/1 Inyatoy damdama ditu'un Kristuh din agguy na'aliwan di bahol tu'u, at hiyah ne panginnilaan hi aat di pamhod Apo Dios ay ditu'un nidugah. Hi Jesu Kristu ya na'ahhamad di nangulgudnah nan makulug an tugun, an hiyay na'abbagbagtun namahuan hi natayana, ya un an amin di mamahuan, ya hiyay mumpapto' hitun luta; ya ta''on nan a'alida, ya ipapto'na goh. Mabiggat, ya hiyay gotad di Hudyuh nan Punnomnomandah Nunlapawan di Anghel Apo Dios Hinan Tatagu; Ya inilan Jesus an magadyuh di pumbangngadanah nan nalpuwanah wadan Amana, at taynana tun luta; Ya pohpohdon Jesus nan nangulug ay hiyan taynanah tun luta, ya impattignay pamhodnan didad nangamung un natoy. Hiyah ne aatna, ti nidugah di pamhod Apo Dios hinan tataguh tun luta, at hennagna han oh'ohhan imbaluynan dida, ta an amin di mangulug ay hiya, ya adida milahhin ay Apo Dios, at mi'tagudan hiyah mid pogpogna.

/2 Heten na'at, ya hiyay nangipa'annung hidin impitudo' Ama tu'uh din nun'alunonah nan tataguh penghana, ti inalinay. Munhabi han babain mid ah lala'ih nangelo' ay hiya, ya muntungaw at lala'i, ya hay mingadan, ya hi Emmanuel, ya nan alyon di hapit an Emmanuel, ya alyon tu'uy, wah Apo Dios ay ditu'u.