1

1 Wamba wetete yuu ati-la naya-kola, Gotena pii oko ateaipia. Pii oko bala tane Gote atoto, bala Ayiane Gote oko towa atu ateapele-pia. 2 Yuu ati-la ungi lea-angi, pii oko bala Ayiane Gote towa atu ateapele-pia. 3 Goteto minditaka eya tupa pitaka pii okomane angu yakale lea-kola, pitaka taka yaepia. Minditaka eya tupa pitakana mindikipi mindi asini waka mindina nayaepia. Jia. 4 Balanga saka atapowa atene oko yene. Balanga saka atapowa atene okonemane wandakali tupa mo tii piya yaepia. 5 Tii-pene oko bala yuu undupi-lene okona atoto, tii pua ateya tekeko, undupi-lene okonemane tii-pene oko sia mina napiyane. Jia. 6 Goteto akali mindi epeakale lea-kola, bala epo ateaipia. Akali okonena gene oko Jone. 7 Wandakali pitaka-mane balana pii ale wato, tii-pene oko lo bilipi leakale nembo toto, Joneto tii-pene oko bala akali oko lo wandakali tupa lamalu epea. 8 Jone bala tii-pene oko jia. Bala wisanisa mindi atoto, tii-pene oko bala akali oo eya oko loto, wandakali tupa lamalu epea. 9 Gotena pii oko bala tii-pene enene oko ati kenga atala yuunga epo atoto, wandakali pitaka mo tii piyawa atalane. 10 Balato yuu ati-la yakale lea-kola, yuu ati-la okolapo yaepia. Bala yuu okona ateane tekeko, yuunga wandakali tupamane bala andoto, akali oko bala Mesaya oko ateya nembo nateai. 11 Akali okone balana yuu tene okona pea-kola, bala yame wandakali tupana kambua-mane bala Mesaya oko epeya lo lamia napeai. 12 Wuane tekeko, wandakali minditupa-mane bala lo bilipi loto, bala utupanena Akali Andane oko ateya leai-kola, Goteto utupane balana andopane tupa gulaya yane. 13 Ayiane angini-lamane andopane mindi liyambana tundupa paini mandipakale nembo toto, mindi mandiyapele tekeko, Goteto wandakali tupa balana andopane tupa guleakale nembo toto, mana okone wato mina napeaipia. Jia. Bala tane-mane wandakali utupane balana andopane tupa gulaya alane. 14 Gotena pii oko bala akali mindi gulo atoto, nanima aposolo akali tupana tombenenga epo atea. Nanimato andema-kola, bala Ayiane Gotena iwanane mindiki atoto, tai-lene wete atea. Goteto bala epeakale lea-kola, balato wandakali tupa ondo wete wato, wayumane moyo ateanga, nanimato andemane. Gotena pii enene oko balanga tumbi latane atea. 15 Enene, wandakali mindikipi mindimane Ayiane Gote oko alu mindikipi mindi lee-mane anda napeaini tekeko, balana Iwanane mindiki oko bala Ayiane Gote towa atu atalane okonemane Gote bala okopene lo nanima andawa leane. Wamba Goteto balana loo tupa Mosesanga maiya-kola, Mosesato Gotena loo utupane Juta yame wandakali nanima geane tekeko, Jisasa Kataisato nanima ondo wete wato, nanima mee moyoto, Gotena pii enene oko nanima langea. Gotena ondo ene oko balanga tumbi latane atea-kola, balato nanima pitaka ondo wete wato, mee moyaka pua atea. Ipa peya-maiyane akali Joneto Jisasa epeanga andoto, wandakali tupa pii taimane lamawuato, wamba nambato akali mindi matili epolopeya lo yakama langewa okoni leaipia. Angini-mane namba mandi napenenga, akali okone bala wamba ini bulupane ateaipia. Wuane nembo toto, nambato akali okone bala nambana Akali Andane oko atolopeya lo yakama langewa okoni. Akali okone bala andipa amo epeya oko andalapa. Joneto wuane leaipia. 19 Alu mindi, Jutusaleme tane Juta yame wandakali tupamane pitisa akalipi, Lipai yame akalipi, utupanena minditupa lamawuato, ipa peya-maiyane akali Jone oko bala ateyanga poto, yakamato nimba apipe lo bala tipa piyapa leainipia. Wuane leai-kola, akali utupane-mane poto, bala tipa peai-kola, balato wisanisa mindi atoto, utupanena pii okone yano peleaipia. 20 Utupane-mane bala lamawuato, nimba Mesaya oko jia yalua leai-kola, balato utupanena pii okone tanga nalene, pii tika pua loto, enene, namba Mesaya oko jia leaipia. 21 Jia lea-kola, utupane-mane bala tipa puato, nimba Mesaya oko jia yando, nimba potopesa akali Ilainja okope leai-kola, balato namba akali okone jia leaipia. Utupane-mane bala tipa puato, nimba akali potopisa mindi epolopeya layene okope leai-kola, balato jia leaipia. 22 Jia laka pea-kola, utupane-mane bala lamawuato, nimba api atelepe lo nimba tipa pulu pulupa lo nanima langiyai akali utupane lamai-makaleko. Nimba apipe. Nimbato wua piyawane lo nimba tane nanima langi leai. 23 Wuane leai-kola, balato utupane lamawuato, wamba potopisa akali Aisayato pii mindi loto, akali mindimane wandakali napalene yuu mindina atoto, yakamato Akali Andane okona asini oko mo tika piyapa lo atolopeya layene eya. Nambato pii okone lo atalawane lea. 24 Wamba Patasai tupamane akali utupane Jone ateanga peakale leai-kola, balato pii okone utupane lamaiya. 25 Lamaiya-kola, utupane-mane bala tipa puato, nimba Mesaya oko yandopi, Ilainja yandopi, potopisa akali epolopeya oko yandopi, utupanena mindi ata napeendo, anu peakale nimbato wandakali tupa ipa peya-mawua atelepe leai. 26 Wuane leai-kola, Joneto utupanena pii okone yano peyoto, nambato ipa-mane angu wandakali tupa ipa peya-maiyawane lea. Akali mindi matili epolopeya lewa oko balato namba sia minulu-peya. Namba akali gene nayene okomane balana suu kee pula okona eyaka oko tita lolane namba akali epene mindi jia. Bala yakama tombenga epo ateya tekeko, yakamato bala akali oko ya lo anda napeyai lea. 28 Jone bala Betani yuu okona atoto, pii utupane lea. Betani yuu okone ipa Jotane okona amo yangi yene okonena mandaka Joneto wandakali tupa ipa peya-mawua atea. 29 Anate-lene ipa peya-maiyane akali Joneto Jisasa epeanga andoto, wandakali ongane ateaini tupa lamawuato, Gotena sipisipi andopane epeya oko andalapa lea. Balato yuu okona wandakali tupana koo tupa apia-malu epeya. 30 Wamba nambato yakama languato, namba angini-mane namba mandi napenenga, akali matili epolopeya oko bala wamba ini bulupane ateane mambele, bala nambana lipinga gulo atolopeya lewa okoni. Akali epeya oko bala akali okone. 31 Wamba nambato akali okone bala Gotena Iwanane ateya lo anda napewane tekeko, Isatale tane wandakali tupamane bala akali oko ya lo andeakale nembo toto, nambato utupane ipa peya-malu epewane lea. 32 Wuane lalu, Jone bala wisanisa mindi atoto, wamba nambato akali okone bala Gotena iwanane ateya lo anda napewane tekeko, Goteto namba languato, nimbato ipa-mane wandakali tupa ipa peya-malu puu lea. Ipa peya-mawua atole-kola, matili Oli Sipitisa oko bala akali mindinga epo pitulanga nimbato andolopele. Akali okonemane piape puato, wandakali tupa Oli Sipitisa okomane ipa peya-malupeya lea. Goteto wuane lea-kola, nambato Jisasa ipa peya-maewa okone angi, Oli Sipitisa oko eka uya gulo, ati kenga atala yuunga epoto, balanga epo peteanga andewa. 34 Andoto, namba wisanisa atoto, akali oko bala Gotena Iwanane ateya lewa. Joneto wuane lea. 35 Anate-lene Jone balana disaipolo lapo akali towa atu dee lapone yuu okonena ateai. 36 Joneto Jisasa asia epo peanga andoto, Gotena sipisipi andopane oko bala amo epo peya oko andalapa lea. 37 Balato wuane lea oko ale wato, Jonena disaipolo okonelapo-mane Jisasa watama peapi. 38 Watama peapi-kola, Jisasato anda-peke loto, okonelapo bala watama epeapinga andoto, liyambato aki mindi aiya pima epeyapipe lea. Wuane lea-kola, okonelapo-mane bala tipa puato, Lapai, nimba aninga pangilinipe leapi. Iputu pii loto, gene Lapai okone mopeke loto, tisa lalaini. 39 Aninga pangilinipe lo tipa peapi-kola, balato andolo ipulupa lea. Wuane lea-kola, okonelapo-mane bala towa atu poto, bala paleane anda oko andeapi. Okone angi, ole-lene taeme poo kilokopi mindi lea-kola, utulu okonena okonelapo bala towa anda okonena atu paleai. 40 Wamba ipa peya-maiyane akali Joneto Jisasa andayo Gotena sipisipi andopane oko bala amo epo peya oko andalapa lea-angi, lapo akali-mane balana pii okone ale alu, Jisasa watama peapele. Akali okone-lapona mindoko bala Saimone Pita amene Endutu oko. 41 Anate-lene balato balana amene Saimone okone wamba ini bulupane aiya pua andoto, nalipato Mesaya oko andaipa leaipia. Gene Mesaya oko mopeke loto, Gitiki pii lo Kataisa lalaini. 42 Nalipato Mesaya oko andaipa lalu, Endutu balato Saimone lamo atu Jisasa ateanga pea-kola, Jisasato bala andatawa yoto, nimba Jone iwanane Saimone atele tekeko, matili wandakali-mane nimbana gene oko Sipasa lolopeyai lea. Gene Sipasa okone Gitiki pii mopeke loto, Pita lalaini. Gene okone-lapona tene oko ana. 43 Anate-lene Jisasa bala Galili disitiki okona pokale nembo toto, Pilipi aiya pua andoto, nimba namba watama ipu lea. 44 Pilipi bala Endutu, Pita-la, okonelapo towa Betesaita tano okona tane ateai. 45 Jisasato nimba namba watama ipu lea-kola, Pilipito Nataniale aiya pua andoto, bala lamawuato, loo yata yane buku okona wamba Mosesato pii mindi pepa peyoto, matili akali mindi epolopeya leaipia. Dee, Potopisa akali tupamane pii minditupa pepa peyoto, wuane teke leainipia. Andipa nanimato akali okone andalama. Bala Nasatesa tano okona tane Josepe iwanane Jisasa oko leaipia. 46 Wuane lea-kola, Natanialeto Pilipi tipa puato, Nasatesa tano okona tane akali mindi katulo gene yene atolo-peyape leaipia. Wuane lea-kola, Pilipito bala lamawuato, nimbato andolanga, bakale ipu leaipia. 47 Wuane lea-kola, Nataniale bala Jisasa ateanga poyale pea-kola, Jisasato bala epeanga andea. Andoto, balato Nataniale andayo, wandakali minakasawa owato pii na-lalane Isatale tane akali enene mindi epeya oko andalapa lea. 48 Wuane lea-kola, Natanialeto bala tipa puato, nimbato anu puato, nambana mana tupa andelenepe lea. Wuane lea-kola, Jisasato bala lamawuato, wamba Pilipito nimba ipu nalala-kola, nimba ita piki tene okona atale okone angi, nambato nimba andalo lea. 49 Wuane lea-kola, Natanialeto balana pii okone yano peyoto, tisa, nimba Gotena iwanane atoto, Isatale tanena kiŋi oko atele lea. 50 Wuane lea-kola, Jisasato bala lamawuato, nimba ita piki tene okona atale okone angi, nambato nimba andalo leyo-ko. Tene mindiki okonena angu nimbato namba lo bilipi lelepe. Matili nambato piape okone sia minuto, piape andane wete tupa puluwa-kola, nimbato andolopele lea. 51 Wuane lalu, Jisasato bala lamawuato, nambato pii enene wete mindi yakama langeyo lea. Matili yakamato andolai-kola, ati iyu oko yapu lapo pula-kola, Akalina Iwanane okonga enjole tupa iyu puu, nena ipu pua atolainga yakamato andolopeyai lea.

2

1 Jisasato Nataniale Pilipi-la, okonelapo ipulupa lenenga, ole lapo pea. Okone angi, Galili disitiki okona tano Kena tane akali mindimane wanda mindi kee lea-kola, Jisasana angini okomane andolo pea. 2 Wanda kee leane akali okonemane Jisasapi, balana disaipolo tupapi, utupane yakama andolo ipulupa lea-kola, utupanepi andolo peai. 3 Akali okonemane wanda kee lea-kola, andolo epeaini wandakali tupa pitaka-mane tomo no ateai. Tomo no ateai-angi, ipa waene oko koyo pea-kola, Jisasa angini okomane bala iwanane lamawuato, waene koyo piya lea. 4 Wuane lea-kola, Jisasato bala lamawuato, ama, nambato kenda-pene okone mo tika pulane gii oko na-epeyako. Nimbato namba languato, wua pii nalape-pene lea. 5 Wuane lea-kola, balana angini okomane piape akali tupa lamawuato, balato mangene mindi piyapa leando, balato lola pua piyapape lea. 6 Gotena wenonga kalato atene atolomane nembo toto, Juta yame wandakali tupamane ole kambuanga wasa-wasa peyoyale, jatamu andane minditupana ipa ambu pete loto, yata alainipia. Ipa jatamu andane ana-mane waa-pene wataka ongane mee yane utupanena mindiki-mindiki lo wandakali-mane katulo ipa pene andetepi mindi gae lo pete lape-pene. 7 Ipa jatamu andane utupane ongane yai-kola, matili Jisasato piape akali tupa lamawuato, yakamato ipa ambuto, jatamu utupa tumbi lalapa lea-kola, utupane-mane ipa ambuto, jatamu andane utupane tumbi wete laya yai. 8 Tumbi laya yai-kola, Jisasato utupane lamawuato, andipa ipa okonena minditupa ambuto, tomo tale pua mawua ando ateya akali oko malu pulupa lea-kola, utupane-mane ipa okonena minditupa ambu awua poto, bala maiyai. 9 Piape akali utupane-mane mee ipa enene ambuto, bala maiyama nembo teaini tekeko, utupane-mane ipa okone ani tawe mialaipe lo tomo tale pua mawua ando ateane akali okonemane nembo natea. Nembo natene atoto, balato ipa okone no makande pea-kola, waene gulea. Waene gulea-kola, balato wanda kee leane akali oko epeakale lea. 10 Akali okone epea-kola, tomo tale pua mawua ando ateane akali okomane bala lamawuato, wandakali pitaka-mane waene epene oko wamba ini tale pua maiyaini. Wandakali-mane waene epene okonena kambua wamba ini no koyo peyai-kola, matili waene koo yale tupa tale pua maiyaini tekeko, nimbato waene koo yale tupa wamba ini tale pua maiyu, waene epene oko epapu mo awua epele lea. 11 Jisasa bala Galili disitiki okona tano Kena okona atoto, metekolo piape bulupane okone puato, balana tai-lene andane oko mo pana ya-kola, balana disaipolo tupamane bala lo bilipi leai. 12 Bilipi leai-kola, Jisasapi, balana angini okopi, amene tupapi, balana disaipolo tupapi, utupane yakama Kapaneame tano okona puu nena lalu, ole minditupa okonena ateai. 13 Juta yame wandakali tupa Pasopa tomo nalaini oto oko epoyale pea-kola, Jisasa balana disaipolo tupa towa atu Jutusaleme peai. 14 Balato lotu anda andane okona ende anda-pangosa kolandaka loto andea-kola, wandakali-mane yia bulumakopi, sipisipipi, eka uyapi, utupane Gote lo opa maiyakale nembo toto, wandakali minditupa-mane okonetaka tupa makesa yo ateai. Akali minditupa-mane muni lawa pua peteaini teke. 15 Jisasato utupane andoto, eyaka minditupa mo tongo pua mina mindiki loto, kunju mindi gulo waa puato, yia bulumakopi, sipisipipi, minditaka makesa yo ateaini wandakali tupapi, utupane pitaka peyo wata kamaka lalu, muni lawa pua peteaini akali tupana muni yaini tupa minu gae loto, utupanena tepolo toko tupa kulembo lea. 16 Wuane piyu, balato wandakali eka uya makesa yo ateaini tupa lamawuato, yakamato namba Ayianena anda oko mo lawa puato, makesa anda mindi gulaya naene kondalapa. Eka uya utupa awua pulupa lea. 17 Balato wuane peanga andoto, balana disaipolo tupamane Gotena pii pepa pelene eya mindi nembo tolo-peke loto, nimbana anda oko kuai lo ateakale loto, nambato piape taimane pua atolowa-kola, akali minditupa-mane namba minu koyolo-peyai layene eya lo nembo teai. 18 Jisasato minditaka makesa yo peteaini wandakali tupa peyo wateanga andoto, Juta yamena akali kawane tupamane bala tipa puato, Goteto nimba languato, piape oko pipe lea-kola, nimbato wuane pua ateyo lo nanima andawa loyale, nimbato metekolo piape andoko pulape leai. 19 Wuane leai-kola, Jisasato pii kokoli mindi utupane lamawuato, yakamato lotu anda oko lai lo apolai-kola, ole tepo angu pola-kola, nambato anda oko pulu-peke lolo-peyawa lea. 20 Wuane lea-kola, Juta yamena akali kawane tupamane bala andayo lamba loto, nanimana yumbane tupamane lotu anda andane oko pua angu ateai-kola, mali paiyasa tukumindinga wataka peane tekeko, nimbato ole tepo angu tupana anda oko katulo pulu-peke lolo-peyawa lelepe leai. 21 Utupane-mane wuane leaini tekeko, Juta yame-mane bala peyo ome lolai-kola, ole tepo angu pola-kola, malinga ika lokale nembo toto, Jisasato pii kokoli mindi utupane lamawuato, yakamato lotu anda oko lai lo apolai-kola, ole tepo angu pola-kola, nambato anda oko pulu-peke lolo-peyawa lea. 22 Matili Goteto Jisasa malinga ika laya yane okone angi, balana disaipolo tupamane balana pii okone nembo tolo-peke loto, pii Jisasato wamba leane okonepi, Gotena pii pepa pelene eya tupapi, utupane bilipi leai. 23 Juta yame wandakali tupa Pasopa tomo nalaini oto oko epeane okone angi, Jisasa bala Jutusaleme atoto, metekolo piape minditupa pua atea-kola, wandakali kambua-mane andoto, bala lo bilipi leai. 24 Wuane tekeko, Jisasato wandakali tupa pitakana nembo-tene oko andalane. Tene okonena, wandakali mindimane bala lamawuato, wandakali utupa-mane nimbana metekolo piape tupa angu andoto, nimba lo bilipi leyai lo lamaulane tene mindi ata napeya. Jia. Bala tane-mane wandakali pitakana mana tupa andoto, wandakali utupane-mane bala lo bilipi leyama nayu naleai nembo toto, utupanenga tungi peyo ata napea.

3

1 Patasai yamena akali Neketomasa lene mindi bala Juta yamena akali kawane mindi ateaipia. 2 Utulu akali okone bala Jisasa peteanga epoto, tisa, Gote bala wandakali mindi towa ata napeando, wandakali okonemane metekolo piape nimbato pilini okonepene tupa katulo napulu-peya. Tene okonena, nanimato andeyama-kola, Goteto nimba tisa piape pulu puu leane ya lo nembo teyama leaipia. 3 Wuane lea-kola, Jisasato balana pii okone yano peyoto, nambato pii enene wete mindi nimba langeyo. Wandakali mindi bala mandulu-peke lene gulo ata napeando, Goteto bala moyo ando ateya lo balato katulo anda napulu-peya leaipia. 4 Wuane lea-kola, Neketomasato bala tipa puato, anu puato, wandakali mini-yene mindi bala katulo anginina ini anda-pangosa pitulu-peke lola-kola, angini-mane bala dee lapone mandulu-peke lolo-peyape leaipia. 5 Wuane lea-kola, Jisasato balana pii okone yano peyoto, wandakali-mane andopane mindi mandeya-kola, andopane okone bala wandakali atalane leaipia. Oli Sipitisa okomane wandakali mindi mandulu-peke leya-kola, wandakali okone bala Gotena yame ateya nembo toto, nambato pii enene wete mindi nimba langeyo. Goteto wandakali mindi ipa okola, Oli Sipitisa okola, okonelapo-mane mandulu-peke naleando, wandakali okone bala katulo Gotena yame ata napulu-peya. 7 Nambato nimba mandulu-peke lene gulo atape-pene leyo okonena, nimba moko nalape. 8 Popo lalane oko bala tane popo lo awua pokale nembo tolane pua popo lo awua mindisa puku piyane. Popo leya-kola, nimbato ale alene tekeko, ukusa ato lo awua epeyape, dee, popo lo awua poto, aninga koyo pulu-peyape lo nimbato nembo natelene. Wuane pua teke, Oli Sipitisa okomane wandakali mindi mandulu-peke lokale nembo toto, okone mandulu-peke leya-kola, wandakali okone mandulu-peke lene gulo atalane tekeko, Oli Sipitisa okomane anu puato wandakali mindi mandulu-peke leyape lo nimbato nembo natalene leaipia. 9 Wuane lea-kola, Neketomasato bala tipa puato, anu puato, mangene nimbato lele utupane katulo wuane pulu-peyape leaipia. 10 Wuane lea-kola, Jisasato balana pii okone yano peyoto, nimba Isatale tanena tisa atele-ko. Anu peakale nimbato pii okone katulo yano peya napelepe. 11 Nambato pii enene wete mindi nimba langeyo. Nanimato minditaka lee-mane andemane tupa wayumane nembo toto, yakama Patasai tupa langeyama tekeko, yakamato nanimana pii okone ale wato, enene pii leyai nembo taa na-piyaini. 12 Yuunga wandakali mindikipi mindi ati kenga pulu, yuunga peke nalea. Jia. Ati kenga atala yuunga epewane Akalina Iwanane nambato angu ati kenga mangene piyane tupa katulo yakama langiyawane. Wuane tekeko, yuu okona mangene piyaini tupa nambato yakama langiwa-kola, yakamato nambana pii okone ale wato, enene leya nembo natapiai-ko. Gote bala ati kenga atoto, mangene minditupa wua peya loto, nambato yakama langewando, nambato enene leya lo yakamato anu puato nembo tolopeyaipe. 14 Wamba Isatale tane wandakali tupa oma napeakale nembo toto, Mosesa bala utupane towa atu wandakali napalene yuu okona atoto, etelu gulene mindi batasa-mane waa peaipia. Waa piyu, balato ita mindi yokowa peyata wato, etulu okone ita okonena peyo yuka yaepia. Wuane pua teke, Akalina Iwanane oko lo bilipi lolai wandakali tupa pitaka saka atapowa ateakale nembo toto, Goteto Akalina Iwanane oko ita malamanda okona peyo yuka wato, minaiyu lape-pene leaipia. 16 Wamba Gotena iwanane okone ati kenga atea-kola, Goteto bala yuunga epeakale loto, wandakali tupa yapa lo tale peakale naleaipia. Jia. Balana iwanane okonemane wandakali tupa molo-peke leakale loto, Goteto bala yuunga epeakale leaipia-ko. Goteto wandakali tupa pitaka epelewa yamapane yo atoto, balana iwanane okone lo bilipi lolai wandakali tupa alu napene, pitaka saka atapowa ateakale nembo toto, balana iwanane mindiki oko angu epeakale leane. 18 Balana iwanane okone lo bilipi lene wandakali tupanga Goteto koo tene mindi yata na-alane tekeko, wandakali waka tupamane balana iwanane mindiki angu oko lo bilipi na-lalaini mambele, Goteto utupane yapa lo tale puato, koo tene tupa utupanenga yata alane. 19 Goteto balana pii enene oko wato minalaini wandakali tupa minu tai laya eya-kola, utupane-mane balana piape piyaini. Wandakali waka tupamane okone andeakale nembo toto, Gotena wandakali utupane tii-pene okona epoto, piape piyaini tekeko, wandakali waka minditupa-mane mana koo tupa minu ateyai-kola, tii-pene okonemane utupanena mana koo tupa mo pana alane. Mo pana olane nembo toto, wandakali utupane pitaka-mane tii-pene okone embo wete wato, tii-pene okonena na-epalaini. Jia. Gotena tii-pene okone ati kenga atala yuunga epea-kola, utupane-mane tii-pene okone epele naene, undupi-lene oko epele wete alaini nembo toto, Goteto utupane yapa lo tale puato, koo tene mindi utupanenga yata alane. 22 Matili Jisasapi, balana disaipolo tupapi, utupane Jutiya disitiki okona po atoto, wandakali tupa ipa peya-maiki pua ateai. 23 Okone angi, Etoteto Jone andi laa napenenga, Jonetopi wandakali tupa ipa mia-maiki pua ateaipia. Salima yuu mandaka gulo Ainone yuu okona ipa kambua epo palane nembo toto, bala yuu okonena atoto, wandakali ipuku peaini tupa ipa peya-maiki pua ateaipia. 25 Ipa peya-maiki pua atea-kola, Jonena disaipolo tupamane Juta yame akali mindi towa pii yanda puato, Gotena wenonga kalato ata napene atamakale nembo toto, wandakali-mane anu puato, wasa-wasa peyape-penepe leainipia. 26 Wuane lalu, utupane-mane Jone ateanga poto, bala lamawuato, tisa, wamba akali mindi nimba towa atu ipa Jotane amo yangi ateapi-angi, nimbato bala ati kenga atala yuunga epeane lee okoni. Andipa balato wandakali ipa peya-mawua ateya-kola, wandakali tupa pitaka nimba tepa alu, bala ateyanga peyai okonde leainipia. 27 Wuane leai-kola, Joneto utupanena pii okone yano peyoto, wamba namba Mesaya oko jia lewa. Wuane tekeko, Goteto namba languato, Mesaya oko bala epoyale peya loto, nimbato wandakali tupa wamba ini lamalu puu leane lewa okone yakamato ale yai okoni leaipia. Ati kenga ateya Gote okomane minditaka mindi wandakali mindinga mai napeando, wandakali okonemane minditaka okone katulo mia napulu-peya. Wuane pua teke, Goteto wandakali utupane Jisasa ateyanga peakale nalapia-yale, utupane-mane bala ateyainga napupiai-yale. Jia. 29 Akali mindimane wanda mindi kee leya-kola, wanda okone balana wetene gulo pitiyane. Akali okonemane wanda okone kee leyo nembo toto, pii leya-kola, akali okonena amene okomane balana pii okone ale wato, epele alane. Wuane pua teke, sosa oko Jisasana wetene gulo pitiyane. Bala lo bilipi lene wandakali tupa balana yame gulo peteyai nembo toto, balato pii leya-kola, nambato balana pii okone ale wato, epele wete eyo. 30 Akali okone bala lipinga wete atola-kola, namba balana pangosa atape-pene. 31 Yuu okona akali mindimane yuu okona mangene piyaini tupa nembo toto, pii lalane. Ati kenga atala yuunga epeane akali oko bala yuu okona wandakali tupa pitaka sia minuto, utupanena lipinga wete ateya. 32 Wamba bala ati kenga atoto, minditaka andeane tupapi, pii ale yane tupapi, utupane wandakali tupa lamaiyane tekeko, wandakali-mane balana pii okone ale wato, bilipi na-lalaini. 33 Ayiane Gote okomane balana iwanane oko towa epelewa yamapane yo atoto, wandakalipi, waka minditaka eya tupapi, utupane pitaka balana kininga yata yaepia. Dee, Goteto balana Oli Sipitisa oko yapu loto, yangisa angu wandakali mindi mai napeaipia. Goteto Oli Sipitisa oko Jisasanga tumbi laya wato, yuunga puu lea-kola, Jisasato Gotena pii oko wandakali tupa lamaiki piyane. Wandakali-mane balana pii okone ale wato, bilipi lalaini mana okomane Goteto enene pii lalane lo andawa lalaini. 36 Gotena Iwanane oko lo bilipi lene wandakali tupa saka atapowa atolopeyai tekeko, balana pii oko wato mina na-piyaini wandakali tupa saka atapowa ata napulu-peyai. Jia. Gotena yataka ene oko wandakali utupanenga yapowa yolopeya. Ipa peya-maiyane akali Joneto wuane leaipia.

4

1 Jisasa bala tane-mane wandakali tupa ipa peya-mai napeaipia. Jia. Balana disaipolo tupamane wandakali tupa ipa peya-mawua ateaini tekeko, wandakali-mane loto, Jisasato Jone sia minuto, wandakali kambua ipa peya-mawua ateya-kola, utupane balana disaipolo tupa ateyai leainipia. Wandakali-mane wuane leaini okone Patasai tupamane ale apiai nembo toto, Jisasa bala Jutiya disitiki oko tepa alu, Galili disitiki okona peke loyale pea. 4 Galili disitiki okona peke loyale asini oko Samatiya disitiki okona tombenenga yene. 5 Jisasa bala asini okone watama poto, Samatiya disitiki tano Saika lene okona peakaiyu lea. Tano okone bala yuu mindi wamba Jekopoto balana iwanane Josepe mayane okona mandaka gulo ya. 6 Wamba Jekopoto yuu okonena atoto, ipa ambuyale, ipa yuli mindi tombo yaepia. Tualo kilokopi mindi lea-kola, Jisasa bala asini epeane okomane balana umbaini oko tai nalea-kola, ipa yuli tomba-yene petene ongane mandaka petea. 7 Balana disaipolo tupa tomo kamboyale tanonga peai-kola, Samatiya disitiki okona tane wanda mindi ipa ambulu epeaipia. Epea-kola, Jisasato bala lamawuato, ipa nokale. Ambu gii leaipia. 9 Jisasato wuane leane tekeko, Juta yame wandakali tupamane Samatiya yame wandakali tupa towa atu mangene mindikipi mindi na-piyainipia. Tene okonena, Samatiya yame wanda okonemane Jisasana pii okone yano peyoto, anu peakale Juta yame akali nimbato Samatiya yame wanda namba andoto teke, ipa nokale, ambu gii lelepe leaipia. 10 Wuane lea-kola, Jisasato balana pii okone yano peyoto, Goteto minditaka epene mindi mee giyane oko nimbato andapi-yale, ipa nokale ambu gii leyo akali oko api ateyape lo nimbato nembo tapi-yale. Okone nembo toto, nimbato wandakali saka atapowa ateakale lo ataya alane ipa oko gii lo tee lapi-yale, nambato okone nimba giwa-yale leaipia. 11 Wuane lea-kola, wanda okonemane bala lamawuato, Akali Andane, ipa yuli oko nenanga wete tomba-yene eya leaipia. Yuli okonena ipa ambuyale pene mindi nimbato ai napele-ko. Wandakali saka atapowa ateakale lo ataya alane ipa okone aninga ambulape. 12 Wamba nanimana yumbane Jekopoto ipa kundu oko tomboto, bala tane ipa ambu naka puato, balana bulumako tupapi, sipisipi tupapi, iwanane tupapi, utupane-mane ipa oko neakale lo ambu maiki peaipia. Balato ipa kundu oko nanima geane-ko. Nimbato bala sia minuto, wandakali saka atapowa ateakale lo ataya alane ipa okone katulo namba gulape leaipia. 13 Wuane lea-kola, Jisasato balana pii okone yano peyoto, ipa kundu okona nolai wandakali tupa pitaka lapone ipa nono olopeyai leaipia. 14 Wuane tekeko, nambato ipa mindi wandakali maluwa tupanga ipa lai yungalane pua epoto, wandakali utupane saka atapowa ateakale lo ataya olopeya leaipia. Utupane-mane ipa okone nalu, matili-matilipi dee lapone ipa nono na-olopeyai. Jia. 15 Wuane lea-kola, wanda okonemane bala lamawuato, Akali Andane, namba dee lapone ipa nono wato, ipa ambulu-peke na-lokalenga, nimbato ipa okone namba gii leaipia. 16 Wuane lea-kola, Jisasato bala lamawuato, nimbana akalini oko epeakalenga, nimbato bala lamaulu pulu, bala towa atu onga peke lalapape leaipia. 17 Wuane lea-kola, wanda okonemane bala lamawuato, nambana akalini mindi ata napene leaipia. Wuane lea-kola, Jisasato bala lamawuato, nimbato enene pii lele leaipia. Wamba nimba akali yau tupana puku piyu, utupane pitaka tepa aka piki pee okoni. Andipa akali nimba towa atu peteyapi okone nimbana akalini jia-ko. Nimbana akalini mindi ata napeya lele okone enene pii lele leaipia. 19 Wuane lea-kola, wanda okonemane bala lamawuato, Akali Andane, nambato nimba potopisa akali mindi atele lo andeyo leaipia. 20 Samatiya yame wandakali nanimana yumbane tupamane yuu wangiane okona epo amunguli puato, Gote lo lotu laka peaini tekeko, Juta yame wandakali yakamato loto, wandakali pitaka-mane Jutusaleme okona angu amunguli puato, Gote lo lotu lape-pene lalaini leaipia. 21 Wuane lea-kola, Jisasato bala lamawuato, nambato pii nimba langeyo oko enene leya lo wanda nimbato nembo tape leaipia. Matili Samatiya yame wandakali yakamato yuu wangiane okonapi, Jutusaleme tano okonapi, yuu okone-lapona angu atoto, Ayiane Gote oko lo lotu nalolo-peyai. Jia. Yakamato yuu waka tupanapi atoto, bala lo lotu lolopeyai. 22 Juta yame nanimana akali mindimane wandakali tupa molo-peke lolopeya. Tene okonena, nanimato Gotena pii pepa pelene eya tupa pitaka dii lo andoto, mangene Goteto wamba peane tupapi, matili pulupeya tupapi, utupane nembo toto, bala lo lotu lalamane. Samatiya yame wandakali yakamato okonetaka tupa nembo natene, bala lo lotu lalaini. 23 Wuane tekeko, Gote bala sipitisa mindi ateya okonena, balana Oli Sipitisa okomane wandakali minu tai laya ola-kola, utupane-mane Gotena pii enene oko wato minuto, bala lo lotu lape-pene. Wandakali okonepene tupamane bala lo lotu lapiai lakae lo Ayiane Gote okomane nembo talane. Tene okonena, oto mindi epola-angi, Oli Sipitisa okomane lotu enene lalaini wandakali tupa minu tai laya ola-kola, utupane-mane Gotena pii enene oko wato minuto, bala lo lotu lolopeyai. Oto okone andipa epo eya leaipia. 25 Wuane lea-kola, wanda okonemane bala lamawuato, nambato Mesaya, balana gene okone Gitiki pii mopeke loto, Kataisa lalaini oko epolopeya nembo teyo. Bala epola-angi, balato pitaka taka nanima langulu-peya leaipia. 26 Wuane lea-kola, Jisasato bala lamawuato, nimba towa pii leyapa akali namba Mesaya okone ateyo leaipia. 27 Wuane lea-kola, balana disaipolo tupa epoto, bala wanda okone towa pii lo peteapele yanga andoto, moko wete loto, nembo kambua teai. Minditupa-mane anu peakale balato wanda oko towa pii lo pitiyape nembo teai. Minditupa-mane aki mindi mokale nembo toto, bala wanda oko towa pii lo pitiyape nembo teaini tekeko, disaipolo utupanena mindikipi mindimane bala tipa puato, anu peakale nimbato Samatiya wanda oko towa pii lelepe lopi, nimbato aki mokale nembo toto, bala towa pii lelepe lopi, naleai. Jia. 28 Jisasato namba Mesaya oko ateyo leane okonena, wanda okonemane balana ipa pene oko ongane yakale lalu, tano okona peke loto, wandakali tupa lamai-yaepia. 29 Balato utupane lamawuato, akali mindimane mangene nambato wamba pewane tupa pitaka langi yiake lala leaipia. Bala Mesaya oko ateyape. Yakamato bala andolo ipulupa leaipia. 30 Wuane lea-kola, wandakali utupane tano okone tepa alu, Jisasa ateanga epoyale epeainipia. 31 Wandakali utupane Jisasa ateanga epo ata nayai-kola, balana disaipolo tupamane bala lamawuato, tisa, nimba tomo naa-kae laka peai. 32 Wuane laka peai-kola, Jisasato utupane lamawuato, namba tomo nolane eya tupa yakamato anda napeyai lea. 33 Wuane lea-kola, balana disaipolo tupamane yakama teke-teke pii mindi tipa piki puato, wandakali mindimane tomo mindi awua epoto, bala maiyape leai. 34 Wuane leai-kola, Jisasato utupane lamawuato, nambato piape mindi pula nembo toto, Goteto namba puu leane lea. Balato nembo teya pua, nambato piape okone pikoyo pipe-pene okone nambana tomo nolane oko guleya. 35 Wandakali-mane pii kokoli mindi loto, akali mindimane eenga tomo waini yandeya-kola, akali waka mindimane tomo mandiyane lalaini. Wuane pua teke, wamba wandakali waka minditupa-mane eenga tomo waini tupa yandeai-kola, nambato yakama ee okonena tomo mandulu pululpa lewa. Wuane lewa-kola, yakamato ee okonena poto, tomo yakamato yanda napeai tupa mandeai okonemane pii kokoli layene okone enene gulea. Tomo waini yandalane wandakali okola, tomo mandiyane wandakali okola, okonelapo lapotaka epele yakale nembo toto, andipa tomo mandiyane akali okomane wandakali saka atapowa ateakale lo ataya olane tomo oko manduto, yole meya. Yakamato pii waka mindi lalaini oko loto, wandakali mindimane ee mindi yandola-angi, ana tukumindi pola-kola, tomo tupa mandipe-pene yolopeya lalaini tekeko, ee tupana tomo mandipe-pene eya oko andalapa lo nambato yakama langeyo lea. 39 Balato wuane lea-angi, utupane-mane andeai-kola, Samatiya disitiki okona tane wandakali kambua bala atea okona epeainga andeai. Wamba Samatiya yame wanda oko bala Saika tano okona poto, akali mindimane mangene nambato wamba pewane tupa pitaka langi yiake lea-kola, Samatiya yame wandakali kambua utupane-mane Jisasa lo bilipi leai. Bilipi loto, bala ateanga epoto, bala yakama towa atu atamakale lo tee leai-kola, bala ole lapo yuu okonena atea. 41 Yuu okonena atoto, balato pii minditupa utupane lamaiya-kola, Samatiya yame wandakali waka kambua minditupa-mane balana pii utupane ale wato, bala lo bilipi leai. 42 Bilipi loto, utupane-mane wanda oko lamawuato, wamba nanimato nimbana pii oko ale wato, bala lo bilipi lalama tekeko, andipa nanima tane balana pii oko ale wato, enene bala yuu okona wandakali tupa molo-peke lolane akali oko ateya lo andeyama leai. 43 Wamba Jisasa bala tane pii mindi loto, potopisa akali mindi balana yuu tene okona ateando, balana yuu tene okona atalaini wandakali tupamane balana gene oko laiyu na-lalaini leaipia. Pii okone nembo toto, Jisasa bala Galili disitiki okona pea. 45 Wamba Juta yame wandakali tupamane Pasopa tomo neaini okone angi, Jisasa bala Jutusaleme atoto, metekolo piape minditupa pea. Okone angi, Galili disitiki tane wandakali minditupa-mane Pasopa tomo okone nolo poto, metekolo piape utupane pitaka andeai. Tene okonena, Jisasa bala Galili disitiki okona peakaiyu lea-angi, Galili tane wandakali utupane-mane bala wayu epeleya lo lameai. 46 Lameai-kola, bala Galili disitiki tano Kena okona lapone pea. Wamba bala tano okonena atoto, ipa enene oko mo waene gulaya yane. Jisasa bala Kena tano okonena lapone peane okone angi, gapomane akali kawane mindina iwanane oko Kapaneame tano okona siki oma-yene ya. 47 Balana iwanane okone omoyale pea wete, akali okonemane ale ya-kola, Jisasa bala Jutiya disitiki oko tepa alu, Galili disitiki okona epeya lene oko ale yaepia. Ale wato, bala Jisasa ateanga poto, nambana iwanane oko mo atu yolanga, nimba Kapaneame tano okona puu nena lamape lo tee lea. 48 Wuane lea-kola, Jisasato bala lamawuato, wandakali yakamato nambana metekolo piapepi, kokoli piapepi, utupane anda napeaindo, yakamato namba lo bilipi nalolo-peyai lea. 49 Wuane lea-kola, gapomane akali okonemane bala lamawuato, Akali Andane, nambana iwanane oko omolane. Nimba wamba ini puu nena laa lea. 50 Wuane lea-kola, Jisasato bala lamawuato, nimbana iwanane okone saka pitulu-peyako. Nimba puu lea. Wuane lea-kola, Jisasato pii enene leya lo bilipi loto, akali okone bala andaka peke lea. 51 Bala peke loto, Kapaneame tano okona peakaiyu lata naeya-kola, balana piape akali tupamane bala asininga malanda wato, nimbana iwanane oko atu yoto, saka peteya leainipia. 52 Wuane leai-kola, balato utupane tipa puato, taeme aki-tupi lapia-kola, bala atu yoto, saka pupiape leaipia. Wuane lea-kola, utupane-mane bala lamawuato, tuni otonga taeme wane kiloko lapia-kola, balana umbaininga toto pipiane oko atu yapia leainipia. 53 Wuane leai-kola, ayiane okonemane nembo tolo-peke loto, tuni otonga taeme mindiki okonena teke lapia-kola, Jisasato nimbana iwanane oko saka pitulu-peya lapia nembo teaipia. Wuane nembo toto, akali okonepi, balana andaka atalaini yamepi, utupane pitaka-mane Jisasa lo bilipi leainipia. 54 Jisasa bala Jutiya disitiki oko tepa alu, Galili disitiki okona epo atoto, metekolo piape lapone okone pea.

5

1 Matili Juta yame wandakali tupamane lotu andane mindi lalaini oto oko epoyale pea-kola, Jisasa balana disaipolo tupa towa atu Jutusaleme peai. 2 Jutusaleme tano okona ende ana-mane pitane atene mindina asia lomba andane oko Sipisipi Asia Lomba lalaini. Asia lomba andane okonena mandaka ipa angini aŋako mindi pitiyane. Iputu pii loto, ipa angini okonena gene oko Betesata lalaini. Ipa angini okonena matenenga anda aiyakame yau pitane atalane. 3 Anda aiyakame yau utupane ongane ateyai-kola, wandakali lee koopi, kee koopi, papaka tambupi, siki pelene wandakali kambua tupa anda utupanena yalaini. 4 [Eyai-kola, ole minditupana Akali Andane okona enjole mindi ipuku puato, ipa angini okone mo ema piya yaka piyaepia. Wuane piki pea-angi, wandakali siki pelene utupanena mindi bala wamba ini ingane ipa angini okonena poto peteya-kola, wandakali okonena siki tupa atu yaka piyaepia. Tene okonena, wandakali siki pelene tupa anda aiyakame yau utupanena pituto, enjole okonemane ipa angini okone mo ema piya yakale lo maliyo pitiyaini-pia.] 5 Akali maliyo ateaini utupanena mindi bala mali paiyasa teponga dee kitupasa siki angu omo yaepia. 6 Jisasato andea-kola, akali okone bala wamba wete siki omo yene yane ya lo andoto, bala tipa puato, nimbana siki oko atu yapia lakae lo nembo telepe lea. 7 Wuane lea-kola, akali siki oma yene yane okomane balana pii okone yano peyoto, Akali Andane, ipa oko mo ema piki piyane tekeko, namba mo awua ipa okona polane akali mindi ata napeya. Tene okonena, namba tane ipa okona poyale tengamane peyo-kola, wandakali waka tupamane namba wata peke lalu, yakama wamba ini ingane ipa angini okona palaini lea. 8 Wuane lea-kola, Jisasato bala lamawuato, nimba ika lalu, nimbana pangilini toko oko mo awua puu lea. 9 Wuane lea-kola, wamba ini kapoyale okone angi teke, akali okonena siki oko atu ya-kola, bala paliyane toko okone mo awua pea. Sambasa mindina balato wuane pea. 10 Wuane pea-kola, Juta yame akali minditupa-mane akali wamba siki yane okone lamawuato, andipa Sambasa angi, nimba pangilini toko oko mo awua napupe-pene leainipia. 11 Wuane leai-kola, akali okonemane utupanena pii okone yano peyoto, nambana siki mo atu yala akali okomane namba languato, nimba pangilini toko oko mo awua puu lala-kola, awua peyo leaipia. 12 Wuane lea-kola, utupane-mane bala tipa puato, akali andoko-mane nimba languato, nimbana pangilini toko oko mo awua puu lalape leainipia. 13 Utupane-mane wuane leaini tekeko, wandakali kambua epo amunguli peai-kola, Jisasa bala tengamane too pua pea. Bala too pua pea-kola, akali wamba siki oma yene yane okonemane balana siki oko mo atu yapiane akali oko nembo nateaipia. 14 Matili akali okone bala lotu anda andane okona ende anda-pangosa atea-kola, Jisasato bala aiya pua andoto, nimbana siki oko atu yapia lo andele leaipia. Nimbato mana koo tupa minu ateendo, nimbanga kenda-pene andane wete mindi epolane. Nimbato mana koo tupa dee lapone mina napene kondape lea. 15 Wuane lea-kola, akali okone bala Juta yame akali tupa ateainga poto, utupane lamawuato, nambana siki mo atu yapiane akali okone bala Jisasa leaipia. 16 Wuane lea-kola, Sambasa angi Jisasato akali okone mo atu yane nembo toto, Juta yame akali utupane-mane kenda-pene andane minditupa bala maiki peainipia. 17 Wuane piki pua ateai-kola, Jisasato utupane lamawuato, namba Ayiane okomane ole dindi lo piape piyane okonena, nambatopi ole dindi lo piape piyawane leaipia. 18 Wuane lea-kola, Juta yame akali utupane-mane ale wato, Jisasato Gote balana Ayiane wetete ateya leya okonemane bala tane Gote ateya okonepene teke ateyo leya nembo teainipia. Dee, Sambasa angi Jisasato akali okone mo atu yane okomane Sambasa okona loo oko kalo peya lo andeaini tekepia. Tene okone-lapona, Juta yame wandakali tupamane Jisasa peyo ome laima lakae lo nembo teainipia. 19 Juta yame akali tupamane Jisasa peyo ome laima lakae lo nembo teai-kola, Jisasato utupane lamawuato, Gote Iwanane okona gene oko laiyu na-lalaini wandakali tupamane bala epeakale leane Ayiane okona gene oko laiyu naleya-kola teke, piyane leaipia. Ayiane Gote okomane wandakali mindi yapa lo tale napiyane. Jia. Wandakali-mane Ayiane okona gene oko laiyu lalaini pua teke, utupane pitaka-mane balana Iwanane okona gene oko laiyu leakale nembo toto, Ayiane Goteto wandakali yapa lo tale pulane piape okone pitaka bala iwanane okonga mayane. Maya-kola, Ayiane okomane wandakali omene tupa malinga ika laya wato, saka atapowa ateakale lo ataya alane pua teke, balana Iwanane okomane wandakali minditupa saka atapowa ateakale lo ataya wakale nayuto, utupane saka atapowa ateakale lo ataya alane. Ayiane okomane balana Iwanane oko epelewa yamapane yo atoto, balato piape piyane tupa pitaka balanga andawa lalane. Yakamato moko loto, nembo kambua talapale nayuto, Goteto balana piape utupane pitaka sia minene piape andane wete tupa balana iwanane okonga andawa lolopeya. Andawa leya-kola, Ayiane okomane piape piyane utupane balana iwanane okomane piyane teke. Nambato pii enene wete mindi yakama langeyo. Iwanane okomane bala tanena nembo-tene oko wato minuto, mangene mindi katulo napiyane. Jia. Balana Ayiane okomane mangene piyane tupa iwanane okomane andoto, wuane teke piyane. 24 Nambato pii enene wete mindi yakama langeyo. Wandakali mindimane nambana pii oko ale wato, namba ati kenga atala yuunga puu leane Ayiane Gote oko lo bilipi leaindo, Goteto wandakali okone yapa lo tale napulu-peya. Jia. Wandakali okone bala omene gulalane mana oko tepa alu, saka atene tene mialu, matilipi saka atapowa atolopeya. 25 Nambato pii enene wete mindi yakama langeyo. Ayiane Gote okomane balana iwanane oko Akalina Iwanane ateya nembo toto, wandakali yapa lo tale pulane tai-lene oko balanga mayaepia. Dee, wandakali saka atapowa ateakale lo ataya alane tai-lene oko Ayiane Gote bala tanenga yalane pua teke, Ayiane okomane wandakali saka atapowa ateakale lo ataya alane tai-lene oko balana iwananenga mayaepia. Tene okonena, namba lo bilipi nalene wandakali omene gulo atalaini tupamane Gote Iwanane okona pii oko ale olane oto oko andipa epo eya. Pii okone bilipi lolai wandakali tupa, saka atapowa atolopeyai leyo. 28 Nambato wuane leyo okonena, yakamato moko loto, nembo kambua na-talapape. Jia. Matili oto mindi epola-angi, Gote Iwanane okomane wandakali omene malinga paleyai tupa lamawuato, ika lalapa lola-kola, utupane pitaka-mane balana pii okone ale olopeyai. 29 Ale wato, utupane yakamana mali tupa tepa alu, ika loto, takita epolopeyai. Mana epene tupa minu atalu, omolaini wandakali tupa ika loto, saka atapowa atolopeyai. Koo pua atalu, omolaini wandakali tupa malinga ika lolai-kola, nambato utupane yapa lo tale puato, koyakale lolo-peyawa. 30 Namba tane-mane nembo teyo pua pukale nembo natalawane. Jia. Namba ati kenga atala yuunga puu leane Ayiane okomane piape pula nembo teya pua nambato pukale nembo talawane. Wuaneko, namba tane wua pukale nembo toto, mangene mindi na-piyawane. Jia. Nambana Ayiane okomane wandakali tupa yapa lo tale pipe leya pua, nambato wandakali tupa tika pua yapa lo tale piyawane. 31 Namba tane Gote Iwanane ateyo lewando, wandakali-mane nambana pii angu ale wato, nambato enene pii leyape, owato pii leyape lo tatake olopeyai. 32 Wuane tekeko, wamba yakamato akali minditupa ipa peya-maiyane akali Jone oko bala ateanga peakale leai-kola, Jone bala lamu kaiyapiane mindi gulo atoto, yakamana nembo-tene tupa tii piya yaepia. Balato enene pii oko loto, namba andayo, bala Gote Iwanane ateya lo yakama langea-kola, ole ukupini mindilapo angu yakamato balana pii oko ale wato, epelewa ateainipia. Yuunga akali mindimane namba Gote Iwanane ateya leandopi, naleandopi, okone angini mindi jia tekeko, Goteto yakama molo-peke lapia lakae lo nembo toto, nambato pii utupane leyo. Ayiane Gote okomane namba balana Iwanane atele leya-kola, nambato balana pii okone enene ya lo nembo teyo. 36 Joneto namba Gote Iwanane ateya leane tekeko, Ayiane Goteto piape minditupa namba guato, utupane pikoyo pipe leane. Wuane lea-kola, nambato piape utupane pua ateyo okonemane Jonena pii sia minuto, Goteto namba languato, piape utupane pulu puu leane lo andawa leya. 37 Alu mindikipi mindi yakamato Gote lee-mane anda napene ato, balana pii oko ale-mane ale nayai. Jia. Namba piape pulu puu leane Ayiane Goteto namba balana Iwanane ateya leane tekeko, yakamato namba balana Iwanane ateya lo bilipi naleai-kola, Gotena pii oko yakamanga yaa napeya. 39 Gotena pii pepa pelene eya okomane wandakali saka atapowa atolane asini oko yakamanga andawa lolopeya nembo toto, yakamato Gotena pii utupane dii lo andoto, aki leyape lo andalaini. Gotena pii utupane-mane namba Gote Iwanane ateya lo langiyaini. 40 Wuane tekeko, yakamato nambanga saka atapowa atene yalane oko molo ipumakale nembo natalaini. 41 Wandakali-mane nambana gene oko laiyu leakale loto, namba na-epewane. Jia. 42 Ayiane Goteto namba languato, nambana pii oko wandakali tupa lamaulu puu lea-kola, nambato balana pii yakama langulu epewane. Nambato balana pii tupa yakama langiyawane tekeko, yakamato pii okone enene ya lo bilipi na-lalaini. Wuaneko, nambato yakamana mana okone andoto, yakamato Gote epelewa yamapane yo ata na-piyaini ya lo andeyo. Wandakali waka mindi bala tanena pii oko yakama langulu epeando, yakamato balana pii lola tupa ale wato, balana pii okone enene ya lo bilipi nalolo-peyai. 44 Wandakali yangone tupamane yakamana gene tupa laiyu lapiai lakae lo yakamato nembo talaini tekeko, Gote mindiki angu okomane yakamana gene tupa laiyu leakale lo yakamato nembo natalaini-ko. Anu puato, yakamato katulo namba Gote Iwanane ateya lo bilipi lolo-peyaipe. 45 Yakamato namba Gote Iwanane ateya lo bilipi nalolai okonena, nambato Ayiane Gote okona wenonga atoto, yakama kosimi lolopeya nembo na-talapape. Jia. Mosesato yakama moyolo-peya lo yakamato nembo teyai tekeko, Gotena wenonga atoto, Mosesato yakama kosimi loyale ateya. 46 Wamba balato nambana piapepi, manapi, utupane yakama languato, Gotena pii layene tupa pepa peleane tekeko, yakamato balana pii utupane bilipi naleyai-kola, balato yakama kosimi loyale ateya. Yakamato Gotena pii layene balato pepa peleane utupane bilipi leai-yale, yakamato namba lo bilipi lapiai-yale. 47 Wuane tekeko, Mosesato pii pepa peleane utupane yakamato bilipi naleyai-ko. Anu puato, yakamato nambana pii tupa bilipi lolo-peyaipe. Jisasato wuane lea.

6

1 Wamba Jisasato metekolo piape tupa piki puato, wandakali siki pelene tupa mo atu yaka pua atea-kola, wandakali wete kambua-mane andeai. Andalu, matili Jisasa bala Galili ipa angini gene mindi Taipi-tiasa lene okona amo yangi pea-angi, wandakali kambua wetete bala watama epeai. 3 Watama epeai-kola, balana disaipolo tupa towa atu bala yuu wangiane mindina puu iyu lalu, peteai. 4 Okone angi, Juta yame-mane Pasopa tomo nalaini oto oko mandaka gulea. 5 Jisasa bala wangiane okonena pituto, wandakali kambua wetete bala peteanga epeyai oko andea. Andoto, balato Pilipi tipa puato, wandakali utupane tomo neakale nanimato betesa aninga kambamape lea. 6 Jisasato metekolo piape mindi puato, wandakali utupane tomo neakale mauwakale nembo toto teke, mee Pilipito bala lo bilipi leyape lo andoyale, bala minu makande puato, pii okone lea. 7 Pii okone lea-kola, Pilipito balana pii okone yano peyoto, nanimato (200) tu andete kina-mane betesa kambemando, wandakali utupa mindiki-mindiki lo tomo aŋako wetete nolai-kola, katu nalolo-peya lea. 8 Wuane lea-kola, Jisasana disaipolo Saimone Pita amene Endutu balato Jisasa lamawuato, wua leaipia: 9 Iwana oo ateya okonga pisa lapo, bali-mane waa-pene betesa yau, utupane mandiya ya tekeko, tomo aŋako wete utupane-mane wandakali kambua wetete utupa wayumane moya napulu-peya lea. 10 Yuu wangiane ongane tani kambua atea-kola, Jisasato balana disaipolo tupa lamawuato, yakamato wandakali tupa peteakale lalapa lea. Pitiyapa leai-kola, wandakali tupamane taninga peteai. Akali tupa angu dii loto, (5,000) tausene yaupi mindi peteai. 11 Peteai-kola, Jisasato betesa utupane moto, Gote ando wayu pele loto, wandakali peteaini utupane neakale lo tale pua maya. Wuane pua teke, balato pisa okolapo moto, wandakali peteaini utupane neakale lo tale pua maiya-kola, wandakali utupane mindiki-mindiki lo betesa okola, pisa okola, okonelapo lapotaka yakama tane okotuma nokale nembo teaini pua moto, neai. 12 Wandakali utupane pitaka-mane no embo yai-kola, Jisasato balana disaipolo tupa lamawuato, tomo akanane tupa mee yoto, tamulane. Yakamato utupane mo yomo alapa lea. 13 Wuane lea-kola, wandakali utupane-mane tomo no embo yai-kola, Jisasana disaipolo tupamane bali dini-mane waa-pene betesa yau tupana akenane yane tupa mo amunguli puato, basaketa nuu alesa tumbi laya yai. 14 Jisasato metekolo piape okone pea-kola, wandakali tupamane andoto, enene wete, akali oko bala potopesa akali ati kenga atala Goteto yuunga epeakale lokale leane oko ya leai. 15 Wuane lalu, bala utupanena kiŋi ateakale nembo toto, utupane-mane bala minuyale epeaini tekeko, Jisasato okone andoto, utupane awua tepa alu, bala angu yuu wangiane okonena peke lea. 16 Ole lene nai andaka pea-kola, Jisasana disaipolo tupa ipa angini matene okona puu nena leai. 17 Puu nena lalu, sipi mindina peakaiyu lo pitiyu, utupane yakama ipa angini okonena amo yangi Kapaneame tano okona poyale peai. Peai-kola, yuu wamba undupi leane tekeko, Jisasa bala yakama ateainga wamba kapoyale na-epea. 18 Undupi lea-angi, popo andane mindi lo awua epeane mindimane ipa oko taimane mina ika laya ya. 19 Jisasana disaipolo tupamane sipi okonena pitiyu, pulu lama-lama poto, kilomita yaupi, watakapi, mindi gulo peai wete, Jisasa bala ipa okona tokonga kee atama epoto, sipi okonena mandaka gulo epea. Balana disaipolo tupamane bala andoto, yama mindi ipa okona tokonga kee atama epeya nembo toto, yuku-mane omeai. 20 Yuku-mane omeai-kola, Jisasato utupane lamawuato, akali mindi ipa okona tokonga kee atama epeyanga yakamato andeyai oko namba Jisasa epeyo-ko. Yakama yuku naene kondalape lea. 21 Wuane lea-kola, utupane-mane bala sipi okona ipupia lakae lo nembo teaini tekeko, okone angi teke utupane yakama sipinga pitiyu poyale peaini yuu okonena peakaiyu leai. 22 Wamba Akali Andane Jisasato ipa angini Galili okona amo yangi atoto, Gote ando wayu pele lalu, wandakali tupa betesa neakale maiya-kola, wandakali tupamane betesa utupane neai. Nalu, wandakali utupane yakama ipa angini matene okona atoto andeai-kola, Jisasa bala sipi mindiki yane okona peakaiyu nalea-kola, balana disaipolo tupa yakama angu sipi okonena pitiyu, peai. Sipi waka mindi ongane nayanga andeaini tekeko, anate-lene wandakali utupane-mane andeai-kola, Jisasapi, balana disaipolo tupapi, utupane yuu okonena ata napeainipia. Okone angi, sipi minditupa Taipi-tiasa tano oko tepa alu epoto, yuu ongane mandaka peakaiyu leai-kola, wandakali utupane sipi utupanena peakaiyu lo pitiyu, Jisasa aiya pima poto, Kapaneame tano okona peakaiyu leainipia. 25 Wandakali utupane yakama sipi utupanena pitiyu, ipa angini okonena amo yangi poto, Jisasa aiya pua andoto, tisa, andoko angi nimba wali ipupipe lo bala tipa peai. 26 Wuane leai-kola, Jisasato utupane lamawuato, nambato pii enene wete mindi yakama langeyo lea. Yakamato namba aiya pima epeyai tekeko, namba Mesaya oko ateyo lo yakama andawa loyale, nambato metekolo piape andane minditupa piwa tupa nembo toto, yakamato namba aiya pima naepeyei. Jia. Nambato betesa kambua yakama mee giwa-kola, yakamato no embo apiai pua, dee lapone namakale nembo toto, yakamato namba aiya pima epeyai. 27 Yuu okona tomo tupa tamuto, koyalane-ko. Yakamato tomo okonepene tupa mia-makale nembo toto, piape pua ata na-piyapa. Jia. Akalina Iwanane okomane piape peakale loto, Ayiane Goteto bala ata lata yako. Akalina Iwanane okonemane yakama saka atapowa ataya olane tomo oko yakama geakale nembo toto, yakamato piape pua atalapa lea. 28 Wuane lea-kola, utupane-mane bala tipa puato, nanimato Gotena piape tupa pua atamakale nembo toto, piape anu-pene tupa pua atamakalepe leai. 29 Wuane leai-kola, balato utupanena pii okone yano peyoto, yakamato akali Goteto epeakale leane oko bilipi lo ateaindo, yakamato Gotena piape pua atolai-kola pulupeya lea. 30 Wuane lea-kola, utupane-mane bala lamawuato, Gotena pii pepa pelene eya mindimane loto, balato ati kenga tawe betesa oko wandakali tupa neakale maiyane layene eya leai. Gotena pii layene eya okonemane leya pua teke, nanimana yumbane tupa wandakali napalene yuu okona ateai okone angi, Mosesato utupane betesa mana lene oko neakale maiki pea-kola, utupane-mane betesa okone naka peainipia-ko. Goteto nimba ati kenga atala yuunga puu leane lo nanimato andalapale nembo toto, nimbato metekolo piape anu-pene mindi pulape leai. 32 Wuane leai-kola, Jisasato utupane lamawuato, nambato pii enene wete mindi yakama langeyo lea. Mosesato ati kenga tawe betesa okone yakamana yumbane tupanga mai napeaipia. Jia. Nambana Ayiane okomane betesa ati kenga tawe okone yakamana yumbane tupanga mayaepia. Wuane pua teke, balato betesa ati kenga tawe enene oko yakama geya. 33 Ati kenga atalu, yuunga epeane betesa okonemane yuu okona wandakali tupa saka atapowa ateakale lo ataya alane lea. 34 Wuane lea-kola, utupane-mane bala lamawuato, Akali Andane, nimbato betesa okone ole dindi lo nanima gula leai. 35 Wuane leai-kola, balato utupane lamawuato, namba wandakali saka atapowa ateakale lo ataya alane betesa okone ateyo lea. Wandakali mindi bala nambanga epola okone bala aŋakopi mindi tomo nono na-olopeya. Dee, namba lo bilipi lolane wandakali okone bala matili-matilipi ipa nono na-olopeya teke. Jia wete. 36 Nambato metekolo piape mindi piwa-kola, yakamato utupane andapiai lo nambato yakama langiyo tekeko, yakamato namba lo bilipi naleyai. 37 Namba tane nembo tolowa pua pukale lo na-epewane. Jia. Namba ati kenga atala yuunga puu leane Ayiane okonemane nembo tola pua pukale nembo toto, namba ati kenga atalu, yuunga epewane. Wandakali minditupa-mane Gotena Iwanane oko andoto, bala lo bilipi lolai-kola, namba Ayiane okomane utupane pitaka saka atapowa atapiai lakae lo nembo teya. Namba yakama ateyainga puu leane Ayiane okonemane wandakali utupane namba lo bilipi leakale nembo toto, namba gea. Gea-kola, nambato utupanena mindikipi mindi alu peakale lo ando konda naene, yuu koyo pula-angi, utupane pitaka malinga ika laya apiai lakae lo nembo teyo. Tene okonena, namba Ayiane okonemane wandakali namba gula tupa pitaka nambanga epolai-kola, nambato utupane peyo wata napulu-peyo. Jia wete. Yuu oko koyo pula okone angi, nambato utupane malinga ika laya olopeyo. Jisasato wuane lea. 41 Jisasato ati kenga atalu, yuunga epeane betesa oko namba lea-kola, Juta yame wandakali utupane-mane mulu-mulu leai. 42 Mulu-mulu loto, utupane-mane akali oko bala Josepe iwanane Jisasa jiape leai. Nanimato balana angini, ayiane-la, okonelapo andeyamae piako. Anu puato, bala ati kenga atalu, yuunga epewane katulo leyape leai. 43 Wuane leai-kola, Jisasato utupane lamawuato, yakama teke-teke mulu-mulu lo ateyai oko kondalapa lea. 44 Wamba namba Ayiane Gote oko towa atu atoto, bala andalu, yuunga epewane. Yuu okona wandakali waka mindikipi mindimane bala anda napeai. Jia. Wandakali mindikipi mindi bala tane katulo namba ateyonga na-epalaini tekeko, potopisa akali tupamane Gotena pii layene mindi pepa peyoto, Goteto wandakali tupa pitaka mana lamaulu-peya leai. Ayiane okona pii okone ale wato, mana molai wandakali tupa pitaka nambanga epolopeyai. Namba ati kenga atala yuunga puu leane Ayiane okona pii okonemane wandakali utupane kilau lo mola-kola, utupane nambanga epolopeyai. Epolai-kola, matili yuu koyo pula-angi, nambato wandakali utupane malinga ika laya olo-peyawa. 47 Nambato pii enene wete mindi yakama langeyo. Wandakali saka atapowa ateakale lo ataya alane betesa oko namba ateyo-kola, namba lo bilipi lola wandakali tupa saka atapowa atolopeyai. 49 Wamba yakamana yumbane tupa wandakali napalene yuu okona atoto, betesa gene mana lene oko neaini tekeko, matili utupane pitaka omeainipia. 50 Ati kenga atalu, yuunga epeane betesa saka atene oko namba. Wandakali-mane betesa oko no atoto, oma napeakale nembo toto, betesa oko ati kenga atalu, yuunga epeane. Wandakali mindimane betesa oko neando, bala saka atapowa atolopeya. Yuu okona wandakali tupa saka atapowa ateakale nembo toto, betesa nambato utupane mauwakale oko nambana umbaini oko. Jisasato wuane lea. 52 Wuane lea-kola, Juta yame wandakali yakama teke-teke pii yanda puato, nanimato balana umbaini oko nalapa loto, akali okomane anu pua katulo gulupeyape leai. 53 Wuane leai-kola, Jisasato utupane lamawuato, nambana umbaini oko tomo enene eya lea. Dee, nambana tundupa oko ipa nolane enene eya. Nambana umbaini tundupa-la, okonelapo nolai wandakali tupa nambanga atolai-kola, namba utupanenga atolo-peyawa. Yuu oko koyo pula-angi, nambato utupane malinga ika laya olowa-kola, utupane saka atapowa atolopeyai. Wuane tekeko, nambato pii enene wete yakama langeyo. Yakamato Akalina Iwanane okona umbaini tundupa-la, okonelapo nanene kondeaindo, yakama saka atapowa ata napulu-peyai. 57 Wamba betesa gene mana lene oko ati kenga ato yuunga epea-kola, yakamana yumbane tupamane betesa okone neaini tekeko, matili utupane yakama omeainipia. Nambana umbaini oko betesa okonepene jia. Namba ati kenga atalu, yuunga epewane-ko. Nambana umbaini nolai wandakali tupa saka atapowa atolopeyai. Ayiane saka atene okomane namba ati kenga atala yuunga puu lea-kola, namba epewane. Bala mambele namba saka ateyo. Wuane pua teke, namba nolai wandakali tupa namba mambele saka atapowa atolopeyai. 59 Jisasa bala Juta yamena lotu anda Kapaneame tanonga ateane okona atoto, wandakali tupa mana lamawuato, pii utupane lea. 60 Jisasato wuane lea-kola, bala towa atu epoko pua ateaini wandakali kambua-mane balana pii okone ale wato, pii lalawa puato, pii mana Jisasato langeya okona tene oko nembo tape-pene pitete-pene guleya-ko. Apito balana pii okone ale wato, balato tika pua leya lolo-peyape leai. 61 Wuane lo mulu-mulu leyai nembo toto, Jisasato utupane lamawuato, nambato pii leyo utupane yakamato ale wato, namba lo bilipi leyai oko awua tepa eyaipe lea. 62 Wuane yando, Akalina Iwanane wamba ati kenga yuu ateane okona peke lola-angi, yakamato mangene okone andeaindo, yakamato anu pulu-peyaipe. 63 Nanimana umbaini-mane katulo nanima saka atapowa ateakale lo ataya na-olopeya. Jia. Oli Sipitisa okomane wandakali tupa saka atapowa ateakale lo ataya alane. Nambato Gotena pii oko wandakali tupa lamai-yokola, Oli Sipitisa oko epoto, utupane saka atapowa ateakale lo ataya alane lea. 64 Wamba Jisasato bulupane tewa balana piape pua atea-angi, akali bala ene pitulu-peya okopi, wandakali bala lo bilipi nalolo-peyai tupapi, utupane nembo teaipia. Utupane andayo, balato pii mindi tako pua loto, Oli Sipitisa okomane wandakali tupa saka atapowa ateakale lo ataya alane tekeko, yakamana minditupa-mane namba lo bilipi naleyai. 65 Tene okonena, nambato yakama languato, namba Ayiane okomane namba lo bilipi lolane tai-lene oko wandakali mindinga mai napeando, wandakali okonemane namba atolowanga katulo naepolo-peya lewane lea. 66 Wuane lea-kola, okone angi tewa, wandakali bala towa atu epoko pua atoto, mana meaini tupana kambua minditupa-mane bala towa atu epoko pua ata napene, bala awua tepa alu, peke leai. 67 Bala awua tepa alu, peke leai-kola, Jisasato balana disaipolo alesa akali tupa tipa puato, yakamatopi namba awua tepa aima lakae lo nembo teyaipe lea. 68 Wuane lea-kola, Saimone Pitato balana pii okone yano peyoto, Akali Andane, nimbato wandakali saka atapowa ateakale lo ataya alane pii tupa lalene. Nanimato andeyama-kola, Goteto nimba balana akali epene tika-pene wete oko atola lata yane lo andoto, nanimato nimba lo bilipi leyama. Nanimato nimba tepa wato, akali waka mindi pemando, okone kuai nalolo-peya lea. 70 Wuane lea-kola, Jisasato balana disaipolo tupa lamawuato, nambato alesa akali yakama nambana disaipolo tupa atalapale loto, yapa lo mewane tekeko, yakamana akali mindi bala sipitisa koo Satane yale ateya lea. 71 Saimone Isaka-tiyote iwanane Jutasa bala Jisasana disaipolo alesa akali tupana mindi ateane tekeko, matili Jutasato bala ene pitulu-peya nembo toto, Jisasato yakamana akali mindi bala sipitisa koo Satane yale ateya lea.

7

1 Jutiya disitiki okona Juta yame akali minditupa-mane Jisasa peyo ome laima lakae lo nembo toto, bala aiya pua ateai-kola, bala Jutiya disitiki okona epoko pua ata napukale nembo toto, Galili disitiki okona angu epoko pua atea. 2 Wuane pua atea-kola, Juta yame wandakali tupa Jutusaleme poto, anda aiyakame tupana palu atoto, lotu andane mindi lalu, tomo andane mindi nalaini oto oko mandaka epea. 3 Okone angi, Jisasana amene tupamane bala lo bilipi naleai. Tene okonena, utupane-mane bala lamba loto, akali mindimane bala gene yene atokale nembo teando, bala too pua atoto, piape mindikipi mindi na-piyaini leai. Nimbato metekolo piape tupa pilini yando, wandakali pitaka-mane nimbana metekolo piape utupane andeakale. Nimba lo bilipi lene Jutiya disitiki tane wandakali tupamane nimbana metekolo piape tupa andeakale teke. Nimba Galili disitiki oko tepa alu, Jutiya disitiki okona poto, metekolo piape utupane panakame pipe leai. 6 Wuane leai-kola, Jisasato utupane lamawuato, nambato yuu okona wandakali tupana mana miniyai tupa andoto, utupane koo ya lalawane. Wuane leyo-kola, wandakali utupane-mane namba towa embo wete alaini okonena, namba Jutusaleme polane oto oko ipu ata naeya. Wuane tekeko, yuu okona wandakali tupamane katulo yakama towa embo wete naeyai-kola, yakama Jutusaleme polane oto oko ole dindi lo epalane. 8 Yakama Jutusaleme lotu andane oko lolo pulupa. Namba Jutusaleme polane oto oko ipu ata naeya-kola, andipa oko angi namba lotu andane oko lolo napeyo lea. 9 Wuane lalu, bala Galili disitiki okona atea. 10 Bala Galili disitiki okona gii ukupini mindi ateane tekeko, balana amene tupa Jutusaleme wamba ini peai-kola, aŋa matili yale, balapi pea. Bala panakame puu napene, tengamane too pua pea. 11 Bala tengamane too pua peane okonena, Juta yame wandakali tupana akali kawane tupamane bala kapoyale anda napeainipia. Wuaneko, lotu andane lolane oto oko epea-angi, utupane-mane bala aiya pima epoko puato, akali oko bala aninga ateyape lo tipa piki pua ateai. 12 Tipa piki pua ateai-kola, wandakali amunguli pua ateaini tupamane bala andayo mulu-mulu loto, pii kambua leainipia. Wandakali minditupa-mane mulu-mulu loto, Jisasato wandakali tupa minakasa alane leai. Wandakali minditupa-mane bala akali epene mindi ateya leaini tekeko, Juta yamena akali kawane tupamane kenda-pene mindi yakama gulaini lo yuku wato, utupane-mane pii okone panakame naleai. Jia. 14 Ole minditupa pea-kola, lotu lo ateaini oto tupana tombenenga, Jisasa bala lotu anda andane okona ende anda-pangosa kolandaka loto, Gotena pii mana tupa lamauwa atea. 15 Mana lamauwa atea-kola, Juta yamena akali kawane tupamane moko loto, nembo kambua toto, akali oko bala ee ana kambua sukulu nalea-ko. Balato Gotena pii mana tupa aninga tawe mana meape leai. 16 Wuane leai-kola, Jisasato utupane lamawuato, Goteto wandakali minditupa lamawuato, yakamato nambana pii oko wandakali tupa lamalu pulupa leya-kola, wandakali utupanena minditupa-mane yakama tanena gene tupa laiyu lamakale nayuto, yakama tanena pii oko wandakali tupa lamai-yaini. Wuane tekeko, pii nambato lalawane tupa namba tanena pii jia. Namba Ayiane okomane balana pii oko wandakali tupa lamalu puu leane pua, nambato balana pii utupane lalawane. Tene okonena, wandakali mindimane nambana pii oko ale wato, Gotena nembo-tene wato minukale nembo teando, nambana pii okone yapa lo tale puato, nambato namba tanena pii mindi naleya. Jia. Gotena pii oko leya lo andolopeyai. Nambato Gotena gene oko laiyu lokale nembo toto, balana pii oko wandakali tupa lamai-yawane okomane namba akali tika-pene atoto, owato pii na-lalae ya lo yakamato andape-pene. 19 Mosesato Gotena loo tupa yakama geane tekeko, yakamana mindikipi mindimane loo utupane wato mina na-piyaini. Jia. Nambato Gotena gene oko laiyu lauwa lakae lo nembo toto, balana enene pii oko lalawane-ko. Anu peakale yakamato namba peyo ome laima lakae lo nembo teyaipe. Jisasato wuane lea. 20 Wuane lea-kola, wandakali epo amunguli pua ateaini tupamane bala tipa puato, apito nimba peyo ome laima lakae lo nembo teyape. Nimbanga sipitisa koo mindi ateya-kola, nimbato wuane lele leai. 21 Wuane leai-kola, Jisasato utupane lamawuato, wamba Mosesato loo mindi yata wato, yakamato iwana mindi mandulai-angi, ole kitupasa pola-kola, balana yala-pene umbaini oko katu apia-maiyapape leaipia. Mosesato mana okone wamba bulupane yata nayaepia. Jia. Yakamana yumbane Apatakameto mana okone wamba bulupane yata ya-kola, Mosesato mana okone minu tai laya yaepia. Yakamato mana okone wato minuto, iwana mindi mandulai-angi, ole kitupasa pola-kola, balana yala-pene umbaini oko katiyaini. Iwanaŋa okona yala-pene umbaini kateakale lene ole kitupane lola okone Sambasa mindi yando, yakamato Sambasa loo oko kalo peyama nembo toto teke, iwana okonena yala-pene umbaini katu apia-maiyaini. Sambasa tupana yakamato iwana tupana yala-pene umbaini katuto, piape piyaini pua teke, Sambasa mindina nambato metekolo piape mindiki piwa-kola, anu peakale yakamato moko lapiaipe. 24 Yakamato nambana mana tupa lee-mane angu andoto, namba yapa lo tale peyai mana oko kondalu, yakamato mana epene tika-pene oko wato minuto, nambana mana tupa kuai lo yapa lo tale piyapa lea. 25 Jisasato wuane lea-kola, Jutusaleme tane wandakali minditupa-mane pii lalawa puato, Juta yamena akali kawane tupamane akali mindi peyo ome lamakale nembo toto, aiya pua ateyai akali oko bala jiape leai. 26 Balato wandakali tupa pitakana wenonga panakame atoto, pii lo ateya tekeko, Juta yamena akali kawane tupamane pii kondaa lo bala lamai napeyai oko andalapa. Utupane-mane bala Mesaya oko ateya nembo tolaini. 27 Nanimato akali okona yuu tene oko nembo teyama tekeko, Mesaya oko epola-angi, wandakali mindikipi mindimane balana yuu tene oko nembo natolo-peyaiko. Bala Mesaya oko jia leai. 28 Wuane leai-kola, Jisasa bala lotu anda andane okona ende anda-pangosa atoto, wandakali tupa mana lamawua ateaipia. Balato pii taimane loto, enene, yakamato namba andoto, nambana yuu tene oko nembo teyai tekeko, namba epewane oko namba tane epokale nembo toto na-epewane. Jia. Gote enene okomane namba ati kenga atala yuunga puu lea-kola, namba yuunga epeane lo yakamato anda napeyai. 29 Namba bala towa atu atapale okonena, nambato bala andeyawane. Namba ati kenga atewa-kola, balato namba yuunga puu leane. Jisasato wuane lo mana lamawua atea. 30 Balato wuane lo mana lamawua atea-kola, utupane-mane bala andi laima lakae lo nembo teaini tekeko, bala andi lolane oto oko ipu ata naya-kola, wandakali mindikipi mindimane bala mina napene, kondayai. 31 Amunguli pua ateaini wandakali tupana kambua-mane Mesaya oko epola-angi, balato akali oko sia minuto, metekolo piape kambua wete napulu-peya yalua loto, bala Mesaya okone ya lo bilipi leai. 32 Amunguli pua ateaini wandakali tupamane akatete lamo nena puato, Jisasa bala Mesaya oko ya leai-kola, Patasai tupamane pii okone ale yai. Ale wato, pitisa akali kawane tupa towa pii mindi lo puta puato, utupane-mane yakamana yanda yene minditupa lamawuato, yakamato Jisasa andi lolo pulupa leainipia. 33 Akali utupane-mane Jisasa andi lolo peai-kola, Jisasato Juta yame wandakali tupa lamawuato, namba ana aŋalapo minditupa angu tako pua yakama towa atu atalu, namba ati kenga atala yuunga puu leane Ayiane oko ateyanga peke lolo-peyawa lea. 34 Namba Ayianena yuu okona atolowa-kola, yakama katulo yuu okonena naepolo-peyai. Jia. Yakamato namba aiya pulupeyai tekeko, yakamato namba ando mia napulu-peyai lea. 35 Wuane lea-kola, Juta yamena akali kawane tupa yakama teke-teke pii mindi lamai-lamai puato, Jisasato yakama katulo namba atolowa okona naepolo-peyai leya. Yakamato namba aiyu pulupeyai tekeko, yakamato namba ando mia napulu-peyai leya-ko. Balato mangene anu-pene mindi pukale nembo toto, wuane leyape. Bala aninga pola-kola, nanimato bala katulo aiya pua anda napulu-peyamape. Wamba Juta yame wandakali minditupa nanimana yuu oko tepa alu, Gitiki yamena yuu okona poto, ateyai. Bala yuu okonena poto, Juta yame wandakali utupanena tombenenga atoto, wandakali yame waka tupa mana lamauwa atokale nembo toto, wuane leyape leai. 37 Juta yame wandakali tupamane lotu lalaini oto kitupane koyo puyale lotu andane mindi leai-angi, Jisasa bala ika lo atoto, pii mindi wandakali tupa taimane lamawuato, Gotena pii pepa pelene eya mindimane leya pua, wandakali mindimane namba lo bilipi leaindo, ipa saka balana yamapanenga lai yungu epolopeya layene eya. Tene okonena, wandakali mindi ipa nono yando, bala nambanga ipa nolo epeakale lea. 39 Okone angi, Jisasa bala gene andane mindi mia napea-kola, Goteto balana Oli Sipitisa oko wandakali tupanga mai na-epea tekeko, matili bala lo bilipi lolai wandakali tupamane Oli Sipitisa oko molopeyai nembo toto, Jisasato pii okone wandakali utupane lamaiya. 40 Lamaiya-kola, wandakali amunguli pua ateaini tupana minditupa-mane balana pii okone ale wato, enene, akali oko bala potopisa akali ati kenga atala Goteto yuunga epeakale lokale leane oko ateya leai. 41 Wandakali waka minditupa-mane akali oko bala Mesaya oko ateya leai. Wuane tekeko, wandakali minditupa-mane Gotena pii pepa pelene eya mindimane loto, kiŋi Dapiti yame okomane balana yuu tene Beselekeme tano okona atoto, Mesaya oko mandulu-peya layene eya-ko. Mesaya oko bala Galili disitiki okona tane mindi ata napulu-peya nembo teyama leai. 43 Wuane leai-kola, wandakali amunguli pua ateaini tupamane Jisasa bala Mesaya oko ateyape lo pii yanda puato, yapu lo lapo peai. 44 Akali yangi-mane bala andi laima lakae lo nembo teaini tekeko, utupanena mindikipi mindimane bala minata nayai. 45 Yanda yene tupamane Jisasa andi nalene, pitisa akali kawane tupapi, Patasai tupapi, utupane ateainga peke leai-kola, Juta yamena akali kawane utupane-mane yanda yene tupa tipa puato, anu peakale yakamato Jisasa andi lo awua na-epeyaipe leainipia. 46 Wuane leai-kola, yanda yene tupamane utupanena pii okone yano peyoto, Jisasato pii tene andane palene tupa lala pua wamba akali mindikipi mindimane naleane okonena, nanimato bala andi lo awua naepene kondalama leainipia. 47 Wuane leai-kola, Patasai tupamane utupane tipa puato, Jisasato yakamapi minakasa ala-kola, yakamatopi bala lo bilipi lalaipe leainipia. 48 Wandakali amunguli pua ateyai tupamane Mosesana loo oko wayumane nembo natene ato, Jisasa bala Mesaya oko ateya lo bilipi leyai-kola, Goteto kenda-pene andane wete mindi utupane malupeya. Wuane tekeko, Patasai tupapi, Juta yamena akali kawane tupapi, nanimana mindikipi mindimane bala Mesaya oko ateya lo bilipi naleyama leainipia. 50 Patasai utupane mindina gene oko Neketomasa lene. Wamba bala Jisasa peteanga poto, bala towa pii lalawa peaipia. Akali okonemane Juta yamena akali kawane utupane lamawuato, wua leaipia. 51 Nanimana loo okomane mana mindi yata wato, nanimato akali mindi mee kosimi loto, balanga koo tene minditupa yata ape-pene naleya. Jia. Nanimato balana pii wamba ini ale wato, balana mana tupa nembo toto, bala yapa lo tale pipe-pene leya leaipia. 52 Wuane lea-kola, Juta yamena akali kawane tupamane balana pii okone yano peyoto, nimba Galili disitiki okona tane mindi ata napele-ko. Anu peakale nimbato Galili tane Jisasa oko moyoyale wuane lelepe. Nimbato Gotena pii pepa pelene eya tupa wayumane wete dii lo andoto, Galili tane mindi bala potopisa akali mindi atolopeya layene naeya oko andape leainipia. 53 [Wuane lalu, akali utupane mindiki-mindiki lo yakama andaka peainipia.]

8

1 [Jisasa bala Olipi wangiane okona pea. 2 Anate-lene upa pitane nai peakaiyu lea-angi, bala lotu anda andane okona ende anda-pangosa dee lapone teke peakaiyu lea. Wandakali pitaka bala ateanga epeai-kola, bala pituto, utupane mana lamauwa petea. 3 Akali mindina wetene okomane pamuku pua palea-kola, mindimane andoto, loo tupana mana andene akali tupapi, Patasai tupapi, utupane lamai-yainipia. Lamai-yaikola, utupane-mane wanda okone atu Jisasa mana lamawua peteanga epoto, wandakali tupana wenonga ateakale leai. 4 Ateakale lalu, utupane-mane Jisasa lamawuato, tisa, wanda okomane pamuku pua paliya-kola, mindimane andala yala leai. 5 Wamba Mosesato loo mindi nanimanga yata wato, wanda okonepene tupa ana-mane peyo ome lalapape leane-ko. Nimbato aki lelepe leai. 6 Jisasato utupanena pii okone yano peyola-kola, utupane-mane bala kosimi lamakale nembo toto, bala minu mandeke puato, wuane leaini tekeko, Jisasato utupanena pii okone yano peya napene, mee tombawua loto, balana kii ondene okomane yuunga pepa mindi pelea. 7 Jisasato utupanena pii okone yano napelea-kola, utupane-mane bala tipa pitawa yapo yai. Wuane pea-kola, bala ika loto, utupane lamawuato, koo napilini akali mindimane wanda oko ana-mane wamba ini peya lea. 8 Wuane lalu, Jisasa bala lapone tombawua loto, yuunga pepa mindi pelea. 9 Jisasato wuane lea-kola, loo tupana mana andene akali tupapi, Patasai tupapi, utupane-mane balana pii okone ale alu, mindiki-mindiki lo puku peai. Akali mini-yene tupa wamba ini peai-kola, patane yale tupa matili peai. Akali utupane pitaka peai-kola, wanda okone angu Jisasana wenonga atea. 10 Atea-kola, Jisasa ika lo atoto, bala tipa puato, wanda, akali andalama tupa aninga palaipe. Akali utupanena mindiki mindimane nimba kosimi loyale ata napeyaipe lea. 11 Wuane lea-kola, wanda okonemane bala lamawuato, Akali Andane, akali mindikipi mindimane namba kosimi loyale ata napeyai lea. Wuane lea-kola, Jisasato bala lamawuato, nambatopi nimba kosimi naleyo-ko. Andipa ateyama gii okona atoto tewa, nimbato koo mindi dee lapone napipe. Nimba puu lea.] 12 Wandakali kambua lotu anda andane okonena ende anda-pangosa amunguli pua ateai-kola, Jisasato utupane lapone mana lamawuato, nambato yuu okona atoto, tii pua atalawane lea. Namba watama epolai wandakali tupanga saka atapowa ateakale lo ataya alane tii-pene okone yola-kola, utupane undupi pangosa epoko pua ata napulu-peyai. Jia wete lea. 13 Wuane lea-kola, Patasai tupamane bala lamawuato, nimba tane angu wuane lele okonena, wandakali waka tupamane nimbana pii okone bilipi lolane tene mindi napaleya leai. 14 Wuane leai-kola, Jisasato utupanena pii okone yano peyoto, yuu namba atalu epewane okopi, yuu namba polopeyawa okopi, okonelapo yakamato nembo nateyai tekeko, yuu namba atalu epewane okopi, yuu namba polopeyawa okopi, okonelapo nambato nembo teyo lea. Nambato wuane nembo toto, mana okopene tupa minuto, piape piyawane lewando, wandakali waka tupamane nambana pii okone bilipi lape-pene. 15 Yakamato yuunga wandakali tupana pii mana wato minuto, namba yapa lo tale peyai. Yuunga wandakali tupana pii mana wato minuto, nambato wandakali mindikipi mindi yapa lo tale na-piyawane. 16 Wuane tekeko, yakamana loo okomane pii mindi loto, wandakali lapo wisanisa atoto, pii mindiki okone teke leapindo, okone-lapona pii okone enene yolopeya layene eya. Namba angu ata napeyo. Jia. Namba ati kenga atala yuunga puu leane Ayiane oko namba towa atu ateyapa. Wuaneko, nambato wandakali mindi yapa lo tale pewando, namba Ayiane okomane pii mindiki okone teke lola-kola, nalipana pii okone enene yolopeya. 18 Namba tane mana okopene tupa minuto, piape piyawane leyo. Namba ati kenga atala yuunga puu leane Ayiane okomane namba andayo pii mindiki okone teke leya-kola, nalipana pii okone enene wete eya lea. 19 Wuane lea-kola, Patasai tupamane bala tipa puato, nimbana Ayiane okone aninga ateyape leai. Wuane leai-kola, Jisasato utupanena pii okone yano peyoto, yakamato namba andapiai-yale, nambana Ayiane okopi andapiai-yale tekeko, yakamato namba Ayiane nalipa lapotaka anda napeyai lea. 20 Wayu pele muni aindaka lalaini pene tupa yaini ongane mandaka pituto, Jisasato wandakali tupa mana lamawuato, pii utupane leane tekeko, wandakali-mane bala andi lolane oto oko ipu ata naya-kola, wandakali mindikipi mindimane bala andi loyale mina napeai. 21 Okone angi, Jisasato dee lapone teke wandakali tupa mana lamawuato, namba polowa-kola, yakamato namba aiya pulupeyai tekeko, yakamato katulo namba anda napulu-peyaiko. Yakamana koo piyaini tupa yakamanga mee yapowa yola-kola, yakama omolai-angi, yuu namba polowa okona yakama katulo naepolo-peyai lea. 22 Wuane lea-kola, Juta yamena akali kawane tupa yakama teke-teke pii lalawa puato, balato yuu namba polowa okona yakama katulo naepolo-peyai leya-ko. Bala tane peyo ome lokale nembo toto, wuane leyape leai. 23 Wuane leai-kola, Jisasato utupane lamawuato, yuunga yuu oko yakamana yuu tene oko eya-kola, yakamato yuunga wandakalina mana tupa wato minu atalaini. Tene okonena, yakama omolai-angi, yakamato koo piyaini utupanena koo tene tupa yakama tanenga mee yapowa yolopeya lo nambato yakama langeyo. Wuane tekeko, ati kenga oko nambana yuu tene oko eya-kola, nambato yuu okona wandakalina mana tupa wato mina na-piyawane. Yakamato namba Mesaya oko ateya lo bilipi naleaindo, matili yakama omolai-angi, yakamato mana koo mineaini tupa yakamanga mee yapowa yolopeya lea. 25 Wuane lea-kola, utupane-mane bala tipa puato, nimba apipe leai. Wuane leai-kola, balato utupane lamawuato, namba Mesaya oko ateyo lo nambato yakama wamba langewa okoni. 26 Nambato yakama yapa lo tale puato, katulo pii kambua lauwa-yale tekeko, namba ati kenga atewa-kola, mindimane namba yuunga puu leane. Balato enene pii tupa lalane. Nambato balana pii enene utupane ale wato, yuu okona wandakali tupa lamai-yawane lea. 27 Jisasato wuane leane tekeko, wandakali tupamane balana pii okone ale wato, bala ati kenga atea-kola, Aiyane Goteto bala yuunga puu leane nembo nateai. Jia. 28 Nembo nateai-kola, Jisasato utupane lamawuato, ole dindi lo nambato mana epene tupa angu minalawane okonena, namba ati kenga atala yuunga puu leane Ayiane okomane namba towa epele alane. Wuaneko, namba angu atola loto, balato namba awua tepa naya. Jia. Bala namba towa atu atalapale. Matili yakamato Akalina Iwanane oko ita malamanda okona minaiyu lolai-angi, namba tanena nembo-tene oko wato minuto, nambato mangene mindikipi mindi na-piyaeya lo yakamato andolopeyai. Okone angi, yakamato andolai-kola, namba Ayiane okomane wua lape lo namba mana langeya-kola, namba Mesaya oko atoto, balana pii oko wandakali tupa lamai-yaeya lo yakamato andolopeyai lea. 30 Wuane lea-kola, wandakali kambua-mane balana pii oko ale wato, bala lo bilipi leai. 31 Juta yame wandakali minditupa-mane Jisasana pii leane tupa ale wato, balato enene pii leya lo bilipi leai-kola, balato utupane lamawuato, yakamato nambana pii tupa wayumane wato minu ateaindo, yakama nambana disaipolo enene tupa atolopeyai lea. 32 Yakama nambana disaipolo enene tupa atoto, enene pii oko nembo tolai-kola, enene pii okomane yakama tinga lo molopeya lea. 33 Wuane lea-kola, utupane-mane bala lamawuato, nanima Apatakame yamena mandiyene tupa ateyama. Alu mindikipi mindi nanimato yole mia napene, wandakali waka mindina katapusa piape mindi pimai napema-ko. Anu peakale, nimbato nanima languato, enene pii okomane yakama tinga lo molopeya lelepe leai. 34 Wuane leai-kola, balato utupanena pii okone yano peyoto, nambato pii enene wete mindi yakama langeyo lea. Mana koo wato minalaini wandakali tupamane mana koo utupanena katapusa piape pua atalaini. 35 Katapusa piape piyane wandakali mindi bala piape anduane okona yame tupa towa ole dindi lo atapowa ata napiyane. Jia. Piape anduane okona iwanane oko bala ayianena yame tupa towa atu ole dindi lo atapowa atalane. 36 Tene okonena, Iwanane okomane katapusa piape pua atalaini wandakali yakama tinga lo meando, yakama tinga lo mene wete atolopeyai. 37 Nambato yakama Apatakame yamena mandiyene tupa ateyai nembo teyo tekeko, namba Ayiane oko towa atu atewa-angi, minditaka andewane tupa nambato yakama langeyo-kola, yakamato nambana pii okone wato mina-makale nembo nateyai. Tene okonena, yakamana ayiane waka okomane wua piyapape leya-kola, yakamato balana pii oko ale wato, namba peyo ome laima lakae lo nembo teyai. 39 Wuane lea-kola, Juta yame akali utupane-mane balana pii okone yano peyoto, nanimana ayiane oko Apatakame leai. Wuane leai-kola, Jisasato utupane lamawuato, yakama Apatakamena mandiyene yame atapia-yale, Apatakameto mana epene minu ateane pua teke yakamato mana epene minu atapiai-yale lea. 40 Goteto enene pii oko namba langea-kola, nambato balana pii enene okone ale wato, yakama langewa tekeko, andipa yakamato namba peyo ome laima lakae lo nembo teyai. Apatakameto pii enene lalaini akali tupa peyo ome naleaipia. 41 Yakamato yakama ayiane waka okona mana koo tupa wato minu ateyai lea. Wuane lea-kola, utupane-mane balana pii okone yano peyoto, nanimana angini-mane pamuku pima epoko puato, nanima mandi napea. Jia. Nanimana Ayiane mindiki angu ateya oko bala Gote leai. 42 Wuane leai-kola, Jisasato utupane lamawuato, namba tane epokale nembo toto na-epewane lea. Namba ati kenga atewa-kola, Goteto namba yuunga puu lea-kola, namba epewane-ko. Gote bala yakamana ayiane atapia-yale, yakamato namba towa epelewa yamapane yo atapiai-yale. 43 Yakamana ayiane oko Satane ateya-kola, balato nembo teya pua yakamato pima lakae lo nembo toto, yakamato katulo nambana pii oko kuai lo ale aa na-piyaini. Jia. Yakamato nambana pii tupa ale wato teke, pii utupanena tene tupa wayumane nembo nateyai. Wamba bulupane tewa Satane bala wandakali tupa peyo ome lalane sipitisa koo mindi ateane. Enene pii oko balanga naeya-kola, balato enene pii oko wato mina napiyane. Bala owato pii tupa pitakana tene oko atoto, owato pii tupa lola-angi, bala tanena pii tupa lola-kola pulupeya. 45 Nambato pii enene oko leyo-kola, yakamato nambana pii okone enene ya lo bilipi na-lalaini. 46 Nambato koo piyane lo yakamana mindimane katulo andawa nalolo-peyape. Nambato enene pii oko leyo-ko. Anu peakale yakamato nambana pii okone enene ya lo bilipi naleyaipe. 47 Gotena yame wandakali tupamane balana pii oko ale alaini tekeko, yakama balana yame wandakali tupa ata napeyai okonena, yakamato balana pii oko ale aa na-piyaini. Jisasato wuane lea. 48 Jisasato wuane lea-kola, Juta yame akali utupane-mane balana pii okone yano peyoto, nimba Samatiya yame mindi atele-kola, sipitisa koo mindi nimbanga ateya leyama okone enene jiape leai. 49 Wuane leai-kola, balato utupanena pii okone yano peyoto, nambato nambana Ayiane okona gene oko laiyu lalawane okonena, sipitisa koo mindi nambanga ata napeya lo yakamato andeyai. Wandakali-mane nambana gene oko laiyu lapiai lakae lo nembo nateyo tekeko, yakamato nambana gene oko laiyu lalapale lo namba Ayiane okomane nembo teya. Wuaneko, yakamato nambana gene oko mo ainapi leyai okonena, balato yakama yapa lo tale peya. 51 Wuane tekeko, nambato pii enene wete mindi yakama langeyo. Wandakali mindimane nambana pii oko wato minu ateando, bala saka atapowa atolopeya lea. 52 Wuane lea-kola, Juta yame akali utupane-mane bala lamawuato, Apatakamepi, potopisa akali tupapi, utupane pitaka omeaini tekeko, nimbato nanima languato, wandakali mindimane nimbana pii oko wato minu ateaindo, bala saka atapowa atolopeya lele leai. Nimbato wuane lele okonena, andipa nanimato andeyama-kola, sipitisa koo mindi nimbanga ateya. 53 Potopisa akali tupapi, nanimana yumbane Apatakamepi, utupane pitaka omeainipia. Nimbato akali utupane pitaka sia minuto, akali gene andane wetete yene mindi ateyo nembo toto, wandakali mindimane nimbana pii oko wato minu ateaindo, bala saka atapowa atolopeya lelepe. Nimba api ateyo nembo toto, wuane lelepe leai. 54 Wuane leai-kola, balato utupane lamawuato, namba tanena gene oko laiyu lewando, nambana gene nayolopeya tekeko, namba Ayiane okomane nambana gene oko laiyu lalane lea. Yakamato nambana Ayiane oko nembo nateyai tekeko, yakamato owato pii loto, bala yakamana Gote oko ateya lalaini. Nambato bala andoto, balana pii oko wato minu atalawane. Tene okonena, nambato bala anda na-peyawane lewando, namba owato pii lene akali yakama yale gulo atolo-peyawa. 56 Wamba yakamana yumbane Apatakameto namba epolane oto oko andokale nembo toto, bala epelewa ateaipia. Matili balato oto okone andoto, epele wete yaepia lea. 57 Wuane lea-kola, Juta yame akali utupane-mane bala lamawuato, nimba ee ana paiyasa yau pene ata napele-ko. Nimbato Apatakame anda napee. Jia wete leai. 58 Wuane leai-kola, balato utupane lamawuato, nambato pii enene wete mindi yakama langeyo. Wamba Apatakame angini-mane bala mandi napea-angi, namba saka atewane oko mee atapowa ateyo lea. 59 Wuane lea-kola, Juta yame akali utupane-mane bala ana-mane peyo ome lamakale nembo toto, ana minditupa meaini tekeko, Jisasa bala tengamane too pua poto, lotu anda andane ende okona kamaka pea.

9

1 Jisasa balana disaipolo tupa towa asini poto andeai-kola, angini-mane lene koo mandu yane akali mindi atea. 2 Atea-kola, utupane-mane bala tipa puato, tisa, apito wamba koo pea-kola, angini-mane akali oko lene koo mandeape leai. Balana angini, ayiane-la, okonelapo-mane wamba koo peapelepe. Pee, bala tane-mane wamba koo peape leai. 3 Wuane leai-kola, Jisasato utupanena pii okone yano peyoto, akali okone bala tane yandopi, balana angini, ayiane-la, okonelapo yandopi, utupanena mindimane wamba koo peane mambele angini-mane akali oko lene koo mandi napea. Jia. Nambato Gotena piape puluwa oko wandakali-mane panakame andeakale nembo toto, angini-mane akali oko lene koo mandeakale lo Goteto ando konda yane. 4 Namba yuu okona ateyo-angi, yuu okona wandakali tupamane Gotena piape tupa andeakale nembo toto, namba tii pua ateyo. Matili yuu undupi lola-angi, wandakali mindikipi mindimane katulo piape napulu-peyaiko. Andipa yuu tii peya oko angi, namba ati kenga atala yuunga puu leane Ayiane okona piape tupa pimawua atape-pene lea. 6 Wuane lalu, balato yuu okona apesango soo lo tepa wato, apesango okone yuu towa minu mandau puato, akali lene koo okonena lenenga yuu yanga-maiya. 7 Yuu yanga-maiyu, Jisasato akali okone lamawuato, nimba ipa angini aŋako gene Silomo lene okona wasa-wasa peyolo puu lea-kola, akali okone bala wasa-wasa peyolo pea. Gene Silomo okone mo peke loto, peakale latane lalaini. Akali okone ipa angini Silomo okona poto, ipa okonena wasa-wasa peyalu, andaka peke lea-angi, balana lene okolapo tea-kola, balato pitaka taka kuai lo andeaipia. 8 Wamba akali okonemane wandakali tupa tee loto, minditaka giyapa lo petea-kola, wandakali kambua-mane bala akali lene koo ya lo andeaini-pia. Balana lene tea-kola, wandakali utupanepi, wandakali bala towa yuu mindikinga atalaini tupapi, utupane yakama teke-teke mindi akali tipa piki puato, akali oko wamba lene koo atoto, wandakali-mane minditaka giyapa lo tee lalane pia okone jiape leainipia. 9 Wuane leai-kola, wandakali minditupa-mane utupanena pii okone yano peyoto, enene, bala akali okone leaini tekeko, wandakali minditupa-mane utupanena pii okone yano peyoto, jia, bala akali waka mindi tekeko, bala mee akali mindiki okonepene teke gulo ateya leainipia. Wuane leai-kola, akali okone bala tane namba akali lee koo pia okone teke leaipia. 10 Wuane lea-kola, utupane-mane bala tipa puato, nimbana lene okolapo anu puato, tapiape leainipia. 11 Wuane leai-kola, balato utupanena pii okone yano peyoto, akali Jisasa lene okomane yuu minditupa minu mandau puato, nambana lenenga yuu yanga mawuato, namba ipa angini aŋako Silomo lene okona wasa-wasa peyolo puu lapia. Wuane lapia-kola, namba poto, ipa okonena wasa-wasa peyauwa-kola, namba lee tauwa leaipia. 12 Wuane lea-kola, utupane-mane bala tipa puato, akali okone bala aninga ateyape leainipia. Wuane leai-kola, balato namba nembo nateyo leaipia. 13 Sambasa angi Jisasato yuu minditupa minu tala puato, akali lee koo okonena lenenga yuu yanga mawuato, balana lee taya apiya nembo toto, wandakali utupane-mane akali wamba lene koo ateane okone bala atu Patasai tupa ateainga peainipia. 15 Peai-kola, Patasai tupamanepi bala tipa puato, nimbana lene oko anu puato tapiape leainipia. Wuane leai-kola, balato utupanena pii okone yano peyoto, akali mindimane mandau minditupa nambana lenenga yangapia-kola, nambato wasa-wasa peyo apiauwa. Andipa namba lee too ateyo leaipia. 16 Wuane lea-kola, Patasai yangi-mane loto, Jisasato akali okonena lee taya apiane okonemane Sambasa loo oko wato mina napipia yako. Bala Gote towa atu atalu, na-epea ya leainipia. Utupane-mane wuane leaini tekeko, Patasai yangi-mane pii mindi loto, akali okone bala koo piyane akali mindi atapia-yale, balato metekolo piape okonepene tupa katulo napipia-yale leainipia. Wuane loto, Patasai utupane-mane pii waka-waka loto, yame lapo gulo ateainipia. 17 Tene okonena, utupane-mane akali wamba lene koo ateane okone dee lapone pii mindi tipa puato, nimbana lene taya apiane akali okone bala akali anu-pene mindi ateya lelepe leainipia. Wuane leai-kola, akali wamba lee koo ateane okomane akali okone bala potopisa akali mindi ateya leaipia. 18 Wuane lea-kola, Juta yame akali utupane-mane balana pii okone ale wato, balato owato leya nembo toto, utupane-mane balana angini, ayiane-la, okonelapo epeakale leainipia. 19 Balana angini, ayiane-la, okonelapo epeapi-kola, Juta yame akali utupane-mane okonelapo tipa puato, akali oko liyambana iwanane okope leainipia. Wuane leai-kola, okonelapo-mane utupanena pii okone yano peyoto, enene, bala nalipana iwanane leapilipia. Wuane leapi-kola, utupane-mane okonelapo tipa puato, liyambato bala wamba lene koo mandeapipe leainipia. Wuane leai-kola, okonelapo-mane utupanena pii okone yano peyoto, enene, nalipato bala wamba lene koo mandepa leapilipia. Wuane leapi-kola, utupane-mane okonelapo tipa puato, wuane yando, andipa bala anu puato, lee teyape leainipia. 21 Wuane leai-kola, okonelapo-mane utupanena pii okone yano peyoto, balana lene okolapo anu puato tapiape lo nalipato nembo nateyapa leapilipia. Dee, apito balana lene okolapo taya apiape lo nalipato nembo nateyapa teke. Bala akali mini-yene mindi ateya-ko. Bala tane-mane yakama langeakalenga, yakamato bala tipa piyapa leapelepia. 22 Wamba Juta yame akali utupane-mane pii mindi lo yake puato, wandakali mindimane Jisasa bala Mesaya oko ateya leaindo, bala nanima towa atu lotu lo ata napeakale. Nanimato bala peyo watamakale leainipia. Tene okonena, akali okonena angini, ayiane-la, okonelapo-mane Juta yame akali utupane yuku wato, nalipana iwanane oko bala akali mini-yene mindi ateya-ko. Yakamato bala tipa piyapa leapelepia. 24 Wuane leapi-kola, Juta yame akali utupane-mane akali wamba lene koo ateane okone bala lapone epeakale leainipia. Bala epea-kola, utupane-mane bala lamawuato, nanimato akali Jisasa okone bala koo piyane nembo teyama-ko. Nimbato balana gene oko laiyu nalene, Gotena gene oko laiyu lape. Nimbana weno minuto, Gotena gene oko loto, enene pii lolo-peyawa laa leainipia. 25 Wuane leai-kola, balato utupanena pii okone yano peyoto, akali okone balato koo piyaepe, na-piyaepe lo namba nembo nateyo leaipia. Nambato minditaka mindiki angu nembo teyo. Wamba namba lee koo atewa tekeko, andipa lee teyo leaipia. 26 Wuane lea-kola, utupane-mane bala tipa puato, balato nimbanga anu puato, nimbana lene oko taya apiape leainipia. 27 Wuane leai-kola, balato utupane lamawuato, wamba nambato yakama langiyo tekeko, yakamato nambana pii okone bilipi na-lalai leaipia-ko. Anu peakale yakamato nambana pii mindiki okone teke dee lapone ale amakale nembo teyaipe. Yakamapi balana disaipolo tupa gulaima lakae lo nembo toto, namba dee lapone teke tipa peyaipe leaipia. 28 Wuane lea-kola, Patasai utupane-mane bala lamba loto, Goteto balana pii tupa Mosesa lamaiya-kola, Mosesato pii utupane nanima langeane nembo toto, nanima Mosesana disaipolo tupa ateyama. Nimba akali Jisasa okonena disaipolo mindi atele tekeko, bala aninga atoto epeape lo nanimato nembo nateyama leainipia. 30 Wuane leai-kola, akali okonemane utupanena pii okone yano peyoto, wandakali mindimane koo pua ateaindo, Goteto wandakali okonena pii ale naene kondalane nembo teyama leaipia. Wuane tekeko, wandakali mindimane Gotena nembo-tene oko wato minu, bala lo lotu loto, balana mana epene tupa wato mineando, Goteto wandakali okonena pii ale alane nembo teyama. Wamba wetete tewa ipapo wato, andipa ateyama oto okona giau loto, angini-mane akali lene koo mindi mandea-kola, matili wandakali mindimane balana lee oko taya yane lo nanimato alu mindikipi mindi ale naema. Andipa akali Jisasa oko balato nambana lene oko mo taya ala. Goteto akali okone epeakale nalea-yale, balato katulo mangene okonepene mindi napipia-yale tekeko, yakamato bala aninga atoto epeape nembo nateyama leyai-kola, namba moko loto, nembo kambua teyo leaipia. 34 Wuane lea-kola, utupane-mane balana pii okone yano peyoto, nimba angini-mane nimbanga mana koo yapeta mandea-kola teke, nimbato nanima mana langiwa lakae lo nembo telepe leainipia. Wuane loto, utupane-mane bala utupane towa atu lotu naleakale nembo toto, Juta yamena lotu anda okona takita peyo wateainipia. 35 Patasai tupamane akali wamba lene koo ateane okone bala Juta yamena lotu anda okona ata napeakale lo peyo wata alai lene ale wato, Jisasato bala aiya pima poto, andea. Andoto, utupane-mane Jisasa tipa puato, nimbato Akalina Iwanane oko lo bilipi lelepe lea. 36 Wuane lea-kola, akali okonemane bala tipa puato, Akali Andane, nambato bala lo bilipi lokalenga, bala apipe lea. 37 Wuane lea-kola, Jisasato bala lamawuato, nimbato bala wamba andapi. Nimba towa pii lo ateyapa akali namba Akalina Iwanane oko ateyo lea. 38 Wuane lea-kola, akali okonemane bala lamawuato, Akali Andane, nambato nimba lo bilipi leyo loto, bala lo lotu lea. 39 Okone angi, Jisasato pii mindi loto, nambato wandakali tupa yapa lo tale pulu, ati kenga atala yuunga epewane. Lee koo wandakali tupa lee teakale nembo toto, namba epewa tekeko, lee teyama nembo talaini wandakali yakama lee koo guleakale nembo toto, namba epewa teke lea. 40 Wuane lea-kola, Patasai ongane mandaka gulo ateaini tupamane bala tipa puato, nimbato wuane lele okone nanimapi lene koo teke ateyai lelepe leai. 41 Wuane leai-kola, Jisasato utupane lamawuato, yakama lene koo pia-yale, yakamanga koo tene mindi nayapi-yale tekeko, andipa yakamato katulo andeyama leyai-kola, yakamato mana koo minalaini tupana koo tene oko yakamanga mee eya lea.

10

1 Jisasato pii mindi tako pua loto, nambato pii enene wete mindi yakama langeyo lea. Sipisipi banisa okona asia lomba ando atalane akali okomane asia lomba okone lumbeya-kola, sipisipi yatawa atalaini akali tupa yakama sipisipi banisa okonena anda-pangosa kolandaka lalaini. Wandakali mindimane asia okonena kolandaka nalene, waka mindisa banisa okone keyalu, sipisipi banisa okona kolandaka leando, bala pake nalane akali mindi atolopeya. Sipisipi yatawa atalaini akali tupamane sipisipi banisa okona kolandaka loto, yakama mindiki-mindiki lo yakama tanena sipisipi tupa ee lalaini. Sipisipi yatawa atalane akali mindimane balana sipisipi mindiki-mindiki lo ee loto, gene laka piyane. Gene laka peya-kola, sipisipi utupane-mane balana pii okone ale wato epeyai-kola, balato utupane towa atu sipisipi banisa okone tepa alu, atu kamaka palane. 4 Bala tanena sipisipi utupane pitaka banisa okona kamaka atu ipulu, bala wamba ini ingane peya-kola, balana sipisipi tupamane balana pii ale wato, bala watama palaini. 5 Wuane tekeko, wandakali waka mindimane sipisipi utupane ee leando, utupane-mane bala watama napolo-peyai. Jia wete. Utupane-mane balana pii ale wato, bala akali opene mindi ya lo nembo toto, palaka polopeyai lea. 6 Jisasato pii kokoli okone akali utupane lamaiya tekeko, balato aki nembo toto, wuane leyape lo utupane-mane nembo nateai. 7 Nembo nateai-kola, Jisasato pii minditupa tako pua loto, nambato pii enene wete mindi yakama langeyo lea. Namba tane sipisipi banisa okona asia lomba oko ateyo. 8 Sipisipi banisa okona asia lomba oko namba. Wandakali mindi bala nambanga epoto, Gotena sipisipi banisa okonena anda-pangosa kolandaka leando, Goteto bala molo-peke lolopeya. Utulu bala banisa okonena anda-pangosa kuai lo paliyu, upa pitane takita poto, tomo no atolopeya. Nalu, ole lene bala banisa okonena anda-pangosa peke lolopeya. Wamba namba epo ata napenenga, akali waka minditupa wamba ini epo ateai. Utupane pitaka pake nalaini akali ateyai tekeko, nambana sipisipi tupamane akali utupanena pii oko ale naeyai. Jia. 10 Pake nalaini akali tupamane sipisipi tupa pake mialu, minu koyoto, peyo ome lamakale nembo toto epalaini. Utupane-mane mangene waka mindi pulu na-epalaini. Wuane tekeko, sipisipi utupane kuai lo wete atoto, saka atapowa ateakale nembo toto, namba epewane. 11 Akali minditupa sipisipi tupana anduane ata napene, mee yole moyale piape puato, sipisipi tupa yatawa atalaini. Akali utupane yakamato sipisipi tupa kuai lo yatawa ata na-piyaini. Jia. Sipisipi tupa koyolaini nembo natene, utupane-mane yole moyale sipisipi tupa mee yatawa atalaini. Tene okonena, peango anatope mindi epeando, utupane-mane peango epola okone andoto, sipisipi tupa awua tepa alu, palaka palaini. Palaka polai-kola, peango anatope okonemane sipisipi mindi peyo nola-kola, sipisipi waka tupa mindisa puu toko lolopeyai. Wuane tekeko, peango anatope mindimane sipisipi tupa minu koyolane nembo toto, sipisipi kuai lo yatawa atalane akali mindimane sipisipi tupa moyoyale omape-pene guleando, omolo-peya. Sipisipi kuai lo yatawa atalane akali okone namba. 14 Nambana ayiane okomane namba andeya-kola, nambato bala andalawane. Wuane pua teke, nambato nambana sipisipi tupa andeyo-kola, nambana sipisipi tupamane namba andalaini. Tene okonena, namba sipisipi kuai lo yatawa atene akali oko atoto, sipisipi tupa moyoyale omolo-peyawa. 16 Nambana sipisipi waka minditupa ateyai tekeko, andipa utupane nambana banisa okona anda-pangosa ata napeyai. Nambato sipisipi utupane nambana banisa okonena anda-pangosa atu ipupe-pene. Wuaneko, nambato utupane ee lolowa-kola, utupane-mane nambana pii ale wato, nambana banisa okonena anda-pangosa epolai-angi, nambana sipisipi yame okonelapo sipisipi yame mindiki gulo atolopeyai. Yame mindiki atolai-kola, namba sipisipi utupane pitaka yatawa atalawane akali mindiki atolo-peyawa. 17 Wandakali mindimane namba sia minuto, namba peyo ome nalolo-peya. Jia. Namba tane nambana tandini oko peakale tepa alu, namba omolopeyo. Dee, namba tane teke nambana tandini oko molo-peke loto, katulo saka atolo-peke lolopeyo. Nambana Ayiane okomane wuane pipe leane okonena, mangene okonelapo pulane tai-lene oko nambanga eya. Nambato balana pii okone ale wato, saka atolo-peke lokale nembo toto, sipisipi tupa moyoyale omolopeyo okonena, nambana Ayiane okomane namba towa epelewa yamapane yo ateya. Jisasato wuane lea. 19 Wuane lea-kola, Juta yame akali utupane-mane balana pii utupane ale wato, dee lapone yakama yame lapo gulo ateai. 20 Akali utupanena kambua-mane akali waka tupa lamawuato, balanga sipitisa koo mindi ateya-kola, bala kee ene gulo atoto, wuane leya-ko. Anu peakale yakamato balana pii okone ale eyaipe leai. 21 Wuane leai-kola, Juta yame akali yangi-mane akali utupane lamawuato, sipitisa koo mindimane katulo wandakali lee koo tupa lee taya na-alaini. Dee, Jisasato pii leya utupa sipitisa koo atene wandakali tupamane na-lalaini teke leai. 22 Upa andane wete piyane ana oko epea-kola, Juta yame-mane Jutusaleme lotu anda andane okona asia wamba ini bulupane lumbeaini oto oko lo nembo tolo-peke loto, mali dindi epele alaini oto oko epea. 23 Okone angi, Jisasa bala lotu anda andane okonena ende anda-pangosa anda pimia atane atene Solomonena lalaini okona epoko pua atea. 24 Epoko pua atea-kola, Juta yamena akali kawane minditupa-mane bala ato mapu puato, nimba Mesaya oko ateendo, andoko angi nimbato nanima langulape. Nimba akali okone ateendo, nanima panakame langi-kae leai. 25 Wuane leai-kola, Jisasato utupanena pii okone yano peyoto, namba Ayianena pii wato minuto, nambato piape piyawane tupamane namba Mesaya oko ateya lo yakama andawa leya tekeko, yakamato namba lo bilipi naleyai. Wamba nambato Gotena pii oko yakama langewa tekeko, yakama nambana sipisipi yame ata nepeai. Tene okonena, yakamato nambana pii oko bilipi naleai. 27 Nambato nambana sipisipi tupa andeyo-kola, utupane-mane nambana pii ale wato, namba watama epalaini. 28 Nambato utupane saka atapowa ateakale lo ataya olowa-kola, matili-matilipi utupane alu napulu-peyai. Jia wete. Nambana Ayiane okomane wandakali utupane nambana yame ateakale lo namba geane. Balato minditaka eya tupa pitaka sia minuto, tai wetete ateya okonena, wandakali mindikipi mindimane namba Ayiane okona yame atolaini wandakali utupanena mindikipi mindi pii-mane lo tambo-tambo loto, katulo namolo-peyai. Jia. Namba Ayiane nalipa mindiki ateyapa. Tene okonena, wandakali mindikipi mindimane sipisipi nambana kini tokonga atolai utupane katulo tikayu namolo-peya. Jia. Jisasato wuane lea. 31 Balato namba Ayiane nalipa mindiki ateyapa lea-kola, Juta yame akali utupane-mane bala peyo ome loyale ana minditupa meai. 32 Ana minditupa meai-kola, balato utupane lamawuato, nambana Ayiane okomane namba languato, nimbato piape epene minditupa pipe lea-kola, nambato piape epene kambua pewa. Yakamato nambana piape epene utupanena andoko embo wato, namba ana-mane peyo ome loyale peyaipe lea. 33 Wuane lea-kola, Juta yame akali utupane-mane balana pii okone yano peyoto, nanimato nimbana piape epene mindi nembo toto, nimba ana-mane peyo ome loyale napeyama. Jia. Nimba mee yuunga akali mindi atele tekeko, nimbato Gote lamba loto, nimba tane Gote ateyo lele okonena, nanimato nimba ana-mane peyo ome loyale peyama leai. 34 Wuane leai-kola, balato utupanena pii okone yano peyoto, Gotena pii pepa pelene eya mindimane loto, nambato yakama Gote tupa ateyai lewa layene eya lea. 35 Wamba Goteto Isatale tane wandakali tupa lamawuato, yakama Gote tupa ateyai lea-kola, mindimane pii okone pepa pelea-kola, wandakali mindikipi mindimane katulo Gotena pii pepa pelene eya okone mo lawa napulu-peya. 36 Ayiane Goteto namba ati kenga atala yuunga puu lalu, namba balana Iwanane ateya lea-kola, nambato yakama languato, namba Gotena Iwanane ateyo lewa-ko. Anu peakale yakamato nambana pii okone ale wato, nimbato Gote lamba lele leyaipe. 37 Nambato namba Ayiane okona piape pua ata napewando, yakamato namba balana Iwanane oko ateya lo bilipi na-lalapape. 38 Nambato wuane leyo tekeko, namba Ayiane okona piape pua atalawane-ko. Yakamato nambana pii oko bilipi naleaindo, Ayiane Gote oko nambanga ateya-kola, namba balanga ateya lo yakamato andamakale nembo toto, nambato balana piape pimai-yawane tupa andoto, namba balana Iwanane ateya lo bilipi lalapape. Jisasato wuane lea. 39 Wuane lea-kola, Juta yame akali utupane-mane dee lapone bala andi loyale makande peaini tekeko, balato utupane asia peyo wanjialu pea. 40 Jutusaleme tepa alu, bala ipa Jotane oko kalo piyu, amo maita Joneto wamba ini bulupane wandakali tupa ipa peya-mauwa ateane yuu okona poto, atea. 41 Yuu okonena atea-kola, wandakali kambua bala ateanga epeai. Utupane-mane pii mindi loto, enene, wamba Joneto bala tanena pii lea tupa mo tai laya wato, metekolo piape mindi napeane tekeko, Jisasato wua pulupeya lo Joneto pii leane tupa pitaka enene pii lea ya leai. 42 Yuu okonena tane wandakali kambua-mane wuane loto, Jisasa lo bilipi leai.

11

1 Betani tano okona tane akali Lasatosa lene mindi bala siki oma-yene yaepia. Betani tano okone bala wanda Matiya, balana akini Mata-la, okone-lapona yuu tene oko yane. 2 Matili Matiya okonemane wele tunduma-pene mindi Akali Andane okona kenenga gae loto, balana kawa itini-mane kunu apia-maiya. Matiya, Mata-la, okone-lapona imalini Lasatosa oko bala siki oma-yene ya-kola, balana imalini okonelapo-mane pii mindi Jisasa ateanga wai lo aimo loto, Akali Andane, akali nimba towa epelewa yamapane yo atalene pia okone bala siki oma-yene eya leapelepia. 4 Wuane leapele okone ale wato, Jisasato pii mindi loto, Goteto Lasatosa bala mee omeakale nembo toto, siki okone balanga epeakale lo ando konda nayane. Jia. Wandakali-mane Gote Iwanane okona gene oko laiyu leakale nembo toto, Goteto balana tai-lene oko andawa loyale, siki okone Lasatosa balanga epeakale lo ando konda yane lea. 5 Gotena tai-lene oko wandakali tupanga andawa lokale nembo toto, Jisasato Lasatosa siki oma-yene eya lene ale wato teke, bala wamba kapoyale andolo puu napene, ole lapoai bala yuu ateane okonena mee maliyo atea. Jisasato Mata, balana akini Matiyapi, okone-lapona imalini Lasatosapi, utupane towa epelewa yamapane yo atalaepia. 7 Wuaneko, ole okonelapo pea-angi, balato balana disaipolo tupa lamawuato, nanima Jutiya disitiki okona peke lamakale lea. 8 Wuane lea-kola, balana disaipolo tupamane bala lamawuato, tisa, Juta yame akali tupamane nimba ana-mane peyo ome loyale pipiai-ko. Nimbato yuu okonena dee lapone polape leai. 9 Wuane leai-kola, Jisasato utupanena pii okone yano peyoto, upa pitane nai oko epoto, tama pulu, ole-lene andaka palane lea. Nai tola-kola, wandakali mindi bala epoko pua ateando, balato asini oko kuai lo andoto, ayia peya napulu-peya. 10 Wandakali okone ayia peya napulu-peya tekeko, wandakali mindi bala utulu epoko pua ateando, yuu oko undupi lola-kola, balato asini kuai lo anda napene, ayia peyolo-peya lea. 11 Wuane lalu, balato pii mindi tako pua loto, nanima towa epelewa atalane akali Lasatosa oko bala limu palia ondo apiya-ko. Nambato bala peya ika lolo pokale lea. 12 Lasatosa manda tapia nembo toto, Jisasato bala limu palia ondo apiaya-ko leane tekeko, balana disaipolo tupamane Lasatosa mee limu palipia-kola, wuane leya nembo teainipia. Wuane nembo toto, utupane-mane bala lamawuato, Akali Andane, Lasatosa limu paleando, balana siki oko atu yolopeya yalua leai. 14 Wuane leai-kola, balato utupane panakame lamawuato, Lasatosa wamba manda tapia lea. 15 Yakamato namba lo bilipi leyama nayu bilipi lalapale nembo toto, namba bala towa atu ata napiwa-kola, bala wamba manda tapia. Wuane tekeko, nambato bala malinga ika laya olowa-kola, yakamato namba lo bilipi leyama nayu bilipi lolopeyai nembo toto, namba epele wete eyo. Andipa bala manda-tene eya okona nanima maa lea. 16 Wuane lea-kola, akali Tomasa gene mindi Ditimasa lene okomane disaipolo waka tupa lamawuato, nanima bala towa atu omolo maa lea. 17 Betani tano oko Jutusaleme mandaka gulo kilomita tepopi mindi angu ya-kola, Juta yame wandakali kambua-mane Lasatosa manda tapia lene oko ale yainipia. Ale wato, utupane-mane Matiya, Mata-la, okone-lapona yamapane mo epene pale lamakale nembo toto, Jutusaleme tepa alu, okonelapo peteapi okona poto, ateainipia. Matili Jisasa bala peakaiyu lea-angi, wandakali-mane bala lamawuato, Lasatosa mali pima-kola, ole tukumindi pupia leai. 20 Matato Jisasa epeya lene ale wato, asininga poto, Jisasa malanda ya. Matiya bala mee andaka petea. 21 Matato Jisasa malanda ya-angi, bala lamawuato, Akali Andane, nimba wali atapi-yale, nambana imalini oko oma napipia-yale. 22 Andipapi nimbato Gote lo pote loto, balato nimba moyoyale mangene mindi peakale leendo, balato ale wato, nimbato lole pua pulupeya lo nambato nembo teyo lea. 23 Wuane lea-kola, Jisasato bala lamawuato, nimbana imalini oko malinga ika lolopeya lea. 24 Wuane lea-kola, Matato bala lamawuato, matili yuu koyo puyale pula-kola, wandakali omene tupa malinga ika lolai okone angi, nambana imalini okone bala malinga ika lolopeya nembo teyo lea. 25 Wuane lea-kola, Jisasato bala lamawuato, nambato wandakali omene tupa malinga ika laya wato, saka atapowa ateakale lo ataya alawane-ko. Namba lo bilipi lene wandakali mindi omoto teke, malinga ika lalu, saka atapowa atolopeya lea. 26 Namba lo bilipi loto, saka atapowa atolai wandakali utupane yakama katulo dee lapone oma napulu-peyai. Nimbato wuane lo bilipi lelepe lea. 27 Wuane lea-kola, Matato balana pii okone yano peyoto, enene, Akali Andane nimba Gote Iwanane oko atele lo bilipi leyo. Nimba Mesaya wamba Goteto yuunga epeakale lolo-peyawa leane oko atele lea. 28 Matato wuane lalu, andaka peke loto, balana akini Matiya tengamane lamawuato, tisa oko mandaka epo atoto, nimba ipu leya leaipia. 29 Wuane lea-kola, Matiyato pii okone ale wato, kapoyale ika lalu, Jisasa malanda olo peaipia. 30 Matiya bala kapoyale ika lalu, kamaka pea-kola, Juta yame wandakali bala yamapane mo epene pale lamakale loto, bala towa atu andaka peteaini tupamane bala malinga ai lolo peya nembo toto, bala watama peainipia. Jisasa bala Betani tano okona naepene, Mata asininga malanda yane ongane mee maliyo atea. 32 Maliyo atea-kola, Matiya epoto, Jisasa andoto, balana kee yane ongane aiki lekawa, tombawua loto, Akali Andane, nimba wali atapi-yale, nambana imalini oko oma napipia-yale lea. 33 Wuane lalu, Matiyato ai lo yamataka lea-kola, Juta yame wandakali bala towa atu epeaini tupamanepi ai lo yamataka teke leai. Utupane-mane ai lo yamataka leai oko andoto, Jisasato utupane ondo wato, yamapane kenda wete ya. 34 Yamapane kenda wete wato, bala ai lea. Ai lea-kola, Juta yame wandakali tupa yakama teke-teke pii lalawa puato, balato Lasatosa towa epelewa yamapane wete yalaeya oko andalapa leai. Utupane-mane wuane leaini tekeko, yangi-mane pii mindi loto, balato akali lee koo mindi lee taya yako. Balato Lasatosa towa epelewa yamapane wete yapia-yale, bala oma napeakale nembo toto, katulo bala moyapia-yale jiape leai. Wuane leai-kola, balato utupane tipa puato, yakamato bala aninga mali pipiaipe lea-kola, utupane-mane bala lamawuato, Akali Andane nimbato andolo ipu leai. 38 Nimbato andolo ipu leai-kola, Jisasa bala dee lapone yamapane kenda wete wato, Lasatosa mali pitane yanenga pea. Wamba Lasatosa yame tupamane bala ana anda mindina mali puato, ana andane mindimane mali okona asia tuma peainipia. 39 Mali okona asia oko ana andane mindimane tuma pitane atea-kola, Jisasato akali minditupa lamawuato, yakamato ana oko minu pendeke lo apialapa lea. Wuane lea-kola, akali omeane okona imalini Matato Jisasa lamawuato, Akali Andane, nambana imalini oko mali pitane atapia-kola, ole tukumindi pupia-ko. Andipa bala tamuto, guu koo pulupeya lea. 40 Wuane lea-kola, Jisasato bala lamawuato, nimbato namba lo bilipi leendo, Gotena tai-lene andane oko andolopele lo nambato nimba wamba langiyo okoni lea. 41 Wuane lea-kola, utupane-mane ana okone minu pendeke lo apeai. Apeai-kola, Jisasa bala ati kenga andaiyu loto, nambato loma eyo-kola, Ayiane Gote nimbato ale alene okonena, nambato nimba wayu pele leyo lea. 42 Ole dindi lo nambato loma eyo-kola, nimbato ale alene lo nambato nembo teyo tekeko, wandakali onga ateyai tupamane mangene mindi nambato puluwa okone andoto, nimbato namba ati kenga atala yuunga puu lee-kola, namba epea ya lo bilipi leakale nembo toto, nambato loma oko eyo lea. 43 Wuane lalu, Jisasato pii taimane loto, Lasatosa, nimba takita ipu lea. 44 Takita ipu lea-kola, wamba manda teane akali Lasatosa bala saka atolo-peke lalu, mali okona takita epea. Wamba bala manda tea-angi, wandakali tupamane bala mali puyale, balana kinipi, kenepi, kawanepi, utupane lapa-lapa minditupa-mane ombo wato, tongo peainipia. Bala malinga ika lea-angi, Jisasato wandakali tupa lamawuato, bala katulo epoko peakalenga, yakamato lapa-lapa tupa tita lo tepa alapa lea. 45 Jisasato Lasatosa malinga ika laya yane okone angi, Matiya towa atu Juta yame wandakali epeaini utupanena kambua-mane metekolo piape Jisasato peane okone andoto, bala lo bilipi leai. 46 Wuane tekeko, wandakali utupanena minditupa-mane Patasai tupa ateainga poto, wamba Jisasato metekolo minditupa piyu, andipa Lasatosa malinga ika laya ala lo lamai-yainipia. 47 Lamai-yaikola, Patasai tupapi, pitisa akali kawane tupapi, utupane-mane akali kanjole tupa epeakale lo mo amunguli puato, akali okonemane metekolo piape kambua piyane leainipia. Balato metekolo piape kambua pua ateakale loto, nanimato ando kondemando, wandakali tupa pitaka-mane bala lo bilipi lolai-kola, Lomo tane gapomane ami tupa epoto, Juta yame wandakali nanima minu koyalu, nanimana lotu anda andane oko keao lo apolopeyai. Wuane pulaini nembo toto, nanimato anu piamape leainipia. 49 Akali utupanena mindi gene Kayapasa lene okone bala ee ana okonena pitisa akali kawane oko ateaipia. Balato akali waka utupane lamawuato, kenda-pene nanimanga eya oko mo tika pulane asini oko yakamato aŋakopi mindi nembo nateyai lea. 50 Lomo tane ami tupa epoto, nanima minu koyaindo, Juta yame wandakali nanima pitaka alu pulumane. Akali mindiki-mane nanimana panda moto omeando, bala omola okonemane nanima moyolo-peya lo yakamato nembo nateyaipe leaipia. 51 Pii leane okone Kayapasa bala tane angu nembo toto naleaipia. Jia. Ee ana okonena bala pitisa akali kawane atoto, potopisa pii mindi loto, Jisasato Juta yame wandakali tupa moyoyale omolo-peya leaipia. 52 Jisasato Juta yame wandakali tupa angu moyoyale omolo-peya naleaipia. Jia. Jisasato Gotena andopane yuu waka-waka tupa puu toko lene tupa mo amunguli puato, yame mindiki gulaya oyale, bala omolo-peya loto, pitisa akali kawane okonemane pii okone leaipia. 53 Kayapasato pii okone lea-kola, ole okone angi ato tewa, Patasai tupapi, pitisa akali kawane tupapi, utupane-mane Jisasa peyo ome lamakale loto, pii mindi lo puta peainipia. 54 Utupane-mane pii okone lo puta peai-kola, okone angi tewa, Jisasa bala Juta yame wandakali tupana tombenenga panakame epoko pua ata napea. Jia. Balana disaipolo tupa towa atu bala Betani tano oko tepa alu, tano Epotame lene okona poto ateai. Tano okone wandakali napalene yuu yane mindina mandaka ongane ya. 55 Okone angi, Juta yame wandakali tupamane Pasopa tomo nalaini oto oko mandaka gulea-kola, wandakali kambua-mane Gotena wenonga yakamanga koo tene mindi nayapia lakae lo nembo toto, wamba ini Jutusaleme peainipia. 56 Wandakali utupane lotu anda andane okona banisa anda-pangosa kolandaka loto, Jisasa ayia pua ateai-kola, pitisa akali kawane tupapi, Patasai tupapi, utupane-mane wandakali utupane lamawuato, nanimato Jisasa andi lamakale-ko. Mindimane bala mindinga ateya nembo teaindo, nanima langi-yapape leainipia. Wuane leai-kola, wandakali utupane yakama teke-teke pii lalawa puato, Juta yamena akali kawane tupamane bala peyo ome lolane lo yuku wato, Jisasa bala Pasopa tomo oko nolo naepolo-peya. Jia wete. Nanimato wuane nembo teyama. Yakamato aki nembo teyaipe leainipia.

12

1 Ole wataka angu pola-kola, Juta yame wandakali tupamane Pasopa tomo nalaini oto oko epolopeya nembo toto, Jisasa bala Betani tano okona pea. Tano okone akali Lasatosa wamba Jisasato malinga ika laya yane okonena yuu tene oko ya. 2 Jisasa bala epea-kola, wandakali minditupa-mane balana tomo yanga-maiyai. Lasatosapi, wandakali waka minditupapi, utupane Jisasa towa atu peteai-kola, wanda Matato tomo tupa tale pua maya. 3 Jisasa bala tomo no petea-kola, Matiyato wele tunduma-pene kapo lapo petene pene mindina awua epoto, Jisasana kenenga gae lo ayia maya. Wuane puato, Jisasana kenenga ipati peane oko Matiyato balana kawane itini-mane kunu apia maya-kola, wele okonena tunduma epene peane okomane anda okonena tawe ya. Wandakali minditupa-mane ita nata lene okona pini tupana ipane penge lo moto, wele tunduma-pene okonepene tupa waa peyai-kola, wandakali waka tupamane wele okonepene tupa muni kambua-mane kambalaini. 4 Jutasa Isaka-tiyote bala Jisasana disaipolo tupana mindi atoto teke, matili bala ene petea. Matiyato wele tunduma-pene okone Jisasana kenenga gae lo ayia maya-angi, Jutasato wandakali waka tupa tipa puato, 5 anu peakale wanda okomane wuane peyape. Balato wele oko nanima gipia-yale, nanimato wele okone salimi loto, muni kina andete tepo moto, katulo wandakali tipia tupa moyo maima-yale lea. 6 Balato pii leane okone wandakali tipia tupa nembo toto, nalea. Jia. Balato disaipolo tupana muni tupa ando atoto, minditupa pake miaka pua atalaepia. Tene okonena, balato wele okone nanima gipia-yale, nambato okone salimi loto, muni mialu, minditupa katulo pake miawa-yale nembo toto, wuane lea. 7 Wuane lea-kola, Jisasato bala lamawuato, ole dindi lo wandakali tipia tupa yakama towa atu atolopeyai tekeko, namba yakama towa ole dindi lo ata napulu-peyama. Wandakali-mane namba mali pulai-angi, wanda okomane wele okone nambana umbaininga gae lokale nembo toto, wele okone yatawa pitipia-ko. Andipa balato wele okone gae leya oko gae leakale lo nimbato ando kondaa lea. 9 Juta yame wandakali kambua-mane Jisasa bala Betani tano okona ateya lene oko ale wato, wamba balato Lasatosa malinga ika laya yane nembo toto, Jisasa, Lasatosa-la, okonelapo lapotaka andolo epeai. 10 Wamba Jisasato Lasatosa malinga ika laya yane nembo toto, Juta yame wandakali kambua-mane pitisa akali kawane tupa masia maiyu, Jisasa lo bilipi leai. Tene okonena, pitisa akali kawane utupane-mane Jisasa, Lasatosa-la, okonelapo lapotaka peyo ome lamakale nembo toto, pii lo yake peainipia. 12 Gotena pii pepa pelene eya mindimane loto, Sayone tano okona tane wandakali yakama yuku aa na-piyapape. Yakamana kiŋi oko bala yia dongi andopane mindina masianenga pitiyu epeya oko andalapa layene eya. Gotena pii pepa pelene eya okonemane wuane layene yane pua teke, anate-lene Jisasa bala yia dongi andopane mindi ayia pua moto, okonena pitiyu, Jutusaleme poyale, asini pea. Asini pea-kola, Pasopa tomo noyale Jutusaleme peaini wandakali kambua-mane Jisasa epeya lene oko ale wato, utupane-mane ita pama kembone tupa yando moto, Jisasa asininga malanda olo epeai. Epoto, utupane-mane pii taimane loto, akali epeya oko bala Isatale tanena kiŋi oko ateya leai. Akali Andane Goteto bala epeakale leya-kola, bala epeya. Goteto bala moyo ateakale. Nanimato Gotena gene oko laiyu lamakale leai. 16 Wandakali utupane-mane wuane leai-angi, Jisasana disaipolo tupamane Gotena pii pepa pelene eya okone nembo tolo-peke naleai. Wuane tekeko, matili Goteto gene andane mindi Jisasa maya-angi, balana disaipolo tupamane mangene balato peane okola, pii wandakali utupane-mane leaini okola, okonelapo nembo tolo-peke loto, Gotena pii pepa pelene eya okone Jisasa andayo layene yane nembo teai. 17 Wamba Jisasato Lasatosa malinga ika laya wato, mali okona kamaka epeakale lea-angi, wandakali kambua bala towa atu atoto, andeai. Andoto, utupane-mane Jisasa balato wuane peane okone pii lo tawe yai. 18 Lo tawe yai-kola, Jisasato metekolo piape okone peane lene oko ale wato, wandakali kambua-mane Jutusaleme tepa alu, bala malanda olo peai. 19 Bala malanda yai-kola, Patasai tupamane yakama teke-teke mindi lamaiki puato, wandakali tupa pitaka-mane bala watama peyai oko andalapa. Wandakali-mane bala watama napeakale lo nanimato mangene peyama tupa katu naleya leainipia. 20 Juta yame wandakali tupamane Pasopa tomo nalaini oto oko epea-kola, wandakali kambua Gote lo lotu loyale Jutusaleme peai. Wandakali utupanena minditupa Gitiki yame wandakali ateai. 21 Gitiki yame wandakali utupane-mane Galili disitiki tano Betesaita tane Pilipi ateanga epoto, akali andane, nanimato Jisasa andaima lakae lo nembo teyama leainipia. 22 Wuane leai-kola, Pilipi epoto, Endutu lamaiya-kola, Pilipi, Endutu-la, okonelapo-mane poto, Jisasa lamai-yapili. 23 Lamaiyapi-kola, Jisasato okone-lapona pii okone yano peyoto, Akalina Iwanane oko gene andane miape-pene oto oko wamba mandaka epeya lea. 24 Nambato pii enene wete mindi yakama langeyo. Witi dini mindi bala oma napene, mee andaka yando, dini lia napene, bala angu yalane tekeko, bala yuunga tepa wato, omeando, bala poka loto, dini kambua lialane. 25 Wandakali mindimane namba masia mawuato, yuu okona mangene piyamane tupa epelewa yamapane yo ateando, balato mangene utupane pua atapowa ateakale lo Goteto ando konda napulu-peya tekeko, wandakali mindimane yuu okona mangene piyamane tupa masia mawuato, namba epelewa yamapane yo ateando, matili bala saka atapowa atolopeya. 26 Wandakali mindimane nambana piape pua ateaindo, namba watama epeakale. Yakamato namba watama epeaindo, nambana Ayiane okomane gene andane mindi yakama gula-kola, namba atolowa yuu okonena yakama namba towa atu atolo-peyama. Jisasato wuane lea. 27 Wuane lalu, Jisasato pii minditupa tako pua loto, andipa kenda-pene andane mindi nambanga epoyale peya okonena, namba mini kenda wato, nembo kambua teyo lea. Nembo kambua toto, nambato aki loape. Ayiane, kenda-pene okone nambanga epolane nembo toto, nimbato asia pai laa loape. Jia. Nambato wuane na-lokale. Kenda-pene okone awuakale nembo toto, namba epewane. 28 Ayiane, nimbana gene oko andane eya lo andawa lape lea. Wuane lea-kola, pii layene mindi ati kenga atala epeane okomane loto, wamba nambato nambana gene oko andane eya lo andawa lewa. Matilipi, nambana gene oko andane eya lo dee lapone andawa lolopeyo lea. 29 Goteto wuane lea-kola, ongane mandaka gulo ateaini wandakali minditupa-mane pii okone kuai lo ale naene, ati kulu leya leainipia. Dee, minditupa-mane pii okone apito leyape lo nembo natene, enjole mindimane pii mindi Jisasa lamaeya leai. 30 Wuane leai-kola, Jisasato utupane lamawuato, Goteto pii lala okone nambato ale ola nalala lea. Jia. Yakamato ale alapale nembo toto, balato pii okone lala. 31 Andipa balato yuu okona wandakali tupa yapa lo tale puyale puato, yuu okona ando atalane sipitisa koo Satane oko peyo watoyale peya. 32 Matili akali minditupa-mane namba auwa aiyu lolai-angi, wandakali pitaka nambanga epeakale nembo toto, nambato utupane yoo lo molo-peyawa lea. 33 Akali minditupa-mane bala ita malamanda okona peyo yuka wato, bala auwa aiyu lolopeyai nembo toto, Jisasato wandakali tupa lamawuato, akali minditupa-mane namba awua aiyu lolopeyai lea. 34 Wuane lea-kola, wandakali amunguli peaini tupamane balana pii okone yano peyoto, akali mindimane Gotena pii pepa pelene eya tupa dii lea-kola, Mesaya oko bala matili-matilipi atapowa atolopeya oko ale ema leai. Bala atapowa atolopeya yando, anu peakale nimbato nanima languato, akali minditupa-mane Akalina Iwanane oko awua aiyu lape-pene eya lelepe. Akalina Iwanane okone bala apipe leai. 35 Wuane leai-kola, Jisasato utupane lamawuato, wandakali mindi bala undupi pangosa epoko pua ateando, bala onga peya lo anda napulu-peya lea. Tii-pene oko ole mindilapo angu yakama towa atu atolo-peyako. Matili undupi-lene okomane yakamanga yame peyolane nembo toto, tii-pene okomane mee tii pua ateya okone angi, yakama epoko pua atalapape. 36 Andipa tii-pene oko yakama towa atu ateya-angi, yakamato tii-pene okona andopane tupa atamakale nembo toto, bala lo bilipi lalapa lea. Jisasato pii okone lalu, wandakali amunguli peaini utupane tepa alu, bala yuu mindisa ata too pulu pea. 37 Wamba wete potopesa akali Aisayato Mesaya oko bala tai wete atolopeya nembo toto, Gotena pii minditupa pepa peleaipia. Balato pepa okone peyoto, wandakali-mane nambana piape tupa lee-mane andoto, nambana pii okona tene tupa kuai lo nembo toto, yamapane peke leaindo, nambato utupane mo atu yolo-peyawa leaipia. Wuane tekeko, wandakali utupane-mane yamapane peke naleakale nembo toto, Goteto utupanena lene minu undupi laya alu, utupane-mane balana pii okona tene nembo nateakale laya alu, piyane lo layene eya. Balana pii okone layene eya pua Goteto pea-kola, wandakali utupane-mane katulo Jisasa lo bilipi naleainipia. Wamba Aisayato Gotena pii waka mindi loto, Akali Andane okomane metekolo piape minditupa peane tekeko, apito bala tai wete ateya lo andeape. Nanimato wandakali tupa lamawuato, balato metekolo piape utupane piyane lema tekeko, apito nanimana pii utupane bilipi leape lo layene eya. Gotena pii layene okone enene guleakale nembo toto, Jisasato bala tane Mesaya oko ateya lo wandakali tupa andawa loyale metekolo piape kambua peane tekeko, wandakali kambua-mane balana metekolo piape utupane andoto teke, bala lo bilipi naleai. 42 Enene, Juta yamena akali kawane kambua-mane Jisasa lo bilipi leaini tekeko, Goteto yakamana gene tupa laiyu lapia lakae lo utupane-mane nembo nateai. Jia. Wandakali yangone-mane yakamana gene tupa laiyu lapiai lakae lo nembo teainipia. Tene okonena, Patasai tupamane akali utupane Juta yame wandakali waka tupa towa lotu naleakale lolaini lo yuku wato, Juta yamena akali kawane utupane-mane Jisasa lo bilipi leyama lo pana naene konda yai. 44 Okone angi, Jisasato pii taimane loto, namba lo bilipi lolai wandakali tupamane namba angu lo bilipi nalolo-peyai lea. Utupane-mane namba ati kenga atala yuunga puu leane Ayiane oko lo bilipi lolai-kola teke pulupeya. 45 Dee, namba andolai wandakali tupamane namba ati kenga atala yuunga puu leane Ayiane oko andolai-kola teke pulupeya. 46 Namba lo bilipi lolai wandakali mindikipi mindi undupi pangosa ata napeakale nembo toto, namba ale tii-pene mindi gulo atoto, yuu okona epewane. 47 Namba yuu okona epewane oko yuu okona wandakali tupa yapa lo tale pulu na-epewane. Jia. Nambato utupane molo-peke lolo epewane. Wuaneko, wandakali-mane nambana pii oko ale wato, wato mina napeando, nambato bala yapa lo tale puato, koo tene mindi balanga yata na-olopeyo. Jia. 48 Namba tane wua lokale nembo toto, pii na-lalawane. Jia. Namba ati kenga atala yuunga puu leane Ayiane okomane pii utupa lape leya-kola, nambato pii utupane lalawane. Namba Ayiane okona pii okomane wandakali tupa saka atapowa ateakale lo ataya alane nembo toto, nambato balana pii okone ale wato, pii balato namba langeane tupa lalawane. Tene okonena, wandakali mindimane namba masia guato, nambana pii tupa mia napeaindo, yuu koyo pula-angi, nambana pii okomane wandakali okone yapa lo tale puato, koo tene mindi balanga yata olopeya. Jisasato wuane lea.

13

1 Sataneto Saimone iwanane Jutasa Isaka-tiyote okona nembo-tene oko mina ika laya wato, nimbato Jisasa ene pitula leaipia. Wuane lea-kola, anate-lene Pasopa tomo nolane oto oko epolopeya nembo toto, ole-lene wete Jisasa balana disaipolo tupa towa atu tomo no peteai. Wamba Jisasa bala Gote towa atu atalu, yuu okona epea-kola, Goteto pitaka taka balana kininga yata yane nayuto, Jisasa bala yuunga atoto, bala tanena disaipolo tupa towa wayumane wete epelewa yamapane yane tekeko, bala yuu oko tepa alu, balana Ayiane Gote ateyanga peke lolane oto oko wamba mandaka guleya nembo tea. 4 Wuane nembo toto, Jisasato tomo nokoyo piyu, ika loto, balana tona luu peane oko yoko yata wato, tauwali mindi mea. Mialu, balato disa andane mindina ipa gae lo pete loto, balana disaipolo tupana kene wasa-wasa peya-maiki pima poto, utupanena kenenga ipati peane oko tauwali okonemane kuna-maiki pima pea. 6 Wuane pima pulu, Saimone Pita peteanga pea-kola, Pitato bala tipa puato, Akali Andane, nimbato nambana kene wasa-wasa peyoyale pelepe lea. 7 Wuane lea-kola, Jisasato balana pii okone yano peyoto, nambato mangene peyo okona tene oko nimbato andipa nembo natele tekeko, matili nimbato nembo tolopele lea. 8 Wuane lea-kola, Pitato bala lamawuato, andipapi, matili-matilipi, nimbato nambana kene wasa-wasa peya napula. Jia wete lea. Wuane lea-kola, Jisasato balana pii okone yano peyoto, nambato nimba wasa-wasa peya napewando, nimba katulo namba towa atu ata napulupele lea. 9 Wuane lea-kola, Saimone Pitato bala lamawuato, wuane yando, Akali Andane nimbato nambana kene angu wasa-wasa peya napene, nambana kinipi, kawanepi, utupane pitaka wasa-wasa peya-gii lea. 10 Wuane lea-kola, Jisasato bala lamawuato, wandakali mindi balana umbaini pitaka wasa-wasa peyalu, okone angi teke balana umbaini pitaka wasa-wasa peyolo-peke lolane tene mindi ata napeya lea. Balana kene angu wamba ini kalato atola-kola, balato okonelapo wasa-wasa peleando, balana umbaini pitaka kalato ata napene atolopeya. Andipa yakama kalato ata napene ateyai tekeko, yakama pitaka kalato ata napene ateyai naleyo. Jia lea. 11 Ene pitulu-peya akali oko bala kalato atene ateya nembo toto, Jisasato yakama pitaka kalato ata napene ateyai naleyo lea. 12 Jisasato utupanena kene wasa-wasa peya-maiyu, balana tona luu oko mo puato, dee lapone pitulu-peke lea. Pituto, balato utupane tipa puato, nambato mangene mindi yakamanga peyo okonena tene oko yakamato nembo teyaipe lea. 13 Namba yakamana tisa atoto, yakamana Akali Andane oko ateyo teke. Wuaneko, yakamato namba andayo pii tika pua loto, alumindi tisa laka, alumindi Akali Andane laka piyaini. 14 Nambato pii enene wetete mindi yakama langeyo. Piape akali mindimane balana piape ando atalane akali okona lipinga yale ata napiyane. Dee, wai pii awua palane akali mindimane wai pii okone awua peakale lalane akali okona lipinga yale ata napiyane teke. Jia. Namba yakamana tisa okomane mangene mindi peyo, wuane pua teke yakamatopi mangene okone piyapale nembo toto, nambato mana mindi yakamanga andawa leyo. Namba yakamana Akali Andane okomane yakamana kene wasa-wasa peleyo-ko. Yakama teke-teke mindina kene wasa-wasa peya maiki pipe-pene. 17 Yakamato mana oko nembo toto, wato mineaindo, yakama epelewa atolopeyai. Jisasato wuane lea. 18 Wuane lalu, Jisasato pii mindi tako pua loto, nambato pii enene wete mindi yakama langeyo lea. Nambato wandakali mindi bala nambana piape pulu peakale lolowa-kola, wandakali waka mindimane bala wayu epeleya lo lameando, balato namba wayu epeleya lo lamola-kola teke pulupeya. Dee, wandakali mindimane namba wayu epeleya lo lameando, balato namba ati kenga atala yuunga puu leane Ayiane Gote okopi lamola-kola teke pulupeya. Wuane tekeko, Goteto balana pii pepa pelene eya mindi enene guleakale nembo toto, namba towa atu betesa neyapa akali okomane namba ene peteakale lo ando kondolo-peya. Nambato yakama pitaka-mane wuane pulupeyai naleyo. Jia. Nambato yapa lo mewa akali tupa yakamana mana tupa andeyawane. Matili akali mindimane namba ene pitula-angi, yakamato namba Mesaya oko ateya lo bilipi lalapale nembo toto, andipa balato namba ene piti napene ateya-angi, nambato pii oko yakama wamba ini langeyo lea. 21 Pii okone lalu, Jisasa bala nembo kambua toto, yamapane kenda wete wato, nambato pii enene wete mindi yakama langeyo. Yakamana mindimane namba ene pitulu-peyai lea. 22 Wuane lea-kola, nanimana apito wuane pulupeya leyape lo tatake wato, balana disaipolo tupa yakama teke-teke mindi andaka piki peai. 23 Okone angi, disaipolo mindi Jisasato wayumane epelewa yamapane yo ateane oko bala peteanga mandaka wete gulo petea. 24 Mandaka petea-kola, Saimone Pitato disaipolo okone ando wenone titi loto, bala lamawuato, nimbato bala tipa puato, nanimana apito wuane pulu-peyape laa lea. 25 Pitato wuane lea-kola, disaipolo okone bala Jisasana kangaluane yanenga kawa aimo loto, Akali Andane, apito wuane pulupeya lelepe lea. 26 Wuane lea-kola, Jisasato balana pii okone yano peyoto, nambato betesa konde-lene mindi disanga tanda puato, akali mindi malupeyo. Akali okonemane namba ene pitulu-peya lea. Wuane lalu, Jisasato betesa konde-lene mindi disanga tanda puato, Saimone Isaka-tiyote iwanane Jutasa oko maya. 27 Jutasato betesa okone mea-angi, Satane balana ini anda-pangosa kolandaka lea-kola, Jisasato bala lamawuato, nimbato mangene mindi pukale nembo tele oko wamba ini pii lea. 28 Wuane lea-kola, tomo no peteaini akali tupamane pii okone ale yaini tekeko, anu peakale balato wuane leyape nembo nateai. Jutasato disaipolo yamena muni tupa ando ata-maiyane okonena, minditupa-mane Jisasana pii okone ale wato, Jutasato muni minditupa wandakali tipia tupa wamba ini maiyakale nembo toto, wuane leya nembo teai. Dee, yangi-mane Jisasana pii okone ale wato, Jutasato Pasopa tomo nolane tupa wamba ini kambolo peakale nembo toto, wuane leya nembo teai. Tene okonena, utupane-mane Jisasana pii okone ale wato teke, Jutasato bala wamba ini ene pitulu peakale nembo toto, wuane leya nembo nateai. 30 Jisasato Jutasa lamawuato, nimbato mangene mindi pukale nembo tele oko wamba ini pii lea-angi, Jutasato betesa okone mialu, wamba kapoyale kamaka pea. Bala kamaka pea-angi, yuu oko undupi lamangua ya. 31 Jutasa bala kamaka pea-kola, Jisasato balana disaipolo waka tupa lamawuato, andipa Akalina Iwanane oko bala gene andane mindi meya-kola, Goteto gene andane mindi Akalina Iwananenga meya lea. 32 Goteto Akalina Iwanane okonga gene andane mindi mialu, wamba kapoyale gene andane mindi bala malupeya. 33 Yakamato mindi akali towa epelewa yamapane yaka pua ateaindo, wandakali pitaka-mane yakamana mana okone andoto, yakama nambana disaipolo tupa ateyai lo andolo-peyaiko. Yakama nambana disaipolo tupa ateyai lo andeakale nembo toto, nambato loo wenene mindi yakama geyo. Nambato yakama towa epelewa yamapane yo atalawane pua teke, yakamatopi mindi akali towa epelewa yamapane yaka pua atalapape. Nambana andopane yame, ole aŋalapo angu namba yakama towa atu atalu, nambato yakama tepa alu polowa-kola, yakamato namba aiya pulupeyai tekeko, wamba nambato pii mindi Juta yame wandakali tupa lamaewane okone teke andipa nambato yakama langeyo. Yuu namba polowa okonena yakama katulo naepolo-peyai. Jisasato wuane lea. 36 Jisasato wuane lea-kola, Saimone Pitato bala tipa puato, Akali Andane, nimba aninga polape lea. Wuane lea-kola, Jisasato balana pii okone yano peyoto, yuu namba polowa okonena andipa nimbato katulo watama naepolo-pele tekeko, matili nimbato namba watama epolopele lea. 37 Wuane lea-kola, Pitato bala lamawuato, Akali Andane, nambato nimba moyoyale, namba omape-pene guleando, okone katu-ko. Anu peakale nambato nimba katulo andipa watama naepolo-peyope lea. 38 Wuane lea-kola, Jisasato balana pii okone yano peyoto, nimbato namba moyoyale, nimba omape-pene guleando, okone katu lele tekeko, nambato pii enene wete mindi nimba langeyo. Eka pauli maipa mindimane pii lata naola-kola, ole tepoainga nimbato namba anda na-peyawane lolopele lea.

14

1 Wuane lalu, Jisasato pii mindi balana disaipolo tupa lamawuato, namba Ayianena andaka wandakali atolane lumu kambua atene lea. Lumu kambua ata napipia-yale, lumu kambua ata napeya lo nambato yakama langiwa-yale. Lumu utupanena yakama atalapale lo nambato makande pingulu peyo-ko. Yakamato nembo kambua toto, yamapane kendawa ata na-piyapape. Jia. Yakamato Ayiane Gote lo bilipi leyai pua, namba lo bilipi lalapape. 3 Namba bala ateyanga poto, yakama atalapale panda oko makande pikoyo piyu, namba atolowa yuu okonena yakama towa atu atamakale loto, nambato yakama lamolo-peke lokale. 4 Yuu namba polopeyawa okonena asini oko yakamato nembo teyai lea. 5 Wuane lea-kola, Tomasato bala lamawuato, Akali Andane, nimba aninga polape lo nanimato nembo nateyama-ko. Anu puato, yuu nimba polopele asini oko nanimato katulo nembo tolo-peyamape lea. 6 Wuane lea-kola, Jisasato bala lamawuato, enene pii oko namba lea. Wandakali saka atapowa atolane tene okopi namba teke. Wuaneko, Ayiane Gote ateyanga polane asini oko namba angu ateyo. Wandakali mindi bala asini waka mindina peando, Ayiane Gote ateyanga peakaiyu nalolo-peya. Jia. 7 Wamba yakamato namba wayumane nembo tapiai-yale, yakamato nambana Ayiane oko nembo tapiai-yale teke. Andipa yakamato nambana Ayiane oko andoto, bala okopene ateya nembo teyai lea. 8 Wuane lea-kola, Pilipito bala lamawuato, Akali Andane, nimbato Ayiane oko nanima andawa leendo, okone katu yolopeya nembo teyama-ko. Nimbato Ayiane oko nanima andawa laa lea. 9 Wuane lea-kola, Jisasato bala lamawuato, namba yakama towa atu ataima-kola, ee ana kambua pupia-ko lea. Pilipi nimbato namba api ateyape nembo natelepe. Wandakali mindimane namba andeando, balato nambana Ayiane oko andeya-kola teke piyane-ko. Anu peakale nimbato namba languato, nimbato Ayiane oko nanima andawa laa lelepe. 10 Ayiane oko nambanga ateya-kola, namba balanga atalawane oko nimbato bilipi nalelepe. Pii nambato yakama langiyawane tupa namba tane nembo toto, yakama langi na-piyawane. Jia. Namba Ayiane nambanga ateya okomane pii utupane namba langeya-kola, nambato pii utupane yakama langiyawane. Dee, metekolo piape nambato piyawane tupa namba tane na-piyawane. Jia. Namba Ayiane oko nambanga atoto, balana metekolo piape utupane piyane. 11 Ayiane oko bala nambanga ateya-kola, namba balanga atalane lo bilipi lalapape. Yakamato nambana pii tupa ale wato teke, nambato enene leya lo bilipi naleaindo, yakamato nambana metekolo piape tupa nembo toto, Ayiane Gote oko nambanga atoto, utupane piyane lo bilipi lalapape. 12 Nambato pii enene wete mindi yakama langeyo. Namba lo bilipi lolai wandakali tupamane piape nambato piyawane tupa pulupeyai. Dee, namba Ayiane ateyanga polowa-kola, yakamato nambana gene oko loto, mangene mindi pingipe lolai okone nambato pukale. Tene okonena, namba lo bilipi lolai wandakali yakamato piape nambato piyawane tupa sia minuto, piape andane wete tupa pulupeyai. Yakamato nambana gene oko loto, mangene mindi pingula lo tee leaindo, namba Ayiane okomane balana Iwanane okonga gene andane mindi meakale nembo toto, nambato mangene yakamato tee lolai okone pukale. Jisasato wuane lea. 15 Wuane lalu, Jisasato pii mindi tako pua loto, yakamato namba towa epelewa yamapane yo ateaindo, yakamato nambana pii wato minu atolopeyai lea. 16 Yakamato nambana pii wato minu atolai-kola, Oli Sipitisa okomane nambana panda moto, yakama moyo atapowa ateakale loto, nambato Ayiane Gote oko tee lolowa-kola, balato Oli Sipitisa okone yakama gulupeya. 17 Oli Sipitisa okonemane enene pii oko lalane. Gote lo bilipi nalene wandakali tupamane Oli Sipitisa oko bala ateya nembo natene atoto, balato mangene minditupa piyane lo anda napeyai-kola, utupane-mane katulo bala mia na-piyiani. Wuane tekeko, nambana disaipolo tupa yakamato andeyai-kola, bala yakama towa atu atoto, yakamana anda-pangosa atolopeya ya lo andoto, bala nembo teyai. 18 Ole ukupini mindi pola-kola, Gote lo bilipi nalene wandakali tupamane namba dee lapone anda napulu-peyai tekeko, nambana disaipolo yakama manyani gulo atalapale lo nambato ando konda napulu-peyawa. Jia. Nambato yakama atolainga epolowa-kola, yakamato namba andolopeyai. Namba saka atapowa atolowa-kola, matili yakamapi saka atapowa atolopeyai. 20 Oli Sipitisa oko yakamanga epola-angi, yakamato andolai-kola, namba Ayianenga atalaeya lo andoto, yakama nambanga atolai-kola, namba yakamanga atolowa oko andolopeyai. 21 Nambato leyo pua piyaini wandakali tupamane namba towa epelewa yamapane yo atolai-kola pulupeyai. Utupane-mane namba towa epelewa yamapane yo atolai-kola, nambana Ayiane okomane utupane towa epelewa yamapane yo teke atolopeya. Nambatopi utupane towa epelewa yamapane yo atoto, namba tane utupanenga andawa lolo-peyawa. Jisasato wuane lea. 22 Wuane lea-kola, Jutasato pii mindi bala tipa pea. Jutasa okone bala Jutasa Isaka-tiyote jia. Jutasa waka mindimane Jisasa tipa puato, Akali Andane, anu peakale nimba tane nanimanga angu andawa lolo-pelepe. Anu peakale Gote lo bilipi nalene wandakali tupamane nimba andeakale nembo toto, nimba tane utupanenga andawa nalolape lea. 23 Wuane lea-kola, Jisasato balana pii okone yano peyoto, pii nambato yakama langeyo utupa namba tanena pii tupa jia lea. Namba ati kenga atala yuunga puu leane Ayiane okomane pii utupane namba langeya-kola, nambato pii utupane yakama langeyo. Namba towa epelewa yamapane yo ata napene wandakali tupamane nambana pii wato mina na-piyaini okonena, namba tane utupanenga andawa nalolo-peyo. Wandakali mindimane namba towa epelewa yamapane yo ateaindo, balato nambana pii wato minu atola-kola, nambana Ayiane okomane bala towa epelewa yamapane yo atolopeya. Namba Ayiane nalipa wandakali okonenga epoto, bala towa atu atolo-peyapa. 25 Namba yakama towa atu atoto, pii utupane pitaka yakama langeyo. 26 Wuane tekeko, Oli Sipitisa oko nambana panda moto, yakama moyo ateakale nembo toto, namba Ayiane okomane bala epeakale lolopeya. Yakamato nambana pii tupa pitaka nembo tolo-peke lalapale nayuto, balato yakamana nembo-tene tupa mina ika loto, Gotena mana tupa pitaka yakama langulu-peya. 27 Nambato yakamana yamapane mo tambo laya wato, yakama tepa alu pokale. Gote lo bilipi nalene wandakali tupamane yangone mindina yamapane mo tambo laya alaini pua teke, nambato yakamana yamapane mo tambo laya naeyo. Jia. Nambato utupane sia minuto, yakamana yamapane mo tambo wete laya eyo-ko. Namba yakama tepa alu, polowa-angi, yakamato anu pulu-peyamape lo nembo kambua toto, yuku aa na-piyapape. 28 Namba Ayiane oko ateyanga pulu, matili yakama atolainga peke lokale lauwa. Namba Ayiane balato namba sia minuto, lipinga yale ateya. Wuaneko, yakamato namba towa epelewa yamapane yo atapiai-yale, namba Ayiane oko ateyanga polopeyai leyo okone ale wato, yakamato epele apiai-yale. 29 Matili namba Ayiane ateyanga polowa-angi, yakamato namba lo bilipi lalapale nembo toto, andipa namba Ayiane ateyanga po ata napene ato, yakama wamba ini langeyo. 30 Yuu okona wandakali kambua tupa ando atalane akali koo Satane okona piape akali oko epeya okonena, nambato yakama towa pii kambua lo ata napulu-peyama. Enene, bala tanena tai-lene okomane namba sia minuto, katulo mangene mindikipi mindi nambanga napulu-peya. 31 Wuane tekeko, namba Ayiane oko towa epelewa yamapane yoto, nambato balana pii tupa wato minu atalaeya lo Gote bilipi nalene wandakali tupamane andapiai lakae lo nembo teyo-ko. Nanima ika lalu maa. Jisasato wuane lea.

15

1 Wuane lalu, Jisasato pii mindi tako pua loto, getepe eyaka okona itane enene oko namba ateyo lea. Nambana Ayiane oko bala getepe ee okona anduane atoto, getepe ee okone ando atalane. 2 Namba Ayiane okomane ee okone ando atoto, dini lia na-piyaini kembone tupa pitaka yando apialane. Dini lialane kembone epene tupa pitaka-mane dini minditupa tako pua liakale nembo toto, balato kembone utupane waa puato, utupanena yokone koo tupa pitaka onde lo apialane. 3 Nambato Gotena pii oko yakama langeyo okomane yakama waa peya-kola, yakama kalato ata napene ateyai. 4 Getepe eyaka kembone mindi bala tane kapu toto, tepa yando, kembone okonenga dini mindi katulo lia napulu-peya. Jia. Kembone okone kapu tola-kola, getepe ee ando atalane akali okomane kembone okone balana ee okona kamaka apolopeya. Apola-kola, matili wandakali-mane kembone kapu-tene tupa pitaka mo yomo wato, ita too atene okona yangolo-peyai. Okone taka gulo teke, namba getepe eyaka okona itane ateyo-kola, yakama nambana kembone tupa ateyai. Yakama nambanga ata napene, awua tepa yaindo, yakamanga dini epene mindikipi mindi katulo lia napulu-peya. Jia. Yakama kapu-tene gulo atolai-kola, namba Ayiane okomane yakama mo yomo wato, ita too atene okona yangolo-peya. Wuane tekeko, wandakali mindi nambanga ateando, balanga dini epene kambua lulupeya-ko. Namba yakamanga atolowa-kola, yakama nambanga atalapape. 7 Yakama nambana disaipolo tupa atoto, yakamanga dini kambua lua ateaindo, yakamana mana epene okomane namba Ayiane okona gene oko laiyu lola-kola pulupeya. Kenda-pene mindi yola-kola, nambana Ayiane okomane mangene mindi pipia lakae lo nembo teaindo, yakama namba towa mindiki gulo atoto, nambana pii tupa wato minuto, bala tee loto, mangene mindi pingipe lalapape. Yakamato wuane peaindo, balato mangene okone pingulu-peya. 9 Nambato namba Ayiane okona pii wato minu ateyo-kola, balato namba epelewa yamapane yo atalane. Wuane pua teke, yakamato nambana pii oko wato minu ateaindo, nambato yakama epelewa yamapane yo atolopeyo. Ayiane okomane namba towa epelewa yamapane yo atalane pua teke, nambato yakama towa epelewa yamapane yo ateyo. Nambato yakama towa epelewa yamapane yo atapiai lakae lo nembo toto, yakamato nambana pii oko wato minu atalapape. 11 Nambato epelewa atalawane pua teke, yakamatopi epelewa atapiai lakae lo nembo toto, nambato pii utupa yakama langeyo. 12 Piape anduane mindi bala waka mindinga atoto, balana piape tupa pua ateya-kola, piape anduane okonemane aki peyape lo balana piape akali okomane nembo natalane tekeko, nambana Ayiane okomane pii minditupa namba langea-kola, nambato ale ewane tupa pitaka yakama langewa. Tene okonena, nambato yakama nambana piape akali tupa ateyai nalene, yakama nambana yamapane yene yame ateyai leyo. Yakamato mangene mindi pua atalapa lolowa-kola, yakamato mangene okone pua ateaindo, yakama nambana yamapane yene tupa atolopeyai. Wandakali mindimane balana yamapane yene yame moyoyale omeando, balana mana okonemane wandakali yangone epelewa yamapane yo atalaini mana waka tupa pitaka sia minulu-peya. Namba yakama towa epelewa yamapane yo atalawane wuane pua teke yakamato mindi akali towa epelewa yamapane yaka pua atalapale leyo. 16 Namba yakama towa atu atamakale nembo toto, yakamato namba yapa lo mia napeai. Jia. Yakama nambana yame atalapale nembo toto, nambato yakama yapa lo mewa. Yakamato nambana gene oko loto, namba Ayiane okomane mangene mindi pingeakale lo pote leaindo, balato yakama moyo, mangene okone pingeakale nembo tewa. Wuane nembo toto, yakamanga dini tamu napene, yapowa yalane okonepene tupa lialapale nayuto, yakamato Gotena piape pulu pulupape lo nambato yakama langewa okoni. 17 Yakama teke-teke mindi akali epele aka puato, yamapane yaka pua atalapale nembo toto, nambato pii utupa yakama langeyo. Jisasato wuane lea. 18 Wuane lalu, Jisasato pii minditupa tako pua loto, yakamato namba lo bilipi nalapiai-yale, namba lo bilipi nalene wandakali tupamane yakama towa epelewa yamapane yo atapiai-yale tekeko, yakama wandakali yame okonepene gulo ata napeyai lea. Nambato yakama yapa lo mewa-angi, yakama yame okone tepa alu, nambana yame guleai-kola, utupane-mane yakama towa embo wete yai okoni. Yakama nambana yame ata napeai okone angi, utupane-mane wamba ini namba embo wete yaini oko yakamato embesa olaini. Utupane-mane namba wamba ini embo wete alu, andipa yakamapi embo wete eyai. 20 Piape akali mindimane balana piape anduane okona lipinga yale ata napiyane lo nambato yakama langewa oko nembo tatawa atalapape. Nambana pii wato mina na-piyaini wandakali tupamane yakamana pii oko wato mina napulu-peyai teke. Namba kenda-pene andane giyaini wandakali tupamane kenda-pene andane tupa yakama gulupeyai teke. 21 Namba lo bilipi nalene wandakali tupamane namba ati kenga atala yuunga puu leane Ayiane Gote oko nembo nateyai okonena, yakama nambana disaipolo tupa ateyai nembo toto, utupane-mane mana koo utupane pitaka yakamanga minulu-peyai. 22 Wamba wete Juta yame akali mindimane Gotena pii layene mindi pepa peyoto, nambanga koo tene mindi naya-kola teke, wandakali minditupa-mane namba towa embo wete yai leaipia. Gotena pii pepa pelene eya okone enene guleakale nembo toto, namba wandakali utupanena tombenenga epo atoto, Gotena pii utupanenga lamawuato, metekolo piape kambua pewa. Wamba wandakali waka mindikipi mindimane metekolo piape andane okonepene tupa napeai. Jia. Nambato utupanena tombenenga atoto, metekolo piape andane utupane napewa-yale, utupane-mane namba lo bilipi lolane tene mindi nayapia-yale. Wuane tekeko, utupane-mane nambana metekolo piape andane utupane andoto teke, namba lo bilipi nalene, namba towa embo wete yai. Namba embo wete alaini wandakali utupane-mane nambana Ayiane okopi embo wete eyai-kola, piyaini. Utupane-mane namba Ayiane nalipa lapotaka towa embo wete eyai okonena, utupanenga koo tene mindi eya. 26 Oli Sipitisa oko bala Ayiane Gote oko towa atu atoto, enene pii oko lalane. Nambato bala yakama moyolo epeakale lolowa-kola, bala yakamanga epolopeya. Bala epola-angi, balato wandakali tupa lamawuato, namba Gote Iwanane oko ateya lolopeya. 27 Wamba nambato Gotena piape oko bulupane tewa pewa okone angi, yakama namba towa atu atema. Yakama namba towa atu atama ipulu, andipa ateyama oto oko angi giau leyai okonena, yakamatopi namba Gote Iwanane ateya lo wandakali tupa lamaipe-pene. Jisasato wuane lea.

16

1 Wandakali minditupa-mane namba Ayiane nalipa wayumane nembo nateyai okonena, yakama utupane towa atu lotu lolo epolaini jia loto, utupane-mane yakama peyo watolo-peyai. Dee, matili oto mindi epola-angi, utupane-mane Gotena piape epene mindi peyama nembo toto, yakama peyo ome lolopeyai. Matili utupane-mane kenda-pene andane utupane yakama gulai-angi, utupane-mane wuane pulupeyai lo nambato yakama wamba langea lo yakamato nembo tolo-peke lapiai lakae lo nembo teyo. Yakamato pii utupa nembo tolo-peke loto, namba lo bilipi lalaini mana oko awua tepa naene, bilipi leyama nayu lo atalapale nembo toto, andipa nambato pii utupa yakama langeyo. Jisasato wuane lea. 4 (4b) Wuane lalu, Jisasato pii mindi tako pua loto, wamba bulupane tewa namba yakama towa atu atema-angi, nambato pii utupane yakama langulane tene mindi ata napea-kola, nambato pii utupane yakama langi napewa lea. 5 Andipa namba ati kenga atala yuunga puu leane Ayiane oko ateyanga peke loyale ato, nambato pii utupane yakama langeyo okonena, yakama mini kenda wete eyai tekeko, yakamana mindimane namba tipa puato, nimba aninga pelepe naleyai. 7 Nambato pii enene wete mindi yakama langeyo. Nambato yakama tepa naewando, Oli Sipitisa okomane yakama moyolo naepolo-peya tekeko, nambato yakama tepa alu pewando, nambato bala yakamanga epeakale lokale. Wuaneko, namba yakama tepa alu, namba Ayiane oko ateyanga polowa okomane yakama moyolo-peya leyo. 8 Wandakali minditupa-mane namba lo bilipi naleyai okonena, Oli Sipitisa oko epoto, utupanena mana okone mana koo mindi eya lo utupanenga andawa lolopeya. Namba Ayiane ateyanga polowa-kola, yakamato namba dee lapone anda napulu-peyai okonena, Oli Sipitisa okomane namba akali epene tika-pene mindi ateya lo wandakali utupanenga andawa lolopeya. Dee, Goteto yuu oko ando atalane akali koo Satane oko yapa lo tale puato, koo tene mindi balanga yata yane oko Oli Sipitisa okomane wandakali utupanenga andawa lolopeya. Balato mana tepo utupane namba lo bilipi nalene wandakali tupanga andawa lola-kola, utupane-mane mana utupane kuai lo nembo natene, wamba mana koo tupa minu atemaeya lo andolopeyai. 12 Nambato pii kambua tako pua loto, yakama langualane eya tekeko, andipa yakamato katulo pii utupane kuai lo nembo natolo-peyai. 13 Wuane tekeko, matili enene pii lalane Sipitisa oko epola-angi, bala tane pii mindi nembo toto, yakama langi napulu-peya. Jia. Nambato pii minditupa bala lamalu-wakola, balato ale wato, pii utupane yakama languato, mangene matili pulupeya tupa yakama langulu-peya. Pii utupane yakama languato, balato yakamana nembo-tene tupa mo tika pula-kola, yakamato enene pii tupa pitaka nembo tolopeyai. 14 Oli Sipitisa okomane nambana pii utupane ale wato, yakama langula okonemane nambana gene oko laiyu lolopeya. 15 Ayiane okona minditaka yalane tupa pitaka nambana eya-kola, Oli Sipitisa okomane nambana pii tupa ale wato, yakama langulu-peya leyo. Jisasato wuane leaipia. 16 Wuane lalu, Jisasato pii mindi tako pua loto, ole ukupini mindi pola-kola, yakamato namba anda napulu-peyai. Dee, ole ukupini mindilapo pola-kola, yakamato namba dee lapone andolopeyai lea. 17 Wuane lea-kola, balana disaipolo tupana minditupa-mane yakama teke-teke mindi tipa piki puato, Jisasato nanima languato, ole ukupini mindi pola-kola, namba Ayiane ateyanga polopeyo okonena, yakamato namba anda napulu-peyai leya. Dee, ole ukupini mindilapo pola-kola, yakamato namba dee lapone andolopeyai leya-oko. Balato aki nembo toto, wuane leyape. 18 Oto aki-tupi polopeyape. Balato oto ukupini mindilapo polopeya leya okone nanimato nembo nateyama leai. 19 Utupane-mane pii okone Jisasa tipa pimakale nembo teai-kola, Jisasato okone andoto, utupane tipa puato, nambato yakama languato, ole ukupini mindi pola-kola, yakamato namba anda napulu-peyai. Dee, ole ukupini mindilapo pola-kola, yakamato namba lapone andolopeyai leyo okonena, yakama teke-teke mindi tipa piki peyaipe lea. 20 Nambato pii enene wete mindi yakama langeyo. Nambato yakama tepa alu polowa-kola, namba lo bilipi nalene wandakali tupamane epelewa atolopeyai tekeko, wamba ini nambana disaipolo tupa yakama ai lo yamataka lalu, matili yakama epele wete olopeyai. 21 Wanda-mane andopane mandulane oto oko epola-kola, balana masiane peyola-kola, tandaka andane wete nolopeyo nembo toto, bala yamapane kendawa pitiyaini. Wuane tekeko, andopane kamaka epola-kola, tandaka nolane oko nembo tolo-peke nalolo-peya. Jia. Andopane okone mandiyo nembo toto, wanda oko bala epele wete olopeya. 22 Wuane pua teke, andipa yakamato yamapane kenda eyai tekeko, namba dee lapone epoto, yakama andolowa-angi, yakama epele wete olai-kola, wandakali mindikipi mindimane yakamana epele ene okone katulo mo apia napulu-peya. 23 Oto okone epola-angi, yakamato pii mindikipi mindi namba tipa napulu-peyai. Jia. Wamba ato tewa andipa ateyama oto okona giau loto, yakamato nambana gene oko loto, Goteto mangene mindi pingeakale lo loma yaa napeai tekeko, andipa nambato pii enene wete mindi yakama langeyo. Goteto mangene mindi pingeakale lo yakamato loma yaindo, yakama epele wete alapale nembo toto, balato nambana gene oko nembo toto, mangene okone pingulu-peyako. Yakamato nambana gene oko loto, Ayiane Goteto mangene mindi pingeakale lo loma yalapape. Jisasato wuane lea. 25 Wuane lalu, Jisasato pii mindi tako pua loto, andipa nambato pii kokoli tupa loto, pii utupane yakama langeyo tekeko, matili oto mindi epola-angi, nambato pii kokoli tupa yakama langi napulu-peyo lea. Okone angi, namba Ayiane okomane wua pulupeya lo nambato yakama panakame langulu-peyo. 26 Wamba namba Ayiane oko towa atu atalu, bala tepa alu, yuunga epewane. Andipa namba yuu oko tepa alu, namba Ayiane ateyanga polopeyo. Namba Ayiane oko towa atu atalu, yuunga epeane oko bilipi loto, yakamato namba epelewa yamapane yo ateyai okonena, namba Ayiane okomane yakama epelewa yamapane yo ateya. Tene okonena, namba yuu oko tepa alu, bala ateyanga polowa-angi, balato yakama moyakale loto, nambato bala tee nalolo-peyo. Jia. Yakama tane nambana gene oko loto, balato yakama moyakale lo tee lolai-kola, balato yakama moyolo-peya. Jisasato wuane lea. 29 Wuane lea-kola, balana disaipolo tupamane bala lamawuato, ae, andipa nimbato pii kokoli nalene, pii panakame lele leai. 30 Wandakali mindimane pii mindi nimba tipa napeya-kola teke, nimbato wandakali okone bala wua lo tipa puyale peya nembo toto, balana pii tipa pulane okone yano peyalene. Nimbato okonetaka tupa pitaka nembo talene okonena, nimba Ayiane Gote towa atu atalu, yuunga epeene ya lo bilipi leyama leai. 31 Wuane leai-kola, Jisasato utupanena pii okone yano peyoto, andipa yakamato namba lo bilipi leyama leyai tekeko, yakamato namba lo bilipi leyama nayu leyaipe lea. 32 Ale alapape. Kenda-pene andane mindi nambanga epola-kola, yakama pitaka-mane namba awua tepa alu, palaka puu toko loto, yakamana yuu tene tupana yale-yale polopeyai. Wuane pulane oto oko andipa wamba mandaka epo eya tekeko, namba angu ata napulu-peyo. Jia. Nambana Ayiane oko namba towa atu atolo-peyapa. 33 Yakama yuu okona ateyai-kola, kenda-pene tupa yakamanga epalane tekeko, nambato yuu okona kenda-pene tupa sia minalawane-ko. Yakama yuku naene, yamapane keato yo yanguli pua atalapape. Yakama namba towa mindiki gulo atoto, mini epene palu atalapale nembo toto, nambato pii utupane yakama langeyo. Jisasato wuane lea.

17

1 Jisasato pii utupane lokoyo piyu, ati kenga andaiyu latawa atoto, Ayiane nimba Gote enene mindiki oko angu atoto, namba Mesaya oko atola lo ati kenga atala yuunga puu lee okoni lea. Wandakali-mane wuane lo bilipi leaindo, utupane katulo saka atapowa atolopeyai. Nambato wandakali minditupa saka atapowa ateakale lo ataya ola nembo toto, nimbato wandakali utupane namba giyu, yuu okona wandakali tupa pitaka ando atolane tai-lene oko namba gee okoni. Tene okonena, andipa nambato nimbana gene oko laiyu lolane oto oko wamba mandaka epeya nembo teyo-ko. Nambato nimba gene laiyu lola loto, nimbato nambana gene oko laiyu lape. 4 Ayiane, wamba yuu oko nayenenga, namba nimba towa atu atepa-kola, nambana gene andane ya okoni. Okone angi, nimbato piape minditupa namba guato, piape utupa pula lee. Wuane lee-kola, namba yuu okona atoto, piape utupane pikoyo piwa okomane nimbana tai-lene okola, gene andane okola, okonelapo wandakali tupa andawa lauwa. Andipa namba nimba towa atu atolo-peke lolowa-kola, nimbato gene andane mindiki okone teke namba gii-peke lape. 6 Wamba nimbato yuu okona wandakali minditupa yapa lo mee-kola, utupane nimbana yame ateakale lo nimbato wandakali utupane namba gee. Gee-kola, nambato nimbana mana oko utupanenga andawa lewa. Nambato pii nimbato namba langee tupa wandakali utupane lamaewa-kola, utupane-mane ale yai. Ale wato, wamba namba nimba towa atu atewa-kola, nimbato namba ati kenga atala yuunga puu leene lo utupane-mane bilipi leai. Andipa utupane-mane andeya-kola, pii mana nambanga eya tupa pitaka nimbato namba langeene ya lo andalaini. Nambato nimbana pii oko wandakali utupane lamaewa-kola, utupane-mane nimbana pii okone wato minalaini. 9 Namba lo bilipi nalene wandakali tupa nimbato moyola lo nambato pote naleyo. Jia. Nimbato wandakali namba gee tupa nambana yame atoto, nambana gene oko andane eya lo wandakali waka tupanga andawa lalaini. Nambana wandakali utupane nimbana yame ateyai nembo toto, nambato pote loto, nimbato wandakali utupane moyola leyo. 11 Ayiane nimbato akali minditupa namba gee-kola, nambato utupane towa atu atoto, nimbana tai-lene okomane utupane moyo ando atauwa. Nimbana pii pepa pelene eya mindimane loto, nambana disaipolo tupa alu pulane akali mindiki-mane angu namba awua tepa alu, alu pulupeya layene eya. Pii okone enene guleakale nembo toto, nambato akali okone angu namba tepa alu, bala alu peakale lo ando kondalo. Nambana disaipolo waka tupana mindikipi mindi alu napea. Jia. Namba yuu okona ata napene, nimba atelenga epolopeyo tekeko, akali utupa yuu okona atolopeyai. Ayiane epene wete nimba yale mindi ata napeya-ko. Nalipa mindiki ateyapa pua teke, akali nimbato namba gee utupa yame mindiki ateakalenga, nimbana tai-lene okomane nimbato utupane moyo ando atape. 13 Nambato nimba atelenga epoyale peyo tekeko, andipa namba yuu okona atoto, nambana epele ene oko wandakali utupanenga tumbi leakale nembo toto, pii utupane leyo. 14 Nambato yuunga wandakalina mana koo tupa wato mina na-piyawane. Jia. Nambato nimbana pii tupa nambana disaipolo tupa lamaewa-kola, utupane-mane yuunga wandakalina mana koo tupa wato mina napeyai-kola, yuunga wandakali tupamane utupane towa embo wete eyai. 15 Akali utupane yuu okona ata napeakale nembo toto, nimbato utupane mola lo nambato nimba tee lo loma naeyo. Jia. Sataneto utupane minu koyolane. Nimbato utupane wayumane moyo ando atola loto, nambato nimba tee lo loma eyo. 16 Namba yuunga wandakalina mana koo tupa wato mina na-piyawane pua, nambana disaipolo tupamane yuunga wandakalina mana koo tupa wato minu ata na-piyaini teke. 17 Wuaneko, wamba nimbato namba lo bilipi nalene wandakali tupana tombenenga nimbana piape oko pulu puu leene pua, nambana disaipolo tupamane namba lo bilipi nalene wandakali tupana tombenenga nimbana piape oko pulu peakale lewa. Utupane-mane nimbana piape oko wayumane peakale nembo toto, nambato utupane moyoyale, nambato nimbana piape oko wayumane pukale leyo. Nimbana pii oko enene wetete eya. Nimbana enene pii okonemane akali utupane nimbana piape akali epene wete tupa gulaya ape. 20 Nambana disaipolo utupa angu moyape lo nambato pote naleyo. Jia. Matili wandakali minditupa-mane disaipolo utupanena pii oko ale wato, namba lo bilipi lolopeyai nembo teyo. Nimbato wandakali utupane moyape lo nambato pote leyo teke. 21 Namba lo bilipi nalene wandakali tupamane nimbana pii oko ale wato, nimbato namba ati kenga atala yuunga puu leene lo bilipi lapiai lakae lo nembo teyo. Wuane nembo toto, Ayiane nimba nambanga atele-kola, namba nimbanga atalawane, wuane pua teke namba lo bilipi lolai wandakali tupa pitaka nalipanga atoto, yame mindiki atamakale lo pote leyo. 22 Nalipa mindiki ateyapa, wuane pua teke nalipa lo bilipi lolai wandakali tupa yame mindiki ateakale nembo toto, tii-pene nimbato namba gee oko nambato utupane maewa. 23 Nimbato namba towa epelewa yamapane yo atalene, wuane pua teke nimbato namba lo bilipi lolai wandakali tupa towa epelewa yamapane yo atoto, namba ati kenga atala yuunga puu lee okoni. Namba lo bilipi nalene wandakali tupamane wuane nembo teakale loto, nambana yame oko yame mindiki wetete ateakale nembo toto, namba utupanenga ateyo-kola, nimba nambanga atele. 24 Ayiane, wamba nimbato yuu ati-la yakale nalene atee-angi, nimbato namba epelewa yamapane yo atoto, nimbana tii-pene oko namba gee okoni. Wandakali nimbato namba gee utupane-mane nambana tii-pene okone andeakale nembo toto, yuu namba atolowa okonena wandakali utupane namba towa atu ataima lakae lo nembo teyo. 25 Ayiane epene tika-pene wete, namba lo bilipi nalene wandakali tupamane nimbana mana tupa nembo nateyai tekeko, nambato nimba nembo toto, nimbana mana tupa nambana disaipolo tupanga lapana ewa-kola, utupane-mane nambana pii okone ale wato, nimbato namba ati kenga atala yuunga puu leene nembo teyai. Dee, nimbato namba towa epelewa yamapane yo atalene wuane pua teke, utupane-mane yakamana yangone tupa towa epelewa yamapane yo atapiai lakae lo nembo toto, namba utupanenga atoto, nimbana mana tupa utupanenga lapanawa atolopeyo. Jisasato wuane lea.

18

1 Jisasato pii utupane lo koyo piyu, balana disaipolo tupa towa ipa epo palane Kitone lene oko kalo piyu, ee mindina peakaiyu leai. 2 Wamba ole kambuanga Jisasa balana disaipolo tupa towa ee okonena epo amunguli piki piyaini oko nembo toto, bala ene peteane disaipolo Jutasa okomane Jisasa bala ee okonena poto atolopeya nembo tea. 3 Wuane nembo toto, Jutasato pitisa akali kawane tupapi, Patasai tupapi, utupanena yanda yene minditupa lamialu, ami yanda yene minditupa lamea-kola, utupane-mane lamupi, kaiyapi, kandepa luupi, yandatepi, okonetaka tupa awua ee okonena epeai. 4 Jisasa ene peteane akali Jutasa bala akali utupane towa atu epo atea. Akali utupane epo ateai-kola, kenda-pene balanga epolopeyai tupa pitaka nembo toto teke, Jisasato akali utupane mandaka poto, yakamato api ayia peyaipe lo tipa pea. Tipa pea-kola, utupane-mane balana pii okone yano peyoto, nanimato Nasatesa tane Jisasa oko ayia peyama leai. 6 Wuane leai-kola, balato akali okone namba lea. Wuane lea wete, utupane yakama moko andane loto, aŋa peke lele puato, ayia peyo, yuunga lomba-pene yai. 7 Utupane-mane wuane peai-angi, Jisasato utupane dee lapone teke tipa puato, yakama api ayia peyaipe lea-kola, utupane-mane balana pii okone yano peyoto, nanimato Nasatesa tane Jisasa oko ayia peyama leai. 8 Wamba Jisasato pii mindi Ayiane Gote oko lamawuato, nimbato akali namba gee utupanena mindikipi mindi alu napulu-peya lea. Pii okone enene guleakale nembo toto, balato yanda yene utupane lamawuato, namba Nasatesa tane Jisasa oko ateyo-ko. Yakamato namba ayia peaindo, nambana disaipolo utupa mee peakale lo ando kondalapape lea. 10 Okone angi, Saimone Pitato kandepa luu mindi mandeane okone kilau lo moto, pitisa akali kawane okona piape akali mindina alene tikasa yoko taka lo tepa ya. Piape akali okonena gene oko Malakusa lene. 11 Pitato wuane pea-kola, Jisasato bala lamawuato, namba Ayiane-mane namba tandaka nape-pene leane okonena, nambato tandaka nape-pene jiape. Nimbana kandepa luu oko paliyane andanenga pale lolo-peke laa lea. 12 Wuane lea-kola, ami yanda yene tupapi, utupanena akali kawane okopi, Juta yamena yanda yene tupapi, utupane-mane Jisasa minata wato, eyaka-mane andi leai. 13 Wamba Kayapasato Juta yamena kanjole tupa lamawuato, akali mindiki angu Juta yame wandakali waka tupana panda moto omeando, mana okonemane nanima moyolo-peya leaipia. Ee ana okonena Kayapasa bala pitisa akali kawane atea-kola, akali utupane-mane Jisasa andi lo awua poto, Kayapasana imane Anasa ateanga wamba ini peainipia. 15 Saimone Pita-la, disaipolo waka mindi-la, okonelapo liyamba Jisasa watama peapi. Pitisa akali kawane okomane disaipolo waka okone bala andeyane. Tene okonena, disaipolo okone bala Jisasa watama poto, katulo pitisa akali kawane okona banisa anda-pango kolandaka lea. 16 Wuane tekeko, Pita bala katulo banisa anda-pango kolandaka nalea. Jia. Bala mee kamaka atea-kola, disaipolo mindoko bala kamaka epoto, banisa okona geta ando pitiyane piape wanda oko pii mindi lamaiyu, Pita lamo atu banisa okonena dee lapone anda-pangosa kolandaka lea. 17 Pita bala banisa okonena kolandaka lea-angi, ende okona geta ando pitiyane piape wanda okonemane bala lamawuato, nimbapi Jisasana disaipolo tupana mindi atele ya lea. Wuane lea-kola, Pitato bala lamawuato, namba balana disaipolo mindi jia lea. 18 Upa pea-kola, pitisa akali kawane okona piape akali tupapi, yanda yene tupapi, utupane yakama ita yangoto, upa endo yo ateai-kola, Pita bala poto, akali utupane towa atu upa endo yo atea. 19 Okone angi, pitisa akali kawane okomane Jisasa tipa puato, nimbana disaipolo tupa apipe. Nimbato wandakali tupa mana lamawuato, aki lalenepe leaipia. 20 Wuane lea-kola, Jisasato bala lamawuato, namba too pua atoto, pii mana mindikipi mindi lamai na-piyawane leaipia. Ole dindi lo namba lotu anda andane okona banisa anda-pango yandopi, Juta yamena lotu anda waka mindina yandopi, Juta yame wandakali tupa pitaka amunguli piyaini panda utupanena mindi atoto, nambato pii panakame lamauwa atalawane. 21 Nambato pii lamawua atewa-kola, wandakali utupane-mane ale wato, nambato aki leape nemboto ateyai-ko. Anu peakale nimbato namba tipa pelepe. Nimbato utupane tipa pii leaipia. 22 Wuane lea-kola, yanda yene mindi bala mandaka ateane okomane bala tipa puato, Pitisa akali kawane okona pii okone yano peyoto, anu peakale nimbato wuane lelepe loto, balana kii apene-mane Jisasa peleaipia. 23 Pelea-kola, Jisasato balana pii okone yano peyoto, nimbato nambana pii ale wato, nambato pii koo mindi leya nembo teendo, nambato pii koo wua lele lo nimbato nanima langi. Nambato pii kuai lo leya nembo teendo, anu peakale nimbato namba pelelepe leaipia. 24 Wuane lea-kola, Anasato yanda yene tupa lamawuato, yakamato Jisasa andi lo awua, pitisa akali kawane Kayapasa oko ateyanga pulupa leaipia. 25 Saimone Pita bala upa endo yo atea-kola, akali minditupa-mane bala tipa puato, nimbapi Jisasana disaipolo mindi atelepe leai-kola, balato utupanena pii okone yano peyoto, namba balana disaipolo mindi jia lea. 26 Pitato akali mindina alene yoko taka leane akali okonena yame akali mindi balapi pitisa akali kawane okona piape akali atea. Balato Pita tipa puato, nimba Jisasa towa atu ee okona atale-kola, nambato nimba andalo oko jiape lea. 27 Wuane lea-kola, ole tepone gulo Pitato jia lea. Balato jia lea okone angi teke eka pauli maipa mindimane pii lea. 28 Wamba upa pitane wete, Juta yamena akali minditupa-mane Jisasa andi lo awua poto, Kayapasana anda oko tepa alu, gapomane anda okona peainipia. Juta yamena loo mindimane loto, Juta yame akali mindimane akali yame waka mindina andaka kolandaka leando, Gotena wenonga Juta yame akali okone bala kalato atene gulo atoto, Pasopa tomo oko katulo naa napulu-peya layene yene. Tene okonena, Juta yame akali utupane-mane Pasopa tomo okone namakale nembo toto, Lomo tane gapana Pailate okona andaka kolandaka nalene, kamaka mee maliyo ateainipia. 29 Kamaka maliyo ateai-kola, Lomo tane gapana Pailate bala kamaka epoto, Juta yame akali utupane tipa puato, yakamato aki loto, akali oko kosimi leyaipe leaipia. 30 Wuane lea-kola, utupane-mane balana pii okone yano peyoto, akali okomane koo napiyae pia-yale, nanimato bala nimba atelenga atu aiyu naipuma-yale leainipia. 31 Wuane leai-kola, Pailateto utupane lamawuato, yakamato bala atu aiyu poto, yakama tanena loo tupa wato minuto, bala kosimi lalapa leaipia. Wamba Jisasato balana disaipolo tupa lamawuato, akali minditupa-mane namba ita malamanda okona peyo yuka olai-kola, namba omolopeyo leaipia. Goteto pii Jisasato leane okone enene guleakale nembo tea-kola, Juta yame akali utupane-mane Pailate lamawuato, Lomo tane tupa yakamato loo mindi yata wato, nanima Juta yame akali tupamane wandakali mindi kosimi loto, bala omeakale nalape-pene lalaini leainipia. 33 Wuane leai-kola, Pailate bala gapomane anda okonena andaka kolandaka lolo-peke loto, Jisasa epeakale leaipia. Jisasa epea-kola, Pailateto bala tipa puato, nimba Juta yamena kiŋi oko atelepe leaipia. 34 Wuane lea-kola, Jisasato balana pii okone yano peyoto, nimba tane nembo toto, pii okone namba tipa pelepe. Pee, wandakali waka mindimane namba Juta yamena kiŋi ateya lo nimba langeya-kola, nimbato namba tipa pelepe leaipia. 35 Wuane lea-kola, Pailateto balana pii okone yano peyoto, namba Juta yame akali mindi ata napeyo-ko. Nimbato anu pipi-kola, nimbana Juta yame akali yangone tupapi, pitisa akali kawane tupapi, utupane-mane nimba andi lo awua namba ateyonga epeyaipe leaipia. 36 Wuane lea-kola, Jisasato balana pii okone yano peyoto, yuu okona wandakali-mane namba utupanena kiŋi atola naleai leaipia. Utupane-mane namba makimi lapiai-yale, Juta yame akali tupamane namba andi lo awua na-epeakale nembo toto, utupane-mane Juta akali utupa towa yanda pua atapiai-yale tekeko, namba kiŋi okonepene mindi ata napeyo. Jia leaipia. 37 Wuane lea-kola, Pailateto bala lamawuato, nimba kiŋi mindi-pene mindi atele jiape leaipia. Wuane lea-kola, Jisasato bala lamawuato, nimba tane namba kiŋi mindi-pene mindi ateya lele okoni. Angini-mane namba mandea-kola, nambato enene pii oko wandakali tupa lamauyale namba ati kenga atala yuunga epewane. Enene pii okone wato minu atalaini wandakali tupa pitaka-mane nambana pii oko ale alaini leaipia. 38 (38b) Pailateto wuane lalu, dee lapone kamaka poto, Juta yame tupa lamawuato, nambato balanga koo tene mindikipi mindi ando mia napeyo leaipia. 39 Ee ana dindi lo Pasopa tomo nalaini oto oko epeya-kola, yakamato wandakali katapusa atolane mindi makimi leyai-kola, nambato wandakali okone tita lo tepa alawane-ko. Nambato Juta yame wandakali yakamana kiŋi oko tita lo tepa apia lakae lo nembo teyaipe leaipia. 40 Wuane lea-kola, Juta yame wandakali utupane-mane pii taimane loto, akali okone tita lo tepa olene. Nimbato Batapasa tita lo tepa aa leainipia. Wamba Batapasa bala pake nene akali mindi atoto, gapomane oko yanda pimawua ateaipia.

19

1 Okone angi, Pailateto ami yanda yene minditupa lamawuato, yakamato Jisasa kunju-mane peyalapa lea-kola, utupane-mane bala atu aiyu poto, ole kambuanga kunju-mane peleaini-pia. 2 Peyalu, utupane-mane eyaka ani atene minditupa mo umange pua, kiŋina tangi gulene mindi waa puato, Jisasana kawanenga aiya maiyaini-pia. Aiya maiyu, kiŋi tupamane tona tundupa-pene piyaini okonepene mindi balanga piya mayainipia. 3 Wuane piyu, utupane-mane mindiki-mindiki lo Jisasa ateanga mandaka poto, Juta yamena kiŋi nimba wayu epeleya lalu, bala kii-mane peyaka peainipia. 4 Wuane peai-kola, Pailateto dee lapone kamaka poto, wandakali tupa lamawuato, nambato balanga koo tene mindikipi mindi anda napeyo oko yakamato andalapale nembo toto, bala atu aiyu yakama ateyainga epeyo oko andalapa leaipia. 5 Wuane lea-kola, ani atene eyaka-mane tangi waa peaini okola, tona tundupa-pene okola, okonelapo piyu, Jisasa kamaka epea-angi, Pailateto wandakali utupane lamawuato, akali oko andalapa leaipia. 6 Pitisa akali kawane tupapi, yanda yene tupapi, utupane-mane Jisasa andoto, pii taimane loto, bala ita malamanda okona peyo yuka aa, laka peainipia. Wuane laka peai-kola, Pailateto utupane lamawuato, nambato balanga koo tene mindikipi mindi anda napeyo-ko. Yakama tane bala atu aiyu poto, ita malamanda okona peyo yuka alapa leaipia. 7 Wuane lea-kola, Juta yame wandakali tupamane balana pii okone yano peyoto, nanimana loo mindi eya. Akali okomane bala tane Gotena Iwanane oko ateyo lalane okonena, nanimana loo okonemane nanima languato, bala omape-pene leya leainipia. 8 Wuane leai-kola, Pailateto pii okone ale wato, yuku wete yaepia. 9 Yuku wete wato, bala dee lapone gapomane anda okona kolandaka loto, Jisasa tipa puato, wamba nimba ani atalu, epeepe leane tekeko, Jisasato balana pii okone yano napeleai-pia. 10 Yano napelea-kola, Pailateto bala tipa puato, anu peakale nimbato nambana pii oko yano peya napelepe leaipia. Nimba tinga lo tepa olane tai-lene okola, nimba ita malamanda okona peyo yuka olane tai-lene okola, okonelapo lapotaka nambanga eya oko nimbato nembo natelepe leaipia. 11 Wuane lea-kola, Jisasato balana pii okone yano peyoto, Gote ati kenga ateya okomane tai-lene okone nimba gii napipia-yale, namba minu koyolane tai-lene mindikipi mindi nimbanga nayapia-yale. Wuaneko, nimbato koo mindi pua atele tekeko, Kayapasato namba nimbana kininga yata giya okomane koo wete mindi piya leaipia. 12 Wuane lea-kola, okone angi tewa, Pailateto Jisasa tita lo tepa olane asini mindi ayia peane tekeko, Juta yame wandakali tupamane pii taimane loto, namba tane kiŋi mindi ateyo lalane akali oko bala Lomo tane gapomane akali kawane Sisa oko towa yanda pua atalane akali mindi ateya. Wuaneko, nimbato akali oko tita lo tepa eendo, nimbato gapomane akali kawane okone towa epelewa atalene akali mindi ata napule-kola pulupeya leainipia. 13 Wuane leai-kola, Pailateto Jisasa atu aiyu, gapomane anda okona kamaka poto, Jisasana kote okone yapa lo tale pukale nembo toto, bala toko mindina peteaipia. Bala peteane yuu okonena gene oko ana-mane waa-pene ama oko lene. Iputu pii loto, yuu okonena gene oko Gapata lene. 14 Oto okone angi, Juta yame wandakali tupamane Pasopa tomo oko anate-lene noyale makande pimakale nemboto ateainipia. Otonga tualo kilokopi mindi lea-kola, Pailateto Juta yame wandakali tupa lamawuato, yakamana kiŋi oko andalapa leaipia. 15 Wuane lea-kola, utupane-mane pii taimane laka puato, bala atu aiyu poto, ita malamanda okona peyo yuka aa leainipia. Wuane leai-kola, Pailateto utupane tipa puato, nambato yakamana kiŋi oko ita malamanda okona peyo yuka wape leaipia. Wuane lea-kola, Pitisa akali kawane tupamane balana pii okone yano peyoto, Lomo tane gapomane akali kawane Sisa oko bala angu nanimana kiŋi ateya. Nanimana kiŋi waka mindi ata napeya leainipia. 16 (16b) Pailateto Jisasa utupanenga maiya-kola, ami yanda yene tupamane bala atu aiyu poto, yuu gene kawane kulini lene okona peai. Iputu pii loto, yuu okonena gene oko Golokota lalaini. Jisasa bala tane ita malamanda oko awua pea. 17 Pailateto Jisasa utupanenga maiya-kola, ami yanda yene tupamane bala atu aiyu poto, yuu gene kawane kulini lene okona peai. Iputu pii loto, yuu okonena gene oko Golokota lalaini. Jisasa bala tane ita malamanda oko awua pea. 18 Ami yanda yene tupamane Jisasa ita malamanda okonena peyo yuka alu, akali mindi balana kii tikasa-tole ita malamanda mindina peyo yuka wato, akali mindi balana kii koyasa-tole peyo yuka yai-kola, Jisasa bala akali okone-lapona tombenenga yuka atane atea. 19 Wamba Pailateto Jisasana kote ale wato, bala yapa lo tale peane-angi, balato pii mindi pepa peyoto, Nasatesa tane Jisasa oko bala Juta yamena kiŋi oko ateya lea. Balato pii okone Iputu pii lo peyalu, Lomo tane tupana pii lo peyalu, Gitiki pii lo peyalu, pii tepo utupane pepa pelea. Ami yanda yene tupamane Jisasa ita malamanda okona peyo yuka yai-angi, utupane-mane pepa okone Jisasana ita malamanda okona ate leai. Jisasa bala ita malamanda okona peyo yuka atane ateane yuu okone Jutusaleme mandaka gulo ya-kola, Juta yame wandakali kambua-mane epoto, pepa okone dii lo andeai. 21 Dii lo andeai-kola, pitisa akali kawane tupamane Pailate lamawuato, nimbato Nasatesa tane Jisasa oko bala Juta yamena kiŋi oko lo pepa peyale oko mo apoto, akali oko bala tane namba Juta yamena kiŋi ateyo lalane lo pepa peyo ate laa leainipia. 22 Wuane leai-kola, Pailateto utupanena pii okone yano peyoto, pii nambato pepa peyalo okone peyatane ateakale lo ando kondeyo leaipia. 23 Gotena pii pepa pelene eya mindimane loto, akali utupane-mane nambana tona tupa tale pua moto, nambana tona luu oko apito meyape andoyale tasu peleai layene eya. Pii okone enene guleakale nembo toto, Goteto ami yanda yene tukumindi tupana nembo-tene oko mina ika lea-kola, utupane-mane Jisasa bala ita malamanda okona peyo yuka yai-angi, balana tona tupa yomo tukumindinga tale puato, yakama mindiki-mindiki lo yomo mindi meai. Utupane-mane wuane peaini tekeko, balana tona luu piyane okone tambu latane ata napene, mee lapa-lapa mindiki angu-mane luu puyoko latane ateanga andeai. Andoto, ami yanda yene utupane-mane yakama teke-teke pii lalawa puato, nanimato tona luu oko minu lete nalene, apito meyape andoyale, nanimato tasu peyamakale lalu, utupane-mane tasu peleai. 25 Jisasana angini okopi, bala angini okona akini okopi, akali Kolopasa okona wetene Matiya okopi, Makatala tano okona tane Matiya okopi, utupane yakama Jisasana ita malamanda ateane ongane mandaka gulo ateai. 26 Mandaka gulo ateai-kola, Jisasato balana angini oko andea. Disaipolo Jisasato epelewa yamapane yo ateane oko bala mandaka ateanga andoto, Jisasato balana angini oko lamawuato, wanda, andipa akali oko nimbana iwanane gulo ateya lea. 27 Wuane lalu, balato disaipolo okone lamawuato, andipa wanda oko nimbana angini gulo peteya lea. Wuane lea-kola, okone angi tewa, disaipolo okonemane Jisasana angini oko atu andaka poto, bala moyo ateaipia. 28 Matili Jisasato piape Goteto bala mayane tupa pitaka pikoyo peyo lo andoto, pii pepa pelene eya mindi enene guleakale nembo toto, namba ipa nono piyua lea. Ipa nono piyua lea-kola, akali mindimane sapanjia mindi waene kaa-pene mindi ongane peteane okonena tanda pua meai-kola, waene kaa-pene okone sapanjia okonena pitu tumbi lea. Tumbi lea-kola, balato ita isopo kembone mindina moto, sapanjia oko kembone okonena tutuku puato, Jisasana ambulinga yata yaepia. Yata ya-kola, Jisasato waene kaa-pene okone nalu, piape Goteto bala geane tupa pitaka andipa koyo peya lo andeaipia. Andoto, balato koyo peya lalu, balana mane tuki lalu, balana tandini oko peakale lo tepa ya. 31 Anate-lene Sambasa oto andane wete mindi epolopeya nembo toto, Juta yame wandakali tupamane pitaka taka makande pua atoto, Sambasa angi akali omene tupa ita malamanda tupana mee yuka atane ata napeakale nembo teai. Wuane nembo toto, utupane-mane Pailate lamawuato, akali mindimane ita malamanda okona yuka atane ateyai akali tupana kene tupa peyo kundu leando, utupane wamba ini kapoyale omolai-kola, akali minditupa-mane utupane ondoto, yuunga mo tepa olopeya-ko. Ami yanda yene minditupa-mane utupanena kene tupa peyo kundu leakalenga, nimbato utupane lamai leainipia. 32 Wuane leai-kola, ami yanda yene minditupa epoto, akali mindi wamba ini bulupane Jisasa peyo yuka yaini ongane mandaka gulo ita malamanda waka mindina peyo yuka yaini okonena kene peyo kundu lalu, akali mindokona kene peyo kundu leai. 33 Wuane piyu, utupane-mane Jisasa yuka atane ateanga epoto andeai-kola, bala wamba manda teanenga andoto, balana kene peyo kundu naleai. 34 Utupane-mane balana kene peyo kundu naleaini tekeko, ami yanda yene mindimane Jisasana patilininga yandate-mane peyo lutuku apeya-kola, okone angi teke, tundupa ipa towa balau lea. 35 Gotena pii pepa pelene eya mindimane loto, utupane-mane balana kulini mindikipi mindi peyo kundu nalolo-peyai layene eya. Dee, Gotena pii pepa pelene eya waka mindimane loto, akali mindimane bala yandate-mane peyo lutuku pula-kola, wandakali-mane bala andatawa atolopeyai layene eya. Goteto balana pii layene okonelapo enene guleakale nembo toto, akali utupane-mane mangene okonelapo peakale lo piya ya. Nambato mangene okonelapo lee-mane andewane. Yakamato Jisasa lo bilipi lapiai lakae lo nembo toto, nambato pii enene oko yakama langeyo. 38 Atimatiya tano okona tane Josepe oko bala Jisasa bilipi lo ateane tekeko, balato Jisasa bilipi leyo lo lapana ewando, Juta yame akali tupamane kenda-pene mindi bala gulaini lo yuku wato, tengamane too pua bilipi lo ateaipia. Wuane tekeko, matili Jisasa omea-angi, Josepeto Pailate tee loto, Jisasana umbaini oko mali pulu pokale, gulape leaipia. Wuane lea-kola, Pailateto balana pii okone yano peyoto, atu yalua-ko. Nimbato balana umbaini oko mia lea-kola, Josepe epoto, Jisasana umbaini oko meaipia. 39 Akali Neketomasa lene mindi wamba Jisasa peteanga utulu epeane oko balapi epeaipia. Wamba wandakali minditupa-mane ita yame lapona ipane tunduma-pene tupa moto, mina mindiki loto, salimi leai-kola, Neketomasato ita ipane tunduma-pene okonena kilo paiyasa tepo kamboto, awua epeaipia. 40 Juta yame-mane wandakali omene mindi mali piyaini pua teke, Josepe, Neketomasa-la, okonelapo-mane Jisasana umbaini oko moto, ita ipane tunduma-pene okone bala towa lapalapa-mane yake peapilipia. 41 Ami yanda yene tupamane Jisasa peyo yuku yaini yuu ongane mandaka gulo ee mindi yaepia. Ati mindi ee okonena ya-kola, wamba akali minditupa-mane ana anda mali wenene mindi ati okonena kua peaini tekeko, utupane-mane wandakali mindi mali okonena mali napeainipia. 42 Juta yame wandakali tupamane anate-lene Sambasa oto epolopeya nembo toto, pitaka taka wamba ini makande pulane gii oko koyo puyale pea-kola, Neketomasa, Josepe-la, okonelapo-mane ana anda mali okone mandaka eya nembo toto, Jisasa awua poto, mali okonena mali peapilipia.

20

1 Sande angi, wamba upa pitane wete waa nalene, mee undupi latane atea-kola, Makatala tane Matiya bala Jisasa mali pitane ateanenga peaipia. Poto andea-kola, ana anda mali okonena asia lomba tuma pua ana andane wete yane oko minu pendeke layene yanga andeaipia. 2 Andalu, bala taimane poto, Pita-la, disaipolo waka mindi Jisasato epelewa yamapane yo ateane okola, okonelapo lamawuato, akali minditupa-mane Akali Andane oko mali lopoto, mindisa awua palai ya. Utupane-mane bala aninga yata alaipe lo nanimato nembo nateyama lea. 3 Wuane lea-kola, Pita-la, disaipolo mindoko-la, liyamba Jisasa mali pitane ateanenga poyale asini peapi. 4 Akali okonelapo liyamba lapotaka asia tai leaipili tekeko, disaipolo mindoko-mane Pita wata ai-peke lalu, wamba ini ingane Jisasana mali okona peakaiyu lea. 5 Peakaiyu lalu, bala tombawua loto, mali anda-pangosa andandaka lo andea-kola, Jisasa mali puyale lapa-lapa mindimane bala puta pua ombo yaini tupa mee yanga andea tekeko, disaipolo okone bala ana anda mali kua-pene okona anda-pangosa kolandaka nalea. Jia. 6 Saimone Pita bala disaipolo mindokona masianesa watama epoto, ana anda mali okona anda-pangosa kolandaka loto andea-kola, lapa-lapa utupane ongane mee yanga andea. 7 Lapa-lapa aŋako mindi Jisasana kawanenga yake peaini oko lapa-lapa waka tupa towa atu nayene, bala angu waka mindinga leka yene ya. 8 Gotena pii pepa pelene eya mindimane loto, akali mindi bala malinga ika lolopeya leya tekeko, okone angi, balana disaipolo okonelapo-mane pii okone Jisasa andayo layene eya nembo nateapili. Wuane tekeko, disaipolo mindi malinga wamba ini ingane peakaiyu leane okone balapi mali okona anda-pangosa kolandaka loto, Jisasa bala malinga yaa napea oko andoto, bala malinga ika lala lo bilipi lea. 10 Wuane piyu, disaipolo okonelapo liyamba andaka peapi. 11 Disaipolo okonelapo liyamba peke leapi tekeko, Matiya bala Jisasana mali okona mandaka gulo atoto, ai lo ateaipia. Ai lo atoto, bala tombawua loto, ana anda mali okona andandaka leaipia. 12 Andea-kola, enjole lapo tona ake-pene mindi pua wamba Jisasana umbaini yane ongane peteapinga andeaipia. Enjole mindi Jisasana kawane wamba yane ongane petea-kola, mindoko balana kene wamba yane ongane peteaipia. 13 Enjole okonelapo-mane Matiya tipa puato, wanda, anu peakale nimba ai lo atelepe leapi-kola, balato okone-lapona pii okone yano peyoto, akali minditupa-mane nambana Akali Andane oko mali lopoto, mindisa awua palai yako. Bala aninga yata alaipe lo nambato nembo nateyo okonena, ai lo ateyo leaipia. 14 Wuane lalu, balato mopeke loto andea-kola, akali mindi ongane ateanga andeane tekeko, akali okone bala Jisasa ateya nembo nateaipia. 15 Ai lo petea-kola, Jisasato bala tipa puato, wanda, anu peakale nimba ai lo petelepe. Nimba api ayia pelepe leaipia. Wuane lea-kola, Matiyato bala ee ando atalane akali mindi ya lo nembo toto, nimbato Jisasa mo awua poto, mindinga yata ale yando, nambato bala mo awua pokalenga, nimbato bala onga yata alo lo namba langi leaipia. 16 Wuane lea-kola, Jisasato Matiya leaipia. Balato wuane leane-angi, Matiya mopeke loto, Iputu pii loto, Laponai leaipia. Pii Laponai okone mopeke loto, nanimana pii loto, tisa lalamane. 17 Matiyato Laponai lea-kola, Jisasato bala lamawuato, namba Ayiane ati kenga ateyanga puata naeyo-ko leaipia. Nimbato namba minatawa ata napene, nambana disaipolo tupa ateyainga puu. Pulu, nimbato utupane lamawuato, Jisasato pii mindi loto, yakamana Ayiane Gote oko bala nambana Ayiane Gote oko ateya-kola, namba ati kenga bala ateyanga peyo lala lape leaipia. 18 Wuane lea-kola, Makatala tane Matiya oko bala poto, Jisasana disaipolo tupa lamawuato, nambato Akali Andane oko andalo lalu, pii Jisasato bala lamaiyane tupa utupane lamaiya. 19 Sande angi, Jisasana disaipolo tupa yakama Juta yame wandakali tupa yuku wato, anda yakama peteaini okona asia loko peyatawa peteai. Asia oko loko peyatane ateane tekeko, matili nai andaka pea-angi, Jisasa bala utupane tombenenga epo atoto, yakama mini epene palu pitiyapa lea. 20 Wuane lalu, balana kinipi, patalinipi, utupanenga matikini yane tupa balana disaipolo utupanenga andawa lea-kola, utupane-mane bala yakamana Akali Andane oko ya lo andoto, epele wete yai. 21 Okone angi, Jisasato utupane dee lapone lamawuato, yakama mini epene palu atalapa. Namba ayiane-mane namba languato, nimbato nambana piape pulu puu leane, wuane pua teke nambato yakama balana piape pulu pulupa leyo lea. 22 Wuane lalu, balato utupanenga poo loto, yakamato Oli Sipitisa oko mialapa lea. 23 Yakamato wandakali mindina koo tupa apia-mayiando, balana koo utupane alu pulupeyai. Yakamato wandakali mindina koo tupa apia-mai napeaindo, balana koo tupa balanga yapowa yolopeya lea. 24 Jisasa bala malinga ika lalu, balana disaipolo tupa ateainga epea okone angi, alesa akali utupanena mindi Tomasa gene mindi Ditimasa lene oko bala angu utupane towa atu ata napea. 25 Tene okonena, disaipolo waka tupamane bala lamawuato, nanimato Akali Andane oko andalama leai-angi, balato utupane lamawuato, nambato balana kininga matikini okonelapo andoto, nambana kii ondene oko matikini okone-lapona mina andokale lea. Dee, balana patalininga yandate yaini matikini oko nambana kii okomane mina andokale. Nambato katulo bala mina napewando, bala malinga ika lala lo nambato bilipi nalolo-peyo. Jia wete lea. 26 Satete mindi pea-kola, Jisasana disaipolo tupa yakama dee lapone anda okonena amunguli pua peteai. Okone angi, Tomasa balapi utupane towa atu petea. Utupane-mane anda asia loko peyatawa peteai tekeko, Jisasa bala utupane tombenenga epo atoto, yakama mini epene palu atalapape lea. 27 Wuane lalu, balato Tomasa lamawuato, nimbana kii ondene oko epe loto, nili matikini nambana kininga ateya okolapo mina anda lea. Nimbana kini oko epe loto, nambana patalininga yandate-mane peyo lutuku apaene matikini eya oko mina anda. Mina andoto, nimbato nembo lapo pali napene, namba malinga ika lapi ya lo bilipi laa-kae lea. 28 Wuane lea-kola, Tomasato balana pii okone yano peyoto, nimba nambana Akali Andane Gote oko atele lea. 29 Wuane lea-kola, Jisasato bala lamawuato, nimbato namba andoto, namba lo bilipi lele. Namba anda napene, bilipi lolai wandakali tupa epele wete olopeyai lea. 30 Jisasato metekolo piape waka kambua wete balana disaipolo tupana wenonga peane tupa nambato pepa okona napelewa. Jia. 31 Wuane tekeko, yakamato Jisasa bala Gotena Iwanane atoto, Mesaya oko ateya lo bilipi leaindo, balana gene oko yakamanga yola-kola, yakama saka atapowa atalapale nembo toto, nambato pii utupa pepa okona peleyo.

21

1 Matili Saimone Pitapi, Tomasa gene mindi Ditimasa lene okopi, Galili disitiki okona tano Kena tane Natanialepi, Sepiti iwanane lapo okolapopi, Jisasana disaipolo waka utupanena lapopi, utupane yakama ipa angini Galili gene mindi Taipi-tiasa oko mandaka gulo ateai. Ipa angini okone mandaka ya-kola, Saimone Pitato disaipolo waka tupa lamawuato, namba pisa molo peyo lea. Wuane lea-kola, utupane-mane bala lamawuato, nanimapi nimba towa atu pisa molo maa leai. Maa lalu, utupane yakama sipi mindina peakaiyu loto, pisa molo peaini tekeko, utulu okonena, utupane-mane pisa mindikipi mindi mia napeai. Yuu waa lea-kola, balana disaipolo utupane-mane bala dee lapone andeakale nembo toto, Jisasa bala ipa angini okonena matenenga epo ateane tekeko, balana disaipolo tupamane akali ipa matenenga ateya oko bala Jisasa ateya nembo nateai. 5 Utupane yakama sipinga pitiyu, tepanda-yale ateai-kola, balato pii taimane loto, utupane tipa puato, iwana yame, yakamato pisa minditupa mialaipe lea-kola, utupane-mane balana pii okone yano peyoto, jia leai. 6 Jia leai-kola, balato utupane lamawuato, yakamato pisa mialaini umbene nuu oko sipi okona kii tikasa-tole ipanga aindaka leaindo, yakamato pisa minditupa molopeyai leaipia. Wuane lea-kola, utupane-mane umbene nuu okone sipinga kii tikasa-tole ipa okona aindaka leai-angi, pisa kambua wete umbene nuu okona epo tumbi leai-kola, utupane-mane katulo umbene nuu okone sipi okona anda-pangosa kilau lo mia napeai. 7 Pisa kambua wete meai-kola, disaipolo mindi Jisasato epelewa yamapane yalane okomane Pita lamawuato, akali ipa matenenga ateya oko bala Akali Andane oko ya lea. Wamba Pitato piape pukale nembo toto, balana tona mindi yoko yata yane tekeko, balato disaipolo mindokona pii leane okone ale wato, tona okone mo piyu, ipa angini okona peaka nena lalu, ipa supimi lo awua matenenga pea. 8 Sipi oko ipa matene okona poyale, tepanda yale mita andete mindikipi mindi pupe-pene gulo ya-kola, disaipolo waka tupa sipi okonena pituto, pisa pali-pata umbene nuu okone kilau lo awua ipa matenenga peai. 9 Utupane-mane ipa matenenga peakaiyu lo andeai-kola, Jisasato betesa minditupa ongane yata alu, pisa mindiki yangatane ateanga andeai. 10 Pisa mindiki yangatane atea-kola, Jisasato utupane lamawuato, yakamato pisa epapu mialai tupana minditupa mo awua ipulupa lea. 11 Wuane lea-kola, Saimone Pita bala sipi okona peakaiyu loto, pisa pali-pata umbene nuu oko kilau lo awua epea-kola, ipa matenenga ya. Pisa andane andete mindikinga paiyasa yaunga tepo umbene nuu okonena paleaini tekeko, umbene nuu okone liti nalea. 12 Metekolo piape okone andoto, disaipolo utupane yakamato Jisasa bala Akali Andane oko ateya nembo toto, utupanena akali mindikipi mindimane nimba apipe lo bala tipa napeai. Okone angi, Jisasato utupane lamawuato, yakama tomo nolo ipulupa lea. 13 Tomo nolo epeai-kola, Jisasa bala ita teane okona mandaka gulo epoto, betesa oko moto, utupane maiyu, pisa okopi moto, utupane maya. 14 Wamba bala malinga ika lalu, balana disaipolo tupamane bala andeakale nembo toto, ole lapoai balato utupane ateainga panakame epea. Bala ipa angini Galili okona matenenga panakame epea-angi, balana disaipolo tupamane ole tepone gulo bala andeai. 15 Utupane yakama tomo nokoyo peai-angi, Jisasato Saimone Pita tipa puato, Jone iwanane Saimone, nimbato akali utupa sia minuto, namba wayumane epelewa yamapane yo atelepe lea. Wuane lea-kola, Pitato balana pii okone yano peyoto, enene, nambato nimba towa epele eyo oko Akali Andane nimbato nembo tele okoni lea. Wuane lea-kola, Jisasato bala lamawuato, nimbato nambana sipisipi andopane tupa tomo maiki pua atape lea. 16 Wuane lalu, ole lapone gulo balato Pita tipa puato, Jone iwanane Saimone, nimbato namba wayumane epelewa yamapane yo atelepe lea. Wuane lea-kola, Pitato balana pii okone yano peyoto, enene, nambato nimba towa epele eyo oko Akali Andane nimbato nembo tele okoni lea. Wuane lea-kola, Jisasato bala lamawuato, nimbato nambana sipisipi tupa yatawa ando atape lea. 17 Wuane lalu, ole tepone gulo balato Pita tipa puato, Jone iwanane Saimone, nimbato namba towa epele elepe lea. Ole tepone gulo balato wuane lea-kola, Pita bala yamapane kenda wato, Jisasana pii okone yano peyoto, Akali Andane nimbato pitaka taka nembo talene. Nambato nimba epele eyo oko nimbato nembo tele okoni lea. Wuane lea-kola, Jisasato bala lamawuato, nimbato nambana sipisipi tupa tomo maiki pua atape lea. 18 Nambato pii enene wete mindi nimba langeyo. Wamba nimba iwana patane atee-angi, nimbana tona tupa tane mo piyu, nimba mindisa pokale nembo tee pua teke epoko piki pua atee. Wuane tekeko, matili nimba akali mini-yene gulo atole-angi, nimbato nimbana kini okolapo minaiyu lole-kola, akali waka mindimane nimbana tona mo piya alu, nimba napokale nembo tolene yuu mindina andi lo awua polopeya lea. 19 Akali mindimane wuane pula-kola, akali minditupa-mane Pita peyo ome lolai-kola, bala omola okomane gene andane mindi Gote malupeya nembo toto, Jisasato pii okone lea. Wuane lalu, balato Pita lamawuato, nimbato namba watama ipu lea. 20 Wamba Jisasapi, balana disaipolo tupapi, utupane anda kenga lumu okona pituto, tomo no peteai okone angi, disaipolo mindi Jisasato epelewa yamapane yo ateane okomane Jisasana kangaluane yanenga kawa aimo loto, Akali Andane, apito nimba ene pitulu-peyape lea. Matili Jisasato Pita nimbato namba watama ipu lea-angi, Pitato bala watama poto, masianesa anda-peke lo andea-kola, disaipolo okonemane liyamba watama epeanga andea. 21 Balato disaipolo okone andoto, Jisasa tipa puato, Akali Andane, akali oko anu pulu-peyape lea. 22 Wuane lea-kola, Jisasato bala tipa puato, nambato bala oma napene, mee saka atama pulu, namba dee lapone epolowa oto oko andapia lakae lo nembo tewando, okone nimbana piapepe. Nimbato namba watama ipu lea. 23 Wuane lea-kola, Jisasana disaipolo tupamane pii okone ale wato, balato disaipolo okone oma napulu-peya leya nembo toto, pii okone bala lo bilipi lene wandakali tupanga lo tawe yaini tekeko, Jisasato disaipolo okone bala oma napulu-peya nalea. Jia. Balato Pita tipa puato, nambato akali okone bala oma napene, mee saka atama pulu, namba dee lapone epolowa oto oko andapia lakae lo nembo tewando, okone nimbana piapepe lea. 24 Jisasato mangene utupa peane loto, disaipolo Jisasato epelewa yamapane yo ateane okomane pepa oko peleya. Nanimato balana pii utupa enene eya oko nembo teyama. 25 Jisasato mangene waka kambua wetete peane tupa pitaka mindiki-mindiki lo wua peane loto, wandakali-mane pepa peyapiai-yale, buku andane kambua wetete yapiai-yale. Buku utupane pitaka yapiai-yale, buku utupane pitaka yata olane panda mindi yuunga yuu okona nayapia-yale yalua.