1

1 Boi tuwai-lokalokana babi ana abave'inuba aimo keke ana toveya kaliva ana egana Bona gimiyamiya-vagata, ada Bana Bona Yaubada buye himimiyami, ada Bana Bona Yaubada Tauna. 2 Ada au babi ana abave'inuba againe Bana Bona Yaubada buye himimiyami. 3 Ada Bana Yaubada yana nuwanuwa Bana Bona givelena be Bana Bona gaitoma moya'aidi gibubudi, ada Bana anakaibe babi ana gaitoma sa'eyana sa'eyana gibubudi, au keke tamo hakwadi velugana gida'aibubuna. 4 Bana'e againe gaitoma moya'aidi wayawaidiyao yawaidi hinuhagana, ada Bana'e kaliva yawaida giveleda-ma kadu nuwada gikivemahalina. 5 Ada Bana'e kaliva nuwada gikivemahalina-ma ana egana Tomahala, fa'ina ide uyuyu againe kamimiyami-ma gitutuvemahalida, tu badi to'uyuyu ma Tomahala yana mahalina keke adifaiweya hidaluvekwe'uni. 6 Tu kaliva sa'eyana gilakayemu ana egana Yoni. Bana Yaubada gi'iveninisena be gi'ela. 7 Bana kalivai-nadi gi'ela be kaliva agaidiya mahalina fa'ina ginahawavemogatala, ada yana gahe hinanogalini-yo moya'aidi Tomahala hinavetumaganena. 8 Tu bana Yoni tauna keke Tomahalai-nadi. Bana gi'ela be higa Tomahala fa'ine ginahawavemogatala. 9 Tu Bana Bona mahala velemo'ena ada babiya gihobu'ela be kaliva moya'aida nuwada gi'i'ivemahalina. 10 Ada au Bana Bona babiya gihobu'ela be gimiyami. Yaubada yana nuwanuwa againe Bana Bona Tauna babi ana To'aibubuna nonogana tomiyababi hifaniyena. 11 Tauna yana babi againe gihobu'ela tu yana yo'o hikilowena. 12 Tu tufoidi keke hidakiloweni, au ase'asediya hivega'aulena be hivetumaganena, fa'ina badi tovetumagana gihawahegedi be Yaubada yana yo'ogaga agaidiya hitubuyemu. 13 Badi tovetumagana Yaubada natuneyao hitubuvagu, ada yadi tubuvagu inubana keke kaliva dayagine, keke kaliva be kwamayoku yadi enoluga againe, kadu keke kaliva yana nuwanuwa againe. Au Yaubada Tauna yana vehimeya againe badi tovetumagana au Yaubada natuneyao hitubuvagu. 14 Ada Bana Bona gihobu'ela be givekaliva ada gi'ela adahinageya a buye kamiyami. Kadu ime yana kikaiwabu a'itana, hida kikaiwabu-nadi Yaubada Tamada Natuna anakaibe'u-mo'a givelena-ma. Bana Bona nuwadoga kadu nuwanuwa velemo'ena againe gidodobodabodana. 15 Kadu Yoni Bana fa'ine gilukahihi, gikovalumamala gigayo, “Hida kalivai-nadi fa'ine boi galukahihi gagayo, Iya wai ganagona tu Bana mulikuya gina'ela-ma gikaiwabuhegeku, fa'ina iya aimo keke gadatubuga tu Bana tuwaina gimiyamiya-vagata.” Hidemi Yoni gigahe. 16 Ada Bana'e nuwadoga againe gidodobodabodana ada moya'aida agaideya yana nuwadoga gifolafolakena tova moya'aina, keke tamo gida'ilova. 17 Boi tuwaina Mosese Yaubada yana vehimeya ime miYuda bwanenemeyao givehawaledi, tu tova adamoya Yesu Keliso Tamana Yaubada yana huluva amine gihuluva fa'ina, Yaubada yana nuwadoga kadu yana gahe velemona kahalamanena. 18 Keke tamo hakwadi Yaubada gida'itani, keke. Tu Bana'e Natuna anakaibe'u-mo'a Tamana tova moya'aina giveve'alunena, Yaubada yana huluva ide agaideya givehawala. 19 Tu tova sa'eyana miYuda yama tovehimeya Yelusalema againe abaveyao ana tofaisewa tufoidi kadu manuwa-tafalolo ana toveluga buye'i hi'iveninisedi be Yoni againe hi'ela, higa hinatoliluveluvena. Au higayo, “O hakwa'adi? Ka'i o'eni kalivai-nina Yaubada givegide be yada yo'o unanagoyeda?” 20 Ada Yoni keke gidave'amata, au moya'aidi matadiya gihawavemogatala gigayo, “Iya keke Keliso Yaubada yana Tovegida.” 21 Badi higayo, “Au ugahe o hakwa'adi? Ka'i o'eni Elaiya Yaubada bonana ana to'awatalatalaina tuwaina gimiyami-ma?” Bana gigayo, “Keke. Iya keke Elaiya.” Kadu hitoliluvaluva-havagi higayo, “Ka'i o'eni to'awatalatalaina boi Mosese gilukahihiyena, higa tova mulina gina'ela-ma?” Kadu bana Yoni givekeke. 22 Bana givekeke-yo badi kadu higayo, “O udavenuwa'ata be adanogalina. Badi hi'iveninisema-ma aimo o fa'iniya gavaimi anagahedi? Gavadi o inuba?” 23 Au Yoni gigahedi gigayo, “Tuwaina Aiseya Yaubada bonana ana to'awatalatalaina iya fa'ikuya gilukahihi amine, adamoya iya gahuluhuluva. Bana Aiseya gigayo, Iya tokova, wala'aiya gakovakovadadana gagayo, Kaiwabu yana eda ase'asemiya wanakidewedewena.” Hidedemi Yoni Aiseya bonana giyakahina. 24 Tu badi totoliluvaluva medema tonagona tafatafalolodiyao adi egana Falisi adi yo'o kalivai-dina. Badi Falisi hi'iveninisedi be hi'ela. 25 Ada au Yoni againe hitoliluvaluva-havagi higayo, “O'eni keke Keliso, o'eni keke Elaiya kadu o keke tokivetuvetunu Mosese gilukahihiyena-ma, tu o hakwadi vehimeya givele-yo kaliva ukikivebafitaisoyedi?” 26 Yoni gigayo, “Iya gufagaga againe gakivebafitaisoyedi, tu kaliva sa'eyana omi hinafamiya gilakayemu-ma wafaniyena. 27 Bana mulikuya gina'ela tu gikaiwabuhegeku. Bana kikaiwabu-mo'ena tu iya kwamana kabisoku fa'ina, keke akufaiweya Bana againe ganave'agetoga-yo ana ageyafayafa adi aba'aiyauga ganayauni.” Hidemi Yoni gigahe. 28 Ada hida lukahihi melala ana egana Bedani againe gilakayemu, melalai-nadi Yolidani yuwa fafaline. Medede againe Yoni kaliva gikikivebafitaisoyedi. 29 Tu aiyeta anavelu againe Yoni gida'ita ma Yesu bana againe gi'ela'ela ada Yoni gigahe gigayo, “Wa'ita. Wada kaliva gi'ela'ela-ma Yaubada givegidena, ana egana Yaubada yana Sifi Kabi'ona. Tomiyababi yada koyona ginawahina be ginanauwena, sifi abaveyao againe gina'alika amine. 30 Wada kalivai-nadi fa'ine boi galukahihiyena gagayo, Iya wai ganagona tu Bana mulikuya gina'ela-ma kikaiwabu againe gitubuhegeku, fa'ina iya aimo keke gadatubuga tu Bana tuwaina gimiyamiya-vagata. Hidemi gagahe, ada wadema kaliva-mo'ena. 31 Ada nagona iya gafaniyena gavaita hakwa'adi, tu omi miIsileli agaimiya Bana inubana ganakivemogatalina fa'ina, Yaubada gi'iveniniseku be ga'ela gufa againe gakikivebafitaisoyemi.” 32 Kadu Yoni gihawavemogatala gigayo, “Nagona gafaniyena, Bana Yaubada yana Tovegida ma keke gadahalamaneni, tu Yaubada Alu'aluwana lobameya gihobu be Bana againe gimiya-vagata, ana ita vaita bunebune amine ada iya ga'itana. Ga'ita-yo nuwaku gi'afolena. Bana gi'iveniniseku be kaliva gufeya ganakivebafitaisoyedi-ma bonana nuwaku gi'afolena gigayo, Alu'aluwa ginahobu be kaliva sa'eyana againe ginamiya-vagata amanadi una'itana, au unahalamanena Bana kalivai-nadi Alu'aluwa Mahalina againe kaliva ginavemagadi. Hidemi Yaubada gigaheku. 34 Ada au iya ga'itana, ada moya'aimi matamiya gahawavemogatala hida kalivai-nadi Yaubada Natuna.” Hidedemi Yoni gigahe. 35 Tu kadu aiyeta anaveto againe Yoni gimidimidi ana tomuliya adi'iselu buye'i. 36 Himidimidi tu Yesu gi'ela be ginauna. Yesu ginauna tu Yoni gi'ita-yo gigayo, “Mene wa'ita, Bana Yaubada yana Sifi Kabi'ona.” 37 Ada tomuliya adi'iselu Yoni bonana hinogalini-yo, hilowoga Yesu muline hina. 38 Hinauna tu Yesu gihagavilana gida'ita ma himuliyena, au gitoliluveluvedi gigayo, “Gavadi-yo wa'ela?” Ada tomuliya sa'eyana gigayo, “Labai, gava manuwa againe umiyami?” (Hifufu |i labai |r ana kaivila ide bonadeya “tovehawala lakahina”.) 39 Au Yesu gigayo, “Wa'ela be kana ganavehawalemi.” Ada au hina be manuwa againe gimiyami-ma hi'itana. Ada kauwana giwahivekenana fa'ina, badi Bana againe buye himiyami tu mala a gibogi. 40 Ada kaliva adi'iselu Yoni yana gahe Bana Yesu fa'ine hinogalina-ma sa'eyana Anidulu, bana Saimoni-Fita taina. 41 Ada auhe'ama Anidulu gimadulowoga be gina tawagana Saimoni gilelena. Ginuhagani-yo gigahena gigayo, “Bana Mesaiya higa Yaubada yana Tovegida yada yo'o ginanagoyeda-ma ahe anuhagana.” (Tu bona Gilika againe Tovegida hivewagana Keliso.) 42 Ada au Anidulu tawagana givega'aulena Yesu againe. Ada Yesu gi'itadonedonena gigahena gigayo, “O'eni Saimoni Yoni natuna tu Iya ganaluwatuye Sifasi.” (MiYuda bonadiya bana ana egana Sifasi, bona Gilika ana egana Fita, ada egana ana kaivila kabala.) 43 Tu aiyeta anavefowa againe Yesu ginuwanuwa vaita ginana Galili ana fafali againe, ada Filifi ginuhagana gigahena be higa ginamuliyena. 44 Ma bana Filifi kwanamiBedasaida, medema kadu Anidulu be Fita yadi melala. 45 Au Filifi gina Nataniyela gilelena. Ginuhagani-yo gigahena gigayo, “Kaliva anuhagana, bana fa'ine boi Mosese yana buki-vehimeya againe gi'etoladina, kadu Yaubada bonana ana to'awatalatalaina hi'etoladina-ma Bana kalivai-nadi anuhagana. Ana egana Yesu, Yosefa natuna, kwanamiNasaledi.” 46 Bana Nataniyela gigayo, “Nasaledi melala kabi'ona. Keke tamo tokaiwabu wada melalai-nadi againe ginalakayemu, keke.” Tu Filifi gigahena gigayo, “U'ela be kana, tauni una'itani.” 47 Ada Yesu gida'ita ma Nataniyela gi'ela'ela, ada bana fa'ine gigahe gigayo, “Wa'ita, bana kwanamiIsileli velemo'ena. Yana dewa velemo'ena fa'ina keke tamo ve'alololo bana againe gidadauda.” 48 Nataniyela gigahena gigayo, “Ha'againe u'itaku-yo uhalamaneku?” Yesu gigayo, “Bana Filifi aimo keke gida'ela gidavega'aule tu iya ga'ita be gahalamane, fiki aiwa'une umiyami ana toveya.” 49 Au bana Nataniyela gigayo, “Tovehawala lakahi, Wona velemona o'eni Yaubada Natuna. O'eni miIsileli yada Tokaiwabu.” 50 Yesu gigayo, “O againiya Iya gagahe fiki aiwa'une ga'ita. Hida yaku gahe fa'ina uvetumaganeku. Yaku gahe o fa'iniya medema gaitoma kabi'ona, tu aimo gaitoma lakahina una'itana.” 51 Kadu gigayo, “Yaubada gihalamaneku tu gagahegahe. Lobama gina'ayauna be Yaubada yana tovenuwa'ata Iya Tohobu'ela agaikuya hinatauya be hinalakalaka hinahobuhobu ma o una'itadi.” Hidemi Yesu gigahe.

2

1 Tu aiyeta luhei hihegedi tu kaliva sa'eyana kwamayoku ginagina melala ana egana Kena againe. Kena medema Galili ana fafaliya ada melalai-nadi againe moya'aidi hivaga'auta nagi ana avemwamwala fa'ina, ada Yesu hinana ahe hilakayemu. 2 Kadu Yesu hiyowanina ana tomuliya buye'i nagi ana avemwamwala fa'ina. 3 Au hivaga'auta hivebutu hi'au'a tu bwai ana egana oine hiyu-'owoni-yo Yesu hinana Bana Yesu againe higahe higayo, “Yadi oine a gihavaina.” 4 Ada Bana gigahedi gigayo, “Kwamayoku, gavadi-yo omi wagahegahe? Au Iya Tauku ganavehimeyeku. Yaku ivemogatala ana tova aimo keke gidayemu.” 5 Tu Yesu hinana agetoga agaidiya higahe higayo, “Gavaiya'amine Bana ginagahe, au medede amine wanahuluva.” 6 Ada au aba'aihiwaga kugakugana sikisi gidauda, medema nima ana aba'ikolakola fa'ina miYuda yama dewa tafatafalolona amine. Ada aba'aihiwaga sa'eyana sa'eyana ana laga vaita dolomu kabi'ona faifi o kai seveni amine ana laga. 7 Tu Yesu agetoga gigahedi gigayo, “Aba'aihiwaga gufa-mo'a againe wanavemagana.” Ada au hihiwalakahina. 8 Kadu gigahedi gigayo, “Au wahiwa be avemwamwala ana tovehimeya againe wanauwe.” Ada au hihiwana be kaliva-nadi againe hinauwena. 9 Tu gufa-mo'a a give'oine ada bana tovehimeya giyuluvaluva tu hade'againe oine-nadi hivaini-ma keke gidahalamaneni. Au badi agetoga hihalamanena, taudiyao gufa-mo'a againe hihiwana fa'ina. Ada bana tovehimeya giyuni-yo, tonagi gikovana be gigahena gigayo, “Kaliva yadi oine yamumu-mo'ena himidihiwana, ada wakawaka hinayu'ahiyauwa-yo muliya oine-kawowo hinahiwana. Hidedemi kaliva moya'aidi yadi dewa tu o'eni ma oine yamumu-mo'ena usevauyena be adamo'uya useyemaunena.” Hidedemi gigahe. 11 Ada gufa againe Yesu nimana ana iya'iyaya gifaisewana Kena melala Galili ana fafali againe, ada iya'iyayai-nadi Yesu yana iya'iyaya nagona. Hidedemi gifaisewani-yo yana kikaiwabu gihawavemogatalena kaliva matadiya, ada au ime tomuliya yama vetumagana gilakata. 12 Tu muliya Yesu Kafeneumi melala againe gihobu, kadu badi hinana, tobohiyaneyao kadu ana tomuliya buye hihobu'ela ada medede againe hinumiya. 13 Himiyami tu miYuda yama tafalolo lakahina ana egana lobama ana tovenuwa'ata yana Abamaduviviya giluvedaveda'ufo fa'ina Yesu gitauya Yelusalema againe gilaka'ela. 14 Ada manuwa-tafalolo againe giluku tolukimokimone ginuhagadi, bulumakau sifi bunebune hikimonayedi abaveyao fa'ina. Kadu'e mani tulina tulina ana tosenisi yadi tolameya hivetoga-ma gi'itadi. 15 Gi'itadi-yo yana fuluma bulava Tauna gimetana be moya'aidi gitafidi au giwavidi, kaliva yadi yomuyomu buye'i. Kadu'e tosenisi yadi mani gi'iyauyaulena, ada yadi tolama givetala'afufuna. 16 Kadu badi bunebune hikimonayedi-ma gigahedi gigayo, “Hida lokoloko au wanauwe. Keke Kamaku yana manuwa againe wanakimokimone vaita maketi amine.” Au giwavidi be hihobu. 17 Ada au ana tomuliya Yaubada bonana eto'etoladina sa'eyana nuwadi gi'afolena, gigayo, Ho Yaubada, ya manuwa fa'ina iya gavedivediwe be vita ganuhagana. 18 Tu Yesu tolukimokimone giwavidi fa'ina, miYuda tufoidi higahena higayo, “Hakwadi vehimeya givele-yo kaliva uwavidi? Aituha fifiwalana tamo unafaisewana be ya abavehimeya anahalamanena, ka'i velemo'ena Yaubada givele o ka'i fwaya.” 19 Au Yesu gigahedi gigayo, “Hida manuwa-tafalolo wanayawelina, ada aiyeta tohiye againe kadu ganavemididina.” 20 MiYuda higayo, “Hida manuwa-tafalolo ana aiyogona kaliva hinunauwena malamala foti-sikisi (46) agaidiya, tu O ugahe vaita aiyeta tohiyegaga againe afaiweya unavemididini.” 21 Tu Yesu keke manuwa-tafalolo-mo'ena fa'ine gidalukahihi, au tauna wowona fa'ine gilukahihi. 22 Ada muliya Yesu ahe gimididi-havagi ana toveya, bonai-nadi ime ana tomuliya nuwama gi'afolena ada au Yaubada bonana tuwai-mo'ena hi'etoladina-ma adavadavana kadu Yesu bonana avetumaganena. 23 Atu Yesu tafalolo lakahina, ana egana lobama ana tovenuwa'ata yana Abamaduviviya fa'ina Yelusalema againe gimiyami, ada medema tovai-nadi nimana ana iya'iyaya hi'itana fa'ina, moya'aidi Yesu ana egana hivetumaganena. 24 Tu Bana Yesu ma ase'asedi gihalamanena, fa'ina keke gidavetumaganedi. 25 Bana'e kaliva moya'aida ase'aseda gihalamane-'owona, ada yada dewa fa'ina keke tamo hakwadi againe ginatoliluvaluva, au gihalamane-mo'eda.

3

1 Tu kaliva sa'eyana gimiyami, bana tonagona tafatafalolodiyao adi egana Falisi ana yo'o kalivana, ana egana Nikodimo, ada bana miYuda yama tovehimeya sa'eyana. 2 Ada bogi sa'eyana againe hida kalivai-nadi Yesu againe gi'ela gigahena gigayo, “Tovehawala lakahi, ime ahalamane Yaubada gi'iveninise be bonana unavehawalema, fa'ina tova moya'aina nima ana iya'iyaya ufifaisewana. Ka'i Yaubada keke O buye wadamiyami o, iya'iyaya-nadi keke afaiweya.” 3 Au Yesu gigahena gigayo, “Yaubada gihalamaneku tu gagahegahe. Ka'i kaliva keke ginatubuga-havagi, kadu keke anafaiweya Yaubada yana yo'ogaga agaidiya ana luku ginahalamaneni.” 4 Bana Nikodimo gigayo, “Gavaiya'amine kaliva lakahina kwamana amine ginatubuvagu? Bana keke anafaiweya hinana kamodiya ginaluku-yo kadu ginatubuga-havagi, keke.” 5 Bana Yesu gigayo, “Yaubada gihalamaneku tu gagahegahe. Ka'i kaliva yawaina ivaguna gufa againe kadu Alu'aluwa Mahalina againe keke ginavaini, kadu keke anafaiweya Yaubada yana yo'ogaga agaidiya ginaluku. 6 Bana'e amanadi kaliva dayagine ginatubuga, au kaliva wowona luluna ginavaina tu bana'e ma Alu'aluwa Mahalina yawaine ginatubuga, au Alu'aluwa yawaina ginavaina. 7 Iya gagahe gagayo, Omi wanatubuga-havagi. Hida yaku gahe againe keke nuwami ginavegafo'uya'uya. 8 Kaliva yana tubuga Alu'aluwa Mahalina yawaina againe medema vaita bolimana amine. Bolimana ginauna tauna givehimeyena amine. Butuna wanogalina higa ana aituha, tu inubana kadu ana lauyabu keke wadahalamaneni. Meda anafaiweya Alu'aluwa Mahalina yawaina inubana kadu ana lauyabu keke wadahalamaneni, tu hai kaliva Alu'aluwa Mahalina yawaina againe ginatubuga, medema yawaina ivaguna ana aituha yana huluva againe wa'itana.” Hidemi Yesu gigahe. 9 Tu Nikodimo gigahena gigayo, “Kaliva yana tubuga-havagi gavaiya'amine? Iya keke gadahalamaneni.” 10 Bana Yesu gigayo, “Gavadi-yo o tovehawala lakahi miIsileli agaideya tu hida gaitoma galukahihiyena-ma ufaniyeni. 11 Yaubada gihalamaneku tu gagahegahe. Ime bona ahalamane-mo'ena ma alukahihiyena ada gavadi a'ita-mo'ena ma ahawavemogatalena tu omi tovehawala ma bonama keke wadavenogaleni. 12 Babi ana miya fa'ina omi agaimiya galukahihiyena tu keke wadavetumaganeku. Ka'i lobama ana miya fa'ina ganalukahihi, keke-mo'a wanavetumaganeku. 13 Ada keke tamo hakwadi lobameya gidalaka-yo gidahobu'ela tu Iya Tohobu'ela akukaibe. Au lobameya gamiyami be gahobu'ela. 14 Boi tuwai-mo'ena wala'a againe Mosese oloto kainumuleya gibubuna be ai againe gikivemididina. Kadu meda anafaiweya Iya Tohobu'ela ai againe makewa hinakivemididiku. 15 Gavana fa'ina-yo hinakivemididiku? Hinakivemididiku be higa gava kaliva Iya ginavetumaganeku, medema yawai-vagahina ginanuhagana.” Hidedemi Yesu gigahe. 16 Au higa Yaubada nuwanuwana lakahi-mo'ena tomiyababi, fa'ina Natuna anakaibe'u-mo'a gihawahegena be gava kaliva Bana againe ginavetumagana, medema keke gina'alika-vagata tu yawai-vagahina ginanuhagana. 17 Yaubada Natuna babiya gi'iveninisena keke vaita tomiyababi matahiwadi ginaveledi, keke-mo'a. Au gi'iveninisena be kaliva ginakibababaledi fa'ina. 18 Gava kaliva Yaubada Natuna againe ginavetumagana au medema Yaubada keke matahiwadi ginaveleni, tu gava kaliva gidibutoyoga be keke ginavetumaganeni au ahe'i, ana wamatahiwadi Yaubada matane ahe gimimiyami, fa'ina Natuna anakaibe'u-mo'a ana egana keke gidavetumaganeni. 19 Yaubada yana matahiwadi gavana ana inuba? Tomahala babiya gihobu'ela nonogana, kaliva nuwanuwadi uyu'uyuyune hinamiyami be dewa koyona hinafaisewana fa'ina. Yadi dewa koyona fa'ina keke nuwanuwadi mahalina againe hinamiyami. Hidema fa'ina Yaubada matahiwadi ginaveledi. 20 Tokoyona keke nuwanuwadi mahalina. Au hivenikohiyena, fa'ina mahalina yadi dewa koyona gi'iveyemaunina, ada au keke nuwanuwadi mahalina againe hinayemu. 21 Tu badi kaliva dewa tunutunugina hififaisewana-ma nuwanuwadi mahalina againe hinamiyami be moya'aidi hinahalamanena Yaubada yana faiwala againe yadi dewa tunutunugina hififaisewana. 22 Tu Yesu gilukahihi gihavaina, Yelusalema gihegena ana tomuliya buye hina Yudiya awa'awanine buye himiyami ada kaliva Yesu yana vehimeya againe hibafibafitaiso. 23 Ada kadu Yoni melala ana egana Ainoni againe, medema Salimu liline, kaliva gikikivebafitaisoyedi melalai-nadi againe gufa lakahina gidauda fa'ina. Ada kaliva vevine bana againe hinauna hibafibafitaiso. 24 Medema tovai-nadi Yoni deliya aimo keke hidaseni. 25 Tu Yoni ana tomuliya tufoidi kwanamiYuda sa'eyana buye hivekwageya. Bwanene ana aba'ikolakola tafatafalolona fa'ina hivekwageya. 26 Au Yoni ana tomuliya bana againe hi'ela hi'awatalatalaina higayo, “Tovehawala, Bana boi yuwa Yolidani buye wamiyami ada Bana fa'ine ulumamala-ma, Bana kalivai-nadi againe adamoya kaliva moya'aidi hinauna hibafibafitaiso. Vaita o againiya hida'ela tu Bana againe hinauna.” 27 Higahe-yo Yoni gigahedi gigayo, “Yaubada anakaibe vehimeya givetavetala. Hakwadi yana kikaiwabu lakahina kadu hakwadi yana kikaiwabu kabi'ona ma Yaubada anakaibe givehimeyena. 28 Omi taumiyao boi iya gagahe yaku gahe wanogalina gagayo, Iya keke Keliso, Bana'e Yaubada givegidena be yada yo'o ginanagoyeda amanadi, tu Yaubada gi'iveniniseku be wai ganagona yana eda ganakidewedewena fa'ina. Hidemi gagahemi. 29 Wa'ita, ka'i kaliva ginanagi, kwamayoku bana againe gina'ela buye hinalukahihi ada kaliva tobohiyana badi lilidiya ginamiyami-ma, tonagi agona yana wavemwamwala ginanogalina. Ginanogalini-yo bana kadu ginavemwamwala. Ada iya vaita kaliva toubohiyana amine. Meda anafaiweya moya'aidi Yesu againe hi'ela'ela fa'ina, iya Yesu tobohiyana gavemwamwala-mo'a. 30 Ada aku vehimeya gavaina higa Bana yana kikaiwabu ginalakata tu iya yaku kikaiwabu ginakabi'o be ganamiya-kawowo.” Yoni au hidemi gigahe. 31 Tu Bana higa wese lobameya gihobu'ela-ma moya'aidi kikaiwabu againe gitubuhegedi. Kaliva babiya gilakayemu-ma bana babi ana kaliva kadu babi ana nuwanuwa gilukahihiyena, tu kaliva lobameya gihobu'ela-ma Bana anakaibe Tokaiwabu. 32 Ada gavadi lobameya gi'itana be ginogalina, medema fa'ina gilukahihiyena tu keke tamo hakwadi Bana bonana gidavenogaleni. 33 Tu gava kaliva Bana bonana ginavenogalena, medema gina'alakakila ginagayo, Yaubada Bana velemona. 34 Bana'e Yaubada gi'iveninisena-ma Yaubada bonana gilukahihiyena, fa'ina Yaubada Bana againe Alu'aluwana keke ma'ita gidanuwaloloneni, au gidodobodabodana. 35 Tamada nuwanuwana Natuna ada abavehimeya gaitoma moya'aidi agaidiya Bana nimane gisedi. 36 Gava kaliva Yaubada Natuna givetumaganena medema yawai-vagahina ginuhagana, tu gava kaliva Yaubada Natuna ginadibutoyogena be keke ginavetumaganeni medema yawai-vagahina keke-mo'a ginanuhagani, au Yaubada yana ila'a bana kalivai-nadi againe ginaduva-vagata. Au hidede amine.

4

1 Tu Yesu ana tomuliya himoya'ai. Kaliva tufoidi Yoni himuliyena tu kaliva moya'ai-mo'edi Yesu himulimuliyena be gikikivebafitaisoyedi, ada tonagona tafatafalolodiyao adi egana Falisi Yesu ana tomuliya valeyadi hinogalina. 2 Tu Yesu Tauna keke gidakivebafitaisoyedi, au ime ana tomuliya kaliva akivebafitaisoyedi. 3 Ada au Falisi Yesu yo'o givaidi ma valeyana hinogalina ada Yesu gihalamanena againe, Yudiya ana fafali ginuyabuyabuni tu Galili ana fafali againe giyewayewana. 4 Ada Galili ana eda Sameliya hinafane ginauna fa'ina, Yesu Sameliya ana fafali againe ginauna. 5 Ginauna tu melala sa'eyana Sameliya ana fafali againe gilakayemu, melala ana egana Saika. Boi tuwaina Yakobu natuna Yosefa babi sa'eyana givelena, ada melalai-nadi hida babi liline gidauda. 6 Kadu folufolu Yakobu tuwaina giyalana-ma medede againe gidauda. Ada au Yesu folufolu liline givetoga, fa'ina yanana lauva tunugina ginunauwena tu wowona gilogilogi. Ada kauwana getadeya gilaka. 7 Ime ana tomuliya melala-mo'ena againe ana be a'a anakimonena tu Yesu anakaibe gimiyami. Folufolu liline givetoga tu kwamayoku sa'eyadi, vinemiSameliya, hiyemu be higa gufa hinaboluna. Ada Yesu gigahedi gigayo, “Ma'i gufa wabolu be gayuni.” 9 Au badi kwamayoku higayo, “O'eni kwanamiYuda tu gavadi-yo ima vineSameliya agaimeya gufa uve'o'ola?” Hidemi higahe fa'ina miYuda miSameliya keke tamo tova buye hidalukahihi, au himiyavehaila. 10 Tu Yesu gigahedi gigayo, “Yaubada yana abahawahega agaimiya keke wadahalamaneni kadu Iya inubaku keke wadahalamaneni. Gufa fa'ina gave'o'olemi tu ka'i Iya inubaku wadahalamaneku digo, omi agaikuya wadagahe wadagayo, Ma'i gufa be ayuni. Wadave'o'ola be gufa miyamiya-vagahina gadavelemi.” 11 Hidedemi Yesu gigahe-yo badi higayo, “Kauveya, hida folufolu gava gihobu tunugina ada ya abakaibolu keke. Au ha'againe gufa miyamiya-vagahina ugaheyena-ma unaboluni? 12 Bwaneneda Yakobu hida folufolu giyalana-ma ime miSameliya givelema, ada hida gufa againe bana giyuyu kadu natuneyao buye hiyuyu, ada yadi yomuyomu hiveyuveyudi. Ka'i O'eni Yakobu ukaiwabuhegena? Ka'i keke.” 13 Au Bana Yesu gigahedi gigayo, “Gufa hida folufolu againe giguwaguwalena-ma moya'aimi wanayuna tu aimo kabisona agomi ginataina-havagi. 14 Tu yaku gufa ka'i ganavelemi be wanayuna, au agomi keke ginataina-havagi, ada gufai-nadi ganavelemi medema ginaveguya ase'asemiya be ginaguwaguwalena, ada ana egana yawai-vagahimi.” 15 Hidemi Yesu gigahedi tu kwamayoku higayo, “Kauveya, hida gufa unavelema be anayuni-yo agoma keke ginataina, kadu keke tova moya'aina ana'ela'ela gufa-kaiboluya.” 16 Yesu gigayo, “Wanana moganemi wanavega'aulena be wanayewami.” 17 Badi kwamayoku higayo, “Ima moganema keke.” Yesu gigayo, “Au wagahe velemo'ena. 18 Keke wamoganemi, fa'ina kaliva faifi wanagidi be waviholiliyedi, ada bana kaliva adamoya buye wamimiyami-ma keke moganemi velemo'ena. Hidema fa'ina wagahe velemo'ena higa keke wamoganemi.” 19 Ada au badi kwamayoku higayo, “Kauveya, makewa O'eni Yaubada bonana ana to'awatalatalaina, fa'ina yama huluva uhalamane-mo'ena. 20 Ime miSameliya bwanenemeyao hida oya againe Yaubada againe hihawadavadava, tu omi miYuda wagahe higa vaita Yelusalema gagana againe kaliva Yaubada againe hinahawadavadava.” 21 Bana Yesu kwamayoku gigahedi gigayo, “Iya ganagahe be yaku gahe wanavenogalena. Mali tova giluveda'ufo. Medema tovai-nadi omi tohawadavadava keke hida oya gagana againe kadu keke Yelusalema gagana againe Tamada wanahawadavadavani. Au alu'aluwami againe fafali moya'aina agaidiya wanahawadavadavana. 22 Omi miSameliya yami Yaubada againe wahawadavadava nonogana Bana'e keke wadahalamaneni, tu ime miYuda ma yama Yaubada ahawadavadavana-ma ahalamane-mo'ena, fa'ina miYuda agaimeya tokibababala ginatubuyemu. 23 Tu mali aituha giluveda'ufo ada au gilakayemu be Alu'aluwa Mahalina nuwanuwa velemo'ena inubana ma yana veluga againe fafali moya'aina agaidiya Tamada hinahawadavadavana. E, gavaimi Bana Tamada Kaliva velemo'ena ana lauboda, medemi nuwanuwana kaliva Bana'e hinahawadavadavana. 24 Yaubada Bana yawai-vagata miyamiyanina ana Tovetala, ada ana tohawadavadava gilubodadi be Bana Alu'aluwana againe wayawai-vagahidi hinatubuvagu-yo hinahawadavadavana velemo'ena.” Hidedemi Yesu gigahe. 25 Au badi kwamayoku higahena higayo, “Ahalamanena Yaubada yana Tovegida ginalakayemu, Bana ana egana Keliso. Ada Bana ginalakayemu ana toveya, gaitoma moya'aidi fa'ina ginakivetuvetunuma.” 26 Bana Yesu gigayo, “Iya omi'e agaimiya galulukahihi-ma Iya'eku kalivai-kuna.” 27 Tu Yesu gigahe-yo au ime ana tomuliya ana kimoneya ma ayemu. Ada Bana Yesu kwamayoku buye hilukahihi fa'ina nuwama givegafo'uya'uya tu keke tamo hakwadi agaimeya gidatoliluveluvedi gidagayo, “Gavadi fa'ina walukahihi?” O ka'i Yesu againe gidagahe gidagayo, “Gavana fa'ina kwamayoku buye walukahihi?” Adagahe tu awowomumu fa'ina ave'amata. 28 Ada au kwamayoku yadi aba'aihiwaga hise-vagahini tu hilowoga, melala againe hina kaliva hinuhagadi higahedi higayo, 29 “Wa'ela be kana kaliva wa'ita. Bana boi keke gida'itama tu gaitoma moya'aina ahuluvina-ma giyauna. Ima anuwanuwa ka'i Bana Yaubada yana Tovegida Keliso o ka'i keke?” 30 Higahedi-yo moya'aidi hilowoga Yesu againe hina. 31 Badi kaliva aimo hi'ela'ela tu ime Yesu ana tomuliya aluya'aya'alina agayo, “Tovehawala, ma'i a'a u'ani.” 32 Tu Bana gigayo, “We'a akuga, medema mali a'a omi keke wadahalamaneni.” 33 Au avebutu ave'agahegahe agayo, “Ka'i tamo hakwadi anaga a givelena?” 34 Ada Bana Yesu gigahema gigayo, “Kamaku givegideku be yana vehimeya ganafaisewana. Nuwanuwaku yana faisewa giveleku-ma ganafaisewa-'owona. Yana faisewa tova moya'aina gafififaisewa-ma vaita a'a gada'au'a-yo gada'ahiyauwa amine. 35 Au omi wagagahe wagagayo, Vaikohi fowa kanaluyabuni-yo a'a kana'aiyala. Tu Iya gagahe, Wa'ita, matami wahege be kaliva moya'aidi Iya agaikuya hi'ela'ela-ma wa'itadi. Badi nuwadi ahe giludigadigaga be hinavetumaganeku. 36 Badi bonaku ana tovehawala vaita tofaha kadu toyaudi amine. Badi tofaha ma bonaku kaliva ase'asediya himidifahana, atu badi toyaudi ma yadi kivetuvetunu hive'atutamo'aina againe, kaliva hivetumaganeku, au yaku kaliva hiyaudi. Hivetumaganeku-yo yawai-vagahidi hinuhagana. Ada au yaku tovehawala yadi laufata hivaivaina, higa tofaha kadu toyaudi kaliva yadi vetumagana fa'ina buye hivemwamwala. 37 Ada kaliva higagahe higagayo, Kaliva sa'eyana a'a gifahana tu mali kaliva yaudi againe givelugana. Hida gahe keke fwaya. 38 Iya ga'iveninisemi be faha againe keke wadafaisewa-ma wanayaudi. Mali kaliva hifaisewa tu omi yadi faha wanayaudi, au higa mali kaliva bonaku kaliva ase'asediya himidifahana tu omi'iyao ma yami kivetuvetunu againe kaliva hivetumaganeku.” Hidede amine Yesu ana tomuliya agaimeya gigahe. 39 Ada au kwamayoku yadi melala againe miSameliya moya'aidi agaidiya higahe higayo, “Bana gaitoma moya'aina ahuluvina-ma giyauna.” Ada yadi gahe fa'ina moya'aidi Yesu hivetumaganena. 40 Ada badi miSameliya Yesu againe hi'ela higahe higayo, “Una'ela yama melaleya buye kanamiya.” Ada au Yesu gina badi agaidiya gimiya aiyeta luhei. 41 Ada Yesu Tauna yana gahe fa'ina kadu kaliva moya'aidi hivetumaganena. 42 Ada kwamayoku agaidiya higahe higayo, “Keke yami gahegaga fa'ina adavetumaganeni, au taumeyao Bana bonana anogalina fa'ina avetumaganena, kadu ahalamanena Bana makewa tomiyababi ada Tokibababala.” Hidemi higahe. 43 Tu aiyeta luhei gihavaini-yo Yesu Sameliya ana fafali againe kadu gilowoga gina Galili ana fafali againe. 44 Ma boi Yesu Tauna gigahe gigayo, “Yaubada bonana ana to'awatalatalaina tauna yana yo'o keke hidawowomumuyeni.” 45 Tu Tauna yana fafali Galili againe gilakayemu ana toveya, miGalili yadi wavemwamwala hilusiuleyena. Badi tafalolo lakahina fa'ina Yelusalema againe Yesu buye hina, ada yuwadede againe nimana ana iya'iyaya moya'aina hi'itana fa'ina Yesu nuwadi givaina. 46 Ada au Yesu Kena againe gilakayemu-havagi, melalai-nadi Galili ana fafali againe. Boi hida melala againe givehimeya be gufa-mo'a give'oine. Ada tovehimeya sa'eyana, kaliva lakahina, melala ana egana Kafeneumi againe gimiyami ada natuna kaliva gi'aulolo. 47 Ada Yesu Yudiya ana fafali ginuyabuyabuna be Galili againe giyewana ma bana tovehimeya ginogalini-yo, au gilowoga Yesu againe gi'ela, give'o'olena be ginahobu'ela Kafeneumi againe natuna ginasiveyawana, natuna gi'aulolo vaita gida'alika fa'ina. 48 Tu Yesu gigahena gigayo, “Ka'i keke nimaku ana iya'iyaya ganafaisewani be ganaveyaulowogimi amine o, kadu keke wanavetumaganeku.” 49 Au tovehimeya lakahina gigahena gigayo, “Kauveya, udamadu'ela natuku uda'itana, kabisona gina'alika.” 50 Yesu gigayo, “Au unana natu adamoya ginabwaina.” Ada au kaliva Yesu yana gahe givetumaganena fa'ina gilowoga. 51 Ginauna tu ana agetoga buye hive'anauhaga higahena higayo, “Au natu giyamumu.” 52 Ada bana tovehimeya gitoliluveluvedi gigayo, “Gava kauwana natuku givebutu giyamumu?” Badi higayo, “Boiyesedi kauwana getadeya wowona gituluna.” 53 Au kwamana tamana nuwana gi'afolefolena gigayo, “Au boiyesedi kauwana getadeya Yesu gigaheku gigayo, Natu adamoya ginabwaina, ada medema tovai-nadi wayakahina-ma natuku giyamumu.” Ada au bana tauna Yesu givetumaganena, kadu ana unuma buye'i. 54 Ada au Yesu Yudiya ana fafali ahe ginuyabuyabuna be Galili ana fafali againe giyewana, ada hida nimana ana iya'iyaya anavelu Galili againe gifaisewana be kaliva agaidiya yana faiwala gi'ivemogatalina.

5

1 Himiyami tu miYuda yama tafalolo sa'eyana gilakayemu, ada tafalolo fa'ina Yesu Yelusalema againe gina. 2 Tu Yelusalema melala kuga againe hi'alana ada sifi yadi abaluku liline ni'u abatowa gidadauda, bona Hibeliu againe ana egana Bedesida. Ada ni'u afa'aine abamiyami faifi hiyogona. 3 Ada abamiyami againe to'aulolo moya'aidi hidauda, tomatakoyo tovefela kadu kaliva wowodi gifwalele-vagata. ((Badi gufa yana lu'awabolubolu fa'ina hibodaboda. 4 Higa tamo tova Yaubada yana tovenuwa'ata ni'uya gidahobu'ela gufa gidalu'awabolubolu ada againe gava kaliva gidamadu gufeya gidamiditowa, medema kalivai-nadi gidayamumu. Gavadi yana aulolo, au gidahavaina.)) 5 Ada to'aulolo agaidiya kaliva sa'eyana gimiyami, gi'u'aulolo malamala teti-eita. 6 Ada Yesu to'aulolo-nadi gidauda-ma gi'itana, ada bana gi'u'aulolo lauva tunugina ma gihalamanena. Gi'ita-yo gitoliluveluvena gigayo, “Ka'i nuwanuwa unabwaina?” 7 Bana to'aulolo gigayo, “Kauveya, aku toveluga keke. Gufa yana lu'awabolubolu againe, keke tamo hakwadi gidamiyami-yo gufeya gidanauweku. Aimo gahobuhobu tu mali kaliva auhe'ama gimamadutowa, ada au yana yamumu givaina.” 8 Au Yesu gigahena gigayo, “Umidi, a ivi uwahi be unanaudadana.” 9 Ada auhe'ama kaliva giyamumu, ana ivi giwahina givebutu ginunudadana. Tu aiyeta Yesu kaliva gisiveyawana, medema sabati miYuda yama veyawai. 10 Sabati againe gisiveyawana fa'ina miYuda yama tonagona kaliva giyamumu-ma higahena higayo, “Adamoya sabati. Ide yada vehimeya ivi ana wahi sabati againe gihawatana.” 11 Tu bana kaliva gigahedi gigayo, “Bana gikiveyamumuku-ma gigaheku gigayo, A ivi uwahi be unanaudadana.” 12 Ada badi hitoliluveluvena higayo, “Bana kaliva gigahe higa vaita a ivi unawahina be unanudadana-ma, bana hakwa'adi?” 13 Tu hakwadi gisiveyawana-ma Bana kaliva keke gidahalamaneni, fa'ina yo'o lakahina himiyami ada Yesu a ginanauna. 14 Tu muliya Yesu manuwa-tafalolo againe kalivai-nadi ginuhagana ada gigahena gigayo, “U'ita, ahe uyamumu. Ya dewa koyona unahege-vagahina be mali aulolo koyo-mo'ena keke ginavaini.” 15 Yesu hidemi gigahe tu kaliva gilowoga, gina miYuda agaidiya gi'awatalatalaina gigayo, “Bana kaliva gisiveyawaku-ma ana egana Yesu.” 16 Ada au Bana Yesu sabati veyawai ana tova againe kaliva gisisiveyawadi fa'ina, miYuda yama tonagona nuwanuwadi Yesu hinamununa. 17 Tu hidedemi hinuwanuwa fa'ina, Yesu gigayo, “Kamaku aiyeta moya'aina aimo gifififaisewa, ada hidema fa'ina kadu Iya aiyeta moya'aina gafififaisewa.” 18 Ada au hida yana gahe fa'ina miYuda hinuwakoyo-mo'a, ada nuwanuwadi lakahina hinaluve'alikana. Bana sabati ana vehimeya vaita keke gida'abi'abini fa'ina himidinuwakoyo, tu muliya vaita yana koyona gidave'atutamo'aini higa Yaubada gihawavetamanena vaita bana tauna Yaubada amine, au gilagatamo'aina. Hidema fa'ina hinuwakoyo-mo'a. 19 Tu Yesu miYuda gigahedi gigayo, “Yaubada gihalamaneku tu gagahegahe. Iya Yaubada Natuna keke akufaiweya akukaibe gavadi ganagugaiyeni, keke. Gavadi Kamaku gigugaiyena be ga'itana, medema kadu Iya bana Natuna gagugugaiyena. Gaitoma moya'aina Kamaku gigugaiyena-ma Iya kadu meda anafaiweya gagugaiyena. 20 Fa'ina Kamaku nuwanuwana Iya'eku Natuna, ada gaitoma moya'aina Bana gigugaiyena-ma givehavehawaleku. Ada gugai fifiwala-mo'ena aimo ginavehawaleku be ganafaisewana, ada medema againe wanayaulowoga. 21 Fa'ina Kamaku kaliva alikeya gisivemidididi ada yawaidi giveledi amine, meda anafaiweya Iya Natuna ganahuluva. Gaveyao nuwanuwaku yawaidi ganaveledi, medema au ganaveledi. 22 Au Kamaku keke tamo kaliva gidavedewayaugini tu vedewayauga ana vehimeya Iya Natuna giveleku. 23 A giveleku be kaliva moya'aidi hinawowomumuyeku, Kamaku hiwowomumuyena amine. Badi kaliva Iya Yaubada Natuna keke hidawowomumuyeku-ma, kadu keke Kamaku hidawowomumuyeni, fa'ina Bana gi'iveniniseku. 24 Ada Iya gagahe velemo'ena, gava kaliva bonaku ginanogalina be Bana'e gi'iveniniseku-ma ginavetumaganena, medema yawai-vagahina ginanuhagana, kadu keke yana huluva koyona fa'ina Yaubada againe ginakotu, fa'ina bana alika ana eda gihege tu yawai-vagahina ana eda againe gidamana be ginanauna. 25 Kadu Yaubada gihalamaneku tu gagahegahe, tova giluveda'ufo ada au gilakayemu. Adamoya kaliva yawaidi ivaguna keke hidavaini-ma badi vaita ali'alikadiyao amine, ada badi ali'alikadiyao Iya Yaubada Natuna bonaku hinanogalina ada ka'i hinavenogalena amine o, yawaidi ivaguna hinanuhagana. 26 Fa'ina Kamaku kaliva yawaidi ivaguna inubana ada givewahivedamaku be kadu kaliva yawaidi ivaguna inubana Iya Natuna agaikuya. 27 Ada babiya gahobu'ela be gavekaliva fa'ina, Kamaku kadu abavehimeya velugana giveleku be kaliva moya'aidi yadi dewa fa'ina ganavedewayaugidi. 28 Yaku gahe fa'ina keke nuwami ginavegafo'uya'uya, fa'ina aimo tova mulina kaliva moya'aidi lahi againe hidadauda-ma agoku hinanogalina be hinayemu. 29 Badi yadi dewa hagihagina ma hinamididi-havagi be Yaubada buye hinamiyamiya-vagata, tu badi yadi dewa koyona ma hinamididi-havagi be matahiwadi ganaveledi. 30 Keke Iya akukaibe gadavehimeya au gavaimi Kamaku gigaheku amine gavehivehimeya. Ada keke yaku nuwanuwa amine gadavehimeya, au Bana gi'iveniniseku be gahobu'ela yana nuwanuwa amine gavehivehimeya. Hidema fa'ina yaku vedewayauga tunutunugina. 31 Ka'i Iya akukaibe Tauku fa'ikuya ganahawavemogatala be Tauku ganakilakahiku, omi wananuwanuwa vaita yaku gahe fwaya. 32 Tu tohawavemogatala sa'eyana gimimiyami, Bana Kamaku. Ada Bana inubaku fa'ina gihawavemogatala ada Iya gahalamanena Bana yana gahe Iya fa'ikuya keke fwaya. 33 Kadu Yoni againe kaliva wa'iveninisedi be Iya fa'ikuya gavaimi gigahe-ma hivenuwa'atami, ada bana Yoni yana hawavemogatala inubaku fa'ina au velemo'ena. 34 Tu tomiyababi Iya fa'ikuya gavaimi higahe-ma keke gadanuwenuweni. Bana Yoni tomiyababi tu yana gahe fa'ina nuwami gatalafolena be wanavetumaganeku-yo kibababala wananuhagana. 35 Bana Yoni vaita lamufa gi'ala'alata be kaliva gituvemahalidi-ma amine, ada eda mahamahalina givehawalemi fa'ina tova kali'uhona wavemwamwala. 36 E, Yoni inubaku gihawavemogatalena. Bana yana hawavemogatala gaitoma kabi'ona. Gaitoma lakahina gidadauda be againe wanahalamaneku. Yaku gugai fifiwalana inubaku gihawavemogatalena. Kamaku givehimeyeku be gugai fifiwalana tulina tulina ganafaisewa-'owodi, ada adamoya mena gugai-dina gafifaisewadi medema inubaku omi agaimiya gihawavemogatalena, higa Yaubada Kamaku gi'iveniniseku. 37 Kadu Bana Kamaku gi'iveniniseku-ma Iya fa'ikuya gihawavemogatala tu keke tamo tova Bana agona wadanogalini o magigina wada'itani. 38 Kadu Kamaku bonana keke ase'asemiya gidadauda, fa'ina Iya gi'iveniniseku-ma keke wadavetumaganeku. 39 Yaubada bonana Veyao Tuwaina againe gidadauda-ma wahawa-hagihagiyena, fa'ina wanuwanuwa vaita bonai-nadi againe yawai-vagahimi wananuhagana. Tu kadu hida bonai-nadi Iya fa'ikuya gilukahihi, tu wafaniyeku. 40 Veyao Tuwaina ana buki gilukahihiyeku nonogana, keke Iya agaikuya wada'ela-yo yawai-vagahimi wadanuhagani, au wakiloweku. 41 Tu kikaiwabu keke kaliva agaidiya gadalele, au Kamaku againe kikaiwabu gavaina. 42 Au ase'asemi gahalamanena, keke nuwanuwami Yaubada. 43 Iya'eku ma Kamaku ana eganeya gahobu'ela tu wakiloweku. Ka'i tamo hakwadi tauna ana eganeya gina'ela, makewa bana wanavetumaganena. 44 Keke amifaiweya wanavetumaganeku, fa'ina nuwanuwami lakahina kaliva matadiya wanakaiwabu, tu Yaubada anakaibe'u-mo'a matane wanakaiwabu fa'ina keke wadanuwanuwa. Hidema fa'ina keke amifaiweya wanavetumaganeku. 45 Kadu keke wananuwanuwa vaita Kamaku againe ganavekotumi. Iya keke ganavekotumi. Au bana Mosese ginavekotumi. Omi miYuda moya'aimi Mosese againe wanuwave'avina be vaita ginakibababalemi, tu bana bonana keke wada'abini fa'ina, bana ginavekotumi. 46 Ka'i Mosese wadavetumaganena digo, kadu Iya wadavetumaganeku, fa'ina Mosese Iya fa'ikuya gi'etoladi. 47 Tu Mosese yana etoladi keke wadavetumaganeni fa'ina, kadu keke amifaiweya yaku gahe wanavetumaganeni.” Yesu yana kahihi miYuda yama tonagona agaidiya au hidede amine.

6

1 Tu muliya Yesu tobu ana egana Galili yuwa fafaline gidamana. Tobu ana egana kadu Taibiliya. 2 Ada Yesu nimana ana iya'iyaya to'aulolo agaidiya gififaisewadi fa'ina, yo'o lakahina himulimuliyena. 3 Au Yesu gilaka oya fafaline givetoga, ada ime ana tomuliya buye'i. 4 Ada medema tovai-nadi miYuda yama tafalolo lakahina giluveda'ufo, tafalolo ana egana lobama ana tovenuwa'ata yana Abamaduviviya. 5 Ada au Yesu givetogana, matana gidahegena ma yo'o lakahina Bana againe hi'ela'ela-ma gi'itadi. Gi'itadi-yo Filifi againe gigahe gigayo, “Ha'againe beledi kanakimoneni-yo hida yo'o hina'a?” 6 Ma Yesu hidede amine Filifi gigaluvaluvana be gavaimi ginagahe ma gina'itana. Tu Yesu ahe gihalamanena aimo Tauna gavaimi ginaga. 7 Ada Filifi gigayo, “Ka'i mani lakahina kaliva yana faisewa fatana vaikohi eita amine kadaseni-yo beledi kadakimonena digo, keke adifata kasimina kasimina hinavaini.” 8 Tu ana tomuliya sa'eyana ana egana Anidulu, Saimoni-Fita taina, bana gigahena gigayo, “Kwamana sa'eyana gimimiyami, ana alaka giwahina beledi kabi'ona a'a ana egana bali againe hibubuna-ma faifi, kadu igana kabi'odi luhei. Tu hida a'a hima kasimina keke lakahina, au yo'o keke-mo'a adifata.” 10 Au Bana Yesu gigayo, “Kaliva vevine wanagahedi be hinavetoga.” Ada au agahedi be hivetoga, babi unaunagina kadu isisi'u yamumuna fa'ina. Ada kaliva gagana akilagalagadi adi yo'o 5,000 tu vevine we'owe'o buye'i a gavaiyehi. 11 Hivetoga-yo Yesu beledi faifi givaidi digo Yaubada againe givesiule gikihinehinena ime ana tomuliya givelema be yo'o agaidiya afolakena. Kadu anafaiweya igana gikihinehinena be afolakena, ada moya'aidi adifata amine hi'a. 12 Ada hi'ahiyauwa-yo Yesu gigahema gigayo, “Adi tufo wanakwakwana be keke tamo kanahegeni fa'ina.” 13 Ada au akwakwa, adi tufo beledi faifi kwadakwadana againe feyawa tuwelo avemagadi. 14 Tu yo'o Yesu nimana ana iya'iyaya a'a againe gifaisewana-ma hi'itana againe hivebutu higayo, “Wona velemona Bana Yaubada bonana ana To'awatalatalaina lakahina, Bana yana lakayemu babiya fa'ina kabodabodana-ma.” 15 Higahegahe tu Yesu yadi nuwanuwa gihalamanena, higa vaita hidakive'avini-yo yadi tokaiwabu hidaseni. Tu Yesu keke nuwanuwana hidede amine hinahuluvini fa'ina, ginuyabuyabudi be anakaibe gina gilaka oyeya. 16 Yesu gina tu mala a gilavina, ada ime ana tomuliya taliyeya ahobu digo wakeya ayage, Kafeneumi melala againe avebutu awoidamana. Ada au mala a gibogi tu Yesu aimo wese oyeya, keke ime agaimeya gidayewani. 18 Awoiwo tu mala koyona gilakayemu bolimana lakahina gimadu. 19 Kadu awoiwo awoiwo anunauwena tu ana lauva kilomita ka'i faifi awoihegena, tobu hinafane ayemu tu Yesu a'itana, waka amine ni'u getane agene gi'ela'ela, ada ime amatautave'ine. 20 Tu Yesu gigahema gigayo, “Keke wanamatauta, hima Iya ga'ela'ela.” 21 Agona anogalini-yo avemwamwala agayo, “U'ela uyage.” Au gi'ela giyage ada auhe'ama avaleya ayemu Kafeneumi liline. 22 Bogi ada tu yo'o yuwa tobu fafaline himiya. Mala gilauna hive'agahegahe higayo, “Boiyesedi waka sa'eyanaga a'itana, ada Yesu ana tomuliya hiyage tu Yesu Tauna keke gidayage. Badi hina tu Bana hami gina?” 23 Ada waka kabi'ona kadu velugadi Taibiliya hilowoga be hi'ela ada abaga liline hiyemu, abagai-nadi againe Yesu a'a givesiuleyeni-yo yo'o hi'ana. 24 Ada yo'o Yesu ime ana tomuliya buye hilele-wayogema yo au kabi'odi wakai-dina agaidiya hiyage, Kafeneumi againe hidamana'ela be Yesu hinalelena. 25 Tu Yesu tobu fafaline gidamana-ma hinuhagana higahena higayo, “Tovehawala, gava tova udamana'ela?” 26 Bana Yesu givebutu gilukahihi gigayo, “Yaubada gihalamaneku tu gagahegahe. A'a gavelemi wa'ana be wa'ahiyauwa-yo waleleleku. Keke nimaku ana iya'iyaya wada'itani-yo wadanuwenuweni fa'ina wadaleleku, keke. 27 Keke babi ana a'a fa'ina wanavedivediwe, fa'ina a'ai-nadi keke ginaduva-vagata. Au a'a miyamiya-vagahina Iya Tohobu'ela ganavelemi-ma wanalele-mo'ena, fa'ina Yaubada Kamaku abavehimeya giveleku be hida a'a ganavelemi.” 28 Au badi hitoliluveluvena higayo, “Ka'i Yaubada yana faisewa nuwanuwama ana'abina, gavadi anagani?” 29 Bana Yesu gigayo, “Iya Yaubada gi'iveniniseku be gahobu'ela-ma wanavetumaganeku. Yami faisewa vetumagana. Au hidede amine Yaubada nuwanuwana omi wanafaisewa.” 30 Badi higayo, “Gava iya'iyaya au unafaisewana be ana'itani-yo anavetumagane? Gavadi fifiwalana unafaisewana be ya faiwala ana'itani-yo anahalamanena Yaubada gi'iveninise be u'ela? 31 Bwanenedeyao lobama ana a'a, ana egana mana, wala'aiya hi'au'ana. Meda Yaubada bonana eto'etoladina sa'eyana gigahe gigayo, A'a giveledi medema lobameya gihobuhobu.” 32 Bana Yesu gigayo, “Yaubada gihalamaneku tu gagahegahe. A'a lobameya gihobuhobu-ma keke Mosese gidavelemi, keke. Au Iya Kamaku a'a velemo'ena lobameya giyemu-ma tova moya'aina givelevelemi. 33 Fa'ina a'a Yaubada givetavetala, medema kaliva lobameya gi'iveninisena be gihobu'ela, ada Kalivai-nadi againe tomiyababi yawaidi ivaguna hinavaina.” 34 Badi higahena higayo, “Kauveya, hida a'a ugaheyena-ma udavelevelema tova moya'aina.” 35 Tu Yesu gigahedi gigayo, “Iya'eku yawaimi ivaguna ana a'a. Hakwadi unamuliyeku, medema aimo keke-mo'a mafu ginalau. Kadu hakwadi unavetumaganeku, medema aimo keke-mo'a ago ginataina. 36 Tu ahe gagahemi higa ahe wa'itaku yaku iya'iyaya wa'itana nonogana keke wadavetumaganeku. 37 Gaveyao Iya agaikuya Kamaku ginahawahegedi, medema moya'aidi hinamuliyeku. Ada badi hinamuliyeku-ma, keke-mo'a ganakilowedi. 38 Keke vaita yaku nuwanuwa fa'ina lobama gadahegeni tu gadahobu'ela babiya, keke. Au Kamaku gi'iveniniseku be yana nuwanuwa ganafaisewa fa'ina gahobu'ela. 39 Ada Bana gi'iveniniseku-ma yaku kaliva giveleku. Keke nuwanuwana tamo hakwadi badi agaidiya gananuhegeni-yo gina'alika-vagata. Au nuwanuwana yaku kaliva moya'aidi alikeya ganasivemidididi tova mulina vedewayauga ana toveya. 40 Ada au Kamaku nuwanuwana moya'aidi Iya Bana Natuna agaikuya hina'ita be hinavetumaganeku amanadi yawai-vagahidi hinanuhagana, ada Iya Tauku alikeya ganasivemidididi tova mulina vedewayauga ana toveya. Kamaku yana vehimeya au hidede amine.” Hidedemi Yesu gigahe. 41 Tu miYuda yana gahe hinogalini-yo Bana againe hivebutu hi'alawoluwolu. Bana Yesu a gigahe a'a lobameya gidauda be gihobu amanadi Iya'eku. Hidemi yana gahe fa'ina hi'alawoluwolu. 42 Kadu hive'agahegahe higayo, “Hida kaliva ana egana Yesu Yosefa natuna, ada au hinana tamana ide kahalamanedi. Gavadi-yo gigahe gigayo, Lobameya gamiyami be gahobu'ela? Bana give'alololo.” Hidemi higahe. 43 Tu Yesu gigahedi gigayo, “Auwe, keke wanave'agahegahe wana'alawoluwolu. 44 Kaliva tauna yana nuwanuwa againe keke anafaiweya Iya ginamuliyeku, tu ka'i ase'asena Kamaku gina'onana be nuwana gina'abina o ginamuliyeku, ada alikeya ganasivemididina tova mulina vedewayauga ana toveya. 45 Gahe sa'eyana Yaubada bonana ana to'awatalatalaina yadi bukiya gidadauda gigayo, Yaubada Tauna yana kaliva moya'aidi ginavehawaledi. Ada hai kaliva Kamaku bonana hinogalina be hi'abi'abina, medema Iya agaikuya hinavetomuliya. 46 Keke tamo hakwadi Yaubada Kamaku gida'itani, keke. Au Iya akukaibe ga'itana, fa'ina Kamaku buye amiyami be gahobu'ela. 47 Yaubada gihalamaneku tu gagahegahe, hai kaliva tova moya'aina uvetuvetumaganeku, medema yawai-vagahi ahe unuhagana. 48 Iya'eku yawaimi ivaguna ana a'a. 49 Bwanenemiyao wala'a againe a'a ana egana mana hi'au'ana tu keke hidamiya-vagata, au hi'alika. 50 Tu a'a Iya gagaheyena-ma lobameya gihobu'ela, ada hai kaliva a'ai-nadi una'ana, medema keke una'alika-vagata. Ada au a'ai-nadi Iya'eku. 51 Iya'eku a'a miyamiya-vagahina, lobameya gahobu'ela. Hai kaliva hida a'ai-nadi una'ana, medema unamiyamiya-vagata. Ada hida a'a kaliva moya'aidi fa'idiya ganahawahegena amanadi Iya wowoku. E, wowoku ganaveledi be kaliva yawaidi ivaguna hinavaina fa'ina.” Hidedemi Yesu gilukahihi. 52 Tu Yesu yana gahe ana nuwanuwa fa'ina miYuda hivebutu yadi wa'agodadaga buye hivekwageya higayo, “Gavadi-yo hida kaliva gigahe vaita wowona ginaveleda-yo kana'ani?” 53 Ma Yesu gigahedi gigayo, “Yaubada gihalamaneku tu gagahegahe. Ka'i keke Iya Tohobu'ela wowoku wana'ani dayagiku wanayuni, kadu wayawaimi ivaguna keke. 54 Hai kaliva wowoku u'au'ana kadu dayagiku uyuyuna, medema yawai-vagahi ahe unuhagana, ada alikeya ganasivemididi tova mulina vedewayauga ana toveya. 55 Fa'ina wowoku vaita a'a velemo'ena amine, kadu dayagiku vaita bwai velemo'ena amine, au yawaimi yana faiwala inubana. 56 Bana kaliva wowoku gi'au'ana kadu dayagiku giyuyuna, medema Iya agaikuya gimiyamiyave'avina kadu Iya bana againe gamiyamiyave'avina, au yawaima sa'eyana. 57 Bana Kamaku gi'iveniniseku-ma gimiyamiya-vagata, ada Bana yawaiku inubana fa'ina Iya kadu gamiyamiya-vagata. Meda anafaiweya bana kaliva Iya gina'au'aku, medema kadu ginamiyamiya-vagata, yawai-vagahiku givaivaina fa'ina. 58 Ada au hida a'ai-nadi lobameya gihobu'ela, higa Iya wowoku, ada hidema keke a'a ana egana mana bwanenemiyao hi'au'ana-ma amine. Mana lobameya gihobu be hi'ana tu keke yawai-vagahidi hidavaini, au hi'alika. Tu a'a Iya gagaheyena-ma mema tulina. Gava kaliva hida a'a higa wowoku una'au'ana, medema unamiyamiya-vagata.” 59 Au hidede amine Yesu gilumamala miYuda yadi manuwa-abavehawala ana egana sinagogi Kafeneumi melala againe. 60 Tu kaliva vevine moya'aidi Yesu bonana hinoganogalina be himulimuliyena. Hida yana laumamala manuwa abavehawala Kafeneumi againe hinogalini-yo higayo, “Hida hima vehawala vita-mo'ena. Keke adafaiweya kanamuliyeni.” 61 Tu Bana Yesu Tauna ase'asene gihalamanena badi ana tomuliyamomo yana laumamala hi'alawoluwoluyena, fa'ina gigahedi gigayo, “Yaku vehawala vitana fa'ina, ka'i omi wanuwakoyo? 62 Au Iya Tohobu'ela lobameya ganalaka, boi gamiyami-ma againe ganayewaku. Adamoya yaku laumamala wanuwenuwena vaita vita-mo'ena, tu ka'i aimo yaku laka-havagi wana'itana, gavaimi wananuwanuwa? 63 Yawai-vagahimi inubana keke omi kaliva agaimiya, au yawai-vagahimi inubana Yaubada Alu'aluwana againe. Yaku gahe adamoya agaimiya galukahihiyena, medema alu'aluwami fa'ina, higa yawai-vagahimi wananuhagana. 64 Tu tufoimi keke wadavetumaganeku.” Hidemi Yesu gigahe fa'ina boi nagona gaveyao keke hidavetumaganeni-ma gihalamanedi. Kadu'e bana kaliva nibaineyao agaidiya ginahawavemogatalena-ma tuwaina gihalamane-vagahina. 65 Kadu'e yana gahe giluyabuna gigayo, “Hida yaku laumamala omi wavaitana vita-mo'ena. Hidema fa'ina ahe gagehemi gagayo, Kaliva tauna yana nuwanuwa againe keke anafaiweya Iya ginamuliyeku tu ka'i ase'asena Kamaku gina'onana be nuwana gina'abina o, ginamuliyeku.” 66 Tu au hidede amine Yesu gilukahihi fa'ina, ana tomuliyamomo tufoidi moya'aidi hinuwayewa, be aimo keke hidamulimuliyeni. 67 Badi hinuwayewa fa'ina, Yesu ana yo'o tuwelo gitoliluveluvedi gigayo, “Ka'i omi kadu wananuyabuyabuku, ka'i keke?” 68 Au Saimoni-Fita Yesu againe gigahe gigayo, “Kauveya, keke tamo hakwadi velugana gidamiyami-yo anamuliyeni. O'eni yawai-vagahima ana eda uvehavehawalema. 69 Ada ime avetumagane kadu ahalamane-mo'ena O'eni Yaubada yana Tovegida, Kaliva Mahamahali-mo'e.” Hidemi Fita gigahe. 70 Bana Yesu gigahedi gigayo, “Iya Tauku gavenuwadadanemi ami yo'o tuwelo, tu kaliva sa'eyana agaimiya Setani yana kaliva.” 71 Au bana Yudasi fa'ina Yesu gigahe, bana Saimoni-Isikaliyota natuna, fa'ina bana Yudasi yo'o tuwelo kalivana aimo Yesu nibaineyao agaidiya ginahawavemogatalena.

7

1 Au Yesu hidede amine gilukahihi gihavaina, Galili ana fafali againe gimiyami be ginunudadana. MiYuda yama tonagona nuwanuwadi hinaluve'alikana fa'ina, Yesu keke nuwanuwana Yudiya ana fafali againe ginanunaudadana. 2 Tu miYuda yama tafalolo sa'eyana giluve'eda'ufo, ana egana A'a-'aiyala ana vesiule. 3 Ada Yesu taineyao higahena higayo, “Hida Galili ana fafali unahegeni tu unana Yudiya ana fafaliya be kadu badi ya kalivamomo wesede againe ya aituha fifiwalana ufifaisewadi-ma hina'itadi. 4 Ka'i kaliva nuwanuwana moya'aidi tauna hinahalamanena be hinavetumaganena, au keke ginafaisewakau, fa'ina Tauni una'ivemogatale yo'o matadiya.” 5 Hidemi higahe fa'ina badi taineyao nonogana keke hidavetumaganeni. 6 Badi higahe tu Yesu gigahedi gigayo, “Yaku ivemogatala ana tova aimo keke gidalakayemu tu omi'iyao ma gava tova nuwanuwami wanana, au wanana. Keke tamo gavadi fa'ina wadabodaboda. 7 Tomiyababi keke omi agaimiya hinanuwakoyo tu Iya'eku ma yadi dewa koyona gahawavemogatalena fa'ina, Iya agaikuya hinuwanuwakoyo. 8 Au tafalolo Yelusalema againe omi wanana tu yaku ivemogatala ana tova aimo keke gidalakayemu fa'ina, adamoya hida tafalolo againe Iya keke ganana.” 9 Ada au hidede amine gigahedi-yo au Galili againe gimiya. 10 Tu Yesu taineyao tafalolo againe ahe hilowoga be hina, tu muliya Bana Tauna kadu gina. Au keke yo'o buye hidana, anakaibe gina. 11 Ada au miYuda yama tonagona yo'o agaidiya Yesu hilelelena kaliva hitoliluveluvedi higayo, “Yesu hai gimimiyami?” 12 Ada moya'aidi yo'o sa'eyana sa'eyana agaidiya Bana Yesu fa'ine hi'alawoluwolu. Tufoidi higayo, “Bana kaliva hagihagina.” Tu tufoidi higayo, “Keke, Bana keke kaliva yamumuna fa'ina yo'o ginuwa'abiyedi, gigahe vaita Tauna kaliva kikaiwabuna.” 13 Hidemi hive'agahegahe tu miYuda yama tonagona himatausedi fa'ina, keke yo'o matadiya hidalukahihiyeni. 14 Tu tafalolo ana tova hinafane Yesu manuwa-tafalolo againe giluku givebutu givehawala. 15 Ada badi miYuda hinogalini-yo nuwadi givegafo'uya'uya higayo, “Gavadi-yo hida kaliva tonagona yadi sikulu againe keke gidasikulu tu ginuwahuya?” 16 Au Yesu gigahedi gigayo, “Keke Tauku yaku nuwanuwa gadavehawalemi tu au Bana gi'iveniniseku amanadi yana nuwanuwa gavehavehawalemi. 17 Gava kaliva nuwanuwana velemona Yaubada yana vehimeya gina'itave'avina, medema ginahalamane-mo'ena ka'i Bana Yaubada yana nuwanuwa gavehavehawala, o ka'i au Tauku yaku nuwanuwagaga gavehavehawala. 18 Bana kaliva ka'i tauna yana nuwanuwa ginalukahihiyena digo, au nuwanuwana tauna ginakilakahina, tu Iya nuwanuwaku Bana gi'iveniniseku-ma ganakilakahina, fa'ina keke tamo gadafwaya, au yaku gahe velemo'ena. 19 Mosese Yaubada yana vehimeya givehawalemi tu keke tamo hakwadi agaimiya vehimeyai-nadi gida'itave'avini. Au gavana fa'ina nuwanuwami wanaluve'alikaku?” 20 Hidedemi Yesu gigahe-yo yo'o higahena higayo, “A! O'eni wayafune, fa'ina ugahegahe vaita kabakabaleya. Hakwadi nuwanuwana ginaluve'alika?” 21 Bana Yesu gigahedi gigayo, “Gugai fifiwalana sa'eyanaga sabati againe gafaisewana fa'ina, omi moya'aimi nuwami givegafo'uya'uya. 22 Boi Mosese givehimeya be fwefweya kaliva moya'aidi wowodiya Yaubada yana iya'iyaya wanatomogolohina, tu hida dewa inubana keke Mosese againe, au tuwai-mo'ena bwanenemiyao hidedemi hihuluva. Ada au Mosese givehimeya fa'ina, ka'i fwefweya kaliva ana aiyeta eita sabati againe ginaluvefosena, au sabati nonogana wowone iya'iyaya wanatomogolohina. 23 Ada sabati nonogana mena iya'iyaya ana tomogolota againe wafaisewa be Mosese yana vehimeya wana'itave'avina fa'ina. Ka'i sabati againe hidede amine omi wafaisewa digo, gavadi-yo Iya agaikuya wanuwakoyo sabati againe gafaisewa yamumuna be kaliva yana aulolo matatabuna gavaihegena fa'ina? 24 Keke kiholiholi amine kaliva wanahawavekoyoyeni. Nagona wanalele wananuwanuwa, ka'i velemo'ena bana gihuluva koyona o ka'i keke. Wanahalamane-hagihagiyena, au wanagahe.” Hidemi Yesu gigahe. 25 Tu Yesu yo'o agaidiya hidedemi gigahe-yo au miYelusalema tufoidi hive'atolitoli higayo, “Bana miYuda yama tonagona nuwanuwadi hinaluve'alikana-ma ka'i hidevama Bana'e? 26 Atu wa'ita, kaliva moya'aidi matadiya gilulukahihi tu yada tonagona hive'amata, keke tamo bana againe hidagahe. Ka'i velemona hinuwanuwa vaita hida kaliva Yaubada yana Tovegida Keliso? 27 Atu aimo Yaubada yana Tovegida Keliso ginalakayemu ana toveya, keke tamo hakwadi yana tauya ginahalamaneni tu hida kalivai-nadi ma yana melala moya'aida kahalamanena.” Hidemi miYelusalema higahe. 28 Tu Yesu aimo manuwa-tafalolo againe givehavehawala. Atu miYelusalema yadi gahe ginogalini-yo gikovadona gigayo, “Omi wagagahegahe vaita wadahalamaneku kadu yaku melala wadahalamaneni tu keke Tauku yaku nuwanuwa fa'ina omi agaimiya gada'ela. Bana gi'iveniniseku-ma au velemona tu Bana'e keke wadahalamaneni. 29 Au Bana'e Iya gahalamanena, fa'ina Bana buye amiyami ada gi'iveniniseku be gahobu'ela.” 30 Hidede amine Yesu gigahe fa'ina, badi tonagona nuwanuwadi Yesu hinakive'avina tu yana tova aimo keke gidalakayemu fa'ina, ana kive'avina higa-wayoga. 31 Tu moya'aidi yo'o agaidiya hivetumaganena ada hive'agahegahe higayo, “Ide kahalamanena Yaubada yana Tovegida Keliso ginalakayemu againe, nimana ana iya'iyaya ginafifaisewana. Hida hima Yesu au makewa Yaubada yana Tovegida, fa'ina Yesu nimana ana iya'iyaya moya'aina gififaisewana, ada bana vaita aimo ginalakayemu-ma keke-mo'a hida kaliva anafaiweya ginafaiwalahegeni.” 32 Atu Falisi yo'oyo'o yadi ve'agahegahe vaita Yesu Bana Keliso Yaubada yana Tovegida ma hinogalina. Hinogalini-yo badi'iyao kadu abaveyao ana tofaisewa kikaiwabudiyao badi tuilala hi'iveninisedi be hinakive'avina. 33 Au Yesu gigahe gigayo, “Aimo tova kabisonaga Iya omi buye kanamiyami. Kanamiya kabisona tu Bana gi'iveniniseku-ma againe ganayewaku. 34 Aimo wanaleleku tu keke wananuhagaku, ada Iya ganana againe omi keke amifaiweya wana'ela.” 35 Yesu hidedemi gigahe ada miYuda hinogalini-yo hive'agahegahe higayo, “Bana hima kaliva hai ginana-yo keke adafaiweya kanahagani? Ka'i yada yo'o miGilika hi'abinauna-ma agaidiya ginana be miGilika ginavehawaledi, ka'i keke? 36 Gavadi-yo gigahe gigayo, Aimo wanaleleku tu keke wananuhagaku, ada Iya ganana againe keke amifaiweya wana'ela? Hidema gavaimi ana nuwanuwa?” Hidemi hive'agahegahe. 37 Tu tafalolo ana egana A'a-'aiyala ana vesiule ana lauyabu gilakayemu. Medema aiyetai-nadi tova lakahina, ada au Yesu yo'o hinafadiya gitowamidi gikovadona gigayo, “Gava kaliva ase'ase agona gitaina, medema Iya agaikuya uda'ela yaku gufa udayuna. 38 Ka'i unavetumaganeku, gufa miyamiya-vagahina gava nuwahinageniya ginaguwaguwalena be ginanauna. Hidede amine Veyao Tuwaina ana buki gigahe.” 39 Yesu hidedemi gigahe higa badi hinavetumaganena-ma Alu'aluwa Mahalina ase'asediya ginaluku. Tu Yesu aimo keke gida'alika-yo yana wakaiwabu gidalaka lobameya fa'ina, kadu Yaubada Alu'aluwana kaliva ase'asediya aimo keke gida'iveniniseni. 40 Tu kaliva tufoidi yo'o agaidiya Yesu yana lukahihi gufa miyamiya-vagahina fa'ina hinogalini-yo higayo, “Bana hidevama wona velemona Yaubada bonana ana To'awatalatalaina lakahina, bana kabodabodana-ma.” 41 Kadu tufoidi higayo, “Bana makewa Yaubada yana Tovegida Keliso, yada yo'o ginanagoyeda.” Tu kaliva tufoidi higayo, “Yaubada yana Tovegida keke-mo'a Galili againe ginatubuyemu, tu Bana Yesu ma kwanaGalili. 42 Fa'ina Veyao Tuwaina ana buki gigahe vaita Yaubada yana Tovegida bana Devida ana yo'o kalivana. Bedelihema againe ginatubuyemu, medema Devida yana melala.” 43 Ada au Yesu fa'ine hinuwanuwaluga. 44 Ada kaliva tufoidi nuwanuwadi hinakive'avina tu ana kive'avina higa-wayoga. 45 Atu badi tuilala hi'ela vaita Yesu hidakive'avini amanadi abaveyao ana tofaisewa kikaiwabudiyao be Falisi agaidiya hiyewadi, ada hiyemu-yo badi Falisi hitoliluveluvedi higayo, “Gavana fa'ina keke wada'aliyeni?” 46 Badi tuilala higayo, “Bana hima yana gahe au keke tamo hakwadi Bana amine boi gidalukahihi.” 47 Ma badi Falisi hihawavelaigedi higayo, “Ha! Kadu omi'iyao ma yana ve'alololo nuwami gi'abina. 48 Keke tamo hakwadi yami tovehimeya agaidiya kadu ime Falisi agaimeya Bana againe gidavetumagana, keke-mo'a. 49 Tu hida hima yo'oyo'o kaliva-kawowo Bana himuliyena amanadi, Yaubada yana vehimeya Mosese givelena-ma keke hidahalamaneni fa'ina au Yaubada yana alatabutabu dibune himimiyami.” 50 Hidemi badi Falisi higahe tu Falisi sa'eyana ana egana Nikodimo, bana boi Yesu againe gi'ela buye hilukahihi amanadi gigahedi gigayo, “Keke kanagahe-kawowo yo kaliva kanahawavekoyoyeni. Yada vedewayauga ana vehimeya keke hidede amine. Nagona kaliva kanayowanina be yana gahe kananogalina, yana dewa kana'itanuwenuwena ada ka'i koyona amine gihuluva, au kanahawavekoyoyena.” 52 Au badi Falisi higahena higayo, “Ha! Ka'i o kadu kwanaGalili Yesu amine? Au Yaubada bonana againe unalele be halamana unavaina. Keke tamo Yaubada bonana ana to'awatalatalaina Galili againe ginatubuyemu, keke-mo'a.” (( 53 Ada au higahe-yo moya'aidi hi'abinauna yadi manuweya.

8

1 Tu Yesu gina oya Olive againe gilaka, ada bogi gida malalauga gi'enohobu manuwa-tafalolo againe giluku ada kaliva moya'aidi Bana againe hiyo'oyo'o, ada au givetogana givebutu givehawaledi. 3 Givehavehawala tu Mosese yana vehimeya ana tovehawala kadu tonagona tafatafalolodiyao adi egana Falisi, kwamayoku Yesu againe hisimadumadugedi, badi mali kaliva buye hidauda tu hinuhagadi. Ada yo'o hinafadiya Yesu matane kwamayoku hivemidididi. 4 Hivemidididi tu Yesu againe higahe higayo, “Tovehawala, badi hida hima kwamayoku mali kaliva buye hidauda-ma anuhagadi, au a'ita-mo'edi. 5 Atu Mosese yana buki-vehimeya againe givehimeya be vevine to'udo kuga againe kanatutuve'alikadi. Tu O'eni ma badi fa'idiya ka'i gavaimi unagahe?” 6 Au hidemi higahe be Yesu hinavebauna fa'ina. Hinuwanuwa ka'i yana bonalaufata againe tamo gavadi keke gidalubodani-ma ginagaheyena digo, adifaiweya hinahawavekoyoyena. Tu Yesu gi'ibo'ula givebutu nimalagolagone babiya gi'eto'etoladi. 7 Bana keke gavaimi gidagahegahe tu badi higaheluya'aya'ala fa'ina, gimididi-mo'a gigahedi gigayo, “Hai kaliva sa'eyana agaimiya keke tamo gidakoyo, medema kuga againe kwamayoku ginamidifihadi.” 8 Yesu hidedemi gigahe-yo au gi'ibo'ula-havagi babiya gi'eto'etoladi. 9 Ada au yana gahe hinogalini-yo yadi koyona nuwadi gi'afolena fa'ina hivebutu anakaibe anakaibe hilowolowoga. Au lakahidiyao himidilowoga tu kabi'odiyao wai himulina, ada au moya'aidi hinu-'owoga tu Yesu anakaibe gimiyami, kwamayoku buye'i aimo himidimidi. 10 Kadu Yesu gimididi-mo'a kwamayoku gigahedi gigayo, “Kaliva hami hina? Ka'i keke tamo hakwadi nuwanuwana kuga againe ginafihami?” 11 Au badi kwamayoku higayo, “Kauveya, keke tamo.” Ada Bana Yesu gigayo, “Kadu Iya keke matahiwadi ganavelemi. Au wanana tu yami dewa koyona wanahege-vagahina.”)) 12 Tu muliya Yesu manuwa-tafalolo againe giluku-havagi, yo'o agaidiya gigahe gigayo, “Iya'eku omi tomiyababi yami mahalina, nuwami ana mahalina. Gava kaliva unamulimuliyeku o, keke uyuyu againe unanunaudadana tu nuwa ganakivemahalina be mahalina againe unamiyami tova moya'aina.” 13 Au badi Falisi higahena higayo, “O'eni Tauni fa'iniya ulukahihi uhawavemogatala fa'ina ya hawavemogatala keke velemo'ena.” 14 Bana Yesu gigahedi gigayo, “E, Tauku fa'ikuya galukahihi gahawavemogatala tu hai gatauya kadu hami ganana ma gahalamanena fa'ina, yaku hawavemogatala Tauku fa'ikuya keke fwaya, au gagahe velemo'ena. Tu hai gatauya kadu hami ganana ma omi keke wadahalamaneni. 15 Omi'iyao ma itagaga againe wagahe-kawowo be wahawavekoyoyeku tu, Iya'eku ma keke tamo hakwadi fa'ine nuwaku gidafaisewa-yo gadahawavekoyoyeni. 16 Tu ka'i tamo kaliva fa'ine nuwaku gidafaisewa be gadahawavekoyoyena digo, yaku vehimeya au velemo'ena, fa'ina keke akukaibe gadavehimeya, au Bana Kamaku buye avehimeya, Bana'e amanadi gi'iveniniseku be gahobu'ela. 17 Kadu yami buki-vehimeya againe hi'etoladi vaita tohawavemogatala luhei ka'i yadi gahe sa'eyana, au kanahalamanena yadi gahe velemo'ena. 18 Ada au Iya Tauku fa'ikuya gahawavemogatala kadu Bana Kamaku gi'iveniniseku-ma Iya fa'ikuya gihawavemogatala au Ime tohawavemogatala luhei.” Hidedemi Yesu gigahe. 19 Tu Tamana giyakahina fa'ina higahena higayo, “Tama hai gimimiyami?” Yesu gigahedi gigayo, “Keke wadahalamaneku kadu keke Kamaku wadahalamaneni. Ka'i wadahalamane-mo'eku digo, kadu Kamaku wadahalamane-mo'ena.” 20 Ada au Yesu manuwa-tafalolo againe givehavehawala tu hidede amine gilulukahihi. Velekawowo ana abavedodoga liline gimidimidi tu givehavehawala. Ada yana tova aimo keke gidalakayemu fa'ina ana kive'avina higa-wayoga. 21 Tu kadu Yesu gigahedi gigayo, “Iya ganana gananuyabuyabumi tu omi wanalele-wayogeku, au yami wakoyona wana'alika. Ada Iya ganana againe omi keke amifaiweya wana'ela.” 22 Hidedemi Yesu gigahedi fa'ina, miYuda yama tonagona hive'agahegahe higayo, “Gavadi-yo gigahe gigayo, Iya ganana againe omi keke amifaiweya wana'ela? Ka'i Tauna ginaluve'alikana, ka'i keke?” 23 Au Bana Yesu gigayo, “Omi'iyao ma babiya walakayemu tu Iya'eku ma lobameya gamiyami be gahobu'ela. Omi babi ana kaliva tu Iya lobama ana kaliva. 24 Hidema fa'ina ahe gagahemi yami wakoyona wana'alika, fa'ina ka'i yaku gahe Tauku inubaku fa'ina keke wanavetumaganeni digo, yami wakoyona wana'alika.” 25 Au badi higayo, “O hakwa'adi?” Yesu gigahedi gigayo, “Iya'eku boi yaku vehawala ana abave'inuba againe gavenuwa'atami amine. 26 Ada yaku gahe moya'aina yami koyona fa'ina we'a gidadauda be aimo ganalukahihiyena ada ganahawavekoyoyemi. Ada au Bana gi'iveniniseku-ma bonana velemo'ena ada gavaimi Bana againe ganogalina amanadi, omi tomiyababi agaimiya galulukahihi.” 27 Au hidedemi Yesu gigahe tu badi miYuda yana nuwanuwa hifaniyena, keke hidahalamaneni Tamana Yaubada fa'ine gilukahihi. 28 Ma Yesu kadu gigayo, “Aimo Iya Tohobu'ela ai againe wanakivemididiku ana toveya, au medema tovai-nadi halamana wanavaina inubaku wanahalamanena. Kadu wanahalamanena keke tamo Tauku yaku nuwanuwa againe gadagugaiyeni, tu hida yaku gahe Kamaku givehawaleku amine Iya gagahe. 29 Ada Bana gi'iveniniseku-ma Iya buye amimiyami. Keke gidanuyabuyabuku-yo akukaibe gadamiyami. Tova moya'aina Bana bonana ga'abi'abina fa'ina nuwana gakiveyamumuna.” 30 Ada au hida Yesu yana lukahihi againe moya'aidi hivebutu hivetumaganena. 31 Tu Yesu miYuda Bana bonana hivetumaganena amanadi gigahedi gigayo, “Ka'i yaku vehawala againe wanaluluve'avina amine o, aku tomuliya velemo'ena omi'iyao. 32 Omi yogoyogonimiyao vaita tove'agetoga amine. Yaku vehawala ahe wanogalina ada ka'i bonaku wana'ita'itave'avina, bonaku au velemo'ena ma wanahalamanena be yami ve'agetoga ginahavaina.” 33 Tu badi miYuda Yesu againe higahe higayo, “Ime Abelahamo ana unumamomo ada keke tamo hakwadi againe adave'agetoga. Gavadi-yo ugahe vaita yama ve'agetoga ginahavaini?” 34 Bana Yesu gigahedi gigayo, “Yaubada gihalamaneku tu gagahegahe. Gaveyao hihuluva koyona, medema moya'aidi koyona againe hive'agetoga. 35 Bana kauve'a natuna velemo'ena ma tamana ana unuma agaidiya ginamiya-vagata be yana lokolokofou ginavaina. Atu bana agetoga ma keke yana kauve'a againe ginamiya-vagata higa vaita ana du'u ginavaini. 36 Omi yogoyogonimiyao wamimiyami higa vaita koyona againe wadave'agetoga. Ka'i Iya Yaubada Natuna yami ve'agetoga ganadabana amine o koyona keke ginavehimeyemi, au Yaubada ana unuma agaidiya wanaluku be wanamiya-vagata. 37 Iya gahalamanemi omi'iyao Abelahamo ana unumamomo. Omi Abelahamo bwaneneneyao nonogana nuwanuwami wanaluve'alikaku, fa'ina bonaku keke ase'asemiya gidaluku-yo gidadauda. 38 Gavadi Bana Kamaku againe ahe ga'itana, medema omi agaimiya galulukahihiyena, tu omi meda anafaiweya ka'i gavadi kaliva sa'eyana higa omi tamami againe wanogalina, mededemi wahuluhuluvina.” Hidedemi Yesu gigahe. 39 Badi miYuda higahena higayo, “Abelahamo ime tamama.” Yesu gigayo, “Ka'i velemo'ena omi Abelahamo ana unumamomo, Abelahamo nimana wadavaina tu keke wadavaini. 40 Omi wanuwanuwa amine Abelahamo keke gidanuwanuwa. Iya bona velemo'ena omi agaimiya galukahihiyena, bonai-nadi Yaubada againe ganogalina. Bonaku velemo'ena galukahihiyena fa'ina omi nuwanuwami wanaluve'alikaku. 41 Omi'iyao ma kaliva sa'eyana higa omi tamami amine wahuluhuluva.” Yesu hidedemi gigahe-yo badi higayo, “Ime keke eda natuneyao. Ime tamama au sa'eyana, anafaiweya Bana Yaubada.” 42 Bana Yesu gigahedi gigayo, “Ka'i velemo'ena Bana Yaubada omi tamami digo, omi wadanuwakabubuyeku, fa'ina Iya inubaku ma Yaubada againe gatauya be gahobu'ela. Keke tauku yaku nuwanuwa fa'ina gada'ela, au Bana'e gi'iveniniseku fa'ina gahobu'ela. 43 Gavana fa'ina-yo yaku nuwanuwa galukahihiyena-ma wafaniyeni? Omi bonaku keke nuwanuwami fa'ina keke yaku nuwanuwa wadahalamaneni. 44 Omi'iyao ma tamami au Setani, ada tamami yana nuwanuwa amine omi nuwanuwami wanahuluva. Boi tuwaina babi ana abave'inuba againe bana Setani yana dewa luve'alika, ada hidede amine ginunauwena tova adamoya. Keke-mo'a nuwanuwa velemo'ena againe gidamiyami, fa'ina keke tamo nuwanuwa tunutunugina bana ase'asene gidadauda, keke. Nuwanuwa ve'afwayafwayana bana ase'asene gidadauda fa'ina, yana gahe tova moya'aina fwaya, fa'ina bana ana egana tofwaya. Ada au fwaya matatabuna inubana bana againe. 45 Tu iya'eku ma yaku gahe velemo'ena fa'ina, keke wadavetumaganeku tu omi tamami ma tofwaya amine wanuwanuwa. 46 Keke tamo hakwadi afaiweya Iya agaikuya koyona unanuhagani. Ka'i yaku gahe velemo'ena, gavana fa'ina-yo keke wadavetumaganeku? 47 Kaliva gaveyao Yaubada natuneyao, medema Yaubada bonana hivenogalena. Omi'iyao ma keke Yaubada natuneyao. Hidema fa'ina Bana'e bonana keke wadavenogaleni.” Au hidedemi Yesu gigahedi. 48 Tu miYuda Yesu yana gahe badi fa'idiya hinogalini-yo higahena higayo, “Au O fa'iniya agahe velemo'ena. O'eni vaita ada aniyabina miSameliya kalivadi amine, kadu O'eni wayafune.” 49 Bana Yesu gigayo, “Iya keke wayafuneku. Tu au Bana Kamaku Iya gakilakahina tu omi keke wadakilakahiku, au wahawavekoyoyeku. 50 Ma keke Tauku ganakilakahiku. Au Kaliva sa'eyana gimimiyami, Bana ginakilakahiku ada Bana'e kaiwabu ana tovetala. 51 Yaubada gihalamaneku tu gagahegahe. Gava kaliva bonaku gi'abi'abina, medema keke gina'alika.” 52 Au badi miYuda higayo, “Au ahalamane-mo'e O'eni wayafune. Abelahamo gi'alika kadu Yaubada bonana ana to'awatalatalaina tuwaina hi'alika. Gavadi-yo ugahe vaita ka'i kaliva O bona gina'abina, medema keke-mo'a gina'alika? 53 Ime bwanenema Abelahamo, kaliva kikaiwabuna, tuwai-mo'ena gi'alika. Keke-mo'a Abelahamo kaiwabu againe O udatubuhegeni. Kadu badi Yaubada bonana ana to'awatalatalaina hi'alika-'owoga. O vaita hakwa'adi tu O ugagakahikahi?” 54 Bana Yesu gigayo, “Ka'i Tauku ganakilakahiku, yaku kaiwabu vaita iyohoyoho, vaita gadagahe-kawowo. Atu Bana Kamaku gikilakahiku ada Bana'e omi wahawaveyaubadayena. 55 Tu omi Bana'e keke wadahalamane-mo'eni tu Iya velemona gahalamanena. Ka'i Iya gadagahe gadagayo, Yaubada keke gadahalamaneni, ka'i hidede amine gadagahe digo, Iya gadafwaya omi wafwaya amine. Tu Iya Bana'e gahalamane-mo'ena, kadu bonana ga'abi'abina. 56 Ada omi bwanenemi Abelahamo Iya yaku hobu'ela babiya ma tuwai-mo'ena gimidihalamanena. Hidema fa'ina givemwamwala, ada au yaku tova ahe gi'itana ada givemwamwala.” 57 Au badi miYuda higahena higayo, “O'eni keke Abelahamo uda'itani fa'ina O keke kaliva lakahi, a malamala aimo keke fifiti (50) udavaidi. Au ugahe-kawowo.” 58 Yesu gigahedi gigayo, “Yaubada gihalamaneku tu gagahegahe. Abelahamo aimo keke gidatubuga tu Iya tuwaina tuwai-mo'ena gamiyamiya-vagata.” 59 Hida yana gahe hinogalini-yo kuga hivaina be hinafihana. Tu Yesu giveu be manuwa-tafalolo ginuyabuyabuna.

9

1 Tova sa'eyana ime Yesu ana tomuliya Bana buye anunudadana tu tomatakoyo sa'eyana a'itana, yana tubuga againe givematakoyo. 2 Ada Yesu atoliluveluvena agayo, “Tovehawala, gavana fa'ina hida kaliva yana tubuga againe givematakoyo? Ka'i bana tauna yana koyona fa'ina, o ka'i tamana hinana yadi koyona fa'ina givematakoyo?” 3 Bana Yesu gigayo, “Keke tauna yana koyona fa'ina, kadu keke tamana hinana yadi koyona fa'ina hida kaliva gidavematakoyo. Tu Yaubada yana faiwala bana yana yamumu againe ginaseyemaunena fa'ina givematakoyo. 4 Au aimo uyadayada againe gilubodada be Bana gi'iveniniseku-ma yana faisewa kanafaisewa. Uyuyu giyemuyemu ada uyuyu againe kaliva keke anafaiweya ginafaisewa. 5 Iya aimo babiya gamimiyami ana toveya, Iya omi tomiyababi yami mahala, nuwami gakikivemahalina.” 6 Au hidede amine gigahe-yo babiya gikiwala, kiwalina againe babi giki'amo'amona maikawa amine, au tomatakoyo matana againe babi fwalelena giseni tu gigahena gigayo, “Unana ni'u ana egana Sailomu againe mata unakolana.” Ime bonameya Sailomu ana kaivila ma ive'iveninitana. Ada au kaliva gilowoga matana gikolana giyewana matana gi'ita'italele. 8 Tu yana yo'o kadu badi boi yana vematakoyo tova moya'aina hi'ita'itana, medema higahegahe higayo, “Hida ka'i kaliva edeya gihiyoto be mani fa'ina give'ove'o'ola-ma, o ka'i mali kaliva?” 9 Kadu tufoidi higayo, “Makewa bana hida kalivai-nadi.” Ada kadu tufoidi higayo, “Au keke bana'e tu ana bela tomatakoyo ana bela amine.” Tu bana kaliva tauna gigahegahe gigayo, “Velemo'ena iya kalivai-kuna.” 10 Au badi higahe-fa'ila higayo, “Gavaiya'amine uyamumu-yo mata gi'ita'italele?” 11 Bana kaliva gigayo, “Kaliva sa'eyana, ana egana Yesu, babi giki'amo'amona be matakuya giseni tu gigaheku gigayo, Unana Sailomu ni'u againe mata unakolana. Ada au gana gakola-yo gayamumu, mataku givebutu gi'italele.” 12 Ada badi higayo, “Bana kalivai-nadi hami gina?” Bana gigayo, “Iya keke gadahalamaneni.” 13 Tu tomatakoyo giyamumu-ma, Falisi agaidiya hinauwena. 14 Fa'ina sabati againe veyawai ana tova tu Yesu babi giki'amo'amona be kaliva matane giseni-yo, au gikiyauna. 15 Au Falisi kaliva againe kadu hitoliluvaluva higayo, “Gavaiya'amine uyamumu? Gavai'ona-yo mata gi'ita'italele?” Bana kaliva gigayo, “Babi fwalelena matakuya giseni tu gakolana, ada au mataku gi'ita'italele.” 16 Ada Falisi tufoidi higahegahe higayo, “Hida hima kaliva keke-mo'a Yaubada gida'iveniniseni, fa'ina sabati ana vehimeya keke gida'abi'abini.” Tu kadu tufoidi higahegahe higayo, “Ka'i hida kaliva velemo'ena tokoyona digo, hida iya'iyaya fifiwalana tomatakoyo againe keke anafaiweya gidafaisewani.” Ada au Falisi buye hive'atolitoli, yadi nuwanuwa tulina tulina. 17 Kadu tomatakoyo againe hitoliluvaluva-havagi higayo, “O ugahe vaita hida kaliva mata gidakiyauni. Au bana fa'ine gavaimi unuwanuwa?” Ada bana tomatakoyo gigayo, “Au Bana Yaubada yana kaliva.” 18 Tu badi miYuda hivaita kaliva matana keke velemo'ena gidakoyo-yo gidayamumu, fa'ina kaliva tamana hinana hiyowanidi be hi'ela. 19 Hi'ela-yo hitoliluveluvedi higayo, “Ka'i bana hidevama omi natumi? Omi wagahe vaita yana tubuga againe gidavematakoyo. Ka'i tuwaina matana keke gida'ita'italele tu gavadi-yo adamoya matana gi'italele?” 20 Au kaliva tamana hinana higahedi higayo, “Bana hidevama ime natuma amanadi ahalamane-mo'ena. Kadu'e gitubuga againe makewa matana keke gida'ita'italele. 21 Atu gavadi-yo matana adamoya giyamumu ma keke adahalamaneni, o ka'i hakwadi matana gikiyauna be gi'ita'italele keke adahalamaneni. Au bana tauna againe wanatoliluvaluva. Bana a givekaliva-lakata fa'ina, tauna fa'ine anafaiweya ginahawavemogatala.” 22 Kaliva tamana hinana miYuda yama tonagona higa himatausedi be hidede amine higahe. Fa'ina miYuda ahe hivehimeya, ka'i tamo hakwadi Yesu fa'ine ginagahe vaita Bana Yaubada yana Tovegida Keliso digo, bana kalivai-nadi ana egana hinayawelina be keke anafaiweya manuwa-abavehawala sinagogi againe ginaluku-yo ginatafalolo. 23 Hida vehimeya fa'ina tomatakoyo tamana hinana higahe higayo, “Bana againe wanatoliluvaluva, ahe givekaliva-lakata fa'ina.” 24 Au tova anavelu tomatakoyo giyamumu-ma hiyowanina, higahena higayo, “Ya yamumu fa'ina Yaubada ana egana unakilakahina. Wadema kalivai-nadi ahalamanena Bana wadevama tokoyona fa'ina keke unahawadavadavani.” 25 Tu tomatakoyo gigahedi gigayo, “Iya keke gadahalamaneni ka'i Bana tokoyona o ka'i keke. Tu gaitoma sa'eyana iya gahalamane-mo'ena, higa boi mataku gikoyo-vagata tu adamoya mataku gi'ita'italele.” 26 Ada au badi higayo, “Gavadi o againiya gigani? Gavaiya'amine mata gikiyauni?” 27 Bana gigayo, “Ahe gagahemi tu keke wadavenogaleku. Gavana fa'ina nuwanuwami ganagaheye-havagileni? Ka'i omi nuwanuwami Bana againe kadu wanavetomuliya, ka'i keke?” 28 Gigahe-yo au hifainena higayo, “O'eni wada kaliva ana tomuliya tu ime'eyao ma Mosese yana vehawala amulimuliyena. 29 Yaubada Mosese againe gilukahihi ma ahalamanena tu wama kaliva ma inubana keke adahalamaneni.” 30 Tu bana tomatakoyo gihawavelaigedi gigayo, “A! Keke fwaya. Mataku gikiyauna fa'ina, vaita inubana wadahalamaneni. 31 Ide moya'aida kahalamanena Yaubada tokoyona keke gidavelugadi tu hai kaliva sa'eyana Yaubada gimatausena bonana gi'abi'abina, medema Yaubada givelugana be gugai fifiwalana anafaiweya ginafaisewana. 32 Boi tuwai-mo'ena kadu adamoya keke tamo hakwadi valeyana kadanogalini, vaita kaliva yana tubuga againe givematakoyo amanadi gidakiveyamumuni. 33 Ka'i hida kaliva wavekwageyena-ma keke Yaubada gida'iveniniseni, kadu keke anafaiweya gugai fifiwalana gidafaisewani.” Hidemi tomatakoyo gigahe. 34 Au badi miYuda higayo, “O tokoyona, ya koyona fa'ina utubukoyo, mata keke gida'italele. O tokoyona nonogana, uhuluva vaita halamana unavehawalema.” Ada au hiwavina be gina. 35 Tu badi hiwavina ma Yesu ginogalina. Ginogalini-yo gina gilelena ginuhagana, ada gitoliluveluvena gigayo, “Ka'i Bana Tohobu'ela uvetumaganena?” 36 Bana kaliva tomatakoyo gigayo, “Kauveya, Bana Tohobu'ela hakwa'adi? Unahawavetuvetunuku be ganavetumaganena fa'ina.” 37 Bana Yesu gigayo, “Ahe u'itana. Iya kaliva buye kalulukahihi-ma Kalivai-kuna.” 38 Ada bana tomatakoyo gigayo, “Kauveya iya gavetumagane.” Ada au Yesu againe gi'odu ada gidavadavana. 39 Tu Yesu gigayo, “Iya babiya gahobu'ela be kaliva yadi nuwanuwa ase'asediya ganakivemogatalina. Badi matadi uyu'uyuyuna ganakivemahalidi, tu badi hivaita matadi mahamahalina medema hinavematakoyo.” 40 Ada Falisi tufoidi Bana liline himiyami-ma yana gahe hinogalina ada higahena higayo, “Ka'i O uvaita ime kadu matama gida'uyuyuni.” 41 Yesu gigahedi gigayo, “Ka'i omi fanifanimiyao digo, keke ami wavita. Tu omi wagahe vaita matami mahamahalina fa'ina, ami wavita wamimiyami.” Hidemi Yesu Falisi gigahedi.

10

1 Kadu'e Yesu Falisi agaidiya aimo gilulukahihi gigayo, “Yaku gahe velemona wananogalina. Sifi adi ala fa'ina ganalukahihi. Ka'i kaliva sa'eyana gina'ela vaita sifi adi ala hinagene gidaluku tu keke abaluku-mo'ena againe ginaluku, au ka'i ala fafaline ginalakalowoga, bana kalivai-nadi tokai'afu, vaita mali kaliva yana yomuyomu ginalemana. 2 Tu sifi adi to'itave'avina velemo'ena abaluku againe ginalukuluku. 3 Ada sifi adi to'itave'avina ginayemu againe, abaluku ana tovehimeya wanafali ginayauna be bana ginaluku. Au sifi adi to'itave'avina agona hinanogalina, ada tauna yana sifi adi egana sa'eyana sa'eyana againe ginaluwatuyedi be ginasehobuyedi. 4 E, ginalauwatu-'owoga yo bana wai ginanagona be yana sifi hinamulimuliyena, fa'ina adi to'itave'avina agona hihalamanena. 5 Keke-mo'a mali kaliva hinamuliyeni, keke. Ka'i agona hinanogalina, au hina'ota, kaliva-kawowo agodi keke hidahalamaneni fa'ina.” 6 Au hida gahetalahobuhobu Yesu badi Falisi miYuda yama tonagona agaidiya gilukahihiyena tu badi yana nuwanuwa hifaniyena. 7 Hifaniyena fa'ina Yesu gigahe-havagiledi gigayo, “Yaubada gihalamaneku tu gagahegahe, Iya'eku eda'awana sifi fa'idiya. 8 Badi boi himidi'ela higahe vaita Yaubada gida'iveninisedi, mema tove'alololo, adi egana tokai'afu o ka'i to'ailema. Tu yaku sifi badi kalivai-dina keke hidavenogaledi. 9 Iya'eku eda'awana sifi fa'idiya. Gava kaliva Iya agaikuya unaluku, medema kibababala unavaina. Ada sifi hihobuhobu adiga hilelele be hi'a'ahiyauwa-yo ala hinagene hilukuluku, kadu adi to'itave'avina hilugolegoledi amine, meda anafaiweya o'eni yaku sifi galugolegole. 10 Tokai'afu keke gida'ela-kawowo. Au bana gi'ela be sifi ginaki'afudi ginaluve'alikadi ginaluvehawaliyedi fa'ina. Tu Iya gahobu'ela be yawaidi ivaguna hinavaina, e yadi wavemwamwala hinamiyamiya-vagata. 11 Iya'eku sifi adi To'itave'avina yamumuku, ada Iya To'itave'avina yamumuku yaku sifi fa'idiya yawaiku ganahawahegena. 12 Tu kaliva sa'eyana sifi gi'ita'itave'avidi ada fatana givaivaina. Bana keke sifi wagadi, au fata fa'ina gififaisewa. Ada ka'i tova sa'eyana gida'ita ma galu'eta manimaninina ana egana wolivi gi'ela'ela, au sifi gina'otayabuyabudi. Ada au galu'eta manimaninina sifi tufoidi ginayovadi, tufoidi ginavemaduyauyauledi. 13 Bana kaliva gina'ota, fa'ina bana tofaisewa wafatana. Sifi keke gidanuwenuwedi fa'ina, gina'otayabuyabudi. 14 Iya'eku sifi adi To'itave'avina yamumuku. Bana Kamaku gihalamaneku, kadu Iya Kamaku gahalamanena. Meda anafaiweya yaku sifi gahalamanedi, kadu badi Iya hihalamaneku, ada yawaiku gahawahegena be yaku sifi ganalugolegoledi fa'ina. 16 Kadu yaku sifi velugadiyao himimiyami tu keke hida ala againe hidamiyami. Au mali yo'o agaidiya himimiyami, ada badi kadu akufaiweya gadakovadi be hida'ela, agoku hidavenogalena. Ada au yaku sifi moya'aidi ganave'atutamo'aidi be se'eyaine hinamiyami, adi yo'o sa'eyana adi To'itave'avina sa'eyana. 17 Ada yaku sifi fa'idiya yawaiku ganahawahegena ada muliya ganamididi-havagi. Yawaiku ganahawahegena fa'ina, Kamaku nuwanuwana lakahina Iya'eku. 18 Ka'i Iya ganahawahegeku digo, kaliva adifaiweya hinaluve'alikaku. Ka'i keke ganahawahegeku digo, kadu keke kaliva adifaiweya hinaluve'alikaku. Au Tauku yaku nuwanuwa againe alikeya ganahawahegeku. Akufaiweya gana'alika, kadu akufaiweya ganamididi-havagi. Hida vehimeya higa alika mididi-havagi fa'ina Kamaku giveleku.” 19 Tu Yesu hidede amine gilukahihi fa'ina, miYuda yama tonagona buye hive'anuwanuwa, yadi nuwanuwa tulina tulina. 20 Tufoidi moya'aidi higahegahe higayo, “Yafune Bana againe giluku be givekabaleya, fa'ina gigahegahe-kawowo. Gavana fa'ina Bana bonana aimo wavanevanenegeni?” 21 Tu tufoidi higayo, “Bana yana lukahihi keke kaliva wayafunena amine. Kaliva wayafunena keke anafaiweya tomatakoyo matana ginakiyauni.” Au hidede amine hive'agahegahe. 22 Atu tafalolo sa'eyana ana tova gilakayemu, ada au Yelusalema againe kaliva hivaga'auta. Boi tuwaina nibaimeyao manuwa-tafalolo hiyawelina tu muliya bwanenemeyao ivaguna hiyogona. Ada hida tafalolo-nadi againe manuwa-tafalolo ivaguna ana aiyogona anuwenuwena. 23 Ada medema tovai-nadi kwadudu ana tova, ada Yesu manuwa-tafalolo ana eda'awaneya ginunudadana, eda'awanai-nadi hivewagana Solomoni yana abaga. 24 Ada miYuda yama tonagona Yesu againe hivaga'auta higahena higayo, “Gavana fa'ina ime O inuba fa'ina aimo aleleleni tu O keke udahawavemogatala ime agaimeya? Ka'i velemo'ena O'eni Yaubada yana Tovegida Keliso yada yo'o unanagoyeda amanadi, o ka'i keke? Keke unasevauyeni, au unagahe be ananogalina.” 25 Au Bana Yesu gigahedi gigayo, “Ahe omi agaimiya gahawavemogatala tu omi keke wadavetumaganeku. Au gugai fifiwaladi Kamaku ana eganeya gafifaisewadi-ma, inubaku omi agaimiya hihawavemogatalena. 26 Iya ahe gagehemi tu omi keke yaku sifi fa'ina, keke wadavetumaganeku. 27 Yaku sifi agoku hivenogalena ada Iya gahalamanedi. Badi himuliyeku be yawai-vagahidi gaveledi, ada au keke-mo'a hina'alika-vagata. Kadu keke tamo hakwadi yaku sifi nimakuya ginalemaku. 29 Kamaku yaku sifi giveleku, ada Bana anakaibe fifiwala-mo'ena fa'ina, keke tamo hakwadi anafaiweya Kamaku nimane badi ginalemaku. 30 Iya'eku kadu Kamaku inubama sa'eyana, nuwama sa'eyana.” Au hidede amine Yesu miYuda yama tonagona agaidiya gilukahihi. 31 Tu badi hinogalini-yo kuga hivaina be hinatutuve'alikana fa'ina. 32 Yesu gigahedi gigayo, “Gugai hagihagina moya'aina Tamada yana faiwala againe omi matamiya gafaisewana. Gava gugai fifiwalana fa'ina adamoya wanatutuve'alikaku?” 33 Badi miYuda higayo, “Keke gugai hagihagina fa'ina anatutuve'alika, au Yaubada uhawatagona fa'ina anatutuve'alika. Fa'ina O'eni kaliva nonogana ugahe vaita O Tauni Yaubada.” 34 Bana Yesu gigahedi gigayo, “Gahe sa'eyana yami buki-vehimeya againe ma'i wahalamanena o keke? Gahe-nadi ma Yaubada bonana badi kaliva Yaubada givegidedi be hivetovehimeya-ma. Yaubada gigahe gigayo, Omi kaliva amanadi omi yaubada. 35 E, Yaubada bonana tovehimeya agaidiya giyemu, ada badi kalivai-dina Yaubada Tauna gihawaveyaubadayedi. Ada Yaubada bonana eto'etoladina keke kaliva adifaiweya hinayawelini, au duduva-vagahina. 36 E, tovehimeya agaidiya Yaubada bonana giyemu-ma badi tomiyababi, tu Iya'eku ma Yaubada Kamaku givegideku be babiya gi'iveniniseku bonana ganalukahihiyena fa'ina. Ada Iya gagahe gagayo, Iya'eku Yaubada Natuna. Au gavadi-yo hida yaku gahe fa'ina omi wagaheku vaita Yaubada gadahawatagoni? 37 Ka'i Iya keke gadafifaisewa Kamaku gififaisewa amine digo, au keke wanavetumaganeku. 38 Tu ka'i Iya gafififaisewa Kamaku gififaisewa amine be yaku gugai fifiwalana wa'ita'itana, au yaku gugai wanavetumaganena. Ka'i keke amifaiweya Iya Tauku wanavetumaganeku, au yaku gugai fifiwaladi wa'itadi-ma wanavetumaganedi be halamana wanavaina. E, wanahalamanena Kamaku Tauna nuwahinagekuya gimimiyami, kadu Iya Tauku Kamaku nuwahinagene gamimiyami, au Ime sa'eyama.” 39 Ada au Yesu hidede amine gigahe fa'ina, kadu higaluvaluva-havagi be hinakive'avina tu Yesu gihamwakau. 40 Tu Yesu Yolidani yuwa fafaline ginu-havagi, Yoni boi kaliva gimidikivebafitaisoyedi againe gina gimiyami. 41 Ada kaliva moya'aidi Bana againe hi'ela ada hive'agahegahe higayo, “Bana Yoni keke Yaubada nimana ana iya'iyaya gidafaisewani tu gahe moya'aina hida kalivai-nadi fa'ine Yoni gilukahihiyena amanadi keke fwaya, au gigahe velemo'ena.” 42 Hidedemi higahe ada tufoidi moya'aidi medede againe Yesu hivetumaganena.

11

1 Tu kaliva sa'eyana gi'aulolo, ana egana Lasalo yana melala Bedani, medema Meli kadu tobohiyana Mata badi buye yadi melala. 2 Bana Meli higa muliya Kaiwabu agena bunama againe gibunamina ada agena u'una tunugina againe giluvehavehayana, au bana kwamayoku-nadi nouna Lasalo gi'aulolo. 3 Gi'aulolo tu vevine adi'iselu venuwa'ata Yesu againe hi'iveninisena higayo, “Kauveya, tobohiya bana'e nuwanuwa lakahina amanadi gi'aulolo lakahina.” 4 Tu Yesu ginogalini-yo au gigayo, “Yana aulolo lakahina tu keke vaita gina'alika amine, au yana aulolo againe Yaubada yana kikaiwabu gina'iveyemaunina be Iya Bana Natuna kaliva hinakilakahiku.” 5 Au higa Yesu nuwanuwana Mata kadu tobohiyana be noudi Lasalo buye'i, nuwanuwana badi'iyao. 6 Ada au Lasalo gi'aulolo ma ginogalini-yo kadu aimo yuwa Yolidani fafaline gimiyami aiyeta luhei, keke gidamadulowoga. 7 Aiyeta luhei gimiyami tu ime ana tomuliya gigahema gigayo, “Wa'ela be kana Yudiya ana fafali againe kanayewada.” 8 Ime ana tomuliya agahena agayo, “Tovehawala, boi tova kabi'ona kahegena tu miYuda yama tonagona nuwanuwadi O hinatutuve'alika. Ka'i badi agaidiya kanayewa? Vaita hidedei kadamiya.” 9 Bana Yesu gigayo, “Wa'ita, aiyeta sa'eyana againe kauwana yana mahalina bai tuwelo ginunauwena. Ada au ka'i hakwadi uyadeyadeya ginanunudadana amine o bana keke ginatutumadumadu, fa'ina babi ana mahalina kauwana yana eda gituvemahalina. 10 Tu ka'i kaliva uyuyuya ginanunudadana amine o bana ginatutumadumadu, fa'ina yana mahalina keke.” 11 Au hidede amine Yesu gigahe (higa vaita mena tovai-nadi aimo uyadayada fa'ina keke vita ginanuhagani tu uyuyu ginayemu-yo kaliva hinaluve'alikana.) Au kadu gigahema gigayo, “Tobohiyada Lasalo gi'enonuwaulu tu Iya ganana be ganaluvaguna fa'ina.” 12 Au ime ana tomuliya agahena agayo, “Kauveya, ka'i gi'enonuwaulu, au enonuwaulu againe ginabwaina.” Hidedemi agahe. 13 Tu Yesu Lasalo yana alika fa'ina gilukahihi tu ime avaita dauva-mo'a fa'ina gidalukahihi. 14 Ime afaniyena fa'ina, Yesu gigahe-mo'ema gigayo, “Lasalo a gi'alika, ada tova gilubodana be omi wanavetumaganeku. Medema fa'ina bana gi'alika againe Iya bana buye keke adamiyami fa'ina gavemwamwala be higa tova adamoya wanavetumagane-mo'eku. Au kanana kana'itana.” 16 Hidedemi Yesu gigahe-yo au Tomasi, bana ana egana Natuluga, ime tomuliya velugameyao gigahema gigayo, “Au ide buye kana be ka'alika.” 17 Tu Lasalo ahe hitau-yo aiyeta fowa ahegedi tu muliya Yesu gilakayemu Bedani melala againe. 18 Ma Bedani medema Yelusalema liline, ana lauva ka'i kilomita tohiye amine. 19 Ada au miYuda moya'aidi Mata be Meli agaidiya hiyemu be noudi yana alika fa'ina hina'ivemoluvidi. 20 Ada bana Mata Yesu gi'ela'ela-ma valeyana ginogalini-yo au gilowoga be ginamadubodebodena, tu bana Meli ma gimiya manuweya. 21 Au Mata giyemu Yesu againe gigahe gigayo, “Ho Kauveya, ka'i O hidedei udamiyami digo, nouku keke gida'alika. 22 Tu ahe nouku gi'alika, atu gahalamanena ka'i gavadi Yaubada againe unave'o'olena, medema Bana'e ginavele.” 23 Au Yesu gigayo, “Nou ginamididi-havagi.” 24 Au Mata gigayo, “A gahalamanena bana ginamididi-havagi aimo tova mulina Yaubada kaliva alikeya ginasivemidididi vedewayauga ana toveya. Hidedema gahalamanena.” 25 Bana Yesu gigayo, “Iya'eku mididi-havagi inubana, kadu Iya'eku kaliva yawaimi ivaguna inubana. Gava kaliva ginavetuvetumaganeku, medema keke gina'alika au wayawaina ivaguna ginamiyamiya-vagata. Ka'i bana kalivai-nadi wowona gina'alika, tu tauna ginamiyamiya-vagata. 26 Ada gaveyao wayawaidi himimiyami kadu Iya hivetuvetumaganeku, medema keke-mo'a hina'alika-vagata. Ka'i hida yaku gahe uvetumaganena?” 27 Yesu hidedemi gitoliluvaluva-yo Mata gigayo, “Ika Kauveya, iya gavetumagane, O'eni velemona Yaubada yana Tovegida Keliso. E, O'eni Yaubada Natuna, O Kalivai-nina fa'iniya abodaboda be uhobu'ela babiya.” 28 Ada au Mata hidedemi gigahe-yo gilowoga tobohiyana Meli againe giyewana, giluwahiyena be gi'alakululuyena gigayo, “Bana yada Tovehawala a gi'ela, nuwanuwana o unana be gina'ita.” 29 Ada Meli tobohiyana yana gahe ginogalini-yo au gitowamidi Yesu againe gimaduna. 30 Meli ginauna tu Yesu aimo keke gidayemu melaleya, au edeya Mata ginuhagana againe aimo gimiyami. 31 Ada miYuda ahe hi'ela, bana Meli buye manuweya himiyami hihawavemoluvina. Au Meli gitowamidi manuweya gimaduhobu ma hi'ita-yo au himuliyena, hivaita bana gidanauna tomohuyehuyeya gidatagiya. 32 Badi himuliyena tu bana Meli Yesu againe gilakayemu, gi'ita tu agene gi'ibo'ula-mo'a gigahena gigayo, “Ho Kauveya, ka'i O hidedei udamiyami digo, nouku keke gida'alika.” 33 Ada bana Meli gitagitagi-lulaukuhi, kadu miYuda bana hibwa'ulina-ma kadu buye hive'alulaukuhi. Ada au Yesu yadi tagiya gi'ita-yo alika fa'ina gi'ila'a kadu nuwana gikabubu. 34 Au gigayo, “Hai watau?” Badi higayo, “Kauveya, u'ela be kana u'ita.” 35 Ada au Yesu gitagitagi. 36 Ada bana Yesu gitagitagi fa'ina, badi miYuda higayo, “Wa'ita. Wona velemona nuwanuwana lakahina bana'e.” 37 Tu tufoidi higayo, “Ka'i hida kaliva gidamadu'ela to'aulolo gidamadu'itana digo, anafaiweya gidavelugana be keke gida'alika, fa'ina bana tomatakoyo matana gikiyauna, au ana tagalowalowa.” 38 Tu Yesu alika fa'ina kadu gi'ila'a, au gilowoga aba'aitauna againe gina. Aba'aitauna higa tomohuyahuya, ada kabala lakahina abaluku gisebodana. 39 Au Yesu gigayo, “Kabala wavaini.” Tu bana Mata to'alika nouna gigahena gigayo, “Kauveya, bana hima gilada, fa'ina hitau-yo aiyeta fowa kahegena.” 40 Bana Yesu gigahena gigayo, “Au yaku gahe udanuwa-nunauyena ahe gagahe gagayo, Ka'i unavetumaganeku o, Yaubada yana kikaiwabu una'itana.” 41 Ada au kabala hivaina digo Yesu gi'italele gigayo, “Kamaku, gavesiule againiya ahe uvenogaleku fa'ina. 42 Ada a gahalamanena uvenovenogaleku tova moya'aina, tu O againiya gavesiule be badi lilikuya himidimidi-ma hinanogalina. Hinanogali-yo au hinahalamane-mo'ena O Tauni u'iveniniseku be gahobu'ela.” Hidedemi Yesu Tamana againe gigahe. 43 Ada au give'o'ola gihavaina, gikova'awafatafata gigayo, “Lasalo-yo, uyemu.” 44 Yesu gigahe-yo bana to'alika giyemu, nimana agena kaleko againe boi miYuda yama dewa amine hifafana-ma aimo gidauda. Kadu'e kaleko u'une hifafana-ma aimo gidauda. Au Yesu kaliva gigahedi gigayo, “Wanayauna be ginana.” 45 Tu miYuda Meli againe hi'ela hihawavemoluvina amanadi, tufoidi moya'aidi Yesu nimana ana iya'iyaya hi'ita-yo Bana'e hivetumaganena. 46 Tu tufoidi badi tonagona tafatafalolodiyao adi egana Falisi agaidiya hina Yesu yana gugai fa'ina hi'awatalatalaina. 47 Hi'awatalatalaina gihavaina, badi Falisi kadu abaveyao ana tofaisewa kikaiwabudiyao venuwa'ata hi'iveninisena be koniselo yadi vaga'auta hisena. Ada hivaga'auta-yo hive'agahegahe higayo, “Gavaimi kanagani? Bana wadema kalivai-nadi nimana ana iya'iyaya moya'ai-mo'ena gififaisewana. 48 Ka'i keke kanahawatani digo, kaliva matatabudi hinavetumagana-'owoga ada badi yada tovehimeya miLoma yadi tolugaviya hina'iveninisedi be yada manuwa-tafalolo hinayawelina, kadu ide miYuda moya'aida yada kaiwabu hinavaihegena.” Hidede amine hive'agahegahe. 49 Tu kaliva sa'eyana badi agaidiya gimiyami, ana egana Kaiyafasi, bana abaveyao ana tofaisewa adi tokaiwabu hisena medema malamalai-nadi againe. Au bana Kaiyafasi gigahedi gigayo, “Omi kwavakwavamiyao. Gilubodana be kaliva sa'eyanaga gina'alika ma ma'i wanuwenuwena o ka'i keke? Ka'i ide miYuda moya'aida miLoma nimadiya kana'alika-'owoga kadu yada yo'o hinakwaha, medema keke gidalubodani.” 51 Ma bana Kaiyafasi keke tauna yana nuwanuwa againe hidede amine gidagahe, au bana medema malamalai-nadi againe abaveyao ana tofaisewa adi tokaiwabu ana maka givaina fa'ina, Yaubada nuwanuwa givelena be gavadi aimo ginalakayemu ma gilukahihiyena, higa Yesu miYuda yana yo'o fa'imeya gina'alika. 52 Kadu keke vaita yana yo'o gagana fa'imeya gina'alika, tu kadu badi Yaubada natuneyao moya'aidi fa'idiya gina'alika be badi kalivai-dina fafali tulina tulina agaidiya himiyamiyavehaila amanadi Yaubada yana yo'o sa'eyana againe hinavetobohiyana fa'ina. 53 Ada au medema aiyetai-nadi hivebutu hivevai, tova moya'aina hinuwanuwa be Yesu hinaluve'alikana fa'ina. 54 Badi nuwanuwadi Yesu hinaluve'alikana fa'ina, Bana miYuda yama tonagona hinafadiya aimo keke gidanaudadana, au gilowoga fafali sa'eyana babigaga liline gina melala ana egana Ifilaimo againe gimiyami. Ada medede againe Bana ime ana tomuliya buye amiyami. 55 Tu miYuda yama tafalolo lakahina giluvedaveda'ufo, ana egana lobama ana tovenuwa'ata yana Abamaduviviya, ada moya'aidi melala tulina tulina agaidiya hitauya, hinauna Yelusalema be hinakiveyeveyegadi yama tafalolo ana dewa amine. 56 Ada Yesu hilelelena, manuwa-tafalolo againe himidimidi tu hive'agahegahe higayo, “Gavaimi wanuwanuwa? Ka'i Yesu hida tafalolo againe gina'ela o ka'i keke?” 57 Tu abaveyao ana tofaisewa kikaiwabudiyao kadu Falisi vehimeya ahe hisena higa ka'i tamo kaliva ha'againe Yesu gimiyami-ma ginahalamanena o, ginahawavemogatala badi agaidiya be hinakive'avina fa'ina.

12

1 Tu aiyeta sikisi aimo gidadauda be tafalolo ana egana lobama ana tovenuwa'ata yana Abamaduviviya ginalakayemu. Ada au Yesu gi'ela melala ana egana Bedani againe, medema Lasalo yana melala, bana boi Yesu alikeya gisivemididina amanadi kalivai-nadi. 2 Au Yesu Bedani againe gi'ela ada Bana fa'ine avemwamwala hisena. Ada bana Mata a'a ana haulili gi'ita'itave'avina tu bana Lasalo badi to'a kadu Yesu buye tolameya hi'enolukekela be hi'au'a. 3 Hi'au'a tu bana Meli bunama aba'aihiwaga botolu lakahina amine gi'aliyena, ana egana nado, ai kabuna, medema keke tamo gavadi buye hidave'atutamo'aini, ada fatana keke kabi'ona. Au Meli Yesu agena gibunamina tu u'una tunugina againe agena giluvehavehayana, ada bunama magana yamumuna manuwa gilelevilana. 4 Tu Yesu ana tomuliya sa'eyana ana egana Yudasi-Isikaliyota, bana muliya nibaineyao agaidiya gihawavemogatalena amanadi, gigahe gigayo, “Gavana fa'ina-yo hida bunama keke gidakimonevedamaneni-yo fatana koyokoyo agaidiya gidafolakeni? Ka'i gidakimonevedamanena digo, mani lakahina vaita kaliva sa'eyana yana faisewa malamala sa'eyana fatana amine gidavaina.” 6 Au hidede amine gigahe tu keke vaita velemo'ena koyokoyo gida'itanuwakabubuyedi fa'ina, keke. Au bana tokai'afu fa'ina hidede amine gigahe, ada ime tomuliya yama mani ana abavedodoga gi'ita'itave'avina fa'ina, bana tauna mani givaivaina. 7 Tu Yesu gigahe gigayo, “Au kwamayoku keke unagahenuwa'atugoloseni. Aimo aku aihuya fa'ina gilubodana be hida bunama wowokuya gidahiwa-vagahina. 8 Koyokoyo ma amifaiweya wananuwakabubuyedi tova tunugi-vagahina tu Iya'eku ma keke buye kanamiyami tova tunugina, fa'ina kabisona au ganahegemi.” Hidedemi Yesu gigahe. 9 Tu miYuda moya'aidi yo'o lakahina Yesu Bedani againe gimiyami ma valeyana hinogalina. Hinogali-yo medede againe hi'ela be Yesu hina'itana. Keke vaita Yesu anakaibe hina'itani fa'ina hida'ela, au kadu Lasalo hina'itana fa'ina hi'ela, bana alikeya gisivemididina-ma kalivai-nadi. 10 Tu abaveyao ana tofaisewa kikaiwabudiyao ma buye hivevai be kadu Lasalo Yesu buye hinaluve'alikadi. 11 Au Yesu Lasalo gisivemididina fa'ina, miYuda moya'aidi abaveyao ana tofaisewa adi yo'o hikilowedi be hina Yesu againe hivetuvetumagana. Hidema fa'ina abaveyao ana tofaisewa nuwanuwadi Lasalo buye'i hinaluve'alikana. 12 Aiyeta anavelu againe yo'o lakahina tafalolo ana egana Abamaduviviya fa'ina hivaga'auta amanadi, Yesu valeyana hinogalina vaita Yelusalema againe ginalaka'ela. 13 Hinogali-yo au ai lukumina bodaboda amine hivaina digo hilowoga Yesu hinavega'aulena, ada au hivebutu hikovakovadavadava higayo, “Hosana yama tokibababala. O'eni Kauveya ana eganeya u'ela'ela-ma Yaubada ginanuwakabubuye. E, O'eni miIsileli yama tokaiwabu Yaubada ginanuwakabubuye.” Au hidede amine Yesu hihawadavadavana. 14 Badi hivebutu tu Yesu doniki natudi ginuhagana digo kwaune giyage, au Yaubada bonana eto'etoladina gigahe amine gihuluva. 15 Gigayo, Omi miSaiyoni, keke wanamatauta. Au wa'ita, yami tokaiwabu gi'ela'ela doniki natudi againe giyage be ginanauna. Hidede amine to'awatalatalaina miYelusalema adi egana velugana miSaiyoni fa'idiya gigahe. 16 Tu Yesu doniki kwaune giyage ana toveya, ime ana tomuliya keke adahalamaneni Yaubada bonana eto'etoladina gigahe amine Yesu gihuluva. Au tova mulina Yesu gimididi-havagi be yana wakikaiwabu Tamana againe gilaka ana toveya, gavaimi Yaubada bonana ana to'awatalatalaina Bana fa'ine gi'etoladina ada badi miYuda Yesu againe hihuluva, medema anuwa'afolegena. 17 Ada au yo'oyo'o boi Yesu buye himiyami tu Lasalo gikovana be tomohuyehuyeya giyemu ada alikeya gisivemididina amanadi, Yesu yana gugai kaliva moya'aidi agaidiya hilukahihiyena. 18 Au hida nimana ana iya'iyaya gifaisewana-ma yo'o hinogalina fa'ina, hina edeya hivega'aulena. 19 Hidema fa'ina tonagona adi egana Falisi hive'agahegahe higayo, “Wa'ita, kaliva moya'aidi Bana againe hivetomuliya-'owoga, ada keke adafaiweya kanahawatadi.” 20 Badi hive'agahegahe tu miGilika tufoidi yo'o hinafadiya himiyami, yo'o-dina Yelusalema againe hinauna tafalolo lakahina fa'ina hivagavaga'auta. 21 Au badi miGilika Filifi againe hi'ela, bana kwanamiBedasaida, melalai-nadi Galili ana fafali againe. Badi bana againe hi'ela higayo, “Kauveya, nuwanuwama Yesu ana'itana.” 22 Ada Filifi gina Anidulu givenuwa'atana, ada au adi'iselu hina Yesu hivenuwa'atana. 23 Yesu ginogali-yo gigahedi gigayo, “Au adamoya tova gilakayemu be Iya Tohobu'ela kikaiwabu lakahina ganavaina. 24 Yaubada gihalamaneku tu gagahegahe. Aimo kabi'ona gavadi Iya agaikuya ginalakayemu fa'ina ganalukahihiyena. Ka'i otova keke babiya kanafahani, kadu keke ginamoya'ai a'a-mo'ena keke kananuhagani, au sa'eyanaga ginadauda. Tu ka'i babiya kanafahana be tubuna gina'afuwana, au ginatabo be a'a moya'aina kananuhagana. Meda anafaiweya gana'alika-yo babiya hinatauku tu keke akukaibe ganamiyami, au aimo yaku yo'o hinamoya'ai. 25 Kadu gava kaliva tauni ya miyami babiyagaga fa'ina unuwanuwa, medema yawaini unanuhegena, tu gava kaliva ya miyami ana nuwanuwa hida babi againe unavenikohiyena, medema yawai-vagahi wese lobameya unanuhagana. 26 Ka'i hakwadi o nuwanuwa Iya fa'ikuya unafaisewa, giluboda be Iya agaikuya udavetomuliya, ada hai Iya ganamiyami kadu medede againe o'eni yaku tofaisewa buye kanamiyami. Ada hakwadi Iya fa'ikuya unafaisewa, au o'eni Kamaku ginakilakahi. 27 Tu adamoya Iya ase'aseku gi'u'aulolo ada gavaimi ganagahe? Ka'i ganagayo, Ho Kamaku, tova adamoya unalugolegoleku be keke vita gana'ayauneni? Keke lugolagola fa'ina ganave'o'ola, fa'ina babiya gahobu'ela be tova hidevama gana'alika. 28 Au hidede amine ganave'o'ola, Kamaku, a egana lakahina una'ivemogatalina be kaliva hinakilakahina.” Hidede amine give'o'ola-yo Yaubada agona lobameya giyemu gigayo, “Aku egana lakahina ahe ga'ivemogatalina kadu gana'ivemogatali-havagilena be kaliva hinakilakahiku.” 29 Tu yo'o himidimidi-ma hinogalina. Tufoidi higahe higayo, “Atala gihegena.” Kadu tufoidi higayo, “Lobama ana tovenuwa'ata sa'eyana Bana againe gilukahihi.” 30 Bana Yesu gigahedi gigayo, “Keke vaita Iya fa'ikuya hida ago'ago gidayemu-yo wadanogalini, keke. Au omi fa'imiya gigahe. 31 Tomiyababi koyodiyao adi vematahiwadi ana tova-mo'ena adamoya gilakayemu. E, tova adamoya bana Setani tomiyababi yadi tovehimeya ganawavina be ginana. 32 Ada Iya'eku ma ai againe hinakivemididiku ana toveya, kaliva moya'aidi ganakovadi be nuwadi Iya agaikuya gina'ela.” 33 Hidede amine gigahe be gavaiya'amine gina'alika ma kaliva hinahalamanena. 34 Au kaliva yo'o agaidiya higahe higayo, “Yada buki-vehimeya givehawaleda be higa Yaubada yana Tovegida yada yo'o ginanagoyeda-ma ginamiyamiya-vagata. Gavadi-yo O ugahe ugayo, Iya Tohobu'ela gilubodaku be ai againe hidakivemididiku? O Tauni uvewaga ugayo, Iya Tohobu'ela. Bana hima gava Tohobu'ela?” 35 Au Yesu gigahedi gigayo, “Adamoya Iya Tomahala omi hinafamiya buye kamimiyami tu aimo kabisona gananuyabuyabumi. Nuwami aimo gakikivemahalina tu wanavetumaganeku. Ka'i keke wanavetumaganeku o, uyuyuya wananunudadana. Ada badi uyuyuya hinunudadana-ma eda hinufaniyena. 36 Iya Tomahala aimo omi agaimiya gamimiyami tu wanavetumaganeku be mahalina ana kaliva wanatubuyemu.” Ada au Yesu hidedemi gilukahihi gihavaina, yo'o ginuyabuyabudi gina Tauna gisevauyena be keke hina'itani. 37 Tu Yesu nimana ana iya'iyaya keke sa'eyadi gifaisewadi miYuda matadiya nonogana hidibudibutoyoga keke hidavetumaganeni. 38 Hidede amine hihuluva be Yaubada bonana ana to'awatalatalaina ana egana Aiseya yana gahe tuwaina amine velemo'ena ginalakayemu. Bana gigaheye-vagahina, Kaiwabu-yo, keke tamo hakwadi yada venuwa'ata gidavenogaleni. Kadu keke tamo hakwadi O Kaiwabu ya faiwala nima ana iya'iyaya againe gida'itahalamaneni. 39 Badi Yesu nimana ana iya'iyaya keke hida'itahalamaneni fa'ina keke adifaiweya yadi vetumagana Bana againe hidaseuseni, fa'ina Aiseya kadu Yaubada yana gahe giyakahina gigayo, 40 Matadi gakive'uyuyuna be keke hina'itahalamaneni. Nuwadi gakivefanina be keke hinahalamaneni, ada au keke adifaiweya Iya agaikuya hinahagaviladi-yo ganakiveyamumudi fa'ina. 41 Au hidede amine Aiseya gigahe, fa'ina tuwai-mo'ena Yaubada bana againe Yesu yana kikaiwabu gi'ivemogatalina be Bana fa'ine gigaheye-vagahina. 42 E, miYuda moya'aidi Yesu keke hidavetumaganeni tu au ai'adi tufoidi moya'aidi yama tonagona nonogana hivetumaganena. Hivetumaganena tu yadi vetumagana keke kaliva agaidiya hidahawavemogataleni, fa'ina himatauta vaita Falisi hidahawatadi be keke manuwa-abavehawala againe hinaluku hinatafalolo, au adi egana hidayawelina. 43 Badi kalivai-dina nuwanuwadi lakahina kaliva hinahawaveyamumuyedi tu Yaubada yana hawaveyamumu keke hidanuwenuweni. 44 Tu tova sa'eyana Yesu gikovadona gigayo, “Gava kaliva Iya uvetumaganeku, medema Bana gi'iveniniseku-ma buye uvetumaganema. 45 Ada gava kaliva Iya u'itaku, medema Bana gi'iveniniseku-ma buye u'itama. 46 Babiya gahobu'ela be nuwami gana'ivemahalina fa'ina. Gahobu'ela be gaveyao moya'aimi Iya wanavetumaganeku, medema keke uyuyu againe wanamiyami. 47 Atu gava kaliva bonaku unanogalina tu keke unadibumuhigeni digo, Iya keke ganavematahiwadiye. Keke gadahobu'ela-yo omi tomiyababi matahiwadi ganavelemi fa'ina, keke. Au Iya gahobu'ela be ganakibababalemi fa'ina. 48 Tu tovematahiwadi sa'eyana gimimiyami, ana egana bonaku. Gava kaliva unakiloweku kadu yaku laumamala keke unadibumuhigeni, au bonaku ahe babiya galukahihiyena tu udibutoyogena-ma ana matahiwadi unanuhagana, aimo tova mulina vedewayauga ana toveya. 49 Ada keke Tauku yaku nuwanuwa againe gadalukahihi, au Bana Kamaku gi'iveniniseku-ma givehimeyeku. Gavaimi ganagahe o ka'i ganalaumamala, Bana givehimeyeku. 50 Ada Iya gahalamanena ka'i kaliva Bana yana vehimeya hinadibumuhigena amine o, yawai-vagahidi hinanuhagana. Hidema fa'ina gavaimi Kamaku givehimeyeku be ganagahe, au medede amine gagahegahe.” Hidedemi Yesu yo'oyo'o gigahedi.

13

1 Tu aiyeta sa'eyana gidauda be tafalolo ana egana lobama ana tovenuwa'ata yana Abamaduviviya ginayemu. Ada au Yesu gi'ayaunena yana tova ahe giluvedaveda'ufo be hida babi ginanuyabuyabuni tu ginayewana Tamana againe. Tova moya'aina nuwanuwana lakahina ime'eyao yana kalivamomo babiya amiyami amanadi, ada tova giyemu be yana nuwanuwa agaimeya gavatubuga ma ginavehawalema. 2 Au Yesu be ime ana tomuliya avevelavilavi tu ana tomuliya sa'eyana gimiyami, ana egana Yudasi-Isikaliyota, bana Saimoni natuna. Ada Setani ahe gilakayemu yana nuwanuwa gisena Yudasi ase'asene be Yesu nibaineyao agaidiya ginahawavemogatalena, tu Yesu gihalamanena Tamana abavehimeya gaitoma moya'aina agaidiya ahe givele-'owona, kadu Yaubada againe gitauya be gihobu'ela ada Yaubada againe ginayewana ma gihalamanena. 4 Hidedemi gihalamanena tu tolama againe a'au'a-ma gitowamidi, ana aikeva givehalilina digo sawelo dobone gihifo tu nau'a againe gufa gihiwana, au givebutu vaita agetoga amine ime ana tomuliyamomo agema gikolana digo sawelo dobone gihifona-ma againe giluvehavehayana. 6 Gi'ikolakola tu gi'ela higa vaita Saimoni-Fita agena gidakolana ma Fita gigahena gigayo, “Ho Kauveya! Ka'i iya ageku unakolana, ka'i keke?” 7 Yesu gigayo, “Adamoya hida yaku huluva ana nuwanuwa keke udahalamaneni tu aimo tova mulina nuwa ginamahalina againe unahalamanena.” 8 Tu bana Fita gigayo, “Keke-mo'a iya ageku unakolani.” Yesu gigayo, “Ka'i age keke ganakolani, au keke yaku kaliva o'eni.” 9 Hidedemi gigahe-yo Fita gigayo, “Kauveya, au keke agekuga unakolani tu nimaku u'uku buye'i.” 10 Au Yesu gigayo, “Ahe utowa be matatabuna au yegayega tu giluboda be ageniga ganakolana. Ada omi moya'aimi yegayegamiyao tu kaliva sa'eyanaga keke yegayegana.” 11 Fa'ina Yesu a gihalamanena gava kaliva nibaineyao agaidiya ginahawavemogatalena. Hidema fa'ina ahe gigahe moya'aimi yegayegamiyao tu kaliva sa'eyanaga keke yegayegana. 12 Tu au agema gikolana gihavaina, ana aikeva gi'osena digo tolameya gi'enolukekela-havagi be gigahema gigayo, “Ka'i yaku huluva omi agaimiya mene wahalamanena? 13 Omi wavewagaku Tovehawala kadu Kauveya. Au wagahe yamumuna, fa'ina wona velemona yami Kaiwabu Iya'eku. 14 Ada Iya'eku yami Tovehawala yami Kaiwabu agemi gakolana vaita agetoga amine fa'ina, meda omi amifaiweya wadahuluva, agemi wadave'a'ikolakola. 15 Au dewa hagihagina gavehawalemi be omi taumiyao hidede amine wanahuluva fa'ina. Omi agaimiya Iya gahuluva amine, kadu omi wanahuluva. 16 Yaubada gihalamaneku tu gagahegahe, agetoga yana tovehimeya keke gidakaiwabuhegeni, kadu tovenuwa'ata bana gi'iveninisena-ma keke gidakaiwabuhegeni. 17 Au hida yaku dewa ana nuwanuwa ahe wahalamanena. Ka'i hida nuwanuwa wanadibumuhigena digo, yami vemwamwala gavatubuga wananuhagana.” Au hidemi ve'agetoga fa'ina Yesu gigahe. 18 Kadu gigayo, “Keke vaita moya'aimi fa'imiya gadalukahihi. Kaliva galuwafami-ma a gahalamanemi tu sa'eyana agaimiya ginakoyo. Bana fa'ine Veyao Tuwaina ana buki gigahe gigayo, Kaliva yaku tolameya buye a'au'a-ma givenibaineku. Ada au bana kalivai-nadi hidede amine ginahuluva be Yaubada bonana eto'etoladina velemo'ena ginalakayemu fa'ina. 19 Hida huluva aimo keke gidalakayemu tu tova adamoya gavenuwa'ata-vagahimi be aimo ginalakayemu againe, au wanavetumaganeku wanagayo, Wona velemona Bana Keliso, Yaubada yana Tovegida. 20 Gagahe velemo'ena agaimiya, kaliva gana'iveninisena-ma hakwa'adi ginavetobohiyanena, au vaita kadu Iya ginavetobohiyaneku ada hakwa'adi ginavetobohiyaneku, au vaita kadu Bana'e gi'iveniniseku-ma ginavetobohiyanena.” 21 Tu Yesu hidede amine gilukahihi gihavaina, gi'ase'u'aulolo ada ime ana tomuliya agaimeya gigaheye-mo'ena gigayo, “Yaubada gihalamaneku tu gagahegahe, kaliva sa'eyana agaimiya nibaikweyao agaidiya ginahawavemogataleku.” 22 Yesu gigahe-yo au ime ana tomuliya ave'a'ita'ita, anuwanuwa ka'i hakwadi fa'ine gilukahihi. 23 Tu iya Yesu ana tomuliya nuwanuwana lakahina iya'eku amanadi, Bana liline ga'enolukekela tu ga'au'a. 24 Au bana Saimoni-Fita giveguwautuleku gigayo, “Hakwadi fa'ina gilukahihi-ma unatoliluvaluva be kanahalamanena.” 25 Giveguwautuleku-yo au ga'alaliya Yesu tagane gagayo, “Kauveya, hakwadi fa'ina ulukahihi?” 26 Yesu gigayo, “Hida a'a bwai againe gana'utuvina ada bana ganavelena-ma kalivai-nadi.” Gigahe-yo au a'a gi'utuvina Yudasi-Isikaliyota givelena, bana Saimoni natuna. 27 Ada Yudasi a'a gi'abina tovai-nadi Setani bana ase'asene giluku, ada Yesu gigahena gigayo, “Ya faisewa unamaduvehavaina.” 28 Tu keke tamo ime agaimeya buye a'au'a-ma gidahalamaneni, ka'i gavana fa'ina Yesu Yudasi againe hidede amine gigahe. 29 Tufoima anuwanuwa higa Yudasi mani ana abavedodoga gi'ita'itave'avina fa'ina, Yesu gigahena vaita tafalolo ana a'a bana gidakimoneni, o ka'i koyokoyo agaidiya tamo nuwakabubu gidaveledi. 30 Ada au Yudasi a'a Yesu givelena-ma gi'a gihavaina, auhe'ama gimaduhobu be gina. Ada mala a gibogi. 31 Yudasi a gina tu Yesu gigayo, “Au adamoya Yaubada Iya Tohobu'ela gikivekikaiwabuku, kadu Yaubada yana kikaiwabu Iya Bana Natuna agaikuya kaliva hi'itadavadavana. 32 Ka'i Yaubada yana kikaiwabu Iya agaikuya kaliva hina'itadavadavana amine, au kadu Yaubada Tauna yana kikaiwabu ginaveleku be ganakaiwabu-mo'a. E, hidede amine ginamadu-kivekikaiwabuku. 33 Natukweyao, wanogali! Keke lauva tunugina buye kanamiyami. Tova kabi'ona ganalowoga tu aimo wanaleleku ada miYuda agaidiya gagaheyena amine, kadu omi agaimiya gagahe gagayo, Iya ganana againe keke amifaiweya wana'ela. 34 Tu vehimeya ivaguna ganavelemi. Taumiyao agaimiya wanave'ahawahawahega. Iya omi fa'imiya gahawahegeku amine, taumiyao agaimiya wanave'ahawahawahega. Au hidede amine gavehimeyemi. 35 Ka'i taumiyao agaimiya wanave'ahawahawahega, au huluvai-nadi againe kaliva moya'aidi hinahalamanena hinagayo, Wona velemona badi Yesu ana tomuliya.” Hidedemi Yesu gigahe. 36 Tu Saimoni-Fita gigayo, “Kauveya, hami unana?” Yesu gigayo, “Iya ganana againe, adamoya keke afaiweya unamuliyeku tu tova mulina unamuliyeku.” 37 Fita gigayo, “Kauveya, gavana fa'ina adamoya keke akufaiweya ganamuliye? Au gahawahegeku be O fa'iniya gana'alika.” 38 Yesu gigayo, “Ugahe vaita Iya fa'ikuya una'alika tu gagahe velemo'ena againiya, kamukamu keke ginakwage tu nagona unamidivekekeyeku tova tohiye.”

14

1 Tu Yesu ime ana tomuliya gigahema gigayo, “Keke wana'ase'u'aulolo. Yaubada wanavetumaganena kadu Iya wanavetumaganeku. 2 Abamiya moya'aina Kamaku yana manuweya gidadauda ada Iya ganana be yami abaga ganakidewedewena fa'ina. Ka'i keke abamiya moya'aina gidadauda, kadu keke vaita gadagahe ganana yami abamiya gana'ihagihagiyena. 3 Ada Iya ganana yami abaga ganakidewedeweni-yo au ganayewaku ganavega'aulemi be Iya ganamiyami againe, kadu omi wana'ela buye kanamiyami. 4 Ada yaku abamiya againe ganana-ma ana eda omi wahalamanena.” 5 Tu Tomasi gigahena gigayo, “Kauveya, hami unana ma keke adahalamaneni, fa'ina gavaimi eda anahalamaneni?” 6 Yesu gigayo, “Iya Tauku yami eda Kamaku againe, kadu Iya'eku nuwanuwa velemo'ena inubana, ada Iya'eku yawai-vagahimi inubana. Aku vetumaganagaga medema yami eda Kamaku againe. E, keke tamo hakwadi anafaiweya mali edeya ginalaka'ela Kamaku againe. 7 Ka'i wadahalamane-hagihagiyeku digo, kadu Kamaku wadahalamanena. Ada au tova adamoya be ginanunauwena Bana'e wahalamanena, kadu ahe wa'itana.” 8 Tu Filifi gigahena gigayo, “Kauveya, Tama kaliva-mo'ena unavehawalema be auwe hidedemi amafaiweya anahalamanena.” 9 Au Yesu gigayo, “Ho Filifi, vaita udahalamaneku fa'ina lauva tunugina buye kamimiyami. Gava kaliva Iya gi'itaku, kadu Kamaku gi'itana. Gavadi-yo o ugahe ugayo, Tama unavehawalema? 10 Iya Tauku Kamaku nuwahinagene gamimiyami kadu Bana Kamaku Tauna nuwahinagekuya gimimiyami, au Ime sa'eyama. Vaita hida gahe udavetumaganeni. Ada keke Tauku yaku nuwanuwa againe gadalulukahihi, au Kamaku Tauna nuwahinagekuya gimimiyami be yana faisewa Tauna gifififaisewa. 11 Au yaku gahe wanavetumaganena. Iya Tauku Kamaku nuwahinagene gamimiyami, kadu Bana Kamaku Tauna nuwahinagekuya gimimiyami, au Ime sa'eyama. Ka'i keke amifaiweya yaku gahe wanavetumaganeni, au yaku gugai fifiwalana fa'ina wanavetumaganeku. 12 Yaubada gihalamaneku tu gagahegahe, ka'i gava kaliva o unavetuvetumaganeku, gugai fifiwalana Iya gafaisewana amine, kadu o unafaisewana. Yaku gugai fifiwalana moya'aina tu ya gugai fifiwalana aimo unafaisewana-ma moya'ai-mo'ena, fa'ina Iya Kamaku againe ganayewaku be Alu'aluwa Mahalina omi nuwamiya gana'iveninisena. 13 Ada gavadi gavadi aku eganeya wanave'o'olena, medema ganafaisewana be higa kaliva Kamaku yana kikaiwabu Iya Bana Natuna yaku faisewa againe hina'itadavadavana. 14 Ka'i gavadi gavadi aku eganeya wanave'o'olena, medema ganafaisewana. 15 Ka'i velemo'ena nuwanuwami Iya'eku, au yaku vehimeya wanadibumuhigena. 16 Ada Kamaku ganave'o'olena, ami Toveluga velugana ginahawahegena be omi agaimiya gina'ela ginamiyamiya-vagata fa'ina. Bana'e au Yaubada Alu'aluwana, nuwanuwa velemo'ena inubana. 17 Tu tomiyababi Yaubada keke hidahalamaneni-ma keke adifaiweya hina'ayauneni. Badi keke Alu'aluwa Mahalina hida'itahalamaneni, au hifaniyena fa'ina keke adifaiweya hina'ayauneni. Tu omi'iyao ma Bana'e wahalamanena, fa'ina omi agaimiya gimimiyami ada aimo Tauna nuwahinagemiya ginamiyami. 18 Ada keke vaita natu'aeda amine Iya gananuyabuyabumi, au omi agaimiya ganayewaku. 19 Aimo tova kabisona Iya ganana be kaliva gaveyao keke hidavetumaganeku, medema keke kadu hina'itaku, tu omi'iyao ma wana'ita'itaku. Ada Iya gamiyamiya-vagata fa'ina, kadu omi wanamiyamiya-vagata. 20 Ada Alu'aluwa Mahalina gina'ela ana toveya, ginakivetuvetunumi be omi wanahalamanena Iya Tauku Kamaku nuwahinagene gamimiyami, kadu omi taumiyao Iya nuwahinagekuya wamimiyami, kadu Iya Tauku nuwahinagemiya gamimiyami. 21 Hakwa'adi o yaku vehimeya uhalamanena udibumuhigena, o'eni velemo'ena nuwanuwa Iya'eku, ada o'eni nuwanuwa Iya'eku amanadi Bana Kamaku yana nuwanuwa ginasena o againiya, kadu yaku nuwanuwa ganasena o againiya ada Tauku gana'ivemogataliku be wanahalamane-hagihagiyeku fa'ina.” Hidedemi Yesu gilukahihi. 22 Tu tomuliya sa'eyana ana egana Yudasi, keke Yudasi-Isikaliyota au wagakoyona, Yesu gigahena gigayo, “Kauveya, gavadi-yo ime agaimeya Tauni una'ivemogatali-yo anahalamane, tu keke tomiyababi moya'aidi agaidiya una'ivemogatali?” 23 Au Yesu gigayo, “Ka'i kaliva nuwanuwana Iya'eku, bonaku gina'abina ada Kamaku yana nuwanuwa ginasena bana againe, ada Ime ama'iselu bana kalivai-nadi againe ana'ela buye anavemanuwa. 24 Tu ka'i kaliva keke nuwanuwana Iya'eku, bana bonaku keke gida'abini. Ada hida gahe wanoganogalina-ma keke Tauku bonaku, au Kamaku gi'iveniniseku-ma Bana bonana. 25 Iya omi aimo buye kamimiyami tu hida gaitoma omi agaimiya galukahihiyena. 26 Tu Toveluga, ana egana Alu'aluwa Mahalina, Bana Kamaku gina'iveninisena be yaku kabu ginavaina amanadi, gaitoma moya'aina fa'ina ginakivetuvetunumi, kadu yaku vehawala omi agaimiya fa'ina nuwami ginatalafolena. 27 Kadu nuwami gana'ivehavehagina be ase'asemi keke gina'u'aulolo. Iya nuwaku giyamumu, keke gada'ase'u'aulolo, keke gadamatauta. Iya ganavehimeya be hida yaku miyami yamumuna amine kadu omi wanamiyami tova moya'aina. Ka'i tomiyababi hinavehimeya be yami ase'u'aulolo ginahavaina, keke velemo'ena nuwami ginayamumu. Tu ka'i Iya ganavehimeya be yami ase'u'aulolo ginahavaina, au velemo'ena nuwami ginayamumu. Hidema fa'ina Iya gagahemi keke wana'ase'u'aulolo kadu keke wanamatauta. 28 Au yaku gahe ahe wanogalina gagayo, Iya ganahegemi tu aimo omi agaimiya ganayewaku. Ka'i velemo'ena nuwanuwami Iya'eku digo, yakuna Kamaku againe fa'ina wadavemwamwala, fa'ina Bana Kamaku gikaiwabuhegeku ada yana faiwala wananuhagana velemo'ena. 29 Ada yaku tauya fa'ina gavenuwa'ata-vagahimi aimo buye kamiyami-tu. Ahe gavenuwa'atami be aimo ganana againe, wanavetumaganeku. 30 Keke aimo buye kanalulukahihi lauva tunugina, fa'ina Setani gi'ela'ela. Bana Setani badi tomiyababi keke hidavetumaganeku-ma yadi tovehimeya. E, bana gi'ela'ela be vaita gina'ivehamumuku, tu bana keke-mo'a gidavehimeyeku. 31 Tu tomiyababi gilubodadi be hidahalamanena Iya nuwanuwaku Kamaku, kadu gavaimi Kamaku givehimeyeku medede amine gahuluhuluva.” Ada au Yesu hidede amine gilukahihi gihavaina, gigahema gigayo, “Wa'ela be kana.”

15

1 Kadu Yesu gilukahihi gigayo, “Iya'eku ai veguveguwaku velemo'ena, ada Bana Kamaku ai ana to'itave'avina. 2 Kaliva hivetuvetumaganeku-ma badi laganiku. Hai kaliva keke yaku nuwanuwa amine hinahuluva, medema vaita laganiku keke gidayoyo, ada au medema Kamaku ginakuyadi be ginahegedi. Tu hai kaliva yaku nuwanuwa amine hihuluhuluva, medema vaita laganiku yoyoyona, ada au Kamaku yogo badi agaidiya ginavaihegena be hinayoyo guwadi moya'aina. 3 Tu omi'iyao ma bonaku galumamalena-ma ahe wavetumaganena fa'ina, ahe wayegayega yogomi keke. 4 Au Iya agaikuya wanamiyamiyave'avina, kadu omi agaimiya ganamiyave'avina. Ka'i aiguwa laganina keke ai-mo'ena againe ginamiyave'avina digo, keke anafaiweya ginayoyo. Meda anafaiweya omi'iyao, ka'i keke Iya agaikuya wanamiyave'avina, kadu keke amifaiweya yaku nuwanuwa amine wanahuluva. 5 E, Iya'eku ai veguveguwaku tu omi'iyao laganiku. Hakwadi o Iya agaikuya umiyamiyave'avina kadu againiya Iya ganamiyave'avina, au unayoyoyo lakahina. Ka'i o akaibe tu keke Iya o'eni buye, kadu keke tamo huluva hagihagina afaiweya. 6 Ka'i hakwadi o Iya agaikuya keke unamiyave'avina, aiguwa laganina koyona hihegena be gibou amine, meda Kamaku o ginahege. Ada au laganina koyona hihegena tu tamo hakwadi yana ai fa'ina gikwakwana ada gi'alahina. 7 Tu ka'i omi Iya agaikuya wanamiyave'avina ada bonaku ase'asemiya ginadauda tova moya'aina amine o, gavadi fa'ina nuwanuwami wanave'o'ola, au wanave'o'ola be velemo'ena wananuhagana. 8 Ka'i wanayoyo lakahina higa Yaubada yana nuwanuwa amine wanahuluhuluva tova moya'aina, au kaliva Kamaku ana egana hinakilakahina kadu hina'itami hinagayo, Wa'ita, wona velemona badi'iyao Yesu ana tomuliya. 9 Tu Kamaku nuwanuwana Iya'eku amine, meda Iya nuwanuwaku omi'iyao. Iya agaikuya wanamiyamiyave'avina be yaku nuwanuwa omi agaimiya gaseusena-ma wana'aya'ayaunena tova moya'aina. 10 Kamaku yana vehimeya gadibudibumuhigena, ada au yana nuwanuwa Iya agaikuya ga'aya'ayaunena tova moya'aina. Meda anafaiweya ka'i yaku vehimeya omi wanadibudibumuhigena amine o, yaku nuwanuwa omi agaimiya wana'aya'ayaunena tova moya'aina. 11 Au hidede amine gagahemi be Iya gavemwamwala amine, meda omi wanavemwamwala, higa wanavemwamwala-mo'a. 12 Ada Iya omi fa'imiya gahawahegeku amine, kadu omi taumiyao agaimiya wanave'ahawahawahega. Au hidede amine Iya gavehimeyemi. 13 Ka'i kaliva tobohiyaneyao fa'idiya yawaina tauna ginanuhegena digo, bana velemo'ena nuwanuwana badi'iyao, au yana hawahega lakahi-mo'ena. 14 Ada omi'iyao ma ka'i yaku vehimeya wanadibudibumuhigena digo, omi Iya tobohiyakweyao. 15 Au wa'ita, bana agetoga gavaimi yana tovehimeya ginuwanuwa ma keke gidahalamaneni, fa'ina bana againe keke gidahawavemogataleni. Boi gavewagami agetoga tu tova adamoya gahawavetobohiyanemi, fa'ina nuwanuwa moya'aina Kamaku againe ganogalina-ma omi agaimiya gahawavemogatalena. 16 Omi keke wadavenuwadadaneku, keke. Au Iya gavenuwadadanemi gavegidemi be wanana wanayoyo be guwami ginaduva-vagata. Ada au gavadi aku eganeya Kamaku wanave'o'olena, medema ginavelemi. 17 Gavehimeyemi hidede amine. Omi taumiyao agaimiya wanave'ahawahawahega. 18 Tu ka'i badi kaliva Yaubada hikilowena-ma omi agaimiya hinavenibaina amine, au Iya wananuwa-nunauyeku wanagayo, Yada Kaiwabu babiya gimiyami ana toveya, badi Bana'e himidivenibainena. 19 Ka'i omi tokilowa yadi yo'o kalivai-dina digo, badi taudiyao hive'anuwakabubu amine, kadu omi hidanuwakabubuyemi. Tu Iya gavenuwadadanemi be yaku yo'o agaidiya waluku fa'ina, omi keke badi tokilowa yadi yo'o kalivai-dina. Ada tokilowa hivenibainemi, fa'ina keke yadi yo'o agaidiya wadamiyami. 20 Yaku gahe wananuwa-nunauyena gagayo, Agetoga yana tovehimeya keke gidakaiwabuhegeni. Iya yami tovehimeya hivekwageyeku fa'ina, kadu omi aku agetoga hinavekwageyemi. Ka'i yaku laumamala hidadibumuhigena digo, kadu yami laumamala hidadibumuhigena. 21 Tu omi aku egana wavetumaganena fa'ina, hinakivekoyomi Iya galukahihiyena amine. Bana'e gi'iveniniseku-ma keke hidahalamaneni fa'ina, au hidedemi hinahuluvimi. 22 Ka'i Iya keke gadahobu'ela tokilowa gadakivetuvetunudi digo, keke vita hidawahini. Au ahe gakivetuvetunudi tu bonaku keke hida'abini fa'ina adi wavita, keke adifaiweya hinagahe vaita badi fanifanidiyao. 23 Gava kaliva Iya givenibaineku, medema kadu Kamaku givenibainena. 24 Gugai fifiwaladi boi keke tamo hakwadi gidafaisewani-ma Iya badi matadiya gafaisewadi. Ka'i keke gugai-dina gadafaisewadi digo, kadu keke vita hidawahini, tu yaku gugai ahe hi'itana nonogana Iya hivenibaineku Kamaku buye'i, fa'ina badi adi wavita. 25 Au hidede amine hivenibaineku be gahe sa'eyana yadi buki-vehimeya againe tuwaina gidadauda-ma velemo'ena ginalakayemu fa'ina gigayo, Keke tamo yaku ihi tu hivenibaineku. 26 Tu Bana Toveluga Kamaku againe gimimiyami-ma gana'iveninisena be ginahobu'ela, higa Alu'aluwa Mahalina ada Bana'e nuwanuwa velemo'ena inubana. Au Kamaku againe ginatauya ginahobu'ela be Iya fa'ikuya gina'awatalatalaina. 27 Kadu omi'iyao ma Iya fa'ikuya wana'awatalatalaina, fa'ina yaku faisewa ana abave'inuba againe buye kamimiyami be kanunauwena tova adamoya.” Au hidemi Yesu gigahe.

16

1 Kadu Yesu ana tomuliya agaidiya gilukahihi gigayo, “Hida tokilowa yadi huluva fa'ina gagahe-vagahimi be aimo yami vetumagana keke ginahavaini fa'ina. 2 Aimo ka'i nuwanuwami manuwa-abavehawala againe wanaluku wanatafalolo, au hinahawatami. Ada tova ginalakayemu be kaliva hinaluve'alikami ada hinagayo, Au Yaubada nuwanuwana hina'alika fa'ina aluve'alikadi. 3 Au hidede amine hinakivekoyomi, keke Kamaku hidahalamaneni fa'ina, kadu keke Iya hidahalamaneku fa'ina. 4 Tu omi aku tomuliya gavenuwa'ata-vagahimi be aimo huluvai-nadi ana tova ginayemu-yo yaku venuwa'ata badi fa'idiya nuwami gina'afolena. 5 Boi nagona agaikuya wamidivetomuliya againe, kaliva mena yadi huluva fa'ina keke gadagahemi, buye kamiyami fa'ina. Tu tova adamoya Bana gi'iveniniseku-ma againe ganayewaku, ada vaita tamo hakwadi agaimiya udatoliluvaluva udagayo, Hami unana? Tu keke yakuna fa'ina wadatoliluvaluva. 6 Ada yakuna galukahihiyena fa'ina, ase'asemi gi'u'aulolo. 7 Tu gagahe velemo'ena gananuyabuyabumi be omi yamumu wananuhagana fa'ina. Ka'i Iya keke ganana digo, ami Toveluga agaimiya keke gina'ela. Tu ka'i ganana digo, Bana'e gana'iveninisena be omi agaimiya ginahobu'ela. 8 E, Bana'e gina'ela tomiyababi yadi nuwanuwa kali'uhona ginakivetuvetunugina be yadi dewa koyona hinahalamane-hagihagiyena, kadu gaveyao yegayegadiyao Yaubada matane ma hinahalamanena. Kadu'e Yaubada yana matahiwadi fa'ina ginakivetuvetunudi be hinahalamanena. 9 Keke hidavetumaganeku fa'ina, Alu'aluwa Mahalina hida yadi dewa koyona fa'ina ginakivetuvetunudi. 10 Kamaku againe ganayewaku ada omi aimo keke wana'ita'itaku. Kamaku againe ganayewaku fa'ina, badi tomiyababi hinahalamanena Iya yegayegaku Yaubada matane. Hidedemi Alu'aluwa Mahalina ginakivetuvetunudi. 11 Kadu yana kivetuvetunu sa'eyana ma Yaubada ahe givehimeya be Setani hida babi ana tovehimeya koyona matahiwadi-vagata ginanuhagana. 12 Tu yaku nuwanuwa keke gadalukahihiye-'owoni agaimiya, au tufona moya'aina gidadauda tu tova adamoya keke amifaiweya wananogalini, fa'ina nuwami ginakoyo-mo'a. 13 Tu Alu'aluwa Mahalina, Bana nuwanuwa velemo'ena inubana amanadi, gina'ela ana toveya, nuwanuwa velemo'ena matatabuna fa'ina ginakivetuvetunumi. Keke Tauna yana nuwanuwa amine ginalukahihi, au gavadi Kamaku againe ginanogalina medema ginalukahihiyena, kadu gavadi aimo tova mulina ginalakayemu-ma omi agaimiya ginahawavemogatalena. 14 Yaku nuwanuwa ginavaina be ginavehawalemi, ada au hidede amine aku egana ginakilakahina. 15 Kamaku yana nuwanuwa moya'aina, medema kadu Iya yaku nuwanuwa. Hidema fa'ina gagahe vaita yaku nuwanuwa Alu'aluwa Mahalina ginavaina be ginavehawalemi.” Au hidedemi Alu'aluwa Mahalina fa'ina Yesu gilukahihi. 16 Kadu Yesu gigayo, “Tova kabi'ona aimo keke wana'itaku, kadu tova kabi'ona kanahegeni-yo wana'ita-havagileku.” 17 Au ime ana tomuliya buye ave'agahegahe agayo, “Gavadi-yo gigahe gigayo, Tova kabi'ona aimo keke wana'itaku, kadu tova kabi'ona kanahegeni-yo wana'ita-havagileku. Kadu gavana fa'ina-yo gigahe gigayo, Kamaku againe ganayewaku fa'ina? 18 Ada au buye ave'atolitoli agayo, Yana gahe, higa tova kabi'ona, ana nuwanuwa gavaiya'amine? Hida yana gahe kafaniyena.” 19 Tu Yesu gihalamanena ime nuwanuwama anatoliluveluvena fa'ina gigahema gigayo, “Iya gagahemi gagayo, Tova kabi'ona aimo keke wana'itaku, kadu tova kabi'ona kanahegeni-yo wana'ita-havagileku. Ka'i hida yaku gahe fa'ina buye wave'agahegahe? 20 Yaubada gihalamaneku tu gagahegahe, omi yaku alika fa'ina wanatagitagi wanave'alulaukuhi tu badi tomiyababi hikiloweku-ma hinavemwamwala. Nagona omi wana'ase'u'aulolo tu muliya vemwamwala yami ase'u'aulolo ginatogahegena. 21 Ka'i kwamayoku hinavefahedi againe, aulolo hinavaina yadi venatuna ana tova gilakayemu fa'ina, tu ahe hinavenatuna againe yadi aulolo nuwadi ginaulu tu hinavemwamwala natudi hivenatunena fa'ina. 22 Meda anafaiweya omi'iyao. Adamoya ase'asemi gi'u'aulolo, tu aimo gana'ita-havagilemi ada au ase'asemi ginavatu, ada keke tamo hakwadi anafaiweya yami vemwamwala ginayawelini. 23 Ada aimo yami wavemwamwala ana toveya keke tamo gavadi fa'ina wanatoliluveluveku. Gagahemi velemo'ena gavadi gavadi aku eganeya Kamaku wanave'o'olena, medema ginavelemi. 24 Boi keke tamo gavadi fa'ina aku eganeya wadave'o'oleni. Au adamoya wanave'o'ola be wananuhagana be higa wanavemwamwala-mo'a fa'ina. 25 Adamoya gahetalahobuhobu amine omi agaimiya galulukahihi tu aituha gi'ela'ela be keke gahetalahobuhobu amine ganalukahihi, au Kamaku fa'ina ganagahe-mo'emi. 26 Ada medema tovai-nadi Kamaku againe aku eganeya wanave'o'ola, ada keke ganagahe vaita omi fa'imiya Bana againe Iya ganave'o'ola. Au taumiyao wanave'o'ola-mo'a. 27 Keke omi fa'imiya ganave'o'ola, fa'ina Kamaku Tauna nuwanuwana omi'iyao. Omi nuwanuwami Iya'eku, kadu yaku gahe wavetumaganena gagayo, Yaubada againe gatauya be gahobu'ela. Hidema fa'ina Kamaku nuwanuwana omi'iyao. 28 E, Kamaku againe gatauya be babiya gahobu'ela. Au tova adamoya babi gananuyabuyabuna be Kamaku againe ganayewaku.” Hidedemi Yesu gigahema. 29 Tu ime ana tomuliya agahena agayo, “Ehe, adamoya keke gahetalahobuhobu amine udalukahihi, au ime agaimeya ugahe-mo'a be ahalamanena. 30 Kadu adamoya ahalamanena gaitoma moya'aina O uhalamane-'owona, ada keke vaita tamo hakwadi O againiya anafaiweya gidatoliluvaluva-yo yana nuwanuwa unahalamanena, fa'ina kaliva yama nuwanuwa uhalamane-mo'ena. Hidema fa'ina avetumagane, Yaubada againe velemo'ena utauya be uhobu'ela.” Hidemi agahe. 31 Au Yesu gigahema gigayo, “Ka'i hida au velemona adamoya againe wavetumaganeku? 32 Tu aituha gi'ela'ela, ka'i ahe gilakayemu be wana'oseku-yo kaliva sa'eyana sa'eyana wana'abinauna yami manuweya, ada keke tamo hakwadi Iya buye anamiya. Tu keke velemona akukaibe, fa'ina Kamaku Iya agaikuya gimimiyami. 33 Ada au hidede amine omi agaimiya galukahihi be Iya agaikuya nuwayamumu wanavaina. Tomiyababi agaidiya aulolo wanavaina tu wana'asevatu, fa'ina tomiyababi gafaiwalahegehegedi.”

17

1 Tu Yesu ime ana tomuliya agaimeya gilukahihi gihavaina, lobameya gi'itavedadaga givebutu give'o'ola gigayo, “Kamaku, yaku tova a gilakayemu. Iya O Natu aku egana unakilakahina be Iya O a egana ganakilakahina kaliva matadiya fa'ina. 2 Au abavehimeya kaliva moya'aidi agaidiya uveleku be yaku kaliva O uveleku-ma moya'aidi yawai-vagahidi ganaveledi fa'ina. 3 Yawai-vagahidi ana nuwanuwa gavaiya'amine? Badi O Yaubada velemo'ena akaibe'u-mo'a ma hihalamane kadu Iya Yesu Keliso O u'iveniniseku-ma hihalamaneku. Au hidedemi hihalamanema fa'ina, ahe hivebutu himiyamiya-vagata. 4 Ada ya faisewa uveleku be babiya ganafaisewana-ma au gafaisewa-'owona fa'ina, ya kikaiwabu tomiyababi agaidiya ahe ga'ivemogatalina. 5 Kamaku, boi tuwai-lokalokana babi aimo keke kadabubuni ana toveya, Iya O'eni buye kamiyami ada Iya wakikaiwabuku. Au tova adamoya O unavehimeya be tuwaina Iya gakaiwabu-mo'a amine, meda adamoya mene umimiyami-ma againe ganakaiwabu-mo'a. 6 Tu badi tomiyababi uvenuwadadanedi be uveleku-ma ya nuwanuwa agaidiya ahe gahawavemogatalena. Nagona badi'iyao O ya kaliva tu Iya agaikuya uhawahegedi, ada O bona ahe hi'abina. 7 Ada tova adamoya ahe hihalamanena yaku gahe yaku gugai moya'aina inubana au O againiya. 8 Vehawala O uveleku-ma kadu badi gavehawaledi ada ase'asedi gi'onana. O againiya gatauya be gahobu'ela ma hihalamane-hagihagiyena, kadu Iya fa'ikuya higahe higayo, Wona velemona Bana Yaubada gi'iveninisena. 9 Au badi fa'idiya gave'o'ola. Keke tomiyababi moya'aidi fa'idiya gadave'o'ola, au badi gaveyao Iya agaikuya uhawahegedi-ma fa'idiya gave'o'ola, fa'ina badi'iyao ya kalivamomo. 10 Gaveyao moya'aidi yaku kalivamomo, medema kadu ya kalivamomo. Meda anafaiweya gaveyao moya'aidi ya kalivamomo, medema kadu badi yaku kalivamomo. Ada badi yaku kaiwabu hi'ivemogatalina. 11 Ada tova adamoya O againiya ganayewaku. Iya keke babiya ganamiyami tu badi babiya hinamiyami. Ho Kamaku mahamahali, a egana fifiwalana againe unayavayavadi, eganai-nadi uveleku amanadi. Ada egana sa'eyana, kadu yada nuwanuwa au sa'eyana. Badi yada kalivamomo unayavayavadi be ide nuwanuwa sa'eyana againe kamimiyami amine, kadu badi nuwanuwa sa'eyana againe buye hinamiyami. 12 Aimo badi buye amiyami ana toveya, mena a egana fifiwalana uveleku-ma againe gayavadi. Tova moya'aina galugolegoledi ada keke tamo hakwadi gidabwavi tu kaliva sa'eyanaga gibwavi, bana abaga koyona ana kaliva. Bana gibwavi higa vaita O bona eto'etoladina velemo'ena ginalakayemu fa'ina. 13 Tu tova adamoya O againiya ganayewaku, ada aimo babiya gamimiyami tu hidede amine gave'o'ole be higa badi hinavemwamwala-mo'a fa'ina. E, nuwanuwaku Iya gavemwamwala lakahina amine, kadu badi hinavemwamwala. 14 O bona badi agaidiya gahawavemogatalena, ada medema fa'ina badi tomiyababi O hikilowe-ma hivenibainedi. Iya keke tokilowa amine gadanuwanuwa, kadu anafaiweya yaku kaliva keke tokilowa amine hidanuwanuwa. Keke badi amine yaku kaliva hidanuwanuwa fa'ina, au yaku kaliva agaidiya hivenibaina. 15 Keke vaita gadave'o'ole be hida babi againe unavaihegedi, keke. Tu au gave'o'ole be kaliva koyona Setani againe unayavadi. 16 Iya keke tomiyababi O hikilowe-ma amine gadanuwanuwa, kadu anafaiweya yaku kaliva keke badi tokilowa amine hidanuwanuwa. 17 Nuwanuwa velemo'ena ase'asediya unafahana be mahamahalidiyao O fa'iniya unasevehailedi. O bona, medema nuwanuwa velemo'ena. 18 Tomiyababi agaidiya u'iveniniseku be gahobu'ela amine, meda anafaiweya tomiyababi agaidiya badi gana'iveninisedi be O bona hinalumamalena. 19 Ada badi fa'idiya Iya gahawahegeku O againiya be badi O againiya hinahawahegedi velemo'ena fa'ina. 20 Tu keke hida yaku kalivagaga fa'idiya gadave'o'ola, au kadu badi aimo yadi laumamala hinanogalina be hinavetumaganeku amanadi fa'idiya gave'o'ola. 21 Gave'o'ole be nuwanuwa sa'eyana againe hinamiyami. Kamaku, O Tauni nuwahinagekuya umimiyami, kadu Iya Tauku nuwahinageniya gamimiyami. Meda anafaiweya nuwanuwaku badi taudiyao nuwahinagedeya hinamiyami be tomiyababi moya'aidi hinagahe hinagayo, Wona velemona Yaubada gi'iveninisena be gihobu'ela. 22 Ada kikaiwabu uveleku-ma kadu badi gaveledi be ide nuwanuwa sa'eyana againe kamimiyami amine, meda anafaiweya badi nuwanuwa sa'eyana againe hinamiyami fa'ina. 23 E, Iya Tauku badi nuwahinagediya gamimiyami kadu O Tauni nuwahinagekuya umimiyami be higa yadi nuwanuwa leleleya-mo'a hinamiyami. Nuwanuwaku nuwanuwa leleleya-mo'a hinamiyami be hida iya'iyaya againe tomiyababi moya'aidi hinahalamanena O u'iveniniseku be gahobu'ela. Kadu hinahalamanena ya nuwanuwa Iya agaikuya usena amine, meda badi agaidiya ya nuwanuwa ahe usena. 24 Kamaku, nuwanuwaku yaku kaliva uveleku-ma Iya ganamiyami againe badi buye anamiyami. E, buye anamiyami be yaku kikaiwabu O uveleku-ma hina'itana fa'ina. Tuwai-lokalokana aimo keke babi kadabubuni ana toveya O nuwanuwa Iya'eku fa'ina, hida kikaiwabu uveleku. 25 Ho Kamaku yegayega, tomiyababi keke hidahalamane nonogana Iya gahalamane, kadu hida yaku kaliva O u'iveniniseku ma hihalamanena. 26 Ada O'eni badi agaidiya gahawavemogatale, kadu tova moya'aina ganahawahawavemogatale be ya nuwanuwa lakahina Iya agaikuya useusena-ma badi taudiyao nuwahinagediya hina'aya'ayaunena, kadu Iya Tauku nuwahinagediya ganamiyami fa'ina.” Au hidedemi Yesu yana ve'o'ola Tamana againe.

18

1 Yesu give'o'ola gihavaina, ime ana tomuliya buye ahobu gufa ana egana Kidiloni againe adamana. Yuwadede againe ai moya'aina faha againe gikabu, ada Yesu ime buye aluku. 2 Tu bana Yudasi Yesu gihawavemogatalena-ma, abagai-nadi gihalamanena, fa'ina medede againe tova moya'aina Yesu ime ana tomuliya buye avagavaga'auta. 3 Au abaveyao ana tofaisewa kikaiwabudiyao be tonagona tafatafalolodiyao adi egana Falisi, badi tolugaviya adi yo'o sa'eyana kadu tuilala tufoidi hi'iveninisedi be walamufadiyao wadakidiyao wagiyodiyao Yudasi gi'aliyedi ime Yesu buye amiyami-ma abagai-nadi againe. 4 Hiyemu tu Yudasi Yesu ana tohawavemogatala badi buye himidimidi. Au Yesu gaitoma moya'aina Bana againe ginalakayemu-ma gihalamanena fa'ina givaga'ela badi agaidiya gigahe gigayo, “Hakwadi waleleleni?” Badi higayo, “Yesu kwanaNasaledi.” Bana Yesu gigayo, “Au Iya Kaliva-mo'eku.” 6 Ada Yesu Tauna gigahe Iya Kaliva-mo'eku againe, au hinuvagatugu yadi wamatauta babiya hibe'u. 7 Kadu gitoliluveluvedi gigayo, “Hakwadi waleleleni?” Kadu badi higayo, “Yesu kwanaNasaledi.” 8 Yesu gigayo, “Ahe gagahemi Iya Kaliva-mo'eku. Ka'i Iya waleleleku digo, hida yaku kalivamomo ma waki'ilovedi be hinana.” 9 Hidedemi gigahe be bonana yana ve'o'ola Tamana againe ahe gigaheyena-ma velemo'ena gidalakayemu. Boi hidemi gigahe, “Uveleku kalivai-dina ma keke tamo gadanuhegeni-yo gidabwavi.” 10 Tu Saimoni-Fita yana feto giwahina-ma gisiwakana digo kaliva sa'eyana gilauna be tagana wa'i'atagine giluyo'ena. Bana kalivai-nadi abaveyao ana tofaisewa adi tokaiwabu ana agetoga, ana egana Maleko. 11 Fita bana tagana giluyo'eni-yo Yesu gigahena gigayo, “Ya feto ana foseya useni. Makewa'e aulolo ana gowa Kamaku giveleku-ma ganayuyena, keke ganakiloweni.” 12 Tu Yesu gigahe-yo badi tolugaviya adi tonagona buye, kadu miYuda yadi tuilala au Yesu hikive'avina be hiyogo-yo Anasi againe himidinauwena, bana Kaiyafasi lawana ada medema malamalai-nadi againe bana Kaiyafasi abaveyao ana tofaisewa adi tokaiwabu. 14 Kadu Kaiyafasi ma boi miYuda givehimeyedi gigayo, “Gilubodana be kaliva sa'eyanaga miYuda moya'aida fa'ideya gida'alika.” 15 Tu Saimoni-Fita Yesu gibwa'ulina kadu iya'eku buye, iya kadu Yesu ana tomuliya. Abaveyao ana tofaisewa adi tokaiwabu gihalamane-hagihagiyeku, fa'ina yana manuwa ana eda'awaneya iya Yesu buye aluku tu bana Fita kabu'avane wana liline gimidimidi. Au iya gahobu agetoga kwamayoku wana gi'ita'itave'avina-ma againe gagahe ada wana giyauna be Fita giluku. 17 Bana kwamayoku-nadi Fita againe gigahe gigayo, “Kadu o kalivai-nina wadema kalivai-nadi ana tomuliya agaidiya, au ayoma?” Fita gigayo, “Iya keke.” 18 Tu tokaiwabu ana agetoga be badi tuilala ai hikulina kwadudu fa'ina, ada himidimidi tu ai hivevevala. Ma kadu bana Fita badi agaidiya gina gimidimidi tu ai givevevala. 19 Tu bana abaveyao ana tofaisewa adi tokaiwabu Yesu gitoliluveluvena. Ime ana tomuliya fa'imeya kadu yana vehawala fa'ina gitoliluvaluva. 20 Bana Yesu gigayo, “Tova moya'aina kaliva moya'aidi matadiya gagahegahe. E, manuwa-abavehawala agaidiya be manuwa-tafalolo lakahina againe miYuda moya'aida kavagavaga'auta-ma, gavehavehawala tova moya'aina. Keke tamo gavadi gadagahekauyeni. 21 Tu gavana fa'ina-yo Iya utoliluveluveku? Badi bonaku ahe hinogalina-ma unatoliluveluvedi. Gavaimi gagahegaheye ma hihalamanena.” 22 Hidemi gigahe tu tuilala sa'eyana liline gimidimidi-ma Yesu gilu'atugena gigayo, “Gavadi-yo tokaiwabu lakahina u'ihawadamane?” 23 Yesu gigayo, “Ka'i gagahe koyona digo, gavadi yaku koyona au unahawavemogatala kaliva matadiya. Tu ka'i gagahe yamumuna amine, gavadi-yo ulu'atugeku?” 24 Au Anasi Bana Yesu nimana aimo yogoyogonina Kaiyafasi againe gi'iveninisena, bana abaveyao ana tofaisewa adi tokaiwabu. 25 Tu Saimoni-Fita gimidimidi tu ai givevevala. Badi kaliva buye himidimidi-ma higahena higayo, “O'eni kadu sa'eya ana tomuliya agaidiya, ka'i ayoma?” Tu kadu givekeke gigayo, “Iya keke.” 26 Abaveyao ana tofaisewa adi tokaiwabu ana agetoga sa'eyana, bana kaliva tagana Fita giluyo'ena-ma tobohiyana gigayo, “Ka'i o'eni ma ga'ita, boi faha againe bana buye wamiyami, ka'i ayoma?” 27 Kadu Fita givekeke-havagi. Tu auhe'ama kamukamu gikwage. 28 Tu miYuda Kaiyafasi yana manuweya hihobu be Yesu hinauwena kwanaLoma yama tovehimeya yana manuwa lakahina againe. Bana tovehimeya ana egana Failato. Aimo mala gilaulauna. MiYuda taudiyao manuwa lakahina againe keke hidaluku. Ka'i hidaluku digo, adi hawata hidayawelina vaita ase'asedi hidakivebwanenena. Ka'i hidayawelina digo, tafalolo lakahina a'ana keke adifaiweya hina'ani, tafalolo ana egana lobama ana tovenuwa'ata yana Abamaduviviya. Hidede amine yadi vehimeya gisena. 29 MiYuda adi hawata fa'ina Failato gihobu kabu'avane badi agaidiya be gigayo, “Hida kaliva gavaimi wahawavekoyoyeni?” 30 Badi higayo, “Ka'i hida kalivai-nadi keke tokoyona, kadu keke ada'aliye o againiya.” 31 Failato gigahedi gigayo, “Au omi wananauwena be taumiyao yami vehimeya amine wanavedewayaugina.” Tu miYuda higayo, “Omi miLoma wahawatama fa'ina, keke amafaiweya anavehimeya be kaliva alika againe anahegeni tu nuwanuwama omi wanakivekelosena.” 32 Hidede amine hihuluva be gavaimi Yesu yana alika keloseya fa'ina boi gigaheyena, medema velemo'ena gidalakayemu. 33 Tu miYuda higahe-yo Failato giluku-havagi manuweya ada Yesu giyowanina be gigahena gigayo, “Ka'i velemo'ena O'eni miYuda adi tokaiwabu?” 34 Yesu gigayo, “Ka'i tauni ya nuwanuwa againe hidemi ugahe, o ka'i mali kaliva Iya fa'ikuya o againiya higahe ma unogalina fa'ina ugahe?” 35 Failato gigayo, “Ka'i o uvaita iya kwanamiYuda? Iya hima tuliku. O Tauni ya yo'o be kadu yami abaveyao ana tofaisewa kikaiwabudiyao iya agaikuya hi'aliye. Gavadi tamo koyona ufaisewani-yo?” 36 Yesu gigayo, “Iya'eku tokaiwabu tu keke hida babi againe gadavehimeya. Ka'i hida babi againe gadavehimeya digo, yaku yo'o boiyesedi hidalugaviya be keke miYuda hidakive'aviku fa'ina. Tu yaku abavehimeya inubana tulina.” 37 Au Failato gitoliluveluvena gigayo, “Velemo'ena O'eni tokaiwabu?” Yesu gigayo, “Ika, ugahe amine tokaiwabu Iya'eku. Nuwanuwa velemo'ena fa'ina kaliva agaidiya ga'awatalatalaina. Hidema fa'ina Iya gatubuga kadu hidema fa'ina gahobu'ela babiya. Gaveyao nuwanuwa velemo'ena ana kaliva, medema bonaku hivenogalena.” 38 Failato gigayo, “Nuwanuwa velemo'ena gava'adi?” Gigahe-yo gihobu-havagi kabu'avane miYuda agaidiya, ada gigahedi gigayo, “Keke tamo gavadi koyona Bana againe gadanuhagani. 39 Tu tafalolo lakahina ana egana Abamaduviviya ana toveya yami dewa sa'eyana amine ganahuluva. Kaliva sa'eyana yogoyogonina ganayauna be ginahobu. Ka'i nuwanuwami hida kaliva miYuda ami tokaiwabu ganayauna?” 40 Au badi miYuda hikovadona higayo, “Keke Bana'e. Ime nuwanuwama Balaba.” Tu Balaba bana tomunugakai'afu.

19

1 Tu Failato badi miYuda yadi nuwanuwa ginogalini-yo au givehimeya be tolugaviya bulava againe Yesu hilaulauna. 2 Kadu badau bulava hakahakaluluna againe hi'etowalini-yo u'une hisena, kaleko likelikena hive'osena, medema tokaiwabu ana vaigau. 3 Ada Bana againe hi'ela'ela hihawahawavelaiga higayo, “Siule, siule miYuda adi tokaiwabu.” Ada au wamagigine hilulu'atugena. 4 Kadu Failato gihobu-havagi yo'o gigahedi gigayo, “Wa'ita, Bana gavedewayaugina tu we'a galele-wayoge, au hidedei ganavega'aulena omi matamiya be wanahalamanena keke tamo Bana againe gavadi koyona gadanuhagani.” 5 Au Yesu badau hakahakaluluna vaigau likelikena hive'osena-ma gihobu kabu'avane. Bana Failato gigahedi gigayo, “Wa'ita, hide'i kaliva-mo'ena.” 6 Tu abaveyao ana tofaisewa kikaiwabudiyao be tuilala hi'ita-yo au hivebutu hikovakova higayo, “Kelose againe wanatutuvefosena, au kelose againe wanatutuvefosena.” Ma Failato gigahedi gigayo, “Taumiyao wananauwena be wanakivekelosena. Iya'eku ma keke tamo Bana againe gavadi koyona gadanuhagani.” 7 Badi miYuda higayo, “Bana wadema kalivai-nadi gigahe vaita Bana Yaubada Natuna. Hidema fa'ina gilubodana be Bana gida'alika, fa'ina vehimeya sa'eyana yama buki-vehimeya againe gidadauda gigayo, Ka'i kaliva Yaubada ginahawatagona amine o, bana wanaluve'alikana.” 8 Tu Failato miYuda yadi gahe ginogalina againe, Yesu bonana fa'ina kadu gimatauta keke kabi'ona. 9 Au manuwa lakahina againe giluku-havagi Yesu againe gigahe gigayo, “O gava kaliva?” Tu Yesu keke tamo bonalaufata gidagaheye. 10 Bonana keke gidafatani fa'ina, Failato gigahena gigayo, “Gavana fa'ina keke tamo agaikuya udagahe? Au unahalamanena iya ganavehimeya be hinayau, o ka'i iya ganavehimeya be kelose againe hinatutuvefose, au iya O yaku abavehimeya.” 11 Yesu gigayo, “Afaiweya unavehimeyeku tu keke tauni ya vehimeya fa'ina, au Yaubada abavehimeya givele fa'ina unavehimeya. Hidema fa'ina ka'i o unavehimeya be hinaluve'alikaku amine, ya koyona lakahina, tu bana o againiya gihege'aliyeku-ma yana koyona lakahi-mo'ena.” 12 Failato Yesu yana gahe ginogali-yo nuwana ginauna be gavaiya'amine Yesu ginayauni tu miYuda hikovakova higayo, “Ka'i hida kalivai-nadi unayauna digo, o'eni keke Sisa tobohiyana, bana yada kaiwabu lakahina. Yesu Tauna gikilakahina be higa vaita ginavetokaiwabu. Gava kaliva hidede amine tauna ginakilakahina, medema Sisa nibaina.” 13 Failato hida hifufu ginogali-yo gihobu kabu'avane abavedewayauga ana didiga'u'u againe gihiyoto tu Yesu giyowanina be gi'ela abagai-nadi againe. Ime miYuda bonameya abaga avewagana Gabata, au didiga yamumuna amine. 14 Tu medema aiyeta againe tafalolo lakahina fa'ina hikidewadewa, tafalolo ana egana Abamaduviviya. Mala ginalauna tova-mo'ena ginayemu. Tu kidewadewa ana tova kauwana getadeya Failato miYuda agaidiya gigahe gigayo, “Wa'ita, hide'i ami tokaiwabu.” 15 Gigahe-yo hikovakova higayo, “Gida'alika, gida'alika, keloseya hidatutuvefosena.” Failato gigahedi gigayo, “A! Ka'i nuwanuwami ganavehimeya be kelose againe hinatutuvefosena, Bana ami tokaiwabu?” Amanadi abaveyao ana tofaisewa kikaiwabudiyao hikova higayo, “Sisa anakaibe ama tokaiwabu.” 16 Failato agodi ginogali-yo Yesu badi agaidiya gihawahegena be tolugaviya kelose againe hinatutuvefosena. 17 Au tolugaviya Yesu hinauwena be kelose hive'avalana, hina abaga ana egana Utouto againe. Tu miYuda bonameya abaga ana egana Goligota. 18 Yuwadede againe hinauwena kelose againe hitutuvefosena, kadu kaliva-kawowo adi'iselu buye hitutuvefosedi, sa'eyana fafaline kadu sa'eyana fafaline tu Yesu hinafadiya. 19 Kadu valeyana Failato gi'etoladina, givehimeya be kelose tabone hisena. Gi'etoladi gigayo, |sc BANA HIDEVAMA HIGA YESU kwanaNASALEDI, |sc BANA miYUDA ADI TOKAIWABU.|d Etoladi-mo'ena au hidede amine. 20 Abagai-nadi Yesu hikivekelosena-ma au melala liline, fa'ina miYuda moya'aidi valeyana hihawana. Ada valeyana hi'etoladina bona tohiye againe, bona Hibeliu medema miYuda bonadi, bona Loma kadu bona Gilika. 21 Tu abaveyao ana tofaisewa kikaiwabudiyao Failato againe higahe higayo, “Keke una'etoladini, miYuda adi tokaiwabu. Tu unagayo, hida kaliva gigahe vaita Bana miYuda adi tokaiwabu. Au hidede amine una'etoladi.” 22 Failato gigayo, “Auwe. A ga'etoladina au gimiya.” 23 Tu tolugaviya Yesu hikivekelosena amanadi adi yo'o fowa. Ada au kelose againe hitutuvefosena gihavaina, Yesu ana kaleko hivaina bo'u fowa hisena, tolugaviya sa'eyana sa'eyana bo'u sa'eyana sa'eyana. Kadu ana aikeva hivaina tu medema aikevai-nadi againe keke tamo ana havi, au tunugina hiyogona. 24 Hidema fa'ina tolugaviya hive'agahegahe higayo, “Keke abafolaka fa'ina kanahaini tu kabala kanahegelakahina iya'iyaya kanagaheyena be kanahalamanena hakwadi aikevai-nadi ginavaini.” Au hidedemi hihuluva be Yaubada bonana eto'etoladina velemo'ena ginalakayemu fa'ina gigayo, Aku kaleko taudiyao agaidiya hifolakena, aku aikeva fa'ina kabala hihegelakahina iya'iyaya higaheyena be hakwadi hakwadi hinavaina ma hinahalamanena. Au tolugaviya hidede amine hihuluva. 25 Tu Yesu ana kelose liline vevine tufoidi himidimidi, hinana kadu hinana tobohiyadi, ada Meli Kelofasi vavinena kadu Meli vineMagidala, badi adivefowa himidimidi. 26 Kadu iya gamidiveda'ufo, iya Yesu ana tomuliya nuwanuwana lakahina iya'eku amanadi, ada Yesu hinana be iya'eku gi'itama againe, hinana agaidiya hidedemi gigahe gigayo, “Hinaku, adamoya bana Yoni wanahawavenatunena.” 27 Au iya agaikuya gigayo, “Adamoya hinaku unavehinanedi.” Ada au Yesu gimidi'alika tu muliya ganauwedi be yaku manuweya himiyami. 28 Gimiyami tu yana faisewa matatabuna ahe gihavaina ma Yesu gihalamanena, ada gigahe gigayo, “Agoku gitaina.” Hidedemi gigahe be Yaubada bonana eto'etoladina velemo'ena ginalakayemu fa'ina. 29 Tu oine golagolana wanau'ana gidauda. Au balou oine againe hilu'utuvina be gimaga, ai ana egana hisofa againe hikwanena be hitunena Bana awane. 30 Yesu oine giyuna gihavaina gigayo, “Yaku faisewa a galauyabu.” Gigahe-yo gi'odu, alu'aluwana Yaubada againe giveleyewena. 31 Ada Yesu gi'alika tu medema aiyeta againe sabati fa'ina hikidewadewa, fa'ina keke nuwanuwadi sabati againe to'alika wowodi kelose againe ginadauda. Kadu sabati-nadi aituha lakahina, Abamaduviviya ana sabati fa'ina. Hidema fa'ina miYuda Failato hive'o'olena be tolugaviya ginavehimeyedi ada kaliva kelose againe agedi hinadobona be hinamadu'alika fa'ina, ada wowodi hinakakilina be hinanauwena. 32 Au tolugaviya hina kaliva sa'eyana agena hidobona, kadu velugana agena hidobona, adi'iselu Yesu buye hikivekelosedi-ma kalivai-dina. 33 Tu Yesu againe hi'ela hida'itana ma ahe gi'alika, fa'ina Bana agena keke hidadoboni. 34 Tu tolugaviya sa'eyana bahimina giyo againe gi'onana ma auhe'ama dayagina gufagufa buye gimadutamo'ai. 35 Iya tauku ga'itana ada gaitoma gilakayemu-ma iya tauku galukahihiyena. Tauku ga'itana fa'ina yaku kahihi au velemo'ena, keke gadave'alololo. Ada au iya galukahihiyena be higa omi wanavetumagana fa'ina. 36 Ada tolugaviya hidede amine hihuluva be Yaubada bonana eto'etoladina velemo'ena ginalakayemu fa'ina. Bonai-nadi gigayo, Bana luluna keke tamo hinadoboni. 37 Kadu bona velugana hi'etoladina gigayo, Bana hi'onana-ma hina'itana. 38 Tu kaliva sa'eyana gimiyami, Yosefa bana kwanaAlimadiya. Bana kadu Yesu ana tomuliya tu gimuliyekauyena, miYuda yama tonagona gimatausedi fa'ina. Au bana gina Yesu wowona fa'ina Failato againe give'o'ola. Gihawahegeni-yo Yosefa gina wowona gikakilina be ginauwena. 39 Kadu Nikodimo Yosefa buye hina, ada bana Nikodimo vanedimodimo lakahina ana vita foti-faifi (45) kilo amine gi'aliyena, vane ana egana mulo be alo. Bana Nikodimo boi bogi sa'eyana gina Yesu buye hilukahihi-ma kalivai-nadi. 40 Ada au badi adi'iselu Yesu wowona hivaina, ada kaleko kwayakwayana againe vanedimodimo buye hifafana. To'alika ana aba'aihuya fa'ina miYuda yama dewa au hidede amine. 41 Tu abaga Yesu hikivekelosena-ma liline faha gidauda, kadu faha againe tomohuyahuya ivaguna gidauda, ada medede againe boi keke tamo to'alika hidahuyani. 42 Au medede againe Yesu hihuyana, fa'ina medema aiyeta againe tafalolo lakahina higa Abamaduviviya ana sabati fa'ina hikidewadewa, kadu tomohuyahuyai-nadi eda'ufoya fa'ina.

20

1 Tu sabati hihegena tafaloloya mala aimo keke gidalauni tu Meli vineMagidala gi'enohobu tomohuyehuyeya, ada kabala tomohuyahuya ana eda'awaneya tamo hakwadi give'awawana-ma gi'itana. 2 Au gimadu be gi'ela Saimoni-Fita be iya'eku agaimeya, iya tomuliyai-kuna Yesu nuwanuwana lakahina amanadi, ada gigahema gigayo, “Kauveya wowona tomohuyehuyeya hivaina be hinauwena tu hai hiseni ma keke gadahalamaneni.” 3 Gigahe-yo Fita iya'eku alowoga be ana tomohuyehuyeya. 4 Ama'iselu amadu tu iya gamaduga-mo'a be tomohuyehuyeya gamadu'ela. 5 E, gayemu ga'ibo'ula galukenala, kaleko kwayakwayana hifafana mededemagaga gidauda-ma ga'itana. 6 Tu Saimoni-Fita wai gimulina. Giyemu tomohuyehuyeya giluku au kaleko kwayakwayana gidauda-ma gi'itana, kadu kaleko Yesu u'una ana lifi gi'itana medema keke kaleko kwayakwayana buye se'eyaine gidadauda, au uwa'uwana tulina gidauda. 8 Tu iya'eku ma tomohuyehuyeya wai ganagona-ma au galuku ga'ita-yo nuwahinagekuya gavetumagana gagayo, “Wona velemona gimididi-havagi.” 9 Tu medema tovai-nadi Yaubada bonana higa Yesu yana mididi-havagi fa'ina tuwai-mo'ena hi'etoladina amanadi, aimo keke adahalamane-hagihagiyeni. 10 Ada au ama'iselu alowoga ana yama manuweya. 11 Tu Meli a giyewana tomohuyehuyeya, ada kabu'avane gimidimidi tu gitagitagi. Ada aimo gitagitagi tu gina gi'ibo'ula tomohuyehuyeya be gilukenala, au lobama ana tovenuwa'ata luhei gi'itadi adi vaigau kwayakwayana, ada Yesu wowona boi gidauda-ma againe hihiyoto. Sa'eyana Yesu wa'u'une gihiyoto, sa'eyana wa'agene gihiyoto. 13 Ada tovenuwa'ata sa'eyana Meli gigahena gigayo, “Kwamayoku, gavadi-yo utatagitagiya?” Bana gigayo, “Yaku Kaiwabu wowona hinauwena tu hai hiseni ma keke gadahalamaneni.” 14 Gigahe-yo gida'enovilana ma Yesu gi'itana tu gifaniyena, givaita Bana faha ana to'itave'avina. 15 Tu Yesu gigayo, “Kwamayoku, gavana fa'ina utagitagiya? Hakwadi uleleleni?” Au Meli gigayo, “Kauveya, ka'i yaku Kaiwabu wowona O unauwena, hai useni ma unahawavemogatalena be ganana ganavaina ada gananauwena.” 16 Au Yesu bana ana egana giyakahina gigayo, “Meli.” Ada gihagavilana Hibeliu meyameya gigahena gigayo, “Laboni.” Hifufu ana kaivila ma “Aku Tovehawala.” 17 Yesu gigayo, “Keke una'abiku, fa'ina aimo keke Kamaku againe gadalaka tu tobohiyakweyao agaidiya unana Iya fa'ikuya unagahedi Iya ganalaka Kamaku againe, Bana'e kadu omi Tamami, e yaku Yaubada kadu yami Yaubada.” Hidedemi Yesu gigahe. 18 Au Meli vineMagidala gi'ela ime tomuliya agaimeya gigahe gigayo, “Kaiwabu a ga'itana.” Kadu Yesu yana gahe matatabuna gi'awatalatalainena ime agaimeya. 19 Tu medema aiyetai-nadi tafaloloya, ada mala a gibogi tu ime Yesu ana tomuliya avaga'auta be wana ahe a'aifalidona, miYuda yama tonagona amatausedi fa'ina. Amiyami tu auhe'ama Yesu gilu'afuneunena hinafameya gimidi gigahema gigayo, “Ase'asemi gina'ilova.” 20 Gigahe-yo nimana bahimina givehawalema. Au yama Kaiwabu a'itana fa'ina, vemwamwala givemagama. 21 Kadu Yesu gigahe-havagilema gigayo, “Ase'asemi gina'ilova. Bana Kamaku babiya gi'iveniniseku be yana kabu gavaina amine, meda anafaiweya omi gana'iveninisemi be yaku kabu wanavaina.” 22 Gigahe-yo yawaina giya'avedamana ime agaimeya au gigahema gigayo, “Alu'aluwa Mahalina ginaluku ase'asemiya. 23 Alu'aluwa Mahalina ase'asemiya ginamiyami amine, au ka'i gaveyao yadi koyona omi wanayawelina, au yadi koyona kadu Yaubada ginayawelina ginagayo, Keke adi vita. Kadu ka'i gaveyao yadi koyona keke wanayawelini, au yadi koyona kadu Yaubada keke ginayawelini, we'a adi vita.” 24 Tu Tomasi, sa'eyana Yesu yana yo'o tuwelo agaidiya ana egana Natuluga, Yesu giyemu ime agaimeya ana toveya bana keke ime buye adamiyami. 25 Au agahena agayo, “Kaiwabu ahe a'itana.” Tomasi gigayo, “Yana mididi-havagi fa'ina iya keke ganavetumagana tu nagona neli yana ki'ona gana'itana, kadu nimalagolagoku againe neli nigo'awa'ivina ganakidadanina, kadu giyo nigo'awa'ivina bahimina againe nimaku ginaluku, au muliya ganavetumagana.” 26 Ada aiyeta eita ahege tu kadu avaga'auta-havagi manuweya, au medema Tomasi buye amiyami. Kadu'e wana a'aifalidona tu Yesu gilu'afuneunena hinafameya gimidi gigayo, “Ase'asemi gina'ilova.” 27 Au Tomasi againe gigahe gigayo, “Neli nimakuya giluku-ma againe nimalagolago useni, nimaku u'ita kadu nima utune be giyo nigo'awa'ivina againe useni. Auwe amalakibo, tu unavetumaganeku Iya yawayawaku gamimiyami.” 28 Tomasi gigayo, “Yaku Kaiwabu kadu yaku Yaubada O'eni.” 29 Yesu gigahena gigayo, “O u'itaku fa'ina uvetumaganeku. Badi'iyao ma keke hida'itaku tu au ai'adi hivetumaganeku, badi yadi vemwamwala gavatubuga!” 30 Tu Yesu nimana ana iya'iyaya kadu moya'aina gifaisewana ime tomuliya matameya. Tufona moya'aina hida buki againe keke gada'etoladini. 31 Atu tufona ahe ga'etoladina be omi Yesu wanavetumaganena fa'ina, Bana'e velemona Yaubada yana Tovegida Keliso kadu Bana'e Yaubada Natuna. Ka'i Yesu ana eganeya wanavetumagana, yawaimi ivaguna wanavaina.

21

1 Tu aiyeta gavaiyehi ahegedi tu tova sa'eyana ime tomuliya Galili tobuya amiyami tu Yesu agaimeya gilakayemuna-havagi, tobu kadu ana egana Taibiliya, ada yana ivemogatala hidede amine. 2 Ime Sebedi natuneyao ama'iselu amiyami, kadu Saimoni-Fita, Tomasi bana hivewagana Natuluga, Nataniyela bana kwanamiKena medema Galili ana fafali againe, kadu ana tomuliya adi'iselu, au ama yo'o seveni amine amiyami. 3 Tu bana Saimoni-Fita gigahema gigayo, “Iya ganana bayaumeya.” Ime agayo, “Ime buye kanana.” Au avevai. Ahobu wakeya ayage tu medema bogi-nadi keke tamo igana adave'onani. 4 Ada auwe mala gilaulauna Yesu avaleya gimidimidi tu ime afaniyena, keke adahalamaneni Bana Yesu. 5 Au gikovama gigayo, “Natukweyao, ka'i igana tufona wave'onadi?” Ime agayo, “Anudadana-wayoga.” 6 Bana gigayo, “Waka wa'i'atagine alevatu wanasehobuyena be moya'aidi wanave'onadi.” Au alevatu asehobuyena igana himaga ada keke amafaiweya adataini, igana moya'ai-mo'edi fa'ina. 7 Ada iya Yesu ana tomuliya nuwanuwana lakahina iya'eku amanadi, Fita againe gagahe gagayo, “Wadema yada Kaiwabu.” Bana Saimoni-Fita yaku gahe Kaiwabu fa'ine ginogalini-yo, au ana aikeva faisewa fa'ina givehalilina-ma gi'ose tu lehageya gi'auhifu wa'avaleya gikayolaka. 8 Tu ime'eyao ma waka againe a'ela'ela igana wa'alevatudi ataitaidi, avala eda'ufo fa'ina, ana lauva nimada ana wava wani hanaledi (100) amine. 9 Ada auwe avala avaina be ahobu, ai nolana a'itana igana wa'a'ana gitagotagova. 10 Yesu gigahema gigayo, “Igana adamoya wave'onadi-ma tamo wa'aliye.” 11 Au Saimoni-Fita gihobu wakeya gilaka alevatu wa'avaleya amine gilautaina, igana lakahidiyao himaga adi kilagalaga hanaledi fifiti teli (153), ada igana moya'ai-mo'edi nonogana alevatu keke hidakaninini. 12 Ada au Yesu gigahema gigayo, “Wa'ela be kanave'awaboge.” Tu keke tamo hakwadi agaimeya gidatoliluveluveni gidagayo, “O hakwa'adi?” Adagahe tu awowomumu fa'ina ave'amata. Tu ahalamanena Bana'e yama Kaiwabu. 13 Au Yesu ali'auya gina a'a givaina digo givelema, kadu igana anafaiweya. 14 Ada au Yaubada Yesu alikeya gisivemididini-yo Bana tova tohiye ime ana tomuliya agaimeya gilakayemu, ada hidema tovai-nadi yana ivemogatala anaveto. 15 Tu ave'awaboge gihavaina, Yesu Saimoni-Fita againe gigahe gigayo, “Saimoni, o Yoni natuna, ka'i ya nuwanuwa agaikuya hida kaliva tobohiyamomo yadi nuwanuwa agaikuya gitubuhegena o ka'i keke?” Bana Fita gigayo, “Ika Kaiwabu, ide kavetobohiyana ma makewa O uhalamanena.” Yesu gigayo, “Yaku sifi kabi'odiyao unave'adi.” 16 Kadu tova anavelu gigahe-havagilena gigayo, “Saimoni, o Yoni natuna, ka'i velemo'ena nuwanuwa Iya'eku?” Bana gigayo, “Ika Kaiwabu, kavetobohiyana ma ahe uhalamanena.” Yesu gigayo, “Yaku sifi una'itave'avidi.” 17 Kadu tova anaveto gigahe-havagilena gigayo, “Saimoni, o Yoni natuna, ka'i velemo'ena kavetobohiyana?” Au Fita nuwana gikabubu, fa'ina Yesu gitoliluveluvena tohiye gigayo, “Ka'i nuwanuwa Iya'eku?” Ada gigahena gigayo, “Kaiwabu, gaitoma moya'aina uhalamane-'owona, kadu iya nuwanuwaku O'eni ma ahe uhalamanena.” Yesu gigayo, “Yaku sifi unave'adi. 18 Yaubada gihalamaneku tu gagahegahe, boi o kabi'oniya tauni a gaiyona uhifona, kadu ha'againe nuwanuwa unana au una, tu aimo unavekauve'a ana toveya, nima unatunena mali kaliva a gaiyona ginavehifo ada keke nuwanuwa unana againe, mededei au ginanauwe.” 19 Hidedemi gigahe be higa ginahawavemogatala aimo kaliva Fita hinayogoni-yo hinaluve'alikana be kaliva bana againe Yaubada yana kikaiwabu hina'itadavadavana. Au kadu Yesu gigahena gigayo, “O unamuliyeku.” 20 Tu iya gamuliyedi Yesu be Fita, ada Fita gihagavilana gi'itaku, iya tomuliya Yesu nuwanuwana lakahina amanadi. Kadu buye a'au'a againe, iya Yesu liline-mo'ane ga'enolukekela ada gatoliluveluvena gagayo, “Kauveya, hakwa'adi ginahawavemogatale nibaimomo agaidiya?” 21 Au iya gamuliyedi be Fita gi'itaku-yo Yesu againe gigahe gigayo, “Kaiwabu, hida kalivai-nadi gavaiyami?” 22 Yesu gigahena gigayo, “Ka'i nuwanuwaku bana ginamiyami tu Iya ganayewa'ela ana toveya digo, au ginamiyami tu bana o keke ya gaitoma. Au o'eni unamuliyeku.” 23 Yesu hidede amine gigahe fa'ina, tomuliyai-nadi vaita keke gina'alika ma valeyana give'aliyahega Yesu yana kalivamomo agaidiya. Tu Yesu keke gidagahe vaita bana keke gina'alika. Au gigayo, “Ka'i nuwanuwaku bana ginamiyami tu Iya ganahobu'ela-havagi ana toveya digo, au ginamiyami tu bana o keke ya gaitoma.” Au hidedemi gigahe. 24 Iya Yoni tomuliyai-kuna, ada hida gaitoma iya ga'awatalatalainena be ga'etoladina. Kadu bonaku au velemo'ena ma ahalamanena. 25 Tu Yesu yana gugai kadu moya'aina moya'ai-mo'ena. Ka'i kaliva hina'etoladi-'owona digo, gavaita buki moya'ai-mo'ena againe babi ginamaga, keke anafata.