Jako pengidup
1:1 Apin dunya nyadi, Jako endang udah bisi. Iya enggau Allah Taala, lalu iya sabaka enggau Allah Taala. 2 Kenyau ari mula, Jako endang enggau Allah Taala. 3 Ulih iya Allah Taala ngaga samoa utai; nadai siti utai ti udah digaga tau nyadi enti enda ulih iya. 4 Jako nya pun pengidup, lalu pengidup nya mai penampak ngagai mensia. 5 Penampak manchar dalam petang, lalu pemetang nadai ulih madam ka iya. 6 Allah Taala ngirum ka siko seruan iya, lelaki ti benama John. 7 Iya datai nusoi ngagai orang mayoh pasal penampak nya. Iya datai nusoi ngagai sida, ngambi ka samoa ti ninga pesan lalu arap. 8 Nyadi iya empu ukai penampak; iya datai deka nusoi pasal penampak. 9 Tu penampak ti bendar, penampak ti datai ngagai dunya lalu manchar atas samoa mensia. 10 Nya alai Jako endang udah bisi dalam dunya. Taj a Allah Taala ngaga dunya ulih iya, tang dunya mengkang enda nemu iya. 11 Iya datai ngagai menoa iya empu, tang sida ti sama bansa enggau iya enda nerima iya. 12 Sekeda amat nerima iya lalu arap ka iya; nya alai iya meri sida kuasa nyadi anak Allah Taala. 13 Sida nyadi anak Allah Taala ukai ari peneka sida, reti nya ukai ada nyadi mensia ulih bapai ka mensia; Allah Taala empu ti apai sida. 14 Jako nya nyadi mensia lalu diau begulai enggau kitai, penoh laban pengasih enggau pemendar. Kitai meda mulia iya, mulia ti disambut iya ti Anak Tunggal Apai. 15 John bisi nusoi pasal iya. Ko iya ngangau, "Tu meh iya ti ko aku, leboh aku bejako, 'Iya datai dudi ari aku, tang iya besai agi ari aku, laban iya endang udah bisi apin ku ada." 16 Ari pemesai pengasih iya, iya udah merekat ka samoa kitai, meri kitai berekat nambah-menambah. 17 Adat Allah Taala datai dibai Moses; tang pengasih enggau pemendar datai dibai Jesus Kristus. 18 Nadai siko orang udah meda Allah Taala. Semina iya siko aja, ti sabaka enggau, Allah Taala lalu berimbai enggau Apai, iya ti udah nusoi pasal Apai.
Pesan John Pemaptisa
19 Perintah orang Judah di Jerusalem ti ngasoh sida imam enggau orang Lewi mansang ngagai John. Ko sida nanya iya, "Sapa nuan tu?" 20 John nadai kakang nyaut sida, iya bejako ba moa orang mayoh enggau terang. Tu jako ti disebut iya, "Aku tu ukai Mesiah." 21 "Sapa nuan tu deh? Kati nuan tu ti dikumbai Elijah?" pia ko sida nanya iya. "Ukai, aku ukai Elijah," pia ko John. "Kati nuan tu nabi?" ko sida nanya. "Ukai," ko iya nyaut. 22 Ko sida bejako enggau iya, "Padah ngagai kami, sapa nuan tu. Kami enda tau enda mai saut ari nuan ngagai sida ti ngasoh kami kitu. Kati ko nuan nusoi pasal diri empu?" 23 Disaut John, "Tu utai pasal aku: 'Munyi nyawa orang siko ti ngangau di menoa puang: Gaga jalai ti lurus ditengah Tuhan bejalai!" (Nya munyi jako ti udah disebut nabi Isaiah.) 24 Sida seruan nya ti datai kia endang di-asoh orang Parisi. 25 Ko sida nanya John, "Enti nuan ukai Mesiah, ukai Elijah lalu ukai nabi, nama kebuah nuan maptisa orang?" 26 Disaut John, "Aku maptisa ngena ai; tang bisi siko bediri begulai enggau kita ti enda dikelala kita. 27 Iya datai dudi ari aku; tang aku enda chukop manah muka tali selipar iya." 28 Samoa utai nya nyadi di Betani, adap ka timor Batang Jordan, endor John maptisa orang.
Domba Allah Taala
29 Hari siti John meda Jesus datai ngagai iya, lalu ko iya, "Tu Domba Allah Taala, iya ti muai dosa mensia! 30 Tu meh iya ti ko aku, leboh aku nyebut, 'Bisi orang siko datai dudi ari aku, tang iya bekuasa agi ari aku, laban iya endang udah bisi apin aku ada.' 31 Aku enda nemu sapa iya ti deka datai nya, tang aku datai maptisa orang ngena ai, awak ka iya tau ditemu orang Israel." 32 Tu saksi ti diberi John: "Aku meda Roh nurun ari serega baka burong achang, diau atas iya. 33 Aku mengkang enda ngelala iya, tang Allah Taala ti ngasoh aku maptisa ngena ai, bejako enggau aku munyi tu: 'Nuan deka meda Roh nurun lalu diau atas orang nya; iya nya meh orang ti deka maptisa ngena Roh Kudus.' 34 Aku udah meda iya," ko John, "Aku madah ka kita, iya nya meh anak Allah Taala."
Sida murid Jesus ti terubah iya
35 Nyadi hari siti John bisi dia enggau dua iko murid iya. 36 Leboh nya iya meda Jesus bejalai mansa sida, ko iya, "Tu Domba Allah Taala!" 37 Murid dua iko nya ninga iya nyebut nya lalu bejalai nitih ka Jesus. 38 Jesus malik lalu meda saduai nitih ka iya, lalu ko iya nanya saduai, "Nama utai digiga saduai?" Disaut saduai, "Dini endor nuan diau Rabbi?" (Reti jako Rabbi nya "Pe-ngajar.") 39 Disaut iya, "Aram meda endor aku." Nya alai saduai lalu enggau iya, meda endor iya diau, lalu begulai enggau iya sehari-hari nya. (Jam leboh maya nya kira pukol empat ngalih hari.) 40 Siko ari saduai ti udah ninga John, lalu bejalai nitih ka Jesus, iya nya Andrew, menyadi Simon Peter. 41 Kemaya nya Andrew betemu enggau menyadi iya Simon, lalu ko iya madah ngagai Simon, "Kami udah tetemu ka Mesiah." (Reti jako nya "Kristus.") 42 Udah nya iya mai Simon ngagai Jesus. Jesus merening ngagai iya lalu bejako, "Nuan tu Simon anak John. Nama nuan deka dikumbai Sipas." (Jako nya sabaka enggau Peter, reti nya "Batu.")
Jesus manggil Pilip saduai Natanael
43 Hari siti Jesus mutus ati mansang ka Galili. Iya betemu enggau Pilip lalu bejako enggau iya, "Aram enggau aku!" 44 Pilip datai ari Betsaida, nengeri ti endor Andrew saduai Peter diau. 45 Pilip betemu enggau Natanael lalu bejako enggau iya, "Kami udah tetemu ka iya ti ko Moses dalam Surat Adat, iya ti udah dikenang sida nabi mega. Iya nya Jesus anak Josep, ari Nasaret." 46 Ko Natanael nanya iya, "Kati tau utai ti badas datai ari Nasaret?" Disaut Pilip, "Aram meda." 47 Leboh Jesus meda Natanael datai mansang ngagai iya, ko iya bejako ngenang ka Natanael, "Tu orang Israel ti bendar; nadai bisi akal ti jai ba iya!" 48 Ko Natanael nanya iya, "Kati ko nuan nemu pasal aku?" Disaut Jesus, "Aku bisi meda nuan di baroh kayu ara, apin Pilip manggil nuan." 49 Ko Natanael nyaut iya, "Pengajar! Nuan tu Anak Allah Taala! Nuan rajah bansa Israel!" 50 Ko Jesus, "Kati nuan arap laban aku madah ka diri udah meda nuan di baroh pun kayu ara? Nuan deka meda mayoh agi utai ti lebih besai ari nya!" 51 Lalu ko iya bejako enggau sida, "Aku nusoi ka kita utai ti amat: kita deka meda serega tebuka, lalu sida melikat Allah Taala deka niki katas enggau nurun ka baroh ngagai Anak Mensia."
Gawai tikah di Kana
2:1 Dua hari lepas nya, bisi gawai tikah di nengeri Kana, dalam menoa Galili. Indai Jesus bisi dia, 2 lalu Jesus empu enggau sida murid iya bisi mega kena ambi ngagai pengerami nya. 3 Leboh samoa ai anggor nyau udah abis di-irup orang mayoh, dia indai Jesus bejako enggau iya, ko iya, "Sida nadai agi ai anggor." 4 Ko Jesus nyaut, "Indai, anang nuan madah ngagai aku utai ti patut dikereja aku. Timpoh aku apin datai." 5 Udah nya ko indai Jesus bejako enggau sida anembiak ti dalam rumah nya, "Kereja barang ti di-asoh iya gaga kita." 6 Nyadi adat bebasu endang bisi dalam pengarap orang Judah, nya alai kategal nya enam igi benda ti endor nyimpan ai, bisi di endor nya. Sigi-sigi benda nya ulih ngundan entara dua puloh enggau tiga puloh gilin ai. 7 Ko Jesus bejako enggau sida ti gawa dalam rumah nya, "Isi samoa benda tu enggau ai." Sida ngisi benda nya enggau ai datai ka rekong, 8 lalu udah nya, ko iya bejako enggau sida, "Diatu, kauk ai ari dalam benda nya lalu bai ngagai tuai ti ngator pengerami tu." Sida mai ai nya ngagai iya, 9 lalu iya nyepi ai nya ti udah bebali nyadi ai anggor. Iya enda nemu ari ni penatai ai anggor nya (tang sida ti udah ngauk ai nya nemu utai nya). Nya alai iya ngangau ka lelaki ti nikah nya, 10 lalu ko iya bejako enggau iya, "Samoa orang bukai endang dulu mantai ka ai anggor ti badas, lalu leboh pengabang udah puas ngirup, nya baru mantai ka anggor ti kurang badas. Tang nuan udah naroh ai anggor ti badas datai ka diatu!" 11 Jesus ngereja pengawa nyelai ti terubah nya di Kana, dalam menoa Galili. Dia iya ngayan ka mulia iya, lalu sida murid iya arap ka iya. 12 Udah nya, Jesus enggau indai iya, sida menyadi enggau murid iya, mansang ngagai Kapernaum, lalu diau dia dua tiga hari.
Jesus mansang ngagai Kaba
13 Leboh Gawai Paska, iya nya hari besai orang bansa Judah nyau ka datai, Jesus lalu mansang ngagai Jerusalem. 14 Dalam kaba di endor nya iya tetemu ka orang nyual sapi, bedus enggau burong achang, lalu mega sida penukar wang dukok atas mija sida. 15 Iya ngaga siti penyipat ari tali ti mit lalu muru samoa jelu pansut ari kaba, bedus enggau sapi. Iya nungkup ka mija sida penukar wang lalu nabor ka duit seling sida, 16 lalu ko iya bejako enggau sida ti nyual burong achang, "Bai burong nya ari endor tu! Anang ngaga rumah Apai aku nyadi ka rumah kedai!" 17 Sida murid iya lalu ingat ka jako ti ditulis dalam Bup Kudus, "Pen-geransing aku ka rumah nuan, Allah Taala, mau baka api." 18 Sida ti megai perintah di menoa Judah datai nanya iya baru, ko sida, "Nama kereja ajih digaga nuan kena nunjok ka nuan amat bisi kuasa ngereja utai tu?" 19 Disaut Jesus, "Ruboh rumah Allah Taala tu ulih kita, lalu dalam tiga hari aku deka niri ka iya baru." 20 Ko sida nanya iya, "Empat puloh enam taun pengelama orang ngaga rumah tu. Kati ko nuan ngumbai diri ulih niri ka iya dalam kandang tiga hari?" 21 Tang kaba ti ko Jesus nya tuboh iya empu. 22 Nya alai leboh iya udah angkat ari mati, dia sida murid iya ingat ka utai ti udah disebut iya; lalu sida arap ka Bup Kudus enggau utai ti udah disebut Jesus.
Jesus nemu samoa Mensia
23 Leboh Jesus agi di Jerusalem sekumbang ti ngintu Gawai Paska, mayoh orang arap ka iya, leboh sida meda kereja nyelai ti digaga iya. 24 Tang Jesus enda arap ka sida, laban iya nemu samoa mensia. 25 Nadai guna orang nusoi ngagai iya pasal mensia, laban iya nemu utai ti dalam ati sida.
Jesus saduai Nikodemus
3:1 Bisi siko raban sida orang Parisi ti benama Nikodemus. Iya nya tuai raban bansa Judah. 2 Nyadi sakali iya datai ngagai Jesus leboh malam hari, ko iya nanya Jesus, "Kami nemu Rabbi, nuan tu pengajar ti datai ari Allah Taala. Nadai siko ti ulih ngaga kereja nyelai baka nuan, enti iya enda ditulong Allah Taala." 3 Disaut Jesus, "Amat aku madah ka nuan: nadai siko orang ulih meda Perintah Allah Taala enti iya enda ada baru." 4 Ko Nikodemus nanya iya, "Kati ko orang ti udah besai tuai ada baru? Iya tetap enda ulih tama ka dalam perut indai iya baru lalu ada kedua kali!" 5 Disaut Jesus, "Amat aku madah ka kita: nadai siko orang ulih meda Perintah Allah Taala enti iya enda di-ada ka ulih ai enggau Roh. 6 Mensia ada ari apai indai iya ti endang mensia, tang roh ti ba iya nya di-ada ka Roh. 7 Anang tekenyit ati kategal aku ti madah ka kita, 'Kita enda tau enda ada baru.' 8 Ribut betiup baring endor iya deka; kita ninga munyi iya, tang kita enda nemu ari ni penatai iya lalu kini ka iya betiup. Baka nya mega samoa orang ti di-ada ka Roh." 9 "Kati ko utai nya tau nyadi baka nya?" pia ko Nikodemus nanya. 10 Disaut Jesus, "Nuan pengajar besai orang Israel, kati ko nuan enda nemu utai tu? 11 Amat aku madah ka nuan: kami semina bejako ka utai ti ditemu kami, lalu nusoi utai ti udah dipeda kami, tang taja pia nadai siko kita ti deka nerima pesan kami. 12 Kita enda arap ka aku leboh aku nusoi ka kita gaya utai ti nyadi di dunya tu. Enti pia, kati ko kita deka arap ka aku leboh aku nusoi ka kita pasal utai serega. 13 Nadai siko orang ti udah niki ka serega, semina Anak Mensia siko aja, iya ti nurun ari serega." 14 Baka Moses ti udah ngangkat ka ular engkeraju ngena tungkat di menoa puang, baka nya mega Anak Mensia enda tau enda di-angkat ka, 15 awak ka orang ti arap ka iya deka bulih pengidup meruan. 16 Laban Allah Taala udah balat rindu ka dunya nya kebuah iya meri Anak tunggal iya, awak ka genap iko orang ti arap ka iya enda mati, tang tau bulih pengidup ti meruan. 17 Allah Taala ukai ngasoh Anak iya datai ka dunya tu nyadi hakim, tang nyadi ka Penebus iya. 18 Barang sapa ti arap ka Anak enda kena ukum, tang barang sapa ti enda arap udah di-ukum, laban iya udah enda arap ka Anak tunggal Allah Taala. 19 Tu gaya ukum: penampak udah datai ka dunya, tang mensia rindu agi ka pemetang, laban sida ngereja utai ti jai. 20 Barang sapa ngereja utai ti jai enda rindu ka penampak, lalu enda datai ngagai penampak, laban iya enggai ka penyai pengawa iya dipanchar penampak. 21 Tang barang sapa ngereja utai ti betol deka datai ngagai penampak, awak ka penampak tau man-char atas pengawa iya ti ngasi ka Allah Taala.
Jesus saduai John
22 Udah nya Jesus sama enggau sida murid iya mansang ngagai menoa Judah. Iya diau dia enggau sida lalu maptisa orang. 23 John mega maptisa orang di Inon, enda jaoh ari Salim, laban di endor nya mayoh bendar ai. Orang mayoh datai ngagai iya lalu iya maptisa sida. 24 (John leboh maya nya apin kena tutup.) 25 Sekeda sida murid John betalat enggau orang Judah, ngenang pasal adat bebasu. 26 Nya alai sida mansang ngagai John lalu nusoi ngagai iya pasal utai nya, ko sida, "Pengajar, nuan tentu ingat ka siko orang ti enggau nuan di seberai Batang Jordan dulu suba, orang ti selalu dikenang nuan. Iya diatu maptisa orang, lalu genap iko orang datai ngagai iya!" 27 Disaut John, "Nadai orang tau bulih sebarang utai enti Allah Taala enda meri ngagai iya. 28 Kita empu nyadi saksi aku leboh aku bejako, "Aku ukai Mesiah, tang aku di-asoh datai dulu ari iya.' 29 Orang ti bebini nya ti bempu indu ti enggau iya jadi. Pangan iya bediri ngimbai iya lalu mending, iya gaga ati leboh iya ninga jako lelaki ti nikah nya. Nya gaya pengelantang aku. 30 Iya deka beguna agi ari aku, lalu aku kurang agi beguna ari iya.
Iya ti datai ari Serega
31 Iya ti nurun ari atas besai agi ari samoa orang. Iya ti datai ari tanah endang enggi tanah, lalu bejako ka utai ti nyadi di tanah. Iya ti datai ari serega tinggi ari samoa orang. 32 Iya nusoi utai ti udah dipeda enggau udah didinga iya, tang nadai siko orang nerima pesan iya. 33 Barang sapa ti nerima pesan tu udah ngaku jako Allah Taala endang betol. 34 Iya ti di-asoh Allah Taala bejako nusoi pesan Allah Taala, laban Allah Taala meri Roh diri chukop penoh ka iya. 35 Apai rindu ka Anak iya, lalu udah meri samoa kuasa ngagai iya. 36 Barang sapa ti arap ka Anak deka bulih pengidup meruan; lalu barang sapa ti enda ngasi ka Anak enda tau bulih pengidup, tang pengeringat Allah Taala deka mengkang ba iya belama-lama.
Jesus enggau indu Samaria
4:1 Sida orang Parisi ninga Jesus udah bulih sereta maptisa mayoh agi murid ari John. 2 (Iya ti bendar Jesus nadai maptisa orang; semina sida murid iya aja.) 3 Leboh Jesus ninga jako ti disebut orang, iya angkat ari Judah lalu pulai ka Galili. 4 Di rantu jalai iya mansang kin, iya enda tau enda nengah Samaria. 5 Iya datai ba sabuah nengeri di Samaria ti benama Sikar, enda jaoh ari tanah ti diberi Jakop ngagai anak iya Josep. 6 Telaga Jakop mega bisi dia. Nyapi diri nyau ikak bejalai, Jesus ngetu dia lalu dudok di tisau telaga nya. Maya nya kira tengah hari. 7 Siko indu orang Samaria datai deka ngambi ai ari telaga nya, lalu ko Jesus bejako enggau iya, "Meri aku ai imp." 8 (Nyadi sida murid iya udah bejalai ka nengeri meli pemakai.) 9 Disaut indu nya, "Nuan orang Judah lalu aku orang Samaria—kati ko nuan tau minta ai irup ari aku?" (Orang Judah enda tau ngena utai ti dikena orang Samaria.) 10 Disaut Jesus, "Enti nuan semina nemu utai ti diberi Allah Taala, lalu udah ngelala iya ti minta ngirup ari nuan, nuan tentu deka minta ari iya lalu iya tentu deka meri nuan ai ti idup." 11 Disaut indu nya, "Tuan! Nuan nadai beledi kena nyauk ai lalu telaga nya dalam bendar. Dini endor nuan bulih ai idup? 12 Aki kami Jakop ti meri ka kami telaga tu; iya empu, sida anak iya enggau samoa jelu tupi iya, ngirup ai ari telaga tu magang. Nuan tentu enda ngumbai diri besai agi ari Jakop, enda pia?" 13 Disaut Jesus, "Barang sapa ti ngirup ai tu deka aus baru; 14 tang barang sapa ti ngirup ai ti diberi aku, enda tau aus baru. Ai ti deka diberi aku ngagai iya, deka nyadi mata ai dalam tuboh iya, lalu ngada ka ai idup ngagai iya sereta meri iya pengidup ti meruan." 15 Ko indu nya, "Tuan! Enti pia beri ai tu ka aku, ngambi ka aku enda agi aus, lalu enda agi datai kitu nyauk ai." 16 Ko Jesus, "Alai, padah ka laki nuan. Udah nya datai kitu baru." 17 "Aku nadai laki," pia ko indu nya. Disaut Jesus, "Betol penemu nuan, leboh nuan madah ka diri nadai laki. 18 Nuan udah belai ka lima iko lelaki, lalu lelaki ti enggau nuan begulai diatu ukai laki nuan ti bendar. Nuan udah nusoi utai ti bendar ngagai aku." 19 Ko indu nya, "Dijangka aku nuan tu tentu nabi, tuan. 20 Sida aki ini aku orang Samaria nyembah Allah Taala ba bukit tu, tang kita orang Judah ngumbai Jerusalem nya endor patut alai nyembah Allah Taala." 21 Ko Jesus bejako enggau iya, "Arap ka aku, indu! Timpoh deka datai endor mensia ukai nyembah Apai ba bukit tu, lalu ukai mega di Jerusalem. 22 Kita orang Samaria enda nemu nama utai ti disembah kita; kami orang Judah nemu orang ti disembah kami, laban selamat datai ari bansa Judah. 23 Tang timpoh deka datai, lalu nya udah datai diatu, endor orang ti amat besembah deka nyembah Apai dalam Roh. Orang nya ti dikedeka Apai nyembah iya. 24 Allah Taala nya Roh, lalu sida ti nyembah iya enda tau enda nyembah dalam roh enggau pemendar." 25 Ko indu nya bejako enggau iya, "Aku nemu, Mesiah ti dikumbai Kristus, deka datai. Leboh iya datai, iya deka nusoi ngagai kitai samoa utai." 26 Disaut Jesus, "Aku tu meh iya, aku ti bejako enggau nuan." 27 Leboh nya sida murid Jesus lalu datai. Sida tekenyit bendar ati meda Jesus berandau enggau indu nya. Tang nadai siko sida bejako enggau indu nya munyi tu: "Nama utai ti dikedeka nuan?" tauka nanya Jesus, "Nama kebuah nuan bejako enggau iya?" 28 Udah nya indu nya ninggal ka kebok ai iya, pulai ngagai kandang nengeri lalu bejako ngagai orang mayoh ti dia, ko iya, 29 "Aram betemu enggau orang ti nemu samoa pengawa ti udah digaga aku. Kada enda iya nya ti Mesiah?" 30 Nya alai sida angkat ari nengeri nya lalu mansang ngagai Jesus. 31 Leboh nya sida murid bejako enggau Jesus, ko sida, "Pengajar, makai!" makai!" 32 Tang ko iya nyaut, "Aku bisi utai dipakai ti enda ditemu kita." 33 Nya alai ko sida murid bejako enggau diri sama diri, "Kati bisi orang udah nganjong utai dipakai ngagai iya?" 34 "Pemakai aku," ko Jesus bejako enggau sida, "Iya nya ngasi ka peneka iya ti ngasoh aku, lalu nembu ka pengawa ti di-asoh iya kereja aku. 35 Ukai enda ko kita, 'Empat bulan agi, baru ngetau.' Aku madah ka kita, peda enggau manah ngagai tanah umai; utai ditanam diatu udah mansau lalu tau diketau! 36 Orang ti ngetau bisi upah, lalu iya ngumpol buah pengidup meruan; ngambi ka orang ti nanam enggau orang ti ngetau deka bela gaga. 37 Jako banding endang amat bendar, 'Lain orang ti nanam, lain orang ti ngetau.' 38 Aku udah ngasoh kita ngetau utai ti ukai ditanam kita; orang bukai gawa dia lalu kita empu ti bulih pengun-tong ari nya." 39 Mayoh orang Samaria di nengeri nya arap ka Jesus, laban indu nya udah madah, "Iya nusoi ngagai aku samoa utai ti udah dikereja aku" 40 Nya alai leboh orang Samaria datai ngagai iya, sida minta iya diau enggau sida; lalu Jesus diau dia dua hari. 41 Orang nyau mayoh agi arap ka iya laban pesan iya, 42 lalu ko sida madah ngagai indu nya, "Kami arap diatu, ukai kategal jako nuan, tang laban kami empu udah ninga iya, lalu kami nemu iya tu endang orang ti nyadi ka Penebus dunya."
Jesus nyuman ka siko anak lelaki orang pemesai
43 Udah Jesus diau dua hari di endor nya, iya angkat lalu mansang ka Galili. 44 Laban Jesus empu udah bejako, "Nabi enda dibasa orang ba menoa iya empu." 45 Leboh iya datai di Galili, orang di endor nya nyambut penatai iya, laban sida udah enggau ngulu Gawai Paska di Jerusalem lalu udah mega meda genap bengkah utai ti dikereja iya leboh maya nya. 46 Nya alai Jesus pulai ngagai nengeri Kana di Galili, endor iya udah ngasoh ai amat bebali nyadi ai anggor. Di endor nya bisi siko orang pemesai perintah lalu anak lelaki iya di Kapernaum balat bendar sakit. 47 Leboh iya ninga berita Jesus bisi di Galili datai ari Judah, iya mansang ngagai Jesus lalu ngasoh iya datai ka Kapernaum, nyuman ka anak lelaki iya ti balat bendar sakit. 48 Ko Jesus bejako enggau iya, "Nadai siko kita deka arap, enti kita apin meda kereja ti besai enggau nyelai." 49 Disaut orang pemesai nya, "Tuan, aram enggau aku, apin anak aku mati." 50 Ko Jesus bejako enggau iya, "Pulai meh nuan, anak nuan deka idup!" Orang nya arap ka jako Jesus, lalu mupok pulai ka rumah. 51 Benong di rantu jalai iya pulai ka rumah, iya betemu enggau sida ti gawa ka iya, lalu nusoi berita ngagai iya, ko sida, "Anak lelaki nuan nyau ka gerai!" 52 Iya nanya ka ni maya jam anak iya gerai, lalu ko sida, "Kira pukol satu ngalih hari kemari, penyakit chelap ti nganu iya lalu nadai agi ba iya." 53 Udah nya baru apai anembiak nya ingat ka Jesus ti bejako enggau iya betol bendar ba maya nya jam. Ukai enda ko Jesus, "Anak lelaki nuan deka idup." Nya alai iya enggau samoa sida sabilik bela arap. 54 Nya kedua bengkah kelai digaga Jesus udah iya ti pulai ari Judah ngagai Galili.
Nyuman ka orang ba letong
5:1 Dudi agi ari nya, bisi hari besai orang Judah, lalu Jesus mansang ka Jerusalem. 2 Di Jerusalem, semak Pintu Bedus, bisi siti letong ti bisi lima i^i pintu beserambi, dalam jako Hebrew iya dikumbai Betsata. 3 Mayoh bendar orang ti sakit gali ba serambi nya—sida ti buta, ti kait enggau sida ti bajong. (Sida nganti maya ai nya ti beriak, 4 laban melikat Allah Taala selalu datai ka dalam letong lalu ngasoh ai di endor nya beriak. Nyadi orang sakit ti terubah datai ngagai letong nya leboh ai di endor nya beriak, suman magang ari barang macham penyakit ti nganu iya.) 5 Di endor nya bisi siko lelaki ti udah sakit tiga puloh lapan taun. 6 Jesus meda iya gali dia, lalu Jesus mega nemu pengelama iya ti udah sakit, nya alai ko iya bejako enggau orang nya, "Kati nuan deka gerai?" 7 Ko orang ti sakit nya nyaut, "Tuan, aku nadai orang nulong mai aku ngagai letong nya leboh maya ai beriak. Leboh aku baru nguji deka nurun ka dalam ai, orang bukai dulu agi negu ai nya ari aku." 8 Ko Jesus bejako enggau iya, "Angkat, bai tikai nuan, lalu bejalai." 9 Kemaya nya orang nya lalu suman; iya mai tikai iya lalu bejalai.
Leboh utai nya nyadi, iya nya kena Hari Sabat,
10 nya alai ko sida ti megai kuasa di menoa Judah bejako enggau iya ti udah suman nya, "Tu maya hari Sabat, nuan ngelanggar Adat kami mai tikai nuan leboh hari tu." 11 Disaut iya, "Orang ti nyuman ka aku udah madah ngagai aku munyi tu: 'Bai tikai nuan lalu bejalai.' " 12 Ko sida nanya iya, "Sapa orang nya ti udah ngasoh nuan mai tikai nuan lalu bejalai?" 13 Tang orang ti udah di-asoh suman nya enda ngelala Jesus, laban di endor nya mayoh bendar orang, lalu Jesus udah melesit sebelah orang mayoh dia. 14 Udah nya Jesus betemu enggau iya dalam kaba, lalu ko iya bejako enggau orang nya, "Peda, diatu nuan udah suman. Anang agi bedosa, enggai ka nuan kena penusah ti balat agi ari ti udah." 15 Udah nya orang nya angkat ari endor nya lalu nusoi ngagai sida ti merintah menoa Judah, pasal Jesus ti udah nyuman ka iya. 16 Kategal nya sida lalu belaboh besalah Jesus, laban iya udah ngereja pengawa nya kena Hari Sabat. 17 Ko Jesus nyaut sida, "Apai aku selalu gawa, lalu aku enda tau enda gawa." 18 Jako nya ngasoh orang ti megai perintah di menoa Judah balat agi deka munoh iya: ukai semina kategal iya ti udah ngelanggar adat Hari Sabat, tang laban iya udah ngumbai Allah Taala nya Apai iya empu, lalu ngena jalai nya iya udah ngaga diri sabaka enggau Allah Taala.
Kuasa iya ti Anak
19 Nya alai ko Jesus nyaut sida, "Bendar aku madah ka kita: Anak nadai ngereja utai ngati ka diri; iya semina ngaga utai ti dikereja Apai. Nama utai ti dikereja Apai, nya mega dikereja Anak. 20 Apai rindu ka Anak lalu madah ngagai iya samoa utai ti dikereja iya empu ngagai Anak. Iya deka nunjok ka ngagai Anak utai ti besai agi ari nya dikereja iya, lalu kita deka bela alit ati magang. 21 Baka Apai ti ngangkat ka sida ti mati idup baru, baka nya mega Anak deka meri pengidup ngagai sida ti dikedeka iya. 22 Apai nadai bechara ka sebarang orang. Iya udah meri kuasa ti penoh ngagai Anak iya kena ngator pechara, 23 ngambi ka samoa orang deka ngemesai ka Anak baka sida ti ngemesai ka Apai. Barang sapa ti enda ngemesai ka Anak, enda ngemesai ka Apai ti ngasoh iya. 24 "Enggau bendar aku madah ka kita: barang sapa ti ninga ka jako aku lalu arap ka iya ti ngasoh aku, bisi pengidup ti meruan. Iya enda kena pechara, tang udah ngelimpas pemati ngagai pengidup. 25 Enggau bendar aku madah ka kita: timpoh deka datai—tang udah datai— endor sida ti mati deka ninga munyi nyawa Anak Allah Taala, lalu sida ti ninga iya deka idup. 26 Baka Apai empu ti nyadi ka pun pengidup, baka nya mega iya ngaga Anak nyadi ka pun pengidup. 27 Lalu iya udah meri Anak kuasa kena ngator pechara, laban iya Anak Mensia. 28 Anang tekenyit ati kategal tu; timpoh deka datai endor samoa sida ti udah mati dalam pendam deka ninga munyi nyawa iya, 29 lalu sida deka pansut ari pendam; sida ti udah ngereja utai ti manah deka angkat lalu idup, lalu sida ti udah ngereja penyai deka angkat lalu di-ukum."
Saksi ka Jesus
30 "Aku enda ulih ngereja utai ngati ka diri; aku semina ngator pechara nitih ka padah Allah Taala, nya alai ator aku tetap betol, laban aku ukai ngereja. nitih ka peneka aku empu, tang semina nitih ka peneka iya ti ngasoh aku. 31 "Enti aku ngereja utai ngari ka diri empu, utai ti disebut aku tentu nadai saksi. 32 Tang orang bisi ngari ka aku nunjok ka utai nya amat ngena, lalu aku nemu utai ti disebut iya pasal aku nya endang amat. 33 Kita udah ngasoh seruan kita datai ngagai John, lalu iya bejako ka utai ti bendar. 34 Ukai reti nya aku enda tau enda bisi saksi mensia, tang kebuah aku nyebut tu ngambi ka kita tau bulih selamat. 35 John baka kelita, ditungkun sereta manchar, lalu kita enda lama gaga ka penerang ari iya. 36 Nyadi aku bisi saksi ka diri empu ti besai agi ari ti udah diberi John: pengawa ti dikereja aku nya pengawa ti di-asoh Apai aku kereja aku, utai nya nyadi ka saksi aku lalu nunjok ka Apai amat ngasoh aku'. 37 Lalu Apai ti ngasoh aku mega udah besaksi ka aku. Kita enda kala ninga munyi nyawa iya, tauka meda moa iya, 38 lalu kita nadai kala nyimpan pesan iya dalam ati kita, laban kita enda arap ka iya ti di-asoh iya datai ka dunya tu. 39 Kita belajar ka Bup Kudus laban kita ngumbai dalam iya kita bulih pengidup meruan. Lalu bup nya empu mega bejako ka pasal aku! 40 Tang taja pia, kita lalu enggai datai ngagai aku awak ka bulih pengidup. 41 "Aku enda ngiga jako puji ari mensia. 42 Tang aku nemu kita; aku nemu kita nadai pengerindu ka Allah Taala dalam ati kita. 43 Aku datai ngena kuasa Apai aku, tang kita enda nerima aku; lalu leboh orang datai ngena kuasa diri empu, kita nyambut iya. 44 Kita minta puji pangan diri; tang kita lalu enda kala nguji minta puji ari Allah Taala; ni jalai kita tau arap? 45 Anang ngumbai aku deka besalah kita ba Apai aku. Moses empu orang ti besalah kita—Moses ti dikarap ka kita. 46 Enti kita amat arap ka Moses, kita tentu bisi pengarap ka aku, laban iya nulis ka pasal aku. 47 Tang laban kita udah enda arap ka utai ti ditulis iya, dini kita deka arap ka utai ti disebut aku?"
Jesus meri makai ka lima ribu iko orang
6:1 Udah nya, Jesus pulai ka seberai Danau Galili (tauka Danau Tiberias). 2 Orang mayoh nitih ka iya, laban sida udah meda kereja besai ti udah digaga iya, iya nya nyuman ka sida ti sakit. 3 Jesus niki sigi munggu lalu dudok dia enggau sida murid iya. 4 Nyadi Gawai Paska ti hari besai orang Judah nyau semak. 5 Jesus malik kia-kia lalu meda orang mayoh bendar nitih ka iya, nya alai ko iya bejako enggau Pilip, "Dini endor kitai tau meli roti ka dempa orang ngemayoh tu?" 6 (Iya nyebut nya kena nguji Pilip; iya endang udah nemu bagi utai ti deka digaga iya.) 7 Disaut Pilip, "Keruping roti pen dempa sida siko-siko, enda mega chukop dua ratus ringgit kena meli utai nya." 8 Siko agi murid iya, Andrew, iya nya menyadi Simon Peter, bejako munyi tu: 9 "Bisi siko anembiak lelaki di endor tu ti bisi lima tuko roti ti digaga ari bali enggau ikan dua iko. Tang nama guna utai nya ka orang ti ngemayoh tu?" 10 "Asoh orang mayoh dudok," pia ko Jesus madah ngagai sida. (Nyadi di endor nya mayoh rumput.) Nya alai samoa orang bela dudok magang; samoa pemayoh sida ti lelaki kira lima ribu iko. 11 Jesus ngambi roti, meri terima kasih ngagai Allah Taala, lalu nyadong iya ngagai orang mayoh ti dudok dia. Baka nya mega iya enggau ikan, lalu orang mayoh ti dia bela kenyang magang. 12 Leboh sida bela udah kenyang magang, ko iya bejako enggau sida murid iya, "Gumpol samoa laloh iya; anang masau iya." 13 Nya alai sida lalu ngumpol samoa laloh nya, lalu ngisi dua belas iti bakol ngena laloh utai nya ari lima tuko roti bali, ti udah dempa orang mayoh. 14 Orang mayoh di endor nya meda pemesai kereja ti udah digaga Jesus, nya alai ko sida, "Iya tu tetap Nabi ti deka datai ka dunya tu!" 15 Jesus nemu sida nyau datai lalu ngambi iya, ngaga iya nyadi rajah ngena jalai pejal; nya alai iya lalu pulai kediri ngagai munggu baru.
Jesus bejalai atas ai
16 Udah hari nyau lemai, sida murid iya nurun ngagai danau, 17 nepan ka dalam perau lalu pulai ka seberai danau, ngagai Kapernaum. Hari nyau malam, lalu Jesus apin pulai ngagai sida. 18 Leboh nya hari balat bendar kabut, lalu ai danau balat bendar begelumbang. 19 Sida murid endang udah bedayong kira tiga tauka empat batu, leboh sida meda Jesus bejalai di atas ai, mansang ngagai perau sida, lalu sida balat takut. 20 "Anang takut," pia ko Jesus madah ngagai sida, "aku tu!" 21 Sida mai iya nepan ka dalam perau; lalu kemaya nya perau sida datai di tebing, ba senentang endor ti ditapat sida.
Orang mayoh ngiga Jesus
22 Hari siti orang mayoh ti diau di seberai danau nya, meda sabuah perau aja ti bisi dia. Sida nemu Jesus tentu enda nepan ka dalam perau enggau sida murid iya, tang sida murid iya udah bekejang kediri. 23 Sekeda perau bukai ari Tiberias, sangkai di tebing, ba senentang endor orang mayoh makai roti, udah bekau Tuhan ti meri terima kasih. 24 Leboh orang mayoh meda Jesus nadai dia, lalu sida murid iya mega nadai dia, sida nepan ka dalam perau lalu mansang ka Kapernaum, ngiga iya.
Jesus Roti Pengidup
25 Leboh orang mayoh nemu Jesus di seberai danau nya, ko sida bejako enggau iya, "Pengajar, kemaya nuan datai ditu?" 26 Disaut Jesus, "Enggau bendar aku madah ka kita; kita ngiga aku laban kita udah makai roti datai ka kenyang, ukai kategal kita mereti ka kuasa aku. 27 Anang kita bekereja kategal ti ngiga pemakai ti nemu lenyau; tang kita patut ngiga pemakai ti tau meri pengidup meruan. Pemakai tu, ti deka diberi Anak Mensia ka kita, laban Allah Taala ti Apai, udah meri tanda pemendar ba iya." 28 Ko sida nanya iya, "Nama ti patut dikereja kami awak ka kami ngereja pengawa ka Allah Taala?" 29 Disaut Jesus, "Tu pengawa ti di-asoh Allah Taala kereja kita: arap ka orang ti di-asoh iya." 30 Ko sida nyaut, "Nama kelai ti dikena nunjok ka kuasa nuan, ngambi ka kami tau meda lalu arap ka nuan? Nama utai ti deka dikereja nuan? 31 Sida aki ini kami makai mana di menoa puang, munyi ti ditulis dalam Bup Kudus, 'Iya meri sida roti ari serega ka dempa sida!" 32 Ko Jesus, "Enggau bendar aku madah ka kita! Utai ti diberi Moses ngagai kita nya ukai roti ari serega; iya nya Apai aku ti meri kita roti ti bendar ari serega. 33 Laban roti ti diberi Allah Taala, iya nya iya ti datai ari serega lalu meri pengidup ngagai dunya." 34 Ko sida nanya iya, "Tuan, beri ka kami roti nya belama." 35 Ko Jesus madah ngagai sida, "Aku tu roti pengidup. Iya ti datai ngagai aku enda nemu lapar; iya ti arap ka aku enda nemu aus. 36 Aku madah ka kita, diatu kita udah meda aku tang enda arap. 37 Genap iko orang ti diberi Apai aku ngagai aku, deka datai ngagai aku. Aku enda nulak sebarang orang ti datai ngagai aku, 38 laban aku udah nurun ari serega deka ngereja pengawa nitih ka peneka iya ti ngasoh aku, ukai nitih ka peneka aku empu. 39 Iya ti ngasoh aku deka ka aku ngereja utai tu: nya alai aku enda tau ngelenyau ka siko ari sida ti udah diberi iya ngagai aku, tang aku enda tau enda ngangkat ka sida pulai idup baru leboh maya pengujong dunya. 40 Laban utai ti dikedeka ka Apai aku, tu: samoa sida ti udah meda Anak lalu arap ka iya patut bulih pengidup meruan; lalu aku deka ngangkat ka sida pulai idup baru ba pengujong dunya." 41 Sida orang Judah mut-mut ka iya, laban ko iya, "Aku tu roti ti nurun ari serega." 42 Nya alai ko sida, "Iya tu Jesus anak Josep, enda pia? Kitai nemu apai enggau indai iya. Nya alai kati ko iya diatu ngumbai diri nurun ari serega?" 43 Disaut Jesus, "Badu agi mut-mut enggau diri sama diri. 44 Nadai orang tau datai ngagai aku, enti Apai ti ngasoh aku enda mai iya ngagai aku; lalu aku deka ngasoh iya angkat idup baru leboh maya pengujong dunya. 45 Sida nabi udah nulis, 'Samoa mensia deka di-ajar Allah Taala magang.' Genap iko orang ti ninga ka Apai lalu belajar ari iya, deka datai ngagai aku. 46 Ukai reti nya orang bukai udah meda Apai; semina iya ti datai ari Allah Taala aja ti udah meda Apai. 47 Enggau bendar aku madah ka kita: Iya ti arap deka bulih pengidup meruan. 48 Aku tu meh roti pengidup. 49 Sida aki ini kita makai mana di menoa puang, tang sida mati. 50 Tang roti ti datai ari serega, barang sapa ti makai iya enda tau mati. 51 Aku tu roti ti idup, ti nurun ari serega. Barang orang ti makai roti tu deka mengkang idup belama. Roti ti deka diberi aku, iya nya tuboh aku empu, ngambi ka dunya tau idup." 52 Kategal nya sida orang Judah betalat enggau diri sama diri, ko sida, "Kati ko orang tu tau meri kitai makai tuboh iya?" 53 Ko Jesus bejako enggau sida, "Enggau bendar aku madah ka kita: enti kita enda makai tuboh Anak Mensia lalu ngirup darah iya, kita deka nadai pengidup dalam kita. 54 Barang sapa ti makai tuboh aku lalu ngirup darah aku, bisi pengidup ti meruan, lalu aku deka ngangkat ka iya ari mati leboh maya pengujong dunya. 55 Laban tuboh aku nya pemakai ti bendar, lalu darah aku nya utai di-irup ti bendar. 56 Barang sapa ti makai tuboh aku lalu ngirup darah aku, deka idup dalam aku, lalu aku deka diau dalam iya. 57 Apai ti idup udah ngasoh aku, lalu kategal iya mega aku idup. Baka nya mega, barang sapa ti makai aku deka idup laban aku. 58 Tu meh roti ti datai ari serega; iya enda sabaka enggau roti ti dempa sida aki ini kita, tang udah nya mati. Iya ti makai roti tu deka meruan idup belama." 59 Jesus nyebut jako nya leboh iya ngajar orang ba kanisa di Kapernaum.
Jako pengidup meruan
60 Mayoh sida murid iya ninga nya lalu bejako, ko sida, "Ajar tu kelalu mar ba kami. Sapa ti ulih mending ka tu?" 61 Taj a orang nadai madah, tang Jesus nemu sida murid iya mutap pasal nya; nya alai ko iya bejako enggau sida, "Kati jako nya ngasoh kita ngelengka ka pengarap kita? 62 Kati enti kita meda Anak Mensia pulai ngagai endor iya ti dulu? 63 Utai ti meri pengidup nya Roh Allah Taala; kuasa mensia nadai guna sakali. Jako ti udah disebut aku ngagai kita, iya nya Roh enggau pengidup. 64 Tang agi mega sekeda kita enda arap." (Jesus nemu kenyau ari mula bagi sida ti enda arap, enggau sapa sida ti deka nyual iya.) 65 Lalu nampong nya ko iya, "Nya kebuah aku madah ka kita, nadai orang tau datai ngagai aku, enti enda ari asoh Apai." 66 Kategal nya, mayoh sida ti nitih ka iya pulai lalu enda agi sajalai enggau iya. 67 Nya alai ko Jesus bejako enggau sida murid iya dua belas iko, "Kati kita—deka kita pulai baka sida?" 68 Ko Simon Peter nyaut iya, "Tuhan, sapa orang ti dititih ka kami? Nuan bisi jako ti meri pengidup meruan. 69 Diatu kami arap lalu nemu nuan nya meh iya ti Kudus, datai ari Allah Taala." 70 Ko Jesus nyaut sida, "Kati enda aku ti milih kita dua belas iko? Tang siko ari kita nya sitan!" 71 Iya bejako ka pasal Judas, anak Simon Iskariot. Laban Judas, taja iya siko ari sida dua belas iko murid, iya deka nyual Jesus.
Jesus enggau sida menyadi Iya
7:1 Udah nya Jesus bejalai di menoa Galili; iya enggai bejalai di Judah, laban sida pemerintah orang Judah bisi di endor nya, deka munoh iya. 2 Nyadi Gawai belangkau orang Judah nyau semak, 3 nya alai ko sida menyadi Jesus bejako enggau iya, "Angkat ari endor tu lalu mansang ka Judah, ngambi ka sida murid nuan meda pengawa ti digaga nuan. 4 Nadai orang deka belalai ka pengawa diri, enti iya endang amat ditemu orang. Laban nuan endang ngaga kereja nya, awak ka samoa dunya nemu pasal nuan." 5 (Datai ka sida menyadi iya mega enda arap ka iya.) 6 Ko Jesus bejako enggau sida, "Timpoh aku apin datai. Kita tau ngereja utai sebarang maya. 7 Dunya enda tau begedi ati ngagai kita, tang iya begedi ngagai aku, laban aku seruran madah ka iya, jalai iya jai. 8 Alai meh kita ngagai gawai, aku empu enda ngagai gawai nya, laban timpoh aku apin datai." 9 Iya nyebut nya ngagai sida lalu agi diau di Galili.
Jesus ngabang Gawai Belangkau
10 Udah sida menyadi iya mansang ngagai gawai, Jesus mega mansang kia, tang iya enda ngayan ka diri—ngena jalai belalai. 11 Sida pemerintah orang Judah ngiga iya leboh gawai nya, ko sida nanya, "Dini endor iya?" 12 Orang mayoh bejako belalai ngenang pasal iya, ko sida, "Iya nya orang ti manah." Sekeda madah, "Ukai iya orang ti manah." Mayoh mega madah, "Iya semina beduan orang mayoh." 13 Tang nadai siko orang berani bejako ka pasal iya enggau nyawa ti inggar, laban sida takut ka pemerintah orang Judah. 14 Benong gawai nya Jesus mansang ka dalam kaba lalu ngajar orang mayoh. 15 Sida pemerintah orang Judah tekenyit bendar ati, lalu ko sida, "Kati ko orang tu mayoh bendar penemu, tang iya empu nadai kala besekula?" 16 Disaut Jesus, "Utai ti di-ajar aku' nya ukai penemu aku empu, tang datai ari Allah Taala, iya ti ngasoh aku. 17 Barang sapa ti deka nitih ka utai ti dikedeka Allah Taala, deka nemu sekali ka utai ti di-ajar aku datai ari Allah Taala, tauka aku bejako ngena kuasa diri. 18 Orang ti bejako ngati kediri deka nguji ngiga nama ka diri empu. Tang iya ti deka ka mulia iya ti ngasoh iya, betol ati, lalu nadai utai ti bula mimit dalam iya. 19 Moses udah meh kita Adat, enda pia? Tang nadai siko kita ti ngasi ka Adat nya. Nama kebuah kita nguji deka munoh aku?" 20 Disaut orang mayoh, "Nuan tu bisi antu jai dalam nuan! Sapa orang ti nguji deka munoh nuan?" 21 Disaut Jesus, "Aku ngaga siti kereja ti besai, lalu kita bela alit ati. 22 Laban Moses ngasoh kita enda tau enda nyunat anak kita ti lelaki (taja utai nya ukai bepun ari Moses tang ari sida aki ini kita), kita nyunat anembiak ti lelaki leboh maya Hari Sabat. 23 Enti anembiak lelaki disunat leboh maya Hari Sabat nitih ka Adat Moses, nama kebuah kita ringat ngagai aku, laban aku nyuman ka mensia leboh Hari Sabat? 24 Badu agi nyangka orang ari utai ti dipeda aja, tang kita patut nyangka orang enggau utai ti bendar."
Kati iya amat Mesiah?
25 Sekeda sida di Jerusalem bejako, ko sida, "Kati ukai iya tu ti deka dibunoh sida? 26 Peda! Iya bejako ba moa orang mayoh, lalu nadai siko orang bejako nge-laban iya! Kati sida pemerintah enda nemu iya ti endang Mesiah? 27 Tang leboh Mesiah datai, nadai siko orang nemu ari ni penatai iya. Lalu kitai bela nemu penatai orang tu." 28 Leboh Jesus ngajar dalam kaba, iya bejako enggau nyawa ti inggar, ko iya, "Kati kita amat nemu aku, lalu nemu ari ni penatai aku? Tang aku ukai datai ari peneka aku empu. Iya ti ngasoh aku nya endang amat. Kita enda nemu iya, 29 tang aku nemu iya, laban aku datai ari iya lalu iya ngasoh aku." 30 Udah nya sida nguji deka nangkap iya, tang nadai siko sida berani ngelaboh ka jari, laban timpoh iya apin datai. 31 Tang mayoh orang ti dia arap ka iya, lalu ko sida, "Leboh Mesiah datai, kati iya deka ngereja mayoh agi kerja ti nyelai ari ti digaga orang tu?"
Sida jejaga di-asoh nangkap Jesus
32 Sida orang Parisi ninga orang mayoh bejako belalai ngenang pasal iya, nya alai sida enggau tuai imam, ngasoh jejaga nangkap Jesus. 33 Ko Jesus, "Aku deka begulai enggau kita enda lama agi, udah nya aku pulai ngagai iya ti ngasoh aku. 34 Kita deka ngiga aku, tang kita enda tetemu ka aku, laban endor aku diau enda tau digagai kita." 35 Ko sida pemerintah orang Judah bejako enggau diri sama diri, "Kini ka iya deka bejalai alai kitai enda tau betemu enggau iya? Kati iya deka bejalai ngagai nengeri di menoa Gerika ti endor orang Judah diau, lalu ngajar orang Gerika? 36 Ko iya, 'Kita deka ngiga aku tang enda tetemu ka aku,' lalu 'Kita enda tau bejalai ngagai endor aku bejalai.' Nama reti jako iya nya?"
Mata ai ti idup
37 Nyadi ba hari ti pengabis gawai nya, nya hari ti pemadu beguna. Leboh hari nya Jesus bediri lalu bejako enggau nyawa ti inggar, ko iya, "Barang sapa ti aus datai ngagai aku lalu ngirup. 38 Munyi ti udah ditulis dalam Bup Kudus, 'Barang sapa ti arap ka aku mata ai ti idup deka lilih ari ati iya.' " 39 Jesus nyebut nya ngenang pasal Roh ti deka disambut sida ti arap ka iya. Leboh maya nya Roh apin diberi, laban Jesus apin di-angkat ka ngagai mulia.
Penemu orang mayoh bebagi
40 Mayoh orang ninga iya nyebut jako nya, lalu ko sida, "Orang tu tentu nabi!" 41 Sekeda bejako, "Iya tu Mesiah!" Tang sekeda bejako, "Mesiah enda datai ari Galili! 42 Munyi ti ditulis dalam Bup Kudus, 'Mesiah deka datai ari peturun David lalu ada di Betlehem, nengeri ti endor David diau." 43 Nya alai penemu orang bala mayoh ti dia pasal iya enda sabaka. 44 Sekeda deka nangkap iya, tang nadai siko berani ngelaboh ka jari ba iya.
Sida Pemerintah orang Judah enda arap
45 Sida jejaga pulai ngagai sida tuai imam enggau orang Parisi, ti nanya sida, "nama kebuah kita enda mai iya?" 46 Disaut sida jejaga, "Nadai siko orang kala bejako munyi orang nya!" 47 Ko orang Parisi nanya sida, "Kati kita tesat penemu laban iya? 48 Bisi kita nemu siko sida pemerintah enggau orang Parisi ti arap ka iya? 49 Orang bala mayoh tu enda nemu Adat Moses, nya kebuah sida kena sumpah Allah Taala!" 50 Nikodemus nya siko ari sida; iya mega orang ti udah betemu enggau Jesus dulu ari nya. Ko iya bejako enggau sida. 51 "Nitih ka Adat kitai, kitai enda tau ngukum orang ngapa enti kitai apin ninga penemu iya, lalu apin tetemu ka pengawa ti udah dikereja iya." 52 Disaut sida, "Kati nuan datai ari Galili? Perati ka dalam Bup Kudus, lalu nuan deka nemu, nadai sida ti nyadi nabi kala datai ari Galili."
Indu ti ditangkap benong butang
8:1 Udah nya genap iko orang bela pulai ka rumah, tang Jesus empu mansang ngagai Bukit Kana. 2 Tumu pagi siti iya pulai ka dalam kaba baru. Orang mayoh datai ngelingi iya, lalu iya dudok sereta ngajar sida. 3 Sida orang pengajar Adat enggau orang Parisi datai ngagai iya, mai siko indu ti ditangkap sida benong iya butang, lalu sida ngasoh iya bediri ba moa orang mayoh. 4 Ko sida bejako enggau Jesus, "Pengajar indu tu ditangkap kami benong iya butang. 5 Dalam Adat kami, Moses udah meri pesan, madah ka indu ti baka nya enda tau enda dituku enggau batu datai ka mati. Nya alai diatu, nama runding nuan?" 6 Sida nyebut nya kena nguji iya, awak ka sida ulih besalah iya. Tang Jesus meremi sereta nulis ba tanah ngena tunjok jari iya. 7 Ninga sida itok nanya iya, dia iya angkat lalu bejako, ko iya, "Barang kita ti nadai kala bedosa tau dulu nuku indu nya ngena batu." 8 Udah nya iya meremi baru lalu nulis ba tanah. 9 Leboh sida ninga nya, sida bela angkat siko-siko, iya ti tuai angkat dulu. Jesus tinggal kediri, lalu indu nya bediri dia. 10 Jesus ngangkat ka diri lalu bejako enggau indu nya, "Kini ka tunga sida tadi, indu? Kati nadai siko sida ti tinggal ngukum nuan?" 11 "Nadai tuan," ko indu nya nyaut iya. "Enti baka nya," ko Jesus, "aku mega enda ngukum nuan. Pulai dalam selamat, tang nuan anang bedosa agi."
Jesus ti penerang dunya
12 Jesus bejako baru enggau sida, ko iya, "Aku tu penerang dunya. Barang sapa ti nitih ka aku deka bisi penerang ti ngasoh idup, lalu enda mudah bejalai dalam pemetang." 13 Ko sida orang Parisi bejako enggau iya, "Diatu nuan bejako besaksi ka diri empu; utai ti disebut nuan nya nadai pemendar mimit." 14 Disaut Jesus, "Ukai pia, nyema aku besaksi ka diri empu, utai ti ko aku endang amat, laban aku nemu penatai diri, lalu nemu tuju pejalai diri. Kita enda nemu ari ni penatai aku tauka kini ka tuju pejalai aku. 15 Jalai kita berati ka pendiau orang baka gaya mensia; aku nadai nyangka sebarang orang. 16 Tang enti aku nyangka orang, utai ti disangka aku nya tentu amat, laban utai nya ukai dikereja aku siko; Apai ti ngasoh aku, nya ti enggau aku. 17 Ukai enda bisi ditulis dalam Adat kita, enti dua iko saksi sama satuju, nya baru iya amat. 18 Nyadi aku besaksi ka diri empu, lalu Apai ti ngasoh aku mega besaksi ngari ka aku." 19 "Dini endor Apai nuan?" ko sida nanya iya. "Kita enda nemu aku lalu enda mega nemu Apai aku," ko Jesus, "Enti kita nemu aku, kita mega nemu Apai aku." 20 Samoa jako nya disebut Jesus leboh iya ngajar dalam kaba, ba bilik ti endor nyimpan peti sarang pemeri. Nadai siko orang nangkap iya, laban timpoh iya apin chukop.
Kita enda tau ngagai endor ti digaga aku
21 Jesus bejako enggau sida baru, ko iya, "Aku deka bejalai: kita deka ngiga aku, tang kita deka mati dalam dosa kita. Kita enda tau ngagai endor ti digagai aku." 22 Nya alai ko sida pemerintah Judah bejako, "Ko iya, "Kita enda tau ngagai endor ti digagai aku.' Kati reti jako nya iya deka munoh diri empu?" 23 Disaut Jesus, "Kita datai ari baroh, lalu aku datai ari atas. Kita datai ari dunya tu, tang aku ukai datai ari dunya. 24 Nya kebuah aku madah ka kita, kita deka mati dalam dosa kita. Kita deka mati dalam dosa kita enti kita enda arap ka 'Aku meh Aku.' " 25 "Sapa nuan tu?" ko sida nanya iya. Disaut Jesus, "Munyi ti udah dipadah aku ngagai kita kenyau ari mula. 26 Agi mayoh utai ti deka ditusoi enggau diletak aku pasal kita. Iya ti ngasoh aku, nya meh iya ti bendar, lalu aku nusoi ngagai dunya semina utai ti udah didinga aku ari iya." 27 Sida enda nemu utai ti ditusoi iya ngagai sida nya pasal Apai. 28 Nya alai ko Jesus bejako enggau sida, "Leboh kita ngangkat ka Anak Mensia, nya baru kita deka nemu 'Aku meh Aku'; udah nya kita deka nemu aku nadai ngereja utai ngati ka diri, tang semina nyebut utai ti udah di-ajar Apai ngagai aku. 29 Lalu iya ti ngasoh aku enggau aku; iya nadai kala neju ka aku kediri, laban aku selalu ngereja utai ti dikerindu ka iya." 30 Mayoh sida ti ninga Jesus nyebut utai nya arap ka iya.
Sida ti dilepas enggau ti nyadi ulun
31 Ko Jesus bejako enggau orang Judah ti arap ka iya, "Enti kita ngasi ka ajar aku, kita amat murid aku ti bendar; 32 kita deka nemu utai ti bendar, lalu pemendar nya deka ngelepas ka kita." 33 "Kami tu peturun Abraham," ko sida nyaut, "lalu kami nadai kala udah nyadi ulun orang. Nama reti jako nuan madah ka, 'Kita deka dilepas'?" 34 Ko Jesus bejako enggau sida, "Enggau bendar aku madah ka kita: genap iko orang ti ngaga dosa nyadi ka ulun dosa. 35 Ulun ukai enggi diri sabilik belama, tang anak baru meruan dalam diri sabilik belama. 36 Enti Anak ngelepas ka kita, reti nya kita amat dilepas. 37 Aku nemu kita datai ari peturun Abraham. Tang kita mengkang nguji deka munoh aku, laban kita enda nerima ajar aku. "Aku bejako ngenang utai ti udah dipadah Apai aku ngagai aku, tang kita ngereja utai ti udah dipadah apai kita ngagai kita." 39 Ko sida nyaut iya, "Apai kami Abraham." "Enti kita amat anak Abraham," ko Jesus, "Kita tentu ngereja utai baka ti udah digaga iya. 40 Samoa utai ti udah digaga aku nusoi utai ti bendar ngagai kita, utai ti udah didinga aku ari Allah Taala. Tang agi mega kita nguji deka munoh aku. Abraham nadai ngereja utai baka nya! 41 Kita ngereja utai nitih ka pengawa ti udah dikereja apai kita." "Semina siko Allah Taala aja ti Apai kami," pia ko saut sida. "Kami tu anak iya ti bendar." 42 Ko Jesus bejako enggau sida, "Enti Allah Taala nya amat apai kita, kita tentu rindu ka aku, laban aku datai ari Allah Taala, lalu diatu aku bisi ditu. Aku ukai datai ari peneka aku empu, tang iya ti ngasoh aku datai. 43 Nama kebuah kita enda mereti ka utai ti disebut aku? Laban kita enggai ninga ka pesan aku. 44 Kita anak apai kita Sitan, lalu kita deka nunda pengawa apai kita. Kenyau ari mula iya udah nyadi orang pemunoh. Iya nadai kala ngereja utai ti bendar, laban iya nadai bisi pemendar. Leboh iya nusoi utai bula, iya semina ngereja utai ti selalu dikereja iya, laban iya bula, nya alai iya nyadi ka apai samoa utai ti bula. 45 Aku nusoi utai ti bendar nya kebuah kita enda arap ka aku. 46 Sapa kita ti ulih madah ka aku amat bedosa? Enti aku nusoi utai ti bendar, nama kebuah kita enda arap ka aku? 47 Iya ti datai ari Allah Taala ninga ka jako Allah Taala. Tang kita ukai ari Allah Taala, nya kebuah kita enda ninga ka jako iya."
Jesus enggau Abraham
48 Ko orang Judah nyaut Jesus, "Kati enda betol utai ti ko kami, ti ngumbai nuan orang Samaria sereta bisi antu dalam nuan?" 49 "Aku nadai antu," ko Jesus, "Aku bebasa ka Apai aku, tang kita enda bebasa ka aku. 50 Aku enda ngiga basa ka diri empu. Bisi siko orang ti ngiga basa, iya ti bechara ngari ka aku. 51 Enggau bendar aku madah ka kita: barang sapa ti ngasi ka pesan aku iya enda nemu mati." 52 Ko sida orang Judah bejako enggau iya, "Diatu baru kami nemu nuan bisi antu! Abraham mati, lalu sida nabi mega udah mati, tang nuan majak ngumbai, 'barang sapa ti ngasi ka pesan aku enda nemu mati.' 53 Apai kami Abraham udah mati; nuan tentu enda ngumbai diri bekuasa agi ari Abraham, enda pia? Lalu sida nabi mega udah mati. Sapa nuan tu ko pikir nuan?" 54 Disaut Jesus, "Enti aku ngemesai ka diri empu, utai nya nadai reti. Iya ti ngemesai ka aku nya Apai aku—iya ti dikumbai kita Allah Taala kita. 55 Kita enda nemu iya, tang aku nemu iya. Enti aku ngumbai diri enda nemu iya, reti nya aku bula baka kita. Tang aku nemu iya, lalu ngasi ka jako iya. 56 Apai kita Abraham andal ati deka meda hari aku, iya meda hari nya lalu iya gaga." 57 Ko sida orang Judah bejako enggau iya, "Umor nuan apin bulih lima puloh taun—lalu nuan madah ka diri udah meda Abraham!" 58 Disaut Jesus, "Enggau bendar aku madah ka kita. Apin Abraham ada, aku endang udah bisi." 59 Udah nya sida ngambi batu deka nuku iya; tang Jesus belalai lalu pansut ari kaba nya.
Jesus nyuman ka siko ielaki ti buta
9:1 Leboh Jesus bejalai, dia iya meda siko lelaki ti buta kenyau ari ada. 2 Ko sida murid iya nanya iya, "Pengajar, sapa ti bempu dosa ti ngujong ka iya ada buta? Dosa iya empu tauka dosa apai indai iya?" 3 Disaut Jesus, "Iya ti buta nya ukai kategal dosa iya empu tauka dosa apai indai iya. Iya buta, ngambi ka kuasa Allah Taala tau dipeda orang kategal iya. 4 Kitai enda tau enda ngereja pengawa iya ti ngasoh aku, tekala hari agi siang. Malam nyau semak lalu nadai orang ulih kereja. 5 Leboh aku di dunya tu, aku nyadi ka penerang dunya." 6 Udah iya nyebut jako nya, Jesus nge-ludah di tanah lalu ngaga tanah luchak nya enggau ludah iya; iya ngunsut mata orang ti buta nya ngena tanah nya, 7 sereta madah ngagai iya, "Alai, pungas moa nuan ba Telaga Siloam." (Reti nama nya "Di-asoh.") Nya alai orang nya lalu angkat, mungas moa iya lalu pulai baru, sereta ulih meda. 8 Udah nya sida pangan iya enggau orang mayoh ti udah meda iya minta utai ari orang, nanya, ko sida, "Ukai iya tu ti selalu dudok minta utai ari orang?" 9 Ko sekeda sida, "Iya meh nya," tang sekeda ngumbai, "Ukai, ukai iya tu, tang gamal saduai sabaka." Nya alai ko iya empu bejako, "Aku tu meh ti selalu minta utai." 10 "Kati ko mata nuan tau menchelak deh?" ko sida nanya iya. 11 Ko saut iya, "Orang ti benama Jesus, ngaga tanah luchak lalu ngunsut mata aku ngena tanah nya, udah nya ko iya bejako enggau aku, 'Alai, mansang ngagai Siloam, lalu pungas moa nuan.' Nya alai aku mansang kin, sereta aku mungas moa diri aku lalu ulih meda utai." 12 "Dini endor iya?" ko sida nanya. "Enda aku nemu," pia ko iya nyaut sida.
Sida orang Parisi mansik pasal penyuman nya
13 Udah nya sida mai orang ti udah buta nya ngagai orang Parisi. 14 Nyadi hari Jesus ngaga tanah luchak ti dikena iya ngasoh mata orang ti buta nya menchelak, iya nya kena Hari Sabat. 15 Sida orang Parisi agi nanya orang nya, kebuah iya ulih meda. Ko iya nusoi ngagai sida, "Iya ngunsut mata aku ngena tanah luchak, udah nya aku mungas moa diri, lalu diatu aku ulih meda." 16 Sekeda orang Parisi bejako ko sida, "Orang ti ngereja utai tu ukai ari ator Allah Taala, laban iya enda ngasi ka adat Hari Sabat." Tang sekeda sida bejako munyi tu: "Dini orang ti bedosa ulih ngereja pengawa ti nyelai baka nya?" Nya alai kategal nya penemu sida pasal utai nya enda sabaka. 17 Nya alai orang Parisi nanya orang nya sakali agi, ko sida, "Nuan bejako madah ka iya udah menchelak ka mata nuan, nya alai nama runding nuan pasal orang nya?" "Iya nya nabi," pia ko saut iya. 18 Taj a iya munyi nya, tang sida orang Judah enda arap ka iya udah buta, lalu diatu ulih meda, datai ka sida manggil apai indai iya, 19 lalu nanya saduai, ko sida, "Kati iya tu amat anak saduai? Saduai madah ka iya udah buta kenyau ari ada; kati ko iya ulih meda diatu?" 20 Ko apai indai iya nyaut sida, "Kami duai nemu iya tu anak kami duai, lalu kami duai mega nemu iya udah buta kenyau ari ada. 21 Tang kami duai enda nemu kati ko iya ulih meda diatu, lalu enda mega kami duai nemu, sapa ti menchelak ka mata iya. Tanya iya; iya empu nyau besai, lalu nemu nyaut kita!" 22 Kebuah apai enggau indai iya munyi nya, laban saduai takut ka orang Judah. Sida udah satuju, sebarang orang ngumbai Jesus nya Mesiah deka dibuai ari kanisa. 23 Nya kebuah apai saduai indai iya nyebut, "Iya nyau besai; tanya iya empu!'' 24 Kedua kali sida madah ka orang nya ti udah buta kenyau ari ada, lalu ko sida bejako enggau iya, "Besemaya di moa Allah Taala—nuan deka nusoi utai ti bendar! Kami nemu orang tu endang orang ti bedosa." 25 "Aku enda nemu, sekali ka iya nya orang ti bedosa tauka ukai," ko iya nyaut. "Siti utai ti ditemu aku; aku udah buta, lalu diatu aku ulih meda." 26 Ko sida nanya iya, "Kati ko iya enggau mata nuan? Baka ni jalai iya menchelak ka mata nuan?" 27 Disaut iya, "Aku udah madah ka kita, lalu kita enda arap. Nama kebuah kita agi nanya ka utai nya baru? Kada enda kita empu deka nyadi murid iya?" 28 Sida mechat iya, lalu ko sida, "Nuan nyadi murid orang nya; kami tu murid Moses. 29 Kami nemu Allah Taala udah bejako ngagai Moses. Nyadi pasal orang nya—penatai iya deh kami enda nemu!" 30 Disaut orang nya, "Tu utai ti nyelai bendar! Kita enda nemu ari ni penatai iya, tang iya udah menchelak ka mata aku! 31 Kitai bela nemu Allah Taala enggai ninga ka orang ti bedosa; iya mending ka orang ti bebasa ka iya lalu ngereja utai ti dikedeka iya. 32 Kenyau ari dunya nyadi kelia, kitai nadai kala ninga berita orang ulih ngasoh mata orang ti buta kenyau ari ada—menchelak; 33 semadi meh orang nya datai ari Allah Taala, nya baru iya ulih ngereja utai nya." 34 Disaut sida, "Nuan tu orang ti bedosa kenyau ari ada—lalu nuan nguji deka ngajar kami?" Lalu sida muai iya ari kanisa.
Pemuta ba roh
35 Jesus bisi ninga sida udah muai orang ti buta nya. Iya betemu enggau orang nya, lalu ko iya, "Kati nuan arap ka Anak Mensia?" 36 Disaut orang nya, "Padah ngagai aku, sapa orang nya, tuan, awak ka aku tau arap ka iya!" 37 Ko Jesus bejako enggau iya, "Nuan udah meda iya, lalu iya meh ti berandau enggau nuan diatu." 38 "Aku arap, Tuhan!" pia ko iya. Udah nya iya lalu besugang di moa Jesus. 39 Ko Jesus, "Aku datai ka dunya tu deka ngeletak ukum, ngambi ka orang ti buta ulih meda, lalu orang ti meda nyadi buta." 40 Sekeda orang Parisi ti enggau iya dia, ninga iya nyebut jako nya, lalu ko sida nyaut iya, "Kati reti jako nuan nya, kami tu sama buta?" 41 Disaut Jesus, "Enti kita buta kita nadai penyalah; tang laban ko kita, 'kami ulih meda,' reti nya kita mengkang bisi penyalah."
Jako sempama pasal kandang domba
10:1 "Enggau bendar aku madah ka kita: orang ti tama ka dalam kandang domba enda nengah pintu, tang niki nengah jalai bukai, orang nya penchuri enggau perumpak. 2 Tang iya ti tama ka dalam nengah pintu, nya orang ti endang pengibun domba. 3 Orang ti jaga pintu nya muka pintu ka iya; raban domba mega ngelala nyawa iya leboh iya ngumbai sida, nyebut nama sida siko-siko, lalu iya ngulu ka sida pansut. 4 Udah iya mai sida pansut, iya bejalai dulu ari sida, lalu raban domba nya riitih ka iya, laban sida ngelala nyawa iya. 5 Sida enda nitih ka orang bukai, tang sida lari ari orang bukai, laban sida enda ngelala munyi nyawa iya." 6 Jesus nusoi jako sempama tu ngagai sida, tang sida enda mereti ka utai ti dipadah iya ngagai sida.
Jesus pengibun domba ti badas
7 Nya alai ko Jesus bejako baru, "Enggau bendar aku madah ka kita: aku tu baka pintu kandang domba. 8 Samoa orang bukai ti datai dulu agi ari aku nya penchuri enggau perumpak; tang domba enda ninga ka sida. 9 Aku tu pintu. Barang sapa t: tama ka dalam nengah aku deka bulih selamat; iya deka keluar masok, lalu tetemu ka rumput alai ngulam. 10 Nyadi penchuri datai laban deka enchuri, munoh sereta ngerusak utai. Aku datai awak ka sida tau bulih pengidup, pengidup ti penoh belipat-lipat. 11 "Aku tu pengibun domba ti badas. Pengibun domba ti badas meri nyawa diri kena ngidup ka domba. 12 Orang gaji ti ukai pengibun domba, ti ukai bempu domba ninggal ka sida leboh iya meda ukoi kampong datai; nya alai ukoi kampong nangkap domba sereta mambar ka sida. 13 Orang gaji nya lari laban iya semina makai gaji aja, nya alai iya enda iboh ka domba. 14-15 Aku tu pengibun domba ti badas. Baka Apai nemu aku lalu aku nemu Apai, baka nya mega aku nemu domba aku, lalu sida nemu aku. Lalu aku deka meri nyawa diri kategal sida. 16 Bisi mega domba bukai ti enggi aku, tang nadai dalam kandang tu. Aku mega enda tau enda mai sida; sida deka ninga ka nyawa aku, lalu ila deka nyadi siti raban enggau siko pengibun. 17 "Apai rindu ka aku laban aku deka meri nyawa diri, awak ka aku tau ngambi iya pulai baru. 18 Nadai orang deka ngambi nyawa aku ari aku. Tang aku meri nyawa diri enggau peneka ati aku empu. Aku bisi kuasa meri nyawa diri, lalu aku mega bisi kuasa ngambi iya pulai baru. Nya utai ti udah di-asoh Apai aku kereja aku." 19 Penemu orang Judah enda sabaka baru, laban leka jako nya. 20 Mayoh sida bejako, "Iya bisi antu! Iya tu gila! Nama kebuah kita ninga ka jako iya?" 21 Tang sekeda bejako, "Orang ti bisi antu enda nemu bejako munyi nya! Dini antu ulih ngasoh mata orang ti buta menchelak?"
Jesus dikenggai orang Judah
22 Timpoh udah datai endor ngintu Gawai Penyerah di Jerusalem; leboh nya benong musin chelap. 23 Leboh Jesus bejalai ba Serambi Solomon dalam kaba, 24 dia orang Judah datai ngagai iya, ko sida, "Ni agi pengelama nuan enda madah'ka utai nya ngagai kami? Padah ka kami enggau bendar: kati nuan tu Mesiah?" 25 Disaut Jesus, "Aku udah madah ngagai kita, tang kita enda arap ka aku. Pengawa ti dikereja aku dalam nama Apai aku, nya besaksi ka aku; 26 tang kita enda arap, laban kita ukai domba aku. 27 Raban domba aku ninga ka munyi nyawa aku; aku nemu sida lalu sida nitih ka aku. 28 Aku meri sida pengidup ti meruan lalu sida enda tau mati; lalu nadai siko orang ulih ngerampas sida ari aku. 29 Utai ti udah diberi Apai aku ngagai aku besai ari samoa utai, lalu nadai siko orang ulih ngerampas sida ari jaga Apai aku. 30 Apai enggau aku endang siko aja." 31 Udah nya orang Judah sakali agi ngambi batu deka nuku iya. 32 Ko Jesus bejako enggau sida, "Aku udah ngayan ka ngagai kita mayoh kereja ti badas, ti di-asoh Apai kereja aku. Iya ti ni ngasoh kita ringat lalu deka nuku aku enggau batu?" 33 Orang Judah nyaut iya, ko sida, "Kami ukai deka nuku nuan kategal kereja ti badas, tang kategal jako jai ti dipansut ka nuan mechat Allah Taala! Nuan -semina mensia aja, tang nuan nguji ngaga diri nyadi Allah Taala!" 34 Disaut Jesus, "Ukai enda udah ditulis dalam Adat kita, jako Allah Taala ti munyi tu: 'Kita nya petara.' 35 Kitai nemu utai ti ditulis dalam Bup Kudus nya bendar belama-lama; lalu Allah Taala ngumbai sida petara, sida ti nerima pesan iya. 36 Nyadi pasal aku, Apai udah milih aku lalu ngasoh aku datai ka dunya tu. Kati ko kita ngumbai aku mechat Allah Taala, kategal aku ti madah ka diri Anak Allah Taala?" 37 Manah agi kita anang arap ka aku enti aku enda ngereja pengawa ka Apai aku. 38 Tang enti aku ngereja utai nya, taja kita enda arap ka aku, kita tentu arap ka pengawa ti dikereja aku, ngambi ka kita tau nemu Apai endang bisi dalam aku, lalu aku bisi dalam Apai." 39 Sakali agi sida nguji deka nangkap iya, tang iya ngelepas ka diri ari jari sida. 40 Jesus pulai ka seberai Batang Jordan baru, ngagai endor alai John maptisa orang dulu kelia, lalu diau dia. 41 Mayoh orang datai ngagai iya, ko sida, "John nadai ngaga kereja ti nyelai, tang Samoa utai ti disebut iya pasal orang tu amat magang." 42 Lalu mayoh orang di endor nya arap ka iya.
Pemati Lasarus
11:1 Nyadi bisi siko lelaki ti benama Lasarus, ti diau di Betani, kena sakit. Betani nya nengeri ti endor Maria enggau menyadi indu iya ti benama Marta diau. 2 (Maria nya ti ngiri minyak wangi ba kaki Tuhan lalu ngendas kaki iya ngena bok iya; menyadi lelaki iya Lasarus ti kena sakit.) 3 Saduai menyadi mesan ka Jesus munyi tu, "Tuhan, pangan ti dikerindu nuan kena sakit." 4 Leboh Jesus ninga pesan nya, iya bejako, ko iya, "Penyakit nya enda ngasoh Lasarus mati; utai nya nyadi dikena ngemesai ka nama Allah Taala, ngambi ka Anak Allah Taala tau nyadi besai kategal iya." 5 Jesus rindu ka Marta enggau menyadi indu iya, lalu baka nya mega iya rindu ka Lasarus. 6 Leboh iya ninga berita ti madah ka Lasarus kena sakit, iya agi diau dia dua hari da. 7 Udah nya ko iya bejako enggau sida murid, "Aram kitai pulai ngagai menoa Judah baru." 8 Ko sida bejako enggau iya,' 'Pengajar, apin bangat lama orang Judah deka nuku nuan enggau batu; nama kebuah nuan berunding deka pulai kia baru?" 9 Ko Jesus, "Sahari bisi dua belas jam—enda pia? Nya alai enti orang bejalai dalam siang, iya enda tesangkut, laban iya meda penerang dunya tu. 10 Tang enti iya bejalai dalam petang iya tentu teterap, laban dalam iya nadai penerang." 11 Jesus nyebut nya, lalu nampong baru, "Pangan kitai Lasarus udah tindok, tang aku deka kin lalu ngerak iya." 12 Ko sida murid iya, "Enti iya tindok, Tuhan, iya tentu deka gerai." 13 Tang reti ti ko Jesus nya Lasarus udah mati; dalam runding sida ngumbai Lasarus amat tindok. 14 Nya alai Jesus lalu terus madah ka sida, ko iya, "Lasarus udah mati; 15 tang kategal kita aku berasai gaga laban aku enda enggau iya, nya alai kita deka arap. Aram kitai mansang ngagai iya." 16 Thomas (ti dikumbai Sapit) bejako enggau sida ti sama murid, ko iya, "Aram kitai bela enggau pengajar, ngambi ka kitai bela mati sama enggau iya!"
Jesus ti pengangkat enggau pengidup
17 Leboh Jesus datai, iya ninga Lasarus baru empat hari udah dikubor. 18 Nyadi penyaoh Betani ari Jerusalem enda lebih ari tiga kilometer, 19 lalu orang Judah mayoh bendar datai ngagai Marta saduai Maria, ngelantang ka ati saduai kategal pemati menyadi lelaki saduai. 20 Leboh Marta ninga berita Jesus udah datai, iya lalu mansang ngambat iya, tang Maria tinggal di rumah. 21 Ko Marta bejako enggau Jesus, "Enti nuan bisi ditu suba, Tuhan, menyadi aku tentu enda mati! 22 Tang aku nemu, diatu pen Allah Taala deka meri nuan sebarang utai ti dipinta nuan ari iya." 23 "Menyadi nuan deka angkat idup baru," ko Jesus madah ngagai iya. 24 Disaut iya, "Aku nemu iya deka angkat idup baru, leboh maya pengujong dunya." 25 Ko Jesus bejako enggau iya, "Aku tu ti pengangkat enggau pengidup. Barang sapa ti arap ka aku deka idup, taja iya mati; 26 lalu barang sapa ti idup lalu arap ka aku—enda tau mati. Kati nuan arap ka tu?" 27 "Arap, Tuhan!" ko iya nyaut, "Aku arap ka nuan ti Mesiah, Anak Allah Taala, ti datai ka dalam dunya tu."
Jesus nyabak
28 Udah Marta nyebut nya iya pulai, lalu belalai madah ka menyadi iya Maria, ko iya, "Pengajar bisi ditu, lalu iya nanya ka nuan." 29 Udah Maria ninga nya iya angkat lalu beguai betemu enggau iya. 30 (Jesus apin datai di endor nya, tang iya agi mengkang ba endor alai Marta betemu enggau iya.) 31 Nyadi sida orang Judah ti enggau Maria dalam rumah nya, ngelantang ka iya, lalu nitih ka iya leboh meda iya beguai angkat lalu nurun. Dalam runding sida iya mansang ka pendam lalu nyabak din. 32 Leboh Maria datai ba endor Jesus lalu meda iya, Maria lalu ngungkor ka diri di kaki iya, ko iya, "Tuhan, enti nuan bisi ditu suba menyadi lelaki aku tentu enda nyadi mati!" 33 Jesus meda iya nyabak, lalu orang Judah ti datai enggau iya mega bela nyabak; iya tusah bendar ati sereta sinu meda sida, ko iya, 34 "Dini endor kita ngubor ka iya?" "Aram, awak ka nuan meda Tuhan," pia ko sida nyaut iya. 35 Jesus nyabak. 36 Nya alai ko sida orang Judah bejako, "Peda gaya penge-rindu iya ka Lasarus!" 37 Tang sekeda sida bejako munyi tu: "Ukai enda iya tu ti ngasoh mata orang buta menchelak. Kati enda ulih iya ngasoh Lasarus ti udah mati idup baru?"
Lasarus di-angkat idup baru
38 Sakali agi Jesus sinu ati, nya alai iya lalu mansang ngagai pendam ti endor ngubor ka Lasarus, iya nya lubang baru, lalu moa lubang nya ditutup enggau batu. 39 Ko Jesus, "Angkat ka batu tu ari endor tu!" Marta, menyadi iya ti mati nyaut, "Tuhan, iya diatu tentu nyau bau but. Iya udah dikubor ka ditu empat hari tu udah!" 40 Ko Jesus bejako enggau iya, "Kati aku enda udah madah ka nuan, enti nuan arap, nuan deka meda mulia Allah Taala?" 41 Sida ngangkat ka batu nya. Jesus nengkadah katas lalu bejako, ko iya, Apai, aku muji nuan laban nuan udah ninga ka aku. 42 Aku nemu nuan selalu ninga ka aku. Aku nyebut tu kategal orang mayoh ti begempuru ditu, awak ka sida arap ka nuan amat ngasoh aku." 43 Udah iya nyebut nya, iya lalu ngangau enggau nyawa ti inggar, ko iya, "Lasarus, pansut!" 44 Iya ti mati nya lalu pansut, nyadi jari enggau kaki iya mengkang dibalut ngena gari ti dikena malut orang mati, lalu moa iya dibungkus ngena kain. "Buka balut iya," ko Jesus madah ka sida, "awak ka iya bejalai."
Akal dikena ngelaban Jesus
45 Mayoh orang Judah ti datai ngagai Maria, meda pengawa ti dikereja Jesus, lalu arap ka iya. 46 Tang sekeda sida pulai ngagai orang Parisi lalu nusoi ngagai sida pengawa ti dikereja Jesus. 47 Nya alai orang Parisi enggau sida tuai imam lalu baum enggau kaban Kunsil, ko sida, "Kati ko kitai? Pasal samoa kereja nyelai ti digaga orang tu! 48 Enti kitai neju ka iya ngereja pengawa baka nya, genap iko orang tentu deka arap ka iya, lalu orang Rome tentu deka datai ngambi menoa kitai sereta ngerusak kaba enggau bansa kitai!" 49 Siko ari sida, benama Kaipas, ti nyadi Imam Besai taun nya, bejako, ko iya, "Kita nadai nemu utai mimit! 50 Kati dalam runding kita, enda manah agi siko orang mati kategal orang mayoh, ari samoa bansa ti dirusak?" 51 Iya ti bendar, jako nya ukai disebut iya ari ati iya empu, tang laban iya ti Imam Besai dalam taun nya, iya benabi ka Jesus deka mati kategal orang Judah. 52 Ukai kategal sida aja, tang iya mega deka ngempuru nyadi siti, samoa anembiak Allah Taala ti udah pambar di serata dunya. 53 Kenyau ari nya, sida pemerintah di menoa Judah ngiga akal dikena munoh Jesus. 54 Nya alai Jesus enda agi ngayan ka diri bejalai di Judah, tang iya angkat ari nya lalu mansang ngagai siti endor semak menoa puang, ba nengeri ti dikumbai Ipraim, ti endor iya diau begulai enggau sida murid iya. 55 Gawai orang Judah ti dikumbai Hari Besai Paska nyau semak, lalu mayoh orang ari menoa nya mansang ka Jerusalem, apin gawai nya nyadi, laban deka nuchi diri dulu. 56 Sida ngiga Jesus, lalu leboh sida begempuru dalam kaba, sida bejako enggau pangan diri, ko sida, "Nama runding kita? Iya tentu enda enggau ngintu gawai tu, enda pia?" 57 Sida tuai imam enggau orang Parisi udah meri ator, minta sebarang orang ti nemu endor Jesus, nusoi ngagai sida, awak ka sida ulih nangkap iya.
Jesus ditata ngena minyak di Betani
12:1 Enam hari apin Hari Besai Paska, Jesus mansang ka Betani, endor Lasarus diau, iya nya orang ti udah di-angkat ka Jesus ari mati. 2 Sida nyendia pemakai ka iya di endor nya, Marta nyaup mela utai nya, lalu Lasarus dudok nunga mija begulai enggau Jesus. 3 Udah nya Maria ngambi sabutol minyak wangi ti berega, digaga ari rumput, lalu ngiri ka iya ba kaki Jesus, udah nya lalu dikendas iya ngena bok iya. Rumah nya penoh laban bau minyak nya. 4 Siko ari sida murid Jesus, Judas Iskariot, iya ti deka nyual iya, bejako, ko iya, 5 "Nama kebuah enda nyual minyak nya tiga ratus ringgit, awak ka duit nya tau diberi ngagai orang ti seranta?" 6 Iya nyebut nya, ukai kategal iya sinu ka orang ti seranta, tang laban iya orang ti penchuri; iya ti megai kambut duit sida lalu iya mega ti ngambi duit ari nya. 7 Tang ko Jesus, "Anang kiroh ka iya! Awak ka iya nyimpan utai ti dikemisi diri datai ka hari aku dikubor. 8 Orang ti seranta seruran deka bisi begulai enggau kita, tang aku enda enggau kita belama.'
Akal dikena ngelaban Lasarus
9 Bala besai orang Judah ninga Jesus bisi di Betani, nya alai sida lalu mansang kia. Sida ti kin, ukai semina kategal Jesus aja, tang sida mega deka meda Lasarus, ti udah di-angkat ka Jesus ari mati. 10 Nya alai sida tuai imam mega lalu ngiga akal deka dikena munoh Lasarus; 11 laban kategal iya, mayoh orang Judah enggai nitih ka sida imam lalu arap ka Jesus.
Tama ka Jerusalem enggau pemenang
12 Hari siti orang mayoh ti udah datai ngagai Hari Besai Paska, ninga Jesus bisi datai ka Jerusalem. 13 Nya alai sida ngambi dan engkerema lalu mansang ngambat iya enggau nyawa ti inggar, ko sida, "Puji Allah Taala! Awak ka Allah Taala merekat ka iya ti datai dalam nama Tuhan! Allah Taala merekat ka rajah Israel!" 14 Jesus tetemu ka siko anak keledai lalu dudok di atas nya, munyi ti udah ditulis dalam Bup Kudus: 15 "Anang nuan takut, nengeri Sion! Tu rajah nuan datai, nepan atas anak keledai." 16 Sida murid iya enda mereti ka utai nya leboh maya nya; tang leboh Jesus udah di-angkat ka ngagai mulia iya, nya baru sida ingat ka jako dalam Bup Kudus pasal iya, lalu sida udah ngereja utai nya ka iya. 17 Orang mayoh ti udah enggau Jesus leboh iya ngangau ka Lasarus pansut ari kubor, lalu ngangkat ka iya ari mati, nusoi utai nya ti udah nyadi. 18 Nya kebuah orang mayoh betemu enggau iya—laban sida bisi ninga pasal kereja nyelai ti udah digaga iya. 19 Udah nya ko sida orang Parisi bejako enggau pangan diri, "Kita meda, pengawa kita nadai pemansang mimit! Peda, samoa dunya nitih ka iya!"
Sekeda orang Gerika ngiga Jesus
20 Sekeda orang Gerika enggau orang mayoh besembiang ngagai Jerusalem leboh gawai nya. 21 Sida datai ngagai Pilip (iya nya ari Betsaida, di Galili) lalu ko sida, "Tuan, kami deka betemu enggau Jesus." 22 Pilip angkat lalu madah ngagai Andrew, saduai lalu angkat sama sereta nusoi utai nya ngagai Jesus. 23 Ko Jesus nyaut saduai, "Timpoh udah datai endor Anak Mensia deka diberi basa ti besai. 24 Enggau bendar aku madah ka kita: enti leka gandum enda laboh ka dalam tanah lalu mati, iya mengkang saleka aja. Tang enti iya mati, udah nya iya bebuah mayoh. 25 Barang sapa sayau ka nyawa diri empu—ngelenyau ka iya; tang barang sapa ti enda sayau ka nyawa diri di dunya tu deka idup meruan. 26 Barang sapa ti deka betuai ka aku enda tau enda nitih ka aku, awak ka sida ti anembiak aku seruran enggau aku di sebarang endor aku diau. Apai aku deka ngemesai ka iya ti betuai ka aku."
Jesus ngenang pasal pemati diri
27 "Diatu ati aku balat tusah—nama ti deka disebut aku? Tau aku nyebut, 'Apai, anang ngasoh timpoh tu datai ba aku'? Tang nya kebuah aku datai, awak ka nat ka timpoh pemerinsa tu. 28 Apai, kemesai ka nama nuan!" Udah nya munyi nyawa lalu bejako ari serega, "Aku udah ngemesai ka iya, lalu aku agi deka ngemesai ka iya baru." 29 Orang ti bediri dia, ti ninga nyawa nya bejako, ko sida, "Nya munyi guntor!" Sekeda bejako, "Nya melikat bejako enggau iya!" 30 Tang ko Jesus bejako enggau sida, "Munyi nyawa nya datai ukai kategal aku, tang kategal kita. 31 Diatu timpoh udah datai endor dunya kena pechara; diatu sida ti megai perintah di dunya tu deka dibuai. 32 Leboh aku di-angkat ka ari dunya tu, aku deka ngempuru ka samoa mensia ngagai aku." 33 (Iya nyebut jako munyi nya ngenang pasal pemati ti deka di-asai ka iya.) 34 Orang mayoh nyaut iya, ko sida, "Dalam adat kami madah ka Mesiah deka idup belama. Kati ko nuan ngumbai Anak Mensia enda tau enda di-angkat katas? Sapa Anak Mensia ti ko nuan nya?" 35 Disaut Jesus, "Enda lama agi penerang deka enggau kita. Pajak ka pejalai kita leboh penerang agi bisi enggau kita, awak ka pemetang enda datai ba kita; laban iya ti bejalai dalam petang enda nemu tunga pejalai diri. 36 Arap ka penerang, leboh iya bisi ba kita, awak ka kita nyadi anembiak penerang."
Orang Judah enda arap
Udah Jesus nyebut nya iya bejalai lalu ngelalai ka diri ari sida. 37 Taja iya udah ngereja samoa kereja ti nyelai nya ba moa sida, tang sida enda arap ka iya, 38 ngambi ka jako ti dipansut ka nabi Isaiah tau nyadi amat, ti madah ka: "Tuhan, sapa ti arap ka pesan ditusoi kami? Ngagai sapa Tuhan deka mandang ka kuasa iya?" 39 Kategal nya sida enda arap, laban Isaiah mega bisi bejako, 40 "Allah Taala udah ngasoh mata sida buta, lalu ngasoh pikir sida lap, ngambi ka mata sida enda meda, lalu pikir sida enda mereti ka utai, lalu sida enda pulai ngagai aku, pia ko Allah Taala, awak ka aku nyuman ka sida." 41 Isaiah nyebut nya laban iya meda mulia Jesus, lalu bejako ka pasal iya. 42 Taja mayoh sida pemerintah orang Judah arap ka Jesus; tang kategal sida orang Parisi, sida enda berani bejako di moa orang mayoh, enggai ka diri di-asoh pansut ari kanisa. 43 Sida rindu ka diri dipuji mensia, ari ti dipuji Allah Taala.
Disalah kategal jako Jesus
44 Jesus bejako enggau nyawa ti inggar, ko iya, "Barang saya ti arap ka aku, ukai semina arap ka aku aja, tang iya mega arap ka iya ti ngasoh aku. 45 Barang sapa ti meda aku mega deka meda iya ti ngasoh aku. 46 Aku datai nyadi ka penerang dunya, awak ka genap iko orang ti arap ka aku enda agi dalam petang. 47 Barang sapa ti ninga ka pesan aku, tang enda ngasi ka iya, aku enda nyalah iya. Aku ukai deka nyalah dunya, tang deka meri selamat ka iya. 48 Barang sapa ti ngenggai ka aku lalu enda nerima pesan aku, bisi siko orang ti nyalah iya. Jako ti udah disebut aku deka nyalah iya leboh maya pengujong dunya! 49 Amat, laban aku ukai bejako ngati ka diri tang Apai ti ngasoh aku, ngator aku nyebut utai ti enda tau enda disebut aku. 50 Lalu aku nemu, pesan iya mai pengidup ti meruan. Nya alai utai ti disebut aku, nya utai ti di-asoh Apai tusoi aku."
Jesus masu kaki sida murid iya
13:1 Sahari apin Hari Besai Paska nyadi. Jesus nemu timpoh diri udah datai, endor iya ninggal ka dunya tu lalu mansang ngagai Apai iya. Iya selalu rindu ka sida ti endang enggi iya di dunya tu, lalu iya rindu ka sida datai ka pengujong dunya. 2 Jesus makai lemai begulai enggau sida murid iya. Sitan udah ngasoh Judas, anak Iskariot, deka nyual Jesus. 3 Jesus nemu Apai iya udah meri iya kuasa ti penoh; iya nemu diri datai ari Allah Taala lalu pulai ngagai Allah Taala. 4 Nya alai Jesus angkat ari mija, muka baju luar iya, lalu melit ka kain tula ba punggong iya. 5 Udah nya iya ngiri ai ka dalam bisin, lalu belaboh masu kaki sida murid iya, sereta ngendas kaki sida ngena tula ti dibelit ka iya ba punggong. 6 Iya datai ngagai Simon Peter, ti lalu bejako enggau iya, "Kati nuan masu kaki aku, Tuhan?" 7 Ko Jesus nyaut iya, "Diatu nuan enda nemu utai ti digaga aku, tang ila nuan deka nemu." 8 Ko Peter, "Nuan enda patut sakali-kali masu kaki aku!" "Enti aku enda masu kaki nuan," ko Jesus nyaut, "nuan ukai nyadi murid aku agi." 9 Ko Simon Peter nyaut, "Tuhan, enti pia, anang semina masu kaki aku aja, tang basu mega jari enggau pala aku!" 10 Ko Jesus, "Barang sapa ti udah mandi tetap beresi, lalu tau enda iboh masu diri agi, semina masu kaki diri aja. Samoa kita bela beresi—semina siko aja enda." 11 (Jesus udah nemu sapa bagi sida ti deka nyual iya, nya kebuah iya nyebut, "Samoa kita, semina siko aja ti enda beresi.") 12 Udah iya masu kaki sida, Jesus masok ka baju luar iya baru lalu pulai ngagai penudok iya ba mija. "Kati kita mereti ka utai ti udah digaga aku ba kita?" ko Jesus nanya. 13 "Kita ngumbai aku Pengajar enggau Tuhan, ngena jako kita nya, laban aku endang amat. 14 Aku tu Tuhan kita enggau Pengajar kita, lalu aku baru udah masu kaki kita. Nya alai kita mega patut masu kaki pangan diri. 15 Aku udah ngaga teladan ka kita, ngambi ka kita ngereja utai baka ti udah dikereja aku ba kita. 16 Enggau bendar aku madah ka kita: nadai siko ulun lebih besai agi ari tuan iya; lalu nadai siko seruan lebih besai agi ari orang ti ngasoh iya. 17 Diatu kita nemu utai ti bendar tu; kita deka lantang, enti kita ngaga utai baka nya. 18 "Aku ukai bejako ka samoa kita; aku nemu sida ti udah milih aku. Tang jako dalam Bup Kudus mega enda tau enda nyadi, ti madah ka, 'Iya ti makai pemakai aku udah angkat ngelaban aku.' 19 Aku madah ngagai kita utai tu diatu, apin iya nyadi; awak ka leboh iya nyadi kita arap ka 'Aku meh Aku.' 20 Enggau bendar aku madah ka kita: barang sapa ti nyambut iya ti di-asoh aku, deka mega nyambut aku; lalu barang sapa ti nyambut aku, deka mega nyambut iya ti ngasoh aku."
Jesus nilit penyual iya
21 Udah Jesus nyebut nya ati iya balat tusah, lalu ko iya bejako ba moa sida, "Enggau bendar aku madah ka kita: siko ari kita deka nyual aku." 22 Sida murid bela merening pangan diri, enda nemu sapa ari sida ti ko iya. 23 Siko ari sida murid, ti dikerindu ka Jesus, dudok ngimbai Jesus. 24 Simon Peter dudok ngimbai orang nya, lalu ko iya, "Tanya ari iya, nama utai ti ko iya nya." 25 Nya alai murid ti ngimbai Jesus ngansak ngagai iya, lalu nanya, "Sapa orang nya, Tuhan?" 26 Disaut Jesus, "Aku deka nyepoh ka roti ka dalam mangkok lalu meri roti nya ngagai iya; nya meh iya." Nya alai iya nyingkau sasirap roti, nyepoh ka roti nya ngagai mangkok, lalu nyua ka iya ngagai Judas anak Simon Iskariot. 27 Sereta Judas ngambi roti nya, Sitan tama ka dalam iya. Ko Jesus bejako enggau iya, "Jampat lalu kereja utai ti enda tau enda dikereja nuan!" 28 Nadai siko sida ti dudok dia nemu kebuah Jesus nyebut jako nya ngagai iya. 29 Laban Judas endang nyadi pengibun kambut duit sida, nya alai sakeda sida ngumbai Jesus ngasoh iya angkat meli pemakai ti dikena ngintu gawai, tauka ngasoh iya meri sekeda utai ngagai sida ti seranta. 30 Judas nyambut roti nya lalu pansut kemaya nya. Leboh nya hari udah malam.
Pesan ti baru
31 Udah Judas pansut, ko Jesus bejako enggau sida, "Diatu mulia Anak Mensia di-ayan ngagai kita; diatu mulia Allah Taala di-ayan ulih iya. 32 Nya alai enti mulia Allah Taala di-ayan ulih iya, Allah Taala tentu deka ngayan ka mulia Anak Mensia dalam iya empu, lalu iya deka ngereja kemaya nya. 33 Anak, aku enda lama agi enggau kita. Kita deka ngiga aku; tang diatu aku madah ngagai kita baka ti udah dipadah aku ngagai orang Judah, 'Kita enda tau mansang ngagai endor ti digagai aku.' 34 Pesan ti baru diberi aku ngagai kita: rindu ka pangan diri. Baka aku ti udah rindu ka kita, baka nya mega kita rindu ka pangan diri. 35 Enti kita bisi pengerindu ka pangan diri, nya baru samoa orang deka nemu kita amat murid aku."
Jesus nilit penyangkal Peter
36 Kini nuan deka bejalai, Tuhan?" ko Simon Peter nanya iya. "Nuan enda tau nitih ka aku ngagai endor ti digagai aku," ko Jesus nyaut; "tang dudi ila nuan deka nitih ka aku." 37 "Tuhan, nama kebuah aku enda tau nitih ka nuan diatu?" ko Peter nanya iya, "aku besedia deka mati kategal nuan!" 38 Disaut Jesus, "Kati nuan amat besedia deka mati kategal aku? Enggau bendar aku madah ka nuan: apin manok mengkukok, nuan deka tiga kali madah ka diri enda nemu aku."
Jesus batang jalai ngagai Apai
14:1 Ko Jesus madah ngagai sida, "Anang ati kita irau sereta tusah. Arap ka Allah Taala, lalu arap mega ka aku. 2 Dalam rumah Apai aku mayoh bilik endor diau, lalu aku deka nyendia ka endor alai kita. Aku enda nusoi ka kita ngapa, enti utai nya enda nyadi baka nya. 3 Lalu udah aku kin nyendia endor ka kita, aku deka datai baru lalu mai kita ngagai aku, ngambi ka kita diau begulai enggau aku. 4 Kita nemu jalai mansang ngagai endor ti deka digagai aku." 5 Ko Thomas bejako enggau iya, "Tuhan, kami enda nemu endor ti deka digagai nuan; ni kami nemu jalai mansang kin?" 6 Ko Jesus nyaut iya, "Aku tu meh jalai, pemendar enggau pengidup; nadai siko orang ulih datai ngagai Apai enti enda ulih aku. 7 Diatu nuan udah nemu. aku." Ko iya bejako ngagai sida, "Kita mega deka nemu Apai aku; lalu kenyau ari diatu kita deka nemu iya, lalu kita udah meda iya." 8 Ko Pilip bejako enggau iya, "Tuhan, asoh kami meda Apai; nya aja utai ti dipeguna kami." 9 Disaut Jesus, "Aku lama bendar udah begulai enggau kita samoa; tang agi meh kita enda ngelala aku, Pilip? Barang sapa ti udah meda aku, udah meda Apai. Nama kebuah nuan nyebut, 'Asoh kami meda Apai'? 10 Kati nuan enda arap, Pilip, aku bisi dalam Apai lalu Apai dalam aku? Jako ti udah disebut aku ngagai kita," ko Jesus bejako enggau sida murid iya, "ukai datai ari aku. Apai ti dalam aku, ngereja pengawa iya empu. 11 Arap ka jako aku, ti madah ka aku dalam Apai, lalu Apai dalam aku. Enti enda pia, arap ka pengawa ti digaga aku. 12 Enggau bendar aku madah ka kita: barang sapa ti arap ka aku deka ngaga kereja ti digaga aku— indah kereja ti besai agi ari nya deka digaga iya, laban aku deka mansang ngagai Apai. 13 Aku deka ngereja sebarang utai ti dipinta kita dalam nama aku, awak ka mulia Apai deka dikemesai kategal Anak. 14 Enti kita minta sebarang utai ari aku dalam nama aku, aku deka ngereja iya."
Besemaya ka Roh Kudus
15 "Enti kita rindu ka aku, kita deka ngasi ka pesan aku. 16 Aku deka minta ari Apai, lalu iya deka meri ka kita Penyaup siti, Roh Pemendar, meruan ba kita belama. 17 Dunya tu enda tau nyambut iya laban sida enda meda tauka ngelala iya. Tang kita ngelala iya, laban iya mengkang ba kita lalu diau dalam kita. 18 "Aku enggai neju ka kita kediri; aku deka pulai ngagai kita baru. 19 Enda lama agi dunya tu nadai meda aku agi, tang kita deka meda aku; lalu laban aku idup, kita mega deka idup. 20 Leboh hari nya datai, kita deka nemu aku dalam Apai aku, lalu kita dalam aku, baka aku ti dalam kita. 21 "Barang sapa ti nerima pesan aku lalu ngasi ka pesan nya, orang nya meh ti rindu ka aku. Apai aku deka rindu ka orang ti rindu ka aku; aku empu mega deka rindu ka orang nya lalu ngayan ka diri ngagai iya." 22 Judas (ukai Judas Iskariot) bejako, ko iya, "Tuhan, enggai nyadi nuan semina madah ka diri ngagai kami, lalu enda ngayan ka diri ngagai dunya." 23 Ko Jesus nyaut iya, "Barang sapa ti rindu ka aku deka ngasi ka pesan aku. Apai aku deka rindu ka iya, lalu Apai aku enggau aku empu deka datai ngagai iya lalu diau enggau iya. 24 Barang sapa ti enda rindu ka aku, enda ngasi ka jako aku. Pesan ti udah didinga kita ukai enggi aku, tang datai ari Apai, iya ti ngasoh aku. 25 "Utai nya udah ditusoi aku ngagai kita leboh aku agi enggau kita. 26 Pen-yaup, iya nya Roh Kudus, ti deka di-asoh Apai dalam nama aku, deka ngajar kita genap bengkah utai, lalu ngasoh kita ingat ka samoa utai ti udah di-ajar aku ngagai kita. 27 "Pengelantang aku enggau kita; pengelantang aku empu diberi aku ka kita. Aku enda meri iya ka kita baka ti diberi orang di dunya tu. Anang irau lalu tusah ati; anang takut. 28 Kita udah ninga aku bejako enggau kita, 'Aku bejalai, tang aku deka datai baru ngagai kita.' Enti kita rindu ka aku, kita tentu gaga meda aku mansang ngagai Apai, laban iya besai agi ari aku. 29 Aku udah nusoi utai nya ngagai kita diatu, apin iya nyadi, ngambi ka kita tau arap leboh iya nyau nyadi. 30 Aku enda ulih lama agi bejako enggau kita, laban iya ti merintah dunya tu udah datai. Iya nadai kuasa atas aku, 31 tang dunya enda tau enda nemu aku rindu ka Apai: nya kebuah aku ngereja samoa utai baka ti udah dipesan iya. "Angkat, aram kitai bejalai ari endor tu."
Jesus pun anggor ti bendar
15:1 "Aku tu pun anggor ti bendar, lalu Apai aku nya tukang kebun. 2 Iya muai ari aku tiap dan ti enda bebuah, lalu tiap dan ti bebuah di-intu iya, awak ka iya beresi lalu bebuah lebat agi. 3 Kita endang udah diberesi ngena pesan ti udah di-ajar aku ngagai kita. 4 Mengkang begempong dalam aku, lalu aku deka mengkang begempong dalam kita. Dan anggor enda tau bebuah kediri; tang iya tau bebuah enti iya mengkang begulai enggau batang. Baka nya mega kita enda tau bebuah ngapa, enti kita enda mengkang dalam aku. 5 "Aku tu pun anggor, kita dan iya. Barang sapa ti mengkang dalam aku, lalu aku dalam iya, deka bebuah lebat; laban kita enda ulih ngereja utai enti enda ulih aku. 6 Barang sapa ti enda mengkang dalam aku deka dibuai, baka dan, iya deka layu. Dan ti udah rangkai baka nya deka ditunu, awak ka sida retong laban api. 7 Enti kita mengkang dalam aku, lalu jako aku mengkang dalam kita, nya baru kita deka minta sebarang utai ti dikedeka kita, lalu kita deka bulih. 8 Nya jalai mulia Apai aku di-asoh nyata: ari kita ti bebuah lebat; lalu kategal nya kita nyadi murid aku. 9 Aku rindu ka kita baka Apai ti rindu ka aku; mengkang dalam pengerindu aku. 10 Enti kita ngasi ka pesan aku, kita deka mengkang dalam pengerindu aku, baka aku ti udah ngasi ka pesan Apai aku lalu mengkang dalam pengerindu iya. 11 "Utai nya udah ditusoi aku ngagai kita ngambi ka pengandal aku mengkang ba kita, awak ka ati kita tentu andal bendar. 12 Pesan aku munyi tu: rindu ka pangan diri, baka aku ti udah rindu ka kita. 13 Pengerindu ti pemadu besai ulih diberi mensia ka pangan iya, iya nya ngenjok nyawa diri ka sida. 14 Nyadi kita endang pangan aku, enti kita ngereja utai nunda ti dipesan aku. 15 Aku enda agi ngumbai kita ulun, laban ulun enda nemu utai ti digaga tuan iya. Aku ngumbai kita pangan aku, laban aku udah nusoi ngagai kita utai ti didinga aku ari Apai. 16 Ukai kita ti milih aku; tang aku ti milih kita, lalu ngasoh kita mansang sereta bebuah lebat, buah ti meruan belama-lama. Nya alai Apai deka meri ka kita barang utai ti dipinta kita ari iya dalam nama aku. 17 Tu utai ti dipesan aku ngagai kita: rindu ka pangan diri."
Dunya ti begedi
18 "Enti dunya begedi ngagai kita, kita enda tau enda ingat ka iya ti udah begedi ati ngagai aku. 19 Enti kita endang enggi dunya, iya deka rindu ka kita. Tang aku udah milih kita ari dunya tu, lalu kita ukai enggi iya; nya kebuah dunya begedi ngagai kita. 20 Kingat ka jako ti udah dipadah aku ka kita: 'Ulun nadai lebih besai agi ari tuan iya.' Enti sida besalah aku, sida mega deka besalah kita; enti sida ngasi ka pesan aku, sida mega deka ngasi ka kita. 21 Tang sida deka ngaga samoa nya ngagai kita, laban kita endang enggi aku; tegal sida enda nemu iya ti ngasoh aku. 22 Sida enda salah kategal dosa enti aku enda datai lalu madah ngagai sida; tang laban aku udah madah ngagai sida nya alai sida nadai tau ngumbai diri enda bedosa. 23 Barang sapa ti begedi ngagai aku, begedi ngagai Apai mega. 24 Sida enda salah kategal dosa enti aku enda ngaga kereja ti nadai udah digaga orang bukai ba sida; tang laban sida udah meda utai ti digaga aku, nya kebuah sida begedi ngagai aku enggau Apai aku. 25 Utai nya enda tau enda nyadi pia, awak ka utai ti ditulis dalalm Adat tau nyadi amat, 'Sida begedi ka aku enggau nadai kebuah mimit.' 26 "Penyaup deka datai—Roh pemendar, iya ti datai ari Apai. Aku deka ngirum iya ari Apai ngagai kita, lalu iya deka bejako ka pasal aku. 27 Lalu kita empu mega deka bejako ka pasal aku, laban kita udah enggau aku kenyau ari mula suba.
16:1 "Utai nya udah ditusoi aku ngagai kita ngambi ka kita enda ngelengka ka pengarap kita. 2 Sida deka muru kita ari kanisa sida. Lalu timpoh mega deka datai leboh orang ti munoh kita deka bepikir, ngumbai enggau kereja ti baka nya iya nulong Allah Taala. 3 Sida ngaga kereja nya ngagai kita, laban sida enda nemu Apai tauka aku. 4 Utai nya udah ditusoi aku ngagai kita, awak ka leboh timpoh datai endor sida ngereja utai nya, kita deka ingat ka aku udah nusoi ngagai kita."
Pengawa Roh Kudus
"Aku enda nusoi utai tu ngagai kita kenyau ari mula, laban aku bisi enggau kita. 5 Tang diatu aku pulai ngagai iya ti ngasoh aku; tang taja pia nadai siko kita nanya, "Kini ka nuan bejalai?' 6 Diatu aku udah nusoi ngagai kita, lalu ati kita balat tusah. 7 Enggau bendar aku madah ka kita: manah agi ka kita enti aku nadai enggau kita, laban enti aku enda ninggal ka kita, Penyaup enda datai ngagai kita. Tang enti aku ninggal ka kita, nya baru aku deka ngasoh iya datai ngagai kita. 8 Lalu leboh iya datai, iya deka nunjok ngagai orang mayoh di dunya tu, sida amat salah pasal dosa, salah pasal utai ti ngena, enggau salah pasal ukum Allah Taala. 9 Sida salah pasal dosa, laban sida enda arap ka aku; 10 sida salah pasal utai ti ngena, laban aku deka ngagai Apai lalu kita badu agi meda aku; 11 sida salah pasal ukum, laban sida pemerintah dunya tu udah di-ukum. 12 "Aku agi mayoh utai deka ditusoi ngagai kita, tang diatu utai nya kelalu mayoh dikingat ka kita. 13 Tang leboh Roh pemendar datai, iya deka ngiring kita ngagai pemendar. Iya enda bejako ka diri empu, tang iya deka bejako ngenang ka utai ti didinga iya lalu nusoi ngagai kita pasal utai ti deka datai. 14 Iya deka meri mulia ka aku, laban iya deka nyambut utai ti disebut aku lalu nusoi iya ngagai kita. 15 Samoa utai ti dikemisi Apai aku enggi aku; nya kebuah aku ngumbai Roh deka nyambut utai ti disebut aku lalu nusoi iya ngagai kita."
Penusah enggau pengaga
16 "Enda lama agi kita nadai meda aku; enda lama udah nya kita deka meda aku baru." 17 Sekeda sida murid iya bejako enggau pangan diri, ko sida, "Nama reti jako tu? Iya madah ngagai kitai, 'Enda lama agi kita nadai meda aku; enda lama udah nya kita deka meda aku baru'; lalu iya mega madah, 'Laban aku deka pulai ngagai Apai.' 18 Nama reki jako 'enda lama agi?' " ko sida nanya. "Kitai enda nemu reti jako iya!" 19 Jesus nemu utai ti deka ditanya sida ari iya, nya alai ko iya bejako enggau sida, "Ko aku, 'Enda lama agi kita nadai meda aku; enda lama udah nya kita deka meda aku baru.' Kati nya utai ti ditanya kita ngagai pangan diri? 20 Enggau bendar aku madah ka kita: kita deka tusah sereta nyabak, tang dunya deka gaga; kita deka tusah, tang penusah kita deka pulai nyadi pengaga. 21 Leboh indu nyau radai deka beranak, ati iya tusah, laban jam iya nat ka pemedis udah datai; tang leboh anak iya udah ada iya enda agi ingat ka pemedis, laban iya gaga ka anak mit nya udah ada ka dunya tu. 22 Baka nya mega kita: diatu kita tusah, tang aku deka meda kita baru, lalu ati kita deka balat pengaga, pengaga ti nadai orang tau ngambi ari kita. 23 "Leboh hari nya datai nadai kita deka nanya ka utai ari aku. Enggau bendar aku madah ka kita: Apai deka meri kita sebarang utai ti dipinta kita ari iya dalam nama aku. 24 Datai ka diatu kita nadai kala minta utai dalam nama aku; pinta lalu kita deka nyambut, awak ka pengelantang kita chukop bendar."
Pemenang atas dunya
25 "Utai nya udah ditusoi aku ngagai kita ngena jako sempama. Tang timpoh deka datai endor aku enda agi ngena jako sempama, tang aku deka bejako ka pasal Apai ngagai kita ngena jako ti terus. 26 Leboh hari nya datai kita deka minta ari nya dalam nama aku, lalu aku enda nyebut madah ka diri deka minta ari iya ngari ka kita, 27 laban Apai empu rindu ka kita. Iya rindu ka kita laban kita rindu ka aku, lalu udah arap ka aku amat datai ari Allah Taala. 28 Aku amat datai ari Apai lalu aku udah datai ka dunya tu; lalu diatu aku ninggal ka dunya tu, pulai ngagai Apai." 29 Ko sida murid iya bejako enggau iya, "Peda, diatu nuan bejako enggau terus, enda agi ngena jako sempama. 30 Kami nemu diatu, nuan nemu samoa utai; nuan enda beguna ka orang nanya ka utai ari nuan. Nya ti ngasoh kami arap ka nuan amat datai ari Allah Taala." 31 Ko Jesus nyaut sida, "Kati kita arap diatu? 32 Timpoh deka datai lalu udah datai diatu, endor samoa kita deka pambar pendiau, genap iko kita deka pulai ka menoa diri, lalu aku deka ditinggal kediri. Tang aku ukai kediri, laban Apai bisi enggau aku. 33 Aku nusoi utai tu ngagai kita, ngambi ka kita deka bulih selamat enti kita begempong enggau aku. Dunya tu deka ngasoh kita merinsa. Tang anang takut! Aku udah ngalah ka dunya!"
Jesus besembiang ka sida murid iya
17:1 Udah Jesus tembu nyebut jako iya, iya nengkadah ka langit lalu nyebut, ko iya, "Apai, timpoh udah datai. Beri mulia ka Anak nuan, awak ka Anak tau meri mulia ka nuan. 2 Laban nuan udah meri iya kuasa ari atas samoa mensia, ngambi ka iya tau meri pengidup ti meruan ngagai samoa sida ti udah diberi nuan ngagai iya. 3 Lalu tu pengidup ti meruan: mensia nemu nuan siko aja, Petara ti bendar, lalu nemu Jesus Kristus, ti di-asoh nuan. 4 Aku udah ngayan ka mulia nuan di dunya; aku udah nembu ka pengawa ti di-asoh nuan kereja aku. 5 Apai! Beri aku mulia di moa nuan diatu, mulia ti udah diberi nuan ngagai aku apin dunya nyadi kelia. 6 "Aku udah ngasoh nuan ditemu samoa orang ti diberi nuan ngagai aku di dunya tu. Sida enggi nuan, lalu nuan meri sida ngagai aku. Sida udah ngasi ka jako nuan, 7 lalu diatu sida nemu samoa utai ti diberi nuan ngagai aku endang datai ari nuan magang. 8 Aku meri sida pesan ti diberi nuan ngagai aku, lalu sida nyambut iya; sida nemu aku amat datai ari nuan, lalu sida mega arap ka aku endang di-asoh nuan. 9 "Aku besembiang ka sida. Aku ukai besembiang ka dunya, tang besembiang ka sida ti diberi nuan ngagai aku, laban sida nya endang enggi nuan. 10 Samoa utai ti dikemisi aku enggi nuan magang, lalu samoa utai ti dikemisi nuan enggi aku; lalu mulia aku deka di-ayan nengah sida. 11 Diatu aku datai ngagai nuan; aku nadai agi di dunya tu, tang sida mengkang dalam dunya tu. Apai ti Kudus! Intu sida ngena kuasa nama nuan, nama ti diberi nuan ngagai aku, awak ka sida nyadi siko, baka nuan enggau aku ti siko aja. 12 Leboh aku agi enggau sida aku udah ngintu sida ngena kuasa nama nuan, nama ti diberi nuan ngagai aku, lalu nadai siko sida bisi lenyau, semina iya siko ti endang patut lenyau—awak ka jako Bup Kudus nyadi amat. 13 Nyadi diatu aku pulai ngagai nuan, lalu kebuah aku nyebut jako tu di dunya tu, awak ka pengandal aku bisi penoh dalam ati sida. 14 Aku meri sida pesan nuan lalu dunya begedi ati ngagai sida, laban sida ukai enggi dunya, baka aku ti ukai enggi dunya. 15 Aku enda minta nuan ngambi sida ari dunya tu, tang aku minta nuan ngintu sida ari penyai. 16 Baka aku ti ukai enggi dunya, baka nya mega sida ukai enggi dunya. 17 Ambi sida nyadi ka enggi nuan enggau jalai pemendar; iya nya jako nuan ti pemendar. 18 Aku ngasoh sida datai ka dunya tu baka nuan ti udah ngasoh aku datai ka dunya tu. 19 Lalu kategal sida aku nyerah ka diri ngagai nuan, awak ka sida mega tau diserah ngagai nuan. 20 "Aku ukai besembiang ka sida aja, tang baka nya mega ka sida ti arap ka aku kategal pesan sida. 21 Aku besembiang, awak ka sida nyadi siko. Apai! Awak ka sida dalam tua, baka nuan ti dalam aku lalu aku dalam nuan. Awak ka sida nyadi siko, awak ka dunya tau arap, nuan amat ngasoh aku. 22 Aku meri sida mulia baka ti diberi nuan ngagai aku, awak ka sida tau nyadi siko, baka nuan enggau aku ti nyadi siko. 23 Aku dalam sida lalu nuan dalam aku, awak ka sida saum nyadi siko, awak ka dunya nemu nuan ngasoh aku, lalu nemu mega nuan rindu ka sida baka nuan rindu ka aku. 24 "Apai! Nuan udah meri sida ngagai aku, lalu aku deka ka sida enggau aku di sebarang endor aku diau, awak ka sida tau meda mulia aku, mulia ti diberi nuan ngagai aku; laban nuan endang udah rindu ka aku apin dunya nyadi kelia. 25 Apai ti lurus! Dunya enda nemu nuan, tang aku nemu nuan, lalu sida tu udah nemu nuan ti ngirum aku. 26 Aku udah ngasoh sida nemu nuan, lalu mengkang deka ngereja utai nya, awak ka pengerindu nuan ka aku tau bisi dalam sida, lalu aku mega tau bisi dalam sida."
Jesus kena tangkap
18:1 O Udah Jesus nyebut sembiang nya, iya bejalai enggau sida murid iya lalu ngelayang ka seberai sungai Kidron. Di endor nya bisi siti kebun, Jesus enggau sida murid iya lalu tama ka dalam kebun nya. 2 Judas, ti penyual nemu endor kebun nya, laban Jesus suah udah betemu enggau sida murid iya ba endor nya. 3 Nya alai Judas mansang ngagai endor nya, mai bala soldadu enggau sida ti nyaga kaba, ti di-asoh sida tuai imam enggau orang Parisi. Sida mai senyata, lalu baka nya mega mai lampu enggau tenggau. 4 Jesus nemu genap bengkah utai ti deka nyadi ba iya; nya alai iya mansang ka moa lalu bejako enggau sida, ko iya, "Sapa orang ti digiga kita?" 5 "Jesus ari Nasaret," ko sida nyaut. "Aku tu meh iya," pia ko iya. Judas, ti nyadi penyual, bediri dia enggau sida. 6 Leboh Jesus bejako enggau sida, "Aku tu meh iya," sida lalu surut sereta rebah ka tanah. 7 Jesus nanya sida baru, "Sapa orang ti digiga kita?" "Jesus ari Nasaret," ko sida. 8 "Aku udah madah ngagai kita, aku tu meh iya," ko Jesus. "Enti kita amat ngiga aku, awak ka sida bukai tu ti enggau aku pulai." 9 (Iya nyebut nya awak ka jako ti udah disebut iya tau nyadi amat, "Apai, aku nadai ngelenyau ka siko ari sida ti udah diberi nuan ngagai aku.") 10 Nyadi Simon Peter bisi mai pedang; iya nyintak pedang nya lalu mantap siko ulun Imam Besai, lalu mutus ka pending iya muak ari kanan. Nyadi nama ulun nya Malkus. 11 Ko Jesus bejako enggau Peter, "Selit ka pedang nuan ngagai sarong iya baru! Kati dalam runding nuan aku enda ngirup mangkok pemerinsa ti udah diberi Apai aku ngagai aku?"
Jesus dibai ngagai Anas
12 Raban soldadu enggau pemesai sida sereta enggau jejaga orang Judah, nangkap Jesus lalu masong iya, 13 lalu mai iya dulu ngagai Anas. Iya nya mentua lelaki Kaipas, ti nyadi Imam Besai dalam taun nya. 14 Kaipas nya orang ti ngajar orang Judah, madah ka manah agi enti orang siko mati kategal orang bukai.
Peter besangkal ka Jesus
15 Simon Peter enggau siko murid bukai nitih ka Jesus. Nyadi murid ti siko nya dikelala Imam Besai, nya alai iya enggau Jesus tama ka dalam tengah laman rumah Imam Besai. 16 Nyadi Peter nganti ba pintu ari luar. Nyadi murid ti dikelala Imam Besai nya, pansut ka luar baru, bejako enggau indu ti ba moa pintu sereta mai Peter tama ka dalam. 17 Ko indu ti ba pintu nya bejako enggau Peter, "Kati nuan tu ukai siko ari sida murid orang nya?" "Ukai, aku tu ukai," pia ko Peter. 18 Leboh nya hari balat chelap, nya alai sida anembiak enggau jejaga udah ngidup ka api arang lalu bediri ngelingi nya, bekindu ngangat ka isi diri. Peter mansang kia lalu bekindu enggau sida.
Imam Besai nanya Jesus
19 Nyadi Imam Besai nanya Jesus pasal sida murid iya enggau pasal ajar iya. 20 Disaut Jesus, "Aku selalu bejako enggau nyata di moa orang mayoh; samoa ajar aku dipansut ka aku dalam kanisa enggau dalam kaba, endor orang Judah datai begempuru. Aku nadai kala udah bejako ka utai belalai. 21 Nama kebuah nuan nanya aku? Tanya sida ti udah mending ka ajar aku. Tanya ari sida utai ti ditusoi aku ngagai sida—sida nemu utai ti udah dipadah aku." 22 Leboh Jesus nyebut nya, siko ari sida jejaga ti dia, nampar iya lalu bejako, ko iya, "Dini nuan tau bejako munyi nya ngagai Imam Besai!" 23 Ko Jesus nyaut iya, "Enti aku bisi nyebut utai ti salah, padah ngagai samoa orang ti bisi ditu, nama utai nya. Tang enti utai ti disebut aku nya amat, nama kebuah nuan nampar aku?" 24 Nya alai Anas ngasoh iya dibai mengkang dipasong, ngagai Kaipas, ti nyadi Imam Besai.
Peter besangkal ka Jesus baru
25 Nyadi Peter mengkang bekindu dia ngangat ka isi diri. Ko sida bukai bejako enggau iya, "Kati nuan tu ukai siko ari sida murid orang nya?" Tang Peter besangkal ka jako nya, ko iya, "Ukai, aku tu ukai." 26 Siko ari ulun Imam Besai, kaban iya ti udah putus pending dipantap Peter, bejako, ko iya, "Ukai nuan ti dipeda aku begulai enggau iya dalam kebun?" ko iya nanya. 27 Ko Peter bejako baru. "Ukai!" Lalu kemaya nya manok mengkukok.
Jesus dibai ngagai Pilate
28 Sida mai Jesus ari rumah Kaipas ngagai istana gabenor, tumu-tumu pagi. Nyadi orang Judah enda tama ka dalam istana laban sida deka nuchi diri ari penyalah, awak ka tau enggau makai pemakai Hari Besai Paska. 29 Nya alai Pilate pansut keluar ngagai sida lalu nanya, ko iya, "Nama penyalah orang tu ko kita?" 30 Disaut sida, "Kami tentu enda mai iya ngagai nuan enti iya nadai ngereja penyalah." 31 Ko Pilate bejako enggau sida, "Kita empu mai iya lalu ukum iya nunda ka adat kita." Disaut sida orang Judah, "Kami enda tau ngasoh sebarang orang kena ukum bunoh." 32 (Utai nya nyadi kena ngamat ka jako Jesus, leboh iya madah ka gaya pemati ti deka di-asai ka iya.) 33 Pilate pulai ka dalam istana lalu ngangau ka Jesus, ko iya, "Kati nuan amat rajah orang Judah?" 34 Disaut Jesus, "Kati tanya tu datai ari nuan empu tauka orang bukai bisi udah nusoi ngagai nuan pasal aku?" 35 Ko Pilate nyaut, "Kati dalam runding nuan, aku orang bansa Judah? Bansa nuan empu enggau tuai imam sida ti udah nyerah ka nuan ngagai aku. Nama pengawa ti udah digaga nuan?" 36 Ko Jesus, "Perintah aku ukai di dunya tu; enti perintah aku di dunya tu, sida anembiak aku tentu bebunoh ngela-ban orang ti nyerah ka aku ngagai orang bansa Judah. Ukai, perintah aku ukai di dunya tu!" 37 Nya alai ko Pilate nanya iya, "Kati nuan tu rajah?" Disaut Jesus, "Nuan empu udah madah ka aku tu rajah. Aku ada lalu datai ka dunya tu kategal utai siti tu, bejako ka pemendar. Barang sapa ti enggi pemendar deka mending ka jako aku." 38 "Lalu nama pemendar deh?" ko Pilate nanya.
Jesus kena ukum bunoh
Udah nya Pilate pansut ka luar baru ngagai sida orang Judah, ko iya, "Aku nadai nemu penyalah orang tu. 39 Tang nitih ka adat asal kita, aku selalu ngelepas ka siko orang tutup leboh maya Hari Besai Paska. Kati kita deka ngasoh aku ngelepas ka rajah orang Judah tu ka kita?" 40 Ko sida nyaut iya enggau nyawa ti inggar, "Anang ngelepas ka iya! Kami deka ka Barabas!" (Nyadi Barabas nya orang penyamun.)
19:1 Udah nya Pilate ngambi Jesus lalu nyipat iya. 2 Sida soldadu nyanyam duri, digaga ka makota lalu ditangkup ka ba pala iya; sida ngerasok ka baju panjai ti unggu ba iya, 3 lalu datai ngagai iya sereta bejako, ko sida, "Gayu Rajah orang Judah!" Lalu sida angkat sereta nampar iya. 4 Pilate pansut ka luar sakali agi lalu bejako ngagai orang mayoh, ko iya, "Peda, aku mai iya pansut ngagai kita, ngambi ka kita nemu aku amat nadai nemu penyalah ti udah dikereja iya." 5 Nya alai Jesus pansut ka luar, ngena makota duri enggau baju panjai unggu. Ko Pilate bejako enggau sida, "Peda! Tu orang ti ko kita nya!" 6 Leboh sida tuai imam enggau sida jejaga meda iya, sida bejako enggau nyawa ti inggar, ko sida, "Regang iya! Regang iya!" Ko Pilate bejako enggau sida, "Enti pia. bai-iya ulih kita, lalu regang. Aku nadai tetemu ka penyalah iya." 7 Disaut sida orang Judah, "Kami bisi adat madah ka iya patut kena bunoh, laban iya ngumbai diri anak Allah Taala." 8 Leboh Pilate ninga sida bejako munyi nya, ati iya lebih agi takut. 9 Iya pulai ka istana baru lalu nanya Jesus, ko iya, "Ari ni penatai nuan?" Tang Jesus lalu enda nyaut. 10 Ko Pilate bejako enggau iya, "Kati nuan enggai bejako enggau aku? Kingat nuan, aku bisi kuasa kena ngelepas ka nuan, enggau kuasa ngasoh nuan kena regang." 11 Disaut Jesus, "Nuan bisi kuasa atas aku semina laban kuasa nya diberi Allah Taala ngagai nuan. Nya alai iya ti nyerah ka aku ngagai nuan balat agi bedosa." 12 Leboh Pilate ninga jako nya, iya nguji ngiga jalai dikena ngelepas ka Jesus. Tang sida orang Judah bejako meradak ka nyawa, ko sida, "Enti nuan ngelepas ka iya, reti nya nuan ukai pangan Rajah Besai! Barang orang ti ngumbai diri rajah, nya munsoh Rajah Besai!" 13 Leboh Pilate ninga jako nya, iya mai Jesus pansut lalu dudok ba kerusi penudok hakim, ba endor ti dikumbai "Geladak Batu." (Dalam jako Hebrew utai nya dikumbai "Gabata.") 14 Hari leboh nya nyau ka tengah hari, iya nya hari sabedau Gawai Paska. Ko Pilate bejako ngagai sida orang Judah, "Tu iya ti rajah kita!" 15 Sida nyaut iya enggau inggar, ko sida, "Bunoh iya! Bunoh iya! Regang iya!" Ko Pilate nanya sida, "Kati kita ngasoh aku ngeregang rajah kita?" Disaut sida tuai imam, "Kami nadai rajah bukai, semina siko Rajah Besai aja!" 16 Udah nya Pilate nyerah ka Jesus ngagai sida, awak ka lalu diregang.
Jesus diregang
Nya alai sida lalu mai Jesus. 17 Iya pansut ka luar nyan regang diri, lalu datai ba siti endor ti dikumbai, "Endor Keruntok." (Dalam jako Hebrew iya dikumbai "Golgota.") 18 Dia sida ngeregang iya; sida mega ngeregang dua iko orang bukai, siko fnuak ari sapiak lalu siko ari sapiak, nyadi Jesus di tengah-tengah. 19 Pilate nulis pelekat siti lalu dilekat ka iya ba regang nya. Jako nya munyi tu: "Jesus orang Nasaret, Rajah orang Judah." 20 Mayoh sida orang Judah macha pelekat nya, laban endor sida ti ngeregang Jesus nya enda jaoh ari nengeri. Pelekat nya ditulis dalam jako Hebrew, jako Latin enggau jako Gerika. 21 Tuai imam orang Judah bejako enggau Pilate, "Anang nulis ka leka jako 'Rajah orang Judah,' tang manah agi nyebut, 'Orang tu bejako, aku tu Rajah orang Judah.' " 22 Disaut Pilate, "Utai ti udah ditulis aku mengkang ditulis." 23 Udah sida soldadu ngeregang Jesus, sida ngambi gari iya lalu magi iya empat, sabagi ka siko soldadu. Sida mega ngambi baju panjai iya ti ditenun nyadi, nadai betulang. 24 Ko sida soldadu bejako enggau pangan diri, "Kitai anang nyarik ka tu; manah agi kitai chabut undi—sapa ti empu iya." Utai nya nyadi kena ngamat ka jako dalam Bup Kudus ti munyi tu: "Sida bedua gari aku enggau pangan diri, lalu bechabut undi ka baju panjai aku." Nya alai sida soldadu ngereja utai nya. 25 Bediri ngimbai regang Jesus, iya nya indai iya enggau menyadi indu indai iya, Maria bini Klopas enggau Maria Mag-dalin. 26 Jesus meda indai iya enggau murid ti dikerindu iya bediri dia; nya alai ko iya bejako enggau indai iya, "Indu, tu anak nuan." 27 Udah nya iya bejako enggau murid nya, "Tu indai nuan." Kenyau ari nya murid nya mai indu nya diau ba rumah iya.
Pemati Jesus
28 Jesus nemu leboh maya nya samoa utai udah tembu magang; nya alai ngambi ka jako dalam Bup Kudus nyadi amat, iya lalu nyebut, "Aku aus." 29 Di endor nya bisi siti bisin penoh laban ai anggor ti kurang berega; sida ngerendam bunga karang ba ai anggor nya, disepit sida ngena pating isop, lalu dituat ka sida katas ngagai mulut iya. 30 Jesus ngirup ai anggor nya lalu bejako, ko iya, "Udah tembu!" Udah nya iya nensam ka pala lalu mati.
Rusok Jesus ditumbok
31 Udah nya sida orang Judah minta pemendar ari Pilate, matah ka kaki sida ti udah kena ukum bunoh, lalu ngambi sida ari regang. Sida ngereja nya laban maya nya Hari Lima, lalu sida enggai neju ka bangkai nya mengkang di regang leboh Hari Sabat, laban Hari Sabat ti deka datai nya hari ti kudus. 32 Nya alai sida soldadu lalu mansang kin sereta matah ka kaki iya ti terubah enggau iya ti bukai, ti udah kena ukum bunoh sama enggau Jesus. 33 Tang leboh sida datai ba Jesus, sida meda iya udah mati, nya alai sida enda matah ka kaki nya. 34 Tang taja pia siko ari sida soldadu nya lalu ngachok rusok Jesus ngena sangkoh, kemaya nya darah enggau ai lalu pansut. 35 (Iya ti meda utai nya nyadi lalu nusoi iya, awak ka kita mega tau arap. Utai ti ditusoi iya nya amat, lalu iya mega nemu diri nusoi utai ti bendar.) 36 Utai nya digaga awak ka jako dalam Bup Kudus tau nyadi amat, "Siti pen nadai meh tulang iya deka patah." 37 Bisi mega ba siti endor dalam Bup Kudus madah, "Orang mayoh deka merening ngagai iya ti udah di-achok sida."
Bangkai Jesus dikubor
38 Udah nya, Josep, ari nengeri Arimatia, minta pemendar ari Pilate ngambi bangkai Jesus. (Josep nya endang orang ti nitih ka Jesus, tang iya belalai, laban iya takut ka sida orang Judah ti megai kuasa.) Pilate ngasoh iya ngambi bangkai nya, nya alai Josep lalu mansang ngambi bangkai nya. "Nikodemus, iya ti udah mansang ngagai Jesus leboh malam hari, sama enggau Josep. lya mai kira 39 kilogram rempah, ti dichampor mor enggau garu. 40 Saduai ngambi bangkai Jesus lalu mungkus iya ngena kain linin; lalu dalam nyin di-engkah saduai rempah; laban nya jalai orang Judah ngintu bangkai ti deka dikubor. 41 Di endor nya bisi sabidang kebun, ti endor Jesus dibunoh, lalu ba endor nya bisi siti kubor baru ti apin dikena orang. 42 Laban maya nya sahari apin Hari Sabat orang Judah, lalu baka nya mega kubor nya semak ari endor nya, nya alai saduai ngengkah Jesus ba endor nya.
Kubor Puang
20:1 Tumu pagi Hari Minggu, leboh agi petang, Maria Magdalin mansang ngagai kubor lalu meda batu udah dibaring ka ari moa kubor. 2 Iya belanda lalu mansang ngagai Simon Peter enggau siko murid bukai ti dikerindu ka Jesus, ko iya madah ngagai saduai, "Sida udah ngambi Tuhan ari kubor lalu kami enda nemu endor sida ngengkah iya!" 3 Udah nya Peter enggau murid siko nya angkat mansang ngagai kubor. 4 Saduai bela belanda, tang murid ti siko belanda deras agi ari Peter, lalu dulu agi datai ba kubor. 5 Iya meremi lalu meda kain linin, tang iya enda tama ka dalam. 6 Ari belakang iya datai Simon Peter, lalu iya terus tama ka dalam kubor. Iya meda kain linin melapui dia 7 enggau kain ti dikena mungkus pala Jesus. Kain nya enda begulai enggau kain linin tang nyengkutong kediri. 8 Udah nya murid ti dulu datai di kubor tadi mega lalu tama ka dalam; iya meda sereta arap. 9 (Sida apin mereti ka jako dalam Bup Kudus ti madah ka iya enda tau enda angkat ari mati.) 10 Udah nya sida murid lalu pulai ka rumah.
Jesus ngayan ka diri ba Maria Magdalin
11 Maria bediri nyabak ari luar kubor. Sambil nyabak iya meremi lalu nilik ka dalam kubor, 12 sereta meda dua iko melikat di endor nya, ngena gari burak, dudok ba senentang endor bangkai Jesus, siko dudok ba muak ari pala lalu siko ba senentang kaki iya. 13 "Indu, nama kebuah nuan nyabak" ko saduai nanya iya. Disaut iya, "Sida udah mai Tuhan aku ka bukai, lalu aku enda nemu dini endor sida ngengkah iya!" 14 Udah iya bejako munyi nya, iya malik ka belakang lalu Jesus bediri dia; tang iya enda ngelala nya Jesus. 15 "Indu, nama kebuah nuan nyabak?" Ko Jesus nanya iya. "Sapa ti digiga nuan?" Iya ngumbai Jesus nya orang tukang kebun, nya alai ko iya, "Enti nuan udah mai iya ka bukai, tuan, padah ngagai aku endor nuan ngengkah iya, awak ka aku ngambi iya." 16 Ko Jesus bejako enggau iya, "Maria!" Indu nya malik ngagai iya lalu bejako dalam jako Hebrew, "Raboni!" (reti nya "Pengajar.") 17 Ko Jesus madah ngagai iya, "Anang megai aku, laban aku apin pulai ngagai Apai aku. Tang bejalai nuan ngagai sida menyadi aku, lalu tusoi ngagai sida, "Aku pulai ngagai Apai aku ti Apai kita, Allah Taala aku enggau Allah Taala kita!" 18 Nya alai Maria Magdalin angkat lalu nusoi ngagai sida murid, madah ka diri udah meda Tuhan, lalu iya udah madah ngagai iya jako nya.
Jesus ngayan ka diri ba sida murid iya
19 Nyau lemai Hari Minggu nya, lalu sida murid begempuru ba siti endor, pintu dikunchi laban sida takut ka orang Judah. Udah nya Jesus datai lalu bediri begulai enggau sida, ko iya, "Selamat ka kita." 20 Udah nyebut jako nya iya ngayan ka jari enggau rusok diri ngagai sida. Sida murid andal bendar ati meda Tuhan. 21 Udah nya ko Jesus bejako enggau sida baru, "Selamat ka kita. baka Apai ti udah ngasoh aku, baka nya mega aku ngasoh kita." 22 Iya nyebut nya lalu ngasoh ka seput atas sida, ko iya, "Sambut Roh Kudus. 23 Enti kita ngampun dosa orang, sida di-ampun; enti kita enda ngampun dosa sida, sida enda di-ampun."
Jesus saduai Tomas
24 Siko ari sida murid dua belas iko, Tomas (ti dikumbai Besapit), nadai enggau sida leboh Jesus datai. 25 Nya alai sida murid ti bukai nusoi ngagai iya, ko sida, "Kami bisi meda Tuhan!" Ko Tomas bejako enggau sida, "Enti aku enda meda abi paku lawang di tapa jari iya, lalu enda ngachok ka tunjok aku ba abi telih nya, aku enda arap." 26 Saminggu lepas nya sida murid begempuru baru dalam rumah, lalu Tomas bisi enggau sida. Taja pintu dikunchi sida, tang Jesus tama ka dalam lalu bediri enggau sida, ko iya, "Selamat ka kita." 27 Udah nya ko iya bejako enggau Tomas, "Tegu abi telih tu enggau tunjok nuan, lalu peda tapa jari aku: udah nya unjor ka jari nuan lalu achok abi telih rusok aku. Badu agi kakang ati, lalu arap!" 28 Ko Tomas nyaut iya, "Tuhan aku, Allah Taala aku!" 29 Ko Jesus bejako enggau iya, "Kati nuan arap laban nuan meda aku? Lantang meh orang ti arap ka aku, taja sida enda meda aku!"
Guna bup tu
30 Jesus ngereja mayoh macham pengawa ti nyelai di moa sida murid iya, tang utai nya enda ditulis dalam bup tu. 31 Utai tu ditulis awak ka kita tau arap ka Jesus nya amat Mesiah, Anak Allah Taala, lalu ulih pengarap nya kita bisi pengidup dalam nama iya.
Jesus ngayan ka diri ba tujoli iko murid
21:1 Udah nya Jesus ngayan ka diri sakali agi ngagai sida murid iya, di Danau Tiberias. Tu gaya iya ngayan ka diri. 2 Simon Peter, Tomas (ti dikumbai Besapit), Natanael (iya ti datai ari Kana di Galili), sida anak Sebedi, enggau dua iko agi sida murid Jesus ti bukai—bela bisi dia. 3 Ko Simon Peter bejako enggau sida bukai, "Aku tu deka nurun berikan." "Kami mega deka enggau nuan," ko sida madah ngagai iya. Nya alai sida angkat lalu nepan ka dalam perau; tang samalam-malam nya sida nadai bulih ikan siko. 4 Sereta mata panas udah tumboh, Jesus bediri di tebing ai, tang sida murid enda ngelala nya Jesus, 5 Udah nya ko iya bejako enggau sida, "O Bujang, kati kita bisi bulih utai?" "Nadai bulih siko," ko sida nyaut. 6 Ko iya bejako enggau sida, "Ulor ka pukat kita muak ari kanan perau kita, lalu kita deka bulih." Nya alai sida ngulor ka pukat muak ari kanan perau, lalu iya enda ulih batak agi laban ikan kelalu mayoh. 7 Siko murid ti dikerindu ka Jesus bejako enggau Peter, ko iya, "Iya nya Tuhan!" Leboh Simon Peter ninga iya nya Tuhan, iya lalu malut ka baju luar iya ba tuboh diri (laban iya udah bebuka baju) lalu terejun ka dalam ai. 8 Sida murid ti bukai mansang ka tebing ngena perau, narit pukat ti penoh laban ikan. Sida enda jaoh ari tebing, kira saratus meter. 9 Leboh sida udah niki ka tebing sida meda api bisi menyadi lalu ikan dipanggang atas nya, enggau sekeda roti. 10 Udah nya ko Jesus bejako enggau sida, "Bai sekeda ikan ti ulih kita." 11 Simon Peter nepan ka dalam perau lalu narit pukat nya ka tebing, penoh laban ikan, saratus lima puloh tiga iko samoa; taja ikan mayoh bendar dibalut pukat nya, tang pukat nya nadai charik. 12 Ko Jesus bejako enggau sida, "Aram makai." Nadai siko sida murid berani nanya iya munyi tu, "Sapa nuan tu?" laban sida ngelala iya nya Tuhan. 13 Nya alai Jesus datai, ngambi roti lalu meri ngagai sida; baka nya mega iya nyua ka ikan ngagai sida. 14 Nya ketiga kali Jesus udah ngayan ka diri ngagai sida murid, udah iya ti angkat ari mati.
Jesus saduai Peter
15 Udah sida tembu makai, ko Jesus bejako enggau Simon Peter, "Simon anak John, kati nuan rindu ka aku lebih ari sida tu?" Disaut iya, "Au Tuhan! Nuan nemu aku rindu ka nuan. Ko Jesus bejako enggau iya, "Intu raban domba aku." 16 Kedua kali Jesus bejako enggau iya, "Simon anak John, kati nuan rindu ka aku?" Disaut iya, "Au Tuhan! Nuan nemu aku rindu ka nuan." Ko Jesus bejako enggau iya, "Intu raban bedus aku." 17 Ketiga kali Jesus bejako enggau iya, "Simon anak John, kati nuan rindu ka aku?" Peter lalu tusah ati laban Jesus udah nanya iya munyi nya tiga kali, "Kati nuan rindu ka aku?" lalu ko iya, "Tuhan, nuan nemu samoa utai; nuan mega nemu aku rindu ka nuan! Ko Jesus bejako enggau iya, "Intu raban bedus aku. 18 Enggau bendar aku madah ka nuan: leboh nuan agi biak nuan selalu nanchang punggong diri ngena belulang lalu bejalai di sebarang endor nuan deka; tang leboh nuan nyau tuai nuan deka ngunjor ka jari diri lalu orang bukai deka nanchang sida ka nuan sereta mai nuan ngagai endor ti dikenggai ka nuan." 19 (Jesus nyebut jako munyi nya kena iya madah ka gaya pemati ti deka di-asai ka Peter, lalu mai mulia ngagai Allah Taala.) Udah nya ko Jesus bejako enggau iya, "Titih ka aku!"
Jesus enggau sida murid ti bukai
20 Peter malik ka belakang lalu meda siko murid, iya ti dikerindu ka Jesus—iya nya iya ti nyandih ba Jesus leboh sida makai sereta nanya, "Tuhan, sapa ti deka nyual nuan?" 21 Leboh Peter meda iya, ko iya bejako enggau Jesus, "Tuhan, kati pasal orang tu?" 22 Ko Jesus nyaut iya, "Enti aku deka, aku tau ngasoh iya idup datai ngagai aku datai baru, tang nama guna nya ba nuan? Titih ka aku!" 23 Nya alai berita nya lalu ditemu sida ti nitih ka Jesus, madah ka murid iya siko nya enda mati. Tang Jesus ukai madah ka iya enda mati, ko iya, "Enti aku deka ngasoh iya idup datai ngagai aku datai baru, nama guna nya ba nuan?" 24 Iya nya murid ti bejako ngenang ka utai nya, iya ti nulis ka utai nya; lalu kami nemu utai ti disebut iya endang amat.
Penutup
25 Bisi mega mayoh utai bukai ti digaga Jesus. Enti utai nya ditulis ka magang, dipelaba aku samoa dunya tu enda chukop endor ngengkah bup ti ditulis.