/1 Ngem i Dios ay nepasingan na i aya na nittam, ta maski paga turi ta minattagaruli ittam, ay natay si Cristo gafu nittam. Sangaw, ta nage na fiesta na Pascua, turi ta nannammuan ngana ni Jesus tu aranni i panoli na ngana ta Yama, ay yaw ngana i panaw na ta davvunaw; Kunne ta dana nga pangaya na ta totolay na toye ta mundo, inaya na ira ta adde ta panuppalan. Naggafu kani Jesu-Cristo nga nangipakannammu nittam ta ngamin nga kurug; Yaya gapa i katannangan ta ngamin nga patul ta davvunaw; Yaya i nangaya nittam gafu ta binaggawan na i katagaruliat-tam ta daga na. Kuruga iddukan na Dios ngamin i totolay, yatun i gafuna tu zinog na ta davvunaw i tattadday nga Ana na, tapenu ngamin i mangurug sa ay ari matay, nu ari matolay tu adde ta ngangangay. I Yafu Dios ay nappasingan gari niakan ay kinagi na, Wan, inaya taka ta aya nga awan tu kofutan na; Ta kunnuri, ina taka nga sigga-aya anna sigga-pagallallo.

/2 Kakurugan na tu kuruga makapabbaw i pangurug tam: Ta nepemamma nittam tu yaya ay tolay, ngem napakurug tu yaya ay Espiritu; nasingan na angheles ira, nelayyagayya ta ngamin nga totolay, kurugan na interu mundo, anna minune ta gloria.