1

1 Sa ompisa dapo boo nakayman, monaan:nani da Tokawanan. Kaanggat Diyos da Tokawanan da da Tokawanan ba Diyos. 2 Sa ompisa dapo iya kaanggat:ta Diyos. 3 Konin pinararang Diyos da boo nakayman da- wala nakayman nawed napararang sa konin. 4 Ibat sa konin da biyag gidte da- da biyag ba magparawa sa mga kairayaan. 5 Da rawa ba magrawa sa kadeleman da- naba ba nawed batay nadaeg kadeleman. 6 Pinaidaw Diyos da konin sogo da ngaran ba laki Howan. 7 Iya pomaraoy towa para somistigo para sa rawa da- para misarig sa rawa da boo iraya panawen sa konin sinistigohan. 8 Nawed iya da rawa no nawed ba iya ba pomaraoy towa para magsistigo para sa rawa. 9 Da rawa gidte ba paraoy towa sa paranawan da magrawa sa boo kairayaan. 10 Da Tokawanan ba sa paranawan. Konin pinararang da paranawan ngani iya nawed kinilala mga iraya sa paranawan. 11 Iya pomaraoy sa konin sadiri lasyon ngani iya nawed tinabang ag konin kalasyon. 12 Ngani da boo tomabang da- misarig sa konin ba konin pinakan kapangyadihan para onga Diyos. 13 Kora ba binilang onga Diyos nawed panawen sa kora inonga sa alabet lawas da- sa pinanawen iraya no nawed ba ibat sa Diyos. 14 Da Tokawanan ba naggawa iraya da- iya mamatawan sa yamen, magpaban-aw gidte boo kapiyaanan remrem da- katotohanan Diyos. Yamen akitan da konin kalakolan konin tinabang ibat sa Apang sa iya konin sai ngani ka onga. 15 Iya sinistigohan gidte laki Howan amba, Iya da naay nagtodyo maraw naay sinabi amba, Da batay rateng sa naay paoriyan ba mahalaga dapo sa naay, panawen iya ba iya:ani bayo ako inonga. Naba:a ngani. 16 Ibat sa semker gidte da konin kapiyaanan remrem, tamo boo ba magtabang dason-dason ka konin parongaw. 17 Pinababa Diyos sa laki Moysis da bilin, ngani da kapiyaanan remrem da- da katotohanan Diyos ba laki Hisos Kiristo da pomaban-aw. 18 Wala tang iraya kaban-aw sa Diyos. Da sai ngani ka onga Diyos ag iya ba Diyos wala ikadarwa da- apalayawan gidte Apang ba iya da pomakilala sa konin. 19 Tiya da sistigo laki Howan maraw pinaparaoy mga poon mga Diw sa Hirosalim da kalaati magpamanawen sa balay Diyos da- mga kaapoan laki Libi para tanongon sa laki Howan no tawa iya. 20 Iya ba nawed dayo magtebag no nawed ba iya magpapawa gidte amba, Nawed ako da Kiristo, ag Tagaribri pinangako Diyos. 21 Kora magtanong amba, No amba, tawa kay kawo? Kawo dia ba laki Iliyas? Iya tembag, Nawed gidte! Kora magtanong dapo amba, Kawo dia da Tagabarita ibat sa Diyos yamen nagpanyaan? Iya tembag, Nawed! 22 Kaya kora magtanong dapo, No amba, tawa kawo? Komo sabiyen sa yamen para yamen asabi sa mga pomaparaoy sa yamen. Nakay da komo batay asabi para sa komo sadiri? 23 Tembag laki Howan, makay ag sinabi sa barita laki Isayas amba, Ako da magtokawanan maeyat sa poro nawed apirmihan iraya amba, Koyo taldengen da batay dinalanan Panginoon! Naba:a ngani. 24 Da mga agtanong ba pinaparaoy mga Parisiyo. 25 Kora magtanong dapo sa laki Howan amba, Nawed kay ma amba kawo da Kiristo, nawed din amba laki Iliyas, kayno da Tagabarita! No amba, kaytang kawo magbaotismo sa sapa? 26 Iya tembag, Ako magbaotismo sa sapa, ngani sa koyo:wani da sai nawed dapo koyo kilala. 27 Iya da batay sa naay paoriyan ngani ako nawed abaya kayno mag-okad ngani eket konin panlaed. 28 Naba ba mangyadi sa goraan Bitanya, sa karipay salog Hordan ag pagbaotismohan laki Howan. 29 Maraw sai:yakay ka omaga akitan laki Howan laki Hisos pabali sa konin. Konin sinabi amba, Tiya da Topa te Diyos mag-alis kadaetan mga taga paranawan! 30 Iya da naay nagtodyo ag naay sinabi amba, Da sai ka mahalaga dapo sa naay ba batay sa naay paoriyan panawen Iya ba Iya:ani bayo ako inonga. 31 Iya nawed naay kilala gidte ag monaan kayno ako towa magparaoy da- magbaotismo sa sapa para iya pakilalaen sa mga taga Israil. 32 Laki Howan ba magsistigo amba, Naay akitan da Ispirito Banal maglayangan ibat sa langit makay ag sai ka korkoro, da- mamataw:wa sa konin. 33 Iya nawed naay kilala gidte ag monaan, ngani da Diyos ag pomaidaw sa naay para ako magbaotismo sa sapa ba iya da somabi sa naay amba, Komo batay akitan da Ispirito Banal batay lomayangan da- mamataw sa sai ka iraya-iya da batay magbaotismo sa Ispirito Banal. 34 Naba ba naay akitan da- naay nagsistigohan amba iya da Onga Diyos. 35 Maraw sai:yakay ka aldaw, sata:akay din laki Howan anggat da darwa sa konin mga nagtod-an. 36 Konin akitan laki Hisos magdalan sata da- konin sinabi, Tiya da Topa te Diyos! 37 Akarngeyan ag darwa ka nagtod-an da konin nagsabi naba da sidawa ba tomongroy sa laki Hisos. 38 Laki Hisos ba mamaliwi. Maraw konin akitan sidawa magtongroy sa konin ba konin tinanong amba, Nakay da kandawa nagsarak? Sidawa tembag amba, Rabi, kawo saan magpamataw? (Da alabet sabiyen Rabi ba Tagatodo). 39 Amba laki Hisos, Apora kandawa da- ban-awan. Sidawa anggat da- akitan da konin pamatawan, da- sidawa sata:ani ag aldaw naba. Badya:a giraapon. 40 Da sai sa sidawa karngey sa sabi laki Howan ba laki Anris arian laki Simon Pidro. 41 Agad konin asbokan da konin kakaan, da- sinabi sa konin amba, Kidawa asbokan da Misiyas (da alabet sabiyen ba Kiristo, ag Tagaribri pinangako Diyos). 42 Iya ba pinaanggat laki Anris sa laki Hisos. Iya ba binan-awan laki Hisos da konin sinabi amba, Kawo ba laki Simon. Da kom apang ba nag-awit din Howan. Da batay ginawa ngaran sa komo ba Sipas. 43 Maraw omaga:akay da pakana laki Hisos ba paraoy sa Galiliya. Konin akitan laki Pilipi da- sinabi sa konin amba, Kawo tomongroy sa naay. 44 Laki Pilipi ba taga Bitsaida, ag goraan din kolaki Pidro da- Anris. 45 Akitan laki Pilipi laki Tanail da sinabi sa konin amba, Yamen asbokan laki Hisos taga Nasarit, ag onga laki Hosi. Iya da nagtodyo sa Ribro laki Moysis ag sinoratan Bilin, da- iya din da nagtodyo ag mga tagabarita ibat sa Diyos. 46 Magtanong laki Tanail amba, Abaya dia maki omibat piya sa Nasarit? Tembag laki Pilipi, Kawo towa! Komo ban-awan! 47 Maraw akitan laki Hisos laki Tanail ba pabali sa konin ba konin sinabi amba, Tiya da sai ka bagay gidte awiten Israil, nawed tang mandaya. 48 Iya tinanong laki Tanail, Omaning ako komo:wa akilala? Laki Hisos ba tembag amba, Bayo kawo pinaparaoy laki Pilipi ba kawo naay akitan sa poon igos. 49 Amba laki Tanail, Tagatodo, kawo nga da Onga Diyos! Kawo nga da Hadi Israil! 50 Sinabi laki Hisos amba, Mag-isarig dia kawo panawen sa naay sinabi amba kawo naay akitan sa poon igos? Kawo batay kaban-aw mga nakayman labi dapo makapangyadihan saba! 51 Da- konin dapo sinabi sa laki Tanail, Naay gidte nagsabi sa koyo, Koyo batay akitan boka da soksokowan da- da mga anghil Diyos ba magyakbang da- maglopot sa Onga Iraya.

2

1 Maraw kalawey darwa ka aldaw, maki kasayahan sa kasalan sa goraan Kana sa porobinsiya Galiliya. Sata da adang laki Hisos. 2 Pinaparaoy din sata laki Hisos da- konin mga nagtod-an. 3 Maraw naobos:sani da inemen kalibed ba sinabi adang laki Hisos sa konin amba, Kora naobosan:nani inemen kalibed. 4 Amba laki Hisos, Anday, ako ayaw komo agsakwatan. Nawed dapo rateng da odas para akilalaan mga iraya no tawa gidte ako. 5 Sinabi konin adang sa mga magpamanawen amba, Koyo panawenen da nakayman konin batay sinabi sa koyo. 6 Sata ba maki anim lakol ka tapayan yadi sa bato. Naba da tapayan naggamit mga Diw sa kora maglinis toltol sa kora maniho. Da tayma sai ba laman dalwampo anggan tatlompo ka tabayay. 7 Sinabi laki Hisos sa mga magpamanawen amba, Koyo pakapnoon sapa da mga tapayan. da kora nga pinakapno anggan nawed ngani maglabis. 8 Maraw kalbas ba konin sinabi, Koyo somarok:kani da koyo babaen sa magpamahala pag handaan. Iya kora nga binabaan. 9 Konin nga tinikman da sapa nagawa inemen kalibed. Amatangan mga somarok no saan galing naba, ngani nawed amatangan ag magpamahala kaya konin pinatwagan da lalaki kinasal 10 da- pinodi amba, Da layen monaan nahayin ba ag masadap gidte ka inemen da- maoson:na ininem mga iraya ba bayo naghayin da kasagadan ngani. Ngani koyo kay pinaori da masadap gidte ka inemen. 11 Sata sa Kana, Galiliya, ba pinanawen laki Hisos da monaan ka tandaanan naba. Sa makay naba ba konin pinaban-aw da konin kapangyadihan da- misarig sa konin da konin mga nagtod-an. 12 Maraw kadalan naba laki Hisos ba domolong sa Kapirnaom kaanggat da konin adang da- mga arian da- mga nagtod-an. Da- kora mamataw sata nawed maoson ka aldaw. 13 Bali:yani da mga aldaw kasayahan Paskwa mga Diw, kaya laki Hisos ba tomokad sa Hirosalim. 14 Konin akitan sa ayanmanan lakol ka balay Diyos da mga magpabili mga baka da- mga topa da- mga kalapati, da- da mga magpamalit kwarta magtongka sata. 15 Iya gomawa sai ka pamogbog lobid da- konin binolyaw palwas da mga baka da- topa. Konin sinambolat da mga kwarta mga magpamalit da- nagpamalombog da kora mga palagyanan. 16 Konin binilin sa mga magpabili kalapati amba, Koyo alsen towa da mga naba! Ayaw koyo gaw-en pamiliyan da balay naay Apang! 17 Aremreman konin mga nagtod-an da sinabi sa Banal ka Kasoratan amba, Naay Diyos, da naay gidte alapet sa komo balay ba makay apoy magsikrab sa naay poso. Naba:a ngani. 18 Panawen naba iya tinanong mga poon mga Diw amba, Nakay ka tandaanan da komo batay apaban-aw sa yamen para apatonayan kawo abaya gomawa makay naba? 19 Laki Hisos ba tembag amba, Koyo ngani gerasen da balay Diyos tiya da- naay:yakay batay ginawa sa tatlo ngani ka aldaw. 20 Sinabi ag mga Diw amba, Apatnapo da- anim ka dag-on pinanawen da balay Diyos tiya da- komo kono batay:yakay pinanawen sa tatlo ngani ka aldaw? 21 Ngani da balay Diyos nagtodyo laki Hisos ba konin lawas. 22 Kaya maraw iya nabiyag:gakay ba aremreman konin mga nagtod-an da konin sinabi naba da- kora maniwala sa Banal ka Kasoratan da- sa mga sinabi laki Hisos. 23 Ag mga aldaw kasayahan Paskwa ba laki Hisos ba sa Hirosalim. Sa odas naba ba maoson da misarig sa konin maraw kora akitan da mga tandaanan konin pinanawen. 24 Ngani laki Hisos ba nawed komatiwala konin sadiri sa kora, panawen konin gidte kilala kora boo. 25 Nawed:da kailangan maki dapo magtokawanan sa konin para sa tawa man, panawen konin:na amatangan da remrem boo iraya.

3

1 Maki sai ka poon mga Diw da ngaran ba Kodimo. Iya ba sai ka Parisiyo. 2 Sai ka madlem iya ba paraoy sa laki Hisos da magsabi sa konin amba, Tagatodo, yamen amatangan kawo ba sai ka tagatodo ibat sa Diyos, panawen wala kapamanawen tiya pag mga tandaanan komo nagpanawen no nawed ba ag sa konin da Diyos. 3 Laki Hisos ba tembag, Naay gidte nagsabi sa komo, No nawed da sai ka iraya ba inonga:akay ba nawed iya batay naghadian Diyos. 4 Tinanong laki Kodimo amba, Omaning batay aonga:akay da sai ka iraya no koyay:yani? Nawed gidte abaya kasled:dakay sa boyon kon adang para aonga:akay! 5 Amba laki Hisos, Naay gidte nagsabi sa komo, No nawed sa sapa da- sa Ispirito Banal inonga ag iraya ba iya nawed abaya onga Diyos. 6 Da inonga iraya ba iraya ngani- da- da inonga Ispirito Banal ba ispirito ngani-. 7 Kawo ayaw magtaka sa naay sinabi sa komo amba, Kailangan koyo ba inonga:akay. 8 Magramoymoy da koaya kayno saan da alabet da- koyo akarngeyan da bagorbor naba, ngani nawed koyo amatangan no saan mag-ibat da- no saan magparaoy. Amba kay din da tayma inonga Ispirito Banal. 9 Tinanong laki Kodimo amba, Omaning batay apangyadi naba? 10 Laki Hisos ba tembag, Kawo ba kilala tagatodo sa Israil ngani nawed kay komo amatangan da mga nakayman naba! 11 Naay gidte nagsabi sa komo, Da yamen amatangan da yamen nagsabi, da- da yamen akitan da yamen nagpatonayan, ngani nawed kay koyo nagtabang da yamen nagsabi. 12 No nawed koyo nagpaniwalaan da naay nagsabi sa mga nakayman sa paranawan tiya ba omaning koyo batay apaniwalaan no da naay batay sinabi ba mga nakayman ibat sa Diyos? 13 Wala somalbon sa soksokowan no nawed ba ag lompot ibat sa soksokowan-wala roma no nawed ba da Onga Iraya. 14 Da- no omaning pinataas sa kayo laki Moysis da otan ag konin pinanawen sata sa poro nawed apirmihan iraya, amba kay din da Onga Iraya ba kailangan pataasen, 15 para da tawa man mag-isarig sa konin ba kamaki biyag gidte wala arasan. 16 Amba:a ngani- da palayaw Diyos sa paranawan, kaya konin nga tinaboy konin sai ngani ka onga para da iya mag-isarig sa konin ba nawed batay natay no nawed ba kamaki biyag gidte wala arasan. 17 Panawen pinaidaw Diyos sa paranawan da konin Onga, nawed para hosgahan da mga sa paranawan no nawed ba para kora ba konin ribriyen. 18 Nawed naghosgahan da iya mag-isarig sa Onga Diyos, ngani hinosgahan:nani da iya nawed mag-isarig sa konin, panawen iya ba nawed mag-isarig sa sai ngani ka Onga Diyos. 19 Kora ba hinosgahan panawen paraoy towa sa paranawan da rawa ngani da mga iraya ba alabet sa kadeleman da- dayo kay sa rawa, panawen daet da kora nagpanawen. 20 Da iya magpamanawen daet ba dayo sa rawa da- nawed magpabali saba para nawed nabandira da konin mga pinanawen. 21 Ngani da iya magpamiyag sa kataldengan ba magpabali sa rawa para nabandira:ani da konin mga nagpanawen ba ibat sa iya maki kasaiyan sa Diyos. Naba:a ngani. 22 Maraw kalawey naba laki Hisos da- konin mga nagtod-an ba paraoy sa porobinsiya Hodiya. Sata iya mamataw kora kaanggat nawed naw maagot ka odas da- magbaotismo. 23 Laki Howan ba magbaotismo kay din sa Inon bali te sa Salim, panawen sata da maoson sapa. Magpamparaoy sa konin da mga iraya da- magpabaotismo. 24 Ag odas naba ba nawed dapo napiriso laki Howan. 25 Da kalaati mga nagtod-an laki Howan da- da sai ka Diw ba magdibatihan para sa kaogalian mga Diw sa maglinis. 26 Kaya kora paraoy sa laki Howan da- sinabi sa konin amba, Tagatodo, ag lalaki nata komo kaanggat sa karipay salog Hordan, ag komo nagpatonayan, ba magbaotismo din da- magparaoy sa konin da boo! 27 Laki Howan ba tembag amba, Wala batay atabang da iraya no nawed ba iya ba pinakan Diyos. 28 Koyo:wa din da sistigo pag naay sinabi amba, Nawed ako da Kiristo; ako ba pinaidaw ngani sa konin paonaan. 29 Da babayi batay kinasal ba para sa lalaki batay kinasal. Sata da abyan ag lalaki batay kinasal da- magpakarngey. Iya angasan gidte no karngey tokawanan ag lalaki batay kinasal. Amba kay din ako ba angasan gidte mona. 30 Kailangan iya ba pinahalagahan da- ako kay ba pinaababa. 31 Da ibat sa soksokowan ba makapangyadihan sa boo. Da ibat sa lopa ba taga lopa ngani- da iya magtokawanan para sa mga nakayman sa lopa. Da ibat sa soksokowan ba makapangyadihan sa boo. 32 Konin nagsistigohan da konin akitan da- akarngeyan, ngani wala maniwala sa konin sistigo. 33 Ngani da iya magpaniwala sa konin sistigo ba magpatonay amba totoo da nagsabi Diyos. 34 Da pinaidaw Diyos ba magpangadar tokawanan Diyos panawen nagtaboy Diyos sa konin da konin Ispirito anggan. 35 Da Onga Diyos ba nagpalayaw kon Apang da- iya ba konin nagpamahala sa boo nakayman. 36 Da iya mag-isarig sa Onga ba maki biyag gidte wala arasan; ngani da etean kay sa Onga ba nawed batay maki biyag gidte no nawed ba batay gidte mamirmi sa konin da kabaisan Diyos.

4

1 Nabaritaan mga Parisiyo maoson dapo da naranggot da nabaotismohan laki Hisos sa laki Howan kay. 2 Ngani da totoo ba nawed laki Hisos da bomaotismo no nawed ba ag konin mga nagtod-an. 3 Kaya maraw naba ba amatangan laki Hisos ba iya omalis sa Hodiya paraoy:yakay sa Galiliya. 4 Kailangan iya domalan sa porobinsiya Samariya. 5 Iya rateng sa sai ka goraan Samariya ag nag-awit Sikar, bali te sa agayen tinaboy laki Hakob sa kon onga laki Hosi ag tangona dapo. 6 Sata da bal-on tangona laki Hakob. Laki Hisos ba tomongka sa tebteb naba, panawen iya ba rogso:ani sa magkadangan. Halos tenga:ani aldaw. 7 Rateng da sai ka babayi taga Samariya para omasoy. Sinabi sa konin laki Hisos amba, Ako kay komo painemen! 8 Wala saba da konin mga nagtod-an panawen kora ba paraoy sa goraan para bomili pamangnen. 9 Sinabi sa konin ag babayi, Kaytang kawo magpainem sa naay? Kawo ba Diw da- ako kay ba taga Samariya. Panawen da mga Diw ba wala pakiaram sa mga taga Samariya. 10 Laki Hisos ba tembag, No komo ngani amatangan da nagtaboy Diyos da no tawa da mag-ay-ay sa komo batay ininem, kawo ba batay omay-ay sa konin, da- kawo kay ba konin batay pinakan sapa magtaboy biyag gidte. 11 Amba da babayi, Koyay, alalem da bal-on tiya da- kawo ba wala kay panarok. Saan kawo batay gomaro sapa magtaboy biyag gidte? 12 Makapangyadihan dapo dia kawo sa tamo pangapoan laki Hakob ag tomaboy ag bal-on tiya? Iya da- konin mga onga da- konin din mga hayop ba minem towa. 13 Laki Hisos ba tembag, Da mag-inem ag sapa tiya ba batay:yakay makainem, 14 ngani da kasai minem ag sapa naay batay tinaboy ba nawed:da tay makainem kaagot man. Naba ba batay makay sai ka bokalan sa konin magbokbokal da- batay magtaboy sa konin biyag gidte wala arasan. 15 Sinabi ag babayi, Koyay, pakanen kay ako ag sapa komo nagsabi, para ako nawed:da makainem kayno towa paraoy para omasoy. 16 Amba laki Hisos, Moli:a kawo, komo paanggaten towa da komo koyay. 17 Amba da babayi, Ako ba wala koyay. Tembag laki Hisos, Totoo da komo sinabi kawo wala koyay! 18 Panawen lima:ani da komo sawa da da komo nagpaanggat mona ba nawed amba komo koyay. Totoo da komo sinabi. 19 Sinabi ag babayi amba, Koyay, naay amatangan sa komo sabi kawo ba sai ka tagabarita ibat sa Diyos. 20 Yamen mga pangapoan ba sa bogsor tiya kora magsamba sa Diyos ngani koyo kay mga Diw nagsabi amba, Sa Hirosalim ngani abaya sambahen da Diyos. 21 Laki Hisos ba tembag sa konin amba, Inay, kawo maniwala sa naay, magrateng:nga da odas koyo batay sinamba tamo Apang, nawed sa bogsor tiya kayno sa Hirosalim. 22 Nawed koyo akilalaan da koyo nagsamba ngani yamen kilala da yamen nagsamba, panawen da karibriyan pinangako Diyos ba ibat sa mga Diw. 23 Ngani magrateng:nga da odas da- mona:a ngani-, da mga magsamba gayed sa Apang ba batay somamba sa konin sa Ispirito Banal da- sa katotohanan. Panawen tiya da nagsarak Apang sa mga magsamba sa konin. 24 Da Diyos ba Ispirito kaya da mga magsamba sa konin ba kailangan gidte iya ba sambahen sa Ispirito da sa katotohanan. 25 Sinabi ag babayi amba, Naay amatangan batay towa da Kiristo. No iya towa iya da batay mangadar sa tamo boo nakayman. 26 Amba laki Hisos, Ako ag magtokawanan sa komo ba iya:a ngani-! 27 Sa odas din naba ba rateng da konin mga nagtod-an. Kora ba namangha gayed maraw kora akitan laki Hisos ba magtokawanan sa sai ka babayi. Amba man ba kayno sai ba wala magtanong sa konin amba, Nakay da komo alabet sa konin? e amba, Kaytang kawo magtokawanan sa konin? 28 Inogonan ag babayi da konin tabayay, paoli sa goraan da- sinabi sa mga taga sata amba, 29 Apora koyo! Koyo ban-awan da iraya magsabi sa naay ag boo naay:ya pinanawen. Iya:a nga dia da Kiristo, ag Tagaribri pinangako Diyos? 30 Kaya kora lomwas sa goraan da- paraoy sa laki Hisos. 31 Sa odas naba ba da mga nagtod-an ba mag-ateet kay sa laki Hisos amba, Tagatodo, mamangan:na kawo! 32 Ngani laki Hisos ba tembag, Ako maki pamangnen para mangan nawed koyo amatangan. 33 Kaya magpaltanongan da mga nagtod-an amba, Maki dia bomaba pamangnen sa konin? 34 Sinabi sa kora laki Hisos, Da naay pamangnen ba da tepden da kaliyagan ag pomaidaw sa naay da yadien da konin pinapanawen. 35 Nawed ma koyo maki kasabiyan amba, Apat dapo ka bolan ba tag-ani:yani. Ngani naay nagsabi sa koyo, Koyo man-aw piya sa mga agayen: mapola:ani da- abaya:a aniyen. 36 Da mag-ani ba magtabang kabayadan da- magtipon bokar para sa biyag gidte wala arasan. Kaya tanan nagkaasyagan da mag-asik da da mag-ani. 37 Kaya totoo nga da kasabiyan amba, Roma da mag-asik da- roma kay da mag-ani. 38 Koyo naay:ya sinogo para aniyen da nawed koyo inasik. Mamanawen da roma, da- koyo da mag-ani sa kora pinaghidapan. 39 Maoson da mga taga Samariya sa goraan naba da misarig sa laki Hisos panawen sa sinabi ag babayi amba, Konin sinabi da boo naay:ya pinanawen. 40 Kaya pabali da mga taga Samariya sa laki Hisos da- kora inaringi amba, Kawo towa dapo te! Da- iya sata darwa ka aldaw. 41 Da- maoson dapo da misarig maraw iya ba akarngeyan, 42 da- kora sinabi sa babayi amba, Yamen mag-isarig mona nawed:dani sa komo sinabi no nawed ba sa yamen akarngeyan sa konin. Yamen:na kilala iya nga da Tagaribri boo mga kairayaan. 43 Maraw kalawey da darwa ka aldaw laki Hisos ba omalis paraoy:yakay sa Galiliya, 44 panawen iya:a din da magsabi amba, Da tagabarita ibat sa Diyos ba naggalang kayno saan poyida ngani sa konin sadiri kalasyon. 45 Maraw iya rateng sa Galiliya, iya ba tinabang gidte piya ag mga taga sata, panawen kora din ba sa Hirosalim ag odas kasayahan Paskwa da- kora akitan da boo konin pinanawen sata. 46 Laki Hisos ba paraoy:yakay sa Kana, Galiliya. Sata konin ginawa inemen kalibed da sapa. Sa Kapirnaom ba maki sai ka atatas ka poon. Maki maskit da konin onga lalaki. 47 Maraw konin abaritaan laki Hisos ba paoli:akay sa Galiliya ibat sa Hodiya ba iya ba konin pinaraoyan. Konin inateet domolong sa Kapirnaom da- papiyaen da konin onga magpanawnaw. 48 Sinabi sa konin laki Hisos amba, Anggan nawed koyo akitan da mga tandaanan da mga kapanggilalas ba nawed dapo koyo mag-isarig sa naay. 49 Ngani sinabi ag poon, Koyay, kita:a dapo bayo natay da naay onga. 50 Laki Hisos ba tembag, Kawo moli:ani. Piya:a da komo onga. Maniwala ngani- ag lalaki sa sinabi laki Hisos da- iya nga ba moli. 51 Sa dalan dapo ba iya ba sinalobong:nga konin mga tagoanggat da- sinabi amba, Piya:ani da komo onga. 52 Kora konin tinanong amba, Nakay da odas iya pomiya? Kora amba, Naapon dapo kalawey tanghali ba iya wala:ani lagnat. 53 Aremreman ag apang amba ag odas din naba da sinabi laki Hisos amba, Piya:ani da komo onga. Kaya iya da- da boo konin mag-anak ba misarig sa laki Hisos. 54 Naba da ikadarwa ka tandaanan konin pinanawen sa Galiliya maraw iya paraoy:yakay sata ibat sa Hodiya.

5

1 Maraw kadalan:na naba ba rateng da sai:yakay ka kasayahan mga Diw, kaya laki Hisos ba tomokad sa goraan lakol Hirosalim. 2 Sata sa bali Sakbawan mga Topa ba maki linaw lakol no nag-awit sa tokawanan Hibriyo ba Bitisda. Sata maki lima ka makay pasirongan. 3 Sata da kaosonan maki maskit-mga raprap, mga tiklay, da- mga lompo. Kora nagpanyaan komiskisaw da sapa, 4 panawen maki odas maglopot sa linaw da sai ka anghil Panginoon da- nagpakiskisaw da sapa. Da monaan lompot no komiskisaw:wa da sapa ba pomiya:ani kayno nakay da konin maskit. 5 Sata ba maki sai ka lalaki tatlompo:a da- walo ka dag-on maki maskit. 6 Akitan laki Hisos iya sata magtilagay. Konin amatangan amba maagot:ta maki maskit ag lalaki tiya. Kaya iya ba tinanong laki Hisos amba, Kawo alabet pomiya? 7 Tembag da maki maskit amba, Koyay, wala magpalpot sa naay no nakiskisaw:wa da sapa. Ako magparaoy dapo disin sata ba maki:ya monaan sa naay. 8 Sinabi sa konin laki Hisos, Kawo patindeg, komo babaen da komo kalkanan da kawo mangadang. 9 Agad pomiya ag lalaki, binaba konin kalkanan da mangadang. Naba ba Aldaw Magpahinga, 10 kaya sinabi mga poon mga Diw sa lalaki pinapiya amba, Mona ba Aldaw Magpahinga. Nag-ayawan tamo Bilin da babaen da komo kalkanan. 11 Ngani iya tembag, Da pomapiya sa naay da somabi amba naay babaen da naay kalkanan da- ako mangadang. 12 da iya ba kora tinanong, Tawa gidte ag iraya naba ag somabi sa komo amba babaen da komo kalkanan da- kawo mangadang? 13 Ngani nawed nakilala ag lalaki da pomapiya sa konin, panawen maoson gidte da mga iraya sata da- laki Hisos kay ba wala:a sata. 14 Maraw kalbas, ag lalaki ba akitan laki Hisos sa balay Diyos, da iya ba sinabiyan amba, Kawo gidte pakarngey! Kawo piya:ani mona! Kawo ayaw:wa mamanawen daet kaaram maki dapo mangyadi sa komo lalo:a daet. 15 Omalis da lalaki da- sinabi sa mga poon mga Diw amba, Laki Hisos da pomapiya sa naay. 16 Kaya ibat saba laki Hisos ba nagpahidapan mga poon mga Diw, panawen iya ba magpapiya sa Aldaw Magpahinga. 17 Kaya sinabi sa kora laki Hisos amba, Anggan mona ba da naay Apang ba toloy:ya magpamanawen ag konin kailangan panawenen, da amba din ako. 18 Panawen sa konin sinabi naba ba lalo dapo iya ba alabet kora pabonoon, panawen konin:na winala koyinta da kora maniho para sa Aldaw Magpahinga da- konin dapo nagsabi da Diyos da konin Apang da- sa makay naba, konin nagtepeng sa Diyos da konin sadiri. 19 Kaya sinabi sa kora laki Hisos amba, Naay gidte nagsabi sa koyo, Ako ag Onga Diyos ba wala apanawen sa naay sadiri ngani. Da naay ngani apanawen ba ag naay akitan nagpanawen naay Apang. Da nagpanawen naay Apang ba naba din da naay nagpanawen. 20 Panawen ako ag Onga ba nagpalayaw naay Apang kaya nagpaban-aw sa naay da boo konin nagpanawen. Da- lalo dapo makapangyadihan sa mga naba da konin batay pinaban-aw sa naay, para koyo boo ba nangamangha gidte. 21 No omaning nagbiyag:gakay naay Apang da mga nangatay da- magtaboy biyag gidte sa kora, amba kay din ako, ag konin Onga ba magtaboy din biyag gidte sa tawa man naay alabet. 22 Da naay Apang ba nawed maghosga sa tawa man no nawed ba ako, ag konin Onga, da tinaboyan boo kapangyadihan maghosga 23 para ako ba galangen boo, makay din ag kora maggalang sa naay Apang. Da iya nawed maggalang sa Onga ba nawed din maggalang sa Apang ag pomaidaw sa Onga. 24 Naay gidte nagsabi sa koyo, Da iya agpakarngey sa naay tokawanan da- mag-isarig sa pomaidaw sa naay ba maki biyag gidte wala arasan. Iya nawed batay pinadosahan no nawed ba makay pinasepat:tani ibat sa katayan anggan sa biyag. 25 Naay gidte nagsabi sa koyo, Magrateng da odas, da- mona:a ngani-, batay akarngeyan ag mga nangatay da tokawanan ag Onga Diyos da da makarngey da- maniwala sa konin ba batay nangabiyag. 26 No omaning da naay Apang da maki kapangyadihan magtaboy biyag gidte, amba kay din ako, ag konin Onga, ba konin pinakan kapangyadihan magtaboy biyag. 27 Ako pinakan din kapangyadihan homosga panawen ako da Onga Iraya. 28 Koyo ayaw magtaka sa naay batay sinabi, panawen batay:ya rateng da odas da boo nangatay:yani ba batay karngey naay tokawawan, 29 da- kora batay:yakay nangabiyag da- kora batay manlowas sa kora limbengan. Da iya mamanawen piya ba batay pinakan biyag gidte wala arasan da da iya kay mamanawen daet ba batay pinadosahan. 30 Ako ba wala gidte apanawen sa naay sadiri kapangyadihan. Ako ba maghosga toltol ngani sa sabi naay Apang, kaya mataldeng da naay hosga. Da naay nagtoltol ba nawed ag naay sadiri alabet no nawed ba da alabet ag pomaidaw sa naay da naay nagtoltol. 31 No ako ngani da magsistigo para sa naay ba nawed abaya tabangen da naay sistigo, 32 ngani maki roma magsistigo para sa naay da- naay amatangan totoo da konin nagsabi. 33 Koyo pinaidaw sa laki Howan da koyo mga sogo da- iya ba somistigo para sa katotohanan. 34 Nawed:da kailangan da sistigo iraya; naba ba naay ngani nagsabi para koyo disin ba naribri. 35 Laki Howan ba makay maigang ka solo- magrawa, da- koyo ba asyagan sa konin rawa nawed te maagot. 36 Ngani maki sistigo para sa naay mahalaga dapo sa sistigo kay laki Howan: naba da mga nagpapanawen sa naay naay Apang, ag naay timped. Da mga naba da magpatonay amba ako ba pinaidaw naay Apang. 37 Da naay Apang ag pomaidaw sa naay ba magsistigo din para sa naay. Nawed tang koyo arngeyan da iya agtokawanan da- nawed din koyo akitan da konin hidsoda. 38 Nawed koyo nagpapirmi sa koyo poso da konin tokawanan panawen koyo nawed maniwala sa naay, ag konin pinaidaw. 39 Koyo magsarak sa mga Banal ka Kasoratan, panawen koyo magremrem amba sata koyo batay asbokan da biyag gidte wala arasan. Da mga naba da magsistigo para sa naay 40 ngani koyo dayo kay pabali sa naay para koyo kamaki biyag gidte. 41 Ako ba nawed maghangad ako nagpodi mga iraya. 42 Ngani koyo naay kilala da- naay amatangan koyo nawed nagpalayaw da Diyos sa koyo poso. 43 Ako ba nagpaparaoy gidte towa naay Apang ngani koyo ba dayo tomabang sa naay. Ngani no maki roma paraoy towa sa konin ngani sadiri kapangyadihan ba iya kay da koyo batay tinabang. 44 Omaning koyo batay kapaniwala sa naay no da koyo naghangad ba da magpodiyan sa sai-sai da- nawed koyo naghangad da papodi ibat sa sai ngani ka Diyos? 45 Ayaw koyo agremremen amba ako da batay magsombong sa Apang laban sa koyo; laki Moysis, ag koyo nag-asahan, iya da magsombong laban sa koyo. 46 No koyo gidte pinaniwalaan laki Moysis ba koyo batay:ya din disin maniwala sa naay, panawen iya somorat para sa naay. 47 Ngani no nawed koyo pinaniwalaan da konin mga sinorat, omaning koyo batay apaniwalaan da naay mga nagsabi?

6

1 Maraw kalawey:ya mga aldaw, kora Hisos ba omipay sa karipay dagat- dagatan Galiliya ag nag-awit din dagat-dagatan Tibiriyas. 2 Iya nag-anggatan kaosonan gidte iraya panawen kora akitan da mga kamangha-mangha konin pinanawen sa iya pomapiya sa mga maki maskit. 3 Laki Hisos ba tomokad sa latayan kaanggat da konin mga nagtod-an, da- manongka sata. 4 Bali:ya da mga aldaw kasayahan Paskwa mga Diw. 5 Laki Hisos ba man-aw. Konin akitan da kaosonan gidte iraya naba:ani. Konin tinanong laki Pilipi amba, Saan tamo batay bomili pamangnen para kapamangan da boo mga iraya tiya? 6 Konin sinabi naba para porbahan laki Pilipi, panawen amatangan:na laki Hisos da konin batay pinanawen. 7 Laki Pilipi ba tembag, Kayno:wa darwa ka daan ka dinaryo ba nawed batay sibay pabiliyen tinapay para kapamangan kay te da tayma sai. 8 Sinabi laki Anris, ag sai sa konin mga nagtod-an da- arian laki Simon Pidro amba, 9 Maki towa sai ka onga lalaki maki nagbaba lima ka tinapay sibada da- darwa ka isda. Ngani kaomaning te tiya sa kaamba kaoson ka iraya! 10 Laki Hisos amba, Kora koyo patongkaen. Gamasenan ag poro naba. Manongka kora boo-Mga lima ka ribo da mga lalaki. 11 Ginaro laki Hisos da tinapay da maraw kapasalamat:tani sa Diyos ba pinangeray sa mga iraya. Amba din da konin pinanawen sa isda. Namakan da boo anggan kora alabet. 12 da maraw kora nangaabsoyan:nani ba konin sinabi sa konin mga nagtod-an amba, Koyo tiponon da mga natra para nawed nasayang. 13 Kaya kora tinipon da natra sa mga namisang-misang ibat sa lima ka tinapay sibada da- kora kapno dapo labindarwa ka alat. 14 Maraw akitan mga iraya da tandaanan naba pinanawen laki Hisos ba kora sinabi amba, Tiya:a ngani- da Tagabarita amba batay towa sa paranawan! 15 Amatangan laki Hisos batay pabali da mga iraya da- iya batay gidte limpod para gaw-en hadi, kaya omalis:sakay iya ngani paraoy sa kalatayanan. 16 Maraw masoram-soram:mani, da mga nagtod-an laki Hisos ba paraoy sa tebteb dagat-dagatan 17 da- somakay sa bangka paipay sa goraan Kapirnaom. Madelem:ma ba laki Hisos ba wala dapo. 18 Nagkamaeyat:ta da koaya da lakol:la da pad alon. 19 Maraw kora agpanagwan darwa ka patpa, kora akitan laki Hisos agkadangan sa ngaway sapa, pabali sa bangka ngani nawed kora akilalaan. Kaya kora ba mangirabot gidte. 20 Ngani konin sinabi sa kora, Koyo ayaw aliman! Tiya ba ako! 21 Angasan kora pinasakay sa bangka laki Hisos, da kamalay te ba pomondo:wa da bangka sa kora nagparaoyan. 22 Maraw omaga:akay, sata dapo da kaosonan mga iraya sa poro kora mamangan. Kora aremreman sai ngani ka bangka sata. Kora din amatangan laki Hisos ba nawed kaanggat sa konin mga nagtod-an sa bangka, panawen kora ngani da somakay sa bangka da- omalis. 23 Rateng kay da roma ka bangka ibat sa goraan Tibiriyas da- pomondo sa poro bali sa kora mamangan tinapay maraw kapasalamat da Panginoon. 24 Maraw akitan ag kaosonan iraya laki Hisos ba wala:a sata, kayno ag konin mga nagtod-an, ba kora somakay sa mga bangka sata da- paraoy din sa Kapirnaom para saraken laki Hisos. 25 Kora akitan laki Hisos sa karipay dagat-dagatan da- kora tinanong amba, Tagatodo, kawo kaagot dapo towa? 26 Laki Hisos ba tembag, Naay gidte nagsabi sa koyo, Ako koyo nagsarak nawed panawen sa mga tandaanan koyo akitan no nawed ba panawen sa koyo kapamangan tinapay da- nangaabsoyan. 27 Koyo mamanawen nawed para maki pamangnen nagkapanis, no nawed ba para maki pamangnen mag-agot, ag magtaboy biyag gidte wala arasan. Naba da batay tinaboy sa koyo ag Onga Iraya, panawen iya da pinatonayan Diyos Apang. 28 Kaya iya kora tinanong, Nakay-nakay da yamen kailangan panawenen para yamen atped da kaliyagan Diyos? 29 Amba laki Hisos, Tiya da alabet Diyos koyo panawenen: Koyo manarig sa konin pinaidaw. 30 Kora amba, Nakay dapo ka tandaanan komo batay pinaban-aw sa yamen para yamen misarig sa komo? Nakay da komo batay pinanawen? 31 Da tamo mga pangapoan ba mamangan pamangnen nag-awit mana sa poro nawed apirmihan iraya toltol sa nasorat sa Banal ka Kasoratan amba, Kora ba konin pinakan pamangnen ibat sa soksokowan. Naba:a ngani. 32 Laki Hisos ba tembag, Naay gidte nagsabi sa koyo, Nawed laki Moysis da tomaboy sa koyo pamangnen ibat sa soksokowan, no nawed ba ag naay Apang. Iya da magtaboy sa koyo ag pamangnen gidte ibat sa soksokowan. 33 Panawen da pamangnen taboy Diyos ba da maglopot ibat sa soksokowan da- magtaboy biyag gidte sa mga kairayaan. 34 Kora amba, Koyay, yamen boo odas komo pakanen ag pamangnen naba. 35 Amba laki Hisos, Ako da pamangnen magtaboy biyag gidte. Da iya magpabali sa naay ba nawed:da batay nabayog da- da iya mag-isarig sa naay ba nawed:da batay makainem kaagot man. 36 Ngani naay sinabi sa koyo kayno ako ba koyo akitan, amba man koyo nawed mag-isarig sa naay. 37 Batay anggat sa naay da boo nagtaboy sa naay naay Apang. Da- nawed gidte naay batay sinikway da iya magpabali sa naay, 38 panawen ako ba lompot ibat sa soksokowan nawed para panawenen da naay kaliyagan no nawed ba da kaliyagan ag pomaidaw sa naay. 39 da tiya da kaliyagan ag pomaidaw sa naay amba, Ayaw naay pabayaan nawala da kayno sai sa konin tinaboy sa naay no nawed ba kora biyagen:nakay sa paoriyan aldaw. 40 Panawen tiya da kaliyagan naay Apang amba, Da boo kaserey da- mag-isarig sa naay ag Onga Diyos ba kamaki biyag gidte wala arasan da- kora ba naay:yakay batay biniyag sa paoriyan aldaw. 41 Da mga Diw ba mag-ompisa agbolong-bolongan laban sa konin panawen konin sinabi amba, Ako da pamangnen lompot ibat sa soksokowan. 42 Kaya kora sinabi amba, Nawed ma tiya laki Hisos ag onga laki Hosi? Tamo kilala da konin apang da- adang. Omaning mona konin asabi amba iya lompot ibat sa soksokowan? 43 Kaya sinabi laki Hisos amba, Koyo empet sa magbolong-bolongan. 44 Wala kapabali sa naay no nawed pinabali ag pomaidaw sa naay-wala roma no nawed ba ag Apang sa soksokowan. Da- da iya batay pabali sa naay ba naay:yakay batay biniyag sa paoriyan aldaw. 45 Nagkasorat sa ribro sai sa mga tagabarita ibat sa Diyos amba, Kora boo ba batay tindoan Diyos. Naba:a ngani. Kaya da tayma magpakarngey sa naay Apang da- konin tindoan ba pabali sa naay. 46 Nawed naay nagsabi amba maki:ya kaban-aw sa naay Apang, no nawed ako ngani, ag ibat sa naay Apang, da kaban-aw:wani sa konin. 47 Naay gidte nagsabi sa koyo, Da iya mag-isarig sa naay ba maki biyag gidte wala arasan. 48 Ako da pamangnen magtaboy biyag gidte. 49 Da koyo mga pangapoan ba mamangan pamangnen nag-awit mana pag kora ba sa poro nawed apirmihan iraya, amba man kora nangatay. 50 Ngani da iya mamangan tiya pag pamangnen ibat sa soksokowan ba nawed:da batay natay. 51 Ako da pamangnen magtaboy biyag gidte ag lompot ibat sa soksokowan. Batay nabiyag kaagot man da iya magpamangan ag pamangnen tiya. Da- da pamangnen naay batay tinaboy para sa batay kabiyag mga kairayaan ba da naay lawas. 52 Panawen saba ba da mga Diw ba abaisan da- magpaltanongan amba, Omaning batay ataboy sa tamo ag iraya tiya da konin lawas para tamo kainen? 53 Kaya sinabi laki Hisos amba, Naay gidte nagsabi sa koyo, No koyo nawed magpamangan ag lawas Onga Iraya da- nag-inem da konin daya, ba koyo nawed batay kamaki biyag gidte. 54 Da iya magpamangan ag naay lawas da- mag-inem naay daya ba maki biyag gidte wala arasan, da- iya naay:yakay batay biniyag sa paoriyan aldaw. 55 Panawen da naay lawas ba pamangnen gidte da- da naay daya ba inemen gidte. 56 Da iya magkain naay lawas da- mag-inem naay daya ba magpamirmi gidte sa naay da- ako kay ba magpamirmi sa konin. 57 Da naay Apang ag pomaidaw sa naay ba iya da magtaboy biyag, da- ako ba nagkabiyag panawen sa konin. Amba kay din da iya magpamangan sa naay ba batay nabiyag panawen sa naay. 58 Kaya tiya da pamangnen lompot ibat sa soksokowan amba, Da iya magpamangan tiya ba batay nabiyag kaagoton man. Tiya ba nawed makay ag pamangnen namangan tamo mga pangapoan sa poro nawed apirmihan iraya. Kora nangatay kayno kora mamangan naba. 59 Naba ba sinabi laki Hisos ag iya magtodo sa balay pagtiponan mga Diw sa Kapirnaom. 60 Naba ba arngeyan ag mga konin kaanggat da- maoson sa kora da magsabi amba, Naba ba mahidap ka tokawanan! Tawa da batay katabang naba? 61 Amatangan laki Hisos sa konin sadiri amba magpaybolongan da konin mga kaanggat para saba, kaya konin sinabi sa kora amba, Panawen sa mga tokawanan naba ba koyo batay:ya dia awal-an koyo pag-isarig sa naay? 62 Lalo:a dia no da Onga Iraya ba koyo akitan pinasalbon sa konin monaan inibatan? 63 Da magtaboy biyag gidte ba da Ispirito Diyos. Naba ba nawed batay apanawen iraya. Panawen sa mga tokawanan naay sinabi sa koyo ba koyo katabang ag Ispirito ag magtaboy biyag gidte. 64 Ngani maki sa koyo dayo mag-isarig sa naay. Panawen amatangan:na laki Hisos ibat dapo ag monaan no tawa-tawa da nawed mag-isarig sa konin da- no tawa da batay pomaabel sa konin. 65 Konin dapo sinabi amba, Naba da dahilan kaya naay sinabi sa koyo amba, Wala kapabali sa naay no nawed inabaya naay Apang. 66 Ibat saba, maoson sa konin mga kaanggat da paawak da- dayo:a anggat sa konin. 67 Kaya tinanong laki Hisos da labindarwa ka nagtod-an amba, Koyo kay, koyo alabet din dia omalis? 68 Tembag laki Simon Pidro amba, Panginoon, yamen saan batay paraoy? Sa komo da mga tokawanan magtaboy biyag gidte wala arasan. 69 Yamen agpaniwala da yamen nagkapiho kawo da Banal ibat sa Diyos. 70 Laki Hisos ba tembag amba, Nawed ma koyo naay hinidang, koyo ag labindarwa? Ngani da sai sa koyo ba sai ka aponin kadaetan! 71 Da konin nagtodyo ba laki Hodas ag onga laki Simon Iskariyoti. Panawen laki Hodas, kayno iya ba sai sa labindarwa, iya da batay pomaabel sa laki Hisos.

7

1 Maraw kadalan naba, rinibok laki Hisos da Galiliya; dayo konin ribokon da Hodiya panawen alabet iya ba bonoon mga poon mga Diw sata. 2 Nagkabali:yani da mga aldaw sai:yakay ka kasayahan mga Diw. Sa mga aldaw naba ba kora mamataw sa mga barangas. 3 Kaya sinabi sa laki Hisos konin mga arian amba, Kaytang kawo nawed omalis towa da- paraoy sa Hodiya, para akitan komo mga katongroy da komo mga nagpanawen? 4 No da alabet sai ka iraya ba nakilala ba iya ba nawed magpanawen sa nawed akitan roma. Ganyang komo nagpanawen da mga nakayman naba ba kawo paban-aw:wani sa boo mga kairayaan. 5 Kayno ag mga arian laki Hisos ba nawed din mag-isarig sa konin. 6 Iya tembag, Nawed dapo naay odas. Ngani sa koyo kay ba kayno nakay pag odas ba abaya. 7 Da mga iraya sa paranawan ba nawed abaya nagkaabaisan sa koyo ngani ako ba kora nagpamaisan, panawen naay layen nagsabi amba daet da kora nagpanawen. 8 Koyo:wa ngani da paraoy sa kasayahan. Ako nawed batay paraoy sa kasayahan panawen nawed dapo naay odas. 9 Maraw nasabi naba ba iya paogon:nani sa Galiliya. 10 Maraw kaalis da konin mga arian magtokad sa kasayahan, laki Hisos ba tomokad din sata nawed anggat sa kaosonan no nawed ba sa nawed akitan mga iraya. 11 Iya ba nagsarak sata mga poon mga Diw. Kora amba, Saan kaya iya? 12 Magbolonganan gidte da kaosonan mga iraya para sa konin. Maki amba, Iya ba piya ka iraya! Maki kay amba, Nawed! Konin naglingo da mga iraya. 13 Ngani wala mangahas magtokawanan sa akarngeyan kaosonan para sa konin, sa aliman sa kora mga poon. 14 Maraw batay:ya kagtengaan kasayahan, laki Hisos ba tomokad da- semled sa lakol ka balay Diyos da mag-ompisa magtodo. 15 Manggilalas gidte da mga poon mga Diw da kora amba, Saan gomaro kadonongan da iraya naba? Iya ba nawed tang tindoan! 16 Laki Hisos ba tembag, Da naay nagtodo ba nawed ibat sa naay sadiri no nawed ba ibat sa Diyos, ag pomaidaw sa naay. 17 Da iya handa gidte panawenen da kaliyagan Diyos ba konin batay amatangan no da naay nagtodo ba ibat sa Diyos no sa naay ngani sadiri. 18 Da iya magtokawanan ibat sa konin ngani sadiri ba alabet iya ba palakolon. Ngani da iya agpamanawen para palakolon da pomaidaw sa konin ba totoo gidte da- nawed magpamosli. 19 Nawed ma tinaboy:ya sa koyo laki Moysis da Bilin? Amba man ba wala kayno sai sa koyo agpamanawen naba. Kaytang kay koyo alabet ako ba pabonoon? 20 Tembag da mga iraya, Kawo mana ba nag-apo daet ka ispirito! Tawa da alabet pomabono sa komo? 21 Laki Hisos tembag amba, Sai ngani ka nakayman da naay pinanawen ba koyo boo ba manggilalas:sani. 22 Tinaboy sa koyo laki Moysis da bilin para sa maglong-oy da- naba ba koyo nagpanawen kayno Aldaw Magpahinga. (Da katotohanan naba ba nawed gidte ibat sa laki Moysis naba no nawed ba ibat sa konin dapo pangapoan.) 23 No naglong-oy da sai ka polahan lalaki kayno sa Aldaw Magpahinga para tepden da Bilin tinaboy sa laki Moysis, kaytang koyo nagkaabaisan sa naay sa ako magpapiya sa sai ka iraya sa Aldaw Magpahinga? 24 Ayaw koyo homosga toltol sa nagkaakitan ngani, no nawed ba toltol sa totoo gidte. 25 Kaya sinabi ag kalaati mga taga Hirosalim amba, Nawed ma tiya ag iraya kora alabet pabonoon? 26 Koyo ban-awan! Iya ba magtodo sa akarngeyan gidte boo ngani kora wala nagsabi laban sa konin! Amatangan:na gidte dia tamo mga poon amba iya da Kiristo, ag Tagaribri pinangako Diyos? 27 Ngani ag iraya naba ba tamo amatangan no taga saan iya, ngani no batay rateng da Kiristo ba wala batay kamatang no saan omibat! 28 Laki Hisos ba magtodo sa lakol ka balay Diyos da- iya magtokawanan maeyat amba, Ako dia ba koyo kilala? Koyo dia amatangan no ako ba taga saan? Ako nawed paraoy towa sa naay sadiri ngani. Da pomaidaw sa naay ba asarigan, ngani iya ba nawed koyo kilala gidte. 29 Iya naay kilala panawen ako ba ibat sa konin da iya da pomaidaw sa naay. 30 Kaya kora magporba iya ba paabelen. Ngani wala kabel sa konin panawen nawed dapo konin odas. 31 Kayno amba, maoson sa kaosonan mga iraya da misarig sa konin. Kora amba, No batay paraoy towa da Kiristo ba iya dia batay kapanawen tandaanan makapangyadihan dapo sa mga pinanawen ag iraya tiya? 32 Akarngeyan din kalaati mga Parisiyo da bolong-bolongan mga iraya para sa laki Hisos. Kora da- da mga koyay magpamanawen sa balay Diyos ba pomaidaw mga tagabantay sa balay Diyos para abelen laki Hisos. 33 Kaya konin sinabi amba, Ako batay dapo koyo kaanggat sa nawed maagot ka odas, da- ako batay:yakay paoli sa pomaidaw sa naay. 34 Ako koyo batay sinarak ngani ako nawed koyo batay akitan, panawen koyo nawed batay kaparaoy sa naay batay pinaraoyan. 35 Mamagpaltanongan da mga poon mga Diw amba, Saan kaya batay paraoy da iraya naba, da- nawed tamo batay akitan? Batay dia sata sa mga Diw manambolat sa mga goraan mga Nawed Diw para magtodo din sa mga Nawed Diw? 36 Nakay dia da alabet sabiyen ag konin nagsabi amba, Ako koyo batay sinarak da ako nawed batay koyo akitan, da amba, Koyo nawed kaparaoy sa naay batay pinaraoyan? 37 Maraw paoriyan aldaw kasayahan, ag mahalaga sa boo, laki Hisos ba patindeg da- magtokawanan maeyat amba, Da iya makainem ba pabali sa naay da- minem. 38 Toltol sa nasorat sa Banal ka Kasoratan amba, Da iya mag-isarig sa naay ba da mga bokalan sapa magtaboy biyag gidte ba batay bomokbokal sa konin poso. 39 Da konin nagtodyo ba da Ispirito Banal batay tinabang mga mag-isarig sa konin. Ag odas naba nawed dapo nagkataboy da Ispirito Banal, panawen nawed dapo pinalakol laki Hisos. 40 Sa mga karngey sa konin ba maki magsabi amba, Iya:a gidte ngani- da Tagabarita tamo nagpanyaan! 41 Amba da roma, Iya nga da Kiristo! Ngani tembag kay da roma, Abaya dia omibat sa Galiliya da Kiristo? Nawed gidte! 42 Nawed ma nagkasorat sa Banal ka Kasoratan amba da Kiristo ba batay omibat sa andana hadi Dabid, da- batay inonga sa Bitlihim, ag goraan te inibatan hadi Dabid? 43 Kaya naeray-eray da remrem mga iraya para sa konin. 44 Da alabet kalaati ba iya paabelen ngani wala kay kasonggab sa konin. 45 Da mga tagabantay sa balay Diyos ba paoli:akay sa mga poon magpamanawen para sa Diyos da- sa mga Parisiyo, da- kora tinanong amba, Kaytang iya nawed koyo pinaanggat towa? 46 Kora tembag amba, Wala dapo iraya magtokawanan makay iya! 47 Amba da mga Parisiyo, Koyo dia ba nadaya:a din ag iraya naba? 48 Maki ma mga poon e mga Parisiyo magpaniwala sa konin? 49 Mga iraya ngani wala amatangan sa Bilin tinaboy sa laki Moysis da agpaniwala sa konin-kora ba sa galem sompa Diyos! 50 Da sai din sa kora ba laki Nikodimo, ag pomaraoy sa laki Hisos ag monaan. Kora konin tinanong amba, 51 Nawed ma inayawan tamo Bilin da hosgahen da sai ka iraya no nawed dapo tinanong da- inaram no nakay da konin pinanawen? 52 Kora tembag amba, Kawo dia ba taga Galiliya din? Komo saraken sa Banal ka Kasoratan da- komo batay akitan wala tagabarita mag-ibat sa Galiliya.

8

2 Kaomagahan gidte ba iya sata:akay sa lakol ka balay Diyos. Pabali sa konin da boo kairayaan, kaya iya tomongka da kora ba tindoan. 3 Pinaanggat sa konin mga kamatangen sa Bilin da- mga Parisiyo da sai ka babayi abel sa magpangalonya. Iya kora pinatindeg sa kora tenga, 4 da- sinabi sa laki Hisos amba, Tagatodo, ag babayi tiya ba abel sa magpangalonya. 5 Sa tamo Bilin ba binilin laki Moysis sa tamo amba, Batowen da babayi makay naba anggan anggan iya natay natay. Omaning da komo batay asabi para sa konin? 6 Amba da kora tanong para iya porbahan para kora ba maki asombong laban sa konin. Ngani laki Hisos ba misongo da- somorat konin solo sa lopa. 7 Maraw kora ba toloy:ya magtanong sa konin ba kora ba konin binan-awan da- sinabi amba, Da tawa man sa koyo wala kadaetan ba iya da monaan bomato sa konin. 8 Da- iya misongo:wakay da- somorat sa lopa. 9 Maraw kora akarngeyan naba kora ba sai-sai malpangadang, da monaan ba mga koyay. Wala aogonan no nawed ba laki Hisos ngani da- ag babayi sa konin ropangan. 10 Iya ba binan-awan laki Hisos da tinanong, Saan:na kora? Wala dia homosga sa komo? 11 Tembag ag babayi amba, Wala ngani-, koyay! Sinabi laki Hisos, Kawo nawed din naay batay hinosgahan. Idaw:wa kawo da- ayaw:wa mamanawen daet. 12 Laki Hisos ba tomokawanan:nakay sa mga iraya amba, Ako da magparawa sa mga kairayaan sa paranawan. Da iya mag-anggat sa naay ba nawed:da batay mangadang sa kadeleman no nawed ba maki batay rawa magtaboy biyag gidte. 13 Sinabi sa konin mga Parisiyo amba, Kawo ba magsistigo para sa komo sadiri kaya nawed totoo da komo sistigo. 14 Laki Hisos ba tembag, Kayno ako ba magsistigo sa naay sadiri ba totoo da naay sistigo panawen naay amatangan no saan ako omibat da- no saan ako batay paraoy. Ngani nawed kay koyo amatangan da naay inibatan da da naay batay pinaraoyan. 15 Koyo maghosga toltol sa kaogalian mga iraya, ngani ako kay ba nawed maghosga sa tawa man. 16 Kayno ako maghosga ba totoo da naay hosga panawen nawed ngani ako da maghosga no nawed ba kaanggat din da naay Apang ag pomaidaw sa naay. 17 Sa koyo Bilin ba nasorat amba, Da sistigo darwa ka iraya ba totoo. 18 Ako magsistigo para sa naay sadiri da- magsistigo din da naay Apang ag pomaidaw sa naay. 19 Kaya iya ba kora tinanong amba, Saan da kom Apang? Laki Hisos ba tembag, Ako nawed koyo kilala, kayno ag naay Apang. No ako disin koyo kilala gidte ba koyo din batay kilala da naay Apang. 20 Naba ba sinabi laki Hisos ag iya ba magtodo sa lakol ka balay Diyos, sa maki mga palagyanan taboy. Ngani wala iraya kaabel sa konin panawen nawed dapo konin odas. 21 Sinabi:yakay sa kora laki Hisos amba, Ako batay:ya omalis da- ako koyo batay sinarak, ngani koyo batay nangatay sa koyo mga kadaetan. Koyo nawed kaparaoy sa naay batay pinaraoyan. 22 Mamagtokawanan da mga Diw amba, Iya batay dia pakatay kaya konin sinabi, Koyo nawed kaparaoy sa naay batay pinaraoyan? 23 Laki Hisos amba, Koyo ba taga lopa da- ako kay ba taga kangawayan. Koyo ba taga paranawan tiya, ako ba nawed. 24 Kaya naay sinabi sa koyo, Koyo batay nangatay sa koyo mga kadaetan. Koyo batay nga nangatay sa koyo mga kadaetan no koyo nawed maniwala amba, Ako ba Ako ngani-. 25 Kora amba, Tawa kawo? Laki Hisos ba tembag amba, Ag naay:ya sinabi sa koyo ag monaan dapo. 26 Ako ba maoson batay asabi da- batay ahosga laban sa koyo. Ngani da pomaidaw sa naay ba asarigan da- da mga nakayman naay akarngeyan sa konin ba naba da naay nagsabi mga iraya sa paranawan. 27 Nawed kora amatangan iya ba magtokawanan para sa konin Apang sa soksokowan. 28 Kaya sinabi laki Hisos, No koyo:wa napataas da Onga Iraya, koyo:wa batay amatangan amba Ako ba Ako ngani-. Ako ba wala nagpanawen ibat sa naay ngani sadiri no nawed ba ako magtokawanan toltol sa tindo naay Apang sa naay. 29 Da- naay kaanggat da pomaidaw sa naay. Ako nawed konin nag-ogonan panawen boo odas naay nagpanawen da kaangas-angas sa konin. 30 Ag odas konin nagsabi da mga naba ba maoson mga karngey da maniwala sa konin. 31 Sinabi kay laki Hisos sa mga Diw magpaniwala sa konin amba, No koyo magtoltol sa naay todo ba koyo ba naay gidte nga mga nagtod-an; 32 koyo batay amatangan da katotohanan da- da katotohanan da batay magbal-an sa koyo. 33 Kora tembag sa konin amba, Yamen ba kaapoan laki Abraham, da- yamen ba nawed tang tagoanggat kayno tawa. Omaning komo asabi amba yamen batay binal-anan? 34 Laki Hisos ba tembag amba, Naay gidte nagsabi sa koyo amba, Da iya magpanawen daet ba tagoanggat kadaetan. 35 Da tagoanggat ba nawed batay kabilang sa mag-anakan boo odas ngani da onga ba kabilang kaagoton man. 36 No koyo nagbal-anan ag Onga ba koyo ba bal-an:na gayed. 37 Naay amatangan koyo ba kaapoan laki Abraham, kayno amba ba ako koyo alabet bonoon, panawen dayo koyo tabangen da naay todo. 38 Naay nagsabi da naay akitan sa naay Apang; koyo kay nagpanawen da koyo akarngeyan sa koyo apang. 39 Kora amba, Laki Abraham da yamen pangapoan. Tembag laki Hisos amba, No laki Abraham da koyo pangapoan ba koyo batay tinoladan da konin pinanawen. 40 Ngani ako ba koyo alabet bonoon, ag naay ngani kay nagsabi da katotohanan naay akarngeyan sa Diyos. Nawed amba da pinanawen laki Abraham. 41 Da koyo nagpanawen ba makay ag nagpanawen koyo apang. Kora tembag amba, Yamen nawed mga onga sa kalonya! Da Diyos ngani da yamen gidte Apang. 42 Sinabi laki Hisos, No da Diyos gidte ngani-da koyo Apang ba ako koyo disin nagpalayaw panawen ako ba towa paraoy ibat sa Diyos. Ako nawed paraoy towa sa naay ngani sadiri no nawed ba ako konin pinaidaw. 43 Kaytang nawed koyo amatangan da naay nagsabi? Panawen nawed koyo atabang da naay nagtodo sa koyo. 44 Da aponin kadaetan da koyo apang da- no nakay da konin alabet ba naba da koyo alabet panawenen. Ibat dapo tangona, iya ba amomono da- kalaban katotohanan. Nawed batay asbokan sa konin da katotohanan kayno kaagot man. No iya ba magpamosli ba naba ba ibat gidte sa konin sadiri ogali, panawen iya ba boslien da- aponin boo kaboslian. 45 Ngani da naay nagsabi ba katotohanan, kaya ako nawed koyo nagpaniwalaan. 46 Tawa sa koyo da batay kasabi amba ako ba pomanawen daet? No katotohanan da naay nagsabi, kaytang koyo nawed maniwala sa naay? 47 Da iya ba ibat sa Diyos ba magpaniwala sa tokawanan Diyos. Ngani koyo ba nawed ibat sa Diyos kaya koyo dayo magpaniwala sa konin tokawanan. 48 Sinabi sa konin ag mga Diw amba, Nawed ma totoo da yamen sinabi amba, Kawo ba sai ka taga Samariya da- kawo nag-apo daet ka ispirito? 49 Tembag laki Hisos, Ako nawed nag-apo daet ka ispirito. Naay naggalang da naay Apang ngani ako ba koyo nagwala koyinta. 50 Ako nawed magsarak naay kapodiyan; maki alabet ako ba galangen da- iya da maghosga. 51 Naay gidte nagsabi sa koyo, Da magtoltol sa naay nagtodo ba kaagot man ba nawed batay kadanas katayan. 52 Sinabi ag mga Diw amba, Mona ba yamen gidte apiho kawo nga ba nag-apo daet ka ispirito. Laki Abraham ba natay, amba din da mga tagabarita Diyos, ngani komo nagsabi amba nawed batay natay da iya magtoltol sa komo nagtodo. 53 Kawo dia makapangyadihan dapo sa yamen pangapoan laki Abraham? Iya ba natay, amba din da mga tagabarita Diyos. Omaning da komo remrem sa komo sadiri? 54 Laki Hisos ba tembag amba, No ako da magpalakol sa naay sadiri ba wala kaparosan naba. Da naay Apang, ag koyo nagsabi amba kono iya da koyo Diyos, ba iya da magpalakol sa naay. 55 Iya nawed koyo nagkilala ngani iya ba naay gidte nagkilala. No naay nagsabi iya nawed naay kilala ba ako ba boslien din makay koyo. Ngani iya ba naay gidte kilala da- naay nagpanawen da konin nagsabi. 56 Angasan gidte da koyo pangapoan laki Abraham sa konin akitan da aldaw ako batay towa. Konin nga akitan naba da- iya ba angasan. 57 Panawen saba ba sinabi sa konin ag mga Diw amba, Kawo wala dapo limampo ka dag-on da komo:wa kono akitan laki Abraham? 58 Laki Hisos ba tembag, Naay gidte nagsabi sa koyo, Bayo inonga laki Abraham ba Ako ba Ako ngani-. 59 Kora gomalamit bato para iya ba batowen ngani laki Hisos ba tomago da- lomwas sa balay Diyos.

9

1 Ag laki Hisos ba agkadangan ba iya maki akitan sai ka lalaki raprap ibat sa iya inonga. 2 Iya tinanong ag konin mga nagtod-an amba, Tagatodo, kaytang iya raprap ibat sa iya inonga? Tawa kaya da maki kadaetan? Iya dia no konin mga koyay? 3 Laki Hisos ba tembag, Ag lalaki tiya ba raprap ibat sa iya inonga nawed panawen sa iya maki kadaetan kayno ag konin mga koyay, no nawed ba saba ba batay akitan da kapangyadihan Diyos. 4 Kailangan tamo panawenen da nagpapanawen ag pomaidaw sa naay anggan aldaw dapo. Maraw rateng da madlem ba wala:a batay kapamanawen. 5 Anggan ako towa dapo sa paranawan ba ako ba magparawa sa paranawan. 6 Maraw nasabi naba laki Hisos ba iya tempay sa lopa da- ginawa losak da- naba ba pinair sa mata ag raprap. 7 Sinabi sa konin laki Hisos amba, Kawo paraoy sata sa linaw Siloi (da alabet sabiyen Siloi ba Pinaidaw). Kawo manramos sata. Amba ngani- da pinanawen ag raprap da- maraw iya moli sa konin balay ba kaban-aw:wani. 8 Tinanong ag konin mga katingyaw balay da- ag mga kaban-aw sa konin ag iya ba magpangay-ay dapo amba, Ned ma naba ag lalaki ag monaan ba magtongka da magpangay-ay? 9 Tembag da kalaati amba, Naba ngani-! Amba kay ag roma, Nawed! Ngani makay din konin kiray. Kaya sinabi ag lalaki, Ako:wa ngani-! 10 Iya ba kora tinanong amba, Omaning kawo kaban-aw mona? 11 Iya tembag amba, Ag lalaki nag-awit Hisos ba tempay sa lopa da- ginawa losak da- pinair sa naay mata da konin sinabi amba, Kawo paraoy sa Siloi da- manramos. Kaya ako sata nga paraoy da- ako manramos da- ako kaban-aw:wani. 12 Iya kora tinanong amba, Saan:na iya? Iya tembag amba, Awan! 13 Kora pinaanggat sa mga Parisiyo ag aray raprap. 14 Ag laki Hisos ba gomawa losak da- pinapiya da raprap ba Aldaw Magpahinga. 15 Iya ba tinanong din ag mga Parisiyo no omaning iya kaban-aw. Konin sinabi sa kora, Konin pinairan losak da naay mata, da- ako manramos da mona ako kaban-aw:wani. 16 Kaya da kalaati mga Parisiyo ba amba, Nawed ibat sa Diyos ag iraya naba panawen iya nawed magtoltol sa Bilin para sa Aldaw Magpahinga. Ngani sinabi kay ag roma amba, Omaning batay kapamanawen makay naba ka tandaanan da sai ka iraya makadaetan? Da- naeray-eray da kora remrem. 17 Kaya kora:akay tinanong da aray raprap, Omaning da komo remrem sa iraya naba, ag pomapiya kono komo mata? Iya tembag amba, Iya ba sai ka tagabarita! 18 Ag mga Diw ba dayo maniwala amba iya ba ag monaan ba raprap da- mona ba kaban-aw:wani, kaya kora pinaparaoy da konin mga koyay 19 da- sidawa tinanong amba, Kandawa dia onga tiya? Totoo ngani- iya ba raprap ibat sa iya inonga? Kaytang iya ba kaban-aw:wani mona? 20 Tembag da konin mga koyay, Kidawa amatangan iya ba kidawa onga, da- iya ba raprap ibat sa iya inonga. 21 Ngani nawed kidawa amatangan kaytang iya ba kaban-aw:wani mona no tawa kaya da pomapiya sa konin. Iya:a da koyo tanongon! Iya ba sibay:ya da kaamatangan da- iya kasabi:yani para sa konin sadiri. 22 Makay naba da sabi konin pad koyay panawen sa sidawa aliman sa mga Diw, panawen kasaiyan:na mga Diw da palwasen sa rimponan da tawa man magsabi amba laki Hisos ba iya da Kiristo. 23 Naba da dahilan kaya sidawa sinabi amba, Iya ba sibay:ya da kaamatangan. Iya da koyo tanongon. 24 Kaya kora:akay pinaparaoy ag aray raprap da- sinabi sa konin amba, Kawo mangako sa ropangan Diyos amba kawo batay gidte magsabi totoo! Yamen amatangan makadaetan ag iraya naba. 25 Iya amba, Nawed naay amatangan no iya makadaetan no nawed. Da naay ngani amatangan ba ag monaan ba ako ba raprap ngani mona ba kaban-aw:wani. 26 Iya kora:akay tinanong, Omaning da konin pinanawen sa komo? Omaning konin pinapiya da komo mata? 27 Iya tembag, Naay:ya sinabi sa koyo da- koyo dayo maniwala. Kaytang koyo:wakay alabet akarngeyan? Koyo dia alabet din konin mga nagtod-an? 28 Iya ba kora gidte dinagilan kaya kora amba, Kawo da nagtod-an ag iraya naba. Yamen kay ba mga nagtod-an laki Moysis. 29 Yamen amatangan tomokawanan da Diyos sa laki Moysis ngani ag iraya naba ba nawed yamen amatangan no saan iya omibat! 30 Tembag ag lalaki, Naba nga da kapanggilalas! Nawed koyo amatangan no saan iya omibat, ngani konin kay pinapiya da naay mata. 31 Tamo amatangan nawed nagpakarngeyan Diyos da mga iraya makadaetan, no nawed ba konin nagpakarngeyan da mga magsamba sa konin da- magtoltol sa konin kaliyagan. 32 Ibat sa ompisa paranawan ba wala arngeyan amba maki iraya kapapiya sai ka iraya raprap ibat sa iya inonga. 33 Wala apanawen ag iraya naba no iya ba nawed ibat sa Diyos! 34 Kora tembag amba, Kawo ba makadaetan ibat sa inonga da- kawo dapo da batay magtodo sa yamen? Da- iya ba kora inimbanda. 35 Abaritaan laki Hisos amba ag lalaki konin pinapiya ba inimbanda mga Parisiyo kaya maraw konin akitan ba iya konin tinanong amba, Kawo dia mag-isarig sa Onga Iraya? 36 Tembag ag lalaki, Koyay, tawa iya para ako ba kapag-isarig sa konin? 37 Amba laki Hisos, Iya ba komo akitan, iya ag magtokawanan sa komo. 38 Amba da lalaki, Panginoon, ako ba mag-isarig sa komo! Da- iya lomohod da- konin sinamba laki Hisos. 39 Sinabi dapo laki Hisos amba, Ako towa paraoy para homosga-para da mga raprap ba kaban-aw da- naraprap kay da mga kaban-aw. 40 Naba ba akarngeyan mga kalaati Parisiyo bali sa konin da- iya ba kora tinanong amba, Da komo dia alabet sabiyen yamen ba raprap din? 41 Laki Hisos ba tembag, No koyo ba raprap ba koyo ba wala disin kadaetan! Ngani koyo nagsabi amba koyo ba kaban-aw kaya koyo ba magpamirmi sa koyo mga kadaetan.

10

1 Naay gidte nagsabi sa koyo, Da magseled sa kolongan mga topa da- nawed magdalan sa sakbawan, no nawed ba magyakbang sa bakodan, ba magpanakaw da daet ka iraya. 2 Ngani da magdalan sa sakbawan ba iya da mag-alaga mga topa. 3 Iya nagpasled ag tagabantay sakbawan, da- nagpakarngeyan mga topa da konin belsan. Konin nagpatwagan da konin mga topa sa konin-konin ngaran da- nagpalwas sa kolongan. 4 No napalwas:sani da boo konin topa, iya ba magpangonaan sa kora da- da mga topa kay ba magtongroy sa konin panawen kora kilala da konin belsan. 5 Kora nawed magtongroy sa roma, no nawed ba magdalagan dapo paadayo, panawen nawed kora kilala da kora belsan. 6 Nanoltol laki Hisos sa mga iraya da halimbawa naba, ngani nawed kora amatangan da konin alabet sabiyen. 7 Kaya sinabi:yakay laki Hisos amba, Naay gidte nagsabi sa koyo, Ako da sakbawan mga topa. 8 Da boo mga monaan sa naay ba mga magpanakaw da- daet ka iraya, ngani kora ba nawed pinakarngeyan mga topa. 9 Ako da sakbawan. Da iya naay pinasled ba batay naribri, iya batay semled da- batay lomwas da- batay kaban-aw maganda ka gamasenan. 10 Kaya ngani batay towa da magpanakaw ba para manakaw da- bomono da- somida. Ako towa paraoy para da mga topa ba kamaki biyag-sai ka biyag sibay gidte. 11 Ako da piya ka tagaalaga topa. Nagtaboy ag piya ka tagaalaga da konin biyag para sa mga topa. 12 Da magpaopa ba magdalagan no akitan magrateng:nga da aso kotanan. Konin nag-ogonan da mga topa panawen iya ba nawed tagaalaga da- da mga topa ba nawed konin. Kaya nagtangay aso kotanan da sai da- manambolat:tani da mga topa. 13 Iya magdalagan panawen iya ba nag-opahan ngani da- iya ba wala alapet sa mga topa. 14 Ako da piya ka tagaalaga topa. Naay kilala da naay mga topa da ako kay ba kora kilala 15 makay din ag ako ba kilala naay Apang da iya kay ba naay kilala. Da- naay nagtaboy da naay biyag para sa mga topa. 16 Ako maki roma ka topa wala dapo sa kolongan tiya. Kailangan kora naay din pasleden towa. Kora batay pinakarngeyan da naay belsan. Sa makay naba kora ba batay sai ngani ka topahan da- sai din da mag-alaga. 17 Kaya ako ba nagpalayaw naay Apang ba panawen naay nagtaboy da naay biyag para ako ba abaya:akay nabiyag. 18 Wala kagaro sa naay naba. Ako gidte da magtaboy naba sa katayan. Ako maki kapangyadihan magtaboy naba da- biyagen:nakay. Tiya da nagpapanawen naay Apang sa naay. 19 Panawen sa mga tokawanan naba, nawed:dakay magkasai da mga Diw. 20 Maoson sa kora da magsabi amba, Iya nag-apo daet ka ispirito da- nagkabolingaw! Kaytang koyo agpakarngey sa konin? 21 Sinabi kay ag roma, Nawed abaya magtokawanan makay naba da sai ka nag-apo daet ka ispirito! Batay dia kapaban-aw:wakay sa sai ka raprap da sai ka daet ka ispirito? 22 Tagdimla:ani ag odas naba, odas gidte kasayahan magpodi para sa balay Diyos sa Hirosalim. 23 Laki Hisos ba magkadangan sa balay Diyos sa pasirongan ag nag-awit pasirongan laki Salomon. 24 Iya ba pinaribokan mga Diw da- kora sinabi sa konin amba, Kaomaning dapo kaagot yamen komo batay pinapanya? Komo:wa sabiyen mapawa sa yamen no kawo:wa ngani- da Kiristo! 25 Laki Hisos ba tembag, Naay:ya sinabi sa koyo, ngani koyo dayo maniwala. Da nagpapanawen sa naay naay Apang da magsistigo para sa naay. 26 Ngani koyo dayo maniwala panawen koyo nawed kabilang sa naay mga topa. 27 Magpakarngey sa naay da naay mga topa. Kora naay kilala da- kora magtongroy sa naay. 28 Kora naay nagpakan biyag gidte wala arasan da kaagot man ba kora nawed batay natay. Kora nawed batay aagaw tawa man sa naay. 29 Da naay Apang, ag tomaboy sa kora sa naay, ba lalo makapangyadihan sa boo, da- kora nawed batay aagaw tawa man sa naay Apang ag mag-alaga sa kora. 30 Ako da- naay Apang ba sai ngani. 31 Panawen sa konin sinabi naba ba da mga Diw ba gomalamit:takay bato para iya ba batowen. 32 Kaya sinabi sa kora laki Hisos amba, Maoson:na piya ka panawen da pinapanawen sa naay naay Apang da- koyo akitan da mga naba. Alin sa mga naba da dahilan kaya ako koyo alabet batowen? 33 Iya timbag mga Diw amba, Nawed sa mga piya ka panawen kaya kawo yamen alabet batowen no nawed ba sa kawo magtongayaw sa Diyos, panawen amba kawo Diyos ag kawo kay ba iraya ngani. 34 Tembag laki Hisos, Nawed ma nasorat sa koyo Bilin, Da Diyos ba amba, Koyo ba mga diyos? 35 Tamo amatangan da Banal ka Kasoratan ba nawed gidte abaya sidaen! No amba, no inawit diyos da mga tinaboyan Banal ka Kasoratan ba 36 omaning koyo asabi amba ako, ag pinoyida naay Apang da- pinaidaw sa paranawan, ba magtongayaw sa Diyos, panawen sa naay nagsabi amba, Ako da Onga Diyos. 37 No nawed naay nagpanawen da mga nagpapanawen sa naay naay Apang ba koyo ayaw maniwala sa naay. 38 Ngani no naay nagpanawen da mga naba, kayno koyo dayo maniwala sa naay, koyo kay maniwala sa naay mga nagpanawen, para koyo gidte amatangan sa naay da Apang da ako ba sa konin. 39 Kora:akay pinorbahan iya ba abelen, ngani iya ba domalagan. 40 Laki Hisos ba paraoy:yakay sa karipay salog Hordan sa pagbaotismohan galing laki Howan. Sata iya mamataw. 41 Maoson pabali sa konin. Kora amba, Laki Howan ba wala pinanawen katakataka ngani boo gidte totoo da konin sinabi para sa iraya tiya. 42 Da- sata ba maoson da misarig sa laki Hisos.

11

1 Maki sai ka iraya da ngaran ba laki Lasaro. Iya ba magpamataw sa goraan te Bitanya kaanggat kobayi Mariya da- Marta, ag konin mga kakaan. Bayi Mariya da bomobo pamango da- pomair konin obok sa mga paa Panginoon. Agkasakit laki Lasaro, 3 kaya pinasabi sa laki Hisos ag talkaka amba, Panginoon, da komo nagpalayaw ka abyan ba maki sakit. 4 Ngani maraw naba ba akarngeyan laki Hisos ba konin sinabi, Nawed batay katay da sakit naba no nawed ba para da Diyos ba palakolon, da- sa makay naba ba batay din pinalakol da Onga Diyos. 5 Palayaw gidte laki Hisos da talkakaan Marta da- Mariya da Lasaro. 6 Kayno amba ba ibat konin:na abaritaan laki Lasaro ba maki sakit ba konin dapo pinalawey darwa ka aldaw 7 bayo konin sinabi sa konin mga nagtod-an amba, Tamo:wakay sa Hodiya. 8 Tembag da konin mga nagtod-an amba, Tagatodo, nawed ma bali naapon ngani te ba kawo ba alabet kora batowen. Kaytang kawo sata:akay batay paraoy? 9 Sinabi laki Hisos, Nawed ma maki labindarwa ka odas sa boo aldaw? Nawed nagkasongko da iya magkadangan aldaw, panawen konin gidte akitan da rawa paranawan tiya, 10 ngani nagkasongko kay da iya agkadangan madlem panawen wala sa konin da rawa. 11 Sinabi laki Hisos da mga naba da- konin dapo sinabi amba, Akalekan laki Lasaro ag tamo abyan. Ako batay sata para iya ba polawen. 12 Kora tembag amba, Panginoon, no amba ba iya batay pomiya. 13 Da alabet sabiyen laki Hisos ba laki Lasaro ba natay:yani ngani kora dia amba akalekan ngani ngani-. 14 Kaya sinabi gidte laki Hisos amba, Natay:yani laki Lasaro 15 da- panawen saba ba koyo batay mag-ompisa mag-isarig sa naay. Kaya ako ba wala sata ako din ba angasan, panawen naba ba batay gidte maki pakinabang sa koyo. Tamo:wani! 16 Laki Tomas ag nag-awit Siing ba amba sa konin mga kaanggat, Tamo:wani anggat sa tamo Tagatodo, para tamo ba natay anggat sa konin. 17 Ag laki Hisos ba rateng ba iya sinabiyan amba apat:ta ka aldaw laki Lasaro ba limbeng sa leyang bato. 18 Da Bitanya ba korang darwa ka patpa sa Hirosalim, 19 da- maoson sa mga Diw da domaraw sa kobayi Marta da- Mariya para sidawa ba ayoon panawen sa natay ag sidawa arian. 20 Maraw akarngeyan bayi Marta laki Hisos ba magrateng:ngani ba iya konin sinalobong. Bayi Mariya kay ba sata ngani sa balay. 21 Sinabi bayi Marta sa laki Hisos amba, Panginoon, no kawo ba towa ba nawed disin natay da naay arian. 22 Ngani naay amatangan kayno mona ba da nakayman komo ay-ayan sa Diyos ba batay tinaboy sa komo. 23 Amba laki Hisos, Batay:yakay biniyag da komo arian. 24 Bayi Marta ba tembag, Naay:ya nga amatangan iya ba batay:yakay biniyag sa paoriyan aldaw sa odas batay:yakay biniyag da mga nangatay. 25 Sinabi laki Hisos amba, Ako da magpabiyag:gakay da ako da biyag. Da iya mag-isarig sa naay ba kayno natay ba batay:yakay biniyag, 26 da- da iya nagkabiyag gidte da- mag-isarig sa naay ba nawed batay natay kaagot man. Kawo dia magpaniwala saba? 27 Iya tembag amba, Hee ngani-, Panginoon! Ako mag-isarig amba kawo da Kiristo, ag Onga Diyos, ag amba batay towa sa paranawan. 28 Maraw nasabi naba ba moli bayi Marta. Konin pinatwagan bayi Mariya sa nawed akarngeyan roma. Iya amba, Saba:ani da Tagatodo, kawo konin nagpaparaoy. 29 Maraw akarngeyan naba, agad gidte patindeg bayi Mariya, da- mangadang paparaoy sa laki Hisos. 30 Nawed dapo kasled sa goraan te laki Hisos. Iya ba sata dapo sa iya sinalobong bayi Marta. 31 Bayi Mariya ba inanggatan mga Diw omayo sa konin maraw iya agad patindeg da- lomwas sa balay. Kora dia amba, Iya batay paraoy sa lebeng da- sata magpanangis. 32 Rateng bayi Mariya sa laki Hisos da- maraw iya konin akitan ba iya lomohod sa konin ropangan da- iya amba, Panginoon, no kawo ba towa ba nawed disin natay da naay arian. 33 Nalognoy:ya gidte laki Hisos maraw konin akitan magpakongkong bayi Mariya da- da mga Diw konin kaanggat. 34 Iya amba, Iya saan koyo pinalagay? Kora tembag, Panginoon, kawo towa da- komo ban-awan. 35 Laki Hisos ba magpanangis, 36 kaya sinabi ag mga Diw amba, Konin gidte nga nagpalayaw laki Lasaro! 37 Ngani sinabi kay ag kalaati amba, Napaban-aw ag iraya tiya da raprap! Kaytang nawed konin nahadangan para nawed natay laki Lasaro? 38 Nalognoy:yakay laki Hisos. Iya paraoy sa lebeng. Naba ba leyang nagtakleban sai ka bato. 39 Laki Hisos ba amba, Koyo alsen da bato. Bayi Marta, ag kakaan ag natay, ba tembag amba, Panginoon, bawo:wa mona. Apat:ta ka aldaw iya ba natay. 40 Laki Hisos amba, Nawed ma naay:ya sinabi sa komo no kawo mag-isarig sa naay ba komo batay akitan no kaomaning kakol da kapangyadihan Diyos? 41 Kaya kora inalis da bato. Laki Hisos ba maningara da- iya amba, Naay Apang, ako magpasalamat sa komo panawen ako komo:wa pinakarngeyan. 42 Naay amatangan ako ba boo odas komo nagpakarngeyan, ngani naay sinabi naba para da mga iraya sa naay paribok ba batay kamatang amba kawo da pomaidaw sa naay. 43 Maraw nasabi:ya naba, iya tomokawanan maeyat amba, Lasaro, kawo lomwas! 44 Lomwas nga laki Lasaro, nagpanabedan dapo papa golanit panlebeng da konin mga alima da- paa, da- nagpotos panyo da konin kiray. Sinabi laki Hisos sa kora, Iya ba koyo okadan da- bayaan mangadang. 45 Maoson sa mga Diw domaraw sa bayi Mariya da- kaban-aw sa pinanawen laki Hisos da misarig sa konin. 46 Ngani da kalaati kay ba paraoy sa mga Parisiyo da- binarita da pinanawen laki Hisos. 47 Kaya pinatipon mga koyay magpamanawen sa balay Diyos da- mga Parisiyo da hosayan lakol mga Diw da kora sinabi amba, Nakay da tamo batay pinanawen? Ag iraya naba ba magpamanawen maoson ka katakataka. 48 No iya tamo batay pinabayaan, batay misarig sa konin da boo. Batay towa da mga poon taga Roma da- batay rinanggas da tamo lakol ka balay Diyos da- batay namono da tamo lasyon. 49 Sai sa kora ba magtokawanan. Iya ba laki Kaipas, ag koyay lakol magpamanawen sa balay Diyos ag dag-on naba. Iya amba, Koyo ba wala amatangan! 50 Nawed ma koyo naremrem piya dapo para sa tamo no sai ka iraya ngani da natay para sa kairayaan sa nangatay kay da boo lasyon? 51 Konin sinabi naba nawed sa konin ngani sadiri no nawed ba makay poon sa mga magpamanawen sa balay Diyos ag dag-on naba ba konin hinolaan batay natay laki Hisos para sa mga Diw- 52 da- nawed para sa mga Diw ngani no nawed ba para konin tiponon da pasaiyen da boo mga onga Diyos manambolat sa roma-roma ka poro. 53 Ibat sa aldaw naba ba kora:a sinakona amba pabonoon laki Hisos, 54 kaya iya ba nawed:da agkadangan magpaban-aw sa mga Diw, no nawed ba iya paraoy sa goraan Ipraim, sai ka goraan bali sa poro nawed apirmihan iraya. Da- sata iya mamatawan anggat sa konin mga nagtod-an. 55 Nagkabali:yani da kasayahan Paskwa mga Diw. Maoson taga goraanan te da tomokad sa Hirosalim bayo magpaskwa para kora panawenen da maglinis toltol sa Bilin. 56 Laki Hisos ba kora nagsarak da- maraw kora magpatindeg sata sa lakol ka balay Diyos ba kora ba magpaltanongan amba, Omaning kaya sa koyo? Iya kaya batay paraoy sa kasayahan e nawed? 57 Binilin ag mga koyay magpamanawen da- mga Parisiyo tod-on ag mga kamatang no saan laki Hisos para iya ba kora paabelen.

12

1 Anim ka aldaw bayo rateng da kasayahan Paskwa. Laki Hisos ba rateng sa Bitanya, sa goraan te laki Lasaro ag konin:nakay biniyag. 2 Iya ba hinandaan sata tal-aponan. Bayi Marta ba mamanawen da- laki Lasaro ba sai sa mga kasaro laki Hisos. 3 Bayi Mariya kay ba gomaro mahal gidte ka banglo, sai ka gatang malislisaw ka banglo da ngaran ba nardo da- binobo sa mga paa laki Hisos. Maraw kalbas ba pinairan konin obok. Omayooyan sa boo balay da banglo. 4 Laki Hodas Iskariyoti, sai sa mga nagtod-an laki Hisos, ag batay pomaabel sa konin, ba magsabi amba, 5 Kaytang nawed pinabili ag banglo da- tinaboy sa mga mahidapen da kabayadan? Batay tatlo ka daan ka dinaryo da kabayadan naba. 6 Konin sinabi naba nawed sa iya ba maki alapet sa mga mahidapen no nawed ba panawen sa iya ba ananakaw. Iya da mag-alaga kora kwarta da konin layen naggaro naba. 7 Laki Hisos ba tembag, Iya koyo pabayaan! Konin binokod tiya para sa aldaw ako batay limbeng. 8 Boo odas batay koyo kaanggat da mga mahidapen, ngani ako ba nawed batay koyo kaanggat sa boo odas. 9 Abaritaan kaosonan mga iraya amba laki Hisos ba sa Bitanya kaya kora sata paraoy nawed ngani panawen sa konin no nawed ba para kora akitan laki Lasaro ag konin biniyag:gakay. 10 Kaya sinakona ag mga koyay magpamanawen sa balay Diyos amba pabonoon din laki Lasaro, 11 panawen maoson ka mga Diw da somway sa kora da- misarig sa laki Hisos, panawen sa konin pinanawen sa laki Lasaro. 12 Maraw omaga:akay abaritaan kaosonan gidte iraya paraoy sa kasayahan amba laki Hisos ba magparaoy sa Hirosalim. 13 Kora gomaro mga daon barawan da lomwas sa goraan lakol para iya ba salobongon. Kora magyagyagang amba, Hite! Podiyen ngani- da iya magrateng sa ngaran Diyos! Podiyen ngani- da Hadi sa Israil! 14 Maraw akitan laki Hisos da sai ka onga asno ba konin sinakayan makay ag nasorat amba, 15 Koyo taga goraan lakol Sion! Koyo ayaw aliman! Koyo masdan! Magrateng da koyo hadi magsakay sa sai ka onga asno. Naba:a ngani. 16 Ag monaan ba nawed amatangan konin mga nagtod-an da alabet sabiyen naba, ngani maraw laki Hisos ba nabiyag:gakay da- pinalakol ba kora aremreman, naba da nagsabi Banal ka Kasoratan para sa konin da- amba nga da nangyadi. 17 Binarita kaosonan iraya da kora sinistigohan maraw pinatwagan laki Lasaro ibat sa lebeng da- biniyag ibat sa mga nangatay. 18 Naba da dahilan kaya iya ba sinalobong kaamba kaoson ka iraya-kora abaritaan da konin pinanawen kapanggilalas. 19 Mamagtokawanan da mga Parisiyo amba, Tamo ba nawed:da batay kapandaeg! Magtoltol:la sa konin da boo kairayaan! 20 Maki mga Nawed Diw tomokad din sa Hirosalim para somamba sa Diyos sa odas kasayahan. 21 Kora pabali sa laki Pilipi taga Bitsaida, sa Galiliya, da- omateet amba, Koyay, yamen alabet agpakasma sa laki Hisos. 22 Sinabi naba laki Pilipi sa laki Anris da- sidawa pabali sa laki Hisos da- pinaaram da kora aringi. 23 Sinabi sa kora laki Hisos amba, Magrateng:nga da odas batay pinalakol da Onga Iraya. 24 Naay gidte nagsabi sa koyo, No da beter tirigo ba nawed nabobod da- makay natay sa lopa ba batay mamirmi sai ngani. Ngani no makay natay ba naba ba batay mamokar maoson. 25 Da iya magpahalaga sa konin sadiri biyag ba iya da batay awal-an naba, ngani da iya kay magwala halaga sa konin sadiri biyag sa paranawan tiya ba iya da batay maki naba anggan sa biyag gidte wala arasan. 26 Da iya magpamanawen sa naay ba kailangan tomongroy sa naay. da kayno saan ako ba sata din da naay tagapamanawen. Batay pinodi naay Apang da iya magpamanawen sa naay. 27 Mona ba nagkaalognoyan gidte da naay remrem. Da- omaning da naay batay sinabi? Naay Apang, ako komo ribriyen sa odas naba? Nawed gidte! Panawen tiya da dahilan kaya ako towa paraoy-para danasen da kahidapan naba. 28 Naay Apang, komo palakolon da komo ngaran. Maki magtokawanan ibat sa soksokowan amba, Naay:ya pinalakol, da- naay:yakay batay pinalakol. 29 Naba ba akarngeyan kaosonan mga iraya sata da- da kalaati sa kora ba amba, Domalegdeg! Amba kay da roma, Magtokawanan sa konin da sai ka anghil. 30 Kaya sinabi laki Hisos sa kora amba, Da tokawanan tiya ba pinakarngey nawed para sa naay no nawed ba para sa koyo. 31 Mona:ani da odas para hosgahan da paranawan. Mona:ani batay inaboy da pamoonan sa paranawan tiya. 32 Da- no ako ba pinataas:sani naay batay pinabali sa naay da boo iraya. 33 Konin sinabi naba para paaramen no omaning iya batay natay. 34 Tembag da kaosonan mga iraya amba, Yamen arngeyan sa Bilin amba da Kiristo ba batay mamirmi kaagot man. Kaytang komo nagsabi amba kailangan pataasen da Onga Iraya? Tawa mana da Onga Iraya naba? 35 Sinabi laki Hisos sa kora, Kabeste:a te da odas koyo batay dapo kaanggat da rawa. Koyo mangadang anggan koyo dapo kaanggat da rawa, para koyo nawed adeleman. Nawed amatangan ag magkadangan sa delem no saan iya paraoy. 36 Ag koyo dapo kaanggat da rawa ba koyo misarig sa rawa para koyo ba mga iraya magpamiyag sa rawa. Maraw naba ba nasabi laki Hisos ba iya omalis da- tomago. 37 Kayno kora akitan iya pomanawen maoson ka tandaanan ba kora nawed dapo din misarig sa konin. 38 Sa makay naba ba natped da sinabi laki Isayas ag tagabarita Diyos amba, Panginoon, tawa da maniwala sa yamen mga tokawanan? Sa tawa pinaban-aw Panginoon da konin kapangyadihan? Naba:a ngani. 39 Naba da dahilan kaya kora nawed kapaniwala, makay ag pinasabi dapo Diyos sa laki Isayas amba, 40 Naay rinaprap da kora mga mata da- pinakaskil da kora olo para kora nawed kaban-aw kayno kamatang da kora remrem kayno paoli sa naay para kora ba naay papiyaen. Naba:a ngani. 41 Naba ba sinabi laki Isayas panawen konin akitan da kalakolan laki Hisos da- iya tomokawanan para sa konin. 42 Kayno amba, maoson din da misarig sa konin kayno mga poon mga Diw. Ngani naba ba nawed kora nanoltol panawen kora aliman sa mga Parisiyo, kaaram kora alsen sa rimponan mga Diw. 43 Panawen da kora alabet ba kora papodiyan mga iraya sa kora kay ba papodiyan Diyos. 44 Laki Hisos ba magtokawanan maeyat amba, Da iya mag-isarig sa naay ba nawed ngani sa naay mag-isarig no nawed ba sa pomaidaw din sa naay. 45 Da- da kaban-aw sa naay ba kaban-aw din sa pomaidaw sa naay. 46 Ako paraoy towa sa paranawan makay rawa para da mga misarig sa naay ba nawed mamirmi sa kadeleman. 47 Da iya karngey naay tokawanan da- nawed konin timped naba ba iya nawed naay batay hinosgahan, panawen ako towa paraoy nawed para hosgahan da mga iraya sa paranawan no nawed ba para kora ba ribriyen. 48 Maki batay homosga sa tawa man somikway sa naay da- nawed tomabang sa naay mga tokawanan. Da tokawanan naay pinangadar ba naba da batay homosga sa konin sa paoriyan aldaw. 49 Panawen ako nawed tomokawanan sa naay ngani kapangyadihan no nawed ba da naay Apang da bomilin sa naay no omaning da naay batay sinabi da- pinangadar. 50 Da- naay amatangan da konin bilin da magtaboy biyag gidte wala arasan. Kaya da nagpasabi naay Apang ba naba da naay nagsabi.

13

1 Sai dapo ka aldaw bayo rateng da kasayahan Paskwa mga Diw. Amatangan laki Hisos rateng:nga da odas iya batay omalis sa paranawan tiya da- batay paoli sa konin Apang. Konin:na nagpalayaw ag konin mga nagtod-an towa sa paranawan da- semker:ra gidte da konin palayaw sa kora. 2 Magpanal-aponan laki Hisos da- konin mga nagtod-an. Nagpalagay:ya ag aponin kadaetan sa remrem laki Hodas, ag onga laki Simon Iskariyoti, da para sa batay pomaabel sa laki Hisos. 3 Amatangan:na laki Hisos tinaboy:yani sa konin konin Apang da boo kapangyadihan. Konin din amatangan iya ba batang sa Diyos da- batay:yakay paoli sa konin. 4 Kaya iya ba patindeg da- linso da konin panlowas nagsool da- magbegkes towalya sa konin bar-is. 5 Maraw kalbas iya bomobo sapa sa batiya da- mag-ompisa mag-oyas mga paa konin mga nagtod-an da- pairan towalya ag nagbegkes sa konin. 6 Maraw iya pabali sa laki Simon Pidro ba laki Pidro ba magdiklamo amba, Panginoon, komo dia batay inoyasan da naay mga paa? 7 Laki Hisos ba tembag amba, Nawed komo amatangan mona da naay nagpanawen ngani komo din batay amatangan no kalbas. 8 Sinabi sa konin laki Pidro, Nawed gidte naay batay pinaoyas sa komo da naay mga paa. Amba laki Hisos, No kawo ba nawed naay batay inoyasan ba kawo ba wala eray sa naay kahadian. 9 Kaya sinabi laki Pidro amba, Panginoon, no amba ba nawed ngani paa, no nawed ba anggan alima da- olo! 10 Amba laki Hisos, Da iraya karangoy:yani ba kailangan:na ngani mag-oyas paa panawen malinis:sani da boo konin lawas. Da- koyo malinis:sani ngani sai sa koyo ba nawed. 11 Panawen amatangan laki Hisos no tawa da batay pomaabel sa konin kaya konin sinabi malinis:sa kora ngani sai sa kora ba nawed. 12 Maraw naoyasan:nani laki Hisos da kora mga paa, iya ba mag- sool:lakay golanit da- sata:akay sa pagkainan. Kora konin tinanong amba, Koyo dia amatangan no nakay da naay pinanawen sa koyo? 13 Ako koyo nag-awit Tagatodo da Panginoon, da- amba ngani- koyo, panawen ako ngani-. 14 No ako, ag koyo Panginoon da- Tagatodo, ba omoyas koyo mga paa, kailangan din koyo magpal-oyasan koyo mga paa. 15 Koyo naay pinakan halimbawa da- naba da koyo kailangan toladan. 16 Naay gidte nagsabi sa koyo, Wala tagoanggat mahalaga dapo sa konin panginoon, kayno ag pinaidaw sa pomaidaw sa konin. 17 No koyo amatangan da mga naba da- koyo batay pinanawen ba koyo ba angasan. 18 Nawed koyo boo da naay nagtodyo. Naay kilala da naay mga hinidang. Ngani kailangan natped da nasabi sa Banal ka Kasoratan amba, Da mamangan anggat sa naay ba iya da somikad sa naay. Naba:a ngani. 19 Naay nagsabi naba sa koyo bayo mangyadi para no naba ba nangyadi:yani ba koyo misarig amba, Ako ba Ako ngani-. 20 Naay gidte nagsabi sa koyo, Da magtabang sa naay nagpaidaw ba magtabang sa naay, da- da magtabang sa naay ba magtabang sa pomaidaw sa naay. 21 Maraw nasabi naba, nagkaalognoyan da remrem laki Hisos da- konin gidte sinabi amba, Naay gidte nagsabi sa koyo, Da sai sa koyo ba batay pomaabel sa naay. 22 Magpaysereyan da konin mga nagtod-an. Nawed gidte kora amatangan no tawa da konin nagtodyo. 23 Sai sa kora, pag nagtod-an nagpalayaw gidte laki Hisos, ba magtongka sa konin tebteb. 24 Kinamit laki Pidro da- sinabi amba, Komo tanongon no tawa da konin nagtodyo. 25 Kaya iya ba misari sa soot laki Hisos da- konin tinanong amba, Panginoon, tawa da komo nagtodyo? 26 Laki Hisos ba tembag, Da naay pinakan dinede pisang pamangnen ba iya:a ngani-. Da- maraw nagaro:wani da- nadede:ani da pisang pamangnen ba konin tinaboy sa laki Hodas, onga laki Simon Iskariyoti. 27 Maraw nata-bang:ngani laki Hodas da pamangnen ba laki Satanas kay ba semled sa konin. Sinabi laki Hisos amba, Da komo batay:ya pinanawen ba komo:wa agad panawenen. 28 Ngani kayno sai sa konin kasaro ba wala kamatang no kaytang konin nasabi naba. 29 Panawen laki Hodas da mag-alaga kora kwarta ba kora dia amba iya nagpabili laki Hisos da kora kailangan sa kasayahan e nagpanaboy sa mga mahidapen. 30 Maraw naman-gan:nani laki Hodas da pamangnen ba iya omalis. Madlem:mani. 31 Maraw kaalis:sani laki Hodas ba sinabi laki Hisos, Mona ba nagpaban-aw:wani da nagpalakol ag Onga Iraya, da- nagpalakol:la din da Diyos panawen sa konin. 32 Da- no da Diyos ba nagpalakol:lani panawen sa konin ba iya kay ba batay pomaban-aw ag kalakolan konin Onga da- naba ba agad konin batay nayadi. 33 Naay mga nagpalayaw, Kabeste:a da odas ako koyo batay dapo kaanggat. Ako koyo batay sinarak, ngani naay nagsabi sa koyo mona da naay:ya sinabi sa mga Diw amba, Koyo nawed kaparaoy sa naay nagparaoyan. 34 Sai ka bayo ka bilin da naay nagtaboy sa koyo, Koyo magpalayawan. No omaning koyo naay pinalayaw ba amba kay din koyo magpalayawan. 35 No koyo magpalayawan ba koyo batay akilalaan boo iraya amba koyo ba naay mga nagtod-an. 36 Tinanong laki Pidro amba, Panginoon, kawo saan batay paraoy? Laki Hisos ba tembag, Sa naay paraoyan ba kawo ba nawed abaya anggat mona, ngani isag kawo batay din sata. 37 Laki Pidro amba, Kaytang ako nawed abaya anggat sa komo mona? Ako handa magtaboy naay biyag para sa komo. 38 Laki Hisos ba tembag amba, Totoo dia komo nga batay tinaboy da komo biyag para sa naay? Naay gidte nagsabi sa komo, Bayo mangarang-it da manok, katatlo ako komo batay tinanggiyan.

14

1 Koyo ayaw nagkaalognoyan da koyo remrem. Koyo mag-isarig sa Diyos da- mag-isarig din sa naay. 2 Sata sa naay Apang ba maoson pamatawan. No nawed amba ba nawed:da disin naay sinabi sa koyo amba, Mona ba ako batay sata para naay handaen da koyo batay pamatawan. 3 No ako sata:ani da- naay:ya nahanda da koyo batay pamatawan ba ako batay:yakay towa da- koyo naay batay kaanggat. Sa makay naba ba kayno saan ako ba koyo ba sata din. 4 Koyo:wa amatangan da dalan paparaoy sa naay nagparaoyan. 5 Sinabi sa konin laki Tomas amba, Panginoon, yamen nawed amatangan no saan kawo batay paraoy, omaning yamen batay amatangan da dalan? 6 Laki Hisos ba tembag, Ako da dalan, da da katotohanan da- da biyag. Wala kaparaoy sa naay Apang no nawed sa naay ngani. 7 No ako koyo:wa kilala ba koyo:wa din batay kilala da naay Apang. Ibat mona ba iya koyo:wa kilala da- akitan. 8 Sinabi sa konin laki Pilipi amba, Panginoon, komo nga paban-awen sa yamen da Apang da- sibay:yani sa yamen. 9 Laki Hisos ba tembag amba, Pilipi, maagot:ta ako koyo kaanggat. Kaytang ako nawed dapo komo kilala? Da kaban-aw:wa sa naay ba kaban-aw:wa din sa Apang. Kaytang komo nagsabi amba, Komo paban-awen sa yamen da Apang? 10 Nawed ma kawo magpaniwala ako ba sai sa Apang, da- da Apang ba sai din sa naay? Da mga tokawanan naay nagsabi sa koyo ba nawed sa naay sadiri no nawed ba da Apang ag magpamirmi sa naay ba iya da magpanawen konin mga panawenen. 11 Koyo maniwala sa naay : ako ba sai sa Apang da- da Apang ba sai din sa naay. No koyo dayo maniwala sa naay nagsabi ba koyo maniwala sa mga naay nagpanawen. 12 Naay gidte nagsabi sa koyo, Da iya mag-isarig sa naay ba batay kapamanawen naay mga nagpanawen da- labi dapo saba, panawen ako batay:ya paraoy sa Apang. 13 Da- da nakayman koyo ay-ayan sa Apang sa koyo maki kasaiyan sa naay ba naay batay pinanawen. Sa makay tiya, da Apang ba batay pinalakol panawen sa naay. 14 Naay batay pinanawen da nakayman koyo aringien sa koyo maki kasaiyan sa naay. 15 No ako ba koyo nagpalayaw koyo batay magteped sa naay mga bilin. 16 Ako batay omay-ay sa naay Apang da- koyo ba konin batay pinakan sai dapo ka Anonolong koyo batay kaanggat kaagot man, 17 wala roma no nawed ba da Ispirito Banal, ag magpaban-aw katotohanan Diyos. Iya nawed atabang mga taga paranawan panawen iya nawed kora akitan kayno akilalaan. Ngani iya ba koyo kilala panawen iya ba sa koyo da- batay mamirmi sa koyo. 18 Koyo nawed naay batay inogonan koyo ngani wala palkabano. Ako batay:yakay sa koyo. 19 Nawed te maagot ka odas ako ba nawed:da tay akitan mga taga paranawan. Ngani ako ba koyo batay:yakay akitan, panawen ako ba batay biyagan da koyo batay din biyagan. 20 Koyo batay amatangan sa aldaw naba amba ako ba sai sa naay Apang, da- koyo kay ba sai din sa naay da- ako kay ba sa koyo. 21 Da iya magtabang sa naay mga bilin da- magteped sa mga naba ba iya da magpalayaw sa naay. Da iya magpalayaw sa naay ba batay pinalayaw naay Apang. Iya naay din batay pinalayaw da- ako batay gidte magpakilala sa konin. 22 Iya tinanong laki Hodas (nawed ag Iskariyoti) amba, Panginoon, kaytang sa yamen ngani kawo batay gidte magpakilala da- nawed sa mga taga paranawan? 23 Laki Hisos ba tembag, Da iya magpalayaw sa naay ba batay temped sa naay mga tokawanan. Iya batay pinalayaw naay Apang da- kidawa batay sa konin da- batay mamataw sa konin. 24 Da iya nawed magpalayaw sa naay ba nawed magteped sa naay mga todo. Nawed naay da mga todo koyo akarngeyan no nawed ba ibat sa naay Apang ag pomaidaw sa naay. 25 Naay:ya sinabi sa koyo da mga naba sa ako koyo dapo kaanggat. 26 Ngani da Anonolong-wala roma no nawed ba da Ispirito Banal-ag batay pinaidaw naay Apang panawen sa koyo maki kasaiyan sa naay, ba iya da batay magtodo sa koyo boo nakayman da- batay magparemrem ag boo naay sinabi sa koyo. 27 Kaginhawahan da naay nag-ogonan sa koyo. Da naay kaginhawahan da naay nagtaboy sa koyo. Ako ba nawed magtaboy kaginhawahan makay ag magtaboy mga taga paranawan. Koyo ayaw nagkaalognoyan da- ayaw aliman. 28 Koyo akarngeyan naay sinabi sa koyo amba, Ako batay:ya omalis ngani batay:yakay paoli sa koyo. No ako koyo nagpalayaw ba koyo disin kaangasan da ako ba paraoy sa naay Apang, panawen da naay Apang ba mahalaga dapo sa naay. 29 Bayo dapo mangyadi naba ba naay:ya nagsabi sa koyo para no nangyadi:yani ba koyo ba misarig sa naay. 30 Ako ba nawed:da batay magtokawanan maaba sa koyo, panawen magrateng:nga da pamoonan paranawan tiya. Iya wala kapangyadihan sa naay, 31 ngani kailangan amatangan mga taga paranawan naay nagpalayaw da naay Apang, da- da boo naay nagpanawen ba da konin gidte mga binilin sa naay. Koyo patindeg, tamo:wani.

15

1 Ako da piya gidte ka poon obas da- da naay Apang da an-aalaman. 2 Konin nagpotol da tayma sanga sa naay nawed agpamokar da- konin nagkapon da- naglinis da tayma sanga magpamokar para lalo maoson da bokar. 3 Koyo nalinis:sani sa mga tokawanan naay sinabi sa koyo. 4 Koyo mamirmi sa naay da- ako ba batay mamirmi sa koyo. Nawed batay kapamokar da sanga nawed mag-ikapet sa poon. Amba kay din koyo nawed batay kapamokar no koyo nawed magpamirmi sa naay. 5 Ako da poon obas, koyo kay da mga sanga. Da iya magpamirmi sa naay da- ako sa konin ba iya da magpamokar maoson. Panawen koyo ba wala apanawen no nawed sa naay tolong. 6 Da nawed magpamirmi sa naay ba batay binenglay da- batay natoyo makay ag sanga tigpas:sani. Da makay naba ka mga sanga ba batay gidte inipon da- binenglay sa apoy para naareng. 7 No koyo magpamirmi sa naay da- magpamirmi sa koyo da naay tokawanan ba koyo ay-ayan da koyo alabet da- batay tinaboy sa koyo. 8 No koyo ba magpamokar maoson ba batay napalakol da naay Apang da- sa makay naba ba koyo ba naay gidte nagtod-an. 9 No omaning ako nagpalayaw naay Apang ba amba kay din koyo naay nagpalayaw. Koyo magpamirmi sa naay palayaw. 10 No koyo nagteped da naay mga bilin ba koyo batay mamirmi sa naay palayaw, makay din ako, naay nagteped da mga bilin naay Apang da- ako ba magpamirmi sa konin palayaw. 11 Naay:ya sinabi sa koyo da mga naba para sa koyo da naay kaangasan da- semker:ra gidte da koyo kaangasan. 12 Tiya da naay bilin, Koyo magpalayawan makay din ag naay palayaw sa koyo. 13 Wala palayaw labi dapo sa palayaw sai ka iraya magtaboy konin biyag para sa konin mga abyan. 14 Koyo ba naay mga abyan no koyo magteped naay mga bilin. 15 Koyo nawed:da naay nag-awit mga tagoanggat panawen nawed amatangan tagoanggat da pakana konin panginoon, no nawed ba koyo ba naay nag-awit mga abyan panawen naay sinabi sa koyo da boo naay akarngeyan sa naay Apang. 16 Nawed koyo da pomili sa naay. Ako ba pomili da- homidang sa koyo para koyo mangadang da- magpamokar, da- para mamirmi da koyo bokar. No amba ba da nakayman koyo ay-ayan sa naay Apang sa koyo maki kasaiyan sa naay ba batay tinaboy sa koyo. 17 Da naay nagbilin sa koyo ba, Koyo magpalayawan. 18 No nagkaabaisan sa koyo da mga taga paranawan ba kailangan koyo amatagan abaisan:na kora sa naay bayo sa koyo. 19 No koyo ba maki kasaiyan sa mga taga paranawan ba koyo kora batay pinalayaw makay kora gidte. Ngani ganyang koyo ba naay pinili ibat sa paranawan tiya da koyo ba wala:a kasaiyan sa mga taga paranawan, ba kora ba nagkaabaisan sa koyo. 20 Koyo remremen da naay sinabi sa koyo, Wala tagoanggat mahalaga dapo sa konin panginoon. No ako kora pinahidapan ba koyo ba batay din kora pinahidapan. No kora timped da naay mga tokawanan ba kora din batay timped da koyo mga tokawanan. 21 Ngani da boo naba ba kora batay pinanawen sa koyo panawen sa koyo maki kasaiyan sa naay, da- panawen nawed kora kilala da pomaidaw sa naay. 22 No ako nawed towa paraoy da- mangadar sa kora ba kora disin ba wala kadaetan. Ngani kora wala:a batay adahilan sa kora kadaetan. 23 Da nagkaabaisan sa naay ba nagkaabaisan din sa naay Apang. 24 No ako nawed pomanawen sa kora ropangan mga panawen ibat:ta ba nawed napanawen tawa man ba kora disin ba wala kadaetan. Ngani kora akitan da naay mga pinanawen. Kayno amba, kidawa naay Apang ba kora namaisan. 25 Ngani naba ba nangyadi para natped da nasorat sa kora Bilin amba, Kora abaisan sa naay wala dahilan. 26 No rateng da Anonolong ag naay batay pinaidaw ibat sa naay Apang ba iya batay somistigo para sa naay. Iya ba wala roma no nawed ag Ispirito ibat sa naay Apang ag magpaban-aw ag katotohanan Diyos. 27 Da- koyo batay din magsistigo para sa naay panawen koyo naay:ya kaanggat ibat sa ako mag-ompisa mangadar.

16

1 Da boo tiya ba naay:ya sinabi sa koyo para koyo ayaw awal-an pag-isarig sa naay. 2 Koyo batay namoyawan mga Diw sa mga balay pagtiponan. Batay rateng da odas da iya bomono sa koyo ba batay magremrem amba iya mamanawen para sa Diyos. 3 Da- kora batay pinanawen naba sa koyo panawen kidawa naay Apang ba nawed kora nagkilala. 4 Tiya ba naay:ya sinabi sa koyo para no rateng da odas kora batay pinanawen da mga naba ba koyo batay aremreman naay:ya pinaonaan naba sa koyo. Nawed dapo naay sinabi sa koyo da mga naba ibat dapo ag monaan panawen ako koyo dapo kaanggat; 5 ngani mona ba ako batay:ya sata sa pomaidaw sa naay. Amba man, wala kayno sai sa koyo magtanong sa naay no saan ako batay paraoy? 6 Da- mona ag naay:ya sinabi sa koyo naba ba koyo nangarongkot:ta gidte. 7 Ngani naay nagsabi sa koyo da katotohanan maraw naay nagsabi amba, Da ako omalis ba para sa koyo kapakinabangan, panawen nawed batay towa paraoy sa koyo da Anonolong no ako nawed batay omalis ngani no ako omalis ba iya ba naay batay pinaidaw sa koyo. 8 No iya rateng konin batay pinapihohan da mga taga paranawan para sa kora kadaetan, sa kataldengan da- sa hosga. 9 Para sa kadaetan panawen kora nawed mag-isarig sa naay, 10 para sa kataldengan panawen ako batay:ya sa naay Apang da- ako nawed:da koyo batay akitan, 11 da- para kay sa hosga panawen da pamoonan paranawan tiya ba hinosgahan:nani. 12 Ako maoson dapo batay sinabi sa koyo ngani nawed dapo koyo atabang mona. 13 Ngani no rateng:nga da Ispirito ag magpaban-aw katotohanan Diyos, koyo batay konin tinolongan para koyo amatangan da boo katotohanan. Iya ba nawed batay magtokawanan sa konin sadiri no nawed ba konin batay sinabi sa koyo da konin akarngeyan da- da mga batay rateng. 14 Ako konin batay pinalakol panawen konin:nakay batay sinabi sa koyo da konin akarngeyan sa naay. 15 Da boo sa naay Apang ba naay, kaya ako amba, Batay:yakay sinabi sa koyo ag Ispirito da konin akarngeyan sa naay. 16 Kabeste:a da odas ako nawed:da koyo batay akitan, da- kalawey nawed te maagot ba ako koyo:wakay batay akitan. 17 Mamagtokawanan da kalaati konin nagtod-an amba, Nakay dia da konin alabet sabiyen? Kaytang konin sinabi amba, Kabeste:a da odas ako nawed:da koyo batay akitan, da- kalawey nawed te maagot ba ako koyo:wakay batay akitan? da amba dapo, Panawen ako batay:ya sa naay Apang. 18 Kaya kora amba, Nakay dia da alabet sabiyen ag kabeste:a da odas? Nawed tamo amatangan. 19 Adamdaman laki Hisos kora ba alabet magtanong, kaya konin sinabi, Koyo ma magpaltanongan para sa naay sinabi amba, Kabeste:a da odas ako nawed:da koyo batay akitan da- kalawey nawed te maagot da- ako koyo:wakay batay akitan? 20 Naay gidte nagsabi sa koyo, Koyo batay manangis da batay magpakongkong ngani batay angasan da mga taga paranawan. Koyo batay gidte marongkot ngani da koyo karongkotan ba batay:yakay kaangasan. 21 No nagkaadamdaman:nani da sai ka babayi batay mangonga ba iya nagkalognoy panawen rateng:nga da odas sa iya nagpamarian. Ngani no mangonga:ani, nawed:dani nagkaaremreman ag iya nagpamarian. Iya ba nagkaangasan panawen inonga:ani sa paranawan da sai ka polahan. 22 Amba kay din koyo : koyo nagkaalognoyan mona ngani ako koyo batay:yakay akitan da- koyo batay gidte kapno kaangasan nawed batay aagaw tawa man. 23 Sa aldaw naba ba koyo ba wala:a kailangan tanongon sa naay. Naay gidte nagsabi sa koyo, Kayno nakay koyo ay-ayan sa naay Apang sa koyo maki kasaiyan sa naay ba konin batay tinaboy sa koyo. 24 Anggan mona koyo wala dapo nag-ay-ayan sa konin sa maki kasaiyan sa naay. Koyo mag-ay-ay da- koyo batay tomabang, para sibay gidte da koyo kaangasan. 25 Da mga naba ba naay sinabi sa koyo pahalimbawa. Ngani batay:ya rateng da odas nawed:da makay naba da ako batay magtokawanan sa koyo, no nawed ba batay:ya gidte naay sinabi sa koyo da para sa naay Apang. 26 Sa aldaw naba ba koyo batay omay-ay sa konin sa maki kasaiyan sa naay. Nawed naay nagsabi amba ako batay omay-ay sa naay Apang para sa koyo, 27 panawen koyo ba nagpalayaw ngani-naay Apang. Koyo konin nagpalayaw panawen ako koyo nagpalayaw da koyo magpaniwala ako ba batang sa Diyos. 28 Ako ba batang sa naay Apang da- paraoy towa sa paranawan; mona ako batay omalis sa paranawan da- batay paoli sa naay Apang. 29 Sinabi ag konin mga nagtod-an amba, Mona ba mapawa:ani da komo nagsabi sa yamen da- nawed:da pahalimbawa! 30 Mapawa:a sa yamen mona na komo:wa amatangan da boo nakayman da- kawo nawed kailangan tanongon tawa man. Panawen saba yamen magpaniwala amba kawo ba batang sa Diyos. 31 Laki Hisos ba tembag amba, Koyo kono ba magpaniwala:a mona? 32 Batay:ya rateng da odas da- mona:a ngani-, koyo batay manambolat, da- iya-iya ba batay mangoli da- ako koyo batay inogonan. Kayno amba ba ako nawed ako ngani panawen naay kaanggat da naay Apang. 33 Naba ba naay:ya sinabi sa koyo para koyo kamaki kaginhawahan sa koyo maki kasaiyan sa naay. Koyo batay pinahidapan mga taga paranawan, ngani paeyaten da koyo remrem! Naay:ya rinegnas da kapangyadihan paranawan tiya.

17

1 Maraw nasabi:yani laki Hisos da mga tokawanan naba ba iya ba tomingara sa soksokowan da iya amba, Naay Apang, rateng:nga da odas. Ako, ag komo Onga, ba komo palakolon para kawo kay ba naay apalakol, 2 panawen ako ba komo pinakan kapangyadihan sa boo kairayaan, para magtaboy biyag gidte wala arasan sa boo komo tinaboy sa naay. 3 Da biyag gidte wala arasan ba da magkilala gidte sa komo, ag sai ngani da- Diyos gidte, da- sa laki Hisos Kiristo ag komo pinaidaw. 4 Naay pinaban-aw towa sa lopa da komo kalakolan. Naay:ya yinadi da komo pinapanawen sa naay. 5 Kaya mona, naay Apang, ako komo kay pakanen kalakolan sa komo ropangan, ag naay kalakolan pag ako komo kaanggat bayo dapo rinarang da paranawan. 6 Kawo naay pinakilala sa mga iraya komo tinaboy sa naay ibat sa paranawan. Kora ba komo. Kora komo tinaboy sa naay da- kora timped da komo tokawanan. 7 Mona ba kora amatangan ibat sa komo da boo komo tinaboy sa naay, 8 panawen naay tindo sa kora da komo tindo sa naay da- kora kay tinabang. Kora gidte amatangan ako ba batang sa komo da- kora agpaniwala amba kawo ngani- da pomaidaw sa naay. 9 Kora ba naay nagdarangin. Nawed da mga taga paranawan da naay nagdarangin no nawed ba da boo komo tinaboy sa naay, panawen kora ba komo. 10 Da boo sa naay ba komo da- da boo sa komo ba naay. Da- ako ba pinalakol:la panawen sa kora. 11 Da- mona ba ako batay:ya sa komo. Ako batay:ya omalis sa paranawan ngani kora ba sa paranawan dapo. Naay Apang, kawo da Banal gidte! Kora komo dahanan sa komo gidte kapangyadihan, ag komo tinaboy sa naay, para kora ba sai ngani makay din ag kita ba sai ngani. 12 Sa odas ako kora kaanggat, kora naay dinahanan sa komo gidte kapangyadihan komo tinaboy sa naay. Kora naay inalagaan da- kayno sai sa kora ba wala naomaning no nawed ba ag bagay padosahan sa katayan, para natped da Banal ka Kasoratan. 13 Da- mona, ako batay:ya sa komo da- naay nagsabi naba sa ako ba sa paranawan dapo para kora poso ba nangakapno naay kasyagan. 14 Naay:ya tinaboy sa kora da komo mga todo, da- kora ba namaisan mga taga paranawan, panawen kora ba wala:a kasaiyan sa mga taga paranawan, makay din ako ba wala kasaiyan sa mga taga paranawan. 15 Nawed naay nagdarangin amba kora ba alisen sa paranawan no nawed ba kora ba komo ribriyen sa nag-awit Daet. 16 Kora ba wala kasaiyan sa mga taga paranawan makay din ako ba wala kasaiyan sa mga taga paranawan. 17 Kora komo pabokodon para sa komo. Da komo katotohanan da magpabokod sa kora. Da komo tokawanan ba katotohanan. 18 No omaning ako komo pinaidaw sa paranawan ba amba kay din kora naay:ya pinaidaw sa paranawan. 19 Da- naay nagtaboy da naay sadiri sa komo para ngani sa kora, para kora kay ba taboyon gidte din sa komo. 20 Nawed ngani kora da naay nagdarangin no nawed ba anggan din ag mga batay mag-isarig sa naay panawen sa kora magsistigo. 21 Naay Apang, naay darangin ba kora boo ba sai gidte, makay ag kawo ba sai sa naay da- ako kay ba sai sa komo. Disin ba kora ba sai gidte sa kita. Sa makay naba ba da mga taga paranawan ba batay misarig amba ako ba komo pinaidaw. 22 Naay tinaboy sa kora da kalakolan komo tinaboy sa naay, para kora ba sai gidte, makay din kita ba sai ngani gidte, 23 ako ba sa kora da- kawo ba sa naay. Sa makay naba ba kora batay gidte nga sai, da batay akilalaan mga taga paranawan amba ako komo pinaidaw, da- kora ba komo nagpalayaw makay din ag komo palayaw sa naay. 24 Naay Apang, naay alabet kaanggat sa naay batay pinaraoyan da mga komo tinaboy sa naay para kora amasdan da kalakolan komo tinaboy sa naay, panawen ako komo:wa pinalayaw bayo rinarang da paranawan. 25 Naay Apang, kawo da mataldeng gidte! Kawo nawed kilala mga taga paranawan ngani kawo naay kilala, da- amatangan ag mga komo tinaboy sa naay amba kawo da pomaidaw sa naay. 26 Kawo naay pinakilala sa kora da- batay dapo pinakilala para da komo palayaw sa naay ba sa kora din da- ako kay ba sai din sa kora.

18

1 Maraw nasabi:ya laki Hisos da mga naba, iya omalis kaanggat da konin mga nagtod-an. Kora paraoy sa karipay tekran Kidron da- semled sa sai ka alamanan sata. 2 Ag poro naba ba amatangan laki Hodas ag batay pomaabel sa konin panawen layen te laki Hisos da- da konin mga nagtod-an ba sata malkasma. 3 Kaya laki Hodas ba paraoy sata kaanggat da sai ka barkadahan mga sondalo taga goraan Roma da- da kalaati mga tagabantay sa balay Diyos nagpaparaoy mga koyay magpamanawen sa balay Diyos da- mga Parisiyo. Kora maki nagbaba mga armas da- solo- da- saleng. 4 Amatangan laki Hisos da boo batay mangyadi sa konin kaya kora ba konin sinalobong da- tinanong amba, Tawa da koyo nagsarak? 5 Kora amba, Laki Hisos ag taga goraan Nasarit. Iya amba, Ako ba Ako ngani-. Kora kaanggat laki Hodas ag magpaabel sa konin. 6 Maraw sinabi laki Hisos sa kora amba, Ako ngani-, ba kora napaelnek da nangatwang:nga sa lopa. 7 Iya magtanong:ngakay amba, Tawa gidte mana da koyo nagsarak? Kora tembag amba, Laki Hisos ag taga Nasarit. 8 Iya amba, Naay:ya sinabi sa koyo ako:wa ngani-. No ako da koyo nagsarak ba koyo pabayaan omalis da naay mga nagtod-an. 9 Konin sinabi naba para natped da konin sinabi amba, Kayno sai sa komo tinaboy sa naay ba wala naomaning. Naba:a ngani. 10 Linangso laki Simon Pidro da konin pisaw da- pinalang ag tagoanggat ag poon sa mga magpamanawen sa balay Diyos, da- natigpas da kanan dako kon talinga. Da ngaran ag tagoanggat naba ba laki Malko. 11 Sinabi laki Hisos sa laki Pidro amba, Komo:wakay soolon kom pisaw! Nawed ma naay kailangan inemen sa ineman kahidapan tinaboy sa naay naay Apang? 12 Laki Hisos ba inabel da- ginapos kon alima ag barkadahan mga sondalo kaanggat kora kapitan da- ag mga bantay mga Diw. 13 Iya ba kora dapo pinaanggat sa laki Anas ag bianan laki Kaipas, ag koyay lakol magpamanawen sa balay Diyos ag odas naba. 14 Laki Kaipas da somabi sa mga Diw amba, Piya dapo da sai ka iraya ngani da natay para sa boo lasyon. 15 Laki Simon Pidro da- sai dapo ka nagtod-an ba tomongroy sa laki Hisos. Kakilala gidte ag poon mga magpamanawen sa balay Diyos da nagtod-an naba, kaya iya kasled kaanggat laki Hisos sa ayanmanan balay ag poon. 16 Naogonan kay laki Pidro magpatindeg sa lowas sakbawan. Lomwas:sakay ag nagtod-an kilala ag poon da- magtokawanan sa daraga agbantay sa sakbawan da pinasled laki Pidro. 17 Laki Pidro ba tinanong ag daraga amba, Kawo ba kasai din sa mga nagtod-an ag iraya naba? Tembag laki Pidro amba, Nawed! 18 Madimla ag odas naba kaya da mga tagoanggat da- da mga tagabantay ba magpatindeg sa paribok sai ka baya para magpanaang. Laki Pidro ba lomiog sa kora, da magpanaang din. 19 Laki Hisos ba tinanong pag poon sa mga magpamanawen para sa konin mga nagtod-an da- sa konin tindo. 20 Tembag laki Hisos amba, Layen ako magtokawanan sa akarngeyan boo. Layen ako magtodo sa mga balay pagtiponan mga Diw da- sa lakol ka balay Diyos. Sata nga ba magrimpon da kaosonan mga Diw. Ako ba wala sinabi sa nawed akarngeyan roma. 21 Kaytang ako da koyo nagtanong? Da koyo tanongon ba ag karngey sa naay sinabi. Kora da kamatang no nakay da naay tindo. 22 Maraw nasabi naba, iya ba sinampal sai sa mga agbantay sata. Konin tinanong amba, Kaytang komo timbag amba da poon ag mga magpamanawen? 23 Iya ba timbag laki Hisos, No ako tomokawanan daet ba komo gidte sabiyen ag daet. Ngani no piya da naay sinabi kaytang ako komo sinampal? 24 Laki Hisos nagapos dapo ba pinaanggat koyay Anas sa koyay Kaipas, ag poon sa mga magpamanawen sa balay Diyos. 25 Sata dapo din laki Simon Pidro magpatindeg magpanaang. Iya tinanong ag mga sata, Nawed dia kawo ba nagtod-an din ag iraya naba? Naba ba tinanggiyan laki Pidro amba, Nawed gidte! 26 Iya ba tinanong kay sai sa mga tagoanggat ag poon sa mga magpamanawen sa balay Diyos. Ag tagoanggat naba ba kaseledan ag lalaki konin tinigpasan talinga. Iya amba, Nawed ma kawo ag naay akitan kaanggat laki Hisos sa alamanan? 27 Naba ba tinanggiyan:nakay gidte laki Pidro. Kamalay te ba mangarang-it:ta da manok. 28 Laki Hisos ba kora pinaanggat ibat sa balay koyay Kaipas anggan sa balay lakol ag gobirnador. Nagkaboka:ani naba. Da mga Diw ba dayo semled sa balay lakol ag gobirnador para kora ayaw abilang maki daet toltol sa kora kaogalian da- sa makay naba ba kora abaya mamangan topa te pamaskwa. 29 Kaya lomwas koyay Pilato da- kora tinanong amba, Nakay da koyo sombong laban sa iraya tiya? 30 Kora tembag, No iya nawed mamanawen daet ba iya nawed yamen batay binaba sa komo. 31 Sinabi sa kora koyay Pilato, No amba, iya koyo paanggaten da- koyo hosgahen toltol sa koyo bilin. Tembag da mga Diw, Yamen ba wala kapangyadihan homosga para natay da tawa man. 32 Naba ba nangyadi para natped da sinabi laki Hisos no omaning da konin batay katayan. 33 Koyay Pilato ba semled:dakay sa balay lakol da- pinaparaoy laki Hisos. Iya magtanong sa konin amba, Kawo dia da Hadi mga Diw? 34 Laki Hisos ba tembag amba, Naba dia ba ibat sa komo sadiri remrem e maki magsabi naba sa komo? 35 Koyay Pilato ba tembag, Ako dia ba Diw? Da komo mga kalasyon da- da mga koyay magpamanawen sa balay Diyos da pomaanggat sa komo towa. Nakay dia da komo pinanawen? 36 Laki Hisos ba tembag, Da naay kahadian ba nawed sa paranawan tiya. No sa paranawan tiya da naay kahadian ba batay disin maglaban da naay mga kairayaan da- nawed disin batay apaabel mga Diw. Ngani nawed sa paranawan tiya da naay kahadian. 37 Amba koyay Pilato, No amba, kawo dia ba sai ka hadi? Laki Hisos ba tembag, Kawo:wani da magsabi amba ako ba hadi. Tiya gidte da dahilan kaya ako ba inonga da- paraoy towa sa paranawan: para magtokawanan para sa katotohanan. Da tawa man sa katotohanan ba magpakarngey sa naay. 38 Tinanong koyay Pilato amba, Nakay da katotohanan? Maraw nasabi:ya naba, lomwas:sakay koyay Pilato da- sinabi sa mga Diw amba, Ako wala akitan kadaetan sa konin. 39 Tayma kasayahan Paskwa ba kailangan ako magbal-an sai ka piriso para sa koyo. Koyo dia alabet naay bal-anan da Hadi mga Diw? 40 Kora boo ba tomakap amba, Nawed! Ayaw iya no nawed ba laki Barabas! Laki Barabas ba sai ka daet ka iraya.

19

1 Kaya laki Hisos ba tinaboy koyay Pilato sa mga sondalo da- pinahaplit. 2 Da mga sondalo ba gomaro sai ka balagen madogi da- binararaw da- sinorbong sa olo laki Hisos. Maraw kalbas ba iya pinasoolan sai ka bado kolay obi 3 da- sai-sai ba pabali sa konin da amba, Palakolon ngani- da hadi mga Diw! Da- iya ba kora nagpanampal. 4 Lomwas:sakay koyay Pilato da sinabi sa mga Diw amba, Koyo gidte pakarngeyan! Iya naay batay pinaloba sa koyo para koyo amatangan ako wala akitan kadaetan sa konin. 5 da pinalwas laki Hisos maki nagsool sorbong dogi da- bado kolay obi. Sinabi sa kora koyay Pilato, Koyo man-aw! Tiya da iraya! 6 Maraw iya ba akitan mga koyay magpamanawen sa balay Diyos da- da mga tagabantay ba kora mamagtakap amba, Iya papakoon sa kodos! Iya papakoon sa kodos! Sinabi koyay Pilato, Iya koyo gawen da- koyo da magpako sa konin. Ako wala akitan kadaetan sa konin. 7 Tembag da kaosonan mga Diw, Yamen maki bilin da- toltol sa bilin naba ba iya kailangan natay panawen iya amba iya da Onga Diyos. 8 Lalo aliman koyay Pilato maraw konin akarngeyan da mga tokawanan naba. 9 Iya semled:dakay sa balay lakol da- laki Hisos ba tinanong amba, Taga saan kawo? Ngani nawed tembag laki Hisos. 10 Amba koyay Pilato, Kawo dia dayo magtokawanan sa naay? Nawed ma komo amatangan kawo abaya naay bal-anan kayno papakoon sa kodos. 11 Laki Hisos ba tembag amba, Kawo ba wala kapangyadihan laban sa naay no nawed ba ag tinaboy Diyos sa komo. Kaya lalo makadaetan ag pomagaladgad sa naay towa. 12 Maraw naba ba akarngeyan koyay Pilato ba lalo:a konin alabet bal-anan laki Hisos. Ngani mamagtakap da kaosonan mga iraya amba, No komo binal-anan da iraya naba ba kawo nawed:da abyan koyay Sisar! Da tawa man amba iya hadi ba kalaban koyay Sisar. 13 Maraw akarngeyan koyay Pilato da mga tokawanan naba ba konin pinalwas laki Hisos. Da- iya tomongka sa tongkaan anhohosay, sata dako sa nag-awit "Latag Bato", ag sa tokawanan Hibriyo ba Gabata. 14 Naba ba aldaw maghanda kasayahan Paskwa da- batay:ya tenga aldaw. Sinabi sa mga Diw koyay Pilato amba, Towa da koyo hadi! 15 Kora mamagtakap amba, Iya pabonoon! Iya pabonoon! Papakoon sa kodos! Tinanong koyay Pilato amba, Naay dia batay pinapako sa kodos da koyo hadi? Tembag da mga koyay magpamanawen sa balay Diyos, Yamen ba wala hadi no nawed ba da Sisar! 16 Kaya laki Hisos ba tinaboy koyay Pilato sa mga sondalo para iya pakoon sa kodos. Kora nga ginaro laki Hisos. 17 da iya lomwas nagpas-an konin kodos paparaoy sa poro nag-awit Bongo, ag sa tokawanan Hibriyo ba Golgota. 18 Maraw rateng sata ba iya pinako sa kodos, kaanggat darwa dapo-sai sa kapet kanan da- sai sa kaliwa. 19 Koyay Pilato ba pomasorat makay tiya ka tokawanan da- pinaikapet sa kodos: Laki Hisos ag taga Nasarit, Hadi mga Diw. 20 Naba ba nagkasorat sa mga tokawanan Hibriyo da- Latin da- Girigo da- maoson sa mga Diw da kabasa naba panawen bali sa goraan lakol da poro pinakoan laki Hisos. 21 Sinabi sa koyay Pilato ag mga koyay magpamanawen amba, Ayaw komo agsoraten amba Hadi mga Diw, no nawed ba iya da magsabi amba, Ako da Hadi mga Diw. 22 Tembag koyay Pilato amba, Da naay:ya nasorat ba nasorat:tani. 23 Maraw laki Hisos ba pinako:a sa kodos mga sondalo, kora ginaro da konin mga nagsool da- kora nangeray kora apat. Kora din ginaro da konin panggalem nagsool. Naba ba wala tayi da- pinanawen boo ibat sa ngaway da anggan sa gaba. 24 Mamagtokawanan da mga sondalo, Ayaw tamo agsagien tiya! Tamo magpostahanan:na ngani para amatangan no tawa da batay tomabang naba. Nangyadi nga naba para natped da nagsabi sa Banal ka Kasoratan amba, Kora nangeray da naay mga nagsool da- da naay panggalem nagsool ba kora pinostahanan. Naba:a ngani. Amba nga da pinanawen mga sondalo. 25 Bali te sa kodos laki Hisos ba agpatindeg konin adang, da- ag arian babayi konin adang, da- bayi Mariya sawa laki Kiliopas. Anggat din sa kora bayi Mariya taga Magdala. 26 Maraw akitan laki Hisos da konin adang da- konin gidte nagpalayaw ka nagtod-an magpatindeg sata ba konin sinabi, Adang, naba da makay komo onga! 27 Da- konin sinabi sa nagtod-an amba, Naba da makay komo adang! Ibat saba ba ag adang laki Hisos ba pinapamataw ag nagtod-an sa konin balay. 28 Maraw kalbas naba amatangan laki Hisos amba nayadi:a ngani- da boo, da- para natped da Banal ka Kasoratan konin sinabi amba, Ako makainem! 29 Sata ba maki sai ka keden kapno inemen kalibed maarsem. Kora binabad sata da sai ka makay lomot, da- tinakes sa sanga alaman isopo, da- pinasepsep sa konin bibi. 30 Maraw konin:na nasepsep da inemen ba konin sinabi amba, Nayadi:ani! Konin pinoklay da konin olo da- nagto da konin inawa. 31 Naba ba aldaw maghanda da- ag mga Diw ba dayo sata dapo sa kodos da mga bangkay sa Aldaw Magpahinga, panawen mahalaga gidte ag Aldaw Magpahinga naba. Kaya kora inay-ayan sa koyay Pilato amba patigloon da mga binti ag mga pinako sa kodos, da- alsen sata da mga bangkay. 32 Sata nga paraoy da mga sondalo da- naniglo nga da mga binti ag darwa pinako kasabay din laki Hisos. 33 Ngani maraw kora sata sa laki Hisos da- kora akitan iya natay:yani ba nawed:da kora tiniglo da konin mga binti. 34 Ngani sinandak sai ka sondalo da tagiriran laki Hisos da- agad tomaridis da daya da- sapa. 35 Da agban-aw naba da magsistigo da- totoo gidte da konin sistigo da konin amatangan totoo gidte da konin sinabi. Konin sinistigohan naba para koyo mag-isarig din. 36 Nangyadi da mga naba para natped da nagsabi sa Banal ka Kasoratan amba, Wala batay natiglo kayno sai sa konin bongkalo. Naba:a ngani. 37 Da- sinabi kay ag roma dapo ka eray sa Banal ka Kasoratan amba, Kora batay magban-aw sa konin ag kora sinandak. Naba:a ngani. 38 Maraw kalbas naba laki Hosi taga Arimatiya ba paraoy sa koyay Pilato para omay-ay payag para nagaro da bangkay laki Hisos. Laki Hosi ba sai din ka nagtod-an laki Hisos ngani nawed paaram panawen sa iya aliman sa mga Diw. Iya kay ba pinayagan koyay Pilato. Kaya lingkat laki Hosi da bangkay laki Hisos da- binaba sa batay paglebengan. 39 Omanggat sa konin laki Nikodimo. Iya da pomaraoy sa laki Hisos ag sai ka madlem. Iya maki nagbaba banglo-mga sai ka salop da- kalaati pag pinayliog mira da- aloy. 40 Sidawa ginaro da bangkay laki Hisos da pinalagyan banglo da- nagsabedan papa golanit toltol sa kaogalian mga Diw. 41 Sata sa poro pinakoan laki Hisos ba maki alamanan da- sata ba maki sai ka batay lebeng wala tang limbeng. 42 Ganyang ag odas naba ba aldaw maghanda mga Diw para sa Aldaw Magpahinga, da- bali kay da lebeng naba ba sata:a sidawa limbeng laki Hisos.

20

1 Madelem-delem dapo pag omaga linggo ba sata:a magparaoy sa lebengan bayi Mariya taga Magdala. Konin akitan wala:ani da bato panakep sa sakbawan lebeng. 2 Kaya iya magdalaganan magparaoy sa laki Simon Pidro da- sa nagtod-an nagpalayaw gidte laki Hisos da sinabi sa sidawa amba, Ginaro:wa sa lebeng da bangkay Panginoon da- nawed yamen amatangan saan:na binaba! 3 Kaya laki Pidro da- ag roma ka nagtod-an ba magparaoy sa lebengan. 4 Sidawa ba tanan magdalaganan ngani laki Pidro ba aonahan ag nagtod-an nagpalayaw gidte laki Hisos. 5 Iya ba misongo da riniwa da galem. Konin akitan da papa golanit, ngani iya ba nawed semled. 6 Rateng kay laki Simon Pidro da- iya toloy semled sa lebeng. Konin akitan da papa golanit mag-ilatag, 7 da da panyo pamotos sa olo laki Hisos. Naba ba nawed kaanggat ag mga papa no nawed ba bokod kay nagbaroron sa tebteb. 8 Semled din ag nagtod-an monaan rateng. Konin akitan naba da iya maniwala. 9 Nawed dapo sidawa amatangan gidte ag nasorat sa Banal ka Kasoratan amba, Laki Hisos ba kailangan nabiyag:gakay. 10 Da- moli da mga nagtod-an. 11 Bayi Mariya ba magpatindeg sa lowas ag lebeng da- magpanangis; iya misongo da- semrey sa galem. 12 Iya maki akitan darwa ka anghil magsool kasorap ka golanit magtongka sa palagyan bangkay laki Hisos, sai ba sa olo dako da- sai ba sa paa dako. 13 Sidawa tinanong bayi Mariya amba, Inay, kaytang kawo magpanangis? Iya tembag, Kora ginaro da naay Panginoon da nawed naay amatangan no saan binaba. 14 Da- iya mamaliwi da konin akitan laki Hisos agpatindeg sata, ngani nawed konin kilala amba naba ba laki Hisos. 15 Iya tinanong laki Hisos amba, Inay, kaytang kawo magpanangis? Tawa da komo nagsarak? Amba dia bayi Mariya iya da mag-alaga ag alamanan, kaya konin sinabi amba, Koyay, no kawo da gomaro ba komo kay tod-on sa naay no saan komo binaba da- naay batay ginaro. 16 Amba laki Hisos, Mariya! Iya paloba da- konin sinabi sa tokawanan Hibriyo, Raboni! da alabet sabiyen ba Tagatodo. 17 Amba laki Hisos, Ako ayaw dapo komo aggenan, panawen ako nawed dapo kaparaoy sa naay Apang. No nawed ba kawo paraoy sa naay mga arian da- komo sabiyen ako batay dapo somalbon sa naay Apang da- koyo Apang, sa naay Diyos da- koyo Diyos. 18 Kaya bayi Mariya taga Magdala ba paraoy sa mga nagtod-an da- sinabi, Naay akitan da Panginoon! Da- konin nanoltol sa kora da mga sinabi laki Hisos. 19 Sa madlem ag aldaw linggo naba, da mga nagtod-an ba magrimpon. Langkeb da mga sakbawan panawen sa kora ba aliman sa mga Diw. Laki Hisos ba rateng da magpatindeg sa kora tenga. Iya amba, Sa koyo:wa ngani- da kaginhawahan! 20 Maraw konin nasabi naba ba konin pinaban-aw da konin mga alima da- konin tagiriran. Nangaangasan gidte da mga nagtod-an maraw kora akitan da Panginoon. 21 Sinabi:yakay laki Hisos sa kora amba, Sa koyo:wa ngani- da kaginhawahan! No omaning ako pinaidaw naay Apang ba amba kay din koyo naay nagpaidaw. 22 Da- kora ba konin minaroymoyan da- konin sinabi, Koyo tabangen da Ispirito Banal. 23 No koyo nagpatawad da kadaetan tawa man ba napatawad:da ngani-. Ngani no nawed koyo nagpatawad da mga naba ba nawed din napatawad. 24 Ngani laki Tomas ag nag-awit Siing, sai sa labindarwa ka nagtod-an ba wala sata pag rateng laki Hisos. 25 Kaya sinabi sa konin ag mga roma ka nagtod-an amba, Yamen akitan da Panginoon! Laki Tomas ba magtebag, Ako nawed gidte batay maniwala anggan nawed naay akitan da mga limbaed pako sa konin mga alima da- batay apalbog da naay solo sata, da- da naay alima sa konin tagiriran. 26 Maraw kalawey:ya da walo ka aldaw, agrimpon:nakay sa galem balay da mga nagtod-an; kora kaanggat laki Tomas. Langkeb da mga sakbawan ngani laki Hisos ba semled da- patindeg sa kora tenga, da- sinabi amba, Sa koyo:wa ngani-da kaginhawahan. 27 Da- konin sinabi sa laki Tomas amba, Komo pabaliyen towa da komo solo da- kom ban-awan da naay mga alima. Palbogon da komo alima sa naay tagiriran. Kawo ayaw:wa ag-alingangaan no nawed ba kawo maniwala:ani. 28 Tembag laki Tomas amba, Naay Panginoon da naay Diyos! 29 Sinabi sa konin laki Hisos amba, Kawo dia maniwala:ani panawen ako komo akitan? Angasan da iya magpaniwala kayno ako nawed konin akitan. 30 Maoson dapo ka tandaanan pinanawen laki Hisos da sinistigohan ag mga konin nagtod-an, ngani nawed nagkasorat sa kasoratan tiya. 31 Da mga nasorat towa ba para koyo mag-isarig amba laki Hisos da Kiristo, ag Onga Diyos da- sa koyo mag-isarig sa konin ba koyo kamaki biyag gidte sa koyo maki kasaiyan sa konin.

21

1 Maraw kalawey naba ba laki Hisos ba paban-aw:wakay sa konin mga nagtod-an sa tebteb dagat-dagatan Tibiriyas. Makay tiya da nangyadi. 2 Mal-anggatan kora Simon Pidro, Tomas ag nag-awit Siing, Tanail taga goraan Kana, Galiliya, da mga onga laki Sibidiyo, da darwa dapo sa konin mga nagtod-an. 3 Sinabi sa mga roma laki Simon Pidro amba, Ako batay mangisda. Kora amba, Yamen batay anggat. Kaya kora omalis da- somakay sa bangka, ngani wala abel ag madlem naba. 4 Maraw mapoti:a da sirangan, laki Hisos ba patindeg sa pangpang, ngani iya ba nawed akilalaan mga nagtod-an. 5 Konin sinabi, Mga padi, koyo dia maki abel? Kora amba, Wala gidte! 6 Amba laki Hisos, Koyo laboon da koyo lambat sa kanan dako koyo bangka, da- koyo batay kabel. Kora nga linabo da kora lambat da- naba ba nawed kora aranggot panawen sa maoson da abel. 7 Sinabi sa laki Pidro pag nagtod-an nagpalayaw gidte laki Hisos amba, Iya nga da Panginoon! Maraw naba ba akarngeyan laki Simon Pidro, ba konin binegkes sa lawas da konin golanit (panawen iya ba wala bado) da- tomalon sa sapa. 8 Da mga nagtod-an konin kaanggat ba sa bangka da- batay:ya pomondo nagranggot da lambat kapno isda. Kora nawed naw adayo sa pangpang-mga sampo ka kawayan ngani. 9 Maraw kora katakdang sa pangpang ba kora kaban-aw maki baya maki isda nag-ihaw da- mga tinapay. 10 Laki Hisos amba, Koyo magbaba te towa koyo abel isda. 11 Kaya laki Pidro ba somalakay sa bangka da- rinanggot sa pangpang da lambat kapno mga isda lakol-sai ka daan da- limampo da tatlo da boo. Nawed nasagi da lambat, kayno kaamba kaoson da isda. 12 Laki Hisos amba, Apora koyo da- man-aga. Kayno sai sa mga nagtod-an ba wala mangahas magtanong sa konin no tawa iya, panawen kora amatangan iya da Panginoon. 13 Laki Hisos ba pabali da- ginaro da tinapay da tinaboy sa kora. Amba din da isda. 14 Tiya da ikatatlo laki Hisos ba paban-aw sa konin mga nagtod-an ibat sa iya nabiyag:gakay. 15 Maraw kora kapamangan ba laki Simon Pidro ba tinanong laki Hisos amba, Simon, onga laki Howan, ako dia komo nagpalayaw labi dapo sa mga tiya? Iya tembag, Hee ngani-! Panginoon, komo amatangan kawo naay nagpalayaw. Sinabi sa konin laki Hisos, Komo alagaan da naay mga topa te. 16 Iya tinanong:ngakay laki Hisos, Simon, onga laki Howan, ako dia komo nagpalayaw? Amba laki Simon, Hee ngani-, Panginoon! Komo amatangan kawo naay nagpalayaw. Amba laki Hisos, Komo alagaan da naay mga topa. 17 Katatlo:wani iya tinanong laki Hisos, Simon, onga laki Howan, ako dia komo nagpalayaw? Marongkot laki Pidro panawen katatlo:wa iya tinanong laki Hisos amba, Ako dia komo nagpalayaw? Iya tembag, Panginoon, komo amatangan da boo nakayman. Komo amatangan kawo ba naay nagpalayaw. Sinabi sa konin laki Hisos, Komo alagaan da naay mga topa. 18 Naay gidte nagsabi sa komo, Ag kawo kaongaan dapo ba kawo da magsool sa komo sadiri da kawo magkadangan no saan da komo alabet. Ngani no kawo koyay:yani ba komo batay inenat da komo alima da roma da batay magsool sa komo da kawo batay binaba no saan da nawed komo alabet. 19 Konin sinabi naba para pakilalaen no omaning batay natay laki Pidro da- sa makay naba batay pinalakol da Diyos. Maraw kalbas ba sinabi sa konin laki Hisos, Kawo tomongroy sa naay! 20 Laki Pidro ba mamaliwi. Konin akitan magtongroy ag nagtod-an nagpalayaw gidte laki Hisos. Iya da misari sa soot laki Hisos maraw kora magpanal-aponan da- tomanong amba, Panginoon, tawa da batay pomaabel sa komo? 21 Maraw iya akitan laki Pidro ba laki Pidro ba magtanong sa laki Hisos amba, Panginoon, nakay kay da batay nangyadi sa iraya tiya? 22 Laki Hisos ba tembag, No naay alabet iya ba biyagan anggan sa ako batay:yakay paoli towa ba nakay da komo pakiaram? Kawo tomongroy sa naay! 23 Panawen saba ba nabarita sa mga arian amba nawed batay natay da nagtod-an naba. Ngani nawed sinabi laki Hisos iya ba nawed tay natay, no nawed ba, No naay alabet iya ba biyagan anggan ako batay:yakay paoli towa ba nakay da komo pakiaram? 24 Tiya nga da nagtod-an magsistigo para sa mga nakayman naba. Iya din da somorat ag mga naba, da- yamen amatangan totoo gidte da konin sistigo. 25 Maoson dapo da pinanawen laki Hisos. No batay sinorat da boo ba naay nagremrem wala:a batay palagyan sa boo paranawan para sa boo mga kasoratan naba.