1

1 Ri lamba pamulana naria mamimo to niposumba Alatala. I'a nosanggani-nggani ante Alatala, pade I'amo Alatala. 2 Nggari lamba pamulana I'a nosanggani-nggani ante Alatala. 3 I'amo to nompajadi pura-pura to nariana. Da'a ria sangaya to najadi ane da'a nggari I'a. 4 I'amo pu'u katuwua, pade I'amo to nanggeni reme ka manusia. 5 Nau dunia e'i narumau ante kaja'ana, reme etu newanta. Karumau nu dunia da'a ntoto namala mompakalipo reme etu. 6 Naria samba'a tau narata nisuro Alatala, sangana Yohanes. 7 I'a narata ewa samba'a sabi motesa mompakanoto isema reme etu ala nggari tesana pura-pura manusia mamala momparasaya. 8 I'a mboto da'a reme etu, i'a aga notesa mompakanoto isema reme etu. 9 Reme to nakonona I'amo to niposumba Alatala to narata ri dunia nompakareme pura-pura manusia. 10 I'a njau nariamo ri dunia pade nggari I'a sampe dunia nipajadi. Tapi tempo I'a narata manusia ri dunia da'a nangginjani I'a. 11 I'a narata ri ngatana mboto, tapi todeana da'a nadota mantarima I'a. 12 Tapi isema-sema to nantarima I'a bo nomparasaya I'a, ira niwai ka kuasa majadi ana-ana nu Alatala. 13 Ira najadi ana-ana nu Alatala da'a sabana nipoanaka totu'a ira, atau nggari dota manusia bara dota samba'a uma. Tapi Alatala mbotomo to nompajadi ira anana. 14 To niposumba Alatala etu netimbali najadi manusia pade I'a neto'o ri tatongota ri dunia e'i. Pade kita nanggita kuasa bo kagayana to nipogumaa, etumo kuasa bo kagayana to nitarimana nggari ja'i Umana ewa Anana samba'a lau. I'a mpu'u-mpu'u neliu towe belona pade nggari I'amo kita mangginjani Alatala. 15 Yohanes nompakanoto ka todea isemana To niposumba Alatala etu. Nongaremo i'a, "E'imo I'a to nipatujuku bopia tempo aku nanguli kana maria to marata ri puriku to neliu nggabete kuasana nggari aku, sabana nggari lamba pamulana naria mamimo I'a da'apa aku nesuwu." 16 I'a mpu'u-mpu'u neliu towe belona, da'a ria kaopu-opuna rasi to niwaina ka kita. 17 Nggari nabi Musa kita nantarima Atura-atura agama. Tapi nggari Yesus Kristus kita mpu'u-mpu'u mangginjani Alatala bo towe belona ka kita. 18 Da'apa naria samba'a tau to nanggita Alatala. Tapi Anana to samba'a lau to naroo ri ja'ina, I'amo to nompopokita Alatala ka kita. 19 Topanggeni-topanggeni agama Yahudi ri ngata Yerusalem nompakau bara sakuya mba'a roa ira ante tau-tau to Lewi malau mpaka ri ja'i Yohanes Topediu ala mompekutana i'a iwe'i: "Isema kakonona komi e'i?" 20 Nangepe etu notesamo Yohanes mpakanoto, "Aku e'i da'a Magau to Mompakasalama to nijanji Alatala." 21 Pade sangganipa ira nompekutana i'a, "Ane iwetu, isema ntoto tanu komi? Bara komi e'imo nabi Elia?" Nesonomo Yohanes, "Da'a." Pade nekutana wo'umo ira, "Bara komi e'imo nabi to nijanji Alatala marata banepia?" Nesonomo Yohanes, "Da'a." 22 Pade nanguli wo'umo ira, "Ane iwetu, uli ka kami isema kakonona komi etu ala mamala ratesa kami ka tau-tau to nompakau kami e'i. Iwenu pantesa komi ewa koromu mboto?" 23 Nesonomo Yohanes, "Aku e'imo to nitesa nabi Yesaya nggaolu iwe'i: 'Naria samba'a tau nongare-ngare ri karawa baina: pakanoa jala i Pue!' " 24 Ri tatongo tau-tau to nipakau mpaka ri ja'i Yohanes naria wo'u bara sakuya mba'a tau to Parisi. 25 Ira wo'u nompekutana i'a, "Ane komi da'a Magau to Mompakasalama, da'a wo'u nabi Elia, bo da'a nabi to nijanji Alatala marata, nokuya komi nombadiu tau?" 26 Nesonomo Yohanes, "Aku nombadiu tau ante ue ewa tandaina najeamo ira nggari silaka ira. Tapi ri tatongo komi naria samba'a tau anu da'apa ninjani komi. 27 I'a etu marata ri puriku. Tapi I'a neliu nggabete kuasana nggari aku sampe aku da'a masipato mombawole lui sapatuna." 28 Pura-pura etu najadi ri ngata Betania ri sambote Binangga Yordan ri peto'o Yohanes nombadiu tau. 29 Kaeona etu Yohanes nanggita Yesus narata mpaka ri ja'ina, pade niulina ka tau-tau ri setu, "Kitamo! Etumo Ana Bimba nu Alatala to mompakalipo silaka manusia! 30 I'a etumo to niuliku bopia tempo aku nanguli ka komi kana marata samba'a tau ri puriku to neliu nggabete kuasana nggari aku, sabana nggari lamba pamulana naria mamimo I'a da'apa aku nesuwu. 31 Bopia aku da'apa nangginjani I'a etu Magau to Mompakasalama. Tapi patuju karataku mombadiu tau ante ue ala I'a rapopanjani ka tau-tau to Israel." 32 Pade naria wo'u tesa Yohanes ntanina iwe'i: "Aku nanggita Nosa Nagasa nu Alatala nana'u nggari langi nolenje mpotonji banggebodo netu'u ri korona. 33 Tempo etu da'apa ninjaniku I'a Magau to Mompakasalama. Tapi Alatala to nompakau aku mombadiu tau ante ue nanguli ka aku bopia, 'Ane iko manggita Nosa Nagasaku mana'u metu'u ri ja'i samba'a tau, I'a etumo to mombadiu tau ante Nosa Nagasaku.' " 34 Pade nanguli wo'umo Yohanes, "Ante mataku mboto aku nanggita kajadia etu pade iwe'imo tesaku ka komi: I'a etumo Ana nu Alatala!" 35 Kaeona etu naria wo'umo Yohanes ri setu nosanggani-nggani ante romba'a topantuki i'a. 36 Tempo ira nanggita Yesus noliu ri setu, nangulimo Yohanes, "Kitamo! Etumo Ana Bimba nu Alatala!" 37 Tempo romba'a topantuki Yohanes etu nangepe nuapa to niulina, nalaimo ira nantuki Yesus. 38 Yesus neili ntaliku nanggita ira romba'a nantuki I'a. Pade nipekutanana ka ira, "Nuapa nielo komi?" Nesonomo ira romba'a, "Rabi (batuana Guru), ri umba nipeto'o Komi?" 39 Nesonomo Yesus, "Mai kita komi mbotomo." Tempo etu kira-kira tinti ampa ngguwiana. Jadi nalau mpu'umo ira romba'a nanggita peto'o Yesus. Pade ira neto'o mpasanggani ante I'a eo etu. 40 Nggari ira romba'a to nangepe tesa Yohanes pade nantuki Yesus eo etu samba'a nosanga ka Andreas, sampesuwu i Simon Petrus. 41 Jadi nalaimo Andreas nasalisa nangelo sampesuwuna i Simon pade niulina ka i'a, "Nirata kamimo Mesias!" (Batuana Mesias Magau to Mompakasalama to nijanji Alatala. Ane riara Basa Yunani batuana Kristus.) 42 Pade nikeninamo i Simon mpaka ri ja'i Yesus. Tempo ira narata ri setu Yesus nanggita i Simon pade niulina, "Iko Simon ana Yohanes. Tapi nompamula we'i-we'i iko kana rapoposanga i Kefas." (Sanga Kefas riara Basa Yunani i Petrus. Batuana Kefas bo Petrus etumo "watu".) 43 Kaeona etu Yesus nopatuju malau mpaka ri Bagia Galilea. I'a nomposintomu i Filipus, pade niulina ka i'a, "Kamaimo, tukimo Aku." 44 Filipus etu tau nggari ngata Betsaida, etumo ngata nipeto'o Andreas bo i Petrus. 45 Pade nalaumo i Filipus nomposirata ka i Natanael pade niulina ka i'a, "Nirata kamimo tau to nitesa nabi Musa riara buku-buku Atura nu Alatala pade to nitesa nabi-nabi nggaolu, etumo Yesus nggari ngata Nazaret, ana Yusuf." 46 Tapi nesonomo i Natanael, "A! Da'a ntoto ria to nabelona meumba nggari ngata Nazaret!" Nanguli i Filipus ka i'a, "Kamaimo. Kita komi mbotomo!" Pade nalau mpu'umo i Natanael. 47 Tempo Yesus nanggita i Natanael narata ri ja'ina, I'a nanguli, "Kitamo! E'imo mpu'u-mpu'u samba'a tau to Israel! Da'a ntoto naria to nadenggona riara nta'ina." 48 Nangepe etu nangulimo i Natanael ka Yesus, "Iwenu sampe Komi nangginjani aku?" Nesonomo Yesus, "Da'apa Filipus nalau nompokio komi, Aku nanggita komi ri wayo nggayu ara guria." 49 Sangga nangepe etu nangulimo i Natanael, "Guru, Komimo Ana nu Alatala! Komimo mpu'u-mpu'u Magau nto Israel!" 50 Nangulimo Yesus ka i'a, "Komi nomparasaya sabana Aku nanguli ka komi Aku nanggita komi ri wayo kayu ara guria. Tapi komi kana manggita kajadia to meliu nggabete nggari kajadia etu." 51 Pade niuli Yesus wo'u ka i'a, "Aku mpu'u-mpu'u notesa ka komi, komi kana manggita langi matibea pade mukita wo'u malaeka-malaeka Alatala aga mana'u bo mepone ri ja'iku, Ana nu Manusia."

2

1 Rombengi kaliuna nggari kajadia etu naria posusa mponika ri ngata Kana ri Bagia Galilea. Indo Yesus naria ri setu, 2 pade Yesus bo anaguruna wo'u nigaga malau ri posusa etu. 3 Tempo ira ri posusa etu naopu puramo ue anggur. Jadi nangulimo indona ka Yesus, "Mana ria ue anggur ira. Naopu puramo." 4 Nanguli Yesus ka indona, "Nindo, nokuya komi nanguli iwetu ka Aku? Da'apa narata tempona Aku mompopokita kuasaku." 5 Pade nangulimo indona ka tau-tau topetande ri posusa etu, "Powia komi ngina nuapa-nuapa to rapakauna ka komi." 6 Ri setu naria aono ongu gumba bete nipowia nggari watu to nipakasadia rapombarama kada bo pale nantuki ada-ada nto Yahudi. Gumba etu isina saongu kira-kira satu lite ue. 7 Nangulimo Yesus ka tau-tau topetande ri posusa etu, "Isi komimo gumba-gumba etu ante ue." Pade niisi iramo sampe naponu. 8 Naopu etu nanguli wo'umo Yesus ka ira, "We'i-we'i sanggu sakedi ue etu, keni komi ka pue mposusa etu." Pade ira nanggeni ue etu ka pue mposusa etu. 9 Pue mposusa etu nompetami sakedi ue etu to nabalimo najadi anggur. Da'a ninjanina nggari umba anggur etu. Aga tau to nombasanggu ue etu nangginjani. Naopu pue mposusa nompetami anggur etu nipokiona boti langgai 10 pade niulina ka i'a, "Nabiasa tau nombawai anggur to nabelona ntani ruru, pade ane torata nabasamo nanginu pade niwai ka ira anggur biasa. Tapi komi e'i nomboli anggur to neliu nggabelona sampe we'i-we'i!" 11 Etumo kabaraka pamulana to nipowia Yesus tempo I'a ri ngata Kana ri Bagia Galilea. Ante kabaraka etu I'a nompopokita kuasana sampe anaguru-anaguruna nomparasaya I'a. 12 Naopu posusa etu nalaumo Yesus mpaka ri ngata Kapernaum nosanggani-nggani ante indona pade sampesuwu-sampesuwuna bo anaguru-anaguruna. Pade neto'omo ira ri setu bara sakuya mbengi kasaena. 13 Tempo namosumo Eo Bete Paska nto Yahudi nalaumo Yesus mpaka ri ngata Yerusalem. 14 Ri lalowo Sapo Mpepue I'a nombarata tau nobalu-balu japi, bimba bo tonji banggebodo. Pade naria wo'u tau toposinjula doi nekatoko ri setu. 15 Nanggita etu Yesus nompowia sampeka potarampea nggari kaloro pade nipopalaina ira pura-pura nosanggani-nggani ante pura-pura bimba bo japi etu nggari lalowo Sapo Mpepue. Pade doi nu toposinjula doi nikamburakana pade meja-meja ira nidungganakana. 16 Pade niulina ka tau nobalu-balu tonji banggebodo etu, "Kenimo pura-pura etu nggari se'i! Ne'e komi mompajadi sapo Umaku ewa sapo mpotomu!" 17 Pade natitoramo rara anaguru-anaguruna nuapa to nitulisi riara Buku Nagasa to nanguli iwe'i: "Toweku ka sapomu, Pue, ewa apu to nompakaboa tinalu." 18 Naopu etu topanggeniaka-topanggeniaka nombaewa Yesus ante nanguli, "Kabaraka nuapa mupowia ala mompopokita ka kami Komi nakuasa nompopalai tau-tau iwetu?" 19 Nesonomo Yesus, "Gero komimo sapo e'i pade Aku kana mombabangu bali riara tempo tolueo." 20 Pade nanguli wo'umo topanggeniaka nto Yahudi, "A! Sapo Mpepue e'i nikarajaa ntau patampulu bo onompae kasaena. Iwenu Komi mamala mombabangu bali riara tolueo?" 21 Tapi sapo to nipatuju Yesus ante tesana etumo korona mboto. 22 Nggari purina naliu Yesus natuwu bali nggari kamatena natitoramo rara anaguruna tesana e'i. Pade niparasaya iramo nuapa to nitulisi riara Buku Nagasa pade nuapa to nitesa Yesus mboto. 23 Tempo Yesus danaria ri ngata Yerusalem tempo Posusa Eo Bete Paska, nadeamo tau nomparasaya I'a sabana ira nanggita kabaraka-kabaraka to nipowiana. 24 Tapi Yesus mboto da'a nasadia mantarima patuju ira ri ja'ina, sabana ninjanina isi rara nta'i ira pura-pura. 25 Da'a paraluu tau mompakanoto inggu manusia ka I'a sabana ninjanina puramo isi rara nta'i manusia.

3

1 Naria samba'a to Parisi nosanga ka i Nikodemus. I'a samba'a topanggeniaka agama nto Yahudi. 2 I'a narata ri ja'i Yesus tempo nggawengi pade nanguli ka I'a, "Guru, nanotomo ka kami Komi etu samba'a guru to nisuro Alatala, sabana da'a ria samba'a tau mamala manggawia kabaraka ewa to nikawia Komi etu ane Alatala da'a nosanggani-nggani ante i'a." 3 Nesonomo Yesus, "Aku mpu'u-mpu'u notesa ka komi, da'a ria samba'a tau mamala majadi todea riara Poparenta nu Alatala ane i'a da'a raote mpanjili." 4 Nekutanamo Nikodemus ka I'a, "Iwenu sampe tau to natu'amo raote mpanjili? Natantumo i'a da'a mamala mesua bali riara nta'i indona pade raote mpanjili!" 5 Nesonomo Yesus, "Aku mpu'u-mpu'u notesa ka komi, ane tau da'a raote ante ue pade ante kuasa Nosa Nagasa nu Alatala tau etu da'a mamala majadi todea riara Poparenta nu Alatala. 6 Koro batata e'i najadi nggari manusia, tapi to najadi nggari kuasa Nosa Nagasa nu Alatala etumo katuwua nabou. 7 Jadi ne'e komi matekaja mangepe tesaku etu to nanguli komi kana raote mpanjili. 8 Poiri nakantawui mpaka ri umba nipodotana. Kita nangepe serena tapi da'a ninjanita nggari umba karatana pade mpaka ri umba rakalauna. Iwetu wo'u ante tau to niote mpanjili ante kuasa Nosa Nagasa nu Alatala." 9 Pade nekutana wo'umo i Nikodemus ka Yesus, "Iwenu sampe etu mamala majadi?" 10 Nesonomo Yesus, "Komi e'i Guru nto Israel to nibila. Iwenu sampe da'a ninjanimu batua nu tesaku e'i? 11 Aku mpu'u-mpu'u notesa ka komi, Kami e'i notesa ka komi nuapa to ninjani Kami, pade Kami nanguli ka komi nuapa to nikita Kami mboto, tapi komi da'a madota mantarima tesa Kami etu. 12 Komi da'a nomparasaya ane Aku notesa ka komi ewa nuapa-nuapa to najadi ri dunia e'i. Iwenu komi mamala momparasaya ane Aku mombatesa ka komi nuapa to najadi riara suruga? 13 Da'apa ria samba'a tau neore mpaka ri suruga nanggita to najadi ri setu. Aga Aku, Ana nu Manusia to nana'u nggari suruga mpaka riara dunia to nanggita etu. 14 Nabi Musa nggaolu nompowia sanggayu ule nggari tambaga ri karawa baina pade nionggotakana mpakalanga-langa ala isema-sema mantingoa ule etu kana matuwu. Nasimbayu ewa ule etu nionggotaka mpakalanga-langa, iwetu wo'u Aku, Ana nu Manusia kana raonggotaka mpakalanga-langa, 15 ala isema-sema momparasaya Aku mombarata katuwua mabelo sampe ri kasae-saena. 16 Sabana nabete mpu'umo towe nu Alatala ka manusia ri dunia sampe niwaina Anana to samba'a lau, ala isema-sema momparasaya I'a da'a maropu tapi mombarata katuwua mabelo sampe ri kasae-saena. 17 Sabana patuju Alatala nompakau Anana mboto marata ri dunia e'i da'a ala mompakasala manusia tapi ala ira mamala rapakasalamana. 18 Tau to nomparasaya Ana nu Alatala etu da'a rapakasala. Tapi tau to da'a nomparasaya I'a nipakatantumo salana sabana ira da'a nomparasaya Ana nu Alatala to samba'a lau etu. 19 Nipakatantumo sala manusia sabana Ana nu Alatala narata ri dunia ewa reme nombawanta karumauna, tapi manusia aga nompokono karumauna sabana pokainggu ira naja'a. 20 Isema-sema nanggawia kaja'ana da'a ntoto nipokonona reme. Pade ira da'a ntoto madota mompakamosu reme etu ala pura-pura pokainggu ira to naja'a etu ne'e matikita. 21 Tapi isema-sema to nanoa pokaingguna madota mompakamosu reme etu ala manoto rakita pokainggu ira nantuki dota Alatala." 22 Naopu etu nalaimo Yesus ante anaguruna mpaka ri Bagia Yudea. Ri setu I'a neto'o bara sakuya kasaena ante ira pade nombadiu tau ewa tandaina ira najadi topomparasaya I'a. 23 - 24 Tempo etu Yohanes Topediu da'apa nisuaraka riara tarunggu. I'a nombadiu tau ri ngata Ainon nosinggamosu ante ngata Salim, sabana ri setu nadea ue. Tau-tau bate-batena narata ri ja'ina pade nidiuna. 25 Ri setu anaguru-anaguru Yohanes nosinggarau ante samba'a tau to Yahudi ewa ada-ada mompegasa koro. 26 Jadi nalaumo anaguruna ri ja'i Yohanes ante nanguli, "Guru, danitora komi tau to nosanggani ante komi ri sambote Binangga Yordan to nipopokita komi ka kami bopia? I'a wo'u nombadiu tau, pade pura-pura tau nalau mpaka ri ja'ina." 27 Nesonomo Yohanes, "Da'a ria samba'a mamala mombarata nuapa-nuapa ane da'a rawai Alatala ka i'a. 28 Niepe komi mbotomo tesaku bopia nanguli, 'Aku e'i da'a Magau to Mompakasalama to nijanji Alatala. Aku e'i aga tau to nisuro mokolu ka I'a.' 29 Ane ri posusa mponika boti langgaimo to mosanggani ka boti besi. Tapi wega nu boti langgai aga nekanggore namosu ante i'a, pade nadamba mpu'umo rarana mangepe suara boti langgai etu. Iwetu wo'u ante aku. We'i-we'i aku nadamba mpu'umo raraku. 30 I'a kana mantambai rabila tapi aku e'i kana mantambai rapakakedi." 31 "To nana'u nggari suruga etu neliu nggalanga nggari pura-pura manusia. Tapi to nopu'u nggari dunia e'i bate-batena manusia biasa, i'a aga nombatesa nuapa-nuapa to najadi ri dunia e'i. Tapi to nana'u nggari suruga etu neliu nggalanga nggari pura-pura manusia. 32 I'a nombatesa nuapa to nikitana pade to niepena, tapi da'a ria samba'a tau to nantarima pantesana etu. 33 Tapi tau-tau to nantarima tesana etu nompakanoto ante powia ira etu ira mpu'u-mpu'u nompangaku Alatala nakono. 34 Tau to nisuro Alatala etu I'amo to niposumba Alatala, sabana I'a mpu'u-mpu'u nipakakuasa Nosa Nagasa nu Alatala. 35 Umana Alatala nompotowe I'a, pade niwaina ka I'a mpengele-ngele kuasa. 36 Isema-sema to nomparasaya Anana etu, kana mombarata katuwua mabelo sampe ri kasae-saena. Tapi isema-sema to da'a natundu ri ja'i Anana etu da'a mombarata katuwua mabelo etu. Ira aga rapawela ka rau rara nu Alatala sampe ri kasae-saena."

4

1 Tau-tau to Parisi nangepe lele to nanguli nadeamo tau to nalau ri ja'i Yesus ala radiu majadi topantuki I'a sampe topantuki Yesus neliu nggadea nggari topantuki Yohanes Topediu. 2 Kakonona da'a Yesus mboto to nombadiu tau aga anaguru-anaguruna. 3 Jadi tempo Yesus nangginjani tau-tau to Parisi nangepe lele etu nalaumo I'a nompalasi Bagia Yudea nanjili bali mpaka ri Bagia Galilea. 4 Riara mpolumakona etu Yesus kana moliu ri Bagia Samaria. 5 Jadi naratamo Yesus ri saongu ngata ri Bagia Samaria nosanga ka ngata Sikhar. Ngata etu namosu tana to niwai Yakub ka anana Yusuf nggaolu. 6 Ri setu naria saongu buwu to niuli Buwu Yakub. Jadi nenontomo Yesus pade nekatoko ri sinjori buwu etu, sabana nalengemo I'a nolumako. Tempo etu natongomo eo. 7 - 8 Anaguru-anaguru Yesus napola mpaka riara ngata etu mangoli panggoni. Tempo Yesus nekatoko ri buwu etu naratamo samba'a besi to Samaria nantombu ue. Nangulimo Yesus ka i'a, "Indo, wai ka Aku sanu ue komi kuinu." 9 Nangulimo besi to Samaria etu ka I'a, "Komi etu tau to Yahudi, aku e'i tau to Samaria. Iwenu sampe Komi merapi ue inu nggari ja'iku?" Niulina iwetu sabana nabiasa tau-tau to Yahudi da'a madota mosanggani-nggani ante tau-tau to Samaria. 10 Nesonomo Yesus, "Ane munjani pewai bayangi nu Alatala pade isema Aku to nomperapi ue inu nggari ja'imu, natantumo komi mboto kana momperapi ue inu nggari ja'iku pade Aku kana mombawai ka komi ue to mombawai katuwua mabelo." 11 Naopu etu nanguli wo'umo besi etu, "Uma, da'a ria posanggu Komi rapombasanggu ue e'i, pade buwu e'i nandala mpu'u. Nggari umba rapangala Komi ue to mombawai katuwua mabelo to nitesa Komi etu? 12 Iwenumo? Komi neliu nggakuasa nggari totu'a kami nggaolu Yakub to nombawai buwu e'i ka kami majadi sosora? I'a mboto nanginu ue nggari buwu e'i pade wa'a wo'u ana-anana bo pompatuwuna." 13 Nanguli wo'umo Yesus ka besi etu, "Isema-sema manginu ue nggari buwu e'i kana mabaipa tambolona. 14 Tapi isema-sema manginu ue to kuwai ka i'a, mana mabai tambolona sampe ri kasae-saena. Sabana ue to kuwai ka i'a etu majadi ewa ue mpemata moili nggariara nggatuwuna sampe i'a mombarata katuwua mabelo sampe ri kasae-saena." 15 Nangepe etu nanguli wo'umo besi etu, "Ane iwetu, Uma, wai ka akumo ue etu ala mana mabai tamboloku pade ne'e mana aku malenge momai mantombu ue e'i." 16 Nangulimo Yesus ka i'a, "Kalau pokiomo ruru rongomu pade panjili bali ri se'i ante i'a." 17 Nesonomo besi etu, "Aku da'a norongo." Nanguli Yesus ka i'a, "Nakono mpu'u tesamu etu komi da'a norongo. 18 Sabana naria limamba'a langgai to nomporongo komi pade langgai to naria ri ja'imu we'i-we'i etu da'a rongomu. Nakonomo tesa to niulimu pani'a." 19 Pade nangulimo besi etu, "Uma, nanotomo ka aku Komi etu samba'a nabi. 20 Totu'a kami nggaolu nombasomba Alatala ri bunggu bulu e'i, tapi komi tau to Yahudi nanguli aga ri ngata Yerusalem masipato tau mombasomba Alatala." 21 Nesonomo Yesus ka i'a, "Indo, parasayamo tesaku e'i. Kana marata tempona tau da'a mana mombasomba Umata Alatala ri bulu e'i pade da'a wo'u ri ngata Yerusalem. 22 Komi to Samaria nombasomba anu da'a ninjani komi. Tapi kami tau to Yahudi nombasomba to ninjani kami mamimo, sabana Magau to Mompakasalama meumba nggari tatongo ntau to Yahudi. 23 Tapi kana marata tempona banepia, pade kakonona naratamo tempona etu, tau-tau to mpu'u-mpu'u mombasomba Umata Alatala kana mombasomba I'a ante kuasa nggari ja'i Nosa Nagasa nu Alatala nantuki pepatuduki to nakonona. Sabana topesomba-topesomba iwetumo to nielo Umata Alatala. 24 Alatala ewa nosa to da'a namala nikita. Jadi tau-tau to madota mombasomba I'a kana mombasomba I'a ante kuasa nggari ja'i Nosa Nagasa nu Alatala nantuki pepatuduki to nakonona." 25 Nesono wo'umo besi etu, "To ninjaniku kana marata samba'a Magau to Mompakasalama to niuli Kristus. Ane I'a etu marata I'a kana motarangga mpakanoto mpengele-ngele ka kita." 26 Nangulimo Yesus ka besi etu, "Aku to notesa ka komi we'i-we'i, Akumo tau to niulimu etu." 27 Tempo ira danotesa-tesa naratamo anaguru-anaguru Yesus nggariara ngata. Natekaja ira nanggita Yesus notesa-tesa ante samba'a besi. Tapi da'a ria kamba samba'a nabia nompekutana besi etu, "Nuapa paraluumu?" Ira da'a wo'u nabia nompekutana Yesus, "Nuapa sabana Guru notesa-tesa ante besi etu?" 28 Naopu etu besi etu nombaboli gumbana ri setu pade nanjilimo i'a mpaka riara ngata. Narata ri setu niulina ka tau-tau riara ngata etu, 29 "Kamaimo kita lau manggita samba'a tau guria to nombatesa ka aku pura-pura nuapa to nipowiaku. Bara suka I'amo Magau to Mompakasalama to nijanji Alatala?" 30 Nangepe tesa besi etu nalaumo ira nggariara ngata etu mpaka ri ja'i Yesus. 31 Tempo besi etu nalau mpaka riara ngata nangulimo anaguru-anaguru Yesus ka I'a, "Maimo Guru, manggonimo kita." 32 Tapi nesonomo Yesus, "Nariamo panggoniku anu da'a ninjani komi." 33 Nangepe etu nosipekutanamo ira samba'a bo samba'a, "Naria tau nanggeni panggoni ka I'a?" 34 Jadi nangulimo Yesus ka ira, "Panggoniku etumo mantuki dota Alatala to nompakau Aku pade mompakaopu bago to niparasayana ka Aku. 35 Naria pantesa komi iwe'i: 'Patambulapa pade marata tempo mokato.' Tapi kuuli ka komi, 'Antoakamo ante mata komi mboto, pae-pae ri tinalu etu nakunimo, namalamo rakato. 36 Tau-tau topokato nantarima tambona. Nompamulamo ira nompasiromu asele mpobago ira, etumo manusia to matuwu sampe ri kasae-saena. Pade topotuja bo topokato mamala madamba-damba mpasanggani-nggani.' 37 Nakono mpu'u tesa to nanguli, 'To samba'ana notuja to santanina nokato.' 38 Aku nompakau komi malau mombakato anu da'a nituja komi. Tau ntanina notuja pade komimo to nantarima asele mpanggawia ira." 39 Riara ngata to Samaria etu nadeamo tau to nomparasaya Yesus sabana niepe iramo tesa besi etu to nanguli, "I'a nantesa ka aku pura-pura nuapa to nipowiaku." 40 Jadi nalaumo ira mpaka ri ja'i Yesus. Narata ri setu nerapimo ira ante mpu'u-mpu'u ala Yesus mesai ri ngata ira bara sakuya kasaena. Jadi nesai mpu'umo Yesus ri setu rombengi kasaena. 41 Pade nantambaimo kadea ntau to nomparasaya Yesus sabana niepe ira mbotomo tesana. 42 Naopu etu nangulimo ira ka besi etu, "We'i-we'i niparasaya kami mpu'umo, da'a aga nggari tesamu tapi niepe kami mbotomo tesana. Pade ninjani kamimo I'a mpu'u-mpu'u Magau to Mompakasalama manusia ri dunia." 43 Naopu neto'o ri setu rombengi kasaena nanggaliwomo Yesus napola mpaka ri Bagia Galilea. 44 Nariamo sanggani bopia Yesus mboto nanguli, "Samba'a nabi da'a nibila ntau ane riara ngatana mboto." 45 Jadi tempo I'a narata ri Bagia Galilea I'a nitarima tau-tau to Galilea ante nadamba rara. Sabana ira wo'u nantuki Posusa Eo Bete Paska ri ngata Yerusalem bopia pade nikita ira mbotomo pura-pura nuapa to nipowia Yesus ri setu. 46 Pade nalau wo'umo I'a mpaka ri ngata Kana ri Bagia Galilea, ngata nipompajadina ue newali anggur bopia. Ri ngata Kapernaum naria samba'a madika to nokarajaa riara sapo magau, anana naju'a ntomo. 47 Sangga nangepe lele to nanguli naratamo Yesus ri Bagia Galilea nggari Bagia Yudea, nalaumo madika etu mpaka ri ja'ina pade nerapi ante mpu'u-mpu'u, "Tulungi malau mpaka ri ngata Kapernaum mompakabelo anaku, sabana ntora namatemo i'a!" 48 Nangepe etu nangulimo Yesus ka i'a, "Ane komi pura-pura da'a nanggita tandai-tandai to nipogumaa bo kabaraka-kabaraka komi da'a ntoto nomparasaya." 49 Nangulimo madika etu ka Yesus, "Pue, kuperapi ka Komi masalisa kita malau sampe anaku danaria nosana." 50 Nanguli Yesus ka i'a, "Panjilimo komi! Nabelomo anamu!" Nangepe etu niparasaya madikamo tesa to niuli Yesus ka i'a etu. Jadi nanjilimo i'a. 51 Tempo i'a da ri tatongo jala i'a nitomunaka bara sakuya mba'a batuana nggari Kapernaum. Ira nanguli ka i'a, "Nabelomo ana komi!" 52 Pade i'a nompekutana ira, "Ipiamo anaku nompamula nabelo ju'ana?" Nesonomo ira, "Yowi ntongo eo kira-kira tinti saongu nana'umo panena." 53 Pade natitoramo madika tinti saongu yowi Yesus nanguli ka i'a, "Nabelomo anamu!" Pade madika saongu njapo nomparasaya Yesus. 54 Etumo tandai to nipogumaa karongganina to nipowia Yesus tempo I'a narata bali nggari Bagia Yudea mpaka ri Bagia Galilea.

5

1 Naopu etu nanjili balimo Yesus mpaka ri ngata Yerusalem ala mantuki eo bete nto Yahudi ri setu. 2 Ri ngata Yerusalem namosu bobaa ngata to nosanga ka "Bobaa Bimba" naria saongu kola to niuli riara Basa Ibrani Kola Betesda. Nantalili kola etu naria limaongu tambale. 3 Ri tambale etu nadea mpu'u tau naju'a naturu. Naria tau naburo, naria tau nakejo, naria tau napunggu. [Ira pura-pura nompopea ue mojajompe. 4 Apa sanggani-sanggani malaeka i Pue nana'u riara ue kola etu nombajajompe ue. Pade isema-sema mokolu nesua riara ue tempona ue etu nojajompe, i'a kaliu-liu nabelo nggari ju'ana.] 5 Ri setu naria samba'a langgai to naju'a tolumpulu bo walumpaemo kasaena. 6 Tempo Yesus nanggita tau etu naturu ri setu pade ninjanina sakuya kasaena ju'ana etu, nekutanamo I'a ka tau etu, "Madota iko mabelo?" 7 Nesonomo tau naju'a etu, "Uma, da'a ria tau manggeni aku mpaka riara kola tempo ue kola etu nojajompe. Bate-batena tempo aku dalaku mompasimbuku malau mesua nariamo tau ntanina nokolu nesua riara ue etu." 8 Pade nangulimo Yesus ka i'a, "Pembangumo! Lulumo ompa paturumu pade polumakomo!" 9 Kaliu-liu nabelomo ju'a ntau etu. Nilulunamo ompana pade nolumakomo i'a. Tempo kajadia etu nawela Eo Mpenonto. 10 Sabana etu nangulimo topanggeniaka-topanggeniaka nto Yahudi ka tau lako nabelo nggari ju'ana etu, "Eo e'i Eo Mpenonto. Da'a mamala iko mompasinaka ompamu iwetu!" 11 Tapi nangulimo tau etu, "Tau to nompakabelo ju'aku pani'a nanguli ka aku, 'Lulumo ompamu bo polumakomo!' " 12 Nekutanamo tau-tau to Yahudi etu, "Isema tanu nompakau iko mombalulu ompamu pade molumako?" 13 Tapi da'a ninjani ntau lako nabelo nggari ju'ana etu bara isema to nompakabelo ju'ana, sabana Yesus notinggalipo nggari tatongo ntau dea etu. 14 Naopu etu Yesus nomposintomu tau etu riara Sapo Mpepue, pade niulina ka i'a, "Kitamo! Nabelomo ju'amu. Jadi ne'e mana iko mompowia silaka ala ne'e iko mawela to neliu nggaja'a nggari ju'amu etu." 15 Naopu etu nalaumo tau etu mpaka ri ja'i topanggeniaka nto Yahudi pade niulina ka ira Yesusmo to nompakabelo ju'ana. 16 Jadi nompamulamo ira mangelo jala mompandasa Yesus, sabana I'a nompakabelo tau naju'a etu ri Eo Mpenonto. 17 Tapi nangulimo Yesus ka ira, "Umaku bate-batena nokarajaa sampe ri eo e'i, pade Aku wo'u kana mokarajaa." 18 Nangepe tesa Yesus etu topanggeniaka-topanggeniaka nto Yahudi nantambai nangelo jala mompatesi I'a. Sabana I'a da'a aga nombaliunaka ada-ada Eo Mpenonto tapi I'a wo'u nanguli Alatala Umana mboto. Ante nanguli iwetu I'a nompakasimbayu korona ante Alatala. 19 Pade nesonomo Yesus ka topanggeniaka-topanggeniaka nto Yahudi etu, "Aku mpu'u-mpu'u notesa ka komi, Aku da'a mamala mompowia nuapa-nuapa nantuki dotaku mboto, tapi nuapa to nikitaku nggari ja'i Umaku etumo to nipowiaku. Nuapa-nuapa to nipowia Umaku, etu wo'u to kupowia. 20 Sabana Umaku nompotowe Aku Anana pade nipopokitana ka Aku pura-pura nuapa to nipowiana. Pade da'a aga etu, I'a kana mompopokita tandai-tandai to meliu nggabete nggari powia-powia etu pani'a ala rapogumaa komi. 21 Nasimbayu ewa Umaku nompakatuwu bali tau namate pade nombawai ka ira katuwua nabou, iwetu wo'u Aku Anana nombawai katuwua nabou ka isema-sema to nipodotaku. 22 Umaku mboto da'a mombatangara isema-sema sabana kuasa mombatangara manusia niwainamo ka Aku Anana 23 ala pura-pura tau mombabila Anana nasimbayu ewa ira nombabila I'a. Isema-sema da'a nombabila Aku e'i batuana ira da'a wo'u nombabila Umaku to nompakau Aku. 24 Aku mpu'u-mpu'u notesa ka komi, isema-sema mangepe pantesaku pade momparasaya Pue Alatala to nompakau Aku, ira kana mombarata katuwua mabelo sampe ri kasae-saena. Ira da'a mawela pesuku tapi ira nikabasakamo nggari kamatea pade nombarata katuwua nabou. 25 Aku mpu'u-mpu'u notesa ka komi, kana marata tempona banepia, pade kakonona naratamo tempona etu, tau-tau namate kana mangepe suara Ana nu Alatala, pade ira to mangepe suara etu kana matuwu bali. 26 Sabana nasimbayu ewa Umaku Alatala nakuasa mombawai katuwua ka manusia, iwetu wo'u Aku Anana niwaina ka kuasa mombawai katuwua ka manusia. 27 Pade niwaina wo'u ka Aku kuasa mombatangara manusia sabana Akumo to niuli Ana nu Manusia. 28 Ne'e komi mogumaa mangepe tesaku etu, sabana kana marata tempona pura-pura tau namate riara dayo kana mangepe suaraku. 29 Pade ira kana membangu nggariara dayo. Ira to nabelo pokaingguna kana membangu mombarata katuwua mabelo. Pade ira to naja'a pokaingguna kana membangu ala rasuku." 30 "Aku da'a mamala mompowia nuapa-nuapa nantuki dotaku mboto. Aku nombatangara nantuki nuapa to niepeku nggari ja'i Umaku, pade potangaraku nanoa sabana Aku da'a nantuki dotaku mboto tapi aga dota nu Umaku to nompakau Aku. 31 Ane aga Aku njamba'aku motesa mompakanoto isema Aku e'i natantu da'a masipato raparasaya pantesaku etu. 32 Tapi naria samba'a tau ntanina to nompakanoto isema Aku, pade ninjaniku tesana etu nakono. 33 Komi nombasuro tau nalau mpaka ri ja'i Yohanes Topediu pade i'a nompakanoto isema Aku e'i. 34 Kakonona da'a paraluu manusia mompakanoto isema Aku. Tapi niuliku iwetu ala komi mamala rapakasalama. 35 Yohanes Topediu etu nasimbayu ewa saongu poindo najela to newanta, pade komi nadamba-damba nantarima remena etu. Tapi kadamba nu rara komi etu aga sampalai. 36 Tapi naria sangelepa to neliu nggabete nggari tesa Yohanes Topediu to nompakanoto isema Aku. Etumo panggawiaku to niparasaya Umaku ka Aku ala kupakaopu. Pade panggawia etumo nompakanoto Aku e'i nipakau Umaku. 37 Pade Umaku to nompakau Aku wo'u nompakanoto isema Aku. Da'apa sanggani komi nangepe suarana pade da'apa wo'u sanggani komi nanggita lenjena. 38 Pade tesa-tesana da'a niboli komi riara nta'i. Nanotomo etu sabana Aku to nipakauna da'a niparasaya komi. 39 Komi naraji neguru isi Buku Nagasa sabana niuli komi nggariara buku etu komi mombarata katuwua mabelo sampe ri kasae-saena. Tapi isi Buku Nagasa etumo to nompakanoto isema Aku. 40 Tapi naupa iwetu komi bate-batena da'a madota marata ri ja'iku ala mombarata katuwua mabelo sampe ri kasae-saena. 41 Aku e'i da'a miki rabila manusia. 42 Tapi ninjaniku da'a ntoto naria towe ri ja'i Alatala riara nta'i komi. 43 Aku e'i narata ri ja'i komi niposumba Umaku, tapi komi da'a madota mantarima Aku. Tapi ane tau ntanina marata ri ja'i komi nantuki dotana mboto tau etumo to ratarima komi. 44 Natantumo da'a mamala komi momparasaya Aku sabana komi damadota ratoiya ntau. Komi da'a ntoto nompasimbuku ala ratoiya Alatala to samba'a lau! 45 Tapi naupa iwetu ne'e rapekiri komi bara Aku to mompangadu komi ri ngayo Umaku banepia. Naria to mompangadu komi, etumo nabi Musa mboto to nisarumaka komi. 46 Sabana ane komi mpu'u-mpu'u nomparasaya tesa nabi Musa, natantumo komi wo'u kana momparasaya Aku, sabana koroku e'imo to nitesa nabi Musa riara buku-bukuna. 47 Tapi ane da'a niparasaya komi nuapa to nitulisi nabi Musa iwenumo komi mamala momparasaya pantesaku?"

6

1 Naliu etu nalaumo Yesus mpaka ri sambote Rano Galilea to niuli wo'u Rano Tiberias. 2 Nadea mpu'u tau nantuki I'a sabana nikita iramo tandai-tandai to nipogumaa to nipowiana ri ja'i tau-tau naju'a. 3 Narata ri sambote rano nantendemo Yesus ri saongu buluna pade ri setu I'a nekatoko ante anaguru-anaguruna. 4 Tempo etu wo'u namosumo Eo Bete Paska nto Yahudi. 5 Tempo Yesus nantonguaka ri ntalilina nikitana tau dea narata mpaka ri ja'ina. Pade niulina ka i Filipus, "Ri umba rakalauta mangoli panggoni rawai ka tau dea e'i?" 6 Ninjani Yesus mamimo nuapa rapowiana ngina tapi niulina iwetu ala mombauji i Filipus. 7 Nesonomo i Filipus, "Roti olina roatu mpeka doi salaka da'a magana rakoni ntau dea e'i, nau damo rabagi ka ira aga mbau sakedi." 8 Pade nangulimo samba'a anaguruna ntanina to nosanga ka Andreas sampesuwu i Simon Petrus, 9 "Ri se'i naria samba'a ngana langgai nobaku limaongu roti pade romba'a bau. Tapi nuapa batuana etu ka tau-tau iwetu kadeana?" 10 Nangulimo Yesus, "Pakaumo ira pura-pura mekatoko." Ri peto'o etu nadea kawoko. Jadi tau dea etu nekatoko puramo ri bunggu nggawoko etu. Kadea nu langgai ri setu kira-kira limanjobu mba'a. 11 Naopu etu Yesus nangala roti pade niulina tarima kasi ka Alatala. Pade nitibo-tibona roti etu ka tau dea to nekatoko ri setu. Iwetu wo'u nipowiana ante bau. Pade tau dea etu nanggoni sampe nabasa. 12 Sangga nabasapa ira nangulimo Yesus ka anaguru-anaguruna, "Pasiromu komi puramo labi-labi nu roti ante bau etu. Ne'e sampe maria to ratajiaka." 13 Jadi nggari limaongu roti to nikoni ntau dea etu, nipasiromu ira labina naponupa sampulu rotonda. 14 Sangga nikita ntau dea tandai to nipogumaa to nipowia Yesus etu notesamo ira, "Mpu'u-mpu'u I'a etumo nabi to nisarumakata marata ri dunia e'i!" 15 Ninjani Yesus ira nopatuju marata mompasu'u I'a majadi Magau ira. Jadi nalaimo I'a njamba'ana nggari ja'i ira nantende mpaka ri buluna. 16 Tempo ntora nawengi notuamo anaguru-anaguru Yesus nggari buluna nalau mpaka ri wiwi rano. 17 Pade nesawi sakayamo ira ala mewote mpaka ri ngata Kapernaum. Tempo nawengimo Yesus da'apa narata ri ja'i ira. 18 Pade naratamo poiri naramboso sampe nabetemo balumba rara rano. 19 Tempo ira nosakaya kira-kira lima atau ono kilo ira nanggita Yesus nolumako ri bunggu nu ue etu nantotoaka sakaya ira. Nanggita etu naekamo rara ira. 20 Tapi nangulimo Yesus ka ira, "Ne'e maeka! Aku Yesusmo e'i!" 21 Nangepe etu ira nantarima I'a riara sakaya ante nadamba rara. Pade kaliu-liu nasampomo sakaya ira ri peto'o to nitunggai ira. 22 Naeo mpadondona todea to danaria ri sambote rano etu nantora aga saongu sakaya ri setu yowi. Pade nitora ira Yesus da'a nesawi sakaya mpasanggani-nggani ante anaguru-anaguruna, aga ira to nesawi sakaya mpaka ri sambotena. 23 Tempo etu naratamo sakaya-sakaya ntanina nggari ngata Tiberias nasampo namosu peto'o ira pura-pura nanggoni roti to niposambaya i Pue. 24 Sangga ninjani ntau dea etu Yesus ante anaguru-anaguruna da'a mana naria ri setu, ira wo'u nesawi sakaya nalau mpaka ri ngata Kapernaum mangelo I'a. 25 Tempo tau dea nosintomu ka Yesus ri sambote rano etu ira nompekutana I'a, "Guru, ipiamo Komi narata ri se'i?" 26 Nesonomo Yesus, "Aku mpu'u-mpu'u notesa ka komi, komi nangelo Aku sabana komi nanggoni roti sampe nabosu, da'a sabana komi nangginjani patuju tandai to nipogumaa to nipowiaku etu. 27 Ne'e komi aga mokarajaa mangelo panggoni to masalisa maopu bo mawau. Agina komi mokarajaa mangelo panggoni to da'a mawau to mamala mombawai katuwua mabelo sampe ri kasae-saena. Aku, Ana nu Manusiamo to mombawai panggoni etu ka komi, sabana Akumo to nionggotaka Alatala mowia etu." 28 Pade nekutanamo ira ka I'a, "Nuapa masipato rapowia kami ala kami mowia to nikonoa Alatala?" 29 Nesonomo Yesus, "Iwe'imo powia to nikonoa Alatala: Parasayamo Aku to nipakauna." 30 Pade nanguli wo'umo ira ka Yesus, "Ane iwetu tandai nuapa rapowia Komi ala kami mamala manggita pade momparasaya Komi? Powia nuapa rapowia Komi? 31 Tempo totu'a kami nggaolu naria ri karawa baina ira nanggoni roti to niuli 'manna.' Ewa to nitulisi riara Buku Nagasa iwe'i: 'I'a nombawai roti nggari suruga rakoni ira.' " 32 Nanguli Yesus ka ira, "Aku mpu'u-mpu'u notesa ka komi, da'a Musa nggaolu to nombawai ka komi roti nggari suruga, tapi Umaku to nombawai ka komi roti to mpu'u-mpu'u nggari suruga we'i-we'i. 33 Sabana roti to nopu'u nggari ja'i Alatala etumo to nana'u nggari suruga pade nombawai katuwua ka manusia riara dunia." 34 Nanguli wo'umo tau dea etu, "Ane iwetu, Guru, wai ka kamimo roti etu eo-eo." 35 Nangulimo Yesus ka ira, "Aku e'imo roti to mombawai katuwua etu. Isema-sema marata ri ja'iku da'a mana maoro, pade isema-sema momparasaya Aku da'a mana mabai tambolona sampe ri kasae-saena. 36 Tapi ewa to niuliku ka komi pani'a, naupa komi nanggita Aku komi da'apa nomparasaya Aku. 37 Pura-pura tau to niwai Umaku ka Aku kana marata ri ja'iku, pade isema-sema marata ri ja'iku kana kutarima, da'a ntoto kupoara. 38 Sabana patujuku mana'u nggari suruga da'a ala mompowia dotaku mboto tapi ala mompowia nuapa to nipodota Alatala to nompakau Aku. 39 Pade iwe'imo dota Alatala to nompakau Aku, ala nggari pura-pura tau to niwaina ka Aku da'a maria samba'a to malipo. Ira pura-pura kana kupakatuwu bali ri kaopu nu dunia. 40 Iwe'imo dota Umaku, ala pura-pura tau to manggita Aku Anana pade momparasaya Aku kana mombarata katuwua mabelo sampe ri kasae-saena. Pade ira kana kupakatuwu bali ri kaopu nu dunia." 41 Nangepe tesa etu nokagagutu-gutumo tau-tau to Yahudi ri setu, sabana Yesus nanguli, "Aku e'imo roti to nana'u nggari suruga." 42 Nangulimo ira samba'a bo samba'a, "Iwenu, da'a I'a e'i Yesus ana Yusuf? Ninjanita pura indo bo umana. Iwenu sampe I'a nanguli I'a nana'u nggari suruga?" 43 Nangepe etu nangulimo Yesus ka ira, "Ne'e komi mokagagutu-gutu samba'a bo samba'a. 44 Da'a ria samba'a mamala marata ri ja'iku ane Umaku to nompakau Aku da'a manggeni ira mpaka ri ja'iku. Pade isema-sema to marata ri ja'iku kana kupakatuwu bali ri kaopu nu dunia. 45 Riara buku nabi-nabi naria nitulisi iwe'i: 'Tau pura-pura kana rapatuduki Alatala.' Jadi isema-sema to mangepe pepatuduki Umaku pade meguru nggari ja'ina kana marata ri ja'iku. 46 Etu da'a batuana nariamo tau to nanggita Umaku. Sabana aga Aku to narata nggari ja'ina to nanggita I'a. 47 Aku mpu'u-mpu'u notesa ka komi, isema-sema to nomparasaya Aku kana mombarata katuwua mabelo sampe ri kasae-saena. 48 Aku e'imo roti to mombawai katuwua. 49 Totu'a komi nggaolu nanggoni roti to niuli 'manna' ri karawa baina, pade ira pura-pura namate. 50 Tapi da'a iwetu ante roti to nana'u nggari suruga. Isema-sema to manggoni roti etu da'a mana mamate. 51 Aku e'imo roti to nana'u nggari suruga to mombawai katuwua etu. Isema-sema manggoni roti etu kana matuwu mabelo sampe ri kasae-saena. Roti to mombawai katuwua etumo isi koroku to kuwai ala manusia riara dunia mamala matuwu mabelo sampe ri kasae-saena." 52 Nangepe pantesa Yesus etu nosinggarau mbotomo tau-tau to Yahudi. Nosipekutanamo ira samba'a bo samba'a, "Iwenu I'a mamala mombawai isi korona ala rakonita?" 53 Pade nangulimo Yesus ka ira, "Aku mpu'u-mpu'u notesa ka komi, ane komi da'a manggoni isi koroku, pade da'a manginu leiku komi da'a ntoto matuwu mabelo. 54 Tapi isema-sema to manggoni isi koroku pade manginu leiku ira kana mombarata katuwua mabelo sampe ri kasae-saena, pade Aku kana mompakatuwu bali ira ri kaopu nu dunia. 55 Sabana isi koroku etumo panggoni to nakonona pade leiku etumo panginu to nakonona. 56 Isema-sema to manggoni isi koroku pade manginu leiku maroo mosanggani-nggani ante Aku pade Aku maroo mosanggani-nggani ante ira. 57 Umaku to Natuwuna nompakau Aku, pade Aku natuwu nggari kuasana. Iwetu wo'u tau to manggoni isi koroku kana matuwu nggari kuasaku. 58 Aku e'imo roti to nana'u nggari suruga. Roti e'i da'a ewa roti 'manna' to nikoni totu'a komi nggaolu. Naupa ira nanggoni roti 'manna' etu namatemo ira. Tapi isema-sema manggoni roti e'i kana matuwu mabelo sampe ri kasae-saena." 59 Pura-pura tesa etu nitesa Yesus tempo I'a nompatuduki tau riara sapo mpodade ri ngata Kapernaum. 60 Naopu nangepe pantesa Yesus etu nadeamo topantuki I'a nanguli, "A, nakaja gaga pepatuduki e'i! Da'a ria samba'a mamala mantuki tesa etu!" 61 Ninjani Yesus topantuki I'a nokagagutu-gutu iwetu. Jadi nangulimo I'a ka ira, "Naju'amo rara komi mangepe pepatudukiku etu? 62 Iwenumo ane komi manggita Aku, Ana nu Manusia meore mpanjili mpaka ri peto'oku pamulana? 63 Nosa Nagasa nu Alatalamo to mombawai katuwua. Kuasa manusia da'a ria gunana. Tesa-tesa to niuliku ka komi etumo tesa nggari ja'i Nosa Nagasa nu Alatala. Pade tesa-tesa etu to mombawai katuwua mabelo. 64 Tapi naupa iwetu danaria sanu nggari tatongo komi to da'a nomparasaya." Yesus nanguli iwetu sabana ninjanina mamimo nggari pamulana isema-sema to da'a momparasaya pade isema wo'u to mompobalu I'a ka balina. 65 Pade niuli Yesus wo'umo, "Etu sampe nitesaku ka komi pani'a, da'a ria samba'a mamala marata ri ja'iku ane da'a nipaloga Umaku." 66 Nompamula nggari eo etu nadeamo topantuki Yesus nompalasi I'a. Ira mana madota mantuki I'a. 67 Nanggita etu nangulimo Yesus ka anaguruna sampulu romba'a etu, "Iwenumo? Komi wo'u madota mompalasi Aku?" 68 Nesonomo i Simon Petrus, "Pue, ri ja'i sema rakalau kami? Aga Komi to nombatesa tesa to mombawai katuwua mabelo sampe ri kasae-saena. 69 Pade niparasaya kamimo ante mpu'u-mpu'u Komimo To Nagasana to narata nggari ja'i Alatala." 70 Nesonomo Yesus, "Aku mbotomo to nompelisi komi sampulu romba'a etu. Tapi naupa iwetu naria samba'a nggari tatongo komi etu majadi ewa Magau nu Seta." 71 To nipatuju Yesus i'amo Yudas ana i Simon Iskariot. Sabana naupa Yudas etu samba'a nggari tatongo ira sampulu romba'a, i'a etumo to mompobalu Yesus ka balina banepia.

7

1 Naopu etu nalaumo Yesus nompebutu ngata ri Bagia Galilea. I'a da'a mana madota malau ri Bagia Yudea sabana topanggeniaka-topanggeniaka nto Yahudi ri setu danangelo jala mompatesi I'a. 2 Tempo etu namosumo eo bete nto Yahudi to niuli Eo Bete Mowia Pakumpa. 3 Jadi nangulimo sampesuwu-sampesuwu Yesus ka I'a, "Agina Komi mompalasi ngata e'i pade malau mpaka ri Bagia Yudea ala pura-pura topantuki Komi mamala manggita kabaraka-kabaraka to nipowiamu. 4 Da'a ria samba'a tau aga mantabuniaka panggawiana ri peto'o nakalinoa ane i'a madota ranjani ntau pura-pura. Ane Komi mpu'u-mpu'u mompowia tandai to nipogumaa pakanotomo etu ka todea." 5 Niuli ira iwetu sabana ira mboto wo'u da'a nomparasaya I'a. 6 Nesonomo Yesus, "Da'apa narata tempoku malau. Tapi komi mamala malau tempo nuapa-nuapa, 7 sabana da'a ria tau ri dunia e'i nomporau rara komi. Tapi Aku niporau rara ira, sabana Aku nompakanoto pokainggu ira naja'a. 8 Kalaumo komi mpaka ri posusa eo bete etu. Aku da'apa malau, sabana da'apa narata tempoku malau." 9 Iwetumo pantesa Yesus ka sampesuwu-sampesuwuna. Pade naopu etu I'a mboto naroo ri Bagia Galilea. 10 Sangga nalaimo sampesuwu Yesus mpaka ri Yerusalem, I'a wo'u nalau nggalino njamba'ana mpaka ri posusa etu ala da'a ranjani ntau dea. 11 Ri posusa etu topanggeniaka-topanggeniaka nto Yahudi tunggai nangelo I'a. Ira nekutana-tana, "Ri umba tanu I'a?" 12 Ri tatongo ntau dea nadeamo tau nosiwawayo samba'a bo samba'a ewa Yesus. Naria to nanguli, "I'a tau nabelo." Tapi naria wo'u sanu tau nanguli, "Da'a! I'a nombabagiu todea!" 13 Tapi da'a ria samba'a tau nabia nanguli ntodo, sabana ira naeka ka topanggeniaka-topanggeniaka nto Yahudi. 14 Karantongo posusa etu nesuamo Yesus mpaka riara Sapo Mpepue pade nompamulamo I'a nompatuduki tau. 15 Nangepe pepatuduki Yesus natekajamo rara topanggeniaka-topanggeniaka nto Yahudi. Ira nanguli, "Hai! Iwenumo sampe tau e'i nata'u iwetu? Kakonona I'a da'a nosikola ri posikolata!" 16 Nesonomo Yesus ka ira, "Pepatudukiku da'a nantuki pangginjaniku mboto, tapi etu nggari ja'i Alatala to nompakau Aku. 17 Isema-sema madota manggawia dota Alatala natantumo nangginjani ane pepatuduki to nitesaku e'i nggari ja'i Alatala bara aga nggari ja'iku mboto. 18 Tau to nompatuduki nantuki pangginjanina mboto aga miki rabila manusia. Tapi tau to nompasimbuku ala tau to nompakau i'a rabila, tau etumo nanoa, da'a ria bagiuna. 19 Nabi Musa nombawai ka komi Atura-atura agama tapi da'a ria samba'a nggari tatongo komi natutu nantuki Atura-atura etu. Jadi nokuya komi nompasimbuku mompatesi Aku?" 20 Nesonomo tau dea etu, "Nagilamo Komi! Isema nompasimbuku mompatesi Komi?" 21 Nesonomo Yesus ka ira, "Aga sangaya kabaraka to nipowiaku ri Eo Mpenonto bopia pade komi pura-pura natekaja. 22 Nabi Musa nombawai ada mposuna ka komi. Kakonona ada etu da'a nopu'u nggari ja'i Musa tapi nggari ja'i totu'a komi nggaolu. Pade komi mboto nompowia ada mposuna etu ri Eo Mpenonto. 23 Jadi ane komi nowia ada mposuna ri Eo Mpenonto ala ne'e mombaliunaka Atura-atura to nipapola i Musa, nokuya komi nomporau Aku sabana Aku nompakabelo njumaongu koro samba'a tau naju'a ri Eo Mpenonto bopia? 24 Ne'e mana mompakatantu sala ntau nantuki to nikita matamu, tapi pakatantumo sala ntau ante nanoa!" 25 Naopu etu naria bara sakuya mba'a pue ngata Yerusalem nanguli, "Da'a I'a e'imo tau to nielo topanggeniaka-topanggeniaka ala rapatesi ira? 26 Tapi kitamo! I'a notesa ri ngayo ntodea pade da'a ria samba'a tau nombabali tesana. Ne'e-ne'e topanggeniaka-topanggeniaka nangginjani I'a etumo Magau to Mompakasalama to nijanji Alatala! 27 Tapi ane Magau to Mompakasalama marata da'a ninjanita nggari umba karatana. Tapi tau e'i ninjanita nggari umba karatana." 28 Etu sampe tempo Yesus nompatuduki riara Sapo Mpepue I'a notesa ante suarana namangga, "Niuli komi ninjani komi mamimo isema Aku e'i pade nggari umba karataku. Tapi Aku da'a narata nantuki dotaku mboto. Aku narata nantuki dota Alatala to nompakau Aku. I'amo to mamala raparasaya, tapi komi da'a ntoto nosinjani ante I'a. 29 Tapi Aku nosinjani ante I'a, sabana Aku narata nggari ja'ina. I'amo to nompakau Aku momai." 30 Tempo etu naria to nompasimbuku manjoko I'a. Tapi da'a ria samba'a namala manjoko I'a sabana da'apa narata tempona to nipakatantu Alatala. 31 Tapi nggari tatongo ntau dea etu nadeamo tau nomparasaya I'a. Ira nanguli, "Natantumo I'a etu Magau to Mompakasalama to nijanji Alatala, sabana kitamo kadea nu tandai-tandai to nipogumaa to nipowiana!" 32 Tau-tau to Parisi nangepe lele to nanguli tau dea nosiwawayo iwetu ewa Yesus. Jadi balengga-balengga topanggeni agama Yahudi bo tau-tau to Parisi nompakau bara sakuya mba'a topojaga Sapo Mpepue malau manjoko Yesus. 33 Jadi nangulimo Yesus ka ira, "Aku damo sampalai mosanggani-nggani ante komi pura-pura pade Aku kana manjili mpaka ri ja'i to nompakau Aku. 34 Komi kana mangelo Aku tapi da'a rarata komi Aku. Pade da'a mamala komi malau mpaka ri peto'o kukalau." 35 Sangga nangepe tesa Yesus etu notesamo tau-tau to Yahudi samba'a bo samba'a, "Peto'o ri umba rakalauna sampe da'a raratata I'a? Bara I'a malau mpaka ri ja'i tau-tau to Yahudi to neto'o nosimpotatare ri tatongo tau-tau da'a to Yahudi pade mompatuduki tau-tau da'a to Yahudi? 36 Nuapa wo'u batuana pantesana nanguli 'Komi kana mangelo Aku tapi da'a rarata komi Aku, pade da'a mamala komi malau mpaka ri peto'o kukalau?' " 37 Ri eo kaopuna posusa etu, etumo eo to neliu nggapokona, nekanggoremo Yesus riara Sapo Mpepue notesa ante suara namangga, "Isema-sema to nabai tambolona, kamaimo manginu ri ja'iku. 38 Ewa to nitulisi riara Buku Nagasa, isema-sema nomparasaya Aku kana maria ue moili nggariara nta'ina to mombawai katuwua." 39 To nipatuju Yesus etumo Nosa Nagasa nu Alatala to mesua ri ja'i tau-tau to nomparasaya I'a. Tempo etu Nosa Nagasa da'apa nipopana'u ka topomparasaya sabana Yesus da'apa niore bo nibila ri suruga. 40 Nadea tau nangepe pantesa Yesus etu pade naria ira santongo nanguli, "Natantumo I'a nabi to nijanji Alatala nggaolu!" 41 Tapi naria wo'u santongo ira nanguli, "I'a e'imo Magau to Mompakasalama to nijanji Alatala!" Tapi naria wo'u sanu tau nanguli, "Da'a! Magau to Mompakasalama da'a marata nggari Bagia Galilea! 42 Sabana riara Buku Nagasa naria nitulisi Magau to Mompakasalama kana meumba nggari muli Magau Daud, I'a kana marata nggari ngata Betlehem ngata pesuwu Magau Daud." 43 Jadipa tau dea etu nosisala paha mbotomo ewa Yesus. 44 Naria ira to madota manjoko I'a, tapi da'a ria samba'a namala mombasoko I'a. 45 Naopu etu topojaga Sapo Mpepue to nipakau lau manjoko Yesus nanjili mpaka ri ja'i tau-tau to Parisi bo balengga-balengga topanggeni agama. Narata ri setu nangulimo tau-tau to Parisi bo balengga-balengga topanggeni agama ka ira, "Nokuya komi da'a nanggeni tau etu wemai?" 46 Nesonomo topojaga Sapo Mpepue etu, "Da'apa sanggani kami nangepe tesa manusia ewa tesa ntau etu!" 47 Nesonomo tau-tau to Parisi, "Iwenumo? Komi wo'u nibagiu ntau etu? 48 Kitamo! Da'a ntoto ria topanggeniaka bara tau to Parisi to nomparasaya I'a! 49 Aga tau dea biasa etu nomparasaya, ira to da'a nangginjani Atura-atura agama. Nasurukawumo ira!" 50 Ri tatongo to Parisi ri setu naria samba'a tau nosanga ka Nikodemus. Nariamo sanggani bopia I'a nalau ri ja'i Yesus. Nangulimo i'a ka roa-roana to Parisi, 51 "Iwenumo? Nantuki Atura-atura agamata mamala samba'a tau rapakasala ane da'apa niepeta tesana bara da'apa ninjanita pokaingguna?" 52 Tapi roa-roana to Parisi nanggarau i'a. Niuli ira, "Komi wo'u tau nggari Galilea? Paresamo Buku Nagasa mpakabelo-belo! Kana rakita komi da'a ntoto ria samba'a nabi meumba nggari Bagia Galilea!" [ 53 Naopu etu nanjilimo ira pura-pura mpaka ri sapo ira mboto.

8

1 Tapi Yesus lau nantende mpaka ri bunggu nu Bulu Zaitun. 2 To nailena kampadondo njiina nalau wo'umo I'a nesua riara Sapo Mpepue, pade pura-pura tau dea narata ri ja'ina. Pade nekatokomo I'a nompatuduki ira. 3 Tempo etu naratamo guru-guru agama bo tau-tau to Parisi nanggeni samba'a besi to nirata ira nebualo. Besi etu nipopekanggore ira ri tatongo ntau dea. 4 Pade nangulimo ira ka Yesus, "Guru, besi e'i nirata kami nebualo. 5 Riara Atura-atura agama naria parenta i Musa ka kita to nanguli besi-besi noinggu iwetu kana rarempe ante watu sampe mamate. Iwenu pombaratamu ewa powia besi e'i?" 6 Patuju nu pompekutana ira etu ala mangelo sala Yesus sampe ira mamala mompakasala I'a. Tapi Yesus da'a notingo. I'a aga notunggou nantulisi ri tana ante koyampalena. 7 Tapi da'a nenonto ira nompekutana-tana I'a. Jadi kaopuna nekanggoremo Yesus nanguli ka ira, "Isema-sema nggari tatongo komi etu to da'a nasilaka, i'amo mokolu mombarempe besi e'i ante watu." 8 Naopu Yesus notesa iwetu notunggou wo'umo I'a nantulisi ri tana ante koyampalena. 9 Sangga nangepe pantesa Yesus etu nalaimo ira nggari setu samba'a bo samba'a nompamula nggari totu'a sampe naboli damo Yesus ante besi etu ri ngayona. 10 Pade nekanggoremo Yesus nanguli ka besi etu, "Ri umba puramo tau pani'a? Mana ria to madota mompakasala iko?" 11 Nesonomo besi etu, "Da'a mana ria, Pue." Nangulimo Yesus, "Aku wo'u da'a mompakasala iko. Panjilimo iko, pade ne'e mana mowia silaka."] 12 Nanguli wo'umo Yesus ka tau dea, "Aku e'imo reme nu dunia. Isema-sema majadi topantuki Aku da'a molumako riara karumauna, tapi ira kana mombarata reme to mombawai katuwua mabelo." 13 Nesonomo tau-tau to Parisi ka I'a, "Komi etu nantesa koromu mboto! Pantesamu etu da'a nakono!" 14 Nangulimo Yesus, "Nau Aku nantesa koroku mboto, pantesaku e'i nakono sabana ninjaniku nggari umba karataku pade mpaka ri umba wo'u kukalau. Tapi da'a ninjani komi nggari umba karataku pade mpaka ri umba kukalau. 15 Komi etu nompakatantu sala ntau nantuki pompekiri manusia. Tapi Aku e'i da'a nompakatantu sala ntau. 16 Tapi ane rapana Aku mowia etu natantumo pombabutusiku kana manoa, sabana Aku da'a aga njamba'aku. Umaku to nompakau Aku nomporoa Aku. 17 Riara Atura-atura agama komi naria nitulisi iwe'i: 'Ane maria romba'a sabi mantakono sangele riara mpotangara, tesa ira namala raparasaya.' 18 Naria romba'a to nompakanoto isema Aku e'i. Samba'a Aku mboto, pade karomba'ana Umaku to nompakau Aku." 19 Pade nekutanamo ira ka I'a, "Ri umbamo Umamu?" Nesonomo Yesus, "Komi da'a ntoto nangginjani isema kakonona Aku e'i. Pade da'a wo'u ninjani komi Umaku. Ane ninjani komi Aku, natantu ranjani komi wo'u Umaku." 20 Pantesa Yesus etu nitesana tempo I'a nompatuduki tau namosu ante peti mpesomba riara Sapo Mpepue. Da'a ria samba'a tau namala manjoko I'a sabana da'apa narata tempona. 21 Pade nanguli wo'umo Yesus ka ira, "Aku kana malai nggari se'i pade komi kana mangelo Aku, tapi komi aga mamate riara silakamu. Komi da'a mamala malau ri peto'o to kukalau." 22 Nangepe etu notesamo topanggeniaka-topanggeniaka nto Yahudi samba'a bo samba'a, "Bara I'a mopatuju mompatesi korona mboto, sabana niulina, 'Komi da'a mamala malau ri peto'o to kukalau.' " 23 Tapi nangulimo Yesus ka ira, "Komi e'i nopu'u nggari kaedena, tapi Aku e'i nopu'u nggari kalangana. Komi nggari dunia e'i, tapi Aku da'a nggari dunia e'i. 24 Etu sampe niuliku ka komi, komi kana mamate riara silakamu. Sabana ane komi da'a momparasaya Aku e'imo I'a natantumo komi kana mamate riara silakamu." 25 Pade nekutana wo'umo ira, "Isema tano kakono-konona komi etu?" Nesonomo Yesus, "Mana ria gunana kutesa ka komi! 26 Danadeapa mamala kutesa mompakasala komi. I'a to nompakau Aku etu nanoa. Pade nuapa to niepeku nggari ja'ina etu wo'u kutesa ka manusia ri dunia e'i." 27 To nitesa Yesus etu nantesa Umana, tapi da'a ninjani ira patujuna etu. 28 Etu sampe I'a nanguli ka ira, "Ane komi mangonggotaka Aku, Ana nu Manusia mpakalanga-langa banepia, tempo etumo kana ranjani komi Aku e'imo I'a to nipakau Alatala, pade kana ranjani komi wo'u da'a ria sangaya to nipowiaku nantuki dotaku mboto. Tapi Aku bate-batena notesa nantuki nuapa to nipatuduki Umaku ka Aku. 29 Pade to nompakau Aku etu wo'u nomporoa Aku. Da'a nipalambana Aku njamba'aku, sabana Aku bate-batena nompowia to nompakadamba rarana." 30 Tempo Yesus notesa iwetu nadeamo tau nomparasaya I'a. 31 Naopu etu nangulimo Yesus ka tau-tau to Yahudi to nomparasaya I'a, "Ane komi maroo mantuki tesaku komi mpu'u-mpu'u majadi topantuki Aku. 32 Pade ante iwetu komi kana mangginjani pepatuduki to nakonona sampe komi mana rapobatua." 33 Nesonomo tau-tau to Yahudi etu, "Kami e'i muli Abraham. Da'apa naria sanggani kami nipobatua ntau. Nokuya Komi nanguli ka kami, 'Komi mana rapobatua?' " 34 Nesonomo Yesus ka ira, "Aku mpu'u-mpu'u notesa ka komi, isema-sema nompowia silaka i'a nipobatua silaka. 35 Ane samba'a batua, da'a natantu i'a maroo raranjapo madikana. Tapi ane ana madika mboto, natantumo i'a maroo raranjapo umana. 36 Jadi ane Ana nu Alatala mbotomo to manggabasaka komi nggari silaka, komi mpu'u-mpu'u matekabasaka! 37 Ninjaniku komi etu pura-pura muli Abraham. Tapi nau damo wa'a danaria komi to madota mompatesi Aku, sabana komi da'a ntoto madota mantarima pepatudukiku. 38 Nuapa to nikitaku ri ja'i Umaku etumo to nitesaku ka komi. Tapi komi etu aga nompowia nuapa to nipatuduki umamu ka komi." 39 Nesonomo ira ka Yesus, "Uma kami Abraham." Nangulimo Yesus, "Ane mpu'u-mpu'u komi etu muli Abraham, natantumo pokainggu komi kana mabelo ewa pokainggu Abraham. 40 Aku nompasimbayu ka komi pepatuduki to nakono to niepeku nggari ja'i Alatala mboto tapi komi aga madota mompatesi Aku. Da'a iwetu pokainggu Abraham! 41 Pokainggu komi e'i ewa pokainggu uma komi mboto!" Nesono wo'umo ira, "Kami e'i da'a ana wone! Uma kami aga samba'a lau, etumo Alatala!" 42 Nangulimo Yesus ka ira, "Ane Alatala etu Uma komi, komi kana mompotowe Aku, sabana Aku narata nggari ja'ina. Aku da'a narata nantuki dotaku mboto, tapi nantuki dotana to nompakau Aku. 43 Nuapa sabana sampe da'a ntoto ninjani komi batuana pantesaku? Sabana komi da'a madota mantarima pepatudukiku. 44 Magau nu Setamo uma komi! Pade komi batena madota mantuki dota nu uma komi etu. Nggari pamulanamo i'a bate-batena topepatesi, pade da'a ntoto naria to nanoana ri ja'ina, nau aga sakedi. Ane i'a nodawa etu masipato mpu'u sabana iwetu mamimo ingguna. I'a topodawa pade uma nu pura-pura topodawa. 45 Jadi etumo sabana ane Aku nombatesa ka komi tesa to nakonona komi da'a madota momparasaya tesa etu. 46 Isema nggari ja'i komi etu mamala mompakanoto Aku e'i nowia silaka? Ane Aku notesa ka komi tesa to nakonona, nokuya komi da'a nomparasaya Aku? 47 Tau-tau to najadi bagia nu Alatala madota mantarima Tesa nu Alatala. Tapi komi da'a madota mantarima tesa etu sabana komi da'a bagia nu Alatala." 48 Nangepe tesa etu tau-tau to Yahudi nanguli sinja'i Yesus iwe'i: "Nakono mpu'u tesa kami! Komi e'imo tau to Samaria to nipesua seta!" 49 Nesonomo Yesus, "Aku e'i da'a nipesua seta. Aku nombabila Umaku, tapi komi etu nanguli sinja'i Aku. 50 Aku da'a miki rabila ntau. Naria mamimo samba'a to nombabila Aku pade I'amo to nompakatantu Aku nanoa. 51 Aku mpu'u-mpu'u notesa ka komi, isema-sema mantuki tesaku ira da'a ntoto mamate sampe ri kasae-saena." 52 Nangepe etu nangulimo tau-tau to Yahudi ka Yesus, "We'i-we'i ninjani kami mpu'umo Komi etu nipesua seta! Abraham pade nabi-nabi nggaolu namate puramo. Tapi Komi nanguli isema-sema mantuki tesamu da'a ntoto mamate sampe ri kasae-saena! 53 Iwenumo? Komipa neliu nggabete nggari pueta Abraham? I'a pade nabi-nabi nggaolu namate puramo! Ulimo! Isema ntoto Komi sampe Komi nabia nanguli iwetu?" 54 Nesonomo Yesus, "Ane Aku miki rabila ntau da'a ntoto ria batuana. Tapi Umaku to nipangaku komi Alatalamu, I'amo to nombabila Aku. 55 Komi da'a nosinjani ante I'a. Tapi Aku nosinjani belo ante I'a. Ane Aku manguli Aku da'a nosinjani ante I'a Aku e'i majadi topodawa nasimbayu ewa komi. Tapi Aku mpu'u-mpu'u nosinjani ante I'a pade Aku natutu nantuki tesana. 56 Totu'a komi nggaolu Abraham nadamba mpu'u rarana sabana ninjanina i'a kana manggita karataku ri dunia. Nikitanamo pade nadamba mpu'umo rarana." 57 Nanguli wo'umo tau to Yahudi etu ka Yesus, "Komi etu da'apa nagana limampulu mpae umurumu! Iwenu sampe Komi nanguli nikita Komimo totu'a kami nggaolu Abraham?" 58 Nesonomo Yesus, "Aku mpu'u-mpu'u notesa ka komi, da'apa Abraham nesuwu, Aku e'i njau nariamo!" 59 Nangepe pantesa Yesus etu tau-tau to Yahudi nangala watumo madota mombarempe I'a sampe mamate. Tapi notinggalipomo I'a nggari tatongo ira pade nalai nompalasi Sapo Mpepue etu.

9

1 Tempo Yesus riara mpolumakona I'a nanggita samba'a tau to naburo mami nggari pesuwuna. 2 Nekutanamo anaguru-anaguru Yesus ka I'a, "Guru, isema to nasilakana sampe tau e'i naburo mami nggari pesuwuna? Totu'ana atau i'a mboto?" 3 Nesonomo Yesus, "Da'a i'a nasilaka, da'a wo'u totu'ana. Tapi etu najadi ala kabaraka nu Alatala mamala rakita riara nggatuwuna. 4 Ane eona danarawa kita kana manggawia panggawia nu Alatala to nompakau Aku. Sabana ane nggawengina da'a mana naria samba'a to mamala manggawia. 5 Sakuya kasaena Aku riara dunia e'i Akumo najadi reme to mompakareme rara manusia." 6 Naopu I'a notesa iwetu Yesus nantailu tana pade nialana nipiji-pijina ante koyampalena sampe najadi depu, pade nigesena depu etu ri mata ntoburo etu. 7 Pade niulina ka tau etu, "Kalau do'umo matamu ri ue kola Siloam." Sanga Siloam etu batuana "Nipakau." Jadi nalau mpu'umo toburo etu. Narata ri kola Siloam etu nido'unamo matana pade natinggulimo i'a ante matana to nanaa. 8 Tau-tau saboya ante i'a pade tau-tau to nanggita i'a nerapi-rapi ri wiwi jala bopia, ira nosipekutana samba'a bo samba'a, "Da'a i'a etumo tau to nekatoko ri wiwi jala nerapi-rapi bopia?" 9 Naria to nanguli, "Nakono! I'a mamimo!" Tapi naria wo'u sanu tau nanguli, "Da'a i'a, aga lenjena nasimbayu." Tapi i'a mboto nanguli, "Akumo e'i!" 10 Jadi nekutanamo ira ka i'a, "Iwenu sampe matamu nipakanaamo?" 11 Nesonomo i'a, "Tau to nosanga ka Yesus nompowia depu, pade depu etu nigesena ri mataku. Pade nipakauna aku malau mombado'u mataku ri kola Siloam. Jadi nalau mpu'umo aku nombado'u mataku ri ue kola Siloam etu. Naopu aku nendo'u namalamo aku nekita." 12 Nekutana wo'umo ira ka i'a, "Ri umbamo tau etu?" Nesonomo toburo etu, "Da'a ninjaniku." 13 - 14 Tempo Yesus nombagalo tana ante iluna pade nompakanaa mata ntoburo etu nawela Eo Mpenonto. Jadi etu sampe toburo to nabelomo matana etu nikeni ntau mpaka ri ja'i tau-tau to Parisi. 15 Pade tau-tau to Parisi wo'u nompekutana toburo etu, "Iwenu sampe matamu nipakanaa?" Nesonomo i'a, "I'a nombagese depu ri mataku. Pade naopu aku nendo'u namalamo aku nekita." 16 Pade nangulimo bara sakuya mba'a to Parisi, "Ane iwetu nanotomo tau etu da'a nggari ja'i Alatala, sabana I'a da'a natundu riara atura-atura Eo Mpenonto." Tapi naria wo'u santongo nanguli, "Umbamo tau nasilaka mamala manggawia kabaraka ewa etu?" Jadi nosisala paha mbotomo ira. 17 Jadi nekutana wo'umo to Parisi ka toburo etu, "Iwenu pombaratamu ewa tau etu, sabana matamu to nipakanaana?" Nesonomo toburo etu, "I'a samba'a nabi." 18 Tapi topanggeniaka-topanggeniaka nto Yahudi etu da'a madota momparasaya tau etu mpu'u-mpu'u naburo pade lako nipakanaa matana. Jadi ira nompokio indo bo uma ntoburo to nipakabelo matana etu 19 pade nipekutana ira, "Nakono mpu'u e'imo ana komi to niuli komi naburo mami nggari pesuwuna? Iwenu sampe we'i-we'i nabelomo matana?" 20 Nesonomo indo bo uma ntoburo etu, "To ninjani kami i'a etu mpu'u-mpu'u ana kami, pade i'a mpu'u-mpu'u naburo mami nggari pesuwuna. 21 Tapi bara iwenu sampe i'a namala nekita we'i-we'i da'a ninjani kami. Pade da'a wo'u ninjani kami bara isemana to nompakabelo matana etu. Agina komi mompekutana i'a mboto. Nabetemo i'a. Namalamo i'a mboto motesa mombasono pompekutana komi etu." 22 Indo bo umana nanguli iwetu sabana naekamo ira ka topanggeniaka-topanggeniaka nto Yahudi. Sabana nasintuwumo topanggeniaka-topanggeniaka bara isema-sema mompangaku Yesus Magau to Mompakasalama to nijanji Alatala ira mana rapaloga mesua riara sapo mpodade. 23 Etu sampe indo bo umana nanguli, "Nabetemo i'a. Agina komi mompekutana i'a mboto." 24 Naopu etu ira nompokio toburo etu sangganipa pade niuli ira ka i'a, "Ulimo to nakonona ri ngayo Alatala! Ninjani kamimo tau nompakanaa matamu etu tau nasilaka!" 25 Pade nesonomo toburo etu, "Da'a ninjaniku ane I'a nasilaka bara da'a. Tapi to ninjaniku, pangane aku naburo, tapi we'i-we'i namalamo aku nekita." 26 Pade nanguli wo'umo to Parisi ka i'a, "Nuapa nikawiana ka iko? Iwenu I'a nompakanaa matamu?" 27 Nesonomo toburo etu, "Naopumo nitesaku ka komi pani'a tapi komi da'a madota mangepe. Nokuya komi madota mangepe pesonoku wo'umo? Bara komi wo'u madota majadi topantuki I'a?" 28 Nangepe etu ira nanguli sinja'i i'a pade nanguli, "Iko etumo topantuki I'a, kami e'i da'a! Kami e'i topantuki i Musa! 29 Ninjani kami Alatala notesa ante i Musa nggaolu. Tapi ane tau etu, da'a ninjani kami nggari umba karatana." 30 Pade nesono wo'umo toburo etu, "Etu sangele mpu'u-mpu'u nipogumaa! Da'a ninjani komi nggari umba karatana, tapi I'a nompakanaa mataku to naburo! 31 Ninjanitamo Alatala da'a nangepe posambaya ntau nasilaka, tapi I'a nangepe posambaya ntau to nepue ka I'a pade tunggai nantuki dotana. 32 Nggari lamba pamulana da'apa sanggani niepeta naria tau namala nompakanaa mata ntau naburo mami nggari pesuwuna. 33 Ane tau etu da'a nggari ja'i Alatala, natantumo I'a da'a ntoto mamala mompowia nuapa-nuapa." 34 Nesonomo ira, "Iwenu? Iko etu tau nasilaka mami nggari pesuwumu! Da'a ntoto masipato iko mompatuduki kami e'i!" Jadi nompamula nggari eo etu to Parisi mana mompaloga tau etu mesua riara sapo mpodade. 35 Sangga niepe Yesus tau etu mana nipaloga mesua riara sapo mpodade nto Yahudi nalaumo I'a nosirata ka i'a. Pade niuli Yesus ka i'a, "Iwenumo? Niparasayamu Ana nu Manusia?" 36 Nesonomo tau etu, "Isema tau to niuli Komi etu, Uma? Uli ka aku ala aku mamala momparasaya I'a." 37 Nangulimo Yesus ka i'a, "Nikitamu I'a. I'amo to notesa ka iko." 38 Pade nangulimo tau etu, "Pue, niparasayakumo!" Pade nekadedemo i'a nombasomba Yesus. 39 Nanguli Yesus ka i'a, "Patuju karataku ri dunia e'i ala mompakanoto sala ntau ala tau-tau naburo mamala mekita, pade tau-tau to nanaa matana majadi maburo." 40 Tesa-tesa Yesus etu niepe bara sakuya mba'a tau to Parisi ri setu. Jadi ira nompekutana I'a, "Iwenumo? Niuli Komi kami e'i wo'u naburo?" 41 Nesonomo Yesus, "Ane rapana komi naburo, natantumo da'a nasilaka komi. Tapi komi nanguli, 'Kami namala nekita.' Etu sampe komi bate-batena nasilaka."

10

1 "Aku mpu'u-mpu'u notesa ka komi, tau to nesua riara gimpu aga nompone wala da'a nesua nggari pewobo, tau etu topangangga pade topeago. 2 Tapi tau to nesua nggari pewobo gimpu, i'amo topoewu bimba-bimba etu. 3 Topanggatono gimpu etu kana mombabea pewobo ka i'a, pade bimba-bimba etu kana mompetalinga suarana tempo i'a mompokio sanga ira saongu-saongu. Pade i'a kana manggeni ira mpaka ri sawalikuna. 4 Ane bimba-bimba etu nesuwu puramo ri sawalikuna, topoewu etu molumako mokolu ka bimbana etu. Pade bimba-bimba etu mantuki ri purina, sabana bimba-bimba etu nangginjani suara topoewu etu. 5 Bimba-bimba etu da'a madota mantuki tau ntanina. Ira aga mongowa malai pura nggari ja'ina, sabana da'a ninjani ira suara ntau etu." 6 Yesus nombatesa porapa etu ka tau-tau to Parisi, tapi patuju nu porapa etu da'a ninjani ira. 7 Sabana etu nanguli wo'umo Yesus ka ira, "Aku mpu'u-mpu'u notesa ka komi, Aku e'imo pewobo mesua riara gimpu bimba etu. 8 Pura-pura tau to narata nokolu ka Aku ira etumo topangangga pade topeago. Tapi bimba-bimba etu da'a nompetalinga suara ira. 9 Aku e'imo pewobo etu. Isema-sema mesua mojala ri ja'iku ira kana rapakasalama. Ira mamala mesua pade mesuwu mombarata panggoni. 10 Ane topangangga, ira aga momai mangangga pade mepatesi bo mompakaropu. Tapi Aku e'i narata ala manusia mombarata katuwua to neliu mpu'u kabelona." 11 "Aku e'imo topoewu to nabelona. Aku mombawai katuwuku mboto ala bimbaku mamala matuwu. 12 Ane tau aga nigaji, i'a da'a topoewu bimba pade i'a da'a wo'u pue bimba etu. Etu sampe ane i'a manggita asulako momai mombaraga bimba-bimbana i'a aga mangowa malai mompalasi bimba-bimba etu. Pade bimba etu kana rasoko nu asulako etu pade bimba ntanina raraga raposimpotatarena. 13 Tau nigaji etu aga mangowa malai iwetu sabana i'a aga nigaji. I'a da'a nompotowe bimba-bimba etu. 14 - 15 Aku e'imo topoewu to nabelona. Nasimbayu ewa Umaku nangginjani Aku pade Aku wo'u nangginjani I'a, iwetu wo'u Aku nangginjani pura-pura bimbaku pade bimba-bimbaku nangginjani Aku. Pade Aku mombawai katuwuku mboto ala bimba-bimbaku mamala matuwu. 16 Danariapa bimba-bimbaku ntanina anu da'apa nesua riara gimpu e'i. Ira etu wo'u kana kukeni ri se'i. Ira kana mompetalinga suaraku pade pura-pura bimbaku kana majadi salunu. Pade ira rapoewu samba'a lau topoewu. 17 Umaku nompotowe Aku sabana Aku nombawai katuwuku ala Aku mamala matuwu bali. 18 Da'a ria samba'a tau mamala mompatesi Aku. Tapi Aku mombawai katuwuku nantuki dotaku mboto. Aku nakuasa mombawai katuwuku rapatesi iwetu pade Aku nakuasa wo'u matuwu bali, sabana etumo parenta to nitarimaku nggari ja'i Umaku." 19 Nangepe pantesa Yesus etu nosisala paha wo'umo sangganipa tau-tau to Yahudi. 20 Naria nadea ira to nanguli, "I'a etu nipesua seta! Nagilamo I'a! Nokuya komi madota mangepe pantesana?" 21 Tapi naria wo'u sanu tau nanguli, "Da'a! Ane tau nipesua seta da'a iwetu tesana! Natantumo seta da'a namala mompakabelo tau naburo!" 22 Tempo etu naratamo ntoana Posusa Mombatora Pompareki Sapo Mpepue ri ngata Yerusalem. Posusa etu nawela tempo leni. 23 Yesus nolumako ri tambale Sapo Mpepue to nosanga ka Tambale Salomo. 24 Pade naratamo tau-tau to Yahudi nantatiku I'a ri setu. Nekutanamo ira ka I'a, "Sakuya kasaena Komi mompalamba kami naingu? Ane Komi mpu'u-mpu'u Magau to Mompakasalama to nijanji Alatala, uli pakanotomo ka kami!" 25 Nesonomo Yesus, "Naopumo niuliku ka komi aga da'a niparasaya komi. Kabaraka-kabaraka to nikawiaku ante kuasa nggari ja'i Umaku nompakanoto ka komi isema Aku e'i. 26 Tapi da'a ntoto niparasaya komi sabana komi da'a bimba-bimbaku. 27 Bimba-bimbaku nompetalinga pantesaku pade Aku nangginjani ira pade ira nantuki Aku. 28 Aku nombawai ka ira katuwua mabelo sampe ri kasae-saena pade ira da'a ntoto rapakaropu. Da'a ntoto maria samba'a tau mamala manggeni bimbaku malai nggari ja'iku. 29 Umaku to neliu nggakuasa, pade I'amo to nombawai bimba-bimba etu ka Aku. Da'a ntoto ria samba'a tau mamala manggeni ira malai nggari ja'ina. 30 Aku bo Umaku da'a ria posisalana, aga samba'a lau." 31 Nangepe tesana etu tau-tau to Yahudi nangala watumo sangganipa madota mombarempe Yesus. 32 Tapi nangulimo Yesus ka ira, "Nadeamo panggawia to nabelo nggari ja'i Umaku to nipopokitaku ka komi. Nggari panggawia umbana sampe komi madota mombarempe Aku ante watu?" 33 Nesonomo tau-tau to Yahudi, "Da'a nggari panggawiamu to nabelona etu sampe kami madota mombarempe Komi ante watu, tapi sabana Komi nompakakedi Alatala. Komi etu aga manusia biasa, tapi Komi nompakasimbayu koromu ante Alatala!" 34 Nesonomo Yesus, "Riara Atura-atura agama komi naria nitulisi tesa Alatala to niuli ka topanggeniaka nto Israel nggaolu iwe'i: 'Niuliku komi pura-pura ewa Alatala.' 35 Nuapa to nitulisi riara Buku Nagasa etu da'a ria nabali-bali tapi bate-batena nalaku sampe ri kasae-saena. Tau-tau to nantarima Tesa nu Alatala nggaolu etu nikasangaina 'ewa Alatala.' 36 Aku e'imo to nipelisi Alatala bo nipakauna mpaka riara dunia. Jadi nokuya komi nanguli Aku nompakakedi Alatala ante notesa, 'Aku e'imo Ana nu Alatala?' 37 Ane Aku da'a mompowia bago to niparasaya Umaku ka Aku, ne'e raparasaya komi Aku. 38 Tapi ane Aku mompowia bago etu, naupa komi da'a madota momparasaya Aku, masipato komi momparasaya nuapa to nipowiaku etu. Ante iwetu kana ranjani komi bo manoto ka komi Aku e'i nosaongu ante Umaku pade Umaku wo'u nosaongu ante Aku." 39 Nangepe etu sangganipa wo'u tau-tau to Yahudi nompasimbuku manjoko Yesus, tapi I'a notinggalipo nggari tatongo ira. 40 Naopu etu nalau wo'umo Yesus mpaka ri sambote Binangga Yordan ri peto'o Yohanes Topediu pamulana nombadiu tau bopia. Pade naroomo Yesus ri setu. 41 Tempo I'a ri setu nadeamo tau narata ri ja'ina. Pade nangulimo ira samba'a ka roana, "Yohanes da'a ntoto nompowia kabaraka. Tapi pura-pura nuapa to nitesana ewa Yesus nakono mpu'u!" 42 Pade nadeamo tau ri setu nomparasaya Yesus.

11

1 - 2 Naria samba'a langgai nosanga ka i Lazarus to neto'o ri ngata Betania nosanggani-nggani ante sampesuwuna besi to nosanga ka i Maria bo i Marta. Maria etumo besi to nombatoli minya wongi ri kada Yesus pade nipe'ena ante wo'ona. Naria sanggani i Lazarus naju'a ntomo. 3 Jadi romba'a sampesuwu i Lazarus etu nompakau tau malau manguli ka Yesus iwe'i: "Pue, wegamu to nipotowemu naju'a" 4 Sangga nangepe kareba etu nangulimo Yesus, "Ju'ana etu da'apa rapomatena. Etu najadi ala Alatala rabila bo ratoiya ntau, sabana nggari ju'a etu Aku, Ana nu Alatala kana rabila bo ratoiya." 5 Yesus nompotowe i Marta, i Maria bo i Lazarus. 6 Jadi tempo Yesus nangepe kareba to nanguli i Lazarus naju'a nitunggaina neto'o rombengipa kasaena ri peto'o nikalauna etu. 7 Naliu rombengi etu niulina ka anaguru-anaguruna, "Mai manjilimo kita mpaka ri Bagia Yudea." 8 Nesonomo anaguruna, "Guru, da'apa nasae tau-tau to Yahudi ri setu nadota mombarempe Komi ante watu sampe mamate. Nuapa sabana we'i-we'i Guru madota malau mpaka ri setu?" 9 Nangulimo Yesus ka ira, "Saeo saena sampulu rojaa. Tau to nolumako ri eona da'a matipasunu ri watu apa nikitana reme to nompakarawa jalana. 10 Tapi tau to nolumako tempo nggawengina kana matipasunu ri watu sabana da'a ria reme ri ja'ina mompakarawa jalana." 11 Iwetumo panguli Yesus ka anaguruna. Naopu etu nipapolana pantesana etu ka ira. Niulina, "Wegata i Lazarus napisimo. Tapi Aku malau mombalike i'a." 12 Pade nangulimo anaguru-anaguru Yesus, "Ane i Lazarus napisimo, i'a kana mabelo bali nggari ju'ana etu." 13 Tapi kakonona patuju tesa Yesus nanguli Lazarus namatemo. 14 Sabana etu, Yesus nanguli ntodomo ka anaguru-anaguruna, "Lazarus namatemo. 15 Nadamba raraku Aku da'a naria ri setu tempo i'a namate, sabana to najadina etu manggeni belo ka komi ala komi momparasaya Aku. Kamaimo, kita malau manggita i Lazarus." 16 Pade nangulimo i Tomas to nidae "Ngana Norapi" ka roa-roana anaguru Yesus, "Kamaimo, kita mantuki I'a ala kita wo'u mamate mpasanggani-nggani ante I'a." 17 Tempo Yesus narata ri ngata Betania patambengimo kasaena Lazarus niboli riara dayona. 18 Ngata Betania etu namosu ante ngata Yerusalem, kira-kira toluongu kilo kakawaona. 19 Jadi nadeamo tau to Yahudi narata ri ja'i Marta bo i Maria mompakawoe rara ira romba'a sabana sampesuwu ira Lazarus namatemo. 20 Sangga i Marta nangepe lelena namosumo Yesus, nalaumo i'a nantomunaka I'a. Aga i Maria nopea ri sapona. 21 Sangga nikitana Yesus nangulimo i Marta ka I'a, "Pue, ane Komi naria ri se'i tempo etu, sampesuwuku Lazarus da'a namate. 22 Tapi naupa iwetu ninjaniku nuapa-nuapa raperapi Komi we'i-we'i kana rawai Alatala ka Komi." 23 Nangulimo Yesus ka i Marta, "Sampesuwumu etu kana matuwu bali." 24 Nanguli i Marta, "Iyo. Ninjanikumo i'a kana matuwu bali tempo pura-pura tau namate matuwu bali ri kaopu nu dunia." 25 Nanguli Yesus ka i Marta, "Aku e'imo to mompakatuwu bali tau namate pade to mombawai katuwua. Isema-sema momparasaya Aku naupa i'a namatemo i'a kana matuwu bali. 26 Pade isema-sema to natuwu bo nomparasaya Aku, ira mana mamate sampe ri kasae-saena. Niparasayamu to niuliku e'i?" 27 Nanguli i Marta, "Iyo, Pue. Niparasayakumo Komi etu Ana nu Alatala, Magau to Mompakasalama to nijanji Alatala kana marata ri dunia." 28 Naopu i Marta notesa ka Yesus iwetu, nalaumo i'a nompokio i Maria pade nosiwawayo ka i'a, "Naratamo Guru. I'a madota mosirata ka iko." 29 Nangepe pantesa i Marta etu, nekanggoremo i Maria nalau nasalisa nomposirata Yesus. 30 Tempo etu Yesus da'apa nesua riara ngata Betania. I'a da ri sawalikuna ri peto'o niposiratana ante i Marta. 31 Tau-tau to Yahudi to nompakawoe rara i Maria rara njapona nanggita i'a nompari-mpari nalau. Jadi ira wo'u nalau nantuki i'a. Niuli ira, "I'a nalau nageo ri dayo ria." 32 Sangga naratapa i Maria ri ja'i Yesus nekadedemo i'a ri ngayona ante nanguli, "Pue, ane Komi naria ri se'i bopia natantumo sampesuwuku da'a namate." 33 Tempo Yesus nanggita i Maria bo roa-roana to nantuki i'a nageo-geo, nasusa mpu'umo rarana. 34 Pade nekutanamo I'a ka ira, "Ri umba tanu dayona?" Nesonomo ira, "Pue, kamaimo lau rakitata." 35 Pade nageomo Yesus. 36 Nanggita etu nangulimo tau-tau to Yahudi to nantuki i Maria etu, "Kitamo. Nipotowe Yesus mpu'u i Lazarus." 37 Tapi naria wo'u sanu ira nanguli samba'a ka roana, "Tau naburo namala nipakabelona. Iwenu sampe I'a da'a namala nompakabelo ju'a i Lazarus ala i'a da'a namate?" 38 Ante nasusa wo'umo rarana Yesus nompakamosu dayo i Lazarus. Dayo etu saongu bololia ri kente nu bulu, bolona nitondo ante watu bete. 39 Nangulimo Yesus, "Kaliakamo watu etu!" Tapi nangulimo i Marta sampesuwu ntomate etu, "Pue, natantu nawaumo i'a, sabana patambengimo i'a riara dayo etu." 40 Nangulimo Yesus ka i Marta, "Iwenu? Da'a niuliku ka komi pani'a ane komi momparasaya Aku komi kana manggita kabete nu kuasa Alatala?" 41 Naopu etu nikaliaka iramo watu bete nipombatondo dayo etu. Pade nantingoamo Yesus ante nanguli, "Umaku, Aku nosukuru sabana posambayaku e'i niepemumo. 42 Ninjaniku Komi bate-batena nangepe posambayaku, tapi niuliku iwetu ala raepe tau-tau ri se'i ala ira mamala momparasaya Komimo to nompakau Aku momai ri dunia e'i." 43 Naopu notesa iwetu nongaremo Yesus ante suara namangga, "Lazarus! Kamaimo!" 44 Pade nesuwumo tomate etu nggariara dayona. Kadana bo palena daniwewe pompo'u sompu pade balenggana danipo'u pasapu. Pade nangulimo Yesus ka ira ri setu, "Wolemo pompo'una etu ala i'a mamala molumako mabelo." 45 Nanggita kajadia etu nadeamo tau to Yahudi to narata mompakawoe rara i Maria nomparasaya Yesus. 46 Tapi naria sanu tau nggari tatongo ira to nalau mpaka ri ja'i tau-tau to Parisi nombatesa ka ira nuapa to nipowia Yesus etu. 47 Jadi balengga-balengga topanggeni agama bo tau-tau to Parisi nompasiromu Polibu Bete Agama Yahudi. Niuli ira ka topolibu to nasiromu etu, "Nuapa masipato rapowiata? Nadea mpu'u kabaraka to nipowia ntau etu. 48 Ane kita batena mompalamba I'a iwetu, natantumo pura-pura tau kana momparasaya I'a! Pade kaopuna tantara Roma kana marata mombagero Sapo Mpepueta bo njumaongu ngatata!" 49 Naria samba'a nggari tatongo ira to nosanga ka i Kayafas, to najadi Balengga Topanggeni Agama mpae etu. I'a nanguli ka ira, "Da'a ninjani komi nuapa-nuapa! 50 Da'a ntoto ninjani komi kabelona todea! Nabelopa samba'a tau mamate manjaliku todea ala pura-pura todea ne'e rapakaropu!" 51 Kakonona tesa i Kayafas etu da'a nitesana nggari pekirina mboto. Tapi ewa Balengga Topanggeni Agama Yahudi mpae etu, i'a nombaboto kamate Yesus manjaliku todea to Yahudi. 52 Pade da'a aga to Yahudi, tapi ala pura-pura ana nu Alatala to neto'o ri umba-umba ri dunia mamala rapasiromu majadi nosaongu. 53 Jadi nompamula nggari eo etu nasintuwumo topanggeniaka-topanggeniaka nto Yahudi mompatesi Yesus. 54 Sabana etu Yesus mana nosanggani-nggani ante todea to Yahudi. Tapi nalaumo I'a nggari Bagia Yudea etu mpaka ri bagia to namosu karawa baina, etumo ri ngata Efraim. Pade naroomo I'a ri setu mpasanggani-nggani ante anaguruna. 55 Tempo etu namosumo ntoana eo bete agama Yahudi to nosanga ka Eo Paska. Jadi nadeamo tau nggari ngata-ngata bo boya-boya nto Yahudi nantende mpaka ri ngata Yerusalem ala mantuki ada pompegasa koro ira da'apa pamulana Eo Bete Paska. 56 Narata ri setu ira nangelo-ngelo Yesus. Pade tempo ira nasiromu ri Sapo Mpepue nosimpekutana ira samba'a bo samba'a, "Iwenu pombarata komi? Bara da'a mabia I'a marata ri posusa e'i." 57 Iwetu panguli ira sabana nariamo parenta nggari balengga-balengga topanggeni agama bo tau-tau to Parisi to nanguli iwe'i: "Isema-sema nangginjani peto'o Yesus, kana raulina ka kami ala I'a mamala rasoko kami!"

12

1 Onoeopa pade marata Eo Bete Paska nalaumo Yesus mpaka ri ngata Betania, ngata nipeto'o i Lazarus to nipakatuwu Yesus bali nggari kamatena bopia. 2 Ri setu ira nompowia posusa mombabila I'a. Marta nantulungi nanggeni panggoni ka ira pade i Lazarus naria ri tatongo tau-tau to nekatoko nanggoni mpasanggani-nggani ante Yesus. 3 Tempo ira nekatoko ri setu i Maria nangala sabotolo minya wongi to nasuli mpu'u olina, kira-kira santongo lite isina. Pade naratamo i'a nombatoli lana etu ri kada Yesus pade nipe'ena ante wo'ona sampe nangau. Pade ranjapo etu pura-pura nawongi mpu'u soana nggari minya wongi etu. 4 Nanggita etu notesamo samba'a anaguru Yesus to nosanga ka Yudas Iskariot to mompobalu Yesus banepia. Niulina, 5 "Nokuya minya to nasuli olina etu da'a nipobalu nte toluatu mpeka doi salaka pade doi etu rawai ka tau nakasiasi?" 6 Kakonona Yudas da'a nantora tau nakasiasi, tapi i'a madota mompelea doi etu, sabana i'amo anaguru to niparasaya nombaboli doi ira, pade sanggani-sanggani i'a nompelea doi etu. Etu sampe i'a notesa iwetu. 7 Tapi nangulimo Yesus ka Yudas, "Palambamo i'a manggawia etu, sabana to nikawiana etu mantora eo pombatana Aku banepia. 8 Tau nakasiasi bate-batena maria ri tatongo komi, tapi Aku e'i da'a mana masaeka ri tatongo komi." 9 Nadeamo tau to Yahudi nangepe lele Yesus naria ri ngata Betania. Jadi nalaumo ira mpaka ri setu ala manggita Yesus pade ala manggita i Lazarus wo'u to nipakatuwu Yesus bali nggari kamatena. 10 Jadi balengga-balengga topanggeni agama nasintuwu madota mompatesi i Lazarus wo'u. 11 Sabana nggari Lazarus etumo nadeamo tau to Yahudi da'a mana madota mantuki balengga-balengga topanggeni agama. Ira aga madota mantuki Yesus bo momparasaya I'a. 12 Naeo mpadondona nadeamo tau to narata ri ngata Yerusalem ala mantuki posusa Paska etu nangepe lele Yesus nompakamosu ngata Yerusalem. 13 Jadi niala ira lolo tawa nggaluku pade nalaumo ira nombatomunaka Yesus. Nongare-ngaremo ira, "Ratoiyata Alatala! Perapi Pue Mombagane Magau to narata niposumba i Pue! Perapi I'a mombagane Magau nto Israel!" 14 Yesus nosirata ka saongu ana keledai pade nipesawina. Kajadia etu nompakadupa tesa nitulisi riara Buku Nagasa iwe'i: 15 "Ne'e komi maeka, pue ngata Yerusalem! Kitamo! Magau komi marata nesawi ana keledai!" 16 Tempo etu da'apa ninjani anaguru-anaguruna batuana kajadia etu. Tapi naliu Yesus natuwu bali nggari kamatena pade neoremo mpaka ri suruga, nanotomo ka ira tesa-tesa nggari Buku Nagasa etu nantesa Yesus pade etumo to najadi ri ja'ina. 17 Tempo etu ri ngata Yerusalem nadeamo tau to nosanggani-nggani ante Yesus tempo I'a nompokio i Lazarus nggariara dayona pade nompakatuwu bali i'a. Ira etumo batena nantesa ka tau ntanina kajadia etu. 18 Etumo sampe nadea tau nalau nantomunaka Yesus sabana niepe ira Yesusmo to nompowia kabaraka etu. 19 Nanggita etu nangulimo tau-tau to Parisi samba'a bo samba'a, "Nidagimo kita! Kitamo! Pura-pura tau ri dunia e'i nalau nantuki I'a!" 20 Ri tatongo ntau dea to nalau mepue ka Alatala ri ngata Yerusalem tempo posusa Paska etu naria wo'u bara sakuya mba'a to Yunani. 21 Ira narata ri ja'i Filipus pade nanguli ka i'a, "Ane mamala kami wo'u madota mosirata ka Yesus." (Filipus etu tau nggari ngata Betsaida ri Bagia Galilea.) 22 Sangga nangepe pomperapi ira etu nalaumo Filipus notesa ka Andreas pade ira romba'a nalau notesa pomperapi etu ka Yesus. 23 Nangulimo Yesus ka ira, "Naratamo tempona Aku, Ana nu Manusia rapakabete pade rabila. 24 Aku mpu'u-mpu'u notesa ka komi, ane rapana ongu pae da'a ratuja ri tana pade raiwu nasimbayu ewa tomate, pae etu bate-batena aga saongu lau. Tapi ane ongu pae etu ratuja ri tana pade raiwu nasimbayu ewa tomate, kaopuna pae etu mowua madea. 25 Isema-sema aga nompotowe katuwuna riara dunia e'i kana malipo katuwuna banepia. Tapi isema-sema da'a nompotowe katuwuna riara dunia e'i, ira kana mombarata katuwua mabelo sampe ri kasae-saena. 26 Isema-sema madota mantulungi Aku kana mantuki Aku ala ira mosanggani-nggani ante Aku. Pade isema-sema mantulungi Aku kana rabila Umaku. 27 We'i-we'i nasusamo raraku e'i. Nuapa masipato kuuli we'i-we'i? Da'a masipato Aku manguli, 'Uma, kabasakamo Aku nggari kasusana to marata ri ja'iku.' Sabana patuju karataku e'i ala mombarasai kasusa etu! 28 Tapi iwe'i to masipato kuuli: 'Uma, powiamo to mompakabete sangamu!' " Naopu I'a nanguli iwetu nariamo suara nggari langi nanguli, "Nipakabetekumo sangaku, pade kana kupakabetepa ngina." 29 Nangepe suara etu nariamo tau-tau to nanguli, "Etu aga guntu." Tapi naria wo'u sanu ira nanguli, "Naria malaeka notesa ka I'a." 30 Jadi nangulimo Yesus ka ira, "Suara to niepe komi pani'a da'a nitesa ala mantulungi Aku, tapi ala mantulungi komi. 31 We'i-we'i naratamo tempona sala manusia ri dunia kana ratangara. We'i-we'i tempona wo'umo Magau nu Seta to nakuasana riara dunia rapopalai. 32 Pade Aku, ane Aku raonggotaka mpakalanga nggari dunia e'i Aku kana manggeni pura-pura tau marata ri ja'iku." 33 Yesus notesa iwetu ala mompakanoto iwenu jala nggamatena. 34 Pade nangulimo tau dea ka I'a, "Naria nitulisi riara buku Atura-atura agama Magau to Mompakasalama to nijanji Alatala kana matuwu sampe ri kasae-saena. Jadi iwenu sampe Komi nanguli Ana nu Manusia kana raonggotaka mpakalanga? Isema Ana nu Manusia etu?" 35 Nesonomo Yesus, "Damo sampalai reme maroo ri ja'i komi. Jadi agina komi molumako tempo danarawa ala ne'e komi rarata rumau. Tau nolumako riara karumauna da'a nanoto mpaka ri umba rakalauna. 36 Parasayamo reme etu tempo danaria nosanggani-nggani ante komi ala komi wo'u majadi ana-ana nu reme." Sangga notesa iwetu nalaimo Yesus nggari ja'i ntodea. I'a da'a mana nosanggani-nggani ante ira. 37 Naupa nadeamo kabaraka nikawiana ri ngayo ntau dea, ira da'a nomparasaya I'a. 38 Etu pura-pura najadi ala madupamo tesa to nitulisi nabi Yesaya nggaolu iwe'i: "Pue, da'a ria to nomparasaya kareba to nikeni kami ka ira! Da'a ria to nompariara nta'i kabaraka-kabaraka to nipopokita i Pue ka ira!" 39 Jadi ira da'a namala nomparasaya, sabana naria wo'u tesa Alatala to nipasimbayu nabi Yesaya nggaolu iwe'i: 40 "Nitunggaiku nompakaburo mata ira pade nompakako'o rara ira, ala mata ira da'a mamala mekita pade rara ira da'a mangginjani, ala ira ne'e manjili ri ja'iku merapi ala kupakabelo." 41 Iwetumo tesa to niuli nabi Yesaya nggaolu sabana nikitana mamimo baraka Yesus pade nitesana nombaboto etu. 42 Naupa iwetu nadea wo'u topanggeniaka nto Yahudi to nomparasaya Yesus. Aga ira da'a nabia nompangaku etu ri ngayo ntau dea sabana naeka ira ka to Parisi, ne'e-ne'e ira rasuwuraka nggariara sapo mpodade. 43 Sabana neliupa dota ira rabila manusia pade rabila Alatala. 44 Pade nongaremo Yesus ri tatongo ntau dea, "Isema-sema nomparasaya Aku, da'a aga nomparasaya Aku tapi ira wo'u nomparasaya Alatala to nompakau Aku. 45 Pade isema-sema to nanggita Aku, ira wo'u nanggita Alatala to nompakau Aku. 46 Aku e'i nomai ri dunia e'i ewa reme ala isema-sema momparasaya Aku mana meto'o riara karumauna. 47 Ane maria tau to mangepe tesaku tapi da'a mantuki tesa etu, da'a Aku to mompakasala ira. Sabana Aku narata riara dunia e'i da'a ala mompakasala manusia, tapi ala mompakasalama manusia. 48 Ane tau da'a madota mantarima Aku pade da'a madota mangepe tesaku nariamo to mompakasala ira. Tesa to nitesaku ka ira etumo to mompakasala ira ri kaopu nu dunia. 49 Sabana Aku da'a notesa nantuki dotaku mboto. Aku aga nombatesa bo nanguli nuapa to niparenta Umaku ka Aku, sabana I'amo to nompakau Aku marata ri dunia. 50 Pade ninjaniku wo'u parentana etu mombawai katuwua mabelo sampe ri kasae-saena. Jadi tesa to nitesaku ka komi aga nantuki nuapa to niparenta Umaku ka Aku."

13

1 Tempo etu namosumo Eo Bete Paska. Pade ninjani Yesusmo ntora naratamo tempona I'a mompalasi dunia e'i manjili mpaka ri ja'i Umana. I'a mpu'u-mpu'u nompotowe ira to najadi bagiana riara dunia. Jadi tempo etumo nipopokitana ka ira towena to da'a ria kaopu-opuna. 2 Yesus bo anaguru-anaguruna nekatoko nanggoni mpasanggani-nggani. Tempo etu Magau nu Seta naopumo nosiwawayo riara pekiri Yudas ana i Simon Iskariot ala mompobalu Yesus ka balina. 3 Ninjani Yesus Umana Alatala nombawai pura-pura kuasa ka I'a. Pade ninjanina wo'u I'a narata nggari ja'i Alatala bo I'a kana manjili mpaka ri ja'i Alatala. 4 Jadi nekanggoremo I'a nombawonju baju nggumbana, pade nialana saongu handu nipo'una ri kopena. 5 Naopu etu nialana ue nitolina riara loya. Pade nompamulamo I'a nombarama kada anaguruna samba'a bo samba'a. Pade nipe'ena kada ira ante handu to nipo'u ri kopena etu. 6 Tempo Yesus narata ri ja'i Simon Petrus, nangulimo i Petrus ka I'a, "Pue, da'a masipato Komi mombarama kadaku!" 7 Nanguli Yesus ka i'a, "We'i-we'i da'apa ninjanimu nuapa batuana to nikawiaku e'i. Tapi nggapurina kana munjani." 8 Tapi nanguli wo'umo i Petrus ka Yesus, "Ne'e, Pue! Ne'e ntoto Komi mombarama kadaku!" Nesonomo Yesus, "Ane Aku da'a mombarama kadamu, da'a ntoto maria posinggamosumu ante Aku." 9 Nangepe etu nanguli wo'umo i Simon Petrus, "Ane iwetu, Pue, ne'e aga kadaku rarama Komi tapi pale bo balenggaku wo'u." 10 Tapi nangulimo Yesus ka i'a, "Tau naopu nandiu nagasa puramo korona, da'a mana paraluu radiu. Aga kadana kana rarama mpakagasa. Komi etu nagasamo, aga da'a pura-pura komi." 11 Niuli Yesus iwetu sabana ninjanina isema to mompobalu I'a ka balina. Etu sampe niulina, "Da'a pura-pura komi nagasa." 12 Naopu Yesus nombarama kada ira, nialanamo baju nggumbana nipasuana bali, pade nekatokomo I'a ri meja. Naopu etu nekutanamo I'a ka anaguru-anaguruna, "Ninjani komi batuana nuapa to lako nikawiaku ka komi pani'a? 13 Komi nanguli Aku Guru bo Pue komi, pade tesa komi etu nakono, sabana Aku e'i mpu'u-mpu'u Guru bo Pue komi. 14 Jadi ane Aku e'i, Guru bo Pue komi, nompakaede koroku nombarama kada komi, masipato komi wo'u mompakaede koro komi mosirama kada samba'a bo samba'a. 15 Aku nompopokita ka komi saongu jonjo ala nuapa to nipowiaku etu wo'u rapowia komi samba'a bo samba'a. 16 Aku mpu'u-mpu'u notesa ka komi, samba'a batua da'a neliu nggabete katuwuna nggari ja'i madikana. Iwetu wo'u samba'a tau nipakau da'a neliu nggabete nggari tau nompakau i'a. 17 Ane etu manoto ranjani komi, madamba mpu'umo komi ane komi mompowia to nitesaku etu. 18 Nuapa to niuliku pani'a da'a nipawela ka komi pura-pura. Ninjaniku mamimo isema to nipelisiku. Tapi kana rapakadupa nuapa to nitulisi riara Buku Nagasa to nanguli iwe'i: 'Tau nanggoni mpasanggani-nggani ante Aku, i'amo majadi baliku banepia.' 19 Etu nitesaku ka komi we'i-we'i tempo etu da'apa najadi ala ane majadimo ngina raparasaya komimo Aku e'i mpu'u-mpu'u Alatala. 20 Aku mpu'u-mpu'u notesa ka komi, isema-sema mantarima tau to nipakauku ira wo'u mantarima Aku. Pade isema-sema mantarima Aku ira wo'u mantarima Umaku to nompakau Aku." 21 Naopu Yesus nombatesa etu pura-pura nasusa mpu'umo rarana. Pade niulina, "Aku mpu'u-mpu'u notesa ka komi, naria samba'a nggari tatongo komi to mompobalu Aku ka baliku." 22 Nangepe etu anaguru-anaguruna aga nosikita mbotomo ante kaingu nu rara sabana da'a ninjani ira isema to nipatuju Yesus etu. 23 Tempo etu samba'a anaguruna to nipotowe Yesus nekatoko ri sinjorina. 24 Jadi Simon Petrus nombakode roana etu ante matana pade nanguli, "Pekutana ka Guru bara isema to nipatujuna etu." 25 Jadi anaguru to nekatoko ri sinjori Yesus etu nompakamosu I'a pade nekutana, "Pue, isema to nipatuju Komi etu?" 26 Nesonomo Yesus, "Isema to kuwai ka roti to kutome riara ue mpane, i'amo to nipatujuku." Naopu etu Yesus nangala sanggoto roti nitomena riara ue mpane pade niwaina ka Yudas ana i Simon Iskariot. 27 Iwetu Yudas nangala roti etu kaliu-liu nesuamo Magau nu Seta riara nta'ina. Pade nangulimo Yesus ka Yudas, "Pakasalisa urusimo nuapa madota mukawia!" 28 Da'a ria kamba samba'a ira sampekatoko nanggoni etu to nangginjani nuapa patuju Yesus notesa iwetu ka Yudas. 29 Naria to nompekiri Yesus nompakau Yudas malau mangoli bara nuapa-nuapa rapake ira riara mposusa etu bara mombawai doi ka tau nakasiasi, sabana Yudas topomboliaka doi ira. 30 Jadi naopu Yudas nangala roti nggari ja'i Yesus, nalaimo i'a nggari setu. Tempo etu nawengimo. 31 Sangga nalaipa Yudas nangulimo Yesus ka anaguruna, "We'i-we'i Aku, Ana nu Manusia kana ratoiya bo rapakabete. Pade nggari nuapa to majadi ri ja'iku etu Alatala wo'u ratoiya bo rapakabete. 32 Ane Alatala ratoiya bo rapakabete nggari nuapa to majadi ri ja'iku Aku wo'u ratoiya bo rapakabete Alatala nggari kajadia etu. Pade etu masalisa majadi. 33 Ana-anaku, Aku da'a mana masaeka mosanggani-nggani ante komi. Komi kana mangelo Aku tapi ewa to niuliku ka topanggeniaka-topanggeniaka nto Yahudi bopia, iwetu wo'u kuuli ka komi we'i-we'i, 'Ri umba kukalau komi da'a mamala malau.' 34 Naria parenta nabou kuwai ka komi iwe'i: Komi kana mosipotowe samba'a bo samba'a. Nasimbayu ewa Aku nompotowe komi iwetu wo'u komi kana mosipotowe samba'a bo samba'a. 35 Ane komi mosipotowe samba'a bo samba'a kana ranjani ntau puramo komi etu anaguru-anaguruku." 36 Pade nekutanamo Petrus ka Yesus, "Pue, ri umba rakalau Komi?" Nesonomo Yesus, "Ri umba kukalau da'apa mamala iko malau. Tapi banepianapa pade iko malau mantuki Aku." 37 Nesono wo'umo Petrus ka I'a, "Iwenu sampe aku da'a mamala mantuki Komi we'i-we'i, Pue? Nasadiamo aku mamate manjaliku Komi!" 38 Nesonomo Yesus, "Mpu'u-mpu'u iko madota mamate manjaliku Aku? Aku mpu'u-mpu'u notesa ka iko, da'apa manu mora'o ngina njau tolungganimo iko mombasapu Aku."

14

1 Nangulimo Yesus ka anaguruna, "Ne'e masusa rara komi. Parasayamo Alatala, pade parasaya wo'u Aku. 2 Ri sapo Umaku nadea mpu'u peto'o. Aku malau mpaka ri setu mompakasadia peto'o ka komi. Ane da'a iwetu kana kuuli mpakanoto ka komi. 3 Pade maopu Aku malau mompakasadia peto'o ka komi Aku kana manjili bali mai mangala komi ala ri umba kupeto'o ri setu wo'u rapeto'o komi. 4 Peto'o kukalau etu ninjani komimo jalana." 5 Nangulimo i Tomas ka I'a, "Pue, da'a ninjani kami ri umba rakalau Komi. Jadi iwenu kami mangginjani jala mpaka gusa'a?" 6 Nesonomo Yesus ka i'a, "Aku e'imo jala, Akumo to mompakanoto tesa to nakonona ewa Alatala, pade Akumo to mombawai katuwua. Da'a ria samba'a mamala malau mpaka ri ja'i Umaku ane da'a ante Aku. 7 Ane komi mosinjani ante Aku, komi mosinjani wo'u ante Umaku. Pade nompamula we'i-we'i nosinjanimo komi ante I'a pade nikita komimo I'a." 8 Nanguli i Filipus ka Yesus, "Pue, popokita ka kamimo Umamu, pade masana rara kami." 9 Nesonomo Yesus ka i'a, "Iwenumo, Filipus, nasaemo Aku nosanggani-nggani ante komi tapi komi da'apa nosinjani ante Aku? Isema-sema nanggita Aku, nikitana wo'umo Umaku. Jadi iwenu sampe komi nanguli, 'Popokita ka kamimo Umamu?' 10 Iwenumo? Da'apa ntoto niparasayamu Aku e'i nosaongu ante Umaku pade Umaku nosaongu ante Aku? Nuapa to niuliku ka komi da'a tesaku mboto. Tapi Umaku to naroo ri ja'iku to nompowia etu pura-pura. 11 Parasayamo tesaku e'i, Aku mpu'u-mpu'u nosaongu ante Umaku pade Umaku wo'u nosaongu ante Aku. Ane etu nakaja raparasaya komi ante nangepe tesaku parasayamo sabana nikita komi kabaraka-kabaraka to nipowiaku. 12 Aku mpu'u-mpu'u notesa ka komi, isema-sema to nomparasaya Aku ira mamala mompowia kabaraka ewa to nipowiaku. Pade da'a aga etu, ira mamala mowia kabaraka to meliu nggabete nggari to nipowiaku, sabana Aku malau mpaka ri ja'i Umaku. 13 Pade nuapa-nuapa to raperapi komi ante manguli sangaku etu kana kupowia ka komi, ala nggari powiaku etu Umaku rabila bo ratoiya. 14 Nuapa-nuapa raperapi komi ante manguli sangaku kana kupowia ka komi." 15 "Ane komi mompotowe Aku komi kana mantuki parenta-parentaku. 16 Pade Aku kana merapi ri ja'i Umaku ala rawaina ka komi Topetulungi ntanina, to maroo ri ja'i komi sampe ri kasae-saena. 17 Topetulungi etumo Nosa Nagasa nu Alatala to mompakanoto ka komi pepatuduki to nakonona. Tau-tau ri dunia e'i to da'a nomparasaya da'a mamala mantarima I'a sabana ira da'a nanggita I'a bo ira da'a nosinjani ante I'a. Tapi komi kana mosinjani ante I'a sabana I'a nosanggani-nggani ante komi we'i-we'i pade I'a kana meto'o riara nta'i komi ngina. 18 Aku da'a mompalasi komi ewa ngana pailu. Tapi Aku kana manjili bali ri ja'i komi. 19 Da'a mana masaeka Aku mana rakita tau-tau ri dunia e'i. Tapi komi kana manggita Aku. Pade komi kana matuwu sabana Aku kana matuwu bali. 20 Ane maratamo tempo etu kana ranjani komi Aku nosaongu ante Umaku pade komi wo'u nosaongu ante Aku pade Aku nosaongu ante komi. 21 Isema-sema mompariara nta'i pade mantuki parenta-parentaku ira etumo to nompotowe Aku. Pade ira to nompotowe Aku kana rapotowe Umaku wo'u, pade Aku mboto mompotowe ira pade mompopokita koroku ka ira." 22 Pade nekutana Yudas (da'a Yudas Iskariot) ka Yesus, "Pue, nuapa sabana Komi aga mompopokita koromu ka kami, da'a ka pura-pura manusia ri dunia?" 23 Nesonomo Yesus, "Isema-sema mompotowe Aku kana mantuki tesaku. Pade Umaku kana mompotowe i'a pade kami kana marata meto'o mpasanggani-nggani ante i'a. 24 Tapi tau da'a nompotowe Aku da'a wo'u madota mantuki tesaku. Pade tesa to niepe komi e'i da'a nggari ja'iku mboto, tapi nggari ja'i Umaku to nompakau Aku. 25 Pura-pura tesa etu nitesaku ka komi tempo Aku danaria nosanggani-nggani ante komi. 26 Tapi ane Nosa Nagasa nu Alatala marata I'a kana mompatuduki ka komi mpengele-ngele pade mompopatora ka komi pura-pura nuapa to nitesaku ka komi. Sabana I'amo Topetulungi to rapakau Umaku manjambei Aku. 27 Aku kana mompakasana rara komi ante kasana nu rara nggari ja'iku mboto. Pade kasana nu rara etu da'a nasimbayu ewa kasana nu rara nggari ja'i manusia ri dunia to naja'a e'i. Jadi ne'e komi masusa rara, ne'e komi maeka rara. 28 Niepe komimo tesaku pani'a to nanguli Aku malau nggari ja'i komi tapi Aku kana manjili bali ri ja'i komi. Ane mpu'u-mpu'u komi mompotowe Aku komi kana madamba rara mangepe tesa nanguli Aku malau mpaka ri ja'i Umaku, sabana I'a neliu nggakuasa nggari Aku e'i. 29 Tesa etu niuliku ka komi we'i-we'i tempo da'apa najadi ala ane majadimo ngina kana raparasaya komimo. 30 Da'a mana madea gaga pantesa kuuli ka komi, sabana Magau nu Seta to nombakuasai dunia e'i ntora naratamo mompandasa Aku. I'a da'a nakuasa ri ja'iku, 31 tapi etu kana majadi ala manusia ri dunia e'i mangginjani Aku nompotowe Umaku pade Aku nompowia pura-pura nuapa to niparentana ka Aku. Kamaimo kita malai nggari se'i."

15

1 Nanguli wo'umo Yesus ka ira, "Aku e'imo walaa anggur to nakonona, pade Umaku pue ntinalu anggur etu. 2 Rangga-ranggaku to da'a nowua nikoto nitajiakana. Tapi rangga-rangga to nowua nipegasana mpakabelo-belo ala mantambai kadea nu wuana. 3 Komi etu nagasamo sabana niepe komimo pepatuduki to nitesaku ka komi. 4 Komi kana maroo mosaongu rara ante Aku pade Aku wo'u maroo mosaongu rara ante komi. Rangga-rangga to noga'a nggari batana da'a mamala mowua. Aga rangga-rangga to nasintaka ri bata kayu etu to mowua. Iwetu wo'u komi da'a mamala mowua ane komi da'a maroo mosaongu rara ante Aku. 5 Aku e'imo walaa anggur pade komi etumo rangga-ranggana. Ane komi maroo mosaongu rara ante Aku pade Aku maroo mosaongu rara ante komi, komi kana mowua madea. Tapi ane komi moga'a nggari ja'iku komi da'a mamala mompowia nuapa-nuapa. 6 Tau da'a naroo nosaongu rara ante Aku kana ratajiaka nasimbayu ewa rangga kayu ratajiaka sampe majadi mangau. Rangga-rangga ewa etu aga rapasiromu ratajiaka riara apu pade rapalabu. 7 Ane komi maroo mosaongu rara ante Aku pade tesaku maroo riara nta'i komi, perapimo nuapa-nuapa to nipokono komi pade etu kana rawai ka komi. 8 Ane komi mowua madea manotomo komi mpu'u-mpu'u anaguruku. Pade ante iwetu Umaku kana ratoiya bo rabila. 9 Nasimbayu ewa Umaku nompotowe Aku, iwetu wo'u Aku nompotowe komi. Komi kana maroo mosaongu rara ante Aku ala komi mombarasai pepotoweku. 10 Ane komi mantuki parenta-parentaku, komi mpu'u-mpu'u maroo mosaongu rara ante Aku pade mombarasai pepotoweku nasimbayu ewa Aku wo'u nantuki parenta Umaku pade naroo nosaongu rara ante I'a pade nombarasai pepotowena. 11 Pura-pura e'i niuliku ka komi ala kadamba nu raraku mamala wo'u rarasai komi pade ala komi mpu'u-mpu'u madamba rara. 12 Iwe'imo parentaku kuuli ka komi: posipotowemo samba'a bo samba'a nasimbayu ewa Aku nompotowe komi. 13 Iwe'imo jonjo tau mpu'u-mpu'u nompotowe wegana: i'a nombawai katuwuna manjaliku wegana. 14 Komimo wega-wegaku ane komi mantuki parenta-parenta to niwaiku ka komi. 15 Aku mana manguli komi batua, sabana samba'a batua da'a nangginjani nuapa to nipowia madikana. Tapi we'i-we'i Aku manguli komi wegaku. Nanotomo etu sabana pura-pura nuapa to niepeku nggari ja'i Umaku etu wo'u nitesaku ka komi. 16 Da'a komi to nompelisi Aku, tapi Aku to nompelisi komi pade nompakau komi malau mowua madea, etumo wua to da'a maopu-opu. Ane komi mowua iwetu nuapa-nuapa raperapi komi nggari ja'i Umaku ante manguli sangaku kana rawaina ka komi. 17 Jadi iwe'imo parentaku ka komi: posipotowemo samba'a bo samba'a." 18 "Ane komi raporau rara ntau ri dunia to da'a nomparasaya, kana ratora komi ira nokolu nomporau Aku. 19 Ane rapana komi nosimporoa ante tau da'a nomparasaya Aku, natantumo ira kana mompotowe komi sabana komi roa ira mboto. Tapi komi da'a nosimporoa ante ira sabana Aku nompelisi komi ala malai nggari ja'i ira. Jadi etu sampe ira nomporau rara komi. 20 Toramo nuapa to niuliku ka komi pani'a: samba'a batua da'a neliu nggabete katuwuna nggari madikana. Ane Aku nipandasa ira, natantumo komi wo'u kana rapandasa ira. Ane pepatudukiku nituki ira, natantumo pepatuduki komi wo'u kana ratuki ira. 21 Pura-pura etu kana rapowia ira ka komi sabana komi najadi topantuki Aku. Etu rapowia ira sabana ira da'a ntoto nosinjani ante Alatala to nompakau Aku. 22 Ane rapana Aku da'a narata nombatesa ka ira, ira da'a nasala. Tapi naratamo Aku pade nitesaku mamimo ka ira. Jadi mana ria tanje ira mowia silaka. 23 Isema-sema nomporau Aku ira wo'u nomporau Umaku. 24 Ane Aku da'a nompowia kabaraka-kabaraka ri tatongo ira anu da'a sanggani nipowia tau ntanina ira da'a nasilaka. Tapi nikita iramo kabaraka-kabaraka etu pade ira batena nomporau Aku ante Umaku wo'u. 25 Tapi etu najadi ala madupa tesa to nitulisi riara Atura-atura agama ira iwe'i: 'Ira nomporau Aku nau da'a naria sabana.' 26 Aku kana mompakau ka komi Topetulungi nggari ja'i Umaku, etumo Nosa Nagasa nu Alatala to mompakanoto ka komi pepatuduki to nakonona. Ane I'a marata I'amo to majadi sabiku. 27 Pade komi wo'u majadi sabiku sabana komimo to nosanggani-nggani ante Aku nggari pamula panggawiaku riara dunia e'i."

16

1 "Pura-pura etu niuliku ka komi ala komi ne'e mokanggaura momparasaya. 2 Komi kana rapopalai nggariara sapo mpodade nto Yahudi. Pade kana marata tempona tau to mompatesi komi mompekiri powia ira etu mompakadamba rara Alatala. 3 Etu pura-pura rapowia ira ri ja'i komi sabana ira da'a nosinjani ante Umaku pade da'a wo'u nosinjani ante Aku. 4 Pura-pura etu niuliku ka komi we'i-we'i ala ane etu majadi kana ratora komi kajadia-kajadia etu nitesaku mamimo ka komi." "Tesa etu da'a niuliku ka komi nggari pamulana sabana Aku danosanggani-nggani ante komi. 5 Tapi we'i-we'i Aku malau mpaka ri ja'i Umaku to nompakau Aku pade da'a ria samba'a nggari tatongo komi nompekutana ri umba kukalau. 6 Nasusa mpu'u rara komi sabana Aku notesa ka komi pani'a Aku kana malau. 7 Tapi naupa iwetu kakono-konona neliu nggabelo ka komi ane Aku malau. Sabana ane Aku da'a malau Topetulungi da'a marata ri ja'i komi. Tapi ane Aku malau Aku kana mompakau I'a marata ri ja'i komi. 8 Ane Topetulungi etu marata I'a kana mompakanoto ka manusia ri dunia ira nasilaka. Pade rapakanotona wo'u ka ira kanoaku, pade rapakanotona natantumo potangara nu Alatala. 9 Rapakanotona manusia nasilaka sabana ira da'a nomparasaya Aku. 10 Rapakanotona wo'u kanoaku, sabana Aku malau mpaka ri ja'i Umaku pade komi mana manggita Aku. 11 Pade kana rapakanotona wo'u natantumo Alatala mombasuku tau nasilaka, sabana Magau nu Seta to nombakuasai dunia e'i naopumo nitangara. 12 Danadeapa madota kutesa ka komi tapi da'a rapakule komi mantarima etu pura-pura we'i-we'i. 13 Tapi ane maratamo Nosa Nagasa etu I'amo to manggeni komi mangginjani pura-pura pepatuduki to nakonona. I'a da'a motesa nantuki dotana mboto. Tapi nuapa to niepena, etumo to ratesana. Pade I'a kana motesa ka komi nuapa to majadi ri eo nggapurina. 14 I'a kana mombabila Aku bo mompakabete sangaku sabana nuapa to nitarimana nggari ja'iku etumo to ratesana mpakanoto ka komi. 15 Pura-pura nuapa to naria ri ja'i Umaku, etu pura-pura bagiaku wo'u. Etu sampe niuliku ka komi nuapa to nitarima Nosa Nagasa nggari ja'iku etumo to ratesana mpakanoto ka komi." 16 "Sampalaipa komi mana manggita Aku. Pade sampalaipa wo'u komi kana manggita Aku." 17 Nangepe tesana etu nosipekutana mbotomo anaguruna samba'a bo samba'a, "Nuapa ntoto patujuna nanguli ka kita 'Sampalaipa komi mana manggita Aku, pade sampalaipa wo'u komi kana manggita Aku?' Pade nuapa wo'u patuju tesana nanguli 'Aku malau mpaka ri ja'i Umaku?' " 18 Nosipekutana nju'umo ira, "Nuapa patuju tesana 'Sampalaipa?' Da'a ntoto ninjanita patuju tesana etu." 19 Ninjani Yesus ira madota mompekutana I'a. Jadi niulina ka ira iwe'i: "Nikitaku komi tunggai nosipekutana mbotomo nuapa patuju pantesaku pani'a tempo Aku nanguli, 'Sampalaipa komi mana manggita Aku pade sampalaipa wo'u komi kana manggita Aku.' 20 Aku mpu'u-mpu'u notesa ka komi, komi kana motumangi bo mageo mpajea manggita nuapa to majadi ri ja'iku, tapi baliku ri dunia e'i kana madamba-damba. Komi kana masusa rara manggita etu tapi kasusa rara komi kana mabali majadi kadamba nu rara. 21 Ane samba'a besi ntora moana natantumo nasusa mpu'u rarana sabana naratamo ntoana moana. Tapi ane nesuwumo anana etu nikalinganamo susa rarana etu. Nadamba mpu'u rarana sabana samba'a ngana nesuwu ri dunia. 22 Iwetu wo'u ante komi. We'i-we'i nasusamo rara komi. Tapi Aku kana mosirata bali ante komi pade tempo etu komi kana madamba bali. Pade da'a ria samba'a tau mamala mompakalipo kadamba nu rara komi etu. 23 Tempo etu komi da'a mana mekutana nuapa-nuapa ri ja'iku. Aku mpu'u-mpu'u notesa ka komi, nuapa-nuapa raperapi komi nggari ja'i Umaku ante manguli sangaku kana rawaina ka komi. 24 Sampe we'i-we'i komi da'apa nomperapi nuapa-nuapa ante manguli sangaku. Tapi perapimo we'i-we'i pade komi kana rawai ala komi mpu'u-mpu'u madamba!" 25 "Tesa to niuliku ka komi e'i aga nijaliliku. Tapi kana marata tempona da'a mana kujalili ka komi, tapi kana kutesa mpakanoto ka komi Umaku. 26 Tempo etumo komi kana merapi ri ja'i Umaku ante manguli sangaku. Da'a paraluu Aku momperapi nuapa-nuapa ka komi ri ja'i Umaku. 27 Sabana Umaku mboto nompotowe komi. I'a nompotowe komi sabana komi nompotowe Aku pade niparasaya komimo Aku e'i narata nggari ja'ina. 28 Aku e'i narata nggari ja'i Umaku pade nomai riara dunia e'i. Tapi we'i-we'i Aku mompalasi dunia e'i pade manjili mpaka ri ja'i Umaku." 29 Pade nangulimo anaguruna ka I'a, "Kitamo! We'i-we'i Komi notesa ante nanoto ka kami, da'a mana ante jalili. 30 We'i-we'i nanotomo ka kami Komi nangginjani mpengele-ngele. Da'a paraluu tau nompekutana Komi. Etu sampe niparasaya kami Komi mpu'u-mpu'u narata nggari ja'i Alatala." 31 Nesonomo Yesus, "Mpu'u-mpu'u niparasaya komimo we'i-we'i? 32 Toramo! Kana marata tempona, pade kakonona naratamo tempo etu, komi kana raposimpotatare. Komi mbau manjili mpaka ri sapomu mboto, komi mompalasi Aku njamba'aku. Tapi Aku da'a mpu'u njamba'aku sabana Umaku kana mosanggani-nggani ante Aku. 33 Pura-pura etu nitesaku ka komi ala masana rara komi sabana mosaongu rara ante Aku. Riara dunia e'i komi kana rapandasa. Tapi pakaroso rara komi! Kuasa to naja'a riara dunia e'i nidagikumo!"

17

1 Naopu Yesus notesa iwetu nantingoamo I'a ri langi ante nosambaya iwe'i: "Umaku, naratamo tempona. Popokitamo kuasa bo kagaya nu Anamu ala Anamu wo'u mamala mompopokita kuasa bo kagayamu. 2 Komi nombawai ka Aku kuasa moparenta pura-pura manusia ala Aku mamala mombawai katuwua mabelo sampe ri kasae-saena ka tau-tau to niwaimu ka Aku. 3 Iwe'imo sampe manusia matuwu mabelo sampe ri kasae-saena: ira mosinjani ante Komi, Alatala to nakonona to samba'a lau, pade ira mosinjani wo'u ante Yesus Kristus to nipakaumu etu. 4 Aku nompopokita kuasa bo kagayamu riara dunia e'i ante nompakaopu panggawia to niparasayamu ka Aku. 5 We'i-we'i, Uma, Aku merapi wai ka Akumo kuasa bo kagayaku ri ngayomu nasimbayu ewa kuasa bo kagaya to naria ri ja'iku mpasanggani-nggani ante Komi tempo dunia da'apa nipajadi." 6 "Uma, nipopanjanikumo Komi ka tau-tau to niwaimu ka Aku nggariara dunia e'i. Ira etu bagiamu mamimo. Pade ira wo'u niwaimu ka Aku, pade nituki iramo tesamu. 7 We'i-we'i ninjani iramo nuapa pura to niwaimu ka Aku mpu'u-mpu'u nopu'u nggari ja'imu, Uma. 8 Sabana nitesaku ka ira puramo tesa to niulimu ka Aku, pade tesa-tesa etu pura-pura nitarima iramo. Nanotomo ka ira Aku narata nggari ja'imu, pade niparasaya ira wo'umo Komi to nompakau Aku. 9 Aku mosambaya ka ira anaguruku e'i. Da'a pura-pura manusia to niposambayaku tapi aga ira to niwaimu ka Aku, sabana ira etu mpu'u-mpu'u bagiamu. 10 Pura-pura tau to najadi bagiaku, ira wo'u najadi bagiamu. Pade pura-pura tau to najadi bagiamu wo'u najadi bagiaku. Pade kuasa bo kagayaku nanoto nikita riara nggatuwu ira. 11 Mana masaeka Aku meto'o ri dunia e'i. Aku kana malau mpaka ri ja'imu tapi ira daneto'o ri dunia e'i. O, Umaku to nagasa. Jagaimo ira ante kuasamu mboto, kuasa to niwaimu ka Aku. Jagaimo ira ala ira mosaongu rara nasimbayu ewa Komi bo Aku wo'u nosaongu rara. 12 Tempo Aku danosanggani-nggani ante ira Akumo to nombajagai ira ante kuasamu, etumo kuasa to niwaimu ka Aku. Nijagaiku ira sampe da'a ria ntanina to natontona, aga i'a to masipato matonto sampe ri kasae-saena. Etu najadi ala madupa nuapa to nitulisi riara Buku Nagasa. 13 We'i-we'i Aku malau mpaka ri ja'imu, Uma. Pura-pura e'i nitesaku ka anaguruku tempo Aku danaria riara dunia e'i ala ira mpu'u-mpu'u madamba ante kadamba nu rara nggari ja'iku mboto. 14 Uma, nipasimbayuku ka iramo tesamu. Pade tau-tau riara dunia e'i nompokarau ira, sabana anaguruku etu da'a nosaongu pekiri ante ira nasimbayu ewa Aku wo'u da'a nosaongu pekiri ante tau-tau etu. 15 Aku da'a nerapi ala Komi mangala ira nggari dunia e'i. Tapi kuperapi ala Komi mombajagai ira nggari Magau nu Seta. 16 Ira da'a nosaongu pekiri ante tau-tau da'a nomparasaya nasimbayu ewa Aku wo'u da'a nosaongu pekiri ante tau-tau etu. 17 Pajadimo ira bagiamu to nagasana, Uma, ante mompatuduki ka ira pepatuduki to nakonona. Tesamu, Uma, etumo pepatuduki to nakonona. 18 Nasimbayu ewa Komi nompakau Aku nomai riara dunia e'i, iwetu wo'u Aku nompakau ira malau mpaka ri ja'i tau ntanina riara dunia e'i. 19 Uma, Aku mombawai koroku mboto manjaliku ira ala ira wo'u mamala majadi bagiamu to nagasana ante mangginjani pepatuduki to nakonona." 20 "Da'a aga anaguruku e'i kuposambaya, tapi Aku wo'u mosambaya ka pura-pura tau to momparasaya Aku banepia ante mangepe tesa-tesa to rapatolele anaguru-anaguruku e'i. 21 Uma, kuperapi ala ira pura-pura mosaongu rara. Nasimbayu ewa Aku nosaongu rara ante Komi bo Komi nosaongu rara ante Aku, kuperapi ala ira wo'u mosaongu rara ante Kita ala pura-pura tau momparasaya Komimo to nompakau Aku e'i. 22 Niwaiku ka iramo kuasa to niwaimu ka Aku ala ira mosaongu rara nasimbayu ewa Kita wo'u nosaongu rara. 23 Aku nosaongu rara ante ira pade Komi nosaongu rara ante Aku ala ira mpu'u-mpu'u mosaongu rara. Ane iwetu kana manoto ka pura-pura manusia Komimo to nompakau Aku pade Komi to nompotowe ira nasimbayu ewa Komi nompotowe Aku. 24 Uma, to nipodotaku ala tau-tau to niwaimu ka Aku etu mamala mosanggani-nggani ante Aku ala rakita ira kuasa bo kagayaku; etumo kuasa bo kagaya to niwaimu ka Aku sabana Komi nompotowe Aku nggari lamba pamulana da'apa dunia nipajadi. 25 O, Umaku to nanoana. Manusia riara dunia e'i da'a nosinjani ante Komi, tapi Aku nosinjani ante Komi. Pade anaguruku e'i nangginjani Komimo to nompakau Aku. 26 Nipopanjaniku ka iramo Komi, Uma. Pade Aku bate-batena mompopanjani Komi ka ira ala towemu to naria ri ja'iku bate-batena maria wo'u ri ja'i ira, pade ala Aku mboto mamala mosaongu rara ante ira."

18

1 Naopu Yesus nosambaya nalaimo I'a ante anaguru-anaguruna mpaka ri sambote salu ue to nosanga ka Ue Kidron. Ri setu naria saongu pampa. Yesus ante anaguruna nalau nesua riara pampa etu. 2 Yudas, to nompobalu Yesus etu, nangginjani pampa etu sabana Yesus bo anaguruna naoso nasiromu ri setu. 3 Jadi naratamo i'a ri setu nanggeni salunu tantara Roma bo topojaga Sapo Mpepue to nipakau balengga-balengga topanggeni agama bo tau-tau to Parisi. Ira narata nanggeni poindo, sulo bo parewa mposipatesi. 4 Ninjani Yesus puramo nuapa to majadi ri korona. Jadi nalaumo I'a nompakamosu tau dea etu pade nekutana ka ira, "Isema to nielo komi?" 5 Nesonomo ira, "Yesus to Nazaret." Nesonomo Yesus, "Aku e'imo I'a." Yudas topobalu Yesus etu wo'u nenggore ri tatongo ntau dea etu. 6 Tempo Yesus nanguli ka ira, "Aku e'imo I'a," nokanggaura ntalikumo tau dea etu pade nadungga sangganimo ira. 7 Pade Yesus nompekutana ira sangganipa, "Isema to nielo komi?" Nesonomo ira, "Yesus to Nazaret." 8 Pade nangulimo Yesus, "Niulikumo ka komi pani'a, Aku e'imo I'a. Jadi ane Akumo to nielo komi, palambamo roaku e'i malai." 9 Ante pantesana etu nadupamo tesa to niuli Yesus pani'a, "Uma, nggari pura-pura topantuki to niwaimu ka Aku da'a ria samba'a to natontona." 10 Nanggita kajadia etu i Simon Petrus nombabitu gumana pade nitimbena samba'a batua nu Balengga Topanggeni Agama to nosanga ka i Malkhus sampe napudumo talinga ngganana. 11 Tapi nangulimo Yesus ka i Simon Petrus, "Boli mpanjilimo gumamu riara walombona! Iwenumo? Niulimu kupoara kasusa e'i to niwai Umaku ka Aku?" 12 Naopu etu tantara-tantara Roma ante tadulakona bo topojaga Sapo Mpepue nombasoko Yesus pade nombaso'o I'a. 13 Pade Yesus pamulana nikeni ira mpaka ri ja'i Hanas, matu'a langgai i Kayafas. Kayafas etumo to najadi Balengga Topanggeni Agama mpae etu. 14 I'amo to nanguli ka topanggeniaka nto Yahudi bopia, "Nabelopa samba'a tau mamate manjambei todea." 15 Simon Petrus bo samba'a anaguru Yesus ntanina nantuki Yesus. Anaguru Yesus to samba'ana etu nosinjani ante Balengga Topanggeni Agama. Jadi i'a namala nesua mpasanggani-nggani ante Yesus ri lalowo sapo nu Balengga Topanggeni Agama etu. 16 Tapi i Petrus nopea ri sawalikuna namosu pewobo wala. Jadi anaguru Yesus ntanina to niposinjani Balengga Topanggeni Agama etu nesuwu mpaka ri sawalikuna. Pade notesamo i'a ka besi to nanggatono pewobo ala i Petrus rapaloga mesua riara wala etu. Pade nikenina i Petrus nesua riarana. 17 Nanggita i Petrus nangulimo besi topanggatono pewobo etu ka i'a, "Iwenu? Da'a komi wo'u samba'a anaguru tau ya'a?" Nesonomo i Petrus, "Da'a!" 18 Nggawengina etu naleni mpu'u. Jadi bara sakuya mba'a batua bo topojaga Sapo Mpepue nompakawaa apu nggari wuri niponeru ira ri lalowo etu. Pade i Petrus wo'u nenggore mpasanggani-nggani ante ira noneru ri apu etu. 19 Tempo etu nompamulamo Balengga Topanggeni Agama nompekutana Yesus, "Isema pura anagurumu, pade nuapa pura nipatudukimu ka ira?" 20 Nesonomo Yesus, "Aku nabiasa nompatuduki ante nanoto ri ngayo ntau dea. Aku batena nompatuduki riara sapo mpodade bo riara Sapo Mpepue, peto'o tau to Yahudi nasiromu. Da'a ria sanggani Aku notesa nggalino. 21 Jadi nuapa sabana komi nompekutana Aku? Agina komi mompekutana tau dea to nangepe Aku nuapa to nitesaku ka ira. Iramo to nangginjani nuapa to nitesaku etu." 22 Tempo Yesus notesa iwetu naria samba'a topojaga Sapo Mpepue to nekanggore namosu ante Yesus nombasapa lenje Yesus, pade niulina, "Da'a nabelo Iko nombasono balengga topanggeni agama iwetu!" 23 Nesonomo Yesus, "Ane nasala tesaku, tesa mpakanotomo nuapa to nasalana. Tapi ane nakono tesaku etu, nuapa sabana komi nombasapa Aku?" 24 Naopu etu Hanas nompakau tau manggeni Yesus ante palena niso'o malau mpaka ri ja'i Kayafas to najadi Balengga Topanggeni Agama mpae etu. 25 Tempo etu i Simon Petrus danoneru mpekanggore ri setu. Pade naria wo'umo tau nanguli ka i'a, "Iwenu? Da'a iko wo'u samba'a anaguru ntau ya'a?" Tapi nesapumo i Petrus, "Da'a!" 26 Naria wo'umo samba'a batua Balengga Topanggeni Agama ri setu to nawela raposampesuwu tau to nitimbe i Petrus talingana sampe napudu pangane. Nangulimo tau etu ka i Petrus, "Da'a iko to nikitaku ri pampa nosanggani-nggani ante Yesus pangane?" 27 Tapi nesapu wo'umo i Petrus, "Da'a!" Iwetu i Petrus notesa kaliu-liu nora'omo manu. 28 Dabobayana mpu'u Yesus nikeni iramo nggari sapo i Kayafas nalau mpaka ri sapo Gubernur. Topanggeniaka-topanggeniaka nto Yahudi da'a nesua riara sapo Gubernur etu, sabana ira da'a madota majadi matantoru nantuki Atura-atura agama ira. Nipowia ira iwetu ala ira mamala manggoni panggoni posusa Paska ngina. 29 Sabana etu i Pilatus nesuwu mpaka ri sawalikuna nosirata ka ira, pade nipekutanana ka ira, "Nuapa sala ntau e'i nipangadu komi?" 30 Nesonomo ira, "Ane I'a da'a tau naja'a natantu kami da'a madota manggeni I'a ri ja'i komi, Uma." 31 Nanguli i Pilatus ka ira, "Ala komimo I'a, pade ratangara komi mbotomo salana nantuki Atura-atura agama komi!" Tapi nesonomo tau-tau to Yahudi etu, "Kami da'a nipaloga mombasuku tau sampe mamate." 32 Etu najadi ala madupa tesa to niuli Yesus bopia nombaboto jala nggamatena. 33 Nangepe etu nesua wo'umo i Pilatus mpaka riara sapona pade nipakauna tau manggeni Yesus ri ja'ina. Pade nipekutanana ka Yesus, "Komimo Magau nto Yahudi?" 34 Nesonomo Yesus, "Pekutana etu nggari ja'i komi mboto, atau naria tau nanguli ka komi ewa Aku?" 35 Nanguli i Pilatus, "Aku e'i da'a tau to Yahudi! Tau-tau to Yahudi bo balengga-balengga topanggeni agama mbotomo to nanggeni Komi ri ja'iku. Sala nuapa ntoto nikawiamu?" 36 Nesonomo Yesus, "Poparentaku da'a nggari dunia e'i. Ane rapana Aku magau nggari dunia e'i natantumo topantuki-topantuki Aku kana meewa ala Aku ne'e rasoko bo rakeni ri ja'i topanggeniaka-topanggeniaka nto Yahudi. Tapi poparentaku da'a nggari dunia e'i." 37 Pade nekutana wo'umo i Pilatus ka I'a, "Ane iwetu tanu, magau mpu'u Komi?" Nesonomo Yesus, "Ewa niuli komi etu nakono, Aku e'i samba'a magau. Aku nipoanaka pade nomai riara dunia ante patuju mompatolele pepatuduki to nakonona. Isema-sema to natundu riara pepatuduki to nakonona, ira etumo to nompetalinga Aku." 38 Nekutanamo i Pilatus, "Nuapa ntoto pepatuduki to nakonona?" Naopu etu nesuwu wo'umo i Pilatus nggariara njapona mpaka ri sawalikuna, pade niulina ka tau-tau to Yahudi, "Da'a ntoto naria sangaya sala ntau etu nirataku. 39 Tapi nantuki kabiasa komi, ane Eo Bete Paska aku kana manggabasaka ka komi samba'a tau nitarunggu. Madota komi kukabasaka ka komi Magau nto Yahudi etu?" 40 Tapi nongaremo ira ante suara namangga, "Ne'e! Ne'e I'a rakabasaka! Agina i Barabas rakabasaka ka kami!" Barabas etu samba'a parampo.

19

1 Naopu etu i Pilatus nompakau tantara-tantarana mombaporo Yesus. 2 Naopu nombaporo I'a, tantara-tantara etu nompowia saongu songgo nggari karui pade nipoposonggo ira ka Yesus. Naopu etu nipasua ira ka I'a santonga baju nakamumu ewa baju magau. 3 Pade ira tunggai nompakamosu Yesus nompongei-ngei I'a ante nanguli, "Ratoiyata Magau nto Yahudi!" Pade nisapa-sapa iramo lenje Yesus. 4 Naopu etu nesuwu wo'umo i Pilatus mpaka ri sawalikuna nanguli ka tau-tau to Yahudi, "Kita komimo! I'a kukeni mesuwu mpaka ri ja'i komi ala ranjani komi da'a ntoto naria salana nirataku." 5 Pade Yesus nikeni nesuwu ri sawalikuna nosonggo karui bo nobaju magau nakamumu. Pade nangulimo i Pilatus ka tau dea etu, "Kitamo! E'imo I'a!" 6 Sangga nanggita Yesus nongare-ngaremo balengga-balengga topanggeni agama bo topojaga-topojaga Sapo Mpepue, "Pakumo I'a ri kayu parika! Pakumo I'a ri kayu parika!" Nangulimo i Pilatus ka ira, "Ala komi mbotomo I'a, pade paku I'a ri kayu parika, sabana tau etu da'a ntoto naria salana nirataku." 7 Nesonomo tau-tau to Yahudi ka i'a, "Nantuki Atura-atura kami tau e'i masipato rapatesi sabana I'a nompangaku korona Ana nu Alatala!" 8 Sangga nangepe pantesa tau-tau to Yahudi etu nantambai kaeka rara i Pilatus. 9 Jadi nesua balimo i'a riara njapona pade Yesus wo'u nikeni nesua ri setu. Pade nekutanamo i Pilatus ka Yesus, "Tau nggari umba kakonona Komi e'i?" Tapi Yesus da'a nesono. 10 Jadi nanguli wo'umo i Pilatus ka I'a, "Iwenumo? Da'a madota Komi motesa ante aku? Da'a ninjanimu aku e'i nakuasa mombakabasaka Komi, pade nakuasa wo'u mombapaku Komi ri kayu parika?" 11 Nesonomo Yesus, "Da'a ntoto ria kuasamu ri ja'iku ane da'a niwai Alatala ka komi. Jadi tau-tau to nanggeni Aku ri ja'imu neliu mpu'u kabete silaka ira." 12 Sangga i Pilatus nangepe pantesa Yesus etu, nielonamo jala ala Yesus mamala rakabasaka. Tapi nongare wo'umo tau-tau to Yahudi, "Ane komi mombakabasaka tau etu komi da'a nowega ante Magau Kaisar! Isema-sema nompangaku korona samba'a magau, i'amo bali Magau Kaisar!" 13 Nangepe tesa tau-tau to Yahudi etu, nikeni Pilatusmo Yesus mpaka ri sawalikuna pade nekatokomo i'a ri kadera mpotangara to nosanga ka "Jaula Watu." Ane riara basa Ibrani sangana "Gabata." 14 Tempo etu nawela eo mpompakasadia tempo Posusa Paska, kira-kira ntongo eo. Nangulimo i Pilatus ka tau-tau to Yahudi, "E'imo magau komi!" 15 Tapi nongare-ngaremo ira, "Patesimo I'a! Patesimo I'a! Pakumo I'a ri kayu parika!" Nanguli i Pilatus ka ira, "Iwenu? Masipato aku mombapaku magau komi ri kayu parika?" Nesonomo balengga-balengga topanggeni agama, "Aga Magau Kaisar magau kami!" 16 Kaopuna i Pilatus nombawai Yesus ka tau-tau to Yahudi ala I'a rapaku ri kayu parika sampe mamate. Pade Yesus nikeni tantara-tantara nggari setu. 17 Nalaimo I'a nggari ngata etu ante nanjumbuaka mboto kayu rapomparika I'a mpaka ri peto'o to nosanga ka Peto'o Wuku Balengga. Ane riara basa Ibrani sangana "Golgota." 18 Ri setumo Yesus nipaku ira ri kayu parika. Nosanggani-nggani ante I'a naria wo'u romba'a tau ntanina to nipaku ri kayu parika, samba'a ri sabingga ngganana, samba'a ri sabingga njidina pade Yesus ri tatongona. 19 Naria dopi nitulisi nipakasadia i Pilatus to nipataka ri kayu pomparika Yesus to nanguli iwe'i: |scYESUS TO NAZARET, MAGAU NTO YAHUDI.|r 20 Dopi nitulisi etu nibasa nadea tau to Yahudi sabana peto'o Yesus nipaku ri kayu parika etu namosu ngata Yerusalem, pade tesa etu nitulisi riara tolungaya basa, etumo Basa Ibrani, Basa Latin, pade Basa Yunani. 21 Nanggita etu nangulimo balengga-balengga topanggeni agama ka i Pilatus, "Ne'e ratulisi komi 'Magau nto Yahudi.' Agina ratulisi komi 'Tau e'i nompangaku korona Magau nto Yahudi.' " 22 Tapi nesonomo i Pilatus, "Nuapa to nitulisiku etu, batena etumo!" 23 Naopu tantara-tantara nombapaku Yesus ri kayu parika ira nangala pakeana pade nibagi-bagi ira patabagia, simbau sabagia. Baju nggumbana wo'u niala ira, tapi baju etu da'a naria pojauna, aga nitanu wa'amo santonga lau. 24 Etu sampe tantara-tantara etu nanguli, "Ne'e raserita baju nggumba e'i. Agina kita mompenoa mowia nomoro. Isema mawela nomoro i'a mombarata baju e'i." Etu pura-pura najadi ala madupa tesa to nitulisi riara Buku Nagasa to nanguli iwe'i: "Ira nosibagi-bagi ka pakeaku, pade bajuku nipompenoa ira." Jadi nuapa to nipowia tantara-tantara etu nasimbayu ntoto ewa to nitulisi nggaolu. 25 Namosu ri pu'u kayu pomparika Yesus etu indona nenggore mpasanggani-nggani ante sampesuwu besi nu indona. Naria wo'u i Maria rongo i Klopas pade i Maria Magdalena. 26 Sangga Yesus nanggita indona nenggore ri setu ri sinjori anaguruna to nipotowena, niulinamo ka indona, "Nindo, etumo anamu." 27 Pade niulina wo'umo ka anaguruna etu, "Etumo indomu." Jadi nompamula nggari eo etu, anaguru etu nantarima indo Yesus neto'o riara njapona. 28 Ninjani Yesus naopumo mpengele-ngele bagona. Jadi notesamo I'a ala madupamo tesa to nitulisi riara Buku Nagasa. Niulina, "Nabai tamboloku." 29 Ri setu naria saongu tubu niisi ante ue anggur to napoi. Jadi naria tau nangala sangele wunga to nasimbayu ewa lumu nitome ira riara ue anggur etu. Naopu etu nitosupaka ira wunga etu ri wuntu sanggoto kayu pade nipopoinu ira ka Yesus. 30 Naopu Yesus nanjasipi anggur etu niulina, "Naopu puramo bagoku." Naopu etu notunggoumo balenggana pade nalaimo nosana. 31 Eo etu eo mpompakasadia ka Eo Mpenonto, pade Eo Mpenonto etu nawela posusa Paska nto Yahudi. Topanggeniaka-topanggeniaka nto Yahudi da'a madota watabaku ntau nipaku ri kayu parika etu rapakela makambero ri setu tempo Eo Mpenonto. Jadi etu sampe ira nerapi ka i Pilatus ala kada tau-tau nipaku ri kayu parika etu raboba mpakakoto ala tau-tau etu masalisa mamate pade watabaku ira masalisa rata'uraka nggari kayu parika. 32 Jadi nalaumo tantara-tantara nombaboba mpakakoto kada-kada tau romba'a to nipaku ri kayu parika mpasanggani-nggani ante Yesus. 33 Tapi tempo ira narata ri ja'i Yesus nikita ira namatemo I'a. Jadi da'a najadi ira nombaboba mpakakoto kada Yesus. 34 Aga naria samba'a nggari tatongo tantara etu nombatosu usu Yesus ante tawalana. Pade kaliu-liu nesuwumo lei ante ue nggari usu Yesus. 35 Tau to nanggita kajadia etu ante matana mboto, i'amo to nompatolele kajadia etu ka komi ala komi wo'u momparasaya. Nakonomo tesana etu pade ninjanina mbotomo tesana etu nakono. 36 Pura-pura etu najadi ala madupa nuapa to nitulisi riara Buku Nagasa to nanguli iwe'i: "Da'a ria sampeka wukuna to rapakakoto." 37 Pade naria wo'u tesa ntanina riara Buku Nagasa to nanguli, "Ira kana mantingoa tau to nitosu ira tawala." 38 Naopu etu naria samba'a tau nosanga ka Yusuf nggari ngata Arimatea nalau nomperapi watabaku Yesus ka i Pilatus. Yusuf etu samba'a topantuki Yesus, aga da'a ninjani ntau sabana i'a naeka ka topanggeniaka nto Yahudi. Pomperapi Yusuf etu nipoiyo i Pilatus. Jadi nalaumo Yusuf nanta'uraka watabaku Yesus nggari kayu parika. 39 Nosanggani-nggani ante Yusuf naria wo'u i Nikodemus, tau to narata nanggita Yesus tempo nggawengina bopia. I'a nanggeni galo rampa-rampa nawongi nosanga ka mur bo gaharu, kira-kira tolumpulu kilo katomona. 40 Pade niala ira romba'a watabaku Yesus nisompu ira ante kae gandisi to nalusuna nosanggani ante rampa-rampa to nawongi etu nantuki ada nto Yahudi. 41 Namosu peto'o nipombapaku Yesus ri kayu parika naria salimpu pampa. Riara pampa etu naria saongu dayo nabou nipa'a ri bulu watu anu da'apa sanggani nipake. 42 Jadi watabaku Yesus niboli ira riara dayo etu, sabana namosumo dayo etu pade mana masaeka pamulana Eo Mpenonto.

20

1 Ri eo Aka kampadondo njiina nalaumo i Maria Magdalena mpaka ri dayo Yesus. Sangga naratapa i'a ri dayo nikitanamo watu nipompiku dayo etu nikaliakamo nggari pewobo dayo etu. 2 Jadi nangowamo i'a mpaka ri ja'i Simon Petrus bo anaguru to nipotowe Yesus etu, pade niulina ka ira, "Niala ntaumo watabaku Yesus nggariara dayo, pade da'a ninjani kami bara ri umba nipomboli ira!" 3 Nangepe etu nalaimo i Petrus bo anaguru ntanina etu mpaka ri dayo. 4 Nangowamo ira romba'a mpaka gusa'a tapi anaguru ntanina etu neliu nggagasipa pade i Petrus. Jadi i'a nokolu narata ri dayo. 5 Sangga naratapa i'a ri dayo notunggoumo i'a nompeside riara dayo. Nikitana kae gandisi niposompu Yesus ri setu. Tapi i'a da'a nesua riara dayo etu. 6 Pade naratamo i Simon Petrus nggapurina. I'a kaliu-liu nesua riara dayo etu. Nikitana kae gandisi niposompu Yesus ri setu. 7 Pade nikitana wo'u kae nipompo'u balengga Yesus. Tapi kae etu da'a nipasanggani ante kae gandisi etu, aga nilulu mpakabelo-belo niboli ri peto'o ntanina ri sinjorina. 8 Pade nesua wo'umo anaguru ntanina to nokoluna narata ri dayo etu. Nikitana kae etu pade niparasayanamo. 9 Tempo etu da'apa ninjani ira patuju tesa to nitulisi riara Buku Nagasa nggaolu to nanguli Yesus kana matuwu bali nggari kamatena. 10 Naopu etu nanjilimo ira romba'a mpaka ri sapo. 11 Tapi i Maria Magdalena danekanggore ri sawaliku dayo etu nageo-geo. Tempo i'a nageo ri setu notunggoumo i'a nompeside riara dayo. 12 Ri setu nikitana romba'a malaeka nobaju nabula nekatoko ri walea pomboli watabaku Yesus, samba'a ri balenggana pade samba'a ri kadana. 13 Pade nekutanamo malaeka-malaeka etu ka i Maria, "Nokuya komi nageo-geo?" Nesonomo i Maria, "Pueku niala ntaumo nggari se'i pade da'a ninjaniku ri umba nipomboli ira." 14 Naopu etu i'a nompeili ri talikuna nikitana Yesus nenggore ri setu, aga da'apa ninjanina I'amo Yesus. 15 Nekutanamo Yesus ka i'a, "Nindo, nokuya komi nageo-geo? Isema nielomu?" Niuli Maria bara topokarajaa ri pampa etu. Jadi nesonomo i'a ri ja'ina, "Uma, ane komimo to nangala watabakuna nggari se'i ulimo ka aku bara ri umba nipomboli komi ala aku mamala malau mangala I'a." 16 Nangulimo Yesus ka i'a, "Maria." Nangepe etu negoli ntaliku i Maria pade nangulimo i'a ante Basa Ibrani, |i"Rabuni!"|r Batuana "Guru." 17 Pade nangulimo Yesus ka i'a, "Ne'epa ruru Aku musoko, sabana Aku da'apa neore mpaka ri ja'i Umaku. Tapi kalaumo mpaka ri ja'i sampesuwu-sampesuwuku pade ulimo ka ira iwe'i: 'Aku malaumo mpaka ri ja'i Umaku bo Umamu, etumo Alatalaku bo Alatalamu.' " 18 Jadi nalaumo i Maria Magdalena mpaka ri ja'i anaguru-anaguru Yesus pade niulina, "Nikitakumo i Pue!" Pade nitesana wo'u ka ira pura-pura nuapa to nitesa Yesus ka i'a. 19 Ri eo Aka etu wo'u tempo nggawengina anaguru-anaguru Yesus nasiromu ri saongu sapo. Pewobo sapo etu nikunci sabana ira naeka ka topanggeniaka-topanggeniaka nto Yahudi. Sampegoli naratamo Yesus nekanggore ri tatongo ira, pade niulina ka ira, "Pue mombagane komi." 20 Naopu Yesus nombatabe ira iwetu nipopokitanamo ka ira palena bo usuna. Sangga nanggita Yesus nadamba mpu'umo rara ira. 21 Pade nanguli wo'umo Yesus ka ira, "Pue mombagane komi. Nasimbayu ewa Umaku nompakau Aku iwetu wo'u Aku mompakau komi." 22 Naopu etu nitawuinamo ira ante nosana pade nanguli, "Tarima komimo Nosa Nagasa nu Alatala. 23 Ane komi mombaampungi silaka ntau, silaka ira kana raampungi Alatala, pade ane komi da'a mombaampungi silaka ntau, silaka ira da'a wo'u raampungi Alatala." 24 Tomas, samba'a nggari sampulu romba'a anaguru Yesus, to niuli wo'u Ngana Norapi, da'a naria nosanggani-nggani ante roa-roana tempo Yesus narata nompopokita korona ka ira. 25 Jadi nangulimo anaguru-anaguruna ntanina ka Tomas, "Nikita kamimo i Pue!" Tapi nangulimo i Tomas, "Ane aku da'apa manggita walea paku ri palena pade mombadika koyampaleku ri walea etu bo mombadika paleku ri walea tawala ri usuna, da'apa ntoto kuparasaya." 26 Walumbengi kaliuna nasiromu wo'umo anaguru-anaguru Yesus riara njapo etu, pade i Tomas wo'u naria nosanggani-nggani ante roana ri setu. Pewobo nikunci puramo tapi naupa iwetu naratamo Yesus nenggore ri tatongo ira, pade niulina ka ira, "Pue mombagane komi." 27 Naopu etu niulina ka i Tomas, "Dikamo koyampalemu ri se'i. Kitamo paleku e'i. Pade dikamo palemu ri walea tawala ri usuku e'i. Ne'e mana mabata-bata raramu, tapi parasayamo." 28 Pade nangulimo i Tomas ka Yesus, "Pueku! Alatalaku!" 29 Nangulimo Yesus ka i Tomas, "Iko nomparasaya sabana iko nanggita Aku. Tapi neliu nggabelopa tau to nomparasaya nau da'a nanggita Aku." 30 Danadeapa tandai-tandai to nipogumaa ntanina to nikawia Yesus tempo I'a danaria nosanggani-nggani ante anaguru-anaguruna anu da'a nitulisi riara buku e'i. 31 Tapi nuapa to nitulisi riara buku e'i, patujuna ala manggeni komi momparasaya Yesus etumo mpu'u-mpu'u Magau to Mompakasalama, Ana nu Alatala. Pade patujuna wo'u ala komi mamala mombarata katuwua mabelo sampe ri kasae-saena ante momparasaya I'a.

21

1 Naopu etu Yesus nompopokita korona sangganipa ka anaguruna ri wiwi Rano Tiberias. Iwe'imo tesana. 2 Bara sakuya mba'a anaguru Yesus nasiromu ri setu, etumo i Simon Petrus, i Tomas to nidae Ngana Norapi, i Natanael nggari ngata Kana ri Bagia Galilea, bo romba'a ana i Zebedeus, pade romba'a anaguruna ntanina. 3 Nangulimo i Simon Petrus ka roa-roana, "Aku e'i malau mompemala bau ri rano." Nesonomo roa-roana, "Momai wo'u kami." Jadi nalaumo ira mpasanggani-nggani nesawi sakaya. Nojala baumo ira njambengi ntua tapi da'a ntoto ria bau namala ka ira. 4 Kampadondona etu Yesus nekanggore ri wiwi rano, tapi da'a ninjani anaguruna I'a etu Yesus. 5 Nangulimo Yesus ka anaguruna riara sakaya, "Iwenumo, ana-anaku? Naria bau nirata komi?" Nesonomo ira, "Da'a ntoto naria." 6 Nanguli Yesus ka ira, "Tendeakamo jala komi ri sabingga nggana sakaya etu pade komi kana mombarata bau." Jadi nitendeaka ira mpu'umo jala ri sabingga nggana sakaya etu. Sangga ira nombataja jala etu da'a mana nipakule ira sabana nadea mpu'u bau riarana. 7 Nanggita kajadia etu nangulimo anaguru to nipotowe Yesus ka i Petrus, "Etumo i Pue!" Sangga i Petrus nangepe tesa etu nialanamo bajuna nipasuana bali, sabana i'a nojala bau da'a nobaju. Pade nekawantumo i'a mpaka riara rano norabu mpaka ri kabatana. 8 Aga anaguru-anaguru Yesus ntanina etu nesawi sakaya mpaka ri kabatana ante nombataja jala naponu ante bau etu, sabana ira da'a nakawao nggari kabatana, kira-kira satu metere kakawaona. 9 Tempo ira nana'u nggariara sakaya nikita ira naria ruti nu apu to nipowia nggari wuri danarega ri setu, pade ri bunggu ruti nu apu etu naria bau ante roti. 10 Nangulimo Yesus ka ira, "Keni ri se'imo sanu bara sakuya mba'a bau to nipemala komi etu." 11 Jadi i Simon Petrus nesawi riara sakaya pade nitajana jala etu sampe ri kabatana. Jala etu naponu ante bau to nabetena, kadeana pura-pura satu limampulu bo tolumba'a. Tapi naupa iwetu kadeana, nau aga sambalaa lui jala etu da'a ria nadapa. 12 Pade niuli Yesus wo'umo ka anaguruna, "Kamaimo kita molalawo." Da'a ntoto naria to nabia nekutana ka Yesus, "Isema Komi?" Sabana ninjani ira puramo I'a etu i Pue. 13 Nalaumo Yesus nangala roti etu pade nitibo-tibona ka ira. Pade iwetu wo'u nipowiana ante bau. 14 Etumo katolungganina Yesus nompopokita korona ka anaguru-anaguruna naopu I'a natuwu bali nggari kamatena. 15 Naopu ira nanggoni nangulimo Yesus ka i Simon Petrus, "Simon, ana Yohanes, neliupa towemu ka Aku pade towe nu roa-roamu etu?" Nesonomo i Petrus, "Iyo, ninjanimu mboto, Pue, aku nompotowe Komi." Nanguli Yesus ka i'a, "Ane iwetu, piaramo ana-ana bimbaku." 16 Pade nekutanamo Yesus ka i Petrus karongganina, "Simon, ana Yohanes, iko nompotowe Aku?" Nesonomo i Petrus, "Iyo, ninjanimu mboto, Pue, aku nompotowe Komi." Nanguli Yesus, "Ane iwetu, poewumo bimba-bimbaku." 17 Pade nekutanamo Yesus ka i Petrus katolungganina, "Simon, ana Yohanes, iko nompotowe Aku?" Nangepe etu nasusa mpu'umo rara i Petrus, sabana tolungganimo Yesus nompekutana i'a, "Iko nompotowe Aku?" Jadi nesonomo Petrus ka I'a, "Pue, ninjanimu mpengele-ngele. Ninjanimu aku nompotowe Komi." Nanguli Yesus, "Ane iwetu, piaramo bimba-bimbaku. 18 Aku mpu'u-mpu'u notesa ka iko, tempo iko danamuda iko mboto noso'o kopemu pade nalau mpaka ri umba nipodotamu. Tapi ane iko matu'amo, iko kana mombawai palemu raso'o tau ntanina, pade iko kana rakeni ntau malau mpaka ri peto'o anu da'a nipokonomu." 19 Ante jalili etu Yesus nompakanoto jala nggamate i Petrus banepiana ala Pue Alatala rabila bo ratoiya. Naopu etu nanguli wo'umo Yesus ka i Petrus, "Ne'e menonto mantuki Aku!" 20 Naopu etu neilimo i Petrus pade nikitana anaguru to nipotowe Yesus nantuki purina. Anaguru etumo to nekatoko ri sinjori Yesus tempo ira nanggoni nggawengina pade nekutana, "Isema to mompobalu Komi, Pue?" 21 Sangga nikita i Petrus anaguru etu, nipekutanana ka Yesus, "Pue, nuapa majadi ante roaku ya'a?" 22 Nesonomo Yesus, "Ane Aku madota i'a matuwu sampe Aku manjili bali ri dunia e'i, etu da'a miki munjani. Tapi iko, ne'e menonto mantuki Aku!" 23 Nggari setu natolelemo kareba ri tatongo topomparasaya Yesus to nanguli anaguru to nipotowena etu da'a mamate. Tapi kakonona Yesus da'a nanguli anaguruna etu da'a mamate. To niulina, "Ane Aku madota i'a matuwu sampe Aku manjili bali ri dunia e'i, etu da'a miki munjani." 24 Aku e'imo anaguruna etu. Akumo to nantesa pura-pura kajadia etu. Pade aku e'i wo'umo to nantulisi etu pura-pura riara buku e'i. Pade ninjanita nuapa to nitesaku etu mpu'u-mpu'u nakono. 25 Danadeapa ntani-ntanina to nipowia Yesus. Ane rapana ratulisi pura-pura kajadia etu, kupekiri dunia e'i da'a masuka rapomboli pura-pura buku to ratulisi etu.