The New Testament of our Lord and Saviour Jesus Christ
1 - 16 Iwe'imo tuntu posisunju sanga ntotu'a Yesus Kristus, muli i Daud, to nipomuli Abraham: Abraham noana ka Ishak, Ishak noana ka Yakub, Yakub noana ka Yehuda bo sampesuwu-sampesuwuna, Yehuda njambokona i Tamar noana ka i Peres bo i Zerah, Peres noana ka i Hezron, Hezron noana ka i Ram, Ram noana ka Aminadab, Aminadab noana ka i Nahason, Nahason noana ka i Salmon, Salmon njambokona i Rahab noana ka i Boas, Boas njambokona i Rut noana ka Obed, Obed noana ka Isai, Isai noana ka Magau Daud, Magau Daud njambokona balu Uria noana ka i Salomo, Salomo noana ka i Rehabeam, Rehabeam noana ka Abia, Abia noana ka Asa, Asa noana ka Yosafat, Yosafat noana ka Yoram, Yoram noana ka Uzia, Uzia noana ka Yotam, Yotam noana ka Ahas, Ahas noana ka i Hizkia, Hizkia noana ka i Manasye, Manasye noana ka Amon, Amon noana ka Yosia, Yosia noana ka Yekhonya bo sampesuwu-sampesuwuna namosu tempona to Yahudi nidagi bo nitajiaka mpaka ri tana Babel. Sangga narata ri tana Babel, Yekhonya noana ka i Sealtiel, Sealtiel noana ka i Zerubabel, Zerubabel noana ka Abihud, Abihud noana ka Elyakim, Elyakim noana ka Azur, Azur noana ka i Zadok, Zadok noana ka Akhim, Akhim noana ka Eliud, Eliud noana ka Eleazar, Eleazar noana ka i Matan, Matan noana ka Yakub, Yakub noana ka Yusuf rongo i Maria, pade Maria to nangote Yesus to niuli Kristus. 17 Jadi nggari Abraham sampe narata ri Magau Daud naria sampulu patantapi mulina. Pade nggari i Daud sampe ri tempo to Yahudi nitajiaka mpaka ri tana Babel naria wo'u sampulu patantapi mulina. Pade nggari tempo to Yahudi nitajiaka mpaka ri tana Babel sampe ri pesuwu Kristus naria wo'u sampulu patantapi mulina. 18 Iwe'imo tesa pesuwu Yesus Kristus. Indona i Maria notingea ante Yusuf. Tapi da'apa ira norongo natianamo i Maria nggari kuasa Nosa Nagasa nu Alatala. 19 Yusuf, tingeana etu, samba'a tau to nanoa rarana. Da'a nadota i'a mompakaeya i Maria ri ngayo ntau dea. Jadi patujuna mompakaopu potingea ira nggalino. 20 Tempo Yusuf danompekiri patujuna etu i'a nangipi. Pade riara mpangipina etu i'a nanggita samba'a malaeka i Pue notesa ka i'a iwe'i: "Yusuf, muli i Daud, ne'e iko maeka mangala i Maria majadi rongomu, sabana ngana to nikatianana etu najadi nggari kuasa Nosa Nagasa nu Alatala. 21 I'a kana mangote samba'a ngana langgai, pade kana mupoposanga I'a Yesus sabana I'amo to mompakasalama todeana nggari silaka ira." 22 Etu pura-pura najadi ala mompakadupa tesa i Pue to niboto nabina nggaolu iwe'i: 23 "Samba'a randoo kana matiana pade mangote samba'a ngana langgai. Pade I'a kana rapoposanga Imanuel, to naria batuana 'Alatala nosanggani ante kita.' " 24 Jadi sangga nembangupa Yusuf nipowianamo ewa to niparenta malaeka etu ka i'a. Nialanamo i Maria najadi rongona, 25 tapi ira da'a nosampaturu sampe i Maria nangote anana langgai etu. Sangga nesuwupa ngana etu Yusuf nompoposanga I'a Yesus.
1 Yesus niote ri ngata Betlehem ri Bagia Yudea tempo Magau Herodes noparenta. Naopu etu naratamo tau-tau topande nanggita betu'e nggari sabingga kamataeona mpaka ri ngata Yerusalem, 2 pade nekutanamo ira, "Ri umbamo ngana to niote etu to majadi Magau nto Yahudi? Kami nanggita betu'e to nompakanoto pesuwuna nebulu ri pebuluna pade naratamo kami mombasomba I'a." 3 Sangga nangepe tesa etu natekajamo Magau Herodes, pade wa'a wo'u pura-pura pue ngata Yerusalem. 4 Jadi Magau Herodes nompasiromu pura-pura balengga topanggeni agama bo guru-guru agama pade nipekutanana ka ira, "Ri umba ngata pesuwu Magau to Mompakasalama to nijanji Alatala?" 5 Nesonomo ira, "Ri ngata Betlehem ri Bagia Yudea, sabana naria tesa nitulisi nabi nggaolu iwe'i: 6 'Iko ngata Betlehem ri Bagia Yudea, iko da'a ntoto ngata to neliu nggakedi nggari ngata-ngata ri bagia Yudea. Sabana nggari ja'imu kana meumba samba'a topanggeniaka to manggeniaka todeaku Israel.' " 7 Naopu etu Herodes nompokio nggalino tau-tau nggari kamataeona etu pade nipekutanana mpakabelo-belo tempo pebulu nu betu'e to nikita ira etu. 8 Naopu etu nipakauna ira mpaka ri ngata Betlehem. Niulina ka ira, "Kalaumo komi mangelo ngana etu mpakabelo-belo. Pade ane rarata komi I'a, uli ka aku, ala aku wo'u mamala malau mombasomba I'a." 9 Sangga nangepe tesa magau etu nanggaliwomo ira. Pade kitamo! Betu'e to nikita ira ri kamataeona nokolu ka ira sampe nenonto ri ntoto sapo to nipeto'o Ngana nggedi etu. 10 Tempo ira nanggita betu'e etu nadamba mpu'umo rara ira. 11 Sangga nesuapa ira rara njapo etu nikita iramo Ngana nggedi etu ante indona i Maria. Pade notimbakotumo ira nombasomba I'a. Naopu etu nibuka iramo peti pomboli mbara-mbara ira, pade nipesomba ira ka I'a pewai-pewai ira, etumo bulawa, bo rongele wongi to nasuli mpu'u olina to niuli kemenyan bo mur. 12 Naopu etu Alatala nompopanjani ka ira riara mpangipi ala ne'e manjili mpaka ri ja'i Magau Herodes. Jadi nanjilimo ira nantuki jala ntanina. 13 Sangga nanggaliwopa tau-tau topande nanggita betu'e etu naratamo samba'a malaeka i Pue nompopokita korona ka Yusuf riara mpangipina pade nanguli, "Pembangumo, kenimo masalisa Ngana etu ante indona mpaka ri tana Masir. Peto'omo ri setu sampe aku marata motesa wo'u ka iko. Sabana Magau Herodes nopatuju mangelo mompatesi Ngana etu." 14 Jadi nembangumo Yusuf pade wengi etu wo'u nikenina Ngana etu ante indona nalau mpaka ri tana Masir. 15 Pade neto'omo ira ri setu sampe Magau Herodes namate. Ante iwetu nadupamo tesa i Pue to niboto nabi nggaolu iwe'i: "Aku nompokio Anaku ala I'a momai nggari tana Masir." 16 Tempo nanotomo ka Magau Herodes i'a niakala tau-tau topande nanggita betu'e etu, narau mpu'umo rarana. Pade nipakauna tantarana malau mompatesi pura-pura ngana langgai noumuru rompae mpana'u ri ngata Betlehem bo bagia ri ntalilina. Umuru ngana to nipatesi etu nantuki kasaena pebulu betu'e to ninjanina nggari ja'i tau-tau topande nanggita betu'e etu. 17 Ante kajadia etu nadupamo tesa i Pue to niboto nabi Yeremia nggaolu iwe'i: 18 "Ri ngata Rama natiepe suara notumangi bo nageo mpajea. Etumo i Rahel nantangi ana-anana. I'a da'a madota rapakawoe rarana sabana anana mana ria." 19 Sangga namatepa Magau Herodes, naratamo samba'a malaeka i Pue ri tana Masir nompopokita korona ka Yusuf riara mpangipina. 20 Niulina, "Pembangumo, kenimo Ngana etu ante indona bo panjilimo komi mpaka ri tana Israel, sabana namatemo tau-tau to madota mompatesi I'a." 21 Jadi nembangumo Yusuf pade nikeninamo Ngana etu ante indona nanjili mpaka ri tana Israel. 22 Tapi tempo i'a nangepe lele Arkhelaus, ana Magau Herodes nanjambei umana noparenta ri Bagia Yudea, naekamo rarana mapola ri setu. Naopu i'a nangepe popatora nggari ja'i Alatala riara mpangipina, nalaumo ira mpaka ri Bagia Galilea. 23 Pade neto'omo ira ri ngata to nosanga ka ngata Nazaret. Ante iwetu nadupamo tesa to niboto nabi-nabi nggaolu ewa Magau to Mompakasalama iwe'i: "I'a kana rauli tau to Nazaret."
1 Tempo etu naratamo Yohanes Topediu nompatuduki ri karawa baina Bagia Yudea. 2 Niulina, "Kajeamo komi nggari silakamu sabana namosumo tempona Alatala moparenta ri dunia ewa magau!" 3 Yohanes etu tau to nipatuju riara tesa i Pue to niboto nabi Yesaya nggaolu iwe'i: "Naria samba'a tau nongare-ngare ri karawa baina iwe'i: Pakasadiamo jala ka i Pue! Pakanoa jala to ratukina!" 4 Yohanes etu nompake pakea nggari wulu nu unta. I'a nosulepe kulimba pade panggonina nggaboro bo ue wani. 5 Nadeamo tau narata ri ja'ina nggari ngata Yerusalem bo njumaongu Bagia Yudea bo pura-pura bagia namosu Binangga Yordan. 6 Ira pura-pura nompangaku silaka-silaka ira pade nidiu Yohanes ri Binangga Yordan ewa tandaina najeamo ira nggari silaka ira. 7 Tempo Yohanes nanggita nadea tau to Parisi bo tau-tau to Saduki narata radiu, niulina ka ira, "Komi topebagiu nasimbayu ewa ule! Isema nanguli komi mamala malai ala ne'e mawela pesuku Alatala to marata? Etu da'a nakono! 8 Ane mpu'u-mpu'u komi najeamo nggari silakamu, popokitamo etu ante pokainggumu to nabelo. 9 Ne'e rapekiri komi iwe'i: 'Kami e'i muli Abraham. Pesuku Alatala etu da'a rapawela ka kami.' Etu da'a wo'u nakono! Sabana kuuli ka komi, ane Alatala madota, watu-watu e'i mamala rapajadina muli Abraham. 10 We'i-we'i nasadiamo baliu rapotowo kayu sampe ri kale-kalena. Ane da'a ntoto ria wuana to nabelo, kayu etu kana ratowo pade ratajiaka riara apu. 11 Aku e'i nombadiu komi ante ue ewa tandaina najeamo komi nggari silakamu. Tapi maliu aku kana marata samba'a to neliu nggakuasa nggari aku sampe nau aga manjoko sapatuna aku da'a masipato. I'a kana mombadiu komi ante Nosa Nagasa nu Alatala bo apu. 12 I'a nasimbayu ewa samba'a tau nombawaro pae. Nariamo tapi ri palena. I'a kana mombawaro pura-pura paena sampe magasa, pade pae to namonona kana rabolina riara logona. Tapi warana kana rapalabuna riara apu to da'a ria kapaya-payana." 13 Tempo etu naratamo Yesus nggari Bagia Galilea mpaka ri Binangga Yordan ala radiu Yohanes. 14 Tapi Yohanes nompoara pomperapina etu. Niulina, "Kakonona akumo to masipato radiu Komi, da'a si Komi marata ri ja'iku ala radiu." 15 Tapi nangulimo Yesus ka i'a, "Diumo Aku we'i-we'i, sabana ante iwetu kita mompowia pura-pura to nipodota Alatala." Nangepe etu nasitujumo Yohanes nombadiu Yesus. 16 Naopu nidiu nesoremo Yesus nggari ue. Pade ewa nisuka tempona etu wo'u langi natebea pade nikitana Nosa Nagasa nu Alatala nana'u ri ja'ina ewa samba'a tonji banggebodo. 17 Pade nariamo suara nggari suruga nanguli, "E'imo Anaku to nipotoweku. I'amo to nikonoa raraku."
1 Naopu etu Yesus nikeni Nosa Nagasa nu Alatala nantende mpaka ri karawa baina ala rapesoba Magau nu Seta. 2 Ri setu patampulu eo patampulu mbengi Yesus da'a nanggoni nuapa-nuapa. Naopu etu naoro mpu'umo ta'ina. 3 Pade naratamo Magau nu Seta nompakamosu I'a ante nanguli, "Ane Iko mpu'u-mpu'u Ana nu Alatala pakaumo watu-watu e'i majadi roti." 4 Tapi nesonomo Yesus, "Naria nitulisi riara Buku Nagasa iwe'i: Da'a aga nggari roti manusia mamala matuwu, tapi nggari pura-pura tesa to nitesa nu Alatala." 5 Naopu etu Yesus nikeni Magau nu Seta mpaka ri ngata Yerusalem, ngata to nagasana etu, pade I'a nitu'una ri wumbu nu Sapo Mpepue. 6 Pade niulina ka Yesus, "Ane Iko Ana nu Alatala, potingganawumo Iko nggari se'i mpaka ri tana. Iko da'a ria mokuya sabana naria nitulisi riara Buku Nagasa iwe'i: 'Pue Alatala kana mompakau malaeka-malaekana mombajagai iko. Ira kana mantinande iko ante pale ira, ala kadamu ne'e mawela watu.' " 7 Tapi nesonomo Yesus ka i'a, "Naria wo'u nitulisi riara Buku Nagasa to nanguli iwe'i: 'Ne'e iko mombasoba Pue Alatalamu!' " 8 Pade sangganipa Yesus nikeni Magau nu Seta mpaka ri bunggu bulu to nalanga mpu'u. Pade nipopokitana ka I'a pura-pura poparenta to naria riara dunia e'i ante mpengele-ngele kuasana. 9 Pade niulina ka I'a, "Pura-pura etu kana kuwai ka Iko ane Iko mekadede mombasomba aku." 10 Tapi nesonomo Yesus ka i'a, "E, Magau nu Seta, palaimo iko nggari se'i! Sabana naria nitulisi riara Buku Nagasa iwe'i: 'Iko kana mombasomba Pue Alatalamu. Aga I'amo to masipato mupepue.' " 11 Nangepe etu nalaimo Magau nu Seta nompalasi Yesus, pade naratamo malaeka-malaeka i Pue nantulungi I'a. 12 Tempo Yesus nangepe lele Yohanes Topediu nitarunggu, natinggulimo I'a mpaka ri Bagia Galilea. 13 Narata ri setu nolinjamo I'a nggari ngata Nazaret nalau neto'o ri ngata Kapernaum ri wiwi Rano Galilea ri Bagia Zebulon bo Naftali. 14 Nipowiana iwetu ala madupamo tesa i Pue to niboto nabi Yesaya nggaolu iwe'i: 15 "Tana Zebulon bo tana Naftali ri jala mpaka ri rano ri sambote Binangga Yordan, ri Bagia Galilea to nipeto'o tau-tau da'a to Yahudi. 16 Tau-tau to natuwu ri karumauna ri setu nanggita reme to nabetena. Ira to naeka-eka mamate niwanta nu rememo." 17 Nompamula nggari tempo etu Yesus nompatolele ka tau-tau iwe'i: "Kajeamo nggari silaka komi, sabana namosumo tempona Alatala moparenta ri dunia ewa magau." 18 Naria sanggani Yesus nolumako ri wiwi Rano Galilea. Ri setu I'a nanggita romba'a tau nosampesuwu, etumo i Simon to nidae i Petrus ante tua'ina Andreas. Tempo etu ira nantendeaka jala nompemala bau ri rano etu sabana ira topompemala bau. 19 Nangulimo Yesus ka ira, "Kamaimo, tukimo Aku pade Aku mompatuduki komi mangelo tau majadi topantuki Alatala." 20 Nangepe etu kaliu-liu ira romba'a nompalasi jala ira ri setu pade nalau nantuki Yesus. 21 Naopu etu napolamo Yesus sampe I'a nanggita romba'apa tau nosampesuwu, etumo Yakobus bo Yohanes ana-ana i Zebedeus. Tempo etu ira nompakabelo jala ira riara saongu sakaya mpasanggani-nggani ante uma ira i Zebedeus. Yesus nompokio ira romba'a mantuki I'a. 22 Nangepe etu kaliu-liu ira nompalasi sakaya bo uma ira pade nalau nantuki Yesus. 23 Nalaumo Yesus nompebutu ngata ri Bagia Galilea. Ri ngata-ngata etu I'a nompatuduki tau ri sapo mpodade nto Yahudi pade I'a nompatolele Kareba Belo to nanguli mana masaeka Alatala moparenta ri dunia ewa magau. Pade nipakabelona pura-pura tau to naju'a bo nalente. 24 Karebana natolele mpaka ri umba-umba ri Bagia Siria, sampe tau-tau nanggeni ka I'a pura-pura roana to nawela mpengele ju'a bo kasusana, tau-tau nipesua seta, tau-tau nadola, pade tau-tau napunggu. Pade Yesus nompakabelo ira pura-pura. 25 Nadea mpu'u tau to nantuki I'a. Naria ira nggari Bagia Galilea, Bagia Sampulu Ngata, ngata Yerusalem, Bagia Yudea pade naria ira nggari bagia sambote Binangga Yordan.
1 Tempo Yesus nanggita tau dea etu, nantendemo I'a mpaka ri saongu bulu. Naopu I'a nekatoko ri setu naratamo topantuki-topantuki I'a ri ja'ina. 2 Pade nompamulamo I'a nompatuduki ira. Niulina, 3 "Nasana mpu'umo tau-tau aga netidombo ri ja'i Pue Alatala, sabana iramo to majadi todea riara Poparenta nu Alatala. 4 Nasana mpu'umo tau-tau to nasusa rara, sabana iramo to rapakawoe rarana. 5 Nasana mpu'umo tau-tau to naede rara, sabana iramo to mantarima pura-pura nuapa to nijanji Alatala. 6 Nasana mpu'umo tau-tau to mpu'u-mpu'u madota mowia dota Alatala, sabana iramo to rawai ka pompakule mowia to nipodota ira etu. 7 Nasana mpu'umo tau-tau to naasi matana nanggita roana, sabana iramo to rapoasi mata nu Alatala. 8 Nasana mpu'umo tau-tau to nagasa rarana, sabana iramo to manggita Alatala. 9 Nasana mpu'umo tau-tau to nompoposinggabelo roana, sabana iramo to rauli ana-ana nu Alatala. 10 Nasana mpu'umo tau-tau to rapandasa sabana madota mowia dota Alatala, sabana iramo to majadi todea riara Poparenta nu Alatala. 11 Nasana mpu'umo komi ane komi rasalaraka ntau atau rapandasa bara rauli sinja'i ntau sabana komi topomparasaya Aku. 12 Iwetu wo'u nipowia ntotu'a ira ka nabi-nabi nggaolu. Jadi pakadambamo raramu ane etu majadi ri ja'imu sabana nadea mpu'u rasi to nipakasadia ka komi ri suruga." 13 "Komimo gara nu dunia. Tapi ane gara majadi nameli natantu da'a namala rapakapaga bali. Gara etu mana ria gunana, aga ratajiaka pade ralonggo-longgo ntau. 14 Komimo reme nu dunia. Ngata ri bunggu nu bulu da'a namala ratabuniaka. 15 Iwetu wo'u da'a ria tau nombatunju poindo pade nombaladu ante tonda. Tapi poindo etu kana rabolina ri kalangana sampe pura-pura tau raranjapo rawanta remena. 16 Iwetu wo'u reme to naria riara nta'i komi kana rapopokita ka tau ntanina ala ira mamala manggita pokainggumu to nabelona pade mantoiya Umamu ri suruga." 17 "Ne'e rapekiri komi Aku e'i narata mompakalipo Atura-atura agama bo pepatuduki nabi-nabi. Karataku e'i da'a mompakalipo Atura-atura bo pepatuduki etu, tapi aga mompakanoto batuana to nakonona. 18 Aku mpu'u-mpu'u notesa ka komi, ane damaria langi bo dunia, da'a ntoto maria sambela nggari Atura-atura etu malipo, nau aga saongu huruf to neliu nggakedi bara saongu titik. Pura-pura Atura etu kana madupa. 19 Jadi isema-sema to nombaliunaka saongu parenta riara Atura-atura etu nau aga parenta to neliu nggakedina pade nompatuduki tau ntanina mompasiala pokaingguna etu, i'a kana majadi tau to neliu nggaede katuwuna riara Poparenta nu Alatala. Tapi isema-sema to natundu riara Atura-atura etu pade nompatuduki tau ntanina wo'u matundu riarana, tau etumo kana majadi tau to nalanga katuwuna riara Poparenta nu Alatala. 20 Sabana kuuli ka komi, ane pokainggumu da'a meliu ngganoa nggari pokainggu guru-guru agama bo tau-tau to Parisi natantumo komi da'a ntoto mamala majadi todea riara Poparenta nu Alatala." 21 "Natantu niepe komimo parenta to nitesa ka totu'ata nggaolu iwe'i: 'Ne'e mepatesi! Isema-sema mepatesi kana rasuku.' 22 Tapi kuuli ka komi, isema-sema narau rara ri ja'i sampesuwuna kana rasuku. Isema-sema nanguli sinja'i sampesuwuna kana rakeni ri ngayo Ntopolibu Bete Agama Yahudi. Pade isema-sema nanguli sampesuwuna todoyo kana ratajiaka riara apu naraka. 23 Sabana etu ane tempo komi malau manggeni pesombamu ka Alatala ri meja mpesomba pade matitora komi ka sampesuwumu to naju'a rarana ri ja'imu, 24 palasi ntanimo ruru pesombamu etu ri ngayo meja mpesomba. Pade patinggulimo komi mpaka ri ja'ina mosinggabelo bali ante i'a. Ane maopupa etu kalaumo komi mombawai pesombamu ka Alatala. 25 Ane komi malau ratangara ri ja'i ntopotangara, komi kana masasinta mosinggabelo bali ante balimu ri santongo jala. Sabana ane komi da'a mosinggabelo ante i'a, natantumo balimu etu kana mompakasala komi ri ja'i ntopotangara, pade topotangara etu kana mombawai komi riara mpale polisi, pade polisi etu kana mombasuaraka komi riara tarunggu. 26 Aku mpu'u-mpu'u notesa ka komi, natantumo komi da'a ntoto mamala rakabasaka nggariara tarunggu etu ane pura-pura salamu da'a mubayari." 27 "Natantu niepe komi parenta nggaolu iwe'i: 'Ne'e mogau sala ante tau da'a rongomu mboto.' 28 Tapi kuuli ka komi isema-sema mombalele mata samba'a besi ante dota rara mogau sala ante i'a, natantumo tau etu nireke nombabualo besi etu riara pekirina. 29 Ane mata ngganamu manggeni komi mowia silaka, su'i tajiakamo matamu etu. Nabelopa saongu sipa nu koromu malipo pade njumaongu koromu ratajiaka riara naraka. 30 Pade ane pale ngganamu manggeni komi mowia silaka, tompo tajiakamo palemu etu. Nabelopa saongu sipa nu koromu malipo pade njumaongu koromu mesua riara naraka." 31 "Naria wo'u tesa nggaolu nanguli iwe'i: 'Isema-sema madota mombasompo rongona besi i'a kana mombawai ka rongona sura tala.' 32 Tapi kuuli ka komi, isema-sema to mombasompo rongona besi to da'a nogau sala ante langgai ntanina i'a nompowia rongona besi etu nireke nebualo ane i'a raporongo langgai ntanina. Pade tau to nomporongo besi to nisompomo, i'a wo'u nireke nebualo." 33 "Niepe komi parenta to nitesa ka totu'ata nggaolu iwe'i: 'Ne'e mompalewa janjimu, tapi paratamo janji to nitesamu ri ja'i Alatala ante netunda.' 34 Tapi kuuli ka komi, ne'e ntoto metunda! Ne'e metunda ante manguli langi, sabana langi pekatoko nu Alatala. 35 Ne'e metunda ante manguli dunia, sabana dunia e'i polampi kada nu Alatala. Ne'e metunda ante manguli Yerusalem, sabana Yerusalem ngata nu Magau to Nakuasana. 36 Pade ne'e metunda ante manguli balenggamu mboto, sabana da'a nompakule komi mombabali wulu wo'omu nau aga sambalaa majadi mabula bara mawuri. 37 Tapi ane makono ulimo 'iyo,' pade ane da'a makono, ulimo 'da'a.' Tesa to neliu nggari etu nopu'u nggari ja'i Magau nu Seta." 38 "Niepe komi parenta nggaolu iwe'i: 'Mata kana rasambei ante mata, ngisi kana rasambei ante ngisi.' 39 Tapi kuuli ka komi ne'e mombabalasi tau to nompowia kaja'ana ka komi. Tapi ane maria tau mombasapa kalimpi ngganamu, wai ka i'a wo'umo kalimpi njidimu. 40 Pade ane maria tau manggeni komi ri ja'i ntopotangara sabana madota mangala bajumu, wai ka i'a wo'umo buyamu. 41 Ane maria tau mompasu'u komi manggolo mbara-mbarana saongu kilo kakawaona, kolomo mbara-mbara etu rongu kilo. 42 Waimo ka tau to merapi ri ja'imu, pade ne'e mompoara tau to marata manginda nggari ja'imu." 43 "Niepe komi parenta nggaolu iwe'i: 'Potowemo sanggamanusiamu pade porau raramo balimu.' 44 Tapi kuuli ka komi, potowemo balimu pade posambayamo ka tau-tau to mompandasa komi. 45 Sabana ante iwetu komi moinggu nasimbayu ewa Umamu ri suruga. I'a nompopebulu eo ka tau-tau naja'a bo tau-tau to nabelo. Pade I'a nompakadunggu uja ka tau-tau to nanoa pade ka tau-tau to nadenggona wo'u. 46 Ane komi aga mompotowe tau to nompotowe komi, natantumo Alatala da'a mombabalasi kabelomu etu. Sabana topomperapi balasitee wo'u noinggu ewa etu. 47 Pade ane komi aga najole ri ja'i roamu mboto, natantumo powiamu etu da'a neliu nggabelo nggari powia tau ntanina. Nau tau-tau da'a nangginjani Alatala wo'u noinggu iwetu! 48 Jadi komi kana moinggu mabelo pura nasimbayu ewa Umamu to naria riara suruga."
1 "Toramo, ne'e komi mompowia ada-ada to nipakatantu riara Atura-atura agama ri ngayo ntau dea ala rakita ira. Sabana ane iwetu pokainggu komi, powiamu etu da'a ntoto rabalasi Umamu ri suruga. 2 Jadi tempo komi mombawai doi petulungi ka tau nakasiasi, ne'e rapatolele powiamu etu ewa kabiasa ntau tumoni-moni nabelo rarana. Ira nombawai ka tau nakasiasi ri ngayo ntau dea riara sapo-sapo mpodade pade ri jala-jala rara ngata ala ratoiya ntau. Aku mpu'u-mpu'u notesa ka komi, nitarima iramo pura-pura balasi nu powia ira. 3 - 4 Tapi ane komi mombawai doi petulungi ka tau-tau nakasiasi waimo nggalino. Ne'e rapopanjani ka tau ntanina. Pade Umamu ri suruga to nanggita powiamu nggalino etu kana mombabalasi kabelomu etu." 5 "Tempo komi mosambaya, ne'e moinggu ewa tau-tau tumoni-moni nabelo. Ira nompokono nenggore mosambaya riara sapo-sapo mpodade pade ri sidu-sidu nu jala jama ala rakita ntau dea. Aku mpu'u-mpu'u notesa ka komi, nitarima iramo pura-pura asele nu posambaya ira. 6 Tapi ane komi mosambaya, pesuamo riara ntombimu pade pikumo pewobo. Posambayamo ka Umamu to da'a nikita. Pade Umamu to nanggita komi nosambaya nggalino kana mombabalasi komi. 7 Pade tempo komi mosambaya ne'e mompakandate posambayamu ante mombasili-sili tesa ewa kabiasa ntau da'a nosinjani ante Alatala. Ira nompekiri ante mosambaya mandate posambaya ira ratarima Alatala. 8 Jadi ne'e mompasiala pokainggu ira etu! Sabana ninjani Umamu mamimo nuapa to niparaluumu da'apa komi merapi nggari ja'ina. 9 Jadi posambayamo komi iwe'i: 'Uma kami to naria riara suruga, rabila kami sangamu. 10 Karatamo Komi moparenta ri dunia e'i, kajadimo dotamu ri dunia nasimbayu ewa ri suruga. 11 Waimo ka kami panggoni butu-butu eona. 12 Pade ampungimo silaka kami ewa kami wo'u nombaampungi tau-tau nowia sala ri ja'i kami. 13 Ne'e rapakamba kami rapesoba, tapi kabasakamo kami nggari kuasa Magau nu Seta. [Sabana Komimo Magau to nabaraka bo nakuasa sampe ri kasae-saena. Amin!'] 14 Ane komi mombaampungi tau-tau to nompowia sala ri ja'imu, Umamu ri suruga wo'u kana mombaampungi silaka komi. 15 Tapi ane komi da'a mombaampungi tau-tau to nompowia sala ri ja'imu, Umamu ri suruga da'a wo'u mombaampungi silaka komi" 16 "Ane komi mapuasa ne'e mompopokita lenje ewa tau nandasa ewa kabiasa ntau tumoni-moni nabelo. Ira tunggai nombabali lenje ira ala manoto ka tau ntanina ira napuasa. Aku mpu'u-mpu'u notesa ka komi, nirata iramo pura-pura balasi nggari powia ira etu. 17 Tapi ane komi mapuasa, pendo'umo bo salagamo wo'omu 18 ala ne'e ranjani tau ntanina komi mapuasa, aga ranjani Umamu ri suruga to da'a nikita. I'amo to manggita powiamu nggalino etu pade mombabalasi komi." 19 "Ne'e komi mompasiromu kakalumana ka koromu mboto ri dunia e'i. Sabana kakalumanamu ri dunia namala rakoni saipa bara tagara, pade peto'o pomboli kakalumanamu mamala ragero bo kakalumanamu etu rapangangga ntau. 20 Agina komi mompasiromu kakalumana ka koromu mboto ri suruga. Sabana ri setu kakalumanamu da'a namala rakoni saipa bara tagara, pade peto'o pomboli kakalumanamu da'a namala ragero bo rapangangga ntau. 21 Jadi ne'e mompasiromu kakalumana ri dunia, sabana ri umba kakalumanamu ri setu wo'u pekirimu. 22 Matamu nasimbayu ewa poindo nu koromu. Ane matamu mabelo, kana mareme sanggani njumaongu koromu. 23 Tapi ane matamu magawu, marumau sanggani njumaongu koromu. Jadi ane reme to naria riara nta'imu marumau, marumau mpu'u pura-pura katuwumu. 24 Da'a ria samba'a tau mamala majadi batua nggari romba'a madika. Sabana i'a kana magigi rarana ri ja'i madika to samba'ana pade mompotowe madika ntanina etu. Bara i'a kana mombabila madika to samba'ana pade momporau rara madika ntanina etu. Iwetu wo'u ane komi. Da'a mamala komi mepue sanggani ka Alatala bo manjarumaka mbara-mbara ri dunia e'i" 25 "Sabana etu kuuli ka komi, ne'e makini-kini rara mompekiri katuwu komi, bara nuapa rakoni komi atau rainu komi. Ne'e makini-kini mompekiri koro komi mboto bara pakea nuapa rapake komi. Sabana to napokona riara nggatuwuta da'a aga panggoni bo pakea. 26 Kitamo tonji-tonji ri laerawa! Ira da'a notuja pae, da'a nokato bara nomboli pae riara logo. Tapi naupa iwetu Uma komi ri suruga nombawai ka ira panggoni. Pade riara mpanggita Alatala katuwu komi neliupa nggari tonji-tonji. 27 Da'a ria gunana komi makini rara. Da'a ria samba'a nggari tatongo komi to nompakule mantambai umuruna nau aga sambengi ante makini-kini rarana. 28 Pade da'a wo'u naria gunana komi makini-kini mompekiri pakeamu. Kitamo bunga-bunga to natuwu ranggawoko. Bunga etu da'a nanggawia bara nantanu. 29 Tapi naupa iwetu kuuli ka komi, Magau Salomo to nakalumana mpu'u da'a ria pakeana to narambana ewa bunga-bunga etu! 30 Ane Alatala mompakaramba bunga-bunga ranggawoko to natuwu sampalai lau pade nipalabu riara apu, natantumo I'a kana mombawai ka komi pakea to niparaluu komi. Komi mpu'u-mpu'u tau to nakura pomparasaya! 31 Jadi ne'e komi makini-kini ante manguli, 'Nuapa rakonita, nuapa rainuta, bara pakea nuapa rapaketa?' 32 Pura-pura etu wo'u nielo tau-tau to da'a nomparasaya Alatala. Tapi pura-pura to niparaluu komi etu ninjani Umamu ri suruga. 33 Jadi pekoumo ruru ri ja'i Alatala pade tunggai mowia dotana pade pura-pura etu kana rapakagana ka komi. 34 Sabana etu ne'e makini-kini mompekiri bara nuapa majadi naile, sabana naile naria mboto kasusana. Kasusana eo e'i naganamo rapekirita eo e'i."
1 "Ne'e komi sakedi-sakedi mompakasala tau ala ne'e komi rapakasala Alatala. 2 Sabana iwenu komi mompakasala roamu iwetu wo'u Alatala mompakasala komi. Komi kana rabalasi nantuki potimba to nipake komi mboto ante tau ntanina. 3 Nokuya komi nanggita mpuli ri mata roamu, tapi baloti ri matamu mboto da'a ria nikitamu? 4 Iwenu komi nanguli ka roamu, 'Kamai kukaliaka mpuli nggari matamu,' tapi ri matamu mboto naria baloti? 5 Komi aga nagasi nompakasala roamu! Kaliaka ntanimo ruru baloti nggari matamu mboto pade komi mamala manggita ante manoto ala manggaliaka mpuli nggari mata roamu!" 6 "Ne'e rawai ka asu anu to nagasana ala ne'e ira megoli manggiki komi. Pade ne'e rawai ka wawu mutiara to nasuli olina ala ne'e ira aga mombalonggo-longgo bayangi." 7 "Perapimo nggari ja'i Alatala pade komi kana rawai, elomo pade komi kana mombarata, tinggedemo pewobo pade pewobo kana rabea ka komi. 8 Sabana isema-sema merapi i'a kana rawai, isema-sema mopaelo i'a kana mombarata, pade isema-sema mantinggede pewobo, i'a kana rabea ka pewobo. 9 Natantu da'a ria samba'a uma nggari tatongo komi to mombawai watu ka anana ane i'a merapi roti! 10 Pade da'a wo'u naria uma to mombawai ule ka anana ane i'a merapi bau. 11 Naupa komi tau to naja'a ninjani komi mombawai nuapa to nabelona ka ana-ana komi mboto. Ne'epa rauli Uma komi ri suruga. Natantumo I'a wo'u kana mombawai anu nabelo ka isema-sema merapi ri ja'ina." 12 "Jadi nuapa-nuapa to mupodota rapowia ntau ka komi, iwetu wo'u komi mowia ri ja'i ira. Sabana parenta etumo isi to napokona nggari njumaongu Atura-atura i Musa bo pepatuduki nu nabi-nabi nggaolu. 13 Pesuamo ri pewobo to napii, sabana pewobo bo jala mpaka ri naraka naluo, pade nadea wo'u tau to nantuki ri setu. 14 Tapi napiimo pewobo bo jala mombarata katuwua mabelo, pade sakedi lau tau to nombaratana." 15 "Komi kana mainga ri ja'i nabi-nabi topodawa. Ira narata ri ja'i komi notimoni-moni nalusu rarana ewa bimba, tapi kakonona riara nta'i ira naja'a mpu'u ewa asulako to nasoana. 16 Nggari pokainggu ira komi mamala mangginjani isema nabi topodawa. Natantu lemo ntasi da'a nowua lonja, pade walaa winti manu da'a nowua ntimu. 17 Iwetu wo'u kayu to nabelona kana mowua mabelo, tapi kayu da'a nabelo da'a wo'u mowua mabelo. 18 Da'a ria kayu to nabelona to da'a nowua nabelo. Pade da'a wo'u naria kayu da'a nabelo to nowua nabelo. 19 Butu-butu kayu to da'a nowua nabelo kana ratowo pade ratajiaka riara apu. 20 Jadi iwetu wo'u ante nabi-nabi topodawa. Ira manoto ranjani komi nggari pokainggu ira. 21 Da'a pura-pura tau to nekakai ka Aku 'Pue, Pue,' mamala majadi todea riara Poparenta nu Alatala, aga tau to nompowia dota nu Umaku ri suruga. 22 Ri kaopu nu dunia banepiana kana madea tau manguli ka Aku, 'Pue, Pue, kami nompasimbayu tesamu ka tau ntanina riara sangamu, pade riara sangamu wo'u kami nompopalai seta-seta nggari ja'i ntau. Pade nadeamo kabaraka to nipowia kami riara sangamu.' 23 Tapi Aku kana mombasono ira iwe'i: 'Da'a ninjaniku komi! Palaimo nggari se'i, komi to nompowia kaja'ana!' " 24 "Jadi isema-sema to nangepe tesaku pade nantuki tesa etu i'amo nasimbayu ewa tau to nanoto to nompowia sapona ri bunggu watu to narosona. 25 Sangga naratapa uja, nanggabuntumo ue pade sapo etu niburu mpoiri naramboso. Tapi da'a ria mokuya-kuya sapo etu sabana nipowia ri bunggu watu to narosona. 26 Tapi isema-sema to nangepe tesaku pade da'a nantuki tesa etu, i'amo nasimbayu ewa tau to nadoyona to nompowia sapona ri bunggu bone. 27 Sangga naratapa uja, nanggabuntumo ue pade sapo etu niburu mpoiri naramboso. Pade nadunggamo sapo etu sampe nagero puramo." 28 Sangga naopupa Yesus nompatuduki etu pura-pura ka todea, nasumara mpu'umo ira, 29 sabana akalana nopaguru nakuasa mpu'u, da'a ewa guru-guru agama ira.
1 Sangga notuapa Yesus nggari bunggu nu bulu, nadeamo tau nantuki I'a. 2 Tempo etu naratamo samba'a tau naju'a bete notimbakotu nombasomba Yesus, pade niulina, "Pue, ane Komi madota, Komi mamala mompakabelo ju'aku e'i." 3 Nangepe etu Yesus nangojo palena nanjoko tau etu ante nanguli, "Aku madota. Nabelomo ju'amu!" Pade kaliu-liu nabelomo ju'a ntau etu. 4 Pade nangulimo Yesus ka i'a, "Tora-tora, ne'e mutesa ka isema-sema nuapa to najadi ri ja'imu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo ju'amu." 5 Tempo Yesus nesua ri ngata Kapernaum naratamo samba'a balengga tantara Roma mpaka ri ja'ina. I'a nerapi ante mpu'u-mpu'u rarana ka Yesus, 6 "Pue, batuaku naju'a ntomo ri sapoku ria. I'a aga naturu ri setu sabana napunggu, pade nandasa mpu'u niepena." 7 Nangulimo Yesus ka i'a, "Aku malau mompakabelo i'a." 8 Tapi nangulimo balengga tantara etu, "Uma, aku e'i da'a masipato mantarima Komi riara njapoku. Aga ulimo sambela rombela pade batuaku etu kana mabelo. 9 Ninjaniku etu sabana aku wo'u samba'a tau to natundu ri ja'i balenggaku. Pade naria anabua-anabuaku to natundu ri ja'iku wo'u. Ane aku manguli ka samba'a anabuaku, 'Kalaumo,' i'a kana malau. Pade ane aku manguli ka anabuaku ntanina, 'Kamaimo ri se'i,' i'a kana momai. Pade ane aku manguli ka batuaku, 'Powiamo etu,' i'a kana mowia etu." 10 Sangga nangepe tesa etu nasumaramo Yesus, pade niulina ka tau dea to nantuki I'a, "Aku mpu'u-mpu'u notesa ka komi, nau ri ja'i ntau to Yahudi da'a ria sanggani nirataku pomparasaya ntau to naroso ewa pomparasaya ntau e'i! 11 Kuuli ka komi, tempo banepia madea tau da'a to Yahudi kana majadi todea nu Alatala. Ira marata nggari sabingga kamataeona bo kasolona pade mekatoko manggoni madamba-damba mpasanggani-nggani ante Abraham, Ishak bo Yakub riara Poparenta nu Alatala. 12 Tapi tau-tau to Yahudi mboto to masipato majadi todea riara Poparenta nu Alatala da'a mamala. Ira aga ratajiaka ri karumauna makawao nggari ja'i Alatala, pade ri setu ira aga mageo-geo bo mosinggiki baga ante kasusa rara." 13 Pade nangulimo Yesus ka balengga tantara etu, "Panjilimo. Nuapa to niparasayamu etu kana majadi." Pade ri tempo etu wo'u nabelomo ju'a nu batuana. 14 Naopu etu nalaumo Yesus mpaka ri sapo i Petrus. Ri setu nikitana matu'a besi i Petrus aga noturu sabana naju'a pane. 15 Nanggita etu Yesus nanjoko pale nu besi etu pade kaliu-liu nabelomo ju'ana. Naopu etu nembangumo besi etu nalau nangala panggoni nikenina ka Yesus. 16 Sangga nangguwiapa naratamo tau nanggeni roa ira to nipesua seta mpaka ri ja'i Yesus. Ante nanguli sambela I'a nompopalai seta-seta nggari ja'i ntau. Pade pura-pura tau to naju'ana wo'u nipakabelona. 17 Etu najadi ala madupamo tesa Alatala to niboto nabi Yesaya nggaolu iwe'i: "I'amo to nanggolo kasusata bo nompakabelo ju'a-ju'ata." 18 Naria saeo nadea tau nantalili Yesus. Nanggita etu nangulimo I'a ka anaguruna, "Kamaimo kita mpaka ri sambote rano." 19 Tempo etu naria samba'a guru agama to narata to ja'i Yesus ante nanguli, "Guru, ri umba-umba rakalau Komi aku kana mantuki Komi." 20 Nangulimo Yesus ka i'a, "Asulako naria bolona rapaturuna bo tonji naria jumuna, tapi Aku, Ana nu Manusia da'a ria peto'o kupaturu." 21 Naopu etu nangulimo samba'a topantuki I'a ntanina, "Pue, paloga ntanimo ruru aku manjili mombatana umaku. Naopu etu pade aku momai mantuki Komi." 22 Tapi nangulimo Yesus ka i'a, "Tukimo Aku! Waikamo tau-tau namate mombatana tau to namatena." 23 Naopu etu Yesus nesawi sakaya mpasanggani-nggani ante anaguruna, pade nalaimo ira nosakaya. 24 Tempo ira nosakaya sampegoli naratamo poiri naramboso nompakabete balumba ri rano sampe sakaya ira nibungu nu balumba. Tapi tempo etu Yesus naturu nalumpi. 25 Jadi nalaumo anaguruna nombalike I'a ante nanguli, "Pue, tulungimo! Mamatemo kita!" 26 Nangulimo Yesus ka ira, "Nokuya komi naeka? Komi tanu tau to nakura pomparasaya!" Naopu etu nekanggoremo I'a pade nanguli, "Poiri ante balumba, penontomo!" Pade kaliu-liu naoto puramo rano etu. 27 Nanggita kajadia etu nasumara puramo anaguruna sampe ira nanguli, "Isema tanu kakonona tau e'i sampe poiri bo balumba natundu ri ja'ina?" 28 Naopu etu naratamo ira ri sambote rano ri bagia nto Gadara. Naratapa ira ri setu nesuwumo romba'a tau nggari tatongo dayo-dayo nosintomu ka Yesus. Ira romba'a etu nipesua seta. Nagila mpu'umo ira sampe da'a ria tau nabia moliu ri setu. 29 Nongare-ngaremo ira romba'a, "O, Ana nu Alatala! Nuapa urusamu ante kami, mai mompandasa kami nau da'apa tempona?" 30 Da'a nakawao nggari setu nadea wawu nangelo panggonina. 31 Jadi seta-seta to nesua riara ntau romba'a etu nerapi ka Yesus, "Ane Komi mompopalai kami nggari ja'i ntau e'i, palogamo kami mesua ri ja'i wawu-wawu etu!" 32 Nangulimo Yesus ka seta-seta etu, "Palaimo!" Jadi nesuwumo seta-seta nggari ja'i ntau romba'a etu pade nolinja nesua ri ja'i nu wawu-wawu. Iwetu nipesua seta-seta nangowa puramo wawu etu notingganawu nggari wiwi bingge mpaka riara rano sampe namate natala riara rano. 33 Sangga nanggita kajadia etu nalaimo tau-tau topanggatono wawu mpaka riara ngata. Pade nitesa ira puramo nuapa to najadi ri ja'i wawu ira bo ri ja'i ntau romba'a to nipesua seta pane'a. 34 Nangepe etu nalaumo pura-pura pue ngata mosirata ka Yesus. Sangga naratapa ri ja'i Yesus nerapimo ira ante mpu'u-mpu'u rara ala I'a mompalasi bagia ira etu.
1 Naopu etu nesawi sakayamo Yesus nanjili mpaka ri sambote rano sampe narata ri ngata to nipeto'ona. 2 Ri setu naratamo bara sakuya mba'a tau nombakowa roa ira to napunggu naturu ri ompa paturuna mpaka ri ja'i Yesus. Sangga nanggita karoso nu pomparasaya ira, nangulimo Yesus ka topunggu etu, "Anaku, pakaroso raramu. Silaka-silakamu niampungimo." 3 Nangepe tesa Yesus etu bara sakuya mba'a guru agama ri setu nompekiri riara nta'i ira, "Tau e'i nompakakedi Alatala!" 4 Tapi ninjani Yesusmo pompekiri ira. Etu sampe I'a nanguli ka ira, "Nokuya komi nompekiri naja'a iwetu riara nta'imu? 5 Umba to neliu nggamuda rauli, 'Silakamu niampungimo,' atau manguli, 'Pekanggore pade polumakomo?' Natantu neliu nggamuda manguli, 'Silakamu niampungimo.' 6 Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia e'i." Pade nangulimo I'a ka topunggu etu, "Pekanggoremo! Onggotaka ompa paturumu pade patinggulimo!" 7 Nangepe etu nekanggoremo topunggu etu, pade nanjilimo i'a mpaka ri sapona mboto. 8 Nanggita kajadia etu naekamo rara ntau dea ri setu. Pade ira nantoiya Alatala sabana I'a nombawai kuasa to nabetena ewa etu ka manusia. 9 Naopu etu nalaimo Yesus nggari setu. Tempo I'a noliu ri ngata etu nikitana samba'a topomperapi balasitee nekatoko riara kantorona. Sangana i Matius. Nangulimo Yesus ka i'a, "Kamaimo, tukimo Aku!" Nangepe etu nekanggoremo Matius pade nalaumo i'a nantuki Yesus. 10 Naopu etu Yesus ante anaguruna nalau nanggoni ri sapo i Matius. Pade ri setu nadea wo'u topomperapi balasitee bo tau-tau ntanina to nasilaka nasiromu nanggoni mpasanggani ante ira. 11 Sangga nanggita etu nangulimo bara sakuya mba'a tau to Parisi ka anaguru Yesus, "Nokuya gurumu nanggoni mpasanggani-nggani ante topomperapi balasitee bo tau-tau to nasilaka?" 12 Tesa ira etu niepe Yesus. Jadi niulina ka ira, "Da'a tau to naroso korona paraluu rapakuli dokutoro, aga tau to naju'ana. 13 Kau pegurumo batua nu tesa Alatala to nanguli iwe'i: 'To nipodotaku ala komi maasi mata ri ja'i tau ntanina. Da'a nipodotaku binata-binata rakeni rasambale ka Aku.' Sabana patuju karataku ri dunia e'i da'a mompokio tau-tau to nanoa rarana, tapi ala mompokio tau-tau nasilaka." 14 Naliu etu naratamo bara sakuya mba'a topantuki Yohanes Topediu mpaka ri ja'i Yesus. Nekutanamo ira ka I'a, "Kami bo tau-tau to Parisi naoso napuasa nantuki ada-ada agamata. Nokuya anaguru Komi da'a napuasa?" 15 Nesonomo Yesus ka ira ante porapa iwe'i: "Masipato torata mapuasa bo masusa rara ri posusa mponika tempo boti langgai danosanggani ante ira? Natantumo da'a! Tapi kana marata tempona boti langgai raala nggari ja'i ira. Tempo etu pade ira mapuasa." 16 Nanguli wo'umo Yesus, "Da'a ria samba'a tau nombatampala baju to narantana ante tampala kae to nabouna. Sabana tampala kae to nabouna etu kana mosimpakuru mompakaseri baju to narantana etu sampe mantambai kaja'ana seri nu baju etu. 17 Iwetu wo'u ante ue anggur. Da'a ria samba'a tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu sampe masowe wetumo ue anggur pade marugi pombolina. Ue anggur to nabouna kana raisi riara pomboli to nabouna wo'u. Ante iwetu pura-pura kana mabelo, nabeloka ue anggur, nabeloka pombolina." 18 Tempo Yesus danotesa, naratamo samba'a topanggeniaka ri sapo mpodade nto Yahudi. Nekadedemo i'a ri ngayo Yesus ante nanguli, "Anaku besi lako-lakopa namate. Tapi kamaimo mpaka ri sapoku, dikamo palemu ri korona pade i'a kana matuwu bali." 19 Nangepe etu nekanggoremo Yesus nalau nantuki tau etu. Pade anaguruna wo'u nantuki I'a. 20 Ri tatongo jala naria samba'a besi to sampulu rompaemo nangote lei. I'a nompakamosu Yesus nggari talikuna pade nikabena tampa nu baju Yesus, 21 sabana nipekirina riara nta'ina, "Nau aga bajuna kukabe kana mabelomo ju'aku." 22 Tempona etu Yesus nompeili nanggita besi etu. Pade niulina ka i'a, "Anaku, pakaroso raramu. Sabana iko nomparasaya Aku, nabelomo ju'amu." Pade tempo etu wo'u nabelomo ju'a nu besi etu. 23 Naopu etu napolamo Yesus mpaka ri sapo topanggeniaka ri sapo mpodade pane'a. Narata ri setu nikitana tau nantawui sasuli bo tau dea nakanano. 24 Niulina ka ira, "Palaimo komi pura-pura! Ngana besi etu da'a namate. I'a aga napisi." Nangepe tesa etu, ira aga nompongiri-ngiri Yesus. 25 Tapi naopu ira pura-pura nipopalaina, nesuamo Yesus ri ja'i ngana besi, nisokona palena pade kaliu-liu natuwu balimo i'a. 26 Naopu etu natolelemo kareba kajadia etu sampe ri njumaongu ngata ri bagia etu. 27 Tempona Yesus nompapola polumakona nggari setu ri tatongo jala naria romba'a toburo nantuki I'a ante nongare-ngare, "Muli i Daud! Potowemo kami!" 28 Tempo Yesus nesua riara saongu sapo, nesua wo'umo toburo romba'a etu nompakamosu I'a. Pade nekutanamo I'a ka ira, "Niparasaya komi Aku nakuasa mompakabelo matamu?" Nesono ira, "Niparasaya kami, Pue." 29 Naopu etu Yesus nanggabe mata ira ante nanguli, "Majadimo nantuki nuapa to niparasaya komi!" 30 Kaliu-liu nabelomo mata ira romba'a. Pade Yesus nantagi ira ante mpu'u-mpu'u. Niulina, "Ne'e ntoto ratesa ka tau-tau ntanina nuapa to najadi ri ja'imu etu." 31 Tapi sangga nalaipa nggari setu ira nompatolele kareba Yesus ri njumaongu bagia etu. 32 Sangga nalaipa romba'a toburo pane'a, naria wo'umo samba'a tau nikeni mpaka ri ja'i Yesus. Tau etu nabobomo sabana nipesua seta. 33 Jadi tempo seta etu nipopalai Yesus nggari ja'ina nasowamo i'a notesa. Nanggita kajadia etu nasumara mpu'umo todea sampe ira nanguli, "Kajadia ewa etu da'apa sanggani nikita ntau ri tana Israel e'i" 34 Tapi nangulimo tau-tau to Parisi ri setu, "A, tau e'i aga nompopalai seta ante kuasa nggari ja'i Magau nu Seta mboto!" 35 Naopu etu nalaumo Yesus nompebutu ngata. I'a nopaguru ri sapo-sapo mpodade ira bo nompatolele Kareba Belo to nanguli iwenumo ane Alatala moparenta ri dunia. Pade nipakabelona pura-pura tau to naju'a bo nalente korona. 36 Tempo I'a nanggita todea, naasi mpu'umo matana, sabana nandasamo ira pade da'a ria tau nantulungi ira ewa bimba da'a ria topoewuna. 37 Pade nangulimo Yesus ka anaguruna, "Nadeamo tau nasadia mantarima Kareba Belo. Ira nasimbayu ewa pae to natasamo, namalamo rakato. Tapi tau topokato da'a nadeaka. 38 Sabana etu komi kana merapi ka Pue ntinalu etu ala I'a mompakau tau malau mokato."
1 Yesus nompokio sampulu romba'a anaguruna mpaka ri ja'ina pade niwaina ka ira kuasa mompopalai seta-seta bo kuasa mompakabelo mpengele-ngele ju'a bo kalente nu koro ntau. 2 E'imo sanga sampulu romba'a anaguru etu: Pamulana i Simon to nidae i Petrus, pade naria wo'u Andreas tua'i i Petrus, Yakobus ana i Zebedeus bo Yohanes tua'i Yakobus, 3 i Filipus bo i Bartolomeus, i Tomas bo i Matius topomperapi balasitee, Yakobus ana Alfeus, i Tadeus, 4 i Simon to Zelote, pade Yudas Iskariot to mompobalu Yesus ka balina banepia. 5 Ira sampulu romba'a nipakau Yesus ante tewai-tewai iwe'i: "Ne'e malau mpaka ri ngata-ngata tau-tau da'a to Yahudi bara mpaka ri ngata-ngata nto Samaria. 6 Kalaumo ruru mpaka ri ja'i ntau to Yahudi, muli Israel to nasimbayu ewa bimba-bimba to natontona. 7 Kalaumo bo patolele ka ira iwe'i: 'Namosumo ntoana Alatala moparenta manusia ri dunia e'i ewa magau.' 8 Pakabelo tau-tau to naju'a, pakatuwu bali tau-tau to namatena, pakabelo tau-tau to naju'a bete, popalai seta-seta to nesua riara nta'i ntau. Kuasa etu niwai bayangi ka komi. Jadi wai wo'u bayangi ka tau ntanina nuapa to niwai ka komi etu. 9 Ne'e rakeni komi bulawa bara salaka bara doi tambaga riara karepemu. 10 Ne'e rakeni komi batutu rapomboli baku. Ne'e rakeni baju rontonga, bara sapatu atau lembau, sabana topokarajaa masipato rapatuwu tau-tau to nitulungina. 11 Ane komi mesua riara kota bara ngata elomo samba'a tau to nabelo rarana mantarima komi rara njapona. Pade peto'omo komi ri ja'ina sampe komi malai mompalasi ngata etu. 12 Tempo komi mesua rara njapo ntau, ulimo ka pue njapo iwe'i: 'Perapi Pue mombagane komi.' 13 Ane nabelo rara pue njapo etu pade ira mantarima komi, nuapa to niperapi komi nggari ja'i Alatala etu kana maroo ri ja'i ira. Tapi ane ira da'a madota mantarima komi, asele mpeganemu etu da'a mawela ira. 14 Ane maria pue njapo bara pue ngata da'a madota mantarima komi atau da'a madota mangepe tesa komi, palaimo komi nggari sapo bara ngata ira pade sapunaimo sowu nggari kada komi ewa tandaina ira kana rasuku Alatala banepia. 15 Aku mpu'u-mpu'u notesa ka komi, ri kaopu nu dunia banepia meliu nggatomo pesuku Alatala ka ira pade pesuku to rapawela ka pue ngata Sodom bo Gomora to naja'a mpu'u pokainggu ira!" 16 "Kitamo! Aku nompakau komi malau ri tatongo tau-tau naja'a nasimbayu ewa bimba-bimba ri tatongo asulako. Jadi komi kana mata'u ewa ule bo monondo ewa tonji banggebodo. 17 Komi kana mainga ri ja'i pura-pura tau sabana komi kana rakeni ratangara ri ngayo ntopotangara. Pade komi kana raboba riara sapo-sapo mpodade. 18 Komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Etumo loga nabelo ka komi motesa ewa Aku ka ira bo ka tau-tau ntanina da'a to Yahudi. 19 Tempo komi rakeni ri ngayo ira ne'e maeka mompekiri nuapa ratesa komi ka ira bara iwenu komi mombasono ira. Sabana ri tempo etu wo'umo kana rawai ka komi tesa-tesa to masipato ratesa komi. 20 Tesa-tesa to rauli komi etu da'a tesa nggari pekiri komi mboto, tapi tesa nggari ja'i Nosa Nagasa nu Umamu Pue Alatala. I'amo to mokarajaa riara nta'i komi mompakanoto tesa nuapa to masipato ratesa komi. 21 Kana marata tempona tau mombawai sampesuwuna mboto rapatesi pade uma mombawai anana mboto rapatesi. Pade ngana-ngana kana mangewa indo uma ira mboto bo mompatesi ira. 22 Komi kana raporau rara ntau pura-pura sabana komi nomparasaya Aku. Tapi isema-sema maroo momparasaya sampe ri kaopuna kana rapakasalama. 23 Ane komi rapandasa ntau ri saongu ngata palaimo mpaka ri ngata ntanina. Aku mpu'u-mpu'u notesa ka komi, da'apa komi malau mompebutu ngata ri tana Israel Aku, Ana nu Manusia kana marata. 24 Samba'a anaguru da'a neliu nggari guruna. Samba'a batua da'a neliu nggari madikana. 25 Naganamo ane samba'a anaguru mombarasai ewa to nirasai guruna pade samba'a batua mombarasai ewa to nirasai madikana. Ane Aku niuli ntau Beelzebul, Magau nu Seta, neliu-liupa komi to najadi topantuki Aku. Komi wo'u kana rauli sinja'i ira." 26 "Jadi ne'e komi maeka ri ja'i ntau to mangewa komi. Sabana pura-pura pokainggu ira to nitampunisi kana rabonggaraka. Pura-pura to nitabuniaka natantumo rapakanoto. 27 Pura-pura to nitesaku ka komi tempo nggawengina kana ratesa komi tempo eona, pade nuapa to niposiwawayo ka komi kana raposilelei komi ka todea nggari bunggu nu ata. 28 Ne'e komi maeka ri ja'i ntau to madota mompatesi komi. Da'a ria kuasa ira mombasuku komi riara naraka. Tapi komi kana maeka ri ja'i Alatala to nakuasa mompatesi komi pade mombasuku komi riara naraka sampe ri kasae-saena. 29 Natantu ninjani komi tonji rone ane nipobalu olina romba'a saongu rupia. Tapi naupa da'a nadea olina ka manusia da'a ria samba'a tonji rone mamate ane da'a rapodota nu Umamu Pue Alatala. 30 Tapi komi neliu nggadeapa olina riara mpanggitana. Nau wulu wo'o komi mboto naopu puramo nibilana. 31 Jadi ne'e komi maeka, sabana neliu nggasulipa oli komi pade oli tonji rone nadea. 32 Isema-sema mompangaku Aku ri ngayo manusia, Aku wo'u mompangaku i'a ri ngayo Umaku Pue Alatala ri suruga. 33 Tapi isema-sema mombasapu Aku ri ngayo manusia, Aku wo'u mombasapu i'a ri ngayo Umaku ri suruga." 34 "Ne'e rapekiri komi karataku e'i manggeni posinggabelo ri dunia. Da'a nakono! Tapi karataku e'i mompoposinggarau tau. 35 Nggari karataku ngana langgai kana mangewa umana mboto, pade ngana besi mangewa indona, pade mania besi mangewa matu'ana besi. 36 Pade to najadi bali etumo ira saongu njapo mboto. 37 Tau to nompotowe uma bo indona neliupa nggari pompotowena ka Aku da'a masipato rauli topantuki Aku. Pade tau to nompotowe anana neliupa nggari pompotowena ka Aku da'a wo'u masipato rauli topantuki Aku. 38 Tau da'a nasadia mantuki Aku ante mpu'u-mpu'u rarana nau sampe mamate rapaku ri kayu parika, i'a da'a masipato rauli topantuki Aku. 39 Isema-sema da'a nasadia mamate sabana nantuki Aku, i'a da'a mombarata katuwua mabelo sampe ri kasae-saena. Tapi isema-sema nasadia mamate sabana mantuki Aku, i'amo to mombarata katuwua mabelo sampe ri kasae-saena. 40 Isema-sema mantarima komi topantuki Aku, i'a wo'u mantarima Aku. Pade isema-sema mantarima Aku, i'a wo'u mantarima Pue Alatala to nompakau Aku. 41 Isema-sema mantarima samba'a nabi nu Alatala sabana i'a mpu'u-mpu'u nabi nu Alatala, tau-tau etu kana mombarata tambo nasimbayu ewa to rawai ka nabi nu Alatala etu. Pade isema-sema mantarima samba'a tau nanoa rarana sabana i'a mpu'u-mpu'u tau nanoa, tau-tau etu kana mombarata tambo nasimbayu ewa to rawai ka tau nanoa rarana etu. 42 Pade isema-sema mantulungi topantuki Aku, nau aga mombawai saongu sanggiri ue rainu sabana i'a mpu'u-mpu'u topantuki Aku, natantumo tau-tau etu kana mombarata tambona banepia!"
1 Sangga naopupa Yesus nompatuduki sampulu romba'a anaguruna iwetu nalaimo I'a nggari setu ala mompatuduki tau pade mompatolele Kareba Belo riara ngata-ngata ri bagia etu. 2 Tempo etu Yohanes Topediu naria riara tarunggu. Nggari setu i'a nangepe lele nantesa pura-pura nuapa to nipowia Kristus. Jadi i'a nompakau bara sakuya mba'a anaguruna malau mompekutana Yesus. 3 Niulina ka ira, "Pekutanamo ka I'a iwe'i: 'Komi e'imo Magau to Mompakasalama to nijanji Alatala, bara damariapa ntanina to rapopea kami?' " 4 Sangga nangepe pompekutana etu nesonomo Yesus ka ira, "Panjilimo komi mpaka ri ja'i Yohanes pade uli ka i'a pura-pura nuapa to niepe pade nikita komi ri se'i. 5 Tau naburo namala nekita, tau napunggu namala nolumako, tau naju'a bete nipakabelo bali, tau nabongo namala neepe, tau namate nipakatuwu bali, pade Kareba Belo nggari ja'i Alatala nipatolele ka tau napakasi. 6 Nabelo ntotomo tau to da'a nokanggaura nomparasaya Aku." 7 Sangga nanjilipa anaguru-anaguru to nipakau Yohanes etu, nompamulamo Yesus notesa ka tau dea ewa katuwu Yohanes Topediu. Niulina, "Nuapa patuju komi nalau ranggarawana bopia? Aga manggita wio niburu mpoiri gusa'a guse'i? Natantu da'a iwetu. 8 Jadi nuapa patuju komi malau gusetu? Ala manggita samba'a tau nopakea nagaya? Natantu da'a wo'u, sabana tau nopakea iwetu aga neto'o ri sapo magau. 9 Jadi nuapa patuju komi malau gusetu? Ala manggita samba'a nabi? Nakono! Toramo! Yohanes neliu nggari nabi-nabi ntanina, 10 sabana i'amo to nitesa riara Buku Nagasa iwe'i: 'Kitamo! Aku mompakau batuaku mokolu nggari ja'imu, ala i'a mompakasadia jala ka Komi.' " 11 Nanguli wo'umo Yesus, "Aku mpu'u-mpu'u notesa ka komi, riara dunia e'i da'apa naria neumba samba'a to neliu nggalanga katuwuna nggari Yohanes Topediu. Tapi tau to neliu nggaede katuwuna riara Poparenta nu Alatala i'amo to neliu nggalanga katuwuna nggari ja'i Yohanes. 12 Nggari pamulana pokarajaa Yohanes Topediu sampe we'i-we'i todea nu Alatala niewa ntau to madota mombakuasai ira. 13 Nompamula nggari nabi-nabi nggaolu sampe Yohanes we'i-we'i pura-pura nabi bo tesa-tesa riara buku i Musa nombaboto tempo e'i. 14 Pade ane komi madota momparasaya tesa-tesa etu, Yohanes e'i nabi Elia to niboto mamimo nggaolu karatana. 15 Isema-sema naria talingana, epemo mpakabelo-belo tesaku e'i! 16 Aku motesa mompakanoto ka komi inggu tau-tau tempo we'i-we'i. Ira nasimbayu ewa ngana-ngana nekatoko ri potomu to nggari sampeto'ona nompongare roana to santanina iwe'i: 17 'Kami nantawui sasuli ala mompakadamba rara komi, tapi komi da'a ria nadamba. Kami nodade nasusa tapi komi da'a ria notumangi.' 18 Iwetu wo'u inggu ntau ri ja'i Yohanes bo Aku. Tempo Yohanes etu narata i'a napuasa pade da'a nanginu anggur, pade ira aga nanguli i'a nipesua nu seta! 19 We'i-we'i Aku, Ana nu Manusia narata. Aku nanggoni bo nanginu, tapi ira nanguli, 'Kitamo tau e'i! I'a samba'a tau nadoko bo nalangu to nowega ka tau topomperapi balasitee bo tau-tau nasilaka!' Tapi naupa iwetu, ane tau mantarima noto nggari ja'i Alatala kana manoto rakita aselena riara nggatuwu ira." 20 Naopu etu nompamulamo Yesus nangontiaka pue ngata to da'a najea nggari silaka ira naupa nadea mpu'u kabaraka nikawia Yesus ri ngata ira. 21 Niulina, "Umba komi, pue ngata Khorazim! Mandasa mpu'umo komi banepia! Pade mandasa mpu'umo komi to neto'o ri ngata Betsaida! Sabana ane rapana kabaraka-kabaraka to nikawiaku ri ngata komi etu kukawia ri ngata Tirus bo Sidon, natantu nasaemo ira tau-tau da'a to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to naja'ana. 22 Tapi kuuli ka komi, tempo Pue Alatala mombatangara manusia banepia, pesuku komi meliu nggatomo nggari pesuku to rapawela ka pue ngata Tirus bo Sidon. 23 Pade komi pue ngata Kapernaum, komi nompekiri bara komi etu raore sampe ri suruga! Tapi etu da'a ntoto nakono! Komi kana ratajiaka riara naraka! Sabana ane rapana kabaraka-kabaraka to nikawiaku ri ngata komi kukawia ri ngata Sodom to naja'a mpu'u, natantumo ngata etu da'a naropu, tapi batena naria sampe we'i-we'i. 24 Tapi kuuli ka komi, tempo Pue Alatala mombatangara manusia banepia pesuku komi meliu nggatomo nggari pesuku to rapawela ka pue ngata Sodom!" 25 Tempona etu nosambayamo Yesus. Niulina, "Uma, Pue nu langi bo dunia, Aku mosukuru ri ja'imu sabana pura-pura etu nitabuniakamu nggari ja'i tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna, 26 sabana etumo to nipodamba raramu, Uma." 27 Naopu etu nanguli wo'umo Yesus, "Mpengele-ngele niwai Umaku ka Aku. To mpu'u-mpu'u nosinjani ante Aku, Ana nu Alatala aga Umaku Pue Alatala. Da'a ria tau ntanina. Pade to mpu'u-mpu'u nosinjani ante Umaku aga Aku, Anana bo isema-sema kupodota mompopanjani I'a ka ira. 28 Kamaimo ri ja'iku, komi pura-pura to nalengemo bo to nanggeni ntomo. Aku mboto manggabasaka panggenimu. 29 Tukimo parentaku pade pegurumo ri ja'iku, pade komi kana masana raramu. Sabana Aku nalusu bo naede raraku. 30 Parenta-parentaku da'a nakaja ratuki, pade panggeni to kuwai ka komi nanga'a."
1 Tempo etu Yesus ante anaguruna noliu ri tinalu gando ri Eo Mpenonto. Tempo ira noliu ri setu nompamulamo anaguru Yesus nompui wua gando sakedi pade nionta sabana naoromo ta'i ira. 2 Nanggita powia ira etu nangulimo bara sakuya mba'a tau to Parisi ri setu ka Yesus, "Kitamo! Anagurumu nombaliunaka Atura-atura agamata ante nowia anu nitagi ri Eo Mpenonto!" 3 Tapi nesonomo Yesus ka ira, "Iwenumo? Da'apa nibasa komi tesa riara Buku Nagasa ewa powia i Daud nggaolu tempona i'a ante roa-roana naoro ta'i? 4 I'a nesua riara Sapo Alatala pade nikonina roti to nipesomba ka Alatala ri setu. Tapi kakonona nantuki Atura-atura agamata roti etu aga mamala rakoni topanggeni-topanggeni agama. Da'a masipato rakoni Daud ante roa-roana. 5 Bara da'apa wo'u nibasa komi to nitulisi riara Atura-atura agama. Ri Eo Mpenonto topanggeni-topanggeni agama nokarajaa riara Sapo Mpepue tapi ira da'a nireke nasala. 6 Toramo mpakabelo-belo nuapa kuuli ka komi e'i. Ri se'i naria samba'a to neliu nggapoko nggari Sapo Alatala. 7 Naria tesa nitulisi riara Buku Nagasa iwe'i: 'To nipodotaku ala komi maasi mata manggita roamu. Da'a nipodotaku binata-binata rakeni rasambale ka Aku.' Ane komi mpu'u-mpu'u nangginjani patuju tesa etu natantumo komi da'a nombasalaraka tau-tau to da'a nasala. 8 Sabana Aku, Ana nu Manusiamo to nakuasa ri Eo Mpenonto." 9 Naopu etu nalaumo Yesus nompalasi peto'o etu pade nesuamo I'a riara saongu sapo mpodade nto Yahudi. 10 Ri setu naria samba'a tau namate palena sabingga. Naria bara sakuya mba'a tau ri setu madota mangelo sala Yesus ala mompangadu I'a. Etu sampe ira nompekutana I'a, "Nantuki Atura-atura agamata masipato kita mompakabelo tau naju'a tempo Eo Mpenonto bara da'a?" 11 Nesonomo Yesus ka ira, "Ane rapana naria samba'a ri tatongo komi to naria bimbana nanawu ralowu nandala tempo Eo Mpenonto nuapa rakawiana? Natantumo i'a kana malau mombasoreaka bimbana etu nggariara lowu nandala etu! 12 Tapi samba'a manusia neliu nggadea olina nggari saongu bimba. Jadi ane iwetu, masipato kita mantulungi tau ri Eo Mpenonto!" 13 Naopu etu nangulimo Yesus ka tau to namate palena sabingga etu, "Ojomo palemu!" Tau etu nangojo palena, pade kaliu-liu nabelo balimo palena nasimbayu ewa palena to sabinggana. 14 Tapi tau-tau to Parisi ri setu nompalasi sapo mpodade etu pade nolibu mangelo jala mompatesi Yesus. 15 Yesus nangginjani patuju ja'a tau-tau to Parisi etu. Jadi nalaumo I'a nggari setu mpaka ri peto'o ntanina. Nadea tau nantuki I'a pade I'a nompakabelo pura-pura tau to naju'ana. 16 Pade nitagina ira ne'e motesa ka tau ntanina isema I'a. 17 Ante iwetu nadupamo Tesa nu Alatala to niboto nabi Yesaya nggaolu iwe'i: 18 "I'a e'imo Batuaku to nipelisiku. I'amo to nipotoweku bo nipodamba raraku. Nosa Nagasa kuwai ka I'a, pade I'a mompatolele ka pura-pura tau da'a to Yahudi parenta-parentaku nanoa. 19 I'a da'a mosinggarau, pade I'a da'a wo'u mongare-ngare. Suarana da'a wo'u raepe ntau ri jala jama. 20 Wolo naringgolu da'a rapakakotona, pade sumbu mpoindo jelana aga nakampido da'a rapopayana. I'a bate-batena mokarajaa sampe parenta to nanoana etu ranjani manusia. 21 Pade pura-pura manusia kana manjarumaka I'a." 22 Naopu etu naria samba'a tau nikeni mpaka ri ja'i Yesus to naburo bo nabobo sabana i'a nipesua seta. Pade Yesus nompakabelo tau etu sampe i'a namala notesa pade nekita bali. 23 Nanggita kajadia etu nogumaa mpu'umo tau dea ri setu sampe nosimpekutana ira samba'a bo samba'a, "Bara I'a e'imo Magau to Mompakasalama, Muli i Daud to nijanji Alatala nggaolu." 24 Tapi tempo tau-tau to Parisi nangepe tesa ntau dea etu nesonomo ira, "A, tau e'i kuasana nggari ja'i Beelzebul, Magau nu Seta. Etu sampe I'a namala nompopalai seta-seta." 25 Tapi ninjani Yesusmo pompekiri ira. Etu sampe niulina ka ira, "Ane rapana maria samba'a magau pade todea riara poparentana etu aga natibagi-bagi bo nosipobali, natantumo poparentana etu kana magero. Pade ane tau-tau ri saongu ngata bara ri saongu njapo aga natibagi-bagi bo nosipobali, natantumo ira kana magaro mosimpotatare. 26 Iwetu wo'u ane Magau nu Seta mompopalai roana seta-seta ntanina, batuana seta-seta aga natibagi-bagi bo nosipobali. Ane iwetu natantumo poparenta Magau nu Seta etu da'a maroo, aga magero wa'amo. 27 Niuli komi Aku nompopalai seta ante kuasa Beelzebul, Magau nu Seta. Tapi ane iwetu uli ka Aku ante kuasa isema roa-roa komi nompopalai seta-seta? Natantumo ante kuasa nggari ja'i Alatala! Jadi powia roamu mboto nompakanoto pombarata komi etu nasala! 28 Tapi Aku nompopalai seta-seta ante kuasa nggari ja'i Nosa Nagasa nu Alatala. Pade etu nompopokita ka komi Pue Alatala nompamulamo noparenta ri tatongo komi. 29 Iwenu tau mamala mesua riara njapo ntau to naroso ala mangala mbara-mbarana? Natantumo i'a nokolu mombabaga mantipunggu pue njapo to naroso etu. Pade naopu etu mamalamo i'a mangala mbara-mbarana etu. 30 Isema-sema da'a nosanggani ante Aku, i'amo baliku. Isema-sema da'a nantulungi Aku, i'a etu nombagero panggawiaku. 31 Jadi kuuli ka komi, mpengele-ngele silaka bo tesa nanguli sinja'i namala raampungi. Tapi ane tau manguli sinja'i Nosa Nagasa nu Alatala i'a da'a ntoto mamala raampungi. 32 Isema-sema motesa mangewa Aku, Ana nu Manusia mamala raampungi. Tapi isema-sema motesa mangewa Nosa Nagasa nu Alatala, da'a ntoto mamala raampungi, nabeloka we'i-we'i, nabeloka tempo banepiana. 33 Ane kayu to nabelona nabelo wo'u wuana. Ane kayu da'a nabelo, da'a wo'u nabelo wuana. Sabana nggari wua kayu etu, ninjani komi kayu etu nabelo. 34 Komi tanu tau-tau topebagiu ewa ule! Da'a ntoto namala komi notesa to nabelona sabana naja'a mpu'u raramu! Sabana nuapa to nitesa ntau aga nantuki nuapa to naria riara nta'ina. 35 Tau nabelo rarana nombatesa to nabelona, sabana to niboli riara nta'ina nabelo puramo. Pade tau naja'a rarana nombatesa to naja'ana, sabana to niboli riara nta'ina aga kaja'ana. 36 Jadi toramo! Ri Eo Mpotangara banepiana pura-pura tau kana mombatanggu butu-butu tesa naja'a to nitesana. 37 Sabana tesamu mboto rapake mompakanoto ane komi masala bara da'a." 38 Naopu etu nangulimo bara sakuya mba'a guru agama bo tau to Parisi ka Yesus, "Guru, kami madota manggita Komi mowia tandai to nipogumaa." 39 Tapi nesonomo Yesus ka ira, "Naja'a mpu'umo komi pura-pura! Komi da'a natutu natundu ri ja'i Alatala! Komi nerapi Aku mowia saongu tandai to nipogumaa. Tapi da'a ntoto kukawia etu ka komi! Tandai to rapopokita ka komi aga tandai ewa to najadi ri ja'i nabi Yunus nggaolu. 40 Nasimbayu ewa nabi Yunus naria riara nta'i bau bete tolumbengi tolueo kasaena, iwetu wo'u Aku, Ana nu Manusia kana maria riara dayo tolumbengi tolueo kasaena. 41 Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi to natuwu we'i-we'i. Pade ira kana mompakasala komi, sabana ira najeamo nggari silaka ira tempo ira nangepe tesa nabi Yunus ka ira. Tapi we'i-we'i naria ri tatongo komi samba'a to neliu nggakuasa nggari nabi Yunus, tapi komi da'a madota mantarima tesana. 42 Wa'a wo'u ri Eo Mpotangara magau besi nggari sabingga puluna kana rapakatuwu bali mpasanggani-nggani ante komi. Pade i'a kana mompakasala komi, sabana i'a narata nggari ngata to nakawao mpu'u ala mangepe pepatuduki Magau Salomo. Tapi we'i-we'i naria ri tatongo komi ri se'i samba'a to neliu nggakuasa nggari Magau Salomo, tapi komi da'a madota mantarima tesana." 43 "Tempo seta nesuwu nompalasi samba'a tau i'a nalau ranggarawa baina nangelo peto'o rapangosarakana, tapi da'a niratana. 44 Sabana etu i'a nanguli, 'Aginapa aku matingguli mpaka ri sapo to nipalasiku ria.' Sangga nanjilipa i'a niratanamo peto'o etu naboa, da'a ria topeto'o, pade sapo etu naopu nipegasa bo nipakasiayumo. 45 Pade seta etu nalau nompokio pitumba'a roana to neliu nggaja'a nggari i'a mboto. Pade naratamo ira nesua ri ja'i ntau etu pade naroo ri setu. Kaopuna katuwu ntau etu neliu mpu'umo kaja'ana nggari pamulana bopia. Iwetu wo'u to majadi ri ja'i tau-tau naja'a tempo we'i-we'i." 46 Tempo Yesus danotesa-tesa ka tau dea etu, naratamo indona bo sampesuwu-sampesuwuna. Ira nenggore ri sawalikuna madota motesa ka I'a. 47 Pade naria samba'a tau nalau nanguli ka Yesus, "Uma, naria indomu bo sampesuwu-sampesuwumu ri sawalikuna. Ira madota motesa ka Komi." 48 Nesonomo Yesus ka tau to notesa ka I'a etu, "Isemamo indoku bo isema sampesuwu-sampesuwuku?" 49 Nitujurakana anaguru-anaguruna pade niulina, "E'i puramo indoku bo sampesuwuku. 50 Sabana isema-sema nompowia dota Umaku ri suruga, ira etumo indoku bo sampesuwuku."
1 Ri eo etu wo'u nesuwumo Yesus nggari sapo etu nalau nekatoko ri wiwi rano. 2 Nadea mpu'u tau nasiromu nantalili I'a sampe I'a nalau nekatoko riara saongu sakaya, pade tau dea pura-pura nenggore ri wiwi rano etu. 3 Pade I'a nompatuduki mpengele-ngele pepatuduki ka ira ante nompake porapa. Niulina, "Naria samba'a tau nalau nosawu pae. 4 Tempo i'a nosawu naria sanu pae nanawu ri wiwi jala. Pade naratamo tonji-tonji nantunggu pae etu sampe naopu. 5 Naria wo'u sanu pae nanawu ri bunggu watu-watu to nakura tanana. Pae etu nasasinta natuwu sabana tana aga sakedi lau. 6 Tapi sangga napanepa eo, nalelemo pae lako natuwu etu. Nangau puramo sabana da'a nandalaka kalena. 7 Naria wo'u sanu pae nanawu raranggarui. Pade natuwumo karui nangoo pae etu sampe namate. 8 Naria wo'u sanu pae nanawu ri tana to naboyana pade nowua. Naria to nowua satu nggani kadeana, naria onompulu nggani, pade naria wo'u tolumpulu nggani kadeana. 9 Isema-sema naria talingana, epemo mpakabelo-belo tesaku e'i." 10 Naopu etu naratamo anaguru-anaguru Yesus nompekutana I'a, "Guru, nuapa sabana ane Komi notesa ka tau dea Komi nompake porapa?" 11 Nesonomo Yesus, "Sabana komimo to nipaloga mangginjani tesa ewa Poparenta nu Alatala to nitabuniaka nggari lamba pamulana, tapi tau dea da'a. 12 Tau-tau to nomparasaya Tesa nu Alatala kana ratambai ka ira pangginjani ewa Tesa etu, sampe meliu nggadea pangginjanina etu. Tapi tau-tau da'a nomparasaya Tesa nu Alatala, pangginjani tesa sakedi to naria ri ja'i ira kana raala nggari ja'i ira. 13 Etu sampe Aku notesa ka tau dea ante porapa. Sabana naupa ira nanggita da'a ninjani ira batuana nuapa to nikita ira, pade naupa ira nompetalinga da'a namala ira mantarima bo mangginjani batuana tesa etu. 14 Ante iwetu nadupamo Tesa nu Alatala to nipasimbayu nabi Yesaya nggaolu to nanguli iwe'i: 'Komi bate-batena mangepe tapi da'a ntoto ranjani komi batuana. Komi bate-batena manggita tapi da'a ntoto ranjani komi batuana kajadia to nikita komi. 15 Sabana tau-tau e'i netiwatumo. Ira aga netimbongomo, pade mata ira nitunggai nipisi ira mbotomo. Ane etu da'a nipowia ira mamala ira manggita nuapa majadi, mamala ira mangepe pade mangginjani batuana, mamala ira mangginjani sampe riara nta'i pade manjili ri ja'iku ala Aku mompakabelo ira.' " 16 Pade nanguli Yesus ka anaguruna, "Tapi komimo to nauntu mpu'u sabana mata komi nanggita nuapa to nipowiaku, pade talinga komi nangepe pepatudukiku. 17 Aku mpu'u-mpu'u notesa ka komi, nadea nabi bo tau-tau nanoa nggaolu nadota manggita nuapa to nikita komi, tapi da'a nikita ira. Ira mpu'u-mpu'u nadota mangepe nuapa to niepe komi, tapi da'a ria niepe ira." 18 "Epe komimo batuana porapa toposawu pae to nitesaku pane'a. 19 Pae to nanawu ri wiwi jala etu nasimbayu ewa tau-tau nangepe Tesa Poparenta nu Alatala tapi da'a ninjani ira patujuna. Pade naratamo Magau nu Seta nompakalipo Tesa etu nggariara nta'i ira. 20 Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade kaliu-liu nantarima tesa etu ante nadamba rara. 21 Tapi pomparasaya ira da'a naroso ewa tuja-tuja da'a naroso pokalena, sampe ira da'a naroo nomparasaya. Tempo ira nipandasa bo nipakasusa sabana nomparasaya Tesa etu, kaliu-liu nokanggauramo ira. 22 Pae to nanawu raranggarui nasimbayu ewa tau-tau to nangepe Tesa nu Alatala tapi ira aga nasiwu-siwu nompekiri katuwu ira mboto riara dunia e'i pade ira aga naino ka doi. Etu pura-pura nompakapii Tesa nu Alatala sampe da'a ria gunana riara nggatuwu ira. 23 Tapi pae to nanawu ri tana naboya nasimbayu ewa tau-tau to nangepe Tesa nu Alatala pade tesa etu ninjani ira patujuna sampe nadea mpu'u wuana to nabelo riara nggatuwu ira. Naria to nowua satu nggani kadeana, naria nowua onompulu nggani kadeana pade naria nowua tolumpulu nggani kadeana." 24 Naria porapa ntanina to nitesa Yesus ka tau dea etu. Niulina, "Poparenta nu Alatala nasimbayu ewa samba'a tau to nalau notuja pae to nabelona ri tinaluna. 25 Tapi tempo pura-pura tau naturu nggawengina, naratamo balina nombatuja jono ri tatongo tinalu pae etu pade nalaimo i'a. 26 Natuwumo pae etu sampe nesuwumo bulina, pade natikita wo'u jono natuwu ri tatongo pae etu. 27 Pade naratamo batua-batua pue ntinalu etu nanguli ka i'a, 'Uma, natantumo pae to nabelona to nituja komi ri tinalu etu. Jadi nggari umbamo jono etu?' 28 Nesonomo pue ntinalu, 'Etumo bago nu baliku.' Naopu etu nanguli wo'umo batua-batua etu, 'Uma, ane rapokono komi kami malau mombarebu jono etu.' 29 Tapi nangulimo pue ntinalu etu, 'Ne'e! Sabana ane komi mombarebu jono etu natantumo pae wo'u matirebu sanggani ante jono etu. 30 Palambamo jono etu matuwu mpasanggani-nggani ante pae sampe marata tempona mokato. Damo aku manguli ka topokato pae etu iwe'i: Pasiromu komi ntanimo ruru jono-jono etu, rapo'u komi pade rapalabu riara apu. Ane maopu jono etu rapalabu pasiromumo pae etu pade raboli komi riara logoku.' " 31 Naopu etu nitesa Yesus wo'umo ka ira saongu porapa ntanina. Niulina, "Pantambai kadea ntau to majadi todea riara Poparenta nu Alatala nasimbayu ewa saongu wua kayu to nakedi mpu'u to niala samba'a tau pade nikeni nitujana ri tinaluna. 32 Wua kayu etu to neliu nggakedi nggari wua kayu ntanina. Tapi tempo natuwumo wua kayu etu najadi sampu'u kayu to neliu nggabete nggari kawoko-kawoko ntanina. Wua kayu etu najadi sampu'u kayu bete sampe tonji-tonji narata mowia jumuna ri lolona." 33 Pade naria porapa ntanina to nitesana ka tau dea iwe'i: "Pantambai kadea ntau to majadi todea riara Poparenta nu Alatala nasimbayu ewa ragi to niala samba'a besi pade niposigalona ante patampulu lite labu nu gando. Kaopuna pura-pura labu nu gando etu nebombo." 34 Pura-pura pepatuduki etu nitesa Yesus ka tau dea ante mompake porapa. Da'a ria to nipatudukina ka ira ane da'a ante porapa. 35 Ane iwetu nadupamo tesa to niboto nabi nggaolu iwe'i: "Aku mompake porapa ane motesa ka ira. Aku kana motesa nuapa to nitabuniaka nggari lamba dunia nipajadi." 36 Naopu etu nalaimo Yesus nompalasi tau dea etu nalau nesua rara njapo. Pade naratamo anaguruna nanguli ka I'a, "Guru, tulungi tesa pakanoto ka kami batuana porapa to nitesa Komi ewa jono natuwu nosanggani ante pae." 37 Nesonomo Yesus, "Tau to notuja pae to nabelona etu nirapaka ewa Aku, Ana nu Manusia. 38 Tinalu etu nirapaka ewa dunia e'i. Pae to nabelona etu nirapaka ewa tau-tau to najadi todea nu Alatala. Pade jono etu nirapaka ewa tau-tau to najadi topantuki Magau nu Seta. 39 Bali to notuja jono etu nirapaka ewa Magau nu Seta. Tempo nokato etumo kaopu nu dunia banepia, pade tau-tau nokato etumo, malaeka-malaeka nu Alatala. 40 Nasimbayu ewa jono nipasiromu pade nipalabu riara apu, iwetu wo'u to majadi tempo kaopu nu dunia banepia. 41 Aku, Ana nu Manusia kana mompakau malaeka-malaekaku malau mompasiromu nggari tatongo todeaku pura-pura tau to nompakanawu roana riara silaka pade pura-pura tau ntanina to nompowia kaja'ana. 42 Ira pura-pura kana ratajiaka riara apu naraka to najela-jelana. Ri setumo ira aga mageo-geo bo mosinggiki baga ante kasusa rara. 43 Tempo etu tau-tau to nanoa pokaingguna kana mareme nasimbayu ewa mata eo riara Poparenta nu Uma ira Pue Alatala. Isema-sema naria talingana, epemo mpakabelo-belo tesaku e'i." 44 Nangulimo Yesus, "Poparenta nu Alatala nasimbayu ewa porapa e'i. Samba'a tau nombarata mbara-mbara to nasulina nitabuniaka riara tinalu ntau. Kaliu-liu niiwuna bali, pade nalaumo i'a ante kadamba nu rarana nompobalu pura-pura to naria ri ja'ina. Pade doi olina etu nipakena mangoli tinalu to nipombaratana mbara-mbara nasuli etu." 45 "Iwetu wo'u Poparenta nu Alatala nasimbayu ewa porapa e'i: Samba'a topodaga nalau nangelo sangele watu mutiara to neliu mpu'u kagayana. 46 Sangga niratanapa saongu watu mutiara to nasuli mpu'u olina, nalaumo i'a nompobalu pura-pura mbara-mbarana pade doi olina etu nipakena mangoli watu mutiara etu." 47 "Poparenta nu Alatala wo'u nasimbayu ewa porapa e'i: Saongu jala bau nitendeaka riara rano, pade nompengaya lenje bau nesua riarana. 48 Sangga naponupa jala etu nionggotaka ntopompemala baumo mpaka ri kabatana, pade ri setu ira nekatoko nompelisi bau etu. Bau to nabelona niboli ira riara tonda, tapi bau da'a nabelo nitajiaka ira. 49 Iwetu wo'u majadi ri kaopu nu dunia banepia. Malaeka-malaeka i Pue kana malau mompelisi tau-tau naja'a nggari tatongo tau-tau nabelo. 50 Tau-tau naja'a etu kana ratajiaka riara apu naraka to najela-jelana, pade ri setumo ira mageo-geo bo mosinggiki baga ante kasusa rara." 51 Naopu etu nekutanamo Yesus, "Ninjani komi puramo batuana porapa-porapa etu?" Nesonomo ira, "Iyo, ninjani kami puramo, Uma." 52 Pade nanguli wo'umo Yesus ka ira, "Butu mba'a guru agama to majadi topantuki Aku bo mantarima pepatuduki ewa Poparenta nu Alatala, tau etu nasimbayu ewa samba'a pue njapo to nompopesuwu parewa to nabou nosanggani-nggani ante parewa to nasaena nggariara peto'o pomboli kakalumanana." 53 Sangga naopupa Yesus nombatesa porapa-porapa etu nalaimo I'a nompalasi peto'o etu 54 mpaka ri ngatana mboto. Naratapa ri setu nesuamo I'a ri sapo mpodade nompaguru pue ngata etu. Natekaja rara ira nangepe tesana sampe ira nekutana, "Nggari umba tanu nipombaratana noto ewa etu? Pade nggari umba wo'u nipombaratana kuasa nompowia kabaraka-kabaraka? 55 Da'a I'a etu ana Yusuf topowia parewa nggari kayu? Da'a indona nosanga ka i Maria, pade sampesuwuna langgai ira Yakobus, Yusuf, i Simon bo Yudas? 56 Pade da'a wo'u sampesuwuna besi pura-pura neto'o ri ngatata e'i? Nggari umba pura nipombaratana noto bo kuasa etu?" 57 Pade naju'amo rara ira ri ja'ina. Tapi nangulimo Yesus ka ira, "Samba'a nabi nibila ntau ri umba-umba ngata ntanina, tapi ane ri ngatana mboto bara sapona mboto I'a da'a ria nibila." 58 Pade Yesus da'a nompowia nadea kabaraka ri setu sabana ira da'a nomparasaya.
1 Tempo etu topoparenta ri Bagia Galilea Magau Herodes. I'a nangepe kareba to nantesa powia Yesus 2 pade niulina ka pangga-pangga bete to nomporoa i'a, "Natantumo I'a etu Yohanes Topediu! Natuwu balimo i'a nggari kamatena! Etu sampe I'a nakuasa nompowia kabaraka-kabaraka!" 3 Iwetumo pompekiri Magau Herodes sabana bopia i'a nompakau tau nanjoko Yohanes bo nombaso'o i'a pade nombasuaraka i'a riara tarunggu. Herodes nowia iwetu sabana kajadia ante i Herodias, rongo i Filipus, sampesuwu i Herodes mboto to niala niporongo i Herodes. 4 Tapi Yohanes nangontiaka i Herodes. Niulina, "Nantuki Atura-atura agamata da'a masipato komi nomporongo i Herodias!" 5 Tempo etu i Herodes madota mompatesi Yohanes, tapi i'a naeka ka tau dea, sabana Yohanes nireke ira samba'a nabi. 6 Tempo posusa eo jadi i Herodes, ana randoo i Herodias nojoge ri ngayo pura-pura toposusa etu. Nadamba mpu'u rara i Herodes nanggita i'a nojoge 7 sampe i'a nojanji ante netunda ka randoo etu nuapa-nuapa raperapina kana rawaina ka i'a. 8 Nangepe tesa i Herodes randoo etu nerapi ka i'a nantuki pompakau indona iwe'i: "Wai ka aku ri se'i balengga Yohanes Topediu raboli riara santonga dula." 9 Nangepe pomperapi etu nasusamo rara i Herodes. Tapi naupa iwetu nipakauna tau nompowia nuapa to niperapi randoo etu, sabana i'a nojanji ri ngayo toposusa to nanggoni mpasanggani-nggani ante i'a. 10 Nipakaunamo tantarana malau ri tarunggu mombatompo tambolo Yohanes. 11 Pade balenggana niboli ira riara santonga dula nikeni niwai ka ngana randoo etu. Naopu etu randoo etu nanggeni balengga etu niwaina ka indona. 12 Sangga nangepepa nuapa to najadi, naratamo topantuki Yohanes nangala watabakuna, pade nitana iramo ri dayo. Naopu etu nalaumo ira notesa ka Yesus nuapa to najadi. 13 Tempo Yesus nangepe kareba kamate Yohanes nesawi sakayamo I'a njamba'ana nompalasi peto'o etu nalau mpaka ri peto'o nakalinoa. Tapi tempo tau dea nangepe Yesus nalaimo, ira wo'u nompalasi ngata-ngata ira nalau nantuki I'a. Aga ira nolumako ri kabatana. 14 Tempo Yesus nana'u nggariara sakaya nikitana nadea mpu'u tau nompopea I'a. Naasi mpu'umo matana nanggita ira, pade I'a nompakabelo ira to naju'a. 15 Sangga nangguwiamo da'a mana masaeka mawengi, naratamo anaguru-anaguru Yesus ri ja'ina pade nangulimo ira ka I'a, "Guru, peto'o e'i nakalinoa, pade mana masaeka mawengi. Agina tau dea etu rapakau matingguli ala ira mamala malau mpaka ri ngata-ngata namosu nggari se'i mangoli panggoni." 16 Tapi nangulimo Yesus ka anaguruna, "Da'a paraluu ira malau. Komimo mombawai ka ira panggoni." 17 Nesonomo anaguru-anaguruna, "To naria ri ja'i kami e'i aga limaongu roti pade romba'a bau." 18 Nangulimo Yesus, "Keni ri se'imo roti bo bau etu." 19 Naopu etu nipakauna tau dea nekatoko ri bunggu nggawoko. Pade nialanamo limaongu roti bo romba'a bau etu pade nantingoa langi nosambaya nanguli tarima kasi ka Alatala. Naopu etu nitubi-tubina roti etu pade niwaina ka anaguru-anaguruna ala ratibo-tibo ira ka tau dea. 20 Ira pura-pura nanggoni sampe nabosu. Naopu etu anaguruna nompasiromu bali labi panggoni to naboli, naponupa sampulu rotonda. 21 Kadea ira to nanggoni ri setu kira-kira limanjobu mba'a langgai, da'a nibila besi-besi ante ngana-ngana. 22 Naopu etu Yesus nompakau anaguru-anaguruna mesawi sakaya mokolu ka I'a mpaka ri sambote rano, pade nipakauna tau dea manjili mpaka ri ngata ira mboto. 23 Naopu I'a nompakau tau dea manjili, nantendemo I'a njamba'ana mpaka ri saongu bulu ala mosambaya. Tempo nawengimo I'a danaria ri setu njamba'ana. 24 Tapi tempo etu sakaya to nipesawi anaguru-anaguruna nakawaomo nggari kabatana ri tatongo rano. Sakaya etu nakalenga-lenga nikeni balumba bete sabana nantomu poiri bete. 25 Kira-kira tinti toluongu nggawengina naratamo Yesus nompakamosu ira nolumako ri bunggu ue rano. 26 Tempo anaguru-anaguruna nanggita I'a nolumako ri bunggu nu ue naeka mpu'umo rara ira. Nangulimo ira, "Etumo mboa!" Pade nongare-ngaremo ira ante naeka rara. 27 Tapi kaliu-liu Yesus nanguli ka ira, "Pakaroo rara komi! Aku Pue Yesusmo e'i! Ne'e maeka!" 28 Pade nangulimo i Petrus, "Pue, ane mpu'u-mpu'u Komi, pokiomo aku mpaka ri ja'imu molumako ri bunggu ue." 29 Nesonomo Yesus, "Kamaimo!" Jadi nana'umo i Petrus nggariara sakaya, pade nolumakomo i'a ri bunggu ue mompakamosu Yesus. 30 Tapi tempo i'a nanggita karoso nu poiri bete naekamo rarana. Nompamulamo i'a natala riara ue rano etu. Pade nongaremo i'a, "Pue, tulungimo aku!" 31 Jadi kaliu-liu Yesus nangojo palena nanjoko i Petrus. Pade niulina ka Petrus, "Nakura mpu'u pomparasayamu! Nokuya komi nolengga-lengga rara?" 32 Tempo ira romba'a nesawimo riara sakaya kaliu-liu nenontomo poiri bete etu. 33 Pade naratamo anaguru-anaguruna riara sakaya etu nekadede mombasomba I'a. Nanguli ira, "Mpu'u-mpu'u Komimo Ana nu Alatala!" 34 Sangga naratapa ira ri sambote rano nana'umo ira ri Bagia Genesaret. 35 Tempo pue ngata ri setu nangginjani tau to narata etu Yesus, kareba etu nipatolele ira mpaka ri umba-umba ngata ri bagia etu sampe pura-pura tau naju'a ri setu nikeni mpaka ri ja'i Yesus. 36 Ira nerapi ka Yesus ala ira rapaloga aga manggabe tampa nu bajuna. Pade isema-sema to nanggabe tampa nu bajuna nabelo pura nggari ju'a ira.
1 Naopu etu naratamo bara sakuya mba'a tau to Parisi bo guru-guru agama Yahudi nggari ngata Yerusalem mpaka ri ja'i Yesus, pade nekutanamo ira, 2 "Nokuya anagurumu nombaliunaka ada-ada ntotu'ata nggaolu? Tempo nanggoni ira da'a norama pale ntani nantuki ada-adata!" 3 Nesonomo Yesus ka ira, "Nokuya wo'u komi nombaliunaka parenta-parenta nu Alatala ante nantuki ada-ada ntotu'a komi nggaolu? 4 Sabana Alatala nanguli, 'Bilamo indo umamu,' pade niulina wo'u, 'Isema-sema manguli sinja'i umana bara indona i'a kana rapatesi.' 5 Tapi komi nompatuduki iwe'i: Ane tau manguli ka indo umana, 'Pura-pura nuapa to masipato kuwai ka komi naopumo nipesombaku ka Alatala,' 6 tau etu da'a mana paraluu mombabila indo umana. Jadi ante nantuki ada-ada ntotu'a komi nggaolu iwetu komi nombasapuaka Tesa nu Alatala! 7 Komi tanu tau-tau aga nabelo ri lenje! Nakono mpu'u Tesa nu Alatala to nipasimbayu nabi Yesaya nggaolu iwe'i: 8 'Tau-tau e'i aga nombabila Aku ri sumba, tapi da'a ante mpu'u-mpu'u rara ira. 9 Da'a ntoto ria gunana ira mepue ka Aku, sabana pepatuduki to nipatuduki ira aga ada-ada nu manusia.' " 10 Naopu etu Yesus nompokio tau dea pade niulina ka ira, "Epemo mpakabelo-belo ala ranjani komi tesaku e'i. 11 Nuapa-nuapa to nesua ri ngangata da'a mompakatantoru manusia riara mpanggita Alatala. Tapi nuapa-nuapa to nesuwu nggari sumbata, etumo to mompakatantoru manusia riara mpanggita Alatala." 12 Naopu etu naratamo anaguru-anaguruna nompakamosu Yesus pade nanguli, "Guru, ninjani Komi tau-tau to Parisi nakedi rara nangepe tesa Komi pane'a?" 13 - 14 Nesonomo Yesus, "Palambamo tau-tau to Parisi etu sabana pura-pura anu da'a nituja Umaku ri suruga kana rarebuna. Tau-tau to Parisi etu ewa topanggeniaka naburo. Ane tau naburo nombanini roana toburo, natantumo ira romba'a kana manawu sanggani ralowu." 15 Pade nangulimo i Petrus ka Yesus, "Guru, tulungi pakanoto ka kami batuana porapa pane'a." 16 Nesonomo Yesus, "Iwenumo? Da'apa ninjani komi wo'u? 17 Da'apa ninjani komi panggoni to nesua ri ngangata napola mpaka ri ta'ita pade nggari setu aga niote wa'amo? 18 Tapi tesa-tesa to naja'a to neumba nggariara nta'ita pade to nesuwu nggari sumbata, etumo to nompakatantoru kita riara mpanggita Alatala. 19 Sabana nggariara nta'i neumba mpengele-ngele pompekiri to naja'ana, sampe naria tau nompatesi roana, nebualo, nogau sala ante tau da'a rongona mboto, nangangga, nodawa ri ngayo ntopotangara, pade nanguli sinja'i. 20 Pokainggu etumo to nompakatantoru manusia riara mpanggita Alatala. Tapi nanggoni ante da'a morama pale, etu da'a nompakatantoru tau riara mpanggita Alatala." 21 Naliu etu nalaimo Yesus nompalasi peto'o etu pade nalaumo I'a mpaka ri bagia namosu ngata Tirus bo ngata Sidon. 22 Ri setu naria samba'a besi to Kanaan tau da'a to Yahudi. I'a narata mpaka ri ja'i Yesus ante nongare-ngare iwe'i: "Pue, Muli i Daud! Potowemo aku e'i! Anaku besi nipesua seta sampe nandasa mpu'umo i'a nabaya!" 23 Tapi Yesus da'a notingo nombasono besi etu. Pade anaguru-anaguruna nompakamosu I'a ante nerapi ka I'a, "Guru, agina pakaumo besi etu malai. I'a aga nongare-ngare nantuki purita." 24 Nesonomo Yesus, "Aku e'i nipakau mantulungi aga muli Israel to natonto nasimbayu ewa bimba-bimba." 25 Tapi naratamo besi etu nekadede ri ngayo Yesus pade niulina, "Pue, tulungimo aku!" 26 Nesonomo Yesus, "Da'a nabelo mangala panggoni ngana-ngana ratajiaka ka asu." 27 Nanguli besi etu, "Nakono to niuli Komi, Pue. Tapi asu wo'u nabiasa nanggoni rombo-rombo mpanggoni to nanawu nggari bunggu meja puena." 28 Naopu etu nangulimo Yesus, "Indo, naroso mpu'u pomparasayamu! Sabana etu nuapa to niperapimu etu kana majadi." Pade tempo etu wo'u nabelo balimo ana nu besi etu. 29 Naopu etu nalai wo'umo Yesus nompalasi peto'o etu nolumako nosale wiwi Rano Galilea. Pade nantendemo I'a ri saongu bulu pade nekatoko. 30 Naopu etu nadea mpu'u tau narata mpaka ri ja'ina nanggeni roa ira to napungguna, tau to nakejo kadana, tau naburo, tau nabobo pade nadea tau ntanina to naju'ana. Ira nikeni ri ngayo Yesus pade I'a nompakabelo ira pura-pura. 31 Nanggita etu nogumaa mpu'umo tau dea sabana tau-tau nabobo namala notesa, tau-tau nakejo kadana nipakabelo, tau-tau napunggu namala nolumako pade tau-tau naburo namala nekita. Etu sampe tau dea nombabila bo nantoiya Alatala to nipesomba nto Israel. 32 Naopu etu Yesus nompokio anaguru-anaguruna pade niulina ka ira, "Naasi mpu'umo mataku nanggita tau dea etu, sabana tolumbengimo kasaena ira nosanggani-nggani ante Aku pade we'i-we'i mana ria panggoni ira. Aku da'a madota mompakau ira manjili ante maoro ta'i. Ne'e-ne'e ira maleto pade madungga ri jala." 33 Nesonomo anaguruna, "Nggari umba raratata panggoni rawai ka tau iwetu kadeana? Peto'o e'i nakalinoa." 34 Pade nekutanamo Yesus ka ira, "Sakuya ongu roti to naria ri ja'i komi?" Nesonomo ira, "Pituongu, pade naria wo'u bara sakuya mba'a bau nggedi." 35 Nangepe etu Yesus nompakau tau dea nekatoko puramo ri tana. 36 Pade nialana roti pituongu bo bau-bau nggedi etu pade niulina tarima kasi ka Pue Alatala. Naopu etu nitubi-tubina roti bo bau etu pade niwaina ka anaguruna. Pade ira nombatibo-tibo panggoni etu ka tau dea. 37 Ira pura-pura nanggoni sampe nabosu. Naopu etu anaguru Yesus nompasiromu labi-labi mpanggoni ntau dea etu, naponupa pitu karanji. 38 Tau nanggoni tempo etu patanjobu mba'a langgai, da'a nibila besi-besi bo ngana-ngana. 39 Naopu etu Yesus nompakau tau dea manjili. Pade I'a mboto nesawi sakaya nggari setu nalau mpaka ri Bagia Magadan.
1 Naria bara sakuya mba'a tau to Parisi pade tau to Saduki narata ri ja'i Yesus ala mompesoba I'a. Ira nerapi ka Yesus ala I'a mowia tandai to nipogumaa ala mompakanoto I'a nggari ja'i Alatala. 2 Nesonomo Yesus ka ira, "Ane nasolomo eo pade naleimo langi komi nanguli, 'Kana marawa lombona.' 3 Pade ane kabobayana komi nanguli, 'Maujamo ngina sabana naleimo langi pade naguntoumo lombona.' Komi nata'u nombaboto lombona ante nanggita langi tapi da'a ninjani komi tandai-tandai to nipowia Alatala ri dunia we'i-we'i. 4 Naja'a mpu'u tau-tau we'i-we'i. Komi da'a natutu nomparasaya Alatala. Komi nerapi ala Aku mompowia tandai to rapogumaa ntau. Tapi etu da'a kupowia ka komi! Tandai to rapopokita ka komi aga tandai ewa to najadi ri ja'i nabi Yunus nggaolu." Naopu etu nalaimo Yesus nompalasi ira. 5 Tempo anaguru-anaguru Yesus nalau mpaka ri sambote rano nikalinga ira manggeni baku. 6 Tempo etu nangulimo Yesus ka ira, "Pakabelo-belo. Komi kana mainga ala ne'e mawela ragi tau-tau to Parisi bo tau-tau to Saduki." 7 Nangepe etu notesamo anaguruna samba'a bo samba'a, "I'a nanguli iwetu sabana kita da'a nobaku roti." 8 Tapi ninjani Yesus nuapa to nitesa ira. Etu sampe I'a nanguli ka ira, "Nokuya komi batena nanguli komi da'a nobaku roti? Komi tau-tau nakura mpu'u pomparasaya! 9 Iwenumo? Da'apa ninjani komi? Da'a mana nitora komi limanjobu mba'a tau to nanggoni limaongu roti? Da'a nitora komi sakuya tonda labina to nipasiromu komi? 10 Pade da'a wo'u nitora komi patanjobu mba'a to nanggoni pituongu roti? Da'a nitora komi sakuya karanji labina to nipasiromu komi? 11 Iwenu sampe da'apa ninjani komi da'a roti to nipatujuku pane'a? Komi kana mainga ala ne'e sampe mawela ragi tau-tau to Parisi bo tau-tau to Saduki!" 12 Nggari setu nanotomo ka ira da'a ragi roti to nipatuju Yesus. Tapi patuju tesana ira kana mainga ri ja'i pepatuduki tau-tau to Parisi bo tau-tau to Saduki. 13 Tempo Yesus narata ri bagia namosu ngata Kaisarea Filipi, nekutanamo I'a ka anaguru-anaguruna, "Nantuki pombarata todea, isema kakonona Aku, Ana nu Manusia e'i?" 14 Nesonomo ira, "Naria tau nanguli Komi Yohanes Topediu to natuwu bali. Naria wo'u sanu nanguli Komi nabi Elia to neumba bali, pade naria wo'u tau nanguli Komi nabi Yeremia bara samba'a nabi nggaolu ntanina to natuwu bali." 15 Pade nekutana wo'umo Yesus ka ira, "Tapi nantuki pombarata komi, isema Aku e'i?" 16 Nesonomo i Simon Petrus, "Komi Magau to Mompakasalama, Ana nu Alatala to Natuwuna." 17 Nangulimo Yesus, "Nasana mpu'umo iko, Simon ana Yunus, sabana da'a manusia to nompopanjani etu ka iko, tapi Umaku mboto ri suruga. 18 Pade kuuli ka iko, ikomo to niuli Petrus, batuana 'watu'. Pade ri bunggu watu e'i Aku mompopenggore todea topomparasaya Aku. Pade njumaongu kuasa nggari naraka da'a mompakule mombadagi topomparasaya etu. 19 Aku mombawai ka iko kunci pewobo Poparenta nu Alatala. Nuapa to mutagi ri dunia, etu wo'u ratagi Alatala ri suruga. Pade nuapa to mupaloga ri dunia, etu wo'u rapaloga Alatala ri suruga." 20 Naopu etu nangulimo I'a ka ira, "Ne'e ratesa ka isema-sema Aku e'i Magau to Mompakasalama." 21 Nompamula nggari tempo etu Yesus nompakanoto ka anaguru-anaguruna I'a kana malau mpaka ri ngata Yerusalem, pade ri setu I'a kana mpu'u-mpu'u rapandasa totu'a-totu'a nto Yahudi, balengga-balengga topanggeni agama, bo guru-guru agama Yahudi. Pade I'a kana rapatesi, pade ri eo katolueona I'a kana rapakatuwu bali nggari kamatena. 22 Nangepe tesa etu i Petrus nanggeni Yesus ri sawalikuna pade nompamula i'a nangontiaka Yesus. Niulina, "Pue, ne'e sampe etu majadi ri ja'i Komi! Perapi Pue Alatala mompakakawao etu nggari ja'imu!" 23 Tapi Yesus nompeili nanguli ka i'a, "Palaimo iko nggari se'i, Magau nu Seta! Iko nombalawa dota Alatala majadi ri ja'iku! Pompekirimu etu pompekiri manusia, da'a pompekiri nggari ja'i Alatala!" 24 Naopu etu nanguli Yesus ka anaguru-anaguruna, "Isema-sema madota majadi topantuki Aku, i'a kana mombakabasaka dotana mboto pade i'a kana masadia mantuki Aku nau sampe mamate rapaku ri kayu parika. 25 Isema-sema da'a masadia mantuki Aku nau sampe mamate i'a da'a mombarata katuwua mabelo sampe ri kasae-saena. Tapi isema-sema mombakabasaka pura-pura dotana mboto pade mantuki Aku nau sampe rapatesi, i'a kana mombarata katuwu mabelo sampe ri kasae-saena. 26 Natantumo da'a ria gunana ane samba'a tau mombarata pura-pura nuapa to naria ri dunia tapi da'a masalama, aga rasuku sampe ri kasae-saena ri naraka. Sabana da'a ria nuapa-nuapa to namala rasulata ante katuwua mabelo etu. 27 Mana masaeka Aku, Ana nu Manusia kana marata bali nggari suruga ante kuasa bo reme nggari ja'i Umaku, mosanggani-nggani ante malaeka-malaekaku. Pade ri tempo etu Aku kana mombabalasi butu mba'a tau nantuki pokaingguna. 28 Aku mpu'u-mpu'u notesa ka komi, naria bara sakuya mba'a tau ri tatongo komi ri se'i da'apa mamate ane da'apa rakita ira Aku, Ana nu Manusia marata ri dunia e'i ewa samba'a magau."
1 Onombengi kaliuna Yesus nanggeni i Petrus, Yakobus ante sampesuwuna Yohanes nalau nantende mpaka ri saongu bulu to nalangana. Aga Yesus ante ira tolumba'a to naria ri setu. 2 Tempo ira ri setu sampegoli nabalimo lenje Yesus ri ngayo ira. Lenjena nareme mpu'u ewa kareme nu mata eo, pade pakeana nabula damo nenggila. 3 Sampegoli anaguru Yesus nanggita romba'a nabi nggaolu nenggore ri setu notesa-tesa ante Yesus. Ira etumo nabi Musa bo nabi Elia. 4 Sangga nanggitapa etu nangulimo i Petrus ka Yesus, "Pue, nasana mpu'u kami ri se'i. Ane Pue madota aku mowia toluongu pakumpa ri se'i, saongu ka Komi, saongu ka i Musa pade saongu ka Elia." 5 Tempo Petrus danotesa ante Yesus, naratamo kulimu to nareme nombabungu ira, pade nggariara kulimu etu naria suara nanguli, "E'imo Anaku to nipotoweku. I'amo to nikonoa raraku. Epe komimo tesana!" 6 Tempo anaguru Yesus nangepe suara etu naeka mpu'umo rara ira sampe notatungga ira narapa ri tana. 7 Tapi Yesus nompakamosu ira pade nanggabe ira ante nanguli, "Pembangumo. Ne'e mana maeka!" 8 Tempo ira nantingara to nikita ira aga Yesus njamba'ana. Da'a mana naria tau ntanina nikita ira. 9 Tempo ira notua nggari buluna etu Yesus nombatagi ira, "Ne'e ratesa ka isema-sema nuapa to nikita komi pane'a ane Aku, Ana nu Manusia da'apa rapakatuwu bali nggari kamateku." 10 Pade nekutanamo anaguruna ka I'a, "Nuapa sabana guru-guru agama nanguli nabi Elia kana mokolu marata pade Magau to Mompakasalama?" 11 Nesonomo Yesus, "Nakonomo tesa etu. Nabi Elia kana mokolu marata sabana i'amo to mompakasiayu mpengele-ngele. 12 Tapi kuuli ka komi, kakonona naratamo nabi Elia, aga i'a da'a ninjani ntau. Tau-tau etu aga nompowia ri ja'ina dota ira to naja'a. Pade iwetu wo'u Aku, Ana nu Manusia kana rapandasa ira." 13 Nangepe tesa etu nanotomo ka anaguruna Yohanes Topediu to nipatuju Yesus ante tesana to nantesa nabi Elia. 14 Tempo Yesus ante tolumba'a anaguruna nosirata ka tau dea naratamo samba'a tau nekadede ri ngayo Yesus ante nanguli, 15 "Pue, potowemo anaku! I'a naju'a nadola, nandasa mpu'u i'a. I'a naoso nadungga ri apu pade naoso wo'u nadungga ri ue. 16 I'a nikeniku ri ja'i anaguru Komi tapi ira da'a namala mompakabelo ju'ana etu." 17 Pade nesonomo Yesus, "Iwenu tanu komi? Komimo tanu tau mpu'u-mpu'u da'a nomparasaya pade topesapuaka! Sakuyapa kasaena Aku kana mosanggani ante komi! Sakuyapa kasaena Aku kana mosabara ri ja'i komi! Kenimo wemaimo ngana etu!" 18 Sangga naratapa ngana etu ri ngayona Yesus nompopalai seta to nompakaju'a ngana etu. Pade nalai mpu'umo seta etu nggari ja'ina. Pade tempo etu wo'u nabelomo ju'a ngana etu. 19 Naliu etu naratamo anaguru-anaguru Yesus ri ja'ina tempo ira mana ri tatongo ntau dea, pade nipekutana ira ka I'a, "Iwenu sampe kami da'a namala nompopalai seta etu pane'a?" 20 Nesonomo Yesus, "Sabana nakura pomparasaya komi. Aku mpu'u-mpu'u notesa ka komi, ane pomparasaya komi aga sakedi lau ewa wua kayu to neliu nggakedi, da'a ria to da'a mamala rapowia komi. Komi mamala manguli ka bulu etu, 'Polinja gu sa'amo,' pade bulu etu kana molinja gu sa'a. [ 21 Tapi seta ewa etu pane'a aga namala rapopalai ante mosambaya bo mapuasa."] 22 Tempo Yesus ante anaguruna nasiromu mpasanggani-nggani ri Bagia Galilea, nangulimo I'a ka ira, "Aku, Ana nu Manusia da'a mana masaeka kana rawai ka baliku, 23 pade Aku kana rapatesi ira. Tapi ri eo katolueona Aku kana rapakatuwu bali." Sangga nangepe tesa etu nasusa mpu'umo rara anaguruna pura-pura. 24 Sangga naratapa Yesus bo anaguruna ri ngata Kapernaum naratamo samba'a topomperapi balasitee Sapo Mpepue nompekutana ka i Petrus, "Gurumu nabiasa nombabayari balasitee Sapo Mpepue atau da'a?" 25 Nesonomo i Petrus, "Iyo, nibayarina." Naopu etu nanjilimo Petrus mpaka ri sapo to nipeto'o ira. Narata ri setu da'apa i'a notesa nuapa-nuapa nekutanamo Yesus ka i'a, "Simon, iwenu pombaratamu? Isema kakonona masipato mombabayari balasitee bara kasowia ka magau-magau ri dunia e'i? Todeana mboto atau pue ngata to nikuasaina etu?" 26 Nesonomo i Petrus, "Natantu pue ngata to nikuasaina to masipato mombabayari." Nangulimo Yesus, "Ane iwetu, todeana mboto da'a masipato mombabayari balasitee etu. 27 Tapi naupa iwetu, ne'e kita mompakakedi rara ntau etu. Agina komi malau mome'i ri rano. Alamo bau pamulana to murata. Riara ngangana kana murata saongu doi to nagana mombabayari balasitee kita romba'a. Kenimo doi etu pade bayarimo balasiteeta ka tau topomperapi balasitee etu."
1 Tempo etu naratamo anaguru Yesus ri ja'ina nompekutana I'a, "Guru, isema to meliu nggalanga katuwuna riara Poparenta nu Alatala banepia?" 2 Nangepe etu Yesus nompokio samba'a ngana nggedi pade nipopekanggorena ri tatongo anaguruna, 3 pade niulina ka ira, "Aku mpu'u-mpu'u notesa ka komi, ane komi da'a majea bo majadi nasimbayu ewa ngana nggedi e'i, komi da'a mamala majadi todea riara Poparenta nu Alatala. 4 Jadi tau to mompakaede rarana pade majadi ewa ngana nggedi e'i, i'amo to meliu nggalanga katuwuna riara Poparenta nu Alatala. 5 Pade isema-sema mantarima samba'a ngana nggedi ewa e'i sabana i'a nantuki Aku i'a wo'u mantarima Aku. 6 Tapi isema-sema mombabagiu samba'a ngana nggedi sampe i'a mana momparasaya, nabelopa ane saongu watu bete raso'o ri tambolona pade i'a ratajiaka riara ntasi to nandalana. 7 Nandasamo tau-tau ri dunia sabana nadeamo to nompakanawu ira riara silaka. Kana maria to manawu riara silaka tapi mandasa mpu'umo tau to mompakanawu ira. 8 Jadi ane palemu atau kadamu manggeni komi mowia silaka agina pale atau kadamu etu ratompo pade ratajiaka. Nabelopa komi mesua matuwu mabelo riara suruga ante pale bara kada mapudu iwetu pade ratajiaka riara apu to najela sampe ri kasae-saena ante palemu bo kadamu magana. 9 Pade ane matamu manggeni komi mowia silaka agina rasu'i tajiaka ongu matamu. Nabelopa komi mesua matuwu mabelo riara suruga ante momata sabingga pade ratajiaka riara apu naraka ante mata to maganana. 10 Jadi pakabelo-belo, ne'e manjauru ngana nggedi ewa ngana e'i. Sabana kuuli ka komi malaeka-malaeka to nombajagai ira bate-batena naria ri ngayo Umaku ri suruga. [ 11 Pade Aku, Ana nu Manusia narata ri dunia ala mompakasalama tau-tau to natontona."] 12 "Rapana maria samba'a tau nompatuwu bimba satu onguna pade naria saongu bimba natonto nuapa rapowiana? Iwenu pombaratamu? Natantumo i'a kana mompalasi bimbana siompulu bo sasio etu ri buluna pade malau mangelo bimbana saongu to natonto etu. 13 Parasayamo Aku, ane raratana bali bimba etu meliu nggadamba rarana manggita saongu bimba etu pade manggita siompulu bo sasio bimba to da'a natonto. 14 Iwetu wo'u Uma komi ri suruga da'a madota samba'a nggari tatongo ngana nggedi e'i malipo pomparasayana." 15 "Ane maria sampesuwumu mowia sala ri ja'imu, kalau komi ri ja'ina pade tesamo pakanoto ka i'a salana. Kawiamo etu nggalino, aga komi romba'a. Ane i'a mantarima pantesamu kasintuwumu ante i'a kana mabelo bali. 16 Tapi ane i'a da'a madota mantarima pantesamu keni wo'umo samba'a atau romba'a roamu majadi sabi pantesamu ante i'a. Sabana riara Buku Nagasa naria nitulisi iwe'i: 'Ane maria tau nipangadu kana maria romba'a atau tolumba'a sabi motesa mompakanoto kasalana.' 17 Ane i'a da'a madota mantarima pantesa ira, kenimo i'a ri ngayo ntodea topomparasaya. Pade ane i'a da'a madota mantarima tesa belo nggari ja'i todea etu, i'a kana rareke komi nasimbayu ewa tau da'a nosinjani ante Alatala bo tau-tau topomperapi balasitee to naja'ana. 18 Aku mpu'u-mpu'u notesa ka komi, nuapa to nitagi komi ri dunia e'i, etu nitagi wo'u ri suruga. Pade nuapa to nipaloga komi ri dunia e'i, nipaloga wo'u ri suruga. 19 Pade kuuli wo'u ka komi ane maria romba'a komi ri dunia e'i mosaongu rara mosambaya merapi sangele, posambaya komi etu kana rapoiyo Umaku ri suruga. 20 Sabana ri umba-umba tau nasiromu riara sangaku nau aga romba'a atau tolumba'a, Aku mboto naria ri setu nosanggani-nggani ante ira." 21 Naopu etu naratamo i Petrus nompekutana Yesus, "Pue, ane maria sampesuwuku mowia sala ri ja'iku, sampe sakuya nggani aku kana mombaampungi i'a? Bara sampe pitunggani?" 22 Nesonomo Yesus, "Da'a aga pitunggani, tapi sampe noatu nggani. 23 Sabana Pue Alatala nasimbayu ewa magau riara porapa e'i. Naria samba'a magau to madota momparesa inda-inda nu batuana. 24 Tempo i'a nompamula nomparesa inda ira, naria samba'a batua niposintingayo ante i'a to noinda juta-juta rupia. 25 Tapi batua etu da'a nompakule mombabayari indana etu. Jadi nangulimo magau, 'Ane iwetu pobalumo batua etu mpasanggani-nggani ante rongona, ana-anana bo pura-pura mbara-mbara riara njapona rapombabayari indana ri ja'iku etu!' 26 Nangepe etu nekadedemo batua etu ri ngayo magau nerapi ante mpu'u-mpu'u rarana, 'Magau, posabara ntanimo ruru ri ja'iku. Pura-pura indaku etu kana kubayari mpakaopu!' 27 Nangepe etu, naasimo mata magau nanggita batuana etu. Jadi nikabasakana batua etu pade indana etu nipakaopunamo. 28 Tempo batua etu nesuwu ri sawalikuna i'a nosintomu ante roana to noinda ri ja'ina bara sakuya atu njobu rupia. Nisokona tambolo roana etu pade nikojena ante nanguli, 'Bayari puramo indamu ri ja'iku!' 29 Pade nekadedemo roana etu ri ngayona nerapi ante mpu'u-mpu'u rarana, 'Posabara ntanimo ruru, wega. Indaku pura-pura etu kana kubayari mpakaopu.' 30 Tapi batua etu da'a madota mantarima pomperapi roana etu. I'a aga nalau nombasuaraka roana riara tarunggu sampe pura-pura indana etu rabayarina mpakaopu. 31 Tempo batua-batua ntanina nanggita nuapa to nipowia batua etu ka roana, nasusa mpu'umo rara ira. Jadi nalaumo ira mpaka ri ja'i magau nantesa ka i'a pokainggu batuana pane'a. 32 Sangga nangepe tesa etu, magau nompokio batua to naja'a powiana etu pade niulina, 'Iko samba'a batua to naja'a mpu'u! Pura-pura indamu to nadea mpu'u etu nipakaopukumo sabana iko nerapi ri ja'iku. 33 Nokuya iko da'a naasi matamu nanggita roamu nasimbayu ewa aku naasi mataku nanggita iko?' 34 Jadi nabilisi mpu'u rara magau ri ja'i batuana etu. Niwaina batua etu ka topeboba riara tarunggu sampe i'a mombabayari mpakaopu pura-pura indana." 35 Yesus nompakaopu tesana ante nanguli, "Iwetu wo'u Umaku ri suruga mompowia ka komi ane komi da'a mombaampungi sampesuwumu ante mpu'u-mpu'u raramu!"
1 Naopu Yesus nombatesa etu pura-pura nalaimo I'a nompalasi Bagia Galilea nalau mpaka ri Bagia Yudea ri sambote Binangga Yordan. 2 Nadea mpu'u tau nantuki I'a pade ri setu I'a nompakabelo ju'a-ju'a ira. 3 Pade naratamo bara sakuya mba'a tau to Parisi madota mangelo sala Yesus. Ira nompekutana I'a iwe'i: "Nantuki Atura-atura agamata mamala samba'a langgai mombasompo rongona besi ante mpengele-ngele sabana?" 4 Nesonomo Yesus, "Iwenumo? Da'apa nibasa komi to nitulisi riara Buku Nagasa nggaolu? Ri lamba pamulana Topompajadi manusia nompajadi samba'a langgai bo samba'a besi. 5 Pade naopu etu niulina, 'Etumo sabana langgai kana mompalasi indo umana pade malau maroo ri ja'i rongona besi sampe ira romba'a majadi samba'a.' 6 Jadi riara mpanggita Alatala ira romba'a etu da'a mana romba'a tapi samba'a. Sabana etu nuapa to nipakasaongu Alatala, ne'e rapopoga'a manusia." 7 Pade nekutana wo'umo tau-tau to Parisi ka I'a, "Ane iwetu, nuapa sabana i Musa nompakau langgai mombawai sura tala ka rongona besi pade mombasompo i'a?" 8 Nesonomo Yesus, "Musa nompaloga komi mombasompo rongomu iwetu sabana nako'o gaga rara komi. Tapi ri lamba pamulana da'a iwetu. 9 Jadi epe komi tesaku e'i. Isema-sema mombasompo rongona besi pade momporongo besi ntanina naupa rongona pamulana etu da'a nogau sala ante langgai ntanina, tau etu nireke nebualo." 10 Naopu etu anaguru-anaguru Yesus nanguli ka I'a, "Ane iwetu kasusana atura mporongo nabelopa ane tau da'a morongo!" 11 Nesonomo Yesus, "Da'a pura-pura tau mamala mantarima pantesa etu, aga ira to nipakatantu Alatala. 12 Sabana naria tau da'a namala morongo sabana da'a nagana sipana nesuwu nggariara indona. Naria wo'u tau da'a namala morongo sabana nitunggai nigero ntau sipana. Pade naria wo'u tau da'a norongo sabana dotana mboto, ala ira maloga mantui bago i Pue. Isema-sema mompakule mantarima pepatuduki e'i kana ratarimana." 13 Naria sanggani nadea mpu'u tau nanggeni ana-ana ira mpaka ri ja'i Yesus ala I'a mombadika palena ri koro ira pade mosambaya ka ira. Tapi anaguru-anaguru Yesus nanggarau tau-tau etu. 14 Nanggita etu nangulimo Yesus ka anaguru-anaguruna, "Pakambamo ngana-ngana etu marata ri ja'iku! Ne'e ratagi ira, sabana aga tau to noinggu ewa ngana-ngana e'i to masipato majadi todea riara Poparenta nu Alatala." 15 Pade nidikana palena ri balengga ngana-ngana etu ala mombagane ira. Naopu etu nalaimo I'a nggari setu. 16 Naria saeo samba'a tau nompakamosu Yesus pade nekutana, "Guru, powia nuapa to nabelona to masipato kupowia ala aku mamala matuwu mabelo sampe ri kasae-saena?" 17 Nesonomo Yesus, "Nuapa sabana komi nompekutana Aku ewa powia to nabelona? Da'a ria ntanina to nabelo aga Pue Alatala. Ane komi madota matuwu mabelo sampe ri kasae-saena, tukimo parenta-parenta Alatala." 18 Pade nekutana wo'umo tau etu, "Parenta-parenta umbana?" Nesonomo Yesus, "Ne'e mepatesi, ne'e mogau sala ante tau da'a rongomu mboto, ne'e mangangga, ne'e modawa ri ngayo ntopotangara, 19 bilamo indo bo umamu, pade potowemo sanggamanusiamu nasimbayu ewa komi nompotowe koromu mboto." 20 Nangulimo tau etu ka Yesus, "Parenta-parenta etu nitukiku puramo. Nuapapa wo'u to masipato kukawia?" 21 Nesono Yesus, "Ane komi madota majadi mabelo ntoto, kalau pobalu puramo mbara-mbaramu pade palelemo doi olina etu ka tau-tau nakasiasi ala murata kakalumana ri suruga. Maopu etu kamai, tukimo Aku!" 22 Nangepe tesa Yesus etu nalaimo tau etu ante nasusa rarana, sabana i'a samba'a tau to nakalumana mpu'u. 23 Naopu etu nangulimo Yesus ka anaguru-anaguruna, "Aku mpu'u-mpu'u notesa ka komi, nakaja mpu'u tau nakalumana majadi todea riara Poparenta nu Alatala. 24 Pade kuuli wo'u ka komi, nagampapa saongu binata to nabetena ewa unta mesua ri bolo jaru pade samba'a tau nakalumana majadi todea riara Poparenta nu Alatala." 25 Sangga nangepe pantesa Yesus etu, natekaja mpu'umo rara anaguruna sampe ira nanguli, "Ane iwetu natantumo da'a ria samba'a tau to mamala rapakasalama!" 26 Yesus nompenaa ira pade nanguli, "Ane aga nggari manusia, natantu da'a mamala majadi. Tapi ane nggari Alatala pura-pura mamala majadi." 27 Pade nangulimo i Petrus, "Kita we'i, Pue. Kami e'i nompalasi pura-pura nuapa to naria ri ja'i kami pade nantuki komi. Nuapa rarata kami banepia?" 28 Nesonomo Yesus ka ira, "Aku mpu'u-mpu'u notesa ka komi, tempo Alatala mompakabou mpengele-ngele banepia, Aku, Ana nu Manusia kana mekatoko ri pekatoko magau to nagayana. Pade tempo etu wo'u komi to nantuki Aku kana mekatoko ri sampulu rongu pekatoko magau ntanina mombatangara muli nu sampulu romba'a ana Israel. 29 Isema-sema to nompalasi sapona bara sampesuwuna, bara indo umana, bara ana-anana, bara tinaluna sabana nantuki Aku, tau etu kana mombarata bali satu nggani kadeana. Pade i'a wo'u mombarata katuwua mabelo sampe ri kasae-saena. 30 Tapi nadea tau to nalanga katuwuna we'i-we'i kana majadi tau to naede katuwuna banepia. Pade nadea wo'u tau to naede katuwuna we'i-we'i kana majadi tau to nalanga katuwuna banepia."
1 Yesus nanguli, "Tempo Alatala moparenta I'a masimbayu ewa porapa e'i: Naria samba'a tau to naria tinalu nipotuja anggur. Nasadondo mpu'u i'a nesuwu nggari sapona nalau mangelo tau ragajina mokarajaa ri tinaluna. 2 I'a nomposirata bara sakuya mba'a topokarajaa pade niulina ka ira, 'Kalaumo komi mokarajaa ri tinaluku ria, pade kuwai ka komi simbau sampeka doi salaka majadi gajimu saeo.' Nasitujumo ira, pade i'a nompakau ira malau mokarajaa ri tinaluna. 3 Tinti sasio mpadondona nalau wo'umo pue ntinalu etu mopaelo topokarajaa ntanina. Nikitana bara sakuya mba'a tau ri potomu aga nekatoko-toko wa'amo. 4 Niulina ka ira, 'Kalaumo komi mokarajaa ri tinaluku ria, damo kuwai ka komi gaji to masipatona.' Jadi nalau mpu'umo ira nokarajaa. 5 Tinti sampulu rongu nalau wo'umo pue ntinalu etu mopaelo topokarajaa ntanina. Niulina ka ira, 'Kalau komi mokarajaa ri tinaluku, damo kuwai ka komi gaji to masipatona.' Pade wa'a wo'u nipowiana tinti toluongu ngguwiana. 6 Kira-kira tinti alima ngguwiana nalau wo'umo pue ntinalu etu mopaelo topokarajaa ntanina. Niposiratana bara sakuya mba'a tau aga nekatoko-toko da'a ria pokarajaana. Nekutanamo i'a ka ira, 'Nokuya komi aga nekatoko njaneo, da'a nokarajaa?' 7 Nesonomo ira, 'Da'a naria tau nombagaji kami.' Pade nanguli pue ntinalu etu, 'Ane iwetu, kalaumo komi mokarajaa ri tinaluku.' Nangepe etu nalaumo ira. 8 Sangga nasolopa eo nangulimo pue ntinalu etu ka mandorona, 'Pokio puramo topokarajaa pade bayari puramo gaji ira mompamula nggari ira to lako nompamula nokarajaa tinti alima ngguwiana sampe marata ri ja'i ira to nokarajaa nggari mpadondona.' 9 Naratamo topokarajaa to nompamula nokarajaa tinti alima ngguwiana, pade ira niwai simbau sampeka doi salaka. 10 Iwetu wo'u sampe narata ri ja'i topokarajaa to nokarajaa nggari mpadondona. Ira nompekiri riara nta'i iwe'i: 'Natantumo kami kana rawai meliu nggadea sabana kami nokarajaa njaneo.' Tapi gaji to niwai ka ira nasimbayu ante tau ntanina etu, aga simbau sampeka doi salaka. 11 Naopu ira nantarima gaji nompamulamo ira nongua-ngua ka pue ntinalu etu ante nanguli, 12 'Tau-tau topokarajaa to narata ngguwiana nokarajaa aga sajaa lau. Kami e'i nokarajaa ntomo njaneo ri kapanena, tapi komi nombawai gaji ka ira nasimbayu ante kami!' 13 Nangulimo pue ntinalu ka samba'a nggari tatongo ira, 'Sampesuwu, aku da'a nasala ri ja'i komi. Nikasitujutamo gajimu kana sampeka doi salaka saeo. 14 Jadi alamo gaji komi pade panjilimo. Aku madota mombawai gaji ka tau to narata ri purina nasimbayu ewa to niwaiku ka komi. 15 Natantu aku namala mowia nantuki dotaku ante doiku mboto! Bara nasiriati rara komi nanggita aku mowia nabelo ri ja'i tau ntanina?' " 16 Pade Yesus nompakaopu porapa etu ante nanguli, "Iwetu wo'umo banepiana tau-tau to ri purina we'i-we'i kana majadi ri koluna. Pade tau-tau to ri koluna we'i-we'i kana majadi tau-tau to ri purina." 17 Tempo etu Yesus riara mpolumakona mpaka ri ngata Yerusalem. Riara mpolumakona I'a nanggeni sampulu romba'a anaguruna mompatani nggari ja'i ntau dea pade niulina ka ira, 18 "Epemo mpakabelo-belo! We'i-we'i kita e'i mantende mpaka ri ngata Yerusalem. Ri setu Aku, Ana nu Manusia kana rawai ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi. 19 Maopu etu Aku kana rawai ka tau-tau da'a to Yahudi pade rapongei-ngei ira bo raporo mpakandasa. Pade kaopuna Aku kana rapaku ira ri kayu parika sampe mamate. Tapi ri eo katolueona Aku kana matuwu bali." 20 Naliu etu naratamo rongo i Zebedeus ntalianana ri ja'i Yesus. Nekadedemo i'a ri ngayo Yesus sabana naria sangele pomperapina. 21 Nekutanamo Yesus ka i'a, "Indo, nuapa nipodotamu?" Nesonomo indo etu, "Tempo Komi majadi Magau palogamo ana-anaku e'i mekatoko moparenta mpasanggani-nggani ante Komi, samba'a ri pangganamu, pade samba'a ri panggeimu." 22 Tapi nesonomo Yesus ka ira, "Da'a ninjani komi nuapa niperapi komi. Iwenumo? Rapakule komi manggolo pepandasa nasimbayu ewa pepandasa to rapawela ka Aku?" Nesonomo ira, "Rapakule!" 23 Pade nanguli Yesus ka ira, "Nakono komi kana manggolo pepandasa nasimbayu ewa to rapawela ka Aku. Tapi da'a Aku to nakuasa mompakatantu isema masipato mekatoko ri pangganaku bara ri panggeiku. Peto'o etu bagia ira to nipakatantu Umaku." 24 Tempo sampulu mba'a anaguru Yesus ntanina nangepe pomperapi etu, narau mpu'umo rara ira ri ja'i romba'a to nosampesuwu etu. 25 Etu sampe Yesus nompokio ira pura-pura pade niulina ka ira, "Ninjani komi mbotomo topoparenta-topoparenta tau-tau da'a to Yahudi nomparenta todea ira ante nasombo, pade topanggeniaka-topanggeniaka ira nompandasa todea ira. 26 Tapi da'a masipato komi moinggu iwetu! Kakonona kana iwe'i: isema-sema nggari tatongo komi to madota malanga panggana i'a etu kana majadi topantulungi roana. 27 Pade isema-sema madota majadi to nalanga katuwuna kana majadi batua komi 28 nasimbayu ewa Aku, Ana nu Manusia. Aku da'a narata ri dunia e'i ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea." 29 Tempo Yesus ante anaguru-anaguruna nompalasi ngata Yerikho, nadea mpu'u tau nantuki I'a. 30 Ri setumo naria romba'a tau naburo nekatoko ri wiwi jala. Tempo ira nangepe lele Yesusmo to noliu ri jala etu, nongare-ngaremo ira, "Pue, Muli i Daud! Potowemo kami!" 31 Tapi tau dea to nantuki Yesus nangontiaka ira romba'a ante nanguli, "Ne'e makanano! Pekalinomo!" Tapi tau-tau naburo etu nantambai nongare ante suara to namangga, "Pue, Muli i Daud! Potowemo kami!" 32 Nangepe ira nongare-ngare nenontomo Yesus, pade nipokiona ira. Pade nekutanamo I'a ka ira, "Nuapa to rapodota komi kupowia ka komi?" 33 Nesono ira romba'a, "Pue, to nipodota kami ala mata kami mamala mekita." 34 Naasi mpu'u mata Yesus nanggita ira romba'a. Jadi niojona palena nanggabe mata ira. Pade kaliu-liu nabelomo mata ira. Pade nalaumo ira romba'a nantuki Yesus.
1 Tempo namosumo ira ri ngata Yerusalem, naratamo ira ri ngata Betfage ri kente nu Bulu Zaitun. Ri setu Yesus nompakau romba'a anaguruna mokolu ka I'a. 2 Niulina ka ira, "Kalaumo komi mpaka ri ngata to namosu ri ngayota etu. Ane marata ri setu komi kana mombarata saongu keledai nitataka mpasanggani-nggani ante anana. Wolemo kalorona pade umbu mpaka wemai. 3 Ane maria tau mompekutana komi, uli ka ira, 'Pue paraluu mompake keledai e'i. Damo rapopanjilina ngina.' Pade tau etu kana mompaloga komi manggeni binata etu." 4 Etu najadi ala madupa tesa Alatala to niboto nabi nggaolu iwe'i: 5 "Ulimo ka pue ngata Sion, kitamo, ri setumo Magau komi marata! I'a naede mpu'u rarana, I'a nesawi keledai, etumo saongu keledai to namudana." 6 Jadi nalaumo romba'a anaguru Yesus nompowia ewa nitewaina ka ira. 7 Niumbu iramo keledai ante anana mpaka ri ja'i Yesus. Narata ri setu nilampi ira pakea ri bunggu keledai etu pade nesawimo Yesus ri bungguna. 8 Tempo Yesus noliu ri jala jama nadea mpu'u tau nombajini buya ira ri jala, pade naria sanu nangala tawa-tawa kayu nitale-tale ira ri tatongo jala ewa tandai pebila ira ka Yesus. 9 Pade nongare-ngaremo todea to nokolu ka Yesus nosanggani ante ira to nantuki ri purina, "Ratoiyata Muli i Daud! Perapi Pue mombagane Magau to narata niposumba Alatala! Ratoiyata Alatala ri suruga!" 10 Sangga nesuapa Yesus ri ngata Yerusalem nakanano mpu'umo pura-pura tau ri setu ante nasana rara. Ira nosimpekutana samba'a bo samba'a, "Isema kakonona tau etu?" 11 Nesonomo tau dea to nantuki I'a, "I'amo Yesus, nabi nggari ngata Nazaret ri Bagia Galilea!" 12 Naopu etu nalaumo Yesus nesua ri lalowo Sapo Mpepue pade nipopalaina pura-pura topotomu nggari setu. Nisumbolinakana pura meja-meja ntoposinjula doi bo kadera-kadera nu topobalu-balu tonji banggebodo. 13 Niulina ka ira, "Riara Buku Nagasa naria nitulisi iwe'i: 'Sapoku kana rauli sapo mposambaya.' Tapi komi ri se'i nompajadi Sapo Mpepue e'i peto'o parampo!" 14 Naopu etu naratamo tau-tau naburo bo tau-tau nakejo kadana mpaka ri ja'i Yesus riara Sapo Mpepue. Pade I'a nompakabelo ira. 15 Tapi tempo balengga-balengga topanggeni agama bo guru-guru agama nanggita kabaraka-kabaraka to nipowia Yesus pade nangepe ngana-ngana ri Sapo Mpepue nongare-ngare 'Ratoiyata Muli i Daud,' narau mpu'umo rara ira. 16 Nangulimo ira ka Yesus, "Niepemu nuapa to nitesa ngana-ngana e'i? Nokuya komi da'a nombatagi ira?" Nesonomo Yesus, "Niepekumo. Iwenumo? Da'a nibasa komi nuapa to nitulisi riara Buku Nagasa iwe'i: 'Pue, ngana-ngana bo ngana-ngana nggedi danantomi nipatudukimu mombatoiya bo mompakabete sangamu.' " 17 Naopu etu nalaimo Yesus nompalasi ira. Nesuwu I'a nggari ngata Yerusalem nalau mpaka ri ngata Betania. Naratapa ri setu noturumo I'a sambengi. 18 Kaeona mpandondo tempo Yesus ante anaguruna nolumako nanjili mpaka ri ngata Yerusalem, naoromo ta'ina. 19 Namosu jala nikitana sampu'u kayu ara. Jadi nalaumo I'a nompakamosu kayu etu. Tapi da'a ria kamba saongu wua ara niratana, aga tawa-tawa bayangi. Etu sampe nitesana ka kayu etu, "Mompamula eo e'i, iko mana mowua!" Pade kaliu-liu nalelemo kayu etu. 20 Sangga nanggita kajadia etu nogumaamo rara anaguru-anaguruna. Nekutanamo ira ka I'a, "Iwenu sampe kayu ara etu nasasinta nalele iwetu?" 21 Nesonomo Yesus, "Aku mpu'u-mpu'u notesa ka komi, ane komi momparasaya pade da'a molenga-lenga rara komi wo'u mamala mowia ewa to nipowiaku ka kayu etu. Pade da'a aga iwetu, komi kana mamala manguli ka bulu e'i, 'Polinjamo, potingganawu riara ntasi,' pade natantumo etu kana majadi. 22 Nuapa-nuapa raperapi komi riara mposambayamu, natantumo kana ratarima komi ane komi momparasaya." 23 Sangga naratapa ri ngata Yerusalem nesuamo Yesus riara Sapo Mpepue pade nopaguru ri setu. Tempo I'a danopaguru naratamo balengga-balengga topanggeni agama bo totu'a-totu'a nto Yahudi. Nekutanamo ira ka Yesus, "Ante kuasa nggari umba Komi nompopalai topotomu nggari Sapo Mpepue yowi? Isema nombawai kuasa etu ka Komi?" 24 Nesonomo Yesus, "Naria wo'u sangaya kupekutana ka komi ntani ruru. Ane komi mombasono pompekutanaku e'i, Aku mompopanjani ka komi isema to nombawai kuasa ka Aku mompowia mpengele-ngele etu. 25 Ulimo ka Aku isema nombawai kuasa ka Yohanes Topediu nombadiu tau? Alatala atau manusia?" Pade nosimpekutana to Yahudi etu samba'a bo samba'a, "Iwenu kita mombasono I'a? Ane kita manguli kuasa Yohanes nggari ja'i Alatala I'a kana manguli ka kita, 'Ane iwetu nokuya komi da'a nomparasaya Yohanes?' 26 Tapi ane kita manguli kuasana nggari ja'i manusia, kita kana maeka ri ja'i ntau dea, sabana ira pura-pura nomparasaya Yohanes mpu'u-mpu'u samba'a nabi." 27 Jadi nesonomo ira ka Yesus, "Da'a ninjani kami nggari umba kuasana." Pade nanguli Yesus ka ira, "Ane iwetu da'a wo'u kutesa ka komi ante kuasa nggari umba Aku nowia mpengele-ngele etu." 28 Pade nekutanamo Yesus ka topanggeniaka nto Yahudi etu, "Iwenu pombarata komi ewa tesa iwe'i? Naria samba'a uma noana romba'a ngana langgai. I'a nanguli ka anana ulumbua, 'Anaku, kalaumo iko mokarajaa eona e'i ri tinalu to nipotuja anggur ria.' 29 Pade nesono ana ulumbua, 'Iyo, uma. Aku malau.' Tapi kakonona i'a da'a nalau. 30 Pade nalau wo'umo uma etu mpaka ri ja'i anana karomba'ana pade niulina, 'Anaku, kalaumo iko mokarajaa eona e'i ri tinalu to nipotuja anggur ria.' Tapi nesonomo ngana etu, 'Manaku!' Tapi naliu etu nanjosomo rarana sampe nalau mpu'umo i'a nokarajaa ri tinalu." 31 Pade nekutana Yesus ka topanggeniaka nto Yahudi etu, "Jadi nggari ngana romba'a etu isemana to nantuki dota nu umana?" Nesonomo ira, "Ngana karomba'ana." Nanguli Yesus ka ira, "Aku mpu'u-mpu'u notesa ka komi, tau-tau naja'a ewa topomperapi balasitee bo besi-besi bajinga to mokolu majadi todea riara Poparenta nu Alatala, da'a komi. 32 Sabana Yohanes Topediu narata nompatuduki ka komi jala to nanoana, pade komi da'a nomparasaya i'a. Tapi topomperapi balasitee bo besi-besi bajinga nomparasaya i'a. Pade naupa komi nanggita etu komi da'a najea, komi da'a ntoto nomparasaya." 33 Pade nanguli wo'umo Yesus ka ira, "Epe wo'umo porapa ntanina iwe'i: Naria samba'a pue ntinalu to nombatuja anggur ri tinaluna. Niwala ntikuna tinalu etu pade nikaena lowu peto'o parewa rapompea wua anggur. Pade nipowiana sou panggatono tinalu etu. Naopu etu nipajana tinalu etu ka bara sakuya mba'a topokarajaa, pade nalaumo i'a mpaka ri ngata ntanina. 34 Sangga naratapa tempona mompui wua anggur nipakaunamo bara sakuya mba'a batuana malau mpaka ri ja'i topokarajaa tinalu etu ala mantarima bagiana nggari wua anggur. 35 Tapi topokarajaa tinalu etu nanjoko batua to nipakauna, pade naria to niboba ira, naria sanupa nipatesi ira, pade naria to nirempe ira ante watu. 36 Naopu etu sangganipa wo'u pue ntinalu nompakau batua ntanina neliu nggadea nggari pamulana mpaka ri ja'i ntopokarajaa tinalu. Tapi ira aga nipowia ntopokarajaa tinalu nasimbayu ewa batua-batua pamulana. 37 Kaopuna nipakaunamo anana mboto. Nipekirina, 'Natantumo ira kana mekou ri ja'i anaku mboto!' 38 Tapi tempo topokarajaa tinalu etu nanggita ana pue ntinalu etu, nangulimo ira samba'a bo samba'a, 'Kitamo! Etumo ana pue ntinalu to majadi pue ntinalu banepia. Kamaimo kita mompatesi i'a ala tinalu e'i raalata majadi bagiata.' 39 Jadi nisoko iramo ana pue ntinalu etu pade i'a nikeni ira mpaka ri sawaliku tinalu etu pade nipatesi ira." 40 Pade nekutanamo Yesus ka topanggeniaka nto Yahudi etu, "Jadi ane pue ntinalu etu manjili nuapa rapowiana ka topokarajaa-topokarajaa tinaluna etu?" 41 Nesonomo ira, "Natantumo i'a kana mompatesi ira to naja'a etu pade mombapaja tinalu etu ka tau ntanina to madota mombawai ka i'a bagiana nggari asele ntinalu ane marata tempo mpowuana." 42 Pade nangulimo Yesus ka ira, "Natantumo nibasa komi tesa riara Buku Nagasa to nanguli iwe'i: 'Watu to nitajiaka ntopowia sapo, watu etumo to najadi palo mpondasi to neliu nggaroso. Etu nipowia i Pue, sangele powia to nipogumaa matata.' " 43 Nanguli wo'umo Yesus ka ira, "Jadi kuuli ka komi, bagia komi riara Poparenta nu Alatala kana raala nggari ja'i komi pade rawai ka tau-tau ntanina to nompowia pokainggu to masipato ka todea nu Alatala. 44 Pade isema-sema to nanawu ri bunggu watu etu kana marege pade isema-sema raparumpi watu etu kana marege majadi sowu." 45 Tempo balengga-balengga topanggeni agama bo tau-tau to Parisi nangepe porapa Yesus etu, ninjani ira porapa etu nipawelana ka ira. 46 Etu sampe ira madota manjoko Yesus. Tapi ira naeka ka tau dea, sabana nantuki pombarata tau dea Yesus etu samba'a nabi.
1 Yesus nombatesa porapa ntanina ka topanggeniaka nto Yahudi. Niulina, 2 "Tempo Alatala moparenta namala rarapaka ewa samba'a magau to nompowia posusa mponika anana langgai. 3 I'a nompakau batua-batuana malau mompokio pura-pura tau to nigagana mantuki posusa etu. Tapi ira pura-pura to nigaga etu da'a nadota nalau. 4 Jadi magau etu nompakau batua-batua ntanina ante tewai iwe'i: 'Kau uli ka ira to nigagaku, nasadia puramo. Japi bo ana-ana japi to naboyana naopumo nisambale, pade nasadia puramo. Kamaimo mantuki posusaku e'i!' 5 Tapi ira pura-pura to nipokio iwetu da'a ntoto nompariara pegaga etu. Ira aga mbau nalau nompowia bagona mboto. Naria to nalau mpaka ri tinalu pade naria ntanina nalau nombaurusi podagana, 6 naria sanupa nanjoko batua-batua to nipakau magau etu pade nombaboba bo nompatesi ira. 7 Sangga nangepe nuapa to najadi etu, narau mpu'umo rara magau etu. I'a nompakau tantara-tantarana malau mompatesi topepatesi-topepatesi etu pade mompalabu ngata ira. 8 Naopu etu nipokiona wo'umo batua-batuana pade niulina ka ira, 'Nasadiamo posusa mponika anaku, tapi ira to nigagaku da'a masipato momai ri posusa e'i. 9 Jadi kalaumo komi mpaka ri jala-jala jama pade isema-sema raposirata komi, pokiomo ira momai ri posusata e'i.' 10 Jadi nalaumo batua-batuana mpaka ri jala-jala jama nompasiromu pura-pura tau to niposirata ira, nabeloka tau-tau to nabelo rarana, nabeloka tau-tau naja'a sampe kaopuna naponu puramo sapo posusa etu ante torata. 11 Pade nesuamo magau manggita torata-torata. Ri tatongo torata ri setu nikitana samba'a tau da'a nopakea pakea mposusa. 12 Nekutanamo magau ka tau etu, 'Wega, nokuya komi nesua ri se'i da'a nopakea mposusa?' Tapi tau etu da'a ria notingo. 13 Pade nangulimo magau ka batuana, 'So'omo palena bo kadana pade tajiakamo i'a ri sawalikuna ri peto'o narumau. Ri setu i'a kana mageo bo mosinggiki baga ante kasusana.' " 14 Pade Yesus nompakaopu porapana iwe'i: "Nadea tau nipokio tapi nakura to nipelisi." 15 Naopu etu nalaumo tau-tau to Parisi mowia sintuwu iwenu ira mamala mangelo kasala tesa Yesus. 16 Ira nompakau bara sakuya mba'a topantuki ira nosanggani ante bara sakuya mba'a tau to nosabingga ante Magau Herodes malau mpaka ri ja'i Yesus. Naratapa ri setu nangulimo ira to nipakau etu ka Yesus, "Guru, ninjani kami Komi samba'a tau to nanoa rara. Komi nompatuduki ante nanoto pokainggu to masipato riara mpanggita Alatala. Komi da'a naeka ri ja'i isema-sema sabana Komi da'a nompoposisala manusia. 17 Jadi tulungi tesa ka kami pombarata Komi. Nantuki Atura-atura agama masipato mombabayari balasitee ka Magau Kaisar bara da'a?" 18 Tapi Yesus nangginjani patuju ira to naja'ana. Etu sampe I'a nanguli, "Umba komi, topebagiu! Nokuya komi nompasimbuku mangelo kasala tesaku? 19 Popokita ka Aku sampeka doi salaka to nipake komi mombabayari balasitee." Jadi ira nompopokita ka I'a sampeka doi salaka. 20 Pade nekutanamo Yesus, "Gambara bo sanga isema to naria ri doi e'i?" 21 Nesonomo ira, "Gambara bo sanga Magau Kaisar." Jadi nangulimo Yesus ka ira, "Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala!" 22 Sangga nangepe pesono Yesus etu, nogumaamo ira. Jadi kaopuna nalaimo ira nompalasi I'a. 23 Ri eo etu wo'u naria bara sakuya mba'a tau to Saduki narata ri ja'i Yesus. Ane to Saduki, iramo tau-tau to Yahudi to nomparasaya tau namate da'a mana matuwu bali banepia. 24 Jadi ira nompekutana Yesus, "Guru, nabi Musa nompatuduki iwe'i: 'Ane maria samba'a langgai namate da'a noana, sampesuwuna langgai kana momporongo besi baluna etu ala ana ira romba'a etu majadi muli sampesuwuna to namatena etu.' 25 Naria ri tatongo kami ira nosampesuwu pitumba'a langgai bayangi. Ulumbuana norongomo tapi da'apa ira njamboko noana namatemo i'a. Naopu etu baluna etu niporongo tua'ina. 26 Tapi da'apa ira noana tua'ina etu wo'u namate. Pade iwetumo najadi ante katolumba'ana sampe ri sampesuwuna kapitumba'ana. 27 Kaopuna besi etu wo'u namate. 28 Jadi tempo tau namate matuwu bali banepia, besi etu rongo isema nggari ira pitumba'a, sabana i'a niporongo ira pura-pura?" 29 Nesonomo Yesus, "Nasala pompekiri komi sabana da'a ninjani komi isi Buku Nagasa, pade da'a wo'u ninjani komi kuasa nu Alatala. 30 Tempo tau namate matuwu bali banepia, katuwu ira kana masimbayu ewa malaeka-malaeka ri suruga, ira mana morongo bara raporongo. 31 Iwenumo? Da'apa nibasa komi nuapa to nitesa Alatala ka komi riara Buku Nagasa ewa tau namate matuwu bali? I'a nanguli iwe'i: 32 'Akumo Alatala Abraham, Alatala Ishak bo Alatala Yakub.' Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi nanotomo Abraham, Ishak bo Yakub mana namate." 33 Sangga nangepepa pepatuduki Yesus etu, nogumaa puramo tau dea. 34 Tempo tau-tau to Parisi nangepe lele tau-tau to Saduki nekalino mbotomo sabana nidagi Yesus, nasiromumo ira ri ja'ina. 35 Pade samba'a nggari tatongo ira, etumo samba'a guru agama, nompasimbuku nangelo kasala tesa Yesus ante nekutana iwe'i: 36 "Guru, nggari pura-pura parenta ri Atura-atura agamata umbana to neliu nggapokona?" 37 Nesonomo Yesus, " 'Potowemo Pue Alatalamu ante mpu'u-mpu'u raramu, ante pura-pura katuwumu, pade ante pura-pura pekirimu.' 38 Etumo parenta pamulana to neliu nggapokona. 39 Pade parenta karongelena to nasimbayu ante parenta pamulana iwe'i: 'Potowemo sanggamanusiamu nasimbayu ewa komi nompotowe koromu mboto.' 40 Rongele parenta etu pu'u nu pura-pura Atura Agama bo pepatuduki nu nabi-nabi nggaolu." 41 Tempo tau-tau to Parisi danasiromu ri setu, nekutanamo Yesus ka ira, 42 "Iwenu pombarata komi ewa Magau to Mompakasalama to nijanji Alatala nggaolu? Muli isema I'a?" Nesonomo ira, "Muli Magau Daud." 43 Nangulimo Yesus, "Ane iwetu, nuapa sabana i Daud nompokio I'a Puena? Sabana ante pekeniaka Nosa Nagasa nu Alatala i Daud nanguli iwe'i: 44 'Pue Alatala nanguli ka Pueku, kamai pekatokomo ri sabingga ngganaku sampe Aku mompowia pura-pura balimu mekou ri ja'imu.' 45 Jadi ane Magau to Mompakasalama niuli i Daud Puena, iwenu sampe I'a nireke aga muli i Daud?" 46 Da'a ria samba'a tau namala mombasono Yesus. Pade nompamula nggari eo etu da'a mana naria tau nabia mompekutana I'a.
1 Naopu etu nangulimo Yesus ka tau dea bo anaguru-anaguruna, 2 "Guru-guru agama bo tau-tau to Parisi nipakakuasa mompatuduki Atura-atura i Musa ka komi. 3 Etu sampe komi masipato mantuki bo matundu riara pepatuduki ira. Tapi ne'e mompasiala pokainggu ira, sabana ira mboto da'a nantuki pepatuduki to nipatuduki ira ka komi. 4 Ira nompakadea atura-atura bo ada-ada to natomo ratuki, pade ira nompasu'u tau mantuki atura-atura bo ada-ada etu. Tapi ira mboto da'a madota mantulungi tau mantuki atura-atura bo ada-ada etu. 5 Pura-pura powia ira aga nipowia ala rakita ntau. Ira nompake talidangga to narembana to niisi ante tesa-tesa nu Alatala, pade ira nompakandate wua nu pakea ira ala manoto ka tau ntanina ira natutu nantuki Atura-atura agama. 6 Nadamba rara ira nekatoko ri pekatoko ntotu'a ri posusa bo peto'o to nibila ri sapo mpodade. 7 Nadamba mpu'u rara ira ane ira rabila ntau ri potomu pade ane ira nipokio ntau Guru. 8 Tapi ane komi, ne'e komi madota rabila bo rauli Guru iwetu, sabana aga samba'a lau gurumu, etumo Kristus. Pade komi pura-pura nosampesuwu samba'a bo samba'a. 9 Pade ne'e mompakalanga tau ri dunia e'i ante mompokio ira Uma, sabana aga samba'a lau to masipato rauli Uma, etumo Umamu ri suruga. 10 Pade ne'e wo'u komi madota rauli Topanggeniaka, sabana aga samba'a lau to masipato rauli Topanggeniaka, etumo Kristus. 11 Tapi tau to nalanga katuwuna ri tatongo komi i'amo tau to nantulungi komi. 12 Tau to mompakalanga rarana mboto kana rapakaede, pade tau to mompakaede rarana mboto kana rapakalanga. 13 Tapi mandasa mpu'umo komi guru-guru agama bo tau-tau to Parisi! Komi aga nabelo ri lenje! Komi nombalawa tau ntanina majadi todea riara Poparenta nu Alatala. Komi mboto da'a madota majadi todeana pade komi aga nombalawa tau ntanina to madota majadi todeana. [ 14 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Komi nombabagiu tobalu-tobalu besi ala mombarata sapo ira. Pade komi nantabuniaka pokainggu komi to naja'a etu ante nosambaya nasae-sae. Etu sampe meliu nggatomo pesuku to rapawela ka komi banepia.] 15 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Naraji mpu'u komi nompatuduki tau ntanina mantuki pepatuduki komi. Komi nalau nombawote tasi bo nolumako nakawao ri kabatana ala mangelo samba'a tau mesua agamamu. Sangga nesuapa i'a agamamu i'a nipajadi komi samba'a tau masipato mesua riara naraka to ronggani kaja'ana nggari komi mboto. 16 Mandasa mpu'umo komi topanggeniaka-topanggeniaka to naburo! Komi nompatuduki iwe'i: 'Ane samba'a tau nojanji ante nanguli sanga Sapo Mpepue, i'a da'a nipo'u pojanjina. Tapi ane i'a nojanji ante nanguli bulawa riara Sapo Mpepue, i'a nipo'u pojanjina etu.' 17 Nadoyo mpu'u komi! Komi ewa tau naburo! Umbana to neliu nggapokona, bulawa atau Sapo Mpepue to nompakagasa bulawa to naria riarana? Natantumo Sapo Mpepue to napokona! 18 Komi wo'u nompatuduki tau iwe'i: 'Isema-sema nojanji ante nanguli meja mpesomba ri Sapo Mpepue i'a da'a nipo'u pojanjina etu. Tapi ane i'a nojanji ante nanguli pesomba to nipesomba ri bunggu meja mpesomba etu, i'a nipo'u pojanjina etu.' 19 Komi mpu'u-mpu'u ewa toburo! Umbana to neliu nggapokona, pesomba ka Alatala atau meja mpesomba? Natantumo meja mpesomba ri Sapo Mpepue etumo to nompakagasa pesomba to nipesomba ri bungguna! 20 Sabana etu ane samba'a tau nojanji ante nanguli meja mpesomba batuana i'a nojanji ante nanguli meja mpesomba nosanggani ante pura-pura nuapa to nipesomba ri bungguna. 21 Pade ane samba'a tau nojanji ante nanguli Sapo Mpepue, etu nasimbayu ewa i'a nojanji ante nanguli Sapo Mpepue bo Alatala to neto'o ri sapo etu! 22 Pade ane samba'a tau nojanji ante nanguli suruga etu nasimbayu ewa i'a nojanji ante nanguli sanga pekatoko nu Alatala ri suruga bo Alatala to nekatoko ri bungguna! 23 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Sabana komi nombawai ka Alatala sabagia nggari sampulu bagia nggari rampa-rampa ri lalowomu ewa karanggada, nggulasi bo muguntumpa. Tapi parenta-parenta to napokona da'a ntoto nituki komi, ewa parenta moinggu manoa, maasi mata ri ja'i roamu bo matutu mantuki janjimu. Kakonona parenta-parenta to napokona etu paraluu ratuki komi, tapi ne'e rakalinga atura-atura ntanina etu wo'u. 24 Komi nasimbayu ewa tau naburo madota mombanini tau ntanina! Komi nasimbayu ewa tau to nanggaliaka karomu nggari panginu komi, tapi binata nabete ewa unta niome komi! 25 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Komi norama sanggiri bo tubu ri bagia sawalikuna, tapi isi riarana aga niago komi nggari ja'i ntau ante da'a ria kabasa-basana. 26 Komi mpu'u-mpu'u ewa tau naburo! Pegasa ntanimo ruru bagia riara nu sanggiri ala bagia sawalikuna wo'u magasa! 27 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Komi nasimbayu ewa dayo to nicee naputi. Ri sawalikuna nagaya mpu'u, tapi riarana aga naria wuku-wuku ntomate bo mpengele-ngele to nawau. 28 Iwetu wo'u komi. Riara mpanggita ntau komi nireke tau nanoa. Tapi riara nta'i komi aga naria bagiu bo kaja'ana! 29 Mandasa mpu'umo komi guru-guru agama bo tau-tau to Parisi! Komi aga nabelo ri lenje! Komi nompakabelo dayo nabi-nabi Alatala nggaolu bo nombawera mpakagaya dayo nu tau-tau nanoa nggaolu. 30 Komi nanguli, 'Ane kami natuwu tempo totu'ata nggaolu, kami da'a ntoto nasintuwu nompatesi nabi-nabi!' 31 Ante iwetu komi mboto nompangaku koromu muli-muli ntau to nompatesi nabi-nabi nggaolu. 32 Jadi tambai pakaganamo silaka-silaka nu totu'a komi nggaolu etu! 33 Umba komi, topebagiu! Umba komi muli tau-tau naja'a! Da'a ntoto mamala komi mombakabasaka koromu nggari pesuku riara naraka banepia! 34 Epemo mpakabelo-belo! Aku kana mompakau ka komi nabi-nabi bo tau-tau nanoto bo guru-guru mompatuduki tesaku ka komi. Maria sanu rapatesi komi, maria sanu to rapaku komi ri kayu parika, pade maria sanupa to raporo komi riara sapo-sapo mpodade komi. Pade maria sanupa to raraga-raga komi nggari saongu ngata mpaka ri ngata to rakalau ira. 35 Jadi kaopuna komi to natuwu we'i-we'i kana mombatanggu lei nu tau-tau nanoa rarana to nipatesi ri dunia e'i, nompamula nggari lei i Habel to nanoa rarana sampe ri lei i Zakharia, ana i Berekia to nipatesi ri lalowo Sapo Mpepue ri olo nu Sapo Mpepue bo meja mpesomba. 36 Aku mpu'u-mpu'u notesa ka komi, komi to natuwu we'i-we'i kana mombatanggu pura-pura kaja'a ntotu'a komi nggaolu etu!" 37 "Umba komi to Yerusalem, pue ngata Yerusalem! Komi nompatesi nabi-nabi pade komi nombarempe ante watu tau-tau to nisuro Alatala mpaka ri ja'imu! Nadea ngganimo Aku madota manggalendu komi pura-pura nasimbayu ewa manu nombaruta anana, tapi komi da'a madota. 38 Epemo! Sapo Mpepue e'i kana rapalasi Alatala. 39 Sabana kuuli ka komi, komi mana manggita Aku sampe Aku marata bali ri dunia pade komi mantotoaka Aku ante manguli, 'Perapi Pue mombagane Magau to narata niposumba Alatala!' "
1 Naopu etu nalaumo Yesus nompalasi Sapo Mpepue. Tempo etu naratamo anaguruna nompopokita ka I'a kagaya nu pura-pura Sapo Mpepue. 2 Tapi nangulimo Yesus ka ira, "Nikita komi sapo-sapo e'i? Aku mpu'u-mpu'u notesa ka komi, kana marata tempona banepia pura-pura to nikita komi e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero." 3 Naopu etu nalaumo Yesus mpaka ri Bulu Zaitun. Tempo I'a nekatoko ri setu naratamo anaguru-anaguruna ri ja'ina ala mompekutana I'a nggalino. Niuli ira, "Tulungi ulimo ka kami, nepia pura-pura to nitesa Komi pane'a majadi, pade nuapa tandaina karatamu bo kaopu nu dunia e'i?" 4 Nesonomo Yesus ka ira, "Pakabelo-belo ala ne'e komi rabagiu! 5 Sabana madea tau kana marata mompobalu sangaku. Ira manguli, 'Akumo Magau to Mompakasalama!' Pade madea tau rabagiu ira. 6 Komi kana mangepe wamba ntau mosipatesi pade raepe komi wo'u lele ntau nosipatesi. Tapi ne'e komi maeka, sabana etu pura-pura kana majadi ntani ruru. Tapi etu da'apa tandaina kaopu nu dunia. 7 Tempo etu tau-tau nggari sangata kana mosibali ka tau-tau to sangatana, pade magau simbau magau wo'u kana mosiewa. Pade ri umba-umba ri dunia kana maria kamateoro bo lingu. 8 Tapi kajadia etu pura-pura aga kasusa pamulana, ewa ju'a besi ntora moana. 9 Tempo etu komi kana rasoko pade rawai ka tau to mompandasa komi pade mompatesi komi. Komi kana raporau rara ntau nggari umba-umba ri dunia sabana komi nomparasaya Aku. 10 Pade tempo etu madea tau kana mokanggaura momparasaya Aku. Maria to mombawai roa ira topomparasaya ka bali ira. Pade madea tau mosiporau rara samba'a bo samba'a. 11 Pade madea nabi topodawa kana meumba pade mombabagiu tau dea. 12 Ri tempo etu kaja'ana kana mantambai kadeana sampe madea tau mana mosimpotowe. 13 Tapi isema-sema to maroo momparasaya sampe ri kaopuna kana rapakasalama. 14 Pade Kareba Belo ewa Poparenta nu Alatala kana rapatolele ri njumaongu dunia ala pura-pura manusia mamala mangepe. Maopu etu pade marata kaopu nu dunia." 15 "Pade komi kana manggita to niuli 'Kaja'ana to Mompakatantoru' mekanggore ri Sapo Mpepue, ewa to niboto nabi Daniel nggaolu. (Isema-sema mombabasa tesa e'i pekiri mbotomo batuana.) 16 Tempo komi manggita etu tau-tau to naria ri Bagia Yudea kana mangowa malai mpaka ri buluna. 17 Ane tau-tau to nompamaya ka poiri ri bunggu nu sapona ne'e mana ira mesua rara njapo mangala bara nuapa-nuapa. 18 Ane tau-tau ri tinaluna, ne'e mana ira manjili ri ngata mangala pakeana. Palaimo masasinta! 19 Ri eo etu mandasa mpu'umo besi-besi to matiana bo ira to danompatomi. 20 Pekakaimo ka Alatala ala tempo komi mangowa malai etu da'a mawela tempo leni bara Eo Mpenonto. 21 Sabana ri eo etu maja'a mpu'u kasusa bo kapari to mawela manusia. Nggari lamba pamulana sampe we'i-we'i da'apa sanggani najadi kasusa bo kapari to naja'a ewa etu, pade da'a mana maria ri tempo marata. 22 Ane tempo kasusa etu da'a masasinta rapakaopu i Pue, natantumo da'a kamba samba'a mamala matuwu. Tapi nggari towe Alatala ka todea topomparasaya, tempona etu kana masasinta rapakaopuna. 23 Ri tempo etu ane maria tau manguli ka komi, 'Kitamo! Ri se'imo Magau to Mompakasalama,' bara manguli, 'Ri setumo I'a,' ne'e raparasaya komi tesana. 24 Sabana kana meumba tau topodawa to mompangaku iramo Magau to Mompakasalama, pade meumba wo'u nabi-nabi topodawa to mompowia tandai-tandai to nipogumaa bo kabaraka-kabaraka ala mombabagiu tau. Ane mamala nau tau-tau to nipelisi Alatala rabagiu ira wo'u! 25 Toramo! Da'apa etu pura-pura najadi nibotoku mamimo ka komi! 26 Jadi ane maria tau manguli ka komi, 'Kitamo! Magau to Mompakasalama naria ri karawa baina,' ne'e komi malau! Ane ira manguli, 'Kitamo! Ri setumo I'a rara njapo,' ne'e raparasaya komi tesa ira! 27 Sabana tempo Aku, Ana nu Manusia marata bali ri dunia e'i, karataku kana matekita ri umba-umba ri dunia, nasimbayu ewa kila neumba ri kamataeona pade norea sampe ri kasolona. 28 Ane rakita komi tonji kolaa masiromu manggoni, natantumo nanoto ri setu naria binata namate. Iwetu wo'u ante karataku. Natantumo etu manoto ka pura-pura tau." 29 "Ane maopumo tempo kasusa bo kapari etu, kaliu-liu mata eo kana majadi marumau pade wula mana mewanta. Betu'e-betu'e kana manawu nggari langi pade kuasa-kuasa to naria ri langi kana ragagoya pura. 30 Ri tempo etu kana meumba tandaina ri langi to mompakanoto karataku, Ana nu Manusia. Pade pura-pura manusia ri dunia kana mageo mpajea. Ira kana manggita Aku, Ana nu Manusia mana'u riara kulimu ante kuasa bo karemeku to nipogumaa. 31 Kololio to nabetena kana rapopomoni pade malaeka-malaekaku kana kupakau malau mompasiromu pura-pura tau to nipelisiku nggari umba-umba ri dunia." 32 "Pariaramo pepatuduki nggari kayu ara. Ane komi manggita rangga-ranggana nompamula nangura bo tawana nompamula noroya, natantu ninjani komi namosumo tempo eo mapane. 33 Iwetu wo'u ane komi manggita kajadia-kajadia to nitesaku pani'a, kana ranjani komi namosumo tempo karataku. Damo mompopea tempona. 34 Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate. 35 Langi bo dunia kana malipo tapi tesaku kana maroo sampe ri kasae-saena." 36 "Tapi eo bo tempo karataku etu da'a ria samba'a nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina. 37 Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi Nuh nggaolu. 38 Tempo etu da'apa njumaongu dunia nipakalodo ue bete manusia nakanjalia. Ira aga nanggoni bo nanginu pade norongo bo nosiporongo ewa biasa sampe nabi Nuh nesua riara sakaya betena. 39 Da'a ninjani ntau dea nuapa rapawela ka ira sampe pura-pura ue ri dunia nanggabuntu sanggani bo ira nalome puramo. Iwetu wo'u tempo Aku, Ana nu Manusia marata. Manusia bate-batena makanjalia iwetu. 40 Ri tempo etu kana maria romba'a langgai manggawia mpasanggani ri tinalu. Samba'a kana kuala, pade samba'a kana kuboli setu. 41 Pade ane maria besi romba'a mogili mpasanggani-nggani, samba'a kana kuala pade samba'a wo'u kana kuboli ri setu. 42 Etu sampe kuuli, komi kana mainga, sabana da'a ninjani komi nepia karata Pue komi." 43 "Toramo tesa e'i! Ane rapana samba'a pue njapo nangginjani tinti sakuya nggawengina topangangga marata, natantumo i'a kana mainga-inga. I'a da'a mompalamba topangangga mesua rara njapona. 44 Iwetu wo'u komi kana mainga mompopea karataku, sabana Aku, Ana nu Manusia kana marata ante da'a ranjani-njani komi." 45 "Rapana maria samba'a batua to nanoto to natutu nantuki dota madikana. Natantu i'amo to raonggotaka madikana majadi topombaurusi pura-pura batua rara njapo. I'amo to mombaurusi panggoni ka batua-batua ntanina ri tempona. 46 Mabelo mpu'umo batua etu ane madikana manjili pade manggita i'a mompowia panggawia to niparasaya ka i'a. 47 Aku mpu'u-mpu'u notesa ka komi, batua etu kana raonggotaka madikana majadi topombaurusi pura-pura mbara-mbarana. 48 Tapi mandasa mpu'u ane rapana batua etu maja'a pokaingguna pade i'a mompekiri riara nta'ina iwe'i: 'Damasaepa madikaku manjili.' 49 Pade i'a mompamula mombaboba batua-batua ntanina pade i'a aga manggoni manginu mpasanggani-nggani ante tau nakalangu. 50 Tapi tempo batua etu makanjalia iwetu, madikana kana manjili ri eo bo tempo to da'a ninjanina. 51 Pade batua etu kana rapatesi. I'a kana ratajiaka riara naraka mpasanggani-nggani ante tau-tau aga nabelo ri lenje. Ri setu ira mageo-geo bo mosinggiki baga ante masusa mpu'u rara."
1 "To majadi tempo Aku marata bali ri dunia nasimbayu ewa porapa e'i: Naria sampulu mba'a randoo nalau mantomunaka boti langgai, simbau nanggeni poindona. 2 Limamba'a nggari tatongo ira nadoyo, pade limamba'a ira nanoto. 3 Ira to nadoyona nanggeni poindo tapi da'a nipakasadia ira lana rapombasowo. 4 Tapi ira to nanotona nanggeni poindo pade nipakasadia ira wo'umo lana rapombasowo. 5 Nasae mpu'u karata boti langgai sampe naluru mata pade napisi puramo ira. 6 Ntongo wengi naria tau nongare, 'Ritumo boti langgai! Kamaimo mantomunaka i'a!' 7 Nangepe etu kaliu-liu nembangumo sampulu mba'a randoo etu pade simbau nompakasadia poindona. 8 Pade nangulimo randoo-randoo to nadoyona ka roana to nanotona, 'Wega, wai ka kami sakedi lanamu. Mapayamo poindo kami e'i!' 9 Tapi nesonomo ira to nanotona, 'Ne'ena, sabana da'a magana ngina lana rapombasowo poindo kami bo poindo komi. Kalaumo komi mangoli lana ri ja'i ntopobalu lana.' 10 Jadi nalaumo randoo-randoo to nadoyona mangoli lana. Tapi tempo ira da ri tatongo jala lau mangelo lana naratamo boti langgai. Pade randoo-randoo to nasadia poindona nesua rara njapo nosusa mpasanggani ante boti langgai. Sangga nesuapa ira nipikumo pewobo. 11 Naopu etu narata wo'umo limamba'a randoo to nadoyo pane'a. Pade nongaremo ira nggari sawalikuna, 'Pue njapo, tulungi bea ka kamimo pewobo!' 12 Tapi nesonomo boti langgai etu, 'Da'a ntoto ninjaniku isema komi!' " 13 Pade Yesus nompakaopu porapana iwe'i: "Etu sampe komi kana mainga-inga, sabana da'a ninjani komi eona bo tempo karataku." 14 "To majadi tempo Aku marata bali nasimbayu ewa porapa e'i: Samba'a madika nopatuju malau mpaka ri ngata nakawao. Da'apa i'a nalau nipokiona batua-batuana pade niwaina ka ira kakalumanana. 15 Samba'a niwaina ka limanjobu mpeka doi bulawa, samba'apa niwaina ka ronjobu mpeka doi bulawa, pade samba'apa niwaina ka sanjobu mpeka doi bulawa. Ira niwai ka doina nantuki pompakule ira mompoposaro doi. Naopu etu nanggaliwomo madika etu. 16 Tau to niwai ka limanjobu mpeka doi bulawa kaliu-liu nalau nompoposaro doi etu sampe niratana sarona limanjobu mpekana. 17 Iwetu wo'u tau to niwai ka ronjobu mpeka doi bulawa nalau nompoposaro doina etu sampe niratana sarona ronjobu mpekana. 18 Tapi tau to niwai ka sanjobu mpeka doi bulawa etu nalau nombakae lowu ri tana pade nitabuniakana doi nggari madikana etu ri lowu. 19 Nasae mpu'umo madika etu pade natingguli bali. Sangga naratapa ri setu nipokionamo batua-batuana ala mombareke saro nu doina. 20 Naratamo batua to niwai ka limanjobu mpeka doi bulawa etu nanggeni doi ante saro limanjobu mpeka to niratana. Pade niulina, 'Madika, komi nombawai ka aku limanjobu mpeka doi bulawa bopia. Kitamo! E'imo ana nu doi etu limanjobu mpekana.' 21 Nangulimo madika, 'Nabelomo! Komi samba'a batua to nabelo to natutu mantui bago to niparasaya ka komi. Komi namala niparasaya ante mbara-mbara sakedi. Sabana etu kana kuparasaya ka komi mbara-mbara madea. Kamaimo madamba-damba mpasanggani ante aku.' 22 Pade narata wo'umo batua to niwai ka ronjobu mpeka doi bulawa. Nangulimo i'a, 'Madika, komi nombawai ka aku ronjobu mpeka doi bulawa bopia. Kitamo! E'imo ana nu doi etu ronjobu mpekana.' 23 Nangulimo madika, 'Nabelomo! Komi samba'a batua to nabelo to natutu nantui bago to niparasaya ka komi. Komi namala niparasaya ante mbara-mbara sakedi. Sabana etu kana kuparasaya ka komi mbara-mbara madea. Kamaimo madamba-damba mpasanggani ante aku.' 24 Naopu etu naratamo batua to niwai ka sanjobu mpeka doi bulawa. Nangulimo i'a, 'Madika, ninjaniku komi samba'a tau to nasoa. Komi nangala asele ri tinalu anu da'a nituja komi, pade komi nangala anu da'a nisawu komi. 25 Naekamo raraku. Jadi aku nalau nantabuniaka doi komi rara lowu. Kita we'i! E'imo doi komi, madika.' 26 Pade nangulimo madika, 'Iko samba'a batua to naja'a bo nasondo rarana! Ninjanimu aku nangala asele nggari tinalu anu da'a nitujaku, pade aku nangala anu da'a nisawuku. 27 Ane iwetu nokuya komi da'a nombawai doiku etu ka tau nompoposaro doi ala tempo aku narata mamala kuala mpanjili doiku etu ante sarona?' 28 Pade niuli madika ka batuana ntanina, 'Alamo doi bulawa sanjobu mpeka etu nggari ja'ina, rawai ka batua to naria sampulu njobu mpeka! 29 Sabana isema to naria madea kana ratambai ka i'a sampe madea mpu'u ri ja'ina. Tapi isema to naria aga sakedi, etu wo'u kana raala mpakaopu nggari ja'ina. 30 Pade tajiakamo batua to da'a ria gunana etu mpaka ri sawalikuna ri karumauna. Ri setu i'a kana mageo bo mosinggiki bagana ante masusa rara.' " 31 "Tempo Aku, Ana nu Manusia manjili bali ri dunia ante kuasaku ewa magau nosanggani ante malaeka-malaekaku, Aku kana mekatoko ri pekatoko magau to nagayana. 32 Pade pura-pura manusia ri dunia kana rapasiromu ri ngayoku pade Aku kana mompopoga'a ira majadi robingga nasimbayu ewa samba'a topoewu nompopoga'a bimbana nggari towauna. 33 Tau-tau to nanoana kana rapasiromu ri sabingga ngganaku, pade tau-tau to naja'ana kana rapasiromu ri sabingga njidiku. 34 Pade Aku kana manguli ka ira ri sabingga ngganaku iwe'i: 'Kamaimo komi to nigane Umaku. Pesuamo riara Poparentaku! Naria peto'o ri se'i to nipakasadia ka komi nggari lamba pamulana. 35 Sabana tempo Aku naoro ta'iku komi nombawai ka Aku panggoni. Tempo nabai tamboloku, komi nombawai ka Aku panginu. Tempo Aku najadi torata komi nantarima Aku raranjapomu. 36 Tempo Aku da'a ria pakeaku komi nombawai ka Aku pakea. Tempo Aku naju'a komi nantalioda Aku. Tempo Aku riara tarunggu komi narata nanggita Aku.' 37 Pade tau-tau to nanoa etu kana manguli, 'Pue, ipiamo kami nanggita Komi naoro ta'i pade nombawai ka Komi panggoni, bara nanggita Komi nabai tambolo pade nombawai ka Komi panginu? 38 Ipiamo Komi najadi torata pade kami nantarima Komi raranjapo kami, bara nanggita Komi da'a nopakea pade nombawai ka Komi pakea? 39 Ipiamo kami nanggita Komi naju'a bara riara tarunggu pade kami nalau nantalioda Komi?' 40 Pade Aku kana mombasono ira, 'Aku mpu'u-mpu'u notesa ka komi, nuapa to nipowia komi ka sampesuwu-sampesuwuku nau aga samba'a to naede katuwuna, nasimbayu ewa komi nompowia etu ka Aku.' 41 Maopu etu Aku kana manguli ka ira ri sabingga njidiku, 'Palaimo nggari ja'iku komi to nijanjiaka Umaku! Palaimo riara apu to najela sampe ri kasae-saena to nipakasadia ka Magau nu Seta ante malaeka-malaeka to nantuki i'a. 42 Sabana tempo Aku naoro ta'iku komi da'a nombawai ka Aku panggoni. Tempo nabai tamboloku komi da'a nombawai ka Aku panginu. 43 Tempo Aku najadi torata komi da'a nantarima Aku raranjapomu. Aku da'a nopakea tapi komi da'a nombawai ka Aku pakea. Aku naju'a pade Aku nitarunggu, tapi komi da'a narata nantalioda Aku.' 44 Pade ira kana manguli ka Aku, 'Pue, ipiamo kami nanggita Komi naoro ta'i, bara nabai tambolomu? Ipiamo Komi najadi torata, bara da'a nopakea, bara naju'a, bara nitarunggu pade kami da'a nantulungi Komi?' 45 Pade Aku kana mombasono ira, 'Aku mpu'u-mpu'u notesa ka komi, tempo komi da'a nadota mantulungi sampesuwu-sampesuwuku to naede katuwuna nasimbayu ewa komi da'a nadota mantulungi Aku.' " 46 Pade Yesus nompakaopu tesana ante nanguli, "Pura-pura tau to naja'a etu kana rasuku sampe ri kasae-saena. Tapi tau-tau to nanoa etu kana matuwu mabelo sampe ri kasae-saena."
1 Sangga naopupa Yesus nompatuduki etu pura-pura nangulimo I'a ka anaguru-anaguruna, 2 "Ninjani komimo damo nepua Eo Bete Paska. Pade Aku, Ana nu Manusia kana rawai ka baliku ala rapaku ri kayu parika." 3 Tempo etu nasiromumo balengga-balengga topanggeni agama bo totu'a-totu'a nto Yahudi ri sapo nu Balengga Topanggeni Agama to nosanga ka i Kayafas. 4 Ira nasintuwu manjoko Yesus nggalino pade mompatesi I'a. 5 Tapi nanguli ira samba'a ka roana, "Ne'e kita mowia etu tempo Eo Bete ala ne'e majadi kakanano ri tatongo ntau dea." 6 Tempo Yesus ante anaguru-anaguruna naria ri ngata Betania ira nesai ri sapo ntau nosanga ka i Simon to naju'a bete bopia. 7 Tempo ira ri setu naratamo samba'a besi nanggeni saongu botolo nipowia nggari watu to niisi minya wongi to nasuli mpu'u olina. Tempo Yesus nekatoko nanggoni naratamo besi etu nombatoli minya wongi etu ri balengga Yesus ewa tandai pebilana ka I'a. 8 Tapi sangga nanggita powia besi etu naraumo rara anaguru-anaguru Yesus. Ira nanguli, "Nokuya minya wongi etu aga nipakarugi sinja'i? 9 Kakonona minya wongi etu mamala rapobalu ante olina to nadea pade doi olina rawai ka tau-tau nakasiasi!" 10 Yesus nangginjani pompekiri ira, jadi niulina ka ira, "Nokuya komi nompakasusa besi e'i? Nuapa to nipowiana ka Aku nabelo. 11 Tau-tau nakasiasi bate-batena maria ri tatongo komi, tapi Aku da'a batena mosanggani ante komi. 12 Ante nombatoli minya e'i ri ja'iku i'a nompakasadia koroku ratana banepia. 13 Aku mpu'u-mpu'u notesa ka komi, ri umba-umba ri dunia Kareba Belo rapatolele, powia nu besi e'i kana ratesa wo'u ala mombatora i'a." 14 Naopu etu samba'a nggari sampulu romba'a anaguru Yesus to nosanga ka Yudas Iskariot nalau mpaka ri ja'i balengga-balengga topanggeni agama 15 pade niulina, "Ane aku mombawai Yesus riara mpale komi, nuapa rawai komi ka aku?" Nangepe etu ira nombawai ka i'a tolumpulu mpeka doi salaka. 16 Pade nompamula nggari tempo etu Yudas nangelo loga to nabelona mombawai Yesus riara mpale balina. 17 Ri eo pamulana Posusa Roti Da'a Nidika Ragi naratamo anaguru-anaguru Yesus nompekutana I'a, "Guru, ri umba peto'o mupokono rakalau kami ala mompakasadia panggoni Posusa Paska ka Komi?" 18 Nesonomo I'a, "Kalaumo komi mpaka ri ngata Yerusalem ri ja'i yanu, pade ulimo ka i'a iwe'i: 'Guru nanguli, mana masaeka Aku ri se'i. Aku madota mantuki Eo Bete Paska ri sapomu mpasanggani-nggani ante anaguru-anaguruku.' " 19 Pade nalaumo anaguru-anaguruna nompowia ewa to nipakau Yesus ka ira, pade nipakasadia iramo panggoni Posusa Paska. 20 Tempo nawengimo nekatokomo Yesus nanggoni mpasanggani-nggani ante sampulu romba'a anaguruna. 21 Tempo ira nanggoni nangulimo Yesus, "Aku mpu'u-mpu'u notesa ka komi, samba'a nggari tatongo komi kana mompobalu Aku ka baliku." 22 Nangepe etu nasusa mpu'umo rara ira, pade nekutanamo ira samba'a bo samba'a ka I'a, "Pue, da'a aku e'i to nipatujumu?" 23 Nesonomo Yesus, "Tau to mombatome roti riara tubu mpasanggani-nggani ante Aku, i'amo to mompobalu Aku. 24 Aku, Ana nu Manusia kana mamate ewa to nitulisi riara Buku Nagasa. Tapi mandasa mpu'umo tau to mompobalu Aku etu! Nabelopa ane tau etu da'a niote ri dunia." 25 Naopu etu nekutanamo Yudas to mompobalu Yesus ngina, "Guru, da'a aku e'i to nipatujumu?" Nesonomo Yesus, "Iwetu pangulimu." 26 Tempo ira nanggoni Yesus nangala roti pade nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ante nanguli, "Alamo roti e'i, pade konimo. E'imo koro bataku." 27 Naopu etu nialana wo'u saongu sanggiri panginu, niulina tarima kasi ka Pue Alatala, pade niwaina ka ira ante nanguli, "Inu komi puramo panginu e'i, 28 sabana e'imo leiku to rapatiti ka tau dea ngina ala mompakaasa Pojanji Alatala ante manusia. Leiku e'i rapatiti ka tau dea ala silaka-silaka ira mamala raampungi. 29 Parasayamo tesaku e'i. Nompamula we'i-we'i Aku mana manginu anggur sampe marata tempona banepia Aku manginu anggur to nabouna mpasanggani-nggani ante komi riara Poparenta Umaku." 30 Naopupa ira nodade nombatoiya Alatala nalaumo ira mpaka ri Bulu Zaitun. 31 Pade nangulimo Yesus ka anaguru-anaguruna, "Wengi e'i komi pura-pura kana mokanggaura momparasaya tempo manggita nuapa to majadi ri ja'iku, sabana naria Tesa Alatala to nitulisi riara Buku Nagasa iwe'i: 'Aku kana mompatesi topoewu sampe bimba-bimbana mosimpotatare.' 32 Tapi tempo Aku matuwu bali Aku mokolu ka komi mpaka ri Bagia Galilea." 33 Nangepe etu nangulimo i Petrus, "Naupa ira pura-pura mokanggaura momparasaya tempo manggita nuapa to majadi ri ja'imu, aku e'i da'a!" 34 Tapi nangulimo Yesus ka i'a, "Aku mpu'u-mpu'u notesa ka iko, wengina e'i wo'u da'apa manu mora'o, tolungganimo iko mombasapu Aku." 35 Nesonomo i Petrus, "Nau aku mamate mpasanggani ante Komi aku da'a ntoto mombasapu Komi!" Pade iwetu wo'u to niuli pura-pura anaguruna ntanina. 36 Naopu etu naratamo Yesus ante anaguru-anaguruna ri saongu peto'o to nosanga ka Getsemani. Narata ri setu nangulimo I'a ka ira, "Pekatokomo ri se'i. Aku malau ri sa'a mosambaya." 37 Nikenina Petrus bo romba'a ana i Zebedeus mpasanggani-nggani. Pade nompamulamo I'a nasusa bo nandasa rarana. 38 Niulina ka ira, "Nasusa mpu'umo raraku, ewa mamate nirasaiku! Popeamo ri se'i, pade komi kana mainga-inga mpasanggani-nggani ante Aku!" 39 Naopu etu napolamo Yesus sakedi pade nekadede I'a sampe ri tana pade nosambaya. Niulina, "Uma, ane mamala kuperapi ala kasusa bo kapari e'i ne'e rapawela ka Aku e'i. Tapi ne'e dotaku majadi, aga dotamu mboto!" 40 Naopu etu nanjilimo I'a ri ja'i anaguruna tolumba'a etu. Niratana ira pura-pura napisi. Pade niulina ka i Petrus, "Kitamo! Da'a nipakule komi mosanggani ka Aku nau aga sajaa? 41 Komi kana mainga bo mosambaya ala ne'e komi mawela pesoba! Riara nta'imu naria dota mompowia to nabelona, tapi koromu da'a nompakule." 42 Naopu etu nalau wo'umo Yesus njamba'ana karongganina nosambaya. Niulina, "Uma, ane kasusa bo kapari e'i kana rapawela ka Aku pade da'a namala rapakakawao nggari ja'iku, pakambamo dotamu majadi." 43 Naopu etu narata wo'umo I'a ri ja'i anaguruna. Niratana ira aga napisi wo'umo sabana naluru mpu'u mata ira. 44 Pade sangganipa wo'u I'a nompalasi ira pade nalau nosambaya katolungganina. Posambayana nasimbayu ante posambayana pane'a. 45 Naopu nosambaya narata wo'umo I'a ri ja'i anaguruna pade niulina ka ira, "Iwenumo? Danapisi bo nangosaraka komi? Kitamo! Naratamo tempona Aku, Ana nu Manusia rawai riara mpale tau-tau nasilaka. 46 Pembangumo! Kitamo! Naratamo tau to nompobalu Aku! Kamaimo kita mantomunaka i'a." 47 Tempo Yesus danotesa naratamo Yudas, samba'a nggari sampulu romba'a anaguruna. Pade nosanggani ante i'a naria tau dea nanggeni guma bo pato to nipakau balengga-balengga topanggeni agama bo totu'a-totu'a nto Yahudi. 48 Da'apa ira nomai Yudas nompakatantu ka ira tandaina ala ranjani ira ri umbana Yesus. Niulina, "Isema ngina kueki, etumo I'a. Soko komimo I'a!" 49 Jadi sangga naratapa Yudas ri setu i'a kaliu-liu nompakamosu Yesus pade nanguli, "Tabe, Guru!" Pade niekina Yesus. 50 Nangulimo Yesus ka i'a, "Umba, wega, etumo patujumu nomai ri se'i?" Pade kaliu-liu tau dea etu nompakamosu Yesus pade nanjoko I'a. 51 Nanggita etu samba'a nggari anaguru to nosanggani ante Yesus nangosu gumana nantimbe batua nu Balengga Topanggeni Agama sampe napudu talingana. 52 Nangulimo Yesus ka anaguruna etu, "Boli mpanjilimo gumamu ri peto'ona! Sabana isema-sema mantimbe ante guma kana mamate ratimbe ante guma wo'u. 53 Iwenumo? Da'a ninjanimu ane Aku merapi tulungi nggari ja'i Umaku I'a nasalisa mompakau njobu-njobu malaekana mantulungi Aku? 54 Tapi ane etu majadi da'a madupa tesa to nitulisi riara Buku Nagasa nggaolu to nanguli e'i pura-pura kana majadi ri ja'iku." 55 Pade ri tempo etu nangulimo Yesus ka tau dea ri setu, "Iwenumo? Niuli komi Aku e'i samba'a parampo sampe komi kana marata ante guma bo pato manjoko Aku? Eo-eo Aku nekatoko nopaguru ri Sapo Mpepue. Nokuya komi da'a nanjoko Aku tempo etu? 56 Tapi pura-pura etu kana majadi ala madupa tesa to nitulisi nabi-nabi nggaolu ri Buku Nagasa." Naopu etu nalaimo pura-pura anaguruna nompalasi I'a. 57 Pade ira to nanjoko Yesus nanggeni I'a mpaka ri sapo nu Balengga Topanggeni Agama to nosanga ka Kayafas. Tempo etu guru-guru agama bo totu'a-totu'a nto Yahudi nasiromu nolibu ri setu. 58 Petrus nantuki ira nggawao sampe narata ri lalowo sapo Balengga Topanggeni Agama. Narata ri setu nesuamo i'a nekatoko mpasanggani-nggani ante topojaga-topojaga sabana i'a madota mangginjani nuapa majadi ante Yesus. 59 Tempo etu balengga-balengga topanggeni agama bo pura-pura Topolibu Bete Agama nto Yahudi etu nompasimbuku mangelo tau modawa mompakanoto kasala Yesus ala I'a mamala rasuku mamate. 60 Tapi naupa nadea tau narata nodawa ala mombanawusaka I'a da'a ria nirata ira kasalana. Kaopuna naria romba'a tau nantingayo Polibu Bete etu 61 pade nanguli, "Naria sanggani tau e'i nanguli iwe'i: 'Aku nompakule mombagero Sapo Mpepue e'i pade mombabangu mpanjili sapo etu riara tolumbengi.' " 62 Naopu etu nekanggoremo Balengga Topanggeni Agama nanguli ka Yesus, "Iwenumo? Naria pesonomu ewa tesa-tesa nu sabi e'i to nanguli Komi atau da'a?" 63 Tapi naupa da'a ria salana Yesus aga nekalino. Pade sangganipa Balengga Topanggeni Agama nanguli ka I'a, "Ante sanga Alatala to Natuwuna, aku nompakau Iko ulimo ka kami ane Iko Magau to Mompakasalama, Ana nu Alatala!" 64 Nesonomo Yesus, "Ewa niuli komi nakono. Pade kuuli ka komi, kana marata tempona banepia komi kana manggita Aku, Ana nu Manusia mekatoko ri sabingga nggana nu Alatala to Nakuasana. Pade komi kana manggita Aku mana'u nggari langi riara kulimu." 65 Nangepe etu Balengga Topanggeni Agama nombaseri pakeana tandaina narau mpu'u rarana. Pade niulina ka Topolibu Bete, "I'a nompakakedi Alatala! Rapokuya kita mangelo sabi-sabi ntanina? Niepe komi mbotomo tesana nompakakedi Alatala! 66 Iwenu pombarata komi?" Nesonomo ira Topolibu Bete, "I'a masipato rasuku mamate!" 67 Naopu etu tau-tau ri setu nantailu lenje Yesus pade nombajaguru I'a. Naria sanupa to nanjapa I'a 68 ante nanguli, "E, Magau to Mompakasalama, ulimo sema nombasapa Iko!" 69 Tempo etu i Petrus nekatoko ri sawalikuna ri lalowo sapo etu. Tempo i'a ri setu samba'a batua besi nompakamosu i'a pade nanguli, "Iko wo'u samba'a tau nosanggani ante Yesus to Galilea etu!" 70 Tapi Petrus nesapu ri ngayo ira pura-pura, "Da'a nakono! Da'a ninjaniku patuju tesamu!" 71 Naopu etu Petrus nalau ri pewobo wala lalowo. Ri setu samba'a batua besi ntanina nanggita i'a pade nanguli ka tau-tau ri setu, "Tau e'i wo'u nosanggani-nggani ante Yesus to Nazaret etu." 72 Tapi Petrus nesapu wo'umo ante metunda, "Da'a ninjaniku tau etu!" 73 Da'a nasae kaolona tau-tau to nenggore ri setu nompakamosu Petrus pade nanguli ka i'a, "Natantumo iko samba'a roana, sabana nanoto nggari tesamu iko wo'u to Galilea!" 74 Pade nompamulamo Petrus netunda bo nojanji. Niulina, "Da'a ntoto ninjaniku tau etu!" Pade iwetu Petrus notesa kaliu-liu nora'omo manu. 75 Nangepe etu natetoramo rarana ewa tesa Yesus pane'a to nanguli, "Da'apa manu mora'o ngina, tolungganimo iko mombasapu Aku." Pade nesuwumo Petrus nggari setu nalau nageo nakanjodu-njodu ante nasusa mpu'u rarana.
1 Kampadondo njiina balengga-balengga topanggeni agama bo totu'a-totu'a nto Yahudi nasiromu nolibu nompakatantu Yesus kana rapatesi. 2 Ira nombaso'o I'a pade nanggeni I'a mpaka ri ja'i Gubernur Pilatus. Narata ri setu Yesus niwai ira ka Pilatus. 3 Tempo Yudas to nompobalu Yesus nanggita Yesus nipakatantu kana rapatesi, nanjoso raramo i'a. Nalaumo i'a mpaka ri ja'i balengga-balengga topanggeni agama pade nipopanjilina ka ira tolumpulu mpeka doi salaka. 4 Niulina ka ira, "Nasilakamo aku e'i! Aku nompobalu samba'a tau da'a ria salana sampe I'a kana rapatesi!" Nesonomo ira, "Etu da'a urusa kami! Urusamu mboto!" 5 Nangepe etu Yudas nantajiaka doi salaka etu riara Sapo Mpepue pade nalaimo i'a neloe. 6 Balengga-balengga topanggeni agama nantirunaka doi salaka etu pade niuli ira, "Doi e'i doi oli nu lei. Da'a namala rapasanggani ante doi nipasiromu ri Sapo Mpepue." 7 Jadi nipakatantu ira doi etu rapake mangoli salimpu tana to niuli "Tana Ntopowia Kura" majadi tana rapombatana tau-tau da'a to Yahudi to mamate ri ngata Yerusalem. 8 Etu sampe tana etu niuli "Tana Nikabubu Nu Lei" sampe we'i-we'i. 9 - 10 Ante powia etu nadupamo tesa nabi Yeremia nggaolu to nanguli iwe'i: "Olina to nipakatantu to Israel tolumpulu mpeka doi salaka. Pade doi etu nipake ira nangoli tana ntopowia kura. Etu najadi nantuki to niparenta i Pue ka aku." 11 Tempo Yesus nantingayo Gubernur Pilatus nekutanamo Gubernur ka I'a, "Komimo Magau nto Yahudi?" Nesonomo Yesus, "Ewa to niuli komi etu, Uma, nakono." 12 Tapi tempo balengga-balengga topanggeni agama bo totu'a-totu'a nto Yahudi nompangadu I'a, da'a ria I'a nenjui. 13 Etu sampe Gubernur Pilatus nekutana ka I'a, "Da'a niepemu pura-pura tesa ira nompangadu Komi?" 14 Tapi Yesus da'a ntoto nesono kamba sambela sampe nasumara mpu'u rara Gubernur. 15 Butu-butu mpae tempo Eo Bete Paska Gubernur nabiasa nombakabasaka samba'a tau to nitarunggu nantuki dota ntau dea. 16 Mpae etu naria samba'a tau nitarunggu to ninjani ntau dea, sangana Yesus Barabas. 17 Jadi tempo Pilatus nombatangara Yesus tau dea nasiromu. Pade nekutanamo Pilatus ka ira, "Isema rapodota komi kukabasaka ka komi? Yesus Barabas atau Yesus to niuli Kristus?" 18 Niuli Pilatus iwetu apa ninjaninamo topanggeniaka nto Yahudi nombawai Yesus ka i'a sabana nasiriati rara ira. 19 Tempo Pilatus nekatoko ri peto'o mpotangara etu, naratamo samba'a tau nanggeni tesa nggari ja'i rongo i Pilatus to nanguli iwe'i: "Ne'e mombagalo urusa tau to nanoana etu! Sabana nggari I'a aku nombarata pangipi to nompakasusa raraku iwengi." 20 Tapi balengga-balengga topanggeni agama bo totu'a-totu'a nto Yahudi nompakapane rara ntau dea ala ira merapi Pilatus mombakabasaka ka ira i Barabas pade mombasuku Yesus kana mamate. 21 Nekutanamo i Pilatus ka tau dea, "Nggari ira romba'a isema rapodota komi kukabasaka ka komi?" Nesonomo ira, "Barabas!" 22 Pade nekutana wo'umo i Pilatus, "Ane iwetu, nuapa kupowia ante Yesus to niuli Kristus?" Nesonomo ira, "Paku I'a ri kayu parika!" 23 Pade nekutana wo'umo i Pilatus, "Nokuya? Kaja'ana nuapa ntoto to nipowiana?" Tapi ira aga nantambai nongare ante suara to neliu nggamangga, "Paku I'a ri kayu parika!" 24 Kaopuna nanotomo ka Pilatus da'a ria gunana mompapola motesa ka ira, sabana ira aga nantambai nongare-ngare, sakedika majadi kakanano. Jadi nialana ue niramana palena ri ngayo ntau dea ewa tandaina da'a i'a to nasala ane Yesus rapatesi. Pade niulina ka ira, "Aku da'a mombatanggu kamate ntau e'i. Etu kana ratanggu komi!" 25 Nesonomo tau dea, "Wa'a mamimo! Damo kami bo muli-muli kami mombatanggu kamatena!" 26 Naopu etu i Pilatus nombakabasaka ka ira i Barabas. Pade nipakauna tantarana mombaporo Yesus pade mombapaku I'a ri kayu parika. 27 Naopu etu tantara nu Gubernur nanggeni Yesus riara sapo Gubernur pade nipokio ira pura-pura roa ira nasiromu nantalili I'a. 28 Niwonju iramo pakea Yesus pade nipopasua ka I'a baju nalei ewa to nipake magau. 29 Nipowia ira songgo nggari karui pade nipoposonggo ka I'a. Niwai ira ka I'a sampeka lembau ri pale ngganana ewa lembau nisoko samba'a magau. Pade nekadedemo ira ri ngayona nompongei-ngei I'a ante nanguli, "Ratoiyata Magau nto Yahudi!" 30 Ira nantailu I'a pade lembau ri palena niala ira nipombaboba balenggana. 31 Sangga naopupa ira nompongei-ngei I'a iwetu, niwonju iramo baju nalei etu pade nipopasua bali ka I'a pakeana mboto. Naopu etu I'a nikeni ira mpaka ri sawaliku ngata ala rapaku ri kayu parika. 32 Ri tatongo jala ira nosintomu ka samba'a tau nggari ngata Kirene to nosanga ka i Simon. I'a nisoko ira pade nipasu'u ira nanjumbuaka kayu pomparika Yesus. 33 Napolamo ira sampe narata ri peto'o nosanga ka Golgota, batuana "Peto'o Wuku Balengga." 34 Narata ri setu Yesus nipopoinu ka anggur nigalo ante pakuli to napa'i. Tapi iwetu nipetamina sakedi mana nadota I'a nanginu. 35 Ri setumo ira nombapaku Yesus ri kayu parika. Naopu etu ira nombabagi pakeana ante nompenoa nowia nomoro. Isema nawela nomoro i'a nombarata pakea etu. 36 Naopu etu nekatokomo ira ri setu nombajagai I'a. 37 Ri ntoto balenggana ri kayu parika etu nipataka ira dopi to nitulisi tesa pebata to nipawela ka I'a iwe'i: |scE'IMO YESUS, MAGAU NTO YAHUDI|r. 38 Ri setu naria wo'u romba'a parampo nipaku ri kayu parika ntanina mpasanggani-nggani ante Yesus, samba'a ri sabingga ngganana, pade samba'apa ri sabingga njidina. 39 Tau-tau to noliu ri setu nanguli sinja'i I'a pade nombawiri mata ka I'a. 40 Ira nanguli, "Niulimu Iko mamala mombagero Sapo Mpepue pade mombabanguna mpanjili riara tolu eo! Ane Iko mpu'u-mpu'u Ana nu Alatala, pakasalama koromu mboto! Pana'umo nggari kayu parika etu!" 41 Iwetu wo'u balengga-balengga topanggeni agama bo guru-guru agama ante totu'a-totu'a nto Yahudi nompongei-ngei I'a. Niuli ira, 42 "Tau ntanina namala nipakasalamana. Tapi kita we'i! Korona mboto da'a namala nipakasalamana! Ane I'a mpu'u-mpu'u Magau nto Israel, agina I'a mana'u nggari kayu parika pade kami momparasaya I'a! 43 I'a nanjarumaka Alatala pade niulina I'a Ana nu Alatala! Jadi kamaimo kita manggita ane Alatala madota mompakasalama I'a we'i-we'i!" 44 Pade parampo-parampo to nipaku ri kayu parika mpasanggani ante Yesus wo'u nanguli sinja'i I'a iwetu. 45 Nompamula ri katongo nu eo narumaumo eo ri njumaongu tana etu sampe ri tinti toluongu ngguwiana. 46 Kira-kira tinti toluongu ngguwiana etu, nongaremo Yesus ante suara namangga, "|iEli, Eli, lama sabakhtani?|r" Batuana, "Alatalaku, Alatalaku, nokuya Komi nompalasi Aku?" 47 Sangga nangepe etu nangulimo bara sakuya mba'a tau ri setu, "I'a nompokio nabi Elia!" 48 Pade nangowamo samba'a nggari tatongo ira nasalisa nangala sangele wunga to nasimbayu ante lumu nibanggana riara anggur napoi. Naopu etu niumpuna ante wolo nipopoinuna ka Yesus. 49 Tapi naria tau ntanina nanguli, "Ne'epa ruru! Rakitata ane nabi Elia marata mompakasalama I'a!" 50 Naopu etu nongare wo'umo Yesus ante suara namangga, pade nalaimo nosana. 51 Ri tempo etu wo'u naseri ntongomo kae powombo ri Sapo Mpepue nggari ba'ana narata ri wayona. Pade naria wo'u lingu bete bo watu-watu bete natebingga. 52 Dayo-dayo natebuka pade nadea topomparasaya to namatena natuwu bali 53 pade nesuwu nggariara dayo-dayo etu. Pade naopu Yesus natuwu bali nesuamo ira riara ngata Yerusalem, ngata to nagasana, pade nadea tau ntanina nanggita ira. 54 Tempo balengga tantara bo tantara-tantarana to nombajagai Yesus ri setu nangepe lingu bete etu pade nanggita nuapa-nuapa to najadi ri setu, naeka mpu'umo rara ira. Niuli ira, "Mpu'u-mpu'u tau e'i Ana nu Alatala!" 55 Ri setu naria wo'u nadea besi to nenggore neantoaka nggawao. Iramo besi-besi to nantuki Yesus pade nantulungi I'a nompamula nggari bagona ri Bagia Galilea. 56 Ri tatongo ira naria i Maria Magdalena pade i Maria indo Yakobus bo Yusuf, pade indo ana-ana i Zebedeus. 57 Tempo ntora nasolomo eo naratamo samba'a tau nasugi nggari ngata Arimatea to nosanga ka Yusuf. Yusuf e'i wo'u samba'a topantuki Yesus. 58 Nalaumo i'a mpaka ri ja'i Pilatus nerapi watabaku Yesus. Nangepe pomperapi etu i Pilatus nompakau tantarana nombawai watabaku Yesus ka Yusuf. 59 Pade Yusuf nangala watabaku Yesus etu, nisompuna ante kae gandisi to nalusuna 60 pade nibolina riara dayona mboto to lako nipa'a ri saongu bulu watu. Naopu etu niluliakana wo'u saongu watu bete nipombapiku pewobo dayo etu, pade nalaimo i'a. 61 Tempo etu i Maria Magdalena ante i Maria ntanina nekatoko ri ngayo dayo etu. 62 Naeompadondona ri Eo Mpenonto nalaumo balengga-balengga topanggeni agama bo tau-tau to Parisi mpaka ri ja'i Pilatus. 63 Narata ri setu nangulimo ira, "Uma, nitora kami tesa topebagiu etu tempo I'a danatuwu. Niulina, 'Ri eo katolueona Aku kana matuwu bali.' 64 Jadi etu sampe kami merapi ala komi mompakau tantara-tantara malau manggatono dayona ria sampe eo katolueona ala ne'e-ne'e anaguruna malau mangala watabakuna pade manguli ka tau dea, 'Natuwu balimo I'a!' Ane etu majadi bagiu kaopuna meliu nggaja'a nggari bagiuna pamulana." 65 Nesonomo i Pilatus, "Etumo tantara-tantara. Kenimo ira manggatono dayo mpakabelo-belo." 66 Jadi nalaumo ira nombamere watu nipompiku dayo ala ne'e rabuka ntau. Pade nipakau ira tantara-tantara manggatono ri setu.
1 Naliu Eo Mpenonto da'apa nebulu eo ri eo Aka, nalaumo i Maria Magdalena bo i Maria ntanina manggita dayo Yesus. 2 Sampegoli naria lingu bete sabana malaeka i Pue nana'u nggari suruga nombaluliaka watu nipompiku dayo. Pade naopu etu nekatokomo i'a ri bunggu watu etu. 3 Lenjena nenggila ewa kila, pakeana damo naputi nju'u. 4 Tantara-tantara to nanggatono ri setu naeka mpu'u sampe nolalete-lete koro ira, pade nadunggamo ira najadi ewa tomate. 5 Pade nangulimo malaeka etu ka besi-besi etu, "Ne'e maeka. Ninjaniku komi mangelo Yesus to namate nipaku ri kayu parika. 6 Tapi I'a mana ria ri se'i. Natuwu balimo I'a ewa niulina bopia. Kamaimo manggita peto'o pombaboli watabakuna. 7 Pade kalaumo masalisa uli ka anaguru-anaguruna natuwu balimo I'a. I'a mokolu ka komi mpaka ri Bagia Galilea. Ri setumo komi kana manggita I'a. Toramo nuapa to nitesaku ka komi!" 8 Jadi nompari-mparimo besi-besi etu nalai nggari dayo etu. Naekamo ira tapi nadamba wo'u rara ira. Nangowamo ira ala manguli ka anaguru-anaguru Yesus nuapa to najadi. 9 Sampegoli ri setumo Yesus nosintomu ka ira pade nanguli, "Tabe." Ira nompakamosu I'a pade nanggalipui kadana mombasomba I'a. 10 Nangulimo Yesus ka ira, "Ne'e maeka. Kau uli ka anaguru-anaguruku malau mpaka ri Bagia Galilea. Ri setumo ira kana manggita Aku." 11 Sangga nalaipa besi-besi, nalaumo bara sakuya mba'a tantara topanggatono dayo etu mpaka ri ngata notesa ka balengga-balengga topanggeni agama nuapa to najadi ri dayo pane'a. 12 Nangepe tesa ira balengga-balengga topanggeni agama nasiromu nolibu ante totu'a-totu'a nto Yahudi. Pade ira nompakatantu mombawai doi madea ka tantara-tantara etu. 13 Niuli ira ka tantara-tantara etu, "Uli komi iwe'i: 'Ntongo wengi pangane naratamo topantuki Yesus nompangangga watabakuna tempo kami napisi.' 14 Ane Gubernur mangepe tesa etu, damo kami motesa ka i'a ala da'a mokuya-kuya komi." 15 Jadi tantara-tantara nantarima doi etu pade nitesa-tesa ira ewa to nipakau ka ira. Pade tesa tantara-tantara etu batena nipatolele ri tatongo nto Yahudi sampe we'i-we'i. 16 Pade nalaumo sampulu samba'a anaguru Yesus mpaka ri saongu bulu ri Bagia Galilea to nipakatantu Yesus ka ira. 17 Sangga nanggita I'a nekadedemo ira nombasomba I'a. Tapi danaria to norongu rara. 18 Yesus nompakamosu ira pade nanguli ka ira, "Pura-pura kuasa ri langi bo dunia niwai ka Aku. 19 Sabana etu kalaumo komi mpaka ri umba-umba ri dunia, mompatuduki pura-pura tau majadi topomparasaya Aku. Diumo ira riara sanga Umata Pue Alatala bo Aku, Anana bo Nosa Nagasana ewa tandaina ira topomparasaya Aku. 20 Patudukimo ira mantuki pura-pura to niparentaku ka komi. Pade toramo! Aku kana mosanggani ka komi sampe ri kaopu nu dunia."
1 Tesa e'imo pamulana Kareba Belo to nombatesa Yesus Kristus, Ana nu Alatala. 2 Naria tesa Alatala to nitulisi nabi Yesaya nggaolu iwe'i: "Kita we'i! Aku nompakau batuaku mokolu nggari ja'imu ala i'a mompakasadia jala ka Komi. 3 Naria samba'a tau nongare-ngare ri karawa baina iwe'i: 'Pakasadiamo jala ka i Pue! Pakanoa jala to ratukina!' " 4 Ewa to nitulisi etu iwetu wo'u Yohanes Topediu neumba ri karawa baina. I'a nompatuduki tau dea iwe'i: "Kajeamo komi nggari pokainggumu to naja'ana. Pade komi kana radiu ala silaka-silakamu raampungi nu Alatala." 5 Pade naratamo tau-tau ri ja'ina nggari njumaongu Bagia Yudea bo pura-pura pue ngata Yerusalem. Ira pura-pura nompangaku silaka-silaka ira pade nidiu Yohanes ri Binangga Yordan ewa tandaina najeamo ira nggari silaka ira etu. 6 Pakea Yohanes nikawia nggari wulu nu unta pade sulepena nikawia nggari kulimba, pade panggonina nggaboro bo ue wani. 7 I'a nompatolele tesa ka tau dea iwe'i: "Damariapa ngena to maratana nggari puriku to neliu nggakuasa nggari aku. Nau aga motungga mombawole lui sapatuna aku e'i da'a ntoto masipato. 8 Aku e'i nombadiu komi ante ue ewa tandaina najeamo komi nggari silakamu. Tapi I'a kana mombadiu komi ante Nosa Nagasa nu Alatala." 9 Tempo etu naratamo Yesus nggari ngata Nazaret ri Bagia Galilea, pade I'a nidiu Yohanes ri Binangga Yordan. 10 Iwetu Yesus nesore nggari ue nikitana langi natebea pade Nosa Nagasa nu Alatala nana'u ri ja'ina ewa samba'a tonji banggebodo. 11 Pade naria suara nggari suruga nanguli, "Ikomo Anaku to nipotoweku. Ikomo to nikonoa raraku." 12 Naopu etu kaliu-liu Nosa Nagasa nu Alatala nanggeni Yesus mpaka ri karawa baina. 13 Pade Yesus neto'o ri setu patampulu mbengi kasaena nipesoba Magau nu Seta. I'a nosanggani-nggani ante binata-binata naila ri setu, pade malaeka-malaeka i Pue narata nantulungi I'a. 14 Naliu Yohanes Topediu nitarunggu, nalaumo Yesus mpaka ri Bagia Galilea nompatolele Kareba Belo nggari ja'i Alatala. 15 Niulina, "Naratamo tempona to nipakatantu Alatala. Namosumo tempona Alatala moparenta ri dunia e'i ewa magau. Kajeamo komi nggari pokainggu komi to naja'ana, pade parasayamo Kareba Belo nggari ja'i Alatala!" 16 Tempona Yesus nolumako ri wiwi Rano Galilea I'a nanggita i Simon ante tua'ina Andreas. Tempo etu ira nantendeaka jala nompemala bau ri rano etu sabana ira topompemala bau. 17 Nangulimo Yesus ka ira, "Kamaimo, tukimo Aku, pade Aku mompatuduki komi mangelo tau majadi topantuki Alatala." 18 Nangepe tesa etu kaliu-liu ira romba'a nompalasi jala ira ri setu pade nalau nantuki Yesus. 19 Naopu etu Yesus nompapola polumakona sakedi pade nikitana Yakobus, ana i Zebedeus, bo tua'ina Yohanes riara saongu sakaya nompakabelo jala ira. 20 Iwetu Yesus nanggita ira nangulimo I'a ka ira, "Kamaimo, tukimo Aku." Nangepe etu ira romba'a nompalasi uma ira riara sakaya nosanggani-nggani ante tau-tau to nigajina, pade nalaumo ira nantuki Yesus. 21 Naopu etu naratamo Yesus ante topantuki-topantuki I'a ri ngata Kapernaum. Pade ri Eo Mpenonto nesuamo I'a ri sapo mpodade nto Yahudi pade nopaguru ri setu. 22 Nasumara mpu'u tau-tau to nangepe pepatudukina sabana akalana nopaguru nakuasa mpu'u, da'a ewa guru-guru agama. 23 Tempo etu riara sapo mpodade etu naria samba'a tau to nipesua seta. Sampegoli nongaremo i'a ante suara namangga, 24 "E, Yesus to Nazaret! Nuapa madota mupowia ka kami? Komi narata mompakaropu kami? Ninjaniku isema Komi. Komimo to Nagasana nggari ja'i Alatala!" 25 Tapi Yesus nanggarau seta etu, "Pekalino! Palaimo nggari ja'i ntau etu!" 26 Nangepe etu seta etu nombagagoya-goya mpakagai tau etu pade nesuwumo i'a nggari ja'i ntau etu ante nongare-ngare. 27 Nanggita etu nasumara puramo tau ri setu sampe ira nosimpekutana samba'a bo samba'a, "Hai! Nuapa e'i? Sangele pepatuduki to nabouna. Ante kuasana I'a nomparenta seta-seta malai pade seta-seta etu natundu nantuki parentana!" 28 Naopu etu nasalisa natolele kareba ewa Yesus sampe ri njumaongu Bagia Galilea. 29 Sangga nesuwupa nggari sapo mpodade etu nalaumo Yesus mpasanggani-nggani ante Yakobus bo Yohanes mpaka ri sapo i Simon bo Andreas. 30 Riara njapo etu matu'a besi i Simon naturu ri paturuna sabana naju'a pane. Iwetu Yesus nesua rara njapo notesamo tau ri setu ka I'a, "Guru, naju'a we'i matu'a besi i Simon." 31 Jadi nalaumo Yesus nompakamosu besi etu. Nisokona palena pade nitulungina besi etu nembangu. Kaliu-liu nabelomo ju'ana, pade nompamulamo i'a nangala panggoni nikenina ka ira. 32 Ulungguwia etu tempo nasolomo eo, naratamo tau dea nanggeni roa-roa ira to naju'a bo tau-tau nipesua seta mpaka ri ja'i Yesus. 33 Pura-pura pue ngata etu nasiromu ri ngayo sapo to nipeto'o Yesus etu. 34 Pade Yesus nompakabelo nadea tau to nawela mpengele-ngele ju'a, pade nadea seta nipopalaina nggari ja'i ntau dea. Da'a nipalogana seta-seta etu notesa sabana ninjani ira isema I'a. 35 Dakampadondo njiina kaeona etu nembangumo Yesus nompalasi sapo etu. Pade nalaimo I'a mpaka ri saongu peto'o to nakalinoana pade nosambaya ri setu. 36 Simon bo roa-roana nalau nangelo I'a. 37 Sangga nirata irapa Yesus, nangulimo ira ka I'a, "Guru, pura-pura tau nangelo Komi." 38 Nangulimo Yesus ka ira, "Kamaimo kita mompapola polumakota mpaka ri ngata-ngata ntanina ala Aku mamala mompatolele Kareba Belo ka tau-tau ri setu wo'u, sabana etumo patuju karataku e'i." 39 Jadi nalaumo I'a nompatolele Kareba Belo ri sapo-sapo mpodade ri njumaongu Bagia Galilea. Pade I'a wo'u nompopalai seta-seta nggari ja'i tau-tau to nipesua seta. 40 Naopu etu naratamo samba'a tau to naju'a bete mpaka ri ja'i Yesus. Nekadedemo i'a ri ngayona pade nerapi ante mpu'u-mpu'u, "Pue, ane Komi madota, Komi mamala mompakabelo ju'aku e'i." 41 Nanggita tau etu naasi mpu'umo mata Yesus. I'a nangojo palena nanjoko koro ntau etu, pade niulina ka i'a, "Aku madota. Kabelomo ju'amu!" 42 Kaliu-liu nalinomo ju'a ntau etu pade nabelo balimo korona. 43 Pade Yesus nompakau i'a nalai ante nompopatora i'a iwe'i: 44 "Tora-tora, ne'e mutesa ka isema-sema nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo pesomba ka Alatala ewa to niparenta i Musa ala mompopokita ka tau pura-pura nabelomo ju'amu." 45 Tapi nalaumo tau etu nompatolele kajadia etu ka tau-tau ri umba-umba sampe Yesus mana namala mesua nggamata-mata riara ngata. I'a aga neto'o ri sawaliku ngata ri peto'o nakalinoana. Tapi naupa iwetu tau dea danarata ri ja'ina nggari umba-umba ngata.
1 Bara sakuya mbengi kaliuna nesua wo'umo Yesus ri ngata Kapernaum. Pade natolelemo tesa to nanguli Yesus naria rara njapona. 2 Nangepe etu nadea mpu'umo tau narata nasiromu ri sapo etu sampe mana nasuka, nau aga ri ngayo pewobo mana ria peto'o. Ri setu Yesus nompatolele Tesa nu Alatala ka ira. 3 Tempona I'a danotesa naratamo patamba'a tau nombakowa roa ira to napungguna. 4 Ira da'a namala nompakamosu Yesus sabana tau-tau ri setu neliu nggadea. Jadi nalaumo ira nepone ri bunggu ata nu sapo etu, pade nibongga ira ata ri ntoto Yesus. Sangga natebukapa ata etu niulunjaka iramo topunggu etu ante ompa paturuna. 5 Tempo Yesus nanggita karoso pomparasaya ira etu, nangulimo I'a ka topunggu etu, "Anaku, silaka-silakamu niampungimo." 6 Nangepe etu nompamulamo bara sakuya mba'a guru agama to nekatoko ri setu nompekiri riara nta'i ira, 7 "Nokuya tau e'i notesa iwetu? I'a nompakakedi Alatala! Da'a ria samba'a manusia namala mombaampungi silaka, aga Alatala mboto!" 8 Tapi Yesus nangginjani nuapa to nipekiri ira. Etu sampe I'a nanguli ka ira, "Nokuya komi nompekiri iwetu? 9 Umba to neliu nggamuda rauli, 'Silakamu niampungimo,' atau manguli, 'Pekanggore, onggotakamo ompa paturumu pade polumakomo?' Natantu neliu nggamuda manguli, 'Silakamu niampungimo.' 10 Tapi Aku mompopokita ka komi Aku, Ana nu Manusia nakuasa mombaampungi silaka manusia ri dunia e'i." Pade nipakauna topunggu etu, 11 "Pekanggore, onggotakamo ompa paturumu pade patinggulimo!" 12 Nangepe etu nekanggoremo topunggu etu. Kaliu-liu i'a nangonggotaka ompa paturuna pade nesuwumo i'a nikita mata ira pura-pura. Nanggita etu nogumaa puramo tau ri setu, pade ira nombatoiya Alatala ante nanguli, "Da'apa sanggani nikitata kajadia ewa e'i!" 13 Naopu etu nalau wo'umo Yesus mpaka ri wiwi rano. Tempo I'a ri setu narata puramo tau dea ri ja'ina, pade I'a nompatuduki ira. 14 Naopu etu tempo Yesus noliu ri setu, nikitana samba'a topomperapi balasitee to nosanga ka i Lewi, ana Alfeus, nekatoko ri kantoro topomperapi balasitee. Nangulimo Yesus ka i'a, "Kamaimo, tukimo Aku." Nangepe etu nekanggoremo i Lewi nalau nantuki Yesus. 15 Naopu etu nalaumo Yesus ante anaguruna nanggoni ri sapo i Lewi. Ri setu nadea wo'u topomperapi balasitee bo tau-tau ntanina to nasilaka nanggoni mpasanggani-nggani ante ira, sabana nadeamo ira to nantuki Yesus. 16 Tempo guru-guru agama to nantuki pepatuduki to Parisi nanggita Yesus nanggoni mpasanggani ante topomperapi balasitee bo tau-tau nasilaka iwetu, nangulimo ira ka topantuki-topantuki I'a, "Nokuya gurumu nanggoni mpasanggani-nggani ante topomperapi balasitee bo tau-tau to nasilaka?" 17 Sangga nangepe pompekutana etu, nangulimo Yesus ka ira, "Da'a tau-tau to naroso korona paraluu rapakuli dokutoro, aga tau-tau to naju'ana. Patuju karataku e'i da'a ala mompokio tau-tau nanoa rarana, tapi ala mompokio tau-tau nasilaka." 18 Naria sanggani anaguru-anaguru Yohanes Topediu bo tau-tau to Parisi napuasa. Tempo etu naria tau narata ri ja'i Yesus pade nompekutana I'a, "Nokuya anaguru-anaguru Yohanes bo topantuki-topantuki tau-tau to Parisi napuasa tapi topantuki-topantuki Komi da'a napuasa?" 19 Nesonomo Yesus ka ira ante porapa iwe'i: "Masipato torata mapuasa ri posusa mponika ane boti langgai danosanggani ante ira? Natantumo da'a! Ane boti langgai danosanggani ante ira da'a masipato ira mapuasa! 20 Tapi kana marata tempona boti langgai raala nggari ja'i ira. Tempo etumo ira kana mapuasa." 21 Nanguli wo'umo Yesus, "Da'a ria tau nombatampala baju to narantana ante kae to nabouna. Sabana ane iwetu tampala kae to nabouna kana mosimpakuru mompakaseri baju to narantana etu. Kaopuna mantambai kaja'a seri nu baju etu. 22 Iwetu wo'u ante ue anggur. Da'a ria tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu, sampe magero puramo, nabeloka ue anggur nabeloka pombolina. Tapi ue anggur to nabouna kana raisi riara pomboli to nabouna wo'u." 23 Naria saeo Eo Mpenonto Yesus ante anaguruna noliu ri tatongo ntinalu gando. Tempo ira noliu ri setu nompamulamo anaguru-anaguruna nompui gando sakedi. 24 Nanggita etu nangulimo tau-tau to Parisi ri setu, "Kitamo! Nokuya anaguru-anagurumu nombaliunaka Atura-atura agamata ante nowia anu nitagi ri Eo Mpenonto?" 25 Nesonomo Yesus, "Iwenumo? Da'apa nibasa komi tesa riara Buku Nagasa ewa powia i Daud nggaolu tempo i'a ante roa-roana naoro ta'i pade mana ria panggoni? 26 I'a nesua riara Sapo Alatala tempo Abyatar najadi Balengga Topanggeni Agama, pade nikonina roti to nipesomba ka Alatala ri setu. Pade niwaina wo'u ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, da'a tau ntanina." 27 Pade nanguli wo'umo Yesus ka ira, "Eo Mpenonto nipakatantu Alatala manggeni belo ka manusia. Manusia da'a nipajadi Alatala ala rapakasusa ada-ada Eo Mpenonto. 28 Jadi Aku, Ana nu Manusiamo to nakuasa ri Eo Mpenonto."
1 Pade nesua wo'umo Yesus ri sapo mpodade. Ri setu naria samba'a tau to namate palena sabingga. 2 Bara sakuya mba'a tau-tau to Parisi ri setu nompariara mpakabelo-belo nanggita ane Yesus mompakabelo tau etu ri Eo Mpenonto ala ira mamala mompakasala I'a. 3 Nangulimo Yesus ka tau to namate palena etu, "Kamai pekanggoremo ri tatongona ri se'i!" 4 Pade nekutanamo Yesus ka tau-tau to Parisi ri setu, "Nantuki Atura-atura agamata nuapa to nipaloga ka kita ri Eo Mpenonto, mowia to nabelona atau to naja'ana? Mompakasalama tau atau mompatesi tau?" Tapi ira aga nekalino da'a nenjui. 5 Yesus nanggita ira ntalili. Nasusa bo naraumo rarana sabana da'a naasi mata ira nanggita tau to namate palena. Pade nangulimo I'a ka tau etu, "Ojomo palemu!" Tau etu nangojo palena, pade kaliu-liu nabelo balimo palena etu. 6 Naopu etu nesuwumo tau-tau to Parisi nggari sapo mpodade etu pade kaliu-liu ira nalau nolibu ante topantuki-topantuki Magau Herodes mangelo jala ala ira mamala mompatesi Yesus. 7 Pade nalaumo Yesus ante topantuki-topantuki I'a mpaka ri Rano Galilea. Nadea mpu'u tau nggari Bagia Galilea nantuki ira mpaka gusa'a. Nadea wo'u ira to narata nggari Bagia Yudea, 8 nggari ngata Yerusalem, nggari Bagia Idumea, nggari sambote Binangga Yordan, pade nggari bagia namosu ngata Tirus bo Sidon. Ira pura-pura narata ri ja'i Yesus sabana nangepe lele to nantesa pura-pura nuapa to nipowiana. 9 Nadea mpu'u tau to nasiromu ri setu sampe Yesus nompakau topantuki-topantuki I'a mompakasadia saongu sakaya ka I'a ala ne'e sampe I'a rarumpa ira. 10 Etu najadi sabana nadea mpu'u tau naju'a nipakabelona bopia sampe pura-pura tau naju'a nosiaso-aso mompasimbuku mompakamosu I'a ala ira mamala manggabe I'a. 11 Tempo tau-tau to nipesua seta nanggita Yesus, nekadedemo ira ri ngayona ante nongare-ngare, "Komimo Ana nu Alatala!" 12 Tapi Yesus nombatagi seta-seta etu ala ne'e motesa sema kakonona I'a. 13 Naopu etu nantendemo Yesus mpaka ri saongu bulu, pade nipokiona ri ja'ina isema tau to nipodotana. Tau to nipokiona etu narata puramo ri ja'ina, 14 pade nipelisina nggari tatongo ira sampulu romba'a tau momporoa I'a riara bagona. Ira nipelisina ala rapakauna malau mompatolele Kareba Belo, 15 pade ala ira mamala rawai kuasa mompopalai seta-seta. 16 Sanga ira sampulu romba'a to nipelisina etumo: i Simon to nidaena wo'u i Petrus, 17 Yakobus ana i Zebedeus bo tua'ina Yohanes. Ira romba'a nidaena Boanerges, to naria batuana "Ana Guntu." 18 Naria wo'u Andreas, i Filipus, i Bartolomeus, i Matius, i Tomas, Yakobus ana Alfeus, i Tadeus, i Simon to Zelote, 19 pade Yudas Iskariot to mompobalu I'a. 20 Naopu etu nesuamo Yesus raranjapo, pade narata wo'umo tau dea ri ja'ina sampe I'a ante anaguru-anaguruna da'a ntoto naria loga manggoni. 21 Tempo etu naria tau nanguli, "Nabayamo I'a!" Jadi sangga nangepe tesa etu naratamo indona bo sampesuwu-sampesuwuna ala mangala I'a matingguli ri sapo ira. 22 Nangulimo guru-guru agama to narata nggari ngata Yerusalem, "I'a nipesua i Beelzebul, Magau nu Seta. Ante kuasa nggari ja'i Tadulako nu seta etu I'a nompopalai seta nggari ja'i ntau!" 23 Nangepe etu Yesus nompokio guru-guru agama etu pade I'a notesa ka ira ante porapa iwe'i: "Natantumo Magau nu Seta da'a madota mompopalai roana. 24 Rapana maria samba'a magau pade todea riara poparentana aga matibagi-bagi pade mosipobali, natantumo poparentana etu kana magero. 25 Pade ane tau sanjapo matibagi-bagi pade mosipobali, natantumo ira kana magaro mosimpotatare. 26 Iwetu wo'u ante Magau nu Seta. Ane i'a mangewa roana pade ira matibagi-bagi, natantumo poparentana da'a maroo. Mana masaeka magero. 27 Da'a ria tau namala mesua riara njapo ntau to narosona ala mangago mbara-mbarana ane da'a ratipunggu ntani pue njapo to naroso etu. Ane iwetu i'a mamala mangago pura-pura isi njapona. 28 Aku mpu'u-mpu'u notesa ka komi, mpengele-ngele silaka manusia bo tesa-tesa nanguli sinja'i namala raampungi. 29 Tapi isema-sema nanguli sinja'i Nosa Nagasa nu Alatala da'a ntoto mamala raampungi. Silaka ira etu da'a ria ampuna sampe ri kasae-saena." 30 Yesus nanguli iwetu sabana naria tau nanguli I'a nipesua seta. 31 Naopu etu naratamo indo bo sampesuwu-sampesuwu Yesus. Narata ri setu nenggoremo ira ri sawalikuna pade nompakau tau mompokio Yesus momai mpaka ri ja'i ira. 32 Tempo etu nadea tau nekatoko nantalili Yesus. Ira nanguli ka I'a, "Kitamo, naria indomu bo sampesuwu-sampesuwumu ri sawalikuna. Ira madota mosirata ka Komi." 33 Nesonomo Yesus ka ira, "Isema indoku bo sampesuwuku?" 34 I'a nanggita ira pura-pura to nekatoko nantalili I'a, pade niulina, "E'i puramo indoku bo sampesuwu-sampesuwuku. 35 Sabana isema-sema to nompowia dota Alatala, ira etumo nireke indoku bo sampesuwuku."
1 Naria sanggani Yesus nompamula wo'umo nopaguru ri wiwi rano. Ri setu nadea mpu'u tau narata nantatiku I'a. Sabana etu I'a nalau nekatoko riara saongu sakaya to nolanto ri bunggu rano, pade tau dea nenggore ri kabatana. 2 Pade nompamulamo I'a nompatuduki mpengele-ngele pepatuduki ka ira ante nompake porapa. Riara mporapana etu niulina iwe'i: 3 "Epemo! Naria samba'a tau nalau nosawu pae. 4 Tempo i'a nosawu naria sanu pae nanawu ri wiwi jala. Pade naratamo tonji-tonji nantunggu pae etu sampe naopu. 5 Naria wo'u sanu pae nanawu ri bunggu watu-watu to nakura tanana. Pae etu nasasinta natuwu sabana tana aga sakedi lau. 6 Tapi sangga napanepa eo nalelemo pae lako natuwu etu. Nangau puramo sabana da'a nandalaka kalena. 7 Pade naria wo'u sanu pae nanawu raranggarui. Natuwumo karui etu nangoo pae etu sampe da'a ria aselena. 8 Pade naria wo'u sanu pae nanawu ri tana to naboyana. Pae etu naboya pade nowua nabelo. Naria to nowua tolumpulu nggani kadeana, naria sanu onompulu nggani pade naria wo'u nowua satu nggani kadeana." 9 Pade nanguli wo'umo Yesus ka ira, "Isema-sema naria talingana, epemo mpakabelo-belo tesaku e'i." 10 Tempo Yesus damo njamba'ana naratamo topantuki-topantuki I'a ante sampulu romba'a anaguruna nerapi ala I'a mompakanoto ka ira batuana porapa etu. 11 Nangulimo Yesus ka ira, "Komimo to nipaloga mangginjani tesa ewa Poparenta nu Alatala to nitabuniaka nggari lamba pamulana. Tapi ane tau-tau ntanina, ira kana rapatuduki ante porapa-porapa 12 ala 'Naupa ira bate-batena manggita da'a mesua ri pekiri ira, naupa ira bate-batena mompetalinga da'a ranjani ira batuana tesa etu. Etu majadi ala ne'e ira majea pade raampungi nu Alatala.' " 13 Pade nangulimo Yesus ka ira, "Ane komi da'a namala mangginjani batuana porapa e'i iwenu komi mangginjani porapa-porapa ntanina? 14 Toposawu pae etu nirapaka ewa tau nompatolele Tesa nu Alatala. 15 Pae to nanawu ri wiwi jala nasimbayu ewa tau-tau to nangepe Tesa nu Alatala, tapi kaliu-liu narata Magau nu Seta nangala tesa etu to lako nesua riara pekiri ira. 16 Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade kaliu-liu nantarima tesa etu ante nadamba rara. 17 Tapi Tesa etu da'a norali riara nta'i ira sampe ira da'a naroo nomparasaya. Tempo ira nombarata kasusa bo pepandasa sabana nomparasaya Tesa nu Alatala etu, kaliu-liu ira nokanggaura. 18 Pade pae to nanawu raranggarui nasimbayu ewa tau-tau to nangepe Tesa nu Alatala pade nantarima Tesa etu. 19 Tapi ira nakini rara nantora katuwu ira ri dunia e'i. Ira aga nompekiri kakalumana pade ira naino ka mpengele-ngele mbara-mbara ri dunia. Pura-pura etu nombalawa Tesa nu Alatala sampe da'a ria aselena riara nggatuwu ira. 20 Pade pae to nanawu ri tana to naboyana nasimbayu ewa tau-tau to nangepe Tesa nu Alatala pade nantarima Tesa etu riara nta'i ira. Kaopuna naria asele nggari Tesa etu riara nggatuwu ira. Naria sanu tolumpulu nggani kadeana, naria onompulu nggani kadeana pade naria sanupa satu nggani kadeana." 21 Pade nanguli wo'umo Yesus ka ira, "Natantumo poindo da'a nikeni rara njapo pade niungo riara tonda bara ri wayo ranja mpaturu. Tapi poindo etu kana raboli ri kalangana. 22 Sabana pura-pura nuapa to nitabuniaka we'i-we'i kana rapakanoto banepia, pade pura-pura nuapa anu da'apa nanoto ka tau we'i-we'i kana ranjani ntau pura-pura banepiana. 23 Isema-sema naria talingana, epemo mpakabelo-belo tesaku e'i!" 24 Pade nanguli wo'umo Yesus ka ira, "Pariara nta'imo nuapa to niepe komi! Ane komi mpu'u-mpu'u mompasimbuku mompariara nta'i Tesa etu, kana ratambai ka komi pangginjani ewa Tesa etu. 25 Sabana isema-sema mompariara nta'i Tesa nu Alatala kana ratambai ka ira pangginjani ewa Tesa etu. Tapi isema-sema da'a mompariara nta'i Tesa nu Alatala etu, pangginjani Tesa etu to naria ri ja'ina kana raala nggari ja'ina." 26 Pade nangulimo Yesus, "Pantambai kadea ntau to majadi todea riara Poparenta nu Alatala nasimbayu ewa samba'a tau nosawu ri tinaluna. 27 Tempo nggawengina i'a naturu. Tempo eona i'a nembangu pade pae to nisawuna nantambai eona nantambai kabetena, naupa da'a ninjanina iwenu sampe etu najadi. 28 Tana etu mbotomo to nompowia pae etu matuwu. Pamulana nesuwu kadana pade bulina pade panggaopuna wuanamo. 29 Ane natasamo pae nompamula tau etu nokato sabana temponamo mokato." 30 Nanguli wo'umo Yesus, "Pantambai kadea ntau to majadi todea riara Poparenta nu Alatala namala rapakasimbayu ewa nuapa? Porapa nuapa kupake mompakanoto etu? 31 Etu nasimbayu ewa saongu wua kayu nakedi mpu'u to nituja ri tinalu ntau. Wua kayu etu to neliu nggakedina nggari pura-pura wua kayu ri dunia. 32 Tapi ane nitujamo pade natuwupa i'amo to neliu nggabetena nggari tuja-tuja ntanina. Ra'a-ra'ana majadi mabete sampe tonji-tonji marata mowia jumuna ri kauluna." 33 Iwetumo Yesus nompaguru tau dea ante nompake nadea porapa ewa etu nantuki pompakule ira mantarima tesa etu. 34 I'a bate-batena nompake porapa ane notesa ka tau dea. Tapi tempo I'a nosanggani-nggani ante anaguruna I'a notarangga mpakanoto pura-pura tesana ka ira. 35 Ri kaede eo etu wo'u nangulimo Yesus ka anaguru-anaguruna, "Kamaimo kita mosakaya mpaka ri sambote rano e'i." 36 Jadi anaguru-anaguru Yesus nompalasi tau dea pade nesawi sakaya to nipesawi Yesus. Pade nalaumo ira mpasanggani-nggani ante I'a. Naria bara sakuya ongu sakaya ntanina nosanggani-nggani ante ira. 37 Tempo ira nosakaya naratamo poiri naramboso mpu'u pade nompamulamo balumba-balumba bete nombarumpa sakaya ira sampe ue rano nesua riarana sakedi ira natala. 38 Tempo etu Yesus naturu ante nompake luna ri bagia puri nu sakaya etu. Jadi nalaumo anaguru-anaguruna nombalike I'a. Nangulimo ira ka I'a, "Guru, nokuya Komi nompalamba kita matala?" 39 Nangepe etu nembangumo Yesus pade nomparenta poiri bo balumba-balumba bete, "Penontomo bo kalinomo!" Naopu etu nenontomo poiri pade naotomo ue rano etu. 40 Pade nangulimo Yesus ka anaguruna, "Nokuya komi naeka? Nokuya komi da'a nomparasaya Aku?" 41 Nanggita kajadia etu naeka mpu'umo anaguru-anaguruna. Nosimpekutanamo ira samba'a bo samba'a, "Isema tanu kakonona tau e'i sampe poiri bo balumba nantuki parentana?"
1 Naopu etu naratamo Yesus ante anaguru-anaguruna ri sambote Rano Galilea ri bagia to Gerasa. 2 Iwetu Yesus nana'u nggari sakaya I'a nitomunaka samba'a langgai to nesuwu nggari tatongo dayo. Langgai etu nipakagila nu seta 3 pade i'a aga neto'o ri tatongo dayo-dayo. I'a mana namala nipo'u ntau nau damo nipo'u ante rante. 4 Nadea ngganimo kadana bo palena nipo'u ntau ante rante. Tapi rante nipompo'u i'a etu naopu pura nidapana, pade ase to nipasua nipombabalanggu kadana nikotona pura. Da'a ria kamba samba'a tau to nompakule manta'amaka i'a. 5 Eo wengi i'a aga nalau-nalau ri dayo bo ri bulu-buluna ante nongare-ngare pade nompakabela korona mboto ante watu. 6 Tempo Yesus danakawao nikitana, nangowamo i'a mpaka ri ja'ina pade nekadede nombasomba Yesus. 7 Nongaremo i'a ante suara namangga, "Yesus, Ana nu Alatala to Neliu Nggalangana, nuapa urusamu ante aku e'i? Aku merapi riara sanga Alatala, ne'e mompandasa aku!" 8 Niulina iwetu sabana Yesus nompakau seta etu iwe'i: "Seta to naja'a, pesuwumo iko nggari ja'i ntau e'i!" 9 Pade nekutanamo Yesus ka tau etu, "Isema sangamu?" Nesonomo tau etu, "Sangaku 'Njobu-njobu,' sabana nadea mpu'u kami." 10 Pade mpanggani-nggani tau etu nerapi ante mpu'u-mpu'u rarana ka Yesus ala seta-seta etu ne'e rapopalaina nggari bagia etu. 11 Namosu ante peto'o etu nadea mpu'u wawu nangelo panggonina ri kente nu bulu. 12 Jadi seta-seta riara ntau etu nerapi ka Yesus, "Pakaumo kami mesua riara wawu-wawu etu!" 13 Nangulimo Yesus, "Kaumo gusa'a!" Jadi nesuwumo seta-seta etu nggari ja'i ntau pane'a pade nesuamo ira riara wawu-wawu nadea etu. Sangga nipesua seta-seta, nangowamo wawu-wawu etu notingganawu nggari wiwi bingge mpaka riara rano sampe namate natala puramo. Kadea nu wawu etu kira-kira ronjobu onguna. 14 Tempo tau-tau to nombajagai wawu-wawu nanggita nuapa to najadi nangowamo ira nompatolele kajadia etu riara ngata ira pade riara ngata-ngata to namosuna. Sangga nangepe tesa etu, nalaumo tau dea nanggita nuapa to najadi. 15 Tempo ira narata ri ja'i Yesus nikita ira tau to nipesua njobu-njobu seta etu nekatoko ri setu. Nopakeamo i'a pade nanoto balimo pekirina. Nanggita etu naeka puramo ira. 16 Pade tau-tau to nanggita kajadia etu notesa ka tau-tau ntanina nuapa to najadi ri ja'i ntau to nipesua seta pade nuapa wo'u to najadi ri ja'i wawu-wawu. 17 Naopu etu pue ngata ri setu nerapi ante mpu'u-mpu'u ka Yesus ala I'a mompalasi bagia ira etu. 18 Tempo Yesus nesawi sakaya naratamo tau to nipesua seta pane'a nerapi ante mpu'u-mpu'u ala i'a mamala malau mpasanggani-nggani ante Yesus. 19 Tapi Yesus da'a nompaloga i'a. Niulina, "Ne'e. Panjilimo komi mpaka ri ja'i sampesuwumu pade tesa ka ira nuapa to nipowia i Pue ka komi. Uli ka ira iwenu Pue naasi matana nanggita komi." 20 Jadi nalaumo tau etu pade nompamulamo i'a mompatolele ka tau-tau ri Bagia Sampulu Ngata ewa nuapa to nipowia Yesus ka i'a. Nangepe tesana etu nasumara puramo tau. 21 Pade Yesus newote bali ante sakaya mpaka ri sambote rano. Sangga narata ri setu nadea mpu'u tau nasiromu nantaguni I'a. Tempo I'a da ri wiwi rano 22 naratamo samba'a topanggeniaka ri sapo mpodade nto Yahudi to nosanga ka Yairus. Sangga nikitana Yesus naratamo i'a nekadede ri ngayona 23 pade nerapi ante mpu'u-mpu'u ri ja'ina, "Uma, anaku besi naju'a ntomo, sakedika namate. Kuperapi ane mamala kamaimo ri ja'ina pade dikamo pale Komi ri korona ala i'a mabelo bali pade da'a mamate!" 24 Nangepe etu nalaumo Yesus nosanggani-nggani ante Yairus. Nadea mpu'u tau nantuki ira sampe nosiaso-aso nombawinggu Yesus. 25 Ri setu naria samba'a besi to naju'a nangote lei sampulu rompaemo kasaena. 26 Mpanggani-ngganimo i'a nipakuli sando-sando sampe naopu puramo mbara-mbara to naria ri ja'ina nipobaluna nipombabayari sando-sando etu. Tapi da'a ntoto ria gunana. Ju'ana aga nantambai kaja'ana. 27 Tempo besi etu nangepe kareba Yesus, nalaumo i'a ri tatongo ntau dea nompakamosu Yesus nggari purina. Pade nikabena baju Yesus, 28 sabana nipekirina, "Nau aga bajuna kukabe, kana mabelo ju'aku." 29 Sangga nanggabe baju Yesus, kaliu-liu nenontomo lei to niotena, pade nirasaina riara korona nabelomo ju'ana. 30 Tempo etu wo'u Yesus nombarasai naria kuasa nesuwu nggari ja'ina. Jadi I'a nompeili tau dea etu pade nekutana, "Isema nanggabe bajuku pane'a?" 31 Nesonomo anaguru-anaguruna ka I'a, "Guru, nikita Komi mbotomo tau dea damo nosiaso e'i. Iwenu sampe Komi nekutana, 'Isema nanggabe Aku?' " 32 Tapi Yesus kana nompenoto ri ntalilina mangelo tau to nanggabe I'a. 33 Besi etu ninjanina nuapa to najadi ri korona. Jadi ante nolalete bo naeka rarana nekadedemo i'a ri ngayo Yesus pade nipangakuna ka I'a pura-pura nuapa to najadi pane'a. 34 Nangepe etu nangulimo Yesus ka I'a, "Anaku, sabana komi nomparasaya Aku nabelomo ju'amu. Panjilimo ante mabelo. Da'a mana komi maju'a iwetu." 35 Tempo Yesus danotesa, naratamo bara sakuya mba'a tau nggari sapo Yairus, topanggeniaka ri sapo mpodade etu. Nangulimo ira ka Yairus, "Uma, namatemo anamu. Nabelopa ne'e mana mompakasusa guru malau mpaka ri sapomu." 36 Tapi Yesus da'a nompariara tesa ira etu. Niulina ka Yairus, "Ne'e maeka! Parasayamo Aku!" 37 Pade da'a nipaloga Yesus tau dea nantuki I'a mpaka ri sapo Yairus. Aga ira i Petrus, Yakobus bo Yohanes tua'i Yakobus to nipalogana mantuki I'a. 38 Tempo ira narata ri sapo Yairus, Yesus nanggita tau-tau nakanano mpu'u. Naria tau notumangi bo nantete ante suara namangga. 39 Nesuamo Yesus raranjapo pade niulina ka ira, "Nokuya komi nakanano bo nantete iwetu? Ngana etu da'a namate. I'a aga napisi." 40 Nangepe etu ira aga nompongiri-ngiri I'a. Tapi Yesus nompopalai ira pura-pura nggariara njapo etu. Pade nipakenina indo uma nu ngana etu ante tolumba'a anaguruna to nosanggani ante I'a, pade nesuamo ira ri tombi ngana etu. 41 Pade nisoko Yesus pale ngana besi etu ante nanguli, "Talita kum." Batuana, "Ngana besi, kuuli ka iko, pembangumo." 42 Kaliu-liu nembangumo ngana besi etu pade nompamulamo i'a nolumako. Umuru nu ngana besi etu sampulu rompaemo. Nanggita kajadia etu nogumaa mpu'umo ira ri setu. 43 Pade Yesus nombatagi ira, "Ne'e ntoto motesa ka tau ntanina nuapa to najadi ri se'i!" Pade niparentana wo'u ala ngana besi etu rawai panggoni sakedi.
1 Pade nalaimo Yesus nggari setu nanjili mpaka ri ngatana mboto mpasanggani-nggani ante anaguru-anaguruna. 2 Ri tempo Eo Mpenonto nompamulamo I'a nopaguru ri sapo mpodade ri setu. Tau dea to naria ri setu natekaja mpu'u nangepe I'a. Ira nanguli, "Nggari umba tanu nipombaratana pangginjanina etu? Nggari umba tanu noto nipakena mompatuduki iwetu? Iwenu sampe I'a namala mompowia kabaraka-kabaraka? 3 I'a e'i aga topowia parewa nggari kayu, ana i Maria bo tuaka Yakobus, Yoses, Yudas bo i Simon! Pade tua'ina besi wo'u naria ri tatongota ri se'i!" Etu sampe ira da'a madota momparasaya I'a. 4 Tapi nangulimo Yesus ka ira, "Samba'a nabi nibila ntau ri umba-umba ngata ntanina. Tapi ri ngatana mboto ri tatongo sampesuwuna bo ira saongu njapo i'a da'a ria nibila." 5 Pade da'a namala Yesus nompowia nadea kabaraka ri setu. I'a aga namala nompakabelo bara sakuya mba'a tau naju'a ante nombadika palena ri koro ira. 6 Natekaja mpu'umo I'a sabana tau ri setu da'a nomparasaya I'a. Naopu etu nalaumo Yesus nompebutu ngata ri bagia etu bo nompaguru tau dea. 7 I'a nompokio sampulu romba'a anaguruna mpaka ri ja'ina pade nipakauna ira malau romba'a-romba'a sanjala. Niwaina ka ira kuasa ala ira mamala mompopalai seta-seta, 8 pade nitewaina ka ira iwe'i: "Ne'e komi manggeni bara nuapa-nuapa riara mpolumakomu. Ne'e manggeni baku bara batutu rapomboli panggoni bara doi ri karepe. Tapi to mamala rakeni aga lembau. 9 Komi mamala mompake sapatu, tapi ne'e manggeni baju rontonga." 10 Pade niulina wo'u ka ira, "Ane komi marata ri saongu ngata pade maria pue njapo mompopesai komi, peto'omo komi ri sapo etu sampe komi malai mompalasi ngata etu. 11 Tapi ane maria pue ngata da'a madota mantarima komi ri ngata ira bara mangepe pepatudukimu, palasimo ngata etu. Pade sapunaimo sowu nggari kadamu ala majadi popatora ka ira ri setu ira kana rasuku Alatala." 12 Naopu etu nalaumo ira sampulu romba'a nompatolele ka tau dea ala ira kana majea nggari silaka-silaka ira. 13 Pade ira nompopalai nadea seta nggari ja'i ntau nipesua seta, pade nadea tau to naju'a nigese ira lana pade nompakabelo ju'a-ju'a ira. 14 Kareba Yesus niepe Magau Herodes wo'umo, sabana natolelemo sanga Yesus mpaka ri umba-umba. Naria tau to nanguli, "I'a etu Yohanes Topediu to natuwu bali. Etu sampe naria kuasa ri ja'ina mowia kabaraka-kabaraka." 15 Tapi naria tau ntanina nanguli, "I'a etumo nabi Elia." Pade naria wo'u to nanguli, "I'a etu samba'a nabi nasimbayu ewa nabi-nabi nggaolu." 16 Tapi tempo Magau Herodes nangepe tesa-tesa etu nangulimo i'a, "Natantumo I'a etu Yohanes Topediu! Bopia nipakauku tau nombatompo balenggana. Tapi we'i-we'i natuwu balimo i'a!" 17 - 18 Iwe'imo sabana Magau Herodes nompekiri iwetu. Bopia i'a nomporongo i Herodias, rongo nu sampesuwuna mboto to nosanga ka i Filipus. Naopu etu nadea ngganimo Yohanes Topediu nangontiaka Magau Herodes sabana pokaingguna etu. Niulina ka i Herodes iwe'i: "Nantuki Atura-atura agamata da'a ntoto masipato komi mangala rongo nu sampesuwumu mboto!" Etu sampe Magau Herodes nompakau tantarana nanjoko Yohanes pade nombasuaraka i'a riara tarunggu. 19 Tempo etu nabilisi mpu'umo rara i Herodias ri ja'i Yohanes. I'a madota mompatesi Yohanes tapi da'a namala, 20 sabana Magau Herodes naeka rarana ri ja'i Yohanes. Ninjanina Yohanes samba'a tau nanoa bo nagasa rarana. Jadi Yohanes nikalendu Magau Herodes mpakabelo-belo riara tarunggu. Tempo i Herodes nangepe tesa-tesa Yohanes, naingu rarana. Tapi naupa iwetu nipokonona wo'u nangepe tesana etu. 21 Kaopuna i Herodias nombarata loga to nabelo ala Yohanes namala rapatesi. Ri eo jadina mboto Magau Herodes nompowia posusa, pade i'a nombagaga pura-pura pangga bete bo balengga-balengga tantara bo totu'a-totu'a nggari njumaongu Bagia Galilea. 22 Tempo posusa etu nesuamo ana randoo i Herodias nojoge ri ngayo ira pura-pura. Randoo etu mpu'u-mpu'u nompakadamba rara Magau Herodes bo torata-toratana etu. Jadi nangulimo i Herodes ka i'a, "Tesamo nuapa-nuapa mupodota, etu kana kuwai ka iko." 23 Pade i'a nojanji ka randoo etu ante netunda, "Nuapa-nuapa muperapi kana kuwai ka iko, nau sampe santongo nggari poparentaku!" 24 Nangepe etu nesuwumo randoo etu nalau nekutana ka indona, "Nindo, nuapa masipato kuperapi nggari ja'i Magau Herodes?" Nesonomo indona, "Perapimo balengga Yohanes Topediu!" 25 Jadi natinggulimo randoo etu nasasinta mpaka ri ja'i Magau Herodes pade niulina, "Magau, to kuperapi ala balengga Yohanes Topediu rawai ka aku we'i-we'i raboli riara santonga dula!" 26 Nangepe pomperapi randoo etu nasusa mpu'umo rara Magau Herodes. Tapi da'a nabia i'a nompoara pomperapi etu sabana i'a nojanji ante netunda ri ngayo torata-toratana. 27 Jadi tempo etu wo'u nipakauna samba'a tantarana malau manggeni balengga Yohanes mpaka ri ja'ina. Pade nalaumo tantara etu mpaka riara tarunggu nombatompo tambolo Yohanes. 28 Pade nikeninamo balengga Yohanes etu niboli riara santonga dula pade niwaina ka randoo etu. Naopu etu randoo etu nombawai balengga etu ka indona. 29 Sangga nangepe kareba etu, naratamo anaguru-anaguru Yohanes mangala watabakuna nggariara tarunggu pade nitana ira ri dayo. 30 Anaguru-anaguru to nipakau Yesus nanggeni Kareba Belo nanjili bali pade nasiromu mpasanggani-nggani ante Yesus. Pade ira nombatesa ka I'a pura-pura nuapa to nipowia ira bo to nipatuduki ira. 31 Naopu etu nangulimo Yesus ka ira, "Kamaimo kita mompatani ri peto'o to nakalinoana ala mamala mangosaraka sampalai." Niulina iwetu sabana aga nosinjambei tau narata ri ja'ina sampe ira nau aga nanggoni da'a nakapo. 32 Jadi nalaumo ira nesawi sakaya mpaka ri peto'o to nakalinoana. 33 Tapi tau dea nanggita ira nosakaya nalau, pade ninjani ira patuju Yesus bo anaguruna. Jadi nalaumo tau dea nggari pura-pura ngata nantuki jala kabatana mokolu ka Yesus bo anaguruna mpaka ri peto'o to nikalau ira. 34 Tempo Yesus nana'u nggariara sakaya nikitana nadea mpu'u tau nasiromu ri setu. Nanggita etu naasi mpu'umo matana sabana ira nasimbayu ewa bimba-bimba da'a ria topoewuna. Jadi nompamulamo I'a nompaguru ka ira mpengele-ngele pepatuduki. 35 Sangga nangguwiapa da'a mana masaeka mawengi, naratamo anaguru-anaguru Yesus nanguli ka I'a, "Guru, peto'o e'i nakalinoa pade mana masaeka mawengi. 36 Agina tau dea etu rapakau matingguli ala ira mamala mangoli panggoni ri ngata-ngata bo boya-boya to namosuna." 37 Tapi nangulimo Yesus ka ira, "Komimo mompakoni ira." Nanguli ira ka Yesus, "Hai! Iwenu kami mowia etu? Ane kami malau mangoli roti ka ira pura-pura olina roatu mpeka doi salaka mami!" 38 Nekutanamo Yesus ka ira, "Sakuya ongu roti to naria ri ja'imu? Kau paresamo!" Naopu ira nomparesa nangulimo ira ka Yesus, "To naria limaongu roti bo romba'a bau." 39 Pade Yesus nompakau tau dea etu mekatoko mobagi-bagi ri bunggu nggawoko naramata ri setu. 40 Nangepe etu nekatokomo tau dea nobagi-bagi, naria satu mba'a sabagi, naria limampulu mba'a sabagi. 41 Pade Yesus nangala limaongu roti bo romba'a bau etu pade nantingoa langi nosambaya nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ala rapalele ka tau dea etu. Pade romba'a bau etu wo'u nipalelena ka ira pura-pura. 42 Pade tau pura-pura nanggoni sampe nabosumo. 43 Naopu etu anaguru-anaguru Yesus nompasiromu labi roti bo bau to nabolina, naponupa sampulu rotonda. 44 Kadea langgai to nanggoni ri setu kira-kira limanjobu mba'a. 45 Naopu etu kaliu-liu Yesus nompakau anaguru-anaguruna mesawi sakaya mokolu ka I'a mpaka ri ngata Betsaida ri sambote rano. Tapi I'a mboto nompakau tau dea etu manjili ri sapo ira. 46 Sangga noga'apa I'a ante tau dea etu nantendemo I'a mpaka ri saongu bulu ala mosambaya. 47 Tempo nawengimo sakaya to nipesawi anaguruna ri tatongo ranomo, pade Yesus njamba'ana da ri kabatana. 48 Nikita Yesus nandasamo ira nowose sakaya sabana poiri bete nantomunaka sakaya ira etu. Kira-kira tinti toluongu nggawengina naratamo I'a mpaka ri ja'i ira nolumako ri bunggu rano ewa madota mombaliunaka ira. 49 Tempo ira nanggita I'a nolumako ri bunggu nu ue nipekiri ira I'a etu mboa. Jadi nawaranggaamo ira 50 sabana ira pura-pura nawiora nanggita I'a. Tapi nasalisa I'a notesa ka ira, "Ne'e maeka! Pakaroo raramu! Aku Yesusmo e'i!" 51 Pade nesawimo I'a riara sakaya mpasanggani-nggani ante ira. Pade nenontomo poiri bete etu. Nanggita etu nasumara mpu'umo rara ira, 52 sabana naupa ira nanggita kajadia ante roti pangane, da'apa nanoto ka ira isema kakonona Yesus. Danakumba pekiri ira. 53 Sangga naratapa ira ri sambote rano nana'umo Yesus ante anaguru-anaguruna ri Bagia Genesaret. 54 Iwetu ira nana'u nggari sakaya ninjani ntau mamimo Yesus. 55 Jadi nangowamo ira nompari-mpari nalau mpaka ri ngata-ngata namosu setu. Pade nompamula ira nombakowa tau-tau naju'a ante ompa paturu ira mpaka ri ja'i Yesus nantuki lele to niepe ira. 56 Ri umba-umba nikalau Yesus, nabeloka ri ngata-ngata, nabeloka ri kota-kota, nabeloka ri boya-boya, naria tau nanggeni toju'a mpaka ri potomu, pade niperapi ira ka Yesus ante mpu'u-mpu'u ala ane mamala tau naju'a etu nau aga manggabe tampa nu bajuna. Pade isema-sema to nanggabe tampa nu bajuna nabelo pura nggari ju'a ira.
1 Naria sanggani tau-tau to Parisi bo bara sakuya mba'a guru agama nggari ngata Yerusalem narata ri ja'i Yesus. 2 Ira nanggita bara sakuya mba'a anaguru Yesus nanggoni ante da'a norama pale ntani ruru nantuki ada-ada nto Parisi. 3 Ane tau-tau to Parisi bo pura-pura tau to Yahudi ntanina da'apa mamala manggoni ane ira da'apa morama pale nantuki ada-ada ntotu'a ira nggaolu. 4 Wa'a wo'u ane ira manjili nggari potomu. Da'apa ira manggoni ira kana morama pale ntani nantuki ada-ada ntotu'a. Pade nadea wo'u ada-ada ntanina to nipasumuli nggari totu'a ira nggaolu to nituki ira. Jonjona, ira kana norama sanggiri, jolo bo parewa-parewa ntanina to nipowia nggari tambaga. 5 Jadi etumo sabana tau-tau to Parisi bo guru-guru agama etu nekutana ka Yesus, "Nokuya anaguru-anagurumu da'a nantuki ada-ada ntotu'ata nggaolu? Nokuya ira aga nanggoni ante pale da'a nirama?" 6 Nesonomo Yesus ka ira, "Komi tau-tau aga nabelo ri lenje! Nakono mpu'u Tesa nu Alatala to nipasimbayu nabi Yesaya nggaolu ewa komi. Nitulisina iwe'i: 'Tau-tau e'i aga nombabila Aku ri sumba, tapi da'a ante mpu'u-mpu'u rara ira. 7 Da'a ntoto ria gunana ira mepue ka Aku, sabana ira nompatuduki ada-ada nu manusia ante nanguli etu parenta-parenta nu Alatala.' 8 Jadi parenta-parenta Alatala da'a nipariba'a komi tapi ada-ada nu manusia nisoko komi ante naroso." 9 Pade nanguli wo'umo Yesus ka ira, "Nata'u mpu'umo komi nanjapuaka parenta Alatala ala matundu riara ada-ada komi mboto. 10 Jonjona, nabi Musa nanguli iwe'i: 'Bilamo indo umamu,' pade niulina wo'u, 'Isema-sema manguli sinja'i umana bara indona i'a kana rapatesi.' 11 Tapi komi nompatuduki iwe'i: 'Da'a mokuya ane samba'a tau manguli ka indo bo umana nuapa to masipato rapakena mantulungi ira nirekena pesomba ka Alatala.' 12 Pade ane i'a mowia iwetu komi mana mompaloga i'a mantulungi indo bo umana. 13 Jadi ante iwetu komi nanjapuaka Tesa nu Alatala ante nompariba'a ada-ada ntotu'a to nipasumuli ka komi. Pade nadeapa ntani-ntanina to nipowia komi nasimbayu ante etu." 14 Pade sangganipa Yesus nompokio tau dea marata ri ja'ina, pade nitesana ka ira porapa e'i: "Umba komi pura-pura, epemo tesaku e'i pade pekirimo batuana. 15 Da'a ria sangele nggari sawalikuna to nesua riara manusia mamala mompakatantoru ira riara mpanggita Alatala. Tapi pokainggu to naja'a to nopu'u nggariara nta'i manusia, etumo to nompakatantoru ira riara mpanggita Alatala. 16 Isema-sema naria talingana, epemo mpakabelo-belo tesaku e'i." 17 Naopu etu Yesus nompalasi tau dea pade nesua raranjapo. Tempo etu nekutanamo anaguruna ka I'a ewa batuana porapa to lako nitesana pani'a. 18 Nangulimo Yesus ka ira, "Iwenumo? Komi wo'u naingu nasimbayu ewa tau dea pani'a? Da'apa nanoto ka komi batuana porapa etu? Da'a ria panggoni to nikoni manusia mamala mompakatantoru i'a riara mpanggita Alatala. 19 Sabana panggoni etu da'a nesua riara pekirina tapi aga nesua riara nta'i likona, pade nggari setu aga niotena mpanjili." Ante nanguli iwetu, Yesus nompakatantu mpengele-ngele panggoni namala rakoni, da'a ria to nipopali. 20 Pade nanguli wo'umo Yesus, "Nuapa to nesuwu nggari pekiri manusia etumo to nompakatantoru ira riara mpanggita Alatala. 21 Sabana nggariarana, etumo nggariara nta'ina neumba pompekiri-pompekiri to naja'a to nanggeni tau nogau sala ante tau da'a rongona mboto, nangangga, nepatesi, 22 nebualo, da'a nabasa-basa naino ka mbara-mbara ntau, nowia kaja'ana, nebagiu, da'a nabasa-basa nantuki dota rara to naja'ana, nasiriati, nanguli sinja'i, nasombo, pade noinggu nadoyo. 23 Pokainggu to naja'a etumo to neumba nggariara manusia pade nompakatantoru ira riara mpanggita Alatala." 24 Naopu etu nalaumo Yesus mpaka ri bagia namosu ngata Tirus. Narata ri setu nesuamo I'a raranjapo. Patujuna ala ne'e rakita ntau dea. Tapi karatana ri bagia etu da'a namala nitabuniaka. 25 - 26 Ri setu naria samba'a besi da'a to Yahudi nggari Bagia Siro Fenisia. Ana besi nggari besi etu nipesua seta. Jadi iwetu i'a nangepe lele Yesus naria ri ngata etu, naratamo i'a nekadede ri ngayona nerapi ante mpu'u-mpu'u rara, "Tulungimo aku, popalaimo seta nggari ja'i anaku!" 27 Tapi nangulimo Yesus ka i'a, "Pakambamo ngana-ngana manggoni ntani ruru sampe mabosu. Sabana da'a masipato mangala panggoni ngana-ngana ratajiaka ka asu." 28 Nangulimo besi etu, "Nakono to niuli Komi, Pue. Tapi asu ri wayo meja wo'u nanggoni rombo-rombo mpanggoni to nanawu nggari ja'i ngana-ngana." 29 Pade nanguli Yesus ka i'a, "Nakonomo tesamu. Sabana etu panjilimo we'i-we'i. Nalaimo seta etu nggari ja'i anamu." 30 Pade nanjilimo besi etu. Sangga narata ri sapona nikitanamo anana besi naturu ri ompa paturuna pade seta etu nalaimo nggari ja'ina. 31 Naopu etu Yesus nompalasi Bagia Tirus pade napolamo I'a noliu ri ngata Sidon mpaka ri Rano Galilea. Riara mpolumakona I'a nantuki jala ri Bagia Sampulu Ngata. 32 Narata ri setu naria tau nanggeni roana to nabongo bo nabobo mpaka ri ja'ina. Pade ira nerapi ka Yesus ante mpu'u-mpu'u rara ala I'a mombadika palena ri koro ntau etu ala mompakabelo i'a. 33 Yesus nanggeni tau etu nggari ja'i ntau dea, pade nisuarakana koyampalena riara talinga ntau etu. Naopu etu nitailuna palena pade nituina ka jila ntau etu. 34 Naopu etu Yesus nantingoa langi ante nangore nosana, pade niulina ka tau etu riara Basa Ibrani, "Efata!" Batuana, katebeamo! 35 Pade natebeamo talinga ntau etu, pade nalulu balimo jilana sampe i'a namala notesa ante nabelo. 36 Pade Yesus nompakau ira pura-pura ala ne'e mombatesa kajadia etu ka tau-tau ntanina. Tapi nantambai nitagi nantambai ira nompatolele kajadia etu. 37 Sangga nangepe kajadia etu nogumaa mpu'umo tau dea. Ira nanguli, "Pura-pura to nipowiana nabelo! Tau nabongo nipakabelona talingana sampe namala neepe, pade tau nabobo wo'u nipakabelona sampe namala notesa ante nabelo!"
1 Tempo etu naria wo'umo tau dea nasiromu ri ja'i Yesus pade mana ria panggoni ira. Jadi Yesus nompokio anaguru-anaguruna ri ja'ina pade niulina ka ira, 2 "Naasi mpu'umo mataku nanggita tau dea e'i, sabana tolumbengimo ira nosanggani-nggani ante Aku ri se'i sampe mana ria panggoni ira. 3 Pade ane ira kupakau manjili ante maoro, natantumo ira kana maleto pade madungga ri jala, sabana naria ira to narata nggari peto'o to nakawaona." 4 Nesonomo anaguru-anaguruna, "Iwenumo? Kita e'i ri peto'o nakalinoa. Nggari umbamo rapangalata panggoni rapakoni ka tau dea e'i ala mabosu?" 5 Jadi nekutanamo Yesus ka ira, "Sakuya ongu roti to naria ri ja'i komi?" Nesono ira, "Pituongu." 6 Nangepe etu Yesus nompakau tau dea etu nekatoko ri tana. Naopu etu nialana roti pituongu etu pade niulina tarima kasi ka Pue Alatala. Pade nibingga-binggana roti etu pade niwaina ka anaguru-anaguruna ala rapalele ka tau dea. Pade anaguru-anaguruna nompalele roti etu ka ira. 7 Naria wo'u bara sakuya mba'a bau ri ja'i ira. Sangga niganenapa nipakaunamo anaguruna nompalele bau etu ka tau dea. 8 Pura-pura tau nanggoni sampe nabosu. Naopu etu nipasiromu iramo labi-labi mpanggoni etu naponupa pitu karanji. 9 Kadea ira to nanggoni ri setu kira-kira patanjobu mba'ana. Naopupa ira nanggoni Yesus nompakau ira manjili. 10 Sangga nalaipa tau dea etu Yesus ante anaguruna nesawi sakaya nalau mpaka ri Bagia Dalmanuta. 11 Pade naratamo bara sakuya mba'a tau to Parisi mpaka ri ja'i Yesus. Nompamulamo ira nosisono ante I'a sabana ira madota mompesoba I'a. Nangulimo ira ka I'a, "Kawiamo sangaya tandai to nipogumaa ala mompopokita ka kami Komi mpu'u-mpu'u nipakau Alatala." 12 Nonguamo Yesus riara nta'ina pade niulina ka ira, "Nokuya komi to natuwu we'i-we'i batena merapi tandai to nipogumaa? Aku mpu'u-mpu'u notesa ka komi, komi e'i da'a ntoto rapopokita ka tandai to nipogumaa iwetu!" 13 Naopu etu Yesus nompalasi ira pade nalau nesawi sakaya mpaka ri sambote rano. 14 Tempo nesawi sakaya da'a nitora anaguru Yesus nanggeni baku. To nikeni ira riara sakaya aga saongu lau roti. 15 Nangulimo Yesus ka ira, "Pakabelo-belo! Komi kana mainga ala ne'e mawela ragi tau-tau to Parisi bo ragi Magau Herodes." 16 Nangepe etu notesamo ira samba'a bo samba'a, "Masipato I'a nanguli iwetu sabana da'a ria roti ri ja'ita se'i." 17 Ninjani Yesus nuapa to nitesa ira etu. Jadi niulina ka ira, "Nokuya komi nanguli, 'Da'a ria roti ri ja'ita?' Iwenumo? Da'apa nanoto rara komi? Da'apa ninjani komi batua nu tesaku pani'a? Bara nabungu pekiri komi! 18 Komi nomata tapi nokuya komi da'a namala nekita? Komi notalinga tapi nokuya komi da'a namala neepe? Da'a nitora komi to najadi bopia? 19 Tempo Aku nombabingga-bingga limaongu roti nipakoni ka limanjobu mba'a tau, sakuya tonda labina to nipasiromu komi?" Nesonomo ira, "Sampulu rotonda." 20 Pade nanguli I'a, "Tempo pituongu roti nibinggaku nipakoni ka patanjobu mba'a tau, sakuya karanji labina to nipasiromu komi?" Nesonomo ira, "Pituongu karanji." 21 Pade nanguli Yesus, "Ane iwetu nokuya komi da'apa nangginjani batua nu tesaku pani'a?" 22 Naopu etu naratamo ira ri ngata Betsaida. Ri setu naria tau nanggeni samba'a toburo mpaka ri ja'i Yesus pade ira nerapi ala Yesus mombadika palena ri mata ntau etu. 23 Jadi Yesus nanjoko pale ntoburo etu pade nikenina mpaka ri sawaliku ngata. Ri setu Yesus nantailu mata ntau etu pade nidikana palena ri matana. Naopu etu nekutanamo I'a ka toburo, "Namalamo komi nanggita nuapa-nuapa?" 24 Tau etu nanggita mpaka ri koluna pade niulina, "Iyo! Aku nanggita tau nolumako. Tapi nikitaku ira aga ewa pu'u-pu'u nggayu!" 25 Nangepe etu sangganipa Yesus nombadika palena ri mata ntoburo etu. Naopu etu toburo mpu'u-mpu'u nompasimbuku nanggita. Pade nabelomo matana sampe i'a namala nanggita nuapa-nuapa ante nanoto. 26 Naopu etu Yesus nompakau i'a manjili. Niulina, "Panjilimo, ne'e mana mesua bali rara ngata etu." 27 Naopu etu nalaumo Yesus ante anaguru-anaguruna mpaka ri ngata-ngata to namosu ngata Kaisarea Filipi. Ri tatongo jala nekutanamo Yesus ka ira, "Nantuki tesa ntau dea, isema kakonona Aku e'i?" 28 Nesonomo ira, "Naria to nanguli Komi Yohanes Topediu to natuwu bali, pade naria wo'u sanu nanguli Komi nabi Elia to neumba bali. Pade naria wo'u to nanguli Komi samba'a nggari nabi-nabi nggaolu to natuwu bali." 29 Pade nekutanamo Yesus ka ira, "Tapi nantuki pombarata komi, isema Aku e'i?" Nesonomo i Petrus, "Komimo Magau to Mompakasalama to nijanji Alatala!" 30 Nangepe etu nangulimo Yesus ka ira, "Ne'epa ratesa ka tau-tau ntanina isema Aku e'i." 31 Naliu etu nompamulamo Yesus nompatuduki anaguru-anaguruna. Niulina, "Aku, Ana nu Manusia kana mombarasai mpengele-ngele kasusa. Aku kana rapoara totu'a-totu'a nto Yahudi bo balengga-balengga topanggeni agama bo guru-guru agama. Pade Aku kana rapatesi ira. Tapi ri eo katolueona Aku kana matuwu bali." 32 Etu pura-pura nitesa Yesus ka ira ante nanoto. Nangepe etu i Petrus nanggeni Yesus mpaka ri sabinggana pade nangontiaka I'a. Niulina, "Guru, ne'e motesa-tesa iwetu!" 33 Tapi Yesus nakampeili nanggita anaguru-anaguruna, pade niontiakana i Petrus, "Palaimo iko nggari se'i, Magau nu Seta! Pompekirimu etu pompekiri manusia, da'a pompekiri nggari ja'i Alatala!" 34 Naopu etu Yesus nompokio tau dea ri setu mpaka ri ja'ina nosanggani-nggani ante anaguruna pade niulina ka ira, "Isema-sema madota majadi topantuki Aku, i'a kana mombakabasaka dota rarana mboto pade masadia mantuki Aku nau sampe mamate rapaku ri kayu parika. 35 Sabana isema-sema da'a masadia mantuki Aku nau sampe mamate i'a da'a mombarata katuwua mabelo sampe ri kasae-saena. Tapi isema-sema to mombakabasaka pura-pura dotana mboto pade mantuki Aku bo manggeni Kareba Belo nau sampe rapatesi, i'a kana mombarata katuwua mabelo sampe ri kasae-saena. 36 Natantumo da'a ntoto ria gunana ane samba'a tau mombarata pura-pura nuapa to naria riara dunia e'i tapi da'a masalama, aga rasuku sampe ri kasae-saena ri naraka. 37 Da'a ria nuapa-nuapa to namala rasulata ante katuwua mabelo etu. 38 Isema-sema maeya mompangaku Aku bo tesa-tesaku ri tatongo tau-tau to nasilaka bo tau dea to da'a natutu nantuki Alatala, Aku, Ana nu Manusia wo'u maeya mompangaku i'a tempo Aku marata bali ri dunia e'i. Tempo etu Aku kana marata ante reme bo kuasa nu Umaku, nosanggani-nggani ante malaeka-malaeka to nagasana!"
1 Pade niulina wo'u ka ira, "Aku mpu'u-mpu'u notesa ka komi, naria bara sakuya mba'a tau ri tatongo komi ri se'i da'apa mamate ane da'apa rakita ira Alatala mompamula moparenta ante kuasana." 2 Onombengi kaliuna Yesus nanggeni i Petrus, Yakobus bo Yohanes mpasanggani-nggani nalau nantende mpaka ri saongu bulu to nalangana. Ri setu aga ira mboto, da'a ria tau ntanina. Tempo ira ri setu sampegoli nabalimo lenje Yesus ri ngayo ira. 3 Pakeana nabula nju'u damo nenggila. Da'a ria samba'a tau ri dunia e'i to mamala mantapasi pakeana ewa kagasana bo kabulana pakea Yesus etu. 4 Pade ira tolumba'a nanggita nabi Elia bo nabi Musa nggaolu notesa-tesa ante Yesus. 5 Nanggita etu nangulimo i Petrus ka Yesus, "Guru, nasana mpu'u kami ri se'i. Nabelopa kami mowia toluongu pakumpa ri se'i, saongu ka Komi, saongu ka i Musa bo saongu ka Elia." 6 Kakonona da'a ninjani Petrus nuapa to masipato ratesana sabana naeka mpu'umo rara ira tolumba'a. 7 Tempo etu naratamo kulimu nombabungu ira pura-pura, pade nggariara kulimu etu niepe ira suara nanguli, "E'imo Anaku to nipotoweku. Epe komimo tesana!" 8 Sampida mata lau ira nanggita ntalili, mana nikita ira tau romba'a pani'a. To nikita ira damo Yesus njamba'ana. 9 Tempo ira notua nggari buluna etu Yesus nompopatora ka ira, "Ne'e motesa ka isema-sema nuapa to nikita komi pani'a ane da'apa Aku, Ana nu Manusia matuwu bali nggari tatongo ntau to namatena." 10 Ira nompariara popatora Yesus etu, tapi ira nosimpekutana samba'a bo samba'a nuapa patuju Yesus nanguli, "Matuwu bali nggari tatongo ntau to namatena." 11 Pade nekutanamo ira ka I'a, "Nuapa sabana guru-guru agama nanguli nabi Elia kana mokolu marata pade Magau to Mompakasalama?" 12 Nesonomo Yesus, "Nakonomo tesa ira. Nabi Elia kana mokolu marata ala mompakasiayu mpengele-ngele. Tapi ane iwetu, nuapa patuju nu tesa to nitulisi riara Buku Nagasa to nanguli Ana nu Manusia kana mombarasai madea kasusa pade rasalai ntau dea? 13 Tapi kuuli ka komi, kakonona naratamo nabi Elia, pade tau-tau nompowia ka i'a nantuki dota ira, nasimbayu ewa to nitulisi nggaolu riara Buku Nagasa ewa i'a." 14 Tempo Yesus, i Petrus, Yakobus pade Yohanes nanjili ri ja'i anaguruna ntanina, nikita ira tau dea nantalili anaguru-anaguruna etu. Pade naria bara sakuya mba'a guru agama nosisono-sono ante anaguru Yesus. 15 Tempo tau dea nanggita Yesus natekajamo ira, pade ira nangowa nantomunaka I'a. 16 Nekutanamo Yesus ka ira, "Nuapa to niposinjono komi pani'a?" 17 Nesonomo samba'a nggari tatongo ntau dea etu, "Guru, aku nanggeni anaku mpaka ri ja'imu sabana i'a nipesua seta to nompakabobo i'a. 18 Butu nggani seta etu nesua ri ja'ina i'a nidungganakana mpaka ri tana. Pade ngangana nawura, bagana nosinggiki pade korona najadi nako'o. Niperapiku ka anagurumu ala ira mompopalai seta etu, tapi ira da'a nompakule." 19 Nangepe etu nangulimo Yesus ka ira, "Iwenu tanu komi? Komimo tau mpu'u-mpu'u da'a nomparasaya! Sakuyapa kasaena Aku kana mosanggani ante komi? Sakuyapa kasaena Aku kana mosabara ri ja'i komi? Keni wemaimo ngana etu!" 20 Pade nikeni iramo ngana etu ri ja'i Yesus. Tempo seta riara ngana etu nanggita Yesus, kaliu-liu i'a nombabaga ngana etu sampe i'a nadungga pade notinggaduli ante ngangana nawura. 21 Pade nekutanamo Yesus ka uma nu ngana etu, "Sakuyamo kasaena anamu nombarasai iwe'i?" Nesonomo umana, "Da nggari kakedina. 22 Nadea ngganimo i'a nipakadungga seta etu riara apu atau ri ue ala mompatesi i'a. Tapi ane Komi mamala mowia bara nuapa ka anaku e'i, potowemo kami! Tulungimo kami!" 23 Nangulimo Yesus ka i'a, "Pangulimu, 'Ane Komi mamala mowia bara nuapa.' Tapi kakonona pura-pura namala majadi ka tau to nomparasaya!" 24 Kaliu-liu nongaremo uma nu ngana etu, "Aku nomparasayamo! Tapi tulungimo, pomparasayaku e'i danalente!" 25 Sangga Yesus nanggita tau dea nangowa nantatiku I'a, niparentana seta etu iwe'i: "Palaimo iko, seta to nompakabobo pade nompakabongo ngana e'i! Palaimo iko pade ne'e mana mesua ri ja'ina!" 26 Nangepe etu nesuwumo seta etu ante nongare pade nombajuanaka mpakagai ngana etu. Iwetu seta nesuwu nggari ja'ina ngana etu ewa tomate, sampe tau dea nanguli, "Namatemo i'a." 27 Tapi Yesus nanjoko pale ngana etu pade nantulungi i'a nembangu. Pade nembangumo ngana etu. 28 Tempo Yesus nesua raranjapo ante anaguruna, nekutanamo ira ka I'a, "Pue, iwenu sampe kami da'a nompakule nompopalai seta etu pani'a?" 29 Nesonomo Yesus, "Seta ewa etu da'a namala rapopalai ante akala ntanina. Tapi aga ante posambaya." 30 Naopu etu Yesus ante anaguruna nompalasi peto'o etu nompapola polumako ira noliu ri Bagia Galilea. Patuju Yesus ala ne'e ranjani ntau mpaka ri umba I'a, 31 sabana I'a nompatuduki anaguru-anaguruna. Nangulimo I'a ka ira, "Aku, Ana nu Manusia kana rawai ka baliku, pade Aku kana rapatesi ira. Tapi ri eo katolueona Aku kana matuwu bali." 32 Tapi da'a ninjani anaguru Yesus patuju nu tesana etu, pade naekamo rara ira nompekutana batuana ri ja'ina. 33 Naratamo ira ri ngata Kapernaum. Sangga nesuapa ira raranjapo nekutanamo Yesus ka anaguruna, "Nuapa to niposinggarau komi ri jala pani'a?" 34 Tapi ira aga nekalino sanggani, sabana ri jala pani'a ira nosinggarau ka isema to neliu nggalanga katuwuna nggari tatongo ira. 35 Nanggita etu Yesus nekatoko ri setu pade nipokiona anaguruna sampulu romba'a etu mpaka ri ja'ina. Pade niulina ka ira, "Isema-sema madota majadi to neliu nggalanga katuwuna i'a kana majadi to neliu nggaede nggari roana, pade i'a kana majadi batua nu roana pura-pura." 36 Pade nialana samba'a ngana nggedi nikenina ri tatongo ira pura-pura. Pade nikalipuina ngana etu ante nanguli ka ira, 37 "Isema-sema nantarima samba'a ngana nggedi ewa ngana e'i riara sangaku, i'a nantarima Aku. Pade isema-sema to nantarima Aku da'a aga Aku to nitarimana, tapi i'a wo'u nantarima Umaku to nompakau Aku." 38 Pade nangulimo Yohanes ka Yesus, "Guru, kami nanggita samba'a tau nompopalai seta ante kuasa nggari sanga Komi. Tau etu nitagi kami sabana i'a da'a topantuki kita." 39 Tapi nangulimo Yesus, "Ne'e komi mombatagi i'a, sabana da'a ria tau to nompowia kabaraka ante kuasa nggari sangaku to namala manguli sinja'i Aku. 40 Isema-sema da'a nangewa kita, ira roata. 41 Aku mpu'u-mpu'u notesa ka komi, isema-sema mombawai ka komi ue inu sabana komi topantuki Kristus, natantumo i'a kana mombarata tambona banepia. 42 Pade isema-sema mombabagiu samba'a ngana nggedi sampe i'a mana momparasaya, nabelopa ane saongu watu bete raso'o ri tambolona pade i'a ratajiaka riara ntasi. 43 Ane palemu manggeni komi mowia silaka, tompomo palemu etu! Nabelopa komi mesua matuwu mabelo riara suruga ante pale mapudu pade ratajiaka riara naraka ante pale to maganana, etumo riara apu to da'a ntoto ria kapaya-payana. [ 44 Ri setu kaule da'a ria kamatena pade apu da'a ria kapaya-payana.] 45 Pade ane kadamu manggeni komi mowia silaka, tompomo kadamu etu! Nabelopa komi mesua matuwu mabelo riara suruga ante kada mapudu pade ratajiaka riara naraka ante kada to maganana. [ 46 Ri setu kaule da'a ria kamatena pade apu da'a ria kapaya-payana.] 47 Pade ane matamu manggeni komi mowia silaka, su'i kaliakamo matamu etu! Nabelopa komi mesua matuwu mabelo riara suruga ante momata sabingga pade ratajiaka riara naraka ante mata to maganana. 48 Ri setu kaule da'a ria kamatena pade apu da'a ria kapaya-payana. 49 Butu mba'a tau pokaingguna kana rapakagasa riara mpanggita Alatala ante apu [nasimbayu ewa pesomba nipakagasa ante gara.] 50 Gara nabelo, tapi ane gara majadi nameli, iwenupa wo'u mompakapaga bali? Iwetu wo'u komi kana mompopokita belo riara nggatuwumu, pade tunggai mosinggabelo ante roa ntanina."
1 Naopu etu Yesus nompalasi peto'o etu pade nalau mpaka ri Bagia Yudea bo bagia sambote Binangga Yordan. Ri setu nadea wo'u tau narata nantaguni I'a, pade ewa kabiasana Yesus nompatuduki ira. 2 Naria bara sakuya mba'a tau to Parisi narata ri ja'i Yesus ala mompesoba I'a. Nekutanamo ira ka Yesus, "Nantuki Atura-atura agamata mamala samba'a langgai mombasompo rongona besi?" 3 Nesonomo Yesus, "Nuapa to niparenta nabi Musa ka komi?" 4 Nesono ira, "Musa nompaloga posompo porongo ane langgai mombawai sura tala ka rongona besi." 5 Nanguli wo'umo Yesus ka ira, "Atura etu nitulisi i Musa ka komi sabana nako'o gaga rara komi! 6 Tapi da'a iwetu ri lamba pamulana tempo Alatala nompajadi dunia. I'a nompajadi manusia langgai bo besi. 7 Etumo sabana samba'a langgai kana mompalasi indo umana pade maroo ri ja'i rongona besi, 8 pade ira romba'a kana majadi samba'a. Ira mana rauli romba'a, tapi damo samba'a. 9 Sabana etu nuapa to nipakasaongu Alatala, ne'e rapopoga'a manusia!" 10 Tempo ira raranjapomo nekutana wo'umo anaguru Yesus ka I'a ewa pepatudukina pani'a. 11 Nangulimo Yesus ka ira, "Isema-sema mombasompo rongona besi pade momporongo besi ntanina, i'a nireke nebualo. 12 Pade ane besi moga'a ante rongona langgai pade raporongo langgai ntanina, i'a wo'u nireke nebualo." 13 Naopu etu naratamo tau-tau nanggeni ana-ana ira mpaka ri ja'i Yesus ala I'a mombadika palena ri koro ira pade mombagane ira. Tapi anaguru-anaguruna nanggarau tau-tau etu. 14 Nanggita etu naraumo rara Yesus sampe niulina ka anaguru-anaguruna, "Pakambamo ngana-ngana etu marata ri ja'iku! Ne'e ratagi ira, sabana aga tau-tau to noinggu ewa ngana-ngana e'i to masipato majadi todea riara Poparenta nu Alatala. 15 Aku mpu'u-mpu'u notesa ka komi, da'a ria samba'a tau namala majadi todea riara Poparenta nu Alatala ane i'a da'a mekou ri ja'i Alatala nasimbayu ewa ngana-ngana e'i." 16 Pade nisalungguna ngana-ngana etu samba'a bo samba'a pade nidikana palena ri koro ira ala mombagane ira. 17 Tempo Yesus nompapola polumakona, naria samba'a tau nangowa nantotoaka I'a. Nekadedemo i'a ri ngayo Yesus ante nanguli, "Guru to nabelona, nuapa masipato kupowia ala mamala matuwu mabelo sampe ri kasae-saena?" 18 Nesonomo Yesus, "Nokuya komi nanguli Aku nabelo? Da'a ria tau ntanina to nabelona, aga Pue Alatala. 19 Natantu ninjanimu parenta-parenta Alatala to nanguli, 'Ne'e mepatesi, ne'e mogau sala ante tau da'a rongomu mboto, ne'e mangangga, ne'e modawa ri ngayo ntopotangara, ne'e mebagiu, pade bilamo indo umamu.' " 20 Nesonomo tau etu, "Guru, parenta-parenta etu nitukiku puramo nggari kakediku." 21 Pade Yesus nombalele mata ntau etu ante towena, pade niulina ka i'a, "Aga sangelepa to nakura ri ja'imu. Kalau pobalu puramo kakalumanamu pade palelemo doina ka tau-tau nakasiasi ala murata kakalumana ri suruga. Maopu etu kamai, tukimo Aku." 22 Nangepe tesa Yesus etu nabalimo lenje ntau etu sampe nalaimo i'a ante nasusa rara, sabana nadea mpu'u kakalumanana. 23 Naopu etu Yesus nanggita anaguru-anaguruna to nantalili I'a pade niulina ka ira, "Nakaja mpu'u tau nakalumana majadi todea riara Poparenta nu Alatala." 24 Nangepe etu natekaja mpu'umo rara anaguruna etu. Tapi Yesus nompapola tesana ka ira, "Ana-anaku, nakaja mpu'u tau majadi todea riara Poparenta nu Alatala. 25 Nagampapa saongu binata to nabetena ewa unta mesua ri bolo jaru pade samba'a tau nakalumana majadi todea riara Poparenta nu Alatala." 26 Nangepe etu nantambai naingu anaguruna sampe ira nosimpekutana samba'a bo samba'a, "Ane iwetu natantumo da'a ria samba'a tau to mamala rapakasalama!" 27 Yesus nombalele mata ira pade nanguli, "Ane aga nggari manusia, natantu da'a mamala majadi. Tapi da'a iwetu ante Alatala. Sabana pura-pura mamala majadi ane I'a madota." 28 Naopu etu nangulimo i Petrus ka Yesus, "Kita we'i, Pue. Kami e'i nompalasi pura-pura nuapa to naria ri ja'i kami pade nantuki Komi." 29 Nangulimo Yesus, "Aku mpu'u-mpu'u notesa ka komi, butu mba'a tau to nompalasi sapona bara sampesuwuna, bara indo umana, bara anana bo tinaluna sabana nantuki Aku bo nanggeni Kareba Belo, 30 natantumo i'a kana mombarata bali riara nggatuwuna we'i-we'i satu nggani kadeana nggari nuapa to nipalasina. I'a kana mombarata sapo bo sampesuwu langgai ante sampesuwu besi, indo, ngana-ngana bo tinalu, nau ante pepandasa. Pade ri tempo nggapurina i'a kana mombarata katuwua mabelo sampe ri kasae-saena. 31 Tapi nadea tau to nalanga katuwuna we'i-we'i kana majadi tau to naede katuwuna banepia. Pade nadea wo'u tau to naede katuwuna we'i-we'i kana majadi tau to nalanga katuwuna banepia." 32 Tempo Yesus ante anaguruna riara mpolumako ira mpaka ri ngata Yerusalem Yesus nolumako njamba'ana ri koluna. Nakini-kini rara anaguruna nompekiri nuapa majadi ri ja'i Yesus ri setu, pade naeka wo'u rara tau-tau ntanina to nantuki ira nggari purina. Pade sangganipa Yesus nompokio anaguruna sampulu romba'a ri ja'ina pade nompamulamo I'a notesa ka ira nuapa to majadi ri ja'ina. 33 Niulina, "Epemo mpakabelo-belo! We'i-we'i kita mantende mpaka ri ngata Yerusalem. Ri setu Aku, Ana nu Manusia kana rapobalu ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi. Pade Aku kana rawai ka tau-tau da'a to Yahudi, 34 pade Aku kana rapongei-ngei bo ratailu ira. Pade Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali." 35 Naopu etu Yakobus bo Yohanes ana i Zebedeus nompakamosu Yesus pade nanguli, "Guru, nisarumaka kami nuapa raperapi kami kana rapoiyo Komi." 36 Nekutana Yesus ka ira, "Nuapa to nipodota komi ala kupowia ka komi?" 37 Nesonomo ira, "Palogamo kami mekatoko moparenta mpasanggani-nggani ante Komi tempo Komi moparenta ante nakuasa ewa magau banepia, samba'a ri pangganamu pade samba'a ri panggeimu." 38 Nangulimo Yesus ka ira, "Da'a ninjani komi nuapa to niperapi komi etu. Iwenumo? Rapakule komi manggolo pepandasa nasimbayu ewa pepandasa to rapawela ka Aku, pade manta'amaka kasusa ewa to kurasai banepia?" 39 Nesonomo ira, "Rapakule!" Pade nangulimo Yesus ka ira, "Natantumo komi kana manggolo pepandasa nasimbayu ewa pepandasa to rapawela ka Aku, pade komi kana mombarasai nuapa to kurasai. 40 Tapi da'a Aku to nakuasa mompakatantu isema masipato mekatoko ri pangganaku bara ri panggeiku. Peto'o etu bagia ira to nipakatantu Umakumo." 41 Nangepe nuapa to niperapi Yakobus bo Yohanes sampulu mba'a anaguru Yesus ntanina nanggarau ira romba'a etu. 42 Tapi Yesus nompokio ira pura-pura mpaka ri ja'ina pade niulina ka ira, "Ninjani komi mbotomo ira to nireke topoparenta tau-tau da'a nosinjani ante Alatala nabiasa nomparenta todea ira ante nasombo. Pade topanggeniaka-topanggeniaka ira nompandasa todea ira. 43 Tapi da'a masipato komi moinggu iwetu! Kakonona kana iwe'i: Isema-sema nggari tatongo komi to madota malanga panggana i'a etu kana majadi topantulungi roana. 44 Pade isema-sema to madota majadi to nalanga katuwuna kana majadi batua komi pura-pura. 45 Sabana Aku, Ana nu Manusia mboto da'a narata ri dunia e'i ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea." 46 Naopu etu naratamo Yesus ante anaguruna ri ngata Yerikho. Tempo Yesus nesuwu nggari ngata etu nosanggani ante anaguruna bo nadea mpu'u tau ntanina, ri setu naria samba'a toburo nosanga ka i Bartimeus, ana i Timeus, nekatoko nerapi-rapi ri wiwi jala. 47 Tempo i'a nangepe lele Yesus to Nazaret noliu ri setu, nompamulamo i'a nongare, "Yesus, Muli i Daud, potowemo aku e'i!" 48 Nadea tau nangontiaka i'a ante nanguli, "Ne'e makanano! Pekalinomo iko!" Tapi i'a aga nantambai nongare ante suara to namangga, "Muli i Daud, potowemo aku!" 49 Nangepe etu nenontomo Yesus, pade niulina ka tau ri setu, "Pokiomo i'a wemai." Jadi ira nompokio toburo etu ante nanguli, "Pakaroo raramu! Pekanggoremo. I'a nompokio iko." 50 Nangepe etu nipalewanamo buyana pade nompari-mpari nekanggore nalau nantotoaka Yesus. 51 Pade nekutanamo Yesus ka i'a, "Nuapa to mupodota kupowia ka iko?" Nesonomo toburo etu, "Guru, to nipodotaku ala mataku mamala mekita!" 52 Pade nangulimo Yesus ka i'a, "Panjilimo. Nabelomo matamu sabana iko nomparasaya." Kaliu-liu nabelomo mata ntoburo etu. Pade nalaumo i'a nantuki Yesus riara mpolumakona.
1 Tempo Yesus ante anaguruna namosumo ante ngata Yerusalem, naratamo ira ri ngata Betfage bo ngata Betania ri kente nu Bulu Zaitun. Ri setu Yesus nompakau romba'a anaguruna mokolu ka I'a. 2 Niulina ka ira, "Kalaumo komi mpaka ri ngata to namosuna ri setu. Tempona komi mesua rara ngata komi kana mombarata saongu ana keledai nitataka ri setu to da'apa sanggani nipesawi ntau. Wolemo ana keledai etu nggari potatakana pade umbumo wemai. 3 Pade ane maria tau mompekutana komi, 'Nokuya komi nombawole ana keledai etu?' uli ka tau etu, 'Pue paraluu mompake ana keledai e'i. Damo rapopanjilina ngina.' " 4 Jadi nalaumo ira romba'a etu pade nirata ira mpu'u saongu ana keledai nitataka ri wiwi jala namosu pewobo saongu sapo. Pade niwole iramo ana keledai etu nggari potatakana. 5 Tempo etu nekutanamo bara sakuya mba'a tau to nenggore ri setu, "Nuapa nipowia komi? Nokuya komi nombawole ana keledai etu?" 6 Pade nesonomo ira nantuki tewai to nitesa Yesus ka ira. Nangepe etu tau-tau etu nompaloga ira nanggeni ana keledai nggari setu. 7 Jadi ana keledai etu niumbu ira mpaka ri ja'i Yesus. Narata ri setu nilampi ira ante buya, pade nesawimo Yesus ri bungguna. 8 Nadea tau ri setu nombajini buya ira ri jala pade naria wo'u tau nombatale rangga-rangga kayu nggedi to nanggamatana to niala ira nggari pampa ewa tandaina pebila ira ka Yesus. 9 Pade nongare-ngaremo pura-pura tau, nabeloka ira ri koluna, nabeloka ira ri purina. Ira nanguli, "Ratoiyata Alatala! Perapi Pue mombagane Magau to narata niposumba Alatala! 10 Perapi Pue mombagane poparenta nu Magau to maratana, etumo poparenta Muli nu umata Magau Daud. Ratoiyata Alatala ri suruga!" 11 Tempo Yesus nesua riara ngata Yerusalem nalaumo I'a mpaka ri Sapo Mpepue nanggita pura-pura nuapa to naria ri setu. Naopu etu nalaimo I'a mpaka ri ngata Betania nosanggani ante anaguruna sampulu romba'a sabana nangguwiamo. 12 Kaeona mpadondo tempo ira nalai nggari ngata Betania, naoromo ta'i Yesus. 13 Pade da nggawao I'a nanggita sampu'u kayu ara to noroyamo. Jadi nalaumo I'a nompakamosu kayu etu ala manggita ane maria wuana. Tapi tempona I'a narata ri setu da'a ria kamba saongu wuana niratana aga tawana bayangi, sabana da'apa tempo mpowuana. 14 Pade I'a nombajanjiaka kayu ara etu ante nanguli, "Ne'e mana maria wuamu rakoni ntau sampe ri kasae-saena." Tesana etu niepe anaguruna. 15 Pade naratamo ira ri ngata Yerusalem. Sangga naratapa ri setu nesuamo Yesus riara Sapo Mpepue, pade nompamulamo I'a nompopalai topotomu nggari setu. Nisumbolinakana puramo meja-meja ntoposinjula doi bo kadera-kadera ntopobalu tonji banggebodo. 16 Pade da'a nipalogana kamba samba'a manggeni mbara-mbara nantuki jala moliu ri lalowo Sapo Mpepue. 17 Pade nipatudukina tau dea ri setu iwe'i: "Riara Buku Nagasa naria nitulisi iwe'i: 'Sapoku kana rauli sapo mposambaya tau njumangata.' Tapi komi e'i nompajadi Sapo Mpepue e'i peto'o parampo!" 18 Balengga-balengga topanggeni agama bo guru-guru agama nangepe kajadia etu. Jadi nompamulamo ira mangelo jala mompatesi Yesus sabana naekamo rara ira ri ja'ina nanggita pura-pura tau nogumaa nangepe pepatudukina. 19 Tempo ntora mawengimo nalai wo'umo Yesus ante anaguruna nggariara ngata etu. 20 Kaeona mpadondo tempo ira noliu ri jala mpaka ri Yerusalem nikita ira kayu ara to nijanjiaka Yesus yowi. Nangau puramo sampe ri kalena. 21 Pade natetoramo rara i Petrus kajadia yowi ante kayu etu. Niulina ka Yesus, "Kitamo, Guru. Kayu ara to nijanjiaka Komi yowi nangau puramo!" 22 Nangulimo Yesus, "Parasayamo ri ja'i Alatala! 23 Aku mpu'u-mpu'u notesa ka komi, komi mamala manguli ka bulu e'i, 'Polinjamo, potingganawu riara ntasi.' Pade etu kana majadi ane komi da'a morompenga pekirimu pade manjarumaka nuapa to niuli komi etu kana majadi. 24 Sabana etu kuuli ka komi, ane komi merapi sangele ka Pue Alatala, parasayamo pomperapimu etu kana madupa, pade nuapa to niperapimu etu kana ratarima komi. 25 Pade tempo komi mekanggore mosambaya ane maria kasala roamu ri ja'imu, ampungi ntani ruru i'a ala Umamu to naria ri suruga wo'u mombaampungi sala-salamu. [ 26 Tapi ane komi da'a mombaampungi roamu, natantumo Umamu ri suruga wo'u da'a mombaampungi sala-salamu."] 27 Pade narata wo'umo ira ri ngata Yerusalem. Tempona Yesus nolumako ri lalowo Sapo Mpepue naratamo balengga-balengga topanggeni agama, guru-guru agama bo totu'a-totu'a nto Yahudi. 28 Nekutanamo ira ka I'a, "Ante kuasa nggari umba Komi nompopalai topotomu nggari Sapo Mpepue yowi? Isema nombawai kuasa etu ka Komi?" 29 Nesonomo Yesus, "Naria wo'u sangaya kupekutana ka komi ntani ruru. Sonomo pompekutanaku e'i pade Aku manguli ka komi ante kuasa nggari umba Aku nowia mpengaya-ngaya etu. 30 Ulimo ka Aku, isema nombawai kuasa ka Yohanes Topediu nombadiu tau? Alatala atau manusia?" 31 Pade nosimpekutanamo ira samba'a bo samba'a, "Iwenu kita mombasono I'a? Ane kita manguli kuasa Yohanes nggari ja'i Alatala natantumo I'a kana manguli ka kita iwe'i: 'Ane iwetu nokuya komi da'a nomparasaya Yohanes?' 32 Tapi da'a mamala kita manguli kuasa Yohanes nggari ja'i manusia!" Niuli ira iwetu apa naeka ira ri ja'i ntau dea, sabana tau dea nomparasaya Yohanes mpu'u-mpu'u samba'a nabi. 33 Jadi nesonomo ira ka Yesus, "Da'a ninjani kami nggari umba kuasana." Pade nangulimo Yesus ka ira, "Ane iwetu da'a wo'u kutesa ka komi ante kuasa nggari umba Aku nowia mpengele-ngele etu."
1 Pade nompamulamo Yesus notesa ka topanggeniaka-topanggeniaka nto Yahudi ante porapa. Niulina, "Naria samba'a tau nombatuja anggur ri tinaluna. Naopu etu tinalu etu niwala ntikuna, pade nikaena saongu lowu peto'o parewa rapompea wua anggur. Nikawiana wo'u sou panggatono tinalu. Naopu etu nipajana tinalu etu ka bara sakuya mba'a topokarajaa pade nalaimo i'a mpaka ri ngata ntanina. 2 Sangga naratapa tempona mompui wua anggur nipakaunamo samba'a batua malau mpaka ri ja'i topokarajaa tinaluna etu ala mantarima bagiana nggari asele tinalu nipotuja anggur etu. 3 Tapi ira aga nombasoko batua etu pade nombaboba i'a pade nompakau i'a manjili ante pale ntoya. 4 Naopu etu pue ntinalu nompakau wo'umo samba'a batuana ntanina mpaka ri ja'i topokarajaa tinalu. Tapi i'a wo'u niboba ira sampe nabela balenggana, pade i'a mpu'u-mpu'u nipakaeya ira. 5 Naliu etu pue ntinalu etu nompakau wo'umo batua to santanina mpaka ri ja'i topokarajaa tinalu. Tapi i'a aga nipatesi ira. Pade iwetu wo'u to nipowia ira ante batua-batua ntanina. Naria to niboba ira, pade naria ntanina to nipatesi ira. 6 Kaopuna naboli damo samba'a lau ri ja'i pue ntinalu, etumo anana mboto to nipotowena. Anana etu nipakauna mpaka ri ja'i ntopokarajaa tinalu. Nipekirina, 'Natantumo ira kana mekou ri ja'i anaku mboto.' 7 Tapi iwetu nanggita ana nu pue ntinalu etu, nangulimo topokarajaa etu samba'a bo samba'a, 'Kitamo! Etumo ana pue ntinalu to majadi pue ntinalu banepia. Kamaimo kita mompatesi i'a ala tinalu e'i raalata majadi bagiata.' 8 Jadi nisoko iramo ana pue ntinalu etu pade i'a nipatesi ira, pade watabakuna nitajiaka ira ri sawaliku tinalu etu." 9 Pade nekutanamo Yesus ka topanggeniaka nto Yahudi etu, "Jadi nuapa to rapowia pue ntinalu etu? Natantumo i'a kana marata mompatesi topokarajaa tinalu etu pade mombapaja tinalu etu ka tau-tau ntanina. 10 Natantumo nibasa komi tesa riara Buku Nagasa to nanguli iwe'i: 'Watu to nitajiaka ntopowia sapo watu etumo to najadi palo mpondasi to neliu nggaroso. 11 Etu nipowia i Pue, sangele powia to nipogumaa matata.' " 12 Nangepe etu topanggeniaka nto Yahudi etu nompasimbuku mangelo jala manjoko Yesus, sabana ninjani ira porapa Yesus etu nipawela ka ira. Tapi ira naeka ka tau dea. Jadi nalaimo ira nompalasi I'a. 13 Naopu etu topanggeniaka-topanggeniaka nto Yahudi etu nompakau bara sakuya mba'a to Parisi ante bara sakuya mba'a anabua Magau Herodes malau mangelo kasala tesa Yesus. 14 Sangga naratapa ira ri ja'i Yesus nangulimo ira, "Guru, ninjani kami Komi samba'a tau to nanoana. Komi da'a ntoto naeka ka isema-sema sabana Komi da'a nompoposisala manusia. Komi batena nompatuduki ante nanoto pokainggu nuapa to masipato riara mpanggita Alatala. Jadi tulungi ulimo ka kami nantuki Atura-atura agama masipato mombabayari balasitee ka Magau Kaisar bara da'a? 15 Masipato kami mombabayari etu bara da'a?" Tapi ninjani Yesus patuju ira aga mebagiu. Jadi niulina ka ira, "Nokuya komi mangelo kasala tesaku? Keni ka Aku wemai sampeka doi salaka ala kukita!" 16 Pade nikeni ira mpu'umo sampeka doi etu. Pade nekutanamo I'a ka ira, "Gambara ante sanga isema to naria ri doi e'i?" Nesonomo ira, "Gambara ante sanga Magau Kaisar." 17 Pade nangulimo Yesus ka ira, "Ane iwetu, waimo ka Magau Kaisar nuapa to masipato rawai ka Magau Kaisar, pade waimo ka Alatala nuapa to masipato rawai ka Alatala!" Nangepe pesono Yesus etu, nogumaamo ira. 18 Naopu etu naratamo bara sakuya mba'a tau to Saduki ri ja'i Yesus. Iramo tau-tau to Yahudi to nomparasaya tau namate da'a mana matuwu bali banepia. Jadi nekutanamo ira ka Yesus, 19 "Guru, nabi Musa nantulisi atura e'i ka kita: 'Ane maria samba'a langgai norongo pade da'apa rongona noana namatemo i'a, sampesuwuna mboto kana momporongo baluna etu ala muli ira romba'a majadi muli sampesuwuna to namatena etu.' 20 Naria ira nosampesuwu pitumba'a langgai bayangi. Ulumbuana norongomo, tapi da'apa ira njamboko noana namatemo i'a. 21 Pade tua'ina karomba'ana nomporongo baluna etu. Tapi da'apa ira noana i'a wo'u namate. Pade wa'a wo'u to najadi ante katolumba'ana 22 sampe ri kapapitumba'ana. Da'a ria samba'a ira nomboli ngana ka besi etu. Kaopuna besi etu wo'u namate. 23 Jadi to rapekutana kami ka Guru iwe'i: Tempona tau-tau namate matuwu bali banepia, besi etu rongo isema, sabana i'a niporongo ira pitumba'a?" 24 Nesonomo Yesus ka ira, "Nasalamo pompekiri komi sabana da'a ninjani komi isi Buku Nagasa pade da'a wo'u ninjani komi kuasa nu Alatala. 25 Tempo tau namate matuwu bali banepia, katuwu ira kana masimbayu ewa malaeka-malaeka ri suruga. Ira mana morongo bo mana raporongo. 26 Iwenumo? Da'apa nibasa komi nuapa to nitesa riara Buku nabi Musa ewa tau namate matuwu bali? Ri ayat-ayat to nantesa kajadia ante santungu gumbu to najelana da'a nikoni nu apu, Alatala nanguli ka i Musa, 'Akumo Alatala Abraham, Alatala Ishak bo Alatala Yakub.' 27 Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi nanotomo Abraham, Ishak bo Yakub mana namate. Nasalanjalamo pompekiri komi etu!" 28 Tempo etu naratamo samba'a guru agama ri ja'i Yesus. Niepenamo tesa Yesus ante tau-tau Saduki pani'a pade niepena pesono Yesus nabelo mpu'u. Jadi nekutanamo i'a ka Yesus, "Guru, parenta Alatala umbana to neliu nggapokona?" 29 Nesonomo Yesus, "To neliu nggapokona iwe'i: 'Umba komi tau-tau to Israel, Pue Alatalata, Pueta samba'a lau. 30 Potowemo Pue Alatalamu ante mpu'u-mpu'u raramu, pade ante pura-pura katuwumu, pade ante pura-pura pekirimu, pade ante pura-pura karoso koromu.' 31 Pade parenta karongelena iwe'i: 'Potowemo sanggamanusiamu nasimbayu ewa komi nompotowe koromu mboto.' Da'a ria parenta ntanina to neliu nggapokona nggari rongele parenta etu." 32 Pade nangulimo guru agama etu ka I'a, "Nakono mpu'u, Guru. Nakonomo tesa komi nanguli Alatala aga samba'a lau pade da'a ria to ntanina, aga I'a. 33 Pade ewa niuli komi manusia kana mompotowe Alatala ante mpu'u-mpu'u rarana, ante pura-pura pekirina pade ante pura-pura karoso korona. Pade masipato kita mompotowe sanggamanusiata ewa korota mboto. Etu neliu nggabelo nggari mombawai pesomba to nitunu bo pewai-pewai ntanina ka Alatala." 34 Sangga nangepe guru agama etu notesa ante nanoto iwetu, nangulimo Yesus ka i'a, "Komi ntoramo najadi todea riara Poparenta nu Alatala." Nompamula nggari setu mana ria samba'a to nabiana nompekutana Yesus. 35 Tempo Yesus nopaguru ri Sapo Mpepue nekutanamo I'a ka tau dea ri setu, "Iwenu sampe guru-guru agama nanguli Magau to Mompakasalama aga muli i Daud? 36 Magau Daud mboto ante pekeniaka Nosa Nagasa nu Alatala nanguli iwe'i: 'Pue Alatala nanguli ka Pueku, kamai pekatokomo ri sabingga ngganaku sampe Aku mompowia pura-pura balimu mekou ri ja'imu.' 37 Jadi ane Magau to Mompakasalama niuli Daud Puena, iwenu sampe I'a nireke aga muli i Daud?" Sangga nangepe tesa Yesus etu nadamba mpu'umo rara ntau dea. 38 Tempo Yesus nopaguru I'a nanguli, "Pakabelo-belo ala ne'e komi moinggu ewa guru-guru agama. Ira aga nompokono manjayo-njayo nompake baju ndoe ala rapogumaa ntau, pade ira aga nompokono rabila ntau riara potomu. 39 Ira aga nompokono mekatoko ri peto'o to nibilana riara sapo mpodade bara ri peto'o ntotu'a ri posusa. 40 Ira nombabagiu tobalu-tobalu besi ala mombarata sapo ira. Pade ira nantabuniaka pokainggu ira to naja'ana etu ante nosambaya nasae-sae. Etu sampe meliu nggatomo pesuku to rapawela ka ira banepia!" 41 Naria sanggani Yesus nekatoko nantingayo peti mpesomba ri Sapo Mpepue pade nompariara iwenu tau mombasuaraka doi ira riara peti etu. Nadea tau to nasugina narata nombasuaraka doi ira riara peti mpesomba etu. Nadea mpu'u pewai ira. 42 Pade narata wo'u samba'a besi tobalu to nakasiasi mpu'u nombasuaraka doina rompeka doi tambaga to nakura mpu'u olina. 43 Pade Yesus nompokio anaguruna ri ja'ina, pade niulina ka ira, "Aku mpu'u-mpu'u notesa ka komi, besi tobalu to nakasiasi etumo to nadeapa pewaina nggari pura-pura tau ntanina to nombasuaraka doina riara peti mpesomba etu. 44 Sabana ira aga nombawai nggari labi nu doi ira, tapi tobalu besi etu nombawai ante kapepana. I'a nombawai pura-pura doi to naria ri ja'ina, etumo pura-pura katuwuna."
1 Tempo Yesus nesuwu nggariara Sapo Mpepue, naria samba'a anaguruna nanguli ka I'a, "Guru, kitamo kagaya nu sapo-sapo e'i! Kitamo karoso nu watu-watuna!" 2 Nangulimo Yesus ka i'a, "Nikitamu sapo-sapo to nagaya e'i. Tapi kana marata tempona banepia pura-pura to nikitamu e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero." 3 Pade nalaumo Yesus nekatoko ri Bulu Zaitun ri peto'o to nantingayo Sapo Mpepue. Ri setu i Petrus, Yakobus, Yohanes bo Andreas nompekutana I'a nggalino, 4 "Guru, tulungi uli ka kami nepia etu pura-pura majadi? Nuapa tandaina to mompakatantu namosumo kajadia to nitesa Komi pani'a?" 5 Nesonomo Yesus ka ira, "Pakabelo-belo ala ne'e komi rabagiu! 6 Sabana madea tau kana marata mompobalu sangaku. Ira manguli, 'Akumo Magau to Mompakasalama!' Madea tau kana mamala rabagiu ira iwetu. 7 Ane komi mangepe wamba ntau mosipatesi bara mangepe lele ntau nosipatesi, ne'e komi maeka! Etu pura-pura kana majadi ntani ruru, tapi etu da'apa tandaina kaopu nu dunia. 8 Tempo etu tau-tau nggari sangatana kana mosibali ka tau-tau to sangatana, pade magau simbau magau wo'u kana mosiewa. Pade ri umba-umba ri dunia e'i kana maria lingu pade kana maria wo'u kamateoro. Tapi etu pura-pura aga kasusa pamulana, ewa ju'a besi ntora moana. 9 Tapi komi e'i, pakabelo-belo, sabana komi kana rasoko pade rakeni rapangadu ri ngayo ntopotangara agama. Komi kana raboba riara sapo mpodade pade komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Tempo etu komi kana motesa ka ira ewa Aku. 10 Pade Kareba Belo kana rapatolele ka pura-pura manusia ri dunia e'i ntani ruru. 11 Ane komi rasoko rakeni ratangara ne'e komi masusa pekirimu mompekiri nuapa pesono komi. Ane maratamo tempo etu tesamo nuapa to rawai ka komi, sabana da'a komi mboto to motesa tapi Nosa Nagasa nu Alatala. 12 Pade ri tempona etu wo'u kana maria tau mombawai sampesuwuna mboto rapatesi, pade maria totu'a mombawai anana mboto rapatesi. Ngana-ngana kana mangewa indo umana pade mombawai ira rapatesi. 13 Pade komi kana raporau rara ntau pura-pura sabana komi nomparasaya Aku. Tapi isema-sema to maroo momparasaya sampe ri kaopuna kana rapakasalama." 14 "Komi kana manggita to niuli 'Kaja'ana to Mompakatantoru' mekanggore ri peto'o to da'a masipatona. Isema-sema mombabasa tesa e'i pekiri mbotomo batuana. Tempo etu majadi tau-tau to naria ri Bagia Yudea kana mangowa malai mpaka ri buluna. 15 Ane tau-tau to nompamaya ka poiri ri bunggu nu sapona ne'e mana mesua mangala mbara-mbarana nggariara njapona. 16 Ane tau-tau ri tinaluna, ne'e mana ira manjili ri ngata mangala pakeana. Palaimo masasinta! 17 Ri eo etu mandasa mpu'umo besi-besi to matiana bo ira to danompatomi. 18 Pekakaimo ka Alatala ala etu da'a majadi tempo leni. 19 Sabana ri eo etu maja'a mpu'u kasusa bo kapari to mawela manusia. Da'apa sanggani najadi kasusa bo kapari ewa etu nompamula nggari lamba pamulana dunia nipajadi Alatala sampe we'i-we'i. Pade da'a mana ria kasusa bo kapari ewa etu ri tempo marata. 20 Ane Pue da'a masalisa mompakaopu kasusa bo kapari etu, natantumo da'a kamba samba'a mamala matuwu. Tapi nggari towe Alatala ka todea topomparasaya to nipelisina, tempona etu kana masalisa rapakaopuna. 21 Ri tempona etu ane maria tau manguli ka komi, 'Kitamo! Ri se'imo Magau to Mompakasalama,' bara manguli ka komi, 'Ri setumo I'a,' ne'e raparasaya komi tesana. 22 Sabana kana meumba tau topodawa to mompangaku iramo Magau to Mompakasalama. Pade meumba wo'u nabi-nabi topodawa. Ira pura-pura kana mompowia tandai-tandai to nipogumaa bo kabaraka-kabaraka ante patuju ane mamala mombabagiu tau-tau to nipelisi Alatala. 23 Tapi komi kana mainga sabana da'apa etu majadi nitesaku ka komi mamimo." 24 "Ri tempo etu ane maopumo kasusa bo kapari etu mata eo kana majadi marumau pade wula mana mewanta. 25 Betu'e-betu'e kana manawu nggari langi pade kuasa-kuasa ri langi kana ragagoya pura. 26 Pade ri tempo etumo pura-pura manusia ri dunia kana manggita Aku, Ana nu Manusia mana'u riara kulimu ante kuasa bo karemeku to nipogumaa. 27 Pade Aku kana mompakau malaeka-malaekaku malau mompasiromu pura-pura tau to nipelisiku nggari patanjulapa dunia, nggari tampa nu langi marata ri tampa nu dunia." 28 "Pariaramo pepatuduki nggari kayu ara. Ane komi manggita rangga-ranggana nompamula nangura pade nompamula noroya, natantu ninjani komi namosumo tempo eo mapane. 29 Iwetu wo'u ane komi manggita kajadia-kajadia to nitesaku pani'a, kana ranjani komi namosumo tempo karataku. Damo mompopea tempona. 30 Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate. 31 Langi bo dunia kana malipo tapi tesaku kana maroo sampe ri kasae-saena. 32 Tapi eo bo tempo karataku etu da'a ria samba'a nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina." 33 "Jadi pakabelo-belo. Komi kana mainga sabana da'a ninjani komi nepia tempo karataku. 34 Karataku nasimbayu ewa porapa e'i: Naria samba'a tau to nalau mpaka ri ngata nakawao. Da'apa i'a nalau niwaina kuasa ka batua-batuana mombaurusi sapona. Butu mba'a niwaina bagona samba'a bo samba'a. Pade topanggatono pewobo nitewaina mainga mompopea karatana. 35 Jadi iwetu wo'u komi kana mainga mompopea karataku sabana da'a ninjani komi nepia Aku manjili, bara ulungguwiana bara ri tongo wengi bara kabobayana bara ri pebulu nu eo. 36 Komi kana mainga ala ane Aku marata ne'e-ne'e komi aga kurata maturu. 37 Nuapa to nitesaku ka komi, kutesa wo'u ka pura-pura tau. Komi kana mainga!"
1 Tempo etu damo rombengipa mawela Eo Bete Paska bo Posusa Roti Da'a Nidika Ragi. Balengga-balengga topanggeni agama Yahudi bo guru-guru agama danangelo jala manjoko Yesus nggalino pade mompatesi I'a. 2 Nangulimo ira, "Ne'e kita manjoko I'a tempo eo posusa etu, ala ne'e magado tau dea." 3 Naria sanggani Yesus ri ngata Betania ri sapo i Simon to naju'a bete bopia. Tempo I'a nekatoko nanggoni naratamo samba'a besi nanggeni saongu botolo to nipowia nggari watu naisi minya wongi to nasuli mpu'u olina to nipowia nggari kale to nawongi. Narata ri setu niposona tambolo botolo etu pade nitolina minya wongi etu ri balengga Yesus. 4 Naria bara sakuya mba'a tau ri setu to narau rara nanggita powia nu besi etu. Notesamo ira samba'a bo samba'a, "Nokuya minya wongi etu nipakarugi sinja'i? 5 Kakonona minya etu mamala rapobalu ante olina toluatu mpeka doi salaka pade doi etu mamala rawai ka tau-tau nakasiasi." Pade ira nanggarau besi etu. 6 Tapi nangulimo Yesus ka ira, "Pakambamo i'a! Nokuya komi nompakasusa i'a? I'a nanggawia sangele to nabelona ri ja'iku. 7 Tau to nakasiasi bate-batena maria ri tatongo komi pade ira mamala ratulungi komi ri butu-butu tempo to nipodota komi. Tapi Aku e'i da'a batena mosanggani ante komi. 8 Besi e'i nompowia nuapa to namala nikawiana. I'a nombatoli minya wongi ri ja'iku ala mompakasadia koroku ratana banepia. 9 Aku mpu'u-mpu'u notesa ka komi, ri umba-umba ri dunia Kareba Belo rapatolele, powia nu besi e'i kana ratesa wo'u ala mombatora i'a." 10 Naopu etu nalaumo Yudas Iskariot, samba'a nggari sampulu romba'a anaguru Yesus, mpaka ri ja'i balengga-balengga topanggeni agama ante patujuna mompobalu Yesus ka ira. 11 Tempo ira nangepe tesa Yudas, nadamba mpu'umo rara ira, pade ira nojanji mombawai doi ka i'a. Naopu etu nompamulamo Yudas nangelo loga to nabelona mombawai Yesus ka balina etu. 12 Naratamo eo pamulana Posusa Roti Da'a Nidika Ragi, etumo tempo tau-tau to Yahudi nanjambale ana bimba rakoni ri Posusa Paska. Tempo etu naratamo anaguru Yesus nompekutana I'a, "Pue, ri umba peto'o mupokono rakalau kami mompakasadia panggoni Posusa Paska ka Komi?" 13 Nangepe etu I'a nompakau romba'a anaguruna ante tewai iwe'i: "Kalaumo komi mpaka ri ngata Yerusalem. Ri setu samba'a langgai manggeni gumba nu ue kana mosintomu ka komi. Tukimo i'a 14 mpaka ri sapo to rakalauna, pade ulimo ka pue njapo ri setu, 'Iwe'imo tewai Guru ka kami: Ri umba tombi to nipakasadia ka Aku manggoni panggoni Posusa Paska ante anaguruku?' 15 Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita." 16 Pade nalaumo romba'a anaguruna etu nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu. 17 Sangga nawengipa naratamo Yesus ante sampulu romba'a anaguruna etu. 18 Tempona ira nekatoko nanggoni, nangulimo Yesus ka ira, "Aku mpu'u-mpu'u notesa ka komi, samba'a nggari tatongo komi to nanggoni mpasanggani-nggani ante Aku kana mompobalu Aku ka baliku." 19 Nangepe etu nasusa mpu'umo rara ira, pade nekutanamo ira ka Yesus samba'a bo samba'a, "Pue, da'a aku e'i to nipatuju Komi?" 20 Nangulimo I'a ka ira, "I'amo samba'a nggari komi sampulu romba'a e'i to mombatome roti riara tubu mpasanggani-nggani ante Aku. 21 Aku, Ana nu Manusia kana mamate ewa to nitulisi riara Buku Nagasa. Tapi mandasa mpu'u tau to mompobalu Aku etu! Nabelopa ane tau etu da'a niote ri dunia." 22 Tempona ira nanggoni Yesus nangala saongu roti pade nanguli tarima kasi ka Alatala. Naopu etu nibingga-binggana roti etu pade niwaina ka ira ante nanguli, "Alamo roti e'i. E'imo koro bataku." 23 Naopupa etu nialana wo'umo saongu sanggiri panginu pade niulina tarima kasi ka Pue Alatala. Naopu etu niwaina ka ira pade ira pura-pura nanginu nggari sanggiri panginu etu. 24 Pade niulina wo'umo ka ira, "E'imo leiku to rapatiti ka tau dea ngina ala mompakaasa pojanji Alatala ante manusia. 25 Aku mpu'u-mpu'u notesa ka komi, nompamula we'i-we'i Aku mana manginu anggur sampe marata tempona banepia Aku manginu anggur to nabouna riara Poparenta nu Alatala." 26 Pade naopupa ira nodade nombatoiya Alatala nalaimo ira mpaka ri Bulu Zaitun. 27 Nangulimo Yesus ka ira, "Komi pura-pura kana mokanggaura momparasaya Aku, sabana naria Tesa nu Alatala to nitulisi riara Buku Nagasa iwe'i: 'Aku kana mompatesi topoewu sampe bimba-bimbana mosimpotatare.' 28 Tapi tempo Aku matuwu bali Aku mokolu ka komi mpaka ri Bagia Galilea." 29 Nangepe etu nangulimo i Petrus, "Naupa ira pura-pura mokanggaura momparasaya aku e'i da'a!" 30 Tapi nangulimo Yesus ka i'a, "Aku mpu'u-mpu'u notesa ka iko, wengina e'i wo'u da'apa magana ronggani manu mora'o tolungganimo iko mombasapu Aku." 31 Tapi i Petrus nantambai kabiana nanguli, "Nau aku mamate mpasanggani ante Komi aku da'a ntoto mombasapu Komi!" Pade iwetu wo'u to niuli pura-pura anaguruna ntanina. 32 Pade naratamo ira ri saongu peto'o nosanga ka Getsemani. Narata ri setu nangulimo Yesus ka anaguruna, "Pekatokomo ri se'i tempo Aku malau mosambaya." 33 Pade nikenina i Petrus, Yakobus bo Yohanes napola sakedi mpasanggani-nggani. Pade nompamulamo Yesus nasusa bo nawiora mpu'u rarana. 34 Niulina ka ira tolumba'a, "Nasusa mpu'umo raraku, ewa mamate nirasaiku! Popeamo Aku ri se'i pade mainga-inga." 35 Pade napolamo Yesus sakedi. Notimbakotumo I'a nekadede sampe ri tana pade nosambaya ka Umana Alatala ala ane mamala I'a makabasaka nggari kasusa bo kapari to marata ri ja'ina etu. 36 Niulina, "Uma, O, Umaku! Da'a ria to da'a namala mupowia. Ane mamala pakakawaomo nggari ja'iku kasusa bo kapari e'i! Tapi ne'e dotaku majadi, aga dotamu mboto." 37 Naopu etu nanjilimo Yesus ri ja'i anaguruna tolumba'a etu. Niratana ira pura-pura napisi. Pade niulina ka i Simon Petrus, "Simon, iwenumo? Napisimo iko? Da'a nipakulemu mosanggani ka Aku nau aga sajaa? 38 Komi kana mainga bo mosambaya ala ne'e komi mawela pesoba! Riara nta'imu naria dota mompowia to nabelona, tapi koromu da'a nompakule." 39 Pade nalau wo'umo Yesus nosambaya ewa posambayana pani'a. 40 Naopu etu narata wo'umo I'a ri ja'i anaguruna. Niratana ira aga napisi wo'umo sabana naluru mpu'u mata ira. Mana ninjani ira nuapa to rauli ira ka I'a. 41 Tempo Yesus natingguli ri ja'i ira katolungganina, niulina ka ira, "Iwenumo? Danapisi bo nangosaraka komi? Naganamo! Naratamo tempona Aku, Ana nu Manusia rawai riara mpale tau-tau nasilaka. 42 Pembangumo! Kitamo! Naratamo tau to nompobalu Aku! Kamaimo kita mantomunaka i'a!" 43 Tempona Yesus danotesa, naratamo Yudas samba'a nggari sampulu romba'a anaguruna etu nituki ntau dea to nanggeni guma bo pato. Ira nipakau balengga-balengga topanggeni agama, guru-guru agama bo totu'a-totu'a nto Yahudi. 44 Da'apa ira nomai Yudas nompakatantu ka ira tandaina ala ranjani ira ri umbana Yesus. Niulina, "Isema ngina kueki, etumo I'a. Soko komimo I'a pade keni I'a nggari setu ante rajagai mpakabelo-belo." 45 Sangga naratapa Yudas ri setu i'a kaliu-liu nompakamosu Yesus pade nanguli, "Tabe, Guru!" Pade niekina Yesus. 46 Naopu etu ira to nikeni Yudas nompakamosu Yesus pade nanjoko I'a. 47 Nanggita etu samba'a nggari anaguru Yesus to nenggore ri setu nangosu gumana nantimbe batua nu Balengga Topanggeni Agama sampe napudu talingana. 48 Nangulimo Yesus ka tau dea etu, "Iwenumo? Niuli komi Aku e'i samba'a parampo sampe komi kana marata ante guma bo pato manjoko Aku? 49 Kakonona eo-eo Aku naria ri tatongo komi nopaguru ri Sapo Mpepue. Nokuya komi da'a nanjoko Aku ri setu? Tapi etu kana majadi ala madupa tesa to nitulisi riara Buku Nagasa." 50 Naopu etu pura-pura anaguruna nangowa nompalasi Yesus. 51 Naria samba'a kabilasa aga sabala lau buya ri korona nantuki puri Yesus. I'a nisoko ntau ri setu, 52 tapi i'a nombawonju buyana pade nalai ante nelaya. 53 Pade Yesus nikeni ira mpaka ri ngayo Balengga Topanggeni Agama. Ri setu pura-pura balengga topanggeni agama, totu'a-totu'a nto Yahudi bo guru-guru agama nasiromu nolibu. 54 Petrus nantuki Yesus nggawao sampe narata ri lalowo sapo nu Balengga Topanggeni Agama. Narata ri setu nekatokomo i'a noneru mpasanggani-nggani ante topojaga-topojaga. 55 Tempo etu balengga-balengga topanggeni agama ante pura-pura Topolibu Bete Agama nto Yahudi etu nompasimbuku mangelo tau mompakanoto kasala Yesus ala I'a mamala rasuku mamate. Tapi da'a ntoto nirata ira kasalana. 56 Nadea tau nodawa ala mombanawusaka I'a, tapi tesa ira da'a nosirata samba'a bo samba'a. 57 Pade nekanggoremo bara sakuya mba'a tau ntanina nombabata I'a ante tesa-tesa dawa iwe'i: 58 "Niepe kami tau e'i nanguli, 'Aku mombagero Sapo Mpepue e'i to nipowia pale manusia, pade riara tempo tolumbengi kubangu sapo ntanina anu da'a nikawia pale manusia.' " 59 Tapi tesa-tesa tau etu wo'u da'a nosirata samba'a bo samba'a. 60 Pade nekanggoremo Balengga Topanggeni Agama ri ngayo ira pura-pura nompekutana Yesus iwe'i: "Iwenumo? Naria pesonomu ewa tesa-tesa nu sabi e'i to nanguli Iko atau da'a?" 61 Tapi naupa da'a ria salana, Yesus aga nekalino. Da'a ria nuapa-nuapa nisonona. Jadi sangganipa Balengga Topanggeni Agama nompekutana I'a, "Ulimo ka kami, Ikomo Magau to Mompakasalama, Ana nu Alatala to Nibila?" 62 Nesonomo Yesus, "Akumo I'a. Pade komi pura-pura kana manggita Aku, Ana nu Manusia mekatoko ri sabingga nggana nu Alatala to Nakuasana. Pade komi kana manggita Aku mana'u riara kulimu nggari langi." 63 Nangepe etu Balengga Topanggeni Agama nombaseri pakeana tandaina narau mpu'u rarana, pade niulina ka Topolibu Bete, "Rapokuya kita mangelo sabi-sabi ntanina? 64 Niepe komi mbotomo tesana nompakakedi Alatala! Iwenu pombarata komi?" Nesonomo ira pura-pura, "I'a kana rasuku mamate!" 65 Pade nompamulamo bara sakuya mba'a tau nantailu I'a. Pade ira nombatondo lenje Yesus pade nombajaguru I'a ante nanguli, "E, Nabi, ulimo sema nombajaguru Iko!" Pade topojaga-topojaga wo'u nombaboba I'a. 66 Tempona etu Petrus danaria ri lalowo sapo etu. Naratamo samba'a besi batua Balengga Topanggeni Agama. 67 Tempo i'a nanggita Petrus nekatoko noneru ri setu i'a nombalele mata lenje i Petrus pade niulina ka i'a, "Komi wo'u samba'a tau nosanggani-nggani ante Yesus to Nazaret etu!" 68 Tapi Petrus nesapu. Niulina, "Da'a! Da'a ninjaniku patuju tesamu!" Pade nesuwumo i'a mpaka ri tambale ri ngayo nu sapo etu. [Pade nora'omo manu.] 69 Tempo Petrus ri setu i'a nikita besi batua etu wo'umo. Pade niuli besi etu ka tau-tau ntanina ri setu, "Tau e'i wo'u samba'a roana." 70 Tapi sangganipa i Petrus nesapu. Da'a nasae nggari setu nanguli wo'umo tau-tau to nenggore ri setu ka Petrus, "Natantumo komi e'i samba'a roana, sabana komi wo'u samba'a to Galilea!" 71 Tapi nompamulamo Petrus netunda bo nojanji. Niulina, "Mpu'u-mpu'u da'a ntoto ninjaniku tau to niuli komi etu!" 72 Iwetu Petrus notesa nora'omo manu karongganina. Pade natetoramo rara i Petrus tesa Yesus ka i'a pangane to nanguli, "Da'apa magana ronggani manu mora'o, tolungganimo iko mombasapu Aku." Pade nageomo i'a nakanjodu-njodu.
1 Dakampadondo njiina balengga-balengga topanggeni agama, totu'a-totu'a nto Yahudi bo guru-guru agama nosanggani-nggani ante pura-pura Topolibu Bete Agama ntanina nosaongu patujumo. Ira nombaso'o Yesus pade nanggeni I'a mpaka ri ngayo Gubernur Pilatus. Ri setu Yesus niwai ira ka Pilatus. 2 Pade nekutanamo Pilatus ka Yesus, "Komimo Magau nto Yahudi?" Nesonomo Yesus, "Ewa to niuli komi etu, Uma, nakono." 3 Naopu etu nadea mpu'u tesa-tesa pebata to nitesa balengga-balengga topanggeni agama ka Yesus. 4 Nangepe etu nekutana wo'umo Pilatus ka Yesus, "Iwenumo? Naria pesonomu ewa tesa-tesa pebata e'i? Epemo, nadea mpu'u tesa pebata ira ri ja'imu." 5 Tapi Yesus da'a ntoto nesono nau aga sambela sampe nasumara mpu'u Pilatus. 6 Najadi kabiasanamo butu-butu mpae tempo Eo Bete Paska Gubernur nombakabasaka samba'a tau to nitarunggu nantuki pomperapi ntau dea. 7 Tempona etu naria samba'a tau to nitarunggu nosanga ka i Barabas. I'a nitarunggu mpasanggani-nggani ante bara sakuya mba'a tau to nepatesi tempo nangewa pomarenta. 8 Jadi naratamo tau dea ri ja'i Pilatus nerapi ala i'a manggabasaka ka ira samba'a tau nitarunggu ewa to nipowiana butu-butu mpae. 9 Nangepe pomperapi ira nekutanamo Pilatus ka ira, "Rapokono komi ane aku manggabasaka ka komi Magau nto Yahudi?" 10 Niulina iwetu sabana ninjaninamo balengga-balengga topanggeni agama nanggeni Yesus ri ja'ina sabana naju'a rara ira. 11 Tapi balengga-balengga topanggeni agama nompakapane rara ntau dea ala merapi i Barabasmo to rakabasaka ka ira. 12 Pade nekutana wo'umo Pilatus ka ira, "Ane iwetu, nuapa to masipato kupowia ri ja'i ntau to niuli komi Magau nto Yahudi e'i?" 13 Nongare wo'umo ira, "Pakumo I'a ri kayu parika!" 14 Pade nekutana wo'umo Pilatus ka ira, "Nokuya? Kaja'ana nuapa ntoto to nipowiana?" Tapi ira aga nantambai nongare ante suara to neliu nggamangga, "Pakumo I'a ri kayu parika!" 15 Dota Pilatus mompakadamba rara ntau dea. Sabana etu i'a nanggabasaka i Barabas ka ira. Pade nipakauna tantarana nombaporo Yesus pade mombapaku I'a ri kayu parika. 16 Pade Yesus nikeni tantara-tantara mpaka riara sapo Gubernur, etumo ri tombi mpotangara. Pade nipokio ira pura-pura roa ira nasiromu. 17 Ri setu ira nompopasua ka Yesus baju nakamumu ewa to nipake magau, pade nipowia ira wo'u songgo nggari karui nipoposonggo ka Yesus. 18 Pade nompamulamo ira nompongei-ngei I'a ante nanguli, "Ratoiyata Magau nto Yahudi!" 19 Naopu etu ira tunggai nombaboba balenggana ante sampeka wolo pade ira tunggai nantailu I'a. Naopu etu nekadedemo ira ri ngayona ante nongei-ngei mombasomba I'a. 20 Naopupa ira nompongei-ngei I'a iwetu, niwonju iramo baju nakamumu etu pade nipopasua bali ka I'a pakeana mboto. Pade I'a nikeni ira mpaka ri sawaliku ngata ala rapaku ri kayu parika. 21 Tempona etu noliumo samba'a tau nosanga ka i Simon tau nggari ngata Kirene, uma Aleksander bo i Rufus, to dako narata nggari sawaliku ngata. I'a etu nipasu'u tantara-tantara manjumbuaka kayu pomparika Yesus. 22 Pade napolamo ira sampe narata ri peto'o to nosanga ka Golgota, batuana "Peto'o Wuku Balengga." 23 Pade ira nombawai ka Yesus ue anggur nigalo ante pakuli to niuli mur, tapi ue anggur etu nipoarana. 24 Pade ri setumo ira nombapaku I'a ri kayu parika. Naopu etu nibagi-bagi iramo pakeana ante nompenoa nowia nomoro ala mompakatantu bagia ira samba'a bo samba'a. 25 Tempo Yesus nipaku ira ri kayu parika, kira-kira tinti sasio mpadondona. 26 Ri kayu parikana naria nitulisi tesa pombabata I'a iwe'i: |scE'IMO MAGAU NTO YAHUDI.|r 27 Naria wo'u romba'a parampo nipaku ri kayu parika ntanina mpasanggani-nggani ante Yesus, samba'a ri pangganana pade samba'a ri panggeina. [ 28 Ante iwetu nadupamo tesa to nitulisi riara Buku Nagasa to nanguli, "I'a nireke samba'a nggari tatongo tau-tau naja'a."] 29 Tau-tau to noliu ri setu nanguli sinja'i I'a pade nombawiri mata ka I'a. Niuli ira, "E, niulimu Iko mamala mombagero Sapo Mpepue pade mombabanguna mpanjili riara tolu eo. 30 Ane iwetu, pakasalama koromu mboto! Pana'umo nggari kayu parika etu!" 31 Iwetu wo'u balengga-balengga topanggeni agama bo guru-guru agama nompongei-ngei I'a. Nangulimo ira samba'a ka roana, "Tau ntanina nipakasalamana. Tapi kita we'i! Korona mboto da'a namala nipakasalamana! 32 Ane I'a mpu'u-mpu'u Magau nto Israel, etumo Magau to Mompakasalama, agina I'a mana'u nggari kayu parika ala kita manggita pade momparasaya I'a!" Pade tau to romba'ana to nipaku ri kayu parika ri sinjori Yesus etu wo'u nanguli sinja'i I'a. 33 Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana. 34 Pade ri tinti toluongu ngguwiana etu, nongaremo Yesus ante suara namangga, "|iEloi, Eloi, lama sabakhtani?|r" Batuana, "Alatalaku, Alatalaku, nokuya Komi nompalasi Aku?" 35 Sangga nangepe etu nangulimo bara sakuya mba'a tau ri setu, "Epemo! I'a nompokio nabi Elia!" 36 Pade nangowamo samba'a nggari tatongo ira nanggeni sangele wunga to nasimbayu ewa lumu, pade nibanggana riara anggur to napoina. Naopu etu niumpuna ante wolo pade nipopoinuna ka Yesus. Niulina, "Rapopeata sampalai ala manggita ane nabi Elia marata mombata'uraka I'a nggari kayu parika!" 37 Naopu etu nongare wo'umo Yesus ante suara namangga, pade nalaimo nosana. 38 Tempona etu wo'u naseri ntongomo kae powombo ri Sapo Mpepue nggari ba'ana narata ri wayona. 39 Tempo balengga tantara to nenggore nosintingayo ka I'a nanggita kamate Yesus iwetu, nangulimo i'a, "Mpu'u-mpu'u tau e'i Ana nu Alatala!" 40 Ri setu naria wo'u bara sakuya mba'a besi nenggore neantoaka nggawao. Ri tatongo ira naria i Maria Magdalena, i Salome, pade i Maria indo Yakobus muda bo Yoses. 41 Iramo besi-besi to nantuki pade nantulungi Yesus tempo I'a ri Bagia Galilea. Pade naria wo'u ri setu nadea besi ntanina to narata ri ngata Yerusalem nosanggani-nggani ante I'a. 42 Eo etu eo mpompakasadia ka Eo Mpenonto, damo sambengipa mawela Eo Mpenonto. Tempo ntora nasolomo eo 43 naratamo samba'a tau nosanga ka Yusuf, tau nggari ngata Arimatea. I'a samba'a nggari Polibu Bete Agama nto Yahudi to nibila ntau dea, pade i'a wo'u nompopea tempo Alatala mompamula moparenta ri dunia. I'a netibia nalau nantingayo Pilatus nerapi watabaku Yesus. 44 Pilatus nakandodo nangepe Yesus namatemo. Jadi nipokiona balengga tantara pade nipekutanana, "Iwenumo? Nakono mpu'u Yesus namatemo?" 45 Sangga niepenapa pantesa nggari ja'i balengga tantara to nanguli Yesus namatemo, nipaloganamo Yusuf lau mangala watabaku Yesus. 46 Jadi Yusuf nangoli kae gandisi nalusu raposompu, pade nita'urakana watabaku Yesus nggari kayu parika pade nisompuna ante kae to niolina etu. Pade nibolina watabaku Yesus etu riara dayo to nipa'a ri saongu bulu watu. Naopu etu niluliakana wo'u saongu watu bete nipombapiku pewobo dayo etu. 47 Tempo etu i Maria Magdalena bo i Maria indo Yoses nanggita peto'o nipombaboli watabaku Yesus etu.
1 Sangga naliupa Eo Mpenonto nalaumo Maria Magdalena, i Maria indo Yakobus, ante i Salome nangoli rampa-rampa to nawongina rakeni raboli ri watabaku Yesus. 2 Pade dakampadondo njiina ri eo pamulana minggu etu tempo eo dako neonga, nalaumo besi-besi etu mpaka ri dayo Yesus. 3 Ri tatongo jala nosimpekutana ira samba'a bo samba'a, "Isema mamala mombaluliaka watu to nipompiku dayo etu ka kita?" 4 Tapi sangga namosupa ira ri dayo etu nikita ira nakalulimo watu to nabetena mpu'u etu. 5 Pade nesuamo ira riara dayo. Ri setu nikita ira samba'a kabilasa nobaju bula nekatoko ri sabingga nggana dayo etu. Nanggita etu naeka mpu'umo rara ira. 6 Tapi nangulimo kabilasa etu ka ira, "Ne'e maeka! Ninjaniku komi mangelo Yesus to Nazaret to namate nipaku ri kayu parika. Natuwu balimo I'a, mana ria ri se'i. Kitamo! E'imo peto'o pombaboli watabakuna. 7 Tapi kalaumo komi uli ka anaguruna pade ka i Petrus, 'I'a mokolu ka komi mpaka ri Bagia Galilea. Ri setumo komi kana manggita I'a ewa to niulina ka komi bopia.' " 8 Jadi nesuwumo ira nggari dayo pade nangowa nalai nggari setu sabana natekaja bo naeka mpu'umo rara ira. Da'a ria ira notesa nuapa-nuapa ka isema-sema sabana naeka rara ira. [ 9 Sangga Yesus natuwu bali nggari kamatena ri mpadondo eo Aka, pamula-mulana I'a nompopokita korona ka i Maria Magdalena, etumo besi to nikabasaka Yesus nggari kuasa pitumba'a seta bopia. 9 Nalaumo besi-besi etu mpaka ri ja'i Petrus ante roana, pade nitesa ira pura-pura to niuli kabilasa etu ka ira. 10 Naopu etu nalaumo Maria nombatesa kajadia etu ka roa-roa Yesus to danasusa-susa rara bo nageo-geo. 10 Naopu etu Yesus nompakau anaguru-anaguruna mompatolele ka tau nggari kamataeona sampe ri kasolona Kareba to nagasana to da'a ri kabalina to nantesa katuwua mabelo sampe ri kasae-saena.] 11 Tapi tempo ira nangepe tesa to nanguli Yesus natuwu bali pade I'a nikita Maria, da'a ntoto niparasaya ira tesa etu. 12 Naopu etu Yesus nompopokita korona wo'umo ka romba'a topantuki I'a ante lenjena ntanina tempo ira nolumako ri sawaliku ngata. 13 Nanggita etu nanjilimo ira romba'a nantesa kajadia etu ka anaguru-anaguruna ntanina. Tapi roa-roa ira etu da'a wo'u nomparasaya tesa etu. 14 Kaopuna Yesus nompopokita korona ka sampulu samba'a anaguruna tempo ira nekatoko nanggoni mpasanggani. I'a nangontiaka ira sabana ira nako'o rara nomparasaya roa ira to nanggita I'a tempo natuwu bali nggari kamatena. 15 Pade niulina ka ira, "Kalaumo komi mpaka ri njumaongu dunia pade patolelemo Kareba Belo ka pura-pura manusia. 16 Isema-sema to momparasaya pade radiu ewa tandaina ira topomparasaya Aku ira kana rapakasalama. Tapi isema-sema da'a momparasaya kana rasuku. 17 Tau-tau to momparasaya kana rawai ka kuasa mompowia tandai-tandai to nipogumaa iwe'i: ira kana mompopalai seta-seta ante kuasa nggari sangaku. Ira kana motesa ante basa-basa to nopu'u nggari ja'i Nosa Nagasa nu Alatala. 18 Ane ira manjoko ule bara manginu panginu to mepakamate, ira da'a mokuya-kuya. Pade ira kana mombadika pale ira ri koro tau-tau naju'a pade tau etu kana mabelo bali." 19 Sangga naopupa Yesus notesa iwetu ka ira, neoremo I'a mpaka ri suruga pade nekatoko ri peto'o to nibila ri panggana nu Alatala. 20 Naopu etu nalaumo anaguru-anaguruna nompatolele Kareba Belo ka tau-tau ri umba-umba, pade Pue mboto nokarajaa mpasanggani ante ira. I'a nombawai ka ira kuasa mowia tandai-tandai to nipogumaa ala mompakaroso tesa to nipatolele ira etu.] [
1 Teofilus to nibilaku. Nadeamo tau nompasimbuku nantulisi saongu kareba ewa nuapa to najadi ante Yesus ri tatongota. 2 Isi kareba etu nantuki tesa to nipatolele ka kita nggari tau-tau to nanggita kajadia-kajadia etu ante matana mboto nggari pamulana. 3 Jadi naopu aku nomparesa pura-pura kajadia etu mpakabelo-belo nompamula nggari pamula-mulana, nipekiriku nabelopa ane aku wo'u mantulisi saongu kareba to nosisunju-sunju etu ka komi. 4 Nitulisiku kareba e'i ala komi mamala mangginjani bo momparasaya pura-pura nuapa to nipatuduki ka komi mpu'u-mpu'u nakono. 5 Tempo Magau Herodes noparenta ri Bagia Yudea, naria samba'a topanggeni agama Yahudi to nosanga ka i Zakharia. I'a samba'a tau nggari lunu topanggeni agama to nosanga ka lunu muli Abia. Rongona nosanga ka Elisabet. I'a wo'u muli nu topanggeni agama. 6 Katuwu ira njamboko etu nompakadamba rara nu Alatala, sabana ira natundu riara pura-pura parenta bo atura i Pue. 7 Ira da'a noana sabana Elisabet nagampa, bo ira njamboko wo'u natu'amo. 8 Naria sanggani, tempo lunu Abia nombarata lelena, i Zakharia nobago ewa topanggeni agama ri ngayo Alatala ri Sapo Mpepue. 9 Pade ira nowia nomoro nantuki kabiasa ira mompakatantu isema motunju wongi ri ngayo Alatala. Nomoro etu nawela i Zakharia, jadi i'amo to nesua riara Sapo Mpepue motunju wongi. 10 Tempo i'a notunju wongi riara Sapo Mpepue todea nosambaya ri sawalikuna. 11 Tempo etu naratamo samba'a malaeka i Pue nompopokita korona ka i Zakharia. Malaeka etu nekanggore ri sabingga nggana nu meja mpotunju wongi etu. 12 Sangga nanggita malaeka etu natikajamo i Zakharia pade naeka mpu'u rarana. 13 Tapi nangulimo malaeka etu ka i'a, "Ne'e maeka, Zakharia. Nitarima Alatalamo posambayamu. Rongomu Elisabet kana moana samba'a ngana langgai pade i'a kana mupoposanga Yohanes. 14 Iko kana madamba mpu'u raramu pade madea tau madamba rarana tempo ngana etu mesuwu. 15 I'a majadi samba'a tau to moangga riara mpanggita i Pue. I'a da'a manginu pura-pura panginu to nepakalangu. I'a kana maponu ante Nosa Nagasa nu Alatala nompamula nggariara nu indona. 16 Pade ante pepatudukina nadea to Israel kana rakenina bali momparasaya Pue Alatala. 17 I'a kana majadi suro i Pue Alatala to nakuasa ewa Nabi Elia nggaolu. I'a mompoposinggabelo uma ante anana, pade tau da'a natundu ri ja'i Alatala rakenina mpanjili ri jala to nakonona. Pura-pura etu rakawiana ala mompakasadia todea to madota mantarima i Pue." 18 Nangepe tesa malaeka etu nekutanamo i Zakharia, "Nuapa tandaina mompakatantu etu majadi? Aku natu'amo, bo rongoku wo'u natu'amo." 19 Nesonomo malaeka etu, "Aku e'i Gabriel to nekanggore ri ngayo Alatala! Akumo to nipakauna mompasimbayu kareba belo e'i ka komi. 20 Nuapa to niuliku kana majadi ri tempo to nipakatantu Alatala! Tapi sabana da'a niparasayamu tesaku, iko mana masowa mojarita. Iko kana mabobo sampe madupa nuapa to nitesaku etu!" 21 Tempo etu tau dea nompopea i Zakharia ri sawalikuna. Naingumo ira sabana nasae gaga i'a da'a nesuwu nggariara Sapo Mpepue. 22 Tempo i'a nesuwu i'a mana nasowa nojarita ka ira. Niwiatakana palena notesa ka ira pura-pura sabana i'a nabobomo. Nanggita etu ninjani ntaumo naria panggita to nikitana riara Sapo Mpepue etu. 23 Sangga naopupa bagona ri Sapo Mpepue etu, natinggulimo i Zakharia nggari Yerusalem mpaka ri sapona. 24 Da'a sakuya kasaena nggari setu natianamo rongona Elisabet, pade limambula kasaena i'a netabuni da'a nesuwu-suwu nggariara njapona. 25 Nangulimo Elisabet, "Iwe'imo tanu powia i Pue ri ja'iku. I'a nantulungi aku nompakalipo eya nu mataku nggari kagampaku." 26 Tempona onombulamo ta'i Elisabet, Alatala nompakau malaekana i Gabriel malau mpaka ri saongu ngata ri Bagia Galilea to nosanga ka Nazaret. 27 Malaeka etu nipakau mpaka ri ja'i samba'a randoo, sangana i Maria. Randoo etu notingea ante samba'a langgai to nosanga ka Yusuf, samba'a muli Magau Daud. 28 Malaeka etu narata ri ja'i Maria pade nanguli, "Umba, iko Maria. Ikomo tau to nigane i Pue. Pue nosanggani ante iko." 29 Natikaja Maria nangepe tesa malaeka etu, pade nipekirina riara nta'ina, "Nuapa patujuna tesa ewa etu?" 30 Pade nangulimo malaeka etu ka i Maria, "Ne'e maeka, Maria, sabana iko nikonoa rara nu Alatala. 31 Iko kana matiana pade mangote samba'a ngana langgai pade I'a kana mupoposanga Yesus. 32 I'a kana majadi samba'a tau to nalanga katuwuna pade I'a kana rauli Ana nu Alatala. Pue Alatala kana mompajadi I'a Magau ewa totu'ana nggaolu Magau Daud. 33 Pade I'a kana moparenta to Yahudi ewa samba'a magau sampe ri kasae-saena. Poparentana etu da'a ria kaopu-opuna." 34 Nangulimo Maria ka malaeka etu, "Iwenu etu majadi ri koroku? Aku e'i danarandoo." 35 Nesono malaeka etu ka i Maria, "Nosa Nagasa nu Alatala kana marata ri ja'imu pade kuasa nu Alatala etu kana maria ri ja'imu. Etumo sabana ngana to mesuwu nggari ja'imu etu kana rauli Nagasa, Ana nu Alatala. 36 Pade kana mutora Elisabet sampesuwumu etu natianamo, e'imo kaonombulana naupa i'a etu natu'amo pade to niuli ntau i'a nagampa. 37 Pura-pura to niuliku ka iko kana majadi sabana pura-pura to nipodota nu Alatala kana majadi. Da'a ria anu da'a majadi ane I'a madota." 38 Pade nangulimo i Maria, "Aku e'imo batua i Pue. Majadimo ri ja'iku ewa nuapa to niulimu etu." Naopu etu nalaimo malaeka etu nompalasi i Maria. 39 Naopu etu nalaumo i Maria nasalisa mpaka ri saongu ngata ri buluna ri Bagia Yudea. 40 Narata ri setu i'a nalau mpaka ri sapo i Zakharia. Tempona i'a nesua i'a nombatabe Elisabet. 41 Iwetu Elisabet nangepe petabe i Maria, nonggayamo ngana riara nta'ina. Pade Elisabet nipesua Nosa Nagasa nu Alatala, 42 pade notesa ante suara naro'o, "Ikomo to nigane Pue Alatala neliu nggari pura-pura besi ntanina, pade rasi Alatala naria ri ja'i anamu. 43 Mpu'u-mpu'u aku nibila Alatala ante nikarata indo nu Pueku ri ja'iku mboto. 44 Iwetu aku nangepe petabemu, nonggayamo ngana riaraku ante kadambana. 45 Iko mpu'u-mpu'u rawai ka rasi bo belo sabana niparasayamu nuapa to niuli i Pue ka iko, etu kana majadi." 46 Naopu etu nangulimo i Maria, "Ante raraku mpu'u aku mantoiya mompakabete i Pue, 47 pade nadamba mpu'u raraku, sabana Alatala Magau to nompakasalama aku. 48 I'a nantora aku, batuana to napakasi. Mompamula nggari eo e'i pura-pura manusia kana manguli akumo to niwai Alatala ka rasi. 49 Sabana Alatala to Neliu Nggakuasa nompowia kabaraka ka aku. Nagasa mpu'u sangana. 50 Towe Alatala kana mana'u ri ja'i ntau to naeka ri ja'ina sampe muli nu mulina. 51 Ante palena to nakuasa etu I'a nompoposimpotare tau-tau nasombo pade nombagado nia pekiri ira. 52 Magau-magau to nalangana nita'urakana ri kaedena, pade tau-tau to naedena nipakalangana. 53 Tau-tau naoro nipakabosuna sampe nabasa ante mpengaya anu to nabelona. Pade to nasugi nipopalaina ante pale ntoya. 54 Kita to Israel todeana nitulungina sabana nitorana pojanjina to niulina ka totu'ata. 55 Etumo, pojanji mompotowe Abraham ante pura-pura mulina sampe ri kasae-saena." 56 Naopu etu kira-kira tolumbula kasaena i Maria neto'o mpasanggani ante Elisabet, pade naopu etu nanjilimo i'a mpaka ri ngatana mboto. 57 Naratamo ntoana Elisabet moana pade i'a nangote samba'a ngana langgai. 58 Tempo roa-roana to nosinggamosu ante i'a pade sampesuwu-sampesuwuna nangepe iwenu i Pue naasi matana nanggita Elisabet, nadamba sangganimo ira ante i'a. 59 Pade tempo nagana walumbengi umuru nu ngana nggedi etu naratamo ira mombasuna bo mompoposanga ngana etu. Ira nadota mompoposanga i'a Zakharia nantuki sanga nu umana. 60 Tapi nanguli indona, "Ne'e! I'a kana rapoposanga Yohanes." 61 Nangulimo ira, "Da'a ria sampesuwumu nosanga ewa etu!" 62 Jadi nekutanamo ira ka i Zakharia ante nombawiataka pale, "Isema kakono-konona rapoposanga ka ngana e'i?" 63 Zakharia nerapi saongu watu rapotulisina pade nitulisina, "Sangana Yohanes." Nanggita etu natekajamo ira pura-pura. 64 Naopu i Zakharia nantulisi etu kaliu-liu namalamo i'a notesa, pade nompamulamo i'a mombabila bo mantoiya Alatala. 65 Nanggita etu naeka puramo ira to nosinggamosu ri setu. Pade natolelemo kareba etu ntiku-ntiku ngata ri Bagia buluna Yudea etu. 66 Pura-pura tau to nangepe nuapa to najadina etu nompekiri riara nta'i ira, "Majadi nuapa ngana e'i banepia?" Niuli ira iwetu sabana nikita ira naria kuasa i Pue ri ja'i ngana etu. 67 Ri tempo etu i Zakharia, uma nu ngana etu, nipesua Nosa Nagasa nu Alatala sampe i'a namala nompasimbayu tesa i Pue ka ira. 68 Niulina, "Kamaimo kita to Israel mantoiya i Pueta Alatala. Sabana naratamo I'a mantulungi todeana, pade mombakabasaka kita nggari balita. 69 I'a nombawai ka kita samba'a Magau to Mompakasalama to neliu kakuasana, etumo Muli Magau Daud, batua nu Alatala. 70 Nggari nabi-nabi to nipelisina nggaolu I'a nojanji 71 mompakasalama kita nggari balita pade nggari kuasa tau-tau to nanggarau kita. 72 I'a wo'u nojanji mompotowe totu'ata nggaolu pade mompakadupa pojanjina to nabelona ka ira, 73 - 74 etumo pojanjina to niulina ka totu'a Abraham. I'a nojanji mombakabasaka kita nggari balita ala kita mamala mepue ri ja'ina ante da'a ria ekata. 75 Nijanjina etu ala kita mamala mepue ri ja'ina ante rara to magasa bo manoa tempo kita danatuwu ri dunia." 76 Pade niuli Zakharia ka anana, "Iko, anaku, kana rauli nabi nu Alatala to Neliu Nggalanga, sabana iko mokolu ka i Pue ala mompakasadia todea nu Alatala ala ira masadia mantarima i Pue. 77 Iko kana motesa ka ira iwenu ira mamala rapakasalama, etumo silaka-silaka ira mamala raampungi Alatala. 78 Alatala mpu'u-mpu'u nompotowe kita. Karatana nggari suruga mompakasalama kita etu nasimbayu ewa eo neonga mpadondona. 79 Nasimbayu ewa eo neonga nombawanta karumauna, iwetu wo'u karatana. I'a marata mompakabelo tau-tau to nasilaka to natuwu nompopea jala nggamate ira. I'a marata mompakasalama kita pade mombanini kita mpaka ri jala kabelona." 80 Ana i Zakharia etu nantambai eona nantambai kabete korona pade nantambai i'a nompotowe Alatala. Sangga nabete nalaumo i'a neto'o ri karawa baina nantongoraka tempona i'a mompamula mompatolele tesa Alatala ka tau-tau to Israel.
1 Tempona etu Kaisar Agustus noparenta ala sanga pura-pura tau riara Poparenta nto Roma ratulisi riara buku senju ri ngata totu'a ira mboto. 2 Popabila pamula-mulana e'i nikawia tempona i Kirenius najadi Gubernur ri Bagia Siria. 3 Pura-pura tau nalau mpaka ri ngata totu'a ira mboto ala sanga ira ratulisi riara buku senju. 4 Iwetu wo'u Yusuf. I'a nanggaliwo nggari ngata Nazaret ri Bagia Galilea mpaka ri ngata Betlehem ri Bagia Yudea, ngata pesuwu Magau Daud, sabana Yusuf muli i Daud. 5 Yusuf nalau mpasanggani-nggani ante tingeana Maria to natiana etu ala sanga ira ratulisi ri setu. 6 Tempo ira ri ngata Betlehem naratamo ntoana i Maria moana. 7 I'a nangote samba'a ngana langgai, anana ulumbua. Ngana etu nibunguna ante buya, pade nipopaturuna riara peto'o panggoni binata ri gimpu binata, sabana ira da'a nombarata peto'o riara njapo ntau. 8 Wengi pesuwu Yesus etu naria topoewu-topoewu nombajagai bimba-bimba ira ranggarawana namosu ngata etu. 9 Sampegoli naratamo samba'a malaeka i Pue ri ja'i ira pade reme i Pue nombawanta ira. Nanggita etu naeka mpu'umo ira. 10 Tapi nangulimo malaeka ka ira, "Ne'e komi maeka sabana karataku e'i nanggeni kareba to nabelo ka komi pura-pura, pade to mompakadamba pura-pura tau. 11 Wengina e'i ri ngata pesuwu Magau Daud niotemo samba'a Magau to Mompakasalama komi, etumo i Pue Yesus Kristus. 12 Iwe'imo tandaina to mompakatantu ka komi nakono tesaku: ngana etu nibungu ante buya pade nipopaturu ri peto'o panggoni binata." 13 Sampegoli nadeamo roa malaeka etu pade ira nombatoiya Alatala iwe'i: 14 "Ratoiyata Alatala to naria ri suruga! Pade ri dunia mosinggabelo pura-pura tau to nikonoa Alatala." 15 Sangga malaeka-malaeka etu nompalasi ira nanjili mpaka ri suruga, nosimpakenimo topoewu etu samba'a bo samba'a, "Kamaimo kita mpaka ri ngata Betlehem manggita nuapa to najadina etu to nitesa i Pue ka kita." 16 Ira nompari-mpari nalau, pade nirata ira Maria ante Yusuf pade ngana etu danaturu riara peto'o panggoni binata. 17 Sangga nikita ntopoewupa ngana etu, nitesa ira puramo nuapa to nitesa malaeka ka ira ewa ngana etu. 18 Pura-pura tau to nangepe tesa topoewu etu nasumara mpu'u. 19 Tapi i Maria nomboli pura riara nta'ina nuapa to niepena ewa anana etu pade tunggai nitondoakana. 20 Naopu etu nanjilimo topoewu-topoewu etu mpaka ri bimba ira ante nombatoiya pade nombabila Alatala, sabana pura-pura to niepe ira pade to nikita ira etu nakono mpu'u nantuki nuapa to niuli malaeka ka ira. 21 Sangga naganapa umuru ngana etu walumbengi, nikawiamo ada mposuna, pade I'a nipoposanga Yesus nantuki tesa malaeka ka i Maria tempona I'a da'apa nikatiana nu indona. 22 Naratamo ntoana Yusuf pade Maria malau mpaka ri Sapo Mpepue ri ngata Yerusalem manggawia ada mompegasa koro to niwai Musa ka to Yahudi. Ngana etu nikeni wo'u mpaka ri ngata Yerusalem ala rakeni raposambaya ri ngayo Pue Alatala. 23 Etu nantuki atura to naria riara Atura i Pue to nipapola i Musa iwe'i: "Pura-pura ngana langgai ulumbuana kana rakeni raposambaya ri ngayo i Pue." 24 Yusuf ante Maria wo'u nopatuju manggeni pesomba ira, etumo romba'a tonji banggebodo, ane da'a romba'a ana ntonji banggebodo, ewa to nipakatantu riara Atura-atura i Pue. 25 Tempona etu ri ngata Yerusalem naria samba'a tau nosanga ka i Simeon. I'a samba'a tau nanoa rara to naeka ri ja'i Alatala bo nompopea karata Magau to Mompakasalama to nijanji Alatala. Nosa Nagasa nu Alatala naria ri ja'ina, 26 pade Nosa Nagasa etu naopumo nanguli ka i'a, "Da'apa iko mamate ane da'apa mukita Magau to Mompakasalama to nijanji Alatala etu." 27 Simeon nikeni Nosa Nagasa nu Alatala nesua riara Sapo Mpepue. Tempona etu Yusuf ante i Maria nanggeni mpesua ana ira Yesus ala manggawia ada to nipakatantu riara Atura-atura agama. 28 Sangga nanggita ngana etu nalaumo Simeon nanjalunggu I'a pade nombatoiya Alatala iwe'i: 29 "Iwe'ipa, Pue, nadupamo pojanjimu. Pakambamo batuamu e'i mamate ante mabelo, 30 sabana mataku mbotomo nanggita Magau to Mompakasalama to nijanjimu 31 to niwaimu ka pura-pura manusia ri dunia. 32 I'a ewa reme to nombawanta jala ka pura-pura tau da'a to Yahudi ala ira marata ri ja'imu. Pade I'amo reme to nompakaria pebila ka todeamu to Israel." 33 Nangepe tesa i Simeon ewa ana ira etu, nogumaamo indo uma nu ngana etu. 34 Pade Simeon nombagane ira bo nanguli ka i Maria indo ngana etu, "Ngana e'i nipelisi Alatala mombalalamaka nadea to Israel tapi mombasoreaka nadea to Israel ntanina. I'a majadi saongu tandai nggari ja'i Alatala to raewa ntau dea, 35 ala ante iwetu meumba puramo isi rara nta'i ira. Pade kasusa bo kapari ewa guma kana mantosu rara nta'imu." 36 Naria wo'u samba'a nabi nu Alatala, samba'a besi to natu'a mpu'umo. Sangana Hana, ana i Fanuel samba'a tau muli Asyer. Sangga naganapa pitumpae norongo, 37 nabalumo Hana. Naopu i'a nabalu da'a ria sanggani i'a nompalasi Sapo Mpepue. Eo wengi i'a ri setu nepue ka Alatala ante nosambaya bo napuasa. Tempona Yesus nikeni ri Sapo Mpepue Hana noumuru walumpulu bo patampae. 38 Ewa nisuka tempona etu wo'u i'a narata, pade nikitana Yesus etu. Tempona i'a nanggita Yesus i'a nombatoiya Alatala. Pade nitesana ewa ngana etu ka pura-pura tau to nompopea tempona Alatala mombakabasaka to Yahudi nggari bali ira. 39 Sangga naopu pura nuapa to niparenta Alatala riara Aturana nipowia Yusuf ante Maria, nanjilimo ira mpaka ri ngata nipeto'o ira, etumo ngata Nazaret ri Bagia Galilea. 40 Pade Yesus nantambai kasaena nantambai kabete korona pade nantambai karosona. I'a samba'a ngana to nanotona pade I'a nigane Alatala. 41 Mpae-mpae indo uma Yesus nalau mpaka ri ngata Yerusalem nantuki posusa eo bete nto Yahudi to niuli Posusa Paska. 42 Sangga naganapa umuru Yesus sampulu rompae nalaumo ira saongu njapo mpaka ri ngata Yerusalem mantuki eo bete etu ewa kabiasa ira. 43 Sangga naopupa posusa etu, natinggulimo totu'a Yesus. Tapi ante da'a ntoto ninjani indo umana Yesus netiboli ri ngata Yerusalem. 44 Nipekiri indo umana I'a nolumako mpasanggani-nggani ante tau dea. Polumako ira etu saeo ntuamo pade nielo ira Yesus ri tatongo sampesuwu bo wega ira etu. Tapi da'a ria nirata ira Yesus. 45 Sabana etu natingguli bali ira mpaka ri ngata Yerusalem nopaelo I'a. 46 Nagana katolumbengina pade I'a nirata ira riara Sapo Mpepue. I'a nekatoko nangepe tesa guru-guru agama pade I'a wo'u nekutana-tana ri ja'i ira. 47 Nogumaa puramo tau to nangepe I'a sabana nata'u mpu'u I'a nombasono-sono guru-guru agama. 48 Nanggita I'a ri setu nasumara wo'u indo umana. Pade notesamo indona ka I'a, "Yesus, nokuya Iko nompowia kami iwe'i? Nasusa mpu'u aku ante umamu nopaelo Iko!" 49 Nesonomo I'a, "Nokuya komi nangelo Aku? Da'a ninjani komi Aku kana maria ri sapo nu Umaku?" 50 Tapi da'a ninjani indo umana nuapa batuana tesa to niulina ka ira etu. 51 Naopu etu natinggulimo Yesus mpasanggani-nggani ante indo umana mpaka ri ngata Nazaret, pade ri setu I'a natundu ri ja'i ira. Pura-pura nuapa to najadi etu niboli nu indona riara nta'ina pade nitondoakana. 52 Pade Yesus nantambai eona nantambai kabetena bo nantambai kata'una, pade nantambai nipotowe Alatala ante manusia.
1 Riara kasampulu limampaena Kaisar Tiberius noparenta ewa Magau Roma, Pontius Pilatus najadi Gubernur ri Bagia Yudea, pade Herodes Antipas noparenta ri Bagia Galilea. Filipus, totuaka i Herodes noparenta ri Bagia Iturea bo Trakhonitis, pade i Lisanias noparenta ri Bagia Abilene. 2 Tempo etu i Hanas ante i Kayafas najadi Balengga Topanggeni Agama nto Yahudi. Riara mpae etumo naratamo Alatala notesa ka Yohanes, ana i Zakharia etu ri karawa baina. 3 Naopu Alatala notesa ka i'a nalaumo Yohanes ri ngata-ngata ri bagia lemba Yordan nompatolele kareba nggari ja'i Alatala ka pura-pura tau ri setu. Niulina, "Komi pura-pura kana majea nggari silaka-silakamu pade komi kana radiu ala komi raampungi nu Alatala." 4 Pepatuduki Yohanes etu nompakadupa nuapa to nitulisi riara buku nabi Yesaya nggaolu, iwe'i: "Naria samba'a tau nongare-ngare ri karawa baina, 'Pakasadiamo jala ka i Pue. Pakanoamo jala to ratukina. 5 Lobu-lobuna kana raiwu pade to nabuntina kana rapakarano. Jala to noleko-lekona kana rapakanoa bo lowu-lowuna raiwu rapakasirano. 6 Pade pura-pura tau ri dunia kana manggita Alatala marata mompakasalama manusia.' " 7 Nadea tau narata ri ja'i Yohanes ala radiuna. Jadi notesamo i'a ka ira, "Komi topebagiu nasimbayu ante ule! Isema nanguli komi mamala malai ala ne'e mawela pesuku Alatala to marata? Etu da'a nakono! 8 Ane mpu'u-mpu'u komi najea, etu kana rapopokita komi ante pokainggumu to nabelo. Ne'e komi mompekiri, 'Kami e'i muli Abraham. Pesuku Alatala etu da'a rapawela ka kami!' Etu da'a wo'u nakono! Sabana kuuli ka komi, ane Alatala madota watu-watu e'i mamala rapajadina muli Abraham! 9 We'i-we'i nasadiamo baliu rapotowo kayu sampe ri kale-kalena. Ane da'a ntoto ria wuana to nabelo, kayu etu kana ratowo pade ratajiaka riara apu." 10 Pade nekutanamo tau dea ka i'a, "Ane iwetu nuapa to masipato rapowia kami?" 11 Nesonomo Yohanes, "Tau maria morontonga bajuna, kana rawaina santonga ka tau da'a ntoto ria bajuna. Pade tau maria panggonina kana rawaina wo'u ka roana to da'a ria panggonina." 12 Naria wo'u topomperapi balasitee narata ri ja'i Yohanes merapi radiu. Ira nekutana, "Guru, nuapa to masipato rapowia kami?" 13 Nesonomo Yohanes, "Ne'e komi merapi melabi nggari kadea nu balasitee to nipakatantu topoparenta ka komi." 14 Pade naria wo'u tantara-tantara narata nekutana ka Yohanes, "Iwenu ante kami? Nuapa to masipato rapowia kami?" Nesonomo Yohanes ka ira, "Ne'e mana komi momparangga bara mompakaeka tau ala mangala doina. Ne'e komi mangelo neliu nggari gaji komi. Naganamo etu." 15 Tempona etu pura-pura tau nekutana riara nta'i ira, "Bara Yohanes e'imo Magau to Mompakasalama to nijanji Alatala." 16 Ninjani Yohanes pompekiri ira. Jadi nitesana ka ira pura-pura, "Aku mombadiu komi ante ue ewa tandaina najeamo komi nggari silaka komi. Tapi kana marata samba'a tau to neliu nggakuasa nggari aku. Aku neliu nggaede nggari I'a sampe da'a masipato aku mombawole lui sapatuna. I'a kana mombadiu komi ante Nosa Nagasa nu Alatala bo apu. 17 I'a nasimbayu ante tau nombawaro pae. Nariamo tapi ri palena. I'a kana mombawaro pura-pura paena sampe magasa, pade pae to namonona kana rabolina riara logona. Tapi warana kana rapalabuna riara apu to da'a ria kapaya-payana." 18 Iwetumo Yohanes nompatuduki tau-tau ante mpengaya-ngaya akala tempona i'a nompatolele Kareba Belo. 19 Naria sanggani Yohanes nangontiaka Magau Herodes to noparenta ri Bagia Galilea. Niontiakana ewa porongona ante i Herodias, rongo ntuakana mboto bo nengele-ngele anu naja'a ntanina to nikawiana. 20 Tapi Magau Herodes aga nantambai kaja'ana ante nombasuaraka Yohanes riara tarunggu. 21 Da'apa Yohanes nisuaraka riara tarunggu tempo pura-pura tau dea naopumo nidiuna, Yesus wo'u nidiu Yohanes. Tempo Yesus nosambaya natebeamo langi 22 pade Nosa Nagasa nu Alatala nana'u ri ja'ina nolenje mpotonji banggebodo. Pade naria suara nggari suruga nanguli, "Ikomo Anaku to nipotoweku. Ikomo to nikonoa raraku." 23 - 38 Tempo Yesus nompamula panggawiana to niwai Alatala ka I'a, umuruna kira-kira tolumpulu mpaemo. Nantuki pombarata ntau I'a ana Yusuf, Yusuf ana Eli; Eli ana i Matat; Matat ana i Lewi; Lewi ana i Malkhi; Malkhi ana Yanai; Yanai ana Yusuf; Yusuf ana i Matica; Matica ana Amos; Amos ana i Nahum; Nahum ana i Hesli; Hesli ana i Nagai; Nagai ana i Maat; Maat ana i Matica; Matica ana i Simei; Simei ana Yosekh; Yosekh ana Yoda; Yoda ana Yohanan; Yohanan ana i Resa; Resa ana i Zerubabel; Zerubabel ana i Sealtiel; Sealtiel ana i Neri; Neri ana i Malkhi; Malkhi ana Adi; Adi ana i Kosam; Kosam ana Elmadam; Elmadam ana Er; Er ana Yesua; Yesua ana Eliezer; Eliezer ana Yorim; Yorim ana i Matat; Matat ana i Lewi; Lewi ana i Simeon; Simeon ana Yehuda; Yehuda ana Yusuf; Yusuf ana Yonam; Yonam ana Elyakim; Elyakim ana i Melea; Melea ana i Mina; Mina ana i Matata; Matata ana i Natan; Natan ana i Daud; Daud ana Isai; Isai ana Obed; Obed ana i Boas; Boas ana i Salmon; Salmon ana i Nahason; Nahason ana Aminadab; Aminadab ana Admin; Admin ana Arni; Arni ana i Hezron; Hezron ana i Peres; Peres ana Yehuda; Yehuda ana Yakub; Yakub ana Ishak; Ishak ana Abraham; Abraham ana i Terah; Terah ana i Nahor; Nahor ana i Serug; Serug ana i Rehu; Rehu ana i Peleg; Peleg ana Eber; Eber ana i Salmon; Salmon ana i Kenan; Kenan ana Arpakhsad; Arpakhsad ana i Sem; Sem ana i Nuh; Nuh ana i Lamekh; Lamekh ana i Metusalah; Metusalah ana i Henokh; Henokh ana Yared; Yared ana i Mahalaleel; Mahalaleel ana i Kenan; Kenan ana Enos; Enos ana i Set; Set ana Adam; Adam ana Alatala.
1 Naopu Yesus nidiu I'a naponu ante Nosa Nagasa nu Alatala. I'a nompalasi Binangga Yordan, pade I'a nikeni Nosa Nagasa etu mpaka ri karawa baina. 2 Ri setu I'a nipesoba Magau nu Seta patampulu mbengi kasaena. Riara patampulu mbengi I'a ri setu da'a ria nuapa-nuapa nikonina sampe naoro mpu'u ta'ina. 3 Pade nangulimo Magau nu Seta ka I'a, "Ane Iko Ana nu Alatala balimo watu e'i mewali roti!" 4 Nesonomo Yesus ka i'a, "Naria nitulisi riara Buku Nagasa iwe'i: 'Da'a aga nggari roti manusia mamala matuwu.' " 5 Naopu etu Yesus nikeni Magau nu Seta wo'umo mpaka ri saongu bulu to nalangana. Pade riara tempo sampida mata nipopokitana ka Yesus pura-pura poparenta to naria riara dunia e'i. 6 Pade niulina ka Yesus, "Pura-pura kuasa pade kakalumana e'i kuwai ka Iko, sabana pura-pura etu niwai ka aku, pade namala kuwai ka isema-sema kupodota. 7 Pura-pura etu majadi bagiamu ane Iko mombasomba aku." 8 Tapi nesonomo Yesus, "Riara nu Buku Nagasa nitulisi iwe'i: 'Iko kana mombasomba Pue Alatalamu. Aga I'amo to masipato mupepue.' " 9 Naopu etu Yesus nikeni Magau nu Seta etu wo'umo mpaka ri ngata Yerusalem pade nitu'una ri wumbu nu Sapo Mpepue, pade niulina, "Ane Iko Ana nu Alatala, potingganawumo Iko nggari se'i mpaka ri tana. 10 Iko da'a ria mokuya sabana riara Buku Nagasa naria nitulisi iwe'i: 'Pue Alatala kana mompakau malaeka-malaekana mombajagai iko. 11 Ira kana mombatande iko riara mpale ira ala kadamu ne'e mawela watu.' " 12 Tapi nesonomo Yesus, "Naria wo'u Tesa nu Alatala to nanguli iwe'i: 'Ne'e iko mombasoba Pue Alatalamu.' " 13 Naopu Magau nu Seta etu nompesoba Yesus ante nompengaya akala, nipalasina Yesus, pade nitongorakana loga to nabelona. 14 Naopu etu natinggulimo Yesus mpaka ri Bagia Galilea. Kuasa Nosa Nagasa nu Alatala naria ri ja'ina. Pade natolelemo karebana ri pura-pura ngata ri setu. 15 I'a nopaguru ri sapo-sapo mpodade nto Yahudi pade pura-pura tau nantoiya I'a. 16 Pade nalaumo Yesus mpaka ri ngata Nazaret. Ri ngata etumo I'a nipakabete. Pade nantuki kabiasana tempo Eo Mpenonto I'a nesua ri Sapo Mpodade. Ri setu I'a nekanggore ala mombabasa sabagia nggari Buku Nagasa. 17 Buku nabi Yesaya niwai ka I'a. Nitimpana niratana saongu bagia pade nibasana bagia etu to nanguli iwe'i: 18 "Nosa Nagasa i Pue naria ri ja'iku, sabana I'amo to nombalanti Aku mompatolele Kareba Belo ka tau-tau napakasi. I'a nompakau Aku manguli ka tau-tau to nitawani ira kana makabasaka, pade ka tau-tau naburo, ira mamala mekita bali, pade ka tau-tau natitanamaka, ira kana rasoreaka. 19 I'a wo'u nompakau Aku mompasimbayu karata i Pue mompakasalama todeana." 20 Naopu Yesus nombabasa buku etu, nitutuna mpanjili pade nipopatinggulina ka tau to nipakakuasa ri setu. Naopu etu nekatokomo I'a. Pura-pura tau riara Sapo Mpodade etu nanggita I'a. 21 Pade nompamulamo I'a nompatuduki ira. Niulina, "Tesa nggari Buku Nagasa to nibasaku pane'a lako nipakadupa ri ngayo komi." 22 Nangepe I'a pura-pura tau ri setu nantakono tesana etu, pade nogumaa ira sabana nabelo mpu'u tesa-tesa to niulina. Nekutanamo ira samba'a bo samba'a, "Iwenu sampe I'a namala notesa iwetu? I'a aga ana Yusuf!" 23 Pade nangulimo Yesus ka ira, "Natantu komi kana manguli ka Aku porapa e'i: 'Sando, pakabelo koromu mboto!' Pade komi kana manguli wo'u ka Aku, 'Powia wo'u kabaraka ri ngatamu mboto e'i ewa nuapa niepe kami nikawiamu ri ngata Kapernaum.' " 24 Pade niulina wo'u, "Toramo! Da'a ria samba'a nabi nibila ntau ri ngatana mboto! 25 Tapi toramo nuapa to najadi ri tempo nabi Elia. Tolumpae santongo kasaena eo napane, da'a ria narata uja, pade najadimo kamateoro neliu ganta ri pura-pura ngata. Tempo etu nadea besi nabalu ri tana Israel. 26 Naupa iwetu nabi Elia etu da'a nipakau Alatala malau mantulungi ira besi tobalu to Yahudi etu. Tapi i'a nipakau malau mpaka ri ngata Sarfat ri Bagia Sidon mantulungi samba'a besi tobalu da'a to Yahudi. 27 Iwetu wo'u to najadi ri tempo nabi Elisa. Tempo etu nadea tau to Israel naju'a bete. Tapi da'a ria ira to Yahudi to nipakabelo nabi Elisa. Aga i Naaman, samba'a tau da'a to Yahudi nggari Siria to nipakabelona nggari ju'a betena!" 28 Naopu nangepe tesa Yesus etu narau mpu'umo rara pura-pura tau riara Sapo Mpodade etu. 29 Jadi nekanggoremo ira nompopalai Yesus nggari ngata ira, pade nikeni ira I'a mpaka ri wiwi bingge to nipeto'o ngata ira etu. Patuju ira mombajuanaka I'a nggari bingge to nalangana etu. 30 Tapi Yesus noliu ri tatongo ira pade nalai. 31 Naopu etu nalaumo Yesus mpaka ri ngata Kapernaum ri Bagia Galilea. Ri setu I'a nopaguru ri sapo mpodade tempo Eo Mpenonto. 32 Nasumara mpu'u tau-tau ri setu nangepe pepatudukina, sabana nakuasa mpu'u tesana. 33 Riara sapo mpodade nto Yahudi etu naria samba'a tau to nipesua seta. I'a nongare ante suara namangga, 34 "E, Yesus to Nazaret! Nuapa madota mupowia ka kami? Komi narata mompakaropu kami? Ninjaniku isema Komi! Komimo to Nagasana nggari ja'i Alatala!" 35 Tapi Yesus nanggarau seta etu, "Pekalino! Palaimo nggari ja'i ntau etu!" Pade seta etu nombadungganaka tau etu ri tatongo ntau dea pade nalaimo i'a nggari ja'i ntau etu ante da'a nompakaju'a i'a. 36 Nanggita etu nasumara puramo tau ri setu pade ira notesa samba'a bo samba'a, "Hai! Iwenu sanga tau e'i? Ante kuasana I'a nompakau seta-seta nalai nggari ja'i ntau etu, pade seta etu nalai mpu'u!" 37 Naopu etu natolelemo kareba Yesus ri umba-umba bagia etu. 38 Naopu etu Yesus nompalasi sapo mpodade etu nalau mpaka ri sapo samba'a tau to nosanga ka i Simon. Matu'a besi i Simon naraya mbongo pade tau-tau ri setu nerapi ala Yesus mantulungi i'a. 39 Jadi nalaumo Yesus nekanggore ri sinjori matu'a besi i Simon etu, pade nitesana ante kuasa nompopalai ju'a raya etu nggari ja'i nu besi etu. Nabelomo i'a pade kaliu-liu i'a nembangu nalau nangala panggoni nikenina ka ira. 40 Sangga nangguwiamo pura-pura tau nanggeni roa ira to naju'a nompengele ju'a mpaka ri ja'i Yesus. I'a nombadika palena ri koro ira samba'a bo samba'a nompakabelo ju'a ira pura-pura. 41 To nipesua seta nipakabelona wo'u. Seta-seta etu nesuwu nalai nggari ja'i tau-tau etu ante nongare-ngare, "Komimo Ana nu Alatala!" Tapi Yesus nombatagi seta-seta etu, "Pekalino!" Da'a nipalogana ira notesa sabana ninjani ira I'amo Magau to Mompakasalama to nijanji Alatala. 42 Ri kampadondona etu nanggaliwomo Yesus nggari ngata etu pade nalau mpaka ri saongu peto'o to nakalinoana. Tapi tau dea nangelo I'a. Tempo ira nombarata Yesus ira nompasimbuku nombata'amaka I'a ante nanguli, "Ne'e mompalasi kami! Kana meto'o ri se'i Komi!" 43 Tapi nangulimo Yesus ka ira, "Aku kana malau mompatolele Kareba Belo ewa Poparenta nu Alatala ri ngata-ngata ntanina wo'u, sabana etumo to nipakau Alatala ka Aku." 44 Jadi nalaumo I'a nompatolele Kareba Belo ri sapo-sapo mpodade ri ngata-ngata nto Yahudi.
1 Naria sanggani Yesus nekanggore nopaguru ri wiwi rano Genesaret. Tau dea nantalili I'a nangepe Tesa nu Alatala. 2 Tempo etu I'a nanggita rongu sakaya ri wiwi rano etu. Pura-pura topompemala bau nana'u nggari sakaya-sakaya etu nantapasi jala ira. 3 Yesus nesawi saongu sakaya, etumo sakaya i Simon Petrus, pade nipakauna Simon nanggeni sakaya etu makawao sakedi nggari wiwi rano. Yesus nekatoko ri bunggu sakaya etu, pade nggari setu I'a nompaguru tau dea. 4 Sangga naopupa I'a nompaguru tau dea niulina ka i Simon, "Keni mpaka ri kandalana sakayamu pade tendeaka jalamu mompemala bau." 5 Nesonomo i Simon, "Guru, njambengi ntuamo kami nompemala bau tapi da'a ria kamba samba'a nirata kami. Tapi sabana guru nompakau kami, kami mantendeaka jala sangganipa mompemala bau." 6 Sangga nituki ira panguli Yesus etu nadea mpu'u bau nirata ira sampe jala ira naponu, ntora naseri. 7 Jadi ira nanggabe roa ira ri sakaya ntanina marata mantulungi ira. Naratamo roa-roa ira pade ira mpasanggani-nggani nangisi bau etu riara rongu sakaya etu. Naponu pura rongu sakaya etu niisi bau sampe sakaya etu sakedika natala. 8 Tempo Simon Petrus nanggita etu, notimbakotumo i'a ri ngayo Yesus ante nanguli, "Ne'e mamosu ri ja'iku, Pue, apa aku samba'a tau nasilaka!" 9 Niulina iwetu sabana i'a ante tau-tau to nosanggani-nggani ante i'a nasumara nanggita kadea nu bau to namala nijala ira. 10 Iwetu wo'u roa-roa i Simon, etumo Yakobus bo Yohanes, ana-ana i Zebedeus. Pade nangulimo Yesus ka i Simon, "Ne'e maeka. Komi nokolu topangelo bau, tapi mompamula we'i-we'i komi majadi topangelo manusia majadi topantuki Alatala." 11 Naopu etu ira nanggeni rongu sakaya etu mpaka ri wiwi rano. Pade ira tolumba'a nompalasi pura-pura etu nalau nantuki Yesus. 12 Naria sanggani Yesus naria ri saongu ngata. Ri setu naria samba'a langgai korona naju'a bete. Tempona i'a nanggita Yesus naratamo i'a notimbakotu ri ngayona pade nerapi mpu'u-mpu'u ka I'a, "Pue, ane Komi madota, Komi mamala mompakabelo ju'aku e'i." 13 Nangepe etu Yesus nangojo palena nanjoko tau etu ante nanguli, "Aku madota. Nabelomo ju'amu!" Kaliu-liu ju'a ntau etu nabelo. 14 Pade Yesus nantagi tau etu, "Ne'e mutesa ka tau nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo ju'amu." 15 Naupa tau etu nitagi iwetu, kareba Yesus natiepe ri umba-umba sampe nadea mpu'u tau narata ala mangepe tesana pade ala rapakabelo nggari ju'a ira. 16 Tapi sanggani-sanggani Yesus nalau mpaka ri peto'o to nakalinoana pade nosambaya ri setu. 17 Naria sanggani Yesus nopaguru. Tempo etu naria bara sakuya mba'a tau to Parisi ante guru-guru agama nekatoko nangepe I'a ri setu. Ira narata nggari pura-pura ngata to naria ri Bagia Galilea ante Bagia Yudea bo nggari ngata Yerusalem wo'u. Kuasa nggari ja'i Pue Alatala naria ri ja'i Yesus sampe I'a namala mompakabelo tau-tau to naju'ana. 18 Tempona etu naratamo bara sakuya mba'a tau nombakowa samba'a tau topunggu noturu ri ompa paturuna. Ira nompasimbuku manggeni tau etu mesua rara njapo ala i'a ratu'u ri ngayo Yesus. 19 Tapi da'a namala ira manggeni topunggu etu mesua sabana tau-tau ri setu neliu nggadea. Sabana etu nalaumo ira nepone ri bunggu ata sapo etu. Narata ri bunggu ata etu nibongga ira ata etu pade niulu ira tau naju'a etu ante parewa mpoturuna ri ngayo Yesus ri tatongo ntau dea etu. 20 Tempo Yesus nanggita karoso pomparasaya ira I'a nanguli, "Sampesuwu, silakamu niampungimo." 21 Nangepe etu nompamulamo guru-guru agama ante tau-tau to Parisi ri setu nompekiri riara nta'i ira, "Naja'a mpu'u tau e'i! I'a nompakakedi Alatala! Da'a ria samba'a tau ntanina namala mombaampungi silaka, aga Alatala mboto!" 22 Ninjani Yesus pompekiri guru-guru agama ante tau to Parisi etu. Jadi niulina ka ira, "Nokuya komi nompekiri iwetu riara nta'imu? 23 Umba to neliu nggamuda rauli, 'Silakamu niampungimo,' atau manguli, 'Pekanggoremo pade polumakomo?' Natantu neliu nggamuda manguli, 'Silakamu niampungimo.' 24 Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia e'i." Pade nipakauna topunggu etu, "Pekanggoremo, onggotaka ompa paturumu pade patinggulimo!" 25 Nangepe etu nekanggoremo topunggu etu ri tatongo ntau dea pade nionggotakana ompa paturuna nanjili ante nombatoiya bo nombabila sanga Alatala. 26 Nanggita etu nogumaa puramo tau ri setu pade ira nombatoiya bo nombabila sanga Alatala. Ante naeka mpu'u rara ri ja'i Alatala ira nanguli, "Eona e'i nikitatamo nuapa anu to nipogumaa." 27 Naopu etu nesuwumo Yesus nggari sapo etu pade nikitana samba'a tau topomperapi balasitee to nosanga ka i Lewi nekatoko riara kantoro topomperapi balasitee. Nangulimo Yesus ka i'a, "Kamaimo, tukimo Aku!" 28 Nangepe etu nekanggoremo i Lewi pade nipalasina pura-pura panggawiana nalau nantuki Yesus. 29 Naopu etu Lewi nanggawia posusa ka Yesus ri sapona. Nadea topomperapi balasitee ante tau-tau ntanina nanggoni mpasanggani-nggani ante ira ri posusa etu. 30 Naopu nanggita Yesus nalau ri posusa mpasanggani-nggani ante i Lewi, nonguamo bara sakuya mba'a tau to Parisi ante guru-guru agama to nantuki pepatuduki to Parisi. Nangulimo ira ka topantuki-topantuki Yesus, "Nokuya komi pura-pura nanggoni pade nanginu mpasanggani-nggani ante topomperapi balasitee bo tau-tau to nasilaka?" 31 Nesonomo Yesus, "Da'a tau-tau to naroso korona paraluu rapakuli dokutoro, aga tau-tau to naju'ana. 32 Aku da'a narata mompokio tau-tau to nanoa rarana tapi aga narata mompokio tau-tau nasilaka ala ira majea nggari silaka-silaka ira." 33 Pade nekutanamo tau ka Yesus, "Topantuki-topantuki Yohanes naoso napuasa pade nosambaya. Iwetu wo'u topantuki-topantuki to Parisi. Tapi topantuki-topantuki Komi aga nanggoni bo nanginu. Nokuya ira da'a napuasa?" 34 Nesonomo Yesus ka ira ante porapa iwe'i: "Masipato komi mompakau toratamu mapuasa ri posusa mponika ane boti langgai danosanggani ante ira? Natantu da'a! 35 Tapi kana marata tempona boti langgai etu raala nggari ja'i ira. Pade tempo etumo ira kana mapuasa." 36 Naopu etu Yesus nombatesa ka ira porapa iwe'i: "Da'a ria samba'a tau manjeri baju to nabouna rapotampalana ka baju to narantana, sabana ane iwetu baju to nabouna etu kana maseri, pade kae rapotampala etu da'a wo'u nabelo rakita ri baju to narantana etu. 37 Iwetu wo'u ante ue anggur. Da'a ria samba'a tau nombaisi ue anggur to nabouna riara pombolina to nasae, sabana ane iwetu ue anggur to nabouna etu kana morende mompakaposo pombolina etu sampe masowe wetumo ue anggur pade marugi pombolina. 38 Kakonona, ue anggur to nabouna kana raboli riara pombolina to nabouna wo'u. 39 Tau nabiasa nanginu anggur to nasaena da'a madota manginu to nabouna, sabana niulina, 'Nabelopa anggur to nasaena.' "
1 Tempo Eo Mpenonto Yesus ante anaguruna noliu ri tinalu gando. Ri setu nompamulamo anaguruna nompui pae sakedi, nipioyo ira pade nionta ira. 2 Nanggita powia ira etu nangulimo bara sakuya mba'a tau to Parisi ri setu, "Nokuya komi nombaliunaka Atura-atura agamata ante nowia to nitagi ri Eo Mpenonto?" 3 Nesonomo Yesus, "Iwenumo? Da'apa nibasa komi tesa riara Buku Nagasa ewa powia i Daud nggaolu tempona i'a ante roa-roana naoro ta'i? 4 I'a nesua riara Sapo Alatala pade nialana roti to nipesomba ka Alatala ri setu. Nikonina roti etu pade niwaina wo'u ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, da'a tau ntanina." 5 Pade niuli Yesus wo'umo, "Aku, Ana nu Manusiamo to nakuasa ri Eo Mpenonto." 6 Tempo Eo Mpenonto ntanina, nesuamo Yesus ri sapo mpodade nto Yahudi pade nopaguru. Ri setu naria samba'a tau namate pale ngganana. 7 Bara sakuya mba'a guru agama bo tau to Parisi nompariara mpakabelo-belo manggita ane Yesus mompakabelo tau naju'a etu tempo Eo Mpenonto, sabana ira madota mangelo sala ri ja'i Yesus ala ira mamala mompangadu I'a. 8 Tapi ninjani Yesus pompekiri ira. Jadi nangulimo I'a ri ja'i ntau to namate palena etu, "Pembangumo, kamai pekanggoremo ri tatongona se'i!" Nangepe etu nembangumo tau etu nalau nekanggore ri setu. 9 Pade nekutanamo Yesus ka ira pura-pura, "Nantuki Atura-atura agama nuapa to nipaloga ka kita rapowia ri Eo Mpenonto? Mowia to nabelo bara to naja'a? Mompakasalama koro ntau bara mompatesi tau?" 10 Naopu Yesus nekutana iwetu I'a nanggita ntalili ri ja'i ntau dea etu. Pade nangulimo I'a ka tau namate palena etu, "Ojomo palemu!" Tau etu nangojo palena, pade nabelo balimo palena etu. 11 Tapi naopu nanggita etu narau mpu'umo rara guru-guru agama bo tau-tau to Parisi etu. Pade nompamulamo ira nolibu mantesa nuapa mamala rakawia ri ja'i Yesus. 12 Tempona etu Yesus nantende mpaka ri saongu bulu pade ri setu I'a nosambaya ka Umana Pue Alatala njambengi ntua. 13 Sangga naeompadondo, nipokiona puramo tau to nantuki I'a, pade nipelisina sampulu romba'a nggari tatongo ira etu majadi surona. 14 To nipelisina etumo: i Simon, to nidaena i Petrus, Andreas tua'i Simon, Yakobus, Yohanes, i Filipus, i Bartolomeus, 15 i Matius, i Tomas, Yakobus ana Alfeus, i Simon to Zelote, 16 Yudas ana Yakobus, ante Yudas Iskariot to najadi topobalu Yesus. 17 Naopu etu notuamo Yesus ante anaguruna nggari bulu etu sampe narata ri kadelena. Ri setu naria nadea topantuki I'a ntanina pade nadea tau to narata nggari umba-umba ri bagia nto Yahudi, nggari ngata Yerusalem bo nggari ngata Tirus ante ngata Sidon to ri wiwi ntasi. 18 Ira narata ala mangepe tesa Yesus pade ala rapakabelo nggari ju'a-ju'a ira pura-pura. Ira to nipesua seta wo'u narata pade nipakabelona. 19 Pura-pura tau nompasimbuku manggabe koro Yesus sabana naria kuasa nesuwu nggari korona to nompakabelo ju'a ira pura-pura. 20 Yesus nanggita topantuki-topantuki I'a pade niulina, "Nasana mpu'umo komi to nakasiasina, sabana komimo to najadi todea riara Poparenta nu Alatala. 21 Nasana mpu'umo komi to naoro we'i-we'i, sabana komi kana rapakabosu. Nasana mpu'umo komi to notumangi we'i-we'i, sabana komi kana rapakadamba. 22 Nasana mpu'umo komi ane komi raporau rara ntau, rapatani ntau, rasalai ntau, bo sanga komi rapakawau ntau sabana komi topantuki Aku, Ana nu Manusia. 23 Iwetu wo'u nikawia totu'a ira nggaolu ka nabi-nabi Alatala. Ane etu majadi, kana madamba mpu'u rara komi sabana nadea mpu'u rasi to nipakasadia ka komi ri suruga. 24 Tapi mandasa mpu'umo komi to nakalumana we'i-we'i, sabana nirata komi puramo nuapa to nompakadamba. Mana ria ntanina. 25 Mandasa mpu'umo komi to nagana panggoni we'i-we'i, sabana komi kana maoro. Mandasa mpu'umo komi to nadamba rara we'i-we'i, sabana komi kana masusa rara pade motumangi. 26 Mandasa mpu'umo komi to nitoiya pura-pura tau, sabana iwetu wo'u nipowia totu'a ira nggaolu ka nabi-nabi topodawa." 27 "Tapi kuuli ka komi to nangepe tesaku we'i-we'i: Potowemo balimu, powia belo ka tau to nomporau rara komi. 28 Perapi belo ka tau to nombajanjiaka komi pade posambaya wo'u ka tau to nowia naja'a ri ja'imu. 29 Ane maria tau mombasapa kalimpi ngganamu, wai ka i'a wo'u kalimpi njidimu. Ane maria tau mangala buyamu, wai ka i'a wo'u bajumu. 30 Ane maria tau merapi ri ja'imu kana rawai ka i'a. Pade ane mbara-mbaramu rapangangga ntau ne'e mana muperapi anu to nialana. 31 Nuapa-nuapa to mupodota rapowia ntau ka komi, iwetu wo'u komi mowia ri ja'i ira. 32 Ane komi aga nompotowe tau to nompotowe komi, ne'e rasarumaka Alatala mombawai rasi ka komi, sabana tau nasilaka wo'u nowia iwetu. 33 Ane komi nowia nabelo aga ka tau to nowia anu nabelo ka komi, natantu komi da'a rareke tau to nabelo rarana, sabana tau nasilaka wo'u nowia iwetu. 34 Pade ane komi nompopoinda doimu aga ka tau to nompakule mompopanjili doi etu, natantu komi da'a rareke tau to nabelo, sabana tau nasilaka wo'u nompopoinda doi ira ka tau nasilaka ntanina ane ranjani ira tau etu nompakule mompopanjili doi etu. 35 Kakonona da'a iwetu! Komi kana mompotowe balimu, pade powia anu mabelo ka ira. Komi kana mombawai ka tau ante mana mompopea balasina. Ane komi mowia iwetu rasimu kana madea bo komi majadi ana-ana nu Alatala, sabana I'a wo'u nowia to nabelo ka tau da'a ninjanina notarima kasi bo wo'u ka tau naja'a. 36 Komi wo'u kana mabelo rara nasimbayu ante Uma komi Pue Alatala." 37 "Ne'e komi sakedi-sakedi mompakasala tau ala ne'e komi rapakasala Alatala. Ne'e komi sakedi-sakedi mompakatantu tau nasala rasuku ala ne'e komi rasuku Alatala. Ampungimo tau ntanina ala komi wo'u raampungi Alatala. 38 Wai ka tau ntanina ala Alatala wo'u mombawai ka komi. Ane komi mombawai madea kana madea wo'u rarata komi. Kadeana etu masimbayu ewa posuka to naponu to niparo'o ante nigagoya ala namala raisi wo'u sampe mabubuaka. Komi kana rabalasi nantuki posuka to nipake komi ante tau ntanina." 39 Naopu etu Yesus nombatesa wo'umo saongu porapa ka topantuki-topantuki I'a iwe'i: "Da'a namala samba'a toburo mombanini toburo ntanina. Natantu ira romba'a kana manawu riara lowu. 40 Da'a ria samba'a anaguru neliu nggapande nggari guruna. Tapi ane matamapa, i'a kana masimbayu ante guruna. 41 Nokuya komi namala nanggita silaka roamu to nakedina ewa mpuli ri matana, tapi silaka komi mboto to nabetena ewa baloti ri matamu mboto da'a ria nikitamu? 42 Iwenu komi mamala manguli ka i'a, 'Sampesuwuku, kamai kukaliaka mpuli nggari matamu,' i'apa baloti ri matamu mboto da'a nikitamu? Komi topebagiu! Kaliaka ntani ruru baloti ri matamu mboto. Ante iwetu komi mamala manggita ante manoto ala manggaliaka mpuli nggari mata roamu etu!" 43 "Da'a naria kayu nabelo nowua da'a nabelo. Da'a wo'u naria kayu da'a nabelo nowua nabelo. 44 Pura-pura kayu ninjani nggari wuana. Natantu lemo ntasi da'a nowua mpolonja, bo walaa winti manu da'a nowua ntimu. 45 Iwetu wo'u manusia. Tau nalusu rarana, powiana ante tesana nabelo sabana to niboli riara nta'ina nabelo pura. Pade tau naja'a rarana, powiana ante tesana kana maja'a sabana to niboli riara nta'ina aga to naja'ana. Nuapa to nitesa ntau aga nantuki nuapa to naria riara nta'ina." 46 Nangulimo Yesus, "Nokuya komi nanggasangai Aku Pue tapi komi da'a nantuki nuapa to niuliku? 47 Kana kupopokita ka komi kasimbayu inggu ntau to narata ri ja'iku to nangepe pade nantuki tesaku! 48 I'a nasimbayu ewa samba'a topowia sou to nombakae mpakandala pade nowia pondasi ri bunggu watu. Tempo ue nanggabuntu nombarumpa sapo etu, sapo etu da'a nogoya sabana nibangu ri bunggu pondasi to naroso. 49 Tapi ane tau aga nangepe tesaku tapi da'a nantuki tesa etu, i'a nasimbayu ewa tau to nowia sapona ri bunggu tana, da'a nipowiana pondasi. Tempo ue nanggabuntu nombarumpa sapo etu, kaliu-liu sapo etu nadungga, pade naja'a mpu'u kagerona."
1 Naopu Yesus notesa ka tau dea nalaumo I'a mpaka ri ngata Kapernaum. 2 Ri setu naria samba'a balengga tantara Roma. Pade naria wo'u samba'a batua to nipotowena. Batua etu naju'a ntomo. 3 Tempo balengga tantara etu nangepe kareba Yesus nipakauna bara sakuya mba'a totu'a nto Yahudi mpaka ri ja'i Yesus merapi ala I'a marata mompakabelo batuana to naju'a etu. 4 Tempo totu'a nto Yahudi narata ri ja'i Yesus ira mpu'u-mpu'u nerapi tulungi ka I'a. Niuli ira, "Balengga tantara e'i kana masipato ratulungi Komi, 5 sabana i'a nompotowe kita to Yahudi pade i'a wo'u nombawai doi nombabangu sapo mpodade kami." 6 Nangepe etu nalaumo Yesus mpasanggani-nggani ante ira mpaka ri ja'i balengga tantara etu. Tempo ira namosu ri sapona balengga tantara etu nompakau roana malau mantomunaka Yesus ante manguli, "Uma, da'a paraluu Komi marata ri sapoku, sabana aku da'a masipato mantarima Komi riara njapoku. 7 Aku mboto wo'u da'a masipato marata ri ja'imu. Aga ulimo sambela rombela pade batuaku etu kana mabelo. 8 Ninjaniku i'a kana mabelo sabana aku wo'u samba'a tau to natundu ri ja'i balenggaku. Pade naria anabua-anabua to natundu ri ja'iku wo'u. Ane aku manguli ka samba'a anabua, 'Kalaumo,' i'a kana malau. Pade ane aku manguli ka anabua ntanina, 'Kamaimo se'i,' i'a kana momai. Pade ane aku manguli ka batuaku, 'Powiamo e'i,' i'a kana mowia etu." 9 Tempo Yesus nangepe tesa etu nasumaramo I'a, pade niulina ka tau dea to nantuki I'a, "Natantu mpu'u pomparasaya tau etu! Nau ri ja'i ntau to Israel da'a ria sanggani nirataku pomparasaya ntau to naroso ewa pomparasaya ntau e'i!" 10 Naopu etu nanjilimo tau to nipakau balengga tantara etu. Tempo ira narata ri sapo balengga tantara etu, nabelomo batua to naju'a etu. 11 Da'a nasaeka nggari setu nalaumo Yesus mpaka ri saongu ngata to nosanga ka ngata Nain. Anaguru-anaguruna nosanggani ante I'a pade nadea mpu'u tau ntanina nantuki I'a. 12 Tempo Yesus namosu bobaa mesua riara ngata etu nikitanamo topokowa tomate nesuwu nggariara ngata etu. Tomate etu ngana langgai to samba'ana lau, ana nggari samba'a besi tobalu. Nadea wo'u tau nggari ngata etu nantuki tobalu etu. 13 Tempo Yesus nanggita tobalu etu, naasimo matana, pade niulina ka i'a, "Ne'e mana motumangi." 14 Pade nalaumo Yesus nompakamosu pokowa ntomate etu pade nisokona. Tau-tau nokowa tomate etu nenonto, pade notesamo Yesus, "E, ngana kabilasa, Aku manguli ka iko, pembangumo!" 15 Pade nembangumo kabilasa to namate etu. I'a nekatoko pade nompamula notesa-tesa. Naopu etu Yesus nombawai i'a ka indona. 16 Nanggita etu naekamo pura-pura tau ri setu, pade nompamulamo ira nombatoiya Alatala. Niuli ira, "Samba'a nabi to nabetena narata ri tatongota. Naratamo Alatala mompakabelo todeana." 17 Naopu etu natolelemo kareba Yesus etu ka pura-pura tau ri Bagia Yudea, pade ri bagia ntanina to namosuna wo'u. 18 Anaguru-anaguru Yohanes Topediu notesa ka i'a pura-pura nuapa to nipowia Yesus. Nangepe etu Yohanes nompokio romba'a anaguruna, 19 pade nipakauna ira malau mompekutana Yesus. Niuli Yohanes, "Uli ka I'a iwe'i: 'Komi e'imo Magau to Mompakasalama to nijanji Alatala, bara damariapa ntanina to rapopea kami?' " 20 Pade nalaumo ira romba'a mpaka ri ja'i Yesus pade nanguli, "Yohanes nompakau kami mekutana ri ja'i Komi iwe'i: 'Komi e'imo Magau to Mompakasalama to nijanji Alatala, bara damariapa to rapopea kami?' " 21 Tempona etu nadea tau naju'a nipakabelo Yesus, pade nadea seta nipopalaina nggari ja'i ntau, pade nadea toburo nipakabelona sampe namala ira nekita bali. 22 Jadi nesonomo Yesus ka ira to nipakau Yohanes etu, "Panjilimo komi mpaka ri ja'i Yohanes, pade tesamo ka i'a pura-pura nuapa to niepe pade nikita komi. Tau naburo namala nekita, tau napunggu namala nolumako, tau naju'a bete nipakabelo bali, tau nabongo namala neepe, tau namate nipakatuwu bali, pade Kareba Belo nggari ja'i Alatala nipatolele ka tau napakasi. 23 Nabelo ntotomo tau to da'a nokanggaura nomparasaya Aku." 24 Sangga nalaipa tau to nipakau Yohanes etu, nompamulamo Yesus notesa ka tau dea etu ewa katuwu Yohanes. Niulina, "Nuapa patuju komi nalau ranggarawana bopia? Aga manggita wio niburu mpoiri gusa'a guse'i? Natantu da'a iwetu. 25 Jadi nuapa patuju komi malau gusetu? Ala manggita samba'a tau to nopakea nagaya? Natantu da'a wo'u, sabana tau nopakea nagaya pade nagana katuwuna iwetu aga neto'o ri sapo magau. 26 Jadi nuapa patuju komi malau gusetu? Ala manggita samba'a nabi? Nakono! Toramo! Yohanes neliu nggari samba'a nabi, 27 sabana i'amo tau to nitesa riara Buku Nagasa iwe'i: 'Kitamo! Aku mompakau batuaku mokolu nggari ja'imu, ala i'a mompakasadia jala ka Komi.' " 28 Nanguli wo'umo Yesus, "Riara dunia e'i da'apa ria samba'a tau to neliu nggalanga katuwuna nggari Yohanes. Tapi tau to neliu nggaede katuwuna riara Poparenta nu Alatala i'apa neliu nggalanga katuwuna nggari ja'i Yohanes." 29 Tempona pura-pura tau nangepe tesa Yesus, ira ante topomperapi balasitee wo'u nasituju ante nia Alatala, sabana ira pura-pura nidiu Yohanes ewa tandaina najeamo ira nggari silaka-silaka ira. 30 Tapi to Parisi ante guru-guru agama da'a nadota nantarima nia Alatala ka ira. Etumo sabana ira da'a nadota radiu Yohanes. 31 Pade niuli Yesus wo'umo, "Aku motesa mompakanoto ka komi inggu tau-tau tempo we'i-we'i. 32 Ira nasimbayu ewa ngana-ngana nekatoko ri potomu, to nggari sampeto'ona nompongare roana to santanina iwe'i: 'Kami nantawui sasuli ala mompakadamba rara komi, tapi komi da'a ria nadamba. Kami nodade nasusa, tapi komi da'a ria notumangi.' 33 Tempo Yohanes etu narata, i'a napuasa pade da'a nanginu anggur, pade niuli komi, 'I'a nipesua nu seta!' 34 Aku, Ana nu Manusia narata nanggoni ante nanginu, pade niuli komi, 'Kitamo tau etu! Nadoko, to nalangu, wega tau-tau topomperapi balasitee ante tau to nadea silakana!' 35 Naupa damo iwetu kabelo nu Alatala manoto rakita wuana riara nggatuwu ntau to nantarima kabelo nu Alatala etu." 36 Naria samba'a tau to Parisi nosanga ka i Simon nombagaga Yesus manggoni mpasanggani ri sapona. Jadi nalaumo Yesus mpaka ri sapona pade nekatoko nanggoni mpasanggani-nggani. 37 Ri ngata etu naria wo'u samba'a besi bajinga. Tempona i'a nangepe Yesus naria nanggoni ri sapo Simon tau to Parisi etu, nalaumo i'a nanggeni saongu botolo nggedi to nipowia nggari watu pualam to niisi minya to neliu nggawongina. 38 I'a narata nompakamosu kada Yesus nggari talikuna pade nageo. Pade ue matana nisasiina ka kada Yesus, pade nipe'ena kada Yesus ante wo'ona sampe nabai. Naopu etu kada Yesus niekina pade nitolina minya wongi etu. 39 Sangga nanggita etu, notesamo i Simon riara nta'ina, "Tau e'i kakonona da'a samba'a nabi. Ane I'a samba'a nabi natantu ranjanina isema besi to nanjoko I'a etu, sabana besi etumo tunggai nowia silaka riara nggatuwuna." 40 Tapi nangulimo Yesus ka i Simon, "Simon, naria sangaya kutesa ka komi." Nesonomo i Simon, "Iyo, tesamo nuapa, Guru." 41 Pade nanguli Yesus, "Naria romba'a tau to noinda ri ja'i ntau to nompopoinda doina. Samba'a nanginda limatu mpeka doi salaka pade samba'a nanginda lima mpeka doi salaka. 42 Tau romba'a topanginda doi etu da'a mana nompakule nombabayari mpakaopu inda ira etu. Jadi nanguli pue nu doi ka ira romba'a etu iwe'i: 'Doiku to niinda komi romba'a etu mana kutuntu ka komi.' " Pade nanguli Yesus ka i Simon, "Ri olo ira romba'a etu sema to neliu nompotowe pue doi etu?" 43 Nangulimo i Simon, "Pombarataku tau to nelabi kadea indana etu to neliu pompotowena." Nesono Yesus, "Pombaratamu etu nakono." 44 Naopu etu Yesus nompeeli besi etu ante nanguli ka i Simon, "Nikitamu besi e'i? Tempo Aku narata ri sapomu da'a nipakasadiamu ue kupombarama kadaku nantuki ada kita to Yahudi. Tapi besi e'i nombarama kadaku ante ue matana pade nipakabaina ante wo'ona. 45 Komi da'a nombatotoaka Aku ante nombaeki Aku. Tapi besi e'i da'a ria kabasana nombaeki kadaku nggari lamba karataku ri se'i. 46 Komi da'a nombatoli minya wongi ri balenggaku, tapi besi e'i nombatoli minya wongi ri kadaku. 47 Jadi kuuli ka komi, Simon, nggari kabete towe besi e'i nantujuraka silakana to nadeana etu niampungi Alatalamo. Ane tau niampungi aga sakedi aga sakedi wo'u pompotowena." 48 Pade nangulimo Yesus ka besi etu, "Silaka-silakamu naopu puramo niampungi." 49 Naopu etu nompamulamo tau-tau ntanina to nekatoko nanggoni mpasanggani ante Yesus notesa samba'a bo samba'a, "Isema Tau e'i sampe I'a namala mombaampungi silaka!" 50 Tapi nangulimo Yesus ka besi etu, "Sabana iko nomparasaya nipakasalamamo iko. Patinggulimo iko ante mabelo!"
1 Da'a nasae nggari setu nalaumo Yesus nompebutu ngata nompatolele Kareba Belo iwe'i: "Nompamulamo Pue Alatala noparenta ri dunia we'i-we'i." Anaguruna sampulu romba'a nalau mpasanggani-nggani ante I'a, pade 2 naria wo'u bara sakuya mba'a besi to nantuki ira. Besi-besi etu to nipesua seta bopia bo nawela nompengaya ju'a to nipakabelo Yesus. Samba'a nggari ja'i ira nosanga ka i Maria Magdalena. Naria papitu seta nipopalai Yesus nggari ja'ina. 3 Naria wo'u Yohana rongo i Khuza, topomboli doi Magau Herodes. Pade naria wo'u i Susana ante nadeapa besi ntanina. Ira nantuki Yesus bo nantulungi I'a ante anaguru-anaguruna nggari mbara-mbara ira mboto. 4 Nadea tau narata mpaka ri ja'i Yesus nggari bara sakuya ngata. Tempo nadeamo ira nasiromu Yesus nombatesa ka ira saongu porapa. 5 "Naria samba'a tau nalau nosawu pae. Tempo i'a nosawu naria sanu pae nanawu ri wiwi jala, pade nilonggo ntau ante nitunggu tonji sampe naopu. 6 Naria wo'u sanu pae nanawu ri bunggu watu-watu to nakura tanana. Pae etu natuwu tapi da'a nasaeka nalele sabana da'a naria ue nombabangga kalena. 7 Naria wo'u sanu pae to nanawu raranggarui. Natuwumo karui etu mpasanggani-nggani ante pae, pade nangoo pae etu sampe namate. 8 Pade naria wo'u sanu pae nanawu ri tana to naboyana pade nowua satu ngganina kadeana." Naopu notesa iwetu nangulimo Yesus, "Isema-sema naria talingana, epemo mpakabelo-belo tesaku e'i!" 9 Naopu etu nekutanamo topantuki-topantuki Yesus ka I'a, "Nuapa batuana porapa etu?" 10 Nesonomo Yesus, "Komimo to nipaloga mangginjani tesa ewa Poparenta nu Alatala to nitabuniaka nggari lamba pamulana. Tapi tau ntanina nipatuduki ante porapa ala naupa ira mangantoaka da'a mamala ira manggita, pade naupa ira mangepe da'a mamala ira mangginjani batuana tesa etu. 11 Iwe'imo batuana porapa etu. Pae etu Tesa nu Alatala. 12 Pae to nanawu ri wiwi jala nasimbayu ewa tau-tau to nangepe Tesa nu Alatala tapi narata Magau nu Seta tunggai nompakalinga rara ira nggari tesa to niepe ira ala ne'e ira momparasaya pade rapakasalama. 13 Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade nantarima tesa etu ante nadamba rara. Tapi pomparasaya ira da'a naroso nasimbayu ewa tuja-tuja da'a naroso pokalena. Tempo Magau nu Seta narata mompesoba ira nokanggauramo ira momparasaya. 14 Pae to nanawu raranggarui nasimbayu ewa tau-tau to nangepe Tesa nu Alatala. Tapi ira aga nasiwu-siwu nompekiri katuwu ira mboto pade ira aga naino ka doi pade madota matuwu masana ri dunia. Etu pura-pura nompakapii pekiri ira sampe Tesa nu Alatala da'a ria gunana riara nggatuwu ira. 15 Pae to nanawu ri tana to naboyana nasimbayu ewa tau-tau to nanoa bo nabelo rarana. Ira nangepe Tesa nu Alatala pade tesa etu niboli ira riara nta'i. Tesa etu mpu'u-mpu'u nituki ira sampe nadea mpu'u wuana to nabelo riara nggatuwu ira." 16 "Da'a ria tau nantunju poindo niungona riara tonda atau ri wayo ranja mpaturu. Tapi poindo etu kana rabolina ri kalangana ala pura-pura tau to mesua riara njapo kana rawantana. 17 Etu nombagambara ka kita pura-pura nuapa to nitabuniaka we'i-we'i kana rapakanoto banepiana, pade nuapa anu da'apa nanoto we'i-we'i kana matebonggaraka pade ranjani ntau banepiana. 18 Jadi pakabelo-belo iwenu komi mangepe Tesa nu Alatala, sabana isema mantarima Tesa etu kana ratambai ka i'a pangginjani ewa tesa etu. Tapi isema da'a mantarima Tesa etu, pangginjani Tesa etu to nipekirina ninjanina kana raala nggari ja'ina." 19 Naria sanggani indona ante sampesuwu-sampesuwu Yesus narata mosintomu ka I'a. Tempona etu da'a namala ira nosintomu ka I'a sabana nadea tau nantalili I'a nangepe tesana. 20 Naria samba'a tau nalau nanguli ka Yesus, "Uma, naria indomu bo sampesuwu-sampesuwumu ri sawalikuna. Ira madota mosintomu ka Komi." 21 Tapi nangulimo Yesus ka tau pura-pura, "Isema-sema mangepe Tesa nu Alatala pade mantuki nuapa to niulina, ira etumo indoku bo sampesuwu-sampesuwuku." 22 Naria sanggani Yesus ante anaguru-anaguruna nesawi sakaya. Pade niulina ka ira, "Kamaimo kita mosakaya mpaka ri sambote rano." Pade nanggaliwomo ira. 23 Tempo ira nosakaya Yesus noturu nalumpi ri tatongo anaguru-anaguruna. Sampegoli naratamo poiri naramboso nantawui sakaya etu pade najadimo balumba bete. Nompamulamo ue rano nesua riara sakaya, sakedika ira matala. 24 Nanggita etu nalaumo anaguruna nombalike Yesus pade nanguli, "Guru, Guru! Nandasamo kita!" Nangepe tesa etu nembangumo Yesus pade nomparenta poiri ante balumba etu, "Poiri ante balumba, penontomo!" Pade nenontomo poiri ante balumba etu pade rano etu najadi nalino. 25 Pade nangulimo Yesus ka anaguru-anaguruna, "Nokuya komi da'a nomparasaya Aku?" Nasumara ante naekamo anaguru-anaguruna etu. Pade notesamo ira samba'a bo samba'a, "Isema tanu kakonona tau e'i sampe poiri ante balumba nantuki parentana?" 26 Naopu etu Yesus ante anaguru-anaguruna nosakaya sampe narata ri bagia to Gerasa, to nosinjambote ante Bagia Galilea. 27 - 29 Tempona Yesus nana'u ri tana I'a nitotuaka samba'a langgai nggari ngata etu to nipesua seta. Nasaemo i'a nelaya. Da'a mana madota i'a meto'o ri sou, i'a aga madota meto'o ri dayo-dayo. Nadea ngganimo i'a nipesua seta sampe naupa palena ante kadana nipo'u rante bo i'a nikatono mpu'u-mpu'u, danamalapa rante etu nidapana, pade i'a nipasu'u seta-seta nalau riara karawa baina. Sangga nikitana Yesus nalaumo i'a nongare ri ja'ina. Pade Yesus nompakau seta nesuwu nggari ja'i ntau etu. Nangepe etu tau to nipesua seta etu notimbakotu ri ngayo Yesus pade nekakai, "Yesus, Ana nu Alatala to Nalanga. Nuapa urusamu ante aku? Aku merapi ne'e rapandasa aku!" 30 Pade nekutanamo Yesus ka tau etu, "Isema sangamu?" Nesonomo tau etu, "Sangaku Njobu-njobu." Niulina iwetu sabana nadea mpu'u seta riarana. 31 Naopu etu seta-seta etu nerapi ante mpu'u-mpu'u ka Yesus, "Ne'e rapakau kami malau rapandasa nu Alatala sampe ri kasae-saena!" 32 Namunji ri setu nadea wawu nangelo panggonina ri kente-kente nu bulu. Jadi seta-seta etu nerapi mpu'u-mpu'u ri ja'i Yesus ala ira rapaloga mesua ri ja'i wawu etu. Nangepe etu Yesus nompaloga ira. 33 Jadi nesuwumo seta-seta etu nggari ja'i ntau etu nolinja nesua ri ja'i wawu-wawu. Naopu etu nangowamo wawu-wawu etu notingganawu nggari wiwi bingge mpaka riara rano sampe namate natala. 34 Tempo tau topanggatono wawu etu nanggita nuapa najadi ri wawu etu, nalaumo ira nantesa kajadia etu riara ngata ira pade riara ngata-ngata ntanina to namosu ri setu. 35 Nangepe tesa ira nalaumo tau dea nanggita nuapa to najadi. Tempo ira narata ri ja'i Yesus nikita ira tau to nipesua seta etu natikabasakamo nggari ja'i seta-seta etu. I'a nekatoko namunji kada Yesus. Nopakeamo i'a pade nabelomo pekirina. Nanggita etu naeka puramo ira. 36 Ira to nanggita kajadia etu notesa ka tau-tau ntanina iwenu tau etu nipakabelo Yesus. 37 Pade pura-pura tau riara Bagia Gerasa etu nerapi ante mpu'u-mpu'u rara ka Yesus ala I'a mompalasi bagia ira etu sabana naeka puramo ira. Jadi nalaimo Yesus nesawi sakaya manjili. 38 Tau to nikabasaka nggari ja'i seta-seta etu nerapi ante mpu'u-mpu'u ri ja'i Yesus ala i'a wo'u mamala malau mpasanggani ante Yesus. Tapi nangulimo Yesus ka tau etu, 39 "Panjilimo, patolele ka tau nuapa to nikawia Alatala ri ja'imu." Pade nalaumo tau etu notesa ka pura-pura tau riara ngata nuapa to nikawia Yesus ri ja'ina. 40 Tempo Yesus nanjili nggari sambote rano I'a nitomunaka tau-tau ante nadamba sabana ira aga nompopea-pea karatana. 41 Tempo etu naratamo samba'a topanggeniaka ri sapo mpodade nto Yahudi to nosanga ka Yairus. Notimbakotumo i'a ri ngayo Yesus pade niperapina ante mpu'u-mpu'u rarana ala Yesus malau ri sapona, 42 sabana anana samba'a lau, etumo anana besi noumuru sampulu rompae naju'a ntomo. Nangepe etu nalaumo Yesus mpaka ri sapona. Tempo ira nalau mpaka gusa'a nadea tau nosimpii nawela nombawinggu Yesus. 43 Ri setu naria wo'u samba'a besi to sampulu rompaemo nangote lei. Da'a ria to namala mompakabelo i'a. 44 Besi etu nompakamosu Yesus nggari talikuna pade nikabena wiwi baju Yesus. Tempona etu kaliu-liu nenontomo lei to niote besi etu. 45 Tempo etu nekutanamo Yesus, "Isema nanggabe Aku pane'a?" Pura-pura tau nesapu, pade nangulimo i Petrus, "Guru, ri se'i nadea tau nosimpii ka kita. Komi nawela niwinggu ira." 46 Tapi nangulimo Yesus, "Naria tau nanggabe Aku pani'a. Ninjaniku sabana nirasaiku naria kuasa nesuwu nggari ja'iku." 47 Sangga ninjani besi etu powiana pani'a da'a namala ratabuniaka, naratamo i'a ante naeka pade nekadede ri ngayo Yesus. Pade nitesana ka tau dea ri setu, "E'imo sabana aku nanggabe baju Yesus. Sampulu rompaemo aku nangote lei, tapi naopu aku nanggabe baju Yesus kaliu-liu nenontomo lei to nioteku." 48 Naopu etu notesamo Yesus ka i'a, "Anaku, sabana komi nomparasaya Aku, nabelomo ju'amu. Patinggulimo komi ante mabelo." 49 Tempona Yesus danotesa ka besi etu, naratamo samba'a tau nggari sapo Yairus. Nanguli i'a ka Yairus, "Uma, namatemo anamu. Ne'e mana mompakasusa Guru malau mpaka ri sapomu." 50 Tapi tempo Yesus nangepe tesa etu, nangulimo I'a ka Yairus, "Ne'e maeka! Parasayamo Aku, pade anamu kana matuwu." 51 Sangga naratapa ira ri sapo Yairus, Yesus da'a nompaloga tau nesua ri tombi ngana etu ante I'a. Aga i Petrus, Yohanes, Yakobus bo indo uma nu ngana etu namala nesua nosanggani ante I'a. 52 Tempo etu pura-pura tau ri setu notumangi pade nageo mpajea nantangi ngana etu sabana namatemo i'a. Tapi nangulimo Yesus ka ira, "Ne'e mana komi motumangi! Ngana etu da'a namate, i'a aga napisi." 53 Nangepe etu ira aga nompongiri-ngiri Yesus, sabana ninjani ira ngana besi etu mpu'u-mpu'u namatemo. 54 Tapi Yesus nalau nesua nanjoko pale ngana etu pade niulina, "Ngana, pembangumo!" 55 Tempo etu wo'u narata bali nosa nu ngana etu, pade kaliu-liu i'a nembangu. Naopu etu Yesus nompakau indo umana mompakoni ngana etu. 56 Sangga nanggita kajadia etu nasumara mpu'umo totu'a ngana etu. Tapi Yesus nombatagi ira, "Ne'e ratesa ka tau ntanina nuapa to najadi ri se'i."
1 Yesus nompokio sampulu romba'a anaguruna pade niwaina ka ira kuasa mompopalai seta-seta pade mompakabelo ju'a-ju'a. 2 Pade nipakauna ira malau mompakabelo tau to naju'a pade mompatolele Kareba Belo, etumo Pue Alatala nompamulamo noparenta ewa samba'a magau. 3 Yesus nombatagi ira, "Ne'e manggeni bara nuapa-nuapa riara mpolumako komi. Ne'e manggeni lembau bara batutu, bara manggeni baku, bara manggeni doi, bara manggeni rontonga baju. 4 Ane komi marata ri saongu ngata pade maria pue njapo mompopesai komi, peto'omo komi ri setu sampe komi malai nggari ngata etu. 5 Pade ri umba-umba komi da'a ratarima ntau, sapunaimo sowu nggari kadamu tempo komi malai ala majadi popatora ka tau ri setu ira kana rasuku Alatala." 6 Naopu etu nalaimo anaguru Yesus nalau nompebutu ngata mompatolele Kareba Belo etu, pade mompakabelo tau to naju'a ri umba-umba. 7 Tempona Magau Herodes Antipas nangepe tesa ewa nuapa to nipowia Yesus riara poparentana ri Galilea, naingumo i'a, sabana naria tau to nanguli, "Tau e'i kakonona Yohanes Topediu to natuwu bali nggari kamatena." 8 Naria wo'u to nanguli, "I'a nabi Elia neumba bali." Pade tau to santanina nanguli, "I'a samba'a nabi nggaolu to natuwu bali." 9 Tapi nangulimo i Herodes, "Nipakaukumo tau nombatompo balengga Yohanes bopia. Jadi tau e'i, sema kakonona I'a? Nadeamo tesa niepeku ewa I'a." Etu sampe Herodes nangelo jala ala mosirata ka Yesus. 10 Sangga nanjilipa anaguru-anaguru Yesus notesamo ira ka I'a ewa pura-pura nuapa to nipowia ira. Naopu etu Yesus nanggeni ira sampulu romba'a nalau nompatani ri saongu ngata to nosanga ka ngata Betsaida. 11 Tapi tempo tau dea nangginjani patuju Yesus, ira pura-pura nantuki I'a. Pade ri tatongo jala ri setu Yesus nantarima ira pade nompatuduki ka ira tesa ewa Poparenta nu Alatala. Pade nipakabelona wo'u tau-tau to naju'ana ri setu. 12 Tempo ntora mawengimo naratamo anaguru Yesus sampulu romba'a etu nanguli ka I'a, "Guru, agina tau dea etu rapakau matingguli ala ira mamala malau mangelo panggoni ante peto'o rapaturu ira, apa peto'ota e'i nakalinoa." 13 Tapi nangulimo Yesus ka ira, "Komi mompakoni ira." Nesonomo anaguruna etu, "To naria ri ja'i kami aga limaongu roti bo romba'a bau. Etu da'a magana ratibo ka ira ane kita da'a malau mangoli mpakadea panggoni." 14 (Kadea ira ri setu kira-kira limanjobu mba'a langgai.) Tapi nangulimo Yesus ka anaguruna, "Pakaumo ira etu mekatoko kira-kira limampulu mba'ana sampeto'o." 15 Pade nipowia anaguru Yesus nuapa to niulina ka ira. Nipakau ira pura-pura tau etu nekatoko. 16 Naopu etu Yesus nangala limaongu roti bo romba'a bau etu, pade nantingoa langi nosambaya nanguli tarima kasi ri ja'i Alatala. Pade nibingga-binggana roti ante bau etu pade niwaina ka anaguruna nombatibo-tibo ka tau dea. 17 Ira pura-pura nanggoni sampe nabosu. Pade anaguruna nompasiromu labi panggoni to nabolina, naponupa sampulu rotonda. 18 Naria sanggani Yesus nosambaya njamba'ana, anaguru-anaguruna da'a nakawao ante I'a. Naopu I'a nosambaya Yesus nompekutana ira, "Nantuki tesa ntodea, isema Aku e'i?" 19 Nesonomo ira, "Naria to nanguli Komi Yohanes Topediu to natuwu bali. Naria wo'u sanu nanguli Komi nabi Elia to neumba bali. Pade naria wo'u to nanguli bara Komi samba'a nabi nggaolu to natuwu bali." 20 Pade Yesus nekutana sangganipa, "Tapi nantuki pombarata komi, isema Aku e'i?" Nesonomo Petrus, "Komi Magau to Mompakasalama to nijanji Alatala!" 21 Naopu Petrus nompangaku etu Yesus nombatagi ira, "Ne'e mpu'u rauli etu ka sema-sema! 22 Aku, Ana nu Manusia kana rapandasa mpu'u pade Aku rapoara totu'a-totu'a nto Yahudi ante balengga-balengga topanggeni agama bo guru-guru agama. Aku kana rapatesi pade ri eo katolueona Aku kana matuwu bali." 23 Naopu etu niulina ka pura-pura tau ri setu, "Isema-sema madota majadi topantuki Aku i'a kana mombakabasaka dotana mboto, pade eo-eo i'a kana masadia mantuki Aku nau sampe mamate rapaku ri kayu parika. 24 Sabana isema-sema da'a masadia mantuki Aku nau sampe mamate i'a da'a mombarata katuwua mabelo sampe ri kasae-saena. Tapi isema-sema mombakabasaka pura-pura dota rarana pade mantuki Aku nau sampe rapatesi, i'a kana mombarata katuwua mabelo sampe ri kasae-saena. 25 Natantumo da'a ria gunana ane samba'a tau mombarata pura-pura nuapa to naria ri dunia tapi da'a masalama, aga rasuku sampe ri kasae-saena ri naraka. 26 Isema-sema maeya mompangaku Aku pade tesaku, Aku wo'u kana maeya mompangaku i'a tempona Aku manjili ri dunia. Tempo etu Aku kana marata ante kuasa bo remeku mosanggani-nggani ante kuasa bo reme Umaku Pue Alatala ante malaeka-malaeka to nagasana. 27 Tapi toramo! Mana masaeka etu majadi! Naria bara sakuya mba'a ri tatongo komi e'i da'apa mamate ane da'apa rakita ira Pue Alatala mompamula moparenta." 28 Kira-kira walumbengi kaliuna Yesus nombawai pepatuduki etu ka ira, I'a nanggeni i Petrus, Yohanes ante Yakobus nalau nantende ri saongu buluna mosambaya ka Alatala. 29 Tempo Yesus danosambaya nabalimo lenjena pade bajuna najadi nabula nenggila sanggani. 30 Tempona etu naratamo tau romba'a notesa ante I'a, etumo i Musa ante Elia, nabi Alatala nggaolu. 31 Ira romba'a nompopokita koro ira riara reme nggari suruga. Pade ira notesa ewa kamate Yesus to majadi ri ngata Yerusalem. 32 Tempona etu i Petrus bo romba'a roana nangantu mpu'u sampe ira napisi. Tempo ira nembangu nikita ira reme Yesus ante romba'a tau nenggore ri setu nosanggani ante I'a. 33 Tempo tau romba'a etu nompamula nompalasi Yesus nangulimo i Petrus ka I'a, "Guru, nasana mpu'u kami ri se'i. Nabelopa kami mompowia toluongu pakumpa ri se'i, saongu ka Komi, saongu ka i Musa pade saongu ka Elia." Tapi da'a ninjani i Petrus nuapa nitesana etu sabana da'a nanoto rarana nanggita kajadia pane'a. 34 Tempo Petrus danotesa naratamo kulimu nombabungu ira pura-pura, pade naekamo ira sabana ira nibungu kulimu. 35 Pade nggariara kulimu etu naria suara nanguli, "E'imo Anaku to nipelisiku. Epe komimo tesana!" 36 Sangga nalino suara etu, nikita ira damo Yesus njamba'ana ri setu. Nompamula nggari tempona etu ira tolumba'a nomboli riara nta'i ira ewa kajadia etu. Da'apa ira madota motesa ka samba'a tau ewa nuapa to nikita ira. 37 Kaeona mpadondo notuamo Yesus ante anaguruna nggari buluna etu. Narata ri kadelena nadea tau narata ri ja'i Yesus. 38 Naria samba'a langgai nggari tatongo ntau dea etu nongare ka Yesus, "Guru! Tulungi kita ka aku ruru anaku, anaku aga samba'ana lau. 39 Ane nesuamo seta ri ja'ina i'a kaliu-liu nongare pade korona nolalete sampe ngangana nawura. Seta etu da'a ria nalai-lai nompandasa ngana etu. Nasae pade i'a nesuwu nggari ja'ina. 40 Niperapiku ka anaguru-anaguru Komi mompopalai seta etu, tapi da'a nipakule ira." 41 Nangepe etu nangulimo Yesus ka tau ri setu, "Iwenu tanu komi? Komimo tanu tau mpu'u-mpu'u da'a nomparasaya pade topesapuaka! Sakuyapa kasaena Aku kana mosanggani ante komi pade mosabara ri ja'i komi?" Naopu etu nangulimo Yesus ka uma ngana to naju'ana etu, "Keni wemaimo anamu!" 42 Tempona ngana etu nolumako mpaka ri ja'i Yesus, nidungganaka nu setamo i'a pade korona nokalalete-lete. Tapi Yesus nompopalai seta pade nompakabelo ngana etu nggari ju'ana. Sangga nabelopa ngana etu niwaina ka umanamo. 43 Nanggita kabete kabaraka Alatala etu, nasumara mpu'umo pura-pura tau ri setu. Tempona tau danasumarapa nanggita pura-pura nuapa to nikawia Yesus, nangulimo I'a ka anaguru-anaguruna, 44 "Pariara mpakabelo-belo nuapa to niuliku e'i. Kana marata tempona Aku, Ana nu Manusia kana rawai ka baliku." 45 Tapi anaguru-anaguru Yesus etu da'a nangginjani nuapa batuana to nitesana etu. Batua nu tesa etu danitabuniaka ka ira sampe da'apa ninjani ira. Pade da'a nabia ira nompekutana batuana ri ja'ina. 46 Pade nompamulamo anaguru-anaguru Yesus nosinggarau mbotomo bara isema nggari ja'i ira etu to neliu nggalanga katuwuna. 47 Yesus nangginjani pompekiri ira. Jadi nialana samba'a ngana nggedi pade nipopekanggorena ri sinjorina ri setu. 48 Pade niulina ka ira, "Isema-sema to mantarima samba'a ngana sabana i'a topomparasaya Aku, etu batuana i'a wo'u mantarima Aku. Pade isema-sema mantarima Aku i'a wo'u mantarima Alatala to nompakau Aku. Jadi isema nggari ja'i komi pura-pura e'i to naede katuwuna i'amo to neliu nggalanga katuwuna riara mpanggita Alatala." 49 Naopu etu nangulimo Yohanes ka Yesus, "Guru, kami nanggita samba'a tau nompopalai seta ante kuasa nggari sanga Komi. Tau etu nitagi kami sabana i'a da'a topantuki kita." 50 Tapi nanguli Yesus ka i'a, "Ne'e komi mombatagi i'a, sabana isema da'a nangewa komi i'a roa komi." 51 Tempona namosumo ntoana Yesus meore mpaka ri suruga I'a nompakatantu polumakona kana malau mpaka ri ngata Yerusalem. 52 Pade nipakauna tau mokolu ka I'a ala mompakasadia mpengaya-ngaya ka I'a. Jadi nalaumo ira pade nesua riara saongu ngata nto Samaria. 53 Tapi pue ngata etu da'a nadota nantarima Yesus sabana ninjani ira patujuna malau mpaka ri ngata Yerusalem. 54 Sangga ninjani Yakobus bo Yohanes pue ngata etu da'a madota mantarima Yesus, nangulimo ira ka I'a, "Pue, ane rapodota Komi, raperapi kami apu nggari langi mana'u mompalabu tau-tau e'i." 55 Tapi Yesus nompeili ira romba'a pade nanggarau ira. 56 Naopu etu nalaimo ira mpaka ri ngata to santanina. 57 Tempo Yesus ante anaguruna nompapola polumako ira naria samba'a tau nanguli ka I'a, "Ri umba-umba rakalau Komi aku kana mantuki Komi!" 58 Nangulimo Yesus ka i'a, "Asulako naria bolona rapaturuna bo tonji naria jumuna, tapi Aku, Ana nu Manusia da'a ria peto'o kupaturu." 59 Pade nanguli wo'umo Yesus ka samba'a tau ntanina, "Kamaimo, tukimo Aku!" Tapi nesonomo tau etu, "Pue, paloga ntanimo ruru aku manjili mombatana umaku. Naopu etu pade aku momai mantuki Komi." 60 Tapi nangulimo Yesus ka i'a, "Waikamo tau-tau to namate mombatana tau to namatena. Komi kana malau mpaka ri umba-umba mompatolele Kareba Belo ewa Poparenta nu Alatala." 61 Naria wo'u samba'a tau ntanina nanguli ka Yesus, "Aku kana mantuki Komi, Pue, tapi paloga ntani ruru aku malau mopasabi ka kami saongu njapo." 62 Tapi nangulimo Yesus ka i'a, "Ane komi mopajeko naoso nakampeili, etu da'a nabelo. Wa'a wo'u ante topantuki Aku. Ane i'a kana mombatora nuapa to nipalasina da'a masipato i'a rapake riara Poparenta nu Alatala."
1 Naopu etu Yesus nompelisi pitumpulu mba'a topantuki I'a ntanina. Ira pitumpulu mba'ana etu nipakauna romba'a-romba'a sanjala mokolu ka I'a mpaka ri pura-pura ngata to rakalauna. 2 Niulina ka ira, "Nadea tau madota mantarima Kareba Belo. Ira nasimbayu ante pae to natasamo. Mamalamo rakato. Pae rakato nadea mpu'u, tapi tau topokato da'a nadea. Sabana etu komi kana merapi ka Pue ntinalu ala I'a mompakau tau malau mokato. 3 Kalaumo komi we'i-we'i, tapi pakabelo-belo. Aku mompakau komi mpaka ri tatongo ntau to naja'a. Komi nasimbayu ka ana nu bimba nipopalai ri tatongo asulako. 4 Ne'e komi manggeni doi bara batutu rapomboli baku bara sapatu ropasa. Naganamo sapasa. Ne'e komi motesa masae ante tau raposirata komi ri jala. 5 Ane komi mesua ri sapo ntau kana rauli ntani ruru, 'Tabe, perapi Pue mombagane komi saongu njapo.' 6 Ane maria ira riara njapo etu to madota mantarima rasi bo belo etu, Alatala kana mombawai ka ira rasi bo belo madea. Tapi ane da'a ria to madota mantarima etu, Alatala da'a mombawai ka ira rasi bo belo etu. 7 Ri umba sapo to mantarima komi, peto'omo komi ri setu. Ne'e komi molinja-linja nggari sapo etu. Konimo bo inumo nuapa-nuapa to rawai pue njapo ka komi, sabana tau nokarajaa masipato mantarima gajina. 8 Ane komi mesua ri saongu ngata pade komi ratarima pue ngata ante nabelo, konimo panggoni nuapa-nuapa to rawai ira ka komi ri setu. 9 Pakabelomo tau naju'a ri ngata etu pade uli ka ira, 'Nompamulamo Alatala noparenta ri tatongo komi pura-pura.' 10 Tapi ane komi mesua ri saongu ngata pade da'a ratarima pue ngata ri setu, kalaumo komi ri jala jama rara ngata etu pade pongaremo komi iwe'i: 11 'Sowu e'i nggari ngata komi nentaka ri kada kami. Rasapunai kami ri ngayo komi ewa tandaina komi kana rasuku banepia. Tapi toramo! Namosumo tempo Alatala mompamula moparenta ewa magau.' " 12 Pade nangulimo Yesus ka ira pitumpulu mba'a, "Toramo! Tempo Pue Alatala mombatangara pura-pura manusia banepiana, neliu nggandasapa tau-tau etu pade pue ngata Sodom to naja'ana mpu'u." 13 Nanguli wo'umo Yesus, "Umba komi, pue ngata Khorazim! Mandasa mpu'umo komi banepia! Pade mandasa wo'u komi to neto'o ri ngata Betsaida! Sabana ane rapana kabaraka-kabaraka to nikawiaku ri ngata komi kukawia ri ngata Tirus bo Sidon, natantu nasaemo ira tau-tau da'a to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to naja'ana. Kabaraka-kabarakaku nikita komi tau to Yahudi, tapi komi da'a najea. 14 Jadi tempo Pue Alatala mombatangara manusia banepia, pombasuku komi meliu nggatomo nggari pombasuku pue ngata Tirus bo Sidon. 15 Pade komi pue ngata Kapernaum, komi nompekiri bara komi etu raore mpaka ri suruga! Tapi etu da'a ntoto nakono! Komi kana ratajiaka riara naraka!" 16 Pade nangulimo Yesus ka pitumpulu mba'a topantuki I'a, "Isema-sema to nangepe tesa komi, etu nasimbayu ewa ira nangepe tesaku. Isema-sema da'a nantarima komi ira da'a nantarima Aku. Pade isema-sema da'a nantarima Aku ira wo'u da'a nantarima Pue Alatala to nompakau Aku." 17 Tempo pitumpulu mba'a topantuki Yesus etu nanjili nggari polumako ira, nadamba mpu'u rara ira. Nangulimo ira ka Yesus, "Pue, seta-seta wo'u natundu bo nalai tempo nipopalai kami riara sanga Komi!" 18 Nangulimo Yesus ka ira, "Nakono. Nikitaku Magau nu Seta nanawu nggari langi ewa kila. 19 Toramo e'i! Aku nombawai ka komi kuasa ala naupa komi mombalonggo ule bo ndorokaa da'a ria mokuya. Pade niwaiku wo'u kuasa ka komi mombadagi balita, Magau nu Seta. Da'a ria i'a namala mompandasa komi. 20 Naupa iwetu ne'e komi madamba sabana seta-seta natundu ri ja'i komi. Aginapa komi madamba sabana sanga komi naopu nitulisi riara buku Pue Alatala ri suruga." 21 Tempona etu wo'umo Nosa Nagasa nu Alatala nompakadamba rara Yesus pade Yesus nosambaya. Niulina, "Uma, Pue nu langi bo dunia, Aku mosukuru ri ja'imu sabana pura-pura etu nitabuniakamu nggari ja'i tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna, sabana etumo to nipodamba raramu, Uma." 22 Pade niuli Yesus ka tau-tau ri setu, "Mpengele-ngele niwai Umaku ka Aku. To mpu'u-mpu'u nosinjani ante Aku, Ana nu Alatala, aga Umaku Pue Alatala. Da'a ria tau ntanina. Pade to mpu'u-mpu'u nosinjani ante Umaku Pue Alatala aga Aku, Anana bo isema-sema kupodota mompopanjani I'a ka ira." 23 Naopu etu negolimo Yesus notesa ka anaguru-anaguruna, "Nabelo mpu'umo komi sabana komi nanggita pura-pura nuapa to nikawiaku. 24 Toramo! Nadea nabi ante magau nadota manggita nuapa to nikita komi we'i-we'i, tapi etu da'a nikita ira. Ira nadota mangepe nuapa to niepe komi we'i-we'i, tapi da'a ria niepe ira." 25 Naria samba'a guru agama to Yahudi nekanggore mangelo kasala tesa Yesus. Nekutanamo i'a, "Guru, nuapa to masipato kupowia ala aku mamala matuwu mabelo sampe ri kasae-saena?" 26 Nesonomo Yesus, "Nuapa to nitulisi riara Atura-atura agama to nipapola i Musa? Nuapa to nibasamu ri setu?" 27 Nesonomo tau etu, "To nitulisi ri setu iwe'i: 'Potowemo Pue Alatalamu ante mpu'u-mpu'u raramu, ante pura-pura katuwumu, ante pura-pura karoso koromu, pade ante pura-pura pekirimu wo'u, bo potowemo sanggamanusiamu nasimbayu ewa komi nompotowe koromu mboto.' " 28 Nangulimo Yesus ka i'a, "Nawelamo pesonomu etu. Ane komi mowia iwetu, komi kana matuwu mabelo sampe ri kasae-saena." 29 Tapi guru agama etu madota mantakono korona mboto. Jadi nekutana wo'umo i'a ka Yesus, "Isema sanggamanusiaku etu?" 30 Nesonomo Yesus ante porapa e'i, "Naria samba'a tau to Yahudi notua nggari ngata Yerusalem mpaka ri ngata Yerikho. Tempona i'a ri tatongo jala i'a nibaga parampo, pade pura-pura pakeana ante mbara-mbarana naopu niago ira. I'a wo'u niboba santongo mate pade nipalasi ira ri setu. 31 Tempona etu wo'u naria samba'a topanggeni agama to Yahudi noliu ri setu. Sangga nanggita tau etu, i'a neleli nombaliunaka tau etu pade napolamo i'a. 32 Iwetu wo'u tau to Lewi to nokarajaa ri Sapo Mpepue to noliu ri setu. Tempo i'a nanggita tau niboba parampo ri setu i'a wo'u neleli nombaliunaka tau etu ri wiwi jala. 33 Naopu etu ri purina naria wo'u samba'a tau to Samaria noliu ri setu. Tempo i'a nanggita tau etu naasi mpu'u matana. 34 Nalaumo i'a ri ja'i ntau etu pade nipakulina bela-bela ntau etu ante lana bo ue anggur, pade niwewena bela etu ante kae. Naopu etu nionggotakana nipopesawina ri bunggu jarana pade nikenina ri sapo ntau ri jala poliu nikatonona ri setu. 35 Naeompadondo to Samaria etu nangala rompeka doi salaka niwaina ka pue njou to nipesai ira etu, pade niulina, 'Poeru ruru toju'a e'i. Manjili aku pade kubayari pura-pura to nipake komi nompoeru i'a.' " 36 Pade nipakaopu Yesus tesana ante saongu pompekutana ka guru agama etu iwe'i: "Nantuki pombaratamu, nggari tolumba'a tau etu ri umbana to nantora sanggamanusiana ri ja'i ntau nirampo etu?" 37 Nesonomo guru agama etu, "Tau to naasi matana nantulungi tau etu." Pade nangulimo Yesus, "Kau kawia komi wo'u iwetu!" 38 Naopu etu Yesus ante anaguru-anaguruna nompapola polumako ira sampe narata ri saongu ngata. Ri setu naria samba'a besi to nosanga ka i Marta nompakeni Yesus mpaka ri sapona. 39 Naria samba'a sampesuwu besi i Marta, sangana i Maria. Maria etu narata nekatoko ri ngayo Yesus nangepe pepatudukina. 40 Tapi Marta nasiwu-siwu nombatorata ira etu. Pade nalaumo i Marta nanguli ka Yesus, "Nipekiri Komi nabelo ane aga aku njamba'aku nokarajaa, Maria da'a? Pakaumo Maria etu mantulungi aku mokarajaa." 41 Tapi nesonomo Yesus, "Marta, Marta, nikitaku komi nasusa rara ante napari nompekiri nuapa-nuapa. 42 Kakonona to niparaluu mpu'u mupowia aga sangele, etumo mangepe Tesa nu Alatala. Etu to nabelona to nipelisi i Maria. Pade etu da'a namala raala ntau nggari ja'ina."
1 Naria sanggani Yesus nosambaya ri saongu peto'o. Naopu I'a nosambaya naria samba'a nggari anaguru-anaguruna nanguli ka I'a, "Pue, patuduki wo'u kami mosambaya ewa Yohanes Topediu nompatuduki anaguru-anaguruna." 2 Pade nangulimo Yesus ka ira, "Ane komi mosambaya uli komi iwe'i: 'Uma kami, rabila kami sangamu. Karatamo Komi moparenta ri dunia e'i. 3 Waimo ka kami panggoni butu-butu eona. 4 Pade ampungimo silaka kami ewa kami wo'u nombaampungi tau-tau nowia sala ri ja'i kami. Pade ne'e rapakamba kami rapesoba.' " 5 Pade nanguli wo'umo Yesus ka anaguru-anaguruna, "Rapana maria samba'a nggari komi malau mpaka ri sapo roamu tempo natongomo wengina pade manguli ka i'a, 'Sampesuwuku, wai ka aku sakedi panggoni komi, 6 apa naria samba'a roaku dako narata nggari polumakona nesai ri sapoku. Tapi ri sapoku da'a ria panggoni kuwai ka i'a.' 7 Natantumo roana etu da'a mesono iwe'i: 'Ne'e mompakasusa aku, apa pewobo nilawa kamimo. Kami ntaliana naturumo. Aku da'a mamala membangu mombawai ka iko nuapa to niperapimu.' " 8 Pade nangulimo Yesus, "Aku manguli ka komi, rapana i'a da'a madota membangu mombawai ka komi panggoni etu sabana komi samba'a roana, tapi natantumo i'a kana membangu mombawai ka komi nuapa to niperapimu etu sabana komi da'a naeya merapi ri ja'ina. 9 Sabana etu kuuli ka komi, perapimo, pade komi kana rawai; elomo pade komi kana mombarata; tinggedemo pewobo pade pewobo kana rabea ka komi. 10 Sabana isema-sema merapi i'a kana rawai, isema-sema mopaelo i'a kana mombarata, pade isema-sema mantinggede pewobo i'a kana rabea ka pewobo. 11 Iwenumo? Naria samba'a uma ri tatongo komi ane anana merapi bau rawaina ka ule? Natantumo da'a! 12 Bara ane anana merapi tolu manu ri ja'ina, rawaina ka ndorokaa? Natantumo da'a wo'u! 13 Naupa komi tau to naja'a ninjani komi wo'u mombawai nuapa to nabelona ka ana-ana komi mboto. Ne'epa rauli Umata to naria ri suruga. Natantumo I'a wo'u kana mombawai Nosana to Nagasa ka isema-sema to merapi ri ja'ina." 14 Naria sanggani Yesus nompakabelo samba'a tau to nipakabobo seta to nesua riarana. Sangga seta etu nipopalai Yesus namalamo tobobo etu notesa-tesa. Nanggita etu nogumaa puramo tau dea to naria ri setu. 15 Tapi naria wo'u sanu tau nanguli, "I'a namala nompopalai seta-seta ante kuasa nggari ja'i Beelzebul, Magau nu Seta." 16 Naria wo'u tau to madota mompesoba Yesus. Jadi ira nerapi ala I'a mowia kabaraka mompopokita ka ira I'a nggari ja'i Alatala. 17 Tapi ninjani Yesus patuju ira. Jadi niulina ka ira, "Ane maria samba'a magau pade todea riara poparentana natibagi-bagi bo nosipobali, natantumo poparentana etu kana magero. Pade ane tau-tau ri saongu njapo aga natibagi-bagi bo nosipobali, natantumo ira kana magado mosimpotatare. 18 Iwetu wo'u ante Magau nu Seta. Ane seta-seta aga natibagi-bagi bo nosipobali, natantumo poparentana etu kana magero. Sampe niuliku iwetu sabana niuli komi Aku nompopalai seta ante kuasa nggari ja'i Beelzebul, Magau nu Seta etu. Tapi etu da'a nakono. 19 Ane etu nakono uli ka Aku ante kuasa isema roa-roa komi nompopalai seta-seta? Natantumo ante kuasa nggari ja'i Alatala! Jadi powia roamu mboto etu nompakanoto pombarata komi etu nasala! 20 Tapi Aku nompopalai seta-seta ante kuasa nggari ja'i Alatala mboto! Pade etu nompopokita ka komi Pue Alatala nompamulamo noparenta ri tatongo komi! 21 Ane maria samba'a tau to naroso nagana pura parewa mposibalina nanggatono sapona, natantumo mbara-mbarana da'a namala raala ntau. 22 Tapi ane maria samba'a tau to neliu nggaroso marata mebaga pade mombadagi pue njapo etu, i'a kana mangala pura-pura parewa mposibali to nisarumaka pue njapo etu. Pade mbara-mbarana ranjapo etu kana rapalele ka roa-roana." 23 Pade nanguli wo'umo Yesus, "Isema-sema da'a nosanggani ante Aku i'amo baliku. Bo isema-sema da'a nantulungi Aku, i'a etu nombagero panggawiaku." 24 Pade nanguli wo'umo Yesus, "Tempo seta nesuwu nompalasi samba'a tau i'a nalai ranggarawa baina nangelo peto'o rapangosarakana, tapi da'a niratana. Sabana etu i'a nanguli, 'Aginapa aku matingguli mpaka ri sapo to nipalasiku ria.' 25 Sangga nanjilipa i'a niratanamo peto'o etu naopu nipegasa bo nipakasiayumo. 26 Pade seta etu nalau nompokio pitumba'a roana to neliu nggaja'a nggari i'a mboto. Pade naratamo ira nesua ri ja'i ntau etu pade naroo ri setu. Kaopuna katuwu ntau etu neliu mpu'u kaja'ana nggari pamulana bopia." 27 Naopu Yesus notesa etu nangulimo samba'a besi nggari olo ntau dea ka I'a, "Natantumo nadamba mpu'u indomu to noanaka Komi bo nompatomi Komi!" 28 Tapi nesonomo Yesus, "Nakono, tapi neliu nggadambapa tau to nangepe Tesa nu Alatala pade nompangala tesana etu." 29 Tempo nadea tau nasiromu nantalili Yesus I'a nompapola tesana. Niulina, "Naja'a mpu'u tau we'i-we'i! Komi nerapi Aku mowia saongu tandai to nipogumaa ala mompopokita ka komi Aku e'i narata nggari ja'i Alatala. Tapi etu da'a kupowia ka komi! Tandai to rapopokita ka komi aga tandai ewa to najadi ri ja'i nabi Yunus nggaolu. 30 Nasimbayu ewa nabi Yunus najadi tandai to nipogumaa tau-tau ri ngata Niniwe nggaolu, iwetu wo'u Aku, Ana nu Manusia kana majadi tandai rapogumaa ntau we'i-we'i. 31 Ri Eo Mpotangara banepia magau besi nggari sabingga puluna kana rapakatuwu bali mpasanggani-nggani ante komi to natuwu we'i-we'i. Pade i'a kana mompakasala komi, sabana i'a narata nggari ngata nakawao mpu'u ala mangepe pepatuduki Magau Salomo. Tapi we'i-we'i naria ri tatongo komi samba'a to neliu nggakuasa nggari Magau Salomo, tapi komi da'a madota mantarima tesana. 32 Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi. Pade ira kana mompakasala komi, sabana ira najeamo tempo ira nangepe tesa nabi Yunus ka ira. Tapi we'i-we'i naria ri tatongo komi ri se'i samba'a to neliu nggakuasa nggari nabi Yunus, tapi komi da'a madota mantarima tesana." 33 "Da'a naria tau nombatunju poindo pade nitabuniakana ranggapeo atau niladuna ante tonda. Natantumo poindo etu kana raboli ri kalangana ala pura-pura tau mesua rara njapo mamala manggita reme poindo etu. 34 Matamu etumo poindo koromu. Ane matamu mabelo, kana mareme sanggani njumaongu koromu. Tapi ane matamu magawu, marumau mpu'u katuwumu. 35 Sabana etu pariara mpakabelo-belo. Ne'e sampe to niuli komi reme to naria riara nta'i komi etu, aga rumau. 36 Ane pura-pura pompekirimu nareme, da'a ria to narumauna, pura-pura katuwumu etu wo'u kana mareme nasimbayu ewa reme nu poindo nombawanta komi." 37 Naopu Yesus notesa naria samba'a to Parisi nompakeni I'a malau manggoni ri sapona. Jadi nalaumo Yesus nanggoni ri sapona etu. 38 Ri setu natekajamo to Parisi etu sabana Yesus da'a nantuki ada nto Parisi norama palena ntani ruru pade nanggoni. 39 Etu sampe Yesus nanguli ka i'a, "Komi to Parisi nabiasa nombarama tubu bo suraya bagia sawalikuna. Tapi rara nta'i komi danatantoru bo naja'a mpu'u. 40 Komi tau-tau todoyo! Pue Alatala to nompowia koromu bo rara nta'imu wo'u! 41 Nuapa to naria ri ja'imu kana rawai komi ka tau-tau nakasiasi ante rara to nagasa. Ane komi mowia etu komi kana majadi nagasa pura. 42 Mandasa mpu'umo komi to Parisi. Komi nombabayari ka Alatala sabagia nggari sampulu bagia nggari pura-pura pombaratamu, nabeloka rampa-rampa to namura ewa kuni bo kula ante uta-uta ntanina. Tapi da'a nanoa rara komi bo komi da'a nompotowe Alatala. Kakonona kana manoa rara komi, pade komi kana mompotowe Alatala, tapi ne'e rakalinga komi atura-atura to napoko ntanina etu. 43 Mandasa mpu'umo komi to Parisi, sabana komi madota mekatoko ri pekatoko to nibilana ri sapo mpodade, pade komi madota rabila ntau ri potomu. 44 Mandasa mpu'umo komi, sabana komi nasimbayu ewa dayo da'a naria niboli tandaina. Tau noliu da'a ninjanina riara dayo etu nawau. Wa'a wo'u ante komi. Da'a ninjani tau ntanina riara nta'i komi etu naja'a." 45 Naopu etu naria samba'a nggari guru agama to naria ri setu nanguli ka Yesus, "Guru, tempo Komi nanguli iwetu natantu Komi nanjalai kami wo'u!" 46 Nesonomo Yesus ka ira, "Mandasa wo'u komi guru-guru agama, sabana komi nombawai ka tau atura-atura to natomo gaga ratuki, tapi komi mboto da'a madota mantulungi ira mantuki atura-atura etu! 47 Mandasa mpu'umo komi, sabana komi nompakabelo dayo nabi-nabi Alatala nggaolu, tapi komi wo'u muli ntau to nompatesi ira! 48 Totu'a komi nggaolu to nompatesi nabi-nabi etu, pade komi to nompakabelo dayo-dayo etu. Naupa komi mowia anu nireke ntau nabelo, riara nta'i komi danaja'a nasimbayu ewa totu'a komi nggaolu to nompatesi nabi-nabi. 49 Naria tesa nu Alatala to nanguli iwe'i: 'Nabi-nabi bo suroku kana kupakau ri ja'i ira. Maria santongo rapatesi ira, bo maria wo'u to rapandasa ira.' Niuli Alatala iwetu sabana ninjanina komi wo'u nasimbayu kaja'ana ante totu'a komi nggaolu. 50 Jadi komi to natuwu we'i-we'i kana rasuku Alatala sabana totu'a komi nggaolu nompatesi pura-pura nabi Alatala nggari lamba kajadia nu dunia, 51 nompamula nggari pompatesi i Habel sampe ri pompatesi i Zakharia to najadi ri lalowo Sapo Mpepue ri olo nu Meja Mpesomba bo Sapo Mpepue etu. Parasayamo! Komi to natuwu we'i-we'i kana rasuku sabana powia-powia etu! 52 Mandasa mpu'umo komi guru-guru agama, sabana komi nombalawa tau ala ira da'a mamala mangginjani jala mpaka ri ja'i Alatala! Komi mboto da'a madota mantuki jala etu pade komi nombalawa tau to madota malau mantuki jala etu!" 53 Naopu notesa iwetu nalaimo Yesus nggari setu. Pade nompamula nggari tempo etu naju'a mpu'u rara guru-guru agama bo tau-tau to Parisi ri ja'ina. Ira nompasimbuku manggeni Yesus motesa nengele-ngele, 54 ala mangelo kasala tesana sampe I'a mamala rapangadu ira.
1 Tempo etu nonjobu-njobu tau narata nasiromu ri ja'i Yesus sampe nosimpii nosilonggo-longgo kada. Tempo tau-tau etu danasiromu, notesamo Yesus ka anaguru-anaguruna, "Ne'e sampe komi majadi nasimbayu ante to Parisi. Ira aga nabelo ri lenje tapi naja'a riarana! Inggu ira to naja'a etu nendai nasimbayu ewa ragi newoke nompopebombo labu nu gando. 2 Tapi isi rara nta'i ira etu kana ranjani ntau sabana pura-pura nuapa to nitampunisi kana rabonggaraka pade pura-pura nuapa to nitawu kana ranjani. 3 Pura-pura nuapa to nitesa komi tempo nggawengina kana raepe ri kaeona, pade nuapa to niposiwawayo komi riara ntombi kana raposilelei nggari bunggu nu ata!" 4 "Toramo, komi to najadi wega-wegaku. Ne'e komi maeka ka tau, sabana to namala rakawia ira aga mompatesi koromu. Naopu etu da'a ria kuasa ira nuapa-nuapa. 5 Kuuli ka komi isema masipato rapokaeka komi. Agina komi maeka ri ja'i Alatala, sabana I'amo to nakuasa mompatesi koromu pade nakuasa wo'u mantajiaka komi riara naraka! Tora mpakabelo-belo! Aga Alatala rapokaeka komi! 6 Natantumo ninjani komi tonji rone nipobalu limamba'a rongu rupia olina. Naupa da'a nadea olina etu ka manusia da'a ria samba'a nikalinga Alatala. 7 Da'a aga etu. Wo'o ri balenggamu wo'u naopu pura nibila Alatala. Jadi ne'e maeka, sabana neliupa oli komi riara mpanggita Alatala pade oli ntonji rone nadea." 8 "Toramo mpakabelo-belo! Isema-sema mompangaku Aku ri ngayo manusia, Aku, Ana nu Manusia wo'u mompangaku i'a ri ngayo pura-pura malaeka Alatala. 9 Tapi isema-sema mombasapu Aku ri ngayo manusia, Aku wo'u mombasapu i'a ri ngayo malaeka-malaeka Alatala. 10 Isema-sema notesa nangewa Ana nu Manusia mamala raampungi. Tapi isema-sema to nanguli sinja'i Nosa Nagasa nu Alatala, i'a da'a namala raampungi. 11 Tempo komi rakeni ntau ri ngayo ntopotangara ri sapo mpodade nto Yahudi, pade tempo komi rakeni ratangara ri ngayo Gubernur bo tau-tau to nakuasa, ne'e makini rara mantondoaka iwenu komi motesa mombasono ira. 12 Tempo etu wo'umo Nosa Nagasa nu Alatala kana mompatuduki ka komi nuapa ratesa komi." 13 Naria samba'a nggari tatongo ntau dea nanguli ka Yesus, "Guru, namatemo uma kami pade nipalasina kakalumanana ka kami anana. Tapi pura-pura etu niala ntuakaku. I'a da'a madota mombabagi ka aku bagiaku nggari kakalumana uma kami etu. Jadi pakaumo i'a mombabagi ka aku bagiaku etu." 14 Nesonomo Yesus, "Sampesuwu, Aku e'i da'a totu'a ada atau to mombabagi kakalumana ka komi romba'a!" 15 Pade nangulimo Yesus ka tau pura-pura, "Pakabelo-belo! Ne'e maino raramu, sabana katuwua manusia da'a nggari kasugina, naupa mbara-mbarana neliu nggadea." 16 Pade Yesus nombatesa ka ira saongu porapa iwe'i: "Naria samba'a tau nasugi asele ntanana nadea mpu'u. 17 Jadi nompamulamo i'a nompekiri, 'Nuapa kukawia we'i-we'i? Mana ria peto'o rapomboli asele ntanaku.' 18 Naopu nipekirina, nitesana ka korona mboto, 'E'imo akalaku. Logoku nakedi gaga. Jadi kana kupowia to neliu nggabetena. Ri setumo kupomboli asele ntanaku ante mbara-mbara kakalumanaku ntanina. 19 Naopu etu mamala aku motesa ka koroku mboto: Nauntu mpu'umo iko. Pura-pura anu nabelo naria puramo ri ja'imu, da'a maopu-opu sampe mompae-mpae. Penontomo we'i-we'i. Panggonimo bo panginumo mpakadamba-damba.' 20 Tapi nangulimo Alatala ka i'a, 'E, todoyo, ri wengina e'i iko kana mamate, pade pura-pura to nipakasadiamu mana mamala rapake komi!' " 21 Pade Yesus nompakaopu tesana ante nanguli, "Iwetumo tau ane aga nompasiromu kakalumana ka korona mboto ri dunia e'i, tapi da'a nakalumana riara mpanggita Alatala." 22 Pade nangulimo Yesus ka topantuki-topantuki I'a, "Etumo sabana Aku nanguli ka komi, 'Ne'e makini-kini rara mompekiri katuwu komi, bara nuapa to rakoni komi atau pakea nuapa to rapake komi, 23 sabana to napoko riara nggatuwuta da'a aga panggoni atau pakea. 24 Kitamo tonji-tonji kolaa. Ira da'a notuja-tuja, da'a nokato, pade da'a naria logo nipomboli ira panggoni. Tapi naupa iwetu Alatala nombawai ka ira panggoni! Natantu I'a kana mompiara komi to neliu nipotowena nggari tonji-tonji etu! 25 Da'a ria gunana komi makini rara. Da'a ria samba'a nggari tatongo komi to nompakule mantambai umuruna nau aga sambengi ante makini-kini rarana. 26 Jadi ane komi da'a nompakule mowia to nanga'ana etu ante nakini-kini raramu, natantumo da'a ria gunana komi makini-kini mompekiri panggoni atau pakea! 27 Kitamo bunga-bunga to natuwu raranggawoko. Bunga etu natuwu nau da'a nanggawia bara nantanu. Tapi naupa iwetu kuuli ka komi, Magau Salomo to nakalumana mpu'u da'a ria pakeana to narambana ewa bunga-bunga etu! 28 Ane Alatala nompakaramba bunga-bunga to natuwu sampalai lau pade nalele nitajiaka riara apu, natantumo I'a kana mombawai ka komi pakea to niparaluu komi! Komi mpu'u-mpu'u tau to nakura nomparasaya! 29 Jadi ne'e komi makini mompekiri nuapa rakoni komi bara nuapa rainu komi! 30 Etu wo'u to nielo tau-tau ri dunia e'i to da'a nosinjani ante Alatala. Tapi pura-pura to niparaluu komi ninjani Umamu Pue Alatala. 31 Jadi pekoumo ruru ri ja'i Alatala pade pura-pura etu kana rapakagana ka komi. 32 Anaguru-anaguruku, ne'e komi maeka, nau komi da'a nadea, sabana komi nipelisi Umamu Pue Alatala mombarata bagia riara Poparentana. 33 Jadi pobalumo mbara-mbara to naria ri ja'imu, pade waimo doina etu ka tau nakasiasi. Pakasadia komi karepe to da'a mamala magero, etumo kakalumana ri suruga. Kakalumana etu da'a ria kaopu-opuna, sabana ri suruga etu da'a namala rapangangga ntau, da'a namala rakoni saipa. 34 Jadi pakasadiamo kakalumana ri suruga, sabana ri umba kakalumana komi, ri setu wo'u pekiri komi.' " 35 - 36 Yesus nombatesa wo'u saongu porapa iwe'i: "Komi kana mainga nasimbayu ante batua-batua to nompopea karata madika ira nggari posusa mponika. Batua-batua etu bate-batena nainga pade poindo ira da'a ria nipopaya ira. Pade ane marata madika ira mantinggede pewobo, masalisa pewobo etu rabea ka i'a. 37 Nabelo mpu'u batua-batua etu to nainga nompopea karata madika ira. Parasayamo! Madika ira etu kana mompakasadia korona pade mompakau ira mekatoko, pade i'a mboto mombatibo ka ira panggoni! 38 Nabelo mpu'u batua-batua etu to nainga nompopea karata madika ira, naupa i'a marata tongo wengi bara kabobayana." 39 Pade nanguli wo'umo Yesus, "Kana ratora wo'u tesaku e'i! Ane rapana pue njapo mangginjani tinti sakuya topangangga marata, natantumo i'a kana mainga manggatono sapona. I'a da'a mompalamba topangangga mesua rara njapona. 40 Iwetu wo'u komi kana mainga mompopea karataku, sabana Aku, Ana nu Manusia kana marata ante da'a ranjani-njani komi." 41 Pade nekutanamo i Petrus ka Yesus, "Pue, porapa etu nipawelamu aga ka kami atau ka pura-pura tau ntanina wo'u?" 42 Nesonomo Yesus ante porapa iwe'i: "Rapana maria samba'a batua to nanoto to natutu nantuki dota madikana. Natantu i'amo to raonggotaka madikana majadi topanggeniaka pura-pura batua rara njapona. I'amo to mombaurusi panggoni ka batua-batua ntanina eo-eo. 43 Mabelo mpu'umo batua etu ane madikana manjili pade manggita i'a mompowia panggawia to niparasaya ka i'a. 44 Aku mpu'u-mpu'u notesa ka komi, batua etu kana raonggotaka madikana majadi topombaurusi pura-pura mbara-mbarana. 45 Tapi mandasa mpu'u batua etu ane i'a mompekiri riara nta'ina iwe'i: 'Damasaepa madikaku manjili.' Pade i'a mompamula mombaboba batua-batua ntanina, nabeloka langgai nabeloka besi, pade aga manggoni manginu sampe makalangu. 46 Tapi tempo batua etu makanjalia iwetu, madikana kana manjili ri eo bo tempo to da'a ninjanina. Pade batua etu kana rapatesi. I'a kana ratajiaka riara naraka mpasanggani-nggani ante tau da'a nomparasaya Alatala. 47 Batua to nangginjani dota madikana tapi da'a nasadia-dia pade da'a nantuki dotana etu, i'a kana rajani sampe mandasa. 48 Tapi batua to da'a nangginjani nuapa to nipodota madikana pade nikawiana to nasala sampe masipato rasuku, i'a aga raboba sakedi. Sampe niuliku iwetu sabana tau niwai ka nadea, nadea wo'u raperapi nggari ja'ina. Pade tau to niparasaya ka nadea, neliu nggadea wo'u raperapi nggari ja'ina." 49 Nanguli wo'umo Yesus, "Patujuku narata ri dunia e'i ala manggeni apu mompalabu dunia, etumo ala manusia rasuku. Pade naino mpu'u raraku ala apu etu rapakajela. 50 Danariapa pepandasa marata ri koroku. Pade da'a wo'u nabelo raraku ane etu da'apa nadupa. 51 Nipekiri komi karataku manggeni posinggabelo ri dunia e'i, tapi da'a nakono! Da'a posinggabelo tapi posinggarau to nikeniku ri dunia. 52 Nompamula we'i-we'i ane maria limamba'a riara saongu njapo, ira kana matibagi-bagi. Ira tolumba'a manggarau tau romba'a. Pade ira romba'a manggarau tau tolumba'a. 53 Uma kana mangewa anana langgai, pade anana langgai etu mangewa umana mboto. Indo kana mangewa anana besi pade anana besi etu mangewa indona. Matu'ana besi kana mangewa maniana besi, bo maniana besi etu kana mangewa matu'ana besi wo'u." 54 Nanguli wo'umo Yesus ka tau dea, "Ane rakita komi kulimu meomba ri kasolo nu eo, natantu rauli komi: 'Mana masaeka mauja!' Pade mpu'u-mpu'u kana mauja! 55 Pade ane rakita komi wo'u poiri nggari puluna makantawui, natantu rauli komi: 'Kana mapane eo!' Pade mpu'u-mpu'u kana mapane eo! 56 E, komi todoyo! Nata'u mpu'u komi mombatandai lombona ante manggita langi bo dunia. Tapi nokuya komi da'a nangginjani batuana nuapa to nikawia Alatala tempo we'i-we'i?" 57 "Nokuya komi da'a madota mompakatantu powia to nakonona? 58 Ane komi rabata ntau pade malau mpaka ri ja'i ntopotangara komi kana mompasimbuku mosinggabelo ante tau etu tempo komi da ri tatongo jala. Ane da'a iwetu, komi kana rakenina ratangara ri ja'i ntopotangara. Pade topotangara etu kana mombawai komi ka polisi ala rasuaraka riara tarunggu. 59 Parasayamo! Da'a mamala komi rapopesuwu nggariara ntarunggu etu ane da'apa rabayari mpakaopu wayamu!"
1 Tempona etu naria tau notesa ka Yesus ewa nuapa to najadi ri ja'i bara sakuya mba'a to Galilea. Ira nipatesi Gubernur Pilatus tempona ira nanggeni pesomba ka Alatala ri Sapo Mpepue. 2 Naopu nangepe tesa etu nangulimo Yesus, "Nipekiri komi to Galilea etu nipatesi sabana silaka ira neliu nggadea nggari tau-tau Galilea ntanina. 3 Tapi, da'a ntoto nakono! Toramo! Ane komi da'a majea nggari silakamu komi wo'u kana rapatesi pura. 4 Tora komimo tau sampulu walumba'a to namate ri Siloam tempona ira nirumpi sapo to nalangana. Nipekiri komi kajadia etu nantujuraka silaka ira neliu nggadea nggari pura-pura tau ntanina to neto'o ri ngata Yerusalem etu. 5 Tapi da'a ntoto nakono! Sangganipa kuuli ka komi, ane komi da'a majea nggari silakamu, natantumo komi wo'u kana rapatesi." 6 Naopu etu Yesus nombatesa wo'umo saongu porapa iwe'i: "Naria sampu'u kayu ara nituja ri tinalu ntau. Pade naria sanggani pue ntinalu etu nalau nangelo wua nggari kayu etu. Narata ri tinalu nielona wua kayu etu tapi da'a ria kamba saongu wuana niratana. 7 Jadi niulina ka topanggatono tinalu etu, 'Kita we'i! Tolumpae ka e'imo aku narata nangelo wua nggari kayu e'i, tapi da'a ria kamba saongu wuana nirataku. Agina ratowo kayu e'i. Da'a ria gunana, aga nompakarugi tana.' 8 Tapi nesonomo topanggatono tinalu etu, 'Uma, rapakambata ntani ruru kayu e'i matuwu sampaepa. Aku mombatonggo tana ri pu'una pade mombapupu mompakaboya i'a. 9 Rakitata. Bara mpae marata i'a mowua. Tapi ane da'a mowua kayu e'i kana ratowota.' " 10 Tempo Eo Mpenonto Yesus nopaguru riara saongu sapo mpodade. 11 Ri setu naria samba'a besi to naju'a sampulu walumpaemo kasaena apa nipesua seta to nompakaju'a i'a. I'a nabunggu da'a namala nekanggore nanoa. 12 Tempona Yesus nanggita besi etu I'a nompokio pade notesa ka i'a, "Indo, we'i-we'i nabelomo ju'amu." 13 Pade nidikana palena ri koro nu besi etu pade kaliu-liu nanoamo koro nu besi etu, pade nompamulamo i'a nombatoiya Alatala. 14 Tapi tempo topanggeniaka ri sapo mpodade etu nanggita Yesus nompakabelo tau naju'a etu ri Eo Mpenonto, naraumo rarana. Pade niulina ka todea ri setu, "Riara santipa naria aono eo to nipakatantu ka kita nanggawia. Kamaimo komi rapakabelo ri eo-eo etu, aga ne'e ri Eo Mpenonto!" 15 Nangepe tesa etu notesamo Yesus ri ja'i topanggeniaka ri sapo mpodade etu, "Topebagiu tanu komi! Tempo Eo Mpenonto komi pura-pura nombakabasaka japimu bara jaramu pade nikeni nesuwu rapopoinu. 16 Ri se'i we'i-we'i naria samba'a besi, muli Abraham, to nipesua seta sampulu walumpaemo kasaena. Natantumo i'a wo'u masipato rakabasaka nggari kuasa Magau nu Seta etu ri Eo Mpenonto!" 17 Pesono Yesus etu nompakaeya mata pura-pura balina ri setu. Tapi pura-pura tau ntanina nadamba rara nanggita pura-pura anu nabelo to nikawia Yesus etu. 18 Naopu etu nangulimo Yesus, "Ante nuapa mamala kupakasimbayu ka pantambai kadea ntau to najadi todea riara Poparenta nu Alatala? 19 Etu nasimbayu ka porapa e'i. Naria saongu wua kayu to nakedi mpu'u to niala samba'a tau nitujana ri tinaluna. Wua kayu etu natuwu pade najadi sampu'u kayu bete. Pade nadea tonji narata nowia jumuna ri lolo nggayu etu." 20 Pade nanguli wo'umo Yesus, "Ante nuapa ntanina mamala kupakasimbayu ka pantambai kadea ntau to najadi todea riara Poparenta nu Alatala? 21 Etu nasimbayu ka ragi to niala samba'a besi pade niposigalona ante patampulu lite labu nu gando. Kaopuna pura-pura labu nu gando etu nebombo." 22 Tempo Yesus nompapola polumakona mpaka ri ngata Yerusalem I'a noliu ri ngata-ngata. Pade ri ngata-ngata etu I'a nopaguru. 23 Ri saongu ngata naria samba'a tau narata nekutana ka Yesus, "Uma, aga sakedi lau tau to rapakasalama?" Nesonomo Yesus, 24 "Komi pura-pura kana mompasimbuku ante mpu'u-mpu'u mesua ri pewobo to napiina. Sabana toramo! Nadea tau kana mompasimbuku mesua tapi da'a ria mamala. 25 Kana marata tempona pue njapo membangu mombalawa pewobo. Pade komi aga menggore ri sawalikuna mantinggede pewobo etu ante manguli, 'Uma, bea ka kami pewobo!' Tapi pue njapo etu kana mesono, 'Da'a ninjaniku komi pade nggari umba komi!' 26 Pade komi kana manguli wo'umo, 'Kami nanggoni nanginu mpasanggani-nggani ante komi, pade komi wo'u nopaguru ri tatongo ngata-ngata kami nggaolu!' 27 Tapi pue njapo etu kana mesono wo'umo ka komi, 'Da'a ninjaniku nggari umba komi. Palaimo komi nggari se'i! Komi pura-pura tau naja'a!' 28 Pade tempo komi manggita Abraham, Ishak ante Yakub nosanggani-nggani ante pura-pura nabi nosusa madamba-damba ri suruga, komi kana mageo bo mosinggiki baga ante kasusa rara sabana komi aga nipasuma nggari setu. 29 Tau-tau ntanina da'a to Yahudi kana marata nggari umba-umba ri dunia mantuki posusa Alatala ri suruga etu. Ira marata nggari pebuluna bo kasolona, pade nggari tasina bo puluna. 30 Toramo! Tempona etu tau ri purina etu kana majadi ri koluna, pade tau ri koluna kana majadi ri purina." 31 Tempona etu wo'u naria bara sakuya mba'a to Parisi narata ri ja'i Yesus pade nanguli, "Komi kana malai nggari se'i, sabana Magau Herodes madota mompatesi Komi!" 32 Tapi nesonomo Yesus, "Kau uli ka tau topebagiu etu iwe'i: 'Aku da'apa malai nggari se'i sabana eo e'i ante naile Aku mompopalai seta-seta pade mompakabelo tau-tau naju'a. Danepuapa Aku mompakaopu panggawiaku.' " 33 Pade nangulimo Yesus ka tau ri setu, "Naupa iwetu aku kana mompapola wo'u polumakoku mpaka ri ngata Yerusalem eo e'i, naile ante nepua, sabana da'a nabelo ane samba'a nabi rapatesi ri peto'o ntanina nggari ngata Yerusalem. 34 Umba komi to Yerusalem, pue ngata Yerusalem! Komi nompatesi nabi-nabi pade komi nombarempe ante watu tau-tau to nisuro Alatala mpaka ri ja'imu! Nadea ngganimo Aku madota manggalendu komi pura-pura nasimbayu ante manu nombaruta anana, tapi komi da'a madota. 35 Epemo! Alatala mana nosanggani ante komi. Kuuli ka komi, komi mana manggita Aku sampe Aku marata bali ri dunia pade komi mantotoaka Aku ante manguli, 'Perapi Pue mombagane Magau to narata niposumba Alatala.' "
1 Tempo Eo Mpenonto nalaumo Yesus nanggoni ri sapo samba'a topanggeniaka nto Parisi. Pura-pura tau to naria ri setu nanggita bo nompariara Yesus. 2 Sampegoli naratamo samba'a tau naju'a ri ngayo Yesus. Kadana ante palena nebangga puramo. 3 Nanggita tau etu nekutanamo Yesus ri ja'i guru-guru agama Yahudi ante tau-tau to Parisi to naria ri setu, "Nantuki Atura-atura agama Yahudi mamala kita mompakabelo tau naju'a tempo Eo Mpenonto bara da'a?" 4 Guru-guru agama ante tau-tau to Parisi etu aga nekalino, da'a ria ira nesono. Pade Yesus nanjoko pale ntau to naju'a etu pade nipakabelona, pade nipakauna nalai. 5 Naopu etu niulina ka guru-guru agama ante tau-tau to Parisi etu, "Ane maria ana komi bara japi komi manawu riara lowu tempo Eo Mpenonto, natantumo komi masasinta malau mangonggotaka ngana etu bara japi etu nggariara lowu eo etu wo'u, naupa eo etu Eo Mpenonto!" 6 Naopu nangepe tesa Yesus etu, da'a ria samba'a ira to namala nesono. 7 Tempona etu Yesus nanggita torata-torata ri posusa to Parisi etu nompelisi pekatoko-pekatoko to neliu nggabelona. Sabana etu I'a nompatuduki ira pura-pura ante saongu porapa iwe'i: 8 "Ane rapana komi ragaga malau mpaka ri posusa ne'e komi malau mekatoko ri ompa to nipakasadia ka totu'a. Sabana bara maria samba'a tau ntanina ri setu to neliu nibila. 9 Pade pue njapo to nombagaga komi romba'a kana marata pade manguli ka komi, 'Merapi ampu, peto'o e'i nipakasadia ka torata e'i. Komi kana molinja ri peto'o ntanina.' " Pade niuli Yesus, "Natantu kana maeya mata komi molinja mekatoko ri talikuna. 10 Sabana etu ane komi ragaga malau mpaka ri posusa, pelisimo peto'o ri talikuna ala pue njapo marata manguli ka komi, 'Wegaku, kamai mekatoko ri ompa ntotu'a e'i.' Ante inggumu etu komi kana rabila ri ngayo pura-pura torata ntanina. 11 Sabana butu mba'a tau to nompakalanga rarana kana rapakaede, tapi tau to nompakaede rarana kana rapakalanga." 12 Naopu etu nangulimo Yesus ka pue njapo ri setu, "Ane komi mombagaga tau marata manggoni ri posusa ntongo eo bara tempo nggawengina, ne'e komi mombagaga roa-roamu, bara sampesuwu-sampesuwumu bara tau to nosinggamosu ka komi to nasugina, sabana banepia ira kana mombagaga komi wo'umo. Ane iwetu powiamu to nabelona etu kana rabalasi ira. 13 Jadi ane komi mowia posusa, gagamo tau to nakasiasina, tau to nakeruna, tau to napungguna pade tau to naburona. 14 Ane komi mowia iwetu komi kana ragane, sabana tau-tau etu pane'a da'a mamala mombabalasi powiamu to nabelona etu. Powiamu etu kana rabalasi Alatala tempona tau-tau to nabelona rapakatuwu bali nggari kamatena." 15 Tempona samba'a tau to nanggoni mpasanggani-nggani ri posusa etu nangepe tesa Yesus pane'a i'a nanguli, "Natantu nasana mpu'umo tau to mamala manggoni mpasanggani-nggani ante Alatala ri posusa bete ri suruga." 16 Nangepe tesa ntau etu Yesus nombatesa saongu porapa iwe'i: "Sanggani tempo samba'a tau nowia posusa bete pade nadea tau nigagana. 17 Naratamo tempo nompamula nosusa pade nipakauna batuana malau manguli ka pura-pura tau to nigagana iwe'i: 'Kamaimo, nasadia puramo.' 18 Tapi nompamulamo ira pura-pura samba'a bo samba'a merapi ampu. Samba'a nanguli ka batua to narata ri ja'ina, 'Aku dako nangoli salimpu tana. Aku kana malau momparesa tana etu. Merapi ampu, aku da'a majadi momai!' 19 Pade nangulimo tau ntanina, 'Aku dako nangoli japi sampulu onguna. Aku malau we'i-we'i mompembai mopajeko ante japi-japi etu. Merapi ampu, aku da'a majadi momai!' 20 Pade nangulimo tau ntanina, 'Aku dako norongo, jadi sabana etu da'a namala aku momai!' 21 Nanjilimo batua etu mpaka ri ja'i pue njapo etu, pade niulina ka i'a nuapa pura to nipotanje ntau to nigaga etu. Nangepe tesa batua etu narau mpu'umo rara pue njapo etu, pade niulina ka batuana etu, 'We'i-we'i kalaumo masasinta ri jala-jala bete ante ri jala-jala nggedi ri ngata e'i pade mangelo tau to nakasiasina, tau to nakeruna, tau to naburona ante tau to napungguna. Kenimo ira pura-pura ri se'i!' 22 Jadi nalaumo batua etu nantuki pura nuapa to nipakau pue njapo etu ka i'a. Naopu etu nalaumo batua etu notesa ka pue njapo, 'Uma, to nipakaumu naopumo nikawiaku. Nadeamo tau narata tapi danariapa peto'o to naloga to da'apa niisi.' 23 Pade nangulimo pue njapo ka batuana etu, 'Ane iwetu, kalaumo mpaka ri jala-jala bete pade jala-jala nggedi ri sawaliku ngata. Pasu'umo tau-tau marata ala maponu sapoku! 24 Natantu da'a ria samba'a tau to nigagaku pangane to mamala marata manggoni mpasanggani-nggani ri posusaku e'i!' " 25 Nadea mpu'u tau nalau mpasanggani-nggani ante Yesus. Pade negolimo I'a notesa ka ira, 26 "Ane samba'a tau madota majadi topantuki Aku i'a kana mompotowe Aku neliupa nggari pompotowena ka indo umana, rongona ante ana-anana, sampesuwu-sampesuwuna, ante korona mboto wo'u. Ane i'a da'a nompotowe Aku neliupa nggari ira pura-pura ante korona mboto wo'u da'a mamala i'a majadi topantuki Aku. 27 Isema-sema da'a madota manjumbuaka kayu pomparikana pade malau mantuki Aku da'a masipato majadi topantuki Aku. 28 Ane rapana maria samba'a nggari komi madota mowia saongu sapo to nabetena, natantumo da'apa i'a nompamula mombabangu i'a kana mekatoko mombabila ntani doina bara magana mompakatoka sapona bara da'a. 29 Sabana ane dako ratinjana maopumo doina mompakatoka sapona etu natantumo pura-pura tau to manggita powiana etu kana mompongiri i'a. 30 Ira kana manguli, 'A, nadoyo tau e'i! I'a nompamula nowia sapona tapi da'a nipakulena mompakatoka sapo etu.' 31 Iwetu wo'u ane samba'a magau malau mosibali ka magau ntanina to narata mosibali ante i'a. Natantumo da'apa i'a malau i'a kana mekatoko mompekiri ntani ruru ane tantarana sampulu njobu mba'ana nompakule mosibali ka tantara rompulu njobu mba'ana nggari magau ntanina etu. 32 Ane ranjanina da'a rapakule tantarana mosibali ka tantara magau ntanina etu, natantumo tempo balina etu danakawaopa i'a kana mombasuro tau malau mpaka ri ja'i magau ntanina etu merapi mosinggabelo. 33 Jadi iwetu wo'u ante komi. Da'apa mamala komi majadi topantuki Aku komi kana mekatoko mompekiri mpakabelo-belo ntani ruru tesaku e'i. Pade naopu nompekiri pura-pura, komi kana manggabasaka pura-pura nuapa to naria ri ja'imu pade momai mantuki Aku. Ane da'a iwetu da'a namala komi majadi topantuki Aku." 34 "Natantu ninjani komi gara nabelo. Tapi ane gara majadi nameli natantu da'a namala rapakapaga bali. 35 Mana ria gunana. Da'a namala rapake nabeloka mompakaboya tana nabeloka rapajadi pupu. Kana ratajiaka wa'amo. Isema-sema naria talingana, epemo mpakabelo-belo tesaku e'i!"
1 Naria sanggani nadea topomperapi balasitee bo tau-tau ntanina to da'a nabelo inggu ira narata nangepe tesa Yesus. 2 Nanggita etu nompamulamo tau-tau to Parisi ante guru-guru agama nanggangua. Niuli ira, "A, da'a nabelo tau e'i! I'a nasintuwu ante tau to naja'a bo nanggoni mpasanggani ante ira!" 3 Nangepe tesa ira Yesus nombatesa ka ira porapa e'i. 4 "Rapana ane maria samba'a nggari komi mompatuwu bimba satu onguna pade matonto saongu, nuapa rapowiana? Natantumo rapalasina siompulu bo sasio ongu etu ranggarawana pade malau raelona bimba to natonto etu sampe raratana. 5 Pade ane raratana bimba etu kana rasumbuakana manjili ante kadamba rarana. 6 Marata ri sapona i'a kana mompasiromu roa-roana ante tau to nosinggamunji ante i'a pade manguli, 'Kamaimo kita madamba-damba, sabana bimbaku to natontona etu nirataku bali!' 7 Iwetu wo'u ri suruga. Neliu nggadambapa Alatala ante malaekana manggita samba'a tau naja'a powiana to majea nggari silakana pade manggita siompulu bo siomba'a tau to nanoa rarana to mana paraluu majea." 8 Yesus nompapola tesana ante porapa ntanina iwe'i: "Rapana ane maria samba'a besi nomboli doi salaka sampulu mpekana pade matonto sampeka, nuapa rapowiana? Natantumo i'a kana mombatunju poindo mosewe pura-pura sapona mangelo mpakabelo-belo sampe raratana doina to natonto etu. 9 Pade ane doi etu raratana i'a kana mompokio roa-roana ante tau-tau to nosinggamunji ante i'a pade manguli, 'Kamaimo kita madamba-damba, sabana doiku to natontona nirataku bali.' 10 Iwetu wo'u malaeka-malaeka Alatala. Nadamba mpu'u rara ira ane samba'a tau naja'a powiana majea nggari silakana." 11 Pade notesa wo'umo Yesus ante porapa e'i, "Naria samba'a uma noana romba'a langgai. 12 Notesamo ana kaopu ka umana iwe'i: 'Uma, wai ka akumo bagiaku nggari kakalumanamu.' Nangepe tesa etu umana nombabagi kakalumanana ka ira romba'a. 13 Bara sakuya mbengi kaliuna ngana kaopuna etu nompobalu bagiana to niwai nu umana ka i'a. Naopu etu nialana doi etu pade nalaimo i'a mpaka ri ngata ntau to nakawao. Sangga naratapa ri setu nipakaopunamo doina ante natuwu nantuki dotana mboto ante noinggu naja'a. 14 Sangga naopu puramo doina, najadimo oromate ri ngata etu sampe i'a nompamula namateoro. 15 Jadi nalaumo i'a nokarajaa ri ja'i samba'a tau ri ngata etu. Tau etu nompakau i'a malau mpaka ri tinalu mompakoni wawu. 16 Ri setu i'a madota manggoni mugu-mugu to niwai ka wawu etu sabana naoro mpu'u ta'ina. Tapi naupa iwetu da'a ria samba'a tau narata nombawai panggoni ka i'a. 17 Kaopuna nanotomo rarana, pade nipekirina, 'Tau-tau to nokarajaa ka umaku panggoni ira da'a naopu-opu, tapi aku ri se'i namateoromo. 18 We'i-we'i aku kana manjili bali ri ja'i umaku pade kana kuuli ka i'a, Uma, nasilakamo aku ri ja'i Alatala ante ri ja'i komi wo'u. 19 Aku mana masipato rauli anamu. Uma, ulimo aku aga tau topokarajaa ri ja'imu.' 20 Naopu nompekiri iwetu, nanggaliwomo i'a nanjili mpaka ri ja'i umana. Tempo i'a danakawao nikita umanamo. Naasi mpu'umo mata umana nanggita anana sampe i'a nangowa nantomuaka i'a. Narata ri ja'i anana nikalipuinamo pade niekina. 21 Pade nangulimo anana etu ka umana, 'Uma, nasilakamo aku ri ja'i Alatala ante ri ja'i komi wo'u. Aku mana masipato rauli anamu.' 22 Tapi umana nompokio batua-batuana pade niulina ka ira, 'Kau ala masasinta baju to neliu nggabelona rapasua ka i'a, pade pasua ka wo'u sinji ri koyampalena ante sapatu ri kadana. 23 Maopu etu kau ala komi japi to naboyana rasambale komi. Kita kana manggoni madamba-damba, 24 sabana anaku e'i ewa namatemo, tapi tempona we'i-we'i natuwu bali. I'a natontomo, tapi we'i-we'i narata bali.' Jadi ira nanggawia posusa pade nadamba-damba. 25 Tempona ira nosusa, anana ulumbua ri tinalu. Tempona i'a nanjili namunji ri sapo niepena musi-musi ante dero-dero. 26 Nipokiona samba'a batua pade nipekutanana, 'Nokuya tau nadea-dea ri sapo setu?' 27 Nesonomo batua etu, 'Tua'i komi to natontona narata bali. Pade uma komi nompakau kami nanjambale japi to naboyana sabana tua'imu narata ante nabelo.' 28 Nangepe etu naraumo anana ulumbua pane'a sampe da'a madota i'a mesua riara njapo. Jadi nesuwumo umana nantanara i'a ala i'a mesua riara njapo. 29 Tapi nangulimo i'a ka umana, 'Nompae-mpaemo aku nokarajaa ka komi ewa batuamu. Da'a sanggani aku nombaliunaka parenta komi. Tapi da'a ria sanggani komi nanjambale ka aku nau kamba saongu towau ala aku madamba-damba ante roa-roaku. 30 Damo narata anamu to nompakaopu mbara-mbara kakalumana komi nikenina nongei-ngei ka bajinga, pade komi nanjambale japi ka i'a etu.' 31 Nesonomo umana ri ja'i anana ulumbua etu, 'Anaku, iko bate-batena naria ante aku, pade pura-pura anuku, anumu wo'u. 32 Tapi kita kana mosusa ante madamba-damba sabana tua'imu ewa namatemo, tapi we'i-we'i natuwu bali. I'a natontomo tapi we'i-we'i narata bali.' "
1 Yesus nombatesa ka topantuki-topantuki I'a porapa e'i wo'u. "Naria samba'a tau nasugi to naria samba'a wakelena nombaurusi kakalumanana. Tau nasugi etu nangepe kareba nggari ja'i tau ntanina to nanguli wakelena etu nompakaopu kakalumanana. 2 Jadi nipokiona wakelena etu pade niulina, 'Natantu mpu'u tesa niepeku ewa inggumu! We'i-we'i kawia pakagana suramu ewa panggawiamu nombaurusi kakalumanaku, sabana komi mana mamala majadi wakeleku.' 3 Nangepe etu nompekirimo wakele etu riara nta'ina, 'Hai, iwenumo aku e'i? Balenggaku e'i madota manggabasaka aku. Nuapa kukawia ngina? Ane aku motonggo da'a mana kupakule. Ane merapi-rapi ri jala maeya mataku. 4 A, iwe'imo akalaku! Ane aku rakabasaka kana madea roaku to madota mantarima aku ri sapo ira.' 5 Jadi nalaumo i'a nompokio pura-pura tau to noinda doi ri ja'i balenggana. Niulina ka tau pamulana, 'Sakuyamo indamu ri ja'i balenggaku?' 6 Nesonomo tau etu, 'Satu ongu gumba lana.' Nangulimo wakele etu, 'E'imo sura inda komi. Kamaimo pekatoko ri se'i, masasinta ratulisi komi limampulu ongu gumba.' 7 Pade niulina ka tau ntanina, 'Sakuyamo indamu?' Nesonomo tau etu, 'Sanjobu karu ose.' Pade nangulimo wakele etu, 'E'imo sura inda komi. Tulisimo waluatu karu.' 8 Tempo tau nasugi etu nangepe nuapa to nikawia wakelena to nadenggo rarana etu i'a nombatoiya wakelena etu sabana nata'u akalana." Pade Yesus nompakaopu tesana iwe'i: "Tau-tau to nadenggo rarana ri dunia e'i neliu nggapandepa nompakasiayu bago ira nggari tau-tau to nanoa rara to natuwu riara karemena. 9 Pade kuuli wo'u ka komi, pakemo kakalumana dunia e'i, naupa naja'a, rapombarata roa ala tempona kakalumana dunia mana ria olina komi kana ratarima ri peto'o to nabelona ri suruga. 10 Tau-tau to namala niparasaya ante mbara-mbara sakedi namala wo'u niparasaya ante mbara-mbara to nadea. Tapi tau-tau to nadenggo rarana ante mbara-mbara sakedi nadenggo wo'u rarana ante mbara-mbara to nadeana. 11 Jadi ane komi da'a namala niparasaya ante kakalumana nggari dunia to naja'ana e'i, natantumo da'a ria to madota momparasaya ka komi kakalumana to nabelona nggari suruga. 12 Pade ane komi da'a namala niparasaya ante mbara-mbara tau ntanina, natantumo da'a ria to madota mombawai ka komi kakalumana majadi bagiamu. 13 Da'a namala samba'a tau majadi batua nggari romba'a madika. Sabana i'a kana magigi rarana ri ja'i madika to samba'ana pade mompotowe madika ntanina etu. Atau i'a kana mombabila madika to samba'ana pade momporau rara madika ntanina etu. Iwetu wo'u ante komi. Da'a mamala komi mepue sanggani ka Alatala bo manjarumaka mbara-mbara ri dunia e'i." 14 Tau-tau to Parisi nangepe pura-pura to nitesa Yesus pane'a. Pade ira nompongiri Yesus sabana ira nompotowe doi. 15 Tapi nangulimo Yesus ka ira, "Komi tau to nantakono inggu komi mboto ri ngayo tau ntanina, tapi Alatala nangginjani isi rara nta'imu. Da'a nipokonona pokainggumu iwetu. Toramo! Nuapa to nabelo nantuki pombarata manusia, etumo to nipoja'a rara Alatala. 16 Atura-atura agama Yahudi pade nuapa to nipatuduki nabi-nabi ka kita nipatolele sampe karata Yohanes Topediu. Nompamula nggari tempo etu Kareba Belo ewa Alatala ante Poparentana nipatolele ka tau-tau sampe we'i-we'i. Pade pura-pura tau nompasimbuku mpu'u nosimpago mesua riara Poparenta nu Alatala etu. 17 Neliu nggagampapa langi bo dunia malipo pade saongu huruf nggari Atura-atura agama etu rapakalipo." 18 Pade nanguli wo'umo Yesus, "Isema-sema to nombasompo rongona besi pade nomporongo besi ntanina i'a etu nebualo. Pade tau to nomporongo besi to nisompomo, i'a wo'u topebualo." 19 Nanguli wo'umo Yesus, "Naria samba'a tau nasugi, pakeana nasuli mpu'u olina, katuwuna eo-eo nabelo. 20 Naria wo'u samba'a tau nakasiasi nosanga ka i Lazarus. Korona pura-pura nabaka. I'a nabiasa nikeni ntau mpaka ri pewobo ntau nasugi etu. 21 Nisarumakana bara mamala i'a manggoni rombo panggoni to nanawu nggari meja ntau nasugi etu. Pade asu-asu wo'u narata nombajila bakana. 22 Naratamo tempona tau nakasiasi etu namate pade i'a nikeni malaeka mpaka ri peto'o to nibila ri sinjori Abraham ri suruga. Tau nasugi etu wo'u namate pade nitana. Pade i'a nitajiaka riara naraka. 23 Ri setu i'a nandasa mpu'u. Tempona i'a nantingoa ri kalangana nikitana Abraham ri peto'o nakawao pade i Lazarus ri sinjorina ri setu. 24 Pade nongaremo tau nasugi etu, 'Umaku, Abraham, potowemo aku! Pakaumo i Lazarus mantonomaka sanggoya palena ri ue pade marata mombasasii jilaku, sabana nandasa mpu'umo aku riara apu e'i!' 25 Tapi nesonomo Abraham, 'Toramo, anaku, iko nadamba-damba katuwumu nggari kakedi-kedimu sampe iko namate, tapi Lazarus e'i tau nandasa. We'i-we'i i'a nipakadamba ri se'i, tapi iko nipakandasa. 26 Ntanina nggari etu, ri olo kita e'i naria limba to nandalana ala tau nggari se'i da'a namala gusetu, pade tau-tau nggari setu da'a namala momai guse'i.' 27 Nangepe etu nangulimo tau nasugi etu, 'Ane iwetu, kuperapi ka komi, pakaumo i Lazarus mpaka ri sapo nu umaku. 28 Danariapa limamba'a sampesuwuku ri setu. Pakaumo i Lazarus etu malau mompopanjani ka ira ala ira wo'u ne'e mesua ri peto'o to nandasa e'i.' 29 Tapi nesonomo Abraham, 'Nariamo buku-buku i Musa ante buku-buku nabi-nabi ri ja'i ira. Palambamo ira mantuki nuapa to nitulisi riara buku-buku etu!' 30 Tapi nesonomo tau nasugi etu, 'Etu da'a nagana, Uma. Tapi ane maria tau namate matuwu bali malau mpaka ri ja'i ira, kana majea ira nggari silaka-silaka ira.' 31 Tapi nesonomo Abraham, 'Da'a nakono! Ane ira da'a nantuki tesa to nitewai Musa ante nabi-nabi ntanina, naudamo tomate membangu matuwu bali, da'a wo'u rapompangala ira.' "
1 Pade nangulimo Yesus ka topantuki-topantuki I'a, "Natantumo kana maria saba-sabana sampe tau mowia silaka. Tapi mandasa mpu'umo tau to mompakeni tau ntanina mowia silaka. 2 Nabelopa saongu watu bete raso'o ri tambolona pade i'a ratajiaka riara ntasi pade i'a mombabagiu samba'a ngana nggedi sampe i'a mana momparasaya. 3 Sabana etu komi kana mainga. Ane maria sampesuwumu mowia silaka ontiakamo i'a. Pade ane i'a majea pade merapi ampu, ampungimo i'a. 4 Ane i'a mowia maja'a ri ja'i komi pitunggani riara saeo pade butu nggani i'a marata merapi ampu ri ja'imu, komi kana mombaampungi i'a." 5 Pade nangulimo anaguru-anaguruna ka Yesus, "Pue, pakarosomo pomparasaya kami." 6 Nangepe etu nangulimo Yesus, "Ane pomparasaya komi aga sakedi lau nasimbayu ewa wua kayu to nakedi mpu'u, komi mamala manguli ka kayu bete e'i, 'Kawukamo pade kau polinjamo mpaka ri tatongo ntasi.' Pade natantumo kayu etu kana molinja." 7 "Rapana samba'a nggari komi maria samba'a batua to nopajeko bara nompoewu bimba ri karawana. Tempo batua etu manjili nggari karawana etu, natantumo komi da'a manguli ka i'a, 'Kamaimo masasinta manggoni!' 8 Da'a mpu'u iwetu. Natantumo komi kana manguli ka i'a, 'Kalau poriapu ruru panggoniku. Pade ane mangongomo pomporiapumu etu pakasadia pade keni ka aku panggoni etu. Ane maopu aku manggoni manginu pade mamala iko malau manggoni.' 9 Natantumo batua etu da'a miki ratoiya sabana i'a aga nantuki dota madikana. 10 Iwetu wo'u komi. Ane komi maopu mowia pura-pura to niparenta ka komi, ulimo, 'Kami e'i aga batua biasa. Kami aga nowia nuapa to masipato rapowia kami.' " 11 Tempo Yesus nompapola polumakona mpaka ri ngata Yerusalem, I'a nantuki pobingga Bagia Samaria ante Bagia Galilea. 12 Tempona I'a nesua ri saongu ngata naria sampulu mba'a tau to naju'a bete nomposirata I'a. Ira nekanggore nakawao 13 bo nongare, "Yesus, Guru, potowemo kami!" 14 Pade Yesus nangantoaka ira ante nanguli, "Kalaumo komi ri ja'i topanggeni-topanggeni agama merapi ala koro komi raparesa ira." Nangepe etu nalaumo ira nantuki tesa Yesus etu. Tempo ira danalau-lau nabelomo koro ira pura-pura. 15 Tempo samba'a nggari ira nanggita korona nabelomo, natinggulimo i'a mpaka ri ja'i Yesus ante nombatoiya-toiya Alatala ante suara namangga. 16 Pade notimbakotumo i'a ri ngayo Yesus ante nanguli tarima kasi ri ja'ina. Tau etu i'amo samba'a tau nggari Bagia Samaria. 17 Pade nangulimo Yesus, "Naria sampulu mba'a tau pane'a to nipakabeloku. Ri umbamo ira to sasiona? 18 Nokuya aga tau da'a to Yahudi e'i to narata nanguli tarima kasi ka Alatala?" 19 Pade niuli Yesus ka tau etu, "Pekanggoremo bo kalaumo. Nabelomo ju'amu sabana komi nomparasaya Aku." 20 Naria bara sakuya mba'a to Parisi nompekutana Yesus, "Nepia Alatala marata moparenta ri dunia?" Nesonomo Yesus, "Da'a ria tandai-tandaina to namala rakita to mompakatantu nepia Alatala marata moparenta. 21 Da'a ria to mamala manguli, 'Kitamo, e'imo I'a,' bara manguli, 'Kitamo, ri setumo I'a.' Poparenta nu Alatala da'a namala rakita ntau sabana Alatala noparenta riara nta'i manusia." 22 Naopu etu nangulimo Yesus ka anaguru-anaguruna, "Kana marata tempona komi madota manggita Aku, Ana nu Manusia naupa aga sampalai lau, tapi komi da'a manggita Aku. 23 Kana maria tau manguli ka komi banepia, 'Kitamo, ri setumo I'a,' atau manguli, 'Ri se'imo I'a.' Tapi ne'e komi malau mantuki ira, 24 sabana tempo Aku marata bali ri dunia, kana ranjani komi. Nasimbayu ewa kila norea ri laerawa pade nombawanta pura-pura langi, iwetu wo'umo tempo karataku. Etu kana rakita ntau pura-pura. 25 Tapi da'apa marata tempona etu, pamulana Aku mpu'u-mpu'u rapandasa pade rapoara tau-tau to natuwu tempo e'i. 26 Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi Nuh nggaolu. 27 Ira nanggoni nanginu pade norongo nosiporongo ewa biasa sampe nabi Nuh nesua riara sakaya betena. Naopu etu nanggabuntu puramo ue ri dunia e'i sampe pura-pura tau ntanina etu namate. 28 Wa'a wo'u pokainggu manusia ri ngata Sodom tempo i Lot neto'o ri setu. Ira nanggoni nanginu, naria nobalu-balu naria neoli. Ira notuja-tuja pade nombangu sapo ewa biasa. 29 Tapi tempona i Lot nalai nggari ngata Sodom etu, eo etu wo'umo nana'umo apu ante watu to najelana nggari langi nompakaropu ira pura-pura ri ngata etu. 30 Masimbayu ka etu wo'u banepia tempo Aku, Ana nu Manusia marata bali ri dunia. 31 Tempo karataku etu tau to nompamaya ka poiri ri bunggu nu sapona ne'e mana'u mesua rara njapo mangala mbara-mbara to naria ri setu. Iwetu wo'u tau-tau to naria ri tinaluna. Ne'e mana ira manjili mpaka ri ngata. Palaimo masasinta! 32 Toramo nuapa to najadi ri ja'i rongo i Lot tempona i'a nompeili nanggita ngata Sodom. 33 Tau aga nantora katuwuna mboto tapi da'a nantuki dota Alatala, da'a namala matuwu mabelo sampe ri kasae-saena. Tapi tau to nantuki Alatala ante da'a nantora katuwuna mboto, etumo tau to namala matuwu mabelo sampe ri kasae-saena. 34 Epemo tesaku! Ane karataku etu tempo nggawengina ane maria romba'a moturu mosaongu ranja, samba'a kana kuala pade samba'a kuboli ri setu. 35 Pade ane karataku tempo eona ane maria besi romba'a mogili mpasanggani-nggani, samba'a kana kuala pade samba'a wo'u kana kuboli ri setu. 36 Pade ane maria langgai romba'a manggawia mpasanggani-nggani ri tinalu, samba'a kana kukeni pade samba'a wo'u kuboli." 37 Pade nekutanamo anaguru-anaguru Yesus, "Pue, ri umba etu majadi?" Nesonomo Yesus, "Ane rakita komi tonji kolaa nasiromu nanggoni, natantumo nanoto ri setu naria binata namate. Iwetu wo'u ante karataku. Natantu manoto wo'u ka komi ri umba rakajadina."
1 Naopu etu Yesus nombatesa ka anaguru-anaguruna saongu porapa mompatuduki ira ala maoso mosambaya, ne'e maopu rara. 2 Niulina, "Ri saongu ngata naria samba'a topotangara to da'a nekou ri ja'i Alatala pade da'a nombabila sanggamanusiana. 3 Pade ri ngata etu naria wo'u samba'a besi tobalu. I'a tunggai narata ri ja'i topotangara etu nerapi tulungi ante nanguli, 'Tulungimo aku mantingayo baliku!' 4 Pamulana topotangara etu da'a nadota mantulungi tobalu etu. Tapi kaopuna nipekirina, 'Naupa aku da'a nekou ri ja'i Alatala pade da'a wo'u nombabila sanggamanusiaku, 5 aginamo aku mantulungi tobalu e'i sabana i'a nombabago aku. Ane aku da'a mantulungi i'a, i'a kana marata-rata mompakalenge aku.' " 6 Pade nangulimo Yesus ka anaguru-anaguruna, "Epemo mpakabelo-belo nuapa to nitesa topotangara to nadenggo etu! 7 Ane tau to nadenggo rarana madota mantulungi tobalu to nerapi-rapi ri ja'ina, ne'epa rauli Alatala. Natantumo I'a kana mantulungi todeana to nipelisina to da'a nenonto mekakai ri ja'ina. Ne'e rapekiri komi I'a nompakasae-sae pade mantulungi ira. 8 Natantumo I'a kana masasinta mantulungi ira. Tapi tempo Aku, Ana nu Manusia marata bali ri dunia e'i, natantumo tau to mpu'u-mpu'u nomparasaya Aku da'a madea." 9 Pade Yesus nombatesa wo'u saongu porapa ri ja'i ntau to nompekiri aga iramo tau to nabelona pade tau ntanina da'a ria gunana. 10 Niulina, "Naria romba'a tau nalau mpaka ri Sapo Mpepue mosambaya, samba'a to Parisi pade samba'a topomperapi balasitee. 11 Tau to Parisi etu nenggore pade nosambaya riara nta'ina, 'Pue Alatala, aku nosukuru ri ja'imu sabana aku e'i da'a nasimbayu ante tau ntanina, etumo tau topebagiu, tau to nadenggo rarana, ante tau to nebualo. Aku nosukuru aku da'a nasimbayu ante topomperapi balasitee etu. 12 Ronggani santipa aku napuasa pade aku nombawai ka Pue sabagia nggari sampulu bagia nggari pura-pura pombarataku.' 13 Tapi tempo topomperapi balasitee etu nosambaya i'a nenggore nggawao. Da'a nabia i'a nakantingoa ri langi. Ante nanjoso rara i'a nanjapa-njapa bombarana ante nanguli, 'Pue Alatala, potowemo aku, sabana aku e'i samba'a tau nasilaka.' " 14 Pade nangulimo Yesus, "Tempona ira romba'a nanjili, natantumo topomperapi balasitee etumo to nikonoa Alatala, da'a tau to Parisi to nalanga rarana etu. Sabana isema-sema to nompakalanga rarana kana rapakaede, pade isema-sema to nompakaede rarana, kana rapakalanga." 15 Nadea tau nanggeni ana-ana ira mpaka ri ja'i Yesus ala I'a mombadika palena ri ngana-ngana etu mombagane ira. Tapi tempo anaguru-anaguru Yesus nanggita etu, ira nanggarau tau-tau etu. 16 Tapi Yesus nompokio ngana-ngana etu pade niulina ka anaguru-anaguruna, "Pakambamo ngana-ngana etu marata ri ja'iku! Ne'e ratagi ira, sabana aga tau to noinggu ewa ngana-ngana e'i to masipato majadi todea riara Poparenta nu Alatala. 17 Toramo! Da'a ria samba'a tau namala majadi todea riara Poparenta nu Alatala ane i'a da'a mekou ri ja'i Alatala nasimbayu ante ngana-ngana e'i." 18 Naria samba'a topanggeniaka nto Yahudi nekutana ri ja'i Yesus, "Guru to nabelona, nuapa masipato kupowia ala aku mamala matuwu mabelo sampe ri kasae-saena?" 19 Nesonomo Yesus, "Nokuya komi nanguli Aku nabelo? Da'a ria ntanina nabelo, aga Pue Alatala. 20 Natantumo ninjanimu parenta Alatala to nanguli, 'Ne'e mogau sala ante tau da'a rongomu mboto, ne'e mepatesi, ne'e mangangga, ne'e modawa ri ngayo ntopotangara, pade bilamo indo umamu.' " 21 Nesonomo tau etu, "Parenta-parenta etu nitukiku puramo nggari kakediku." 22 Sangga nangepe etu nangulimo Yesus ka tau etu, "Danariapa sangaya to masipato mupowia. Pobalumo pura-pura mbara-mbaramu pade palelemo doina etu ka tau-tau nakasiasi ala murata kakalumana ri suruga. Maopu etu kamai, tukimo Aku!" 23 Tapi sangga nangepe tesa Yesus etu nasusamo rara topanggeniaka etu, sabana i'a samba'a tau nakalumana mpu'u. 24 Ninjani Yesusmo nasusa rara ntau etu. Etu sampe niulina, "Nakaja mpu'u tau nakalumana mesua majadi todea riara Poparenta nu Alatala. 25 Nagampapa saongu binata to nabetena ewa unta mesua ri bolo jaru pade samba'a tau nakalumana mesua majadi todea riara Poparenta nu Alatala." 26 Pade nangulimo tau-tau to nangepe tesa Yesus etu, "Ane iwetu natantumo da'a ria samba'a tau to mamala rapakasalama!" 27 Nangulimo Yesus, "Anu da'a nipakule manusia nipakule nu Alatala." 28 Naopu etu nangulimo i Petrus ka Yesus, "Kita we'i, Pue. Kami e'i nompalasi pura-pura nuapa to naria ri ja'i kami pade nantuki Komi." 29 Pade nangulimo Yesus ka ira, "Aku mpu'u-mpu'u notesa ka komi, isema-sema to nompalasi sapona bara rongona bara sampesuwuna bara indo umana bara anana sabana nantuki Alatala, 30 i'a kana mombarata bali riara nggatuwuna we'i-we'i neliu nggadea nggari nuapa to nipalasina. Pade ri tempo nggapurina i'a kana mombarata katuwua mabelo sampe ri kasae-saena." 31 Yesus nompokio sampulu romba'a anaguruna nalau mpasanggani-nggani, pade niulina ka ira, "Epemo mpakabelo-belo! We'i-we'i kita mantende mpaka ri ngata Yerusalem. Pade ri setu pura-pura nuapa to nitulisi nabi-nabi ewa Aku, Ana nu Manusia kana madupa. 32 Aku kana rawai ka tau-tau da'a to Yahudi pade rapongei-ngei ira, rauli sinja'i pade ratailu ira. 33 Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali." 34 Pura-pura nuapa to nitesa Yesus etu da'a ninjani anaguru-anaguruna. Tempona etu nitabuniaka ka ira batuana nggari tesa etu, pade da'a ninjani ira nuapa patuju nu tesa Yesus etu. 35 Tempona Yesus ntora narata ri ngata Yerikho, naria samba'a tau naburo nekatoko nerapi-rapi ri wiwi jala. 36 Tempo niepena gosa ntau dea noliu ri setu, nipekutanana ka tau-tau to namosu i'a, "Nuapa e'i?" 37 Nangulimo ira, "Yesus tau nggari ngata Nazaret etu moliu ri se'i." 38 Nangepe etu nongaremo tau to naburo etu, "Yesus, Muli i Daud, potowemo aku e'i!" 39 Tau-tau to nokolu ka Yesus nangontiaka toburo etu ante nanguli, "Ne'e makanano! Pekalinomo iko!" Tapi toburo etu nantambai nongare ante suara to namangga, "Muli i Daud, potowemo aku!" 40 Nangepe etu, nenontomo Yesus, pade nipekikenina toburo etu mpaka ri ja'ina. Tempona toburo etu narata ri ja'ina, nekutanamo Yesus ka i'a, 41 "Nuapa to mupodota kupowia ka iko?" Nesonomo toburo etu, "Pue, to nipodotaku ala mataku mamala mekita!" 42 Pade nangulimo Yesus ka i'a, "Kitamo! Nabelomo matamu sabana iko nomparasaya!" 43 Kaliu-liu nabelomo mata ntoburo etu, pade nalaumo i'a nantuki Yesus ante nombatoiya Pue Alatala. Tempona pura-pura tau dea ri setu nanggita kajadia etu, ira pura-pura nantoiya Alatala.
1 Sangga naratapa ri ngata Yerikho nesuamo Yesus nombaliunaka ngata etu. 2 Ri ngata etu naria samba'a balengga topomperapi balasitee, sangana i Zakheus. Nakalumana mpu'u i'a. 3 I'a madota manggita Yesus, tapi da'a namala sabana naede korona pade nadea mpu'u tau nantalili Yesus. 4 Jadi Zakheus nokolu nangowa mpaka ri sampu'u kayu ri wiwi jala, tau dea ri purina. Narata ri setu i'a nompone kayu etu pade nekatoko ri pangana ala i'a mamala manggita Yesus tempona I'a moliu ri setu. 5 Tempo Yesus narata ri wayo nggayu etu I'a nantingara ri panga nu kayu etu nanggita i Zakheus, pade niulina, "Zakheus, pana'umo masalisa, sabana Aku madota mpaka ri sapomu eo e'i." 6 Nangepe etu nompari-mparimo i Zakheus nana'u pade nikenina Yesus mpaka ri sapona ante nadamba rarana. 7 Tapi sangga nanggita etu nokagagutu-gutumo pura-pura tau samba'a bo samba'a, "Da'a nabelo Yesus nalau nesai nosanggani ante tau to nadenggo rarana etu!" 8 Tempo Yesus ri sapona nekanggoremo i Zakheus pade niulina ka Yesus, "Pue, santongo mbara-mbaraku kana kuwai ka tau to nakasiasi. Pade isema-sema to nibagiuku, aku kana mompopanjili ka ira patanggani kadeana." 9 Nangepe etu nangulimo Yesus, "Tesamu etu tandaina komi saongu njapo nipakasalamamo eona e'i, sabana nasimbayu ante Abraham totu'amu nggaolu, komi wo'u nomparasaya Alatala. 10 Komi nipakasalama sabana etumo patuju Ana nu Manusia narata ri dunia. Aku narata mangelo ante mompakasalama tau-tau to nalipo riara silaka ira." 11 Tempona tau-tau danangepe tesa Yesus etu, I'a nompapola tesana ka ira ante saongu porapa. Nitesana porapa e'i ka ira sabana namosumo I'a ri ngata Yerusalem pade niparasaya ntodea Pue Alatala kana kaliu-liu mompamula moparenta ri dunia. 12 Jadi Yesus nombatesa ka ira porapa e'i. "Samba'a madika nopatuju malau mpaka ri ngata nakawao ala ralanti majadi magau pade naopupa ralanti manjili mpaka ri ngatana mboto ala moparenta ri setu. 13 Da'apa i'a nalau nipokiona ruru sampulu mba'a batuana pade niwaina ka ira simbau sampeka doi bulawa. Pade niulina ka ira, 'Doi e'i rapogoli komi sampe aku manjili.' Naopu etu nalaimo i'a. 14 Tapi tau-tau ri ngatana ri setu nagigi rara ri ja'ina. Jadi nipakau ira topanggeni tesa mpaka ri ngata nakawao to nikalauna etu. Narata ri setu nangulimo topanggeni tesa etu ka magau to nakuasa ri setu, 'Kami da'a madota madika e'i majadi magau ri bagia kami.' 15 Tapi madika etu kana nilanti najadi magau ri bagia ira. Pade naopu etu nanjilimo i'a mpaka ri ngatana mboto. Narata ri sapona nipokiona sampulu mba'a batuana to niwaina ka doi bulawa etu marata ri ja'ina. Sangga naratapa ira nekutanamo i'a ka ira, 'Sakuyamo ana nu doiku nipogoli komi?' 16 Naratamo batuana pamulana ri ngayona pade nanguli, 'Magau, doi bulawamu sampeka etu nipogoliku najadi sampulu.' 17 Pade nangulimo magau etu ka batuana etu, 'Nabelomo! Komi batua to nabelona. Komi namala niparasaya ante mbara-mbara sakedi. Sabana etu komi kana rapajadi topoparenta sampulu ngata.' 18 Pade naratamo batua karomba'ana ri ngayo magau pade nanguli, 'Magau, doimu sampeka nipogoliku najadi alima.' 19 Pade nangulimo magau ka i'a, 'Komi kana rapajadi topoparenta lima ngata.' 20 Pade naratamo batua ntanina nanguli, 'Magau, e'imo doi bulawa sampeka to niwai komi ka aku. Nibunguku ante kae pade nitabuniakaku ri peto'o to nabelona. 21 Naeka aku ri ja'i komi, sabana ninjaniku komi samba'a tau to nasoa. Komi nangala anu da'a niboli komi, pade nangala asele ri tinalu anu da'a nituja komi.' 22 Nangepe etu nesonomo magau ka batua etu, 'Iko e'i samba'a batua to naja'a! Tesamu mboto kupake mombatangara iko. Ninjanimu aku samba'a tau nasoa. Aku nangala anu da'a niboliku pade aku nangala asele ri tinalu anu da'a nitujaku. 23 Ane iwetu nokuya iko da'a nombawai doiku etu ka tau to nompopoana doi ala tempona aku marata mamala kuala mpanjili doiku ante anana?' 24 Pade niuli magau etu ka tau-tau to naria ri setu, 'Alamo doi bulawana sampeka etu rawai ka batua to naria doi bulawana sampulu mpeka etu.' 25 Tapi nangulimo tau-tau etu ka magau, 'Magau, nariamo doina sampulu mpekana!' 26 Nesonomo magau etu, 'Nakonomo etu, tapi toramo! Isema to naria nadea kana ratambai ka i'a. Tapi isema naria aga sakedi, etu wo'u kana raala mpakaopu nggari ja'ina. 27 Pade we'i-we'i kenimo ri ngayoku bali-baliku etu to da'a nadota mantarima aku majadi magau ira. Patesimo ira pura-pura ri ngayoku se'i!' " 28 Naopu Yesus notesa ka tau pura-pura etu nalaumo I'a nokolu ka ira mpaka ri ngata Yerusalem. 29 Tempo namosumo I'a ri ngata Betfage bo ngata Betania ri Bulu Zaitun, nipakauna romba'a anaguruna mokolu ka I'a. 30 Niulina ka ira, "Kalaumo komi mpaka ri ngata to namosumo ri ngayota etu. Tempona komi mesua ri sa'a komi kana mombarata saongu ana keledai nitataka to da'apa sanggani nipesawi ntau. Wolemo ana keledai etu nggari potatakana pade umbumo wemai. 31 Ane maria tau mompekutana komi, 'Nokuya komi nombawole ana keledai etu?' tesa ka tau etu, 'Pue paraluu mompake keledai e'i.' " 32 Jadi nalaumo romba'a anaguru Yesus to nipakau mokolu etu, pade nirata ira nasimbayu ewa nuapa to niuli Yesus etu. 33 Tempona ira nombawole ana keledai etu, nekutanamo puena ka ira, "Nokuya komi nombawole ana keledai etu?" 34 Nesonomo ira, "Pue paraluu mompake keledai e'i." 35 Naopu etu niumbu iramo ana keledai etu mpaka ri ja'i Yesus. Niboli ira pakea ri bengo keledai etu pade nitulungi ira Yesus nesawi ri bengona. Naopu etu nalaumo ira pura-pura. 36 Tempona Yesus noliu ante keledai etu, tau-tau nombajini buya ira ri jala nombatomunaka I'a. 37 Tempo Yesus ntora narata ri ngata Yerusalem ri jala to notua nggari Bulu Zaitun etu, nompamulamo pura-pura todea topantuki I'a etu nongare-ngare nantoiya Alatala ante nadamba rara sabana pura-pura kabaraka to nikita ira. 38 Nongare-ngaremo ira, "Perapi Pue mombagane Magau to narata niposumba Alatala! Nosinggabelomo kita ante Alatala! Ratoiyata Alatala ri suruga!" 39 Tempo etu naria bara sakuya mba'a to Parisi nggari olo ntau dea etu nongare ka I'a, "Guru, ne'e rapakamba topantuki-topantuki Komi notesa iwetu!" 40 Tapi nesonomo Yesus, "Parasayamo Aku, ane ira da'a motesa iwetu, natantumo watu-watu e'i kana mongare mombatoiya Alatala!" 41 Tempo namosumo Yesus ri ngata Yerusalem pade nikitana ngata etu ri ngayona, notumangimo I'a nantangi pue ngata etu. 42 Niulina, "Nabelo mpu'umo ane eo e'i komi mangginjani nuapa to raparaluu rakawia komi ala maria posinggabelo ri ngatamu e'i. Tapi kakonona da'a ninjani komi. 43 Sabana etu kana marata tempona ngata komi rapatiku pade raewa balimu. Ngatamu kana rawala ntiku ira sampe mana mamala komi mesuwu, pade komi ralawa mpii nggari umba-umba. 44 Ngatamu kana ragero pade komi pura-pura kana rapatesi ira. Da'a mana maria watu to nipake komi nowia ngata e'i rapakamba ira mosisunju nau kamba saongu, sabana da'a ninjani komi tempo Alatala narata mompakasalama komi." 45 Naopu etu nalaumo Yesus nesua riara Sapo Mpepue. Ri setu nompamulamo I'a nompopalai topotomu to naria ri setu. 46 Niulina ka ira, "Riara Buku Nagasa naria nitulisi iwe'i: 'Sapoku kana rapake ewa peto'o mosambaya.' Etu to niuli Alatala, tapi komi ri se'i nompajadi Sapo Mpepue e'i peto'o parampo!" 47 Naopu etu eo-eo Yesus nesua nopaguru riara Sapo Mpepue. Balengga-balengga topanggeni agama ante guru-guru agama bo totu'a-totu'a nto Yahudi danangelo jala mompatesi I'a. 48 Tapi da'a nirata ira jala mowia etu sabana pura-pura tau mpu'u-mpu'u madota mangepe tesana.
1 Naria sanggani Yesus nopaguru bo nompatolele Kareba Belo ka tau-tau riara Sapo Mpepue. Tempo etu naratamo balengga-balengga topanggeni agama, guru-guru agama ante totu'a-totu'a nto Yahudi, 2 pade nangulimo ira ka I'a, "Uli ka kami ante kuasa nggari umba Komi nompopalai topotomu nggari Sapo Mpepue? Isema nombawai kuasa etu ka Komi?" 3 Nesonomo Yesus, "Da'apa Aku mombasono pompekutanamu naria wo'u sangaya kupekutana ka komi. Uli ka Aku 4 isema nombawai kuasa ka Yohanes Topediu mombadiu tau? Alatala atau manusia?" 5 Pade nompamulamo ira nosipekutana samba'a bo samba'a, "Iwenu kita mombasono I'a? Ane kita manguli kuasa Yohanes nggari ja'i Alatala I'a kana manguli ka kita, 'Ane iwetu nokuya komi da'a nomparasaya Yohanes?' 6 Tapi ane kita manguli kuasana nggari ja'i manusia, natantumo pura-pura tau ri se'i kana mombarempe kita ante watu sampe mamate sabana ira pura-pura nomparasaya Yohanes mpu'u-mpu'u samba'a nabi." 7 Jadi nesonomo ira ka Yesus, "Da'a ninjani kami nggari umba kuasana." 8 Pade nangulimo Yesus ka ira, "Ane iwetu da'a wo'u kutesa ka komi ante kuasa nggari umba Aku nowia mpengele-ngele etu." 9 Naopu etu Yesus nombatesa ka tau dea porapa iwe'i: "Naria samba'a tau to nombatuja anggur ri tinaluna. Naopu etu nipajana tinalu etu ka bara sakuya mba'a topokarajaa pade nalaimo i'a mpaka ri ngata ntanina neto'o ri setu nasae. 10 Sangga naratapa tempona mompui wua anggur nipakaunamo samba'a batuana malau mpaka ri ja'i ntopokarajaa tinalu etu ala mantarima bagiana nggari asele ntinalu etu. Tapi topokarajaa tinalu etu nombaboba batua etu pade nompakau i'a nanjili ante pale ntoya. 11 Naopu etu pue ntinalu etu nompakau wo'umo samba'a batua ntanina, tapi batua etu wo'u niboba pade nipakaeya ntopokarajaa etu, pade nipakau nanjili ante pale ntoya wo'u. 12 Sangganipa pue ntinalu etu nompakau batua katolumba'ana. Tapi batua etu wo'u niboba sampe nalei pade nitajiaka ira mpaka ri sawaliku tinalu etu. 13 Kaopuna nangulimo pue ntinalu etu, 'Aginamo aku mompakau anaku mboto to nipotoweku malau mpaka ri ja'i ira. Natantumo ira kana mekou ri ja'ina.' 14 Tapi tempona topokarajaa tinalu etu nanggita ana pue ntinalu etu, nangulimo ira samba'a ka roa ntanina, 'E'imo i'a, ana pue ntinalu. Kamaimo kita mompatesi i'a ala tinalu e'i raalata majadi bagiata.' 15 Pade i'a nikeni ira mpaka ri sawaliku tinalu etu pade nipatesi ira." Pade nangulimo Yesus ka tau to nangepe porapa etu, "Tempo pue ntinalu etu matingguli mpaka ri tinaluna etu, nuapa rapowiana? 16 Natantumo i'a kana mompatesi topokarajaa etu pura-pura, pade mompokio tau ntanina marata mokarajaa ri tinalu etu." Nangepe etu nangulimo tau dea ka Yesus, "A, da'a mamala majadi iwetu!" 17 Tapi Yesus nanggita ira ante notesa, "Kana majadi iwetu banepia sabana etumo batuana tesa to nitulisi riara Buku Nagasa iwe'i: 'Watu to nitajiaka ntopowia sapo, watu etumo to najadi palo mpondasi to neliu nggaroso.' " 18 Pade nanguli wo'umo Yesus, "Isema-sema to manawu ri watu etu kana marege, pade isema-sema to raparumpi watu etu kana marege majadi sowu." 19 Ninjani guru-guru agama Yahudi bo balengga-balengga topanggeni agama porapa etu nipawela Yesus ka ira. Sabana etu ira madota manjoko I'a tempona etu wo'u, tapi ira naeka ka tau dea. 20 Jadi ira nangelo loga to nabelona ala mamala manjoko Yesus. Ira nombasogo bara sakuya mba'a tau tumoni-moni ira tau to nanoa rarana. Tapi tau-tau etu nipakau ira mangelo kasala tesa Yesus ala I'a mamala rakeni rapangadu ri ngayo Gubernur. 21 Jadi nalaumo ira ri ja'i Yesus pade nanguli, "Guru, ninjani kami pura-pura nuapa to nitesa bo to nipatuduki Komi etu nakono. Ninjani kami wo'u Guru da'a nompoposisala tau, aga nompatuduki dota Alatala to nakonona ka pura-pura tau. 22 Sabana etu uli ka kami nantuki Atura-atura agama masipato mombabayari balasitee ka Magau Kaisar bara da'a?" 23 Tapi ninjani Yesus bagiu ira etu. Jadi niulina, 24 "Popokita ka Aku sampeka doi salaka. Lenje ante sanga isema to naria ri doi etu?" Nesonomo ira, "Lenje bo sanga Magau Kaisar." 25 Pade nangulimo Yesus ka ira, "Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala." 26 Kaopuna da'a ria nirata ira nau aga sakedi kasala nggari tesa Yesus ri ngayo ntau dea. Ira aga nekalino ante nogumaa nangepe pesono Yesus etu. 27 Naria bara sakuya mba'a to Saduki narata ri ja'i Yesus. Ane to Saduki etu, ira to Yahudi to nomparasaya tau namate da'a mana matuwu bali nggari kamatena banepia. 28 Nangulimo ira ka Yesus, "Guru, nabi Musa nantulisi atura e'i ka kita: 'Ane rapana maria samba'a langgai norongo pade tau etu namate da'apa ria anana, sampesuwuna mboto kana momporongo baluna etu ala muli ira romba'a etu majadi muli sampesuwuna to namatena etu.' 29 Naria ira nosampesuwu pitumba'a langgai bayangi. Ulumbuana norongomo tapi da'apa ira njamboko noana namatemo i'a. 30 Jadi tua'ina karomba'ana nomporongo baluna etu, tapi da'apa ira noana i'a wo'u namate. 31 Iwetu wo'u to najadi ante tua'ina katolumba'ana sampe ri kapapituna. 32 Pade kaopuna besi etu wo'u namate. 33 Jadi tempo tau to namate matuwu bali nggari kamatena banepia besi etu rongo isema, sabana i'a niporongo ira pitumba'a?" 34 Pade nesonomo Yesus ka ira, "Ane tau-tau ri dunia e'i, ira norongo bo niporongo. 35 Tapi ane tau-tau to masipato rapakatuwu Alatala bali pade matuwu ri suruga tempo etu, ira da'a mana morongo bara raporongo. 36 Ira mana morongo sabana ira mana mamate-mate. Ira kana masimbayu ante malaeka i Pue. Ira majadi ana-ana Alatala sabana ira naopu nipakatuwu bali nggari kamatena. 37 Pade nabi Musa mboto nompakanoto ka kita tomate kana matuwu bali. Riara mpotulisina ewa santungu gumbu to najelana da'a nikoni nu apu nikasangaina Pue Alatala, 'Alatala Abraham, Alatala Ishak bo Alatala Yakub.' 38 Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi ane Pue Alatala nikasangai Musa Alatala Abraham, Ishak ante Yakub, etu batuana ira da'a tau to namate tapi tau to natuwuna, sabana riara mpanggita Alatala, pura-pura tau danatuwu." 39 Naopu Yesus notesa iwetu nangulimo bara sakuya mba'a guru agama ri setu ka I'a, "Nabelo mpu'u pesono Guru." 40 Ira nanguli iwetu sabana nikita ira to Saduki etu mana nabia mekutana ri ja'i Yesus. 41 Pade nangulimo Yesus ka ira, "Iwenu sampe tau nanguli Magau to Mompakasalama to nijanji Alatala aga muli Magau Daud? 42 Riara buku Mazmur i Daud mboto nanguli iwe'i: 'Pue Alatala nanguli ka Pueku, kamai pekatokomo ri sabingga ngganaku, 43 sampe Aku mompowia pura-pura balimu mekou ri ja'imu.' 44 Jadi ane Magau to Mompakasalama niuli Daud Puena, iwenu sampe I'a nireke aga muli i Daud?" 45 Tempo tau dea danangepe tesa Yesus, nangulimo I'a ka topantuki-topantuki I'a, 46 "Pakabelo-belo ala ne'e komi moinggu ewa guru-guru agama. Ira aga nompokono nanjayo-njayo nobaju nandoe ala rabila ntau, pade ira aga madota rabila ntau tempo ira ri potomu. Tempo ira nesua riara Sapo Mpodade ira aga madota mekatoko ri peto'o-peto'o to nibilana. Wa'a wo'u tempo ira ri posusa. Ira aga madota rabila ntodea ri setu. 47 Ira nombabagiu tobalu-tobalu besi ala mombarata sapo besi-besi etu. Pade ira nantabuniaka pokainggu ira to naja'ana ante nosambaya nasae-sae. Etu sampe meliu nggatomo pesuku to rapawela ka ira banepia!"
1 Ri Sapo Mpepue Yesus nanggita tau to nakalumana nombasuaraka doi ira nadea riara peti mpesomba ri setu. 2 Nikitana wo'u samba'a besi tobalu to nakasiasi mpu'u nombasuaraka rompeka doi tambaga to nakura mpu'u olina. 3 Sangga nanggita etu nangulimo I'a, "Aku mpu'u-mpu'u notesa ka komi, pewai tobalu to nakasiasi etu neliu nggadea nggari pewai ntau pura-pura, 4 sabana ira nombawai nggari labi nu doi ira. Tapi naupa tobalu e'i nakasiasi mpu'u i'a nombawai pura-pura doi to naria ri ja'ina." 5 Naria bara sakuya mba'a topantuki Yesus notesa ka I'a, "Sapo Mpepue e'i nipakaramba mpu'u ante watu-watu to nagaya-gaya pade ante mbara-mbara to narambana to niwai ntau ka Alatala." Nangepe etu nangulimo Yesus, 6 "Kana marata tempona banepia pura-pura to nikita komi e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero." 7 Pade nekutanamo ira ka Yesus, "Guru, nepia etu pura-pura majadi? Nuapa tandaina to mompakatantu namosumo tempona pura-pura to niuli Komi etu majadi?" 8 Nesonomo Yesus, "Pakabelo-belo ala ne'e komi rabagiu, sabana madea tau kana marata mompobalu sangaku. Maria samba'a manguli, 'Akumo Magau to Mompakasalama!' Pade maria wo'u to manguli, 'Naratamo tempona Yesus marata bali ri dunia!' Tapi ne'e komi mantuki ira. 9 Pade ne'e komi maeka ane mangepe kareba posimpatesi ante posiewa. Etu pura-pura kana majadi ntani ruru. Tapi etu da'apa tandaina kaopu nu dunia." 10 Pade niulina wo'umo, "Tempo etu tau-tau nggari sangata kana mosibali ka tau-tau to sangatana, pade magau simbau magau kana mosiewa. 11 Kana maria lingu to naro'ona. Ri umba-umba ri dunia kana maria kamateoro ante ju'a mpendai njilele. Pade ri langi maria tandai-tandaina to mompakaeka tau. 12 Tapi da'apa pura-pura etu majadi komi kana rasoko ntau ntani ruru pade rapandasa ira. Komi kana ratangara ri polibu nto Yahudi pade rasuaraka riara tarunggu. Pade komi rakeni wo'u ri ngayo magau-magau ante gubernur-gubernur sabana komi nomparasaya Aku. 13 Etumo loga to nabelo ka komi mompakanoto ka ira isema Aku. 14 Pakasaongumo raramu ne'epa ruru mompekiri nuapa rauli komi mombasono ira, 15 sabana tempona etu wo'umo Aku mboto kana mombawai ka komi pompekiri to nabelona ala komi mamala motesa mombasono ira. Etu sampe balimu da'a mamala mombabali tesamu atau mombasapu nuapa to rauli komi. 16 Tempona etu indo umamu, sampesuwu sararamu ante roamu kana mombasoko ante mombakeni komi ri ja'i ntopotangara. Pade maria bara sakuya mba'a nggari komi to rapatesi ira. 17 Komi kana raporau rara pura-pura tau sabana komi nomparasaya Aku. 18 Tapi naupa iwetu komi kana rapakasalama Alatala. Sambalaa wulu wo'o nggari balenggamu da'a malipo. 19 Pakaroso pomparasayamu ri ja'iku sabana ante iwetu komi mamala mombarata katuwua mabelo sampe ri kasae-saena." 20 "Ane rakita komi ngata Yerusalem e'i rapatiku tantara balina natantumo ranjani komi mana masaeka ngata e'i rapakagero. 21 Tempona etu tau-tau to naria ri Bagia Yudea e'i kana mangowa malai mpaka ri buluna. Pade tau-tau to naria riara ngata Yerusalem e'i kana malai nggari ngata e'i. Pade tau to naria ri sawalikuna ne'e mesua riarana, 22 sabana eo etumo tempo Alatala mombasuku to Yahudi. Etu mompakadupa pura-pura to nitulisi nabi-nabi Alatala nggaolu. 23 Ri eo etu mandasa mpu'umo besi-besi to matiana bo ira to danompatomi. Pura-pura tau ri ngata e'i kana mandasa mpu'u sabana etumo tempo Alatala marata mombasuku to Yahudi. 24 Kana maria to Yahudi rapatesi ante guma, pade maria ntanina to rasoko ratawani balina rakeni mpaka ri umba-umba ri dunia. Pade tempona etu ngata Yerusalem e'i kana mamala ka tau-tau da'a to Yahudi pade raparenta ira sampe nagana tempona to nipakatantu Alatala ka ira." 25 "Pade kana maria tandai-tandai rakita komi ri mata eo, ri wula ante ri betu'e-betu'e. Ri dunia e'i pura-pura tau kana mawiora rarana ante maingu mangepe pogu balumba bete moruu ewa guntu. 26 Tempona etu tau-tau kana malipo rarana nggari eka ira mompekiri nuapa to majadi ri dunia, sabana kuasa-kuasa to naria ri langi kana ragagoya pura. 27 Naopu pura-pura etu majadi ira kana manggita Aku, Ana nu Manusia mana'u riara kulimu ante kuasa bo karemeku to nipogumaa. 28 Tempo pura-pura kajadia etu mompamula majadi, pakasadia koromu pade mantingoa ri langi, sabana sampalaipa maratamo Aku, Magau to Mompakasalama komi." 29 Pade Yesus nombatesa saongu porapa ka topantuki-topantuki I'a iwe'i: "Kitamo kayu ara ante pura-pura kayu ntanina. 30 Ane rakita komi kayu noroya, natantumo ninjani komi namosumo eo mapane. 31 Iwetu wo'u ane komi manggita kajadia-kajadia to nitesaku pani'a, kana ranjani komi mana masaeka Alatala marata moparenta ri dunia. 32 Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate. 33 Langi bo dunia kana malipo tapi tesaku kana maroo sampe ri kasae-saena." 34 Pade nangulimo Yesus, "Komi kana mainga. Ne'e komi makako gaga aga mosusa-susa bo manginu mpakalangu-langu pade aga mompekiri anu niparaluu komi matuwu eo-eo. Ane komi da'a mainga, ante da'a ranjani-njani komi Aku, Ana nu Manusia e'i kana marata ri ja'i komi nasimbayu ante tonji da'a ninjani-njanina sampegoli i'a niso'o tinggolu. 35 Iwetu wo'u pura-pura manusia ri dunia e'i. Ante da'a ranjani-njani ira sampegoli Aku, Ana nu Manusia kana marata ri ja'i ira pura-pura. 36 Sabana etu komi kana mainga-inga. Ne'e menonto-nonto merapi doa ala komi mompakule manta'amaka pura-pura kajadia etu ante masalama, pade ala komi mamala mantingayo Aku, Ana nu Manusia." 37 Ri tempo eona Yesus nopaguru ri Sapo Mpepue, pade tempo nggawengina I'a nalau naturu ri Bulu Zaitun. 38 Pade mpadondo-mpadondo pura-pura tau narata ri Sapo Mpepue ala mangepe tesana.
1 Tempona etu namosu ntoana posusa to niuli nto Yahudi Posusa Roti Da'a Nidika Ragi. Posusa etu to niuli ira wo'u Posusa Paska. 2 Balengga-balengga topanggeni agama ante guru-guru agama danangelo jala mompatesi Yesus nggalino, sabana ira naeka ri ja'i ntau dea. 3 Ri tempona etu nesuamo Magau nu Seta riara nta'i Yudas Iskariot, samba'a nggari sampulu romba'a anaguru Yesus. 4 Naopu nipesua Magau nu Seta nalaumo Yudas mpaka ri ja'i balengga-balengga topanggeni agama ante balengga-balengga topojaga Sapo Mpepue ala motesa ante ira iwenu i'a mamala mompobalu Yesus ka ira. 5 Nangepe etu nadamba mpu'umo rara ira, pade ira nojanji mombawai doi ka i'a. 6 Yudas wo'u nasituju ante nia ira, pade nalaimo i'a nggari setu mangelo loga to nabelona mombawai Yesus ka ira tempo da'a ria tau dea. 7 Naratamo eo mposusa Roti Da'a Nidika Ragi, etumo tempona manjambale ana bimba rakoni ri posusa etu. 8 Pade Yesus nompakau i Petrus bo Yohanes iwe'i: "Kalau pakasadia ka kitamo panggoni Posusa Paska ala kita manggoni mpasanggani-nggani." 9 Nekutanamo ira romba'a, "Ri umba rapodota Komi rapompakasadia kami panggoni etu?" 10 Nesonomo Yesus, "Tempona komi mesua rara ngata samba'a langgai manggeni gumbu nu ue kana mosintomu ka komi. Tukimo i'a mpaka ri sapo to rakalauna. 11 Pade ulimo ka pue njapo ri setu, 'Guru nompakau kami mompekutana komi, ri umbana tombi rapanggonina panggoni Posusa Paska mpasanggani-nggani ante anaguruna?' 12 Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita." 13 Jadi nalaumo i Petrus bo Yohanes etu nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu. 14 Sangga naratamo tempona manggoni panggoni Posusa Paska etu, nekatokomo Yesus nanggoni mpasanggani-nggani ante anaguruna. 15 Nangulimo Yesus ka ira, "Nabete mpu'u raraku manggoni panggoni Paska e'i mpasanggani-nggani ante komi da'apa Aku rapandasa. 16 Parasayamo tesaku e'i! Aku mana manggoni panggoni Paska e'i sampe marata tempona batuana Posusa Paska to nakonona rapakadupa. Etu kana majadi tempo Pue Alatala marata momparenta manusia ri dunia e'i." 17 Naopu etu niala Yesus saongu sanggiri panginu pade niulina tarima kasi ka Pue Alatala. Naopu etu niulina ka anaguru-anaguruna, "Alamo panginu e'i, pade inu komi mpasanggani-nggani. 18 Epemo! Nompamula we'i-we'i Aku mana manginu anggur sampe marata tempona banepia Alatala moparenta ri dunia e'i." 19 Naopu etu niala Yesus wo'umo roti pade niulina tarima kasi ka Pue Alatala. Pade roti etu nibingga-binggana pade nibagina ka ira ante nanguli, "E'imo koro bataku to rawai mantolo silaka komi. Kawiamo ada e'i ala mombatora Aku." 20 Sangga naopu ira nanggoni, iwetu wo'u nikawiana ante panginu. Nialana saongu sanggiri pade niulina, "Panginu e'i tandai pojanji Alatala to nabouna ante manusia. Pojanji etu rapakaasa ante leiku to rapatiti ka komi. 21 Tapi kitamo! Tau to mompobalu Aku ka baliku ngina naria mpasanggani ante Aku ri se'i. 22 Aku, Ana nu Manusia kana mamate nantuki to nipakatantu Alatala ka Aku. Tapi mandasa mpu'umo tau to mompobalu Aku etu!" 23 Pade nompamulamo anaguru-anaguru Yesus nosipekutana samba'a bo samba'a, "Isema nggari tatongota e'i to mompobalu Yesus?" 24 Pade neumbamo posinggarau ri tatongo anaguru-anaguru Yesus bara isema nggari ira nireke to neliu nggalanga katuwuna. 25 Nangepe etu nangulimo Yesus ka ira, "Ri dunia e'i magau-magau nabiasa aga nompakau todea ira ala mompopokita kalanga nu katuwuna. Naupa iwetu ira madota rauli tau to nabelo rarana. 26 Tapi da'a masipato komi moinggu iwetu. Kakonona komi kana moinggu iwe'i: to nalanga katuwuna nggari komi kana majadi nasimbayu ante to naedena, pade topanggeniaka komi kana majadi nasimbayu ante batua. 27 Isema to nalanga katuwuna? Tau to nekatoko nanggoni atau tau nombatande i'a? Natantumo tau to nekatoko nanggoni etu to neliu nggalanga katuwuna. Tapi Aku e'i, Pue komi, najadi nasimbayu ante tau nombatande komi. 28 Komimo to nosanggani-nggani ante Aku tempo Aku nipandasa. 29 Sabana etu nasimbayu ewa Umaku Pue Alatala mombawai ka Aku kuasa moparenta banepia, iwetu wo'u Aku mombawai ka komi kuasa moparenta banepia. 30 Komi kana mosusa madamba-damba ante Aku tempo Aku majadi Magau. Pade komi kana mekatoko ri sampulu rongu pekatoko magau momparenta to Yahudi, etumo muli nggari sampulu romba'a ana Israel." 31 Pade nangulimo Yesus ka i Simon Petrus, "Simon, epemo tesaku! Magau nu Seta niwai Alatala ka logamo mompesoba komi pura-pura. Pesobana etu nasimbayu ewa tau nombawaro pae. 32 Tapi Aku naopumo nosambaya ka iko, Simon, ala iko da'a mokanggaura momparasaya Aku. Pade tempo iko matingguli bali momparasaya Aku, iko kana mompakaroso pomparasaya roamu wo'u." 33 Pade nesonomo i Petrus, "Pue, aku nasadia mesua riara tarunggu mpasanggani-nggani ante Komi, pade ane Komi rapatesi aku wo'u nasadia mamate mpasanggani-nggani ante Komi!" 34 Tapi nesonomo Yesus, "Parasayamo Petrus, da'apa manu mora'o ngina bobaya tolungganimo iko mombasapu Aku." 35 Naopu etu nangulimo Yesus ka ira pura-pura, "Tempo komi nipakauku bopia nalau nompatolele Kareba Belo niuliku ne'e rakeni doi bara batutu bara sapatu. Tempona komi nalau naria to nakura ri ja'i komi?" Nesonomo ira, "Da'a ria nakura nuapa-nuapa." 36 Pade nangulimo Yesus, "Nakonomo etu. Tapi we'i-we'i isema naria doi bara batutu kana rakenina. Pade isema da'a naria gumana kana rapobaluna baju rapangoli samata guma. 37 Etu paraluu we'i-we'i sabana kana rapakadupa nuapa to nitulisi riara Buku Nagasa ewa Aku iwe'i: 'I'a kana rauli samba'a tau to naja'a.' Nuapa to nitulisi etu kana madupa we'i-we'i." 38 Pade nangulimo ira, "Pue, kitamo. E'imo romata guma." Nesonomo Yesus, "Naganamo etu." 39 Pade nalaumo Yesus ante anaguru-anaguruna nantende ewa biasa mpaka ri Bulu Zaitun. 40 Sangga naratapa ri setu, nangulimo Yesus ka ira, "Posambayamo ala ne'e komi mawela pesoba." 41 Naopu etu nalaumo I'a nakawao sakedi nggari ja'i ira, pade notimbakotumo I'a nosambaya ka Pue Alatala iwe'i: 42 "Umaku, ane mupodota, pakakawaomo nggari ja'iku kasusa bo kapari e'i! Tapi ne'e dotaku to majadi, aga dotamu mboto." 43 Naopu etu naratamo samba'a malaeka nggari suruga nompakaroo rarana. 44 Pade nosambaya wo'umo Yesus ante mpu'u-mpu'u, sampe inina najadi ewa lei natiti ri tana sabana nasusa mpu'u rarana. 45 Naopu nosambaya nalaumo Yesus nompakamosu anaguru-anaguruna. Niratana ira pura-pura napisi sabana naluru mata ante nasusa rara. 46 Pade niulina ka ira, "Nokuya komi napisi? Pembangumo pakanoto raramu pade posambayamo ala ne'e komi mawela pesoba!" 47 Tempona Yesus danotesa ka ira, naratamo bara sakuya mpulu mba'a tau to nikeni Yudas samba'a nggari sampulu romba'a anaguru Yesus etu. Yudas nompakamunji Yesus ala mombaeki I'a. 48 Tapi nangulimo Yesus ka i'a, "Yudas, iko nombaeki Aku ewa roamu, tapi kakonona iko mombawai Aku, Ana nu Manusia ka baliku." 49 Tempona anaguru-anaguru Yesus to naria ri setu nanggita nuapa to majadi, nangulimo ira, "Pue, we'i-we'i kami mombatimbe ira ante guma?" 50 Pade samba'a nggari ira nantimbe batua nu Balengga Topanggeni Agama sampe napudu talinga ngganana. 51 Tapi Yesus nombatagi ira, "Ne'e mana metimbe!" Pade nialana talinga to nanawu etu nipatakana bali. 52 Pade nangulimo Yesus ka balengga-balengga topanggeni agama bo balengga-balengga topojaga Sapo Mpepue bo totu'a-totu'a ngata to narata ri setu manjoko I'a, "Iwenumo? Niuli komi Aku e'i parampo sampe komi kana marata ante guma bo pato manjoko Aku? 53 Eo-eo Aku naria nosanggani ante komi ri Sapo Mpepue tapi da'a nabia komi nanjoko Aku. Tapi damo wengina e'i pade narata komi manjoko Aku. Tempo rumau e'i wo'umo Magau nu Seta nakuasa." 54 Naopu etu Yesus nikeni ira mpaka ri sapo Balengga Topanggeni Agama. Petrus nantuki ira nggari purina nakawao sakedi sampe narata ri sapo etu. 55 Ri tatongo lalowo ri setu naria apu nipakawaa ntau raponeru. Jadi nalaumo Petrus nekatoko ri tatongo ntau noneru ri setu. 56 Tempo i'a nekatoko namosu apu etu naria samba'a batua besi nombalele mata i'a pade nanguli, "Tau e'i wo'u naria nosanggani ante Yesus!" 57 Tapi Petrus nesapu, niulina, "Da'a nakono! Da'a ninjaniku I'a!" 58 Da'apa nasae naria wo'u samba'a tau ntanina ri setu nanggita Petrus pade nanguli, "Iko wo'u samba'a nggari topantuki Yesus!" Tapi nangulimo Petrus, "Da'a nakono!" 59 Kira-kira saongu jaa kaliuna naria wo'umo samba'a tau ntanina nanguli, "Natantumo tau e'i topantuki Yesus, sabana i'a wo'u samba'a tau nggari Bagia Galilea!" 60 Tapi nesonomo Petrus, "Da'a! Da'a ninjaniku nuapa patujumu!" Tempo etu wo'u, da'apa naopu Petrus notesa, nora'omo manu. 61 Pade neilimo Yesus nanggita Petrus. Ri setumo natitora rara Petrus ewa nuapa to niuli Pue ka i'a pangane iwe'i: "Da'apa manu mora'o ngina bobaya, tolungganimo iko mombasapu Aku." 62 Pade nesuwumo Petrus nggari setu nalau nageo nakanjodu-njodu. 63 Tau-tau nombajagai Yesus nompongei-ngei ante nombaboba I'a. 64 Ira nombalamu matana pade nombaboba I'a ante nanguli, "E, nabi! Ulimo sema to nombaboba Iko!" 65 Pade ira tunggai nanguli sinja'i I'a. 66 Naeompadondo nasiromumo totu'a-totu'a nto Yahudi, balengga-balengga topanggeni agama ante guru-guru agama, pade Yesus nikeni ri ja'i Polibu Bete Nto Yahudi etu. 67 Nangulimo ira ka Yesus, "Ane Iko Magau to Mompakasalama, ulimo ka kami!" Nesonomo Yesus, "Aku da'a manguli nuapa-nuapa sabana natantumo komi da'a momparasaya tesaku, 68 pade ane Aku mekutana ri ja'i komi da'a madota komi mombasono pompekutanaku. 69 Tapi nompamula we'i-we'i Aku, Ana nu Manusia kana mekatoko ri peto'o to nibila ri panggana Alatala to nakuasa." 70 Pade nekutanamo ira pura-pura, "Ane iwetu, Iko e'i Ana nu Alatala?" Nesonomo Yesus, "Iyo, ewa to niuli komi etu, nakono." 71 Pade nangulimo ira samba'a bo samba'a, "Ane iwetu da'a mana paraluu sabi ntanina. Niepeta mbotomo tesana!"
1 Pade nekanggoremo pura-pura Topolibu Bete nto Yahudi etu nalau nanggeni Yesus mpaka ri ja'i Gubernur Pilatus. 2 Ri setu nompamulamo ira nompangadu I'a. Nitesa ira ka i Pilatus, "Kami nombarata tau e'i nanggeni todea nangewa pomarenta Roma. I'a nombatagi tau mombabayari balasitee ri ja'i Magau Kaisar, pade niulina wo'u I'a mboto Magau to Mompakasalama to nijanji Alatala." 3 Nangepe etu nekutanamo Pilatus ka Yesus, "Komimo Magau nto Yahudi?" Nesonomo Yesus, "Ewa to niuli komi etu, Uma, nakono." 4 Naopu etu nangulimo i Pilatus ka balengga-balengga topanggeni agama ante tau dea etu, "Iwenumo, tau e'i niparesaku da'a ria salana!" 5 Tapi ira nantambai nompangadu ante nanguli, "Ante pepatudukina I'a nanggeni todea ri jala to nasalana ri pura-pura ngata ri Bagia Yudea e'i. I'a nompamula nggari Bagia Galilea, sampe narata ri se'i." 6 Nangepe etu nekutanamo i Pilatus, "Tau e'i tau nggari Bagia Galilea?" Nesonomo tau, "Iyo, I'a etu tau nggari Galilea." 7 Tempona ninjanina Yesus tau nggari Bagia Galilea, etumo bagia to niparenta Magau Herodes, Pilatus nompakau tau nanggeni Yesus ri ja'i Magau Herodes etu. Tempona etu Magau Herodes wo'u naria ri ngata Yerusalem. 8 Tempona Magau Herodes nanggita Yesus nadamba mpu'u rarana, sabana niepenamo tesa ewa Yesus pade nasaemo i'a madota manggita I'a. Nisarumakana bara mamala i'a manggita Yesus mowia kabaraka. 9 Sabana etu nipekutana-tanana ri ja'i Yesus, tapi Yesus da'a ria nesono. 10 Naopu etu balengga-balengga topanggeni agama ante guru-guru agama to naria ri setu narau mpu'u rara ira nompangadu Yesus. 11 Naopu etu Magau Herodes ante tantara-tantarana nanguli sinja'i bo nompongei-ngei I'a. Pade Yesus nipopasua ka baju magau pade nipopanjilina mpaka ri ja'i Pilatus. 12 Eona etu wo'u Magau Herodes ante Pilatus nosimporoamo, naupa bopia ira aga nosipobali. 13 Pilatus nompakau mompasiromu balengga-balengga topanggeni agama, totu'a-totu'a ngata ante todea etu, 14 pade niulina ka ira pura-pura, "Komi nanggeni tau e'i ri ja'iku ante nanguli I'a nanggeni tau nangewa pomarenta. Tapi we'i-we'i I'a niparesakumo ri ngayo komi da'a ria nirataku salana to niuli komi ri ja'ina. 15 Wa'a wo'u pombarata Magau Herodes sabana i'a wo'u nompopanjili Yesus e'i ri ja'ita ri se'i. Da'a ria powiana to naja'ana to masipato rapatesi ka I'a. 16 Sabana etu aku aga mompakau tantaraku mombaboba I'a pade manggabasaka I'a." 17 Niuli Pilatus iwetu sabana butu mpae tempona Posusa Paska i'a kana manggabasaka ka tau dea samba'a tau nggariara tarunggu. 18 Tapi nongare-ngare puramo tau to naria ri setu, "Patesimo I'a! Kabasaka ka kamimo i Barabas!" 19 Barabas etu samba'a tau to nitarunggu sabana i'a nangewa pomarenta ri ngata Yerusalem pade i'a wo'u topepatesi. 20 Tapi Pilatus madota manggabasaka Yesus. Jadi sangganipa i'a notesa tau dea etu. 21 Tapi nongare-ngare wo'umo ira, "Pakumo I'a ri kayu parika! Pakumo I'a ri kayu parika!" 22 Pade notesamo Pilatus katolungganina ka ira, "Nokuya? Kaja'a nuapa ntoto to nipowiana? Da'a ria nirataku salana to nipowiana to masipato rasuku mate ka I'a. Aku aga mompakau tantaraku mombaboba I'a pade manggabasaka I'a." 23 Tapi ira nantambai nongare-ngare ante suara to neliu nggamangga, "Yesus kana rapaku ri kayu parika!" Kaopuna padagimo ira, sabana ira nongare-ngare mpu'u. 24 - 25 Jadi Pilatus nompakau tantarana manggeni Yesus ri sawaliku ngata ala rapatesi mantuki dota ntau dea etu. Pade nikabasakana ka ira tau to niperapi ira, etumo i Barabas, tau to nitarunggu sabana i'a nangewa pomarenta bo nepatesi. 26 Naopu etu Yesus nikeni mpesuwu nggari setu. I'a nipasu'u nanjumbuaka kayu pomparika rapombapaku I'a. Ri tatongo jala ira nosintomu ka samba'a tau nosanga ka i Simon. I'a samba'a tau nggari ngata Kirene pade tempona etu i'a mesua mpaka riara ngata. I'a nisoko ira pade nipasu'u nanjumbuaka kayu pomparika Yesus pade nolumako nantuki purina. 27 Tempo Yesus nikeni ri sawaliku ngata etu nadea mpu'u tau nantuki I'a. Ri tatongo ira naria bara sakuya mba'a besi to notumangi nantangi I'a ante nantimbolu-mbolu bombara ira sabana nasusa rara ira. 28 Neilimo Yesus ri ja'i ira pade nanguli, "Besi-besi to Yerusalem, ne'e mana motumangi mantangi Aku. Tangimo koro komi mboto bo ana-ana komi, 29 sabana kana marata ntoana besi-besi motesa, 'Nandasa mpu'umo kami! Aginamo kami nagampa, da'apa sanggani noana, bo da'apa sanggani nompatomi ngana!' 30 Tempona etumo tau kana motesa ka bulu-buluna, 'Kalabumo mombarumpi kami,' pade ira motesa ka bunggu-bunggu nggedi, 'Iwumo kami!' 31 Kana mandasa mpu'u komi, sabana ane ira mowia iwe'i ri ja'iku to nanoa rara, iwenu ante komi to nadenggo raramu? Natantumo komi kana meliu nggandasa rapowia ira banepia!" 32 Tempona etu naria wo'u romba'a tau naja'a to nikeni rapatesi mpasanggani-nggani ante Yesus. 33 Ira pura-pura nalau sampe narata ri saongu peto'o to nosanga ka Peto'o Wuku Balengga. Ri setu tantara-tantara Roma nombapaku Yesus ri kayu parika etu. Tau-tau naja'a romba'a etu wo'u nipaku ri kayu parika ntanina, samba'a ri sabingga nggana Yesus samba'a ri sabingga njidina. 34 Naopu etu nosambayamo Yesus ka Pue Alatala, "Uma, ampungimo ira. Da'a ninjani ira nuapa to nipowia ira." Ri setu wo'u tantara-tantara nombabagi-bagi pakea Yesus ante nompenoa nowia nomoro. Isema nawela nomoro i'a nombarata pakea etu. 35 Tau dea nekanggore ri setu nantara pura-pura nuapa to najadi etu. Pade topanggeniaka to Yahudi to naria ri setu nombawiri mata ka Yesus. Niuli ira, "Kita we'i! Tau ntanina nipakasalamana. Ane I'a mpu'u-mpu'u Magau to Mompakasalama to nipelisi Alatala, agina I'a mompakasalama korona mboto we'i-we'i!" 36 Tantara-tantara etu wo'u nompongei I'a. Ira nompakamosu Yesus pade nombawai ka I'a ue anggur to napoi. 37 Pade niuli ira, "Ane Iko mpu'u-mpu'u Magau nto Yahudi pakasalamamo koromu!" 38 Ri ntoto balenggana ri kayu parika etu naria nitulisi, |scE'IMO MAGAU NTO YAHUDI.|r 39 Samba'a nggari tau naja'a to nipaku ri kayu parika nanjalai Yesus. Niulina, "Ane mpu'u-mpu'u Iko Magau to Mompakasalama to nijanji Alatala, pakasalamamo koromu ante kami wo'u!" 40 Tapi tau naja'a ntanina etu nangontiaka roana etu. Niulina, "Nokuya iko da'a naeka ri ja'i Alatala? Kita pura-pura nitangara kana mamate. 41 Ane kita romba'a e'i nitangara masipato ante pokaingguta. Tapi tau e'i da'a ntoto nowia to nasalana!" 42 Pade niulina ka Yesus, "Yesus, toramo aku tempo Komi marata ante kuasa ewa magau." 43 Nangulimo Yesus ka i'a, "Aku mojanji ka iko, eo e'i wo'u iko kana mosanggani-nggani ante Aku ri suruga." 44 Kira-kira tinti sampulu rongu narumaumo eo ri njumaongu tana etu sampe tinti toluongu ngguwiana. 45 Pade naseri ntongomo kae powombo ri Sapo Mpepue. 46 Naopu etu nongaremo Yesus ante suara namangga, "Umaku, kuwaimo nosaku riara mpalemu!" Naopu notesa iwetu nalaimo nosana. 47 Tempona balengga tantara ri setu nanggita nuapa to najadi i'a nombatoiya Alatala. Niulina, "Natantumo tau e'i tau to nanoana." 48 Tau dea to narata nantara pura-pura kajadia etu nanggita Yesus namatemo. Jadi nanjilimo ira ante nanjapa-njapa bombara sabana nasusa rara. 49 Pura-pura roa Yesus ante besi-besi wo'u to nantuki I'a nggari Bagia Galilea etu, nenggore nggawao nanggita pura-pura to najadi etu. 50 - 51 Naria samba'a tau nggari ngata Arimatea ri Bagia Yudea to nosanga ka Yusuf. I'a samba'a tau to nabelo pokaingguna bo nanoa rarana to mantongoraka tempo Alatala mompamula moparenta ri dunia. Naupa i'a samba'a nggari Polibu Bete Nto Yahudi i'a da'a ria nasituju ante potangara bo powia ira mompatesi Yesus. 52 Yusuf etu nalau nerapi ka Pilatus ala watabaku Yesus rawai ka i'a. 53 Naopu etu nita'urakana watabaku Yesus nggari kayu parika, pade nisompuna ante kae gandisi to nalusuna. Naopu etu nibolina watabaku Yesus etu riara dayo to nipa'a ri bulu watu. Dayo etu da'apa sanggani nipake. 54 Eo etu eo Jumaa, etumo eo mpopakasadia ka Eo Mpenonto. Mana masaeka marata Eo Mpenonto etu. 55 Besi-besi to narata nosanggani-nggani ante Yesus nggari Bagia Galilea nantuki Yusuf nalau nanggita dayo etu. Nikita ira wo'u iwenu watabaku Yesus niboli riara dayo etu. 56 Naopu etu natinggulimo ira mpaka ri ngata, pade nipakasadia iramo rampa-rampa ante minya wongi ka watabaku Yesus. Pade ri Eo Mpenonto, nenontomo ira nokarajaa nantuki Atura-atura agama nto Yahudi.
1 Ri eo Aka kampadondona mpu'u nalaumo besi-besi etu mpaka ri dayo Yesus nanggeni rampa-rampa to nipakasadia ira. 2 Tempo ira narata ri dayo etu nikita ira nakalulimo watu to nipompiku dayo. 3 Nesuamo ira riara dayo etu, tapi da'a nirata ira watabaku Yesus ri setu. 4 Tempona ira danenggore ri setu naingu nompekiri kajadia etu, sampenjani naria romba'a malaeka to nopakea nenggila nekanggore namosu ira. 5 Naeka mpu'u rara besi-besi etu sampe ira nekadede sampe ri tana. Pade nangulimo romba'a malaeka etu ka ira, "Nokuya komi nangelo tau to natuwuna ri peto'o tau namate? 6 I'a da'a mana ria ri se'i. Natuwu balimo I'a! Toramo nuapa to nitesana ka komi tempo I'a danaria ri Bagia Galilea. Niulina, 7 'Aku, Ana nu Manusia kana rawai ka tau-tau nasilaka, pade rapaku ri kayu parika sampe mamate, pade matuwu bali ri eo katolueona.' " 8 Nangepe etu natitoramo rara besi-besi etu ewa tesa Yesus bopia. 9 Naopu etu natinggulimo ira nggari dayo etu, pade nitesa ira pura-pura nuapa to najadi etu ka sampulu samba'a anaguru Yesus ante pura-pura topantuki I'a ntanina. 10 Besi-besi to notesa pura-pura nuapa to najadina ka topantuki-topantuki Yesus etumo: i Maria Magdalena, Yohana, i Maria indo Yakobus, ante besi-besi ntanina to nosanggani-nggani ante ira. 11 Tapi anaguru-anaguru Yesus da'a nomparasaya tesa nu besi-besi etu. Ira nompekiri besi-besi etu aga notesa anu da'a nakono. 12 Tapi Petrus nekanggore nangowa mpaka ri dayo etu. Tempona i'a nekadede nanggita riarana nikitana damo kae niposompu Yesus ri setu. Nanggita etu nasumaramo Petrus, pade natinggulimo i'a ante nadea pompekutana riara nta'ina ewa nuapa to najadi ri setu. 13 Tempo eo etu wo'u nalaumo romba'a topantuki Yesus mpaka ri saongu ngata nosanga ka ngata Emaus, kira-kira sampulu saongu kilo kakawaona nggari ngata Yerusalem. 14 Ira notesa nggalalau ewa nuapa pura to najadi ri ja'i Yesus etu. 15 Tempona ira danotesa-tesa bo nosinjula pekiri, naratamo Yesus mboto ri ja'i ira, pade nolumako mpasanggani-nggani ante ira. 16 Ira nanggita Yesus tapi naria sangele nompakaingu ira sampe da'a ninjani ira I'a etu Yesus. 17 Nangulimo Yesus ka ira, "Nuapa nitesa komi tempo komi nolumako pane'a?" Nenontomo ira romba'a etu ante lenje nasusa. 18 Pade nangulimo samba'a nggari ira to nosanga ka i Kleopas, "Nggari pura-pura tau ri ngata Yerusalem bara aga njamba'a Komi to da'a nangginjani nuapa to najadi bara sakuya mbengi to naliuna!" 19 Nekutanamo Yesus, "Nuapa to najadina?" Nesonomo ira, "To najadi ri ja'i Yesus tau nggari Nazaret. I'a samba'a nabi, tesa-tesana bo powiana nakuasa mpu'u nabeloka riara mpanggita Alatala nabeloka riara mpanggita pura-pura tau. 20 Tapi topanggeni-topanggeni agama bo balengga-balengga ngata kami nombawai I'a ka pomarenta ala ratangara kana mamate. Pade I'a nipaku ira ri kayu parika. 21 Kakonona nisarumaka kami I'amo to narata manggabasaka ngata Israel nggari kuasa nto Roma. Pade we'i-we'i katolumbenginamo kamatena etu. 22 Ntanina nggari etu bara sakuya mba'a besi nggari mbira kami nompakatikaja kami, sabana pangane bobaya ira nalau mpaka ri dayo Yesus, 23 tapi da'a nirata ira watabakuna ri setu. Ira nanjili nanguli ka kami ira nanggita malaeka-malaeka to notesa ka ira Yesus namate natuwu bali. 24 Naopu etu bara sakuya mba'a tau nggari tatongo kami nalau mpaka ri dayo etu pade nirata ira nuapa to nitesa besi-besi etu nakono, tapi da'a nikita ira Yesus." 25 Nangepe etu nangulimo Yesus ka ira, "Nabodo mpu'u komi! Nabungu mpu'u pekiri komi momparasaya nuapa to nitesa nabi-nabi! 26 Etumo Magau to Mompakasalama to nijanji Alatala kana mombarasai kasusa bo kapari ntani ruru, pade maopu etu I'a mombarata pebila." 27 Pade Yesus notarangga ka ira nuapa to nitesa ewa korona riara pura-pura Buku Nagasa, nompamula nggari buku-buku to nitulisi i Musa sampe ri buku pura-pura nabi. 28 Tempo ira narata ri ngata Emaus etu Yesus tumoni-moni madota molumako mpapola. 29 Tapi ira nanta'amaka I'a mapola. Niuli ira, "Kana mosanggani ante kami. We'i-we'i ntora mawengimo." Jadi nesuamo Yesus nosanggani ante ira riara njapo. 30 Tempo I'a nekatoko nanggoni mpasanggani-nggani ante ira nialana roti pade niulina tarima kasi ka Alatala. Naopu etu nibingga-binggana roti etu pade niwaina ka ira. 31 Kaliu-liu nanotomo rara ira. Ninjani ira Yesusmo e'i. Pade nalipomo Yesus nggari tatongo ira. 32 Nanggita etu natitoramo rara ira pade niuli ira samba'a bo samba'a, "Natantu etumo sabana nadamba rarata tempo I'a notesa ka kita ri tatongo jala pangane bo notesa nompakanoto nuapa to nitulisi riara Buku Nagasa ka kita!" 33 Tempo etu wo'u nekanggoremo ira nanjili mpaka ri ngata Yerusalem. Narata ri setu nirata ira anaguru Yesus to sampulu samba'a etu nasiromu ante tau ntanina. 34 Ira to naria ri setu notesa ka ira romba'a, "Pue mpu'u-mpu'u natuwu bali! I'a nompopokita korona ka i Simon Petrus!" 35 Nangepe etu notesamo romba'a topantuki Yesus to dako narata etu nuapa najadi ri ja'i ira mboto ri tatongo jala mpaka ri ngata Emaus, pade iwenu ira nangginjani Yesus tempona I'a nombabingga roti. 36 Tempo ira danotesa-tesa etu, sampenjani naratamo Yesus nekanggore ri tatongo ira ri setu. Pade nangulimo I'a, "Pue mombagane komi." 37 Tapi ira pura-pura natikaja pade naeka mpu'u rara. Nipekiri ira bara mboa etu. 38 Etu sampe Yesus nanguli ka ira, "Nokuya komi naeka bo norompenga pompekiri? 39 Kitamo paleku bo kita wo'u kadaku. Aku mboto e'i! Lememo bo pariaramo. Mboa da'a ria isi bo wukuna ewa to nikita komi we'i-we'i." 40 Yesus notesa iwetu ante nompopokita ka ira palena bo kadana. 41 Tempona etu ewa da'apa niparasaya ira I'a etu Yesus sabana nadamba mpu'u rara ira bo nasumara. Jadi nangulimo Yesus ka ira, "Bara naria panggoni komi ri se'i?" 42 Pade ira nombawai ka I'a sanggoto bau nitunu. 43 Yesus nangala bau etu pade nikonina ri ngayo ira. 44 Naopu etu nangulimo Yesus ka ira, "Iwe'imo to niuliku ka komi bopia tempo Aku danaria nosanggani-nggani ante komi: pura-pura tesa to nitulisi riara buku i Musa, pade to nitulisi riara buku-buku nabi-nabi ntanina, pade to nitulisi riara Buku Mazmur ewa Aku, etu pura-pura kana rapakadupa." 45 Pade nipakanotona pekiri ira ala ira mamala mangginjani nuapa to nitulisi riara Buku Nagasa etu. 46 Niulina ka ira, "Riara Buku Nagasa naria tesa to nanguli iwe'i: Magau to Mompakasalama kana rapatesi pade ri eo katolueona I'a kana matuwu bali nggari kamatena. 47 Pade riara sangana kana rapatolele Kareba Belo to nanguli iwe'i: pura-pura tau kana majea nggari silaka-silaka ira ala Alatala mombaampungi ira. Kareba etu kana rapatolele mompamula nggari ngata Yerusalem e'i sampe ri njumaongu dunia. 48 Komimo to nanggita pura-pura kajadia etu. 49 Toramo! Aku kana mompopana'u ka komi Nosa Nagasa to nijanji Umaku. Tapi komi kana mompopea ntani ruru ri ngata Yerusalem e'i sampe kuasa nggari ja'i Alatala etu mana'u mombabungu komi pura-pura." 50 Naopu etu Yesus nanggeni anaguru-anaguruna etu nesuwu nggari ngata Yerusalem nalau sampe namosu ri ngata Betania. Ri setu I'a nangonggotaka palena pade nombagane ira pura-pura. 51 Tempona I'a danombagane ira, noga'amo I'a nggari ja'i ira, pade neore mpaka ri suruga. 52 Pade notimbakotumo anaguru-anaguruna nombasomba I'a. Naopu etu natinggulimo ira mpaka ri ngata Yerusalem ante nadamba mpu'u rara. 53 Ira bate-batena naria riara Sapo Mpepue nombatoiya bo nombabila sanga Alatala.
1 Ri lamba pamulana naria mamimo to niposumba Alatala. I'a nosanggani-nggani ante Alatala, pade I'amo Alatala. 2 Nggari lamba pamulana I'a nosanggani-nggani ante Alatala. 3 I'amo to nompajadi pura-pura to nariana. Da'a ria sangaya to najadi ane da'a nggari I'a. 4 I'amo pu'u katuwua, pade I'amo to nanggeni reme ka manusia. 5 Nau dunia e'i narumau ante kaja'ana, reme etu newanta. Karumau nu dunia da'a ntoto namala mompakalipo reme etu. 6 Naria samba'a tau narata nisuro Alatala, sangana Yohanes. 7 I'a narata ewa samba'a sabi motesa mompakanoto isema reme etu ala nggari tesana pura-pura manusia mamala momparasaya. 8 I'a mboto da'a reme etu, i'a aga notesa mompakanoto isema reme etu. 9 Reme to nakonona I'amo to niposumba Alatala to narata ri dunia nompakareme pura-pura manusia. 10 I'a njau nariamo ri dunia pade nggari I'a sampe dunia nipajadi. Tapi tempo I'a narata manusia ri dunia da'a nangginjani I'a. 11 I'a narata ri ngatana mboto, tapi todeana da'a nadota mantarima I'a. 12 Tapi isema-sema to nantarima I'a bo nomparasaya I'a, ira niwai ka kuasa majadi ana-ana nu Alatala. 13 Ira najadi ana-ana nu Alatala da'a sabana nipoanaka totu'a ira, atau nggari dota manusia bara dota samba'a uma. Tapi Alatala mbotomo to nompajadi ira anana. 14 To niposumba Alatala etu netimbali najadi manusia pade I'a neto'o ri tatongota ri dunia e'i. Pade kita nanggita kuasa bo kagayana to nipogumaa, etumo kuasa bo kagayana to nitarimana nggari ja'i Umana ewa Anana samba'a lau. I'a mpu'u-mpu'u neliu towe belona pade nggari I'amo kita mangginjani Alatala. 15 Yohanes nompakanoto ka todea isemana To niposumba Alatala etu. Nongaremo i'a, "E'imo I'a to nipatujuku bopia tempo aku nanguli kana maria to marata ri puriku to neliu nggabete kuasana nggari aku, sabana nggari lamba pamulana naria mamimo I'a da'apa aku nesuwu." 16 I'a mpu'u-mpu'u neliu towe belona, da'a ria kaopu-opuna rasi to niwaina ka kita. 17 Nggari nabi Musa kita nantarima Atura-atura agama. Tapi nggari Yesus Kristus kita mpu'u-mpu'u mangginjani Alatala bo towe belona ka kita. 18 Da'apa naria samba'a tau to nanggita Alatala. Tapi Anana to samba'a lau to naroo ri ja'ina, I'amo to nompopokita Alatala ka kita. 19 Topanggeni-topanggeni agama Yahudi ri ngata Yerusalem nompakau bara sakuya mba'a roa ira ante tau-tau to Lewi malau mpaka ri ja'i Yohanes Topediu ala mompekutana i'a iwe'i: "Isema kakonona komi e'i?" 20 Nangepe etu notesamo Yohanes mpakanoto, "Aku e'i da'a Magau to Mompakasalama to nijanji Alatala." 21 Pade sangganipa ira nompekutana i'a, "Ane iwetu, isema ntoto tanu komi? Bara komi e'imo nabi Elia?" Nesonomo Yohanes, "Da'a." Pade nekutana wo'umo ira, "Bara komi e'imo nabi to nijanji Alatala marata banepia?" Nesonomo Yohanes, "Da'a." 22 Pade nanguli wo'umo ira, "Ane iwetu, uli ka kami isema kakonona komi etu ala mamala ratesa kami ka tau-tau to nompakau kami e'i. Iwenu pantesa komi ewa koromu mboto?" 23 Nesonomo Yohanes, "Aku e'imo to nitesa nabi Yesaya nggaolu iwe'i: 'Naria samba'a tau nongare-ngare ri karawa baina: pakanoa jala i Pue!' " 24 Ri tatongo tau-tau to nipakau mpaka ri ja'i Yohanes naria wo'u bara sakuya mba'a tau to Parisi. 25 Ira wo'u nompekutana i'a, "Ane komi da'a Magau to Mompakasalama, da'a wo'u nabi Elia, bo da'a nabi to nijanji Alatala marata, nokuya komi nombadiu tau?" 26 Nesonomo Yohanes, "Aku nombadiu tau ante ue ewa tandaina najeamo ira nggari silaka ira. Tapi ri tatongo komi naria samba'a tau anu da'apa ninjani komi. 27 I'a etu marata ri puriku. Tapi I'a neliu nggabete kuasana nggari aku sampe aku da'a masipato mombawole lui sapatuna." 28 Pura-pura etu najadi ri ngata Betania ri sambote Binangga Yordan ri peto'o Yohanes nombadiu tau. 29 Kaeona etu Yohanes nanggita Yesus narata mpaka ri ja'ina, pade niulina ka tau-tau ri setu, "Kitamo! Etumo Ana Bimba nu Alatala to mompakalipo silaka manusia! 30 I'a etumo to niuliku bopia tempo aku nanguli ka komi kana marata samba'a tau ri puriku to neliu nggabete kuasana nggari aku, sabana nggari lamba pamulana naria mamimo I'a da'apa aku nesuwu. 31 Bopia aku da'apa nangginjani I'a etu Magau to Mompakasalama. Tapi patuju karataku mombadiu tau ante ue ala I'a rapopanjani ka tau-tau to Israel." 32 Pade naria wo'u tesa Yohanes ntanina iwe'i: "Aku nanggita Nosa Nagasa nu Alatala nana'u nggari langi nolenje mpotonji banggebodo netu'u ri korona. 33 Tempo etu da'apa ninjaniku I'a Magau to Mompakasalama. Tapi Alatala to nompakau aku mombadiu tau ante ue nanguli ka aku bopia, 'Ane iko manggita Nosa Nagasaku mana'u metu'u ri ja'i samba'a tau, I'a etumo to mombadiu tau ante Nosa Nagasaku.' " 34 Pade nanguli wo'umo Yohanes, "Ante mataku mboto aku nanggita kajadia etu pade iwe'imo tesaku ka komi: I'a etumo Ana nu Alatala!" 35 Kaeona etu naria wo'umo Yohanes ri setu nosanggani-nggani ante romba'a topantuki i'a. 36 Tempo ira nanggita Yesus noliu ri setu, nangulimo Yohanes, "Kitamo! Etumo Ana Bimba nu Alatala!" 37 Tempo romba'a topantuki Yohanes etu nangepe nuapa to niulina, nalaimo ira nantuki Yesus. 38 Yesus neili ntaliku nanggita ira romba'a nantuki I'a. Pade nipekutanana ka ira, "Nuapa nielo komi?" Nesonomo ira romba'a, "Rabi (batuana Guru), ri umba nipeto'o Komi?" 39 Nesonomo Yesus, "Mai kita komi mbotomo." Tempo etu kira-kira tinti ampa ngguwiana. Jadi nalau mpu'umo ira romba'a nanggita peto'o Yesus. Pade ira neto'o mpasanggani ante I'a eo etu. 40 Nggari ira romba'a to nangepe tesa Yohanes pade nantuki Yesus eo etu samba'a nosanga ka Andreas, sampesuwu i Simon Petrus. 41 Jadi nalaimo Andreas nasalisa nangelo sampesuwuna i Simon pade niulina ka i'a, "Nirata kamimo Mesias!" (Batuana Mesias Magau to Mompakasalama to nijanji Alatala. Ane riara Basa Yunani batuana Kristus.) 42 Pade nikeninamo i Simon mpaka ri ja'i Yesus. Tempo ira narata ri setu Yesus nanggita i Simon pade niulina, "Iko Simon ana Yohanes. Tapi nompamula we'i-we'i iko kana rapoposanga i Kefas." (Sanga Kefas riara Basa Yunani i Petrus. Batuana Kefas bo Petrus etumo "watu".) 43 Kaeona etu Yesus nopatuju malau mpaka ri Bagia Galilea. I'a nomposintomu i Filipus, pade niulina ka i'a, "Kamaimo, tukimo Aku." 44 Filipus etu tau nggari ngata Betsaida, etumo ngata nipeto'o Andreas bo i Petrus. 45 Pade nalaumo i Filipus nomposirata ka i Natanael pade niulina ka i'a, "Nirata kamimo tau to nitesa nabi Musa riara buku-buku Atura nu Alatala pade to nitesa nabi-nabi nggaolu, etumo Yesus nggari ngata Nazaret, ana Yusuf." 46 Tapi nesonomo i Natanael, "A! Da'a ntoto ria to nabelona meumba nggari ngata Nazaret!" Nanguli i Filipus ka i'a, "Kamaimo. Kita komi mbotomo!" Pade nalau mpu'umo i Natanael. 47 Tempo Yesus nanggita i Natanael narata ri ja'ina, I'a nanguli, "Kitamo! E'imo mpu'u-mpu'u samba'a tau to Israel! Da'a ntoto naria to nadenggona riara nta'ina." 48 Nangepe etu nangulimo i Natanael ka Yesus, "Iwenu sampe Komi nangginjani aku?" Nesonomo Yesus, "Da'apa Filipus nalau nompokio komi, Aku nanggita komi ri wayo nggayu ara guria." 49 Sangga nangepe etu nangulimo i Natanael, "Guru, Komimo Ana nu Alatala! Komimo mpu'u-mpu'u Magau nto Israel!" 50 Nangulimo Yesus ka i'a, "Komi nomparasaya sabana Aku nanguli ka komi Aku nanggita komi ri wayo kayu ara guria. Tapi komi kana manggita kajadia to meliu nggabete nggari kajadia etu." 51 Pade niuli Yesus wo'u ka i'a, "Aku mpu'u-mpu'u notesa ka komi, komi kana manggita langi matibea pade mukita wo'u malaeka-malaeka Alatala aga mana'u bo mepone ri ja'iku, Ana nu Manusia."
1 Rombengi kaliuna nggari kajadia etu naria posusa mponika ri ngata Kana ri Bagia Galilea. Indo Yesus naria ri setu, 2 pade Yesus bo anaguruna wo'u nigaga malau ri posusa etu. 3 Tempo ira ri posusa etu naopu puramo ue anggur. Jadi nangulimo indona ka Yesus, "Mana ria ue anggur ira. Naopu puramo." 4 Nanguli Yesus ka indona, "Nindo, nokuya komi nanguli iwetu ka Aku? Da'apa narata tempona Aku mompopokita kuasaku." 5 Pade nangulimo indona ka tau-tau topetande ri posusa etu, "Powia komi ngina nuapa-nuapa to rapakauna ka komi." 6 Ri setu naria aono ongu gumba bete nipowia nggari watu to nipakasadia rapombarama kada bo pale nantuki ada-ada nto Yahudi. Gumba etu isina saongu kira-kira satu lite ue. 7 Nangulimo Yesus ka tau-tau topetande ri posusa etu, "Isi komimo gumba-gumba etu ante ue." Pade niisi iramo sampe naponu. 8 Naopu etu nanguli wo'umo Yesus ka ira, "We'i-we'i sanggu sakedi ue etu, keni komi ka pue mposusa etu." Pade ira nanggeni ue etu ka pue mposusa etu. 9 Pue mposusa etu nompetami sakedi ue etu to nabalimo najadi anggur. Da'a ninjanina nggari umba anggur etu. Aga tau to nombasanggu ue etu nangginjani. Naopu pue mposusa nompetami anggur etu nipokiona boti langgai 10 pade niulina ka i'a, "Nabiasa tau nombawai anggur to nabelona ntani ruru, pade ane torata nabasamo nanginu pade niwai ka ira anggur biasa. Tapi komi e'i nomboli anggur to neliu nggabelona sampe we'i-we'i!" 11 Etumo kabaraka pamulana to nipowia Yesus tempo I'a ri ngata Kana ri Bagia Galilea. Ante kabaraka etu I'a nompopokita kuasana sampe anaguru-anaguruna nomparasaya I'a. 12 Naopu posusa etu nalaumo Yesus mpaka ri ngata Kapernaum nosanggani-nggani ante indona pade sampesuwu-sampesuwuna bo anaguru-anaguruna. Pade neto'omo ira ri setu bara sakuya mbengi kasaena. 13 Tempo namosumo Eo Bete Paska nto Yahudi nalaumo Yesus mpaka ri ngata Yerusalem. 14 Ri lalowo Sapo Mpepue I'a nombarata tau nobalu-balu japi, bimba bo tonji banggebodo. Pade naria wo'u tau toposinjula doi nekatoko ri setu. 15 Nanggita etu Yesus nompowia sampeka potarampea nggari kaloro pade nipopalaina ira pura-pura nosanggani-nggani ante pura-pura bimba bo japi etu nggari lalowo Sapo Mpepue. Pade doi nu toposinjula doi nikamburakana pade meja-meja ira nidungganakana. 16 Pade niulina ka tau nobalu-balu tonji banggebodo etu, "Kenimo pura-pura etu nggari se'i! Ne'e komi mompajadi sapo Umaku ewa sapo mpotomu!" 17 Pade natitoramo rara anaguru-anaguruna nuapa to nitulisi riara Buku Nagasa to nanguli iwe'i: "Toweku ka sapomu, Pue, ewa apu to nompakaboa tinalu." 18 Naopu etu topanggeniaka-topanggeniaka nombaewa Yesus ante nanguli, "Kabaraka nuapa mupowia ala mompopokita ka kami Komi nakuasa nompopalai tau-tau iwetu?" 19 Nesonomo Yesus, "Gero komimo sapo e'i pade Aku kana mombabangu bali riara tempo tolueo." 20 Pade nanguli wo'umo topanggeniaka nto Yahudi, "A! Sapo Mpepue e'i nikarajaa ntau patampulu bo onompae kasaena. Iwenu Komi mamala mombabangu bali riara tolueo?" 21 Tapi sapo to nipatuju Yesus ante tesana etumo korona mboto. 22 Nggari purina naliu Yesus natuwu bali nggari kamatena natitoramo rara anaguruna tesana e'i. Pade niparasaya iramo nuapa to nitulisi riara Buku Nagasa pade nuapa to nitesa Yesus mboto. 23 Tempo Yesus danaria ri ngata Yerusalem tempo Posusa Eo Bete Paska, nadeamo tau nomparasaya I'a sabana ira nanggita kabaraka-kabaraka to nipowiana. 24 Tapi Yesus mboto da'a nasadia mantarima patuju ira ri ja'ina, sabana ninjanina isi rara nta'i ira pura-pura. 25 Da'a paraluu tau mompakanoto inggu manusia ka I'a sabana ninjanina puramo isi rara nta'i manusia.
1 Naria samba'a to Parisi nosanga ka i Nikodemus. I'a samba'a topanggeniaka agama nto Yahudi. 2 I'a narata ri ja'i Yesus tempo nggawengi pade nanguli ka I'a, "Guru, nanotomo ka kami Komi etu samba'a guru to nisuro Alatala, sabana da'a ria samba'a tau mamala manggawia kabaraka ewa to nikawia Komi etu ane Alatala da'a nosanggani-nggani ante i'a." 3 Nesonomo Yesus, "Aku mpu'u-mpu'u notesa ka komi, da'a ria samba'a tau mamala majadi todea riara Poparenta nu Alatala ane i'a da'a raote mpanjili." 4 Nekutanamo Nikodemus ka I'a, "Iwenu sampe tau to natu'amo raote mpanjili? Natantumo i'a da'a mamala mesua bali riara nta'i indona pade raote mpanjili!" 5 Nesonomo Yesus, "Aku mpu'u-mpu'u notesa ka komi, ane tau da'a raote ante ue pade ante kuasa Nosa Nagasa nu Alatala tau etu da'a mamala majadi todea riara Poparenta nu Alatala. 6 Koro batata e'i najadi nggari manusia, tapi to najadi nggari kuasa Nosa Nagasa nu Alatala etumo katuwua nabou. 7 Jadi ne'e komi matekaja mangepe tesaku etu to nanguli komi kana raote mpanjili. 8 Poiri nakantawui mpaka ri umba nipodotana. Kita nangepe serena tapi da'a ninjanita nggari umba karatana pade mpaka ri umba rakalauna. Iwetu wo'u ante tau to niote mpanjili ante kuasa Nosa Nagasa nu Alatala." 9 Pade nekutana wo'umo i Nikodemus ka Yesus, "Iwenu sampe etu mamala majadi?" 10 Nesonomo Yesus, "Komi e'i Guru nto Israel to nibila. Iwenu sampe da'a ninjanimu batua nu tesaku e'i? 11 Aku mpu'u-mpu'u notesa ka komi, Kami e'i notesa ka komi nuapa to ninjani Kami, pade Kami nanguli ka komi nuapa to nikita Kami mboto, tapi komi da'a madota mantarima tesa Kami etu. 12 Komi da'a nomparasaya ane Aku notesa ka komi ewa nuapa-nuapa to najadi ri dunia e'i. Iwenu komi mamala momparasaya ane Aku mombatesa ka komi nuapa to najadi riara suruga? 13 Da'apa ria samba'a tau neore mpaka ri suruga nanggita to najadi ri setu. Aga Aku, Ana nu Manusia to nana'u nggari suruga mpaka riara dunia to nanggita etu. 14 Nabi Musa nggaolu nompowia sanggayu ule nggari tambaga ri karawa baina pade nionggotakana mpakalanga-langa ala isema-sema mantingoa ule etu kana matuwu. Nasimbayu ewa ule etu nionggotaka mpakalanga-langa, iwetu wo'u Aku, Ana nu Manusia kana raonggotaka mpakalanga-langa, 15 ala isema-sema momparasaya Aku mombarata katuwua mabelo sampe ri kasae-saena. 16 Sabana nabete mpu'umo towe nu Alatala ka manusia ri dunia sampe niwaina Anana to samba'a lau, ala isema-sema momparasaya I'a da'a maropu tapi mombarata katuwua mabelo sampe ri kasae-saena. 17 Sabana patuju Alatala nompakau Anana mboto marata ri dunia e'i da'a ala mompakasala manusia tapi ala ira mamala rapakasalamana. 18 Tau to nomparasaya Ana nu Alatala etu da'a rapakasala. Tapi tau to da'a nomparasaya I'a nipakatantumo salana sabana ira da'a nomparasaya Ana nu Alatala to samba'a lau etu. 19 Nipakatantumo sala manusia sabana Ana nu Alatala narata ri dunia ewa reme nombawanta karumauna, tapi manusia aga nompokono karumauna sabana pokainggu ira naja'a. 20 Isema-sema nanggawia kaja'ana da'a ntoto nipokonona reme. Pade ira da'a ntoto madota mompakamosu reme etu ala pura-pura pokainggu ira to naja'a etu ne'e matikita. 21 Tapi isema-sema to nanoa pokaingguna madota mompakamosu reme etu ala manoto rakita pokainggu ira nantuki dota Alatala." 22 Naopu etu nalaimo Yesus ante anaguruna mpaka ri Bagia Yudea. Ri setu I'a neto'o bara sakuya kasaena ante ira pade nombadiu tau ewa tandaina ira najadi topomparasaya I'a. 23 - 24 Tempo etu Yohanes Topediu da'apa nisuaraka riara tarunggu. I'a nombadiu tau ri ngata Ainon nosinggamosu ante ngata Salim, sabana ri setu nadea ue. Tau-tau bate-batena narata ri ja'ina pade nidiuna. 25 Ri setu anaguru-anaguru Yohanes nosinggarau ante samba'a tau to Yahudi ewa ada-ada mompegasa koro. 26 Jadi nalaumo anaguruna ri ja'i Yohanes ante nanguli, "Guru, danitora komi tau to nosanggani ante komi ri sambote Binangga Yordan to nipopokita komi ka kami bopia? I'a wo'u nombadiu tau, pade pura-pura tau nalau mpaka ri ja'ina." 27 Nesonomo Yohanes, "Da'a ria samba'a mamala mombarata nuapa-nuapa ane da'a rawai Alatala ka i'a. 28 Niepe komi mbotomo tesaku bopia nanguli, 'Aku e'i da'a Magau to Mompakasalama to nijanji Alatala. Aku e'i aga tau to nisuro mokolu ka I'a.' 29 Ane ri posusa mponika boti langgaimo to mosanggani ka boti besi. Tapi wega nu boti langgai aga nekanggore namosu ante i'a, pade nadamba mpu'umo rarana mangepe suara boti langgai etu. Iwetu wo'u ante aku. We'i-we'i aku nadamba mpu'umo raraku. 30 I'a kana mantambai rabila tapi aku e'i kana mantambai rapakakedi." 31 "To nana'u nggari suruga etu neliu nggalanga nggari pura-pura manusia. Tapi to nopu'u nggari dunia e'i bate-batena manusia biasa, i'a aga nombatesa nuapa-nuapa to najadi ri dunia e'i. Tapi to nana'u nggari suruga etu neliu nggalanga nggari pura-pura manusia. 32 I'a nombatesa nuapa to nikitana pade to niepena, tapi da'a ria samba'a tau to nantarima pantesana etu. 33 Tapi tau-tau to nantarima tesana etu nompakanoto ante powia ira etu ira mpu'u-mpu'u nompangaku Alatala nakono. 34 Tau to nisuro Alatala etu I'amo to niposumba Alatala, sabana I'a mpu'u-mpu'u nipakakuasa Nosa Nagasa nu Alatala. 35 Umana Alatala nompotowe I'a, pade niwaina ka I'a mpengele-ngele kuasa. 36 Isema-sema to nomparasaya Anana etu, kana mombarata katuwua mabelo sampe ri kasae-saena. Tapi isema-sema to da'a natundu ri ja'i Anana etu da'a mombarata katuwua mabelo etu. Ira aga rapawela ka rau rara nu Alatala sampe ri kasae-saena."
1 Tau-tau to Parisi nangepe lele to nanguli nadeamo tau to nalau ri ja'i Yesus ala radiu majadi topantuki I'a sampe topantuki Yesus neliu nggadea nggari topantuki Yohanes Topediu. 2 Kakonona da'a Yesus mboto to nombadiu tau aga anaguru-anaguruna. 3 Jadi tempo Yesus nangginjani tau-tau to Parisi nangepe lele etu nalaumo I'a nompalasi Bagia Yudea nanjili bali mpaka ri Bagia Galilea. 4 Riara mpolumakona etu Yesus kana moliu ri Bagia Samaria. 5 Jadi naratamo Yesus ri saongu ngata ri Bagia Samaria nosanga ka ngata Sikhar. Ngata etu namosu tana to niwai Yakub ka anana Yusuf nggaolu. 6 Ri setu naria saongu buwu to niuli Buwu Yakub. Jadi nenontomo Yesus pade nekatoko ri sinjori buwu etu, sabana nalengemo I'a nolumako. Tempo etu natongomo eo. 7 - 8 Anaguru-anaguru Yesus napola mpaka riara ngata etu mangoli panggoni. Tempo Yesus nekatoko ri buwu etu naratamo samba'a besi to Samaria nantombu ue. Nangulimo Yesus ka i'a, "Indo, wai ka Aku sanu ue komi kuinu." 9 Nangulimo besi to Samaria etu ka I'a, "Komi etu tau to Yahudi, aku e'i tau to Samaria. Iwenu sampe Komi merapi ue inu nggari ja'iku?" Niulina iwetu sabana nabiasa tau-tau to Yahudi da'a madota mosanggani-nggani ante tau-tau to Samaria. 10 Nesonomo Yesus, "Ane munjani pewai bayangi nu Alatala pade isema Aku to nomperapi ue inu nggari ja'imu, natantumo komi mboto kana momperapi ue inu nggari ja'iku pade Aku kana mombawai ka komi ue to mombawai katuwua mabelo." 11 Naopu etu nanguli wo'umo besi etu, "Uma, da'a ria posanggu Komi rapombasanggu ue e'i, pade buwu e'i nandala mpu'u. Nggari umba rapangala Komi ue to mombawai katuwua mabelo to nitesa Komi etu? 12 Iwenumo? Komi neliu nggakuasa nggari totu'a kami nggaolu Yakub to nombawai buwu e'i ka kami majadi sosora? I'a mboto nanginu ue nggari buwu e'i pade wa'a wo'u ana-anana bo pompatuwuna." 13 Nanguli wo'umo Yesus ka besi etu, "Isema-sema manginu ue nggari buwu e'i kana mabaipa tambolona. 14 Tapi isema-sema manginu ue to kuwai ka i'a, mana mabai tambolona sampe ri kasae-saena. Sabana ue to kuwai ka i'a etu majadi ewa ue mpemata moili nggariara nggatuwuna sampe i'a mombarata katuwua mabelo sampe ri kasae-saena." 15 Nangepe etu nanguli wo'umo besi etu, "Ane iwetu, Uma, wai ka akumo ue etu ala mana mabai tamboloku pade ne'e mana aku malenge momai mantombu ue e'i." 16 Nangulimo Yesus ka i'a, "Kalau pokiomo ruru rongomu pade panjili bali ri se'i ante i'a." 17 Nesonomo besi etu, "Aku da'a norongo." Nanguli Yesus ka i'a, "Nakono mpu'u tesamu etu komi da'a norongo. 18 Sabana naria limamba'a langgai to nomporongo komi pade langgai to naria ri ja'imu we'i-we'i etu da'a rongomu. Nakonomo tesa to niulimu pani'a." 19 Pade nangulimo besi etu, "Uma, nanotomo ka aku Komi etu samba'a nabi. 20 Totu'a kami nggaolu nombasomba Alatala ri bunggu bulu e'i, tapi komi tau to Yahudi nanguli aga ri ngata Yerusalem masipato tau mombasomba Alatala." 21 Nesonomo Yesus ka i'a, "Indo, parasayamo tesaku e'i. Kana marata tempona tau da'a mana mombasomba Umata Alatala ri bulu e'i pade da'a wo'u ri ngata Yerusalem. 22 Komi to Samaria nombasomba anu da'a ninjani komi. Tapi kami tau to Yahudi nombasomba to ninjani kami mamimo, sabana Magau to Mompakasalama meumba nggari tatongo ntau to Yahudi. 23 Tapi kana marata tempona banepia, pade kakonona naratamo tempona etu, tau-tau to mpu'u-mpu'u mombasomba Umata Alatala kana mombasomba I'a ante kuasa nggari ja'i Nosa Nagasa nu Alatala nantuki pepatuduki to nakonona. Sabana topesomba-topesomba iwetumo to nielo Umata Alatala. 24 Alatala ewa nosa to da'a namala nikita. Jadi tau-tau to madota mombasomba I'a kana mombasomba I'a ante kuasa nggari ja'i Nosa Nagasa nu Alatala nantuki pepatuduki to nakonona." 25 Nesono wo'umo besi etu, "To ninjaniku kana marata samba'a Magau to Mompakasalama to niuli Kristus. Ane I'a etu marata I'a kana motarangga mpakanoto mpengele-ngele ka kita." 26 Nangulimo Yesus ka besi etu, "Aku to notesa ka komi we'i-we'i, Akumo tau to niulimu etu." 27 Tempo ira danotesa-tesa naratamo anaguru-anaguru Yesus nggariara ngata. Natekaja ira nanggita Yesus notesa-tesa ante samba'a besi. Tapi da'a ria kamba samba'a nabia nompekutana besi etu, "Nuapa paraluumu?" Ira da'a wo'u nabia nompekutana Yesus, "Nuapa sabana Guru notesa-tesa ante besi etu?" 28 Naopu etu besi etu nombaboli gumbana ri setu pade nanjilimo i'a mpaka riara ngata. Narata ri setu niulina ka tau-tau riara ngata etu, 29 "Kamaimo kita lau manggita samba'a tau guria to nombatesa ka aku pura-pura nuapa to nipowiaku. Bara suka I'amo Magau to Mompakasalama to nijanji Alatala?" 30 Nangepe tesa besi etu nalaumo ira nggariara ngata etu mpaka ri ja'i Yesus. 31 Tempo besi etu nalau mpaka riara ngata nangulimo anaguru-anaguru Yesus ka I'a, "Maimo Guru, manggonimo kita." 32 Tapi nesonomo Yesus, "Nariamo panggoniku anu da'a ninjani komi." 33 Nangepe etu nosipekutanamo ira samba'a bo samba'a, "Naria tau nanggeni panggoni ka I'a?" 34 Jadi nangulimo Yesus ka ira, "Panggoniku etumo mantuki dota Alatala to nompakau Aku pade mompakaopu bago to niparasayana ka Aku. 35 Naria pantesa komi iwe'i: 'Patambulapa pade marata tempo mokato.' Tapi kuuli ka komi, 'Antoakamo ante mata komi mboto, pae-pae ri tinalu etu nakunimo, namalamo rakato. 36 Tau-tau topokato nantarima tambona. Nompamulamo ira nompasiromu asele mpobago ira, etumo manusia to matuwu sampe ri kasae-saena. Pade topotuja bo topokato mamala madamba-damba mpasanggani-nggani.' 37 Nakono mpu'u tesa to nanguli, 'To samba'ana notuja to santanina nokato.' 38 Aku nompakau komi malau mombakato anu da'a nituja komi. Tau ntanina notuja pade komimo to nantarima asele mpanggawia ira." 39 Riara ngata to Samaria etu nadeamo tau to nomparasaya Yesus sabana niepe iramo tesa besi etu to nanguli, "I'a nantesa ka aku pura-pura nuapa to nipowiaku." 40 Jadi nalaumo ira mpaka ri ja'i Yesus. Narata ri setu nerapimo ira ante mpu'u-mpu'u ala Yesus mesai ri ngata ira bara sakuya kasaena. Jadi nesai mpu'umo Yesus ri setu rombengi kasaena. 41 Pade nantambaimo kadea ntau to nomparasaya Yesus sabana niepe ira mbotomo tesana. 42 Naopu etu nangulimo ira ka besi etu, "We'i-we'i niparasaya kami mpu'umo, da'a aga nggari tesamu tapi niepe kami mbotomo tesana. Pade ninjani kamimo I'a mpu'u-mpu'u Magau to Mompakasalama manusia ri dunia." 43 Naopu neto'o ri setu rombengi kasaena nanggaliwomo Yesus napola mpaka ri Bagia Galilea. 44 Nariamo sanggani bopia Yesus mboto nanguli, "Samba'a nabi da'a nibila ntau ane riara ngatana mboto." 45 Jadi tempo I'a narata ri Bagia Galilea I'a nitarima tau-tau to Galilea ante nadamba rara. Sabana ira wo'u nantuki Posusa Eo Bete Paska ri ngata Yerusalem bopia pade nikita ira mbotomo pura-pura nuapa to nipowia Yesus ri setu. 46 Pade nalau wo'umo I'a mpaka ri ngata Kana ri Bagia Galilea, ngata nipompajadina ue newali anggur bopia. Ri ngata Kapernaum naria samba'a madika to nokarajaa riara sapo magau, anana naju'a ntomo. 47 Sangga nangepe lele to nanguli naratamo Yesus ri Bagia Galilea nggari Bagia Yudea, nalaumo madika etu mpaka ri ja'ina pade nerapi ante mpu'u-mpu'u, "Tulungi malau mpaka ri ngata Kapernaum mompakabelo anaku, sabana ntora namatemo i'a!" 48 Nangepe etu nangulimo Yesus ka i'a, "Ane komi pura-pura da'a nanggita tandai-tandai to nipogumaa bo kabaraka-kabaraka komi da'a ntoto nomparasaya." 49 Nangulimo madika etu ka Yesus, "Pue, kuperapi ka Komi masalisa kita malau sampe anaku danaria nosana." 50 Nanguli Yesus ka i'a, "Panjilimo komi! Nabelomo anamu!" Nangepe etu niparasaya madikamo tesa to niuli Yesus ka i'a etu. Jadi nanjilimo i'a. 51 Tempo i'a da ri tatongo jala i'a nitomunaka bara sakuya mba'a batuana nggari Kapernaum. Ira nanguli ka i'a, "Nabelomo ana komi!" 52 Pade i'a nompekutana ira, "Ipiamo anaku nompamula nabelo ju'ana?" Nesonomo ira, "Yowi ntongo eo kira-kira tinti saongu nana'umo panena." 53 Pade natitoramo madika tinti saongu yowi Yesus nanguli ka i'a, "Nabelomo anamu!" Pade madika saongu njapo nomparasaya Yesus. 54 Etumo tandai to nipogumaa karongganina to nipowia Yesus tempo I'a narata bali nggari Bagia Yudea mpaka ri Bagia Galilea.
1 Naopu etu nanjili balimo Yesus mpaka ri ngata Yerusalem ala mantuki eo bete nto Yahudi ri setu. 2 Ri ngata Yerusalem namosu bobaa ngata to nosanga ka "Bobaa Bimba" naria saongu kola to niuli riara Basa Ibrani Kola Betesda. Nantalili kola etu naria limaongu tambale. 3 Ri tambale etu nadea mpu'u tau naju'a naturu. Naria tau naburo, naria tau nakejo, naria tau napunggu. [Ira pura-pura nompopea ue mojajompe. 4 Apa sanggani-sanggani malaeka i Pue nana'u riara ue kola etu nombajajompe ue. Pade isema-sema mokolu nesua riara ue tempona ue etu nojajompe, i'a kaliu-liu nabelo nggari ju'ana.] 5 Ri setu naria samba'a langgai to naju'a tolumpulu bo walumpaemo kasaena. 6 Tempo Yesus nanggita tau etu naturu ri setu pade ninjanina sakuya kasaena ju'ana etu, nekutanamo I'a ka tau etu, "Madota iko mabelo?" 7 Nesonomo tau naju'a etu, "Uma, da'a ria tau manggeni aku mpaka riara kola tempo ue kola etu nojajompe. Bate-batena tempo aku dalaku mompasimbuku malau mesua nariamo tau ntanina nokolu nesua riara ue etu." 8 Pade nangulimo Yesus ka i'a, "Pembangumo! Lulumo ompa paturumu pade polumakomo!" 9 Kaliu-liu nabelomo ju'a ntau etu. Nilulunamo ompana pade nolumakomo i'a. Tempo kajadia etu nawela Eo Mpenonto. 10 Sabana etu nangulimo topanggeniaka-topanggeniaka nto Yahudi ka tau lako nabelo nggari ju'ana etu, "Eo e'i Eo Mpenonto. Da'a mamala iko mompasinaka ompamu iwetu!" 11 Tapi nangulimo tau etu, "Tau to nompakabelo ju'aku pani'a nanguli ka aku, 'Lulumo ompamu bo polumakomo!' " 12 Nekutanamo tau-tau to Yahudi etu, "Isema tanu nompakau iko mombalulu ompamu pade molumako?" 13 Tapi da'a ninjani ntau lako nabelo nggari ju'ana etu bara isema to nompakabelo ju'ana, sabana Yesus notinggalipo nggari tatongo ntau dea etu. 14 Naopu etu Yesus nomposintomu tau etu riara Sapo Mpepue, pade niulina ka i'a, "Kitamo! Nabelomo ju'amu. Jadi ne'e mana iko mompowia silaka ala ne'e iko mawela to neliu nggaja'a nggari ju'amu etu." 15 Naopu etu nalaumo tau etu mpaka ri ja'i topanggeniaka nto Yahudi pade niulina ka ira Yesusmo to nompakabelo ju'ana. 16 Jadi nompamulamo ira mangelo jala mompandasa Yesus, sabana I'a nompakabelo tau naju'a etu ri Eo Mpenonto. 17 Tapi nangulimo Yesus ka ira, "Umaku bate-batena nokarajaa sampe ri eo e'i, pade Aku wo'u kana mokarajaa." 18 Nangepe tesa Yesus etu topanggeniaka-topanggeniaka nto Yahudi nantambai nangelo jala mompatesi I'a. Sabana I'a da'a aga nombaliunaka ada-ada Eo Mpenonto tapi I'a wo'u nanguli Alatala Umana mboto. Ante nanguli iwetu I'a nompakasimbayu korona ante Alatala. 19 Pade nesonomo Yesus ka topanggeniaka-topanggeniaka nto Yahudi etu, "Aku mpu'u-mpu'u notesa ka komi, Aku da'a mamala mompowia nuapa-nuapa nantuki dotaku mboto, tapi nuapa to nikitaku nggari ja'i Umaku etumo to nipowiaku. Nuapa-nuapa to nipowia Umaku, etu wo'u to kupowia. 20 Sabana Umaku nompotowe Aku Anana pade nipopokitana ka Aku pura-pura nuapa to nipowiana. Pade da'a aga etu, I'a kana mompopokita tandai-tandai to meliu nggabete nggari powia-powia etu pani'a ala rapogumaa komi. 21 Nasimbayu ewa Umaku nompakatuwu bali tau namate pade nombawai ka ira katuwua nabou, iwetu wo'u Aku Anana nombawai katuwua nabou ka isema-sema to nipodotaku. 22 Umaku mboto da'a mombatangara isema-sema sabana kuasa mombatangara manusia niwainamo ka Aku Anana 23 ala pura-pura tau mombabila Anana nasimbayu ewa ira nombabila I'a. Isema-sema da'a nombabila Aku e'i batuana ira da'a wo'u nombabila Umaku to nompakau Aku. 24 Aku mpu'u-mpu'u notesa ka komi, isema-sema mangepe pantesaku pade momparasaya Pue Alatala to nompakau Aku, ira kana mombarata katuwua mabelo sampe ri kasae-saena. Ira da'a mawela pesuku tapi ira nikabasakamo nggari kamatea pade nombarata katuwua nabou. 25 Aku mpu'u-mpu'u notesa ka komi, kana marata tempona banepia, pade kakonona naratamo tempona etu, tau-tau namate kana mangepe suara Ana nu Alatala, pade ira to mangepe suara etu kana matuwu bali. 26 Sabana nasimbayu ewa Umaku Alatala nakuasa mombawai katuwua ka manusia, iwetu wo'u Aku Anana niwaina ka kuasa mombawai katuwua ka manusia. 27 Pade niwaina wo'u ka Aku kuasa mombatangara manusia sabana Akumo to niuli Ana nu Manusia. 28 Ne'e komi mogumaa mangepe tesaku etu, sabana kana marata tempona pura-pura tau namate riara dayo kana mangepe suaraku. 29 Pade ira kana membangu nggariara dayo. Ira to nabelo pokaingguna kana membangu mombarata katuwua mabelo. Pade ira to naja'a pokaingguna kana membangu ala rasuku." 30 "Aku da'a mamala mompowia nuapa-nuapa nantuki dotaku mboto. Aku nombatangara nantuki nuapa to niepeku nggari ja'i Umaku, pade potangaraku nanoa sabana Aku da'a nantuki dotaku mboto tapi aga dota nu Umaku to nompakau Aku. 31 Ane aga Aku njamba'aku motesa mompakanoto isema Aku e'i natantu da'a masipato raparasaya pantesaku etu. 32 Tapi naria samba'a tau ntanina to nompakanoto isema Aku, pade ninjaniku tesana etu nakono. 33 Komi nombasuro tau nalau mpaka ri ja'i Yohanes Topediu pade i'a nompakanoto isema Aku e'i. 34 Kakonona da'a paraluu manusia mompakanoto isema Aku. Tapi niuliku iwetu ala komi mamala rapakasalama. 35 Yohanes Topediu etu nasimbayu ewa saongu poindo najela to newanta, pade komi nadamba-damba nantarima remena etu. Tapi kadamba nu rara komi etu aga sampalai. 36 Tapi naria sangelepa to neliu nggabete nggari tesa Yohanes Topediu to nompakanoto isema Aku. Etumo panggawiaku to niparasaya Umaku ka Aku ala kupakaopu. Pade panggawia etumo nompakanoto Aku e'i nipakau Umaku. 37 Pade Umaku to nompakau Aku wo'u nompakanoto isema Aku. Da'apa sanggani komi nangepe suarana pade da'apa wo'u sanggani komi nanggita lenjena. 38 Pade tesa-tesana da'a niboli komi riara nta'i. Nanotomo etu sabana Aku to nipakauna da'a niparasaya komi. 39 Komi naraji neguru isi Buku Nagasa sabana niuli komi nggariara buku etu komi mombarata katuwua mabelo sampe ri kasae-saena. Tapi isi Buku Nagasa etumo to nompakanoto isema Aku. 40 Tapi naupa iwetu komi bate-batena da'a madota marata ri ja'iku ala mombarata katuwua mabelo sampe ri kasae-saena. 41 Aku e'i da'a miki rabila manusia. 42 Tapi ninjaniku da'a ntoto naria towe ri ja'i Alatala riara nta'i komi. 43 Aku e'i narata ri ja'i komi niposumba Umaku, tapi komi da'a madota mantarima Aku. Tapi ane tau ntanina marata ri ja'i komi nantuki dotana mboto tau etumo to ratarima komi. 44 Natantumo da'a mamala komi momparasaya Aku sabana komi damadota ratoiya ntau. Komi da'a ntoto nompasimbuku ala ratoiya Alatala to samba'a lau! 45 Tapi naupa iwetu ne'e rapekiri komi bara Aku to mompangadu komi ri ngayo Umaku banepia. Naria to mompangadu komi, etumo nabi Musa mboto to nisarumaka komi. 46 Sabana ane komi mpu'u-mpu'u nomparasaya tesa nabi Musa, natantumo komi wo'u kana momparasaya Aku, sabana koroku e'imo to nitesa nabi Musa riara buku-bukuna. 47 Tapi ane da'a niparasaya komi nuapa to nitulisi nabi Musa iwenumo komi mamala momparasaya pantesaku?"
1 Naliu etu nalaumo Yesus mpaka ri sambote Rano Galilea to niuli wo'u Rano Tiberias. 2 Nadea mpu'u tau nantuki I'a sabana nikita iramo tandai-tandai to nipogumaa to nipowiana ri ja'i tau-tau naju'a. 3 Narata ri sambote rano nantendemo Yesus ri saongu buluna pade ri setu I'a nekatoko ante anaguru-anaguruna. 4 Tempo etu wo'u namosumo Eo Bete Paska nto Yahudi. 5 Tempo Yesus nantonguaka ri ntalilina nikitana tau dea narata mpaka ri ja'ina. Pade niulina ka i Filipus, "Ri umba rakalauta mangoli panggoni rawai ka tau dea e'i?" 6 Ninjani Yesus mamimo nuapa rapowiana ngina tapi niulina iwetu ala mombauji i Filipus. 7 Nesonomo i Filipus, "Roti olina roatu mpeka doi salaka da'a magana rakoni ntau dea e'i, nau damo rabagi ka ira aga mbau sakedi." 8 Pade nangulimo samba'a anaguruna ntanina to nosanga ka Andreas sampesuwu i Simon Petrus, 9 "Ri se'i naria samba'a ngana langgai nobaku limaongu roti pade romba'a bau. Tapi nuapa batuana etu ka tau-tau iwetu kadeana?" 10 Nangulimo Yesus, "Pakaumo ira pura-pura mekatoko." Ri peto'o etu nadea kawoko. Jadi tau dea etu nekatoko puramo ri bunggu nggawoko etu. Kadea nu langgai ri setu kira-kira limanjobu mba'a. 11 Naopu etu Yesus nangala roti pade niulina tarima kasi ka Alatala. Pade nitibo-tibona roti etu ka tau dea to nekatoko ri setu. Iwetu wo'u nipowiana ante bau. Pade tau dea etu nanggoni sampe nabasa. 12 Sangga nabasapa ira nangulimo Yesus ka anaguru-anaguruna, "Pasiromu komi puramo labi-labi nu roti ante bau etu. Ne'e sampe maria to ratajiaka." 13 Jadi nggari limaongu roti to nikoni ntau dea etu, nipasiromu ira labina naponupa sampulu rotonda. 14 Sangga nikita ntau dea tandai to nipogumaa to nipowia Yesus etu notesamo ira, "Mpu'u-mpu'u I'a etumo nabi to nisarumakata marata ri dunia e'i!" 15 Ninjani Yesus ira nopatuju marata mompasu'u I'a majadi Magau ira. Jadi nalaimo I'a njamba'ana nggari ja'i ira nantende mpaka ri buluna. 16 Tempo ntora nawengi notuamo anaguru-anaguru Yesus nggari buluna nalau mpaka ri wiwi rano. 17 Pade nesawi sakayamo ira ala mewote mpaka ri ngata Kapernaum. Tempo nawengimo Yesus da'apa narata ri ja'i ira. 18 Pade naratamo poiri naramboso sampe nabetemo balumba rara rano. 19 Tempo ira nosakaya kira-kira lima atau ono kilo ira nanggita Yesus nolumako ri bunggu nu ue etu nantotoaka sakaya ira. Nanggita etu naekamo rara ira. 20 Tapi nangulimo Yesus ka ira, "Ne'e maeka! Aku Yesusmo e'i!" 21 Nangepe etu ira nantarima I'a riara sakaya ante nadamba rara. Pade kaliu-liu nasampomo sakaya ira ri peto'o to nitunggai ira. 22 Naeo mpadondona todea to danaria ri sambote rano etu nantora aga saongu sakaya ri setu yowi. Pade nitora ira Yesus da'a nesawi sakaya mpasanggani-nggani ante anaguru-anaguruna, aga ira to nesawi sakaya mpaka ri sambotena. 23 Tempo etu naratamo sakaya-sakaya ntanina nggari ngata Tiberias nasampo namosu peto'o ira pura-pura nanggoni roti to niposambaya i Pue. 24 Sangga ninjani ntau dea etu Yesus ante anaguru-anaguruna da'a mana naria ri setu, ira wo'u nesawi sakaya nalau mpaka ri ngata Kapernaum mangelo I'a. 25 Tempo tau dea nosintomu ka Yesus ri sambote rano etu ira nompekutana I'a, "Guru, ipiamo Komi narata ri se'i?" 26 Nesonomo Yesus, "Aku mpu'u-mpu'u notesa ka komi, komi nangelo Aku sabana komi nanggoni roti sampe nabosu, da'a sabana komi nangginjani patuju tandai to nipogumaa to nipowiaku etu. 27 Ne'e komi aga mokarajaa mangelo panggoni to masalisa maopu bo mawau. Agina komi mokarajaa mangelo panggoni to da'a mawau to mamala mombawai katuwua mabelo sampe ri kasae-saena. Aku, Ana nu Manusiamo to mombawai panggoni etu ka komi, sabana Akumo to nionggotaka Alatala mowia etu." 28 Pade nekutanamo ira ka I'a, "Nuapa masipato rapowia kami ala kami mowia to nikonoa Alatala?" 29 Nesonomo Yesus, "Iwe'imo powia to nikonoa Alatala: Parasayamo Aku to nipakauna." 30 Pade nanguli wo'umo ira ka Yesus, "Ane iwetu tandai nuapa rapowia Komi ala kami mamala manggita pade momparasaya Komi? Powia nuapa rapowia Komi? 31 Tempo totu'a kami nggaolu naria ri karawa baina ira nanggoni roti to niuli 'manna.' Ewa to nitulisi riara Buku Nagasa iwe'i: 'I'a nombawai roti nggari suruga rakoni ira.' " 32 Nanguli Yesus ka ira, "Aku mpu'u-mpu'u notesa ka komi, da'a Musa nggaolu to nombawai ka komi roti nggari suruga, tapi Umaku to nombawai ka komi roti to mpu'u-mpu'u nggari suruga we'i-we'i. 33 Sabana roti to nopu'u nggari ja'i Alatala etumo to nana'u nggari suruga pade nombawai katuwua ka manusia riara dunia." 34 Nanguli wo'umo tau dea etu, "Ane iwetu, Guru, wai ka kamimo roti etu eo-eo." 35 Nangulimo Yesus ka ira, "Aku e'imo roti to mombawai katuwua etu. Isema-sema marata ri ja'iku da'a mana maoro, pade isema-sema momparasaya Aku da'a mana mabai tambolona sampe ri kasae-saena. 36 Tapi ewa to niuliku ka komi pani'a, naupa komi nanggita Aku komi da'apa nomparasaya Aku. 37 Pura-pura tau to niwai Umaku ka Aku kana marata ri ja'iku, pade isema-sema marata ri ja'iku kana kutarima, da'a ntoto kupoara. 38 Sabana patujuku mana'u nggari suruga da'a ala mompowia dotaku mboto tapi ala mompowia nuapa to nipodota Alatala to nompakau Aku. 39 Pade iwe'imo dota Alatala to nompakau Aku, ala nggari pura-pura tau to niwaina ka Aku da'a maria samba'a to malipo. Ira pura-pura kana kupakatuwu bali ri kaopu nu dunia. 40 Iwe'imo dota Umaku, ala pura-pura tau to manggita Aku Anana pade momparasaya Aku kana mombarata katuwua mabelo sampe ri kasae-saena. Pade ira kana kupakatuwu bali ri kaopu nu dunia." 41 Nangepe tesa etu nokagagutu-gutumo tau-tau to Yahudi ri setu, sabana Yesus nanguli, "Aku e'imo roti to nana'u nggari suruga." 42 Nangulimo ira samba'a bo samba'a, "Iwenu, da'a I'a e'i Yesus ana Yusuf? Ninjanita pura indo bo umana. Iwenu sampe I'a nanguli I'a nana'u nggari suruga?" 43 Nangepe etu nangulimo Yesus ka ira, "Ne'e komi mokagagutu-gutu samba'a bo samba'a. 44 Da'a ria samba'a mamala marata ri ja'iku ane Umaku to nompakau Aku da'a manggeni ira mpaka ri ja'iku. Pade isema-sema to marata ri ja'iku kana kupakatuwu bali ri kaopu nu dunia. 45 Riara buku nabi-nabi naria nitulisi iwe'i: 'Tau pura-pura kana rapatuduki Alatala.' Jadi isema-sema to mangepe pepatuduki Umaku pade meguru nggari ja'ina kana marata ri ja'iku. 46 Etu da'a batuana nariamo tau to nanggita Umaku. Sabana aga Aku to narata nggari ja'ina to nanggita I'a. 47 Aku mpu'u-mpu'u notesa ka komi, isema-sema to nomparasaya Aku kana mombarata katuwua mabelo sampe ri kasae-saena. 48 Aku e'imo roti to mombawai katuwua. 49 Totu'a komi nggaolu nanggoni roti to niuli 'manna' ri karawa baina, pade ira pura-pura namate. 50 Tapi da'a iwetu ante roti to nana'u nggari suruga. Isema-sema to manggoni roti etu da'a mana mamate. 51 Aku e'imo roti to nana'u nggari suruga to mombawai katuwua etu. Isema-sema manggoni roti etu kana matuwu mabelo sampe ri kasae-saena. Roti to mombawai katuwua etumo isi koroku to kuwai ala manusia riara dunia mamala matuwu mabelo sampe ri kasae-saena." 52 Nangepe pantesa Yesus etu nosinggarau mbotomo tau-tau to Yahudi. Nosipekutanamo ira samba'a bo samba'a, "Iwenu I'a mamala mombawai isi korona ala rakonita?" 53 Pade nangulimo Yesus ka ira, "Aku mpu'u-mpu'u notesa ka komi, ane komi da'a manggoni isi koroku, pade da'a manginu leiku komi da'a ntoto matuwu mabelo. 54 Tapi isema-sema to manggoni isi koroku pade manginu leiku ira kana mombarata katuwua mabelo sampe ri kasae-saena, pade Aku kana mompakatuwu bali ira ri kaopu nu dunia. 55 Sabana isi koroku etumo panggoni to nakonona pade leiku etumo panginu to nakonona. 56 Isema-sema to manggoni isi koroku pade manginu leiku maroo mosanggani-nggani ante Aku pade Aku maroo mosanggani-nggani ante ira. 57 Umaku to Natuwuna nompakau Aku, pade Aku natuwu nggari kuasana. Iwetu wo'u tau to manggoni isi koroku kana matuwu nggari kuasaku. 58 Aku e'imo roti to nana'u nggari suruga. Roti e'i da'a ewa roti 'manna' to nikoni totu'a komi nggaolu. Naupa ira nanggoni roti 'manna' etu namatemo ira. Tapi isema-sema manggoni roti e'i kana matuwu mabelo sampe ri kasae-saena." 59 Pura-pura tesa etu nitesa Yesus tempo I'a nompatuduki tau riara sapo mpodade ri ngata Kapernaum. 60 Naopu nangepe pantesa Yesus etu nadeamo topantuki I'a nanguli, "A, nakaja gaga pepatuduki e'i! Da'a ria samba'a mamala mantuki tesa etu!" 61 Ninjani Yesus topantuki I'a nokagagutu-gutu iwetu. Jadi nangulimo I'a ka ira, "Naju'amo rara komi mangepe pepatudukiku etu? 62 Iwenumo ane komi manggita Aku, Ana nu Manusia meore mpanjili mpaka ri peto'oku pamulana? 63 Nosa Nagasa nu Alatalamo to mombawai katuwua. Kuasa manusia da'a ria gunana. Tesa-tesa to niuliku ka komi etumo tesa nggari ja'i Nosa Nagasa nu Alatala. Pade tesa-tesa etu to mombawai katuwua mabelo. 64 Tapi naupa iwetu danaria sanu nggari tatongo komi to da'a nomparasaya." Yesus nanguli iwetu sabana ninjanina mamimo nggari pamulana isema-sema to da'a momparasaya pade isema wo'u to mompobalu I'a ka balina. 65 Pade niuli Yesus wo'umo, "Etu sampe nitesaku ka komi pani'a, da'a ria samba'a mamala marata ri ja'iku ane da'a nipaloga Umaku." 66 Nompamula nggari eo etu nadeamo topantuki Yesus nompalasi I'a. Ira mana madota mantuki I'a. 67 Nanggita etu nangulimo Yesus ka anaguruna sampulu romba'a etu, "Iwenumo? Komi wo'u madota mompalasi Aku?" 68 Nesonomo i Simon Petrus, "Pue, ri ja'i sema rakalau kami? Aga Komi to nombatesa tesa to mombawai katuwua mabelo sampe ri kasae-saena. 69 Pade niparasaya kamimo ante mpu'u-mpu'u Komimo To Nagasana to narata nggari ja'i Alatala." 70 Nesonomo Yesus, "Aku mbotomo to nompelisi komi sampulu romba'a etu. Tapi naupa iwetu naria samba'a nggari tatongo komi etu majadi ewa Magau nu Seta." 71 To nipatuju Yesus i'amo Yudas ana i Simon Iskariot. Sabana naupa Yudas etu samba'a nggari tatongo ira sampulu romba'a, i'a etumo to mompobalu Yesus ka balina banepia.
1 Naopu etu nalaumo Yesus nompebutu ngata ri Bagia Galilea. I'a da'a mana madota malau ri Bagia Yudea sabana topanggeniaka-topanggeniaka nto Yahudi ri setu danangelo jala mompatesi I'a. 2 Tempo etu namosumo eo bete nto Yahudi to niuli Eo Bete Mowia Pakumpa. 3 Jadi nangulimo sampesuwu-sampesuwu Yesus ka I'a, "Agina Komi mompalasi ngata e'i pade malau mpaka ri Bagia Yudea ala pura-pura topantuki Komi mamala manggita kabaraka-kabaraka to nipowiamu. 4 Da'a ria samba'a tau aga mantabuniaka panggawiana ri peto'o nakalinoa ane i'a madota ranjani ntau pura-pura. Ane Komi mpu'u-mpu'u mompowia tandai to nipogumaa pakanotomo etu ka todea." 5 Niuli ira iwetu sabana ira mboto wo'u da'a nomparasaya I'a. 6 Nesonomo Yesus, "Da'apa narata tempoku malau. Tapi komi mamala malau tempo nuapa-nuapa, 7 sabana da'a ria tau ri dunia e'i nomporau rara komi. Tapi Aku niporau rara ira, sabana Aku nompakanoto pokainggu ira naja'a. 8 Kalaumo komi mpaka ri posusa eo bete etu. Aku da'apa malau, sabana da'apa narata tempoku malau." 9 Iwetumo pantesa Yesus ka sampesuwu-sampesuwuna. Pade naopu etu I'a mboto naroo ri Bagia Galilea. 10 Sangga nalaimo sampesuwu Yesus mpaka ri Yerusalem, I'a wo'u nalau nggalino njamba'ana mpaka ri posusa etu ala da'a ranjani ntau dea. 11 Ri posusa etu topanggeniaka-topanggeniaka nto Yahudi tunggai nangelo I'a. Ira nekutana-tana, "Ri umba tanu I'a?" 12 Ri tatongo ntau dea nadeamo tau nosiwawayo samba'a bo samba'a ewa Yesus. Naria to nanguli, "I'a tau nabelo." Tapi naria wo'u sanu tau nanguli, "Da'a! I'a nombabagiu todea!" 13 Tapi da'a ria samba'a tau nabia nanguli ntodo, sabana ira naeka ka topanggeniaka-topanggeniaka nto Yahudi. 14 Karantongo posusa etu nesuamo Yesus mpaka riara Sapo Mpepue pade nompamulamo I'a nompatuduki tau. 15 Nangepe pepatuduki Yesus natekajamo rara topanggeniaka-topanggeniaka nto Yahudi. Ira nanguli, "Hai! Iwenumo sampe tau e'i nata'u iwetu? Kakonona I'a da'a nosikola ri posikolata!" 16 Nesonomo Yesus ka ira, "Pepatudukiku da'a nantuki pangginjaniku mboto, tapi etu nggari ja'i Alatala to nompakau Aku. 17 Isema-sema madota manggawia dota Alatala natantumo nangginjani ane pepatuduki to nitesaku e'i nggari ja'i Alatala bara aga nggari ja'iku mboto. 18 Tau to nompatuduki nantuki pangginjanina mboto aga miki rabila manusia. Tapi tau to nompasimbuku ala tau to nompakau i'a rabila, tau etumo nanoa, da'a ria bagiuna. 19 Nabi Musa nombawai ka komi Atura-atura agama tapi da'a ria samba'a nggari tatongo komi natutu nantuki Atura-atura etu. Jadi nokuya komi nompasimbuku mompatesi Aku?" 20 Nesonomo tau dea etu, "Nagilamo Komi! Isema nompasimbuku mompatesi Komi?" 21 Nesonomo Yesus ka ira, "Aga sangaya kabaraka to nipowiaku ri Eo Mpenonto bopia pade komi pura-pura natekaja. 22 Nabi Musa nombawai ada mposuna ka komi. Kakonona ada etu da'a nopu'u nggari ja'i Musa tapi nggari ja'i totu'a komi nggaolu. Pade komi mboto nompowia ada mposuna etu ri Eo Mpenonto. 23 Jadi ane komi nowia ada mposuna ri Eo Mpenonto ala ne'e mombaliunaka Atura-atura to nipapola i Musa, nokuya komi nomporau Aku sabana Aku nompakabelo njumaongu koro samba'a tau naju'a ri Eo Mpenonto bopia? 24 Ne'e mana mompakatantu sala ntau nantuki to nikita matamu, tapi pakatantumo sala ntau ante nanoa!" 25 Naopu etu naria bara sakuya mba'a pue ngata Yerusalem nanguli, "Da'a I'a e'imo tau to nielo topanggeniaka-topanggeniaka ala rapatesi ira? 26 Tapi kitamo! I'a notesa ri ngayo ntodea pade da'a ria samba'a tau nombabali tesana. Ne'e-ne'e topanggeniaka-topanggeniaka nangginjani I'a etumo Magau to Mompakasalama to nijanji Alatala! 27 Tapi ane Magau to Mompakasalama marata da'a ninjanita nggari umba karatana. Tapi tau e'i ninjanita nggari umba karatana." 28 Etu sampe tempo Yesus nompatuduki riara Sapo Mpepue I'a notesa ante suarana namangga, "Niuli komi ninjani komi mamimo isema Aku e'i pade nggari umba karataku. Tapi Aku da'a narata nantuki dotaku mboto. Aku narata nantuki dota Alatala to nompakau Aku. I'amo to mamala raparasaya, tapi komi da'a ntoto nosinjani ante I'a. 29 Tapi Aku nosinjani ante I'a, sabana Aku narata nggari ja'ina. I'amo to nompakau Aku momai." 30 Tempo etu naria to nompasimbuku manjoko I'a. Tapi da'a ria samba'a namala manjoko I'a sabana da'apa narata tempona to nipakatantu Alatala. 31 Tapi nggari tatongo ntau dea etu nadeamo tau nomparasaya I'a. Ira nanguli, "Natantumo I'a etu Magau to Mompakasalama to nijanji Alatala, sabana kitamo kadea nu tandai-tandai to nipogumaa to nipowiana!" 32 Tau-tau to Parisi nangepe lele to nanguli tau dea nosiwawayo iwetu ewa Yesus. Jadi balengga-balengga topanggeni agama Yahudi bo tau-tau to Parisi nompakau bara sakuya mba'a topojaga Sapo Mpepue malau manjoko Yesus. 33 Jadi nangulimo Yesus ka ira, "Aku damo sampalai mosanggani-nggani ante komi pura-pura pade Aku kana manjili mpaka ri ja'i to nompakau Aku. 34 Komi kana mangelo Aku tapi da'a rarata komi Aku. Pade da'a mamala komi malau mpaka ri peto'o kukalau." 35 Sangga nangepe tesa Yesus etu notesamo tau-tau to Yahudi samba'a bo samba'a, "Peto'o ri umba rakalauna sampe da'a raratata I'a? Bara I'a malau mpaka ri ja'i tau-tau to Yahudi to neto'o nosimpotatare ri tatongo tau-tau da'a to Yahudi pade mompatuduki tau-tau da'a to Yahudi? 36 Nuapa wo'u batuana pantesana nanguli 'Komi kana mangelo Aku tapi da'a rarata komi Aku, pade da'a mamala komi malau mpaka ri peto'o kukalau?' " 37 Ri eo kaopuna posusa etu, etumo eo to neliu nggapokona, nekanggoremo Yesus riara Sapo Mpepue notesa ante suara namangga, "Isema-sema to nabai tambolona, kamaimo manginu ri ja'iku. 38 Ewa to nitulisi riara Buku Nagasa, isema-sema nomparasaya Aku kana maria ue moili nggariara nta'ina to mombawai katuwua." 39 To nipatuju Yesus etumo Nosa Nagasa nu Alatala to mesua ri ja'i tau-tau to nomparasaya I'a. Tempo etu Nosa Nagasa da'apa nipopana'u ka topomparasaya sabana Yesus da'apa niore bo nibila ri suruga. 40 Nadea tau nangepe pantesa Yesus etu pade naria ira santongo nanguli, "Natantumo I'a nabi to nijanji Alatala nggaolu!" 41 Tapi naria wo'u santongo ira nanguli, "I'a e'imo Magau to Mompakasalama to nijanji Alatala!" Tapi naria wo'u sanu tau nanguli, "Da'a! Magau to Mompakasalama da'a marata nggari Bagia Galilea! 42 Sabana riara Buku Nagasa naria nitulisi Magau to Mompakasalama kana meumba nggari muli Magau Daud, I'a kana marata nggari ngata Betlehem ngata pesuwu Magau Daud." 43 Jadipa tau dea etu nosisala paha mbotomo ewa Yesus. 44 Naria ira to madota manjoko I'a, tapi da'a ria samba'a namala mombasoko I'a. 45 Naopu etu topojaga Sapo Mpepue to nipakau lau manjoko Yesus nanjili mpaka ri ja'i tau-tau to Parisi bo balengga-balengga topanggeni agama. Narata ri setu nangulimo tau-tau to Parisi bo balengga-balengga topanggeni agama ka ira, "Nokuya komi da'a nanggeni tau etu wemai?" 46 Nesonomo topojaga Sapo Mpepue etu, "Da'apa sanggani kami nangepe tesa manusia ewa tesa ntau etu!" 47 Nesonomo tau-tau to Parisi, "Iwenumo? Komi wo'u nibagiu ntau etu? 48 Kitamo! Da'a ntoto ria topanggeniaka bara tau to Parisi to nomparasaya I'a! 49 Aga tau dea biasa etu nomparasaya, ira to da'a nangginjani Atura-atura agama. Nasurukawumo ira!" 50 Ri tatongo to Parisi ri setu naria samba'a tau nosanga ka Nikodemus. Nariamo sanggani bopia I'a nalau ri ja'i Yesus. Nangulimo i'a ka roa-roana to Parisi, 51 "Iwenumo? Nantuki Atura-atura agamata mamala samba'a tau rapakasala ane da'apa niepeta tesana bara da'apa ninjanita pokaingguna?" 52 Tapi roa-roana to Parisi nanggarau i'a. Niuli ira, "Komi wo'u tau nggari Galilea? Paresamo Buku Nagasa mpakabelo-belo! Kana rakita komi da'a ntoto ria samba'a nabi meumba nggari Bagia Galilea!" [ 53 Naopu etu nanjilimo ira pura-pura mpaka ri sapo ira mboto.
1 Tapi Yesus lau nantende mpaka ri bunggu nu Bulu Zaitun. 2 To nailena kampadondo njiina nalau wo'umo I'a nesua riara Sapo Mpepue, pade pura-pura tau dea narata ri ja'ina. Pade nekatokomo I'a nompatuduki ira. 3 Tempo etu naratamo guru-guru agama bo tau-tau to Parisi nanggeni samba'a besi to nirata ira nebualo. Besi etu nipopekanggore ira ri tatongo ntau dea. 4 Pade nangulimo ira ka Yesus, "Guru, besi e'i nirata kami nebualo. 5 Riara Atura-atura agama naria parenta i Musa ka kita to nanguli besi-besi noinggu iwetu kana rarempe ante watu sampe mamate. Iwenu pombaratamu ewa powia besi e'i?" 6 Patuju nu pompekutana ira etu ala mangelo sala Yesus sampe ira mamala mompakasala I'a. Tapi Yesus da'a notingo. I'a aga notunggou nantulisi ri tana ante koyampalena. 7 Tapi da'a nenonto ira nompekutana-tana I'a. Jadi kaopuna nekanggoremo Yesus nanguli ka ira, "Isema-sema nggari tatongo komi etu to da'a nasilaka, i'amo mokolu mombarempe besi e'i ante watu." 8 Naopu Yesus notesa iwetu notunggou wo'umo I'a nantulisi ri tana ante koyampalena. 9 Sangga nangepe pantesa Yesus etu nalaimo ira nggari setu samba'a bo samba'a nompamula nggari totu'a sampe naboli damo Yesus ante besi etu ri ngayona. 10 Pade nekanggoremo Yesus nanguli ka besi etu, "Ri umba puramo tau pani'a? Mana ria to madota mompakasala iko?" 11 Nesonomo besi etu, "Da'a mana ria, Pue." Nangulimo Yesus, "Aku wo'u da'a mompakasala iko. Panjilimo iko, pade ne'e mana mowia silaka."] 12 Nanguli wo'umo Yesus ka tau dea, "Aku e'imo reme nu dunia. Isema-sema majadi topantuki Aku da'a molumako riara karumauna, tapi ira kana mombarata reme to mombawai katuwua mabelo." 13 Nesonomo tau-tau to Parisi ka I'a, "Komi etu nantesa koromu mboto! Pantesamu etu da'a nakono!" 14 Nangulimo Yesus, "Nau Aku nantesa koroku mboto, pantesaku e'i nakono sabana ninjaniku nggari umba karataku pade mpaka ri umba wo'u kukalau. Tapi da'a ninjani komi nggari umba karataku pade mpaka ri umba kukalau. 15 Komi etu nompakatantu sala ntau nantuki pompekiri manusia. Tapi Aku e'i da'a nompakatantu sala ntau. 16 Tapi ane rapana Aku mowia etu natantumo pombabutusiku kana manoa, sabana Aku da'a aga njamba'aku. Umaku to nompakau Aku nomporoa Aku. 17 Riara Atura-atura agama komi naria nitulisi iwe'i: 'Ane maria romba'a sabi mantakono sangele riara mpotangara, tesa ira namala raparasaya.' 18 Naria romba'a to nompakanoto isema Aku e'i. Samba'a Aku mboto, pade karomba'ana Umaku to nompakau Aku." 19 Pade nekutanamo ira ka I'a, "Ri umbamo Umamu?" Nesonomo Yesus, "Komi da'a ntoto nangginjani isema kakonona Aku e'i. Pade da'a wo'u ninjani komi Umaku. Ane ninjani komi Aku, natantu ranjani komi wo'u Umaku." 20 Pantesa Yesus etu nitesana tempo I'a nompatuduki tau namosu ante peti mpesomba riara Sapo Mpepue. Da'a ria samba'a tau namala manjoko I'a sabana da'apa narata tempona. 21 Pade nanguli wo'umo Yesus ka ira, "Aku kana malai nggari se'i pade komi kana mangelo Aku, tapi komi aga mamate riara silakamu. Komi da'a mamala malau ri peto'o to kukalau." 22 Nangepe etu notesamo topanggeniaka-topanggeniaka nto Yahudi samba'a bo samba'a, "Bara I'a mopatuju mompatesi korona mboto, sabana niulina, 'Komi da'a mamala malau ri peto'o to kukalau.' " 23 Tapi nangulimo Yesus ka ira, "Komi e'i nopu'u nggari kaedena, tapi Aku e'i nopu'u nggari kalangana. Komi nggari dunia e'i, tapi Aku da'a nggari dunia e'i. 24 Etu sampe niuliku ka komi, komi kana mamate riara silakamu. Sabana ane komi da'a momparasaya Aku e'imo I'a natantumo komi kana mamate riara silakamu." 25 Pade nekutana wo'umo ira, "Isema tano kakono-konona komi etu?" Nesonomo Yesus, "Mana ria gunana kutesa ka komi! 26 Danadeapa mamala kutesa mompakasala komi. I'a to nompakau Aku etu nanoa. Pade nuapa to niepeku nggari ja'ina etu wo'u kutesa ka manusia ri dunia e'i." 27 To nitesa Yesus etu nantesa Umana, tapi da'a ninjani ira patujuna etu. 28 Etu sampe I'a nanguli ka ira, "Ane komi mangonggotaka Aku, Ana nu Manusia mpakalanga-langa banepia, tempo etumo kana ranjani komi Aku e'imo I'a to nipakau Alatala, pade kana ranjani komi wo'u da'a ria sangaya to nipowiaku nantuki dotaku mboto. Tapi Aku bate-batena notesa nantuki nuapa to nipatuduki Umaku ka Aku. 29 Pade to nompakau Aku etu wo'u nomporoa Aku. Da'a nipalambana Aku njamba'aku, sabana Aku bate-batena nompowia to nompakadamba rarana." 30 Tempo Yesus notesa iwetu nadeamo tau nomparasaya I'a. 31 Naopu etu nangulimo Yesus ka tau-tau to Yahudi to nomparasaya I'a, "Ane komi maroo mantuki tesaku komi mpu'u-mpu'u majadi topantuki Aku. 32 Pade ante iwetu komi kana mangginjani pepatuduki to nakonona sampe komi mana rapobatua." 33 Nesonomo tau-tau to Yahudi etu, "Kami e'i muli Abraham. Da'apa naria sanggani kami nipobatua ntau. Nokuya Komi nanguli ka kami, 'Komi mana rapobatua?' " 34 Nesonomo Yesus ka ira, "Aku mpu'u-mpu'u notesa ka komi, isema-sema nompowia silaka i'a nipobatua silaka. 35 Ane samba'a batua, da'a natantu i'a maroo raranjapo madikana. Tapi ane ana madika mboto, natantumo i'a maroo raranjapo umana. 36 Jadi ane Ana nu Alatala mbotomo to manggabasaka komi nggari silaka, komi mpu'u-mpu'u matekabasaka! 37 Ninjaniku komi etu pura-pura muli Abraham. Tapi nau damo wa'a danaria komi to madota mompatesi Aku, sabana komi da'a ntoto madota mantarima pepatudukiku. 38 Nuapa to nikitaku ri ja'i Umaku etumo to nitesaku ka komi. Tapi komi etu aga nompowia nuapa to nipatuduki umamu ka komi." 39 Nesonomo ira ka Yesus, "Uma kami Abraham." Nangulimo Yesus, "Ane mpu'u-mpu'u komi etu muli Abraham, natantumo pokainggu komi kana mabelo ewa pokainggu Abraham. 40 Aku nompasimbayu ka komi pepatuduki to nakono to niepeku nggari ja'i Alatala mboto tapi komi aga madota mompatesi Aku. Da'a iwetu pokainggu Abraham! 41 Pokainggu komi e'i ewa pokainggu uma komi mboto!" Nesono wo'umo ira, "Kami e'i da'a ana wone! Uma kami aga samba'a lau, etumo Alatala!" 42 Nangulimo Yesus ka ira, "Ane Alatala etu Uma komi, komi kana mompotowe Aku, sabana Aku narata nggari ja'ina. Aku da'a narata nantuki dotaku mboto, tapi nantuki dotana to nompakau Aku. 43 Nuapa sabana sampe da'a ntoto ninjani komi batuana pantesaku? Sabana komi da'a madota mantarima pepatudukiku. 44 Magau nu Setamo uma komi! Pade komi batena madota mantuki dota nu uma komi etu. Nggari pamulanamo i'a bate-batena topepatesi, pade da'a ntoto naria to nanoana ri ja'ina, nau aga sakedi. Ane i'a nodawa etu masipato mpu'u sabana iwetu mamimo ingguna. I'a topodawa pade uma nu pura-pura topodawa. 45 Jadi etumo sabana ane Aku nombatesa ka komi tesa to nakonona komi da'a madota momparasaya tesa etu. 46 Isema nggari ja'i komi etu mamala mompakanoto Aku e'i nowia silaka? Ane Aku notesa ka komi tesa to nakonona, nokuya komi da'a nomparasaya Aku? 47 Tau-tau to najadi bagia nu Alatala madota mantarima Tesa nu Alatala. Tapi komi da'a madota mantarima tesa etu sabana komi da'a bagia nu Alatala." 48 Nangepe tesa etu tau-tau to Yahudi nanguli sinja'i Yesus iwe'i: "Nakono mpu'u tesa kami! Komi e'imo tau to Samaria to nipesua seta!" 49 Nesonomo Yesus, "Aku e'i da'a nipesua seta. Aku nombabila Umaku, tapi komi etu nanguli sinja'i Aku. 50 Aku da'a miki rabila ntau. Naria mamimo samba'a to nombabila Aku pade I'amo to nompakatantu Aku nanoa. 51 Aku mpu'u-mpu'u notesa ka komi, isema-sema mantuki tesaku ira da'a ntoto mamate sampe ri kasae-saena." 52 Nangepe etu nangulimo tau-tau to Yahudi ka Yesus, "We'i-we'i ninjani kami mpu'umo Komi etu nipesua seta! Abraham pade nabi-nabi nggaolu namate puramo. Tapi Komi nanguli isema-sema mantuki tesamu da'a ntoto mamate sampe ri kasae-saena! 53 Iwenumo? Komipa neliu nggabete nggari pueta Abraham? I'a pade nabi-nabi nggaolu namate puramo! Ulimo! Isema ntoto Komi sampe Komi nabia nanguli iwetu?" 54 Nesonomo Yesus, "Ane Aku miki rabila ntau da'a ntoto ria batuana. Tapi Umaku to nipangaku komi Alatalamu, I'amo to nombabila Aku. 55 Komi da'a nosinjani ante I'a. Tapi Aku nosinjani belo ante I'a. Ane Aku manguli Aku da'a nosinjani ante I'a Aku e'i majadi topodawa nasimbayu ewa komi. Tapi Aku mpu'u-mpu'u nosinjani ante I'a pade Aku natutu nantuki tesana. 56 Totu'a komi nggaolu Abraham nadamba mpu'u rarana sabana ninjanina i'a kana manggita karataku ri dunia. Nikitanamo pade nadamba mpu'umo rarana." 57 Nanguli wo'umo tau to Yahudi etu ka Yesus, "Komi etu da'apa nagana limampulu mpae umurumu! Iwenu sampe Komi nanguli nikita Komimo totu'a kami nggaolu Abraham?" 58 Nesonomo Yesus, "Aku mpu'u-mpu'u notesa ka komi, da'apa Abraham nesuwu, Aku e'i njau nariamo!" 59 Nangepe pantesa Yesus etu tau-tau to Yahudi nangala watumo madota mombarempe I'a sampe mamate. Tapi notinggalipomo I'a nggari tatongo ira pade nalai nompalasi Sapo Mpepue etu.
1 Tempo Yesus riara mpolumakona I'a nanggita samba'a tau to naburo mami nggari pesuwuna. 2 Nekutanamo anaguru-anaguru Yesus ka I'a, "Guru, isema to nasilakana sampe tau e'i naburo mami nggari pesuwuna? Totu'ana atau i'a mboto?" 3 Nesonomo Yesus, "Da'a i'a nasilaka, da'a wo'u totu'ana. Tapi etu najadi ala kabaraka nu Alatala mamala rakita riara nggatuwuna. 4 Ane eona danarawa kita kana manggawia panggawia nu Alatala to nompakau Aku. Sabana ane nggawengina da'a mana naria samba'a to mamala manggawia. 5 Sakuya kasaena Aku riara dunia e'i Akumo najadi reme to mompakareme rara manusia." 6 Naopu I'a notesa iwetu Yesus nantailu tana pade nialana nipiji-pijina ante koyampalena sampe najadi depu, pade nigesena depu etu ri mata ntoburo etu. 7 Pade niulina ka tau etu, "Kalau do'umo matamu ri ue kola Siloam." Sanga Siloam etu batuana "Nipakau." Jadi nalau mpu'umo toburo etu. Narata ri kola Siloam etu nido'unamo matana pade natinggulimo i'a ante matana to nanaa. 8 Tau-tau saboya ante i'a pade tau-tau to nanggita i'a nerapi-rapi ri wiwi jala bopia, ira nosipekutana samba'a bo samba'a, "Da'a i'a etumo tau to nekatoko ri wiwi jala nerapi-rapi bopia?" 9 Naria to nanguli, "Nakono! I'a mamimo!" Tapi naria wo'u sanu tau nanguli, "Da'a i'a, aga lenjena nasimbayu." Tapi i'a mboto nanguli, "Akumo e'i!" 10 Jadi nekutanamo ira ka i'a, "Iwenu sampe matamu nipakanaamo?" 11 Nesonomo i'a, "Tau to nosanga ka Yesus nompowia depu, pade depu etu nigesena ri mataku. Pade nipakauna aku malau mombado'u mataku ri kola Siloam. Jadi nalau mpu'umo aku nombado'u mataku ri ue kola Siloam etu. Naopu aku nendo'u namalamo aku nekita." 12 Nekutana wo'umo ira ka i'a, "Ri umbamo tau etu?" Nesonomo toburo etu, "Da'a ninjaniku." 13 - 14 Tempo Yesus nombagalo tana ante iluna pade nompakanaa mata ntoburo etu nawela Eo Mpenonto. Jadi etu sampe toburo to nabelomo matana etu nikeni ntau mpaka ri ja'i tau-tau to Parisi. 15 Pade tau-tau to Parisi wo'u nompekutana toburo etu, "Iwenu sampe matamu nipakanaa?" Nesonomo i'a, "I'a nombagese depu ri mataku. Pade naopu aku nendo'u namalamo aku nekita." 16 Pade nangulimo bara sakuya mba'a to Parisi, "Ane iwetu nanotomo tau etu da'a nggari ja'i Alatala, sabana I'a da'a natundu riara atura-atura Eo Mpenonto." Tapi naria wo'u santongo nanguli, "Umbamo tau nasilaka mamala manggawia kabaraka ewa etu?" Jadi nosisala paha mbotomo ira. 17 Jadi nekutana wo'umo to Parisi ka toburo etu, "Iwenu pombaratamu ewa tau etu, sabana matamu to nipakanaana?" Nesonomo toburo etu, "I'a samba'a nabi." 18 Tapi topanggeniaka-topanggeniaka nto Yahudi etu da'a madota momparasaya tau etu mpu'u-mpu'u naburo pade lako nipakanaa matana. Jadi ira nompokio indo bo uma ntoburo to nipakabelo matana etu 19 pade nipekutana ira, "Nakono mpu'u e'imo ana komi to niuli komi naburo mami nggari pesuwuna? Iwenu sampe we'i-we'i nabelomo matana?" 20 Nesonomo indo bo uma ntoburo etu, "To ninjani kami i'a etu mpu'u-mpu'u ana kami, pade i'a mpu'u-mpu'u naburo mami nggari pesuwuna. 21 Tapi bara iwenu sampe i'a namala nekita we'i-we'i da'a ninjani kami. Pade da'a wo'u ninjani kami bara isemana to nompakabelo matana etu. Agina komi mompekutana i'a mboto. Nabetemo i'a. Namalamo i'a mboto motesa mombasono pompekutana komi etu." 22 Indo bo umana nanguli iwetu sabana naekamo ira ka topanggeniaka-topanggeniaka nto Yahudi. Sabana nasintuwumo topanggeniaka-topanggeniaka bara isema-sema mompangaku Yesus Magau to Mompakasalama to nijanji Alatala ira mana rapaloga mesua riara sapo mpodade. 23 Etu sampe indo bo umana nanguli, "Nabetemo i'a. Agina komi mompekutana i'a mboto." 24 Naopu etu ira nompokio toburo etu sangganipa pade niuli ira ka i'a, "Ulimo to nakonona ri ngayo Alatala! Ninjani kamimo tau nompakanaa matamu etu tau nasilaka!" 25 Pade nesonomo toburo etu, "Da'a ninjaniku ane I'a nasilaka bara da'a. Tapi to ninjaniku, pangane aku naburo, tapi we'i-we'i namalamo aku nekita." 26 Pade nanguli wo'umo to Parisi ka i'a, "Nuapa nikawiana ka iko? Iwenu I'a nompakanaa matamu?" 27 Nesonomo toburo etu, "Naopumo nitesaku ka komi pani'a tapi komi da'a madota mangepe. Nokuya komi madota mangepe pesonoku wo'umo? Bara komi wo'u madota majadi topantuki I'a?" 28 Nangepe etu ira nanguli sinja'i i'a pade nanguli, "Iko etumo topantuki I'a, kami e'i da'a! Kami e'i topantuki i Musa! 29 Ninjani kami Alatala notesa ante i Musa nggaolu. Tapi ane tau etu, da'a ninjani kami nggari umba karatana." 30 Pade nesono wo'umo toburo etu, "Etu sangele mpu'u-mpu'u nipogumaa! Da'a ninjani komi nggari umba karatana, tapi I'a nompakanaa mataku to naburo! 31 Ninjanitamo Alatala da'a nangepe posambaya ntau nasilaka, tapi I'a nangepe posambaya ntau to nepue ka I'a pade tunggai nantuki dotana. 32 Nggari lamba pamulana da'apa sanggani niepeta naria tau namala nompakanaa mata ntau naburo mami nggari pesuwuna. 33 Ane tau etu da'a nggari ja'i Alatala, natantumo I'a da'a ntoto mamala mompowia nuapa-nuapa." 34 Nesonomo ira, "Iwenu? Iko etu tau nasilaka mami nggari pesuwumu! Da'a ntoto masipato iko mompatuduki kami e'i!" Jadi nompamula nggari eo etu to Parisi mana mompaloga tau etu mesua riara sapo mpodade. 35 Sangga niepe Yesus tau etu mana nipaloga mesua riara sapo mpodade nto Yahudi nalaumo I'a nosirata ka i'a. Pade niuli Yesus ka i'a, "Iwenumo? Niparasayamu Ana nu Manusia?" 36 Nesonomo tau etu, "Isema tau to niuli Komi etu, Uma? Uli ka aku ala aku mamala momparasaya I'a." 37 Nangulimo Yesus ka i'a, "Nikitamu I'a. I'amo to notesa ka iko." 38 Pade nangulimo tau etu, "Pue, niparasayakumo!" Pade nekadedemo i'a nombasomba Yesus. 39 Nanguli Yesus ka i'a, "Patuju karataku ri dunia e'i ala mompakanoto sala ntau ala tau-tau naburo mamala mekita, pade tau-tau to nanaa matana majadi maburo." 40 Tesa-tesa Yesus etu niepe bara sakuya mba'a tau to Parisi ri setu. Jadi ira nompekutana I'a, "Iwenumo? Niuli Komi kami e'i wo'u naburo?" 41 Nesonomo Yesus, "Ane rapana komi naburo, natantumo da'a nasilaka komi. Tapi komi nanguli, 'Kami namala nekita.' Etu sampe komi bate-batena nasilaka."
1 "Aku mpu'u-mpu'u notesa ka komi, tau to nesua riara gimpu aga nompone wala da'a nesua nggari pewobo, tau etu topangangga pade topeago. 2 Tapi tau to nesua nggari pewobo gimpu, i'amo topoewu bimba-bimba etu. 3 Topanggatono gimpu etu kana mombabea pewobo ka i'a, pade bimba-bimba etu kana mompetalinga suarana tempo i'a mompokio sanga ira saongu-saongu. Pade i'a kana manggeni ira mpaka ri sawalikuna. 4 Ane bimba-bimba etu nesuwu puramo ri sawalikuna, topoewu etu molumako mokolu ka bimbana etu. Pade bimba-bimba etu mantuki ri purina, sabana bimba-bimba etu nangginjani suara topoewu etu. 5 Bimba-bimba etu da'a madota mantuki tau ntanina. Ira aga mongowa malai pura nggari ja'ina, sabana da'a ninjani ira suara ntau etu." 6 Yesus nombatesa porapa etu ka tau-tau to Parisi, tapi patuju nu porapa etu da'a ninjani ira. 7 Sabana etu nanguli wo'umo Yesus ka ira, "Aku mpu'u-mpu'u notesa ka komi, Aku e'imo pewobo mesua riara gimpu bimba etu. 8 Pura-pura tau to narata nokolu ka Aku ira etumo topangangga pade topeago. Tapi bimba-bimba etu da'a nompetalinga suara ira. 9 Aku e'imo pewobo etu. Isema-sema mesua mojala ri ja'iku ira kana rapakasalama. Ira mamala mesua pade mesuwu mombarata panggoni. 10 Ane topangangga, ira aga momai mangangga pade mepatesi bo mompakaropu. Tapi Aku e'i narata ala manusia mombarata katuwua to neliu mpu'u kabelona." 11 "Aku e'imo topoewu to nabelona. Aku mombawai katuwuku mboto ala bimbaku mamala matuwu. 12 Ane tau aga nigaji, i'a da'a topoewu bimba pade i'a da'a wo'u pue bimba etu. Etu sampe ane i'a manggita asulako momai mombaraga bimba-bimbana i'a aga mangowa malai mompalasi bimba-bimba etu. Pade bimba etu kana rasoko nu asulako etu pade bimba ntanina raraga raposimpotatarena. 13 Tau nigaji etu aga mangowa malai iwetu sabana i'a aga nigaji. I'a da'a nompotowe bimba-bimba etu. 14 - 15 Aku e'imo topoewu to nabelona. Nasimbayu ewa Umaku nangginjani Aku pade Aku wo'u nangginjani I'a, iwetu wo'u Aku nangginjani pura-pura bimbaku pade bimba-bimbaku nangginjani Aku. Pade Aku mombawai katuwuku mboto ala bimba-bimbaku mamala matuwu. 16 Danariapa bimba-bimbaku ntanina anu da'apa nesua riara gimpu e'i. Ira etu wo'u kana kukeni ri se'i. Ira kana mompetalinga suaraku pade pura-pura bimbaku kana majadi salunu. Pade ira rapoewu samba'a lau topoewu. 17 Umaku nompotowe Aku sabana Aku nombawai katuwuku ala Aku mamala matuwu bali. 18 Da'a ria samba'a tau mamala mompatesi Aku. Tapi Aku mombawai katuwuku nantuki dotaku mboto. Aku nakuasa mombawai katuwuku rapatesi iwetu pade Aku nakuasa wo'u matuwu bali, sabana etumo parenta to nitarimaku nggari ja'i Umaku." 19 Nangepe pantesa Yesus etu nosisala paha wo'umo sangganipa tau-tau to Yahudi. 20 Naria nadea ira to nanguli, "I'a etu nipesua seta! Nagilamo I'a! Nokuya komi madota mangepe pantesana?" 21 Tapi naria wo'u sanu tau nanguli, "Da'a! Ane tau nipesua seta da'a iwetu tesana! Natantumo seta da'a namala mompakabelo tau naburo!" 22 Tempo etu naratamo ntoana Posusa Mombatora Pompareki Sapo Mpepue ri ngata Yerusalem. Posusa etu nawela tempo leni. 23 Yesus nolumako ri tambale Sapo Mpepue to nosanga ka Tambale Salomo. 24 Pade naratamo tau-tau to Yahudi nantatiku I'a ri setu. Nekutanamo ira ka I'a, "Sakuya kasaena Komi mompalamba kami naingu? Ane Komi mpu'u-mpu'u Magau to Mompakasalama to nijanji Alatala, uli pakanotomo ka kami!" 25 Nesonomo Yesus, "Naopumo niuliku ka komi aga da'a niparasaya komi. Kabaraka-kabaraka to nikawiaku ante kuasa nggari ja'i Umaku nompakanoto ka komi isema Aku e'i. 26 Tapi da'a ntoto niparasaya komi sabana komi da'a bimba-bimbaku. 27 Bimba-bimbaku nompetalinga pantesaku pade Aku nangginjani ira pade ira nantuki Aku. 28 Aku nombawai ka ira katuwua mabelo sampe ri kasae-saena pade ira da'a ntoto rapakaropu. Da'a ntoto maria samba'a tau mamala manggeni bimbaku malai nggari ja'iku. 29 Umaku to neliu nggakuasa, pade I'amo to nombawai bimba-bimba etu ka Aku. Da'a ntoto ria samba'a tau mamala manggeni ira malai nggari ja'ina. 30 Aku bo Umaku da'a ria posisalana, aga samba'a lau." 31 Nangepe tesana etu tau-tau to Yahudi nangala watumo sangganipa madota mombarempe Yesus. 32 Tapi nangulimo Yesus ka ira, "Nadeamo panggawia to nabelo nggari ja'i Umaku to nipopokitaku ka komi. Nggari panggawia umbana sampe komi madota mombarempe Aku ante watu?" 33 Nesonomo tau-tau to Yahudi, "Da'a nggari panggawiamu to nabelona etu sampe kami madota mombarempe Komi ante watu, tapi sabana Komi nompakakedi Alatala. Komi etu aga manusia biasa, tapi Komi nompakasimbayu koromu ante Alatala!" 34 Nesonomo Yesus, "Riara Atura-atura agama komi naria nitulisi tesa Alatala to niuli ka topanggeniaka nto Israel nggaolu iwe'i: 'Niuliku komi pura-pura ewa Alatala.' 35 Nuapa to nitulisi riara Buku Nagasa etu da'a ria nabali-bali tapi bate-batena nalaku sampe ri kasae-saena. Tau-tau to nantarima Tesa nu Alatala nggaolu etu nikasangaina 'ewa Alatala.' 36 Aku e'imo to nipelisi Alatala bo nipakauna mpaka riara dunia. Jadi nokuya komi nanguli Aku nompakakedi Alatala ante notesa, 'Aku e'imo Ana nu Alatala?' 37 Ane Aku da'a mompowia bago to niparasaya Umaku ka Aku, ne'e raparasaya komi Aku. 38 Tapi ane Aku mompowia bago etu, naupa komi da'a madota momparasaya Aku, masipato komi momparasaya nuapa to nipowiaku etu. Ante iwetu kana ranjani komi bo manoto ka komi Aku e'i nosaongu ante Umaku pade Umaku wo'u nosaongu ante Aku." 39 Nangepe etu sangganipa wo'u tau-tau to Yahudi nompasimbuku manjoko Yesus, tapi I'a notinggalipo nggari tatongo ira. 40 Naopu etu nalau wo'umo Yesus mpaka ri sambote Binangga Yordan ri peto'o Yohanes Topediu pamulana nombadiu tau bopia. Pade naroomo Yesus ri setu. 41 Tempo I'a ri setu nadeamo tau narata ri ja'ina. Pade nangulimo ira samba'a ka roana, "Yohanes da'a ntoto nompowia kabaraka. Tapi pura-pura nuapa to nitesana ewa Yesus nakono mpu'u!" 42 Pade nadeamo tau ri setu nomparasaya Yesus.
1 - 2 Naria samba'a langgai nosanga ka i Lazarus to neto'o ri ngata Betania nosanggani-nggani ante sampesuwuna besi to nosanga ka i Maria bo i Marta. Maria etumo besi to nombatoli minya wongi ri kada Yesus pade nipe'ena ante wo'ona. Naria sanggani i Lazarus naju'a ntomo. 3 Jadi romba'a sampesuwu i Lazarus etu nompakau tau malau manguli ka Yesus iwe'i: "Pue, wegamu to nipotowemu naju'a" 4 Sangga nangepe kareba etu nangulimo Yesus, "Ju'ana etu da'apa rapomatena. Etu najadi ala Alatala rabila bo ratoiya ntau, sabana nggari ju'a etu Aku, Ana nu Alatala kana rabila bo ratoiya." 5 Yesus nompotowe i Marta, i Maria bo i Lazarus. 6 Jadi tempo Yesus nangepe kareba to nanguli i Lazarus naju'a nitunggaina neto'o rombengipa kasaena ri peto'o nikalauna etu. 7 Naliu rombengi etu niulina ka anaguru-anaguruna, "Mai manjilimo kita mpaka ri Bagia Yudea." 8 Nesonomo anaguruna, "Guru, da'apa nasae tau-tau to Yahudi ri setu nadota mombarempe Komi ante watu sampe mamate. Nuapa sabana we'i-we'i Guru madota malau mpaka ri setu?" 9 Nangulimo Yesus ka ira, "Saeo saena sampulu rojaa. Tau to nolumako ri eona da'a matipasunu ri watu apa nikitana reme to nompakarawa jalana. 10 Tapi tau to nolumako tempo nggawengina kana matipasunu ri watu sabana da'a ria reme ri ja'ina mompakarawa jalana." 11 Iwetumo panguli Yesus ka anaguruna. Naopu etu nipapolana pantesana etu ka ira. Niulina, "Wegata i Lazarus napisimo. Tapi Aku malau mombalike i'a." 12 Pade nangulimo anaguru-anaguru Yesus, "Ane i Lazarus napisimo, i'a kana mabelo bali nggari ju'ana etu." 13 Tapi kakonona patuju tesa Yesus nanguli Lazarus namatemo. 14 Sabana etu, Yesus nanguli ntodomo ka anaguru-anaguruna, "Lazarus namatemo. 15 Nadamba raraku Aku da'a naria ri setu tempo i'a namate, sabana to najadina etu manggeni belo ka komi ala komi momparasaya Aku. Kamaimo, kita malau manggita i Lazarus." 16 Pade nangulimo i Tomas to nidae "Ngana Norapi" ka roa-roana anaguru Yesus, "Kamaimo, kita mantuki I'a ala kita wo'u mamate mpasanggani-nggani ante I'a." 17 Tempo Yesus narata ri ngata Betania patambengimo kasaena Lazarus niboli riara dayona. 18 Ngata Betania etu namosu ante ngata Yerusalem, kira-kira toluongu kilo kakawaona. 19 Jadi nadeamo tau to Yahudi narata ri ja'i Marta bo i Maria mompakawoe rara ira romba'a sabana sampesuwu ira Lazarus namatemo. 20 Sangga i Marta nangepe lelena namosumo Yesus, nalaumo i'a nantomunaka I'a. Aga i Maria nopea ri sapona. 21 Sangga nikitana Yesus nangulimo i Marta ka I'a, "Pue, ane Komi naria ri se'i tempo etu, sampesuwuku Lazarus da'a namate. 22 Tapi naupa iwetu ninjaniku nuapa-nuapa raperapi Komi we'i-we'i kana rawai Alatala ka Komi." 23 Nangulimo Yesus ka i Marta, "Sampesuwumu etu kana matuwu bali." 24 Nanguli i Marta, "Iyo. Ninjanikumo i'a kana matuwu bali tempo pura-pura tau namate matuwu bali ri kaopu nu dunia." 25 Nanguli Yesus ka i Marta, "Aku e'imo to mompakatuwu bali tau namate pade to mombawai katuwua. Isema-sema momparasaya Aku naupa i'a namatemo i'a kana matuwu bali. 26 Pade isema-sema to natuwu bo nomparasaya Aku, ira mana mamate sampe ri kasae-saena. Niparasayamu to niuliku e'i?" 27 Nanguli i Marta, "Iyo, Pue. Niparasayakumo Komi etu Ana nu Alatala, Magau to Mompakasalama to nijanji Alatala kana marata ri dunia." 28 Naopu i Marta notesa ka Yesus iwetu, nalaumo i'a nompokio i Maria pade nosiwawayo ka i'a, "Naratamo Guru. I'a madota mosirata ka iko." 29 Nangepe pantesa i Marta etu, nekanggoremo i Maria nalau nasalisa nomposirata Yesus. 30 Tempo etu Yesus da'apa nesua riara ngata Betania. I'a da ri sawalikuna ri peto'o niposiratana ante i Marta. 31 Tau-tau to Yahudi to nompakawoe rara i Maria rara njapona nanggita i'a nompari-mpari nalau. Jadi ira wo'u nalau nantuki i'a. Niuli ira, "I'a nalau nageo ri dayo ria." 32 Sangga naratapa i Maria ri ja'i Yesus nekadedemo i'a ri ngayona ante nanguli, "Pue, ane Komi naria ri se'i bopia natantumo sampesuwuku da'a namate." 33 Tempo Yesus nanggita i Maria bo roa-roana to nantuki i'a nageo-geo, nasusa mpu'umo rarana. 34 Pade nekutanamo I'a ka ira, "Ri umba tanu dayona?" Nesonomo ira, "Pue, kamaimo lau rakitata." 35 Pade nageomo Yesus. 36 Nanggita etu nangulimo tau-tau to Yahudi to nantuki i Maria etu, "Kitamo. Nipotowe Yesus mpu'u i Lazarus." 37 Tapi naria wo'u sanu ira nanguli samba'a ka roana, "Tau naburo namala nipakabelona. Iwenu sampe I'a da'a namala nompakabelo ju'a i Lazarus ala i'a da'a namate?" 38 Ante nasusa wo'umo rarana Yesus nompakamosu dayo i Lazarus. Dayo etu saongu bololia ri kente nu bulu, bolona nitondo ante watu bete. 39 Nangulimo Yesus, "Kaliakamo watu etu!" Tapi nangulimo i Marta sampesuwu ntomate etu, "Pue, natantu nawaumo i'a, sabana patambengimo i'a riara dayo etu." 40 Nangulimo Yesus ka i Marta, "Iwenu? Da'a niuliku ka komi pani'a ane komi momparasaya Aku komi kana manggita kabete nu kuasa Alatala?" 41 Naopu etu nikaliaka iramo watu bete nipombatondo dayo etu. Pade nantingoamo Yesus ante nanguli, "Umaku, Aku nosukuru sabana posambayaku e'i niepemumo. 42 Ninjaniku Komi bate-batena nangepe posambayaku, tapi niuliku iwetu ala raepe tau-tau ri se'i ala ira mamala momparasaya Komimo to nompakau Aku momai ri dunia e'i." 43 Naopu notesa iwetu nongaremo Yesus ante suara namangga, "Lazarus! Kamaimo!" 44 Pade nesuwumo tomate etu nggariara dayona. Kadana bo palena daniwewe pompo'u sompu pade balenggana danipo'u pasapu. Pade nangulimo Yesus ka ira ri setu, "Wolemo pompo'una etu ala i'a mamala molumako mabelo." 45 Nanggita kajadia etu nadeamo tau to Yahudi to narata mompakawoe rara i Maria nomparasaya Yesus. 46 Tapi naria sanu tau nggari tatongo ira to nalau mpaka ri ja'i tau-tau to Parisi nombatesa ka ira nuapa to nipowia Yesus etu. 47 Jadi balengga-balengga topanggeni agama bo tau-tau to Parisi nompasiromu Polibu Bete Agama Yahudi. Niuli ira ka topolibu to nasiromu etu, "Nuapa masipato rapowiata? Nadea mpu'u kabaraka to nipowia ntau etu. 48 Ane kita batena mompalamba I'a iwetu, natantumo pura-pura tau kana momparasaya I'a! Pade kaopuna tantara Roma kana marata mombagero Sapo Mpepueta bo njumaongu ngatata!" 49 Naria samba'a nggari tatongo ira to nosanga ka i Kayafas, to najadi Balengga Topanggeni Agama mpae etu. I'a nanguli ka ira, "Da'a ninjani komi nuapa-nuapa! 50 Da'a ntoto ninjani komi kabelona todea! Nabelopa samba'a tau mamate manjaliku todea ala pura-pura todea ne'e rapakaropu!" 51 Kakonona tesa i Kayafas etu da'a nitesana nggari pekirina mboto. Tapi ewa Balengga Topanggeni Agama Yahudi mpae etu, i'a nombaboto kamate Yesus manjaliku todea to Yahudi. 52 Pade da'a aga to Yahudi, tapi ala pura-pura ana nu Alatala to neto'o ri umba-umba ri dunia mamala rapasiromu majadi nosaongu. 53 Jadi nompamula nggari eo etu nasintuwumo topanggeniaka-topanggeniaka nto Yahudi mompatesi Yesus. 54 Sabana etu Yesus mana nosanggani-nggani ante todea to Yahudi. Tapi nalaumo I'a nggari Bagia Yudea etu mpaka ri bagia to namosu karawa baina, etumo ri ngata Efraim. Pade naroomo I'a ri setu mpasanggani-nggani ante anaguruna. 55 Tempo etu namosumo ntoana eo bete agama Yahudi to nosanga ka Eo Paska. Jadi nadeamo tau nggari ngata-ngata bo boya-boya nto Yahudi nantende mpaka ri ngata Yerusalem ala mantuki ada pompegasa koro ira da'apa pamulana Eo Bete Paska. 56 Narata ri setu ira nangelo-ngelo Yesus. Pade tempo ira nasiromu ri Sapo Mpepue nosimpekutana ira samba'a bo samba'a, "Iwenu pombarata komi? Bara da'a mabia I'a marata ri posusa e'i." 57 Iwetu panguli ira sabana nariamo parenta nggari balengga-balengga topanggeni agama bo tau-tau to Parisi to nanguli iwe'i: "Isema-sema nangginjani peto'o Yesus, kana raulina ka kami ala I'a mamala rasoko kami!"
1 Onoeopa pade marata Eo Bete Paska nalaumo Yesus mpaka ri ngata Betania, ngata nipeto'o i Lazarus to nipakatuwu Yesus bali nggari kamatena bopia. 2 Ri setu ira nompowia posusa mombabila I'a. Marta nantulungi nanggeni panggoni ka ira pade i Lazarus naria ri tatongo tau-tau to nekatoko nanggoni mpasanggani-nggani ante Yesus. 3 Tempo ira nekatoko ri setu i Maria nangala sabotolo minya wongi to nasuli mpu'u olina, kira-kira santongo lite isina. Pade naratamo i'a nombatoli lana etu ri kada Yesus pade nipe'ena ante wo'ona sampe nangau. Pade ranjapo etu pura-pura nawongi mpu'u soana nggari minya wongi etu. 4 Nanggita etu notesamo samba'a anaguru Yesus to nosanga ka Yudas Iskariot to mompobalu Yesus banepia. Niulina, 5 "Nokuya minya to nasuli olina etu da'a nipobalu nte toluatu mpeka doi salaka pade doi etu rawai ka tau nakasiasi?" 6 Kakonona Yudas da'a nantora tau nakasiasi, tapi i'a madota mompelea doi etu, sabana i'amo anaguru to niparasaya nombaboli doi ira, pade sanggani-sanggani i'a nompelea doi etu. Etu sampe i'a notesa iwetu. 7 Tapi nangulimo Yesus ka Yudas, "Palambamo i'a manggawia etu, sabana to nikawiana etu mantora eo pombatana Aku banepia. 8 Tau nakasiasi bate-batena maria ri tatongo komi, tapi Aku e'i da'a mana masaeka ri tatongo komi." 9 Nadeamo tau to Yahudi nangepe lele Yesus naria ri ngata Betania. Jadi nalaumo ira mpaka ri setu ala manggita Yesus pade ala manggita i Lazarus wo'u to nipakatuwu Yesus bali nggari kamatena. 10 Jadi balengga-balengga topanggeni agama nasintuwu madota mompatesi i Lazarus wo'u. 11 Sabana nggari Lazarus etumo nadeamo tau to Yahudi da'a mana madota mantuki balengga-balengga topanggeni agama. Ira aga madota mantuki Yesus bo momparasaya I'a. 12 Naeo mpadondona nadeamo tau to narata ri ngata Yerusalem ala mantuki posusa Paska etu nangepe lele Yesus nompakamosu ngata Yerusalem. 13 Jadi niala ira lolo tawa nggaluku pade nalaumo ira nombatomunaka Yesus. Nongare-ngaremo ira, "Ratoiyata Alatala! Perapi Pue Mombagane Magau to narata niposumba i Pue! Perapi I'a mombagane Magau nto Israel!" 14 Yesus nosirata ka saongu ana keledai pade nipesawina. Kajadia etu nompakadupa tesa nitulisi riara Buku Nagasa iwe'i: 15 "Ne'e komi maeka, pue ngata Yerusalem! Kitamo! Magau komi marata nesawi ana keledai!" 16 Tempo etu da'apa ninjani anaguru-anaguruna batuana kajadia etu. Tapi naliu Yesus natuwu bali nggari kamatena pade neoremo mpaka ri suruga, nanotomo ka ira tesa-tesa nggari Buku Nagasa etu nantesa Yesus pade etumo to najadi ri ja'ina. 17 Tempo etu ri ngata Yerusalem nadeamo tau to nosanggani-nggani ante Yesus tempo I'a nompokio i Lazarus nggariara dayona pade nompakatuwu bali i'a. Ira etumo batena nantesa ka tau ntanina kajadia etu. 18 Etumo sampe nadea tau nalau nantomunaka Yesus sabana niepe ira Yesusmo to nompowia kabaraka etu. 19 Nanggita etu nangulimo tau-tau to Parisi samba'a bo samba'a, "Nidagimo kita! Kitamo! Pura-pura tau ri dunia e'i nalau nantuki I'a!" 20 Ri tatongo ntau dea to nalau mepue ka Alatala ri ngata Yerusalem tempo posusa Paska etu naria wo'u bara sakuya mba'a to Yunani. 21 Ira narata ri ja'i Filipus pade nanguli ka i'a, "Ane mamala kami wo'u madota mosirata ka Yesus." (Filipus etu tau nggari ngata Betsaida ri Bagia Galilea.) 22 Sangga nangepe pomperapi ira etu nalaumo Filipus notesa ka Andreas pade ira romba'a nalau notesa pomperapi etu ka Yesus. 23 Nangulimo Yesus ka ira, "Naratamo tempona Aku, Ana nu Manusia rapakabete pade rabila. 24 Aku mpu'u-mpu'u notesa ka komi, ane rapana ongu pae da'a ratuja ri tana pade raiwu nasimbayu ewa tomate, pae etu bate-batena aga saongu lau. Tapi ane ongu pae etu ratuja ri tana pade raiwu nasimbayu ewa tomate, kaopuna pae etu mowua madea. 25 Isema-sema aga nompotowe katuwuna riara dunia e'i kana malipo katuwuna banepia. Tapi isema-sema da'a nompotowe katuwuna riara dunia e'i, ira kana mombarata katuwua mabelo sampe ri kasae-saena. 26 Isema-sema madota mantulungi Aku kana mantuki Aku ala ira mosanggani-nggani ante Aku. Pade isema-sema mantulungi Aku kana rabila Umaku. 27 We'i-we'i nasusamo raraku e'i. Nuapa masipato kuuli we'i-we'i? Da'a masipato Aku manguli, 'Uma, kabasakamo Aku nggari kasusana to marata ri ja'iku.' Sabana patuju karataku e'i ala mombarasai kasusa etu! 28 Tapi iwe'i to masipato kuuli: 'Uma, powiamo to mompakabete sangamu!' " Naopu I'a nanguli iwetu nariamo suara nggari langi nanguli, "Nipakabetekumo sangaku, pade kana kupakabetepa ngina." 29 Nangepe suara etu nariamo tau-tau to nanguli, "Etu aga guntu." Tapi naria wo'u sanu ira nanguli, "Naria malaeka notesa ka I'a." 30 Jadi nangulimo Yesus ka ira, "Suara to niepe komi pani'a da'a nitesa ala mantulungi Aku, tapi ala mantulungi komi. 31 We'i-we'i naratamo tempona sala manusia ri dunia kana ratangara. We'i-we'i tempona wo'umo Magau nu Seta to nakuasana riara dunia rapopalai. 32 Pade Aku, ane Aku raonggotaka mpakalanga nggari dunia e'i Aku kana manggeni pura-pura tau marata ri ja'iku." 33 Yesus notesa iwetu ala mompakanoto iwenu jala nggamatena. 34 Pade nangulimo tau dea ka I'a, "Naria nitulisi riara buku Atura-atura agama Magau to Mompakasalama to nijanji Alatala kana matuwu sampe ri kasae-saena. Jadi iwenu sampe Komi nanguli Ana nu Manusia kana raonggotaka mpakalanga? Isema Ana nu Manusia etu?" 35 Nesonomo Yesus, "Damo sampalai reme maroo ri ja'i komi. Jadi agina komi molumako tempo danarawa ala ne'e komi rarata rumau. Tau nolumako riara karumauna da'a nanoto mpaka ri umba rakalauna. 36 Parasayamo reme etu tempo danaria nosanggani-nggani ante komi ala komi wo'u majadi ana-ana nu reme." Sangga notesa iwetu nalaimo Yesus nggari ja'i ntodea. I'a da'a mana nosanggani-nggani ante ira. 37 Naupa nadeamo kabaraka nikawiana ri ngayo ntau dea, ira da'a nomparasaya I'a. 38 Etu pura-pura najadi ala madupamo tesa to nitulisi nabi Yesaya nggaolu iwe'i: "Pue, da'a ria to nomparasaya kareba to nikeni kami ka ira! Da'a ria to nompariara nta'i kabaraka-kabaraka to nipopokita i Pue ka ira!" 39 Jadi ira da'a namala nomparasaya, sabana naria wo'u tesa Alatala to nipasimbayu nabi Yesaya nggaolu iwe'i: 40 "Nitunggaiku nompakaburo mata ira pade nompakako'o rara ira, ala mata ira da'a mamala mekita pade rara ira da'a mangginjani, ala ira ne'e manjili ri ja'iku merapi ala kupakabelo." 41 Iwetumo tesa to niuli nabi Yesaya nggaolu sabana nikitana mamimo baraka Yesus pade nitesana nombaboto etu. 42 Naupa iwetu nadea wo'u topanggeniaka nto Yahudi to nomparasaya Yesus. Aga ira da'a nabia nompangaku etu ri ngayo ntau dea sabana naeka ira ka to Parisi, ne'e-ne'e ira rasuwuraka nggariara sapo mpodade. 43 Sabana neliupa dota ira rabila manusia pade rabila Alatala. 44 Pade nongaremo Yesus ri tatongo ntau dea, "Isema-sema nomparasaya Aku, da'a aga nomparasaya Aku tapi ira wo'u nomparasaya Alatala to nompakau Aku. 45 Pade isema-sema to nanggita Aku, ira wo'u nanggita Alatala to nompakau Aku. 46 Aku e'i nomai ri dunia e'i ewa reme ala isema-sema momparasaya Aku mana meto'o riara karumauna. 47 Ane maria tau to mangepe tesaku tapi da'a mantuki tesa etu, da'a Aku to mompakasala ira. Sabana Aku narata riara dunia e'i da'a ala mompakasala manusia, tapi ala mompakasalama manusia. 48 Ane tau da'a madota mantarima Aku pade da'a madota mangepe tesaku nariamo to mompakasala ira. Tesa to nitesaku ka ira etumo to mompakasala ira ri kaopu nu dunia. 49 Sabana Aku da'a notesa nantuki dotaku mboto. Aku aga nombatesa bo nanguli nuapa to niparenta Umaku ka Aku, sabana I'amo to nompakau Aku marata ri dunia. 50 Pade ninjaniku wo'u parentana etu mombawai katuwua mabelo sampe ri kasae-saena. Jadi tesa to nitesaku ka komi aga nantuki nuapa to niparenta Umaku ka Aku."
1 Tempo etu namosumo Eo Bete Paska. Pade ninjani Yesusmo ntora naratamo tempona I'a mompalasi dunia e'i manjili mpaka ri ja'i Umana. I'a mpu'u-mpu'u nompotowe ira to najadi bagiana riara dunia. Jadi tempo etumo nipopokitana ka ira towena to da'a ria kaopu-opuna. 2 Yesus bo anaguru-anaguruna nekatoko nanggoni mpasanggani-nggani. Tempo etu Magau nu Seta naopumo nosiwawayo riara pekiri Yudas ana i Simon Iskariot ala mompobalu Yesus ka balina. 3 Ninjani Yesus Umana Alatala nombawai pura-pura kuasa ka I'a. Pade ninjanina wo'u I'a narata nggari ja'i Alatala bo I'a kana manjili mpaka ri ja'i Alatala. 4 Jadi nekanggoremo I'a nombawonju baju nggumbana, pade nialana saongu handu nipo'una ri kopena. 5 Naopu etu nialana ue nitolina riara loya. Pade nompamulamo I'a nombarama kada anaguruna samba'a bo samba'a. Pade nipe'ena kada ira ante handu to nipo'u ri kopena etu. 6 Tempo Yesus narata ri ja'i Simon Petrus, nangulimo i Petrus ka I'a, "Pue, da'a masipato Komi mombarama kadaku!" 7 Nanguli Yesus ka i'a, "We'i-we'i da'apa ninjanimu nuapa batuana to nikawiaku e'i. Tapi nggapurina kana munjani." 8 Tapi nanguli wo'umo i Petrus ka Yesus, "Ne'e, Pue! Ne'e ntoto Komi mombarama kadaku!" Nesonomo Yesus, "Ane Aku da'a mombarama kadamu, da'a ntoto maria posinggamosumu ante Aku." 9 Nangepe etu nanguli wo'umo i Simon Petrus, "Ane iwetu, Pue, ne'e aga kadaku rarama Komi tapi pale bo balenggaku wo'u." 10 Tapi nangulimo Yesus ka i'a, "Tau naopu nandiu nagasa puramo korona, da'a mana paraluu radiu. Aga kadana kana rarama mpakagasa. Komi etu nagasamo, aga da'a pura-pura komi." 11 Niuli Yesus iwetu sabana ninjanina isema to mompobalu I'a ka balina. Etu sampe niulina, "Da'a pura-pura komi nagasa." 12 Naopu Yesus nombarama kada ira, nialanamo baju nggumbana nipasuana bali, pade nekatokomo I'a ri meja. Naopu etu nekutanamo I'a ka anaguru-anaguruna, "Ninjani komi batuana nuapa to lako nikawiaku ka komi pani'a? 13 Komi nanguli Aku Guru bo Pue komi, pade tesa komi etu nakono, sabana Aku e'i mpu'u-mpu'u Guru bo Pue komi. 14 Jadi ane Aku e'i, Guru bo Pue komi, nompakaede koroku nombarama kada komi, masipato komi wo'u mompakaede koro komi mosirama kada samba'a bo samba'a. 15 Aku nompopokita ka komi saongu jonjo ala nuapa to nipowiaku etu wo'u rapowia komi samba'a bo samba'a. 16 Aku mpu'u-mpu'u notesa ka komi, samba'a batua da'a neliu nggabete katuwuna nggari ja'i madikana. Iwetu wo'u samba'a tau nipakau da'a neliu nggabete nggari tau nompakau i'a. 17 Ane etu manoto ranjani komi, madamba mpu'umo komi ane komi mompowia to nitesaku etu. 18 Nuapa to niuliku pani'a da'a nipawela ka komi pura-pura. Ninjaniku mamimo isema to nipelisiku. Tapi kana rapakadupa nuapa to nitulisi riara Buku Nagasa to nanguli iwe'i: 'Tau nanggoni mpasanggani-nggani ante Aku, i'amo majadi baliku banepia.' 19 Etu nitesaku ka komi we'i-we'i tempo etu da'apa najadi ala ane majadimo ngina raparasaya komimo Aku e'i mpu'u-mpu'u Alatala. 20 Aku mpu'u-mpu'u notesa ka komi, isema-sema mantarima tau to nipakauku ira wo'u mantarima Aku. Pade isema-sema mantarima Aku ira wo'u mantarima Umaku to nompakau Aku." 21 Naopu Yesus nombatesa etu pura-pura nasusa mpu'umo rarana. Pade niulina, "Aku mpu'u-mpu'u notesa ka komi, naria samba'a nggari tatongo komi to mompobalu Aku ka baliku." 22 Nangepe etu anaguru-anaguruna aga nosikita mbotomo ante kaingu nu rara sabana da'a ninjani ira isema to nipatuju Yesus etu. 23 Tempo etu samba'a anaguruna to nipotowe Yesus nekatoko ri sinjorina. 24 Jadi Simon Petrus nombakode roana etu ante matana pade nanguli, "Pekutana ka Guru bara isema to nipatujuna etu." 25 Jadi anaguru to nekatoko ri sinjori Yesus etu nompakamosu I'a pade nekutana, "Pue, isema to nipatuju Komi etu?" 26 Nesonomo Yesus, "Isema to kuwai ka roti to kutome riara ue mpane, i'amo to nipatujuku." Naopu etu Yesus nangala sanggoto roti nitomena riara ue mpane pade niwaina ka Yudas ana i Simon Iskariot. 27 Iwetu Yudas nangala roti etu kaliu-liu nesuamo Magau nu Seta riara nta'ina. Pade nangulimo Yesus ka Yudas, "Pakasalisa urusimo nuapa madota mukawia!" 28 Da'a ria kamba samba'a ira sampekatoko nanggoni etu to nangginjani nuapa patuju Yesus notesa iwetu ka Yudas. 29 Naria to nompekiri Yesus nompakau Yudas malau mangoli bara nuapa-nuapa rapake ira riara mposusa etu bara mombawai doi ka tau nakasiasi, sabana Yudas topomboliaka doi ira. 30 Jadi naopu Yudas nangala roti nggari ja'i Yesus, nalaimo i'a nggari setu. Tempo etu nawengimo. 31 Sangga nalaipa Yudas nangulimo Yesus ka anaguruna, "We'i-we'i Aku, Ana nu Manusia kana ratoiya bo rapakabete. Pade nggari nuapa to majadi ri ja'iku etu Alatala wo'u ratoiya bo rapakabete. 32 Ane Alatala ratoiya bo rapakabete nggari nuapa to majadi ri ja'iku Aku wo'u ratoiya bo rapakabete Alatala nggari kajadia etu. Pade etu masalisa majadi. 33 Ana-anaku, Aku da'a mana masaeka mosanggani-nggani ante komi. Komi kana mangelo Aku tapi ewa to niuliku ka topanggeniaka-topanggeniaka nto Yahudi bopia, iwetu wo'u kuuli ka komi we'i-we'i, 'Ri umba kukalau komi da'a mamala malau.' 34 Naria parenta nabou kuwai ka komi iwe'i: Komi kana mosipotowe samba'a bo samba'a. Nasimbayu ewa Aku nompotowe komi iwetu wo'u komi kana mosipotowe samba'a bo samba'a. 35 Ane komi mosipotowe samba'a bo samba'a kana ranjani ntau puramo komi etu anaguru-anaguruku." 36 Pade nekutanamo Petrus ka Yesus, "Pue, ri umba rakalau Komi?" Nesonomo Yesus, "Ri umba kukalau da'apa mamala iko malau. Tapi banepianapa pade iko malau mantuki Aku." 37 Nesono wo'umo Petrus ka I'a, "Iwenu sampe aku da'a mamala mantuki Komi we'i-we'i, Pue? Nasadiamo aku mamate manjaliku Komi!" 38 Nesonomo Yesus, "Mpu'u-mpu'u iko madota mamate manjaliku Aku? Aku mpu'u-mpu'u notesa ka iko, da'apa manu mora'o ngina njau tolungganimo iko mombasapu Aku."
1 Nangulimo Yesus ka anaguruna, "Ne'e masusa rara komi. Parasayamo Alatala, pade parasaya wo'u Aku. 2 Ri sapo Umaku nadea mpu'u peto'o. Aku malau mpaka ri setu mompakasadia peto'o ka komi. Ane da'a iwetu kana kuuli mpakanoto ka komi. 3 Pade maopu Aku malau mompakasadia peto'o ka komi Aku kana manjili bali mai mangala komi ala ri umba kupeto'o ri setu wo'u rapeto'o komi. 4 Peto'o kukalau etu ninjani komimo jalana." 5 Nangulimo i Tomas ka I'a, "Pue, da'a ninjani kami ri umba rakalau Komi. Jadi iwenu kami mangginjani jala mpaka gusa'a?" 6 Nesonomo Yesus ka i'a, "Aku e'imo jala, Akumo to mompakanoto tesa to nakonona ewa Alatala, pade Akumo to mombawai katuwua. Da'a ria samba'a mamala malau mpaka ri ja'i Umaku ane da'a ante Aku. 7 Ane komi mosinjani ante Aku, komi mosinjani wo'u ante Umaku. Pade nompamula we'i-we'i nosinjanimo komi ante I'a pade nikita komimo I'a." 8 Nanguli i Filipus ka Yesus, "Pue, popokita ka kamimo Umamu, pade masana rara kami." 9 Nesonomo Yesus ka i'a, "Iwenumo, Filipus, nasaemo Aku nosanggani-nggani ante komi tapi komi da'apa nosinjani ante Aku? Isema-sema nanggita Aku, nikitana wo'umo Umaku. Jadi iwenu sampe komi nanguli, 'Popokita ka kamimo Umamu?' 10 Iwenumo? Da'apa ntoto niparasayamu Aku e'i nosaongu ante Umaku pade Umaku nosaongu ante Aku? Nuapa to niuliku ka komi da'a tesaku mboto. Tapi Umaku to naroo ri ja'iku to nompowia etu pura-pura. 11 Parasayamo tesaku e'i, Aku mpu'u-mpu'u nosaongu ante Umaku pade Umaku wo'u nosaongu ante Aku. Ane etu nakaja raparasaya komi ante nangepe tesaku parasayamo sabana nikita komi kabaraka-kabaraka to nipowiaku. 12 Aku mpu'u-mpu'u notesa ka komi, isema-sema to nomparasaya Aku ira mamala mompowia kabaraka ewa to nipowiaku. Pade da'a aga etu, ira mamala mowia kabaraka to meliu nggabete nggari to nipowiaku, sabana Aku malau mpaka ri ja'i Umaku. 13 Pade nuapa-nuapa to raperapi komi ante manguli sangaku etu kana kupowia ka komi, ala nggari powiaku etu Umaku rabila bo ratoiya. 14 Nuapa-nuapa raperapi komi ante manguli sangaku kana kupowia ka komi." 15 "Ane komi mompotowe Aku komi kana mantuki parenta-parentaku. 16 Pade Aku kana merapi ri ja'i Umaku ala rawaina ka komi Topetulungi ntanina, to maroo ri ja'i komi sampe ri kasae-saena. 17 Topetulungi etumo Nosa Nagasa nu Alatala to mompakanoto ka komi pepatuduki to nakonona. Tau-tau ri dunia e'i to da'a nomparasaya da'a mamala mantarima I'a sabana ira da'a nanggita I'a bo ira da'a nosinjani ante I'a. Tapi komi kana mosinjani ante I'a sabana I'a nosanggani-nggani ante komi we'i-we'i pade I'a kana meto'o riara nta'i komi ngina. 18 Aku da'a mompalasi komi ewa ngana pailu. Tapi Aku kana manjili bali ri ja'i komi. 19 Da'a mana masaeka Aku mana rakita tau-tau ri dunia e'i. Tapi komi kana manggita Aku. Pade komi kana matuwu sabana Aku kana matuwu bali. 20 Ane maratamo tempo etu kana ranjani komi Aku nosaongu ante Umaku pade komi wo'u nosaongu ante Aku pade Aku nosaongu ante komi. 21 Isema-sema mompariara nta'i pade mantuki parenta-parentaku ira etumo to nompotowe Aku. Pade ira to nompotowe Aku kana rapotowe Umaku wo'u, pade Aku mboto mompotowe ira pade mompopokita koroku ka ira." 22 Pade nekutana Yudas (da'a Yudas Iskariot) ka Yesus, "Pue, nuapa sabana Komi aga mompopokita koromu ka kami, da'a ka pura-pura manusia ri dunia?" 23 Nesonomo Yesus, "Isema-sema mompotowe Aku kana mantuki tesaku. Pade Umaku kana mompotowe i'a pade kami kana marata meto'o mpasanggani-nggani ante i'a. 24 Tapi tau da'a nompotowe Aku da'a wo'u madota mantuki tesaku. Pade tesa to niepe komi e'i da'a nggari ja'iku mboto, tapi nggari ja'i Umaku to nompakau Aku. 25 Pura-pura tesa etu nitesaku ka komi tempo Aku danaria nosanggani-nggani ante komi. 26 Tapi ane Nosa Nagasa nu Alatala marata I'a kana mompatuduki ka komi mpengele-ngele pade mompopatora ka komi pura-pura nuapa to nitesaku ka komi. Sabana I'amo Topetulungi to rapakau Umaku manjambei Aku. 27 Aku kana mompakasana rara komi ante kasana nu rara nggari ja'iku mboto. Pade kasana nu rara etu da'a nasimbayu ewa kasana nu rara nggari ja'i manusia ri dunia to naja'a e'i. Jadi ne'e komi masusa rara, ne'e komi maeka rara. 28 Niepe komimo tesaku pani'a to nanguli Aku malau nggari ja'i komi tapi Aku kana manjili bali ri ja'i komi. Ane mpu'u-mpu'u komi mompotowe Aku komi kana madamba rara mangepe tesa nanguli Aku malau mpaka ri ja'i Umaku, sabana I'a neliu nggakuasa nggari Aku e'i. 29 Tesa etu niuliku ka komi we'i-we'i tempo da'apa najadi ala ane majadimo ngina kana raparasaya komimo. 30 Da'a mana madea gaga pantesa kuuli ka komi, sabana Magau nu Seta to nombakuasai dunia e'i ntora naratamo mompandasa Aku. I'a da'a nakuasa ri ja'iku, 31 tapi etu kana majadi ala manusia ri dunia e'i mangginjani Aku nompotowe Umaku pade Aku nompowia pura-pura nuapa to niparentana ka Aku. Kamaimo kita malai nggari se'i."
1 Nanguli wo'umo Yesus ka ira, "Aku e'imo walaa anggur to nakonona, pade Umaku pue ntinalu anggur etu. 2 Rangga-ranggaku to da'a nowua nikoto nitajiakana. Tapi rangga-rangga to nowua nipegasana mpakabelo-belo ala mantambai kadea nu wuana. 3 Komi etu nagasamo sabana niepe komimo pepatuduki to nitesaku ka komi. 4 Komi kana maroo mosaongu rara ante Aku pade Aku wo'u maroo mosaongu rara ante komi. Rangga-rangga to noga'a nggari batana da'a mamala mowua. Aga rangga-rangga to nasintaka ri bata kayu etu to mowua. Iwetu wo'u komi da'a mamala mowua ane komi da'a maroo mosaongu rara ante Aku. 5 Aku e'imo walaa anggur pade komi etumo rangga-ranggana. Ane komi maroo mosaongu rara ante Aku pade Aku maroo mosaongu rara ante komi, komi kana mowua madea. Tapi ane komi moga'a nggari ja'iku komi da'a mamala mompowia nuapa-nuapa. 6 Tau da'a naroo nosaongu rara ante Aku kana ratajiaka nasimbayu ewa rangga kayu ratajiaka sampe majadi mangau. Rangga-rangga ewa etu aga rapasiromu ratajiaka riara apu pade rapalabu. 7 Ane komi maroo mosaongu rara ante Aku pade tesaku maroo riara nta'i komi, perapimo nuapa-nuapa to nipokono komi pade etu kana rawai ka komi. 8 Ane komi mowua madea manotomo komi mpu'u-mpu'u anaguruku. Pade ante iwetu Umaku kana ratoiya bo rabila. 9 Nasimbayu ewa Umaku nompotowe Aku, iwetu wo'u Aku nompotowe komi. Komi kana maroo mosaongu rara ante Aku ala komi mombarasai pepotoweku. 10 Ane komi mantuki parenta-parentaku, komi mpu'u-mpu'u maroo mosaongu rara ante Aku pade mombarasai pepotoweku nasimbayu ewa Aku wo'u nantuki parenta Umaku pade naroo nosaongu rara ante I'a pade nombarasai pepotowena. 11 Pura-pura e'i niuliku ka komi ala kadamba nu raraku mamala wo'u rarasai komi pade ala komi mpu'u-mpu'u madamba rara. 12 Iwe'imo parentaku kuuli ka komi: posipotowemo samba'a bo samba'a nasimbayu ewa Aku nompotowe komi. 13 Iwe'imo jonjo tau mpu'u-mpu'u nompotowe wegana: i'a nombawai katuwuna manjaliku wegana. 14 Komimo wega-wegaku ane komi mantuki parenta-parenta to niwaiku ka komi. 15 Aku mana manguli komi batua, sabana samba'a batua da'a nangginjani nuapa to nipowia madikana. Tapi we'i-we'i Aku manguli komi wegaku. Nanotomo etu sabana pura-pura nuapa to niepeku nggari ja'i Umaku etu wo'u nitesaku ka komi. 16 Da'a komi to nompelisi Aku, tapi Aku to nompelisi komi pade nompakau komi malau mowua madea, etumo wua to da'a maopu-opu. Ane komi mowua iwetu nuapa-nuapa raperapi komi nggari ja'i Umaku ante manguli sangaku kana rawaina ka komi. 17 Jadi iwe'imo parentaku ka komi: posipotowemo samba'a bo samba'a." 18 "Ane komi raporau rara ntau ri dunia to da'a nomparasaya, kana ratora komi ira nokolu nomporau Aku. 19 Ane rapana komi nosimporoa ante tau da'a nomparasaya Aku, natantumo ira kana mompotowe komi sabana komi roa ira mboto. Tapi komi da'a nosimporoa ante ira sabana Aku nompelisi komi ala malai nggari ja'i ira. Jadi etu sampe ira nomporau rara komi. 20 Toramo nuapa to niuliku ka komi pani'a: samba'a batua da'a neliu nggabete katuwuna nggari madikana. Ane Aku nipandasa ira, natantumo komi wo'u kana rapandasa ira. Ane pepatudukiku nituki ira, natantumo pepatuduki komi wo'u kana ratuki ira. 21 Pura-pura etu kana rapowia ira ka komi sabana komi najadi topantuki Aku. Etu rapowia ira sabana ira da'a ntoto nosinjani ante Alatala to nompakau Aku. 22 Ane rapana Aku da'a narata nombatesa ka ira, ira da'a nasala. Tapi naratamo Aku pade nitesaku mamimo ka ira. Jadi mana ria tanje ira mowia silaka. 23 Isema-sema nomporau Aku ira wo'u nomporau Umaku. 24 Ane Aku da'a nompowia kabaraka-kabaraka ri tatongo ira anu da'a sanggani nipowia tau ntanina ira da'a nasilaka. Tapi nikita iramo kabaraka-kabaraka etu pade ira batena nomporau Aku ante Umaku wo'u. 25 Tapi etu najadi ala madupa tesa to nitulisi riara Atura-atura agama ira iwe'i: 'Ira nomporau Aku nau da'a naria sabana.' 26 Aku kana mompakau ka komi Topetulungi nggari ja'i Umaku, etumo Nosa Nagasa nu Alatala to mompakanoto ka komi pepatuduki to nakonona. Ane I'a marata I'amo to majadi sabiku. 27 Pade komi wo'u majadi sabiku sabana komimo to nosanggani-nggani ante Aku nggari pamula panggawiaku riara dunia e'i."
1 "Pura-pura etu niuliku ka komi ala komi ne'e mokanggaura momparasaya. 2 Komi kana rapopalai nggariara sapo mpodade nto Yahudi. Pade kana marata tempona tau to mompatesi komi mompekiri powia ira etu mompakadamba rara Alatala. 3 Etu pura-pura rapowia ira ri ja'i komi sabana ira da'a nosinjani ante Umaku pade da'a wo'u nosinjani ante Aku. 4 Pura-pura etu niuliku ka komi we'i-we'i ala ane etu majadi kana ratora komi kajadia-kajadia etu nitesaku mamimo ka komi." "Tesa etu da'a niuliku ka komi nggari pamulana sabana Aku danosanggani-nggani ante komi. 5 Tapi we'i-we'i Aku malau mpaka ri ja'i Umaku to nompakau Aku pade da'a ria samba'a nggari tatongo komi nompekutana ri umba kukalau. 6 Nasusa mpu'u rara komi sabana Aku notesa ka komi pani'a Aku kana malau. 7 Tapi naupa iwetu kakono-konona neliu nggabelo ka komi ane Aku malau. Sabana ane Aku da'a malau Topetulungi da'a marata ri ja'i komi. Tapi ane Aku malau Aku kana mompakau I'a marata ri ja'i komi. 8 Ane Topetulungi etu marata I'a kana mompakanoto ka manusia ri dunia ira nasilaka. Pade rapakanotona wo'u ka ira kanoaku, pade rapakanotona natantumo potangara nu Alatala. 9 Rapakanotona manusia nasilaka sabana ira da'a nomparasaya Aku. 10 Rapakanotona wo'u kanoaku, sabana Aku malau mpaka ri ja'i Umaku pade komi mana manggita Aku. 11 Pade kana rapakanotona wo'u natantumo Alatala mombasuku tau nasilaka, sabana Magau nu Seta to nombakuasai dunia e'i naopumo nitangara. 12 Danadeapa madota kutesa ka komi tapi da'a rapakule komi mantarima etu pura-pura we'i-we'i. 13 Tapi ane maratamo Nosa Nagasa etu I'amo to manggeni komi mangginjani pura-pura pepatuduki to nakonona. I'a da'a motesa nantuki dotana mboto. Tapi nuapa to niepena, etumo to ratesana. Pade I'a kana motesa ka komi nuapa to majadi ri eo nggapurina. 14 I'a kana mombabila Aku bo mompakabete sangaku sabana nuapa to nitarimana nggari ja'iku etumo to ratesana mpakanoto ka komi. 15 Pura-pura nuapa to naria ri ja'i Umaku, etu pura-pura bagiaku wo'u. Etu sampe niuliku ka komi nuapa to nitarima Nosa Nagasa nggari ja'iku etumo to ratesana mpakanoto ka komi." 16 "Sampalaipa komi mana manggita Aku. Pade sampalaipa wo'u komi kana manggita Aku." 17 Nangepe tesana etu nosipekutana mbotomo anaguruna samba'a bo samba'a, "Nuapa ntoto patujuna nanguli ka kita 'Sampalaipa komi mana manggita Aku, pade sampalaipa wo'u komi kana manggita Aku?' Pade nuapa wo'u patuju tesana nanguli 'Aku malau mpaka ri ja'i Umaku?' " 18 Nosipekutana nju'umo ira, "Nuapa patuju tesana 'Sampalaipa?' Da'a ntoto ninjanita patuju tesana etu." 19 Ninjani Yesus ira madota mompekutana I'a. Jadi niulina ka ira iwe'i: "Nikitaku komi tunggai nosipekutana mbotomo nuapa patuju pantesaku pani'a tempo Aku nanguli, 'Sampalaipa komi mana manggita Aku pade sampalaipa wo'u komi kana manggita Aku.' 20 Aku mpu'u-mpu'u notesa ka komi, komi kana motumangi bo mageo mpajea manggita nuapa to majadi ri ja'iku, tapi baliku ri dunia e'i kana madamba-damba. Komi kana masusa rara manggita etu tapi kasusa rara komi kana mabali majadi kadamba nu rara. 21 Ane samba'a besi ntora moana natantumo nasusa mpu'u rarana sabana naratamo ntoana moana. Tapi ane nesuwumo anana etu nikalinganamo susa rarana etu. Nadamba mpu'u rarana sabana samba'a ngana nesuwu ri dunia. 22 Iwetu wo'u ante komi. We'i-we'i nasusamo rara komi. Tapi Aku kana mosirata bali ante komi pade tempo etu komi kana madamba bali. Pade da'a ria samba'a tau mamala mompakalipo kadamba nu rara komi etu. 23 Tempo etu komi da'a mana mekutana nuapa-nuapa ri ja'iku. Aku mpu'u-mpu'u notesa ka komi, nuapa-nuapa raperapi komi nggari ja'i Umaku ante manguli sangaku kana rawaina ka komi. 24 Sampe we'i-we'i komi da'apa nomperapi nuapa-nuapa ante manguli sangaku. Tapi perapimo we'i-we'i pade komi kana rawai ala komi mpu'u-mpu'u madamba!" 25 "Tesa to niuliku ka komi e'i aga nijaliliku. Tapi kana marata tempona da'a mana kujalili ka komi, tapi kana kutesa mpakanoto ka komi Umaku. 26 Tempo etumo komi kana merapi ri ja'i Umaku ante manguli sangaku. Da'a paraluu Aku momperapi nuapa-nuapa ka komi ri ja'i Umaku. 27 Sabana Umaku mboto nompotowe komi. I'a nompotowe komi sabana komi nompotowe Aku pade niparasaya komimo Aku e'i narata nggari ja'ina. 28 Aku e'i narata nggari ja'i Umaku pade nomai riara dunia e'i. Tapi we'i-we'i Aku mompalasi dunia e'i pade manjili mpaka ri ja'i Umaku." 29 Pade nangulimo anaguruna ka I'a, "Kitamo! We'i-we'i Komi notesa ante nanoto ka kami, da'a mana ante jalili. 30 We'i-we'i nanotomo ka kami Komi nangginjani mpengele-ngele. Da'a paraluu tau nompekutana Komi. Etu sampe niparasaya kami Komi mpu'u-mpu'u narata nggari ja'i Alatala." 31 Nesonomo Yesus, "Mpu'u-mpu'u niparasaya komimo we'i-we'i? 32 Toramo! Kana marata tempona, pade kakonona naratamo tempo etu, komi kana raposimpotatare. Komi mbau manjili mpaka ri sapomu mboto, komi mompalasi Aku njamba'aku. Tapi Aku da'a mpu'u njamba'aku sabana Umaku kana mosanggani-nggani ante Aku. 33 Pura-pura etu nitesaku ka komi ala masana rara komi sabana mosaongu rara ante Aku. Riara dunia e'i komi kana rapandasa. Tapi pakaroso rara komi! Kuasa to naja'a riara dunia e'i nidagikumo!"
1 Naopu Yesus notesa iwetu nantingoamo I'a ri langi ante nosambaya iwe'i: "Umaku, naratamo tempona. Popokitamo kuasa bo kagaya nu Anamu ala Anamu wo'u mamala mompopokita kuasa bo kagayamu. 2 Komi nombawai ka Aku kuasa moparenta pura-pura manusia ala Aku mamala mombawai katuwua mabelo sampe ri kasae-saena ka tau-tau to niwaimu ka Aku. 3 Iwe'imo sampe manusia matuwu mabelo sampe ri kasae-saena: ira mosinjani ante Komi, Alatala to nakonona to samba'a lau, pade ira mosinjani wo'u ante Yesus Kristus to nipakaumu etu. 4 Aku nompopokita kuasa bo kagayamu riara dunia e'i ante nompakaopu panggawia to niparasayamu ka Aku. 5 We'i-we'i, Uma, Aku merapi wai ka Akumo kuasa bo kagayaku ri ngayomu nasimbayu ewa kuasa bo kagaya to naria ri ja'iku mpasanggani-nggani ante Komi tempo dunia da'apa nipajadi." 6 "Uma, nipopanjanikumo Komi ka tau-tau to niwaimu ka Aku nggariara dunia e'i. Ira etu bagiamu mamimo. Pade ira wo'u niwaimu ka Aku, pade nituki iramo tesamu. 7 We'i-we'i ninjani iramo nuapa pura to niwaimu ka Aku mpu'u-mpu'u nopu'u nggari ja'imu, Uma. 8 Sabana nitesaku ka ira puramo tesa to niulimu ka Aku, pade tesa-tesa etu pura-pura nitarima iramo. Nanotomo ka ira Aku narata nggari ja'imu, pade niparasaya ira wo'umo Komi to nompakau Aku. 9 Aku mosambaya ka ira anaguruku e'i. Da'a pura-pura manusia to niposambayaku tapi aga ira to niwaimu ka Aku, sabana ira etu mpu'u-mpu'u bagiamu. 10 Pura-pura tau to najadi bagiaku, ira wo'u najadi bagiamu. Pade pura-pura tau to najadi bagiamu wo'u najadi bagiaku. Pade kuasa bo kagayaku nanoto nikita riara nggatuwu ira. 11 Mana masaeka Aku meto'o ri dunia e'i. Aku kana malau mpaka ri ja'imu tapi ira daneto'o ri dunia e'i. O, Umaku to nagasa. Jagaimo ira ante kuasamu mboto, kuasa to niwaimu ka Aku. Jagaimo ira ala ira mosaongu rara nasimbayu ewa Komi bo Aku wo'u nosaongu rara. 12 Tempo Aku danosanggani-nggani ante ira Akumo to nombajagai ira ante kuasamu, etumo kuasa to niwaimu ka Aku. Nijagaiku ira sampe da'a ria ntanina to natontona, aga i'a to masipato matonto sampe ri kasae-saena. Etu najadi ala madupa nuapa to nitulisi riara Buku Nagasa. 13 We'i-we'i Aku malau mpaka ri ja'imu, Uma. Pura-pura e'i nitesaku ka anaguruku tempo Aku danaria riara dunia e'i ala ira mpu'u-mpu'u madamba ante kadamba nu rara nggari ja'iku mboto. 14 Uma, nipasimbayuku ka iramo tesamu. Pade tau-tau riara dunia e'i nompokarau ira, sabana anaguruku etu da'a nosaongu pekiri ante ira nasimbayu ewa Aku wo'u da'a nosaongu pekiri ante tau-tau etu. 15 Aku da'a nerapi ala Komi mangala ira nggari dunia e'i. Tapi kuperapi ala Komi mombajagai ira nggari Magau nu Seta. 16 Ira da'a nosaongu pekiri ante tau-tau da'a nomparasaya nasimbayu ewa Aku wo'u da'a nosaongu pekiri ante tau-tau etu. 17 Pajadimo ira bagiamu to nagasana, Uma, ante mompatuduki ka ira pepatuduki to nakonona. Tesamu, Uma, etumo pepatuduki to nakonona. 18 Nasimbayu ewa Komi nompakau Aku nomai riara dunia e'i, iwetu wo'u Aku nompakau ira malau mpaka ri ja'i tau ntanina riara dunia e'i. 19 Uma, Aku mombawai koroku mboto manjaliku ira ala ira wo'u mamala majadi bagiamu to nagasana ante mangginjani pepatuduki to nakonona." 20 "Da'a aga anaguruku e'i kuposambaya, tapi Aku wo'u mosambaya ka pura-pura tau to momparasaya Aku banepia ante mangepe tesa-tesa to rapatolele anaguru-anaguruku e'i. 21 Uma, kuperapi ala ira pura-pura mosaongu rara. Nasimbayu ewa Aku nosaongu rara ante Komi bo Komi nosaongu rara ante Aku, kuperapi ala ira wo'u mosaongu rara ante Kita ala pura-pura tau momparasaya Komimo to nompakau Aku e'i. 22 Niwaiku ka iramo kuasa to niwaimu ka Aku ala ira mosaongu rara nasimbayu ewa Kita wo'u nosaongu rara. 23 Aku nosaongu rara ante ira pade Komi nosaongu rara ante Aku ala ira mpu'u-mpu'u mosaongu rara. Ane iwetu kana manoto ka pura-pura manusia Komimo to nompakau Aku pade Komi to nompotowe ira nasimbayu ewa Komi nompotowe Aku. 24 Uma, to nipodotaku ala tau-tau to niwaimu ka Aku etu mamala mosanggani-nggani ante Aku ala rakita ira kuasa bo kagayaku; etumo kuasa bo kagaya to niwaimu ka Aku sabana Komi nompotowe Aku nggari lamba pamulana da'apa dunia nipajadi. 25 O, Umaku to nanoana. Manusia riara dunia e'i da'a nosinjani ante Komi, tapi Aku nosinjani ante Komi. Pade anaguruku e'i nangginjani Komimo to nompakau Aku. 26 Nipopanjaniku ka iramo Komi, Uma. Pade Aku bate-batena mompopanjani Komi ka ira ala towemu to naria ri ja'iku bate-batena maria wo'u ri ja'i ira, pade ala Aku mboto mamala mosaongu rara ante ira."
1 Naopu Yesus nosambaya nalaimo I'a ante anaguru-anaguruna mpaka ri sambote salu ue to nosanga ka Ue Kidron. Ri setu naria saongu pampa. Yesus ante anaguruna nalau nesua riara pampa etu. 2 Yudas, to nompobalu Yesus etu, nangginjani pampa etu sabana Yesus bo anaguruna naoso nasiromu ri setu. 3 Jadi naratamo i'a ri setu nanggeni salunu tantara Roma bo topojaga Sapo Mpepue to nipakau balengga-balengga topanggeni agama bo tau-tau to Parisi. Ira narata nanggeni poindo, sulo bo parewa mposipatesi. 4 Ninjani Yesus puramo nuapa to majadi ri korona. Jadi nalaumo I'a nompakamosu tau dea etu pade nekutana ka ira, "Isema to nielo komi?" 5 Nesonomo ira, "Yesus to Nazaret." Nesonomo Yesus, "Aku e'imo I'a." Yudas topobalu Yesus etu wo'u nenggore ri tatongo ntau dea etu. 6 Tempo Yesus nanguli ka ira, "Aku e'imo I'a," nokanggaura ntalikumo tau dea etu pade nadungga sangganimo ira. 7 Pade Yesus nompekutana ira sangganipa, "Isema to nielo komi?" Nesonomo ira, "Yesus to Nazaret." 8 Pade nangulimo Yesus, "Niulikumo ka komi pani'a, Aku e'imo I'a. Jadi ane Akumo to nielo komi, palambamo roaku e'i malai." 9 Ante pantesana etu nadupamo tesa to niuli Yesus pani'a, "Uma, nggari pura-pura topantuki to niwaimu ka Aku da'a ria samba'a to natontona." 10 Nanggita kajadia etu i Simon Petrus nombabitu gumana pade nitimbena samba'a batua nu Balengga Topanggeni Agama to nosanga ka i Malkhus sampe napudumo talinga ngganana. 11 Tapi nangulimo Yesus ka i Simon Petrus, "Boli mpanjilimo gumamu riara walombona! Iwenumo? Niulimu kupoara kasusa e'i to niwai Umaku ka Aku?" 12 Naopu etu tantara-tantara Roma ante tadulakona bo topojaga Sapo Mpepue nombasoko Yesus pade nombaso'o I'a. 13 Pade Yesus pamulana nikeni ira mpaka ri ja'i Hanas, matu'a langgai i Kayafas. Kayafas etumo to najadi Balengga Topanggeni Agama mpae etu. 14 I'amo to nanguli ka topanggeniaka nto Yahudi bopia, "Nabelopa samba'a tau mamate manjambei todea." 15 Simon Petrus bo samba'a anaguru Yesus ntanina nantuki Yesus. Anaguru Yesus to samba'ana etu nosinjani ante Balengga Topanggeni Agama. Jadi i'a namala nesua mpasanggani-nggani ante Yesus ri lalowo sapo nu Balengga Topanggeni Agama etu. 16 Tapi i Petrus nopea ri sawalikuna namosu pewobo wala. Jadi anaguru Yesus ntanina to niposinjani Balengga Topanggeni Agama etu nesuwu mpaka ri sawalikuna. Pade notesamo i'a ka besi to nanggatono pewobo ala i Petrus rapaloga mesua riara wala etu. Pade nikenina i Petrus nesua riarana. 17 Nanggita i Petrus nangulimo besi topanggatono pewobo etu ka i'a, "Iwenu? Da'a komi wo'u samba'a anaguru tau ya'a?" Nesonomo i Petrus, "Da'a!" 18 Nggawengina etu naleni mpu'u. Jadi bara sakuya mba'a batua bo topojaga Sapo Mpepue nompakawaa apu nggari wuri niponeru ira ri lalowo etu. Pade i Petrus wo'u nenggore mpasanggani-nggani ante ira noneru ri apu etu. 19 Tempo etu nompamulamo Balengga Topanggeni Agama nompekutana Yesus, "Isema pura anagurumu, pade nuapa pura nipatudukimu ka ira?" 20 Nesonomo Yesus, "Aku nabiasa nompatuduki ante nanoto ri ngayo ntau dea. Aku batena nompatuduki riara sapo mpodade bo riara Sapo Mpepue, peto'o tau to Yahudi nasiromu. Da'a ria sanggani Aku notesa nggalino. 21 Jadi nuapa sabana komi nompekutana Aku? Agina komi mompekutana tau dea to nangepe Aku nuapa to nitesaku ka ira. Iramo to nangginjani nuapa to nitesaku etu." 22 Tempo Yesus notesa iwetu naria samba'a topojaga Sapo Mpepue to nekanggore namosu ante Yesus nombasapa lenje Yesus, pade niulina, "Da'a nabelo Iko nombasono balengga topanggeni agama iwetu!" 23 Nesonomo Yesus, "Ane nasala tesaku, tesa mpakanotomo nuapa to nasalana. Tapi ane nakono tesaku etu, nuapa sabana komi nombasapa Aku?" 24 Naopu etu Hanas nompakau tau manggeni Yesus ante palena niso'o malau mpaka ri ja'i Kayafas to najadi Balengga Topanggeni Agama mpae etu. 25 Tempo etu i Simon Petrus danoneru mpekanggore ri setu. Pade naria wo'umo tau nanguli ka i'a, "Iwenu? Da'a iko wo'u samba'a anaguru ntau ya'a?" Tapi nesapumo i Petrus, "Da'a!" 26 Naria wo'umo samba'a batua Balengga Topanggeni Agama ri setu to nawela raposampesuwu tau to nitimbe i Petrus talingana sampe napudu pangane. Nangulimo tau etu ka i Petrus, "Da'a iko to nikitaku ri pampa nosanggani-nggani ante Yesus pangane?" 27 Tapi nesapu wo'umo i Petrus, "Da'a!" Iwetu i Petrus notesa kaliu-liu nora'omo manu. 28 Dabobayana mpu'u Yesus nikeni iramo nggari sapo i Kayafas nalau mpaka ri sapo Gubernur. Topanggeniaka-topanggeniaka nto Yahudi da'a nesua riara sapo Gubernur etu, sabana ira da'a madota majadi matantoru nantuki Atura-atura agama ira. Nipowia ira iwetu ala ira mamala manggoni panggoni posusa Paska ngina. 29 Sabana etu i Pilatus nesuwu mpaka ri sawalikuna nosirata ka ira, pade nipekutanana ka ira, "Nuapa sala ntau e'i nipangadu komi?" 30 Nesonomo ira, "Ane I'a da'a tau naja'a natantu kami da'a madota manggeni I'a ri ja'i komi, Uma." 31 Nanguli i Pilatus ka ira, "Ala komimo I'a, pade ratangara komi mbotomo salana nantuki Atura-atura agama komi!" Tapi nesonomo tau-tau to Yahudi etu, "Kami da'a nipaloga mombasuku tau sampe mamate." 32 Etu najadi ala madupa tesa to niuli Yesus bopia nombaboto jala nggamatena. 33 Nangepe etu nesua wo'umo i Pilatus mpaka riara sapona pade nipakauna tau manggeni Yesus ri ja'ina. Pade nipekutanana ka Yesus, "Komimo Magau nto Yahudi?" 34 Nesonomo Yesus, "Pekutana etu nggari ja'i komi mboto, atau naria tau nanguli ka komi ewa Aku?" 35 Nanguli i Pilatus, "Aku e'i da'a tau to Yahudi! Tau-tau to Yahudi bo balengga-balengga topanggeni agama mbotomo to nanggeni Komi ri ja'iku. Sala nuapa ntoto nikawiamu?" 36 Nesonomo Yesus, "Poparentaku da'a nggari dunia e'i. Ane rapana Aku magau nggari dunia e'i natantumo topantuki-topantuki Aku kana meewa ala Aku ne'e rasoko bo rakeni ri ja'i topanggeniaka-topanggeniaka nto Yahudi. Tapi poparentaku da'a nggari dunia e'i." 37 Pade nekutana wo'umo i Pilatus ka I'a, "Ane iwetu tanu, magau mpu'u Komi?" Nesonomo Yesus, "Ewa niuli komi etu nakono, Aku e'i samba'a magau. Aku nipoanaka pade nomai riara dunia ante patuju mompatolele pepatuduki to nakonona. Isema-sema to natundu riara pepatuduki to nakonona, ira etumo to nompetalinga Aku." 38 Nekutanamo i Pilatus, "Nuapa ntoto pepatuduki to nakonona?" Naopu etu nesuwu wo'umo i Pilatus nggariara njapona mpaka ri sawalikuna, pade niulina ka tau-tau to Yahudi, "Da'a ntoto naria sangaya sala ntau etu nirataku. 39 Tapi nantuki kabiasa komi, ane Eo Bete Paska aku kana manggabasaka ka komi samba'a tau nitarunggu. Madota komi kukabasaka ka komi Magau nto Yahudi etu?" 40 Tapi nongaremo ira ante suara namangga, "Ne'e! Ne'e I'a rakabasaka! Agina i Barabas rakabasaka ka kami!" Barabas etu samba'a parampo.
1 Naopu etu i Pilatus nompakau tantara-tantarana mombaporo Yesus. 2 Naopu nombaporo I'a, tantara-tantara etu nompowia saongu songgo nggari karui pade nipoposonggo ira ka Yesus. Naopu etu nipasua ira ka I'a santonga baju nakamumu ewa baju magau. 3 Pade ira tunggai nompakamosu Yesus nompongei-ngei I'a ante nanguli, "Ratoiyata Magau nto Yahudi!" Pade nisapa-sapa iramo lenje Yesus. 4 Naopu etu nesuwu wo'umo i Pilatus mpaka ri sawalikuna nanguli ka tau-tau to Yahudi, "Kita komimo! I'a kukeni mesuwu mpaka ri ja'i komi ala ranjani komi da'a ntoto naria salana nirataku." 5 Pade Yesus nikeni nesuwu ri sawalikuna nosonggo karui bo nobaju magau nakamumu. Pade nangulimo i Pilatus ka tau dea etu, "Kitamo! E'imo I'a!" 6 Sangga nanggita Yesus nongare-ngaremo balengga-balengga topanggeni agama bo topojaga-topojaga Sapo Mpepue, "Pakumo I'a ri kayu parika! Pakumo I'a ri kayu parika!" Nangulimo i Pilatus ka ira, "Ala komi mbotomo I'a, pade paku I'a ri kayu parika, sabana tau etu da'a ntoto naria salana nirataku." 7 Nesonomo tau-tau to Yahudi ka i'a, "Nantuki Atura-atura kami tau e'i masipato rapatesi sabana I'a nompangaku korona Ana nu Alatala!" 8 Sangga nangepe pantesa tau-tau to Yahudi etu nantambai kaeka rara i Pilatus. 9 Jadi nesua balimo i'a riara njapona pade Yesus wo'u nikeni nesua ri setu. Pade nekutanamo i Pilatus ka Yesus, "Tau nggari umba kakonona Komi e'i?" Tapi Yesus da'a nesono. 10 Jadi nanguli wo'umo i Pilatus ka I'a, "Iwenumo? Da'a madota Komi motesa ante aku? Da'a ninjanimu aku e'i nakuasa mombakabasaka Komi, pade nakuasa wo'u mombapaku Komi ri kayu parika?" 11 Nesonomo Yesus, "Da'a ntoto ria kuasamu ri ja'iku ane da'a niwai Alatala ka komi. Jadi tau-tau to nanggeni Aku ri ja'imu neliu mpu'u kabete silaka ira." 12 Sangga i Pilatus nangepe pantesa Yesus etu, nielonamo jala ala Yesus mamala rakabasaka. Tapi nongare wo'umo tau-tau to Yahudi, "Ane komi mombakabasaka tau etu komi da'a nowega ante Magau Kaisar! Isema-sema nompangaku korona samba'a magau, i'amo bali Magau Kaisar!" 13 Nangepe tesa tau-tau to Yahudi etu, nikeni Pilatusmo Yesus mpaka ri sawalikuna pade nekatokomo i'a ri kadera mpotangara to nosanga ka "Jaula Watu." Ane riara basa Ibrani sangana "Gabata." 14 Tempo etu nawela eo mpompakasadia tempo Posusa Paska, kira-kira ntongo eo. Nangulimo i Pilatus ka tau-tau to Yahudi, "E'imo magau komi!" 15 Tapi nongare-ngaremo ira, "Patesimo I'a! Patesimo I'a! Pakumo I'a ri kayu parika!" Nanguli i Pilatus ka ira, "Iwenu? Masipato aku mombapaku magau komi ri kayu parika?" Nesonomo balengga-balengga topanggeni agama, "Aga Magau Kaisar magau kami!" 16 Kaopuna i Pilatus nombawai Yesus ka tau-tau to Yahudi ala I'a rapaku ri kayu parika sampe mamate. Pade Yesus nikeni tantara-tantara nggari setu. 17 Nalaimo I'a nggari ngata etu ante nanjumbuaka mboto kayu rapomparika I'a mpaka ri peto'o to nosanga ka Peto'o Wuku Balengga. Ane riara basa Ibrani sangana "Golgota." 18 Ri setumo Yesus nipaku ira ri kayu parika. Nosanggani-nggani ante I'a naria wo'u romba'a tau ntanina to nipaku ri kayu parika, samba'a ri sabingga ngganana, samba'a ri sabingga njidina pade Yesus ri tatongona. 19 Naria dopi nitulisi nipakasadia i Pilatus to nipataka ri kayu pomparika Yesus to nanguli iwe'i: |scYESUS TO NAZARET, MAGAU NTO YAHUDI.|r 20 Dopi nitulisi etu nibasa nadea tau to Yahudi sabana peto'o Yesus nipaku ri kayu parika etu namosu ngata Yerusalem, pade tesa etu nitulisi riara tolungaya basa, etumo Basa Ibrani, Basa Latin, pade Basa Yunani. 21 Nanggita etu nangulimo balengga-balengga topanggeni agama ka i Pilatus, "Ne'e ratulisi komi 'Magau nto Yahudi.' Agina ratulisi komi 'Tau e'i nompangaku korona Magau nto Yahudi.' " 22 Tapi nesonomo i Pilatus, "Nuapa to nitulisiku etu, batena etumo!" 23 Naopu tantara-tantara nombapaku Yesus ri kayu parika ira nangala pakeana pade nibagi-bagi ira patabagia, simbau sabagia. Baju nggumbana wo'u niala ira, tapi baju etu da'a naria pojauna, aga nitanu wa'amo santonga lau. 24 Etu sampe tantara-tantara etu nanguli, "Ne'e raserita baju nggumba e'i. Agina kita mompenoa mowia nomoro. Isema mawela nomoro i'a mombarata baju e'i." Etu pura-pura najadi ala madupa tesa to nitulisi riara Buku Nagasa to nanguli iwe'i: "Ira nosibagi-bagi ka pakeaku, pade bajuku nipompenoa ira." Jadi nuapa to nipowia tantara-tantara etu nasimbayu ntoto ewa to nitulisi nggaolu. 25 Namosu ri pu'u kayu pomparika Yesus etu indona nenggore mpasanggani-nggani ante sampesuwu besi nu indona. Naria wo'u i Maria rongo i Klopas pade i Maria Magdalena. 26 Sangga Yesus nanggita indona nenggore ri setu ri sinjori anaguruna to nipotowena, niulinamo ka indona, "Nindo, etumo anamu." 27 Pade niulina wo'umo ka anaguruna etu, "Etumo indomu." Jadi nompamula nggari eo etu, anaguru etu nantarima indo Yesus neto'o riara njapona. 28 Ninjani Yesus naopumo mpengele-ngele bagona. Jadi notesamo I'a ala madupamo tesa to nitulisi riara Buku Nagasa. Niulina, "Nabai tamboloku." 29 Ri setu naria saongu tubu niisi ante ue anggur to napoi. Jadi naria tau nangala sangele wunga to nasimbayu ewa lumu nitome ira riara ue anggur etu. Naopu etu nitosupaka ira wunga etu ri wuntu sanggoto kayu pade nipopoinu ira ka Yesus. 30 Naopu Yesus nanjasipi anggur etu niulina, "Naopu puramo bagoku." Naopu etu notunggoumo balenggana pade nalaimo nosana. 31 Eo etu eo mpompakasadia ka Eo Mpenonto, pade Eo Mpenonto etu nawela posusa Paska nto Yahudi. Topanggeniaka-topanggeniaka nto Yahudi da'a madota watabaku ntau nipaku ri kayu parika etu rapakela makambero ri setu tempo Eo Mpenonto. Jadi etu sampe ira nerapi ka i Pilatus ala kada tau-tau nipaku ri kayu parika etu raboba mpakakoto ala tau-tau etu masalisa mamate pade watabaku ira masalisa rata'uraka nggari kayu parika. 32 Jadi nalaumo tantara-tantara nombaboba mpakakoto kada-kada tau romba'a to nipaku ri kayu parika mpasanggani-nggani ante Yesus. 33 Tapi tempo ira narata ri ja'i Yesus nikita ira namatemo I'a. Jadi da'a najadi ira nombaboba mpakakoto kada Yesus. 34 Aga naria samba'a nggari tatongo tantara etu nombatosu usu Yesus ante tawalana. Pade kaliu-liu nesuwumo lei ante ue nggari usu Yesus. 35 Tau to nanggita kajadia etu ante matana mboto, i'amo to nompatolele kajadia etu ka komi ala komi wo'u momparasaya. Nakonomo tesana etu pade ninjanina mbotomo tesana etu nakono. 36 Pura-pura etu najadi ala madupa nuapa to nitulisi riara Buku Nagasa to nanguli iwe'i: "Da'a ria sampeka wukuna to rapakakoto." 37 Pade naria wo'u tesa ntanina riara Buku Nagasa to nanguli, "Ira kana mantingoa tau to nitosu ira tawala." 38 Naopu etu naria samba'a tau nosanga ka Yusuf nggari ngata Arimatea nalau nomperapi watabaku Yesus ka i Pilatus. Yusuf etu samba'a topantuki Yesus, aga da'a ninjani ntau sabana i'a naeka ka topanggeniaka nto Yahudi. Pomperapi Yusuf etu nipoiyo i Pilatus. Jadi nalaumo Yusuf nanta'uraka watabaku Yesus nggari kayu parika. 39 Nosanggani-nggani ante Yusuf naria wo'u i Nikodemus, tau to narata nanggita Yesus tempo nggawengina bopia. I'a nanggeni galo rampa-rampa nawongi nosanga ka mur bo gaharu, kira-kira tolumpulu kilo katomona. 40 Pade niala ira romba'a watabaku Yesus nisompu ira ante kae gandisi to nalusuna nosanggani ante rampa-rampa to nawongi etu nantuki ada nto Yahudi. 41 Namosu peto'o nipombapaku Yesus ri kayu parika naria salimpu pampa. Riara pampa etu naria saongu dayo nabou nipa'a ri bulu watu anu da'apa sanggani nipake. 42 Jadi watabaku Yesus niboli ira riara dayo etu, sabana namosumo dayo etu pade mana masaeka pamulana Eo Mpenonto.
1 Ri eo Aka kampadondo njiina nalaumo i Maria Magdalena mpaka ri dayo Yesus. Sangga naratapa i'a ri dayo nikitanamo watu nipompiku dayo etu nikaliakamo nggari pewobo dayo etu. 2 Jadi nangowamo i'a mpaka ri ja'i Simon Petrus bo anaguru to nipotowe Yesus etu, pade niulina ka ira, "Niala ntaumo watabaku Yesus nggariara dayo, pade da'a ninjani kami bara ri umba nipomboli ira!" 3 Nangepe etu nalaimo i Petrus bo anaguru ntanina etu mpaka ri dayo. 4 Nangowamo ira romba'a mpaka gusa'a tapi anaguru ntanina etu neliu nggagasipa pade i Petrus. Jadi i'a nokolu narata ri dayo. 5 Sangga naratapa i'a ri dayo notunggoumo i'a nompeside riara dayo. Nikitana kae gandisi niposompu Yesus ri setu. Tapi i'a da'a nesua riara dayo etu. 6 Pade naratamo i Simon Petrus nggapurina. I'a kaliu-liu nesua riara dayo etu. Nikitana kae gandisi niposompu Yesus ri setu. 7 Pade nikitana wo'u kae nipompo'u balengga Yesus. Tapi kae etu da'a nipasanggani ante kae gandisi etu, aga nilulu mpakabelo-belo niboli ri peto'o ntanina ri sinjorina. 8 Pade nesua wo'umo anaguru ntanina to nokoluna narata ri dayo etu. Nikitana kae etu pade niparasayanamo. 9 Tempo etu da'apa ninjani ira patuju tesa to nitulisi riara Buku Nagasa nggaolu to nanguli Yesus kana matuwu bali nggari kamatena. 10 Naopu etu nanjilimo ira romba'a mpaka ri sapo. 11 Tapi i Maria Magdalena danekanggore ri sawaliku dayo etu nageo-geo. Tempo i'a nageo ri setu notunggoumo i'a nompeside riara dayo. 12 Ri setu nikitana romba'a malaeka nobaju nabula nekatoko ri walea pomboli watabaku Yesus, samba'a ri balenggana pade samba'a ri kadana. 13 Pade nekutanamo malaeka-malaeka etu ka i Maria, "Nokuya komi nageo-geo?" Nesonomo i Maria, "Pueku niala ntaumo nggari se'i pade da'a ninjaniku ri umba nipomboli ira." 14 Naopu etu i'a nompeili ri talikuna nikitana Yesus nenggore ri setu, aga da'apa ninjanina I'amo Yesus. 15 Nekutanamo Yesus ka i'a, "Nindo, nokuya komi nageo-geo? Isema nielomu?" Niuli Maria bara topokarajaa ri pampa etu. Jadi nesonomo i'a ri ja'ina, "Uma, ane komimo to nangala watabakuna nggari se'i ulimo ka aku bara ri umba nipomboli komi ala aku mamala malau mangala I'a." 16 Nangulimo Yesus ka i'a, "Maria." Nangepe etu negoli ntaliku i Maria pade nangulimo i'a ante Basa Ibrani, |i"Rabuni!"|r Batuana "Guru." 17 Pade nangulimo Yesus ka i'a, "Ne'epa ruru Aku musoko, sabana Aku da'apa neore mpaka ri ja'i Umaku. Tapi kalaumo mpaka ri ja'i sampesuwu-sampesuwuku pade ulimo ka ira iwe'i: 'Aku malaumo mpaka ri ja'i Umaku bo Umamu, etumo Alatalaku bo Alatalamu.' " 18 Jadi nalaumo i Maria Magdalena mpaka ri ja'i anaguru-anaguru Yesus pade niulina, "Nikitakumo i Pue!" Pade nitesana wo'u ka ira pura-pura nuapa to nitesa Yesus ka i'a. 19 Ri eo Aka etu wo'u tempo nggawengina anaguru-anaguru Yesus nasiromu ri saongu sapo. Pewobo sapo etu nikunci sabana ira naeka ka topanggeniaka-topanggeniaka nto Yahudi. Sampegoli naratamo Yesus nekanggore ri tatongo ira, pade niulina ka ira, "Pue mombagane komi." 20 Naopu Yesus nombatabe ira iwetu nipopokitanamo ka ira palena bo usuna. Sangga nanggita Yesus nadamba mpu'umo rara ira. 21 Pade nanguli wo'umo Yesus ka ira, "Pue mombagane komi. Nasimbayu ewa Umaku nompakau Aku iwetu wo'u Aku mompakau komi." 22 Naopu etu nitawuinamo ira ante nosana pade nanguli, "Tarima komimo Nosa Nagasa nu Alatala. 23 Ane komi mombaampungi silaka ntau, silaka ira kana raampungi Alatala, pade ane komi da'a mombaampungi silaka ntau, silaka ira da'a wo'u raampungi Alatala." 24 Tomas, samba'a nggari sampulu romba'a anaguru Yesus, to niuli wo'u Ngana Norapi, da'a naria nosanggani-nggani ante roa-roana tempo Yesus narata nompopokita korona ka ira. 25 Jadi nangulimo anaguru-anaguruna ntanina ka Tomas, "Nikita kamimo i Pue!" Tapi nangulimo i Tomas, "Ane aku da'apa manggita walea paku ri palena pade mombadika koyampaleku ri walea etu bo mombadika paleku ri walea tawala ri usuna, da'apa ntoto kuparasaya." 26 Walumbengi kaliuna nasiromu wo'umo anaguru-anaguru Yesus riara njapo etu, pade i Tomas wo'u naria nosanggani-nggani ante roana ri setu. Pewobo nikunci puramo tapi naupa iwetu naratamo Yesus nenggore ri tatongo ira, pade niulina ka ira, "Pue mombagane komi." 27 Naopu etu niulina ka i Tomas, "Dikamo koyampalemu ri se'i. Kitamo paleku e'i. Pade dikamo palemu ri walea tawala ri usuku e'i. Ne'e mana mabata-bata raramu, tapi parasayamo." 28 Pade nangulimo i Tomas ka Yesus, "Pueku! Alatalaku!" 29 Nangulimo Yesus ka i Tomas, "Iko nomparasaya sabana iko nanggita Aku. Tapi neliu nggabelopa tau to nomparasaya nau da'a nanggita Aku." 30 Danadeapa tandai-tandai to nipogumaa ntanina to nikawia Yesus tempo I'a danaria nosanggani-nggani ante anaguru-anaguruna anu da'a nitulisi riara buku e'i. 31 Tapi nuapa to nitulisi riara buku e'i, patujuna ala manggeni komi momparasaya Yesus etumo mpu'u-mpu'u Magau to Mompakasalama, Ana nu Alatala. Pade patujuna wo'u ala komi mamala mombarata katuwua mabelo sampe ri kasae-saena ante momparasaya I'a.
1 Naopu etu Yesus nompopokita korona sangganipa ka anaguruna ri wiwi Rano Tiberias. Iwe'imo tesana. 2 Bara sakuya mba'a anaguru Yesus nasiromu ri setu, etumo i Simon Petrus, i Tomas to nidae Ngana Norapi, i Natanael nggari ngata Kana ri Bagia Galilea, bo romba'a ana i Zebedeus, pade romba'a anaguruna ntanina. 3 Nangulimo i Simon Petrus ka roa-roana, "Aku e'i malau mompemala bau ri rano." Nesonomo roa-roana, "Momai wo'u kami." Jadi nalaumo ira mpasanggani-nggani nesawi sakaya. Nojala baumo ira njambengi ntua tapi da'a ntoto ria bau namala ka ira. 4 Kampadondona etu Yesus nekanggore ri wiwi rano, tapi da'a ninjani anaguruna I'a etu Yesus. 5 Nangulimo Yesus ka anaguruna riara sakaya, "Iwenumo, ana-anaku? Naria bau nirata komi?" Nesonomo ira, "Da'a ntoto naria." 6 Nanguli Yesus ka ira, "Tendeakamo jala komi ri sabingga nggana sakaya etu pade komi kana mombarata bau." Jadi nitendeaka ira mpu'umo jala ri sabingga nggana sakaya etu. Sangga ira nombataja jala etu da'a mana nipakule ira sabana nadea mpu'u bau riarana. 7 Nanggita kajadia etu nangulimo anaguru to nipotowe Yesus ka i Petrus, "Etumo i Pue!" Sangga i Petrus nangepe tesa etu nialanamo bajuna nipasuana bali, sabana i'a nojala bau da'a nobaju. Pade nekawantumo i'a mpaka riara rano norabu mpaka ri kabatana. 8 Aga anaguru-anaguru Yesus ntanina etu nesawi sakaya mpaka ri kabatana ante nombataja jala naponu ante bau etu, sabana ira da'a nakawao nggari kabatana, kira-kira satu metere kakawaona. 9 Tempo ira nana'u nggariara sakaya nikita ira naria ruti nu apu to nipowia nggari wuri danarega ri setu, pade ri bunggu ruti nu apu etu naria bau ante roti. 10 Nangulimo Yesus ka ira, "Keni ri se'imo sanu bara sakuya mba'a bau to nipemala komi etu." 11 Jadi i Simon Petrus nesawi riara sakaya pade nitajana jala etu sampe ri kabatana. Jala etu naponu ante bau to nabetena, kadeana pura-pura satu limampulu bo tolumba'a. Tapi naupa iwetu kadeana, nau aga sambalaa lui jala etu da'a ria nadapa. 12 Pade niuli Yesus wo'umo ka anaguruna, "Kamaimo kita molalawo." Da'a ntoto naria to nabia nekutana ka Yesus, "Isema Komi?" Sabana ninjani ira puramo I'a etu i Pue. 13 Nalaumo Yesus nangala roti etu pade nitibo-tibona ka ira. Pade iwetu wo'u nipowiana ante bau. 14 Etumo katolungganina Yesus nompopokita korona ka anaguru-anaguruna naopu I'a natuwu bali nggari kamatena. 15 Naopu ira nanggoni nangulimo Yesus ka i Simon Petrus, "Simon, ana Yohanes, neliupa towemu ka Aku pade towe nu roa-roamu etu?" Nesonomo i Petrus, "Iyo, ninjanimu mboto, Pue, aku nompotowe Komi." Nanguli Yesus ka i'a, "Ane iwetu, piaramo ana-ana bimbaku." 16 Pade nekutanamo Yesus ka i Petrus karongganina, "Simon, ana Yohanes, iko nompotowe Aku?" Nesonomo i Petrus, "Iyo, ninjanimu mboto, Pue, aku nompotowe Komi." Nanguli Yesus, "Ane iwetu, poewumo bimba-bimbaku." 17 Pade nekutanamo Yesus ka i Petrus katolungganina, "Simon, ana Yohanes, iko nompotowe Aku?" Nangepe etu nasusa mpu'umo rara i Petrus, sabana tolungganimo Yesus nompekutana i'a, "Iko nompotowe Aku?" Jadi nesonomo Petrus ka I'a, "Pue, ninjanimu mpengele-ngele. Ninjanimu aku nompotowe Komi." Nanguli Yesus, "Ane iwetu, piaramo bimba-bimbaku. 18 Aku mpu'u-mpu'u notesa ka iko, tempo iko danamuda iko mboto noso'o kopemu pade nalau mpaka ri umba nipodotamu. Tapi ane iko matu'amo, iko kana mombawai palemu raso'o tau ntanina, pade iko kana rakeni ntau malau mpaka ri peto'o anu da'a nipokonomu." 19 Ante jalili etu Yesus nompakanoto jala nggamate i Petrus banepiana ala Pue Alatala rabila bo ratoiya. Naopu etu nanguli wo'umo Yesus ka i Petrus, "Ne'e menonto mantuki Aku!" 20 Naopu etu neilimo i Petrus pade nikitana anaguru to nipotowe Yesus nantuki purina. Anaguru etumo to nekatoko ri sinjori Yesus tempo ira nanggoni nggawengina pade nekutana, "Isema to mompobalu Komi, Pue?" 21 Sangga nikita i Petrus anaguru etu, nipekutanana ka Yesus, "Pue, nuapa majadi ante roaku ya'a?" 22 Nesonomo Yesus, "Ane Aku madota i'a matuwu sampe Aku manjili bali ri dunia e'i, etu da'a miki munjani. Tapi iko, ne'e menonto mantuki Aku!" 23 Nggari setu natolelemo kareba ri tatongo topomparasaya Yesus to nanguli anaguru to nipotowena etu da'a mamate. Tapi kakonona Yesus da'a nanguli anaguruna etu da'a mamate. To niulina, "Ane Aku madota i'a matuwu sampe Aku manjili bali ri dunia e'i, etu da'a miki munjani." 24 Aku e'imo anaguruna etu. Akumo to nantesa pura-pura kajadia etu. Pade aku e'i wo'umo to nantulisi etu pura-pura riara buku e'i. Pade ninjanita nuapa to nitesaku etu mpu'u-mpu'u nakono. 25 Danadeapa ntani-ntanina to nipowia Yesus. Ane rapana ratulisi pura-pura kajadia etu, kupekiri dunia e'i da'a masuka rapomboli pura-pura buku to ratulisi etu.
1 Teofilus to nibila, riara bukuku pamulana nitulisiku ka komi ewa pura-pura nuapa to nikawia pade to nipatuduki Yesus nggari pamulana 2 - 3 sampe I'a neore mpaka ri suruga. Nitulisiku wo'u iwenu I'a nipandasa sampe namate pade iwenu I'a natuwu bali nggari kamatena. Naopu I'a natuwu bali, nadea ngganimo nipopokitana korona ka anaguru-anaguruna to nipelisina bopia, ala ranjani ira mpu'u-mpu'u I'a natuwu bali. Riara tempo patampulu mbengina ira nanggita I'a, pade I'a nompatuduki ka ira ewa Poparenta nu Alatala. Pade ante kuasa Nosa Nagasa I'a nombawai parenta ka anaguru-anaguruna. 4 Tempo I'a nasiromu ante ira, nitewaina ka ira, "Ne'e komi mompalasi ngata Yerusalem. Popea ntani ruru ri setu sampe Umaku Pue Alatala mompopana'u ka komi Nosa Nagasana to nijanjina, ewa to niuliku ka komi bopia. 5 Toramo! Yohanes nombadiu tau ante ue ewa tandaina najeamo ira nggari silaka. Tapi riara bara sakuya mbengipa komi kana radiu ante Nosa Nagasa nu Alatala." 6 Tempo anaguru-anaguruna etu nasiromu nosanggani ante Yesus, ira nekutana ri ja'ina, "Pue, iwe'i-we'i Pue mombakabasaka kita to Israel nggari balita ala mamala kita momparenta ngatata mboto?" 7 Nesonomo Yesus, "Umaku mboto to nakuasa mompakatantu nepia etu majadi. Etu da'a miki ranjani komi. 8 Tapi komi kana mantarima kuasa ane Nosa Nagasa nu Alatala mana'u ri ja'i komi. Pade komi kana mompatolele karebaku ka tau-tau ri ngata Yerusalem, pade ri pura-pura Bagia Yudea ante Bagia Samaria, sampe ri umba-umba ri dunia." 9 Naopu Yesus notesa iwetu, nateonggotakamo I'a nggari ngayo ira mpaka ri suruga nikita nu mata ira mboto, sampe kulimu nombabungu I'a nggari panggita ira. 10 Tempo ira danantingoa langi nanggita Yesus neore etu, sampegoli naria romba'a malaeka to nopakea naputi nenggore ri sinjori ira. 11 Nangulimo malaeka etu, "Umba komi, to Galilea! Nokuya komi aga mpanggoremo ri setu nantingoa langi? Yesus to nikita komi neore nggari ngayo komi mpaka ri suruga pani'a kana marata bali ri dunia e'i nasimbayu ewa nikita komi pane'a." 12 Naopu etu natinggulimo anaguru-anaguru Yesus nggari Bulu Zaitun mpaka ri ngata Yerusalem. Bulu etu kakawaona kira-kira saongu kilo nggari Yerusalem. 13 Narata ri Yerusalem nalaumo ira ri sapo nipeto'o ira nepone ri tombi kalangana. Sanga nu anaguru-anaguruna etumo: i Petrus, Yohanes, Yakobus, Andreas, i Filipus, i Tomas, i Bartolomeus, i Matius, Yakobus ana Alfeus, i Simon tau to Zelote, pade Yudas ana Yakobus. 14 Da'a nenonto ira pura-pura nasiromu nosaongu rara nosambaya. Nosanggani-nggani ante ira naria wo'u bara sakuya mba'a besi pade i Maria indo Yesus, ante sampesuwu-sampesuwu Yesus. 15 Naria saeo ira pura-pura nasiromu kira-kira satu rompulu mba'a kadeana. Ri setu nekanggoremo i Petrus ri tatongo ira topomparasaya i Pue Yesus pade nanguli, 16 "Sampesuwu-sampesuwu pura-pura, kana nadupamo nuapa to nitulisi riara Buku Nagasa ewa Yudas. Tempo nggaolu Magau Daud nombaboto tesa nggari ja'i Nosa Nagasa ewa Yudas, roata to nanggeni tau nanjoko i Pue Yesus. 17 Yudas etu samba'a roata, sabana i'a nipelisi i Pue Yesus mboto mokarajaa mpasanggani-nggani ante kita." 18 (Yudas etu nangoli salimpu tana ante doi to niratana nggari powiana to naja'ana. Ri tana etu i'a namate nanawu. Ta'ina nasemparaka sampe isi rarana nakamburaka nesuwu ri sawalikuna. 19 Pura-pura tau neto'o ri ngata Yerusalem nangginjani nuapa to najadi etu. Etumo sabana tana etu nipoposanga ira Akeldama, to naria batuana riara basa ira mboto "Tana Nikabubu nu Lei".) 20 Nanguli wo'umo i Petrus, "Riara Buku Mazmur naria tesa nosinggawela ante Yudas iwe'i: 'Palambamo sapo peto'ona majadi maboa. Ne'e rawai tau meto'o riarana.' Pade naria wo'u to nitulisi iwe'i: 'Agina pekatokona raala tau ntanina.' " 21 - 22 Pade i Petrus nompapola tesana iwe'i: "Sampesuwu-sampesuwu, etumo sabana kita kana mompelisi samba'a tau nggari tatongota mantuki kita mompatolele ka tau i Pue Yesus natuwu bali nggari kamatena. Tau rapelisita etu kana samba'a tau bate-batena nosanggani-nggani ante kami nantuki i Pue Yesus nompamula nggari tempo Yohanes nombadiu tau sampe ri tempo i Pue Yesus neore mpaka ri suruga." 23 Jadi nggari tatongo ira topomparasaya i Pue Yesus etu romba'a tau nipakatantu ira rapelisi manjambei i Yudas, etumo Yusuf Barsabas (i'a wo'u nidae Yustus) ante i Matias. 24 - 25 Naopu etu ira nosambaya, "Pue, ninjanimu isi rara nta'i pura-pura manusia. Yudas nalau nompalasi pobagona ewa anagurumu pade namate nalau mpaka ri peto'o to masipato ante powiana. Jadi popokita ka kami isema nggari romba'a tau e'i to nipelisimu manjambei Yudas mokarajaa mosanggani ante kami mompatolele tesamu." 26 Naopu ira nosambaya ira nantendeaka nomoro. Sanga i Matias to nawelana. Jadi nompamula nggari eo etu i Matias nireke samba'a nggari sampulu romba'a anaguru i Pue Yesus.
1 Sangga narata tempo eo bete nto Yahudi to nosanga ka Eo Pentakosta, nasiromumo pura-pura topomparasaya i Pue Yesus ri saongu peto'o. 2 Sampegoli niepe ira moni nggari langi ewa nguu nu bara naramboso. Nguu nu bara etu natiepe ri umba-umba riara njapo to nikasiromu ira etu. 3 Pade nikita ira sangaya ewa jela nu apu nolenje mpojila nendele ri umba-umba pade netu'u ri ja'i ira samba'a bo samba'a. 4 Ira pura-pura nipesua Nosa Nagasa nu Alatala pade nompamulamo ira notesa ante basa-basa to nopu'u nggari ja'i Nosa Nagasa nu Alatala etu. Ira namala notesa basa-basa etu sabana kuasa Nosa Nagasa naria ri ja'i ira. 5 Tempo etu wo'u nadea tau-tau to Yahudi ntanina naria ri ngata Yerusalem. Ira e'imo tau-tau to naroso poagamana to narata nggari umba-umba ngata ri dunia. 6 Sangga niepe ntau nguu nu bara etu, naratamo tau dea nasiromu. Natekaja mpu'u ira sabana niepe ira basa ira mboto namala nipotesa topomparasaya i Pue Yesus. 7 Ante rara to natekaja pade nogumaa ira notesa samba'a bo samba'a, "Kitamo! Tau-tau to notesa e'i, ira pura-pura to Galilea! 8 Tapi iwenu sampe kita pura-pura nangepe ira notesa ante basa nggari ngatata mboto? 9 Kita e'i tau nggari tana Partia, Media, Elam, nggari Mesopotamia, Yudea pade Kapadokia. Naria wo'u kita nggari Pontus bo Asia, 10 nggari Frigia pade Pamfilia, nggari Masir pade nggari tana Libia namosu ante ngata Kirene. Naria wo'u ri tatongota e'i tau narata nggari Roma. 11 Sabagia nggari kita tau to Yahudi bo naria wo'u tau ntanina to nesua agama Yahudi. Naria tau to narata nggari Bagia Kreta bo Arab. Kita e'i tau nggari mpengaya basa tapi kita pura-pura nangepe ira notesa ante basata mboto ewa powia to neliu nggabelo to nipowia Alatala!" 12 Ira pura-pura nogumaa bo naingu, pade nosipekutanamo ira samba'a bo samba'a, "Nuapa batuana kajadia e'i?" 13 Tapi naria wo'u tau-tau ntanina ri setu to nompongei-ngei. Ira nanguli, "A, tau-tau etu, ira aga nalangu." 14 Nangepe tesa etu, nekanggoremo i Petrus nosanggani ante ira sampulu samba'a anaguru ntanina etu, pade notesamo i'a ka tau dea ante suara namangga. Niulina, "Sampesuwu-sampesuwu to Yahudi, pade komi pura-pura to neto'o ri Yerusalem! Epemo mpakabelo-belo tesaku e'i! Kana kupakanoto ka komi batuana nuapa to najadi ri se'i. 15 Kami e'i da'a nalangu ewa nibata komi, sabana we'i-we'i da'apa tempo panginu, datinti sasio mpadondona. 16 Tapi kajadia e'i karata nu Nosa Nagasa ewa to nijanji Alatala nantuki tesa to niboto nabi Yoel nggaolu iwe'i: 17 'Alatala notesa: Ri tempo kaopu nu dunia banepia Aku kana mompopana'u Nosaku ka pura-pura manusia. Ana-ana komi, nabeloka langgai nabeloka besi, kana mompasimbayu tesaku ka komi. Kabilasa-kabilasa komi kana manggita panggita nggari ja'iku. Pade totu'a-totu'a komi kana mangipi ewa pangipi kuwai ka ira. 18 Sampe ri batua-batuaku wo'u, nabeloka langgai nabeloka besi, kana kuwai ka Nosa Nagasa ri eo to nijanjiku etu. Pade ira kana mompasimbayu nuapa-nuapa kuuli ka ira. 19 Aku kana mompopokita ka komi kabaraka-kabaraka ri langi pade tandai-tandai nipogumaa ri dunia e'i. Kana maria lei bo apu bo rangasu. 20 Mata eo kana mabali majadi marumau, wula kana majadi maralei. Etu kana majadi ruru pade marata eo bete to nabelona, etumo tempo Pue marata ri dunia e'i. 21 Pade isema-sema to mekakai ka i Pue kana rapakasalama.' 22 Sampesuwu-sampesuwuku to Israel, epemo tesaku e'i! Alatala nompopokita ka komi pura-pura I'a mpu'u-mpu'u naria nosanggani-nggani ante Yesus to Nazaret etu, sabana nadea kabaraka pade tandai-tandai to nipogumaa to nikawia Alatala niposabana Yesus etu. Komi mboto nangginjani etu sabana kajadia-kajadia etu pura-pura najadi ri tatongo komi mboto. 23 Yesus etu niwai riara mpale komi pade I'a nipatesi komi. I'a niwai komi ka tau naja'a ala I'a rapaku ira ri kayu parika. Tapi kakonona to najadi etu nantuki nia to nipakatantu Alatala, sabana ninjanina nggari pamula-mulana nuapa to majadi ante Yesus. 24 Komi nompatesi Yesus, tapi Alatala nompakatuwu I'a bali nggari tatongo ntau namate. Alatala nombakabasaka Yesus nggari kasesana I'a namate sabana da'a namala I'a rata'amaka ri peto'o ntomate. 25 Nanotomo etu sabana Magau Daud nggaolu nombatesa Yesus iwe'i: 'Nikitaku Pue namosu ante aku. I'a ri sabingga ngganaku ala momporoa aku ala aku da'a molengga ragoya nuapa-nuapa. 26 Etumo sampe nadamba raraku, pade aku mantoiya-toiya. Naupa aku manusia biasa, aku e'i aga maroo manjarumaka kuasamu. 27 Sabana Komi da'a nompalamba aku maboli riara dunia ntomate. Komi da'a nompalamba watabaku Batuamu to Nagasana maboli riara dayo sampe mapopo. 28 Nitujurakamu ka aku jala mpaka ri katuwua mabelo sampe ri kasae-saena. Neliu nggadamba raraku sabana Komi nosanggani ante aku.' 29 Sampesuwu-sampesuwuku, natantu nanotomo ka kita pura-pura da'a watabakuna mboto to nipatuju Magau Daud, sabana totu'ata i Daud etu namate pade nitana. Dayona danariapa ri tatongota sampe eo e'i. 30 - 31 Tapi Daud samba'a nabi, pade ninjanina nuapa rakawia Alatala banepiana. Ninjanina pojanji Alatala ka i'a. Alatala nojanji ante netunda kana maria samba'a nggari muli i Daud banepia raonggotaka majadi magau nasimbayu ewa i Daud mboto. Etu sampe i Daud nombaboto Magau to Mompakasalama iwe'i: 'I'a da'a rapalamba maboli riara dunia ntomate, korona da'a rapalamba riara dayo sampe mapopo.' 32 Yesus etumo to nipatuju tesa Daud etu, sabana I'amo to nipakatuwu Alatala bali. Kami pura-pura e'i najadi sabina sabana ante mata kami mboto kami nanggita I'a natuwu bali. 33 I'a nionggotaka Alatala ri peto'o to nibila ri sabingga ngganana ri suruga. Pade nitarimana Nosa Nagasa to nijanji Umana Pue Alatala bopia. Jadi sampesuwu-sampesuwu, to nikita komi pade to niepe komi we'i-we'i najadi sabana kuasa Nosa Nagasa etu to niwai Yesus ka kami. 34 Jadi da'a korona mboto to nipatuju tesa Magau Daud to niuli kami pane'a, sabana natantu da'a Daud to natuwu bali pade neore mpaka ri suruga. Tapi Daud nanguli, 'Pue Alatala nanguli ka Pueku, kamai pekatokomo ri sabingga ngganaku 35 sampe Aku mompowia pura-pura balimu mekou ri ja'imu.' " 36 Pade Petrus nompakaopu tesana ante nanguli, "Jadi sampesuwu-sampesuwu, etumo sampe komi tau to Israel pura-pura kana mangginjani, Yesus e'i to nipaku komi ri kayu parika, I'amo to nionggotaka Alatala majadi Pue pade Magau to Mompakasalama!" 37 Tempo tau-tau nangepe tesa i Petrus etu, nanjoso rara mpu'umo ira. Pade ira nekutana ka i Petrus bo suro-suro ntanina, "Sampesuwu-sampesuwu, ane iwetu, nuapa masipato rapowia kami?" 38 Nesonomo i Petrus, "Komi kana majea nggari silaka komi, pade komi kana radiu samba'a bo samba'a ante sanga Yesus Kristus ala silakamu raampungi. Pade Alatala kana mombawai ka komi Nosa Nagasana. 39 Pojanji Alatala e'i niwaina ka komi pura-pura, pade ka muli nu muli komi, pade ka tau-tau ri ngata nakawao. Pojanjina etu niwai Pueta Alatala ka pura-pura tau to nipokiona marata ri ja'ina." 40 Da'a aga iwetu tesa i Petrus, tapi ante nadeapa tesa ntanina i'a notarangga ka ira. Pade nipopanjanina ka ira, "Poga'amo komi ante tau to nadenggo rarana ri dunia we'i-we'i sabana ira kana rasuku Alatala!" 41 Naopu nangepe tesa i Petrus, nadeamo tau to nomparasaya tesana etu, pade ira nidiu ewa tandai ira topomparasaya i Pue Yesus. Pade ri eo etu kadea ntau to nomparasaya i Pue Yesus natetambai wo'umo tolunjobu mba'a kadeana. 42 Topomparasaya i Pue Yesus to nabou etu nabati mpu'u neguru nggari ja'i suro-suro, pade ira tunggai nasiromu mpasanggani-nggani. Ira naoso nanggoni bo nosambaya mpasanggani-nggani. 43 Nadea mpu'u kabaraka bo tandai nipogumaa to nipowia nu suro-suro sampe nogumaa pura todea. 44 Pura-pura topomparasaya nosaongu rara, pade nuapa-nuapa to naria ri ja'i ira nipake ira mpasanggani-nggani. 45 Kayuaya pade mbara-mbara ira nipobalu pade doina etu nibagi-bagi ka isema-sema to naria paraluuna. 46 Eo-eo ira tunggai nasiromu ri Sapo Mpepue. Ira pura-pura nanggoni mpasanggani-nggani ri sapo-sapo ira ante nadamba bo naede rara. 47 Da'a nenonto-nonto ira nombatoiya Pue Alatala. Pura-pura todea ntanina nombabila ira. Pade eo-eo i Pue nantambai ka ira tau-tau ntanina to nipakasalamana.
1 Naria saeo i Petrus bo Yohanes nalau mpaka ri Sapo Mpepue tinti toluongu kaede nu eo, tempo mposambaya nto Yahudi. 2 Ri bobaa bete to nosanga ka Bobaa Naramba naria samba'a langgai to napunggu mami nggari pesuwuna. Eo-eo i'a nikowa mpaka ri bobaa etu ala i'a mamala mantinande palena merapi-rapi ka topoliu nesua nalau mosambaya ri Sapo Mpepue etu. 3 Tempo tau topunggu etu nanggita i Petrus bo Yohanes noliu mesua mpaka ri Sapo Mpepue etu, nitinandena palena nerapi ka ira romba'a nuapa to nariana. 4 Ira nanggita topunggu etu pade notesamo i Petrus ka i'a, "Kitamo kami!" 5 Tau topunggu etu nompenoto ira ante panjarumaka maria nuapa-nuapa rawai ka i'a. 6 Tapi nanguli i Petrus ka i'a, "Da'a ntoto naria doiku, tapi nuapa to naria ri ja'iku, etumo kuwai ka iko. Ante kuasa Yesus Kristus to Nazaret etu, polumakomo iko!" 7 Pade i Petrus nanjoko pale nggana topunggu etu, pade nantulungi i'a nekanggore. Kaliu-liu narosomo kada ante wuku lali ntopunggu etu. 8 I'a kaliu-liu nekanggore pade nompamula nolumako gusa'a guse'i. Naopu etu nesuamo i'a riara Sapo Mpepue mpasanggani-nggani ante i Petrus bo Yohanes. I'a nolumako pade nekawantu-wantu pade nantoiya Alatala. 9 Pura-pura tau riara Sapo Mpepue etu nanggita i'a nolumako pade nantoiya-toiya Alatala. 10 Pade ninjani ntau i'a e'imo to nabiasa nekatoko ri Bobaa Naramba ri Sapo Mpepue nerapi-rapi ka tau. Nogumaa ante natekaja ira nanggita nuapa to najadi ri ja'i ntopunggu etu. 11 Topunggu etu pangane tunggai nantuki i Petrus bo Yohanes. Tempo ira tolumba'a etu narata ri tambale to niuli Tambale i Salomo, pura-pura tau narata nasiromu ri ja'i ira, apa natekaja ira nanggita topunggu etu nolumakomo. 12 Tempo i Petrus nanggita tau dea etu notesamo i'a ka ira, "Sampesuwu-sampesuwuku to Israel, nokuya komi nogumaa nanggita anu najadi e'i? Nokuya komi tunggai nanggita kami? Natantu pombarata komi tau e'i nolumako sabana baraka kami mboto, atau sabana kami naroso poagama kami. Tapi etu da'a ntoto nakono! 13 Etu najadi nggari Alatala to nipesomba totu'ata Abraham, Ishak, bo Yakub. Alatala nombabila pade nompakabete sanga batuana Yesus. Yesus e'i to niwai komi ka tau nakuasa. I'amo to nipoara komi ri ngayo Pilatus tempo Pilatus madota manggabasaka i'a. 14 I'a nagasa bo nanoa, tapi komi pura-pura nompoara I'a pade nerapi ala i Pilatus mombakabasaka ka komi samba'a topepatesi. 15 Komi nompatesi I'a, tano I'amo to nombawai katuwu ka manusia pura-pura. Tapi I'a nipakatuwu Alatala bali nggari kamatena. Kajadia etu nikita kami mbotomo! 16 Jadi sampesuwu-sampesuwu, topunggu to nikita pade ninjani komi e'i nipakabelo ante kuasa sanga Yesus. I'a nabelo ntotomo ri ngayo komi ri se'i sabana pomparasaya ka Yesus etu. 17 Komi mboto ante totu'a-totu'a ngatata e'i nompatesi Yesus. Tapi ninjaniku etu nikawia komi sabana da'a ninjani komi I'amo Magau to Mompakasalama. 18 Tapi powia komi etu nompakadupa nuapa to niboto Alatala nantuki tesa pura-pura nabina nggaolu, etumo Magau to Mompakasalama kana mombarasai kasusa bo kapari. 19 Jadi sampesuwu-sampesuwu, kajeamo komi nggari pokainggumu to naja'a pade manjili ri ja'i Alatala ala silaka-silaka komi rapakalipona. 20 Kawiamo etu ala i Pue Alatala marata mompakasana rara komi pade ala I'a wo'u mompakau Yesus marata ri ja'i komi. Yesus etu to nipakatantu Alatala nggari pamula-mulana majadi Magau to Mompakasalama komi. 21 I'a kana meto'o ri suruga ntani ruru sampe marata tempona Alatala mompakabou pura-pura dunia e'i ewa to niuli Alatala nantuki tesa nabi-nabina tempo nggaolu. 22 Naria tesa nggari ja'i nabi Musa nggaolu to nombaboto Yesus iwe'i: 'Pue Alatala kana mangonggotaka ka komi samba'a nggari tatongo sampesuwumu mboto majadi samba'a nabi nasimbayu ewa aku e'i. Komi kana mompangala nuapa pura to raulina ka komi. 23 Isema da'a mompangala nuapa to rauli nu nabi etu, tau etu kana rapatani nggari todea nu Alatala pade i'a kana rapatesi.' 24 Sampesuwu-sampesuwu, pura-pura nabi to nompasimbayu tesa nggari ja'i Alatala, nompamula nggari nabi Samuel nggaolu pade nabi-nabi ntanina to narata nggapuri, ira pura-pura nombaboto nuapa to najadi tempo e'i. 25 Komimo to nantarima rasi to nijanji Alatala nantuki tesa nabi-nabi. Riara pojanji to nipowia Alatala ante Abraham totu'ata nggaolu niulina iwe'i: 'Nggari mulimu banepia pura-pura manusia ri dunia kana mombarata rasi nggari ja'iku.' Sampesuwu-sampesuwuku, pojanji Alatala etu nawela ante komi wo'u we'i-we'i! 26 Etumo sabana Yesus to nipelisi Alatala nipakauna narata ri ja'ita to Yahudi nokolu, ala I'a mombawai rasi ka kita. Rasina etumo mompowia kita pura-pura majea nggari pokainggu to naja'ana."
1 Tempo i Petrus bo Yohanes danotesa ka tau dea, naratamo bara sakuya mba'a topanggeni agama, balengga topojaga Sapo Mpepue ante tau-tau to Saduki ri ja'i ira. 2 Narau mpu'u ira sabana i Petrus bo Yohanes nompatuduki ka tau dea Yesus natuwu bali nggari kamatena. Pepatuduki etu nompakanoto tomate kana matuwu bali. 3 Etu sabana ira nombasoko romba'a suro etu, pade nanjuaraka ira romba'a riara tarunggu. Tapi tempo etu nawengimo. Da'apa namala ira ratangara. Jadi i Petrus bo Yohanes nita'amaka ri setu sampe naile mpadondona. 4 Naupa iwetu tau-tau to nangepe pepatuduki nu suro-suro etu pane'a, nadea to nomparasaya i Pue Yesus. Jadi kadea ntopomparasaya i Pue Yesus nantambai sampe nitasere limanjobu mba'ana. 5 Tonailena topanggeniaka-topanggeniaka agama Yahudi, totu'a-totu'a nto Yahudi ante guru-guru agama nasiromu ri Yerusalem. 6 Ira nasiromu ante Balengga Topanggeni Agama to nosanga ka i Hanas, nosanggani-nggani ante i Kayafas, Yohanes, Aleksander, bo sampesuwu ntanina Balengga Topanggeni Agama. 7 Sangga nasiromumo ira, Petrus bo Yohanes nikeni nantingayo ira pura-pura. Tau topunggu to nipakabelo nikeni ri setu wo'u. Pade nompamulamo ira nomparesa Petrus bo Yohanes ante nekutana, "Iwenu komi nompakabelo topunggu e'i? Ante baraka nuapa atau ante kuasa isema komi nompakabelo i'a?" 8 Pade nesonomo i Petrus ante kuasa nggari ja'i Nosa Nagasa nu Alatala, "Uma-uma, topanggeniaka todea pade totu'a-totu'a ngata. 9 Kami e'i nitangara komi we'i-we'i sabana powia kami nantulungi samba'a topunggu, pade sabana komi madota mangginjani ante baraka nuapa kami namala nompakabelo topunggu e'i. 10 Jadi ala ranjani komi pade pura-pura to Israel wo'u, kami manguli ka komi, tau e'i nipakabelomo pade i'a nekanggore ri ngayo komi pura-pura sabana baraka nggari ja'i Yesus Kristus to Nazaret. Komi nombapaku I'a ri kayu parika sampe I'a namate, tapi Alatala nompakatuwu I'a bali. 11 Yesus etumo to nipatuju ri tesa riara Buku Nagasa to nanguli iwe'i: 'Watu to nitajiaka ntopowia sapo, watu etumo to najadi palo mpondasi to neliu nggaroso.' 12 Aga Yesus to namala mompakasalama manusia, sabana ri njumaongu dunia da'a ria samba'a ntanina to nipakatantu Alatala mamala mompakasalama kita, aga Yesus mboto." 13 Tempo topolibu etu nanggita kabia i Petrus bo Yohanes notesa pade nikita ira romba'a suro etu aga tau-tau to naede katuwuna da'a nosikola nalanga, nogumaamo ira pura-pura. Pade nanotomo ka ira romba'a suro etu topomparasaya i Pue Yesus. 14 Topolibu etu madota mombasapuaka kabaraka to nikawia Petrus bo Yohanes, tapi da'a namala sabana topunggu to nipakabelo etu naria nekanggore ri ngayo ira nosanggani-nggani ante Petrus bo Yohanes. 15 Jadi ira nompakau romba'a suro etu rakeni mpesuwu mpaka ri sawalikuna sampalai, pade ira nosimpekutana samba'a bo samba'a, 16 "Nuapa rapowiata ka tau romba'a e'i? Nanotomo ka pura-pura tau to neto'o ri ngata Yerusalem e'i sangele kabaraka to nabetena nipowia ira romba'a. Da'a mamala rasaputa kajadia etu. 17 Tapi ala kareba e'i ne'e matolele sampe makawao ri ja'i ntau pura-pura, kamai kita momparangga ira romba'a ala ne'e mana ira motesa ka tau-tau ante sanga Yesus etu." 18 Naopu etu ira nompokio bali suro romba'a pangane pade niuli ira, "Ne'e mana ntoto komi motesa atau mompatuduki tau ante sanga Yesus!" 19 Tapi nesonomo i Petrus bo Yohanes, "Pakatantu komi mbotomo nuapa to nakonona riara mpanggita Alatala, mantuki parenta komi atau mantuki parenta Alatala. 20 Kami e'i da'a namala menonto motesa ewa nuapa to nikita pade niepe kami mboto." 21 Naopu etu topolibu etu nomparangga wo'umo romba'a suro etu, tapi kaopuna nikabasaka iramo. Da'a ntoto nirata ira jala mombasuku i Petrus bo Yohanes, sabana pura-pura tau nantoiya-toiya Alatala nggari kabaraka to nikawia ira etu. 22 Nogumaa mpu'u ira pura-pura sabana tau topunggu to nipakabelo etu, nelabi patampulu mpaemo i'a napunggu. 23 Naopu i Petrus bo Yohanes nikabasaka, nanjilimo ira ri ja'i roa-roa ira. Naratapa ri setu nitesa ira ka roa-roa iramo, tewai-tewai nu balengga-balengga topanggeni agama bo totu'a-totu'a nto Yahudi ri ja'i ira romba'a. 24 Sangga niepe roa-roa ira tesa etu, nekakaimo ira pura-pura ka Pue Alatala ante nosaongu rara. Niuli ira, "Pue, Komimo to nompajadi langi bo dunia, bo tasi pade pura-pura isina. 25 Ante kuasa nggari ja'i Nosamu batuamu i Daud, totu'a kami nggaolu nombaboto iwe'i: 'Tau-tau da'a to Yahudi narau. Pade tau-tau to Yahudi nowia nia anu da'a ria gunana. 26 Magau-magau ri dunia nasiromu pade pura-pura topanggeniaka ngata nosaongu rara mangewa i Pue bo Magau to Mompakasalama to nipelisina.' 27 O Pue, tesa nggari ja'i Daud e'i mpu'u-mpu'u nipakadupamo, sabana da'apa nasae ri ngata e'i Magau Herodes pade i Pontius Pilatus nasiromu ante tau-tau da'a to Yahudi pade tau-tau to Yahudi. Patuju ira mangewa i Pue Yesus, Batuamu to Nagasana to nipelisimu majadi Magau to Mompakasalama. 28 Ira nosintuwu mompatesi i Pue Yesus. Tapi kakonona to nikawia ira nompakadupa nuapa to nipakatantumu nggari pamulana. Etu pura-pura najadi nantuki kuasa bo dotamu mboto. 29 Jadi niperapi kami, Pue, kitamo powia ira nomparangga kami. Rawai ka kami kuasa ala kami mamala motesa ante mabia mompatolele tesamu. 30 Popokita kuasamu, Pue, ala kami mamala mompakabelo tau-tau naju'a pade mowia kabaraka bo tandai to nipogumaa ante kuasa i Pue Yesus, Batuamu to nagasana etu." 31 Naopu ira nosambaya ka i Pue iwetu, sapo nikasiromu ira etu nogoya, pade ira pura-pura naponu ante Nosa Nagasa nu Alatala. Naopu etu nalaumo ira nompatolele Tesa nu Alatala ante kabia rara. 32 Pura-pura topomparasaya i Pue Yesus etu natuwu nosaongu rara pade nosaongu pekiri. Da'a ria samba'a ri tatongo ira etu nanguli mbara-mbarana anuna mboto. Tapi nuapa pura to naria ante ira, etu nipake ira mpasanggani-nggani. 33 Ante kuasa nabete suro-suro i Pue Yesus etu nompatolele kareba to nanguli Yesus natuwu bali. Pade Alatala nombawai ka ira pura-pura rasi nadea. 34 Da'a ria samba'a nggari tatongo ira etu nakura nuapa-nuapa, sabana ira to naria tanana to naria sapona, nipobalu ira etu pade oli nu tana bara sapo etu 35 nikeni ira ri ja'i nu suro-suro. Doi etu nibagi-bagi suro-suro ka isema-sema to naria paraluuna. 36 Iwetu wo'u to nikawia Yusuf samba'a to Lewi nggari Lewuto Siprus. I'a nidae nu suro-suro i Barnabas to naria batuana "to nompakawoe rara ntau." 37 Yusuf etu nompobalu tanana pade doi etu nikeni niwaina ka suro-suro i Pue Yesus.
1 Tapi naria wo'u samba'a langgai ntanina nosanga ka Ananias, rongona nosanga ka i Safira. Ira njamboko wo'u nompobalu salimpu tana ira. 2 Pade doi oli ntana nipobalu ira etu, saga'a niboli ka ira mboto, pade saga'a nikeni Ananias ri ja'i suro-suro. Pade nangulimo Ananias, "E'i puramo doi oli ntana nipobalu kami." Powiana etu pura-pura ninjani rongona. 3 Tapi nangulimo i Petrus ka i'a, "Ananias, nokuya iko nompalamba Magau nu Seta nakuasa riara nta'imu sampe iko nodawa ka Nosa Nagasa nu Alatala? Ante nggalino-lino iko nanta'amaka saga'a doimu etu ka iko mboto! 4 Tana etu da'apa nipobalumu iko puena. Pade naopu tana etu nipobalumu, doi oli tana etu iko wo'u puena. Nokuya sampe naria patuju riara nta'imu mompowia to naja'ana etu? Iko da'a aga nodawa ka manusia, tapi iko nodawa ka Alatala!" 5 - 6 Iwetu Ananias nangepe tesa-tesa i Petrus etu, nadunggamo i'a pade namate. Naopu etu naratamo bara sakuya mba'a kabilasa nombasompu watabaku Ananias, pade nikeni ira mpaka ri sawalikuna ala ratana ri dayo. Pura-pura tau naeka mpu'u nangepe nuapa to najadina etu. 7 Kira-kira tolu jaa kaliuna Ananias nitana, nesua wo'umo i Safira, rongona besi. Da'apa ninjanina nuapa to lako-lako najadi. 8 Nangulimo i Petrus ka i'a, "Pembai uli ka aku, tana nipobalu komi njamboko etu, aga e'i puramo doi olina?" Nesonomo i Safira, "Nakono. Etu puramo doi olina." 9 Pade nangulimo i Petrus ka i'a, "Nokuya iko pade rongomu Ananias nosaongu rara nompembai nombabagiu Nosa Nagasa i Pue? Epemo! Tau-tau to nombatana rongomu lako nanjili nggari dayo. Ira kana manggeni iko wo'u mpaka ri sawalikuna mombatana iko!" 10 Nangepe tesa etu nadunggamo Safira etu pade kaliu-liu namate ri ngayo i Petrus. Pade tempo kabilasa-kabilasa etu nesua nikita ira i Safira wo'umo namate. Pade nikeni iramo watabakuna mpaka ri sawalikuna pade nitana ira ri sinjori dayo rongona Ananias. 11 Nggari kajadia etu naeka mpu'umo pura-pura topomparasaya bo tau-tau ntanina to nangepe nuapa to najadina etu. 12 Nadea mpu'u kabaraka bo tandai to nipogumaa nikawia suro-suro ri tatongo ntau dea. Pade ante nosaongu rara pura-pura topomparasaya nasiromu ri Sapo Mpepue ri peto'o to niuli Tambale Salomo. 13 Tau ntanina da'a nabia narata nasiromu ante ira sabana naeka ira. Aga tau-tau to nomparasaya etu mpu'u-mpu'u nibila ntodea. 14 Pade nantambai kasaena nantambai kadea ntau to nomparasaya i Pue Yesus, nabeloka langgai nabeloka besi. 15 Nanggita kabaraka-kabaraka to nikawia suro-suro sampe pura-pura tau naju'a nikeni ri jala pade nitu'u ri bunggu paturu bo ompa ala ane Petrus moliu nau aga sakedi wayona mawela bara sakuya mba'a nggari ira, ala ira rapakabelo. 16 Nadea wo'u tau narata nggari ngata-ngata to nantatiku ngata Yerusalem. Ira nanggeni tau-tau naju'a pade tau to nipesua nosa seta to naja'ana. Pade pura-pura tau etu nipakabelomo. 17 Kaopuna nasiriatimo rara Balengga Topanggeni Agama Yahudi bo pura-pura roana, etumo tau-tau to Saduki, sabana nadea tau nomparasaya i Pue Yesus. Jadi ira nosintuwu. 18 Suro-suro i Pue Yesus nisoko ira pade nisuaraka riara tarunggu ngata. 19 Tapi nggawengina etu samba'a malaeka i Pue nombabea pewobo-pewobo tarunggu pade nanggeni suro-suro etu mpaka ri sawalikuna. Naopu etu niulina ka ira, 20 "Kalaumo, pekanggore ri Sapo Mpepue pade patolelemo ka todea ri setu pura-pura tesa ewa katuwu to nabouna nggari ja'i Pue Yesus." 21 Naopu nangepe tesa etu suro-suro etu nantuki nuapa to niuli malaeka etu. Nasadondo mpu'u nalaumo ira ri Sapo Mpepue pade nompamula nompatuduki tau ri setu. Tempo etu Balengga Topanggeni Agama ante roa-roana nompakau totu'a-totu'a bo topanggeniaka nto Yahudi mompasiromu Polibu Bete Agama. Pade ira nompakau tau malau mangala suro-suro etu nggari tarunggu rakeni ratangara ri ngayo ira. 22 Tempo tau-tau nipakau etu narata ri tarunggu, suro-suro etu da'a mana ria nirata ira riara tarunggu etu. Jadi nanjilimo tau-tau nipakau etu nopakilu ka Polibu Bete Agama nuapa to nirata ira riara tarunggu. 23 Niuli ira, "Tempo kami narata ri tarunggu nikita kami pewobo tarunggu etu natepiku mpakabelo-belo pade topanggatono-topanggatono naria nanggatono pewobo etu. Tapi tempo kami nombabea pewobo etu, da'a mana ria samba'a nirata kami riarana." 24 Tempo balengga topojaga Sapo Mpepue pade balengga-balengga topanggeni agama nangepe pakilu etu, naingu mpu'u rara ira nompekiri nuapa najadi ante suro-suro etu bo nuapa ngena majadi. 25 Da'a nasaeka naratamo samba'a tau nanguli ka ira, "Kita we'i! Tau-tau to nisuaraka komi riara tarunggu, we'i-we'i ira naria riara Sapo Mpepue nompatuduki todea!" 26 Nangepe tesa etu nalaumo balengga topojaga Sapo Mpepue ante roana mangala suro-suro etu. Tapi da'a mana nipandasa ira, apa naeka ira ka tau dea. Nipekiri ira ane ira mompandasa suro-suro etu tau dea kana mombarempe ira ante watu. 27 Suro-suro etu nikeni ira nesua nantingayo Polibu Bete Agama etu. Pade nompamulamo Balengga Topanggeni Agama nomparesa ira. 28 I'a nanguli, "Kami mpu'u-mpu'u nombatagi komi bopia, ne'e mana mompatuduki tau ante sanga Yesus etu. Tapi kita we'i! Komi kana nompatolele pepatuduki etu ri njumaongu ngata Yerusalem, pade niuli komi wo'u, Yesus etu namate nipatesi kami!" 29 Nesonomo i Petrus bo suro-suro ntanina, "Kami kana matundu ri ja'i Alatala, da'a ri ja'i manusia. 30 Komi nompatesi Yesus ante nombapaku I'a ri kayu parika. Tapi Alatala to nipesomba totu'ata nggaolu nompakatuwu I'a bali nggari kamatena. 31 I'amo to nipakalanga Alatala ante kuasana to nabete majadi Topanggeniaka bo Magau to Mompakasalama kita nggari silaka, ala kita to Israel rawai loga majea nggari silaka-silakata pade raampungi. 32 Kami e'imo najadi sabi nggari pura-pura etu nosanggani-nggani ante Nosa Nagasa nu Alatala to niwaina ka tau to nantuki parentana." 33 Sangga nangepe nuapa to nitesa suro-suro etu, naju'a mpu'umo rara Topolibu Bete Agama, sampe ira nasintuwu madota mompatesi suro-suro etu. 34 Tapi riara Polibu Bete Agama etu naria samba'a tau to Parisi to nosanga ka i Gamaliel. I'a samba'a guru agama to nibila pura-pura tau dea. I'a nekanggore pade nompakau tau manggeni suro-suro mesuwu ri sawalikuna sampalai. 35 Naopu etu niulina ka Topolibu Bete etu, "Umba komi, sampesuwu-sampesuwuku to Israel. Kita kana mompekiri mpakabelo-belo nuapa to rapowiata ka tau-tau e'i. 36 Sabana bara sakuya mpae naliu wo'u naria neumba samba'a tau nosanga ka i Teudas. I'a nompangaku korona tau nabete pade tau nabaraka mpu'u, sampe naria tau nantuki i'a patatu mba'a kadeana. Tapi i'a nipatesi pade pura-pura topantuki i'a nagaro nosimpotatare. 37 Naopu etu tempo popabila manusia, neumba wo'umo Yudas, tau nggari Bagia Galilea. I'a wo'u nompadidi tau dea nombatuki i'a. Tapi i'a wo'u nipatesi pade pura-pura topantuki i'a wo'u nagaro nosimpotatare. 38 Sabana etu kuuli ka komi, ne'e komi mompowia nuapa-nuapa ka topantuki Yesus e'i. Palambamo ira, sabana ane pepatuduki pade panggawia ira e'i aga nopu'u nggari ja'i manusia, etu kana malipo. 39 Tapi ane etu nopu'u nggari ja'i Alatala, komi da'a mamala mombadagi ira. Pade da'a aga iwetu! Ne'e sampe komi mangewa Alatala!" Sangga nangepe tesa i Gamaliel, nitarima Topolibu Betemo tesana etu. 40 Naopu etu suro-suro nipokio ira mesua bali. Narata ri sa'a, ira niporo pade nitagi iwe'i: "Ne'e mana komi mompatuduki tau ante manguli sanga Yesus!" Naopu etu suro-suro etu nikabasakamo. 41 Jadi nalaumo suro-suro etu nompalasi Polibu Bete Agama etu ante nadamba mpu'u rara sabana ira nireke Alatala masipato rapandasa apa ira topomparasaya i Pue Yesus. 42 Pade eo-eo ira ri Sapo Mpepue pade ri sapo-sapo ntau. Da'a nenonto ira nompatuduki pade nompatolele Kareba Belo to nanguli Yesus Magau to Mompakasalama to nijanji Alatala.
1 Nantambai kasaena nantambai kadea ntopomparasaya i Pue Yesus. Tempo etu topomparasaya i Pue Yesus to Yahudi to nompake Basa Yunani nongua ka topomparasaya i Pue Yesus to nobasa Yahudi. Nangulimo ira to nobasa Yunani, "Besi-besi kami to nabaluna da'a nombarata petulungi balanja eo-eo ewa to nipalele ka besi-besi tobalu to nobasa Yahudi." 2 Nangepe etu suro-suro sampulu romba'a etu nompokio pura-pura topomparasaya i Pue Yesus mompasiromu. Pade nangulimo suro-suro ka ira, "Da'a nabelo ane kami menonto mompatolele Tesa nu Alatala ala mompakasiayu panggoni. Agina bago etu rawai ka tau ntanina. 3 Jadi sampesuwu-sampesuwu, aginapa komi mompelisi nggari tatongo komi pitumba'a tau to naria sangana nabelo, to naponu ante Nosa Nagasa nu Alatala pade nata'u. Pura-pura bago e'i kana rawai kami ka ira. 4 Tapi bago kami e'i batena mosambaya pade mompatolele Tesa nu Alatala." 5 Naopu nangepe tesa suro-suro etu, nasituju puramo topomparasaya i Pue Yesus ante tesa etu. Jadi nipelisi iramo i Stefanus, samba'a tau to naroso pomparasayana pade to naponu ante Nosa Nagasa nu Alatala. Pade nipelisi ira wo'u i Filipus, pade i Prokhorus, i Nikanor, i Timon, i Parmenas, pade i Nikolaus samba'a tau nggari ngata Antiokhia. I'a da'a tau to Yahudi, aga i'a nesuamo agama to Yahudi. 6 Pitumba'a tau etu nikeni ka suro-suro. Naopu etu suro-suro nosambaya pade nombadika pale ri balengga ira ala mangonggotaka ira majadi topantulungi suro-suro. 7 Ante jala iwetu Tesa nu Alatala natolele pade topomparasaya i Pue Yesus ri ngata Yerusalem tunggai nantambai kadeana. Pade nadea wo'u balengga topanggeni agama Yahudi nantuki pade nomparasaya i Pue Yesus. 8 Stefanus mpu'u-mpu'u niwai Alatala ka towe belo. Pade naria kuasa Alatala ri ja'ina sampe i'a namala nanggawia nadea kabaraka bo tandai to nipogumaa ri tatongo ntau dea. 9 Tapi naria wo'u tau-tau nangewa i'a. Ira etu to Yahudi to nodade ri sapo mpodade to niuli Sapo Mpodade Batua to Nikabasaka. Ira tau to Yahudi nggari ngata Kirene pade nggari ngata Aleksandria, pade nggari Propinsi Kilikia pade nggari Propinsi Asia. Ira nosibali ante i Stefanus. 10 Tapi ira da'a namala nombabali nuapa to nitesa i Stefanus, sabana Nosa Nagasa nu Alatala nombawai ka i'a kapande notesa. 11 Jadi ira nombasogo bara sakuya mba'a tau ala ira motesa, "Kami nangepe tau etu nompakakedi i Musa ante Alatala." 12 Iwetumo ira nompakapane rara ntau dea ante totu'a-totu'a nto Yahudi bo guru-guru agama. Naopu etu nalaumo ira nombasoko i Stefanus, pade i'a nikeni ira ratangara ri ngayo Polibu Bete Agama Yahudi. 13 Nikeni ira wo'u sabi-sabi ri ngayo Polibu Bete etu nombatesa jarita to da'a nakonona ewa i Stefanus. Sabi-sabi etu nanguli, "Tau e'i bate-batena nanguli sinja'i Sapo Mpepue to Nagasana bo Atura-atura agama to nipapola i Musa ka kita. 14 Kami nangepe i'a notesa Yesus tau nggari ngata Nazaret etu kana mombagero Sapo Mpepue e'i pade mombabali pura-pura ada to nipasumuli i Musa ka kita." 15 Pura-pura tau to naria riara Polibu Bete Agama etu nompenoto Stefanus. Pade tempo etu ira nanggita lenje Stefanus nasimbayu ewa lenje samba'a malaeka.
1 Pade nekutanamo Balengga Topanggeni Agama ka i Stefanus, "Iwenu? Nakono pura to niuli ntau etu?" 2 Nesonomo i Stefanus, "Uma-uma bo sampesuwu-sampesuwu pura-pura, epe ntani ruru tesaku e'i. Da'apa Abraham totu'ata nggaolu nolinja mpaka ri ngata Haran, tempo i'a daneto'o ri tana Mesopotamia, naratamo Alatala to Neliu Nggakuasa ri ja'ina nompopokita korona ka i'a. 3 Pade nangulimo Alatala ka i'a, 'Palasimo ngatamu e'i pade pura-pura sampesuwumu. Kalaumo iko mpaka ri tana to kupopokita ka iko.' 4 Nangepe etu nalaimo Abraham nompalasi tana to Kasdim etu, pade nolinjamo i'a mpaka ri ngata Haran. Pade naopu kamate umana i'a nipakau Alatala molinja nggari setu mpaka ri tana Israel, tana to nipeto'ota we'i-we'i. 5 Tempo etu da'a ria tana niwai Alatala ka Abraham majadi bagiana mpeliu-liu, nau aga sandanga da'a ntoto niwaina ka i'a. Tapi Alatala nojanji ka Abraham, tana e'i kana rawai ka Abraham mpeliu-liu sampe ri muli-mulina. Tempo Alatala nojanji etu, Abraham da'apa noana. 6 Tapi iwe'imo tesa to niuli Alatala ka Abraham, 'Mulimu kana meto'o mombasowo tau ri tana tau ntanina. Pue ngata etu kana mompobatua ira, pade mompandasa ira patatu mpae kasaena. 7 Tapi naopu etu tau to nompobatua ira kana kusuku. Pade mulimu kana mesuwu nggari tana etu, pade ira kana momai marata mepue ka Aku ri peto'o e'i.' 8 Naopu notesa iwetu, Alatala nompakaasa pojanjina ante Abraham ante nompowia ada mposuna. Jadi tempo Ishak ana Abraham nipoanaka, i'a nisuna Abraham tempo umuruna dawalumbengi. Wa'a wo'u Ishak nombasuna anana Yakub, pade Yakub wo'u nombasuna anana sampulu romba'a to najadi totu'a-totu'ata to Yahudi. 9 Totu'a-totu'ata nasiriati rara ka Yusuf, tua'i ira etu, sampe i'a nipobalu ira ka tau to Masir. I'a nipajadi batua tapi Alatala nomporoa i'a, 10 pade nanggabasaka i'a nggari pura-pura kasusana. Alatala nombawai ka i'a kapande to nompakadamba rara Firaun, Magau to Masir, sampe i'a nionggotaka Magau Masir majadi Gubernur nombaparenta tana Masir. Pade i'a wo'u niwai ka kuasa nombaurusi pura-pura anu Firaun etu. 11 Naliu etu narata oromate ri tana Masir bo tana Kanaan, sampe pura-pura manusia ri setu nasusa mpu'u. Wa'a wo'u totu'a-totu'ata, da'a mana naria panggoni ira. 12 Tapi sangga Yakub nangepe naria panggoni ri tana Masir, nipakauna anana, totu'a-totu'ata etu, nalau mpaka ri tana Masir mangoli panggoni. Etumo tempo pamulana ira nalau ri tana Masir. 13 Tempo ira nalau karongganina, Yusuf nompopanjani ka sampesuwu-sampesuwuna etu, i'a etumo Yusuf. Lako etu pade ninjani Magau Masir ewa sampesuwu-sampesuwu Yusuf. 14 - 15 Naopu etu Yusuf nompakatu kareba ka umana Yakub nerapi ala umana ante pura-pura ira santina molinja meto'o ri tana Masir. Jadi nolinjamo Yakub ante ira pura-pura mpaka ri tana Masir. Kadea ira pura-pura to nolinja gusa'a pitumpulu bo limamba'a. Ri setu naliu bara sakuya mpae namatemo Yakub. Wa'a wo'u anana, totu'a-totu'ata pura-pura. 16 Pade watabaku ira nikeni nilinja mpaka ri ngata Sikhem, pade nitana ri dayo to nioli Abraham nokolu ante doi salaka nggari ja'i samba'a tau to Hemor ri Sikhem etu. 17 Tempo namosumo ntoana Alatala mompakadupa pojanjina ka Abraham, nantambaimo kadea ntau to Yahudi ri tana Masir. 18 Naliu etu nompamulamo samba'a magau ntanina noparenta ri tana Masir to da'a mana nangginjani Yusuf. 19 I'a nombabagiu totu'a-totu'ata pade nompandasa ira pura-pura. Niparentana ala ngana-ngana langgai ira to lako nesuwuna kana raboli ri sawaliku ngata ala mamate. 20 Tempo etumo i Musa nesuwu. I'a samba'a ngana nggedi to mpu'u-mpu'u nagaya lenjena. Tolumbula kasaena i'a nikeniaka indo umana. 21 Pade tempo i'a mana namala ratabuniaka totu'ana i'a nikeni niboli ri sawaliku ngata. Naria samba'a besi ana Magau Firaun nanggita i'a pade nangala i'a pade nikeniakana ewa anana mboto. 22 Pura-pura pangginjani pade ada-ada to Masir nipatuduki ka i'a sampe nakuasa mpu'u i'a, nabeloka ri potesana nabeloka ri powiana. 23 Tempo i Musa noumuru patampulu mpae nariamo dota rarana malau manggita sampesuwu-sampesuwuna to Israel. 24 Tempo i'a narata ri setu nikitana samba'a tau to Yahudi nipandasa ntau to Masir. Pade nalaumo i'a nantulungi nanjaliku tau to nipandasa etu ante nompatesi tau to Masir etu. 25 Nipekiri i Musa sampesuwu-sampesuwuna to Yahudi etu kana mangginjani i'a etu to rapake Alatala mombakabasaka ira nggari pobatua to Masir. Tapi da'apa ninjani ira. 26 Tonailena nalau wo'umo i'a pade nikitana romba'a tau to Yahudi nosibaga. I'a nompasimbuku nompoposinggabelo ira romba'a etu. Niulina ka ira, 'Umba komi! Nokuya komi mosibaga? Komi e'i nosampesuwu!' 27 Tapi tau to nombaboba roana etu nombajuanaka i Musa, pade niulina, 'Iko da'a topanggeniaka bo topotangara kami! 28 Natantu iko etu madota mompatesi aku ewa iko nompatesi to Masir yowi!' 29 Sangga nangepe tesa ntau etu nalaimo i Musa nggari tana Masir nalau neto'o ri tana to Midian. Pade ri setu i'a norongo pade noana romba'a ngana langgai. 30 Patampulu mpae kaliuna naratamo samba'a malaeka ri ja'i Musa ri karawa baina namosu ri Bulu Sinai. Malaeka etu narata riara apu ri santungu gumbu najela. 31 Natekaja rara i Musa nanggita etu sampe i'a nalau nompakamosu apu etu ala mangginjani nuapa etu. Pade niepena suara i Pue nanguli, 32 'Aku e'imo Alatala to nipesomba totu'amu nggaolu, Alatala Abraham, Ishak bo Yakub.' Nangepe etu naekamo rara i Musa sampe nokalalete. Da'a mana i'a nabia manggita gumbu najela etu. 33 Pade nanguli wo'umo Alatala ka i'a, 'Wonjumo sapatumu, sabana tana to nipekanggoremu, tana nagasa nggari karataku e'i. 34 Nikitaku kasusa bo kapari to nirasai todeaku ri tana Masir. Niepekumo pantete ira pade nana'umo Aku mombakabasaka ira. We'i-we'i maimo. Aku mompakau iko manjili mpaka ri tana Masir!' " 35 Nitesa Stefanus wo'umo ka Topolibu etu, "E'imo i Musa to nipoara ira to Yahudi ante tesa e'i: 'Iko da'a topanggeniaka bo topotangara kami!' Tapi kakonona i'amo to nipakau Alatala majadi topanggeniaka bo topombasoreaka ira nggari pobatua to Masir. Etu nikawiana ante petulungi malaeka to narata ri ja'ina ri gumbu to najela etu. 36 Musa etumo to nanggeni to Yahudi nesuwu nggari tana Masir, pade to nompowia kabaraka-kabaraka ante tandai-tandai to nipogumaa ri tana Masir, ri Tasi Nalei pade ri karawa-karawa baina patampulu mpae kasaena. 37 Musa wo'u to nanguli ka to Israel iwe'i: 'Alatala kana mangonggotaka ka komi samba'a nabi nggari tatongo sampesuwu komi mboto nasimbayu ante aku e'i.' 38 Pade tempo totu'a-totu'ata to Yahudi etu naria ri karawa baina, i Musamo to najadi topotariolo ira ante malaeka to notesa ka ira ri Bulu Sinai. Pade i Musa to nantarima tesa nggari ja'i Alatala rapapola ka kita ala isema-sema mantuki tesa etu kana matuwu mabelo sampe ri kasae-saena. 39 Naupa iwetu totu'a-totu'ata da'a ntoto natundu ri ja'i Musa. Ira nombasapuaka i'a pade ira madota manjili mpaka ri tana Masir. 40 Niuli ira ka i Harun, tuaka i Musa, 'Powia ka kami sanu nolenje mpowiata ala wiata etu malau mokolu ka kami. Apa da'a mana ninjani kami bara nuapamo to najadi ka i Musa etu to nanggeni kami nesuwu nggari tana Masir!' 41 Tempo etu nipowia iramo saongu parantau nolenje mpoana japi. Naopu etu nikeni ira pesomba nipesomba ira ka parantau etu. Pade nipowia ira posusa nombatoiya nuapa to nipowia pale ira mboto etu. 42 Tapi Alatala nompalasi ira pade nompalamba ira nombasomba betu'e-betu'e ri langi. Etu nasimbayu ewa tesa to nitulisi riara buku-buku nu nabi-nabi iwe'i: 'Umba komi, to Israel! Da'a Aku to nipesomba komi ante nanjambale binata ri karawa baina patampulu mpae kasaena. Nadea wiata ntanina to nipesomba komi. 43 Da'a aga etu, tapi tenda mpepue ka wiata Molokh wo'u to nikeni-keni komi nosanggani-nggani ante parantau nolenje mpobetu'e Refan! Parantau-parantau etumo to nipowia komi ala mamala rapesomba komi. Etumo sabana komi kana kutajiaka makawao mpaka ri ja'i balimu ri tana Babel!' 44 Sampesuwu-sampesuwu, tempo totu'a-totu'ata naria ri karawa baina etu ira naria tenda mpepue to nikawia nggari kae to najadi tandai Alatala nosanggani ante ira. Tenda etu nipowia ira nantuki to niparenta Alatala ka Musa nantuki jonjo ewa to nipopokita Alatala ka i'a. 45 Tenda etu nikeni ana-ana ntotu'ata tempo ira ante Yosua nalau mangago tana Israel e'i nggari ja'i tau-tau ntanina. Tau-tau etu nipopalai Alatala tempo totu'a-totu'ata nesua ri tana e'i. Pade tenda etu wo'u bate-batena nipake ira mepue ka Alatala sampe ri tempo i Daud najadi Magau to Yahudi. 46 Magau Daud nikonoa rara nu Alatala sampe i'a nerapi ka Alatala ala i'a rapaloga mowia saongu sapo rapeto'o Alatala to nipesomba Yakub, totu'ana nggaolu etu. 47 Tapi damo i Salomo, ana Daud etu to nompowia Sapo Mpepue etu. 48 Tapi naupa iwetu Alatala to neliu kalangana da'a neto'o ri sapo to nikawia mpale manusia. Etu nasimbayu ewa tesa to nitulisi nabi iwe'i: 49 'Langi etu kaderaku pade dunia etumo polampi kadaku. Da'a ria sapo to namala rapowia komi to namala kupeto'o. Da'a wo'u naria sapo to namala kupangosaraka, 50 sabana dunia ante pura-pura isina nikawiaku mboto.' Iwetu panguli i Pue." 51 Pade nanguli Stefanus wo'umo ka ira Topolibu Bete etu, "Sampesuwu-sampesuwu, nako'o mpu'u rara komi! Pade komi mpu'u-mpu'u nabongo! Da'a madota komi mangepe pade mantuki Tesa Alatala! Nasimbayu ewa totu'amu nggaolu komi tunggai nangewa Nosa Nagasa nu Alatala! 52 Pura-pura nabi nipakandasa totu'amu nggaolu. Ira nompatesi pura-pura suro to nipakau Alatala narata nombangareaka karata nu Batua Alatala to Nanoana, etumo Yesus. Pade we'i-we'i I'amo to nipakaja'a pade nipatesi komi! 53 Komimo to nantarima Atura-atura agama to niwai malaeka-malaeka ka totu'a-totu'ata nggaolu, tapi da'a madota komi mantuki Atura-atura etu!" 54 Iwetu Topolibu Bete Agama etu nangepe nuapa pura to niuli Stefanus, naju'a mpu'u rara ira pade nosinggiki baga ira nanggita i'a. 55 Tapi Stefanus to naponu ante Nosa Nagasa nu Alatala nakantingoa mpaka ri langi. Nikitana kareme nu Alatala. Pade nikitana wo'u Yesus nekanggore ri peto'o to nibila ri sabingga nggana nu Alatala. 56 Nangulimo Stefanus, "Kitamo! Aku nanggita langi natebea pade Yesus, Ana nu Manusia nekanggore ri sabingga nggana nu Alatala ri suruga!" 57 Nangepe etu nongare-ngaremo Topolibu Bete ante nombalamu talinga ira ala da'a mana mangepe tesa i Stefanus etu. Pade nangowamo ira pura-pura nantatiku i'a. 58 I'a nitajiaka ira mpaka ri sawaliku ngata. Pade ri setu i'a nirempe ira ante watu. Sabi-sabi to naria ri Polibu Bete pangane nombawonju baju ira niboli ri ja'i samba'a tau nosanga ka i Saulus ala ira mamala mombarempe i Stefanus. 59 Tempo i Stefanus nirempe ira, nekakaimo i'a, "Pue Yesus, tarimamo nosaku!" 60 Naopu etu notimbakotumo i'a pade nongare ante suarana namangga, "Pue, ampungimo silaka ira e'i!" Naopu etu namatemo i'a.
1 - 2 Tempo i Stefanus nipatesi nasituju wo'u i Saulus. Naopu etu tau-tau to naeka ri ja'i Alatala nombatana i Stefanus ri dayo. Ante nasusa mpu'u rara ira nombatangi i'a. Nompamula eo etu wo'u topomparasaya i Pue Yesus ri ngata Yerusalem mpu'u-mpu'u nipandasa to Yahudi sampe ira nagaro nosimpotatare mpaka ri umba-umba ri tana Yudea ante Samaria. Aga suro-suro i Pue Yesus da'a. 3 Tapi i Saulus nompasimbuku mompakaropu topomparasaya i Pue Yesus etu. Butu-butu sapo ira nipesuana pade isema-sema to nomparasaya i Pue Yesus, nabeloka langgai nabeloka besi, niumbunjaina ri sawalikuna pade nisuarakana riara tarunggu. 4 Topomparasaya i Pue Yesus to nagaro nosimpotatare etu nompatolele kareba i Pue Yesus mpaka ri umba-umba. 5 Samba'a nggari ja'i ira nosanga ka i Filipus. I'a nalau ri ngata Samaria pade nipatolelena ka tau-tau ri setu tesa Magau to Mompakasalama to nijanji Alatala. 6 - 7 Nadea tau to nipesua seta nipakabelona. Seta-seta etu nesuwu ante nongare-ngare. Pade nadea tau napunggu pade tau nakejo wo'u nipakabelona. Tempo tau-tau nangepe i Filipus notesa pade ira nanggita kabaraka-kabaraka to nikawiana, ira ante nosaongu rara nompariara nta'i pade nantarima nuapa to nitesa i Filipus. 8 Jadi nadamba mpu'umo rara tau-tau ri ngata Samaria etu. 9 Riara ngata etu naria samba'a sando nosanga ka i Simon. Bara sakuya kasaena i'a nompowia tau-tau ri ngata Samaria natekaja ante panggawiana. Pade i'a nanguli ka tau i'a samba'a tau nabaraka. 10 Pura-pura tau riara ngata etu, nabeloka totu'a-totu'a nabeloka ngana-ngana, nompariara nta'i tesana. Ira nanguli, "Tau e'imo naria kuasa nggari ja'i Alatala to niuli Kuasa Bete!" 11 Ira pura-pura nantuki i'a apa nasaemo i'a nipogumaa ira sabana nggari kasandona etu. 12 Tapi we'i-we'i niparasaya iramo tesa i Filipus to nompatolele ka ira Kareba Belo ewa Poparenta nu Alatala pade wo'u ewa Yesus Kristus, Magau to Mompakasalama to nijanji Alatala. Naopu ira nomparasaya, ira nidiu ewa tandaina ira topomparasaya i Pue Yesus, nabeloka langgai nabeloka besi. 13 Simon mboto wo'u nomparasayamo, pade naopu i'a nidiu nalaumo i'a mpasanggani-nggani ante i Filipus. Nogumaa mpu'u i'a nanggita kabaraka-kabaraka ante tandai-tandai to nipogumaa to nikawia i Filipus. 14 Suro-suro ri ngata Yerusalem nangepe kareba tau-tau ri ngata Samaria nantarima Tesa nu Alatala. Jadi nipakau iramo i Petrus bo Yohanes mpaka gusa'a. 15 Tempo ira romba'a narata ri setu, ira nosambaya ka tau-tau to Samaria etu ala ira rapesua Nosa Nagasa nu Alatala. 16 Nikawia ira iwetu sabana Nosa Nagasa nu Alatala da'apa nana'u nesua ri ja'i to Samaria to nomparasaya. Ira aga nidiu ante nanguli sanga i Pue Yesus. 17 Pade i Petrus bo Yohanes nombadika pale ira ri balengga tau-tau to Samaria etu, pade ira nipesua Nosa Nagasa nu Alatala. 18 Nikita i Simon Nosa Nagasa nu Alatala nesua ri ja'i ntau tempo suro-suro nombadika pale ri balengga ira. Jadi nikenina doi ka i Petrus bo Yohanes madota mangoli baraka etu. 19 Niulina, "Wai ka aku wo'u sanu baraka komi etu ala ane aku wo'u mombadika paleku ri balengga ntau ira wo'u mamala rapesua Nosa Nagasa nu Alatala." 20 Tapi nesonomo i Petrus, "Masurukawu mpu'u iko ante doimu sabana nipekirimu baraka to niwai Alatala mamala raoli ante doi! 21 Iko da'a ntoto masipato metuki riara panggawia kami e'i, sabana raramu da'a nanoa ri ja'i Alatala. 22 - 23 Ninjaniku iko etu naponu ante siriati raramu pade iko nipobatua to naja'ana! Sabana etu kabasakamo patujumu to naja'ana etu, pade perapimo ka i Pue, ala I'a mombaampungi pompekirimu to naja'ana etu." 24 Pade nanguli i Simon, "Ai! Tulungi posambaya komi ka aku, perapi ka i Pue ala ne'e maria sangaya to niuli komi etu madupa ri ja'iku." 25 Sangga naopu Petrus bo Yohanes notesa nompakanoto ka tau isema Yesus pade nompatolele tesa i Pue ka ira, nanjilimo ira mpaka ri ngata Yerusalem. Pade riara mpolumako ira etu nipatolele ira Kareba Belo ka tau-tau ri ngata-ngata Samaria to niliunaka ira. 26 Pade naria samba'a malaeka narata nanguli ka i Filipus, "Kalaumo iko ri sabingga puluna ri poga'a jala motua nggari ngata Yerusalem mpaka ri ngata Gaza." Jala etu nakalinoa. 27 - 28 Jadi nalaumo i Filipus. Tempona etu naria samba'a tau Etiopia nanjili nggari ngata Yerusalem. I'a samba'a pangga bete nipakakuasa nombaurusi mbara-mbara Magau Besi Etiopia. Magau Besi etu nosanga ka i Kandake. Pangga bete etu dariara mpolumakona natingguli nombasomba Alatala nggari ngata Yerusalem. Tempo dokana nolumako i'a nekatoko nombabasa buku nabi Yesaya. 29 Pade Nosa Nagasa nanguli ka i Filipus, "Kau polumako iko mompakamosu doka ntau etu." 30 Jadi nangowamo i Filipus nompakamosu doka ntau etu. Niepena tau etu nombabasa buku nabi Yesaya. Pade nipekutanana i'a, "Tua, ninjani komi batuana nuapa nibasa komi etu?" 31 Nesonomo tau etu, "Iwenu aku mangginjani ane da'a ria tau mompakanoto batuana ka aku? Kamai pesawimo ri doka e'i, pekatokomo ri sinjoriku se'i." 32 Iwe'imo tesa-tesa to nibasa ntau etu, "I'a ewa bimba niumbu rakeni rasambale, ewa saongu ana bimba da'a nombee ane wuluna ragari. Iwetu wo'u I'a da'a ntoto notesa, nau aga sambela. 33 I'a nisalai pade I'a nitangara ante da'a naria kakonona. Da'a ria mulina to mamala ratutura ntau, sabana I'a nipatesi, mana ria ri dunia e'i." 34 Nangulimo pangga bete etu ka i Filipus, "Ane mamala, uli ka aku isema ntoto kakonona to niuli nabi Yesaya e'i tempo i'a notesaka tau niporapaka bimba, korona mboto bara tau ntanina?" 35 Pade i Filipus nombatarangga etu ka i'a. I'a nompamula nggari tesa-tesa to nibasa pangga bete etu pade nipasimbayuna ka i'a Kareba Belo i Pue Yesus. 36 Riara mpolumako etu naratamo ira ri saongu peto'o to naria ue. Nanguli pangga bete etu, "Kitamo! Etu naria ue. Mamala aku radiu komi we'i-we'i?" [ 37 Nesonomo i Filipus, "Ane komi nomparasaya ante rara mpu'u-mpu'u, komi mamala radiu." Nangulimo pangga bete Etiopia etu, "Aku nomparasaya Yesus etu Ana nu Alatala!"] 38 Naopu etu nipakauna nompopeta'a dokana. Pade nana'umo ira romba'a nggari doka pade nalaumo ira riara ue. Pade pangga bete etu nidiu i Filipusmo ewa tandaina i'a topomparasaya i Pue Yesus. 39 Tempo ira nesore nggariara ue, Nosa Nagasa nu Alatala nangala i Filipus nggari setu. I'a da'a mana nikita pangga bete nggari Etiopia etu. Pade ante nadamba mpu'u rarana pangga bete etu nompapola polumakona. 40 Ante da'a ninjani-njani i Filipus, nariamo i'a ri ngata Asdod. Pade napolamo i'a nompatolele Kareba Belo ka tau-tau ri pura-pura ngata sampe i'a narata ri ngata Kaisarea.
1 Ri tempo etu wo'u Saulus bate-batena nadota mompararai pade mompatesi topomparasaya-topomparasaya i Pue Yesus. Nalaumo i'a ri ja'i Balengga Topanggeni Agama Yahudi, 2 pade nerapi sura kuasa rakenina ka topanggeniaka-topanggeniaka sapo-sapo mpodade nto Yahudi ri ngata Damsyik. Patujuna ane raposintomuna ri setu ngina tau-tau to nantuki Pepatuduki Yesus, rasokona tau-tau etu rakenina ira mpaka ri ngata Yerusalem ala ratangara, nabeloka langgai nabeloka besi. 3 Riara mpolumakona mpaka ri ngata Damsyik tempo namosumo i'a ri ngata, sampegoli naria saongu reme newanta nggari langi nantatiku i'a. 4 Nadunggamo i'a pade niepena suara nanguli ka i'a, "Saulus, Saulus! Nuapa sabana iko nompandasa Aku?" 5 Nekutanamo i Saulus, "Isema Komi, Pue?" Nesonomo suara etu, "Akumo Yesus to nipandasamu. 6 We'i-we'i pekanggoremo iko pesuamo riara ngata e'i. Ri setu pade rauli ka iko nuapa masipato mupowia." 7 Tau-tau to nosanggani ante Saulus etu, natekaja mpu'u ira sampe da'a nasowa notesa, sabana ira wo'u nangepe suara etu, tapi da'a nikita ira tau topotesa etu. 8 Naopu etu nekanggoremo i Saulus, niboarakana matana, tapi matana mana nanoto nanggita nuapa-nuapa. Jadi i'a damo ninini roana nesua ri ngata Damsyik. 9 Tolumbengi kasaena i'a da'a namala nekita pade i'a da'a nanggoni bara nanginu nuapa-nuapa. 10 Ri ngata Damsyik naria samba'a topomparasaya i Pue Yesus to nosanga ka Ananias. Riara saongu panggitana Pue notesa ka i'a. Niuli Pue, "Ananias!" Nesono Ananias, "Iyo, e'imo aku, Pue." 11 Notesamo Pue, "Kalaumo we'i-we'i mpaka ri sapo Yudas ri jala to nosanga ka Jala Nanoa. Elomo ri setu samba'a tau nggari ngata Tarsus to nosanga ka i Saulus. We'i-we'i i'a nosambaya 12 pade riara panggitana nikitana iko narata ri ja'ina nombadika palemu ri balenggana ala i'a mamala mekita bali." 13 Nesonomo Ananias, "Pue, nadea tesa niepeku nggari ja'i ntau nantesa Saulus etu. Niuli ira nadea mpu'u topomparasaya i Pue ri ngata Yerusalem nipandasana. 14 Pade we'i-we'i i'a nomai ri se'i ante kuasa nggari ja'i balengga-balengga topanggeni agama Yahudi ala manjoko pura-pura tau nomparasaya Komi, Pue." 15 Tapi nangulimo i Pue, "Iko kana malau! Sabana i'a nipelisiku malau mompatolele sangaku ka tau-tau da'a to Yahudi, ka magau-magau pade ka tau-tau Yahudi wo'u. 16 Damo Aku mboto ngina mompakanoto ka i'a kasusa to raratana sabana i'a mantuki Aku." 17 Jadi nalaumo Ananias mpaka ri sapo i Yudas ri Jala Nanoa etu. Pade nesuamo i'a nombadika palena ri balengga i Saulus, pade niulina, "Sampesuwuku, Saulus. Pue Yesus to nikitamu ri tatongo jala tempo komi mpaka wemai, nompakau aku marata ri se'i ala komi mamala mekita bali pade rapesua Nosa Nagasa nu Alatala." 18 Kaliu-liu ewa ruke nu bau nanawu nggari mata i Saulus sampe namala i'a nekita bali. Naopu etu nembangumo i Saulus pade i'a nidiu ewa tandaina i'a topomparasaya i Pue Yesus. 19 Naopu nidiu nanggonimo i'a pade naroso bali wukuna. Naopu etu Saulus neto'o ante topomparasaya-topomparasaya i Pue Yesus ri ngata Damsyik bara sakuya mbengi kasaena. 20 Tempo etu wo'u, i'a kaliu-liu nalau ri sapo-sapo mpodade ri Damsyik nompatolele kareba ka tau-tau to Yahudi to nanguli, "Yesus, I'amo Ana nu Alatala!" 21 Nogumaa puramo tau nangepe i Saulus. Ira nanguli, "Iwenu sanga tau e'i? I'amo tau to nompatesi tau-tau nomparasaya Yesus ri ngata Yerusalem bopia. Tantu i'a wo'u narata wemai ante patujuna mombasoko ira to nomparasaya Yesus ri se'i pade manggeni ira ratangara ri ja'i balengga-balengga topanggeni agama Yahudi!" 22 Tapi nantambai eona nantambaimo kuasa i Saulus nompatolele kareba i Pue Yesus. I'a mpu'u-mpu'u nompakanoto ka tau-tau to Yahudi ri ngata Damsyik Yesus Magau to Mompakasalama to nijanji Alatala, sampe mana namala ira mombabali tesana. 23 Naliu bara sakuya mbengi nggari setu, nasiromumo tau-tau to Yahudi nosintuwu mompatesi i Saulus. 24 Eo wengi ira nanggatono bobaa tembo ri ngata etu ala ane Saulus mesuwu i'a mamala rapatesi ira. Tapi nia ira etu ninjani i Saulusmo. 25 Jadi naria sambengi topantuki-topantuki i Saulus nombarata akala ala Saulus mamala malai nggari ja'i ntau to madota mompatesi i'a. Saulus niala nidika ira riara karanji lauro, pade niulunjaka ira nggari bunggu nu tembo ngata etu mpaka ri sawalikuna. 26 Nggari setu Saulus nalau mpaka ri ngata Yerusalem. Ri setu i'a nompasimbuku nompasanggani ante topomparasaya-topomparasaya i Pue Yesus. Tapi naeka ira nanggita i Saulus. Da'apa niparasaya ira i'a etu mpu'u-mpu'u topomparasaya i Pue Yesus. 27 Tapi i Barnabas nalau nomporoa i Saulus pade nanggeni i'a ri ja'i suro-suro i Pue Yesus. Nitesana ka ira iwenu i Saulus nanggita i Pue Yesus ri tatongo jala, pade iwenu i Pue Yesus notesa ka i'a. Nitesana wo'u ka ira iwenu i Saulus notesa ante kabiana nompatolele Kareba i Pue Yesus ka tau-tau ri ngata Damsyik. 28 Nangepe tesa etu, suro-suro nantarima i Saulus neto'o mpasanggani-nggani ante ira. Pade nalaumo Saulus ri umba-umba ri Yerusalem nompatolele Kareba i Pue Yesus ante kabiana. 29 I'a wo'u notesa bo nosisono ka tau-tau to Yahudi to nobasa Yunani. Tapi ira etu nompasimbuku mompatesi i'a. 30 Tempo topomparasaya ntanina nangginjani etu ira nanggeni Saulus notua mpaka ri ngata Kaisarea pade i'a nipakau ira nanjili mpaka ri ngata Tarsus, ngatana mboto. 31 Jadi topomparasaya i Pue Yesus ri njumaongu Bagia Yudea, Galilea pade Samaria mana nipandasa. Nantambai eona nantambai kadea ntau to nomparasaya i Pue Yesus, pade nantambai karoso pomparasaya ira. Etu najadi sabana ira nekou ri ja'i Pue pade nggari petulungi Nosa Nagasa ka ira. 32 Tempo etu Petrus nalau ri umba-umba nanggita topomparasaya i Pue Yesus. Naria sanggani i'a nesai ri ngata Lida. 33 Ri setu i'a nosintomu ante samba'a langgai nosanga ka Eneas. Walumpaemo kasaena i'a napunggu, pade mana ntoto namala nembangu nggari paturuna. 34 Nangulimo Petrus ka i'a, "Eneas, Yesus Kristus mompakabelo iko. Pembangumo, pasiayumo ompa paturumu e'i." Kaliu-liu nabelomo Eneas pade nembangumo i'a. 35 Pura-pura tau to neto'o ri ngata Lida bo Bagia Saron nanggita Eneas nabelomo. Pade ira pura-pura nomparasaya i Pue Yesus. 36 Ri ngata Yope naria samba'a besi to nomparasaya i Pue Yesus, sangana i Tabita. Ante Basa Yunani sangana i Dorkas, batuana "rusa." Pokaingguna nabelo pura, pade i'a tunggai nantulungi tau-tau napakasi katuwuna. 37 Tempo etu naju'amo i'a sampe namate. Sangga watabakuna naopu nidiu i'a nikeni niboli riara ntombi kalangana. 38 Ngata Yope da'a nakawaoka nggari ngata Lida. Etu sampe topomparasaya i Pue Yesus ri ngata Yope nangepe i Petrus naria ri ngata Lida. Jadi ira nompakau romba'a tau nalau ri ja'i Petrus ante nitewai iwe'i: "Kamai masalisa mpaka ri ngata Yope." 39 Sangga nangepe tesa ntau romba'a etu, nalaumo i Petrus nantuki ira mpaka ri ngata Yope. Narata ri setu i'a nikeni mpaka ri tombi kalangana etu. Pura-pura tobalu besi notumangi nantaguni i Petrus ante nompopokita ka i'a baju-baju pade pakea to nijau i Tabita ka ira tempo i'a danatuwu. 40 Naopu etu i Petrus nompakau ira pura-pura nesuwu, pade notimbakotumo i'a nosambaya. Naopu etu i'a nantingayo watabaku i Tabita pade niulina, "Tabita, pembangumo!" Tabita nombaboaraka matana pade tempo i'a nanggita i Petrus nembangumo i'a pade nekatoko. 41 Pade i Petrus nanjoko palena nantulungi i'a nekanggore. Naopu etu nipokio i Petrus topomparasaya ri setu nosanggani-nggani ante tobalu-tobalu besi pane'a, pade nipopokitana ka ira i Tabita natuwu bali. 42 Kareba ewa kajadia etu natolele ri njumaongu ngata Yope, sampe nadea mpu'u tau nomparasaya i Pue Yesus. 43 Petrus neto'o ri ngata Yope etu bara sakuya mbengipa ri sapo samba'a tau topokarajaa kulimba to nosanga ka i Simon.
1 Ri ngata Kaisarea naria samba'a langgai nosanga ka i Kornelius. I'a samba'a balengga tantara Roma, panggana kapitee to nanjoko satu mba'a tantara ri Pasukan Italia. 2 I'a samba'a tau naeka ri ja'i Alatala, pade ira pura-pura saongu njapo nepue ka Alatala, naupa ira da'a to Yahudi. Nadea ngganimo i'a nantulungi tau-tau to Yahudi to napakasi, pade i'a naoso nosambaya ka Alatala. 3 Naria saeo kira-kira tinti toluongu kaede eo, i'a nanggita saongu panggita. riara panggitana etu nikitana ante nanoto samba'a malaeka Alatala narata nanguli ka i'a, "Kornelius!" 4 Naeka mpu'u Kornelius nanggita malaeka etu. Pade niulina, "Nuapa, Pue?" Nesonomo malaeka, "Posambayamu pade petulungimu ri ja'i ntau napakasi nikonoa rara nu Alatala sampe I'a nantora iko. 5 We'i-we'i pakaumo tau mpaka ri ngata Yope mompokio samba'a tau to nosanga ka i Simon Petrus. 6 I'a neto'o ri sapo samba'a topokarajaa kulimba nosanga ka i Simon to neto'o ri wiwi ntalinti." 7 Sangga nalaimo malaeka to notesa ka i Kornelius etu, Kornelius nompokio romba'a batua nggariara njapona pade samba'a tantarana to niparasayana to nepue ri ja'i Alatala. 8 Pade nitesana ka ira tolumba'a nuapa lako najadi riara mpanggitana etu. Naopu etu nipakauna ira malau mpaka ri ngata Yope mompokio Simon Petrus. 9 Naile ntongo eo kira-kira tinti sampulu rongu tempo ira tolumba'a dariara mpolumako namosumo marata ri ngata Yope, i Petrus nepone mosambaya ri bunggu ata nu sapo to nadelena. 10 Tempo i'a ri setu naoro mpu'umo ta'ina, madota manggoni. Tempo panggoni danipakasadia, i'a nanggita saongu panggita. 11 Nikitana langi natibea pade sangaya ewa sabala kae tarapaal nabini natiloe ri siduna patanjidu nateulunjaka nggari langi sampe ri tana. 12 riara nu kae tarapaal etu naria nompengele binata: naria to nokada patanggada, naria to nenjoyo, pade naria wo'u tonji-tonji to nailana. 13 Pade niepe i Petrus suara nanguli ka i'a, "Petrus, pekanggoremo! Sambalemo binata-binata e'i pade konimo etu!" 14 Tapi nesonomo i Petrus, "O, da'a, Pue. Da'apa ria sanggani aku nanggoni anu nipopali pade natantoru etu nantuki atura agama kami!" 15 Tapi nanguli wo'umo suara etu ka i'a karongganina, "Nuapa to niuli Alatala nabelo rakoni ne'e muuli nakapali!" 16 Panggitana etu nisili sampe nagana tolunggani. Naopu etu kae tarapaal ante binata etu nateoremo mpaka ri langi. 17 Naingu mpu'u rara i Petrus nompekiri batuana nggari panggitana to lako nikitana etu. Tempo i'a danompekiri etu, naratamo tau tolumba'a to nipakau i Kornelius etu ri ngata Yope. Ira nompekutana pue ngata, "Ri umba sapo i Simon?" Sapo etu nitujuraka ka ira pade nalaumo ira mpaka ri ngayo pewobo sapo etu, 18 pade nekutana, "Naria tau nosanga ka i Simon Petrus neto'o ante komi ri se'i?" 19 Tempo i Petrus danompekiri batuana panggitana pane'a etu, Nosa Nagasa nu Alatala notesa ka i'a, "Petrus, naria tau tolumba'a narata nompaelo iko. 20 Anumo, masalisa mana'u mpaka ri tambena pade ne'e iko makini-kini mantuki ira, sabana Aku mboto nompakau ira marata mompokio iko." 21 Nangepe etu nana'umo i Petrus mpaka ri tambena pade notesamo i'a ka tau tolumba'a etu, "Aku e'imo to nielo komi. Nuapa patuju komi marata ri se'i?" 22 Nesonomo ira, "Kami e'i nipakau Kapitee Kornelius mpaka wemai. I'a samba'a tau nabelo rarana to naeka ri ja'i Alatala, pade i'a nibila pura-pura tau to Yahudi. Samba'a malaeka nu Alatala nompakau i'a mompokio komi malau ri sapona ala mangepe nuapa rauli komi ka i'a." 23 Naopu etu i Petrus nanta'amaka ira maturu ri sapo setu sambengi. Naeompadondo nalaumo i Petrus mpasanggani-nggani ante ira, pade bara sakuya mba'a topomparasaya nggari ngata Yope wo'u nantuki ira. 24 Ira naturu sambengi ri jala, pade nailena naratamo ira ri ngata Kaisarea. Ri setu ira nipopea-pea i Kornelius saongu njapo. Naria wo'u sampesuwu-sampesuwuna ante wega-wega rapana to nipokiona nasiromu ri sapona. 25 Sangga naratapa i Petrus, nalaumo i Kornelius nantomunaka i'a, pade notimbakotumo i'a ri ngayo i Petrus mombasomba i'a. 26 Tapi i Petrus nanjoko palena nompopenggore i'a ante nanguli, "Pekanggoremo, Uma. Aku e'i aga manusia biasa wo'u nasimbayu ante komi." 27 Tempona notesa ante i Kornelius Petrus nesua riara njapo. Ri setu nikitana nadeamo tau nasiromu. 28 Pade notesamo i'a ka ira, "Sampesuwu-sampesuwu, ninjani komi mboto nantuki Atura agama Yahudi, kami to Yahudi da'a mamala mompasanggani ante tau-tau da'a to Yahudi, kami nitagi mesua ri sapo-sapo ira. Tapi Alatala naopu nompakanoto ka aku riara panggitaku da'a mamala aku manguli manusia natantoru sampe da'a mamala aku mosigalo ante ira. Nantuki Alatala aku mamala mosigalo ante pura-pura manusia. 29 Etumo sabana da'a ria katomo nu raraku marata wemai tempo aku nipokio komi. Jadi we'i-we'i kuperapi, uli ka aku nuapa ntoto patuju komi nompokio aku e'i marata ri se'i?" 30 Nesonomo i Kornelius, "Tolumbengi naliu, kira-kira ewa tempo we'i, tinti toluongu kaede eo wo'u, aku nosambaya ri sapoku e'i. Sampegoli naria samba'a malaeka nikitaku nekanggore ri ngayoku. Pakeana nenggila-nggila. 31 Nangulimo i'a ka aku, 'Kornelius! Posambayamu nitarima nu Alatalamo, pade nitorana kajoi nu raramu nantulungi tau napakasi. 32 Jadi pakaumo tau mpaka ri ngata Yope mompokio wemai tau to nosanga ka i Simon Petrus. I'a neto'o ri sapo samba'a tau topokarajaa kulimba nosanga ka i Simon, sapona ri wiwi ntalinti.' 33 Etumo sabana aku nasalisa nompakau tau nalau nompokio komi. Mpu'u-mpu'u nabelo rara komi narata wemai. We'i-we'i kami e'i puramo nasiromu ri ngayo nu Alatala ala mangepe pura-pura nuapa to nipakauna ratesa komi ka kami." 34 Naopu etu nompamulamo i Petrus notesa ka ira, "Sampesuwu-sampesuwu, we'i-we'i nanotomo raraku Alatala da'a nompoposisala manusia, tapi manusia pura-pura nirekena nasimbayu pura. 35 Isema-sema to naeka ri ja'ina pade powiana nanoa, tau etumo nikonoa rara Alatala. Da'a nikitana tau etu nggari ngata ri umba. 36 Sampesuwu-sampesuwu, ninjani komi mbotomo kareba to nipasimbayu Alatala ka kami tau to Israel. Kareba etu nompakanoto Yesus nompoposinggabelo manusia ante Alatala. Yesus etumo Pue pura-pura manusia da'a aga tau to Yahudi. 37 Natantu ninjani komi kajadia-kajadia ri pura-pura tana to Yahudi. Kajadia etu nompamula nggari Bagia Galilea naopu Yohanes nombadiu tau to najea nggari silaka-silaka ira. 38 Pade ninjani komi wo'u ewa Yesus nggari Nazaret. Alatala nompelisi I'a pade nombawai ka I'a Nosa Nagasa pade kuasa. I'a nalau ri umba-umba nompowia anu nabelo pade nompakabelo pura-pura tau to nipandasa Magau nu Seta. Etu nikawia Yesus sabana kuasa Alatala nosanggani-nggani ante I'a. 39 Kami e'imo to nanggita pura-pura nuapa to nipowia Yesus nabeloka ri tana ntau to Yahudi nabeloka ri ngata Yerusalem. Kaopuna Yesus etu nipatesi ira tau to Yahudi, I'a nipaku ira ri kayu parika. 40 Yesus e'imo to nipakatuwu Alatala bali nggari kamatena ri eo katolueona pade nipopokitana ka manusia. 41 Tapi da'a pura-pura tau nanggita I'a, aga kami to nipelisi Alatala nokolu majadi sabi-sabina. Naopu Yesus natuwu bali, kami e'i nanggoni pade nanginu mpasanggani-nggani ante I'a. 42 Pade I'a nompakau kami e'i mompatolele Kareba Belo ka pura-pura tau, pade mompakanoto ka tau Yesus etumo to nilanti Alatala majadi Topotangara pura-pura manusia, nabeloka tau danatuwu, nabeloka tau to namatena. 43 Yesus etumo to nitesa pura-pura nabi nggaolu. Nantuki tesa ira isema-sema nomparasaya Yesus, silaka-silakana kana raampungi." 44 Tempo i Petrus danotesa, nana'umo Nosa Nagasa nu Alatala nesua ri ja'i pura-pura tau to nangepe tesa i Petrus etu. 45 Nanggita etu nogumaa puramo tau-tau to Yahudi to nomparasaya i Pue Yesus to nantuki i Petrus nggari Yope, sabana tau-tau da'a to Yahudi wo'u nipesua Nosana Nagasa nu Alatala. 46 Nanotomo ira nipesua Nosa Nagasa etu sabana ira notesa ante basa-basa to nopu'u nggari ja'i Nosa Nagasa nu Alatala, pade ira nantoiya Alatala. Nanggita etu notesamo Petrus ka roana, 47 "Kitamo! Tau da'a to Yahudi e'i wo'u nipesua Nosa Nagasa nu Alatala nasimbayu ante kita to Yahudi. Ane iwetu ira wo'u mamala radiu ewa tandaina ira topomparasaya i Pue Yesus!" 48 Pade nangulimo i Petrus ka Kornelius saongu njapo, "Komi kana radiu ante sanga Yesus Kristus." Naopu nidiu, ira Kornelius saongu njapo nerapi ala Petrus meto'o ante ira ruru bara sakuya mbengipa kasaena.
1 Suro-suro i Pue Yesus pade topomparasaya ri njumaongu ngata ri Yudea nangepe tau-tau da'a to Yahudi wo'u nomparasaya Tesa nu Alatala. 2 Tempo i Petrus nalau mpaka ri ngata Yerusalem, tau-tau to Yahudi to nomparasaya i Pue Yesus nanjalaraka i'a. 3 Ira nanguli, "Nokuya komi nalau ri sapo ntau da'a to Yahudi, ira tau da'a nisuna? Nokuya komi nanggoni mpasanggani-nggani ante ira?" 4 Nangepe tesa etu, notesamo i Petrus ka ira pura-pura anu najadi nompamula nggari pamulana. Niulina, 5 "Tempo aku nosambaya ri ngata Yope, aku nanggita saongu panggita. Riara panggitaku etu nikitaku sangaya ewa sabala kae tarapaal nabini niulunjaka nggari langi natiloe ri siduna patanjidu nitu'u ri ngayoku. 6 riara nu kae tarapaal etu nikitaku mpengele binata nokada patanggada, pade binata-binata naila, binata-binata nenjoyo, pade tonji-tonji naila. 7 Pade niepeku suara nanguli ka aku, 'Anumo, pekanggoremo, Petrus! Sambalemo binata e'i pade konimo!' 8 Tapi nesonomo aku, 'Da'a, Pue! Da'apa sanggani aku nanggoni to nakapali pade natantoru ewa etu!' 9 Tapi notesa wo'umo suara nggari langi etu karongganina, 'Nuapa to niuli Alatala namala rakoni, ne'e muuli nakapali!' 10 Tolunggani etu najadi, pade kae etu neore bali mpaka ri langi. 11 Ewa nisuka tempona etu wo'u, tolumba'a tau nggari ngata Kaisarea to nipakau i Kornelius ri ja'iku narata ri sapo peto'oku etu. 12 Pade Nosa Nagasa nu Alatala nompakau aku malau mpasanggani-nggani ante ira ante da'a ria kakini-kini raraku. Jadi nalaumo aku, pade onomba'a topomparasaya nggari Yope e'i nantuki aku mpaka ri Kaisarea, pade kami pura-pura nesua ri sapo i Kornelius. 13 Naopu etu i Kornelius nantesa ka kami iwenu i'a nanggita samba'a malaeka nekanggore riara njapona pade nanguli, 'Pakaumo tau mpaka ri ngata Yope mompokio samba'a tau nosanga ka i Simon Petrus. 14 I'a kana manguli ka iko kareba to mompakanoto iwenu komi saongu njapo mamala rapakasalama.' " 15 Pade i Petrus nompapola tesana, "Tempo aku danotesa ka ira, nana'umo Nosa Nagasa nesua ri ja'i ira nasimbayu ewa najadi ante kita ri pamulana bopia. 16 Ri setu nitora nu raraku tesa i Pue Yesus to nanguli, 'Yohanes nombadiu tau ante ue, tapi komi kana radiu ante Nosa Nagasa nu Alatala.' 17 Sampesuwu-sampesuwuku, nanotomo Alatala nombawai Nosa Nagasana ka ira tau da'a to Yahudi nasimbayu ewa niwaina ka kita tempo kita nomparasaya i Pue Yesus Kristus. Sabana etu da'a namala aku mombatondo patuju nu Alatala!" 18 Tempo ira to nasiromu ri setu nangepe tesa i Petrus, mana ira nebali. Ira aga nosanggani-nggani nantoiya Alatala. Niuli ira, "Ane iwetu, tau-tau da'a to Yahudi wo'u nipaloga Alatala majea nggari silaka-silaka ira pade mantarima katuwua mabelo sampe ri kasae-saena!" 19 Naopu i Stefanus namate niparunju watu, nadea topomparasaya i Pue Yesus nalai niraga nosimpoga'a-ga'a mpaka ri umba-umba ngata. Naria to nalai sampe ri Bagia Fenisia, pade naria wo'u nalai mpaka ri Lewuto Siprus bo ngata Antiokhia. Ira nompatolele Kareba Belo nggari ja'i Alatala ri ngata-ngata nikalau ira, tapi aga ka tau-tau to Yahudi. 20 Tapi nggari topomparasaya i Pue Yesus etu naria ira nggari Lewuto Siprus pade ngata Kirene to nalau mpaka ri ngata Antiokhia pade nompatolele Kareba Belo i Pue Yesus ka tau-tau da'a to Yahudi wo'u. 21 Kuasa i Pue naria nomporoa ira sampe nadea to Antiokhia nomparasaya pade nombajuju katuwu ira ka i Pue Yesus. 22 Kareba ewa nuapa to najadi ri ngata Antiokhia etu natolele wo'u mpaka ri ja'i ntopomparasaya i Pue Yesus ri ngata Yerusalem. Nangepe kareba etu, ira nompakau i Barnabas mpaka ri ngata Antiokhia. 23 Sangga narata i Barnabas ri setu pade nikitana iwenu Alatala nombawai rasi ka ira etu, nadamba mpu'u rarana. Jadi niulina ka ira, "Komi kana maroo mantuki i Pue Yesus ante mpu'u-mpu'u rara!" 24 Barnabas e'i, i'a samba'a tau to nabelo rarana, pade to naponu ante Nosa Nagasa nu Alatala, pade i'a samba'a tau mpu'u-mpu'u nomparasaya i Pue Yesus. Etu sampe nadea tau ri Antiokhia nomparasaya i Pue Yesus. 25 Naopu etu nalaumo i Barnabas mpaka ri ngata Tarsus nopaelo i Saulus. 26 Sangga nosirata i'a ante i Saulus, nikenina i'a mpaka ri ngata Antiokhia. Pade ri setu sampae kasaena ira nasiromu mpasanggani-nggani ante topomparasaya pade nompatuduki tau dea. Ri ngata Antiokhia etumo tau-tau nomparasaya i Pue Yesus pamula-mulana niuli tau to Karistee. 27 Ri tempo etu wo'u naria bara sakuya mba'a nabi nggari Yerusalem notua mpaka ri ngata Antiokhia. 28 Ri tatongo ira naria samba'a tau nosanga ka Agabus. I'a nekanggore ri tatongo ira pade ante pekeniaka Nosa Nagasa nu Alatala i'a nombaboto kana majadi nggapurina ri ntiku-ntiku dunia oromate to neliu-liuna. (Oromate etu mpu'u-mpu'u najadi tempo Magau Klaudius najadi Magau nto Roma.) 29 Nangepe etu pura-pura topomparasaya i Pue Yesus ri Antiokhia etu nompakatantu mombawai petulungi ira ka sampesuwu-sampesuwu ira riara i Pue to neto'o ri Bagia Yudea. Ira newai nantuki pompakulena samba'a bo samba'a. 30 Sintuwu ira etu nipajalamo, pade i Barnabas bo i Saulus nipakau ira manggeni pewai ira etu ka topanggeniaka topomparasaya i Pue Yesus ri Bagia Yudea etu.
1 Kira-kira tempona etu wo'u nompamulamo Magau Herodes Agripa nompandasa bara sakuya mba'a topomparasaya. 2 I'a nompakau tau nombatimbe Yakobus sampesuwu i Yohanes. 3 Sangga nikita i Herodes powiana etu nompakadamba rara ntau to Yahudi, nikawiana wo'umo powia ewa etu. Niparentana tau manjoko i Petrus wo'u. Anu etu najadi tempo Eo Bete Posusa Roti Da'a Nidika Ragi. 4 Naopu i Petrus nisoko, i'a nisuaraka riara tarunggu, pade Herodes nompakau sampulu onomba'a tantara manggatono i'a, patamba'a sanggani. Patuju i Herodes ala Petrus ratangara ri ngayo ntau dea maopu Eo Bete Paska etu. 5 Jadi i Petrus nita'amaka riara tarunggu. Tapi topomparasaya-topomparasaya i Pue Yesus etu bate-batena nosambaya ka i Petrus ante mpu'u-mpu'u ri ja'i Alatala. 6 Tempo damo sambengi Magau Herodes nopatuju mombatangara i Petrus ri ngayo todea, i Petrus naturu ri olo romba'a tantara riara nu tarunggu etu, nipo'u ante rongu rante. Naria wo'u romba'a tantara ntanina nanggatono pewobo tombi tarunggu etu. 7 Sampegoli naratamo malaeka i Pue nekanggore ri setu, pade reme newanta riara tombi nu tarunggu etu. Malaeka etu nantapee-pee palena ri koro i Petrus mombalike i'a. Nangulimo malaeka etu, "Pembangumo masalisa!" Tempo etu wo'u nakabasaka mbotomo rante ase nggari pale i Petrus etu. 8 Naopu etu nanguli malaeka, "Pasuamo pakeamu, pade pasua wo'umo sapatumu." Nangepe etu i Petrus nantuki parenta nu malaeka etu. Naopu etu nanguli wo'umo malaeka, "Pakemo buyamu pade kamai tukimo aku!" 9 Pade nalaumo i Petrus nantuki malaeka etu. Tapi tempo etu da'apa nanoto rara i Petrus nuapa to nipowia malaeka etu mpu'u-mpu'u najadi. Nipekirina etu aga saongu panggitana. 10 Ira nolumako nombaliunaka peto'o topojaga pewobo pamulana, pade pewobo karonguna, pade naratamo ira ri bobaa ase mpaka riara ngata. Bobaa ase etu natebea mboto, pade nesuwumo ira nantuki sampenga jala. Narata ri setu sampegoli nalipomo malaeka etu nompalasi i Petrus. 11 Naopu etu nanotomo rara i Petrus pade i'a nanguli, "We'i-we'i mpu'u-mpu'u ninjanikumo i Pue nompakau malaekana mombakabasaka aku nggari kuasa Magau Herodes pade nggari mpengaya-ngaya nuapa rapowia tau-tau to Yahudi ri ja'iku." 12 Naopu nompekiri kajadia etu, nalaumo i Petrus mpaka ri sapo i Maria, indo Yohanes Markus. Ri sapo etu nadea tau nasiromu nosambaya. 13 Petrus nantenggedeu pewobo ri sawalikuna, pade naratamo samba'a batua besi nosanga ka i Rode mombabea pewobo. 14 Tempo i'a nangepe suara i Petrus, nadamba mpu'umo i'a. Pade kaliu-liu nesua balimo i'a riara njapo etu, da'a nibeana pewobo etu. Pade niulina ka tau-tau ri setu, "Petrus naria ri sawalikuna etu!" 15 Tapi nangulimo ira ka ngana besi etu, "Nagila iko!" Tapi i Rode bate-batena nanguli, "Mpu'u-mpu'u i'a etu i Petrus!" Nangepe etu ira nanguli, "Etu aga malaekana!" 16 Tempo ira notesa-tesa, i Petrus da'a nenonto-nonto nantenggedeu pewobo ri sawalikuna. Kaopuna nalaumo ira nombabea pewobo. Tempo nikita ira i Petrus mpu'u etu, nogumaa mpu'umo ira. 17 Petrus nombawiataka palena ala ira pura-pura malino, pade nitesana iwenu i Pue nanggeni i'a nesuwu nggariara tarunggu etu. Pade niulina wo'u, "Popanjani ka Yakobus pade sampesuwu-sampesuwuta ntanina nuapa to najadi e'i." Naopu etu nalaimo i Petrus mpaka ri peto'o ntanina. 18 Naeompadondona naingu ante naeka mpu'umo tantara-tantara to nanggatono tarunggu etu. Nosimpekutanamo ira, "Ri umbamo i Petrus?" 19 Magau Herodes nompakau tau mangelo i Petrus, tapi ira da'a nombarata i'a. Etu sampe Magau Herodes nomparenta ala tantara-tantara sampulu onomba'a to nanggatono i Petrus etu raparesa pade rakeni rapatesi. Naopu etu notuamo Magau Herodes nggari Bagia Yudea mpaka ri ngata Kaisarea, pade neto'omo i'a ri setu bara sakuya kasaena. 20 Magau Herodes narau mpu'u ka pue ngata Tirus bo Sidon. Sabana etu ira nosanggani-nggani narata merapi mosinggabelo ante Herodes, apa ngata ira etu aga nanjarumaka panggoni nggari bagia to niparenta i Herodes. Pamulana ira nombabuju samba'a batua to nombaurusi sapo Magau Herodes to nosanga ka i Blastus, ala i'a mosabingga ka ira. Naopu etu nalaumo ira nantingayo Magau Herodes merapi mosinggabelo. 21 Jadi ri eo to nipakatantu, Magau Herodes nompasua pakea kamagauna pade nalau nekatoko ri pekatoko magau motesa ka todea. 22 Nanggita etu nongare-ngaremo todea etu nantoiya i Herodes. Niuli ira, "E'imo suara nu wiata, da'a suara nu manusia!" 23 Ri tempo etu wo'u malaeka i Pue nompakaju'a Magau Herodes sabana i'a da'a nombabila Alatala, i'a da'a nombabali tesa todea etu. Jadi tempona i'a danatuwu nakaulemo i'a, nikoni ndoro sampe namate. 24 Naopu etu nantambai eona nantambai natolele Tesa nu Alatala, pade nantambai kadea ntau nomparasaya i Pue Yesus. 25 Sangga naopu i Barnabas bo i Saulus nanggeni petulungi to Antiokhia ka topanggeniaka topomparasaya ri ngata Yerusalem, nanjilimo ira mpaka ri ngata Antiokhia. Ira nanggeni Yohanes Markus wo'u mpasanggani-nggani ante ira.
1 Ri tatongo ntopomparasaya ri ngata Antiokhia naria bara sakuya mba'a nabi pade guru to nompasimbayu Tesa nu Alatala, etumo i Barnabas, i Simeon to nidae i Wuri, pade i Lukius nggari ngata Kirene, i Menahem to nipakabete mpasanggani-nggani ante Magau Herodes Antipas, pade i Saulus. 2 Naria sanggani, tempo ira pura-pura nantoiya Alatala pade napuasa, Nosa Nagasa nu Alatala notesa ka ira, "Onggotaka ka Aku i Barnabas bo i Saulus ala ira manjoko panggawia to nipakatantuku ka ira." 3 Jadi naopu ira pura-pura napuasa pade nosambaya wo'umo ira nombadika pale ira ri balengga i Barnabas bo i Saulus, pade nisuromo ira romba'a etu nalau mompatolele Kareba Belo. 4 Jadi nalaumo i Barnabas bo i Saulus mpaka ri ngata Seleukia nantuki tesa nggari ja'i Nosa Nagasa nu Alatala ka ira. Nggari setu nosumombamo ira mpaka ri Lewuto Siprus. 5 Narata ri ngata Salamis, nipatolele iramo Tesa nu Alatala ri sapo-sapo mpodade to Yahudi. Yohanes Markus wo'u nantuki nantulungi ira riara mpolumako ira. 6 Naopu Lewuto Siprus etu nipolumako ira, naratamo ira ri ngata Pafos. Ri setu ira nomposirata ka samba'a tau to Yahudi to nosanga ka i Bar-Yesus. I'a samba'a sando to nompangaku korona samba'a nabi Alatala, tapi da'a nakono. 7 I'a nowega ka Gubernur ri lewuto etu, to nosanga ka i Sergius Paulus. Gubernur etu samba'a tau to nata'una. I'a nompokio i Barnabas bo i Saulus sabana i'a madota mangepe Tesa nu Alatala. 8 Aga sando etu Bar-Yesus, to nosanga wo'u Elimas riara Basa Yunani, nangewa i Barnabas bo i Saulus. I'a nompasimbuku ala Gubernur etu ne'e momparasaya Yesus. 9 Tapi i Saulus, to nidae wo'u i Paulus, naponu ante Nosa Nagasa nu Alatala. I'a nompenaa mpadodo sando etu, 10 pade niulina, "He iko, topebagiu to naja'ana, ana Magau nu Seta! Ikomo bali pura-pura anu to nanoana! Nokuya iko da'a nenonto mompakadenggo jala i Pue to nabelona? 11 Kita we'i! Pue kana mombasuku iko! Iko kana maburo sampe da'a mana mamala manggita eo bara sakuya mbengi kasaena!" Nangepe etu kaliu-liu naburomo mata Bar-Yesus sampe i'a kana nalau nangelo-ngelo tau mombanini i'a. 12 Sangga nikita Gubernur nuapa to najadina etu, niparasayanamo i Pue Yesus. Nasumara mpu'u i'a nangepe pepatuduki ewa i Pue. 13 Nggari ngata Pafos Paulus bo roa-roana nesawi sakaya mpaka ri ngata Perga ri Propinsi Pamfilia. Ri setu Yohanes Markus nompalasi ira pade nanjili bali mpaka ri ngata Yerusalem. 14 Nggari ngata Perga Paulus bo i Barnabas nompapola polumako ira mpaka ri ngata Antiokhia ri Bagia Pisidia. Tempo Eo Mpenonto nalaumo ira nesua ri sapo mpodade to Yahudi pade nekatoko ri setu. 15 Naopu nombabasa tesa nggari buku i Musa bo buku-buku nabi-nabi, topanggeniaka-topanggeniaka sapo mpodade etu nompakau tau mompekutana ka i Paulus bo roa-roana, "Sampesuwu-sampesuwu, ane maria tesa komi mompakaroso pomparasaya tau-tau e'i, kami mombawai loga ka komi mombatesa etu ka ira." 16 Jadi nekanggoremo i Paulus, pade niwiatakana palena, pade niulina, "Sampesuwu-sampesuwuku to Israel, pade pura-pura sampesuwu-sampesuwuku ntanina ri se'i to naeka ri ja'i Alatala. Epemo tesaku! 17 Alatala to nipesombata to Israel to nompelisi totu'a-totu'ata nggaolu majadi todeana. Pade i'a nompakadea muli ira tempo ira daneto'o ri tana Masir. Naopu etu ante kabaraka nabete Alatala nanggeni ira nesuwu nggari tana Masir. 18 Pade patampulu mpae kasaena Alatala nosabara nggari pokainggu ira riara karawa baina. 19 Pade naopu I'a nompakaropu pitumba'a magau ante todea-todea ira ri tana Kanaan, tana etu nibagi-bagina ka to Yahudi majadi tana ira. 20 Etu pura-pura nikawia Alatala riara patatu limampulu mpae kasaena. Naopu tana Kanaan etu nibagi-bagina ka to Yahudi, Alatala nompakatantu ka ira topotangara-topotangara nanggeniaka ira. Topotangara kaopuna etumo i nabi Samuel. 21 Naopu etu ira nerapi samba'a magau raonggotaka ka ira to mamala manggeniaka ira. Jadi Alatala nompakatantu ka ira i Saul, ana i Kish nggari muli i Benyamin najadi magau ira. Pade i'a nanggeniaka ira patampulu mpae kasaena. 22 Pade naopu Saul nileso Alatala, nipelisina wo'u i Daud najadi magau ira. Iwe'imo to niuli Alatala ewa i Daud: 'Nikitaku Daud ana Isai samba'a tau to nompakadamba raraku. I'a kana manggawia nuapa pura to kupodota.' 23 Pade nggari muli i Daud etu nionggotaka Alatala ka to Israel samba'a Magau to Mompakasalama to nijanjina, etumo Yesus. 24 Da'apa Yesus nompamula panggawiana, Yohanes Topediu nompatuduki ka to Israel ira pura-pura kana majea nggari silaka pade ira kana radiu. 25 Pade tempo mana masaeka maopu panggawiana nangulimo Yohanes ka tau dea, 'Aku e'i da'a Magau to nipopea komi! Tapi toramo! I'a kana marata maliu aku e'i, pade I'apa neliu nggabete pade aku. Nau aga mombawole lui sapatuna aku da'a masipato.' 26 Sampesuwu-sampesuwu pura-pura, nabeloka komi muli Abraham nabeloka komi pura-pura to naeka ri ja'i Alatala. Kitamo to nipakatu Alatala ka Kareba Belo etu to nompakanoto iwenu kita mamala rapakasalama. 27 Tau-tau to neto'o ri ngata Yerusalem bo topanggeniaka-topanggeniaka ira da'a nangginjani Yesus etumo Magau to Mompakasalama. Da'a wo'u ninjani ira pepatuduki nu nabi-nabi to nibasa ri Eo-eo Mpenonto. Tapi tesa nabi-nabi etu nipakadupa ira tempo ira nombasuku Yesus. 28 Naupa da'a nirata ira nau aga sangele sala nggari ja'ina to masipato rasuku mamate, niperapi ira ka Gubernur Pilatus ala Yesus rapatesi. 29 Sangga naopupa ira nompowia pura-pura to nitulisi riara Buku Nagasa ewa I'a, watabakuna nita'uraka nggari kayu parika pade niboli riara dayo. 30 Tapi Alatala nompakatuwu bali I'a nggari kamatena. 31 Pade naopu etu riara bara sakuya mbengi nadea nggani I'a nompopokita korona ka tau to nantuki I'a nggari tana Galilea mpaka ri ngata Yerusalem. Ira etumo to najadi sabi-sabina ka tau to Yahudi. 32 Jadi sampesuwu-sampesuwu, we'i-we'i kami narata mompatolele ka komi Kareba Belo etu. Nuapa to nijanji Alatala ka totu'a-totu'ata nggaolu, 33 etu nipakadupanamo ka kita tempo I'a nompakatuwu bali Yesus nggari kamatena. Naria nitulisi riara Mazmur karonguna iwe'i: 'Ikomo Anaku, eo e'i Aku najadi Umamu.' 34 Alatala nompakatuwu bali Yesus nggari kamatena, pade da'a nompakamba watabakuna mapopo riara dayo. Nanotomo etu sabana niulina iwe'i: 'Pojanji to nagasa bo natantu rapakadupa to nijanjiku ka i Daud, pojanji etu kana kupakadupa ka Iko.' 35 Naria wo'u tesa Mazmur ntanina to nanguli, 'Pue da'a mompakamba Batuana to Nagasana mapopo riara dayo.' 36 Tesa etu da'a nosinggawela ante i Daud, sabana naopu i'a nompowia nuapa to nipakau Alatala ka i'a, namatemo i'a. Pade i'a nitana namosu dayo ntotu'ana nggaolu, pade watabakuna naopumo napopo. 37 Tapi Yesus to nipakatuwu Alatala bali nggari kamatena da'a ria napopo. 38 Jadi sampesuwu-sampesuwu, kana ranjani komi aga Yesus to namala mombaampungi silaka. 39 Silaka-silakata da'a namala raampungi ane kita aga mantuki Atura-atura agama to nipapola Musa ka kita. Tapi butu mba'a tau to nomparasaya Yesus, silakana kana raampungi. 40 Etumo sabana komi kana mainga ala ne'e majadi ka komi nuapa to niuli nabi-nabi iwe'i: 41 'Kita we'i komi topesalaraka! Komi kana mawiora pade maropu sanggani, sabana tempo we'i-we'i Aku kana mompowia sangele anu da'a ntoto raparasaya komi, nau damo maria tau motarangga etu ka komi.' " 42 Naopu notesa iwetu nesuwumo i Paulus bo i Barnabas nggari sapo mpodade etu. Narata ri sawalikuna ira niperapi manjili bali ri Eo Mpenonto marata mompapola tesa to nitesa ira etu. 43 Sangga nesuwu puramo tau-tau nggariara sapo mpodade etu, nadea tau-tau to Yahudi bo tau ntanina to nesuamo ri agama Yahudi nantuki Paulus bo Barnabas. Suro-suro etu nompatuduki ira ala ira maroo rara metidombo ri towe belo nu Alatala. 44 Eo Mpenonto marata miki pura-pura tau riara ngata etu narata mangepe Tesa nu Alatala. 45 Tempo to Yahudi nanggita tau dea etu, nasiriati mpu'u rara ira. Ira nombasalaraka i Paulus, pade pura-pura to nitesana niewa ira. 46 Naupa iwetu, Paulus bo i Barnabas nelabi kabiana notesa ka ira, "Tesa nu Alatala kana ratesa ka komi to Yahudi ntanimo ruru. Aga komi mombabali tesa etu. Komi nompoara mombarata katuwua mabelo sampe ri kasae-saena. Sabana etu kami mana mompatolele tesa etu ka komi to Yahudi! We'i-we'i kami malau ri ja'i ntau da'a to Yahudi, 47 sabana to niparenta i Pue ka kami iwe'i: 'Aku mompakatantu komi majadi reme mombawanta tau-tau da'a to Yahudi, ala nggari ja'i komi, pura-pura tau ri dunia mangginjani iwenu Alatala mompakasalama manusia.' " 48 Tempo tau-tau da'a to Yahudi ri setu nangepe tesa etu, nadamba mpu'u rara ira. Pade ira nanguli, "Nabelo mpu'u Tesa nu Alatala e'i!" Pade tau-tau to nipakatantu Alatala mombarata katuwua mabelo sampe ri kasae-saena, tau-tau etumo nomparasaya i Pue Yesus. 49 Pade Tesa i Pue natolele ri umba-umba ri bagia etu. 50 Tapi tau-tau to Yahudi ri setu nompakapane rara besi-besi to noanggana to naeka ri ja'i Alatala ante balengga-balengga riara ngata etu. Ira nompopeumba posiewa ante i Paulus bo i Barnabas pade nompopalai ira romba'a nggari bagia etu. 51 Jadi Paulus bo i Barnabas etu nombasapunai sowu nggari kada ira ewa tandaina tau-tau etu kana rasuku Alatala. Pade nalaimo ira mpaka ri ngata Ikonium. 52 Topomparasaya-topomparasaya i Pue Yesus ri ngata Antiokhia mpu'u-mpu'u nadamba rara, pade ira naponu ante Nosa Nagasa nu Alatala.
1 Ri ngata Ikonium najadi wo'umo nasimbayu ewa nuapa to najadi ri ngata Antiokhia etu. Paulus bo i Barnabas nalau wo'u ri sapo mpodade to Yahudi, pade ri setu ira notesa-tesa ka tau sampe nadea tau to Yahudi bo tau-tau da'a to Yahudi nomparasaya Yesus. 2 Tapi tau-tau to Yahudi to da'a madota momparasaya Yesus nompakapane rara tau-tau ntanina da'a to Yahudi sampe narau mpu'u rara ira ri ja'i tau-tau to nomparasaya ka Yesus. 3 Sabana etu i Paulus bo Barnabas nasae neto'o ri setu. Ante kabia ira nompatolele kareba i Pue. Pade i Pue mboto nombawai kuasa ka ira nompowia kabaraka-kabaraka ante tandai-tandai to nipogumaa ala mompakakono tesa ira ewa towe belona etu. 4 Tapi tau-tau riara ngata etu nosiewa mbotomo samba'a bo samba'a. Naria to nosinjabingga ka to Yahudi to da'a nomparasaya, pade naria wo'u nosinjabingga ka i Paulus bo i Barnabas. 5 Pade nosintuwumo tau to Yahudi ante topanggeniaka-topanggeniaka ira nosanggani-nggani ante tau-tau ntanina da'a to Yahudi mompandasa pade mombarempe i Paulus bo i Barnabas etu ante watu. 6 Tapi ira romba'a nangginjani nia etu sampe ira nalai mpaka ri Bagia Likaonia, etumo ri ngata Listra, ngata Derbe pade ri ngata-ngata ntanina ri bagia etu. 7 Pade ri setu wo'u ira nompatolele ka tau Kareba Belo. 8 Ri ngata Listra naria samba'a langgai kadana napunggu nggari pesuwuna. I'a da'a ntoto namala nolumako sabana nalente mpu'u kadana. 9 Tau etu nekatoko ri setu nangepe tesa i Paulus. Tempo Paulus nanggita tau etu ninjanina tau etu nomparasaya mpu'u sampe i'a mamala rapakabelo. Jadi i Paulus nanggita i'a, 10 pade nanguli ante suara namangga, "Pekanggore pakanoa!" Sangga nangepe etu nekanggoremo topunggu etu nasalisa pade nompamula nolumako ri setu. 11 Sangga nikita ntau dea ri setu nuapa to nikawia i Paulus nongaremo ira ante basa ira mboto to niuli Basa Likaonia, "Nana'umo wiata-wiata ri dunia nolenje mpomanusia!" 12 Niuli ira i Barnabas i'amo wiata Zeus, pade i Paulus wiata Hermes apa i'amo topotesa. 13 Naopu etu naratamo topanggeniaka baruga wiata Zeus to naria ri sawaliku ngata etu. I'a nanggeni japi-japi pomawa ante wunga-wunga mpaka ri bobaa ngata etu sabana i'a ante todea etu madota mombasomba i Paulus bo i Barnabas etu. 14 Sangga niepe i Paulus bo i Barnabas nuapa patuju tau-tau dea etu, niseka iramo pakea ira mboto ante nasusa mpu'u rara sabana tau dea etu madota mombasomba ira. Nangowamo ira mpaka ri tatongo ntau dea etu pade nongare nombatagi todea etu iwe'i: 15 "Sampesuwu-sampesuwu, ne'e komi mombasomba kami! Kami e'i manusia biasa wo'u ewa komi! Kami narata ri se'i mompatolele Kareba Belo ka komi ala komi mompalasi ada komi mepue ka wiata-wiata e'i pade marata ri ja'i Alatala to natuwuna. I'amo to nompajadi langi bo dunia bo tasi pade pura-pura to naria riarana. 16 Tempo nokolu Alatala nompalamba pura-pura manusia natuwu nantuki dota ira mboto. 17 Naupa iwetu, bate-batena naria powiana to nabelo ewa tandai to nompakanoto ka kita I'amo Alatala. Niwaina ka kita uja nggari langi, pade niwaina isi panggawiata ane narata ntoana. Niwaina wo'u ka kita panggoni pade niwaina wo'u kadamba rara." 18 Naupa suro-suro etu nombatagi iwetu, sakedi-sakedipa da'a namala ira mombata'amaka tau dea mombasomba ira. 19 Naopu etu naratamo bara sakuya mba'a tau to Yahudi nggari ngata Antiokhia ri Bagia Pisidia bo nggari ngata Ikonium. Ira nantanara tau dea ri Listra etu ala ira wo'u mangewa Paulus. Pade ira nombarempe i Paulus ante watu, pade i'a niumbunjai ira mpaka ri sawaliku ngata. Niuli ira namatemo i'a. 20 Tapi tempo topomparasaya-topomparasaya ri setu nekanggore nantatiku i'a, nembangu bali i'a pade nesua wo'umo i'a riara ngata. Pade naeo to nailena nalaumo i'a mpaka ri ngata Derbe mpasanggani-nggani ante i Barnabas. 21 Ri ngata Derbe i Paulus bo i Barnabas nompatolele Kareba Belo pade ri setu nadea tau nomparasaya i Pue Yesus. Naopu etu nanjilimo ira romba'a mpaka ri ngata Listra. Pade nggari setu nalaumo ira mpaka ri ngata Ikonium pade mpaka ri ngata Antiokhia ri Bagia Pisidia. 22 Ri ngata-ngata etu ira nompakaroo rara topomparasaya i Pue Yesus. Niuli ira, "Kita kana maroso momparasaya i Pue Yesus. Ne'e mokanggaura. Kita kana mombarasai madea susa ntanimo ruru pade mamala kita mesua riara Poparenta nu Alatala." 23 Pade ri ngata-ngata etu i Paulus bo i Barnabas nangonggotaka topanggeniaka-topanggeniaka topomparasaya i Pue Yesus. Ira napuasa bo nosambaya ka topanggeniaka-topanggeniaka etu ala ira raporoa i Pue to niparasaya ira. 24 Naopu etu napolamo i Paulus bo i Barnabas nombaliunaka Bagia Pisidia sampe narata ri Bagia Pamfilia. 25 Pade naopu ira nompatolele Tesa nu Alatala ri ngata Perga, notuamo ira mpaka ri ngata Atalia ri wiwi ntasi. 26 Nggari setu ira nesawi sakaya bete manjili mpaka ri ngata Antiokhia ri Bagia Siria. Ri ngata etumo ira nokolu niposambaya ntopomparasaya i Pue Yesus ala Alatala momporoa ira riara panggawia to lako nipakaopu ira we'i-we'i. 27 Tempo ira narata ri ngata Antiokhia nipasiromu ira topomparasaya ri setu. Pade nitesa ira pura-pura to nipowia Alatala niposabana ira. Nitesa ira wo'u iwenu Alatala nombawai loga ka tau-tau da'a to Yahudi momparasaya Yesus. 28 Pade nasaemo i Paulus bo i Barnabas neto'o ri ngata Antiokhia nosanggani-nggani ante topomparasaya i Pue Yesus ri setu.
1 Tempo Paulus bo i Barnabas naria ri ngata Antiokhia naratamo bara sakuya mba'a tau to Yahudi nggari Bagia Yudea. Ira nompamula nompatuduki ka topomparasaya-topomparasaya i Pue Yesus ri setu iwe'i: "Ane komi da'a rasuna nantuki Atura-atura to nipatuduki i Musa, da'a mamala komi rapakasalama." 2 Tapi i Paulus bo i Barnabas mpu'u-mpu'u nangewa bo nombabali pepatuduki tau-tau etu. Jadi kaopuna nipakatantumo ala i Paulus bo i Barnabas ante bara sakuya mba'a topomparasaya ntanina nggari ngata Antiokhia malau mpaka ri ngata Yerusalem ala molibu mombatesa ewa pepatuduki etu ante suro-suro pade topanggeniaka-topanggeniaka topomparasaya ntanina ri setu. 3 Paulus ante roa-roana nikeni topomparasaya ri ngata Antiokhia sampe ri sawaliku ngata. Nggari setu ira nalau nombaliunaka Bagia Fenisia bo Bagia Samaria. Ri setu ira nombatesa ka topomparasaya-topomparasaya i Pue Yesus iwenu tau-tau da'a to Yahudi nompalasi pomparasaya ira nokolu ala mantuki Alatala. Kareba etu mpu'u-mpu'u nompakadamba rara topomparasaya-topomparasaya i Pue Yesus ri setu. 4 Sangga Paulus ante roa-roana narata ri ngata Yerusalem ira nitomunaka topomparasaya i Pue Yesus, suro-suro bo topanggeniaka-topanggeniaka ntanina ante kadamba nu rara. Pade nitesa Paulus bo roa-roana ka tau-tau etu pura-pura nuapa to nikawia nu Alatala niposabana ira ka tau-tau da'a to Yahudi. 5 Tapi naria bara sakuya mba'a tau to Parisi to nomparasaya i Pue Yesus nekanggore pade notesa, "Tau-tau da'a to Yahudi to nomparasaya etu kana rasuna pade ira kana rapakau mantuki Atura-atura agama to nipapola i Musa ka kita." 6 Nangepe tesa etu suro-suro pade topanggeniaka-topanggeniaka ntanina etu nolibu ala etu pura-pura namala ratesa. 7 Nasae mpu'u ira nosinjula pekiri. Kaopuna nekanggoremo i Petrus pade niulina ka ira, "Sampesuwu-sampesuwu, ninjani komi mbotomo bara sakuya tempo naliu Alatala nompelisi aku nggari tatongo komi mompatolele Kareba Belo ka tau-tau da'a to Yahudi ala ira mangepe kareba etu pade momparasaya. 8 Pade Alatala, to nangginjani isi rara nta'i manusia, nantarima ira tau da'a to Yahudi. Ninjani kami etu sabana I'a nombawai Nosa Nagasana ka ira nasimbayu ewa niwaina ka kita wo'u. 9 Alatala da'a nompoposisala kita tau-tau to Yahudi ante ira tau-tau da'a to Yahudi. I'a nompakagasa rara ira wo'u sabana ira nomparasaya. 10 Ane iwetu, nokuya komi da'a madota mantarima nuapa to nikawia Alatala we'i-we'i? Nokuya komi madota mompasu'u ira mantuki atura-atura to nakaja ratuki? Totu'a-totu'ata nggaolu pade kita mboto da'a nompakule nantuki atura-atura etu. 11 Tapi niparasayata kita nipakasalama aga ante towe belo i Pue Yesus. Iwetu wo'u ira." 12 Naopu Petrus notesa iwetu pura-pura tau nasiromu ri setu nekalino sanggani. Pade ira nompetalinga i Barnabas bo i Paulus nombatesa bali ewa kabaraka-kabaraka ante tandai-tandai to nipogumaa to nipowia Alatala niposabana ira ka tau-tau da'a to Yahudi. 13 Sangga naopupa ira notesa, nangulimo Yakobus, "Sampesuwu-sampesuwu, epe komimo tesaku! 14 Simon Petrus lako-lakopa nombatarangga ka kita iwenu Alatala nggari pamulana nantujuraka patujuna ka tau-tau da'a to Yahudi, patujuna mompelisi nggari ja'i ira tau-tau majadi topomparasaya I'a. 15 Etu nasimbayu ewa nuapa to niboto nabi-nabi, apa naria nitulisi iwe'i: 16 'Nanguli Alatala: Maopu etu Aku kana marata bali mompopembangu bali poparenta Magau Daud to nageromo. Aku kana mompakasiayu to mana nasiayu pade mompakaroso etu wo'umo. 17 Kupowia etu ala pura-pura manusia ntanina etu mangelo Aku, etumo pura-pura tau da'a to Yahudi to nipokioku majadi todeaku. Iwetumo to niuli i Pue to nompakadupa etu pura-pura. 18 to nitesana nggaolu.' 19 Jadi sampesuwu-sampesuwu, nantuki pombarataku ne'e kita mompakasusa tau-tau da'a to Yahudi to negoli nomparasaya Alatala. 20 Tapi kita kana mantulisi sura manguli ka ira, 'Ne'e rakoni komi panggoni to napalina sabana nipakoni ka pue ntanina, pade ne'e rakoni komi bau ane da'a rasambale, pade ne'e manggoni lei. Pade ne'e mosampaturu ante tau da'a rongomu mboto.' 21 Aga atura-atura etumo to paraluu ratuki ira ala tau-tau to Yahudi da'a maju'a rara manggita ira mowia iwetu. Sabana nompamula nggari nggaolu Atura-atura i Musa etu nipatolele ri pura-pura ngata, etu nibasa ri Eo-eo Mpodade ri sapo-sapo mpodade nto Yahudi." 22 Nangepe tesa Yakobus etu nasitujumo suro-suro bo topanggeniaka-topanggeniaka ntanina bo pura-pura topomparasaya. Jadi ira nompakatantu mompelisi bara sakuya mba'a tau nggari ja'i ira rapakau mpaka ri ngata Antiokhia mosanggani-nggani ante i Paulus bo i Barnabas ala ira mompasimbayu asele mpolibu ira ka topomparasaya ri setu. Nipelisi iramo i Silas bo Yudas to nidae wo'u i Barsabas. Romba'a tau etu tau-tau to nibila ri tatongo topomparasaya i Pue Yesus ri Yerusalem. 23 Pade nitulisi ira sura ka topomparasaya-topomparasaya ri ngata Antiokhia rakeni tau romba'a etu to nanguli iwe'i: "Sura e'i nggari ja'i kami suro-suro bo topanggeniaka-topanggeniaka ntanina to raposampesuwu komi riara i Pue, ka topomparasaya-topomparasaya i Pue Yesus da'a to Yahudi to neto'o ri ngata Antiokhia pade ri Propinsi Siria bo Kilikia. 24 Niepe kami bara sakuya mba'a tau nggari ja'i kami nalau ri ja'i komi nompakagero rara pade nompakaingu komi ante pepatuduki-pepatuduki ira. Tapi kakonona ira da'a nipakau kami nompowia iwetu. 25 Sabana etu nolibumo kami ri se'i, pade kami pura-pura nasintuwu mompelisi bara sakuya mba'a tau, pade mompakau ira malau ri ja'i komi. Ira kana malau mpasanggani-nggani ante sampesuwuta i Barnabas bo i Paulus to nipotowe kami. 26 Paulus bo Barnabas e'i, iramo tau-tau to mamate matuwu nantuki Pueta Yesus Kristus. 27 Jadi kami nompakau Yudas bo i Silas malau ri ja'i komi nosanggani-nggani ante Paulus bo Barnabas. Ira kana mompakapola ka komi ante tesa ira mboto isi nu sura e'i. 28 Sampesuwu-sampesuwu, iwe'imo asele mpolibu kami: To nipokono Nosa Nagasa nu Alatala ante kami wo'u ala komi ne'e rapasu'u mantuki atura-atura to nakajana. Aga atura-atura iwe'i paraluu ratuki komi: 29 Ne'e rakoni komi panggoni to nipakoni ka pue ntanina. Ne'e rakoni komi lei, pade wo'u ne'e rakoni komi bau nggari binata namate pudu. Pade ne'e komi mosampaturu ante tau da'a rongomu mboto. Ane komi mantuki atura-atura e'i, etumo powia to nabelona. Sampe ri se'imo ruru isi sura kami." 30 Jadi naopu ira patamba'a nopasabi, notuamo ira malau mpaka ri ngata Antiokhia. Naratapa ri sa'a nipasiromu iramo pura-pura topomparasaya pade sura etu niwai ka ira. 31 Tempo ira pura-pura nombabasa sura etu, nadamba mpu'u rara ira, apa isi sura etu nompakawoe rara ira. 32 Yudas bo i Silas, ira wo'u nabi to namala mompasimbayu Tesa nu Alatala. Jadi nasae ira notesa ka to Antiokhia to nomparasaya i Pue Yesus ala mompakaroo rara ante mompakaroso pomparasaya ira. 33 Yudas bo i Silas neto'o ri setu bara sakuya mbengi kasaena. Naopu etu ira romba'a nipaloga topomparasaya ri setu manjili mpaka ri ja'i suro-suro ri ngata Yerusalem to nompakau ira. Nangulimo topomparasaya ri setu ka ira, "Pakabelo ri jala. Pue momporoa komi." [ 34 Tapi kaopuna i Silas da'a nalau. I'a nompakatantu kana meto'o ri ngata Antiokhia.] 35 Paulus bo i Barnabas wo'u neto'o bara sakuya kasaena ri ngata Antiokhia. Ri setu ira romba'a nosanggani-nggani ante nadea tau ntanina nompatuduki pade nompatolele Tesa i Pue. 36 Da'a nasae kaliuna nangulimo i Paulus ka i Barnabas, "Kamaimo kita manjili mpaka ri ngata-ngata to nikalauta mompatolele Tesa i Pue bopia. Kita kana malau manggita sampesuwu-sampesuwu to nomparasaya i Pue Yesus ri setu, ala rakitata iwenu ira ria." 37 Nangepe etu nasitujumo i Barnabas. I'a madota manggeni i Yohanes Markus wo'u, 38 aga i Paulus nompekiri da'a nabelo manggeni i Markus, sabana i'a nompalasi ira bopia ri Bagia Pamfilia, pade mana nadota manggawia mpasanggani-nggani ante ira. 39 Jadipa ira i Paulus bo i Barnabas nosinggarau mpu'umo sampe kaopuna ira nosimpoga'a. Barnabas nangala i Markus pade ira nesawi sakaya pade nalau mpaka ri Lewuto Siprus. 40 Pade Paulus nompelisi i Silas nomporoa i'a. Topomparasaya-topomparasaya ri ngata Antiokhia nosambaya ala i Pue momporoa ira romba'a riara mpolumako ira. Naopu etu nanggaliwomo ira. 41 Nalaumo ira nombagulili pura-pura Propinsi Siria bo Kilikia. Ri setu ira nompakaroso pomparasaya topomparasaya i Pue Yesus.
1 Paulus nompapola polumakona mpaka ri ngata Derbe pade ri ngata Listra. Ri setu naria samba'a topomparasaya i Pue Yesus nosanga ka i Timotius. Indona samba'a to Yahudi to nomparasaya wo'umo ka i Pue Yesus. Aga umana tau to Yunani. 2 Timotius nibila pura-pura topomparasaya ri ngata Listra bo Ikonium. 3 Paulus madota mangala i Timotius mantuki i'a. Jadi i'a nombasuna i Timotius ala Timotius etu mamala ratarima tau-tau to Yahudi ri bagia etu, sabana ninjani ira pura-pura uma i Timotius samba'a tau to Yunani to da'a nombasuna ana ira. 4 Naopu Timotius nisuna Paulus, nalaimo ira romba'a. Ri pura-pura ngata to nikalau ira nipapola ira ka topomparasaya i Pue Yesus kabotu nu polibu suro-suro ante topanggeniaka-topanggeniaka ntanina ri ngata Yerusalem. Nipatuduki ira ka topomparasaya etu ala ira pura-pura kana mantuki atura-atura to nipakatantu etu. 5 Jadi iwetumo pomparasaya topomparasaya i Pue Yesus nipakaroso, pade nantambai eo nantambai kadea ntau nomparasaya. 6 Nosa Nagasa nu Alatala da'a nompaloga Paulus ante i Silas mompatolele Tesa nu Alatala ri Propinsi Asia. Jadi ira nompapola polumako ira mpaka ri Bagia Frigia bo Galatia ri Propinsi Galatia. 7 Tempo ira narata ri kabingga Bagia Misia, nipembai ira mapola mesua ri Propinsi Bitinia. Tapi Nosa Nagasa i Pue Yesus nombatagi ira mapola. 8 Jadi ira nolumako nombaliunaka Bagia Misia sampe narata ri ngata Troas ri wiwi ntasi. 9 Wengina etu ri ngata Troas nikita i Paulus sangaya panggita. riara panggitana etu nikitana samba'a tau nggari Propinsi Makedonia nenggore ri ngayona pade nerapi mpu'u-mpu'u ka i Paulus, "Kamaimo mpaka ri Makedonia mantulungi kami ri se'i!" 10 Jadi naopu i Paulus nanggita panggita etu, kami nompakasadia malau mpaka ri Propinsi Makedonia etu, sabana nipekiri kami, mpu'u-mpu'u Alatala nompakau kami mompatolele Kareba Belo etu ka tau-tau ri setu. 11 Kami nompalasi ngata Troas pade nesawi sakaya bete napola mpaka ri Lewuto Samotrake. Pade eo to nailena napolamo kami sampe narata ri ngata Neapolis ri Propinsi Makedonia. 12 Nggari setu nantendemo kami mpaka ri ngata Filipi, etumo ngata natolele ri Propinsi Makedonia. Ngata Filipi etu ngata to nipeto'o ntau narata nggari ngata Roma. Ri setu kami neto'o bara sakuya mbengi kasaena. 13 Ri Eo Mpenonto kami nalau ri wiwi ue bete ri sawaliku nu ngata sabana nipekiri kami ri setu bara maria peto'o raposambaya nto Yahudi. Pade nekatoko kami notesa-tesa ante besi-besi to nasiromu ri peto'o etu. 14 Ri tatongo ira etu naria samba'a besi nggari ngata Tiatira nosanga ka i Lidia. I'a topobalu buya nakamumu to nasuli mpu'u olina, pade i'a samba'a tau to nombasomba Alatala. Tempo i'a nangepe tesa i Paulus, i Pue nombabuka pekirina sampe i'a nantarima pepatuduki etu. 15 Naopu etu i Lidia pade ira sanjapo nidiu ewa tandaina ira topomparasaya i Pue Yesus. Naopu ira nidiu, i Lidia nombagaga kami malau meto'o ri sapona. Niulina, "Nikita komi aku e'i nomparasayamo i Pue. Jadi we'i-we'i kamaimo komi ri sapoku." I'a mpu'u-mpu'u nerapi sampe kami nalau neto'o ri ja'ina. 16 Naria saeo, tempo kami nalau ri peto'o posambaya etu, niposintomu kami samba'a batua besi. I'a nipesua seta to namala nombaboto kajadia-kajadia to marata. Ante mombaboto rasi ntau besi etu nombarata nadea saro ka madikana. 17 Besi etu nantuki i Paulus bo kami ante nongare, "Tau-tau e'i batua nu Alatala to nabete kuasana! Ira narata nompatolele ka komi iwenu komi mamala rapakasalama!" 18 Bara sakuya mbengi kasaena besi etu aga nongare-ngare iwetumo. Kaopuna i Paulus mana namala nosabara mangepe i'a, sampe i'a neili ntaliku pade nanguli ka seta to naria riara besi etu, "Ante sanga Yesus Kristus, palaimo iko nggari ja'i besi etu!" Tempona etu wo'u nalaimo seta nggari ja'i besi etu. 19 Sangga ninjani madika nu besi etu mana ria loga ira mombarata doi, nisoko iramo i Paulus bo i Silas. Pade ira romba'a etu niumbunjai nikeni ira ri ja'i topoparenta-topoparenta to naria ri potomu. 20 Tempo ira nantingayo topoparenta-topoparenta ri setu, nangulimo madika nu besi etu, "Tau-tau e'i tau to Yahudi to nompakagado ngata e'i. 21 Ira nompatuduki tau mompowia ada to nitagi atura-aturata to Roma. Da'a mamala ratukita ada etu!" 22 Tau dea ri potomu etu wo'u nanggarau i Paulus bo i Silas. Pade topoparenta-topoparenta etu nompakau tau nombaseri pakea nggari koro romba'a suro etu pade nombaporo ira. 23 Naopu niporo mpakaju'a-ju'a, ira nisuaraka riara tarunggu. Pade balengga tarunggu nipakau manggatono ira mpakabelo-belo. 24 Jadi i'a nombasuaraka ira ri tombi tarunggu riarana mpu'u. Pade kada ira nibalanggu ante kayu. 25 Kira-kira natongo wengina i Paulus bo i Silas nosambaya pade nodade nantoiya Alatala. Tau-tau ntanina to nitarunggu ri setu wo'u nangepe ira nodade. 26 Sampegoli naratamo lingu bete nombagagoya sapo tarunggu etu sampe ri pondasina. Pura-pura pewobo natibea pade pura-pura pompo'u ntau riara tarunggu etu nawonju sanggani. 27 Nembangumo balengga tarunggu etu. Sangga nikitana pura-pura pewobo natebea, nibituna gumana ala mompatesi korona, sabana nipekirina tau-tau riara tarunggu etu nalai puramo. 28 Tapi nongaremo i Paulus ante suara namangga, "Ne'e mompatesi koromu! Kami kana naria pura ri se'i!" 29 Nangepe etu niperapi balengga tarunggu etu poindo pade nangowamo i'a nalau mpaka riara tarunggu. Ante nokalalete i'a nekadede ri ngayo i Paulus bo i Silas. 30 Pade nikenina ira mpaka ri sawalikuna pade niulina, "Nuapa masipato kupowia ala aku rapakasalama?" 31 Nesonomo i Paulus ante i Silas, "Parasayamo i Pue Yesus, pade komi kana rapakasalama ante pura-pura tau neto'o riara njapo komi." 32 Pade nitarangga i Paulus bo i Silas tesa i Pue ka balengga tarunggu etu, pade ka ira pura-pura saongu njapo. 33 Ri tongo wengi etu wo'u balengga tarunggu etu nanggeni ira pade nompegasa pura-pura bela ira. Naopu etu i'a ante pura-pura tau riara njapona etu kaliu-liu nidiu ewa tandaina ira topomparasaya i Pue Yesus. 34 Naopu etu nikeninamo i Paulus ante i Silas nalau ri sapona, pade ri setu nipakonina ira. Nadamba mpu'u rara ira sanjapo sabana ira nomparasayamo ka Alatala. Naopu etu i Paulus bo i Silas nikeni bali riara tarunggu. 35 Naeompadondona topoparenta-topoparenta ngata Filipi etu nompakau polisi malau mpaka ri tarunggu mompapola ka balengga tarunggu parenta iwe'i: "Kabasakamo tau romba'a to nitarunggu yowi etu." 36 Nangepe etu nangulimo balengga tarunggu etu ka i Paulus, "Topoparenta-topoparenta ngata nomparenta aku mombakabasaka komi. We'i-we'i mamala komi malai. Pakabelo-belo ri jala." 37 Tapi nangulimo i Paulus ka polisi to narata ri setu, "Kami e'i todea Roma! Naupa iwetu da'apa nitangara kami niporo ri ngayo ntau dea, pade nisuaraka riara tarunggu! Pade we'i-we'i topoparenta-topoparenta mompakau kami malau nggalino! Kami da'a madota! Ira mboto kana marata mompopesuwu kami!" 38 Polisi-polisi etu nompakilu tesa etu ka topoparenta-topoparenta ngata. Sangga nangepe i Paulus bo i Silas etu todea Roma, naekamo ira. 39 Pade nalaumo ira mboto nerapi ampu ri ja'i Paulus bo i Silas. Naopu etu nikeni ira romba'a suro etu ri sawalikuna, pade niperapi ira, "Aginamo komi malai nggari ngata e'i." 40 Jadi nalaimo Paulus bo i Silas nompalasi tarunggu etu nalau mpaka ri sapo i Lidia. Ri setu ira nosintomu ante topomparasaya-topomparasaya i Pue Yesus pade nompakaroo rara ira. Naopu etu nalaimo ira nggari ngata Filipi etu.
1 Paulus bo i Silas nompapola polumako ira noliu ri ngata Amfipolis pade ngata Apolonia sampe narata ri ngata Tesalonika. Ri setu naria sapo mpodade nto Yahudi. 2 Jadi nalaumo i Paulus ri sapo mpodade to Yahudi etu ewa kabiasana nosinjula pekiri ante tau-tau to nasiromu ri setu. Toluntipa nosintuki-ntuki tempo Eo Mpenonto i'a notesa ka ira ewa isi Buku Nagasa. 3 Nipakanotona ka ira batuana isi buku etu. Nitaranggana ka ira, "Nantuki Buku Nagasa e'i Magau to Mompakasalama to nijanji Alatala paraluu rapandasa sampe mamate, tapi I'a kana matuwu bali nggari kamatena. Yesus to nitesaku ka komi, I'amo Magau to Mompakasalama etu." 4 Nangepe tesa Paulus etu naria bara sakuya mba'a tau to Yahudi nomparasaya tesa etu pade nosabingga ka i Paulus bo i Silas. Iwetu wo'u nadea tau to Yunani to naeka ka Alatala, pade nadea wo'u besi-besi to noanggana nggari ngata etu. 5 Tapi tempo tau-tau to Yahudi to da'a nomparasaya Yesus nanggita etu nasiriatimo ira ri ja'i Paulus bo i Silas. Jadi ira nompokio tau-tau topenjayo-njayo ri potomu nowia kanano pade nompakagado riara ngata etu. Naratamo ira ri sapo i Yason to nipeto'o i Paulus bo i Silas, pade nisuaki ira sapo etu ala manggeni i Paulus bo i Silas mesuwu mantingayo tau dea etu. 6 Tapi da'a nirata ira i Paulus bo i Silas ri setu. Jadi niumbunjai iramo i Yason bo bara sakuya mba'a tau topomparasaya ntanina ri setu mpaka ri ngayo topoparenta-topoparenta ngata etu. Nongaremo ira, "Paulus bo i Silas etu nompakagado tau ri umba-umba ri dunia! We'i-we'i ira narata nompakagado ngatata e'i wo'u! 7 Pade i Yason e'i nantarima ira etu ri sapona. Ira e'i puramo nombaliunaka atura-atura to nipakatantu Magauta Kaisar Roma, sabana niuli ira danaria wo'upa magau ntanina to nosanga ka Yesus." 8 Sangga nangepe tesa-tesa etu nagado mpu'umo rara ntodea bo topoparenta-topoparenta ngata. 9 Kaopuna Yason bo roa-roana topomparasaya etu kana mombawai doi pejami ka topoparenta-topoparenta ngata. Naopu etu pade ira nikabasakamo. 10 Wengina etu nangulimo topomparasaya-topomparasaya ri ngata Tesalonika ka i Paulus bo i Silas, "Aginamo komi malau mpaka ri ngata Berea." Jadi nalaumo i Paulus bo i Silas. Narata ri setu nalaumo ira nesua ri sapo mpodade nto Yahudi. 11 Tau-tau to Yahudi ri ngata etu nabelo rara ira, da'a ewa tau to Yahudi ri ngata Tesalonika, sabana ira ri ngata Berea nantarima Kareba Yesus etu ante mpu'u-mpu'u rara ira. Pade eo-eo ira nomparesa Buku Nagasa ala manggita kakonona tesa i Paulus etu ka ira. 12 Nadea nggari tatongo ira to nomparasaya Yesus, pade da'a aga sakedi tau-tau to Yunani to noanggana nomparasaya wo'u, nabeloka besi nabeloka langgai. 13 Tapi tempo tau-tau to Yahudi ri ngata Tesalonika nangepe i Paulus nompatolele Tesa nu Alatala ri ngata Berea, naratamo ira ri ngata Berea pade ri setu wo'u nompowia gado pade nompakapane rara ntau dea. 14 Jadi topomparasaya-topomparasaya ri ngata Berea etu nasalisa nanggeni i Paulus mesuwu nggari ngata Berea mpaka ri wiwi ntalinti. Tapi i Silas ante i Timotius daneto'o ri ngata Berea etu. 15 Tau-tau to nanggeni Paulus etu nalau mpasanggani-nggani ante i'a sampe narata ri ngata Atena. Naopu etu natinggulimo ira mpaka ri ngata Berea ante nanggeni tewai i Paulus ka i Silas bo i Timotius ala ira masalisa mombatuntumaka i'a ri ngata Atena. 16 Tempo i Paulus nompopea i Silas bo i Timotius ri ngata Atena, nasusa mpu'u rarana nanggita kadea nu parantau-parantau to nipesomba nto Atena etu. 17 Etumo sabana i'a nosinjula pekiri ri sapo mpodade ante tau-tau to Yahudi pade tau-tau ntanina to nombasomba Alatala. Iwetu wo'u ri potomu, eo-eo i'a nosinjula pekiri ante isema-sema to naria ri setu. 18 Ri ngata Atena etu naria wo'u tau-tau napande to nantuki pepatuduki nu Epikuros pade pepatuduki to nosanga ka Stoa. Bara sakuya mba'a guru rongele pepatuduki etu nosinjono wo'u ante Paulus. Ira nanguli, "Nuapa wo'u ninjani ntau ya'a! Pangginjanina aga sakedi lau, tapi nadea wo'u tesana!" Pade naria ira ntanina to nanguli, "Bara i'a madota mompatuduki ka kita ewa wiata-wiata nggari ngata ntanina!" Niuli ira iwetu sabana i Paulus notesa ka ira ewa Yesus, pade ewa manusia natuwu bali nggari kamatena. 19 Jadi ira nanggeni i Paulus mpaka ri polibu ri Bulu Areopagus. Narata ri setu nangulimo ira ka i'a, "Kami e'i madota mangepe pepatuduki nabou to nipatolelemu etu 20 sabana komi mompatolele pepatuduki nontani nggari ntanina to niepe nu talinga kami mboto. Kami madota mangginjani batuana." 21 Niuli ira iwetu sabana pura-pura to Atena pade tau-tau ntanina to neto'o ri ngata Atena etu, aga madota mantesa atau mangepe nuapa-nuapa to nabouna. 22 Nangepe tesa ira etu nekanggoremo i Paulus ri ngayo topolibu ri Bulu Areopagus etu pade niulina, "Tau-tau to Atena! Nikitaku komi mpu'u-mpu'u topoagama, 23 sabana tempo aku nenjayo-njayo riara ngata komi e'i nikitaku peto'o-peto'o pesomba komi. Pade nirataku saongu peto'o pesomba to naria nitulisi, 'Peto'o Pesomba ka Pue to Da'a Ninjanita Sangana.' Jadi Pue to nipesomba komi naupa sangana da'a ninjani komi, Pue etumo to nipatoleleku ka komi ri se'i. 24 Pue Alatala nompajadi dunia e'i bo pura-pura isina. I'amo Pue langi bo dunia. Pade I'a da'a neto'o ri sapo mpesomba to nikawia nu manusia. 25 I'a da'a wo'u nomparaluu ratulungi nu manusia, sabana I'amo to nombawai katuwu bo nosa pade mpengaya-ngaya ka pura-pura manusia. 26 Nggari samba'a manusia nipajadina pura-pura manusia ri dunia ala ira momuli meto'o ri njumaongu dunia e'i. Nipakatantuna nggari pamulana panta'a tana rapeto'o butu-butu ngata, pade nipakatantuna kasaena ira matuwu ri tana etu. 27 Nikawia Alatala iwetu ala manusia mopaelo I'a. Jadi rapana ane ira mopaelo I'a, ira kana mosirata ka I'a. Tapi kakonona, da'a paraluu mopaelo I'a masae-sae, sabana I'a namosu ante kita samba'a bo samba'a. 28 Ewa niuli ntau, 'Kita natuwu pade nonggaya pade naria ri dunia e'i sabana kuasa Alatala.' Nasimbayu ante etu wo'u to niuli bara sakuya mba'a topande mowia dulua nggaolu nggari ngata komi. Ira nanguli, 'Kita pura-pura e'i anana wo'u.' 29 Jadi sampesuwu-sampesuwu, kita e'i ana-ana nu Alatala. Sabana etu da'a mamala kita mompakasimbayu Alatala ante parantau-parantau to nipowia nggari bulawa bara salaka bara watu nantuki kapande nu manusia. 30 Alatala da'a nombasuku manusia nokolu tempo ira nombasomba parantau-parantau ewa etu sabana da'apa ninjani ira etu nasala. Tapi nompamula we'i-we'i I'a nompakau pura-pura manusia ri umba-umba ri dunia kana majea nggari pokainggu ira etu. 31 Kita kana majea sabana naria saongu tempo banepia to nipakatantunamo pura-pura manusia ri dunia e'i kana ratangara ante nanoa rara. Manusia kana ratangara samba'a tau to nipelisi nu Alatala, etumo Yesus. Pade ala mompakanoto I'amo Topotangara to nipelisina etu, Alatala nompakatuwu bali Yesus nggari kamatena." 32 Tempo tau-tau etu nangepe tesa tomate natuwu bali nggari kamatena, naria nggari tatongo ira nompongiri i Paulus sabana da'a niparasaya ira tomate mamala rapakatuwu bali. Tapi naria wo'u to nanguli, "Kami damadota wo'u mangepe tesamu etu." 33 Naopu etu nalaimo i Paulus nompalasi polibu etu. 34 Tapi naria tau nggari tatongo ira etu nosabingga ka i Paulus pade nomparasaya Yesus. Samba'a nggari ira i Dionisius, samba'a nggari topolibu to nasiromu ri Bulu Areopagus etu. Pade naria wo'u samba'a besi nosanga ka i Damaris, pade bara sakuya mba'a tau ntanina.
1 Naopu etu i Paulus nompalasi ngata Atena pade nalaumo i'a mpaka ri ngata Korintus. 2 Ri setu i'a nosintomu ante samba'a tau to Yahudi nggari Propinsi Pontus to nosanga ka Akwila. Akwila ante rongona i Priskila lako narata ri ngata Korintus nggari Propinsi Italia. Ira nolinja mpaka ri Korintus sabana i Klaudius, Magau Roma, nomparenta pura-pura tau to Yahudi kana mompalasi ngata Roma ri Propinsi Italia etu. Jadi nalaumo i Paulus nantunggai ira romba'a, 3 pade i'a neto'o ri ja'i ira sabana mata mpopaelo i Paulus nasimbayu ante mata mpopaelo ira, etumo nowia tenda. Ira tolumba'a nokarajaa mpasanggani-nggani. 4 Pade ri Eo-eo Mpenonto nalaumo i Paulus ri sapo mpodade nto Yahudi notesa nosinjula pekiri ante tau-tau nasiromu ri setu, nabeloka tau to Yahudi, nabeloka tau to Yunani. I'a nompasimbuku manggeni ira momparasaya i Pue Yesus. 5 Sangga naratapa i Silas bo i Timotius nggari Propinsi Makedonia, nikabasaka i Paulusmo panggawiana nowia tenda etu, pade eo-eo i'a nompatolele Tesa nu Alatala ka tau to Yahudi. Nipatudukina ka ira, "Yesusmo Magau to Mompakasalama to nijanji Alatala." 6 Tapi tau to Yahudi etu batena nangewa Paulus pade nanguli sinja'i i'a. Jadi i Paulus nombawurenggenaka pakeana ante nanguli, "Salamu muposala mboto! Etu da'a salaku! Nompamula we'i-we'i aku malau mompatolele Tesa nu Alatala ka tau-tau da'a to Yahudi!" 7 Naopu etu i Paulus nompalasi ira pade nalau neto'o ri sapo ri sinjori nu sapo mpodade etu. Pue njapo etu nosanga ka i Titius Yustus. I'a da'a to Yahudi tapi i'a nomparasaya Alatala. 8 Topanggeniaka sapo mpodade etu to nosanga ka i Krispus ante pura-pura ira saongu njapo nomparasaya i Pue Yesus. Pade nadea tau-tau to Korintus ntanina nangepe kareba to nikeni i Paulus etu, pade ira wo'u nomparasaya pade nidiu ewa tandaina ira topomparasaya i Pue Yesus. 9 Naria sambengi i Paulus nanggita saongu panggita. Riara mpanggitana etu i Pue nanguli ka i'a, "Ne'e maeka! Ne'e menonto mompatolele Tesaku, 10 sabana damadeapa tau ri ngata e'i kana momparasaya Aku. Ne'e maeka, sabana Aku mosanggani-nggani ante iko. Da'a ria samba'a tau mamala mowia anu maja'a ri ja'imu." 11 Sabana etu i Paulus neto'o ri ngata Korintus sampae santongo kasaena pade nompatuduki Tesa nu Alatala ka tau-tau ri setu. 12 Tempo i Galio najadi gubernur ri Propinsi Akhaya etu, tau-tau to Yahudi nosintuwu nangewa i Paulus. I'a nisoko ira pade nikeni ri ngayo Gubernur Galio etu ala ratangara. 13 Ira nompangadu i'a iwe'i: "Tau e'i nanggeni tau dea mombasomba Alatala ante pepatuduki nontani nggari Atura-atura agama to nipapola i Musa ka kami!" 14 Iwetu i Paulus madota mesono, nangulimo Gubernur Galio, "E, tau-tau to Yahudi! Ane to nipangadu komi e'i saongu peliunaka atura Roma bara saongu kaja'ana, masipato aku mosabara mangepe tesa pepangadu komi e'i. 15 Tapi e'i aga posisala pombarata ewa tesa-tesa pade sanga-sanga pade atura-atura agama komi mboto! Etu kana rapasiayu komi mboto. Aku e'i da'a madota mombatangara parakara ewa e'i!" 16 Naopu etu Gubernur Galio nompopalai ira nggari peto'o mpotangara etu. 17 Naopu nesuwu nggari setu todea etu nanjoko topanggeniaka sapo mpodade nto Yahudi to nosanga ka i Sostenes, pade i'a niboba ira ri ngayo peto'o mpotangara. Tapi Gubernur Galio da'a ntoto nipariara nta'ina powia ira etu. 18 Naopu etu danasaepa i Paulus neto'o ri ngata Korintus. Naopu etu nopasabimo i'a ka topomparasaya-topomparasaya ri setu pade nosumombamo i'a mpaka ri Propinsi Siria nosanggani-nggani ante Priskila bo Akwila. Da'apa ira nosumomba, ri ngata Kengkrea, i Paulus nombagari wo'ona to nipalambana najadi nandoe nantuki ada nto Yahudi, sabana naria pojanjina ri ngayo i Alatala. 19 Riara posumomba ira etu ira nesai ri ngata Efesus. Ri setu i Paulus nompalasi ira Priskila bo Akwila pade nalaumo i'a njamba'ana nesua ri sapo mpodade notesa nosinjula pekiri ante tau-tau to Yahudi ri setu. 20 Ira to Yahudi nerapi ala i'a meto'o masae ante ira, tapi i'a da'a madota. 21 Nopasabimo i'a ka ira pade nanguli, "Ane rapodota Alatala, aku kana manjili wo'u wemai." Naopu notesa iwetu nosumombamo i Paulus nggari ngata Efesus sampe narata ri ngata Kaisarea. 22 Sangga naratapa ri ngata Kaisarea, nantendemo i'a mpaka ri ngata Yerusalem ala mombawai tabe ka topomparasaya ri setu. Naopu etu pade notuamo i'a mpaka ri ngata Antiokhia. 23 Naopu i'a neto'o bara sakuya kasaena ri setu, nalau wo'umo i'a mpaka ri Bagia Galatia bo Frigia ala mompakaroso pomparasaya topomparasaya i Pue Yesus ri setu. 24 Tempo Priskila bo Akwila naria ri Efesus naratamo samba'a tau to Yahudi ri setu nggari ngata Aleksandria ri tana Masir, sangana Apolos. I'a samba'a tau napande notesa, pade i'a mpu'u-mpu'u nangginjani isi Buku Nagasa. 25 I'a nipatuduki ntau tesa i Pue Yesus. Jadi tempo i'a narata ri ngata Efesus notesamo i'a ante rarana newoya-woya. Nipatudukina ka tau-tau tesa Yesus etu ante nanoto, naupa to ninjanina nggari tesa etu aga pepatuduki Yohanes Topediu. 26 Ante kabiana Apolos nompamula notesa ri sapo mpodade nto Yahudi. Tempo i Priskila bo Akwila nangepe i'a, ira nompakeni i'a mpaka ri sapo ira. Pade ri setu ira notarangga mpakanoto ka i'a tesa Alatala anu da'apa ninjanina. 27 Naopu nggari setu Apolos nompakatantu malau mpaka ri Propinsi Akhaya. Jadi topomparasaya i Pue Yesus ri ngata Efesus etu nantulungi i'a ante nantulisi sura ka topomparasaya-topomparasaya ri Akhaya ala ira madota mantarima Apolos ri setu. Jadi tempo Apolos narata ri Propinsi Akhaya etu, pepatudukina mpu'u-mpu'u nantulungi tau-tau to najadi topomparasaya i Pue Yesus nggari towe belo nu Alatala. 28 Ante tesana to nakuasa Apolos nombadagi pura-pura tesa to Yahudi ri ngayo todea. Nipakanotona ka ira nggari Buku Nagasa, Yesusmo Magau to Mompakasalama to nijanji Alatala.
1 Tempo Apolos danaria ri ngata Korintus, i Paulus nompesayo ngata-ngata ri buluna ri Bagia Galatia bo Frigia, pade naopu etu naratamo i'a ri ngata Efesus. Ri setu i'a nosintomu ante bara sakuya mba'a topomparasaya i Pue Yesus, 2 pade nekutanamo i'a ka ira, "Tempo komi nomparasaya i Pue Yesus komi nipesua Nosa Nagasa nu Alatala?" Nesonomo ira, "Da'apa. Da'apa niepe kami nariamo Nosa Nagasa nu Alatala etu." 3 Pade nekutana wo'umo i Paulus, "Ane iwetu, pepatuduki isema to nituki komi tempo komi nidiu?" Nesono ira, "Pepatuduki to nipatolele Yohanes." 4 Pade nangulimo i Paulus, "Yohanes etu nombadiu tau ewa tandaina najeamo ira nggari silaka-silaka ira. Pade i'a wo'u nompatuduki ka tau-tau to Yahudi ira kana momparasaya samba'a tau to marata ri purina, etumo Yesus." 5 Tempona ira nangepe tesa Paulus etu, ira to Efesus nidiu wo'u ante sanga i Pue Yesus. 6 Paulus nombadika palena ri balengga ira pade kaliu-liu nana'umo Nosa Nagasa nu Alatala nesua ri ja'i ira. Pade nompamulamo ira notesa ante basa-basa to nopu'u nggari ja'i Nosa Nagasa nu Alatala pade nompasimbayu tesa nggari ja'i Alatala. 7 Kadeana tau-tau etu, kira-kira sampulu romba'a. 8 Tempona Paulus naria ri ngata Efesus, riara tolumbula kasaena i'a naoso nalau ri sapo mpodade nto Yahudi. Ri setu ante kabiana i'a notesa nosinjula pekiri ante ira ala manggeni ira momparasaya Yesus Magau to Mompakasalama to nijanji Alatala. 9 Tapi bara sakuya mba'a tau ri tatongo ira etu nako'o rara pade da'a madota momparasaya. Ri ngayo ntau pura-pura to nasiromu ri setu, ira nanjalai pepatuduki Yesus etu. Etumo sabana i Paulus nompalasi ira, pade nipakenina tau-tau to nomparasaya i Pue Yesus nalau mpaka ri sapo mpokulia i Tiranus. Ri setu eo-eo ira nosinjula pekiri ante tau-tau. 10 Etumo to nipowia i Paulus rompae kasaena, sampe pura-pura tau to neto'o ri Propinsi Asia nangepe Tesa nu Pue, nabeloka tau to Yahudi nabeloka tau da'a to Yahudi. 11 Alatala nombawai kuasa ka i Paulus nompowia kabaraka-kabaraka to nontani nggari ntanina, 12 sampe nau aga pasapu bara buya to nipakena nikeni ka tau-tau naju'a, ju'a ira etu nabelo, pade seta-seta to nesua riara ntau nesuwu nggari ja'i ira. 13 - 14 Ri tempo etu naria bara sakuya mba'a sando to Yahudi to nalau ri umba-umba nompopalai seta nggari ja'i ntau. To nompowia etu iramo pitumba'a langgai, ana nu samba'a balengga topanggeni agama Yahudi to nosanga ka i Skewa. Ira nompembai mompake sanga i Pue Yesus mompopalai seta-seta nggari ja'i ntau. Niuli ira, "Ante sanga Yesus to nipatolele Paulus etu kami mompopalai iko!" 15 Tapi nesonomo seta etu, "Ane Yesus, ninjaniku I'a, pade Paulus wo'u ninjanikumo. Tapi iko e'i, da'a ria batuana!" 16 Pade nekawantumo tau nipesua nu seta etu nombarumpa nombabaga ira pitumba'a sampe ira pura-pura nidagina. Ira nangowa nalai nggari sapo ntau etu ante bela bo nelaya, sabana baju bo poruka ira etu niseri-seri ntau etu nggari koro ira papitu etu. 17 Pura-pura tau to neto'o ri ngata Efesus nangepe kajadia etu, nabeloka tau-tau to Yahudi, nabeloka tau-tau da'a to Yahudi. Sangga nangepe etu nogumaa puramo ira, pade sanga i Pue Yesus nantambai nibila pade nitoiya ira. 18 Nadea mba'a nggari ja'i ira to nomparasaya i Pue Yesus etu nangaku ri ngayo ntodea ewa powia-powia ira to naja'ana. 19 Pade naria wo'u to nabiasa nompake pangginjani to naja'ana nompasiromu buku-buku ira pade etu nipalabu ira ri ngayo ntodea. Nibila ira oli nu buku etu, kira-kira limampulu njobu mpeka doi salaka kadeana. 20 Jadi nggari kajadia-kajadia nabaraka ewa etu, nantambai eona nantambai kadea ntau nangepe Tesa nu Pue, pade nantambai kadea ntau to nompangala Tesa etu. 21 Naopu kajadia-kajadia etu, Paulus nonia malau mpaka ri Propinsi Makedonia ante Propinsi Akhaya, pade naopu etu patujuna mapola mpaka ri ngata Yerusalem. Niulina ka roana, "Maopu aku mpaka ri ngata Yerusalem, aku kana malau mpaka ri ngata Roma wo'u." 22 Jadi nipakauna romba'a roana sampokarajaa mokolu ka i'a mpaka ri Propinsi Makedonia. Sanga ira romba'a, etumo o Timotius pade Erastus. Tapi i Paulus mboto daneto'o bara sakuya mbengipa kasaena ri Propinsi Asia. 23 Kira-kira ri tempona etu wo'u, neumbamo kakanano to nabetena ri ngata Efesus nggari pepatuduki i Pue Yesus. Iwe'imo tesana. 24 Ri ngata etu naria samba'a pande nu salaka to nosanga ka i Demetrius. Panggawiana mowia sapo-sapo nggedi nolenje sapo mpepue ka wiata Artemis. Nggari panggawiana etu nadea mpu'u asele to nirata i Demetrius pade roa-roana. 25 I'a nompasiromu pura-pura roana sampokarajaa ante pande-pande salaka ntanina to nowia sapo-sapo nggedi wiata Artemis, pade niulina ka ira, "Sampesuwu-sampesuwu, ninjani komi mboto nggari panggawiata e'i pade kita matuwu. 26 We'i-we'i nikita komi pade niepe komi mbotomo nuapa nipowia i Paulus etu! I'a nanguli ka todea parantau-parantau wiata to nipowia nu pale manusia da'a nakono wiata. Pade nadeamo tau nomparasaya pepatudukina etu, da'a aga ri ngata Efesus e'i, tapi ntora pura-pura Propinsi Asia wo'u! 27 Jadi sampesuwu-sampesuwu, to nipokaekaku panggawiata e'i rasalai ntau. Da'a aga etu, tapi mamala sampe sapo mpepue wiata Artemis to nabetena etu rareke ntau mana ria gunana. Pade kabetena wiata Artemis mboto etu to nipesomba pura-pura tau ri Asia pade ri njumaongu dunia mana ria!" 28 Sangga nangepe tesa i Demetrius etu, nabilisi mpu'umo rara ira pura-pura, sampe ira nongare-ngare, "Matuwu Artemis, wiatata to Efesus!" 29 Pade natolelemo kakanano etu sampe ri njumaongu ngata Efesus. Todea etu nanjoko i Gayus bo Aristarkhus, etumo romba'a roa sampolumako ante i Paulus nggari Propinsi Makedonia, pade ira niumbunjai ntodea nalau nasalisa nesua ri lalowo bete ngata etu. 30 Paulus madota mesua mantingayo todea ri setu tapi topomparasaya-topomparasaya i Pue Yesus da'a nompaloga i'a mesua. 31 Wa'a wo'u bara sakuya mba'a topoparenta to noanggana nggari Propinsi Asia to nowega ante Paulus. Ira nompakau tau nalau manguli ka i Paulus, "Ne'e mpu'u mesua mantingayo todea riara nu kasiromu etu!" 32 Tempo etu nagado mpu'umo tau dea to nasiromu ri setu. Naria to nongare iwe'i, naria wo'u to nongare iwetu, sabana nadea nggari ira etu da'a ninjani nuapa patuju ira nasiromu ri setu. 33 Nantuki pombarata sabagia nggari todea etu, kasiromu ira etu niposabana samba'a to Yahudi nosanga ka Aleksander, sabana i'amo to nipopokolu nu to Yahudi ri ngayo todea. Aleksander etu nombawiataka palena, tandaina i'a madota motesa manjaliku korona ka todea. 34 Tapi iwetu ira nanggita i'a etu samba'a to Yahudi, nongaremo ira mpasanggani-nggani rongu jaa kasaena, "Matuwu Artemis, wiatata to Efesus!" 35 Kaopuna juru tulisi ngata etu namala nompopondodo tau dea etu. Nangulimo i'a ka ira, "Tau-tau to Efesus, ninjani ntau pura-pura kita to Efesus e'i to nompiara sapo mpepue wiata Artemis bo watu nakarampua to nanawu nggari langi! 36 Da'a ria samba'a to nombabali etu! Sabana etu kuperapi ka komi, pekalino puramo! Ne'epa rapowia komi sangele ante da'apa nompekiri asele nu powia etu! 37 Tau-tau e'i nikeni komi pura-pura ri se'i, naupa ira da'a nangangga nuapa-nuapa nggari sapo mpepue wiatata Artemis, pade ira da'a wo'u nompakakedi sanga Artemis etu. 38 Ane i Demetrius ante roa sampokarajaana etu maria tesa pepangadu ira ka samba'a tau, aginapa ira manggeni parakara etu ri ngayo ntopotangara. Potangara natebea ri tempo to natantuna, pade topotangara-topotangara naria nepopea. 39 Pade ane danariapa sangaya ntanina rapekutana komi, etu kana rapakaopu ri ngayo polibu ntodea to nipakatantu nu pomarenta. 40 Sabana nuapa najadi eo e'i mamala mompakandasa kita pura-pura! Kita mamala rasangga nu pomarenta Roma tau topeewa, sabana da'a ria kamba saongu alasa to mamala raulita mompakakono kakanano e'i!" 41 Naopu juru tulisi nanguli etu pura-pura, nipakauna tau dea etu manjili.
1 Sangga nalinomo kakanano ri ngata Efesus etu, Paulus nompasiromu todea topomparasaya pade notesamo i'a nompakaroso rara ira. Naopu etu nopasabimo i'a pade nalau nolumako mapola mpaka ri Propinsi Makedonia. 2 riara mpolumakona etu i'a nompesayo ngata-ngata ri Makedonia etu pade nompatuduki mompakaroso rara topomparasaya-topomparasaya ri setu. Naopu etu napolamo i'a mpaka ri Propinsi Akhaya, tana nto Yunani. 3 Tolumbula kasaena i'a neto'o ri setu. Naopu etu i'a nopatuju mesawi sakaya mpaka ri ngata Yerusalem ri Propinsi Siria. Tapi da'apa i'a nalai, naria kareba niepena to nanguli tau-tau to Yahudi ri setu nosintuwu mompatesi i'a. Jadi nipakatantuna manjili mantuki jala kabatana mombaliunaka Propinsi Makedonia. 4 Naria bara sakuya mba'a roa i Paulus to nosanggani-nggani ante i'a. Ira etumo, i Sopater ana i Pirus nggari ngata Berea, Aristarkhus bo i Sekundus tau to Tesalonika, pade i Gayus nggari ngata Derbe. Naria wo'u i Timotius, i Tikhikus bo i Trofimus, pura-pura tau nggari Propinsi Asia. 5 Ira pura-pura nokolu ka kami pade nompopea kami ri ngata Troas. 6 Naopu etu kami nantuki jala kabatana sampe ri ngata Filipi. Sangga naliupa Posusa Eo Bete Roti Da'a Nidika Ragi, nesawi sakayamo kami nggari ngata Filipi etu. Pade limambengi nggari setu kami nosintomu wo'u ante roa-roa kami etu ri ngata Troas. Pade neto'omo kami ri setu santipa kasaena. 7 Wengi eo Aka kami nasiromu nanggoni mpasanggani ante topomparasaya-topomparasaya ri ngata Troas. Paulus nompatuduki pade notesa sampe natongo wengina sabana patujuna naile mpadondo i'a manggaliwo. 8 Tombi nikasiromu kami etu ri tombi katolunjunjuna. Nadea poindo nitunju ri setu. 9 Naria samba'a kabilasa nosanga ka Eutikhus nekatoko ri tilalaba. Tempo Paulus notesa-tesa nasae, nangantu mpu'umo kabilasa etu sampe napisimo i'a ri tilalaba etu. Pade nanawumo i'a nggari tilalaba tombi katolunjunjuna etu mpaka ri tana. Tempo tau nana'u mangonggotaka i'a, namatemo i'a. 10 Tapi Paulus nana'u mpaka ri tambena pade niobona kabilasa etu, pade nikalipuina. Pade niuli Paulus ka tau-tau nantaguni tomate etu, "Ne'e masusa rara komi, natuwu balimo i'a." 11 Naopu etu nepone bali Paulus ri tombi kalangana ri kasiromu ira etu, pade nibagi-bagina roti pade nanggoni mpasanggani-nggani ante ira. Naopu nanggoni notesa wo'umo i'a ka topomparasaya-topomparasaya ri setu sampe naeo. Naopu etu nanggaliwomo i'a. 12 Kabilasa to namate nanawu etu natuwu balimo. I'a nikeni nu roana mpanjili, pade nadamba mpu'umo rara ira pura-pura. 13 Naopu etu nalaumo kami mpaka ri sakaya bete pade nosumomba nokolu mpaka ri ngata Asos mantomunaka i Paulus ri setu. Iwetu to nipakatantu i Paulus sabana i'a madota molumako mpaka gusa'a mantuki jala kabatana. 14 Sangga nosintomupa kami ante Paulus ri Asos, nesawi sakayamo i'a pade nosumomba kami pura-pura mpaka ri ngata Mitilene. 15 Nggari setu nosumomba wo'umo kami, pade eo to nailena naratamo kami ri ntoto Lewuto Khios. Pade to nailena wo'umo naratamo kami ri Lewuto Samos. Pade sambengipa naratamo kami ri ngata Miletus, kasampoa nu ngata Efesus. 16 Nggari pamula nu posumomba kami i Paulus nompakatantu mana mesai ri ngata Efesus ala ne'e malera ri Propinsi Asia. I'a nompari-mpari malau ala ane mamala, i'a kana maria ri ngata Yerusalem mantuki Posusa Eo Bete Pentakosta ri setu. 17 Nggari ngata Miletus Paulus nompakatu kareba mpaka ri ngata Efesus nompokio topanggeniaka-topanggeniaka topomparasaya ri setu marata mosintomu ante i'a ri ngata Miletus. 18 Sangga naratapa ira, nangulimo i Paulus ka ira, "Sampesuwu-sampesuwuku, ninjani komi iwenu katuwuku ri tatongo komi nggari karataku pamulana ri Propinsi Asia e'i sampe we'i-we'i. 19 Ante kaede nu raraku aku nobago ka i Pue ri se'i. Riara bagoku etu nadea ue mataku natiti pade nadea kapari nirasaiku sabana nia tau-tau to Yahudi madota mompatesi aku. 20 Ninjani komi aku e'i da'a natonggo raraku mompasimbayu ka komi nuapa to noguna ka komi. Aku batena nompatuduki komi, nabeloka ri ngayo ntodea, nabeloka ri sapo-sapo komi. 21 Aku batena nompopanjani ka komi pura-pura, nabeloka tau-tau to Yahudi, nabeloka tau-tau da'a to Yahudi, ala komi majea nggari silaka-silaka komi pade marata ri ja'i Alatala ante momparasaya Pueta, i Pue Yesus. 22 We'i-we'i aku malau mpaka ri ngata Yerusalem nantuki parenta Nosa Nagasa nu Alatala ka aku. Da'apa ninjaniku nuapa pura majadi ri ja'iku ri setu. 23 Aga to ninjaniku ri umba-umba ngata nikalauku Nosa Nagasa nompakanoto ka aku, aku kana rasoko rasuaraka riara tarunggu pade mombarasai kasusa bo kapari ri ngata Yerusalem. 24 Tapi mana kupotowe koroku e'i, bara mamate bara matuwu, kana kupajala bagoku to niparasaya i Pue Yesus ka aku sampe kaopu nggatuwuku. Bagoku etumo mompatolele Kareba Belo ewa towe belo nu Alatala. 25 Sampesuwu-sampesuwuku, we'i-we'i ninjaniku komi to nitunggaiku mompatolele tesa ewa Poparenta nu Alatala, mana banepia sanupa komi manggita aku e'i. 26 Sabana etu eo e'i ante mpu'u-mpu'u raraku aku manguli ka komi, ane rapana maria nggari ja'i komi banepia mawela pesuku Alatala sampe ri kasae-saena, etu sala komi mboto! Etu da'a salaku, 27 sabana aku da'a natonggo raraku mompatuduki ka komi pura-pura nia Alatala. Etu pura-pura nipatoleleku ka komi! 28 Komi kana mombajagai koro komi mboto. Pade jagai wo'u pura-pura anggota gareja to niparasaya Nosa Nagasa nu Alatala ka komi. Nasimbayu ewa topoewu nompiara bimba-bimbana komi kana mompiara todea nu Alatala etu to niolina ante lei nu Anana mboto. 29 Ninjaniku ane malaimo aku mompalasi komi kana marata tau-tau naja'a ri tatongo komi mompakasusa todea to nipiara komi nasimbayu ewa asulako marata mombabaga bimba. 30 Pade nggari tatongo komi wo'u kana meumba tau to mompatuduki to nadenggona. Ira mowia iwetu ala mompakeni topomparasaya i Pue Yesus malai nggari jala to nakonona malau mantuki jala ira to nasalana. 31 Sabana etu komi kana mainga. Toramo, sampesuwu-sampesuwuku, tolumpae kasaena, ante nadea ue mataku natiti, eo wengi aku da'a nenonto mompatuduki mompopainga komi samba'a bo samba'a. 32 Jadi we'i-we'i, sampesuwu-sampesuwuku, kujujumo katuwu komi riara mpale i Pue ala I'amo to mompiara komi. Pade kuuli ka komi, tukimo Tesa nu Alatala to nompakanoto towe belona ka kita. I'amo to namala mompakaroso pomparasaya komi pade mombawai ka komi rasi to nipakasadiana ka tau-tau to nipelisina majadi todeana. 33 Da'a ria sanggani aku naino ka doi bara pakea ntau. 34 Ninjani komi mbotomo iwenu ante paleku mboto aku nobago nompakagana to niparaluuku ante roa-roaku sampokarajaa. 35 Ante mpengele-ngele akala niwaiku jonjo ka komi iwenu kita kana mobago ala mantulungi roa-roata to nakasiasi. Kita kana mompariara nta'i tesa i Pue Yesus to nanguli: 'Neliupa kabelona ane kita mombawai pade kita mantarima.' " 36 Sangga naopupa Paulus notesa etu pura-pura, notimbakotumo i'a mpasanggani-nggani ante ira pura-pura nggari ngata Efesus pade i'a nosambaya. 37 Ira etu notumangi puramo, pade nikalipui ira i Paulus pade nieki ira i'a. 38 Mpu'u-mpu'u nalebuku rara ira sabana Paulus nanguli ka ira, "Mana banepia sanupa komi manggita aku e'i." Naopu etu ira nanggeni i Paulus sampe ri sakaya.
1 Ri setu nopasabimo kami ka topanggeniaka-topanggeniaka topomparasaya nggari ngata Efesus etu, pade nipalasi kamimo ira. Kami nesawi sakaya napola mpaka ri Lewuto Kos. Pade to nailena naratamo kami ri Lewuto Rodos. Nggari setu nosumomba wo'umo kami napola mpaka ri kasampoa sakaya ri ngata Patara. 2 Ri Patara kami nomposintomu sakaya malau mpaka ri Bagia Fenisia. Sakaya etumo nipesawi kami pade nalau nosumomba. 3 Nalaumo kami sampe nanggita Lewuto Siprus. Lewuto etu niliunaka kami ri sabingga njidi pade napolamo kami mpaka ri Bagia Siria. Nasampomo kami ri ngata Tirus sabana ri setumo pangulaya sakaya to nipesawi kami rata'uraka. 4 Ri ngata Tirus etu kami nalau nanggita topomparasaya i Pue Yesus pade neto'o ri ja'i ira santipa kasaena. Ante pekeniaka Nosa Nagasa ira nompopatora ka i Paulus, "Agina ne'e mantende mpaka ri ngata Yerusalem!" 5 Tapi sangga naganamo santipa kami neto'o ri setu nipalasi kamimo ira nalau nompapola polumako kami. Ira pura-pura nosanggani-nggani ante ana bo rongo ira nanggeni kami mpaka ri sawaliku ngata. Ri wiwi talinti setumo kami pura-pura notimbakotu nosambaya. 6 Naopu etu nopasabimo kami nesawi sakaya. Pade nanjilimo ira mpaka ri sapo ira pura-pura. 7 Nggari ngata Tirus etu nosumombamo kami sampe narata ri ngata Ptolemais. Ri setu kami nalau nombawai tabe ka topomparasaya i Pue Yesus. Pade neto'omo kami ante ira sambengi kasaena. 8 Naeompadondo nalai wo'umo kami sampe narata ri ngata Kaisarea. Narata ri setu nalaumo kami neto'o ri sapo i Filipus samba'a topanggeni Kareba Belo. I'a samba'a nggari tatongo ira pitumba'a tau to nipelisi bopia mantulungi suro-suro. 9 Naria ana i Filipus patamba'a randoo. Ira patamba'a etu nabi to niwai Alatala ka noto bo pompakule mompasimbayu tesa nggari ja'i Alatala. 10 Naopu bara sakuya mbengi kami neto'o ri setu naratamo samba'a nabi nggari Bagia Yudea to nosanga ka Agabus. 11 I'a narata ri ja'i kami pade nialana sulepe i Paulus, pade niso'ona ka kadana bo palena mboto pade niulina, "Iwe'imo to niuli Nosa Nagasa nu Alatala: Pue sulepe e'i kana raso'o ntau to Yahudi ri ngata Yerusalem iwe'i, pade rawai ka tau-tau da'a to Yahudi." 12 Sangga nangepe tesana etu, kami ante pura-pura topomparasaya to neto'o ri ngata Kaisarea nerapi ka i Paulus ante mpu'u-mpu'u, "Ne'e mapola mpaka ri ngata Yerusalem!" 13 Tapi nesonomo i Paulus, "Nokuya komi nageo nompakagero raraku? Nasadiamo aku e'i mpaka ri ngata Yerusalem da'a aga rapo'u tapi sampe mamate wo'u sabana aku topomparasaya i Pue Yesus!" 14 Da'a madota Paulus nangepe tesa kami. Jadi nenontomo kami nombatagi i'a. Pade nanguli kami, "Palambamo dota i Pue madupa." 15 Naopu neto'o ri setu bara sakuya mbengi kasaena, nompakasadiamo kami mantende mpaka ri ngata Yerusalem. 16 Naria bara sakuya mba'a topomparasaya nggari ngata Kaisarea wo'u nalau mpasanggani-nggani ante kami. Ira nanggeni kami mpaka ri sapo i Manason ri Yerusalem, apa ri sapona etu rapesai kami maturu. Manason, i'a samba'a tau nggari Lewuto Siprus to nasaemo najadi topomparasaya i Pue Yesus. 17 Sangga narata ri ngata Yerusalem kami nitarima ntopomparasaya ri setu ante nadamba rara. 18 Tonailena i Paulus nosanggani-nggani ante kami nalau nantalioda i Yakobus. Pura-pura topanggeniaka topomparasaya naria wo'u ri setu. 19 Naopu kami nombatabe ira, Paulus nombatesa ka ira nuapa pura to nikawia Alatala niposabana i'a ka tau-tau da'a to Yahudi. 20 Naopu nangepe tesa i Paulus etu Yakobus ante topanggeniaka-topanggeniaka topomparasaya ntanina etu nantoiya Alatala. Pade niuli ira ka i Paulus, "Sampesuwu, kana ranjani komi nonjobu-njobumo to Yahudi nomparasaya i Pue Yesus. Ira pura-pura etu natutu nantuki Atura-atura agama to nipapola i Musa. 21 Tapi niepe ira komi nompatuduki tau-tau to Yahudi to neto'o ri tatongo ntau da'a to Yahudi ala manggabasaka Atura-atura Alatala etu. Niepe ira wo'u komi nanguli ne'e mana mombasuna ana ira pade wo'u mana mantuki ada-ada to Yahudi. 22 We'i-we'i to Yahudi to nomparasaya etu kana mangepe nariamo komi ri se'i. Jadi we'i-we'i, 23 aginapa komi mantuki tesa kami e'i. Naria patamba'a tau ri se'i to nojanji ri ngayo i Pue nantuki adata. 24 Agina komi malau mompowia ada mompegasa koro mpasanggani-nggani ante ira, pade komi mombabayari oli pura-pura anu rapepue ira, ala wo'o ira mamala ragau nantuki pojanji ira etu. Ante iwetu kana manotomo ka pura-pura tau nuapa to niepe ira ewa komi da'a nakono, apa komi mboto nantuki Atura-atura agama to nipapola i Musa. 25 Atura etu kana ratuki komi. Tapi ira tau-tau da'a to Yahudi to nomparasaya i Pue Yesus, nipakatu kami ka suramo mompakatantu atura-atura nuapa paraluu ratuki ira. Etumo, ira da'a mamala manggoni panggoni to nipakoni ka pue ntanina, da'a mamala manggoni lei bara manggoni bau ane da'a rasambale, pade da'a mamala ira mosampaturu ante tau da'a rongo ira mboto." 26 Nangepe etu nasitujumo i Paulus ante tesa Yakobus bo topanggeniaka-topanggeniaka ntanina etu. Jadi naeompadondona nalaumo i'a mompowia ada mompegasa koro nosanggani-nggani ante ira patamba'a. Naopu etu nesuamo ira riara Sapo Mpepue notesa ka topanggeni agama ri setu nepitumbengipa ada mompegasa etu maopu pade pesomba ira samba'a bo samba'a rakeni rapesomba ka Alatala. 27 Tempo ntora naopu tempo nipakatantu ira mompowia ada mompegasa koro etu, naria bara sakuya mba'a to Yahudi nggari Propinsi Asia nanggita i Paulus riara Sapo Mpepue. Ira nompakagado todea ri setu pade nanjoko i Paulus, 28 ante nongare-ngare, "Tau-tau to Israel, tulungimo kami! E'imo tau to nalau ri umba-umba nompatuduki tau pura-pura nangewa kita to Yahudi! I'a nompatuduki tau mombabali Atura-atura nu agama to nipapola i Musa pade manjalai Sapo Mpepue e'i! Pade we'i-we'i i'a nanggeni tau da'a to Yahudi nesua riara Sapo Mpepue nompakaruto peto'o to nagasana e'i!" 29 Niuli ira iwetu, sabana nikita iramo i Trofimus samba'a tau da'a to Yahudi nggari ngata Efesus etu naria nosanggani-nggani ante i Paulus riara ngata, pade nipekiri ira i Paulus nanggeni i'a nesua ri Sapo Mpepue. 30 Nangepe etu nagado mpu'umo pura-pura tau riara ngata Yerusalem, pade nangowamo ira mpasanggani-nggani mpaka ri Sapo Mpepue nanjoko i Paulus. I'a niumbunjai ira mpaka ri sawalikuna. Tempo etu kaliu-liu pewobo Sapo Mpepue etu nipiku. 31 Tempo topegado etu nompasimbuku mompatesi i Paulus naria tau nalau nopakilu ka balengga tantara Roma, "Nagadomo njumaongu ngata Yerusalem!" 32 Nangepe pakilu etu balengga tantara nasalisa nangala tantara-tantarana pade nalaumo ira mpaka ri peto'o to nagadona etu. Tempo tau dea etu nanggita balengga tantara ante roana narata, nenontomo ira nombaboba i Paulus. 33 Nalaumo balengga tantara etu nanjoko Paulus pade nipakauna tau nombaso'o i'a ante rongu rante. Naopu etu nipekutanana ka tau dea etu, "Isema tau e'i? Nuapa nipowiana?" 34 Saga'a nggari tau dea etu nanguli iwe'i, pade naria wo'u saga'a nanguli iwetu. Iwetu kagadona sampe balengga tantara etu da'a namala nangginjani nuapa kakonona to najadina. Etu sabana i'a nomparenta ala i Paulus etu kana rakeni ri asrama tantara. 35 Tempo tantara to nanggeni i'a narata ri tangga asrama etu, topegado-topegado etu nanggarau mpu'u sampe i Paulus damo nikowa tantara nesua mpaka riara asrama. 36 Ira topegado etu netuki nggari puri pade nongare-ngare, "Patesimo i'a!" 37 Tempo ira ntora nesua riara asrama tantara, nangulimo i Paulus ka balengga tantara, "Mamala aku motesa ka komi sampalai?" Nangulimo balengga tantara ka i'a, "Hai! Namala tanu iko notesa ante basa Yunani! 38 Ane iwetu iko da'a tau to Masir to nangewa pomarenta pade nanggeni patanjobu mba'a topepatesi nalai ri karawa baina bopia!" 39 Nesonomo i Paulus, "Da'a. Aku e'i tau to Yahudi, nggari ngata natolele, etumo ngata Tarsus ri Propinsi Kilikia. Aku merapi, wai ka aku loga motesa ka tau dea e'i." 40 Naopu etu balengga tantara etu nompaloga Paulus motesa. Jadi nenggoremo Paulus ri tangga ri setu pade niwiatakana palena ala ira malino mangepe tesana. Nalinomo ira sakedi pade nompamulamo Paulus notesa ka ira ante Basa Ibrani.
1 "Uma-uma bo sampesuwu-sampesuwu pura-pura, epemo tesaku mompakanoto ka komi isema aku e'i!" 2 Tempo tau dea etu nangepe i Paulus notesa ante Basa Ibrani ira nekalino sanggani, pade Paulus nompapola tesana. 3 Niulina, "Aku e'i samba'a tau to Yahudi nipoanaka ri ngata Tarsus ri Propinsi Kilikia. Tapi aku nipakabete ri se'i ri ngata Yerusalem, pade nipaguru i Guru Bete nosanga ka Gamaliel. Aku nipatudukina mpakabelo-belo mantuki Atura-atura agama to nipapola i Musa ka totu'ata nggaolu. Nasimbayu ewa komi ri se'i, aku wo'u mpu'u-mpu'u natundu ri ja'i Alatala. 4 Etu sampe aku nompandasa topantuki-topantuki Pepatuduki Yesus. Naria to nipatesiku, naria to nisokoku pade nisuarakaku riara tarunggu, nabeloka langgai nabeloka besi. 5 Balengga Topanggeni Agama mboto ante Topolibu Bete Agama mamala mantakono tesaku e'i. Sabana ira mbotomo nombawai ka aku sura rakeni ka tau-tau to Yahudi ri ngata Damsyik. Ante sura etu aku mamala mombasoko topomparasaya Pepatuduki Yesus ri setu pade manggeni ira ri ngata Yerusalem ala rasuku." 6 "Riara mpolumakoku tempo namosumo aku ri ngata Damsyik, ntora natongo eo, sampegoli naria reme nggari langi to nareme mpu'u nantatiku aku. 7 Nadunggamo aku pade naria suara niepeku nanguli, 'Saulus, Saulus! Nokuya iko nompakasusa Aku?' 8 Nekutanamo aku, 'Isema Komi, Pue?' Nesonomo suara etu, 'Aku e'imo Yesus nggari Nazaret to nipakasusamu.' 9 Pura-pura tau nantuki aku nanggita reme etu, tapi da'a niepe ira suara notesa ka aku. 10 Pade nekutana wo'umo aku, 'Nuapa masipato kupowia, Pue?' Nesonomo Pue, 'Pembangumo! Kalaumo mesua ri ngata Damsyik. Ri setu pade rauli ka iko nuapa to nipakatantu Alatala mupowia.' 11 Tempo etu naburomo mataku sabana niwanta reme etu. Jadi aku damo ninini roaku nolumako nalau nesua riara ngata Damsyik. 12 Ri setu naria samba'a tau nosanga ka Ananias. I'a samba'a tau nanoa rarana to natutu nantuki Atura-atura agama to nipapola i Musa ka kita. I'a mpu'u-mpu'u nibila pura-pura tau to Yahudi to neto'o ri ngata Damsyik. 13 Naratamo i'a nanggita aku. Nenggoremo i'a ri sinjoriku pade nanguli, 'Sampesuwuku, Saulus, boaraka matamu. Iko kana mekita bali.' Kaliu-liu nabelomo mataku pade aku nanggita Ananias. 14 Naopu etu nangulimo i'a ka aku, 'Alatala to nipesomba totu'ata nggaolu nompelisi iko ala munjani nuapa dotana. I'a nompelisi iko manggita Yesus, Batuana to nanoa, pade mangepe tesa nggari ja'ina mboto. 15 Iko kana majadi sabina mompatolele nuapa to nikitamu bo nuapa to niepemu ka pura-pura tau. 16 We'i-we'i ne'e mana mompopea masae. Pembangumo, waimo koromu radiu ewa tandaina komi topomparasaya i Pue Yesus. Pekakaimo iko ka i Pue Yesus ala silakamu raampungi.' 17 Sampesuwu-sampesuwu, naopu etu nanjilimo aku mpaka ri ngata Yerusalem, pade tempo aku nosambaya riara Sapo Mpepue nikitaku saongu panggita. 18 Nikitaku i Pue Yesus notesa ka aku iwe'i: 'Palasimo ngata Yerusalem masalisa, apa tau-tau ri se'i da'a madota mantarima posabimu ewa Aku.' 19 Tapi nangulimo aku, 'Pue, ira kana mantarima etu, sabana ninjani ira powiaku bopia, iwenu aku nesua ri sapo-sapo mpodade manjoko bo mombaboba pade mombasuaraka riara tarunggu topomparasaya Komi. 20 Iwetu wo'u tempo sabi Komi i Stefanus nipatesi ira. Aku mboto naria ri setu, pade aku nasituju i'a rapatesi. Pade aku e'imo topanggatono pakea tau-tau to nompatesi i'a.' 21 Tapi nanguli wo'umo i Pue ka aku, 'Kana kalau, sabana Aku mompakau iko malau ri ngata-ngata to nakawaona ri ja'i tau-tau da'a to Yahudi.' " 22 Tau dea etu nalino nangepe tesa i Paulus. Tapi tempo i'a nanguli i'a nalau mpaka ri ja'i ntau da'a to Yahudi, mana madota ira mangepe tesana. Nongaremo ira ante suara namangga mpu'u, "Patesimo tau etu! I'a da'a mana masipato matuwu!" 23 Tempo nongare-ngare ira wo'u nombawonto-wonto baju-baju ira pade nanggamburaka sowu ri laerawa sabana ira mpu'u-mpu'u narau. 24 Nanggita etu balengga tantara Roma nomparenta ala i Paulus rakeni ri asrama tantara. Patujuna ala i'a raparesa ri setu pade raporo ala ranjani nuapa sabana tau-tau to Yahudi etu nongare-ngare iwetu ka i'a. 25 Tapi tempo i Paulus niso'omo ala raporo, nangulimo i'a ka balengga tantara to nenggore ri setu, "Nipaloga todea Magau Roma raporo nau da'apa nitangara?" 26 Nangepe tesa i Paulus, nalaumo tantara etu mpaka ri ja'i balengga ira pade nanguli, "Agina rapekiri ntanimo ruru nuapa rapowia komi ka tau e'i, Tua, sabana i'a todea Magau Roma." 27 Nangepe etu nalaumo balengga tantara etu ri ja'i Paulus, pade nipekutanana, "Uli ka aku! Iko todea Magau Roma?" Nesonomo i Paulus, "Iyo, nakono." 28 Pade nanguli wo'umo balengga tantara etu, "Aku e'i najadi todea Magau Roma ante nadea mpu'u nibayariku!" Nesono wo'umo i Paulus, "Tapi aku e'i todea Magau Roma nggari pesuwuku." 29 Nangepe etu kaliu-liu nokanggauramo tantara-tantara to nasadia mombaporo i Paulus etu. Pade balengga tantara etu wo'u naeka, sabana i'a nombaso'o i Paulus, tano i Paulus etu todea Magau Roma. 30 Balengga tantara Roma etu mpu'u-mpu'u madota mangginjani nuapa sabana to nakonona tau-tau to Yahudi nombasalaraka i Paulus. Sabana etu to nailena i'a nompakau pura-pura balengga topanggeni agama ante Polibu Bete Agama masiromu. Pade i Paulus nipopesuwu nggariara tarunggu pade nikeni mantingayo ira.
1 Narata ri setu i Paulus nompenoto ira Topolibu Bete etu, pade nangulimo i'a, "Sampesuwu-sampesuwuku, sampe ri eo e'i aku natuwu ante raraku nagasa ri ngayo Alatala." 2 Tempo i Paulus notesa iwetu, Balengga Topanggeni Agama to nosanga ka Ananias nompakau tau to nenggore ri sinjori i Paulus etu mombasapa sumba i Paulus. 3 Pade nangulimo i Paulus ka Ananias, "Komi tau nadenggo, aga tumoni-moni nanoa rara. Komi nekatoko ri setu mombatangara aku nantuki Atura-atura agama to nipapola i Musa, tano komi mboto nombaliunaka Atura-atura etu ante nompakau tau mombasapa aku. Komi mboto kana rasuku Alatala!" 4 Tau-tau ri sinjori i Paulus nanguli ka i'a, "Iko nombasalaraka Balengga Topanggeni Agama to nipakatantu Alatala!" 5 Nesono Paulus, "O, sampesuwu pura-pura, da'a ninjaniku i'a etu Balengga Topanggeni Agama. Ane etu ninjaniku aku da'a manguli tesa etu pane'a, sabana riara Buku Nagasa naria nitulisi iwe'i: 'Ne'e iko mombasalaraka topanggeniaka todeamu.' " 6 Nikita i Paulus naria sanu tau-tau riara Mpolibu Bete Agama etu tau-tau to Saduki, pade naria wo'u sanu tau-tau to Parisi. Sabana etu nitesana ka ira pura-pura, "Sampesuwu-sampesuwu pura-pura, aku e'i wo'u tau to Parisi, muli nto Parisi! Aku nitangara ri se'i sabana aku nomparasaya tau namate kana matuwu bali!" 7 Nangepe etu nompamulamo tau-tau to Parisi pade tau-tau to Saduki etu nosinggarau mbotomo sampe Polibu etu natebagi rongu. 8 Etu najadi sabana nantuki pombarata tau-tau to Saduki tau namate da'a mana matuwu, malaeka i Pue da'a naria, pade malaeka manusia wo'u da'a naria. Aga tau-tau to Parisi nomparasaya etu pura-pura. 9 Jadi neumbamo kakanano naja'a mpu'u. Nekanggoremo bara sakuya mba'a tau to Parisi to najadi guru agama pade ira mpu'u-mpu'u nombabali tesa tau-tau to Saduki etu. Niuli ira, "Nantuki pombarata kami, tau e'i da'a ntoto ria salana, nau aga sakedi. Bara naria anitu atau malaeka i Pue notesa ka i'a." 10 Posinggarau etu mpu'u-mpu'u najadi nakanano, sampe balengga tantara etu naeka ne'e-ne'e Paulus etu rasemparaka ira. Etu sampe i'a nompakau tantarana malau mangala Paulus nggari tatongo ntau dea etu rakeni ira mpaka ri asrama tantara. 11 Wengi to sambengina naratamo i Pue Yesus nenggore ri sinjori i Paulus pade nanguli, "Pakaroo raramu. Iwenu iko nompatolele tesaku ri ngata Yerusalem, iwetu wo'u iko kana mompatolele tesaku ri ngata Roma." 12 - 13 Naeompadondo dakabobayana mpu'u naria nelabi patampulu mba'a tau to Yahudi nompamula wo'umo nowia sintuwu. Ira netunda samba'a-samba'a da'a manggoni bo manginu ane i Paulus da'apa rapatesi ira. 14 Nalaumo ira ri ja'i balengga-balengga topanggeni agama ante totu'a-totu'a to Yahudi pade niuli ira, "Kami e'i netunda puramo da'apa kami manggoni bo manginu ane i Paulus da'apa rapatesi kami! 15 We'i-we'i kami merapi ala komi mantulisi sura rapakatu ka balengga tantara Roma merapi i'a manggeni Paulus manjili mantingayo Polibu Bete Agama. Ulimo ka i'a danariapa bara sakuya ngaya pompekutana rapekutana komi ka i Paulus. Pade ri tempona etu kami kana masadia mompatesi i'a da'apa i'a marata ri se'i." 16 Tapi naria samba'a kabilasa pinuana i Paulus nangepe nia ira etu. Jadi nalaumo i'a mpaka ri asrama tantara pade nitesana nia tau-tau etu ka i Paulus. 17 Naopu nangepe tesa pinuanana etu, Paulus nompokio samba'a tantara pade niulina ka i'a, "Keni ngana e'i malau ri ja'i balengga tantara. Naria sangaya madota ratesana ka i'a." 18 Jadi tantara etu nanggeni ngana etu ri ja'i balengga tantara pade nanguli, "Paulus to nitarunggu komi etu, nompokio aku pade nerapi ala aku manggeni ngana e'i ri ja'i komi apa naria sangaya madota ratesana ka komi." 19 Nangepe etu balengga tantara etu nombanini ngana etu nikenina nompatani ri soso asrama pade nipekutanana, "Nuapa ntoto madota mutesa ka aku?" 20 Nesonomo ngana etu, "Tau-tau to Yahudi nasintuwu merapi ka komi ala komi manggeni i Paulus mantingayo Polibu Bete Agama naile. Ira kana manguli danariapa bara sakuya ngaya pompekutana rapekutana ira ka i Paulus. 21 Tapi kuperapi ka komi, ne'e ntoto ratuki pomperapi ira etu. Apa ira nelabi patampulu mba'ana nasadia neopo ri jala mombalawa i Paulus. Ira pura-pura netunda da'a manggoni bo manginu ane i Paulus da'apa rapatesi ira. We'i-we'i nasadiamo ira. Ira damo mompopea pesono komi." 22 Nangepe etu nangulimo balengga tantara etu, "Ne'e mutesa ka isema-sema iko notesa pura-pura e'i ri ja'iku." Pade nipakauna ngana etu manjili. 23 Naopu etu balengga tantara etu nompokio romba'a tantarana, pade niulina ka ira, "Pakasadia roatu mba'a tantara pade pitumpulu tantara nesawi jara, pade roatu mba'a tantara notawala. Wengina e'i tinti sasio komi kana malai nggari se'i mpaka ri ngata Kaisarea. 24 Pakasadia wo'u jara rapesawi i Paulus. Keni i'a mpakabelo-belo sampe marata ri ja'i Gubernur Feliks." 25 Naopu etu balengga tantara etu nantulisi sura ka i Feliks to nanguli iwe'i: 26 "Gubernur Feliks to nibila kami, tabe nggari ja'i kami Klaudius Lisias. 27 Tau e'i nisoko nto Yahudi sakedi-kedipa rapatesi iramo. Niepeku i'a samba'a todea Magau Roma, jadi nikeniku salunu tantara nompakasalama i'a. 28 Naopu etu nikeniku i'a mpaka ri Polibu Bete Agama ira, sabana aku madota mangginjani nuapa ntoto salana to nipangadu ka i'a. 29 Ri setu nikitaku i'a nipangadu ira aga nosinggawela ante Atura-atura agama ira mboto. Da'a ria salana to masipato rasuku mamate bara ratarunggu. 30 Naopu etu niepeku naria sintuwu to Yahudi mompatesi i'a. Jadi kaliu-liu nipakauku i'a rakeni mpaka ri ja'i komi. Pade nipakauku wo'u pura-pura tau to nompangadu i'a kana malau manggeni tesa pepangadu ira ri ja'i komi." 31 Naopu balengga tantara etu nompakasadia sura etu, tantara-tantara to nipakauna etu nalau mantuki parentana. Nalaumo ira nangala i Paulus pade i'a nikeni ira nalai nggawengina etu wo'u sampe narata ri ngata Antipatris. 32 Pade naeompadondona nanjilimo tantara nolumako nggada patatu mba'a etu, pade tantara nojara etu nanggeni Paulus napola mpaka ri ngata Kaisarea. 33 Tempo ira narata ri setu niwai iramo sura nggari ja'i balengga ira ka Gubernur etu, pade i Paulus wo'u niwai ira ri ja'ina. 34 Naopu Gubernur nombabasa sura etu i'a nompekutana i Paulus, "Nggari umba ntoto peto'omu?" Sangga ninjani Gubernur Festus i Paulus nopu'u nggari Propinsi Kilikia, etumo bagia to niparentana mboto, 35 niulina, "Jadi iwe'imo, aku kana momparesa parakaramu ane pura-pura tau to nompangadu iko marata ri se'i." Pade niparentana tau nanggeni i Paulus rakatono ntani ri sapo Herodes.
1 Limambengi kaliuna notuamo Balengga Topanggeni Agama Yahudi to nosanga ka Ananias bo bara sakuya mba'a topanggeniaka to Yahudi mpaka ri ngata Kaisarea. Nikeni ira wo'u samba'a topojarita to nosanga ka i Tertulus. Ira nantingayo i Gubernur Feliks, pade nitesa iramo tesa pepangadu ira ewa kasala i Paulus. 2 Paulus nipokio mantingayo i Feliks pade nompamulamo i Tertulus nompangadu i Paulus iwe'i: "Gubernur to nibilaku, kami todea riara poparenta komi natuwu ante nasana-sana. Pade nggari kanoto komi moparenta, nadeamo to nipakabelo ri ngata kami. 3 Pura-pura panggawia komi to nompakabelo ngata kami e'i nitarima kami ante nadamba rara. Pade da'a mabasa-basa kami manguli tarima kasi. 4 Jadi ala ne'e komi masae mopea, kami merapi ala komi mamala mangepe sampalai tesa pepangadu kami to nambukuna e'i. 5 Tau e'i nirata kami topegado to neliu kaja'ana. Ri umba-umba ri dunia i'a nowia kakanano ri tatongo ntau to Yahudi. Pade i'a wo'u samba'a topanggeniaka tau to nantuki Pepatuduki Yesus nggari ngata Nazaret. 6 I'a wo'u mompembai mompakaruto Sapo Mpepue, tapi i'a nisoko kami. Patuju kami mombatangara i'a nantuki Atura-atura agama kami mboto. 7 Aga balengga tantara i Lisias nangago i'a nggari ja'i kami, 8 pade niparentana ala pura-pura topangadu kana mantingayo komi. Jadi Gubernur to nibilaku, ane komi momparesa tau e'i, kana ranjani komi mboto nggari ja'ina etu nakono nuapa to nipangadu kami ka i'a." 9 Pade pura-pura tau to Yahudi to naria ri setu wo'u nompangadu i Paulus pade nantakono nuapa to niuli i Tertulus etu. 10 Naopu etu Gubernur nowiataka palena ka i Paulus ala i'a motesa. Pade nangulimo Paulus, "Gubernur to nibilaku, ninjaniku komi nompae-mpaemo najadi topotangara ri ngata e'i. Etumo sabana nadamba mpu'u raraku mamala mombabali tesa ntau nompangadu aku ri ngayo komi. 11 Mamala komi mboto mompakatantu da'apa nelabi nggari sampulu rombengi kaliuna aku nantende mpaka ri ngata Yerusalem nalau mepue ri Sapo Mpepue. 12 Da'a ria sanggani tau to Yahudi etu nombarata aku nosinggarau, bara nompowia kakanano, nabeloka riara Sapo Mpepue, nabeloka ri sapo-sapo mpodade, nabeloka riara ngata. 13 Da'a wo'u namala ira mompopokita ka komi tesa pepangadu ira etu nakono. 14 Tapi aku kana mompangaku ri ngayo komi, aku e'i nantuki pepatuduki Yesus nombasomba Alatala to nipesomba totu'a kami nggaolu. Pepatuduki etu nireke ira to Yahudi e'i nasala. Tapi aku batena nomparasaya pura-pura to nitulisi riara buku-buku i Musa pade buku-buku nabi-nabi ntanina. 15 Nasimbayu ante to Yahudi e'i aku wo'u manjarumaka ka Alatala pura-pura tau kana matuwu bali nggari kamatena, nabeloka tau-tau nanoa rarana, nabeloka tau-tau nadenggo rarana. 16 Etumo sabana aku mompasimbuku mpakabelo-belo matuwu ante raraku malusu bo magasa ri ngayo nu Alatala pade ri ngayo manusia wo'u. 17 Naria bara sakuya mpae aku nompalasi ngata Yerusalem. Pade lako bara sakuya mbengi naliu e'i aku nanjili bali nanggeni doi nantulungi sampesuwuku to Yahudi, pade wo'u ala mombawai pesombaku ka Alatala. 18 Tempo aku danaria ri Sapo Mpepue, naria bara sakuya mba'a tau to Yahudi nggari Propinsi Asia nomposirata aku naopu aku nowia ada nompakagasa koroku. Da'a ria nadea tau nosanggani-nggani ante aku, pade da'a wo'u naria kakanano tempo etu. 19 Kakonona kana maria wo'u ira ri se'i mompangadu aku ri ngayo komi ane maria tesa pepangadu ira ka aku. 20 Atau agina tau-tau to nompangadu aku e'i motesa nuapa kaja'ana to nirata ira ri ja'iku tempo aku naria ri ngayo Polibu Bete Agama. 21 Da'a ria sala ntanina nirata ira, aga sambela tesa e'i to nitesaku ri ngayo ira, 'Aku nitangara eo e'i sabana aku nomparasaya tau-tau namate kana matuwu bali.' " 22 Gubernur Feliks nangginjani ante nabelo pepatuduki to niuli Pepatuduki Yesus. Jadi i'a nompopenonto polibu etu pade nanguli, "Aku mompakaopu parakara e'i ane mariamo balengga tantara i Lisias ri se'i." 23 Naopu etu niparentana samba'a balengga tantara manggatono i Paulus. Tapi naupa i'a nikatono, i'a niwai loga molumako sakedi pade roana nipaloga marata mantulungi i'a. 24 Bara sakuya mbengi kaliuna, naratamo i Gubernur Feliks nosanggani-nggani ante rongona to nosanga ka i Drusila. Drusila etu samba'a tau to Yahudi. Feliks nompakau tau lau mangala i Paulus rakeni ri ja'ina. Sangga naratapa i Paulus pade nipetalinga i Feliksmo tesana ewa pomparasayana ka Yesus Kristus. 25 Nangulimo i Paulus ka ira, "Pokaingguta kana manoa, pade kita kana manta'amaka dota rarata to naja'ana, sabana kita kana ratangara Alatala banepia." Tempo Feliks nangepe tesa Paulus etu naeka mpu'umo i'a. I'a nanguli, "Naganamo we'i-we'i! Kalau ntanimo ruru iko. Ane maria loga damo rapokio motesa wo'umo." 26 Kakonona i Feliks nanjarumaka i Paulus mombawai doi ka i'a ala i'a rakabasaka. Etu sampe mpanggani-ngganimo i Paulus nipokio Feliks motesa-tesa ante i'a. 27 Rompae kaliuna, i Feliks etu nisambei, pade i Perkius Festus najadi Gubernur ri bagia etu. Tempo i Feliks nalai, nipalambanamo i Paulus riara tarunggu sabana i'a madota mangala rara tau-tau to Yahudi.
1 Naliu katolumbengina i Festus narata ri propinsi etu, nantendemo i'a nggari ngata Kaisarea mpaka ri ngata Yerusalem. 2 Sangga naratapa i'a ri setu naratamo balengga-balengga topanggeni agama bo topanggeniaka-topanggeniaka to Yahudi ri ja'ina. Pade notesamo ira pepangadu ira ewa i Paulus. Ira mpu'u-mpu'u nerapi ka i Festus 3 ala ane mabelo rarana ka ira, i'a kana mompakau tau manggeni i Paulus mpaka ri ngata Yerusalem. Etu niperapi ira apa nasintuwumo ira mantingawu mompatesi i'a ri tatongo jala. 4 Tapi nesonomo i Festus ka ira, "Paulus danitarunggu ri ngata Kaisarea, pade aku mboto mana masaeka manjili gusa'a. 5 Jadi agina bara sakuya mba'a topanggeniaka komi nggari se'i motua mpasanggani-nggani ante aku mpaka ri ngata Kaisarea. Pade ane maria salana, ri setu pade ratesa komi tesa pepangadu etu." 6 Naliu Festus neto'o ri ngata Yerusalem walu atau sampulu mbengi kasaena, nanjilimo i'a mpaka ri ngata Kaisarea. Narata ri setu, naeo tonailena nesuamo i'a ri sapo mpotangara pade nipakauna tau manggeni i Paulus mantingayo i'a. 7 Sangga naratapa i Paulus nekanggoremo tau-tau to Yahudi to notua nggari ngata Yerusalem etu nantatiku i'a, pade nipamula iramo nombatesa tesa pepangadu ira to natomo-tomona ka i'a. Tapi da'a ntoto namala ira mompopokita salana to nipangadu ka i'a. 8 Naopu ira nompangadu i'a iwetu, i Paulus nebali. Niulina, "Aku e'i da'a nanggawia to naja'ana. Aku da'a nombaliunaka Atura-atura agama to nipapola i Musa, bo da'a wo'u nompakaruto Sapo Mpepue. Pade aku da'a nombasapuaka parenta Magau Roma." 9 Tapi i Festus madota mangala rara to Yahudi, jadi i'a nompekutana i Paulus, "Madota iko malau mpaka ri ngata Yerusalem ala iko ratangara ri ngayoku ri setu ewa nuapa to nipangadu ira etu?" 10 Nesonomo i Paulus, "Aku da'a madota, sabana aku danenggore ri ngayo polibu mpotangara to nipakatantu Magau Roma mboto e'i, pade ri se'imo aku masipato ratangara. Ninjani komi mbotomo, Tua, aku e'i da'a ria salaku ri ja'i ntau to Yahudi. 11 Ane aku e'i nombaliunaka atura-atura atau nanggawia sangaya to masipato aku rasuku mamate, nasadiamo aku mamate. Tapi ane tesa pepangadu ira etu da'a nakono, da'a ria samba'a mamala mombawai aku ka ira etu. Aku mekitangara ri ja'i Magau Roma." 12 Sangga naopu i Festus notesa-tesa ante topolibu ri setu, nangulimo i'a ka i Paulus, "Iko nekitangara ri ja'i Magau Roma. Jadi iko kana malau mantingayo Magau etu." 13 Da'a nasae kaliuna naratamo Magau Agripa ante i Bernike ri ngata Kaisarea ala mombabila i Festus sabana i'a lako nionggotaka najadi Gubernur. 14 Naopu bara sakuya mbengi ira ri setu, i Festus nombatesa parakara i Paulus ka Magau Agripa. Niuli i Festus, "Ri se'i naria samba'a tau nipalamba i Feliks riara tarunggu to nosanga ka i Paulus. 15 Tempo aku naria ri ngata Yerusalem balengga-balengga topanggeni agama ante totu'a-totu'a to Yahudi nompangadu tau etu. Niperapi ira ala aku mombasuku tau etu. 16 Tapi aku nombasono ira, 'Nantuki atura kami to Roma, samba'a tau to nipangadu kana mosintingayo ante tau to nompangadu i'a, pade rawai loga mombabali tesa ntau to nompangadu i'a etu. Ane da'apa najadi iwetu da'apa mamala i'a rawai wa'amo.' 17 Jadi tempo tau to nompangadu i Paulus etu narata ri se'i, da'a mana aku nopea nasae-sae. To nailena nipowiakumo polibu mpotangara pade niparentaku Paulus rakeni rapoposintingayo. 18 Tempo tau-tau to nompangadu i'a etu nekanggore nompangadu i'a, nipekiriku kana maria tesa pepangadu powiana to naja'a mpu'u. Tapi kakonona da'a ria nitesa ira bara sangaya to naja'ana. 19 Ira aga nosisala pombarata ante i'a ewa agama ira mboto, pade wo'u ewa samba'a tau nosanga ka Yesus. Tau etu namatemo, aga i Paulus etu nanguli I'a natuwu bali. 20 Tempona etu danaingu aku mompekiri bara iwenu aku mamala mompakanoto parakara etu. Jadi nipekutanaku ka i Paulus bara madota i'a malau mpaka ri ngata Yerusalem pade ratangara ri setu parakarana. 21 Tapi i Paulus nekitangara ri ngayo Magau Roma. Niperapi i Paulus ala i'a rakatono ntani sampe parakarana rabutusi ri ngayo Magau Roma. Etu sampe aku nomparenta ala i'a rakatono ntani sampe maria logaku mompakau i'a rakeni mpaka ri ja'i Magau Roma etu." 22 Naopu nangepe etu nangulimo i Agripa ka i Festus, "Aku wo'u madota mangepe pantesa ntau etu." Nesonomo Festus, "Naile mamala komi mangepe i'a." 23 To nailena naratamo Magau Agripa ante i Bernike ante tandai kamagauna. Nesuamo ira riara tombi mpolibu mpasanggani-nggani ante balengga-balengga tantara pade madika-madika riara ngata etu. Pade i Festus nomparenta ala i Paulus rakeni mpesuamo. 24 Sangga naratapa i Paulus, nangulimo i Festus, "Magau Agripa, pade pura-pura to naria ri se'i. Kita komimo tau e'i! I'a nipangadu pura-pura tau to Yahudi ri ja'iku, nabeloka to naria ri ngata Yerusalem, nabeloka to naria ri se'i. Ira nongare-ngare nerapi ala i'a rasuku mamate. 25 Tapi naopu aku nomparesa i'a, da'a naria kamba sangaya salana nirataku to masipato i'a rasuku mamate. Kaopuna i'a mboto nekitangara ri ngayo Magau Roma. Sabana etu nipakatantukumo i'a kana rakeni mpaka ri ja'i Magau Roma etu. 26 Aga da'apa naria sangaya to nanotona mamala kutulisi ka Magau Roma. Etumo sabana aku nompopotingayo i'a etu ka komi pura-pura, to kaiyampuuna ka komi to nibilaku, Magau Agripa. Patujuku ane maopu i'a raparesa, kana mariamo to mamala ratulisi ka Magau Roma. 27 Apa mantuki pombarataku da'a ntoto masipato samba'a tau rakeni mpaka ri ja'i Magau ane da'a rapakanoto nuapa ntoto salana to nipangadu ka i'a."
1 Pade nangulimo Magau Agripa ka i Paulus, "Iko rawai loga motesa mombabali tesa ntau to nompangadu iko." Jadi i Paulus nangonggotaka palena, pade nompamulamo i'a notesa iwe'i: 2 "Magau Agripa to nibilaku, aku nombarasai nauntu mpu'u sabana eo e'i aku namala motesa ri ngayo komi mombabali pura-pura tesa to nipangadu nto Yahudi ka aku. 3 Kaiyampuuna sabana komi mpu'u-mpu'u nangginjani pura-pura ada bo pepatuduki to nipoposisala to Yahudi. Sabana etu aku merapi ante mpu'u-mpu'u ala komi mosabara mangepe tesaku e'i. 4 Ninjani ntau to Yahudi puramo jala nggatuwuku nggari kakediku, sabana aku natuwu ri tatongo ira nompamula ri ngataku Tarsus pade ri ngata Yerusalem wo'u. 5 Nasaemo ira nosinjani aku e'i, pade ane ira madota, mamala ira mantakono tesaku e'i. Nompamula nggari tempo aku danakabilasa aku nantuki pepatuduki to Parisi, etumo pepatuduki to mpu'u-mpu'u nantuki pura-pura Atura agamata to Yahudi. 6 Pade we'i-we'i aku nenggore ri ngayo komi ri se'i ratangara aga sabana aku nomparasaya Alatala kana mompakadupa pojanjina ka totu'ata nggaolu. 7 Pojanji etumo to nisarumakata nto Yahudi, muli nggari sampulu romba'a ana i Israel. Etumo sampe kita da'a nabasa-basa mepue ka Alatala eo wengi. O Magau to nibilaku, aku nipangadu tau-tau to Yahudi sabana aku nanjarumaka pojanji etu! 8 Iwenumo sampesuwu-sampesuwuku to Yahudi? Nokuya komi nompekiri Alatala da'a mamala mompakatuwu bali tau namate? 9 Nokolu aku mboto e'i wo'u nompekiri aku kana mompowia mpengele-ngele nuapa to mamala mangewa Yesus to Nazaret etu. 10 Pade etu mpu'u-mpu'u to nipowiaku ri ngata Yerusalem. Ante sura kuasa nggari ja'i balengga-balengga topanggeni agama nadea topomparasaya i Pue Yesus nisuarakaku riara tarunggu. Pade tempo ira nisuku mamate, aku wo'u nasituju. 11 Nadea ngganimo aku nompandasa ira riara sapo mpodade ala mompasu'u ira mombasapu pomparasaya ira ka Yesus. Narau mpu'u raraku ri ja'i ira sampe aku nalau mompandasa ira sampe ri ngata-ngata ntanina nakawao." 12 "Ante patuju etu aku nanggeni sura kuasa nggari ja'i balengga-balengga topanggeni agama nalau mpaka ri ngata Damsyik. 13 Magau to nibilaku, tempo aku da ri tatongo jala kira-kira tongo eo, aku nanggita reme nggari langi nelabi mpu'u karemena nggari reme nu eo. Reme etu nombawanta aku ante roa-roaku sanjala. 14 Kami pura-pura nadungga, pade niepeku suara nanguli ka aku ante Basa Ibrani, 'Saulus, Saulus, nokuya iko nompandasa Aku? Iko aga mompakasusa koromu mboto ane iko mangewa pekeniakaku!' 15 Pade nekutanamo aku, 'Isema Komi, Pue?' Nesono wo'umo suara etu, 'Aku e'imo i Yesus to nipandasamu! 16 Tapi we'i-we'i pembangumo iko, pade pekanggoremo! Aku nompopokita koroku ka iko ala mangonggotaka iko majadi batuaku ante sabiku. Iko kana mompatolele ka tau-tau ntanina ewa nuapa to nikitamu eo e'i pade ewa nuapa kupopokita ka iko ri tempo marata. 17 Iko kana kukabasaka nggari kuasa ntau to Yahudi pade nggari kuasa ntau da'a to Yahudi to madota mompakasusa iko. Aku mompakau iko malau mpaka ri ja'i ira tau da'a to Yahudi. 18 Pakanoto rara ira ala ira mamala mesuwu nggariara karumauna pade megoli mesua riara karemena, ala ira mamala makabasaka nggari kuasa Magau nu Seta pade mantarima kuasa nggari ja'i Alatala. Pade ante momparasaya Aku silaka-silaka ira raampungi pade ira mamala majadi todea nu Alatala.' " 19 "Sabana etu, Magau Agripa, aku e'i bate-batena natutu nantuki nuapa to nikitaku riara mpanggitaku nggari ja'i Alatala etu. 20 Pamula-mulana aku nalau notesa ka tau-tau ri ngata Damsyik, pade ri ngata Yerusalem ante njumaongu Bagia Yudea. Pade nalau wo'umo aku ri ja'i tau-tau da'a to Yahudi. Niuliku ka ira pura-pura, 'Kana majea komi nggari silaka-silaka, pade megoli mombajuju koro komi ka Alatala. Pade popokita ante pokainggu to nabelo, mpu'u-mpu'u najeamo komi nggari silaka-silaka etu.' 21 Etumo sabana tau-tau to Yahudi nombasoko aku riara Sapo Mpepue pade ira nompasimbuku mompatesi aku. 22 Tapi naupa iwetu, sampe iwe'i-we'i aku danikalendu nu Alatala sampe danamalapa aku nekanggore notesa ka pura-pura tau, nabeloka tau nalanga panggana nabeloka todea biasa. Nuapa to nitesaku etu nasimbayu ewa nuapa to niboto Musa ante nabi-nabi ntanina nggaolu. 23 Etumo, Magau to Mompakasalama to nijanji Alatala etu, kana masusa sampe mamate. Pade I'amo pamula-mulana tau namate natuwu bali, ala ante iwetu I'a manggeni reme to mompakabelo pura-pura manusia, nabeloka tau to Yahudi, nabeloka tau-tau da'a to Yahudi." 24 Tempo i Paulus danotesa iwetu, nongaremo i Festus, "Nagilamo, iko Paulus! Pangginjanimu to nadea etu nompakagila iko!" 25 Tapi nesonomo Paulus, "Aku e'i da'a nagila, Tua. Tesa-tesa to niuliku e'i nakono pade nesuwu nggari pekiriku to nanotona. 26 Ninjani Magau Agripa mboto nuapa to nitesaku pane'a nakono. Etu sampe aku nabia notesa iwetu ri ngayona, apa kajadia etu pura-pura da'a nitabuniaka. 27 Magau Agripa to nibilaku, ninjaniku magau wo'u nomparasaya nuapa to niuli nabi-nabi nggaolu." 28 Pade nangulimo Magau Agripa ka i Paulus, "Niulimu aku e'i mamala mupajadi to Karistee riara tempo da'a masae e'i!" 29 Pade nesonomo i Paulus, "Bara masae bara da'a masae, aku merapi doa ka Alatala ala Magau pade komi pura-pura to nangepe tesaku eo e'i, mamala majadi topomparasaya i Pue Yesus nasimbayu ewa aku. Aga ne'e sampe komi ratarunggu." 30 Kaopuna nekanggoremo Magau Agripa pade Gubernur bo i Bernike pade pura-pura tau ntanina to nasiromu etu, pade nesuwumo ira nggari polibu etu. 31 Sangga ira naria ri sawalikuna, nangulimo ira samba'a bo samba'a, "Da'a ria kamba sangaya to nipowia ntau e'i to masipato rasuku mamate bara ratarunggu." 32 Nangulimo Magau Agripa ka i Festus, "Kakonona tau e'i mamalamo rakabasaka ane i'a da'a nekitangara ri ngayo Magau Roma."
1 Naopu etu Gubernur Festus nompakatantu kami kana mosumomba mpaka ri ngata Roma ri Propinsi Italia. Jadi Paulus ante bara sakuya mba'a tau nitarunggu ntanina niparasaya ka Yulius, samba'a tadulako nu tantara Roma to nosanga ka "Pasukan Magau Roma." 2 Kami nesawi saongu sakaya bete nopu'u nggari ngata Adramitium. Pade nanggaliwomo kami nggari ngata Kaisarea ante patuju mosumomba mesai ri kasampoa-kasampoa ri talinti-talinti Propinsi Asia. Naria wo'u samba'a tau nggari ngata Tesalonika ri Propinsi Makedonia to nosanga ka Aristarkhus nalau nosanggani ante kami. 3 Tonailena sakaya kami nesai nasampo ri ngata Sidon. Yulius nabelo rarana ri ja'i Paulus, sampe niwaina loga ka i Paulus nalau nanggita roa-roana ri ngata Sidon etu ala ira mamala mombawai ka i'a nuapa to raparaluuna. 4 Nggari setu kami nompapola posumomba kami. Tapi sakaya kami nompotomu poiri sampe kami kana nosale ri wiwi ntalinti Lewuto Siprus to nalendu sakedi nggari poiri etu. 5 Naopu etu nosumombamo kami ri tasi ri ntoto Propinsi Kilikia bo Pamfilia, pade napola sampe narata ri ngata Mira ri Propinsi Likia. 6 Ri ngata Mira etu Yulius nombarata saongu sakaya bete nggari ngata Aleksandria mosumomba mpaka ri Propinsi Italia. Pade kami nipakauna nolinja ri sakaya etu. 7 Bara sakuya mbengimo kasaena sakaya etu nosumomba ante naole. Kaopuna ante kasusana kami namala nompakamosu ngata Knidus. Nggari setu, kami da'a nompapola posumomba kami nantuki nia pamulana sabana peburu mpoiri da'apa nabelo. Jadi sakaya kami etu nalau nosale ri wiwi ntalinti Lewuto Kreta nombaliunaka uju Salmone ala ne'e mawela gaga poiri bete etu. 8 Nasusa mpu'u kami nosale ri wiwi ntalinti ri sabingga puluna Lewuto Kreta etu. Kaopuna naratamo kami ri kasampoa nggedi to nosanga ka Kasampoa Naramba, namosu ngata Lasea. 9 Tempo etu nasae gagamo kami nosumomba sampe naliumo Eo Bete Nggapuasa nto Yahudi. Mana tempo mabelo mosumomba. Sabana etu nangulimo i Paulus ka ira riara sakaya etu, 10 "Sampesuwu-sampesuwu, nantuki pombarataku ane kita mompapola posumombata e'i, kana mandasa mpu'u kita ngina. Kana marugi mpu'u kita, da'a aga pangulaya sakaya e'i, tapi kita e'i wo'u mamate!" 11 Tapi Yulius etu da'a nantuki tesa i Paulus, sabana nipompangalanapa tesa topompajala sakaya bo kapiteena pade tesa i Paulus. 12 Kasampoa Naramba etu da'a nabelo rakasampo kami masae ri tempo nu leni. Sabana etu nadea nggari topesawi sakaya kami etu nanguli, "Agina kita mompalasi kasampoa e'i pade mompasimbuku mosumomba mpaka ri ngata Feniks masampo ri setu tempo leni." Ngata Feniks etu saongu kasampoa Lewuto Kreta to nalendu nggari poiri ri tempo leni sabana nantingayo kasolo nu eo ri puluna pade tasina. 13 Tempona etu nompamulamo poiri neburu naole-ole nggari sabingga puluna. Etu sampe nipekiri ira pura-pura patuju ira mapola mpaka ri kasampoa Feniks namala majadi. Sabana etu nionggotaka iramo balango sakaya etu, pade nosumombamo kami nosale ri wiwi ntalinti Lewuto Kreta etu. 14 Tapi da'a nasae nggari setu naratamo poiri bete nggari Lewuto Kreta etu to niuli ntau "Poiri Bete nggari sabingga tasina pebulu nu eo." 15 Sakaya kami etu nirumpa nu poiri bete pade mana mamala mantingayo poiri. Jadi nipalamba kamimo sakaya etu nalome nikeni nu poiri. 16 Tempo kami nalome nikeni nu poiri etu naratamo kami ri sabingga puluna saongu lewuto nggedi nosanga Kauda. Ri tempo etu kami nompasimbuku ante nasusa mpu'u nombataja mangore sakaya nggedi to nosanga sekoci riara nu sakaya bete etu. 17 Sangga sekoci namala nionggotaka pade niboli ri bunggu nu sakayamo, sakaya bete etu nipakaroso anabua-anabua sakaya ante nipo'u nu kaloro nantalili koro nu sakaya etu. Naopu etu nipopana'u iramo somba nu sakaya, sabana naeka ira sakaya etu mombarumpa bone to nasore to namosu talinti tana Libia. Jadi iwetumo sakaya etu nipalamba ira nalome nikeni nu poiri. 18 Da'a nenonto poiri naramboso etu nantawui sakaya kami, sampe naeompadondo nitajiaka ira saga'a pangulaya sakaya riara ntasi ala manga'a sakedi sakaya etu. 19 Pade to nailena nitajiaka ira wo'umo parewa-parewa nu sakaya etu ante pale ira mboto mpaka riara ntasi. 20 Naopu etu bara sakuya mbengimo kasaena kami mana nanggita eo bo betu'e, pade poiri wo'u da'a ntoto nenonto karambosona. Kaopuna mana ria panjarumaka kami namala masalama. 21 Naopu bara sakuya mbengi kasaena tau-tau riara sakaya etu da'a mana manggoni, nekanggoremo i Paulus ri tatongo ira pade nanguli, "Sampesuwu-sampesuwu, ane komi nantuki tesaku bopia nanguli ne'e mompalasi Lewuto Kreta, kita e'i da'a mandasa ante marugi ewa e'i! 22 Tapi we'i-we'i kuperapi ka komi pura-pura, pakaroo rara komi! Da'a ria samba'a nggari tatongo kita e'i mamate, tapi sakaya e'i kana marugi. 23 Ninjaniku etu sabana iwengi naria samba'a malaeka nggari ja'i Alatala to nipesombaku, etumo Alatala to nombajagai aku, narata ri ja'iku pade nanguli, 24 'Ne'e maeka, Paulus! Iko kana mapola mantingayo Magau Roma. Pade nggari kabelo nu rara nu Alatala ri ja'imu, pura-pura tau nosanggani-nggani ante iko ri sakaya e'i kana masalama.' 25 Sabana etu, sampesuwu-sampesuwu, pakaroomo rara komi, sabana niparasayaku nuapa to niuli Alatala ka aku etu natantumo kana majadi! 26 Tapi sakaya kita e'i ngina kana mombarumpa bone nabua namosu wiwi talinti nu saongu lewuto." 27 Tempo nagana kasampulu patambengina sakaya kami nolanto-lanto ri tasi Adria, kira-kira natongo wengina, anabua sakaya etu nombarasai sakaya ira etu mana nakawao nggari kabatana. 28 Sabana etu niukuru ira kandala nu tasi etu ante lui pade watu, rompulu ndopo kandala nu ue etu. Ira namaju sakedi da'a nakawaoka nggari setu pade niukuru ira wo'umo, sampulu alima ndopo kandala nu tasi etu. 29 Naopu etu niulunjaka ira pataongu balango nggari bagia puri nu sakaya etu ala mompopeta'a sakaya, sabana ira naeka sakaya kami etu mombarumpa watu gusu. Pade nisarumaka ira ane mamala masalisa-lisa maeo. 30 Tapi bara sakuya mba'a anabua nu sakaya etu nompasimbuku malai nggari sakaya etu. Niulunjaka ira sekoci mpaka ri bunggu nu tasi ewa ira madota mangulunjaka balango ri kolu nu sakaya etu. 31 Nanggita kajadia etu nangulimo i Paulus ka Yulius ante tantara-tantarana etu, "Ane anabua-anabua sakaya etu mompalasi sakaya e'i, komi pura-pura da'a ntoto masalama!" 32 Nangepe tesa Paulus etu tantara-tantara etu nombadapa kaloro nu sekoci pade nipalamba ira nalome. 33 Tempo ntora maeomo, Paulus nompakau pura-pura tau kana manggoni. Niulina, "Sampulu patambengimo kasaena komi aga nompopea-pea, da'a ria komi nanggoni nuapa-nuapa! 34 Sabana etu kuperapi ka komi, kana manggoni komi sakedi we'i-we'i. Panggoni etu paraluu rakoni komi ala komi maroso bali pade mamala masalama nggari kasusa e'i. Komi pura-pura kana masalama. Da'a ria mokuya komi ngina, nau aga sambalaa wulu wo'o komi da'a maronto!" 35 Naopu notesa iwetu, Paulus nangala roti pade niulina tarima kasi ka Pue Alatala ri ngayo ira pura-pura. Nibagi-bagina roti etu, pade nompamulamo i'a nanggoni. 36 Naopu etu naroso bali rara ira pura-pura, pade ira wo'u nanggoni. 37 Kadea kami pura-pura riara sakaya bete etu, roatu pitumpulu bo onomba'a. 38 Naopu nanggoni sampe nabosu puramo, ira nantajiaka gando to naria ri sakaya etu riara ntasi ala manga'a sakedi sakaya etu. 39 Tempo naeomo topompajala sakaya etu nanggita kabatana tapi da'a ninjani ira kabatana ri umba etu. Nikita ira saongu sidu nu tasi ante talintina. Patuju ira ala sakaya etu rapakasampo ira ri talinti etu. 40 Naopu etu nidapa ira kaloro-kaloro nu balango-balango, pade balango-balango etu nipalasi ira naboli riara ntasi. Pade niwole ira kaloro-kaloro pompo'u guli ala sakaya mamala raguli. Pade niore ira somba ri kolu nu sakaya etu ala poiri mantawui sakaya etu malau mpaka ri talinti. 41 Tapi da'apa narata ri talinti etu sakaya kami aga nombarumpa bone nabua. Bagia kolu nu sakaya etu nesua riara bone sampe sakaya etu mana namala mapola, pade bagia ri puri nu sakaya etu naropotaka nirumpa nu balumba bete etu. 42 Nanggita kajadia etu, tantara-tantara etu madota mompatesi pura-pura tau nitaha etu ala da'a ria samba'a morabu ri kabatana pade malai. 43 Tapi Yulius nantagi ira sabana i'a madota mompakasalama i Paulus etu. Pade nipakauna pura-pura tau to namala norabu motingganawu mokolu riara ntasi morabu mpaka ri talinti etu. 44 Pade tau-tau ntanina kana metuntumaka ante nanjoko dopi pade kayu bingga-bingga nu sakaya etu. Jadi ante iwetumo kami pura-pura nasalama nesore ri kabatana.
1 Sangga nasalama puramo kami nesore ri kabatana ri wiwi talinti etu, pade ninjani kami lewuto etu, Lewuto Malta. 2 Pue ngata Malta etu najole mpu'u ira ri ja'i kami. Ira nantarima kami pura-pura ante nabelo pade niparega ira apu raponeru kami, sabana nompamulamo nauja pade rawana wo'u nalenimo. 3 Paulus nalau nompasiromu rangga-rangga nu kayu. Sangga nitu'una kayu etu ri apu, nesuwumo samba'a ule nggari kayu sabana kapane nu apu etu, pade nantuda pale i Paulus. 4 Sangga nikita pue ngata ule etu neloe ri pale Paulus, notesamo ira ka roana samba'a bo samba'a, "Tau e'i natantumo i'a samba'a topepatesi, sabana naupa nasalamamo i'a nggari tasi, Wiata Topotangara da'a mompakamba i'a matuwu." 5 Tapi Paulus aga nantarampea ule etu mpaka riara nu apu, pade da'a ntoto nirasaina ju'ana. 6 Pue ngata etu nompekiri pale Paulus kana mebangga, bara i'a madungga bo mamate. Tapi nasae nipopea ira, da'a ria nakuya-kuya i Paulus. Nanggita etu nabalimo pompekiri ira, pade niuli ira Paulus etu samba'a wiata. 7 Da'a nakawao nggari setu naria tana ntopoparenta Lewuto Malta etu, sangana i Publius. I'a nantarima kami ante kadamba nu rarana pade tolumbengi kasaena kami nitoratana riara njapona. 8 Tempona etu uma i Publius etu nakambole naturu sabana naju'a kokora bo natero. Paulus nesua ri ja'ina pade ante nosambaya bo nombadika palena ri koro ntau naju'a etu nipakabelona ju'ana etu. 9 Sangga nangepe kajadia etu naratamo pura-pura tau ntanina to naju'a nggari lewuto etu ri ja'i Paulus, pade ira wo'u nipakabelona. 10 Ira mpu'u-mpu'u nombabila kami, pade tempo nasadiamo kami manggaliwo, nikeni ira ka sakaya nipesawi kami pura-pura nuapa to niparaluu kami riara posumomba kami etu. 11 Naopu tolumbula kasaena kami neto'o ri Lewuto Malta etu, nosumomba wo'umo kami ante saongu sakaya nggari ngata Aleksandria to nosanga ka "Wiata Mporapi Kastor bo Poluks". Sakaya etu nesai nasampo ri Lewuto Malta etu sampe naopu tempo leni. 12 Nosumombamo kami sampe narata ri ngata Sirakusa, pade tolumbengi kasaena kami naturu ri setu. 13 Nggari setu nosumomba kami nosale talinti sampe narata ri ngata Regium. To nailena nompamulamo poiri neburu nggari puluna sampe riara rombengipa naratamo kami ri kasampoa Putioli ri Propinsi Italia. 14 Ri setu kami nosintomu ante bara sakuya mba'a topomparasaya i Pue Yesus, pade kami nipakeni meto'o ante ira pitumbengi kasaena. Pade naopu etu nolumakomo kami mapola mpaka ri ngata Roma. 15 Tempo topomparasaya-topomparasaya i Pue Yesus ri ngata Roma etu nangepe kareba kami mamosu maratamo, naratamo ira mombatomunaka kami ri Potomu Apius pade ri ngata Pasanggaraha Tiga. Sangga nosintomupa kami ante ira nosukurumo i Paulus ka Pue Alatala, pade naroomo rarana. 16 Sangga naratapa kami ri ngata Roma Paulus mana nitarunggu. I'a nipaloga meto'o ri umba-umba nipodotana. Tapi naria samba'a tantara nanggatono i'a ri setu. 17 Nagana tolumbengi nggari setu, Paulus nompokio totu'a-totu'a to Yahudi nggari ngata Roma etu. Sangga nasiromupa ira, nangulimo i Paulus ka ira etu, "Sampesuwu-sampesuwuku, aku da'a nasala nuapa-nuapa ka sampesuwu-sampesuwuta to Yahudi bara mombaliunaka ada-ada to nitarimata nggari ja'i totu'a-totu'ata nggaolu. Tapi naupa iwetu aku nisoko ri ngata Yerusalem pade niwai riara mpale tau-tau to Roma. 18 Naopu parakaraku e'i niparesa ira, ira nadota mombakabasaka aku, sabana nanotomo da'a ria sala nipowiaku masipato aku rasuku mamate. 19 Tapi tempo tau-tau to Yahudi nombabali patuju etu, da'a ria jala ntanina, aku kana mekitangara ri ja'i Magau Roma. Naupa iwetu da'a ria pepangaduku nuapa-nuapa ri ja'i sampesuwu-sampesuwuku tau to Yahudi etu. 20 Jadi etu sampe aku nerapi mosintomu ante komi. Aku madota motesa ka komi ewa parakaraku e'i. Kakonona aku e'i nibalanggu sabana aku nomparasaya Magau to Mompakasalama to nisarumaka pura-pura to Israel." 21 Nangepe tesa i Paulus etu nesonomo ira, "Kami e'i da'a ria nantarima kamba santa'u sura nggari Bagia Yudea nosinggawela ewa parakara komi etu. Pade da'a wo'u naria samba'a tau nggari setu narata nanggeni kareba nosinggawela ante komi bara motesa anu naja'a ewa komi ka kami. 22 Tapi kami e'i madota mangepe ewa pomparasayamu etu, sabana to ninjani kami, ri umba-umba tau nanjalai pepatuduki to nituki komi etu." 23 Jadi totu'a-totu'a to Yahudi etu nompakatantu saeo rakasiromu ira ante i Paulus. Tempo naratamo eo to nipakatantu ira etu, nadeamo tau narata nasiromu ri sapo Paulus. Pade nggari mpadondo sampe ngguwiana i Paulus nombatarangga ka ira ewa Poparenta nu Alatala. Nipakena isi buku-buku nabi Musa pade buku-buku nabi-nabi ntanina motarangga ka ira ala manggeni ira momparasaya Yesus Magau to Mompakasalama to nijanji Alatala. 24 Naria to nomparasaya nuapa to niuli Paulus, tapi naria wo'u ira da'a nomparasaya. 25 Kaopuna, nompamula ira nalai nggari setu sabana posisala pombarata ira ewa pepatuduki i Paulus etu. Tapi da'apa ira nalai nangulimo i Paulus ka ira, "Nakono ntoto Tesa nggari ja'i Nosa Nagasa nu Alatala to nipasimbayu nabi Yesaya ka totu'a-totu'ata nggaolu iwe'i: 26 'Kau uli ka tau-tau to Yahudi iwe'i: Komi maoso mangepe, tapi da'a ria ranjani komi batuana. Komi maoso mompariara, tapi da'a ria rakita komi nuapa majadi. 27 Etu majadi sabana tau-tau e'i netiwatumo, ira netimbongomo, pade mata ira nipisi iramo. Ane etu da'a nipowia ira, mamala ira manggita nuapa majadi, mamala ira mangepe pade mangginjani batuana, mamala ira mangginjani to nakonona pade manjili ri ja'iku ala Aku mompakabelo ira.' " 28 Kaopuna niuli Paulus wo'umo ka ira, "Sampesuwu-sampesuwuku, kana ranjani komi, Kareba Belo e'i to nanguli iwenu Alatala mompakasalama manusia, nipatolelemo ka tau-tau da'a to Yahudi. Iramo to mompangala Kareba etu!" [ 29 Naopu nangepe tesa i Paulus etu, tau-tau to Yahudi nagaro nompalasi peto'o etu ante nosisapuaka samba'a bo samba'a.] 30 Rompae kasaena Paulus neto'o ri ngata Roma ri sapo to nisioana mboto. Ri setu nitarimana ante nadamba rarana pura-pura tau to narata ri ja'ina. 31 Nipatolelena ka ira kareba ewa Poparenta nu Alatala, pade nipatudukina ka ira kareba ewa i Pue Yesus Kristus. Etu pura-pura nipowiana ante da'a ria kakinina. Da'a ria i'a nilawa-lawa ntau.
1 Sura e'i nggari ja'iku Paulus, batua Yesus Kristus, ka komi topomparasaya i Pue Yesus ri ngata Roma to nipotowe Alatala bo nipokiona majadi todeana. Aku nipelisi bo nisuro manggeni Kareba Belo nggari ja'i Alatala 2 to nijanjina nggaolu nantuki tesa nggari nabi-nabi to nitulisi riara Buku Nagasa. 3 - 4 Kareba Belo etu nantesa Ana nu Alatala, etumo Pueta Yesus Kristus. Ewa manusia I'a muli Magau Daud. Tapi I'a wo'u Ana nu Alatala. Etu nipakanoto Alatala ante kuasa Nosa Nagasana tempo I'a nompakatuwu Yesus bali nggari kamatena. 5 Nggari ja'i Yesus wo'u kami nantarima rasi Alatala, etumo najadi surona, ala kami mamala manggeni tau nggari pura-pura ngata momparasaya bo mekou ri ja'i Pue Yesus ala sangana rabila bo ratoiya. 6 Pade komi ri ngata Roma wo'u nesua todea to nipokio Alatala majadi bagia Yesus Kristus. 7 Perapi Umata Pue Alatala bo i Pue Yesus Kristus mombagane komi bo mombawai katuwua mabelo ka komi. 8 Pamula-mulana aku nosukuru ri ja'i Pue Alatalaku riara sanga Yesus Kristus sabana katuwu komi pura-pura. Sabana tesa ewa pomparasaya komi natolele ri umba-umba ri dunia. 9 Aku tunggai nanggeni komi riara posambayaku. Alatala mboto namala mantakono tesaku e'i. I'amo Alatala to nitulungiku ante mpu'u-mpu'u raraku, etumo nanggeni Kareba Belo to nantesa Anana. 10 Pade aku batena merapi ka Alatala ane rapodotana we'i-we'i aku mamala momai mantalioda komi. 11 Sabana naino mpu'u raraku mantalioda komi ala aku mamala mompalele ka komi pompakule nggari ja'i Nosa Nagasa nu Alatala sampe pomparasaya komi rapakaroso. 12 To nipatujuku ala kita mpasanggani-nggani mamala mosipakaroso rara nggari pomparasayata samba'a bo samba'a. 13 Sampesuwu-sampesuwu, to nipodotaku ala ranjani komi nadea ngganimo aku nonia momai mantalioda komi tapi sampe we'i-we'i bate-batena naria to nombalawa aku. Patujuku momai mantalioda komi ala maria asele nu bagoku ri tatongo komi nasimbayu ewa to najadi ri tatongo tau-tau da'a to Yahudi ntanina. 14 Sabana aku masipato mantulungi pura-pura tau, nabeloka tau nangginjani ada, nabeloka tau da'a nangginjani ada, nabeloka tau nosikola, nabeloka tau da'a nosikola. 15 Etu sampe aku mpu'u-mpu'u madota mompatolele Kareba Belo ka komi wo'u to neto'o ri ngata Roma. 16 Da'a naeya mataku mompatolele Kareba Belo, sabana riara kareba etu naria kuasa Alatala to mompakasalama butu-butu mba'a topomparasaya; pamula-mulana tau to Yahudi pade tau-tau da'a to Yahudi wo'u. 17 Sabana riara Kareba Belo nipakanoto iwenu kita majadi manoa riara mpanggita Alatala, etumo ante momparasaya nggari pamulana sampe kaopuna. Etu nasimbayu ewa tesa to nitulisi riara Buku Nagasa iwe'i: "Tau to najadi nanoa riara mpanggita Alatala ante nomparasaya, i'amo to matuwu mabelo sampe ri kasae-saena." 18 Nggari suruga Alatala nompopokita rau rarana ka pura-pura tau to nanjapuaka I'a bo nompowia kaja'ana. Powia ira to naja'a etu nombalawa tau mangginjani pepatuduki to nakonona ewa Alatala. 19 Manusia masipato mawela rau rara nu Alatala sabana nanotomo ka ira nuapa to namala ranjani ira ewa Alatala. Etu nipakanoto Alatala mboto ka ira. 20 Sabana nompamula nggari tempo dunia nipajadi sampe we'i-we'i, nanotomo ka ira anu da'a natekita nggari ja'ina, etumo kuasana to da'a ria kaopu-opuna bo ingguna ewa Alatala. Etu nanotomo ka ira nggari pura-pura nuapa to nipajadina sampe da'a ria to namala manguli, "Da'a ninjani kami!" 21 Sabana naupa ira nangginjani Alatala, ira da'a nombabila I'a ewa Alatala, pade ira da'a wo'u nosukuru ri ja'ina. Tapi ira aga nompekiri anu da'a ria gunana bo rara nta'i ira najadi narumau. 22 Ira nompangaku korona tau nanoto, tapi kakonona ira najadi todoyo. 23 Ira da'a nepue ka Alatala to da'a ria namate to neliu nggakuasa bo nagaya. Tapi ira aga nepue ka parantau-parantau nolenje mpomanusia, mpotonji, mpobinata to nokada patanggada bo binata to nekanjoyo to namala namate. 24 Sabana etu Alatala nompakamba ira nantuki dota rara ira mboto nowia kaja'ana, sampe ira nompakatantoru koro ira samba'a bo samba'a. 25 Ira nanjambei pepatuduki ewa Alatala to nakonona ante pepatuduki to nasala. Da'a Topolemo to nibila bo nipesomba ira, tapi aga to nipajadina. Kakonona Topolemo etumo to masipato ratoiya sampe ri kasae-saena. Amin! 26 Sabana etu Alatala nompakamba ira nantuki dota rara ira to naja'a to nompakaeya. Besi-besi mana nompokono langgai ewa to nabiasa najadi ri ja'i manusia, tapi nompokono simbau ira besi. 27 Iwetu wo'u langgai mana madota mosampaturu ante rongo ira mboto ewa to masipatona, tapi nariapa dota ira mogau sala ka ira simbau langgai. Ira nowia pokainggu to nompakaeya ira simbau langgai sampe kaopuna ira nawela balasi riara koro ira mboto to masipato ante powia ira to nasala. 28 Ira nompekiri da'a ria gunana mosinjani ante Alatala. Jadi etu sampe Alatala nompakamba pekiri ira najadi nagero sampe ira nompowia anu da'a masipato rapowia. 29 Jonjona: rara nta'i ira naponu ante mpengele-ngele inggu to naja'a bo nadenggo. Ira da'a nabasa ante nuapa to naria ri ja'i ira, nawau rara ira, ira nasiriati, ira nadota mepatesi bo mosinggarau bo mebagiu. Ira nomboli rau, ira tunggai nantesa roa ira nggalino 30 bo nompakaja'a sanga tau ntanina. Ira nomporau rara Alatala, ira nalanga rara bo nabiasa nangoa. Ira nata'u nangelo akala mowia kaja'ana bo ira da'a nekou ri ja'i ntotu'ana. 31 Ira nadoyo, ira da'a namala raparasaya, da'a ria towe ira bo da'a ria asi mata ira nanggita sanggamanusiana. 32 Ninjani ira mamimo parenta nu Alatala to nanguli tau-tau to noinggu iwetu masipato rasuku sampe mamate. Tapi naupa iwetu kana nikawia ira wo'u pokainggu etu, pade da'a aga etu, ira nasituju wo'u ane tau ntanina nowia iwetu.
1 Jadi sampesuwu-sampesuwu, ane komi nompakasala roamu da'a mamala komi manguli, "Aku e'i da'a ria salaku." Sabana komi mboto wo'u nompowia pokainggu to nasimbayu ewa pokainggu roa to nipakasalamu. Jadi ante nompakasala roamu iwetu komi wo'u nompakasala koromu mboto! 2 Ninjanita mbotomo ane Alatala mombasuku tau to noinggu iwetu kabotu mpotangarana nanoa. 3 Tapi sampesuwu-sampesuwu, komi mboto wo'u nanggawia pokainggu to nipakasalamu ka roamu. Jadi iwenu? Bara nipekiri komi naupa nowia iwetu komi mamala makabasaka nggari pesuku nu Alatala? 4 Alatala nabelo mpu'u rarana, I'a mpu'u-mpu'u nosabara ri ja'i komi, pade I'a da'a nasalisa mombasuku silaka-silaka komi. Tapi ne'e komi manjapuaka kabelo nu Alatala etu! Toramo! Patuju kabelo nu rara Alatala etumo ala manggeni komi majea nggari silakamu! 5 Tapi komi nako'o rara, da'a madota majea. Sabana etu komi mbotomo mantambai katomo nu pesuku to rapawela ka komi ri kaopu nu dunia tempo Alatala mompopokita rau rarana bo mombabutusi potangara ante manoa. 6 Sabana Alatala kana mombabalasi butu mba'a tau nantuki powiana. 7 I'a kana mombawai katuwua mabelo sampe ri kasae-saena ka ira to natutu nompowia to nabelona ala ira ratoiya bo rabila bo mombarata katuwu to da'a ria kaopu-opuna. 8 Tapi I'a kana manggarau bo mombasuku butu mba'a tau aga nompekiri korona mboto pade da'a nantuki pepatuduki to nakonona tapi aga nantuki to naja'ana. 9 Butu mba'a tau nompowia kaja'ana kana mandasa bo mombarasai kasusa, pamula-mulana tau-tau to Yahudi pade tau-tau da'a to Yahudi wo'u. 10 Tapi pura-pura tau to nompowia kabelona kana ratoiya bo rabila bo mombarata katuwua mabelo, pamula-mulana tau-tau to Yahudi pade tau-tau da'a to Yahudi wo'u, 11 sabana Alatala da'a nanggita lenje. 12 Ane tau-tau to da'a nangginjani Atura-atura agama Yahudi nompowia silaka, ira kana mamate bo rapopoga'a nggari ja'i Alatala sampe ri kasae-saena. Tapi pesuku etu da'a nibutusi nantuki Atura-atura agama Yahudi. Tapi tau-tau to nangginjani Atura-atura agama Yahudi kana rasuku nantuki Atura-atura agama etu ane ira mowia silaka. 13 Sabana da'a tau-tau to nangepe Atura-atura agama to majadi manoa riara mpanggita Alatala, tapi tau-tau to nantuki Atura-atura etu. 14 Tau-tau da'a to Yahudi da'a nangginjani Atura-atura agama Yahudi. Tapi ane nggari dota ira mboto ira mantuki parenta-parenta to naria riara Atura-atura etu, batuana pekiri rara nta'i ira mbotomo nanggeniaka katuwu ira nasimbayu ewa ira nangginjani Atura-atura agama Yahudi, naupa ira da'apa nangginjani Atura-atura etu. 15 Pokainggu ira mboto nompakanoto nuapa to niparenta riara Atura-atura agama ewa natetulisi riara nta'i ira. Etu nipakanoto pekiri rara nta'i ira mboto, sabana naria pompekiri ira nompakasala ira bo naria wo'u pompekiri ira to nantakono ira. 16 Jadi ri Eo Mpotangara banepia Alatala kana mompakau Yesus Kristus mombatangara pura-pura manusia iwetu nantuki pura-pura nuapa to nitabuniaka riara pekiri rara nta'i ira. Etumo to nipakanoto riara Kareba Belo to nipatoleleku. 17 Tapi umba komi tau to Yahudi, komi nompangaku koro komi tau to Yahudi. Komi nanjarumaka majadi manoa riara mpanggita Alatala ante mantuki Atura-atura agama. Komi nangoa ante nanguli, "Kamimo todea to nipelisi Alatala!" 18 Komi nangginjani dota nu Alatala pade komi nata'u nompakatantu nuapa to nabelona sabana komi nipatuduki nggari Atura-atura agama. 19 Nipekirimu komimo to nata'u nompatuduki tau da'a nosinjani ante Alatala nasimbayu ewa tau nombanini toburo. Pade nipekirimu komi wo'u to najadi reme ri tatongo ntau to natuwu riara karumauna. 20 Pade nipekirimu komimo to nata'u nompatuduki tau-tau da'a ria adana pade nompaguru tau-tau todoyo. Etu nipekirimu sabana riara Atura-atura agama Yahudi to naria ri ja'imu naria mpengele-ngele pangginjani bo pepatuduki to nakonona. 21 Jadi komi nompatuduki tau ntanina, tapi nokuya komi da'a nompatuduki koro komi mboto? Komi nompatuduki ka tau ntanina, "Ne'e mangangga." Tapi nokuya komi mboto nangangga? 22 Komi nompatuduki ka tau, "Ne'e mogau sala ante tau da'a rongomu mboto." Tapi nokuya komi mboto nogau sala iwetu? Komi narau rara nanggita banta tapi nokuya komi mboto nangala nuapa-nuapa to naria ri bunggu banta etu? 23 Komi nadamba-damba sabana naria Atura-atura agama Yahudi ri ja'imu. Tapi nokuya komi nanjalai Alatala ante da'a nantuki Atura-aturana etu? 24 Riara Buku Nagasa naria nitulisi iwe'i: "Nggari pokainggu komi tau-tau to Yahudi sampe tau-tau da'a to Yahudi nombasalaraka Alatala." 25 Ane komi matundu riara Atura-atura agama Yahudi ada mposuna komi mpu'u-mpu'u naria gunana. Tapi ane komi mombaliunaka Atura-atura etu, ada mposuna komi mana ria gunana. 26 Jadi ane tau da'a to Yahudi to da'a nisuna mompariara parenta-parenta to nipakatantu riara Atura-atura agama, natantumo i'a kana ratarima Alatala nasimbayu ewa tau to Yahudi to nisuna. 27 Pade tau-tau to da'a nisuna kana mompakasala komi tau to Yahudi. Sabana nariamo buku Atura-atura agama ri ja'i komi pade komi nisuna, tapi komi nombaliunaka Atura-atura etu. Ira tau da'a nisuna, tapi iramo to natundu riara Atura-atura agama. 28 Jadi to Yahudi to nakonona to nireke todea nu Alatala da'a aga sangana to Yahudi. Pade ada mposuna to nakonona to nombatandai isema bagia nu Alatala da'a aga to nipowia ri koro manusia. 29 Tapi tau to Yahudi to mpu'u-mpu'u todea nu Alatala etumo tau to nantuki Alatala nggariara nta'ina. Pade powia to nombatandai isema bagia nu Alatala etumo pokarajaa Nosa Nagasa nu Alatala riara nta'i mompakalipo dota rara to naja'a, da'a ada mposuna to nipowia manusia nantuki Atura-atura agama. Tau ewa etu da'a ratoiya manusia, tapi i'a kana ratoiya Alatala.
1 Bara maria to nekutana, "Ane iwetu nuapa pelabina tau to Yahudi? Nuapa gunana mantuki ada mposuna?" 2 Tantu nadea pelabina, naria mami gunana. Pamula-mulana tau to Yahudimo to niparasaya ka tesa-tesa nu Alatala. 3 Tapi iwenu ane maria ri tatongo ira to da'a naroo nomparasaya Alatala? Etu batuana Alatala da'a namala raparasaya? 4 Natantumo da'a ntoto nakono! Sabana nanotomo Alatala batena nanoa naupa pura-pura tau nodawa. Ewa to nitulisi riara Buku Nagasa iwe'i: "Pue, nuapa-nuapa mutesa, kana manoto kakono nu tesa etu. Pade naupa Komi rapakasala, Komi bate-batena nakono." 5 Tapi ane kaja'ata mompakanoto kanoa rara nu Alatala, ne'e kita manguli Alatala da'a nanoa ane I'a mombabalasi kaja'ata etu. Etu pompekiri manusia. 6 Tapi etu da'a ntoto nakono! Sabana ane Alatala da'a nanoa da'a masipato I'a mombatangara manusia ri dunia e'i. 7 Bara naria tau to nompekiri iwe'i: "Nokuya kita nipakasala ewa tau nasilaka ane nggari pokaingguta to nadenggona kanoa nu Alatala mantambai manoto sampe I'a ratoiya?" 8 Ante etu nakono agina kita manguli, "Kamaimo kita mowia kaja'ana ala meumba to nabelona!" Naria mamimo tau nompakaja'a sangaku ante nanguli aku mboto notesa iwetu. Tapi etu da'a ntoto nakono! Tau-tau to nanguli etu masipato rasuku Alatala! 9 Jadi iwenu? Kami to Yahudi neliu nggabelopa nggari tau-tau ntanina riara mpanggita Alatala? Natantumo da'a! Sabana ewa to niuliku ri ba'ana, pura-pura manusia nasilaka, nabeloka tau to Yahudi nabeloka tau da'a to Yahudi. 10 Ewa to nitulisi riara Buku Nagasa iwe'i: "Da'a ria samba'a to nanoana, nau kamba samba'a da'a ntoto ria. 11 Da'a ria samba'a to nanotona riara mpanggita Alatala, pade da'a wo'u ria nau aga samba'a to nangelo Alatala. 12 Pura-pura tau nasalanjalamo, katuwu ira mana ria gunana. Da'a ria to nompowia kabelona, nau aga samba'a da'a ntoto ria. 13 Tesa-tesa ira nawau mpu'u nasimbayu ewa dayo ntomate to natebuka. Tesa bagiu nesuwu nggari jila ira. Sumba ira nompakaja'a nasimbayu ewa bisa nu ule. 14 Ira bate-batena netunda njilaka. 15 Ira nasalisa nalau mompatesi tau. 16 Ri umba-umba nikalau ira, ira nompakagado bo nompakasusa tau ntanina. 17 Da'a nadota ira natuwu mosinggabelo. 18 Pade ira da'a ntoto nekou ri ja'i Alatala." 19 Ninjanitamo pura-pura to nitulisi riara Atura-atura agama Yahudi nitulisi ka tau-tau to natundu riara Atura-atura etu. Jadi mana ria kamba samba'a to namala mebali. Njumaongu dunia masipato rasuku Alatala. 20 Da'a ria samba'a tau to mamala rareke manoa riara mpanggita Alatala ante mantuki Atura-atura agama. Tapi Atura-atura etumo to nompakanoto ka kita pura-pura manusia nasilaka. 21 Tapi we'i-we'i Alatala nompopokita ka kita iwenu sampe manusia mamala majadi manoa riara mpanggitana. Etu da'a majadi ante mantuki Atura-atura agama. Riara Buku i Musa bo buku nabi-nabi naria tesa to nombaboto iwenu Alatala mompakanoa kita. 22 Etumo manusia majadi manoa riara mpanggita Alatala ante momparasaya Yesus Kristus. Butu mba'a tau to nomparasaya kana rareke Alatala manoa. Da'a ria posisalana, 23 sabana pura-pura manusia nasilaka bo mana mamala mombarasai kabelo nu Alatala to nipogumaa. 24 Tapi kita najadi nanoa riara mpanggitana nggari kamate Yesus Kristus nantolo silakata. Etu niwai Alatala bayangi sabana towe belona mboto. 25 Yesus Kristus nipakatantu Alatala mamate majadi posompo silaka tau-tau to nomparasaya I'a. Etu nikawia Alatala ala mompopokita kanoana. Sabana tempo nggaolu I'a nosabara nanggita manusia nowia silaka sampe ira da'a nisukuna. 26 Patujuna ala mompopokita ka tau tempo we'i-we'i I'a nanoa bo I'a mantarima tau-tau to nomparasaya i Pue Yesus ewa tau nanoa riara mpanggitana. 27 Jadi ane iwetu, tantu da'a namala kita mantoiya korota mboto. Iwenu sampe kita da'a namala mantoiya korota mboto? Sabana nanotomo kita da'a najadi nanoa riara mpanggita Alatala nggari powiata mboto tapi nggari pomparasayata ka Yesus Kristus. 28 Jadi katantuna iwe'i: manusia majadi manoa riara mpanggita Alatala ante momparasaya da'a ante mantuki Atura-atura agama. 29 Nanotomo Alatala da'a aga Alatala nto Yahudi. Tapi I'a wo'u Alatala ntau da'a to Yahudi. 30 Sabana Alatala aga samba'a lau, pade I'amo to mompakanoa tau-tau to Yahudi ane ira momparasaya i Pue Yesus, pade I'a wo'u mompakanoa tau-tau da'a to Yahudi ane ira momparasaya i Pue Yesus. 31 Jadi iwenu? Ante momparasaya i Pue Yesus batuana kita manjapuaka Atura-atura agama Yahudi? Natantumo da'a! Kakonona, ante momparasaya i Pue Yesus kita mantakono Atura-atura agama.
1 Jadi pekirimo jonjo Abraham, totu'ata nggaolu. Nuapa to najadi riara nggatuwuna? 2 Ane rapana Abraham najadi tau nanoa sabana powiana to nabelo i'a namala mantoiya korona mboto. Tapi da'a namala i'a mantoiya korona iwetu ri ngayo Alatala. 3 Sabana naria tesa ri Buku Nagasa to nanguli iwe'i: "Abraham nomparasaya Alatala, pade nggari pomparasayana etu i'a nireke Alatala tau nanoa." 4 Ane tau nokarajaa gajina da'a nireke pewai bayangi, tapi etu sangele to masipato ratarimana. 5 Tapi da'a iwetu kita ante Alatala. Kita nireke nanoa riara mpanggitana da'a nggari powiata to nabelo tapi nggari pomparasayata ka Alatala to nompakanoa tau-tau to nadenggona. 6 Etu nasimbayu ewa tesa Magau Daud nggaolu. I'a notesa ewa kasana nu rara ntau to nireke Alatala nanoa da'a nggari powiana to nabelo tapi nggari pomparasayana ka Alatala. 7 Daud nanguli iwe'i: "Nasanamo tau to niampungi salana, to nitampunisi silakana. 8 Nasanamo tau mana nireke Alatala nasilaka." 9 Jadi iwenu? Nariamo kasana to nitesa Magau Daud etu aga ka tau to Yahudi to nantuki ada mposuna atau ka tau-tau da'a to Yahudi wo'u to da'a nantuki ada mposuna? Natantumo ka ira pura-pura! Sabana ewa niuli kami ri ba'ana, Abraham nireke Alatala nanoa nggari pomparasayana. 10 Ipia Abraham najadi nanoa riara mpanggita Alatala, naopu i'a nisuna atau da'apa i'a nisuna? Natantumo etu najadi da'apa i'a nisuna. 11 I'a nisuna nggapurina, pade posunana etu najadi tandaina i'a nireke Alatala nanoa nggari pomparasayana tempo i'a da'apa nisuna. Jadi ante iwetu i'a najadi "Uma" nu pura-pura tau to nomparasaya tapi da'apa nisuna nantuki ada agama Yahudi. Ira wo'u nireke Alatala nanoa ante nomparasaya nasimbayu ewa Abraham. 12 Pade i'a wo'u najadi "Uma" tau-tau nisuna, etumo ira to da'a aga nantuki ada mposuna agama Yahudi tapi to nantuki jonjo pomparasaya Abraham tempo i'a da'apa nisuna. 13 Tempo nggaolu Alatala nojanji ka Abraham iwe'i: "Dunia e'i kana majadi bagiamu sampe ri muli-mulimu." Alatala nojanji iwetu da'a sabana Abraham nantuki Atura-atura agama Yahudi, tapi sabana i'a nanoa riara mpanggita Alatala nggari pomparasayana. 14 Sabana ane aga tau to nanjarumaka Atura-atura agama ala majadi manoa to mantarima nuapa to nijanji Alatala rawai ka ana-anana, batuana pomparasaya ka Alatala da'a ntoto ria gunana, pade pojanjina aga pojanji bayangi. 15 Kakonona nggari Atura-atura agama sampe nanotomo rau rara Alatala sabana manusia bate-batena nombaliunaka Atura-atura etu. Ane rapana da'a ria Atura-atura agama, da'a ria tau rareke nasala. 16 Jadi kita mantarima nuapa to nijanji Alatala ante momparasaya, ala manoto etu nggari towe belo nu Alatala da'a nggari powia manusia. Patuju nu Alatala ala nuapa to nijanjina namala ratarima pura-pura muli Abraham, da'a aga ira to nompasimbuku mantuki Atura-atura agama, tapi wo'u ira to nomparasaya Alatala nasimbayu ewa Abraham. Sabana Abraham najadi umata pura-pura. 17 Ewa tesa Alatala to nitulisi riara Buku Nagasa iwe'i: "Aku nangonggotaka iko majadi uma ntodea ri umba-umba ri dunia." Riara mpanggita Alatala Abraham najadi umata pura-pura. I'a nomparasaya ka Alatala to nakuasa nompakatuwu tomate bo to nompakule mompajadi ante tesana anu da'a naria najadi naria. 18 Naupa da'a masipato i'a manjarumaka majadi uma ntodea ri umba-umba ri dunia i'a batena nomparasaya bo nanjarumaka etu nantuki tesa Alatala to niuli ka i'a to nanguli, "Kadea nu mulimu banepia masimbayu ewa betu'e ri langi." 19 Tempo Abraham nangepe pojanji etu namosu satumpae umuruna. Tapi da'a nalente pomparasayana tempo i'a nompekiri korona to natu'a mpu'umo bo rongona i Sara to nagampa. 20 I'a da'a nolengga-lengga nomparasaya nuapa to nijanji Alatala ka i'a, tapi pomparasayana nompakaroso rarana sampe i'a nantoiya bo nombabila Alatala. 21 Niparasayana mpu'u Alatala nompakule nompakadupa pojanjina. 22 Jadi etu sampe i'a nireke Alatala nanoa. 23 Tesa-tesa "i'a nireke Alatala nanoa" da'a aga nipawela ka Abraham, 24 tapi etu wo'u nipawela ka kita. Sabana kita wo'u rareke Alatala manoa ane kita momparasaya ka Alatala to nompakatuwu bali Pueta Yesus nggari kamatena. 25 I'a niwai Alatala rapatesi mombasompo silakata, pade naopu etu I'a nipakatuwu bali ala kita mamala majadi manoa riara mpanggita Alatala.
1 Jadi we'i-we'i kita nireke nanoa riara mpanggita Alatala sabana nomparasaya. Etu sampe kita natuwu nosinggabelo ante Alatala nggari nuapa to nipowia Pueta Yesus Kristus ka kita. 2 Ante nomparasaya Yesus Kristus kita niwai loga mombarasai towe belo nu Alatala ewa to nirasaita mamimo we'i-we'i. Pade nadamba mpu'u rarata sabana naria panjarumakata mombarata bagia riara kuasa bo kagaya nu Alatala to nipogumaa. 3 Pade da'a aga etu, tapi kita wo'u nadamba-damba riara kasusa bo kapari to nirasaita sabana ninjanitamo nggari kasusa bo kapari etu kita majadi maroo. 4 Pade ane kita maroo kita mamala manta'amaka tempo rapesoba sampe kita rakonoa Alatala. Pade ane ranjanita kita nikonoa Alatala panjarumakata ri ja'ina mantambai maroso. 5 Ane maria panjarumakata ewa etu da'a malente rarata. Nuapa to nisarumakata kana madupa. Nanotomo etu sabana nariamo towe Alatala riara nta'ita to najadi nggari Nosa Nagasa to niwaina ka kita. 6 Iwe'imo to nompakanoto towe Alatala ka kita. Ewa nisuka tempo kita da'a nompakule mompakanoa korota mboto Kristus namate nanjaliku kita tau-tau to da'a nantuki dota Alatala. 7 Ri pokainggu manusia nakura niratata tau to nasadia mamate manjaliku roana to nanoana. Ane roana tau mpu'u-mpu'u nabelo rarana bara maria samba'a romba'a to mabia mamate manjaliku i'a, tapi etu nakura najadi. 8 Tapi Alatala nompopokita kabete nu towena ka kita iwe'i: tempo kita danasilaka Kristus namate nanjaliku kita. 9 Jadi ane we'i-we'i kita nireke nanoa riara mpanggita Alatala nggari katiti nu lei Kristus, natantumo kita kana rapakasalama Kristus nggari pesuku Alatala banepia. 10 Bopia tempo kita danobali ante Alatala I'a nompakau Anana marata ri dunia mamate manjaliku kita ala kita rapoposinggabelo bali ante I'a. We'i-we'i nosinggabelo balimo kita ante Alatala nggari kamate Anana. Jadi ante iwetu natantumo kita kana rapakasalama nggari pesuku to marata, sabana Anana natuwu balimo nggari kamatena pade batena nosanggani-nggani ante kita. 11 Pade da'a aga iwetu, nadamba wo'u rarata sabana kita nosaongu rara ante Alatala. Etu najadi nggari powia Pueta Yesus Kristus to nompoposinggabelo kita bali ante Alatala. 12 Naria silaka riara dunia sabana powia samba'a manusia to nombaliunaka parenta Alatala, etumo Adam. Pade nggari silaka Adam etu sampe naria kamatea ri dunia. Pade kaopuna kamatea nendai ka pura-pura manusia sabana pura-pura manusia nowia silaka. 13 Tempo da'apa naria Atura-atura agama Yahudi naria mamimo silaka ri dunia. Tapi silaka-silaka etu da'apa nireke Alatala, sabana da'apa ria Atura-atura agama to nompakanoto powia nuapa nireke silaka. 14 Tapi naupa iwetu nompamula nggari tempo Adam sampe ri tempo i Musa pura-pura manusia kana nawela kuasa kamatea. Naupa ira da'a nombaliunaka parenta Alatala ewa to nipowia Adam ira batena nawela kuasa kamatea. Adam naria kasimbayuna ante tau to narata nggapurina, etumo Yesus. 15 Tapi powia Adam bo powia Yesus da'a nasimbayu. Pewai bayangi nu Alatala ka kita da'a nasimbayu ante silaka Adam. Nggari silaka Adam etu pura-pura manusia nawela kuasa kamatea. Tapi neliu nggabetepa asele towe belo nu Alatala to niwaina ante kajoina ka pura-pura manusia nggari powia Yesus Kristus. 16 Sangganipa kuuli pewai Alatala ka kita da'a nasimbayu ante silaka Adam. Nggari silaka samba'a tau pura-pura manusia nasala riara mpanggita Alatala bo masipato rasuku. Tapi nggari pewai bayangi nu Alatala etu silaka-silakata to nadea nipakalipo pade kita najadi nanoa riara mpanggitana. 17 Nggari silaka samba'a tau etu pura-pura manusia nawela kuasa kamatea. Tapi neliu nggabetepa asele nu powia to samba'ana, etumo Yesus Kristus. Isema-sema to nomparasaya I'a kana mantarima towe belo nu Alatala to neliu-liuna sampe majadi tau nanoa riara mpanggitana. Pade ira kana matuwu bo moparenta mosanggani ante Kristus sampe ri kasae-saena. 18 Jadi nggari sangele silaka samba'a pura-pura manusia nasilaka sampe masipato rasuku. Pade nggari sangele powia nanoa to samba'ana pura-pura manusia mamala majadi manoa riara mpanggita Alatala sampe masipato matuwu mabelo sampe ri kasae-saena. 19 Nggari pombaliunaka samba'a pura-pura manusia najadi nasilaka. Pade nggari katundu to samba'ana pura-pura manusia mamala majadi manoa riara mpanggita Alatala. 20 Atura-atura agama Yahudi niwai Alatala ala mantambai kadea nu silaka to nipowia manusia. Tapi naupa silaka manusia nantambai kadeana, nantambaipa kadeana towe belo nu Alatala. 21 Bopia silaka nombakuasai pura-pura manusia sampe ira nawela kuasa kamatea. Tapi patuju nu Alatala ala towe belonamo to mombakuasai pura-pura manusia. Etu najadi tempo I'a nantarima kita ewa tau nanoa to masipato matuwu mabelo sampe ri kasae-saena sabana kita nosaongu rara ante Pueta Yesus Kristus.
1 Jadi ane iwetu bara maria to nompekiri iwe'i: "Agina kita tunggai mowia silaka ala mantambai kadea nu towe belo nu Alatala." 2 Tapi ne'e ntoto mompekiri iwetu. Da'a mana masipato kita tunggai mowia silaka sabana kita mana nikuasai silaka. 3 Tantu ninjani komimo tempo kita nidiu ewa tandaina kita topomparasaya Yesus Kristus ewa kita wo'u namate nosanggani-nggani ante I'a. 4 Tempo kita nidiu ewa kita namate bo nitana nosanggani-nggani ante I'a. Etu najadi ala tempo Kristus nipakatuwu bali nggari kamatena ante kuasa Umana to nabetena, kita wo'u mamala matuwu ante pokainggu to nabou. 5 Sabana ane kita namate nosanggani-nggani ante I'a natantumo kita wo'u kana matuwu bali mosanggani-nggani ante I'a. 6 Ninjanitamo tempo Kristus namate nipaku ri kayu parika pokaingguta nokolu wo'u nipatesi nosanggani-nggani ante I'a ala kuasa silaka riara nggatuwuta rapakaropu. Ante iwetu kita mana mamala rapobatua nu silaka. 7 Sabana tau to namate nikabasakamo nggari kuasa silaka. 8 Jadi ane kita namate nosanggani-nggani ante Kristus, niparasayata natantumo kita kana matuwu mosanggani-nggani ante I'a. 9 Sabana ninjanita Kristus nipakatuwu balimo nggari kamatena pade I'a mana mamate. Kamatea mana mamala mombakuasai I'a. 10 I'a namate sanggani lau nombadagi kuasa silaka sampe ri kasae-saena. Pade we'i-we'i I'a batena natuwu mompakadamba rara Alatala. 11 Iwetu wo'u komi kana matuwu ewa tau to nikabasaka nggari kuasa silaka bo to natuwu mompakadamba rara Alatala, sabana komi nosaongu rara ante Yesus Kristus. 12 Sabana etu ne'e mana mompalamba silaka mombakuasai koro komi to mamate sampe komi mantuki dota rara to naja'ana. 13 Pade ne'e komi mompake sipa nu koromu mompowia kaja'ana. Tapi jujumo koromu ka Alatala ewa tau to natuwu bali nggari kamatena. Jujumo sipa nu koromu ka Alatala ala etu rapake mompowia to nanoana, 14 sabana komi mana nikuasai silaka. Nanotomo etu sabana komi mana nisoko Atura-atura agama, tapi komi nisoko towe belo nu Alatala. 15 Jadi iwenu? Mamalamo kita mowia silaka sabana kita mana nisoko Atura-atura agama tapi aga nisoko towe belo nu Alatala? Natantumo da'a ntoto mamala! 16 Natantu ninjani komi ane komi mekou ri ja'i samba'a tau bo mantuki parentana komi najadi batuana. Iwetu wo'u ane komi mantuki dota rara to naja'a komi majadi batua silaka pade kaopuna komi mamate bo moga'a nggari ja'i Alatala sampe ri kasae-saena. Tapi ane komi mekou ri ja'i Alatala komi majadi batuana pade rareke manoa riara mpanggitana. 17 Bopia komi batua nu silaka. Tapi nosukuru mpu'u ka Alatala, sabana we'i-we'i ante mpu'u-mpu'u rara komi nantuki pepatuduki to nipatolele ka komi. 18 Komi nikabasakamo nggari kuasa silaka pade we'i-we'i komi nompowia to nanoana. 19 Aku nompake porapa nggari katuwuta eo-eo ewa batua ala da'a makaja komi mangginjani patujuku, sabana pompaha komi danakura. Bopia komi nipobatua silaka sampe komi nompake sipa nu koromu nompowia to natantoru bo naja'a sampe pokainggumu nantambai naja'a. Tapi we'i-we'i komi kana mompake sipa nu koromu mompowia to nanoana sampe katuwu komi majadi magasa. 20 Bopia tempo komi nipobatua nu silaka komi da'a nompekiri to nanoana. 21 Nuapa asele to nitarima komi nggari pokainggu komi to nompakaeya matamu we'i-we'i? Natantumo da'a ntoto ria, sabana asele pokainggu etu aga kamatea. 22 Tapi we'i-we'i komi nikabasakamo nggari kuasa silaka pade najadi batua nu Alatala. Aselena etumo pokainggu komi najadi nagasa bo komi nombarata katuwua nabelo sampe ri kasae-saena. 23 Sabana tambo nu silaka kamatea, tapi pewai bayangi nggari ja'i Alatala etumo katuwua nabelo sampe ri kasae-saena sabana nosaongu rara ante Pueta Yesus Kristus.
1 Sampesuwu-sampesuwu, komi pura-pura nangginjani atura-atura. Jadi natantumo ninjani komi ane kita danatuwu kita danisoko atura-atura. Tapi ane kita namatemo, kita mana nisoko atura-atura etu. 2 Jonjona, samba'a besi to niporongo danisoko nu ada-ada mporongo ane rongona langgai danatuwu. Tapi ane rongona namatemo, besi etu nakabasaka nggari ada-ada mporongo to nompakaroso porongo ira njamboko. 3 Jadi ane besi etu mangala langgai ntanina tempo rongona danatuwu, etu niuli nebualo. Tapi ane rongona langgai namatemo besi etu mana nisoko ada-ada mporongo. Jadi ane i'a niporongo langgai ntanina etu mana nireke nebualo. 4 Iwetu wo'u ante komi, sampesuwu-sampesuwuku. Tempo Kristus namate komi wo'u ewa namate nosanggani-nggani ante I'a sampe komi mana nisoko Atura-atura agama. Ante iwetu we'i-we'i komi najadi bagia tau ntanina to natuwu bali nggari kamatena ala katuwuta moguna ka Alatala. 5 Bopia da'apa kita nomparasaya i Pue Yesus kita danatuwu nantuki dota rara to naja'a. Pade tempo etu dota rara to naja'a etu nipakapane nu Atura-atura agama to nombatagi kita mompowia kaja'ana. Etu sampe kita batena nompowia to naja'ana sampe kita masipato mamate bo rapopoga'a nggari ja'i Alatala. 6 Tapi we'i-we'i kita nikabasakamo nggari Atura-atura agama to nompo'u kita bopia, sabana kita ewa namate nosanggani-nggani ante Kristus. Jadi kita da'a mana nantuki jala nokolu. Kita mana mekou ri ja'i Alatala ante mantuki Atura-atura agama to nitulisi. Tapi we'i-we'i kita nantuki jala to nabou, kita nekou ri ja'i Alatala ante petulungi nggari ja'i Nosana to Nagasa. 7 Jadi ane iwetu bara maria to nompekiri Atura-atura agama etu naja'a. Tapi etu da'a ntoto nakono, sabana nggari Atura-atura agama nanotomo ka kita nuapa to niuli silaka. Ane rapana da'a ria atura agama to nanguli, "Ne'e maino ka mbara-mbara ntau," natantu da'a ninjaniku etu silaka. 8 Tapi tempo aku nangepe atura etu silaka nombarata loga mompopeumba dota raraku maino ka mpengele-ngele. Ane da'a ria Atura-atura agama nompakanoto nuapa to niuli silaka, da'a ntoto ria kuasa silaka riara nggatuwuta. 9 Bopia tempo aku da'apa nangginjani Atura-atura agama aku natuwu nasana. Tapi naopu aku nangginjani Atura-atura agama silaka to naria riara nta'iku nompamula nakuasa, pade nanotomo aku masipato mamate bo rapopoga'a nggari ja'i Alatala sampe ri kasae-saena. 10 Atura-atura agama to nipatuju Alatala manggeni aku matuwu mabelo aga nompakanoto aku masipato mamate. 11 Tempo aku nangepe Atura-atura agama silaka nombarata loga mombabagiu aku. Pade nggari Atura-atura agama silaka namala nompakanawu aku sampe aku masipato mamate. 12 Atura-atura agama nagasa bo parenta-parenta Alatala nagasa, nanoa bo nabelo. 13 Ane iwetu bara maria to manguli iwe'i: "Atura-atura agama to nabelo etu nompakamate aku sampe aku masipato rapopoga'a nggari ja'i Alatala!" Tapi etu da'a ntoto nakono! Silakamo to nompakamate aku! Atura-atura agama to nabelo nipake silaka nompakanawu aku sampe aku masipato mamate. Nggari Atura-atura agama nantambai nanoto kaja'a nu silaka. 14 Sampesuwu-sampesuwu, ninjanitamo Atura-atura agama nagasa sabana etu nggari ja'i Nosa Nagasa nu Alatala. Tapi aku e'i aga manusia nasilaka, aku nipobatua nu silaka. 15 Sabana da'a ninjaniku pokaingguku mboto. Pokainggu to nabelo to nipodotaku da'a nipowiaku. Tapi pokainggu to nipowua mataku, etumo to nipowiaku! 16 Ane pokainggu anu da'a nipodotaku to nipowiaku, batuana aku nantakono Atura-atura agama. Aku nanguli Atura-atura etu nabelo. 17 Jadi mana aku to nompowia pokainggu to naja'a etu tapi silaka to naria riara nta'iku. 18 Sabana ninjanikumo da'a ria kamba sangele to nabelona riara nta'iku, etumo riara ingguku ewa manusia. Sabana naupa aku madota mompowia to nabelona, da'a kupakule mowia etu. 19 Pokainggu to nabelo to nipodotaku da'a nipowiaku, tapi kaja'ana to da'a nipodotaku, etumo to nipowiaku. 20 Jadi ane aku mompowia anu da'a nipodotaku iwetu, batuana da'a aku to nompowia pokainggu etu tapi silaka to naria riara nta'iku. 21 Jadi iwe'imo to najadi riara nggatuwuku: Ane aku madota mompowia to nabelona bate-batena to naja'ana to nipowiaku. 22 Riara pekiri rara nta'iku aku nompokono Atura-atura nu Alatala. 23 Tapi riara koroku naria kuasa ntanina to nosibali ante pekiri rara nta'iku sampe aku nidagina bo nipobatua nu silaka to nombakuasai koroku etu. 24 - 25 Jadi iwe'imo katuwuku. Riara pekiri rara nta'iku aku madota matundu riara Atura-atura Alatala, tapi riara koroku aku bate-batena natundu riara silaka to nombakuasai aku. Nandasa mpu'umo aku e'i! Isema to mamala manggabasaka aku nggari kuasa silaka e'i to nanggeni aku mamate? Aku nosukuru ri ja'i Alatala sabana Pueta Yesus Kristus to nanggabasaka aku!
1 Jadi we'i-we'i mana ria pesuku to rapawela ka tau-tau to nosaongu rara ante Yesus Kristus. 2 Sabana kuasa Nosa Nagasa nombawai ka kita katuwu nabou pade nanggabasaka kita nggari kuasa silaka bo kamatea sabana kita nosaongu rara ante Yesus Kristus. 3 Atura-atura agama da'a namala manggabasaka kita nggari kuasa silaka sabana kita da'a nompakule mantuki Atura-atura etu. Tapi nuapa to da'a namala nipowia Atura-atura agama, etumo to nipowia Alatala. I'a nompakau Anana mboto mpaka ri dunia netimbali majadi manusia ante koro to nasimbayu ewa koro manusia to nasilaka. Pade I'a nombasuku Anana mboto ala mompakaropu kuasa silaka riara nta'i manusia. 4 Etu nipowia Alatala ala kita mamala mompowia pura-pura pokainggu to nanoa to nituntu riara Atura-atura agama. Kita namala mowia etu sabana kita mana natuwu nantuki dota rara to naja'a, tapi kita natuwu nantuki dota Nosa Nagasa nu Alatala. 5 Isema-sema to natuwu nantuki dota rarana to naja'a bate-batena nompekiri dota rara to naja'a. Tapi isema-sema to natuwu nantuki dota Nosa Nagasa nu Alatala bate-batena nompekiri nuapa to nipodota Nosa Nagasa. 6 Ane pekirita nikuasai dota rara to naja'a kita kana mamate bo rapopoga'a nggari ja'i Alatala sampe ri kasae-saena. Tapi ane pekirita nikuasai Nosa Nagasa nu Alatala kita kana matuwu mosinggabelo ante Alatala sampe ri kasae-saena. 7 Ane pekirita nikuasai dota rara to naja'a kita majadi bali nu Alatala, sabana kita da'a natundu riara Atura-atura Alatala. Da'a aga etu, tapi ane pekirita nikuasai dota rara to naja'a kita da'a nompakule mantuki Atura-atura etu. 8 Tau-tau to nantuki dota rarana to naja'a da'a namala mompakadamba rara Alatala. 9 Tapi sampesuwu-sampesuwu, komi mana nantuki dota raramu to naja'a. Komi nantuki dota Nosa Nagasa nu Alatala sabana nariamo Nosa Nagasa riara nta'i komi. Ane tau da'a ria Nosa Nagasa nu Kristus riara nta'ina i'a da'a bagia Kristus. 10 Tapi ane Kristus neto'o riara nta'i komi, naupa koro komi kana mamate sabana silaka, wayo komi kana matuwu mabelo sampe ri kasae-saena sabana komi najadi nanoa riara mpanggita Alatala. 11 Nosa Nagasa nu Alatala nompakatuwu bali Yesus nggari kamatena pade I'a wo'u neto'o riara nta'i komi. Jadi naupa koro komi kana mamate, Alatala to nompakatuwu bali Yesus Kristus etu kana mompakatuwu koro komi wo'u ante kuasa Nosana to Nagasa to naria riara nta'i komi. 12 Jadi sampesuwu-sampesuwu, we'i-we'i kita masipato matuwu mantuki dota Nosa Nagasa nu Alatala, da'a dota rarata to naja'a. 13 Sabana ane kita batena matuwu mantuki dota rara to naja'a etu, kita kana mamate bo rapopoga'a nggari ja'i Alatala. Tapi ane kita manggabasaka pokainggu to naja'a ante kuasa nggari ja'i Nosa Nagasa nu Alatala, kita kana matuwu mabelo sampe ri kasae-saena. 14 Isema-sema to nikeniaka Nosa Nagasa nu Alatala, iramo ana-ana nu Alatala. 15 Sabana Nosa Nagasa to niwai Alatala ka kita da'a nanggeni kita rapobatua silaka sampe kita matuwu wo'u ante eka rara. Tapi Nosa Nagasa etu nangonggotaka kita majadi ana-ana nu Alatala. Pade ante pekeniaka Nosa Nagasa etu kita namala manguli ka Alatala, "O, Yuma, Komi Umaku!" 16 Nosa Nagasa nu Alatala mbotomo nantakono nuapa to nanotomo riara nta'ita, etumo kita ana-ana nu Alatala! 17 Pade ane kita ana-ana nu Alatala batuana kita wo'u tau to masipato mantarima rasi-rasi to nipakasadia Alatala ka ana-anana. Kita wo'u masipato mantarima pura-pura nuapa to nipakasadia Alatala ka Kristus, sabana kita nombarasai kasusa ewa to nirasaina ala kita wo'u mombarata bagia riara kuasa bo kagayana to nipogumaa. 18 Nantuki pombarataku kasusa bo kapari to nirasaita we'i-we'i da'a ntoto ria batuana ane rapoposisala ante kabelona to rarasaita banepia. 19 We'i-we'i pura-pura nuapa to nipajadi Alatala nompopea ante nalentora rarana tempo Alatala mompopokita kuasa bo kagaya nu ana-anana. 20 Sabana pura-pura to nipajadi Alatala etu da'a namala mombarasai nuapa to niponiana. Pura-pura etu nompamula narompo bo namate. Etu da'a nggari dotana mboto tapi etumo to nipodota Alatala majadi. Tapi naupa iwetu naria panjarumaka iwe'i: 21 Kana marata sanggani tempo pura-pura nuapa to nipajadi Alatala wo'u kana rakabasaka nggari kuasa kamatea pade mombarasai kuasa bo kagayana to rawaina ka ana-anana. 22 Sabana ninjanitamo pura-pura to nipajadi Alatala nandasamo sampe we'i-we'i nasimbayu ewa samba'a besi nekakai tempona i'a moana. 23 Pade da'a aga pura-pura to nipajadi Alatala to nekakai, tapi kita topomparasaya i Pue Yesus wo'u nekakai riara nta'ita. Kita nalentora mompopea tempo Alatala manggabasaka kita nggari kuasa kamatea pade mompakanoto kita mpu'u-mpu'u nionggotaka majadi anana. Ninjanita tempo etu kana marata sabana kita nipesua Nosa Nagasa nu Alatala ewa tandaina pojanjina ka kita kana rapakadupa. 24 Kita nipakasalamamo pade we'i-we'i kita mompopea sampe mombarasai pura-pura etu. Ane kita mompopea sangele, batuana da'apa nikitata nuapa to nipopeata etu, sabana da'a ria tau mompopea sangele to nikitanamo. 25 Tapi ane kita mompopea nuapa to da'apa nikitata kita bate-batena mompopea ante mosabara. 26 Nosa Nagasa nu Alatala wo'u nantulungi kita riara kalenteta. Sabana da'a ninjanita iwenu kasipatona kita mosambaya. Tapi Nosa Nagasa mboto nantulungi kita mosambaya ante pekakai to da'a namala nisowadaka manusia. 27 Pade Alatala to nanggita isi rara nta'i manusia nangginjani patuju nu Nosa Nagasa etu, sabana Nosa Nagasa nosambaya ka topomparasaya nantuki dota nu Alatala mboto. 28 Ninjanitamo Alatala nokarajaa riara mpengele-ngele to najadi ri ja'ita ala manggeni belo ka kita to nompotowe I'a, etumo kita to nipokiona najadi ana-anana nantuki dotana mboto. 29 Sabana kita to nipelisina nggari lamba pamulana nipakatantuna majadi nasimbayu ewa Anana i Pue Yesus. Patujuna ala Yesus majadi Ana Ulumbua pade kita majadi sampesuwu-sampesuwuna. 30 Pade kita to nipakatantuna nggari lamba pamulana etu nipokiona majadi todeana. Pade kita to nipokiona nirekena tau nanoa riara mpanggitana. Pade kita to nirekena tau nanoa niwaina ka bagia riara kuasa bo kagayana mboto. 31 Jadi nantora etu pura-pura nuapa masipato raulita? Ane Alatala mosabingga ka kita, isema mabia mangewa kita? 32 I'a da'a natowe ka Anana mboto tapi niwaina rapatesi manjaliku silakata. Jadi ane I'a da'a natowe nombawai Anana mboto rapatesi natantumo I'a wo'u kana mombawai ka kita ante kajoina mpengele-ngele to niparaluuta. 33 Isema to nabia mompangadu kita to nipelisi Alatala? Da'a ntoto ria, sabana Alatala mboto nantarima kita ewa tau nanoa riara mpanggitana. 34 Isema to nabia mompakasala kita? Da'a ntoto ria, sabana Kristus namate mombasompo salata. Pade da'a aga etu, I'a nipakatuwu bali pade nionggotaka ri panggana nu Alatala. I'amo to nanjaliku kita ri ngayo Alatala. 35 Jadi nuapa to namala mombalawa towe Kristus ri ja'ita? Natantu da'a ntoto ria! Nau kita masusa atau mapari atau rapandasa ntau, nau kita maoromate atau da'a ntoto ria pakea, nau kita nirumpa baranggau atau rapatesi, kita bate-batena rapotowena. 36 Riara Buku Nagasa naria nitulisi iwe'i: "O, Pue, eo wengi naria tau madota mompatesi kami. Kami nireke ewa bimba to rakeni rasambale." 37 Tapi nau nuapa-nuapa majadi ri ja'ita kita mpu'u-mpu'u padagi ante kuasa i Pue Yesus to nompotowe kita. 38 Sabana niparasayaku da'a ria kamba sangele to namala mombalawa towe Kristus ri ja'ita, nabeloka kamatea atau katuwuta eo-eo, nabeloka malaeka atau seta atau mpengele-ngele kuasa ntanina, nabeloka nuapa-nuapa to najadi we'i-we'i atau nuapa-nuapa to majadi banepia, 39 nabeloka kuasa-kuasa ri langi atau kuasa-kuasa ri dunia, nabeloka nuapa-nuapa ntanina to nipajadi Alatala. Etu pura-pura da'a namala mombalawa towe Alatala ri ja'ita sabana kita nosaongu rara ante Pueta Yesus Kristus.
1 Nuapa to kuuli e'i mpu'u-mpu'u nakono. Aku da'a nodawa, sabana aku nosaongu rara ante Kristus. Pade Nosa Nagasa nu Alatala to naria riara pekiri rara nta'iku wo'u nantakono tesaku e'i. 2 - 3 Nalebuku bo nasusa mpu'u raraku nompekiri sampesuwuku to Israel sabana nakura ira to nomparasaya i Pue Yesus. Kakonona aku nasadia rajanjiaka Alatala bo rapopoga'a nggari ja'i Kristus manjambei ira to nosangata ante aku. 4 Ira to Israel todea nu Alatala to nionggotakana najadi ana-anana mboto. Ira to nipopokita ka kuasa bo kagayana. Ira to niwai ka pojanji-pojanjina, pade ira to niwai ka Atura-atura agama. Ira to nipatuduki ka ada-ada mepue ka Alatala, pade ira to nantarima nadea mpu'u pojanji Alatala ntanina. 5 Ira muli Abraham, Ishak bo Yakub, totu'a nggaolu to Israel. Pade tempo Kristus netimbali najadi manusia I'a najadi tau to Israel. I'amo to neliu nggalanga nggari ntanina, I'amo Alatala to masipato ratoiyata sampe ri kasae-saena. Amin! 6 Naupa nadea to Israel da'a nomparasaya i Pue Yesus etu da'a batuana Alatala da'a nompakadupa pojanjina. Sabana da'a pura-pura muli Israel to nipelisi Alatala majadi todeana. 7 Pade da'a wo'u pura-pura muli Abraham to nireke mulina to masipato mantarima nuapa to nijanji Alatala. Sabana Alatala nanguli ka Abraham iwe'i: "Aga mulimu nggari Ishak to rareke mulimu." 8 Etu batuana da'a pura-pura tau to nipomuli Abraham nireke ana-ana nu Alatala, aga ira to nomparasaya pojanji Alatala nasimbayu ewa Abraham. 9 Sabana iwe'imo pojanji Alatala to niparasaya Abraham: "Mpae marata Aku kana manjili manggita komi, pade da'apa Aku marata rongomu i Sara kana moana samba'a ngana langgai." 10 Pade da'a aga etu, ri tesa ewa i Ribka, rongo totu'ata nggaolu Ishak, neliu ngganoto ka kita Alatala nompelisi tau nantuki dotana mboto. Ribka natiana ka ana Ishak. 11 - 12 Tapi da'apa i'a nangote romba'a ngana norapi, Alatala nanguli ka i'a iwe'i: "Anamu ulumbua kana rapobatua nu tua'ina." Tempo Alatala notesa etu romba'a ngana etu da'apa nesuwu, ira da'apa nompowia nuapa-nuapa to nabelo atau to naja'a. Tapi Alatala nompakatantu nokolu ngana umbana to nipelisina mantarima rasi nggari ja'ina. Nipowiana iwetu ala mompakanoto I'a da'a nompelisi tau nantuki powia ira, tapi I'a nompelisi tau nantuki dotana mboto. 13 Etumo patuju nu tesa riara Buku Nagasa to nanguli iwe'i: "Yakub nipotoweku, tapi Esau nipowua mataku." 14 Jadi ane iwetu, ne'e kita manguli powia Alatala etu da'a nanoa. Etu da'a ntoto nakono! 15 Sabana I'a nanguli ka nabi Musa nggaolu iwe'i: "Aku kana maasi mata ka isema to kupoasi mata bo mompotowe ka isema to kupotowe." 16 Jadi etu majadi da'a nggari dota manusia atau nggari powia manusia, tapi nggari asi mata Alatala mboto. 17 Riara Buku Nagasa naria Tesa Alatala ka Firaun, Magau tana Masir nggaolu iwe'i: "Aku nangonggotaka iko najadi magau ante sangele lau patuju, etumo ala nggari powiaku riara nggatuwumu Aku mompopokita kuasaku bo sangaku ratoiya bo rapakabete ri njumaongu dunia." 18 Jadi nanotomo ka kita Alatala naasi matana ri ja'i isema-sema to nipodotana bo I'a nompakako'o rara isema-sema to nipodotana. 19 Natantumo kana maria tau to manguli iwe'i: "Ane iwetu, nokuya Alatala danompakasala manusia, sabana kita da'a namala mangewa dotana?" 20 Tapi sampesuwu-sampesuwu, ne'e manjapuaka Alatala! Namala kura manguli ka topowiana, "Nokuya iko nompowia aku iwe'i?" Natantu da'a ntoto namala! 21 Topomandu kura nakuasa nombamandu tana lei nantuki dotana mboto. Nggari salemo tana lei i'a nombamandu rongu kura, saongu to nagayana pade saongu kura biasa. 22 Iwetu wo'u ante Alatala. I'a nakuasa nompowia nuapa-nuapa to nipodotana ri ja'ita. Kakonona Alatala nonia mompopokita rau rarana ka tau-tau naja'a bo mompopokita kuasana sabana ira masipato rasuku sampe ri kasae-saena. Tapi naupa iwetu I'a danosabara ri ja'i ira to masipato mawela rau rarana. 23 I'a nosabara iwetu ala mompopokita kabete nu towena bo asi matana ka tau-tau to nipakatantuna nggari lamba pamulana mantarima bagia nggari kabelona. 24 Pade kita e'imo tau-tau to nipokiona mantarima rasi etu, da'a aga tau-tau to Yahudi, tapi tau-tau da'a to Yahudi wo'u. 25 Naria tesa Alatala riara buku nabi Hosea to nanguli iwe'i: "Tau-tau da'a todeaku kana kuuli todeaku. Ira to da'a nipotoweku kana kuuli to nipotoweku." 26 "Pade ri umba peto'o pue ngata niuli da'a todeaku, ri setumo ira kana rauli ana nu Alatala to Natuwuna." 27 Naria wo'u tesa to niboto nabi Yesaya nantesa to Israel iwe'i: "Naupa muli Israel nadea mpu'u, ewa kadea nu bone ri wiwi ntalinti, aga sabagia nggedi nggari tatongo ira to rapakasalama, 28 sabana Pue kana masalisa mombasuku pura-pura manusia ri dunia. I'a da'a mombasoro-soro tempo etu." 29 Naria tesa nabi Yesaya ntanina to nanguli iwe'i: "Ane rapana Alatala to Neliu Nggakuasa da'a nombaboli mulita, tantu mpu'u-mpu'u kita maropu nasimbayu ewa pue ngata Sodom bo Gomora nggaolu." 30 Jadi iwe'imo to nipatujuku: Tau-tau da'a to Yahudi da'a nompasimbuku majadi manoa riara mpanggita Alatala. Tapi sabana ira nomparasaya, ira nireke Alatala nanoa. 31 Tapi tau-tau to Israel nasaemo nompasimbuku majadi manoa riara mpanggita Alatala ante mantuki Atura-atura agama Yahudi. Tapi etu da'a najadi. 32 Nuapa sabana? Sabana ira aga nanjarumaka pokainggu ira mboto to nabelo, ira da'a nanjarumaka pomparasaya ira ka Alatala ala majadi manoa. Ira ewa tau natepasunu ri watu sabana nakaja rara ira momparasaya kamate i Pue Yesus ri kayu parika. 33 Etu niboto riara Buku Nagasa iwe'i: "Kita we'i! Aku nomboli samba'a tau ri Bulu Sion to nirapaka ewa saongu watu bete. Nadea tau kana matepasunu ri watu etu pade madungga. Tapi isema-sema momparasaya I'a da'a rapakaeya."
1 Sampesuwu-sampesuwu, dota raraku bo posambayaku ka Alatala ala tau-tau to Israel mamala rapakasalama. 2 Ninjanikumo ira mpu'u-mpu'u naraji mepue ka Alatala, tapi da'a ninjani ira jala to nakono mepue ka I'a. 3 Da'a nitarima ira jala to nipakasadia Alatala ka manusia ala majadi manoa riara mpanggitana. Ira da'a natutu nantuki jala etu sabana ira aga nompasimbuku mompakanoa koro ira mboto riara mpanggita Alatala ante nantuki Atura-atura agama. 4 Tapi ante karata Yesus Kristus, Atura-atura agama mana nalaku pade we'i-we'i isema-sema momparasaya i Pue Yesus kana rareke manoa riara mpanggita Alatala. 5 Naria tesa to nitulisi Nabi Musa ewa jala majadi manoa riara mpanggita Alatala ante mantuki Atura-atura agama. Niulina iwe'i: "Isema-sema to nantuki pura-pura atura agama, ira kana mombarata katuwua mabelo." 6 - 7 Tapi naria tesa ntanina riara Buku Nagasa ewa jala majadi manoa riara mpanggita Alatala ante momparasaya. Iwe'imo tesa etu: "Ne'e mompekiri riara nta'imu iwe'i: Isema mamala meore mpaka ri suruga? Isema mamala mana'u ri dunia ntomate?" Da'a paraluu kita meore mpaka ri suruga mangelo Kristus, sabana naratamo I'a ri ja'ita ri dunia. Pade da'a paraluu kita mana'u mpaka ri dunia ntomate manggeni Kristus nggari setu, sabana natuwu balimo I'a nggari kamatena. Kakonona majadi manoa riara mpanggita Alatala ante momparasaya da'a sangele to nakaja. 8 Tapi iwe'imo to nitesa riara Buku Nagasa: "Namosumo Tesa i Pue ante komi, naria ri sumbamu bo naria wo'u riara nta'imu." Etumo tesa to nipatolele kami to nanggeni tau momparasaya. 9 Jadi ane komi mompangaku ante sumbamu, "Yesus I'amo Pueku," pade ane komi momparasaya riara nta'imu Alatala nompakatuwu bali I'a nggari kamatena, komi kana rapakasalama. 10 Sabana kita momparasaya riara nta'ita sampe majadi manoa riara mpanggita Alatala, pade kita mompangaku ante sumbata sampe rapakasalama. 11 Riara Buku Nagasa naria nitulisi iwe'i: "Isema-sema to momparasaya I'a da'a rapakaeya." 12 Tesa-tesa e'i nosinggawela ka pura-pura tau sabana da'a ria posisalana ri olo ntau to Yahudi bo tau da'a to Yahudi. Aga samba'a lau Pue, pade I'a Pue ntau pura-pura. I'a nombawai rasi to neliu-liuna ka pura-pura tau to nekakai ka I'a. 13 Sabana "Isema-sema to mekakai ka i Pue kana rapakasalama." 14 Tapi iwenumo tau mekakai ka i Pue ane ira da'apa nomparasaya I'a? Pade iwenu ira momparasaya i Pue ane ira da'apa nangepe karebana? Pade iwenu ira mangepe karebana ane da'apa ria tau nompatolele kareba etu ka ira? 15 Pade iwenu tau mompatolele Kareba Belo ane da'apa ria to nombasuro ira manggeni kareba etu? Ewa to nitulisi riara Buku Nagasa iwe'i: "Nabelo mpu'u karata ntau to nanggeni Kareba Belo." 16 Nariamo tau nanggeni Kareba Belo. Tapi da'a pura-pura tau nantarima Kareba etu. Naria tesa nabi Yesaya nggaolu ewa etu to nanguli iwe'i: "Pue, da'a nadea tau nomparasaya tesa to nikeni kami!" 17 Jadi tau namala momparasaya ane ira mangepe Kareba Belo, pade Kareba Belo etumo tesa ewa Kristus. 18 Tapi aku nekutana, "Iwenu? Tau to Israel da'apa nangepe Kareba Belo?" Natantu niepe iramo, sabana naria nitulisi riara Buku Nagasa iwe'i: "Tesa to niuli ira natolele sampe ri njumaongu dunia. Kareba to nikeni ira natolele sampe ri umba-umba ri dunia." 19 Tapi sangganipa kupekutana, "Tau to Israel da'apa nangginjani batuana Kareba etu?" Natantu ninjani iramo. Sabana nokolu naria tesa Alatala ewa to Israel to nipasimbayu i Musa iwe'i: "Aku kana mompowia komi majadi masiriati tempo komi manggita toweku ri ja'i tau-tau da'a to Yahudi to nireke komi da'a todeaku. Komi kana maju'a rara manggita asi mataku ri ja'i tau-tau to nireke komi tau nabodo to da'a nangginjani Alatala." 20 Pade ri purina nabi Yesaya ante nabia nompasimbayu tesa Alatala ewa tau-tau da'a to Yahudi iwe'i: "Tau-tau to da'a nompasimbuku mangelo Aku, iramo to nosirata ante Aku. Pade tau-tau to da'a nekakai ka Aku, iramo to nanggita Aku." 21 Tapi iwe'imo tesa Alatala ewa tau-tau to Israel: "Njineo ntua Aku nangojo paleku madota mantarima ira, tapi ira da'a madota mekou ri ja'iku. Ira aga nompakako'o rara."
1 Jadi aku nekutana iwe'i: "Alatala nompoara todeana to Israel?" Natantumo etu da'a ntoto nakono! Sabana aku mboto tau to Israel, muli Abraham to nipomuli i Benyamin. 2 Alatala da'a ntoto nompoara todeana to nipelisina nggari lamba pamulana. Tantu ninjani komi mbotomo tesa nggari Buku Nagasa ewa nabi Elia. I'a nompangadu to Israel ri ngayo Alatala iwe'i: 3 "Pue, nabi-nabimu nipatesi ira, bo peto'o pesomba ka Pue nigero iramo. Damo njamba'aku e'i topomparasaya to nabolina, pade ira nompasimbuku mompatesi aku." 4 Tapi nuapa to niuli Pue ka i'a? Niulina, "Danaria pitunjobu mba'apa to niboliku najadi bagiaku mboto. Ira da'a sanggani nekadede mombasomba wiata Baal." 5 Iwetu wo'u tempo we'i-we'i. Danaria sabagia nggedi nggari to Israel to nomparasaya i Pue Yesus. Iramo to nipelisi Alatala nantuki towe belona mboto. 6 Ira nipelisina nantuki towe belona mboto, da'a nantuki pokainggu ira to nabelo. Sabana ane ira nipelisi nantuki pokainggu ira mboto, batuana towe belo Alatala etu da'a towe belona mpu'u. Etu aga pombabalasi pokainggu ira to nabelo. 7 Jadi iwenumo? Todea to Israel da'a nombarata kabelona to nielo ira. Aga sabagia nggedi to Israel to nombarata kabelona etu bo najadi nanoa riara mpanggita Alatala, etumo ira to nipelisi Alatala nggari lamba pamulana. Pura-pura tau to Israel ntanina aga nompakako'o rara. 8 Etu ewa to nitulisi riara Buku Nagasa iwe'i: "Alatala nompakabungu pekiri bo rara nta'i ira. I'a nompakaburo mata ira sampe ira da'a namala manggita jala to nakonona, bo I'a nompakabongo talinga ira sampe ira da'a namala nangepe pepatuduki to nakonona sampe ri eo e'i." 9 Pade Magau Daud wo'u nanguli iwe'i: "Pue, waikamo rasi to naria ri ja'i ira majadi ewa talia manjoko ira, sampe ira mpu'u-mpu'u rasuku. 10 Waikamo mata ira maburo sampe da'a mamala ira manggita jala to nakonona. Pade pakandasamo ira ante katomona sampe ira mabunggu sampe ri kasae-saena." 11 Jadi sangganipa kupekutana, "Iwenumo? Tau-tau to Israel nanawu riara silaka sampe ri kasae-saena?" Natantumo da'a! Tapi nggari silaka ira tau-tau da'a to Yahudi nombarata loga rapakasalama. Ante manggita kajadia etu tau-tau to Israel kana masiriati ka tau-tau da'a to Yahudi. 12 Nggari silaka tau-tau to Israel etu, tau-tau ntanina ri dunia nombarata rasi nadea. Pade nggari kanawu ira, tau-tau da'a to Yahudi nombarata belo. Jadi ane iwetu to najadi sabana tau-tau to Israel da'a nomparasaya, natantumo neliu nggadea rasi nggari ja'i Alatala ane ira pura-pura majea bo momparasaya. 13 Tesaku e'i kupawela ka komi tau-tau da'a to Yahudi. Aku suro i Pue Yesus to nisurona manggeni Kareba Belo ka komi tau-tau da'a to Yahudi. Bagoku e'i mpu'u-mpu'u nitesaku ka tau pura-pura 14 ante manjarumaka aku mamala mompakaino rara sampesuwu-sampesuwuku to Israel sampe maria ira to madota momparasaya bo rapakasalama. 15 Jadi tempo ira nipoara Alatala jala nibuka ka pura-pura tau ntanina ri dunia ala mosinggabelo ante I'a. Pade neliupa kabelona ane tau to Israel ratarimana bali. Natantumo kajadia etu masimbayu ewa tau namate matuwu bali! 16 Ane asele ntanata pamulana niwai ka Alatala, batuana pura-pura asele ntanata wo'u bagiana. Pade ane kale nu kayu nireke bagia nu Alatala, batuana rangga-ranggana wo'u bagiana. 17 Tau-tau to Israel to nipoara Alatala namala nirapaka rangga-rangga kayu zaitun to nikoto bo nitajiaka. Pade komi tau-tau da'a to Yahudi to nomparasaya Yesus nirapaka rangga-rangga kayu zaitun nggakayu to nipataka ri walea rangga-rangga to nikoto etu ri olo rangga-rangga kayu zaitun to nipiara. Pade komi wo'u nombarata rasi bo belo to niwai Alatala ka tau-tau to Israel nggaolu nasimbayu ewa rangga-rangga to nipataka mombarata panggoni nggari kale kayu zaitun to nipiara. 18 Jadi sampesuwu-sampesuwu da'a to Yahudi, ne'e komi masombo manggita tau to Israel to nipoara ewa rangga-rangga to nikoto etu. Toramo! Komi aga ewa rangga, pade da'a rangga to nompakatuwu kale, tapi kale to nompakatuwu rangga. 19 Bara maria ri tatongo komi to manguli iwe'i: "Rangga-rangga etu nikoto ala kami mamala rapataka." 20 Etu nakono, tapi toramo! Ira nipoara sabana ira da'a nomparasaya, pade komi nitarima sabana komi nomparasaya. Tapi naupa iwetu ne'e komi masombo, agina komi maeka ka Alatala! 21 Sabana ane naliu rara Alatala nompoara tau-tau to Israel to nirapaka rangga kayu, natantumo I'a wo'u maliu rarana mompoara komi ane komi da'a momparasaya! 22 Jadi nggari setu nanotomo ka kita kabelo nu rara Alatala bo kako'ona mombasuku. I'a nako'o nombasuku tau-tau to Israel to da'a nomparasaya, tapi I'a nabelo rara ri ja'i komi to nomparasaya ane komi maroo manjarumaka kabelona etu. Tapi ane da'a, komi wo'u kana rapoarana. 23 Ane ira tau-tau to Israel mana manjapuaka Alatala tapi majea bo momparasaya, ira wo'u kana ratarima Alatala bali. Sabana I'a nakuasa mantarima ira mpanjili. 24 Komi tau-tau da'a to Yahudi nasimbayu ewa rangga-rangga kayu zaitun nggakayu. Ane komi namala rakoto nggari batanggayu pade rapataka ri kayu zaitun to nipiara naupa etu nontani nggari biasa, neliu-liupa ira to Israel to nasimbayu ewa rangga-rangga kayu zaitun to nipiara. Natantumo ira namala rapataka mpanjili ri batana mboto! 25 Sampesuwu-sampesuwu, to nipodotaku ala komi mangginjani sangele to nitabuniaka nggari lamba pamulana sampe we'i-we'i. Tesa e'i kuuli ka komi ala ne'e komi mompakalanga rara ante mompekiri komi nangginjani mpengele-ngele. Tesa to nitabuniaka etumo iwe'i: sabagia nggari tau to Israel nompakako'o rara we'i-we'i, tapi ira aga moinggu iwetu sampe maganamo tau-tau da'a to Yahudi to nipakatantu Alatala momparasaya i Pue Yesus. 26 Jadi ane etu majadi pura-pura tau to Israel wo'u kana rapakasalama. Kajadia etu nosinggawela ante tesa Alatala riara Buku Nagasa iwe'i: "Magau to Mompakasalama kana marata nggari Bulu Sion, pade I'a kana mompakalipo pura-pura kaja'ana nggari muli Yakub. 27 Pade Aku kana mombaampungi silaka-silaka ira nantuki pojanjiku ka ira nggaolu." 28 Ri tempo we'i-we'i tau-tau to Israel najadi bali nu Alatala sabana ira da'a madota momparasaya Kareba Belo. Pade etumo to nanggeni rasi ka komi tau-tau da'a to Yahudi. Tapi naupa iwetu, tau-tau to Israel danipotowe Alatala sabana I'a nompelisi ira nggaolu najadi todeana, pade I'a bate-batena nantora pojanjina ka totu'a ira nggaolu. 29 Sabana ane Alatala mompakatantu mompelisi bo mombawai rasi ka tau, I'a da'a mombabali katantuna etu. 30 Tempo nokolu komi tau-tau da'a to Yahudi da'a natundu ri ja'i Alatala. Tapi tempo tau-tau to Israel da'a natundu ri ja'i Alatala komi nipoasi matana. 31 Iwetu wo'u tau-tau to Israel. We'i-we'i ira da'a natundu ri ja'i Alatala ala komi rapoasi matana. Tapi kana marata tempona banepia ira wo'u rapoasi mata Alatala nasimbayu ewa komi. 32 Sabana Alatala nompakamba pura-pura manusia da'a natundu ri ja'ina, ala I'a mamala mompopokita asi matana ka ira pura-pura banepia. 33 O, nabete mpu'u kabelo nu Alatala! I'a mpu'u-mpu'u nanoto bo pangginjanina da'a ria panta'ana! Da'a ria samba'a to namala mompakanoto katantuna! Da'a ria to namala mangginjani pura-pura niana. 34 Riara Buku Nagasa naria nitulisi iwe'i: "Isema nangginjani pekiri Alatala? Isema mamala mompatuduki I'a? 35 Isema nombawai sangele ka I'a sampe I'a masipato mompopatingguli ka ira balasina? Natantu da'a ntoto ria!" 36 Sabana pura-pura nuapa nopu'u nggari ja'i Alatala pade natuwu nggari kuasana bo najadi bagiana mboto. I'amo to masipato ratoiya bo rabilata sampe ri kasae-saena! Amin!
1 Sampesuwu-sampesuwu, naasi mpu'u mata Alatala manggita kita. Sabana etu kuperapi ante mpu'u-mpu'u ala komi mombajuju koro komi ka Alatala nasimbayu ewa tau-tau nombawai pesomba ka Alatala. Etumo pesomba komi to natuwu bo to nagasa to nikonoa rara Alatala. Etumo ada mpesomba komi to masipatona. 2 Ne'e mana komi mompasiala pokainggu bo kabiasa nu dunia, tapi pakambamo katuwumu rabali Alatala ante mombawai pekirimu rapakabouna. Ante iwetu komi kana mangginjani nuapa dota Alatala riara nggatuwumu, etumo nuapa to nabelona, nuapa to nikonoa Alatala, bo nuapa to da'a nasala riara mpanggitana. 3 Aku nionggotaka Alatala najadi surona nggari towe belona mboto. Jadi etu sampe aku manguli ka komi pura-pura iwe'i: Ne'e komi mompakalanga rara ane komi mompekiri koromu mboto. Tapi nabelopa komi mompekiri koromu ante manoa nantuki kadea nu pomparasaya to niwai Alatala ka komi samba'a bo samba'a. 4 Ri korota samba'a bo samba'a nadea sipa, pade sipa etu pura-pura naria gunana mboto. 5 Iwetu wo'u kita topomparasaya Kristus. Naupa kita nadea, kita najadi saongu riara Kristus. Pade kita nosidai samba'a bo samba'a ewa sipa-sipa nu koro. 6 Kita samba'a bo samba'a niwai ka pompakule to nosisala nantuki towe belo nu Alatala, tapi pura-pura pompakule etu naria gunana mboto. Jadi ane kita niwai ka pompakule mompasimbayu tesa nggari ja'i Alatala, kita kana mompowia etu nantuki pomparasaya to naria ri ja'ita. 7 Ane kita niwai ka pompakule mantulungi tau ntanina, kita kana mpu'u-mpu'u mantulungi ira. Ane kita niwai ka pompakule mopaguru, kita kana mopaguru ante mpu'u-mpu'u. 8 Ane kita niwai ka pompakule mompakaroso rara tau ntanina, kita kana mpu'u-mpu'u mowia etu. Ane kita niwai ka pompakule mombawai ka tau ntanina, kita kana mombawai ante majoi rarata. Ane kita niwai ka pompakule manggeniaka todea, kita kana manggeniaka ira ante mpu'u-mpu'u rarata. Ane kita niwai ka pompakule mompopokita asi mata ri ja'i ntau to nandasa, kita kana mowia etu ante madamba rarata. 9 Kita kana mompotowe roata ante mpu'u-mpu'u. Ne'e aga tumoni-moni mosipotowe. Pakakawaomo pokainggu to naja'a, pade powiamo to nabelona ante mpu'u-mpu'u rara. 10 Posipotowemo samba'a bo samba'a ewa sampesuwu otemu, pade pasimbukumo komi samba'a bo samba'a mokolu mombabila roamu. 11 Pokarajaamo ante maraji, ne'e mabuto. Pade pokarajaamo ka i Pue ante mpu'u-mpu'u raramu, ne'e mabasa-basa. 12 Komi kana madamba-damba riara panjarumakamu ka i Pue. Pakaroomo raramu tempo komi nipandasa. Ne'e mabasa mosambaya. 13 Tulungimo roamu topomparasaya to nakabuna, pade tarimamo torata riara njapomu. 14 Ane maria tau mompandasa komi, ne'e mombajanjiaka ira tapi perapimo ka ira rasi nggari ja'i Pue. 15 Komi kana madamba-damba mpasanggani-nggani ante tau to nadamba, bo motumangi mpasanggani-nggani ante tau to notumangi. 16 Komi kana matuwu mosaongu rara samba'a bo samba'a. Ne'e mompakalanga raramu tapi komi kana mosimporoa ante tau to naede katuwuna. Ne'e mompekiri koromu neliu nggapande nggari roamu. 17 Ane maria tau mompakaja'a komi, ne'e rabalasi ante kaja'ana. Kawiamo nuapa to nireke nabelo riara mpanggita ntau pura-pura. 18 Ane mamala nggari komi pasimbukumo matuwu mosinggabelo ante pura-pura tau. 19 Sampesuwu-sampesuwuku, ne'e mombabalasi kaja'a ntau ri ja'imu, tapi pakambamo Alatala mombabalasi ira to nompakaja'a komi. Sabana riara Buku Nagasa nitulisi tesa to nanguli iwe'i: "Akumo to mebalasi, Akumo to mesawa. Iwetu panguli i Pue." 20 Tapi ane balimu maoro ta'i, wai ka ira panggoni. Ane ira mabai tambolo, wai ka ira panginu. Sabana ante mowia iwetu, kaopuna maeya mboto mata ira mompekiri powia ira to naja'a. 21 Ne'e sampe komi radagi kaja'ana, tapi balasimo kaja'ana ante pokainggu to nabelo ala komi mamala mombadagi to naja'ana ante kabelona.
1 Butu mba'a tau kana matundu ri ja'i pomarenta sabana da'a ria topoparenta to da'a nombarata kuasana nggari ja'i Alatala. Pura-pura topoparenta to naria we'i-we'i nipakakuasa Alatala. 2 Etu sampe tau to nangewa pomarenta nangewa nuapa to nipakatantu Alatala mboto. Pade tau noinggu iwetu natantumo kana rasuku. 3 Sabana pomarenta da'a paraluu rapokaeka ntau to noinggu nabelo. Aga tau to noinggu naja'a to masipato maeka ri ja'i pomarenta. Jadi ane komi madota matuwu ante da'a ria eka ri ja'i pomarenta, kawiamo to nabelona pade komi kana ratoiya ntopoparenta. 4 Sabana topoparenta batua nu Alatala to nokarajaa mompakabelo katuwuta. Tapi ane komi mowia kaja'ana, natantumo komi kana maeka ri ja'i ira sabana naria mami kuasa ira mombasuku tau naja'a. Ira batua nu Alatala, ira mompakawela pesuku Alatala ka tau-tau to nowia kaja'ana. 5 Etu sabana kita masipato mekou ri ja'i pomarenta. Kita mekou ri ja'i ira ala kita da'a mawela pesuku. Tapi da'a aga etu, kita wo'u mekou ri ja'i ira sabana pekiri rara nta'ita mboto nompakanoto ka kita etu masipato rapowiata. 6 Etu wo'u sampe kita masipato mombabayari balasitee, sabana topoparenta batua nu Alatala to nipakatantu mantui bago etu wo'u. 7 Wai ka pura-pura pomarenta nuapa to masipato rawai ka ira. Bayarimo balasitee ka ira to nipakatantu mantarima balasitee. Pade bayarimo bea ka ira to nipakatantu mantarima bea. Pekoumo ri ja'i ntau to masipato rapekou, bo bilamo tau to masipato rabila. 8 Ne'e kita moinda nuapa-nuapa ka tau ntanina, tapi kita kana tunggai mosipotowe samba'a bo samba'a. Aga etu inda to masipato ka kita. Sabana isema-sema to nosipotowe batuana ira natundu riara pura-pura Atura agama. 9 Riara Atura etu naria parenta-parenta iwe'i: "Ne'e mogau sala ante tau da'a rongomu mboto, ne'e mepatesi, ne'e mangangga, ne'e maino manggita anu roamu." Parenta etu pura-pura bo parenta-parenta ntanina wo'u nesua riara saongu parenta, etumo: "Potowemo sanggamanusiamu nasimbayu ewa komi nompotowe koromu mboto." 10 Isema-sema nompotowe sanggamanusiana, natantumo i'a da'a mompowia kaja'ana ka ira. Jadi ane kita mompotowe sanggamanusiata batuana kita matundu riara pura-pura Atura agama. 11 Kita masipato mosipotowe iwetu sabana ninjanita tempo we'i-we'i namosumo karata i Pue Yesus bali ri dunia. Kita kana manoto rara bo mainga, sabana karata i Pue Yesus namosupa we'i-we'i pade tempo kita nompamula nomparasaya. 12 Tempo narumau ntora naopumo. Namosumo tempo nareme. Jadi etu sampe kita kana manggabasaka pokainggu-pokainggu to narumau bo mompake parewa mposibali to masipato ka tau natuwu riara karemena. 13 Kita kana matuwu ante pokainggu to masipato ka tau to natuwu riara karemena. Ne'e kita masiromu manggoni mpebasa bo manginu sampe malangu. Ne'e kita mogau sala ante tau da'a rongota mboto atau mompebasa-basa mantuki dota rarata to naja'a. Ne'e kita mosinggarau atau masiriati. 14 Tapi pasialamo pokainggu Pue Yesus Kristus riara nggatuwuta, ne'e mana mompiara bo mantuki dota rara to naja'a.
1 Ane maria topomparasaya to nalente pomparasayana, tarimamo ira ante mabelo. Ne'e manjalaraka pombarata ira. 2 Naria tau to nomparasaya i'a namala nanggoni mpengele-ngele panggoni. Tapi tau ntanina to nalente pomparasayana aga nanggoni uta-uta, da'a nanggoni bau. 3 Kakonona tau to nanggoni mpengele-ngele panggoni da'a masipato manjalaraka tau to da'a nanggoni bau. Pade tau da'a nanggoni bau, ne'e manjalaraka tau to nanggoni mpengele-ngele panggoni. Sabana ira nitarima Alatalamo majadi todeana. 4 Da'a masipato komi manjalaraka batua tau ntanina. Ane pokainggu batua etu nakono atau nasala, etu urusa madikana mboto, da'a urusa komi. Kakonona pokaingguna bate-batena makono sabana Pue nakuasa nombasaro i'a. 5 Naria topomparasaya nompekiri saongu eo neliu nggabelo nggari eo ntanina. Tapi naria topomparasaya i Pue Yesus ntanina nompekiri pura-pura eo nasimbayu. To napokona butu mba'a tau kana maroso momparasaya nuapa to naria riara nta'ina. 6 Tau to nombabila saongu eo nombabila eo etu sabana nipekirina etu nompakadamba rara i Pue. Pade wa'a wo'u tau to nanggoni mpengele-ngele panggoni. Nikonina etu sabana nipekirina etu nompakadamba rara i Pue, sabana i'a nanguli tarima kasi ka Pue Alatala. Pade wa'a wo'u tau to da'a nanggoni bau. I'a da'a nanggoni bau sabana nipekirina etu nompakadamba rara i Pue, pade i'a wo'u nanguli tarima kasi ka Alatala. 7 Kita da'a aga natuwu nantuki dotata mboto. Pade kita da'a namate nantuki dotata mboto. 8 Natuwu atau namate kita batena nantuki dota i Pue. Natuwu atau namate kita batena bagia i Pue. 9 Etumo sampe Kristus namate pade natuwu bali nggari kamatena, ala I'a majadi Pue nu pura-pura manusia, nabeloka to natuwuna, nabeloka to namatena. 10 Jadi ane iwetu, nokuya komi nombasalaraka roamu topomparasaya? Nokuya komi nanjalai i'a? Toramo! Kita pura-pura kana mantingayo Alatala banepia ala ratangarana. 11 Nanotomo etu sabana riara Buku Nagasa naria nitulisi iwe'i: "Alatala nanguli, 'Natantumo butu mba'a tau kana motimbakotu ri ngayoku. Pura-pura tau kana mompangaku Akumo Alatalana.' " 12 Jadi sampesuwu-sampesuwu, kita pura-pura kana mompangaku pokaingguta mboto ri ngayo Alatala banepia. 13 Sabana etu kuuli ka komi, ne'e mana kita mosisalaraka. Tapi kita kana mainga ala ne'e maria pokaingguta to manggeni roata topomparasaya rapesoba atau manawu ante mowia pokainggu to nirekena nasala. 14 Ewa tau to nosaongu rara ante i Pue Yesus, ninjaniku bo niparasayaku da'a ria panggoni nuapa-nuapa to natantoru riara mpanggita Alatala. Tapi ane maria tau to nomparasaya panggoni etu natantoru, etu mpu'u-mpu'u natantoru ka i'a. 15 Ane nggari panggoni to nikoni komi roamu topomparasaya naju'a rarana, batuana komi mana matuwu ante towe. Ne'e sampe panggoni to nikoni komi mompakagero pomparasaya nu roamu, sabana i'a wo'u samba'a topomparasaya to nitolo ante kamate Kristus. 16 Jadi ne'e sampe panggoni to nireke komi nabelo rakoni majadi sabana sampe komi rasalai tau ntanina. Agina ne'e manggoni panggoni to nireke roamu natantoru. 17 Sabana ane kita najadi todea to niparenta Alatala nuapa to nikonita atau niinuta da'a napokona. To napokona rarata kana manoa, kita kana matuwu mosinggabelo ante roata bo madamba-damba sabana naria Nosa Nagasa nu Alatala riara nta'ita. 18 Ane kita mantuki Kristus ante pokainggu iwetu, kita kana rakonoa Alatala bo rabila manusia. 19 Etu sampe kita kana mompasimbuku matuwu mosinggabelo ante roata, pade mosipakaroso rara samba'a bo samba'a. 20 Ne'e sampe kita mompakagero nuapa to nabelo to nipowia Alatala riara nggatuwu roata ante manggoni panggoni to nirekena natantoru. Kakonona pura-pura panggoni namala rakoni, da'a ria to natantoru. Tapi kita nasala ane nuapa to nikonita manggeni roata rapesoba. 21 Agina ne'e mana manggoni bau atau manginu panginu to mepakalangu atau mowia nuapa-nuapa to mombagero pomparasaya roamu. 22 Ane komi nomparasaya powiamu etu da'a nasala, kawiamo etu ri ngayo Alatala aga komi mboto tapi ne'e ri ngayo roa-roamu to nalente pomparasayana. Nasana mpu'u tau to da'a nisalaraka pekiri rara nta'ina mboto ewa nuapa to nirekena namala rakonina. 23 Tapi tau to norongu rara manggoni sangele, nasala ane i'a manggoni panggoni etu sabana i'a da'a nantuki nuapa to niparasayana. Pade nuapa-nuapa to nipowiata anu da'a nantuki pomparasayata, powia etu silaka.
1 Kita to naroso pomparasayata masipato mantulungi roa-roata to nalente pomparasayana. Ne'e aga mompekiri kasana nu rarata mboto. 2 Kita masipato mompakasana rara sanggamanusiata ala mompakabelo ira bo mompakaroso pomparasaya ira. 3 Sabana Kristus wo'u da'a aga nangelo kasana nu rarana mboto, tapi I'a nasadia nipandasa. Riara Buku Nagasa naria tesana to nanguli iwe'i: "Pura-pura tesa ira to nanjalai Alatala nawela aku." 4 Pura-pura nuapa to nitulisi riara Buku Nagasa nggaolu nitulisi ala mompatuduki kita. Nggari pepatuduki to niratata nggari Buku Nagasa kita majadi maroo tempo nipandasa pade pomparasayata rapakaroso sampe kita maroo manjarumaka Alatala. 5 Perapi Pue Alatala, to nompakaroso pomparasayata bo nompakaroo rarata tempo kita nipandasa, mantulungi komi matuwu mosaongu rara samba'a bo samba'a nantuki jonjo Yesus Kristus 6 sampe komi mosaongu rara mantoiya bo mombabila Alatala, Uma nu Pueta Yesus Kristus. 7 Jadi sampesuwu-sampesuwu, komi kana mositarima samba'a bo samba'a ante mabelo nasimbayu ewa Kristus wo'u nantarima komi ala ante iwetu Alatala rabila bo ratoiya ntau. 8 To nipatujuku iwe'i: Kristus narata ri dunia mantulungi tau to Yahudi ala pojanji Alatala ka totu'a ira nggaolu madupa sampe manoto ka pura-pura tau Tesa nu Alatala etu nakono. 9 Pade Kristus wo'u narata ala tau-tau da'a to Yahudi mantoiya Alatala sabana ira wo'u nipoasi matana. Naria tesa riara Buku Nagasa ewa etu to nanguli iwe'i: "Sabana etu, O Pue, aku kana mombabila Komi ri tatongo tau-tau da'a to Yahudi. Aku kana modade mombatoiya sangamu." 10 Pade naria tesa ntanina riara Buku Nagasa to nanguli iwe'i: "Umba komi tau-tau da'a to Yahudi, Komi kana madamba-damba mpasanggani-nggani ante todea nu Alatala." 11 Pade naria wo'u tesa Alatala ntanina to nanguli iwe'i: "Umba komi tau-tau da'a to Yahudi, komi kana mantoiya Alatala. Pura-pura tau kana mantoiya I'a." 12 Pade naria wo'u tesa to nitulisi nabi Yesaya iwe'i: "Nggari muli Isai kana meumba samba'a magau to moparenta tau-tau da'a to Yahudi. I'amo to majadi panjarumaka ira." 13 Perapi Pue Alatala, pu'u panjarumakata, mompakadamba rara komi bo mombawai ka komi katuwua mabelo sabana komi nomparasaya I'a sampe mantambai eona mantambai panjarumaka komi ri ja'ina ante kuasa nggari ja'i Nosa Nagasana mboto. 14 Sampesuwu-sampesuwuku, niparasayaku pokainggu komi batena nabelo. Ninjani komimo pura-pura pepatuduki to nakonona bo komi nompakule mosipakaroso rara samba'a bo samba'a. 15 Tapi naupa iwetu aku nabia sakedi nantulisi bara sakuya ngele ka komi. Patujuku ala mompopatora ka komi, sabana etumo bago to niparasaya Alatala ka aku. 16 I'a nangonggotaka aku najadi batua Yesus Kristus ala rasurona mpaka ri ja'i tau-tau da'a to Yahudi. Bagoku etu namala nirapaka bago topanggeni agama Yahudi to nanggeni pesomba ntodea ka Alatala. Sabana aku nompatolele Kareba Belo ka tau-tau da'a to Yahudi ala ira to momparasaya namala kukeni ka Alatala ewa pesomba. Pade pesombaku etu natantumo ratarimana sabana ira nipakagasa Nosa Nagasa nu Alatala mboto. 17 Jadi aku namala madamba-damba mompekiri bago to nituiku ka Alatala, sabana aku nosaongu rara ante Yesus Kristus. 18 Aku aga mabia motesa ewa nuapa to nipowia Kristus niposabana aku. Nggari tesa bo powiaku aku nanggeni tau-tau da'a to Yahudi matundu ri ja'i Alatala. 19 Pade etu nipowiaku ante kabaraka-kabaraka bo tandai-tandai to nipogumaa bo kuasa nggari ja'i Nosa Nagasa nu Alatala. Nggari ngata Yerusalem sampe ri tana Ilirikum pura-pura Kareba Belo ewa Kristus naopumo nipatoleleku. 20 Riara bagoku etu aku bate-batena nompasimbuku nompatolele Kareba Belo ka tau-tau to da'apa nangginjani sanga Kristus. Patujuku ala ne'e sampe aku manggeni Kareba Belo ka tau-tau to naopu nikeni ka kareba etu. 21 Tapi aku madota mowia ewa to nitulisi riara Buku Nagasa to nanguli iwe'i: "Tau-tau to da'apa nikeni ka kareba ewa I'a kana manggita I'a. Ira to da'apa nangepe kana mangginjani karebana etu." 22 Sampesuwu-sampesuwu, kakonona nggari bagoku etumo sampe nadea ngganimo da'apa najadi aku malau manggita komi. 23 Tapi we'i-we'i bagoku ri se'i naopumo. Pade nompae-mpaemo dota raraku momai manggita komi. 24 Jadi nisarumakaku ane aku malau mpaka ri tana Spanyol aku mamala mesai manggita komi ri ngata Roma bo madamba-damba mpasanggani-nggani ante komi sampalai. Naopu etu kusarumaka komi mamala mantulungi aku riara mpolumakoku mpaka ri tana Spanyol. 25 Tapi da'apa aku momai ri ja'i komi aku mokolu malau mpaka ri ngata Yerusalem manggeni petulungi ka topomparasaya i Pue Yesus ri setu. 26 Sabana topomparasaya ri Propinsi Makedonia bo Akhaya nompakatantu mompakatu petulungi ka topomparasaya i Pue Yesus to napakasi ri ngata Yerusalem. 27 Etu nipowia ira nggari kadamba nu rara ira mboto. Tapi kakonona ira noinda ka roa ira topomparasaya to Yahudi iwetu. Sabana nggari tau to Yahudi sampe tau-tau da'a to Yahudi nombarata nadea rasi nggari ja'i Alatala. Jadi masipato mpu'u tau-tau da'a to Yahudi mantulungi tau-tau to Yahudi ante rasi nggari dunia e'i. 28 Jadi aku kana mokolu malau mpaka ri ngata Yerusalem manggeni doi petulungi to nipasiromu etu ka topomparasaya ri setu. Naopu etu aku kana mesai manggita komi riara mpolumakoku mpaka ri tana Spanyol. 29 Pade ninjaniku ane aku marata ri ja'i komi natantumo aku kana manggeni nadea rasi nggari ja'i Kristus ka komi. 30 Sampesuwu-sampesuwu, kita nosaongu rara ante Pueta Yesus Kristus bo kita mosipotowe samba'a bo samba'a ante pekeniaka Nosa Nagasa nu Alatala riara nta'ita. Sabana etu aku mpu'u-mpu'u merapi ka komi, pekakaimo ka Alatala mpasanggani-nggani ante aku riara posambayamu momposambaya aku. 31 Posambayamo ala aku mamala matipalewa nggari ja'i tau-tau to Yahudi ri Bagia Yudea to da'a nomparasaya i Pue Yesus. Pade posambaya wo'umo ala doi petulungi to kukeni ka topomparasaya i Pue Yesus ri Yerusalem mamala ratarima ira ante mabelo. 32 Ante iwetu, ane Alatala madota, aku mamala momai ri ja'i komi ante madamba mpu'u raraku, pade aku mamala mombarata kasana rara ri tatongo komi. 33 Perapi Pue Alatala, pu'u katuwua nabelo, mosanggani-nggani ante komi pura-pura. Amin!
1 Ante suraku e'i aku madota mompoposinjani komi ante sampesuwuta besi i Febe. I'a samba'a topantulungi todea topomparasaya ri ngata Kengkrea. 2 Kuperapi ala komi mantarima i'a ewa sampesuwumu riara i Pue, sabana etu pokainggu to masipato ka topomparasaya i Pue Yesus. Ane maria to niparaluuna tulungimo i'a, sabana i'a mboto nantulungi nadea tau, pade aku mboto wo'u nitulungina. 3 Pakasampe tabeku ka ira i Priskila bo Akwila, roa-roaku sampokarajaa nanggeni Kareba Belo Yesus Kristus. 4 Ira sakedika namate nantulungi aku. Aku nosukuru ka ira, pade da'a aga aku tapi pura-pura topomparasaya da'a to Yahudi wo'u. 5 Pakasampe wo'u tabeku ka topomparasaya i Pue Yesus to nodade ri sapo ira. Pakasampe tabeku ka Epenetus to nipotoweku. I'a tau pamulana to nomparasaya Kristus ri Propinsi Asia. 6 Pade pakasampe wo'u tabeku ka i Maria. I'a nokarajaa ntomo ka komi. 7 Pakasampe tabeku ka Andronikus bo Yunias, sampesuwu-sampesuwuku to Yahudi. Ira nitarunggu mpasanggani-nggani ante aku bo ira nibila pura-pura suro i Pue Yesus. Da'apa aku nomparasaya Kristus ira nokolu nomparasaya. 8 Pakasampe tabeku ka Ampliatus to nipotoweku riara i Pue. 9 Pakasampe tabeku ka Urbanus, roata sampokarajaa nanggeni Kareba Kristus. Pade pakasampe tabeku ka i Stakhis to nipotoweku. 10 Pakasampe tabeku ka Apeles to mpu'u-mpu'u nompopokita katutuna nantuki Kristus tempo i'a nipandasa. Pade pakasampe tabeku ka ira Aristobulus saongu njapo. 11 Pakasampe tabeku ka i Herodion, roaku to Yahudi, bo ka ira nggari sapo i Narkisus to nomparasaya i Pue. 12 Pakasampe wo'u tabeku ka i Trifena bo i Trifosa to nokarajaa ntomo nanggeni Kareba i Pue. Pade pakasampe tabeku ka i Persis to nipotoweku to nokarajaa ntomo nanggeni Kareba i Pue. 13 Pakasampe tabeku ka i Rufus bo indona to nipoindoku wo'u. Rufus samba'a topomparasaya to noangga ri ngayo i Pue. 14 Pakasampe tabeku ka Asinkritus, i Flegon, i Hermes, i Patrobas, i Hermas bo sampesuwu-sampesuwu topomparasaya to nosanggani-nggani ante ira. 15 Pakasampe tabeku ka i Filologus bo Yulia, i Nereus bo sampesuwuna besi Olimpas bo ka pura-pura topomparasaya to nosanggani-nggani ante ira. 16 Posipakasampemo tabe samba'a bo samba'a ante towe. Pura-pura topomparasaya Kristus wo'u nompakasampe tabe ira ka komi. 17 Sampesuwu-sampesuwu, kuperapi ante mpu'u-mpu'u ala komi mainga ri ja'i ira to nompakagado topomparasaya bo nanggeni tau manawu riara silaka ante pepatuduki ira to nangewa pepatuduki to nipatuduki ka komi bopia. Pakakawaomo komi nggari ja'i tau-tau ewa etu. 18 Sabana tau to noinggu iwetu da'a nantuki Kristus, Pueta, tapi ira aga nantuki dota rara ira mboto. Ira nombabagiu tau to danagasa rarana ante tesa-tesa ira to napande bo namomi. 19 Kareba ewa komi natiepe ri umba-umba. Pura-pura tau nangepe lelena iwenu komi natundu riara Kareba Belo. Etu sampe nadamba mpu'u raraku nompekiri komi. To nipodotaku ala komi mapande mangginjani powia to nabelona bo makawao nggari kaja'ana. 20 Pue Alatala, pu'u katuwua nabelo, kana masalisa mantulungi komi mombadagi Magau nu Seta. Perapi towe belo nggari ja'i Pueta Yesus mosanggani-nggani ante komi. 21 Tarimamo tabe nggari ja'i Timotius, roaku sampokarajaa, pade nggari ja'i Lukius, Yason bo i Sosipater, roa-roaku to Yahudi. 22 Aku, Tertius, to nipopale i Paulus nantulisi sura e'i, aku wo'u mompakasampe tabeku riara i Pue ka komi pura-pura. 23 Tarima wo'u tabe nggari ja'i Gayus. Aku Paulus, nipalogana naturu ri sapona, pade pura-pura topomparasaya ri se'i wo'u nodade ri sapona. Tarimamo tabe nggari ja'i Erastus, topombaurusi doi ri ngata e'i. Pade tarima wo'u tabe nggari ja'i sampesuwuta i Kwartus. [ 24 Perapi towe belo Pueta Yesus Kristus mosanggani-nggani ante komi pura-pura. Amin!] 25 Ratoiyata Alatala! I'a nakuasa mompakaroso pomparasaya komi nantuki Kareba Belo to nipatoleleku, etumo tesa ewa Yesus Kristus. Kareba Belo etu nitabuniaka nggari lamba pamulana, 26 tapi ri tempo we'i-we'i etu nipopanjani nggari buku-buku to nitulisi nabi-nabi nggaolu. Kareba etu nipatolele ka pura-pura manusia nantuki parenta Alatala to natuwu sampe ri kasae-saena. Patujuna ala ira pura-pura momparasaya bo matundu ri ja'ina. 27 I'amo Alatala samba'a lau. I'amo to nangginjani mpengele-ngele. I'amo to masipato ratoiyata sampe ri kasae-saena sabana nuapa to nipowia Yesus Kristus. Amin! Tabe nggari ja'iku, Paulus
1 Sura e'i nggari ja'iku Paulus to nipelisi najadi suro Yesus Kristus nantuki dota Alatala mboto, pade nggari ja'i sampesuwuta i Sostenes, 2 ka todea topomparasaya Alatala to naria ri ngata Korintus. Komi nipakagasa sabana nosaongu rara ante Yesus Kristus. Pade komi nipokio matuwu ante pokainggu to nagasa mosanggani-nggani ante pura-pura tau ri njumaongu dunia e'i to nekakai ka sanga Pueta Yesus Kristus. I'a Pue ira bo Pueta wo'u. 3 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi. 4 Aku da'a nenonto nanguli tarima kasi ka Alatala ewa katuwu komi, sabana towe belona niwai ka komi to nosaongu rara ante Yesus Kristus. 5 Riara mpengele-ngele katuwu komi nipakasugi sabana komi nosaongu rara ante Yesus Kristus. Komi niwai ka pompakule motesa ante napande bo komi niwai ka mpengele-ngele pangginjani to nabelona. 6 Kareba ewa Kristus to nipatolele ka komi nipakanoto kakonona riara nggatuwu komi. 7 Jadi da'a ntoto nakura pompakule nggari ja'i Nosa Nagasa nuapa-nuapa ri ja'i komi we'i-we'i tempo komi mompopea karata Pueta Yesus Kristus bali ri dunia. 8 I'a kana mompakaroso komi sampe ri kaopuna sampe komi da'a mamala rapakasala tempo Pueta Yesus Kristus marata bali ri dunia. 9 Alatala namala raparasaya mompowia etu. I'amo to nompokio komi majadi saongu rara ante Anana Yesus Kristus, Pueta pura-pura. 10 Sampesuwu-sampesuwu, aku merapi ka komi riara sanga Pueta Yesus Kristus ala komi masintuwu bo mosaongu rara. Ne'e sampe magero sintuwu komi, tapi komi kana masintuwu mosaongu rara bo pekiri samba'a bo samba'a. 11 Niuliku iwetu sabana naria ira nggari sapo i Kloe notesa ka aku naria posinggarau ri tatongo komi. 12 To nipatujuku iwe'i: Ri tatongo komi naria to nanguli, "Aku e'i topantuki Paulus," pade naria sanupa to nanguli, "Aku e'i topantuki Apolos," pade naria ntanina nanguli, "Aku e'i topantuki Petrus," pade naria ntanina nanguli, "Aku e'i topantuki Kristus." 13 Toramo! Kristus da'a natibagi-bagi! Paulus da'a nipaku ri kayu parika manjaliku sala komi! Komi da'a nidiu ewa tandaina komi najadi topantuki Paulus! 14 Aku nosukuru sabana da'a ria ntanina nggari tatongo komi to nidiuku, aga i Krispus bo i Gayus. 15 Ne'e sampe maria to manguli i'a nidiu ewa tandaina i'a najadi topantuki aku! 16 (O, nitoraku, ira i Stefanus saongu njapo wo'u nidiuku. Tapi ntanina nggari ira etu da'a nitoraku ane naria to nidiuku.) 17 Aku da'a nipakau Kristus mombadiu tau tapi ala mompatolele Kareba Belo. Pade tempo aku nompatolele Kareba etu aku da'a notesa nantuki noto nggari ja'i manusia ala ne'e sampe tau aga nanjarumaka kata'uku notesa. Ane iwetu kamate Kristus ri kayu parika da'a ria gunana. 18 Kareba Belo ewa kamate Kristus ri kayu parika nireke ntau to da'a nipakasalama sangele tesa ntodoyo. Tapi ane kita to nipakasalama, kareba etu nireketa kuasa nu Alatala mboto. 19 Riara Buku Nagasa naria Tesa nu Alatala to nanguli iwe'i: "Aku kana mompakaropu noto ntau to nanotona, pade kapande ntau to napandena kana kupakalipo." 20 Jadi nuapa gunana tau-tau to nanoto? Nuapa gunana tau-tau to napande? Nuapa gunana tau-tau to napande nosisono ri dunia e'i? Pura-pura noto manusia ri dunia e'i nipakanoto Alatala aga sangele to da'a ria gunana. 21 Sabana manusia da'a namala mosinjani ante Alatala ane aga manjarumaka notona mboto. Tapi nggari kabelo rara nu Alatala I'a madota mompakasalama isema-sema to nomparasaya Kareba Belo. Tapi Kareba etu aga nireke tau-tau ri dunia e'i sangele tesa ntodoyo. 22 Tau-tau to Yahudi madota manggita tandai to nipogumaa ala mantakono Kareba to nipatolele. Pade tau-tau to Yunani aga mangelo noto nggari dunia e'i. 23 Tapi kami nompatolele Kareba Kristus to namate nipaku ri kayu parika. Kareba etu nompakaju'a rara tau-tau to Yahudi, pade nireke tau-tau to Yunani sangele tesa ntodoyo. 24 Tapi ka tau-tau to nipokio Alatala majadi todeana kareba Kristus etu nompakanoto iwenu Alatala nompopokita kuasa bo notona ka manusia, nabeloka tau-tau to Yahudi nabeloka tau-tau to Yunani. 25 Sabana powia Alatala to nireke manusia nadoyo neliu nggabelo nggari noto manusia. Pade powia Alatala to nireke manusia nalente neliu nggaroso nggari karoso manusia. 26 Sampesuwu-sampesuwu, toramo iwenu katuwu komi bopia tempo Alatala nompokio komi majadi todeana. Sakedi lau nggari tatongo komi to nanoto riara mpanggita dunia. Sakedi lau komi to nakuasa bo nalanga katuwuna. 27 Tapi to nireke nadoyo riara mpanggita manusia ri dunia nipelisi Alatala ala mompakaeya tau-tau to nanotona. To nireke nalente riara mpanggita manusia ri dunia nipelisina ala mompakaeya tau-tau to narosona. 28 To da'a ria gunana, to nisalai pade to nireke da'a ntoto ria batuana riara mpanggita manusia nipelisi Alatala ala mompakanoto nuapa to nitoiya manusia ri dunia e'i da'a ria gunana. 29 Patujuna ala ne'e maria manusia to mamala mombatoiya korona mboto ri ngayo Alatala. 30 Nggari Alatala mbotomo kita najadi saongu rara ante Yesus Kristus. Pade nggari Kristus kita nangginjani noto nggari ja'i Alatala. I'amo to nompakanoa kita riara mpanggita Alatala sampe kita najadi bagia nu Alatala to nagasana. Pade I'amo to nantolo silakata. 31 Jadi ewa to nitulisi riara Buku Nagasa, "Isema-sema madota mombatoiya sangele i'a kana mombatoiya nuapa to nipowia i Pue."
1 Sampesuwu-sampesuwu, tempo aku narata ri ja'i komi nanggeni Kareba Belo nggari ja'i Alatala, aku da'a notesa ante tesa-tesa to nalanga bo nagayana, aku da'a notesa nantuki noto nggari ja'i manusia ri dunia. 2 Sabana nipakatantukumo ne'e motesa sangele ntanina nggari tesa Yesus Kristus bo kamatena ri kayu parika. 3 Tempo aku narata ri tatongo komi nalentemo raraku pade aku nolalete ante naeka rara. 4 Tempo aku nompatolele Kareba Belo ka komi aku da'a nompasimbuku manggeni komi momparasaya ante nompake tesa-tesa to nopu'u nggari noto manusia. Tapi aku nompatolele kareba etu ka komi ante nompopokita ka komi kuasa nggari ja'i Nosa Nagasa nu Alatala. 5 Patujuku nowia iwetu ala pomparasaya komi ne'e aga nopu'u nggari noto manusia tapi nopu'u nggari kuasa nu Alatala mboto. 6 Naupa iwetu kami nompasimbayu noto ka topomparasaya to naroso pomparasayana. Noto etu da'a noto nggari dunia e'i atau nggari ja'i topanggeniaka-topanggeniaka dunia to naja'a e'i to rapakalipo kuasana banepia. 7 Tapi noto to nipatolele kami noto nggari ja'i Alatala to nitabuniakana nggari dunia e'i. Da'apa dunia nipajadi, Alatala nonia mompopanjani notona etu ka kita we'i-we'i, ala kita mamala mombarata bagia riara kuasa bo kagayana to nipogumaa. 8 Da'a ria samba'a nggari tatongo topanggeniaka-topanggeniaka dunia to naja'a e'i to nangginjani noto Alatala etu. Sabana ane rapana noto etu ninjani ira, natantumo ira da'a nombapaku i Pue to nakuasa ri kayu parika. 9 Tapi ewa to nitulisi riara Buku Nagasa iwe'i: "Nuapa to da'a ria sanggani nikita manusia, nuapa to da'a ria sanggani niepe ntalinga ira, bo nuapa to da'a ria sanggani nesua ri pekiri manusia etumo to nipakasadia Alatala ka tau-tau to nompotowe I'a." 10 Tapi etumo to nipakanoto Alatala ka kita nggari Nosana to Nagasa. Sabana Nosa Nagasa nu Alatala nangginjani mpengele-ngele sampe narata ri nia nu Alatala to natetabuniaka. 11 To nangginjani pompekiri samba'a manusia aga tau etu mboto. Iwetu wo'u to nangginjani pompekiri nu Alatala aga Nosa Nagasana mboto. 12 Kita da'a niwai ka noto nggari dunia e'i, tapi kita niwai ka Nosa Nagasa nggari ja'i Alatala mboto ala kita mamala mangginjani nuapa-nuapa to niwai Alatala ka kita ante najoi rarana. 13 Jadi etu wo'umo to nipatolele kami. Kami da'a nompatolele tesa etu ante tesa-tesa nggari noto manusia, tapi ante tesa-tesa to nipatuduki Nosa Nagasa nu Alatala mboto. Kami nompakanoto pepatuduki to nakonona nggari ja'i Nosa Nagasa nu Alatala ka tau-tau to nipesua Nosa Nagasana etu. 14 Tau-tau to da'a nipesua Nosa Nagasa nu Alatala da'a nantarima pepatuduki nggari ja'i Nosa Nagasa, sabana pepatuduki etu nirekena aga sangele tesa ntodoyo. I'a da'a namala mangginjani pepatuduki etu sabana pepatuduki etu aga namala ranjani ntau ante pekeniaka Nosa Nagasa nu Alatala. 15 Tapi tau to nipesua Nosa Nagasa nu Alatala naria notona sampe i'a namala nompoposisala nuapa to nakono bo nuapa to nasala. Tapi i'a da'a namala rapakasala tau-tau to da'a nipesua Nosa Nagasa nu Alatala. 16 Ewa to nitulisi riara Buku Nagasa iwe'i: "Da'a ria samba'a to nangginjani pekiri i Pue sampe i'a namala mompatuduki I'a." Tapi kita topomparasaya, pekirita nasimbayu ante pekiri Kristus!
1 Sampesuwu-sampesuwu, tempo aku naria ri tatongo komi aku da'a namala notesa ka komi nasimbayu ewa aku notesa ka tau-tau to nipesua Nosa Nagasa nu Alatala. Tapi aku aga notesa ka komi ewa tau-tau to natuwu nantuki dota rara manusia. Aku aga notesa ka komi nasimbayu ewa komi danangana riara pomparasaya komi ka Kristus. 2 Aku aga nombawai ka komi panggoni ngana nggedi, da'a panggoni to nako'ona, sabana komi da'apa nompakule manggoni panggoni to nako'ona. Pade kakonona sampe we'i-we'i komi batena da'apa nompakule manggoni etu. 3 Komi danatuwu nantuki dota rara manusia. Sabana naria nggari tatongo komi to nasiriati bo nosinggarau. Natantumo pokainggu ewa etu nompopokita komi danatuwu nantuki dota rara manusia. Komi danatuwu ewa tau-tau to da'a nosinjani ante Alatala. 4 Nanotomo etu sabana naria nggari tatongo komi to nanguli, "Aku e'i topantuki Paulus," pade naria sanupa nanguli, "Aku e'i topantuki Apolos." Pokainggumu etu nompakanoto komi danatuwu ewa tau-tau to da'a nosinjani ante Alatala. 5 Pekirimo! Isema Apolos? Bo isema Paulus? Natantu kami aga batua-batua Alatala to nanggeni komi nomparasaya i Pue Yesus. Kami aga batua to nantui bago to niwai Pue ka kami. 6 Aku e'i notuja pade Apolos nombajunju. Tapi Alatalamo to mompakatuwu tuja-tuja. 7 Jadi to masipato rabila da'a topotuja bara topojunju, tapi Alatala. I'amo to mompakatuwu tuja-tuja. 8 Kakonona topotuja bo topojunju nosaongu patuju, pade ira mbau nantarima tambona nantuki bago to nipowia ira. 9 Sabana kami bo Apolos roa sampokarajaa ante Alatala pade komimo to najadi ewa tinalu Alatala. Komimo to najadi ewa sapo nu Alatala. 10 Nggari towe belo Alatala aku e'i najadi ewa samba'a topowia sapo to napandena. Ante noto nggari ja'i Alatala aku nompowia pondasi sapo, pade tau ntanina nombabangu sapo ri bunggu nu pondasi etu. Tapi ira kana mombabangu sapo etu mpakabelo-belo. 11 Sabana da'a ria tau to mamala mompowia pondasi ntani nggari pondasi to nipowiamo, etumo Yesus Kristus. 12 Naria to nombabangu sapo ri bunggu mpondasi etu ante bulawa, naria to nombabangu ante salaka, naria ntanina to nombabangu ante watu to nasulina, pade naria to nombabangu ante kayu, jono bo kada mpae. 13 Tapi pokarajaa ira samba'a bo samba'a kana rapakanoto kabelona banepia. Sabana tempo i Pue Yesus marata bali ri dunia pokarajaa ira etu kana rapakanoto. Pokarajaa ira etu kana rauji ante apu ala manoto iwenu kabelo nu pokarajaa etu. 14 Ane sapo to nipowia ntau ri bunggu mpondasi etu bate-batena maroo tempo niuji ante apu, topowia sapo kana mombarata tambona nggari ja'i Alatala. 15 Tapi ane sapo to nipowiana mapapu riara apu etu i'a kana marugi. I'a mboto kana masalama, tapi ewa tau sakedika namate riara apu. 16 Iwenumo, sampesuwu-sampesuwu? Da'a nitora komi, komimo to najadi ewa Sapo nu Alatala pade Nosa Nagasana neto'o riara nta'i komi pura-pura? 17 Isema-sema mombagero Sapo nu Alatala etu kana rasuku Alatala, sabana Sapo nu Alatala etu nagasa. Toramo! Komimo Sapo nu Alatala etu! 18 Ne'e mombabagiu koromu mboto! Ane maria nggari tatongo komi to nompekiri korona nanoto riara mpanggita manusia, agina i'a menonto mompekiri ewa etu ala i'a mpu'u-mpu'u mamala majadi manoto riara mpanggita Alatala. 19 Sabana tau to nireke nanoto riara mpanggita manusia nabodo riara mpanggita Alatala. Ewa to nitulisi riara Buku Nagasa iwe'i: "Alatala mompakanawu topande riara kapandena mboto." 20 Pade naria tesa ntanina to nanguli iwe'i: "Pue nangginjani pompekiri tau-tau topande ri dunia da'a ria gunana." 21 Jadi ane iwetu, ne'e mana mombatoiya topanggeniaka-topanggeniaka komi, sabana kakonona komi naopu niwai ka mpengele-ngele to niparaluu. 22 Paulus, Apolos bo Petrus niwai Alatala ka komi majadi topantulungi komi. Niwaina ka komi katuwu to nabou, pade nikabasakana komi nggari kamatena. Nuapa-nuapa to naria riara dunia e'i, nuapa-nuapa to najadi we'i-we'i, pade nuapa-nuapa to majadi banepia nipakatantu Alatala manggeni belo ka komi. Mpengele-ngele etu bagia komi, 23 pade komi najadi bagia Kristus, pade Kristus bagia nu Alatala.
1 Jadi Apolos ante aku kana rareke komi batua Kristus. Kami e'i wakelena to niparasaya ka tesa nggari ja'i Alatala to nitabuniaka nggaolu tapi to nipatolele we'i-we'i. 2 To napokona ante samba'a wakele, i'a kana matutu mantuki dota nu madikana. 3 Ane aku e'i, da'a mokuya ane aku rapakasala komi atau tau ntanina. Tapi aku da'a nompakasala koroku mboto. 4 Da'a ninjaniku sangele riara nggatuwuku sampe aku masipato rapakasala. Tapi da'a etu to nompakatantu aku tau nanoa. Pue mbotomo to mompakatantu ane aku manoa bara da'a. 5 Jadi ne'e komi masalisa mompakasala tau ane da'apa narata tempona. Popeamo sampe i Pue marata bali ri dunia. I'amo to mompakanoto pura-pura nuapa to nikalendu nu rumau we'i-we'i. I'amo to mompakanoto mpengele-ngele nia to naria riara nta'i manusia. Ri tempo etumo Alatala kana mombatoiya butu-butu mba'a to masipatona. 6 Sampesuwu-sampesuwuku, to nitesaku ewa Apolos bo aku ri ba'ana nitesaku ala mantulungi komi. Patujuku ala nggari jonjo katuwu kami komi mamala meguru batuana tesa to nanguli, "Ne'e pompekiri komi meliu nggari to nitulisi riara Buku Nagasa." Patujuku ala komi ne'e mombatoiya samba'a nggari topanggeniaka komi pade mompakasala to santanina. 7 Komi da'a neliu nggari tau ntanina. Toramo! Pura-pura nuapa to naria ri ja'imu niwai ka komi. Jadi nokuya komi nompakalanga rara ante nanguli etu asele powiamu mboto? 8 Iwenumo? Nipekiri komi nagana puramo ri ja'i komi, nasugimo komi riara mpengele-ngele? Nipekiri komi komi noparenta ewa magau pade kami da'a? O, nabelo mpu'u ane komi mpu'u-mpu'u majadi magau ala kami wo'u mamala moparenta mpasanggani-nggani ante komi! 9 Nantuki pombarataku kami suro-suro i Pue Yesus nipajadi Alatala to neliu nggandasa ri dunia. Kami nireke nasimbayu ewa tau nikeni nisuku mamate ri ngayo ntodea. Kami aga najadi panggoni mata pura-pura isi langi bo dunia, nabeloka manusia nabeloka malaeka-malaeka i Pue. 10 Kami nireke ntau todoyo sabana kami nanggeni Tesa Kristus. Tapi nantuki pompekiri komi, komimo to nanoto sabana nosaongu rara ante Kristus! Kami nalente-lente tapi nantuki pompekiri komi, komimo to naroso! Kami nisalai ntau tapi nantuki pompekiri komi, komimo to nibila! 11 Sampe we'i-we'i kami naoro ta'i bo nabai tambolo. Kami nopakea nte sanjia-njia, kami niboba pade da'a ria peto'o to nikaroo kami. 12 Kami nokarajaa ntomo ante pale kami mboto ewa batua ala mangelo katuwua. Ane kami nijanjiaka ntau kami nerapi rasi nggari ja'i Alatala ka tau etu. Ane kami nipandasa ntau kami bate-batena nosabara. 13 Ane kami niuli sinja'i ntau kami nesono ante tesa to nalusuna. Kami nireke ewa rumpu-rumpu ri dunia e'i, kami nireke ewa rangu nu dunia sampe we'i-we'i. 14 Sampesuwu-sampesuwuku, tesa e'i kutulisi ka komi da'a ante patuju mompakaeya komi, tapi ala mompatuduki komi ewa ana-anaku to nipotoweku. 15 Sabana naupa naria nonjobu-njobu guru nompatuduki komi, tapi da'a nadea umamu. Sabana akumo to najadi ewa umamu riara Yesus Kristus ante nanggeni Kareba Belo ka komi. 16 Jadi etu sampe aku merapi ante mpu'u-mpu'u ka komi, pasialamo pokaingguku. 17 Etumo patujuku nompakau Timotius malau mpaka ri ja'i komi. I'a ewa anaku mboto to nipotoweku, samba'a topomparasaya i Pue to namala raparasaya. I'a kana mompopatora ka komi pokaingguku ewa topomparasaya Yesus Kristus nasimbayu ewa to nipatudukiku ka pura-pura topomparasaya i Pue Yesus ri umba-umba ngata. 18 Naria bara sakuya mba'a tau ri tatongo komi to najadi nasombo, sabana ira nompekiri aku mana momai ri ja'i komi. 19 Tapi ane rapodota i Pue aku kana masalisa momai ri ja'i komi. Pade ane aku marata kana kukita mboto ane tau-tau nasombo etu mpu'u-mpu'u nakuasa atau aga nata'u notesa-tesa. 20 Sabana ane samba'a tau najadi todea riara Poparenta nu Alatala, etu nanoto nikita nggari kuasa Alatala to naria riara nggatuwuna, da'a aga nggari tesa-tesana. 21 Jadi ane aku momai ri ja'i komi ri setu nuapa rapokono komi? Rapokono komi aku momai ri ja'i komi mompatuduki komi ante tesa-tesa to nakasara atau marata mompatuduki komi ante towe bo rara to nalusuna?
1 Naria lele niepeku to nanguli naria samba'a nggari tatongo komi to nogau sala ante rongo nu umana mboto. Nau ri tatongo ntau da'a nomparasaya Alatala da'a ntoto nirata pokainggu to naja'a ewa etu! 2 Tapi naupa iwetu komi aga nasombo-sombo nompekiri kaja'ana etu. Kakonona komi masipato masusa mpu'u rara, pade masipato komi mompopalai tau to nompowia etu nggari tatongo komi. 3 Naupa aku da'a naria ri tatongo komi we'i-we'i nirasaiku ewa aku naria mamimo ri setu. Pade aku naopumo nompakatantu pesuku to masipato rapawela ka tau to nompowia kaja'ana etu nasimbayu ewa aku naria ri tatongo komi ri setu. 4 Jadi ane komi masiromu mpasanggani-nggani riara sanga Pue Yesus, powiamo nasimbayu ewa aku wo'u nosanggani-nggani ante komi. Ante kuasa nggari ja'i Pueta Yesus 5 komi kana mombawai tau etu riara mpale Magau nu Seta sampe dota rarana to naja'a rapakalipo ala kaopuna i'a mamala rapakasalama tempo i Pue Yesus marata bali ri dunia. 6 Da'a masipato komi nasombo-sombo mompekiri kaja'a ntau etu. Natantu ninjani komimo sangele powia to naja'a namala mompakuja'a pura-pura todea nasimbayu ewa sakedi lau ragi namala mompopebombo pura-pura labu nu gando. 7 Jadi tajiakamo ragi to nasaena, etumo pokainggu nasilaka, ala komi majadi magasa nasimbayu ewa labu nu gando nabou to da'apa nawela ragi. Pade niparasayaku iwetu to najadi ante komi, sabana Kristus nipatesi manjaliku silakata. I'a nasimbayu ewa ana bimba to nipatesi ri Posusa Paska nto Yahudi. 8 Jadi ewa to nipowia tempo Posusa Paska kamaimo kita mantajiaka ragi to nasae, etumo manggabasaka pokainggu to nasilaka bo naja'a. Pade kamaimo kita manggoni roti da'a nipowia ante ragi, etumo matuwu ante pokainggu to magasa bo manoa. 9 Riara suraku bopia nitulisiku ne'e mosigalo ka tau nogau sala ante tau da'a rongona mboto. 10 Tau-tau to nipatujuku da'a tau ri dunia e'i to nogau sala, to da'a ria kabasa-basana mombarata untu ka korona mboto, to nebagiu, pade to nompakoni pue-pue ntanina. Da'a ira to nipatujuku, sabana ane iwetu komi kana malai nggari dunia e'i ala ne'e mosigalo ka ira. 11 To nitulisiku ka komi etumo ne'e mosigalo ka tau to nompangaku korona topomparasaya i Pue tapi ira nogau sala ante tau da'a rongo ira mboto, ira da'a ria kabasa-basana mombarata untu ka korona mboto, ira nompakoni pue-pue ntanina, ira nanguli sinja'i tau ntanina, ira topanginu, atau ira topebagiu. Ne'e mosanggani ante tau to noinggu iwetu nau aga manggoni mpasanggani-nggani! 12 - 13 Da'a urusaku mombatangara tau-tau da'a topomparasaya. Ira kana ratangara Alatala. Tapi komi kana mombatangara tau-tau to nomparasaya. Jadi ewa to nitulisi riara Buku Nagasa, "Popalaimo tau naja'a nggari tatongo komi!"
1 Ane maria nggari tatongo komi to nosinggarau ante roana, nokuya i'a nabia manggeni roana etu ratangara ntau da'a nomparasaya Alatala? Nokuya i'a da'a nanggeni roana etu ratangara topomparasaya i Pue? 2 Iwenumo? Da'a ninjani komi topomparasaya i Pue kana mombatangara pura-pura isi langi bo dunia banepia? Jadi ane isi langi bo dunia kana ratangara komi, natantumo komi kana mompakule mombatangara parakara-parakara to nanga'ana ri tatongo komi mboto! 3 Da'a ninjani komi kita topomparasaya kana mombatangara malaeka-malaeka i Pue? Jadi natantumo komi kana mompakule mombatangara parakara biasa riara nggatuwu komi eo-eo! 4 Jadi ane maria parakara biasa ewa etu nokuya komi nanggeni roamu ratangara tau-tau to da'a nomparasaya? 5 Aku nanguli tesa etu ala mompakaeya komi. Natantumo naria samba'a nggari tatongo komi to nanoto sampe i'a mamala mombatangara parakara ri olo komi topomparasaya! 6 Tapi etu da'a najadi. Komi aga nanggeni roamu topomparasaya ratangara ntopotangara to da'a nomparasaya i Pue! 7 Posinggarau komi samba'a bo samba'a etu tandaina komi nidagimo sabana pokainggu komi etu da'a ntoto masipato ka topomparasaya. Kakonona nabelopa ane komi mompakamba koromu rapakaja'a ntau atau rabagiu ntau. 8 Tapi etu da'a nipowia komi! Komi mbotomo nompakaja'a bo nombabagiu roa-roamu topomparasaya! 9 Iwenumo? Da'a ninjani komi tau-tau to nadenggo rara da'a ntoto mamala mombarata bagia riara Poparenta nu Alatala? Ne'e masalanjala! Tau-tau nogau sala ante tau da'a rongona mboto, tau-tau to nompakoni pue-pue ntanina, tau-tau nebualo, bo tau-tau nogau sala langgai mbau langgai besi mbau besi, ira pura-pura da'a ntoto mamala mombarata bagia riara Poparenta nu Alatala. 10 Wa'a wo'u ante topangangga, tau-tau da'a ria kabasa-basana mombarata untu ka korona mboto, tau-tau nanginu sampe malangu, tau-tau nanguli sinja'i roana, bo topebagiu. Ira wo'u da'a ntoto mamala mombarata bagia riara Poparenta nu Alatala. 11 Bopia bara sakuya mba'a nggari tatongo komi noinggu iwetu wo'u. Tapi silaka komi etu nitapasimo. Katuwu komi nipakagasamo, komi najadi tau nanoa riara mpanggita Alatala. Etu pura-pura najadi nggari pomparasayamu ka Pue Yesus Kristus bo nggari kuasa Nosa Nagasa nu Alatala. 12 Bara naria to nanguli iwe'i: "Pura-pura pokainggu nipaloga ka aku." Tapi toramo, da'a pura-pura pokainggu nanggeni belo ka aku. "Pura-pura pokainggu nipaloga ka aku," tapi aku da'a mompaloga sangele mombakuasai aku. 13 Naria wo'u to nanguli iwe'i: "Panggoni nipowia ala rakoni, pade ta'ita nipowia rapangisi panggoni." Tapi toramo, Alatala kana mompakaropu panggoni bo ta'ita banepia. Korota da'a nipowia ala mogau sala ante tau da'a rongota mboto tapi ala mombabila i Pue. Pade Puemo to manggeniaka korota. 14 Ante kuasana mboto Alatala nompakatuwu bali i Pue Yesus nggari kamatena, pade iwetu wo'u I'a kana mompakatuwu bali kita nggari kamateta. 15 Da'a ninjani komi korota ewa sipa nu koro Kristus? Jadi masipato kita mompake korota to najadi ewa sipa nu koro Kristus ala mogau sala ante besi bajinga? Natantumo da'a ntoto masipato! 16 Da'a ninjani komi tau to nogau sala ante besi bajinga najadi saongu koro ante i'a? Sabana naria to nitulisi riara Buku Nagasa iwe'i: "Ira romba'a kana majadi samba'a." 17 Tapi tau to najadi topomparasaya i Pue kana majadi saongu rara ante I'a. 18 Ne'e ntoto mogau sala ante tau da'a rongomu mboto. Sabana pura-pura silaka ntanina to nipowia manusia nompakaja'a tau ntanina. Tapi ane i'a mogau sala ante tau da'a rongona mboto i'a mompakaja'a korona mboto. 19 Iwenumo? Da'a ninjani komi koromu najadi ewa sapo mpepue to nipeto'o Nosa Nagasa nu Alatala? I'a naria riara nta'i komi. I'a nipopana'u Alatala ka komi. Jadi koro komi da'a komi puena tapi Alatala puena. 20 Komi naopumo nitolo Alatala ante oli to nasulina. Sabana etu komi masipato matuwu ante pokainggu to mombabila Alatala.
1 We'i-we'i aku madota mombasono pompekutana-pompekutana to nitulisi komi riara sura. Ane samba'a tau da'a norongo etu nabelo. 2 Tapi nantora pesoba-pesoba mogau sala, nabelopa ane butu mba'a langgai bo butu mba'a besi kana morongo. 3 Rongo langgai kana mantuki dota rongona besi mosampaturu, pade iwetu wo'u rongo besi. 4 Sabana da'a rongo besi to nakuasa mompakatantu nuapa to rapowia ri korona mboto, tapi rongona langgai. Pade iwetu wo'u da'a rongo langgai to nakuasa mompakatantu nuapa to rapowia ri korona mboto, tapi rongona besi. 5 Ne'e moga'a mosampaturu ane da'apa ria kasituju mpasanggani-nggani. Komi mamala moga'a mosampaturu bara sakuya kasaena ane rongo langgai bo rongo besi mosituju ala mombarata loga mosambaya. Tapi ane maopumo tempo to nipakatantu etu, komi kana matingguli mosampaturu ala ne'e komi rapesoba Magau nu Seta mogau sala sabana komi da'a mamala manta'amaka dota nasumu. 6 Tesaku e'i ewa morongo bara da'a morongo da'a sangele parenta nggari ja'iku, tapi etu aga sangele pombarataku. 7 Kakonona to nipodotaku ala pura-pura tau mamala maloa nasimbayu ewa aku e'i. Tapi butu mba'a tau niwai ka pompakulena mboto nggari ja'i Alatala. Naria to niwai ka pompakule matuwu maloa sampe mamate, tapi naria ntanina da'a niwai ka pompakule ewa etu. 8 Iwe'imo pepatudukiku ka tau da'apa norongo pade ka besi-besi tobalu: Nabelopa ane ira matuwu maloa nasimbayu ewa aku. 9 Tapi ane ira da'a mamala manta'amaka nasu ira, agina ira morongo. Sabana nabelopa morongo pade mandasa manta'amaka nasu. 10 Iwe'imo pepatudukiku ka tau-tau to norongomo. Pepatuduki e'i da'a nggari ja'iku mboto tapi nggari ja'i Pue. Rongo besi da'a mamala moga'a ante rongona langgai. 11 Tapi ane rapana i'a moga'a i'a kana maroo matuwu maloa atau matingguli bali ri ja'i rongona langgai. Pade samba'a rongo langgai da'a mamala mombasompo rongona besi. 12 Pade iwe'imo pepatudukiku ka tau-tau ntanina. Pepatuduki e'i nggari ja'iku mboto da'a parenta nggari ja'i Pue. Ane samba'a topomparasaya norongomo ante besi da'a topomparasaya pade rongona besi etu madota maroo matuwu mpasanggani-nggani, langgai etu da'a mamala mombasompo rongona besi etu. 13 Pade ane samba'a topomparasaya besi niporongo langgai da'a topomparasaya pade rongona langgai etu madota maroo matuwu mpasanggani-nggani ante i'a, besi etu da'a mamala moga'a ante rongona langgai etu. 14 Sabana rongo langgai to da'apa nomparasaya i Pue nireke ewa bagia nu Alatala sabana nggari rongona besi etu to nomparasaya. Pade wa'a wo'u rongo besi to da'a nomparasaya nireke ewa bagia nu Alatala sabana nggari rongona langgai to nomparasaya. Ane da'a iwetu ana-ana ira kana rareke natantoru riara mpanggita Alatala nasimbayu ante ana-ana ntau da'a nomparasaya. Tapi ane ira maroo matuwu mpasanggani-nggani ana-ana ira kana rareke ewa bagia nu Alatala. 15 Tapi ane rongo langgai atau rongo besi to da'a nomparasaya madota moga'a ante rongona topomparasaya, ne'e ratagi ira moga'a. Ane iwetu rongo langgai atau besi to nomparasaya da'a mana nisoko ada mporongo. Tapi toramo! Alatala madota ala komi matuwu mosinggabelo samba'a bo samba'a. 16 Sabana da'apa ninjani komi nuapa to majadi. Bara rongo besi to nomparasaya mamala manggeni rongona langgai rapakasalama. Bara rongo langgai to nomparasaya mamala manggeni rongona besi rapakasalama. 17 Butu mba'a tau kana matuwu nantuki to nipakatantu i Pue ka i'a. Katuwuna kana bate-batena ewa tempo i'a nipokio Alatala majadi todeana. Etumo atura to nipatudukiku ka pura-pura topomparasaya. 18 Jonjona, ane samba'a tau to Yahudi to nisuna tempo i'a nipokio Alatala majadi todeana, ne'e i'a mompasimbuku mompakalipo tandai posuna etu. Iwetu wo'u ane samba'a tau da'apa nisuna tempo i'a nipokio Alatala majadi todeana, ne'e i'a merapi rasuna. 19 Sabana mantuki ada mposuna atau da'a mantuki ada etu da'a napoko. To napokona etumo mantuki parenta-parenta nu Alatala. 20 Butu mba'a tau katuwuna kana bate-batena ewa tempo i'a nipokio Alatala majadi todeana. 21 Ane komi najadi samba'a batua tempo komi nipokio Alatala, ne'e masusa-susa rara mompekiri etu. Tapi ane komi mombarata loga ala mana majadi tau nipobatua, pakemo loga etu. 22 Toramo! Samba'a tau to najadi batua tempo i'a nipokio i Pue najadi ewa samba'a tau da'a nipobatua sabana i'a nikabasaka i Pue nggari silakana. Pade samba'a tau da'a nipobatua tempo i'a nipokio i Pue najadi ewa samba'a batua sabana i'a nekou ri ja'i Kristus. 23 Toramo! Komi naopumo nitolo Alatala pade olina naopu nibayarina. Sabana etu ne'e sampe komi rapobatua manusia. 24 Jadi sampesuwu-sampesuwu, butu mba'a tau kana maroo mosanggani-nggani ante Alatala, katuwuna kana bate-batena ewa tempo i'a nipokio Alatala majadi todeana. 25 Ane pompekutana komi ewa tau-tau da'apa norongo, da'a ria parenta nggari ja'i Pue kupapola ka komi, tapi kutesa ka komi pombarataku mboto. Pade tesaku e'i masipato raparasaya komi sabana aku niwai noto nggari ja'i Pue. 26 Jadi iwe'imo pombarataku: nantora mpengele-ngele kasusa riara dunia to najadi we'i-we'i, nabelopa ane katuwu komi bate-batena ewa we'i-we'i. 27 Ane komi norongomo, ne'e mangelo jala moga'a ante rongomu. Ane komi da'apa norongo, ne'e mana mangelo morongo. 28 Tapi ane rapana komi morongo, komi da'a masilaka. Pade ane samba'a randoo raporongo i'a da'a masilaka. Tapi toramo, tau-tau to morongo kana mantingayo mpengele-ngele kasusa riara nggatuwu ira. Pade to nipodotaku ala komi ne'e mawela kasusa etu. 29 Sampesuwu-sampesuwuku, patujuku iwe'i: tempota mana masaeka. Jadi mompamula we'i-we'i tau-tau to norongona ne'e aga mompekiri rongona. 30 Pade tau-tau to nageo ante nasusa rara ne'e aga mompekiri kasusa rarana. Tau-tau to nadamba ne'e aga mompekiri kadamba nu rarana. Tau-tau to nodaga ne'e aga mompekiri balu-baluna. 31 Pade tau-tau to nompariba'a mbara-mbara dunia e'i ne'e aga mompekiri mbara-mbara etu. Sabana dunia to ninjanita we'i-we'i mana masaeka malipo. 32 To nipodotaku ala komi matuwu ante da'a makini-kini rara. Tau da'apa norongo nompakasaungga pekirina ka bago i Pue. I'a nompekiri iwenu i'a mamala mompakadamba rara i Pue. 33 Tapi tau to norongomo kana mompakasaungga pekirina ka mpengele-ngele ri dunia e'i. I'a kana mompekiri iwenu i'a mamala mompakadamba rara rongona besi 34 sampe pekirina matibagi-bagi. Besi-besi to mana norongo bo randoo-randoo nompakasaungga pekiri ira ka i Pue. Ira nompekiri iwenu koro bo pekiri rara nta'i ira mamala magasa riara mpanggita Alatala. Tapi besi-besi to norongomo kana mompekiri mpengele-ngele ri dunia e'i. Ira kana mompekiri iwenu mompakadamba rara rongona langgai. 35 Aku nantesa e'i ka komi ala mantulungi komi. Da'a patujuku ala mompandasa komi ante mpengele-ngele atura, tapi ala komi mowia to makono bo masipato riara mpanggita Alatala. Pade patujuku ala komi maroo mantuki i Pue ante pompekiri to da'a matibagi-bagi. 36 Ane maria langgai to nompekiri pokaingguna da'a mana masipato ri ja'i tingeana, pade i'a mana mamala manta'amaka nasuna sampe nirasaina ira kana morongo, agina i'a mompowia to nipodotana etu. Agina ira morongo, etu da'a silaka. 37 Tapi ane maria langgai to nompekiri nabelopa i'a da'a momporongo tingeana, pade ane katantuna etu nipowiana ante da'a nipasu'u ntau, pade ane i'a mamala mombakuasai nasuna, nabelopa ane i'a da'a morongo. 38 Jadi langgai to momporongo tingeana nompowia kabelona, tapi langgai to da'a morongo nompowia to neliu nggabelo. 39 Samba'a besi to norongomo nisoko ada mporongo ane rongona langgai danatuwu. Tapi ane rongona langgai namatemo i'a mamala raporongo langgai ntanina to nipokonona. Tapi i'a kana raporongo langgai to nomparasaya i Pue. 40 Nantuki pombarataku, masanapa i'a ane da'a raporongo bali. Etu aga pombarataku mboto, tapi naupa iwetu tesa etu masipato raepe sabana aku e'i samba'a tau to nikuasai Nosa Nagasa nu Alatala.
1 Ane pompekutana komi ewa panggoni to nipakoni ka pue-pue ntanina, iwe'imo pesonoku: Komi nanguli, "Kita pura-pura naria pangginjanita." Nakonomo etu, tapi toramo, pangginjani nompakasombo tau tapi towe nompakaroso rara ntau. 2 Tau to nompekiri nariamo pangginjanina tapi i'a da'a nompotowe tau ntanina, kakonona da'apa nangginjani ante nanoto ewa to masipato ranjanina. 3 Tapi tau to nompotowe Alatala, i'amo to niposinjani Alatala. 4 Jadi ane mantesa panggoni to nipakoni ka pue-pue ntanina, ninjanitamo parantau-parantau to nipake tempo nompakoni pue-pue ntanina etu nombagambara sangele to da'a ria. Pade ninjanita wo'u Alatala aga samba'a lau, da'a ria ntanina. 5 Naria mamimo nadea ngele to nipesomba manusia to niuli ira pue bo karampua, nabeloka ri langi nabeloka ri dunia. Tapi naupa iwetu to niparasaya tau ntanina 6 ninjanita Alatala aga samba'a lau. I'amo Umata to nompajadi mpengele-ngele to naria ri langi bo dunia. I'amo to najadi patuju katuwuta. Pade aga samba'a lau Pueta, etumo Yesus Kristus. Nggari I'amo sampe mpengele-ngele ri langi bo dunia nipajadi, pade nggari I'amo sampe kita matuwu. 7 Tapi naupa iwetu, da'a pura-pura tau nangginjani etu. Naria topomparasaya to nabiasa nompakoni pue-pue ntanina da'apa ira nomparasaya Kristus. Jadi sampe we'i-we'i ane ira manggoni panggoni to nipakoni ka pue-pue ntanina, panggoni etu nireke ira mpu'u-mpu'u panggoni nu pue-pue etu. Ante nanggoni panggoni etu nirasai ira nasilaka sabana pomparasaya ira da'apa naroso. 8 Kakonona panggoni da'a mamala manggeni kita mompakamosu Alatala. Ane kita da'a manggoni panggoni etu posinggamosuta ante Alatala da'a mantambai makura. Pade ane kita manggoni panggoni etu kita da'a mantambai mamosu ante Alatala. 9 Tapi sampesuwu-sampesuwu, pakabelo-belo ala ne'e sampe tau-tau to nalente pomparasayana rapakagero pomparasayana sabana komi nomparasaya pura-pura panggoni namala rakoni. 10 Patujuku iwe'i: Rapana komi to nangginjani pura-pura panggoni mamala rakoni malau manggoni ri sapo mpesomba nu pue-pue ntanina. Pade rapana maria samba'a roamu topomparasaya to da'apa naroso pomparasayana manggita komi manggoni ri setu. Manggita etu natantumo i'a wo'u kana mabia manggoni panggoni to nipesomba ka pue-pue ntanina etu. 11 Tapi ante iwetu roamu topomparasaya etu to nitolo ante lei Kristus kana rapakagero pomparasayana sabana "pangginjani" komi etu. 12 Pade ane komi mompowia silaka iwetu ri ja'i sampesuwumu ante mompakagero pomparasayana to nalentena, komi wo'u mompowia silaka ri ja'i Kristus mboto. 13 Jadi sampesuwu-sampesuwu, ane panggoni to nikoniku mompakagero pomparasaya sampesuwuku, aku mana manggoni panggoni etu ala ne'e aku mompakagero pomparasayana.
1 Aku e'i tau da'a nipobatua tau ntanina. Aku e'i samba'a suro i Pue Yesus. Aku mboto nanggita Pueta Yesus. Pade komi mbotomo asele nu bago to nipowiaku ka i Pue. 2 Naupa riara mpanggita tau ntanina aku da'a nireke samba'a suro i Pue, natantumo riara mpanggita komi aku surona mami! Sabana nggari katuwu komi topomparasaya i Pue nanotomo aku e'i mpu'u-mpu'u samba'a suro i Pue. 3 Ane maria tau mompakasala pokaingguku ewa samba'a suro i Pue iwe'imo pesonoku: 4 - 5 Kakonona aku masipato manggeni samba'a rongo to nomparasaya mpasanggani-nggani riara mpolumakoku nasimbayu ewa to nipowia suro-suro i Pue ntanina bo sampesuwu-sampesuwu i Pue mboto bo i Petrus. Kakonona aku masipato mantarima panggoni bo panginu nggari ja'i ntodea topomparasaya. 6 Kakonona da'a aga aku bo i Barnabas to masipato mokarajaa ante pale mangelo katuwua kami mboto. Kami wo'u masipato ratulungi todea topomparasaya. 7 Natantu da'a ria samba'a tantara nombatanggu katuwuna mboto tempo nosibali. Katuwuna kana nitanggu balenggana. Topokarajaa tinalu to nipotuja anggurmo to masipato manggoni asele ntinaluna. Pade topoewu bimbamo to masipato manginu susu nggari bimbana. 8 Nuapa to nitesaku e'i da'a aga pompekiri manusia, tapi riara Atura-atura agama Yahudi wo'u naria pepatuduki to nasimbayu. 9 Riara Atura-atura to nipapola i Musa etu naria nitulisi iwe'i: "Ne'e mombamumu sumba nu japi tempo mantulungi puena mombalonggo-longgo pae. Palambamo japi manggoni sakedi." Jadi iwenumo? Nantuki komi aga japi to nipariara Alatala? 10 Natantu kitamo to nipatujuna ante tesa etu! Tesa etu nitulisi ala mogambara sangele ka kita. Topopajeko bo topomporo nokarajaa ante panjarumaka mantarima sabagia nggari asele ntana to nikarajaa ira etu. 11 Iwetu wo'u kami suro-suro i Pue Yesus to nombatuja Tesa nu Alatala riara nta'i komi. Natantumo kami masipato manjarumaka petulungi sakedi nggari ja'i komi! 12 Ane guru-guru ntanina ri setu masipato manjarumaka petulungi nggari ja'i komi, neliu-liupa kami! Tapi kami da'a sanggani nerapi petulungi etu. Kami aga nanta'amaka riara mpengele-ngele kasusa ala ne'e mowia sangele to mombalawa tau mantarima Kareba Belo ewa Kristus. 13 Natantu ninjani komimo topanggeni-topanggeni agama to nokarajaa ri Sapo Mpepue nombarata panggoni ira nggari pesomba to nipesomba ka Alatala ri Sapo Mpepue etu. Ira to nantulungi todea manggeni pesomba ira ri meja mpesomba nombarata sabagia nggari panggoni to nipesomba etu. 14 Iwetu wo'u Pue nompakatantu ala tau-tau to nanggeni Kareba Belo kana matuwu nggari petulungi tau-tau to nantarima Kareba Belo etu. 15 Naupa iwetu aku e'i da'a sanggani nerapi tulungi nggari ja'i komi. Pade patujuku nantulisi sura e'i ka komi da'a ala komi mompamula mombatanggu katuwuku. Nabelopa aku mamate pade aku mompakatomo komi mombatanggu katuwuku, sabana etumo kabiasaku to nitoiyaku. 16 Tempo aku nompatolele Kareba Belo da'a masipato aku mombatoiya koroku mboto sabana aku nisuro Alatala mowia etu. Mandasamo aku ane da'a mompatolele Kareba Belo! 17 Ane aku mompatolele Kareba etu nggari dotaku mboto, aku masipato mombarata tambo. Tapi aku da'a nompatolele Kareba Belo nggari dotaku mboto. Etu bago to niparasaya ka aku. 18 Jadi ane iwetu nuapa tamboku? Tamboku iwe'i: aku mamala mompatolele Kareba Belo ante da'a merapi gaji ka tau-tau to nipatolele ka Kareba etu. Pade aku da'a nerapi petulungi to masipato kutarima ewa samba'a topanggeni Kareba Belo. 19 Aku e'i da'a nipobatua ntau. Tapi naupa iwetu aku nombawai koroku majadi batua pura-pura tau ala aku mamala manggeni madea mpu'u tau momparasaya i Pue Yesus. 20 Ri tatongo tau-tau to Yahudi aku noinggu ewa tau to Yahudi. Ri tatongo ira to natundu riara Atura-atura agama Yahudi aku noinggu ewa tau to natundu riara Atura-atura etu, naupa aku mboto da'a mana nikuasai Atura-atura etu. Patujuku ala aku mamala manggeni ira to natundu riara Atura-atura agama Yahudi etu momparasaya i Pue Yesus. 21 Ri tatongo tau-tau da'a nangginjani Atura-atura agama Yahudi aku noinggu nasimbayu ewa tau da'a nangginjani Atura-atura agama Yahudi. Patujuku ala aku mamala manggeni ira momparasaya i Pue Yesus. Tapi ante mowia iwetu aku da'a nombaliunaka Atura-atura nu Alatala, sabana aku e'i natundu riara Atura-atura Kristus. 22 Ri tatongo tau-tau nalente pomparasayana aku noinggu nasimbayu ewa tau to nalentena ala aku mamala manggeni ira majadi topomparasaya i Pue Yesus to narosona. Aku nantuki mpengele-ngele inggu bo kabiasa ntau ala ante mpengele-ngele akala aku mamala mompakasalama sabagia nggari ira. 23 Etu pura-pura nipowiaku ala Kareba Belo mamala matolele pade ala aku mboto wo'u mamala mombarata bagia riara rasi-rasi nggari Kareba Belo etu. 24 Natantu ninjani komimo ri posilumba mangowa pura-pura topangowa nangowa tapi aga samba'a lau mombarata hadia padagi. Jadi komi wo'u kana moinggu ewa topangowa: pasimbukumo ante mpu'u-mpu'u rara ala komi mamala mombarata hadia. 25 Butu mba'a tau to nantuki posilumba kana mombalati-lati korona mboto. Ira mowia iwetu ala mombarata hadia padagi to da'a nainti, etumo sangele songgo to nipowia nggari tawa-tawa to sampalai malele. Tapi kita e'i mombalati-lati korota ala mombarata hadia to mainti sampe ri kasae-saena. 26 Jadi etumo sabana aku da'a nangowa sambara. Aku da'a nojaguru ewa tau aga nombajaguru lombona. 27 Tapi aku nombalati-lati koroku pade mombakuasai dota koroku mboto ala maopu aku mompatolele Kareba Belo ka tau-tau ntanina ne'e sampe aku da'a mombarata hadia.
1 Sampesuwu-sampesuwuku, to nipodotaku ala komi mantora nuapa to najadi ante totu'ata nggaolu tempo ira nantuki nabi Musa. Ira pura-pura nikalendu kulimu to najadi tandaina Alatala nosanggani-nggani ante ira, pade ira pura-pura nombawote Tasi Nalei ante nasalama. 2 Ira pura-pura ewa nidiu riara kulimu bo tasi etu ewa tandaina ira topantuki i Musa. 3 - 4 Ira pura-pura nanggoni panggoni to nasimbayu, pade ira pura-pura nanginu ue to nasimbayu. Panggoni bo panginu etu nggari ja'i Alatala mboto. Ira pura-pura nanginu ue to nesuwu nggariara bulu watu. Bulu watu etu nirapaka ewa Kristus to nalau mpasanggani-nggani ante ira. 5 Tapi naupa iwetu sabagia bete nggari ira da'a nikonoa rara Alatala. Nanotomo etu sabana nadea ira namate-mate ri karawa baina. 6 Etu pura-pura najadi ewa jonjo mompopatora ka kita ala kita ne'e maino mompowia to naja'ana ewa to nipowia ira. 7 Jadi ne'e kita mepue ka pue-pue ntanina ewa to nipowia sabagia nggari ira nggaolu. Riara Buku Nagasa naria nitulisi ewa pokainggu ira etu iwe'i: "Todea etu nekatoko nanggoni bo nanginu, pade naopu etu nekanggoremo ira nadamba-damba nepue ka pue-pue ntanina." 8 Ne'e kita mogau sala ante tau da'a rongota mboto ewa to nipowia sabagia nggari ira. Toramo! Nggari powia ira etu riarana saeo rompulu bo tolunjobu mba'a ira namate sanggani. 9 Ne'e kita manjapuaka i Pue ewa to nipowia sabagia nggari ja'i ira. Toramo! To nompowia etu namate nite'o ule! 10 Pade ne'e kita mokagagutu-gutu ewa to nipowia sabagia nggari ja'i ira. Toramo! To nompowia etu nipatesi malaeka i Pue! 11 Etu pura-pura najadi ri ja'i ira ewa jonjo ka kita. Pade kajadia-kajadia etu nitulisi riara Buku Nagasa ala majadi popatora ka kita to natuwu we'i-we'i tempo namosu kaopu nu dunia. 12 Jadi komi to nompekiri da'a mamala rapakanawu riara silaka, pakabelo-belo! Ne'e sampe komi wo'u manawu riara silaka! 13 Pesoba-pesoba to nawela komi nasimbayu ewa pesoba-pesoba to nawela pura-pura manusia. Tapi Alatala namala raparasaya mantulungi komi. I'a da'a mompakamba komi rapesoba ante pesoba to meliu nggari pompakule komi. Tempo komi rapesoba I'a kana mompakanoto ka komi jala mesuwu nggari pesoba etu ala komi mamala manta'amaka sampe ri kaopu nu pesoba etu. 14 Jadi sampesuwu-sampesuwu to nipotoweku, ne'e ntoto mepue ka pue-pue ntanina. 15 Aku notesa ka komi ewa tau-tau to nanotona. Jadi pekirimo riara nta'imu mboto ane tesaku e'i nakono atau da'a. 16 Tempo kita manginu panginu ante manguli tarima kasi ka Alatala ri posusa mantora kamate i Pue Yesus, natantumo etu tandaina kita nombarata bagia riara kuasa lei Kristus. Pade tempo kita nanggoni roti to nibingga-bingga riara posusa etu natantumo etu tandaina kita nombarata bagia riara koro Kristus. 17 Naupa kita nadea, kita pura-pura najadi saongu, sabana ri posusa mantora kamate i Pue etu naria saongu lau roti to nikonita mpasanggani-nggani. 18 Pekiri wo'umo kabiasa tau-tau to Israel. Tempo ira nanggoni panggoni to nipesomba ka Alatala ri meja mpesomba riara Sapo Mpepue ira najadi nosaongu rara ante Alatala to nipesomba ri meja mpesomba etu. 19 Jadi nuapa patuju tesaku etu? Bara maria to nompekiri patujuku iwe'i: pue-pue ntanina to nipakoni mpu'u-mpu'u sangele to nakono pade panggoni to nipakoni ka ira sangele to noguna. 20 Tapi etu da'a ntoto nakono! To nipatujuku iwe'i: Panggoni to nipakoni ntau ka pue-pue ntanina kakonona nipakoni ka seta-seta, etu da'a nipakoni ka Alatala. Pade aku da'a madota ala komi majadi nosaongu ante seta-seta. 21 Da'a ntoto masipato komi manginu panginu ri posusa mantora kamate i Pue ane komi wo'u manginu panginu ri posusa mombabila seta-seta! Da'a ntoto masipato komi mekatoko manggoni panggoni ri posusa mantora kamate i Pue etu ane komi wo'u manggoni panggoni ri posusa mombabila seta-seta! 22 Iwenumo? Komi madota mompakaju'a rara i Pue? Komi neliu nggakuasa nggari I'a? Natantumo da'a! 23 Naria tau nanguli, "Pura-pura pokainggu nipaloga ka aku." Etu nakono, tapi da'a pura-pura pokainggu nanggeni belo. Pura-pura pokainggu nipaloga tapi da'a pura-pura pokainggu nompakaroso rara todea topomparasaya. 24 Ne'e aga mompekiri kabelo koromu mboto, tapi pekirimo nuapa to nanggeni belo ka tau ntanina. 25 Komi mamala manggoni mpengele-ngele bau to nipobalu ri potomu. Da'a paraluu rapekutana ane bau etu nipesomba ka pue-pue ntanina. Da'a paraluu rapekiri komi ane powiamu etu nasala bara da'a. 26 Sabana riara Buku Nagasa nitulisi iwe'i: "Njumaongu dunia bo pura-pura isina anu i Pue." 27 Ane komi ragaga ntau da'a topomparasaya malau manggoni ri sapona, pade komi madota malau manggoni ante i'a, konimo nuapa-nuapa to ratibo ka komi. Da'a paraluu rapekutana ane panggoni etu nipakoni ka pue-pue ntanina. Da'a paraluu rapekiri komi ane powiamu etu nasala bara da'a. 28 Tapi ane maria tau manguli ka komi, "Panggoni e'i nipakoni ka pue-pue ntanina," ne'e rakoni komi panggoni etu ala mombatora kabelo ntau to notesa etu ka komi pade ala ne'e mompakasusa pekiri rara nta'i. 29 To nipatujuku ne'e mompakasusa pekiri rara nta'i tau etu, da'a pekiri rara nta'imu mboto. Tapi bara maria to mekutana, "Nokuya aku da'a mamala mowia sangele sabana etu nireke nasala riara pekiri rara nta'i tau ntanina? 30 Ane aku manguli tarima kasi ka Alatala da'apa aku manggoni, nokuya aku nipakasala ntau sabana nanggoni panggoni to niposambayaku?" 31 Sampesuwu-sampesuwuku, iwe'imo pesonoku: Nuapa-nuapa mupowia, nabeloka manggoni, nabeloka manginu, nabeloka powia ntanina, kawiamo etu ala nggari pokainggu komi etu Alatala rabila bo ratoiya. 32 Ne'e mompakanawu tau ntanina riara silaka ante pokainggumu, nabeloka tau-tau to Yahudi nabeloka tau-tau to Yunani, nabeloka todea topomparasaya Alatala. 33 Aku mboto nompasimbuku matuwu mompakadamba rara pura-pura tau riara mpengele-ngele pokaingguku. Aku da'a aga nompekiri kabelo koroku mboto tapi aku nompekiri nuapa to nanggeni belo ka pura-pura tau ala ira mamala rapakasalama.
1 Jadi pasialamo pokaingguku nasimbayu ewa aku nompasiala pokainggu Kristus. 2 Sampesuwu-sampesuwu, aku nantoiya komi sabana komi batena nantora aku riara mpengele-ngele, pade komi naroo nantuki pepatuduki to nipatudukiku ka komi. 3 Tapi naria sangele paraluu ranjani komi iwe'i: Kristusmo to najadi balengga nu butu mba'a langgai, langgai to najadi balengga nu besi, pade Alatala to najadi balengga Kristus. 4 Jadi langgai to nosambaya atau nompasimbayu tesa nggari ja'i Alatala riara mpodade ante nombabungu balenggana i'a da'a nombabila Kristus to najadi balenggana. 5 Pade besi to nosambaya atau nompasimbayu tesa nggari ja'i Alatala riara mpodade ante da'a nombabungu balenggana i'a da'a nombabila rongona langgai to najadi balenggana. Da'a ria posisalana besi etu ante besi to nigau wo'ona. 6 Ane besi da'a madota mombabungu balenggana agina wo'ona ragunji sanggani. Tapi ane nireke sangele to nompakaeya mata ane wo'ona ragunji atau ragau iwetu, agina i'a mombabungu balenggana riara mpodade. 7 Da'a masipato langgai mombabungu balenggana tempo nosambaya atau nompasimbayu tesa nggari ja'i Alatala sabana i'a nipajadi nantuki lenje Alatala ala mompopokita kuasa bo kagaya nu Alatala mboto. Tapi besi nipajadi ala mompopokita kuasa bo kagaya nu rongona langgai. 8 Sabana langgai da'a nipajadi nggari besi, tapi besi nipajadi nggari langgai. 9 Pade iwetu wo'u langgai da'a nipajadi Alatala ala mantulungi besi, tapi besi nipajadi Alatala ala mantulungi langgai. 10 Etu sampe besi masipato mombabungu balenggana ewa tandaina i'a nekou ri ja'i rongona langgai, sabana pokaingguna etu nikita malaeka-malaeka i Pue. 11 Tapi naupa iwetu toramo! Riara nggatuwuta ewa topomparasaya i Pue, besi paraluu langgai pade langgai paraluu besi. 12 Sabana naupa besi pamulana nipajadi nggari usu langgai, langgai-langgai kana niote nu besi. Tapi pura-pura to nipajadi etu nopu'u nggari ja'i Alatala. 13 Pekiri komi mbotomo. Masipato besi mosambaya ka Alatala riara mpodade ane balenggana da'a nibungu? Natantu da'a. 14 Nantuki kabiasa to naria ri ja'ita mboto ninjanita ane langgai nandoe wo'ona etu sangele to nompakaeya. 15 Tapi ane besi nandoe wo'ona etu sangele to nompakagaya i'a. Sabana besi niwai wo'o ewa sangele pombungu balenggana. 16 Ane maria tau to madota mosinggarau ewa pepatuduki e'i, aga sangele lau kutesa ka ira: Da'a ria kabiasa ntanina to nituki kami bo pura-pura todea topomparasaya Alatala. 17 Da'a namala aku mantoiya pokainggu komi ewa tewai to kuuli ri se'i. Sabana kasiromu komi topomparasaya da'a nanggeni belo ka komi, tapi aga nanggeni kaja'ana. 18 To niepeku, tempo komi nasiromu naria komi natibagi-bagi. Pade niparasayaku sabagia nggari kareba to niepeku etu nakono. 19 Kakonona kana maria komi matibagi-bagi iwetu ala manoto isema nggari tatongo komi mpu'u-mpu'u topomparasaya to nakonona. 20 Tempo komi nasiromu nanggoni mpasanggani-nggani pokainggu komi da'a masipato ka tau to nantuki posusa mantora kamate i Pue. 21 Sabana ri posusa etu komi aga nosimpago nanggoni panggoni komi mboto, komi da'a nompopea sampe pura-pura tau nombarata panggonina. Jadi naria tau to da'a nombarata panggoni nuapa-nuapa, pade naria ntanina nanginu sampe nakalangu. 22 Nokuya iwetu? Nokuya komi da'a manggoni bo manginu ntani ruru ri sapomu mboto? Nokuya komi nompakaja'a kasiromu todea topomparasaya Alatala? Nokuya komi nompakaeya tau da'a nompakule manggeni panggoni ri posusa etu? Iwenumo? Nuapa masipato kuuli ka komi? Masipato aku mombatoiya pokainggu komi etu? Natantu da'a ntoto masipato! 23 Pepatuduki ewa posusa mantora kamate i Pue nitarimaku nggari ja'i Pue mboto, pade etumo to nipatudukiku ka komi bopia. Etumo ri tempo nggawengina i Pue Yesus nipobalu ka balina I'a nangala roti, 24 pade niulina tarima kasi ka Alatala. Naopu etu nibingga-binggana roti etu ante nanguli, "Roti e'i koro bataku to niwai manjaliku komi. Kawiamo ada e'i ala mombatora Aku." 25 Pade iwetu wo'u naopu ira nanggoni nialana saongu sanggiri pade niulina, "Panginu e'i tandaina Pojanji Alatala to nabouna to rapakaasa ante leiku. Butu nggani komi manginu panginu ada e'i kawiamo etu ala mombatora Aku." 26 Sabana butu nggani komi manggoni roti bo manginu panginu ada e'i komi mompatolele kamate i Pue sampe I'a marata bali ri dunia e'i. 27 Sabana etu isema-sema to nanggoni roti atau nanginu panginu ante pokainggu to da'a masipato ri posusa mantora kamate i Pue, ira nompowia silaka ri ja'i Pue to nombawai koro bo leina manjaliku kita. 28 Jadi butu mba'a tau kana momparesa korona mboto ntani ruru. Pade naopu etu i'a mamala manggoni roti bo manginu panginu ri posusa mantora kamate i Pue etu. 29 Sabana tau to manggoni roti bo manginu panginu etu ante da'a nantora koro i Pue natantumo kana rasuku Alatala. 30 Etu sampe nadeamo tau ri tatongo komi nalente bo naju'a, pade bara sakuya mba'a nggari tatongo komi namatemo. 31 Tapi ane kita momparesa korota ntani ruru da'apa mantuki posusa mantora kamate i Pue kita da'a rapakawela pesuku. 32 Tapi ane rapana kita rapakawela pesuku Alatala ewa etu, patujuna ala kita rapatudukina ala ne'e kita rasuku mpasanggani-nggani ante tau-tau ri dunia to da'a nomparasaya i Pue. 33 Jadi sampesuwu-sampesuwuku, ane komi masiromu manggoni ri posusa mantora kamate i Pue komi kana mosipopea pura pade manggoni mpasanggani-nggani. 34 Ane maria tau naoro ta'ina, agina i'a manggoni ri sapona mboto ntani ruru, ala ne'e sampe komi mawela pesuku Alatala sabana pokainggu komi da'a nabelo tempo komi masiromu mpasanggani-nggani. Pade ane aku momai ri ja'i komi aku kana mompakasiayu nuapa-nuapa ntanina to da'apa nasiayu.
1 Sampesuwu-sampesuwu, ane pompekutana komi ewa pompakule nggari ja'i Nosa Nagasa nu Alatala, iwe'imo pesonoku: to nipodotaku ala komi mangginjani pepatuduki to nakonona ewa pompakule-pompakule etu. 2 Ninjani komi mbotomo tempo komi da'apa nomparasaya i Pue Yesus komi batena nikeni mepue ka pue-pue ntanina to da'a nasowa notesa. 3 Etu sampe aku manguli ka komi da'a ria tau to nikuasai Nosa Nagasa nu Alatala mamala manguli, "Nasurukawumo Yesus." Pade iwetu wo'u da'a ria tau mamala mompangaku, "Yesusmo Pueku," ane i'a da'a nikuasai Nosa Nagasa nu Alatala. 4 Naria mpengele-ngele pompakule nggari Nosa Nagasa nu Alatala, tapi etu pura-pura nopu'u nggari ja'i Nosa Nagasa nu Alatala to samba'a lau. 5 Naria mpengele-ngele bago mantulungi Pue tapi aga samba'a lau Pue to nitulungi. 6 Pade naria mpengele-ngele baraka ri tatongo topomparasaya tapi aga samba'a lau Alatala to nombawai baraka etu ka pura-pura tau. 7 Kita pura-pura niwai ka pompakule nggari ja'i Nosa Nagasa nu Alatala ala manggeni belo ka tau ntanina. 8 Naria tau to niwai Nosa Nagasa ka pompakule mompasimbayu noto nggari ja'i Pue. Tau ntanina niwai Nosa Nagasa etu ka pompakule mompasimbayu pangginjani to niratana nggari ja'i Pue. 9 Tau ntanina niwai Nosa Nagasa ka pompakule momparasaya neliu nggari biasa. Pade tau ntanina niwai Nosa Nagasa ka baraka mompakabelo ju'a-ju'a ntau. Pade etu pura-pura nggari ja'i Nosa Nagasa to nasimbayu. 10 Pade tau ntanina niwai ka pompakule mowia kabaraka. Tau ntanina niwai ka pompakule mompasimbayu tesa nggari ja'i Pue, pade tau ntanina niwai ka pompakule mompoposisala nuapa to nopu'u nggari Nosa Nagasa nu Alatala ante nuapa to nopu'u nggari kuasa-kuasa ntanina. Pade tau ntanina niwai ka pompakule notesa basa-basa to nopu'u nggari ja'i Nosa Nagasa nu Alatala. Pade to samba'ana niwai ka pompakule mompakanoto batuana tesa-tesa nggari basa-basa etu. 11 Pompakule etu pura-pura nggari kuasa Nosa Nagasa nu Alatala to samba'a lau. Butu-butu mba'a nipalele ka pompakule to natantuna nantuki dota Nosa Nagasa nu Alatala etu. 12 Koro batata saongu lau naupa nadea sipana. Tapi naupa nadea sipa nu koro etu, ira bate-batena saongu koro. Iwetu wo'u kita topomparasaya Kristus to nirapaka ewa saongu koro. Naupa kita nadea, kita bate-batena nosaongu. 13 Kita pura-pura nidiu Nosa Nagasa to samba'a lau ala majadi saongu koro, nabeloka tau-tau to Yahudi, nabeloka tau-tau da'a to Yahudi, nabeloka batua-batua nabeloka tau da'a batua. Kita pura-pura nipesua Nosa Nagasa to samba'a lau. 14 Koro batata da'a aga saongu lau sipana tapi nadea. 15 Ane rapana kadata manguli, "Aku e'i da'a sipa nu koro sabana aku da'a pale," natantumo etu da'a nakono. Kada etu batena sipa nu korota. 16 Pade ane rapana talingata manguli, "Aku e'i da'a sipa nu koro sabana aku da'a mata," natantumo etu da'a wo'u nakono. Talinga etu batena sipa nu korota. 17 Ane rapana pura-pura korota majadi mata, iwenumo kita meepe? Pade ane rapana pura-pura korota majadi talinga, iwenumo kita meenga? 18 Tapi kakonona Alatala nompakatantu butu-butu sipa nu koro ri peto'o to masipatona nantuki dotana mboto. 19 Ane rapana aga saongu lau sipa nu koro, natantumo da'a ntoto ria koro bata. 20 Kakonona nadeamo sipa ri korota, tapi pura-pura sipa etu batena saongu koro. 21 Jadi mata da'a mamala manguli ka pale, "Aku da'a nomparaluu iko." Pade iwetu wo'u balengga da'a mamala manguli ka kada, "Aku da'a nomparaluu iko." 22 Tapi sipa-sipa nu koro to nireke nalente, kakonona to neliu nggapokona. 23 Pade sipa to nireke da'a nibila, sipa etumo to neliu nibilata. Pade sipa to da'a nagaya nikita, sipa etumo to nipariara nta'ita. 24 Tapi sipa to nagayana da'a paraluu rapariara nta'ita iwetu. Alatala mboto nompowia pura-pura korota sampe sipa-sipa to nireke da'a nibila niwai neliu nggadea pebila 25 ala korota ne'e matibagi-bagi. Butu-butu sipa kana mompekiri kabelo nu sipa-sipa ntanina. 26 Ane saongu sipa nandasa pura-pura sipa nu koro etu wo'u nandasa. Ane saongu sipa nibila, pura-pura sipa nu koro wo'u nibila. 27 Komi pura-pura ewa koro Kristus pade komi samba'a bo samba'a ewa sipa nu korona. 28 Pade ri tatongo todea topomparasaya, Alatala nangonggotaka tau-tau mantui mpengele-ngele bago. Pamulana naria tau-tau nionggotakana majadi surona. Pade karongelena naria tau-tau nionggotakana majadi nabi to nompasimbayu tesa nu Alatala. Katolungelena naria tau-tau to nionggotakana majadi guru. Pade naria wo'u to niwaina ka pompakule mowia kabaraka. Naria to niwaina ka pompakule mompakabelo ju'a-ju'a ntau. Naria to niwaina ka pompakule mantulungi tau-tau ntanina, naria to niwaina ka pompakule manggeniaka todea, pade naria to niwaina ka pompakule motesa basa-basa to nopu'u nggari ja'i Nosa Nagasa. 29 Natantumo da'a pura-pura tau nionggotaka majadi suro! Da'a pura-pura tau nionggotaka majadi nabi. Da'a pura-pura tau nionggotaka majadi guru. Da'a pura-pura tau niwai ka pompakule mowia kabaraka. 30 Da'a pura-pura tau niwai ka pompakule mompakabelo ju'a-ju'a ntau. Da'a pura-pura tau niwai ka pompakule motesa basa-basa to nopu'u nggari ja'i Nosa Nagasa. Pade da'a pura-pura tau niwai ka pompakule mompakanoto batuana tesa-tesa nggari basa-basa etu. 31 Jadi komi kana mpu'u-mpu'u maria dota rara mombarata pompakule-pompakule to neliu mpu'u kagunana. Pade we'i-we'i aku kana mompopokita ka komi sangele to neliu mpu'u kabelona.
1 Naupa aku mamala motesa mpengele-ngele basa manusia bo basa-basa malaeka wo'u, tapi ane aku da'a mompotowe tau ntanina, tesa-tesaku etu da'a ntoto ria gunana, aga nasimbayu ewa goo to naonina atau gimba to nagai onina. 2 Pade naupa aku mamala mompasimbayu tesa-tesa nggari ja'i Alatala, pade aku mamala mangginjani mpengele-ngele to nitabuniaka bo mangginjani mpengele-ngele pangginjani ntanina, pade pomparasayaku maroso mpu'u sampe aku mamala mompakau bulu molinja, tapi ane aku da'a mompotowe tau ntanina, katuwuku da'a ntoto ria gunana. 3 Pade naupa aku mombawai pura-pura mbara-mbaraku ka tau to nakasiasi, pade aku mombawai koroku mboto rapalabu, tapi ane aku da'a mompotowe tau ntanina, pura-pura pewaiku etu da'a ntoto ria gunana. 4 Tau to nompotowe roana nandate posabarana bo nabelo rarana. I'a da'a nasiriati, i'a da'a nompakalanga korona bo da'a nasombo. 5 I'a da'a nompowia to nompakaeya mata bo i'a da'a aga nangelo kabelo nu korona mboto. I'a da'a nagampa nakedi rara bo i'a da'a nomboli riara kasala to nipowia ntau ri ja'ina. 6 I'a da'a nadamba-damba nanggita pokainggu ntau to nadenggona, tapi i'a nadamba-damba nanggita pokainggu ntau to nanoana. 7 I'a bate-batena nantaha nantingayo mpengele-ngele to najadi. I'a bate-batena nomparasaya roana, i'a bate-batena nanjarumaka pokainggu roana, pade i'a bate-batena nosabara riara mpengele-ngele. 8 Pepotowe da'a ria kaopuna. Ane pompakule mompasimbayu tesa nggari ja'i Alatala, etu kana malipo banepia. Pade pompakule motesa basa-basa to nopu'u nggari ja'i Nosa Nagasa bo pompakule mangginjani to nitabuniaka kana malipo banepia. 9 Sabana pangginjanita danakura, pade pompakuleta nompasimbayu tesa-tesa nggari ja'i Alatala da'apa nagana. 10 Tapi tempo Alatala mompakagana mpengele-ngele banepia pompakule-pompakule to danakura etu kana malipo. 11 Jonjona, tempo aku danangana aku notesa ewa samba'a ngana, aku nombarasai ewa samba'a ngana, aku nompekiri ewa samba'a ngana. Tapi tempo aku nabetemo, inggu-inggu ngana etu nikabasakaku puramo. 12 We'i-we'i kita nasimbayu ewa tau nanggita lenje to nagawu-gawu riara pompewayo. Tapi tempo banepia kita kana manggita ante manoto ewa tau mosinggita lenje. We'i-we'i pangginjaniku danakura, tapi tempo banepia etu aku kana mangginjani pura-pura nuapa ante manoto nasimbayu ewa Alatala nangginjani pura-pura nuapa ewa koroku e'i. 13 Jadi naria tolungele to maroo sampe ri kasae-saena, etumo pomparasaya, panjarumaka bo towe. Pade nggari tolungele etu to neliu nggabetena etumo towe.
1 Jadi pasimbukumo ante mpu'u-mpu'u rara mompotowe tau ntanina. Pade komi kana mpu'u-mpu'u maria dota rara mombarata pompakule-pompakule nggari ja'i Nosa Nagasa nu Alatala, neliu-liupa pompakule mompasimbayu tesa nggari ja'i Pue. 2 Ane samba'a tau notesa basa-basa to nopu'u nggari ja'i Nosa Nagasa i'a notesa ka Alatala da'a ka manusia, sabana da'a ria tau to namala mangginjani batua tesana. Ante pekeniaka Nosa Nagasa i'a notesa anu da'apa ninjani manusia. 3 Tapi ane samba'a tau nompasimbayu tesa nggari ja'i Pue i'a notesa ka manusia ala mompakaroso pomparasaya ira, mompatuduki ira bo mompakawoe rara ira. 4 Tau to notesa basa to nopu'u nggari ja'i Nosa Nagasa nompakaroso pomparasayana mboto, tapi tau to nompasimbayu tesa nggari ja'i Alatala nompakaroso pomparasaya todea topomparasaya i Pue. 5 To nipodotaku ala komi pura-pura mamala motesa basa-basa to nopu'u nggari ja'i Nosa Nagasa. Tapi neliu nggari etu to kupodota ala komi pura-pura mamala mompasimbayu tesa nggari ja'i Pue. Tau to nompasimbayu tesa nggari ja'i Pue riara mpodade neliu nggaguna nggari tau to notesa basa-basa to nopu'u nggari ja'i Nosa Nagasa. Tapi ane i'a mamala mompakanoto batuana tesa-tesa etu, nasimbayu gunana ante nompasimbayu tesa nggari ja'i Pue, sabana todea topomparasaya mamala mangginjani batuana tesa etu pade pomparasaya ira mamala rapakaroso. 6 Sampesuwu-sampesuwu, ane rapana aku marata ri ja'i komi pade motesa basa-basa to nopu'u nggari ja'i Nosa Nagasa, nuapa gunana etu ka komi? Natantu da'a ntoto ria gunana. Tapi kana maria gunana ka komi ane aku mompakanoto ka komi sangele tesa nggari ja'i Alatala, atau motarangga ka komi sangele kareba anu da'apa ninjani komi, atau mompasimbayu ka komi tesa nggari ja'i Pue, atau mompatuduki komi. 7 Pekirimo jonjo parewa-parewa musi to da'a nonosa ewa sasuli bara koronjo. Ane parewa musi etu da'a rapopomoni ante manoto da'a ria tau mamala mangginjani dade to nipopomoni. 8 Pade ane kololio da'a rapopomoni ante manoto mompokio tantara malau mangewa bali-bali ira, natantu da'a maria tantara mompakasadia korona malau mosibali ante balina. 9 Iwetu wo'u ante komi. Ane komi motesa basa-basa to da'a ninjani roa-roamu, iwenu ira mangginjani patuju nu tesamu? Tesa-tesamu da'a ria gunana. Komi aga masimbayu ewa tau notesa ka lombona. 10 Ri dunia e'i nadea ngele basa, da'a ninjaniku sakuya kadeana. Tapi naupa iwetu pura-pura basa naria batuana. 11 Tapi ane aku da'a nangginjani batuana basa to nitesa samba'a tau, aku majadi ewa torata nggari sawaliku ngata riara mpanggitana, bo wa'a wo'u i'a riara mpanggitaku. 12 Jadi iwetu wo'u ane komi motesa ka roamu riara basa to nopu'u nggari ja'i Nosa Nagasa. Sampesuwu-sampesuwuku, ninjaniku komi mpu'u-mpu'u madota mombarata pompakule nggari ja'i Nosa Nagasa nu Alatala. Jadi nabelopa komi mompasimbuku mompopoguna pompakule-pompakule to mantulungi topomparasaya ala mantambai maroso pomparasaya ira. 13 Sabana etu tau to notesa basa-basa to nopu'u nggari ja'i Nosa Nagasa riara mpodade kana mosambaya merapi ala i'a rawai pompakule mompakanoto batuana tesa-tesa etu. 14 Sabana ane aku mosambaya riara basa to nopu'u nggari ja'i Nosa Nagasa pekiriku da'a najala, tapi aku aga notesa nantuki tesa-tesa to niwai Nosa Nagasa ka aku. 15 Jadi nuapa masipato kupowia? Iwe'imo: aku kana mosambaya riara basa to nopu'u nggari ja'i Nosa Nagasa, pade aku kana mosambaya wo'u nantuki pekiriku. Aku kana modade riara basa to nopu'u nggari ja'i Nosa Nagasa, pade aku kana modade wo'u nantuki pekiriku mboto. 16 Ane komi mosukuru ka Alatala riara basa to nopu'u nggari ja'i Nosa Nagasa pade maria tau-tau ntanina riara mpodade etu to da'a nangginjani batuana tesamu etu, iwenu ira mantakono posambayamu etu? Sabana da'a ninjani ira batuana tesamu etu. 17 Naupa posambayamu etu nabelo mpu'u tapi tau ntanina etu da'a ntoto nipakaroso pomparasayana. 18 Aku nosukuru ri ja'i Alatala sabana aku niwai ka pompakule motesa basa-basa to nopu'u nggari ja'i Nosa Nagasa neliu nggari komi pura-pura. 19 Tapi naupa iwetu, riara kasiromu todea topomparasaya nipokonokupa motesa limambela tesa to ninjani ntodea ala mompatuduki ira. Etu neliu nggabelo pade motesa njobu-njobu mbela tesa riara basa to nopu'u nggari ja'i Nosa Nagasa nu Alatala. 20 Sampesuwu-sampesuwuku, ne'e mana mompekiri ewa ngana-ngana! Ane mompekiri kaja'ana komi kana masimbayu ewa ngana nggedi to da'apa nangginjani mompowia kaja'ana. Tapi ane mompekiri pompakule nggari ja'i Nosa Nagasa etu komi kana manoto ewa tau to nabetemo. 21 Riara Buku Nagasa naria nitulisi iwe'i: "Nangulimo i Pue, 'Nggari tau-tau to notesa basa-basa ntanina, etumo nggari tau-tau nggari sawaliku ngata, Aku kana motesa ka todeaku e'i. Tapi naupa iwetu ira da'a mompetalinga tesaku.' " 22 Jadi pompakule motesa basa-basa to nopu'u nggari ja'i Nosa Nagasa sangele tandaina to nompakanoto isema tau-tau da'a nomparasaya. Etu da'a tandaina to nompakanoto isema topomparasaya i Pue. Pade pompakule mompasimbayu tesa nggari ja'i Alatala tandaina to nompakanoto isema topomparasaya, da'a nompakanoto isema tau-tau da'a nomparasaya. 23 Jadi ane pura-pura topomparasaya masiromu sanggani pade komi pura-pura motesa basa-basa to nopu'u nggari ja'i Nosa Nagasa, nuapa majadi ane maria tau-tau to da'apa nangginjani Tesa nu Alatala atau tau-tau da'a nomparasaya mesua ri setu? Natantumo ira kana mompekiri komi pura-pura aga tau nagila. 24 Tapi ane tau-tau da'a nomparasaya atau tau to da'apa nangginjani Tesa nu Alatala mesua ri kasiromu komi tempo pura-pura topomparasaya mompasimbayu tesa nggari ja'i Pue, tesamu etu kana mompakanoto silaka-silaka ira etu. Pura-pura pokainggu ira kana rapakanoto nggari tesa-tesa etu. 25 Pura-pura pompekiri ira to nitabuniaka riara nta'i ira kana rapakanoto sampe ira kana motimbakotu mombasomba Alatala ante manguli, "Mpu'u-mpu'u Alatala naria ri tatongo komi ri se'i." 26 Jadi sampesuwu-sampesuwuku, nuapa patuju to napokona nggari tesaku e'i? Iwe'imo: Ane komi masiromu modade, kana maria tau to modade, pade maria tau ntanina to mompatuduki, kana maria tau mompakanoto tesa nggari ja'i Alatala. Pade tau ntanina kana motesa riara basa-basa to nopu'u nggari ja'i Nosa Nagasa, pade tau ntanina kana mompakanoto batuana tesa-tesa etu. Tapi pura-pura etu kana rapowia komi ala mompakaroso pomparasaya ntodea. 27 Ane maria to motesa basa-basa to nopu'u nggari ja'i Nosa Nagasa ne'e meliu nggari romba'a atau tolumba'a, pade ira kana motesa mosimpaliu samba'a bo samba'a. Pade kana maria to mamala mompakanoto batuana tesa-tesa etu. 28 Ane da'a ria to mamala mompakanoto batuana tesa-tesa etu, agina topotesa basa-basa etu malino riara mpodade etu. Agina ira motesa-tesa basa etu riara nta'i ira mboto ka Alatala. 29 Ane tau mompasimbayu tesa nggari ja'i Alatala nabelopa aga romba'a atau tolumba'a motesa pade tau ntanina kana mompetalinga mpakabelo-belo ala mompoposisala tesa-tesa etu. 30 Pade ane samba'a tau ntanina to nekatoko ri setu mombarata tesa-tesa nggari ja'i Alatala, topotesa pamulana kana menonto. 31 Komi pura-pura mamala mompasimbayu tesa nggari ja'i Pue mosimpaliu samba'a bo samba'a ala pura-pura topomparasaya mamala rapatuduki bo rapakaroso. 32 Toramo! Tau to nompasimbayu tesa nggari ja'i Pue namala motesa atau menonto motesa nantuki dotana mboto. 33 Sabana to nipokono Alatala da'a kagadona tapi kaamana. Naria sangele pepatuduki to nalaku ri ja'i topomparasaya ri umba-umba ngata, 34 etumo, besi-besi kana malino riara mpodade. Ira da'a nipaloga motesa-tesa. Tapi ira kana mekou ewa to nitulisi riara Atura-atura agama. 35 Ane maria to madota ranjani ira, agina ira mekutana ka rongo ira tempo ira manjili ri sapo ira mboto. Sabana da'a masipato besi-besi motesa mompakagado podade ntopomparasaya. 36 Iwenumo? Da'a nasituju komi ante atura-atura etu? Toramo! Tesa nu Alatala da'a nopu'u nggari ja'i komi! Pade da'a aga komi to nipatolele ka tesa etu! 37 Ane maria tau to mompekiri i'a samba'a nabi to niwai ka pompakule mompasimbayu tesa nggari ja'i Alatala atau to niwai ka pompakule ntanina nggari ja'i Nosa Nagasa, kana ranjanina tesa-tesa to nitulisiku e'i parenta nggari ja'i Pue mboto. 38 Tapi ane i'a da'a madota mantarima tesaku e'i ne'e komi mompariara tesana. 39 Jadi sampesuwu-sampesuwuku, komi kana mpu'u-mpu'u maria dota rara mombarata pompakule mompasimbayu tesa nggari ja'i Pue. Tapi ne'e mombatagi tau motesa basa-basa to nopu'u nggari ja'i Nosa Nagasa. 40 Tapi pura-pura to rapowia komi kana rapowia mantuki akala to nalusu bo nasiayu.
1 Sampesuwu-sampesuwu, aku madota mompopatora ka komi Kareba Belo to nipatoleleku ka komi to nitarima komi pade to naroso niparasaya komi. 2 Kareba Belo etu namala manggeni komi rapakasalama ane komi maroo momparasaya tesa to nipatoleleku ka komi. Ane da'a, pomparasaya komi da'a ria gunana. 3 Aku nompasimbayu ka komi bopia pepatuduki to neliu nggapokona to nitarimaku mboto, etumo Kristus namate nanjaliku silakata ewa to nitulisi riara Buku Nagasa. 4 I'a nitana riara dayo, pade ri eo katolueona I'a nipakatuwu bali nggari kamatena ewa to nitulisi riara Buku Nagasa. 5 Naopu etu I'a nompopokita korona ka i Petrus pade ka anaguru-anaguruna sampulu romba'a. 6 Pade naopu etu nipopokitana korona ka topantuki-topantuki I'a nelabi nggari limatu mba'ana sanggani. Pade sabagia bete nggari ja'i ira danatuwu sampe we'i-we'i, tapi naria bara sakuya mba'a to namatemo. 7 Naopu etu nipopokitana korona ka Yakobus, pade ka pura-pura tau to najadi surona. 8 Pade kaopuna nipopokitana korona wo'u ka aku to nasimbayu ewa ngana nesuwu da'apa nagana mbulana. 9 Sabana aku e'i suro i Pue Yesus to neliu nggaede katuwuku. Kakonona aku e'i da'a masipato rauli samba'a suro i Pue sabana aku nompandasa todea topomparasaya Alatala bopia. 10 Tapi nggari towe belo nu Alatala aku najadi samba'a suro i Pue Yesus. Pade towe belona etu naria aselena riara nggatuwuku. Aku nokarajaa neliu nggatomo nggari pura-pura suro i Pue ntanina. Tapi kakonona da'a aku to nokarajaa ntomo iwetu. Etu asele nu towe belo nu Alatala to naria ri ja'iku. 11 Jadi da'a napoko ane komi nangepe Kareba Belo nggari ja'iku atau nggari ja'i suro-suro ntanina. To napokona kami nompatolele Kareba Belo pade Kareba etu niparasaya komimo. 12 Jadi ane kami nompatolele ka komi tesa to nanguli Kristus nipakatuwu bali nggari kamatena, nokuya naria tau ri tatongo komi to nanguli tau namate da'a ntoto rapakatuwu bali? 13 Ane tau namate da'a ntoto rapakatuwu bali batuana Kristus wo'u da'a nipakatuwu bali nggari kamatena. 14 Pade ane Kristus da'a nipakatuwu bali nggari kamatena da'a ntoto ria gunana nggari Kareba Belo to nipatolele kami, pade da'a wo'u ria gunana pomparasaya komi. 15 Pade da'a aga etu. Ane tesa ira nakono kami nodawa, sabana kami nanguli Alatala nompakatuwu Kristus bali nggari kamatena. Tapi ane rapana nakono tau namate da'a rapakatuwu bali batuana Alatala da'a nompakatuwu Kristus bali. 16 Sabana ane tau namate da'a rapakatuwu bali natantumo Kristus da'a nipakatuwu bali. 17 Pade ane Kristus da'a nipakatuwu bali, pomparasaya komi da'a ntoto ria gunana, komi bate-batena nasilaka. 18 Pade topomparasaya-topomparasaya I'a to namatena mana ria panjarumaka. 19 Ane kita mamala manjarumaka Kristus aga tempo kita natuwu ri dunia e'i kitamo tau-tau to neliu nggandasa. 20 Tapi kakonona Kristus mpu'u-mpu'u nipakatuwu bali nggari kamatena. Pade kajadia etu nompakanoto tau-tau namate kana rapakatuwu bali. 21 Nggari powia samba'a tau, manusia kana mamate. Iwetu wo'u nggari powia to samba'ana, manusia mamala rapakatuwu bali nggari kamatena. 22 Pura-pura manusia kana mamate sabana silaka Adam nawela kita pura-pura. Iwetu wo'u kita pura-pura kana rapakatuwu bali nggari kamateta sabana nosaongu rara ante Kristus. 23 Tapi tau-tau to namatena kana rapakatuwu bali nantuki posisunjuna to nipakatantu. Kristus tau pamulana nipakatuwu bali. Pade maopu etu tau-tau to nosaongu rara ante I'a kana rapakatuwu bali tempo I'a marata bali ri dunia. 24 Maopu etu pade marata kaopu nu dunia. Tempo etu Kristus kana mompakaropu mpengele-ngele kuasa to naria, nabeloka kuasa balengga-balengga seta, nabeloka kuasa-kuasa to nipokaeka manusia, nabeloka kuasa pue-pue ntanina. Maopu etu I'a kana mombawai kuasana moparenta ewa magau ka Umana Pue Alatala. 25 Kristus kana moparenta ewa magau sampe Alatala mompowia pura-pura balina mekou ri ja'ina. 26 Pade bali kaopuna to rapakaropuna etumo kamatea. 27 Nanotomo pura-pura balina kana mekou ri ja'ina sabana naria to nitulisi riara Buku Nagasa iwe'i: "Alatala nompowia pura-pura nuapa to naria nekou ri ja'ina." Nanotomo Alatala mboto da'a nekou ri ja'i Kristus mosanggani-nggani ante pura-pura nuapa to naria, sabana I'amo to mompowia ira pura-pura mekou ri ja'i Kristus. 28 Jadi tempo pura-pura nuapa to naria mekou ri ja'i Kristus, I'a mboto ewa Ana nu Alatala kana mekou ri ja'i Umana to nompowia pura-pura nuapa mekou ri ja'ina, ala kaopuna Alatala kana momparenta mpengele-ngele to naria. 29 Ane tau namate da'a rapakatuwu bali rapokuya tau nidiu ewa tandaina ira topomparasaya i Pue Yesus manjaliku tau-tau to namatemo? Nuapa gunana mowia ada etu ane tau namate da'a ntoto rapakatuwu bali? 30 Pade ane tau namate da'a rapakatuwu bali rapokuya kami madota mantingayo kasusa bo kapari butu-butu eona? 31 Eo-eo aku ntora namate. Nanotomo kasana nu raraku nompekiri komi to nosaongu rara ante Pueta Yesus Kristus. Pade iwetu wo'u nanoto kakono nu tesaku e'i! Aku da'a nodawa! 32 Pekirimo! Nuapa gunana aku nosibali ante tau-tau naja'a ri ngata Efesus nasimbayu ewa tau nosibali ante binata-binata nasoa? Natantumo da'a ntoto ria gunana ane aku nowia etu ewa samba'a manusia to da'a ria panjarumakana rapakatuwu bali nggari kamatena! Ane tau namate da'a rapakatuwu bali agina kita mantuki popata to nanguli iwe'i: "Kamaimo kita manggoni bo manginu ala madamba-damba, sabana naile kita kana mamate." 33 Tapi ne'e masalanjala! Ane komi masintuwu ante tau-tau to nadenggo pekirina pokainggu komi wo'u rapakadenggo. 34 Jadi pakanoto raramu we'i-we'i. Ne'e mana mowia silaka! Kakonona komi kana maeya mata sabana danaria ri tatongo komi tau-tau to da'apa nomparasaya Alatala! 35 Tapi bara naria to nekutana iwe'i: "Iwenu sampe tau namate rapakatuwu bali? Iwenumo koro bata ira ane rapakatuwu bali?" 36 Nadoyo tanu komi nompekutana iwetu! Ane komi nombatuja ri tinalu da'a ntoto ria to matuwu ane ongu to nituja da'a mokolu raiwu ntana nasimbayu ewa tomate! 37 Pade to nituja komi etu da'a tuja-tuja mboto. To nituja komi aga onguna, bara ongu gando atau ongu tuja-tuja ntanina. 38 Tapi Alatala nompakatuwu ongu-ongu to nituja etu nantuki dotana sampe butu-butu ongu najadi ewa lio nu tuja-tuja etu mboto. 39 Koro bata anu natuwu ri dunia e'i da'a butu nasimbayu. Koro bata manusia nosisala ante koro bata nu binata-binata bo koro bata tonji bo bau. 40 Pade iwetu wo'u nuapa to naria ri langi nosisala ante to naria ri dunia. Pade nosisala kagayana to naria ri suruga ante to naria ri dunia e'i. 41 Kagaya nu mata eo sangele, bo kagaya nu wula sangele ntanina. Pade kagaya nu betu'e sangele wo'u, bo betu'e mboto mbau nosisala kagayana. 42 Iwetu wo'u ante koro bata ntau namate to rapakatuwu bali. Watabaku to nitana namala mapopo. Tapi koro bata to rapakatuwu bali da'a mana mamala mapopo. 43 Watabaku to nitana naja'a nikita bo nalente. Tapi koro bata to rapakatuwu bali nagaya bo naroso. 44 Watabaku to nitana koro manusia biasa, tapi koro bata to rapakatuwu bali koro nipakakuasa Nosa Nagasa nu Alatala. Naria koro manusia biasa, pade naria wo'u koro to nipakakuasa Nosa Nagasa nu Alatala. 45 Ewa to nitulisi riara Buku Nagasa iwe'i: "Manusia pamulana, Adam, najadi anu to natuwu." Tapi Kristus, to nireke Adam kaopuna, nombawai katuwua ka manusia sampe ri kasae-saena. 46 To najadi nokolu koro manusia biasa, da'a koro to nipakakuasa Nosa Nagasa nu Alatala. Koro to nipakakuasa Nosa Nagasa najadi ri purina. 47 Manusia pamulana etu nopu'u nggari tana ri dunia e'i, tapi Kristus, to nireke manusia karongelena, nopu'u nggari suruga. 48 Koro manusia ri dunia e'i nasimbayu ewa koro Adam to nopu'u nggari tana etu. Tapi tau-tau to nosaongu rara ante Kristus kana mombarata koro nggari suruga nasimbayu ewa koro Kristus. 49 We'i-we'i korota ri dunia nasimbayu ewa koro Adam to nopu'u nggari dunia e'i. Tapi kita topomparasaya Kristus kana mombarata koro nggari suruga nasimbayu ewa koro Kristus. 50 Sampesuwu-sampesuwu, iwe'imo patujuku: korota to nipajadi nggari isi bo lei da'a ntoto mamala mombarata bagia riara Poparenta nu Alatala. Korota to mamala mapopo da'a ntoto mamala mosanggani-nggani ante Alatala to da'a ria kamate-matena. 51 Epemo! Kupopanjani ka komi sangele to nitabuniaka Alatala nggari lamba pamulana. Kita pura-pura da'a mamate, tapi kita pura-pura kana rabali 52 riara sampida mata tempo kololio i Pue kaopuna rapopomoni. Sabana kololio etu kana rapopomoni, pade tau-tau to namatena kana rapakatuwu bali ante koro to mana mapopo, pade kita pura-pura kana rabali. 53 Sabana korota to namala mapopo kana rasambei ante koro to mana mapopo. Koro to mamala mamate kana rasambei ante koro to da'a mana mamate. 54 Pade ane koro to mamala mamate bo mapopo rasambei ante koro to da'a mana mamate bo mapopo, kana madupa tesa to nitulisi riara Buku Nagasa iwe'i: "Nipakaopumo kamatea! Padagimo Alatala!" 55 "Nidagimo kamatea! Mana ria kuasana mompandasa manusia!" 56 Nggari silaka manusia sampe naria kuasa kamatea. Pade silaka nakuasa riara nggatuwu manusia sabana naria Atura-atura agama nompakanoto nuapa to niuli silaka. 57 Tapi ratoiyata Pue Alatala! I'amo to manggeni kita majadi padagi sabana kita nosaongu rara ante Pueta Yesus Kristus! 58 Jadi sampesuwu-sampesuwu to nipotoweku, mantora etu pura-pura komi kana maroo momparasaya. Ne'e mompakamba nuapa-nuapa mombagagoya pomparasaya komi. Ne'e menonto mompasimbuku ante mpu'u-mpu'u raramu mantui bago to niwai Pue ka komi, sabana ninjani komi, pura-pura nuapa to rapowia komi ka i Pue natantumo kana maria aselena.
1 Ane pompekutana komi ewa doi rapasiromu ala mantulungi topomparasaya i Pue iwe'imo pesonoku: komi kana mowia nasimbayu ewa to nipakauku ka todea topomparasaya ri Bagia Galatia. 2 Etumo ri eo-eo Aka komi kana mompatani sabagia nggari doi pombaratamu nantuki kadea nu pombaratamu samba'a bo samba'a. Pade doi etu kana raboli komi sampe aku momai ri ja'i komi ala ne'e doi etu aga rapamula rapasiromu tempo aku lako momai ri ja'i komi. 3 Tempo etu aku kana mompakau tau-tau to rapelisi komi manggeni doi petulungi nggari ja'i komi mpaka ri ngata Yerusalem. Ira kana kuwai ka sura mompakanoto isema ira bo bago nuapa to niparasaya ka ira. 4 Pade ane rapekiri komi mabelopa ane aku wo'u mantuki ira, kami kana malau mpasanggani-nggani. 5 Aku kana momai mantalioda komi maopu aku mompebutu Propinsi Makedonia, sabana patujuku malau mokolu mpaka ri Makedonia. 6 Pade bara aku mamala meto'o ante komi bara sakuya kasaena, bara sampe maopu tempo leni, ala komi mamala mantulungi aku riara mpolumakoku mpaka ri peto'o ntanina. 7 Sabana aku da'a madota aga mesai sampalai ri ja'i komi. Tapi nisarumakaku aku mamala meto'o ante komi masae sakedi ane etu rapaloga i Pue. 8 Tapi we'i-we'i aku kana maroo ri ngata Efesus sampe Eo Bete Pentakosta, 9 sabana nadeamo loga niwai ka aku ri se'i mompowia pokarajaa to mamala manggeni belo ka tau dea, naupa nadea wo'u baliku ri se'i. 10 Ane Timotius mesai ri ja'i komi tarimamo i'a ante mabelo ala i'a da'a maeka ri tatongo komi, sabana i'a nantui bago i Pue nasimbayu ewa aku mboto. 11 Jadi ne'e sampe maria tau manjauru i'a. Tapi tulungimo i'a mompapola polumakona ante mabelo ala i'a mamala manjili ri ja'iku, sabana aku nompopea karatana ri se'i nosanggani-nggani ante sampesuwu-sampesuwu topomparasaya ntanina. 12 Ane pompekutana komi ewa sampesuwuta Apolos, nadea ngganimo aku nanguli ka i'a ala malau mantalioda komi mosanggani-nggani ante topomparasaya-topomparasaya ntanina. Tapi i'a da'apa madota malau we'i-we'i. Ane maria logana i'a kana momai ri ja'i komi. 13 Komi kana mainga bo maroo momparasaya. Komi kana mabia bo maroso. 14 Nuapa-nuapa rapowia komi kana rapowia ante towe. 15 Natantumo komi nosinjani ante ira i Stefanus saongu njapo. Ira tau-tau pamulana ri Propinsi Akhaya to nomparasaya i Pue Yesus, pade ira nompasimbuku ante mpu'u-mpu'u rara mantulungi todea topomparasaya. Jadi sampesuwu-sampesuwu, kuperapi ka komi ante mpu'u-mpu'u raraku, 16 pekoumo komi ri ja'i ntau ewa ira pade ri ja'i butu mba'a tau to nokarajaa ntomo ante ira nantulungi todea topomparasaya. 17 Nadambamo raraku tempo i Stefanus, i Fortunatus bo Akhaikus nomai ri ja'iku ri se'i, sabana ira nanjaliku komi nantulungi aku ri se'i. 18 Ira nompakasana raraku nasimbayu ewa ira nompakasana rara komi. Jadi etu sampe kuperapi ka komi, bilamo tau-tau ewa ira etu. 19 Nadea tabe nggari ja'i ntodea topomparasaya ri Propinsi Asia. Pade tarima wo'u nadea tabe riara sanga i Pue nggari ja'i Akwila bo i Priskila nosanggani-nggani ante todea topomparasaya to nodade ri sapo ira. 20 Pade nadea tabe wo'u nggari ja'i pura-pura topomparasaya ri se'i. Posipakasampemo tabe samba'a bo samba'a ante towe. 21 Ante paleku mboto aku nantulisi ka komi iwe'i: tabe nggari ja'iku Paulus. 22 Isema-sema da'a nompotowe i Pue, masurukawumo i'a! Maranata, karatamo i Pue! 23 Perapi i Pue Yesus mombagane komi. 24 Aku nompotowe komi pura-pura to nosaongu rara ante Yesus Kristus. Tabe nggari ja'iku, Paulus
1 Sura e'i nggari ja'iku Paulus to nionggotaka najadi suro Yesus Kristus nantuki dota Alatala, bo nggari ja'i sampesuwuta i Timotius, ka todea topomparasaya Alatala ri ngata Korintus pade ka pura-pura topomparasaya ri njumaongu Propinsi Akhaya. 2 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi. 3 Kana ratoiyata Alatala, Uma nu Pueta Yesus Kristus. I'a Umata to naasi matana manggita kita bo I'amo Alatala to nompakaroso rarata riara mpengele-ngele. 4 I'a nompakaroso rara kami riara mpengele-ngele kasusa bo kapari to nirasai kami, ala ante karoso rara to nitarima kami nggari ja'ina kami wo'u mamala mompakaroso rara tau-tau ntanina to nombarasai kasusa bo kapari. 5 Sabana nasimbayu ewa kami nadea nombarasai kasusa bo kapari ewa to nirasai Kristus, iwetu wo'u Kristus mpu'u-mpu'u nompakaroso rara kami. 6 Ane kami mombarasai kasusa bo kapari, etu majadi ala kami mamala mompakaroso rara komi, pade ala komi mamala rapakasalama. Ane rara kami rapakaroso riara kasusa bo kapari, etu majadi ala komi wo'u mamala rapakaroso rara sampe komi maroo manta'amaka kasusa bo kapari nasimbayu ewa kami. 7 Etu sampe kami mpu'u-mpu'u nanjarumaka komi. Sabana ninjani kami ane komi mombarasai kasusa bo kapari ewa to nirasai kami, rara komi wo'u kana rapakaroso nasimbayu ewa kami. 8 Sampesuwu-sampesuwu, to nipodota kami ala komi mangginjani iwenu kasusa bo kapari to nirasai kami ri Propinsi Asia. Pepandasa to nawela kami natomo mpu'u, neliu nggari pompakule kami sampe naopumo rara kami matuwu. 9 Nirasai kami ewa kami nisuku mamate. Tapi etu najadi ala kami ne'e manjarumaka karoso kami mboto tapi manjarumaka Alatala to nakuasa mompakatuwu bali tau namate. 10 I'amo to nompakasalama kami nggari pepandasa to nompakawiora rara etu sampe kami da'a namate. Pade I'a bate-batena mompakasalama kami. I'amo to nisarumaka kami kana mompakasalama kami nggari kasusa bo kapari banepia. 11 Etu kana majadi ante petulungi posambaya komi. Sabana ane madea tau momposambaya kami Alatala kana mantulungi kami. Ante iwetu madea tau kana manguli tarima kasi ka Alatala manggita asele nu posambaya ira etu. 12 Naria sangele to nompakadamba rara kami iwe'i: Pokainggu kami riara dunia e'i bate-batena nanoa bo nagasa riara mpanggita Alatala, neliu-liupa tempo kami nosanggani-nggani ante komi. Pokainggu kami da'a nantuki noto manusia tapi nantuki towe belo nu Alatala. 13 - 14 Sabana to nitulisi riara sura kami mamala rabasa komi bo ranjani komi ante nanoto, da'a ria patuju ntanina natetabuniaka riarana. We'i-we'i komi da'apa nangginjani patuju kami ante nabelo. Tapi nisarumakaku kana marata tempona komi mpu'u-mpu'u mangginjani patuju kami, ala tempo karata i Pue Yesus banepia komi mamala madamba-damba mompekiri kami nasimbayu ewa kami kana madamba-damba mompekiri komi. 15 - 16 Niparasayaku komi mpu'u-mpu'u kana madamba mompekiri aku iwetu. Etu sampe nipakatantuku riara mpolumakoku mpaka ri Propinsi Makedonia aku kana mesai ri ja'i komi ronggani ala komi mamala mantarima rasi nggari ja'iku ronggani kadeana. Patujuku mesai mantalioda komi ntani ruru pade mapola mpaka ri Propinsi Makedonia. Pade tempo manjili nggari Makedonia patujuku mesai mantalioda komi karongganina ala komi mamala mantulungi aku mompapola polumakoku mpaka ri Bagia Yudea. 17 Tapi niaku etu nabalimo. Bara naria to nompekiri aku norongu rara tempo aku nompakatantu polumakoku etu. Atau ira nompekiri aku aga nompakatantu niaku nantuki dotaku mboto, sanggani nanguli, "Iyo," sanggani nanguli, "Da'a." 18 Tapi sampesuwu-sampesuwu, nasimbayu ewa Alatala namala raparasaya, janji kami wo'u namala raparasaya. Tesa kami ka komi natantu, da'a sanggani nanguli, "Iyo," pade sanggani nanguli, "Da'a." 19 Sabana Yesus Kristus, Ana nu Alatala, to nipatolele i Silas, i Timotius bo aku mboto ka komi, da'a tau norongu rara. I'a da'a sanggani nanguli, "Iyo", pade sanggani nanguli, "Da'a." Tesana bate-batena namala raparasaya. 20 Sabana pura-pura pojanji Alatala ka kita kana rapakadupa sabana kita nosaongu rara ante Kristus. Etu sampe kita namala manguli, "Nakono mpu'u pojanji-pojanji Alatala." Pade ante iwetu Alatala nibila bo nitoiya. 21 Alatala mbotomo to mompakaroso kita pura-pura, nabeloka kami nabeloka komi wo'u sabana kita mosaongu rara ante Kristus. Alatalamo to nompelisi kita majadi bagiana 22 pade niwaina ka kita Nosana to Nagasa ewa tandaina kita bagiana. Nosana to Nagasa etu najadi panjokota to nompakanoto nuapa to nijanjina ka todeana natantumo kana ratarimata. 23 Sampesuwu-sampesuwu, aku da'a nodawa. Alatala mboto sabiku. I'a nangginjani isi rara nta'iku. Ninjanina aku da'a nomai mantalioda komi ri ngata Korintus sabana aku da'a nadota mompakasusa rara komi. 24 Da'a patujuku momparenta ka komi nuapa to masipato raparasaya komi, sabana naroo mamimo pomparasaya komi. Tapi kami aga madota mokarajaa mpasanggani-nggani ante komi ala komi rapakadamba rara.
1 Sabana etu nipakatantukumo riara nta'iku iwe'i: agina aku mana malau mantalioda komi ane etu aga mompakasusa rara komi ewa to najadi bopia. 2 Sabana ane aku mompakasusa rara komi isemapa to mamala mompakawoe raraku? Natantu da'a ria ntanina, aga komi to nipakasusaku! 3 Pade etumo patujuku nantulisi sura etu ka komi bopia ala ane aku momai ri ja'i komi ne'e aku rapakasusa komi to masipato mompakadamba raraku. Niparasayaku ane aku madamba komi wo'u madamba-damba. 4 Tempo aku nantulisi sura etu ka komi aku mpu'u-mpu'u nasusa bo nagero raraku, pade aku nadea nggani nageo nakanjodu-njodu. Patujuku nantulisi sura etu da'a ala mompakasusa rara komi, tapi ala komi mamala mangginjani kabete nu toweku ri ja'i komi pura-pura. 5 Tau to nompakasusa rara etu da'a nompakasusa raraku, tapi i'a nompakasusa rara komi pura-pura, atau ala ne'e mako'o gaga tesaku agina aku manguli i'a nompakasusa rara sabagia nggari komi. 6 Tapi we'i-we'i kuuli ka komi, naganamo pesuku to nipawela todea topomparasaya ka tau etu. 7 We'i-we'i komi kana mombaampungi i'a bo mompakawoe rarana ala ne'e i'a masusa gaga sampe maopu rarana. 8 Jadi kuperapi ka komi popokita wo'umo ka i'a towe komi. 9 Patujuku nantulisi sura etu ka komi bopia ala mombauji komi. Aku nadota manggita ane komi bate-batena masadia mantuki pura-pura parenta nggari ja'iku. 10 Jadi naganamo we'i-we'i. Ane tau etu naopu niampungi komi pura-pura, i'a wo'u niampungikumo. Pade nuapa to niampungiku--ane mpu'u-mpu'u naria sala to masipato kuampungi--etu niampungiku riara mpanggita Kristus ala komi pura-pura mamala mosinggabelo bali. 11 Tau etu niampungikumo ala ne'e sampe kita raakala Magau nu Seta, sabana ninjanita mamimo akalana mombabagiu kita. 12 Tempo aku narata ri ngata Troas ala mompatolele Kareba Belo ewa Kristus, Pue nombabuka jala ka aku mokarajaa ri setu. 13 Tapi nakini mpu'umo raraku sabana aku da'a nosirata ka sampesuwuta i Titus ri setu. Sabana etu nopasabimo aku ri ja'i tau-tau to Troas, pade napolamo aku mpaka ri Propinsi Makedonia. 14 Tapi nosukuru mpu'u ka Alatala! Nggari I'amo kami najadi padagi sabana nosaongu rara ante Kristus. I'a nantulungi kami nompatolele Kareba Belo sampe pura-pura tau mamala mosinjani ante I'a. Kareba etu natolele mpaka ri umba-umba nasimbayu ewa soa nawongi mpu'u natienga ri umba-umba. 15 Sabana riara mpanggita Alatala kami nireke nasimbayu ewa soa dupa to nienga ntau pura-pura, nabeloka ira to rapakasalama, nabeloka ira to rasuku sampe ri kasae-saena. 16 Nantuki ira to rasuku sampe ri kasae-saena kami e'i nireke ewa soa ntomate, tandaina ira kana rasuku. Tapi nantuki ira to rapakasalama kami nireke ewa soa nawongi mpu'u, tandaina ira kana matuwu mabelo. Isema to nompakule mantui bago ewa etu? Natantu nantuki pompakuleta mboto da'a ria samba'a! 17 Tapi kami e'i da'a nasimbayu ewa nadea tau ntanina to nompatolele Tesa nu Alatala ala mangelo untu ka koro ira mboto. Patuju kami nagasa sabana kami tau to nisuro Alatala mompatolele Tesana ante kuasa nggari ja'i Kristus. Pade Alatala mboto nanggita powia kami etu.
1 Bara maria to mompekiri kami nompamula wo'u mombatoiya koro kami mboto. Atau bara rapekiri ira kami wo'u nomparaluu sura ka komi bara nggari ja'i komi to nombatoiya kami ewa to nikeni tau-tau ntanina etu. Tapi etu da'a ntoto niparaluu kami! 2 Sabana komi mbotomo najadi ewa sura to nombatoiya kami to nitulisi riara nta'i kami to namala rabasa bo ranjani pura-pura tau. 3 Nggari pokainggu komi nanotomo ka ira asele mpobago kami nanggeni tesa Kristus ka komi. Namala rauli komi nasimbayu ewa sura to nombatoiya kami to nitulisi Kristus mboto. Sura etu da'a nitulisi ante pena bo tinta, pade da'a wo'u nitulisi ri watu mpotulisi. Tapi sura etu nitulisi Nosa Nagasa nu Alatala to natuwuna riara nta'i manusia. 4 Kami nabia nanguli iwetu riara mpanggita Alatala sabana naria kuasa Kristus riara nggatuwu kami. 5 Da'a namala kami manguli pompakule mantui bago etu nggari ja'i kami mboto. Tapi pompakule kami nggari ja'i Alatala. 6 I'amo to nombawai ka kami pompakule mompatuduki ka tau pojanjina to nabou. Pojanji nabou etu da'a nopu'u nggari atura-atura to nitulisi, tapi nopu'u nggari ja'i Nosa Nagasa nu Alatala. Sabana atura-atura to nitulisi aga nompakanoto tau nasilaka kana mamate, tapi Nosa Nagasa nu Alatala mombawai katuwua mabelo. 7 Tempo pojanji nggasae to nompakanoto tau nasilaka kana mamate nipowia bo nitulisi ri watu mpotulisi, reme nggari ja'i Alatala nombawanta i Musa sampe nareme mpu'umo lenjena. Tau-tau to Israel da'a nompakule nompenaa lenje i Musa naupa reme etu nompamula nalipo tempo etu. Jadi ane iwetumo reme bo kagaya nu Alatala to nipopokita tempo pojanji nggasae nipowia, 8 natantumo neliu nggabelo pojanji nabou to nipowia Nosa Nagasa nu Alatala. 9 Ane pojanji nggasae to nompakatantu manusia nasilaka kana rasuku niwai ante tandai-tandai bo reme to nipogumaa, natantumo neliu nggabelo pojanji nabou to nompakatantu iwenu manusia mamala majadi manoa riara mpanggita Alatala. 10 Kakonona namala rauli pojanji nggasae to niwai ante tandai reme bo kagaya to nipogumaa etu mana ria kuasana ane rapoposisala ante pojanji to nabou to neliu nggabelo. 11 Ane pojanji nggasae to da'a nasae nalaku etu nireke nakuasa bo nabelo, natantumo neliu nggakuasa bo neliu nggabelo pojanji nabou to nalaku sampe ri kasae-saena. 12 Kami nanjarumaka pojanji Alatala to nabou etu. Jadi etu sampe kami nabia mpu'u motesa ka komi ante nanoto. 13 Kami da'a nasimbayu ewa i Musa nggaolu to nombasalibumbu lenjena ala tau-tau to Israel da'a manggita reme i Pue malipo nggari lenjena. 14 Kakonona pekiri iramo to natitutu, sabana sampe we'i-we'i tempo ira nombabasa pojanji nggasae etu riara buku-buku i Musa, pompekiri ira ewa nisalibumbu. Sabana pekiri manusia to natitutu iwetu aga namala rabuka ane tau nosaongu rara ante Kristus. 15 Sampe we'i-we'i butu nggani ira nombabasa buku-buku i Musa, ewa pekiri ira danisalibumbu. 16 Tapi ane samba'a tau majea pade mantuki i Pue, posalibumbu etu kana rabuka. 17 To nipatuju ante Pue ri se'i etumo Nosa Nagasa nu Alatala. Pade ane Nosa Nagasa nu Alatala naria ri ja'ita, kita mpu'u-mpu'u nakabasaka nggari pura-pura nuapa to nompopoga'a kita nggari ja'i Pue. 18 We'i-we'i lenjeta da'a nisalibumbu ewa lenje i Musa nggaolu. Kita mompopokita kuasa bo kareme i Pue riara nggatuwuta. Mantambai eona kita mantambai mabali majadi nasimbayu ewa Pue mboto. Pade kabalina etu majadi nggari kuasa Nosa Nagasa i Pue.
1 Bago to nitui kami e'i niparasaya Alatala ka kami nggari asi matana mboto. Jadi etu sampe kami da'a naopu rara mantui bago e'i. 2 Kami nanggabasaka pura-pura pokainggu narumau to nompakaeya. Kami da'a nombabagiu tau bo kami da'a nompakadenggo Tesa nu Alatala ante mombagalo pepatuduki ntanina to nasalana. Tapi kami nompatolele Tesa nu Alatala to nakonona ante nanoto. Ante iwetu kami mompopokita ka pura-pura tau kami mpu'u-mpu'u tau to nanoa riara mpanggita Alatala. 3 Ane Kareba Belo to nipatolele kami nireke danagawu, etu nagawu ka tau-tau to rasuku sampe ri kasae-saena banepia sabana da'a nomparasaya. 4 Magau nu Seta to nombabagiu manusia ri dunia e'i nompakaburo pekiri tau-tau da'a nomparasaya ala ira ne'e manggita reme nu Kareba Belo. Kareba Belo etu nompakanoto kuasa bo kagaya nu Kristus to nasimbayu ntoto ante Alatala. 5 Kareba to nipatolele kami etu da'a kareba to nantesa koro kami mboto. Tapi kareba etu nompakanoto ka komi Yesus Kristusmo Pue pade kami e'i najadi batua komi nantuki dota i Pue Yesus. 6 Tempo Alatala nompajadi langi bo dunia I'a nanguli, "Nggari karumauna kana meumba reme." Pade I'a wo'u nompakareme rara nta'ita ala pekirita majadi manoto. Ante iwetu kita mamala mangginjani kuasa bo kagaya nu Alatala to natikita ri lenje Kristus. 7 Tapi kuasa bo kagaya etu niboli Alatala riara koro kami manusia biasa to nasimbayu ewa kura tana. Ante iwetu nanotomo kuasa to neliu-liuna etu nggari ja'i Alatala da'a nggari ja'i kami mboto. 8 Kami bate-batena nitiku ntau ri umba-umba tapi kami da'a nidagi. Kami naoso naingu tapi kami da'a naopu rara. 9 Kami bate-batena nipandasa ntau tapi kami da'a sanggani nipalasi Alatala. Kami naoso niboba sampe nadungga tapi kami da'a namate. 10 Koro kami bate-batena nombarasai kasusa bo kapari ewa to nirasai i Pue Yesus tempo I'a nipatesi. Etu najadi ala kuasa nggari katuwu Yesus manoto rakita riara nggatuwu kami. 11 Sabana kami to natuwu bate-batena nantingayo kamatea sabana nomparasaya i Pue Yesus, ala kuasa nggari katuwu Yesus manoto rakita riara nggatuwu kami to mamala mamate. 12 Jadi ante iwetu kami bate-batena mantingayo kamatea tapi etu manggeni komi mombarata katuwua mabelo sampe ri kasae-saena. 13 Riara Buku Nagasa naria nitulisi iwe'i: "Aku nomparasaya, pade etu sampe aku notesa." Nasimbayu ewa etu kami wo'u nomparasaya sampe kami notesa. 14 Niparasaya kami Alatala to nompakatuwu bali i Pue Yesus nggari kamatena kana mompakatuwu bali kami wo'u nasimbayu ewa I'a. Pade niparasaya kami I'a kana manggeni kami nosanggani-nggani ante komi mpaka ri ja'ina mboto. 15 Pura-pura to nirasai kami etu najadi ala manggeni belo ka komi ala mantambai kadea ntau to mombarasai towe belo nu Alatala. Ante iwetu mantambai kadea ntau to mosukuru ka Alatala, sampe I'a mpu'u-mpu'u ratoiya bo rabila. 16 Jadi etu sampe kami da'a naopu rara. Naupa koro kami mantambai eona mantambai malente, rara nta'i kami mantambai eona mantambai maroso. 17 Kasusa to nanga'a to nirasai kami sampalai we'i-we'i kana manggeni kami mantarima rasi bo belo sampe ri kasae-saena to neliu nggabete nggari kasusa etu. 18 Jadi kami da'a nompekiri kasusa bo kapari to namala nikita ri dunia e'i, tapi kami nompekiri kabelona to da'apa namala nikita to nipakasadia ka kami. Sabana to namala nikita ri dunia e'i aga sampalai, tapi kabelona to da'apa namala nikita etu maroo sampe ri kasae-saena.
1 Sampesuwu-sampesuwu, ninjanita ane mageromo "tenda" to nipeto'ota ri dunia e'i, etumo koro batata, Alatala kana mombawai ka kita saongu "sapo" ri suruga, etumo koro nabou to da'a nipowia manusia to maroo sampe ri kasae-saena. 2 Tapi tempo kita danatuwu ri dunia e'i kita nekakai ante nalentora rara ala mombarata koro nabou nggari suruga etu. 3 Sabana ante iwetu kita batena maria koro. 4 Tempo kita danatuwu ri dunia e'i nasusa rarata sabana natomo katuwuta. Da'a patujuta mamate bo mombawonju korota e'i, tapi kita madota rawai ka koro nabou nggari suruga etu ala korota to mamala mamate rasambei ante koro to matuwu sampe ri kasae-saena. 5 Alatala mbotomo to nompakasadia kita ala mantarima etu pura-pura, pade niwaina ka kita Nosana to Nagasa ewa panjokota to nompakatantu nuapa to nijanjina etu kana majadi. 6 Jadi etu sampe kami bate-batena naroso rara. Ninjani kami ane kami danatuwu ri dunia e'i kami da'apa nosanggani-nggani ante Pue ri suruga. 7 Pade kami natuwu ri dunia e'i ante nomparasaya Kristus, da'a sabana nanggita I'a. 8 Jadi ewa niuliku ri ba'ana narosomo rara kami. Kakonona to nipokono kami ala mompalasi koro kami e'i pade malau meto'o mpasanggani-nggani ante i Pue. 9 Jadi etu sampe kami tunggai mompasimbuku mompakadamba rarana, nabeloka ane kami danatuwu ri dunia e'i, nabeloka ane kami mompalasi dunia e'i. 10 Sabana kita pura-pura kana mantingayo Kristus banepia ala ratangarana. Pade maopu ratangarana samba'a bo samba'a, kita kana mombarata tambo nantuki to masipato ante powiata tempo kita natuwu ri dunia e'i, bara powia nabelo atau powia naja'a. 11 Ninjani kami nuapa batuana maeka ri ja'i Pue. Jadi etumo sabana kami tunggai mompasimbuku manggeni tau momparasaya i Pue Yesus. Nanotomo ka Alatala pokainggu kami nanoa. Pade nisarumakaku etu nanoto wo'u ka komi pura-pura. 12 Ante tesa e'i kami da'a mompasimbuku mombatoiya wo'umo koro kami mboto ka komi. Tapi kami aga mompakanoto ka komi sangele pokainggu kami to nabelo, ala komi mamala mombatoiya kami ri ngayo tau-tau to nangewa kami ri setu. Sabana ira aga nombatoiya tau nantuki to namala nikita, da'a nantuki inggu rara nta'ina. 13 Ane kami noinggu nagila ewa to niuli ntau, toramo, kami noinggu iwetu ala Alatala rabila bo ratoiya. Pade ane kami noinggu nanoto etu ala manggeni belo ka komi. 14 Kami noinggu iwetu sabana towe Kristus nombakuasai kami. Niparasaya kami iwe'i: ane samba'a tau namate nanjaliku kita etu batuana kita pura-pura ewa namate. 15 Pade Kristus mpu'u-mpu'u namate manjaliku kita pura-pura. Patuju nu kamatena etu ala kita to danatuwu ri dunia e'i mana matuwu mantuki dotata mboto tapi ala kita matuwu mantuki dota Kristus to namate nanjaliku kita pade to nipakatuwu bali. 16 Jadi etumo sabana nompamula we'i-we'i kami mana mompekiri tau nantuki panggita manusia. Naupa bopia kami nompekiri Kristus nantuki panggita manusia, we'i-we'i kami mana mompekiri iwetu. 17 Jadi tau to nosaongu rara ante Kristus najadi manusia nabou. Katuwuna nokolu naliumo pade pura-pura katuwuna najadi nabou. 18 Etu pura-pura nggari ja'i Alatala. I'a nompakau Kristus marata ri dunia ala mompoposinggabelo bali kita ante I'a. Pade niparasayana ka kami bago mompatolele ka tau-tau ntanina ira wo'u mamala mosinggabelo bali ante I'a. 19 To nipatuju kami iwe'i: nggari kamate Kristus Alatala nompoposinggabelo bali manusia ante I'a. Mana nirekena silaka-silaka ira. Pade niparasayana ka kami bago mompatolele Tesana to nompakanoto iwenu manusia mamala mosinggabelo bali ante I'a. 20 Jadi kami e'i tau-tau to nisuro Kristus. Ewa kami niposumba Alatala merapi ala komi mosinggabelo bali ante I'a. Jadi riara sanga Kristus kami merapi ka komi, waimo koro komi rapoposinggabelo bali ante Alatala. 21 Kristus da'a ntoto nasilaka. Tapi I'a nipowia Alatala posompo silaka manjaliku kita ala kita mamala majadi manoa riara mpanggita Alatala ante mosaongu rara ante Kristus.
1 Jadi sampesuwu-sampesuwu, ewa roa sampokarajaa ante Alatala kami merapi ka komi ante mpu'u-mpu'u rara, ne'e sampe towe belo nu Alatala to nitarima komi da'a ria aselena riara nggatuwu komi. 2 Sabana naria Tesa nu Alatala iwe'i: "Ri tempo to nipakatantuku Aku nangepe komi. Pade Aku nantulungi komi ri eo to nipakatantuku mompakasalama manusia." Toramo mpakabelo-belo! We'i-we'imo tempona to nipakatantu Alatala etu! We'i-we'imo eo to nipakatantuna mompakasalama manusia! 3 Kami da'a madota ala bago kami ewa topompatolele Kareba Belo rapakasala ntau. Jadi etumo sabana kami nompasimbuku matuwu ante pokainggu to da'a nompakaju'a rara ntau. 4 Nau nuapa-nuapa majadi kami bate-batena noinggu nabelo ala manoto kami mpu'u-mpu'u batua nu Alatala. Naupa kami nipandasa, nipakasusa, pade niwala ntiku kasusana kami batena nanta'amaka. 5 Kami niboba bo nisuaraka riara tarunggu. Kami nipandasa todea to nagado, kami nokarajaa ntomo, kami nabiasa da'a noturu bo kami nabiasa nakura panggoni. 6 Ante pokainggu to nagasa, nanoto, nosabara bo nabelo kami nompopokita ka tau kami mpu'u-mpu'u batua nu Alatala. Naria pompakule nggari ja'i Nosa Nagasa nu Alatala riara nggatuwu kami, pade kami nompotowe tau-tau ntanina ante mpu'u-mpu'u rara. 7 Nanotomo kami batua nu Alatala sabana kami nompatolele pepatuduki to nakonona, pade kuasa Alatala mboto nosanggani-nggani ante kami. Kami bate-batena noinggu nanoa. Pade pokainggu to nanoa etumo najadi ewa parewa mposibali kami ala meewa bo mebali. 8 Kami nibila ntau tapi nisalai tau ntanina. Kami nitoiya ntau tapi niuli sinja'i tau ntanina. Kami nireke topebagiu, tapi kakonona kami aga notesa to nakonona. 9 Kami nireke tau da'a ria gunana, tapi kami ninjani ntau pura-puramo. Kami nadea nggani ntora namate, tapi kitamo, kami bate-batena natuwu. Kami naoso nipandasa ntau tapi kami da'a namate. 10 Kami naoso nipakasusa rara, tapi kami da'a nenonto nosukuru. Kami nakasiasi, tapi kami bate-batena nompakasugi nadea tau ntanina. Ane rakita ewa da'a ria nuapa-nuapa ri ja'i kami, tapi kakonona mpengele-ngele naria ri ja'i kami. 11 Sampesuwu-sampesuwu ri Korintus, kami notesa nombasuwuraka isi rara nta'i kami pura-pura ka komi. Natebukamo rara kami ri ja'i komi. 12 Kami da'a nantabuniaka towe kami ka komi, tapi komi nantabuniaka towe komi ka kami. 13 Kutesa ka komi ewa ka ana-anaku mboto, bukamo rara komi ri ja'iku nasimbayu ewa aku nombabuka raraku ri ja'i komi! 14 Ne'e komi mosiala patuju ante tau-tau da'a nomparasaya i Pue Yesus. Iwenumo? Masipato tau to nanoana mosiala patuju ante tau to nadenggona? Masipato reme mosigalo ante karumauna? 15 Masipato Kristus mosimporoa ante Magau nu Seta? Masipato topomparasaya masintuwu ante tau da'a nomparasaya? 16 Masipato kita mepue ka pue-pue ntanina riara Sapo Mpepue? Natantumo pura-pura etu da'a ntoto masipato! Toramo! Kitamo to najadi ewa Sapo Mpepue nu Alatala to natuwuna. Ewa to niuli Alatala mboto iwe'i: "Aku kana meto'o ri tatongo ira. Aku kana maroo mosanggani-nggani ante ira. Aku kana majadi Alatala ira pade ira majadi todeaku." 17 "Sabana etu pesuwumo komi nggari tatongo ira pade poga'amo komi nggari ja'i ira. Ne'e manggabe anu to natantoru riara mpanggitaku, pade Aku kana mantarima komi ri ja'iku." 18 "Aku kana majadi Umamu pade komi kana majadi ana-anaku. Iwetumo panguli i Pue to Neliu Nggakuasa."
1 Sampesuwu-sampesuwu to nipotoweku, pojanji-pojanji etu nipawela ka kita. Jadi kamaimo kita mompakagasa korota nggari pura-pura nuapa to nompakatantoru koro bo pekiri rara nta'ita. Pade kamaimo kita mantambai eona mantambai magasa pokaingguta ante matuwu maeka ri ja'i Alatala. 2 Sampesuwu-sampesuwu, bukamo rara komi ri ja'i kami! Da'a ria sanggani kami nompowia sala ri ja'i komi nau aga samba'a. Da'a ria sanggani kami nompakasalanjala komi. Da'a ria sanggani kami nombabagiu komi ala mompakauntu koro kami mboto. 3 Aku da'a nanguli iwetu ala mompakasala komi, sabana ewa to niuliku ri ba'ana kami mpu'u-mpu'u nompotowe komi! Matuwu atau mamate kami tunggai mompotowe komi! 4 Da'a nakaja rara kami notesa ka komi ante nanoto iwetu. Nasana mpu'umo raraku nantora komi. Naupa aku nombarasai kasusa bo kapari, da'a ria kaopu-opuna kadamba nu raraku. 5 Tempo kami narata ri Propinsi Makedonia kasusa kami da'a ria kaopu-opuna, tapi kami nipandasa nggari mpengele-ngele. Nggari tau-tau ntanina naria to nombabali kami, pade riara nta'i kami mboto naria eka rara. 6 Tapi Alatala nompakaroso rara tau-tau to naopu rarana, pade I'a nompakaroso rara kami wo'u ante karata i Titus. 7 Da'a aga karata i Titus to nompakaroso rara kami tapi pantesana wo'u to nantesa iwenu i'a nipakaroso rara tempo i'a naria ri tatongo komi. Pade nitesana wo'u ka kami ewa kalentora rara komi manggita aku pade ewa kasusa rara komi nantora pokainggu komi bopia. Pade niulina komi mpu'u-mpu'u madota manjaliku aku ri ngayo tau-tau to nangewa aku. Jadi nangepe tesa Titus etu nantambaimo kadamba nu raraku. 8 Naupa isi suraku bopia nompakasusa rara komi da'a nanjoso raraku nantulisi sura etu. Kakonona nanjosomo raraku bopia sabana nikitaku suraku etu nompakasusa rara komi. Tapi kasusa rara komi etu aga sampalai. 9 We'i-we'i nadambamo raraku, da'a sabana komi nipakasusa rara, tapi sabana kasusa rara komi etu nanggeni komi najea nggari pokainggu komi to nasala. Kasusa nu rara komi etu nipake Alatala manggeni komi majea. Jadi komi da'a nipakarugi ante sura kami etu. 10 Sabana kasusa rara nggari ja'i Alatala ewa etu nanggeni tau majea nggari silaka sampe ira mamala rapakasalama. Pade da'a ria samba'a tau manjoso rarana ane etu majadi. Tapi kasusa rara to nirasai ntau to da'a nomparasaya Alatala aga manggeni ira mamate pade rapopoga'a nggari ja'i Alatala. 11 Kitamo nuapa to najadi ante kasusa rara nggari ja'i Alatala to nirasai komi etu. Komi mpu'u-mpu'u madota mowia to nanoana. Komi mpu'u-mpu'u nompasimbuku mompakanoto pokainggu komi nakono. Naraumo komi mompekiri silaka to nipowia roa komi etu. Naekamo rara komi. Nalentoramo rara komi manggita aku. Naraji mpu'umo komi nompowia to niparentaku etu. Nasadiamo komi nombasuku tau to nasala etu. Riara mpengele-ngele komi nompopokita komi da'a nasala riara parakara etu bopia. 12 Jadi naupa aku nantulisi sura to nompakasusa rara komi etu, da'a patujuku ala mompakasala tau to nowia sala atau manjaliku tau to nipakaja'a tau nasala etu. Patujuku nantulisi sura etu ala riara mpanggita Alatala manoto ka komi iwenu kakonona kabete nu towe komi ri ja'i kami. 13 Jadi nangepe asele sura kami etu rara kami nipakaroso. Pade kami da'a aga nipakaroso rara tapi kami wo'u nipakadamba mpu'umo nanggita kadamba nu rara i Titus. Sabana tempo i'a nantalioda komi ri Korintus i'a mpu'u-mpu'u nipakasana rara. 14 Da'apa i'a nalau nantalioda komi aku nombatoiya komi ka i'a. Pade pokainggu komi to nikita Titus da'a nompakaeya aku. Nasimbayu ewa pura-pura tesa kami ka komi batena nakono, iwetu wo'u tesa kami nombatoiya komi ka i Titus etu wo'u nakono. 15 Pade towe i Titus ri ja'i komi nantambai kabetena tempo i'a nantora iwenu komi pura-pura natundu ri ja'ina pade iwenu komi nantarima i'a ante nombabila i'a bo nekou ri ja'ina. 16 Nadamba mpu'u raraku sabana komi namala niparasaya riara mpengele-ngele.
1 Sampesuwu-sampesuwu, kami madota mompakanoto ka komi nuapa to najadi nggari towe belo nu Alatala ri tatongo todea topomparasaya ri Propinsi Makedonia. 2 Ira mpu'u-mpu'u nipandasa ante pesoba-pesoba to natomo mpu'u. Tapi ri tatongo pesoba etu kadamba nu rara ira nantambai kadeana sampe ira nombawai ante najoi mpu'u rara ka tau-tau ntanina, naupa ira mboto nakasiasi mpu'u. 3 Ira da'a aga nombawai nantuki pompakule ira, tapi ira nombawai neliu nggari pompakule ira. Etu nikitaku mboto! 4 Nggari dota ira mboto ira nerapi ante mpu'u-mpu'u rara ka aku ala ira wo'u mamala rawai loga masintuwu ante tau-tau ntanina mantulungi topomparasaya-topomparasaya to nakasiasi. 5 To niwai ira neliu mpu'u nggari to nisarumaka kami. Pamulana ira nombajuju koro ira mboto ka i Pue pade wo'u ka kami nantuki dota Alatala. 6 Jadi etu sampe kami nerapi ka i Titus ala i'a mompapola bago to nabelona mompasiromu doi petulungi to nipamulana ri tatongo komi bopia. 7 Komimo to neliu nggabelo riara mpengele-ngele. Pomparasaya komi mpu'u-mpu'u naroso. Komi niwai ka pompakule motesa-tesa bo mompasimbayu pangginjani nggari ja'i Pue. Nabete mpu'u rara komi mantulungi tau ntanina. Pade nabete mpu'u towe komi ri ja'i kami. Sabana etu masipato wo'u komi meliu nggabelo mompajala bago mompasiromu doi petulungi etu. 8 Tesaku ka komi etu da'a parenta. Tapi patujuku mompopanjani ka komi nuapa to nipowia tau ntanina mantulungi roana ala manggita sampe ri umba towe komi. 9 Sabana ninjani komi mboto kabete nu towe belo Pueta Yesus Kristus. Naupa I'a mpu'u-mpu'u nakalumana I'a najadi nakasiasi mpu'u ala mantulungi komi. I'a nipakakasiasi mpu'u ala komi mamala rapakakalumana. 10 Jadi iwe'imo pombarataku ewa kasiromu doi petulungi etu. Mpae naliu komimo tau-tau pamulana to nadota mompasiromu doi petulungi etu, pade komi wo'u tau-tau pamulana to nompamula nompasiromu doi etu. 11 Jadi we'i-we'i papolamo bago etu sampe maopu ala karaji komi mompakaopu bago etu masimbayu ante kabete nu rara komi nompamula bago etu bopia. Waimo nantuki pompakule komi samba'a bo samba'a. 12 Sabana ane komi mombawai ante kamomi nu rara, pewai komi etu kana rakonoa rara Alatala. To rapariarana ane kita mombawai nantuki kadeana to naria ri ja'ita da'a nantuki anu da'a naria ri ja'ita. 13 Da'a ntoto patujuku ala tau-tau ntanina ratulungi pade komi rapakatomo, tapi patujuku ala maria kasimbayuna riara nggatuwu komi. 14 We'i-we'i komi nompakule mantulungi ira ante labina to naria ri ja'i komi. Pade tempo banepia ira wo'u mamala mantulungi komi nggari labi to maria ri ja'i ira. Ane iwetu maria kasimbayuna. 15 Ewa to nitulisi riara Buku Nagasa iwe'i: "Tau to nompasiromu nadea, da'a ria pelabina, pade tau to nompasiromu sakedi da'a ria kakurana." 16 Kami nosukuru ri ja'i Pue Alatala sabana I'a nompakabete rara Titus mompekiri kabelo komi nasimbayu ewa pompekiriku mboto. 17 Nanotomo etu sabana Titus nompoiyo pomperapi kami mompapola mombaurusi kasiromu doi petulungi etu. Pade da'a aga etu, tapi nabete mpu'umo rarana mantulungi komi sampe i'a mboto nompakatantu kana malau mpaka ri ja'i komi. 18 Pade kami nompakau samba'a sampesuwuta ntanina mantuki Titus riara mpolumakona. I'a tau to mpu'u-mpu'u nibila pura-pura topomparasaya sabana pokarajaana mompatolele Kareba Belo. 19 Da'a aga etu, tapi i'a wo'u nipelisi ntodea topomparasaya momporoa kami riara mpolumako kami manggeni doi petulungi etu. Kami nokarajaa mompasiromu doi petulungi etu ala i Pue rabila bo ratoiya ntau, pade ala mompopokita kabete nu rara kami mantulungi tau nakasiasi. 20 Patuju kami nompakau sampesuwuta etu mpasanggani-nggani ante i Titus ala ne'e maria tau manjalaraka akala kami mombaurusi pewai to nadea etu. 21 Sabana kami madota mompowia to nanoana, nabeloka riara mpanggita Alatala, nabeloka riara mpanggita manusia. 22 Nosanggani-nggani ante Titus bo sampesuwuta ntanina etu, nipakau kami wo'umo samba'apa, etumo sampesuwuta to nadea ngganimo nompopokita ka kami kabete nu rarana mantulungi tau ntanina. Pade we'i-we'i nantambaimo kabete nu rarana mantulungi mombaurusi kasiromu doi petulungi etu sabana i'a mpu'u-mpu'u nanjarumaka komi. 23 Ane i Titus, i'a roaku sampokarajaa mantulungi komi. Pade romba'a sampesuwuta ntanina to mantuki i'a etu, ira tau to nisuro ntodea topomparasaya. Nggari katuwu ira nadea mpu'u tau nombabila bo nombatoiya Kristus. 24 Jadi kuperapi ka komi popokitamo towe komi ka ira ala manoto ka pura-pura topomparasaya komi mpu'u-mpu'u nompotowe ira, pade ala manoto tesa-tesa kami nombatoiya komi ka ira bopia mpu'u-mpu'u nakono.
1 Kakonona da'a paraluu aku mantulisi ka komi ewa doi petulungi ka topomparasaya to nakasiasi ri Bagia Yudea. 2 Sabana ninjaniku nabete mpu'umo rara komi mantulungi ira. Aku nantoiya komi ri ja'i to Makedonia. Niuliku ka ira, "Nasadiamo topomparasaya ri Propinsi Akhaya mombawai petulungi, nompamula nggari mpae naliu." Nangepe tesa ewa kabete rara komi madota mantulungi iwetu sabagia bete nggari ja'i ira wo'u naria dota rara mantulungi. 3 Tapi naupa iwetu nipekiriku nabelopa ane aku mompakau i Titus ante roana etu ka komi mantulungi mompakasadia doi petulungi komi. Ante iwetu mpu'u-mpu'u masadia petulungi komi tempo aku marata ewa to nitesaku ka tau-tau to Makedonia. Ne'e-ne'e tesa-tesaku nombatoiya komi etu aga tesa bayangi! 4 Sabana ane petulungi komi da'apa nasadia tempo aku marata mpasanggani-nggani ante to Makedonia, natantumo maeya mpu'u mataku, ne'epa rauli komi. Sabana niuliku ka ira komi mpu'u-mpu'u nasadia mantulungi. 5 Jadi etu sampe nipekiriku paraluu aku merapi ka roa-roa etu ala mokolu ka aku mpaka ri ja'i komi mantulungi mompakasadia petulungi to nijanji komi bopia. Nipowiaku iwetu ala petulungi komi etu masadia tempo kami marata. Ante iwetu kana manoto petulungi komi etu niwai ante najoi rara da'a sabana nipasu'u. 6 Pariara nta'imo tesaku e'i: tau to nombatuja sakedi, sakedi wo'u aselena. Pade tau to nombatuja nadea kana madea wo'u aselena. 7 Butu mba'a tau kana mombawai nantuki to nipakatantu riara nta'ina mboto. Ne'e i'a mombawai ante nakaja rara atau ante nipasu'u. Sabana Alatala nompotowe tau to nombawai ante nadamba rarana. 8 Pade Alatala nakuasa mantambai rasi ka komi to nadea-deana sampe komi bate-batena rapakagana riara mpengele-ngele. Ante iwetu komi mamala mompowia mpengele-ngele powia to nabelona mantulungi tau-tau ntanina. 9 Riara Buku Nagasa naria nitulisi iwe'i: "I'a nompalele rasi ka tau-tau nakasiasi. Kanoa nu rarana naroo sampe ri kasae-saena." 10 Alatala nombawai sawua ka toposawu, pade niwaina panggoni rakonita. Pade iwetu wo'u I'a mombawai bo mompakadea rasi ka komi sampe komi mantambai mombawai ka tau ntanina. 11 Komi kana rapakasugi riara mpengele-ngele sampe komi bate-batena mamala mombawai ante najoi rara. Pade tempo kami mombawai pewai komi etu ka tau-tau nakasiasi ri Bagia Yudea madea tau kana manguli tarima kasi ka Alatala. 12 Sabana petulungi to niwai komi etu da'a aga mantulungi mompakagana nuapa to niparaluu todea topomparasaya, tapi manggeni madea tau wo'u manguli tarima kasi ka Alatala. 13 Ira kana mantoiya bo mombabila Alatala, sabana ante mombawai petulungi etu komi mompakanoto komi mpu'u-mpu'u natundu riara Kareba Belo nu Kristus to nipangaku komi. Pade ira kana mantoiya Alatala sabana komi mombawai petulungi ka ira bo tau-tau ntanina ante najoi rara. 14 Pade ira kana momposambaya komi ante nalentora rara sabana manggita asele nu towe belo nu Alatala to neliu-liuna riara nggatuwu komi. 15 Masipato mpu'u kita mosukuru ri ja'i Alatala sabana pewaina to da'a namala rasowadakata kabelona!
1 We'i-we'i aku, Paulus e'i, madota merapi sangele ka komi. Naria bara sakuya mba'a tau ri setu to nanguli iwe'i: "Tempo Paulus naria ri tatongota i'a nekou, tapi tempo nosinggakawao pade nabia i'a." Jadi ante naede bo nalusu rara nasimbayu ewa kaede bo kalusu rara Kristus mboto 2 aku merapi ka komi, ne'e mompasu'u aku moinggu mako'o ri ja'i komi tempo aku momai ri setu. Sabana aku nopatuju moinggu mako'o iwetu ri ja'i tau-tau ri setu to nanguli pokaingguku nasimbayu ewa tau-tau ri dunia to da'a nekou ri ja'i Alatala. 3 Toramo! Naupa kami natuwu riara dunia kami da'a nosibali mangewa kaja'ana ante pompakule manusia biasa. 4 Parewa mposibali to nipake kami da'a parewa mposibali nggari dunia e'i, tapi parewa to nabaraka nggari ja'i Alatala. Ante parewa etu kami mompakaropu akala-akala tau-tau to nangewa Alatala. 5 Kami mompakaropu mpengele-ngele pompekiri to nadenggona bo mpengele-ngele pompekiri to nasombona to nombalawa tau mangginjani Alatala. Kami mompakatundu mpengele-ngele pompekiri ri ja'i Kristus. 6 Jadi ane komi pura-pura nompakanoto komi mpu'u-mpu'u natundumo ri ja'i kami, nasadiamo kami mombasuku ira to da'a natundu. 7 Sampesuwu-sampesuwu, pekirimo to nanoto ranjani komi. Ane maria tau mpu'u-mpu'u nompekiri i'a bagia Kristus, kana ratorana kami wo'u bagia Kristus nasimbayu ewa i'a. 8 Naupa aku mombatoiya kuasa to niwai Kristus ka kami meliu nggari to masipatona, aku da'a maeya mata. Sabana kuasa etu niwai Pue ka kami ala mompakaroso pomparasaya komi, da'a ala mombagero komi. 9 Da'a patujuku mompakaeka komi ante sura-suraku. 10 Sampe niuliku iwetu sabana ninjaniku nariamo tau to nanguli iwe'i: "Sura-sura i Paulus nataja bo nako'o, tapi ane i'a mboto naria ri tatongota, i'a aga noinggu nalente-lente, pade pantesana da'a ntoto ria batuana." 11 Tapi kana ranjani tau-tau to nanguli iwetu ane kami momai ri ja'i komi pokainggu kami kana masimbayu pura ante tesa to nitulisi kami riara sura-sura. 12 Da'a nabia kami manguli koro kami mboto nasimbayu ante ira to nombatoiya koro ira mboto! Da'a nabia kami mompakasimbayu koro kami ante ira! Ira nositoiya mboto samba'a bo samba'a. Ira nantoiya koro ira nantuki panggita ira mboto. Natantumo nadoyo mpu'umo tau-tau etu! 13 Tapi kami da'a ntoto nasimbayu ante ira! Ane kami mombatoiya koro mboto kami da'a mombaliunaka to masipatona, sabana kami aga mombatoiya pokarajaa to niparasaya Alatala ka kami. Pade komi pura-pura ri Korintus nesua bagia mpokarajaa to niparasaya ka kami etu. 14 Da'a nasala ane kami mombatoiya asele mpokarajaa kami ri tatongo komi, sabana kamimo to nanggeni Kareba Belo ewa Kristus ka komi. 15 Kami da'a nombaliunaka to masipatona ante nanguli asele mpokarajaa tau ntanina asele mpokarajaa kami mboto. Tapi kami nanjarumaka pomparasaya komi kana mantambai maroso sampe kaopuna mantambai mabete asele mpokarajaa kami ri tatongo komi. 16 Ante iwetu kami mamala mapola mompatolele Kareba Belo sampe ri bagia-bagia ntanina meliu nggari bagia komi. Kami da'a madota mombatoiya koro kami mboto ewa asele mpokarajaa tau-tau ntanina. 17 Ewa to nitulisi riara Buku Nagasa iwe'i: "Tau to madota mombatoiya sangele, i'a kana mombatoiya nuapa to nipowia i Pue." 18 Sabana tau to nikonoa Alatala da'a tau to nombatoiya korona mboto tapi tau to nitoiya Alatala.
1 Sampesuwu-sampesuwu, kuperapi ala komi mosabara ante aku. Palogamo aku motesa madoyo sakedi we'i-we'i! Tapi nosabara mamimo komi ante aku! 2 Nasusa mpu'umo raraku mompekiri komi nasimbayu ewa kasusa rara Alatala mboto! Sabana komi nasimbayu ewa samba'a randoo to nagasa pokaingguna to nipopotingeaku ante Kristus. 3 Tapi nakini mpu'umo raraku, ne'e-ne'e komi raakala ntau sampe komi mana mompotowe Kristus ante mpu'u-mpu'u raramu nasimbayu ewa i Hawa niakala ule tempo nggaolu. 4 Sabana nikitaku ewa komi nasadia mantarima ante nasana rara tau-tau to narata ri ja'imu mompatolele kareba ka komi to nantesa Yesus ntanina, da'a Kareba i Pue Yesus to nipatolele kami ka komi. Komi nasadia mantarima kuasa ntanina nggari to nitarima komi nggari ja'i Nosa Nagasa nu Alatala. Pade komi nasadia mantarima kareba ntanina nggari Kareba Belo to nitarima komi nggari ja'i kami bopia. 5 Posabaramo komi ante aku e'i, sabana nantuki pombarataku aku e'i da'a ntoto nakura nggari tau-tau to nireke komi suro to neliu ntoto kata'una. 6 Naupa aku da'a nata'u notesa, pangginjaniku da'a ria kakurana. Etu bate-batena nipopokita kami ka komi riara mpengele-ngele bopia. 7 Tempo aku naria ri tatongo komi aku nompatolele Kareba Belo ka komi ante da'a ntoto nerapi gaji nggari ja'i komi. Aku nompakaede koroku nokarajaa ante paleku mboto ala manggeni belo ka komi pura-pura. Tapi nokuya komi nompekiri powiaku etu nasala? 8 Tempo aku nomai nantulungi komi aku nitanggu todea topomparasaya nggari ngata ntanina. Namala rauli aku nompakarugi ira ala mamala mantulungi komi. 9 Pade tempo aku ri tatongo komi ane naria to niparaluuku aku da'a nompakatomo komi. Sabana to niparaluuku etu nipakagana sampesuwu-sampesuwu topomparasaya to narata nggari Propinsi Makedonia. Aku bate-batena nompasimbuku ala ne'e mompakatomo komi mompekiri katuwuku. Pade aku bate-batena mompasimbuku iwetu. 10 Da'a ria samba'a ri Propinsi Akhaya to mamala mombatagi aku motesa mombatoiya pokaingguku etu! Tesaku e'i nakono sabana pepatuduki to nakonona nggari ja'i Kristus naria riara nta'iku! 11 Nuapa sabana aku notesa iwetu? Bara nipekiri komi aku da'a nompotowe komi? Etu da'a nakono! Ninjani Alatala mbotomo aku nompotowe komi! 12 Tapi aku bate-batena mantuki kabiasaku etu. Aku da'a merapi gaji nggari ja'i komi ala mompakalipo tesa tau ntanina to nangoa nanguli ira nokarajaa nasimbayu ante kami. 13 Tau-tau ewa etu aga suro-suro topodawa! Ira topokarajaa to nadenggona, aga tumoni-moni najadi suro-suro Kristus! 14 Kakonona pokainggu ira etu da'a nompakagumaa kami, sabana Magau nu Seta mboto namala mombabali korona majadi ewa malaeka to naremena. 15 Jadi da'a sangele to rapogumaa ane batua-batuana wo'u tumoni-moni majadi ewa suro-suro to nantuki dota Alatala. Kaopuna ira kana rabalasi ante pesuku to masipato ante powia ira. 16 Sangganipa kuperapi, ne'e rapekiri komi aku e'i tau nadoyo. Tapi naupa bara maria to nompekiri iwetu, palogamo aku mombatoiya koroku mboto sakedi ewa samba'a tau nadoyo. 17 Ante mombatoiya koroku mboto e'i aku da'a notesa nantuki parenta i Pue, tapi ewa samba'a tau nadoyo. 18 Kakonona nadeamo tau ntanina nombatoiya koro ira bo powia to nipowia ante karoso ira mboto. Jadi aku wo'u kana mombatoiya koroku sakedi. 19 Nantuki komi, komimo tau-tau to nanoto mpu'u, tapi komi aga nosabara ante tau-tau nadoyo! 20 Nanotomo etu sabana komi nosabara mpu'u ane maria topanggeniaka mompobatua komi, ane ira mompakaopu mbara-mbara komi, ane ira mombaakala komi, ane ira moinggu masombo-sombo ri ja'i komi, atau ane ira mombasapa lenje komi! 21 Ante naeya mata aku kana mompangaku ka komi, kami da'a nabia moinggu iwetu ri ja'i komi! Tapi ane maria ira to nabia mombatoiya koro ira mboto aku wo'u nabia! We'i-we'i aku notesa ewa tau nadoyo! 22 Iwenumo? Ira tau-tau to Yahudi? Aku wo'u tau to Yahudi! Ira tau-tau to Israel? Aku wo'u tau to Israel! Ira muli Abraham? Aku wo'u muli Abraham! 23 Ira batua Kristus? Pantesaku e'i ewa pantesa togila! Aku batua Kristus to neliu nggabelo nggari ira! Aku nokarajaa neliu nggatomo nggari ira! Aku nisuaraka riara tarunggu neliu nggaoso nggari ira! Aku nicambu neliu nggaja'a nggari ira, pade nadea ngganimo aku ntora namate! 24 Limangganimo aku niporo ntau to Yahudi, butu nggani tolumpulu sasio mbela. 25 Tolungganimo aku niboba nto Roma ante kayu. Sanggani aku nirempe ntau ante watu. Tolungganimo sakaya bete to nipesawiku natala rara ntasi, pade naria sanggani aku nalome rara ntasi saeo sambengi. 26 Nadea ngganimo aku nolumako nakawao. Riara mpolumakoku etu aku nandasa nombawote ue nanggabuntu, aku nandasa nantingayo parampo, aku nipandasa tau-tau to Yahudi bo tau-tau da'a to Yahudi wo'u. Aku nipandasa riara ngata pade ri karawa baina. Aku nandasa rara ntasi pade aku wo'u nipandasa tau-tau tumoni-moni nomparasaya i Pue Yesus. 27 Aku bate-batena nokarajaa ntomo sampe nadea ngganimo aku da'a nakapo noturu njambengi ntua. Aku naoro ta'i bo nabai tambolo, pade naoso nanta'amaka nanggoni. Aku naoso naleni bo nakura pakea. 28 Pade ntanina nggari etu pura-pura, eo-eo aku nakini raraku nompekiri pura-pura todea topomparasaya. 29 Ane maria nggari tatongo ira to nalente pomparasayana, aku wo'u mombarasai kalentena etu. Ane maria nggari ja'i ira to nanawu riara silaka, aku wo'u masusa raraku nompekiri ira. 30 Ane aku nipasu'u mombatoiya koroku, agina aku mombatoiya nuapa-nuapa to nompakanoto kalenteku. 31 Alatala, Uma nu Pueta Yesus, nangginjani aku da'a nodawa! I'amo to ratoiya sampe ri kasae-saena! 32 Tempo aku ri ngata Damsyik Gubernur to nipakakuasa Magau Aretas nompakau tantarana nanggatono bobaa bete ngata etu ala manjoko aku. 33 Tapi aku niulunjaka riara karanji lauro nggari saongu tilalaba ri tembo ngata mpaka ri sawalikuna. Ante iwetu aku nakabasaka nggariara mpale Gubernur etu.
1 Aku kana mompapola mombatoiya koroku. Naupa da'a ria gunana aku kana mompapola mantesa panggita to nikitaku bo pangginjani to nipopanjani Alatala ka aku. 2 Aku nosinjani ante samba'a topomparasaya Kristus. Sampulu patampae naliu i'a nionggotaka sampe ri suruga katolunjunjuna. Da'a ninjaniku ane korona mpu'u-mpu'u nateonggotaka atau etu aga panggitana, tapi Alatala nangginjani. 3 - 4 Kusili sangganipa tau etu nionggotaka sampe nesua ri suruga. Da'a ninjaniku ane korona mpu'u-mpu'u nionggotaka atau etu aga sangele panggitana, tapi Alatala nangginjani. Pade ri setu i'a nangepe tesa-tesa anu da'a namala rasowadaka, tesa anu da'a namala ratesa manusia. 5 Aku mombatoiya katuwu tau etu, tapi da'a katuwuku. Ewa katuwuku mboto aku aga mombatoiya nuapa-nuapa to mompopokita kalenteku. 6 Kakonona ane aku madota mombatoiya koroku, aku da'a noinggu nadoyo-doyo sabana tesa to kuuli etu kana makono. Tapi aku da'a madota mombatoiya katuwuku mboto ala ne'e sampe maria tau mompekiri aku meliupa nggari to nakonona. Ne'e-ne'e pompekiri ira meliu nggari pokaingguku to nikita ira riara nggatuwuku pade tesa to niepe ira nggari ja'iku. 7 Jadi aku niwai Alatala ka sangele to nompandasa aku nasimbayu ewa karui to nantosu koroku ala aku ne'e majadi masombo nggari panggita-panggita to nikitaku. Etumo sangele suro nggari ja'i Magau nu Seta to nompandasa aku ala aku ne'e majadi masombo. 8 Tolungganimo aku nerapi ka i Pue ante mpu'u-mpu'u raraku ala suro nggari ja'i Magau nu Seta etu rapopalai nggari ja'iku. 9 Tapi nangulimo Pue ka aku, "Naganamo ane naria towe beloku ri ja'imu, sabana neliu ngganoto kuasaku riara nggatuwumu ane komi nalente." Jadi etu sampe aku kana mombatoiya kalenteku etu, ala Kristus bate-batena manggalendu aku ante kuasana. 10 Jadi aku kana madamba-damba riara kalenteku. Pade aku wo'u madamba-damba ane aku rauli sinja'i, rapakasusa, rapandasa, bo mpu'u-mpu'u rapakaja'a sabana nomparasaya Kristus. Sabana tempo aku nalente-lente iwetu, aku naroso ante kuasa Kristus. 11 Sampesuwu-sampesuwu, aku e'i notesa ewa samba'a todoyo, tapi komimo to nompasu'u aku nowia iwetu! Kakonona komimo to masipato mombatoiya aku, sabana naupa aku e'i nireke samba'a tau to da'a ria gunana, aku da'a ntoto nakura ane rapoposisala ante ira to nireke komi suro-suro to neliu ntoto kata'una. 12 Sabana tandai-tandai to nompakanoto aku mpu'u-mpu'u samba'a suro i Pue Yesus to nakonona nipowiaku ante nosabara ri tatongo komi. Etumo aku nompowia tandai-tandai to nipogumaa bo kabaraka-kabaraka ri tatongo komi. 13 Pokarajaaku ri tatongo komi nasimbayu ewa pokarajaaku ri tatongo pura-pura topomparasaya ntanina. Aga sangele posisalana powiaku ri ja'i komi, etumo aku da'a nompakatomo komi mompekiri katuwuku. Naupa powiaku etu da'a nasala, tapi aku merapi ampu ri ja'i komi. 14 We'i-we'i nasadiamo aku momai mantalioda komi katolungganina, pade aku batena nopatuju da'a mompakatomo komi. Sabana to nipodotaku da'a mbara-mbara komi tapi towe komi! Da'a ngana-ngana to masipato mompasiromu kakalumana ka totu'ana, tapi totu'a to masipato mompasiromu kakalumana ka ana-ana ira! 15 Jadi aku kana mombawai ka komi pura-pura nuapa to naria ri ja'iku, nau koroku mboto wo'u. Ane aku mpu'u-mpu'u nompotowe komi iwetu, nokuya komi nakura nompotowe aku? 16 Ninjani komi mbotomo aku da'a sanggani nompakatomo komi mompekiri katuwuku. Tapi danaria to nanguli, "Nata'u mpu'u i Paulus. I'a nombaakala kita ala mombarata untu ka korona mboto ante mombabagiu kita!" 17 Iwenumo? Nariamo sanggani komi niakala tau-tau to nipakauku mpaka ri ja'i komi? Naria ira nangelo untu nggari ja'i komi? 18 Aku nompakau Titus mpaka ri ja'i komi nosanggani-nggani ante sampesuwuta ntanina etu. Nariamo sanggani i Titus nangelo untu ka korona mboto nggari ja'i komi? Natantumo da'a ria! Tapi ninjani komi mbotomo kami romba'a nosaongu rara pade pokainggu kami ri tatongo komi nasimbayu puramo. 19 Bara nipekiri komi patuju tesa kami e'i aga mebali ri ngayo komi! Tapi sampesuwu-sampesuwu to nipotoweku, etu da'a nakono! Ri ngayo Alatala mbotomo kami notesa ewa tau to nosaongu rara ante Kristus. Pade pura-pura nuapa to nitesa kami patujuna ala mompakaroso pomparasaya komi. 20 Sabana nakinimo raraku ane aku momai ri ja'i komi pokainggu komi da'a masimbayu ewa to nipokonoku, pade pokaingguku wo'u ri ja'i komi da'a masimbayu ewa to nipokono komi. Nakinimo raraku ane aku momai ri setu maria komi to mosinggarau, bara maria to masiriati, bara maria to marau rarana bo maria to aga mompekiri korona mboto. Nakinimo raraku maria tau manguli sinja'i bo mompakaja'a roa-roana, bara maria to masombo-sombo bo to mompakagado todea topomparasaya. 21 Nakinimo raraku ne'e-ne'e ane aku sangganipa momai ri ja'i komi, Alatala kana mompakaeya aku ri ngayo komi. Ne'e-ne'e aku mageo ri ngayo komi sabana madea nggari tatongo komi to nasilaka bopia da'apa najea nggari silaka-silaka. Bara maria to danogau sala ante tau da'a rongona mboto bara mowia to da'a ntoto masipato ewa to nabiasa nipowia ira bopia.
1 Tolunggani ka e'imo aku momai ri ja'i komi. Riara Buku Nagasa naria nitulisi iwe'i: "Butu-butu tesa pepangadu ri ja'i ntau kana ratakono romba'a atau tolumba'a sabi pade namala rareke nakono." 2 Tempo aku naria ri tatongo komi karongganina bopia nipopatoraku tau-tau to nowia silaka bo komi pura-pura. Pade we'i-we'i naupa aku nosinggakawao ante komi kupopatora bali ka komi iwe'i: ane aku momai ri ja'i komi mana ria ampuku ri ja'i ira to nowia silaka etu. 3 Komi madota manggita tandaina to mompakanoto aku mpu'u-mpu'u niposumba Kristus! Jadi etu kana rakita komi! Sabana ane Kristus mangontiaka komi I'a da'a nalente-lente, tapi I'a mpu'u-mpu'u nakuasa ri tatongo komi. 4 Tempo Kristus nipaku ri kayu parika sampe namate nalentemo I'a. Tapi we'i-we'i I'a batena natuwu ante kuasa nggari ja'i Alatala. Iwetu wo'u kami to nosaongu rara ante I'a. Kami aga manusia to nalentena. Tapi ane mantingayo komi kami kana makuasa nasimbayu ewa Kristus ante kuasa nggari ja'i Alatala. 5 Sampesuwu-sampesuwu, ujimo koro komi mboto ala manggita ane komi mpu'u-mpu'u natuwu ewa topomparasaya i Pue. Paresamo koro komi mboto. Natantumo Yesus Kristus naria riara nta'i komi? Ane etu da'a nanoto, batuana komi da'a mpu'u-mpu'u topomparasaya i Pue. 6 Tapi nisarumakaku kana manoto ka komi kami e'i mpu'u-mpu'u suro i Pue to nakonona. 7 Kami nosambaya ka Alatala ala komi ne'e mowia silaka. Patuju kami mosambaya iwetu da'a ala mompakanoto kami e'i mpu'u-mpu'u suro i Pue to nakonona. Tapi patuju kami ala komi batena mowia to nanoana. Jadi ane kami rareke ntau da'a suro i Pue to nakonona, da'a ria mokuya! 8 Sabana kami da'a namala mompowia sangele to mangewa to nakonona. Tapi kami aga mompowia to nakonona. 9 Nadamba mpu'u rara kami ane kami nalente bo komi naroso. Jadi kami bate-batena mosambaya ala pokainggu komi majadi mabelo pura. 10 Etu sampe aku nantulisi tesa-tesa e'i ka komi tempo kita nosinggakawao. Patujuku ala ane aku momai ri ja'i komi ri setu da'a paraluu aku motesa mako'o mompakabelo pokainggu komi ante kuasa to niwai i Pue ka aku. Sabana kuasa etu niwaina ka aku ala mompakaroso komi da'a ala mombagero komi. 11 Jadi sampesuwu-sampesuwuku, pakadambamo rara komi. Pasimbukumo mompakabelo pokainggu komi. Tarimamo pepatudukiku e'i! Komi kana matuwu ante mosaongu pekiri bo mosaongu rara, pade mosinggabelo samba'a bo samba'a. Pade Alatala, pu'u nu towe bo katuwua nabelo kana mosanggani-nggani ante komi. 12 Posipakasampemo tabe samba'a bo samba'a ante towe. 13 Pade tarimamo tabe nggari ja'i pura-pura topomparasaya ri se'i. 14 Perapi Pue Yesus Kristus mombagane komi. Perapi Pue Alatala mompotowe komi, pade perapi Nosa Nagasa nu Alatala mosanggani-nggani ante komi pura-pura. Tabe nggari ja'iku, Paulus
1 - 2 Sura e'i nggari ja'iku Paulus, suro i Pue Yesus, ka topomparasaya-topomparasaya i Pue Yesus ri Propinsi Galatia. Tabe nggari ja'iku bo nggari ja'i pura-pura topomparasaya to nosanggani ante aku ri se'i. Aku e'i najadi suro i Pue da'a nggari dota nu manusia pade da'a wo'u manusia to nangonggotaka aku. Tapi aku nionggotaka Yesus Kristus mboto bo Umata Pue Alatala to nompakatuwu I'a bali nggari kamatena. 3 Perapi Umata Alatala bo Pue Yesus Kristus mombagane komi bo mombawai katuwua mabelo ka komi. 4 Pue Yesus nombawai korona rapatesi mantolo silakata nantuki dota Umata Alatala ala I'a mamala mombakabasaka kita nggari pura-pura kaja'ana ri dunia we'i-we'i. 5 Rabila bo ratoiyata Alatala sampe ri kasae-saena. Amin! 6 Da'a nesua ri akalaku iwenu komi nasasinta gaga nompalasi Pue Alatala to nompokio komi majadi todeana nggari towe belo Kristus pade nantuki pepatuduki tau ntanina to niuli ira "kareba belo." 7 Kakonona da'a ria "kareba belo" ntanina. Aga naria tau-tau nompakagado komi ante pepatuduki ira to nasala. Ira aga madota mompakadenggo Kareba Belo to nantesa Kristus. 8 Tapi kuuli ka komi, nau kami mboto atau malaeka nggari suruga mompatolele pepatuduki to da'a nasimbayu ante Kareba Belo to nipatolele kami ka komi bopia, nasurukawumo i'a! 9 Tempo kami danaria ri tatongo komi bopia niuli kami mami iwetu, pade we'i-we'i sangganipa kuuli, ane maria tau mompatolele pepatuduki to da'a nasimbayu ante Kareba Belo to nitarima komi, nasurukawumo i'a! 10 Jadi iwenumo, sampesuwu-sampesuwu? Ante nanguli iwetu aku miki ratoiya ntau? Etu mpu'u-mpu'u da'a nakono! Aku aga madota ratoiya Alatala. Bara nipekiri komi aku aga madota mompakadamba rara manusia. Tapi etu da'a nakono, sabana ane aku danompasimbuku mompakadamba rara manusia aku da'a masipato majadi batua Yesus Kristus. 11 Sampesuwu-sampesuwu, kana ranjani komi Kareba Belo to nipatoleleku etu da'a Kareba Belo nggari ja'i manusia. 12 Aku da'a nantarima Kareba Belo etu nggari ja'i manusia, pade da'a wo'u manusia to nompatuduki etu ka aku. Tapi Yesus Kristus mbotomo to nompopanjani isi Kareba Belo etu ka aku. 13 Natantu niepe komimo tesa ewa katuwuku bopia tempo aku danantuki agama Yahudi. Ante da'a ria ampu aku nompandasa topomparasaya i Pue Yesus. Aku batena nompasimbuku mompakaropu pomparasaya ira. 14 Aku neliu nggaraji nggari pura-pura sanggatuwuku to Yahudi nantuki Atura-atura agama Yahudi. Aku mpu'u-mpu'u naria dotaku nantuki ada-ada ntotu'a kami nggaolu. 15 Tapi tempo aku da'apa nesuwu, ante towe belona Alatala nompelisi aku bo nompokio aku majadi surona. 16 I'a nompopanjani Anana i Pue Yesus ka aku ala aku mamala mompatolele Kareba i Pue Yesus ka tau-tau da'a to Yahudi. Tempo aku nisuro Alatala manggeni Kareba etu aku da'a nalau ri ja'i manusia merapi rapatuduki. 17 Aku da'a wo'u nalau mpaka ri ngata Yerusalem manggita ira to najadi suro i Pue Yesus nokolu nggari aku. Tapi aku nalau mpaka ri tana Arab, pade nggari setu aku nanjili bali mpaka ri ngata Damsyik. 18 Tolumpae pade kaliuna aku nalau mpaka ri ngata Yerusalem manggita Petrus. Aku neto'o ri ja'ina aga sampulu limambengi kasaena. 19 Tapi aku da'a nanggita suro-suro i Pue Yesus ntanina, aga Yakobus tua'i i Pue. 20 Parasayamo tesaku e'i! Ri ngayo Alatala mboto aku manguli, tesa to nitulisiku e'i nakono! Aku da'a nodawa! 21 Naopu etu pade aku nalau mpaka ri Bagia Siria bo Kilikia. 22 Tapi sampe ri tempo etu topomparasaya Kristus ri Bagia Yudea da'apa nangginjani lenjeku. 23 Ira aga nangepe kareba to nanguli, "Tau to mpu'u-mpu'u nompandasa kita topomparasaya bopia we'i-we'i nompatolele Kareba Belo ewa pomparasaya ka i Pue Yesus to madota rapakaropuna bopia!" 24 Pade ira nantoiya Alatala sabana nuapa to najadi ante aku.
1 Pade sampulu patampae kaliuna nalau wo'umo aku mpaka ri ngata Yerusalem nosanggani ante i Barnabas. Pade aku wo'u nanggeni i Titus. 2 Aku nalau mpaka ri Yerusalem sabana naria tesa nggari ja'i Alatala nompakau aku malau. Sangga naratapa ri setu aku nasiromu aga ante topanggeniaka-topanggeniaka topomparasaya, pade nipakanotoku ka ira isi Kareba Belo to nipatoleleku ka tau-tau da'a to Yahudi. Patujuku ala pepatudukiku ne'e rasalai sampe da'a ria gunana bagoku mompatolele Kareba Belo, nabeloka to nipowiaku bopia, nabeloka to danipowiaku we'i-we'i. 3 Tapi ira nantakono pepatudukiku. Etu nanoto sabana Titus, to Yunani to nosanggani ante aku ri setu, da'a nipasu'u ira rasuna 4 naupa naria tau ntanina nompasu'u. Ira tau to nanguli ira topomparasaya i Pue Yesus, tapi ira nodawa. Ira nesua nggalino ri polibu etu ala manggita iwenu pokaingguta to natekabasaka nggari Atura-atura agama Yahudi sabana kita nosaongu rara ante Yesus Kristus. Patuju ira ala kita kana matundu riara Atura-atura etu. 5 Tapi kami da'a ntoto nekou ri ja'i ira, nau aga sampalai, ala kakono nu Kareba Belo kana maria ri ja'i komi. 6 Tapi topanggeniaka-topanggeniaka topomparasaya to nireke nalanga katuwuna nasituju ante Kareba Belo to nipatoleleku. Da'a ria nuapa-nuapa to nitambai ira riara Kareba etu. (Ane ira nalanga katuwuna atau da'a, nasimbayu riara mpanggitaku, sabana Alatala da'a nanggita lenje.) 7 Tapi nanotomo ka ira aku niparasaya Alatala nanggeni Kareba Belo ka tau da'a to Yahudi nasimbayu ewa Petrus niparasaya Alatala nanggeni Kareba Belo ka tau to Yahudi. 8 Sabana Alatala nombawai pompakule ka Petrus majadi topanggeni Kareba Belo ka tau to Yahudi, pade I'a wo'u nombawai pompakule ka aku majadi topanggeni Kareba Belo ka tau da'a to Yahudi. 9 Tempo ira Yakobus, Petrus bo Yohanes, to nireke topanggeniaka topomparasaya i Pue Yesus ri Yerusalem, nanggita kabelo nu Alatala to niwai ka aku, etumo majadi surona, ira nosisoko pale ante aku bo i Barnabas ewa tandaina kami pura-pura roa sampokarajaa nanggeni Kareba Belo. Kami pura-pura nasituju ala aku ante i Barnabas kana manggeni Kareba Belo ka tau da'a to Yahudi bo ira manggeni Kareba Belo ka tau to Yahudi. 10 Aga sangele niperapi ira, etumo ala kami mantora mantulungi tau napakasi ri Yerusalem. Pade etumo bago to nipobete raraku bo nipowiaku ante mpu'u-mpu'u. 11 Tempo i Petrus narata ri ngata Antiokhia aku nangewa i'a ngga mata-mata sabana pokaingguna ri setu nasala. 12 Tempo i'a lako narata i'a nanggoni mpasanggani-nggani ante topomparasaya da'a to Yahudi. Tapi naratapa bara sakuya mba'a tau to nisuro Yakobus, nouramo i'a nggari ja'i ntopomparasaya da'a to Yahudi, pade mana madota manggoni mpasanggani ante ira, sabana i'a naeka raontiaka topomparasaya to Yahudi to nanguli kita kana rasuna ala rapakasalama. 13 Pade topomparasaya to Yahudi ntanina wo'u nompasiala pokainggu Petrus to nadenggona sampe i Barnabas mboto natikeni nantuki pokainggu ira etu. 14 Tapi tempo aku nanggita pokainggu ira etu da'a nasipato ante pepatuduki to nakono nggari Kareba Belo, aku nangontiaka i Petrus ri ngayo ira pura-pura. Niuliku, "Komi samba'a tau to Yahudi, tapi komi mana nantuki ada nto Yahudi. Komi aga natuwu nantuki kabiasa ntau da'a to Yahudi. Ane iwetu, nokuya komi madota mompasu'u tau-tau da'a to Yahudi mantuki ada-ada nto Yahudi?" 15 Sampesuwu-sampesuwu, Petrus ante aku tau to Yahudi mami nggari pesuwu kami, da'a tau da'a to Yahudi to da'a nantuki Atura-atura agama. 16 Tapi naupa iwetu ninjani kami manusia da'a nireke manoa riara mpanggita Alatala ante mantuki Atura-atura agama, tapi ante momparasaya Yesus Kristus. Kami mboto nomparasaya Yesus Kristus ala majadi manoa riara mpanggita Alatala sabana pomparasaya kami ri ja'i Kristus, da'a sabana mantuki Atura-atura agama. Sabana ante mantuki Atura-atura agama da'a ria samba'a mamala majadi manoa riara mpanggita Alatala. 17 Kami topomparasaya to Yahudi manjarumaka majadi manoa riara mpanggita Alatala sabana mosaongu rara ante Kristus. Tapi ante nowia iwetu nanotomo kami topombaliunaka Atura-atura agama Yahudi nasimbayu ewa ira tau da'a to Yahudi to da'a nantuki Atura-atura agama etu. Jadi iwenu? Etu batuana Kristus nantulungi tau nowia silaka? Etu da'a ntoto nakono! 18 Sabana ane aku manjili manjarumaka Atura-atura agama to nikabasakakumo, pade manguli ante mantuki Atura-atura etu aku mamala majadi manoa riara mpanggita Alatala, nanotomo aku topombaliunaka Atura-atura. 19 Sabana tempo aku danantuki Atura-atura agama, nanotomo ka aku da'a kupakule majadi manoa riara mpanggita Alatala ante mantuki Atura-atura agama, sabana da'a kupakule mantuki Atura-atura etu. Jadi nenontomo aku manjarumaka Atura-atura agama ala aku mamala matuwu ante mantuki nuapa to nikonoa Alatala. Tempo Kristus namate ri kayu parika, riara mpanggita Alatala aku wo'u namate nosanggani-nggani ante I'a, sabana I'a namate nanjaliku aku. 20 Jadi namala rauli iwe'i: mana aku to natuwu, tapi Kristus natuwu riara nta'iku. Pade katuwu to nabou to nirasaiku we'i-we'i nggari pomparasayaku ka Ana nu Alatala to nompotowe aku bo nombawai korona rapatesi manjaliku aku. 21 Aku da'a nompoara towe belo nu Alatala etu. Sabana ane kita mamala majadi manoa riara mpanggita Alatala ante mantuki Atura-atura agama, etu batuana kamate Kristus da'a ria gunana!
1 Umba komi to Galatia to nabodo, isema to nanjalipuyo komi sampe komi mana madota mantuki pepatuduki to nakonona? Niepe komi mbotomo tesaku bopia nompakanoto iwenu asele nu kamate Yesus Kristus ri kayu parika. 2 Aga sangele to madota kunjani nggari ja'i komi. Komi nantarima Nosa Nagasa nu Alatala ante nantuki Atura-atura agama atau ante nangepe bo nomparasaya Kareba Belo? Natantumo ante nangepe bo nomparasaya Kareba Belo! 3 Jadi nokuya komi nadoyo-doyo? Nompamulamo komi natuwu ewa topomparasaya i Pue Yesus ante kuasa nggari ja'i Nosa Nagasa nu Alatala. Iwenu sampe we'i-we'i komi nompasimbuku majadi nagasa ante pompakule komi mboto? 4 Iwenu? Da'a ria gunana pura-pura nuapa to nirasai komi etu? Natantumo naria pura gunana! 5 Alatala nompopana'u Nosana to Nagasa ka komi ante najoi rarana bo I'a nompowia kabaraka-kabaraka ri tatongo komi. Iwenumo? Etu pura-pura nipowiana sabana komi nantuki Atura-atura agama? Natantu da'a ntoto! Tapi etu nipowiana sabana komi nangepe bo nomparasaya Kareba Belo! 6 Etu nasimbayu ewa tesa to nitulisi riara Buku Nagasa ewa Abraham iwe'i: "Abraham nomparasaya Alatala, pade nggari pomparasayana etu i'a nireke Alatala tau nanoa." 7 Jadi sampesuwu-sampesuwu, miki ranjani komi tau-tau to natuwu ante nomparasaya Alatala, iramo to mpu'u-mpu'u nireke muli Abraham, sabana ira wo'u nomparasaya nasimbayu ewa i'a. 8 Ninjani Alatala nggari lamba pamulana patujuna mantarima tau da'a to Yahudi majadi manoa riara mpanggitana ane ira momparasaya I'a. Jadi I'a wo'u nokolu nompakanoto Kareba Belo ka Abraham ewa to nitulisi riara Buku Nagasa iwe'i: "Nggari mulimu banepia, pura-pura manusia ri dunia kana mombarata rasi nggari ja'iku." 9 Abraham nomparasaya pade i'a niwai Alatala ka rasi. Jadi iwetu wo'u pura-pura tau to natuwu ante nomparasaya kana rawai Alatala ka rasi nasimbayu ewa Abraham. 10 Isema-sema to nanjarumaka majadi manoa riara mpanggita Alatala ante mantuki Atura-atura agama, iramo to nijanjiaka Alatala. Etu nanoto sabana naria tesa riara Buku Nagasa to nanguli iwe'i: "Isema-sema da'a natutu nantuki pura-pura parenta to nitulisi riara Atura-atura agama, i'amo to nijanjiaka Alatala." 11 Nanoto mpu'u da'a ria tau to nireke Alatala nanoa ante mantuki Atura-atura agama sabana naria tesa ntanina ri Buku Nagasa to nanguli iwe'i: "Tau to najadi nanoa riara mpanggita Alatala ante nomparasaya, i'amo to matuwu mabelo sampe ri kasae-saena." 12 Tapi to napokona riara Atura-atura agama da'a pomparasaya. To napokona matutu matundu riara Atura agama. Sabana riara Buku Nagasa naria tesa iwe'i: "Isema-sema to natutu nantuki Atura-atura agama, iramo to matuwu mabelo." 13 Kakonona kita pura-pura masipato rajanjiaka Alatala, sabana kita da'a natutu nantuki Atura-aturana. Tapi Kristus nombakabasaka kita nggari pejanjiaka etu, sabana naria tesa riara Buku Nagasa to nanguli iwe'i: "Isema-sema to namate ri kayu parika, i'amo to nijanjiaka Alatala." Jadi tempo Kristus namate ri kayu parika I'a nijanjiaka nanjaliku kita. 14 Patuju Yesus Kristus nombawai korona rapatesi iwetu ala rasi to niwai Alatala ka Abraham nggaolu mamala wo'u rawai ka tau-tau da'a to Yahudi to momparasaya I'a. Ante iwetu kita pura-pura mamala rapesua Nosa Nagasa to nijanji Alatala. 15 Sampesuwu-sampesuwuku, kuala saongu jonjo nggari katuwuta eo-eo. Sura pojanji to niteke manusia da'a namala rapakalipo ntau atau nitambai isina. 16 Wa'a wo'u ante pojanji Alatala. I'a nombawai pojanjina ka Abraham bo mulina. Riara Buku Nagasa da'a nitulisi "bo ka muli-mulimu," batuana ka muli Abraham to nadea. To nitulisi, "bo ka mulimu," batuana ka muli Abraham samba'a lau, etumo Kristus. 17 Patujuku iwe'i: Pojanji Alatala ante Abraham nipakaasa Alatala mboto. Jadi Atura-atura agama Yahudi to niwai patatu tolumpulu mpae nggapurina da'a namala mompakalipo pojanjina ante Abraham etu sampe pojanji etu mana nalaku. Pojanji Alatala kana madupa pura. 18 Ane rapana Abraham nantarima rasi sabana nantuki Atura-atura agama, etu batuana da'a rasi nggari pojanji Alatala, etu aga nggari powiana mboto. Tapi kakonona nggari pojanji etumo sampe Abraham nombarata rasi. 19 Jadi ane iwetu nuapa patuju nu Atura-atura agama? Atura-atura agama nitambai nggapurina ala mompakanoto manusia nombaliunaka dota Alatala. Pade Atura-atura etu nalaku sampe karata nu muli Abraham to niboto riara pojanji Alatala ka Abraham nggaolu, etumo Yesus Kristus. Alatala nompakau malaeka-malaekana manggeni Atura-atura agama ka i Musa to najadi tau ntongo nompapola Atura-atura etu ka manusia. 20 Samba'a tau ntongo niparaluu ane maria robingga. Tapi tempo Alatala nompowia pojanjina ante Abraham, nipowiana njamba'ana, da'a ria malaeka atau tau ntongo. 21 Jadi ane iwetu Atura-atura agama nosisala ante pojanji-pojanji Alatala? Natantumo da'a! Sabana ane rapana naria atura-atura to namala ratukita sampe kita mombarata katuwua mabelo sampe ri kasae-saena, etu batuana kita mamala rareke Alatala manoa ante mantuki Atura-atura agama. 22 Tapi tesa to naria riara Buku Nagasa nompakanoto pura-pura manusia batena nasilaka riara mpanggita Alatala. Patujuna ala aga tau to nomparasaya Yesus Kristus to mamala mantarima nuapa to nijanji Alatala, da'a tau to natundu riara Atura-atura agama. 23 Tempo nokolu da'apa ninjanita momparasaya ka i Pue Yesus, kita danisoko nu Atura-atura agama. Kita ewa niwala sampe marata tempona Alatala mompakanoto ka kita iwenu momparasaya ka i Pue Yesus ala kita mamala majadi manoa riara mpanggitana. 24 Jadi Atura-atura agama etu nasimbayu ewa topanggatono kita sampe karata Kristus ala kita mamala majadi manoa riara mpanggita Alatala ante momparasaya Kristus. 25 Tapi we'i-we'i kita mana nikatono Atura-atura agama sabana naratamo Kristus pade kita nomparasayamo. 26 Jadi sampesuwu-sampesuwu, komi pura-pura najadi ana nu Alatala sabana komi nomparasaya Yesus Kristus. 27 Komi pura-pura nidiu ewa tandaina komi topomparasaya Kristus. Jadi komi nantarima inggu-inggu Kristus riara nggatuwu komi. 28 Riara mpanggita Alatala mana ria posisalana ri olo ntau Yahudi bo tau da'a to Yahudi, batua bo tau da'a batua, langgai bo besi. Kita pura-pura nasimbayu riara mpanggitana sabana kita nosaongu rara ante Yesus Kristus. 29 Jadi ane komi bagia Kristus komi wo'u muli Abraham. Pade masipato komi mantarima nuapa to nijanji Alatala ka Abraham.
1 To nipatujuku iwe'i: rapana maria samba'a muli ntau nasugi. Tempo i'a danangana katuwuna nasimbayu ante samba'a batua, naupa i'a to masipato mantarima pura-pura kakalumana nu umana banepia. 2 I'a nasimbayu ewa batua sabana i'a nikatono ntau to nipakatantu umana, bo kakalumanana niurusi ntau to nipakakuasa sampe marata tempona to nipakatantu umana. 3 Iwetu wo'u ante kita. Katuwuta nokolu nasimbayu ewa katuwu ngana. Kita batena nisoko nu ada-ada bo atura-atura to naria riara dunia e'i. 4 Tapi sangga naratamo tempo to nipakatantu Alatala, I'a nombasuro Anana marata ri dunia. Anana etu nipoana samba'a besi, pade I'a natundu riara Atura-atura agama. 5 I'a nisuro Alatala manggabasaka kita to nisoko Atura-atura agama, ala kita mamala raonggotaka majadi ana nu Alatala. 6 Alatala nompopana'u Nosa Nagasa nu Anana riara nta'ita sabana kita najadi anana. Pade nggari pekeniaka Nosa Nagasa riara nta'ita kita nanguli ka Alatala, "O, Yuma, Komi Umaku!" 7 Jadi sampesuwu-sampesuwu, komi mana najadi batua, tapi komi najadi ana nu Alatala. Pade ane komi anana natantumo komi masipato wo'u mantarima pura-pura nuapa to nipakasadiana ka anana. 8 Nokolu tempo komi da'apa nangginjani Alatala, komi najadi batua nu pue-pue ntanina to nireke komi Alatala, tapi kakonona da'a ntoto Alatala. 9 Tapi we'i-we'i komi nangginjani Alatala--atau nabelopa rauli Alatala nangginjani komi. Jadi nokuya komi madota manjili manjoko ada-ada bo atura-atura to da'a nakuasa mantulungi komi majadi manoa riara mpanggita Alatala? Nokuya komi madota matundu bali riara ada-ada bo atura-atura etu? 10 Nokuya komi nantora eo-eo mpopali, wula-wula to natantu, tempo-tempo ntanina to natantu bo mpae-mpae to nipakatantu riara Atura-atura agama? 11 Nakini mpu'u raraku ne'e-ne'e da'a ria gunana katiti nu iniku nompatuduki komi bopia! 12 Sampesuwu-sampesuwu, aku merapi ante mpu'u-mpu'u raraku ala komi mompasiala pokaingguku. Sabana naupa aku tau to Yahudi aku mana mantuki ada-ada nto Yahudi ala majadi nasimbayu ewa komi tau da'a to Yahudi. Tempo aku nosanggani ante komi da'a sanggani komi nowia sala ri ja'iku. 13 Ninjani komi mbotomo pamulana aku nompatolele Kareba Belo ka komi sabana aku naju'a. 14 Tapi naupa ju'aku etu nompakarunggu rara komi, aku da'a ntoto nipoara komi atau niporau rara komi. Tapi aku nitarima komi ewa malaeka Alatala, atau ewa Yesus Kristus mboto. 15 Tempo etu nasana mpu'u rara komi ri ja'iku. Tapi we'i-we'i nokuya komi mana nasana rara ri ja'iku? Nakono mpu'u tesaku e'i! Bopia komi mpu'u-mpu'u nasadia mantulungi aku. Ane namala nau mata komi mboto rasu'i rawai ka aku. 16 Tapi iwenumo we'i-we'i? Aku nireke komi balimu sabana aku nantesa ka komi nuapa to nakonona? 17 Tau-tau ntanina etu nompasimbuku ante mpu'u-mpu'u mangala rara komi, tapi patuju ira da'a nabelo. Ira aga madota mompopoga'a komi ante aku ala komi mpu'u-mpu'u mantuki ira. 18 Kakonona nabelo ane tau nompasimbuku ante mpu'u-mpu'u mangala rarata. To napokona patuju ira nabelo. Wa'a wo'u aku, pade da'a aga tempo aku nosanggani ante komi. 19 Ana-anaku to nipotoweku, nasimbayu ewa samba'a besi nandasa mpu'u tempo noana, iwetu wo'u aku nandasa nompekiri komi. Pade aku kana mandasa iwetu sampe inggu-inggu Kristus mpu'u-mpu'u naria nikita riara nggatuwu komi. 20 Nalentora mpu'u raraku mosanggani-nggani ante komi we'i-we'i ala aku mamala mombabali suaraku to naro'o majadi suara nalente, sabana nasudumo raraku mompekiri komi! 21 Umba komi to madota matundu riara Atura-atura agama ala majadi manoa riara mpanggita Alatala! Iwenu? Da'a nanoto ka komi nuapa to naria riara Atura-atura agama? 22 Ri setu nitulisi naria romba'a ana Abraham, samba'a nipoana Hagar, besi to najadi batua, bo samba'apa nipoana Sara, rongo Abraham to da'a najadi batua. 23 Ana nu besi to najadi batua nipoana nantuki dota manusia. Tapi ana nu besi to da'a najadi batua nipoana nantuki pojanji Alatala ka Abraham. 24 - 25 Tesa e'i najadi sangele porapa ka kita. Romba'a besi etu niporapaka ewa rongele pojanji. Hagar nirapaka ewa pojanji to niwai Alatala ka i Musa ri bunggu Bulu Sinai ri tana Arab. I'a nirapaka ewa tau to nantuki Atura-atura agama ala mompasimbuku majadi manoa riara mpanggita Alatala. Sabana pura-pura tau to nompasimbuku mantuki Atura-atura agama natuwu ewa batua, ira natundu riara Atura-atura etu nasimbayu ewa samba'a batua natundu ri ja'i madikana. Pade i Hagar namala wo'u nirapaka ewa ngata Yerusalem ri dunia e'i, sabana pue ngata Yerusalem natuwu ewa batua, ira aga natundu riara Atura-atura agama. 26 Tapi i Sara nirapaka ewa Yerusalem ri suruga. I'a namala nirapaka ewa tau to nomparasaya Alatala ala majadi manoa riara mpanggitana. Sara etu to nipoindota sabana kita da'a nipobatua Atura-atura agama nasimbayu ewa Sara da'a najadi batua. 27 Pamulana Sara nagampa, tapi kaopuna i'a noanaka samba'a ngana nantuki pojanji Alatala ka Abraham. Etu nasimbayu ewa tesa to nitulisi riara Buku Nagasa iwe'i: "Kana madamba-damba besi to nagampa, to da'a sanggani noana. Kana meliu nggadamba, komi to da'a sanggani nombarasai ju'a mpoana, sabana besi to nipalasi rongona kana meliu nggadea anana nggari besi to naria rongona." 28 Sampesuwu-sampesuwu, nasimbayu ewa Ishak to nipoana nantuki pojanji Alatala, komi wo'u najadi ana-ana Alatala nantuki pojanjina. 29 Tapi tempo nggaolu Ismael, to nipoana nantuki dota manusia, nompandasa tua'ina Ishak to nipoana nantuki dota Nosa Nagasa nu Alatala. Iwetu wo'u we'i-we'i, kita to nanjarumaka pojanji Alatala nipandasa ntau to nipobatua Atura-atura agama. 30 Tapi nuapa to niuli riara Buku Nagasa? "Popalaimo besi to najadi batua etu ante anana, sabana anana etu da'a mamala mombarata bagia nggari kakalumana umana nosanggani-nggani ante ana to nipoana besi to da'a najadi batua." 31 Jadi sampesuwu-sampesuwu, kita da'a nasimbayu ewa ana nu besi to najadi batua. Kita nasimbayu ewa ana nu besi to da'a najadi batua, sabana kita da'a nipobatua Atura-atura agama, tapi kita nomparasaya pojanji Alatala.
1 Kristus nanggabasaka kita nggari Atura-atura agama ala kita mpu'u-mpu'u makabasaka. Jadi pakaroomo rara komi ala komi batena makabasaka. Ne'e mana madota rapobatua. 2 Toramo! Aku, Paulus, nanguli ka komi, ane komi mompasimbuku majadi manoa riara mpanggita Alatala ante rasuna nantuki Atura-atura agama Yahudi, etu batuana Kristus da'a ntoto ria gunana ka komi! 3 Sangganipa kupopatora ka komi to madota rasuna, komi kana masipato mantuki pura-pura Atura agama ntanina wo'u. 4 Ane komi mompasimbuku majadi manoa riara mpanggita Alatala ante mantuki Atura-atura agama, noga'amo komi nggari ja'i Kristus. Nakawaomo komi nggari towe belo nu Alatala. 5 Tapi sampesuwu-sampesuwu, ante petulungi Nosa Nagasa nu Alatala kita nanjarumaka majadi manoa riara mpanggita Alatala ante momparasaya i Pue Yesus. Pade etumo to nipopeata ante mpu'u-mpu'u rarata. 6 Ane kita nosaongu rara ante Yesus Kristus, da'a ria posisalana ane kita nisuna atau da'a nisuna. To napokona, momparasaya i Pue Yesus. Pade pomparasayata kana rapopokitata ante mompotowe tau ntanina. 7 Bopia pomparasaya komi nantambai eo nantambai naroso. Jadi iwenu sampe we'i-we'i komi mana madota mantuki pepatuduki to nakonona? Isema to nombalawa komi? 8 Natantumo powia ira etu da'a nggari Alatala to nompokio komi majadi todeana. 9 Pepatuduki ira to nasalana etu nasimbayu ewa ragi, sabana nau aga sakedi lau ragi rapake, pura-pura gando to rapowia roti kana mebombo. 10 Tapi niparasayaku komi da'a mantuki pepatuduki ntanina, sabana kita nosaongu rara ante i Pue. Pade niparasayaku isema-sema to nompakagado pekiri komi kana rapawela pesuku Alatala. 11 Sampesuwu-sampesuwu, naria tau to nanguli aku mboto danompatuduki ada mposuna kana ratuki ala majadi manoa riara mpanggita Alatala. Tapi tesa ira etu da'a ntoto nakono! Sabana ane aku danompatuduki iwetu, natantumo aku mana rapandasa ntau to Yahudi! Ane aku danompatuduki iwetu, pepatudukiku ewa kamate i Pue Yesus ri kayu parika mana mompakaju'a rara ira to Yahudi! 12 Agina tau-tau to nompakagado pekiri komi etu manggabiri koro ira mboto! 13 Sampesuwu-sampesuwu, komi nipokio Alatala ala rakabasaka nggari Atura-atura agama. Tapi ne'e sampe etu majadi loga ka komi mantuki mpengele-ngele dota rara to naja'a. Tapi komi kana mosipotowe samba'a bo samba'a bo mositulungi, 14 sabana pura-pura Atura agama nesua riara parenta to nanguli iwe'i: "Potowemo sanggamanusiamu ewa komi nompotowe koromu mboto." 15 Tapi ane komi mosinggarau bo mosipoju'a ka rara, pakabelo-belo. Ne'e sampe komi mosipakaropu pomparasaya! 16 Patujuku iwe'i: komi kana matuwu mantuki dota Nosa Nagasa nu Alatala. Ne'e aga matuwu mantuki dota rara to naja'a. 17 Sabana dota rara naja'a nangewa dota Nosa Nagasa, bo dota Nosa Nagasa nangewa dota rara to naja'a. Rongele etu nosiewa sampe komi da'a namala manggawia nuapa to nipodota komi mboto. 18 Tapi ane komi nikeniaka Nosa Nagasa nu Alatala, komi da'a natundu riara Atura-atura agama. 19 Nanotomo pokainggu ntau to nantuki dota rara to naja'a. Jonjona iwe'i: ira nogau sala ante tau da'a rongo ira mboto, ira nowia to natantoru bo da'a nasipato. 20 Ira nepue ka pue-pue ntanina bo ira nombadoti tau ntanina. Ira nosipobali ante tau ntanina, ira nosibaga, ira nasiriati, ira nasasinta narau bo ira aga nompekiri koro ira mboto. Ira aga nangelo posinggarau sampe nosinjabingga. 21 Ira naino ka mbara-mbara ntau, ira nalangu-langu bo nasiromu nanggoni mpebasa, pade nadea wo'u pokainggu ira ntanina ewa etu. Jadi ewa to niuliku ka komi bopia, sangganipa kupopatora ka komi, tau tunggai noinggu iwetu da'a ntoto mamala majadi todea riara Poparenta nu Alatala. 22 Tapi ane tau-tau to nikeniaka Nosa Nagasa nu Alatala, iwe'imo inggu ira: ira nosipotowe, ira nadamba-damba bo nasana rara. Ira nosabara bo nalusu bo nabelo rara ante tau ntanina. Ira namala raparasaya, 23 ira naede rara, pade ira nanta'amaka dota koro ira mboto. Da'a ria Atura-atura agama to nombatagi pokainggu-pokainggu ewa etu. 24 Isema-sema to nosaongu rara ante Kristus nompakalipo inggu-ingguna to naja'a ante dota rarana to naja'a bo dota rarana to da'a namala nipampa. 25 Ane kita nosaongu rara ante Nosa Nagasa nu Alatala masipato kita matuwu mantuki dota Nosa Nagasa etu wo'u. 26 Ne'e kita malanga rara atau mosipoju'a ka rara, bo ne'e kita masiriati samba'a bo samba'a.
1 Sampesuwu-sampesuwu, ane komi manggita roamu mompowia silaka, komi to natuwu nantuki Nosa Nagasa nu Alatala kana manggeni i'a manjili ri jala to nakonona. Tapi kawiamo etu ante nalusu rara, bo mainga ala ne'e sampe komi wo'u mawela pesoba. 2 Positulungimo komi samba'a bo samba'a ala ante iwetu komi mantuki parenta Kristus. 3 Ane samba'a tau nompekiri koronapa neliu nggabelo nggari roana, tanusi da'a, i'a aga nombabagiu korona mboto. 4 Tapi nabelopa butu-butu mba'a momparesa pokaingguna mboto ala manggita ane etu nabelo atau da'a. Ane pokaingguna nabelo, mamala i'a madamba-damba mompekiri etu. Tapi ne'e i'a mompoposisala pokaingguna etu ante pokainggu tau ntanina, 5 sabana butu-butu mba'a kana mombatanggu pokaingguna mboto. 6 Komi to nipatuduki Tesa nu Alatala masipato mantulungi tau to nompatuduki komi ante mombabagi ka i'a nuapa-nuapa to nabelona to naria ri ja'imu. 7 Sampesuwu-sampesuwu, ne'e sampe komi rabagiu! Alatala da'a namala rapongei-ngei! Nuapa to nituja, etu wo'u to rakato. 8 Batuana ane pokainggu ntau aga nantuki dota rara to naja'a, i'a kana mamate bo rapopoga'a nggari ja'i Alatala sampe ri kasae-saena. Tapi ane pokaingguna nantuki dota Nosa Nagasa nu Alatala, i'a kana mombarata katuwua mabelo sampe ri kasae-saena nggari ja'i Nosa Nagasa etu. 9 Sabana etu, ne'e kita mabasa-basa mompowia to nabelona, sabana ane kita da'a menonto mompowia to nabelona, sanggani tempo kita kana mantarima aselena. 10 Jadi tempo danaria loga kita kana mompowia to nabelona ka pura-pura tau, neliu-liupa ka roa-roata topomparasaya. 11 Kitamo, sampesuwu-sampesuwu, aku mboto mantulisi bagia sura e'i ante paleku mboto! Nikita komi iwenu kabete nu huruf-huruf to nipakeku! 12 Tau-tau to madota mompasu'u komi rasuna, kakonona aga miki ratoiya roa ira to Yahudi ante mompopokita ira mantuki Atura-atura agama. Tapi patuju ira ala ne'e rapandasa ntau to Yahudi, sabana ira mboto nomparasaya kamate Kristus ri kayu parika. 13 Kakonona, ira mboto, to nantuki ada mposuna, da'a natutu nantuki pura-pura Atura agama. Ira aga madota ala komi rasuna ala ira mamala mompakalanga koro ira sabana komi mantuki parenta ira etu. 14 Tapi aku da'a ntoto madota mompakalanga koroku mboto; aku aga madota mompakalanga Pueta Yesus Kristus to namate ri kayu parika. Nggari kamatena nanotomo ka aku da'a ria nuapa-nuapa riara dunia to namala mompakanoa aku riara mpanggita Alatala. Jadi aku nanggabasaka pura-pura nuapa ri dunia to nisarumakaku bopia, pade aku aga manjarumaka i Pue Yesus. 15 Sabana nisuna atau da'a nisuna da'a napoko. To napokona majadi manusia nabou ante momparasaya i Pue Yesus. 16 Perapi Pue Alatala mompopokita asi matana bo mombawai katuwua mabelo ka tau-tau to natuwu nantuki pepatuduki e'i, pade ka pura-pura todeana ntanina. 17 Jadi nompamula we'i-we'i, ne'e mana maria tau mompakasusa aku, sabana walea bela-bela ri koroku najadi tandaina aku batua i Pue Yesus. 18 Sampesuwu-sampesuwu, perapi towe belo nggari ja'i Pueta Yesus Kristus mosanggani-nggani ante komi. Amin! Tabe nggari ja'iku, Paulus
1 Sura e'i nggari ja'iku, Paulus to nionggotaka najadi suro Yesus Kristus nggari dota Alatala mboto, ka komi todea nu Alatala ri ngata Efesus to naroo nomparasaya i Pue Yesus Kristus. 2 Perapi Umata Alatala bo i Pue Yesus Kristus mombagane komi bo mombawai katuwua mabelo ka komi. 3 Masipato ratoiyata Alatala, Uma nu Pueta Yesus Kristus! I'a nombagane kita ante nombawai ka kita mpengele-ngele rasi bo belo nggari Nosana to Nagasa ri suruga sabana kita nosaongu rara ante Kristus. 4 Ri lamba pamulana da'apa dunia nipajadi, Alatala nompelisi kita majadi todeana nggari powia Kristus ka kita. Patujuna ala kita matuwu magasa ante da'a ria inggu to nasala ri ngayona. 5 Nggari towena mboto I'a nompakatantu mami nggari lamba pamulana mangonggotaka kita to nosaongu rara ante Yesus Kristus majadi anana nantuki nia bo dotana mboto. 6 Etu sampe masipato kita mantoiya towe belona to neliu-liuna to niwaina ka kita ante kamomi nu rarana mboto sabana kita nosaongu rara ante Anana to nipotowena. 7 Ante lei i Pue Yesus kita nitolomo, silakata niampungimo nggari towe belo nu Alatala to neliu kabetena. 8 Towe belona etu nipopeliuna ka kita ante mpengele-ngele noto bo pangginjani. 9 Nantuki dotana mboto Alatala nompopanjani ka kita niana to nasae natitabuniaka. Nipakatantunamo nggaolu ala niana etu kana rapakadupa Kristus 10 ane maganamo tempo to nipakatantuna. Iwe'imo niana etu: Pura-pura nuapa to nariana, nabeloka to ri suruga nabeloka to ri dunia kana rapakasaongu, pade Kristus mboto majadi balengga panggeniakana. 11 Da'a aga etu, tapi kita nipelisi Alatala majadi bagiana sabana kita nosaongu rara ante Kristus. Nggari lamba pamulana kita nipakatantuna majadi bagiana nantuki niana mboto, sabana I'a nompowia mpengele-ngele nantuki nia bo dotana mboto. 12 Etu sampe kami to Yahudi to nokolu nomparasaya Kristus masipato mantoiya kabelo nu Alatala to nipogumaa. 13 Pade iwetu wo'u komi tau-tau da'a to Yahudi. Tempo komi nangepe pepatuduki to nakonona komi nomparasaya Kristus bo komi wo'u najadi bagia nu Alatala. Pepatuduki to nakonona etumo Kareba Belo to nompakanoto iwenu kita mamala rapakasalama. Pade Alatala nombawai tandai to nompakanoto komi mpu'u-mpu'u bagiana, etumo nipopana'una ka komi Nosa Nagasa to nijanjina nggaolu. 14 Nosa Nagasa etumo najadi panjokota to nompakanoto nuapa to nijanji Alatala ka todeana natantumo kana ratarimata. Panjokota etu bate-batena maria ri ja'ita sampe ri kaopu nu dunia tempo kita to najadi bagia nu Alatala rakabasaka nggari pura-pura kaja'ana. Etu sampe masipato kita mantoiya kabelo nu Alatala to nipogumaa! 15 Sabana etu, nompamula nggari tempo aku nangepe kareba to nanguli komi nomparasaya i Pue Yesus bo nompotowe pura-pura topomparasaya, 16 da'a nenonto-nonto aku nosukuru ri ja'i Alatala sabana katuwu komi. Aku bate-batena nanggeni komi riara posambayaku. 17 Aku nerapi ka Alatala, Uma nu Pueta Yesus Kristus, Umata to neliu nggakuasa, ala I'a mombawai ka komi noto nggari ja'i Nosana to Nagasa, pade mompopanjani ka komi isema I'a ala kaopuna komi mosinjani belo ante I'a. 18 Aku nerapi ala I'a mombabuka pekiri komi ala manoto ranjani komi nuapa to namala rasarumaka komi nggari ja'ina to nompokio komi majadi todeana. Pade aku wo'u nerapi ala ranjani komi kabelona bo kagayana mpengele-ngele to nipakasadia Alatala ka todeana, 19 pade ala ranjani komi wo'u kabete nu kuasana to nipogumaa to naria riara nggatuwuta to nomparasaya I'a. Kuasa etu nasimbayu ewa kuasana to neliu-liuna 20 to nipakena tempo I'a nompakatuwu bali Kristus nggari kamatena pade nombawai ka I'a pekatoko to nibilana ri pangganana ri suruga. 21 Kristus neliu nggakuasa nggari pura-pura kuasa to naria, nabeloka kuasa balengga-balengga seta, nabeloka kuasa-kuasa to nipokaeka manusia, nabeloka kuasa pue-pue ntanina. Pade I'a neliupa nggari pura-pura tau to nalanga panggana, nabeloka to natuwu we'i-we'i nabeloka to matuwu ri tempo marata. 22 Alatala nompowia mpengele-ngele nekou ri ja'i Kristus. Pade Kristus, to nombakuasai mpengele-ngele etu, nionggotakana najadi balengga topomparasaya I'a. 23 Kita topomparasaya Yesus Kristus nasimbayu ewa koro Kristus mboto bo I'amo balenggata to naria ri umba-umba ri langi bo dunia. Jadi pura-pura nuapa to naria ri ja'ina naria wo'u ri ja'ita.
1 Sampesuwu-sampesuwu, tempo komi da'apa nomparasaya i Pue Yesus komi ewa namate sabana komi batena nowia silaka bo nombaliunaka parenta-parenta Alatala. 2 Komi batena natuwu nantuki kabiasa-kabiasa manusia ri dunia e'i, komi nantuki dota Magau nu Seta, balengga nu kuasa-kuasa ri laerawa. I'amo to nombakuasai rara ntau to da'a natundu ri ja'i Alatala. 3 Nokolu kita pura-pura noinggu nasimbayu ewa ira. Kita wo'u natuwu nantuki mpengele-ngele dota rarata to naja'a. Kita aga nompowia nuapa to nompakasana korota bo pekiri rara nta'ita mboto to naja'ana. Kakonona kita masipato rapawela pesuku nu Alatala nasimbayu ewa tau-tau ntanina to naja'ana. 4 Tapi naasi mpu'u mata Alatala nanggita kita. Nabete mpu'u towena to nipopokitana ka kita 5 sampe tempo kita da ewa namate sabana da'a natundu ri ja'ina, I'a nompakatuwu bali kita nosanggani-nggani ante Kristus. Toramo! Aga nggari towe belo nu Alatala komi nipakasalama. 6 Pade kita niorena pade niwaina pekatoko to nibila nosanggani-nggani ante Yesus Kristus ri suruga sabana kita nosaongu rara ante Kristus. 7 Patujuna ala ri tempo nggapurina kabete nu towe belona to neliu-liuna to nipakanotona ka kita nggari kabelo powia Yesus Kristus mamala rapopokita. 8 Nggari towe belo nu Alatala komi nipakasalama sabana komi nomparasaya i Pue Yesus. Etu da'a asele powia komi mboto tapi etu pewai nu Alatala bayangi. 9 Kita da'a nipakasalama nggari powiata mboto. Jadi da'a ria tau to mamala mompakalanga korona ante manguli, "Aku e'i nipakasalama ante powiaku mboto!" 10 Kita e'i nipajadi Alatala manusia nabou sabana kita nomparasaya Yesus Kristus. Patuju Alatala ala kita manggawia powia to nabelona to nipakatantuna mamimo ka kita nggaolu. 11 Jadi sampesuwu-sampesuwuku, toramo iwenu katuwu komi tempo nokolu. Komi muli ntau da'a to Yahudi pade komi niuli nto Yahudi tau da'a nisuna, etumo tau da'a todea nu Alatala. Ira to Yahudi niuli tau to nisuna, etumo tau to najadi todea nu Alatala. Tapi kakonona ada mposuna aga tandai to nipowia manusia ri koro ira. 12 Toramo, nokolu komi da'apa nangginjani Kristus, komi da'a nipaloga mosanggani-nggani ante tau-tau to Israel to najadi todea nu Alatala. Pojanji nu Alatala ka todeana da'a nalaku riara nggatuwu komi. Komi aga natuwu riara dunia e'i ante da'a nangginjani Alatala, da'a ria panjarumaka komi nuapa-nuapa. 13 Tapi we'i-we'i komi nosaongu rara ante Yesus Kristus. Nokolu komi nakawao nggari ja'i Alatala, tapi we'i-we'i komi nipakamosu ante I'a sabana nggari lei Kristus to nantapasi sala komi. 14 Kristus mbotomo topomposinggabelo kita. I'a nompakasaongu rara tau-tau to Yahudi ante tau-tau da'a to Yahudi ante nompakalipo pura-pura posibali to nompopoga'a kita nasimbayu ewa wala nompopoga'a tau. 15 Ante kamatena ri kayu parika nipopenontona Atura-atura agama Yahudi ante pura-pura parenta bo pepatudukina. Patujuna ala tau to Yahudi bo tau da'a to Yahudi rapakasaongu majadi manusia nabou to nosaongu rara ante I'a. Ante jala iwetumo I'a nompoposinggabelo kita. 16 Patujuna wo'u ala nggari kamatena ri kayu parika kita to nipakasaonguna rapoposinggabelona ante Alatala sampe maropu pura posibalita. 17 Kristus narata nompatolele Kareba Belo ewa posinggabelo etu ka kita pura-pura, nabeloka komi tau da'a to Yahudi to nakawao nggari ja'i Alatala, nabeloka kami tau to Yahudi to namosu ante I'a. 18 Sabana nggari powia Kristus kita pura-pura namala mantingayo Umata Alatala ante petulungi Nosana to Nagasa. 19 Jadi sampesuwu-sampesuwu da'a to Yahudi, bopia komi da'a nireke todea nu Alatala, pade komi aga nireke tau topesowo. Tapi we'i-we'i mana iwetu. Komi wo'umo nireke todea nu Alatala nosanggani-nggani ante topomparasaya i Pue Yesus ntanina; komi wo'u ananjapo nu Alatala mboto. 20 Kita topomparasaya i Pue Yesus nasimbayu ewa sapo to nibangu Alatala. Suro-suro i Pue Yesus bo nabi-nabi nasimbayu ewa pondasi sapo etu. Yesus Kristus mboto ewa palo mpondasi to neliu nggaroso pade komi wo'u ewa sapo to nibangu Alatala ri bunggu nu pondasi etu. 21 Tau to nosaongu rara ante i Pue Yesus nasimbayu ewa parewa nu sapo to nisunju mpakabelo-belo sampe kaopuna majadi saongu sapo mpepue to nagasa to masipato rapeto'o i Pue. 22 Pade ewa topomparasaya i Pue Yesus komi wo'u nibangu nosanggani-nggani ante topomparasaya ntanina majadi sapo to nipeto'o nu Alatala mboto. Nanotomo I'a neto'o ri tatongota sabana naria Nosa Nagasana riara nta'ita pura-pura.
1 Jadi etumo sabana aku, Paulus nomposambaya komi. Aku e'i tau to nitarunggu we'i-we'i sabana nomparasaya Yesus Kristus bo nompatolele Kareba Belo ka komi tau-tau da'a to Yahudi. 2 Natantu niepe komimo iwenu sampe Alatala nombawai ka aku bago manggeni Kareba Belo etu ala katuwu komi rapakabelo. Etu nipowiana nggari towe belona mboto. 3 I'a nompopanjani ka aku niana to natitabuniaka nggari lamba pamulana ewa to nitulisiku sakedi ri ba'ana. 4 Ane komi mombabasa nuapa to nitulisiku etu, kana manoto ka komi pangginjaniku ewa nia Alatala to nipakadupa riara nggatuwu Kristus etu. 5 Ri tempo nggaolu nia etu da'apa nipopanjani ka manusia. Tapi we'i-we'i Nosa Nagasa nu Alatala nompopanjani nia etu ka suro-suro i Pue Yesus bo nabi-nabina to nagasana. 6 Iwe'imo nia to nipopanjanina etu: Ante momparasaya Yesus Kristus tau-tau da'a to Yahudi wo'u masipato mantarima rasi-rasi nggari ja'i Alatala mosanggani-nggani ante tau to Yahudi. Tau-tau da'a to Yahudi wo'u najadi ewa sipa ri saongu koro, pade ira wo'u masipato mantarima pura-pura nuapa to nijanji Alatala. Etu pura-pura najadi riara nggatuwu ira sabana ira nomparasaya Kareba Belo. 7 Aku e'i nionggotaka najadi topanggeni Kareba Belo etu nantuki towe belo nu Alatala. Pade nggari kuasana mboto I'a nombawai ka aku pompakule manggeni kareba etu. 8 Nggari pura-pura topomparasaya i Pue Yesus akumo to neliu nggaede katuwuku. Tapi naupa iwetu akumo to nipelisi Alatala nompatolele Kareba Belo ka tau-tau da'a to Yahudi ewa kabelo Kristus to neliu-liuna to da'a namala rareke. 9 Aku nipelisi ala mompakanoto ka pura-pura tau iwenu Alatala to nompajadi langi bo dunia nompakadupa niana to nitabuniakana nggari lamba pamulana. 10 Patujuna ala we'i-we'i I'a mompopanjani ka pura-pura kuasa ri laerawa mpengele-ngele notona mantulungi manusia. Etu pura-pura rapopanjanina nggari nuapa to majadi riara nggatuwu topomparasaya-topomparasaya i Pue Yesus. 11 Alatala nompowia etu pura-pura nantuki niana mboto to naria mami nggari lamba pamulana sampe ri kasae-saena. Pade niana etu nipakadupana ante karata Pueta Yesus Kristus. 12 Ante nomparasaya bo nosaongu rara ante I'a kita nipaloga mompakamosu Alatala riara posambaya ante da'a maeka sabana ninjanita I'a kana mantarima kita. 13 Sabana etu, sampesuwu-sampesuwu, aku merapi ka komi, ne'e malente rara mompekiri aku riara tarunggu, sabana pura-pura kasusa to nirasaiku ri se'i nanggeni belo ka komi. 14 Jadi tempo aku nantora etu pura-pura, aku nekadede nosambaya ri ngayo Umata Alatala 15 to nipoumata pura-pura, nabeloka kita ri dunia, nabeloka ira to naria ri suruga. 16 Aku nerapi ka Alatala ala nggari kabete nu kuasana bo kabelona I'a mombawai ka komi kuasa nggari ja'i Nosa Nagasana ala komi maroo rara momparasaya 17 sampe Kristus bate-batena meto'o riara nta'i komi. Etu kana majadi ane komi tunggai momparasaya I'a. Pade aku nerapi ala komi batena maroo manjarumaka towe nu Alatala sampe komi maroso nasimbayu ewa kayu to nandala kalena bo sapo to naroso pondasina. 18 - 19 Aku wo'u nerapi ala komi mpasanggani-nggani ante pura-pura topomparasaya ntanina mamala mangginjani bo mombarasai kabete nu towe Kristus ka kita to neliu nggari pangginjani manusia. Da'a namala raukuruta kaluona, kandatena, kalangana bo kandala nu towe etu. Pade aku nerapi ka Alatala ala komi mamala mombarasai towe Kristus etu sampe kaopuna pura-pura to naria ri ja'i Alatala maria wo'u ri ja'i komi. 20 Ante kuasana to nokarajaa riara nta'ita, Alatala mamala mompowia neliu nggari nuapa to niperapita atau to nipekirita. 21 Jadi kamaimo kita mantoiya Alatala ri tatongo ntodeana topomparasaya sabana powia Yesus Kristus! Kamaimo kita mombabila sangana we'i-we'i pade sampe ri kasae-saena! Amin!
1 Jadi nantora etu aku to nitarunggu ri se'i sabana nomparasaya i Pue merapi ala komi matuwu ante pokainggu to masipato ka tau to nipokio Alatala majadi todeana. 2 Komi kana tunggai matuwu ante maede bo malusu rara. Ane komi rapandasa, komi kana mosabara mandate. Ne'e masalisa makedi rara ka roamu, tapi popokita ka i'a towemu. 3 Pasimbukumo ante mpu'u-mpu'u rara matuwu mosinggabelo ala mompiara kasintuwu to nirasai komi sabana Nosa Nagasa nu Alatala nompakasaongu rara komi samba'a bo samba'a. 4 Kita pura-pura ewa saongu koro riara i Pue. Kita pura-pura nipesua Nosa Nagasa nu Alatala. Iwetu wo'u kita pura-pura nipokio Alatala najadi todeana ala mosaongu panjarumakata. 5 Kita pura-pura nomparasaya samba'a lau Pue pade nantuki sangele lau pepatuduki. Kita pura-pura nidiu ewa tandaina kita topomparasaya i Pue Yesus. 6 Aga samba'a lau Alatala, Umata pura-pura. I'amo to nomparenta kita pura-pura bo to naria nosanggani-nggani ante kita pade to naria ri tatongota pura-pura. 7 Tapi naupa iwetu da'a nasimbayu pompakule to niwai ka kita. Pompakule to niwai ka kita nantuki to nipakatantu Kristus mboto. 8 Etu sampe naria nitulisi riara Buku Nagasa iwe'i: "Tempona I'a neore mpaka ri peto'o to nalangana nadea balina to nikenina. Pade I'a nompalele pompakule-pompakule ka manusia." 9 Jadi ane niuli, "I'a neore," natantumo I'a nokolu nana'u sampe ri tambe nu dunia. 10 Pade I'a to nana'una etu, I'a wo'u to neore ri peto'o to neliu nggalanga nggari pura-pura langi ala pura-pura langi bo dunia maponu ante kuasana. 11 I'amo to nompalele pompakule-pompakule ka manusia. Santongo niwaina pompakule majadi suro, santongo niwaina pompakule majadi nabi to nompasimbayu tesa nggari ja'i Alatala. Santongo wo'u niwaina pompakule majadi topompatolele Kareba Belo, pade ntanina niwaina pompakule manggeniaka bo mompatuduki topomparasaya. 12 Etu nipowiana ala mompakaroso topomparasaya i Pue Yesus ala kita mompakule mantui bago to nipodota Alatala. Patujuna ala kita to najadi koro Kristus mantambai maroso 13 sampe kaopuna kita mpasanggani-nggani mosaongu pomparasaya bo mosaongu pangginjanita ewa Ana nu Alatala. Pade kita mpasanggani-nggani mantambai manoto bo maroso sampe majadi masimbayu ewa Kristus mboto. 14 Ante iwetu kita mana ewa ngana-ngana nggedi to nagampa rakeni mantuki mpengaya-ngaya pepatuduki nasimbayu ewa sakaya nagampa nitawui mpoiri gusa'a guse'i. Kita mana nagampa rabagiu ntau ante mpengele-ngele akala to mompakasalanjala. 15 Tapi kita tunggai matuwu nantuki pepatuduki to nakonona ante mosipotowe samba'a bo samba'a, sampe riara mpengele-ngele kita mantambai maroso bo manoto nasimbayu ewa Kristus mboto. I'amo to najadi balenggata 16 pade kitamo to najadi ewa korona. Pura-pura sipa to naria ri koro niposidumpa mpakabelo-belo pade niposiumpu ante karaua-karaua ala majadi saongu. Pade ane pura-pura sipa etu mokarajaa mantuki pompakule to niwai ka i'a, njumaongu koro etu matuwu mabelo bo mantambai eona mantambai maroso. Wa'a wo'u ante kita topomparasaya i Pue Yesus. Ane kita mbau mompake pompakule to niwai i Pue ka kita ante mosipotowe, mantambai eona mantambai maroso pomparasayata bo kasintuwuta. 17 Jadi sampesuwu-sampesuwu, ante kuasa i Pue aku merapi ante mpu'u-mpu'u ka komi, ne'e mana matuwu nasimbayu ewa tau-tau to da'a nosinjani ante Alatala pade aga natuwu ante nompekiri anu da'a ria gunana. 18 Narumaumo pekiri ira, pade nakampatanimo ira nggari katuwua nabelo nggari ja'i Alatala, sabana nako'o rara ira sampe nabungu pekiri ira. 19 Mana ninjani ira naeya pade pura-pura katuwu ira tunggai nantuki dota rara to naja'ana. Ira da'a nabasa nompowia mpengele-ngele to naja'ana. 20 Tapi da'a iwetu to nipatuduki ka komi ewa Kristus. 21 Natantu niepe komimo karebana pade komi nipatuduki nantuki pepatuduki to nakono nggari ja'ina. 22 Etumo, komi nipatuduki manggabasaka pokainggu to naliu-liuna to nituki komi tempo komi da'apa nomparasaya i Pue Yesus. Pokainggu komi etu nipakagero dota rara to naja'ana to nanggeni komi nantuki jala to nasalana. 23 Komi wo'u nipatuduki ala mompaloga Alatala mompakabou pekiri bo rara nta'i komi. 24 Pade komi nipatuduki wo'u mantuki pokainggu to nabou ewa to nipajadi Alatala nantuki ingguna mboto to nanoa bo mpu'u-mpu'u nagasa. 25 Sabana etu, sampesuwu pura-pura, ne'e mana modawa, tapi tunggai motesa to nakonona samba'a bo samba'a, sabana kita pura-pura ewa sipa to naria ri koro Kristus. 26 Ane komi manggarau ne'e sampe rau raramu mompakasilaka komi. Ne'e wo'u mombaboli rau rara sampe masolo eo. 27 Pade ne'e mombawai loga ka Magau nu Seta riara nggatuwu komi. 28 Tau topangangga kana menonto mangangga. Nabelopa i'a mokarajaa ante palena mboto mangelo katuwua ante akala to nanoa ala i'a mamala mantulungi tau ntanina riara kapepana. 29 Sampesuwu-sampesuwu, ane komi motesa ne'e tesa to naja'a mesuwu nggari sumbamu, tapi suwurakamo tesa-tesa to nompakabelo bo masipato ka tau-tau ntanina ala tesa komi etu mamala mantulungi tau-tau to nangepena. 30 Pade ne'e komi mompakasusa rara Nosa Nagasa nu Alatala. Toramo! Nosa to Nagasa etumo tandaina to nompakanoto komi Alatala puena. Pade Nosa Nagasana etu wo'u najadi panjokota sampe marata tempona kita rakabasaka nggari dunia to naja'a e'i. 31 Pakalipomo mpengele-ngele ju'a rara. Ne'e mana momboli rau rara bo mosinggarau. Ne'e mana mosipongare ante mosiuli sinja'i. Pade ne'e mana mompakaja'a tau ntanina. 32 Tapi komi kana mabelo bo malusu rara samba'a bo samba'a. Pade komi kana mosiampungi samba'a bo samba'a nasimbayu ewa Alatala nombaampungi komi nantuki nuapa to nipowia Kristus.
1 Sabana etu sampesuwu pura-pura, pasialamo pokainggu Alatala sabana komi anana to nipotowena. 2 Pade komi kana matuwu ante towe nasimbayu ewa Kristus nompotowe kita. Nggari towena to nabete I'a nombawai korona rapatesi ala mompakasalama kita. Powiana etu nompakadamba rara Alatala nasimbayu ewa sangele pesomba to nawongi to nipesomba ka I'a. 3 Komi todea nu Alatala. Jadi da'a ntoto masipato komi mogau sala ante tau da'a rongomu mboto, bara mompowia mpengele-ngele to natantoru, atau maino ante da'a ria kabasa-basana. Powia etu da'a masipato maria ri tatongo komi, nau aga rauli. 4 Iwetu wo'u ante tesa-tesa njilaka bo tesa-tesa sambara bo kuwawa-kuwawa to da'a masipato. Etu pura-pura da'a masipato ka komi. Tapi nabelopa komi manguli tarima kasi ka Alatala. 5 Toramo mpakabelo-belo! Tau to nogau sala ante tau da'a rongona mboto bo tau to nompowia to natantoru bo tau da'a ria kabasa-basana da'a ntoto mamala majadi todea riara Poparenta nu Alatala bo Kristus. Sabana powia etu nasimbayu kaja'ana ewa tau nompakoni pue-pue ntanina. 6 Ne'e komi rabagiu ntau ante tesa-tesa da'a ria gunana to nanguli powia etu da'a nasala. Toramo! Nggari powia-powia etumo sampe pesuku Alatala rapawela ka tau-tau da'a natundu ri ja'ina. 7 Sabana etu ne'e komi mowega ante ira. 8 Komi mboto wo'u nokolu natuwu riara karumauna, tapi we'i-we'i komi najadi reme sabana komi nosaongu rara ante i Pue. Jadi komi kana matuwu ante pokainggu to masipato ka tau to najadi reme, 9 sabana asele nu reme etu mpengele-ngele powia to nabelo bo to nanoa bo to nakono. 10 Pekirimo mpakabelo-belo iwenu inggu to nompakadamba rara i Pue. 11 Ne'e komi mosintuwu ante tau to nanggawia powia nggarumau to da'a ria gunana. Nabelopa powia etu rapakanoto ante jonjo powiamu to nabelo nasimbayu ewa reme nombawanta karumauna. 12 Kakonona pokainggu to nipowia ira nggalino etu mpu'u-mpu'u nompakaeya mata, nau aga ratesa-tesa. 13 Tapi pura-pura to niwanta nu reme kana manoto rakita. 14 Pade pura-pura to nipakanoto iwetu kana mabali majadi reme. Etu sampe naria niuli iwe'i: "Pembangumo komi to naturuna. Pembangumo nggari tatongo ntomate, Pade reme Kristus kana mombawanta komi." 15 Sabana etu, pekirimo mpakabelo-belo pokainggu komi. Ne'e matuwu ewa tau-tau to nadoyo, tapi komi kana matuwu ewa tau-tau to nanoto. 16 Pakemo loga to naria ri ja'i komi mompowia to nabelona, sabana tempo we'i-we'i tempo to naja'a. 17 Jadi ne'e komi madoyo, tapi pekirimo mpakabelo-belo ala ranjani komi nuapa to nipodota i Pue ka komi. 18 Ne'e komi malangu ntule, sabana etu aga mompopeumba dota rara to naja'a. Nabelopa komi tunggai rakuasai Nosa Nagasa nu Alatala. 19 Pade podademo samba'a bo samba'a ante tesa-tesa nggari buku Mazmur bo podade-podade to mantoiya Alatala bo podade-podade to niwai Nosa Nagasa nu Alatala. Komi kana modade ante madamba mombatoiya Pue ante mpu'u-mpu'u raramu. 20 Tunggai posukurumo riara mpengele-ngele ka Umata Alatala ante sanga Pueta Yesus Kristus. 21 Pekoumo komi ri ja'i roamu samba'a bo samba'a sabana komi nombabila Kristus. 22 Totu'a besi, pekoumo ri ja'i rongomu langgai ewa komi mekou ri ja'i Pue, 23 sabana totu'a langgai najadi balengga rongona besi nasimbayu ewa Kristus najadi balengga topomparasaya. I'a mboto nompakasalama topomparasaya to najadi ewa sipa nu korona. 24 Jadi nasimbayu ewa topomparasaya nekou ri ja'i Kristus, iwetu wo'u totu'a besi kana mekou ri ja'i rongona langgai riara mpengele-ngele. 25 Totu'a langgai, potowemo rongomu besi nasimbayu ewa Kristus nompotowe todeana bo nombawai korona rapatesi ala mompakasalama kita. 26 Etu nipowia Kristus ala kita rapakagasa bo rapatani ka I'a mboto. Kita nipegasana ante ue pediu bo tesana 27 ala kita mamala ratarimana ewa todeana to nabelo ntoto, ante da'a ria jeko atau silaka nuapa-nuapa, tapi nagasa pura ante da'a ria sala nuapa-nuapa. 28 Nasimbayu ewa Kristus nompotowe todeana, iwetu wo'u totu'a langgai kana mompotowe rongona besi nasimbayu ewa i'a nompotowe korona mboto. Isema-sema nompotowe rongona besi batuana i'a nompotowe korona mboto. 29 Da'apa ria lelena tau nompandasa korona mboto, tapi i'a aga nompiara bo nombajagai korona mpakabelo-belo nasimbayu ewa Kristus wo'u nompiara bo nombajagai todeana. 30 Etu nipowia Kristus sabana kita ewa sipa nu korona mboto. 31 Riara Buku Nagasa naria nitulisi iwe'i: "Samba'a langgai kana mompalasi indo umana pade malau mosaongu njou ante rongona besi, pade ira romba'a kana majadi samba'a." 32 Tesa e'i nakumba batuana, tapi nantuki pangginjaniku to nipatuju nu tesa e'i etumo posinggamosu Kristus ante todeana. 33 Tapi naudamo iwenu, tesa etu nosinggawela wo'u ante komi. Butu mba'a totu'a langgai kana mompotowe rongona besi nasimbayu ewa i'a nompotowe korona mboto, pade butu mba'a totu'a besi kana mombabila rongona langgai.
1 Ngana-ngana, komi kana matundu ri ja'i indo umamu sabana etumo inggu to masipato ka topomparasaya i Pue Yesus. 2 Bilamo indo bo umamu. Nggari Sampulu Parenta nu Alatala, etumo parenta pamulana to nitambai ante pojanjina. 3 Pade iwe'imo pojanji etu: ane komi mombabila uma bo indomu, komi kana masana bo mandate umurumu riara dunia. 4 Komi to najadi uma-uma nu ngana, ne'e komi mompakarau rara anamu mboto. Tapi pakabetemo ira ante pepatuduki bo pepatora nggari ja'i Pue. 5 Komi to najadi batua, tukimo parenta madikamu to naria ri dunia e'i. Kawiamo etu ante mombabila bo mekou ri ja'i ira ante mpu'u-mpu'u raramu nasimbayu ewa komi mekou ri ja'i Kristus mboto. 6 Ne'e aga miki ratoiya manusia ante mokarajaa mabelo tempo komi rakita madikamu. Tapi pokarajaamo ante mpu'u-mpu'u raramu ewa batua Kristus to nantuki dota Alatala. 7 Pokarajaa etu kana mukarajaa ante dota rara nasimbayu ewa komi mokarajaa ka i Pue, da'a aga ka manusia. 8 Toramo! Butu mba'a tau to nompowia to nabelona, nabeloka i'a batua nabeloka da'a batua, i'a kana mantarima balasina to nabelo nggari ja'i Pue nantuki mpengele-ngele belo to nipowiana. 9 Pade komi to najadi madika, komi wo'u kana moinggu mabelo ri ja'i batuamu. Ne'e mana komi momparangga ira, sabana ninjani komi mboto Puemu bo Pue ira samba'a lau. I'amo to naria ri suruga pade I'a da'a nanggita lenje. 10 Kaopuna, komi kana maroso ante kuasa to neliu-liuna to nitarima komi nggari ja'i Pue sabana komi nosaongu rara ante I'a. 11 Pakemo pura-pura parewa mposibali nggari ja'i Alatala ala komi mompakule manta'amaka mangewa mpengele-ngele akala Magau nu Seta. 12 Sabana kita da'a nosibali ka manusia tapi kita nosibali ka balengga-balengga seta, karampua-karampua, bo pue-pue ntanina riara dunia to naja'a e'i, bo mpengele-ngele seta ntanina ri laerawa. 13 Sabana etu pakemo pura-pura parewa mposibali nggari ja'i Alatala ala komi mompakule mangewa bali-balimu ri tempo mposibali to naja'a etu. Kawiamo etu ala ane maopumo komi mosibali, komi bate-batena maroso. 14 Jadi ta'amakamo mangewa balimu ante pura-pura parewa mposibali nggari ja'i Alatala. Komi kana mantuki pepatuduki to nakonona. Etumo sulepemu. Komi kana moinggu manoa. Etumo baju asemu to nanggalendu koro batamu. 15 Komi kana malulu rara manggeni Kareba Belo ewa posinggabelo manusia ante Alatala. Etumo sapatumu to naroso. 16 Komi kana maroo momparasaya Pue riara mpengele-ngele. Etumo kaliawomu. Etu kana rapake komi ala komi mompakule mantenggu mpengele-ngele parewa to naja'a to nipake Magau nu Seta nombabaga komi. 17 Komi kana maroo manjarumaka Kristus to nompakasalama komi. Etumo songgo wajamu. Pade komi kana mompake Tesa nu Alatala. Etumo gumamu to niwai Nosa Nagasana ka komi. 18 Kawiamo etu pura-pura ante mosambaya bo merapi tulungi ka Alatala. Posambayamo ri butu-butu loga nantuki pekeniaka Nosa Nagasa nu Alatala. Komi kana mainga tempo mosambaya bo ne'e menonto mosambaya ka pura-pura topomparasaya i Pue Yesus. 19 Pade posambaya wo'u ka aku ala ane tempo aku motesa Alatala mombawai ka aku tesa-tesa to masipatona ala ante mabia aku mamala mompakanoto isi Kareba Belo to nitabuniaka nggari nggaolu. 20 Sabana nggari Kareba Belo etumo sampe aku najadi suro pade we'i-we'i aku naria riara tarunggu. Posambayamo ka aku ala aku mabia mompatolele Kareba Belo sabana etumo bago to masipato kupowia. 21 To nipodotaku ala komi mangginjani iwenu katuwuku ri se'i. Jadi etu sampe aku nompakau i Tikhikus mpaka ri ja'i komi ala i'a mamala mompakanoto etu pura-pura ka komi. I'a samba'a sampesuwuta to nipotoweku to natutu nantulungi pokarajaa i Pue. 22 I'a nipakauku mpaka ri ja'i komi ala i'a mamala mompopanjani ka komi nuapa pura to najadi ri ja'iku ri se'i, pade ala i'a mamala mompakawoe rara komi. 23 Perapi Umata Alatala bo i Pue Yesus Kristus mombawai katuwua mabelo bo towe bo karoso pomparasaya ka pura-pura topomparasaya ri setu. 24 Perapi Alatala mombagane pura-pura tau to nompotowe Pueta Yesus Kristus ante towe to da'a ria kaopu-opuna. Amin! Tabe nggari ja'iku, Paulus
1 Sura e'i nggari ja'i kami Paulus bo i Timotius, batua Yesus Kristus, ka pura-pura topomparasaya Yesus Kristus to naria ri ngata Filipi, ante topanggeniaka-topanggeniaka bo topantulungi-topantulungi topomparasaya. 2 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi. 3 Sampesuwu-sampesuwu pura-pura, butu nggani aku nantora komi aku nosukuru ri ja'i Pue Alatalaku. 4 Pade butu nggani aku nosambaya ka komi aku batena nosambaya ante nadamba mpu'u raraku, 5 sabana komi nasintuwu nantulungi aku nompatolele Kareba Belo nggari ja'i Alatala, nompamula nggari eo pamulana sampe we'i-we'i. 6 Pue Alatala mbotomo to nompamula panggawia to nabelona etu riara nta'i komi. Pade niparasayaku I'a wo'u kana mompakapola panggawia etu sampe maopu ri tempo Yesus Kristus marata bali ri dunia. 7 Masipato aku mantora komi pura-pura ante nadamba mpu'u raraku sabana komi mpu'u-mpu'u nipotoweku. Pade komi nombarata bagia nggari towe belo to niwai Alatala ka aku, nabeloka tempo aku riara tarunggu, nabeloka tempo aku ri sawalikuna nantakono bo nompakanoto kakono Kareba Belo. 8 Alatala mboto nangginjani iwenu kalentora raraku nantora komi ante towe nggari ja'i Yesus Kristus mboto. 9 Iwe'imo pomperapiku ri ja'i Pue Alatala: aku mosambaya ala komi mantambai mepotowe pade mantambai mangginjani nuapa to nakonona bo mantambai kanoto pekiri komi. 10 Ante iwetu komi mamala mompelisi nuapa to nabelona ala katuwu komi majadi magasa pade da'a ria salana sampe Kristus marata bali. 11 Aku wo'u mosambaya ala komi bate-batena mompowia to nanoana ante petulungi Yesus Kristus sampe nadea mpu'u tau mombabila bo mantoiya Alatala. 12 Sampesuwu-sampesuwu, to nipodotaku ala komi mangginjani nuapa to najadi ri ja'iku e'i da'a naja'a, tapi kakonona etumo to nompakatolele Kareba Belo 13 sampe nanotomo ka pura-pura tantara to nombajagai sapo magau bo ka pura-pura tau ntanina ri se'i aku e'i nitarunggu sabana aku batua Kristus. 14 Pade sabagia bete nggari topomparasaya ri se'i nantambai karoso pomparasaya ira ri ja'i Pue, sabana nanggita nuapa to najadi ri ja'iku ri tarunggu. Kaopuna nantambai kabia ira nompatolele Tesa nu Alatala ante da'a ria eka rara. 15 Naria bara sakuya mba'a nggari tatongo ira to nompatolele Kareba Kristus sabana nasiriati nanggita aku, pade ira aga madota mosinggarau. Tapi naria wo'u ntanina to nompatolele Kareba Kristus ante patuju to nabelo. 16 Ira etumo nompatolele ante towe sabana ninjani ira aku nionggotaka Alatala ala mantakono Kareba Belo. 17 Tapi ira to nasiriati etu nompatolele Kareba Kristus sabana aga nompekiri koro ira mboto, da'a ante rara to nabelo. Nipekiri ira powia ira etu mantambai kasusaku riara tarunggu. 18 Tapi da'a mokuya. Sabana nau iwenu, nabeloka etu nipowia ante patuju to nadenggo, nabeloka etu nipowia ante patuju to nanoa, Kareba Kristus kana nipatolele. Etumo nompakadamba raraku. Pade aku batena madamba-damba 19 sabana ninjaniku, ante posambaya komi pade petulungi Nosa Nagasa Yesus Kristus, aku kana rakabasaka nggari tarunggu e'i. 20 To nipolentoraku bo nisarumakaku ala ne'e aku maeya riara mpengele-ngele, tapi ala aku we'i-we'i batena mabia ewa nokolu sampe nau aku matuwu atau mamate Kristus kana rabila bo ratoiya riara nggatuwuku. 21 Sabana patujuku matuwu etumo mantambai mosinjani belo ante Kristus, pade ane aku mamate etu neliupa kabelona. 22 Tapi ane matuwu ri dunia e'i batuana aku mamala manggeni tau momparasaya Yesus Kristus, da'a mana ninjaniku umbana to kupelisi, matuwu atau mamate. 23 Aku niposidii rongele pompekiri. Aku mpu'u-mpu'u madota mompalasi dunia e'i malau meto'o mosanggani-nggani ante Kristus, sabana etumo to neliu kabelona. 24 Tapi neliu kapokona aku maroo ri dunia e'i ala mantulungi komi. 25 Jadi natantumo ka aku, aku damatuwu. Pade ninjaniku aku kana maroo mosanggani-nggani ante komi pura-pura ala komi mantambai maroso bo madamba momparasaya i Pue Yesus. 26 Ante iwetu komi kana mantambai mantoiya bo mombabila Yesus Kristus sabana aku danamalapa mosanggani ante komi. 27 Nuapa-nuapa majadi ri ja'iku, komi kana matuwu ante pokainggu to masipato ante Kareba Belo Kristus. Komi kana matuwu iwetu ala naupa aku marata manggita komi atau da'a, aku kana mangepe kareba to nanguli komi naroo nosaongu rara bo pekiri nanta'amaka pomparasaya to nipatuduki riara Kareba Belo. 28 Ne'e maeka ri ja'i balimu, tapi komi kana tunggai mabia. Ante iwetu komi mompakanoto ka balimu etu ira pura-pura to rapakaropu banepia tapi komi to rapakasalama. Etu pura-pura nggari ja'i Alatala. 29 Komi masipato moinggu iwetu sabana komi niwai Alatala ka loga da'a aga momparasaya Kristus, tapi wo'u mombarasai kasusa bo kapari sabana komi topomparasaya I'a. 30 We'i-we'i komi nombarasai kasusa nasimbayu ewa to nirasaiku to nikita komi mboto bopia pade to niepe komi bate-batena nirasaiku sampe we'i-we'i.
1 Jadi sampesuwu-sampesuwu, ninjaniku narosomo pomparasaya komi sabana komi nosaongu rara ante Kristus, pade rara komi nipakawoe ante towena. Nasintuwumo komi ante Nosa Nagasa nu Alatala pade komi wo'u nosipotowe bo nosipoasi mata samba'a bo samba'a. 2 Sabana etu aku merapi ala komi mompakagana kadamba raraku ante matuwu mosaongu rara samba'a bo samba'a ante mosipotowe bo mosaongu pekiri bo patuju. 3 Ne'e aga mantora bo mantoiya koro komi mboto, tapi nabelopa komi ante maede rara manguli roa komi neliu nggabelopa nggari komi mboto. 4 Ne'e komi aga mompekiri katuwu komi mboto, tapi pekiri wo'umo katuwu roa ntanina. 5 Komi kana moinggu ewa Yesus Kristus iwe'i: 6 Naupa I'a Alatala, I'a da'a nanta'amaka kuasana bo kasimbayu katuwuna ewa Alatala ri suruga. 7 Tapi I'a nanggabasaka pura-pura etu pade netimbali najadi samba'a batua. I'a najadi nasimbayu ewa manusia, 8 pade ewa samba'a manusia I'a nompakaede korona ante matundu ri ja'i Alatala sampe namate, etumo namate nipaku ri kayu parika ewa samba'a tau naja'a. 9 Etumo sabana Alatala nangonggotaka I'a ri peto'o to neliu nggalanga pade nombawai ka I'a sanga to neliu nggakuasa nggari pura-pura sanga ntanina. 10 Etu nipowia Alatala ala ane mangepe sanga Yesus pura-pura to naria ri suruga, ri dunia bo ri tambe nu dunia kana motimbakotu mombasomba I'a, 11 pade ira pura-pura kana mompangaku Yesus Kristusmo Pue. Ante iwetu ira mombabila bo mombatoiya Umata Pue Alatala. 12 Jadi sampesuwu-sampesuwu to nipotoweku, nasimbayu ewa komi nantuki tesaku bopia tempo aku danosanggani-nggani ante komi, neliu-liupa we'i-we'i tempo kita nosinggakawao. Kuperapi ka komi pasimbukumo matuwu ante mpu'u-mpu'u maeka ri ja'i Alatala ala patujuna mompakasalama komi madupa riara nggatuwu komi. 13 Sabana I'a mbotomo to nokarajaa riara nta'i komi nombawai ka komi dota rara bo pompakule mompowia patujuna to nabelo etu. 14 Nuapa-nuapa to rapowia komi kana rapowia ante da'a mongua atau mosinggarau, 15 ala da'a maria sala komi, bo pokainggu komi manoa pura ewa ana-ana nu Alatala to naria ri tatongo manusia to nadenggo bo naja'a rarana. Komi ewa poindo to nombawanta ira 16 sabana komi nompatolele ka ira tesa to namala manggeni ira matuwu mabelo sampe ri kasae-saena. Ane komi matuwu iwetu meliu nggadamba raraku tempo Kristus marata bali ri dunia, sabana katuwu komi etu mompakanoto da'a nalenge bayangi aku nokarajaa ntomo ri tatongo komi bopia. 17 Pomparasaya komi ka Alatala nasimbayu ewa pesomba ka I'a. Pade kamateku banepia masimbayu ewa ue anggur to nitoli topanggeni agama Yahudi ri pesomba to nikenina rapesomba ka Alatala. Tapi naupa etu majadi aku kana mosukuru bo madamba-damba mpasanggani-nggani ante komi. 18 Iwetu wo'u komi kana mosukuru bo madamba-damba mpasanggani-nggani ante aku. 19 Nisarumakaku ante petulungi i Pue Yesus aku mamala masalisa mompakau i Timotius mpaka ri ja'i komi, ala ane i'a manjili aku madamba mangepe kareba komi. 20 Sabana da'a ria roaku ntanina to nosaongu pekiri mompekiri kabelo komi. 21 Pura-pura roaku ntanina aga nasiwu nompekiri bago ira mboto, da'a nompekiri bago Yesus Kristus. 22 Tapi ninjani komi mboto pokainggu i Timotius. I'a nokarajaa ntomo nosanggani-nggani ante aku mompatolele Kareba Belo nasimbayu ewa samba'a ngana mantulungi umana. 23 Jadi ane ninjaniku nuapa to majadi ri ja'iku ri se'i, aku kana masalisa mompakau i'a mpaka ri ja'i komi. 24 Tapi nisarumakaku ante petulungi i Pue aku mboto wo'u mamala momai ri ja'i komi. 25 Tapi da'apa etu majadi, nipekiriku paraluu sampesuwuta Epafroditus, to nisuro komi mantulungi aku, kupakau manjili mpaka ri ja'i komi. I'a roaku sampokarajaa to najadi tantara Kristus nosanggani-nggani ante aku. 26 Nalentoramo rarana nantora komi pura-pura, pade nasusa rarana sabana niepe komimo lelena i'a naju'a. 27 Nakono mpu'u i'a naju'a, sakedika namate. Tapi Alatala naasi matana nanggita i'a pade da'a aga i'a, ante aku wo'u, ala ne'e mantambai kasusa raraku. 28 Etu sampe aku nasalisa nompakau i'a manjili mpaka ri ja'i komi ala ane komi mosirata ante i'a, madamba rara komi pade mana masusa gaga pekiriku. 29 Jadi tarimamo i'a ante madamba-damba ewa samba'a sampesuwu riara i Pue. Pade bilamo tau-tau ewa i'a 30 sabana i'a sakedika namate nompapola bago Kristus. I'a da'a ntoto nompekiri katuwuna mboto nanjaliku komi mantulungi aku ri se'i.
1 Sampesuwu-sampesuwu, kapolana, komi kana madamba-damba sabana komi nosaongu rara ante i Pue. Da'a nakaja raraku mombasili nuapa to nitulisiku ka komi bopia, sabana pepatuduki etu manggalendu komi nggari pura-pura to naja'ana. 2 Komi kana mainga ri ja'i ntau to nompowia to naja'ana, to noinggu mpoasu. Komi kana mainga ri ja'i ira to nanguli komi kana rasuna ala majadi todea nu Alatala. 3 Kakonona kita, da'a ira, todea nu Alatala to nakonona, sabana kita nombasomba Alatala ante pekeniaka Nosa Nagasana mboto, pade kita nadamba-damba sabana nosaongu rara ante Yesus Kristus. Kita da'a aga manjarumaka ada-ada to nitukita, ewa ada mposuna, ala rapakasalama. 4 Kakonona aku mamala manjarumaka ada-ada etu. Ane maria tau to nompekiri i'a kana ratarima Alatala sabana i'a mpu'u-mpu'u nantuki ada-ada agama, neliu-liupa aku e'i. 5 Aku nisuna tempo aku danoumuru walumbengi. Aku nipoana samba'a tau to Israel nggari muli Benyamin. Aku mpu'u-mpu'u tau to Yahudi mami, pade aku mpu'u-mpu'u natutu nantuki pura-pura Atura agama to nipapola i Musa sabana aku tau to Parisi. 6 Bopia newoya mpu'u raraku nantuki Atura-atura agama kami sampe aku nompandasa topomparasaya i Pue Yesus. Pura-pura Atura etu nitukiku, da'a ria sangele to niliunakaku. 7 Tapi pura-pura etu to nirekeku bopia noguna riara nggatuwuku, we'i-we'i nirekeku mana ria gunana sabana aku nomparasaya Kristus. 8 Da'a aga etu, tapi pura-pura nuapa nirekeku mana ria gunana rapoposisala ante sangele to neliupa kabelona, etumo nosinjani ante Pueku Yesus Kristus. Pura-pura nikabasakakumo bo nirekeku ewa rumpu ala aku mamala mosinjani belo ante Kristus 9 bo mosaongu rara ante I'a. Aku nireke Alatala nanoa da'a sabana powiaku mantuki Atura-atura agama, tapi sabana aku nomparasaya Kristus. Kanoana etu nggari Alatala mboto nantuki pomparasaya ka Kristus. 10 To nipodotaku etumo mosinjani belo ante I'a pade mombarasai kuasa to nompakatuwu bali I'a nggari kamatena. Bo aku wo'u madota mombarasai kasusa bo kapari to nirasaina pade matundu sampe mamate nasimbayu ante I'a 11 ante panjarumaka aku wo'u mamala rapakatuwu bali nggari tatongo ntau namate. 12 Aku da'a nanguli etu pura-pura nadupamo riara nggatuwuku atau aku najadi tau da'a ria salana. Tapi aku bate-batena mompasimbuku ala etu kana madupa riara nggatuwuku, sabana etumo patuju Yesus Kristus nompokio aku majadi bagiana. 13 Sampesuwu-sampesuwu, aku da'a nompekiri etu pura-pura nadupamo riara nggatuwuku. Tapi naria sangele to kupowia, etumo aku bate-batena manggalinga pura-pura to naria ri talikuku pade aku mompasimbuku ante mpu'u-mpu'u raraku mombarata nuapa to naria ri ngayoku. 14 Aku nompari-mpari mongowa mpaka ri panta'ana ala mombarata hadia padagi nggari ja'i Alatala, etumo matuwu mabelo ri suruga ante momparasaya Yesus Kristus, sabana etumo patuju Alatala nompokio kita. 15 Jadi kamaimo kita to naroso pomparasayata mosaongu pombarata ewa etu. Tapi ane maria pombarata komi ntanina, etu wo'u kana rapakanoto Alatala ka komi. 16 To napokona kita kana maroo mantuki noto to naria ri ja'ita sampe we'i-we'i. 17 Sampesuwu-sampesuwu pura-pura, pasialamo pokaingguku pade pariaranta'i wo'u pokainggu tau ntanina to natuwu nantuki jonjo kami. 18 Sabana nadea ngganimo aku nanguli ka komi bopia, pade we'i-we'i ante nageo aku nombasili bali ka komi, nadeamo tau to natuwu ante pokainggu to nanjapuaka kamate Kristus. 19 Natantumo ira kana rasuku sampe ri kasae-saena ri naraka, sabana "Pue" ira aga dota rara ira mboto to naja'ana. Powia-powia to nepakaeya to nipodamba-damba ira sabana ira aga nompekiri nuapa-nuapa to naja'ana ri dunia e'i. 20 Tapi pokaingguta da'a iwetu, sabana kita todea nu suruga. Pade nggari setumo karata Pue Yesus Kristus, Magau to Mompakasalama to nipopeata ante kalentora nu rarata. 21 I'a kana mombabali korota to nalente-lente e'i majadi nasimbayu ewa korona mboto to neliu kakuasana ante baraka to nipakena nompatundu pura-pura nuapa ri ja'ina.
1 Jadi sampesuwu-sampesuwu to nipotoweku bo to nipolentoraku, pakaroomo pomparasaya komi ka i Pue. Komimo to najadi tandaina bagoku naria aselena, komimo to nompakadamba raraku. 2 Sampesuwuku Euodia bo i Sintikhe, aku mpu'u-mpu'u merapi ala komi mosaongu rara ewa topomparasaya i Pue. 3 Pade kuperapi ka wega rapaku wo'u, tulungimo besi romba'a e'i ala mosaongu rara bali. Ira nokarajaa ntomo ante aku nompatolele Kareba Belo nosanggani-nggani ante i Klemens bo roa-roaku sampokarajaa ntanina. Sanga ira naria nitulisi riara Buku nu Alatala to nompakatantu sema matuwu mabelo sampe ri kasae-saena. 4 Sampesuwu-sampesuwu pura-pura, ne'e menonto madamba-damba sabana komi nosaongu rara ante i Pue. Sangganipa kuuli ka komi, ne'e menonto madamba-damba! 5 Komi kana malusu rara ri ja'i ntau pura-pura. Toramo! Mana masaeka i Pue marata. 6 Ne'e makini-kini rara riara mpengele-ngele, tapi kenimo pura-pura riara mposambaya komi. Perapimo nggari ja'i Alatala ante mosukuru, 7 pade belo nu Alatala to neliu nggari pompekiri manusia, kana mompakaroo rara nta'i bo pekiri komi to nosaongu rara ante Yesus Kristus. 8 Kaopuna, sampesuwu-sampesuwu, paraluu komi tunggai mantondoaka nuapa to nakonona, nuapa to masipato rabila bo nuapa to nanoana. Pekirimo nuapa to nagasana, nuapa to nagayana, bo nuapa to nabelo raepe ntau. Tondoakamo pokainggu to neliu nggabelo, bo nuapa to masipato ratoiya. 9 Tukimo nuapa to nipeguru bo nitarima komi nggari ja'iku, nabeloka to niepe komi, nabeloka jonjo to nikita komi riara nggatuwuku. Ane etu rapowia komi, Alatala, pu'u nu belo etu, kana mosanggani-nggani ante komi. 10 Ante nadamba mpu'u raraku aku nantoiya i Pue sabana we'i-we'i komi nantulungi aku wo'umo. Da'a patujuku manguli komi da'a nantora aku bopia, tapi ninjaniku da'apa ria loga komi mompakatu pewai komi ka aku. 11 Aku nanguli e'i da'a sabana aku nakabu, sabana aku negurumo matuwu masana naupa iwenu-wenu katuwuku. 12 Ninjanikumo natuwu nakabu pade ninjaniku wo'u natuwu nelabi. Nipegurukumo akala matuwu masana mantingayo mpengele-ngele katuwu, nabeloka tempo nabosu ta'i, nabeloka tempo naoro ta'i, nabeloka aku nelabi, nabeloka aku nakabu. 13 Aku nompakule mantingayo mpengele-ngele ante petulungi Kristus to nompakaroso aku. 14 Naupa etu, nabelo mpu'umo rara komi nantulungi aku riara kasusaku ri se'i. 15 Sampesuwu-sampesuwu to Filipi, ninjani komi mbotomo tempo Kareba Belo pamulana nipatolele ka komi pade aku nompalasi Propinsi Makedonia, da'a ria topomparasaya ntanina nasintuwu nantulungi aku mompapola bago etu, aga komi mboto. 16 Da'a aga etu, tempo aku danaria ri ngata Tesalonika, da'a aga sanggani komi nompakatu pewai ka aku. 17 Etu da'a batuana aku aga madota mantarima pewai komi. Tapi to nipodotaku ala nggari powia komi etu maria aselena to mantambai rasi ka komi. 18 Nitarimaku puramo pewai nggari ja'i komi, pade etu kakonona neliu nggagana. Pura-pura pewai to nipakatu komi nitarimakumo nggari ja'i Epafroditus sampe nagana puramo to niparaluuku. Pewai komi etu nasimbayu ewa pesomba to nawongi to nikonoa bo nipodamba rara Alatala. 19 Alatalaku kana mompakagana ka komi nuapa pura to niparaluu nantuki kasugina to nelabi-labina to naria ante Yesus Kristus. 20 Kana ratoiya bo rabila Umata Pue Alatala sampe ri kasae-saena. Amin! 21 Pakasampe tabeku ka pura-pura topomparasaya Yesus Kristus ri setu. Pade tarima tabe nggari ja'i roa-roa to nosanggani-nggani ante aku ri se'i. 22 Tarima wo'u tabe nggari ja'i pura-pura topomparasaya ri se'i, neliu-liupa ira nggari sapo Magau Kaisar. 23 Perapi towe belo nggari ja'i Pue Yesus Kristus mosanggani-nggani ante komi pura-pura. Amin! Tabe nggari ja'i kami, Paulus bo Timotius
1 Sura e'i nggari ja'iku Paulus to nionggotaka najadi suro Yesus Kristus nantuki dota Alatala, pade nggari ja'i Timotius, sampesuwuta topomparasaya 2 ka topomparasaya ri ngata Kolose to naroo nomparasaya bo nosaongu rara ante Kristus. Perapi Umata Pue Alatala mombagane bo mombawai katuwua mabelo ka komi. 3 Butu nggani kami nomposambaya komi da'a nenonto kami nanguli tarima kasi ka Pue Alatala, Uma nu Pueta Yesus Kristus, 4 sabana niepe kami komi nomparasaya Yesus Kristus pade nompotowe pura-pura todea topomparasaya. 5 Etu nipowia komi sabana komi bate-batena nanjarumaka rasi bo belo to nipakasadia Alatala ka komi ri suruga. Pura-pura etu niepe komi mamimo tempo tesa to nakonona nipatolele ka komi bopia, etumo Kareba Belo. 6 Kareba Belo etu natolele sampe ri umba-umba ri dunia pade noasele riara nggatuwu tau-tau to nomparasaya tesa etu. Pade nantambaimo kadea ntau to nomparasayana. Etu nasimbayu ewa to najadi ante komi. Tempo komi nangepe Kareba Belo etu niparasaya komimo sampe komi mpu'u-mpu'u nombarasai towe belo nu Alatala. 7 Kareba Belo etu niepe komi nggari ja'i Epafras, roa sampokarajaa to nipotowe kami. I'a samba'a batua Kristus to natutu nantulungi komi. 8 I'amo to nanguli ka kami iwenu komi nosipotowe samba'a bo samba'a ante pekeniaka Nosa Nagasa nu Alatala. 9 Jadi nompamula nggari tempo kami nangepe lele etu da'a nenonto kami nosambaya ka komi. Kami batena nerapi ka Pue Alatala ala komi rawai noto bo pangginjani nggari ja'i Nosa Nagasana sampe komi mamala mangginjani pura-pura dota Alatala ka komi. 10 Ante iwetu komi mamala matuwu ante pokainggu to masipato ka topomparasaya i Pue pade tunggai mompakadamba rarana. Komi mamala mompowia mpengele-ngele powia to nabelona pade mantambai eona mantambai mosinjani belo ante Alatala. 11 Kami nerapi ala Pue Alatala mompakaroso komi ante kuasana to nipogumaa sampe komi mompakule manta'amaka ante mosabara tempo nipandasa. 12 Pade komi mamala mosukuru ri ja'i Umata Pue Alatala ante madamba rara. Sabana I'amo to nompowia komi masipato mombarata bagia nggari pura-pura nuapa to nipakasadiana ka todeana riara Poparentana to nareme. 13 I'amo to nanggabasaka kita nggari kuasa karumauna pade nanggeni kita majadi todea Poparenta nu Anana to nipotowena. 14 Nggari Anana etu kita nitolo, etumo silaka-silakata niampungimo. 15 Kristus nasimbayu ntoto ewa Alatala to da'a namala nikita lenjena. I'amo to nireke Ana Ulumbua sabana kuasana neliu nggabete nggari pura-pura to nipajadi. 16 Nggari I'amo pura-pura nuapa to naria ri langi bo dunia nipajadi, nabeloka to namala nikita, nabeloka anu da'a namala nikita, nabeloka malaeka-malaeka i Pue, nabeloka karampua-karampua, nabeloka seta-seta, nabeloka pue-pue ntanina. Pura-pura nuapa to naria nipajadi Kristus ala mombabila bo mompakabete I'a. 17 Kristus naria mamimo tempo da'apa naria nuapa-nuapa ri langi bo dunia. Pade I'a nombakuasai bo nanggeniaka pura-pura etu. 18 Pade I'a wo'u balengga nu todea topomparasaya to namala nipakasimbayu ewa korona mboto. I'amo pu'u katuwua todeana etu. I'amo to niuli Ana Ulumbua, etumo to pamulana natuwu bali nggari kamatena ala manoto I'amo to neliu nggakuasa nggari pura-pura nuapa to naria ri langi bo dunia. 19 Sabana to nipodota Alatala ala pura-pura ingguna bo kuasana maria wo'u ri ja'i Anana. 20 Pade dota Alatala wo'u ala nggari Anana etu pura-pura nuapa to nipajadi mamala rapoposinggabelo bali ante I'a, nabeloka to naria ri dunia, nabeloka to naria ri langi. Pura-pura etu nipoposinggabelo bali ante Alatala nggari lei Kristus to natiti tempo I'a namate nipaku ri kayu parika. 21 Bopia komi wo'u natuwu nakawao nggari ja'i Alatala. Komi najadi bali nu Alatala sabana pekirimu bo pokainggumu naja'a. 22 Tapi we'i-we'i ante kamate nu Anana mboto, komi nipoposinggabelo bali ante Alatala. Patujuna ala mompakagasa komi sampe mana ria sala bara kakura komi riara mpanggitana. 23 Etu kana majadi ane komi maroo momparasaya bo maroso mantuki i Pue ante da'a molengga-lengga pade da'a menonto manjarumaka pojanji-pojanji Alatala to niepe komi riara Kareba Belo. Kareba etu nipatolele sampe ri njumaongu dunia. Pade aku wo'u, Paulus, nionggotaka najadi topompatolele Kareba etu. 24 Jadi sampesuwu-sampesuwu, we'i-we'i nadambamo raraku nombarasai kasusa bo kapari sabana pokarajaaku mantulungi komi. Ante nombarasai kasusa bo kapari riara koroku mboto aku mompakagana kasusa bo kapari to nipakatantu Kristus ka aku riara pokarajaaku mantulungi todea topomparasaya, etumo ira to najadi ewa koro Kristus mboto. 25 Aku najadi topantulungi todea topomparasaya sabana aku nionggotaka Alatala mantui bago to niparasayana ka aku, etumo mompasimbayu pura-pura Tesa nu Alatala ka komi. 26 Riara Tesa etu nipakanoto nia Alatala to nitabuniaka nggari njobu-njobu mpae naliu tapi we'i-we'i nipopanjanina ka todeana topomparasaya I'a. 27 I'a madota mompopanjani ka ira niana to neliu nggabelo ka pura-pura manusia ri dunia. Niana etu iwe'i: Kristus kana matuwu riara nta'i komi sampe natantumo komi mombarata bagia riara kuasa bo kagaya nu Alatala to nipogumaa. 28 Jadi Kareba Kristus etumo to nipatolele kami ka pura-pura tau nantuki noto to naria ria ja'i kami. Kami nantewai bo nompatuduki ira pura-pura ala kami mamala manggeni ira mantingayo Alatala ante da'a maria kakura nuapa-nuapa sabana ira nosaongu rara ante Kristus. 29 Etu sampe aku nokarajaa ntomo, aku mpu'u-mpu'u nompasimbuku ante kuasa nggari ja'i Kristus to nokarajaa riara nta'iku ante naroso.
1 To nipodotaku ala komi mangginjani iwenu katomona pokarajaaku nantulungi komi bo ira ri ngata Laodikia pade pura-pura tau to da'apa nosinjani ante aku. 2 Patujuku nanguli iwetu ala rara komi pura-pura rapakaroso pade komi mosimpotowe samba'a bo samba'a sampe majadi mosaongu rara bo pekiri. Ante iwetu komi kana mpu'u-mpu'u mangginjani ante natantu pura-pura nia Alatala to nitabuniaka nggari lamba pamulana, etumo komi kana mosinjani belo ante Kristus mboto. 3 Sabana Kristusmo pu'u nu pura-pura noto bo pangginjani to nabelona. 4 Tesa etu kuuli ka komi ala ne'e maria tau manggeni komi masalanjala ante tesa-tesa to namomi. 5 Sabana naupa aku mboto da'a naria ri tatongo komi, nirasaiku ewa aku bate-batena naria nosanggani-nggani ante komi. Pade nadamba mpu'u raraku nangepe lele to nanguli komi nosaongu rara bo naroo nomparasaya Kristus. 6 Sampesuwu-sampesuwu, nitarima komimo Pue Yesus Kristus riara nggatuwu komi. Jadi komi kana matuwu eo-eo mosaongu rara ante I'a. 7 Komi kana maroo momparasaya I'a nasimbayu ewa tuja-tuja to nandala kalena. Pade pomparasaya komi kana mantambai maroso nasimbayu ewa sapo nibangu mpakaroso. Pade komi kana mantambai maroso manjoko pepatuduki to nakonona to nipatuduki ka komi. Pade komi kana tunggai mosukuru ri ja'i Pue Alatala. 8 Komi kana mainga ala ne'e maria tau mombabagiu komi pade mompasu'u komi mantuki pepatuduki agama to nasala bo da'a ntoto ria gunana. Sabana pepatuduki ira etu aga nopu'u nggari ja'i manusia, nggari ada-ada bo atura-atura ri dunia e'i. Tapi etu da'a nopu'u nggari ja'i Kristus. 9 Jadi ne'e mantuki pepatuduki ira to nasala, sabana ri ja'i Kristus naria pura-pura inggu bo kuasa Alatala. 10 Pade komi nosaongu rara ante Kristus sampe da'a ria kakura nuapa-nuapa ri ja'i komi, sabana pura-pura nuapa to naria ri ja'i Kristus naria wo'u ri ja'i komi. Pade Kristus to neliu nggakuasa nggari pura-pura kuasa ntanina to naria ri langi bo dunia. 11 Tempo komi nosaongu rara ante Kristus komi ewa nisuna. Posuna komi etu da'a ewa ada mposuna to nipowia manusia, tapi etu powia Kristus riara nta'imu. Batuana komi nikabasakana nggari kuasa nu dota raramu to naja'a. 12 Tempo komi nidiu ewa tandaina komi topomparasaya Kristus komi ewa namatemo pade nitana nosanggani-nggani ante Kristus. Pade komi wo'u nipakatuwu bali mpasanggani-nggani ante Kristus, sabana komi nomparasaya kuasa Alatala to nompakatuwu Kristus bali nggari kamatena. 13 Bopia tempo komi da'apa nomparasaya Kristus komi da ewa namate sabana komi bate-batena nombaliunaka Atura-atura nu Alatala. Komi batena nikuasai dota rara komi to naja'a. Tapi tempo etu komi ewa nipakatuwu Alatala bali mpasanggani-nggani ante Kristus. Pura-pura silakata niampunginamo. 14 Ewa naria sura to nompakatantu pura-pura silaka to nipowiata. Kita nipangadu bo nipakasala isi sura etu. Tapi tempo Kristus namate nipaku ri kayu parika sura etu nipakalipo Alatalamo sampe kita mana nireke tau nasala. 15 Pade tempo Kristus namate nipaku ri kayu parika, Alatala nombadagi pura-pura seta, karampua-karampua bo pue-pue ntanina to nakuasa. Ante kamate Kristus ri kayu parika Alatala nompakanoto ka njumaongu dunia I'amo padagi bo iramo to nidagina. 16 Jadi sampesuwu-sampesuwu, ne'e mompariara nta'i tau to mompakasala komi sabana komi nanggoni bara nanginu to nipopali nantuki ada-ada ira. Ne'e mompariara nta'i tau to mompakasala komi sabana komi da'a nantuki eo bete agama Yahudi, ewa eo bete wula nggiki bo Eo Mpenonto. 17 Sabana atura-atura bo ada-ada etu aga nombagambara anu to marata ri purina. Pade to narata ri purina etumo kabelona to niwai Kristus ka komi. 18 Jadi ane maria tau mompakasala komi sabana komi da'a nantuki pepatuduki ira, ne'e rapariara nta'i komi tesa ira. Sabana ira aga tumoni-moni naede rara pade ira nombasomba malaeka-malaeka i Pue. Pade ira nanguli pepatuduki ira etu nakono sabana naria panggita nikita ira. Ira aga nompakalanga rara sabana pepatuduki ira nopu'u nggari pekiri ira mboto to nikuasai dota rara to naja'a. Tapi kakonona da'a masipato ira noinggu iwetu. 19 Ira mana nanjarumaka Kristus to najadi balenggata. Kita topomparasaya namala rarapaka ewa koro Kristus. Ane ri koro manusia balengga to nombakuasai koro, pade pura-pura sipa nu koro niposiumpu bo niposidumpa ante karaua-karauana bo posidumpa nu wuku-wukuna ala majadi saongu. Iwetu wo'u kita topomparasaya. Kristus nompakasaongu kita pade nanggeniaka kita sampe mantambai eona mantambai maroso pomparasayata ewa to nipodota Alatala. 20 Tempo Kristus namate kita topomparasaya ewa namate wo'u nosanggani-nggani ante I'a, pade ante iwetu kita mana nisoko nu ada-ada bo atura-atura nggari dunia e'i. Jadi ane iwetu, nokuya komi danatundu riara atura-atura etu nasimbayu ewa tau-tau danipatundu nu ada-ada ri dunia e'i? 21 Nokuya komi danatundu riara atura-atura to nanguli, "Ne'e manjoko e'i", "Ne'e mombajila panggoni etu, bara ne'e mantui nuapa-nuapa to nipopali"? 22 Atura-atura etu da'a ria gunana ka kita sabana aga nantesa panggoni to nipake sampalai pade nalipo. Kakonona atura-atura etu aga nopu'u nggari parenta-parenta bo pepatuduki manusia. 23 Riara mpanggita manusia atura-atura etu mpu'u-mpu'u nabelo, sabana topantuki atura etu naraji nepue nantuki atura agama to nipakatantu ira mboto. Ira nompakaede rara pade nompandasa koro ira mboto. Tapi kakonona atura-atura etu da'a ntoto ria gunana manta'amaka dota rara manusia to naja'ana.
1 Tempo Kristus nipakatuwu bali nggari kamatena kita topomparasaya wo'u ewa nipakatuwu bali mpasanggani-nggani ante I'a. Sabana etu pekirimo anu to naria ri suruga, peto'o Kristus nekatoko ri peto'o to nibila ri panggana nu Alatala. 2 Komi kana tunggai mompekiri katuwumu to nabou nosanggani ante Kristus ri suruga. Ne'e aga mompekiri katuwumu ri dunia e'i. 3 Sabana komi ewa namatemo pade we'i-we'i komi ewa natuwu nosanggani ante Kristus ri ngayo Alatala. Katuwumu to nabou etu da'apa namala nikita ntau we'i-we'i. 4 Tapi tempo Kristus, to najadi pu'u katuwuata, marata bali ri dunia I'a kana mompopokita kuasa bo kagayana to nipogumaa. Pade komi wo'u kana manoto rakita mosanggani-nggani ka I'a ante kuasa bo kagayana etu. 5 Sabana etu kabasakamo pokainggu-pokainggu to nopu'u nggari dunia to naja'a e'i. Jonjona, ne'e mana mogau sala ante tau da'a rongomu mboto, ne'e mowia pokainggu to nompakatantoru, ne'e mantuki dota raramu to naja'a bo dota-dota ntanina to da'a nabelo. Pade ne'e wo'u maino ka mbara-mbara ntau ante da'a mabasa-basa, sabana etu nasimbayu kaja'ana ante mepue ka pue-pue ntanina. 6 Pokainggu-pokainggu ewa etumo to nompopeumba rau rara Alatala ka tau-tau da'a natundu ri ja'ina. 7 Bopia pokainggu komi wo'u nasimbayu ewa etu tempo komi danikuasai inggu-inggu naja'a. 8 Tapi we'i-we'i kabasakamo pura-pura pokainggu to naja'a. Ne'e mombaboli rau riara nta'imu, ne'e manggarau tau ntanina, ne'e momporau rara ntau, ne'e manguli sinja'i tau ntanina pade ne'e sampe maria tesa-tesa njilaka mesuwu nggari sumbamu. 9 Ne'e komi mosipodawa samba'a bo samba'a, sabana nabalimo katuwu komi bopia. Nikabasaka komimo pokainggu-pokainggu to naja'a, 10 pade nitarima komimo katuwu nabou. Komi nipajadi Alatala manusia nabou pade I'a bate-batena manggeni komi mompasiala ingguna mboto sampe kaopuna komi mpu'u-mpu'u mosinjani belo ante I'a. 11 Ane kita najadi manusia nabou mana ria posisalana ri olo tau-tau to Yahudi bo tau-tau da'a to Yahudi. Mana ria posisalana ri olo tau-tau nisuna nantuki ada-ada agama Yahudi bo tau-tau da'a nisuna iwetu. Mana ria tau nireke tolare bara tau da'a ria adana. Mana ria posisalana ri olo batua bo madika. To neliu nggapokona etumo Kristus, pade I'a neto'o riara nta'i pura-pura tau to nomparasaya I'a. 12 Sampesuwu-sampesuwu, komi nipotowe Alatala pade nipelisina majadi todeana to nagasa. Etu sampe masipato komi maasi mata manggita roamu. Komi kana mabelo rara samba'a bo samba'a. Komi kana maede raramu, bo malusu pokainggumu, pade komi kana mandate posabaramu ane rapandasa. 13 Ne'e masalisa makedi rara ri ja'i roamu, tapi ane maria posinggarau, posiampungimo komi samba'a bo samba'a. Ampungimo tau to mowia sala ri ja'imu nasimbayu ewa i Pue nombaampungi silakamu. 14 Tapi to neliu nggapokona, komi kana mosipotowe samba'a bo samba'a. Sabana posipotowe etumo to mpu'u-mpu'u mompakasaongu rara todea topomparasaya. 15 Komi kana tunggai mompaloga Kristus mombakuasai katuwu komi sampe komi bate-batena matuwu mosinggabelo samba'a bo samba'a. Sabana etumo patuju Alatala mompokio komi ala majadi saongu nasimbayu ante saongu koro to nadea sipana. Pade ne'e menonto manguli tarima kasi ka Alatala. 16 Tesa-tesa Kristus kana raboli mpakabelo-belo riara nta'i komi sampe mpu'u-mpu'u moguna riara nggatuwumu. Jonjona: posipatuduki bo posipopanjanimo komi samba'a bo samba'a nantuki pura-pura noto to naria ri ja'imu. Podademo ante tesa-tesa nggari Buku Mazmur bo podade-podade to nantoiya Alatala bo podade-podade nggari ja'i Nosa Nagasa nu Alatala. Podademo ka Alatala ante mosukuru riara nta'imu. 17 Pade nuapa-nuapa rapowia komi bara rauli komi, etu kana rapowia bo rauli ewa to masipato ka tau-tau to nomparasaya i Pue Yesus. Pade ulimo tarima kasi ka Umata Alatala riara sanga i Pue Yesus. 18 Totu'a-totu'a besi, pekoumo ri ja'i rongomu langgai ewa to masipato ka besi-besi to nomparasaya i Pue. 19 Pade totu'a-totu'a langgai, potowemo rongomu besi, ne'e moinggu makasara ri ja'ina. 20 Ngana-ngana, tukimo pura-pura parenta nu indo umamu sabana etumo pokainggu to nompakadamba rara i Pue. 21 Pade sampesuwu-sampesuwu to najadi uma, ne'e mompakaju'a rara ana-anamu ala ne'e ira maopu rara. 22 Sampesuwu-sampesuwu to najadi batua, tukimo pura-pura parenta nu madikamu ri dunia e'i. Ne'e aga mantuki parentana tempo komi nikitana ala komi ratoiyana. Tapi tukimo parentana ante naliongu rara sabana komi nekou ri ja'i Pue. 23 Nuapa-nuapa raparenta ka komi, kawiamo etu ante mpu'u-mpu'u raramu nasimbayu ewa komi nantulungi i Pue da'a aga manusia. 24 Sabana ninjani komi Pue mbotomo to mombabalasi pokainggu komi. I'a kana mombawai ka komi nuapa-nuapa to nijanjina ka ana-anana. Toramo! Kristusmo madika to nitulungi komi. 25 Pade isema-sema to mowia kaja'ana kana rabalasi ante pesuku to masipato ante kaja'ana etu, sabana Pue da'a nanggita lenje.
1 Sampesuwu-sampesuwu to najadi madika, komi kana moinggu manoa bo makono ri ja'i batua-batuamu, sabana ninjani komi mbotomo naria Madikamu ri suruga. 2 Ne'e mabasa-basa mosambaya ka Pue Alatala ante mainga, pade ne'e menonto manguli tarima kasi ka I'a. 3 Posambaya wo'u ka kami ala Alatala mombabuka jala ka kami mompatolele niana to nitabuniakana nggari nggaolu to nipakadupa Kristus. Sabana nggari pokarajaaku nompatolele tesa etumo sampe aku nitarunggu we'i-we'i. 4 Jadi posambayamo ala aku mamala mompakanoto tesa Kristus etu, sabana etumo bago to masipato kupowia. 5 Ane komi mosigalo ante tau-tau da'a topomparasaya komi kana moinggu manoto, pade pakemo loga to naria ri ja'imu. 6 Ane komi motesa ka ira, tesa-tesamu kana malusu bo mabelo. Kana ranjani komi wo'u akala to masipatona mombasono pompekutana ira samba'a bo samba'a. 7 Sampesuwu-sampesuwu, ane i Tikhikus marata ri ja'i komi, i'a kana mantesa mpakanoto ka komi ewa katuwuku ri se'i. I'a samba'a sampesuwu to nipotoweku. I'a wo'u samba'a roaku sampokarajaa bo batua i Pue to natutu nokarajaa nantulungi todea topomparasaya. 8 I'a nipakauku mpaka ri ja'i komi ala komi mamala mangginjani ewa katuwu kami ri se'i, pade ala i'a mamala mompakaroso rara komi ri setu. 9 Pade nosanggani ante i'a nipakauku wo'u Onesimus, sampesuwuta to nipotoweku to natutu nomparasaya. I'a samba'a nggari ngata komi mboto. Ira romba'a kana mompakanoto ka komi nuapa pura to najadi ri se'i. 10 Tabe nggari ja'i Aristarkhus to nosanggani ante aku riara tarunggu ri se'i. Pade tabe nggari ja'i Markus sampesuwu i Barnabas. Toramo to nitewaiku ka komi bopia ewa i Markus etu. Ane i'a momai ri ja'i komi ri setu, tarimamo i'a ante mabelo. 11 Tabe wo'u nggari ja'i Yesus to nidae Yustus. Nggari tau-tau to Yahudi to nomparasaya aga ira tolumba'a etu to nokarajaa ante aku we'i-we'i mangelo tau majadi todea nu Poparenta nu Alatala. Iramo to mpu'u-mpu'u nompakaroso raraku. 12 Pade tabe nggari ja'i Epafras, batua Yesus Kristus nggari ngata komi mboto. I'a tunggai nokarajaa ntomo nomposambaya komi pura-pura ala komi majadi topomparasaya to maroso pade ala komi maroo mantuki pura-pura dota Alatala. 13 Aku mboto nanggita i'a nokarajaa ante mpu'u-mpu'u rarana nantulungi komi to neto'o ri ngata Kolose bo ira to neto'o ri ngata Laodikia bo ngata Hierapolis wo'u. 14 Tabe wo'u nggari ja'i Dokutoro Lukas to nipotoweku, pade nggari ja'i Demas. 15 Kuperapi pakasampe tabeku ka topomparasaya-topomparasaya ri ngata Laodikia, pade ka i Nimfa bo todea topomparasaya to nasiromu nodade ri sapona. 16 Ane sura e'i naopu nibasa ri ngayo komi pura-pura, kuperapi ala rapakatu ka todea topomparasaya ri ngata Laodikia ala mamala rabasa ka ira ri setu wo'u. Iwetu wo'u komi kana mombabasa suraku to rapapola nggari ngata Laodikia ka komi. 17 Pade ulimo ka Arkhipus, "Pakaopumo pokarajaa to niwai Pue ka komi." 18 Tabe nggari ja'iku, Paulus. Kaopu nu sura e'i nitulisi ante paleku mboto. Toramo, aku dariara tarunggu. Perapi towe belo nu Alatala mosanggani ante komi pura-pura. Tabe nggari ja'iku, Paulus
1 Sura e'i nggari ja'i kami tolumba'a, etumo, i Paulus, i Silas bo i Timotius, ka topomparasaya i Pue Yesus ri ngata Tesalonika to nosaongu rara ante Umata Pue Alatala bo Pue Yesus Kristus. Perapi Pue Alatala mombagane bo mombawai katuwua mabelo ka komi. 2 Kami da'a nenonto nanguli tarima kasi ka Pue Alatala sabana katuwu komi pura-pura, pade kami tunggai nanggeni komi pura-pura riara posambaya. 3 Tempo kami nosambaya ka Umata Pue Alatala kami batena nantora powia komi to nompopokita pomparasaya komi. Kami nantora iwenu komi nantulungi tau ntanina ante towe, pade nitora kami wo'u iwenu komi naroo rara tempo nipandasa ntau sabana komi bate-batena manjarumaka Pueta Yesus Kristus. 4 Sampesuwu-sampesuwu to nipotowe Alatala, ninjani kami komi nipelisi Alatala najadi todeana. 5 Nanotomo etu sabana tempo kami nompatolele Kareba Belo ka komi, etu da'a nipatolele kami ante tesa bayangi, tapi ante kuasa bo petulungi nggari ja'i Nosa Nagasa nu Alatala. Pade kami mboto nombarasai kuasa Alatala nokarajaa riara nta'i kami tempo kami nompatolele tesa etu ka komi. Ninjani komi mbotomo pokainggu kami tempo kami danaria ri tatongo komi ri setu. Kami noinggu iwetu ala manggeni belo ka komi. 6 Pade komi nompasiala pokainggu kami etu bo pokainggu i Pue wo'u. Naupa komi nipandasa mpu'u komi nantarima Tesa nu Alatala ante nadamba rara. Nosa Nagasa nu Alatala mbotomo to nompakadamba rara komi. 7 Etu sampe katuwu komi najadi jonjo to nipasiala pura-pura topomparasaya i Pue Yesus ri Propinsi Makedonia bo Propinsi Akhaya. 8 Nompamula nggari ngata komi Tesa i Pue natolelemo sampe ri umba-umba ri Makedonia bo Akhaya. Pade da'a aga etu. Tesa ewa pomparasaya komi ka Alatala wo'u natiepe ri umba-umba. Ri umba polumako kami da'a paraluu kami motesa ka tau ewa pomparasaya komi, sabana tesa etu naopu ninjani ira. 9 Ira mboto notesa ka kami iwenu komi nantarima kami tempo kami narata ri ja'i komi bopia. Pade nitesa ira wo'u iwenu komi nenonto mepue ka pue-pue ntanina pade nompamula mepue ka Alatala to natuwuna bo to nakonona. 10 Nitesa ira wo'u iwenu komi nompopea karata Anana nggari suruga, etumo Yesus. I'amo to nipakatuwu Alatala bali nggari kamatena. Pade I'amo to mombakabasaka kita nggari pesuku Alatala to rapawela ka tau nasilaka banepiana.
1 Sampesuwu-sampesuwu, ninjani komi mbotomo karata kami ri ja'i komi da'a narata bayangi, tapi nariamo aselena. 2 Ninjani komi da'apa kami narata ri ngata komi, kami mpu'u-mpu'u nipandasa bo nipakaja'a ntau ri ngata Filipi. Tapi naupa nadea tau nangewa kami ri setu, Pue Alatalata nompakaroo rara kami ala kami nabia nompatolele ka komi Kareba Belo nggari ja'ina. 3 Pepatuduki kami etu da'a nasala. Da'a wo'u naria patuju kami to naja'ana, atau patuju mombabagiu tau. 4 Tapi kami nompatuduki ewa tau to nireke Alatala masipato raparasaya ka Kareba Belo etu. Kami da'a notesa ala mompakadamba rara manusia, tapi kami notesa ala mompakadamba rara Alatala, sabana I'amo to nomparesa rara nta'i kami. 5 Ninjani komi mbotomo da'a ria sanggani kami nompadidi komi, pade da'a wo'u naria akala kami mantabuniaka patuju aga mompakauntu koro kami mboto. Alatala mbotomo mamala mantakono tesa kami e'i! 6 Kami da'a wo'u miki ratoiya ntau, nabeloka komi, nabeloka tau-tau ntanina. Kakonona masipato kami rabila bo ratoiya komi sabana kami e'i suro-suro Kristus mboto. 7 Tapi da'a iwetu patuju kami. Tempo kami naria ri tatongo komi ri setu, kami nalusu rara nasimbayu ewa samba'a indo to nompatomi bo nompotowe anana mboto. 8 Nabete mpu'u pepotowe kami ka komi, sampe kami nasadia nompatolele Kareba Belo ka komi. Pade neliu nggari etu, kami wo'u nasadia mamate mantulungi komi, sabana kami mpu'u-mpu'u nompotowe komi! 9 Sampesuwu-sampesuwu, tantu danitora komi iwenu kami nokarajaa ntomo ri tatongo komi. Eo wengi kami nokarajaa ala ne'e mompakatomo komi mompekiri katuwu kami tempo kami nompatolele ka komi Kareba Belo nggari ja'i Alatala. 10 Pokainggu kami ri ja'i komi to nomparasaya i Pue Yesus nagasa bo nanoa, pade da'a ria nuapa-nuapa to masipato rasalai. Komi mbotomo bo Alatala wo'u namala mantakono pokainggu kami etu. 11 - 12 Ninjani komi mbotomo kami tunggai nompatuduki komi nasimbayu ewa samba'a uma nompatuduki anana mboto. Kami nompakaroso rara komi pade kami tunggai nompopatora ka komi ala matuwu masipato ewa samba'a topomparasaya Alatala. I'amo to nompokio komi majadi todea riara poparentana, ala komi mombarata bagia riara kareme bo kagayana to nipogumaa. 13 Naria sangelepa ntanina sampe kami da'a nenonto nanguli tarima kasi ka Alatala. Etumo tempo komi nangepe Tesa nu Alatala to nipatolele kami ka komi, tesa etu da'a nireke komi aga tesa manusia. Tapi etu nitarima komi ewa tesa nggari ja'i Alatala mboto. Pade etu mpu'u-mpu'u Tesa nu Alatala to nokarajaa riara nggatuwu komi to nomparasaya i Pue Yesus. 14 Sampesuwu-sampesuwu, nuapa to najadi ri ja'i komi nasimbayu ewa to najadi ri ja'i ira topomparasaya Yesus Kristus ri Bagia Yudea. Komi wo'u nipandasa roamu nggari ngata komi mboto nasimbayu ewa ira nipandasa roa ira to Yahudi ri ngata ira mboto. 15 Tau-tau to Yahudi wo'u nompatesi i Pue Yesus bo nabi-nabi nu Alatala pade nompandasa kami wo'u. Ira da'a ntoto nompakadamba rara Alatala, pade ira nobali ka pura-pura tau 16 ante nombalawa kami mompatolele Kareba Belo ka tau ntanina da'a to Yahudi to nompakanoto iwenu ira mamala rapakasalama. Ante powia ira etu, silaka ira to Yahudi bate-batena natetambai sampe nadea gagamo. Kaopuna ira nawela pesuku nu Alatala. 17 Tapi, sampesuwu-sampesuwu, nompamula nggari tempo kita nipopoga'a sampalai, mpu'u-mpu'u nalentora rara kami manggita komi. Naupa kita nosinggakawao peto'o, kami batena nalentora nompekiri komi. Jadi ante mpu'u-mpu'u rara kami nompasimbuku masalisa momai mantalioda komi. 18 Naria mamimo nia kami momai ri ja'i komi. Aku mboto bara sakuya ngganimo nompasimbuku momai ri ja'i komi, tapi Magau nu Seta batena nombalawa kami. 19 Nalentora mpu'umo rara kami manggita komi, sabana komimo to nompakadamba rara kami. Komimo to niposabana sampe nariamo panjarumaka kami to natantuna mompopea karata i Pue Yesus bali ri dunia. Kami kana madamba-damba ri ngayona banepia sabana nariamo asele pobago kami. 20 Mpu'u-mpu'u nggari komimo sampe kami kana rabila ri ngayo i Pue Yesus. Nggari komimo sampe nadamba mpu'u rara kami.
1 Kaopuna mana namala kami nanta'amaka kalentora rara kami. Jadi nipekiri kami agina aku neto'o njamba'aku ri ngata Atena 2 pade sampesuwuta i Timotius rapakau mpaka ri ja'i komi. Timotius e'i samba'a batua Alatala to nokarajaa nosanggani ante kami manggeni Kareba Belo Kristus. I'a nipakau kami mpaka ri ja'i komi ala mompakaroo rara komi bo mompakaroso pomparasaya komi. 3 I'a nipakau kami mpaka ri ja'i komi ala ne'e maria nggari tatongo komi to mokanggaura momparasaya sabana nipandasa ntau. Kakonona ninjani komi mbotomo kita kana rapandasa sabana etumo to nipakatantu Alatala ka kita. 4 Tempo kami danaria nosanggani-nggani ante komi bopia, niuli kami mamimo kana maria tau mompandasa kita sabana kita nomparasaya i Pue Yesus. Pade ninjani komi mboto etumo to mpu'u-mpu'u najadi. 5 Jadi etu sampe aku nompakau i Timotius malau mpaka ri ja'i komi, ala mamala kunjani iwenumo pomparasaya komi, sabana mana namala aku nanta'amaka kalentora raraku nompekiri komi. Nakini raraku ne'e-ne'e komi namala radagi Magau nu Seta ante pesoba-pesobana sampe mana ria asele nggari katiti nu ini kami nanggeni Kareba Belo ka komi. 6 Tapi we'i-we'i natinggulimo i Timotius ri ja'i kami ri se'i, pade nitesana ka kami kareba to nompakadamba rara kami. Niulina, "To Tesalonika naroso pomparasaya ira, bo ira nosipotowe samba'a bo samba'a. Ira bate-batena nantora kita ante nadamba rara pade ira nalentora manggita kita nasimbayu ewa kita nalentora manggita ira." 7 Sampesuwu-sampesuwu to nipotoweku, nangepe kareba to nitesa i Timotius etu, nawoemo rara kami. Naupa kami nasusa bo nipandasa ntau, nawoemo rara kami nangepe komi batena naroo nomparasaya. 8 Jadi we'i-we'i naroso balimo rara kami sabana komi naroo nomparasaya i Pue. 9 Tempo kami nosambaya ka komi ri ja'i Pue Alatalata, nadamba mpu'u rara kami. Ewa da'a ria tesa to nagana manguli tarima kasi kami ka I'a nggari kadamba nu rara kami nantora komi. 10 Eo wengi kami merapi ka Alatala ante mpu'u-mpu'u rara ala kami mamala malau manggita komi pade mompakagana nuapa-nuapa to nakura ri pomparasaya komi. 11 Perapi Umata Pue Alatala mboto bo Pueta Yesus mombabuka jala ka kami ala mosirata bali ante komi. 12 Perapi Pue manggeni komi mantambai mosipotowe samba'a bo samba'a bo mpu'u-mpu'u mompotowe pura-pura tau, nasimbayu ewa kami mpu'u-mpu'u nompotowe komi. 13 Perapi Pue mompakaroso pomparasaya komi sampe komi majadi magasa bo manoa ri ngayo Umata Pue Alatala tempo Pueta Yesus marata bali ri dunia nosanggani ante pura-pura topantuki I'a to nagasana.
1 Sampesuwu-sampesuwu, kapolana kami merapi bo mompopatora ka komi ante kuasa to niwai i Pue Yesus ka kami, tukimo pepatuduki to niepe komi nggari ja'i kami to nompakanoto pokainggu nuapa to masipato rakawia komi ala mompakadamba rara Alatala. Kakonona, pokainggu komi nantuki pepatuduki etu. Tapi kami merapi ka komi, ratambaipa pokainggu komi to nabelona etu. 2 Ninjani komi atura-atura to nipatuduki kami ka komi ante kuasa nggari ja'i Pue Yesus. 3 Iwe'imo dota rara Alatala: komi kana matuwu ante pokainggu to nagasana, bo ne'e mogau sala mosampaturu ante tau da'a rongomu mboto. 4 Butu mba'a langgai nggari tatongo komi kana mangginjani iwenu matuwu mosanggani-nggani ante rongona ante pokainggu to nagasa bo masipato ratoiya. 5 Ne'e komi matuwu mantuki dota rara to naja'a nasimbayu ewa pokainggu ntau da'a nangginjani Alatala. 6 Ri pokainggu langgai bo besi, ne'e komi mompowia silaka ri ja'i sampesuwumu, ne'e mombabagiu i'a ante mangala rongona, sabana Alatala kana mombasuku pura-pura tau to nompowia sala ewa etu. Etu pura-pura nipatuduki bo nipopatora kami ka komi bopia. 7 Alatala da'a nompokio kita ala kita mogau sala ante tau da'a rongota mboto. Tapi I'a nompokio kita ala matuwu ante pokainggu to magasa. 8 Jadi isema-sema to nompoara pepatuduki e'i da'a nompoara pepatuduki manusia, tapi ira nompoara pepatuduki Alatala to nombawai Nosana to Nagasa ka komi. 9 Sampesuwu-sampesuwu, da'a paraluu aku mantulisi ka komi ewa posipotowe samba'a bo samba'a, sabana Alatala mbotomo nompatuduki etu ka komi. 10 Kakonona nosimpotowemo komi ante pura-pura topomparasaya i Pue Yesus ri njumaongu Propinsi Makedonia. Tapi kami merapi ka komi ante mpu'u-mpu'u, ratambaipa posipotowe komi etu. 11 Pasimbukumo matuwu malino mompasiayu bagomu mboto. Ne'e mombagalo urusa tau ntanina. Pokarajaamo mangelo katuwua komi mboto ewa to niparenta kami ka komi bopia. 12 Ane komi matuwu iwetu, komi kana rabila tau-tau to da'a nomparasaya i Pue Yesus, pade komi da'a metimbaloe ka tau-tau ntanina. 13 Sampesuwu-sampesuwu, to nipodota kami ala komi mangginjani nuapa kakono-konona majadi ante tau-tau to namatemo ala ne'e komi masusa rara nasimbayu ewa tau-tau ntanina to da'a ria panjarumakana. 14 Kita nomparasaya i Pue Yesus namate natuwu bali. Iwetu wo'u topomparasaya i Pue Yesus to namatemo. Ira kana rapakatuwu Alatala bali nggari kamatena pade rakeni mpasanggani-nggani ante i Pue Yesus. 15 Pepatuduki kami e'i nggari ja'i Pue mboto. Tempo I'a marata bali ri dunia, kita to danatuwu tempo etu da'a meore mosirata ka I'a mokolu ka roa-roata to namatena. 16 Tempo parenta rawai bo tadulako malaeka mongare ante suara to namangga bo kololio Alatala rapopomoni, tempo etu wo'u i Pue Yesus mboto kana mana'u nggari suruga. Pade topomparasaya Kristus to namatemo kana matuwu bali. 17 Naopu etu kita to danatuwu tempo etu kana raore mpasanggani-nggani ante ira riara kulimu mosirata ka i Pue Yesus ri laerawa. Pade kita kana matuwu mpasanggani-nggani ante i Pue sampe ri kasae-saena. 18 Sabana etu, sampesuwu-sampesuwu, posipakawoemo rara komi samba'a bo samba'a ante pepatuduki e'i.
1 Sampesuwu-sampesuwu, da'a paraluu kami mantulisi ka komi mompakanoto ewa tempo to natantuna kajadia-kajadia etu pura-pura majadi. 2 Ninjani komi mboto ante nanoto karata i Pue Yesus banepia masimbayu ewa karata samba'a topangangga tempo nggawengina ante da'a ninjani-njani ntau. 3 Tempo tau-tau aga manguli, "Katuwuta ri dunia nabelo pura, da'a ria nuapa-nuapa to rapokaekata," ri tempo etumo ira kaliu-liu rasuku. Da'a ntoto maria jala ira malai nggari kasusa etu. Etu kana majadi ante da'a ninjani-njani ira, nasimbayu ewa ju'a samba'a besi ntora moana. 4 Tapi sampesuwu-sampesuwuku, komi da'a natuwu ri karumauna ewa tau-tau to da'a nomparasaya. Jadi komi da'a rapakatikaja tempo karata i Pue Yesus nasimbayu ewa tempo karata samba'a topangangga tempo nggawengina. 5 Komi pura-pura tau to natuwu riara karemena, komi nompowia to nabelona nasimbayu ewa powia ntau ri eona. Kita da'a natuwu ri karumauna, kita da'a nompowia to naja'ana nasimbayu ewa to nipowia ntau tempo nggawengina. 6 Jadi kita kana mainga bo manoto rarata. Ne'e makanjalia nasimbayu ewa tau-tau to da'a nomparasaya Alatala. 7 Tau ri karumauna aga nalumpi bo nalangu sampe mana nanoto rarana. 8 Tapi kita tau to natuwu riara karemena. Etu sampe kita masipato manoto rarata. Kita kana maroo momparasaya Alatala pade mompotowe tau-tau ntanina ala kita maroso nasimbayu ewa tantara to nobaju ase. Kita kana maroo manjarumaka Alatala mompakasalama kita ala kita maroso ewa tantara nosonggo waja. 9 Sabana Alatala nompelisi kita da'a ala rasuku tapi ala rapakasalama ante momparasaya Pueta Yesus Kristus. 10 I'a namate nantolo silakata ala tempo I'a marata bali ri dunia nau kita damatuwu atau namatemo tempo etu, kita mamala matuwu mpasanggani-nggani ante I'a. 11 Sabana etu, sampesuwu-sampesuwu, posipakawoemo rara komi, bo posipakarosomo pomparasaya komi samba'a bo samba'a ewa to nipowia komi mami we'i-we'i. 12 Sampesuwu-sampesuwuku, kami mpu'u-mpu'u merapi ala komi mombabila topanggeniaka-topanggeniaka to nokarajaa ntomo ri tatongo komi, etumo ira to nipelisi i Pue manggeniaka bo mompatuduki komi. 13 Bilamo ira bo potowemo ira ante mpu'u-mpu'u rara, sabana ira mpu'u-mpu'u nokarajaa nantulungi komi. Pade katuwumo mosinggabelo ante pura-pura roamu. 14 Kami wo'u merapi ka komi, uli ka tau-tau nasondo rarana, ira kana mokarajaa. Pakaroomo rara tau-tau to naeka rarana. Tulungimo tau-tau to nalente pomparasayana. Posabaramo komi ri ja'i ntau pura-pura. 15 Pakabelo-belo, ne'e sampe maria komi mombabalasi powia to naja'ana ante kaja'ana, tapi tunggai mompasimbuku mowia to nabelona ka roa-roa komi pade ka pura-pura tau ntanina. 16 Eo wengi komi kana madamba. 17 Ne'e mabasa mosambaya. 18 Pade posukurumo ri ja'i Alatala riara mpengele-ngele, sabana etumo dota rarana ka komi to nosaongu rara ante Yesus Kristus. 19 Ne'e manta'amaka powia Nosa Nagasa nu Alatala. 20 Ne'e manjapuaka tesa nggari ja'i Nosa Nagasa nu Alatala to nipasimbayu roamu, 21 tapi ujimo pura-pura tesa etu. Pade tukimo nuapa to nabelona. 22 Pakakawao koro komi nggari mpengele-ngele to naja'ana. 23 Perapi Pue Alatala mboto, to nombawai katuwua to nabelo, mompakagasa pura-pura katuwu komi sampe komi mpu'u-mpu'u magasa riara mpanggitana. Perapi Pue mombajagai pura-pura katuwu komi, nabeloka nosamu, nabeloka wayomu, nabeloka koromu sampe da'a ntoto maria nuapa-nuapa to nasalana tempo Pueta Yesus Kristus marata bali ri dunia. 24 Alatala nompokio kita majadi todeana. Jadi I'amo to mompowia etu pura-pura ka komi sabana I'a namala raparasaya. 25 Sampesuwu-sampesuwu, tulungi posambaya wo'u ka kami. 26 Pakasampe tabe kami ka pura-pura topomparasaya i Pue Yesus ri setu ante towe. 27 Ante kuasa to niwai i Pue ka aku, aku momparenta komi ala sura e'i rabasa ka pura-pura topomparasaya i Pue Yesus ri setu. 28 Perapi Pueta Yesus Kristus mombagane komi pura-pura. Tabe nggari ja'i kami tolumba'a, Paulus, Silas, bo Timotius
1 Sura e'i nggari ja'i kami tolumba'a, etumo, i Paulus, i Silas bo i Timotius, ka topomparasaya ri ngata Tesalonika to nosaongu rara ante Umata Pue Alatala bo Pue Yesus Kristus. 2 Perapi Pue Alatala bo Pue Yesus Kristus mombagane bo mombawai katuwua mabelo ka komi. 3 Sampesuwu-sampesuwu, kami da'a nenonto nanguli tarima kasi ka Pue Alatala sabana katuwu komi. Masipato kami nosukuru sabana nantambai eona nantambai karoso pomparasaya komi ka i Pue Yesus, pade komi pura-pura nantambai nosipotowe samba'a bo samba'a. 4 Etu sampe ri ngata-ngata ntanina kami nantoiya pokainggu komi ri ngayo ntodea topomparasaya Alatala. Ante nadamba rara kami notesa ka ira iwenu komi ri ngata Tesalonika naroo nomparasaya tempo nipandasa bo nipakasusa. 5 Nuapa to najadi ri ja'i komi etu saongu tandai to nompakanoto potangara Alatala nanoa. Iwe'imo kanoana: Komi naroo nomparasaya tempo nipandasa. Jadi etu sampe komi kana rareke masipato majadi todea riara Poparenta nu Alatala. 6 Alatala kana mowia to nanoana ante mombabalasi powia ira to nompandasa komi, 7 pade I'a kana mombakabasaka komi, bo kami wo'u, nggari kasusa to nirasaita we'i-we'i. Etu rapowiana tempo i Pue Yesus mana'u nggari suruga mosanggani-nggani ante malaeka-malaekana to nakuasa 8 ante remena to najela ewa apu. I'a kana mana'u ala mombasuku tau to da'a nadota mosinjani ante Alatala bo da'a nadota momparasaya Kareba Belo to nantesa Pueta Yesus. 9 Tau-tau etu kana rasuku Alatala sampe ri kasae-saena. Ira kana rapopoga'a nggari ja'i Pue pade nggari reme bo kuasana. 10 Pura-pura etu kana majadi tempo i Pue Yesus marata banepia ala rabila bo ratoiya ntopantuki I'a pade rapogumaa pura-pura topomparasaya I'a. Sampesuwu-sampesuwu, komi wo'u kana mombabila bo mantoiya I'a eo etu sabana niparasaya komimo kareba to nipatolele kami ka komi. 11 Etu sampe kami da'a nenonto nosambaya ka komi. Kami merapi ala pokainggu komi rapajadi masipato ka tau to nipokio Alatalata majadi todeana. Kami wo'u merapi ala Pue Alatala mompakadupa pura-pura patuju komi mowia to nabelona, bo mombawai kuasa ka komi ala mantulungi komi mompakaopu pura-pura bago to nipamula komi sabana komi nomparasaya i Pue Yesus. 12 Patuju kami merapi iwetu ala nggari powia komi to nabelona etu, sanga Pueta Yesus kana rabila bo ratoiya, pade ala komi wo'u rabila bo ratoiya i Pue Yesus. Etu pura-pura majadi nggari towe belo Umata Pue Alatala bo Pue Yesus Kristus.
1 Sampesuwu-sampesuwu, kami madota mompakanoto ka komi ewa nuapa majadi tempo Pueta Yesus Kristus marata bali ri dunia pade kita raore rapasiromu mpasanggani-nggani ante I'a. Kami merapi, 2 ne'e komi masasinta gaga maingu atau mawiora rara ane komi mangepe kareba to nanguli narata balimo i Pue Yesus. Ne'e komi maingu naupa maria tau manguli ka komi etu tesa nggari ja'i Nosa Nagasa, atau ira manguli etu to niuli kami atau to nitulisi kami riara sura. 3 - 4 Nau bara iwenu ntoto kareba etu, ne'e sampe komi mamala rabagiu, sabana da'apa eo etu marata naria rongele kana majadi ntanimo ruru. Pamulana, nadea mpu'u tau kana mombasapuaka bo mangewa Alatala. Pade karongelena, tau to niuli Topangewa Alatala kana meumba. I'a kana mompakalanga korona bo mangewa pura-pura nuapa to nipesomba manusia atau to nireke manusia ewa alatala. Da'a aga iwetu, tapi kaopuna i'a kana mesua mekatoko ri Sapo Mpepue pade manguli i'a mbotomo Alatala. Tapi natantumo i'a kana ratajiaka riara naraka banepia. 5 Sampesuwu-sampesuwu, natantu nitora komi nuapa pura to nipatudukiku ka komi ewa etu tempo aku danaria nosanggani-nggani ante komi. 6 Pade ninjani komi Topangewa Alatala etu da'apa neumba sabana we'i-we'i danaria sangele nombalawa i'a. Ninjani komi mbotomo nuapa to nombalawa i'a. Jadi ane marata tempona to nipakatantu Alatala, Topangewa Alatala etu kana meumba. 7 Kuasa naja'a to nombakuasai i'a nompamula nokarajaa nggalino ri dunia we'i-we'i, tapi korona mboto da'apa neumba sabana i'a danilawa. I'a bate-batena ralawa sampe ri tempo topelawa etu rakaliaka. 8 Aga maopu etu pade i'a meumba. Tapi tempo i Pue Yesus marata ante kuasana to nipogumaa, I'a kana mompatesi Topangewa Alatala etu. Pue Yesus kana mompakaropu i'a ante nosa nggari sumbana. 9 Topangewa Alatala etu kana meumba ante kuasa Magau nu Seta pade i'a kana mombabagiu tau ante mompowia mpengele-ngele kabaraka bo tandai-tandai to nipogumaa. 10 I'a kana mompake mpengele-ngele akala to naja'a mombabagiu tau-tau to masipato rasuku Alatala. Ira masipato rasuku Alatala sabana ira da'a madota mantarima bo mompotowe pepatuduki to nakonona nggari ja'i Alatala to namala mompakasalama ira. 11 Etu sampe Alatala kana mompakatu ka ira sangele kuasa to mombabagiu ira sampe ira momparasaya dawa nu Topangewa Alatala etu. 12 Alatala kana mowia iwetu ala kaopuna pura-pura tau to da'a nomparasaya pepatuduki to nakonona tapi aga nompokono to naja'ana kana rasuku. 13 Jadi sampesuwu-sampesuwu to nipotowe i Pue, masipato kami da'a nenonto manguli tarima kasi ka Alatala sabana katuwu komi. Kami kana manguli tarima kasi sabana Alatala nompelisi komi nggari lamba pamulana ala komi rapakasalamana. Etu pura-pura najadi nggari powia Nosa Nagasa riara nggatuwu komi ala mompakajadi komi todea Alatala to nagasana. Pade etu najadi sabana komi nomparasaya pepatuduki to nakonona. 14 I'a nompokio komi majadi todeana nggari Kareba Belo to nipatolele kami ka komi. Patujuna ala komi mamala mombarata bagia riara kuasa bo kagaya Pueta Yesus Kristus. 15 Jadi sampesuwu-sampesuwu, sabana etu, pakaroso pomparasaya komi. Komi kana tunggai mantuki pepatuduki to nipatolele kami ka komi, nabeloka to nitesa kami ante sumba, nabeloka to nitulisi kami riara sura. 16 - 17 Pue Alatala nompotowe kita pade nggari towe belona mboto I'a nompakaroo rarata sampe ri kasae-saena, pade nombawai ka kita panjarumaka to nabelona. Perapi Pueta Yesus Kristus mboto bo Umata Pue Alatala mompakawoe bo mompakaroso rara komi ala komi tunggai mowia bo motesa nuapa to nabelona.
1 Kapolana sampesuwu-sampesuwu, posambayamo ka kami to nompatolele Tesa nu Alatala ala Tesa etu masasinta matolele pade ratarima bo rabila ntau ante nabelo nasimbayu ewa etu nitarima bo nibila komi bopia. 2 Posambaya wo'u ka kami ala kami mamala rakabasaka nggari ja'i tau-tau to nadenggo bo naja'a rarana, sabana da'a pura-pura tau nomparasaya Tesa nu Alatala. 3 Tapi da'a ria kaopuna petulungi i Pue. I'a bate-batena mompakaroso rara komi bo mombajagai komi nggari kuasa Magau nu Seta. 4 Pue to nanggeniaka komi. Jadi etumo sabana natantumo ka kami nuapa to nitewai kami ka komi, etu nituki komi we'i-we'i, pade etu bate-batena ratuki komi. 5 Perapi i Pue mompoewu komi sampe komi mpu'u-mpu'u mangginjani towe Alatala ka komi pade komi maroo rara nasimbayu ewa karoo rara Kristus mboto. 6 Sampesuwu-sampesuwu, ante kuasa to niwai Pue Yesus Kristus ka kami, kami momparenta komi, ne'e ntoto mowega ante topomparasaya to nasondo rarana mokarajaa pade da'a nantuki pepatuduki to nipatuduki kami ka komi. 7 Ninjani komi mbotomo pokainggu kami bopia kana masipato rapasiala komi. Kami da'a nasondo rara nokarajaa tempo kami naria ri tatongo komi. 8 Kami da'a wo'u nanggoni panggoni ntau anu da'a nibayari kami. Tapi eo wengi kami nokarajaa ntomo ala ne'e mompakatomo komi mompekiri katuwu kami. 9 Kakonona masipato kami merapi tulungi ka komi. Tapi kami da'a madota, sabana kami madota mompopokita ka komi saongu jonjo to namala rapasiala komi. 10 Da'a aga iwetu. Tempo kami danaria ri tatongo komi bopia, kami nomparenta komi iwe'i: "Isema-sema da'a madota mokarajaa, ne'e rapakoni i'a." 11 Sampesuwu-sampesuwu, kami nantulisi tesa e'i ka komi sabana niepe kami naria tau-tau ri setu to nasondo rarana. Ira da'a nasiwu nokarajaa, ira aga nasiwu-siwu mombabago roa-roa ira. 12 Jadi ante kuasa to niwai Pue Yesus Kristus ka kami, kami momparenta bo mompopatora tau-tau etu, "Pokarajaamo komi ante malino mopaelo katuwua komi mboto." 13 Tapi sampesuwu-sampesuwu pura-pura, kami manguli ka komi, "Ne'e mabasa mowia to nabelona." 14 Ane maria tau da'a madota mantuki tesa to nitulisi kami riara sura e'i, pariara nta'imo i'a. Ne'e mowega ante i'a ala kaopuna maeya mboto matana. 15 Aga ne'e rareke i'a bali komi, tapi patudukimo i'a ewa samba'a sampesuwumu. 16 Perapi Pue mboto bate-batena mombawai ka komi katuwua mabelo riara mpengele-ngele, sabana I'amo pu'u katuwua to nabelona etu. Perapi Pue mosanggani-nggani ante komi pura-pura. 17 Tabe nggari ja'iku, Paulus. Kaopuna sura e'i nitulisiku ante paleku mboto. Etumo tandaina to nitulisiku ri pura-pura suraku ala ranjani komi sura e'i nggari ja'iku mboto. Etumo akalaku mantulisi sura. 18 Perapi Pueta Yesus Kristus mombagane komi pura-pura. Tabe nggari ja'i kami tolumba'a, Paulus, Silas, bo i Timotius
1 - 2 Sura e'i nggari ja'iku i Paulus ka i Timotius to najadi ewa anaku mboto sabana nomparasaya i Pue Yesus. Aku e'i najadi suro Yesus Kristus nantuki parenta Alatala, Magau to Mompakasalama kita bo Pue Yesus Kristus to nisarumakata. Perapi Umata Pue Alatala bo Pueta Yesus Kristus mombagane komi bo mompopokita asi mata ri ja'i komi bo mombawai katuwua mabelo ka komi. 3 Komi kana maroo meto'o ri ngata Efesus ewa to nitewaiku ka komi bopia tempo aku nanggaliwo mpaka ri Propinsi Makedonia. Komi kana maroo ri setu ala mompatuduki tau-tau to nompatolele pepatuduki to nasala ala ira menonto mompatuduki etu. 4 Pade patuduki ka ira wo'u ne'e mana mompariara tesa-tesa kabali to nipetowali manusia bo tuntu-tuntu ntotu'a nggaolu to da'a ria kaopu-opuna. Tesa-tesa etu aga nompopeumba posinggarau pade da'a nanggeni tau mangginjani nia Alatala. Niana etu aga namala ranjani ante momparasaya i Pue. 5 Patuju tewaiku e'i ala topomparasaya mosipotowe samba'a bo samba'a. Etu kana majadi ane ira maliongu rara bo magasa rara nta'i bo mpu'u-mpu'u momparasaya i Pue. 6 Naria bara sakuya mba'a tau mana matuwu ante inggu iwetu. Ira aga notesa-tesa anu da'a ria batuana. 7 Ira madota majadi guru to mompatuduki Atura-atura agama tapi ira mboto da'a nangginjani batuana tesa-tesa to nipake ira bo nuapa-nuapa to nisowadaka ira ante nakono. 8 Ninjanita tesa nggari Atura-atura agama nabelo ane rapake ante nanoa. 9 Pade ninjanita wo'u Atura-atura etu da'a nipowia ka tau-tau to nanoana tapi ka tau-tau to nadenggona, ka tau-tau to nawatu, tau-tau da'a nantuki dota Alatala, tau-tau to nasilaka, tau-tau da'a nagasa pokaingguna, tau-tau da'a nombabila Alatala, tau-tau to nompatesi indo umana, pade pura-pura topepatesi ntanina. 10 Atura etu nipowia ka tau-tau nogau sala ante tau da'a rongona mboto, tau-tau to nosiporongo mbau langgai bo mbau besi, topanga'e, topodawa, sabi-sabi topodawa, pade ka isema-sema to nanggawia pura-pura pokainggu to da'a masipato ante pepatuduki to nakonona. 11 Pepatuduki to nakonona etu naria riara Kareba Belo to niparasaya ka aku, etumo Kareba Belo to nakuasa nggari ja'i Alatala to masipato ratoiya. 12 Aku notarima kasi ka Pueta Yesus Kristus to nombawai pompakule ka aku mantulungi tau mangginjani Kareba Belo etu, sabana nipekirina aku namala raparasaya mantui bago etu. 13 Tempo bopia aku e'i nompakakedi I'a, aku nompandasa bo nanjalai I'a. Tapi naupa iwetu Alatala nompotowe aku, sabana ri tempo etu aku da'apa nomparasaya I'a, da'apa nanoto ka aku powiaku etu naja'a. 14 Pade towe belo nu Pueta nipopelabina ka aku nosanggani-nggani ante pomparasaya bo towe nggari ja'i Yesus Kristus. 15 Naria tesa to nakono mpu'u bo masipato ratarima bo raparasaya pura-pura tau iwe'i: "Yesus Kristus narata ri dunia e'i ala mompakasalama tau-tau to nasilaka." Pade nggari pura-pura tau nasilaka akupa to neliu silakana. 16 Tapi etumo sabana aku nipotowe Alatala ala Yesus Kristus namala mompopokita posabarana to da'a ria kaopu-opuna ri ja'iku to neliu nggaja'a. Ante iwetu aku najadi jonjo ka pura-pura tau ntanina to momparasaya I'a banepia pade mombarata katuwua mabelo sampe ri kasae-saena. 17 Alatalamo Magau nggari lamba pamulana sampe ri kasae-saena. I'a da'a ria mamate-mate, I'a da'a namala rakita, aga I'amo Alatala to nakonona. I'amo to masipato rabila bo ratoiyata sampe ri kasae-saena. Amin! 18 Timotius, anaku, bago etu kuparasaya ka komi nantuki tesa nu Alatala to nipasimbayu nabi-nabina nosinggawela ante katuwu komi. Tesa etu kana majadi ewa bakumu mompakaroso komi mantui bago to nabelo etu ewa samba'a tantara to naroso nangewa balina. 19 Tuimo bago etu ante pomparasaya to naroso bo rara nta'i to nagasa. Naria tau da'a nantuki rara nta'ina to nagasa sampe nageromo pomparasayana. 20 Romba'a nggari tatongo ira etumo i Himeneus bo Aleksander. Ira romba'a niwaikumo ka Magau nu Seta ala ira rapatuduki ne'e mana mompakakedi Alatala.
1 Jadi iwe'imo tewaiku pamulana: todea topomparasaya kana merapi ka Alatala nuapa-nuapa to niparaluu pura-pura tau, ira kana momposambaya pura-pura tau, ira kana mekakai ka Alatala ala mantulungi pura-pura tau, pade ira kana mosukuru ka Alatala sabana petulungina ka pura-pura tau. 2 Ira kana momposambaya magau-magau bo pura-pura tau to nipakakuasa ala kita mamala matuwu masana bo mosinggabelo ante mpu'u-mpu'u mantuki dota Alatala bo moinggu mabelo. 3 Masipato kita mosambaya iwetu sabana etumo powia to nabelo to nompakadamba rara Alatala, Magau to Mompakasalama kita. 4 I'a madota ala pura-pura tau mamala rapakasalama bo mangginjani pepatuduki to nakonona. 5 Sabana aga samba'a lau Alatala pade aga samba'a lau wo'u tau ntongo to nompoposinggabelo Alatala ante manusia, etumo samba'a manusia to nosanga ka Yesus Kristus. 6 I'a nombawai korona mboto rapatesi ala mantolo silaka pura-pura manusia. Ante iwetu, ri tempo to natantuna, Alatala nompakanoto ka pura-pura manusia I'a madota mompakasalama ira. 7 Pade etu sampe aku nionggotaka Alatala majadi topompatolele Kareba Belo, pade nisurona malau mompatuduki tau-tau da'a to Yahudi ala ira momparasaya pepatuduki to nakonona. To nitesaku e'i nakono mpu'u, aku da'a nodawa! 8 Jadi aku madota ala langgai ri umba-umba mosambaya ante mangonggotaka palena to nagasa ante da'a ria rau rara bara posinggarau. 9 Iwetu wo'u besi-besi, ira kana mompakaramba koro ira ante akala to malusu bo masipato. Ira kana mompake pakea to da'a nepakaeya. Ne'e mompengaya-ngaya wo'o. Ne'e wo'u mompake ramba-ramba bulawa, mutiara bo pakea to nasuli-sulina. 10 Aginapa ira mompakaramba koro ira ante pokainggu to nabelo ewa to masipato ka besi to nompangaku korona topomparasaya Alatala. 11 Besi-besi kana mangepe pepatuduki mpakabelo-belo ante mekalino pade mekou ri ja'i topanggeni podade. 12 Aku da'a nompaloga besi-besi mompaguru atau momparenta langgai. Ira kana mekalino, 13 sabana to nipajadi Alatala pamulana i'amo Adam, pade naopu etu Hawa. 14 Pade da'a Adam to nibagiu Magau nu Seta, aga Hawa sampe i'a nombaliunaka parenta Alatala. 15 Tapi naupa iwetu, besi-besi kana rapakasalama sabana moana ane ira maroo momparasaya, mompotowe tau-tau ntanina pade matuwu ante pokainggu to magasa bo masipatona.
1 Nakono mpu'u tesa to nanguli iwe'i: "Ane tau madota majadi topanggeniaka topomparasaya, to nipodotana etu sangele pokarajaa to nabelo mpu'u." 2 Topanggeniaka topomparasaya kana moinggu manoa, etumo tau aga samba'a lau rongona, tau to nata'u manta'amaka dota rarana mboto, tau to nanoto pade to naria adana. I'a kana madota mantarima torata riara njapona, pade i'a kana mata'u mompaguru tau ntanina. 3 I'a samba'a tau da'a nabiasa nanginu to nepakalangu pade da'a nabiasa nosibaga. Tapi i'a kana moinggu malusu pade da'a mompokono posinggarau. I'a da'a wo'u mamala momata doi. 4 I'a kana mata'u mompakasiayu awuna mboto ante mabelo pade mompatuduki anana ala tunggai matundu bo mombabila totu'ana. 5 Sabana ane i'a da'a mamala mompakasiayu awuna mboto iwenu i'a mamala mompakasiayu todea topomparasaya Alatala? 6 I'a da'a mamala tau lako nomparasaya ala ne'e i'a majadi masombo sampe mawela pesuku nasimbayu ewa to nipawela ka Magau nu Seta. 7 I'a wo'u samba'a tau to nabelo pokaingguna sampe nipokono bo nibila tau-tau da'a topomparasaya ala ne'e sampe i'a rasalaraka ntau pade rapakanawu riara mpale Magau nu Seta. 8 Iwetu wo'u inggu tau-tau to raonggotaka majadi topantulungi topomparasaya. Ira kana tau to nibila riara pokaingguna, ira tau to nabelo bo nanoa, ira da'a nomata doi pade da'a wo'u nabiasa nalangu. 9 Ante rara nta'i to nagasa ira kana maroo manjoko pepatuduki to nakonona to nipakanoto Alatala. 10 Da'apa ira raonggotaka majadi topantulungi topomparasaya, pokainggu ira kana rauji ntani ruru. Pade ane nanotomo da'a ria pokainggu to nasala, ira namala raonggotaka majadi topantulungi topomparasaya. 11 Iwetu wo'u rongo ira kana besi to nibila ntau riara pokaingguna, da'a besi to nabiasa mompakaja'a tau ntanina. Pade ira kana mata'u manta'amaka dota rara ira mboto pade mamala raparasaya riara mpengele-ngele. 12 Topantulungi topomparasaya kana tau aga samba'a lau rongona. I'a wo'u kana mata'u mompakasiayu awuna mboto ante mabelo. 13 Topantulungi topomparasaya to nokarajaa ante nabelo ri tatongo topomparasaya kana rabila ntau pade ira mantambai mabia motesa ewa pomparasaya ira ka Yesus Kristus. 14 Timotius, nisarumakaku da'a mana masaeka aku mamala momai mantalioda komi. Tapi naupa iwetu aku nantulisi sura e'i ka komi 15 ala nau aku masae marata komi mamala mangginjani pokainggu to masipato ka kita to najadi ananjapo nu Alatala, etumo todea to nomparasaya Alatala to Natuwuna. Kitamo to nanjoko mpakaroso pepatuduki to nakonona nggari ja'i Alatala nasimbayu ewa posuko bo palo nombatande sapo. 16 Natantumo neliu nggabelo pepatuduki agamata to nitabuniaka nggari lamba pamulana tapi to nipakanoto Alatala we'i-we'i. Etumo, Yesus Kristus netimbali najadi manusia. Kanoana nipopokita Nosa Nagasa nu Alatala, pade I'a nikita malaeka-malaeka. Karebana nipatolele ka tau-tau da'a to Yahudi, I'a niparasaya ntau ri umba-umba ri dunia, pade I'a niore mpaka ri suruga.
1 Nosa Nagasa nu Alatala nanguli ante nanoto iwe'i: Tempo namosu kaopu nu dunia banepia kana maria tau to mokanggaura momparasaya. Ira mantuki seta-seta topebagiu pade momparasaya pepatuduki to nopu'u nggari ja'i seta-seta. 2 Pepatuduki etu rakeni ntau aga nabelo ri lenje bo nodawa. Rara nta'i ira narumaumo. 3 Ira kana mompatuduki tau ala ne'e mana morongo bo ne'e mana manggoni bara sakuya ngele panggoni to nipakatantu. Tapi kakonona panggoni etu nipajadi Alatala ala rakoni ntau to nomparasaya pade nangginjani pepatuduki to nakonona. Panggoni etu namala rakonita ante manguli tarima kasi ka Alatala, 4 sabana pura-pura to nipajadi Alatala nabelo. Da'a ria sangele to nipopali ane rakonita ante manguli tarima kasi ka Alatala, 5 sabana panggoni etu nipakagasa ante posambaya nantuki Tesa nu Alatala. 6 Timotius, ane komi mompatuduki pura-pura etu ka topomparasaya komi majadi batua Yesus Kristus to nabelona. Etu kana majadi ane komi batena mantuki tesa-tesa agama Karistee to napokona bo pepatuduki-pepatuduki to nakonona ewa to nitukimu sampe we'i-we'i. 7 Tapi pakakawaomo nggari tesa-tesa kabali to da'a ria gunana to nipetowali manusia. Komi kana mompopobiasa koromu matuwu ante pokainggu to nantuki dota Alatala. 8 Sabana mombalati koro batata aga sakedi lau gunana. Tapi matuwu mantuki dota Alatala nadea mpu'u gunana riara mpengele-ngele. Ante matuwu nantuki dota Alatala kita mombarata rasi to nijanjina, etumo katuwua mabelo nompamula we'i-we'i sampe ri kasae-saena. 9 Tesa e'i mpu'u-mpu'u nakono bo masipato ratarimata bo raparasayata pura-pura. 10 Etumo sabana sampe kita nompasimbuku ante mpu'u-mpu'u rara pade nokarajaa ntomo, sabana kita nanjarumaka Alatala to Natuwuna. I'amo Magau to Mompakasalama pura-pura manusia, neliu-liupa ira to nomparasaya I'a. 11 Patudukimo pura-pura etu pade pakaumo topomparasaya mantuki pepatuduki etu. 12 Ne'e sampe maria tau manjauru komi sabana komi danamuda. Tapi popokitamo jonjo ka topomparasaya riara tesamu, riara pokainggumu, riara towemu, pade riara pomparasayamu bo kagasa katuwumu. 13 Pade tempo komi mompopea karataku, komi kana maraji mombabasa Buku Nagasa ka todea topomparasaya. Popatoramo ira ala mantuki tesa etu pade patudukimo ka ira pepatuduki to nakonona. 14 Ne'e malinga mompake pompakule nggari ja'i Nosa Nagasa nu Alatala to niwaina ka komi bopia tempo nabi-nabi nompasimbayu tewai Alatala ka komi pade topanggeniaka topomparasaya nombadika pale ira ri balenggamu. 15 Kawiamo bago etu pura-pura ante mpu'u-mpu'u rara ala pantambai pompakulemu mantui bago etu manoto ka pura-pura tau. 16 Jagaimo pokainggumu bo jagai wo'u pepatudukimu. Komi kana matutu manggawia pura-pura etu sabana ante iwetu komi kana mompakasalama koromu mboto ante tau-tau to mangepe pepatudukimu etu wo'u.
1 Ne'e komi mangontiaka samba'a langgai to natu'ana, tapi popatoramo i'a nasimbayu ewa umamu mboto. Pade popatoramo langgai-langgai to namudana nasimbayu ewa sampesuwumu mboto. 2 Pade popatoramo besi-besi to natu'ana nasimbayu ewa indomu mboto, pade popatoramo besi-besi to namudana ante pokainggumu to nagasa nasimbayu ewa tua'imu mboto. 3 Tulungimo tobalu-tobalu besi to mpu'u-mpu'u natuwu njamba'ana. 4 Tapi ane maria anana atau makumpuna, ira etumo to masipato mokolu meguru mompiara totu'ana mboto pade mombabalasi kabelo totu'a ira etu. Sabana etumo pokainggu to nabelo to nikonoa rara Alatala. 5 Tobalu besi to mpu'u-mpu'u natuwu njamba'ana to da'a ria sema-sema mompiara ira aga natuwu nanjarumaka Alatala. Eo wengi ira da'a nenonto-nonto nosambaya merapi tulungi ka I'a. 6 Tapi tobalu besi to natuwu nompegaya bo nompesana-sana ewa namatemo pomparasayana naupa korona danatuwu. 7 Pasimbayumo tewai-tewaiku e'i ka topomparasaya ala ira matuwu ante pokainggu to da'a namala rasalaraka. 8 Tapi ane maria tau to da'a nompiara sampesuwuna mboto, neliu-liupa ira saongu njapo, tau etu nombasapuaka pepatuduki to niparasayana. I'a neliu nggaja'a nggari tau da'a nomparasaya. 9 Tobalu besi to masipato sangana rasuaraka riara sanga-sanga tobalu to ratulungi todea topomparasaya aga besi umuruna da'a nakura nggari onompulu mpae to sanggani lau niporongo. 10 Pade i'a wo'u kana ninjani ntaumo ewa besi to nompowia to nabelona. Jonjona: i'a nompiara anana ante nabelo, nadamba rarana nantarima torata riara njapona, i'a nantulungi todea topomparasaya, i'a nantulungi tau-tau to nasusa, pade i'a nabati nompowia mpengele-ngele powia to nabelona. 11 Tapi ne'e rasuaraka sanga tobalu-tobalu besi to namudana riara sanga-sanga etu. Sabana ane nasu ira nompone sampe neliu nggaroso nggari towe ira ri ja'i Kristus, ira kana madota raporongo bali. 12 Ane etu majadi ira mawela pesuku sabana ira manjapuaka pojanji ira ka i Pue bopia. 13 Pade ira wo'u aga mompopobiasa masondo rara pade manjayo-njayo mompone sou ntau. Pade ira da'a aga mompopobiasa masondo rara ira wo'u manggeni tesa bo mombagalo urusa tau ntanina bo motesa mpengele-ngele to da'a masipato ratesa. 14 Sabana etu to nipodotaku ala tobalu-tobalu besi to namudana raporongo bali pade moana bo mompakasiayu awuna mboto ala ne'e mombawai loga ka balita mompakawau sangata. 15 Sampe niuliku iwetu sabana naria mamimo tobalu besi to nasalanjalamo nantuki dota Magau nu Seta. 16 Ane maria topomparasaya to nosampesuwu ante tobalu besi, ira kana mompiara tobalu besi etu. Ne'e sampe mompakatomo todea topomparasaya. Ante iwetu todea topomparasaya mamala mantulungi tobalu-tobalu besi to mpu'u-mpu'u natuwu njamba'ana lau. 17 Topanggeniaka-topanggeniaka to nanggeniaka todea topomparasaya ante nabelo masipato rawai ka pebila bo petulungi to neliu nggari biasa, neliu-liupa ira to nokarajaa ntomo nanggeni Tesa nu Alatala pade nompatuduki todea. 18 Sabana riara Buku Nagasa naria tesa to nanguli iwe'i: "Ne'e mombamumu sumba japi tempo i'a mombalonggo-longgo pae ala maronto nggari bulina, tapi palogamo i'a manggoni sakedi." Pade naria tesa ntanina to nanguli, "Topokarajaa masipato mantarima gajina." 19 Ne'e komi mangepe tesa ntau mompangadu samba'a topanggeniaka topomparasaya ane da'a ria romba'a atau tolumba'a sabi mantakono tesa etu. 20 Ane maria ira to nowia silaka ira kana raontiaka ri ngayo ntodea topomparasaya ala tau ntanina maeka mowia silaka. 21 Timotius, ri ngayo Alatala bo Yesus Kristus pade malaeka-malaekana to nagasa, aku mantewai komi ante mpu'u-mpu'u raraku iwe'i: tukimo tewai-tewai e'i ante akala to nanoana. Kawiamo etu pura-pura ante da'a manggita lenje. 22 Ne'e masasinta gaga mombadika palemu ri koro ntau mangonggotaka ira majadi topanggeniaka topomparasaya. Ne'e sampe komi matipakeni mantuki silaka tau ntanina. Jagaimo koromu ala batena matuwu ante pokainggu to nagasa. 23 Ne'e mana aga manginu ue biasa, tapi inumo sakedi anggur ala mompakuli ta'imu bo ju'a-ju'amu ntanina. 24 Ne'e masasinta gaga mangonggotaka tau majadi topanggeniaka topomparasaya sabana naria tau silakana nanoto nau da'apa nitangara. Tapi silaka tau ntanina aga majadi manoto ane i'a ratangara. 25 Iwetu wo'u pokainggu to nabelo nanoto mami nikita ntau. Tapi naupa da'a kaliu-liu nanoto nikita, pokainggu to nabelo da'a namala matetabuniaka liu. Etu kana ranjani ntau.
1 Topomparasaya to najadi batua kana mombabila bo matundu ri ja'i madikana ala ne'e sampe sanga Alatala bo pepatuduki to nakonona rasalaraka ntau. 2 Pade ane madika ira samba'a topomparasaya, ne'e ira mantua'i mata i'a sabana i'a nosaongu pomparasaya ante ira. Tapi ira kana mantambai maraji mokarajaa sabana madika to nitulungi ira wo'u topomparasaya to nipotowe ira. Timotius, komi kana mompatuduki bo mompopatora todea topomparasaya pura-pura pepatuduki etu. 3 Ane maria tau mompatuduki pepatuduki ntanina pade i'a da'a nasituju ante pepatuduki to nakono nggari ja'i Pueta Yesus Kristus bo pepatuduki to nanggeni kita matuwu mantuki dota Alatala, 4 i'a etu nasombo. Da'a ninjanina nuapa-nuapa. Ju'ana tau nompowia iwetu aga nangelo saba bo nosinggarau ka batua nu tesa. Asele powiana etu iwe'i: tau nosipoju'a ka rara, ira nosipobali bo nosiuli sinja'i, ira tunggai nosibata, 5 pade ira da'a nenonto nosinggarau. Nageromo pekiri ira pade mana ninjani ira pepatuduki to nakonona. Ira nompekiri mepue ka Alatala aga sangele jala mombarata kasugi. 6 Kakonona nauntu mpu'umo tau to mepue ka Alatala ane i'a matuwu masana ante nuapa-nuapa to naria ri ja'ina. 7 Sabana tempo kita niote da'a ria nuapa-nuapa nikenita riara dunia e'i, pade ane kita mamate da'a ria nuapa-nuapa mamala rakenita nggari dunia e'i. 8 Jadi ane mariamo panggoni bo pakeata, naganamo. 9 Tapi tau-tau to madota majadi makalumana kana mawela pesoba. Ira rasoko mpengele-ngele dota rara to naja'a bo nadoyo to mombagero katuwu ira. Dota rara etu mompakanawu ira pade manggeni ira rapandasa sampe ri kasae-saena, 10 sabana pu'u nu pura-pura kaja'ana etumo nompotowe doi. Naria bara sakuya mba'a tau aga nombaraga doi sampe nompalasi pomparasaya ira ka i Pue Yesus pade nompandasa koro ira mboto ante mpengaya-ngaya kasusana. 11 Tapi komi, batua nu Alatala, pakakawaomo nggari pokainggu iwetu. Pasimbukumo mowia to nanoana pade mompasimbuku matuwu nantuki dota Alatala. Komi kana mantambai momparasaya, potowemo sanggamanusiamu, pakaroo raramu momparasaya tempo nipandasa pade moinggu malusu. 12 Pasimbukumo mantuki posilumba riara pomparasaya ante mabelo. Pasimbukumo mombarata katuwua mabelo sampe ri kasae-saena, sabana etumo patuju Alatala nompokio komi tempo komi nompangaku i Pue Yesus ri ngayo ntodea bopia. 13 Ri ngayo Alatala, pu'u katuwu pura-pura anu natuwu, bo Yesus Kristus to nompangaku tesa to nakonona ri ngayo Pontius Pilatus, aku mantewai komi iwe'i: 14 Tukimo parenta-parentaku e'i ante pokainggu to nagasa to da'a namala rasalaraka ntau sampe Pueta Yesus Kristus marata bali ri dunia e'i. 15 I'a kana marata ri tempo to nipakatantu Alatala. I'amo to neliu nggabelo katuwuna. Aga I'amo topoparenta langi bo dunia. I'amo Magau nu pura-pura magau, I'amo Pue nu pura-pura pue. 16 Aga I'a njamba'ana lau to da'a namate. I'a natuwu riara reme to da'a namala rapakamosu. Da'a ria kamba samba'a tau to nanggita I'a, pade da'a wo'u naria to nompakule manggita I'a. Perapi I'a rabila bo makuasa sampe ri kasae-saena. Amin! 17 Timotius, tewaimo ka tau-tau to nakalumana ri dunia e'i ala ne'e majadi masombo bo ne'e aga manjarumaka kakalumana ira to da'a naroo. Tapi ira kana manjarumaka Alatala to nompakagana ka kita mpengele-ngele ante najoi rarana ala etu rapodamba-dambata. 18 Tewaimo ka ira, kana moinggu mabelo bo masugi ante pokainggu to nabelona. Ira kana majoi rara bo masadia mombabagi ka tau ntanina nuapa-nuapa to naria ri ja'i ira. 19 Ante iwetu ira mompasiromu kakalumana to majadi panjarumaka ira to nabelona ri tempo marata ala ira mpu'u-mpu'u mombarata katuwua mabelo sampe ri kasae-saena. 20 Timotius, jagaimo mpakabelo-belo nuapa to niparasaya ka komi. Pakakawaomo nggari tesa-tesa njilaka to da'a ria gunana. Pade pakakawaomo nggari posisono-sono to nopu'u nggari tesa to niuli ntau pangginjani to nakono tapi kakonona aga tesa dawa. 21 Naria mamimo tau to nanguli naria pangginjani etu ri ja'i ira sampe nasalanjalamo nggari pomparasaya to nakonona. Perapi Pue mombagane komi. Tabe nggari ja'iku, Paulus
1 - 2 Sura e'i nggari ja'iku i Paulus ka i Timotius, anaku to nipotoweku. Aku nisuro Yesus Kristus nantuki dota Alatala ala mompatolele pojanji Alatala to nanguli, isema-sema nomparasaya Yesus Kristus kana matuwu mabelo sampe ri kasae-saena. Perapi Pue Alatala bo Pueta Yesus Kristus mombagane komi bo maasi mata ri ja'i komi bo mombawai katuwua mabelo ka komi. 3 Aku nosukuru ri ja'i Pue Alatala to nipesombaku ante rara nta'i to nagasa, nasimbayu ewa totu'aku nggaolu. Eo wengi aku nantora komi riara posambayaku. 4 Tempo aku nantora kasusa rara komi tempo kita noga'a bopia, nalentora mpu'u raraku manggita komi ala aku mpu'u-mpu'u madamba. 5 Aku nosukuru ri ja'i Alatala sabana natitora raraku iwenu komi mpu'u-mpu'u nomparasaya i Pue Yesus nasimbayu ewa i Lois, puemu besi bo indomu Eunike. Pade niparasayaku komi batena nomparasaya nasimbayu ewa ira. 6 Sabana etu aku nompopatora ka komi, kana ratambai rapopoguna pompakule to niwai Alatala ka komi tempo aku nombadika paleku ri koromu bopia. Ne'e maeka mompopoguna pompakule etu, 7 sabana Nosa Nagasa to nipopana'u Alatala ka kita da'a manggeni kita maeka, tapi I'a nombawai baraka bo towe bo kuasa manta'amaka korota mboto. 8 Sabana etu ne'e maeya matamu mompatolele tesa i Pueta, pade ne'e wo'u maeya matamu mompekiri aku to nitarunggu sabana aku topomparasaya I'a. Tapi ante kuasa nggari ja'i Alatala mboto komi wo'u kana mantingayo kasusa nasimbayu ewa aku sabana mompatolele Kareba Belo. 9 Alatala nompakasalama kita bo nompokio kita matuwu magasa da'a sabana powiata to nabelona, tapi etu najadi nggari dota rarana mboto bo towe belona ka kita. Ri lamba pamulana da'apa dunia nipajadi, nipakatantunamo mompopokita towe belona etu ka kita to mosaongu rara ante Yesus Kristus. 10 Pade we'i-we'i towe belona etu nipopokitanamo ante karata Yesus Kristus, Magau to Mompakasalama kita. Pue Yesus nompakaropu kuasa kamatea, pade I'a nompatolele Kareba Belo ka kita to nompakanoto iwenu manusia mamala matuwu mabelo sampe ri kasae-saena. 11 Aku mboto nionggotaka Alatala majadi surona nompatolele bo nompatuduki Kareba Belo etu. 12 Etumo sabana aku nombarasai pura-pura kasusa ewa e'i. Tapi naupa iwetu da'a naeya mataku, sabana ninjanikumo isema to niparasayaku, pade natantumo ka aku I'a nompakule mombajagai nuapa to niparasayana ka aku sampe ri kaopu nu dunia. 13 Timotius, pasialamo jonjoku mompatuduki pepatuduki to nakonona to niepemu nggari ja'iku, pade kawiamo etu ante towe bo pomparasaya to naria ri ja'ita sabana kita mosaongu rara ante Yesus Kristus. 14 Pade ante petulungi Nosa Nagasa nu Alatala to naria riara nta'ita, jagaimo pepatuduki to nakonona to niparasaya ka komi ala etu ne'e rabali ntau. 15 Ninjanimu pura-pura topomparasaya nggari Propinsi Asia nompalasi aku. Romba'a nggari tatongo ira etumo i Figelus bo i Hermogenes. 16 Tapi perapi Pue Alatala maasi mata ri ja'i ira Onesiforus sanjapo, sabana nadea ngganimo i'a narata nompakadamba raraku. Da'a naeya matana nanggita aku riara tarunggu. 17 Iwetu i'a narata ri ngata Roma i'a nangelo-ngelo aku sampe niratana. 18 Ninjanimu mboto ri ngata Efesus bopia nadea mpu'u petulungina ka aku. Perapi Pue maasi matana manggita Onesiforus tempo kaopu nu dunia.
1 Jadi Timotius, anaku, komi kana maroso ante petulungi to niwai Yesus Kristus ka kita. 2 Pade pepatuduki to niepemu nggari ja'iku ri ngayo ntau dea kana muparasaya ka tau-tau to namala raparasaya bo to nompakule mompatuduki tau ntanina. 3 Ewa tantara Yesus Kristus to nabelona komi wo'u kana mantingayo kasusana. 4 Toramo! Samba'a tantara to nompajala bagona da'a nateka'i ante urusa-urusa ntanina ala i'a mamala mompakadamba rara balenggana. 5 Komi kana masimbayu ewa samba'a topomore. I'a da'a mamala mombarata hadia padagi ane i'a da'a mantuki atura-atura to nipakatantu. 6 Komi kana masimbayu wo'u ewa topotinalu to nokarajaa ntomo. I'amo tau pamulana to masipato mantarima asele ntinalu etu. 7 Pekirimo mpakabelo-belo tesaku e'i pade Pue kana mantulungi komi mangginjani etu pura-pura ante manoto. 8 Toramo! Yesus Kristus najadi Muli Magau Daud, pade I'a namate natuwu bali ewa to nitesa riara Kareba Belo to nipatoleleku. 9 Aku e'i nipandasa sabana nompatolele Kareba Belo etu. Aku niso'o ante rante nasimbayu ewa tau naja'a. Tapi Tesa nu Alatala da'a namala rarante, etu kana matolele ri umba-umba. 10 Etumo sabana aku naroo riara mpengele-ngele kasusana ala tau-tau to nipelisi Alatala mamala rapakasalama ante momparasaya Yesus Kristus sampe ira mombarata bagia nggari kuasa bo reme i Pue sampe ri kasae-saena. 11 Nakono mpu'u tesa to nanguli iwe'i: "Ane kita mamate mpasanggani-nggani ante I'a, kita wo'u matuwu mpasanggani-nggani ante I'a. 12 Ane kita maroo momparasaya, kita kana moparenta mpasanggani-nggani ante I'a. Ane kita mombasapu I'a, I'a wo'u mombasapu kita. 13 Ane kita da'a mamala raparasaya, I'a batena namala raparasaya, sabana I'a da'a namala manjapuaka korona mboto." 14 Popatoramo ka topomparasaya pura-pura tesaku etu. Pade tewaimo ka ira riara sanga Alatala ala ne'e ira mosinggarau ka batuana tesa-tesa. Etu da'a ria gunana pade aga nompakagado rara ntau to nangepe etu. 15 Pasimbukumo majadi tau to nikonoa rara nu Alatala ewa samba'a topokarajaa to da'a paraluu maeya matana mantora asele mpokarajaana. Patudukimo Tesa nu Alatala to nakono ante manoa. 16 Pakakawaomo nggari tesa-tesa njilaka to da'a ria gunana, sabana tesa-tesa ewa etu aga nanggeni tau mantambai nasilaka. 17 Tesa-tesa etu nendai nasimbayu ewa ju'a bete to naja'ana. Romba'a tau to noinggu iwetu etumo i Himeneus bo i Filetus. 18 Ira nompalasi pepatuduki to nakonona ante nanguli naopumo Alatala nompakatuwu bali pura-pura tau to namatena. Pepatuduki ira etu nompakagado pomparasaya bara sakuya mba'a tau. 19 Tapi naupa iwetu pepatuduki Alatala to nakonona batena naroso nasimbayu ewa pondasi to da'a namala ragoya nuapa-nuapa. Riara pepatuduki etu naria nitulisi iwe'i: "Pue nangginjani isema-sema to najadi todeana." Pade naria tesa ntanina ri setu to nanguli, "Isema-sema to nanguli i'a topomparasaya i Pue Yesus, i'a kana manggabasaka pokaingguna to naja'ana." 20 Riara njapo to nabetena naria mpengele-ngele parewa ri awu. Naria to nipowia nggari bulawa bo salaka, tapi naria wo'u to nipowia nggari kayu bo tana lei. Parewa bulawa bo salaka etu nipake mantande torata to nibila, tapi parewa ntanina etu nipake eo-eo. 21 Jadi ane tau manggabasaka pura-pura pokainggu to naja'ana, i'a masipato rapake i Pue, nasimbayu ewa parewa bulawa bo salaka to neliu nggabelona etu. I'a nipegasa nggari silakana ala moguna ka Puena, i'a nasadia rapake mompowia mpengele-ngele bago to nabelona. 22 Jadi pakakawaomo nggari pokainggu naja'a to nipodamba ngana-ngana muda. Tapi pasimbukumo matuwu ante manoa rara. Parasayamo pepatuduki to nakonona ante natutu rara; potowemo Alatala bo sanggamanusiamu, pade pasimbukumo mosinggabelo ante pura-pura tau to nekakai ka i Pue ante rara to nagasa. 23 Pakakawaomo nggari ja'i ntau to nadoyo to nekutana anu da'a ria gunana. Ninjanimu mboto etu aga majadi posinggarau. 24 Tapi samba'a batua i Pue da'a masipato mosinggarau. I'a kana malusu rara ri ja'i ntau pura-pura. I'a kana mompakule mompatuduki ante mabelo, pade i'a wo'u kana mosabara. 25 Ante maede rara i'a kana mompatuduki tau-tau to nangewa i'a, ala ane mamala ira rakeni Alatala majea nggari pokainggu ira to nasala pade mangginjani pepatuduki to nakonona. 26 Ante iwetu ira majadi manoto bali pade ira makabasaka nggari kuasa Magau nu Seta to nombabagiu bo nompasu'u ira mantuki dotana.
1 Timotius, kana munjani ane mamosumo kaopu nu dunia kana marata tempo to makajana. 2 Manusia aga mompotowe korona mboto. Ira madoko nu doi, ira masombo bo mangoa pade manguli sinja'i tau ntanina. Ira da'a matundu ri ja'i ntotu'a ira mboto bo da'a ranjani ira motarima kasi. Ira kana mpu'u-mpu'u maja'a, 3 bo ira mpu'u-mpu'u da'a maria towe. Ira da'a madota mosinggabelo bo ira bate-batena mompakawau sanga tau ntanina. Ira da'a mamala manta'amaka dota koro ira mboto bo ira aga masoa mpu'u. Ira momporau rara pura-pura nuapa to nabelona. 4 Ira mompakanawu roa ira mboto bo ira da'a ria rekena, pade ira mompekiri iramo to neliu pangginjanina. Ira melabipa mompotowe kasana koro ira mboto pade mompotowe Alatala. 5 Riara mpanggita eo-eo ira momparasaya Alatala, tapi riara nta'ina ira mombasapuaka kuasana. Pakakawaomo koromu nggari ja'i ntau noinggu iwetu, 6 sabana ri tatongo ira naria to nata'u akala ira mesua raranjapo ntau ala mombabagiu besi-besi to nadoyo to nadea silakana bo to nikuasai nadea ngele dota rara to naja'ana. 7 Besi-besi etu batena meguru tapi ira da'a sanggani mamala mangginjani pepatuduki to nakonona. 8 Topebagiu etu mpu'u-mpu'u mangewa pepatuduki to nakonona nasimbayu ewa Yanes bo Yambres nangewa nabi Musa ri ngayo Magau Firaun nggaolu. Pekiri ira maja'a bo pomparasaya ira da'a ntoto makono. 9 Tapi ira da'a mamala mompapola powia ira etu, sabana bagiu ira etu kana manoto ka pura-pura tau nasimbayu ewa bagiu Yanes bo Yambres nggaolu najadi nanoto. 10 Tapi ninjanimu mboto aku da'a nasimbayu ewa topebagiu etu. Ninjanimu pepatudukiku, pokaingguku bo patujuku matuwu. Ninjanimu mboto pomparasayaku ka Alatala, posabaraku ri ja'i ntau pura-pura bo pepotoweku ka sanggamanusiaku. 11 Ninjanimu iwenu aku naroo tempo nipandasa bo nipakasusa ewa to najadi ri ngata Antiokhia, ngata Ikonium bo ngata Listra bopia. Aku mpu'u-mpu'u nipandasa, tapi Pue bate-batena nompakasalama aku nggari kasusa etu pura-pura. 12 Kakonona, pura-pura tau to madota matuwu mantuki dota Alatala bo mosaongu rara ante Yesus Kristus kana rapandasa ntau. 13 Aga tau naja'a bo topebagiu kana mantambai kaja'ana. Ira mombabagiu tau bo ira wo'u rabagiu. 14 Tapi naupa iwetu, komi kana maroo manjoko pepatuduki to nipegurumu bo to mpu'u-mpu'u niparasayamu, sabana ninjanimu pokainggu tau-tau to nompaguru etu ka komi. 15 Pade ninjanimu wo'u nggari kakedimu komi nangginjani isi Buku Nagasa to namala mompakanoto ka komi ante momparasaya Yesus Kristus komi namala rapakasalama. 16 Pura-pura tesa to naria riara Buku Nagasa nitulisi ante kuasa nggari ja'i Alatala mboto bo noguna mompatuduki to nakonona, mompakanoto sala, mompakabelo pokainggu bo mompatuduki tau mompowia to nanoana. 17 Ante mangginjani isi Buku Nagasa butu mba'a topomparasaya Alatala rapakagana ala i'a mompakule mompowia pura-pura powia to nabelona.
1 Toramo! Yesus Kristus kana marata bali ri dunia e'i mombatangara pura-pura manusia, nabeloka to danatuwu nabeloka to namatemo, pade I'a kana moparenta ri dunia e'i ewa magau. Sabana etu, riara sanga Alatala bo Yesus Kristus aku mantewai komi iwe'i: 2 Patolelemo Tesa nu Alatala. Komi kana masadia ri butu-butu loga, nabeloka loga nabelo atau da'a. Pakanoto ka tau pokainggu ira to nasalana, ontiakamo to nompowia sala, pade waimo tesa to nabelo ka ira pura-pura. Patudukimo ira mpakabelo-belo ante maponu posabara. 3 Sabana kana marata tempona banepia tau mana madota mangepe pepatuduki to nakonona. Tapi ira aga mompasiromu guru-guru to mompaguru pepatuduki to rapokono talinga ira, ala ira mamala mangepe pepatuduki to nasituju ante dota rara ira mboto to naja'ana. 4 Ira mombalamu talinga ira ala ne'e mangepe pepatuduki Alatala to nakonona, pade ira aga manta'a talinga ira mangepe tesa-tesa kabali to nipetowali manusia. 5 Tapi, Timotius, jagaimo koromu mpakabelo-belo nau nuapa majadi. Pakaroo raramu tempo rapandasa. Tuimo bagomu ewa topanggeni Kareba Belo, pade pajala puramo bago to niparasaya Alatala ka komi. 6 Aku nanguli iwetu sabana mana masaeka aku mamate majadi pesomba ka Alatala. Sampalaipa aku mompalasi dunia e'i. 7 Nitukikumo posilumba nangowa to nabelona. Nangowamo aku sampe ri panta'ana. Aku batena natutu nomparasaya sampe ri kaopuna. 8 Jadi we'i-we'i nasadiamo hadia padagi ka aku to rawai i Pue ka tau to nanoana. Ri kaopu nu dunia i Pue Yesus mboto, Topotangara to nanoana, kana mombawai hadia etu ka aku, pade da'a aga ka aku tapi ka isema-sema to nalentora mpu'u mompopea karatana. 9 Pasimbukumo masalisa marata ri ja'iku ri se'i, 10 sabana i Demas nompalasi aku, apa i'a aga nompotowe katuwuna ri dunia we'i-we'i. Nalaimo i'a mpaka ri ngata Tesalonika. Pade i Kreskes nalau mpaka ri Propinsi Galatia, bo i Titus mpaka ri Bagia Dalmatia. 11 Aga i Lukas to naria ri ja'iku ri se'i. Ane komi momai tulusaka wo'u i Markus mpaka wemai, sabana i'a mamala mantulungi bagoku ri se'i. 12 Pade Tikhikus nipakaukumo mpaka ri ngata Efesus. 13 Ane komi momai ri se'i, keni wo'u baju leniku to niboliku ri ngata Troas ri sapo i Karpus. Pade keni wo'u buku-bukuku, neliupa buku-buku to nikawia nggari kulimba. 14 Aleksander, pande nu tambaga etu, nadea ja'ana nipowiana ri ja'iku. Pue kana mombabalasi i'a nantuki pokaingguna etu. 15 Komi mboto kana mainga ka i'a sabana i'a mpu'u-mpu'u nangewa pepatudukita. 16 Tempo aku pamulana nitangara, da'a ria kamba samba'a nomporoa aku; pura-pura roaku nompalasi aku. Perapi Pue da'a mompakasala ira sabana powia ira etu. 17 Tapi i Pue nomporoa aku, bo I'a nompakaroso aku ala aku nompakule nompatolele pura-pura Kareba Belo sampe niepe pura-pura tau da'a to Yahudi. Kaopuna aku da'a najadi nipatesi. 18 Pade niparasayaku i Pue kana manggabasaka aku nggari pura-pura powia ntau to naja'a pade manggeni aku ante masalama mesua ri Poparentana ri suruga. I'a masipato rabila bo ratoiya sampe ri kasae-saena. Amin! 19 Pakasampe tabeku ka i Priskila bo Akwila, pade ka ira Onesiforus sanjapo. 20 Erastus naboli ri ngata Korintus bo i Trofimus nipalasiku ri ngata Miletus sabana i'a naju'a. 21 Pasimbukumo momai ri se'i da'apa tempo leni. Nadea tabe nggari ja'i Ebulus, i Pudes, i Linus bo i Klaudia, pade nggari ja'i pura-pura topomparasaya i Pue Yesus ntanina ri se'i. 22 Perapi Pue mosanggani-nggani ante komi. Perapi I'a mombagane komi pura-pura. Tabe nggari ja'iku, Paulus
1 Sura e'i nggari ja'iku Paulus, batua Alatala bo suro Yesus Kristus ka anaku i Titus. Aku nipelisi bo nisuro Alatala mantulungi tau-tau to nipelisina ala ira maroo momparasaya I'a. Pade aku wo'u nisurona manggeni ira momparasaya pepatuduki to nakonona to nanggeni ira matuwu ante inggu to masipato ka topomparasaya Alatala 2 ala ira mamala manjarumaka matuwu mabelo sampe ri kasae-saena. Etu to nijanji Alatala ri lamba pamulana tempo dunia e'i da'apa nipajadina. Pade ninjanitamo Alatala da'a nodawa. Pojanjina namala raparasayata. 3 We'i-we'i ri tempo to nipakatantuna mboto I'a nompopanjani pojanjina etu ka manusia riara tesa to niuli Kareba Belo. Pade kareba etu niparasaya ka aku ala rakeni ka tau pura-pura nantuki parenta Alatala, Magau to Mompakasalama kita. 4 Titus, komi mpu'u-mpu'u ewa anaku mboto sabana komi wo'u nomparasaya i Pue Yesus nasimbayu ewa aku. Perapi Pue Alatala bo Pue Yesus Kristus, Magau to Mompakasalama kita, mombagane bo mombawai katuwua mabelo ka komi. 5 Patujuku nompalasi komi ri Lewuto Kreta ala komi mompakasiayu anu da'apa nasiayu ri setu, pade ala komi mangonggotaka topanggeniaka-topanggeniaka topomparasaya ri pura-pura ngata. Toramo atura-atura to nipakatantuku ka komi iwe'i: 6 Tau to masipato raonggotaka majadi topanggeniaka topomparasaya aga tau da'a naria inggu to nasalana, to natutu rarana nompiara rongona samba'a lau. Ana-anana kana momparasaya i Pue Yesus bo ne'e aga mompebasa matuwu masana ri dunia, bo ne'e mawatu. 7 Topanggeniaka topomparasaya etu kana matuwu ante da'a ria ingguna to nasalana, sabana i'a wakele Alatala mboto. I'a da'a mamala masombo atau masalisa marau, pade da'a topanginu anu mepakalangu, pade da'a toposibaga bo da'a tau nadoko nu doi. 8 I'a samba'a tau to najoi rarana mantarima torata riara njapona, bo tau nompokono to nabelona. I'a kana samba'a tau to nanoto, to nanoa bo nagasa rarana, bo tau to namala manta'amaka dota rarana. 9 I'a kana maroo mantuki pepatuduki to nakonona to nipatuduki ka i'a ala i'a mamala mompatuduki topomparasaya mantuki pepatuduki to nakonona, pade ala i'a wo'u mamala mompakanoto sala ntau to nombasapuaka pepatuduki etu. 10 Sampe niuliku iwetu sabana nadeamo tau to nangewa pepatuduki to nakonona, ira nombabagiu tau ante nompatuduki anu da'a ria gunana. To nadeana ira tau to Yahudi to nesua agama Karistee. 11 Ira kana ratagi sabana nadea ongu njou nipakagado ante pepatuduki ira to da'a nasipatona. Patuju ira aga mangala doi ntau ante akala to nadenggo-denggona. 12 Naria samba'a nabi nggari ira to Kreta mboto to nanguli iwe'i: "To Kreta bate-batena topodawa. Ira nasimbayu kaja'ana ewa binata to nasoana; ira tau nadoko to nabuto rarana." 13 Tesa nabi etu nakono. Sabana etu komi kana mako'o mangontiaka ira to nompatuduki to nasala etu ala ira majea bo mantuki pepatuduki to nakonona. 14 Ne'e mana ira momparasaya kabali-kabali nto Yahudi bo atura-atura to nipakatantu manusia to nombasapuaka pepatuduki to nakonona. 15 Ka tau to nagasamo pura-pura nuapa nagasa. Tapi ka tau to natantorumo bo da'a nomparasaya Alatala, da'a ria sangele to nagasa, sabana pekiri bo rara nta'i ira natantoru mami. 16 Ira nanguli ira nosinjani ante Alatala, tapi powia ira nanjapuaka I'a. Ira nompowia to nompakarunggu rara Alatala, bo ira da'a madota matundu ri ja'ina. Da'a namala ira nompowia to nabelona.
1 Tapi Titus, komi kana mompatuduki ka tau nuapa to masipato ante pepatuduki to nakonona. 2 Patudukimo ka totu'a-totu'a langgai ira kana manta'amaka dota rara ira mboto. Ira kana matuwu ante inggu to masipato rabila bo ira kana manoto. Ira kana mantuki pepatuduki to nakonona, ira kana mpu'u-mpu'u mompotowe tau ntanina, pade ira kana maroo momparasaya naupa nipandasa. 3 Wa'a wo'u ante totu'a-totu'a besi. Uli ka ira, ira kana matuwu ante inggu to nagasa to masipato riara mpanggita Alatala. Ne'e ira mompakaja'a tau ntanina, ne'e ira manggapilaya manginu anu mepakalangu. Tapi ira kana mata'u mompaguru to nabelona, 4 ala ante iwetu ira mamala mompatuduki besi-besi to namudana mompotowe rongo bo ana ira mboto. 5 Ira kana majadi tau nanoto rarana to natuwu ante da'a mogau sala nuapa-nuapa. Ira kana maraji mompakasiayu awuna. Ira kana majadi tau to nabelo rarana to natundu ri ja'i rongona mboto. Ane ira moinggu iwetu, da'a ria tau mamala manjalaraka Tesa nu Alatala. 6 Iwetu wo'u to rapatuduki komi ka langgai-langgai to namudana. Uli ka ira, ira kana manta'amaka mpengele-ngele dota rara ira to naja'ana. 7 Pade komi mboto kana tunggai mompowia to nabelona ala pokainggumu etu majadi jonjo to mamala rapasiala ntau. Ane komi mompatuduki tau, patudukimo ante manoa bo mpu'u-mpu'u raramu. 8 Pakemo tesa to nakonona to da'a mamala rasalaraka ntau, ala balimu maeya mboto mata ira sabana pura-pura nuapa to niulimu etu nabelo. Da'a ria sangele to naja'ana to namala rasalaraka ira ka kita. 9 Patudukimo batua-batua ala ira bate-batena matundu ri ja'i madika ira. Ira kana mokarajaa mompakadamba rara madika ira etu. Ne'e ira mesapuaka, 10 bo ne'e ira mompelea mbara-mbara nu madika ira. Kana manoa rara ira ala mompopokita ka madika ira, mpu'u-mpu'u ira namala raparasaya. Ira kana moinggu iwetu ala mpengele-ngele powia ira mompopokita ka tau kabelo nu pepatuduki ewa Pue Alatala, Magau to Mompakasalama kita. 11 Kita masipato matuwu ante pokainggu to nabelona iwetu sabana nggari towe belona mboto Alatala nompakau anana i Pue Yesus narata ri dunia e'i ala mompakasalama pura-pura manusia. 12 Nggari towe belona I'a nompatuduki kita ala mompalasi pokainggu to da'a nipokonona bo dota rara to naja'ana. Pade nipatudukina ala kita matuwu ri dunia e'i ante inggu to manoto pade mompowia to nanoana bo to nantuki dota Alatala. 13 Kita kana matuwu iwetu ri dunia e'i ante manjarumaka saongu kajadia to mpu'u-mpu'u mompakasana rarata, etumo karata Yesus Kristus ante kuasa bo karemena to nipogumaa. I'amo Alatalata bo Magau to Mompakasalama kita. 14 I'a nombawai korona rapatesi ala manggabasaka kita nggari pura-pura kaja'ana pade mompegasa katuwuta sampe kita majadi todeana mboto to maraji mompowia to nabelona. 15 Jadi Titus, patudukimo pura-pura etu ka topomparasaya i Pue Yesus. Popatora etu ka ira bo ontiakamo ira to da'a nantuki pepatuduki etu. Kawiamo etu ante kuasa to niwai Alatala ka komi. Ne'e rapalamba tau mombasapuaka komi.
1 Komi kana mompopatora ka topomparasaya ri setu ira masipato mekou ri ja'i pomarenta bo ri ja'i ntau to nipakakuasa riara ngata. Ira kana matundu bo masadia mantui pura-pura pokarajaa to nabelona. 2 Ne'e ira manguli sinja'i tau-tau ntanina. Ne'e ira mosinggarau ante isema-sema. Tapi ira kana mabelo bo malusu rara ri ja'i ntau pura-pura. 3 Toramo, kita wo'u bopia danadoyo ewa etu. Kita da'a natundu pade kita nantuki jala to nasalana. Kita wo'u bopia nipobatua mpengele-ngele dota rara to naja'ana bo aga nompekiri kasana nu korota mboto. Kita wo'u natuwu ante pekiri naponu ante kaja'ana bo siriati, pade kita nosiporau rara samba'a bo samba'a. 4 Tapi naupa kita tunggai nompowia pokainggu to naja'a ewa etu bopia, Alatalata, Magau to Mompakasalama kita, nompopokita kabelona bo towena ka kita. 5 I'a nompakasalama kita, da'a sabana kita nompowia to nanoana, tapi sabana I'a mboto naasi matana nanggita kita. I'a nompakasalama kita ante nompegasa kita nggari silakata pade nombawai ka kita katuwu nabou. I'a nombabali katuwuta majadi nabelo ante kuasa Nosana to Nagasa 6 to nipopana'una ka kita ante kajoi nu rarana niposabana Yesus Kristus, Magau to Mompakasalama kita. 7 Etu nipowia Alatala ala nggari towe belona kita rarekena tau nanoa, pade ala kita majadi tau to namala manjarumaka matuwu mabelo sampe ri kasae-saena. 8 Tesa-tesaku e'i mpu'u-mpu'u nakono. Jadi Titus, to nipodotaku ala komi momparo'o tesa e'i ala topomparasaya Alatala tunggai mompasimbuku mowia to nabelo bo noguna ka tau pura-pura. 9 Tapi pakakawaomo komi nggari pompekutana to da'a ria gunana, pade nggari tesa-tesa tuntu ntotu'a nggaolu to nipetowali ntau mboto. Pakakawao wo'u nggari posisono bo posinggarau ntau mantesa atura-atura agama, sabana etu pura-pura da'a ntoto ria gunana bo untuna. 10 Komi kana mangontiaka tau to nompakagado todea topomparasaya. Ane i'a da'a menonto mowia etu, ontiakamo i'a sangganipa. Ane naganamo ronggani i'a niontiaka iwetu da'a wo'u nenonto, ne'e mana mowega ante i'a, 11 sabana ninjanimu tau to noinggu ewa etu nasalanjalamo. I'a tunggai nowia silaka pade silaka-silakana mboto nompakasala i'a. 12 Ane aku mompakau Artemas atau i Tikhikus mpaka ri ja'imu, komi kana mompasimbuku masalisa momai ri ja'iku ri ngata Nikopolis, sabana nipakatantukumo meto'o ri setu sampe maopu tempo leni. 13 Komi kana mpu'u-mpu'u mompasimbuku mantulungi i Zenas, topotangara, bo Apolos riara mpolumako ira ala da'a ria makura nuapa-nuapa ka ira. 14 Roa-roata topomparasaya i Pue Yesus wo'u kana meguru mompowia to nabelona ala mompakagana to niparaluu roa-roa ira to nakabuna. Ne'e sampe katuwu ira da'a ria gunana. 15 Nadea tabe nggari ja'i pura-pura sampesuwuta to naria ante aku ri se'i. Pakasampe tabe kami ka roa-roa saongu pomparasaya ri setu to nompotowe kami. Perapi Pue mombagane komi pura-pura. Tabe nggari ja'iku, Paulus
1 Sura e'i nggari ja'iku Paulus to nitarunggu sabana nomparasaya Yesus Kristus, bo nggari ja'i sampesuwuta i Timotius, ka i Filemon roa kami sampokarajaa to nipotowe kami, 2 pade ka topomparasaya-topomparasaya i Pue Yesus to nodade ri sapomu, pade ka Apfia sampesuwuta besi, bo Arkhipus, roata sampokarajaa. 3 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi. 4 Butu nggani aku nanggeni komi riara posambaya aku nosukuru ri ja'i Pue Alatalaku, 5 sabana niepeku komi nomparasaya i Pue Yesus pade nompotowe pura-pura topomparasaya. 6 Aku nosambaya ala kasintuwu komi topomparasaya manggeni komi mantambai mangginjani mpengele-ngele rasi to naria ri ja'ita sabana nosaongu rara ante Kristus. 7 Sampesuwuku, towemu ri ja'i ntopomparasaya i Pue Yesus mpu'u-mpu'u nompakadamba pade nompakaroso raraku, sabana komi mpu'u-mpu'u nompakasana rara todea topomparasaya. 8 Etu sampe naria pomperapiku ri ja'imu. Kakonona aku namala momparenta komi mowia to masipatona sabana aku suro Kristus. 9 Tapi nantora towemu etu agina aku merapi ala etu rapowia komi. Aku e'i, Paulus samba'a totu'a to nitarunggu we'i-we'i sabana nomparasaya Yesus Kristus. 10 Jadi naria pomperapiku ka komi to nosinggawela ante Onesimus. I'a najadi ewa anaku mboto sabana aku nanggeni i'a nomparasaya i Pue Yesus tempo aku riara tarunggu ri se'i. 11 Tempo bopia i'a da'a noguna ka komi, tapi we'i-we'i i'a mpu'u-mpu'u nogunamo ka komi bo ka aku wo'u. 12 We'i-we'i Onesimus to nipotoweku etu kupakau manjili bali mpaka ri ja'imu. 13 Kakonona aku madota manta'amaka i'a ri ja'iku ri se'i ala i'a mamala manjaliku komi mantulungi aku to nitarunggu sabana nompatolele Kareba Belo. 14 Tapi aku da'a madota mowia iwetu ane da'apa nikasituju komi. To nipodotaku ala to nabelona etu ne'e mupowia sabana nipasu'u tapi nggari dota raramu mboto. 15 Nipekiriku bara Onesimus nipopoga'a nggari ja'imu sampalai ala komi mamala mantarima i'a bali sampe ri kasae-saena. 16 We'i-we'i i'a da'a mana aga samba'a batua, tapi neliu nggari etu i'a samba'a topomparasaya to nipotowe. I'a nipotoweku, pade natantumo i'a wo'u nipotowemu, nabeloka ewa samba'a batuamu, nabeloka ewa sampesuwumu riara i Pue. 17 Jadi ane aku nireke roamu topomparasaya kuperapi tarimamo Onesimus bali nasimbayu ewa komi nantarima aku. 18 Pade ane i'a nompakarugi komi atau noinda ri ja'imu damo aku mombatangguna. 19 Aku Paulus, nantulisi tesa e'i ante paleku mboto. Aku kana mombabayari etu pura-pura ka komi. Kakonona da'a paraluu aku mompopatora ka komi iwenu komi mboto noinda ri ja'iku sabana nggari aku sampe komi nombarata katuwua nabelo ewa topomparasaya i Pue Yesus. 20 Jadi sampesuwuku, kuperapi ala komi mowia to noguna ka aku sampesuwumu riara i Pue. Pakasanamo raraku ewa sampesuwumu riara Kristus ante mantarima Onesimus bali. 21 Aku nantulisi sura e'i ka komi ante nomparasaya komi kana mowia nuapa to niperapiku etu. Pade da'a aga etu, ninjaniku komi kana mowia meliu nggari pomperapiku etu. 22 Pade nariapa sangele pomperapiku iwe'i: Tulungi pakasadia ka aku peto'o kupoturu ri sapomu, sabana nisarumakaku nggari posambaya komi pura-pura aku kana rakabasaka nggariara tarunggu e'i sampe mamala manjili ri ja'i komi. 23 Tabe nggari ja'i Epafras to nosanggani-nggani ante aku riara tarunggu sabana i'a nomparasaya Yesus Kristus. 24 Tarima wo'u tabe nggari ja'i roa-roaku sampokarajaa, etumo i Markus, Aristarkhus, i Demas bo i Lukas. 25 Perapi towe belo nggari ja'i Pue Yesus Kristus mosanggani-nggani ante komi pura-pura. Tabe nggari ja'iku, Paulus
1 Tempo nggaolu nadea ngganimo Alatala nompasimbayu tesana ka nabi-nabi to nompapola etu ka totu'ata nggaolu ante mpengele-ngele akala. 2 Tapi ri tempo namosu kaopu nu dunia e'i Anana mbotomo to nompasimbayu tesana ka kita. Nosanggani-nggani ante Anana etu Alatala nompajadi langi bo dunia, pade nipakatantuna ala pura-pura nuapa to nariana majadi bagia nu Anana. 3 Anana etu nompopokita kuasa bo kagaya nu Alatala, bo I'a nasimbayu ntoto ewa Alatala. I'amo to nombatande mpengele-ngele ri langi bo dunia ante tesana to nakuasa. Naopu I'a nompegasa manusia nggari silaka, I'a neore mpaka ri suruga pade nekatoko ri peto'o to nibila ri panggana nu Alatala to Neliu Nggakuasa. 4 Jadi Ana nu Alatala neliu nggalanga nggari malaeka-malaeka Alatala, pade sanga to niwai Alatala ka I'a neliu nibila nggari sanga malaeka-malaeka. 5 Nanotomo kalangana etu sabana da'a ria sanggani Alatala notesa ka malaekana iwe'i: "Ikomo Anaku, eo e'i Aku najadi Umamu." Tapi etu to niulina ka Anana mboto. Pade da'a ria sanggani Alatala notesa ewa malaekana iwe'i: "Aku Umana, pade I'a Anaku." 6 Pade tempo Alatala nompakau Anana ulumbua marata ri dunia e'i, I'a wo'u nanguli iwe'i: "Pura-pura malaeka kana mombasomba Anaku etu." 7 Tapi to niuli Alatala ewa malaeka-malaekana iwe'i: "Alatala nompajadi malaeka-malaekana ewa poiri. Ira nasimbayu ewa apu to najela." 8 Tapi to niulina ka Anana iwe'i: "O Alatala, poparentamu maroo sampe ri kasae-saena, Komi noparenta todeamu ante nanoa rara. 9 Komi nompotowe pokainggu to nanoa bo nomporau rara pokainggu to nadenggona. Sabana etu Aku, Alatalamu, nangonggotaka Komi majadi Magau to neliu nggalanga panggana nggari roamu bo nombawai ka Komi kadamba nu rara to neliu-liuna." 10 Pade niuli Alatala wo'u ka Anana iwe'i: "Pue, ri lamba pamulana Komi nompajadi dunia, Pade langi wo'u powia mpalemu. 11 Etu pura-pura kana maropu banepia, tapi Komi bate-batena maria. Etu pura-pura kana maranta ewa pakea, 12 pade ratika Komi nasimbayu ewa buya. Etu kana rasambei nasimbayu ewa baju to narantana. Tapi Komi da'a ntoto mabali, Katuwumu da'a ria kaopu-opuna." 13 Pade da'a ntoto ria sanggani Alatala nanguli ka malaekana ewa to niulina ka Anana iwe'i: "Kamai pekatokomo ri sabingga ngganaku sampe Aku mompowia pura-pura balimu mekou ri ja'imu." 14 Jadi ane iwetu, nuapa kakonona malaeka-malaeka i Pue? Ira pura-pura topantulungi Alatala to nisurona mantulungi tau-tau to rapakasalamana.
1 Jadi Yesus neliu nggalanga nggari malaeka-malaeka i Pue. Etu sampe kita kana manjoko mpakabelo-belo pepatuduki to niepeta ala ne'e kita masalanjala nggari jala to nakonona etu. 2 Tesa to nipapola malaeka-malaeka i Pue ka totu'ata nggaolu nanoto mpu'u kakonona, pade isema-sema da'a nantuki tesa etu atau da'a natundu riara tesa etu nombarata pesuku to nasipatona. 3 Ne'epa rauli Kareba Belo to nipatolele i Pue Yesus! Kareba etu neliu nggabelo nggari tesa to nipapola malaeka-malaeka nggaolu. Jadi ane kita da'a mompariara kareba etu iwenumo kita makabasaka nggari pesuku? Kareba etu pamulana nipatolele i Pue Yesus mboto, pade tau-tau to nangepe I'a nompakanoto ka kita kareba etu mpu'u-mpu'u nakono. 4 Pade Alatala mboto nantakono tesa to nipatolele ira ante nompowia mpengele-ngele kabaraka bo tandai to nipogumaa, pade nompalele pompakule ka ira nggari Nosa Nagasana nantuki dotana mboto. 5 Da'a malaeka-malaeka to nipakakuasa Alatala ala moparenta dunia nabou banepia to nitesata ri se'i. 6 Tapi manusia to nipakakuasana. Naria tesa riara Buku Nagasa to nompakanoto etu iwe'i: "O Pue Alatala, nuapa ntoto kami manusia sampe Pue nantora kami? Naupa kami aga manusia, Pue nompiara kami. 7 Sampalai lau kami nipowia Pue naede sakedi nggari malaeka. Kami niwai Pue ka pekatoko to nakuasa bo nibila. 8 Pade kami niwai Pue ka kuasa ala momparenta pura-pura nuapa to naria." Jadi ane niuli, "Kami niwai Alatala ka kuasa ala momparenta pura-pura nuapa to naria," etu batuana da'a ria sangele anu da'a niwaina rakuasai manusia. Tapi we'i-we'i da'apa nikitata manusia nomparenta pura-pura nuapa to naria. 9 Tapi to nikitata iwe'i: Yesus sampalai nipakaede sakedi nggari malaeka ala nggari towe belo nu Alatala I'a mamate manjaliku manusia. Pade we'i-we'i nikitata I'a niwai ka pekatoko to nakuasa bo nibila sabana I'a nasadia nasusa bo napari sampe namate. 10 Etu najadi sabana etumo to masipato ante dota nu Alatala. I'amo to nompajadi mpengele-ngele, pade etu pura-pura bagiana. I'a nompakamba Yesus mombarasai kasusa bo kapari sampe majadi Topanggeniaka to da'a ria kakurana to mompakule mompakasalama manusia. Ante iwetu I'a mamala manggeni nadea tau mombarata bagia riara kuasa bo kagayana to nipogumaa. 11 Yesus nompegasa kita nggari silakata. Pade kita to nipegasa bo I'a to nompegasa kita aga samba'a lau Umata. Etu sampe Yesus da'a naeya matana nompangaku kita ewa sampesuwuna. 12 I'a nanguli ka Alatala iwe'i: "Aku kana mompatolele karebamu ka sampesuwu-sampesuwuku. Aku mombatoiya sangamu ri tatongo kasiromu todeamu." 13 Pade niuli Yesus wo'u iwe'i: "Aku manjarumaka Pue Alatala." Pade sangganipa niulina iwe'i: "E'imo Aku nosanggani-nggani ante ngana-ngana to niparasaya Alatala ka Aku." 14 Kita to niuli Yesus anana, manusia biasa ante koro to mamate. Jadi etu sampe Yesus wo'u najadi manusia pade nombarasai pura-pura nuapa to nirasaita. Etu nipowiana ala nggari kamatena I'a mamala mompakaropu kuasa Magau nu Seta to nombakuasai kamatea. 15 Ante jala iwetu I'a nombakabasaka tau-tau to nipobatua eka rara ira mamate sanggasae-saena ira natuwu ri dunia e'i. 16 Nanotomo da'a malaeka to nitulungina, aga muli Abraham. 17 Etu sampe I'a kana najadi nasimbayu pura ante sampesuwu-sampesuwuna. Ante iwetu I'a namala majadi Balengga Topanggeni Agama to naasi matana manggita todeana bo to natutu nompowia bago to niwai Alatala ka I'a, sampe silaka manusia mamala raampungi. 18 I'a mboto nombarasai kasusa bo kapari tempo I'a nipesoba. Etu sampe I'a nompakule mantulungi tau-tau to nipesoba.
1 Sampesuwu-sampesuwuku, nagasamo katuwumu bo komi to nipokio Alatala matuwu mabelo ri suruga. Sabana etu pekirimo mpakabelo-belo Yesus e'i. I'a nisuro Alatala najadi Balengga Topanggeni Agama ri agama to nipangakuta. 2 I'a natutu nompowia nuapa to nipakatantu Alatala ka I'a nasimbayu ewa nabi Musa natutu nantulungi todea to Yahudi to najadi ananjapo nu Alatala. 3 Tapi neliu nibilapa Yesus nggari Musa nasimbayu ewa topowia sapo neliu nibilapa nggari sapo to nipowiana. 4 Butu-butu sapo, naria topowiana. Tapi topowia mpengele-ngele I'amo Pue Alatala mboto. 5 Ane Musa, i'a natutu nantulungi ananjapo nu Alatala ewa samba'a batua. I'a nantesa ka ira nuapa to rapatolele banepia. 6 Tapi Kristus Ana nu Alatala to natutu nombaurusi pura-pura ananjapo nu Alatala. Pade kita majadi ananjapona ane kita maroo momparasaya bo maroo manjarumaka I'a ante madamba rara sampe ri kaopuna. 7 Jadi epemo tesa nggari ja'i Nosa Nagasa nu Alatala to nanguli iwe'i: "Ane komi mangepe suara Alatala eo e'i, 8 - 9 ne'e komi mompakako'o rara nasimbayu ewa totu'amu nggaolu tempo ira nangewa Aku ri karawa baina. Naupa ira batena nanggita kabaraka-kabaraka to nipowiaku patampulu mpae kasaena, ira batena nompesoba bo nombauji Aku. 10 Etu sampe narau mpu'u raraku ri ja'i ira pade Aku nanguli, 'Ira bate-batena nasalanjalamo, da'a nadota mantuki jalaku.' 11 Nabilisi mpu'u raraku sampe Aku nojanji iwe'i: 'Ira da'a ntoto mamala mangosaraka mpasanggani-nggani ante Aku.' " 12 Jadi sampesuwu-sampesuwuku, komi kana mainga ala ne'e sampe maria ri tatongo komi tau to naja'a pekirina bo da'a nomparasaya sampe i'a mombasapu Alatala to Natuwuna. 13 Tapi eo-eo komi kana mosipakaroso rara samba'a bo samba'a tempo danaria loga to niuli "eo e'i" riara tesa Buku Nagasa. Ne'e sampe komi majadi mako'o rara sabana nibagiu nu silaka. 14 Ane kita batena momparasaya Alatala ante maroo rara sampe ri kaopuna nasimbayu ewa kita naroo nomparasaya ri pamulana, kita kana mombarata bagia nggari pura-pura nuapa to naria ri ja'i Kristus. 15 Etumo to nipatuju tesa to niuli ri ba'ana iwe'i: "Ane komi mangepe suara Alatala eo e'i, ne'e komi mompakako'o raramu nasimbayu ewa totu'amu nggaolu tempo ira nangewa Aku." 16 Jadi isema to nangepe suara Alatala? Isema to nompakarau rarana ante nangewa I'a? Etumo pura-pura to Yahudi to nikeni i Musa nesuwu nggari tana Masir. 17 Pade isema to nipokarau rara Alatala patampulu mpae kasaena? Natantumo ira etu wo'u to nowia silaka ri karawa baina sampe namate ri setu. 18 Isema to nipatuju Alatala tempo I'a nojanji ira da'a ntoto mamala mangosaraka mpasanggani-nggani ante I'a? Natantumo ira to da'a natundu ri ja'ina. 19 Jadi nanotomo ka kita ira da'a namala nangosaraka mpasanggani-nggani ante Alatala sabana ira da'a nomparasaya.
1 Sampesuwu-sampesuwu, pojanji Alatala etu danalaku pade kita danamala mangosaraka mpasanggani-nggani ante I'a. Etu sampe kita kana mainga ala ne'e maria nggari tatongo komi to nireke naboli. 2 Sabana kita wo'u nangepe Kareba Belo nu Alatala nasimbayu ewa ira totu'ata nggaolu. Tapi kareba to niepe ira da'a ria gunana ka ira, sabana ira aga nangepe bayangi, da'a niparasaya ira kareba etu. 3 Tapi kita to nomparasayamo to namala mangosaraka mpasanggani-nggani ante Alatala, da'a ira. Sabana naria to niulina iwe'i: "Nabilisi mpu'u raraku sampe Aku nojanji iwe'i: 'Ira da'a ntoto mamala mesua mangosaraka mpasanggani-nggani ante Aku.' " Ira da'a nombarasai kabelo nu pangosaraka Alatala naupa etu nasadiamo nggari lamba pamulana naopu Alatala nompajadi langi bo dunia. 4 Nanotomo pangosaraka etu nasadia sabana naria tesa ri Buku Nagasa to nanguli ewa eo kapapituna iwe'i: "Ri eo kapapituna Alatala nangosaraka nggari pura-pura bagona." 5 Ri tesa to naria ri ba'ana Alatala nanguli, "Ira da'a ntoto mamala mesua mangosaraka mpasanggani-nggani ante Aku." 6 Jadi nggari tesa etu nanotomo danaria loga ka tau ntanina mangosaraka mpasanggani-nggani ante Alatala. Sabana tau-tau pamulana to nangepe Kareba Belo etu da'a nombarasai kabelo nu pangosaraka Alatala etu, sabana ira da'a nomparasaya. 7 Jadi etu sampe Alatala nompakatantu loga ntanina to niulina "eo e'i" ala manusia mamala mangosaraka mpasanggani-nggani ante I'a. Sangga naliu bara sakuya atu mpae Alatala notesa ewa etu nggari sumba Daud riara tesa to nitulisiku ri ba'ana iwe'i: "Ane komi mangepe suara Alatala eo e'i, ne'e komi mompakako'o rara." 8 Tempo nokolu Yosua nanggeni totu'ata nesua ri tana Kanaan to nijanji Alatala. Ane rapana etu nireke nesua mangosaraka mpasanggani-nggani ante Alatala, natantumo Alatala da'a notesa nggapurina ewa loga ntanina mangosaraka mpasanggani-nggani ante I'a. 9 Jadi danaria loga ka kita todea nu Alatala mangosaraka mpasanggani-nggani ante I'a nasimbayu ewa I'a nangosaraka ri eo kapapituna. 10 Nanotomo etu sabana isema-sema to nangosaraka mpasanggani-nggani ante Alatala nenontomo nggari bagona nasimbayu ewa Alatala wo'u nenonto nggari pura-pura bagona. 11 Sabana etu kamaimo kita mompasimbuku ante mpu'u-mpu'u rarata mangosaraka mpasanggani-nggani ante Alatala. Ne'e sampe maria nau aga samba'a to da'a mamala mombarasai kabelona etu sabana da'a nomparasaya nasimbayu ewa totu'ata nggaolu. 12 Tesa nu Alatala tesa to natuwu bo nakuasa. Tesa etu neliu nggataja nggari guma to nomata ntimali. Nasimbayu ewa guma mamala mantosu sampe ri panta'a nosa bo wayo manusia bo posidumpa nu wuku bo unto nu wuku, iwetu wo'u Tesa nu Alatala namala mombabuka bo momparesa pekiri bo patuju rara nta'i manusia. 13 Da'a ria kamba sangele to nipajadi Alatala to natetabuniaka nggari panggitana, tapi etu pura-pura natebuka bo nanoto ka I'a. Pade ri ngayona banepia kita kana mompangaku pura-pura pokaingguta. 14 Jadi kita kana maroo manjoko pomparasaya to nipangakuta, sabana naria Balengga Topanggeni Agama to nalanga katuwuna to nesua sampe ri ngayo Alatala ri suruga ala mantulungi kita, etumo Yesus, Ana nu Alatala. 15 I'a Balengga Topanggeni Agama to nangginjani kalenteta, sabana I'a wo'u nombarasai pesoba-pesoba nasimbayu ewa kita. Aga I'a da'a sanggani nidagi pesoba sampe nasilaka. 16 Sabana etu, kamaimo kita ante mabia mompakamosu Alatala to noparenta ante towe belona ala kita mamala rapoasi matana bo mombarata towe belona mantulungi kita tempona raparaluuta.
1 Butu mba'a Balengga Topanggeni Agama nipelisi nggari tatongo todea pade nionggotaka majadi wakele ira ri ngayo Alatala. Bagona etumo manggeni ka Alatala pewai-pewai bo pesomba-pesomba to majadi posompo silaka. 2 I'a namala nantulungi ante nalusu rara tau-tau to nabodo bo nasalanjalamo, sabana i'a mboto wo'u manusia to nadea kalentena. 3 Etu sampe i'a kana manggeni pesomba ka Alatala mombasompo silaka, nabeloka silakana mboto nabeloka silaka todea. 4 Da'a ria samba'a to nangonggotaka korona mboto majadi Balengga Topanggeni Agama, tapi i'a kana nipokio bo nionggotaka Alatala, nasimbayu ewa i Harun nggaolu nipokio bo nionggotaka Alatala najadi Balengga Topanggeni Agama to Yahudi. 5 Iwetu wo'u Kristus. I'a da'a nangonggotaka korona mboto majadi Balengga Topanggeni Agama to nibila. Tapi I'a nipokio bo nionggotaka Alatala mboto. Etu nanoto nggari tesa Alatala to nanguli iwe'i: "Ikomo Anaku, eo e'i Aku najadi Umamu." 6 Pade niulina wo'u ri ayat ntanina iwe'i: "Iko Topanggeni Agama sampe ri kasae-saena, nasimbayu ewa i Melkisedek." 7 Tempo Yesus natuwu ri dunia I'a nosambaya ante ue mata bo nekakai merapi tulungi ka Alatala to namala manggabasaka I'a nggari kamatena. Pade posambayana niepe Alatala sabana I'a tunggai nekou ri ja'ina. 8 Naupa Yesus Ana nu Alatala, I'a neguru natundu ri ja'i Alatala nggari kasusa bo kapari to nirasaina. 9 Sangga naganapa pura-pura etu nirasaina, I'a najadi pu'u katuwua nabelo sampe ri kasae-saena ka pura-pura tau to natundu ri ja'ina. 10 Pade I'a nionggotaka Alatala najadi Balengga Topanggeni Agama nasimbayu ewa i Melkisedek, topanggeni agama nggaolu. 11 Danadea to miki kutesa ka komi ewa kasimbayu Kristus ante i Melkisedek, tapi etu nakaja ratarangga sabana nakumba mpu'u pompaha komi. 12 Kakonona temponamo komi majadi guru mompatuduki tau ntanina, sabana nasaemo komi nomparasaya i Pue Yesus. Tapi komi danomparaluu guru mompatuduki ka komi pepatuduki pamulana nggari Tesa nu Alatala. Komi da ewa ngana nggedi, da'apa namala nanggoni panggoni to nako'o-ko'o. Komi danantomi! 13 Isema-sema danantomi batuana danangana. Da'apa ninjanina mompoposisala nuapa to nakonona bo to nasalana. 14 Tapi panggoni to nako'o-ko'o aga nikoni ntau to nabetemo, etumo tau to nabiasamo nombalati korona mompoposisala nuapa to nabelona bo to naja'ana.
1 Jadi sampesuwu-sampesuwu, ne'e mana kita aga mompekiri pepatuduki pamulana ewa Kristus. Tapi kamaimo kita meguru kapola nu pepatuduki Kristus sampe kita mantambai manoto riara pomparasayata. Ne'e mana kita mombasili pepatuduki pamulana ewa majea nggari pokainggu to naja'a to da'a ria gunana pade momparasaya Alatala. 2 Ne'e mana kita mombasili pepatuduki ewa ada mpediu, atau pepatuduki ewa mombadika pale ri balengga ntau ala ira rapesua Nosa Nagasa nu Alatala. Ne'e mana kita mombasili pepatuduki ewa tau namate matuwu bali atau pepatuduki ewa pesuku sampe ri kasae-saena. 3 Tapi kamaimo kita meguru kapola nu pepatuduki Kristus. Pade ane Pue mompaloga, etumo to rapowiata! 4 Toramo, sampesuwu-sampesuwu, da'a ria jala manggeni tau majea bali ane ratunggai ira mokanggaura momparasaya. Sabana bopia ira natuwu riara reme nu Alatala. Nitarima iramo rasi nggari suruga, pade ira wo'u nipesua Nosa Nagasa nu Alatala. 5 Nirasai iramo kabelo Tesa nu Alatala pade nikita ira baraka to nabete to nasimbayu ewa baraka to mana'u ri dunia banepia. 6 Ane ira mokanggaura momparasaya naupa etu pura-pura nirasai ira, da'a ria jala manggeni ira majea bali nggari silaka ira. Sabana ante powia ira etu ewa ira mombapaku bali Ana nu Alatala ri kayu parika, pade ira manjalai I'a ri ngayo ntau dea. 7 Tau ewa etu nasimbayu ka porapa e'i. Tana to nadea nggani nawela uja pade nombawai asele to noguna ka topokarajaa riarana, tana etu kana ragane Alatala. 8 Tapi ane tana etu aga nikatuwu nu jono bo karui, da'a ntoto ria gunana. Tana etu mana masaeka rajanjiaka Alatala. Pade kaopuna tana etu kana rapalabu mpakaopu. 9 Tapi, sampesuwu-sampesuwu to nipotoweku, naupa kami notesa iwetu, niparasaya kami komi da'a noinggu iwetu. Niparasaya kami naria pokainggu to neliu nggabelo ri ja'i komi, etumo pokainggu to masipato ka tau to nipakasalama. 10 Alatala da'a nadenggo rarana, I'a da'a manggalinga powia bo pepotowe komi to nipopokita komi ka I'a ante mantulungi topomparasaya i Pue Yesus, nompamula nggari tempo bopia sampe we'i-we'i. 11 To nipodota kami ala komi samba'a bo samba'a batena mabati mowia etu sampe ri kaopuna ala komi mamala mantarima pura-pura nuapa to nisarumaka komi. 12 Ne'e sampe komi masondo rara, tapi pasialamo jonjo ntau to nomparasaya ante nosabara sampe ira nombarata nuapa to nijanji Alatala. 13 Tempo Alatala nombawai pojanji ka Abraham, I'a nojanji ante nanguli sangana mboto, sabana da'a ria to neliu nggalanga nggari I'a. 14 Niulina, "Natantumo Aku kana mombagane iko, bo mompakadea mulimu." 15 Jadi sangga Abraham nompopea ante nosabara, nitarimanamo nuapa to nijanji Alatala ka i'a. 16 Ane manusia nojanji ira nanguli sanga to neliu nggalanga nggari koro ira mboto, pade etu nompakaroso tesa ira bo nompopenonto pura-pura tesa ntau to nombasapuaka tesa etu. 17 Iwetu wo'u ante Alatala. I'a madota mompopokita ka tau to masipato mantarima nuapa to nijanjina pojanjina etu natantumo, da'a ntoto mabali. Jadi nipakarosona pojanjina ante nojanji. 18 Rongele etu da'a namala mabali. Alatala da'a ntoto nodawa ewa pojanjina etu to nipowiana ante nojanji. Patujuna nojanji iwetu ala kita to nekalendu ri ja'ina mamala rapakaroso rara sampe kita maroo manjarumaka nuapa to nijanjina etu. 19 Panjarumakata to natantuna etu nasimbayu ewa balango sakaya to naroso bo naroo. Pade nggari panjarumakata etu kita mamala mompakamosu Alatala nasimbayu ewa Balengga Topanggeni Agama namala mombaliunaka kae powombo mesua riara Peto'o to Neliu Nggagasa riara Sapo Mpepue. Da'a nabali panjarumakata sabana to nisarumakata Alatala mboto. I'a naria ri peto'o to neliu nggagasa ri suruga, pade 20 Yesus nokolu nesua ri setu ala mompakasadia jala ka kita. I'a nionggotaka najadi Balengga Topanggeni Agama nasimbayu ewa i Melkisedek sampe ri kasae-saena.
1 Melkisedek e'i Magau ngata Salem bo topanggeni agama nu Alatala to Neliu Nggalanga. Tempo Abraham nanjili nggari posibali nombadagi magau-magau, i Melkisedek nalau nosirata ka Abraham pade nombagane i'a. 2 Naopu etu Abraham nombabagi ka i Melkisedek sabagia nggari sampulu bagia mbara-mbara to niagona nggari ja'i magau-magau. Sanga Melkisedek etu, batuana "Magau to Nanoana," pade i'a wo'u Magau ngata Salem to naria batuana "Magau to Nanggeni Posinggabelo." 3 Melkisedek da'a ria uma indona atau totu'ana nggaolu. Katuwuna da'a ria pamulana atau kaopuna. I'a nasimbayu ewa Ana nu Alatala, pade i'a batena topanggeni agama sampe ri kasae-saena. 4 Jadi pekirimo kabete i Melkisedek e'i. Abraham, uma ntotu'ata nggaolu nombawai ka i'a sabagia nggari sampulu bagia nggari mbara-mbara to niagona nggari ja'i magau-magau to nidagina. 5 Nantuki Atura-atura agama Yahudi muli i Lewi to najadi topanggeni agamamo to masipato mombarata sabagia nggari sampulu bagia nggari pombarata nu todea to Yahudi. Naupa ira pura-pura muli Abraham, nantuki Atura-atura agama aga topanggeni agamamo to masipato mangala etu nggari ja'i sampesuwu-sampesuwu ira to Yahudi. 6 Tapi naupa i Melkisedek da'a muli i Lewi i'a nombarata sabagia nggari sampulu bagia nggari mbara-mbara to niago Abraham nggari ja'i magau-magau etu, pade i'a nombagane Abraham, tau to niwai ka pojanji nu Alatala. 7 Ninjanita pura-pura tau to nigane neliu nggaede nggari tau to nombagane i'a. 8 Ane topanggeni-topanggeni agama Yahudi to nantarima sabagia nggari sampulu bagia, ira manusia biasa to namate. Tapi nantuki Buku Nagasa i Melkisedek, to niwai Abraham ka sabagia nggari sampulu bagia, da'a namate tapi batena natuwu. 9 Lewi totu'a nu pura-pura topanggeni agama to masipato mantarima sabagia nggari sampulu bagia nggari todea to Yahudi. Tapi naupa i'a da'apa nesuwu tempo Abraham nombawai sabagia nggari sampulu bagia ka i Melkisedek, namala rauli ewa i Lewi mboto wo'u nombawai sabagia nggari sampulu bagia tempo etu. 10 Sabana i'a nariamo riara koro totu'ana Abraham tempo i Melkisedek nosirata ka Abraham. 11 Ante pekeniaka topanggeni-topanggeni agama muli i Lewi Atura-atura agama niwai ka todea to Yahudi. Tapi ira da'a namala nanggeni manusia majadi tau da'a ria salana riara mpanggita Alatala. Jadi etu sampe paraluu raonggotaka Balengga Topanggeni Agama ntanina to nasimbayu ewa i Melkisedek, da'a ewa i Harun muli i Lewi etu to najadi Balengga Topanggeni Agama Yahudi pamulana. 12 Jadi ane topanggeni-topanggeni agama nisambei, natantumo batuana atura-atura to nipajala ira wo'u kana rasambei. 13 - 14 Balengga Topanggeni Agama to nipatuju ri tesa pane'a I'amo Pueta. Ninjanita pura-pura I'a da'a muli i Lewi tapi I'a muli Yehuda. Pade da'a ria muli Yehuda to najadi topanggeni agama. Da'a ria sanggani Musa nanguli muli-muli Yehuda majadi topanggeni agama. 15 Nuapa to niuli kami ri ba'ana neliu ngganoto sabana we'i-we'i nariamo Balengga Topanggeni Agama ntanina to nasimbayu ewa i Melkisedek. 16 I'a nionggotaka najadi topanggeni agama da'a nantuki atura-atura nggasae to nompakatantu muli isema to masipato majadi topanggeni agama. Tapi I'a nionggotaka nantuki katuwuna to nakuasa to da'a ria kaopu-opuna. 17 Sabana riara Buku Nagasa naria tesa to nanguli iwe'i: "Iko topanggeni agama sampe ri kasae-saena nasimbayu ewa i Melkisedek." 18 Jadi we'i-we'i Atura-atura agama nggasae nisambei Alatala sabana da'a ria kuasana bo da'a ria gunana. 19 Sabana Atura-atura agama da'a ntoto namala manggeni kita majadi tau da'a ria salana riara mpanggita Alatala. Tapi we'i-we'i nariamo sangele jala to neliu nggabelo to nisarumakata. Ante manjarumaka jala etu kita mamala mompakamosu Alatala. 20 Da'a aga etu, tapi tempo Yesus nionggotaka najadi Balengga Topanggeni Agama etu nipowia Alatala ante nojanji. Tempo ira muli i Lewi nionggotaka najadi topanggeni agama, Alatala da'a nojanji. 21 Tapi tempo Yesus nionggotakana I'a nojanji. Niulina ka Yesus iwe'i: "Aku nojanji pade da'a ntoto mabali pekiriku, Iko topanggeni agama sampe ri kasae-saena." 22 Ante iwetu nanotomo Yesus najadi panjokota to nompakatantu pojanji Alatala nabou to neliu nggabelo kana madupa. 23 Pade naria sangelepa. Muli i Lewi to najadi topanggeni agama kana madea, sabana ira kana mamate samba'a bo samba'a sampe da'a namala mompapola bago ira. 24 Tapi Yesus batena natuwu. Etu sampe I'a batena nobago ewa topanggeni agama. Bagona da'a nolinja ka tau ntanina. 25 Jadi etu sampe I'a namala mompakasalama sampe ri kasae-saena tau to nompakamosu Alatala ante momparasaya I'a, sabana Yesus batena naroo nanjaliku ira ri ngayo Alatala. 26 Jadi Yesus Balengga Topanggeni Agama to masipato ka kita. I'a nagasa, da'a ntoto ria salana atau silakana. I'a natepatani nggari ja'i tau-tau nasilaka pade neore sampe ri peto'o to neliu nggalanga ri suruga. 27 I'a da'a nasimbayu ewa Balengga Topanggeni Agama ntanina. Ira eo-eo kana manggeni pesomba mombasompo silaka ira mboto ruru, pade ira mamala manggeni pesomba mombasompo silaka ntodea. Tapi Yesus nanggeni pesomba sanggani lau sampe ri kasae-saena tempo I'a nombawai korona mboto rapatesi manjaliku manusia. 28 Jadi nikitata, nantuki Atura-atura agama Yahudi tau to nalente bo nasilaka nionggotaka najadi Balengga Topanggeni Agama. Tapi nggapurina nantuki tesa nu Alatala to niulina ante nojanji, Anana mboto nionggotakana najadi Balengga Topanggeni Agama to da'a ntoto ria kakurana nuapa-nuapa sampe ri kasae-saena.
1 Patuju to napokona riara tesaku etu iwe'i: Naria mamimo Balengga Topanggeni Agama ewa etu ri ja'ita. I'a nekatoko ri peto'o to nibila ri panggana nu Alatala to Neliu Nggakuasa ri suruga. 2 I'a nantui bago ewa Balengga Topanggeni Agama ri Peto'o to Neliu Nggagasa, etumo ri Tenda Mpepue to nakonona ri suruga to nipowia Alatala da'a manusia. 3 Butu mba'a Balengga Topanggeni Agama nionggotaka ala manggeni pewai bo pesomba ka Alatala. Jadi Yesus wo'u kana manggeni pesomba ka Alatala. 4 Ane rapana I'a ri dunia e'i, I'a da'a ntoto majadi topanggeni agama, sabana nariamo topanggeni agama to nanggeni pesomba ka Alatala nantuki Atura-atura agama Yahudi. 5 Bago to nipowia ira kakonona aga gambara bo wayo nggari akala mepue ka Alatala ri suruga. Etu sampe tempo nabi Musa nggaolu nasadia nompowia Tenda Mpepue ri karawa baina, Alatala nompopatora ka i'a iwe'i: "Toramo! Iko kana mompowia pura-pura etu nantuki jonjo to nipopokita ka iko ri bunggu nu buluna." 6 Tapi Yesus nombarata bago ewa topanggeni agama to neliu nggabelo nggari bago topanggeni agama ri dunia e'i to nantuki pojanji nggasae. Pade iwetu wo'u pojanji nabou to niurusina ri olo Alatala bo manusia neliu nggabelo nggari pojanji nggasae, sabana pojanji to nabou nikawia nantuki janji-janji to neliu nggabelo. 7 Ane rapana pojanji pamulana etu da'a ria kakurana, tantu etu da'a paraluu rasambei ante pojanji karongelena. 8 Tapi Alatala mboto nanggita todea to Yahudi da'a nompakule nantuki pojanji nggasae. Etu sampe niulina iwe'i: "Toramo! Kana marata tempo banepia Aku mompowia pojanji nabou ante todea Israel bo Yehuda. 9 Pojanji etu da'a masimbayu ewa pojanji nggasae to nipowiaku ante totu'a ira nggaolu tempo Aku nombanini ira nesuwu nggari tana Masir. Ira da'a naroo nantuki pojanji etu. Jadi etu sampe Aku mana nompeili ira. 10 Tapi iwe'imo pojanji to kupowia ante todea Israel ri tempo marata etu: Aku kana mombaboli Atura-aturaku riara pekiri ira, bo mantulisi etu riara nta'i ira. Aku majadi Alatala ira pade ira majadi todeaku. 11 Pade ira mana paraluu mompatuduki roa-roa bo sampesuwu-sampesuwu ira mosinjani ante Alatala, sabana ira pura-pura, nabeloka totu'a, nabeloka ngana, kana mosinjani ante Aku. 12 Aku kana mombaampungi sala ira, pade silaka-silaka ira mana kutora." Iwetumo panguli i Pue. 13 Ante notesa ewa pojanji to nabou, Alatala nompakanoto pojanji nggasae mana nalaku. Pade nuapa to natu'a bo mana nalaku natantumo mana masaeka malipo.
1 Riara pojanji Alatala nggasae etu naria atura-atura to nompakatantu akala mepue ka Alatala, pade naria wo'u peto'o mpepue to nipowia manusia. 2 Saongu tenda nipataka, riarana naria rontombi. Ri tombi sawalikuna naria peto'o mpoindo bo meja ante roti to nipesomba ka Alatala. Tombi etu niuli Peto'o to Nagasa. 3 Pade riara kae powombo karobalana naria tombi to niuli Peto'o to Neliu Nggagasa. 4 Ri tombi etu naria meja mpotunju wongi to nipowia nggari bulawa bo Peti Pojanji to nilapi pura ante bulawa. Riara Peti etu naria kura nikawia nggari bulawa pomboli panggoni "manna," bo lembau i Harun to nosulu, bo rongu watu to nabemba nitulisi parenta-parenta Alatala. 5 Pade ri bunggu nu Peti Pojanji etu naria to nipowia mpolenje romba'a malaeka to niuli Kerub to nombagambara karia nu Alatala ri setu. Kapi ira nompakaulu tutu nu Peti etu to niuli peto'o pantolo silaka. Tapi etu pura-pura da'a namala ratesa mpakanoto we'i-we'i. 6 Iwetumo akala nompakasadia tombi riara Tenda Mpepue. Eo-eo topanggeni-topanggeni agama nesua ri tombi sawalikuna ala mantui bago ira. 7 Tapi aga Balengga Topanggeni Agama njamba'ana to namala mesua ri tombi karontombina to niuli Peto'o to Neliu Nggagasa, pade etu aga sanggani sampae. Tempo i'a mesua kana rakenina lei to rapesombana mombasompo silakana mboto bo silaka to nipowia todea ante da'a nitunggai. 8 Nggari atura etu Nosa Nagasa nu Alatala nompakanoto ka kita iwe'i: ane danaria Tenda Mpepue pamulana etu, batuana da'apa nibuka jala mesua sampe ri ngayo Alatala ri Peto'o to Neliu Nggagasa. 9 Etu nombagambara tempo we'i-we'i. Pewai-pewai bo pesomba-pesomba to nipesomba ntau nantuki atura-atura pojanji nggasae da'a namala mompakagasa rara nta'i topesomba etu sampe ira masipato mesua mantingayo Alatala. 10 Pura-pura etu aga nosinggawela ante panggoni, panginu bo mpengele-ngele ada mompegasa koro. Etu atura-atura to nosinggawela ante korota, da'a rara nta'ita, pade aga nalaku sampe marata tempona Alatala mompowia pojanji nabou. 11 - 12 Tapi Kristus narata ewa Balengga Topanggeni Agama to nanggeni kabelona to nirasaita mamimo. I'a noliu riara Tenda Mpepue to neliu nggabete bo neliu nggabelo nggari tenda mpepue ri dunia e'i, pade nesua ri Peto'o to Neliu Nggagasa ri suruga. Tenda Mpepue etu da'a nipowia mpale manusia, etu da'a nopu'u nggari dunia e'i. Tempo Kristus nesua ri setu sanggani lau sampe ri kasae-saena I'a da'a nanggeni lei ntowau tuamana atau lei ana japi ewa pesombana, tapi I'a nanggeni leina mboto. Ante iwetu I'a nanggabasaka kita nggari silakata sampe ri kasae-saena. 13 Nantuki pojanji nasae lei nggari towau bo japi pomawa pade sowu nggari ana japi to nipalabu ewa pesomba ka Alatala nikamburoi ka tau to najadi natantoru ala ira majadi magasa. Jadi ane lei bo sowu etu namala mompakagasa koro ntau to natantoru iwetu, 14 natantumo neliu nggamonjo lei Kristus! Sabana ante petulungi Nosa Nagasa, to naria sampe ri kasae-saena, Kristus nombawai korona mboto ka Alatala ewa pesomba to da'a ria kakurana. Leina nompakagasa rara nta'ita nggari powia to da'a ria gunana ala kita mamala mepue ka Alatala to Natuwuna. 15 Etu sampe Kristus najadi tau ntongo to nombaurusi pojanji Alatala to nabou ala tau-tau to nipokio Alatala mamala mantarima rasi-rasi to nijanjina sampe ri kasae-saena. Etu pura-pura majadi sabana Kristus namate ala manggabasaka ira nggari sala-sala to nipowia ira tempo pojanji nggasae danalaku. 16 Ane maria sura pojanji mombabagi kakalumana, kana manoto topowia sura etu namatemo da'apa kakalumana rabagi. 17 Sabana sura etu da'apa namala ratuki ane danatuwu topowia sura. Etu aga nalaku ane namatemo topowiana. 18 Iwetu wo'u pojanji Alatala pamulana da'apa nalaku ane da'apa nipatiti nu lei binata to nisambale. 19 Pamulana, i Musa nompatolele ka todea to Yahudi pura-pura parenta to naria riara Atura-atura agama Yahudi. Naopu etu nialana lei ana japi bo towau tuamana to nisambale pade nigalona ante ue. Naopu etu nikamburoina ri Buku Parenta-Parenta bo todea ante ra'a-ra'a kawoko hisop to nipo'u ante lui wulu bimba to nalei. 20 Niulina ka ira, "E'imo lei to nompakaasa pojanji to nipakatantu Alatala ka komi." 21 Pade iwetu wo'u i Musa nanggamburoi ante lei Tenda Mpepue bo pura-pura parewa to rapake mepue ka Alatala. 22 Kakonona, nantuki Atura-atura agama Yahudi ntora pura-pura to naria nipakagasa ante lei. Pade ane da'a ria katiti nu lei silaka da'a namala raampungi. 23 Jadi Tenda Mpepue bo pura-pura parewana etu to nombagambara nuapa to naria ri suruga kana nipakagasa iwetu. Tapi to naria ri suruga etu paraluu nipakagasa ante pesomba to neliu nggabelo. 24 Sabana Kristus da'a nesua ri Peto'o to Nagasa ri dunia to nipowia mpale manusia to nombagambara Peto'o to Nagasa to nakonona ri suruga. Tapi I'a nesua ri suruga pade ri setu I'a batena mantingayo Alatala ala mantulungi kita. 25 Butu-butu mpae Balengga Topanggeni Agama Yahudi nesua ri Peto'o to Neliu Nggagasa ante nanggeni lei nggari saongu binata. Tapi Kristus da'a nesua mpanggani-nggani iwetu manggeni korona mboto ewa pesomba. 26 Sabana ane iwetu batuana I'a nombarasai kasusa bo kapari mpanggani-nggani nompamula nggari lamba pamulana. Tapi kakonona, ri tempo e'i to namosu kaopu nu dunia I'a narata sanggani lau ala mompakaropu silakata ante nombawai korona mboto rapatesi. 27 Alatala nompakatantu manusia mamate aga sanggani lau, pade naopu etu ira ratangara. 28 Jadi iwetu wo'u Kristus namate aga sanggani lau ewa pesomba mompakaropu silaka ntodea. Naopu etu I'a kana marata sangganipa, da'a ala mompakaropu silaka, tapi ala mompakasalama tau-tau to nalentora mompopea karatana.
1 Atura-atura agama Yahudi aga gambara kabelona to rakeni Kristus ka kita, da'a lenjena mpu'u. Pesomba-pesomba to nipakatantu riara Atura-atura etu da'a ntoto namala manggeni tau majadi manoa riara mpanggita Alatala, naupa ira butu-butu mpae marata manggeni pesomba to nasimbayu rapesomba ka Alatala. 2 Ane rapana pesomba ira etu namala mantapasi silaka, natantumo ira mana manggeni pesomba ka Alatala, sabana mana matomo rara ira mantora silaka ira. 3 Tapi kakonona pesomba to nikeni ntau butu-butu mpae aga nompopatora ka tau ira nasilaka. 4 Sabana lei nggari japi pomawa bo towau tuamana da'a ntoto namala mompakaropu silaka. 5 Etu sampe tempo Kristus narata ri dunia e'i, I'a nanguli iwe'i: "O Alatala, pesomba bo pewai da'a nipodotamu, tapi naria koro to nipakasadiamu ka Aku. 6 Pesomba to nipalabu bo pewai-pewai to niwai ala mombasompo silaka da'a nipokonomu. 7 Pade Aku nanguli, 'Kita we'i, O, Pue Alatala, naratamo Aku mompowia dotamu nasimbayu ewa to nitulisi riara Buku Nagasa ewa Aku.' " 8 Ri ba'ana, I'a nanguli, "Pesomba bo pewai da'a nipodotamu." Pade niulina, "Pesomba to nipalabu bo pewai-pewai to niwai mombasompo silaka da'a nipokonomu." Etu to niulina naupa etu pura-pura nikeni ka Alatala nantuki Atura-atura agama Yahudi. 9 Naopu I'a nanguli iwetu, nitambaina iwe'i: "Kita we'i, O, Pue Alatala. Naratamo Aku mompowia dotamu." Jadi sampesuwu-sampesuwu, pesomba-pesomba to nantuki Atura-atura agama Yahudi nipakalipo Alatalamo ala I'a mamala manjambei pesomba etu ante pesomba Kristus. 10 Pade nggari dota Alatala etumo, kita nipakagasa tempo Yesus Kristus nombawai korona mboto ewa pesomba sanggani lau sampe ri kasae-saena. 11 Eo-eo topanggeni-topanggeni agama Yahudi nekanggore nantui bago ira. Nompenggani-nggani ira nanggeni pesomba-pesomba to nasimbayu ka Alatala. Tapi pesomba etu da'a namala mompakaropu silaka. 12 Tapi Kristus nanggeni sangele lau pesomba pade pesombana etu namala mompakaropu silaka sampe ri kasae-saena. Naopu etu I'a neore mpaka ri suruga pade nekatoko ri peto'o to nibila ri panggana nu Alatala. 13 Pade we'i-we'i I'a nompopea sampe Alatala mompowia pura-pura balina mekou ri ja'ina. 14 Jadi nggari sangele lau pesombana Kristus nompegasa kita nggari silakata pade nompajadi kita tau da'a ria sala riara mpanggita Alatala sampe ri kasae-saena. 15 Nosa Nagasa nu Alatala wo'u nompakanoto etu ka kita. Niulina iwe'i: 16 "Iwe'imo pojanji to kupowia ante ira ri tempo to marata etu: Aku kana mombaboli Atura-aturaku riara pekiri ira, bo mantulisi etu riara nta'i ira." Iwetu panguli i Pue. Pade niulina wo'u, 17 "Silaka-silaka bo kaja'a-kaja'a ira mana kutora." 18 Jadi ane silaka-silaka bo kaja'a-kaja'a naopu niampungimo, mana paraluu pesomba mombasompo silaka. 19 - 20 Jadi sampesuwu-sampesuwu, we'i-we'i kita nabia mompakamosu Alatala sabana nggari lei i Pue Yesus. Ante kamatena I'a nombabuka ka kita jala to nabou to nanggeni katuwua nabelo. Ri Tenda Mpepue jala mesua riara Peto'o to Neliu Nggagasa nilawa kae powombo. Tapi ante nombawai korona rapatesi Kristus nombabuka jala ala kita mamala mompakamosu Alatala nasimbayu ewa Balengga Topanggeni Agama Yahudi nombaliunaka kae powombo mpaka ri ja'i Alatala ri Peto'o to Neliu Nggagasa. 21 Pade Kristus najadi Balengga Topanggeni Agama to nanggeniaka ananjapo Alatala. 22 Jadi kamaimo kita mompakamosu Alatala ante rara to nalusu bo pomparasaya to naroo sabana rara nta'ita to nompakasala kita bopia naopu nipakagasa ante lei Kristus, pade korota naopu nidiu ante ue to nagasa. 23 Kamaimo kita maroo manjarumaka nuapa to nipangakuta ante da'a molenga-lenga, sabana ninjanita Alatala namala raparasaya mompakadupa pojanjina. 24 Pade kamaimo kita mompekiri roata samba'a bo samba'a ala kita mamala mosipakaroso rara sampe kita pura-pura mosipotowe bo manggawia powia to nabelona. 25 Ne'e kita metiko'o rara masiromu modade ewa kabiasa bara sakuya mba'a tau, tapi kamaimo kita mosipopatora samba'a bo samba'a, neliu-liupa we'i-we'i sabana ninjanita namosumo karata i Pue Yesus bali ri dunia. 26 Ane ratunggaita mowia silaka naopu kita nantarima pepatuduki to nakono, mana ria pesomba to namala mompakaropu silaka etu. 27 Tapi to naria aga pesuku to mompakawiora rara to rapopeata bo apu to napane mpu'u to mompalabu mpakaopu tau-tau to nangewa Alatala. 28 Tau to nanjapuaka Atura-atura agama to nipapola i Musa nipatesi ante da'a ria ampu ane naria tolumba'a sabi nompakanoto kasalana. 29 Tapi neliu nggatomo mpu'u pesuku to masipato rapawela ka tau to nombalonggo-longgo Ana nu Alatala. Tau etu nompekiri lei i Pue Yesus da'a ria gunana, tanu lei etu mboto nantapasi silakana nantuki pojanji Alatala. Pade tau etu nanjalai Nosa Nagasa to nanggeni towe belo nu Alatala ka todeana. 30 Ninjanitamo isema to nanguli iwe'i: "Akumo to mombabalasi. Aku mombasuku ira." Pade niulina wo'u, "Pue kana mombatangara todeana." 31 Natantumo nawiora mpu'u rara ntau to nawela pesuku nggari ja'i Alatala to Natuwuna! 32 Tapi sampesuwu-sampesuwu, toramo katuwumu tempo bopia. Tempo komi lako nantarima reme nggari ja'i Pue nadea kasusa bo kapari to nirasai komi, tapi komi batena naroo nomparasaya. 33 Sanggani-sanggani komi nisalai bo nipakaja'a ntau ri ngayo ntodea. Naria wo'u komi nosimporoa ante tau-tau to nipowia ntau iwetu. 34 Komi wo'u naasi mata nomporoa bo nantulungi tau-tau to nitarunggu, pade tempo mbara-mbara komi nikaliaka ntau komi batena nadamba-damba, sabana ninjani komi naria kakalumana komi to neliu nggabelo ri suruga to naroo sampe ri kasae-saena. 35 Jadi sampesuwu-sampesuwu, ne'e komi maeka momparasaya, sabana ane komi maroo momparasaya mabete mpu'u tambo komi banepia. 36 Komi kana maroo rara ala komi mamala mompowia dota Alatala pade naopu etu mantarima nuapa to nijanjina. 37 Sabana riara Buku Nagasa naria nitulisi iwe'i: "Damo sampalai I'a to marata etu kana masalisa marata. I'a da'a mombasoro-soro karatana etu. 38 Pade todeaku to najadi nanoa riara mpanggitaku ante nomparasaya, iramo to matuwu mabelo sampe ri kasae-saena. Tapi ane ira mokanggaura ira mana rakonoa raraku." 39 Tapi sampesuwu-sampesuwuku, kita e'i da'a tau-tau to nokanggaura pade rasuku sampe ri kasae-saena. Tapi kita tau-tau to nomparasaya Alatala pade mombarata katuwua mabelo sampe ri kasae-saena.
1 Nomparasaya batuana ninjanitamo nuapa to nisarumakata kana raratata, nariamo katantuna riara nta'ita ewa nuapa anu da'apa nikitata. 2 Nggari pomparasaya ira totu'ata nggaolu nikonoa Alatala. 3 Nggari pomparasayata ninjanita langi bo dunia nipajadi Alatala ante Tesana sampe nuapa to natekita najadi nggari anu da'a natekita. 4 Nggari pomparasayana i Habel nanggeni ka Alatala pesomba to neliu nggabelo nggari pesomba tuakana i Kain. Nggari pomparasayana etu i Habel nitarima Alatala ewa tau nanoa sabana nanotomo pesombana nikonoa Alatala. Pade naupa i'a namatemo, kita batena nipatuduki nggari jonjo pomparasayana. 5 Nggari pomparasayana i Henokh da'a namate tapi niore Alatala nggari dunia e'i. I'a nielo-elo tapi da'a ria nirata ntau sabana i'a niore Alatala nggari dunia e'i. Naria tesa ri Buku Nagasa to nompakanoto da'apa i Henokh niore, katuwuna nikonoa Alatala. 6 Toramo! Da'a ria kamba samba'a to namala nikonoa Alatala ane da'a ria pomparasayana, sabana isema-sema to madota mompakamosu Alatala kana momparasaya naria Alatala, pade momparasaya wo'u I'a mombawai rasi ka tau-tau to nangelo I'a ante mpu'u-mpu'u rarana. 7 Nggari pomparasayana tempo i Nuh nipopanjani Alatala ewa kajadia to majadi anu da'apa sanggani nikita ntau, i'a natundu ri ja'ina bo nompowia sakaya bete ala mompakasalama ira saongu njapo. Ante iwetu pura-pura manusia ri dunia nipakasala tapi i Nuh mboto nireke Alatala nanoa sabana pomparasayana. 8 Nggari pomparasayana Abraham nantuki parenta Alatala tempo i'a nipokio Alatala malau mpaka ri tana to nijanji Alatala majadi bagiana. Nanggaliwomo i'a nggari ngatana mboto naupa da'apa ninjanina ri umba tana to rakalauna etu. 9 Nggari pomparasayana i'a neto'o ri tana to nijanji Alatala etu ewa topesowo sabana tana etu da'apa najadi bagiana. Ri setu i'a daneto'o ri tenda, pade wa'a wo'u Ishak bo Yakub, mulina to niwai Alatala ka janji to nasimbayu. 10 Abraham nosabara neto'o iwetu sabana nisarumakana i'a kana meto'o ri ngata to naroo ri suruga banepia to niponia bo nipowia Alatala ante pondasi to da'a magero-gero. 11 Nggari pomparasayana Abraham bo rongona i Sara wo'u nombarata karoso ala momuli, naupa Abraham natu'amo bo i Sara nagampa. Etu najadi sabana ninjanina Alatala namala raparasaya mompakadupa pojanjina. 12 Naupa Abraham neliu nggatu'amo i'a nomuli ka muli to nadea anu da'a namala rabila kadeana, nasimbayu ewa betu'e ri langi bo bone ri wiwi ntasi. 13 Pura-pura ira etu batena nomparasaya sampe namate. Da'apa nitarima ira nuapa to nijanji Alatala, tapi niparasaya ira etu kana ratarima muli ira banepia. Ira nompangaku dunia e'i da'a peto'o ira to nakonona, ira aga topesowo bo topenjayo ri dunia e'i. 14 Tau to nanguli iwetu nompakanoto ira danangelo peto'o to majadi bagia ira mboto. 15 Da'a tana to nipalasi ira bopia to nipolentora ira, sabana ane iwetu nariamo loga ka ira manjili gu sa'a. 16 Tapi kakonona ira nalentora ka ngata to neliu nggabelo, etumo ngata to naria ri suruga. Etu sampe Alatala da'a naeya matana ane niuli Alatala ira, sabana naria mami ngata to nipakasadiana ka ira. 17 - 18 Nggari pomparasayana tempo Abraham niuji Alatala, i'a nasadia nombawai anana Ishak rasambale ewa pesomba ka Alatala. Bopia Alatala nojanji ka Abraham iwe'i: "Nggari Ishakmo pade komi mombarata muli to nijanjiku ka komi." Tapi naupa iwetu Abraham nasadia nombawai Ishak, anana samba'a lau, rasambale ewa pesomba ka Alatala. 19 Nipekirina Alatala nompakule mompakatuwu bali Ishak nggari kamatena. Jadi namala rauli ewa Abraham nantarima bali anana to nipakatuwu Alatala bali nggari kamatena. 20 Nggari pomparasayana Ishak etu nombajanji ka anana Yakub bo Esau rasi to rawai ka ira tempo marata. 21 Pade nggari pomparasayana tempo Yakub mana masaeka mamate, i'a nombajanji rasi etu ka romba'a ana Yusuf. Pade i'a nompatuko ri lembauna nombatoiya bo nombabila Alatala. 22 Nggari pomparasayana tempo Yusuf mana masaeka mamate, i'a nombaboto iwenu todea Israel kana mesuwu nggari tana Masir banepia. Pade i'a nombaboli tewai ewa nuapa rapowia ka watabakuna tempo ira mesuwu malai. 23 Nggari pomparasaya indo uma i Musa, tempo ana ira etu niote i'a nitabuniaka ira tolumbula kasaena sabana nikita ira i'a samba'a ngana to nagayana. Da'a naeka ira nangewa parenta Magau Masir to nanguli butu mba'a ngana langgai to Israel kana rapatesi. 24 Nggari pomparasayana tempo Musa nabetemo, i'a da'a nadota rauli ana nu ana besi Magau Masir. 25 Nipokononapa mombarasai kasusa bo kapari mpasanggani-nggani ante todea nu Alatala pade mombarasai kasana aga sampalai nggari katuwu nasilaka. 26 Nipekirina nabelopa i'a rasalai nasimbayu ewa Kristus to marata banepia pade mombarata pura-pura kakalumana ri Masir, sabana i'a bate nanjarumaka rasi to rawai Alatala ka i'a banepia. 27 Nggari pomparasayana Musa da'a naeka nalai nggari tana Masir naupa narau mpu'u rara Magau Masir. Musa naroo nantuki dota Pue nasimbayu ewa i'a nanggita Alatala to da'a natekita. 28 Nggari pomparasayana i'a nompowia ada Paska pade niparentana ala lei nggari ana bimba to nisambale ragese ka pewobo sapo nto Yahudi, ala ne'e sampe ana ira mawela rapatesi tempo malaeka Alatala marata mompatesi ngana-ngana ulumbua ri Masir. 29 Nggari pomparasaya ira, tau-tau to Israel namala nombawote Tasi Lei nasimbayu ewa nolumako ri kabatana. Tapi tempo to Masir nompasimbuku mewote mombaraga ira, ira aga niome ntasi. 30 Nggari pomparasaya tau-tau to Israel tembo ngata Yerikho nadungga naopu nitalili ira pitueo kasaena. 31 Pade nggari pomparasayana i Rahab, besi bajinga, da'a namate mpasanggani-nggani ante to Yerikho to da'a natundu ri ja'i Alatala, sabana i'a nantarima mata-mata to Israel ante nabelo. 32 Sampesuwu-sampesuwuku, danadeapa jonjo ntanina to mamala kutesa tapi da'a nagana logaku mantesa mpakanoto ewa pomparasaya ira i Gidion, i Barak, i Simson, Yefta, i Daud, nabi Samuel ante nabi-nabi ntanina. 33 Ante nomparasaya naria ira nombadagi magau-magau. Naria ira nomparenta todeana ante nanoa, pade naria ira nantarima nuapa to nijanji Alatala ka ira. Naria ira nombalamu nganga nu singa. 34 Naria ira nompopaya apu to narega nju'u, pade naria ira nadea ngganimo nakabasaka nggari topetimbe. Tempo nalente naria ira nipakaroso bali. Naria ira najadi naroso riara posibali sampe ira nompakule nombadagi tantara-tantara to sangatana. 35 Pade naria besi-besi nanggita bali ana-ana ira to namate nipakatuwu bali. Tapi naria tau-tau ntanina to nompakamba koro ira niboba sampe namate. Ira da'a nadota rakabasaka nggari kasusa etu ala ira mamala rapakatuwu bali ante katuwua to neliu nggabelo. 36 Naria wo'u to nipongei-ngei bo niporo mpakandasa, pade naria to nibalanggu bo nisuaraka riara tarunggu. 37 Naria wo'u to nirempe watu sampe namate bo naria to nigaragaji mpakaputu, pade naria to nipatesi ante guma. Ira nalai-lai nangelo katuwua pade pakea ira aga kulimba nu bimba bo towau. Ira mpu'u-mpu'u nakabu, ira nipakasusa bo nipakasesa. 38 Ira nalai-lai ri karawa baina bo ri buluna. Ira aga neto'o ri bololia bo ri bolo-bolo ntana. Kakonona ewa dunia to naja'a e'i da'a masipato rapeto'o ira. 39 Ira pura-pura nikonoa Alatala sabana pomparasaya ira naupa ira da'apa nantarima pura-pura nuapa to nijanji Alatala, 40 sabana naria to neliu nggabelo to nipakasadia Alatala ka kita. Pade patujuna ala ira mompopea sampe kita pura-pura rapakagasa mpasanggani-nggani ante da'a ria pokainggu to nasalana.
1 Toramo, nadea mpu'u tau topomparasaya nantara kita. Sabana etu kamaimo kita mantajiaka pura-pura nuapa to nompakakaduku bo silaka to nagampa mpu'u nompule kita. Kamaimo kita mongowa ntutu riara posilumba to nipakatantu Alatala ka kita. 2 Kamaimo kita mowia etu ante tunggai manggita Yesus, pu'u nu pomparasayata bo to nompakaroso pomparasaya etu sampe ri kaopuna. I'a naroo nanta'amaka kasusa bo kapari nipaku ri kayu parika ante da'a nompekiri eyana, sabana nitorana kadamba to nipakasadia ka I'a. Pade we'i-we'i I'a nekatoko ri peto'o to nibila ri panggana nu Alatala. 3 Pekirimo I'a to naroo nanta'amaka rau rara nggari ja'i tau-tau nasilaka to nangewa I'a ala ne'e komi majadi malente bo maopu rara. 4 Sampesuwu-sampesuwu, riara posibali komi mangewa silaka da'apa ria komi nandasa sampe nesuwu lei. 5 Bara nikalinga komimo tesa nu Alatala nggari Buku Nagasa to niulina ala mompakaroso rara komi ewa ana-anana mboto iwe'i: "Anaku, ne'e manjapuaka pepatuduki i Pue. Ne'e maopu rara ane I'a mangontiaka komi. 6 Sabana i Pue nompatuduki butu mba'a tau to nipotowena. I'a nombaporo butu mba'a tau to nipangakuna anana." 7 Jadi komi kana maroo manta'amaka kasusa bo kapari to nirasai komi. Tarimamo etu ewa pepatuduki nggari ja'i Umamu Alatala, sabana I'a nanggita komi ewa anana mboto. Nariamo ngana da'a nipatuduki nu umana? Natantumo da'a! 8 Tapi ane komi da'a nipatuduki nasimbayu ewa pura-pura ngana ntanina, batuana komi da'a ana ote, komi aga ana wone. 9 Ntanina nggari etu, umata ri dunia nompatuduki kita pade kita nekou ri ja'i ira. Ane iwetu natantumo kita kana neliupa mekou ri ja'i Umata Alatala to nompajadi wayota ala kita matuwu mabelo. 10 Umata ri dunia e'i nompatuduki kita sampalai nantuki nuapa to nireke ira nabelo. Tapi Alatala nompatuduki kita ala manggeni belo ka kita. Patujuna ala kita majadi magasa nasimbayu ewa I'a. 11 Tantu tempo kita nipatuduki kita da'a nadamba, tapi aga nasusa. Tapi ane kita mantarima pepatuduki etu, kaopuna kana maria aselena riara nggatuwuta, etumo kita matuwu mosinggabelo ante manoa rara. 12 Sabana etu, sampesuwu-sampesuwu, pakaroo rara komi to nalente bo pakaroso pomparasaya komi to nogoya-goya. 13 Tukimo jala to nakonona ala roa-roa komi to nalente pomparasaya ira da'a masalanjala, tapi majadi tau to maroso pomparasayana. 14 Komi kana tunggai mompasimbuku matuwu mosinggabelo ante pura-pura tau. Pade pasimbuku wo'u matuwu magasa, sabana tau da'a nagasa katuwuna da'a ntoto mamala manggita i Pue. 15 Jagaimo koro komi samba'a bo samba'a ala ne'e sampe maria tau to da'a madota mantarima towe belo nu Alatala. Ne'e sampe maria tau nomboli silaka riara nta'ina. Sabana ante iwetu ira majadi ewa kale to napa'ina ri tatongo komi. Ira aga mompopeumba posinggarau pade mompakatantoru todea. 16 Ne'e sampe maria to mogau sala ante tau da'a rongona mboto, bo ne'e sampe maria to aga mompekiri kasana korona ri dunia bo da'a mompekiri dota nu Alatala nasimbayu ewa to nipowia Esau. I'a nompobalu rasi bo kabelona to majadi bagiana ewa ana ulumbua ante sanjuraya lau panggoni. 17 Ninjani komi mbotomo tempo i'a nerapi rasi etu nggari ja'i umana nggapuri i'a nipoara naupa i'a nerapi-rapi ante nageo. Sabana da'a niratana jala mombabali nuapa to nipowiana bopia. 18 Sampesuwu-sampesuwu, nuapa to nirasaita to nantarima Pojanji Alatala to Nabou da'a nasimbayu ante nuapa to nirasai totu'ata nggaolu tempo Alatala nombawai Pojanjina Nggasae. Ira to Israel narata nantingayo sangele to namala raere, etumo Bulu Sinai ante apu to najela-jela. Ira nanggita karumauna to neliu-liu bo bara to neliu nggagai. 19 Ira nangepe wamba kololio to nagai mpu'u bo suara notesa. Tempo ira nangepe suara etu naeka mpu'umo ira sampe ira nerapi ante mpu'u-mpu'u ala suara etu mana motesa ka ira. 20 Sabana da'a namala ira nanta'amaka mangepe parenta to nitesa suara etu, iwe'i: "Ane maria komi bara binata komi marata mangere bulu e'i, i'a kana rarempe ante watu sampe mamate." 21 Pura-pura nuapa to nikita ira ri setu mpu'u-mpu'u nompakawiora rara ira sampe i Musa nanguli, "Aku mpu'u-mpu'u naeka bo nolalete." 22 Tapi neliu nggabelopa to nirasaita to nantarima pojanji Alatala to nabou. Ewa kita narata ri Bulu Sion, ngata nu Alatala to Natuwuna, etumo ngata Yerusalem ri suruga. Kita nanggita njobu-njobu malaeka to nasiromu nadamba-damba. 23 Pade kita nanggita todea topomparasaya i Pue Yesus to naria sanga-sanga ira nitulisi riara buku Alatala ri suruga. Kita nanggita Alatala, Topotangara pura-pura manusia. Pade kita nanggita wayo-wayo ntau nanoa to najadi nagasa. 24 Pade kita wo'u nanggita Yesus, Tau Ntongo to nombaurusi pojanji nabou etu. Pade kita nanggita leina to nipatiti to neliu nggabelo nggari lei i Habel. 25 Jadi sampesuwu-sampesuwu, pakabelo-belo ala ne'e sampe komi da'a madota mangepe tesa to niuli Alatala ka komi. Sabana ane ira to da'a nadota mangepe pepatora Alatala nggari buluna ri dunia da'a nakabasaka nggari pesuku Alatala, neliu-liupa kita to nangepe I'a notesa nggari suruga. Ane kita da'a madota mangepe I'a, natantumo kita wo'u da'a makabasaka nggari pesukuna to marata. 26 Tempo nggaolu ri Bulu Sinai suara Alatala to nagai nombagagoya dunia. Tapi we'i-we'i I'a nojanji iwe'i: "Sangganipa banepia kana kugagoya dunia, pade da'a aga dunia tapi langi wo'u." 27 Tesana "sangganipa" etu nompakanoto pura-pura nuapa to nipajadina kana ragagoyana bo rapakalipona ala aga to da'a namala ragagoya to naboli. 28 Jadi etu sampe kita masipato manguli tarima kasi ka Alatala sabana kita niwai loga majadi todea riara Poparentana to da'a ntoto namala ragagoya. Pade kamaimo kita mepue ka Alatala ante inggu to nompakadamba I'a, etumo ante maeka bo mekou ri ja'ina. 29 Sabana Alatalata kana mombasuku tau-tau to mompoara kabelona nasimbayu ewa apu to napane nju'u mompalabu mpakaopu tinalu.
1 Ne'e komi menonto mosipotowe samba'a bo samba'a ewa topomparasaya i Pue Yesus to nosampesuwu. 2 Ne'e malinga rara mantarima torata anu da'a ninjani komi riara njapo komi, sabana ante nowia iwetu nariamo bara sakuya mba'a tau nantarima malaeka-malaeka i Pue riara njapo ira ante da'a ninjani-njani. 3 Toramo tau-tau to nitarunggu nasimbayu ewa komi mboto wo'u nitarunggu mpasanggani-nggani ante ira. Pade toramo tau-tau to nipakasusa ntau, sabana ninjani komi mboto kasusa to nirasai ira. 4 Porongo kana rabila ri tatongo komi pura-pura. Ne'e mompakatantoru porongomu ante mogau sala ante tau da'a rongomu mboto, sabana Alatala kana mombasuku tau to nogau sala ante tau da'a rongona mboto bo topebualo. 5 Ne'e komi rapobatua nu doi, tapi komi kana madamba-damba ante nuapa-nuapa to naria ri ja'imu. Sabana Alatala nanguli iwe'i: "Aku da'a ntoto mompalamba komi atau mompalasi komi." 6 Etu sampe kita mabia manguli iwe'i: "Pue topantulungi aku, jadi aku da'a maeka. Nuapa to mamala rapowia ntau ka aku?" 7 Pekirimo katuwu topanggeniaka-topanggeniaka agama komi to nanggeni Tesa nu Alatala ka komi bopia. Pariara nta'imo jonjo katuwu ira bo kamate ira, pade pasialamo pomparasaya ira. 8 Toramo! Yesus Kristus batena nasimbayu, nabeloka tempo bopia, nabeloka we'i-we'i pade sampe ri kasae-saena. 9 Ne'e komi rapakasalanjala ntau ante mantuki mpengele-ngele pepatuduki to nontani nggari pepatuduki to nakonona. Agina pomparasayata rapakaroso nggari towe belo nu Alatala, da'a nggari atura-atura ewa panggoni to masipato rakonita. Atura-atura etu da'a ntoto namala mantulungi kita. 10 Naria meja mpesombata. Tapi topanggeni agama to nanggeni pesomba ri Tenda Mpepue nantuki Atura-atura agama da'a namala ratulungi ri meja mpesomba etu. 11 Nantuki Atura-atura agama Yahudi lei nggari binata to nisambale ewa pesomba kana nikeni Balengga Topanggeni Agama rapesomba riara Peto'o to Neliu Nggagasa riara Sapo Mpepue ala mombasompo silaka ntodea. Tapi watabaku nu binata etu kana nipalabu ri sawaliku ngata. 12 Etu nombagambara ka kita nuapa to najadi ante Yesus. I'a wo'u nikeni nipatesi ri sawaliku bobaa ngata Yerusalem ala I'a mamala mompakagasa topomparasaya I'a ante leina mboto. 13 Sabana etu kamaimo kita maroo ri ja'i Yesus, ne'e mana kita manjili matundu riara Atura-atura agama. Kamaimo kita wo'u rasalai nasimbayu ewa I'a nisalai. 14 Sabana ri dunia e'i da'a ria peto'ota to naroo, tapi kita manjarumaka peto'o ntanina to neliu nggabelo ri suruga. 15 Jadi sabana etu pura-pura, ante petulungi Yesus kamaimo kita tunggai manggeni pesombata ka Alatala, etumo tesata mombatoiya bo mombabila sangana. 16 Tapi ne'e rakalingata mompowia to nabelona bo mositulungi, sabana etumo pesomba to nompakadamba rara nu Alatala. 17 Tukimo parenta-parenta ntopanggeniaka-topanggeniaka komi pade pekoumo ri ja'i ira. Sabana iramo to nanggeniaka katuwu komi. Kana marata tempo banepia ira kana motarangga mpakanoto ri ja'i Alatala iwenu ira nanggeniaka komi. Jadi pekoumo komi ri ja'i ira ala ira mamala mantui bago etu ante madamba rara. Ane komi da'a mekou ri ja'i ira, ira aga masusa rara pade etu da'a manggeni kabelona ka komi. 18 Sampesuwu-sampesuwu, posambayamo ka kami. Niparasaya kami rara nta'i kami nagasa. Riara mpengele-ngele kami batena madota mompowia nuapa to nanoana 19 Neliu-liupa aku merapi ante mpu'u-mpu'u ala komi momposambaya aku ala aku mamala masasinta rakeni Alatala manjili ri ja'i komi. 20 - 21 Alatala nompakatuwu bali Pueta Yesus nggari kamatena. I'amo Topoewu to nakuasa to nompoewu kita bimba-bimbana. Leina nipatiti nompakaasa pojanji Alatala ante kita to nalaku sampe ri kasae-saena. Perapi Alatala, pu'u katuwua nabelo mompakagana ka komi nuapa pura to nabelona to niparaluu komi ala komi mompakule mowia dotana. Perapi I'a manggeni komi mompowia to nikonoana ante petulungi nggari ja'i Yesus Kristus. I'amo to masipato ratoiyata bo rabilata sampe ri kasae-saena. Amin! 22 Sampesuwu-sampesuwu, aku merapi ka komi epemo ante mosabara tesa to nitulisiku e'i, sabana suraku e'i da'a wo'u nandateka. 23 Kana ranjani komi sampesuwuta i Timotius nikabasakamo nggari tarunggu. Ane i'a masasinta marata ri ja'iku, aku manggeni i'a mpasanggani-nggani momai manggita komi. 24 Pakasampe tabe kami ka pura-pura topanggeniaka komi pade ka pura-pura topomparasaya ri setu. Pade tarimamo tabe nggari ja'i topomparasaya-topomparasaya ri Propinsi Italia. 25 Perapi Pue mombagane komi pura-pura.
1 Sura e'i nggari ja'iku Yakobus, batua Alatala bo Pue Yesus Kristus, ka pura-pura topomparasaya Alatala to nosimpotatare ri njumaongu dunia. Tabe nggari ja'iku. 2 Sampesuwu-sampesuwu, ane komi mombarata mpengaya-ngaya pesoba, komi kana mosukuru, 3 sabana ninjani komi ane komi matutu momparasaya i Pue tempo mombarata pesoba kaopuna komi majadi maroo rara. 4 Jadi komi kana tunggai maroo ala komi majadi manoto, pade da'a maria inggu nuapa-nuapa to masipato raontiaka, pade pomparasaya komi ri ja'i Alatala da'a makura nuapa-nuapa. 5 Ane maria nggari tatongo komi to nakura notona, i'a kana merapi noto nggari ja'i Alatala. Pade Alatala kana mombawai noto etu ka i'a, sabana Alatala nombawai ka pura-pura tau ante najoi rarana. Da'a niwaina nggarau. 6 Tapi tau to merapi kana momparasaya mpu'u-mpu'u. Da'a mamala i'a morongu rara, sabana tau morongu rara nasimbayu ewa balumba ri tasi nitawui poiri gusa'a guse'i. 7 - 8 Tau norongu rara ewa etu da'a naliongu pekirina. Ne'e i'a manjarumaka mombarata nuapa-nuapa nggari ja'i Pue! 9 Topomparasaya to napakasi kana madamba-damba ane i'a rapakalanga Alatala katuwuna. 10 Pade topomparasaya to nakalumana wo'u kana madamba-damba ane i'a rapakaede Alatala katuwuna, sabana ninjaninamo i'a kana mamate nasimbayu ewa sese kawoko to nalipomo karambana. 11 Tempo mata eo nebulu ante kapanena mpu'u, kawoko etu kaliu-liu nalele sampe naronto sesena, pade nalipo puramo karambana. Iwetu wo'u ante tau nakalumana. Sanggani tempo i'a kana mamate riara popaelona. 12 Nasana mpu'umo tau to naroo rarana riara pesoba, sabana ane i'a manta'amaka sampe ri kaopu pesoba etu, Alatala kana mombawai ka i'a katuwua mabelo sampe ri kasae-saena. Etu to nijanji Alatala ka tau-tau nompotowe I'a. 13 Ane samba'a tau rapesoba mowia kaja'ana ne'e i'a manguli, "Pesoba e'i narata nggari ja'i Alatala." Etu da'a nakono, sabana Alatala mboto da'a mamala rapesoba mowia kaja'ana pade I'a da'a wo'u mompesoba tau mowia kaja'ana. 14 Tapi tau nipesoba mowia kaja'ana ane i'a rataja bo rakeni dota rarana mboto to naja'ana. 15 Ane dota rarana to naja'a etu ratukina, i'a kana masilaka. Pade ane i'a tunggai mowia silaka etu, kaopuna i'a kana mamate pade rapopoga'a nggari ja'i Alatala sampe ri kasae-saena. 16 Sampesuwu-sampesuwu to nipotoweku, ne'e komi masala paha! Alatala da'a mompesoba kita mowia kaja'ana. 17 Pura-pura to niwaina ka kita nabelo ntoto, da'a ria to naja'ana. Pura-pura nuapa to nabelona narata nggari ja'i Alatala ri suruga to nompajadi pura-pura reme ri langi. I'a da'a nasimbayu ewa wayo to nagampa nabali. I'a bate-batena nabelo. 18 Nggari dotana mboto I'a nompajadi kita ana-anana ante nompatolele ka kita tesana to nakono. Etu nipowiana ala kita majadi to neliu nibila nggari pura-pura nuapa to nipajadina. 19 Sampesuwu-sampesuwu to nipotoweku, pariara nta'imo mpakabelo-belo tesaku e'i. Kita kana masadia mangepe, tapi ne'e kaliu-liu motesa, bo ne'e masalisa marau, 20 sabana isema-sema to narau da'a mamala mompowia to nabelona to nompakadamba rara Alatala. 21 Sabana etu kabasaka puramo kabiasa inggu to natantoru bo naja'a. Pariaramo ante kaede rara tesa to niboli Alatala riara nta'imu, sabana tesa etu nakuasa mompakasalama komi. 22 Jadi tukimo Tesa nu Alatala, ne'e aga mangepe bayangi, sabana ane aga mangepe bayangi komi mombabagiu koro komi mboto. 23 Tau to nangepe Tesa nu Alatala tapi da'a nitukina, i'amo nasimbayu ewa tau to nanggita lenjena ri pompewayo, 24 nalaipa i'a nikalinganamo lenjena etu. 25 Tapi tau to nompariara nta'i Tesa nu Alatala pade naroo nantuki tesa etu, da'a aga mangepe bayangi bo manggalinga, tau etumo kana rawai Alatala ka rasi riara bara nuapa-nuapa rapowiana. Tesa nu Alatala etu nabelo ntoto bo naria kuasana nombakabasaka manusia. 26 Ane maria samba'a tau to nompekiri i'a tau naroso poagamana tapi i'a da'a nombajagai jilana, i'a nombabagiu korona mboto. Agamana etu da'a ria gunana. 27 Tau to nakono poagamana to da'a ria salana riara mpanggita Umata Alatala, etumo tau to nantulungi ngana-ngana pailu bo tobalu-tobalu to nasusa, bo to nombajagai korona mboto ala ne'e rapakatantoru powia to naja'ana ri dunia e'i.
1 Sampesuwu-sampesuwuku, ewa tau to nomparasaya Yesus Kristus, Pueta to nakuasa, ne'e komi manggita lenje. 2 Rapana maria tau nakalumana marata ri gareja komi nompake sinji bulawa bo pakea nagaya, pade marata wo'u samba'a tau napakasi nompake pakea nte sanjia-njia. 3 Pade komi neliupa mombabila tau nopakea nagaya etu. Komi manguli ka i'a, "Kamaimo, Tua, mekatoko ri kadera to nabelona e'i." Tapi ka tau to napakasi komi manguli, "Pekanggore gusa'amo, iko, bara pekatokomo ri jaula se'i." 4 Ante powia iwetu komi nompoposisala sanggamanusiamu. Komi nasimbayu ewa topotangara to naja'a pompekirina. 5 Toramo, sampesuwu-sampesuwu to nipotoweku, tau napakasi ri dunia e'i to nipelisi Alatala. Naupa da'a nadea kakalumana ira ri dunia, ira nipelisi Alatala majadi tau to naroso pomparasayana. Iramo to mantarima rasi nggari ja'i Alatala to nijanjina ka tau to nompotowe I'a. 6 Tapi naupa iwetu komi nanjalai tau napakasi bo nombabila tau nakalumana. Nokuya komi nombabila tau-tau nakalumana, tano iramo to nantanamaka komi bo nangumbunjai komi mpaka ri ja'i ntopotangara? 7 Tau nakalumanamo to nanguli sinja'i sanga to nibila, etumo Yesus to najadi Pueta! 8 Komi mowia to nabelona ane komi mantuki atura Alatala to napokona to nitulisi riara Buku Nagasa iwe'i: "Potowemo sanggamanusiamu nasimbayu ewa komi nompotowe koromu mboto." 9 Tapi ane komi aga manggita lenje, komi nowia silaka. Atura Alatala etu nompakanoto komi nasilaka. 10 Toramo! Ane komi mompasimbuku mantuki pura-pura Atura Alatala tapi mombaliunaka aga sangaya atura, etu nasimbayu ewa komi nombaliunaka pura-pura Atura etu. 11 Jonjona. Alatala nanguli, "Ne'e mebualo," pade I'a wo'u nanguli, "Ne'e mepatesi." Jadi ane komi da'a mebualo, tapi mepatesi, komi wo'u topombaliunaka Atura Alatala. 12 Komi kana ratangara Alatala nantuki Aturana to nakuasa mombakabasaka manusia nggari kuasa silaka. Jadi komi kana mainga motesa bo mompowia nuapa-nuapa, 13 sabana tempo Eo Mpotangara etu Alatala da'a maasi matana manggita tau to da'a naasi matana nanggita sanggamanusiana. Tapi tau to naasi matana nanggita sanggamanusiana da'a paraluu maeka. I'a da'a mawela pesuku Alatala. 14 Sampesuwu-sampesuwuku, da'a ria gunana tau nanguli, "Aku nomparasaya i Pue Yesus," ane i'a da'a mompopokita etu ante powiana to nabelona. Natantumo pomparasayana ewa etu da'a mamala mompakasalama i'a. 15 Rapana maria roamu topomparasaya to nandasa sabana da'a ria pakeana bo da'a magana panggonina eo-eo. 16 Pade rapana komi aga manguli ka i'a, "Pakabelo-belo ri jala. Kusarumaka komi mombarata baju mpane pade manggoni sampe mabosu ta'i." Tapi ane komi da'a mompakagana ka i'a nuapa to niparaluuna riara nggatuwuna, tesa komi etu da'a ntoto ria gunana! 17 Iwetu wo'u ante pomparasaya. Ane da'a rapopokita ante powia to nabelona, pomparasaya etu ewa namate, da'a ria gunana! 18 Bara maria tau to manguli, "Naria tau to nanjarumaka pomparasayana ala rapakasalama bo naria wo'u to nanjarumaka powiana to nabelona." Pesonoku ka ira iwe'i: "Da'a mamala komi mompopokita ka aku pomparasayamu ane da'a ante powiamu to nabelona. Tapi aku mompopokita ka komi pomparasayaku ka Alatala ante powiaku to nabelona." 19 Komi nomparasaya Alatala aga samba'a lau. Etu nabelo, tapi da'a nagana! Seta-seta wo'u nomparasaya iwetu! Tapi ira nolete pura ante nawiora rara sabana ninjani ira Alatala kana mombasuku ira banepia. 20 Nadoyo tanu komi! Kupakanoto ka komi da'a ria gunana aga momparasaya. Paraluu wo'u powia to nabelona. 21 Toramo tesa Abraham, totu'ata nggaolu. I'a nireke Alatala tau nanoa rarana sabana powiana, etumo tempo i'a nombawai anana Ishak ka Alatala ri peto'o pesomba. 22 Nggari tesa etu nanotomo ka kita pomparasaya Abraham nosinggeni ante powiana, pade powiana etu nompakagana pomparasayana. 23 Jadi ante iwetumo tesa Buku Nagasa nipakadupa to nanguli iwe'i: "Abraham nomparasaya Alatala pade nggari pomparasayana etu i'a nireke Alatala tau nanoa rarana." Etu sampe Abraham niuli wega nu Alatala. 24 Jadi sampesuwu-sampesuwu, nanotomo ka kita tau nireke Alatala nanoa rarana sabana i'a nowia to nabelona, da'a aga momparasaya bayangi. 25 Iwetu wo'u ante i Rahab, besi bajinga nggaolu etu. I'a nireke Alatala tau nanoa rarana sabana powiana. I'a nantarima mata-mata nto Yahudi riara njapona bo nantulungi ira nalai nggari ngata etu mantuki jala ntanina. 26 Jadi sampesuwu-sampesuwu, nasimbayu ewa koro manusia ane mana ria nosana namatemo, iwetu wo'u ante pomparasayata. Ane da'a nipopokita ante powia to nabelona, pomparasayata etu namate, da'a ria gunana.
1 Sampesuwu-sampesuwuku, ne'e madea nggari tatongo komi madota majadi guru mompatuduki Tesa nu Alatala, sabana ninjani komi mboto kita to najadi guru kana ratangara Alatala banepia ante potangara to neliu nggatomo nggari tau ntanina. 2 Toramo! Kita pura-pura naoso nowia sala. Tapi tau da'a sanggani nowia sala ante tesana pomparasayana da'a nakura nuapa-nuapa. I'a namala nombakuasai pura-pura korona. 3 Kita mombadika sama to nanggedi ri nganga jara ala i'a mantuki dotata. Ante akala iwetu mamala kita mombagoliaka pura-pura koro jara to nabete etu. 4 Pekirimo jonjo ntanina ewa sakaya bete. Naupa sakaya etu nabete mpu'u pade nikeni poiri naramboso, tapi namala nigoliaka guli to nanggedi nantuki dota topompajala sakaya etu. 5 Iwetu wo'u ante jilata. Naupa jila etu nanggedi mpu'u, jilata etu nipake ntau mompakalanga tesa. Pekirimo jonjo ewa pangale. Naupa nabete mpu'u, pangale namala rapakajela ante apu to nanggedina. 6 Jila manusia nasimbayu kaja'ana ante apu. Ri korota jila etumo pu'u kaja'ana to nompakaja'a njumaongu korota. Jila etu nikuasai kaja'ana to nopu'u nggari naraka sampe jila etu wo'u nompandasa njumaongu katuwuta. 7 Pura-pura binata namala rapoponondo, nabeloka tonji, nabeloka binata nenjoyo, nabeloka bau riara ue. Pade naria mamimo tau to nompoponondo ira. 8 Tapi da'a ria samba'a tau to namala mompoponondo jila manusia. Jilata etu naja'a mpu'u, da'a namala nita'amaka. Jilata nasimbayu ewa bisa nu ule to mepakamate. 9 Ante jila kita nanguli tarima kasi ka Pue Alatala, Umata ri suruga. Tapi ante jilata wo'u kita nombajanjiaka sanggamanusiata to nipajadi Alatala nantuki lenjena mboto. 10 Nggari saongu sumba nesuwu tesa tarima kasi bo tesa-tesa nombajanjiaka wo'u. Sampesuwu-sampesuwuku, kakonona da'a masipato iwetu! 11 Pekirimo mata ue. Natantumo da'a naria mata ue nompopesuwu ue nameli bo ue napa'i nggari uluna saulu lau! 12 Wa'a wo'u ante kayu. Natantumo da'a ria kayu ara nowua zaitun, pade da'a wo'u naria anggur nowua ara. Mata ue to napaga da'a wo'u mamala mompopesuwu ue nameli. 13 Ane maria nggari tatongo komi to nata'u bo nanoto, etu kana rapopokita komi ante pokainggu to nabelona. Noto komi etu kana rapopokita ante mowia to nabelona ante kaede rara. 14 Tapi ane komi aga nasiriati bo naju'a rara, pade aga mompekiri kabelo koro komi mboto, ne'e mantoiya noto ewa etu, sabana inggu komi to naja'a etu nanjapuaka Tesa nu Alatala to nakonona. 15 Noto ewa etu da'a nopu'u nggari ja'i Alatala. Etu aga nopu'u nggari dunia to naja'a e'i, nggari dota rara manusia to naja'a, bo nggari seta-seta. 16 Ri umba naria tau to nasiriati bo aga mompekiri kabelo korona mboto, natantumo ri setu wo'u naria posinggarau bo mpengaya-ngaya powia to naja'ana. 17 Tapi tau to naria noto to nopu'u nggari ja'i Alatala, nagasa rarana, da'a ria pokaingguna nuapa-nuapa to naja'ana. Pade i'a wo'u natuwu nosinggabelo ante tau ntanina, nalusu rarana, i'a nasadia mantarima pombarata tau ntanina. Naasi mpu'u matana nanggita roana to nandasa, pade nadea powiana to nabelona. I'a da'a nompakasabingga, pade natebuka bo nanoa rarana. 18 Pokainggu to nanoana nasimbayu ewa wua to nituja. Tau-tau to natuwu nompoposinggabelo tau ntanina nombatuja wua etu, pade asele to najadina etumo powia to nanoana ri tatongo ira pura-pura.
1 Nggari umba pura posibaga bo posinggarau to naria ri tatongo komi? Natantumo etu nggari dota rara komi to naja'a to nosibaga riara nta'imu. 2 Komi naino tapi da'a nombarata, jadi komi nepatesi. Komi nasiriati tapi da'a ria nirata komi. Jadi komi nosinggarau bo nosibaga. Sampesuwu-sampesuwu, komi da'a nombarata nuapa to nipodota komi sabana komi da'a nerapi ka Alatala. 3 Pade naupa komi nerapi komi da'a nombarata sabana patuju komi merapi nasala. Nuapa niperapi komi etu aga rapompakasana koro komi mboto. 4 Komi nasimbayu ewa besi to niporongo aga nongei-ngei ka langgai ntanina to najadi bali nu rongona! Natantumo ninjani komi ane komi mowega ante dunia to naja'a e'i komi majadi bali nu Alatala. Isema-sema madota mowega ka dunia to naja'a e'i i'a mompajadi korona mboto bali nu Alatala. 5 Ne'e rapekiri komi da'a nakono tesa nu Buku Nagasa to nanguli iwe'i: "Dota to naria riara nta'ita naroso mpu'u!" Etu mpu'u-mpu'u nakono! 6 Tapi petulungi Alatala ka kita neliu nggaroso nggari dota etu. Etu sampe naria tesa to nitulisi riara Buku Nagasa iwe'i: "Alatala nangewa tau to nalanga rarana, tapi I'a nompotowe tau to naede rarana." 7 Sabana etu, sampesuwu-sampesuwu, pekoumo ri ja'i Alatala, pade ewamo Magau nu Seta, pade i'a kana mangowa malai nggari ja'i komi. 8 Pakamosumo ri ja'i Alatala pade Alatala wo'u mompakamosu komi. Komi to nasilaka, kabasakamo pokainggumu to naja'a! Pakagasamo rara komi to norongu rarana! 9 Komi masipato masusa rara bo motumangi ante manjoso rara mompekiri silaka komi. Pongirimu kana majadi tangimu, bo kadamba raramu kana majadi kasusa raramu. 10 Pakaedemo rara komi ri ngayo Pue pade I'a kana mompakalanga komi. 11 Sampesuwu-sampesuwu, ne'e mosisalai, sabana tau nombasalai bo nompakasala roana topomparasaya, i'a nombasalai bo nompakasala Atura-atura nu Alatala. Pade ane komi mompakasala Atura-atura nu Alatala, batuana komi da'apa topantuki atura, tapi komi aga topompakasala atura etu. 12 Kakonona aga samba'a lau to nakuasa mombawai atura ka manusia bo mompakasala manusia, etumo Alatala mboto. Aga I'amo to nakuasa mompakasalama kita atau mombasuku kita ri naraka. Tapi komi da'a masipato mompakasala sanggamanusiamu! 13 Sampesuwu-sampesuwu, naria ri tatongo komi to nanguli iwe'i: "Eo e'i bara naile kami kana malau mpaka ri ngata ri anu bo meto'o ri setu sampae kasaena lau modaga bo mompaelo doi." Epe komimo tesaku e'i! 14 Da'a ninjani komi nuapa majadi ante katuwumu naile. Katuwu komi ri dunia e'i nasimbayu ewa sumoa, aga sampalai nikita pade kaopuna nalipomo. 15 Kakonona komi kana manguli iwe'i: "Ane rapodota i Pue kami kana matuwu mompowia e'i bara etu." 16 Tapi komi da'a nanguli iwetu. Komi aga nangoa bo nalanga rara. Kakonona pura-pura pangoa ewa etu naja'a! 17 Jadi toramo, isema-sema nangginjani nuapa to nabelo rapowiana tapi da'a nipowiana, tau etu nasilaka.
1 Umba komi tau-tau nakalumana, epemo tesaku e'i. Komi kana motumangi bo mageo mpajea sabana komi kana mandasa mpu'u! 2 Kakalumanamu narompomo. Pakeamu nikoni saipamo. 3 Bulawa bo salakamu nikoni ntagaramo sabana aga niboli-boli wa'amo! Komi aga nompasiromu mpakadea mbara-mbara ri dunia, tapi dunia e'i ntora maopumo. Tagara bulawa bo salakamu etu kana majadi sabi mantujuraka salamu, pade kaopuna komi kana rasuku riara apu. 4 Komi da'a nombabayari tambo ka tau-tau topokarajaa ri tinalumu. Tambo etu wo'u majadi sabi mantujuraka salamu ri ngayo Alatala, sabana pokangangua ira to nokato ri tinalumu niepe Pue Alatala to Neliu Nggakuasa. 5 Katuwu komi ri dunia neliu nggagana pade doimu aga nipake komi nompebasa bo nompesana ri dunia e'i. Nasimbayu ewa japi to nipakaboya nompopea eo mposambale iwetu wo'u komi. Ante da'a ninjani-njani, komi kana rasuku ri Eo Mpotangara. 6 Komi wo'u nombasuku bo nompatesi tau to nanoa, naupa ira da'a nangewa komi. 7 Jadi sampesuwu-sampesuwuku, komi kana mosabara sampe i Pue Yesus marata. Kitamo iwenu posabara samba'a topotinalu nompopea sampe nowua nuapa to nitujana. Ante nosabara i'a nompopea uja tempo motuja bo uja nompakajadi wuana. 8 Komi wo'u kana mosabara pade maroo rara sabana namosumo karata i Pue Yesus. 9 Ne'e mosipongua bo mosipakasala, ala ne'e komi rasuku Alatala. Toramo! Namosumo Topotangara, mana masaeka marata. 10 Sampesuwu-sampesuwu, tukimo jonjo nabi-nabi to nompasimbayu tesa nggari ja'i Pue. Ira batena nosabara bo naroo rara tempo nipandasa. 11 Iramo to niuli tau nasana mpu'u, sabana ira naroo bo nosabara tempo nipandasa. Tantu niepe komi tesa Ayub nggaolu, iwenu sampe i'a naroo mpu'u tempo nipandasa, pade ninjani komi iwenu sampe katuwuna nipakabelo bali, sabana i Pue neliu mpu'u towena bo asi matana. 12 Sampesuwu-sampesuwu, to napoko mpu'u ratora komi iwe'i: ne'e metunda ante manguli langi bara tana bara nuapa-nuapa ntanina. Ane iyo, ulimo, "Iyo," ane da'a, ulimo, "Da'a." Ne'e komi metunda ala ne'e komi mawela pesuku nu Alatala. 13 Ane maria nggari tatongo komi to nasusana, i'a kana mosambaya. Ane maria tau nadamba, i'a kana modade mantoiya Alatala. 14 Pade ane maria tau naju'a, i'a kana mompokio topanggeniaka-topanggeniaka topomparasaya. Ira kana mosambaya ka tau to naju'a etu bo mombagese lana ri korona riara sanga i Pue. 15 Ane ira mosambaya ante pomparasaya mpu'u, Pue kana mompakabelo tau naju'a etu. Pade ane ju'ana etu nopu'u nggari silaka, Pue kana mombaampungi i'a. 16 Etumo sabana komi kana mosipangaku sala, pade mosiposambaya ala ju'a komi rapakabelo. Posambaya samba'a tau to nanoa rarana nabete mpu'u kuasana. 17 Pekirimo jonjo nabi Elia nggaolu. I'a samba'a manusia biasa nasimbayu ewa kita. I'a nosambaya ante mpu'u-mpu'u rarana ala ne'e mauja. Pade mpu'u-mpu'u da'a nauja tolumpae santongo kasaena. 18 Kaopuna i'a nosambaya sangganipa pade naratamo uja nggari langi sampe tuja-tuja ntau najadi bali. 19 Sampesuwu-sampesuwuku, ane maria ri tatongo komi samba'a tau da'a mana mantuki Tesa nu Alatala pade naria wo'u samba'a roana ntanina malau manggeni i'a manjili bali ri ja'i Alatala, etu powia to nabelo. 20 Toramo! Tau to nanggeni roana to nasilaka etu manjili nggari jalana to nasala mompakasalama roana etu nggari pesuku Alatala, pade silaka roana to nadea kana raampungi. Tabe nggari ja'iku, Yakobus
1 Sura e'i nggari ja'iku Petrus suro Yesus Kristus ka komi to nipelisi najadi todea nu Alatala to neto'o nombasowo tau ntanina nosimpotatare ri umba-umba ri Propinsi Pontus, Galatia, Kapadokia, Asia bo Bitinia. 2 Komi nipelisi Umata Alatala nantuki niana mboto nggari lamba pamulana. Pade nggari pokarajaa Nosa Nagasa nu Alatala komi nipajadi todeana sampe komi natundu ri ja'i Yesus Kristus bo nipakagasa nggari leina mboto. Perapi towe belo Alatala bo katuwua mabelo mantambai kadeana ri ja'i komi. 3 Ratoiyata Alatala, Uma nu Pueta Yesus Kristus! Nggari kabete nu asi matana I'a nombawai ka kita katuwu to nabou ante nompakatuwu bali Yesus Kristus nggari kamatena. Jadi we'i-we'i nariamo panjarumakata to naroso. 4 Kita nanjarumaka mombarata rasi-rasi to nipakasadia Alatala ka pura-pura anana, etumo rasi-rasi to nibolina ri suruga ka kita. Rasi-rasi etu da'a namala maropu, da'a namala magero, da'a namala mabali. 5 Sampesuwu-sampesuwu, komi masipato mantarima rasi-rasi etu, sabana komi nomparasaya Alatala. Pade komi batena nijagaina ante kuasana ala komi mamala mantarima kabelona to nasadia rawai ka komi ri kaopu nu dunia. 6 Sabana etu komi kana madamba-damba naupa we'i-we'i komi nombarasai kasusa sampalai ante nawela mpengele-ngele pesoba. 7 Patuju nu pesoba-pesoba etu ala mombauji pomparasaya komi ala manggita kaliongu nu pomparasaya komi etu. Bulawa niuji ante apu ala manggita ane maria galona bara da'a. Tapi pomparasayamu neliu nggadea olina nggari bulawa. Jadi ane bulawa to namala maropu niuji ante apu, neliu-liupa pomparasaya komi! Etu kana rauji wo'u ante pesoba-pesoba ala manoto kaliongu nu pomparasaya komi ka i Pue Yesus. Ane maliongu pomparasaya komi, komi kana ratoiya bo rabila bo rapakalanga tempo Yesus Kristus marata bali ri dunia. 8 Naupa komi da'a nanggita I'a nggaolu komi nompotowe I'a. Pade naupa komi da'a nanggita I'a we'i-we'i komi batena nomparasaya I'a. Etu sampe nadamba mpu'umo rara komi ante kadamba nu rara to neliu-liuna to da'a namala rasowadaka. 9 Nadamba mpu'umo rara komi sabana nitarima komimo asele nggari pomparasayamu, etumo komi nipakasalama nggari pesuku sampe ri kasae-saena. 10 - 11 Nabi-nabi Alatala nggaolu nombaboto kabelona to nitarima komi etu. Ira nombaboto ewa towe belo to nirasai komi we'i-we'i. Ante pekeniaka Nosa Nagasa Kristus riara nta'i ira Alatala nompopanjani ka ira ewa kasusa bo kapari to mawela Kristus pade kuasa bo kalanga katuwu to raratana maliu kasusa bo kapari etu. Tapi da'apa ninjani nabi-nabi iwenu kadupa nu tesa-tesa to niboto ira. Etu sampe ira nomparesa mpakabelo-belo ala mangginjani tempo nuapa bo iwenu kadupana pura-pura nuapa to niboto ira etu. 12 Pade Alatala nompakanoto ka ira nuapa-nuapa to niboto ira da'a nosinggawela ante ira mboto tapi etu nosinggawela ante komi to natuwu we'i-we'i. Kajadia-kajadia to niboto ira etu we'i-we'i nipatolele ka komi nggari tau-tau to nanggeni Kareba Belo ka komi ante petulungi Nosa Nagasa nu Alatala to nipopana'u nggari suruga. Kakonona malaeka-malaeka i Pue mboto nadota mangginjani kareba to nipatolele ka komi etu. 13 Sampesuwu-sampesuwu, naria mamimo panjarumakata to natantuna. Sabana etu, komi kana mainga, ne'e makanjalia, pade maroo manjarumaka rasi-rasi to rawai ka komi tempo Yesus Kristus marata bali ri dunia. 14 Komi kana matuwu ewa ana-ana nu Alatala to natundu ri ja'ina. Ne'e mana mantuki dota raramu to naja'a to nitukimu tempo komi danatuwu riara karumauna. 15 Tapi komi kana matuwu ante pokainggu to magasa pura, sabana Alatala to nompokio komi majadi todeana wo'u nagasa. 16 Niuliku iwetu sabana naria tesa nu Alatala riara Buku Nagasa to nanguli, "Komi kana moinggu magasa, sabana Aku nagasa." 17 Sampesuwu-sampesuwu, komi nanggasangai Pue Alatala Umamu tempo komi nosambaya. Pade I'amo to mombatangara pura-pura tau nantuki powia ira mboto ante da'a manggita lenje. Jadi etumo sabana komi kana matuwu ante mekou ri ja'ina tempo komi daneto'o ri dunia e'i ewa torata. 18 Pekoumo ri ja'ina sabana ninjani komi mbotomo nuapa to nipake Alatala manggabasaka komi nggari katuwu komi to da'a ria gunana to nipasumuli totu'a komi nggaolu. To nipake Alatala da'a sangele to namala maropu ewa bulawa atau salaka, 19 tapi sangele to neliu nggasuli olina, etumo lei Kristus mboto. I'a nireke ewa saongu ana bimba nadoli to nisambale manjaliku komi. 20 Da'apa dunia nipajadi I'a nipakatantu Alatala mami majadi topantolo silaka manusia. Pade ri tempo we'i-we'i namosu kaopu nu dunia I'a narata ri dunia e'i ala mamate manjaliku komi. 21 Nggari I'amo sampe komi nomparasaya Alatala. I'a nipakatuwu Alatala bali nggari kamatena pade niwaina ka kuasa bo kagayana to nipogumaa. Jadi etu sampe komi nomparasaya bo nanjarumaka Alatala. 22 Sampesuwu-sampesuwu, ante nantuki pepatuduki to nakonona, katuwu komi nipakagasa sampe komi namala nompotowe sampesuwumu topomparasaya i Pue Yesus ante kamomi nu rara. Sabana etu posipotowemo samba'a bo samba'a ante mpu'u-mpu'u rara. 23 Sabana komi nipajadi Alatala manusia nabou pade katuwumu to nabou etu da'a nopu'u nggari ja'i manusia to mamate. Katuwumu nopu'u nggari ja'i Alatala to da'a mamate-matena. Komi nombarata katuwu nabou etu sabana komi nomparasaya Tesa nu Alatala to natuwu bo naroo sampe ri kasae-saena. 24 Ewa to nitulisi riara Buku Nagasa iwe'i: "Katuwu pura-pura manusia ewa kawoko, pade pura-pura kuasa bo kagayana ewa sese nggawoko. Kawoko etu nalele pade sesena naronto. 25 Tapi Tesa nu Alatala naroo sampe ri kasae-saena." Tesa nu Alatala etumo Kareba Belo to nipatolele ka komi.
1 Jadi sampesuwu-sampesuwu, nirata komimo katuwu to nabou. Sabana etu kabasakamo pura-pura pokainggu to naja'a bo nebagiu. Ne'e mana aga mabelo ri lenje, ne'e mana maju'a rara bo ne'e mana mompakaja'a tau ntanina. 2 Nasimbayu ewa ngana nggedi to dako nesuwu tunggai naino rarana nantomi ue njusu indona, iwetu wo'u komi kana maino rara mangepe Tesa nu Alatala to najadi ewa panggoni wayomu to nagasa. Ane iwetu pomparasaya komi kana mantambai maroso sampe komi mantarima pura-pura nuapa to nipakasadia Alatala ka tau to nipakasalamana. 3 Kawiamo etu sabana nirasai komi mamimo kabelo nu rara i Pue. 4 Pue Yesus nirapaka ewa saongu watu to natuwuna. Watu etu nipoara manusia tapi nipelisi Alatala ewa watu to neliu nggasuli olina. Jadi kamaimo mompakamosu i Pue 5 ala komi wo'u rapajadina ewa watu-watu to natuwuna to nipake mowia saongu sapo Alatala. Pade riara sapo etu komi majadi ewa topanggeni agama to nipakatantu mantulungi Alatala. Sabana komi mombatoiya Alatala bo mombajuju koro komi mboto ewa pesomba ka I'a. Pade pesombamu etu kana rakonoa rara Alatala sabana Yesus Kristus mantulungi komi. 6 Nanotomo etu sabana naria tesa to nitulisi riara Buku Nagasa iwe'i: "Epemo! Aku nompelisi saongu watu to nasulina pade watu etu nitu'uku ri Bulu Sion majadi palo mpondasi to neliu nggaroso. Isema-sema momparasaya watu etu da'a ntoto rapakaeya." 7 Yesus, to nirapaka ewa watu etu, mpu'u-mpu'u nanggeni belo ka komi topomparasaya. Tapi ane tau da'a nomparasaya, kana majadi ri ja'i ira ewa to nitulisi riara Buku Nagasa iwe'i: "Watu to nitajiaka ntopowia sapo, watu etumo to najadi palo mpondasi to neliu nggaroso." 8 Pade, "Watu etu nompakatepasunu tau. Watu etu nompakadungga ira." Ira natepasunu sabana da'a madota momparasaya Tesa nu Alatala, pade etumo to nipakatantu Alatala ka ira. 9 Tapi sampesuwu-sampesuwu, komi da'a ewa ira etu. Komimo tau-tau to nipelisi Alatala. Komimo to nipelisi najadi ewa topanggeni agama to mantulungi magau. Komimo todeana to nipakatantu mantulungi Alatala, komimo to najadi bagiana. Komi nipelisi ala mompatolele kareba ewa powia Alatala to nipogumaa. I'amo to nompokio komi mesuwu nggariara karumauna ala mesua matuwu riara karemena to nipogumaa. 10 Tempo bopia komi da'a todeana, tapi we'i-we'i komi najadi todeana. Bopia komi da'a nipoasi matana, tapi we'i-we'i komi nipoasi matanamo. 11 Sampesuwu-sampesuwu to nipotoweku, katuwuta ri dunia e'i ewa tau topesowo bo torata to neto'o sampalai lau. Etu sampe aku merapi ante mpu'u-mpu'u ka komi, ne'e mantuki dota rara to naja'a to nangewa pomparasaya komi ka i Pue. 12 Komi kana matuwu ante pokainggu to nanoa mpu'u ri tatongo tau-tau da'a nomparasaya i Pue. Ane iwetu naupa ira manjalaraka komi ante manguli komi tau naja'a, kaopuna ira kana manggita pokainggu komi to nabelona pade mantoiya Alatala tempo I'a marata ri dunia banepia. 13 Pekoumo ri ja'i pura-pura topoparenta to nipakatantu manusia sabana etumo to nipodota i Pue. Pekoumo ri ja'i magau sabana i'amo to neliu nggabete kuasana. 14 Pade pekoumo ri ja'i gubernur-gubernur sabana iramo to nipakakuasa magau ala mombasuku tau-tau to naja'a bo mombatoiya tau-tau to nabelo pokaingguna. 15 Sabana to nipodota Alatala ala nggari pokainggumu to nabelo komi mompakalino tau-tau nadoyo to notesa-tesa nantuki pekiri ira to nabodo. 16 Komi kana matuwu ewa tau da'a nipobatua manusia. Tapi ne'e sampe etu majadi tanje ka komi mowia kaja'ana. Nabelopa komi matuwu ewa batua to natundu ri ja'i Alatala. 17 Bilamo pura-pura tau, potowemo sampesuwumu topomparasaya, pekoumo ri ja'i Alatala bo bilamo magau. 18 Komi to najadi batua kana mpu'u-mpu'u mekou ri ja'i madikamu bo mombabila ira, nabeloka ira to nanondo bo nalusu rara, nabeloka ira to nasoana. 19 Ane komi rapandasa madikamu naupa komi da'a nowia kasalana pade komi maroo riara kasusa etu sabana nantora dota Alatala, komi kana ragane Alatala. 20 Natantumo da'a masipato komi ratoiya ane komi maroo tempo niboba madikamu sabana nowia kaja'ana! Tapi ane komi rapandasa sabana pokainggumu nabelo pade komi maroo riara kasusa etu, komi mpu'u-mpu'u ragane Alatala, 21 sabana etumo patuju Alatala nompokio komi. Toramo! Kristus wo'u nipandasa ala manggeni belo ka komi. I'a nombawai jonjo ka komi ala komi mompasiala pokaingguna etu. 22 I'a da'a sanggani nowia silaka, da'a ria sanggani I'a nodawa. 23 Tempo I'a niuli sinja'i ntau I'a da'a nebalasi. Tempo I'a nipandasa I'a da'a nesawa. Tapi I'a aga nombajuju korona ka Alatala, Topotangara to nanoana. 24 Kristus mbotomo nanggolo silaka-silakata ri korona mboto tempo I'a nipaku ri kayu parika, ala kita rakabasaka nggari kuasa silaka bo matuwu mantuki dota Alatala. Pade nggari bela-belana tempo niporo ju'a-ju'a komi nipakabelomo. 25 Tempo bopia komi ewa bimba-bimba to nasalanjalamo. Tapi we'i-we'i komi nanjilimo ri ja'i Ntopoewu to nanggeniaka katuwumu.
1 Iwetu wo'u komi totu'a-totu'a besi. Komi kana mekou ri ja'i rongomu langgai ala ane maria rongomu to da'a nomparasaya Tesa nu Alatala pokainggumu etu manggeni ira momparasaya. Da'a paraluu komi motesa nuapa-nuapa ka ira. 2 Sabana ane ira manggita komi mekou ri ja'i Alatala ante pokainggu to nagasa ira kana rakeni momparasaya. 3 Ne'e sampe kagayamu aga ri sawalikuna, ewa nokalapenda wo'omu bara nompake ramba-ramba bulawa bara pakea to nasuli-sulina. 4 Tapi kagayamu kana mopu'u nggariara nta'imu, etumo nggari inggumu to nalusu bo nasana. Etumo kagayana to da'a ntoto malipo bo to neliu nggasuli olina riara mpanggita Alatala. 5 Sabana iwetu wo'u pokainggu besi-besi to nagasa to nomparasaya Alatala tempo nggaolu. Besi-besi etu nompakagaya koro ira ante nekou ri ja'i rongona langgai. 6 Jonjona, Sara natundu ri ja'i Abraham pade nompangaku i'a madikana. Pade komi nireke ewa ana-ana i Sara ane komi batena mowia mabelo bo da'a maeka mantingayo nuapa-nuapa. 7 Iwetu wo'u komi totu'a-totu'a langgai. Komi kana matuwu mosanggani-nggani ante rongomu ante pokainggu to nanoto. Toramo ira da'a nasimbayu karosona ante langgai. Bilamo ira sabana ira wo'u niwai Alatala ka katuwua nabelo sampe ri kasae-saena nasimbayu ewa komi langgai. Kawiamo etu ala da'a maria nuapa-nuapa mombalawa posambayamu. 8 Jadi sampesuwu-sampesuwu, komi pura-pura kana mosaongu pekiri bo mosaongu rara. Posipotowemo samba'a bo samba'a ewa tau nosampesuwu. Komi kana mosipoasi mata samba'a bo samba'a bo moinggu maede rara. 9 Ane maria tau mowia kaja'ana ri ja'imu ne'e mombabalasi ira ante kaja'ana. Ane ira manguli sinja'i komi ne'e rapesawa. Agina komi merapi rasi nggari ja'i Alatala ka ira. Sabana komi nipokio Alatala moinggu mabelo ewa etu ala komi mombarata rasi bo belo nggari ja'ina. 10 Riara Buku Nagasa nitulisi iwe'i: "Isema-sema madota matuwu madamba bo mombarasai katuwu to mabelo, i'a kana mombajagai jilana ala ne'e motesa to naja'ana bo ne'e mebagiu. 11 I'a kana manggabasaka pokaingguna to naja'a bo mompowia to nabelona. I'a kana mangelo posinggabelo ante mompasimbuku matuwu mosinggabelo ante tau-tau ntanina. 12 Sabana Pue batena nompariara tau to nanoa pade I'a nangepe posambaya ira. Tapi I'a nangewa tau to nompowia kaja'ana." 13 Ane komi tunggai mowia pokainggu to nabelo sema madota mompowia kaja'ana ka komi? Natantumo da'a ria! 14 Tapi ane rapana komi rapandasa sabana pokainggumu to nanoana, masana mpu'umo komi. Ane maria tau mompandasa komi ne'e maeka ri ja'i ira, bo ne'e makini rara. 15 Tapi jujumo katuwumu ka Kristus, pade mompangaku I'amo Puemu to nagasa. Pade komi kana masadia mombasono mpakanoto butu-butu tau to mekutana ewa panjarumaka ri ja'i Pue to naria riara nta'imu. Tapi komi kana mombasono ira ante malusu bo maede rara. 16 Pade komi kana matuwu ante rara nta'i to nagasa ala ane maria tau manjalai pokainggumu to nabelo ewa topomparasaya Kristus, ira kana maeya mboto. 17 Toramo! Nabelopa rapandasa sabana mompowia to nabelona ane etu dota Alatala pade rapandasa sabana mompowia kaja'ana. 18 Sabana Kristus wo'u nipandasa nau da'a nowia kaja'ana. I'a namate sanggani lau sampe ri kasae-saena nombasompo silaka manusia. I'a to nanoa rarana namate nanjaliku kita to nadenggo rara ala manggeni kita mosinjani belo ante Alatala. Korona nipatesi tapi I'a nipakatuwu bali ante kuasa Nosa Nagasa nu Alatala. 19 Tempo Kristus namate I'a nikeniaka Nosa Nagasa nalau nompatolele Tesa nggari ja'i Alatala ka wayo-wayo ntau to nitarunggu ri peto'o ntomate, 20 etumo ira to da'a natundu ri ja'i Alatala tempo nabi Nuh nggaolu. Tempo nabi Nuh danompowia sakaya betena, nandate mpu'u posabara Alatala nompopea manusia majea nggari silaka-silaka ira. Tapi tempo ue nanggabuntu nompakalodo dunia aga sakedi lau tau nesua riara sakaya etu sampe nipakasalama, etumo aga walumba'a lau. 21 Kajadia etu nombagambara ka kita iwenu kita nipakasalama ante nantuki ada mpediu tandaina kita topomparasaya i Pue Yesus. Ada etu da'a nompegasa gege nggari korota, tapi ante nantuki ada etu kita nerapi ala Alatala mombawai ka kita rara nta'i to nagasa. Ada mpediu etu nompakasalama kita sabana Yesus Kristus natuwu bali nggari kamatena. 22 I'a neore mpaka ri suruga pade nekatoko ri peto'o to nibila ri panggana nu Alatala. Pade ri setu pura-pura malaeka bo topoparenta bo karampua-karampua to nakuasa ri laerawa natundu ri ja'ina.
1 Kristus mboto nombarasai kasusa bo kapari ri korona tempo I'a ri dunia e'i. Jadi etumo sabana komi wo'u kana mompakaroo raramu ala masadia rapandasa ewa I'a. Sabana isema-sema to nombarasai kasusa bo kapari ri korona mboto da'a mana mowia silaka. 2 Jadi tempo kita danatuwu ri bengo nu dunia e'i kita kana matuwu mantuki dota nu Alatala, ne'e mana mantuki dota rara manusia to naja'a. 3 Sabana naganamo loga komi nantuki pokainggu-pokainggu tau da'a nangginjani Alatala. Bopia komi aga natuwu ante pokainggu to natantoru, komi aga nantuki dota rara to naja'a, komi nabiasa nalangu-langu, komi nasiromu nanggoni mpebasa bo nanginu-nginu tule, pade komi nompakoni pue-pue ntanina ante akala to nompakarunggu rara. 4 Tapi we'i-we'i natekaja roa-roa komi sabana komi mana madota mantuki ira mompebasa mowia kaja'ana. Pade ira nanguli sinja'i komi. 5 Tapi kana marata tempona ira mompangaku powia ira to naja'a etu ri ngayo Alatala, sabana nasadiamo I'a mombatangara pura-pura tau, nabeloka to danatuwu nabeloka to namatemo. 6 Etu sampe Kareba Belo nipatolele wo'u ka tau-tau to namatemo. Patujuna ala naupa ira nisuku bo koro ira namatemo ewa nabiasa ante manusia, wayo ira mamala matuwu mabelo nantuki dota nu Alatala. 7 Namosumo kaopu nu dunia. Jadi etu sampe komi kana manoto bo mainga ala komi mamala mosambaya. 8 Tapi to neliu nggapokona komi kana mpu'u-mpu'u mosipotowe samba'a bo samba'a. Sabana ane kita mompotowe roata kita da'a mompariara nta'i sala ira to nadea ri ja'ita. 9 Komi kana majole mantarima torata riara njapomu ante da'a mongua-ngua. 10 Kita samba'a bo samba'a niwai ka pompakule nggari ja'i Alatala. Jadi kita kana mompake pompakule etu ala mantulungi roa-roata mantarima rasi bo belo nggari ja'i Alatala. 11 Jonjona, isema-sema to niwai ka pompakule manggeni Tesa nu Alatala kana motesa ewa tau to niposumba Alatala mboto. Isema-sema to niwai ka pompakule mantulungi tau ntanina kana mantulungi ante karoso to niwai Alatala ka i'a. Pakemo pompakule-pompakule etu ala riara nuapa-nuapa to majadi Alatala ratoiya bo rabila nggari powia Yesus Kristus ri tatongo komi etu. I'amo to nakuasa bo masipato ratoiya bo rabila sampe ri kasae-saena. Amin! 12 Sampesuwu-sampesuwu to nipotoweku, ne'e komi matekaja mombarasai pepandasa to napa'i mpu'u ewa apu to neliu nggapane to narata mombauji pomparasaya komi. Ne'e rapekiri to nirasai komi etu sangele nontani nggari biasa. 13 Tapi komi kana madamba-damba sabana komi namala mombarasai kasusa bo kapari ewa to nirasai Kristus mboto. Ante iwetu mabete mpu'u kadamba nu rara komi tempo kabete kuasa bo kagaya Kristus to nipogumaa rapopokita ka pura-pura manusia. 14 Ane komi rasalaraka ntau sabana komi nompangaku sanga Kristus masana mpu'umo komi. Sabana ane etu majadi Nosa Nagasa nu Alatala to nipogumaa kana matekita riara nggatuwu komi. 15 Aga ne'e sampe maria nggari tatongo komi to rapandasa sabana i'a nepatesi bara nangangga bara nowia kaja'ana atau nombagalo urusa tau ntanina. 16 Tapi ane komi rapandasa sabana komi topomparasaya ne'e maeya matamu. Ulimo tarima kasi ka Alatala sabana komi nipandasa ewa samba'a topomparasaya Kristus. 17 Naratamo tempona Alatala nompamula mombatangara pura-pura manusia. Pade kita todeana mboto to mokolu ratangarana. Tapi ane kita todeana to mokolu ratangarana natantumo meliu nggatomo pesukuna ka tau-tau to da'a madota momparasaya Kareba Belo nggari ja'ina! 18 Ewa to nitulisi riara Buku Nagasa iwe'i: "Ane tau to nanoa rapakasalama aga ante mombarasai mpengele-ngele kasusana, iwenumo ante tau nasilaka to da'a nantuki dota Alatala? Natantumo ira da'a ntoto namala rapakasalama!" 19 Jadi sampesuwu-sampesuwu, ane maria komi to rapandasa nantuki dota Alatala, jujumo katuwumu ka Alatala to nompajadi langi bo dunia, pade ne'e menonto mowia to nabelona. Sabana I'a namala raparasaya mompakadupa pojanjina ka komi.
1 Umba komi to najadi topanggeniaka todea topomparasaya! Aku wo'u samba'a topanggeniaka topomparasaya, bo aku mboto nanggita kasusa bo kapari to nirasai Kristus bopia. Pade ane Kristus marata bali ante kuasa bo kagayana to nipogumaa aku wo'u mombarata bagia riara pura-pura etu. Jadi aku merapi ante mpu'u-mpu'u ka komi 2 ala komi manggeniaka todea nu Alatala to niparasaya ka komi nasimbayu ewa samba'a topoewu nombaewu bimba-bimbana. Keniakamo ira ante nasana rara nantuki dota nu Alatala, ne'e ewa tau to nipasu'u. Pade ne'e aga mangelo untu ka koro komi mboto, tapi tuimo bago etu sabana komi mpu'u-mpu'u madota mantulungi todea topomparasaya. 3 Pade ne'e dota-dota mompatundu topomparasaya to niparasaya ka komi, tapi nabelopa komi majadi jonjo to masipato rapasiala ira. 4 Pade tempo Kristus, Topoewu to Nabete marata bali ri dunia I'a kana mombawai ka komi hadia, etumo bagia riara kuasa bo kagayana to nipogumaa sampe ri kasae-saena. 5 Iwetu wo'u komi to danamuda. Komi kana mekou ri ja'i totu'a. Pade komi topomparasaya pura-pura kana mompakaede rara bo mositulungi samba'a bo samba'a. Sabana "Alatala nangewa tau to nalanga rarana, tapi I'a nompotowe tau to naede rarana." 6 Jadi sampesuwu-sampesuwu, pakaedemo raramu, bo pekoumo ri ja'i Alatala to nakuasa ala I'a mompakalanga komi ane maratamo tempona. 7 Waimo pura-pura kakini raramu ka I'a sabana I'a batena nompariara komi. 8 Komi kana mainga bo manoto rara, sabana balimu, Magau nu Seta nalau gusa'a guse'i ewa singa to nongao-ngao mangelo sokona. 9 Tapi ewamo i'a ante pomparasaya to naroso, sabana ninjani komi mboto topomparasaya ri umba-umba ri dunia nipandasa nasimbayu ewa komi wo'u. 10 Pade ane maopu komi mombarasai kasusa sampalai, Alatala mbotomo, Pu'u nu towe belo, kana mompakagana nuapa to nakura ri ja'imu. I'a kana mompakaroo raramu, mompakaroso komi pade mombasaro komi. Sabana I'amo to nompokio komi mombarata bagia riara kuasa bo kagayana sampe ri kasae-saena sabana komi nosaongu rara ante Kristus. 11 I'amo to nakuasa sampe ri kasae-saena. Amin! 12 Aku nantulisi suraku to nambukuna e'i ante petulungi i Silas, sampesuwuta riara i Pue to nirekeku samba'a topomparasaya to namala raparasaya. Patujuku nantulisi sura e'i ala mompakaroso rara komi bo mompakanoto ka komi nuapa to nitulisiku e'i mpu'u-mpu'u tesa ewa towe belo nu Alatala to nakonona. Sokomo mpakaroso tesa etu ante mpu'u-mpu'u raramu. 13 Tabe nggari ja'i sampesuwu komi topomparasaya to naria ri se'i ri ngata Babilon to nipelisi Alatala nasimbayu ewa komi. Pade tabe wo'u nggari ja'i anaku i Markus. 14 Posipabotemo tabe samba'a bo samba'a ante towe. Perapi Pue Alatala mombawai katuwua mabelo ka komi pura-pura to nosaongu rara ante Kristus. Tabe nggari ja'iku, Petrus
1 Sura e'i nggari ja'iku Simon Petrus, batua bo suro Yesus Kristus, ka komi to nomparasaya i Pue Yesus nasimbayu ewa kami. I'a Alatalata bo Magau to Mompakasalama to nanggeni kita nomparasaya sabana nanoa mpu'u rarana. 2 Perapi Alatala mombagane komi bo mombawai ka komi katuwua mabelo sabana komi nosinjani ante I'a bo Pueta Yesus. 3 Nggari barakana mboto Alatala nombawai ka kita pura-pura nuapa to niparaluuta ala matuwu ante pokainggu to nantuki dotana. Etu najadi riara nggatuwuta sabana kita nosinjani ante i Pue to nompokio kita mombarata bagia riara kuasa bo kabelona. 4 Nggari kuasa bo kabelona etu I'a nojanji nombawai ka kita rasi-rasi to neliu nggadea olina bo neliu nggabelo. Patujuna nombawai rasi-rasi etu ala komi mamala makabasaka nggari dota rara to naja'a to mombagero dunia e'i pade ala inggu-inggu Alatala mboto maria ri ja'i komi. 5 Jadi etumo sabana komi kana mompasimbuku ala pomparasaya komi ratambai ante pokainggu to nabelo. Pade pokainggu to nabelo etu kana ratambai ante pangginjani ewa Alatala. 6 Pade pangginjani etu kana ratambai ante pompakule mombakuasai koro komi mboto. Pade pompakule mombakuasai koro komi mboto kana ratambai ante karoo rara riara kasusa. Pade karoo rara kana ratambai ante pokainggu to nantuki dota Alatala. 7 Pade pokainggu to nantuki dota Alatala etu kana ratambai ante pepotowe ka sampesuwumu topomparasaya. Pade pepotowe ka sampesuwumu topomparasaya kana ratambai ante pepotowe ka pura-pura tau. 8 Ane pokainggu iwetu meliu kadeana ri ja'i komi, posinjani komi ante Pueta Yesus Kristus mpu'u-mpu'u moguna pade maria aselena. 9 Tapi tau da'a noinggu iwetu nasimbayu ewa tau naburo. Napii pekirina sabana nikalinganamo i'a nipegasa nggari silakana bopia. 10 Jadi sampesuwu-sampesuwu, pasimbukumo ante mpu'u-mpu'u ala mompopokita komi mpu'u-mpu'u nipelisi Alatala bo nipokiona majadi todeana. Sabana ane komi mowia etu natantumo komi da'a ntoto mokanggaura momparasaya. 11 Pade ante iwetu natantumo komi kana ratarima ante mabelo riara poparenta to naroo sampe ri kasae-saena, etumo Poparenta Pueta Yesus Kristus, Magau to Mompakasalama. 12 Jadi sampesuwu-sampesuwu, naupa komi nangginjani pura-pura etu pade komi naroso nantuki pepatuduki to nakono to nitarima komi, aku bate-batena mompopatora etu ka komi. 13 Nipekiriku ane aku danatuwu masipato aku mompakaroso rara komi ante popatoraku etu. 14 Sabana ninjanikumo mana masaeka kamateku, ewa to niuli Pueta Yesus Kristus ka aku. 15 Jadi aku kana mompasimbuku ala komi bate-batena mantora pura-pura pepatudukiku etu ane aku mana ria ri dunia e'i. 16 Tempo kami nompatuduki ka komi ewa kuasa Pueta Yesus Kristus bo karatana ri dunia e'i, kami da'a nantuki kabali-kabali to nipetowali manusia. Tapi mata kami mboto nanggita kabete kuasana to nipogumaa. 17 Sabana kami mboto nanggita tempo I'a nibila bo nipakareme Umata Pue Alatala. Pade niepe kami mboto suara Alatala to Neliu Nggakuasa nanguli iwe'i: "E'imo Anaku to nipotoweku, I'amo to nompakadamba raraku." 18 Suara etu niepe kami mboto nggari suruga tempo kami nosanggani-nggani ante Yesus ri bunggu bulu to nagasa. 19 Jadi nggari nuapa to nikita kami etu neliu ngganoto ka kami kakono nu tesa-tesa to niboto nabi-nabi Alatala nggaolu. Nabelo mpu'u ane komi mompariara nta'i tesa nabi-nabi etu, sabana tesa ira nasimbayu ewa saongu poindo to nombawanta karumauna. Pariara nta'imo tesa etu sampe i Pue Yesus marata bali ri dunia mombawanta komi ante remena nasimbayu ewa eo bo betu'e pompaeo nebulu nombawanta dunia. 20 To napokona, kana ratora komi tesa e'i: tesa-tesa to niboto nabi-nabi nggaolu to naria riara Buku Nagasa da'a namala rapakanoto batuana nantuki pombarata manusia mboto. 21 Sabana tesa nabi-nabi da'a niboto ira nantuki dota manusia. Tapi ira notesa ante pekeniaka Nosa Nagasa nu Alatala nompasimbayu tesa nggari ja'i Alatala mboto.
1 Tempo nggaolu naria nabi-nabi topodawa neumba ri tatongo todea nu Alatala. Pade iwetu wo'u we'i-we'i kana meumba guru-guru topodawa ri tatongo komi. Ira manggeni pepatuduki to nasala to mompakanawu tau, pade ira kana mombasapu i Pue to nantolo silaka ira. Nggari powia ira etumo ira masalisa rasuku. 2 Kana madea tau mompasiala pokainggu ira to nopu'u nggari dota rara to naja'a. Pade nggari ira etu sampe pepatuduki to nakonona kana rasalai ntau. 3 Guru-guru topodawa etu nadoko nu doi. Etu sampe ira aga mangelo untu nggari ja'i komi ante tesa-tesa to nipetowali ira mboto. Tapi pesuku ira nasaemo nipakatantu. Mana masaeka majadi. 4 Toramo! Alatala da'a nanggabasaka malaeka-malaekana mboto nggari pesuku tempo ira nowia silaka, tapi I'a nantajiaka ira riara naraka. Ira nisuaraka riara peto'o narumau pade nitarunggu ri setu sampe marata Eo Mpotangara banepia. 5 Iwetu wo'u Alatala tempo nggaolu da'a nanggabasaka dunia nggari pesukuna tempo I'a nompakaropu tau-tau to da'a nantuki dotana ante ue nanggabuntu nompakalodo dunia. Aga i Nuh ante pitumba'a tau ntanina to nipakasalama sabana i Nuh nompatolele ka tau pokainggu to nikonoa rara Alatala. 6 Iwetu wo'u ante ngata Sodom bo Gomora. Alatala nombasuku pue ngata to naja'a etu ante nompalabu ira ante apu ala majadi popatora ka tau-tau to da'a nantuki dota Alatala. 7 Tapi i Lot nipakasalamana nggari pesuku etu sabana i'a samba'a tau to nanoa pokaingguna. Nasusa mpu'u rarana nanggita pokainggu to natantoru to nipowia tau-tau da'a ria adana etu. 8 Sabana tau to nanoa etu neto'o ri tatongo ira pade eo-eo i'a nanggita pade nangepe powia ira to naja'a sampe nandasa mpu'umo pekiri rara nta'ina to nanoa. 9 Jadi toramo! Alatala mamala mompakasalama tau-tau to nantuki dotana ane ira mombarata pesoba-pesoba. Pade I'a mamala wo'u mombatarunggu tau-tau to naja'ana sampe ira rasuku ri Eo Mpotangara. 10 To mpu'u-mpu'u rasukuna iwetu etumo tau-tau to nantuki dota rara ira to naja'a bo natantoru pade to nanjapuaka kuasa nu Alatala. Nabia bo nasombo mpu'u guru-guru topodawa etu sampe da'a naeka ira nanguli sinja'i malaeka-malaeka to nipogumaa. 11 Malaeka-malaeka Alatala etu neliu nggaroso bo neliu nggakuasa nggari guru-guru topodawa etu. Tapi naupa iwetu malaeka-malaeka etu da'a nompakasala roa-roa ira to nowia sala ante tesa-tesa njilaka ri ngayo i Pue. 12 Tapi guru-guru topodawa etu nombasalaraka anu da'a ninjani ira. Ira nasimbayu ewa binata to da'a ntoto nompekiri, aga natuwu nantuki inggu-inggu to naria ri ja'ina. Binata etu aga niote ala rasoko bo rasambale. Jadi nggari pokainggu to naja'a guru-guru topodawa etu kana rapatesi nasimbayu ewa binata-binata nasoa pade rasuku sampe ri kasae-saena. 13 Ira kana rapandasa sabana nowia pokainggu to naja'a. Nau tempo eona to nipodamba ira aga nompebasa nogau sala nantuki dota rara ira to naja'a. Ira nompakatantoru komi topomparasaya nasimbayu ewa gege nompakarangu baju. Pade nggari pokainggu ira to nepakaeya komi nisalai ntau, sabana guru-guru topodawa etu aga nompebasa nogau sala tempo ira nasiromu nanggoni mpasanggani-nggani ante komi. 14 Ira bate-batena naino mogau sala ante butu mba'a besi to nikita ira. Da'a nabasa-basa ira nowia silaka. Ira nombaopa tau-tau to da'a naroso pomparasayana ala mowia silaka. Pade to najadi kabiasa ira aga nadoko nu doi. Ira mpu'u-mpu'u tau nasurukawu! 15 Nipalasi iramo jala to nakonona pade nasalanjalamo ira. Ira nompasiala pokainggu i Bileam ana i Beor nggaolu. I'a aga naino ka doi to niratana nggari powiana to naja'ana. 16 Tapi i'a nibunggaa sabana kaja'ana etu. Jara pateke to nipesawina saongu binata to da'a namala notesa. Tapi jara etu notesa ewa manusia nombatagi Bileam mompapola niana to nadoyo-doyo etu. 17 Guru-guru topodawa etu nasimbayu ewa ulu nu ue to naotimo. Ira ewa kulimunggapu aga niburu mpoiri tapi da'a najadi uja. Nipakasadia ka ira peto'o to neliu nggarumau. 18 Sabana ante nalanga rara ira nantesa powia ira mboto, tapi tesa-tesa ira nawara. Ira nombaopa tau to lako nakabasaka nggari ja'i roa-roa ira to naja'a pokaingguna. Tau-tau etu niopa ira ante nompakapane dota rara to naja'a ala ira manjili bali mantuki pokainggu to naja'a to lako nikabasaka ira. 19 Guru-guru etu nojanji ka tau-tau etu, "Ane komi mantuki pepatuduki kami komi kana makabasaka nggari atura-atura. Komi mamala mowia nuapa-nuapa nipodota komi." Tapi kakonona ira mboto nipobatua pokainggu-pokainggu to nompakaropu. Sabana ane samba'a tau nidagi dota rarana to naja'a i'a nipobatua dota rarana etu. 20 Nandasa mpu'umo guru-guru topodawa etu. Sabana bopia ira mpu'u-mpu'u nosinjani ante Pue Yesus Kristus, Magau to Mompakasalama kita sampe natekabasakamo ira nggari pokainggu to naja'a ri dunia e'i. Tapi naopu etu ira nipemala bo nipobatua bali pokainggu-pokainggu to naja'a etu. Kaopuna neliu nggandasa katuwu ira nggari pamulana. 21 Nabelopa tau ewa etu da'a sanggani nangginjani jala to nakonona pade nangginjanina tapi kaopuna nompalasi parenta-parenta Alatala to nagasa to nipatuduki ka ira. 22 To najadi ri ja'i ira nasimbayu ewa popata to nanguli iwe'i: "Asu nanjili bali nanggoni luana," pade "Wawu lako nidiu nanjili bali notompu ri gege."
1 Sampesuwu-sampesuwu to nipotoweku, e'imo suraku karongganina ka komi. Riara suraku karongelena aku nompasimbuku mompopatora ka komi pepatuduki to nakonona ala pekiri komi batena magasa. 2 Patujuku ala komi mantora tesa-tesa to niboto nabi-nabi to nagasa nggaolu, pade ala komi mantora wo'u parenta-parenta nggari ja'i Pueta, Magau to Mompakasalama to nipatolele suro-surona to narata ri ja'imu. 3 Tesa to neliu nggapokona ratora komi iwe'i: Ri tempo namosu kaopu nu dunia kana meumba tau to nikuasai dota rara ira mboto to naja'a. Ira kana mompongei-ngei komi 4 ante manguli, "Yesus nojanji marata bali ri dunia. Tapi ri umbamo I'a? Etu da'a ntoto majadi, sabana nggari tempo kamate totu'ata nggaolu sampe we'i-we'i mpengele-ngele ri dunia da'a ria kabalina. Etu bate-batena nasimbayu ewa ri lamba pamulana tempo dunia nipajadi." 5 Tau-tau to notesa iwetu nitunggai ira nanggalinga iwenu Alatala nompajadi langi nggaolu ante tesana, bo iwenu dunia nipajadina nggari ue, pade iwenu sampe kabatana neumba nggari tatongo ue. 6 Pade ante ue wo'u Alatala nompakaropu dunia nggaolu, etumo ante ue bete nanggabuntu nompakalodo dunia. 7 Tapi nggari Tesa nu Alatala etu wo'u langi bo dunia to naria we'i-we'i nipiara sampe kaopuna rapakaropu ante apu. We'i-we'i langi bo dunia danipiara sampe Eo Mpotangara banepia tempo pura-pura tau to da'a nantuki dota Alatala kana rasuku. 8 Tapi, sampesuwu-sampesuwu to nipotoweku, ne'e rakalinga komi tesa e'i: Riara mpanggita i Pue sanjobu mpae nasimbayu ewa sambengi, pade sambengi nasimbayu ewa sanjobu mpae. 9 Pue da'a nompakasae kadupa nu pojanjina marata bali ri dunia naupa naria bara sakuya mba'a tau nanguli iwetu. Tapi I'a nosabara ri ja'i komi sabana I'a da'a madota ala maria to rasuku sampe ri kasae-saena. To nipodotana ala pura-pura tau mombarata loga majea nggari silaka-silaka ira. 10 Tapi i Pue Yesus kana marata bali ri dunia ante da'a ninjani-njani ntau nasimbayu ewa karata ntopangangga. Ri eo etu langi kana malipo sanggani ante guru nu apu to nagai. Pade pura-pura to naria kana maropu rakoni nu apu, bo dunia ante pura-pura isina kana malipo sanggani. 11 Jadi sampesuwu-sampesuwu, ane pura-pura to naria kana maropu iwetu, natantumo kita masipato matuwu ante pokainggu to magasa pade to mantuki dota nu Alatala. 12 Kita e'i nompopea eo to nipakatantu Alatala etu. Kita kana mompasimbuku mompasara eo etu ala masasinta marata. Ri eo etu langi kana maropu rakoni nu apu pade pura-pura to naria kana magonu ante kapanena. 13 Tapi kita mompopea nuapa to nijanji Alatala, etumo langi to nabou bo dunia nabou, peto'o tau-tau to nanoa pokaingguna. 14 Jadi sampesuwu-sampesuwu to nipotoweku, tempo komi mompopea kajadia-kajadia etu, komi kana mompasimbuku matuwu ante pokainggu to magasa to da'a mamala rasalai bo da'a mepakaeya. Pasimbukumo ala ane i Pue Yesus marata bali komi mosinggabelo ante I'a. 15 Toramo, Pue nandate posabarana ala mombawai loga ka tau rapakasalama. Iwetu wo'u to nitulisi sampesuwuta i Paulus to nipotoweta riara sura-surana to nitulisina nantuki noto to niwai Alatala ka i'a. 16 Riara surana pura-pura i'a nompatuduki pepatuduki nasimbayu ewa to nitulisiku ri ba'ana. Naria wo'u tesa Paulus to nakaja sakedi ranjani. Tesa etu nabiasa nipakadenggo ntau to da'a nanoto pekiri ira bo to da'a naroso pomparasaya ira. Iwetu wo'u ira nompakadenggo isi Buku Nagasa ntanina. Tapi nggari pokainggu ira etu ira kana rasuku Alatala. 17 Jadi sampesuwu-sampesuwu to nipotoweku, ninjani komi mamimo kana maria tau moinggu iwetu. Etu sampe komi kana mainga ala ne'e komi rakeni guru-guru topodawa mantuki pepatuduki to nasalana sampe mana ria panjarumaka komi to naroso. 18 Tapi komi kana mantambai mosinjani belo ante Pueta Yesus Kristus, Magau to Mompakasalama, bo mantambai mombarasai towe belona riara nggatuwu komi. I'amo to masipato ratoiyata bo rabilata we'i-we'i pade sampe ri kasae-saena. Amin! Tabe nggari ja'iku, Petrus
1 Ri lamba pamulana nariamo samba'a to niposumba Alatala mombatesa tesa to nombawai katuwua. Tapi naupa I'a naria nggari lamba pamulana I'a niepe kami bo nikita kami ante mata kami mboto. I'a nikita kami ante nanoto pade korona nisoko kami ante pale kami mboto. 2 I'a nipopokita ri dunia e'i pade kami nanggita I'a. Pade we'i-we'i kami nompakanoto ka komi nuapa to nikita kami. Kami nompatolele ka komi tesa Yesus Kristus to nombawai katuwua sampe ri kasae-saena. Ri lamba pamulana I'a naria mamimo nosanggani-nggani ante Umata Pue Alatala, pade nggapurina I'a nipopokita ka kami. 3 Jadi nuapa to nikita kami pade to niepe kami, etumo rapatolele kami ka komi wo'u ala komi mosanggani-nggani ante kami mamala masintuwu belo ante Umata Pue Alatala bo Anana Yesus Kristus. 4 Etu sampe kami nantulisi pura-pura tesa e'i ka komi ala mpu'u-mpu'u madamba rarata mpasanggani-nggani. 5 Iwe'imo kareba to niepe kami nggari ja'i Yesus pade rapatolele kami ka komi: Alatala I'amo reme pade da'a ntoto ria karumauna ri ja'ina. 6 Ane kita manguli, "Kita e'i nasintuwu belo ante Alatala," tapi kita aga matuwu riara rumau, kita nodawa, powiata da'a nantuki pepatuduki to nakonona. 7 Tapi ane kita matuwu riara reme nasimbayu ewa Alatala riara reme etu, kita masintuwu belo samba'a bo samba'a, pade lei Yesus, Anana, mompakagasa kita nggari pura-pura silakata. 8 Ane kita manguli, "Da'a ria silakata," kita mombabagiu korota mboto. Etu tandaina da'a ntoto ria pepatuduki to nakonona naboli riara nta'ita. 9 Tapi ane kita mompangaku silakata ri ja'i Alatala, I'a namala raparasaya mowia to nanoana, etumo I'a kana mombaampungi silakata pade mompegasa kita nggari pura-pura to naja'ana. 10 Ane kita manguli, "Kita da'a nowia silaka," kita nompopodawa Alatala, da'a ntoto naria tesana naboli riara nta'ita.
1 Ana-anaku, patujuku mantulisi tesa e'i ka komi ala komi ne'e mowia silaka. Tapi ane maria to mowia silaka, naria samba'a topanjaliku kita, etumo Yesus Kristus to nanoa rarana. I'amo to manjaliku kita ri ngayo Umana Alatala. 2 Yesus etumo to namate nisuku Alatala mombasompo silaka-silakata. Pade da'a aga silakata to nisompona, tapi silaka pura-pura manusia wo'u. 3 Ane kita mantuki parenta-parenta Alatala, etumo tandaina kita nosinjani belo ante I'a. 4 Tau to nanguli, "Aku nosinjani belo ante Alatala," tapi da'a nantuki parenta-parentana, tau etu topodawa. Da'a ntoto naria pepatuduki to nakonona naboli riara nta'ina. 5 Tapi isema-sema nantuki parenta Alatala, tau etumo to nompotowe Alatala ante mpu'u-mpu'u rarana. Ante jala iwe'imo nanotomo kita mpu'u-mpu'u natuwu nosaongu rara ante Alatala: 6 Isema-sema manguli i'a natuwu nosaongu rara ante Alatala kana mompasiala katuwu Kristus. 7 Sampesuwu-sampesuwu to nipotoweku, aku da'a mantulisi ka komi sangele parenta to nabouna. Tapi etu parenta to nasaemo ninjani komi, nompamula nggari pamulana komi nomparasaya i Pue Yesus. Etumo parenta to niepe komi nokolu to nanguli, "Posipotowemo komi samba'a bo samba'a." 8 Tapi naupa iwetu, parenta to nitulisiku ka komi etu nireke parenta nabou wo'u, sabana batuana to nakonona parenta etu natikita riara nggatuwu i Pue Yesus pade riara nggatuwu komi topomparasaya I'a wo'u. Etu nanoto ka kita sabana rumau nompamula nalipo nggari dunia e'i pade reme to nakonona nompamula newanta. 9 Isema-sema to nanguli i'a natuwu riara reme tapi i'a nomporau rara sampesuwuna, tau etu bate-batena naria riara rumau sampe we'i-we'i. 10 Tau to nompotowe sampesuwuna, tau etumo to natuwu riara reme sampe da'a ria sangele ri ja'ina to mamala mompakanawu i'a riara silaka. 11 Tapi tau nomporau rara sampesuwuna, tau etumo batena naria riara rumau. I'a nolumako riara rumau, pade da'a ninjanina ri umbamo jalana sabana rumau etu nompakarumau matana sampe i'a da'a mamala manggita. 12 Ana-anaku, aku mantulisi tesa e'i ka komi sabana silaka komi niampungimo nggari kamate i Pue Yesus. 13 Aku mantulisi tesa e'i ka komi, totu'a-totu'a, sabana nosinjanimo komi ante i Pue Yesus to naria mamimo nggari lamba pamulana. Aku mantulisi tesa e'i ka komi, kabilasa bo randoo, sabana komi naopumo nombadagi Magau nu Seta. 14 Aku nantulisi tesa e'i ka komi, ana-anaku, sabana komi nosinjanimo ante Umata Pue Alatala. Aku nantulisi tesa e'i ka komi, totu'a-totu'a, sabana komi nosinjanimo ante i Pue Yesus to naria nggari lamba pamulana. Aku nantulisi tesa e'i ka komi, kabilasa bo randoo sabana narosomo pomparasaya komi. Tesa nu Alatala naria riara nta'i komi, pade nidagi komimo Magau nu Seta. 15 Ne'e komi mompotowe dunia bara kaja'ana nuapa-nuapa to naria riarana. Ane komi mompotowe dunia komi da'a mompotowe Umata Pue Alatala. 16 Pura-pura kaja'ana to naria riara dunia e'i da'a nopu'u nggari ja'i Alatala. Dota rara to naja'ana, kario mata, pade kalanga rara nantoiya koro mboto, etu pura-pura aga nopu'u nggari dunia to naja'a e'i. 17 Dunia bo pura-pura to naria riarana to nipoino manusia mana masaeka malipo, tapi tau to nantuki dota nu Alatala kana matuwu mabelo sampe ri kasae-saena. 18 Ana-anaku, namosumo kaopu nu dunia. Niepe komimo Bali Kristus kana marata. Pade we'i-we'i nadeamo bali Kristus neumba. Etu tandaina namosumo kaopu nu dunia. 19 Bali-bali Kristus iramo tau-tau to nariamo ri tatongota bopia, tapi ira kakonona da'a saongu pomparasaya ante kita. Ane ira mpu'u-mpu'u saongu pomparasaya ante kita, natantumo ira bate-batena nosanggani-nggani ante kita. Tapi ira nompalasi kita. Etu najadi ala manoto ira pura-pura da'a mpu'u saongu pomparasaya ante kita. 20 Tapi sampesuwu-sampesuwu, komi nipesua Nosa Nagasa nu Alatala to nipopana'u Yesus Kristus. Etu sampe komi pura-pura nangginjani pepatuduki to nakonona. 21 Aku nantulisi tesa e'i ka komi da'a sabana nipekiriku komi da'a nangginjani pepatuduki to nakonona. Tapi nitulisiku ka komi sabana pepatuduki etu mpu'u-mpu'u ninjani komimo. Pade ninjani komi wo'umo da'a naria tesa dawa riara pepatuduki to nakonona. 22 Isema tau topodawa? I'amo tau to nanguli Yesus da'a Magau to Mompakasalama to nijanji Alatala. Tau etumo bali Kristus. I'a da'a nompangaku Umata Pue Alatala pade Anana Yesus. 23 Tau da'a nompangaku Ana nu Alatala, i'a da'a ana Umata Pue Alatala. Tapi tau to nompangaku Ana nu Alatala, i'a wo'u najadi ana Umata Pue Alatala. 24 Jadi sampesuwu-sampesuwuku, kana rapariara nta'i komi mpakabelo-belo pepatuduki to niepe komi nggari pamulana komi nomparasaya i Pue Yesus. Ane etu mpu'u-mpu'u rapariara nta'i komi, komi bate-batena matuwu mosaongu rara ante i Pue Yesus bo Umana Pue Alatala. 25 Iwe'imo to nijanji i Pue Yesus mboto ka kita: Kita kana matuwu mabelo ante I'a sampe ri kasae-saena. 26 Nitulisiku ka komi tesa e'i to nantesa tau-tau to nompasimbuku mompatuduki pepatuduki to nasalana ka komi. 27 Tapi kakonona mana paraluu tau ntanina mompatuduki komi, sabana komi nipesua Nosa Nagasa nu Alatalamo to nipopana'u i Pue Yesus. Pade Nosa Nagasa etumo naria ri ja'i komi mompatuduki ka komi mpengele-ngele to nabelona. Pepatudukina etu nakono pura, da'a ria to nasalana. Sabana etu komi kana maroo matuwu mosaongu rara ante i Pue Yesus ewa to nipatuduki Nosa Nagasa ka komi. 28 Jadi ana-anaku, komi kana maroo matuwu mosaongu rara ante i Pue Yesus ala da'a maeya matata mantingayo I'a bo da'a ria ekata tempo I'a marata bali ri dunia. 29 Ninjani komimo i Pue Yesus nanoa rarana. Sabana etu kana ranjani komi wo'u, isema-sema to nompowia to nanoana, iramo ana-ana nu Alatala.
1 Kita we'i! Nabete mpu'u towe Alatala ka kita sampe kita nipangakuna anana. Pade mpu'u-mpu'u kita anana mami! Etu sampe bali-bali Alatala ri dunia e'i da'a nosinjani ante kita, sabana ira mboto da'a nosinjani ante Alatala. 2 Sampesuwu-sampesuwu to nipotoweku, kita we'i-we'i ana nu Alatala. Da'apa ninjanita iwenumo katuwuta ri ja'i Alatala banepiana. Tapi ninjanitamo tempo I Pue Yesus marata bali ri dunia kita kana majadi nasimbayu ewa I'a mboto, sabana kita kana manggita lenjena mpu'u. 3 Isema-sema to naria panjarumaka etu ri ja'i Pue mombajagai korona nggari silaka ala i'a mpu'u-mpu'u magasa nasimbayu ewa i Pue Yesus. 4 Tau-tau nompowia silaka nombaliunaka Atura-atura Alatala, sabana pura-pura powia to nombaliunaka Atura-atura Alatala, etumo to niuli silaka. 5 Ninjani komimo patuju karata i Pue Yesus ri dunia, etumo ala mompakalipo pura-pura silaka. Pade I'a mboto da'a ntoto nasilaka. 6 Jadi isema-sema to natuwu nosaongu rara ante I'a, mana nompowia silaka. Tapi tau to nompowia silaka, da'apa ninjanina i Pue Yesus ante nanoto, pade da'a ntoto nosinjani ante I'a. 7 Ana-anaku, ne'e komi mompaloga tau manggeni komi mantuki pepatuduki to nasalana. Toramo! Isema-sema nompowia to nanoana, tau etumo to nireke Alatala nanoa nasimbayu ewa i Pue Yesus wo'u nanoa. 8 Tapi tau to nompowia silaka, i'a etumo ana nu Magau nu Seta, sabana Magau nu Seta nompowia silaka mamimo nggari lamba pamulana. Patuju Ana nu Alatala narata ri dunia etumo ala mompakaropu powia Magau nu Seta etu. 9 Tau to najadi ana nu Alatala da'a nompowia silaka, sabana inggu Alatala mboto naria riara nta'ina. I'a mana mamala mompowia silaka sabana i'a mboto najadi ana nu Alatala. 10 Tapi isema-sema da'a nompowia to nanoana da'a ana nu Alatala. Wa'a wo'u tau to da'a nompotowe roana. Etumo posisalana ana nu Alatala bo ana nu Magau nu Seta. 11 Iwe'imo kareba to niepe komi nggari pamulana komi nomparasaya i Pue Yesus: kita kana mosipotowe samba'a bo samba'a. 12 Ne'e kita mompasiala inggu i Kain. I'a ana nu Magau nu Seta pade i'a nompatesi tua'ina mboto. Nuapa sabana i Kain nompatesi tua'ina mboto? Sabana powia i Kain nadenggo tapi powia tua'ina nanoa. 13 Jadi sampesuwu-sampesuwuku, ne'e komi matekaja ane tau-tau to da'a nomparasaya Alatala nomporau rara komi. 14 Tapi kita e'i da'a nomporau rara roa-roata. Kita e'i nompotowe roa-roata. Etumo tandaina kita nikabasakamo nggari pesuku Alatala pade niratatamo katuwua to nabelo sampe ri kasae-saena. Aga tau da'a nepotowe damasipato rasuku Alatala sampe ri kasae-saena. 15 Isema-sema nomporau rara sampesuwuna, i'a etu topepatesi. Pade ninjani komi mbotomo da'a ria samba'a topepatesi mombarata katuwua mabelo sampe ri kasae-saena. 16 Nggari jonjo i Pue Yesus kita nangginjani batuana towe. I'a namate ala mompakasalama kita. Jadi kita wo'u masipato mantulungi roa-roata nau sampe kita mamate. 17 Ane rapana maria samba'a tau to nagana katuwuna manggita roana nakabu tapi i'a da'a madota mantulungi roana etu, natantumo da'a ntoto ria towe Alatala riara nta'ina! 18 Ana-anaku, ne'e kita mompotowe roata aga ri sumba bara aga ante tesata. Kita kana mompotowe ante mpu'u-mpu'u rarata pade mompopokita towe etu ante powiata to nabelona. 19 Ane kita mompotowe roata ante rarata mpu'u-mpu'u etumo tandaina kita mpu'u-mpu'u ana nu Alatala, pade masana rarata ri ngayo Umata Pue Alatala. 20 Naupa kita rapakasala pekiri rara nta'ita mboto, danamalapa masana rarata sabana Alatala da'a nompakasala kita. Ninjanina pura-pura katuwuta pade I'a neliu nggakuasa nggari rara nta'ita to nompakasala kita. 21 Jadi sampesuwu-sampesuwu to nipotoweku, ane kita da'a nipakasala pekiri rara nta'ita mboto, mabia kita mantingayo Alatala. 22 Pade nuapa to raperapita nggari ja'ina natantumo kana rawaina ka kita, sabana kita natundu riara parenta-parentana pade kita nompowia to nompakadamba rarana. 23 Iwe'imo to niparentana ka kita: kita kana momparasaya Anana Yesus Kristus. Pade kita kana mosipotowe samba'a bo samba'a ewa to niparenta i Pue Yesus mboto ka kita. 24 Isema-sema to natundu riara parenta-parenta nu Alatala, ira natuwu nosaongu rara ante I'a, pade Alatala wo'u natuwu nosaongu rara ante ira. Pade tandaina Alatala natuwu nosaongu rara ante kita etumo nariamo Nosa Nagasana riara nta'ita to niwaina ka kita.
1 Sampesuwu-sampesuwu to nipotoweku, ne'e komi momparasaya pura-pura tau to nanguli naria Nosa Nagasa nu Alatala ri ja'ina. Tapi uji ntanimo ruru ala ranjani ane nosa to naria ri ja'i ira Nosa Nagasa nu Alatala bara da'a. Etu niuliku sabana nadeamo nabi topodawa ri umba-umba ri dunia we'i-we'i. 2 Iwe'imo akala komi mangginjani ane nosa etu Nosa Nagasa nggari ja'i Alatala bara da'a. Tau to nompangaku Yesus Kristus narata ri dunia netimbali najadi manusia, tau etumo naria Nosa Nagasa nggari ja'i Alatala. 3 Tapi tau da'a nompangaku i Pue Yesus da'a naria Nosa Nagasa nggari ja'i Alatala. Tau etu naria nosa nggari ja'i Bali Kristus. Niepe komimo Bali Kristus kana marata, pade we'i-we'i nariamo i'a riara dunia e'i. 4 Tapi ana-anaku, komimo ana-ana nu Alatala pade nidagi komimo nabi-nabi topodawa etu, sabana nelabipa kuasa Nosa Nagasa to naria riara nta'i komi pade kuasa Magau nu Seta to nombakuasai dunia to naja'a e'i. 5 Nabi-nabi topodawa etu nopu'u nggari dunia to naja'a e'i. Etu sampe ira nompatuduki pepatuduki to nopu'u nggari dunia, pade tau-tau nggari dunia e'i wo'u madota mompetalinga ira. 6 Tapi kita nopu'u nggari ja'i Alatala. Etu sampe tau to nosinjani ante Alatala nompetalinga pepatudukita. Tapi tau-tau da'a nomparasaya Alatala da'a nompetalinga pepatudukita. Jadi nggari setu ninjanita isema to naria Nosa Nagasa nggari ja'i Alatala pade isema to naria nosa nggari ja'i Magau nu Seta. To naria nosa nggari ja'i Magau nu Seta etu da'a madota mompetalinga tesa Alatala to nakonona. 7 Sampesuwu-sampesuwu to nipotoweku, kamaimo kita mosipotowe samba'a bo samba'a, sabana towe nopu'u nggari ja'i Alatala, pade isema to nompotowe roana, etu tandaina i'a etu ana nu Alatala bo i'a nosinjani ante Alatala. 8 Tapi tau da'a nompotowe roana da'a nosinjani ante Alatala, sabana Alatalamo to natowena. 9 Alatala nompopokita towena ka kita ante nompakau Anana to samba'a lau mpaka ri dunia ala nggari kamatena kita mamala matuwu sampe ri kasae-saena. 10 Iwe'imo to niuli ka towe: da'a kita to nompotowe Alatala tapi Alatala to nompotowe kita sampe I'a nompakau Anana mboto rasuku majadi posompo silakata. 11 Sampesuwu-sampesuwu to nipotoweku, ane iwetumo towe Alatala ka kita, masipato wo'u kita mosipotowe samba'a bo samba'a. 12 Da'apa naria samba'a manusia nanggita Alatala. Tapi ane kita tunggai mosipotowe samba'a bo samba'a, Alatala naria riara nta'ita, pade ante iwetu towena mpu'u-mpu'u najadi nagana riara nggatuwuta. 13 Iwe'imo tandaina sampe ninjanita kita natuwu nosaongu rara ante Alatala pade I'a natuwu nosaongu rara ante kita: Naria Nosa Nagasana riara nta'ita. 14 Da'a aga iwetu, kami anaguru-anaguruna mbotomo nanggita Ana nu Alatala pade kami nompatolele ka tau Umata Pue Alatala nompakau Anana mpaka ri dunia e'i ala majadi Magau to Mompakasalama manusia nggari silaka. 15 Isema-sema to nompangaku Yesus Ana nu Alatala, tau etumo to natuwu nosaongu rara ante Alatala, pade Alatala natuwu nosaongu rara ante i'a. 16 Jadi ninjanitamo towe Alatala ka kita, pade niparasayatamo towena etu. Toramo! Alatalamo to natowena, jadi isema-sema tunggai nompotowe roana, tau etumo bate-batena natuwu nosaongu rara ante Alatala, pade Alatala bate-batena natuwu nosaongu rara ante i'a. 17 Ante iwetu towena najadi nagana riara nggatuwuta sampe kita mabia ri Eo Mpotangara banepia. Kita mabia ri eo etu tempo i Pue Yesus mombatangara manusia, sabana kita ri dunia e'i nipotowe Alatala nasimbayu ewa I'a nompotowe i Pue Yesus. 18 Isema to nombarasai towe Alatala da'a ria eka rarana, sabana towe Alatala to nagana etu nompopalai eka rarana. Aga tau masipato rasuku to naekana. Jadi isema-sema naeka mompekiri Eo Mpotangara batuana da'apa nitarimana towe Alatala to naganana etu. 19 Kita mompotowe roata sabana Alatala nokolumo nompotowe kita. 20 Ane maria samba'a tau manguli, "Aku nompotowe Alatala," tapi i'a nomporau rara sampesuwuna mboto, tau etu topodawa. Ane i'a da'a nompotowe sampesuwuna to nikita matana mboto, natantumo da'a mamala i'a mompotowe Alatala to da'apa sanggani nikitana! 21 Etu sampe naria parenta nggari ja'i Alatala to nanguli, "Isema-sema nompotowe Alatala, i'a kana mompotowe sampesuwuna wo'u."
1 Isema-sema to nomparasaya Yesus Magau to Mompakasalama to nijanji Alatala, tau etumo najadi ana nu Alatala. Ane i'a nompotowe Umana Pue Alatala, natantumo i'a wo'u nompotowe roa-roana to najadi ana nu Alatala wo'u. 2 Iwe'imo jala sampe ranjanita kita nompotowe roa-roata to najadi ana nu Alatala: kita mompotowe Alatala pade matundu riara parenta-parentana. 3 Matundu riara parenta-parentana etu tandaina kita nompotowe Alatala. Pade parenta-parentana da'a natomo ratuki, 4 sabana butu mba'a to najadi ana nu Alatala nompakule mombadagi pura-pura kaja'ana ri dunia e'i. Kita mamala mombadagi kaja'ana ri dunia e'i ante pomparasayata. 5 Isema to mamala mombadagi kaja'ana ri dunia e'i? Aga tau to nomparasaya Yesus Ana nu Alatala. 6 Yesus Kristus mbotomo Ana nu Alatala to narata ri dunia e'i. I'a nidiu Yohanes Topediu pade natitimo leina tempo I'a namate ri kayu parika. I'a da'a aga nidiu tapi I'a wo'u nipatesi. Nosa Nagasa nu Alatala mboto nantakono etu pura-pura. I'a namala raparasaya sabana I'a batena notesa to nakonona. 7 Jadi naria tolungele to nompakanoto isema Yesus, 8 etumo Nosa Nagasa nu Alatala, pombadiu Yesus, pade kamate Yesus. Anu tolungele etu pura-pura nompakanoto Yesus Ana nu Alatala. 9 Ane ri potangara kita nomparasaya tesa manusia mantakono sangele. Tapi tesa Alatala neliu nggaroso nggari tesa manusia. Jadi masipato kita momparasaya tesa nggari ja'i Alatala, sabana I'a mboto nompakanoto isema kakonona Anana. 10 Isema-sema to nomparasaya Ana nu Alatala nantakono tesa Alatala etu. Tapi isema-sema da'a nomparasaya tesa Alatala etu, ira nompopodawa Alatala, sabana ira da'a nomparasaya nuapa to niuli Alatala ewa Anana. 11 Iwe'imo isi tesa Alatala etu: Niwaina ka kitamo katuwua nabelo sampe ri kasae-saena, pade Anana pu'u katuwua etu. 12 Tau to natuwu nosaongu rara ante Ana nu Alatala nariamo katuwua nabelo etu ri ja'ina. Tapi tau da'a natuwu nosaongu rara ante I'a da'a ria katuwua nabelo etu ri ja'ina. 13 Aku nantulisi pura-pura tesa e'i ka komi to nomparasaya Ana nu Alatala, ala ranjani komi nariamo katuwua nabelo ri ja'i komi sampe ri kasae-saena. 14 Sampesuwu-sampesuwuku, iwe'imo panjarumakata to natantuna ri ja'i Alatala: ane kita merapi nggari ja'ina nantuki dotana mboto I'a nantarima pomperapita. 15 Pade ane ninjanita pomperapita nitarimanamo, natantumo kita kana mombarata nuapa to niperapita nggari ja'ina. 16 Sampesuwu-sampesuwuku, ane komi manggita samba'a roa komi topomparasaya nompowia silaka to da'a nompopoga'a i'a nggari ja'i Alatala sampe ri kasae-saena, komi kana mosambaya ka roa komi etu ala i'a majea pade mombarata katuwua mabelo sampe ri kasae-saena. To nitesaku e'i tau to nompowia silaka to da'a nompopoga'a i'a nggari ja'i Alatala sampe ri kasae-saena. Naria silaka to nompopoga'a tau nggari ja'i Alatala sampe ri kasae-saena. Da'a tau to nompowia silaka etu to niuliku paraluu raposambaya komi. 17 Pura-pura pokainggu to naja'ana etumo silaka. Tapi naria silaka to da'a nompopoga'a tau nggari ja'i Alatala sampe ri kasae-saena. 18 Ninjanita tau to najadi ana nu Alatala da'a tunggai nompowia silaka, sabana Ana nu Alatala mboto nombajagai i'a sampe i'a da'a mamala rapandasa Magau nu Seta. 19 Ninjanita wo'u kita najadi ana nu Alatala naupa njumaongu dunia e'i nikuasai Magau nu Seta. 20 Ninjanita wo'u Ana nu Alatala narata ri dunia e'i mompakanoto rarata ala kita mamala mosinjani ante Alatala. Kita natuwu nosaongu rara ante I'a sabana kita natuwu nosaongu rara ante Anana Yesus Kristus. I'a mbotomo Alatala to nakono, I'amo to nombawai katuwua nabelo sampe ri kasae-saena. 21 Ana-anaku, ne'e komi mepue ka pue-pue ntanina.
1 Sura e'i nggari ja'iku topanggeniaka topomparasaya ka komi totu'a besi to nipelisi Alatala, pade ka ana-anamu. Aku mpu'u-mpu'u nompotowe komi pura-pura, pade da'a aga aku tapi pura-pura tau to nangginjani pepatuduki to nakonona wo'u. 2 Kami pura-pura nompotowe komi sabana kita mpasanggani-nggani naroo nantuki pepatuduki to nakonona. Pepatuduki etu bate-batena naria ri ja'ita sampe ri kasae-saena. 3 Perapi towe belo Umata Pue Alatala bo Anana Yesus Kristus maria ri ja'ita. Perapi ira maasi mata manggita kita pade mombawai ka kita katuwua to nabelona. Etu pura-pura majadi ri ja'ita to naroo nantuki pepatuduki to nakono etu, pade to nompotowe roa-roata. 4 Nadamba mpu'umo raraku nangepe naria anamu natuwu nantuki pepatuduki Alatala to nakonona ewa to niparenta Umata Alatala mboto ka kita. 5 Jadi we'i-we'i, indo, kuperapi ka komi ante mpu'u-mpu'u, ala kita kana mosipotowe samba'a bo samba'a. To nitulisiku e'i da'a parenta to nabouna, tapi etu parenta to niwai ka kita nggari pamulana kita nomparasaya i Pue Yesus. 6 Iwe'imo to niuli ka towe: kita kana matuwu mantuki parenta Alatala. Iwe'imo parenta to niepe komi nggari pamulana etu: Kita kana matuwu ante mosipotowe samba'a bo samba'a. 7 Nadeamo topebagiu neumba pade nalau ri umba-umba ri dunia. Ira etu tau-tau to da'a nompangaku Yesus Kristus narata ri dunia newali manusia. Tau-tau etumo topodawa bo bali Kristus. 8 Etu sampe komi kana mainga, ne'e sampe malipo nggari ja'i komi nuapa to nipatuduki kami ka komi. Komi kana mainga ala komi mamala mombarata pura-pura rasi to nipakasadia Alatala ka komi. 9 Isema-sema da'a naroo mantuki pepatuduki Kristus tapi aga manggabasaka pepatuduki etu, tau-tau etu da'a naria Alatala riara nta'i ira. Tapi isema-sema naroo mantuki pepatuduki Kristus, iramo to naria Umata Pue Alatala bo Anana riara nta'ina. 10 Jadi ane maria tau marata ri ja'i komi to nompatolele pepatuduki to nosisala nggari pepatuduki Kristus, ne'e ratarima ira rara njapo komi. Ne'e komi mombatabe ira, 11 sabana ane komi mombatabe ira, batuana komi najadi topantulungi ira nowia to naja'ana. 12 Danadeapa to kutesa ka komi, tapi nipekiriku nabelopa ne'e ratulisi riara sura. Nisarumakaku aku mboto mamala marata ri ja'i komi pade kita mamala motesa mosirata mata ala mpu'u-mpu'u madamba rarata mpasanggani-nggani. 13 Nadea tabe nggari ja'i ana-ana nu sampesuwumu ri se'i to nipelisi Alatala wo'u.
1 Sura e'i nggari ja'iku topanggeniaka topomparasaya ka i Gayus, wega rapaku to mpu'u-mpu'u nipotoweku. 2 Wegaku, kuperapi ka Pue Alatala ala katuwumu mabelo-belo pade maroso koromu nasimbayu ewa pomparasayamu naroso. 3 Nadamba mpu'u raraku tempo bara sakuya mba'a topomparasaya narata nanguli ka aku komi naroomo nomparasaya pepatuduki to nakonona. Niuli ira komi mpu'u-mpu'u natuwu nantuki pepatuduki etu. 4 To mpu'u-mpu'u nompakadamba raraku etumo nangepe kareba to nanguli ana-anaku naroo natuwu nantuki pepatuduki to nakonona. 5 Wegaku, komi mpu'u-mpu'u natutu nantulungi sampesuwu-sampesuwuta topomparasaya to nesai ri ja'imu, naupa komi da'apa nosinjani ante ira. 6 Ira nanguli ka topomparasaya ri se'i tempo kami nasiromu, neliu mpu'u towemu nantulungi ira. Jadi kuperapi, ane ira mesai wo'u ri setu, tulungimo ira ante akala nabelo to nompakadamba rara Alatala ala ira mamala mompapola polumako ira. 7 Ira nalau mompatolele Kareba Yesus ante da'a mantarima petulungi nuapa-nuapa nggari ja'i ntau to da'apa nomparasaya Alatala. 8 Sabana etu kita topomparasaya masipato mantulungi ira ala kita wo'u masintuwu ante ira mompatolele pepatuduki to nakonona nggari ja'i Alatala. 9 Nariamo sura to nitulisiku ka topomparasaya ri setu, tapi i Diotrefes da'a nadota mantuki tesaku. I'a aga madota ala tesana njamba'ana ratuki ntau. 10 Jadi tempo aku marata ri setu kana kutesa mpakanoto ka komi nuapa pura to nikawiana, sabana powiana etu naja'a mpu'u. Nadea tesa dawa to naja'a mpu'u to niulina ewa kami. Pade da'a aga etu. Tempo roa-roata topomparasaya narata ri setu, i'a da'a nadota mantarima ira riara njapona. Pade i'a nombatagi topomparasaya ntanina ri setu mantarima ira. Pade ira to da'a nantuki tesana etu nisuwurakana nggari tatongo topomparasaya. 11 Wegaku, ne'e mupasiala powia to nadenggona, tapi pasialamo to nabelona. Tau nompowia to nabelona i'a ana nu Alatala. Tapi tau nompowia to naja'ana da'a ntoto nosinjani ante Alatala. 12 Pura-pura tau nantoiya i Demetrius. Nggari pokaingguna to nanoana nanotomo ka ira i'a nantuki pepatuduki to nakonona. Kami wo'u nantoiya i'a, pade ninjanimu nuapa to niuli kami namala raparasaya. 13 Danadea mpu'u tesa paraluu kutesa ka komi, tapi nipekiriku nabelopa ne'e ratulisi riara sura. 14 Nisarumakaku mana masaeka aku momposirata komi pade mamala kita motesa mosirata mata. 15 Perapi Pue mombagane komi. Nadea tabe nggari ja'i roa-roata ri se'i. Pakasampe tabeku ri ja'i roa-roaku ri setu samba'a bo samba'a.
1 Sura e'i nggari ja'iku Yudas, batua Yesus Kristus bo tua'i Yakobus, ka komi to nipokio Alatala majadi todeana. Komi mpu'u-mpu'u nipotowe Umata Alatala pade komi nijagaina ala maroo mantuki Yesus Kristus. 2 Perapi asi mata bo towe bo katuwua mabelo nggari ja'i Alatala rarasai komi ante da'a ria kaopu-opuna. 3 Sampesuwu-sampesuwu to nipotoweku, nabete mpu'u raraku mantulisi sura ka komi ewa kabelona to nirasaita pura-pura tempo nipakasalama i Pue Yesus. Tapi nipekiriku paraluu aku mantulisi mompatuduki komi ala manjoko mpakaroso pepatuduki to nakono to nipasimbayu Alatala ka pura-pura topomparasaya i Pue Yesus. Pade paraluu wo'u aku mompatuduki komi ala bate-batena mangewa tau-tau to madota mombabali pepatuduki etu. Sabana pepatuduki etu niwai Alatala sanggani lau pade nagana puramo sampe ri kasae-saena. 4 Nitulisiku iwetu sabana nariamo bara sakuya mba'a tau to nesua nggalino ri tatongo komi topomparasaya. Ira etu tau-tau da'a nantuki dota Alatala. Ira nombabali tesa ewa towe belo nu Alatala ante nanguli da'a mokuya kita mogau sala sabana Alatala nompotowe kita pade I'a kana mombaampungi salata etu. Pade ira nombasapu Yesus Kristus Magau bo Pueta samba'a lau. Nggari nggaolu pesuku to rapawela ka ira nipakatantu mamimo riara Buku Nagasa. 5 Naupa komi nangginjani etu pura-pura, kana kupopatora sangganipa wo'u ka komi iwe'i: Toramo! Pue nanggabasaka todeana to Yahudi nggari tana Masir. Tapi naupa iwetu I'a nompakaropu ira to da'a nomparasaya. 6 Tora wo'u malaeka-malaeka i Pue to nombaliunaka kuasa to nipakatantu Alatala ka ira sampe ira nompalasi peto'o ira mboto ri suruga. Ira nitarunggu Alatala ri peto'o narumau pade nipo'u ante rante to da'a namala rakabasaka sampe ira rasuku ri Eo Mpotangara banepia. 7 Iwetu wo'u pokainggu pue ngata Sodom bo Gomora pade ngata-ngata ntanina to namosu ri setu. Nasimbayu ewa malaeka-malaeka etu ira wo'u da'a nabasa-basa nogau sala ante tau da'a rongona mboto pade nantuki pokainggu to da'a ntoto masipato. Ngata ira nipakaropu ante apu ewa jonjo ka pura-pura tau iwenu pokainggu to naja'a kana rasuku ante apu sampe ri kasae-saena. 8 Iwetu wo'u guru-guru topodawa etu. Aga niposimpangipi-ngipi ira powia to nompakatantoru koro ira mboto. Ira nanjapuaka kuasa Alatala pade ira nanguli sinja'i malaeka-malaeka ri suruga to nipogumaa. 9 Tapi nau tadulako malaeka i Mikhael mboto da'a nowia iwetu. Tempo i'a nosisono ante Magau nu Seta ewa sema to mamala mangala watabaku i Musa, i'a da'a nabia mompakasala Magau nu Seta ante nanguli sinja'i i'a. Mikhael aga nanguli, "Perapi Pue mombabunggaa iko." 10 Tapi guru-guru etu nanguli sinja'i mpengele-ngele anu da'a ninjani ira. Pade nuapa to ninjani ira nantuki inggu to naria ri ja'i ira nasimbayu ewa binata-binata to da'a namala nompekiri, etumo to nipowia ira ante da'a ria rekena. Tapi kakonona nggari powia etumo katuwu ira majadi magero. 11 Mandasa mpu'u ira! Sabana ira nompasiala pokainggu i Kain nggaolu to nompatesi tua'ina mboto. Ira nompasiala pokainggu i Bileam to nasala aga nadota mombarata doi. Pade ira nangewa Alatala nasimbayu ewa i Korah nggaolu sampe ira wo'u masipato rapakaropu. 12 Tempo komi nasiromu nanggoni mpasanggani-nggani, guru-guru topodawa etu aga nompakaeya mata komi sabana ira aga nompebasa nanggoni ante da'a naeya matana, pade aga nompekiri koro ira mboto. Ira da'a ntoto ria gunana nasimbayu ewa kulimunggapu to da'a najadi uja, aga niburu mpoiri gusa'a guse'i. Pade ira wo'u da'a ria gunana nasimbayu ewa kayu to da'a nowua ri tempona. Kayu etu kana ratowo bo rapekale sampe namate liu-liu. 13 Pokainggu ira to nompakatantoru nasimbayu ewa wura ntasi to nadepu to naboli ri wiwi ntalinti tempo balumba bete rara ntasi. Pade ira da'a namala raparasaya sabana nasalanjalamo nasimbayu ewa betu'e-betu'e ri langi to nanawu nggari peto'o to masipatona pade sambara nolinja. Jadi ira to noinggu ewa etu kana rasuku ri peto'o to neliu nggarumau sampe ri kasae-saena. 14 Henokh, muli kapituntapina nggari Adam, nombaboto ewa guru-guru topodawa etu iwe'i: "Kita we'i! Pue kana marata ante njobu-njobu malaekana to nagasa 15 ala mombatangara pura-pura tau. I'a kana mombasuku pura-pura tau da'a nantuki dota Alatala sabana pura-pura pokainggu ira to naja'a. Pade I'a kana mombasuku ira sabana pura-pura tesa njilaka to niuli ira ka I'a." 16 Guru-guru topodawa etu batena nongua ka katuwu ira mboto pade aga nompakasala tau ntanina. Ira aga natuwu nantuki dota rara ira to naja'a. Ira notesa nompakalanga koro ira mboto pade ira notesa namomi-momi ka tau ala mombarata untu. 17 Tapi sampesuwu-sampesuwu to nipotoweku, toramo tesa to niboto suro-suro nu Pueta Yesus Kristus. 18 Ira nanguli ka komi iwe'i: "Ane namosumo kaopu nu dunia kana meumba topesapuaka to mompongei-ngei Tesa i Pue. Ira aga matuwu mompebasa ka dota rara ira mboto to naja'a." 19 Tau-tau niboto etumo to nompopoga'a todea topomparasaya. Ira aga nikuasai dota-dota naja'a nggari dunia e'i, pade Nosa Nagasa nu Alatala da'a ntoto naria ri ja'i ira. 20 Tapi komi, sampesuwu-sampesuwu to nipotoweku, pakabelomo katuwumu ante maroo mantuki pomparasayamu to nagasana. Pade posambayamo ante pekeniaka Nosa Nagasa nu Alatala. 21 Jagaimo koro komi mboto ala batena matuwu riara towe nu Alatala. Popeamo katuwua mabelo sampe ri kasae-saena to rawai Pueta Yesus Kristus ka komi nantuki asi matana. 22 Komi kana maasi mata ri ja'i ntau to nolengga-lengga momparasaya, 23 pade tulungimo ira ala ira rapakasalama nggari pesuku nasimbayu ewa tau rapakasalama nggariara apu. Pade komi kana maasi mata wo'u manggita tau-tau ntanina to nikuasai dota rara to naja'a. Tapi tulungimo ira manggabasaka pokainggu ira to naja'a ante mainga ala ne'e komi wo'u matepakeni mantuki pokainggu ira to naja'a. 24 Alatala nakuasa mombajagai komi ala ne'e manawu. I'a nakuasa manggeni komi mpaka ri suruga mantingayo I'a riara karemena to nipogumaa ante madamba-damba bo da'a ria sala nuapa-nuapa. 25 I'amo Alatala samba'a lau. I'amo to nompakasalama kita nantuki powia Pueta Yesus Kristus. I'amo Alatala to neliu nggabete katuwuna, Magau to nipogumaa. I'amo to nabaraka bo nakuasa nggari lamba pamulana, we'i-we'i, pade sampe ri kasae-saena. Amin! Tabe nggari ja'iku, Yudas
1 Isi buku e'i nantesa panggita nggari ja'i Yesus Kristus. I'a nipakau Alatala mompopokita ka batua-batuana nuapa to da'a mana masaeka majadi. Yesus nompakau malaekana malau mompopokita etu pura-pura ka batuana Yohanes. 2 Pade Yohanes nompasimbayu pura-pura nuapa to nikitana, etumo tesa nggari ja'i Alatala bo posabi nggari ja'i Yesus Kristus. 3 Masana mpu'u tau to mombabasa tesa-tesa to niboto riara buku e'i bo tau-tau to mangepe bo mantuki nuapa to nitulisi riarana. Sabana mana masaeka pura-pura etu kana majadi. 4 Tesa e'i nggari ja'iku Yohanes ka todea topomparasaya i Pue Yesus ri pituongu ngata ri Propinsi Asia. Perapi Pue Alatala mombawai ka komi rasi bo katuwua mabelo. Rasi etu nggari ja'i Alatala to nariamo nggari lamba pamulana, bo to naria we'i-we'i, pade to maria sampe ri kasae-saena. Pade rasi etu wo'u nggari ja'i papitu nosa nu Alatala to naria ri ngayo pekatoko nu Alatala, 5 pade nggari ja'i Yesus Kristus. I'amo sabi to namala raparasaya, I'amo to pamula-mulana nipakatuwu bali nggari kamatena. I'amo topoparenta pura-pura magau riara dunia. I'a nompotowe kita pade ante leina I'a nanggabasaka kita nggari silakata pura-pura. 6 Kita nipajadina todea riara poparentana, kita nipajadina topanggeni-topanggeni agama to nanggeni pesomba ka Umana Alatala. Perapi Yesus Kristus ratoiya bo rabila, perapi I'a moparenta sampe ri kasae-saena. Amin! 7 Kitamo! I'a marata nibungu kulimu. I'a kana rakita mata pura-pura tau, nabeloka ira to nombasaku usuna. Pade pura-pura manusia ri dunia kana mageo mpajea manggita I'a. Etu mpu'u-mpu'u kana majadi! Amin! 8 Pue Alatala nanguli, "Aku e'imo pamulana bo kaopuna. Aku to naria mamimo nggari lamba pamulana, Aku naria we'i-we'i pade Aku kana maria sampe ri kasae-saena. Akumo to neliu nggakuasa." 9 Aku e'i Yohanes, sampesuwu komi riara i Pue. Nasimbayu ante komi aku wo'u nipandasa sabana nomparasaya i Pue Yesus, bo nasimbayu ante komi aku wo'u nombarata bagia riara poparentana, pade aku wo'u naroo tempo nipandasa nasimbayu ante komi. Aku nipatani ri saongu lewuto nosanga ka Lewuto Patmos, sabana nompatolele Tesa nu Alatala pade nompangaku Yesusmo Pueku. 10 Tempo Eo Mpepue aku nikuasai Nosa Nagasa nu Alatala, pade niepeku suara nggari talikuku to namangga mpu'u ewa wamba nu kololio. 11 Suara etu nanguli iwe'i: "Tulisimo nuapa to mukita pade pakatumo ka todea topomparasaya to neto'o ri pituongu ngata, etumo ngata Efesus, ngata Smirna, ngata Pergamus, ngata Tiatira, ngata Sardis, ngata Filadelfia pade ngata Laodikia." 12 Nangepe etu aku nakampeili madota manggita isema notesa ka aku. Tempo aku nakampeili nikitaku papitu kada mpoindo bulawa. 13 Ri tatongo kada mpoindo etu naria samba'a tau, lenjena ewa Ana nu Manusia. Baju nipasuana nandoe mpu'u narata ri kadana, pade naria pompo'u bombarana bulawa. 14 Balenggana bo wo'ona nabula nju'u ewa kapa bo salju. Pade matana najela ewa jela nu apu. 15 Kadana naralei ewa tambaga nitunu riara apu. Pade suarana namangga mpu'u ewa soo nu ue bete. 16 Ri pale ngganana naria pituongu betu'e, pade nggari ngangana nesuwu samata guma nomata ntimali to nataja mpu'u. Pade lenjena ewa wana nu eo ri eo ntongo. 17 Tempo aku nanggita I'a kaliu-liu aku nadungga ntuobo ri ngayona ewa tomate. Tapi I'a nombadika pale ngganana ri koroku pade niulina ka aku, "Ne'e iko maeka. Aku e'imo pamulana bo kaopuna. 18 Aku e'imo to natuwuna. Bopia aku namatemo. Tapi kitamo, we'i-we'i aku natuwu bali sampe ri kasae-saena. Akumo to nakuasa nanjoko kunci kamatea bo peto'o ntomate. 19 Sabana etu tulisimo nuapa pura to nikitamu, nabeloka to najadi we'i-we'i, nabeloka nuapa to majadi banepia. 20 Da'a ninjanimu batuana pituongu betu'e to nikitamu ri pale ngganaku e'i bo papitu kada mpoindo bulawa. Iwe'imo batuana: pituongu betu'e etu nombagambara pitumba'a malaeka to nanggeniaka todea topomparasaya Aku to neto'o ri pituongu ngata. Pade papitu kada mpoindo bulawa etu nombagambara todea topomparasaya to naria ri pituongu ngata etu."
1 Pade nangulimo Ana nu Manusia ka aku, "Tulisimo ka malaeka to nanggeniaka todea topomparasaya ri ngata Efesus iwe'i: E'imo tesa nggari ja'ina to nanjoko pituongu betu'e ri pale ngganana pade to nolumako ri tatongo papitu kada mpoindo bulawa. 2 Ninjaniku pura-pura pokainggumu. Komi naraji nokarajaa pade komi naroo tempo nipandasa sabana nomparasaya Aku. Ninjanikumo komi da'a nasituju ante pokainggu tau-tau naja'a. Tau-tau to nompangaku korona suro-suroku tapi kakonona da'a, ira niuji komi sampe nanotomo ira topodawa. 3 Pade komi mpu'u-mpu'u nosabara. Komi nipandasa ntau sabana komi topantuki Aku, tapi komi da'a naopu rara. 4 Tapi naria sangele inggu komi to da'a nipodamba raraku. Komi mana nompotowe Aku ewa bopia tempo komi lako nomparasaya. 5 Etu sampe kuuli ka komi, pakabelo-belo!.Nakawao ntotomo kanawu komi! Kajeamo komi, pade powiamo ewa to nipowia komi ri pamulana. Sabana ane komi da'a majea, Aku kana marata mangala kada mpoindo bulawa komi nggari peto'ona. 6 Tapi naupa iwetu naria sangele inggu komi to nipokonoku, etumo komi nomporau rara pokainggu tau-tau to nantuki pepatuduki i Nikolaus, to niporau raraku wo'u. 7 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira wua nggari Kayu Katuwua to naria riara tinalu Alatala ri suruga." 8 Naopu etu nanguli wo'umo Ana nu Manusia ka aku, "Tulisimo ka malaeka to nanggeniaka todea topomparasaya ri ngata Smirna iwe'i: E'imo tewai nggari ja'ina to niuli Pamulana bo Kaopuna, to namate pade natuwu bali. 9 Ninjaniku kasusa bo kapari to nirasai komi. Ninjaniku komi mpu'u-mpu'u nakasiasi, tapi kakonona komi nakalumana riara pomparasaya komi. Ninjaniku komi niuli sinja'i ntau to nompangaku korona tau-tau to Yahudi tapi kakonona da'a. Ira aga todea Magau nu Seta. 10 Tapi ne'e komi maeka mantingayo kasusa bo kapari to mana masaeka rarasai komi. Kitamo! Santongo nggari ja'i komi kana rapopesua Magau nu Seta riara tarunggu ala komi rapesoba. Komi kana rapandasa sampulu eo kasaena. Tapi pakaroo raramu momparasaya Aku sampe mamate, pade Aku kana mombawai ka komi hadia padagi, etumo katuwua mabelo sampe ri kasae-saena. 11 Isema-sema naria talingana, epemo mpakabelo-belo nuapa to niuli Nosa Nagasa nu Alatala ka todea topomparasaya ri umba-umba ngata. Isema-sema padagi da'a ntoto mawela pesuku riara naraka to niuli kamatea karongganina." 12 Naopu etu nanguli wo'umo Ana nu Manusia ka aku, "Tulisimo ka malaeka to nanggeniaka todea topomparasaya ri ngata Pergamus iwe'i: E'imo tewai nggari ja'ina to naria guma nomata ntimali to nataja mpu'u. 13 Ninjanikumo ngata nipeto'o komi, etumo riara ngata peto'o pekatoko Magau nu Seta. Tapi naupa iwetu komi naroo nomparasaya Aku. Tempo sabiku to nosanga ka Antipas nipatesi ri ngatamu komi da'a nombasapu pomparasaya komi ka Aku. Antipas etu sabiku to natutu nomparasaya Aku sampe i'a nipatesi ntau ri ngata komi, etumo ri peto'o Magau nu Seta. 14 Tapi danariapa bara sakuya ngele inggu komi to da'a nipodamba raraku. Naria nggari tatongo komi to nantuki pepatuduki i Bileam nggaolu. Bileam etu nompatuduki Magau Balak iwenu mompakanawu tau-tau to Israel riara silaka, etumo ante manggeni ira manggoni panggoni to napalina sabana nipakoni ka pue-pue ntanina, pade ante manguli da'a mokuya mogau sala ante tau da'a rongota mboto. 15 Pade naria wo'u nggari tatongo komi to nantuki pepatuduki i Nikolaus. 16 Sabana etu kuuli ka komi, kajeamo nggari silakamu etu. Ane komi da'a majea Aku kana masalisa marata ri ja'i komi pade mosibali ka ira etu ante guma to naria ri ngangaku. 17 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata. Isema-sema padagi kana kuwai ka ira roti 'Manna' to natetabuniaka. Pade kana kuwai wo'u ka ira watu bula simbau saongu. Ri watu bula etu nitulisi sanga nabou to da'a ntoto ninjani tau ntanina, aga tau to mantarima watu bula etu to mangginjanina." 18 Pade nanguli wo'umo Ana nu Manusia ka aku, "Tulisimo ka malaeka to nanggeniaka todea topomparasaya ri ngata Tiatira iwe'i: E'imo tesa nggari Ana nu Alatala to naria matana najela ewa apu pade kadana naralei ewa tambaga nitunu riara apu. 19 Ninjanikumo pura-pura pokainggu komi. Ninjaniku towemu bo pomparasayamu ka Aku. Ninjaniku bago komi mantulungi Aku pade ninjaniku iwenu komi nosabara tempo nipandasa. Pade ninjaniku bago komi mantulungi Aku we'i-we'i neliu nggadea nggari to nipowia komi tempo lako nomparasaya Aku. 20 Tapi danariapa sangele pokainggu komi to da'a ntoto nipodamba raraku. Etumo besi to nosanga ka Izebel to nompangaku korona samba'a nabi nipaloga komi nompatuduki bo nombabagiu topantuki-topantuki Aku. I'a nompatuduki ira mogau sala ante tau da'a rongo ira mboto pade manggoni panggoni to napalina sabana nipakoni ka pue-pue ntanina. 21 Niwaikumo loga ka i'a majea nggari ingguna nogau sala etu, tapi i'a da'a ntoto madota majea. 22 Jadi kitamo! Aku kana mompakaju'a i'a sampe i'a aga maturu ri paturuna. Pade ane ira to nantuki i'a nogau sala da'a majea nggari pokainggu ira to naja'a ira kana kupawela kasusa bo kapari to naja'a mpu'u. 23 Pade ana-anana kana kupatesi sampe manoto ka pura-pura topomparasaya Akumo to nomparesa pekiri bo rara nta'i manusia, pade Akumo to mombabalasi komi samba'a bo samba'a nantuki pokainggu-pokainggu komi. 24 Tapi naria wo'u komi to Tiatira to da'a nantuki pepatuduki to naja'a etu pade da'a madota meguru to niuli ntau 'pangginjani Magau nu Seta to nalontona'. Kuuli ka komi iwe'i: Aku da'a mantambai parenta-parenta ntanina ka komi. 25 Aga sokomo mpakaroso pepatuduki to naria ri ja'i komi sampe Aku marata bali. 26 - 27 Isema-sema padagi bo to manggawia dotaku sampe ri kaopuna, kana kuwai ka kuasa nasimbayu ewa to nitarimaku nggari ja'i Umaku. Kana kuwai ka ira kuasa moparenta manusia ri umba-umba ri dunia. Ira kana moparenta ante maroso nasimbayu ewa karoso lembau ase. Pade ira kana mompakaropu bali ira nasimbayu ewa tau mompakarege kura tana. 28 Pade kana kuwai ka ira betu'e Pompaeo. 29 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata."
1 Nanguli wo'umo Ana nu Manusia etu, "Tulisimo ka malaeka to nanggeniaka todea topomparasaya ri ngata Sardis iwe'i: E'imo tesa nggari ja'ina to naria papitu nosa nu Alatala bo to nanjoko pituongu betu'e. Ninjanikumo pura-pura pokainggumu. Komi nireke ntau topomparasaya to naroso, tapi kakonona pomparasaya komi etu namatemo. 2 Pembangumo! Pakarosomo pomparasaya to danariapa ri ja'i komi to ntora namate. Sabana nikitaku nggari pura-pura powiamu, da'apa ria kamba sangele to nagana riara mpanggita nu Alatala. 3 Jadi toramo pepatuduki to niepe komi pade nitarima komi bopia. Tukimo pepatuduki etu pade kajeamo nggari sala-sala komi. Ane komi da'a mainga Aku kana marata ri ja'i komi ewa topangangga. Da'a ranjani-njani komi tempo karataku. 4 Aga danariapa ri tatongo komi ri ngata Sardis bara sakuya mba'a tau to nombajagai pakea ira sampe da'a natantoru. Iramo to mamala molumako mpasanggani-nggani ante Aku mopakea bula, sabana iramo to masipato molumako ante Aku. 5 Isema-sema padagi kana rawai ka baju bula ewa etu. Pade sanga ira da'a kupakalipo nggari Buku Katuwua. Tapi Aku kana mompangaku ira etu ri ngayo Umaku bo malaeka-malaekana. 6 Isema-sema naria talingana, epemo mpakabelo-belo nuapa to niuli Nosa Nagasa nu Alatala ka todea topomparasaya ri umba-umba ngata." 7 Nanguli wo'umo Ana nu Manusia etu, "Tulisimo ka malaeka to nanggeniaka todea topomparasaya ri ngata Filadelfia iwe'i: E'imo tesa nggari ja'ina to nagasa bo nakono. I'amo to nanjoko kunci Poparenta Magau Daud. Ane I'a mombabea pewobo da'a ria samba'a tau mamala mombapikuna, pade ane I'a mombapiku pewobo da'a ria samba'a tau mamala mombabeana. 8 Ninjanikumo pura-pura pokainggumu. Kitamo! Aku nombabea ka komi saongu pewobo, pade da'a ria samba'a tau mamala mombapikuna. Sabana naupa komi da'a naroso ntoto komi natutu nantuki tesaku bo komi da'a nombasapu Aku. 9 Naria tau-tau to najadi todea Magau nu Seta to nanguli ira etu tau to Yahudi tapi kakonona da'a, ira aga nodawa. Tapi kitamo! Ira kana kupowia marata ri ja'i komi. Pade ira kana mekadede ri ngayo komi bo mompangaku Aku mpu'u-mpu'u nompotowe komi. 10 Komi nantuki parentaku to nanguli pakaroo rara tempo nipandasa. Sabana etu Aku kana manggalendu komi nggari kasusa to marata ri njumaongu dunia ala mombasoba pura-pura manusia to neto'o ri dunia. 11 Mana masaeka Aku marata. Jadi sokomo mpakaroso pepatuduki to nipatuduki ka komi ala komi mombarata hadia padagi nggari ja'i Alatala. Ne'e sampe maria tau mangago hadia etu nggari ja'i komi. 12 Isema-sema padagi kana maroo ri suruga sampe ri kasae-saena nasimbayu ewa tinja nu sapo Alatalaku. Ira da'a mana mesuwu nggari setu. Pade ri koro ira kana kutulisi sanga nu Alatalaku bo sanga ngata nu Alatala, etumo Yerusalem nabou to mana'u nggari suruga nggari ja'i Alatalaku. Pade sangaku mboto to nabou kana kutulisi ri koro ira. 13 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata." 14 Nanguli wo'umo Ana nu Manusia ka aku, "Tulisimo ka malaeka to nanggeniaka todea topomparasaya ri ngata Laodikia iwe'i: E'imo tesa nggari ja'ina to nipoposanga 'Amin', etumo sabi to natutu notesa to nakonona. I'amo Pu'u nu pura-pura nuapa to nipajadi Alatala. 15 Ninjanikumo pura-pura pokainggumu. Pomparasaya komi da'a naleni pade da'a wo'u napane. Nabelopa pomparasaya komi maleni bara mapane. 16 Tapi pomparasaya komi etu aga napane ngolo, da'a naleni da'a napane. Sabana etu Aku kana mombaluaraka komi nggari ngangaku. 17 Sabana komi nanguli, 'Kami e'i nakalumanamo, nagana puramo katuwu kami, da'a mana makabu.' Tapi kakonona da'a ninjani komi katuwu komi mboto. Komi neliu nggandasamo. Katuwu komi aga nipoasi mata ntau. Komi nakasiasi mpu'u, naburomo mata komi, bo nelayamo komi. 18 Etu sampe Aku mompatuduki komi iwe'i: Olimo nggari ja'iku bulawa to nipakagasa riara apu ala komi mpu'u-mpu'u makalumana. Pade oli wo'umo pakea bula nggari ja'iku ala komi mamala mopakea pade eya mata komi topelaya etu mamala ratutu. Pade oli wo'umo pakuli ragese ri matamu ala komi mamala mekita bali. 19 Isema-sema to nipotoweku, ira kana kuontiaka pade kuboba ala mompatuduki ira. Etu sampe kuuli ka komi, pakaroso raramu bo kajeamo nggari pomparasayamu to napane ngolo etu. 20 Kitamo! E'imo Aku nekanggore nantenggedeu pewobo. Ane maria tau riarana mangepe suaraku bo mombabea pewobo, Aku kana mesua ri ja'ina pade manggoni mpasanggani-nggani ante i'a. 21 Isema-sema padagi kana kupaloga mekatoko mosanggani ante Aku ri pekatoko poparentaku pade moparenta mpasanggani-nggani ante Aku nasimbayu ewa Aku wo'u najadi padagi sampe nipaloga mekatoko moparenta mosanggani ante Umaku ri pekatokona. 22 Isema-sema naria talingana, epemo mpakabelo-belo nuapa to nitesa Nosa Nagasa nu Alatala ka todea topomparasaya ri umba-umba ngata."
1 Naopu etu aku nanggita pade kitamo, naria saongu pewobo nibea ri suruga. Pade niepeku suara pamulana to niepeku pani'a. Suara etu kamanggana ewa moni kololio. Nangulimo suara etu ka aku, "Peponemo wemai. Aku mompopokita ka iko nuapa to majadi banepiana." 2 Sampegoli aku nikuasai Nosa Nagasa nu Alatala pade ewa aku nariamo riara suruga. Ri setu aku nanggita saongu pekatoko magau, pade naria samba'a nekatoko ri bunggu pekatoko etu. 3 To nekatoko ri setu lenjena damo neringgila ewa mata sinji to nosanga ka watu yaspis, pade ewa watu akik. Naria wo'u sampinoraa nantatiku pekatoko etu to neringgila ewa watu zamrud. 4 Pade nantatiku pekatoko etu naria wo'u rompulu bo ampa pekatoko ntanina to nipekatoko rompulu bo patamba'a totu'a. Ira nompasua pakea bula sanggani pade ri balengga ira naria songgo bulawa. 5 Nggari tatongo pekatoko magau etu nesuwu kila damo mparea newanta, pade nguu nu guntu damo nosinjono poguna. Ri ngayo pekatoko etu naria wo'u pituongu poindo najela. Poindo etu batuana papitu nosa nu Alatala. 6 Pade ri ngayo pekatoko etu naria wo'u sangele nikitaku ewa tasi to nalewayo mpu'u ewa kaca. Ri tatongona bo ri ntalili pekatoko etu naria patamba'a anu to natuwuna. Ri njumaongu koro ira naria mata, nabeloka ri ngayona nabeloka ri bengona. 7 Anu to natuwuna pamulana lenjena ewa singa, pade karomba'ana lenjena ewa japi tuamana. Katolumba'ana lenjena ewa manusia, pade kapatamba'ana lenjena ewa lowe bete to nembua. 8 Anu to natuwuna etu simbau aono kapina, pade ri njumaongu koro ira naria mata, nau ri wayo nu kapina. Eo wengi ira da'a nenonto nanguli, "Nagasa, nagasa, nagasa, Pue Alatala to Neliu Nggakuasa. I'a nariamo nggari lamba pamulana, pade we'i-we'i I'a naria. Pade I'a kana maria sampe ri kasae-saena." 9 Anu to natuwuna etu nantoiya bo nombabila bo nosukuru ri ja'i topekatoko ri pekatoko magau to natuwu sampe ri kasae-saena. Tempo ira nantoiya iwetu 10 rompulu bo patamba'a totu'a etu nekadede sampe ri tana ri ngayo ntopekatoko etu. Ira nombasomba I'a to natuwu sampe ri kasae-saena, pade ira nangala songgo bulawa nggari balengga ira mboto nitu'u ira ri ngayo pekatoko Alatala ewa tandai pebila ira ri ja'ina. Pade niuli ira iwe'i: 11 "O, Alatala, Pue kami, aga Komi to masipato ratoiya bo rabila kami, aga Komimo to nakuasana. Sabana Komimo to nompajadi pura-pura to naria. Nggari dotamu mboto sampe pura-pura etu najadi bo naria."
1 Naopu etu aku nanggita santa'u sura nilulu ri pale nggana ntopekatoko ri pekatoko magau etu. Sura etu nitulisi ntimali pade nipataka papitu segel ala da'a mamala rabuka ntau. 2 Pade nikitaku naria samba'a malaeka to naroso mpu'u narata nekutana ante suarana namangga mpu'u, "Isema to masipato mombalepa segel-segel pade mombabuka sura e'i?" 3 Tapi da'a ntoto ria kamba samba'a to masipato mombabuka sura etu pade mombabasa isina, nabeloka ri suruga, nabeloka ri dunia, nabeloka ri tambe nu dunia. 4 Nanggita etu nageomo aku nakanjodu-njodu ante nasusa mpu'u raraku sabana da'a ntoto naria samba'a tau to masipato mombabuka sura etu pade mombabasa isina. 5 Nanggita aku nageo naria samba'a totu'a nggari tatongo ira rompulu bo patamba'a nanguli ka aku, "Ne'e iko mageo. Kitamo! Nariamo padagi. Sangana Singa nggari bagia todea Yehuda, sulu Magau Daud. I'amo to masipato mombalepa papitu segel etu pade mombabuka sura etu." 6 Naopu etu nikitaku saongu Ana Bimba nenggore ri tatongo pekatoko magau bo patamba'a anu to natuwuna nitatiku totu'a-totu'a etu. Ri korona nikitaku walea baka, belana tempo I'a nipatesi nggaolu. Ri balenggana naria papitu tanduna bo matana wo'u pituongu. Pituongu matana etu batuana papitu nosa nu Alatala to nipakauna malau mpaka ri njumaongu dunia. 7 Pade naratamo Ana Bimba etu nangala sura nilulu etu nggari pale nggana ntopekatoko ri pekatoko magau etu. 8 Sangga Ana Bimba nangala sura etu nekadedemo patamba'a anu to natuwuna bo rompulu bo patamba'a totu'a ri ngayona mombasomba I'a. Ri pale ira samba'a bo samba'a naria kacapi bo tubu bulawa to niisi dupa to nawongi mpu'u. Dupa etu nombagambara posambaya ntodea topomparasaya Alatala. 9 Totu'a-totu'a etu nodade saongu dade to nabouna ka Ana Bimba etu iwe'i: "Komimo to masipato mangala sura etu pade mombalepa segelna. Sabana Komi nipatesi pade ante lei kamatemu etu Komi nantolo manusia nggari njumaongu dunia majadi bagia Alatala, etumo tau-tau nggari butu-butu ngata, pade nggari butu-butu todea to notesa mpengele-ngele basa ri dunia. 10 Ira nipajadimu magau-magau bo topanggeni-topanggeni agama to nanggeni pesomba ka Pueta Alatala. Pade ira kana moparenta ewa magau riara dunia e'i." 11 Naopu etu aku nanggita wo'u pade niepeku suara malaeka nadea, nonjobu-njobu bo juta-juta kadeana. Ira nantatiku pekatoko magau nosanggani-nggani ante patamba'a anu to natuwuna bo rompulu bo patamba'a totu'a etu. 12 Pade nongaremo ira ante suara to namangga mpu'u, "Ana Bimba to nisambale nggaolu etu masipato ratesata kuasana bo kakalumanana, notona bo karosona. I'amo to masipato rabila bo ratoiyata bo rapakabeteta sangana." 13 Pade niepeku wo'umo suara pura-pura to natuwu ri suruga, ri dunia, ri tambe nu dunia, pade ri tasi ante pura-pura nuapa riarana. Ira nodade iwe'i: "Topekatoko ri pekatoko magau bo Ana Bimba etu masipato ratoiya bo rabilata bo rapakabeteta sangana, pade kuasana masipato ratesata sampe ri kasae-saena." 14 Pade nesonomo patamba'a anu to natuwuna etu, "Amin!" Pade nekadedemo totu'a-totu'a etu sampe ri tana mombasomba Alatala.
1 Naopu etu nikitaku Ana Bimba etu nombalepa segel pamulana. Pade niepeku samba'a nggari tatongo patamba'a anu to natuwuna etu notesa ante suara namangga mpu'u ewa moni guntu bete. Niulina, "Kamaimo!" 2 Aku nanggita pade kitamo, ri ngayoku nariamo saongu jara bula nipesawi samba'a tau to nanjoko pana. Pade naria songgo niwai ka i'a, ewa songgo niposonggo ka tau padagi riara posipatesi. Pade nalaumo i'a ewa samba'a Tadulako malau mombadagi balina. 3 Naopu etu Ana Bimba etu nombalepa segel karonguna, pade niepeku anu to natuwuna karomba'ana nanguli, "Kamaimo!" 4 Pade nesuwu wo'umo saongu jara to nalei wuluna. Pade topesawi jara etu niwai kuasa mompoposinggarau manusia riara dunia ala ira mosipatesi. Pade i'a niwai ka wo'u samata guma to nabetena. 5 Naopu etu Ana Bimba etu nombalepa segel katoluonguna. Pade niepeku anu to natuwuna katolumba'ana nanguli, "Kamaimo!" Aku nanggita pade kitamo! Ri ngayoku naria wo'umo saongu jara to nawuri wuluna, pade topesawi jara etu nanjoko saongu potimba. 6 Naopu etu niepeku suara nggari tatongo patamba'a anu to natuwuna etu nanguli, "Oli nu ose sakilo nasimbayu ewa gaji saeo, pade oli nu tolukilo jole wo'u nasimbayu ewa gaji saeo. Aga ne'e rapakagero kayu-kayu zaitun bo walaa-walaa anggur." 7 Naopu etu Ana Bimba nombalepa segel kaampana. Pade niepeku suara nggari ja'i anu to natuwuna kapatamba'ana nanguli, "Kamaimo!" 8 Naliu etu nikitaku saongu jara to nangguni mpaa wuluna. Topesawi jara etu nosanga ka "Kamatea." Pade to nantuki i'a nggari purina nosanga ka "Dunia Ntomate." Ira romba'a etu niwai ka kuasa mompatesi sabagia nggari patabagia nggari pura-pura manusia riara dunia e'i. Naria to namate tempo posipatesi, naria to namate tempo kamateoro, naria to namate tempo ju'a mpendai, pade naria wo'u to namate nikoni binata-binata nasoa riara dunia. 9 Naopu etu Ana Bimba nombalepa segel kaalimana. Pade nikitaku ri wayo Meja Mpesomba naria wayo-wayo ntau namate to nipatesi sabana ira nompatolele Tesa nu Alatala pade natutu nompangaku ira topomparasaya i Pue Yesus. 10 Ira nongare sanggani ante suara to namangga mpu'u, "O Pue to Neliu Nggakuasa, pade to nagasa bo nanoa. Sakuyapa kasaena pade Komi mombatangara bo mombabalasi tau naja'a ri dunia to nompatesi kami e'i?" 11 Naopu etu ira samba'a bo samba'a niwai santonga baju bula. Pade nangulimo Alatala ka ira, "Posabaramo sampalaipa sampe maganamo kadeana roa-roa komi sampokarajaa bo sampesuwu-sampesuwu komi topomparasaya to rapatesi nasimbayu ewa komi." 12 Pade aku nanggita tempo Ana Bimba etu nombalepa segel kaonona. Sangga nilepanapa najadimo lingu bete pade mata eo najadi narumau ewa buya wuri. Pade wula najadi nawonda pura ewa lei. 13 Pade betu'e-betu'e ri langi nanawu sampe ri dunia nasimbayu ewa wua ara da'apa natasa naronto nggari pangana tempo nigagoya poiri bete. 14 Pade kaliu-liu nalipomo langi nasimbayu ewa ompa nilulu. Pade nolinjamo butu-butu bulu bo lewuto nggari peto'ona. 15 Tempo etu nalaumo pura-pura tau riara dunia netabuni riara bololia pade ri kele-kele watu ri buluna, nabeloka magau-magau, nabeloka topoparenta-topoparenta, nabeloka tadulako-tadulako, nabeloka tau-tau nakalumana, nabeloka tau-tau to naroso, nabeloka pura-pura tau najadi batua bo tau-tau da'a najadi batua. 16 Nongaremo ira ka bulu-bulu bo watu-watu, "Iwumo kami e'i! Tabuniakamo kami ala da'a mana rakita mata ntopekatoko ri pekatoko magau etu! Iwumo kami ala kami da'a mawela rau rara nu Ana Bimba etu! 17 Sabana naratamo eo to nipowiora rara manusia tempo Alatala bo Ana Bimba mompopesuwu rau rara ira. Da'a ntoto ria samba'a tau mamala mantaha mawela rau rara etu!"
1 Naopu etu aku nanggita patamba'a malaeka nekanggore ri patanjulapa dunia. Ira nombata'amaka poiri bete nggari patanjulapa dunia ala poiri etu ne'e makantawui ri tasi pade ri kabatana pade ri kayu-kayu rara mpangale. 2 Pade nikitaku wo'umo samba'a malaeka ntanina nesuwu nggari sabingga kamataeona. I'a nanggeni mere nggari ja'i Alatala to Natuwuna. Pade nongaremo i'a ante suara namangga ka patamba'a malaeka ntanina to niwai Alatala kuasa mompakagero dunia bo tasi. 3 Niulina, "Ne'epa ruru rapakagero komi dunia bo tasi bara kabatana bo kayu-kayu rara mpangale ane da'apa kami nombamere batua-batua nu Alatala ri kire ira ala ira ne'e mawela kasusa-kasusa etu." 4 Pade niepeku kadea ntau nimere ri kire ira iwetu, satu patampulu bo patanjobu mba'a. Ira nggari muli sampulu romba'a ana Yakub to niuli to Israel. 5 Nggari muli ira sampulu romba'a ana Israel niala simbau sampulu ronjobu mba'a kadeana. Nggari muli Yehuda sampulu ronjobu nimere. Iwetu wo'u nggari muli i Ruben sampulu ronjobu, nggari muli i Gad sampulu ronjobu, 6 muli Asyer sampulu ronjobu, muli i Naftali sampulu ronjobu, muli i Manasye sampulu ronjobu, 7 muli i Simeon sampulu ronjobu, muli i Lewi sampulu ronjobu, muli Isakhar sampulu ronjobu, 8 muli i Zebulon sampulu ronjobu, muli Yusuf sampulu ronjobu, pade nggari muli i Benyamin sampulu ronjobu. 9 Naopu etu aku nanggita wo'umo pade nikitaku manusia nadea mpu'u, da'a namala nibila kadeana. Ira etu topomparasaya nggari njumaongu dunia, nggari butu-butu ngata, nggari butu-butu todea to notesa mpengele-ngele basa ri dunia. Ira nenggore ri ngayo pekatoko magau bo Ana Bimba. Ira pura-pura nopakea bula pade ri pale ira naria tawa-tawa nggaluku. 10 Nongaremo ira sanggani ante suara namangga mpu'u, "Kamaimo kita mombatoiya bo mombabila Alatalata to nekatoko ri pekatoko magau! Kamaimo kita mombatoiya bo mombabila Ana Bimba, sabana iramo to nompakasalama kita!" 11 Pura-pura malaeka wo'u nekanggore nantatiku pekatoko magau, bo totu'a-totu'a, bo patamba'a anu to natuwuna. Pade nekadedemo malaeka-malaeka etu sampe ri tana ri ngayo pekatoko magau mombasomba Alatala. 12 Niuli ira, "Amin! Ratoiyata Alatalata! Rapakabeteta sangana! Ratesata kanotona, raulita tarima kasi ka I'a. Rabilata I'a pade ratesata kuasana bo barakana sampe ri kasae-saena. Amin!" 13 Naopu etu naria samba'a totu'a nggari ja'i ira rompulu bo patamba'a etu nompekutana aku iwe'i: "Isema tau-tau to nopakea bula etu? Nggari umba ira?" 14 Nesonomo aku, "Tua, komimo to nangginjanina, da'a aku." Pade nangulimo i'a ka aku, "Ira etumo tau nipakasalama nggari pepandasa to neliu mpu'u kaja'ana. Ira nantapasi pakea ira riara lei nu Ana Bimba sampe nabula. 15 Etu sampe ira nekanggore ri ngayo pekatoko Alatala. Eo wengi da'a nenonto ira nepue bo nombasomba Alatala riara Sapo Mpepuena. Pade Alatala to nekatoko ri bunggu pekatoko magau etu kana mosanggani-nggani ante ira ala manggalendu ira. 16 Ira etu da'a mana mombarasai oro nta'i bara bai ntambolo. Pade wana nu eo to napane-panena mana mompandasa ira. 17 Sabana Ana Bimba to naria ri ngayo pekatoko magau etu kana mompoewu ira. I'a kana manggeni ira mpaka ri mata ue to mombawai katuwua mabelo. Pade Alatala mboto kana mombape'e pura-pura ue mata nggari mata ira."
1 Sangga Ana Bimba nombalepa segel kapituonguna, nalino mpaa riara suruga kira-kira santongo jaa kasaena. 2 Pade aku nanggita pitumba'a malaeka to nenggore ri ngayo Alatala. Ira niwai ka pituongu kololio. 3 Naopu etu naria samba'a malaeka ntanina narata nenggore ri ngayo Meja Mpesomba. Malaeka etu nanggeni santonga tubu bulawa rapotunju dupa. Pade i'a niwai nadea dupa ala ratunju majadi pesomba ka Alatala mosanggani-nggani ante posambaya nggari ja'i pura-pura topomparasaya. Pade nitunjuna dupa etu ri Meja Mpesomba to nipowia nggari bulawa to naria ri ngayo pekatoko Alatala. 4 Tempo i'a nombatunju dupa etu, rangasuna nosumoa ri ngayo Alatala mpasanggani-nggani ante posambaya ntodea topomparasaya. 5 Naopu etu nialana tubu mpotunju dupa etu pade niisina ante apu nggari bunggu Meja Mpesomba. Pade nitajiakana mpaka riara dunia. Sangga nitajiakapa apu etu nepogumo guntu bete pade kila damo mparea pade najadimo lingu. 6 Naopu etu pitumba'a malaeka to niwai ka pituongu kololio etu nompakasadia korona mompopomoni kololiona samba'a bo samba'a. 7 Pade malaeka pamulana nompopomoni kololiona. Kaliu-liu nadunggumo uja es bo apu nogalo lei sampe riara dunia ante naromba mpu'u. Pade sabagia nggari tolubagia dunia naopu sanggani nikoni nu apu. Sabagia nggari tolubagia kayu-kayu ri dunia naopu sanggani nikoni nu apu, pade pura-pura kawoko naramata wo'u nikoni nu apu etu. 8 Naopu etu malaeka karomba'ana nompopomoni kololiona. Kaliu-liu naria sangele ewa bulu to nalanga mpu'u to najela ante apu nitajiaka riara ntasi. Pade sabagia nggari tolubagia tasi nabali najadi lei. 9 Pade namate sangganimo sabagia nggari tolubagia nggari pura-pura to natuwu rarantasi. Pade naropumo sabagia nggari tolubagia nggari pura-pura sakaya to nosumomba ri bunggu ntasi. 10 Naopu etu malaeka katolumba'ana nompopomoni kololiona. Kaliu-liu nanawumo saongu betu'e bete nggari langi to najela ewa sulo. Betu'e etu nanawu nawela sabagia nggari tolubagia nggari pura-pura ue bo mata ue ri dunia. 11 Sanga betu'e etu "Pa'i." Jadi sangga nawela betu'e etu sabagia nggari tolubagia nggari ue bo mata ue etu najadi napa'i sanggani. Pade nadea manusia namate sabana nanginu ue to napa'i etu. 12 Naopu etu malaeka kapatamba'ana nompopomoni kololiona. Kaliu-liu nageromo sabagia nggari tolubagia nggari mata eo, wula bo betu'e-betu'e, sampe najadi narumau. Jadi patajaa ri eona mata eo da'a nareme, pade wa'a wo'u wula bo betu'e-betu'e tempo nggawengina. 13 Naopu etu aku nanggita wo'u pade kitamo, naria samba'a tonji lowe nembua ri laerawa. Niepeku wamba nu lowe etu notesa ante suara to namangga. Niulina, "Mandasamo! Mandasamo! Mandasamo tau-tau to naja'a to neto'o ri dunia tempo toluongupa kololio rapopomoni tolumba'a malaeka etu."
1 Naopu etu malaeka kalimamba'ana nompopomoni kololiona. Sangga nomonipa kololiona etu nikitaku saongu betu'e to nanawumo nggari langi sampe ri dunia. Betu'e etu niwai ka kunci pewobo nu lowu to da'a namala nitudu kandalana. 2 Pade betu'e etu nombabea pewobo lowu etu. Naopu etu nesuwumo rangasu bete nggariara lowu ndala etu nasimbayu ewa rangasu tinalu bete to nitunju ntau. Pade mata eo bo lombona najadi narumau sabana nggari rangasu to nadea to nesuwu nggariara lowu ndala etu. 3 Pade nggariara rangasu etu nesuwumo mboko-mboko nalau netu'u ri dunia. Mboko-mboko etu niwai ka kuasa mekiki ante neliu mpu'u kabisana ewa kabisa pekiki ndorokaa to naria riara dunia. 4 Mboko-mboko etu nitagi mompakamate kawoko bara kayu bara tuja-tuja ntanina riara dunia. Aga manusia to da'a naria mere nu Alatala ri kirena to nipaloga rakiki mboko etu. 5 Mboko-mboko etu da'a wo'u nipaloga mompatesi manusia ri dunia. Ira aga nipaloga mompandasa ira mpakaja'a-ja'a limambula kasaena. Ju'a to nirasai manusia to nikiki mboko etu nasimbayu ewa ju'a to nirasai ntau ane nikiki ndorokaa. 6 Riara limambula kasaena etu manusia to nikiki mboko-mboko etu kana mandasa mpu'u niepe sampe ira tunggai mangelo mamate, tapi da'a mamala. Ira kana madota mpu'u mamate, tapi da'a ntoto mamala. 7 Koro mboko-mboko etu nasimbayu ewa jara to nipakasadia malau mosipatesi. Ri balengga ira naria sangele nolenje ewa songgo bulawa. Pade lenje ira etu nasimbayu ewa manusia. 8 Wo'o mboko etu nasimbayu ewa wo'o besi to nandoe. Pade ngisi ira ewa ngisi singa. 9 Bombara ira nitutu nu ruke-ruke ewa baju ase. Pade wamba kapina ewa wamba doka nadea mpu'u niumbu jara nangowa malau mosipatesi. 10 Lelo mboko etu nasimbayu ewa lelo ndorokaa, pade bisa lelona etu wo'u nasimbayu ewa kabisa pesiu nu lelo ndorokaa. Ante lelona etu ira namala mompakandasa manusia limambula kasaena. 11 Naria samba'a magau to najadi balengga ira, i'amo malaeka to nakuasa nombabea pewobo lowu ndala to da'a namala nitudu etu. Sangana riara Basa Ibrani, Abadon, pade riara Basa Yunani Apolion. Batua nu sanga etu "Toperopu." 12 Pepandasa pamulana naliumo, tapi danariapa rongaya pepandasa ntanina to marata. 13 Naopu etu malaeka kaonomba'ana nompopomoni kololiona. Pade niepeku naria suara notesa nggari tatongo patanjidu Meja Mpesomba to nipowia nggari bulawa to naria ri ngayo Alatala. 14 Suara etu nanguli ka malaeka kaonomba'ana to nanjoko kololio etu, "Wolemo patamba'a malaeka to niso'o ri Ue Efrat etu." 15 Jadi patamba'a malaeka etu niwolenamo. Patamba'a malaeka etu nipakasadia mamimo nggari nggaolu ala ri mpae bo wula pade ri eo bo jaa to nipakatantumo ira mamala mompatesi sabagia nggari tolubagia nggari pura-pura manusia riara dunia. 16 Tantara-tantara topesawi jara to nantuki ira etu roatu juta kadeana. Ninjaniku kadeana sabana naria tau nanguli ka aku. 17 Iwe'imo jara-jara pade topesawi-topesawi jara to nikitaku riara mpanggitaku: Topesawi jara etu nobaju ase. Baju ira etu nalei ewa jela apu, pade nagawu ewa rangasu apu, pade nangguni ewa watu to najelana. Ane jara-jara etu balenggana ewa balengga singa pade nggari ngangana nesuwu apu, rangasu bo watu to najelana. 18 Nggari tolungaya pepandasa etu sabagia nggari tolubagia nggari manusia ri dunia nipatesi, etumo nggari apu, rangasu, pade watu to najelana to nesuwu nggari nganga jara-jara etu. 19 Kuasa jara-jara etu nompatesi manusia nggari nganga ira, pade nggari lelona wo'u. Sabana ri lelo jara-jara etu naria sangele nolenje mpobalengga ule to nete'o. Jadi ante lelona jara-jara etu nompandasa manusia. 20 Manusia ntanina to da'a namate riara pepandasa-pepandasa etu da'a ntoto najea nggari panggawia pale ira to naja'a. Etumo ira da'a nenonto nombasomba seta-seta pade parantau-parantau to nipowia ira mboto nggari bulawa, nggari salaka, nggari tambaga, nggari watu, pade nggari kayu, etumo parantau to da'a naria matana mekita bo da'a wo'u naria talingana meepe pade da'a nokada sampe mamala molumako. 21 Ira da'a wo'u najea nggari pokainggu ira to naja'ana, etumo da'a madota menonto mepatesi, pade da'a madota menonto mombadoti tau. Ira da'a madota menonto mogau sala ante tau da'a rongona mboto, pade ira da'a ntoto madota menonto mangangga.
1 Naopu etu aku nanggita samba'a malaeka ntanina to naroso mpu'u nana'u nggari suruga. I'a nibungu kulimu pade balenggana niwewe sampinoraa. Lenjena ewa kareme eo pade kadana ewa tinja to najela ewa apu. 2 Kada ngganana nombalonggo tasi pade kada njidina nombalonggo kabatana. Ri palena naria saongu buku nggedi to natibukamo. 3 Pade nongaremo i'a ante suara to namangga mpu'u, ewa kagai ngao nu singa. Sangga nongarepa malaeka etu nepogumo pituongu guntu damo nosinjono poguna notesa ewa manusia. 4 Naopu pituongu guntu etu notesa aku nadota mantulisi nuapa to niuli suara guntu etu. Tapi naria suara nggari suruga nanguli ka aku, "Tabuniakamo tesa to niuli suara nggari pituongu guntu etu! Ne'e mutulisi etu!" 5 Naopu etu malaeka to nikitaku pani'a to nombalonggo tasi bo kabatana nangonggotaka pale ngganana mpaka ri langi. 6 Pade nojanjimo i'a ante sanga Pue Alatala to natuwu sampe ri kasae-saena, to nompajadi langi, dunia bo tasi pade pura-pura isina. Niuli malaeka etu, "Tempona da'a mana mamala rabonto-bonto. 7 Ane malaeka kapitumba'ana etu mompopomoni kololiona, tempo etumo Alatala kana mompakadupa niana to nasaemo nitabuniaka, ewa to niulina ka batua-batuana nggaolu, etumo nabi-nabi to nompasimbayu tesa nggari ja'ina." 8 Naliu etu suara to niepeku nggari suruga pani'a nanguli wo'umo ka aku, "Kalaumo iko, alamo buku nggedi to natibukamo to nisoko malaeka to nombalonggo tasi bo kabatana etu." 9 Jadi nalaumo aku nompakamosu malaeka etu pade niuliku ka i'a, "Wai ka akumo buku nggedi etu." Nangulimo i'a ka aku, "Alamo bo konimo mpakaopu buku e'i. Riara nta'imu buku e'i kana majadi mapa'i, tapi riara ngangamu kana murasai namomi mpu'u ewa ue wani." 10 Pade nialakumo buku nggedi nggari pale malaeka etu, pade nikonikumo sampe naopu. Riara ngangaku namomi nirasaiku ewa ue wani. Tapi sangga niomeku napa'i nirasaiku riara nta'iku. 11 Naopu etu aku nipakau wo'umo, "Iko kana mompasimbayu tesa nggari ja'i Alatala ka tau dea, etumo todea nggari mpengele-ngele ngata ri dunia to notesa mpengele-ngele basa, pade ka magau-magau wo'u."
1 Naopu etu aku niwai ka sanggoto lembau nolenje mpokayu rapotomo. Pade aku niparenta iwe'i: "Kalaumo iko mombatomo Sapo Mpepue ante Meja Mpesomba. Pade bila wo'u sakuya kadea ntau nepue riara Sapo Mpepue etu. 2 Tapi ne'e mutomo lalowo ri sawaliku Sapo Mpepue etu, sabana lalowo etu niwai ka tau-tau da'a to Yahudi. Ira kana mompakatantoru ngata Yerusalem to nagasa patampulu bo rombula kasaena. 3 Ri tempo etu Aku kana mombasuro romba'a tau mompasimbayu tesa nggari ja'iku. Ante mompake baju to nipowia nggari karu ewa tau nasusa rara ira kana mompasimbayu tesa nggari ja'iku sanjobu roatu bo onompulu eo kasaena." 4 Romba'a tau etu nirapaka ewa rompu'u kayu zaitun bo rongu kada mpoindo to nipopekanggore ri ngayo Pue nu njumaongu dunia. 5 Ane maria tau madota mompakaja'a romba'a tau etu, kana maria apu mesuwu nggari nganga ira mompakaropu bali-bali ira etu. Isema-sema madota mompakaja'a ira kana rapatesi iwetu. 6 Ira romba'a etu nakuasa manta'amaka ala uja da'a madunggu nggari langi sakuya kasaena ira mompasimbayu tesa nggari ja'i Alatala. Ira wo'u nakuasa ri salu-salu nu ue ala mombabali ue-ue etu majadi lei. Pade ira nakuasa mompandasa dunia ante mpengele-ngele kasusana nepia rapodota ira. 7 Ane maopumo ira romba'a mompasimbayu tesa nggari ja'i Alatala etu, kana marata sangele binata naja'a mosibali ka ira. Binata naja'a etu to mesuwu nggariara lowu ndala to da'a namala nitudu kandalana. I'a kana mombadagi romba'a tau pani'a pade mompatesi ira. 8 Pade watabaku ira romba'a etu kana rapalamba nakandoo ri jala jama riara ngata bete, etumo ri peto'o Pue ira nipatesi ri kayu parika. Ngata bete etu nidae Sodom bo Masir sabana naja'a mpu'u todeana. 9 Tolumbengi santongo kasaena watabaku ira romba'a da'a rapaloga ratana ri dayo, aga rakita ntau nggari njumaongu dunia, nggari butu-butu ngata, bo butu-butu todea to notesa nompengele-ngele basa ri dunia. 10 Manggita etu tau-tau to neto'o ri dunia kana madamba mpu'u. Ira kana mosusa madamba-damba bo mosiwai ka parasee samba'a bo samba'a, sabana namatemo romba'a tau etu to mpu'u-mpu'u nompandasa tau pura-pura to neto'o ri dunia. 11 Tapi nikitaku naopu tolumbengi santongo etu, narata balimo nosa ira nggari ja'i Alatala. Natuwu balimo ira pade kaliu-liu nekanggore ri setu. Nanggita etu naeka mpu'umo pura-pura tau. 12 Naopu etu nariamo suara nggari suruga to namangga mpu'u nanguli ka ira romba'a, "Kamai, peponemo wemai!" Pade neoremo ira mpaka ri suruga riara kulimu nikita mata nu tau-tau najadi bali ira etu. 13 Ri tempo etu wo'u sampegoli najadimo lingu bete. Pade nageromo sabagia nggari sampulu bagia nggari ngata bete etu, pade pitunjobu mba'a tau namate sabana lingu bete etu. Nanggita etu nawiora mpu'umo rara tau-tau to danatuwu ri setu, pade ira nanguli, "Nabete mpu'u kuasa nu Alatala to naria ri suruga!" 14 Jadi naliumo pepandasa karongganina. Mana masaeka pepandasa katolungganina wo'u kana majadi. 15 Naopu etu malaeka kapitumba'ana nompopomoni kololiona. Pade kaliu-liu nariamo suara-suara ri suruga nongare ante namangga mpu'u iwe'i: "We'i-we'i pura-pura poparenta ri dunia e'i najadi poparenta Pueta bo poparenta Magau to Mompakasalama to nijanji Alatala. I'a kana moparenta sampe ri kasae-saena!" 16 Pade rompulu bo patamba'a totu'a to nekatoko ri pekatoko ri ngayo Alatala nekadede sanggani sampe ri tana mombasomba Alatala. 17 Niuli ira, "O, Pue Alatala to nabete mpu'u kuasamu to nariamo nggari lamba pamulana pade bate-batena naria we'i-we'i, kami nanguli tarima kasi ka Komi apa nipopokita Komimo kuasamu to nabetena. Nompamulamo Komi moparenta! 18 Tau-tau da'a nosinjani ante Pue nanggarau. Naratamo ntoana Pue mompopesuwu rau rara ka ira. Naratamo ntoana mombatangara tau-tau to namate. Pade narata wo'umo ntoana mombawai tambo ka batua-batuamu, etumo ka nabi-nabi to nompasimbayu tesamu, pade ka pura-pura todeamu, ira to nekou ri ja'imu, Pue, nabeloka tau to naede katuwuna, nabeloka tau to nalanga katuwuna. Naratamo ntoana Pue mompakaropu tau-tau to nompakagero dunia e'i." 19 Naopu etu natibeamo pewobo Sapo Mpepue ri suruga pade riara sapo etu nikitamo Peti Pojanji Alatala. Tempo etu kila damo mparea pade guntu bete damo nosinjono poguna. Najadimo lingu bete ante uja es to naromba mpu'u.
1 Naliu etu natikitamo saongu tandai ri langi to mpu'u-mpu'u nipogumaa. Naria samba'a besi nopakea mata eo. I'a nekanggore ri bunggu wula, pade ri balenggana naria songgo to nipowia nggari sampulu rongu betu'e. 2 Besi etu natianamo da'a mana masaeka moana sampe I'a nodadeo sabana ju'a mpoana. 3 Pade natikita wo'umo saongu tandai ntanina ri langi to mpu'u-mpu'u nipogumaa. Naria sanggayu ule bete to nalei, sangana ule naga. Ule naga etu papitu balenggana pade sampulu tanduna. Butu-butu balenggana naria songgo magau. 4 Ante lelona ule naga etu nangumbunjai sabagia nggari tolubagia nggari betu'e ri langi, pade nitajiakana mpaka ri dunia. I'a nekanggore ri ngayo besi to madota moana etu ala mamala i'a mangome ana nu besi etu ane mesuwumo. 5 Pade besi etu nangote samba'a ngana langgai. Ngana etumo to mombaewu njumaongu dunia ante karosona ewa karoso lembau ase. Da'apa ule naga namala mangome I'a sampegoli ngana etu niore mpaka ri ja'i Alatala ri ngayo pekatoko magau ri suruga. 6 Naopu etu nalaimo besi etu mpaka ri karawa baina. Ri setu i'a neto'o ri peto'o to nipakasadia Alatala mamimo ka i'a. Ri peto'o etu i'a nipiara sanjobu roatu bo onompulu eo kasaena. 7 Naria posibali riara suruga. Tadulako malaeka to nosanga ka i Mikhael ante malaeka-malaeka to nomporoa i'a nosibali nangewa ule naga etu. Pade ule naga etu ante malaeka-malaeka to nomporoa i'a nosibali nangewa Mikhael. 8 Tapi ule naga ante malaeka-malaekana da'a nompakule nangewa Mikhael ante roa-roana. Ira nidagimo pade da'a mana nipaloga neto'o ri suruga. 9 Ule naga etu nipopalai nggari suruga pade i'a nitajiaka mpaka riara dunia nosanggani-nggani ante malaeka-malaeka to nantuki i'a. I'a etu ule ntu'a, to nosanga ka Magau nu Seta, atau Seta to nombabagiu manusia ri njumaongu dunia. 10 Naopu etu aku nangepe suara riara suruga to namangga mpu'u nanguli, "We'i-we'i naratamo ntoana Alatala mompakasalama todeana. Nipopokitanamo kuasana, nompamulamo I'a moparenta ewa samba'a magau. Pade naratamo Magau to Mompakasalama mompopokita kuasana. Sabana nitajiakamo nggariara suruga Magau nu Seta etu to nombasalaraka todea topomparasaya eo wengi ri ngayo Pueta Alatala. 11 Tapi ira nombadagi Magau nu Seta etu ante kuasa nggari lei nu Ana Bimba etu. Ira nombadagi i'a ante tesa posabi ira. Ira da'a nompotowe katuwu ira, pade da'a ntoto naeka nau sampe mamate. 12 Sabana etu, komi to neto'o ri suruga kana madamba-damba. Tapi nandasamo dunia bo tasi sabana nana'umo Magau nu Seta ri ja'imu. Narau mpu'umo rarana sabana ninjanina logana mangewa damo sampalai." 13 Tempo nanotomo ka ule naga etu i'a nitajiaka riara dunia, nompamulamo i'a nombaraga besi to lako nangote ngana langgai etu. 14 Tapi besi etu niwai ka ronggapi kapi to nabetena ewa kapi tonji lowe ala i'a mamala membua mpaka ri peto'o to nipakasadia ka i'a ri karawa baina. Ri setu i'a kana rapiara tolumpae santongo kasaena, pade i'a rakalendu ala da'a mamala rakuya ule naga etu. 15 Ule naga etu nombasuparaka ue bete ewa karona nggari ngangana mpaka ri ja'i besi etu ala mombalomeaka i'a. 16 Tapi dunia nantulungi besi etu. Kaliu-liu nganga nu dunia natibeamo pade ue bete to nisuparaka nggari nganga ule naga etu naopu pura niomena. 17 Nanggita etu narau mpu'umo ule naga ri ja'i besi etu, sampe i'a nalau nombasuaki muli-muli ntanina nu besi etu, etumo tau pura-pura to natutu nantuki parenta-parenta nu Alatala pade bate-batena nangaku Yesusmo Pue ira. 18 Naopu etu nekanggoremo ule naga etu ri wiwi ntalinti.
1 Naliu etu aku nanggita saongu binata nesuwu nggariara ntasi. Binata etu sampulu tanduna pade papitu balenggana. Butu-butu tanduna naria songgo ewa songgo magau, pade ri butu-butu balenggana nitulisi sanga to naria batuana to nompakakedi Alatala. 2 Binata to nikitaku etu ewa lenje binata to niuli "macan tutul," pade kadana ewa kada binata to niuli "beruang," bo sumbana ewa sumba nu singa. Pade ule naga etu nombawai ka binata etu baraka nggari ja'ina mboto bo pekatoko magauna pade kuasa to nabetena. 3 Saongu nggari pituongu balengga binata etu ewa naria bela naja'a to namala mompakamate i'a. Tapi bela etu naorimo. Pura-pura isi dunia nogumaa mpu'u nanggita binata etu, pade ira pura-pura nantuki i'a. 4 Ira nombasomba ule naga etu sabana i'a nombawai kuasa ka binata etu pade ira nombasomba binata etu wo'u. Niuli ira, "Da'a ntoto naria to nasimbayu ka binata e'i! Da'a ntoto wo'u naria to nabia mosibali ka i'a!" 5 Binata etu nipaloga manguli tesa-tesa to nasombo-sombona pade mompakakedi Alatala. I'a wo'u nipaloga moparenta patampulu bo rombula kasaena. 6 Jadi nompamulamo i'a nompakakedi Alatala pade nompakaja'a sangana. Iwetu wo'u peto'o Alatala ri suruga bo pura-pura to neto'o ri setu nipakakedina. 7 I'a nipaloga wo'u mosibali ka todea topomparasaya pade mombadagi ira. Pade niwai ka i'a wo'u kuasa momparenta manusia ri njumaongu dunia, etumo tau ri butu-butu ngata, butu-butu todea to notesa mpengele-ngele basa ri dunia. 8 Pura-pura manusia to neto'o ri bengo dunia e'i kana mombasomba binata etu, etumo pura-pura tau to da'a nitulisi sangana riara Buku Katuwua tempo dunia da'apa nipajadi, etumo buku to naria ri ja'i Ana Bimba to nisambale. 9 Sabana etu isema-sema naria talingana, epemo mpakabelo-belo tesa e'i. 10 Isema-sema to nipakatantu mamimo ratawani, kana ratawani. Isema-sema to nipakatantu mamimo rapatesi ante guma, kana rapatesi ante guma. To napokona ri se'i todea topomparasaya kana maroo tempo nipandasa bo ne'e mokanggaura momparasaya. 11 Naliu etu aku nanggita wo'umo sangele binata naja'a ntanina nesuwu nggariara ntana. Binata etu rongu tanduna nolenje mpotandu ana bimba, pade suarana ewa suara ule naga. 12 Binata karongelena etu ewa wakele nu binata naja'a pamulana. Jadi pura-pura kuasa binata pamulana etu nipake binata karongelena etu. Pura-pura manusia ri dunia nipasu'una mombasomba binata pamulana to naria bela to naja'a mpu'u to naorimo. 13 Binata karongelena etu nompowia tandai-tandai to nipogumaa. Ri ngayo ntau pura-pura nipopana'una apu nggari langi nanawu riara dunia. 14 Nibagiuna pura-pura tau ri dunia ante nompowia tandai-tandai etu ante baraka to niwai binata pamulana ka i'a. Ira nipakauna mompowia pade mompopekanggore saongu pinoito nabete nolenje mpobinata pamulana to nitimbe mpakaja'a tapi i'a bate-batena natuwu. 15 Binata karongelena niwai kuasa mombawai nosa ka pinoito etu sampe pinoito etu namala motesa. Pade niparentana isema-sema da'a madota mombasomba pinoito etu kana rapatesi. 16 Pura-pura tau nipasu'u binata etu mantarima tandai ri pale nggana atau ri kire ira, nabeloka tau-tau to naede katuwuna, nabeloka tau-tau to nalanga katuwuna, nabeloka tau-tau nakalumana nabeloka tau-tau nakasiasi, nabeloka tau-tau najadi batua nabeloka madika-madika. 17 Da'a ria samba'a tau namala mangoli atau mobalu-balu nuapa-nuapa ane da'a naria tandai etu ri pale atau ri kire ira. Tandai etu sanga nu binata pamulana mboto atau nomoro to nompakanoto sangana etu. 18 Ri se'i kana paraluu tau manoto. Tau to mata'u mamala mombabila nomoro-nomoro nggari sanga binata etu, sabana nomoro etu nombagambara sanga samba'a manusia. Nomorona etumo onoatu onompulu bo aono.
1 Naliu etu aku nanggita wo'umo pade kitamo, naria Ana Bimba nekanggore ri bunggu Bulu Sion. Nosanggani-nggani ante I'a naria satu patampulu bo patanjobu mba'a tau to naria sanga Ana Bimba bo sanga Umana Alatala nitulisi ri kire ira. 2 Pade niepeku wamba nggari suruga to nagai mpu'u ewa soo nu ue bete pade ewa pogu guntu bete to naro'ona mpu'u. Wamba to niepeku etu ewa moni musi nggari ja'i ntopomore kacapi tempo ira nokanda kacapina. 3 Pade ira satu patampulu bo patanjobu mba'a to nitolo Ana Bimba nggariara dunia nodade sangaya dade to nabouna ri ngayo pekatoko Alatala bo patamba'a anu to natuwuna bo totu'a-totu'a to nantatiku pekatoko Alatala etu. Dade ira etu da'a namala nipeguru tau-tau ntanina, aga ira satu patampulu bo patanjobu mba'a etu. 4 Ira etumo tau-tau nagasa to da'a sanggani nosampaturu ante besi. Ira nantuki Ana Bimba ri umba-umba nikalauna. Iramo to nitolo nggari tatongo manusia ri dunia pade nijuju ka Alatala bo Ana Bimba nasimbayu ewa tau nombawai asele ntinalu pamulana ka Alatala. 5 Ira da'apa sanggani nodawa, pade da'a ntoto ria sala ira nau aga sakedi. 6 Pade aku nanggita wo'umo samba'a malaeka ntanina nembua ri laerawa. I'a nanggeni Kareba Belo to da'a nabali sampe ri kasae-saena ka njumaongu manusia ri dunia, etumo ka tau ri butu-butu ngata, ka butu-butu todea to notesa mpengele-ngele basa ri dunia. 7 Notesamo i'a ante suara to namangga mpu'u, "Pekoumo ri ja'i Alatala, bilamo bo toiyamo kabete kuasana! Sabana naratamo tempona Alatala mombatangara manusia! Pepuemo ka Alatala to nompajadi langi, dunia bo tasi pade pura-pura mata nu ue!" 8 Naopu etu naria malaeka karomba'ana nantuki malaeka pamulana. Nangulimo i'a, "Nageromo! Nageromo ngata bete Babel sabana pue ngata etu nanggeni tau nggari umba-umba ri dunia mompasiala pokainggu ira nogau sala nasimbayu ewa tau nanggeni roana manginu sampe malangu!" 9 Naopu etu naria malaeka ntanina katolumba'ana nantuki malaeka karomba'ana etu. Nongaremo i'a ante suara namangga mpu'u iwe'i: "Tau-tau to nombasomba binata naja'a ante pinoitona pade nantarima tandai binata etu ri kirena bara ri palena, 10 tau-tau etu kana rapawela rau rara nu Alatala to naja'a mpu'u nasimbayu ewa tau nipasu'u manginu panginu to napa'i mpu'u. Da'a ntoto rapakakura pesuku ka ira. Ira pura-pura kana rapandasa riara apu bo watu-watu najela riara mpanggita malaeka-malaeka to nagasa bo Ana Bimba etu. 11 Rangasu apu to nompandasa tau-tau etu da'a maopu-opu mosumoa sampe ri kasae-saena. Eo wengi da'a ria kaopu-opuna pepandasa ira to nombasomba binata naja'a etu ante pinoitona pade to nantarima tandai sanga binata etu ri koro ira." 12 To napokona ri se'i todea topomparasaya Alatala kana maroo momparasaya tempo nipandasa, etumo ira to nantuki parenta-parenta Alatala bo naroo nomparasaya i Pue Yesus. 13 Naopu etu aku nangepe suara nggari suruga to nanguli, "Tulisimo tesa e'i. Nompamula we'i-we'i nabelo mpu'umo tau-tau to natuwu nosaongu rara ante i Pue sampe namate." Pade nesonomo Nosa Nagasa nu Alatala, "Nakono mpu'u etu. Ira masipato menonto nggari panggawia ira to natomona sabana asele nu panggawia ira etu kana mosanggani-nggani ka ira." 14 Naopu etu aku nanggita wo'umo pade kitamo, naria kulimu to nabula mpu'u. Ri bunggu nu kulimu etu naria samba'a tau nekatoko, lenjena ewa Anu nu Manusia. Ri balenggana naria songgo bulawa pade ri palena naria samata sarenggo to natajana. 15 Naopu etu naria malaeka ntanina nesuwu nggari Sapo Mpepue. Pade nongaremo i'a ante suara namangga mpu'u ka tau nekatoko ri bunggu kulimu etu, "Wiatakamo sarenggomu etu, sombemo we'i-we'i, sabana temponamo mosombe! Natasamo isi dunia!" 16 Jadi tau nekatoko ri bunggu kulimu etu nombawiataka sarenggona ri dunia pade isi dunia nisombenamo. 17 Naopu etu nikitaku samba'a malaeka ntanina nesuwu nggari Sapo Mpepue ri suruga. I'a wo'u nanjoko samata sarenggo to natajana. 18 Pade narata wo'umo samba'a malaeka ntanina nggari Meja Mpesomba. I'amo to nakuasa nanggatono apu ri Meja Mpesomba etu. Nongaremo i'a ante suara namangga mpu'u ka malaeka to nanjoko sarenggo to nataja etu, "Wiatakamo sarenggomu etu pade tirampamo wua anggur ri dunia, sabana natasamo wua anggur etu." 19 Jadi malaeka to nipakau iwetu nombawiataka mpu'umo sarenggona pade nitirampanamo wua anggur etu nggari batana, pade nitendeakana mpaka riara peto'o pompea wua anggur. Powiana etu nombagambara tempo Alatala mompopesuwu rau rarana ri ja'i ntau to naja'a pokaingguna. 20 Jadi wua anggur etu nipea ri peto'o pompea wua anggur etu ri sawaliku ngata. Pade noilimo lei nggari peto'o etu ewa ue karona betena, kakawao poili lei etu toluatu kilo pade kandalana namosu rongu metere.
1 Naopu etu aku nanggita ri langi naria sangelepa tandai nabete to nipogumaa. Naria pitumba'a malaeka ante pitungaya pepandasa kaopuna. Ante pepandasa kaopuna etu kana maopumo rau rara nu Alatala mompokarau manusia riara dunia. 2 Pade nikitaku sangele ewa tasi kaca nogalo apu. Pade ri wiwi ntasi kaca etu aku nanggita tau dea nenggore. Tau-tau etu iramo to nombadagi binata naja'a sabana ira da'a ntoto nombasomba i'a, pade ira da'a nombasomba pinoito binata etu, pade ira da'a nantarima tandaina, etumo nomoro to nombagambara sangana. Ira pura-pura nenggore ri wiwi ntasi etu nanjoko kacapi to niwai Alatala ka ira. 3 Pade nodademo ira dade nabi Musa, batua nu Alatala nggaolu. Pade nipodade ira dade nombabila Ana Bimba iwe'i: "Pue Alatala to Neliu Nggakuasa, neliu mpu'u kabetena bo kabelo powiamu. Nanoa bo nakono pura-pura pokainggumu. Komimo Magau nu pura-pura manusia ri dunia. 4 Pura-pura manusia kana mekou ri ja'imu, Pue. Ira kana mombabila bo mombatoiya sangamu, sabana aga i Pue to mpu'u-mpu'u nagasa. Pura-pura tau ri dunia kana marata mombasomba Komi, Pue, sabana natikitamo pura-pura pombabutusimu nanoa." 5 Naopu etu aku nanggita wo'umo pade kitamo, natibeamo Peto'o to Neliu Nggagasa riara Sapo Mpepue ri suruga. 6 Pade nggariara Sapo Mpepue etu nesuwumo pitumba'a malaeka nanggeni pitungaya pepandasa kaopuna etu. Pakea ira nipowia nggari kae to nabula ntoto damo neringgila, pade pompo'u bombara ira nipowia nggari bulawa. 7 Pade samba'a nggari patamba'a anu to natuwuna nombawai ka pitumba'a malaeka etu pituntonga tubu bulawa niisi naponu ante rau rara nu Alatala to natuwu sampe ri kasae-saena. 8 Pade kaliu-liu Sapo Mpepue ri suruga naponu ante rangasu apu nesuwu nggari ja'i Alatala to nabaraka bo nakuasa mpu'u. Da'a ria samba'a namala mesua riara Sapo etu ane da'apa naopu pitungaya pepandasa to nikeni pitumba'a malaeka etu.
1 Naopu etu aku nangepe suara nggariara Sapo Mpepue to namangga mpu'u nanguli ka pitumba'a malaeka etu, "Kalaumo komi, tubarakamo isi tubu-tubu to naponu ante rau rara nu Alatala etu riara dunia." 2 Nangepe etu nalaumo malaeka pamulana nombatubaraka isi tubuna riara dunia. Pade sampegoli neumbamo bisu-bisu naja'a to naju'a mpu'u ri koro ntau pura-pura to naria tandai binata naja'a etu pade tau pura-pura to nombasomba pinoito binata etu. 3 Naopu etu malaeka karomba'ana nombatubaraka isi tubuna riara ntasi. Pade tasi etu najadi ewa lei ntau namate sampe pura-pura to natuwuna riara ntasi namate. 4 Naopu etu malaeka katolumba'ana nombatubaraka isi tubuna ri pura-pura ue bo mata ue. Pade pura-pura ue etu nabali najadi lei. 5 Naliu etu aku nangepe suara malaeka to nombakuasai ue nanguli, "O, Pue Alatala to nagasa, to naria mamimo nggari pamulana pade we'i-we'i bate-batena naria. Nanoa mpu'u pombabutusi Komi. 6 Sabana tau-tau etu nompopesuwu lei nu todea topomparasaya Alatala bo lei nabi-nabimu. Tapi we'i-we'i Komi nombabalasi ira ante nompopoinu ka ira lei. Masipato mamimo pesuku ira etu." 7 Pade niepeku wo'umo suara nggari Meja Mpesomba nanguli, "Pue Alatala to Neliu Nggakuasa, wa'a mamimo! Nakono pade nanoa mpu'u pesuku to nipawelamu!" 8 Naopu etu malaeka kapatamba'ana nombatubaraka isi tubuna ri mata eo. Pade mata eo etu niwai kuasa mompalabu manusia ante kapanena to naja'a mpu'u ewa apu. 9 Manusia etu nipakaboa kapane nu mata eo etu. Pade ira nanguli sinja'i sanga Alatala sabana I'amo to nomparenta pepandasa etu rapawela ka ira. Tapi ira da'a ntoto nadota majea nggari powia ira to naja'ana, ira da'a nadota mombabila bo mompakabete sanga nu Alatala. 10 Naopu etu malaeka kalimamba'ana nombatubaraka isi tubuna ri pekatoko binata to naja'a etu. Sampegoli pura-pura bagia to niparenta binata etu najadi narumau mpu'u. Pade pura-pura todeana nanggiki jila ante kasusana. 11 Ira nanguli sinja'i Alatala to naria riara suruga sabana naju'a mpu'u niepe ira pade naja'a mpu'umo bisu-bisu ri koro ira. Tapi ira bate-batena da'a ntoto nadota majea nggari pokainggu ira to naja'ana. 12 Naopu etu malaeka kaonomba'ana nombatubaraka isi tubuna ri salu ue bete to nosanga ka Ue Efrat. Pade kaliu-liu naotimo Ue Efrat etu ala masadia jala rapojala magau-magau to marata nggari bagia pebuluna. 13 Pade nikitaku tolumba'a seta nolenje mpotumpa. Samba'a nesuwu nggari nganga ule naga, samba'a nesuwu nggari nganga binata naja'a pade samba'a nesuwu nggari nganga nabi topodawa. 14 Ira tolumba'a etu nosa seta-seta to mompowia tandai-tandai to nipogumaa. Ira kana malau mpaka ri ja'i pura-pura magau ri njumaongu dunia ala mompokio ira masiromu mosibali ka i Pue ri eo to nabetena, etumo tempo Alatala to Neliu Nggakuasa mombadagi pura-pura balina ri dunia. 15 Pade nangulimo i Pue Yesus, "Epemo! Aku kana marata ante da'a ninjani-njanimu ewa samba'a topangangga. Mabelo mpu'u tau tunggai mainga bo mombajagai pakeana ala tempo Aku marata i'a da'a maeya matana nasimbayu ewa tau nolumako nelaya ri ngayo ntau dea." 16 Jadi seta-seta etu nompasiromu magau-magau ante tantara-tantara ira nggari umba-umba ri dunia ri peto'o to niuli riara Basa Ibrani, "Harmagedon." 17 Naopu etu malaeka kapitumba'ana nombatubaraka isi tubuna mpaka ri laerawa. Pade aku nangepe suara to namangga mpu'u nggari pekatoko magau ri Sapo Mpepue to nanguli, "Najadimo!" 18 Pade noreamo kila pade guntu bete damo nosinjono poguna, pade najadimo lingu bete. Nggari pamulana manusia nipajadi Alatala ri dunia sampe tempo e'i, da'apa ntoto naria lingu ewa etu. Neliu mpu'u karimboso nu lingu bete etu. 19 Pade ngata bete nosanga ka ngata Babel nabingga najadi tolubagia. Pade nagero sanggani pura-pura ngata ri njumaongu dunia. Pade Alatala nombabalasi kaja'a nu pue ngata bete etu. I'a mpu'u-mpu'u nompokarau ira ante da'a ntoto naria kalusu-lusuna nasimbayu ewa tau nompasu'u balina manginu panginu to napa'i mpu'u. 20 Tempo etu pura-pura lewuto ri tatongo ntasi nalipo sanggani pade bulu-buluna da'a mana nikita. 21 Pade naria uja es to nabete mpu'u nadunggu nggari langi nombarunju manusia. Katomo nu watu uja es etu kira-kira limampulu kilo saongu. Nanggita etu manusia aga nanguli sinja'i sanga Alatala sabana naja'a mpu'u pepandasa uja es etu.
1 Naopu etu samba'a nggari tatongo pitumba'a malaeka to nanjoko tubu-tubu etu nomai ri ja'iku pade nanguli ka aku, "Kamaimo iko, aku kana mompopokita ka iko iwenu pesuku to rapawela ka besi bajinga to nekatoko namosu peto'o ue to nadeana. 2 Magau-magau ri dunia narata nogau sala ante besi etu. Pade i'a nanggeni manusia nompasiala pokaingguna nogau sala nasimbayu ewa tau nanggeni roana manginu sampe malangu." 3 Naopu etu aku nikeni malaeka etu ante kuasa Nosa Nagasa nu Alatala mpaka ri karawa baina. Ri setu aku nanggita samba'a besi to nesawi saongu binata to nalei mpu'u kulina. Ri njumaongu koro binata etu naria nitulisi mpengele-ngele sanga. Batuana sanga-sanga etu mpu'u-mpu'u nompakakedi Alatala. Binata etu wo'u naria papitu balenggana pade ri balenggana etu naria wo'u sampulu tanduna. 4 Besi etu nompake baju to nalei nogalo nakamumu to niparika ante ramba-ramba bulawa, mutiara bo watu-watu nagaya to nasuli mpu'u olina. Ri palena naria santonga sanggiri bulawa to niisi panginu to naja'a bo naruto to nombagambara pokaingguna nogau sala. 5 Ri kirena nitulisi sanga to nakumba batuana iwe'i: |scBABEL TO NABETENA INDO NU BESI-BESI BAJINGA PETO'O MPENGELE-NGELE POKAINGGU TO NATANTORU RI DUNIA|r 6 Pade nikitaku besi etu nalangu sabana nanginu lei ntodea topomparasaya bo lei tau ntanina to nipatesina sabana batena nanguku Yesusmo Pue ira. Sangga nanggita besi etu, natekaja mpu'umo raraku. 7 Pade nangulimo malaeka etu ka aku, "Nokuya iko natekaja nanggita besi etu? Kana kupakanoto ka iko batuana to nakumba to nirapaka ewa besi etu bo binata to nipesawina to nobalengga papitu pade notandu sampulu. 8 Binata to nikitamu etu natuwu nokolu tapi we'i-we'i da'a mana naria. Tapi i'a kana meumba wo'umo nggariara lowu ndala to da'a namala nitudu kandalana etu. Maopu etu i'a kana rasuku sampe ri kasae-saena. Pade tau-tau to natuwu riara dunia to da'a nitulisi sangana riara Buku Katuwua tempo dunia da'apa nipajadi Alatala, ira kana mpu'u-mpu'u mogumaa manggita binata etu. Sabana nokolu binata etu natuwu, we'i-we'i da'a mana naria, tapi i'a kana meumba bali. 9 Ri se'i kita kana paraluu pekiri to manoto. Pituongu balengga nu binata naja'a to nipesawi besi etu nombagambara pituongu bulu nipombabangu ngata. Pade pituongu balengga etu wo'u nombagambara pitumba'a magau. 10 Tapi limamba'a nggari tatongo magau-magau etu da'a mana noparenta. Samba'a danoparenta pade magau kapitumba'ana da'apa nompamula noparenta. Tapi ane i'a marata, i'a moparenta aga sampalai. 11 Binata to natuwu nokolu pade we'i-we'i da'a mana naria, i'a etumo magau kawalumba'ana. Tapi i'a etu wo'u samba'a nggari tatongo magau pitumba'ana pani'a. Kaopuna i'a kana rasuku sampe ri kasae-saena. 12 Sampulu ongu tandu to nikitamu etu nombagambara sampulu mba'a magau anu da'apa nompamula moparenta. Ira kana rawai ka kuasa moparenta mosanggani-nggani ante binata etu sajaa kasaena. 13 Ira etu nosaongu patuju. Ira kana mombawai karoso bo kuasa poparenta ira ka binata naja'a etu. 14 Pade ira kana mosibali ka Ana Bimba. Tapi Ana Bimba etu kana mombadagi ira sabana I'amo Pue nu pura-pura pue pade Magau nu pura-pura magau. Pade nosanggani-nggani ante Ana Bimba etu kana maria wo'u topantuki-topantuki I'a to nipokiona bo nipelisina to natutu nantuki I'a." 15 Naopu etu nanguli wo'umo malaeka etu ka aku, "Ue nadea to nikitamu pani'a to namosu besi bajinga etu nombagambara tau-tau nggari njumaongu dunia, todea-todea nggari umba-umba ngata to notesa mpengele-ngele basa ri dunia. 16 Sampulu mba'a magau bo binata naja'a to nikitamu etu kana momporau rara besi etu. Ira kana mombaago pura-pura nuapa to naria ri ja'ina pade mompalamba i'a nelaya. Pade ira kana manggoni isi-isi koro besi etu pade mompalabu watabakuna riara apu sampe maopu. 17 Etu pura-pura kana majadi sabana Alatalamo to nompakasaongu pekiri ira ala ira mompowia nia nu Alatala mboto. I'a nompakasaongu rara ira mombawai kuasa ira ka binata naja'a etu ala binata etu moparenta sampe madupa pura nuapa to nitesa Alatala. 18 Pade besi to nikitamu etu nombagambara ngata bete to nomparenta pura-pura magau ri dunia."
1 Naopu etu aku nanggita samba'a malaeka ntanina nana'u nggari suruga. Nabete mpu'u kuasana bo karemena. Pade nggari reme malaeka etu njumaongu dunia najadi nareme. 2 Nongaremo i'a ante suara to namangga mpu'u, "Nageromo! Nageromo ngata bete Babel! Nompamula we'i-we'i ngata etu kana majadi peto'o seta-seta bo peto'o nompengaya-ngaya to naja'ana, pade peto'o nompengaya tonji to natantoruna to niporau rara manusia. 3 Nageromo ngata Babel sabana pura-pura tau to neto'o ri dunia nipakeni pue ngata Babel mompasiala pokainggu ira nogau sala nasimbayu ewa tau nipasu'u manginu panginu sampe malangu. Pura-pura magau ri dunia wo'u nompasiala pokainggu ira to naja'a. Pade topodaga-topodaga ri dunia najadi nakalumana puramo ante nobalu-balu mpengaya-ngaya mbara to nasulina ka pue ngata Babel to da'a ria kabasa-basana." 4 Naopu etu aku nangepe suara ntanina nggari suruga nanguli, "Umba komi, topantuki-topantuki Aku! Pesuwumo komi nggariara ngata etu! Ne'e ratuki komi silaka-silaka nu pue ngata etu ala pesuku to rapawela ka ira ne'e mawela komi wo'u! 5 Sabana nadea mpu'umo silaka ira etu, nobua sampe narata ri langi. Pade we'i-we'i kaja'a ira etu nitora Alatalamo. 6 Jadi powia wo'umo ri ja'i pue ngata etu ewa to nikawia ira ka tau-tau ntanina. Balasimo ka ira ronggani kadeana nggari pura-pura panggawia ira to naja'ana. Isimo sanggiri ira ante panginu ronggani kapa'ina nggari panginu to nipakasadia ira ka tau ntanina. 7 Pakasadia ka ira pepandasa bo kasusana to nasimbayu kadeana ante pokainggu ira mompakalanga rara bo mompebasa-basa kasana koro ira mboto. Sabana ira batena notesa riara nta'i ira iwe'i: 'Aku e'imo samba'a magau besi. Aku da'a tobalu besi, pade aku da'a ntoto mombarasai kasusa bo kapari.' 8 Sabana etu riara saeo lau ira kana rarumpa pepandasa-pepandasa iwe'i: kamatea, kasusa rara, pade kamateoro. Ngata ira etu kana mapapu sanggani rakoni nu apu, sabana nakuasa mpu'umo Alatala to nombasuku pue ngata etu." 9 Tempo magau-magau to nantuki pokainggu pue ngata Babel nogau sala pade nompesana-sana ante ira manggita rangasu apu to nompakapapu ngata etu, ira kana mageo mpajea sabana kagero nu ngata etu. 10 Ira aga mekanggore meantoaka nggawao manggita rangasu apu etu apa naeka ira rapendai kasusana to nombarumpa ngata bete etu. Ira kana manguli, "Owe! Owe! Nandasa mpu'umo ngata bete etu, ngata Babel to naroso mpu'u! Aga riara sajaa lau komi nipawela pesuku nu Alatala!" 11 Pade pura-pura topodaga ri dunia kana mageo mombatangi ngata Babel etu sabana da'a mana maria tau mangoli balu-balu ira. 12 Da'a mana maria topangoli bulawa, salaka, watu-watu sinji to nasulina bo mutiara to nipobalu ira. Da'a mana maria wo'u topangoli pakea to nitanu nggari kae to nalusu mpu'u, kae sutra, kae nalei bo nakamumu to nasulina. Da'a mana maria topangoli mpengele-ngele parewa to nipowia nggari kayu to nawongina bo parewa-parewa nipowia nggari ngisi gaja bara parewa-parewa nipowia nggari kayu to nasuli mpu'u olina. Pade da'a mana maria topangoli parewa-parewa to nipowia nggari tambaga, ase, pade nggari watu pualam. 13 Da'a mana maria topangoli kayu momi, rampa-rampa ntanina, bo minya wongi to niuli dupa, mur bo kemenyan. Da'a mana maria topangoli ue anggur, lana, labu gando bo ose. Wa'a wo'u japi, bimba, jara, kareta bo tau-tau rapobatua mana raoli pue ngata Babel. 14 - 15 Topodaga-topodaga etu kana manguli, "Pura-pura to nipoino raramu da'a mana ntoto naria. Nalipo puramo kakalumanamu bo kagayamu, da'a mana murata bali." Topodaga-topodaga to najadi nakalumana ante nompobalu mbara-mbara etu ka pue ngata Babel aga mekanggore meantoaka nggawao manggita ngata etu sabana maeka rara mawela kasusana to nombarumpa ngata etu. Ira kana mageo mpajea ante masusa rara. 16 Ira kana mongare-ngare, "Owe! Owe! Nandasa mpu'umo ngata bete etu! Pue ngata Babel nabiasa nompake pakea to nipowia nggari kae to nalusu mpu'u, pade nggari kae nakamumu bo nalei to niparika ramba-ramba bulawa, watu-watu sinji to nasulina bo mutiara. 17 Tapi aga riara sajaa lau kakalumana to nadea mpu'u etu naropu sanggani." Pade pura-pura topompajala sakaya bete, ante topokarajaa riarana, pade pura-pura topesawi sakaya ante pura-pura tau to nopaelo katuwu ira ri tasi kana mekanggore meantoaka nggawao manggita ngata etu. 18 Tempo ira manggita rangasu apu nompalabu ngata bete etu mosumoa, ira kana mongare-ngare, "Da'a ria ngata ntanina ri dunia to nasimbayu ewa ngata bete etu!" 19 Ira kana manggamburaka sowu tana ri balengga ira sabana kasusa rara ira. Ira kana mageo bo mantete pade manguli, "Owe! Owe! Nandasa mpu'umo ngata bete etu! Nggari kakalumana pue ngata Babel etu pura-pura tau to naria sakayana rarantasi najadi nakalumana. Tapi kitamo! Aga riara sajaa lau naropu sangganimo pura-pura kakalumana etu!" 20 Umba komi topeto'o ri suruga, pakadambamo raramu! Pakadambamo rara komi topomparasaya i Pue Yesus mosanggani-nggani ante suro-surona bo nabi-nabina! Sabana pue ngata bete etu nisuku Alatalamo! Nibalasinamo powia ira to naja'ana ri ja'i komi! 21 Naopu etu aku nanggita samba'a malaeka to naroso mpu'u nombaonggotaka saongu watu bete ewa watu pogili to nabetena, pade nitajiakana mpaka riara ntasi. Pade niulina, "Nasimbayu ewa watu e'i nitajiaka riara ntasi da'a mana rarata bali, iwetu wo'u ngata Babel to nabetena etu kana rapakaropu sanggani pade da'a mana maria. 22 Da'a mana raepe wamba musi nggari ja'i ntopomore kacapi, bara wamba topodade ri ngata etu. Da'a mana raepe musi sasuli bo topantawui kololio. Da'a mana maria topande manggawia bara nuapa-nuapa ri tatongo ngata etu, pade wamba pogili da'a mana raepe nggariarana. 23 Da'a mana maria reme poindo rakita riarana, pade da'a mana maria raepe suara boti langgai bo boti besi madamba-damba. Etu pura-pura kana majadi sabana topodaga-topodaga nggari ngata etu to neliu nggakalumana ri dunia. Pade nggari pangginjani to naja'ana pue ngata etu nombabagiu pura-pura isi dunia." 24 Ngata Babel kana rasuku iwetu sabana riara ngata etumo lei nu nabi-nabi bo todea topomparasaya Alatala nipopesuwumo. Pade lei nggari kamate pura-pura tau ntanina to nipatesi riara dunia e'i kana rapatanggu ka pue ngata Babel etu.
1 Naopu etu aku nangepe wamba ewa suara ntau dea damo nonguu riara suruga nongare-nongare. Niuli ira, "Toiyamo Alatala! Sabana I'amo to nompakasalama kita! I'amo Alatala to nabete mpu'u katuwuna pade to nakuasana! 2 Toiyamo I'a sabana pombabutusina nanoa pade nakono. Nisukunamo besi bajinga etu to nompakaja'a dunia ante pokaingguna nogau sala. Nipesawanamo besi etu sabana i'a to nompatesi batua-batua nu Alatala." 3 Pade nongare wo'umo tau dea etu, "Toiyamo Alatala sabana rangasu apu nompalabu ngata etu nosumoa sampe ri kasae-saena, da'a ria kaopu-opuna!" 4 Pade rompulu bo patamba'a totu'a pade patamba'a anu to natuwuna etu nekadede mombasomba Alatala to nekatoko ri pekatoko magauna. Ira nanguli, "Amin! Toiyamo Alatala!" 5 Naopu etu naria suara nggari pekatoko magau etu nanguli, "Umba komi batua Alatala pura-pura, toiyamo Pue Alatalata! Toiyamo I'a, komi to nekou ri ja'ina, nabeloka tau to naede katuwuna, nabeloka tau to nalanga katuwuna!" 6 Naopu etu aku nangepe ewa wamba ntau dea nowoo ewa soo nu ue bete pade ewa moni guntu bete. Nongaremo ira, "Toiyamo Alatala! Sabana noparentamo Pue Alatalata to Neliu Nggakuasa! 7 Kamaimo kita mongare ante madamba-damba! Kamaimo kita mantoiya pade mombabila kabete kuasana! Sabana naratamo eo mponika Ana Bimba. Boti besi nasadiamo ranika. 8 I'a niwai pakea bula to nalusuna to nenggila bo nagasa rapakena." (Pakea nalusu etu nombagambara pokainggu-pokainggu nanoa to nipowia todea topomparasaya.) 9 Naopu etu nangulimo malaeka etu ka aku, "Tulisimo e'i: Nabelo mpu'umo tau-tau to nigaga malau ri posusa mponika Ana Bimba etu." Pade niulina wo'umo, "Tesa-tesa e'i tesa Alatala to nakono!" 10 Sangga nangepe pantesa etu nekadedemo aku sampe ri tana ri ngayo malaeka etu ala mombasomba i'a. Tapi nangulimo i'a ka aku, "Ne'e! Ne'e iko mombasomba aku! Pesombamo Alatala! Sabana aku e'i aga samba'a batua nu Alatala nasimbayu ewa iko bo nasimbayu ewa roa-roamu topomparasaya to batena nangaku Yesusmo Pue ira. Sabana isi to napokona nggari tesa to nipasimbayu nabi-nabi nu Alatala etumo mompakanoto Yesusmo Pue." 11 Naopu etu aku nanggita suruga natibea, pade riara suruga nikitaku saongu jara bula. Topesawi jara etu nosanga ka "To Natutu bo Nakono." I'a nombabutusi parakara bo nosipatesi ante nanoa. 12 Matana najela ewa jela nu apu pade ri balenggana nadea songgo magau. Ri korona naria sanga nitulisi, tapi aga I'a mboto nangginjani sanga etu. 13 Baju ndoe to nipasuana natitome riara lei. Pade I'a nidae "Tesa nu Alatala." 14 Tantara-tantara suruga nantuki I'a ante nesawi jara bula pura. Pakea ira nipowia nggari kae nalusu to nabula bo nagasa. 15 Pade nggari nganga topesawi jara etu nesuwu samata guma to natajana. Ante guma etu I'a kana mombadagi pura-pura tau riara dunia to nangewa I'a, pade I'a kana momparenta ira ante karosona to nasimbayu ewa karoso lembau ase. I'a kana mompopesuwu rau rara Alatala to naja'a mpu'u mompakaropu tau-tau najadi balina nasimbayu ewa tau nombalonggo-longgo mpakaoya wua anggur ri peto'o pompea anggur. 16 Ri bajuna bo ri timpuna naria nitulisi sangana iwe'i: |scMAGAU NU PURA-PURA MAGAU, PUE NU PURA-PURA PUE|r. 17 Naopu etu aku nanggita samba'a malaeka nekanggore ri mata eo. Nongaremo i'a ante suara namangga mpu'u nompokio pura-pura tonji to nembua ri laerawa. Niulina, "Kamaimo komi pura-pura, manggoni ri posusa bete to nipakasadia Alatala! 18 Kamaimo ala komi mamala manggoni isi magau-magau bo tadulako-tadulako, pade isi tantara-tantara to nabia! Kamaimo komi manggoni isi topesawi jara bo isi jara ira, pade isi manusia pura-pura, nabeloka batua-batua, nabeloka madika-madika, nabeloka tau-tau to nalanga katuwuna, nabeloka tau-tau to naede katuwuna!" 19 Naopu etu aku nanggita binata to naja'a etu bo magau-magau nggari dunia ante tantara-tantarana nasiromu ala mosibali ka Topesawi jara bula bo tantara-tantarana. 20 Tapi binata naja'a nisoko sanggani ante nabi topodawa to nompowia tandai-tandai nipogumaa ante kuasa niwai binata etu ka i'a. Ante tandai-tandai etu ira nombabagiu tau-tau to nimere ante tandai binata naja'a pade to nombasomba pinoitona. Ira romba'a nisoko pade nitajiaka nggatuwu riara ntasi apu to najela ante watu-watu najela. 21 Naopu etu pura-pura tantara etu nipatesi ante guma to nesuwu nggariara nganga Topesawi jara bula etu. Pade naratamo tonji-tonji nanggoni isi watabaku ntau to namate etu sampe nabasa-basa.
1 Naopu etu aku nanggita samba'a malaeka nana'u nggari suruga. Ri palena naria kunci pewobo nu lowu ndala to da'a namala nitudu kandalana. Pade nisokona wo'u saongu rante to nabete mpu'u. 2 I'a nanjoko ule naga etu to niuli Ule Ntu'a, etumo i'a to niuli Magau nu Seta bara Seta. Pade ule etu nipo'unamo sanjobu mpae kasaena. 3 Nitajiakana ule etu riara lowu ndala to da'a namala nitudu kandalana etu. Naopu etu nikuncina pade nimerena pewobo lowu etu ala ule naga etu da'a mana mamala mesuwu mombabagiu manusia sampe maganamo tempona sanjobu mpae kasaena etu. Maliu etu i'a kana rakabasaka bali sampalai. 4 Naopu etu aku nanggita bara sakuya ongu pekatoko magau. Pade tau-tau to nekatoko ri bunggu pekatoko etu niwai ka kuasa mombabutusi parakara-parakara. Pade nikitaku wo'u wayo-wayo ntau namate nitompo tambolona sabana ira batena nompangaku Yesusmo Pue ira, pade batena nompatolele Tesa nu Alatala. Ira da'a wo'u nombasomba binata naja'a bo pinoitona, pade ira da'a wo'u nantarima tandai binata etu ri kire bara ri pale ira. Ira etu natuwu bali pade noparenta mpasanggani-nggani ante Kristus sanjobu mpae kasaena. 5 Etumo to niuli pembangu ntomate pamulana. Tau-tau namate ntanina da'apa natuwu bali sampe naganamo sanjobu mpae etu. 6 Nabelo mpu'u bo nagasa tau-tau to rapakatuwu bali tempo pembangu ntomate pamulana etu. Ira da'a ntoto mawela pesuku to niuli kamatea karongganina. Tapi ira kana majadi topanggeni-topanggeni agama to manggeni pesomba ka Alatala bo Kristus. Pade ira kana moparenta mpasanggani-nggani ante Kristus sanjobu mpae kasaena. 7 Ane maopumo sanjobu mpaena etu Magau nu Seta kana rakabasaka nggariara tarungguna ri lowu ndala etu, 8 pade i'a kana malau mombabagiu tau-tau ri njumaongu dunia to mangewa Alatala, etumo ira to niuli Gog ante Magog. Magau nu Seta etu kana mompasiromu tau-tau etu ala malau mosipatesi. Kadea ira ewa bone ri wiwi ntalinti, da'a namala rabila. 9 Ira kana marata nggari umba-umba ri dunia pade mombatatiku peto'o ntodea topomparasaya, etumo ngata to nipotowe Alatala. Tapi apu kana mana'u nggari langi mompalabu ira pura-pura sampe maopu. 10 Maopu etu Magau nu Seta to nombabagiu tau pura-pura ri dunia kana ratajiaka riara ntasi apu to najela ante watu-watu najela. Etumo peto'o nipantajiaka binata naja'a bo nabi topodawa nokolu. Ri setu eo wengi ira kana rapandasa sampe ri kasae-saena. 11 Naopu etu aku nanggita saongu pekatoko magau nabula to nabetena. Pade nikitaku wo'u topekatoko ri pekatoko etu. Langi bo dunia nalipo sanggani nggari ngayona sampe da'a mana naria nikita mata. 12 - 13 Pade aku nanggita tau-tau namate nenggore ri ngayo pekatoko etu. Ira etu tau-tau to nalanga katuwuna ri dunia bo tau-tau to naede katuwuna, tau-tau namate natala riara ntasi, tau-tau ntanina to namate, pade pura-pura tau nggari peto'o ntomate. Ira pura-pura nenggore ri ngayo pekatoko Alatala etu. Pade buku-buku nitimpamo pade niparesa. Riara buku-buku etu nitulisi pura-pura pokainggu tau-tau namate etu. Jadi pesuku ka ira nipakatantu nantuki pokainggu-pokainggu ira to nitulisi riara buku-buku etu. Pade naria buku ntanina nitimpa wo'u to niuli Buku Katuwua. 14 - 15 Pura-pura tau to da'a nitulisi sangana riara Buku Katuwua etu nitajiaka riara ntasi apu. Etumo to niuli kamatea karongganina, pesuku riara ntasi. Naopu etu mana ria kamatea bo mana ria peto'o ntomate.
1 Naopu etu aku nanggita langi bo dunia to nabou. Langi pamulana pade dunia pamulana nalipomo, pade mana ria tasi. 2 Pade nikitaku wo'u ngata to nagasa, ngata Yerusalem to nabouna nana'u nggari ja'i Alatala ri suruga. Nagaya mpu'u ngata etu ewa samba'a boti besi nopakea nagaya nasadia mompopea karata rongona. 3 Pade niepeku suara namangga mpu'u nggari pekatoko magau etu nanguli, "Kitamo! We'i-we'i peto'o Alatala nosanggani-nggani ante manusia. I'a meto'o ri tatongo ira pade ira majadi todeana. Pade I'a mboto mosanggani-nggani ante ira pade majadi Alatala ira. 4 I'a mbotomo mombape'e pura-pura ue mata nggari mata ira. Da'a mana maria tau mamate, da'a mana maria tau masusa rara bara mageo, pade da'a mana maria tau maju'a. Sabana anu to nasaena etu naliumo." 5 Naopu etu nangulimo topekatoko ri pekatoko magau, "Kitamo! We'i-we'i Aku mompakabou mpengele-ngele to naria." Pade niulina wo'umo ka aku, "Tulisimo nuapa kutesa, sabana tesa e'i mpu'u-mpu'u nakono pade namala raparasaya." 6 Pade niulina ka aku, "Naopu puramo! Aku e'imo Pamulana pade Kaopuna. Aku nompamula pade Aku wo'u nompakaopuna. Isema-sema to nabai tambolona kana kuwai ka bayangi ue nggari mata ue to nombawai katuwua mabelo sampe ri kasae-saena. 7 Isema-sema padagi ira kana mombarata nggari ja'iku pura-pura nuapa to niuliku etu pane'a. Pade Akumo majadi Alatala ira bo ira majadi anaku. 8 Aga tau-tau to naeka mantuki Aku bara da'a nomparasaya Aku, ante tau-tau to naja'a pokaingguna, tau-tau topepatesi, tau-tau nogau sala, tau-tau topedoti, tau-tau nepue ka pue-pue ntanina, pade pura-pura topodawa, ira pura-pura kana rasuku riara ntasi apu to najela ante watu-watu to najela. Etumo to niuli kamatea karongganina." 9 Naopu etu naratamo samba'a malaeka nggari tatongo ira pitumba'a to nanjoko tubu-tubu niisi ante pitungaya pepandasa kaopuna. Nangulimo i'a ka aku, "Kamaimo, kana kupopokita ka iko boti besi to raporongo Ana Bimba." 10 Pade aku nikenina ante kuasa Nosa Nagasa nu Alatala mpaka ri bunggu bulu to nabetena bo nalanga. Nggari bunggu bulu etu i'a nombatujuraka ka aku ngata nagasa to nosanga ka ngata Yerusalem nana'u nggari ja'i Alatala ri suruga. 11 Ngata etu nareme mpu'u ante kareme nu Alatala mboto. Karemena damo nenggila ewa mata sinji to nasuli olina, ewa watu yaspis to nalewayo mpu'u ewa kaca to nasuli mpu'u olina. 12 Ngata etu wo'u nitalili tembo to nabete bo nalanga mpu'u. Tembo etu naria sampulu rongu bobaana to nikatono sampulu romba'a malaeka. Ri bobaa etu naria nitulisi sanga-sanga ana Israel sampulu romba'a to najadi pue nto Yahudi. 13 Tembo bete etu patanjulapa pade sanjulapa naria toluongu bobaa, etumo ri sabingga kamataeona naria toluongu bobaa, ri sabingga tasina naria toluongu bobaa, ri sabingga puluna naria toluongu bobaa, pade ri sabingga kasolona naria toluongu bobaa. 14 Tembo ngata etu nibangu ri bunggu sampulu rongu watu pondasi pade ri watu pondasi etu naria nitulisi sanga sampulu romba'a anaguru nu Ana Bimba. 15 Malaeka to notesa ante aku etu nanjoko sampeka lembau rapotomo to nipowia nggari bulawa rapotomo kabete ngata etu ante tembo bo bobaana. 16 Ngata etu patanjulapa. Kandatena nasimbayu ewa kambukuna. Malaeka etu nombatomo ngata etu ante lembau potomo etu. Kandatena ronjobu patatu kilo. Kambukuna bo kalangana nasimbayu ante kandatena. 17 Malaeka etu wo'u nombatomo tembo ngata etu. Kabetena onompulu metere. Potomo to nipake malaeka etu nasimbayu ewa potomo to nipake manusia. 18 Tembo ngata etu nipowia nggari watu-watu to nasuli mpu'u olina to niuli watu yaspis. Ngata etu nipowia nggari bulawa pura, damo nenggila ewa kaca to nalewayo. 19 Watu-watu pondasi ngata etu niwera ante sampulu rongaya watu to nasuli mpu'u olina, saongu watu sangaya wo'u rambana. Watu pamulana niwera ante watu yaspis to nalusu bo nalewayo ewa kaca. Watu karonguna niwera ante watu nilam to naramata ewa ue nandala. Watu katoluonguna niwera ante watu mirah to nalei-lei. Watu kaampana niwera ante watu zamrud to naramata ewa pae. 20 Watu kaalimana niwera ante watu unam to naloba nabula bo nalei. Watu kaonona niwera ante watu sardis to natu'a leina. Watu kapapituna niwera ante watu ratna cempaka to nangguni ewa bulawa. Watu kawaluna niwera ante watu beril to naramata ewa tolu memua. Watu kasasiona niwera ante watu krisolit to nakuni-kuni. Watu kasampuluna niwera ante watu krisopras to naramata ewa doa loka. Watu kasampulu saonguna niwera ante watu lazuardi to nagawu ewa langi. Pade watu kasampulu ronguna niwera ante watu kecubung to nakamumu. 21 Pade sampulu rongu bobaa etu nipowia nggari mutiara to nalusu mpu'u, saongu bobaa saongu wo'u mutiara. Pade jala riara ngata etu nipowia nggari bulawa pura, damo nenggila ewa kaca to nalewayo. 22 Da'a ria Sapo Mpepue nikitaku riara ngata etu sabana Pue Alatala to Neliu Nggakuasa bo Ana Bimba mboto najadi Sapo Mpepue ri ngata etu. 23 Pade ngata etu da'a mana nomparaluu reme nu eo bara reme nu wula, sabana reme nggari ja'i Alatala mboto to nompakaremena, pade Ana Bimba najadi ewa poindona. 24 Pura-pura manusia ri dunia kana molumako riara karemena. Pade magau-magau nggari njumaongu dunia kana manggeni kakalumana ira mpaka riara ngata etu. 25 Bobaa-bobaa ngata etu bate-batena natibea, da'a ntoto nipiku-piku, sabana ri ngata etu da'a mana maria nggawengina. 26 Pura-pura manusia ri dunia kana manggeni tanda pebila ira pade kakalumana ira mesua riara ngata etu. 27 Tapi anu to nompakatantoru bo tau-tau nompowia kaja'ana bo tau-tau topodawa da'a ntoto mamala mesua riara ngata etu. To mamala mesua ri setu aga tau-tau to nitulisi sangana riara Buku Katuwua nu Ana Bimba.
1 Pade malaeka etu nompopokita ka aku sanjalu ue, uena damo nenggila ewa kaca to nalewayo. Ue nggari salu ue etu nombawai katuwua to nabelona. Ulu nu ue etu nesuwu nggari pekatoko Alatala bo Ana Bimba etu, 2 pade noili ri tatongo jala jama rara ngata etu. Ri wiwi salu ue ntimali-malina naria sampu'u kayu to niuli "Kayu Katuwua." Kayu etu nowua sampulu ronggani sampae, sambula sanggani kayu etu nowua. Pade tawa kayu etu nipopakuli mompakabelo tau-tau ri njumaongu dunia. 3 Riara ngata etu da'a mana naria nuapa-nuapa to nijanjiaka Alatala. Pekatoko Alatala bo Ana Bimba naria riara ngata etu. Pade pura-pura batuana kana mepue ri ja'ina. 4 Pura-pura tau kana manggita lenjena ante mata ira mboto. Pade sangana kana ratulisi ri kire ira pura-pura. 5 Da'a mana maria nggawengina. Pue ngata etu da'a mana momparaluu poindo bara reme nu eo mombawanta ira, sabana reme nggari ja'i Pue Alatala mbotomo mombawanta ira. Pade ira kana moparenta ewa magau sampe ri kasae-saena. 6 Naopu etu nangulimo malaeka etu ka aku, "Pura-pura tesa pane'a mpu'u-mpu'u nakono pade namala raparasaya. Pue Alatala to nombawai Nosa Nagasana ka pura-pura nabina, I'amo to nompakau malaekana nomai mombatujuraka ka batua-batuana nuapa to mana masaeka majadi." 7 Pade nangulimo i Pue Yesus, "Kitamo! Aku mana masaeka marata! Nabelo mpu'umo tau natutu mantuki pantesa to niboto riara buku e'i!" 8 Aku Yohanes to nanggita bo nangepe pura-pura kajadia etu. Sangga naopu aku nangepe bo nanggita etu pura-pura, nekadedemo aku sampe ri tana ri ngayo malaeka to nombatujuraka etu pura-pura ka aku ala mombasomba i'a. 9 Tapi nangulimo malaeka etu ka aku, "Ne'e! Ne'e iko mombasomba aku! Pesombamo Alatala! Sabana aku e'i aga batua nu Alatala nasimbayu ante iko bo roa-roamu nabi bo tau-tau to natutu nantuki tesa-tesa to nitulisi riara buku e'i!" 10 Pade nanguli wo'umo i'a ka aku, "Ne'e mutabuniaka tesa to niboto riara buku e'i, sabana namosumo kadupana. 11 Isema-sema to naja'a pokaingguna, palambamo ira tunggai mowia kaja'ana. Isema-sema to natantoru pokaingguna, palambamo ira tunggai mowia to natantoru. Isema-sema to nanoa, palambamo ira tunggai mowia to nanoana. Isema-sema to nagasa rarana, palambamo ira tunggai mowia to nagasana." 12 Pade nanguli wo'umo i Pue Yesus, "Toramo tesaku e'i! Aku da'a mana masaeka marata manggeni tambo ala mombabalasi pura-pura tau nantuki pokainggu ira samba'a bo samba'a. 13 Aku e'imo Pamulana bo Kaopuna. Akumo Pompamulana bo Panggaopuna. Akumo to nompamula pade Akumo to nompakaopu. 14 Nasana mpu'umo tau-tau to nantapasi pakeana sampe nagasa, sabana iramo to rapaloga manggoni wua nggari Kayu Katuwua. Iramo to rapaloga mesua riara ngata etu nantuki bobaa betena. 15 Aga tau-tau to naja'ana, tau-tau topedoti, tau-tau to nogau sala ante tau da'a rongona mboto, tau-tau topepatesi, tau-tau to nepue ka pue-pue ntanina, tau-tau topodawa pade pura-pura tau nompokono nodawa, peto'o ira pura-pura aga ri sawaliku ngata etu. 16 Aku, Yesus, nompakau malaekaku malau mompatolele tewai-tewaiku e'i ka komi todea topomparasaya Aku. Aku e'imo sulu, etumo Muli Magau Daud. Aku e'imo betu'e pompaeo to nareme mpu'u." 17 Nosa Nagasa bo boti besi to nasadia raporongo Ana Bimba etu nanguli, "Kamaimo!" Pade butu-butu mba'a tau to nangepe tesa e'i kana manguli, "Kamaimo!" Isema-sema to nabai tambolona, kamaimo! Isema-sema to madota, kamaimo manginu ue to nombawai katuwua. Etu niwai bayangi, da'a paraluu raoli. 18 Aku Yohanes nompopanjani ka pura-pura tau to mangepe tesa pombaboto to nitulisi riara buku e'i iwe'i: Ane maria tau mantambai isi tesa e'i, Alatala kana mantambai ka i'a pepandasa-pepandasa ewa to nitulisi riara buku e'i. 19 Pade ane maria tau mompakalipo isi tesa buku e'i, Alatala kana mompakalipo bagiana nggari Kayu Katuwua pade bagiana riara ngata to nagasa etu ewa to nitulisi riara buku e'i. 20 Pade nangulimo i Pue Yesus to nompasimbayu pura-pura tesa e'i, "Nakono! Aku mana masaeka marata!" Amin! Karatamo Pue Yesus! 21 Perapi Pue Yesus mombagane pura-pura topomparasaya Alatala. Amin!