadlung. Humari sida ag may buhi sida sa panab-anan ni Kiristu Hisus. Inda pag papalad ginan sa kan Kiristu balaw parihu sa nangyari ginan sa tunda pag kasalanan. 18 Nakan ngani nu kabitay ti kasalanan usa ka tawu dinmamay sa tanan tawu tag sa kaparusahan, katunda diman kay buwat katadlungan usa ka tawu pinun-an kapatawadan hanggan buhi sa tanan tawu. 19 Dahil sa kay naglapastangan usa ka tawu, mayamu tawu ti binmaliw makasalanan. Katunda waydi mayamu tawu ti kinilala Diyus kuntay manga matadlung sa panab-anan masurundun ni Kiristu sa kagustuhan niya Ama. 20 Ipinakaun ti Kasuguan hampay yumamu ti maglabag. Dapat nu nagyamu ti kasalanan, lalu man daka kay mayad pag nabubut-un Diyus. 21 Nakan nu hinmari ngani ti kasalanan sa panab-anan kamatayan, katunda diman humari ti mayad pag nabubut-un Diyus nu pagkilalan-un niya ti manga tawu kuntay manga matadlung, hampay karubtan nida ti buhi unman may katapusan sa panab-anan nita Panginuun Hisu-Kiristu.
1 Taynguna hintay nguna kanta sabihun? Pumarargu aw nguna kita sa kasalanan hampay padakaun waydi Diyus kay mayad pag nabubut-un sa kanta? 2 Unman duy. Kita tigbak yi gid sa kasalanan, nakan ngani udyi kailangan kita mag-ugali magkasala. 3 Unman aw lugud niyu naintindihan kuntay kita tanan ti itinulbaw sa kan Kiristu Hisus, ay nipausa sa kan Kiristu kamatayan? 4 Kay ibug sabihun, pagka kita itinulbaw, kita namatay, ilinbung kaibahan ni Kiristu hampay kita diman waydi mabuhi sa usa ka bag-u pag buhi, parihu sa kan Kiristu pagka binuhi siya uman sa panab-anan daka pag kapangyarihan Ama. 5 Dahil nu napausa yi kita sa kan Kiristu sa kamatayan parihu ga sa kay kamatayan niya, pihu mipausa kita sa kanya sa pagkabuhi uman parihu ga sa kay pagkabuhi uman niya. 6 Alam nita ti daan nita pagkatawu ipinaku sa kurus kaibahan ni Kiristu, hampay udyi may kapangyarihan kanta pagkatawu makasalanan ag sa udyi kita baliwun panawuhun kasalanan. 7 Dahil nu namatay ti tawu, pinaribri yi siya sa kapangyarihan kasalanan. 8 Magpaniwala kita kuntay pihu mabuhi kita kaibahan ni Kiristu nu kita namatay waydi kaibahan niya. 9 Alam gid nita si Kiristu binuhi uman ginan sa kamatayan ag udyi makaulit mamatay. Udyi ngani may kapangyarihan sa kanya ti kamatayan. 10 Pagka siya namatay kas-a lang, nanalu siya sa kapangyarihan kasalanan hanggan waya aban. Taynguna bay kay buhi niya para sa Diyus. 11 Katunda diman kailangan kilalan-un niyu kanyu sadili tigbak yi sa kasalanan, dapat buhi ngap para sa Diyus dahil sa kanyu pakiusa sa kan Kiristu Hisus. 12 Danga yi maghari ti kasalanan sa kanyu manga bilug may kamatayan hampay udyi kamu pilitun sumunud sa manga daut kagustuhan niyu naisipan. 13 Danga niyu ipasakup sa kapangyarihan kasalanan una naan pag bahagi bilug niyu para gamit sa kadautan. Bagkus ngap pasakup kamu sa Diyus. Kamu pag manga namatay yi ag binuhi uman, ipakaun niyu sa Diyus kanyu buu pagkatawu hampay gamit yi sa katadlungan. 14 Dahil udyi kailangan maghari sa kanyu ti kasalanan, kabay udyi kamu sakup sa Kasuguan, kamu sakup ngap sa kay mayad pag nabubut-un Diyus. 15 Taynguna bumuwat aw waya kita kasalanan dahil udyi kita sakup sa Kasuguan ag sakup yi kita sa kay mayad pag nabubut-un Diyus? Bukun duy katida. 16 Alam diman niyu nu kamu napasakup una sa kantapu bilang ga panawuhun, panawuhun yi ngap kamu niyu pinagkaamu, nu ngatay manga panawuhun yi kasalanan siyun ginan ti patabgan kamatayan. Aw ngatay panawuhun yi Diyus bag-u ti patabgan katadlungan ngani. 17 Dapat ay salamat sa Diyus, dahil kaybi kamu manga panawuhun kasalanan, taynguna bay masurundun yi kanyu tagipusuun sa iinadal pag katutuuhanan kanyu yi tinanggap. 18 Kamu pinaribri ginan sa kasalanan, taynguna panawuhun yi kamu katadlungan. 19 Maghampang aku angay lang sa ugali tawu hampay balaw makuri maintindihan niyu. Kaybi ipinasakup ngani niyu kanyu sadili sa kayagtingan ag sa kadautan hanggan di mag-amat. Taynguna kailangan ipasakup ngap niyu lubus kanyu sadili sa katadlungan hampay gamitun kamu Diyus. 20 Pagka kamu panawuhun waya kasalanan, balaw kamu sakup sa katadlungan. 21 Hintay nguna pag masulung kanyu nakitan ati katpung? Tunda lang pag manga buwat kanyu pag-ikay-a taynguna, dahil kay patabgan ngani kamatayan. 22 Dapat taynguna kamu pinaribri yi ginan sa kasalanan, kamu manga panawuhun yi Diyus bag-u gamitun kamu Diyus sa kay turunu tungkul sa buhi unman may katapusan. 23 Dahil kamatayan ngani ti isuhul sa kasalanan. Dapat kay pakaun Diyus imaw ti tutuu pag buhi unman may katapusan sa manga tawu napakiusa sa kanta Panginuun Kiristu Hisus.
1 Manga patar-ari, nakaalam yi waydi kamu tungkul sa batas, nakan ngani naintindihan niyu ti tawu nasakup batas hanggan sa udwaya mamatay siya. 2 Halimbawa angay sa batas ti babayi sakup sa kay asawa hanggan sa udwaya mamatay ti lalaki. Dapat ay tunda pag lalaki nu namatay yi, udyi sakup ti babayi sa pagsabihun batas tungkul sa manga may asawa. 3 Kay ibug sabihun, nanguragin ti babayi nu magpaminsan sa iba lalaki madi buhi waya kay asawa. Dapat nu namatay yi kay asawa, ribri ti babayi sa pagsabihun batas. Nu mangasawa siya sa iba lalaki, bukun yi masabi siya nanguragin. 4 Katunda diman manga patar-ari, nu para sa Kasuguan ni Muysis kamu namatay yi dahil kamu nakapaminsan yi sa kay bilug ni Kiristu hampay kamu ribri yi sa Kasuguan ag makapaminsan waydi sa kan Kiristu sa kay pagkabuhi uman hampay magamit kita Diyus kay yi manga suruguun. 5 Kaybi kanta mag-ugali waya angay sa kanta daan pagkatawu. Pinulaw Kasuguan kanta makasalanan pag kagustuhan imaw ti nag-udyuk sa kanta hampay magamit kita kamatayan kay yi suruguun sa bumuwat kadautan. 6 Dapat ay taynguna udyi sakup kita sa Kasuguan, dahil nu para sa Kasuguan imaw ti nakasakup sa kanta, kita tigbak yi napausa yi sa kan Kiristu kamatayan. Nakan kita magsirbi sa Diyus balaw angay sa un-an nisurat pag manga bilin dapat angay ngap sa bag-u buhi sa sirung kapangyarihan Ispiritu. 7 Kay ibug aw lugud sabihun kasalanan ti Kasuguan ni Muysis? Bukun duy katida. Dapat ay unman niku naintindihan waya nu hintay ti kasalanan nu unman ginan ngap sa Kasuguan. Nu abi ti Kasuguan unman may bilin magkun, "Danga kawu maghirak", unman mana niku naintindihan nu hintay ti hirak. 8 Dapat dahil sa bilin, pinulaw kasalanan kang naisipan sa tanan kalasi hirak. Dahil nu unman may Kasuguan ga tigbak lang ti kasalanan. 9 Nu kabag-u di waya, nabuhi aku bukud sa Kasuguan. Dapat pagka naalaman niku ti bilin, nabuhi ngap ti kasalanan, 10 ag aku ngap ti namatay. Inda diman pag bilin ti magpakaun mana buhi dapat imaw ti nagpakaun ngap kamatayan sa kangku. 11 Dahil ginamit kasalanan ti bilin agud aku dayaun ag sa katunda kay yi ngap minatay aku. 12 Ti Kasuguan unman may ikasabi ag ti kada bilin unman diman waydi may ikasabi, matadlung ag mayad. 13 Kay gustu aw sabihun ti Kasuguan madi mayad imaw aw ngap ti nagpakaun kamatayan sa kangku? Bukun duy katida. Ti kasalanan ngap ti nagmatay sa kangku sa panab-anan mayad pag Kasuguan hampay siti ginan pag ipakilala ti kasalanan kay kadaka pag kadautan. 14 Alam yi nita, ti Kasuguan kay turunu sa tawu tagipusuun dapat ay aku nu sa kang lang sadili pagkatawu malumuy ag panawuhun kasalanan. 15 Unman magkaintindihan niku kang sadili buwat. Dahil ti gustu mana niku, unman ngap pagbuwatun niku. Bagkus ngap ti kang gid pagdayuun imaw ngap ti pagbuwatun niku. 16 Dapat ay nu pagbuwatun niku ti bukun gustu niku, pagpaangayan niku kuntay mayad ti Kasuguan. 17 Nakan bukun yi aku ti may buwat tunda, dapat kasalanan ti nangulian sa kangku imaw ti may buwat. 18 Alam diman niku unman may mayad nangulian sa kangku, kang gustu sabihun sa kang makasadili pag naisipan. Kaya niku mataw-an maggayak mayad, dayu lang mabwat niku kang gayak mayad. 19 Dahil unman pagbuwatun niku ti mayad pag ginayak niku. Dapat ti daut kang mana dinayu imaw ngap ti kang pagbuwatun. 20 Nu pagbuwatun niku ti bukun kang gustu, balaw yi aku ti may buwat tunda nu unman ti kasalanan nangulian sa kangku imaw ngap ti may buwat. 21 Inda kang pagtandaan ti magpangyari, nu gustu niku magbuwat mayad, arani ngap sa kangku ti daut. 22 Sa basadan niku tagipusuun pagbayaun gid niku kay manga bilin Diyus. 23 Dapat naungdan niku may tuhay pag magpangyari sa manga gamit niku bilug laban sa mayad pag kagustuhan niku naisipan. Nakan aku sinakup kapangyarihan kasalanan nangulian sa manga gamit niku bilug. 24 Kaawaawa ungud kang kahamtangan. Si unu ti pumaribri sa kangku ginan sa kang bilug inda kay patabgan kamatayan? 25 Diyus ngani ti pumaribri sa panab-anan nita Panginuun Hisu-Kiristu. Salamat gid ungud sa kanya. Nakan kainda kang kahamtangan. Nu sa kang naisipan magsirbi aku sa kay manga bilin Diyus, dapat nu sa kang sadili pagkatawu may kalumuyan, magsirbi aku sa kasalanan.
1 Nakan ngani dayi sintinsiyahan Diyus ti manga magpakiusa sa kan Kiristu Hisus. 2 Udyi kita sakup sa kapangyarihan kasalanan hanggan kamatayan, dahil ti kapangyarihan Ispiritu ti nagparibri sa kanta, imaw diman ti magpakaun buhi. Inda pag kaayadan matanggap nita dahil lang sa kanta pakiusa sa kan Kiristu Hisus. 3 Binwat Diyus ti unman nabuwat Kasuguan dahil sa kalumuyan nita pagkatawu. Sinugu niya kay sadili Anak ga histuda tawu makasalanan hampay ipakaun niya kay buhi sa kamatayan dahil sa kasalanan. Sa katida pag paraan nasintinsiyahan niya ti kasalanan nangulian sa manga tawu tagipusuun. 4 Binwat niya ti tanan inda hampay ti pag-ibilin Kasuguan mitupad sa kanta sa manga mag-ugali angay sa Ispiritu, balaw angay sa sadili lang kagustuhan nita pagkatawu. 5 Dahil ti tawu nu mag-ugali angay sa hilig sadili kagustuhan niya pagkatawu imaw yi lang waydi kay pag-intindihun. Dapat ti tawu nu mag-ugali angay sa udyuk Ispiritu pagharian Ispiritu kay naisipan. 6 Dahil ti tawu nu kay pag-intindihun kay sadili lang kagustuhan niya pagkatawu kay patabgan ay kadamhakan. Dapat tigmasigasid tungkul sa Ispiritu Banal imaw ti may buhi hanggan kahusayan. 7 Ti tawu nu mag-intindi lang sa kay sadili lang kagustuhan niya pagkatawu, siya kalaban yi Diyus, dahil dayu siya magsunud sa kay manga bilin Diyus, dayu gid waydi mahimu. 8 Ag dayu gid mahimu pagbayaun Diyus ti tawu nu mag-ugali angay lang sa sadili kagustuhan niya pagkatawu. 9 Dapat kamu udyi mag-ugali angay sa sadili lang kagustuhan niyu pagkatawu. Bagkus ngap kamu mag-ugali angay sa Ispiritu, nu ungud nangulian yi sa kanyu ti Ispiritu Diyus. Dapat una si unu nu unman may Ispiritu ni Kiristu, unman sakup siya sa kan Kiristu. 10 Nu si Kiristu nangulian yi sa kanyu, kanyu bilug ga namatay dahil sa kasalanan, dapat kanyu tagipusuun magkabuhi dahil kamu kinilala Diyus kuntay manga matadlung. 11 Nu nangulian sa kanyu ti Ispiritu Diyus ti nagbuhi uman sa kan Hisus, ti Diyus ti nagbuhi uman sa kan Kiristu Hisus sa kamatayan, pumakaun waydi buhi sa kanyu manga bilug may kamatayan sa panab-anan niya Ispiritu nangulian sa kanyu. 12 Nakan ngani duy manga patar-ari, kita udyi panawuhun nita sadili kagustuhan pagkatawu. Danga yi mag-ugali kita angay sa kanta sadili kagustuhan pagkatawu. 13 Dahil nu mag-ugali kamu angay lang sa sadili niyu kagustuhan pagkatawu pihu kamu mamatay. Dapat nu sa paban-anan kapangyarihan Ispiritu pagmatyun niyu ti buruwatun angay sa sadili kagustuhan niyu pagkatawu, magkabuhi kamu. 14 Dahil ti tanan manga tuludluan Ispiritu Diyus, imaw ti manga anak Diyus. 15 Ti Ispiritu kay ipinakaun Diyus sa kanyu balaw may turunu hampay kamu buwatun maan madalaun pag panawuhun. Dapat ay pagka natanggap yi niyu ti Ispiritu bag-u kamu pagbuwatun yi niya manga anak Diyus. Nakan magtawag kita sa kanya magkun, "Amang, Amang." 16 Ti Ispiritu ngani tigpatutuu minsan sa kanta tagipusuun kuntay kita manga anak Diyus. 17 Nu ungud kita kay manga anak, kita yi gid ti makatanggap pamana kay ihinanda Diyus sa kay manga anak. Kita kaibahan ni Kiristu sa pagtanggap pamana. Dahil nu kita magtiis kaibahan niya, kaibahan waydi niya kita sa kadayawan. 18 Sa kang sadili isip niku ti paglakawan nita kakurian kainda pihu unman tumimbang sa kadayawan miburayhaw aban sa kanta. 19 Ti tanan linalang Diyus magpatigagad yi gid sa kaudasan nu mipaburayhaw yi Diyus aban kay manga anak niya. 20 Dahil ti tanan linalang Diyus sinakup binul-an turunu, balaw buluntadan nu unman sa kagustuhan Diyus. Madi katida may pag-asa waya, 21 dahil ti tanan linalang Diyus iribri aban sa kay pagkasakup sa karunutan, bag-u may kabahagi sa mamaski pag karibrihan manga anak Diyus. 22 Alam nita ti tanan tanan linalang Diyus hanggan taynguna tugka magpabawi ginan sa kakurian parihu ga babayi magpanamdam. 23 Ag balaw lang sida. Una hanggan kita. Natanggap nita ti Ispiritu, ipinauna ipinakaun Diyus sa kanta. Ga mag-arunghung sa kanta tagipusuun kita sa pakaalagad sa kaudasan nu kay ipaburayhaw Diyus kanta kahamtangan bilang kay manga anak, kay ibug sabihun nu iribri yi aban kanta buu pagkatawu. 24 Ribri yi kita, dahil kita may pag-asa. Dapat ti pag-asa balaw yi masabi pag-asa nu mag-akitan yi ti pag-asahan. Dahil si unu ti umasa waya nu nakitan yi. 25 Dapat nu mag-asa kita sa udwaya nita mag-akitan, pihu kita manga matiniisun. 26 Katunda diman kita manga malumuy pag-awatan di Ispiritu. Dahil nu kita magdarangin kurang kita sa kanta mag-intindi. Nakan ti Ispiritu magdarangin para sa kanta balaw kay pag-ibungat, may ga arunghung sa basad tagipusuun. 27 Magkasalman di Diyus sa kay magsuyasid sa tagipusuun tawu nu hintay ti gustu sabihun Ispiritu, dahil ti Ispiritu magdarangin para sa manga magsarig sa kan Kiristu angay sa kay kagustuhan Diyus. 28 Alam nita sa tanan manga bagay ti Diyus minsan magbuwat sa manga magmahal sa kanya sa kanda ikaayad. Dahil sida pinili niya angay sa kay turunu. 29 Dahil ginan waya sa kabag-u alam di daan Diyus nu si hintay pag manga tawu sa kanya. Tunda pag manga tawu hinanda niya hampay pumarihu sa kay Anak, hampay si Hisus, kay Anak Diyus, bilang ga panganay mayamu patar-ari. 30 Kay manga hinanda ginan waya sa kabag-u kay diman binutung niya. Ti manga binutung niya kay diman kinilala kuntay manga matadlung. Ag ti manga nakilala niya kuntay manga matadlung, kay naayawan diman waydi niya kadayawan. 31 Hintay waya kanta masabi tungkul sa inda pag manga bagay. Nu ti Diyus kampi sa kanta, si unu waya kanta kalaban? 32 Unman inirangan niya kay sadili Anak, bagkus ipinakaun ngap niya para sa kanta tanan. Nu kay ipinakaun niya ngani kay sadili Anak sa kanta, unman aw lugud ipakaun niya sa kanta ti tanan manga bagay mirinsanan sa kay Anak? 33 Si unu lugud ti pumanghas magsumbung laban sa manga tawu pinili yi Diyus. Diyus kabay ti magkilala sa kanda kuntay sida manga matadlung. 34 Hintay waya gid ti sumintinsiya sa kanta atag sa kaparusahan? Si Kiristu Hisus sa kay yi sikun baliwa Diyus. Siya waya ngani ti namatay bag-u binuhi uman Diyus. Taynguna siya yi ti nagbaliwa sa kanta. 35 Si unu waya ti bumulag sa kanta ginan sa pagmahal ni Kiristu. Ngatay kakurian, ngatay kalisdanan, ngatay pag-unuunu, ngatay lun-us, ngatay nu udyi may panlung, ngatay sa mahawag, aw ngatay nu maayangan yi kay urup? 36 Angay sa isinurat sa Banal Kasuratan magkun, "Alang alang sa kanmu, madala yi lang kami matyun ginan sa surip hanggan sa malambung. Inunuunu kami parihu ga manga karanidu maratyun." 37 Ti tanan inda pag kakurian kaya di ay nita madaug dahil sa kanta Panginuun Hisus imaw tigmahal sa kanta. 38 Napihu yi niku unman may bumulag sa kanta ginan sa pagmahal Diyus, una kamatayan, una buhi, una manga anghil, una manga naminunu, una manga paglakawan sa taynguna, una sa paratabgan waya, una manga kamaskihan, 39 una sa kaabwatan, una sa kaabasadan, una si unu waya kay linalang Diyus unman gid may bumulag sa kanta ginan sa kay pagmahal Diyus. Ipinakilala Diyus kay pagmahal sa kanta sa panab-anan ni Kiristu Hisus kanta Panginuun.
1 Magdungug di si Kiristu tutuu kang pagsabihun, unman aku magpudil. Maghiling diman ti Ispiritu Banal lumpiyu kang tagipusuun sa kang pagsabihun sa kanyu magkun, 2 subra masyadu kang karukuan balaw mab-ul kang mag-asaydan sa kang tagipusuun, tungkul sa kang manga kaparihu kanasyun, sa kang manga kasimanwa. Mayad waya abi sa kangku nu saadan yi lang aku miblag ginan sa kan Kiristu basta maribri mana sida. 4 Sida manga Israilita, binwat Diyus manga anak niya. Nakitan nida ti malinaw pag tanda tigpakilala kuntay ti Diyus yi ngap ti kaibahan nida. Tinalaghut Diyus kay taratu sa kanda, sa kanda diman ipinakaun niya ti Kasuguan, ti tutuu gid pag samba hanggan kay manga pangaku. 5 Sida minamat nida ni Abraham ni Isaak ni Hakub. Bag-u siti diman waydi ginan pag linahi si Kiristu sa kay pagkatawu, imaw ti Diyus makamaskihan sa tanan, siya ti pagdayawun hanggan waya aban. Amin. 6 Balaw sa nitugka lang ti Bagaw Diyus. Dahil balaw waydi ti tanan manga linahi Israil niminsan sa kay pinili Diyus pag nasyun. 7 Balaw waydi ti tanan linahi ni Abraham pagkilalan-un kuntay suud niya minamat. Sinabi Diyus sa kanya magkun, "Kan Isaak lang waydi pag manga linahi ti pagkilalan-un kuntay minamat nimu." 8 Inda kay ibug sabihun, ti manga anak ni Ismail unman pagkilalan-un Diyus kuntay manga anak niya. Tunda lang pag manga anak inanak angay sa kay pangaku Diyus imaw ti pagkilalan-un kuntay linahi ni Abraham. 9 Dahil katida kay pangaku Diyus magkun, "Pagka aku aban bumalik maan sa kang taning pag kaudasan, pihu may anak yi si Sara." 10 Dapat balaw lang waydi tunda. Dahil kan Ribika manga anak duwa ka bilug usa usa kanda ama si Isaak kanta kalahian kaybi. 11 Ipinakilala Diyus kay nagpili sa usa lang ka anak sa kan Hakub angay sa kay sadili gayak Diyus, balaw angay sa buwat tawu. Dahil nu udwaya inanak ti manga anak, ag udwaya nakabuwat una daut una mayad, daan yi sinabi Diyus sa kan Ribika magkun, "Sumirbi ti aka sa kay ari." 13 Angay sa isinurat sa Banal Kasuratan magkun, "Pinili niku si Hakub, dinayu niku si Isaw." 14 Nu katunda masabi aw nita kuntay unman matadlung ti Diyus? Bukun ngap unman matadlung ti Diyus. 15 Dahil kainda kay sinabi niya sa kan Muysis magkun, "Naawa aku sa gustu niku pagkaawaan, naluuy aku sa gustu niku pagkaluuyan." 16 Nakan ngani kay magpili Diyus angay gid sa kay pangaawa, balaw angay sa kagustuhan una kasipagan tawu. 17 Dahil sa Banal Kasuratan kay sabi Diyus sa kan Paraun, "Binwat niku kawu hari hampay sa panab-anan nimu pag ipakakit niku kang kapangyarihan ag hampay milantag kang ngaran sa usa ka kalibutan." 18 Nakan ngani pagkaawaan Diyus una hintay kay gustu niya pagkaawaan. Pagpaganitun niya ti tagipusuun tawu kay gustu niya paganitun. 19 Magkumun kawu sa kangku, "Hayga pagsisihun waya Diyus ti tawu? Si unu ti umampara sa kay kagustuhan Diyus?" 20 Dapat kawu duy tawu lang, si unu lugud kawu nakan nagsagut katida sa Diyus? Masabi aw lugud anglit sa nagpanday sa kanya magkun, "Hayga binwat nimu aku kainda?" 21 Unman aw madunung ti manugpanday anglit magbuwat usa ka mahalaga pag anglit, bag-u kay usa basta basta lang, ginan sa usa lang ka pinkul daga? 22 Katunda diman kay binwat Diyus. Madi kaybi gustu gid niya ipakakit kay pangagalit hanggan kay kapangyarihan, dapat lubus inagwanta lang niya ti manga tawu kay pagkagalitan, kay ihinanda hampay parusahan tudasun. 23 Gustu diman niya ipakakit niya kay unman may pumarihu pag kamaskihan sa manga tawu kay pagkaawaan ag kay ihinanda ginan waya kaybi para tabug sa kadayawan. 24 Kita yi paman tunda pag manga tawu kay pinili niya balaw lang ginan sa manga Hudiyu, ginan diman hanggan sa manga balaw Hudiyu. 25 Kainda kay sinabi Diyus sa ribru ni Usyas magkun, "Tunda pag manga tawu balaw daan pinili niku pag nasyun, kang gid ngap ingarnan Kang yi Nasyun. Ti balaw daan niku pagmahalun pag nasyun, kang gid ngap ingarnan Mahal Niku. 26 Nu naan sida pagsabihun magkun, 'Kamu bukun Nasyun niku', siyun ngap ingarnan sida manga anak Diyus buhi." 27 Ainalsa kay busis ni Isayas kay nagtultul tungkul sa taga Israil magkun, "Una ga baras dagat kay kayamu ti manga linahi ni Israil, pira pira lang sa kanda ti maribri. 28 Dahil mahigpit ag bigla pag tupadun Diyus ti sintinsiya sa kalibutan." 29 Si Isayas diman ti may sabi magkun, "Ti Panginuun makapangyarihan sa tanan nagsawad di kay iba sa kanta lahi, Nakan kita unman niparihu ga Suduma ag ga Gumura." 30 Kainda ti gustu niku sabihun, ti manga balaw Hudiyu una unman nanipag sa mayad pag buwat hampay sida mahimu pagkilalan-un Diyus kuntay manga matadlung, lalu ngap kinilala niya sida kuntay manga matadlung dahil kanda pagsarig sa Diyus. 31 Dapat ti Israil lalu ngap nanipag hampay matupad nida ti Kasuguan ni Muysis para pagkilalan-un mana sida Diyus kuntay manga matadlung, dapat sa kay magbantay Diyus kurang di kanda magtupad. 32 Hayga nguna katida? Nakan katida dahil nanipag sida sa kanda sadili buwat lang ag balaw angay sa kanda pagsarig sa Diyus. Ga nadayaan sida sa batu karadayaanun, 33 imaw ti nisurat sa Banal Kasuratan magkun, "Nagpauli aku sa banwa Siun usa ka batu karadayaanun, laun pag batu kanda matalakpahan. Dapat balaw mibuyu una hintay pag tawu nu sumarig sa kanya."
1 Manga patar-ari, imaw diman kang pagpakaisip-isipun hanggan pag-idarangin sa Diyus hampay miribri kang manga kaparihu kanasyun. 2 Mapatutuuhanan niku sida nanipag hampay pagbayaun mana sida Diyus, dapat nagsalan sida sa kanda pag-intindi. 3 Dahil unman naintindihan nida kay paraan Diyus hampay kay pagkilalan-un niya ti manga tawu kuntay manga matadlung. Unman sinunud nida ti paraan Diyus. Bagkus ngap nanipag sida sa kanda sadili paraan hampay pagkilalan-un sida Diyus kuntay manga matadlung. 4 Si Kiristu ti katugkaan Kasuguan ni Muysis. Nakan ngani una hintay ti sumarig sa kanya kilalan-un Diyus kuntay matadlung. 5 Kainda kay sinurat ni Muysis tungkul sa kay pagkilala Diyus sa tawu kuntay matadlung nu sida magtupad sa Kasuguan. Magkun siya, "Ti tawu nu magtupad siya sa Kasuguan, may buhi siya sa panab-anan waydi Kasuguan." 6 Dapat tungkul sa kay pagkilala Diyus sa tawu kuntay siya matadlung dahil sa kay pagsarig, kainda ti pagsabihun sa Banal Kasuratan magkun, "Danga isipa nimu sa kanmu sadili magkun, si unu ti makaatag sa langit?" Nu katida bilang ga ipadugsun maan si Kiristu. 7 "Danga diman waydi nimu pagsabiha, si unu ti dumugsun tag sa kaabasadbasadan?" Nu katida bilang ga bul-un si Kiristu ginan sa namatay. 8 Dapat inda kay pagsabihun magkun, "Arani yi sa kanmu ti barita Diyus, sa kanmu yi bibig ag sa kanmu tagipusuun." Imaw yi ngani ti barita kanmi pag-itudlu tungkul sa pagsarig magkun, 9 nu itultul nimu magkun, "Si Hisus imaw ti Panginuun", ag nu sumarig kawu buu tagipusuun siya binuhi uman Diyus ginan sa kamatayan, nu katunda miribri kawu. 10 Dahil ginan sa kanta tagipusuun kita pag magsarig sa Panginuun bag-u kita pagkilalan-un Diyus kuntay kita matadlung. Ag nu pag-itultul nita kanta pagsarig, miribri kita. 11 Pagsabihun sa Banal Kasuratan, "Balaw mibuyu una hintay pag tawu nu sumarig sa kanya." 12 Balaw may nagtuhay ti kahamtangan una Hudiyu una balaw Hudiyu. Usa lang ti Panginuun tanan tawu. Siya tigpakaun kay manga kaayadan sa tanan manga magdangup sa kanya. 13 Dahil pagkumnun sa Banal Kasuratan, "Maribri ti kada tawu nu magdangup sa kay ngaran Panginuun." 14 Dapat kabitay pag dumangup ti manga tawu sa kay ngaran Panginuun nu unman kanda pagsarigan siya? Kabitay sida pag sumarig nu unman waya sida may nadnugan barita tungkul sa kanya? Kabitay sida pag makadnug nu unman may magtudlu? 15 Kabitay pag makatudlu una si unu nu unman siya pagsuguun? Angay sa nisurat magkun, "Anung pag mangarinu pag lulud ti magdara Mayad pag Barita." 16 Dapat unman tanan tanan nagsunud sa Mayad pag Barita. Kainda kay sabi ni Isayas magkun, "Panginuun, si unu ti naniwala sa kanmi sinabi?" 17 Ti tawu dayu waya sumarig nu unman nakadnug siya sa Mayad pag Barita. Makadnug lang ti tawu nu may manudlu tungkul sa kan Kiristu. 18 Dapat kang paingana, unman aw nguna sida nakadnug? Nakadnug yi waydi sida. Dahil magkun sa Banal Kasuratan, "Ras-ug yi sa tanan rugar kanda bagaw, Kanda bagaw tinmalaptap yi sa kalibutan." 19 Inda waya kang paingana, unman aw nguna nakaintindi ti nasyun Israil? Kaybi waya nasagut yi tunda ni Muysis magkun, "Ti manga tawu balaw paman masabi kuntay usa ka nasyun imaw ngap ti gamitun niku aban hampay sida pumahirak sa kanyu. Gamitun niku ti usa ka nasyun tawu unman may kadunungan hampay paisugun nida kamu." 20 Itinapat yi gid ni Isayas kay pagsabihun magkun, "Magkun ti Panginuun, nakilala aku manga tawu madi unman maghanap sida sa kangku. Aku nagpakakit sa manga tawu madi unman magpaingana tungkul sa kangku." 21 Dapat sinabi niya tungkul sa Israil magkun, "Ginan surip hanggan malambung usa ka sirang aku magpakapatigagad sa usa ka nasyun tawu maganit kay ulu ag maglaban sa kangku."
1 Inda kang paingana, dinayu aw nguna Diyus kay nasyun? Unman duy dinayu niya kay nasyun. Aku kabay Israilita diman waydi, ginan sa lahi ni Abraham, sinulput sa lahi ni Binhamin. 2 Unman dinayu Diyus kay nasyun, kabay sa kabag-u di waya turunu niya kay yi pinili. Unman aw lugud niyu magkaalaman ti pagsabihun sa Banal Kasuratan tungkul sa kan Ilyas? Nangungud siya sa kay darangin sa Diyus laban sa manga taga Israil. 3 Kay sabi niya, "Panginuun, minatay nida kanmu manga purupita, dinaut nida ti manga surunugan hayup pag-isagda sa kanmu. Aku wadi ti nasawad dapat kanda waya gid gustu mana matyun aku." 4 Dapat hintay kay sagut Diyus sa kanya? Magkun ti Diyus, "May sinawadan waya aku pitu ka libu lalaki unman sinamba nida si Baal pag diyusdiyusan." 5 Katunda diman una kainda may imaw diman nasawad manga pinili Diyus dahil sa kay mayad nabubut-un. 6 Pinili ngani sida dahil sa kay mayad gid nabubut-un Diyus, balaw dahil sa kanda sadili buwat. Nu abi pinili sida dahil sa kanda sadili buwat, balaw yi masabi kuntay sa mayad nabubut-un Diyus. 7 Kabitay nguna tunda? Unman nakakarubut ti buu nasyun Israil sa kay inasahan. Dahil maganit kanda manga tagipusuun ti iba. Kay iba lang, ti manga pinili lang Diyus ti nakakarubut tunda. 8 Kainda ti sinabi sa Banal Kasuratan magkun, "Pinakan-an Diyus inda pag manga tawu sa unman yi lang makaintindi. Kanda manga mata unman yi lang kumakit, Kanda manga tuli udyi lang dumungug hanggan taynguna tugka." 9 Sinabi diman ni Dabid, "Pagga bitik, ga bintuka yi kanda karan-an, Karadayaanun nida tag sa kaparusahan. 10 Pagmandulum yi kanda mata hampay udyi lang sida makakit, paggapang yi lang sida sa kakurian hanggan tugka sa kamatayan." 11 Kay aw ibug sabihun tunda, pagka nadayaan ti manga Hudiyu rargu yi lang nguna napuli? Balaw waydi. Dapat ay dahil nagkasala ti manga Hudiyu, nakan nagras-ug ngap ti karibrihan sa manga balaw Hudiyu. Pagka katida naghirak ti manga Hudiyu sa manga balaw Hudiyu. 12 Ginan sa pagsimray manga Hudiyu may natanggap papalad ti tanan nasyun sa babaw daga, ag ginan sa kanda nibuyu, nagras-ug ti kaayadan sa manga balaw Hudiyu. Nu masakup maan aban ti tanan manga ginayak Diyus pag manga Hudiyu, mas lalu daka man pag kaayadan ti matanggap manga balaw Hudiyu. 13 Inda maan kang pagsabihun sa kanyu sa manga balaw Hudiyu, aku kabay Apustul sa manga balaw Hudiyu. Nakan pag-intindihun gid niku kang buruwatun, 14 hampay humirak kang manga kaparihu Hudiyu agud may maribri waya ti iba sa kanda. 15 Pagka sida dinayu Diyus bag-u pinaunyun ngap Diyus ti manga nasyun taga kalibutan tabug sa kanya. Nu bay tanggapun maan ti manga Hudiyu, tunda parihu ga magpakaun buhi sa namatay. 16 Nu ginan sa pinkul harinu ti un-an binwat tinapay ipinakaun sa Diyus, dara di hanggan kay binawasan ipinasakup diman sa Diyus. Nu ipinakaun sa Diyus ti gamut puun kayu, dara hanggan kay manga sanga ipinasakup diman sa Diyus. 17 Pinlud kay iba sanga ti tanum puun ulibu ag kawu, ga sanga lang lupaw pag ulibu, pag-isugdung sa puun tanum ulibu, hampay maayawan taguk sa gamut ginan. 18 Nakan unman kawu kailangan magpuya sa kay pinlud pag manga sanga. Isipa nimu balaw kawu tig-alaga sa kay gamut, ti gamut di tig-alaga sa kanmu. 19 Sabihun nimu waydi, "Pinlud ti manga sanga hampay aku misugdung." 20 Tutuu gid tunda. Pinlud sida dahil unman sida magsarig sa Diyus. Dapat kawu isinugdung dahil magsarig kawu sa Diyus. Nakan ngani, danga kawu magpalabilabi, bagkus ngap pag-aman kawu. 21 Dahil nu unman hininayngan Diyus ti urungan pag manga sanga, ti manga Hudiyu ngani, unman waydi kawu hinayngan niya. 22 Sitay pag makilala nita kay kaayadan Diyus hanggan kay kaisugan. Magpangisug siya sa manga nagkasala sa kanya, dapat mayad siya sa kanmu nu udyi kawu pablag sa kay kaayadan. Nu bay kawu pablag, puldun diman kawu. 23 Ti manga Hudiyu misugdung di maan uman nu sida bumalik sa Diyus ag sumarig sa kanya, dahil may kapangyarihan ti Diyus hampay isugdung maan sida. 24 Nakan ngani kamu duy pag manga balaw Hudiyu ga sanga lang ulibu lupaw nisugdung sa puun tanum ulibu madi balaw angay pag buwat paraan ga baliskad. Ti manga Hudiyu mas lalu misugdung maan Diyus ti sanga alaga pag puun ulibu sa kay di gid maan puun. 25 Manga patar-ari, gustu niku maalaman niyu ti usa ka katutuuhanan udwaya maburayhawan, hampay balaw mag-isip kamu palabilabi sa kanyu sadili. Ti kaganitan nasyun Israil balaw padayundayun, balaw hanggan aban. Inda magkadugay lang hanggan sa udwaya makapakarani sa Diyus ti tanan manga ginayak niya pag manga balaw Hudiyu. 26 Nu katunda, miribri di aban ti usa ka nasyun Israil, angay sa isinurat sa Banal Kasuratan magkun, "Aban ginan sa Siun ti Manugribri, Duraun niya ti tanan kadautan linahi ni Hakub. 27 Inda aban kang taratu sa kanda nu bin-ul yi niku kanda manga kasalanan." 28 Dinayu manga Hudiyu ti Mayad pag Barita, nakan nagbaliw sida manga kalaban Diyus. Bag-u pinakan-an ngap kamu pag manga balaw Hudiyu rugar hampay makakit kaliktasan. Dapat ti manga Hudiyu pinili di Diyus, kay di gid pagmahalun sida dahil sa kay taratu sa kanda manga kaapuapuhan. 29 Dahil ti Diyus unman magkauman kay inisip tungkul sa kay manga ipinakaun pag kaayadan hanggan tungkul sa kay manga pinili pag manga tawu. 30 Kaybi daan kamu pag manga balaw Hudiyu manga malaban sa Diyus, dapat taynguna pagkaawaan ngap kamu niya sa katpung kaudasan manga malaban ti manga Hudiyu. 31 Katunda diman waydi sida nagbaliw manga malaban taynguna katpung kamu pagkaawaan, hampay sida kaawaan di maan waydi Diyus. 32 Dahil pinahintulutan Diyus ti tanan pag manga tawu ga panawuhun yi nida ugali maglaban sa kanya hampay mipakilala waydi niya kay mayad nabubut-un sa kanda tanan. 33 Abunda gid ungud kay kayamanan ti Diyus. Udyi kaya isipun tawu kay kadunungan hanggan kay kaalaman niya. Udyi magkatabu magkasuyasid kay manga turunu hanggan kay pamaraan. 34 Parihu sa isinurat sa Kasuratan magkun, "Unman may tawu nakaintindi sa kay inisip Panginuun. Unman may nagpaturun sa kanya. 35 Unman waydi may tawu nagpakaun una lang hintay sa Diyus hampay balusan maan siya Diyus." 36 Dahil Diyus ti gimpuunan tanan pag manga linalang. Ginan sa kanya tunda tanan ag siya diman ti turunu. Sa kanya di ti kadayawan hanggan aban. Amin.
1 Nakan ngani manga patar-ari, alang alang sa kay pangaawa Diyus daka sa kanta, inda kang paanyu gid mana sa kanyu, ipakaun niyu buhi waya kanyu sadili bilug sa Diyus hampay sakup sa kanya, imaw pag pakaun kay pagbayaun niya. Inda ti tutuu niyu pagsamba sa Diyus. 2 Danga kamu magpaangay sa palakaw manga taga kalibutan inda. Dagpaparihu yi kamu, pag-&bag-u yi kanyu naisipan agud maalaman niyu nu hintay ti kagustuhan Diyus, nu hintay ti mayad ag ti ikabaya niya ag udyi may kakurangan. 3 Angay sa kaayadan kay ipinakaun Diyus sa kangku, pagsabihun niku sa kada usa sa kanyu, danga niyu pagpahalagai subra kanyu sadili bilug, bagkus painuinuha ngap niyu kanyu tutuu kahamtangan angay sa kay kadaka niyu pagsarig kay ipinakaun Diyus sa kada usa sa kanyu. 4 Ti buu bilug mayamu kay gamit may kanya kanya katungkulan. 5 Katunda diman kita mayamu magkausa diman sa kabuuhan bilug ni Kiristu, ti kada usa may kabahagi tag sa manga iba. 6 May kanya kanya pakaun ti Diyus sa kanta, angay sa kay nabubut-un niya mayad sa kanta. Nakan kailangan gamitun nita tunda pag manga pakaun. Nu kay ipinakaun Diyus sa kanta para manugpurupita, pagpurupita yi ngani kita angay sa kay kadaka pag sarig nita. 7 Nu kay ipinakaun Diyus sa kanta para manugsirbi sa kay buruwatun, pagsirbi yi kita. Pagtudlu yi nu kay tinanggap pag pakaun para manugtudlu. 8 Pagparig-un sa manga patar-ari ti pinakan-an para manugparig-un. Nu mag-ambag, danga may kabuyatan. Nu kawu magpinunu, pag-ilubus nimu kanmu pagkapunu. Nu mag-awat sa tawu may kakurian, pagmasulung kam naisipan sa kanmu mag-awat. 9 Pag-ungud yi gid kanyu pagmahal. Pagsuku yi kamu sa daut, mayada niyu ti kaayadan. 10 Pagmalahalan kamu ga suud magtar-ari. Nu kabitay ti manga iba kanda pagpahalaga sa kanyu, paglalu waya daka kanyu magpahalga sa kanda. 11 Pagpakasipag kamu, pagsa karayawan Ispiritu Banal kanyu pagsirbi sa Panginuun. 12 Pagbaya kamu dahil sa kanyu pag-asa. Pagmatugway kanyu naisipan una sa kakurian, ag pirmi pagdarangin. 13 Awati niyu ti manga pangailangan niyu manga patar-ari. Pagpirmi kamu alistu magtanggap sa manga dayuhan sa kanyu balay. 14 Idarangin niyu ti manga mag-unuunu sa kanyu hampay sida papaladan Diyus. Idarangin niyu hampay papaladan sida Diyus, daranginan di niyu sida hampay balaw sida saadan Diyus. 15 Pagpakibagay kamu sa manga magbaya, pagpakibagay diman sa manga maglumi. 16 Pagkausa kanyu nalub-anan. Danga kamu magpalabilabi, bagkus ngap pagpakiusa kamu sa manga makuri kay kahamtangan. Danga pag-isipa niyu kanyu sadili kuntay kamu yi lang ti madunung. 17 Nu may magbuwat daut laban sa kanyu, danga pagbalusa daut. Pangungud kamu sa kanyu ugali mayad sa magbantay tanan tawu. 18 Hanggan tugka sa kanyu makaya pagpakiusa kamu kaayad sa tanan manga tawu. 19 Manga mayad patar-ari, danga kamu magbalus. Ipabahala niyu tunda sa Diyus. Dahil nakasurat sa Banal Kasuratan magkun, "Magkun ti Panginuun, aku ti bahala magganti, pihu gumanti aku." 20 Bagkus ngap, "Nu magkalun-us kanmu kalaban, pakan-a nimu. Nu magkauwaw painma nimu. Nu katunda mangay-a siya sa kay sadili." 21 Danga kawu magpadaug sa daut. Bagkus ngap idaug nimu ti kaayadan sa kadautan.
1 Ti kada usa ka tawu kailangan pagpasakup sa manga pinunu gubirnu. Dahil unman may magpamahala nu unman ginan sa Diyus ag ti manga gubirnu ti magpamahala kainda imaw gid ti pinatukahan Diyus. 2 Nakan ngani ti tawu nu maglaban sa gubirnu, kay ngap paglabanan ti pinili Diyus. Pihu padapatan parusa una sitapu tiglaban. 3 Ti manga pinunu kailangan kadalaan manga tawu magbuwat daut. Dapat ti magbuwat mayad unman waydi kailangan magkadala sa kanda. Ibug aw nimu dayu madala sa manga gubirnu? Pagbuwat kawu sa mayad bag-u bayaun kawu nida. 4 Dahil sida manga suruguun Diyus sa ikamayad nimu. Dapat ay madala kawu nu magbuwat daut, dahil sida tutuu gid may karampatan magparusa. Sida manga suruguun Diyus, hampay parusahan nida ti manga magbuwat daut. 5 Nakan ngani kailangan kamu pagpasakup yi ngani hampay maiwasan niyu kay pangagalit Diyus ag hampay unman kamu may pag-alalahanun kasalanan sa kanyu tagipusuun. 6 Tunda diman ti dahilan nu hayga kamu magbayad buhis. Dahil ti manga pinunu gubirnu manga suruguun ngani Diyus, magpamahala sa tunda pag manga buruwatun. 7 Ipakaun niyu sa kada usa ti dapat sa kanya. Pagbayad buhis hanggan manga lisinsiya sa manughiyaput buhis. Paggalang sa may karampatan galangun, pahalgai niyu ti dapat pahalgaan. 8 Danga magpalya kamu sa kanyu kundisyun magbayad utang una sa kantapu. Danga paglimti kanyu pagmahal sa usa kag sa usa dahil ti pagmahal sa kaparihu tawu imaw ti makatupad sa Kasuguan Diyus. 9 Ti manga sugu Diyus magkun, "Danga kawu mag-uragin, danga kawu maglibun tawu, danga kawu magtakaw, danga kawu maghirak," ag una hintay waya pag manga sugu parihu sa kainda. Tunda tanan tanan nagkamhanan sa inda pag hampang magkun, "Mahala nimu kanmu kaparihu parihu sa kanmu sadili." 10 Ti may pagmahal sa kay kaparihu dayu magbuwat daut una sa kantapu. Nakan pagmahal imaw yi gid ti kamhanan buu Kasuguan. 11 Mayad nu pagbuwatun niyu inda tanan, dahil alam yi niyu nu hintay pag udas yi kainda. Udas yi hampay mimata yi kamu kainda ginan sa katurugan dahil arani yi ti udas nita lubus pag karibrihan, balaw yi ga kaati katpung ga kanta bag-u nagsarig sa Panginuun. 12 Mag-agaw yabi sirang arani yi magkasirang yi. Pagpakarayu yi kita ginan sa tanan buwat daut, ihanda nita kanta sadili sa buwat kaayadan. 13 Pag-ugali kita sa mayad, danga pag-abalaha ti udas sa maglangu, sa magulu pag kasulungan, danga pagpasibut-i ti sadili daut kagustuhan pagkatawu, una sa kahalayan, una sa irisgan, una sa hirirakan. 14 Ipasakup niyu kanyu sadili sa Panginuun Hisu-Kiristu hampay siya ti humari sa kanyu buhi ag danga pakan-an rugar ti sadili naisipan hampay dayu pasibut-an lang ti sadili kagustuhan.
1 Tanggapa niyu ti malumuy kay pagsarig, danga niyu pagtamyawa kay manga tun-anun. 2 May tawu magkaun una hintay pag karan-unun, unman may daut sa kay naisipan. Dapat ti malumuy kay pagsarig unman magkaun taguban. 3 Ti tawu magkaun una hintay pag karan-unun danga mag-away sa tawu unman magkaun taguban. Ti tawu unman magkaun taguban danga waydi pagpihua niya kuntay daut ti magkaun una hintay pag karan-unun, dahil siya tinanggap diman Diyus. 4 Hayga lugud kawu magpihu sa daut sa mayad manga suruguun iba tawu? Kay Panginuun lang ti makasabi nu ngatay siya matinupadun aw ngatay unman. Pihu gid siya balaw dayuun dahil kay Panginuun ti may kapangyarihan magtudlu sa kay suruguun hampay magbuut mayad. 5 May tawu magsabi may mahalaga pag sirang, may tawu waydi magsabi parihu lang ti tanan pag manga sirang. Pagpakarig-un ti kada usa sa kay naisipan nu naan ti mayad sa kanya tungkul sa siti. 6 Ti magpahalaga sa usa ka sirang nakan kay pagpahalagaan, dahil siya mag-alaala sa Panginuun. Ti magkaun una hintay pag karan-unun, mag-alaala diman sa Panginuun dahil magpasalamat diman siya sa Diyus. Tunda ngani ti unman magkaun manga iba kalasi karan-unun nakan katunda kay buwat pag-alaalahun diman niya ti Panginuun, magpasalamat diman sa Diyus. 7 Una sitapu sa kanta balaw mahimu nu sa kay lang sadili pag magkabuhi, unman waydi may tawu mamatay sa kay sadili lang. 8 Nu kita buhi, kanta buhi sakup sa Panginuun. Ag nu kita mamatay, mamatay kita sakup diman waydi sa Panginuun. Nakan ngani sa buhi aw sa mamatay man, kita sakup sa Panginuun. 9 Dahil si Kiristu namatay bag-u nabuhi uman hampay siya yi ngani ti Panginuun una sa manga namatay una sa manga buhi di waya. 10 Kawu duy hayga pagpihuun nimu ti daut ti mayad sa kanmu patar-ari? Hayga unman pagpahalgaan nimu kanmu patar-ari? Kita tanan umatubang sa Diyus hampay mapihu niya ti daut ti mayad sa kanta. 11 Dahil pagsabihun sa Banal Kasuratan magkun, "Magkun ti Panginuun, nu kabitay ud magkauman kang buhi, katunda diman pihu gid ti tanan tawu lumuhud sa kang atubangan ag dumayaw sa Diyus." 12 Nakan ngani ti kada usa sa kanta aban umatubang sa Diyus hampay sumabi kay binwat nu mayad nu daut. 13 Danga yi pihua nita ti kada usa kay daut kay mayad. Bagkus ngap ihanda nita kanta pag-iisip sa danga kita magbuwat karadayaanun nita patar-ari tag sa kasalanan. 14 Angay sa kang magpakiusa sa Panginuun Hisus naintindihan niku pihu ud may turun-anun pag karan-unun. Dapat nu may tawu mag-isip kuntay may kalasi karan-unun pag-irangan, danga yi lang siya magkaun. 15 Nu sa kanmu pagkan-un pag karan-unun magkabyatan ti tagipusuun nimu patar-ari, unman yi angay sa pagmahal ti kanmu pagbuwatun tunda. Si Kiristu namatay para sa kanya, nakan ngani danga ipadamhak nimu siya ginan lang sa kanmu pagkan-un. 16 Ti mayad sa kanmu kailangan dahanan nimu hampay unman puyaan manga iba. 17 Dahil ti pagpasakup tawu sa kay paghari Diyus balaw labut sa kay pagkan-un, sa kay pag-inmun. Ti mahalaga lang nu ti tawu matadlung, nu magkarausa ag nu may kabayaan lunsay manga pakaun Ispiritu Banal. 18 Nu katunda kay magsirbi tawu sa kan Kiristu, pagbayaun siya Diyus ag paggalangun manga tawu. 19 Nakan kailangan pagsipagan nita ti ugali makapakaun kahusayan ag makaparig-un sa kada usa. 20 Ti tawu irinibri yi Diyus danga pagpasipalahan niyu dahil lang sa kanyu karan-unun. Ti tanan karan-unun mahimu kan-un tawu. Dapat ti daut lang nu magkasala ti usa ka tawu dahil sa kanmu pagkan-un. 21 Mayad ti unman magkaun taguban, unman mag-inum makalangu, ag unman magbuwat una hintay nu karadayaanun nimu patar-ari tag sa kasalanan. 22 Kawu yi lang ag Diyus ti dapat makatau sa kanmu intindi tungkul siti. Masulung ti tawu nu pagbuwatun niya ti pag-isipun niya mayad bag-u nu unman pagtamyawun siya niya tagipusuun. 23 Dapat ti tawu nu magkaun siya magkaduwaduwa kay naisipan, siya makasalanan sa kay magbantay Diyus, dahil kay buwat balaw angay sa kay pagsarig sa Diyus. Kasalanan ti magbuwat una hintay nu unman angay sa kay pagsarig sa Diyus.
1 Kita ti manga mabisug kailangan mag-antabay sa manga malumuy kanda pagsarig. Danga ti sadili kasulungan ti pag-&intindiha. 2 Bagkus ngap pakan-an nita kasulungan kanta patar-ari nu ikamayad niya, hampay bumisug kay pagsarig. 3 Si Kiristu unman diman nagsadili kasulungan. Bagkus ngap angay sa isinurat sa Kasuratan magkun, "Sa kanda magpuya mana sa kanmu, aku ngap ti pinuyaan nida." 4 Una hintay ti isinurat sa manga Kasuratan kaybi waya sa ikadunung nita. Nu pagbasahun nita ti manga katutuuhanan sa Banal Kasuratan, amat amat lalu matiniisun kita ag rumig-un kanta naisipan bag-u siyun maan ginan ti pag-asa nita. 5 Kamu kang pag-idarangin sa Diyus, imaw ti nagpakaun sa kanyu matiniisun hanggan marig-un pag naisipan hampay kay awatan kamu sa kanyu pagkarausa angay sa kay mustara ni Kiristu, 6 hampay mirinsanan kanyu magdayaw sa Diyus sa Ama nita Panginuun Hisu-Kiristu. 7 Nu kabitay kamu ungud tinanggap ni Kiristu, katunda diman waydi ti buwatun niyu sa kada usa hampay pagdayawun niyu ti Diyus. 8 Pagkumnun niku sa kanyu, si Kiristu ti nagsirbi sa manga Hudiyu hampay kay ipakilala niya ti Diyus masarigan, magtupad sa kay manga itinaratu sa kanda ni Abraham, 9 ag hampay ti manga balaw Hudiyu magdayaw waydi sa Diyus dahil sa kay pangaawa, angay sa isinurat sa Banal Kasuratan magkun, "Nakan ngani pumasalamat aku sa kanmu sa atubangan manga balaw Hudiyu, Kantahun niku ti kadayawan nimu ngaran." 10 Sinabi waya magkun, "Pagbaya duy kamu pag manga balaw Hudiyu, minsan sa kay pinili Diyus pag nasyun." 11 Sinabi waya magkun, "Dayawun niyu ti Panginuun, kamu pag manga balaw Hudiyu. Ti tanan manga nasyun tawu pagdayaw sa kanya." 12 Idinugang waya ni Isayas magkun, "Rumas-ug ti usa ka linahi ni Isai, Ipakaun siya Diyus hampay magpamahala sa manga balaw Hudiyu. Siya ti asahan nida." 13 Diyus ti may pakaun pag-asa sa kanta imaw waydi ti pumakaun kabayaan sa kanyu, hanggan kahusayan sa kanyu magsarig agud lalu abunda kanyu pag-asa dahil sa kapangyarihan Ispiritu Banal. 14 Manga patar-ari, lubus aku maniwala ud may kurang kanyu kaayadan, may kang-ud kanyu kaalaman ag madunung kamu magparaalalahanan sa usa kag sa usa. 15 Madi katida, sa inda pag surat udyi napigilan niku kang sarabihun dahil may ipaalaala aku manga katutuuhanan sa kanyu. Binwat niku inda dahil sa kay pakaun Diyus sa kangku inda pag marinu pag katungkulan, 16 hampay suruguun yi aku ni Kiristu Hisus. Magsirbi aku tabug sa manga balaw Hudiyu bilang manug-asiwa niya kaayadan. Nakan pag-itudlu niku pirmi sa manga balaw Hudiyu ti Mayad pag Barita hampay sida ga usa ka pakaun ibinukud Ispiritu Banal tabug sa Diyus ag kay gid pagbayaun. 17 Nakan ngani dahil sa kang magpakiusa sa kan Kiristu Hisus, mahimu gid aku makapadayaw sa kang nabwat para sa Diyus. 18 Dahil pinanghasan niku itinultul kay binwat lang ni Kiristu, ginamit niya aku hampay makabutung sa manga balaw Hudiyu tabug sa pagsunud sa Diyus dahil sa kang manga pagbagawun hanggan pagbuwatun, 19 may mamaski waya pag manga tanda makadululaw hanggan sa kapangyarihan Ispiritu Banal. Nakan ngani sa tanan rugar ginan sa Hirusalim hanggan tugka Iliriku pag daga itinudlu yi niku ti tanan Mayad pag Barita tungkul sa kan Kiristu. 20 Magtagatudlui yi gid aku sa Mayad pag Barita sa manga rugar udwaya nakadnug tungkul sa kan Kiristu, hampay balaw ga mag-agaw aku sa binudlayan iba manugtudlu. 21 Angay sa isinurat sa Banal Kasuratan magkun, "Makakit aban ti udwaya nakaalam tungkul sa kanya. Makaintindi aban ti udwaya nakadnug tungkul sa kanya." 22 Ti makuri unman aku may katahanan, nakan pirmi magkaampara kang gayak asan tabug sa kanyu. 23 Dapat taynguna namhan yi kang buruwatun sitay baliwa. Dugay yi gid kang ibug asan tag. 24 Magtagakabtai gid aku sa kanyu dahil tuminir waya mana aku asan sa kanyu kang atag sa Ispanya aban. Magbaya waydi aku nu makapahari dapu sa kanyu bag-u nu awatan niyu aku hampay mitarus kang lakaw. 25 Dapat kainda atag dapu aku sa Hirusalim hampay kang itibu ti awat manga patar-ari sa manga sakup sa Diyus ati. 26 Dahil ibinuluntad nida isip manga patar-ari taga Masidunya hanggan Akaya hampay ipadara nida kanda ambag kuwarta para sa manga makuri pag patar-ari sa Hirusalim. 27 Buluntadan yi gid kanda pakaun tunda. Nu sa ungud talaga kailangan gid waydi nida buwatun tunda. Dahil ti manga balaw Hudiyu nahurayan waydi sa kay papalad Diyus angay sa Ispiritu sa manga Hudiyu, nakan kailangan ihuray waydi manga balaw Hudiyu sa manga Hudiyu ti ipinapalad Diyus kahamtangan sa kanda. 28 Pagka tapus tunda, nu miintirga yi niku tunda pag ambagan kuwarta tanan tanan sa manga patar-ari sa Hirusalim, tuminir waya aku sa kanyu asan kang tabug sa Ispanya. 29 Alam niku nu umasan aku, may imaw abunda aku pag papalad ginan sa kan Kiristu para sa kanyu. 30 Pagsabihun yi gid niku sa kanyu, manga patar-ari, alang alang sa kanta pagsarig sa Panginuun Hisu-Kiristu ag sa pagmahal kay ipinakaun Ispiritu Banal, awati niyu aku sa ungud pag darangin sa Diyus. 31 Idarangin niyu aku sa makaliktas aku sa manga tawu unman magsarig ati sa Hudiya. Idarangin diman niyu kang dara awat tabug sa Hirusalim hampay pagbayaun manga sakup sa Diyus ati. 32 Bag-u, nu kagustuhan Diyus, Rumas-ug aku asan sa kanyu hampay masulung kang naisipan nu makapahari asan sa kanyu. 33 Kamu kang pag-idarangin hampay sa kanyu tanan ti Diyus ti gimpuunan nita kahusayan. Amin.
1 Pag-ibilin niku sa kanyu kanta mahal pag patar-ari si Pibi. Siya usa ka manug-awat sa iglisya sa Sinkiriya. 2 Tanggapun niyu siya dahil sakup siya sa Panginuun. Katunda diman kailangan matinanggapun ti manga sakup sa Diyus. Awatan niyu siya una sa unu pag kailangan niya dahil mayamu waydi patar-ari ti inawatan niya hanggan aku paman inawatan diman waydi niya. 3 Ipadakit niyu kang kamusta sa kanda ni Pirisila ni Akila, sa kang manga kaawat sa buruwatun sa kan Kiristu Hisus. 4 Apinasubu nida kanda sadili bilug sa madala hampay lang makaribri kangku pag buhi. Balaw lang aku tigpasalamat, hanggan ti manga iglisya balaw Hudiyu magpasalamat waydi. 5 Ipadakit diman niyu kang kamusta sa iglisya magtiripun sa balay nida ni Pirisila ni Akila. Ipadakit diman waydi niyu kang kamusta sa pagmahalun niku pag patar-ari sa kan Ipinitu. Siya ti un-an nagsarig sa kan Kiristu ati sa daga nasakupan Asya. 6 Hanggan sa kan Marya, imaw ti nagpakibudlay sa kanyu. 7 Ipadakit waydi niyu kang kamusta sa kanda ni Anduruniku ni Hunya, manga kaparihu niku Hudiyu, manga kaibahan niku sa pirisuhan. Nakilala sida manga Apustul yi waydi, un-an man sa kangku pag nagtanggap sida sa kan Kiristu. 8 Ipadakit waydi niyu kang kamusta sa kan Ampilyatu, sa kang pagmahalun pag patar-ari sa Panginuun. 9 Hanggan sa kan Urbanu, sa kanta kaawat sa buruwatun ni Kiristu, hanggan sa kang pagmahalun pag patar-ari sa kan Istakis. 10 Katunda diman sa kan Apilis, kilala waydi nita kay matinupadun sa kan Kiristu. Ipadakit waydi niyu kang kamusta sa kay magtal-anakan ni Aristubulu, 11 sa kang kaparihu niku Hudiyu sa kan Hirudyun hanggan sa manga patar-ari sa Panginuun sa kay magtal-anakan ni Narsisu. 12 Ipadakit niyu kang kamusta sa kanda ni Tiripina, ni Tiripusa, masipag sida sa buruwatun Panginuun. Katunda diman hanggan sa kan Pirsida, sa kang pagbayaun pag patar-ari. Mayamu kay binwat sa Panginuun. 13 Ipadakit waydi niyu kang kamusta sa kan Rupu, mayad gid ungud siya pag suruguun Panginuun, hanggan sa kay ina, ga kang diman ina. 14 Ipadakit diman niyu kang kamusta sa kanda ni Asinkiritu, ni Piligunti, ni Hirmis, ni Patrubas, ni Hirmas, hanggan sa manga patar-ari kay kaibahan nida. 15 Hanggan sa kanda ni Pilulugu, ni Hulya, sa kan Niryu, hanggan sa kay patar-ari babayi. Katunda diman sa kan Ulimpas hanggan sa tanan patar-ari kay kaibahan nida. 16 Pagmalahalan kamu pagparaingan-an kamu magtar-ari sa kan Kiristu. Ti tanan manga iglisya ni Kiristu magpaingana nu kabitay nguna kamu asan. 17 Pagsabihun yi gid niku sa kanyu, manga patar-ari, tandai niyu ti manga tawu magbuwat karampihan ag ti manga mag-&pasimray sa manga patar-ari tungkul sa kanda pagsarig sa kan Kiristu, paglabanan nida ti manga tudlu kanyu tinanggap. Amana niyu tunda pag manga tawu. 18 Ti katunda pag manga tawu unman magsirbi sa kan Kiristu sa kanta Panginuun, bagkus ngap pag-intindihun lang nida kanda sadili kailangan. Pagpatalangun nida ti marapaniwalaun sa kanda, maghampang sida marinu ag maalumanay. 19 Nilantag yi ti barita tungkul sa kanyu magsunud sa kan Kiristu, nakan magbaya gid aku sa kanyu. Dapat kang gustu pagmadunung kamu tungkul sa mayad, danga pagbatia ti daut. 20 Diyus di ti magpakaun kahusayan. Dayi dumugay taluhun yi lubus niya si Satanas ga ipauli lang sa sirung niyu raprapa. Kang pag-idarangin kamu hampay sa kanyu ti pangaawa nita Panginuun Hisu-Kiristu. 21 Kang kaawat sa buruwatun si Timutiyu magpaingana nu kabitay kamu asan hanggan kang manga kaparihu Hudiyu sida ni Lusyu, ni Hasun, ni Susipatru magpaingana waydi. 22 Aku si Tirsiyu ti nagsurat kan Pablu bagaw. Magpaingana aku waydi sa kanyu sa ngaran Panginuun nu kabitay kamu asan. 23 Hanggan si Gayu magpaingana waydi nu kabitay kamu asan. Kay balay ni Gayu kang pagdayunan. Sa inda diman pag balay pag magtiripun ti buu iglisya. Magpaingana waydi sa kanyu si Irastu ti kasuriru banwa. Hanggan kanta patar-ari si Kuwartu magpaingana waydi sa kanyu nu kabitay kamu asan. 25 Dayawun nita ti Diyus. Siya ti makaparig-un sa kanyu pagsarig angay sa Mayad pag Barita tungkul sa kan Hisu-Kiristu kang pag-itudlu sa kanyu. Maalaman diman waydi nita tunda sa katutuuhanan udwaya maburayhawan kaybi ginan sa sulud kadugayun pag timpu. 26 Taynguna bay tunda pag katutuuhanan niburayhaw yi ngap sa Kasuratan manga Purupita. Bag-u ti Diyus ti unman may katapusan imaw ti nagpatigayun hampay ipakilala tunda pag katutuuhanan sa tanan manga nasyun tawu agud sida sumarig sa Diyus ag sumunud sa kanya. 27 Usa usa ka Diyus. Siya lang ti madunung sa tanan. Siya ti dapat nita dayawun hanggan waya aban sa panab-anan ni Hisu-Kiristu. Amin.
1 Inda duy aku si Pablu ti may surat hanggan kanta patar-ari si Sustinis. Aku si Pablu napili Diyus hampay Apustul ni Hisu-Kiristu angay sa kay kagustuhan Diyus. 2 Inda pag surat tabug sa kanyu, sa iglisya Diyus sa banwa Kurintu. Kamu manga sakup Diyus dahil sa kanyu pakiusa sa kan Kiristu Hisus. Kamu ipinablag yi ginan sa kalibutan minsan sa tanan tawu sa kada rugar magsampit sa ngaran nita Panginuun Hisu-Kiristu, kanda Panginuun, kanta diman tanan Panginuun. 3 Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu. 4 Pirmi aku magpasalamat sa kang Diyus tungkul sa kanyu dahil sa kaayadan kay ipinakaun Diyus sa kanyu, sa kanyu magpakiusa sa kan Kiristu Hisus. 5 Dahil sa kanyu pakiusa sa kan Kiristu, abunda yi ngap kamu sa tanan bagay hanggan sa tanan pamagaw ag sa tanan kadunungan. 6 Mag-akitan yi waydi sa kanyu ti usa ka puruyba tungkul sa katutuuhanan sa kan Kiristu Hisus kanmi itinudlu. 7 Nakan kang-ud yi gid ti tanan pakaun Diyus kanyu natanggap hanggan sa kanyu mag-alagad waya sa kay pagras-ug nita Panginuun Hisu-Kiristu. 8 Si Hisu-Kiristu diman ti pumarig-un sa kanyu hanggan tugka sa katapusan hampay unman may ikasabi sa kanyu sa kaudasan pagras-ug nita Panginuun Hisu-Kiristu. 9 Ti Diyus masarigan, siya diman ti nagpili sa kanyu hampay magpakiusa kamu sa kay Anak, sa kanta Panginuun Hisu-Kiristu. 10 Taynguna kang pagsabihun sa kanyu, manga patar-ari, dahil sa karampatan nita Panginuun Hisu-Kiristu, kailangan kamu pag-arangayan. Una sa kanyu bagaw danga kamu magtalaluhan. Pagkarausa kanyu naisipan hanggan kanyu turunu. 11 Dahil manga katawuhan diman ni Kuluwi ti nagtultul sa kangku, manga patar-ari, magkun, ti iba sa kanyu kunu may magtalaluhan. 12 Inda kang gustu sabihun, ti kada usa hayga magsabi magkun, "Aku sa kan Pablu", ti iba magkun, "Aku sa kan Apulus", magkun maan ti usa, "Aku sa kan Pidru", bag-u may magsabi waya gid, "Aku sa kan Kiristu." 13 Maayaw-ayaw aw lugud si Kiristu? Balaw si Pablu ti ipinaku sa kurus dahil sa kanyu. Pagka kamu itinulbaw balaw kamu ipinasakup sa ngaran ni Pablu. 14 Magpasalamat aku sa Diyus unman aku may itinulbaw sa kanyu nu unman sida lang ni Kirispu ni Gayu. 15 Barang sabihun niyu kamu itinulbaw ipinasakup sa ngaran niku. 16 Inda waya ngani maaw itinulbaw niku sida tanan magtal-anakan ni Istipanas. Udyi aku may magkaisipan itinulbaw iba nu unman sida yi lang. 17 Dahil balaw aku sinugu ni Kiristu hampay magtulbaw sa tawu. Sinugu niya aku hampay manudlu sa Mayad pag Barita. Itinudlu ngani niku ti Mayad pag Barita, dapat balaw sa kadunungan lang niku bagaw, balaw diman sa karinu pamagaw angay sa tawu kadunungan, hampay unman mabul-an halaga kay kamatayan ni Kiristu sa kurus. 18 Ti barita tungkul sa kan Kiristu kamatayan sa kurus ga unman may kabuluhan nu sa manga tawu atag sa kaparusahan. Dapat sa kaay kamatayan ngap ni Kiristu pag ipinakilala Diyus kay kamaskihan sa kanta sa manga pag-iparibri niya. 19 Dahil nisurat sa Banal Kasuratan magkun, "Duraun niku ti kadunungan manga madunung, Bul-an niku halaga ti kaaraman manga maaram." 20 Naan yi nguna ti madunung, naan ti maaram? Naan ti madunung magdibati sitay sa kalibutan? Unman aw binwat Diyus unman may kabuluhan ti kadunungan taga kalibutan? 21 Dahil sa kay kadunungan unman nagbuwat ti Diyus paraan para sa manga tawu hampay makakilala sa Diyus ginan sa kanda lang sadili kadunungan. Inda di ti paraan kay pinili Diyus hampay iribri niya ti manga tawu nu sumarig sida sa kan Kiristu ginan sa Mayad pag Barita kanta pag-itudlu, imaw ti kanda pagsabihun unman kunu may kabuluhan. 22 Ti manga Hudiyu maghanap makadululaw pag tanda. Ti manga balaw Hudiyu maghanap sa kadunungan. 23 Dapat ay kanmi pag-itudlu si Kiristu ti nipaku sa kurus, nu sa manga Hudiyu imaw ngap kanda pag-&ikadaut, nu sa manga balaw Hudiyu unman may kabuluhan siya. 24 Dapat sa manga pinili Diyus una manga Hudiyu una manga balaw Hudiyu, si Kiristu ngap ti kamaskihan hanggan kadunungan Diyus. 25 Dahil balaw lang ga tawu ti kadunungan Diyus una pagsabihun unman may kabuluhan. Balaw lang ga tawu kay kabisugan una pagsabihun malumuy. 26 Pag-isipa niyu, manga patar-ari, kay nagpili Diyus sa kanyu, balaw mayamu ti manga madunung sa kanyu sadili pag-iisip, balaw mayamu ti may kamaskihan, balaw mayamu ti may mataas pag katungkulan. 27 Pinili ngap Diyus ti manga pagkumnun taga kalibutan kuntay unman may kabuluhan, hampay pakay-ahun ngap niya ti manga madunung. Pinili Diyus ti manga pagkumnun taga kalibutan kuntay malumuy, hampay pakay-ahun ti manga mabisug. 28 Ag ti manga pagkumnun taga kalibutan unman may halaga hanggan ti manga pagpuyaan nida imaw ngap ti pinili Diyus hanggan ti manga unman may gana hampay mabul-an ngap niya halaga ti manga pagsabihun mahalga. 29 Nakan una di usa ka tawu unman may makapadayawdayaw sa atubangan Diyus. 30 Dapat kamu pinausa Diyus sa kan Kiristu Hisus. Siya ti binwat Diyus gimpuunan kadunungan nita hanggan katadlungan. Ginan sa kan Kiristu pinaunyun kita Diyus tabug maan sa kay sadili ag irinibri yi kita sa kanta manga kasalanan. 31 Angay sa isinurat sa Banal Kasuratan magkun, "Nu may magkaibug magdayaw, pagdayaw yi siya sa Panginuun."
1 Aku nag-asan manga patar-ari, nagbarita sa kanyu tungkul sa katutuuhanan ipinakilala Diyus sa kangku. Balaw aku nag-asan hampay magpadayawdayaw sa madalum pag pamagawan una sa kang kadunungan. 2 Pagka aku asan sa kanyu tikis yi lang kang linimtan una hintay pag bagay, nu unman si Hisu-Kiristu yi lang ti itinudlu niku, lalu sa kay kamatayan sa kurus. 3 Kang asan sa kanyu aku mahuyang, magkadala ag pagkulbaan waya. 4 Kang manga bagaw hanggan kang tudlu balaw hampay kamu mabutung dahil sa kang sadili kadunungan. May manga tanda ngap sa kapangyarihan Ispiritu Diyus, 5 agud kamu balaw magsarig sa kan Kiristu ginan lang sa kadunungan tawu, nu unman ginan ngap sa kamaskihan Diyus. 6 Dapat nu sa manga marig-un kay sarig, kadunungan ngap ti kanmi pag-itudlu. Bukun kadunungan kalibutan inda, balaw diman kadunungan manga takinan taga kalibutan. Tunda pag kadunungan sa babaw lang daga nu sa kadugayan unman yi may kabuluhan. 7 Dapat ti pagsabihun nimi inda imaw ti kadunungan Diyus udwaya ipinaburayhaw sa manga tawu kaybi ginan, dapat daan ahinanda niya kay udwaya linalang ti kalibutan sa ikadayaw sa kanta. 8 Unman may nakakilala una hintay pag manga pinunu taga kalibutan sa inda pag kadunungan Diyus. Dahil nu nakilala lang nida balaw mana ipinapaku nida sa kurus ti Panginuun, dahil siya ti gimpuunan kadayawan. 9 Dapat ay parihu diman sa asinurat sa Banal Kasuratan magkun, "Ti manga bagay unman nakitan sa mata, unman nadnugan tuli, unman waydi inisip tawu sa kay tagipusuun, imaw ngap ti ihinanda Diyus sa manga magmahal sa kanya." 10 Tunda pag manga ihinanda Diyus, imaw ti ipinakilala Ispiritu sa kanta. Dahil suyasid di Ispiritu ti tanan manga bagay una madalum pag katutuuhanan Diyus. 11 Dahil si unu nguna ti makakilala sa kagustuhan tawu, nu unman kay sadili diman waydi pag naisipan? Katunda diman waydi unman may makakilala sa kagustuhan Diyus nu unman ti Ispiritu lang waydi Diyus. 12 Unman tinanggap nita ti pag-iisip taga kalibutan. Kanta ngap tinanggap ti Ispiritu ginan sa Diyus hampay makilala nita ti manga kaayadan kay ipinakaun Diyus sa kanta. 13 Tunda pag manga kaayadan kanta pag-itudlu sa manga tawu balaw sa bagaw lang angay sa kadunungan tawu nu unman angay ngap sa tudlu Ispiritu. Pag-ipaliwanag nita ti manga katutuuhanan tungkul sa Ispiritu sa manga tawu inulian waydi Ispiritu. 14 Ti tawu nu udwaya inulian Ispiritu Banal unman tumanggap manga katutuuhanan ginan sa Ispiritu Diyus, dahil unman ngap may kabuluhan tunda sa kanya. Unman diman magkauninawan niya dahil tunda pag manga katutuuhanan magkaintindihan lang ginan sa Ispiritu. 15 Dapat nu ti tawu inulian Ispiritu magkaintindihan niya ti tanan bagay nu mahalaga nu unman. Sa kanya bay unman may makaintindi. 16 Dahil isinurat sa Banal Kasuratan magkun, "Si unu ti makaalam sa isip Panginuun, Si unu nguna ti makapaanyu sa Panginuun?" Dapat ti naisipan ni Kiristu itinanum sa kanta tagipusuun.
1 Aku manga patar-ari, nagbagaw sa kanyu unman ga sa manga tawu inulian Ispiritu Banal. Naghampang aku sa kanyu ga sa manga tawu mablagan sa Diyus, ga sa manga lapsag di waya sa kanyu pagsarig sa kan Kiristu. 2 Tinugun niku kamu gatas, balaw kamu pinakan-an niku maganit karan-unun dahil kamu udwaya karaug. Una kainda tugka kamu udwaya may kaya. 3 Dahil una kainda kamu magpatingi waya sa kanyu sadili kagustuhan pagkatawu. Nu kamu maghirirakan hanggan magtalaluhan unman aw lugud kamu mag-ugali angay sa kanyu sadili kagustuhan pagkatawu? Unman aw lugud kanyu pagsundan ti manga kaugalian manga tawu magpatingi lang sa kanda sadili kagustuhan? 4 Dahil magkun ti usa, "Aku sa kan Pablu," magsabi maan ti usa, "Aku sa kan Apulus." Nu katida unman aw kamu nag-ugali angay lang sa kanyu sadili kagustuhan? 5 Hintay nguna si Apulus, hintay nguna si Pablu? Kami parihu diman suruguun lang Diyus. Dahil sa kanmi tudlu kamu nagsarig sa kan Kiristu. Parihu kami magtupad sa buruwatun kay inintirga Panginuun sa kanmi. 6 Aku ti nagtanum, si Apulus ti nagbunyag, Diyus ti nagpalangba. 7 Balaw mahalaga ti magtanum hanggan ti magbunyag. Diyus lang ti mahalaga imaw ti magpalangba. 8 Ti magtanum hanggan ti magbunyag urusa sa kanda budlay. Dapat ti kada usa makatanggap kay pirimyu angay sa kay kabudlayan. 9 Dahil kami hanggan ti Diyus minsan sa buruwatun. Ag kamu ti ga tanman Diyus. Kamu ti pagbalayun Diyus. 10 Aku ti nagkana batu paratungtungan tulduk ga usa ka madunung magpatindug balay angay sa ipinakaun Diyus sa kangku. Iba maan tigbatak bat-angan. Dapat pagdahan ti kada tawu nu kabitay kay bumuwat. 11 Dahil unman may makapatindug sa iba batu paratungtungan tulduk, nu unman si Kiristu Hisus lang ti batu abinugtang Diyus. 12 Dapat nu may magpatindug sitay pag burungsudan kay garamitun gintu, pilak, manga mahalaga pag batu, kayu, yuma kugun, una dayami, 13 ti buwat kada tawu makitan di aban. Dahil nu kaudasan yi pagras-ug ni Kiristu bag-u maalaman yi tunda. Sapagka sa apuy pihu pag makilala. Ti apuy ti sumubuk kada tawu buwat nu kabitay. 14 Una sitapu pag tawu nu balaw maunu sa apuy kay binuwat kay ibinungsud sa burungsudan ati, siya makatanggap pirimyu. 15 Una sitapu pag tawu nu mairub kay binuwat, lugi gid siya. Dapat siya kay apu makaribri di. Dapat sulu lang bilug ti nakaribri sa apuy. 16 Unman aw niyu alam kamu kay balay Diyus? Ti Ispiritu Diyus ti nangulian sa kanyu. 17 Nu dautun tawu kay balay Diyus, dautun waydi siya Diyus dahil ti balay Diyus ibinukud para sa kanya. Kamu yi ngani kay balay Diyus. 18 Una hintay pag tawu danga magdaya sa kay sadili. Una sitapu sa kanyu tig-isip siya may kadunungan sitay sa kalibutan, pagkilala siya bukun ngap tutuu pag kadunungan tunda, hampay siya ngap dumunung. 19 Dahil ti kadunungan kalibutan bukun ngap kadunungan nu sa Diyus. Dahil nisurat sa Banal Kasuratan magkun, "Pagpasalanun Diyus ti manga madunung sa kanda sadili pagdaya." 20 Sinabi waya maan sa Banal Kasuratan magkun, "Alam di Panginuun ti pag-isipun manga madunung ag alam niya pasay unman may kabuluhan." 21 Nakan danga magpadayawdayaw una hintay nu sa kadunungan lang tawu. Dahil ti tanan manga bagay kanyu yi. 22 Una si Pablu, una si Apulus, una si Pidru, una ti kalibutan, una ti buhi, una ti kamatayan, una ti kahamtangan kainda, una ti kahamtangan aban. Ti tanan kanyu yi. 23 Dapat kamu sakup ni Kiristu ag si Kiristu sa Diyus.
1 Kailangan duy kilalan-un niyu kami kay manga suruguun ni Kiristu. Ipiniyar Diyus sa kangku ti madalum pag katutuuhanan balaw daan ipinaburayhaw sa tawu. 2 Ti piniyaran kailangan pagtupad sa kay buruwatun niya amu. 3 Dapat nu sa kangku lang, tutuu unman mahalaga una kamu una iba tawu tigpihu sa kangku nu daut nu mayad. Aku unman waydi magpihu sa kang sadili. 4 Unman aku may magkaisipan daut sa kang sadili bilug. Dapat unman pagsarigan niku inda hampay aku tanggapun Panginuun. Dahil ti Panginuun di tigpihu sa kangku nu mayad nu daut. 5 Nakan ngani danga dapu pagpihua una hintay pag tawu nu daut nu mayad hanggan sa ud Rumas-ug ti Panginuun. Siya ti pumaburayhaw sa manga ilinihim ga sa madlum. Bulwatun niya aban ti pagkutubun tawu. Ati katpung ti kada tawu dayawun Diyus angay sa kay binwat. 6 Manga patar-ari, kami ni Apulus ti binwat niku halimbawa agud masalman niyu kay ibug sabihun magkun, "Danga magpasubra sa asinurat sa Banal Kasuratan." Danga ti usa lang ti pagmayadun bag-u ti usa pagdautun. 7 Hintay ti nagsabi sa kanyu kuntay kamu mayad man sa manga iba? Unman kamu may imaw nu unman ipinakaun Diyus. Dapat nu ipinakaun Diyus sa kanyu hayga pag-ipadayawdayaw niyu ga unman may nagpakaun sa kanyu? 8 Kamu maaw manga busug yi, kamu manga mayaman yi. Madi kami balaw hari kamu ga manga hari yi. Gustu mana niku kamu maghari ngani hampay kita minsan yi sa maghari. 9 Sa kang isip lang, kami ti manga Apustul binwat Diyus bilang ga madamhakan lang, ga manga inalistu maratyun, dahil binwat lang kami paranuudan manga taga kalibutan, manga anghil hanggan manga tawu. 10 Alang alang sa kan Kiristu kami bilang ga unman may kadunungan, dapat kamu madunung di ngap maaw tungkul sa kan Kiristu. Kami bilang ga manga malumuy, kamu bay manga mabisug. Kamu pagdayawun manga tawu, kami bay pagpuyaan ngap manga tawu. 11 Taynguna tugka kami magkalun-us di ag magkauwaw, manga daut yi kanmi rutay, sinampal waya kami, unman may turunu ulian. 12 Kami magpangabudlay sa kanmi sadili kabuhian. Una kami pagmuransahun manga tawu, pag-idarangin nimi sida hampay papaladan Diyus. Una pag-&unuunuhun kami, pag-agwantahun lang nimi. 13 Una kami pagbangdanan kadautan, mayad diman kanmi pagbagawun sa kanda. Hanggan kainda tugka kami ga manga paruk pinaris yi manga taga kalibutan, ga madamhakan pag kalasi manga tawu. 14 Balaw isinurat niku inda hampay kamu kang pakay-ahun, nu unman hampay paalalahanan niku kamu, ga kang suud yi manga anak kang magmahal sa kanyu. 15 Dahil una waya kamu may sampulu ka libu ka manugtudlu tungkul sa kan Kiristu, aku lang waydi kanyu ama. Dahil iinanak niku kamu sa kan Kiristu Hisus pagka tinudluan niku kamu Mayad pag Barita. 16 Inda kang pagsabihun ngani sa kanyu, kamu paghuwad sa kangku. 17 Nakan sinugu niku tabug sa kanyu si Timutiyu, kang pagmahalun ag matinupadun pag anak sa Panginuun. Siya ti pumaalaala sa kanyu nu kabitay kang manga ugali dahil sa kang pakiusa sa kan Kiristu, parihu diman sa kang pag-itudlu sa una naan pag rugar, sa kada iglisya. 18 Ti manga iba asan magpalabilabi, kanda hantup aku dayu makaasan sa kanyu. 19 Dapat balaw waydi dumugay aku asan tag sa kanyu nu sa kagustuhan Panginuun, bag-u kang alamun nu ngatay tutuu may mabuwat sida aw ngatay kanda lang waydi palabilabi pag bagaw. 20 Dahil nu sakup ti tawu sa kay paghari Diyus, mag-akitan tunda balaw lang sa kay bagaw, nu unman hanggan sa kay buwat may kamaskihan. 21 Hintay kanyu gustu? Asan tag aw aku sa kanyu may bitbit pamakul, aw ngatay sa pagmahal ag sa maalumanay pag naisipan?
1 May nakadangat barita sa kangku kuntay masyadu daut pag nangyari. Usa sa kanyu magpanguragin tabug sa kay ina ulung. Una sa manga unman nakatanggap unman may magpanguragin katida. 2 Bag-u kamu manga palabilabihun di, ag unman kamu magruku nu nagkasala ti usa ka patar-ari, hampay mipalwas mana ginan sa kanyu ti nagbuwat katunda pag kasalanan. 3 Dahil nu sa ungud katna una unman sa kanyu atubangan kang bilug, bilang ga sa kanyu atubangan diman aku, dahil ginan sa karampatan nita Panginuun Hisus nakan pinihu yi ngani niku tunda pag tawu kay kasalanan talaga daut, ga bilang aku asan diman sa kanyu. 4 Nu magtiripun kamu bilang ga minsan diman aku sa kanyu, tapil ti kapangyarihan nita Panginuun Hisus. 5 Pagka kamu tiripun yi, ipabahala yi niyu sa kan Satanas tunda pag tawu, hampay dautun kay bilug, dapat iribri di kay karadwa sa kaudasan pagras-ug Panginuun Hisus. 6 Unman mayad kanyu magpadayawdayaw. Unman aw niyu alam una diit lang pag pamadaka, magpahabuk sa pinkul arina. 7 Bul-a yi niyu ti daan pag pamadaka, imaw ti pagkumnun kasalanan, hampay kamu manga malumpiyu yi. Dahil alistu yi kanta Kapistahan sa Pag-alaala sa Karibrihan, minatay yi si Kiristu, ti Anak Karanidu. 8 Nakan ngani tun-anun nita ti kapistahan. Dayi kita sa tinapay may daan pamadaka, imaw ti kasalanan hanggan daut pag naisipan. Pagkaun kita sa tinapay unman may pamadaka. Kay ibug sabihun pagmalumpiyu kanta naisipan, pagmay katutuuhanan. 9 Sinuratan yi niku kamu danga kamu magpausa sa manga mag-uragin. 10 Balaw kang ibug sabihun danga magpausa sa manga unman napasakup sa Panginuun langmadi sida mag-uragin, manga maramuun, maglupig, manga magsamba sa diyusdiyusan. Dahil nu abi kamu unman makapausa sa kanda nu katunda kailangan pag-ighit yi lang kamu sa kalibutan. 11 Dapat inda kang surat sa kanyu, danga kamu magpakiusa una sa kantapu pag-ingarnan patar-ari, nu siya magpanguragin, maramuun, magsamba sa diyusdiyusan, aw ngatay magmuransa, maglangu, maglupig. Nu katunda kay ugali, danga yi lang magsaru sa kanya. 12 Sapagka hintay kang pakialam magpihu sa manga taga luwas iglisya nu daut nu mayad. 13 Diyus lang ti makapihu sa kanda. Dapat unman aw kamu tigpihu sa manga sa sulud nu daut nu mayad? Kailangan ipalwas yi ngani niyu ginan sa kanyu ti daut pag tawu.
1 Nu ti usa sa kanyu may kasaba laban sa usa ka patar-ari, magpanghas aw lugud siya magsumbung sa atubangan manga huwis balaw nakatanggap sa Panginuun? Hayga unman magpahusay siya sa manga patar-ari sa Panginuun? 2 Unman aw niyu alam ti manga napasakup sa Panginuun ti pumihu aban sa manga taga kalibutan nu daut nu mayad? Nu ti manga taga kalibutan pihuun niyu aban, unman aw lugud kaya niyu pihuun ti daut ti mayad sa manga yangkutyangkut pag hurusayun? 3 Unman aw niyu alam kanta pihuun aban ti daut ti mayad sa manga anghil? Unman aw lalu yi ngap ti manga bagay para sa buhi nita sitay sa babaw daga. 4 Nu kamu may kasaba ngani para sa buhi sitay sa babaw daga, piliun aw lugud niyu ti manga tawu unman maasahan sa iglisya hampay manughusay? 5 Nakan pagsabihun niku inda hampay pakay-ahun kamu. Hayga lugud katunda kamu. Pihu gid may madunung sa kanyu maghusay sa kay manga patar-ari. 6 Dapat bagkus ngap ti manga patar-ari magkarasabaan sa atubangan paman unman nakatanggap sa Panginuun. 7 Taynguna duy, nakan kamu magkarasabaan dahil tutuu gid kurang kanyu magmalahalan sa magtar-arian sa Panginuun. Hayga unman bagkus kanyu pag-agwantahun nu may magbuwat kalukuhan sa kanyu? Hayga lugud kamu unman magpatalu yi lang? 8 Dapat kamu diman waydi tigbuwat kadautan hanggan magdaya. Ag tunda paman kanyu pagbuwatun sa kanyu manga patar-ari. 9 Unman aw waya lugud niyu alam ti manga magbuwat kalukuhan dayu masakup sa kay paghari Diyus. Danga kamu magsarig, dahil ti manga magpanguragin, ti manga magsamba sa diyusdiyusan, ti magpamabayi hanggan ti magpanlalaki, tigkaraibgan sa kaparihu lalaki, 10 ti manga magtakaw, ti manga maramuun, ti manga manuglangu, ti manga magmuransa hanggan ti manga manuglupig dayu gid sida masakup sa kay paghari Diyus. 11 Kaybi ti iba sa kanyu katida diman waydi dapat taynguna inugasan yi kanyu kasalanan, sakup yi kamu sa Diyus dahil sa Ispiritu nita Diyus. Nakilala yi kamu Diyus kuntay manga matadlung dahil sa kapangyarihan Panginuun Hisu-Kiristu hanggan dahil sa Ispiritu nita Diyus. 12 Nu sa ungud udyi may bawal sa kangku, dapat may bagay unman sa ikaayad niku. Udyi may bawal sa kangku dapat aku dayu pasakup sa una hintay pag bagay. 13 Ti manga karan-unun para sa tiyan. Ti tiyan para sa manga karan-unun, dapat parihu duraun di Diyus una ti tiyan una ti manga karan-unun. Ti bilug tawu balaw para sa panguragin, nu unman bagkus ngap para sa Panginuun gid. Ag ti Panginuun para sa bilug. 14 Binuhi uman Diyus ti Panginuun, kay kamaskihan bumuhi diman uman sa kanta. 15 Udwaya aw niyu alam kanyu manga bilug gamit ni Kiristu? Bul-un aw lugud niku ti manga gamit bilug ni Kiristu bag-u aw kang buwatun manga garamitun manga uragin? Dayu gid ngapu mahimu tunda. 16 Unman aw lugud niyu alam nu magpaamut ti tawu sa uragin, bilang ga usa yi lang sida ka bilug. Dahil magkun ti Diyus, "Ti duwa magkabilug usa lang ka nayi." 17 Dapat ti magpakiusa sa Panginuun, nakapakiusa sa kanya dahil sa Ispiritu. 18 Pag-iwas kamu sa panguragin. Ti tanan kasalanan nu pagbuwatun tawu, iba ti mag-idamhak sa kakurian dapat tigpanguragin midamhak ngap kay sadili bilug. 19 Unman aw niyu alam kanyu bilug ulian Ispiritu Banal kanyu tinanggap ginan sa Diyus? Balaw yi kamu makapamahala sa kanyu sadili bilug, nu unman Diyus yi ti bahala, 20 dahil kamu binili yi sa halaga. Nakan gamitun niyu kanyu bilug sa ikadayaw sa Diyus.
1 Tungkul bay kanyu isinurat sa kangku, mayad ti lalaki nu unman mag-asawa sa babayi. 2 Dapat hampay balaw madara sa tuksu sa magpanguragin, ti kada lalaki pagmay sadili asawa, kumun diman waydi ti kada babayi. 3 Tupada lalaki una hintay ti angay sa babayi, kumun diman waydi ti babayi sa kay asawa lalaki. 4 Ti babayi unman makapamahala sa kay sadili bilug nu unman kay asawa lalaki tigpamahala. Katunda diman waydi ti lalaki unman makapamahala sa kay sadili bilug nu unman kay asawa babayi tigpamahala. 5 Danga mag-irirangan ti mag-asawa, purya lang sa kanyu kasunduan nu pira ka sirang agud makapadugay kamu sa darangin, bag-u magmirinsanan maan kamu, barang kamu matuksu ni Satanas nu udyi kamu makabata. 6 Inda bilang ga patigayun niku sa kanyu, bukun sugu niku. 7 Nakan ngani kang mana gustu, ti tanan tawu parihu sa kangku, dapat sa kada usa ka tawu may kanya kanya pag pakaun ginan sa Diyus. Ti manga ipinakaun Diyus balaw pararihu. 8 Dapat pagsabihun niku sa manga unman may asawa ag sa manga buranday, ti mayad sa kanda nu katida yi lang sida pagga kangku unman may asawa. 9 Dapat nu unman makabata sida, mahimu diman makaasawa. Makuri nakan ti magkagamun sa magpangasawa, mayad waya ti may asawa. 10 Dapat sa may manga asawa aku may bilin, bukun aku nu unman ti Panginuun. Ti babayi danga magtayak sa kay asawa lalaki. 11 Dapat nu manayak siya, hanggan di danga yi mag-asawa, aw ngatay bumalik maan sa kay asawa. Danga tayakan niya asawa lalaki kay asawa babayi. 12 Dapat sa manga iba aku may bilin, nu sa ungud bukun Panginuun ti may bilin, magkun, una si unu pag patar-ari lalaki ti may asawa unman napasakup sa Panginuun ag nu gustu diman magpaminsan ti babayi sa kay asawa lalaki, danga waydi tayakan kay asawa babayi. 13 Ag ti babayi nu may asawa unman napasakup sa Panginuun ag nu gustu diman magpaminsan ti lalaki sa kay asawa babayi, danga waydi tayakan kay asawa lalaki. 14 Ti lalaki udwaya napasakup sa Panginuun sakup sa kay pagmahal Diyus dahil sa kay asawa babayi magsarig sa Panginuun. Ag ti babayi udwaya napasakup sa Panginuun sakup diman waydi sa kay pagmahal Diyus dahil sa kay asawa lalaki magsarig sa Panginuun. Nu abi balaw katida, kanyu manga anak arayu sa Panginuun. Dapat taynguna sida sakup diman waydi sa kay pagmahal Diyus dahil sa sarig nida manga gurang. 15 Katida madi, ti unman napasakup sa Panginuun nu manayak sa kay asawa napasakup sa Panginuun, unman may tumawid. Una patar-ari lalaki una patar-ari babayi nu pagtayakan asawa unman magsarig sa Panginuun, nalkas yi sa pangasawa. Pinili kamu Diyus hampay may kahusayan. 16 Balaw maalaman nimu duy, nu ngatay miribri ngapu nimu kanmu asawa lalaki. Balaw maalaman nimu duy, nu ngatay miribri nimu kanmu asawa babayi. 17 Pagparargu sa buruwatun ti kada usa angay sa kay ipinakaun Panginuun sa kanya. Pagparargu di siya sa kay kahamtangan una siya binutung yi Diyus. Imaw ti ibinilin niku sa tanan iglisya. 18 Nu ti usa ka tawu daan tinuri bag-u siya binutung Diyus hampay magsarig sa kan Kiristu, danga yi pag-&umana tunda pag tanda. Nu unman waya waydi tinuri, danga yi lang paturi. 19 Unman may hintay ngarana una turi una bukun turi. Ti mahalaga ti pagsunud sa manga bilin Diyus. 20 Pagparargu di ti kada usa sa kay kahamtangan una siya binutung Panginuun. 21 Daan aw kawu panawuhun sa kanmu nagpasakup sa Panginuun? Danga kawu mag-isip makuri una kawu panawuhun. Nu bay kawu sultahan yi lumuwas, pag-uli yi kawu. 22 Una panawuhun siya, nu napasakup siya sa Panginuun ribri yi gid siya hampay magsirbi sa Panginuun. Katunda diman, una ti tawu unman may amu, nu pumasakup siya sa kan Kiristu, panawuhun ngap ni Kiristu siya. 23 Binili kamu Diyus sa daka pag halaga. Danga yi maghangad kamu hampay panawuhun maan kaparihu tawu. 24 Manga patar-ari, una hintay kanyu kahamtangan pagka kamu binutung Diyus, siti yi lang kamu kaibahan niya. 25 Nu bay sa unman may manga asawa, unman aku may ibilin ginan sa Panginuun, dapat aku masarigan dahil sa papalad Panginuun sa kangku, nakan itultul waya niku ti kang inisip. 26 Kang isip mayad ngani inda dahil sa kanta paglakawan kakurian taynguna. Mayad ngani ti tawu nu magbaya sa kay sadili kahamtangan. 27 Nu kawu may asawa, danga maggayak magbulag. Nu udyi kawu may asawa, danga waydi kawu maghangad sa may asawa. 28 Dapat nu kawu mag-asawa bukun waydi kasalanan. Ag nu ti usa ka daraga mag-asawa bukun diman waydi kasalanan. Dapat ti may asawa may kakurian sa kay sadili bilug, kang gustu mana danga niyu malakawan tunda pag kakurian. 29 Dapat kang pagsabihun inda, manga patar-ari, udyi dumugay ti panahun para sa babaw daga, nakan ti manga lalaki nu may asawa danga tugka lang sa asawa kay sirbi. 30 Ti manga maglumi pagga unman diman maglumi. Ti manga magbaya, pagga unman diman magbaya, ti manga magbili pagga unman diman may kasiyunan. 31 Ti manga magpayaman sitay sa babaw daga, pagga unman diman subra kanda kasukatan. Dahil ti manga kabagayan sitay sa babaw daga may katapusan. 32 Dapat kang gustu pagkab-ul yi gid sa kanyu ti aburidu. Ti lalaki nu unman may asawa magpangabudlay sa manga buruwatun Panginuun, nu kabitay makatupad sa kagustuhan niya. 33 Dapat ti may asawa magpangabudlay maghanap kanda kabuhian, nu kabitay makatupad sa kagustuhan niya asawa. 34 Pagtalinduwahun kay naisipan may sa buruwatun Panginuun, may sa kay asawa. Katida diman ti babayi unman may asawa ag ti daraga magpangabudlay sa buruwatun Panginuun, hampay ilubus niya kay kabisugan bilug hanggan naisipan sa Panginuun. Dapat ti babayi nu may asawa magpangabudlay maghanap kanda kabuhian nu kabitay makatupad sa kagustuhan niya asawa. 35 Inda duy kang pagsabihun sa ikaayad niyu. Balaw aku mag-ampara sa kanyu kagustuhan naisipan, nu unman ipinaalaala lang niku sa kanyu ti mayad hampay kamu unman may kaabalahan sa kanyu pagsirbi sa Panginuun. 36 Nu ti usa ka lalaki magpakaisip barang unman makatupad sa kay aguman babayi nu kang-ud yi kay idad ag nu kailangan sundun niya kay kagustuhan, balaw diman kasalanan nu sida mag-asawa. 37 Dapat nu marig-un gid ti lalaki sa kay tagipusuun, unman kailangan sundun lang niya kay kagustuhan. Mahimu diman makapigil siya sa kay naisipan. Mayad kay buwat nu siguradu kay sadili naisipan ag nu magpalalbadan sida kanda kasunduan. 38 Nu sa ungud mayad diman nu mag-asawa sa kay aguman dapat maslalu mayad ti magpigil sa sadili kagustuhan ag magpalalbadan. 39 Ti babayi nu may asawa kailangan magpausa sa kanya hanggan waya buhi kay asawa. Dapat nu namatay yi kay asawa, mahimu siya makaasawa sa una naan pag lalaki kay magustuhan, basta parihu napasakup sa Panginuun. 40 Dapat kang isip lalu waya masulung siya nu udyi siya may gustu sa may asawa maan. Ag kang isip inda kay udyuk Ispiritu Diyus sa kangku.
1 Ipaliwanag maan niku tungkul sa manga karan-unun isinagda sa diyusdiyusan. Alam nita kita tanan may kadunungan. Ti katunda pag kadunungan magpadara sa tawu hampay magpalabilabi, dapat ti tawu nu may pagmahal, makaparig-un siya sa iglisya. 2 Tighantup sa kay sadili siya madunung, udwaya nataw-an niya ti dapat niya maalaman. 3 Dapat alam di Diyus ti tawu nu magmahal sa kanya. 4 Tungkul ngani sa manga karan-unun isinagda sa diyusdiyusan, alam nita ti manga diyusdiyusan unman may kahulugan, ag alam diman nita usa lang ka Diyus. 5 Madi may pagsabihun manga diyus sa langit ag sa babaw daga, ag mayamu ti pag-ingarnan manga diyus hanggan manga panginuun, 6 nu para sa kanta usa lang ti Diyus, ti Ama ti naglalang sa tanan bagay, nabuhi kita para sakup sa kanya. Usa lang ti Panginuun, si Hisu-Kiristu, ginan sa kanya pag nalalang ti tanan bagay. Ginan diman sa kanya kita pag nabuhi. 7 Dapat ti iba unman nida alam kuntay usa lang ti Diyus. Ti iba nararum yi sa pagsamba sa diyusdiyusan nakan ngani hanggan kainda nu magkaun sida tunda pag manga karan-unun pag-alaalahun waya nida kanda pagkan-un isinagda waya sa diyusdiyusan. Dahil kurang kanda kadunungan, nakan aburidu kanda tagipusuun sa kanda hantup sida magkasala. 8 Balaw lang ginan sa karan-unun kita pagbayaun Diyus. Unman may mabawas ginan sa kanta una may tun-anun kita karan-unun. Unman diman may midugang kaayadan sa kanta una unman kita may turun-anun karan-unun. 9 Dapat pag-ingat gid kamu, barang sa kanyu unman yi mag-alaala sa turun-anun, kamu pumatalang ngap sa manga marahantup kuntay kasalanan nu magkaun. 10 Nu kamu ti kang-ud kanyu kadunungan ag magkaun sulud balay diyusdiyusan, bag-u makitan kamu manga malumuy waya sa kanda pagsarig, unman aw nguna lugud sida mibuyu mangaun tunda dahil kanda pag-alaalahun tunda asinagda yi sa diyusdiyusan. 11 Nakan ti usa ka patar-ari niyu malumuy waya sa kay sarig midamhak maaw dahil sa kanyu kadunungan madi kang-ud kay kamatayan ni Kiristu sa kanya. 12 Nu katunda kamu may kasalanan sa kan Kiristu, dahil dinara niyu kanyu patar-ari tag sa kasalanan, pinatalang kay naisipan atag sa kasalanan. 13 Nakan ngani nu ginan sa kang magkaun, magkasala kang patar-ari, nu katunda dayi lang aku mangaun taguban hampay siya balaw magkasala.
1 May makaampara aw lugud sa kangku? Bukun aw lugud aku Apustul? Unman aw lugud nakitan niku si Hisus, kanta Panginuun? Unman aw kamu nakan nakatanggap sa Panginuun dahil kamu kang tinudluan? 2 Una ti iba dayu mangilala kuntay aku Apustul, barang kilala yi waydi niyu. Kamu ti sa Panginuun imaw yi ti puruyba sa kang pagka-Apustul. 3 Inda kang sagut sa manga manug-usisa sa kang pagka-Apustul. 4 Unman aw lugud kami may karampatan diman pag-&alagaan iglisya angay sa kanmi pangailangan? 5 Unman aw lugud mahimu diman kami makataban kanmi sadili asawa napasakup waydi sa Panginuun, parihu sa manga iba Apustul diman magtaban kanda asawa manga patar-ari sa Panginuun ag parihu diman sa kan Pidru? 6 Kami lang aw lugud ni Birnabi ti unman may karampatan umapas sa paghanap sa kanmi kabuhian? 7 Hintay pag sundalu tigsirbi sa katungkulan sadili niya gastus. Si unu lugud pag tawu ti magtanum ubas bag-u ud magpakinabang sa kay burak? Hintay pag manug-alaga sa karanidu ti unman magpakinabang sa kay gatas? 8 Kang pagsabihun balaw tungkul lang sa ugali tawu. Una sa Kasuguan katida diman. 9 Dahil nisurat sa Kasuguan ni Muysis magkun, "Danga pagpungta kay bibig baka sa kay maggiuk." Baka lang aw lugud ti pag-alaalahun Diyus? 10 Balaw lang duy baka. Lalu ngap kita ti pagturunuhun niya. Nakan sinurat tunda dahil sa kanta. Dahil tig-aradu hanggan tiggiuk magsarig hurayan sida. 11 Ipinamgas nimi sa kanyu ti manga papalad ginan sa Ispiritu. Magkalugi aw lugud waya kamu magpakaun sa kanmi? 12 Nu ti iba may karampatan pagpakan-an, lalu man ngap kami. Dapat unman nimi paghabulun kanmi karampatan inda. Tiniis nimi ti tanan bagay hampay balaw maampara nimi ti Mayad pag Barita tungkul sa kan Kiristu. 13 Unman aw niyu alam ti manga magsirbi ati sa balay Diyus pagpakan-an karan-unun ginan sa balay Diyus? Hanggan ti manga magsirbi sa surunugan manga pag-isagda sa Diyus may kahuray waydi sa hayup isinagda sa Diyus. 14 Katunda diman waydi ibinilin Panginuun, ti manga manugtudlu Mayad pag Barita kailangan diman may karabuhian ginan sa Mayad pag Barita. 15 Dapat aku unman ginmaraw sa kang karampatan una di. Unman diman aku nagsurat sa kanyu hampay pakan-an niyu aku. Mayad man nu aku mamatay lang, danga lang marangga kang pagkatawu. 16 Una magtudlu aku Mayad pag Barita balaw kailangan aku magpadayawdayaw sa inda pag katungkulan kang tinanggap ginan sa Panginuun. Abaw abaw duy nu unman niku mitudlu inda pag Mayad pag Barita. 17 Nu abi inda kang buwatun sa buluntadan, may pirimyu mana aku aban. Dapat magtudlu aku Mayad pag Barita, dahil pagtupadun lang niku ti katungkulan iinintirga Diyus sa kangku. 18 Hintay nguna kang pirimyu? Inda ngani kang pinagkasuhul nu mitudlu niku ti Mayad pag Barita unman may bayad ag nu unman aku magsukut kang kasuhulan una aku magpanudlu. 19 Unman may makaampara sa kangku una si unu waya, dapat kang gustu ngap aku suruguun tanan tawu hampay lalu ngap mayamu tawu kang magarya. 20 Nu sa manga Hudiyu, nag-ugali waydi aku Hudiyu hampay magarya waydi sida. Madi unman aku nasakup Kasuguan, basta kang manga kaibahan magsunud sa Kasuguan, aku imaw diman hampay magarya niku sida. 21 Nu sa manga balaw Hudiyu balaw sakup sa Kasuguan ni Muysis, aku magpabagay sa manga balaw Hudiyu balaw sakup sa Kasuguan hampay sida magarya waydi niku. Balaw kuntay sa unman niku pagsundun ti sugu Diyus dahil aku sakup sa kasuguan ni Kiristu. 22 Nu sa manga marahantup barang magkasala, maghuwad waydi aku sa kanda. Sa tanan paraan makibagay aku sa tanan tawu hampay una lang kay iba mabawi di niku una sa kabitay pag paraan. 23 Pagbuwatun niku inda tanan tanan pag manga bagay alang alang sa Mayad pag Barita hampay makatanggap waydi aku manga papalad ginan sa Diyus. 24 Alam diman niyu nu may mag-&urunahan, magpalagiw sida tanan dapat usa lang ti makatanggap pirimyu. Nakan ngani kaayad nu magpalagiw hampay matanggap niyu ti pirimyu. 25 Ti tanan manga magpaanad sa mag-&urunahan, mapinigilun sa kanda tanan kagustuhan hampay makatanggap sida pirimyu madi balaw dugay magkadaut tunda pag pirimyu. Dapat kanta paghangadun pag pirimyu tunda unman may kadautan hanggan aban. 26 Nakan ngani magpalagiw aku hampay pihu Rumas-ug sa kang turunu. Unman diman waydi aku magsuntuk sa durus. 27 Pagpakurian diman niku kang sadili bilug, pagsupilun niku kang sadili kagustuhan barang nu manudlu aku sa iba, aku ngap ti ipurya Diyus.
1 Manga patar-ari, gustu niku maalaman mana niyu ti nangyari sa kanta manga ginurang. Sida tanan giniyahan rurum Panginuun, sida tanan nagdipay sa dagat. 2 Sida tanan napaminsan sa kan Muysis, pagka sida ga itinulbaw sa rurum ag sa dagat. 3 Sida tanan nangaun karan-unun apinakaun Diyus. 4 Sida tanan nag-inum danum waydi apinakaun Diyus dahil nag-inum sida danum ginan sa batu ipinapalad Diyus. Pagka sida nakatapus inum nagkuyug sa kanda ti batu. Inda pag batu si Kiristu yi ngap. 5 Madi daka kay binwat Panginuun sa kanda, kanda ngap binwat unman angay sa Diyus. Nakan ngani nagkarawayak kanda manga but-ul sa pangawakawaan dahil sa parusa Panginuun. 6 Inda pag manga nangyari kaybi, pasay yi manga puruyba sa kanta hampay kita balaw mag-isip tag sa kadautan, balaw ga kanda mag-isip tag sa kadautan. 7 Danga diman waydi kamu magsamba sa manga diyusdiyusan, balaw parihu sa kanda, ti iba nagsamba sa manga diyusdiyusan. Ibinugtang diman waydi sa Banal Kasuratan magkun, "Ti usa ka nasyun Israil nagtukaw hampay magkaun mag-inum bag-u nagtirindug hampay manaruk." 8 Danga diman waydi kita mag-uragin, balaw parihu sa kanda, ti iba nag-uragin, nakan duwapulu may tulu ka libu ti namatay sa usa ka sirang dahil sa parusa Panginuun. 9 Danga diman waydi kita magsubuk sa Panginuun balaw parihu sa kanda ti iba nagsubuk sa Panginuun namatay sida pinangagat ulay. 10 Danga diman waydi kamu magdiklamu laban sa Diyus, balaw parihu sa kanda, ti iba nagbirba laban sa Diyus nakan minatay sida anghil kay sinugu Diyus hampay magpapas sa kanda. 11 Inda ti nangyari sa kanda bilang usa ka puruyba sa kanta, pasay nakasurat sa paalaala sa kanta dahil arani yi kita sa katapusan panahun. 12 Nakan nu pag-isipun tawu marig-un kay tindug, pag-aman barang siya magpu. 13 Unman may subuk Rumas-ug sa kanyu nu unman mabata niyu. Masarigan gid ti Diyus, balaw pahintulutan niya kamu subukan sa udyi niyu makaya. Dapat dungan sa subuk magbuwat siya paraan hampay makalawuy kamu sa kakurian, hampay maagwanta niyu ti subuk. 14 Kamu duy pag manga tuludluan niku, iwasan niyu ti pagsamba sa manga diyusdiyusan. 15 Magbagaw aku sa kanyu parihu sa manga but-anin, kamu bahala yi magkilala sa kang sinabi nu ngatay tama. 16 Ti ungut may papalad pagpa-&salamatan nita sa Diyus. Unman aw lugud kita may kabahagi sa dugu ni Kiristu nu kita mag-inum sa tunda pag ungut? Nu kita magkaun sa tinapay kanta pagpikapikahun, unman aw lugud kita may kabahagi sa bilug ni Kiristu? 17 Madi mayamu, kita usa usa lang ka bilug, usa lang waydi ka tinapay. Dahil kita tanan may kabahagi sa usa lang ka tinapay. 18 Bantayi niyu ti nasyun Israil. Ti manga magkaun sa manga isinagda sa Diyus magpakiusa ngap sa Diyus dahil sa kanda pagsirbi sa surunugan manga panagda sa Diyus. 19 Kabitay lugud kang pagsabihun sa kanyu? Ti isinagda sa manga diyusdiyusan may pakinabang aw lugud? Ti diyusdiyusan may kabuluhan aw? 20 Dapat ti panagda manga tawu unman napasakup sa Panginuun kanda pag-isagda sa manga labang, balaw sa Diyus. Unman gid aku may gustu kamu may pakiusa sa manga labang. 21 Dayu mahimu mainman niyu ti ungut Panginuun hanggan ti ungut gamit sa panagdahan sa manga labang. Dayu mahimu kamu magsaru sa lamak Panginuun hanggan sa lamak panagdahan. 22 Gustu aw lugud nita masubukan kay irang Panginuun, kita aw lugud lalu mabisug man sa kanya? 23 Magkun sida, "Unman may makaampara sa kang buwat una hintay." Nu sa ungud mana, dapat may manga buwat unman mayad. Unman may makaampara sa kanta buwat una hintay dapat may manga buwat unman mapakinabangan. 24 Una si unu pag tawu dag hanap sa kay sadili ikaayad, nu unman ti ikaayad manga iba ti paghanapa. 25 Nu kamu sa palingki, pagbili yi lang kamu kanyu karan-unun danga yi magpakapaingana, danga yi maghantup bagay kasalanan. 26 Dahil inda pag daga kasiyunan Panginuun hanggan tanan tanan bagay sitay sa babaw daga kanya diman. 27 Nu kamu ban-awan usa ka tawu unman napasakup sa Panginuun ag nu gustu niyu umati una hintay ti ihayin kan-a lang niyu, danga yi magpaingana danga yi maghantup bagay kasalanan. 28 Dapat nu may magsabi sa kanyu, "Inda pag karan-unun isinagda sa diyusdiyusan," danga maggaraw duy magkaun, barang ngap patalangun nita ti nagban-aw, hampay balaw maghantup bagay kasalanan. 29 Kang ibug sabihun balaw kuntay kamu tighantup, nu unman ti manga iba. Dahil hayga kanta hantupun may kasalanan ti usa ka tawu nu unman may pag-isipun siya. 30 Nu aku nagpasalamat sa Diyus bag-u nagsaru sa karan-an, hayga aku pagkadat-an waya sa bagaw? Dahil inda pag karan-unun kang pinasalamatan ngani sa Diyus. 31 Nakan una kamu magkaun una mag-inum, una hintay kanyu pagbuwatun, buwata niyu ti tanan sa ikadayaw sa Diyus. 32 Danga ipakakit niyu sa manga Hudiyu una sa manga balaw Hudiyu una hanggan sa iglisya Diyus ti sa ikasimray nida isip. 33 Pagga kangku diman waydi, pagdahanan niku kang ugali sa unman may ikasabi una si hintay, unman paghanapun niku kang sadili ikamayad, nu unman ti paghanapun niku ti ikamayad kayamuan tawu hampay iribri sida.
1 Paghuwad kamu sa kangku ga kang maghuwad waydi sa kan Kiristu. 2 Pagbayaun niku kamu dahil unman aku magkalimtan niyu, kanyu di pagsundun kang itinudlu sa kanyu. 3 Dapat kang gustu pagmaintindihan niyu si Kiristu tigpamahala sa kada lalaki, ti lalaki magpamahala sa kay asawa bag-u ti Diyus magpamahala waydi sa kan Kiristu. 4 Nu magdarangin ti lalaki aw ngatay magpurupita siya bagaw Diyus bag-u may taung kay ulu, magpauya lang siya sa kan Kiristu. 5 Nu magdarangin ti babayi aw ngatay magpurupita bag-u unman may taung kay ulu, magpauya lang siya sa kay asawa lalaki, siya ga babayi kinidkid kay buhuk. 6 Nu ti usa ka babayi unman magtaung sa kay ulu, mayad yi lang ipakidkid kay buhuk. Mahalay mana sa babayi nu magpakidkid kay buhuk, una magpauguy. Nakan mayad man gid nu may taung kay ulu sa magpakidkid kay buhuk. 7 Unman mayad nu magtaung ti lalaki kay ulu, dahil siya linalang ga histuda ag kadayawan Diyus. Dapat sa babayi mag-akitan ti kadayawan lalaki, 8 dahil ti lalaki balaw linalang Diyus ginan sa babayi nu unman babayi ti linalang Diyus ginan sa lalaki. 9 Unman diman linalang ti lalaki para sa babayi nu unman babayi ngapu ti linalang tabug sa lalaki. 10 Pag-isipun nita ti manga anghil nakan ti babayi kailangan magtaung sa kay ulu bilang ga tanda sa kay magpasakup sa kay asawa lalaki. 11 Katunda diman dahil sa kanta pakiusa sa Panginuun ti babayi may kailangan kaawat lalaki ag ti lalaki may kailangan kaawat babayi. 12 Dahil nu kabitay ti babayi ginan sa lalaki, katunda diman ti lalaki pag-ianak babayi. Ag ti tanan bagay ginan sa Diyus. 13 Kamu duy kailangan pagkilala yi. Mayad aw lugud ti babayi nu magdarangin sa Diyus unman may taung kay ulu? 14 Unman aw lugud magkaalaman sa kanta kaugalian hasayan nu ti lalaki aba kay buhuk? 15 Dapat unman aw madayaw manga iba ti babayi nu aba kay buhuk? Dahil pinapaladan waydi siya aba buhuk pinagkataung sa kay ulu. 16 Dapat nu may magkaibug magbirba sa kang sinabi inda, udyi aku may iba paanyu. Kami nakan hanggan tanan iba iglisya Diyus kainda diman kanmi ugali sa pagsamba. 17 Dapat ay may paanyu aku inda sa kanyu. Unman aku magbaya sa kanyu, dahil nu kamu magtiripun, balaw sa ikaayad niyu tunda, nu unman sa ikadaut ngap 18 Dahil un-an sa tanan naalaman niku nu kamu ti manga napasakup sa kan Hisus magtiripun, unman maaw magparaangayan kamu. Ag bilang ga magpasnu yi ngap aku. 19 Siguru pihu balaw parihu kamu tanan sa kanyu pagsarig, hampay burayhaw ngap sa kanyu ti manga ungud magsarig sa Panginuun. 20 Nu kamu ngani magtiripun balaw mahimu kamu kumaun yapun Panginuun. 21 Dahil nu kamu magkaun magbarawagan maaw. Ti usa magkalun-us, ti usa langu yi ngap. 22 Unman aw lugud kamu may balay? May yarabasan may irinman kamu. Hayga lugud unman pagpahalagaan niyu ti iglisya Diyus? Hayga pagpakay-ahun lang niyu ti unman may imaw? Hintay nguna kang masabi sa kanyu? Kamu aw kang pagbayaun sa tunda pag bagay? Bukun ngap aku magbaya. 23 Ti itinudlu Panginuun sa kangku, imaw diman waydi kang itinudlu yi sa kanyu magkun, 24 pagka napakampi si Hudas sa kalaban ni Hisus hampay siya kay itudlu sa kanda, ati katpung pag yabi nagbuul si Hisus ginan sa lamak usa ka tinapay. Nagpasalamat siya sa Diyus bag-u pinikapika niya ti tinapay. Magkun siya, "Inda kang bilug pag-ipakaun sa kanyu. Huwadan niyu inda sa pag-alaala sa kangku." 25 Katunda diman pagka nakayapun yi, binitbit ni Hisus ti ungut magkun, "Inda pag ungut imaw ti bag-u taratu tinalaghut niku dugu. Huwadan niyu inda sa kada niyu mag-inum sa pag-alaala sa kangku." 26 Dahil kada niyu magkaun inda pag tinapay, ag inman niyu ti ungut, pag-ipakilala niyu kay pagkamatay Panginuun hanggan sa udwaya Rumas-ug siya. 27 Nakan ngani una hintay ti magkaun tinapay ag mag-inum sa ungut Panginuun bag-u ud pagpahalgaan niya ti Panginuun, magkasala ngap siya laban sa Panginuun dahil unman pagpahalgaan niya kay bilug ag dugu Panginuun. 28 Dapat pag-&usisa ti tawu sa kay sadili barang may kasalanan, bag-u di kumaun tinapay ag uminum sa ungut. 29 Ti magkaun tunda pag tinapay ag mag-inum sa ungut bag-u unman pagpahalagaan niya ti bilug Panginuun, kay ngap pagbutungun ti sintinsiya Diyus tag sa kay sadili bilug. 30 Nakan ngani mayamu sa kanyu ti may manga sakit ag manga malumuy ag balaw pira ti namatay yi. 31 Dapat ay nu kita mag-usisa sa kanta sadili bilug ngatay may kasalanan, balaw kita sintinsiyahan Diyus. 32 Dapat nu kita pagparig-anan Panginuun kainda, tunda pariga sa kanta hampay kita unman miusa sa manga taga kalibutan sa sintinsiya aban. 33 Nakan manga patar-ari niku, nu kamu magsararuhan, pag-&alalagdan kamu. 34 Tigkalun-us pagkaun dapu siya sa kay balay. Nu kanyu sundun kang paanyu, kamu balaw maparig-anan Diyus sa kanyu magtiripun. Sa kang pag-asan aban ayusun waya niku ti iba pag manga kakurian.
1 Taynguna, manga patar-ari, gustu niku kamu makaalam tungkul sa manga pakaun ginan sa Ispiritu. 2 Alam niyu duy, kanyu udwaya nakatanggap sa kan Hisus, sinarigan niyu ti manga buyun pag diyusdiyusan, imaw ngap ti nagpatalang pirmi sa kanyu. 3 Nakan kang pag-ipaalaala sa kanyu, unman may magbagaw ginan sa udyuk Ispiritu Diyus magkun, "Saadan si Hisus." Unman diman may sumabi magkun, "Si Hisus ti Panginuun," nu unman ginan lang sa udyuk Ispiritu Banal. 4 May tuhay tuhay pag pakaun madi usa lang ka Ispiritu. 5 May tuhay tuhay pag manga arasikasuhun, dapat usa lang ka Panginuun ti pagsirbihan. 6 Ag may tuhay tuhay pag buruwatun, dapat usa lang ka Diyus tigpakaun kaya sa kada usa sa tanan buwat niya. 7 Dapat sa kada tawu pag-ipahayag Ispiritu kay kapangyarihan agud mapakinabangan tanan. 8 Dahil ti Ispiritu magpakaun bagaw kadunungan sa usa ka patar-ari, sa iba ti Ispiritu diman tigpaburayhaw sa manga bagay unman magkaalaman. 9 Sa iba imaw diman pag Ispiritu tigpakaun sarig, sa iba imaw diman waydi inda pag Ispiritu tigpakaun kapangyarihan magpaayad sa sakit. 10 Sa iba maan magpakaun siya kapangyarihan hampay magbuwat makadululaw, sa iba maan hampay magpurupita, sa iba maan pag-ipakaun Ispiritu hampay makakilala nu hintay ti inudyukan Ispiritu Banal ag nu hintay ti ginan sa labang, sa iba maan hampay bumagaw sa tuhay tuhay pag pamagaw balaw inadalan, sa iba maan pag-ipakaun Ispiritu hampay makapaliwanag sa kahulugan tuhay tuhay pag pamagaw. 11 Dapat imaw diman pag Ispiritu ti magbuwat inda tanan tanan. Pag-ipakaun niya sa kada usa angay sa kay kagustuhan niya. 12 Kanta bilug usa usa dapat kay gamit mayamu. Madi mayamu ti gamit bilug, usa usa lang ti bilug. Katida diman waydi si Kiristu. 13 Usa lang ka Ispiritu ti nagtulbaw sa kanta tanan sa bilug ni Kiristu, una kita Hudiyu, una kita Giriyigu, una manga panawuhun, una manga balaw panawuhun, kita tanan pinainum sa usa lang ka Ispiritu. 14 Dahil ti bilug balaw usa lang kay gamit, nu unman mayamu ngap. 15 Nu sabihun abi lulud, "Dahil aku balaw kamang, balaw aku gamit bilug," balaw ngap unman sa bilug diman ti lulud. 16 Nu sabihun abi tuli, "Dahil aku balaw mata, balaw aku gamit bilug," balaw ngap unman sa bilug diman ti tuli. 17 Nu abi ti bilug pasay mata, hintay nguna ti ipatingi? Nu abi ti bilug pasay tuli, kabitay pag humungaw? 18 Dapat taynguna binugtangan Diyus ti bilug tuhay tuhay pag kagamitan angay sa kay kagustuhan. 19 Nu abi tanan tanan usa lang ka gamit unman yi ngap may bilug. 20 Mayamu ngap kay gamit, dapat usa usa lang ka bilug. 21 Balaw sumabi ti mata sa kamang magkun, "Unman aku may kailangan sa kanmu." Una hanggan ulu dayu sumabi sa lulud, "Unman aku may kailangan sa kanyu." 22 Balaw pumadayu, nu unman tunda pag manga gamit ti bilang manga malumuy lalu ngapu pagkailanganun bilug. 23 Tunda pag manga gamit bilug ti pag-isipun nita balaw mahalaga lalu gid ngap pagpahalagaan nita tunda. Ti manga gamit nita bilug balaw marinu, lalu waya ngap kanta pagparinuun. 24 Ti marinu pag manga gamit nita bilug unman kailangan pagparinuun waya. Dapat hinusay Diyus ti bilug, pinakan-an lalu daka pag kadayawan tunda pag gamit bilug ti kurang sa kadayawan. 25 Hampay magkarausa ti manga gamit bilug ag parihu magparasunaidan sa usa kag sa usa. 26 Nu ti usa ka gamit bilug may mag-asaydan, ti tanan gamit minsan sa kanya magdungug kakurian. Nu ti usa ka gamit bilug pagdayawun, ti tanan manga gamit parihu magbaya minsan sa kanya. 27 Kamu yi ngani ti bilug ni Kiristu ag ti kada usa sa kanyu manga gamit bilug niya. 28 Ti iglisya hinusay diman Diyus. Un-an sa tanan ti manga Apustul bag-u ti manga purupita bag-u ti manga manugtudlu bag-u ti manga magbuwat manga makadululaw bag-u ti manga pinakan-an kapangyarihan magpaayad sa sakit, ti may kapangyarihan mag-awat sa iba, ti manga pinakan-an kadunungan sa magpangulu, ag ti manga magbagaw sa tuhay tuhay pag pamagaw balaw inadalan. 29 Balaw sida tanan manga Apustul, balaw sida tanan manga purupita, balaw sida tanan manga manugtudlu, balaw sida tanan manga manugbuwat makadululaw. 30 Balaw tanan pinakan-an sida kapangyarihan magpaayad sa sakit. Balaw sida tanan magbagaw sa tuhay tuhay pag pamagaw. Unman sida tanan makapaliwanag kahulugan sa tuhay tuhay pag pamagaw. 31 Lubus gid niyu hanapun ti lalu mahalaga pag pakaun. Pag-itudlu waya niku sa kanyu ti usa ka pinakamayad pag paraan sa tanan.
1 Una aku magbagaw tuhay tuhay pag pamagaw manga tawu hanggan manga anghil, bag-u unman aku may pagmahal, parihu lang aku sa agung maingay, ga lingganay magpanngil sa tuli. 2 Una pinakan-an yi aku Panginuun hampay makapurupita ag una maalaman niku ti tanan katutuuhanan unman ipinaburayhaw sa tawu, hanggan ti tanan kadunungan, una abi pinakan-an aku Panginuun buu pagsarig hampay ipakababa niku ti manga bantud, bag-u unman aku may pagmahal, unman diman aku may pulus. 3 Una ipakaun niku ti tanan tanan niku kasiyunan sa manga pugri ag una ipakaun waya niku kang bilug hampay sunugun bag-u unman aku may pagmahal, unman gid aku may pakinabang. 4 Ti pagmahal may pasunaid sa kay sadili, ag mahusay sa kaparihu. Ti pagmahal balaw maghirak. Ti pagmahal balaw magpadayaw, balaw magpalabilabi sa kay sadili, 5 balaw mag-ugali mahalay, bukun ngap kay sadili ikaayad ti paghanapun niya. Ti pagmahal balaw magkaaburidu, balaw magkutub, 6 balaw magbaya sa kadautan, nu unman magbaya ngapu sa katutuuhanan. 7 Tanan kay pag-agwantahun, tanan kay pagpa-&niwalaan, tanan kay pag-asahan, tanan kay pagtiisun. 8 Ti pagmahal balaw madura una hanggan aban. Ti magpurupita madura di ay aban, una tigbagaw manga tuhay tuhay pag pamagaw unman inadalan umapas diman, una ti kaalaman madura di aban. 9 Dahil ti pakaun kaalaman hanggan ti pakaun hampay makapurupita kurang waya, 10 dapat nu mangyari aban ti tanan ginayak Diyus udyi may kakurangan. 11 Pagka aku kaybi anak di waya, nagbagaw aku pamagaw anak, kang buut ga anak diman waydi hanggan kang naisipan ga anak diman. Pagka kainda aku may idad yi, tinayakan yi niku ti buut ga anak. 12 Dahil nu kainda di waya baliwa, malamun sa kanta maghiling ga sa usa ka salamin. Dapat aban makitan yi nita sa mata. Kainda udwaya lubus aku makakilala, dapat aban makilala yi ngapu niku, parihu sa kay magkilala Diyus sa kangku. 13 Dapat inda pag tulu ti unman gid madura hanggan waya aban, ti pagsarig, ti pag-asa hanggan ti pagmahal. Dapat ti mahalaga sa tulu imaw ti pagmahal.
1 Kasipag kamu sa pagmahal. Dag pabayabaya duy, hangadun gid niyu ti manga pakaun Ispiritu, dapat lalu ngap hampay kamu pumurupita yi. 2 Dahil tigbagaw sa tuhay tuhay pag pamagaw balaw inadalan, balaw sa tawu pag magbagaw, nu unman tag sa Diyus. Dahil unman may tawu makasalum sa kay pagbagawun. Dahil angay sa udyuk Ispiritu pag magbagaw siya manga katutuuhanan unman magkamaramadan, Diyus lang ti makaalam. 3 Dapat ti magpurupita magbagaw sa manga tawu sa ikarig-un nida pagsarig, hampay matulin kanda mag-sunud ag sa ikabaya nida isip. 4 Ti magbagaw sa tuhay tuhay pag pamagaw magparig-un sa kay sadili sarig. Dapat ti magpurupita magparig-un sa iglisya. 5 Kang gustu mana kamu tanan magbagaw sa tuhay tuhay pag pamagaw balaw inadalan. Dapat lalu waya kang gustu kamu pagmakapurupita. Lalu ngap mahalaga ti magpurupita sa magbagaw sa tuhay tuhay pag pamagaw purya lang mipaliwanag niya hampay maparig-un ti islisya. 6 Nu aku nangus makaasan sa kanyu, manga patar-ari, magbagaw sa tuhay tuhay pag pamagaw unman inadalan, hintay nguna kanyu pakinabangun sa kangku? Mayad waya nu tultulun niku sa kanyu ngatay ti paliwanag, ngatay ti kadunungan, ngatay ti manga bagaw ginan sa Diyus, ngatay ti manga pag-iadal. 7 Una manga bagay unman may arup-arup, ga manga palawta manga gitara nu unman mag-atuatu kabitay pag maalaman tawu nu hintay ti pagpatunuhan. 8 Dahil una budyung nu tumunug unman may turunu, hintay lugud ti mangalistu maglaban sa gira? 9 Ag kabitay pag maintindihan ti kanyu pagsabihun nu unman kanyu pagbagawun hampay masalman kay kahulugan. Barang ga bagyu lang kanyu bagaw maglawuy. 10 Halimbawa, mayamu diman ti manga pamagaw tawu sitay sa babaw daga, tanan tanan may kahulugan gid kanda pamagaw. 11 Nu unman naintindihan niku kanmu kahulugan bagaw, kita parihu unman nanalalman. 12 Katunda diman kamu dahil kanyu paghangadun ti manga pakaun Ispiritu Banal, hangadun niyu hampay lubus yi sa kanyu ti manga pakaun Ispiritu sa ikarig-un iglisya. 13 Nakan una hintay tigbagaw sa tuhay tuhay pag pamagaw unman inadalan kailangan pagdarangin siya hampay mipaliwanag niya kay pagsabihun. 14 Dahil nu aku magdarangin sa tuhay tuhay pag pamagaw, kang lang tagipusuun tigdarangin dapat unman miabay kang naisipan. 15 Kabitay nguna kang buwatun? Mandarangin aku ginan sa kang tagipusuun ag may darangin diman ginan sa kang naisipan. Kumanta aku ginan sa kang tagipusuun, ag kumanta diman ginan sa naisipan. 16 Nu kawu magpasalamat sa Diyus ginan lang sa kanmu tagipusuun, kabitay pag makasabi, "Amin" ti usa ka tawu nu unman napakan-an mag-&alam sa tuhay tuhay pag pamagaw, unman naalaman niya kanmu pagsabihun. 17 Tutuu mayad diman kanmu pasalamat sa Diyus dapat unman makaawat sa iba sa ikarig-un nida pagsarig. 18 Magpasalamat aku sa Diyus, dahil aku makabagaw sa tuhay tuhay pag pamagaw unman inadalan balaw lang ga kanyu tanan. 19 Dapat sa katpung magtiripun ti iglisya mas lalu gustu gid aku magbagaw una lang lima ka taga bagaw basta magkasalman manga manugpatingi hampay rumig-un sida. Unman aku magkasulung magbagaw linibu libu bagaw sa tuhay tuhay pag pamagaw unman inadalan. 20 Manga patar-ari, danga yi ga anak kanyu naisipan. Nu tungkul sa kadautan bay, pagga anak lapsag kamu. Dapat pagginurangun yi kanyu naisipan. 21 Kainda ti pagsabihun sa Banal Kasuratan, magkun ti Panginuun, "Bumagaw aku sa inda pag nasyun, dapat tuhay kay pamagaw ti manugpadakit sa kanda. Dayu aku patingihan nida una manga dayuhan ti pumadakit kang bagaw." 22 Nu katida ti pakaun Ispiritu sa tawu hampay makabagaw siya sa tuhay tuhay pag pamagaw unman inadalan, tunda usa ka tanda balaw sa manga magsarig nu unman sa manga unman magsarig sa kan Hisus. Dapat nu kay pakaun Ispiritu sa tawu hampay siya magpurupita, tida usa ka tanda ngap sa manga magsarig sa kan Hisus balaw sa manga unman magsarig. 23 Nu sa katpung magtiripun ti iglisya nu tanan tanan magbagaw sa tuhay tuhay pag pamagaw unman inadalan, ag nu may rinmas-ug asan manga tawu balaw madunung magbagaw sa tuhay tuhay pag pamagaw, ngatay ngap unman manga magsarig, unman aw sabihun nida kuntay kamu manga paung. 24 Dapat nu kamu tanan tanan magpurupita bag-u nu may rinmas-ug usa ka tawu unman madunung magpurupita, magpatingi siya sa kanyu binagaw bag-u makakilala siya sa kay sadili may kasalanan, magkaalaman yi niya kay tutuu kahamtangan sa atubangan Diyus. 25 Bag-u ipaburayhaw Ispiritu ti manga ilinihim pag kasalanan sa kay tagipusuun, nakan ngani lumuhud siya sumamba sa Diyus ag rargu sumabi siya, "Tutuu maaw ti Diyus sa kanyu karaw-an." 26 Manga patar-ari, hintay nguna ti ibug sabihun inda tanan? Sa kanyu magtiripun ti usa kumanta, ti usa tumudlu, ti usa magpurupita, ti usa maan bumagaw sa tuhay tuhay pag pamagaw bag-u may usa maan pumaliwanag sa kay ibug sabihun. Buwatun niyu ti tanan bagay sa ikarig-un iglisya. 27 Nu may magbagaw sa tuhay tuhay pag pamagaw, kang-ud ti duwa hanggan sa tulu pabulusbulus, kailangan may manugpaliwanag sa kay ibug sabihun. 28 Dapat nu unman may manugpaliwanag sa kay sinabi sa tuhay tuhay pag pamagaw, danga lang pagpadnugan sa kada usa, sa sadili lang tagipusuun pag maghampang sa Diyus. 29 Bumagaw ti duwa tugka lang sa tulu ka purupita bag-u pagkilalan-un manga iba ngatay tutuu ginan sa Diyus kanda pagsabihun. 30 Ag nu ti usa sa manga matukawan siyun may tinanggap bagaw ginan sa Diyus, pumat-ung dapu ti usa ka magbagaw. 31 Dahil kamu tanan mahimu magpurupita tigus-a tigus-a hampay ti tanan manugpatingi pagtudluan ag pagparig-&unun sa Panginuun. 32 Tigpurupita kailangan mapinigilun sa kay sadili tagipusuun. 33 Dahil ti Diyus gimpuunan kahusayan, balaw gimpuunan kaguluhan. Kailangan pariparihu ti mangyari sa kada puru iglisya Diyus. 34 Ti manga babayi kailangan danga mag-ingay sa katpung tiripun iglisya. Dahil unman pagpasnuan sida magbagaw sa katpung pagtiripun. Kailangan ti manga babayi pagmapinakumbabaun angay sa isinurat sa Kasuguan Diyus. 35 Nu sida magtagaalami, pagpaingana sida sa kanda manga asawa nu muli sa balay. Dahil bilang balaw maangay ti babayi nu magbagaw sa katpung tiripun ti iglisya. 36 Barang kanyu hantup sa kanyu ginan ti bagaw Diyus. Kamu lang aw lugud ti may bagaw Diyus? 37 Una si unu nu kay pag-isipun niya siya purupita, nu kay naisipan sakup sa Ispiritu Banal, kailangan pagkilalan-un niya kang isinurat sa kanyu kuntay bilin Panginuun. 38 Ti unman magpaniwala sa katida danga waydi pagpaniwalai. 39 Nakan ngani, manga patar-ari, paghingbut kamu sa makapurupita. Danga waydi pag-irangi ti magbagaw sa tuhay tuhay pag pamagaw unman inadalan. 40 Ti mayad lang pagmalinaw ag maayus ti tanan niyu buruwatun.
1 Taynguna ipagpaalaala niku sa kanyu, manga patar-ari, ti Mayad pag Barita kang itinudlu sa kanyu, kanyu diman tinanggap. Nakan marig-un diman kanyu pagsarig sa Panginuun. 2 Sa inda ginan pag Mayad pag Barita liktas kamu, nu asintadu kamu sa kang itinudlu sa kanyu, ag nu ituduk niyu sa kanyu tagipusuun kanyu pagsarig. 3 Ti itinudlu sa kangku imaw diman waydi kang itinudlu sa kanyu magkun, si Kiristu namatay dahil sa kanta manga kasalanan angay sa isinurat sa Banal Kasuratan. 4 Ilinbung siya bag-u binuhi siya uman sa ikatlu pag sirang angay sa isinurat sa Banal Kasuratan. 5 Napakakit siya sa kan Pidru, bag-u hanggan sa sampulu may duwa ka tuludluan niya. 6 Pagka nagtiripun ti subra lima ka gatus ka patar-ari, napakakit diman si Hisus sa kanda. Mayamu sa kanda buhi di hanggan taynguna tugka, ti iba bay namatay yi. 7 Napakakit diman si Kiristu sa kan Santiyagu bag-u sa tanan manga Apustul. 8 Bag-u pagka sa katapusan napakakit diman siya sa kangku, ga sa usa ka anak ipinanganak sa bukun waya udas. 9 Aku ngani ti pinakaababa sa manga Apustul, unman aku may karampatan ingarnan Apustul, dahil inunuunu niku ti iglisya Diyus. 10 Dapat dahil sa mayad nalub-anan Diyus, aku ngap Apustul. Ag balaw kang pinaiwdan halaga kay ipinakaun sa kangku. Aku nagbudlay subra man sa kanda tanan, madi balaw sa kangku pag kakayahan nu unman sa kabisugan lang Diyus. 11 Una aku una sida parihu lang kanmi pag-itudlu ag katunda diman kamu nagsarig sa kan Kiristu. 12 Nu pag-itultul nita magkun, "Si Kiristu binuhi uman sa kay pagkamatay," bati hayga ti iba sa kanyu magsabi ti manga namatay unman yi buhiun uman? 13 Nu abi ti manga namatay unman buhiun uman, una si Kiristu balaw waydi binuhi uman. 14 Nu abi si Kiristu unman binuhi uman, unman may gana kanmi tudlu, unman diman waydi may gana kanyu pagsarig. 15 Nu abi ungud ngani ti manga namatay balaw yi buhiun uman, masabi paman kami manga magtultul kapudilan tungkul sa Diyus, dahil kanmi pag-itultul magkun, Diyus ti nagbuhi uman sa kan Kiristu. 16 Dahil nu abi unman buhiun uman ti manga namatay, unman diman binuhi uman si Kiristu. 17 Nu abi unman binuhi uman si Kiristu ud may kabuluhan kanyu sarig, kamu sa kanyu waya manga kasalanan. 18 Nu katunda una ti manga namatay sa kan Kiristu lunsay yi nidamhak ngap. 19 Nu sa kanta lang buhi inda sa babaw daga kita pag magsarig sa kan Kiristu, kita sa tanan tawu lalu ngap kaawaawa. 20 Dapat ay si Kiristu binuhi uman sa kay pagkamatay, siya ti puruyba kuntay buhiun uman ti manga namatay. 21 Dahil nu kabitay ginan sa usa ka tawu nangyari ti kamatayan, katunda diman ginan diman waydi sa usa ka tawu nangyari ti pagkabuhi uman. 22 Ti tanan tawu may kamatayan, dahil sida kabilang ni Adam. Katunda diman ti tanan tawu may pagkabuhi uman, dahil sa kanda pakiusa sa kan Kiristu. 23 Dapat ti kada usa angay sa kaayusan. Si Kiristu tig-una sa tanan bag-u ti manga sa kan Kiristu sa kay pagsitay niya aban. 24 Pagka miintirga yi ni Kiristu ti kaharian sa Diyus bag-u Rumas-ug waydi ti katapusan nu sinakup yi niya ti tanan maghari, ti tanan may karampatan ag manga kapangyarihan. 25 Dahil kailangan si Kiristu tigpamahala hanggan sa udwaya mipauli Diyus sa sirung raprapa ni Kiristu ti tanan niya kalaban. 26 Taluhun diman niya aban ti nasawad pag kalaban imaw ngani ti kamatayan. 27 Dahil magkun ti Kasuratan, ipinauli Diyus ti tanan manga bagay sa kay sirung raprapa. Dapat nu pagkumnun ti tanan manga bagay ipinauli yi, naintindihan nita napabukud ti Diyus, imaw ngap ti nagpauli tanan manga bagay sa sirung raprapa ni Kiristu. 28 Nu ti tanan bagay mipauli yi sa kay sirung raprapa, hanggan ti Anak pumasakup waydi sa Diyus sa nagpauli tanan manga bagay sa sirung raprapa niya, hampay ti Diyus yi gid ti may kapangyarihan sa tanan tanan. 29 Nu bukun katida hintay ti buwatun manga pag-itulbaw tungkul sa manga namatay yi, nu ti manga namatay tutuu udyi buhiun uman, hayga pag-itulbaw waya sida tungkul sa manga namatay? 30 Hayga bati kami maglakaw diman sa madala kada udas? 31 Sirang sirang arani yi lang aku sa kamatayan. Inda kang pag-ipakilala sa kanyu dahil kamu duy, manga patar-ari, kang pagbayaun dahil sa kan Kiristu Hisus, sa kanta Panginuun. 32 Nu angay lang sa kang pagkatawu aku naglaban sa manga simarun sitay sa Ipisu, hintay kang pakinabangun. Nu abi ti manga namatay unman buhiun uman, pagkaun ag pag-inum yi lang kita, aldaw mamatay yi waydi. 33 Danga kamu madaya. Ti daut pag kaibahan magdaut sa mayad pag ugali. 34 Pagbalik kamu sa mayad pag naisipan ag danga magkasala kamu. Dahil ti iba unman magkilala sa Diyus. Kang pagkumnun inda sa kanyu sa ikakay-a niyu. 35 Dapat barang may paingana ti manga iba magkun, kabitay pag buhiun uman ti manga namatay? Kabitay kanda kalasi bilug aban? 36 Kawu duy unman may buut. Ti kanmu ipinamgas unman mabuhi nu unman mamatay dapu. 37 Ti kanmu ipinamgas butir lang una tirigu, una tuhay pag kalasi binhi, dapat tuhay ti tumlus kay kalasi bukun yi butir. 38 Dapat Diyus tigpakaun histuda sa binhi angay sa kay kagustuhan, ag sa kada butir siya tigpakaun tuhay tuhay histuda. 39 Balaw tanan nayi parihu, ti nayi tawu tuhay waydi sa hayup, tuhay waydi ti nayi manuk, tuhay maan ti nayi isda. 40 May manga bilug para sa langit, may manga bilug para sa daga, tuhay ti rinu gamit sa langit. 41 Tuhay ti rinu init, tuhay maan ti rinu bulan, ag tuhay waydi maan ti rinu pamgasan. Dahil ti usa ka pamgasan tuhay waydi sa usa kay rinu. 42 Katunda diman waydi ti pagkabuhi uman manga namatay. Pag-ilubung may karunutan, pagbuhiun uman sa udyi may karunutan. 43 Nu ilubung balaw may karinuan bag-u buhiun uman may kadayawan ngap. Nu ilubung may kalumuyan bag-u buhiun uman may kapangyarihan. 44 Nu ilubung may bilug angay sa daga bag-u buhiun uman bilug yi angay sa langit. Nu may bilug angay sa daga may bilug diman waydi angay sa langit. 45 Katunda diman ti isinurat sa Banal Kasuratan magkun, "Ti un-an pag tawu si Adam inarupan Diyus bag-u may buhi yi." Ti sa uryan pag Adam imaw ti Ispiritu tigpakaun buhi sa tawu. 46 Ti angay sa Ispiritu balaw imaw ti mag-una nu unman ti angay ngap sa daga tig-una bag-u di ti angay sa Ispiritu. 47 Ti kabag-u pag tawu si Adam taga daga angay diman waydi sa daga. Ti ikadwa pag Adam taga langit. 48 Nu kabitay ti un-an binwat sa daga, katunda diman ti manga kadasun taga daga diman waydi. Nu kabitay ti rinmas-ug ginan sa langit, katunda diman waydi ga kanya sida manga taga langit. 49 Kanta daan histuda parihu sa kabag-u pag tawu binwat sa daga, katunda diman kanta histuda aban parihu sa nagsitay ginan sa langit. 50 Kang yi ngani pagsabihun sa kanyu, manga patar-ari, nu bilug lang tawu ud pumasakup sa kay paghari Diyus. Ti may karunutan pag bilug ud mauman sa unman may karunutan. 51 Malu, kang itultul sa kanyu ti usa ka katutuuhanan udwaya ipinaburayhaw Diyus sa manga tawu. Balaw tanan tanan kita mamatay, dapat kita tanan bag-uhun, 52 bigla, unman mapidpirawan mata, sa katapusan pag budyung. Dahil tumnug ti budyung bag-u ti manga namatay buhiun uman udyi may karunutan, ag kita bag-uhun waydi. 53 Dahil inda pag may karunutan kailangan tulsan unman may karunutan. Inda pag may kamatayan kailangan tulsan unman may kamatayan. 54 Nu inda pag may karunutan matulsan yi unman may karunutan, ag inda pag may kamatayan matulsan unman may kamatayan, nu katunda matupad yi ngap aban ti bagaw magkun, "Dinura yi ti kamatayan, lubus yi lang nanalu ti Diyus." 55 "Kamatayan, naan tag yi kanmu panalu? Kamatayan, naan tag yi kanmu kapangyarihan magpakuri?" 56 Ginan sa kasalanan may kapangyarihan ti kamatayan hampay magpakuri. Ginan maan sa Kasuguan ti kabisugan kasalanan. 57 Dapat salamat sa Diyus, pagpakan-an niya kita panalu ginan sa kanta Panginuun Hisu-Kiristu. 58 Nakan ngani duy, manga patar-ari, pagmarig-un kamu, danga daradarahan, pagpirmi matinupadun kamu sa buruwatun Panginuun, dahil naalaman yi niyu balaw unman may kabuluhan kanyu tarabahu sa Panginuun.
1 Nu tungkul bay sa kanyu ambagan iawat sa manga napasakup sa Panginuun, kailangan diman buwatun niyu parihu sa kang bilin sa manga iglisya sa taga Galasya. 2 Kada sirang duminggu ti kada usa sa kanyu pagpablag kuwarta angay sa kanyu nakitan hampay alistu yi daan kanyu manga ambag sa kang pagras-ug asan sa kanyu. 3 Sa pagras-ug niku asan, una hintay pag manga tawu kanyu piliun, kang suguun hampay darahun kanyu pakaun kuwarta may tapil surat tag sa Hirusalim. 4 Nu kailangan aku hanggan atag, kumuyug yi lang sida sa kangku. 5 Dapat aku asan tag yi sa kanyu, lakaw waya sa Masidunya. Dahil kang gayak lakaw dap sa Masidunya. 6 Dapat siguru aku madugay aban sa kanyu hanggan sa ud makalawuy ti amihanun, hampay aku awatan niyu sa kang paglakaw una naan tabug. 7 Dahil aku unman may gustu mansabang sa kanyu taynguna ngalay ngalay lang sa kang lakaw. Dahil kang gayak mana madugay aku sa kanyu nu imaw kay kagustuhan Panginuun. 8 Sitay waya dapu aku sa Ipisu tugka waya sa sirang Pintikustis. 9 Dahil may rugar gid aku magtudlu Bagaw Panginuun sitay taynguna, hampay tumanggap ti manga tawu, dapat mayamu diman waydi tiglaban. 10 Nu Rumas-ug si Timutiyu asan sa kanyu kailangan kanyu tanggapun siya sa unman maruku siya kay naisipan. Dahil pagtupadun niya ti buruwatun Panginuun parihu diman ga kangku. 11 Una hintay pag tawu danga magpalabilabi laban sa kanya. Lalu awatan ngapu niyu siya para masulung kay maglakaw hampay makasitay siya sa kangku. Dahil una aku una hanggan ti manga patar-ari maggagad yi gid sa kanya. 12 Dapat inda aku may isabi waya sa kanyu tungkul sa kanta patar-ari sa kan Apulus. Balaw di kas-a sinabihan niku siya pag-asan siya mana sa kanyu, kaibahan manga patar-ari. Udwaya may gustu siya kainda asan tag sa kanyu. Dapat umasan siya nu may rugar aban. 13 Pag-ingat kamu, pagmarig-un kamu sa kanyu pagsarig, pagmatutum kanyu naisipan, kamu pagmabisug. 14 Buwatun niyu ti tanan tarabahu niyu may pagmahal sa Diyus hanggan sa manga tawu. 15 Manga patar-ari, alam niyu ti magtal-anakan ni Istipanas imaw ti un-an nakatanggap sa Panginuun sa Akaya pag daga, ag lubus magsirbi sida sa manga iglisya. Magbilin mana aku sa kanyu, 16 paghuwad kamu sa katunda pag manga tawu, hanggan sa kada usa magtarabahu ag magsirbi kaibahan nida. 17 Magbaya aku sa pagras-ug nida ni Istipanas, ni Purtunatu, ag ni Akaiku, dahil kamu mana kang paghanapun ag inda yi ngap sida. 18 Pinasulung nida kang naisipan, pinasulung waydi nida kanyu naisipan. Pahalgai ngani niyu ti katunda pag manga tawu. 19 Magtagaalami ti manga iglisya sa Asya nu kabitay ti barita asan sa kanyu. Lalu sida ni Akila ni Pirisila magtagaalami waydi hanggan ti manga patar-ari magtiripun sa kanda balay, nu kabitay kanyu kahamtangan asan, dahil sa kanta pakiusa sa Panginuun. 20 Magtagaintindihi ti tanan manga patar-ari sitay magpaingana nu kabitay kamu. Kamu ti magtar-ari sa kan Kiristu, pagparaingan-an waydi kamu ti kada usa sa kanyu asan. 21 Aku si Pablu ti nagpirma inda pag surat. Mahal aw waydi kamu asan? 22 Ti unman magmahal sa Panginuun saadan siya. Pagras-ug yi gid kawu, duy Panginuun. 23 Kang pag-idarangin kamu hampay sa kanyu ti pangaawa nita Panginuun Hisus. 24 Kamu tanan kang pagmahalun dahil sa kanta pakiusa sa kan Kiristu Hisus.
1 Inda ti may surat si Pablu kay pinili Diyus hampay kay Apustul ni Kiristu Hisus, hanggan kanta patar-ari si Timutiyu. Inda pag surat tabug sa iglisya sa Kurintu hanggan sa manga pinili Diyus mag-uli sa buu daga Akaya. 2 Pagsa kanyu ti papalad hanggan kahusayan ginan sa Diyus sa kanta Ama ag ginan diman sa Panginuun Hisu-Kiristu. 3 Kanta dayawun ti Diyus, ti Ama nita Panginuun Hisu-&Kiristu, siya ti maawaun pag Ama, siya pag Diyus tigpakaun tanan maariwaya pag naisipan. 4 Pinaariwaya niya kita sa tanan nita manga kakurian hampay kita maan makaawat sa tanan may manga kakurian dahil sa kanta maariwaya pag naisipan kanta tinanggap ginan sa Diyus. 5 Angay sa kanta magpakiusa sa kan Kiristu sa kay kakurian, katunda waydi pag maariwaya kanmi pagtanggapun ginan diman sa kan Kiristu. 6 Nu kami waydi ti basad kakurian, tunda sa ikaariwaya ngap niyu naisipan ag sa ikaribri niyu. Pagka kami pinaariwaya, tunda sa ikaariwaya diman niyu naisipan. Bumisug kamu nu tis-un niyu ti manga kakurian malakawan niyu parihu sa kanmi paglakawan. 7 Nakan ngani marig-un kanmi sarig tungkul sa kanyu. Alam nimi magpaminsan kamu sa kanmi maariwaya pag naisipan dahil kamu minsan diman sa kanmi sa kakurian. 8 Manga patar-ari, kanmi pag-itultul sa kanyu ti kanmi nalakawan pag kakurian ati sa Asya. Ungud subra yi gid mabuyat pag kakurian kanmi nalakawan, nu sa kanmi di naisipan ga udyi gid lumapus kami. 9 Kanmi isip inda yi kanmi udas kamatayan. Dapat nangyari tunda hampay kami balaw magsarig sa sadili kabisugan, nu unman hampay kanmi ngap sarigan ti Diyus ti pumabuhi sa manga namatay. 10 Ati katpung pihu yi mana kami mamatay dapat kay di ngap irinibri kami. Una ngap hanggan kainda kay di iribri kami. May pag-asa di kami una aban kay di iribri kami. 11 Kailangan pag-awat waydi kamu sa darangin, hampay mayamu ti pumasalamat sa Diyus dahil sa kay papalad sa kanmi bilang sagut niya sa mayamu nandarangin. 12 Inda kanmi ipagdayaw sa Diyus, pagpatutuuhanan nimi naisipan unman may pabalhinguun kanmi magpakiusa sa tanan tawu ag lalu ngap sa kanyu angay sa kanmi magpasakup sa kay kabanalan hanggan katutuuhanan Diyus, dahil lang sa kay pakaun kaayadan Diyus, bukun yi sa kadunungan angay lang sa pagkatawu. 13 Nakan ngani danga waydi niyu pagpasiingi ti kaayadan nimi manga surat sa kanyu. Magsarig aku maintindihan niyu kami aban. 14 Dahil udwaya masyadu maintindihan niyu kainda kuntay nu Rumas-ug aban ti kaudasan Panginuun Hisus, kamu dumayaw sa Panginuun dahil sa kanmi, kumun diman kami dumayaw sa kanya dahil sa kanyu. 15 Dahil imaw yi ngani kang pagpaniwalaan, nakan inisip niku asan tabug dapu aku hampay lalu dumaka kanyu pakinabang sa kang pag-asan sa kanyu. 16 Kang gayak makalakaw gid aku sa kanyu kang atabug sa Masidunya, nu aban aku mag-uli ginan sa Masidunya asan di maan lakaw sa kanyu hampay aku kanyu diman waydi awatan sa kang maglakaw atabug sa Hudiya. 17 Pagka unman nitarus aku mahimu aw nguna masabi kuntay aku pudilun? Kanyu aw isip pauman-uman kang gayak parihu sa ugali tawu taga kalibutan hampay magtalinduwa aku may hu may unman? 18 Alam nita ti Diyus masarigan, katunda diman kang pagsabihun sa kanyu ti hu, hu yi gid. 19 Ti Anak Diyus si Hisu-Kiristu imaw ti itinudlu nimi ni Silbanu ni Timutiyu sa kanyu magkun unman magkatalinduwa si Kiristu, balaw may hu may unman, nu unman tutuu yi gid hu. 20 Dahil ngani si Kiristu ti ipinatupad sa tanan manga itinaratu Diyus. Dahil sa kan Kiristu kita makasagut magkun, "Amin" tungkul sa tanan itinaratu Diyus, sa ikadayaw sa kanya. 21 Diyus ti nagparig-un sa kanmi hanggan sa kanyu dahil sa kanta pakiusa sa kan Kiristu. Siya diman ti nagpili sa kanta. 22 Tinandaan niya kita kuntay kita kanya. Ipinakaun niya sa kanta ti Ispiritu mag-uli sa kanta tagipusuun, imaw kay puruyba tupadun niya kay manga pangaku. 23 Maghiling di ti Diyus, una sa kang tagipusuun. Nakan balaw dap aku nag-asan sa Kurintu dahil kamu kang pagdahanan diman. 24 Balaw duy kanmi gustu kamu giyahan waya nimi sa kanyu pagsarig, dahil marig-un yi waydi kamu sa kanyu pagsarig. Magkaibug kami umawat hampay masulung kamu sa kanyu buhi sa kan Kiristu.
1 Nag-isip aku dayu dap umasan hampay unman aku makapakaun utru sa kanyu karukuan. 2 Nu kamu mapakan-an niku karukuan hintay waya ti pumasaya sa kangku? Unman aw kamu yi mana ti pumasaya sa kangku? Nakan ngani hayga pakan-an waya niku kamu karukuan? 3 Nakan ngani sinuratan dapu niku kamu hampay nu aku umasan, balaw yi karukuan kanyu ipakaun sa kangku, kamu yi ngap ti magpasaya sa kangku. Dahil alam yi waydi niku nu masulung aku, masulung diman waydi kamu. 4 Sa kabag-u niku surat sa kanyu nanlumi aku sa kang tagipusuun, maruku gid aku, balaw diit pagka luwa ti binmulus ginan sa kang mata sa katpung kang magsurat sa kanyu tabug. Sinuratan niku kamu balaw kuntay pakan-an kamu karukuan nu unman hampay ipakilala sa kanyu nu kabitay kay kadaka niku pagmahal sa kanyu. 5 Nu may nagpakaun karukuan una si hintay pag tawu, balaw aku ti pinakan-an niya karukuan. Mahimu sabihun balaw may labis balaw may kurang, kamu tanan tanan pinakan-an niya karukuan. 6 Dapat sa kayamu niyu, hustu yi kanyu parusa sa kanya. 7 Taynguna patawada yi niyu siya, sayahun niyu barang kay karukuan rargu ikalubay niya sarig. 8 Nakan ngani aku inda may ihampang sa kanyu hampay ipakilala mana niyu kanyu pagmahal sa kanya. 9 Nakan nagsurat diman aku sa kanyu sa kabag-u hampay hilingun niku ngatay kanyu pagtupadun mayad mayad ti tanan niku manga pag-ibilin sa kanyu. 10 Una si unu kanyu pinatawad, pinatawad diman niku. Nu may pinatawad aku, nakan kang pinatawad dahil sa kanyu sa atubangan ni Kiristu. 11 Hampay kita dayu madaya ni Satanas. Alam di waydi ngap nita kay turunu. 12 Pagka nag-ati aku sa Turuwas hampay manudlu Mayad pag Barita tungkul sa kan Kiristu, pinakan-an ngap aku Panginuun mayad pag rugar hampay tudluan niku ti manga tawu. 13 Dapat unman masulung kang tagipusuun, dahil unman nagkarasampak kami ni patar-ari Titu. Nakan aku namaalam sa kanda sa taga Turuwas rargu ngap nag-atag sa Masidunya. 14 Dapat salamat sa Diyus, dahil sa kanta pakiusa sa kan Kiristu, pirmi kita pagdarahun Diyus ga manga pirisu hampay ipakilala kay panalu ni Kiristu. Paggamitun kita Diyus hampay ikalat sa tanan rugar ti pagkilala sa kan Kiristu parihu ga hungaw mabanglu. 15 Kita ga katunda kamangyan mabanglu pag-&ipagtuub ni Kiristu para sa Diyus. Magkahungawan kay banglu manga ipagribri hanggan manga midamhak. 16 Maarathat pag bawu nu sa manga midamhak sa ikamatay nida. Dapat sa manga ipagribri mabanglu pag hungaw sa ikabuhi nida. Si unu nguna ti may kang-ud makatupad tunda pag buruwatun? 17 Balaw kami parihu sa iba, magkaibug sida pagmay bayad sa kanda magtudlu Bagaw Diyus. Bagkus ngap kami magtupad sa kay isinugu Diyus magtudlu gid kay bagaw sa atubangan Diyus dahil sa kanmi magpakiusa sa kan Kiristu.
1 Kanyu aw lugud hantup kuntay pagdayawun yi maan nimi kanmi sadili bilug? Kami aw lugud parihu ga manga iba may kailangan surat tabug sa kanyu, aw ngatay ginan sa kanyu hampay maalaman kanmi ugali? 2 Kamu yi ngani ti pinagkasurat hampay maalaman kanmi ugali, nisurat sa kanmi tagipusuun hampay maintindihan ag mabasa tanan tawu. 3 Kamu malinaw pag pinagkasurat ni Kiristu kanmi ipinadangat. Inda nisurat balaw ga kinta nu unman ginan sa Ispiritu Diyus buhi, balaw sa binagasbasan batu nu unman sa pusu tawu pag isinurat. 4 Magkasabi ngani nimi katida dahil may pagsarig kami sa Diyus dahil sa kan Kiristu. 5 Nu sa kanmi lang ud may kaya sa inda pag buruwatun. Kanmi kabisugan lunsay pakaun Diyus. 6 Pinakan-an niya kami kadunungan hampay magsirbi sa bag-u pag taratu, balaw nipuun sa nisurat pag Kasuguan bagkus ngap sa Ispiritu. Ti nisurat pag Kasuguan magpakaun kamatayan dapat ti Ispiritu magpakaun ngap buhi. 7 Katpung ipinakaun kaybi ti Kasuguan iginuhit sa binagasbasan batu, Ipinakakit waydi ti kadayawan Diyus. Madi ti pag-ipakaun Kasuguan ay kamatayan, masyadu masilaw kay uyahun ni Muysis unman nakasumpung ti manga Israilita madi magkadura di tunda pag kadayawan. 8 Unman aw lalu may kadayawan ti pakaun Ispiritu? 9 May kadayawan sa katpung ipinakaun ti Kasuguan madi imaw tigpakaun sintinsiya sa ikamatay tawu. Dapat lalu man ngap may kadayawan ti pakaun kapatawadan. 10 Nakan ngani masabi nita ti daan kadayawan udyi, dahil nailsan lalu waya gid may kadayawan. 11 Nu may kadayawan ti nakalawuy, lalu waya gid ungud may kadayawan ati ti udyi may kaduraan hanggan waya aban. 12 Dahil inda yi ngani kanta sarig, nakan marig-un kanta tagipusuun. 13 Unman kita parihu sa kan Muysis, may patakip kay uyahun hampay balaw mag-akitan manga Israilita tunda pag kadayawan madi madura di maan. 14 Dapat maganit kanda tagipusuun, nakan hanggan taynguna udwaya nab-ul tunda pag patakip kada pagbasahun nida ti Kasuratan tungkul sa daan pag taratu. Madura lang tunda pag patakip nu magpakiusa ti tawu sa kan Kiristu. 15 Hanggan taynguna tugka, may patakip waya kanda naisipan kada pagbasahun nida kan Muysis manga Kasuratan. 16 Dapat sa kay umatubang tawu sa Panginuun mab-&ul kay patakip. 17 Kang pakumnun Panginuun imaw ti Ispiritu. Nu naan ti Ispiritu Panginuun asan diman waydi ti kaluagan. 18 Taynguna nab-ul yi sa kanta uyahun ti patakip, kita tanan tanan amat amat magsinglaw ginan sa kadayawan Panginuun. Inda pag kadayawan ginan sa Panginuun, sa Ispiritu imaw tigpabag-u sa kanta ugali pagkatawu agud amat amat lalu dumaka ti kadayawan sa kanta hanggan sa udwaya kita mag-&iparihu sa kanya.
1 Dahil sa kay pangaawa Diyus pinili niya kami sa buruwatun inda, nakan ngani matutum kanmi naisipan. 2 Dinayu nimi ti buruwatun makakaray-a hanggan tigpabalhinguun. Balaw kami mandaya, unman mag-uman mag-uman kami Bagaw Diyus. Bagkus ngap ipinaburayhaw nimi ti katutuuhanan nakan alistu kami pausisa una sa kantapu nu may pagkutubun sa atubangan Diyus. 3 Nu may patakip waya ti Mayad pag Barita kanmi ipagtudlu, magkatakipan lang inda sa manga midamhak aban. 4 Unman sida magsarig, nakan kanda naisipan binuta ni Satanas, imaw tighari sa manga taga kalibutan. Nakan binuta sida hampay balaw makitan nida ti karayawan Mayad pag Barita tungkul sa kadayawan ni Kiristu imaw ti ga histuda Diyus. 5 Si Hisu-&Kiristu kanta Panginuun ti kanmi ipagtudlu, balaw kanmi sadili. Kami kanyu manga panawuhun dahil ngani sa kan Hisus. 6 Dahil Diyus ti nagsabi magkun, "Ginan sa kadudulman pagsinggit ti karayawan." Siya diman ti nagpakaun rayaw sa kanmi manga naisipan hampay makilala ti kamaskihan Diyus mag-akitan sa uyahun ni Kiristu. 7 Kami pinakan-an inda pag kayamanan angay sa Ispiritu madi kami ga anglit lang kay matpuk, hampay pasnuan manga tawu inda pag kapangyarihan ti higit sa tanan, balaw kanmi sadili, nu unman kapangyarihan ngap Diyus. 8 Pil-it yi kami sa baliw baliw dapat bukun subra, mabata di. Nu kas-a ginan magpakabitay diman dapat balaw waydi nabul-an sa pagsarig kami. 9 Pag-unuunuhun kami dapat balaw waydi pagpabay-anan. Nagpu kami dapat unman waydi natabwan kami arup. 10 Unman madura sa kanmi bilug ti kamatayan ni Hisus hampay, dahil diman sa kanmi bilug, makitan waydi kay buhi ni Hisus. 11 Kami ti manga may buhi pag-ipakaun pirmi sa kamatayan dahil sa kan Kiristu hampay makitan diman kay buhi ni Kiristu dahil sa kanmi bilug may kamatayan. 12 Nakan ngani mag-akitan sa kanmi ti kapangyarihan kamatayan dapat sa kanyu mag-akitan ngap ti buhi unman may katapusan. 13 May nagsabi ngani sa Banal Kasuratan magkun, "Nakan aku magbagaw dahil aku may sarig." Angay sa kahulugan siti pag hampang tungkul sa pagsarig, magbagaw diman ngani kami, dahil kami hanggan may sarig. 14 Dahil alam ngani nimi ti Diyus pinmabuhi maan sa Panginuun Hisus, imaw diman waydi maan ti bumuhi sa kanmi ginan sa kamatayan kaibahan ni Kiristu. Imaw diman ti dumara sa kanyu hanggan sa kanmi atag sa kay arani. 15 Ti tanan inda sa mapakinabangan niyu hampay nu yumamu ti manga tawu magtanggap sa manga pakaun Diyus pag kaayadan, lalu ngap yumamu waydi ti manga magpasalamat magdayaw sa Diyus. 16 Nakan ngani kami balaw magpalumuyun sa kanmi naisipan. Una amat amat maglumuy yi kanmi bilug, mag-amat di ngap magbisug kanmi tagipusuun. 17 Ti malpus malpus pag kakurian kanmi paglakawan inda bilang ngalay ngalay lang. Kay pakinabang aban imaw ti kaayadan unman may katapusan. Unman may tumimbang kakurian sa siti pag kaayadan. 18 Nakan ngani kami magturun balaw sa manga bagay mag-akitan sa mata nu unman ngap sa manga bagay unman mag-akitan, dahil madali di maglawuy ti manga mag-akitan sa mata, dapat unman gid may katapusan ti manga unman mag-akitan sa mata.
1 Magkaalaman diman nita nu madaut kanta bilug ga nangus turda, kita may ulian waya sa langit, balaw binwat tawu kamang, nu unman Diyus ngap ti may buwat. 2 Magpakabitay wadi kita hanggan kita sa inda kanta bilug waya ag talaga subra gid masyadu kanta pagkaibgan tunda pag bilug para sa langit, 3 hampay nu pasulungan kita bag-u bilug, kita dayu makitan ga lilus lang. 4 Hanggan kita sitay waya sa kanta bilug inda ga turda, kita talaga magkakurian, magpakabitay waya balaw waydi tunda kuntay sa Lukasun kanta bilug para sa daga, nu unman hampay ilsan yi bilug para sa langit. Nu katida, kanta buhi may katapusan ilsan aban buhi unman may katapusan. 5 Diyus diman ti naghanda sa kanta hampay kay bag-uhun ngani. Ipinakaun niya sa kanta ti Ispiritu bilang pinagkatanda imaw yi kay puruyba pihu tupadun niya kay manga pangaku. 6 Nakan ngani pirmi di mabisug kanmi naisipan. Alam yi nimi basta maulianan waya ti bilug nimi inda, dayu waya mahimu pakan-an kami bag-u bilug ginan sa Panginuun. 7 Kanmi ugali angay sa kanmi sarig sa Diyus, balaw angay sa manga bagay mag-akitan sa mata. 8 Mabisug kanmi naisipan, daka mana kanmi gustu ighitan nimi inda pag bilug kanmi pag-ulian, hampay manahanan kami ati sa arani Panginuun. 9 Dapat ay una sa inda pag ulian, una ati sa langit pag ulian, ti pinakamahalaga sa kanmi nu pagbayaun kami Diyus. 10 Dahil ngani ti kada usa sa kanta umatubang sa kan Kiristu hampay kay suyasidun kita bag-u kay pakan-an kita pirimyu angay sa kanta binwat, ngatay mayad ngatay daut kanta waya sa babaw daga. 11 Alam diman nimi madala sa Panginuun ti tawu nu may kasalanan, nakan pagsikapun nimi giyahun ti manga tawu tag sa Panginuun. Unman may pag-itagu kami sa atubangan Diyus. Magsarig aku kuntay sa kanyu pagkilala sa kanmi, kami unman may pag-itagu sa kanyu. 12 Balaw sa ipadayaw maan kanmi sadili sa kanyu. Nakan katida kang pagsabihun hampay kamu may ipabantug tungkul sa kanmi ag hampay masagut niyu ti manga tawu kanda dayaw sa mag-akitan lang mata, ag unman sa manga naisipan tagipusuun tawu. 13 Kami aw lugud bilang ga magkapaungpaung? Nakan katida kami dahil ngani sa kanmi magpasakup sa Diyus. But-anin aw kami? Nakan katida kami para ngap sa kanyu. 14 Dahil ngani kay pagmahal ni Kiristu tigpil-it sa kanmi. Kanmi ngani nasalman ti usa namatay tungkul sa tanan tawu. Nakan ngani masabi nita ti tanan tawu namatay. 15 Namatay si Kiristu dahil ngani sa tanan tawu hampay ti manga buhi taynguna danga kanda pag-isipun kanda lang sadili kagustuhan naisipan. Bagkus ngap kailangan si Kiristu yi ti turunuha nida buhi imaw ti namatay dahil sa kanda, siya diman nabuhi maan tungkul sa kanda. 16 Nakan taynguna kanmi magkilala una sa kantapu bukun yi angay sa pagkatawu lang pag ugali. Nu kaybi angay lang sa pagkatawu diman ngap ngani kanmi magkilala sa kan Kiristu, dapat taynguna udyi. 17 Nakan ngani una si unu ti magpakiusa sa kan Kiristu, siya bag-u yi linalang. Udyi ti daan pagkatawu. Siya bag-u yi gid pag tawu. 18 Ti tanan inda ginan sa Diyus. Sa panab-anan lang ngani ni Kiristu pag nipausa Diyus kita sa kanya. Bag-u pinili kami Diyus sa inda pag buruwatun hampay ipausa nimi ti manga tawu sa kanya. 19 Kanmi ibug sabihun, ginan sa kan Kiristu nipausa Diyus ti taga kalibutan sa kanya. Udyi pag-alalahanun niya kanda manga kasalanan. Ipiniyar Diyus sa kanmi inda pag barita hampay ti manga tawu ipausa ngani sa kanya. 20 Nakan ngani kami kay manga sinugu ni Kiristu. Bilang ti Diyus diman gid tigpaanyu sa kanyu ginan diman sa kanmi magkun, "Sa ngaran ni Kiristu kanmi pagpaanyuan kamu pagmipausa kamu sa Diyus." 21 Unman nakalakaw sa kasalanan si Kiristu. Dapat ay dahilan ngani sa kanta siya ngap nibilang sa makasalanan hampay nu kita magpakiusa sa kanya, mangyari yi ngap sa kanta ti katadlungan Diyus.
1 Kami manga kaawat Diyus sa buruwatun. Nakan pagpakapaanyuan nimi kamu danga pagpasipalahi ti manga kaayadan kay ipinakaun Diyus sa kanyu. 2 Dahil kay pagsabihun magkun, "Kang nadnugan kamu sa katpung kang Ipinakakit kang kaayadan sa kanyu. Inawatan niku kamu pagka udas kaliktasan." Pagpatingi kamu, taynguna yi ti udas hampay matanggap niyu ti kaayadan ginan sa Diyus. Malu taynguna yi ngani ti udas kaliktasan. 3 Kanmi iniwasan ti bumwat karadat-an una sa kantapu, hampay balaw mapuyaan kanmi pagsirbi. 4 Bagkus ngap pag-&ipakilala nimi sa tanan nimi buruwatun kuntay kami kay suruguun Diyus, sa kanmi pag-agwanta sa masyadu pag kakurian, sa malisud pag kahamtangan hanggan sa manga kagipitan. 5 Ginaruti kami ag pinirisu, kanmi yi nalakawan ti kaguluhan, ti masyadu pag manga tarabahu, ti unman magkaturug usa ka yabi hanggan ti unman magkaun una pira ka sirang. 6 Kanmi diman ipinakilala kuntay kami kay suruguun Diyus sa mayad nimi pag ugali, sa kadunungan, sa maalumanay, sa magpasunaid hanggan sa kapangyarihan Ispiritu Banal, sa may lubus pagmahal, 7 sa magbagaw katutuuhanan hanggan sa kapangyarihan Diyus. Kanmi matadlung pag ugali buhi imaw kanmi armas panlaban hanggan panangga. 8 Nalakawan yi waydi nimi ti magbaya manga tawu sa kanmi ag ti magkadaut sa kanmi, ti daut pag libak ag ti mayad pag libak. Kami kanda pagsabihun magdaya dapat ngap katutuuhanan kanmi pagbuwatun. 9 Kami kanda pagsabihun balaw nida kilala dapat kilala ngap nida kami. Nu kas-a ga mamatay yi lang kami dapat mabisug di ay ungud. Una kami kanda pagpakaparusahan, unman waydi kami magkamatay. 10 Madi maruku maruku dapat pirmi diman may kabayaan, ga anyu pugri dapat mayamu ngap tawu kanmi pagpayamanun. Ga anyu ud may kaasanan dapat sa kanmi ngap ti tanan bagay. 11 Talaghutan gid kanmi pagbagawun sa kanyu duy, sa manga taga Kurintu, sa kaluagan nimi tagipusuun. 12 Lubus gid kanmi pagmahalun kamu, dapat kamu ngap magpanab-ang sa kanmi. 13 Aku magbagaw sa kanyu parihu sa kang manga anak, nakan duy bukasi yi maan waydi kanyu naisipan tag sa kanmi. 14 Danga kamu magpausa sa manga balaw magpasakup sa kan Hisus. Mahimu aw lugud miusa ti katadlungan tag sa kalikuan? Mahimu aw lugud miusa ti karayawan tag sa kaduluman? 15 Mahimu aw magkabuu sida ni Kiristu ni Satanas? Ti manga napasakup sa kan Hisus balaw magkarausa sa manga unman napasakup sa kanya. 16 Una ti balay Diyus balaw diman miusa sa diyusdiyusan. Kita ti balay Diyus buhi. Siya diman waydi ti may sabi magkun, "Manahanan aku, pumurmar yi gid sa kanda, bag-u aku yi gid kanda Diyus. Sida kang yi gid nasyun. 17 Nakan ngani pagpakarayu kamu ginan sa kanda, Pagpablag kamu ginan sa kanda, magkun ti Panginuun, danga kamu maggaraw sa una hintay pag mayagting hampay kamu kang tanggapun. 18 Magkun ti Panginuun Makamaskihan, Aku yi gid ti kanyu Ama, kamu kang yi waydi manga anak lalaki, manga anak babayi."
1 Mahal niku pag manga patar-ari, ipinangaku sa kanta inda pag manga kaayadan, nakan paglumpiyuha gid kanta sadili sa tanan kayagtingan nita bilug hanggan naisipan. Pag-ungud kita kanta ugali maggalang sa Diyus, ilubus yi nita ipasakup kanta sadili sa kanya. 2 Pakan-i niyu kami rugar una lang diit sa kanyu tagipusuun. Una kaybi ginan unman nimi inunuunu, unman diman pinintasan, unman waydi hanggan dinaya nimi una si unu sa kanyu. 3 Kang asinurat inda sa kanyu balaw kuntay kamu kang pagdayuun. Ga kang diman sinabi yi sa kanyu, kamu kang gid lubus pagmahalun, magkausa kita sa kabuhian hanggan sa kamatayan. 4 Lubus gid makatiwalaan niku kamu. Daan diman kamu kang pagpahalgaan. Madi mayamu kanmi kakurian, lubus ngap aku sa kasulungan, maglapwas sa kang tagipusuun kang kabayaan. 5 Kanmi sa Masidunya kami udyi may pahari pasay kakurian kanmi nalakawan, may kalaban una naan ginan baliwa, pagkulbaan waya kanmi nalub-anan. 6 Dapat ti manga maruku balaw pagpabay-anan Diyus. Sinaya niya aku pagka rinmas-ug si Titu. 7 Balaw kay nagras-ug lang ni Titu ti nagpasulung sa kangku, nu unman kanyu diman hanggan binwat mayad sa kanya. Ibinarita niya kanyu magpatigagad sa kangku, kanyu karukuan hanggan kanyu kasipagan, nakan aku lubus nagbaya. 8 Madi nagpakaun karukuan kang surat sa kanyu, unman niku ipagsisi kang isinurat ati. Kabag-u sinisi mana niku dahil alam niku nagpakaun karukuan kang surat sa kanyu, una balaw dugay pag karukuan. 9 Dapat una katida magbaya di aku, dahil ati pag karukuan imaw ti nagbutung sa kanyu hampay iampu patlikudan niyu kanyu kasalanan. Ti katunda pag karukuan ginan ngap sa Diyus, nakan balaw ikinadaut niyu kami. 10 Ginan ngani sa Diyus tunda pag karukuan, imaw tigpaisip sa kanyu hampay iampu niyu kanyu kasalanan. Siya diman tigpabag-u kanyu ugali sa ikaribri niyu. Dapat ti pakaun karukuan kalibutan tabug ngap sa kamatayan. 11 Isipa niyu kanyu buhi nu hintay ti nangyari sa kanyu dahil sa kanyu karukuan ginan sa Diyus. Nanipag yi gid ungud kamu hampay makilala kuntay kamu unman may kasalanan sa siyun pag manga nangyari, magkaaburidu kamu sa kanyu sadili bilug, dinurnan kamu dala, magpatigagad yi sa kang pagras-ug, pagpakibudlayan niyu sa gustu lang niyu maparusahan ti nagkasala. Ipinakakit niyu lubus kuntay unman may labut kamu sa siyun pag manga nangyari. 12 Alam di Diyus kang nagsurat sa kanyu balaw dahil sa may nagkasala, balaw diman dahil sa may binwatan kasalanan, nu unman hampay pulawun kanyu nalub-anan para sa kanmi. 13 Nakan ti kanyu binwat nagpakaun daka pag kasulungan sa kanmi. Lalu gid ngapu nagbaya kami dahil nagmasulung si Titu dahil kanyu tinanggap ag inawatan siya. 14 Itinultul niku sa kan Titu kuntay kamu mayad pag manga patar-ari. Balaw ngap pudil kang sinabi sa kanya. Ga tutuu gid tanan kanmi pagsabihun sa kanyu, katunda diman waydi pinatutuuhanan ni Titu kuntay balaw pudil kanmi pagdayaw tungkul sa kanyu tabug. 15 Lalu yi ngap kamu kay pagmahalun, nu pag-alalahanun niya kamu tanan manga masurundun. Balaw yi gid niya magkalimtan nu kabitay kanyu nagtanggap sa kanya may dala. 16 Aku magbaya dahil lubus makatiwalaan niku kamu.
1 Gustu nimi ibarita sa kanyu, manga patar-ari, kay pakaun Diyus mayad nabubut-un sa manga iglisya sa Masidunya. 2 Nakalakaw sida masyadu pag kakurian, imaw ti mahigpit pag subuk sa kanda. Madi sida masyadu pugri, sa daka nida pag kabayaan bukas kanda nalub-anan sa kanda magpakaun. 3 Buluntadan gid sa kanda naisipan magpakaun, balaw lang tugka sa kanda kakayahan, nu unman subra waya ngapu. 4 Alam di niku, dahil mahigpit kanda nagdangup sa kanmi kuntay pakan-i kunu sida rugar makaawat sa manga patar-ari sa Hudiya. 5 Balaw lang ga kang inisip kanda binwat. Itinigana nida kanda sadili sa Panginuun dapu bag-u hanggan sa kanmi angay sa kagustuhan Diyus. 6 Nakan ngani pinakihampangan niku si Titu, dahil siya ngani ti nag-umpisa inda, hampay kamu maawatan niya hanggan sa udwaya matapus kanyu mayad pag buruwatun inda. 7 Nibantug yi kanyu pagsarig, kanyu pagpanudlu, kanyu kadunungan, kanyu kasipagan hanggan kanyu pagmahal sa kanmi. Pangungud gid kamu balaw lang ga manga iba sa kanyu mayad pag buruwatun inda. 8 Balaw kuntay ga pagsuguun niku kamu. Kang lang pagsabihun sa kanyu ti pagbuwatun awat manga iba hampay masulayan nu naan tugka kanyu pagmahal. 9 Alam niyu nu kabitay kadaka kay pagmahal nita Panginuun Hisu-Kiristu. Madi mayaman nagpakipugri siya hampay yumaman kamu ginan sa kay kapugrihan. 10 Inda kang paanyu tungkul sa kanyu awat, pararguhan di niyu ti buruwatun kanyu inumpisahan kaaldaw sa usa. Kamu ti nakauna nakaumpisa sa manga iba, balaw lang sa kanyu buwat nu unman hanggan sa kanyu gayak. 11 Nakan ngani pararguhan niyu inda kanyu Ipinakakit kasipagan sa kabag-u danga pag-&apasi hanggan sa unman matapus. Pagpakaun kamu tugka sa makaya niyu. 12 Dahil nu buluntad naisipan tagipusuun kanyu magpakaun, tanggapun Diyus kanyu nakaya ipinakaun. Balaw siya maghingbut nu imaw lang tugka kanyu kaya ipakaun. 13 Balaw kuntay kamu sa pagpasagsaganan ag ti iba unman paman mag-awat. 14 Abunda waydi kamu kainda kanyu kasiyunan, nakan kailangan mangawat kamu sa manga may kakurangan. Nu kamu waydi ti maiwdan ag sida maan ti abunda, sida maan ti mangawat sa kanyu. Nu katunda parihu kamu mag-&arawatan sa usa kag sa usa. 15 Bag-u matupad sa kanyu ti pagsabihun sa Banal Kasuratan magkun, "Ti may nakitan mayamu, balaw diman nagsubra. Ti may nakitan pira pira unman waydi kinurang." 16 Magpasalamat aku sa Diyus, dahil unman maghinayang si Titu kay budlay sa kanyu, parihu diman ga kang magpangabudlay sa kanyu. 17 Balaw gid pinabunglan niya kang nagpakihampang sa kanya bagkus ngap gustu diman niya mangawat sa kanyu, nakan daan handa siya umasan sa kanyu. 18 Pinakuyug nimi sa kanya ti patar-ari daan kilala sa tanan iglisya dahil sa kay magpanudlu Mayad pag Barita. 19 Balaw lang tunda. Siya diman ti pinili manga iglisya hampay kaibahan nimi sa kanmi maglakaw ag hampay awatan niya kami sa pag-asikasu sa inda pag kuwarta ipinakaun manga iglisya. Ti kainda pag sirbi sa ikadayaw sa Panginuun. Siti pag maalaman ti daka pag kagustuhan nimi mangawat sa manga patar-ari. 20 Mag-aman kami hampay unman may masabi una si unu tungkul sa kanmi mag-asikasu sa daka pag abuluy inda. 21 Pag-isipan nimi hampay mabuwat inda sa ikamayad sa kay magbantay Panginuun hanggan sa paghilingan manga tawu. 22 Nakan ngani suguun nimi kaibahan nida kanta usa ka patar-&ari pirmi nasulayan nimi kay ugali ag nakitan nimi kay kasipagan sa buruwatun. Maslalu waya siya masipag taynguna sa mag-awat dahil daka kay magsarig sa kanyu. 23 Si Titu kaibahan yi gid niku makaawat sa kang buruwatun sa kanyu. Nu inda bay pag manga patar-ari kaibahan ni Titu sinugu manga iglisya, matinupadun pag manga suruguun sida sa ikadayaw manga tawu sa kan Kiristu. 24 Nakan ngani ipakakit niyu sa inda pag manga patar-ari kanyu lubus pagmahal hampay makitan manga iglisya balaw kami nagsalan sa kanmi magdayaw tungkul sa kanyu.
1 Udyi kailangan aku sumurat waya sa kanyu tungkul sa pag-awat sa manga patar-ari sa iglisya. 2 Alam niku alistu gid kamu mangawat, kang ngap pag-itultul yi kanyu mayad pag ugali sa manga taga Masidunya. Kang sabi sa kanda kamu pag manga taga Akaya nakahanda yi kanyu abuluy ginan waya sa nakalawuy pag timpu. Mayamu pag manga patar-ari ti napulaw kanda naisipan dahil sa kanyu kasipagan. 3 Nakan ipinaasan niku dapu inda pag manga patar-ari hampay balaw mabuyu kanmi pagdayaw tungkul sa kanyu, ag hampay mitigana yi kanyu iawat parihu sa kang sinabi tungkul sa kanyu. 4 Barang kami mangay-a nu mabuyu, balaw lang kami ti mangay-a hanggan kamu nu may kumuyug sa kangku manga taga Masidunya bag-u nu makitan nida unman diman maaw kamu handa. 5 Nakan ngani pinakihampangan nimi ti manga patar-ari asan tabug sa kanyu hampay maalistu yi niyu kanyu itinaratu pangawat. Nu katunda handa yi kanyu iawat nu Rumas-ug aku asan sa kanyu bag-u makitan kanyu pakaun buluntadan, balaw sa pilitan. 6 Isipa yi lang niyu, tigpamgas pira pira, diit waydi kay tubas. Nu bay aduk kay pamgas, aduk waydi kay tubas. 7 Ti kada usa kailangan magpakaun angay sa kay sadili kagustuhan naisipan, sa maluag naisipan balaw sa kapilitan, dahil pagbayaun Diyus nu buluntad pag pakaun. 8 Madunung ti Diyus magpakaun sa kanyu abunda sa tanan bagay subra waya sa kanyu kailangan hampay may magamit kamu sa kanyu buruwatun kaayadan. 9 Parihu sa pagsabihun sa Banal Kasuratan, magkun, "Alinantag niya kay kaayadan. Kay ipinakaun sa manga pugri kay pangaawa unman may katapusan." 10 Ti Diyus tigpakaun binhi hampay ipamgas hanggan karan-&unun hampay may makaun, siya ti pumakaun binhi sa kanyu, siya diman ti pumadaka hampay mamurak abunda kanyu mayad buut naisipan. 11 Kay pakan-an kamu abunda sa tanan bagay hampay lalu kamu makaawat sa mayamu. Nu katunda yumamu ti manga magpasalamat sa Diyus dahil sa kanyu abuluy kanmi darahun tabug sa kanda. 12 Kanyu awat inda sa manga patar-ari balaw lang sa kuntay kang-ud sa kanda pangailangan nu unman siyun ngap ginan udyi umapas kanda magpasalamat sa Diyus. 13 Nu unman kamu may kabuyatan sa kanyu magpakaun sa kanda hanggan sa tanan tawu imaw yi ti puruyba sa kanda kuntay matinupadun kamu sa Mayad pag Barita ni Kiristu. Nakan siyun ginan dumayaw sida sa Diyus. 14 Nakan ngani sa lubus nida pagmahal sa kanyu, kamu kanda idarangin dahil sa daka gid pag kaayadan kay ipinakaun Diyus sa kanyu. 15 Salamat sa Diyus dahil sa kay pakaun unman may makatimbang.
1 Aku inda si Pablu, ti sabi iba kuntay maparakumbabaun nu kaatubang niyu, dapat maisug nu sa arayu. Magpakihampang aku sa kanyu angay sa mapagpakumbabaun naisipan hanggan kaayadan ni Kiristu. 2 Danga mana duy pagpilita niyu aku magbagaw maisug parihu sa kang mabagaw maisug sa manga tawu magsabi kuntay kanmi mag-ugali angay lang sa kanmi sadili kagustuhan. 3 Madi kanmi mag-ugali parihu diman sa manga iba tawu, unman kami maglaban angay sa buruwatun manga taga kalibutan. 4 Kanmi armas balaw ginan sa kalibutan, bagkus ngap may kapangyarihan ginan sa Diyus hampay makapawasak sa manga ga alad batu. 5 Dahil kanmi pagdautun ti salan pag manga baragawun, pagbinsilun nimi ti tanan magpalabaw laban sa kadunungan Diyus. Pagbihagun nimi ti kada pag-iisip hampay pasakup yi sa kan Kiristu. 6 Nu kamu lubus napasakup yi sa kan Kiristu, alistu kami magparusa sa kada buwat nu laban sa Diyus. 7 Kanyu pagbantayan lang ti manga bagay mag-akitan sa mata. Nu may tawu magpaniwala kuntay siya sa kan Kiristu, isipa niya kami hanggan parihu ga kanya, sa kan Kiristu diman. 8 Padi aku mangay-a una aku magpadayawdayaw sa kanmi karampatan, dahil ipinakaun waydi Diyus sa kanmi inda pag karampatan balaw sa ikadamhak niyu sa kamatayan nu unman sa ikarig-un ngap niyu. 9 Danga pag-isipa niyu inda kang surat kuntay padala lang sa kanyu. 10 Magkun ti iba, "Kay surat lang ti mahigpit. Nu sa atubangan padi ay madala pag tawu, una sa kay pinamagawan balaw may mayad." 11 Kailangan maalaman manga tawu ti manga magsabi katunda, nu hintay kanmi pagsabihun sa surat taynguna kami sa arayu, imaw diman ti kanmi buwatun aban nu kami sa kanyu karaw-an. 12 Unman pag-ipanghas nimi ipaparihu kanmi sadili sa manga magpalabawlabaw. Patalangtalang kanda naisipan. Sulu inisip nida nu hintay ti mayad sa kanda sadili bag-u ipaparihu nida kanda sadili sa kanda inisip pag turunu kaayadan. 13 Dapat kami balaw lumakdang sa katugkaan ipinakaun Diyus sa kanmi. Inintirga niya sa kanmi kay buruwatun hanggan ti panudlu nimi sa kanyu. 14 Balaw kami maglakdang dahil kamu daan nasakup nimi katugkaan ati katpung sa kanmi nag-umpisa nag-asan nagdara Mayad pag Barita tungkul sa kan Kiristu. 15 Balaw kami magpadayaw subra, unman diman kami magpadayaw sa manga iba tawu pag kinabudlayan. Magsarig kami rumig-un waya kanyu pagsarig agud dumaka gid waydi kanmi buruwatun asan sa kanyu dapat balaw kami lumakdang sa kanmi katugkaan. 16 Bag-u mahimu kanmi ipanudlu ti Mayad pag Barita sa kanyu maan luwas pag manga nasyun. Nu katunda unman nimi ipadayaw ti binwat yi manga iba. 17 Parihu sa pagsabihun sa Banal Kasuratan magkun, "Una hintay pag tawu nu magkaibug magpadayaw, pagti Panginuun gid kay ipadayaw." 18 Ti mahalaga lang nu ti tawu pagbayaun Diyus. Ti magpadayaw sa kay sadili unman may kabuluhan.
1 Pagtiis dapu kamu una aku ga buang buang. Alam niku kamu matiniisun ngani. 2 Aku hanggan ga sa Diyus kang mag-&irang sa kanyu tabug sa kasalanan. Parihu kamu ga usa ka daraga mabuut, kang itinaratu sa usa ka lalaki, sa kan Kiristu ngani hampay siya ga kanyu asawa. 3 Dapat naalaala niku barang maakit kanyu naisipan ga kan Iba nadaya waydi ulay, barang kamu Rumamig sa marig-un niyu pagmahal sa kan Kiristu. 4 Dahil ungud gid matiniisun kamu sa kanyu magtanggap sa una hintay pag tawu nu magras-ug asan magpanudlu tuhay pag Hisus sa kanmi itinudlu sa kanyu ag pagtanggapun diman waydi niyu ti tuhay pag ispiritu hanggan tuhay pag adal sa kanmi itinudlu sa kanyu. 5 Dapat kang isip aku balaw lang ga tunda kanyu pagkumnun mayad pag manga Apustul. 6 Mahimu aku balaw marinu sa pinamagawan, dapat balaw ungud kurang sa kadunungan. Pirmi yi waydi ipinakilala nimi inda sa kanyu sa tanan nimi buruwatun. 7 Kang nanudlu sa kanyu balaw hinagadan niku kamu una hintay pag kabaydanan sa Mayad pag Barita Diyus. Aku nagpakumbaba hampay kamu maan ti pahalgaan. Masabi aw lugud kuntay inda kasalanan niku? 8 Iba pag iglisya ti nagpakaun kang manga pangailangan katpung sa kang magsirbi sa kanyu. Bilang ga kang inagawan sida, basta maawatan lang niku kamu. 9 Pagka aku naiwdan kang asan, unman diman aku nagpabyat sa una hintay sa kanyu, dahil rinmas-ug ti manga patar-ari ginan sa Masidunya kanda dinaran-an aku kang-ud pag awat sa tanan niku pangailangan. Ginan waya sa kabag-u inamanan niku sa danga mabyatan kamu sa una hintay pag bagay. Ag inda pag ugali niku balaw umanun niku hanggan waya aban. 10 Dahil ti katutuuhanan ni Kiristu nangulian sa kangku nakan aku dayu umapas kang magpadayawdayaw sa inda pag ugali niku una naan katpung aku sa daga Akaya. 11 Kang yi waydi ugali balaw parahagad. Nakan aw dahil unman kamu kang pagmahalun? Alam di Diyus pagmahalun gid ngap niku kamu. 12 Dapat iparargu di gid niku kang pagbuwatun inda hampay balaw masabi manga magpadayaw sa kanda buruwatun kuntay kanda pagsirbi parihu diman sa kanmi pagbuwatun. 13 Bukun sida tutuu pag manga Apustul. Magdaya lang sida. Magpanaguabi sida kuntay manga Apustul ni Kiristu. 14 Unman waydi kailangan paglingutan nita tunda. Dahil una si Satanas madunung magpanaguabi kuntay siya anghil karayawan. 15 Nakan ngani balaw paglingutan nu kay manga suruguun ni Satanas magpanaguabi waydi kuntay sida manga manugsirbi sa katadlungan. Kanda patabgan aban angay lang sa kanda pagbuwatun. 16 Kang pag-ulitun waya, danga mag-isip una si unu kuntay aku patalangtalang, dapat nu katida kanyu isip, pagpasnui yi lang niyu aku hampay aku pumadayawdayaw waydi usa ka ngalay ngalay, ga usa ka tawu patalangtalang. 17 Ti kang pagsabihun magpadayawdayaw, balaw duy ginan sa Panginuun. Unman ngap may kabuluhan ti ipagyabangyabang usa ka tawu patalangtalang. 18 Mayamu tawu ti magpadayawdayaw sa manga bagay sa babaw daga. Hayga aku dayu hanggan pumadayawdayaw diman. 19 Pagbayaun pag-agwantahun niyu ti manga patalangtalang dahil kamu kabay mapininsarun. 20 Pag-agwantahun di niyu una kamu buwatun suruguun, una kamu pagdayaun, una kamu pagsakupun nida, una kamu pagpalabilabihan nida, una pagsampalun waya. 21 Una waya aku mangay-a, mag-amin yi lang aku dayu buwatun nimi ti katida sa kanyu. Dapat nu may tawu magpadayawdayaw, aku pumadayawdayaw waydi. Kang bagaw inda ga talangtalang. 22 Manga Hibriyu aw lugud sida? Aku diman Hibriyu. Manga Israilita aw sida? Aku imaw diman. Linahi aw sida ni Abraham? Aku imaw diman. 23 Sida aw manga suruguun ni Kiristu? Magbagaw aku ga usa ka paungpaung, dapat aku lalu man mayad pag suruguun ni Kiristu balaw lang ga kanda. Subra man sa kanda kang nagbudlay, balaw lang pira ka pag-ulit aku napirisu, lagat lagat paglipgutun, pirmi arani yi sa kamatayan. 24 Kalima yi ginan kang nalakawan manga Hudiyu nagbakul pudu tigtatlumpulu may siyam ka paghampak. 25 Tulu waydi ka pag-ulit kang nalakawan linipgut manga taga Ruma, binatu waya aku kas-a. Katlu yi ginan nakalakaw aku nagkaratulag kang sinakyan pag bangka. Ag kas-a waydi usa ka yabi usa ka sirang aku mayatawyatawan lang sa dagat. 26 Sa tanan niku lakaw, nalabanan di niku ti tuhay tuhay pag manga madala, ti manga sapa, ti manga tulisan, ti kang manga kaparihu niku Hudiyu, una ti manga balaw Hudiyu, manga madala sa manga banwa, sa pangawakawaan, sa dagat, sa manga tawu magpabalhinguun kuntay patar-ari. 27 May nalakawan diman aku subra gid pag kakurian hanggan budlay, pirmi unman makaturug, pirmi masyadu pag nalun-usan ag nauwawan. Nakasamit diman sa maramig dapat unman may ikulimpay. 28 Bukud waya sa siti, sirang sirang pagdumdumun niku ti kaaburiduhan dahil sa tanan manga iglisya. 29 Nu may linmumuy sa kay pagsunud, aku magpakidamay sa kay kalumuyan. Nu may nalagpak sa kasalanan, subra yi kang karukuan sa kang tagipusuun. 30 Nu kailangan aku mamadayawdayaw, ti kang ipadayaw-&dayaw kang gid kalumuyan. 31 Bukun gid ungud aku magpudil. Tunda ungud alam di Diyus, imaw kay Ama Panginuun Hisus, dayawun kay ngaran hanggan aban. 32 Pagka ati aku sa Damasku ti manga puwirtahan banwa pinabantayan gubirnadur kay sakup ni Hari Aritas, hampay aku madakup nida. 33 Dapat aku isinukad sa balulang bag-u atinuntun sa gaha atag sa luwas alad batu nakan aku nakaribri di.
1 Mahimu diman aku magpadayaw-dayaw madi unman may pakinabang siti. Taynguna aku may itultul maan tungkul sa manga Ipinakakit Panginuun hanggan tungkul sa manga ipinakilala niya. 2 May kilala aku usa ka tawu napasakup sa kan Kiristu. Dinara siya atabug sa ikatlu pag langit, sampulu yi may upat ka timpu ti nakalawuy taynguna tugka. Unman lang niku mapihu nu ngatay Ipinakakit Panginuun tunda aw ngatay tutuu tunda nangyari sa kanya. Diyus lang ti makaalam. 3 Kang ulitun maan magkun, dinara siya atabug sa ikatlu pag langit. Unman niku mapihu nu ngatay Ipinakakit Panginuun tunda, aw ngatay tutuu nangyari sa kanya, unman niku alam. Diyus lang ti makaalam. 4 Pagka ati may nadnugan siya manga bagaw dayi mahuwad mabagaw una waya si unu, unman waydi may karampatan tumultul una si unu pag tawu. 5 Pag-ipadayaw niku tunda pag tawu dapat dayu pag-ipadayaw niku kang sadili, nu ud ngap kang kalumuyan ti pag-ipadayaw di niku. 6 Nu abi aku magpadayaw unman waydi aku masabi manga iba kuntay talangtalang, dahil tutuu kang pagsabihun. Dapat pagpigilan niku kang magpadayaw dahil unman mayad sa kangku nu ti pag-iisip una hintay pag tawu tungkul sa kangku mataas man sa kay nakitan ag nadnugan sa kangku. 7 Dapat hampay balaw niku ipayabangyabang ti masyadu gid pag manga makadululaw kay ipinakilala Diyus sa kangku, nakan pinakan-an aku usa ka pinagkadugi sa kang bilug, usa ka sugu ni Satanas hampay aku labanan agud unman aku magpalabilabi. 8 Tulu gid ka pag-ulit kang idinarangin sa Panginuun hampay bul-un niya tunda ginan sa kangku. 9 Dapat kainda kay sagut niya sa kangku magkun, "Kang-ud yi kawu nu kang pabisugun. Lalu kang mailubus kang kapangyarihan nu kawu malumuy." Nakan ngani lubus kang pagbayaun ag pagdayawun kang kalumuyan hampay udyi gid mab-ul sa kangku kay kamaskihan ni Kiristu. 10 Nakan ngani magbaya diman aku una aku malumuy, una apiapihun, una pakurianan, una unuunuhun, una lang hintay pag aragwantahun dahil ngani sa kan Kiristu. Dahil nu aku malumuy, ati katpung ngap aku may kabisugan. 11 Aku inda ga patalangtalang yi, dapat kamu ti nagpilit sa kangku hampay katunda. Kamu mana ti dapat dumayaw sa kangku. Bilang madi ga ud may gana aku pag tawu dapat unman kailangan ipalabi niyu aku sa kanyu pagkumnun mayad pag manga Apustul asan. 12 Unman diman aku tinmugak nagbuwat puruyba sa kanyu kuntay aku tutuu Apustul. Ipinakakit niku ti manga makamaskihan hanggan makadululaw pag manga tanda. 13 Sa kabitay lugud pag manga bagay masabi niyu kuntay ipinalabi niku kamu sa manga iba iglisya? Unman gid ngani, nu ud inda lang ti masabi niyu aku unman may hinagad sa kanyu una di. Patawada yi lang niyu nu aku nagkurang tungkul siti. 14 Taynguna alistu yi aku sa kay pakatlu pagbalik asan tag sa kanyu, dapat unman kamu may ikabuyat sa kanyu naisipan sa kangku. Unman aku may kailangan sa kanyu kasiyunan, kamu ngap mana ti kang pagkailanganun. Ti manga gurang kailangan maghanda para sa kay manga anak, balaw ay manga anak tighanda para sa kay gurang. 15 Makabaya gid aku nu migastus niku ti tanan niku kasiyunan, una ipakaun waya niku kang buhi sa kamatayan hampay sa ikaayad niyu. Diit lang aw lugud kanyu balus pagmahal sa kang daka pagmahal sa kanyu? 16 Alam niyu unman aku nakapabuyat sa kada usa sa kanyu. Dapat magkun ti manga iba aku magpalingu, pagdayaun lang kunu niku kamu. 17 Hayga? Magsarig aw aku lugud sa kanyu kamayadan dahil may sinugu aku manga patar-ari asan tabug sa kanyu? 18 Kang hinampang si Titu hampay umasan sa kanyu, kang gid ipinaiba sa kanya ti usa ka patar-ari. Nagsarig lang aw lugud si Titu sa kanyu? Unman aw lugud kanmi ugali angay sa usa lang ka Ispiritu, unman aw usa lang kanmi buruwatun? 19 Kanyu aw lugud isip kang lang pag-iiwas kang sadili bilug? Bukun duy. Magbagaw aku sa atubangan Diyus angay sa kanta pakiusa sa kan Kiristu. Kamu kang gid pagmahalun. Ti tanan kang pagbuwatun duy sa ikarig-un di niyu pagsarig. 20 Magkadala aku barang nu asan tabug aku sa kanyu, may makitan aku manga bagay balaw angay sa kang gustu. Una kamu barang may makitan waydi sa kangku balaw angay sa kanyu pag gustu. Barang maras-ugan niku kamu mag-arawayan, maghirira-&kan, magpuruyaan, maglilibakan, magpalalabilabihan, ag magka-&laguluhan. 21 Magkadala aku nu asan tabug aku maan, barang pakay-ahun aku niku Diyus sa kanyu atubangan. Nu katunda kang gid ikalumi ti kayagtingan, ti panguragin hanggan kahalayan udwaya ipinatawad unman diman waya iinampu.
1 Inda aban kang pakatlu pag sabang asan tag sa kanyu. Isinurat sa Banal Kasuratan magkun, "Una si unu ti may isumbung kailangan pagmay magpatutuu duwa una tulu ka kastigus." 2 Taynguna aku atay di waya sa arayu, kang pag-&ulitun waya gid maan sa manga nagkasala hanggan sa manga iba waya ti kang sinabi kaybi sa kang ikadwa pag sabang asan magkun, balaw yi may pasinsiya aban nu aku Rumas-ug asan sa kanyu. 3 Inda kang gid buwatun hampay may puruyba sa kanyu kuntay aku kay pinagkabibig ni Kiristu. Balaw diman malumuy siya sa kay buwat tungkul sa kanyu. Bagkus ngap siya makamaskihan sa kanyu karaw-an. 4 Malumuy siya sa kay nipaku sa kurus, dapat ti kamaskihan Diyus ti nagbuhi maan sa kanya. Dahil sa kanmi magpakiusa sa kan Kiristu kami hanggan malumuy waydi, dapat ti kamaskihan Diyus magpakaun sa kanmi kay buhi ni Kiristu hampay matupad nimi kanmi buruwatun tungkul sa kanyu. 5 Pagpihua gid niyu mayad mayad sa kanyu sarig nu ngatay kanyu buhi angay sa kanyu sarig. Usisaa niyu kanyu sadili tagipusuun. Unman aw lugud niyu nasalman sa kanyu sadili ngani si Kiristu Hisus nangulian sa kanyu? Purya lang nu kamu balaw mapatutuuhanan kuntay napasakup sa kanya. 6 Makitan diman mana niyu kami mapatutuuhanan ngap kuntay napasakup sa kanya. 7 Kanmi diman ipagdarangin kamu sa Diyus hampay danga gid mana kamu magbuwat daut, balaw diman hampay makitan manga iba kami ti mayad, bagkus ngap hampay kamu bumuwat yi gid sa mayad una abi nangus nakitan kami ti ga unman may pulus. 8 Dahil balaw mahimu labanan nimi ti katutuuhanan. Unman kami may mabuwat nu unman umunyun yi lang sa katutuuhanan. 9 Magbaya diman kami una malumuy kami, nu lang kamu rumig-un. Nakan ngani kanmi pag-idarangin kamu hampay kamu kang-ud yi udyi may kakurangan sa atubangan Panginuun. 10 Kang pag-isurat inda pag manga bagay kang udwaya asan sa kanyu hampay nu asan yi aku aban udyi kailangan ipakakit kang kaisugan sa kang magtupad sa karampatan kay ipinakaun Panginuun sa kangku. Inda pag karampatan ti ipinakaun sa kangku sa ikaayad niyu, bukun gid duy sa ikadamhak. 11 Sitay lang tugka duy manga patar-ari kang surat sa kanyu. Aku magpaalam yi sa kanyu. Pagmaalwasi gid kamu hampay kang-ud yi kamu sa atubangan Panginuun. Pagpaniwala kamu sa kang manga paanyu. Pagkarausa yi kamu. Pagmahusay yi kanyu manga ugali. Nu katunda kamu, sa kanyu yi gid ti Diyus, ti gimpuunan pagmahal hanggan kahusayan. 12 Pagparaingan-an paggalalangan kamu ti manga magtar-arian sa kan Kiristu. Ti tanan manga patar-ari sa iglisya magpaingana nu kabitay kamu asan. 13 Pagsa kanyu tanan ti papalad Panginuun Hisu-Kiristu, kay pagmahal Diyus hanggan kay pakiusa Ispiritu Banal.
1 Inda ti may surat si Pablu, ti pinili hampay Apustul. Bukun tawu ti nagpili, unman diman ginan sa tawu kagustuhan. Aku nag-Apustul ginan ngap sa kagustuhan ni Hisu-Kiristu hanggan ginan sa Diyus Ama. Imaw diman ti nagbuhi uman sa kan Hisus. 2 Pinagkausahan nimi tanan manga patar-ari kaibahan niku, pumadara aku surat tabug sa manga iglisya sa taga Galasya. 3 Pagsa kanyu kay papalad hanggan kahusayan ginan sa Diyus Ama hanggan ginan sa Panginuun Hisu-Kiristu. 4 Angay sa kagustuhan nita Diyus Ama ipinakaun ni Hisu-Kiristu kay buhi dahil sa kanta manga kasalanan hampay kay bawiun kita ginan sa inda pag kalibutan hinarian kadautan. 5 Dayawun ti Diyus hanggan waya aban. Amin. 6 Naglingut gid aku nu hayga madali lang tinalikdan niyu ti Diyus, ti nagbutung sa kanyu dahil sa kay pangaawa ni Hisu-Kiristu. Nagpatalad kamu sa tuhay maan pag mayad pag barita. 7 Nu sa ungud udyi may iba waya mayad pag barita. Nakan lang gid may manga maggulu sa kanyu. Kanda gustu umanun ti Mayad pag Barita tungkul sa kan Kiristu. 8 Dapat ay una kami una ti usa ka anghil ginan sa langit, nu tumudlu sa kanyu tuhay pag katutuuhanan bukun ga kanmi pag itinudlu Mayad pag Barita, saadan gid siya. 9 Sinabi yi nimi, kas-a waya sabihun niku sa kanyu, nu may tumudlu sa kanyu tuhay pag katutuuhanan, bukun ga kanyu tinanggap pag Mayad pag Barita, saadan siya. 10 Taynguna nangahulugan aw kang hingbut hampay dayawun tawu? Bukun ay duy. Kang hingbut ngap hampay dayawun aku Diyus. Nakan aw lugud aku masipag agud pagbayaun tawu? Nu tunda lang kang gustu, balaw mahimu aku suruguun ni Kiristu. 11 Kang gustu maalaman niyu, manga patar-ari, balaw pinathaw lang tawu ti Mayad pag Barita kang itinudlu sa kanyu. 12 Balaw nakan niku tinanggap ginan sa tawu, unman diman tawu ti nagtudlu sa kangku. Si Hisu-Kiristu yi ngapu ti nagpakilala inda sa kangku. 13 Naalaman yi waydi niyu kang manga ugali sa kang magsunud waya sa surundanun manga Hudiyu. Udyi may awa sa kang nangunuunu sa iglisya Diyus. Kang gustu mana papasun gid sida. 14 Masyadu gid masipag aku sa kang surundanun ati katpung balaw lang ga kanda sipag tanan manga kaidad niku pag manga Hudiyu. Lubus matinupadun aku sa bilin itinayak niku manga ginurang. 15 Dapat dahil sa kay pangaawa Diyus nakan daan yi pinili niya aku bag-u iinanak. Kay tinawag niya aku hampay kay yi suruguun. 16 Angay sa kay ginayak, ipinakilala niya sa kangku kay Anak hampay ti Mayad pag Barita tungkul sa kanya kang itudlu sa manga balaw Hudiyu. Pagka naalaman niku kay kagustuhan Diyus, unman gid aku nagpaingana waya una sa kantapu pag tawu. 17 Unman diman waydi nag-ati aku sa Hirusalim hampay mihampang sa manga Apustul sa manga un-an tinawag sa kangku. Bagkus ngap nag-atag aku sa Arabya, bag-u siyun ginan nag-atag maan aku sa Damasku. 18 Nakalawuy waya ti tulu ka timpu bag-u di aku nag-atag sa Hirusalim hampay mikabta sa kan Pidru. Nangagum aku sa kanya sa sulud sampulu may lima ka sirang. 19 Unman aku may nakitan iba Apustul nu unman si Santiyagu lang kay patar-ari Panginuun. 20 Tungkul sa bagay inda kang isinurat sa kanyu, alam di Diyus unman aku nagpudil. 21 Siyun ginan nag-atag aku sa manga rugar ati sa daga Sirya hanggan Silisya. 22 Ati katpung udwaya aku nakilala manga patar-ari sa kan Kiristu ati sa Hudiya. 23 Nabaritaan lang nida tunda kaybi pag tawu mag-unuunu sa kanda, taygnuna ngap magtudlu yi tungkul sa pagsarig sa kan Kiristu imaw kaybi kay gustu mana wasakun. 24 Nakan ngani nagdayaw sida sa Diyus dahil sa kay binwat sa kangku.
1 Pagka nakalawuy ti sampulu may upat ka timpu nag-atag maan aku sa Hirusalim kang kaibahan si Birnabi. Dinara diman niku hanggan si Titu. 2 Nakan aku nag-ati maan dahil ipinaalam ngani Panginuun sa kangku kailangan aku umatag. Napakihampang aku sa manga pinagkatakinan iglisya kami kami lang, bag-u itinultul niku mayad mayad sa kanda ti Mayad pag Barita kang pag-itudlu sa manga balaw Hudiyu. Nakan kang itinultul sa kanda dahil kang gustu danga maduraan kahulugan ti kang binudlayan ginan sa kabag-u hanggan taynguna tugka. 3 Dapat kuyug ngani hanggan si Titu. Madi siya Giriyigu, unman diman kanda pinilitan siya turiun. 4 Bilang madi may manga tawu magpabalhinguun kuntay manga patar-ari, kanda mana gustu turiun si Titu. Magpalakaylakay waydi sida hampay sulayun nu kabitay kita irinibri ni Kiristu Hisus ginan sa Kasuguan. Kanda gustu kami buwatun panawuhun. 5 Dapat ay kami unman napasakup sa kanda kagustuhan una di ngalay ngalay, hampay maingatan nimi ti katutuuhanan Mayad pag Barita para sa kanyu. 6 Ti manga pagkilalan-un manga iba kuntay manga pinagkatakinan iglisya udyi waydi may paanyu sa kangku. Unman diman mahalga sa kangku una si unu sida, dahil unman may pag-apihun ti Diyus. 7 Bagkus ngap kinilala nida aku kay pinili Diyus hampay iadal niku ti Mayad pag Barita sa manga balaw Hudiyu, parihu diman waydi sa kay nagpili sa kan Pidru hampay iadal niya ti Mayad pag Barita sa manga Hudiyu. 8 Diyus ti nagpakaun karampatan sa kan Pidru hampay mag-Apustul sa manga Hudiyu, imaw diman ti nagpakaun karampatan sa kangku hampay mag-Apustul sa manga balaw Hudiyu. 9 Ti manga pagkumnun pinagkatulduk iglisya, sida ni Santiyagu, ni Pidru, ni Huwan. Naintindihan waydi nida inda pag katungkulan ipinakaun Diyus sa kangku. Nakan kami ni Birnabi kanda tinanggap ga kanda diman, parihu kami manugtudlu. Kanmi pinagkasunduan kami sa manga balaw Hudiyu, sida bay sa manga Hudiyu. 10 Kanda lang bilin danga pagkalimti nimi ti manga pugri sa Hudiya. Ungud ngani daan di pag-isipun niku sida hampay awatan. 11 Pagka si Pidru nag-ati sa Antiyukya, tinamyaw niku siya sa atubangan manga patar-ari dahil ungud salan kay binwat. 12 Dahil pagka udwaya rinmas-ug ti manga mayad pag kakilala ni Santiyagu, nagsaru di si Pidru sa manga patar-ari balaw Hudiyu. Dapat pagka rinmas-ug yi ngani kay manga kakilala ni Santiyagu, nagpakarayu yi siya nagpatuhay sa lamak dahil nadala siya sa manga magtudlu sa pagturi. 13 Naghuwad paman sa kanya ti manga iba patar-ari siyun manga Hudiyu hanggan si Birnabi natapil ngap sa kanda magpabalhinguun. 14 Pagka nakitan niku kanda nagsimray ginan sa matadlung pag dalan Mayad pag Barita, sinabi niku sa kan Pidru sa atubangan nida tanan magkun, "Nu kawu Hudiyu mag-ugali parihu sa balaw Hudiyu, ag bukun yi ga usa ka Hudiyu, kabitay pag mapilit nimu ti manga balaw Hudiyu mag-ugali parihu sa manga Hudiyu?" 15 Madi kami linahi Hudiyu ag unman ga kanda pagkumnun makasalanan pag manga balaw Hudiyu, 16 alam nimi pagkilalan-un Diyus ti tawu kuntay siya matadlung nu sumarig siya sa kan Hisu-Kiristu ag unman dahil sa kay magtupad sa Kasuguan. Kami diman magsarig sa kan Kiristu Hisus hampay pagkilalan-un Diyus kami matadlung dahil sa kanmi pagsarig sa kan Kiristu ag unman dahil sa kanmi magtupad sa Kasuguan. Dahil dayu kilalan-un Diyus ti tawu kuntay matadlung nu ginan lang sa kay pagtupad sa Kasuguan. 17 Dapat nu kanmi pakiusa sa kan Kiristu ag nu abi kanda pagkumnun kami ngap manga makasalanan parihu sa balaw Hudiyu, kay aw ibug sabihun si Kiristu magpaturun sa kasalanan? Unman duy. 18 Nu pagkaayadun waya maan niku ti kang dinaut, pag-ipakilala niku kuntay aku makasalanan ngap. 19 Dapat ay namatay aku sa Kasuguan, dahil diman sa Kasuguan, hampay kang buhi sakup sa Diyus. 20 Namatay aku kaibahan ni Kiristu sa kurus. Pagka kainda aku nabuhi, balaw yi kang sadili buhi, nu unman si Kiristu lang ti nabuhi sa kangku. Hanggan aku sitay di waya sa babaw daga, kang ugali buhi magsarig sa Anak Diyus, sa nagmayad sa kangku ag nagpakaun kay buhi sa kamatayan para sa kangku. 21 Balaw pagbul-an niku halaga kay pangaawa Diyus sa kangku. Nu abi pagkilalan-un Diyus ti tawu kuntay siya matadlung dahil sa kay magtupad sa Kasuguan, unman yi may pulus kay kamatayan ni Kiristu.
1 Hayga nguna kamu pag manga taga Galasya, patalangtalang? Si unu lugud ti nagpaumang sa kanyu? Marayaw yi apinaliwanag niku sa kanyu tungkul sa kamatayan ni Kiristu sa kurus. 2 Inda lang ti gustu niku maalaman sa kanyu, tinanggap aw niyu ti Ispiritu Diyus dahil sa kanyu pagtupad sa Kasuguan aw ngatay dahil sa kanyu magpatingi hanggan magsunud sa Mayad pag Barita? 3 Talangtalang ungud kamu. Pagka nag-umpisa kamu sa bag-u buhi kaybi kanyu ugali angay sa Ispiritu. Bag-u taynguna pagka tabug sa katapusan angay lang aw sa sadili niyu kakayahan? 4 Udyi aw may pulus sa kanyu ti kanyu linakawan kaybi? Siguru balaw diman unman. 5 Hayga nguna ipinakaun Diyus sa kanyu ti Ispiritu? Hayga may binwat siya manga makadululaw pag tanda? Dahil aw lugud sa kanyu pagtupad sa Kasuguan aw ngatay dahil sa kanyu magpatingi hanggan magsunud sa Mayad pag Barita? 6 Parihu kabay sa isinurat tungkul sa kan Abraham magkun, "Nagsarig siya sa Diyus, nakan kinilala siya Diyus kuntay matadlung." 7 Nakan magkaalaman yi niyu ti tutuu linahi ni Abraham imaw ti manga magsarig sa Diyus. 8 Udwaya nangyari daan ipinakilala Banal Kasuratan ti manga balaw Hudiyu kilalan-un waydi Diyus kuntay sida manga matadlung nu sumarig sida sa kanya. Kabag-u waya ipinakilala yi sa kan Abraham ti Mayad pag Barita magkun, "Ginan sa kanmu papaladan Diyus ti tanan nasyun tawu." 9 Nagsarig sa Diyus si Abraham bag-u siya pinapaladan. Nakan ngani ti tanan tawu nu sumarig sa Diyus, papaladan diman parihu ga kanya. 10 Ti tanan manga magsarig sa kanda magtupad sa Kasuguan, nasakup sa saad. Dahil isinurat sa Banal Kasuratan magkun, "Saadan ti unman mag-alaala magtupad sa tanan isinurat sa ribru Kasuguan." 11 Nu katunda malinaw yi unman may tawu kilalan-un Diyus kuntay siya matadlung ginan sa Kasuguan. Dahil magkun ti Kasuratan, "Ti tawu nu pagkilalan-un Diyus kuntay siya matadlung dahil sa kay pagsarig tunda pag tawu ti may buhi." 12 Dapat ti Kasuguan saman sa pagsarig. Dahil magkun ti Banal Kasuratan, "Ti tawu nu magtupad sa kay bilin Kasuguan may buhi dahil lang sa kay magtupad." 13 Pagka inaku ni Kiristu ti saad sa kanta, kita linukat yi niya ginan sa saad Kasuguan. Dahil isinurat sa Banal Kasuratan magkun, "Sinaadan ti kada tawu ibinitay sa puun kayu." 14 Linukat kita ni Kiristu hampay ti manga papalad kay ipinangaku Diyus sa kan Abraham tanggapun manga balaw Hudiyu ginan sa kan Kiristu Hisus. Nakan ngani nu sumarig kita sa kanya, tanggapun nita ti Ispiritu angay sa kay ipinangaku Diyus. 15 Manga patar-ari, ti taratu imaw ti pirmi paggamitun halimbawa. Pagka napirmahan yi ti taratu dayi mahimu dautun una sitapu pag tawu tunda pag taratu. Dayu waydi mahimu bawasan una dagdagan. 16 May pangaku ngani ti Diyus sa kan Abraham hanggan sa kay linahi. Unman pagsabihun niya magkun, hanggan sa kay manga linahi. Nu abi katida kay pagkumnun kay ibug sabihun mayamu. Dapat kay sinabi Diyus magkun, "Sa kanmu linahi." Kay kahulugan usa usa lang ag inda imaw yi si Kiristu. 17 Inda kang gustu sabihun, tinalaghut dapu Diyus kay taratu sa kan Abraham. Pagka lawuy upat ka gatus may tatlumpulu ka timpu, ipinakaun Diyus ti Kasuguan. Dapat tunda pag taratu unman mabul-an halaga Kasuguan. Dayu waydi mauman ti manga taratu Diyus. 18 Nu abi ipamana Diyus kay ipinangaku sa tawu nu siya magtupad sa Kasuguan, udyi tunda angay sa kay ipinangaku Diyus. Dapat ay ipinakaun ngap Diyus kay ipinangaku sa kan Abraham angay sa kay magtupad Diyus sa kay pangaku. 19 Nu katida, hayga nguna ipinakaun ti Kasuguan? Idinu-&gang ti Kasuguan hampay ipakilala sa manga tawu kanda buwat kasalanan hanggan sa udwaya Rumas-ug ti pinangakuan Diyus pag linahi ni Abraham. Ipinakaun ti Kasuguan ipinadakit manga anghil sa kan Muysis bag-u siya ti nagpadangat sa manga tawu. 20 Dapat ay nu usa lang unman may kailangan siya manugpadangat ag ti Diyus usa lang ngani. 21 Gustu aw sabihun inda ti Kasuguan laban sa kay ipinangaku Diyus? Balaw duy katida. Kainda kay ibug sabihun, nu abi may ipinakaun sa manga tawu usa ka Kasuguan mag-&pakaun buhi, ti tawu mahimu mana pagkilalan-un Diyus kuntay matadlung nu tupadun niya tunda pag Kasuguan. 22 Dapat magkun ti Kasuratan, "Ti usa ka kalibutan nasakup kapangyarihan kasalanan." Nakan ipakaun Diyus sa manga magsarig sa kan Hisu-Kiristu kay ipinangaku. Matanggap lang manga tawu kay ipinangaku Diyus nu sida magsarig sa kan Hisu-Kiristu. 23 Pagka udwaya udas nakahimu makasarig ti manga tawu sa kan Hisu-Kiristu, kita ga manga pirisu waya Kasuguan hanggan sa udwaya nipakilala ti pagsarig inda. 24 Nakan ti Kasuguan imaw ti nagpatuhuyan sa kanta hanggan sa ud nagras-ug si Kiristu hampay kainda kita pagkilalan-un yi Diyus kuntay manga matadlung dahil sa kanta pagsarig sa kanya. 25 Taynguna kita sinmarig yi sa kanya, nakan udyi kita pag-ipatuhuyan Kasuguan. 26 Ginan sa kanyu magsarig sa kan Kiristu Hisus, nakan kamu tanan manga anak yi ngap Diyus kainda. 27 Dahil kamu ti manga itinulbaw sa kan Kiristu, ga isinlung yi niyu kay buhi ni Kiristu. 28 Udyi may tuhay tuhay una Hudiyu, una Giriyigu, una panawuhun, una bukun panawuhun, una lalaki, una babayi. Kamu tanan urusa dahil sa kanyu pakiusa sa kan Kiristu Hisus. 29 Nu kamu sa kan Kiristu, kabilang diman kamu sa kay linahi ni Abraham, manga magmana sa kay itinaratu Diyus.
1 Inda kang gustu sabihun, nu anak waya ti manugmana parihu lang siya sa panawuhun, madi ngap siya ti may apu tanan tanan. 2 Dahil may magpamahala sa anak ag sa kay kasiyunan hanggan sa udwaya ipahintulut ama ti karampatan sa kay anak. 3 Katunda diman waydi kita. Pagka udwaya naintindihan nita ti katutuuhanan, sakup waya gid kita sa manga kapangyarihan maghari sa kalibutan. 4 Dapat ay pagka rinmas-ug ti taning pag kaudasan sinugu Diyus kay Anak. Ainanak siya usa ka babayi, kay buhi napasakup sa sirung Kasuguan, 5 hampay lukatun niya ti manga tawu ginan sa kapangyarihan Kasuguan ag hampay kita manga anak yi ngap Diyus. 6 Dahil kamu manga anak yi Diyus nakan ipinakaun niya sa kanta ti Ispiritu niya Anak mangulian sa kanta tagipusuun imaw tig-ingaran sa kanya magkun, "Amang." 7 Nakan ngani dahil sa kay binwat Diyus bukun yi kawu panawuhun nu unman kay yi ngap anak. Nu kawu kay anak, matanggap nimu kay pamana kay ihinanda Diyus sa kay manga anak. 8 Pagka kamu kaybi udwaya magkilala sa Diyus, kamu panawuhun manga diyusdiyusan. 9 Dapat taynguna kanyu yi nakilala ti Diyus, aw mayad man nu sabihun taynguna kamu nakilala yi Diyus. Hayga lugud kamu magbalik magsirbi maan sa manga kapangyarihan maghari sa kalibutan balaw may pulus ag unman waydi may kabuluhan. Hayga lugud kamu magkaibug maan magpasakup sa siyun pag manga kapangyarihan? 10 May turun-anun kamu manga sirang, manga bulan, manga panahun hanggan manga timpu. 11 Magkaaburidu yi gid aku sa kanyu barang unman may kabuluhan kang nagbudlay dahil sa kanyu. 12 Manga patar-ari, ungud yi gid inda kang pagsabihun sa kanyu, pagga kangku kamu dahil aku ga kanyu yi waydi. Unman kamu may binwat daut sa kangku una di. 13 Alam diman niyu nakan ati katpung sa kabag-u aku nanudlu Mayad pag Barita sa kanyu dahil nasakit aku. 14 Unman niyu aku inunuunu, unman diman niyu dinayu dahil daramun kang bilug, madi tunda ga usa ka daka pag subuk sa kanyu. Lalu ngap kanyu tinanggap aku ga usa ka anghil Diyus, ga kan Kiristu Hisus diman kanyu nagbaya. 15 Nakabaya gid kamu ati katpung. Hintay lugud ti nangyari? Aku makapatutuu gid nu abi mahimu luwatun kanyu mata, linwat mana niyu hampay ipakaun sa kangku. 16 Taynguna bay aku kanyu aw nangus kaaway dahil sa kang magsabi sa katutuuhanan? 17 Masipag mana tunda pag manga tawu sa kanyu, dapat balaw gid sa kaayadan kay turunu. Kanda gustu lang kamu mapakarayu ginan sa kangku hampay sa kanda pag pumasakup. 18 Balaw daut nu unman mag-irang ti tawu kay budlay basta mayad kay turunu, mayad ngap tunda una aku unman asan sa kanyu. 19 Kamu duy lubus niku pagmayadun. Parihu aku ga usa ka babayi magpanganak, may pagdungugun aku mabuyat pag karukuan dahil sa kanyu hanggan sa udwaya makitan si Kiristu sa kanyu buhi. 20 Gustu gid mana niku kamu maatubang hampay sabihun niku ti kang pagdungugun sa kang tagipusuun, dahil ungud gid magulu kang naisipan tungkul sa kanyu. 21 Inda kang paingana sa kanyu, kamu magkaibug magpasakup sa Kasuguan, unman aw niyu pagpatingihan ti pagsabihun Kasuguan? 22 Isinurat kabay sa ribru Kasuguan magkun, "Si Abraham nagkaanak duwa ka anak lalaki. Kay usa sa kay panawuhun sa kan Agar, kay usa sa kan Sara sa bukun panawuhun." 23 Ti anak sa panawuhun ainanak angay lang sa ugali tawu. Dapat ti anak sa balaw panawuhun ainanak angay sa kay taratu Diyus. 24 Sa inda pag manga nangyari kaybi mag-akitan ti usa ka mahalaga pag katutuuhanan. Ti duwa ka babayi bilang ga halimbawa sa duwa ka taratu. Ti usa ka taratu, ti namhan ngani sa Bantud Sinai, ipinahalimbawa sa kan Agar hanggan sa kay manga anak lunsay manga panawuhun. 25 Si Agar nipahalimbawa sa Bantud Sinai sa daga Arabya, larawan diman tungkul sa Hirusalim kainda panawuhun diman waydi hanggan ti tanan manga tawu sakup banwa Hirusalim. 26 Dapat ti Hirusalim taga langit imaw ti bukun panawuhun, siya bilang ga kanta yi ina. 27 Angay sa Kasuratan magkun, "Pagbaya kawu pag babayi una unman nagkaanak. Paghuyaw gid kawu sa kanmu kabayaan, kawu gid pag babayi balaw nakalakaw sakit sa mag-anak. Dahil ngani lalu gid aduk ti manga anak tunda pag babayi ti tinayakan niya asawa, balaw lang ga sa babayi may asawa." 28 Manga patar-ari, kamu manga anak Diyus angay sa kay pangaku parihu ga kan Isaak, ainanak siya angay sa kay taratu Diyus sa kan Abraham. 29 Kaybi si Isaak ti ipinanganak angay sa Ispiritu Diyus, inunuunu ni Ismail, imaw ti ipinanganak angay lang sa kaugalian tawu. Katunda diman waydi ti mangyari una taynguna. 30 Dapat hintay ti isinurat sa Banal Kasuratan? Kay sabi magkun, "Tulaka nimu ti panawuhun pag babayi hanggan kay anak, dahil ti anak panawuhun balaw kailangan hurayan pamana. Ti umapu pamana tunda lang pag anak sa balaw panawuhun pag babayi." 31 Nakan ngani, manga patar-ari, kita bukun anak panawuhun nu unman ngap anak balaw panawuhun.
1 Linukat kita ni Kiristu hampay kita balaw yi panawuhun Kasuguan. Pagpakarig-un ngani kamu danga yi kamu magpasnu buwatun maan panawuhun. 2 Malu, aku ngani si Pablu ti magsabi sa kanyu, nu pumaturi kamu, unman mapakinabangan niyu si Kiristu. 3 Kas-a waya kang gid pagsabihun sa una hintay pag tawu ti magpaturi, kailangan tupada niya ti buu Kasuguan. 4 Nu kamu magkaibug pagkilalan-un Diyus kuntay kamu matadlung dahil sa kanyu magtupad sa Kasuguan, binmulag yi ngap kamu sa kan Kiristu, udyi matanggap niyu kay pakaun kaayadan Diyus. 5 Dapat ay dahil sa Ispiritu alam nimi pihu gid kami aban kilalan-un Diyus manga matadlung dahil sa kanmi pagsarig sa kan Kiristu. 6 Nu ti tawu magpakiusa sa kan Kiristu Hisus, unman mahalaga sa kanya una siya tinuri una unman tinuri. Ti mahalaga lang nu kita magsarig sa kan Kiristu ag nu kanta pagmahalun ti manga iba dahil sa kanta pagsarig sa kanya. 7 Amat amat kamu nagrig-&un yi sa kanyu pagsarig sa kan Kiristu. Si unu lugud ti nag-&ara sa kanyu magsunud sa katutuuhanan? 8 Balaw Diyus ti may buwat tunda sa kanyu, imaw yi ngap ti nagbutung sa kanyu. 9 May sanglitan magkun, "Una diit pag pamadaka sa tinapay magpahabuk sa pinkul arina." 10 Kita magpakiusa sa Panginuun nakan nu para sa kangku pihu kamu napaminsan di kanyu pag-iisip sa kangku. Ag pihu gid parusahan Diyus una si unu tigpagulu sa kanyu. 11 Manga patar-ari, nu abi ga kanda pagkumnun ungud ipagtudlu niku kuntay kailangan turiun ti tawu, hayga pag-&unuunuhun diman aku taynguna tugka? Nu abi tutuu tunda kang ipagtudlu, udyi mana pagkadat-an manga tawu kang ipagtudlu tungkul sa kay kamatayan ni Kiristu sa kurus. 12 Tunda pag manga magpan-gulu sa kanyu danga tugka lang sa pagpaturi, nu unman lus-ani yi lang nida kanda sadili bilug. 13 Manga patar-ari, pinili kamu hampay balaw panawuhun Kasuguan. Pagka kainda kamu balaw yi panawuhun, danga waydi pasibut-an yi lang niyu ti daut kagustuhan niyu naisipan. Kailangan ngap pasibut-an niyu kanyu pagmahal, hampay magsirirbihan kamu sa usa kag sa usa. 14 Dahil matupad ti kabuuhan Kasuguan nu tupadun lang inda pag usa ka bagaw magkun, "Mahala nimu kanmu kaparihu tawu parihu sa kanmu sadili." 15 Dapat nu kamu ga hayup magkaragtan magsiribaan, barang mapapas kamu. 16 Inda kang gustu sabihun, pag-ugali kamu angay sa udyuk Ispiritu, hampay dayi pasibut-an niyu ti daut kagustuhan niyu naisipan. 17 Dahil ti daut kagustuhan pagkatawu maglaban sa kagustuhan Ispiritu ag ti kagustuhan Ispiritu laban waydi sa daut kagustuhan pagkatawu. Maglalabanan sida duwa nakan unman niyu mabwat ti gustu niyu buwatun. 18 Nu kamu panguluhan Ispiritu, udyi kamu sa sirung kapangyarihan Kasuguan. 19 Magkaalaman yi waydi nita ti manga buwat tawu nu angay sa daut kagustuhan niya pagkatawu, ti magpanlalaki, ti magpamabayi, ti mayagting pag naisipan, ti kahalayan, 20 ti magsamba sa diyusdiyusan, ti magpadaya, ti magkutub daut, ti magkagalit, ti mag-imun, ti magkaradat-an, ti maramuun, ti magkinanyakanya yi isip, ti mag-arapinan, 21 ti maghirirakan, ti maglangu, ti magkadara sa kasayahan, hanggan ti iba waya buwat parihu sa kainda pag buwat. Pagsabihan niku kamu parihu diman sa kaybi, balaw gid makapasakup sa kay paghari Diyus ti tawu nu buwatun niya ti katunda pag manga bagay. 22 Dapat ay inda ngani ti burak Ispiritu, ti pagmahal, may kabayaan, may kahusayan, matiniisun, may matugway pag naisipan, kamayadan, matinupadun, 23 maalumanay, mapinigilun sa kay sadili. Unman may pagsabihun ti Kasuguan laban sa kainda pag manga buwat. 24 Nu ti tawu sakup ni Kiristu Hisus, ipinapaku yi niya sa kan Kiristu sa kurus kay sadili kagustuhan pagkatawu hanggan kay daut pag naisipan hanggan kay manga kahalayhalay pag manga hilig. 25 Ti Ispiritu ti nagpakaun buhi sa kanta nakan ngani kailangan kita pasirung sa kapangyarihan Ispiritu. 26 Danga kita palabilabihun, maraaway, danga kita maghirirakan.
1 Manga patar-ari, nu may naabutan kamu tawu magbuwat kasalanan, kailangan tunda sa kanyu ti manga tuludluan Ispiritu ti pagtadlung sa kanya, dapat pagmaalumanay kamu ti kada usa. Pagpasunaid sa kanyu sadili bilug barang kamu matuksu waydi. 2 Pag-arawatan kamu nu may mabuyat pag dararan-un. Nu katunda kanyu buwatun, matupad niyu ti sugu ni Kiristu. 3 Nu may magpainuinu sa kay sadili kuntay siya mahalaga dapat unman diman waydi, dinaya ngap niya kay sadili. 4 Pag-usisa ti kada usa sa kay sadili buwat. Nu mayad kay buwat, pagbaya siya danga yi ipaparihu sa buwat manga iba. 5 Dahil kailangan gid masigdara ti kada usa kay dararan-un. 6 Ti manugtudlu Bagaw Diyus kailangan ayawan niya tuludluan una lang hintay pag kaayadan kanda nakitan. 7 Dagsalan gid ungud kamu sa kanyu pag-iisip. Ti Diyus dayu gid mahimu hakutun tawu. Nu hintay ti ipamgas tawu, imaw diman kay anihun. 8 Nu ti tawu kay naisipan, ga sa magpamgas, sa manga bagay angay lang sa sadili daut kagustuhan, kamatayan ti maani. Nu ti tawu kay naisipan, ga sa magpamgas, sa manga bagay angay sa Ispiritu, tutuu pag buhi unman may katapusan kay maani. 9 Nakan ngani danga kita magsuku sa magbuwat mayad. Nu sa kay yi kaudasan aban, kita makaani nu unman kita magsuku. 10 Nakan ngani danga nita ipalawuy nu may rugar hampay magbuwat mayad sa kanta kaparihu, lalu gid sa manga kaparihu nita magsarig sa kan Kiristu. 11 Makitan niyu daraka gid pag ritra kang nagsurat. Aku diman ti may surat inda. 12 Tunda pag manga tawu ti magpilit sa kanyu hampay magpaturi, magkaibug lang sida magpakakitkakit sa manga iba. Pagbuwatun nida tunda, hampay sida balaw pag-&unuunuhun ga mangyari nu abi ipagtudlu nida ti kahulugan kamatayan ni Kiristu sa kurus. 13 Una ti manga nagpaturi unman diman waydi magtupad sa Kasuguan. Kanda lang gustu sida ti dayawun manga iba nu kamu magpaturi waydi, nakan kamu kanda gid pagpilitun. 14 Nu bay aku, kay kamatayan lang nita Panginuun Hisu-Kiristu sa kurus ti kang pag-ipakatultul. Dahil ginan sa kamatayan ni Kiristu ti ugali kalibutan bilang ga namatay yi nu sa kangku, ag aku ga namatay yi nu sa ugali kalibutan. 15 Balaw mahalaga una tinuri una unman tinuri ti usa ka tawu. Ti mahalaga lang nu siya bag-u linalang. 16 Ti tanan manga mag-ugali angay sa inda pag manga isinurat niku, hanggan ti tanan nasyun Diyus, kang pag-idarangin hampay sa kanda yi kay kahusayan hanggan kay pangaawa Diyus. 17 Bag-u inda wadi kang pagsabihun, una si unu danga yi dagdagan niya kang aragwantahun. Hustu yi kang manga latu hampay makilala aku kay panawuhun ni Hisus. 18 Manga patar-ari, kamu tanan kang pag-idarangin pagsa kanyu tagipusuun kay pangaawa nita Panginuun Hisu-Kiristu. Amin.
1 Inda ti may surat si Pablu, kay Apustul ni Kiristu Hisus angay sa kagustuhan Diyus, tabug sa manga patar-ari sa taga Ipisu, sa manga matinupadun sa kanda pakiusa sa kan Kiristu Hisus. 2 Kamu kang pag-idarangin hampay sa kanyu yi kay papalad hanggan kahusayan ginan sa kanta Diyus Ama hanggan ginan sa Panginuun Hisu-Kiristu. 3 Pagpasalamat kita sa Diyus Ama nita Panginuun Hisu-Kiristu. Ipinakaun niya sa kanta ti tanan ipinapalad Ispiritu Banal sa langit dahil sa kanta magpakiusa sa kan Kiristu. 4 Udwaya nalalang ti kalibutan, daan kita pinili pinausa Diyus sa kan Kiristu hampay kita manga sakup yi Diyus ag udyi may ikasaway sa kay magbantay niya. Dahil sa kay pagmahal Diyus, 5 kita kay ihinanda daan hampay kay yi manga anak sa panab-anan ni Hisu-Kiristu. Imaw kay turunu kagustuhan Diyus. 6 Dayawun nita siya dahil sa makadululaw pag kaayadan kay ipinapalad niya sa kanta sa panab-anan niya pagmahalun pag Anak. 7 Irinibri kita ni Kiristu sa panab-anan niya dugu, ag pinatawad yi kanta manga kasalanan. Ungud gid makadululaw kay mayad pag nabubut-un Diyus, 8 lubus kay ipinakilala niya sa kanta. Pinakan-an niya kita kadunungan hanggan intindi, 9 hampay lubus maintindihan nita kay udwaya pinaburayhaw pag gayak niya. 10 Inda ngani pag ginayak Diyus pihu tupadun niya sa panab-anan ni Kiristu, nu Rumas-ug ti taning pag kaudasan. Inda ngani kay gayak, usahun niya aban sa kan Kiristu ti tanan linalang sa langit una sa babaw daga. 11 Dahil sa kan Kiristu, kami manga Hudiyu ti pinili Diyus ag ibinukud hampay kay yi nasyun. Diyus ti nagbuwat tanan bagay angay sa kay turunu niya kagustuhan. Kainda kay turunu niya gayak, 12 hampay kami pag manga Hudiyu ti un-an man sa kanyu nagsarig sa kan Kiristu sa lalu ikadayaw sa kanya. 13 Dahil sa kan Kiristu, kamu pag manga balaw Hudiyu nagpatingi sa tutuu pag barita Diyus, sa Mayad pag Barita imaw tigpakaun karibrihan. Dahil diman sa kan Kiristu kamu nagsarig sa Diyus. Nakan ngani ipinakaun Diyus sa kanyu ti Ispiritu Banal imaw kay ipinangaku Diyus, bilang puruyba kuntay kamu pinili Diyus hampay kay yi manga sakup. 14 Ti Ispiritu ti ipinakaun sa kanta imaw kay puruyba tupadun Diyus kay manga pangaku sa kanta, sa manga pinili niya, hampay dayu umalinlangan kita hanggan sa udwaya kita lubus miribri Diyus. Dayawun nita kay kapangyarihan hanggan kay kadayawan. 15 Nakan ngani pagka nabaritaan niku kanyu pagsarig sa Panginuun Hisus hanggan kanyu pagmahal sa tanan manga nasakup sa Diyus. 16 balaw may apas kang pasalamat sa Diyus tungkul sa kanyu. Balaw magkalimtan niku kamu sa kang manga darangin. 17 Kang paghagadun sa Diyus nita Panginuun Hisu-Kiristu, sa makapangyarihan pag Ama, hampay ipakaun niya sa kanyu ti Ispiritu Banal, imaw ti tumudlu sa kanyu ag pumakakit tungkul sa Diyus hampay makilala niyu siya. 18 Kang pag-idarangin kamu hampay marayawan kanyu naisipan hampay maalaman niyu kanta pag-asahan dahil sa kay pagbutung niya sa kanta. Kay ihinanda niya ti daka gid pag kaayadan sa tanan manga nasakup sa kanya, 19 hanggan kay unman may katapusan ag makapangyarihan buwat niya sa kanta sa manga nagsarig sa kanya. Imaw diman pag kapangyarihan 20 ti nagbuhi uman sa kan Kiristu ginan sa kamatayan ag ti nagpakaun karampatan sa kanya hampay tumukaw baliwa sa sikun Diyus minsan sa kay maghari. 21 Nakan ngani ti tanan manga naminunu, manga may kangaranan, manga kamaskihan hanggan manga magpamahala, una sa babaw daga una sa langit, sa sirung di kapangyarihan ni Kiristu. Subra kay ngaran ni Kiristu balaw lang ga iba ngaran, balaw lang sa taynguna hanggan sa paratabgan. 22 Ipinasirung Diyus sa kapangyarihan ni Kiristu ti tanan manga bagay. Siya ti binwat pinagkaulu iglisya. 23 Ti iglisya imaw ti pinagkabilug ni Kiristu. Siti pag ipinauli kay kalubusan ni Kiristu hampay aban udyi may masawad lunsay sakup yi sa kay kalubusan ni Kiristu.
1 Kamu pag manga patar-ari balaw Hudiyu, kaybi kamu manga tigbak dahil sa kanyu maglaban sa Diyus ag dahil sa kanyu kasalanan. 2 Ati katpung nagsunud kamu sa daut pag palakaw kalibutan inda, napasirung kamu sa hari kadautan, sa kan Satanas, imaw tighari sa manga tawu maglabag sa Diyus. 3 Kaybi kami pag manga Hudiyu minsan diman waydi sa manga maglaban sa Diyus, nag-ugali kami angay sa kagustuhan sadili pagkatawu, sinunud nimi ti daut pagkawilyan nimi bilug hanggan naisipan. Nakan angay sa kahamtangan nimi pagkatawu minsan kami sa tanan manga tawu pagkagalitan Diyus. 4 Dapat ay abunda gid kay pangaawa Diyus ag daka gid kay pagmahal sa kanta. 5 Una kaybi kita manga tigbak dahil sa kanta paglaban sa Diyus, dapat binuhi niya kita kaibahan ni Kiristu. Naribri kamu dahil lang sa kay mayad nabubut-un Diyus. 6 Dahil sa kanta pakiusa sa kan Kiristu Hisus binuhi uman kita Diyus kaibahan ni Kiristu, pinatukaw kita kaibahan niya sa langit. 7 Binwat niya inda hampay sa pararas-ugun pag kaudasan maipakakit niya kay dayu makarkula pag abunda niya mayad nabubut-un sa kanta sa manga niusa sa kan Kiristu Hisus. 8 Dahil lang sa mayad nabubut-un Diyus naribri kamu pagka kamu nagsarig sa kan Kiristu. Inda pag karibrihan kay ipinakaun Diyus sa kanyu, balaw kanyu sadili buwat. 9 Bukun dahil sa kanyu sadili manga buwat, nakan balaw waydi may ipadayawdayaw una si unu. 10 Kita hinuman Diyus niusa sa kan Kiristu Hisus hampay itigana nita kanta buhi bilug sa buruwatun mayad, imaw kay ihinanda Diyus kaybi waya ginan hampay kanta ugaliun. 11 Nakan isipun niyu kanyu daan pag kahamtangan. Kamu daan inanak manga balaw Hudiyu. Pagkumnun kamu manga Hudiyu kuntay balaw tinuri. Ti manga Hudiyu pagkumnun manga tinuri angay sa kanda binwat sa kanda bilug. 12 Pagdumdumun di niyu sa kaybi pag kausadan ati katpung mablagan kamu sa kan Kiristu, balaw minsan sa nasyun Israil, balaw sakup sa taratu una sa manga ipinangaku Diyus. Kaybi magkabuhi kamu sa kalibutan unman may pag-asahan ag unman may Diyus. 13 Madi kamu kaybi sa arayu, dapat taynguna ipinakarani yi kamu sa panab-anan dugu ni Kiristu dahil sa kanyu magpakiusa sa kan Kiristu Hisus. 14 Inunyunan niya kita sa usa kag sa usa. Kami manga Hudiyu ag kamu manga balaw Hudiyu pinausa niya kita. Pagka ipinakaun niya kay sadili bilug sa kamatayan, dinura niya ti kalagalitan ga alad batu nagbulag sa kanta sa usa kag sa usa. 15 Binul-an niya kahalagaan ti Kasuguan hanggan kay manga sugu manga turun-anun hampay ipausa sa kanya ti manga Hudiyu ag ti manga balaw Hudiyu ag hampay maghari yi ti kahusayan. 16 Namatay siya sa kurus hampay mab-ul niya ti kalagalitan manga Hudiyu ag manga balaw Hudiyu. Parihu kita ipinabalik niya sa Diyus, bag-u binuu niya kita usa yi lang ka bilug. 17 Nagsitay si Kiristu, itinudlu niya sa tanan tawu ti Mayad pag Barita tungkul sa kahusayan, sa kanyu sa manga balaw Hudiyu sa manga arayu sa Diyus hanggan sa manga Hudiyu sa manga arani sa kanya. 18 Dahil sa kan Kiristu ti manga Hudiyu ag ti manga balaw Hudiyu parihu kita makapakarani sa Ama dahil sa kanta pakiusa sa usa ka Ispiritu. 19 Nakan balaw yi kamu manga dayuhan, manga taga iba rugal. Kamu manga kasimanwa yi ngap, manga nasakup sa Diyus, minsan sa kay magtal-anakan. 20 Kamu ipinakana Diyus, kanyu pinagkabungsudan ti manga Apustul ag ti manga purupita. Dapat ti pinakamahalaga pag kalap si Kiristu Hisus. 21 Sa panab-anan niya nagkaraminsan ti kada kalap balay kay pagbuwatun ni Kiristu, hanggan sa udwaya mamhan ti balay kay itinigana hampay ulian Panginuun. 22 Dahil sa kanyu magpakiusa sa kanya, kamu hanggan ga manga kalap yi diman waydi pagbuwatun Ispiritu Banal hampay ulian Diyus.
1 Nakan magdarangin ngani aku sa kanyu, aku si Pablu ti napirisu dahil sa kan Kiristu Hisus tungkul sa kanyu sa manga balaw Hudiyu. 2 Siguru naalaman yi niyu kuntay dahil sa mayad pag nalub-anan Diyus ipiniyar niya sa kangku inda pag katungkulan para sa kanyu pag kaaraydan. 3 Ipinakilala Diyus sa kangku ti madalum pag katutuuhanan udwaya daan ipinaburayhaw ga kang yi isinurat sa kabag-u. 4 Sa kanyu magbasa inda maalaman niyu nu kabitay kang mag-intindi sa madalum pag katutuuhanan ni Kiristu. 5 Inda pag madalum pag katutuuhanan unman ipinaburayhaw sa manga tawu ati kaybi katpung pag udas. Dapat kainda kay ipinakilala yi Ispiritu Banal sa kay manga sakup niya, sa kay manga Apustul, hanggan purupita. 6 Ag inda yi ngani ti madalum pag katutuuhanan magkun, nu sumarig sida sa Mayad pag Barita, ti manga balaw Hudiyu parihu diman waydi sa manga Hudiyu may kabahagi diman waydi sa manga papalad ginan sa Diyus. Ag sida hanggan manga gamit diman bilug ni Kiristu ag may kabahagi sa kay pangaku Diyus kay tinupad sa kan Kiristu Hisus. 7 Sa kay mayad pag nabubut-un Diyus may binwat siya makamaskihan buwat sa kangku ag kay binwat aku manugtudlu Mayad pag Barita. 8 Sa tanan manga nasakup sa Diyus aku ti unman may kabuluhan. Dapat una katida nagustuhan diman niya ipakaun sa kangku inda pag buruwatun, hampay itudlu niku sa manga balaw Hudiyu ti Mayad pag Barita tungkul sa abunda ag dayi maaput naisipan pag papalad ginan sa kan Kiristu. 9 Pinili niya aku hampay iadal niku sa tanan tawu nu kabitay pag matupad ti paggayakun Diyus unman daan ipinaburayhaw niya. Inda kaybi kaybi di waya ginan unman gid ipinaalam Diyus, imaw ti naglalang tanan bagay. 10 Taynguna bay sa panab-anan iglisya gustu Diyus pagmipakilala sa manga pinunu ati sa langit ag sa manga may kamaskihan ti unman may katabuhan pag kadunungan Diyus. 11 Kaybi waya ginan daan di kay ginayak Diyus pag turunu kay ipinatupad kainda sa kanta Panginuun Kiristu Hisus. 12 Dahil sa kanta pakiusa hanggan pagsarig sa kanya, marig-un kanta tagipusuun hampay unman may ampara sa kanta makapakarani sa Diyus. 13 Nakan ngani kang pagsabihun sa kanyu, danga malubay kanyu naisipan dahil sa kakurian kang pag-agwantahun tungkul sa kanyu. Inda nakan sa ikadayaw ngap niyu. 14 Nakan ngani aku magluhud magdarangin sa atubangan Ama. 15 Ginan sa kanya may ngaran hanggan mustara ti kada magtal-&ama magtal-anakan una sa langit hanggan sa babaw daga. 16 Maghagad aku sa Diyus angay sa kay kayamanan hanggan kapangyarihan hampay parig-unun ag pabisugun Ispiritu kanyu tagipusuun, 17 hampay mangulian yi si Kiristu sa kanyu tagipusuun dahil sa kanyu magsarig sa kanya. Magdarangin aku hampay nu kamu manggamut ag marig-un yi sa pagmahal, 18 lubus makaya niyu masalman parihu sa tanan manga nasakup sa Diyus, nu kabitay kay kadaka ti pagmahal ni Kiristu, nu kabitay kay kaluang, kay kaaba, kay kaabwat hanggan kay kaabasad. 19 Magdarangin aku hampay masalman niyu ti pagmahal niya madi balaw maaput tawu naisipan, agud sa kanyu yi ti kalubusan Diyus. 20 Ti Diyus gid ti makabuwat subra man sa tanan nita mahagad ag maisip, dahil sa kay kamaskihan tighari sa kanta. 21 Pagtabug Diyus ti kadayawan ginan sa iglisya dahil sa kanta pakiusa sa kan Kiristu Hisus, sa kada sinulput tawu hanggan waya aban unman may katapusan. Amin.
1 Nakan aku, ti usa ka napirisu dahil sa kang magsirbi sa Panginuun, magsabi sa kanyu, pag-ugali kamu angay sa mayad pag ugali manga pinili Diyus. 2 Kamu pagmapinakumbabaun, pagmabuut ag pagmainagwantahun. Pagparasunaidan kamu sa kada usa. 3 Pinausa yi kamu Ispiritu Banal, pagmasigasid kamu hampay unman madura kanyu pagpakiusa, lubus yi kamu pagkabuu sa kahusayan. 4 Usa usa lang ti bilug, usa lang hanggan ti Ispiritu, katunda diman usa usa lang kanyu pag-asa sa kanyu tanan kay ipinakaun Diyus sa kanyu pagka kamu kay binutung. 5 May usa lang ka Panginuun, usa lang ka sarig, usa lang ka tulbaw sa kan Kiristu. 6 Usa lang ka Diyus imaw yi ti Ama nita tanan. Siya yi gid ti hari sa tanan, siya ti tagabuwat sa tanan ag siya diman tighiyaput sa tanan. 7 Dapat ti kada usa sa kanta kinanya kanya pag pinakan-an ni Kiristu kanta kahuray sa kay abunda pag kayamanan niya. 8 Kainda ti pagsabihun sa Banal Kasuratan magkun, "Pagka siya inmatag sa langit, nanaban siya sa mayamu pag nabihag, bag-u may ipinakaun siya sa manga tawu." 9 Hintay kay ibug sabihun, kay nag-atag sa langit? Kay ibug sabihun sinmitay dapu siya sa babaw daga. 10 Ti sinmitay sa babaw daga imaw diman ti inmatag sa kaabwat-abwatan, sa tungud manga langit, agud siya tig-ukub sa tanan tanan. 11 Siya diman ti may ipinakaun sa manga tawu. Kay iba pinakan-an niya katungkulan sa pagkaApustul, ti manga iba sa pagkapurupita, ti iba sa magtudlu Mayad pag Barita, ti iba pinakan-an niya katungkulan hampay mag-alaga sa iglisya, ti iba hampay manugtudlu. 12 Sida tanan may katungkulan hampay paanadun nida sa buruwatun ti tanan manga nasakup sa Diyus, sa ikarig-un iglisya ni Kiristu. 13 Nu katunda kita tanan magkarausa aban sa kanta pagsarig hanggan sa kanta pagkilala sa Anak Diyus. Bag-u udyi may ikasabi sa kanta, parihu sa kan Kiristu unman yi may kakurangan una di. 14 Bukun yi kita parihu ga manga anak di waya daradarahan sa una hintay ti ipagtudlu. Balaw kita parihu sa manga sarakyan sa dagat paglangkiangun humbak, pag-ipadpad durus. Udyi kita madaya manga tawu kay ibug daran-un kita tag sa kadautan. 15 Bagkus ngap pag-ugali kita magsabi sa tutuu may tapil di pagmahal hampay amat amat kumang-ud kita sa kanta pakiusa sa kan Kiristu. Siya ti kanta ulu. 16 Sa panab-anan niya magkaminsan ti bilug may manga gamit sinugdungsugdung manga kaluasluasan. Si Kiristu tigpakaun kabisugan sa kada gamit hampay makatupad sa kay katungkulan bag-u ti buu bilug dumaka ag bumisug sa pagmahal. 17 Inda kang pagsabihun kang gid pag-ipalugus sa kanyu sa ngaran Panginuun magkun, danga yi kamu mag-ugali parihu sa manga tawu unman magsarig sa kan Kiristu, ud may pulus kanda pag-isipun. 18 Unman sida madunung mag-intindi dahil sa kanda ga ud may namuangan ag maganit waya kanda ulu. Nakan ud sida may kaparti sa buhi kay pag-ipakaun Diyus. 19 Nalagum sida sa kahalayan, udyi may kauyaan una wadi sa hintay, udyi sida may pagbuwatun mayad, nu unman pasay yi lang kahalayan. 20 Balaw katunda kanyu nataw-an sa kan Kiristu. 21 Pinatingihan kabay niyu kay pag-iadal niya ag tinudluan yi kamu katutuuhanan tungkul sa kan Hisus. 22 Tayaki yi niyu kanyu daan pag ugali. Bul-a yi niyu kanyu daan pagkatawu mag-idamhak dahil sa daut pag kagustuhan naisipan. 23 Pagbag-uha yi kanyu nalub-anan hanggan kanyu naisipan. 24 Kailangan gamitun niyu kanyu bag-u pagkatawu ti linalang ga kay histuda Diyus, bag-u mag-akitan sa kanyu ti tutuu gid pag katadlungan sa kanyu lubus magpasakup sa Diyus. 25 Nakan ngani ti kada usa sa kanyu pag-ampu sa kapudilan, parihu sa pagsabihun sa Banal Kasuratan magkun, "Ti kada usa kailangan pagbagaw katutuuhanan sa kay patar-ari." Dahil kita tanan minsan kay manga gamit bilug ni Kiristu. 26 Nu abi kamu magkagalit, danga subra hampay kamu balaw magkasala. Danga niyu pagpabay-ani danga pagpaaputan malambung kanyu galit. 27 Ag danga pagpakan-i niyu rugar ti diyablu. 28 Ti mananakaw danga yi magpakatakaw. Bagkus ngap pagpakasipag yi siya sa tarabahu, gamitun kay kamang sa una hintay pag buruwatun mayad hampay may miawat siya sa manga tawu may pangailangan. 29 Danga kamu magbagaw daut, pag-isipa pirmi kanyu baragawun tunda ikamayad, insaktu sa kay udas, hampay makinabangan manga nakadnug. 30 Danga pagpakan-i niyu karukuan ti Ispiritu Banal Diyus dahil siya yi ngani ti pinagkapirma Diyus sa kanyu, ti puruyba hampay kamu kay pagkilalan-un aban nu Rumas-ug ti taning kaudasan nu kita kay yi iribri. 31 Bul-a yi niyu ti magkutub daut, ti pusuk yi pag isug hanggan ti galit. Danga kamu magpamarahak, una magpuya, danga yi may hamnu galit. 32 Bagkus ngap pagpakabuut kamu, pagparasunaidan kamu, pagparatawadan sa kada usa parihu sa kay nagpatawad Diyus sa kanyu dahil sa kan Kiristu.
1 Kamu kabay kay manga anak Diyus pagmahalun niya. Huwada niyu siya. 2 Pag-ugali kamu lubus may pagmahal parihu sa kan Kiristu. Dahil sa kay pagmahal sa kanta, ipinakaun niya kay buhi nagpakamatay siya ga usa ka mabanglu pag panagda pagbayaun Diyus. 3 Kamu manga nasakup sa Diyus, nakan ngani danga yi magbuwat una magsampit man sa harampangan una kabitay pag kalasi magpanguragin, kayagtingan una manga mahalay pag hilig. 4 Danga yi pagpakan-i rugar una hintay pag mahalay, una manga harampangan ud may kabuluhan, una ti harakutan ud may pulus. Bagkus ngap pagpasalamat gid kamu sa Diyus. 5 Alam diman niyu unman may kaparti sa kaharian Diyus ag ni Kiristu ti tawu nu magpanguragin, nu maraw-ay, nu maraibgun sa kasiyunan, dahil ti maraibgun sa kasiyunan parihu sa magsamba sa diyusdiyusan. 6 Danga kamu padaradara una sa kantapu sa kanda baragawun mahakut sa tunda pag manga buwat. Dahil sa katida pag buwat magkagalit ti Diyus sa manga tawu supakil. 7 Nakan ngani danga kamu magpasalbug sa manga katunda pag kalasi tawu. 8 Kaybi kamu sakup sa kadudulman, dapat taynguna kamu sakup yi sa marayaw dahil sa kanyu pakiusa sa Panginuun. Nakan ngani pag-ugali kamu parihu sa manga tawu sakup yi sa marayaw. 9 Dahil ti ugali sa marayaw kay burak lunsay mayad, matadlung hanggan tutuu. 10 Pag-adali niyu nu hintay ti pagbayaun Panginuun. 11 Danga kamu magpasalbug sa manga tawu magbuwat sa balaw ikamayad, sa manga ugali sakup sa kadudulman. Bagkus ngap ipaburayhaw niyu ti daut nida manga buwat. 12 Dahil makakaray-a sabihun ti manga pagbuwatun nida sa lihim. 13 Nu marayawan ti tanan buwat, makitan ti daut ti mayad. 14 Dahil karayawan yi ngani tigpakilala sa tanan. Nakan ngani pagsabihun magkun, "Pag-imata yi kawu ginan sa katurugan, Pagkabuhi yi kawu ginan sa kamatayan, Rayawan yi kawu ni Kiristu." 15 Nakan ngani pagmadahan yi gid kamu sa kanyu mag-ugali. Pag-ugali kamu parihu sa manga matinudukun, danga parihu sa manga unman may namuangan. 16 Daut yi ngani nakan ti ugali taga kalibutan kainda. Nakan danga pagpalawyan niyu nu may rugar waya makabuwat mayad. 17 Pagmabut-anin kamu. Intindiha niyu nu hintay ti kagustuhan Panginuun. 18 Danga kamu maglangu dahil makarangga tunda sa mayad pag ugali. Bagkus alwasiha niyu sa masuldan kamu Ispiritu Banal. 19 Pagmirinsanan kamu pagkarantahan Bagaw Diyus, manga magdayaw sa Diyus hanggan manga kanta angay sa kay udyuk Ispiritu. Pagkanta kamu ginan sa kanyu buu tagipusuun, pagdayaw kamu sa Panginuun. 20 Pirmi kamu pagpasalamat sa Diyus Ama tungkul sa tanan bagay sa kay ngaran nita Panginuun Hisu-Kiristu. 21 Pagparasakpan kamu sa usa kag sa usa, tanda sa kanyu paggalang sa kan Kiristu. 22 Kamu pag manga babayi, pagpasakup kamu sa kanyu sadili asawa, parihu diman sa kanyu magpasakup sa Panginuun. 23 Dahil lalaki tigdara ulu sa kay asawa babayi, parihu ga kan Kiristu tigdara ulu sa iglisya imaw kay bilug. Siya diman waydi ti manugribri iglisya. 24 Nu kabitay ti iglisya magpasakup sa kan Kiristu, katunda diman waydi ti manga babayi kailangan pasakup sa kanda sadili asawa sa tanan bagay. 25 Kamu pag manga lalaki, mahalun niyu kanyu sadili asawa babayi parihu diman sa kay pagmahal ni Kiristu sa iglisya. Ipinakaun kabay niya kay buhi, nagpakamatay siya para sa iglisya, 26 hampay kay lumpiyuhun sa danum ag sa Bagaw bag-u ipasakup niya sa Diyus. 27 Kay binuwat niya tunda hampay ipaatubang niya sa kay atubangan ti iglisya masnag, unman may huput kadautan, unman may yukut, lubus nasakup sa Diyus, lubus yi lang marinu. 28 Kailangan mahalun manga lalaki kanda sadili asawa parihu sa kanda sadili bilug. Nu ti lalaki magmahal sa kay asawa, magmahal siya sa kay sadili bilug. 29 Unman may tawu magkadaut sa kay sadili bilug, lalu ngap pagpakan-an ag pag-&alagaan niya, parihu diman sa binwat ni Kiristu sa iglisya. 30 Dahil kita kay manga gamit niya bilug. 31 May pagsabihun sa Banal Kasuratan magkun, "Nakan ngani tayakan lalaki kay ama hanggan kay ina, magkausa sida mag-asawa bag-u sida magkabuu usa yi ka nayi." 32 Inda ti usa ka pinakamahalaga ag madalum pag katutuuhanan. Kang isip inda tungkul sa kan Kiristu ag tungkul sa iglisya. 33 Dapat inda may ibug sabihun diman tabug sa kanyu sa kada usa. Ti kada lalaki kailangan mahalun niya kay sadili asawa, pagga kanya diman sadili. Ti kada babayi kailangan paggalang sa kay sadili asawa lalaki.
1 Kamu pag manga anak, pagsunud sa kanyu manga gurang. Katida ti dapat niyu buwatun nu kamu magsarig sa kan Kiristu. 2 Kay sabi sa Banal Kasuratan magkun, "Galanga nimu kanmu ama hanggan kanmu ina hampay kawu umalwan kanmu kahamtangan ag lumawig kanmu buhi sa kanmu ulian pag daga." Inda ti un-an pag sugu may tapil pangaku. 4 Kamu pag manga gurangun, danga pakahigpiti kanyu anak barang magkagalit sa kanyu. Bagkus ngap ginan waya sa diit paanadun niyu sida sa ugali angay sa Bagaw Panginuun. 5 Kamu pag manga panawuhun, pagsunud kamu sa kanyu manga amu sitay sa babaw daga, pagmay dala hanggan galang sa kanyu magtupad sa kanda bilang ga si Kiristu diman kanyu pagsirbihan. 6 Una mag-akitan manga tawu, una unman mag-akitan, pagkatunda diman kanyu buwatun, balaw sa ikabaya tawu, nu unman dahil kamu manga panawuhun ni Kiristu buluntadan kamu pagtupad sa kagustuhan Diyus. 7 Pagsirbi kamu pagmaariwaya kanyu naisipan pagga sa Panginuun diman kanyu pagsirbi ag balaw lang sa tawu. 8 Dahil naalaman yi niyu gantihan di Panginuun ti kada magbuwat mayad una panawuhun una bukun panawuhun. 9 Kamu pag manga amu, pagkaayad kamu sa kanyu manga panawuhun, danga waydi niyu pagpakapadalaa, dahil alam di niyu parihu lang waydi kamu panawuhun usa lang ka Panginuun sa langit, ud may pag-apihun sa kanyu tanan. 10 Inda wadi kang bilin sa kanyu, pagpakarig-un kamu dahil sa kanyu pakiusa sa kan Kiristu ag dahil sa awat niya daka pag kapangyarihan. 11 Isulung niyu ti panangga kay ipinakaun Diyus sa kanyu, hampay may panlaban kamu sa kay manga paraan diyablu. 12 Dahil kanta kalaban balaw manga tawu, nu unman ti kagadhan manga labang sa panungaan langit daga, manga pinunu, manga may kapangyarihan hanggan manga manugpamahala sa kadudulman magsaklaw sa inda pag kalibutan. 13 Nakan ngani isulung niyu ti panangga ginan sa Diyus. Nu katunda makatiis kamu sa kanyu maglaban nu Rumas-ug ti daut pag udas. Bag-u nu matapus tunda kanyu naglaban, marig-un diman kamu sa kanyu pagsarig sa Panginuun. 14 Nakan ngani pagpirmi alistu kamu. Ihawud niyu ti katutuuhanan. Ti katadlungan kanyu panangga isulung yi sa kanyu dubdub. 15 Pagmay ga lapak yi kanyu raprapa kanyu maghanda manudlu sa Mayad pag Barita tungkul sa kahusayan Diyus. 16 Danga malimtan niyu kanyu pagsarig sa kan Kiristu, imaw kanyu panangga hanggan panmatay sa tanan maglabdab pag ugyung ni Satanas. 17 Ikalu niyu ti kaliktasan. Pagsa kanyu kamang ti baladaw pakaun Ispiritu, kay ibug sabihun tunda kay ngani Bagaw Diyus. 18 Tanan tanan inda buwata niyu pagmay darangin paghagad awat sa Panginuun. Pagdarangin kamu sa kada udas angay sa kay udyuk Ispiritu Banal. Nakan ngani pagpirmi gid kamu alistu, dag-apas kamu sa darangin sa tanan manga nasakup sa Diyus. 19 Daranginan diman niyu aku hampay pakan-an kang-ud gid pag baragawun, agud ilubus kang katutuman sa kang magpanudlu sa madalum pag katutuuhanan tungkul sa Mayad pag Barita. 20 Sinugu aku Diyus hampay manudlu sa inda pag Mayad pag Barita una aku sa pirisuhan taynguna. Nakan ngani daranginan yi gid niyu aku hampay ilubus niku kang katutuman sa kang magpanudlu unman may subra unman diman may kurang. 21 Ti pagmayadun nita pag patar-ari ag ti matinupadun sa kay buruwatun Panginuun, si Tikiku ngani imaw ti bumarita sa kanyu tanan bagay tungkul sa kang kahamtangan hanggan kang manga buwat. 22 Nakan pagsuguun niku siya asan tag sa kanyu hampay maalaman niyu kanmi kahamtangan ag hampay bumisug kanyu tagipusuun. 23 Magdarangin aku hampay ti Diyus Ama ag ti Panginuun Hisu-Kiristu pumakaun sa tanan manga patar-ari kay kahusayan hanggan kay pagmahal may tapil pagsarig. 24 Sa tanan tawu nu kanda pagmahal sa Panginuun Hisu-Kiristu balaw magkauman-&uman, pagsa kanda yi ngap kay papalad Diyus.
1 Inda ti may surat kami ni Pablu ni Timutiyu, kay manga panawuhun ni Kiristu Hisus, tabug sa tanan manga pinili Diyus, sa manga magpakiusa sa kan Kiristu Hisus mag-uli asan sa banwa Pilipus hampun sa manga manug-asiwa iglisya hanggan kanda manga kaawat. 2 Kamu kang pag-idarangin hampay sa kanyu yi kay papalad hanggan kahusayan ginan sa kanta Diyus Ama hanggan sa Panginuun Hisu-Kiristu. 3 Magpasalamat aku sa kang Diyus sa kada magkaisipan niku kamu. 4 Sa kada aku magdarangin, pirmi masulung aku magdarangin tungkul sa kanyu tanan. 5 Dahil inawatan niyu aku sa kang magpadakit Mayad pag Barita ginan waya sa kabag-u kanyu nagsarig sa kan Kiristu hanggan taynguna tugka. 6 Alam niku pihu gid tapusun Diyus hanggan sa udwaya kaudasan pagbalik ni Kiristu Hisus ti mayad pag tarabahu kay inumpisahan sa kanyu. 7 Magbaya aku sa kanyu, pirmi diman kang pag-isipun sa kang tagipusuun. Nakan balaw salan kang pag-isipun katida sa kanyu tanan, kabay kamu tanan minsan sa kangku may kabahagi sa inda pag marinu pag katungkulan kay ipinakaun Diyus sa kangku una taynguna sa kang sa pirisuhan hanggan sa kang magtultul sa Mayad pag Barita sa atubangan husgadu. 8 Alam di Diyus tutuu kang pagsabihun nu kabitay kang maghanap sa kanyu tanan parihu ga kan Kiristu Hisus diman magmahal sa kanyu. 9 Inda ngani kang darangin sa kanyu hampay kanyu pagmahal lalu waya dumaka, hampay mabut-anin kamu ag dumunung sa katutuuhanan Diyus. 10 Nu katida madunung kamu magpili sa pinakamayad. Bag-u kamu manga malumpiyu yi ag unman may ikasabi sa kaudasan aban nu Rumas-ug si Kiristu. 11 Nu katunda kamu, mag-akitan sa kanyu buhi ti lunsay marinu gid pag ugali dahil sa kay mayad buwat ni Hisu-Kiristu sa kanyu, sa lubus ikadayaw sa Diyus. 12 Gustu niku mana pagmaalaman niyu, manga patar-ari, kuntay ginan sa manga nangyari sa kangku balaw naampara ti Mayad pag Barita. Bagkus ngap lalu nilantag. 13 Dahil naalaman manga guwardiya sa balay ni Pangulu Hari hanggan manga iba sitay kuntay aku napirisu dahil sa kang magsunud sa kan Kiristu. 14 Ti mayamu pag manga patar-ari lalu matutum kanda naisipan sa Panginuun dahil sa kang sa pirisuhan. Lalu waya ngap udyi sida magkadala magtudlu Bagaw Diyus. 15 Tutuu may manga tawu pag-ibarita nida si Kiristu dahil sa kanda maghirak hanggan mag-away. Dapat ti iba ginan ngap sa mayad pag naisipan kanda pag-ibarita si Kiristu. 16 May pagmahal sida sa kangku, nakan pag-ibarita nida si Kiristu, dahil magkaalaman nida aku pinatukahan Diyus katungkulan sa pagtudlu sa Mayad pag Barita. 17 Una ti manga maghirak magtudlu diman waydi tungkul sa kan Kiristu, dapat unman buu kanda naisipan sa Panginuun. Kanda turunu sa ikaayad lang nida sadili kahamtangan ag gustu ngap nida pakurian waya aku sitay sa pirisuhan. 18 Hayga lugud? Magbaya diman aku basta pag-itudlu si Kiristu sa una hintay pag paraan, una sa tutuu una abi sa pabalhinguun. Pirmi magbaya aku, 19 dahil alam niku pihu di gid aku palpasan aban ginan sa pirisuhan, dahil aku kanyu pag-idarangin ag dahil sa kang-ud pag awat ginan sa Ispiritu ni Hisu-Kiristu. 20 Daka gid kang kagustuhan ag may pag-asa aku dayu gid aku umalinlangan. Bagkus pirmi matutum kang naisipan lalu waya ngap inmamat taynguna agud sa mamatay sa mabuhi man hampay nu makitan aku manga iba, lalu waya dayawan nida si Kiristu. 21 Dahil nu para sa kangku si Kiristu kang tutuu pag buhi ag may pakinabang ngap nu aku mamatay. 22 Dapat abi nu udwaya waydi mamatay aku, mamakibudlay waya aku sa mayad pag buruwatun. Udwaya niku magkaalaman nu hintay kang magustuhan. 23 Aku napil-it yi sa duwa ka bagay. Kang gustu aku mamatay hampay kaibahan yi ni Kiristu, dahil pihu gid imaw ti pinakamayad. 24 Dapat ay nu aku dugay waya kang buhi sitay sa babaw daga, tunda sa ikaayad waya niyu. 25 Alam yi niku pihu madugay waya aku sitay kaibahan niyu tanan hampay kamu kang awatan sa lalu kamu rumig-un ag makabaya sa kanyu pagsarig sa kan Kiristu. 26 Nu katunda nu aku bumalik maan sa kanyu, lalu waya pahalagaan niyu aku angay sa kanyu pakiusa sa kan Kiristu Hisus. 27 Nakan ngani kailangan gid kamu pag-ugali angay sa Mayad pag Barita tungkul sa kan Kiristu. Nu katunda una aku makaasan ag makitan niku kamu, una unman, maalaman diman niku mirinsan di kanyu turunu ag mag-arawatan kamu hampay maingatan ti kanta pagsarigan Mayad pag Barita una may manga kalaban. 28 Danga kamu madiklahan sa manga mag-unuunu sa kanyu. Pirmi pagmatutum kanyu naisipan. Kanyu matutum pag naisipan imaw ti malinaw pag puruyba kuntay sida pihu aban talu. Kamu bay kay iribri Diyus. 29 Pinili diman kamu ag pinakan-an karampatan hampay magsirbi sa kan Kiristu, kay ibug sabihun balaw lang tugka sa magsarig sa kan Kiristu nu unman hanggan sa mag-agwanta para sa kanya. 30 Kamu hanggan aku minsan diman kita sa inda pag labanan kanyu nakitan kaybi sa kangku ag kanyu naalaman kang nalakawan taynguna.
1 Pagpabisugun ungud kamu dahil sa kanyu magpakiusa sa kan Kiristu. Kay pagmahal ni Kiristu tigparig-un sa kanyu naisipan. Magpakiusa waydi kamu sa Ispiritu Banal. Maawaun kamu ag magparasunaidan kamu sa usa kag sa usa. 2 Nakan pagkarausa gid kamu sa kanyu naisipan. Pagpakarausa kamu sa kanyu pagmahal sa usa kag sa usa. Pagkaraminsan kamu sa kanyu kagustuhan hanggan sa kanyu turunu hampay lubus yi aku magbaya dahil sa kanyu. 3 Danga makasadili lang kanyu turunu gayak, danga sa ikadayaw lang sa kanyu sadili. Bagkus ngap lubus pagparakumbabaan kamu sa usa kag sa usa, isipa niyu ti manga iba lalu mayad man sa kanyu sadili bilug. 4 Danga pag-&intindiha lang niyu ti ikamayad niyu sadili. Bagkus ngap pag-arawatan gid kamu sa ikamayad sa kada usa. 5 Kailangan kanyu ugali naisipan pagga kan Kiristu Hisus waydi pag ugali naisipan. 6 Si Hisus daan diman Diyus, unman kailangan maghinaum magpaparihu sa Diyus. 7 Dapat tinalikdan dapu niya tunda tanan tanan, pinili niya ti pagkapanawuhun, nagpaparihu sa manga tawu ag nakitan siya sa histuda tawu. 8 Pagka siya nabilug tawu, nagpakumbaba siya, masurundun siya hanggan tugka sa kamatayan. Sa kurus paman pag namatay. 9 Nakan ngani pinakan-an siya Diyus mataas gid sa tanan pag karampatan. Siya pinakan-an ngaran subra waya sa tanan pag ngaran. 10 Agud ti tanan linalang sa langit, una sa daga, una sa ulian manga namatay lumuhud ag dumayaw sa ngaran ni Hisus. 11 Ipabantug nida tanan magkun, "Si Hisu-Kiristu ti Panginuun," hampay lalu dayawun ti Diyus Ama. 12 Nakan ngani manga patar-ari, kailangan pagmasurundun kamu, lalu taynguna aku unman asan sa kanyu. Paggalang yi gid kamu sa Diyus, pagparargu hanggan sa ud mamhan kanyu karibrihan. 13 Dahil Diyus ti magbuwat sa kanyu kagustuhan hanggan kakayahan hampay makatupad kamu sa kagustuhan niya. 14 Buwata niyu ti tanan pag manga bagay danga sa pilitan ag danga waydi sa barungbadu. 15 Sa kanyu manga kalibut may manga tawu unman mayad kay ugali ag daut kay pagbuwatun. Kailangan kamu pag manga anak Diyus ga mustara sa manga iba tawu malumpiyu kanyu ugali, unman may ikasabi sa kanyu. Nu katunda magduag yi kamu sa kanda karaw-an parihu ga manga pamgasan magrayaw sa langit. 16 Ag itultul niyu ti Mayad pag Barita hampay nu paniwalaan tawu siya may tutuu pag buhi. Nu katida kanyu buwat, kamu kang dayawun sa kaudasan pagbalik ni Kiristu ag pihu kang tarabahu balaw unman may kaganahan hanggan kang budlay balaw nauyang. 17 Nu abi aku matyun, kang dugu ibuhus ga isagda sa Panginuun dungan sa kanyu pag-ipakaun kanyu pagsarig sa kanya. Una abi ti ikamatay niku katida, masulung di aku ag mirinsan kita tanan magbaya. 18 Katunda diman waydi pagmasulung kamu, pakan-an diman waydi niyu aku sa masulung. 19 May pag-asa aku sa Panginuun Hisus hampay udyi dugay masugu niku si Timutiyu asan tag sa kanyu hampay aku balaw yi maruku sa kang naisipan nu mabaritaan niku kanyu kahamtangan asan. 20 Si Timutiyu lang waydi ti parihu ga kangku kay naisipan magpasunaid sa kanyu kahamtangan. 21 Dahil ti pagsipagan manga iba kanda lang sadili pangailangan, unman tungkul sa kay buruwatun ni Hisu-Kiristu. 22 Dapat ay naalaman yi waydi niyu matinupadun si Timutiyu. Inawatan niya aku sa kang magtudlu Mayad pag Barita, parihu ga anak mag-&awat sa kay ama. 23 Nakan mana siya yi gid kang suguun madali asan tag, nu maalaman niku nu hintay ti mangyari sa kang kasu. 24 Dapat may pag-asa aku sa Panginuun makaras-ug diman aku asan udyi waydi dugay. 25 Dapat inisip niku pauliun sa kanyu kanta patar-ari si Ipapruditu. Parihu siya ga kangku manugtarabahu ag sundalu diman Diyus. Siya ti sinugu niyu hampay magdara kanyu pakaun ag rargu makaawat sa kangku sitay. 26 Mag-ayup yi gid siya sa kanyu tanan. Tutuu yi gid pinung-aw siya pagka naalaman niya kuntay nabaritaan niyu siya may sakit. 27 Tutuu ngani nasakit siya. Diit yi lang mamatay. Dapat kinaawaan siya Diyus. Balaw lang siya hanggan aku kinaawaan diman Panginuun hampay balaw manungbawtungbaw kang karukuan. 28 Nakan ngani kang gid gustu pag-atag siya sa kanyu hampay nu makakit kamu sa kanya, makabaya maan kamu ag hampay mab-ul waydi kang karukuan. 29 Kailangan tanggapun ngani niyu siya may daka pag kabayaan dahil magkarausa kamu sa kanyu pakiusa sa Panginuun. Ti katunda pag manga tawu kay buwat ga kanya kailangan pagpahalagaan gid niyu. 30 Arani yi lang siya sa kamatayun, dahil unman inirangan niya kay budlay sa kay buruwatun kay tinanggap ginan sa kan Kiristu. Inawatan niya aku pinarargu niya kanyu iinawat sa kangku tugka sa kanyu makaya.
1 Inda waya duy, manga patar-ari, kang mana sabihun sa kanyu, pagbaya kamu dahil sa kanyu pakiusa sa Panginuun. Una kas-a waya kang ulitun kang isinurat sitay, unman may makuri sa kangku. Dapat imaw ngap tigparig-un sa kanyu. 2 Pag-aman kamu sa manga tawu magbuwat daut, kanda ugali ga idu. Amanan niyu tunda pag manga tawu imaw tigbiyag sa bilug. 3 Kabay kita yi ngap ti tutuu manga tinuri. Dahil magsamba kita sa Diyus angay sa udyuk Ispiritu Banal. Magbaya kita sa kanta pakiusa sa kan Kiristu Hisus ag unman may pagsarigan kita sa kanta sadili bilug. 4 Nu sa ungud aku makasarig mana sa kang sadili pagkatawu. Nu ti iba mag-isip may sarigan sa kanda sadili pagkatawu, lalu gid aku masabi may pagsarigan sa kang sadili pagkatawu. 5 Pagka sa ikawalu pag sirang ginan sa pagkalusad niku, tinuri aku. Linahi aku ni Israil, minamat ni Binhamin, Hibriyu kang manga gurang. Sa kang mag-ungud magtupad sa Kasuguan manga Hudiyu, Parisiyu aku. 6 Masyadu masipag aku nakan inunuunu niku ti iglisya. Nu bay tungkul sa katadlungan ginan sa kang magtupad gid sa Kasuguan, unman may ikasabi. 7 Madi kaybi mahalaga sa kangku kang pagtupad sa Kasuguan manga Hudiyu, taynguna udyi ngap pagpahalagahan niku tunda, dahil pinili niku si Kiristu ti mayad. 8 Balaw lang kang pagtupad sa Kasuguan, hanggan ti tanan pag manga buruwatun kang sinipagan kaybi pag-isipun niku udyi gid ngap mahalaga sa kangku taynguna. Dahil ti pinakamahalaga sa kangku kang pagkilala hanggan kang pakiusa sa kan Kiristu Hisus sa kang Panginuun. Dahil sa kanya dinayu yi niku ti tanan pag manga bagay, ga paruk yi lang balaw yi pagpahalagahan niku hampay sa kangku yi si Kiristu, imaw ti tutuu gid mahalaga, 9 ag hampay aku lubus magpakiusa sa kanya. Udyi aku pagkilalan-un Diyus kuntay aku matadlung dahil lang sa kang magtupad sa Kasuguan ni Muysis. Pagkilalan-un aku Diyus kuntay matadlung dahil aku magsarig sa kan Kiristu. Inda pag katadlungan ginan ngani sa Diyus dahil sa kang pagsarig. 10 Kang gustu lang gid makilala niku si Kiristu, maungdan ti kapangyarihan niya pagkabuhi uman ag masaydan niku kay kakurian ag miparihu aku sa kanya hanggan sa kay kamatayan. 11 Nu katunda may pag-asa aku hampay aban buhiun aku Diyus ginan sa kamatayan. 12 Unman kuntay sa nakaaput yi aku ag unman waya aku kang-ud. Dapat lalu ngapu magparargu aku hampay maaput niku ti turunu kay ihinanda ni Kiristu para sa kangku, pagka aku kay binutung. 13 Manga patar-ari, unman pag-isipun niku kuntay aku nakaaput yi sa turunu. Dapat ay usa lang ka bagay kang pagbuwatun, balaw yi pag-isipun niku ti manga nalawyan yi. Lalu pagtuyuun niku ti turunu sa kang paratabgan. 14 Nakan magparargu aku sa katugkaan hampay tanggapun niku ti pirimyu, nu magtawag yi aban ti Diyus sa kangku ag butungun aku ni Kiristu Hisus tabug sa langit. 15 Katida diman waydi kailangan kita tanan kanta pag-iisip nu marig-un kita sa kanta pagsarig. Nu bay unman kainda kanyu pag-isipun, ipakilala diman waydi Diyus tida sa kanyu. 16 Pagparargu yi lang kita parihu ga kanta diman ugali. 17 Manga patar-ari, kamu tanan tanan paghuwad sa kangku. Bantayan niyu ti manga magtupad sa kanmi mustara sa kanyu. 18 Pirmi kang sinabi sa kanyu ag maglumi aku sa kang tagipusuun sa kang magsabi maan sa kanyu kuntay mayamu tawu mag-ugali maglaban sa kamatayan ni Kiristu sa kurus. 19 Kanda aban ras-ugan sa kaparusahan sa impirnu, dahil kanda sadili kailangan imaw kanda pinagkadiyus. Ti kanda ikakay-a mana, imaw ngap ti pag-ipadayaw nida. Kanda paghingbutun ti manga bagay lang sitay sa babaw daga. 20 Kita bay manga taga langit. Magpatigagad kita sa kanta Manugribri, sa Panginuun Hisu-Kiristu ginan sa lantit. 21 Gamitun niya kay kamaskihan hampay kanta malumuy pag ginhawa bag-uhun niya agud pumarihu sa kay sadili bilug may kadayawan. Tunda pag kamaskihan imaw diman kay paggamitun hampay masakup niya ti tanan pag manga bagay tabug sa kay sadili.
1 Kamu, duy manga patar-ari, kang gid pagmayadun. Mag-ayup yi gid aku sa kanyu, dahil masulung aku sa kanyu, kamu kang gid pinagkapirimyu. Nakan ngani pagpakarig-un gid kamu sa kanyu pakiusa sa Panginuun. 2 Kang pagsabihan sida ni Iudyas ni Sintiki, pagkarausa kanda naisipan dahil sa kanda magpakiusa sa Panginuun. 3 Ag kawu duy usa ka mayad pag kaawat niku, kang pagsabihan diman kawu, awati nimu asan pag manga babayi hampay udyi sida mag-&arawayan. Dahil manga masipag diman waydi sida kaibahan niku sa magpadakit Mayad pag Barita. Nagkarausa diman sida sa buruwatun tabug sa kan Kaluminti hanggan sa tanan niku pag manga kaibahan sa tarabahu. Kanda manga ngaran nisurat sa listahan pag ribru. Ati pag ilinista ti manga ngaran tawu pinakan-an buhi unman may katapusan. 4 Pagbaya kamu pirmi sa kanyu magpakiusa sa Panginuun, ulitun waya gid niku maan magkun, pagbaya kamu. 5 Kailangan pagmakilala gid tanan tawu kanyu kaalumanay. Udyi dugay aban Rumas-ug yi ti Panginuun. 6 Danga kamu magkaarimputu sa una hintay pag bagay. Bagkus ngap pagdarangin kamu paghagad sa Diyus kanyu kailangan pagmay pasalamat diman. 7 Balaw matabu nita masalman kay kahusayan Diyus. Imaw pag kahusayan ti makaingat sa kanyu tagipusuun hanggan sa kanyu naisipan sa kanyu pakiusa sa kan Kiristu Hisus. 8 Inda waya manga patar-ari, kang pagsabihun sa kanyu. Ilubus niyu kanyu naisipan sa una hintay pag manga kaayadan sa ikadayaw manga iba. Nakan ngani pag-ugali yi kanyu naisipan sa manga lunsay tutuu, sa manga pagbayaun manga tawu, sa manga mahal, sa balaw may ikasabi, sa maalumanay pag-iisip, sa manga pagmahalun manga iba. 9 Kailangan kanyu tupadun una hintay kang itinudlu ag ipinadakit sa kanyu. Sunda gid niyu ti kanyu nadnugan ag nakitan sa kangku. Nu katunda kamu, mangulian sa kanyu ti Diyus ti gimpuunan nita kahusayan. 10 Angay sa kang magpakiusa sa Panginuun, aku tutuu gid magbaya dahil pagka nakalawuy dugay pag timpu, nakahimu maan kamu nakaawat sa kangku. Balaw kuntay inapasan niyu kanyu pasunaid sa kangku. Nakan lang unman may rugar kamu makaawat sa kangku. 11 Balaw kang gustu sabihun kuntay aku may kailangan, dahil kang yi waydi naanadan ti unman magsarig sa iba una makuri kang kahamtangan. 12 Nalakawan yi niku ti kakurangan, nalakawan yi waydi niku ti kasaganahan. Naanadan yi nku ti masulung pag naisipan una naan katpung aku, una kapira, una aku busug, una malun-us, una sa kasaganahan, una sa kakurangan. 13 Kaya niku mabuwat inda tanan dahil si Kiristu tigpabisug sa kangku. 14 Dapat ay mayad gid kanyu binwat, pagka inawatan niyu aku sa kang kakurian. 15 Naalaman diman niyu kuntay kamu lang pag taga Pilipus ti nakaabay sa kangku sa makuri kag sa maalwan, kang nighit ginan sa Masidunya sa kang kabag-u waya tudlu Mayad pag Barita sa kanyu. 16 Dahil pagka aku ati sa Tisalunika, ipinadara niyu tabug sa kangku balaw lang kas-a ginan kang garamitun. 17 Balaw kuntay sa may paghingbutun manga pakaun. Dapat ti mahalaga gid sa kangku nu yumamu waya kanyu manga mayad buwat hampay may matanggap waydi kamu pirimyu aban. 18 Inda duy pagsurat kanyu pinagkarisibu sa daka pag ipinakaun niyu sa kangku. Subra waya sa kang pangailangan kanyu awat kay dinara ni Ipapruditu tag sa kangku. Inda usa ka pakaun mabanglu sa Diyus, usa ka pakaun mahal gid, talaga lubus pagbayaun niya. 19 Ginan sa kay kayamanan unman may katabwanan, ipakaun niya ti tanan niyu kailangan dahil sa kanyu gid magpakiusa sa kan Kiristu Hisus. 20 Dayawun nita kanta Diyus Ama hanggan aban. Amin. 21 Ipadakit niyu kang kamusta sa tanan manga pinili Diyus, sa manga magpakiusa sa kan Kiristu Hisus. Kang kaibahan sitay kanta manga patar-ari magpaingana sa kanyu, sa manga taga Pilipus nu kabitay waydi kamu asan. 22 Ti tanan manga pinili Diyus, lalu yi ti manga magtarabahu sa balay ni Pangulu Hari, magpaingana nu kabitay waydi kamu asan. 23 Kamu kang pag-idarangin hampay sa kanyu tanan kay papalad nita Panginuun Hisu-Kiristu.
1 Inda ti may surat si Pablu, dapat kanta patar-ari si Timutiyu magkamusta diman waydi sa kanyu. Aku ti kinaibgan Diyus hampay Apustul ni Kiristu Hisus. 2 Inda pag surat tabug sa manga nasakup sa Diyus mag-uli sa Kulusas, sa manga matinupadun pag patar-ari sa kan Kiristu. Kamu kang pag-idarangin hampay sa kanyu yi kay papalad hanggan kahusayan ginan sa kanta Diyus Ama. 3 Pirmi kami magpasalamat sa Diyus, sa Ama nita Panginuun Hisu-Kiristu sa kada nimi magdarangin sa kanyu. 4 Dahil naalaman nimi ti tungkul sa kanyu pagsarig sa kan Kiristu Hisus hanggan sa kanyu pagmahal sa tanan manga nasakup sa Diyus. 5 Dahil may pag-asa kamu makarubtan niyu ti manga inalistu para sa kanyu ati sa langit. Nasalman yi niyu ti tungkul sa pag-asahan niyu inda pagka itinudlu sa kanyu ti tutuu pag barita Diyus, imaw ti Mayad pag Barita. 6 Inda pag Mayad pag Barita linmantap sa buu kalibutan ag magdara papalad parihu diman sa nangyari sa kanyu pagka nadnugan niyu ag nasalman niyu ti katutuuhanan tungkul sa kay mayad pag nabubut-un Diyus. 7 Inda inadalan niyu ginan sa kan Ipapras, imaw ti matinupadun pag suruguun ni Kiristu. Parihu diman ga kanmi siya panawuhun waydi sa buruwatun, kanmi pinagkaginhawa sa kanyu. 8 Ginan sa kan Ipapras pag naalaman nimi tungkul sa pagmahal kay ipinakaun Ispiritu sa kanyu. 9 Nakan ngani pagka naalaman nimi inda, pirmi nimi pag-idarangin kamu sa Diyus hampay ilubus niya sa kanyu ti kang-ud pag kadunungan kay pakaun Ispiritu, hampay lalu niyu maintindihan kay kagustuhan Diyus. 10 Nu katunda, makaugali kamu angay sa Panginuun hampay kay pagbayaun, abunda sa mayad buwat ag dumaka kanyu pagkilala sa Diyus. 11 Pag-idarangin diman nimi kamu hampay kay daka gid pag kapangyarihan Diyus ti pumarig-un sa kanyu, hampay masulung di gid kamu mag-agwanta sa tanan kakurian, 12 ag hampay kamu magbaya gid magpasalamat sa Diyus Ama, dahil binwat niya kamu kang-ud hampay may kahuray kamu sa kay kaharian hanggan karayawan, pinaminsan kamu sa manga nasakup sa kanya. 13 Irinibri niya kita ginan sa kamaskihan kadudulman, ipinauli yi niya kita sa kaharian niya magmayadun pag Anak. 14 Dahil sa Anak, ipinatawad yi kanta manga kasalanan ag irinibri kita. 15 Sa kan Kiristu pag makilala ti Diyus, ti unman mag-akitan sa mata. Si Kiristu daan di Anak Diyus. Siya diman ti may kapangyarihan sa tanan linalang. 16 Dahil ti tanan tanan bagay una sa langit una sa babaw daga, ti manga mag-akitan hanggan ti unman mag-akitan, linalang Diyus sa panab-anan ni Kiristu, para diman sa kan Kiristu ti tanan tunda. Una ti manga anghil mataas kay katungkulan, ti manga magpamahala, ti manga naminunu, ti may manga kamaskihan sa langit hanggan sa babaw daga, kay diman linalang Diyus sa panab-anan ni Kiristu hampay ipasakup niya sa kan Kiristu. 17 Si Kiristu ti un-an sa tanan. Unman may kaayusan ti tanan manga bagay nu unman ginan lang sa kanya. 18 Siya ti pinagkaulu, ti iglisya kay pinagkabilug. Siya tigpakaun buhi sa iglisya. Siya ti panganay, daan di siya Anak Diyus. Siya ti un-an nabuhi uman hampay siya yi gid ti makapangyarihan sa tanan. 19 Kay nagustuhan Diyus nu kabitay siya kay pagka-Diyus pagkatunda diman kay Anak. 20 Minahal niya ti buu kalibutan hampay miusa maan sa kanya sa panab-anan niya Anak. Sa panab-anan dugu ni Kiristu ibinuhus sa kay namatay sa kurus, pinausa Diyus tag sa kay sadili ti tanan bagay linalang una sa langit, una sa bagaw daga. 21 Kumun diman kamu, kaybi kamu arayu sa Diyus, kanyu naisipan lunsay yi lang gid laban sa Diyus. Kanyu buwat pudu kadautan. 22 Dapat ay kamu pinausa Diyus tag sa kay sadili, dahil sa kay kamatayan ni Kiristu angay sa kay pagkatawu, hampay kamu ipaatubang sa Diyus ud may ikasabi, manga sakup yi sa Diyus, unman may kutub daut. 23 Kailangan kamu pagmarig-un gid sa kanyu pagsarig sa Mayad pag Barita, danga pagpabay-ani niyu, barang maanggihut kamu ginan sa pag-asa kanyu tinanggap pagka nadnugan niyu ti Mayad pag Barita. Kay nagustuhan Diyus aku si Pablu hampay magsirbi sa Mayad pag Barita. Imaw diman pag Mayad pag Barita ti ipagpaliwanag sa tanan manga tawu. 24 Magbaya aku sa kang mag-agwanta sa kang bilug taynguna alang alang sa kanyu, dahil sa panab-anan niku kakurian inda pag-iparargu niku ti pag-agwantahun parihu ga kay inagwanta ni Kiristu para sa iglisya, sa kay pinagkabilug. 25 Ipinakaun Diyus sa kangku inda pag katungkulan alang alang sa kanyu, nakan manugsirbi yi aku sa iglisya. Kang yi gid katungkulan hampay lubus kang pag-itudlu kay Bagaw Diyus sa kanyu. 26 Imaw yi ti madalum pag katutuuhanan, kaybi di waya ginan sa kadugayan pag panahun unman waya nipaburayhaw niya sa manga tawu, dapat taynguna ipinaalam yi Diyus sa manga nasakup sa kanya. 27 Kay gustu Diyus ipaalam sa kanda inda pag daka gid pag makadululaw pag katutuuhanan tungkul sa tanan nasyun tawu. Inda yi ngani ti madalum pag katutuuhanan, magkun, sa kanyu yi gid si Kiristu, nakan may pag-asa kamu miminsan sa Diyus ati sa kay kadayawan. 28 Nakan ngani pag-itudlu nimi si Kiristu sa tanan tawu. Pagpaalalahanan nimi sida, malinaw gid kanmi pagtudluan sida angay sa kanmi makakaya hampay mipaatubang nimi sa Diyus ti kada usa kang-ud ag unman may ikasabi dahil sa kanda magpakiusa sa kan Kiristu. 29 Nakan purus yi gid aku sa kang magpakibudlay angay sa daka gid pag kapangyarihan kay pakaun ni Kiristu sa kangku.
1 Gustu niku pagmaalaman niyu nu kabitay kay kadaka kang magmasigasid para sa kanyu, una sa manga taga Laudisiya hanggan sa tanan udwaya nakakit sa kangku. 2 Nakan katida kang pagbuwatun hampay rumig-un kanda tagipusuun ag hampay sida paminsanun sa pagmahal. Nu katida may kang-ud sida pag-&intindi sa katutuuhanan bag-u kilalan-un nida si Kiristu, imaw ti madalum pag katutuuhanan kaybi ginan udwaya ipinaburayhaw Diyus. 3 Sa kanya pag nakapundu ti lubus mahalaga pag kadunungan hanggan kaalaman. 4 Kang pagsabihun inda hampay una si unu balaw may pumatalang sa kanyu sa kanda manga hampang palingu. 5 Madi aku unman asan, balaw magkalimtan niku kamu, aku magbaya sa kanyu maayus pag ugali hanggan sa kanyu marig-un pag sarig sa kan Kiristu. 6 Nagpasakup yi kamu sa kan Kiristu Hisus sa kanyu Panginuun, nakan pag-ugali kamu magpakiusa sa kanya. 7 Pagga may gamut tulusan kamu sa kanya ag isarig niyu kanyu buhi sa kanya. Pagpakarig-un kamu sa kanyu pagsarig angay sa itinudlu sa kanyu. Pagpirmi yi gid kamu pagpasalamat sa Diyus. 8 Pag-aman kamu hampay balaw kamu madara kadunungan unman may kabuluhan pinathaw lang tawu, manga pinangawat ginurang, manga ugali kalibutan. Tunda pag kadunungan balaw ginan sa kan Kiristu. 9 Dahil pagka nabilug tawu si Kiristu, sa kanya diman ti kalubusan Diyus. 10 Sa kanyu magpakiusa sa kan Kiristu kang-ud diman hanggan kamu. Sakup diman niya ti tanan kapangyarihan una sa langit, una sa babaw daga. 11 Dahil sa kanyu pakiusa sa kan Kiristu, ga tinuri yi kamu, balaw sa kanyu bilug pag tinuri nu unman dahil kamu irinibri sa daut kagustuhan niyu sadili pagkatawu. Inda ti ga tinuri ginan sa kan Kiristu. 12 Pagka itinulbaw kamu, ilinbung kamu kaibahan ni Kiristu. Bag-u nabuhi maan uman niya dahil sa kanyu pagsarig sa makapangyarihan buwat Diyus, imaw ti nagbuhi uman sa kan Kiristu. 13 Kamu pag manga balaw Hudiyu, daan ga tigbak kamu sa kanyu tagipusuun dahil sa kanyu kasalanan ag dahil kamu balaw sakup sa Kasuguan, dapat binuhi uman kamu Diyus kaibahan ni Kiristu. Pinatawad yi kita sa kanta tanan pag manga kasalanan. 14 Pinaiwdan niya kabuluhan ti tanan kasuratan laban sa kanta. Udyi kita may pag-isipun kapanagutan siti. Dinura Diyus tunda pag manga kasuratan pagka imininsan sa kan Kiristu sa kay napaku sa kurus. 15 Sa panab-anan niya kamatayan sa kurus, dinaug ni Kiristu ti takinan manga labang hanggan ti may kapangyarihan sa kalibutan, Ipinakakit niya sa kayamuan tawu kay nanalu sa kanda. 16 Nakan ngani danga yi gid magpasakup kamu sa kanda manga tun-anun tungkul sa manga karan-unun hanggan irinmun, tungkul sa manga kapistahan, tungkul sa manga lapus lati hanggan sirang pamahari. 17 Inda ga manga aninu lang tungkul sa manga bagay Rumas-ug aban dapat si Kiristu ngani ti tutuu. 18 Danga kamu maniwala hampay kanyu pirimyu unman madura sa kanyu. Dahil may manga tawu gustu nida pilitan kamu sa lagat lagat unman maghandum karan-unun hanggan sa magsamba sa manga anghil. Magpalabilabi sida sa kanyu dahil sa kanda nakitan ginan kunu sa Diyus. Dapat unman sida may ipadayawdayaw dahil kanda ugali naisipan parihu lang ga tanan tawu. 19 Nabul-iw yi tunda pag manga tawu sa kan Kiristu, imaw ti ga ulu may kamaskihan sa buu bilug. Ginan sa kan Kiristu pag makatanggap ti bilug kabisugan hampay magkarausa ga may kaluasluasan may manga kusug. Si Kiristu diman ti manug-alaga hanggan ti magpadaka angay sa kay kagustuhan Diyus. 20 Namatay yi kamu kaibahan ni Kiristu, udyi kamu sirung kapangyarihan kadautan maghari sa kalibutan. Hayga kamu mag-ugali waya ga manga taga kalibutan waya. Hayga kamu magpaniwala sa manga tun-anun magkun, 21 "Danga maggaraw tida, danga pagsamiti, danga mag-igpil." 22 Inda manga sugu pag-itudlu lang manga tawu tungkul sa manga bagay udyi mahalaga pagka kinaun yi. 23 Nu sa ungud tunda pag manga turun-anun hanggan manga bilin ga anyu angay sa kadunungan, lalu tunda pag manga bilin tungkul sa pagsamba sa manga anghil ag tunda ngani tungkul sa magpanaguabi magpakumbaba ag tungkul sa magpakuri sa sadili bilug. Dapat tunda tanan unman waydi makaampara sa subra daut pag kagustuhan nida sadili pagkatawu.
1 Kamu ngani binuhi uman kaibahan ni Kiristu. Nakan pagkaibgi niyu ti ihinanda Diyus sa kanyu ati sa langit, ati si Kiristu nakatukaw baliwa sa sikun Diyus nakapaminsan sa kay karampatan maghari. 2 Isip-isipa gid niyu ti manga bagay sa langit, balaw manga bagay sa babaw daga. 3 Dahil namatay yi kamu, kanyu tutuu pag buhi nakatagu sa Diyus, kaibahan ni Kiristu. 4 Si Kiristu ti tutuu pag buhi niyu. Nu miburayhaw siya aban, miburayhaw diman hanggan kamu kaibahan niya, miusa sa kadayawan niya. 5 Nakan kailangan matyun yi lang niyu ti kagustuhan niyu angay waya sa kalibutan, ti panguragin, ti manga mahalay, ti gamun sa kahalayan, ti daut pag manga hilig, ti mairibgun sa kasiyunan imaw diman ti usa ka kalasi panamba sa diyusdiyusan. 6 Dahil nu magbuwat katunda ti tawu, magkagalit ti Diyus sa kanda sa kanda maglabag sa kay kagustuhan. 7 Kaybi di waya nangugali diman kamu sa katida pag kagustuhan angay sa kalibutan. Ati katpung kamu sakup waya sa kanyu daut pag kagustuhan. 8 Dapat kainda, patlikudi yi niyu ti tanan inda, ti galit, ti pusuk yi pag isug, ti magkutub daut. Iwasi yi gid niyu ti pagmuransa, ti mayagting pag baragawun. 9 Danga kamu magpuludilan sa usa kag sa usa, dahil linkas yi niyu ti daan pagkatawu hanggan ti daan pag manga ugali. 10 Isinlung yi niyu ti bag-u pagkatawu, kay linalang Diyus ag kay diman pagbag-&uhun Diyus hampay amat amat kamu lalu ga kay histuda niya ag hampay kang-ud udyi may kurang kanyu pagkilala sa kanya. 11 Nakan ngani ud may naglain parihu lang una manga balaw Hudiyu una manga Hudiyu, una tinuri una balaw tinuri, una manga dayuhan, una manga tawu balaw ga kanta kay ugali, una manga panawuhun una bukun panawuhun. Sa kan Kiristu unman may naglain ti tanan tawu ag siya ti sa kanyu tanan. 12 Kamu manga sakup sa Diyus, kay pinili niya kamu, kay yi gid pagmahalun. Nakan ngani kailangan kamu pagmaawaun, pag-&mayad kanyu nabubut-un, pagmapinakumbabaun, pagmabuut hanggan matiniisun. 13 Pagparakumbabaan kamu. Nu may hinanakit kamu pagparatawadan sa usa kag sa usa. Pinatawad yi kamu Panginuun, nakan kamu pagpatawad diman waydi. 14 Lalu pagmalahalan kamu dahil imaw ti pinagkabugkus sa kanyu lubus pagkarausa. 15 Pagpasakup kamu kanyu tagipusuun sa kahusayan kay pakaun ni Kiristu. Kamu binutung Diyus sa inda pag kahusayan, hampay kamu magkabuu usa ka bilug. Kailangan kamu pagpasalamat sa Diyus. 16 Ti barita tungkul sa kan Kiristu kailangan kanyu ituduk sa kanyu tagipusuun. Pagbililinan kamu, pag-aladalan kamu pagmay kang-ud pag kaalaman. Pagkanta kamu may tapil pagsamba hanggan magdayaw sa Diyus. Pagkanta kamu angay sa kay udyuk Ispiritu Banal. Ginan sa kanyu tagipusuun pagkanta kamu pagpasalamat sa Diyus. 17 Una hintay kanyu buwatun, una sa bagaw una sa buruwatun, buwata niyu ti tanan angay sa kanyu pakiusa sa Panginuun Hisus. Sa panab-anan diman niya pagpasalamat kamu sa Diyus Ama. 18 Manga babayi, pagpasakup kamu sa kanyu sadili asawa, dahil katida gid ti angay sa kanyu pagsarig sa Panginuun. 19 Kamu pag manga lalaki, pagmahala gid niyu kanyu sadili asawa, danga pag-unuunuha. 20 Kamu pag manga anak, pagpirmi pagsunud sa kanyu manga gurang angay sa kanyu pagsarig sa Panginuun, dahil katida gid ti pagbayaun Diyus. 21 Kamu kay manga ama, danga waydi subra kanyu mag-irang sa kanyu manga anak, barang manlubay ngap kanda naisipan. 22 Kamu pag manga panawuhun, pagsunud kamu sa tanan manga sugu niyu amu sitay sa babaw daga. Una may maghiling, una unman, pagtarabahu kamu balaw kuntay sa bayaun manga tawu, bagkus ngap pagtarabahu kamu dahil matinupadun kamu sa kanyu maggalang sa Panginuun. 23 Una hintay kanyu buwatun, lubusan di ngap niyu kanyu kasipagan, bilang ga sa Panginuun diman kanyu pagsirbi, balaw lang sa tawu. 24 Alam diman niyu pirimyuhan kamu Panginuun. Matanggap diman niyu aban ti ihinanda niya sa kay manga anak. Dahil si Kiristu ngani ti Panginuun ti kanyu pagsirbihan. 25 Ti makasalanan bay parusahan Diyus angay sa kanda manga kasalanan, dahil ti Diyus balaw may pag-apihun.
1 Kamu pag manga amu, pagkaayad-ayad waydi sa kanyu manga panawuhun, danga pag-apiapiha. Alalahana waydi niyu, kamu hanggan may Panginuun sa langit. 2 Danga magsuku sa magdarangin. Pangungud kamu sa darangin pagmay pasalamat. 3 Kada kamu magdarangin idarangin diman niyu kami hampay pakan-an kami Panginuun rugar sa makatudlu kay Bagaw ag hampay maipakilala ti madalum pag katutuuhanan ni Kiristu. Dahil sa kang magtudlu nakan aku pinirisu taynguna. 4 Idarangin niyu aku hampay maipakilala niku tunda pag katutuuhanan sa malinaw gid pag tudlu hampay maintindihan manga tawu. 5 Pagmadunung kamu sa kanyu pakiusa sa manga unman may sarig sa kan Kiristu. Danga ipalawuy niyu nu may rugar tumultul sa kanda. 6 Pawilyun niyu ti manga tawu sa kanyu harampangan, adalan niyu kaayad nu kabitay masagut niyu ti kada usa sa kanda nu may paingana. 7 Si Tikiku ti kanmi pagmahalun pag patar-ari ag matinupadun pag suruguun. Parihu diman ga kanmi siya panawuhun waydi sa buruwatun Panginuun. Siya ti bumarita sa kanyu tanan manga mangyari tungkul sa kangku. 8 Sinugu niku siya asan tag sa kanyu hampay masulung maan kanyu naisipan nu maalaman niyu kanmi kahamtangan. 9 Kay kaibahan si Unisimu, kanta matinupadun ag pagmahalun pag patar-ari mausahan diman sa kanyu asan. Sida ni Unisimu ni Tikiku ti bumarita sa kanyu tungkul sa tanan nangyari sitay. 10 Pagkamustahun kamu ni Aristarku, parihu diman pinirisu kami. Pagkamustahun diman kamu ni Markus kay pinsan ni Birnabi. May bilin yi aku sa kanyu tungkul sa kan Markus, tanggapa niyu siya kaayad nu Rumas-ug siya asan sa kanyu. 11 Pagkamustahun diman kamu ni Huswi kay bansag si Hustu. Sida lang ti manga Hudiyu sitay magsarig sa kan Kiristu ti mag-&awat mayad sa kangku sa magtudlu tungkul sa kay maghari Diyus. Pinasulung gid nida kang naisipan. 12 Pagkamustahun diman kamu ni Ipapras maminsanan diman sa kanyu asan, kay diman panawuhun ni Kiristu Hisus. Pirmi siya magpangungud sa darangin hampay kamu parig-unun Diyus, unman may ikasabi ag lubus masurundun sa kagustuhan Diyus. 13 Maghiling gid aku sa kay magpakibudlay tungkul sa kanyu, tungkul sa manga mag-uli sa Laudisiya hanggan sa Hiirapulis. 14 Pagkamustahun diman kamu ni Dimas hanggan ni Lukas, kanta pagmahalun pag duktur. 15 Ipadakit duy niyu kang kamusta sa manga patar-ari sa Laudisiya hanggan sa kan Ninpas ag sa iglisya magtiripun sa kay balay niya. 16 Pagka nabasa niyu inda pag surat, ipabasa diman niyu sa iglisya sa Laudisiya. Basaha diman niyu kang surat tabug sa kanda. 17 Isabi niyu sa kan Arkipu magkun, pagpararguhan di niya ti buruwatun kay tinanggap ginan sa Panginuun. 18 Aku si Pablu ti may surat inda pag kamusta. Alalahana di niyu aku sa pirisuhan. Pagsa kanyu kay papalad Diyus.
1 Inda ti may surat kami ni Pablu, ni Silas, ni Timutiyu, tabug sa iglisya sa Tisalunika, sa manga magpakiusa sa Diyus Ama ag sa Panginuun Hisu-Kiristu. Pag-idarangin nimi kamu hampay sa kanyu ti papalad hanggan kahusayan. 2 Pirmi magpasalamat kami sa Diyus dahil sa kanyu tanan. Kada kami magdarangin kanmi diman pag-idarangin kamu. Pag-alalahanun nimi sa atubangan nita Diyus Ama kanyu tarabahu imaw ti puruyba niyu pagsarig, hanggan kanyu magpangabudlay dahil pag-udyukan kamu niyu pagmahal. Pag-alalahanun diman nimi kanyu ugali naisipan matiniisun dahil sa kanyu pag-asa sa kanta Panginuun Hisu-Kiristu. 4 Naalaman nimi, manga patar-ari, kamu pagmahalun gid Diyus. Siya diman ti may pili sa kanyu. 5 Dahil kanmi ipinadakit ti Mayad pag Barita sa kanyu balaw tugka lang sa bagaw. Kay makamaskihan pag manga buwat Ispiritu Banal ti nagpuruyba sa kanyu tungkul sa katutuuhanan Mayad pag Barita. Nakitan waydi niyu nu kabitay kami sa kanyu atubangan sa kanyu ikaayad. 6 Nag-ugali kamu naghuwad sa kanmi hanggan sa Panginuun. Tinanggap niyu ti Mayad pag Barita may kabayaan kay ipinakaun Ispiritu Banal sa kanyu, madi nakalakaw diman waydi kamu madala pag kakurian. 7 Nakan kamu yi ti mustara sa manga patar-ari ati sa daga Masidunya hanggan Akaya. 8 Dahil balaw lang Bagaw Panginuun ti nalantag sa Masidunya ag sa Akaya ginan sa kanyu, hanggan ngap ti barita tungkul sa kanyu pagsarig sa Diyus nibantug diman sa tanan rugar. Udyi kailangan tultulun waya nimi tunda sa manga tawu. 9 Sida yi ngani ti mamarita nu kabitay kami kanyu tinanggap. Sida diman tigsabi pinatlikudan niyu ti pagsamba sa diyusdiyusan hampay magsirbi kamu sa tutuu Diyus buhi, 10 ag hampay alagdun niyu kay Anak si Hisus ginan sa langit. Binuhi uman Diyus si Hisus ginan sa kamatayan. Siya diman ti rumibri sa kanta sa kay kaudasan sintinsiya Diyus aban.
1 Kamu diman duy manga patar-ari, ti nakaalam balaw unman may kabuluhan kanmi nag-asan sa kanyu. 2 Alam niyu pagka kami sa Pilipus, inunuunu kami ag minuransa waya. Dapat una katida pinabisug di nita Diyus kanmi manga tagipusuun hampay una mayamu ti manga kakurian, ilinantag di nimi ti Mayad pag Barita Diyus sa kanyu. 3 Kanmi tudlu unman may haplit turunu sa ikatalang unman diman sa ikadaut una sa ikadaya. 4 Dahil pinili kami Diyus bag-u kay yi iinintirga sa kanmi ti Mayad pag Barita. Nakan ngani kami magpanudlu una abi balaw pagbayaun tawu basta kami pumakaun kabayaan sa Diyus, imaw tig-usisa sa kanta manga tagipusuun. 5 Alam diman waydi niyu sa kanmi pagtudlu kaybi balaw kami magpakakitkakit lang sa atubangan manga tawu ag alam di Diyus sa kanmi pagtudlu kaybi unman diman waydi kami may pag-itagu ugali maramuun. 6 Unman nimi hiningbut kanyu pagdayaw una manga iba tawu pag pagdayaw. 7 Madi may karampatan mana kami bilang manga Apustul ni Kiristu magpasagsagan sa kanyu, bagkus ngap kami nagmadahan sa kanyu, parihu sa ina kay magdahan mag-alaga sa kay manga anak. 8 Sa daka gid nimi pagmahal sa kanyu ihinanda nimi kanmi sadili sa pagtudlu Mayad pag Barita Diyus sa kanyu. Balaw lang tida, una kanmi buhi unman nimi inirangan ipakaun di nimi sa kanyu nu kailangan. Lubus yi gid magkagamun kami sa kanyu. 9 Pihu udwaya nalimtan niyu, manga patar-ari, nu kabitay kami nagbudlay sa tarabahu yabi sirang hampay kami unman magpakuri sa una hintay sa kanyu, sa kanmi magtudlu Mayad pag Barita Diyus sa kanyu. 10 Alam niyu, alam diman waydi Diyus, kanmi ugali buhi matinupadun, mayad ag unman may ikasabi sa kanmi pakiusa sa kanyu sa manga magsarig yi sa kan Kiristu. 11 Alam yi waydi niyu kami bilang ga kanyu yi ama sa kada usa sa kanyu. 12 Pinabisug nimi kanyu tagipusuun, pinasulung ag binutung sa mag-ugali kang-ud sa kay magbantay Diyus, imaw ti nagpili sa kanyu hampay makatanggap kahuray sa kay kaharian hanggan kadayawan. 13 Inda waya ti pirmi pag-ipasalamat nimi sa Diyus, pagka itinudlu nimi sa kanyu kay Bagaw Diyus, tinanggap niyu tunda ga tutuu ngani Bagaw Diyus, bukun ga bagaw lang tawu. Kay kamaskihan Bagaw Diyus makitan diman gid waydi sa kanyu buhi dahil kamu manga magsarig. 14 Ti mangyari sa kanyu, manga patar-ari, parihu sa nangyari diman sa kay iglisya Diyus sa daga Hudiya, sa manga magsarig ati sa kan Kiristu Hisus. Pag-unuunuhun diman kamu niyu manga kasimanwa, parihu sa manga taga Hudiya inunuunu diman nida kaparihu Hudiyu. 15 Tunda pag manga Hudiyu ti nagmatay sa Panginuun Hisus hanggan sa manga purupita. Sida diman waydi ti nag-unuunu sa kanmi. Maglaban sida sa kagustuhan Diyus, kalaban sida tanan tawu. 16 Nakan pilit gid kanda mana pag-amparahun kanmi pagtudlu Mayad pag Barita sa manga balaw Hudiyu sa ikaribri nida. Aput yi ngani sa katugkaan kanda buwat kadautan nakan sa katapusan nangyari ngani sa kanda ti pangagalit Diyus. 17 Taynguna manga patar-ari, pagka kami niblag sa kanyu ngalay ngalay, balaw sa pag-alaala pag niblag nu unman sa mata lang waydi, magkagamun gid kami sa kanyu. Nakan kami magkaibug yi gid magtagasampaki maan sa kanyu. 18 Balaw lang kas-a una kadwa aku ngani pag tawu si Pablu maggayak mana mansabang sa kanyu dapat pirmi kami pag-amparahun ni Satanas. 19 Udyi kami may paggagadun masulung pag naisipan nu ud dahil lang hanggan sa kanyu, kamu yi lang ti puun nimi kabayaan. Kamu yi ti pinagkapirimyu sa kanmi panalu, kanmi idayaw sa atubangan Panginuun Hisus sa kay pagbalik niya aban. 20 Tutuu ngani ginan sa kanyu mayad buwat kami magtanggap kabayaan hanggan kadayawan.
1 Pagka udyi kami makaagwanta, kanmi inisip mayad nu matayak yi aku usa usa sa Atinas, 2 ag nu suguun tag sa kanyu kanta patar-ari si Timutiyu. Parihu diman ga kanmi siya pinili waydi Diyus hampay manugtudlu Mayad pag Barita tungkul sa kan Kiristu. Sinugu nimi siya hampay parig-unun niya kamu ag hampay pabisugun kamu sa kanyu pagsarig sa Panginuun, 3 agud unman may manlubay sa kanyu dahil sa pag-unuunu. Alam diman niyu ti manga pag-unuunu angay sa kagustuhan Diyus sa kanta. 4 Dahil pagka kami asan waya, ipinaalam yi nimi daan sa kanyu pihu kita may malakawan kakurian, ag nangyari ngap ngani kainda. 5 Nakan ngani pagka udyi aku makaagwanta, sinugu niku si Timutiyu hampay makaalam barita tungkul sa kahamtangan taynguna niyu pagsarig sa Panginuun. Nag-isip aku barang natuksu kamu diyablu. Nu abi katida ti nangyari, nabul-an yi lang halaga kanmi nagpangabudlay. 6 Taynguna nakaras-ag yi maan si Timutiyu asan ginan. May dara siya marinu pag barita tungkul sa kanyu pagsarig hanggan kanyu pagmahal. Itinultul diman niya sa kanmi pirmi kami kanyu pag-isipun, magtagakakiti kamu sa kanmi parihu sa kanmi gustu makakit sa kanyu. 7 Ginan sa kanyu pagsarig sa kan Kiristu, manga patar-ari, nagmasulung kanmi naisipan, madi kami sa karaw-an kaaburiduhan hanggan kakurian. 8 Kanyu unman magkaanggihut ginan sa marig-un pag sarig imaw ti pinmasulungsulung sa kanmi tagipusuun. 9 Kabitay nguna pag kumang-ud kanmi pasalamat sa Diyus tungkul sa kanyu ag tungkul sa kabayaan kanmi tinanggap dahil sa kanyu sa atubangan nita Diyus. 10 Magpangungud kami sa darangin yabi sirang hampay makitan maan nimi kamu ag hampay maawatan kamu sa ikakang-ud niyu pagsarig. 11 Magdarangin kami hampay ti Diyus Ama hanggan kanta Panginuun Hisus pumakaun waya rugar sa kanmi makaasan sa kanyu. 12 Kailangan padakaun ag paimbungun waya Panginuun kanyu pagmahal sa usa kag sa usa hanggan sa tanan manga tawu, parihu diman sa kanmi pagmahal sa kanyu. 13 Nu katida ti mangyari, pabisugun niya kanyu tagipusuun hampay lubus yi kamu sakup sa Diyus Ama ag unman may kasalanan sa kay pagras-ug nita Panginuun Hisus kaibahan ti tanan manga napasakup sa kanya.
1 Usa sa siyun, manga patar-ari, magpaalam waya mana kami kanmi paanyu sa kanyu dahil sa kanta pakiusa sa Panginuun Hisus. Kailangan kanyu ugali pag-angay sa kanyu nataw-an ginan sa kanmi hampay lalu waya sa ikabaya Diyus. Imaw yi kanyu ugali dapat paglalu waya gid sa ikabaya Diyus. 2 Alam diman niyu ti manga itinudlu nimi sa kanyu ginan sa Panginuun Hisus. 3 Inda yi ngani ti kagustuhan Diyus, paglubus yi kamu pasakup sa Diyus ag pagpakarayu kamu sa kahalayan. 4 Kailangan pagmadunung una si unu pag tawu mag-ingat sa kanda buut mag-asawa, dagpadara sa sadili niya daut kagustuhan. 5 Danga kay sadili daut pag kagustuhan ti pagtupada, danga parihu sa ugali manga tawu unman magkilala sa Diyus. 6 Ti tawu nu unman magtupad sa kay lang sadili daut kagustuhan, pihu siya gumalang sa karampatan niya kaparihu, dayu niya mabul-an halaga. Parihu sa kanmi sinabi sa kanyu kaybi ag mahigpit kanmi ipinaalam magkun parusahan Panginuun ti magbuwat katunda pag kadautan. 7 Kita kay pinili Diyus hampay balaw mag-ugali sa mahalay nu unman hampay lubus kita sakup sa Diyus. 8 Nakan nu may tawu magpasipala sa inda pag manga paanyu, balaw tawu kay pag-ipasipala nu unman ti Diyus, imaw ti namakaun kay Ispiritu Banal sa kanyu. 9 Unman yi kailangan tudluan waya nimi kamu tungkul sa pagmahal sa manga patar-ari sa Panginuun, dahil tinudluan yi waydi kamu Diyus, hampay kamu magmalahalan sa usa kag sa usa. 10 Inda ngani kanyu yi pagbuwatun sa tanan manga patar-ari kabuuhan daga sa Masidunya. Madi katida, kanmi waya pagsabihun sa kanyu padakaa waya gid niyu kanyu pagmahal. 11 Pagsikapi niyu ti ugali mabuut. Sarangwun niyu kanyu sadili buwatun. Pagbudlay kamu sa kanyu pangabuhi parihu sa kanmi sinabi yi sa kanyu. 12 Nu katunda, galangun kamu manga tawu udwaya magkilala sa Panginuun. Usa sa siti, danga niyu isarig sa iba kanyu pangabuhi. 13 Manga patar-ari, gustu nimi pagmaalaman niyu kay tutuu tungkul sa manga namatay yi, hampay kamu dayu maaburidu parihu sa tawu unman may pagsarig. 14 Nagpaniwala kita si Hisus namatay bag-u nabuhi siya uman. Nakan ngani katunda diman kita mag-paniwala tungkul sa tanan manga magsarig sa kan Kiristu, nu sida namatay yi, buhiun waydi sida Diyus hampay sida minsan yi sa kan Kiristu. 15 Inda kay tudlu Panginuun kanmi pagsabihun sa kanyu magkun, nu sa kay pagras-ug aban Panginuun, kita ti manga buhi waya dayu gid umuna sa manga namatay yi. 16 Ati katpung pag udas aban nu may bilin yi ti Diyus, nu bumagaw ti pangulu anghil ag nu tumunug ti budyung Diyus, bag-u Rumas-ug yi ti Panginuun ginan sa langit. Ti manga namatay nu nagsarig sa kan Kiristu imaw ti buhiun dapu. 17 Bag-u kita ti manga buhi waya tipunun niya sa manga rurum ipaminsan sa manga nabuhi uman hampay sulangun ti Panginuun sa panungaan langit. Bag-u kaibahan yi niya kita sa kay arani hanggan aban. 18 Nakan ngani pagpalasulungan kamu sa usa kag sa usa dahil sa inda pag manga tudlu.
1 Udyi kailangan aku magsurat waya sa kanyu nu kapira pag mangyari inda pag manga bagay aban. 2 Dahil alam yi waydi niyu ti pagras-ug kaudasan Panginuun parihu sa pagras-ug mananakaw sa yabi. 3 Nu pagkumnun manga tawu, kita may kahusayan unman may pagkadalaan, tunda ngap bigla pag mangyari ti kadamhakan. Dayu gid sida umiwas dahil inda mangyari parihu sa udas nu magpanamdam ti babayi manganak. 4 Dapat kamu, manga patar-ari, balaw yi sa kadudulman, nakan kamu dayu mabiglaan sa udas ati nu Rumas-ug parihu sa mananakaw. 5 Kamu tanan taga karayawan, baliwa sa sirang. Balaw kita taga kadudulman, balaw baliwa sa yabi. 6 Nakan ngani kailangan pirmi kita maimatahan, pirmi alistu, pagmapininsarun kanta pag-iisip. Balaw parihu sa iba. 7 Ugali tawu nu yabi magkaturug, ugali diman tawu nu yabi maglangu. 8 Unman kita kailangan maglangu, dahil kita baliwa sa sirang. Buwatun nita panangga kanta pagsarig hanggan kanta pagmahal. Buwatun nita ga kalu baul kanta pagsarig sa kay pakaun Diyus karibrihan sa kanta. 9 Binutung kita Diyus balaw hampay parusahan, bagkus ngap hampay kita kay iribri nita Panginuun Hisu-Kiristu. 10 Namatay siya para sa kanta hampay kita mabuhi kaibahan niya una kita buhi waya una kita namatay yi. 11 Nakan parargu kamu sa magpaalalahanan hanggan sa magpararig-unan sa usa kag sa usa parihu sa pagbuwatun yi waydi niyu taynguna. 12 Kami mana magpaanyu waya sa kanyu, manga patar-ari, galanga niyu ti manga magpangabudlay dahil sa kanyu, ti manga pinili Diyus hampay sida ti manugpatigayun ag manugtudlu sa kanyu. 13 Ipakakit niyu sa kanda ti lubus paggalang hanggan pagmahal dahil sa kanda buruwatun. Pagkarausa kamu pagkabuu kanyu naisipan. 14 May sabihun waya gid kami sa kanyu, manga patar-ari. Paalalahani gid niyu ti manga bugyahin, pabisuga niyu ti manga malumuy kay sarig, sagabaya niyu ti udyi kakaya, agwantahi niyu sida tanan. 15 Una si unu sa kanyu danga magbalus sa manga magbuwat daut sa kanyu, bagkus ngap parargu kamu sa pagbuwat mayad sa usa kag sa usa hanggan sa tanan tawu. 16 Pagbaya kamu pirmi. 17 Danga mag-ampu sa magdarangin. 18 Una hintay ti mangyari pagpasalamat kamu sa Diyus. Dahil katida kay gustu Diyus kanyu buwatun nu kamu magpakiusa sa kan Kiristu Hisus. 19 Danga niyu amparahun ti Ispiritu Banal. 20 Danga pagpadamhakan niyu ti ipinurupita. 21 Suyasida niyu ti tanan manga bagay ag adia ti mayad. 22 Pagpakarayu kamu sa una hintay pag kalasi kadautan. 23 Pag-idarangin niku kamu hampay kamu lubus pasakup sa Diyus. Siya yi ngani tigpakaun kahusayan. Pag-idarangin diman niku kamu hampay alagaan niya kanyu buu pagkatawu sa unman may kadautan una kanyu tagipusuun, una kanyu karadwa, una kanyu bilug hanggan sa ud Rumas-ug kanta Panginuun Hisu-Kiristu. 24 Masarigan ti nagpili sa kanyu. Pihu tupadun niya kay ginayak. 25 Kami pagdaranginan waydi niyu, manga patar-ari. 26 Pagparaingan-an kamu kag pagmay pagmahal sa tanan manga patar-ari. 27 Kanmi pagsabihun sa kanyu sa ngaran nita Panginuun, basaha niyu inda pag surat sa pagdungugun tanan patar-ari. 28 Pag-idarangin niku kamu hampay sa kanyu kay papalad nita Panginuun Hisu-Kiristu.
1 Inda ti may surat kami ni Pablu, ni Silas, ni Timutiyu, tabug sa iglisya manga taga Tisalunika, sa manga nasakup sa kanta Diyus Ama hanggan sa Panginuun Hisu-Kiristu. 2 Pag-idarangin nimi kamu hampay sa kanyu ti papalad hanggan kahusayan ginan sa Diyus Ama hanggan ginan sa Panginuun Hisu-Kiristu. 3 Kailangan kami pirmi magpasalamat gid sa Diyus tungkul sa kanyu, manga patar-ari. Nakan tama gid nu pirmi kami magpasalamat, dahil mag-amat magrig-un kanyu pagsarig sa kan Kiristu. Hanggan paman kanyu pagmahal sa usa kag sa usa mag-amat waydi magdaka. 4 Pagdayawun nimi kamu, pag-itultul sa tanan manga sakup iglisya Diyus, dahil sa pagsarig niyu ag dahil matiniisun kamu sa katpung pag-unuunuhun kamu una paman sa karaw-an kakurian. 5 Inda yi ngani ti puruyba tungkul sa kay katadlungan Diyus sa kay pagkilala sa tawu. Kamu kay pagkilalan-un niya kuntay kang-ud hampay tanggapun niya sa kay kaharian, madi taynguna kamu may pag-agwantahun dapu tungkul sa kay kaharian Diyus. 6 Matadlung ti Diyus. Gantihan niya kakurian ti manga magpakuri sa kanyu. 7 Kamu ti manga nag-agwanta pasayahun di niya hanggan diman una kami sa kay pagbalik Panginuun Hisus ginan sa langit kaibahan niya kay manga makamaskihan pag manga anghil. 8 Rumas-ug siya sa karaw-an maglalabdaban pag apuy. Bag-u parusahan niya ti tanan tawu dayu magpaniwala sa Diyus ag ti manga dayu magsunud sa Mayad pag Barita tungkul sa kanta Panginuun Hisus. 9 Inda aban ti sintinsiya sa kanda, atag sida sa unman may katapusan pag kadamhakan ag miblag sida sa Panginuun hanggan sa kadayawan niya kamaskihan. 10 Mangyari tunda sa kaudasan niya pagras-ug aban hampay dayawun siya tanan manga napasakup sa kanya ag hampay sambahun siya sa karaw-an tanan manga magsarig sa kanya. Mibilang diman kamu ati, dahil tinanggap niyu ti Mayad pag Barita kanmi itinudlu sa kanyu. 11 Pirmi di gid nimi pag-alalahanun kamu nu kami magdarangin sa Diyus hampay kanyu ugali buhi sa ikabaya Diyus. Ag hampay angay sa kay kapangyarihan papaladan niya kamu sa tanan niyu pagturunuhun mayad hanggan sa tanan niyu buwat pag-udyukan niyu pagsarig. 12 Nu katunda mapakan-an niyu kadayawan ti ngaran Panginuun Hisus, kamu diman hanggan pakan-an waydi kay kadayawan angay sa kay mayad buut Diyus hanggan nita Panginuun Hisu-Kiristu.
1 Nu bay tungkul sa kay pagsitay aban nita Panginuun Hisu-Kiristu ag sa kay pagtipun niya sa kanta, may sabihun kami sa kanyu, manga patar-ari. 2 Danga kamu bigla tarantadu, danga waydi magkaaburidu sa manga barita tawu kuntay rinmas-ug yi ti kaudasan Panginuun. Danga kamu magpaniwala una kanda sabi ipinurupita kunu tunda, una abi itinultul kunu una abi kunu sa surat ginan sa kanmi. 3 Sa una waya kabitay pag paraan tawu, danga kamu padaya. Ti kaudasan Panginuun balaw Rumas-ug hanggan sa ud mangyari dapu ti katapusan pag maglaban sa Diyus ag hanggan sa ud mibantala ti May Puun Kadautan, ti daan ihinanda para tabug sa unman may katapusan pag kaparusahan. 4 Siya yi gid ti Manuglaban. Magpalabilabi siya laban sa tanan pag-ingarnan manga tawu kuntay Diyus hanggan sa tanan pag manga pagsambahun nida. Pagka dugay ipaabwat niya kay sadili, sumaka siya sa balay Diyus, tumukaw siya ati akuun niya kuntay Diyus siya. 5 Unman aw lugud niyu natandaan? Kang yi sinabi sa kanyu inda tanan tanan pagka aku asan waya sa kanyu. 6 Nakan lang, udwaya nangyari inda dahil alam yi waydi niyu may mag-ampara waya hampay nu kaudasan yi bag-u lumuwang ti May Puun Kadautan. 7 Taynguna matagutaguan waya tunda pag kapangyarihan daut kay buwat hanggan sa ud bul-un ti Manug-ampara. Nu bay mab-ul yi ti Manug-ampara, 8 bag-u mibantala yi ti May Puun Kadautan. Pagka sa kaudasan niya pagras-ug ni Kiristu, arupan niya ti May Puun Kadautan kay papasun yi, matyun siya sa masyadu masilaw pag rayaw ni Kiristu. Lumuwang gid ti May Puun Kadautan may kamaskihan ni Satanas. 9 Nakan bumuwat diman ti May Puun Kadautan manga makadululaw pag tanda may daka pag kamaskihan hampay dumaya siya sa manga tawu. 10 Gumamit siya tanan paraan pag pamadaya hampay madaya tag sa kadautan ti manga midamhak, tunda ngani pag manga tawu miribri mana nu nangus kanda lang tinanggap ag minahal ti katutuuhanan. 11 Dahil ngani unman ngap tinanggap nida ti katutuuhanan, nakan pagpahintulutan sida Diyus sa udyi kumilala sida sa tutuu sa pudil. 12 Nakan ngani masintinsiyahan Diyus sa kaparusahan ti tanan tawu magdayu magpaniwala sa katutuuhanan, bagkus ngap binaya nida ti kadautan. 13 Dapat kailangan pirmi kami magpasalamat sa Diyus dahil sa kanyu, manga patar-ari. Kamu kay pagmahalun Panginuun. Kami magpasalamat gid dahil ginan waya sa kabag-u kamu kay yi gid pinili hampay kamu pakan-an karibrihan, dahil sa kay kapangyarihan Ispiritu imaw tigbuwat matadlung sa kanyu ag dahil sa kanyu pagsarig sa katutuuhanan. 14 Nakan kay binutung kamu Diyus pagka itinudlu nimi sa kanyu ti Mayad pag Barita hampay sa kanyu yi kay kadayawan nita Panginuun Hisu-Kiristu. 15 Nakan ngani duy manga patar-ari, pagpakarig-un kamu, dagbul-iw sa manga katutuuhanan kanmi itinudlu sa kanyu una sa bagaw una diman sa surat. 16 Kanmi pag-idarangin kamu hampay pasayahun nita Panginuun Hisu-Kiristu hanggan nita Diyus Ama, imaw ti nagmahal sa kanta. Kinaawaan gid niya kita, pinakan-an niya kita unman magkauman pag matutum naisipan hanggan marig-un pagsarig. 17 Kanmi pag-idarangin kamu hampay pakan-an kamu marig-un pag naisipan agud kanyu pagbuwatun hanggan pagbagawun lunsay kaayadan.
1 Inda waya duy manga patar-ari, kang mana sabihun sa kanyu. Daranginan niyu kami hampay ti Bagaw Panginuun mikalat madali sa tanan rugar ag hampay pahalgaan ti Bagaw Panginuun tanan manga tawu parihu diman sa kanyu binwat. 2 Daranginan diman niyu kami hampay kami makaribri sa lukuluku pag manga tawu ag sa manga magbuwat kadautan. Dahil ngani unman tanan tawu may pagsarig sa Mayad pag Barita. 3 Masarigan ti Panginuun. Kay pakan-an gid kamu kay kabisugan, kay di ingatan kamu sa diyablu. 4 Pihu dayu pumabaya ti Panginuun, nakan lubus kami magpaniwala kanyu ugali angay sa kanmi itinudlu sa kanyu ag rargu di niyu ugaliun. 5 Kamu kang di pag-idarangin hampay garyahun di Panginuun atabug sa maslalu waya daka pagmahal sa Diyus hanggan sa karig-unan sa kan Kiristu. 6 Manga patar-ari, pag-ibilin nimi sa kanyu dahil sa kanta pakiusa sa Panginuun Hisu-Kiristu, pag-iwas kamu sa una hintay pag patar-ari nu mamalibutan lang unman waydi may buwat ag nu dayu waydi sumunud sa kanmi manga bilin sa kanyu. 7 Alam diman niyu kailangan niyu huwadun kanmi binwat. Unman kami magkay-a magbuwat kanmi di waya asan. 8 Unman kami nagtanggap una sa kantapu gin pag bagay, nu unman binayadan nimi. Una yabi una sirang kami nagbudlay nagtarabahu di hampay unman magpasagpun una sa kantapu sa kanyu. 9 Nu sa ungud mana kami may karampatan mag-asa sa kanyu awat dapat ay kami nagtarabahu di hampay kamu pakan-an mustara kailangan niyu sundan. 10 Pagka kami asan di waya sa kanyu, inda kanmi ibinilin sa kanyu magkun, una hintay pag tawu nu dayu manarabahu, danga waydi pagpakan-i niyu. 11 Pagsabihun nimi inda dahil nabaritaan nimi ti iba sa kanyu mag-ugali sa bugyahin, magpanungbalay, magpanlibang, pakialamin. 12 Dahil sa kanmi pakiusa sa Panginuun Hisu-Kiristu mahigpit gid kanmi pag-ibilin sa tunda pag manga tawu, kailangan gid sida pagtarabahu, pag-ugali sa maayus hampay unman sida magsarig lang sa manga iba. 13 Manga patar-ari, danga kamu umampu sa magbuwat mayad. 14 Tandai gid niyu, iwasi diman una si unu ti dayu sumunud sa mayad pag manga bilin nimi sa inda pag surat, hampay siya mangay-a. 15 Dapat danga waydi niyu ipabutang siya bilang ga kaaway. Bagkus di ngap paanyua niyu siya bilang ga kanyu patar-ari. 16 Panginuun ti bulbugan kahusayan. Pag-idarangin nimi kamu hampay pakan-an niya kamu kahusayan sa tanan pag udas. Pagsa kanyu gid tanan ti Panginuun. 17 Aku si Pablu tigpaingana sa kanyu, kabitay waydi kamu asan? Inda yi kang pirma sa tanan niku manga surat. Kainda di kangku pag panurat. 18 Pagsa kanyu gid tanan kay papalad nita Panginuun Hisu-Kiristu.
1 Inda ti may surat si Pablu, kay Apustul ni Kiristu Hisus angay sa kay sugu Diyus imaw ti Manugribri nita, ag ni Kiristu Hisus imaw kanta pag-asahan. 2 Inda pag surat tabug sa kanmu, Timutiyu, kawu kang pinagkaanak sa pagsarig sa kan Kiristu. Kang pag-idarangin kawu hampay kawu papaladan, kaawaan ag pakan-an kahusayan ginan sa Diyus Ama ag ginan sa kanta Panginuun Hisu-Kiristu. 3 Ga kang diman sinabi sa kanmu kang di waya atag sa Masidunya, kang gustu duy kawu asan lang sa Ipisu, dahil may manga tawu magtudlu patalang. Bilini nimu sida danga yi sida magtudlu patalang. 4 Danga yi sida maggaraw tunda pag manga suyut hanggan sa manga tultulanun aba ag listahan nida manga kaapuapuhan. Siti ginan ti bulul-an arawayan, unman diman waydi sa ikatupad sa turunu Diyus. Tunda pag turunu matupad lang tawu nu siya may pagsarig. 5 Kailangan katida kanmu bilinan sida hampay may pagmahal sida ginan sa kanda malumpiyu pag tagipusuun ag ginan sa naisipan nu udyi may pag-alalahanun kasalanan, hanggan ginan sa kanda pagsarig balaw magpabalhinguun. 6 May manga nagsimray ginan sa inda pag turunu kaayadan, nagtalang yi sida atag sa harampangan unman may kabuluhan. 7 Sida mana may gustu manudlu Kasuguan Diyus. Dapat ay unman magkasalman nida kanda pagsabihun, madi nu sa kanda lang hantup tutuu ngap ti kanda pag-itudlu. 8 Dapat alam nita marinu gid ti Kasuguan nu paggamitun tawu sa mayad. 9 Alam diman waydi nita ti Kasuguan bukun binwat para sa tawu matadlung nu unman para sa manga tawu unman magbati sa batas ag sa manga manlahug, sa manga tawu daut ag sa manga makasalanan, sa manga unman magpasakup sa Diyus ag sa manga maglapastangan, sa manga magmatay sa ina sa ama, ag sa manga maglibun sa tawu, 10 sa manga mag-uragin, sa manga magkaibug sa kaparahu lalaki, sa manga manugdagit sa tawu, sa manga pudilun, sa manga magsumpa sa kapudilan ag nu may imaw waya tuhay pag buwat balaw angay sa marinu pag tudlu. 11 Tunda ngani pag tudlu ti angay sa Mayad pag Barita inintirga sa kangku. Tunda yi pag Barita tungkul sa kanta pagdayawun pag kapangyarihan Diyus. 12 Magpasalamat aku sa kanta Panginuun Kiristu Hisus, dahil siya tigpabisug sa kangku hampay mabuwat niku inda pag buruwatun ag kinilala niya aku kuntay aku matinupadun, nakan pinili niya aku hampay magsirbi sa inda pag katungkulan. 13 Madi kaybi waya kang linapastangan, inunuunu ag unman diman waydi pinahalgaan niku siya. Dapat kinaawaan di gid aku Diyus dahil tunda kang binwat kaybi kang udwaya nakaalam ag udwaya may pagsarig sa kanya. 14 Ungud mayad kay nabubut-un nita Panginuun sa kangku, nakan may natanggap di gid aku ginan sa kanya pagsarig hanggan pagmahal, kay ngani pag-ipakaun sa kanta dahil sa kanta pakiusa sa kan Kiristu Hisus. 15 Tutuu ti pagsabihun ag kailangan paniwalaan tanan tawu magkun, "Nakan nagsitay si Kiristu Hisus sa kalibutan hampay iribri ti manga makasalanan." Ag aku ngap ti takinan manga makasalanan. 16 Dapat ay kinaawaan niya aku hampay mipakilala ni Hisu-Kiristu kay lubus matugway naisipan niya sa kangku, sa takinan manga makasalanan, bilang ga mustara sa tanan manga sumarig waydi sa kanya hampay may buhi waydi sida unman may katapusan. 17 Taynguna ti kadayawan hanggan kapangyarihan pagsa kanya, sa usa usa ka Diyus, sa Hari ud may pinag-umpisahan, unman may katapusan, unman may kamatayan ag unman mag-akitan sa mata. Amin. 18 Inda pag bilin kang pag-ipabahala duy Timutiyu sa kanmu angay sa manga ipinurupita kaybi tungkul sa kanmu, imaw ngani tigpabisug sa kanmu maglaban sa kadautan. 19 Pangungud yi lang gid kawu sa kanmu pagsarig ag danga may pag-alalahanun kasalanan sa kanmu tagipusuun. Dahil may manga tawu unman pagpahalagaan nida kanda malumpiyu tagipusuun, nakan rinangga yi kanda pagsarig. 20 Katunda diman sida ni Himiniyu ni Alihanduru. Ipinabahala niku sida sa kan Satanas hampay sida magkariga yi danga yi maglapastangan sa Diyus.
1 Un-an sa tanan kang paanyu sa kanyu kailangan ipaaput niyu sa atubangan Diyus kanyu hagad kaayadan, kanyu darangin, una tungkul sa kanyu sadili una sa iba, hanggan kanyu magpasalamat tungkul sa tanan tawu. 2 Kailangan idarangin niyu ti manga hari hanggan ti tanan tawu may kangaranan hampay kita may kaayusan ag unman may kaguluhan sa kanta lubus magpasakup sa Diyus may kahusayan. 3 Inda ti mayad ag makakaawa sa kay magbantay Diyus kanta Manugribri. 4 Siya may gustu sa tanan tawu hampay miribri sida ag hampay makatau sida sa katutuuhanan. 5 Dahil usa usa lang ti Diyus. Ag usa lang tigpamahalaga tag sa Diyus tag sa manga tawu, si Kiristu Hisus yi ngani pag tawu. 6 Ipinakaun niya kay sadili bilug naglukat sa tanan tawu. Sa taning pag kaudasan pag ipinakilala niya kay ginayak Diyus pag karibrihan. 7 Nakan ngani pinili aku Diyus manugtudlu hanggan Apustul hampay itudlu niku sa manga balaw Hudiyu ti tutuu pag sarig. Kang pagsabihun inda tutuu gid, balaw pudil. 8 Kang gustu ngani ti manga lalaki una naan pag rugar nu magdarangin kailangan ipaabwat nida kanda manga kamang tag sa Diyus, ipasakup nida lubus sa Diyus kanda naisipan, danga may galit hanggan magtalaluhan. 9 Katunda diman kang gustu ti manga babayi danga magsulung mayamu kalasi pag parinu, danga may padayawdayaw, danga masyadu malus-ay ti buhuk, danga magbisti mayamu bulawan masinglaw. 10 Kailangan kanda ngap pinagkabisti kay mayad buwat imaw ti dapat sa manga babayi manga magpasakup sa Diyus. 11 Ti manga babayi kailangan danga mag-ingay sa katpung mag-adal ag kailangan lubus pasakup. 12 Unman pasnuan niku ti babayi nu magtudlu sa manga lalaki. Dayu waydi makapamahala siya sa manga lalaki. Kailangan danga mag-ingay siya. 13 Isipa niyu si Adam ti un-an linalang bag-u di si Iba. 14 Bukun si Adam nu unman si Iba ti nadaya ag nagkasala. 15 Dapat ingatan di Panginuun ti manga babayi sa kanda katpung magpanganak, nu magpakumbaba sida kay ugali sa pagsarig, sa pagmahal ag sa lubus magpasakup sa Panginuun.
1 Tutuu ti pagsabihun magkun, nu may tawu magkaibug magpangasiwa sa iglisya, magkailangan siya sa mayad pag buruwatun. 2 Ti manug-asiwa sa iglisya kailangan unman may masabi sa kanya, usa lang kay asawa, madahan, madunung waydi magtiis sa kay sadili, maginalangun, marapasaka sa bag-u ras-ug ag mayad siya magtudlu. 3 Kailangan unman maraibgun siya sa irinmun makalangu, balaw diman arisgadu, kailangan pag maalumanay ngap siya, maraibgun sa kahusayan, danga maraibgun sa kuwarta. 4 Kailangan mahusay siya magpamahala sa kay kasunu balay. Kailangan siya galangun ag paniwalaan niya manga anak. 5 Dayu waydi makapangasiwa ti tawu sa iglisya Diyus, nu unman kaya niya pamahalaan kay kasunu balay. 6 Kailangan diman waydi siya dugay yi kay magsarig sa Panginuun, barang siya magpalabawlabaw bag-u rargu siya masintinsiyahan parihu sa diyablu. 7 Kailangan diman siya galangun manga tawu bukun kakampi sa iglisya hampay balaw siya mapuyaan ag dayu siya makasulun sa dit-ag ni Satanas. 8 Tungkul maan sa manga magsirbi sa iglisya, kailangan sida mabuut pag manga tawu, danga pudilun, balaw marainum sa makalangu, balaw maraibgun sa kayamanan. 9 Dayu mahimu sida matinupadun sa madalum pag katutuuhanan tungkul sa kanta pagsarig nu may pag-alalahanun waya sida kasalanan sa kanda tagipusuun. 10 Kailangan bantayan diman dapu sida. Nu makitan sida unman may ikasabi bag-u mahimu sida buwatun manugsirbi sa iglisya. 11 Kailangan hanggan kanda manga asawa mabuut, danga sida magkutsukutsu. Kailangan sida manga mayad gid, matinupadun sa tanan bagay. 12 Kailangan usa lang kay asawa ti manugsirbi sa iglisya, kailangan madunung siya magpamahala sa kay kasunu balay, kailangan kaayad magpaanyu sa kay manga anak. 13 Una si unu pag manugsirbi sa iglisya nu matinupadun siya sa kay katungkulan, galangun siya tanan tawu ag may karampatan magbagaw, balaw makinay-ahun siya tungkul sa kanta pagsarig sa kan Kiristu. 14 Daka ti pag-asa niku udyi dugay kita magkarabtaan. Dapat ay isinurat diman niku inda pag manga bilin, 15 hampay una aku unman makaras-ug madali, maalaman diman nimu ti mayad pag ugali kailangan buwatun sa magtal-anakan Diyus, sa iglisya Diyus buhi, imaw yi ngani ti pinagkatulduk hanggan binungsudan katutuuhanan. 16 Tutuu gid madalum ag makadululaw pag katutuuhanan nita surundanun magkun, "Napakilala siya Diyus sa kay nabilug tawu, Pinatutuuhanan siya Ispiritu Banal, Nakitan siya manga anghil, Itinudlu siya sa manga nasyun tawu, Una naan pag rugar may nagpaniwala sa kanya, Tinanggap siya ati sa langit may kadayawan."
1 Malinaw ti pagsabihun Ispiritu magkun, sa uryan panahun tayakan manga iba kanda pagsarig. Sundun ngap nida ti manga manugpatalang ag ti manga tudlu ginan sa manga labang. 2 May manga pudilun manugtudlu aban, kanda naisipan pinadluman ni Satanas, udyi sida magkilala sa daut sa mayad. Sa kanda magdaya, 3 kanda pag-irangan ti tawu nu magkaibug mag-asawa. Una manga karan-unun kay binwat Diyus hampay kan-un manga tawu magsarig may pasalamat ag magkilala sa katutuuhanan, kanda diman pag-irangan. 4 Ti tanan bagay linalang Diyus unman may hintay ag unman kailangan may manga tun-anun. Ti tanan bagay kailangan tanggapun may pasalamat, 5 dahil tunda tanan linumpiyu yi Bagaw Diyus ag sa darangin. 6 Kawu ti mayad pag suruguun ni Kiristu Hisus nu itudlu nimu sa manga patar-ari inda pag manga bilin. Intindiha nimu ti Bagaw Diyus imaw ti makapakaun sarig sa kanmu tagipusuun ag imaw ti marinu pag tudlu kanmu diman waydi pagsundun. 7 Danga pag-uyanga ti udas sa manga suyut angay lang sa kalibutan unman may kabuluhan. Bagkus ngap pangungud kawu kanmu bilug hanggan tagipusuun sa kanmu turunu marapasakup sa Diyus. 8 May pakinabang diman nu magpaantigu ti bilug. Dapat lalu waya may pakinabang nu mangungud kita kanta bilug hanggan tagipusuun sa kanta turunu marapasakup sa Diyus. Dahil nu katida kita pag mag-ugali, may patabgan di kita kaayadan balaw lang sa kainda pag buhi, lalu waya sa ikadwa pag buhi. 9 Balaw pudil inda ti pagsabihun ag kailangan lubus paniwalaan. 10 Nakan kita magpakasipag sa buruwatun una makuri, dahil mag-asa kita sa Diyus buhi, sa Manugribri tanan tawu, lalu sa manga magsarig sa kanya. 11 Paanyua nimu sida sa kanmu magtudlu sa kanda. 12 Danga pasnuan nimu nu magpuya diman sida sa kanmu dahil anak waya kawu baliwa. Bagkus pagpakasipag kawu hampay kawu ti mustara sa manga magsarig sa kan Kiristu, sa kanmu pamagawan, sa kanmu ugali, sa kanmu pagmahal, sa kanmu pagsarig hanggan sa kanmu unman may huput daut una di. 13 Hanggan sa udwaya aku Rumas-ug asan, kada may udas pagpirmi kawu pagbasa Banal Kasuratan sa madnugan manga iba. Pagtudlu kawu ag pagpaliwanag. 14 Danga paghamnua nimu ti ipinakaun Ispiritu Banal sa kanmu angay sa ipinurupita katpung sa nagkupa manga manug-asiwa iglisya kanda kamang sa kanmu. 15 Tupada gid nimu tunda, lubus ihanda nimu kanmu sadili sa inda pag buruwatun hampay makitan tanan tawu mag-amat kanmu kakang-udan. 16 Pagmadahan kawu sa kanmu ugali hanggan sa kanmu magtudlu. Pagparargu sa kanmu magtupad sa inda pag buruwatun hampay makaliktas kawu hanggan ti manga manugpatingi sa kanmu.
1 Danga nimu pagkaransaha sa hampang ti manga lalaki gurangun man sa kanmu. Hampangun nimu sida may galang parihu sa kanmu maggalang sa kanmu ama. Isipa nimu pinagkapatar-ari ti manga kalay-awan lalaki. 2 Galanga nimu ti manga gurangun pag babayi parihu sa kanmu ina. Pagpakiusa kawu sa manga kalay-awan babayi unman may lakay hangalhangal ga kanmu diman manga patar-ari babayi. 3 Pagmagalang kawu sa manga buranday babayi. Awatan nimu sida nu udyi may mag-asikasu sa kanda. 4 Nu bay may manga anak di una manga idu, sida yi lang ti mangasikasu sa kanda gurang, bilang kanda pananagutan sa gurang, katida nakan ti pagbayaun Diyus. 5 Ti babayi buranday nu udyi may katawuhan, Diyus wadi kay pagsarigan, nakan ngani pirmi siya magdarangin yabi sirang maghagad kay pangailangan sa Panginuun. 6 Dapat ti buranday nu mag-ugali sa parabayain, isipa yi lang siya ga namatay. 7 Paanyui duy nimu sida kainda pag manga bagay sa balaw may ikasabi sa kanda. 8 Una si unu nu balaw mag-asikasu sa kay manga katawuhan, lalu sa kay manga kasunu balay, kay tinalikdan yi kay pagsarig sa kan Kiristu, balaw di ngap ga manga unman waya nagsarig sa kan Kiristu. 9 Kainda ti mayad ilista nimu sa listahan manga babayi buranday hampay sida ti awatan, kay idad balaw kurang sa unumpulu ka timpu, kas-a lang ginan nangasawa, 10 kailangan pagpatutuuhanan manga iba kuntay mayad kay buwat, mayad kay nagpadaka sa kay manga anak, mahusay kay nagtanggap sa manga nagsabang sa kay balay. Nagsirbi diman siya sa manga patar-ari sa Panginuun, nangawat sa manga may kakurian, ihinanda niya kay sadili sa tanan mayad pag buwat. 11 Tubay yi lista ti manga babayi buranday udwaya masyadu dugay kay idad dahil nu magkaibug maan mangasawa pabay-anan maan nida kanda pagsirbi sa kan Kiristu. 12 Nakan barang sida libakun nu unman nagtupad sa kanda un-an pag pangaku sa kan Kiristu. 13 Maanad sida sa bugyahin, magkahilig yi gid sa magpanungbalay. Ti usa waya ka alangan sa kanda pagka dugay sida mapinasilabutun ag ragayrayan waya paman. 14 Nakan ngani nu sa kangku, mayad waya nu mangaswa maan ti manga buranday nu udwaya dugay kay idad hampay magkaanak bag-u nu alagaan nida kanda sadili magtal-anakan hampay unman may ikalibak ti manga maglaban sa kanta. 15 Kang pagsabihun inda dahil may manga babayi buranday natuksu ni Satanas. 16 Ti mayad nu manga babayi magsarig sa Panginuun tig-alaga sa kanda katawuhan buranday hampay balaw saragpunun iglisya tunda pag manga buranday. Nu katida, ti awat iglisya tabug lang sa manga buranday udyi may katawuhan magsagpun. 17 Pagkayamu nu magpakaun kamu sa manga manug-asiwa mayad kanda mag-asikasu, lalu sa manga manugbarita hanggan sa manga manugtudlu Bagaw Diyus. 18 Kainda ti pagsabihun Banal Kasuratan magkun, "Danga pagpungta kay bibig baka sa kay maggiuk." Nisurat diman waydi magkun, "Ti manugtarabahu kailangan pakan-an diman kay kaupahan." 19 Nu may magbintang sa manug-asiwa iglisya, danga nimu pasnuan nu unman may duwa manga tulu ka kastigus. 20 Nu may tawu magbuwat kasalanan, bilini nimu sida sa mag-adnugan tanan manga patar-ari hampay ti manga iba magkadala maghuwad. 21 Sa atubangan Diyus ag ni Kiristu Hisus hanggan sa atubangan niya pinili pag manga anghil, kang pagsuguun kawu hampay tupadun nimu inda pag manga bilin sa unman may pagkampihan sa baliw baliw, kailangan paghimasii kaayad. 22 Danga magkadaldali sa magkupa kamang una sa kantapu hampay pakan-an siya katungkulan sa iglisya. Pag-aman kawu sa dayu kawu maabay sa kasalanan manga iba. Pagpirmi kawu unman may huput kasalanan. 23 Danga duy danum lang ti kanmu inmun. Pag-inum diman waydi kawu alak kadiit. May pakinabang tunda sa kam panunaw karan-unun, pirmi nakan kawu magkasakit. 24 May manga tawu nilayaw yi gid kanda kasalanan bag-u mag-aput sa sintinsiya. Dapat ti iba pagka dugay bag-u di sida naabut sa kanda buwat kasalanan. 25 Katunda diman waydi may marinu pag manga buwat madali mag-akitan sa tawu. Una unman mag-akitan madali, balaw diman waydi mitagu tunda hanggan aban.
1 Ti mayad paggalang ti manga panawuhun sa kanda amu hampay unman may ikalibak sa ngaran Diyus una hanggan sa kanta surundanun. 2 Balaw kailangan mag-alukayu ti manga panawuhun sa kanda amu dahil sida parihu magtar-ari sa pagsarig sa kan Kiristu. Lalu waya ngapu pagkaayad kanda pagsirbi dahil ti kanda pagsirbihan mirinsan sa pagsarig sa kan Kiristu hanggan sa pagmahal. Paanyui nimu ti manga tawu sa kainda pag manga bagay. 3 Una si unu ti magtudlu tuhay sa inda pag manga katutuuhanan ag unman angay sa mayad pag manga bilin nita Panginuun Hisu-Kiristu, una hanggan sa manga tudlu tungkul sa kanta surundanun, 4 tunda pag tawu magpadayawdayaw dapat unman may kadunungan. Naugalian yi waydi niya ti parairgu hanggan ti aratwan tungkul sa manga sanglitan, imaw ti pagpun-an durumtan, kagalitan, puruyaan hanggan magbarangdanan, 5 ag aratwan manga tawu alangan kay pag-iisip ag unman magkilala sa katutuuhanan, manga maghantup kuntay ti surundanun sa ikayaman lang nida. 6 Nu sa ungud, tutuu daka kanta pakinabang nu magpasakup sa Diyus ag nu naanadan nita ti magbaya una sa kaalwanan una sa kakurian. 7 Unman kita may dara una hintay sa kanta pagkalusad sitay sa babaw daga, unman diman waydi kita may madara sa kanta pag-ighit sitay ginan. 8 Nakan ngani kailangan kita magbaya nu kita may karan-unun hanggan rutay. 9 Dapat ti tawu nu maghangad sa yumaman, madara siya sa tuksu ga nasduk sa mayamu pag kadautan ag sa unman may kabuluhan pag manga paghangadun, imaw ti magdara sa kanya tabug sa kadamhakan. 10 Dahil ti hangad sa kuwarta imaw ti gimpuunan tanan kadautan. Dahil may manga tawu maraibgun sa kuwarta nagsrimray sa kanda pagsarig, nagpakaun sida kakurian sa kanda sadili bilug. 11 Dapat kawu duy ti suruguun Diyus, pag-iwas kawu sa tunda pag manga bagay. Isipa gid nimu, pagkaayad kanmu ugali sa magpakatadlung, sa pagpasakup sa Diyus, sa pagsarig, sa pagmahal, sa pagtiis hanggan sa maalumanay. 12 Buwata nimu tugka sa kanmu makaya hampay ingatan nimu ti katutuuhanan tungkul sa kanta pagsarig una may kalaban bag-u makarubtan nimu ti tutuu pag buhi unman may katapusan. Kabay imaw pag buhi kay turunu Diyus. Nakan kawu kay pinili Diyus, pagka ipinakilala nimu mayad mayad kanmu pagsarig sa mag-adnugan kayamuan tawu. 13 Sa atubangan Diyus imaw ti gimpuunan tanan magkabuhi ag sa atubangan ni Kiristu Hisus imaw ti nagpatutuu mayad mayad sa kay pagsarig sa pagdungugan ni Punsiyu Pilatu, kang pagsabihan duy kawu, 14 tupada nimu ti katungkulan iinintirga sa kanmu, pagmalumpiyu kam tagipusuun sa unman may ikasabi sa kanmu hanggan sa ud Rumas-ug kanta Panginuun Hisu-Kiristu. 15 Aban sa kay taning pag kaudasan mipaburayhaw Diyus kay pagras-ug ni Hisu-Kiristu. Diyus gid ti marapapalad. Siya yi lang ti makamaskihan, siya ti Hari sa tanan manga hari, siya ti Panginuun sa tanan manga panginuun. 16 Siya lang ti ud may kamatayan, siya ti mangulian sa dayu masumpung pag karayawan. Unman may nakakit sa kanya ag unman may kumakit sa kanya una kainda. Sa kanya ti kadayawan hanggan ti unman may katapusan pag kapangyarihan. Amin. 17 Sabihi nimu ti manga mayaman, danga magpalabawlabaw. Danga sida magsarig sa kanda kayamanan dahil tunda magkadura di. Bagkus ngap pagsarig sida sa Diyus, imaw ti abunda pag manugpakaun tanan bagay sa ikabaya nita. 18 Sabihi nimu sida pagbuwat mayad, pagpakayaman sida sa mayad pag buwat. Pagmarapakaun, pagmaraawat sida sa kaparihu tawu. 19 Nu katida makatipun sida kayamanan sa pag-atubangun pag udas ag makatanggap sida tutuu pag buhi. 20 Kawu duy Timutiyu, ingatan nimu ti iinintirga sa kanmu. Iwasan nimu ti manga harampangan unman ikabaya Diyus hanggan ti salalumpangan. 21 Dahil ti manga magpadunungun nagtalang ngap ginan sa kanda pagsarig sa kan Kiristu. Pagsa kanyu tanan kay papalad Diyus.
1 Inda ti may surat si Pablu. Aku ti kinaibgan Diyus hampay Apustul ni Kiristu Hisus para manudlu aku tungkul sa buhi kay ipinangaku Diyus sa kanta dahil sa kanta pakiusa sa kan Kiristu. 2 Inda pag surat tabug sa kanmu, Timutiyu. Kawu kang pagmahalun dahil kawu kang pinagkaanak sa pagsarig sa kan Kiristu. Kang pag-idarangin kawu hampay kawu papaladan, kaawaan ag pakan-an kahusayan ginan sa Diyus Ama ag ginan sa kanta Panginuun Kiristu Hisus. 3 Magpasalamat aku sa Diyus imaw kang pagsirbihan lubus parihu sa binwat niku manga ginurang. Magpasalamat ungud aku sa Diyus sa kada magkaisipan niku kawu sa kang magdarangin yabi sirang. 4 Gustu gustu gid niku makitan kawu hampay lubus gid kang kabayaan, lalu nu magkaisipan niku kanmu naglumi. 5 Dayu gid niku malimtan kanmu buu pagsarig, parihu sa kay pagsarig nimu idu ni Luida hanggan sa kay pagsarig nimu ina ni Yunisi. Alam niku una kawu katunda diman kanmu pagsarig. 6 Nakan ngani pag-ipaalaala niku sa kanmu, danga paghamnua nimu ti pakaun Ispiritu kanmu tinanggap ginan sa Diyus, sa katpung kawu kinup-an niku kamang. 7 Dahil ti Ispiritu Diyus balaw magpakaun kadalaan sa kanta. Bagkus ngap kay ipinakaun Ispiritu sa kanta ti kapangyarihan, ti pagmahal ag ti mapininsarun. 8 Nakan ngani danga magkay-a magtultul tungkul sa Panginuun. Danga waydi ikakay-a nimu kang mapirisuhan dahil sa kanya. Bagkus ngap pagdamay sa kakurian dahil sa pagtudlu Mayad pag Barita, pagsarig sa kapangyarihan Diyus. 9 Diyus ti nagribri ag nagpili sa kanta hampay kita kay yi nasyun. Balaw dahil sa kanta sadili buwat nu unman angay ngap sa kay turunu pag gayak. Pagka udwaya linalang ti kalibutan daan di itinigana niya kay mayad nabubut-un niya sa kanta dahil kita niusa sa kan Kiristu. 10 Dapat niburayhaw lang kay mayad nabubut-un Diyus pagka nakaras-ug si Kiristu Hisus kanta Manugribri. Tinalu niya ti kamatayan bag-u sa kay magtudlu Mayad pag Barita pag ipinakilala niya ti tutuu pag buhi unman may katapusan. 11 Pinili niya aku Apustul hanggan manugtudlu hampay itudlu niku inda pag Mayad pag Barita. 12 Tida ngani kay dahilan nakan aku mag-agwanta inda pag kakurian. Dapat ay una katida unman aku mag-alinlangan. Dahil lubus niku magkakilala kang Panginuun kang pagsarigan. Pihu gid kaya niya maingatan ti kang inintirga sa kanya hanggan sa ud Rumas-ug ti kaudasan Panginuun. 13 Pag-isipa nimu pirmi kang manga itinudlu sa kanmu, huwada gid nimu. Kabay pasay katutuuhanan tunda. Pagpakarig-un kawu sa pagsarig hanggan sa pagmahal kanta tinanggap dahil sa kanta pakiusa sa kan Kiristu Hisus. 14 Kanmu mahalaga pag katungkulan kailangan alagaan nimu sa kapangyarihan Ispiritu Banal imaw ti nangulian sa kanta. 15 Magkaalaman diman nimu sinukuan aku tanan manga patar-ari sa Asya. Una sida duwa ni Pigilu ni Hirmuginis udyi magpausa sa kangku. 16 Pag-idarangin niku ti magtal-anakan ni Unisipuru hampay kaawaan sida Diyus. Balaw di kas-a sinaya niya aku. Balaw aku kinay-ahan niya madi aku pirisu. 17 Bagkus ngap pagka rinmas-ug siya sa Ruma, pinakahanap gid niya aku hanggan sa ud aku nasampakan. 18 Pagsa kanya kay pangaawa Panginuun nu kaudasan yi aban pagbalik Panginuun. Alam diman gid nimu nu kabitay siya pag nagsirbi sa iglisya ati sa Ipisu.
1 Dapat kawu duy Timutiyu, kang pinagkaanak, pagpakarig-un kawu sa kaayadan kay pag-ipakaun ni Kiristu Hisus dahil sa kanmu pakiusa sa kanya. 2 Ti manga nadnugan nimu sa kangku sa atubangan mayamu manga manugpatingi kailangan kanmu waydi itudlu iintirga sa manga tawu magkaasahan magtudlu waydi sa iba. 3 Pagdamay kawu sa kakurian parihu sa usa ka mayad pag sundalu ni Kiristu Hisus. 4 Ti usa ka sundalu danga magpakialam sa bukun buruwatun sundalu. Lalu ngap kailangan sigasidan niya hampay makabaya kay pinunu. 5 Balaw manalu ti mag-urunahan sa palalagiwan nu siya unman sumunud sa patigayun. 6 Ti manugtanman nu nagbudlay sa tarabahu, imaw ti may karampatan makatanaggap sa kabag-u pag parti niya ani. 7 Isip-isipa gid nimu mayad kang pagsabihun sa kanmu. Ipauninaw Diyus sa kanmu kay ibug sabihun inda tanan tanan. 8 Alalahana nimu si Hisu-Kiristu ti nabuhi uman, imaw ti linahi ni Dabid angay sa Mayad pag Barita kang pag-itudlu. 9 Dahil sa kang magtudlu Mayad pag Barita nakan aku mag-agwanta sa kakurian hanggan sa pirisuhan parihu sa may kasalanan. Dapat balaw magkagapus ti Bagaw Diyus. 10 Nakan maagwanta di niku ti tanan bagay alang alang sa manga pinili Diyus hampay makatanggap diman sida karibrihan hanggan unman may katapusan pag kadayawan kay pakaun ni Kiristu Hisus. 11 Inda ti mapaniwalaan pag kasabihan magkun, "Nu kita namatay kaibahan ni Kiristu, balaw may palya pihu mabuhi diman kita kaibahan niya. 12 Nu kita mainagwantahun sa kakurian humari diman kita kaibahan ni Kiristu. Nu itanggi nita siya sa atubangan manga tawu, itanggi waydi niya kita. 13 Nu unman matinupadun kita, si Kiristu matinupadun di. Dahil unman mitanggi niya kay sadili." 14 Paalalahanan nimu inda pag manga bagay sa kanmu manga tuludluan ag bilini nimu sida sa ngaran Diyus danga sida mag-aratwan tungkul sa manga sanglitan. Unman may pulus tunda pag magpakatalaluhan, bagkus ngap tunda sa ikadamhak manga nakadnug. 15 Pagmasigasid hampay makaatubang kawu sa Diyus, kanmu ugali pagmaangay sa kanya, manugbuwat unman may ikakay-a, matinupadun pag manugtudlu sa tutuu pag barita Diyus. 16 Iwasi nimu ti unman may kabuluhan ag mahalay pag baragawun, dahil ti manga tawu magbuwat katida lalu ngap umarayu, umamat waya kanda unman maggalang sa Diyus. 17 Kanda manga tudlu parihu sa baghak pag sakit magpanlatag sa bilug. Kabilang diman siti pag kalasi tawu sida ni Himiniyu ni Pilitu. 18 Tinmalang sida ginan sa katutuuhanan. Pag-itudlu nida magkun, natupad yi kanta pagkabuhi uman. Nakan kanda pagdautun ti pagsarig manga iba. 19 Dapat marig-un kay ipinakana Diyus pag manga tudlu magkun, "Magkakilala di Panginuun nu si unu ti sa kanya." ag "Ti kada tawu magpatutuu sa kay ngaran Panginuun danga magpasnu sa manga magbuwat kadautan." 20 Sa ulian mayaman balaw tanan kagamitan lunsay yi gintu hanggan pilak, may imaw diman kayu ti binwat taya hanggan daga ga anglit. Tunda pag garamitun gintu manga pilak pagpahalagaan gid niya apu. Dapat ti kagamitan kayu ti binwat taya hanggan tunda pag daga binwat ga anglit balaw masyadu pagpahalagaan. 21 Una si unu ti magpakarayu sa magbuwat kadautan pag-ipaparihu sa manga garamitun pagpahalagaan niya apu, manga sakup sa Diyus, ihinanda para gamitun niya Panginuun, pirmi alistu sa una hintay pag buruwatun mayad. 22 Nakan iwasi yi nimu ti hilig sa daut buwat manga kalay-awan. Pag-isip kawu agud matadlung, matinupadun hanggan mapinasunaidun. Pag-ugali kawu sa mahusay, kaibahan manga tawu malumpiyu kay tagipusuun sa kanda magdangup sa Panginuun. 23 Amani nimu ti ud may kabuluhan pag dibati. Alam yi waydi nimu tunda ngani ti pagpun-an arawayan. 24 Unman kailangan makipag-away ti panawuhun Panginuun. Bagkus ngap kailangan siya madunung makibagay sa tanan tawu ag matiniisun pag manugtudlu. 25 Kailangan pagmaalumanay siya nu magtamyaw sa manga maglaban sa kanya. Barang nu katida pag paraan, pakan-an sida Diyus rugar hampay makasisi ag makaampu sa kanda kasalanan, agud maalaman nida ti katutuuhanan. 26 Nu katunda marayawan kanda naisipan hampay makakalpas sa dit-ag diyablu imaw ti nagbutung sa kanda.
1 Tandai nimu inda. Sa uryan pag kaudasan mangyari ti manga kakurian. 2 Ti manga tawu aban makasadili, mahilig sa kuwarta, palabilabihun, yabangyabangin, magpanmuransa, supladu sa gurangun, unman may pasunaid sa kay sadili, ag maglapastangan sa Diyus. 3 Usa sa siyun manga arisgadu sida, udyi may pangaawa, magpamuya, maurugun, maparanghasin, magkadaut sida sa una hintay pag kaayadan. 4 Balaw lang tunda. Paradaya waya sida, unman may galang, palabilabihun, mahilig sa daut pag kasayahan, unman ngap pagpahalgaan nida ti Diyus. 5 Magpabalhinguun sida kuntay may pagsarig, dapat nu sa ungud pag-itanggi nida ti kapangyarihan Diyus. Pag-aman kawu sa katunda pag manga tawu. 6 Ti iba sa kanda, kanda buwat magdaya hampay makasaka sa manga tawu balay. Bag-u paggaryahun nida ti manga babayi balaw masyadu kay buut, nalagum yi sa kasalanan, manga panawuhun sadili nida daut pag kagustuhan. 7 Tunda pag manga babayi gustu gid nida maalaman ti tanan manga bagay, dapat una waya hanggan aban balaw umintindi sa katutuuhanan. 8 Tunda pag manga lalaki maglaban sa katutuuhanan parihu diman sa kanda ni Hanis ni Hambiris naglaban sa kan Muysis. Udyi sida may pag-isipun kaayadan, nakan nakilala kanda pagsarig kuntay unman may kabuluhan. 9 Dapat balaw Rumargu kanda buwat kadautan, dahil miburayhaw yi waydi sa tanan tawu kanda buwat kadautan, parihu sa nangyari sa kanda ni Hanis ni Hambiris. 10 Dapat balaw katida kawu. Kanmu ngap sinunud kang manga bilin, ugali hanggan turunu. Alam yi waydi nimu kang pagsarig, kang matugway, kang pagmahal hanggan kang matiniisun. 11 Alam diman nimu ti manga mag-unuunu sa kangku hanggan kang inagwanta sa Antiyukya, sa Ikunya, ag sa Listara. Masyadu gid inunuunu aku ati katpung, dapat sa tanan pag manga kakurian tunda ipinaribri di aku Panginuun. 12 Ti tanan manga may gustu mangugali sakup sa Diyus ag magpakiusa sa kan Kiristu, pihu makalakaw pag-unuunu. 13 Ti daut pag manga tawu lalu yi gid magpakadaut. Ti tawu maradaya lalu yi ngap mandaya, ag sida hanggan madaya diman. 14 Dapat danga nimu pagbul-iwi ti kanmu manga nataw-an sa kanmu mag-adal hanggan ti kanmu sinarigan, dahil nakilala yi waydi nimu ti manga tawu nagtudlu sa kanmu. 15 Ginan sa diit di waya kawu, naanad yi kawu sa Banal Kasuratan, imaw ti makapakaun kadunungan sa kanmu sa ikaribri nimu nu kawu magsarig sa kan Kiristu Hisus. 16 Ti tanan Banal Kasuratan ginan sa udyuk Diyus pag nisurat nakan magamit diman sa pagtudlu katutuuhanan, sa pagpakilala sa salan pag manga tudlu, sa pagpatadlung sa manga maliku pag buwat hanggan sa pagbutung tabug sa mayad pag ugali, 17 hampay ti tawu magsirbi sa Diyus madunung ag alistu yi sa tanan mayad pag buruwatun.
1 Aku may pagsabihun gid sa kanmu sa atubangan Diyus hanggan sa atubangan ni Kiristu Hisus, imaw ti pumihu aban sa manga tawu buhi di waya hanggan sa manga namatay yi nu daut nu mayad. Pag-alalahanun diman niku kay pagsitay aban ni Kiristu hanggan kay paghari aban. 2 Nakan kang patigayun sa kanmu duy itudlu nimu ti Bagaw Diyus, una sa hintay pag udas. Danga magpasnu sa manga tawu nu salan, tamyawa. Parig-una nimu ti nalub-anan manga tawu. Pagmaalumanay kawu pirmi, danga gid pag-apasi sa tudlu. 3 Dahil Rumas-ug aban ti udas balaw yi patingihan manga tawu ti katutuuhanan pag tudlu. Bagkus ngap sundun nida kanda sadili kagustuhan. Manhanap sida mayamu pag manga manugtudlu balaw may iba itudlu nu unman ti kanda lang magustuhan manga manugpatingi. 4 Kanda hilig aban sa manga suyut lang, dayi patingihan nida ti katutuuhanan. 5 Nakan ngani pagmapinigilun kawu sa tanan udas. Pag-agwantaha nimu ti kakurian magras-ug sa kanmu. Tupada nimu ti katungkulan manugpadakit Mayad pag Barita. Asikasuha nimu kanmu burutawun dahil sa kanmu pagsirbi sa Diyus. 6 Iintirga yi niku inda kang buhi sa Diyus. Rinmas-ug yi kang kaudasan kamatayun. 7 Lubus aku naglaban ga sa mag-urunahan. Nakaaput yi aku sa turunu niku palalagiwan. Iningatan niku ti katutuuhanan tungkul sa kanta pagsarig. 8 Matanggap yi niku aban kang pirimyu sa kang nanalu. Panginuun ti matadlung pag huwis, imaw ti pumakaun kang pirimyu ati katpung pag kaudasan sa kay pagbalik niya aban. Balaw lang waydi aku ti makatanggap pirimyu. Makatanggap waydi kanda pirimyu ti tanan manga magmahal sa Panginuun, manga magpatigagad sa kay pagbalik niya aban. 9 Pagluwang yi gid duy kawu sitay tag dag yi dugay. 10 Dahil tinayakan yi aku ni Dimas. Ipinalabi di niya ti bagay sa kalibutan. Ati yi siya sa Tisalunika. Si Kirisinti nag-ati sa Galasya. Si Titu waydi ati sa Dalmasya. 11 Si Lukas wadi kang kaibahan. Hanapa nimu si Markus, tabana nimu sitay tag dahil daka kay miawat sa kang manga buruwatun. 12 Sinugu niku si Tikiku tag sa Ipisu. 13 Nu kawu sumitay daran-a nimu kang pangulimpay, nalimtan niku ati sa kan Karpu sa Turuwas. Daran-a diman nimu kang manga ribru, lalu tunda pag manga ribru kay papil pirgamintu. 14 Subra gid pag kadautan kay binwat sa kangku ni Alihanduru imaw ti manugpanday galang. Panginuun ti gumanti sa kanya angay sa kay binwat. 15 Pag-aman kawu sa kanya dahil magpakaampara siya sa Mayad pag Barita kanta pag-itudlu. 16 Udyi may nangiba sa kangku sa kang kabag-u inmatubang sa husgadu. Tinayakan nida aku usa wadi. Patawadun sida Diyus. 17 Dapat balaw aku pinabay-anan Panginuun. Pinakan-an aku kabisugan hampay lubus mipaliwanag niku ti Mayad pag Barita sa mag-adnugan tanan manga balaw Hudiyu. Naribri di aku madi kanda mana ibahug sa manga liyun. 18 Ti Panginuun diman ti makaparibri aban sa kangku sa tanan pag kadautan. Siya diman ti dumara sa kangku tag sa kay kaharian sa langit. Dayawun siya hanggan waya aban. Amin. 19 Ipakamusta nimu aku sa kanda mag-asawa nida ni Pirisila ni Akila, hanggan sa kay magtal-anakan ni Unisipuru. 20 Si Irastu natayak di sa Kurintu, si Turupimu tinayakan niku sa Militu, dahil may sakit siya. 21 Pagluwang yi duy sitay tag pag-udwaya mana amihanun. Pagkamustahun diman kawu nida ni Yubulu, ni Pudinti, ni Linu, ni Kalaudya, hanggan ti tanan patar-ari magpakamusta diman sa kanmu. 22 Pag-idarangin niku kawu hampay kanmu tagipusuun magpakiusa sa Panginuun. Pagsa kanyu tanan kay papalad Diyus.
1 Inda ti may surat si Pablu, kay panawuhun Diyus ag Apustul ni Hisu-Kiristu. Sinugu aku hampay parig-unun ti pagsarig manga pinili Diyus ag hampay itudlu sa kanda ti katutuuhanan nita surundanun, 2 agud magsarig sida sa buhi unman may katapusan. Udwaya linalang ti kalibutan daan di ipinangaku Diyus ti buhi unman may katapusan. Ti Diyus unman madunung magpudil. 3 Sa kay taning pag udas ipinaburayhaw Diyus inda pag barita bag-u kay iinintirga sa kangku hampay kang itudlu sa manga tawu angay sa kay bilin Diyus, imaw yi ngani kanta Manugribri. 4 Inda kang surat tabug sa kanmu, Titu, dahil kawu kang pinagkaanak, usa kita sa kanta pagsarig. Kawu kang pag-idarangin hampay pakan-an kawu kaayadan ag kahusayan ginan sa Diyus Ama ag ginan sa kan Kiristu Hisus, sa kanta Manugribri. 5 Tinayakan niku kawu sa Kirita hampay ayusun nimu ti manga buruwatun udwaya namhan ag hampay pilian nimu manga manug-asiwa ti iglisya sa kada rugar ga kang diman ibinilin sa kanmu. 6 Ti kailangan nimu piliun tunda unman may ikasaway, usa lang kay asawa, kay manga anak magpasakup waydi sa Panginuun, mabuut kanda ugali ag masurundun. 7 Kailangan gid unman may ikasabi sa manug-asiwa iglisya, dahil magpamahala siya sa manga anak Diyus. Kailangan siya unman palabilabihun, unman waydi arisgadu, balaw maglangu, balaw magalitun, balaw daluk, 8 ag balaw waydi mag-irang kay balay. Kailangan siya maraibgun sa mayad, mapinigilun sa kay sadili, matinupadun sa kay kaparihu tawu, masurundun sa Diyus, mapinasunaidun sa kay sadili. 9 Kailangan siya marig-un kay magtupad sa tutuu pag Bagaw Diyus angay sa itinudlu sa kanya hampay mitudlu maan niya sa manga iba sa ikarig-un nida ag hampay ipagpakilala diman waydi niya ti salan manga tawu maglaban sa Mayad pag Barita. 10 Mayamu yi tiglaban sa inda pag adal. Pagdayaun nida ti iba, kanda pagtudluan sa manga unman may kabuluhan. Ti kayamuan ay manga Hudiyu ti magtudlu katida. 11 Kailangan sida amparahan sa kanda maglaban hanggan magdaya, dahil pagguluhun nida ti manga magtal-anakan. Basta sida sa kumakit lang kuwarta, pag-itudlu nida ti unman kailangan itudlu. 12 May usa diman waydi ka purupita sida sa taga Kirita ti magsabi magkun, "Pudilpudilun ti manga taga Kirita, ga ugali daut pag hayup, manga bugyahin, dalukdaluk." 13 Balaw salan kay pagsabihun. Nakan paanyuan nimu sida sa mahigpit hampay mangugali sida sa maayus angay sa kanda pagsarig, 14 ag hampay dayi sida magpaniwala sa manga tultulanun basta basta manga Hudiyu, danga waydi sida magpaniwala sa paanyu manga tawu magdayu sa katutuuhanan. 15 Ti tanan manga bagay malumpiyu diman waydi sa tawu nu malumpiyu kay naisipan. Dapat sa manga tawu daut kay naisipan manga unman magsarig sa kan Hisus, unman may bagay malumpiyu, dahil may pag-alalahanun sida kasalanan sa kay naisipan hanggan sa kay tagipusuun. 16 Ti sabi nida kilala kunu nida ti Diyus, dapat sa kanda tarabahu pag-ipaulam ngap nida ti Diyus. Pagpanab-angan yi sida, dahil sida manga supladu, dayu mahimu sida sa una hintay pag mayad buwat.
1 Kawu bay kailangan pagpaliwanag kawu sa manga tawu tunda kang-ud pag tudlu. 2 Pagkumun kawu sa manga gurangun pag lalaki, pagmapinigilun sida, pagmahusay, pagmaalumanay kanda manga pag-iisip. Pag-ugali sida sa maayus angay sa kanda pagsarig, pagmapinasunaidun sida, pagmatiniisun. 3 Katunda diman pagkumun kawu sa manga gurangun pag manga babayi kailangan ipakakit nida kanda maggalang sa Panginuun hanggan sa tawu, danga sida parabangdan sa tawu, danga sida magkadara sa manga irinmanun, bagkus kailangan pagtudlu sida sa mayad. 4 Kailangan kanda tudluan ti manga babayi udwaya may idad dugay hampay sida magmahal sa kanda asawa hanggan sa kanda manga anak. 5 Pagpirmi sida maalumanay, pagmalinis kanda manga ugali, pagmasipag sa buruwatun sa sulud balay, pagkaayad kanda manga nabubut-un, pagpasakup sida sa kanda manga asawa hampay unman may pag-ilibak ti manga tawu laban sa Bagaw Diyus. 6 Paanyui waydi nimu ti manga lalaki udwaya dugay kay idad. Pagmapinigilun sida sa kanda sadili. 7 Sa tanan nimu buruwatun pagmay makitan sida marinu pag mustara. Pagmatinupadun kawu sa kanmu magtudlu, danga isipun manga iba kuntay hakut lang ti kanmu pagsabihun. 8 Pagpirmi gid hustu angay sa katutuuhanan ti kanmu pagsabihun hampay unman may ikasabi una si unu sa kanmu pagbagawun. Nu katida mangay-a kanta manga kalaban dahil unman may tultulun sida laban sa kanta. 9 Paanyui diman waydi nimu ti manga panawuhun. Pagmasurundun sida sa kanda amu sa tanan nida tarabahu, danga sa kalugusan. Intindiha nida kanda pagsirbi hampay kang-ud. 10 Sabihi nimu sida danga maggawhin. Kailangan paglubus masarigan sida hampay sa tanan nida ugali pag-ipakakit nida ti kaayadan kay pag-itudlu Diyus imaw kanta Manugribri. 11 Dahil Ipinakakit Diyus kay pangaawa sa ikaribri tanan tawu. 12 Inda pag pangaawa ti magbutung sa kanta hampay tayakan ti maliku pag ugali hanggan ti irisipun makasadili angay sa ugali kalibutan. Bag-u makaugali kita mahusay, matadlung ag angay sa kagustuhan Diyus sitay sa kalibutan. 13 Paggagadun nita ti pihur gid mangyari aban, ti madayaw pag kaudasan nu mihayag si Hisu-Kiristu sa karaw-an niya kadayawan. Siya yi ngani kanta makamaskihan pag Diyus hanggan Manugribri. 14 Ipinakaun niya kay sadili bilug hampay lukatun niya kita sa tanan kasalanan ag hampay lumpiyuhun niya kita, kay yi sadili pag nasakupan agud manga masipag sa magbuwat mayad. 15 Itudlu yi ngani nimu inda tanan, ilubus nimu kanmu karampatan sa kanmu magparig-un hanggan sa kanmu magtamyaw sa manga manugpatingi. Danga pakan-an nimu sida kaluagan hampay maghakut diman sa kanmu.
1 Paalaalahi nimu ti manga patar-ari pagpasakup sida sa manga pangulu hanggan sa manga may kangaranan. Pagsunud sida sa may kangaranan. Pagpirmi daan alistu kanda naisipan sa magbuwat mayad. 2 Amparaha nimu sida magbagaw daut una sa kantapu. Iwasi nida ti mag-arawayan. Kailangan sida pagma-alumanay, lubus galanga nida ti tanan tawu. 3 Nu kaybi waya kita diman nagsimray sa dalan, kurang kita sa intindi, manga palasupladu kita, ga panawuhun kita nita sadili kagustuhan naisipan hanggan tanan kalasi kasayahan. Ati katpung may ugali diman kita magkutub ag maghamnu galit ag pirmi kita kinagalitan manga iba. Nagkalagalitan diman kita sa usa kag sa usa. 4 Dapat taynguna ipinaburayhaw Diyus kay pangaawa hanggan kay pagmahal sa manga tawu. Siya ngani kanta Manugribri. 5 Nakan irinibri niya kita, balaw dahil sa kanta sadili buwat mayad nu unman angay lang sa kay pangaawa. Irinibri niya kita, linumpiyu kita sa danum sa katpung kita inanak inuman ag binag-u kita Ispiritu Banal. 6 Ilinubus Diyus sa kanta ti Ispiritu Banal ginan sa kan Hisu-Kiristu sa kanta Manugribri. 7 Dahil sa kay pangaawa sa kanta nakan kita kay pagkilalan-un manga matadlung ag may pag-asa diman kita matanggap nita ti buhi unman may katapusan. 8 Inda pag manga adal imaw ti katutuuhanan. Nakan ngani kang gustu pagkasipag kawu itudlu nimu inda hampay ti manga magsarig sa Diyus handa kanda naisipan sa pagbuwat mayad. Inda pag manga paanyu imaw ti pinakamayad ag mapakinabangan tanan tawu. 9 Iwasan nimu ti manga dibati unman may pulus, ti manga tultulanun aba pag listahan nida manga kaapuapuhan, ti maglalabanan hanggan mag-arawayan tungkul sa Kasuguan. Dahil ti katunda unman makinabangan, unman diman may pulus. 10 Una si unu pag tawu tigpagulu tigpaaway sa manga iba tawu danga yi dap magpakiusa kawu sa kanya nu sinabihan nimu tugka sa ikadwa pag sabi. 11 Dahil alam nimu nu katunda ti tawu magtikis yi siya magbuwat kasalanan. Alam diman niya daut kay pagbuwatun. 12 Kang ipaasan si Artimas, aw ngatay si Tikiku. Nu Rumas-ug asan, pilit gid duy lumuwang kawu kadali sa kangku sa banwa Nikupulis. Kang gayak ati dap aku sa Nikupulis hanggan sa udwaya lumawuy ti amihanun. 13 Danga nimu pabay-ani, awati di gid nimu si Aturni Sinas hanggan si Apulus hampay balaw maatrasadu kanda maglakaw. Pihua gid nimu pagkang-ud kanda manga balalunun. 14 Tudlui gid nimu kanta manga kaibahan asan hampay gamitun nida ti kada udas sa tarabahu ikabuhi nida ag hampay makaawat sida diman sa manga may kakurangan. 15 Pagpaingan-un kawu tanan niku manga kaibahan nu kabitay waydi kawu asan baliwa. Ipadakit waydi nimu kang kamusta asan sa tanan magsarig pag manga patar-ari. Pag-idarangin niku kamu tanan hampay papaladan kamu Diyus.
1 Inda ti may surat si Pablu, ti napirisu dahil ngani sa kan Kiristu Hisus, hanggan kanta patar-ari si Timutiyu. Inda pag surat tag sa kanmu, Pilimun, sa kanmi pagmahalun pag kaawat sa buruwatun, 2 hanggan diman sa iglisya magtiripun sa kanmu balay, hanggan sa kanmi patar-ari babayi sa kan Apya, hanggan sa kanmi kaparihu sundalu sa kan Arkipu. 3 Kamu kang pag-idarangin hampay pakan-an kamu kaayadan hanggan kahusayan ginan sa Diyus, sa kanta Ama hanggan ginan sa Panginuun Hisu-Kiristu. 4 Pirmi duy aku magbaya sa kang Diyus kada kawu kang pag-idarangin, 5 dahil lagat lagat mabaritaan niku kanmu pagmahal ag kanmu pagsarig sa Panginuun Hisus hanggan sa tanan manga magsarig sa kanya. 6 Pag-idarangin duy niku kanta magpakiusa sa sarig nita hampay mamurak sa lubus pagkakilala sa manga kaayadan minsan yi sa kanta pagkausahan sa kan Kiristu. 7 Patar-ari, lubus aku nagbaya ag nagmasulung maan kang naisipan, pagka naalaman niku kuntay dinmasig maan ti naisipan manga magsarig sa kan Hisus dahil sa kanmu pagmahal. 8 Dahil sa kanta pakiusa sa kan Kiristu, mahimu mana aku magpaanyu sa kanmu, Pilimun, kuntay tupada yi lang nimu inda. 9 Dapat dahil sa kang pagmahal gid sa kanmu, nakan lalu kang gustu magpakihampang gid sa kanmu inda. Aku si Pablu, ti sinugu ni Kiristu Hisus, madi taynguna aku usa ka pirisu dahil sa kanya. 10 Aku magpakihampang mana sa kanmu tungkul sa kang pinagkaanak, tungkul sa kan Unisimu. Dahil siya kang naabay sa pagsarig kang atay sa pirisuhan. 11 Nu kaybi unman duy napakinabangan nimu siya, dapat taynguna una kawu una aku may pakinabang ngap sa kanya. 12 Siya kang yi maan ipabalik tabug sa kanmu ga kang yi ipadara kang buu tagipusuun sa kanmu. 13 Gustu gid mana niku siya udyi gid ipalakaw niku ginan sa kang arani hampay siya ga kaublus nimu magsirbi sa kangku hanggan aku sa pirisuhan waya dahil sa kang magtudlu Mayad pag Barita. 14 Dapat dayu diman waydi aku magpiil sa kanya nu unman kawu pumasnu hampay balaw waydi sa pilitan kanmu awat sa kangku, nu unman sa buluntad nimu pag kagustuhan. 15 Banta sitay niblag ngalay ngalay sa kanmu si Unisimu hampay nu bumalik maan siya sa kanmu, kanmu yi gid iribahun siya hanggan di aban. 16 Bukun yi nimu masabi panawuhun nu unman kanmu yi pagmahalun pag patar-ari. Lubus gid pagmahalun niku siya, dapat ay kanmu pagmahal sa kanya balaw lang ga kang pagmahal sa kanya, dahil balaw lang kanmu panawuhun nu unman ngap patar-ari waya nimu siya sa Panginuun. 17 Tanggapa maan nimu si Unisimu parihu sa kanmu magtanggap sa kangku, nu pagpahalgaan nimu kanta magpakiusa sa kan Kiristu. 18 Nu abi nangus siya nagkasala sa kanmu, aw ngatay may utang man, sukta yi lang nimu tunda sa kangku. 19 Aku ti may surat inda, si Pablu. Aku ngani ti bumayad sa kanmu. Udyi lang gustu niku banggitun kuntay ga utang nimu sa kangku kanmu bag-u buhi sa kan Kiristu. 20 Magpakihampang gid aku sa kanmu dahil ngani sa Panginuun, pasnui gid duy kang pagsabihun sa kanmu. Pakan-i nimu masulung pag kabayaan kang tagipusuun, dahil kawu yi waydi kang patar-ari sa kan Kiristu. 21 Tutuu aku magsarig kanmu gid buwatun subra waya sa kang isinurat inda. 22 Aku handai yi gid kang madayunan, dahil aku magsarig yi gid pihu yi pahintulutan Diyus aku makabalik asan tabug sa kanyu, parihu diman sa kanyu paghagadun sa Panginuun. 23 Magpaingana si Ipapras nu kabitay kawu duy asan. Minsan kabay kami napirisu dahil sa kan Kiristu Hisus. 24 Hanggan sida ni Markus, ni Aristarku, ni Dimas, ni Lukas manga kaibahan niku sa buruwatun, magpaingana waydi sa kanmu nu kabitay asan kawu. 25 Pag-idarangin niku kamu hampay sa kanyu ti papalad nita Panginuun Hisu-Kiristu.
1 Kaybi waya ginan ipinadakit manga purupita ti manga binagaw Diyus sa kanta manga ginurang sa tuhay tuhay pag udas ag sa tuhay tuhay pag paraan. 2 Pagka kainda arani yi ti katapusan kalibutan, kay Anak ngap ti nagpadakit sa kay manga binagaw Diyus sa kanta. Ti Anak ti pinili pag manugkarubut sa tanan manga bagay, dahil ginan lang sa kanya pag binwat Diyus ti kalibutan. 3 Ti Anak ti duag kadayawan Diyus. Parihu siya sa Diyus sa tanan bagay. Ti Anak diman ti mag-alaga sa tanan bagay sa kamaskihan niya bagaw. Pagka ihinanda niya kay kapatawadan sa manga tawu kasalanan bag-u tinmukaw siya ati sa langit baliwa sa sikun Diyus, minsan sa karampatan Diyus makamaskihan sa tanan. 4 Lalu gid mayad pag ngaran ti ipinakaun Diyus sa kay Anak, balaw lang ga sa manga anghil, nakan lalu gid mayad siya sa manga anghil. 5 Nakan unman gid may anghil sinabihan Diyus una kapira magkun, "Kawu kang Anak, taynguna aku kanmu yi Ama." Inda waya kay sinabi magkun, "Aku ti Ama tumupad sa kang Anak, Kang Anak tumupad waydi sa kangku." 6 Kainda waya kay sinabi Diyus, pagka arani yi suguun niya ti panganay tag sa kalibutan, magkun siya, "Kailangan siya sambahun tanan manga anghil." 7 Sinabi waydi Diyus tungkul sa manga anghil magkun, "Pagbuwatun Diyus kay manga anghil manga durus, Kay manga suruguun pagbuwatun niya manga labdab apuy." 8 Dapat nu tungkul sa Anak kay sinabi, "Diyus, kanmu katungkulan sa maghari unman may katapusan hanggan waya aban. Ti kamaskihan sa kanmu maghari imaw ti matadlung pag kamaskihan. 9 Minayad nimu ti katadlungan ag kinagalitan nimu ti kadautan, nakan ti Diyus, kanmu ngani Diyus, ti nagpili sa kanmu ag balaw sa kanmu manga kaibahan. Binuhusan kawu lana hampay kawu maghari yi may kabayaan." 10 Bag-u inda waya kay sabi sa Bagaw magkun, "Panginuun, sa kabag-u nikana nimu ti daga, hanggan ti manga langit binwat waydi nimu manga kamang. 11 Ti daga ag ti manga langit mipadamhak di aban. Dapat kawu unman may katapusan. Sida tanan maluma di parihu sa rutay. 12 Parihu sa usa ka kulimpay sida kanmu ayukumun aban bag-u sida mailsan parihu sa bisti. Dapat kawu balaw mauman, kanmu timpu balaw may katapusan." 13 Unman diman sinabi Diyus sa una hintay sa kay manga anghil magkun, "Pagtukaw kawu sitay baliwa sa kang sikun, pagpaminsan sa kang karampatan sa maghari hanggan sa udwaya mabuwat niku kanmu manga kalaban ga tarat-an lang nimu manga lulud." 14 Ti tanan manga anghil manga ispiritu magsirbi sa Diyus, kay manga suruguun hampay mag-alaga sa manga tawu mumana karibrihan.
1 Nakan kailangan intindihun gid nita ti manga bagay kanta nadnugan, barang mianud kita ginan sa katutuuhanan. 2 Dahil mahigpit pag Kasuguan ti ipinadakit manga anghil sa manga tawu. Ti kada naglapastangan ag naglaban nakatanggap tama pag parusa bayad sa kay kasalanan. 3 Kabitay kita dayu parusahan gid nu unman intindihun nita ti barita tungkul sa inda pag mahalaga pag karibrihan. Pagka sa kabag-u, Panginuun gid ti nagpaalam bag-u ti manga nakadnug sa kanya nagtultul maan sa kanta, pinatutuuhanan nida ti karibrihan. 4 Ipinakakit diman waydi Diyus bilang puruyba ti manga makadululaw pag tanda ag ti tuhay tuhay pag mamaski pag buwat hanggan ti may manga pakaun Ispiritu Banal kay ihinuray sa iglisya angay sa kay sadili kagustuhan. 5 Ti bag-u aban pag daga ti kanmi ipagbarita, unman diman ipinabahala Diyus sa manga anghil. 6 Imaw diman ti sinabi usa ka tawu sa Banal Kasuratan magkun, "Hayga duy, Panginuun, kanmu pag-alalahanun ti tawu? Hintay pag kaayadan kanmu nakitan sa kanya? Hintay nguna pag kaayadan kanmu nakitan sa linahi tawu, nakan kanmu pagpahalgaan? 7 Binwat nimu siya ababa man sa manga anghil ngalay ngalay lang. Dapat pinakan-an nimu siya kadayawan hanggan kagalangan, hanggan karampatan hampay maghari sa tanan bagay. 8 Ipinasakup nimu ti tanan manga bagay sa kay kamaskihan." Ipinasakup Diyus sa tawu ti tanan manga bagay, kay ibug sabihun unman siya may sinawadan. Ipinasakup gid niya ti tanan tanan sa tawu. Dapat taynguna unman waya mag-akitan nita ti tanan manga bagay apinasakup sa tawu. 9 Dapat ay mag-akitan nita si Hisus, ti binwat Diyus ababa man sa manga anghil ngalay ngalay lang. Taynguna bay pinakan-an siya karampatan sa maghari may kadayawan hanggan kagalangan, dahil nakalakaw siya kamatayan. Sa kay lubus pangaawa Diyus, nakan namatay si Hisus para sa kada tawu. 10 Linalang Diyus ti tanan bagay angay sa kay gayak niya kagustuhan. Nakan ngani ipinalakaw niya si Hisus sa kakurian kay inagwanta hampay lubus tupadun niya ti kagustuhan Diyus, ag hampay mayamu tawu kay mataban sa kadayawan. 11 Dahil si Hisus tiglumpiyu sa manga tawu kasalanan ag ti manga tawu kay paglumpiyuhun, usa usa di kanda Ama. Nakan unman diman ikakay-a ni Hisus nu pag-ingarnan niya sida kay manga patar-ari. 12 Magkun siya sa Diyus, "Itultul niku kanmu ngaran sa kang manga patar-ari, pagka sa kanda tiripun kawu kang pagdayawun." 13 Inda waya kay sinabi magkun, "Ilubus niku kang sarig sa Diyus." Bag-u inda waya gid magkun, "Inda yi aku hanggan ti manga anak kay ipinakaun Diyus sa kangku." 14 Tawu ngani tunda kay pagkumnun manga anak, nakan si Hisus nabilug diman tawu may nayi may dugu ga kanda diman may nayi may dugu. Nakan katida kay binwat, hampay sa kay pagkamatay mamapas siya sa diyablu, sa may kapangyarihan sa kamatayan, 15 ag hampay iribri niya ti tanan manga tawu ga ginapus nida magkadala sa kamatayan hanggan buhi waya sida. 16 Dahil kay turunu ni Hisus sa kay sitay tag balaw hampay antabayanan niya ti manga anghil nu unman hampay ngap kay antabayanan ti manga linahi ni Abraham. 17 Nakan ngani kailangan siya parihu diman waydi sa kay manga patar-ari sa tanan manga bagay hampay siya usa ka Pangulu Manug-asiwa balay Diyus maawaun ag matinupadun sa kay magsirbi sa Diyus, hampay mipatawad Diyus ti kasalanan manga tawu. 18 Sinubukan gid siya sa kay nalakawan kakurian. Nakan madunung siya makaawat sa manga tawu maglakaw subuk.
1 Manga patar-ari niku, kamu manga ibinukud Diyus hampay kamu kay tanggapun niya. Parihu kita pinili Diyus hampay mabuhi aban sa langit. Nakan ngani isipa niyu si Hisus. Siya ti sinugu gid Diyus. Siya diman ti Pangulu Manug-asiwa nita pagsarig. 2 Matinupadun siya sa Diyus sa nagpili sa kanya sa inda pag buruwatun, parihu ga kan Muysis matinupadun diman sa tanan niya buruwatun tungkul sa kay balay Diyus. 3 Si Hisus pinakan-an karampatan hampay siya yi ti pagdayawun, balaw lang ga kan Muysis. Dahil nu pagdayawun ti balay, lalu waya pagdayawun ti nagpatindug balay. 4 Dahil sa kada balay may nagpatindug. Dapat Diyus ti naglalang sa tanan manga bagay. 5 Matinupadun ngani si Muysis sa tanan niya buruwatun tungkul sa kay balay Diyus. Dahil siya suruguun Diyus hampay ipasandam niya ti manga katutuuhanan kay ipaburayhaw Diyus aban. 6 Si Kiristu bay matinupadun waydi dahil siya ngani ti Anak. Siya ngap tigpangulu sa kay balay Diyus. Kita yi ngani ti balay Diyus nu kanta pagpahalgaan kanta pagsarig hampay marig-un hanggan sa katapusan. 7 Parihu ngani sa sinabi Ispiritu Banal magkun, "Taynguna nu madnugan niyu kay magbagaw, 8 Danga pagpaganita niyu kanyu manga tagipusuun, danga ga kaybi pagka kanyu linabanan aku sa udas pagsubuk ati sa pangawakawaan tawu. 9 Ati sinubukan aku niyu manga ginurang, sinulay nida aku. Sa sulud upatpulu ka timpu nakitan nida kang manga buwat. 10 Nakan ngani nagalit aku sa ati pag manga sinulput tawu. Sinabi niku magkun, pirmi gid sida magsimray kanda manga tigipusuun. Unman natandaan nida kang manga dalan. 11 Nakan ngani sa kang pangagalit sinaadan niku sida magkun, dayu gid sida makaslud sa kang ahinanda pag daga, sa may kaariwayahan." 12 Pag-ingat kamu, manga patar-ari, barang una si unu sa kanyu may daut naisipan unman magsarig bag-u magpablag yi sa Diyus buhi. 13 Kailangan kamu magpararig-unan sirang sirang hanggan may udas waya masabi taynguna. Barang una si unu sa kanyu dayaun di kasalanan ag gumanit kay tagipusuun laban sa Diyus. 14 Kita may kahuray yi ni Kiristu nu marig-un kita pag magsarig ginan sa umpisa ag nu unman kita bumul-iw hanggan tugka sa katapusan. 15 Una kainda magkun ti Kasuratan, "Taynguna, nu madnugan niyu kay magbagaw, danga pagpaganita niyu kanyu manga tagipusuun. Danga ga kaybi pagka kanyu linabanan aku." 16 Dahil hintay pag manga tawu ti naglaban sa Panginuun madi nadnugan nida kay magbagaw? Tunda yi ngani kabay pag manga tawu ti nagkuyug sa kan Muysis ginan sa Ihiptu. 17 Ag hintay pag manga tawu ti kinagalitan Diyus sa sulud upatpulu ka timpu? Tunda yi ngani pag manga nagkasala, nakan sida nagkaramatay sa pangawakawaan. 18 Ag hintay pag manga tawu kay sinaadan magkun, "Dayu gid sida makaslud sa kang ahinanda pag daga, sa may kaariwayahan." Tunda yi ngani pag manga tawu ti unman nagpaniwala. 19 Nakan alam nita sida unman nakahimu nakaslud sa daga ahinanda Diyus dahil unman sida nagsarig.
1 Hanggan taynguna tugka imaw diman pag pangaku Diyus sa kanta, kita makaslud hampay may kaariwayahan sa kay arani. Inda ti dapat nita ingatan gid, bagay may tawu sa kanyu unman makahimu makaslud. 2 Dahil ti Mayad pag Barita itinultul diman sa kanta parihu ga sa kanda kaybi. Dapat unman nida napakinabangan tunda pag barita kanda nadnugan, dahil pagka nadnugan nida, unman sida nagsarig sa kanda tagipusuun. 3 Kita bay manga magsarig sa Diyus nakan kita magsulud ngani hampay may kaariwayahan sa kay arani. Dahil inda kay sinabi Diyus magkun, "Nakan ngani sa kang pangagalit sinaadan niku sida magkun, dayu gid sida makaslud sa kang ahinanda pag daga, sa may kaariwayahan." Nu sa ungud natapus kay manga buwat Diyus pagka linalang yi niya ti kalibutan. 4 Dahil sa usa ka bahagi sa Banal Kasuratan kay sabi kainda tungkul sa ikapitu pag sirang magkun, "Pagka sa ikapitu pag sirang tapus yi ti tanan binwat Diyus. Nagpahari siya sa ikapitu pag sirang sa tanan kay binwat." 5 Dapat kay diman sabi sa Banal Kasuratan magkun, "Dayu gid sida makaslud sa kang ahinanda pag daga sa may kaariwayahan." 6 Ti manga un-an waya gid nakadnug sa Mayad pag Barita unman nakasulud unman nakasamit kaariwayahan sa kay arani Diyus dahil sa kanda naglaban. Dapat ay may imaw waya sumulud sumamit sa kaariwayahan sa kay arani Diyus. 7 Nakan nag-utru ti Diyus nag-alistu usa maan ka sirang kay pagkumnun, "Taynguna." Pagka lawuy dugay pag timpu imaw diman ti ipinadakit ni Dabid pag binagaw Diyus magkun, "Taynguna nu madnugan niyu kay magbagaw, danga pagpaganita niyu kanyu manga tagipusuun." 8 Dahil nu abi dinara ni Huswi ti manga tawu tabug sa lubus kaariwayahan, udyi mana may bagawun ti Diyus tungkul sa usa waya ka kaudasan kaariwayahan. 9 May nasawad waya ngani usa ka kaudasan kaariwayahan para sa nasyun Diyus parihu sa kay nagpahari ti Diyus sa ikapitu pag sirang. 10 Dahil ti tawu nu nakasulud nakasamit sa kaariwayahan sa kay arani Diyus, maariwaya yi waydi sa kay manga buwat parihu sa Diyus nakapahari sa kay manga buwat. 11 Hangadun nita, manga patar-ari ti makasulud makasamit sa kaariwayahan sa kay arani Diyus. Danga kita maglaban, barang kita hanggan unman diman makasamit sa kaariwayahan ga nangyari sa kanda kaybi. 12 Dahil buhi gid ngani ti Bagaw Diyus ag mamaski, matarum man sa una hintay pag baladaw baliw baliw may urup. Ti Bagaw Diyus magtuduk magpisang sa karadwa ag sa tagipusuun tawu, hanggan sa kal-asan ag sa utuk. Pag-ipakilala waydi Bagaw Diyus ti daut ti mayad sa kagustuhan hanggan pag-iisip tawu sa kay tagipusuun. 13 Unman may milihim sa Diyus. Ti tanan nabulwat ag niburayhaw sa kay magbantay, ag sa kanya kita may saragtun. 14 Pagpakarig-un kita sa kanta pagsarig. Dahil kita may Pangulu Manug-asiwa balay Diyus sinmulud sa langit atag sa atubangan Diyus, si Hisus yi ngani, ti Anak Diyus. 15 Kanta Pangulu Manug-asiwa balay Diyus makapasunaid di gid sa kanta kalumuyan. Dahil sinubukan siya sa tanan paraan parihu diman ga kanta, dapat unman gid siya nagkasala. 16 Pagpakarani kita sa Diyus sa may puun pakaun kaayadan, pagmatutum kanta naisipan, hampay kita pagkaawaan niya ag hampay nu katpung kita may kailangan sa kanya, kita awatan diman angay sa kay pangaawa.
1 Ti kada Pangulu Manug-asiwa balay Diyus pinili gid pag tawu, pinatamaan siya Diyus hampay siya ti pinagkabilug manga tawu magsirbi sa atubangan Diyus. Siya tigsagda manga kaluub sa Diyus ag manga hayup pagmatyun panlukat tungkul sa kasalanan tawu. 2 Maalumanay siya madunung magpasunaid sa manga unman nakatau ag sa manga magsimray dahil una siya may manga kalumuyan diman waydi. 3 Nakan kailangan siya magsagda sa Diyus manga hayup minatay dahil sa manga kasalanan unman lang tungkul sa manga iba tawu nu unman hanggan tungkul diman sa kay sadili bilug. 4 Una si unu pag tawu unman umapu lang tunda pag katungkulan. Diyus lang tigpili sa tawu hampay siya Pangulu Manug-asiwa balay Diyus ga kay diman nagpili sa kan Aarun. 5 Katunda diman waydi si Kiristu unman siya nagpalabilabi, ag unman inapu lang niya tunda pag karampatan, nu unman Diyus diman ngap ti nagpili sa kanya hampay siya yi ti Pangulu Manug-asiwa. Magkun ti Diyus, "Kawu kang Anak, taynguna aku kanmu yi Ama." 6 May sinabi waya ti Diyus sa tuhay pag bahagi Kasuratan magkun, "Kawu yi ti Manug-asiwa balay Diyus hanggan aban. Sa kanmu yi kay pamana karampatan ni Milkisidik." 7 Pagka sa babaw waya daga si Hisus, nandarangin siya, ainalsa kay busis, nanlumi nagdangup sa Diyus sa may kamaskihan makaliktas sa kanya sa kamatayan. Ag nadnugan diman kay darangin dahil sa kay nagpakumbaba nagpasakup sa Diyus. 8 Madi siya Anak, sa kay mag-agwanta kakurian naanad siya sa magpasakup sa Diyus. 9 Natupad yi niya ti buu kagustuhan Diyus. Nakan ginan sa kanya pag makatanggap karibrihan unman may katapusan ti manga tawu nu magpaniwala sa kanya. 10 Diyus ti nag-ingaran sa kan Hisus Pangulu Manug-asiwa angay sa karampatan kay minana ginan sa kan Milkisidik. 11 Mayamu waya mana kanmi sabihun tungkul sa inda dapat makuri mipaliwanag dahil naglumuy kamu sa kanyu intindi. 12 Dahil mana kamu kainda madunung yi magtudlu, dapat kailangan ngap may magtudlu waya maan sa kanyu tungkul sa kabag-u ginan pag umpisa adal Bagaw Diyus. Gatas maan kanyu kailangan, bukun maaw maganit pag karan-unun. 13 Ti magkabuhi sa gatas lapsag waya, udwaya may intindi sa daut ag sa mayad. 14 Dapat ti may manga idad yi, magkaun maganit karan-unun, dahil sida nagpaanad yi naantigu magkilala sa daut sa mayad.
1 Nakan danga yi kanta pag-adalan ti nalawyan yi pag manga adal tungkul sa kan Kiristu. Pagparargu yi kita ilubus nita kanta tudlu. Danga yi balikan nita ti kabag-u itinudlu tungkul sa pag-ampu sa manga unman may kabuluhan pag tarabahu, hanggan tungkul sa pagsarig sa Diyus, 2 tungkul sa tudlu sa manga tulbaw, sa pagkupa manga kamang, ag sa pagkabuhi uman manga namatay, ag tungkul sa pagsintinsiya unman may katapusan. 3 Bagkus pagparargu gid kita. Imaw ngani kanta buwatun nu ipahintulut Diyus. 4 Dahil dayu yi mauman mataban sa pag-ampu sa kasalanan ti manga tawu nu ginan yi sa karayawan Panginuun bag-u kanda pinatlikudan maan. Pinakan-an sida manga kaayadan ginan sa langit, tinanggap waydi nida ti Ispiritu Banal. 5 Nasamitan yi nida ti kaayadan Bagaw Diyus hanggan ti manga kapangyarihan lubus mihayag pagka sa kaudasan aban. 6 Dayu yi mauman sida mataban sa pag-ampu sa kasalanan dahil ga kanda ngap ipagpaku maan ti Anak Diyus sa kurus ag pag-ipasurug maan nida siya sa hayagan. 7 Pagpapaladan Diyus ti daga nu hurum dahil uranan bag-u tubuan manga tanum makinabangan niya apu. 8 Dapat nu tunda pag daga tubuan manga ilamnun dugihan kay iba, unman may gana tida pag daga ag udyi dugay aban saadan yi Diyus pihu irubun aban apuy. 9 Dapat ay duy manga patar-ari, madi katida kanmi pagkumnun, balaw diman kuntay kami mag-alinlangan tungkul sa kanyu. Pihu kaayadan ngap ti kanyu patabgan angay sa kanyu kaliktasan. 10 Dahil ti Diyus matadlung ag unman pagkalimtan niya kanyu kasipagan hanggan kanyu pagmahal sa kay ngaran. Makitan yi waydi kanyu pagmahal sa Diyus dahil sa kanyu magsirbi sa manga magsarig sa kanya una kaybi ginan hanggan taynguna tugka. 11 Daka mana kanmi gustu pagpakakit di gid ti kada usa sa kanyu kay kasipagan, danga magpanlubay hanggan sa katapusan, hampay matanggap niyu ti kanyu paghingabtun. 12 Nakan danga kamu magbugya. Huwada ngap niyu ti manga matiniisun sa kanda magsarig sa Diyus dahil sida ngani tigtanggap sa kay ipinangaku Diyus. 13 Sa kay nangaku ti Diyus sa kan Abraham, nagsumpa siya sinampit niya kay sadili ngaran, dahil udyi may iba sampitun makapangyarihan nu unman siya lang. 14 Magkun siya, "Tutuu gid papaladan niku kawu ag payamuun kanmu linahi aban." 15 Nakan ngani pagka nagtiis sa alagad si Abraham, tinanggap niya ti ipinangaku Diyus. 16 Nu abi may manga tawu magtalaluhan bag-u may surumpaan, pagsampitun nida ti lalu makapangyarihan sa kanda hampay parig-unun kanda patutuu, bag-u napda kanda magtalaluhan. 17 Katunda diman kay gustu Diyus ipakilala sa tawu sa makatanggap kay manga ipinangaku niya pihu dayu mauman kay gayak. Nakan nagsumpa waya siya hampay udyi may alinlangan sida. 18 Ti sumpa kag ti pangaku balaw magkauman ag dayu mahimu makapudil ti Diyus. Nakan kita ti manga nagdangup sa kanya, marig-un kita sa kanta maghingabut sa kay ipinangaku. 19 Nu may paghingabtun kita, ga pinunduhan marig-un kanta naisipan ag balaw magkaanggihut, makalawuy di sa limbun rutay balay Diyus makasulud sa Banal pag Suludsulud. 20 Sinmaka ati si Hisus hampay siya tigpamahala sa kanta. Siya waydi kanta manugpanguna. Ati siya ti Pangulu Manug-asiwa balay Diyus hanggan waya aban, angay sa karampatan kay minana ginan sa kan Milkisidik.
1 Si Milkisidik ngani ti hari sa Salim ag Manug-asiwa balay Diyus makamaskihan sa tanan. Pagka nakapapas yi si Abraham sa manga hari nuli siya, sinulang siya ni Milkisidik, bag-u kan Milkisidik pinapaladan si Abraham. 2 Kay inayawan waydi ni Abraham si Milkisidik kay ikasampulu pag bahagi sa tanan bagay kay nab-ul sa gira. Un-an sa tanan ti kahulugan kan Milkisidik ngaran ay hari katadlungan. Hari diman siya sa Salim, kay gustu sabihun hari kahusayan. 3 Unman may ama may ina, unman may naalaman sa kay linahi, unman may naalaman sa kay kapanganakan una kay kamatayan. Parihu sa Anak Diyus, unman may katapusan kay magpangasiwa sa balay Diyus. 4 Isipun ngani niyu nu kabitay kay kadayawan tunda pag tawu. Madi si Abraham ti pinun-an linahi, nagpakaun siya sa kan Milkisidik kay ikasampulu pag bahagi sa tanan bagay kay nab-ul sa gira. 5 Tunda pag manga linahi ni Libi ti nagtanggap katungkulan sa magpangasiwa balay Diyus, angay sa Kasuguan kailangan bul-un nida ti manga ikasampulu ginan sa kanda manga katawuhan, parihu diman waydi linahi ni Abraham. 6 Dapat madi balaw linahi nida, nagtanggap si Milkisidik ikasampulu ginan sa kan Abraham, bag-u kay pinapaladan niya si Abraham, ti pinangakuan Diyus. 7 Maalaman nita pihu gid si Milkisidik ti nagpapalad mas lalu man kay kadayawan balaw lang ga kan Abraham ga kay pinapaladan niya. 8 Tunda pag manga linahi ni Libi may kamatayan ag sida magtanggap manga ikasampulu. Dapat ay magkaalaman nita sa Kasuratan si Milkisidik buhi di. 9 Madi si Libi magtanggap manga ikasampulu, masabi waydi nita, sakup diman si Libi sa kan Abraham sa kay nagpakaun ikasampulu sa kan Milkisidik. 10 Dahil madi udwaya iinanak si Libi, dara yi siya sa linahi aban ni Abraham pagka sinulang si Abraham ni Milkisidik. 11 Nu abi may kamhanan ngani sa kanda magpangasiwa manga Libita, hayga kailangan tuhay waya pag manug-asiwa balay Diyus balaw angay sa karampatan minana ginan sa kay linahi ni Aarun? Dahil katpung ti manga Libita magpangasiwa sa balay Diyus, ipinakaun Diyus ti Kasuguan. Dapat inda pag Manug-asiwa nakamana karampatan sa magpangasiwa ginan ngap sa kan Milkisidik. 12 Dahil nu bag-uhun ti pagkapangasiwa balay Diyus, kailangan umanun waydi ti Kasuguan. 13 Kanta Panginuun ti pagtukuyun inda pag manga bagaw. Dapat siya linahi ni Huda, balaw linahi ni Libi. Ti linahi ni Huda unman magsirbi sa surunugan hayup pag-isagda sa Diyus. 14 Dahil maalaman yi waydi nita ti Panginuun ti sa linahi ni Huda ag sa linahi ni Huda unman may sinabi si Muysis kuntay sida magpangasiwa sa balay Diyus. 15 Lalu waya malinaw inda pagka may tuhay yi ngani pag Manug-asiwa balay Diyus parihu ga kan Milkisidik. 16 Kay karampatan sa magpangasiwa sa balay Diyus balaw minana niya sa kay linahi ga isinurat sa Kasuratan. Nakan may karampatan siya dahil siya may buhi gid unman may katapusan. 17 Dahil inda ti pagsabihun Banal Kasuratan tungkul sa kanya magkun, "Kawu yi ti Manug-asiwa balay Diyus hanggan aban, Sa kanmu yi kay pamana karampatan ni Milkisidik." 18 Pagka katida, nab-ul yi ti un-an waya pag bagaw Kasuguan dahil malumuy ag unman may kabuluhan. 19 Dahil nu ginan lang sa Kasuguan unman diman gid may kamhanan kay turunu. Dapat ipinakilala Diyus sa kanta ti lalu gid mayad pag paghingabtun. Nu ungud gid kita maghingabut, makapakarani kita sa Diyus. 20 Nagsumpa waya paman ti Diyus. Unman nanumpa ti Diyus katpung sa kay nagpili sa kay manga linahi ni Libi pagka sida ti binwat niya manga manug-asiwa balay Diyus. 21 Dapat ay sa kan Hisus may sumpa ti Diyus pagka binwat siya Manug-asiwa balay Diyus. Magkun ti Diyus, "Nagsumpa ti Panginuun ag unman bag-uhun niya kay isip. Kawu yi ti Manug-asiwa balay Diyus hanggan waya aban." 22 Nakan ngani inda pag taratu mas lalu marig-un dahil tinalaghut Diyus sa kan Hisus. 23 Kaybi mayamu ungud ti nagpangasiwa sa balay Diyus. Dahil kada mamatay ti Manug-asiwa, iba maan ti umilis sa katungkulan. 24 Dapat si Hisus ud may katapusan kay buhi, nakan siya makapangasiwa ud magkailsan hanggan waya aban. 25 Nakan ngani siya ti lubus makaparibri sa manga tawu magpakarani sa Diyus ginan sa kanya, dahil pirmi di buhi siya hampay magpamahala sa kanda sa atubangan Diyus. 26 Si Hisus yi lang gid ti may kang-ud sa tanan nita pangailangan. Siya ti Pangulu Manug-asiwa balay Diyus, lubus gid siya banal, unman may kasalanan, unman may huput una di ga buhuk, apinablag siya ginan sa manga makasalanan, lalu binwat siya mataas man sa manga langit. 27 Unman may kailangan siya magsagda sa Diyus manga hayup sirang sirang hampay matyun ga ugali manga iba Pangulu Manug-asiwa balay Diyus una tungkul sa kay sadili kasalanan una tungkul sa kasalanan nasyun. Kas-a lang may isinagda siya sa Diyus, pagka ipinakaun niya kay sadili bilug hampay mamatay. Ti halaga kamatayan niya unman yi may katapusan hanggan waya aban. 28 Manga tawu may kalumuyan ti pinatamaan Kasuguan ni Muysis hampay sida Pangulu Manug-asiwa balay Diyus. Dapat ti bagaw sumpa nagdasun sa Kasuguan hampay patamaan ti Anak, ti kang-ud sa kabanalan hanggan waya aban.
1 Inda yi ngani ti katutuuhanan sa tanan kanmi sinabi. Kita ungud may Pangulu Manug-asiwa balay Diyus matukawan ati sa langit baliwa sa sikun Diyus minsan sa karampatan Diyus sa maghari. 2 Manug-asiwa siya sa Banal pag Suludsulud sa hanunuu pag Turda, kay ibinungsud Panginuun, balaw binwat tawu. 3 Dahil ti kada Pangulu Manug-asiwa balay Diyus binugtangan katungkulan hampay kay isagda niya sa Diyus manga kaluub hanggan manga hayup pagmatyun pagsunugun. Nakan kailangan diman waydi may alistu siya manga panagda sa Diyus. 4 Nu abi si Hisus sitay sa babaw daga, balaw makapangasiwa siya sa balay Diyus dahil may manga magsagda yi waydi manga panagda sa Diyus angay sa Kasuguan. 5 Sida magsirbi ga sa anyu aninu balay Diyus sa langit. Dahil pagka buwatun yi ni Muysis ti Turda, binilinan siya Diyus magkun, "Pag-ingat kawu, buwata nimu ti tanan manga bagay angay gid sa kay tutuu pag mustara ga kang Ipinakakit sa kanmu sa bantud." 6 Lalu gid mataas kay natanggap ni Hisus pag katungkulan sa magpangasiwa balaw lang ga kanda ni Aarun pag katungkulan. Dahil ti taratu kay pagpamahalaan ni Hisus lalu diman waydi mahalaga, inda pag taratu kay pinagkapuun lalu mayad pag manga pangaku. 7 Dahil nu abi kang-ud yi ti un-an pag taratu, udyi waydi kailangan paghanapun waya Diyus rugar para kay ikadwa. 8 Pagka nakitan Panginuun may kakurangan sa kay nasyun, sinabi niya magkun, "Nu sa kay kaudasan aban, magkun ti Panginuun, buwatun niku ti bag-u pag taratu sa linahi ni Israil ag sa linahi ni Huda. 9 Ti bag-u taratu balaw miparihu sa daan taratu ga kang binwat kaybi sa kanda manga ginurang, sa ati katpung kang nag-abat sa kanda hampay ipalwas sida ginan sa daga Ihiptu. Magkun ti Panginuun, unman nagtupad sida sa kang taratu, nakan pinabay-anan niku sida. 10 Magkun ti Panginuun, pagkatapus ati, buwatun niku inda pag taratu sa nasyun Israil. Ipauli niku kang manga Kasuguan sa kanda naisipan, ag isurat sa kanda manga tagipusuun. Aku kanda yi Diyus aban, sida aban kang yi nasyun. 11 Aban udyi may tawu manudlu waya sa kay kaparihu una sa kay patar-ari magkun, 'Kilalan-a nimu ti Panginuun.' Dahil kumilala yi gid sa kangku ti tanan tawu ginan sa pinakaababa hanggan sa pinakamataas. 12 Kaawaan niku sida una sida nagkasala. Kanda kasalanan balaw yi alalahanun niku." 13 Pagka sinabi Diyus magkun, usa ka bag-u taratu, linuma niya ti un-an pag taratu. Ag una hintay pag bagay nu daan yi ag udyi mayad balaw madugay madura yi.
1 Ti un-an pag taratu may bilin diman waydi tungkul sa pagsamba sa Diyus hanggan tungkul sa balay sambahan sitay sa babaw daga. 2 Binwat nida ti usa ka Turda. Kay sanggaan iningarnan Banal pag Sakahan. Ati kay palaulian sulul-an, kay lamisa, hanggan kay tinapay pag-ibugtang sa atubangan Diyus. 3 Ti ikadwa pag sulud limbun iningarnan Banal pag Suludsulud. 4 May gintu pag turuuban kamangyan hanggan Kaban Hugut sa Taratu, pinababawan gintu sa sulud hanggan sa luwas. Tunda pag Kaban palaulian gintu pag surukadan mana pag karan-unun hanggan kan Aarun sugkud imaw ti namsang. Siyun diman sa Kaban ti manga tinabla batu sinuratan taratu. 5 Sa kay babaw Kaban may manga kirub pag anghil magpakilala siyun ti kadayawn Diyus, kanda manga pakpak maghamuy sa kay taklub Kaban, imaw ti Ulian Pangaawa. Dayu nita matigus-a sa harampangan inda pag manga bagay taynguna. 6 Pagka katida yi kay kaayusan, ti manga manug-asiwa balay Diyus pirmi magsaka sa kay sanggaan Turda hampay magtupad sa kanda katungkulan. 7 Dapat nu sa kay Suludsulud ti Pangulu lang Manug-asiwa balay Diyus tigsaka kas-a lang sulud usa ka timpu. Kailangan siya may dara dugu hampay kay pag-isagda sa Diyus, panlukat sa kay sadili manga kasalanan hanggan sa manga iba kanda binwat balaw tikis pag kasalanan. 8 Sa tunda yi ngani pag buruwatun pag-ipakilala yi Ispiritu Banal udwaya mabukasan ti Banal pag Suludsulud hanggan sa udwaya mab-ul ti Banal pag Sakahan. 9 Usa ka pahalimbawa tunda sa taynguna pag udas. Kay gustu sabihun ti manga kaluub hanggan manga hayup pagmatyun pag-isagda sa Diyus balaw lubus makalumpiyu sa tagipusuun hanggan sa naisipan manga tawu magsamba sa Diyus. 10 Dahil tunda pag manga bilin tungkul lang sa manga karan-unun tawu, sa kanda pag-inmun hanggan sa kanda mag-ugas. Nakan may kahulugan lang pag manga bilin hanggan sa udwaya binag-u Diyus ti tanan pag manga bagay. 11 Dapat ay nagsitay yi si Kiristu. Siya yi ti Pangulu Manug-asiwa tungkul sa kaayadan kay ipinangaku Diyus. Magpangasiwa siya sa hanunuu yi pag Turda unman gid may kakurangan. Dahil tunda pag Turda unman binwat tawu kamang, unman diman waydi para sitay sa babaw daga. 12 Kas-a lang gid pag nagsaka si Kiristu ati sa Banal pag Suludsulud, udyi kailangan ulitun. Sa kay nagsaka may dara diman siya dugu hampay siya makaatubang sa Diyus, dapat balaw dugu kambing, balaw diman dugu ibun baka nu unman kay ngap sadili pag dugu. Nakan unman may katapusan kay kinamhan ati pag karibrihan sa kanta manga kasalanan. 13 Dahil ti dugu manga kambing manga tudu baka hanggan kay ayum taranida baka iwinisik sa manga tawu, naglumpiyu diman sa kanda nu sida nagkasala sa manga ibinilin sa Kasuguan. 14 Lalu gid waya daka kay namhan dahil sa dugu ni Kiristu. Dahil sa kapangyarihan Ispiritu unman may katapusan ipinakaun niya kay sadili sa Diyus unman may huput kasalanan. Kay dugu ni Kiristu tiglumpiyu sa kanta tagipusuun hanggan naisipan sa manga buwat unman may kabuluhan hampay kita magsirbi sa Diyus buhi. 15 Sa kay pagkamatay linukat ni Kiristu ti manga tawu ginan sa manga kasalanan kanda binwat sa kanda di waya sakup sa un-an pag taratu. Nakan si Kiristu ngani tigpamahala sa bag-u pag taratu hampay ti manga pinili Diyus makatanggap sa kay ipinangaku pag papalad unman may katapusan. 16 Dahil nu may taratu pamana kailangan ngani mamatay dapu kay manugtaratu, bag-u di matupad ti taratu. 17 Ti taratu pamana kabay dayu waya matupad hanggan sa udwaya mamatay kay apu. 18 Nakan ti un-an pag taratu pinarig-un diman nida sa dugu manga hayup kanda minatay isinagda sa Diyus. 19 Ipinaliwanag dapu ni Muysis sa manga tawu ti tanan buruwatun angay sa Kasuguan. Bag-u bin-ul niya ti dugu baka manga kambing, linakayan danum ti dugu, bag-u isinawsaw niya sa dugu ti marara pag bulbul karanidu hanggan ti sanga isupu bag-u kay winisikan ti ribru Kasuguan hanggan ti tanan tawu. 20 Bag-u magkun siya, "Inda yi gid pag dugu ti itinalaghut sa taratu kay ibinilin Diyus sa kanyu." 21 Katunda diman winisikan diman niya dugu ti Turda ag ti tanan kanda kagamitan sa kanda magsamba. 22 Angay sa Kasuguan harus ngani ti tanan bagay paglumpiyuhun sa dugu, ag nu unman may nabuhus dugu, unman waydi may kapatawadan sa kasalanan. 23 Kailangan lumpiyuhun sa katunda pag paraan ti manga bagay kanda paggamitun sa kanda magsamba, kanda hinuwad ginan sa manga kagamitan sa langit. Dapat ay lalu mahalaga pag isagda sa Diyus ti kailangan tungkul sa manga kagamitan sa langit. 24 Dahil si Kiristu nagsaka sa Banal pag Suludsulud balaw binwat tawu kamang ag unman hinuwad ginan sa kay tutuu. Siyun ngap siya sa langit gid sa atubangan Diyus hampay magpamahala sa kanta. 25 Ti Pangulu Manug-asiwa balay Diyus magsaka timpu timpu sa Banal pag Suludsulud may dara dugu manga hayup. Dapat si Kiristu kas-a lang sinmaka hampay kay ipakaun niya kay sadili kang-ud yi gid, udyi ulitun. 26 Nu abi balaw katida, kailangan mana paulit-ulit si Kiristu mamatay ginan waya sa umpisa pagkalalang kalibutan. Dapat pagka kainda arani yi ti katapusan kalibutan ipinaburayhaw siya kas-a lang bag-u ipinakaun niya kay sadili sa Diyus hampay mab-ul yi ti kasalanan kalibutan. 27 Ti kada tawu pihu kay patabgan kamatayan kas-a lang bag-u umatubang siya sa Diyus hampay pihuun kay daut kay mayad. 28 Katunda diman waydi si Kiristu kas-a lang namatay, ipinakaun niya kay buhi sa Diyus ag inaku niya ti kasalanan kalibutan. Bumalik siya aban, balaw yi hampay mamatay maan tungkul sa manga kasalanan tawu, nu unman hampay iribri niya ti manga magpatigagad sa kanya.
1 Ti Kasuguan ga aninu lang tungkul sa manga kaayadan aban ag unman mag-akitan nita malinaw nu kabitay aban ti tutuu. Nu angay sa Kasuguan una pag-isagda tawu timpu timpu kay hayup sa Diyus kay pagmatyun, unman diman waydi lubus mab-ul kay kasalanan. 2 Dahil nu may kamhanan abi, unman aw nguna apasan mana kanda magsagda hayup? Dahil nu tutuu gid linumpiyu ti manga manugsamba udyi mana sida may magkaisipan waya kasalanan sa kanda tagipusuun. 3 Dapat ay tunda pag manga hayup kanda pag-isagda pagmatyun sa Diyus timpu timpu imaw ngap tigpaalaala sa kanda manga kasalanan. 4 Dahil ti dugu manga tudu baka manga kambing dayu gid makab-ul sa kasalanan manga tawu. 5 Nakan pagka nagsitay si Kiristu sa kalibutan, magkun siya sa Diyus, "Unman gid gustu nimu ti manga hayup pagmatyun dahil sa kasalanan, hanggan ti manga hayup pagmatyun pag-isagda sa kanmu. Nakan ihinanda nimu kang bilug. 6 Unman kawu magbaya sa manga hayup pagsunugun pag-isagda sa kanmu, una sa manga hayup pagmatyun tungkul sa kasalanan manga tawu. 7 Bag-u sinabi niku, 'Diyus, nagsitay yi aku hampay tupadun niku kanmu kagustuhan, angay sa asinurat sa ribru Kasuguan tungkul sa kangku.' " 8 Kabag-u kay sinabi, "Ti manga hayup pagmatyun pag-isagda sa kanmu, tuhay ti pagsunugun, ti iba tungkul sa kasalanan, dapat unman pagkaibgan nimu, unman diman waydi pagbayaun nimu." Dapat tunda pag manga bagay nakan pag-isagda sa Diyus angay lang sa Kasuguan. 9 Bag-u kay sinabi ni Hisus, "Nagsitay aku hampay tupadun niku kanmu kagustuhan." Udyi tinanggap Diyus ti manga hayup pagmatyun pag-isagda sa kanya. Lalu ngap lubus pagpahalgaan niya kan Kiristu pakaun kay sadili bilug hampay mamatay. 10 Tinupad ni Kiristu kay kagustuhan Diyus. Pagka ipinakaun niya kas-a lang kay sadili bilug sa Diyus, linumpiyu niya kita sa kasalanan. 11 Tutuu ti kada magpangasiwa balay Diyus sirang sirang matindugan mag-asikasu kanda magsagda hayup pagmatyun paulit-ulit, kanda magpakaun manga kaluub, madi unman diman makalumpiyu tunda sa kasalanan manga tawu. 12 Dapat si Kiristu kas-a lang nagpakaun kay pakaun sa Diyus hampay mapatawad ti kasalanan manga tawu hanggan waya aban. Bag-u tinmukaw siya sa langit baliwa sa sikun Diyus, minsan sa karampatan Diyus. 13 Siyun ginan mag-alagad siya hanggan sa udwaya kay kalaban binwat ga tarat-an niya manga lulud. 14 Ginan sa kay nagpakaun usa lang ka pakaun sa Diyus lubus pinaunyun ni Kiristu sa kagustuhan Diyus ti manga tawu kay paglumpiyuhun sa kanda manga kasalanan, hampay magpakiusa sida sa Diyus. 15 Pagpatutuuhanan diman Ispiritu Banal tunda para sa kanta, dahil sinabi niya magkun, 16 Magkun ti Panginuun, "Pagkatapus ati buwatun niku inda pag taratu sa kanda, Ipauli niku kang manga Kasuguan sa kanda manga tagipusuun ag isurat sa kanda manga naisipan." 17 Bag-u kay sabi magkun, "Kanda manga kasalanan ag kadautan balaw yi alalahanun niku." 18 Nu pinatawad yi tunda udyi kailangan magsagda waya kita hayup sa Diyus, hampay patawadun ti manga kasalanan. 19 Nakan ngani manga patar-ari, unman yi gid may ampara sa kanta magsaka sa Banal pag Suludsulud, dahil sa kay kamatayan ni Hisus. 20 Binukasan niya para sa kanta ti bag-u pag dalan tabug sa kabuhian lakaw sa limbun rutay balay Diyus, kay kahulugan pag limbun kay ngap bilug ni Kiristu. 21 Taynguna kita may makamaskihan pag Manug-asiwa magpamahala sa kabuuhan magtal-anakan Diyus. 22 Nakan ngani pagpakarani kita sa Diyus may buu pag kagustuhan hanggan marig-un pag sarig sa kanya. Danga yi may mag-asaydan daut kanta naisipan, dahil ngani linumpiyu yi kanta tagipusuun sa manga buwat unman may kabuluhan, ag inugasan kanta manga bilug sa malinis pag danum. 23 Pagpakarig-un kita sa kanta inaku pag sarig, danga kita mag-alinlangan. Dahil Diyus ti may taratu ag lubus siya masarigan dayu pumudil. 24 Isipun nita nu kabitay pag mipulaw ti maimbung pagmahal sa usa kag sa usa, hanggan ti pagbuwat mayad. 25 Danga kalimtan nita pagluwang di kita sa kanta pagtiripun. Danga maghuwad sa manga magpalya. Pagparabisugan ngap kita ti kada usa. Lalu ngap taynguna dahil magkaalaman yi nita arani yi ti kaudasan pagras-ug Panginuun. 26 Nu abi kita tikis yi lang magpadayun sa kasalanan madi nakilala yi nita ti katutuuhanan, udyi may iba waya pag isagda sa Diyus sa ikapatawad nita kasalanan. 27 Udyi may iba paraan nu unman mag-alagad lang kita sa madala gid pag patabgan pag sintinsiya aban, bag-u kay pangagalit Diyus tigpapas ga apuy sa manga kalaban niya. 28 Ti tawu nu naglabag sa Kasuguan ni Muysis udyi pagkaawaan. Nu may duwa una tulu ka kastigus magpatutuu laban sa kanya pihu siya matyun. 29 Pag-isip kamu nu kabitay kay kahigpit pag parusa ti isintinsiya sa tawu nu binul-an niya halaga ti Anak Diyus, ag nu kay linapastangan niya ti dugu ti itinalaghut sa taratu madi imaw ti naglumpiyu sa kanya, ag nu dinayu niya ti Ispiritu imaw tigpakaun kaayadan. 30 Nakilala waydi nita ti may sabi magkun, "Bahala aku magganti, Aku ti pumarusa." Siya diman waydi ti may sabi magkun, "Pihuun Panginuun aban ti daut ti mayad sa kay nasyun." 31 Madala gid ti malagpak tag sa kamang Diyus buhi. 32 Alalahanun niyu ti manga nangyari kaybi pagka kamu linmakaw yi sa karayawan Panginuun. Ati katpung mahigpit pag kakurian kanyu tiniisan dapat unman kamu nagpatalu. 33 Nu kas-a kamu minuransa, pinakurianan sa atubangan kadamlan tawu, ag nu kas-a ginan nadamay kamu sa kanyu manga kaibahan pinakurianan. 34 Napadamay kamu sa manga napirisu, balaw diman waydi kamu nagruku una binul-an kamu kasiyunan, dahil alam ngani niyu lalu waya higit mahalaga ag udyi madura ti kayamanan ahinanda para sa kanyu. 35 Nakan ngani danga kamu maiwdan sarig sa Diyus dahil may daka pag pirimyu aban. 36 Kailangan kamu pagmatiniisun, hampay matupad niyu ti kagustuhan Diyus, agud matanggap niyu kay ipinangaku. 37 Diyus ti may pangaku magkun, "Balaw yi gid dugay, bag-u ti pagkumnum sumitay Rumas-ug yi ag dayi dumugay. 38 Dapat ti tawu may buhi di, nu pagkilalan-un niku siya matadlung dahil sa kay pagsarig sa kangku. Nu bay siya umurung, udyi pagbayaun niku siya." 39 Dapat kita balaw ay ga tunda pag manga mag-urung bag-u ipadamhak. Kita ga tunda ngap pag manga magsarig agud iribri.
1 Nu may pagsarig kita, maniwala diman kita pihu gid mangyari aban ti kanta pag-alagdun, ag may puruyba kita sa kanta tagipusuun tungkul sa katutuuhanan manga bagay una unman mag-akitan sa mata. 2 Kaybi pag manga ginurang pagbayaun Diyus dahil sa kanda pagsarig. 3 Dahil sa kanta pagsarig sa Diyus nakan naintindihan nita ti kalibutan namhan dahil sa kay Bagaw Diyus. Ti manga mag-akitan nita, binwat Diyus ginan sa unman may mag-akitan sa mata. 4 Dahil sa kay pagsarig ni Abil, nakan mayad man kay isinagda sa Diyus balaw lang ngap ga kan Kain pag isinagda. Dahil diman sa kan Abil pagsarig nakan binaya Diyus kay isinagda sa kanya ag kinilala Diyus si Abil kuntay siya matadlung. Dahil una taynguna tigbak yi si Abil, nagmustara waya siya sa kanta dahil sa kay pagsarig. 5 Dahil sa kay pagsarig ni Inuk, bin-ul siya hampay dayu niya malakawan ti kamatayan. Unman yi siya nakitan, dahil siya bin-ul yi Diyus. Alam nita inda ti nangyari sa kanya dahil sa kay pagsarig. Dahil lubus pagbayaun Diyus si Inuk bag-u siya bin-ul. 6 Nu unman may sarig ti tawu, dayu mahimu siya lubus pagbayaun Diyus. Dahil nu ti tawu magpakarani sa Diyus kailangan siya magsarig kuntay may Diyus ag unman siya magpabaya sa manga maghanap sa kanya. 7 Dahil sa kay pagsarig ni Nuwi, nakan naniwala siya sa kay ipinasandam Diyus tungkul sa manga bagay udwaya mag-akitan. Nag-alistu si Nuwi usa ka sakayan hampay makaribri kay buu magtal-anakan. Dahil sa kay sarig ipinurya ni Nuwi ti manga taga kalituban, ag kinilala Diyus siya matadlung dahil sa kay sarig. 8 Dahil sa kay pagsarig naniwala si Abraham, pagka siya tinawag. Diyus hampay atabug sa usa ka rugal imaw kay tanggapun aban pag maranahun. Linmakaw si Abraham madi unman niya alam nu naan tag. 9 Dahil diman sa kay pagsarig nagpakapahalinhalin lang siya kay turda, bilang nangus ga balaw kanya pag daga madi imaw kay ipinangaku Diyus sa kanya. Katida diman waydi sida ni Isaak ni Hakub, dahil minsan kanda maranahun pag pangaku. 10 Dahil pagpatigagadun ngap ni Abraham ti Banwa marig-un kay burungsudan, kay gayak Diyus kay ipakana. 11 Dahil sa kay pagsarig ni Abraham, nakatanggap siya kabisugan hampay magpabuduy sa kan Sara madi lipas yi kay idad ni Abraham, ag unman mag-anak si Sara. Sinarigan niya lubus ti Diyus ti nangaku ag ti dayu pumalya. 12 Nakan madi malumuy yi gid si Abraham pag lalaki, may linahi di parihu sa pamgasan sa langit kay kayamu ag unman mabilang ga baras sa dagat. 13 Sida tanan ti manga sinmarig tugka sa kamatayan, unman nakamtan nida ti ipinangaku, dapat bilang ga kanda di nabantay ginan sa arayu, sida nakabaya di. Naisipan nida sida pasay manga nanday-u lang, ag balaw may kapunduhan sitay sa babaw daga. 14 Nu katunda ti pagbuwatun manga tawu, pag-ipakilala nida sida maghingabut sa kanda sadili gid pag banwa. 15 Ag tutuu nu abi kanda naalaala ati pag daga kanda inighitan, may imaw mana sida rugal hampay bumalik atag. 16 Dapat taynguna paghingabtun nida ti lalu mayad pag ulian, kay ibug sabihun sa langit yi ngap pag ulian. Nakan ti Diyus unman mangay-a una pag-ingarnan nida siya kanda Diyus, dahil kay inalistuhan sida usa ka banwa. 17 Si Abraham ti pinangakuan Diyus. Sinubukan siya Diyus, dapat dahil sa kay pagsarig, alistu siya hampay matyun niya ipakaun sa Diyus kay anak madi usa usa, kay ngaran si Isaak. 18 Sinabi diman Diyus sa kan Abraham magkun, "Ginan sa kan Isaak pag linahi ti pinangakuan Diyus." 19 Kay isip ni Abraham una mamatay si Isaak mahimu buhiun siya uman Diyus. Nakan tinanggap maan ni Abraham kay anak bilang ga ginan yi sa kamatayan. 20 Dahil sa kay pagsarig ni Isaak, ainintirga niya sida ni Hakub ni Isaw sa Diyus hampay papaladan sida sa kanda patabgan. 21 Dahil sa kay pagsarig ni Hakub, pagka atabug yi magkamatay, ainintirga niya kay duwa ka anak ni Husi sa Diyus hampay papaladan, nagsamba siya sa Diyus mahiyaptan sa kay pudpud sugkud. 22 Dahil sa kay pagsarig ni Husi, pagka arani yi siya mamatay, kay ipinaalam niya ti pag-ighit manga linahi ni Israil aban ginan sa Ihiptu. Nagbilin siya sa kanda tungkul sa kay manga but-ul magkun, "Daran-a di niyu nu kamu mighit yi." 23 Dahil kay manga gurang ni Muysis nagsarig sa Diyus nakan pagka may anak sida kanda atinagu sulud tulu ka bulan, dahil sa kanda magbantay marinu pag anak, ag unman sida nadala sa sugu hari. 24 Dahil sa kay pagsarig ni Muysis, pagka daka yi siya, unman siya nagpasnu kuntay kan Paraun anak babayi kay ina. 25 Pinahalgaan di ngap niya ti magpausa sa nasyun Diyus madi pag-unuunuhun. Dinayu di niya ti magkupas pag kasayahan tungkul sa kasalanan. 26 Kay isip ni Muysis daka man pag kayamanan nu pag-unuunuhun siya dahil sa kay pinili Diyus Manugribri pag Hari, balaw di ga manga kayamanan sa Ihiptu, dahil paghingabtun niya kay patabgan pag pirimyu. 27 Dahil sa kay pagsarig, nighit si Muysis ginan sa Ihiptu ag unman siya nadala sa kay pangagalit hari. Balaw siya mag-urung sa kay sarig, nakan bilang ga mag-akitan niya ti Diyus, langmadi unman mag-akitan sa mata. 28 Dahil sa kay pagsarig, itinudlu ni Muysis ti Pag-alaala sa Karibrihan ag nagbilin siya sa manga tawu magkun, wisikan nida dugu ti bakalan hampay lumawuy di ti manugpapas sa manga panganay manga taga Israil agud sida dayu mapapas niya. 29 Dahil sa kanda pagsarig, nagdipay ti manga Israilita sa Dagat Marara parihu sa mamara pag daga. Pagka pinurbahan binwat inda manga taga Ihiptu ay pasay nalimus sida. 30 Dahil sa kanda pagsarig, linibut manga taga Israil ti banwa Hiriku sulud pitu ka sirang, bag-u nangatumpag ti manga alad batu. 31 Dahil si Rahab pag babayi uragin may pagsarig sa Diyus, pinasaka niya mayad ti manga manugtiid, nakan unman siya nidamhak minsan sa manga unman magpasakup sa Diyus. 32 Kabitay waya pag masabi niku, dahil udyi aku may rugar tumultul waya tungkul sa kan Gidyun, sa kan Barak, sa kan Samsun, sa kan Hipti, ag sa kan Dabid, sa kan Samwil hanggan sa manga purupita. 33 Dahil sa kanda pagsarig nanalu sida sa manga kaharian, namwat sida katadlungan, ti itinaratu Panginuun nipakaun yi sa kanda, nagpahirum sida manga bibig liyun, nagpusa di sida sa labdaban apuy. 34 Madi sida libunun mana baladaw nakaribri di. Madi naglumuy sida pinabisug maan hampay maglaban sa gira ag hampay pumaurung sa manga gurupu sundalu taga iba daga. 35 Dahil sa kanda pagsarig manga babayi nakan kanda maan tinanggap kanda manga kasunu balay madi namatay, dapat nabuhi maan. Ti iba namatay sa pakuri manga tawu, balaw may gustu sida makaribri hampay lalu mayad kanda matanggap sa ikadwa pag kinabuhi. 36 Inagwanta manga iba ti libak, ti hampak, hanggan ti tarikada sa kanda pagkapirisu. 37 Sida binatu, rinagari ag minatay baladaw. Sida nagpakapalibutlibut kanda rutay paknul manga karanidu hanggan kambing, sida manga pugri, inunuunu ag nakurian. 38 Sida nagpakapalibutlibut lang sa pangawakawaan, sa manga kabantudan, sa manga lukib hanggan sa lingkaung daga. Balaw angay kanda ulianan inda pag kalibutan dahil sa kanda katadlungan. 39 Sida tanan pagbayaun Diyus dahil mayad kanda magsarig dapat unman nida natanggap ti ipinangaku Diyus. 40 Inalistu Diyus ti lalu mayad pag bagay para sa kanta, nakan unman waya kinamhan Diyus kay turunu sa kanda hanggan sa udwaya miusa kita sa kanda.
1 Naglibut sa kanta ti aduk pag tawu manga maghiling. Nakan pagtayaki yi nita tunda pag manga buwat mag-ampara sa kanta pagsunud lalu hanggan una hintay pag kasalanan magsambur. Pangungud yi kita sa kanta maglakaw sa dalan inalistu Panginuun. 2 Bantayan nita kanta manuggiya si Hisus. Siya diman ti turunu nita sarig. Dahil kabayaan kay patabgan, nakan inagwanta yi lang niya madi ipinurya siya sa kay pagkamatay sa kurus. Bag-u tinmukaw siya ati sa langit baliwa sa sikun Diyus, minsan sa karampatan Diyus. 3 Isip-isipa niyu si Hisus nu kabitay unman sinmuku siya una linabanan siya manga tawu makasalanan. Nakan danga kamu maglubay sa kanyu naisipan, danga waydi magsuku. 4 Sa kanyu maglaban sa kasalanan udwaya nabuhus kanyu dugu sa kamatayan. 5 Nalimtan aw niyu ti itinudlu Diyus sa kanyu sa kay manga anak? Tunda pag manga bagaw ngani tigpabisug sa kanyu naisipan magkun, "Anak niku, danga nimu bul-an halaga ti pariga Panginuun. Danga maglubay kanmu naisipan nu kawu pagtamyawun niya. 6 Dahil ti manga pagmahalun Panginuun imaw lang kay pagparig-anan. Pagbakulun diman niya ti kada anak kay tinanggap." 7 Pagmatiniisun kamu nu pagparig-anan Diyus, dahil imaw yi ngani ti puruyba sa kanyu kuntay kamu kay tinanggap kay yi gid manga anak. Hintay nguna pag anak ti unman pinarig-anan niya ama? 8 Nu bay kamu unman pagparig-anan Diyus, kay ibug sabihun balaw kamu tutuu manga anak niya, tuhay di kanyu ama, dahil basta anak niya kay pagparig-anan. 9 Nu kas-a ginan nu angay sa ugali tawu kita pagparusahan diman nita manga ama nakan kailangan lalu galangun nita sida. Unman aw lalu waya kita pumasakup sa kanta Ama, sa Diyus hampay kita may buhi? 10 Sulud usa ka ngalay ngalay kita pagparig-anan nita manga ama angay sa kanda mayad pag naisipan. Dapat kay pariga Diyus makinabangan nita hampay may kahuray kita sa kay kabanalan. 11 Sa katpung kita pagparig-anan balaw masulung nu unman ikaruku ngap. Dapat pagka lawuy kay magpariga kay burak mayad pag kahusayan hanggan katadlungan sa manga mag-ugali sa kaayadan. 12 Pabisuga niyu kanyu kamang malumuy hanggan kanyu matudturay tuud. 13 Pagbuwat kamu matadlung pag dalan kanyu lakawan, hampay dayu madayaan ti manga pilay, nu unman lalu ngap mahulian di gid sida. 14 Tupadun niyu ti kahusayan sa tanan tawu ag pag-ugali kamu sa unman may kasalanan. Ti tawu nu unman mag-ugali sa lubus marapasakup sa Diyus dayu siya kumakit sa Panginuun. 15 Pagmaingat kamu hampay unman may pumatlikud sa kanyu tanan sa kay pakaun Diyus karibrihan. Barang may magtubu ga ilamnun mapait sa kanyu bag-u miabay ti mayamu ngap pag patar-ari sumimray sa katutuuhanan. 16 Pagmaingat kamu hampay unman may mag-uragin sa kanyu ag hampay unman may tawu asan ga kan Isaw. Unman pinahalgaan niya ti kaayadan Panginuun. Ibinalyu kabay niya kay karampatan bilang panganay sa usa ka pinggan karan-unun. 17 Dahil alam niyu, pagka dugay kay gustu gid ni Isaw papaladan gid mana siya niya ama angay sa kay pagkapanganay, dapat dinayu siya. Madi nanlumi siya ag daka kay gustu bawiun waya mana niya kay karampatan bilang panganay, udyi gid nabawi. 18 Balaw kamu ga manga Israilita kaybi sa kanda nagpakarani sa Bantud Sinai. Nakitan gid nida ati ti apuy maglabdab sa pingit pag kadudulman, nadnugan nida kay hagunung untug. 19 Nakadnug sida kay tunug budyung, hanggan kay magbagaw Diyus. Pagka nadnugan nida kay manga sinabi nanuyu sida danga yi mana siya magbagaw sa kanda. 20 Unman maagwanta nida kay sugu magkun, "Una tawu una hayup nu makatata sa bantud kailangan batuhun niyu matyun." 21 Tutuu madala gid masyadu kanda binantayan ati. Si Muysis hanggan magkun, "Pagtakigan gid aku sa dala." 22 Dapat ay kamu nagpakarani sa bantud Siun ag sa banwa Diyus buhi, imaw ti Hirusalim sa langit, sa may udyi mabilang pag kadamlan manga anghil. Magpakiusa yi kamu sa masulung pag katipunan, 23 hanggan sa iglisya manga anak panganay Diyus. Kanda manga ngaran inilista ati sa langit. Nagpakarani kamu sa Diyus, imaw ti pumihu aban kay daut kay mayad tanan tanan tawu hanggan manga anghil. Nagpausa kamu sa manga tawu matadlung, sa manga udyi may kakurangan una di. 24 Ag kamu nagpakarani sa kan Hisus. Sa kanya pag itinalaghut ti bag-u taratu. Kay dugu ni Hisus ti magtudlu sa kanta mayad man pag manga katutuuhanan, balaw lang ga kay dugu ni Abil. 25 Nakan pagpatingi kamu kaayad-ayad sa kan Hisus magbagaw sa kanyu. Ti manga tawu kaybi unman nakaiwas sa kaparusahan nu sida nagbugya mamatingi sa kan Muysis namadakit sa kanda sitay sa babaw daga sa kay manga pagsabihun Diyus. Mas lalu kita dayu makaribri nu patlikudan nita ti magbagaw ginan sa langit. 26 Pagka kaybi nagbagaw ti Diyus, natandug ti daga. Dapat taynguna nangaku siya magkun, "Kas-a waya tandugun niku balaw lang ti daga hanggan ti langit." 27 Pagka kay sinabi magkun, kas-a waya, kay ibug sabihun ti manga natandug pag manga linalang Diyus bul-un yi niya aban. Ti unman matandug balaw ngap duraun. 28 Nakan pagpasalamat gid kita dahil dayu gid matandug ti kaharian kanta tinanggap sa Diyus. Pagsamba kita sa Diyus, pagdahan kita paggalang hampay pagbayaun niya kita. 29 Dahil kanta Diyus ga apuy maghirut.
1 Kamu magtar-arian sa kan Kiristu, danga apasan niyu kanyu magmalahalan sa usa kag sa usa. 2 Danga duy pag-irangi niyu kanyu manga balay sa manga tawu taga iba daga, tanggapun di niyu, imaw diman ti binwat manga iba. May tinanggap sida manga tawu sa kanda balay unman nida alam kuntay manga anghil maaw. 3 Pagpadamay kamu sa manga napirisu ga kamu diman napirisu kaibahan nida. Pagpasunaid kamu sa kanyu sadili bilug tungkul sa manga pag-unuunuhun. 4 Kailangan galangun tanan tawu ti mag-asawa. Kailangan magtupad ti mag-asawa sa usa kag sa usa. Dahil ti manga naibug hanggan ti nanguragin pasay sintinsiyahan Diyus. 5 Danga kamu mag-ugali maraibgun sa kuwarta. Pagmasulung yi lang kanyu naisipan sa kanyu kahamtangan. Dahil Diyus diman ti may sabi magkun, "Una sa hintay ngarana balaw pakurangan niku kawu, una sa hintay ngarana unman gid pabay-anan niku kawu." 6 Nakan ngani matutum kanta naisipan magsabi magkun, "Ti Panginuun kang kaawat, unman aku magkadala. Udyi may mabuwat ti tawu sa kangku." 7 Isipun niyu ti nangatungkulan sa kanyu kaybi, sida ti nagpaliwanag kay Bagaw Diyus sa kanyu. Isip-isipun niyu nu kabitay kanda nangugali sitay sa babaw daga hanggan kanda ikinamatay. Huwada niyu kanda pagsarig sa Diyus. 8 Nu kabitay si Kiristu Hisus kaaldaw, hanggan taynguna, balaw mauman siya hanggan waya aban. 9 Danga ngani kamu magpadara sa manga tuhay tuhay pag manga adal tawu nu balaw angay sa kanta pagsarig sa kan Kiristu. Dahil mayad ngani nu parig-unun nita kanta naisipan sa kaliktasan kay pag-ipakaun Diyus dahil sa kay mayad nabubut-un niya ag unman dahil sa kanta pagtupad sa manga bilin tungkul sa karan-unun. Ti manga tawu nu magtupad sa tunda pag manga bilin, unman diman nida mapakinabangan tunda. 10 Kita may tuhay pag surunugan tungkul sa panagda sa Diyus. Dapat ti manga manug-asiwa magsirbi sa Turda unman may karampatan magsaru sa kanta. 11 Ti Pangulu Manug-asiwa magdara dugu hayup atag sa Banal pag Suludsulud hampay kay pag-isagda sa Diyus tungkul sa kasalanan. Dapat ti manga bilug hayup ati pagsunugun sa luwas kabalayan. 12 Nakan una si Hisus nag-agwanta namatay sa luwas diman puwirtahan alad batu, hampay paglumpiyuhun ti manga tawu sa kanda manga kasalanan dahil sa kay dugu. 13 Nakan pag-ati ngani kita sa kanya, sa luwas kabalayan. Pagtiis kita una surugun ga kanya diman nagtiis. 14 Dahil sitay sa babaw daga kita unman may pirmaminti ulian dapat paghingabtun nita kanta banwa ulian aban. 15 Kailangan pirmi kita handa magdayaw sa Diyus, bilang ga kanta pakaun sa kanya sa panab-anan ni Hisus, pirmi kailangan dayawun nita ti kaayadan niya ngaran. 16 Dapat danga niyu kalimtan ti pagbuwat mayad ag ti pag-arawatan, bilang usa waydi ka pakaun sa Diyus tutuu pagbayaun niya. 17 Pagpaniwala kamu sa kanyu manga manug-asiwa iglisya ag pagpasakup kamu sa kanda. Unman sida magkagasa mag-alaga sa kanyu, dahil sida may panagutan sa atubangan Diyus tungkul sa kanyu. Pagpaniwala kamu sa kanda hampay unman sida magkaaburidu, nu ud lalu ngap masulung sa kanda buruwatun. Dahil balaw ikamayad niyu nu kanyu manga manug-asiwa magkaaburidu sa kanda katungkulan. 18 Daranginan niyu kami, dahil tutuu kami unman may pag-isipun daut sa kanmi tagipusuun una sa kanmi naisipan. Gustu lang nimi pagmarinu kanmi ugali sa tanan nimi buruwatun. 19 Lalu gid aku magpaawat duy sa kanyu sa darangin, hampay udyi dumugay aku makauli maan sa kanyu. 20 Diyus ti gimpuunan kahusayan. Binuhi niya uman kanta Panginuun Hisus. Nakan si Hisus ti makamaskihan pag manug-alaga sa manga karanidu. Dahil sa kanya pag dugu pag itinalaghut ti unman may katapusan pag taratu. 21 Pag-idarangin niku kamu sa Diyus hampay pakang-udan niya kanyu kaayadan agud matupad niyu kay kagustuhan. Magdarangin aku hampay buwatun ni Hisu-Kiristu sa kanta ti angay sa atubangan Diyus. Sa kan Hisus ti kadayawan hanggan aban. Amin. 22 Daka kang gustu, kamu manga patar-ari, pag-agwanta sa kang manga iinadal. Dahil kamu kang sinuratan balaw sa mayamu pag hampang. 23 Kang pag-ibarita sa kanyu si Timutiyu balaw yi ati sa pirisuhan. Nu muli siya madali, kumuyug aku sa kanya asan tag. 24 Sabihi niyu ti tanan may katungkulan sa kanyu hanggan ti tanan manga patar-ari, pag-isipun di niku sida tanan ag balaw paglimtan kunu kamu manga taga Italya. 25 Kang pag-idarangin kamu hampay kamu tanan papaladan Diyus. Amin.
1 Aku si Santiyagu, kay panawuhun Diyus hanggan nita Panginuun Hisu-Kiristu. Ipadangat niku kang surat sa kanyu sa sampulu may duwa ka linahi nangalat sa tuhay tuhay pag nasyun, nu kabitay waydi kamu asan. 2 Manga patar-ari niku, pagbaya kamu lubus nu kamu makalakaw sa tuhay tuhay pag manga subuk. 3 Dahil alam niyu lalu waya ngap rumig-un kanyu pagsarig nu lumapus sa siyun pag manga subuk. 4 Kailangan ngani kamu pagpakarig-un hanggan sa katapusan hampay kamu kang-ud yi gid udyi may kakurangan. 5 Dapat una si unu sa kanyu nu kurang sa kadunungan, paghagad siya sa Diyus, bag-u siya pakan-an. Dahil ti Diyus abunda kay pamakaun sa tanan tawu, balaw siya mag-irang. 6 Dapat ti tawu nu maghagad kailangan pagmay sarig. Danga mag-alinlangan, dahil ti mag-alinlangan parihu ga humbak dagat paghuypun durus una naan tag. 7 Dagsarig kuntay may matanggap ti tawu una hintay ginan sa Panginuun, 8 nu magkauman-uman kay naisipan, ag nu unman malinaw ti turunu niya kagustuhan. 9 Nu pugri ti usa ka patar-ari, may kabayaan ngap siya nu siya pinaabwat Diyus. 10 Pagbaya waydi ti patar-ari mayaman nu apinaababa siya Diyus, dahil ti mayaman may kaduraan di parihu sa busang ilamnun. 11 Ti ilamnun magkalayung pagka nasinggitan masyadu pag init. Magkarugnas kay busang, magpud-&as kay rinu. Katunda diman waydi ti mayaman ud umapas sa asikasu sa kay kayamanan hanggan sa ud mamatay siya. 12 Paladan Diyus ti tawu nu marig-un sa kay pagsarig una may paglakawan siya subuk. Pagka nakalawuy yi sa pagsubuk, makatanggap siya buhi unman may katapusan, imaw kay atinaratu Panginuun pag pirimyu sa manga magmahal sa kanya. 13 Danga magsabi una si unu nu makalakaw subuk, siya pagtuksuhun Diyus. Dahil ti Diyus unman magkadara sa tuksu, unman waydi siya magtuksu sa tawu. 14 Magkatuksu ti tawu nu magpaangay magkadara siya sa kay sadili daut pag kagustuhan. 15 Pagka ti daut pag kagustuhan nagtubu, nan-gamut yi, kay kasuruhan kasalanan. Pagka namhan ti kasalanan, kay kasuruhan yi kamatayan. 16 Danga kamu magsalan sa kanyu naisipan, mahal niku pag manga patar-ari. 17 Kada mayad hanggan kang-ud pag pakaun pasay ginan sa langit, ginan sa Ama, sa naglalang sa manga init, bulan hanggan pamgasan sa langit. Balaw siya magkauman. Kay karayawan dayu bumaliw kadudulman. 18 Angay sa kay sadili kagustuhan ainanak niya kita uman pagka ipinakilala niya sa kanta ti bagaw katutuuhanan, hampay kita bilang ga kay yi akaan burak. Bag-u katunda diman bag-uhun lalangun niya ti tanan bagay. 19 Tandai niyu inda pag bagaw, manga mayad niku pag patar-ari, kada tawu pagpaanad sa magpatingi, danga susun magsagut. Danga hanggan rargu magkagalit. 20 Dahil nu magkagalit ti tawu unman ikatadlung niya sa atubangan Diyus. 21 Nakan ngani pagpatlikud yi ginan sa kayagtingan niyu buwat, pagbul-a niyu ti daut pag ugali, pagpakumbaba kamu lubus ag tanggapa niyu ti Bagaw Diyus ti itinanum sa kanyu tagipusuun. Inda pag Bagaw Diyus ti makaparibri sa kanyu. 22 Pag-ugali kamu angay sa Bagaw Diyus. Nu pagpatingihan lang niyu ti Bagaw Diyus bag-u unman diman pagtupadun, pagdayaun niyu kanyu sadili. 23 Dahil ti tawu nu magpatingi lang siya sa Bagaw Diyus, bag-u unman magtupad sa kay nadnugan, parihu siya sa usa ka tawu magsalamin. 24 Pagka binantayan niya kay sadili susun linmakaw, pinabay-anan lang niya kay sadili ayus. 25 Dapat ti tawu nu magsuyasid sa Kasuguan bag-u parargu sa kay pagtupad, nu katida pihu papaladan siya Diyus sa tanan niya buruwatun, dahil siya balaw manugpatingi lang bag-u kay paglimtan lang kay nadnugan. Dahil ti Kasuguan unman may kakurangan, tutuu makaparibri sa tawu. 26 Nu ti tawu maghantup sa kay sadili kuntay siya matadlung, bag-u unman waydi mapinigilun siya sa kay dila, pagdayaun lang ngap niya kay sadili, unman may gana kay pagkamatadlung. 27 Kainda ay di ti pagkamatadlung ti kailangan ag pagbayaun nita Diyus Ama, nu ti tawu mag-awat sa manga ilu hanggan sa manga babayi buranday sa kanda kakurian, ag nu mainingatun siya sa kay sadili bilug hampay balaw madara sa daut pag ugali kalibutan inda.
1 Manga patar-ari niku, kamu pag manga magsarig sa kanta Panginuun Hisu-Kiristu, imaw ti makapangyarihan pag Panginuun, danga may pagpiliun kamu tawu. 2 Halimbawa may Rumas-ug sa kanyu tiripun usa ka lalaki may singsing gintu, marinu kay manga rutay, bag-u may usa maan ka tawu pugri, pasay lupun kay rutay. 3 Nu kanyu asikasuhun mayad tunda pag marinu kay rutay, nu sabihun niyu sa kanya, "Sitay ay duy pagkitukaw." Bag-u nu sabihun niyu sa pugri, "Pagtindug lang kawu siyun," aw ngatay, "Siyun lang kawu sa uklug." 4 Nu katunda kanyu buwat, unman aw may pagpiliun ngap kamu ginhawa tawu? Nagsalan yi gid kamu sa kanyu magkilala sa tawu. 5 Isipa gid niyu, mahal niku pag manga patar-ari, pinili Diyus ti manga pugri sitay sa kalibutan hampay sida manga mayaman yi sa pagsarig, kaibahan yi niya sa kay maghari angay sa kay itinaratu sa manga magmahal sa kanya. 6 Dapat unman ngap paggalangun niyu ti manga pugri. Unman aw ti mayaman ti mag-unuunu ngapu sa kanyu, magpangarudkud sa kanyu atag sa huwis? 7 Unman aw lugud sida diman tigbagaw daut pag bagaw laban sa makamaskihan pag ngaran nagsakup sa kanyu? 8 Masulung kanyu pagbuwatun nu magtupad lang kamu sa mahalaga pag sugu Diyus nisurat sa Banal Kasuratan magkun, "Mahala nimu kanmu kaparihu ga kanmu diman waydi sadili bilug." 9 Dapat nu kamu may pagpiliun tawu, kamu magkasala. Kay ibug sabihun kamu manga maglabag sa Kasuguan. 10 Nu ti tawu magtupad sa kabuuhan Kasuguan bag-u magkasala laban sa usa ka sugu, nagkasala ngapu siya sa kabuuhan Kasuguan. 11 Dahil ti magsabi, "Danga magpanguragin", imaw diman ti nagsabi, "Danga maglibun sa tawu." Una kawu unman ngani magpanguragin, nu maglibun diman waydi sa tawu, magkasala diman kawu laban sa kabuuhan Kasuguan. 12 Nakan ngani pagmadahan kamu sa kanyu buwat hanggan sa kanyu bagaw. Dahil pihuun aban kamu nu ngatay angay sa Kasuguan aw ngatay unman. Ti Kasuguan nakan imaw tigpakaun karibrihan. 13 Udyi kaawaan Diyus sa kay magsintinsiya ti tawu unman madunung magkaawa. Dapat ti tawu nu madunung magkaawa, unman kailangan magkadala barang sintinsiyahan Diyus. 14 Manga patar-ari niku, hintay nguna ti pakinabang usa ka tawu nu sabihun niya kuntay siya may pagsarig, bag-u unman diman waydi mag-akitan tunda sa kay manga buwat. Miribri aw lugud siya nu katida lang waydi kay pagsarig? 15 Halimbawa nu may patar-ari unman may rutay, unman may karan-unun. 16 Nu kumumun ti usa sa kanya, "Danga duy kawu magkaaburidu, paglambung yi lang kawu pagkaun." Bag-u unman diman siya pagpakan-an kay manga pangailangan. Kabitay yi lang tunda? 17 Katunda diman waydi ga tigbak ti pagsarig tawu nu unman mag-akitan sa kay buwat. 18 Dapat abi may magsabi magkun, "May pagsarig kawu, aku bay sa buwat." Kang sagut waydi, ipakakit duy nimu kanmu pagsarig nu unman may tapil buwat. Ipakilala diman waydi niku sa kanmu kang pagsarig dahil sa kang manga buwat. 19 Magpaniwala kawu ti Diyus usa usa, unman aw? Mayad duy, una ti manga labang magpaniwala diman waydi, pagtakigan waya sida sa dala. 20 Kawu duy kurang katna sa pag-intindi. Kanmu aw gustu ipaliwanag waya niku sa kanmu kuntay unman may gana pag sarig nu unman may tapil buwat? 21 Kay magkilala Panginuun sa kanta ginurang sa kan Abraham kuntay siya matadlung dahil sa kay binwat, unman aw? Ipinakaun niya kabay sa Diyus kay anak si Isaak, kay mana matyun sa surunugan manga pag-isagda sa Diyus. 22 Siyun makitan nimu kan Abraham pagsarig may tapil buwat. Ginan sa kay binwat bag-u di lubus namhan kay pagsarig. 23 Natupad ti isinurat sa Kasuratan magkun, "Nagsarig si Abraham sa Diyus, nakan ngani siya kinilala Diyus kuntay matadlung." Pagkumnun yi Diyus, "Kang iribahun si Abraham." 24 Siyun ngani niyu pag maalaman ti usa ka tawu pagkilalan-un Diyus kuntay siya matadlung, balaw dahil sa kay pagsarig lang nu unman dahil sa kay buwat waya. 25 Katunda diman si Rahab pag babayi uragin. Masulung kay nagpasaka sa manga manugtiid manga sinugu taga Israil. Itinudlu waya niya sa kanda ti tuhay pag dalan hampay makaibay sida. Dahil sa katida kay binwat ni Rahab nakan kinilala siya Diyus kuntay matadlung. 26 Tigbak ti bilug nu udyi may arup. Katunda diman waydi ga tigbak ti pagsarig nu unman may patapil manga buwat.
1 Manga patar-ari niku, danga mana maghangad ti mayamu sa kanyu hampay manga manugtudlu, kabay alam diman niyu kita manga manugtudlu lalu gid pihuun aban nu daut nu mayad. 2 Kita tanan pirmi magsalan. Una si unu pag tawu nu unman magsalan sa kay bagaw, unman yi may ikasabi sa kanya. Mapinigilun siya sa kay sadili bilug. 3 Nu binwatan nita rinda ti bibig kabayu, magkapasunud ag mag-ipatulin una naan tag kanta gustu. 4 Katunda diman waydi ti bangka. Madi laun ag pagdaradarahun waya durus mabisug, pagwaringun lang diit pag timun una naan tag kay gustu manugpalakaw bangka. 5 Katunda diman hanggan ti dila tawu, madi diit lang pag gamit nita bilug, dapat subra kay magkabuwat pag padayawdayaw. Isipa lang niyu. Ginan lang sa alimpatu pag nanlalangyaban sa katalunan. 6 Ti dila ga usa waydi ka apuy, lubus yi sa kadautan, imaw ti magmaliw sa kanta buu bilug. Tunda ti pagsabihun pag apuy sa dila ginan ngani sa impirnu, pinamaktan niya ti kadungganan tawu. 7 Tanan kalasi manuk una hayup tiglakaw, una iyay tigyapang, una hintay pag iyay tig-uli sa danum maparignuk di tawu, nahugup yi ngap kay ugali. 8 Dapat unman may tawu pumahugup sa kay dila. Ti dila ti pinakadaut, unman may kaapasan pasay yi dalit imaw ti makamatay sa kaparihu tawu. 9 Ti dila kanta paggamitun sa pagdayaw sa Panginuun hanggan sa Ama. Ti dila kanta diman paggamitun sa pagmuransa sa tawu sa linalang ga histuda Diyus. 10 Ginan sa bibig ti pagdayaw sa Diyus. Imaw diman hanggan pag bibig tigmuransa sa tawu. Balaw mana inda mahimu duy, manga patar-ari. 11 Balaw lumuwang ginan sa bulbugan tab-ang ti danum maasin. 12 Manga patar-ari, balaw mamurak ulibu ti puun igus. Balaw diman waydi lumuwang ti danum matab-ang sa bulbugan maasin. 13 Hintay nguna sa kanyu ti madunung hanggan mapi-&ninsarun? Pakitan niya tunda sa kay mayad pag ugali, angay sa mapinakumbabaun pag kadunungan. 14 Dapat kamu nu mahinirakun ag maramuun kanyu tagipusuun, danga waydi niyu iyabang tunda, danga waydi ipaulam ti katutuuhanan. 15 Ti katida pag kadunungan balaw ginan sa Diyus, nu unman taga sitay sa babaw daga, angay sa ikaayad lang sadili bilug ag ginan ngap sa manga labang. 16 Dahil una naan katpung ti may parahirak ag maramuun, siyun diman ti kaguluhan hanggan ti tanan kadautan buwat. 17 Dapat ti may kadunungan ginan sa Diyus pihu marinu gid kay ugali, mairibgun siya sa kahusayan, maalumanay, mapinaangayun, maawaun, hanggan masipag sa mayad buwat, balaw mag-ihid, unman waydi magpabalhinguun. 18 Ag ti tawu nu madunung magpanab-anan sa mayad pag kasunduan, nu itanum niya kay kahusayan, may maani ngap siya katadlungan.
1 Hintay nguna kanyu pagpun-an irisgan nakan mag-arawayan? Unman aw lugud ti daut pag manga kagustuhan namugad sa kanyu nalub-anan sa kada usa sa kanyu? Nakan pudu lalabanan bad naisipan. 2 May paghangadun kamu, dapat unman niyu matanggap. Nakan lumibun lang kamu tawu basta matanggap niyu ti kanyu paghangadun. Kamu maghirak sa kasiyunan manga iba balaw kanyu, nakan kamu magkalagalitan hanggan mag-arawayan. Unman matanggap niyu ti kanyu paghangadun, dahil kamu unman maghagad sa Diyus. 3 Una kamu maghagad balaw waydi kamu pakan-an dahil daut kanyu turunu. Nakan kamu maghagad para gamitun angay lang sa kanyu sadili daut kagustuhan. 4 Unman duy kamu makatiwalaan. Unman aw waya niyu alam nu kanyu pagmahalun ti ugali kalibutan, kamu kalaban yi ngap Diyus. Nakan una hintay ti may gustu magmahal sa ugali kalibutan, kalaban yi ngap siya Diyus. 5 Barang kanyu isip unman mahalaga ti nisurat sa Banal Kasuratan magkun, "Magkaibug gid ti Diyus magpakiusa sa manga tawu, dahil kay pinakan-an sida arup." 6 Dapat masyadu diman marig-un kay awat Diyus sa kanta. Dahil magkun ti Banal Kasuratan, "Ti Diyus lumaban sa manga mayabang, dapat mag-awat sa manga mapinakumbabaun." 7 Nakan ngani pagpasakup kamu sa Diyus. Labani niyu ti diyablu, bag-u pumakarayu yi siya ginan sa kanyu. 8 Pagpakarani kamu sa Diyus, bag-u pumakarani waydi ti Diyus sa kanyu. Lumpiyua kanyu manga kamang, kamu pag manga makasalanan. Lumpiyua kanyu tagipusuun, kamu pag manga tawu magkauman-uman kanyu naisipan. 9 Pagmaruku kamu pagpanhilumawan paglumi gid kamu. Kanyu magparaarak-akan ilsi niyu luwa mata. Kanyu kabayaan pag-ilisi niyu karukuan. 10 Pagpakumbaba kamu sa atubangan Panginuun, bag-u kamu paabwatun niya. 11 Danga magkaradat-an kamu, manga patar-ari. Nu ti tawu mag-away sa usa ka patar-ari, ag magpihu sa usa ka patar-ari nu daut nu mayad, kay pag-awayun ngap ti Kasuguan, kay pagpihuun ti Kasuguan nu daut nu mayad. Nu alamun nimu nu daut nu mayad ti Kasuguan balaw yi ngap kawu magtupad sa Kasuguan, bagkus ngap pagpalabilabihan lang nimu ti Kasuguan. 12 Usa lang ti nagpakaun Kasuguan, siya diman ngapu ti makapihu sa daut sa mayad. Siya lang ti may kapangyarihan hampay makaparibri sa tawu ag makapapas sa tawu. Dapat si unu lugud kawu nakan kawu magpihu sa kanmu kaparihu tawu nu daut nu mayad? 13 Pagpatingi duy kamu tigsabi magkun, "Taynguna una aldaw kami umati sa kabanwabanwahan. Sulud usa ka timpu kanmi ulian ati hampay magnigusyu yumaman." 14 Dapat unman niyu alam nu hintay ti malakawan niyu aldaw pag sirang. Dahil kanyu buhi parihu sa alinyabu, madali nagluwang, bigla lang naparaw. 15 Kainda ti dapat niyu sabihun magkun, "Nu angay sa kagustuhan Panginuun, ag nu buhi waya kami, buwatun nimi ti paggayakun pag buruwatun." 16 Dapat kamu magpalabilabi, magpayabangyabang. Tunda ngap duy daut. 17 Nu alam tawu ti dapat niya buwatun pag kaayadan bag-u unman waydi kay pagtupadun, siya magkasala.
1 Pagpatingi kamu pag manga mayaman. Paglumi kamu pagnguynguy dahil sa manga kakurian Rumas-ug sa kanyu. 2 Daut yi kanyu manga kayamanan, kinaun yi ipus kanyu manga rutay. Una kanyu manga gintu manga pilak tinayan yi. Tunda ngap pag tayan tigpuruyba aban laban sa kanyu, imaw ti ga apuy humirut sa kanyu bilug. Tunda pag kayamanan kanyu tinipun para sa uryan sirang. 4 Magtawag magpatutuu laban sa kanyu ti patabig unman ipinakaun niyu sa manga manug-ani sa kanyu tanman. Kay dangup manga manug-ani kanyu inapi aput yi sa langit, nadnugan yi Panginuun makapangyarihan sa tanan. 5 Magpadayawdayaw kamu dahil kang-ud yi udyi may kurang kanyu kasiyunan sitay sa babaw daga. Nagtabul kamu parihu ga manga hayup iriyawun. 6 Kanyu sinintinsiyahan bag-u ipina-&matay ti manga tawu una unman may kasalanan ag unman sida naglaban sa kanyu. 7 Nakan ngani manga patar-ari, pag-agwanta sa alagad kamu hanggan sa ud Rumas-ug ti Panginuun. Isipa duy niyu ti manugtanman. Tutuu yi gid maggagad sa kay ani, mag-agwanta siya sa alagad sa bag-u padna uran, hanggan sa tigbururak katpung pag uran. 8 Kailangan diman kamu pag-agwanta sa alagad. Pagkarig-un kanyu nalub-anan, dahil arani yi kay pagras-ug Panginuun. 9 Danga kamu maghirinanakitan, manga patar-ari, barang kamu pihuun Diyus kanyu daut kanyu mayad, dahil udyi dugay Rumas-ug yi ti Manugpihu. 10 Manga patar-ari, huwada niyu ti manga purupita ti nagbagaw angay sa kay udyuk Panginuun. Lubus matiniisun sida nag-agwanta sa kakurian. 11 Pagkumnun nita mapalad ti manga matiniisun. Alam yi niyu si Hub matintiisun. Naalaman diman waydi niyu kay binat Panginuun sa kanya pagka nakalawuy ti kakurian. Siti pag makilala nita kuntay ti Panginuun mapinasunaidun ag maawaun. 12 Dapat lalu waya manga patar-ari niku, danga kamu magpanumpa nu kamu magtaratu, danga paghinangbita ti langit hanggan ti daga, una lang hintay. Kang-ud yi waydi nu sabihun niyu, "Hu ngani", nu hu. Sabihun niyu "Unman", nu unman waydi, barang pihuun kamu Diyus kanyu daut kanyu mayad. 13 May tiriisun aw una si unu sa kanyu? Pagdarangin siya. May magbaya aw? Pagkanta siya pagdayaw sa Diyus. 14 May magkasakit aw sa kanyu? Pabul-an niya ti manga manug-asiwa iglisya, hampay idarangin siya ag payidan lana sa ngaran Panginuun. 15 Bag-u paayadun ti may sakit dahil kanda magdarangin may tapil pagsarig. Pabisugun siya Panginuun ag patawadun siya nu siya nagkasala. 16 Nakan ngani isabi niyu kanyu manga kasalanan sa usa kag sa usa, bag-u pagdararanginan kamu sa usa kag sa usa agud kamu paayadun. Daka kay magkabuwat ti darangin tawu matadlung. 17 Si Ilyas pag tawu ga kanta diman. Nangungud siya sa darangin hampay balaw umuran, bag-u sa sulud tulu ka timpu may unum ka bulan balaw yi ngani nag-uran. 18 Pagka siya nandarangin maan, bag-u binmunuk ti uran hanggan ti manga tanum namururak gid maan. 19 Manga patar-ari niku, nu may nagsimray sa kanyu ginan sa katutuuhanan ag nu may usa ka patar-ari nagbawi sa kanya, 20 inda tandai niyu una si unu lang ti magbawi sa tawu makasalanan ginan sa kay naugalian salan, kay irinibri niya ti usa ka tawu karadwa sa kamatayan. Dahil sa kay nagbawi nakan mayamu pag kasalanan ti napatawad yi.
1 Inda ti may surat si Pidru, kay Apustul ni Hisu-Kiristu, tabug sa manga pinili Diyus nangalatkalat nangulian sa manga daga Puntu, Galasya, Kapadusya, Asya hanggan sa Bitinya. 2 Daan di inisip Diyus Ama kay pinili kamu, kay ipinasakup kamu sa Ispiritu hampay kamu masurundun yi sa kan Hisu-Kiristu ag hampay kamu malumpiyu yi sa dugu ni Hisus. Pagsa kanyu kay abunda pag pakaun kaayadan hanggan kahusayan. 3 Dayawun nita ti Diyus, imaw ti Ama nita Panginuun Hisu-&Kiristu. Daka gid kay pangaawa Diyus sa kanta. Dahil lang sa kay pagkabuhi uman ni Hisu-Kiristu ginan sa kamatayan, nakan ngani kita iinanak sa bag-u buhi may pagsarig daka. 4 Nakan may pagsarig kita hampay matanggap nita ti usa ka kayamanan unman may kadautan, dayu marunut, udyi pumud-as. Tunda pag kayamanan itinigana sa kanyu ati sa langit. 5 Sinmarig kamu, nakan kay kapangyarihan Diyus tig-ingat sa kanyu hanggan sa udwaya matanggap niyu ti kaliktasan kay itinigana Diyus hampay ipaburayhaw nu katapusan yi panahun aban. 6 Nakan ngani duy kailangan kamu pagbaya gid, una abi makalakaw dapu kamu sa tuhay tuhay pag subuk sa sulud, diit pag udas. 7 Ti gintu kabay madi madaut di aban, pagtunawun nida sa apuy hampay makitan nu lunsay yi ngani gintu. Katida diman waydi kanyu pagsarig subra waya sa gintu kay kahalaga, pag-ipalakaw sa manga subuk hampay maalaman nu ngatay buu. Nu buu kanyu pagsarig, kamu aban bayaun, purihun hanggan dayawun ati katpung aban sa kay kaudasan nu mihayag si Hisu-&Kiristu. 8 Balaw duy nakitan niyu si Kiristu kaybi ginan, dapat malu kanyu minahal diman siya. Unman waya waydi nakitan niyu siya hanggan taynguna tugka, dapat kanyu ngap pagsarigan siya. Nakan ngani malapwasan diman sa kanyu tagipusuun kanyu kabayaan, balaw yi kaya mitultul tunda pag kabayaan. 9 Pag-&anihun yi niyu ti burak niyu pagsarig, imaw yi ti karibrihan niyu karadwa. 10 Nanipag nagsuyasid gid ti manga purupita nag-usisa sida tungkul sa inda pag karibrihan pagka ipinurupita nida inda pag pakaun kaayadan ti itinigana yi sa kanyu. 11 Inusisa gid nida kaybi nu hintay pag tawu ag nu kapira pag mangyari ti pagtukyun Ispiritu ni Kiristu sa kanda tagipusuun. Dahil ipinauna ipinaalam Ispiritu sa kanda ti malakawan kakurian ni Kiristu hanggan ti kadayawan kay matanggap niya. 12 Pagka ipinaalam manga purupita inda pag manga katutuuhanan itinudlu waydi Diyus sa kanda, kuntay kanda pagbagawun balaw may pakinabang sa kanda nu unman sa kanyu ngap. Inda pag manga katutuuhanan nadnugan yi niyu ginan sa manugpadakit Mayad pag Barita Diyus. Pagka sinugu Diyus ti Ispiritu Banal ginan sa langit tabug sa manga manugbarita, nanudlu sida sa kanyu angay sa udyuk Ispiritu Banal. Una ti manga anghil sa langit daka mana kanda gustu masalman nida inda pag manga katutuuhanan. 13 Nakan ngani ihanda niyu kanyu naisipan. Pagmapinigilun kamu. Ilubus niyu kanyu pagsarig sa kay ipinangaku Diyus pag kaayadan kanyu patabgan nu makitan yi aban si Hisu-Kiristu. 14 Kamu pagga manga anak masurundun. Danga pagsunda ti manga daut pag kagustuhan ga kanyu kaybi binwat pagka kamu udwaya may intindi sa katutuuhanan. 15 Ti Diyus banal, imaw ti nagpili sa kanyu nakan kailangan ilubus niyu ipasakup kanyu sadili sa kanya sa tanan niyu buruwatun. 16 Angay sa isinurat sa Banal Kasuratan, magkun ti Diyus, "Ilubus ipasakup niyu kanyu sadili sa kangku, dahil aku banal." 17 Unman may pagpiliun ti Diyus. Pagpihuun niya ti kada tawu nu daut nu mayad angay sa kay binwat. Nakan paggalang kamu sa Diyus hanggan kamu sitay waya sa babaw daga. Dahil siya kanyu pag-ingarnan kanyu Ama. 18 Dahil naalaman niyu nu hintay ti ilinukat sa kanyu ginan sa unman may kabuluhan pag ugali kanyu minana ginan sa kanyu ginurang. Ti ilinukat sa kanyu balaw manga bagay magkadaut, parihu sa manga pilak, manga gintu. 19 Ti ilinukat sa kanyu kay ngap mahal pag dugu ni Kiristu. Namatay siya tungkul sa kanyu kasalanan ga anak karanidu unman may nu hintay pag alangan unman waydi may daut una di. 20 Udwaya linalang ti kalibutan daan di si Kiristu pinili Diyus. Taynguna pagka arani yi ti katapusan panahun, ipinaburayhaw siya Diyus sa ikaayad niyu. 21 Dahil sa kan Kiristu nakan kamu nakasarig sa Diyus, imaw waydi ti nagbuhi uman sa kan Kiristu ag ti nagpakaun kadayawan. Dahil sa kan Kiristu nakan ngani kamu may pagsarig ag pag-asa sa Diyus. 22 Taynguna kamu manga malumpiyu yi dahil kamu manga masurundun yi sa katutuuhanan, ag dahil kamu may pagmalahalan sa usa kag sa usa balaw sa magpabalhinguun. Pagmaimbung gid kanyu buu tagipusuun kanyu pagmalahalan sa usa kag sa usa. 23 Dahil kamu ungud gid iinanak inuman balaw sa kapangyarihan lang tawu may kamatayan, nu unman sa kapangyarihan ngap Bagaw Diyus. Ag ti Bagaw Diyus buhi gid unman may katapusan. 24 Angay sa nisurat sa Banal Kasuratan magkun, "Ti tanan pag manga tawu parihu sa ilamnun, Parihu ga sa busang ilamnun kanda rinu. Ti ilamnun magkarubay, magkarugnas kay busang. 25 Dapat ti Bagaw Panginuun unman may kaduraan hanggan waya aban." Inda yi ngani pag Bagaw imaw ti Mayad pag Barita ti itinudlu sa kanyu.
1 Nakan ngani tayaki yi niyu ti tanan pag kadautan, ti tanan buwat sa magdaya, una ti magpabalhinguun, una ti maghirak, una ti magmuransa, tayaki yi niyu tunda. 2 Parihu sa manga lapsag bag-u nianak hanapun niyu ti pinagkagatas angay sa Ispiritu unman may lakut daut, hampay dumaka kanyu pagsarig hanggan sa udwaya matanggap niyu ti buu kaliktasan. 3 Dahil angay sa kay sinabi sa Banal Kasuratan magkun, "Nasamitan yi niyu kay pangaawa Panginuun." 4 Pagpakarani kamu sa kan Kiristu. Siya yi ngani ti ga batu may buhi, dinayu manga tawu, dapat pinili ngap Diyus, kay yi pagpahalagahan. 5 Bilang ga manga batu may buhi waydi pagga manga kalap kamu balay Diyus hampay ulian Ispiritu. Bag-u bilang ga manga magpangasiwa ibinukud para sa Diyus, pagpakaun kamu sa Diyus manga pakaun angay sa Ispiritu, kay pagbayaun Diyus dahil sa kan Hisu-Kiristu. 6 Dahil magkun sa Banal Kasuratan, "Bantayi niyu, ipinakana niku sa banwa Siun ti usa ka batu pag kalap pinili, imaw yi ti mahalga. Balaw mibuyu una hintay pag tawu nu sumarig sa kanya." 7 Nakan ngani mahalga si Kiristu sa kanyu sa manga may sarig. Dapat sa manga unman may sarig matupad inda pag Kasuratan magkun, "Ti batu dinyu manga manugpatindug balay, Imaw yi ngap ti ipinakana mahalaga pag kalap." 8 Ag, "Ibinugtang ti usa ka batu karadayaanun, Laun pagka batu kanda matalakpahan." Ga nadayaan yi ngani sida, dahil unman sida naniwala sa Bagaw Diyus. Tunda yi ngani ti inalistu para sa kanda. 9 Dapat kamu ungud usa ka pinili pag lahi. Parihu sa manga manug-asiwa balay Diyus, kanyu pagsirbihan si Kiristu pag Hari. Kamu usa ka nasyun binukud para sa Diyus. Pinili kamu Diyus hampay kamu kay sadili yi pag nasakupan ag hampay ipaburayhaw niyu kay manga buwat makadululaw. Siya diman waydi ti nagtawag sa kanyu ginan sa kadudulman tabug sa kaladulawan pag karayawan niya. 10 Nu kaybi di waya gid kamu bukun kay nasyun Diyus, taynguna bay kamu kay yi pinili hampay kay nasakupan. Kaybi kamu kay inirangan kay pangaawa. Dapat taynguna kamu kay kinaawaan. 11 Manga mahal niku pag patar-ari, kang pag-ipaanyu sa kanyu ga sa manga panday-uhan lang sitay sa kalibutan, pagtayaki yi gid niyu ti daut pag nagustuhan niyu naisipan, imaw tiglaban sa kanyu karadwa. 12 Kailangan pagmay kaayusan kanyu ugali sa karaw-an manga unman magsarig sa Panginuun. Una abi kamu kanda pagbangdanan sa buwat daut, makitan di nida kanyu mayad pag buwat hampay dumayaw di aban sida sa Diyus nu kaudasan yi karas-ugan ni Kiristu. 13 Dahil ngani kamu sa Panginuun, kailangan pagpasakup kamu sa tanan may kangaranan sa nasyun lalu sa Pangulu Hari, dahil siya ti pinakamataas sa tanan pag kapangyarihan. 14 Pagpasakup diman kamu una sa manga gubirnadur, imaw ti manga suruguun Pangulu Hari hampay magparusa sida sa manga magbuwat daut ag hampay magdayaw sa manga magbuwat mayad. 15 Dahil katida gid kay kagustuhan Diyus, kamu pagbuwat mayad hampay imaw kanyu panalu sa pagbagawun manga tawu unman nakaintindi. 16 Kamu manga irinibri yi, dapat una kamu may kaliktasan danga waydi niyu buwatun purun-an buwat daut, kailangan ngap pagga manga panawuhun Diyus kanyu ugali. 17 Galangun niyu ti tanan manga tawu, ag mahalun niyu ti manga patar-ari sa kan Kiristu. Pag-ugali kamu maggalang sa Diyus. Galangun diman niyu ti Pangulu Hari. 18 Kamu pag manga panawuhun, pagpasakup paggalang kamu sa kanyu amu, pagmatinupadun kamu, balaw lang nu mayad ag mahusay pag amu, una diman sa unman mayad pag amu. 19 Ti Diyus magbaya di nu may pagtiis una si unu sa kay malakawan kakurian dahil sa kay naisipan tagipusuun angay sa Diyus, nu mag-agwanta siya una unman may kasalanan. 20 Unman gid may dumayaw sa kanyu nu mag-agwanta kamu parusa dahil sa kanyu binmuwat daut. Dapat nu kamu parusahan madi kanyu buwat mayad bag-u nu tiisun lang niyu kanda parusa sa kanyu, pihu kamu pagbayaun Diyus. 21 Imaw yi ngani kay turunu Diyus sa kanyu pagka kamu pinili niya. Si Kiristu diman nagtiis para sa kanyu, pinakakitan niya kamu mustara hampay kanyu huwadun. 22 Unman nagbuwat si Hisus una hintay pag kasalanan, unman diman may nadnugan sa kanya una hintay pag bagaw balaw katutuuhanan. 23 Una siya minuransa unman siya nagganti. Una siya pinakurianan, unman siya tinmima. Nagsarig yi lang siya sa Diyus, sa madunung magpihu sa daut sa mayad. 24 Sa pagkamatay niya sa kurus, dinara niya sa kay bilug ti kabuyatan nita kasalanan hampay rargu tayakan nita kanta ugali magkasala bag-u umugali yi angay sa kay kagustuhan Diyus. Kamu pinaayad yi dahil lang sa kay manga biyag ni Kiristu. 25 Kaybi kamu nanwayakwayak yi parihu ga manga karanidu tinmalang, dapat taynguna tinipun maan kamu Manug-alaga, imaw ti manuggiya niyu manga karadwa.
1 Kamu duy pag manga babayi, pagpasakup kamu sa kanyu sadili asawa, hampay una si unu sa kanda nu udwaya magpaniwala sa Bagaw Diyus, miabay diman sumarig, dahil sa kanyu mayad pag ugali una balaw yi may patapil paliwanag sa kanda. 2 Pakitan niyu sa kanda kanyu ugali magalang ag mabuut. 3 Kanyu rinu danga tugka lang sa mag-akitan mata parihu sa mayamu pamauli sa buhuk, una manga bisti gintu, manga mahalga pag rutay. 4 Lalu ngap isipun niyu mahalga ti rinu mataguan sa basad niyu tagipusuun. Tunda pag rinu unman magpud-as, ginan sa mahuway ag maalumanay pag naisipan, ungud lubus mahalga sa kay magbantay Diyus. 5 Kaybi waya pag panahun katida pag rinu ti pinahalgaan manga babayi lubus sakup sa Diyus. Sida nagsarig gid sa Diyus ag nagpasakup diman sa kanda manga asawa. 6 Tida imaw yi gid kan Sara itinayak pag mustara. Nagsunud kabay siya sa kay asawa sa kan Abraham, kay iningarnan niya kay takinan. Kamu diman ga kan Sara manga linahi nu mahal lang kanyu manga buwat ag nu unman kamu may pagkadalaan una di. 7 Kamu waydi manga lalaki, pagpasunaid kamu sa kanyu sadili asawa dahil udyi ga lalaki kanda kaya. Parihu diman sa kanyu may karampatan sida sa buhi unman may katapusan kay ipinakaun Diyus sa kanyu. Nu katida kanyu ugali udyi may sumigaud sa kanyu darangin. 8 Inda waya kang sabi sa kanyu tanan, pagmay pagkausa kamu, pagparasunaidan kamu, pagmalahalan kamu sa usa kag sa usa kamu manga magtar-arian. Pagmapininsarun kamu pagma-&pinakumbabaun kanyu naisipan. 9 Danga gantihi daut ti tawu nu magbuwat daut sa kanyu. Danga niyu murahun ti magmura sa kanyu. Bagkus ngap idarangin niyu sida hampay papaladan sida Diyus. Dahil pinili kamu Diyus hampay makatanggap papalad ginan sa kanya. 10 Angay sa nisurat sa Banal Kasuratan magkun, "Ti may gustu magkaibug sa buhi ag sa makakit siya mayad pag kahamtangan, pagpigil siya sa kay baragawun daut, kay bibig danga magbagaw daya. 11 Pagpatlikud siya sa daut, pagbuwat siya mayad, Danga siya magkagasa sa kay maghanap sa kahusayan, 12 Dahil pagbantayan Panginuun ti manga matadlung, kay pagbayaun. Magdungug siya sa kanda manga darangin. Dapat kay magbantay Panginuun may galit sa manga magbuwat daut." 13 Udyi may bumuwat daut laban sa kanyu nu kanyu turunuhun lunsay kaayadan. 14 Dapat nu abi kamu mag-agwanta kakurian dahil ngani sa kanyu magbuwat mayad, papaladan di ngap kamu Diyus. Danga lugud kamu magkadala sa kanda gayak magtima. Danga waydi magkakulbaan kanyu naisipan. 15 Galangun niyu sa kanyu tagipusuun si Kiristu, imaw ti Panginuun. Pagmay alistu kamu pirmi kanyu isagut nu may humagad ginan sa kanyu manga paliwanag tungkul sa kanyu pagsarig. 16 Dapat pagmaalumanay kamu paggalang nu kamu magpaliwanag. Pag-ugali kamu sa malumpiyu kanyu tagipusuun hanggan naisipan hampay mibuyu ti manga magmuransa sa kanyu hanggan ti manga mag-away sa kanyu mayad ugali, dahil ngani kamu kay suruguun ni Kiristu. 17 Lalu waya mayad nu kamu may pag-agwantahun kakurian dahil sa kanyu magbuwat mayad, nu abi tida kay kagustuhan Diyus. Minus lang gid nu abi kamu mag-agwanta kakurian dahil sa kanyu magbuwat daut. 18 Dahil ngani si Kiristu namatay kas-a dahil sa kasalanan tanan tawu. Si Hisus ti unman may kasalanan namatay sa manga tawu makasalanan, hampay kamu kay ipaatubang sa Diyus. Minatay siya sa kay buhi sitay sa babaw daga, bag-u binuhi uman angay sa Ispiritu. 19 Pagka katida nag-ati siya nagpahayag sa manga karadwa napirisu. 20 Tunda ngani pag manga karadwa imaw ti manga unman naniwala kaybi madi kay pagpakaalagdun Diyus ati katpung kan Nuwi magbuwat sakayan. Kay pakinabang inda ginan pag binwat sakayan pira pira di ka tawu waluwalu ti nakaribri sa karaw-an danum. 21 Ti danum halimbawa sa tulbaw magribri taynguna sa kanyu. Ti tulbaw balaw sa kuntay makalumpiyu uring sa bilug. Ti kahulugan tulbaw usa ka taratu sa Diyus ginan sa tawu may malumpiyu pag naisipan hanggan tagipusuun. Pag-iribri kamu tulbaw dahil sa kay pagkabuhi uman ni Hisu-Kiristu. 22 Nag-atag siya sa langit bag-u tinmukaw siya baliwa sa sikun Diyus minsan sa kay karampatan. Siyun yi ngap siya pag maghari sa manga anghil, sa manga may kangaranan hanggan kamaskihan sa langit.
1 Nag-agwanta si Kiristu sa kakurian sa kay buhi sitay sa babaw daga, nakan ngani una kamu pag-alistu sa kanyu naisipan hampay mag-agwanta waydi. Dahil ti tawu nu mag-agwanta sa kakurian sa kay buhi sitay sa babaw daga, napatlikud yi siya ginan sa kasalanan. 2 Yabi sirang kay yi pag-intindihun ti kagustuhan Diyus sa kay buhi sitay sa babaw daga, balaw yi pag-intindihun niya kay sadili pag kagustuhan. 3 Kang-ud yi ti manga nakalawuy pag sirang kanyu inuyang sa kanyu manga binwat angay sa ugali manga balaw napasakup sa kan Kiristu, manga mahalay, manga daut kagustuhan naisipan, manga maglangu, manga subra yi pag kasayahan, manga mag-inuman, manga magsamba sa diyusdiyusan balaw angay sa atubangan Diyus. 4 Maglingut ngani sida nu hayga nguna udyi kamu magpaminsan taynguna sa unman may kabuluhan pag manga ugali nida. Nakan pagkadat-an nida kamu. 5 Dapat may kapanagutan sida sa Diyus. Handa yi sumintinsiya ti Diyus una sa manga buhi waya una sa manga namatay yi. 6 Itinudlu diman ti Mayad pag Barita sa manga namatay hampay mabuhi diman sida waydi sa Ispiritu angay sa Diyus, madi natakdan yi sida kamatayan bilang sintinsiya sa kanda. 7 Arani yi ti katapusan tanan manga bagay, nakan ngani danga kamu makulbain, pagmapininsarun kamu kanyu naisipan hampay kamu makadarangin. 8 Un-an sa tanan kailangan pagmalahalan gid ungud kamu, dahil nu may pagmahal mapatawad di ti mayamu pag kasalanan. 9 Tanggapa di niyu ti manga patar-ari sa kanyu balay, danga sa barungbadu. 10 Pagmatinupadun kamu pag manga piniyaran manga tuhay tuhay pag kaayadan Diyus. Gamita niyu ti kanyu tinanggap ayaw ayaw hampay mapakinabangan tanan patar-ari. 11 Nu kawu magpaliwanag, pagginan sa Diyus kam paliwanag. Nu kawu manugsirbi waydi, gamitun nimu ti kabisugan ipinakaun Diyus sa kanmu magsirbi, hampay sa tanan bagay dayawun ti Diyus dahil sa kan Hisu-Kiristu. Sa kanya ti kadayawan hanggan kamaskihan hanggan di aban. Amin. 12 Manga patar-ari, danga niyu kadulawan ti manga mabuyat pag subuk kanyu magkalakawan. Kanyu aw lugud isip kamu lang ti pagsubukan? 13 Lalu kailangan gid kamu pagbaya sa kanyu magpakidamay sa kakurian ni Kiristu, hampay nu ipaburayhaw yi aban kay kadayawan ni Kiristu, kamu lubus yi sa kabayaan. 14 Papaladan kamu Diyus nu kamu pagmuransahun dahil kamu napasakup yi sa kan Kiristu, tutuu papaladan kamu dahil nangulian sa kanyu ti makamaskihan pag Ispiritu kadayawan, imaw ti Ispiritu Diyus. 15 Danga maglibun sa tawu, danga magtakaw, danga may magbuwat kadautan, danga umapu nu bukun kanyu, hampay kamu balaw maparusahan dahil sa kanyu kasalanan. 16 Dapat una hintay sa kanyu danga mangay-a nu siya parusahan dahil sa kay magpasakup sa kan Kiristu. Lalu ngap pagpasalamat siya sa Diyus, dahil siya magpakiusa sa kan Kiristu. 17 Taynguna yi ti kaudasan hampay pihuun ti manga tawu nu daut nu mayad ag inda umumpisa ginan sa manga pinili Diyus. Ginan ngani sa kanta inda pag umumpisa. Kabitay wadi ti mangyari sa katapusan aban sa manga unman magpaniwala sa Mayad pag Barita Diyus? 18 Parihu sa pagsabihun sa Banal Kasuratan magkun, "Nu ti matadlung diit wadi udyi maribri, hintay nguna ti patabgan manga makasalanan manga unman magkilala sa Diyus?" 19 Nakan ngani ti manga mag-agwanta sa kakurian angay sa kagustuhan Diyus, pagbuwat sida mayad, bag-u intirgahan nida kanda buhi sa Manuglalang, dahil siya ti masarigan.
1 Aku duy may paanyu sa manga manug-asiwa sa kanyu. Aku manug-asiwa diman ga kanyu. Nakitan niku kan Kiristu inagwanta pag manga kakurian. May kabahagi diman aku sa kadayawan arani yi ipaburayhaw aban. 2 Kang gid bilin sa kanyu alagaan niyu ti manada Diyus kay iinintirga sa kanyu. Tupada niyu kanyu buruwatun pagmay maluag pag naisipan, balaw sa nalugusan kanyu kagustuhan. Dahil tunda ngani kay gustu Diyus. Tupada ngani niyu kanyu katungkulan danga magkaibug sa may pakasa, lalu ngap pagmay kabayaan kanyu magsirbi. 3 Danga waydi kamu ga usa ka amu niyu manga nasakupan. Lalu ngap kailangan kamu ti mayad pag mustara sa manada niyu. 4 Sa pagsitay aban Pangulu Manug-alaga, makatanggap kamu masnag pag sangbaw hari, unman magpusyaw una hanggan waya aban. 5 Kamu duy pag manga udwaya masyadu kanyu idad, kailangan pagpasakup kamu sa manga manug-asiwa. Pagparasakpan kamu tanan magsirirbihan kamu sa usa kag sa usa. Angay sa isinurat sa Banal Kasuratan magun, "Ti Diyus lumaban sa mayabangyabang, dapat pakan-an niya kaayadan ti mapinakumbabaun kay naisipan." 6 Nakan ngani pagpakumbaba kamu pagpasirung sa kapangyarihan Diyus, hampay ipaabwat niya kamu nu Rumas-ug kay taning pag udas. 7 Intirgahan niyu sa Diyus ti tanan kakurian niyu, dahil siya madunung mag-alaga sa kanyu. 8 Pagmapininsarun kamu, pag-aman. Si Satanas ngani kanyu kalaban parihu sa liyun kay mag-ungal, magpalibutlibut maghanap kay siribaun. 9 Danga gid kamu magpatalu sa kanya. Pagpakarig-un kamu sa kanyu pagsarig sa Diyus. Naalaman diman ngani niyu, balaw lang kamu ti may pag-agwantahun katida pag kakurian. Hanggan kanyu manga patar-ari sa buu kalibutan may pag-agwantahun diman waydi. 10 Pagka lumawuy kanyu ngalay ngalay pag kakurian, pakan-an kamu Diyus kahustuhan hanggan karig-unan hampay udyi magkaanggihut. Siya ti gimpuunan tanan kaayadan, siya diman waydi ti nagpili sa kanyu hampay kamu may kabahagi waydi sa kay ud may katapusan pag kadayawan kaibahan ni Kiristu. 11 Sa kanya ti kapangyarihan hanggan waya aban. Amin. 12 Sa kang nagsurat inda sa kanyu aku inawatan ni Silbanu. Alam niku siya usa ka masarigan pag patar-ari. Sa inda ngani pag surat dag-ud dag-ud kang gustu pabisugun niku kanyu naisipan, ag kang diman pag-isabi sa kanyu inda ngani ti tutuu pag kaayadan kay ipinakaun Diyus. Dagkaanggihut kamu ginan sa inda pag pakaun kaayadan. 13 Ti iglisya sa Babilun magpaingana nu kabitay waydi kamu asan. Sida manga pinili diman parihu sa kanyu. Si Markus hanggan magpaingana waydi nu kabitay kanyu kahamtangan. Siya kang pinagkaanak sa sarig sa kan Kiristu. 14 Kamu manga magtar-arian sa kan Kiristu, pagparaingan-an kamu pagmay pagmahal sa usa kag sa usa. Ti kahusayan pagsa kanyu yi gid tanan, sa manga napasakup sa kan Kiristu.
1 Inda ti may surat si Simun Pidru, kay Apustul hanggan kay panawuhun ni Hisu-Kiristu. Inda pag surat atag ngani sa kanyu, sa manga nakatanggap mahalaga pag sarig parihu ga kanmi pag sarig. Ti Diyus Manugribri imaw yi ngani si Hisu-Kiristu, ti may pakaun sa kanta inda pag sarig angay sa kay katadlungan. 2 Pagsa kanyu ti abunda pag papalad hanggan kahusayan dahil sa kanyu magkilala sa Diyus hanggan sa kanta Panginuun Hisus. 3 Tinanggap nita dahil sa kay kapangyarihan Diyus ti tanan nita manga pangailangan hampay mag-ugali kita marig-un sa kanya. Mangyari inda dahil sa kanta magkilala sa kan Hisus. Siya diman ti nagpili sa kanta sa panab-anan niya sadili kadayawan hanggan kaayadan. 4 Sa katida pag paraan masyadu gid mahalaga kay manga itinaratu sa kanta hampay makaiwas kamu sa kadautan ginan sa kutub kahalayan sitay sa kalibutan, ag hampay hurayan kamu kay pagka-Diyus. 5 Nakan ngani pagpakasipag kamu hampay kanyu pagsarig dagdagan niyu kaayadan, ti kaayadan dagdagan niyu kadunungan, 6 ti kadunungan dagdagan niyu pagpigil sa sadili, ti pagpigil sa sadili dagdagan niyu karig-unan, ti karig-unan dagdagan niyu magpasakup sa Diyus, 7 ti magpasakup sa Diyus dagdagan niyu mapinasunaidun sa patar-ari, ti mapinasunaidun sa patar-ari dagdagan maan niyu pagmahal. 8 Pagmay imaw kamu katida pag ugali buhi, paabundahun niyu hampay kanyu magkilala sa Panginuun Hisu-Kiristu danga maduraan halaga hanggan pakinabang. 9 Ti tawu nu unman may imaw katida pag ugali buhi ga madlum kay magbantay, nalimtan yi niya kuntay pinatawad yi kay daan pag manga kasalanan. 10 Manga patar-ari, kamu kay manga tinawag ag manga pinili Diyus, nakan ngani pagpakarig-un kamu sa inda pag kahamtangan. Nu inda kanyu buwatun dayu kamu sumimray. 11 Nu katunda, tanggapun kamu may kabayaan sa kay kaharian unman may katapusan ni Hisu-Kiristu, imaw kanta Panginuun ag Manugribri. 12 Madi alam niyu inda ag marig-un kamu sa katutuuhanan kanyu tinanggap, pirmi diman kang pagpaalalahanan kamu tungkul sa inda pag manga bagay. 13 Unman may gustu aku mag-apas kang magpaalaala sa kanyu hanggan aku buhi waya hampay unman malimtan niyu. 14 Alam niku udyi dugay kang buhi sitay sa babaw daga, angay diman sa kay ipinaalam sa kangku nita Panginuun Hisu-Kiristu. 15 Nakan kang buwatun waya tanan niku makaya hampay maalaala waya niyu pirmi inda pag manga bagay una aku aban namatay yi. 16 Dahil pagka kanmi ipinakilala sa kanyu ti kapangyarihan nita Panginuun Hisu-Kiristu hanggan kay pagras-ug niya aban unman gid nimi itinudlu sa kanyu ti manga pinathaw lang pag tultulanun. Nakitan ngap nimi mata kay kamaskihan. 17 Ipinakaun yi Diyus Ama sa kanya ti kadayawan hanggan kapurihan sa katpung may nagbagaw ginan sa mamaski pag kadayawan sa langit magkun, "Inda kang pagmahalun gid pag Anak, siya lubus kang pagkaawaan." 18 Nadnugan gid nimi tunda dahil kaibahan niya kami ati sa sakup sa Diyus pag bantud. 19 Lalu waya pagpaniwalaan nimi ti sinabi manga purupita. Kailangan kanyu intindihun mayad mayad ti sinabi manga purupita dahil tunda pag bagaw parihu ga sulu marayaw sa basad madulum hanggan sa udwaya magkasurip ag suminggit ti kuramnag sa kanyu manga tagipusuun. 20 Lalu waya kailangan alalahanun niyu kuntay ti ipinurupita pag Bagaw Diyus sa Banal Kasuratan dayu mahimu maipaliwanag tawu nu ginan lang sa kay sadili naisipan. 21 Dahil unman may ipinurupta nu ginan lang sa kagustuhan tawu. Inda pag bagaw ginan gid sa Diyus ag binagaw manga tawu angay sa udyuk Ispiritu Banal.
1 Dapat kaybi may naglutaw diman sa nasyun Israil manga pudilun pag purupita. Una sa kanyu may lumutaw diman aban manga pudilun pag manga manugtudlu. Itudlu nida sa lihim kanda salan pag manga adal, imaw tigdaut sa pagsarig manga tawu, pagdayuun nida ti Panginuun ti naglukat sa kanda. Nakan ngani bigla sida ipadamhak sa kamatayan. 2 Mayamu pag tawu sumunud aban sa kanda manga buwat makakaray-a, ag dahil sa kanda buwat daut libakun yi ngap manga tawu ti mayad pag katutuuhanan ginan sa Diyus. 3 Manga maramuun sida, nakan magpabalhinguun sida sa kanda tudlu hampay sida pakan-an niyu kuwarta. Ginan waya sa kabag-u ihinanda yi ti sintinsiya sa kanda, pagtandan di sida Manugsintinsiya. 4 Unman ipinatawad Diyus ti manga anghil. Bagkus ngap pagka sida nagkasala iyinmut sida atabug sa kaabasadbasadan, pinirisu sida sa basad piris pag madlum hampay mag-alagad sa sintinsiya. 5 Unman diman waydi pinatawad Diyus ati katpung pag manga makasalanan pag tawu kaybi nu unman tinabu minatay niya sa gunaw. Si Nuwi lang ti nagtudlu katadlungan imaw kay irinibri Diyus hanggan ti pitu ka tawu naribri diman waydi kaibahan ni Nuwi. 6 Sinintinsiyahan diman Diyus pinapas ti banwa Suduma hanggan ti banwa Gumura nagbaliw yi dapug, bilang ga usa ka mustara sa manga magbuwat daut. 7 Dapat irinibri niya si Lut dahil siya matadlung. Irinuku gid ni Lut ti mahalay pag ugali manga magbuwat kadautan. 8 Tunda ngani pag matadlung pag tawu ati pag nangulian sa kanda karaw-an sirang sirang. Subra ungud kay ruku sa kay matadlung pag tagipusuun pagka nakitan ag nadnugan niya kanda magkagumun sa magbuwat kadautan. 9 Ti Panginuun madunung magparibri sa manga lubus napasakup sa kanya nu may malakawan sida subuk. Madunung waydi siya sa manga unman matadlung hampay sida maparusahan hanggan sa udwaya udas sintinsiya. 10 Lalu gid parusahan aban ti manga mag-ugali angay lang sa sadili nida kagustuhan sa daut pag naisipan hanggan sa mahalay ag unman madunung magpanagunsirung sa may kangaranan. Manga paranghasin tunda pag manga pudilun pag manga manugtudlu, manga palabilabihun. Unman paggalangun nida ti manga makapangyarihan sa langit, bagkus ngap kanda paglibakun. 11 Dapat ay madi ti manga anghil lalu waya mabisug kanda kapangyarihan, unman sida magganti maisug bagaw, unman magsumbung sida sa Panginuun laban sa tunda pag manga pudilun pag manga manugtudlu. 12 Dapat ay tunda pag pudilun pag manga manugtudlu parihu sa manga hayup simarun unman may buut, nianak sida hampay dakpun ag matyun. Ti manga bagay unman magkasalman nida imaw ngap ti kanda paglapastanganun, nakan parihu sa manga simarun hayup sida ipadamhak diman. 13 Tunda yi ngani kay bayad sa kanda mag-api sa manga iba. Sigi lang kanda magbuwat kadautan una sirang hampay masunud lang kanda kagustuhan bilug. Daka gid pag kakay-ahan, subra gid kanda magpuya nu makitan sida sa kanyu karaw-an magsaru sa kanyu karan-an. Magbaya sida nu madaya lang nida kamu. 14 Unman sida may paghanapun nu ud pararauragan lang. Ud magsuku sida sa magbuwat kasalanan. Pagtabantabanun nida ti manga malumuy tag sa kasalanan. Anad gid sida sa maramuun. Sida manga sinaadan yi Diyus. 15 Tinmalang sida ginan sa mayad pag dalan. Hinuwadan nida kan Biur anak si Balaam. Kinaibgan diman ni Balaam kay upa sa kay buwat kadautan. 16 Dapat tinamyaw siya dahil sa kay kasalanan. Madi balaw madunung magbagaw ti asnu, dapat kan Purupita Balaam pag asnu nagbagaw ngap parihu ga tawu, inampara niya kan Balaam buwat unman may kabuluhan. 17 Tunda pag manga manugtudlu pudilun parihu ga manga bubun nak-at, parihu sa manga rurum pag-ipayag durus. Hinandaan sida Diyus ulian sa basad piris pag dulum. 18 Pala-&bilabihun sida nu magbagaw dapat unman diman may kahulugan ti kanda pagsabihun. Kanda garamitun kanda daut pag kagustuhan naisipan hampay maudyukan bumalik maan sa kadautan ti manga bag-u lang magpakarayu sa manga tawu daut kay ugali. 19 Bilang madi sida magsabi sa manga tawu kanda pagbutungun kuntay udyi kunu may umampara sa kanda kagustuhan, dapat sida yi ngap maaw ti panawuhun kalukuhan. Dahil ti tawu sumirbi sa una hintay tigsakup sa kanya. 20 Nakaiwas yi sa kadautan kalibutan ti manga tawu nakakilala sa kan Hisu-Kiristu sa kanda Panginuun Manugribri. Dapat ay nu maraibgun maan sida sa daan pag ugali daut bag-u nu rargu napatalu, lalu man makuri kanda kahamtangan balaw lang ga sa kabag-u. 21 Mayad waya mana nu ud nataw-an nida ti matadlung pag dalan. Masyadu gid makuri ti tawu nu nataw-an niya ti banal pag kasuguan iinintirga sa kanya bag-u kay di maan tinayakan. 22 Nu katida mitama sa kanda ti pagsabihun magkun, "Ga ugali yi waydi idu magbalik yi maan sa kay suka. Una ti ina babuy madi pinarigus yi, magbalik yi maan sa kay lubganan."
1 Inda yi ngani duy manga patar-ari kang ikadwa pag surat tabug sa kanyu. Sa duwa ka surat niku inda pagpulawun niku kanyu mayad pag naisipan, pagpaalaalahanan niku kamu. 2 Isipa niyu ti manga binagaw kaybi manga purupita lubus napasakup sa Diyus. Isipa diman ti ibinilin nita Panginuun imaw ngani ti Manugribri. Tunda pag manga ibinilin nadnugan niyu ginan sa kanyu manga Apustul. 3 Un-an gid sa tanan kailangan kanyu alamun kuntay aban sa uryan sirang may manga tawu kanda ugali angay sa kanda mahalay pag kagustuhan naisipan. Puyaan nida ti Mayad pag Barita. 4 Sabihun nida magkun, "Nangaku si Kiristu kuntay bumalik maan. Bati naan? Hanggan di nangamatay kanta manga ginurang dapat unman diman may nauman ginan sa naglalang kalibutan." 5 Unman may kabuluhan sa kanda ti katutuuhanan magkun, ti langit, ti daga linalang Diyus sa kapangyarihan niya bagaw. Linalang Diyus ti daga ginan sa karaw-an danum. 6 Pagka katpung sa nagkagunaw, danum diman ti inmanaw nagdaut sa un-an pag kalibutan. 7 Sa kay kapangyarihan diman niya bagaw iningatan inda pag langit hanggan daga hampay sunugun aban sa apuy pagka udas yi sintinsiyahan sa kadamhakan ti manga makasalanan pag tawu. 8 Dapat duy manga patar-ari, danga niyu kalimtan, dahil nu sa Panginuun ti usa ka sirang bilang ga usa ka libu timpu, ti usa ka libu timpu ga usa lang ka sirang. 9 Ti Panginuun unman gid pumalya sa kay manga ipinangaku, balaw parihu ga paghantupun manga iba. Nakan udwaya pagtupadun niya tunda pag manga pangaku dahil ngani sa kanyu. Pinakan-an niya rugar ti tanan tawu hampay sida makaampu sa kanda manga kasalanan ag makapasakup sa Diyus. Dahil unman gid gustu niya una si unu pag tawu ipadamhak sa kaparusahan. 10 Dapat ti kaudasan Panginuun Rumas-ug parihu sa ma-&nanakaw. Sa tunda pag udas aban ti manga langit bigla lang madura may daka gid pag tunug. Mairub ti init ti bulan hanggan ti manga pamgasan, ti daga hanggan ti tanan bagay sa babaw daga masunug. 11 Katunda ngani aban ti pangatapusan tanan bagay, nakan ilubus niyu ipasakup kanyu sadili sa Diyus, kanyu ugali buhi pag-angay yi sa kay kagustuhan, 12 hanggan sa pag-&alagdun waya niyu ti kaudasan Diyus kanyu pagpatigagadun. Sa ati katpung aban pag kaudasan palangbasan ti manga langit, mangatunaw hanggan ti manga bagay sa langit sa masyadu gid pagka init. 13 Dapat ay angay sa kay pangaku Diyus may pag-&alagdun kita bag-u pag langit hanggan bag-u pag daga, kay ululianan katadlungan. 14 Nakan ngani duy manga patar-ari, hanggan kamu mag-&alagad waya, intindiha gid niyu kanyu ugali buhi hampay may kahusayan, unman may uring, ud may kadautan sa kay magbantay Panginuun. 15 Isipa gid duy niyu, nakan ngani magpadugaydugay waya ti Panginuun hampay pakan-an waya kamu rugar agud miribri. Imaw diman kay isinurat ni Pablu, kanta mahal pag patar-ari, sa kay manga surat sa kanyu angay sa kadunungan kay ipinakaun Diyus sa kanya. 16 Sa tanan niya pag manga surat kainda diman kay pirmi pag-ipaalaala tungkul sa inda pag katutuuhanan. Kay iba niya pag manga isinurat makuri masalman kay ibug sabihun, nakan ti manga malumuy kay intindi magsalan sa kanda magpakahulugan. Katunda diman waydi kanda pagbuwatun sa iba pag manga bahagi Banal Kasuratan sa ikadamhak ngap nida sadili bilug. 17 Taynguna duy manga patar-ari, alam yi niyu kailangan kamu pagmaingat barang kamu patalangun manga daut pag tawu kanda tudlu unman may katutuuhanan. Nu katunda kamu marig-&un di, dayu gid mapuil. 18 Pagparargu kamu, pagdaka sa kanyu kay kaayadan Diyus hanggan kanyu pagkilala sa kanta Panginuun Manugribri imaw yi ngani si Hisu-Kiristu. Sa kanya ti kadayawan taynguna una hanggan aban. Amin.
1 Kami inda may surat tabug sa kanyu tungkul sa Bagaw may kabuhian. Udwaya linalang ti kalibutan daan di siya. Imaw kanmi nadnugan hanggan nakitan nimi mata, kanmi binantayan ag nahikap nimi kamang. 2 Ipinaburayhaw inda pag buhi, nakitan gid nimi. Nakan kanmi pagpatutuuhanan ngani ag pag-ibarita sa kanyu ti tutuu pag buhi unman may katapusan. Kaybi ginan kaibahan siya Ama, bag-u ipinaburayhaw siya sa kanmi. 3 Tunda ngani ti kanmi nakitan ag nadnugan imaw yi kanmi pag-&itultul sa kanyu hampay kamu hanggan mapakiusa sa kanmi. Kita magpakiusa yi gid sa Ama ag sa kay Anak, sa kan Hisu-Kiristu. 4 Inda imaw yi ngani kanmi pag-isurat hampay kita lubus yi gid magbaya. 5 Inda ti barita niya Anak sa kanmi, imaw diman kanmi pag-&ipadakit maan sa kanyu magkun, ti Diyus pasay yi karayawan ag udyi gid may kaduluman sa kanya. 6 Nu kanta pagsabihun kita magpakiusa sa kanya bag-u kita maglakaw diman waydi sa madlum, kita magpudil, kanta ugali unman angay sa katutuuhanan. 7 Dapat nu kita maglakaw sa marayaw ga kanya waydi sa marayaw, magpakiusa gid kita sa usa kag sa usa, ag kay dugu ni Hisus kay Anak Diyus ti maglumpiyu sa tanan nita manga kasalanan. 8 Nu pagsabihun nita kuntay unman kita may kasalanan, pagdayaun lang nita kanta sadili, ti katutuuhanan unman ngap sa kanta. 9 Nu pag-akuun nita kanta manga kasalanan sa atubangan Diyus, patawadun niya kita sa tanan pag kadautan, dahil ti Diyus matadlung ag masarigan. 10 Nu kanta pagsabihun kita unman may kasalanan, kanta pagbangdanan ti Diyus pudilun ag kay Bagaw Diyus unman waydi mangulian sa kanta.
1 Aku inda may surat tabug sa kanyu, sa kang manga tuludluan hampay kamu balaw magkasala. Dapat nu abi may patar-ari magkasala, may usa ka matadlung pag manugpamahala kita tabug sa Ama, si Hisu-Kiristu yi ngani. 2 Dahil si Kiristu ti nagbaliwa namatay sa kasalanan nita hampay may kapatawadan kita. Ag balaw sa kanta lang sadili pag kasalanan siya pag namatay, nu unman hanggan diman sa kasalanan tanan manga tawu sa babaw daga. 3 Nu tupadun nita kay manga sugu, pihu masabi nita siya kanta pagkilalan-un. 4 Ti tawu tigsabi magkun, "Magkilala aku sa Diyus", bag-u nu unman diman waydi pagtupadun niya kay manga sugu, tunda pag tawu magpudil ag kay ugali unman angay sa katutuuhanan. 5 Dapat una hintay pag tawu nu magtupad sa kay Bagaw Diyus, tutuu lubus yi kay pagmahalun ti Diyus. Nu katida, alam yi nita, kita sa kanya yi ngani. 6 Nu magsabi ti tawu magkun, pirmi siya magpakiusa sa Diyus, kailangan pagga kan Kiristu diman waydi kay ugali. 7 Unman duy, manga patar-ari, aku may isinurat tabug sa kanyu bag-u pag sugu, nu unman imaw diman ti daan pag sugu kaybi ginan. Inda pag daan sugu imaw ti barita kanyu yi nadnugan. 8 Dapat ay bag-u diman waydi pag sugu kang pag-&isurat sa kanyu. Kay katutuuhanan mag-akitan sa kan Kiristu hanggan sa kanyu diman. Dahil ti dulum maglawuy yi ag ti tutuu pag karayawan magrayaw yi. 9 Nu may tawu magsabi kuntay siya sa marayaw yi, bag-u magkagalit diman sa kay patar-ari, siya sa kadudulman waya ngap hanggan kainda tugka. 10 Nu ti tawu magmahal sa kay patar-ari, nangulian yi siya sa karayawan ag udyi may karadayaanun. 11 Dapat ti tawu nu magkagalit sa kay patar-ari, sa basad kadudulman waya siya. Maglakaw waya siya sa basad madlum ag unman niya alam kay patabgan nu naan, dahil binuta kadudulman kay manga mata. 12 Kamu duy pag manga anak, aku inda ngani may surat tabug sa kanyu dahil pinatawad yi kanyu manga kasalanan dahil sa kay ngaran ni Kiristu. 13 Kamu pag manga gurangun, aku inda may surat tag sa kanyu, dahil nakilala niyu siya ti kaybi ginan daan di. Kamu duy pag manga kasupangan pag manga lalaki aku inda may surat sa kanyu, dahil kanyu dinaug ti May Puun Kadautan. 14 Kamu pag manga anak, aku may surat sa kanyu, dahil nakilala niyu ti Ama. Manga gurangun, nagsurat aku sa kanyu, dahil nakilala niyu siya ti kaybi ginan daan di. Kamu duy pag manga kasupangan pag manga lalaki, nagsurat aku sa kanyu, dahil kamu manga mabisug, ti Bagaw Diyus nangulian sa kanyu ag kanyu dinaug yi ti May Puun Kadautan. 15 Danga duy pagmayada ti ugali kalibutan. Danga pagkaibgi niyu ti manga bagay sa kalibutan. Una hintay tigmahal sa ugali kalibutan, unman mahimu magmahal waydi sa Ama. 16 Dahil ti tanan bagay sa kalibutan, ti manga daut pag kagustuhan naisipan, ti manga daut pag kagustuhan mata ag ti magpadayawdayaw sa kay kahamtangan, balaw ginan sa Ama nu unman ginan ngap sa kalibutan. 17 Ti kalibutan hanggan ti manga magkakinabangan ginan sa kalibutan may kaduraan diman. Dapat ti magtupad sa kagustuhan Diyus may tutuu yi gid pag buhi unman may katapusan. 18 Inda duy arani yi ti katapusan kalibutan. Kanyu yi waydi naalaman kuntay lumuwang ti Anti-Kiristu. Taynguna mayamu yi nagp pag manga anti-Kiristu ti linmuwang yi. Siti pag maalaman yi ngani nita inda arani yi ti katapusan kalibutan. 19 Tunda pag manga tawu ginan diman waydi sa kanta karaw-an dapat daan balaw tutuu minsan sa kanta. Nu abi sida ungud minsan sa kanta, unman gid napablag sida sa kanta. Nakan sida napablag, hampay makilala sida tanan balaw tutuu gid minsan sa kanta. 20 Dapat ipinakaun yi sa kanyu ti Ispiritu Banal, nakan alam yi niyu tanan tanan ti katutuuhanan. 21 Nakan aku nagsruat sa kanyu balaw tunda kuntay ud alam niyu ti katutuuhanan. Alam yi ngapu niyu ti katutuuhahan ag alam diman waydi niyu ti kapudilan balaw ginan sa katutuuhanan. 22 Hintay nguna ti pudilun? Tunda ngani ti pudilun tigsabi magkun, si Hisus balaw imaw ti pinili Diyus Manugribri pag Hari. Tigtanggi sa Ama hanggan sa Anak imaw yi ngani ti anti-Kiristu. 23 Nu ti tawu magdayu sa Anak, unman diman waydi sa kanya ti Ama. Nu ti tawu magpatutuu sa Anak, sa kanya diman hanggan ti Ama. 24 Ti kanyu nadnugan kaybi ginan pag manga adal duy, danga yi gid paglimti. Nu udyi may kaduraan sa kanyu tagipusuun ti kanyu nadnugan kaybi ginan, udyi waydi may kinaapasan kanyu pakiusa sa Anak hanggan sa Ama. 25 Inda yi kay itinaratu sa kanta ni Kiristu, ti buhi ngani unman may katapusan. 26 Isinurat gid ngani niku inda tabug sa kanyu tungkul sa manga tawu magkaibug pumatalang sa kanyu. 27 Dapat duy, ipinakaun ni Kiristu sa kanyu ti Ispiritu Banal, imaw ti nangulian sa kanyu. Nakan balaw yi kailangan may magtudlu waya sa kanyu, dahil ti Ispiritu yi gid tigtudlu sa kanyu sa tanan bagay. Kay pag-itudlu Ispiritu balaw pudil, tunda lunsay katutuuhanan ngap. Nakan pagpaniwala kamu sa tudlu Ispiritu, dagpablag kamu ginan sa kan Kiristu. 28 Kamu duy pag manga tuludluan niku, dagpablag gid kamu ginan sa kan Kiristu, hampay nu miburayhaw siya, balaw kita magkadala ag hampay kita balaw mangay-a sa kay atubangan sa kay pagras-ug aban. 29 Alam yi niyu si Kiristu ti matadlung. Nakan magkaalaman diman waydi niyu una hintay pag tawu nu matadlung kay buwat siya anak yi Diyus.
1 Pag-isipa niyu nu kabitay kay kadaka ti pagmahal Ama sa kanta. Daka gid kay pagmahal nakan iningarnan kita manga anak Diyus. Tutuu gid ngani kita manga anak Diyus. Nakan pagdayuun kita manga taga kalibutan dahil dinayu waydi nida ti Diyus. 2 Taynguna duy, kita manga anak yi ngani Diyus. Udwaya ipinaburayhaw Diyus sa kanta nu kabitay kita aban. Dapat maalaman diman nita nu miburayhaw aban si Kiristu, kita parihu diman waydi ga kanya, dahil makitan yi gid nita siya kay histuda. 3 Una hintay pag tawu ti magsarig katunda sa kan Kiristu, mag-ingat sa kay sadili bilug hampay malumpiyu kay buhi, ga kan Kiristu waydi malumpiyu. 4 Una hintay pag tawu nu magbuwat kasalanan, unman siya magpasakup sa Kasuguan. Dahil ti ibug sabihun kasalanan, nu unman magpasakup sa Kasuguan. 5 Alam niyu nakan si Kiristu nagsitay hampay bul-un niya kanta manga kasalanan. Siya bay unman may kasalanan. 6 Una hintay pag tawu nu unman magpablag sa kan Kiristu, unman magpadayun sa kasalanan. Tigpadayun sa kasalanan, udwaya gid nakakit sa kan Kiristu, unman waya hanggan nakakilala sa kanya. 7 Kamu duy pag manga tuludluan niku, danga kamu padaya una sa kantapu. Ti matadlung kay buwat pag tawu, ga kan Kiristu diman waydi matadlung siya. 8 Nu magpadayun sa kasalanan ti tawu, sakup waya siya diyablu, dahil kaybi ginan hanggan taynguna tugka magkasala diman ti diyablu. Nakan nagsitay ti Anak Diyus hampay wasakun niya ti buwat diyablu. 9 Una hintay pag tawu ti nianak Diyus unman mag-ugali sa kasalanan, dahil kay tinanggap yi ti bag-u buhi ginan sa Diyus. Dayu mahimu siya mag-ugali sa kasalanan dahil Diyus yi kay Ama. 10 Sitay pag makilala ti manga anak Diyus ag ti manga anak diyablu. Una hintay pag tawu ti unman mag-ugali sa matadlung, unman siya anak Diyus, una ti tawu nu unman pagmahalun niya kay patar-ari, unman diman siya anak Diyus. 11 Dahil inda pag barita kanyu yi nadnugan kaybi waya ginan magkun, kailangan kita pagmalahalan sa usa kag sa usa. 12 Balaw parihu sa kan Kain. Sakup siya May Puun Kadautan nakan linibun niya kay ari. Nakan kan Kain linibun kay ari dahil matadlung ti buwat niya ari, kan Kain bay lunsay kadautan. 13 Danga kamu madulaw, manga patar-ari, nu kamu pagkagalitan manga taga kalibutan. 14 Alam yi waydi nita, kita kainda may bag-u yi pag buhi, nighit yi kita ginan sa kamatayan, dahil pagmahalun nita kanta manga patar-ari. 15 Una hintay pag tawu tigkagalit sa kay patar-ari, siya manlilibun ngap sa tawu. Alam diman niyu ti kada manlilibun tawu unman gid sa kanya ti tutuu pag buhi unman may katapusan. 16 Siti nita pag makilala ti pagmahal, sa kay unman nag-irang ni Kiristu kay kinabuhi sa kamatayan para sa kanta. Nakan kailangan balaw diman irangan nita kanta buhi para sa manga patar-ari. 17 Ti tawu nu may kasiyunan sitay sa babaw daga, ag nu makitan niya kay patar-ari may kailangan bag-u nu unman siya naawa nag-awat sa kay patar-ari, kabitay pag masabi siya magmahal sa Diyus? 18 Danga tugka lang sa bagaw kanta pagmahal. Danga babaw lang lukub. Pakitan niyu ti tutuu gid pagmahal may patapil buwat. 19 Sitay pag makilala nita kuntay kita sakup yi sa katutuuhanan. Kainda ti paraan hampay magpakarig-un kanta manga tagipusuun sa atubangan Diyus, 20 nu kanta tagipusuun tigpaalaala kuntay may kasalanan waya. Alam waydi nita ti Diyus lalu man makamaskihan sa kanta manga naisipan ag alam di niya ti tanan bagay. 21 Duy, nu unman kita may magkaisipan kasalanan sa kanta tagipusuun, matutum yi kanta naisipan sa kanta magpakarani sa Diyus. 22 Una hintay kanta hagadun, matanggap nita ginan sa kanya, dahil pagtupadun nita kay manga sugu, pagbuwatun nita ti angay sa kay kagustuhan. 23 Inda yi kay sugu, kailangan pagsarig kita sa ngaran niya Anak, sa ngaran ni Hisu-Kiristu. Kailangan gid kita pagmalahalan sa usa kag sa usa, angay diman sa kay ibinilin sa kanta. 24 Tigtupad sa kay manga sugu Diyus dayu miblag ginan sa Diyus ag ti Diyus nangulian waydi sa kanya. Nakan makilala nita kuntay ti Diyus nangulian sa kanta dahil sa Ispiritu Banal imaw ti ipinakaun niya sa kanta.
1 Danga duy manga patar-ari, magpasnu kamu sa kada tawu mag-aku kuntay sa kanya ti Ispiritu Banal. Subuki dap niyu siya nu ngatay tunda pag ispiritu ungud ngani ginan sa Diyus, aw ngatay unman. Dahil mayamu yi pag manga pudilun purupita naglinutaw sa kalibutan. 2 Siti pag makilala niyu ti Ispiritu Diyus, nu una hintay pag tawu tigtudlu magkun, "Si Hisu-Kiristu nabilug tawu". Nakan katida kay pag-itudlu dahil lang sa udyuk Ispiritu Diyus. 3 Ti kada tawu nu unman magpatutuu sa kan Hisus, pihu balaw Ispiritu Diyus tig-udyuk sa kanya. Bagkus ngap ti sa kanya imaw ti manug-udyuk patalang sinugu ni Anti-Kiristu. Naalaman yi waydi niyu Rumas-ug siya aban, ag una kainda atay yi ngap siya sa kalibutan. 4 Kamu duy manga anak yi Diyus, ag dinaug yi niyu ti manga pudilun pag purupita, dahil una mamaski ti sa kalibutan, lalu man mamaski ti Ispiritu Banal, imaw ti nangulian sa kanyu. 5 Sida taga kalibutan, nakan kanda baragawun angay diman sa ugali kalibutan. 6 Kita manga anak Diyus, nakan ti manga nakakilala sa Diyus magpatingi sa kanta. Ti tawu nu unman siya anak Diyus dayu siya pumatingi sa kanta. Siti pag makilala nita ti Ispiritu katutuuhanan ag ti manug-udyuk patalang. 7 Pagmalahalan duy manga patar-ari kita sa usa kag sa usa. Dahil ti pagmahal ginan sa Diyus. Ti tawu nu magmahal, nianak siya Diyus ag nakakilala siya sa Diyus. 8 Ti tawu nu unman magmahal, unman siya magkilala sa Diyus, dahil Diyus gid ti may gimpuunan pagmahal. 9 Sitay pag ipinakilala ti pagmahal Diyus sa kanta pagka sinugu niya kay bugtung Anak sa kalibutan hampay kita may buhi ginan sa kanya. 10 Ti kang pagsabihun pagmahal, bukun kanta pagmahal sa Diyus, nu unman kay ngap pagmahal Diyus sa kanta. Sinugu niya kay Anak hampay bumaliwa mamatay sa kasalanan nita, agud may kapatawadan kita. 11 Nu katida duy manga patar-ari kay kadaka ti pagmahal Diyus sa kanta, kailangan pagmalahalan diman kita sa usa kag sa usa. 12 Kaybi ginan unman may tawu nakakit sa Diyus. Nu kita magmalahalan, ti Diyus nangulian sa kanta ag namhan yi udyi may kurang kay pagmahal sa kanta. 13 Nakan magkaalaman nita kita nangulian sa Diyus ag ti Diyus nangulian waydi sa kanta dahil kita hinurayan waydi kay Ispiritu Banal. 14 Nakitan nimi ag kanmi pagpatutuuhanan kuntay sinugu Ama kay Anak hampay siya yi ngani ti Manugribri sa tanan manga tawu sa babaw daga. 15 Una hintay pag tawu tigpasnu hanggan magtudlu kuntay si Hisus yi ngani ti Anak Diyus, nangulian yi sa kanya ti Diyus ag siya unman mag-iblag sa Diyus. 16 Magkaalaman yi nita ag kanta diman pagsarigan kay pagmahal Diyus sa kanta. Ti Diyus gid ti may gimpuunan pagmahal. Ti tawu nu magparargu sa pagmahal, dayu mag-iblag ginan sa Diyus ag ti Diyus nangulian diman sa kanya. 17 Nu katunda, pirmi di pagdagdagan Diyus kanta pagmahal hanggan sa udyi may kurang, hampay unman kita magkadala sa kaudasan yi aban nu pihuun ti manga tawu nu daut nu mayad. Dahil nu kabitay si Kiristu katunda diman kita sitay sa kalibutan. 18 Ti pagmahal unman may patapil magkadala. Dahil nu lubus yi ti pagmahal udyi gid may rugar para magkadala waya. Dahil nakan magkadala ti tawu barang parusahan. Nakan nu magkadala ti tawu udwaya lubus namhan kay pagmahal. 19 Kita may pagmahal dahil ti Diyus waydi ti un-an nagmahal sa kanta. 20 Una hintay pag tawu tigsabi magkun, "Pagmahalun gid niku ti Diyus," bag-u nu magkagalit diman siya sa kay patar-ari, pudilun tunda pag tawu. Dahil nu unman waydi pagmahalun niya kay patar-ari madi mag-akitan niya sa mata, lalu yi ngap unman siya madunung magmahal sa Diyus sa unman mag-akitan sa mata. 21 Inda ngani pag sugu kay ibinilin ni Kiristu sa kanta magkun, nu ti tawu magmahal sa Diyus, kailangan diman waydi pagmahalun niya kay patar-ari.
1 Una hintay pag tawu tigpaniwala si Hisus yi ngani ti pinili Diyus Manugribri pag Hari, ati pag tawu nianak Diyus. Una hintay pag tawu tigmahal sa Ama, magmahal diman waydi siya sa Anak. 2 Siti pag makilala nita kuntay kita magmahal sa manga anak Diyus, nu kanta pagmahalun ti Diyus ag nu tupadun diman nita kay manga sugu. 3 Dahil kainda di ti pagmahal sa Diyus, nu tupadun nita kay manga sugu. Balaw diman waydi mabuyat kay manga sugu. 4 Dahil una hintay pag tawu nu nianak yi Diyus, magpanalu siya sa ugali kalibutan. Kanta pagsarig imaw yi ngani kanta panalu sa ugali kalibutan. 5 Ti tawu tigsarig kuntay si Hisus yi ngani ti Anak Diyus tunda lang waydi pag tawu ti magpanalu sa ugali kalibutan. 6 Nagsitay si Hisu-Kiristu, itinulbaw siya sa danum, bag-u kay dugu ibinuhus ati katpung sa kay pagkamatay. Balaw lang danum ti mahalaga, nu unman hanggan kay dugu. Hanggan ti Ispiritu tigpakilala nu si unu si Hisus, dahil ti Ispiritu imaw ti may gimpuunan katutuuhanan. 7 Dahil tulu tigpakilala nu si unu si Hisus, ti Ispiritu, ti danum hanggan ti dugu. 8 Inda pag tulu urusa lang kay turunu. 9 Pagpaniwalaan nita ti pagsabihun manga tawu, dapat lalu mahalaga ti pagsabihun Diyus. Dahil pag-ipakilala ngani Diyus sa kanta kay Anak. 10 Ti tawu nu magsarig sa Anak Diyus, may puruyba yi sa kay tagipusuun. Ti tawu nu unman magsarig sa Diyus, pagbangdanan di ngap niya ti Diyus pudilun. Dahil pagpahimudilun niya kay pagsabihun Diyus tungkul sa kay Anak. 11 Inda yi ngani ti pagsabihun Diyus magkun, ipinakaun niya sa kanta ti tutuu pag buhi unman may katapusan. Kay Anak Diyus ti gimpuunan tutuu pag buhi. 12 Ti tawu nu inulianan Anak Diyus, may tutuu pag buhi siya unman may katapusan. Dapat nu unman inulianan Anak Diyus ti tawu unman siya may tutuu pag buhi. 13 Inda pag manga bagay kang asinurat tabug sa kanyu, sa manga nagsarig yi sa ngaran Anak Diyus hampay maalaman niyu kamu may tutuu pag buhi unman may katapusan. 14 Nakan matutum kanta naisipan sa atubangan Diyus, dahil alam nita nu kita manhagad una hintay angay sa kay kagustuhan, kita pagdungugun gid niya. 15 Nu magkaalaman nita kita kay pagdungugun niya una hintay kanta paghagadun, alam yi waydi nita sa kanta yi ti kanta hinagad sa kanya. 16 Nu may maghiling sa kay patar-ari magbuwat kasalanan unman ikamatay, idarangin niya tunda pag patar-ari bag-u pakan-an siya Diyus buhi. Inda tungkul lang sa manga magkasala unman sa ikamatay. Dahil may kasalanan diman sa ikamatay. Balaw kang pagsabihun idarangin niya ti manga mag-&buwat kasalanan sa ikamatay. 17 Ti tanan kadautan kasalanan ngani. Dapat may kasalanan unman waydi sa ikamatay. 18 Magkaalaman nita una hintay ti nianak Diyus dayu pumadayun sa kasalanan, dahil pag-ingatan siya Anak Diyus ag dayu makagaraw sa kanya ti May Puun Kadautan. 19 Magkaalaman nita kita nianak Diyus, dapat ti bilug kalibutan sakup di kapangyarihan ni Satanas. 20 Magkaalaman diman nita nagsitay ti Anak Diyus, bag-u pinakan-an niya kita intindi hampay makilala nita ti Diyus tutuu. Kita magpakiusa sa Diyus tutuu, dahil sa kanta magpakiusa sa kay Anak, sa kan Hisu-Kiristu. Inda yi gid ti Diyus tutuu, ag ti tutuu pag buhi unman may katapusan. 21 Pag-aman kamu duy pag manga tuludluan niku, sa manga diyusdiyusan.
1 Inda ti may surat imaw ti manug-asiwa sa iglisya, atag sa kay pinili Diyus pag Babayi hanggan sa kay manga anak. Lubus duy aku magbaya sa kanmu dahil sa kanta magpakiusa sa katutuuhanan ag balaw lang aku nu ud tunda ngap hanggan tanan pag manga nakakilala sa katutuuhanan. 2 Nakan katida dahil nangulian yi sa kanta ti katutuuhanan, sa kanta di gid, udyi may kaduraan hanggan waya aban. 3 Ti Diyus Ama hanggan kay Anak si Hisu-Kiristu pumakaun sa kanta kay kaayadan, kay kaawa hanggan kay kahusayan, dahil sa kay katutuuhanan hanggan pagmahal. 4 Aku lalu ngap nakabaya pagka naalaman niku kanmu manga anak kay iba kanda ugali buhi angay sa katutuuhanan, angay sa sugu kanta tinanggap ginan sa Ama. 5 Taynguna duy, aku may ipaalaala sa kanmu, bukun lang bag-u pag sugu kang asinurat sa kanyu, nu unman tunda diman pag daan sugu sa kanta yi ginan waya sa kabag-u magkun, pagmalahalan kita sa usa kag sa usa. 6 Inda yi ngani kay kahulugan kang pagsabihun pagmahal, nu kita mag-ugali angay sa manga sugu Diyus. Inda imaw diman pag sugu kanyu nadnugan ginan sa kabag-u magkun, pag-ugali kamu angay sa pagmahal. 7 Dahil ngani nangalat yi sa kalibutan ti manga magdaya, tunda pag manga tawu unman magpasnu kuntay si Hisu-Kiristu nabilug tawu. Tunda yi ngani ti mandadaya ag anti-Kiristu. 8 Pag-aman kamu hampay unman madura ti kanyu binudlayan, ag hampay lubus gid matanggap niyu kanyu pirimyu. 9 Ti tawu nu magdagdag magpasubra sa kay itinudlu ni Kiristu, balaw siya inulianan Diyus. Una si unu ti maggukud sa kay itinudlu ni Kiristu, nangulian sa kanya ti Ama hanggan ti Anak. 10 Una gid hintay ti Rumas-ug sa kanyu nu bukun inda kay pag-itudlu, danga gid niyu tanggapun siya sa kanyu balay, danga gid niyu pagbatia. 11 Dahil ungud ti tawu nu magbati sa tunda pag manugtudlu patalang, magkaminsan yi waydi sa kay daut buwat. 12 Mayamu waya mana kang sarabihun sa kanyu dapat balaw dapu kang gustu isurat sa kanyu. Magkaibug gid mana nakan aku umasan bag-u manharampangan kita sa mag-aratubangan hampay lubus yi lang kita sa kabayaan. 13 Ti manga anak nimu patar-ari babayi kay diman pinili Diyus magpaingana nu kabitay waydi kunu kawu asan.
1 Inda ti may surat ti manug-asiwa sa iglisya atag sa kanmu duy Gayu. Kawu kang gid pagmahalun dahil sa kanta magpakiusa sa katutuuhanan. 2 Gayu, kang di gid pag-idarangin kawu duy, hampay kawu sa mayad gid pag kahamtangan, ag hampay mabisug diman kam bilug, ga kang naalaman kuntay mabisug kawu sa kanmu pakiusa sa Ispiritu. 3 Nakabaya gid ungud aku pagka may rinmas-ug manga patar-ari ag nagtultul sida kawu kunu matinupadun sa katutuuhanan ag kanmu ugali angay diman sa katutuuhanan. 4 Inda duy balaw lang ga iba pag kaayadan makapasulung sa kangku nu maalaman niku kang manga tuludluan kanda ugali angay sa katutuuhanan. 5 Mahal niku pag kakilala, matinupadun gid kawu sa tanan nimu magsirbi sa manga patar-ari una unman magkakilala nimu sida. 6 Nagtultul duy sida tungkul sa kanmu pagmahal sa atubangan iglisya sitay. Mayad gid ngani nu maawatan nimu sida sa kanda maglakaw sa ikadayaw sa Diyus. 7 Linmakaw ngani sida dahil sa kanda magpasakup sa kay ngaran ni Kiristu. Unman sida nagtanggap una hintay pag awat ginan sa manga tawu unman magpasakup sa Diyus. 8 Kailangan gid kanta awatan tunda pag manga tawu hampay may kabahagi kita sa buruwatun tungkul sa katutuuhanan. 9 Nagsurat yi waydi aku sa iglisya dapat unman aku pinatingihan ni Diyutripis dahil kay gustu siya yi ti kilalan-a niyu pag magpangulu. 10 Nakan sa kang mag-asan aban ipaalaala niku kay binwat niya tanan tanan, kay manga pudil pag libak laban sa kanmi. Udwaya kang-ud tunda sa kanya. Dayi pagtanggapun niya ti manga patar-ari nu magsabang. Pag-&arahun waya niya bag-u pag-ipalwas waya niya sa iglisya ti manga may gustu magtanggap sa manga patar-ari magsabang ginan sa arayu. 11 Kawu duy danga gid huwadun nimu ti daut pag mustara, nu unman ti mayad ti huwada. Ti tawu nu magbuwat mayad, siya nianak Diyus. Ti magbuwat daut unman nakakit sa Diyus. 12 Mayad ti itinultul tanan patar-ari tungkul sa kan Dimitiryu, hanggan ti katutuuhanan magpasnu sa kay mayad pag buwat. Imaw diman kanmi magkilala sa kanya. Ag alam nimi tutuu gid ti kanmi pagsabihun. 13 Mayamu waya mana kang sarabihun sa kanmu, dapat balaw dapu kang gustu isurat tunda. 14 Magkaibug gid mana aku umasan balaw yi dugay, hampay magharampangan kita sa mag-aratubangan. 15 Pagsa kanmu ti kahusayan. Pagpaingan-un kawu duy nita manga kakilala taga atay nu kabitay kawu asan. Ipadakit waydi nimu kang kamusta sa kanta manga kakilala asan, nu kabitay waydi ti kada usa sa kanda.
1 Inda ti may surat si Hudas kay panawuhun ni Hisu-Kiristu, kay diman waydi patar-ari ni Santiyagu. Inda kang surat tabug sa kanyu duy, sa manga pagmayadun dahil sa kanyu pakiusa sa Diyus Ama. Kamu manga pinili Diyus ag kamu pag-ingatan ni Hisu-Kiristu. 2 Pagsa kanyu gid lubus kay pangaawa, kay kahusayan hanggan kay pagmahal Diyus. 3 Mahal niku pag manga patar-ari, kang gid mana gustu magsurat tag sa kanyu tungkul sa karibrihan nita tanan. Dapat ay pilit aku sumurat pumaanyu sa kanyu hampay kanyu ingatan ti katutuuhanan tungkul sa kanta pagsarig una may manga kalaban. Inda pag katutuuhanan kas-a lang ginan iinintirga sa manga napasakup sa Diyus. 4 Dahil may manga tawu napalakay sa kanyu unman sida sakup sa Diyus. Binaliktad ngap nida kay pakaun Diyus kaayadan bag-u ilinubus nida kanda buwat kalukuhan. Pagdayuun nida si Hisu-Kiristu kanta ngap Pangulu ag Panginuun. Kaybi di waya sinabi yi sa Banal Kasuratan magkun, may parusa nakahanda sa kanda. 5 Una alam yi niyu, kang waya gustu ipaalaala inda sa kanyu kuntay irinibri Panginuun ti nasyun Israil ginan sa daga Ihiptu bag-u pagka dugay pinapas di niya ti manga unman nagsarig sa kanya. 6 Isipa diman niyu tunda pag manga anghil ti naglakbang sa kanda sadili kahamtangan. Tinayakan ngap nida kanda sadili kahamtangan. Sida ginapus Diyus tunda unman magkabugtas pag tarikada pinirisu sa busul kadudulman hanggan sa udway kaudasan sintinsiya. 7 Isipa diman niyu ti banwa Suduma hanggan ti banwa Gumura ag kay manga kaarani pag banwa. Nagumun diman sida sa manga mahalay pag buwat hanggan sa kalukuhan nakan sida pinarusahan sa apuy unman may katabuhan, bilang ga usa ka paalaala sa tanan tawu. 8 Kumun diman tunda pag manga pudilun pag manga manugtudlu. Dahil sa kanda manga pinamintuhu, pirmi pag-&payagtingun ngap nida kanda sadili bilug, ipagpasipala nida ti kapangyarihan Diyus, pagmuransahun nida ti makapangyarihan pag anghil. 9 Sa kanda katpung magtalaluhan diyablu tungkul sa bangkay ni Muysis ti pangulu anghil si Migwil unman nagpanghas nagbangdan sa diyablu. Sinabi lang niya sa diyablu, "Parusahan kawu Panginuun." 10 Dapat tunda pag manga tawu magmuransa ngap sa unman nida magkasalman. Ti manga bagay kanda yi nataw-an parihu ga manga hayup unman may buut, imaw yi kanda paggamitun sa ikadamhak nida. 11 Madala gid kanda patabgan dahil naghuwad sida sa kay ugali ni Kain. Parihu sa kan Balaam sinukmahan nida ti kadautan basta may matanggap sida kuwarta. Parihu ga kan Kura, sa kanda maglaban sida midamhak aban. 12 Daka gid pag kakay-ahan niyu, pagbul-an yi halaga kamu kanda magpaminsan sa kanyu karan-an magtar-arian, dahil aranghadu sida sa magkaun. Unman sida may pag-isipun nu unman kanda lang sadili. Sida ga manga rurum pagdarahun durus dapat unman waydi may ipakaun uran. Sida ga manga puun kayu unman magburak una mana kay udas mamurak, naayit una gamut, ungud namatay yi. 13 Sida ga manga humbak sa dagat, pagbulwatun nida kanda kahalayan, ga manga talang pag pamgasan. Kanda patabgan pihu gid atag sa busul kadudulman hanggan aban. 14 Ginan sa kan Adam nagkalinahi ti manga tawu kay ikapitu si Inuk. Kaybi di waya nagpurupita diman si Inuk tungkul sa katida pag manga tawu magkun, "Malu, pagbantay kamu, rinmasa-&ug yi ti Panginuun, kaibahan ti manga linibulibu pag manga anghil Diyus, 15 hampay ti tanan manga tawu pilahun ti daut ti mayad ag hampay parusahan ti tanan unman magkilala sa Diyus, dahil sa tanan nida buwat daut ag dahil sa kanda magmuransa sa Diyus. Unman sida mag-alaala sa Diyus, unman diman magkadala sa kanya." 16 Tunda pag manga tawu maraibgun yi lang gid sa kasiyunan, manga mag-isip lunsay makuri, udyi mag-iblag kay naisipan ginan sa kay buwat daut pag kagustuhan, manga padayawdayawin, madunung magpalana magbagaw hampay mab-ul lang kanda pagkaibgan. 17 Dapat duy, mahal niku pag manga patar-ari, alalahana di niyu ti ipinurupita manga Apustul nita Panginuun Hisu-Kiristu. 18 Kaybi di waya sinabi yi nida sa kanyu magkun, "Nu sa uryan uryan aban pag panahun lumutaw ti manga palalibak, manga panawuhun ngani nida sadili daut pag kagustuhan, manga unman magkadala sa Diyus." 19 Tunda pag manga tawu imaw ti pagpun-&an arawayan, ti pag-isipun nida tagipusuun angay lang sa ugali kalibutan, unman sida inulianan Ispiritu. 20 Dapat pagpakarig-un ngap kamu duy sa kanyu lubus pagsarig sa Diyus. Pagdarangin kamu angay sa udyuk Ispiritu Banal. 21 Danga magpablag kamu sa kay pagmahal Diyus, pag-&alagad kamu sa kay pangaawa nita Panginuun Hisu-Kiristu, hampay matanggap niyu ti tutuu pag buhi unman may katapusan. 22 Kaawai duy niyu ti manga mag-alinlangan. 23 Ti iba bawia niyu ga ginan sa apuy. Ti iba kaawai diman waydi niyu, dapat ay lang pagmaaman kamu barang kamu mamaliwan waydi nida kayagtingan. Una kanda manga rutay namaliwan yi kahalayan. 24 Diyus lang ti makaingat sa kanyu hampay kamu balaw malagpak sa kasalanan. Mipaatubang diman niya kamu tabug sa kay kadayawan unman yi may daut kamu una di, nu ud lubus yi ngap sa kabayaan. 25 Siya yi lang ti Diyus kanta Manugribri sa panab-anan nita Panginuun Hisu-Kiristu. Diyus ti may kapurihan, kadayawan, kamaskihan hanggan kapangyarihan kaybi di waya ginan sa kabag-u, una taynguna una hanggan waya aban. Amin.
1 Inda pag kasuratan tungkul sa kay Ipinakakit Diyus sa kan Hisu-Kiristu. Nakan kay Ipinakakit sa kan Hisu-Kiristu hampay kay maan ipaalam sa manga suruguun Diyus ti manga bagay arani yi mangyari yi. Sinugu ni Hisus kay anghil hampay kay ipakakit inda pag manga bagay sa kay panawuhun sa kan Huwan. 2 Bag-u isinurat ni Huwan ti tanan niya nakitan tungkul sa kay sinabi Diyus hanggan tungkul sa kay ipinaalam ni Hisu- Kiristu. 3 Papaladan Diyus ti manugbasa inda pag ribru hanggan ti manga magpatingi sa inda pag ipinurupita tungkul sa manga mangyari aban lalu nu matinupadun sa inda pag isinurat. Dahil inda tanan balaw yi dugay mangyari yi. 4 Aku si Huwan ti may surat sa pitu ka iglisya sa Asya. Pagsa kanyu ti papalad hanggan ti kahusayan ginan sa Diyus. Siya ti Diyus kaybi ginan hanggan kainda hanggan waya aban. Pagsa kanyu ti papalad ginan sa pitu ka Ispiritu sa arani tukawan Diyus. 5 Pagsa kanyu diman ti papalad ginan sa kan Hisu-Kiristu, imaw ti tutuu masarigan pag manugpadakit, ti un-an nabuhi uman ginan sa kamatayan, ti Hari tanan manga hari sa babaw daga. Pagmahalun niya kita ag dahil sa kay dugu pag irinibri niya kita sa kanta manga kasalanan. 6 Binwat niya kita usa ka nasyun manga hari ag manga manug-asiwa balay Diyus hampay kita magsirbi sa Diyus, sa kay Ama ni Hisus. Pagsa kan Hisu-Kiristu ti kadayawan hanggan kapangyarihan hanggan waya aban. Amin. 7 Tandaan gid niyu, Rumas-ug yi siya padara sa rurum sitay tag. Makitan siya tanan tawu, hanggan ti nagharug sa kay habig kumakit diman sa kanya. Ti tanan nasyun sa babaw daga lumumi dahil sa kanya. Pihu gid katida ti mangyari. Amin. 8 Kay sabi Panginuun Diyus magkun, "Aku ti Alpa ag ti Umiga. Aku ti Diyus taynguna, una kaybi ag aku ti Rumas-ug aban, ti makapangyarihan sa tanan." 9 Aku si Huwan, kanyu patar-ari. Magpakiusa kita sa kan Hisus, nakan parihu kita makalakaw sa kakurian, kanta gid pagagwantahun dahil sa kanta magpasakup sa kay paghari Diyus. Tinulak aku atag sa puru Patmus sa karaw-an dagat dahil sa kang magtudlu Bagaw Diyus imaw yi ti katutuuhanan kay ipinakilala ni Hisus. 10 Ati katpung pagka sa sirang Panginuun, sinakup aku Ispiritu Banal bag-u nadnugan niku sa kang magkaday-an may matnug pag bagaw ga budyung kay kadaka. 11 Kay sabi, "Suratan nimu sa ribru ti kanmu makitan bag-u ipadara nimu inda sa pitu ka iglisya, ati sa banwa Ipisu, sa banwa Ismirna, sa banwa Tiyatira, sa banwa Sardis, sa banwa Piladilpiya hanggan sa banwa Laudisiya." 12 Nangaliwliw aku hampay bantayan niku ti magbagaw. Nakitan ngap niku may pitu ka sulu lunsay gintu. 13 May matindugan sa karaw-an pitu ka sulu kay histuda ga anyu lalaki nakalambung aba sadsad sa raprapa, may huragkus gintu sa kay dubdub. 14 Malagti kay buhuk, ga burak kay kalagti hanggan ga nibi, magduag ga apuy kay manga mata. 15 Magsinglaw kay manga lulud ga galang udyi may lakut, ipinalakaw yi sa apuy, pinakintab. Kay magbagaw ga danum magpaywas sa puru. 16 Sa kay sikun may bitbit siya pitu ka pamgasan. Magluwang sa kay bibig ti usa ka baladaw matarum baliw baliw may urup. Masilaw kay uyahun ga singgit init sa karaw-an sirang kay kasilaw. 17 Pagka nakitan niku siya, naplid aku kadaka ga namatay yi sa kay atubangan. Dapat ay kay kinup-an aku niya sikun pag kamang bag-u kay sinabi magkun, "Danga duy kawu magkadala. Aku ti gimpuunan, aku diman ti masawad. 18 Buhi aku, aku sitay namatay dapat bantayi nimu, aku buhi kainda, balaw yi aku mamatay hanggan waya aban. Sa kang yi kamang ti manga susi kamatayan hanggan ulian manga namatay. 19 Nakan ngani isurat nimu ti kanmu makitan, ti mangyari taynguna ag ti manga pihu mangyari waya aban. 20 Inda kay kahulugan ti pitu ka pamgasan sa kang kamang ag ti pitu ka sulu. Ti pitu ka pamgasan imaw ti manga anghil pitu ka iglisya ag ti pitu ka sulu gintu imaw ti pitu ka iglisya.
1 "Isurat nimu sa anghil sa iglisya sa banwa Ipisu pagkumun, inda ti magsabi imaw yi ngani ti may bitbit pitu ka pamgasan sa kay sikun pag kamang, tiglakaw sa karaw-an pitu ka sulu gintu. 2 Alam niku kanmu manga binwat kuntay balaw paghabulun nimu kanmu budlay bagkus ngap pagtiisun lang nimu. Alam diman niku pagsukuan nimu ti manga magbuwat daut. Sinuyasid diman nimu ti manga magpabalhinguuun kuntay sida manga Apustul bag-u nakitan nimu sida manga pudilun maaw. 3 Alam diman waydi niku mabinatahun kawu, nag-agwanta sa mayamu kakurian dahil sa kanmu magpasakup sa kangku ag balaw nanlubay kanmu pagsarig. 4 Dapat may pagsabihun aku laban sa kanmu, nanramig yi duy kawu sa kangku. Kanmu pagmahal udyi ga sa kabag-u. 5 Pag-isipa duy nu kabitay kay kaabwat kanmu kinalagpakan. Ampui yi nimu ti manga buwat nimu daut, baliki maan nimu kanmu mayad pag manga buwat kaybi. Nu unman kanmu tayakan kanmu buwat daut, asan tag aku, bul-un niku kanmu sulu ginan sa kay palaulian. 6 Dapat inda kang pag-ikabaya sa kanmu, pagkagalitan nimu ti ugali manga Nikulaita, imaw diman waydi kang pagkagalitan. 7 "Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu imaw ti pakan-an niku karampatan makakaun sa burak kayu kabuhian sa halamanan Diyus. 8 "Isurat nimu sa anghil sa iglisya sa banwa Ismirna pagkumun, inda ti magsabi imaw ti un-an, imaw ti masawad, imaw ti namatay, imaw maan ti nabuhi uman. 9 Alam niku ti manga subuk kanmu nalakawan. Alam niku kawu pugri, dapat nu sa ungud mayaman ngap kawu. Alam diman niku kawu pagpuyaan manga tawu magpabalhinguun kuntay sida manga Hudiyu dapat nu sa ungud sida manga sakup ngap ni Satanas. 10 Danga duy kadalaan nimu ti manga kakurian kanmu patabgan udyi dugay aban. Malu, ipapirisu diyablu ti iba sa kanyu hampay kamu kay subukan. May tiisun gid kamu sa sulud sampulu ka sirang. Pagpakarig-un duy kawu hanggan tugka sa kamatayan bag-u pakan-an niku kawu kabuhian imaw yi kang pirimyu sa kanmu nanalu. 11 "Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu dayu malakawan niya ti ikadwa pag kamatayan. 12 "Isurat nimu sa anghil sa iglisya sa banwa Pirgamu pagkumun, inda ti magsabi imaw yi ngani ti may bitbit matarum pag baladaw duwa kay urup. 13 Alam niku siyun pag mag-uli kawu sa ulian ni Satanas sa kay kaharian. Dapat marig-un di kanmu pagsarig sa kang ngaran. Balaw ipinaulam nimu kanmu pagsarig sa kangku madi minatay nida kang matinupadun pag suruguun si Antipas sa banwa nimu, sa ulian diman waydi ni Satanas. 14 Dapat may pagsabihun aku laban sa kanmu dahil may mag-akitan aku sa kanmu. Ti iba sa kanmu magsunud sa tudlu ni Balaam. Si Balaam kabay ti nagtudlu kaybi sa kan Balak hampay patalangun niya ti manga Israilita tag sa kasalanan. Nakan nagkaun ngani sida manga isinagda sa manga diyusdiyusan ag nagpanguragin sida. 15 Ti manga iba asan magsunud sa tudlu manga Nikulaita. 16 Nakan ngani ampui nimu kanmu manga kasalanan. Nu unman iampu nimu kanmu kasalanan asan tag yi aku sa kanmu balaw yi dugay bag-u lipulun niku tunda pag manga tawu, tigbasun niku baladaw magluwang ginan sa kang bibig. 17 "Ti may tuli kailangan pagpatingi sa pagsabihun Ispiritu sa manga iglisya. Ti manalu pag tawu pakan-an niku hinamnu pag karan-unun ginan sa langit. Pakan-an diman niku siya batu malagti imaw ti sinuratan bag-u niya pag ngaran. Unman may nakaalam tunda pag ngaran nu ud tunda lang waydi ti pinakan-an. 18 "Isurat nimu tabug sa anghil sa iglisya sa banwa Tiyatira pagkumun, inda ti magsabi imaw yi ngani ti Anak Diyus, imaw ti may mata magduag ga labdab apuy ag kay manga lulud marakintab ga nanisnisan pag galang. 19 Alam niku duy kanmu pagbuwatun, kanmu pagmahal, kanmu pagsarig, kanmu pagsirbi hanggan pagtiis. Alam niku kanmu buwat mayad taynguna balaw lang ga kaybi. 20 Dapat inda aku may pagsabihun laban sa kanmu, kanmu lang pinabay-anan si Hisibil, tunda ngani pag babayi tigpabalhinguun kuntay siya purupita Diyus dapat maaw unman. Magpatalang ngap siya sa kang manga panawuhun, siya ti suluhan sa panguragin, siya diman waydi ti magtaban hampay mangaun sa isinagda sa manga diyusdiyusan. 21 Pinakan-an niku siya rugar hampay iampu niya kay manga kasalanan, dapat unman may gustu siya magbag-u kay ugali sa magpanguragin. 22 Malu, bantayi nimu aban mabuntalidan siya sa kay igyaan dara hanggan kay manga kaibahan sa panguragin. Makalakaw sida aban sa mahigpit pag kakurian, nu unman iampu nida kanda maghuwad sa kan Hisibil buwat kadautan. 23 Matyun aban niku hanggan kay manga anak agud maalaman tanan manga iglisya aku lang ti makasuyasid sa tawu isip ag tagipusuun. Ti kada usa sa kanyu pakan-an niku angay sa kanyu manga binwat. 24 "Dapat may pagsabihun waya aku sa kanyu sa manga iba taga Tiyatira, sa manga unman nagsunud sa kay daut pag tudlu ni Hisibil ag unman nagdunung sa kanda pagkumnun manga madalum pag tudlu ni Satanas. Balaw yi pakan-an niku kamu ga manga mabuyat pag paras-anun. 25 Dapat ti kanyu yi tinanggap ginan sa kangku, danga yi paglimti hanggan sa udwaya Rumas-ug aku. 26 Nu manalu ti tawu ag tumupad sa kagustuhan niku hanggan tugka sa katapusan, imaw yi ti pakan-an niku karampatan parihu diman waydi sa kang tinanggap ginan sa kang Ama hampay magpamahala sa manga nasyun. Pakan-an siya aban karampatan magpamahala may bitbit pamakul baul. Runutun niya ti manga nasyun parihu sa anglit marunut. Ipakaun diman niku sa kanya ti kuramnag. 29 "Ti may tuli kailangan pagpatingi sa pagsabihun Ispiritu sa manga iglisya.
1 "Isurat nimu tag sa anghil sa iglisya sa banwa Sardis pagkumun, inda ti magsabi imaw yi ngani ti may pitu ka Ispiritu Diyus hanggan pitu ka pamgasan. Alam diman waydi niku kanmu pagbuwatun. Nu sa magbantay manga tawu kawu buhi dapat nu sa ungud kawu tigbak yi. 2 Pag-imata yi kawu, kabisug maan kanmu manga buwat mayad nasawad waya sa kanmu hampay balaw dumayun mamatay. Nakitan niku udwaya kang-ud ti manga nabuwat nimu sa atubangan niku Diyus. 3 Pag-isip-isipa gid nimu nu kabitay nimu natanggap ti kanmu nadnugan pag manga tudlu. Tupada nimu tida. Ampui yi patlikudi yi kanmu buwat kadautan. Nu unman kawu mimata, asan tag aku parihu ga mananakaw. Unman nimu alam ti udas niku pagras-ug sa kanmu. 4 "Dapat una katida, may imaw waya pira ka tawu asan sa Sardis manga maaman, malumpiyu di kanda rutay, nakan sida aban pirmi kaibahan niku may sulung rutay malagti, dahil sida ti may karampatan. 5 Ti manalu pag tawu imaw ti makasulung rutay malagti. Dayu bul-un niku kay ngaran ginan sa ribru kabuhian. Magkakilala niku siya sa atubangan niku Ama hanggan sa atubangan niya manga anghil. 6 "Ti may tuli kailangan pagpatingi sa pagsabihun Ispiritu sa manga Iglisya. 7 "Isurat nimu tag sa anghil sa iglisya sa banwa Piladilpiya pagkumun, inda ti magsabi imaw yi ngani ti banal ag masarigan, ti may bitbit susi ni Hari Dabid. Nu siya ti nagbukas unman may makasiradu. Unman waydi may makabukas nu siya ti nagsiradu. 8 Alam niku kanmu manga buwat. Binukasan niku ti usa ka sabian sa kanmu katpungan. Unman may makasiradu tunda pag sabian. Alam niku diit diit lang kanmu kaya dapat sinunud nimu kang itinudlu ag unman ipinaulam nimu kanmu pagsarig sa kangku. 9 Malu, ti manga sakup ni Satanas manga magpabalhinguun kuntay sida Hudiyu dapat bukun waydi Hudiyu, manga pudilun lang. Ti manga iba sa kanda kang ipakaun aban sa kanmu, paludhun niku sa kanmu atubangan hampay makilala nida, aku gid tigmahal sa kanmu. 10 Ingatan diman niku kawu nu Rumas-ug yi ti udas pagsubuk sa tanan manga tawu sa bilug kalibutan, dahil nag-agwanta kawu sa kanmu pagtupad sa kang bilin. 11 Rumas-ug yi aku madali, ingatan nimu ti kaayadan kanmu tinanggap hampay unman may umagaw sa kanmu pirimyu pag sangbaw. 12 Ti manalu pag tawu buwatun niku usa ka tulduk sa balay niku Diyus, dayi ayitun siya ati ginan hanggan waya aban. Iguhit niku sa kanya ti ngaran niku Diyus hanggan ti ngaran banwa niku Diyus, imaw ti bag-u Hirusalim ti dumugsun ginan sa langit, ginan sa kang Diyus. Iguhit diman niku sa kanya kang bag-u pag ngaran. 13 "Ti may tuli kailangan pagpatingi sa pagsabihun Ispiritu sa manga iglisya. 14 "Isurat nimu tag sa anghil sa iglisya sa banwa Laudisiya pagkumun, inda ti magsabi imaw yi ngani ti pag-ingarnan si Amin, imaw ti tutuu masarigan pag manugpadakit. Siya ti gimpuunan tanan linalang Diyus. 15 Alam niku kanmu manga pagbuwatun. Alam niku unman kawu maramig, unman diman mainit. Mahal mana nu kawu maramig una mainit. 16 Dapat kawu maalinabnab, kang yi isuka kawu, dahil unman kawu mainit, unman diman waydi kawu maramig. 17 Pagsabihun nimu kuntay kawu mayaman, unman may kurang, may kang-ud kawu sa tanan bagay. Dapat unman nimu alam anung anung kaawaawa kawu masyadu, kapugrihan yi, ga lilus yi ag buta waya kawu. 18 Nakan ngani kang pagsabihun sa kanmu, pagbili kawu sa kangku lunsay yi pag gintu hampay kawu ungud gid yumaman. Pagbili diman waydi kawu malagti pag rutay hampay kawu may isulung, udyi kawu mangay-a sa kanmu pagkalilus. Pagbili waydi pamulung sa mata hampay kawu kumakit maan. 19 Ti kada tawu kang pagmahalun kang waydi pagtamyawun hanggan pagpariganan. Nakan ngani pagmasipag kawu, ampui yi patlikudi yi kanmu kasalanan. 20 Pagbantay kawu, matindugan aku sa dayu sabian, magtaragham. Nu may makadnug sa kang bagaw bag-u nu bukasan niya ti talakup sabian, aku sumaka. Bag-u sumaru aku sa kanya ag sumaru waydi siya sa kangku. 21 Ti manalu pag tawu imaw ti makatukaw sa kang arani minsan sa kang karampatan maghari parihu diman waydi sa kangku. Dahil aku nanalu nakan matukawan aku kainda sa arani niku Ama minsan sa kay karampatan maghari. 22 "Ti may tuli kailangan pagpatingi sa pagsabihun Ispiritu sa manga iglisya."
1 Bag-u tuhay maan kay Ipinakakit Diyus sa kangku. Nakitan niku sa langit ti usa ka sabian mabukasan. Nadnugan maan niku ti matnug pag bagaw ga budyung kay kadaka kay tunug magkun, "Pag-atay tag kawu sa tungud hampay kang ipakakit sa kanmu ti manga bagay mangyari aban." 2 Kadaka nasakup aku Ispiritu Banal bag-u nakitan niku sa langit ti usa ka tukawan Hari ag nakitan diman niku may matukawan siyun. 3 Kay uyahun masilaw ga mahalaga pag batu, ga haspi ag kurnalina. Sa kay sangput tukawan Hari may usa ka balangaw malatuy ga batu ismiralda. 4 Sa kay sangput diman tukawan Hari pag nakitan niku ti duwapulu may upat ka tukawan hari. May duwapulu may upat ka gurangun ti matukawan siyun. May manga sulung sida malagti pag rutay ag pinasangbawan gintu pag manga sangbaw ipinirimyu sa kanda. 5 Ginan sa tukawan Hari magluwang ti kilat, manga ugung hanggan manga linti maglitik. Sa atubangan tukawan Hari may pitu ka sulu magduag. Inda imaw ti pitu ka Ispiritu Diyus. 6 Sa atubangan tukawan Hari may ga dagat, kay histuda ga bubug pag salamin kay pagkasnag. Sa karaw-an tukawan Hari hanggan sa kay sangput may upat ka linalang may buhi, pudu mata sa kay sarangwan hanggan sa kay dayu. 7 Parihu ga liyun kay histuda ti usa bag-u kay ikadwa ga baka bag-u kay ikatlu ga tawu kay uyahun bag-u kay ikap-at maglayang parihu sa manawul. 8 Tigtigun-um sida ka pakpak ti upat ka linalang may buhi, lipus mata sa sulud hanggan sa luwas. Unman may apas sida magkanta yabi sirang magkun, "Banal, banal, banal ti Panginuun Diyus makamaskihan sa tanan. Ti Diyus kaybi ginan hanggan taynguna hanggan waya aban." 9 Katunda ngani ti upat ka linalang may buhi kanda magdayaw, maggalang hanggan magpasalamat sa Hari magtukaw sa tukawan, imaw ti may buhi unman may katapusan. 10 Sa kanda katpung magdayaw ti duwapulu may upat ka gurangun napadapa sa atubangan tukawan Hari kanda pagsambahun ti matukawan siyun, ti may buhi unman may katapusan. Pag-ibugtang nida sa atubangan tukawan Hari kanda manga sangbaw ti ipinirimyu sa kanda magkun, 11 "Panginuun, kawu kanmi Diyus, kawu ti dapat makatanggap kadayawan, paggalang hanggan kamaskihan. Dahil kawu ti naglalang sa tanan manga bagay, ag angay diman sa kanmu kagustuhan kawu ti nagkarubut sa tanan nimu linalang."
1 Bag-u may nakitan aku sa sikun pag kamang Hari sa kay tukawan ti usa ka kasuratan malulunan may surat sa sulud hanggan sa luwas, siniradu pitu ka kula. 2 Nakitan niku ti usa ka mamaski pag anghil nagpahayag siya daraka pag bagaw magkun, "Hintay ti may karampatan magbuul kay kula bag-u magbukas kasuratan?" 3 Una hintay pag tawu sa langit una sa babaw daga una sa sirung daga unman may makabukas kasuratan, unman waydi may makaduaw kay sulud. 4 Aku naglumi gid masyadu, dahil unman may nakitan tawu may karampatan magbukas kasuratan ag magduaw kay sulud. 5 Bag-u nagsabi ti usa sa manga gurangun sa kangku magkun, "Danga duy maglumi. Ti Liyun sa lahi ni Huda, ti mamaski pag linahi ni Dabid imaw ti nanalu nakan siya ti makabukas kasuratan ag makabuul kay pitu ka kula." 6 Bag-u may nakitan aku usa ka Anak Karanidu sa karaw-an tukawan Hari, sa kay sangput ti upat ka linalang may buhi hanggan ti manga gurangun. Ti Anak Karanidu ga anyu minatay. May pitu ka sungay siya may pitu waydi ka mata, imaw ti pitu ka Ispritu Diyus kay sinugu tag sa bilug kalibutan. 7 Nagpakarani ti Anak Karanidu bag-u kay ginamit ti kasuratan malulunan ginan sa sikun pag kamang Hari sa kay tukawan. 8 Pagka kay bin-ul, napadapa sa atubangan Anak Karanidu ti upat ka linalang may buhi hanggan ti duwapulu may upat ka gurangun. Ayaw ayaw sida may bitbit gitara ag may pinggan gintu malukung punu kamangyan, imaw ti manga darangin manga tawu napasakup sa Diyus. 9 Nagkanta sida inda pag bag-u kanta magkun, "Kawu ti may karampatan magbuul sa kasuratan malulunan ag magbukas kay manga kula, dahil kawu ti minatay ag dahil sa kanmu dugu may linukat kawu manga tawu ginan sa kada linahi, pamagaw, banwa ag nasyun hampay sida manga sakup yi Diyus. 10 Binwat nimu sida usa ka linahi hari, ag manga manug-asiwa magsirbi sa balay nita Diyus. Sida humari sa babaw daga." 11 Nagbantay maan aku bag-u nadnugan niku ti bagaw linibulibu kagadhan anghil matindugan sa sangput tukawan Hari hanggan upat ka linalang may buhi hanggan manga gurangun. 12 Magkarantahan ti manga anghil magkun, "Ti Anak Karanidu ti minatay, nakan siya ti may karampatan makatanggap kamaskihan, kayamanan, kadunungan hanggan kabisugan, paggalang, kadayawan hanggan kapurihan." 13 Nadnugan niku magkarantahan ti tanan manga linalang una sa langit una sa babaw daga una sa sirung daga hanggan sa dagat, tanan tanan manga linalang sa bilug kalibutan magkun. "Sa Hari nakatukaw sa kay tukawan hanggan sa Anak Karanidu, sa kanda yi ti kapurihan, ti paggalang, ti kadayawan hanggan kapangyarihan hanggan waya aban." 14 Ti upat ka linalang may buhi nagbagaw magkun, "Amin." Napadapa ti manga gurangun nagsamba.
1 Bag-u nakitan niku binukasan yi Anak Karanidu ti usa ka kula, bag-u nadnugan niku ti usa sa upat ka linalang may buhi nagbagaw ga linti kay kadaka kay tunug magkun, "Abala kawu." 2 Pagka namantay aku may nakitan aku usa ka kabayu malagti. Ti masakyan siti may bitbit bayi. Pinirimyuhan siya sangbaw sa kay nanalu. Nag-atag siya hampay magparargu siya sa kay magpanalu. 3 Bag-u binukasan yi maan Anak Karanidu kay ikadwa pag kula. Bag-u nadnugan niku ti sinabi ikadwa pag linalang may buhi magkun, "Abala kawu." 4 Usa maan ka kabayu marara ti linmuwang. Ti nakasakay siyun pinakan-an kamaskihan hampay kay duraun ti kahusayan ginan sa babaw daga agud manmaratyan ti manga tawu. Pinakan-an siya daka pag baladaw. 5 Binukasan maan Anak Karanidu kay ikatlu pag kula. Bag-u nadnugan niku ti sinabi ikatlu pag linalang may buhi magkun, "Abala kawu." Usa maan ka kabayu mabiru kang nakitan. May bitbit kiluhan ti masakyan siti. 6 May nadnugan aku bilang may magbagaw ginan sa karaw-an upat ka linalang may buhi magkun, "Ti tarabahu usa ka sirang kay suhul kang-ud lang ibili sa usa ka pulak tirigu. Ti tarabahu usa ka sirang kay suhul kang-ud lang ibili sa tulu ka pulak sibada. Dapat danga pagdauta ti lana ulibu una hanggan ti alak." 7 Binukasan Anak Karanidu ti ikap-at pag kula bag-u nadnugan niku ti sinabi ikap-at pag linalang may buhi magkun, "Abala kawu." 8 May nakitan aku maan usa ka kabayu madapug kay bulbul. Kay ngaran ti masakyan siti Kamatayan. Ti ulian manga karadwa magdasun sa kay uryan. Pinakan-an kamaskihan ti ulian manga karadwa hanggan ti kamatayan hampay matyun nida ti ikap-at pag bahagi manga tawu sa babaw daga, matyun nida sa baladaw, sa lun-us, sa sakit hanggan sa maraisug pag manga hayup. 9 Binukasan maan Anak Karanidu ti ikalima pag kula bag-u nakitan niku ti surunugan manga pag-isagda sa Panginuun. Sa kay sirung surunugan nakitan niku ti manga karadwa manga tawu minatay dahil sa Bagaw Diyus ag dahil sida matinupadun sa kanda magpadakit. 10 Magpamurus sida sa tawag magkun, "Panginuun, kawu ti makamaskihan, ti banal hanggan ti masarigan. Kabitay waya kadugay kami pag mag-alagad. Kapira waya pag sintinsiyahan nimu sa kaparusahan ti manga tawu mag-uli sa babaw daga dahil sa kanda nagmatay sa kanmi." 11 Pinakan-an sida rutay malagti ti kada usa sa kanda. Bag-u sinabihan sida pag-alagadlagad waya diit pag udas hanggan sa udwaya mahustu ti bilang nida manga patar-ari hanggan manga kaibahan magsirbi sa kan Kiristu matyun diman parihu waydi ga kanda. 12 Nakitan niku binukasan yi maan Anak Karanidu ti ikanum pag kula. Bag-u naglinug mabisug, nagdulum yi ti init ga rutay mabiru, nagbaliw ga dugu kay karara ti bulan. 13 Nangalagpak ginan sa langit ti manga pamgasan parihu sa magkarabak bukul igus nu paghampakun bagyu kay puun. 14 Nadura yi ti langit parihu sa kasuratan linulun. Nadura ginan sa kay nagkabugtangan ti tanan manga bantud hanggan manga puru sa dagat. 15 Ti manga hari sa babaw daga hanggan ti manga may kangaranan, ti manga pinunu sundalu, ti manga mayaman, ti manga may kamaskihan hanggan ti tanan manga panawuhun una manga balaw panawuhun, sida tanan tanan napatagu sa manga lukib ag sa manga salipitan batu sa bantud. 16 Magkun sida tabug sa manga bantud hanggan manga batu, "Tabuni yi niyu kami hampay unman makitan nimi ti uyahun Hari nakatukaw sa kay tukawan ag hampay unman madnugan nimi ti pangagalit Anak Karanidu. 17 Dahil nagras-ug yi ti madala gid pag kaudasan, pinahinukdan yi kanda galit. Hintay waya ti umabanti?"
1 Tunda ginan may nakitan maan aku upat ka anghil. Sida upat nagtimbangan sa bilug kalibutan. Inampara nida ti upat ka puun durus hampay unman dapu humuyup sa daga, sa dagat una hanggan sa naan pag puun kayu. 2 Bag-u nakitan niku ti usa waya ka anghil nag-atag tungud baliwa sa butlakan init, may bitbit siya pananda ginan sa Diyus buhi. Nagbagaw siya daka sa upat ka anghil sa pinakan-an Diyus kapangyarihan mandaut sa daga hanggan sa dagat magkun, 3 "Danga niyu dapu pagdauta ti daga hanggan dagat una ti manga puun kayu hanggan sa udwaya matandaan ti manga panawuhun nita Diyus sa kanda bangas." 4 May nagtultul sa kangku nu kabitay kay kayamu ti manga tarandaan. Usa ka gatus may upatpulu may upat ka libu tawu ginan sa tanan linahi Israil ti tarandaan. 5 Sa kada linahi Israil sampulu may duwa ka libu ti tarandaan, sa linahi ni Huda, sa linahi ni Rubin, sa linahi ni Gad, 6 sa linahi ni Asir, sa linahi ni Niptali, sa linahi ni Manasis, 7 sa linahi ni Simyun, sa linahi ni Libi, sa linahi ni Isakar, 8 sa linahi ni Sabulun, sa linahi ni Husi hanggan sa linahi ni Binhamin. 9 Bag-u nakitan maan niku ti kayamuyamuan kagadhan tawu dayi matabu mabilang una waya sitapu pag tawu. Sida ginan sa kada nasyun, sa kada linahi, sa kada histuda tawu, sa tanan kalasi pamagaw. Matindugan sida sa atubangan tukawan Hari hanggan Anak Karanidu. Nakarutay sida manga malagti may bitbit sida panwasawas. 10 Durunganan sida nagbagaw daka magkun, "Ti gimpuunan kaliktasan ginan sa kanta Diyus sa nakatukaw sa tukawan Hari hanggan ginan sa Anak Karanidu." 11 Nagtinindug ti tanan manga anghil manga nakatindug sa kay sangput tukawan Hari, manga gurangun hanggan upat ka linalang may buhi. Napadapa sida sa atubangan Hari, nagsamba sida sa Diyus. 12 Magkun sida, "Amin, sa kanta Diyus ti kapurihan, ti kadayawan, ti kadunungan, ti pasalamat, ti paggalang, ti kamaskihan, ti kabisugan hanggan waya aban. Amin." 13 Pinaingana aku usa ka gurangun ati sa arani tukawan Hari magkun, "Si unu tunda pag manga tawu ti may rutay malagti, naan ginan nguna sida?" 14 Kang sagut magkun, "Tau duy, kawu ngap ti katanda." Sinabi niya sa kangku magkun, "Sida ti nakalapus sa mahigpit pag unuunu, linumpiyu nida kanda rutay linagti sa dugu Anak Karanidu. 15 Nakan ngani sida sa atubangan tukawan Diyus ag magsirbi sa kanya sirang yabi sa kay balay. Ti nakatukaw sa tukawan Hari tig-ukub sa kanda hampay udyi may mangyari sa kanda. 16 Balaw yi sida lunusun, unman yi uwawun. Balaw yi sida mainitan, balaw yi sida ga magkapalian init. 17 Dahil ti Anak Karanidu sa karaw-an tukawan Hari tig-alaga sa kanda. Sida ibahan niya sa manga bulbugan gimpuunan buhi. Payidan Diyus kanda luwa sa kanda manga mata."
1 Pagka binukasan Anak Karanidu ti ikapitu pag kula, lubus yi nap-ut ti tanan ingay sa langit manga tunga sa udas kay kadugay. 2 Bag-u nakitan niku may pitu ka anghil matindugan sa atubangan Diyus, pinakan-an sida budyung ayaw ayaw. Usa waya ka anghil ti nagluwang may dara gintu pag sukadan kamangyan. Nagtuhung siya sa arani gintu pag turuuban kamangyan. Pinakan-an siya mayamu pag kamangyan hampay tuubun sa gintu pag turuuban sa atubangan tukawan Hari, dungan ti darangin manga tawu napasakup sa Diyus. 4 Bag-u ginan sa kamang anghil nagtalimbuuk sa atubangan Diyus ti anus kamangyan dungan sa darangin manga tawu napasakup sa Diyus. 5 Bag-u nagbuul ti anghil manga baga ginan sa turuuban, isinukad niya sa sukadan kamangyan bag-u kay ayinmut tag sa babaw daga. Bigla naglinti nanlilitikan, inmingay, kinmilat bag-u linminug. 6 Nag-alistu ti pitu ka anghil hampay uypun kanda manga budyung. 7 Pagka inyup usa ka anghil kay budyung, nag-uran yilu hanggan apuy may lakut dugu. Nairub kay ikatlu pag parti daga, tapil ti ikatlu pag parti manga puun kayu hanggan ti tanan ilamnun malangba nairub. 8 Pagka inyup ikadwa pag anghil kay budyung nidugsak sa dagat ti ga bantud laun malabdaban. Nagbaliw yi dugu kay ikatlu pag parti dagat. 9 Tigbak yi ti ikatlu pag parti manga linalang sa dagat, nadaut waydi ti ikatlu pag parti manga sakayan sa dagat. 10 Pagka inyup ikatlu pag anghil kay budyung, nalagpak ginan sa langit ti daka pag pamgasan, maglabdab parihu sa sulu, nalagpak sa ikatlu pag parti manga sapa hanggan bulbugan. 11 Inda pag pamgasan kay ngaran Kapaitan. Nagpait yi ti ikatlu pag parti danum. Mayamu pag tawu ti namatay pagka nakainum siti pag danum. 12 Pagka inyup ikap-at pag anghil kay budyung, nadaut ti ikatlu pag parti init, bulan hanggan manga pamgasan, nakan ti ikatlu pag parti nida karayawan madlum yi. Nakan nagdulum yi ngani ti ikatlu pag parti sirang, unman waydi may rinmayaw sa ikatlu pag parti yabi. 13 Bag-u nakitan niku ti usa ka manawul maglayang sa tungud. Nadnugan niku siya nagbagaw daka magkun, "Masyadu yi lang madala ti malakawan tanan tawu magkabuhi sa babaw daga sa tunug manga budyung nu uypun tulu waya ka anghil."
1 Pagka inyup ikalima pag anghil kay budyung, nakitan niku ti usa ka pamgasan nalagpak sa daga. Ipinakaun sa kanya ti susi pamukas sa kaabasadbasadan. 2 Binukasan pamgasan ti kaabasadbasadan bag-u linmuwang ti anus nangagiw parihu ga sa tumpuk daka kay nanganus, nakan nagdulum ti init hanggan ti panungaan langit daga. 3 Naglinuwang ginan sa maanus ti manga apan nanlingatag sa daga. Pinakan-an sida kamaskihan parihu sa alutatip sitay sa babaw daga. 4 Ibinilin sa kanda danga pagdauta ti manga ilamnun, ti manga puun kayu una ti manga tanum. Tunda lang pag manga tawu ti unman may tanda Diyus sa kay bangas ti kanda pakurian. 5 Balaw pinayagan ti manga apan kuntay matya tunda pag manga tawu nu unman pakurian lang nida sulud lima ka bulan. Bilang ga kagat alutatip kay kasakit kay mag-asaydan manga tawu. 6 Sa sulud tunda pag lima ka bulan magpatigagad yi ti manga tawu sa kamatayan, dapat unman diman sida magkamatay. Gustu gid mana sida mamatay, dapat arayu waya ngap sida sa kamatayan. 7 Ti manga apan kay histuda parihu sa manga kabayu alistu pan-gira. Sida ga pinasangbawan gintu, parihu ga tawu kanda uyahun. 8 Ga buhuk babayi kanda bungut, parihu ga liyun kanda ngipun. 9 May takip kanda dubdub bilang yi baul pag panangga. Kay hagbur nida manga pakpak ga kabayu ga manga kalisa magkararadkadan mag-apura tag sa girahan. 10 Kanda ikug may kagat ga alutatip. Sa ikug nida ti kamaskihan panakit sa manga tawu sulud lima ka bulan. 11 Ti anghil tigbantay sa kaabadbasadan imaw kanda hari. Sa bagaw Hibriyu kay ngaran si Abadun, nu sa Giriyigu kay ngaran Apulyun, kay kahulugan pag ngaran manugdaut. 12 Nakalawuy yi ti usa ka kahigpitan, duwa waya ti patabgan. 13 Pagka inyup ikan-um pag anghil kay budyung, nadnugan niku may magbagaw ginan sa manga suuk gintu pag turuuban kamangyan sa atubangan Diyus. 14 Magkun siya sa ikan-um pag anghil may budyung, "Palpasi yi nimu ti upat ka anghil magapusan sa pangpang daka pag sapa Upratis." 15 Pinalpasan yi ngani ti upat ka anghil agud matyun ti ikatlu pag parti manga tawu. Daan yi itinigana tunda pag upat ka anghil para ati katpung pag kaudasan aban una kay sirang, una kay bulan, una kay timpu. 16 May nagtultul sa kangku nu kabitay kay kayamu ti kagadhan masakyan sa manga kabayu, duwa ka gatus ka milyun. 17 Ipinakakit sa kangku nakan kang nakitan ti manga kabayu hanggan kay manga sakay may manga panangga marara ga apuy, malatuy ga batu sapiru, ag madilaw ga asupri. Ti ulu manga kabayu ga manga liyun. Ginan sa kay basad sulang pag linmuwang ti apuy, ti anus hanggan asupri. 18 Tunda pag tulu ka kakurian ti mumatay sa ikatlu pag parti manga tawu. Ti apuy ngani hanggan anus hanggan asupri magluwang ginan sa kanda basad sulang. 19 Ti kamaskihan manga kabayu ginan sa kay sulang hanggan sa kay ikug. Dahil kanda manga ikug parihu ga ulay may ulu imaw kanda paggamitun panakit. 20 Ti nasawad pag manga tawu, tunda manga unman namatay sa siyun pag manga kahigpitan unman nida ainampu kanda kasalanan. Unman kanda tinayakan, unman waydi inapasan nida kanda pagsamba sa manga labang hanggan sa manga diyusdiyusan, sa binwat lang nida manga kamang, manga tawutawu gintu, pilak, galang, batu hanggan kayu, unman waydi makahiling, unman makadungug, unman diman makalakaw. 21 Unman ainampu nida kanda binwat kasalanan sa kanda manga maglibun, sa kanda magdaya, sa kanda magpanguragin hanggan sa kanda magtakaw.
1 Bag-u nakitan maan niku ti usa ka makamaskihan pag anghil nagpakababa ginan sa langit. Nasaput siya rurum may balangaw sa kay tungud ulu. Kay uyahun ga singgit init kay kasilaw. Kay lulud ga labdab apuy ka karara. 2 May bitbit siya ribru diit mabukladan. Itinata niya kay sikun pag lulud sa babaw danum dagat, kay wala sa daga. 3 Nanawag siya daka, kay tawag ga ungal liyun kay kadaka. Pagka siya nanawag daka nagbagaw ti pitu ka kurarug linti. 4 Pagka nagbagaw ti pitu ka linti sumurat yi mana aku, dapat may nasaydan aku usa ka magbagaw ginan sa langit magkun, "Danga nimu alamana ti sinabi pitu ka linti, danga isurat tunda." 5 Nakitan ngani niku tunda pag anghil matat-an sa babaw danum dagat kay baliw lulud sa daga, pinaabwat niya kay sikun baliwa pag kamang, 6 bag-u nanumpa siya hinangbit niya ti ngaran Diyus buhi hanggan waya aban, imaw ti naglalang langit, daga, dagat hanggan tanan tanan apinauli siyun. Magkun ti anghil, "Balaw yi dumugay aban. 7 Nu inyup yi ikapitu pag anghil kay budyung bag-u tunda pag udwaya ipinaburayhaw Diyus pag gayak pihu tupadun yi ga kay diman ipinakilala sa kay manga suruguun, sa manga purupita." 8 Bag-u naghampang maan sa kangku ti nagbagaw kis-ab sa kangku ginan sa langit, magkun siya, "Pagpakarani kawu duy sa anghil matat-an sa babaw danum dagat, kay baliw lulud sa daga, bag-u bul-a nimu kay bitbit ribru mabukladan." 9 Nakan dinulud ngani niku ti anghil bag-u hinagad niku ti ribru. Magkun siya sa kangku, "Bul-a nimu inda kan-a, mapait inda sa kanmu suruksurukan, dapat sa sulang nimu parihu ga daykut kay katagsing." 10 Ginamit niku ti diit pag ribru bag-u kang kinaun. Matagsing ngani parihu yi gid sa daykut putyukan. Dapat pagka tinlun niku mapait yi ngap sa kang suruksurukan. 11 Bag-u sinabi anghil sa kangku magkun, "Kailangan kawu magpurupita maan tungkul sa mayamu pag manga tawu, manga nasyun, manga pamagaw hanggan manga hari."
1 Bag-u ipinakaun anghil sa kangku ti usa ka panukat pag bitlag. Sinabi niya sa kangku magkun, "Pagtindug yi kawu sukata yi nimu ti balay Diyus hanggan ti surunugan manga pagisagda sa Panginuun. Bilanga diman nimu ti manga magsimba ati. 2 Dapat danga dap nimu pagsukata kay manga parasyaran sa luwas balay Diyus, dahil ipinahintulut tunda sa manga tawu unman magpasakup sa Diyus. Sulud upatpulu may duwa ka bulan kanda aban yadakyadakan lulud ti banal pag banwa. 3 Dapat suguun niku ti duwa ka manugpadakit nakasulung rutay pustal. Bag-u itudlu nida ti Bagaw Diyus sa sulud usa ka libu may duwa ka gatus may unumpulu ka sirang kay kadugay." 4 Tunda pag manga manugpadakit imaw yi ti duwa ka puun kayu ulibu, ag imaw diman hanggan ti duwa ka sulu matindugan sa atubangan Panginuun, sa may apu bilug kalibutan. 5 Nu may pumanghas umunuunu sa duwa ka manugpadakit, lumuwang sa kanda sulang ginan ti apuy imaw ti umirub sa kanda manga kalaban. Nu may magkaibug mag-unuunu sa tunda pag manga manugpadakit pihu siya matyun apuy ginan sa kanda sulang. 6 May karampatan sida pumigil sa langit hampay udyi umuran sa kaudasan nida magpurupita. May karampatan diman sida baliwun dugu ti danum ag hampay magpadara una hintay pag kahigpitan tag sa babaw daga una lang kapira kanda gustu. 7 Dapat nu nakatapus sida nakapadakit yi Bagaw Diyus, lumuwang ti Hayup Malangas ginan sa kaabasadbasadan bag-u lumaban siya sa kanda kay taluhun ag matyun. 8 Kanda bangkay mahuprasayan sa karsada mahalaga pag banwa kay ngaran magkabaliwan-an ga Suduma hanggan Ihiptu. Ati diman pag ipinaku sa kurus kanda Panginuun. 9 Sa sulud tulu ka sirang may tunga kanda bangkay panuudan manga tawu ginan sa kada kalasi tawu, sa kada linahi, sa tanan histuda pamagaw, sa kada nasyun tawu. Unman sida pumasnu kuntay ilubung ti manga bangkay. 10 Nu mamatay aban tunda pag duwa ka manugpadakit bumaya ti tanan manga tawu sa kalibutan. May pistahan sida, bag-u mamarakan-an waya dahil tigbak yi tunda pag duwa ka purupita ti namakaun subra pag kakurian sa kanda. 11 Pagka nakalawuy tulu ka sirang may tunga, binuhi maan sida Diyus, tinmindug. Balaw basta pag kulba ti manga nakakit. 12 Bag-u may nadnugan ti duwa ka purupita may binmagaw ginan sa langit magkun, "Pagsitay tag duy kamu sa langit." Hanggan pagbantayan waya sida nida manga kalaban, ati yi tag sida sa langit dinara rurum. 13 Ati katpung pag udas naglinug masyadu gid mabisug. Nawasak ti ikasampulu pag parti banwa, pitu ka libu tawu ti namatay sa linug. Ti nasawad pag manga tawu nadala yi masyadu, dinayaw nida ti Diyus sa langit. 14 Nangyari yi kay ikadwa pag kahigpitan, una kay ikatlu hanggan mangyari diman waydi udyi dumugay aban. 15 Pagka inyup ikapitu pag anghil kay budyung, may manga namaragawan daraka ginan sa langit magkun, "Kanta Panginuun hanggan ti pinili Diyus Manugribri pag Hari nag-aku yi lubus sa paghari sa bilug kalibutan. Humari siya hanggan waya aban." 16 Ti duwapulu may upat ka gurangun matukawan sa kanda manga turukawan sa atubangan napadapa nagsamba sa Diyus, 17 magkun, "Panginuun Diyus makamaskihan sa tanan, kawu ti Diyus kainda, una kaybi ginan. Magpasalamat kami dahil ginamit nimu kanmu kamaskihan unman may katapusan. Kawu naghari yi taynguna. 18 Magkagalit ti manga unman magpasakup sa Diyus, dahil nagras-ug yi ti kaudasan nimu pangagalit. Pihuun yi nimu ti manga namatay nu daut nu mayad. Kanmu diman kaudasan pamakaun pirimyu sa manga suruguun nimu, sa manga purupita. Pakan-an diman nimu pirimyu ti manga napasakup sa kanmu hanggan ti tanan maggalang sa kanmu ngaran, una mayaman una pugri. Udas yi hampay dautun nimu tunda manga nagpakaun kakurian sa kalibutan." 19 Bag-u nabukasan yi ti balay Diyus sa langit ag nakitan ti Kaban Hugut sa Taratu Panginuun. Bag-u nagbalagit ti kilat, nangurarug ti linti, nadnugan ti manga daraka pag ingay, naglinug bag-u nag-uran yilu daraka.
1 Bag-u may nakitan maan aku usa ka makadululaw pag tanda sa langit, ti usa ka babayi kay pinagkalambung init, matindugan sa bulan. Sampulu may duwa ka pamgasan ti pinagkasangbaw sa kay ulu. 2 Arani yi siya manganak nakan nag-aris siya daka sa masyadu niya magpanamdam. 3 Bag-u may usa waya gid maan ka tanda mag-akitan sa langit, may marara pag daragun daka masyadu. Tunda pag daragun may pitu ka ulu bag-u may sampulu waya ka sungay. Kay pitu ka ulu pasay may sangbaw hari. 4 Linaptik ikug daragun ti ikatlu pag parti manga pamgasan sa langit bag-u kay ayinmut tag sa daga. Bag-u tinmuhung ti daragun sa atubangan babayi arani yi manganak hampay kay alakhakun ti lapsag nu milusad. 5 Ti babayi nanlapsag yi lalaki dapat ay may inmagaw sa lapsag bag-u dinara atag sa Diyus, sa tukawan Hari. Tunda pag lapsag ti pinili hampay mahigpit nu humari aban sa tanan nasyun. 6 Dapat ti babayi linmayas atag sa pangawakawaan sa usa ka rugar inalistu Diyus para sa kanya hampay maalagaan siya ati sa sulud usa ka libu may duwa ka gatus may unumpulu ka sirang. 7 Bag-u may gira sa langit. Ti pangulu anghil si Migwil, hanggan manga anghil naglaban sa daragun. Ti daragun hanggan kay manga kakampi pag manga anghil naglaban gid sa gira. 8 Dapat natalu ti daragun bag-u tinulak yi sida ginan sa kanda ulian sa langit. 9 Ti laun pag daragun imaw yi ti pagkumnun gurangun pag ulay, kay ngaran diyablu, imaw ti pagkumnun si Satanas, imaw tigdaya sa bilug kalibutan. Ayinmut siya atag sa daga hanggan kay manga kakampi pag manga anghil ayinmut waydi. 10 Bag-u nadnugan niku may magbagaw daka sa langit magkun, "Taynguna niburayhaw yi kay pagribri nita Diyus sa manga tawu, hanggan kay kapangyarihan hanggan kay maghari. Niburayhaw yi waydi ti karampatan niya pinili Manugribri pag Hari. Dahil ayinmut yi ginan sa langit ti manugsumbung, imaw tigpakasumbung yabi sirang sa kanta manga patar-ari sa atubangan nita Diyus. 11 Kanta manga patar-ari nanalu laban sa diyablu, dahil sa dugu Anak Karanidu, dahil diman sa kanda magpadakit sa Bagaw Diyus. Balaw sida naghinayang kanda buhi una hanggan waya tugka sa kamatayan. 12 Nakan kawu duy pag langit pagbaya, hanggan ti tanan mag-uli asan sa langit pagbaya. Dapat ay kamu pag daga hanggan dagat, mahigpit pag kakurian kanyu malakawan. Dahil masyadu pag galit ti idugsak diyablu sa kanyu. Alam yi niya nakan diit wadi kay udas ti nasawad." 13 Pagka nakitan daragun siya ayinmut sa daga, inusig niya ti babayi ti nanganak usa ka lalaki. 14 Dapat ti babayi pinakanan manga pakpak manawul daka hampay makalayang siya tabug sa pangawakawaan. Ati siya pag alagaan sa sulud tulu ka timpu may tunga arayu ginan sa ulay. 15 Nakan nagbuga ti ulay danum nagbaliw sapa hampay mianud ti babayi. 16 Dapat ti daga nangawat sa babayi, nanggil-ang ti daga bag-u natuyung ti danum kay abinuga daragun nakan naribri di ti babayi. 17 Mahigpit yi kay galit daragun sa babayi nakan pinamharingan niya kay nasawad linahi babayi hampay girahun. Imaw yi pag manga tawu ti magsunud sa kay sugu Diyus, manga balaw magbul-iw sa katutuuhanan ipinakilala ni Hisus. 18 Bag-u ti daragun nagtindug sa baybay dagat.
1 Bag-u nakitan niku ti usa ka hayup malangas magpatakas ginan sa dagat, sampulu kay sungay ag pitu kay ulu. Kada usa ka sungay may sangbaw hari, kada ulu may nakasurat ngaran manga lapastangan sa Diyus. 2 Ti hayup malangas parihu ga liyupardu pag hayup kay histuda, may manga lulud parihu ga lulud usu pag hayup. May bibig bilang ga bibig liyun. Ipinakaun daragun sa hayup malangas kay sadili pag kapangyarihan, kay pagkahari hanggan kay daka gid pag karampatan. 3 Ti usa ka ulu hayup malangas bilang ga nabiyagan, kang-ud gid ikamatay pag biyag, dapat nag-ayad di maan. Naglingut ti tanan tawu sa babaw daga sa nangyari sa hayup malangas, nakan sida nagpaniwala sa kanya. 4 Ti tanan tawu nagsamba sa daragun, dahil ipinakaun niya kay karampatan sa hayup malangas. Sinambahan nida hanggan ti hayup malangas, dinayaw nida magkun, "Hintay ti makatulad sa hayup malangas, si unu ti makalaban sa kanya?" 5 Pinahintulutan ti hayup malangas hampay magbagaw masyadu pag lapastangan laban sa Diyus ag pinakan-an siya karampatan hampay makabuwat kay buruwatun sa sulud upatpulu may duwa ka bulan. 6 Bag-u nagbagaw ngani siya manga lapastangan laban sa Diyus, laban sa ngaran Diyus, laban sa kay ulian Diyus hanggan laban sa tanan mag-uli sa langit. 7 Pinahintulutan diman siya hampay girahun taluhun ti manga napasakup sa Diyus. Pinakan-an siya karampatan mamahala sa kada linahi, sa kada kalasi tawu, sa kada pamagaw, sa kada nasyun tawu. 8 Sumamba sa kanya ti tanan tawu magkabuhi sa babaw daga, purya lang ti manga tawu kay ngaran nisurat yi sa ribru kabuhian ginan waya sa pagkalalang kalibutan. Tunda pag ribru kay apu ti Anak Karanidu imaw ti minatay. 9 Nu may tuli kamu kailangan kamu pagpatingi. 10 Una hintay pag tawu ti pagturuminuhun hampay mabihag, pihu gid siya mabihag aban. Una hintay ti pagturuminuhun hampay mamatay sa baladaw, pihu gid siya matyun baladaw aban. Nakan ngani kailangan ti manga napasakup sa Diyus pagpakarig-un kay pagsarig. 11 Bag-u nakitan niku ti usa waya ka hayup malangas nagluwang ginan sa basad daga. Duwa kay sungay parihu sa sungay anak karanidu. Dapat kay bagaw parihu sa bagaw daragun. 12 Nagsirbi siya sa usa ka hayup malangas ati diman waydi ginan pag ginamit niya ti tanan niya karampatan. Ti tanan tawu sa babaw daga pinilit niya hampay magsamba sida sa usa ka hayup malangas imaw ti may biyag kang-ud ikamatay dapat naayad di maan. 13 Makadululaw pag manga tanda ti binwat ikadwa pag hayup malangas. Ipinaluwang niya ti apuy ginan sa langit tabug sa daga sa magbantay manga tawu. 14 Dinaya niya ti tanan tawu sa babaw daga dahil sa manga tanda ipinabuwat sa kanya sa atubangan usa ka hayup malangas. Nagarya niya ti manga tawu hampay bumwat tawutawu ga hayup malangas, imaw ti nabiyagan baladaw dapat nag-ayad di maan. 15 Pinahintulutan ti ikadwa pag hayup malangas hampay pakanan niya arup ti tawutawu ga hayup malangas, nakan ngani magbagaw ti tawutawu. Pinakan-an kapangyarihan ti ikadwa pag hayup malangas hampay kay ipamatay ti tanan tawu dayu magsamba sa kay tawutawu ga hayup malangas. 16 Sa pilitan pinanmarkahan hayup malangas ti tanan tawu sa sikun nida kamang aw ngatay sa kanda bangas, una may kangaranan pag manga tawu, una unman may kangaranan, una manga mayaman, una manga pugri, una manga panawuhun, una manga balaw panawuhun, tanan tanan sida ipinamarka. 17 Unman mahimu magbili una magpabili nu unman tunda lang ti may marka ngaran hayup malangas aw ngatay rumiru niya ngaran. 18 Kailangan kamu pagmapininsarun sa inda pag bagay. Una sitapu ti madunung, makaintindi siya kay ibug sabihun rumiru, kay kahulugan ngani ngaran hayup malangas. Dahil inda pag rumiru kay kahulugan ngaran usa ka lalaki. Inda ngani ti rumiru, unum ka gatus unumpulu may unum.
1 Bag-u nakitan niku ati ti Anak Karanidu nakatindug sa bantud Siun. Kaibahan niya ti usa ka gatus may upatpulu may upat ka libu ka tawu. Nakasurat sa kanda manga bangas ti ngaran Anak Karanidu hanggan ti ngaran niya Ama. 2 Nadnugan niku may mag-ingay ginan sa langit kay tunug ga danum magpaywas sa puru, ga magranranug linti. Ti kang nadnugan ga magtimpara manga manuggitara. 3 Magkanta sida usa ka bag-u pag kanta sa atubangan tukawan Hari hanggan upat ka linalang may buhi hanggan sa atubangan duwapulu may upat ka gurangun. Unman may makatau sa tunda pag kanta nu ud tunda lang pag usa ka gatus may upatpulu may upat ka libu ka tawu manga linukat ginan sa babaw daga. 4 Inda ti manga lalaki unman niamut sa manga babayi, unman sida nag-asawa. Magkuyug sida sa Anak Karanidu una naan tag siya. Linukat sida ginan sa tanan linahi tawu bilang ga un-an pakaun sa Diyus ag sa Anak Karanidu. 5 Unman sida nagpudil kaybi ginan una di, unman may ikasabi tungkul sa kanda. 6 Nakitan maan niku ti usa ka anghil maglayang sa tungud may dara siya unman may katapusan pag Mayad pag Barita hampay ipadakit niya sa manga tawu mag-uli sa babaw daga, sa kada nasyun, sa kada linahi, sa kada pamagaw hanggan sa kada kalasi tawu. 7 Nagbagaw ti anghil daka magkun, "Pagkadala kamu sa Diyus, dayawun niyu kay kamaskihan. Dahil rinmas-ug yi kay kaudasan hampay pilahun niya ti manga matadlung sa manga unman matadlung. Sambahan niyu ti Diyus ti nagbuwat langit, daga ag dagat hanggan bulbugan danum." 8 Nagdasun sa kanya ti ikadwa pag anghil magkun, "Nawasak yi, nawasak yi ti makamaskihan pag banwa Babilun. Pinakan-an niya maisug pag alak ti tanan nasyun tawu, pinilit pinalangu niya sida sa panguragin niya." 9 Nagdasun sa duwa ka anghil ti ikatlu maan nagbagaw daka magkun, "Una sitapu ti magsamba sa hayup malangas ag sa kay tawutawu una magtanggap marka sa kay kamang una bangas, 10 uminum siya alak lunsay galit Diyus, ayinungyung atag sa ungut sa kay pangaisug. Pakurian sida sa apuy ag asupri sa atubangan manga anghil Diyus hanggan sa atubangan Anak Karanidu. 11 Ti apuy magpakuri sa kanda, magtalimbuuk ti anus hanggan waya aban. Sirang yabi unman may pahari sa kakurian ti manga nagsamba sa hayup malangas ag sa kay tawutawu ag una hintay ti nagtanggap sa kay marka." 12 Nakan ngani kailangan pagpakarig-un ti manga napasakup sa Diyus, ti manga magsunud ngani sa kay sugu Diyus ag unman mag-urung sa kanda pagsarig sa kan Hisus. 13 Nadnugan niku may magbagaw ginan sa langit magkun, "Isurat nimu inda pagkumun, taynguna ginan pinapaladan Diyus ti manga namatay sa kanda pagsirbi sa Panginuun." Magkun ti Ispiritu, "Tutuu ngani, pumahari sida aban sa kanda budlay. Dahil dumasun sa kanda uryan kanda manga binwat." 14 Bag-u nagbantay aku, may nakitan aku usa ka malagti pag rurum, may matukawan sa rurum ga anyu tawu, sa kay ulu may gintu pag sangbaw imaw ti ipinirimyu sa kanya ag may bitbit siya matarum pag karit. 15 Bag-u may linmuwang usa waya ka anghil ginan sa balay Diyus. Nagbagaw siya daka tabug sa matukawan sa rurum magkun, "Bulwata yi duy kanmu karit, paggarab yi kawu dahil udas yi tig-arani. Lutu yi nakan ti aranyun sa babaw daga." 16 Ginamit matukawan sa rurum kay karit bag-u natabu niya nagarab ti aranyun sa babaw daga. 17 Bag-u may usa waya gid ka anghil linmuwang ginan sa balay Diyus sa langit, may bitbit diman waydi matarum pag karit. 18 May usa waya gid maan ka anghil nagluwang ginan sa surunugan manga pag-isagda sa Panginuun. Siya ti manug-alaga sa apuy. Nagbagaw sida daka sa anghil sa may bitbit karit matarum magkun, "Ta gamita yi kanmu karit, rapasa yi nimu ti manga ubas sa tanan manga ubasan sa babaw daga, lutu yi nakan." 19 Nakan ginamit yi ngani anghil kay karit, rinapas yi ngani niya ti manga burak ubas bag-u kay iyinmut yi ngani niya tabug sa pirisian ubas, imaw yi ngani ti mahigpit pag galit Diyus. 20 Bag-u pinisi ti manga ubas ati sa luwas banwa. Ginan sa pirisian ubas nagbaha ti dugu, tulu ka gatus may duwapulu ka kilumitru kay nagbulusan dugu, tupung sa dayu kabayu kay kaabasad.
1 Nakitan niku ti usa waya ka makadululaw ag makamaskihan pag tanda sa langit. May pitu ka anghil pasay may dara kahigpitan. Tunda yi ti pangatapusan pag kahigpitan dahil siti aban pag matabu kay pangagalit Diyus. 2 May nakitan aku ga dagat kay histuda ga bubug pag salamin kay pagkasnag. Nakitan diman niku ti manga tawu nanalu sa hayup malangas hanggan sa kay tawutawu hanggan sa rumiru niya ngaran. Ati sida pag matindugan sa arani dagat ga bubug pag salamin kay pagkasnag. May bitbit sida gitara kay ipinakaun Diyus sa kanda. 3 Bag-u kinanta nida ti kanta ni Muysis kay suruguun Diyus hanggan ti kanta Anak Karanidu magkun, "Kawu ti Panginuun Diyus ti makamaskihan sa tanan, Makapangyarihan ag makadululaw kanmu manga buwat. Kawu ti Hari manga nasyun tawu. Matadlung ag tutuu ti turunu nimu manga buwat. 4 Si unu nguna, Panginuun, ti unman magkadala sa kanmu? Si unu nguna ti dayu manultul sa kanmu kamaskihan? Kawu lang ti banal. Tanan pag manga nasyun pumakarani, sumamba sa kanmu. Dahil nakitan tanan tawu matadlung kanmu manga buwat" 5 Bag-u nakitan niku mabukasan yi ti balay Diyus sa langit, ti Balay Turda Panginuun. 6 Napalwas ginan sa balay Diyus ti pitu ka anghil pasay may dara sida manga kahigpitan. Nakasulung sida rutay malagti unman may uring ag may huragkus gintu kanda manga dubdub. 7 Ti usa sa upat ka linalang may buhi may ipinakaun sa kanda pitu ayaw ayaw usa ka pinggan malukung pasay gintu. Tunda pag manga pinggan malukung kay sukad punu pangagalit Diyus imaw ti may buhi hanggan waya aban. 8 Ti balay Diyus punu yi anus dahil sa kay kadayawan hanggan kamaskihan Diyus. Unman may makasulud sa balay Diyus hanggan sa ud makalawuy ti pitu ka kahigpitan ti dinara pitu ka anghil.
1 Nadnugan niku ti daka pag bagaw ginan sa sulud balay Diyus nagsugu sa pitu ka anghil magkun, "Pag-ati yi kamu, buhusan niyu sa daga ti pangagalit Diyus ginan sa basad pitu ka pinggan malukung." 2 Nag-ati yi ngani ti usa ka anghil, ibinuhus yi ngani niya tag sa daga kay sukad ginan sa kay bitbit niya pinggan malukung. Imaw yi ngani ti nakabiyag madala ag masakit sa manga tawu sa may marka hayup malangas ag sa manga nagsamba sa kay tawutawu. 3 Ibinuhus maan ikadwa pag anghil kay sukad ginan sa kay basad pinggan malukung tag sa dagat. Bag-u ti danum nagbaliw yi ga bilang dugu usa ka bangkay. Nagkaramatay yi ti tanan iyay sa dagat. 4 Ibinuhus yi maan ikatlu pag anghil kay sukad ginan sa pinggan malukung tag sa manga sapa hanggan sa manga bulbugan. Bag-u nagbaliw diman dugu ti danum sa sapa hanggan sa manga bulbugan. 5 Nadnugan niku ti sinabi anghil manug-alaga manga danum magkun, "Kawu ti banal, kawu ti may buhi taynguna hanggan kaybi ginan. Matadlung kawu sa binwat nimu sintinsiya. 6 Pinalanas nida ti dugu manga tawu napasakup sa kanmu hanggan ti dugu manga purupita. Taynguna pinakan-an nimu sida dugu kanda yi irinmun. Tida ti angay yi gid ngani sa kanda binwat kasalanan." 7 Nadnugan niku may nagbagaw ginan sa surunugan manga pag-isagda sa Panginuun magkun, "Panginuun Diyus, kawu ti makamaskihan sa tanan, tutuu matadlung ngani ag kang-ud kanmu pag sintinsiya." 8 Ibinuhus maan ikap-at pag anghil kay sukad ginan sa bitbit niya pinggan malukung atag sa init. Bag-u pinakan-an kamaskihan ti init hampay sunugun niya mabagsik pag init ti manga tawu. 9 Napalian ngani sida masyadu pag init, dapat sinaadan waya nida kay ngaran Diyus madi siya ngap ti may kamaskihan magpadara katunda pag manga kahigpitan. Unman nag-ampu sida sa kanda manga kasalanan ag unman diman waydi nagdayaw sida sa Diyus. 10 Ibinuhus maan ikalima pag anghil kay sukad ginan sa kay bitbit pinggan malukung tag sa tukawan hayup malangas. Nagdulum yi kay kaharian, nanakmulan ti manga tawu kanda bibig sa sakit. 11 Dapat ay sinaadan di ngap nida ti Diyus dahil sa nalakawan nida kakurian may tapil waya manga biyag. Unman gid sida nag-ampu nagtayak sa kanda buwat kadautan. 12 Ibinuhus maan ikan-um pag anghil kay sukad ginan sa kay bitbit pinggan malukung tag sa laun pag sapa Upratis. Nak-at kay danum bag-u alistu yi ti dalan para lakawan manga hari ginan sa butlakan init. 13 Bag-u nakitan niku may tulu ka bilug labang ga histuda pikaw nagluwang ti usa ginan sa sulang daragun, ti usa ginan sa sulang hayup malangas, kay usa ginan sa sulang pudilun purupita. 14 Tunda pag manga labang magbuwat manga makadululaw. Pagpalibutan nida ti tanan manga hari sa bilug kalibutan hampay kanda tipunun tabug sa gira ati katpung aban nu kaudasan yi Diyus makamaskihan sa tanan. Tunda katpung aban pag kaudasan daka gid kay kabantugan. 15 "Pagpatingi kamu, Rumas-ug aku parihu sa mananakaw. Papaladan Diyus ti tawu nu maimatahan diman ag nu unman linukasan niya kay rutay hampay unman lumakaw siya maLukasan ag dayu mangay-a siya sa kayamuan tawu." 16 Tinipun ngani manga labang ti manga hari ati sa usa ka rugar nu sa bagaw Hibriyu kay ngaran Armagidun. 17 Bag-u ibinuhus maan ikapitu pag anghil kay sukad ginan sa kay bitbit niya pinggan malukung tag sa panungaan langit daga. May nagbagaw daka ginan sa tukawan Hari ati sa balay Diyus magkun, "Tinupad yi." 18 Bag-u kinmilat, may manga ugung, linminti, naglinug masyadu. Inda ti pinakamabisug pag linug ginan sa kabag-u waya pag manga linahi tawu. Masyadu gid ungud mabisug. 19 Natlu ti daka pag banwa. Natumpag yi ti manga banwa tanan nasyun. Udyi nakaribri sa sintinsiya Diyus ti bantug pag banwa Babilun, pinainman alak, kay kahulugan kay mahigpit ngani pag galit Diyus. 20 Naparaw ti tanan manga puru sa dagat, napatag ti tanan manga bantud. 21 Ilinagpak ginan sa langit ti yilu ga manga batu kay kabuyat limampulu ka kilu ti kada usa. Nadugsakan ti manga tawu yilu daraka, nakan naglapastangan sida laban sa Diyus. Masyadu gid madala inda pag kahigpitan.
1 Bag-u sa pitu ka anghil may dara pinggan malukung, ti usa nagpakarani sa kangku kay sinabi magkun, "Abala duy, ipakakit niku sa kanmu nu kabitay sintinsiyahan sa parusa ti bantug pag babayi uragin imaw yi ti pagkumnun banwa Babilun nakasakup sa mayamu pag sapa. 2 Sa tunda pag babayi pag nagpauragin ti manga hari sa babaw daga, ga nalangu ti tanan tawu sa bilug kalibutan sa kay pinagkaalak niya, sa magpanguragin." 3 Nasakup aku Ispiritu bag-u itinibu aku usa ka anghil tag sa pangawakawaan. Nakitan niku ati ti usa ka babayi masakyan sa marara pag hayup malangas. Ti hayup malangas may pitu ka ulu, kay sungay sampulu. Sa tanan bilug niya nakasurat ti manga ngaran lapastangan laban sa Diyus. 4 Kay rutay babayi may marara may ga dukut ubi. Sarisari kay bisti may gintu, may masinay pag manga batu, may batu sa manlut. May bitbit siya usa ka pinggan malukung gintu punu yi manga kayagtingan hanggan kadautan niya panguragin. 5 Nisurat sa kay bangas ti usa ka ngaran tagu kay kahulugan magkun, "Ti bantug pag banwa Babilun, ti ina manga magpanguragin hanggan tanan kahalayan sa babaw daga." 6 Nakitan niku ti babayi ga nalangu sa dugu manga tawu napasakup sa Diyus ag sa dugu manga minatay dahil sa kanda pagsarig sa kan Hisus. Pagka nakitan niku siya, naglingut aku masyadu. 7 Pinmaingana ti anghil sa kangku magkun, "Hayga duy kawu magkadulaw? Itultul niku sa kanmu nu hintay kay kahulugan tunda pag babayi, hanggan tunda pag hayup malangas kay sarakyan may pitu ka ulu, kay sungay sampulu. 8 Ti kanmu nakitan pag hayup malangas buhi nu kaybi, kainda bay udyi dapat lumuwang maan uman ginan sa kaabasadbasadan bag-u midamhak di gid maan siya aban. Ti manga tawu magkabuhi sa babaw daga ag kanda ngaran unman nakalista sa ribru kabuhian ginan waya sa gimpuunan kalibutan, tunda pag manga tawu lumingut nu makitan nida ti hayup malangas. Dahil kaybi buhi, siyun ginan udyi siya, dapat aban lumuwang maan. 9 "Dayu maintindihan tawu inda nu unman siya mapininsarun. Ti pitu ka ulu kay ibug sabihun pitu ka tagudtud pagtukawan babayi, ipinahalimbawa diman sa pitu ka hari. 10 Kay lima nadura yi, kay usa hari waya siya, kay ikapitu udwaya rinmasug. Nu Rumas-ug siya balaw siya dumugay. 11 Ti hayup malangas buhi kaybi, dapat taynguna udyi, imaw yi ti ikawalu pag hari aban, madi minsan diman siya sa pitu. Kadamhakan kay patabgan niya aban. 12 "Ti sampulu ka sungay kanmu nakitan kay kahulugan sampulu waydi ka hari udwaya nakahari dapat humari sida aban sa sulud usa ka udas kanda karampatan minsan sa hayup malangas. 13 Usa lang kanda turunu ti sampulu ka hari ag ipasakup nida sa hayup malangas kanda kamaskihan hanggan karampatan. 14 Girahun nida ti Anak Karanidu dapat matalu diman sida dahil ti Anak Karanidu Panginuun manga panginuun, siya diman ti Hari manga hari. May kahuray aban sa kay panalu ti manga tinawag, ti manga pinili ag ti manga matinupadun pag manga magsunud sa kanya." 15 Sinabi diman anghil sa kangku magkun, "Ti manga danum kanmu nakitan tinukawan babayi uragin, imaw yi ngani ti manga nasyun manga kayamuan tawu, manga tuhay tuhay kanda pamagaw. 16 Ti sampulu ka sungay kanmu nakitan hanggan ti hayup malangas magalit aban sa bantug pag babayi uragin. Agawun nida ti tanan kasiyunan niya bag-u Lukasun nida kay rutay. Kan-un nida pati nayi bag-u sunugun nida siya sa apuy. 17 Pinaisip Diyus ti manga hari hampay buwatun nida ti angay sa kay ginayak ag hampay magkausa sida magpasakup sa hayup malangas kanda kamaskihan ag kanda karampatan hanggan sa ud matupad ti manga binagaw Diyus. 18 "Ti babayi kanmu nakitan imaw ti bantug pag banwa may kapangyarihan sa manga hari sa babaw daga."
1 Bag-u nakitan niku may nagpakababa ginan sa langit usa ka anghil may daka pag kamaskihan hanggan karampatan. Narayawan ti bilug kalibutan dahil sa kay kadayawan. 2 Nangungud siya namagaw daka magkun, "Nawasak yi siya, nawasak yi ti bantug pag banwa Babilun. Taynguna ulian yi manga labang tunda pag daga, tunda yi ti tarag-an manga labang. Asan diman ti purugadan manga manuk mayagting ag manga pag-ampuan tawu. 3 Dahil ga pinalangu banwa Babilun ti tanan manga nasyun tawu sa kay pinagkaalak, sa kay magpanguragin. Nanguragin sa kanya ti manga hari sa babaw daga, ti manga magnigusyu nagyaman dahil sa kay ugali magpanguragin." 4 Nadnugan waya maan niku ti usa ka magbagaw ginan sa langit magkun, "Kamu pag nasyun niku, pagpakarayu kamu sa kanya, danga kamu magpausa sa kasalanan niya agud kamu balaw madamay sa malakawan niya kahigpitan. 5 Dahil kay manga kasalanan sunggu yi sa langit, dayi malimtan Diyus kay kadautan. 6 Buwatun niyu sa kanya ga kay diman binwat sa kanyu. Pagbalus kamu sa kanya malamang man sa kay binwat sa kanyu. Pun-a niyu irinmun kay ungut subra waya kay pait sa kay inalistu irinmun niya sa kanyu. 7 Nu kabitay siya magpadayawdayaw sa kay kayamanan ag magpalabawlabaw, katunda diman ipakaun niyu sa kanya ti mahigpit pag kakurian hanggan karukuan bilang patimbang. Dahil pirmi pagpakaisip-isipun niya magkun, 'Rayna yi gid aku tutuu, balaw aku buranday, udyi aku may malakawan karukuan hanggan waya aban.' 8 Nakan durunganan Rumas-ug sa kanya sa sulud usa ka sirang ti manga kahigpitan, may kamatayan, may kapung-awan ag may kalun-usan. Tutdan siya apuy, dahil ti nagsintinsiya sa kanya imaw ti makamaskihan Panginuun Diyus." 9 Mamurahaw aban sa lumi ti manga hari sa babaw daga manga kaibahan niya sa paurag-urag ag sa kahalayhalayan. Bantayan nida ti banwa magkairub daka kay anus. 10 Manindugan sida ginan sa arayu magkadala madamay sa kay nalakawan pag kaparusahan. Sumabi sida magkun, "Anung anung duy ti bantug pag banwa. Sa sulud lang usa ka udas natupad yi ti kaparusahan sa mamaski pag banwa Babilun." 11 Ti manga magnigusyu sa babaw daga lumumi ag manrukuan tungkul sa banwa Babilun dahil balaw yi may mamili kanda paninda. 12 Udyi may mamili kanda gintu, manga pilak, manga mahalaga batu, manga batu sa manlut, manga tuhay tuhay kalasi rutay, manga linu, manga rutay ga dukut dungun ubi, may marara, tanan kalasi kayu mabanglu, manga garamitun bukun yi panhilingun binwat mahalaga pag kayu, manga galang, manga baul, manga malagti pag batu. 13 May paninda diman sida manga kaningay hanggan kamangyan, may mira, may insinsu, may alak, manga langis, may arina hanggan tirigu, may baka, manga karanidu, manga kabayu, manga kalisa, hanggan may paninda diman sida manga panawuhun, manga buhi tawu. 14 Sumabi sa kanya ti manga manugnigusyu magkun, "Nadura yi ti tanan manga mayad pag bagay kanmu paghinam-un. Udyi nimu makitan ti tanan nimu kasiyunan hanggan kanmu karinuan nadura yi sa kanmu." 15 Dayi pumakarani ti manga magnigusyu udyi yumaman sa ati pag banwa dahil magkadala sida barang migapis sa kay kakurian Lumumi sida manrukuan. 16 Sabihun nida magkun, "Anung anung duy ti bantug pag banwa. Daan diman nabistihan niya manga linu, manga rutay ga dukut dungun ubi hanggan marara. Pinabistihan siya duru pag gintu, manga mahalaga pag batu, may manga batu sa manlut. 17 Sa sulud lang usa ka udas bigla nawasak tunda pag kayamanan tanan tanan." Namantay ti manga tawu taga sakayan, manga pangulu sakayan, manga manugsakay, manga manug-alaga layag, hanggan tanan manga mandadagat nakatindug sida sa arayu. 18 Linumian nida ti banwa magkairub basta mag-anus waya ati. Magkun sida, "Unman may kaparihu sa kay kabantugan siti pag banwa." 19 Dinapgan nida kanda ulu sa pangaawa malumian diman sida magkun, "Kaawaawa gid ungud. Anung anung ungud duy ti bantug pag banwa. Sa siti pag banwa pag nagyaman ti tanan manga tawu may sarakyan sa dagat magnigusyu. Dapat sa sulud lang usa ka udas nawasak di ti banwa." 20 Kawu duy pag langit pagbaya sa nangyari sa banwa Babilun. Pagbaya kamu pag manga pinili Diyus, manga Apustul hanggan manga purupita. Nasintinsiyahan yi Diyus ti banwa Babilun sa kaparusahan dahil sa binwat niya sa kanyu. 21 Bag-u ti usa ka makamaskihan pag anghil nagpunpun batu ga usa ka galingan batu kay kalaun bag-u kay ayinmut tag sa dagat. Magkun ti anghil, "Katunda diman aban pag idugsak ti bantug pag banwa Babilun udyi makitan uman. 22 Udyi may masaydan sa kanmu ti manga maggitara, ti manga magpalawta, una magbudyung. Udyi makitan aban ti manga manugpanday. Udyi mag-adnugan aban ti magtunug galingan. 23 Udyi dumuag aban sa kanmu una di usa ka sulu. Udyi madnugan aban ti manga aguman babayi ti manga aguman lalaki magharampangan masulung. Dahil masyadu nagyaman kanmu manga manugnigusyu sa bilug kalibutan. Dinaya nimu ti tanan nasyun sa daut pag kadunungan nimu. 24 Siyun diman waydi pag banwa pag minatay ti manga purupita, ti manga pinili Diyus hanggan ti tanan minatay sa kalibutan.
1 Bag-u nadnugan niku bilang may nagbagaw mayamu gid tawu sa langit magkun, "Dayawun ti Panginuun. Diyus ti gimpuunan karibrihan, kadayawan hanggan kapangyarihan. 2 Dahil matadlung kang-ud kay manga sintinsiya. Sinintinsiyahan niya ti bantug pag babayi uragin, imaw nakan ti nagbuwat kadautan sa babaw daga. Pinarusahan siya Diyus dahil minatay niya ti manga suruguun Panginuun." 3 Utru maan nagbagaw ti kagadhan manga tawu magkun, "Dayawun ti Panginuun. Hanggan waya aban magtalimbuuk ti anus sa pagkairub bantug pag banwa." 4 Ti duwapulu may upat ka gurangun hanggan ti upat ka linalang may buhi nagpadapa nagsamba sa Diyus sa matukawan sa kay tukawan, magkun sida, "Amin, dayawun ti Panginuun." 5 Bag-u may nagbagaw ginan sa tukawan Hari magkun, "Pagdayaw kamu sa kanta Diyus, kamu tanan pag manga suruguun niya, may kangaranan kag sa unman, kamu pag manga maggalang sa kanya." 6 Bag-u nadnugan maan niku bilang ga nagkaminsan nagbagaw ti kayamuan tawu parihu ga danum magpaywas sa puru kay katnug, ga ranranug linti. Kay sabi, "Dayawun ti Panginuun. Dahil maghari ti Panginuun kanta Diyus makamaskihan sa tanan. 7 Pagbaya kita pagmasulung, dayawun nita kay kamaskihan, dahil arani yi aban ti pamasaruhan Anak Karanidu. 8 Alistu yi ti aguman babayi. Ipinakaun Diyus sa kanya ti karampatan hampay makasulung rutay unman may uring, malagti gid masyadu." Tunda pag rutay malagti kay ibug sabihun ti matadlung pag buwat manga tawu napasakup sa Diyus. 9 Sinabi anghil sa kangku, "Isurat nimu inda, mapalad ti manga binan-awan sa karan-an sa pamasaruhan Anak Karanidu." Kay sabi waya anghil sa kangku, "Inda ti tutuu pag manga bagaw Diyus." 10 Napadapa aku sa atubangan anghil hampay magsamba sa kanya. Dapat sinabi niya sa kangku, "Danga duy, aku kabay suruguun diman ga kanmu, parihu diman gid ga kanmu manga patar-ari manga magpadakit tungkul sa kan Hisus. Diyus ti sambahun nimu." Dahil ti katutuuhanan tungkul sa kan Hisus imaw yi ti pinakabusul sa tanan sinabi ag isinurat manga purupita. 11 Bag-u nakitan niku ti langit mabukasan ag may kabayu malagti. Ti masakyan siti pag kabayu imaw ti pag-ingarnan Masarigan, hanggan Tutuu, dahil matadlung siya nu magsintinsiya hanggan kay maggira. 12 Kay mata ga manga labdab yi apuy, mayamu pag sangbaw hari ti masangbawan sa kay ulu. Masuratan sa kay bilug ti ngaran niya, unman may makasalum kay kahulugan nu ud siya lang. 13 Isinugmaw sa dugu kay manga rutay. Bagaw Diyus kay yi ngaran. 14 Nagdasun sa kay uryan ti kagadhan manga anghil ginan sa langit, nakasulung sida rutay manga malagti unman may uring, manga masakyan diman sida sa manga kabayu malagti. 15 Nagluwang ginan sa kay bibig ti baladaw matarum, imaw ti pandaug niya sa manga nasyun tawu. Humari siya sa kanda may bitbit pamakul baul. Siya ngap ti tumata sa manga ubas sa basad pirisian, imaw ngani ti mahigpit pag galit Diyus makapangyarihan sa tanan. 16 Nakapirma kay ngaran sa kay rutay ag sa kay balangbang magkun, "Hari manga hari, ag Panginuun manga panginuun." 17 Bag-u nakitan niku ti usa ka anghil matindugan sa init. Hinugyawan niya ti tanan manga manuk maglayang sa tungud bag-u kay sinabi magkun, "Abala kamu tanan tanan patipun sa daka pag karan-an Diyus. Abala kamu, 18 pagtinduk kamu manga nayi hari, hanggan nayi pangulu sundalu una nayi manga sundalu, nayi manga kabayu hanggan kay manga sakay. Tinduka niyu ti tanan nayi tawu una manga panawuhun una manga balaw panawuhun, manga may kangaranan una unman." 19 Bag-u nakitan niku sida tiripun yi, ti hayup malangas hanggan ti manga hari sa babaw daga hanggan ti kayamuan sundalu nida hampay labanan ti masakyan sa kabayu hanggan ti kaibahan niya kagadhan manga anghil. 20 Nabihag ti hayup malangas, nabihag diman waydi ti pudilun pag purupita imaw ti manugbuwat makadululaw pag tanda sa atubangan hayup malangas. Tunda ngani pag manga tanda makadululaw ti ginamit niya pandaya sa manga tawu nakatanggap marka hayup malangas, sa manga magsamba sa kay tawutawu. Ti hayup malangas ag ti pudilun pag purupita iyinmut buhi tag sa maglabdab danaw apuy asupri. 21 Ti tanan tanan kayamuan nida sundalu minatay sa matarum pag baladaw magluwang ginan sa bibig tawu masakyan sa kabayu. Ag ti manga manuk nanawa sa tinduk manga bangkay tawu.
1 Bag-u nakitan niku ti usa ka anghil magpakababa ginan sa langit, may bitbit laun pag tarikada hanggan susi paniradu sa kaabasadbasadan. 2 Dinuksulan niya ti daragun, imaw ti gurangun pag ulay, siya diman hanggan ti pagkumnun diyablu, kay usa ka ngaran si Satanas. Ginapus siya anghil sa sulud usa ka libu ka timpu. 3 Ayinmut siya tag sa kaabasadbasadan bag-u tinalakpan ag sinusihan anghil hampay udyi siya makaluwang ag udyi makadaya sa manga nasyun tawu hanggan sa udwaya matapus ti usa ka libu ka timpu. Nu makalawuy ti usa ka libu ka timpu, palpasan maan siya ngalay ngalay lang. 4 Nakakit aku may manga tukawan hari. Ti manga nakatukaw ati pinakan-an karampatan hampay pumihu sa daut sa mayad. Nakitan diman niku ti karadwa manga tawu pinugutan ulu dahil sa kanda magsarig sa kan Hisus hanggan sa kanda magpadakit Bagaw Diyus. Unman nagsamba sida sa hayup malangas una sa kay tawutawu. Unman sida nagtanggap manga marka hayup malangas sa kanda bangas una sa kanda kamang. Binuhi sida hampay maghari kaibahan ni Kiristu sa sulud usa ka libu ka timpu. 5 Inda ti un-an pagkabuhi uman ginan sa kamatayan. Pagka nakalawuy ti usa ka libu ka timpu binuhi diman uman ti manga iba pag manga namatay. 6 Masulung ag lubus sakup sa Diyus ti nidungan sa un-an pagkabuhi uman ginan sa kamatayan. Udyi may laban sa kanda ti ikadwa pag kamatayan. Sida aban ti manga manug-asiwa yi sa atubangan Diyus hanggan sa atubangan ni Kiristu, humari sida kaibahan niya sa sulud usa ka libu ka timpu. 7 Nu makalawuy ti usa ka libu ka timpu, palpasan maan si Satanas ginan sa kay pirisuhan. 8 Lumuwang siya hampay dayaun niya ti manga nasyun tawu sa bilug kalibutan, ti manga taga Gug hanggan taga Magug. Tipunun sida ni Satanas hampay maglaban sa gira. Parihu kay kagadhan ga taypuk baras sa baybay dagat kay kayamu. 9 Nangalat sida sa bilug kalibutan bag-u sinangput nida ti kampuhan manga tawu napasakup sa Diyus hanggan ti pagmahalun niya pag banwa. Dapat linmuwang ginan sa langit ti apuy bag-u naayum yi sida. 10 Bag-u ti diyablu ti nagdaya sa kanda ayinmut tag sa malabdaban danaw apuy asupri. Ati diman pag ayinmut ti hayup malangas hanggan ti pudilun pag purupita. Mirinsan sida pakurian yabi sirang hanggan waya aban unman may katapusan. 11 Bag-u nakitan niku ti laun pag malagti pag tukawan Hari hanggan ti matukawan siti. Naparaw sa kay atubangan ti daga hanggan langit, udyi maan nakitan uman. 12 Nakitan niku matindugan sa atubangan tukawan Hari ti manga namatay, manga may kangaranan ag manga unman. Bag-u binuklad ti manga ribru. Binuklad ti usa waya ka ribru, imaw ti ribru kabuhian. Pinila ti manga matadlung ginan sa manga balaw matadlung angay sa kanda manga binwat parihu sa isinurat sa manga ribru. 13 Idinagsa dagat ti manga namatay siyun. Ipinalwang kamatayan hanggan ulian manga karadwa ti manga tawu namatay ag iinintirga siyun. Pinila ti manga matadlung ginan sa manga balaw matadlung angay sa kanda manga binwat. 14 Bag-u ayinmut tag sa danaw apuy ti kamatayan hanggan ti ulian manga karadwa. Tunda pag danaw apuy imaw ti ikadwa pag kamatayan. 15 Ayinmut waydi sa danaw apuy una si unu ti unman nisurat kay ngaran sa ribru kabuhian.
1 Bag-u nakitan niku may bag-u pag langit hanggan may bag-u pag daga. Naparaw yi ti daan pag langit hanggan daan pag daga, naparaw yi waydi hanggan ti dagat. 2 Nakitan niku ti banal pag banwa, imaw ti bag-u pag Hirusalim, magpakababa ginan sa langit, ginan sa Diyus, parihu ga babayi kalasalun, lubus alistu magsulang sa kay arasawan-un pag lalaki. 3 Nadnugan niku may nagbagaw daka ginan sa tukawan Hari magkun, "Taynguna kay ulian Diyus sa karaw-an yi manga tawu. Mangulian siya kaibahan yi nida ag sida kay yi nasyun. Ti Diyus sa kanda yi karaw-an ag siya kanda yi Diyus. 4 Payidun niya tanan manga luwa sa kanda manga mata, udyi may kamatayan, una kakurian, udyi may maglumi, udyi waydi may sakit. Dahil naparaw yi ti daan pag manga kabagayan." 5 Bag-u nagbagaw ti matukawan sa tukawan Hari magkun, "Taynguna buwatun niku ti bag-u pag manga bagay." Kay sinabi waya niya sa kangku magkun, "Isurat nimu pagkumun, masarigan ag tutuu inda pag manga bagaw." 6 Sinabi waya waydi niya sa kangku magkun, "Kang-ud tinupad yi. Aku ti Alpa hanggan ti Umiga, aku ti umpisa aku diman ti masawad. Una si unu ti magkauwaw pakan-an niku karampatan hampay makainum danum unman may bayad ginan sa bulbugan gimpuunan buhi. 7 Inda ti matanggap tawu nu manalu. Aku yi ti Diyus niya, siya kang yi waydi gid anak. 8 Dapat makuri masyadu ti malakawan manga madalain, manga unman nagsarig sa Diyus, manga magkadara sa daut pag kahalayan, manga maglibun sa kay kaparihu tawu, manga uragin, manga magsarig sa kapangyarihan ni Satanas, manga magsamba sa diyusdiyusan hanggan tanan pag manga pudilun. Iyamut sida sa malabdaban danaw apuy asupri, tida imaw ti ikadwa pag kamatayan." 9 Nagpakarani sa kangku ti usa ka anghil kabilang sa pitu ka anghil may bitbit pinggan malukung ayaw ayaw, kada pinggan punu pangatapusan pag kahigpitan. Bag-u nagbagaw sa kangku tunda pag anghil magkun, "Abala duy kawu, ipakakit niku sa kanmu ti aguman babayi, imaw ti arasawan-un Anak Karanidu." 10 Nasakup aku Ispiritu Banal bag-u dinara aku anghil tag sa pinakaabwat ag daka pag bantud. Ipinakakit niya sa kangku ti banal pag banwa Hirusalim magpakababa ginan sa langit, ginan sa Diyus. 11 Sa kanya yi ti kadayawan Diyus. Masilaw ti banwa parihu ga manga mahalaga pag batu haspi, masnag ga bubug. 12 Sinangput alad batu ti banwa madamul ag abwat, may sampulu may duwa ka puwirtahan. Ti kada usa ka puwirtahan may bantay di anghil. May surat ti manga puwirtahan manga ngaran sampulu may duwa ka linahi ni Israil. 13 Tigtigutlu kay puwirtahan, tulu sa butlakan baliwa, tulu sa kanaway baliwa, tulu sa salatan baliwa, tulu waydi sa isalpan baliwa. 14 Ti alad batu sa sangput banwa may sampulu may duwa ka patakinan pag batu. May surat ti kada usa ka patakinan pag batu, tigus-a ka ngaran sampulu may duwa ka Apustul Anak Karanidu. 15 Ti anghil ti nagbagaw sa kangku may bitbit gintu pag panukat hampay sukatun ti banwa, ti manga puwirtahan hanggan kay alad batu. 16 Nikana ti banwa kudradu, nu kabitay kay kaaba imaw diman waydi kay kaluw-ang banwa. Sinukat anghil ti banwa, duwapulu may upat ka libu ka kilumitru kay kaaba katunda diman kay kaluw-ang ag kay kaabwat. 17 Sinukat diman niya ti alad batu. Duwa ka gatus may sampulu may unum ka sugdung raprapa kay kaabwat, angay sa bitbit anghil pag panukat ga tawu diman gamit pag panukat. 18 Haspi pag batu ti binwat alad. Ti buu banwa lunsay yi gintu, masiga parihu sa bubug. 19 Pinaulian tanan kalasi mahalaga pag manga batu ti manga patakinan alad batu. Haspi kay usa, sapiru kay ikadwa, kalsidunya kay ikatlu, ismiralda kay ikap-at, 20 unisi kay ikalima, kurnalina kay ikan-um, kirisulitu kay ikapitu, birilu kay ikawalu, tupas kay ikasiyam, kirisuprasu kay ikasampulu, hasintu kay ikasampulu may usa ag amatista kay ikasampulu may duwa. 21 Batu sa manlut ti binwat kay sampulu may duwa ka puwirtahan. Tigus-a ka batu sa manlut kang-ud sa kada puwirtahan. Ti karsada sa sulud banwa lunsay yi gintu, masnag parihu sa bubug. 22 Unman may nakitan aku balay Diyus sa banwa. Dahil ti Panginuun Diyus makamaskihan sa tanan hanggan ti Anak Karanidu imaw ti pinakasimbahan ati. 23 Udyi may kailangan init una bulan hampay rayawan ti banwa dahil ti kadayawan Diyus tigparayaw ati, ti Anak Karanidu ti sulu. 24 Ginan sa rayaw banwa pag marayawan ti tanan nasyun tawu. Ati diman tag pag daran-un manga hari sa babaw daga kanda kayamanan. 25 Usa ka sirang udyi may siradu ti manga puwirtahan banwa ag unman yi may yabi. 26 Daran-un tag sa banwa ti kayamanan hanggan paggalang manga nasyun. 27 Dapat unman may makasulud ati una hintay pag manga bagay mayagting sa kay magbantay Diyus, una hintay tigbuwat kahalayan, una ti manga magpudil unman gid sumulud. Tunda lang pag manga tawu ti makasulud ati ti nakasurat kanda manga ngaran sa ribru kabuhian. Anak Karanidu kay apu tunda pag ribru.
1 Ipinakakit diman anghil sa kangku ti usa ka sapa kay danum makapakaun tutuu pag buhi sa tawu. Tunda pag sapa kay danum malindag parihu sa bubug. Kay bulbugan ginan sa tukawan Diyus hanggan Anak Karanidu. Bag-u magbulus sa karaw-an karsada banwa. 2 Baliw baliw dipay sapa may puun kayu, kay burak makapakaun tutuu pag buhi sa tawu. Bulan bulan magburak. Kay manga labung magpaayad sa sakit manga nasyun tawu. 3 Naparaw yi ati una hintay pag isinaad Diyus. Siyun gid sa banwa kay tukawan Diyus hanggan Anak Karanidu. Magsirbi sa kanya kay manga suruguun. 4 Makitan nida kay uyahun ag misurat kay ngaran sa kanda manga bangas. 5 Ati udyi may yabi, udyi may kailangan sida sulu una rayaw init, dahil ti Panginuun Diyus tigrayaw sa kanda ati. Humari sida unman may katapusan. 6 Bag-u sinabi anghil sa kangku magkun, "Masarigan ag tutuu inda pag manga bagaw. Ti Panginuun Diyus ti nag-udyuk sa naisipan manga purupita, imaw diman ti nagsugu sa kay anghil hampay ipakakit sa kay manga suruguun ti manga udyi dugay mangyari yi aban." 7 Magkun si Hisus, "Pagpatingi kamu, rumas-ug yi aku udyi dugay. Papaladan Diyus ti tawu magtupad sa manga ipinurupita nisurat sa inda pag ribru." 8 Aku si Huwan imaw ti nakadnug ag nakakit sa tanan tanan inda. Pagka nadnugan ag nakitan niku tunda tanan tanan, napadapa aku sa atubangan anghil hampay sambahun niku siya dahil siya ti nagpakakit sa kangku tunda. 9 Dapat sinabi niya sa kangku magkun, "Danga duy, aku hanggan suruguun parihu sa kanmu, parihu sa kanmu manga patar-ari manga nagpurupita, parihu diman sa tanan manga magpaniwala sa manga bagaw nisurat sa inda pag ribru. Sambahun nimu ti Diyus." 10 Sinabi waya niya sa kangku, "Danga nimu pagsiraduha ti manga ipinurupita nisurat sa inda pag ribru, dahil arani yi ti taning pag kaudasan. 11 Ti daut pag tawu pagpadayun yi lang sa kay kadautan, ti mayagting pag tawu pagpadayun yi lang sa kay kayagtingan. Dapat ti mayad pag tawu pagparargu sa kay kaayadan, katunda diman ti tawu napasakup sa Diyus, pagparargu sa kay pagpasakup." 12 Sinabi ni Hisus magkun, "Pagpatingi kamu, magkaras-ug yi aku, may dara kang manga pirimyu kang ipakaun sa kada tawu angay sa kay binwat. 13 Aku ti Alpa, aku diman ti Umiga, aku ti sa kabag-u, aku diman ti sa katapusan. Aku ti umpisa, aku diman ti masawad." 14 Papaladan Diyus ti maglumpiyu kanda manga rutay, pakan-an sida karampatan hampay makakaun burak kayu makapakaun tutuu pag buhi ag hampay makasulud sa banwa lakaw sa kay manga puwirtahan. 15 Dapat matayak sa luwas banwa ti manga daut pag tawu, ti manga magsarig sa kapangyarihan ni Satanas, ti manga magpanguragin, ti manga maglibun tawu, ti manga magsamba sa diyusdiyusan, ti tanan magbaya sa maradaya hanggan ti manga magdaya. 16 "Aku si Hisus ti nagsugu sa kang anghil hampay ipakilala inda pag manga bagay sa kanyu sa ikarig-un manga iglisya. Aku ginan sa linahi ni Dabid, aku ti masnag pag kuramnag." 17 Pagsabihun Ispiritu hanggan aguman babayi magkun, "Pagsitay yi gid duy kawu." Ti tanan nakadnug inda pagsabi waydi, "Pagsitay yi gid kawu." Una si unu ti magkauwaw pagpakarani, pagbuul danum makapakaun tutuu pag buhi. Pakan-an diman siya unman may bayad. 18 Aku si Huwan ti magbilin mahigpit una sa kantapu pag tawu makadnug sa ipinurupita nisurat sitay pag ribru. Nu may tawu magdagdag sa bagaw nisurat sitay pag ribru, una may parusa dagdagan waya Diyus manga kahigpitan nisurat sitay. 19 Nu may tawu magbawas sa manga bagaw ipinurupita nisurat sitay pag ribru, bul-an diman siya Diyus karampatan sa manga nisurat sitay pag ribru. Dayu siya makakaun burak kayu kabuhian, dayu waydi siya makasulud sa banal pag banwa. 20 Magsabi ti nagpaburayhaw sa tanan inda magkun, "Pihu gid ngani rumas-ug yi aku udyi dugay." Amin, Panginuun Hisus, pagsitay yi duy kawu. 21 Ti tanan tawu napasakup sa Diyus kang pag-idarangin hampay papaladan sida Panginuun Hisus.