/1 Tacast la unay ti panagayat ti Dios iti lubong; nga intedna ti Anacna a Bugbugtong, tapno amin a mamati kencuana, saan a mapucaw, no di ket adda biagna nga agnanayon. Ngem ti Dios ipatalgedna ti ayatna cadatayo, agsipud ta idinto a managbasoltayo pay laeng, ni Cristo natay gapu cadatayo. Ket casangoanan ti rambac ti pascua, idi nga ammo ni Jesus a ti horasna dimtengen tapno manipud itoy lubong umalis ken Ama, idinto nga inayatna dagiti taona nga addada ditoy lubong idi, inayatna ida agingga iti panungpalan. Ni Jehova nagparang caniac iti nabayagen a pannawen, a kinunana, Wen, siac nagayatac kenca iti agnanayon a panagayat: gapuna a babaen ti kinamanangngaasi inyasidegca. Ken aggapu ken Jesu-Cristo, ti matalec a mamanecnec, ti inauna nga anac cadagiti natay, ken ti agturay cadagiti ar-ari ditoy daga: Iti daydiay mangdungdungngo cadatayo, ken nangluc-at cadatayo cadagiti basbasoltayo iti darana met laeng.
/2 Ket amin daytoy, naaramid tapno matungpal ti sinao ti Apo, nga inaramatna di mammadto, a cuncunana: Adtoy ti maysa a virgen agsicugto ket aganacto iti maysa a lalaki, Ket panaganandanto iti Emmanuel; a no mayulog cayatna a saoen: Ti Dios adda cadatayo. Ket awan duadua, dackel ti palimed ti kinasanto: Daydi naiparang iti lasag, Napanecnecan iti espiritu, Nakita dagiti angel, Naicascasaba cadagiti nacion, Napapati ditoy lubong, Naipangato sadi gloria. Ni Jesus cunana kencuana: Nabayag nga aldaw nga addaac cadacayo, ket dinac nailasin, Felipe?. Ti nacakita caniac, nakitana ni Ama, Apayapay a cunaem: Ipakitam cadacami ti Ama? Dica patien aya nga addaac ken Ama ket ni Ama adda caniac?. Idi punganay adda ti Verbo, ket ti Verbo adda iti Dios, ket ti Verbo isu, Dios. Ket daydi a Verbo nagbalin a lasag, ket nakipaggian cadatayo: (ket nakitami ti dayagna, a cas la iti dayag ti Bugbugtong nga Anac ti Ama), napno ti parabur ken pudno.
/3 Ta kencuana agtaeng ti naananay a Kinadios a sibubukel. Idi agsasao pay laeng, adtoy, ti maysa nga ulep a naraniag a lininunganna ida; ket adtoy ti maysa a timec iti ulep a kinunana: Daytoy isu ti Anacco a dungdungoec, isu a pacaayaywac: isu ti denggenyo. Ket simmungbat di angel a nagcuna kencuana: Ti Espiritu Santo umayto kenca, ket ti pannacabalin ti Cangatoan salinungannacanto; gapuna met a ti Santo a mayanacto kenca managanto Anac ti Dios. Uray siasino a mangipaduyacyacto a ni Jesus isu ti Anac ti Dios, agtaeng kencuana ti Dios, ket isu agtaeng iti Dios. Ta nayanac ti maysa nga ubing cadatayo, maysa nga anac a lalaki ti naited cadatayo; ket ti panangituray maiparabawto iti abagana: ket ti naganna magaladanto iti Nacascasdaaw, Mamagbaga, Mannacabalin a Dios, Agnanayon nga Ama, Pricipe ti Cappia.
/4 Cuna kencuana ni Jesus: Siac ti panagungar ken ti biag: ti mamati caniac, uray no matay, agbiagto pay. Kinuna manen, ngarud ni Jesus cadacuada; Pudno, pudno cunac cadacayo, siac ti ruangan dagiti carnero. Ni Jesus kinunana cadacuada: Siac ti tinapay ti biag: ti umay caniac, saanto nga agbisin; ket ti mamati caniac, uray caano saanto a mawaw. Dacayo naganendac ti Mannursuro ken Apo: ket naimbag ti panagcunayo: ta siac a pudno. Kinuna cadacuada ni Jesus: Pudno, pudno, cunac cadacayo, idi casangoanan ti pannacayanac ni Abraham, addaacon. Bayat ti caaddac ditoy lubong, siac ti silaw ti lubong. Ket kinunana cadacuada: Dacayo taga babacayo, siac taga ngatoac; taga ditoy a lubongcayo; siac saanac a taga ditoy a lubong.
/5 Agpataawca ket iwayatyo dagiti iketyo ta cumalapcay pay. Ket simmungbat ni Simon ket kinunana kencuana: Mannursuro, nagbannogcami a nagpatpatnag ket awan ti naalami; nupay casta gapu iti saom iwayatco. Ket idi nga inaramidda daytoy, nacasacawda ti adu unay nga ican, ket nabesbessang dagiti iketda. Ket inbilinna cadagiti adu a tao nga agtugawda iti carootan, ket innalana dagiti lima a tinapay ken dagiti dua nga ican ket intangadna dagiti matana iti langit, binendicionanna; ket pinispisina, ket intedna dagiti tinapay cadagiti adalan, ket dagiti adalan intedda cadagiti adu a tao. Ket nanganda amin, ket nabsogda, ket inacupda dagiti pispisi a natda, sangapulo ket dua nga alat a napno. Ket dagidi nangan aglimariboda a tattao, malacsid dagiti babai ken ubbing. Ket adtoy dagiti dua a bulsec, a situtugawda iti igid ti dalan, idi nangngegda a ni Jesus lumablabas, nagickisda a cuncunada: Caasiannacami, Apo, Anac ni David. Ket ni Jesus, simnec ti asina, inaprusanna dagiti matada ket naigiddato nga nacakitada; ket simmurotda kencuana.