John 1

“Nnelekai” o di mouli

1 “Nnelekai” la nogo i golo i taamada. “Nnelekai” la nogo i baahi o God, gei “Nnelekai” la go God. 2 Nnelekai nogo noho i baahi o God mai loo i taamada. 3 God ne hai nia mee huogodoo mai i mee, di mee e dahi ne hai laa daha mo mee ai. 4 “Nnelekai” ne hidi mai di mouli, gei di mouli deenei la gu haga maalama nia daangada. 5 Di maalama e maahina i lodo di bouli, gei di bouli la digi daa di maalama. 6 God ne hagau mai dana daane kae hegau, dono ingoo go John. 7 Mee ne hanimoi belee haga modongoohia gi nia daangada di maalama, bolo ginaadou ga longono ga hagadonu. 8 Mee hagalee go di maalama, gei mee ne hanimoi belee haga modongoohia di maalama. 9 Di maalama deenei le e donu, dela e hanimoi gi henuailala e haga maalama nia daangada huogodoo. 10 “Nnelekai” gu i henuailala. God ne hai henuailala mai i mee, gei digau henuailala e de iloo a mee. 11 Mee ne hanimoi gi dono henua donu, gei ana daangada donu digi benebene a mee. 12 Gei hunu ginaadou gu hagadonu, gu benebene a mee, gei mee gu dugu ang gi ginaadou di tonu bolo gi hai nia dama ni God. 13 Digaula hagalee ne hai nia dama ni God mai nadau haanau, . Go God hua go tamana digaula. 14 “Nnelekai” la gu hai tangada gu noho i tadau baahi, gidaadou gu mmada gi ono madamada e honu i tumaalia mo di tonu, di madamada ne kae go mee go Tama hua e-dahi mai baahi dono Damana. 15 John e haga modongoohia aga a mee, e wolowolo, “Deenei taane dela helehelekai iei au, bolo e hanimoi i ogu muli, e koia e aamua i di au, idimaa mee gu i-golo i mua dogu haanau.” 16 Mai di honu o dono dumaalia, mee gu hagahumalia gidaadou huogodoo. 17 God ne wanga gi Moses Nnaganoho, gei tumaalia mo di tonu ne lloomoi i baahi o Jesus Christ. 18 Tangada ne mmada gi God ai. Tama a God hua e-dahi dela e hai be God, e noho i baahi o Tamana, e haga modongoohia aga a God gi iloo nia daangada.

Nia agoago a John Babdais

19 Digau aamua o Jew i Jerusalem ga hagau nadau gau hai mee dabu, mono gau Levi gi John belee heeu gi mee, “Goe koai?” 20 John digi de hiihai di helekai gi nia heeu digaula. Mee ga helekai haga madammaa, “Au hagalee go di Mesaia.” 21 Digaula ga heeu labelaa, “Malaa, goe koai? Goe go Elijah?” John ga helekai gi digaula, “Deeai, au hagalee go mee.” Digaula ga heeu, “Goe di soukohp?” Gei mee ga helekai, “Deeai.” 22 Digaula ga helekai gi mee, “Hagia mai goe koai, gimaadou belee hai gi kae madau helekai gi muli gi digau ala ne hagau mai gimaadou. Malaa goe la ga helekai bolo aha i di goe?” 23 John ga helekai i telekai soukohp Isaiah, “Au go di lee o tangada dela e wolowolo i lodo di anggowaa boloo: Haga huudonu ina di ala o Dimaadua e haaele ai!” 24 Digau kae hegau aanei ala ne hagau mai go nia Pharisee, 25 ga heeu gi John, “Ma goe hagalee go di Mesaia, be go Elijah, be go di soukohp, malaa goe e aha dela e haihai au babdais?” 26 John ga helekai, “Au e hai agu babdais gi nia wai. Tangada i godou lodo, e de iloo goodou. 27 Mee e hanimoi i ogu muli, gei au hagalee tau loo, bolo e wwede nia suudi o maa.” 28 Nia mee aanei huogodoo ne hai i Bethany i di baahi gi dua di monowai Jordan, di gowaa nogo hai nia babdais a John.

Ta maa siibi a God

29 Di laangi nomuli, gei John ga mmada gi Jesus e hanimoi, geia ga helekai, “Deenei Ta maa siibi a God, dela e daa gi daha nia huaidu o digau henuailala. 30 Deenei tangada nogo helehelekai iei au boloo, Tangada dela e hanimoi i ogu muli, le koia e aamua i di au, idimaa, mee gu i-golo i mua dogu haanau. 31 Au digi iloo a mee, gei au ne hanimoi belee hai agu babdais gi nia wai, belee haga modongoohia a mee gi digau Israel.” 32 Deenei di haga modongoohia a John ne hai, “Au gu mmada gi di Hagataalunga e haneia i di langi gadoo be di mwuroi e maangi mai gi hongo o mee. 33 Gei au digi modongoohia bolo ma go mee. Malaa God, ne hagau mai au belee hai agu babdais gi nia wai, ne helekai mai boloo, Goe ga mmada gi di Hagataalunga ga haneia gi hongo taane, deelaa go mee e hai ana babdais gi di Hagataalunga Dabu. 34 John ga helekai, “Au gu gidee au, au e hagi adu gi goodou, mee go Tama a God.”

Nia dama agoago a Jesus matagidagi

35 Di laangi nomuli, John nogo duu labelaa i golo mo ana dama agoago dogolua. 36 Di madagoaa hua a mee ne gidee Jesus e haaele i golo, gei mee ga helekai, “Deelaa Ta maa siibi a God.” 37 Nia dama agoago dogolua ne longono a mee ne helekai beenei, ga hula i muli o Jesus. 38 Jesus ga huli gi muli, ga gidee meemaa e daudalia ia, ga heeu, “Goolua e halahala di gulu aha?” Meemaa ga helekai, “Rabai, goe e noho i hee?” (Telekai “Rabai” dono hadinga bolo “Tangada Agoago”) 39 Gei mee ga helekai, “Lloomoi, mmada.” Gei meemaa ga hula i muli o mee, ga gidee di gowaa dela e noho iei mee, ga noho di laangi deelaa i baahi o mee (di madagoaa deelaa, la i-muli di oodee, holongo di laa e haa). 40 Tangada e dahi i meemaa go Andrew, tuaahina daane o Simon Peter. 41 Andrew ga limalima di gidee dono duaahina go Simon Peter, ga helekai gi mee, “Gimaua gu gidee di Mesaia.” (Telekai dono hadinga bolo “Christ”.) 42 Gei mee ga lahi a Simon gi Jesus. Jesus ga mmada adu gi mee, ga helekai, “Doo ingoo go Simon, tama a John. Goe ga haga ingoo bolo Cephas.” (Di ingoo bolo Peter, dono hadinga bolo “Di hadugalaa.”)

Jesus e gahi a Philip mo Nathanael

43 Di laangi nomuli, gei Jesus gu maanadu, bolo ia ga hana gi Galilee. Mee ga gidee ia Philip, ga helekai gi mee, “Hanimoi i ogu muli.” 44 (Philip tangada Bethsaida, di waahale dela e noho ai a Andrew mo Peter). 45 Philip ga gidee ia Nathanael, ga helekai gi mee, “Gimaadou gu gidee tangada Moses ne hihi ono helekai gi lodo di Beebaa Haganoho, nia soukohp labelaa gu hihi i mee. Mee go Jesus, go di tama a Joseph tangada o Nazareth.” 46 Nathanael ga heeu, “Di mee humalia e mee di gila mai i Nazareth?” Philip ga helekai, “Hanimoi, mmada.” 47 Di madagoaa Jesus ne gidee Nathanael e hanimoi, geia ga helekai i mee, “Deenei tangada donu o Israel, ono hala ai!” 48 Nathanael ga heeu gi mee, “Goe e iloo au di aha?” Jesus ga helekai gi mee, “Au gu gidee goe nogo i lala di laagau-‘fig’ i mua Philip ne gahigahi goe.” 49 Nathanael ga helekai, “Tangada Agoago, goe go Tama a God, di king o Israel!” 50 Jesus ga helekai, “Goe ne hagadonu i di au ne helekai adu bolo au gu gidee goe i lala di laagau-‘fig’? Goe ga gidee nia mee mada humalia i di mee deenei!” 51 Mee ga helekai gi digaula, “Au e hagi adu gi goodou di tonu, bolo goodou ga gidee di langi ga mahuge, gei nia gau di langi o God ga hula gi nua ge e loo ia gi lala i hongo di Tama Tangada.”

John 2

Taga hai lodo i Cana

1 Nia laangi e lua nomuli, tagamiami haga hai lodo ga hai i lodo di waahale Cana i Galilee. Tinana o Jesus nogo i golo. 2 Jesus mo ana dama agoago gu gahi mai labelaa gi tagamiami deelaa. 3 I muli nia waini ne odi, gei tinana o Jesus ga helekai gi mee, “Nia waini digaula gu odi.” 4 Jesus ga helekai, “Dogu dinana, hudee hagia mai dagu mee belee hai. Dogu madagoaa la digi dau mai.” 5 Tinana o Jesus ga helekai gi digau hai hegau, “Heia nia mee a mee ala bolo gi heia.” 6 Digau o Jew nadau haganoho daumaha i golo i di hai o di haga madammaa, ala ono ulu mee hadu llauehe e ono i golo, di ulu mee e dahi e mee di haga hau nia galon wai madalua ga hana gi motolu. 7 Jesus ga helekai gi digau hai hegau, “Hagahau ina nia ulu mee aanei gi nia wai.” Digaula ga haga hau nia maa gi hontula. 8 Jesus ga helekai gi digaula, “ duia dulii gi daha, kaina gi tagi o tagamiami.” Digaula ga kae nia wai gi mee. 9 Nia wai gu huli gu hai nia waini, gei mee ga momi nia maa. Mee e de iloo be nia waini ne gaamai i hee, gei digaula ne haga hau mai nadau wai, le e iloo. Gei mee ga gahigahi mai taane hai lodo, 10 ga helekai gi mee, “Nia daangada huogodoo le e taiaga nia waini humalia i mua, e inuinu go digau tagamiami gi libaliba, gei nomuli ga taiaga laa nia waini ala hagalee loo e humalia. Gei goe nogo benebene au waini humalia, ga tugi loo gi dolomeenei!” 11 Deenei di mogobuna matagidagi a Jesus ne hai i Cana i Galilee. Deelaa di gowaa ne haga modongoohia aga dono madamada, nia dama agoago a maa gu hagadonu a mee. 12 Nomuli, Jesus mo dono dinana, ono duaahina daane, mo ana dama agoago ga hula gi Capernaum, ga noho i golo nia laangi dulii.

Jesus e hana gi di Hale Daumaha

13 Hoohoo gi di madagoaa Tagamiami Pasoobaa, Jesus ga hana gi Jerusalem. 14 Mee ga gidee nia daangada i lodo di Hale Daumaha e huihui nadau kau, nia siibi mono mwuroi, gei digau koodai bahihadu e noho i nadau deebele. 15 Mee ga hai dana loahi haga mamaawa, ga hagabagi nia manu huogodoo gi daha mo di Hale Daumaha, nia siibi mono kau. Mee ga hulihuli gi lala nia deebele digau koodai bahihadu, ga magamaga nia bahihadu digaula. 16 Mee ga helekai adu gi nia daangada ala e huihui nadau mwuroi, “Kae ina godou mwuroi gi daha mo kinei! Hudee heina di hale dogu Damana be di hale huihui mee!” 17 Ana dama agoago gu langahia nnelekai di Beebaa Dabu e helekai boloo, “Meenei God, dogu haa manawa i doo hale, le e ulaula i ogu lodo be di ahi. 18 Digau aamua o Jew ga loomoi gi mee ga heeu, “Di mogobuna behee e mee di hai kooe e haga modongoohia oo donu di hai nia mee aanei?” 19 Jesus ga helekai gi digaula, “Oho ina gi daha di hale daumaha deenei, gei au ga haga duu labelaa di maa i lodo nia laangi e dolu.” 20 Digaula ga heeu gi mee, “Goe bolo ga haga duu di maa i lodo nia laangi e dolu? Ma nia ngadau e madahaa maa ono ne hau di Hale Daumaha deenei!” 21 Gei di Hale Daumaha dela e helekai iei Jesus, la go dono huaidina. 22 Dono madagoaa ne mouli aga, gei ana dama agoago gu langahia bolo mee gu helekai beelaa. Digaula gu hagadonu di Beebaa Dabu, mo nnelekai Jesus nogo helehelekai ai.

Jesus e iloo ia digau huogodoo

23 Di madagoaa Jesus nogo i Jerusalem i di madagoaa Tagamiami Pasoobaa, gei digau dogologowaahee gu hagadonu a mee i di nadau gidee nia mogobuna haga goboina a mee ne hai. 24 Gei Jesus digi hagadonu digaula, idimaa, mee e iloo ia nia manawa digaula huogodoo. 25 Dono hadinga ai ma ga haga modongoohia aga digaula gi mee, idimaa, mee e iloo ia hua nia manawa digaula.

John 3

Jesus mo Nicodemus

1 Tagi i golo, tangada o Jew, dono ingoo go Nicodemus, tangada i nia Pharisee. 2 Di boo e dahi, gei mee ga hanimoi gi Jesus, ga helekai, “Rabai, gimaadou e iloo bolo goe tangada agoago ne hagau mai go God, idimaa, tangada e mee di hai ana mogobuna be goe ai, maa God hagalee madalia a mee.” 3 Jesus ga helekai, “Au e hagi adu gi di goe di tonu: Tangada e mee di gidee Tenua o God ai, maa ia digi haanau labelaa.” 4 Nicodemus ga heeu, “Tangada dela gu madua, le e haanau labelaa behee? Mee e deemee di ulu gi lodo tinae dono dinana ga haanau hagalua!” 5 Gei Jesus ga helekai gi mee, “Au e hagi adu gi di goe di tonu: Ma tangada e ulu i Tenua o God ai, maa ia digi haanau i nia wai mo di Hagataalunga. 6 Tuaidina dangada goneiga ne haanau mai baahi nia maadua, gei di hagataalunga la mai i di Hagataalunga. 7 Goe hudee homouli gi agu helekai, ala bolo goodou gi haanau labelaa. 8 Di madangi e gono gi di gowaa dela e hiihai ginai, gei goe e longono dono lee, goe e de iloo be di maa e gono mai i hee, be e gono gi hee. E hai gadoo be digau huogodoo ala gu haanau i di Hagataalunga.” 9 Nicodemus ga heeu, “Dehee dono hai?” 10 Jesus ga helekai gi mee, “Goe tangada agoago aamua o Israel, gei goe e de iloo di mee deenei? 11 Au e hagi adu gi di goe di tonu, bolo gimaadou e helekai nia mee ala gu iloo gimaadou, gei gimaadou e haga modongoohia nia mee ala gu gidee gimaadou, gei deai tangada i goodou e hagadonu madau agoago. 12 Au gu hagi adu gi goodou nia mee o henuailala, gei goodou hagalee hagadonu. Gei nia mee o di langi ma ga hagi adu ko au gi goodou, le e hagadonu go goodou behee? 13 Deai tangada ne hana gi di langi ai, dela hua go Tama Tangada, go mee ne haneia i di langi . 14 Moses ne daudau dana gihaa baalanga mmee i hongo di laagau i lodo di anggowaa, e hai gadoo be di hai a Tama Tangada dela e hai loo gi daudau gi nua, 15 bolo digau huogodoo ala e hagadonu a mee, la ga hai mee gi di mouli dee odi. 16 Idimaa God ne aloho huoloo i henuailala dela ne dugu mai dana Dama daane hua e dahi, bolo digau huogodoo ala e hagadonu a mee, la hagalee mmade, ga hai mee gi di mouli dee odi. 17 Idimaa, God hagalee ne hagau mai dana Dama belee hagi aga henuailala. Mee ne hagau mai dana Dama belee hai di haga mouli henuailala. 18 Be koai ala e hagadonu dana Dama, ginaadou hagalee hagi aga. Be koai ala hagalee hagadonu dana Dama, digaula gu lawa di hagi aga, idimaa digaula digi hagadonu di Tama hua e-dahi a God. 19 Deenei di hai o di hagi aga: Di maalama gu hanimoi gi henuailala, gei nia daangada le aloho hua i di bouli laa hongo di maalama, idimaa, nadau hangaahaihai le e huaidu. 20 Nia daangada ala e hai nia huaidu, hagalee hiihai gi di maalama, ginaadou hagalee lloomoi gi di maalama, idimaa digaula hagalee hiihai nadau haihai huaidu gi haga modongoohia aga. 21 Nia daangada ala e hai nia mee donu, le e lloomoi gi di maalama, gei di maalama ga haga modongoohia aga nadau hegau ala nogo hai, mai nadau hagalongo ang gi God.”

Jesus mo John

22 Nomuli, gei Jesus mo ana dama agoago ga hula gi Judea, ga noho haga dulii i baahi digau i golo, e haihai ana babdais. 23 John nogo babdais labelaa ana daangada i Aenon, hoohoo gi Salim, idimaa, di gowaa deelaa e logo ono wai. Nia daangada e hula gi mee, e babdais go mee. 24 (Di mee deenei la i-mua di galabudi o John.) 25 Hunu daangada i nia dama agoago a John ga daamada ga lagalagamaaloo ang gi tangada o Jew i di hai o di hagahemeheme daumaha. 26 Digaula ga hula gi John, ga helekai gi mee, “Tangada agoago, goe e langahia taane nogo goolua i baahi i dua di monowai Jordan dela nogo helekai iei goe? Mee e hai ana babdais, gei digau huogodoo e hula gi mee.” 27 John ga helekai, “Ma deai tangada e hai ana mee ai, maa God la digi dugu anga. 28 Goodou la go ogu hagadootonu bolo au ne helekai: Ma hagalee ko au go di Mesaia. Au ne hagau mai i mua o mee. 29 Di ahina hai lodo la di ahina donu ni taane hai lodo, gei di hoo taane hai lodo dela e duu i baahi o mee e hagalongo, gu tentene i dono hagalongo gi di lee o taane hai lodo. Deenei di hai o di hagahonu o dogu tene. 30 Mee e hai loo gi damana mai dono hagalabagau, gei au e hai gi dulii mai dogu hagalabagau.

Mee dela ne haneia i di langi

31 “Mee dela ne haneia i di langi e aamua i nia mee huogodoo. Gei tangada henuailala e dau gi henuailala, e helehelekai i nia mee o henuailala. Gei mee ne haneia i di langi, la i-hongo nia mee huogodoo. 32 Mee e haga modongoohia ana mee ne gidee ge ne hagalongo gineia, gei tangada ne hagadonu ana haga modongoohia ai. 33 Tangada dela ga hagadonu ana haga modongoohia, la gu haga gila aga bolo God le e donu. 34 Tangada dela ne hagau mai baahi o God, le e helehelekai nia helekai a God, idimaa, God gu haga honu a mee gi dono Hagataalunga Dabu. 35 Tamana e aloho i dana Dama, gei gu dugu anga nia mee huogodoo gi mee. 36 Be koai hua dela e hagadonu Tama deelaa, geia e hai mee gi di mouli dee odi. Be koai hua dela hagalee hagalongo gi Tama deelaa, geia hagalee hai mee gi di mouli, e noho hua i lodo di hagawelewele o God.”

John 4

Jesus mo di ahina Samaria

1 Nia Pharisee gu longono bolo Jesus gu babdais ana dama agoago e dogologo i nia dama agoago ala ne babdais go John. 2 (Gei e donu, Jesus la digi babdais dana dangada e dahi, ala hua go ana dama agoago.) 3 Di madagoaa Jesus ne longono nnelekai digaula, mee ga hagatanga i Judea, ga hana gi muli gi Galilee. 4 Mee e hai loo gi hana laa lodo Samaria. 5 Mee ga dau adu gi Sychar i Samaria, dela e hagalee mogowaa i di gowaa a Jacob ne wanga gi dana dama daane go Joseph. 6 Di monowai geli Jacob la i golo. Jesus gu duadua i dono heehee mai, geia ga noho i baahi di monowai geli, gei di maa gu oodee. 7 Di ahina o Samaria ga hanimoi, belee haga hau ana wai, Jesus ga helekai gi mee, “Gaamai hunu wai e inu.” 8 (Ana dama agoago gu hula gi lodo di waahale e hui nadau meegai.) 9 Di ahina ga helekai, “Goe tangada o Jew, gei au tangada Samaria, malaa goe e madau au wai mai gi di au behee?” (Digau o Jew hagalee hai hegau gi nia ibu mo nia boolo digau o Samaria e hai hegau ai.) 10 Jesus ga helekai gi mee, “Maa goe e iloo di mee a God dela e wanga, e iloo ma koai dela e madau ana wai, goe ga dangi gi mee, gei mee ga gowadu nia wai haga mouli.” 11 Di ahina ga helekai, “Meenei, dau begedu ai, gei di monowai geli le e llala. Gei nia wai haga mouli le e gaamai kooe i hee? 12 Ma go tadau damana i mua, go Jacob dela ne gaamai gi gidaadou di monowai geli deenei. Mee mo ana dama mo ana manu huogodoo nogo inu mai i di maa. Malaa, goe e koia e aamua i Jacob?” 13 Jesus ga helekai gi mee, “Digau ma ga inu nia wai aanei, e hiieinu labelaa. 14 Gei digau ala ga inu nia wai ga wanga ko au, ginaadou hagalee hiieinu labelaa. Nia wai ala ga wanga ko au, ga hai di monowai o di mouli i nadau lodo, e wanga gi digaula di mouli dee odi.” 15 Di ahina ga helekai, “Meenei, gaamai laa nia wai aalaa! Gidee hiieinu au, ga hanimoi gi kinei labelaa e huai agu wai.” 16 Jesus ga helekai gi mee, “Hana, gahigahia doo lodo, lloomoi.” 17 Di ahina ga helekai, “Dogu lodo ai.” Jesus ga helekai, “E donu go dau helekai bolo goe doo lodo ai. 18 Gei goe gu hai lodo gi nia daane dogolima, gei taane dela e noho goolua dolomeenei, la hagalee di lodo ni oou. E donu go au helekai.” 19 Di ahina ga helekai, “Meenei, au gu modongoohia bolo goe di soukohp. 20 Madau maadua Samaria i mua nogo daumaha ang gi God i tomo di gonduu deenei, gei goodou digau o Jew e hai bolo Jerusalem la hua go di gowaa e daumaha ai gimaadou ang gi God.” 21 Jesus ga helekai gi mee, “ hagadonu ina au, di madagoaa ga dau mai, gei nia daangada ga hagalee daumaha ang gi Tamana i tomo di gonduu deenei, be i lodo Jerusalem. 22 Goodou digau Samaria la digi modongoohia loo be goodou e daumaha gi di ai, gei gimaadou digau o Jew e iloo be di maa koai e daumaha ginai gimaadou, idimaa, di hagamouli le e hanimoi i baahi digau o Jew. 23 Di madagoaa ga dau mai, gei gu i kinei, di madagoaa nia daangada ga daumaha ang gi Tamana i di hagataalunga mo di tonu. Idimaa, deenei taumaha e hiihai ginai Tamana gidaadou gi daumaha ang gi deia. 24 God la di hagataalunga, gei digau ala e daumaha ang gi mee, la gi daumaha i di hagataalunga mo di tonu.” 25 Di ahina ga helekai gi mee, “Au e iloo bolo di Mesaia (dela e haga ingoo bolo Christ) le e hanimoi. Mee ga hanimoi, le e hagi mai nia mee huogodoo.” 26 Gei Jesus ga helekai, “Deenei au go mee, dela e helehelekai adu.” 27 Di madagoaa hua deelaa, nia dama agoago a Jesus gu lloomoi labelaa, digaula gu homouli huoloo i di nadau gidee a Jesus e hagabooboo gi di ahina deelaa. Gei tangada i digaula e heeu gi di ahina deelaa ai, boloo, “Ma di aha e hiihai ginai goe?” be e heeu gi Jesus, “Goe e aha, dela e hagabooboo gi mee?” 28 Di ahina deelaa ga dugu dana mee haga hau wai, ga hana gi muli gi di waahale deelaa, ga helekai gi nia daangada, 29 “Lloomoi, mmada gi taane dela ne hagi mai agu mee huogodoo ala nogo haihai. Mee hagalee go di Mesaia?” 30 Digaula ga hagatanga i di waahale, ga hula gi Jesus. 31 Di madagoaa deelaa, gei nia dama agoago a Jesus ga helekai gi mee, “Tangada Agoago, miami!” 32 Gei mee ga helekai gi digaula, “Agu meegai i golo digi iloo goodou.” 33 Gei nia dama agoago a maa ga daamada ga heheeu i nadau mehanga, “Ma tangada gu gaamai ana meegai gi mee?” 34 Jesus ga helekai, “Agu meegai la go di daudali di hiihai o tangada dela ne hagau mai au, gei e haga lawa ana hegau gi heia. 35 Goodou di godou kai boloo: Nia malama e haa i golo, gei taugai ga hagi. Malaa, au e helekai adu gi goodou: Mmada gi humalia gi di hadagee, nia hua laagau la gu mmaadua, gu humalia di hagi. 36 Tangada dela e hagi, le e kae dono hui i dana moomee, geia e hagi gi di mouli dee odi. Deenei laa, tangada dela e dogi mo tangada dela e hagi, meemaa huogodoo e tentene. 37 Di kai deenei le e donu, bolo tangada e dahi e dogi, ge dahi e hagi. 38 Au ne hagau goodou, belee hagi di hadagee digi ngalua ginai goodou. Nia daangada ne ngalua gi di maa, gei goodou ga hagahumalia mai nadau ngalua.” 39 Digau Samaria dogologo i lodo di waahale deelaa ne hagadonu a Jesus i nnelekai di ahina dela ne hai: “Mee gu hagi mai agu mee huogodoo nogo hai.” 40 Gei di madagoaa digau o Samaria ne loomoi gi mee, digaula gu tangi gi mee, bolo mee gi noho i nadau baahi, gei Jesus ga noho i golo nia laangi e lua. 41 Digau dogologo gu hagadonu a mee mai i ana agoago. 42 Gei digaula ga helekai gi di ahina, “Gimaadou gu hagadonu dolomeenei, hagalee mai i au helekai, go gimaadou hua ne bida hagalongo gi mee. Gimaadou gu iloo bolo ma go mee go tahidi o di Hagamouli o henuailala.”

Jesus e hagahili di magi di tama daane tangada aamua

43 I muli dono noho i golo i nia laangi e lua, Jesus ga hagatanga, ga hana gi Galilee. 44 Idimaa, mee gu helekai, “Soukohp la hagalee hagalaamua i lodo dono guongo donu.” 45 Dono dau i Galilee, nia daangada gu hagahi mai a mee, idimaa, digaula gu hula gi Tagamiami Pasoobaa i Jerusalem, gu gidee ana mee huogodoo nogo hai i Tagamiami. 46 Jesus ga hana labelaa gi Cana i Galilee, di gowaa a mee ne huli nia wai gi hai nia waini. Tangada aamua oobidi i golo, dana dama daane e magi i Capernaum. 47 Dono longono hua bolo Jesus gu hanimoi i Judea gi Galilee, mee ga hana gi mee, ga dangi gi mee gi hana gi Capernaum, e hagahili dana dama gu hoohoo ga made. 48 Jesus ga helekai gi mee, “Tangada i goodou e hagadonu ai, maa goodou digi mmada gi nia mogobuna mono mee haga goboina dangada.” 49 Tangada aamua ga helekai, “Meenei, hanimoi dalia au i mua dagu dama ma ga made. 50 Jesus ga helekai gi mee, “Hana, dau dama la ga mouli.” Taane deelaa gu hagadonu nnelekai a Jesus, ga hana. 51 I dono hanadu hua gi dono hale, nia hege a maa ga heetugi gi mee mo nadau longo, “Dau dama la ga mouli!” 52 Mee ga heeu gi digaula di madagoaa behee dela ne humalia ai dana dama. Gei digaula ga helekai, “Di laa e dahi muli di oodee anaahi ne hili ai di magi o maa.” 53 Tamana gu langahia bolo deelaa di aawaa ne helekai Jesus boloo, “Dau dama la ga mouli.” Malaa, mee mo digau o dono hale huogodoo gu hagadonu. 54 Deenei di lua mogobuna Jesus ne hai i muli dono hanimoi i Judea gi Galilee.

John 5

Di hagahili i baahi di monowai

1 Nomuli, Jesus ga hana gi Jerusalem gi tagamiami daumaha. 2 Di monowai i nnelekai Hebrew bolo Bethzatha, e hoohoo gi di “Bontai Siibi” i Jerusalem, e tuu ai nia balanda e lima i dono gili. 3 Digau magi dogologo e kiikii i hongo nia balanda aalaa, digau deegida, digau mmade nadau wae, mo digau deemee di ngalungalua. Digaula e talitali hua nia wai di monowai gi ngalungalua, ain 4 idimaa, hunu madagoaa hua tangada di langi o Dimaadua e haneia gi di monowai deelaa, e haga ngalungalua nia wai. Tangada magi dela gu ulu matagidagi gi lodo nia wai ala gu ngalungalua, gu hili hua dono magi e de hilihili. 5 Taane i golo, nogo magi i lodo nia ngadau e motolu maa walu. 6 Jesus gu gidee a mee e moe i golo, geia gu iloo bolo mee nogo magi mai i mua loo, gei mee ga heeu, “Goe e hiihai e hagahili?” 7 Taane magi ga helekai, “Meenei, dagu dangada e hagamaamaa au ai gi lodo di monowai ma ga ngalungalua. Au ga menege adu gi lodo, gei tangada gu i-golo i ogu mua.” 8 Jesus ga helekai, “Duu i-nua, dahi aga doo moenge, haaele!” 9 Gei taane deelaa gu limalima gu humalia, ga dahi aga dono moenge, ga haaele. Di laangi ne hai di mee deenei, la di Laangi Sabad. 10 Gei digau aamua o Jew ga helekai gi tangada dela ne hagahili, “Di Laangi Sabad deenei, e hai baahi gi tadau haganoho dau dagidagi doo moenge.” 11 Gei mee ga helekai, “Tangada dela ne haga hili au, ne helekai mai bolo au gi dahi aga ina dogu moenge gi haele.” 12 Digaula ga heeu gi mee, “Taane la koai, dela ne helekai adu bolo goe gi heia di mee deenei?” 13 Gei taane dela ne haga hili le e de iloo ia Jesus. Idimaa, nia daangada dogologowaahee i di gowaa deelaa, gei Jesus gu ngala i mee. 14 Nomuli, Jesus ga gidee a mee i lodo di Hale Daumaha, ga helekai, “Hagalongo, goe gu humalia, malaa, hudee heia labelaa di huaidu gi dee tale adu labelaa di mee koia e huaidu.” 15 Taane deelaa ga hana ga hagi ang gi digau aamua o Jew, bolo ma go Jesus dela ne haga hili ia. 16 Malaa, digaula ga daamada ga hagahuaidu Jesus, i mee dela ne haga hili dana dangada i di Laangi Sabad. 17 Jesus ga helekai, “Dogu Damana le e ngalua i nia madagoaa huogodoo, gei au e hai gi ngalua.” 18 Nnelekai aanei gu hai digau aamua o Jew gi hiihai huoloo bolo e daaligi Jesus gi made. Hagalee bolo mee ne oho taganoho o di Laangi Sabad la hua, mo dana helekai dela bolo God la go dono Damana. Ana helekai la gu hai ia gi tongaadahi gi God.

Di mogobuna a Tama

19 Malaa, Jesus ga helekai, “Au e hagi adu gi goodou di tonu bolo di Tama e deemee di hai ana mee hua i deia. Mee e hai hua nia mee ala e gidee ia e hai go dono Damana. Nia mee ala e hai go Tamana, aalaa nia mee a Tama e hai. 20 Idimaa, Tamana e aloho i dana Dama ge e haga modongoohia ana mee ala e hai huogodoo gi dana Dama. Gei mee ga haga modongoohia nia mee humalia gi nonua i di mee deenei gi mee gi heia, gei goodou huogodoo ga goboina. 21 Gadoo be Tamana dela e haga mouli aga digau mmade, Tama e haga mouli ana daangada ala e hiihai ginai. 22 Tamana hagalee hagi aga. Mee gu wanga gi dana Dama nia mogobuna e dohu e hagi aga, 23 bolo huogodoo gi hagalaamua ina di Tama, be di hagalaamua Tamana. Be koai hua dela hagalee hagalaamua di Tama, geia digi hagalaamua Tamana, dela ne hagau mai a mee. 24 Au e hagi adu gi goodou di tonu: Digau ala e longono agu helekai ga hagadonu a mee dela ne hagau mai au, e hai mee gi di mouli dee odi. Digaula hagalee hagi aga, gu diiagi di made, gu hula gi di mouli. 25 Au e hagi adu gi goodou di tonu: di madagoaa ga dau mai, gei gu i kinei, di madagoaa digau mmade ga longono di lee o Tama a God, gei digau ala gu longono, ga mouli aga. 26 Gadoo be Tamana dela go taamada o di mouli, i di ala la hua, mee ne hai dana Dama gi hai taamada o di mouli. 27 God gu wanga di mogobuna o di hagi aga gi Tama, idimaa, mee go di Tama Tangada. 28 Hudee goboina gi nia mee aanei. Di madagoaa ga dau mai, digau mmade huogodoo ga longono dono lee, 29 ga loomoi gi daha mo nadau daalunga. Digau ala nogo haihai nia humalia, ga aala aga, ga mouli, gei digau ala nogo haihai nia huaidu, ga aala aga, ga hagaduadua.

Nia hagadootonu o Jesus

30 “Au e deemee di hai agu mee i dogu hiihai. Au e hagamodongoohia aga gi hai be nnelekai a God, malaa, dagu hagamodongoohia aga le e donu, idimaa, au hagalee hai agu mee ala e hiihai ginai. E hai hua nia mee ala e hiihai ginai a mee dela ne hagau mai au. 31 Ma au ga hagamodongoohia aga au, gei dagu hagamodongoohia ga hagalee gila bolo e donu. 32 “Malaa, tangada i golo e hagamodongoohia aga au, gei au e iloo bolo ana helekai i di au le e donu. 33 Ma go John dela ne hagau ginai godou gau kae hegau, ana haga modongoohia i di au le e donu. 34 Ma hagalee hai bolo au e hai gi hai dogu dangada haga modongoohia. Au e helekai hua i nia mee aanei, bolo gi mouli ai goodou. 35 John le e hai be di malama dela e ulaula ge e maahina, gei goodou gu hiihai gu tentene hagabalua i di maalama o maa. 36 “Malaa, agu hagamodongoohia i golo, e mada nonua i di hagamodongoohia ne hai go John: Nia mee Tamana bolo au gi heia, aanei e hai ko au, e haga modongoohia aga bolo Tamana la ne hagau mai au. 37 “Tamana ne hagau mai au gu haga modongoohia aga au. Goodou digi longono dono lee, ge digi mmada gi ono golomada. 38 Goodou digi daahia nnelekai a maa i lodo godou manawa, i goodou hagalee hagadonu tangada ne hagau mai go mee. 39 Goodou e halahala gi lodo di Beebaa Dabu, idimaa, goodou e hagamaanadu bolo goodou ga gidee di mouli dee odi i lodo di maa, gei di Beebaa Dabu deenei le e helehelekai i di au! 40 Gei goodou hagalee hiihai e loomoi e hai mee gi di mouli. 41 “Au hagalee hiihai gi di hagaamu o nia daangada. 42 Au e iloo bolo goodou nnagadilinga daangada, gei au e iloo bolo godou manawa aloho i God ai. 43 Au ne hanimoi i di mogobuna o dogu Damana, gei goodou digi hila mai gi di au. Maa tangada ma ga bida hanimoi hua i ono mogobuna, gei goodou e hila ang gi mee. 44 Goodou e hiihai hua e haga hagaamu godou mehanga, gei goodou hagalee hiihai e halahala di hagaamu a God. Malaa e hai behee, goodou e mee di hagadonu au? 45 Hudee hagabaubau bolo ma ko au dela e haga huaidu goodou gi dogu Damana. Moses, go mee dela go di godou hagadagadagagee, go mee dela e hagi aga godou huaidu. 46 Maa nei bolo goodou ne hagadonu huoloo a Moses, gei goodou belee hagadonu au labelaa, idimaa, nia mee a mee ne hihi la ne hihi i di au. 47 Gei di maa goodou hagalee hagadonu nia mee a maa ala ne hihi, gei goodou le e hagadonu agu helekai behee?”

John 6

Jesus e haangai ana daane lima mana (5,000)

1 Nomuli, Jesus ga tuu adu laa lodo Tai o Galilee (dela e haga ingoo bolo Tiberias). 2 Dogologowaahee e daudali a mee, i di nadau gidee ana mee haga goboina e- haga hili digau magi. 3 Jesus ga hana gi di gowaa nnoonua, ga noho i baahi ana dama agoago. 4 Tagamiami Pasoobaa la gu hoohoo mai. 5 Jesus ga mmada gi digau dogologowaahee e loomoi gi deia, gei mee ga heeu gi Philip, “Dehee di gowaa e mee di hui mai tadau meegai e dohu di haangai nia daangada aanei?” 6 Mee ne hai di mee deenei belee hagamada Philip. Gei mee gu iloo hua ana mee ala belee hai. 7 Philip ga helekai, “Nia meegai dee dohu ginigini gi digau aanei le hui gi nia bahihadu silber i hongo di lua lau.” 8 Tama agoago i golo dono ingoo go Andrew, tuaahina o Simon Peter, ga helekai gi mee, 9 “Tama daane i ginei ana palaawaa e lima ge lua iga. Malaa, nia maa e dee dohu gi nia daangada huogodoo aanei!” 10 Jesus ga helekai gi digaula, “Heia digaula gi noho gi lala” (di gowaa deelaa e logo geinga tolo), gei digau huogodoo gu noho gi lala. Nia daane holongo e lima mana(5,000). 11 Jesus ga dahi aga nia palaawaa, ga danggee gi God, ga duwwe gi digaula. Mee ga hai labelaa beelaa gi nia iga, gei digau huogodoo gu miami baagawa. 12 Di madagoaa digaula ne maaluu, mee ga helekai gi ana dama agoago, “Hagabudu ina nia mee ne dubu, hudee hagauwwou mee.” 13 Gei digaula gu hagabudu nia maa huogodoo, gu haa nia gada e madangaholu maa lua ne dubu i nia palaawaa e lima, ala ne gai go nia daangada. 14 Nia daangada huogodoo ne gidee nia mee haga goboina a Jesus ne hai, ga helekai, “E donu huoloo, deenei soukohp dela belee hanimoi gi henuailala!” 15 Jesus gu iloo ia bolo digaula ga loomoi, ga huhuuli ia gi king, gei mee ga hana labelaa gi daha modogoia gi nia gonduu.

Jesus e haele i hongo nia wai

16 Hiahi ia di mee, gei ana dama agoago ga lloo ia gi di tai, 17 ga kaga gi hongo di boodi, ga hula gi muli laa lodo di tai gi Capernaum. Gu boo di mee, gei Jesus digi hanimoi. 18 Di madangi gu gono maaloo, gu hai di tai gi bagibagia. 19 Nia dama agoago gu aalo di nadau boodi, holongo nia maele e dolu be e haa, ga mmada gi Jesus e haele mai i hongo tai, gei digaula gu uli nadau gai, gu mmaadagu huoloo. 20 Jesus ga helekai, “Goodou hudee mmaadagu, ma ko Au.” 21 Digaula gu tentene huoloo gu haga uda a Mee gi lodo di boodi, gei di boodi gu dau i di gowaa dela belee hula ginai digaula.

Nia daangada e halahala a Jesus

22 Dono daiaa, gei digau dogologowaahee ala nogo noho i tongotai, gu gidee bolo ma di boodi hua e-dahi nogo i golo. Digaula gu iloo, bolo Jesus digi hana dalia ana dama agoago, digaula ne hula hua mada ginaadou. 23 Nia boodi mai Tiberias ga loomoi gi tongotai, hoohoo gi di gowaa digau dogologowaahee nogo gai nadau palaawaa, i muli hua di Tagi ne hai dana danggee ang gi God. 24 Di madagoaa digau dogologowaahee ne gidee bolo Jesus gu hagalee i golo mo ana dama agoago, digaula ga kaga gi nia boodi, ga hula gi Capernaum, e halahala a Mee.

Jesus go di palaawaa haga mouli

25 Di madagoaa nia daangada ne gidee a Jesus i baahi i golo di tai, digaula ga helekai gi Mee, “Tangada Agoago, Goe ne dau i kinei ana hee?” 26 Jesus ga helekai, “Au e hagi adu gi goodou di tonu: Goodou e halahala Au, i godou maaluu di gai nia palaawaa, gei hagalee i godou modongoohia agu mogobuna. 27 Hudee ngalua gi nia meegai ala e mee di huaidu. Ngaalua gi nia meegai ala iai di mouli dono hagaodi ai, ala e gowadu go Tama Tangada, idimaa, Tamana go God la gu wanga di maaga haga mogobuna gi hongo o mee.” 28 Digaula ga heeu gi mee, “Gimaadou e hai di madau aha, gi mee ai gimaadou di hai nia mee a God ala e hiihai ginai bolo gi heia?” 29 Jesus ga helekai, “Di mee a God e hiihai ginai gi heia bolo gi hagadonu ina dana Dama dela ne hagau mai.” 30 Digaula ga heeu, “Di mogobuna behee dela e hai kooe ga mmada ginai gimaadou, ga hagadonu goe? Goe ga hai dau aha? 31 Madau maadua namua ne gai nadau ‘manna’ i di anggowaa, be nia helekai di Beebaa Dabu e helekai boloo: Mee ne wanga gi digaula nia palaawaa mai di langi gi geina.” 32 Jesus ga helekai, “Au e hagi adu gi goodou di tonu: Nia palaawaa Moses ne gowadu gi goodou hagalee nia palaawaa mai i di langi. Ma go dogu Damana dela e gowadu nia palaawaa donu mai i di langi. 33 Di palaawaa a God dela e gowadu, la go mee dela ne haneia i di langi ga wanga di mouli gi henuailala.” 34 Digaula ga tangi gi mee, “Meenei, gaamai di palaawaa deenei i nia madagoaa huogodoo.” 35 Jesus ga helekai, “Au go di palaawaa haga mouli. Be koai hua dela ga hanimoi gi di au, geia hagalee hiigai. Be koai hua dela e hagadonu au, geia hagalee hiieinu. 36 Au ne hagi adu gi goodou bolo goodou gu mmada mai, ge hagalee hagadonu. 37 Digau huogodoo ala ga gaamai go dogu Damana, ga loomoi gi di au. Gei au hagalee kili gi daha digaula, 38 idimaa au ne haneia i di langi belee hai di hiihai o mee dela ne hagau mai au, hagalee go dogu hiihai. 39 Deenei di hiihai o maa dela ne hagau mai au, bolo au gi hudee diagia tei dangada i ginaadou ala ne gaamai go mee, bolo gi haga mouli ina digaula huogodoo i di laangi hagaodi. 40 Idimaa, di hiihai dogu Damana le e hai bolo digau huogodoo ala ga mmada gi Tama, ga hagadonu a mee, ga hai mee gi di mouli dee odi. Gei au ga haga mouli aga digaula i di laangi hagaodi.” 41 Digau o Jew ga daamada ga leelee logo i mee, idimaa, mee ne helekai boloo: Au go di palaawaa dela ne haneia i di langi. 42 Digaula ga helekai, “Taane deenei go Jesus, la hagalee go tama daane a Joseph? Gidaadou e iloo tamana mo tinana o maa. Mee e helekai behee dela bolo ia ne haneia i di langi?” 43 Jesus ga helekai, “Hudee leelee logo i godou mehanga. 44 Tangada e mee di hanimoi gi di au ai, maa Tamana dela ne hagau mai Au, digi dugu mai a mee, gei Au ga haga mouli aga a mee i di laangi hagaodi. 45 Ma gu lawa di hihi go nia soukohp boloo: Nia daangada huogodoo le e kabe nadau mee mai God. Digau huogodoo ala gu longono, gu kabe mai mee, le e loomoi gi di au. 46 Deenei la hagalee hai bolo tangada gu mmada gi Tamana. Go mee mai baahi o God, deelaa hua go mee ne mmada gi Tamana. 47 Au e hagi adu di tonu: Koai e hagadonu Au, geia e hai mee gi di mouli dee odi. 48 “Au go di palaawaa o di mouli. 49 Godou maadua mmaadua nogo gai nadau ‘manna’ i lodo di anggowaa, gei digaula gu mmade. 50 Deenei di hai o di palaawaa dela ne haneia i di langi: Be koai hua dela ga gai di maa, geia hagalee made. 51 Au go di palaawaa mouli dela ne haneia i di langi. Be koai hua ma ga gai di palaawaa deenei, ia e- mouli ga hana hua beelaa. Di palaawaa dela e wanga ko au gi mee, la go ogu goneiga bolo gi mouli ai henuailala.” 52 Deenei di mee ne hidi ai digau o Jew ne daamada ga lagalagamaaloo i nadau mehanga, ga heheeu, “Dehee di hai taane deenei e mee di gaamai ono goneiga e gai go gidaadou?” 53 Jesus ga helekai, “Au e hagi adu di tonu: Maa goodou hagalee gai nia goneiga ge hagalee e inu nia dodo o Tama Tangada, goodou di godou mouli ai. 54 Be koai hua dela e gai ogu goneiga mo e inu ogu dodo, ia e hai mee gi di mouli dee odi, gei au ga haga mouli aga a mee i di laangi hagaodi. 55 Idimaa, ogu goneiga la go nia meegai donu, gei ogu dodo la go nia wai inu donu. 56 Be koai hua ga gai ogu goneiga, ga inu ogu dodo, ia e noho i ogu lodo, au e noho i ono lodo. 57 Tamana dela e mouli ne hagau mai au, gei au e mouli mai i mee. E hai gadoo be tangada dela ma ga gai ogu goneiga, ia e mouli mai i di au. 58 Deenei la go di palaawaa dela ne haneia i di langi. Di palaawaa deenei la hagalee hai be nia palaawaa o godou maadua mmaadua ne gai i mua, nomuli digaula ga mmade. Tangada dela ga gai di palaawaa deenei, e mouli ga hana hua beelaa.” 59 Jesus ne hai ana helekai aanei i dono madagoaa nogo agoago i lodo synagogee i Capernaum.

Nnelekai o di mouli dee odi

60 Dogologo i ana dama agoago ne longono nnelekai aanei, ga helekai, “Di agoago deenei e haingadaa. Ma koai e mee di hagalongo gi di maa?” 61 Jesus gu modongoohia, gei tangada ne hagi ang gi mee ai bolo digaula nogo leelee logo i nia mee aanei, ga helekai gi digaula, “Nia kai aanei gu haga paagege goodou? 62 E hai behee maa goodou ga mmada gi Tama Tangada ma ga hana gi nua gi di gowaa nogo noho iei mee i mua? 63 Di Hagataalunga o God dela e dugu mai di mouli, gei nia mogobuna dangada le e balumee. Agu helekai le e gaamai di Hagataalunga haga mouli a God. 64 Gei hunu goodou hagalee hagadonu.” (Jesus gu modongoohia hua mai i di matagidagi, digau ala hagalee hagadonu, koai dela ga hagi anga ia.) 65 Gei mee ga duudagi adu boloo, “Deenei tadinga dagu mee ne hagi adu gi goodou boloo: Tangada e mee di hanimoi gi di au ai, maa Tamana digi dumaalia anga.” 66 Mai i nia helekai aanei, digau dogologo i digau nogo daudali a mee gu huli gi muli, gu diiagi a mee. 67 Gei Jesus ga helekai gi ana dama agoago dilongoholu maa lua, “Gei goodou, goodou e hiihai e hula labelaa?” 68 Simon Peter ga helekai gi mee, “Meenei Tagi, ma koai dela belee hula ginai gimaadou? Nia helekai ala e iai di mouli dee odi, la aalaa hua i doo baahi. 69 Gimaadou gu hagadonu gu iloo bolo goe go di Tama Dabuaahia dela ne hanimoi i baahi o God.” 70 Jesus ga helekai, “Au ne hili goodou dilongoholu maa lua, gei tangada e dahi i goodou la tangada huaidu!” 71 Mee nogo leelee i Judas, tama daane Simon Iscariot. Ma e aha mee tangada e dahi i ana dama agoago, gei go mee dela ga hagi anga a Jesus.

John 7

Jesus mo ono duaahina daane

1 Nomuli, gei Jesus ga hana laa lodo Galilee. Mee e de hiihai di hana gi Judea, idimaa, digau aamua o Jew e hiihai e daaligi a mee gi made. 2 Tagamiami ‘Tabernacle’ o digau o Jew gu hoohoo ga hai.* 3 Gei nia duaahina daane o Jesus ga helekai gi mee, “Hana gi Judea gi mmada adu au dama agoago gi au mee ala e haihai. 4 Deai tangada e hagammuni ana mee ala e haihai ai, maa ia e hiihai bolo nia daangada gi iloo ia. Heia au mee gi henuailala hagatau gi modongoohia ginaadou goe!” 5 (Ono duaahina daane hagalee hagadonu a mee.) 6 Jesus ga helekai gi digaula, “Di madagoaa daudonu mai gi di au, la digi dau mai. Nia madagoaa huogodoo edaudonu adu gi goodou. 7 Henuailala e hiihai adu gi goodou, gei e de hiihai mai, idimaa, au e haga modongoohia i nia madagoaa huogodoo bolo ana hangaahai le e huaidu. 8 Goodou hula gi Tagamiami. Au hagalee hana, idimaa, di madagoaa dela e daudonu mai gi di au, la digi dau mai.” 9 Mee ne helekai beenei, ga noho hua i Galilee. Jesus i Tagamiami o nia ‘tabernacle’ 10 I muli hua ono duaahina daane ne hula gi Tagamiami, gei Jesus gu hana labelaa, malaa, mee ne hana hagammuni. 11 Digau aamua o Jew nogo halahala a mee i Tagamiami deelaa. Digaula ga heheeu, “Mee i hee?” 12 Nia daangada dogologo e leelee haga moolee i mee i nadau mehanga. Hunu daangada e helekai, “Mee tangada humalia.” Hunu daangada e helekai, “Deeai, mee e halahalau nia daangada.” 13 Gei deai tangada e hagabooboo hagammaa ai, idimaa, digaula e mmaadagu digau aamua o Jew. 14 Tagamiami ne hoohoo ga lawa, gei Jesus ga hana gi di Hale Daumaha, ga daamada ga agoago. 15 Nia gau aamua o Jew gu homouli, ga helekai, “Tangada deenei ne iloo nia mee logo mai hee, be mee digi kuulu?” 16 Jesus ga helekai gi digaula, “Agu agoago, la hagalee ni aagu, gei ne loomoi i baahi o God, dela ne hagau mai au. 17 Be koai hua e hiihai e hai nia mee a God ala e hiihai ginai, ia e iloo be agu agoago la ne loomoi i baahi o God, be mai ogu mogobuna. 18 Tangada dela ma ga helehelekai i deia, le e hiihai bolo ia e kae dono hagalaamua. Gei tangada dela e hiihai bolo ia e hagalaamua Tangada dela ne hagau mai ia, go mee dela e donu, gei di kai tilikai i dono baahi ai. 19 E donu bolo Moses la gu gowadu gi goodou nia haganoho. Malaa, tangada i goodou ne daudali nia haganoho aalaa ai. Gei goodou e aha ala e hiihai bolo goodou e daaligi au gi made?” 20 Digau dogologowaahee ga helekai, “Di hagataalunga huaidu i oo lodo! Ma koai belee daaligi goe gi made?” 21 Jesus ga helekai, “Di mogobuna haga goboina e dahi ne hai ko au, gei goodou huogodoo gu goboina huoloo. 22 Moses ne hai dana haganoho bolo gi sirkumsais ina godou dama daane (ma hagalee go Moses gei go godou maadua mmaadua ne daamada di maa), malaa, goodou e sirkumsais tama daane i di Laangi Sabad. 23 Maa tama daane e sirkumsais i di Laangi Sabad gi dee mooho taganoho Moses, malaa goodou e hagawelewele mai gi di au eiaha, be au ne hai dagu dangada gi humalia i di Laangi Sabad? 24 Hudee heia godou hagi aga laa daha. Hagi aga ina hua gi di mee dela e donu!”

Jesus go di Mesaia?

25 Hunu gau i digau o Jerusalem e helekai, “Ma hagalee go taane deenei dela e halahala go digau aamua belee daaligi gi made? 26 Mmada! Mee e agoago hua i mua digau dogologo, gei digaula hagalee helekai hai baahi gi mee! Malaa, digaula gu iloo bolo mee go di Mesaia? 27 Di madagoaa di Mesaia ga hanimoi, tangada e iloo ai be mee ne hanimoi i hee, gei gidaadou huogodoo e iloo be mee ne hanimoi i hee.” 28 Di madagoaa Jesus nogo agoago i lodo di Hale Daumaha, mee ne helekai gi nua, “Goodou gu iloo donu au, be au tangada mai hee? Gei au hagalee ne hanimoi hua i ogu mogobuna. Ma go mee dela ne hagau mai au le e donu. Gei goodou e de iloo a mee, 29 gei au e iloo a mee, idimaa, au ne hanimoi i baahi o mee, go mee ne hagau mai au.” 30 Digaula belee kumi a mee, gei tangada e dahi ne bili gi mee ai, idimaa, dono aawaa la digi dau mai. 31 E dogologo digau i lodo digau dogologowaahee aanei ne hagadonu a mee. Digaula ga helekai boloo, “Di Mesaia ga hanimoi, le e hai behee? Mee ga hai ana mogobuna e mada logo i nia mogobuna a taane deenei?” Digau hagaloohi e hagau e kumi Jesus 32 Nia Pharisee gu longono nia leelee haga moolee digau dogologo i di gili o Jesus, gei digaula mo nia dagi hai mee dabu, ga hagau nadau gau hagaloohi e kumi Jesus. 33 Jesus ga helekai, “Au e noho hua i godou baahi i di madagoaa bodobodo, nomuli gei au ga hana gi mee dela ne hagau mai au. 34 Goodou ga halahala au, gei e deemee di gidee, idimaa, goodou e deemee di hula gi di gowaa dela ga iei au.” 35 Nia dagi aamua o Jew ga helehelekai i nadau mehanga, “Mee ga hana gi hee, dela ga deemee di gidee-(e-)gidaadou? Mee ga hana gi lodo nia waahale digau Greece ala e noho tadau daangada, ga hai ana agoago gi digau Greece? 36 Mee ne helekai boloo: Gidaadou ga halahala ia, gei e dee gidee ia, gei gidaadou e deemee di hula gi di gowaa dela ga noho ieia. Dono hadinga bolo aha?”

Nia wai haga mouli

37 Di laangi haga muliagina Tagamiami deelaa la di laangi koia e hagalabagau, gei Jesus ga duu i-nua, ga helekai gi nua loo, “Be koai hua gu hiieinu, geia gi hanimoi gi di au. 38 Be koai hua dela ga hagadonu au, geia gi inumia. Idimaa di Beebaa Dabu e helekai boloo: Nia wai haga mouli ga hali mai i dono baahi.” 39 Jesus ne helekai i di gili di Hagataalunga dela ga hai mee ginai digau ala gu hagadonu ia. Di madagoaa deelaa, gei di Hagataalunga digi haneia, idimaa, Jesus digi haga uda ginai di madamada.

Di hinihini mehanga nia daangada

40 Hunu gau i lodo digau dogologowaahee aanei, gu longono a mee ne helekai beenei. Digaula ga helekai, “Taane deenei la soukohp donu.” 41 Hunu gau e helekai, “Mee go di Mesaia.” Gei hunu gau e helekai, “Di Mesaia la hagalee hanimoi i Galilee. 42 Di Beebaa Dabu e helekai bolo di Mesaia le e gila mai i di madawaawa o king David, e haanau mai i Bethlehem de waahale a David.” 43 Digau dogologowaahee aalaa gu noho hagabuulinga dagidahi i di gili o Jesus. 44 Hunu gau bolo ginaadou e kumi a mee, ge tangada ne bili gi mee ai.

Tee hagadonu digau aamua o Jew

45 Digau hagaloohi ga hula gi muli, gei nia dagi hai mee dabu, mo nia Pharisee ga heeu, “Goodou e aha digi laha mai a mee?” 46 Nia gau hagaloohi ga helekai, “Ma deai tangada e helehelekai be tangada deenei ai!” 47 Gei nia Pharisee ga helekai, “Mee gu halahalau goodou labelaa? 48 Goodou e iloo tangada aamua be di Pharisee i golo gu hagadonu a mee? 49 Digau dogologowaahee aanei e de iloo nia haganoho Moses, ga hidi ai digaula ga noho i lala di hagahalaua a God!” 50 Di Pharisee Nicodemus, taane dela ne hana ga heetugi gi Jesus i mua, ga helekai gi digaula, 51 “Di tonu o tadau haganoho le e hai bolo gidaadou e deemee di haga huaidu nia daangada i mua di iloo di mee dela ne hai.” 52 Gei digaula ga helekai, “Goe tangada Galilee labelaa? Daulia di Beebaa Dabu, gei goe ga iloo bolo ma soukohp ne hanimoi i Galilee ai!”

John 8

Di ahina ne poo i dana hai be di manu

1 Gei digaula huogodoo ga hula dagidahi gi nadau hale, gei Jesus ga hana gi di Gonduu Olib. 2 Hagaluada loo dono daiaa, mee ga hana gi muli gi di Hale Daumaha. Digaula huogodoo ga dagabuli mai gi baahi o mee, geia ga noho gi lala, ga daamada ga agoago gi digaula. 3 Digau haga dondonu haganoho mo nia Pharisee ga laha mai di ahina ne kumi nogo hai di huaidu hai be di manu, ga haga duu a mee gi i mua digaula huogodoo. 4 Digaula ga helekai gi Jesus, “Tangada Agoago, di ahina deenei ne kumi i dana hai di huaidu hai be di manu. 5 I lodo tadau haganoho, Moses e helekai bolo di ahina beenei, le e dilidili gi made. Malaa, goe ga helekai bolo aha?” 6 Digaula ne hai nadau heeu belee hagamada a Jesus e hagi aga a mee. Gei mee ga hagahaa gi mua, ga hihi i hongo di gelegele gi dono madaalima. 7 Di madagoaa digaula e tuu i golo, e haihai nadau heeu gi mee, gei mee ga duu aga gi nua, ga helekai gi digaula, “Be koai hua i goodou digi hai dana hala, daamada dili a mee gi di hadu.” 8 Gei mee ga hagahaa labelaa gi mua, ga hihi i hongo di gelegele. 9 Di madagoaa hua digaula ne longono nia mee aanei, digaula huogodoo ga hula, hagadau dagidahi, digau mmaadua matagidagi. Jesus ga dubu modogoia, gei di ahina deelaa e duu hua i golo. 10 Jesus ga duu aga, ga helekai gi mee, “Aahee digaula? Ma tangada ne dubu i golo ai belee hagahuaidu goe?” 11 Di ahina deelaa ga helekai, “Meenei, tangada ai.” Jesus ga helekai, “E humalia, au hogi hagalee hagahuaidu goe. Malaa, hana, hudee heia labelaa di huaidu!”

Jesus go di maalama o henuailala

12 Jesus ga helekai labelaa gi nia Pharisee, “Au go di maalama o henuailala. Be koai hua dela e daudali au, geia e hai mee gi di maalama o di mouli, ge hagalee e haele i lodo di bouli.” 13 Nia Pharisee ga helekai gi mee, “Dolomeenei gei goe e haga modongoohia hua goe. Au helekai nogo helekai iei goe, la ono hagahonu ai.” 14 Jesus ga helekai, “Deeai. Maeaha maa au ne haga modongoohia hua au, gei agu helekai le e donu, idimaa, au e iloo au ne hanimoi i hee ge e hana gi hee. Goodou e de iloo be au ne hanimoi i hee ge e hana gi hee. 15 Goodou e hagi aga gi di ala taangada. Gei au hagalee hagi aga tangada. 16 Maa au ga hagi aga, dagu hagi aga le e donu, idimaa, au hagalee modogoau hua. Tamana dela ne hagau mai au, le e madalia au. 17 Ma e hihi i lodo di godou haganoho bolo nia daangada hagadootonu dogolua ma ga donu gi di mee e dahi, nnelekai meemaa le e donu. 18 Au dela e haga modongoohia aga dagu baahi, gei Tamana dela ne hagau mai au, e haga modongoohia aga dalia au labelaa.” 19 Digaula ga heeu gi mee, “Doo damana la i-hee?” Jesus ga helekai, “Goodou e de iloo au mo dogu Damana. Ma goodou ne iloo au, gei goodou gu iloo labelaa dogu Damana.” 20 Jesus ne helehelekai nia mee aanei huogodoo, i dono madagoaa nogo agoago i di Hale Daumaha i di gowaa dela e dugu ai tebedebe hai tigidaumaha. Gei tangada ne kumi a mee ai, idimaa, di madagoaa o maa digi dau mai.

Goodou e deemee di hula gi di gowaa dela e hana ginai au

21 Jesus ga helekai labelaa gi digaula, “Au ga hana gi daha, goodou ga halahala au, gei goodou ga mmade i lodo godou huaidu. Goodou e deemee di hula gi di gowaa dela e hana ginai au.” 22 Gei digau aamua o Jew ga helekai, “Mee e helekai bolo gidaadou e deemee di hula gi di gowaa dela e hana gineia. Deenei le e hai dono hadinga bolo mee ga daaligi ia gi made?” 23 Jesus ga helekai, “Goodou digau ni henuailala, gei au ne haneia i nua. Goodou digau henuailala, gei au hagalee tangada o henuailala. 24 Deelaa laa au e hagi adu gi goodou, bolo goodou ga mmade i lodo godou huaidu. Maa goodou hagalee hagadonu bolo “Au Dela Ko au,” gei goodou ga mmade i lodo godou huaidu.” 25 Digaula ga heeu gi mee, “Goe koai?” Jesus ga helekai, “Gu lawa di hagi adu ko au i taamada loo! 26 Nia mee logowaahee belee helekai iei au i goodou. Nia mee logowaahee belee haga huaidu ai goodou. Tangada ne hagau mai au, go mee dela e donu huoloo, gei au ne hagi ang gi henuailala nia mee ala ne longono iei au mai baahi o mee.” 27 Digaula digi modongoohia bolo Jesus ne helehelekai gi digaula i Tamana. 28 Gei mee ga helekai gi digaula, “Di godou madagoaa ma ga daudau gi nua di Tama Tangada, goodou ga iloo laa, bolo “Au Dela Ko au.” Gei goodou ga iloo labelaa, bolo au hagalee hai agu mee hua i di au. Au e helekai hua i nia mee o dogu Damana, bolo gi helekai ai. 29 Mee dela ne hagau mai au, le e madalia au. Mee digi diagia au modogoau, idimaa, au e hai nia mee ala e hiihai ginai mee i nia madagoaa huogodoo.” 30 Digau dogologo ala ne longono nia mee a Jesus nogo helehelekai ai, gu hagadonu a mee.

Digau moholo mo nia hege

31 Jesus ga helekai gi digau ala gu hagadonu ia, “Maa goodou ma ga daudali agu agoago, goodou gu hai nia dama agoago donu ni aagu. 32 Goodou ga iloo di tonu, gei di tonu ga haga mehede goodou.” 33 Digaula ga helekai, “Gimaadou nia hagadili ni Abraham. Gimaadou digi hai hege gi nia daangada. Goe e helekai bolo gimaadou ga haga maahede behee?” 34 Jesus ga helekai, “Au e hagi adu gi goodou di tonu: Digau huogodoo ala e huaidu, la nia hege ni di huaidu. 35 Di hege la hagalee tangada donu ni di madahaanau. Gei tama daane la tangada donu ni di madahaanau ga hana hua beelaa. 36 Maa di Tama ga haga mehede goodou, gei goodou gu maahede donu. 37 Au e iloo bolo goodou nia hagadili ni Abraham, gei goodou e hagamahi belee daaligi au gi made, idimaa, goodou ala hagalee daudali agu agoago. 38 Au e helehelekai i nia mee o dogu Damana ne hagi mai, gei goodou e hai nia mee di godou damana ne hagi adu.” 39 Digaula ga helekai, “Di madau damana la go Abraham!” Jesus ga helekai, “Maa goodou nia dama ni Abraham, goodou belee hai nia mee a maa nogo hai. 40 Agu mee huogodoo ala ne hai, le e hagi adu gi goodou di tonu, dela ne hagalongo ginai au mai baahi o God. Dolomeenei, gei goodou e hagamahi belee daaligi au gi made. Abraham digi hai dana mee beenei! 41 Goodou e hai nia mee di godou damana nogo hai.” Gei digaula ga helekai, “Ma go God dela go di madau damana. Gimaadou nia dama donu ni mee.” 42 Jesus ga helekai gi digaula, “Maa nei bolo God la Tamana donu ni goodou, goodou la belee aloho i di au, idimaa, au ne hanimoi i baahi o God, gei dolomeenei au gu- i ginei. Au hagalee ne hanimoi hua i di au, go mee ne hagau mai au. 43 Goodou e aha ala digi modongoohia agu helekai? Goodou hagalee modongoohia, idimaa, goodou e deemee di hagalongo gi agu helekai. 44 Goodou nia dama ni Satan, di godou damana, gei goodou e hiihai e daudali di hiihai godou damana. Mai taamada, gei mee tangada daaligi dangada gi made. Mee digi madalia loo di baahi dela e donu, idimaa, ma deai di tonu i ono lodo ai. Di madagoaa mee ma ga helekai kai tilikai, mee e hai hua go dono iloo mai ono lodo, idimaa, mee tangada hai kai tilikai, gei mee la go tamana o nia kai tilikai huogodoo. 45 Gei au e helekai nia helekai ala e donu, deelaa di godou mee ne de hagadonu au. 46 Ma koai i goodou e mee di haga modongoohia aga bolo au gu ihala, gu hai di huaidu? Maa au e helekai i di tonu, goodou e aha ala hagalee hagadonu au? 47 Tangada dela ne hanimoi i baahi o God, e hagalongo gi nia helekai a God. Go goodou hua ala hagalee mai baahi o God, deelaa di mee e hagalee hagalongo ai goodou.”

Jesus mo Abraham

48 Digaula ga heeu adu gi Jesus, “Madau helekai la hagalee donu di helekai bolo goe tangada Samaria, ge iai di hagataalunga huaidu i oo lodo?” 49 Jesus ga helekai, “Dogu hagataalunga huaidu ai. Au e hagalaamua dogu Damana, gei goodou e haga balumee au. 50 Au hagalee halahala dogu hagalaamua. Tangada i golo dela e hagalaamua au ge e donu dana hagi aga.” 51 Au e hagi adu gi goodou di tonu: Be koai hua dela ga daudali agu helekai, geia hagalee loo e made.” 52 Digau o Jew ga helekai gi mee, “Dolomeenei, gei gimaadou gu donu bolo di hagataalunga huaidu i oo lodo. Abraham gu made, nia soukohp gu mmade, gei goe e helekai bolo be koai hua dela ga daudali au agoago, geia hagalee loo e made. 53 Madau damana Abraham gu made. Goe e helekai bolo goe e mada aamua i mee? Nia soukohp e mmade labelaa. Goe e hai bolo goe koai?” 54 Jesus ga helekai gi digaula, “Maa Au ga bida hagalaamua Au, dogu hagalaamua dono hadinga ai. Tangada dela e hagalaamua Au, la dela go dogu Damana, go Mee dela e helekai ai goodou bolo go di godou God. 55 Goodou digi iloo a mee, gei au e iloo a mee. Maa nei bolo au ne helekai bolo au e de iloo eau a mee, au tangada hai kai tilikai be goodou. Au e iloo a mee, ge e daudali ana helekai. 56 Di godou damana go Abraham gu tene gi dono mmada gi dogu hanimoi. Mee gu mmada gu tentene.” 57 Digaula ga helekai, “Oo ngadau digi madalima, gei goe bolo goe gu gidee Abraham?” 58 Jesus ga helekai, “Au e hagi adu gi goodou di tonu: I mua Abraham ne haanau, gei “Au Ko au” gu i-golo.” 59 Digaula belee belee dilidili a mee gi nia hadu, gei Jesus ga haga ngala ia, ga hagatanga gi daha mo di Hale Daumaha.

John 9

Jesus e hagahili taane ne haanau deegida

1 Di madagoaa Jesus ne heehee adu, mee ga gidee taane deegida mai i dono haanau. 2 Ana dama agoago ga helekai adu gi mee, “Meenei Tangada Agoago, di huaidu ni ooi dela ne hidi ei mee ga haanau deegida? Nia huaidu o maa, be nia huaidu o nia maadua o maa?” 3 Jesus ga helekai, “Dono deegida la hagalee ne hidi mai i ono huaidu be nia huaidu ono maadua Mee e dee gida belee haga kila aga nia mogobuna o God i baahi o mee. 4 Di madagoaa e aa, gidaadou e hai gi hai nnegau a tangada dela ne hagau mai au, idimaa, di boo ga dau mai, tangada e mee di ngalua ai. 5 Dogu noho i henuailala, go au di maalama o henuailala.” 6 I muli dana helehelekai nia mee aanei, Jesus ga bui ana haawale, ga unugi gi nia gelegele pigi, ga hunu gi nia golomada o taane deelaa, 7 ga helekai gi mee, “Hana gaugaulia oo golomada i di monowai Siloam. (Di ingoo deenei dono hadinga bolo “Hagau”), gei taane deelaa ga hana, ga gaugau ono golomada, ga hanimoi, gu gidee ia. 8 Digau nogo noho hoohoo gi mee, mo digau ala nogo gidee a mee nogo hai ana madamadau mee i mua, ga heheeu, “Ma hagalee go taane dela nogo madamadau ana mee deenei?” 9 Hunu gau e helekai, “Go mee deenaa.” Hunu gau e helekai, “Deeai, hagalee go mee, mee e dina gi mee.” Gei taane deelaa ga helekai aga, “Au go mee.” 10 Digaula ga heeu gi mee, “Oo golomada la ne hai behee ga gidee?” 11 Mee ga helekai, “Taane dela e haga ingoo bolo Jesus, ne hai ana gelegele pigi, ga hunu gi ogu golomada, ga helekai mai bolo gi hana gi Siloam, gaugaulia ogu golomada, gei au ga hana. Di madagoaa hua dela ne gaugau ogu golomada, gei au gu gidee. 12 Digaula ga heeu labelaa, “Mee i hee?” Mee ga helekai, “Au e de iloo.”

Nia Pharisee e halahala di hai o di haga hili

13 Gei digaula ga lahi taane deelaa nogo deegida gi baahi nia Pharisee. 14 Di laangi Jesus ne hai ana gelegele pigi ga hagahili nia golomada o taane deelaa, la di Laangi Sabad. 15 Nia Pharisee ga heeu labelaa gi taane deelaa di hai ne gidee ia. Gei mee ga hagi anga gi digaula, “Mee ne wanga ana gelegele pigi gi ogu golomada, gei au ga gaugau ogu golomada, dolomeenei gei au gu gidee.” 16 Hunu Pharisee ga helekai, “Taane dela ne hai di mee deenei, hagalee ne hanimoi i baahi o God, idimaa, mee hagalee haga kila aga nia haganoho o di Laangi Sabad.” Gei hunu ginaadou e helekai, “Ma tangada huaidu e mee di hai nia hagadilinga mogobuna beenei?” Digaula gu waewae ginaadou gu noho geegee. 17 Nia Pharisee ga heeu labelaa gi taane deelaa, “Goe e helekai bolo taane ne hai oo golomada gi gidee, e haga ingoo kooe bolo aha?” Mee ga helekai, “Mee go soukohp.” 18 Digau aamua o Jew hagalee hiihai e hagadonu bolo mee nogo deegida i mua ga nomuli ga gidee. Gei digaula ga gahigahi mai nia maadua o maa, 19 ga heeu gi meemaa, “Tama daane ni goolua deenei? Goolua e helekai bolo mee ne haanau deegida? Malaa, mee e aha dela gu gidee dolomeenei?” 20 Nia maadua o maa ga helekai, “Gimaua e iloo di mau dama daane, gimaua e iloo bolo mee ne haanau deegida. 21 Gei gimaua e de iloo be mee ne aha dela ga mee di gidee dolomeenei, koai ne hai nia golomada o maa gi aala. Heeu gi mee, mee gu madua, gu mee hua dana helekai.” 22 Nia maadua o maa ne helekai beenei i di nau mmaadagu i digau aamua o Jew, idimaa, digaula gu buni bolo tangada dela ga haga modongoohia a mee bolo Jesus go di Mesaia, digaula ga hagabagi tangada gi daha mo synagogee. 23 Dela di mee nia maadua o maa ne helekai, “Mee gu madua, heeu gi mee.” 24 Digaula ga gahi mai haga lua taane dela ne haanau mai deegida, ga helekai adu gi mee, “Hagamodu i mua o God, bolo goe e helekai id i tonu. Gimaadou e iloo bolo taane dela ne hagahumalia goe, la taane hai mee hala.” 25 Taane deelaa ga helekai, “Au e de iloo be mee taane hai mee hala be deeai, gei au e iloo bolo au nogo deegida, dolomeenei au gu gidee.” 26 Digaula ga heeu, “Mee ne hai dana aha adu gi di goe? Mee ne hai oo golomada gi gidee behee?” 27 Mee ga helekai, “Au gu lawa dagu hagi adu gi goodou, gei goodou hagalee hagalongo. Ma di aha e hiihai goodou e hagalongo labelaa ginai? Holongo goodou e hiihai labelaa e hai nia dama agoago ni mee?” 28 Digaula ga haganneennee a mee ga helekai, “Goe di tama agoago ni mee, gimaadou nia dama agoago ni Moses. 29 Gimaadou e iloo bolo God gu helekai gi Moses, gei tangada deelaa, gimaadou e de iloo di gowaa dela ne hanimoi iei mee.” 30 Taane ga helekai, “Di mee haga goboina! Goodou e de iloo di gowaa dela ne hanimoi taane deelaa, gei mee ne haga hili ogu golomada! 31 Gidaadou e iloo bolo God la hagalee hagalongo gi digau hai mee hala, mee e hagalongo gi digau ala e hagalaamua ia mo di haga gila aga dono hiihai. 32 Mai taamada o henuailala, deai tangada ne longono bolo tangada i golo ne haga gideenia golomada tangada deegida mai i dono haanau. 33 Maa taane deenei la hagalee mai baahi o God, mee e deemee di hai ana mee!” 34 Digaula ga helekai, “Goe ne haanau, ga madua aga i lodo di huaidu, goe bolo e agoago mai gimaadou?” Gei digaula ga hagabagi a mee gi daha mo synagogee.

Tee gida di baahi gi di hagataalunga

35 Jesus ga longono bolo digaula gu hagabagi taane deelaa gi daha mo synagogee, ga gidee taane deelaa, ga heeu, “Goe e hagadonu Tama Tangada?” 36 Taane ga helekai, “Meenei, hagia mai taane deenei, gi mee au di hagadonu a mee!” 37 Jesus ga helekai gi mee, “Goe gu gidee a mee, go mee dela e leelee adu gi di goe dolomeenei.” 38 Taane deelaa ga helekai, “Meenei dogu Dagi, au gu hagadonu!” ga dogoduli ia gi lala i mua o Jesus. 39 Jesus ga helekai, “Au ne hanimoi gi henuailala belee hai dagu hagi aga. Digau deegida ga gidee, gei digau ala e gidee ga dee gida.” 40 Hunu Pharisee ala i di gowaa deelaa gu longono ana helekai, ga heeu, “Ma e hai be au helekai bolo gimaadou gu dee gida labelaa?” 41 Jesus ga helekai, “Maa goodou e dee gida, gei godou huaidu ai. Gei goodou e helekai bolo goodou e gida, dono hadinga bolo godou huaidu la i-golo hua.”

John 10

Di ala kai o tangada hagaloohi siibi

1 Jesus ga helekai, “Au e hagi adu gi goodou di tonu: Tangada dela hagalee e ulu i di bontai di abaaba siibi, gei e gaga gi lodo i tuai gowaa, la tangada gaiaa. 2 Tangada dela e ulu i di bontai, deelaa tangada hagaloohi siibi donu. 3 Tangada dela e madamada humalia di bontai, le e huge di bontai gi mee. Nia siibi e longono dono lee ma ga gahigahi nadau ingoo, ga dagi ginaadou gi malaelae. 4 Mee ga dagi digaula gi malaelae, ga hana i mua digaula, nia siibi ga daudali a mee, idimaa, digaula e iloo dono lee. 5 Digaula hagalee daudali tangada gee, e llele hua gi daha mo mee, idimaa, digaula e de iloo dono lee.” 6 Jesus ne hagi anga dana ala kai deenei gi digaula, gei digaula digi modongoohia be mee ne helekai bolo aha.

Jesus tangada hagaloohi siibi humalia

7 Jesus ga helekai labelaa, “Au e hagi adu gi goodou di tonu: Au go di bontai di abaaba siibi. 8 Digau huogodoo ala ne loomoi i ogu mua, la digau gaiaa mo digau dada mee, gei nia siibi digi hagalongo gi digaula. 9 Au go di bontai. Be koai hua dela ga ulu i di au, le e haga mouli. Mee ga ulu gi lodo, ga ulu gi daha, e gidee ia ana meegai. 10 Tangada gaiaa e hanimoi hua belee gaiaa, e daaligi gi made mo di oho gi daha. Gei au ne hanimoi bolo gi mouli goodou i di mouli hagatau. 11 Au go tangada hagaloohi siibi humalia, e wanga dehuia dono mouli i ana siibi. 12 Tangada ngalua, dela hagalee tangada hagaloohi siibi, ge hagalee hai mee gi nia siibi, dono madagoaa ma ga mmada gi di paana lodo geinga e hanimoi, gei mee ga diiagi nia siibi ga hana ga lele, gei di paana lodo geinga ga waluwalu nia siibi gi lellele dagidahi. 13 Tangada ngalua le e lele hua gi daha, idimaa, mee tangada ngalua, ge hagalee haa manawa i nia siibi. 14 Au go tangada hagaloohi siibi humalia. Au e iloo eau agu siibi, gei agu siibi e iloo au. 15 E hai be Tamana dela e iloo au, au e iloo Tamana. Au e wanga dehuia dogu mouli i agu siibi. 16 Nia siibi labelaa i golo ni aagu, gei digaula hagalee i lodo di abaaba siibi deenei. Gei au e hai gi laha mai digaula labelaa. Digaula ga longono dogu lee, gei digaula ga hai di hagabuulinga siibi hua e-dahi, e hai di nadau dangada hagaloohi siibi hua e-dahi. 17 Tamana le e aloho i di au, idimaa, au dela e wanga dogu mouli, bolo gi hai mee labelaa ginai. 18 Deai tangada e daa dogu mouli gi daha mo au ai. Ko au hua e bida wanga dogu mouli. Au ogu donu e wanga dogu mouli, gei au ogu donu e daa di maa labelaa. Deenei di mee dogu Damana ne hai mai bolo au gi heia.” 19 Nnelekai aanei la gu hai nia daangada gi noho waewae geegee. 20 Digau dogologo i digaula e helekai boloo, “Di hagataalunga huaidu la gu noho i baahi o mee, mee gu boiboi. Goodou e hagalongo gi mee eiaha?” 21 Gei hunu gau e helekai, “Tangada iai di hagataalunga huaidu, hagalee leelee beenei! Di hagataalunga huaidu e mee di haga gidee tangada deegida behee?!”

Digau o Jew e haga balumee a Jesus

22 Di madagoaa gu dau mai e hai ai Tagamiami e hagadabu di Hale Daumaha i Jerusalem i lodo di madagoaa magalillili. 23 Jesus e heehee i hongo di “Balanda Solomon” i lodo di Hale Daumaha, 24 gei digau o Jew ga haganiga mai a mee ga helekai, “E waalooloo behee go dau haga gologolo gimaadou beenei? Hagia mai haga huudonu, be di maa kooe go di Mesaia?” 25 Jesus ga helekai, “Au gu lawa di hagi adu gi goodou, gei goodou hagalee hagadonu au. Nia hegau haga goboina ala nogo hai ko au i di mogobuna dogu Damana, ne haga modongoohia aga au. 26 Goodou hagalee hagadonu, idimaa, goodou hagalee nia siibi ni aagu. 27 Agu siibi e hagalongo gi dogu lee. Au e iloo digaula, gei digaula e daudali au. 28 Au e wanga di mouli dee odi gi digaula, digaula hagalee mmade, ge tangada e daa digaula gi daha mo au ai. 29 Nia mee Tamana ne gaamai gi di au le koia e aamua i nia mee huogodoo, tangada e mee di kae nia maa gi daha mo dogu Damana ai. 30 Tamana mo au le e dahi.” 31 Gei nia daangada ga ogo labelaa nadau hadu belee dilidili a mee. 32 Jesus ga helekai gi digaula, “Au gu hai agu hegau haga goboina humalia e logo i godou mua, aalaa nia mee ni Tamana ne gaamai bolo gi heia. Malaa, di mogobuna dehee i nia maa dela belee dilidili iei au go goodou?” 33 Digaula ga helekai, “Gimaadou hagalee belee dilidili goe i au hegau humalia ne hai. Gimaadou e dilidili goe, idimaa, goe e hagahuaidu a God. Goe tangada hua, gei goe e helekai bolo goe go God.” 34 Jesus ga helekai, “Ma gu lawa di hihi i lodo di godou haganoho bolo God gu helekai bolo goodou la nia god. 35 Gidaadou gu iloo bolo nnelekai di Beebaa Dabu le e donu ga hana hua beelaa, gei God le e gahi digau ala ne wanga ginai ana helekai bolo nia god. 36 Gei mai gi di au, Tamana ne hili au ga hagau mai gi henuailala. Malaa, e hai behee go di godou helekai bolo au e hagahuaidu a God, idimaa, au dela ne helekai bolo au go Tama a God? 37 Hudee hagadonu ina au maa au hagalee hai nia mee o dogu Damana e hiihai ginai bolo au gi heia. 38 Maa agu mee ala e hai la go nnegau o dogu Damana, e aha dela goodou hagalee hagadonu au, goodou belee hagadonu hua agu hegau haga goboina, gei goodou ga iloo mo di modongoohia bolo Tamana le e noho i ogu lodo, gei au e noho i ono lodo.” 39 Digaula belee kumi a mee labelaa, gei mee gu hana gi daha mo digaula. 40 Gei Jesus ga hana labelaa gi muli gi di baahi dela i golo di monowai Jordan i di gowaa John nogo hai ana babdais, ga noho i golo. 41 Digau dogologo ne loomoi gi mee, ga helehelekai, “John la hagalee hai ana mogobuna haga goboina, gei ana helekai huogodoo i di gili tangada deenei, le e donu.” 42 Digau dogologo nogo i golo gu hagadonu a mee.

John 11

Di made o Lazarus

1 Taane dono ingoo go Lazarus, e noho i Bethany, ne magi. Bethany la go di guongo dela e noho ai a Mary mo dono duaahina go Martha. 2 (Mary deenei la go Mary ne llingi dana lolo kala gi nia wae o Tagi, ga omo gi nia ngaahulu o dono libogo, dono duaahina go Lazarus dela nogo magi.) 3 Taga haanau ahina deelaa ga hai di nau hegau gi Jesus boloo, “Meenei Tagi, doo ehoo hagaaloho la gu magi.” 4 Di madagoaa Jesus ne longono, geia ga helekai, “Di hagaodi o di magi deenei la hagalee go di made o Lazarus. Di mee deenei ne hai belee haga madamada a God, na hai labelaa di mee haga madamada Tama a God.” 5 Jesus e aloho i Martha, mo dono duaahina ahina, mo Lazarus. 6 Jesus gu longono bolo Lazarus gu magi, malaa, mee gu noho hua i di gowaa deelaa i nia laangi e lua. 7 Nomuli, gei mee ga helekai gi ana dama agoago, “Gidaadou ga hula gi muli gi Judea.” 8 Ana dama agoago ga helekai, “Meenei, Tangada Agoago, nia laangi dulii ne too gi daha, gei nia daangada i golo e hiihai e dilidili goe gi nia hadu, gei goe e helekai bolo goe e hana labelaa gi muli?” 9 Jesus ga helekai, “Di laangi e dahi e madangaholu maa lua ono aawaa, hagalee hai beelaa? Digau ma ga heehee , la hagalee hingahinga, idimaa, digaula e gidee di maalama o henuailala. 10 Maa digaula ga taele i di boo, le e hingahinga, idimaa, di maalama la hagalee i baahi digaula.” 11 Jesus ne helekai nia mee aanei, ga duudagi adu, “Tadau ihoo Lazarus gu kii. Au e hana, e hangahanga a mee.” 12 Ana dama agoago ga helekai gi mee, “Meenei, maa mee e kii, mee ga humalia hua.” 13 Nnelekai a Jesus le e hai bolo Lazarus la gu made, gei digaula e hagamamaanadu bolo mee ne helekai bolo Lazarus e kii hua.” 14 Jesus ga haga modongoohia haga madammaa gi digaula, “Lazarus la gu made. 15 Gei au e tentene i goodou gili, i di au hagalee nogo madalia a mee, bolo gi hagadonu goodou. Gidaadou ga hula gi mee.” 16 Thomas (dela e haga ingoo bolo Didymus) ga helekai ang gi ono ehoo dama agoago, “Gidaadou ga hula dalia Tangada Agoago, gi mmade gidaadou madalia a mee.”

Jesus la go di haga mouli aga mo di mouli

17 Di madagoaa Jesus ne dau i golo, gei mee ga iloo bolo Lazarus la gu danu i nia laangi e haa gu too gi daha. 18 Bethany le e hoohoo gi Jerusalem, hogoohi mai nia maele e lua. 19 Digau o Jew dogologo ne loomoi belee haga tentene Martha mo Mary i di made di nau duaahina daane. 20 Di madagoaa Martha ne longono ia bolo Jesus la gu hanimoi, mee ga hana belee haga heetugi gi mee, gei Mary le e noho hua i lodo di hale. 21 Martha ga helekai gi Jesus, “Meenei dogu Dagi, maa goe nogo i ginei, gei dogu duaahina daane la digi made. 22 Gei au e iloo bolo dolomeenei God ga dumaalia adu gi di goe tei mee ma ga dangi iei goe gi mee.” 23 Jesus ga helekai gi mee, “Doo duaahina ga mouli aga.” 24 Martha ga helekai gi Jesus, “Au e iloo bolo dogu duaahina le e mouli aga i di laangi hagaodi.” 25 Jesus ga helekai gi mee, “Au go di haga mouli aga, mo di mouli. Digau ala ga hagadonu au, ga mouli, maeaha maa ginaadou ga mmade. 26 Digau ala e mouli ge e hagadonu au, e hagalee loo e mmade ga hana hua beelaa. Goe e hagadonu di mee deenei?” 27 Gei Martha ga helekai gi mee, “Uaa, Meenei, au e hagadonu bolo goe go di Mesaia, go Tama a God dela belee hanimoi gi henuailala.”

Jesus gu madatangi

28 Muli hua Martha ne helekai, geia ga hana, ga gahigahi hagammuni dono duaahina ahina Mary, ga helekai gi mee, “Tangada Agoago gu i ginei, mee e heheeu goe.” 29 Di madagoaa Mary ne longono ia, ga duu i-nua, ga hagalimalima ga hana ga heetugi gi mee. 30 Jesus digi dau i di guongo deelaa, nogo i di gowaa hua ne heetugi eia gi Martha. 31 Digau ala nogo haga manawa lamalia Mary i lodo di hale, ga gidee a mee ne ulu hagalimalima gi malaelae. Digaula ne haga bau, bolo mee e hana gi taalunga, e dangi i golo. Gei digaula ga daudali a mee. 32 Mary gu dau i di gowaa dela e noho ai a Jesus. Dono madagoaa ne gidee ia a mee, geia ga dogoduli, ga helekai, “Meenei Tagi, maa goe nogo i ginei, gei dogu duaahina daane la digi made.” 33 Jesus ga gidee a mee mo digau labelaa i golo e tangitangi, gei dono manawa gu ngalungalua huoloo. 34 Gei mee ga heeu, “Goodou ne danu a mee i hee?” Digaula ga helekai gi mee, “Meenei, hanimoi, mmada.” 35 Jesus gu madatangi. 36 Digaula ga helekai, “Mmada malaa, di aloho o maa la gu damanaiee huoloo i mee.” 37 Malaa, hunu gau i digaula ga helekai, “Mee gu haga gida dana dangada deegida. Malaa e hai behee, mee e deemee di daa a Lazarus gi daha mo di made?!”

Lazarus gu hagamouli

38 Jesus ga ngalungalua labelaa dono manawa, ga hana gi taalunga. Taalunga la di bagungoo, gei di bontai di maa e pono gi di hadu. 39 Jesus ga helekai, “Daawa ina gi daha di hadu.” Martha, tuaahina o tangada dela ne made, ga helekai gi mee, “Meenei, ma gu bilau huoloo, idimaa, mee ne made gu haa ono laangi.” 40 Jesus ga helekai gi mee, “Au digi helekai bolo goe ga gidee di madamada o God, maa goe ga hagadonu?” 41 Digaula ga daa gi daha di hadu, Jesus ga mmada gi nua, ga helekai, “Di mee bolo goe, Tamana, i doo hagalongo mai gi di au. 42 Au e iloo bolo goe e hagalongo mai i nia madagoaa huogodoo, gei au ne helekai beenei bolo gi hagadonu digau aanei, bolo ma kooe dela ne hagau mai au.” 43 I muli hua ana helekai aanei, geia ga helekai gi nua, “Lazarus, ulu mai gi daha!” 44 Mee ga ulu mai. Nia lima o maa mono wae e didi gi di gahu lodo daalunga, gei nia hadumada o maa e gahu gi di gahu. Jesus ga helekai gi digaula, “Wweedee a mee. Hagau ina a mee gi hana.”

Di haga nohonoho di hai belee daaligi a Jesus

45 E dogologo digau ne loomoi gi Mary, ne mmada gi nia mee ne hai go Jesus, gu hagadonu a mee. 46 Hunu gau ga hula gi muli gi nia Pharisee, ga hagi ang gi digaula nia mee a Jesus ne hai. 47 Nia Pharisee mo nia dagi hai mee dabu, ga gahi mai di hagabuulinga gau hai gabunga aamua, ga helekai, “Gidaadou ga hai tadau aha? Mmada gi nia mogobuna huogodoo taane deenei ala e haihai! 48 Maa gidaadou ga dumaalia gi mee gi heia nia mee aanei, gei digau huogodoo ga hagadonu a mee, gei digau aamua o Rome ga loomoi, ga oho gi daha tadau Hale Daumaha mo tadau henua hagatau!” 49 Tangada e dahi i digaula, dono ingoo go Caiaphas, di tagi aamua hai mee dabu di ngadau deelaa, ga helekai, “Goodou e de iloo nia mee! 50 Goodou digi modongoohia bolo maa tangada e dahi e made gi nia daangada, koia e humalia i di haga huaidu tenua huogodoo?” 51 (Caiaphas digi helekai hua i deia, gei mee ne helekai beenei, idimaa, mee tagi aamua hai mee dabu i di ngadau deelaa, gei mee ne haga modongoohia, bolo Jesus le e made gi digau o Jew, 52 malaa, hagalee go digaula la hua. E hagabuni mai labelaa nia dama a God huogodoo ala gu mamaaheu.) 53 Tugi di laangi deelaa ga huli gi muli, gei digau aamua o Jew ga haga maanadu bolo e daaligi a Jesus gi made. 54 Malaa, Jesus gu hagalee heehee haga mmaa i lodo Judea, gu hagatanga, gu hana gi di gowaa hoohoo gi di anggowaa e hana gi tama guongo go Ephraim, di gowaa dela e noho iei mee mo ana dama agoago. 55 Tagamiami Pasoobaa digau o Jew la gu hoohoo mai, gei digau dogologo gu lloo aga i nadau gowaa gi Jerusalem belee haga kila aga di nadau hai haga madammaa i mua Tagamiami ga daamada. 56 Digaula e halahala a Jesus, ga dagabuli i lodo di Hale Daumaha, ga heheeu, “Goodou le e hai bolo aha? Taane deelaa le e hanimoi gi Tagamiami be deeai?” 57 Nia dagi hai mee dabu mo nia Pharisee gu hai di nadau haga iloo, bolo tangada ga gidee ia Jesus, gi haga iloo gi galabudi a mee.

John 12

Jesus e hagatulu i Bethany

1 Nia laangi e ono i mua Tagamiami Pasoobaa, Jesus ga hana gi Bethany, di guongo o Lazarus, taane dela ne haga mouli go mee. 2 Digaula ga hagatogomaalia di nadau hagamiami hiahi, gei Martha e hagamaamaa e duwwe nia meegai. Lazarus tangada e dahi i digau ala e noho i baahi o Jesus i teebele. 3 Mary ga gaamai dana loaabi lolo kala, dela koia e hui ngadaa huoloo, ne hai gi nia “nard”, ga llingi gi nia wae o Jesus, ga omo gi nia ngaahulu o dono libogo. Di lolo kala gu kala hagatau i lodo di hale deelaa. 4 Tama agoago Jesus go Judas Iscariot, dela ga hagi anga a mee, ga helekai, 5 “Ma e aha di lolo kala deenei digi huina gi daha nia bahihadu silber e dolu lau, nia bahihadu ga wanga gi digau hagaloale?” 6 Mee ne helekai beenei, idimaa hagalee go dono manawa i digau hagaloale, gei idimaa, mee tangada gaiaa. Go mee dela e benebene di budehede hadu ge e daadaa ana mee i di maa. 7 Jesus ga helekai, “Hudee heia a mee. Dugua a mee gi benebene ana mee gi di laangi dela e danu iei au. 8 Godou gau hagaloale le e noho i godou baahi i di waalooloo, gei au ga hagalee i godou baahi i di waalooloo.”

Di haga nohonoho di hai e daaligi a Lazarus

9 Digau dogologowaahee ne longono bolo Jesus la i Bethany, digaula ga hula gi golo. Hagalee go Jesus hua ne hula ginai, e hula labelaa e mmada gi Lazarus ne haga mouli aga go Jesus. 10 Malaa, nia dagi hai mee dabu gu hagamaanadu bolo e daaligi a Lazarus gi made labelaa, 11 idimaa, go mee ne hai digau o Jew dogologowaahee gi diiagi digaula, ga hagadonu a Jesus.

Jesus e ulu i Jerusalem i dono aali

12 Hooaga dono daiaa, digau dogologowaahee ne lloomoi gi Tagamiami Pasoobaa, ga longono bolo Jesus e hanimoi gi Jerusalem. 13 Digaula ga kae nadau manga laagau be nia louniu, ga hula belee haga heetugi gi mee, ga wwolowwolo, “Hagaamuina God! God gi hagahumalia ina a mee dela e hanimoi i di ingoo o Dimaadua! God gi hagahumalia ina di King o Israel!” 14 Jesus ga gidee ia tamaa-‘donkey’, ga gaga gi nonua, ga hana i hongo di maa, gi hai be nnelekai di Beebaa Dabu gu helekai: 15 “Di waahale o Zion, goe hudee madagu! Di godou king deenei e hanadu i hongo tamaa-‘donkey’.” 16 Di madagoaa deelaa, gei nia dama agoago a maa digi modongoohia di mee deelaa, gei di madagoaa Jesus dela ne haga madamada, gei digaula ga langahia bolo di Beebaa Dabu gu helekai beenei, gei digaula gu hai nia mee aanei gi mee. 17 Nia daangada nogo i baahi o Jesus i dono madagoaa ne gahigahi a Lazarus gi daha mo taalunga, ga haga mouli a mee mai di made, gu haga iloo di mee dela ne hai. 18 Digau dogologowaahee gu heetugi gi mee, idimaa, digaula gu longono di mogobuna a maa dela ne hai. 19 Nia Pharisee ga helehelekai i nadau mehanga, “Goodou mmada, gidaadou hagalee loo e gila! Mmada, digau henuailala hagatau la gu daudali hua a mee!”

Hunu gau Greece e halahala a Jesus

20 Hunu gau Greece, i lodo digau ala e hula gi Jerusalem belee daumaha di madagoaa Tagamiami Pasoobaa. 21 Digaula ga hula gi Philip (tangada mai Bethsaida i lodo Galilee), ga helekai, “Meenei, gimaadou e hiihai e heetugi gi Jesus.” 22 Philip ga hana, ga hagi anga gi Andrew, gei meemaa dogolua ga hula, ga haga iloo gi Jesus. 23 Jesus ga helekai gi meemaa, “Di madagoaa la gu dau mai ang gi Tama Tangada e hai mee gi dono madamada aamua. 24 Au e hagi adu di tonu: Di lii-‘wheat’ la hagalee tomo, maa digi doo gi lodo nia gelegele, ga made. Ma ga made, di maa ga hua logowaahee. 25 Maa tangada ma ga aloho i dono mouli, la ga hagalee mouli. Maa tangada ma ga de hiihai gi dono mouli henuailala, la ga hai mee hua gi di mouli, ga hana hua beelaa. 26 Be koai e hiihai e hai hegau mai, geia e hai gi daudali au, geia ga madalia au i di gowaa dela iei au. Gei dogu Damana le e hagalaamua tangada dela e hai hegau mai gi di au.

Jesus e helekai i dono made

27 “Dolomeenei, dogu manawa la gu manawa gee. Gei au ga helekai bolo aha? Au belee helekai boloo: Tamana, goe hudee dugua mai di madagoaa deenei? Gei deelaa tadinga dogu hanimoi, bolo gi dau au gi di hagaduadua deenei! 28 Tamana, haga madamada ina doo ingoo!” Di lee e haneia i di langi, “Au gu haga madamada dogu ingoo, gei au ga haga madamada labelaa di maa.” 29 Digau dogologo e tuu i golo gu longono di lee deelaa, gei hunu ginaadou e hai bolo ma di lee atili, ge hunu ginaadou e hai bolo ma tangada di langi e leelee gi mee!” 30 Jesus ga helekai, “Di lee hagalee ne hai mai gi di au, gei ne hai adu gi goodou. 31 Dolomeenei di madagoaa e hagi aga ai henuailala. Dolomeenei di tagi o henuailala ga hudu gi daha. 32 Dogu madagoaa ma ga daudau gi nua i henuailala, gei au ga dahi mai gi di au nia daangada huogodoo.” 33 Mee e helekai i nia mee aanei, belee haga modongoohia aga tagadilinga made dela e made ieia. 34 Digau dogologo ga helekai, “Madau Haganoho e hagi mai bolo di Mesaia le e mouli ga hana hua beelaa. E hai behee, goe dela e helekai bolo di Tama Tangada le e daudau gi nua? Tama Tangada deenei la koai?” 35 Jesus ga helekai gi digaula, “Di maalama la ga noho i godou baahi i di madagoaa dulii. Hula hua belaa i di godou ala, di madagoaa e hai mee gi di maalama, gi deemee di hanadu di bouli gi goodou. Tangada dela e heehee i lodo di bouli, le e de gidee dono gowaa e hana ginai. 36 Hagadonu ina di maalama i di madagoaa goodou e hai mee gi di maa, gi hai goodou nia daangada ni di maalama.”

Tee hagadonu o nia daangada

Muli Jesus ne helekai, gei mee ga hana hagammuni gi daha mo digaula. 37 Maeaha maa mee ne hai ana mogobuna haga goboina huogodoo aanei i mua nadau golomada, gei digaula hagalee hagadonu a mee, 38 bolo gi kila ai nia helekai soukohp Isaiah ala ne hai boloo, “Meenei Tagi, ma koai dela e hagadonu tadau mee ala gu haga modongoohia? God ne haga modongoohia ana mogobuna la gi di ai?” 39 Deenei tadinga di nadau dee hagadonu, idimaa, Isaiah gu helekai labelaa boloo, 40 “God la gu haga bouli nia golomada digaula, ge gu tai nadau hagabaubau, bolo nadau golomada gi de gidee, gei nadau hagabaubau gi de modongoohia, gei digaula ga hagalee huli mai gi di au, bolo gei au ga hagahili digaula. Aanei nia helekai a God.” 41 Isaiah ne helekai beenei, idimaa, mee gu gidee di madamada o Jesus, mee e helekai i mee. 42 Gei deeai, dogologowaahee nia dagi o digau o Jew e hagadonu a Jesus, gei digaula hagalee haga modongoohia aga nadau hagadonu, idimaa, digaula gu mmaadagu i nia Pharisee ga kili digaula gi daha mo synagogee. 43 Digaula gu hiihai e haga gila aga nia hiihai o nia daangada, laa hongo di hiihai mai baahi o God.

Di hagi aga mai nnelekai a Jesus

44 Jesus ga helekai dono lee gi nua, “Be koai hua dela e hagadonu au, gei mee ne hagadonu labelaa tangada a mee dela ne hagau mai au. 45 Be koai hua e gidee ia au, e gidee labelaa a mee dela ne hagau mai au. 46 Au go di maalama ne hanimoi gi henuailala, bolo digau ala e hagadonu au, ga hagalee noho i lodo di bouli. 47 Au hagalee hagi aga digau ala e longono agu agoago, ge hagalee daudali nia maa. Au hagalee ne hanimoi belee hagi aga henuailala, au ne hanimoi belee haga dagaloaha henuailala. 48 Tangada dela ga hudu Au gi daha, ge hagalee daudali agu agoago, gei nia helekai ala ne helekai iei Au e hagi aga a mee i di laangi hagaodi. 49 Idimaa, hagalee nnelekai ni aagu. Tamana dela ne hagau mai au, go mee hua dela ne dugu mai nia mee ala e helekai ge e leelee iei au.” 50 Gei au e iloo bolo dana haganoho deenei le e gaamai di mouli dee odi. Agu mee ala e helekai ai, la go nia mee a Tamana ne hagi mai bolo gi helekai ai.”

John 13

Jesus e tono nia babaawae o ana dama agoago

1 Di laangi i mua Tagamiami Pasoobaa, Jesus gu modongoohia ia bolo dono madagoaa e hagatanga i henuailala, e hana gi baahi Tamana la gu dau mai. Mee e aloho i ana daangada donu i henuailala. Mee e aloho i digaula ga dae loo gi di hagaodi. 2 Jesus mo ana dama agoago e miami hiahi. Gei Satan gu lawa di haga ulu gi lodo Judas, tama daane Simon Iscariot, di hagamaanadu e wanga Jesus gi digau huaidu. 3 Jesus e iloo Tamana gu wanga gi deia nia mogobuna huogodoo. Mee gu iloo bolo ia ne hanimoi i baahi o God, ga hana labelaa gi baahi o God. 4 Jesus ga duu i nua, ga daa gi daha dono gahu laa daha, ga dahi aga dana taaole, ga nnoo gi dono huaidina, 5 ga llingi ana wai gi lodo di baisin, ga daamada ga tono nia babaawae ana dama agoago, ga omo gi taaole dela i dono huaidina. 6 Mee ga dau mai gi Simon Peter, gei Peter ga helekai gi mee, “Meenei, dogu Dagi, goe ga tono ogu babaawae?” 7 Jesus ga helekai gi mee, “Goe e de iloo agu mee ala e hai dolomeenei. Maalia, goe ga modongoohia laa.” 8 Peter ga helekai, “Goe hagalee loo e tono ogu babaawae.” Gei Jesus ga helekai, “Maa au ga hagalee tono oo wae, gei goe e deemee di hai tama agoago ni aagu.” 9 Simon Peter ga helekai, “Meenei Tagi, hagalee go ogu babaawae la hua. Tono ina labelaa ogu lima mo dogu libogo!” 10 Jesus ga helekai, “Digau ala gu gaugau, la gu madammaa, hagalee humalia di gaugau labelaa, e tono hua nadau babaawae. Malaa, goodou huogodoo la gu madammaa, tangada hua e-dahi digi madammaa.” 11 Jesus gu iloo ma koai dela ga hagi anga ia, deelaa di mee a mee ne helekai ai bolo digau huogodoo gu madammaa, tangada hua e-dahi digi madammaa. 12 I muli hua Jesus ne tono nia babaawae digaula, gei mee ga ulu gi lodo dono gahu laa daha, ga hana gi dono lohongo dela i teebele, ga heeu, “Goodou gu modongoohia dagu mee nogo hai adu gi goodou? 13 Goodou e haga ingoo au boloo: Tangada Agoago, mo di Tagi. E donu go di godou haga ingoo au beelaa, idimaa, mee ko au. 14 Au go di godou Dagi mo di godou Dangada Agoago dela gu tono godou babaawae, malaa, goodou e hai gi hagadau tono labelaa godou babaawae. 15 Au ne hai dagu haga modongoohia adu gi goodou, boloo goodou gi heia be agu mee ala nogo hai adu gi goodou. 16 Au e hagi adu gi goodou di tonu: Ma di hege e mada aamua i dono dagi ai. Teai tangada kae hegau e mada aamua i dono dangada ne hagau ia ai. 17 Dolomeenei goodou gu iloo di tonu deenei, e tentene huoloo behee maa goodou ga haga hai hegau di maa! 18 “Au hagalee helekai i goodou huogodoo. Au e iloo agu gau ala gu hilihili. Malaa, nia helekai di Beebaa Dabu, le e hai gi kila ala e hai boloo, Tangada dela e miami madalia au, deelaa go mee dela e hai baahi mai gi di au. 19 au e hagi adu gi goodou i mua nia maa ma ga kila aga, gei goodou gu hagadonu bolo “Au dela Ko au.” 20 Au e hagi adu gi goodou di tonu: Be koai hua e benebene dagu dangada hagau, geia ne benebene hua au. Be koai hua e benebene au, geia ne benebene hua tangada dela ne hagau mai au.”

Jesus e haga modongoohia dono hagi anga

21 I muli Jesus ne helekai nia mee aanei, gei mee gu lodo huaidu, ga helekai aga, “Tangada e dahi i goodou, e wanga au gi ogu hagadaumee.” 22 Nia dama agoago gu lodo boo huoloo, gu madamada i nadau mehanga be di maa koai dela e helekai iei mee. 23 Tangada agoago e dahi i lodo nia dama agoago aanei dela e aloho iei Jesus, e noho i baahi o Jesus. 24 Simon Peter ga menege adu gi mee, ga helekai be ma koai dela e helekai iei mee. 25 Tama agoago deelaa ga menege gi Jesus, ga heeu gi mee, “ ma koai go tangada?” 26 Jesus ga helekai gi mee, “Au ga haga tiu dagu palaawaa gi lodo di ibu deenei, ga wanga gi mee, deelaa go taane.” Gei mee ga dahi aga dana palaawaa, ga haga tiu, ga wanga gi Judas, go tama daane a Simon Iscariot. 27 Di madagoaa Judas ne kumi di palaawaa, Satan gu ulu gi lodo o mee. Gei Jesus ga helekai gi mee, “Hagalimalima, heia dau mee ne belee hai!” 28 Deai tangada i teebele e modongoohia be Jesus e helekai beleiaha gi Judas. 29 Idimaa, Judas dela e madamada humalia i di budehede bahihadu digaula, gei hunu dama agoago e hagamaanadu, bolo holongo Jesus ne helekai gi mee bolo gi hana gi huia mai ana mee ala e hai tagamiami, be e wanga ana mee gi digau hagaloale. 30 Judas ne kumi di palaawaa deelaa, ga ulu gi malaelae, gei di maa gu boo.

Taganoho hoou

31 Muli hua Judas ne hana, Jesus ga helekai, “Dolomeenei gei nia madamada o Tama Tangada la gu modongoohia aga. Dolomeenei nia madamada o God gu modongoohia aga mai i dono baahi. 32 Maa Tama Tangada ga haga modongoohia aga di madamada o God, malaa, God ga haga modongoohia aga di madamada o Tama Tangada mai dono baahi, gei mee ga hai di mee deenei . 33 Agu dama, au hagalee noho duai i godou baahi. Goodou ga halahala au, gei dolomeenei au ga hagi adu gi goodou dagu mee dela ne hagi ang gi digau aamua o Jew: Goodou e deemee di hula gi di gowaa dela e hana ginai au. 34 “Au e gowadu gi goodou taganoho hoou: Hagadau aloho i goodou. Be dagu hai dela ne aloho i goodou, goodou e hai loo gi hagadau aaloho i goodou. 35 Maa goodou ga hagadau aaloho, gei nia daangada huogodoo ga modongoohia bolo goodou nia dama agoago ni aagu.”

Jesus e hagi aga di haga de iloo a Peter

36 Simon Peter ga heeu gi mee, “Meenei dogu Dagi, dehee di gowaa e hana ginai goe?” Jesus ga helekai, “Goe e deemee di daudali au gi di gowaa dela e hana ginai au. Maalia, gei goe ga mee di daudali au.” 37 Peter ga heeu, “Meenei Tagi, au e aha, dela e deemee di daudali goe dolomeenei? Au gu togomaalia e made adu gi di goe!” 38 Jesus ga helekai, “Goe gu togomaalia bolo goe ga made mai gi di au? Au e hagi adu gi di goe di tonu: Goe ga haga de iloo au haga dolu i mua teduu ma ga wolo.”

John 14

Jesus go di ala gi Tamana

1 Jesus ga helekai gi digaula, “Goodou hudee de nnoomaalia ge lodo huaidu. Hagadonu ina God ge gi hagadonu ina au labelaa. 2 Nia ruum e logo i lodo di hale dogu Damana, gei au e hana e hagatogomaalia di godou lohongo. Maa nei bolo maa hagalee, gei au hagalee hagi adu di maa gi goodou. 3 I muli dagu hagatogomaalia di godou lohongo, gei au ga hanimoi labelaa, ga lahi goodou gi di gowaa dela e noho iei au, ga madalia Au. 4 Goodou gu iloo di ala dela e hana gi di gowaa dela e hana ginai au.” 5 Thomas ga helekai gi mee, “Meenei Tagi, gimaadou e de iloo di gowaa dela e hana ginai goe. Dehee di madau hai ga mee di iloo di ala dela e hana gi golo?” 6 Jesus ga helekai gi mee, “Au go di ala, go di tonu, go di mouli. Tangada e hana laa daha mo au gi Tamana ai. 7 Maa goodou gu iloo au, goodou gu iloo dogu Damana. Tugi dolomeenei ga huli gi muli, goodou gu iloo a mee, gu gidee a mee.” 8 Philip ga helekai gi mee, “Meenei Tagi, haga modongoohia ina Tamana mai gi gimaadou, dela hua di madau mee e hiihai ginai.” 9 Jesus ga helekai, “Gu waalooloo dogu madalia goodou. Philip, goe digi iloo au? Tangada dela gu gidee au, geia gu gidee labelaa Tamana. Ma e aha goe dela e helekai boloo: Haga modongoohia ina Tamana mai gi gimaadou?” 10 Philip, goe hagalee hagadonu bolo au i lodo Tamana, ge Tamana i ogu lodo?” Gei Jesus ga helekai gi ana dama agoago, “Nia helekai ala ne hai adu ko au gi goodou, hagalee ne loomoi i dogu baahi. Tamana dela e noho i ogu lodo e hai ana hegau. 11 Hagadonu ina au, bolo au e noho i lodo o Tamana, ge Tamana le e noho i ogu lodo. Maa deeai, hagadonu ina hua idimaa go agu mee ala ne hai. 12 Au e hagi adu gi goodou di tonu: Digau ala ga hagadonu au, ga hai agu mee ala nogo hai, gei mee ga hai nia maa gi nonua, idimaa, au ga hana gi baahi o Tamana. 13 Gei au ga haga kila aga godou mee huogodoo ala ma ga tangi iei goodou i dogu ingoo, bolo gi modongoohia aga di madamada o Tamana mai i baahi dana Dama. 14 Maa goodou ga tangi mai dahi mee i dogu ingoo, gei au ga hai di maa.

Di hagababa o di hanimoi di Hagataalunga Dabu

15 “Maa goodou e aloho i di au, goodou ga daudali agu haganoho. 16 Au ga dangi gi Tamana, gei mee ga gowadu gi goodou di Hagamaamaa gi noho i godou baahi ga hana hua beelaa. 17 Mee go di Hagataalunga dela e hagi aga di tonu a God. Henuailala e deemee di hai mee gi mee, idimaa, digaula e deemee di mmada gi mee, be e iloo a mee. Gei goodou e iloo a mee, i mee e noho i godou baahi mo i godou lodo. 18 Au ma ga hana, gei goodou hagalee noho mada goodou. Au ga hanimoi labelaa gi goodou. 19 Tama madagoaa dulii i golo, gei digau henuailala ga de gidee ginaadou au, gei goodou ga gidee au. Idimaa, au e mouli, gei goodou e mouli labelaa. 20 Di laangi deelaa ma ga dau mai, gei goodou gu iloo bolo au e noho i lodo dogu Damana, gei goodou le e noho i ogu lodo, gadoo be au dela e noho i godou lodo. 21 Be koai hua e hai mee gi agu haganoho ge daudali ai, go mee e aloho i di au. Dogu Damana e aloho i mee dela e aloho i di au. Gei au hogi e aloho i tangada mo di haga modongoohia au gi mee.” 22 Judas (hagalee go Judas Iscariot) ga helekai, “Meenei Tagi, ma e hai behee go dau haga modongoohia goe mai gi gimaadou, ge hagalee ang gi henuailala?” 23 Jesus ga helekai gi mee, “Digau ala e aloho i di au, le e daudali agu agoago. Gei dogu Damana ga aloho i digaula, gei gimaua mo dogu Damana ga loomoi gi digaula, ga noho i nadau baahi. 24 Digau ala hagalee aloho i di au, hagalee haga gila aga agu helekai. Nia agoago ala ne longono goodou, la hagalee ni aagu, gei ne loomoi i baahi o Tamana dela ne hagau mai au. 25 Au ne helekai adu nia mee aanei i dogu madagoaa e noho i godou baahi. 26 Di Hagamaamaa, go di Hagataalunga Dabu ga hagau mai go Tamana i dogu ingoo, ga agoago adu laa gi goodou nia mee huogodoo, ga hai goodou gi mamaanadu agu mee ala ne hagi adu gi goodou. 27 Au e gowadu gi goodou di noho i di aumaalia. Di aumaalia deenei di mee donu ni aagu e gowadu gi goodou. Au hagalee gowadu gi goodou be di hai o henuailala. Goodou hudee de nnoomaalia, hudee lodo huaidu, hudee mmaadagu. 28 Goodou gu longono agu helekai bolo au e hana, gei au ga hanimoi labelaa gi goodou. Maa goodou e aloho i di au, goodou e tentene gi dogu hana gi Tamana, idimaa, mee koia e aamua i di au. 29 Au gu hagi adu gi goodou dolomeenei i mua di maa ma ga gila aga. Malaa, di madagoaa di maa ma ga gila aga, gei goodou ga hagadonu. 30 Au hagalee hagabooboo adu gi goodou gi waalooloo, idimaa, di tagi o henuailala le e hanimoi. Mee ono mogobuna i dogu gili ai, 31 gei henuailala la gi iloo bolo au e aloho i Tamana, ga hidi mai iei au, ga hai nia mee a maa huogodoo ala bolo gi heia. Lloomoi, gidaadou ga hula gi daha mo di gowaa deenei.

John 15

Jesus di laagau donu

1 Au go di laagau donu, gei dogu Damana tangada hai hadagee. 2 Mee e haala nia manga huogodoo hagalee hua i lodo au. Mee e haga madammaa nia manga ala e hua, gi hua dau logo. 3 Goodou gu haga madammaa gi agu agoago adu gi goodou. 4 Goodou gi buni mai gi di au, gei au ga buni adu gi goodou. Di manga la deemee di hua modogoia. Maa ia ga buni gi tuaidina donu o di laagau, ia ga mee di hua. E hai gadoo be goodou: goodou e deemee di hua, maa goodou hagalee buni mai gi di au. 5 “Au go tuaidina o di laagau, gei goodou go nia manga. Be koai hua dela e buni mai gi di au, gei au e buni ang gi deia, geia ga hua dau logo, idimaa, goodou e deemee di hai godou mee laa daha mo au. 6 Be koai hua hagalee buni mai gi di au, ga hudu gi daha be di manga laagau, ga maangoo. Nia manga laagau beelaa la ga hagabudu mai, ga kili gi lodo di ahi, di gowaa dela e dudu ai. 7 Maa goodou ga buni mai gi di au, agu helekai ga noho i godou lodo, gei goodou ga dangi mai di ingoo hua di mee dela e hiihai ginai, goodou ga hai mee ginai. 8 Di madamada o dogu Damana le e haga gila aga go di godou hua dau logo. Di hai beenei, goodou ga hai nia dama agoago ni aagu. 9 Au e aloho i goodou, gadoo be Tamana dela e aloho i di au. Goodou gi dogi ang gi dogu aloho. 10 Maa goodou ga daudali agu helekai, goodou gu dogi ang gi dogu aloho, gadoo be au dela ne daudali nnelekai dogu Damana, gei au gu dogi ang gi dono aloho. 11 Au ne hagi adu gi goodou nia mee aanei, bolo dogu tene la gi i godou lodo, gei godou tene la gi dogomaalia. 12 Deenei dagu haganoho: Hagadau aaloho i goodou, be au dela e aloho i goodou. 13 Di aloho dela e kaedahi e damanaiee e mee di hai go tangada le e wanga dono mouli gi ono ehoo. 14 Gei goodou nia hoo ni oogu, maa goodou ga daudali agu helekai. 15 Au hagalee haga ingoo goodou bolo nia hege, idimaa, di hege le e de iloo nia mee o dono dagi ala e hai. Au ga haga ingoo goodou bolo nia hoo ni oogu, idimaa, au gu hagi adu gi goodou nia mee huogodoo ala ne hagi mai go dogu Damana. 16 Goodou digi hilihili ina au, go au ne hilihili goodou, ge ne dongo goodou belee hula hagahua dau logo, nia hagadilinga hua ala e hana hua beelaa. Gei Tamana ga gowadu di ingoo hua di mee dela ga dangi ei goodou gi mee i dogu ingoo. 17 Deenei dagu haganoho e hai adu gi goodou: Hagadau aaloho.

Te hiihai o henuailala

18 “Maa henuailala le e de hiihai adu gi goodou, goodou gi langahia bolo digaula ne de hiihai mai gi di au matagidagi. 19 Ma ne bolo goodou digau ni henuailala, ge henuailala e aloho i goodou be nia dama henuailala. Gei au ne hilihili aga goodou mai i henuailala, gei goodou gu hagalee hai nia daangada ni henuailala. Deelaa laa, henuailala le e de hiihai adu gi goodou. 20 Gi langahia agu mee ala ne hagi adu gi goodou: Di hege e aamua i dono dagi ai. Maa digaula gu hagahuaidu au, digaula ga hagahuaidu labelaa goodou. Maa digaula gu daudali agu agoago, gei digaula ga daudali labelaa godou agoago. 21 Digaula ga hai nia mee huogodoo aanei adu gi goodou, idimaa, goodou nia dama ni aagu. Gei digaula e de iloo a mee ne hagau mai au. 22 Maa au digi hanimoi e hagi ang gi digaula, gei digaula nadau huaidu ai. Dolomeenei digaula gu deai nadau helekai hagahumalia nadau huaidu ai. 23 Be koai dela e de hiihai mai gi di au, geia e de hiihai labelaa gi dogu Damana. 24 Maa au digi hai nia hagadilinga mee digi hai loo go tangada mai i-mua i nadau baahi, digaula nadau huaidu ai. Dolomeenei digaula gu gidee agu mee haga goboina ne hai, gei digaula e de hiihai mai gi di au mo dogu Damana. 25 Deenei ne hai loo gi gila, belee haga kila nia mee ala gu hihi gi lodo di nadau haganoho boloo: Te hiihai digaula mai gi di au la dono hadinga ai. 26 Di Hagamaamaa ga hanimoi, go di Hagataalunga e haga modongoohia di tonu o God, e hanimoi i baahi o Tamana. Au ga hagau mai a mee i baahi Tamana, gei mee ga haga modongoohia aga au. 27 Goodou ga haga modongoohia aga au labelaa, idimaa, goodou nogo madalia au mai loo i taamada.

John 16

1 “Au ne hagi adu nia mee aanei bolo gi dee kili gi daha godou hagadonu. 2 Digaula ga kili goodou gi daha mo nia synagogee, gei di madagoaa ga dae mai, digau huogodoo ga daaligi goodou gi mmade, ga hagabau bolo di hai deenei le e hai nnegau a God. 3 Digaula ga hai nia mee aanei adu gi goodou, i digaula e de iloo Tamana be au. 4 Malaa, au gu hagi adu nia mee aanei, bolo goodou gi langahia agu helekai i di madagoaa digaula ga hai nia mee aanei.

Tegau o di Hagataalunga Dabu

“Au digi hagi adu nia mee aanei i taamada, idimaa, au nogo i godou baahi. 5 Malaa, dolomeenei gei au ga hana gi mee dela ne hagau mai au, gei tangada i goodou e heeu mai gi di au be au e hana gi hee ai. 6 Di manawa gee gu haga honu godou manawa, i di au ne hagi adu gi goodou nia mee aanei. 7 Au e hagi adu gi goodou di tonu: Dogu hana le e humalia adu gi goodou, idimaa, maa au hagalee hana, gei Di Hagamaamaa la hagalee hanimoi gi goodou. Maa au ga hana, gei au ga hagau mai a mee gi goodou. 8 Mee ga hanimoi, ga haga donu digau i henuailala, bolo ginaadou e hai gee i di huaidu, i di mee dela e donu, mo i di hagi aga a God. 9 Digaula e hai gee i di huaidu, idimaa, digaula e de hagadonu au. 10 Digaula e hai gee i di hai o di mee dela e donu, idimaa, au ga hana gi Tamana, gei goodou ga deemee di mmada mai gi di au labelaa. 11 Digaula e hai gee i di hagi aga, idimaa, di tagi o henuailala la gu hagi aga. 12 Nia mee logowaahee i golo belee helekai iei au adu gi goodou, gei e haingadaa huoloo di donu ginai goodou dolomeenei. 13 Gei di Hagataalunga dela e donu ga hanimoi, ga dagi goodou gi nia mee huogodoo ala e donu. Mee hagalee helekai aga hua i deia. Mee e haga modongoohia aga hua ana mee ala ne hagalongo ginai, ga hagi adu gi goodou nia mee ala ga loomoi. 14 Mee ga haga madamada au, idimaa, mee ga kae agu helekai, ga hagi adu gi goodou. 15 Nia mee huogodoo ala e hai mee ginai Tamana, go agu mee. Deelaa laa au ne helekai bolo di Hagataalunga ga kae agu mee e wanga gi mee, ga hagi adu gi goodou.

Di manawa gee mo di tentene

16 “Di madagoaa dulii, gei goodou ga de gidee au, gei i muli di madagoaa dulii, gei goodou ga gidee au.” 17 Hunu daangada i ana dama agoago ga heheeu i nadau mehanga, “Di mee hai bolo aha deenei? Mee gu helekai bolo i muli di madagoaa dulii, gei gidaadou ga de gidee a mee, gei i muli di madagoaa dulii, gei gidaadou ga gidee a mee. Mee gu helekai labelaa boloo: Idimaa, au ga hana gi Tamana. 18 Di madagoaa dulii deenei le e hai bolo aha? Gidaadou e de iloo be mee e helekai bolo aha!” 19 Jesus gu modongoohia bolo digaula belee hai nadau heeu, malaa, gei mee ga helekai adu gi digaula, “Au ne helekai boloo: Di madagoaa dulii, gei goodou ga de gidee au, gei i muli di madagoaa dulii, gei goodou ga gidee au. Deenei di mee e heheeu i godou mehanga? 20 Au e hagi adu gi goodou i di tonu: Goodou ga tangitangi ge manawa gee, gei henuailala ga tentene. Goodou ga lodo huaidu, gei godou lodo huaidu ga huli ga tentene. 21 Di madagoaa di ahina ma ga hoohoo ga haanau, mee e manawa gee, idimaa, dono madagoaa haga mmaemmae la gu dau mai. Gei di madagoaa di tama gu haanau, mee gu de langahia dono mmaemmae, idimaa, mee gu tentene, bolo di tama la gu haanau mai gi henuailala. 22 E hai labelaa be goodou. Dolomeenei gei goodou e lodo huaidu, gei au ga heetugi adu labelaa gi goodou, gei godou manawa ga honu i di tentene. Tangada e mee di daa gi daha di godou tentene ai. 23 Di laangi dela ma ga dae mai, goodou hagalee dangi mai i dahi mee. Au e hagi adu gi goodou di tonu: Tamana ga dugu adu gi goodou di godou mee ga dangi ai i dogu ingoo. 24 Ga dae mai gi dolomeenei, goodou digi tangi mai i dahi mee i dogu ingoo. Dangidangi, goodou ga hai mee ginai, godou tentene la ga dohu.

Jesus gu aali i henuailala

25 “Au gu hai hegau i nia ala kai belee hagi adu gi goodou nia mee aanei, gei di madagoaa ga dae mai, gei au ga hagalee hai hegau gi nia ala kai. Au ga helekai adu gi goodou haga madammaa i Tamana. 26 Di laangi ga dau mai, gei goodou ga tangi gi mee i dogu ingoo. Au hagalee helekai bolo au ga dangi gi mee i goodou, 27 idimaa, ma go Tamana dela e aloho i goodou. Mee e aloho i goodou, idimaa, goodou e aloho i di au, gei goodou ne hagadonu bolo au ne hanimoi i baahi o God. 28 Au ne hanimoi i baahi Tamana gi henuailala. Gei dolomeenei au ga hagatanga i henuailala, ga hana gi baahi Tamana.” 29 Gei ana dama agoago ga helekai gi mee, “Dolomeenei goe gu helekai madammaa, hagalee hai hegau nia ala kai. 30 Dolomeenei gimaadou gu iloo, bolo goe e iloo nia mee huogodoo. Goe hagalee hiihai gi tangada e hai adu ana heeu. Di mee deenei e hai gimaadou gi hagadonu bolo goe ne hanimoi i baahi o God.” 31 Jesus ga helekai gi digaula, “Goodou gu hagadonu laa dolomeenei? 32 Di madagoaa ga dau mai, gei gu i kinei, gei goodou huogodoo ga maaheu, tangada nei mo tangada nei ga hana gi dono hale donu. Gei au ga dubu modogoau. Au hagalee modogoau hua, idimaa, Tamana le e madalia au. 33 Au ne hagi adu gi goodou nia mee aanei, bolo gi noho goodou i di aumaalia, i di godou hagadaubuni mai gi di au. Henuailala ga hagaduadua goodou, malaa goodou gi manawa maaloo! Au gu aali i henuailala!”

John 17

Jesus e dalodalo i deia

1 I muli ana helekai aanei, Jesus ga mmada gi nua gi di langi, ga helekai, “Tamana, di madagoaa gu dau mai. Haga uda ina di madamada gi di Tama, gei di Tama ga haga madamada Goe. 2 I doo haga uda ang gi deia di mogobuna di dagi nia daangada huogodoo, bolo gi mee ai dana wanga di mouli dee odi gi digau huogodoo ala ne dugu anga kooe gi deia. 3 Gei di mouli dee odi, dono hadinga e hai bolo gi iloo(- -ginaadou) goe, go di God e donu hua e dahi, gi iloo Jesus Christ dela ne hagau mai kooe. 4 Au gu haga modongoohia doo madamada i henuailala. Au gu haga lawa dagu hegau dela ne gaamai kooe bolo gi heia. 5 Tamana! Haga madamada ina au i mua oo hadumada dolomeenei, di madamada dela nogo i dogu baahi i mua henuailala ne hai.

Jesus e dalodalo i ana dama agoago

6 “Au gu haga modongoohia goe gi au daangada ala ne dugu mai gi di au i henuailala. Nia daangada ni aau, gei goe ne dugu mai digaula gi di au. Digaula gu daudali au helekai, 7 gei dolomeenei digaula gu iloo bolo nia mee huogodoo ala ne gaamai kooe, la ne lloomoi i doo baahi. 8 Au gu wanga gi digaula nia agoago ala ne gaamai kooe gi di au, gei digaula gu kae nia maa. Digaula gu iloo bolo ma e donu bolo au ne hanimoi i doo baahi, gei gu hagadonu, bolo goe ne hagau mai au. 9 Au e dalodalo i digaula. Au hagalee dalodalo i digau henuailala hagatau, gei au e dalodalo hua i digau ala ne gaamai kooe gi di au, i digaula nia dama ni aau. 10 Agu mee huogodoo nia mee ni aau, gei au mee huogodoo nia mee ni aagu. Gei dogu madamada gu modongoohia aga mai i nadau baahi. 11 Dolomeenei, gei au ga hanadu gi di goe. Au ga hagalee noho i henuailala, gei digaula e noho i henuailala. Meenei dogu Damana Dabu! Benabena ina digaula i nia mahi o doo ingoo, di ingoo dela ne gaamai kooe gi di au, gi hai ai digaula di mee hua e-dahi, gadoo be goe mo au ala e dahi. 12 Dogu madagoaa nogo i baahi digaula, au nogo benebene digaula i nia mahi o doo ingoo, go di ingoo dela ne gaamai kooe gi di au. Au nogo madamada humalia i digaula, tangada digaula ne ngala ai, dela hua go tangada dela gu haga ingoo bolo e ngala, gi donu ai nia helekai o di Beebaa Dabu. 13 Dolomeenei gei au ga hanadu, gei au e helekai nia mee aanei i henuailala, bolo gi honu dogu tene i lodo nadau manawa. 14 Au gu wanga gi digaula au agoago, gei digau henuailala e de hiihai gi digaula, idimaa, digaula hagalee digau ni henuailala, gadoo be au dela hagalee tangada ni henuailala. 15 Au hagalee dangi adu bolo goe gi daawa digaula gi daha mo henuailala, gei au e dangi adu bolo goe gi benabena ina digaula gi daha mo tangada haga magiaa.. 16 Digaula hagalee digau ni henuailala, gadoo be au dela hagalee tangada ni henuailala. 17 Haga dabu ina digaula adu gi di goe gi di tonu. Au helekai la go di tonu. 18 Au ne hagau digaula gi lodo henuailala, gadoo be dau hagau mai au gi lodo henuailala. 19 Au e hagadabu au adu gi di goe i digaula, bolo gi donu di hagadabu digaula adu gi di goe.

Jesus e dalodalo i nia daangada huogodoo ala e hagadonu

20 “Au hagalee dalodalo hua i agu dama agoago, gei Au e dalodalo labelaa i digau ala e hagadonu Au mai nadau agoago. 21 Au e dalodalo, digaula huogodoo gi hai hua di mee e dahi. Meenei Tamana, digaula belee hai gi noho i tau lodo, be goe dela i ogu lodo, gei au i oo lodo. Digaula belee hai gi hai hua di mee e dahi, gei digau henuailala ga hagadonu bolo ma kooe dela ne hagau mai au. 22 Au ne wanga gi digaula di madamada dela ne gaamai kooe gi di au, bolo gi hai digaula di mee e dahi, be gidaua ala gu hai di mee e dahi. 23 Au i nadau lodo, gei goe i ogu lodo, gei digaula gi hai hua di mee e dahi, gi hai digau henuailala gi iloo bolo ma kooe dela ne hagau mai au, ge e aloho i digaula, be doo aloho i di au. 24 Meenei Tamana, goe ne dugu mai digaula gi di au. Au e hiihai bolo digaula gi madalia au i di gowaa dela e noho iei au, gi gidee ginaadou ogu madamada, go nia madamada ala ne dugu mai kooe gi di au, i doo aloho i di au i mua di hai o henuailala. 25 Meenei Tamana dela e donu, digau henuailala e de iloo goe, gei au e iloo goe. Gei digau aanei gu iloo bolo ma kooe dela ne hagau mai au. 26 Au ne haga modongoohia aga goe gi digaula, gei au ga duudagi hua beelaa, bolo di aloho dela ne gaamai kooe gi di au, la gi noho i nadau lodo, gei au gi noho labelaa i nadau lodo.”

John 18

Di lawalawa o Jesus

1 I muli ana dalodalo aanei, Jesus mo ana dama agoago ga hula laa lodo tama monowai Kidron. Gei di maa di hadagee i di gowaa deelaa, Jesus mo ana dama agoago ga hula gi golo. 2 Malaa, Judas, dela ga hagi aga a Jesus, e iloo ia di gowaa deelaa, idimaa, nia madagoaa e logo Jesus mo ana dama agoago e nnoo mau e heheetugi i di gowaa deelaa. 3 Malaa, Judas ga hana gi di hadagee deelaa, e lahi ana gau dauwa o Rome, mono gau hagaloohi di Hale Daumaha ala ne hagau go nia dagi hai mee dabu mo nia Pharisee. Digaula gu ulu nadau goloo dauwa, e kae nadau malama mono lama ulaula. 4 Jesus le e iloo nia mee huogodoo ala ga hai ang gi deia, geia ga duu mai gi digaula, ga helekai, “Ma koai dela e halahala go goodou?” 5 Digaula ga helekai gi mee, “Jesus o Nazareth.” Jesus ga helekai, “Au go mee.” Gei Judas dela ga hagi aga a mee, le e duu i baahi digaula. 6 Di madagoaa Jesus ne helekai gi digaula boloo, “Au go mee,” digaula ga mmaanege gi muli, ga tinga laa hongo nia gelegele. 7 Jesus ga heeu labelaa gi digaula, “Ma koai dela e halahala go goodou?” Digaula ga helekai, “Jesus o Nazareth.” 8 Jesus ga helekai, “Au gu lawa di hagi adu gi goodou bolo au go mee. Maa goodou e halahala au, hagau ina digau aanei gi hula.” 9 Mee ne helekai beenei, bolo gi donu ana helekai ala ne helekai, “Tamana, ma tangada e dahi i au daangada ne gaamai gi di au ne ngala ai.” 10 Simon Peter dana hulumanu dauwa, ga dahi aga di maa, ga tuu talinga baahi gau donu o di hege tagi hai mee dabu. Di ingoo di hege deelaa, la go Malchus. 11 Jesus ga helekai gi Peter, “Dugua dau hulumanu gi dono lohongo! Goe e hagabau bolo au hagalee belee inu di ibu o di hagaduadua Tamana dela belee gaamai gi di au?”

Jesus i mua o Annas

12 Nia gau dauwa o Rome mo nadau dagi dauwa, mo digau hagaloohi o Jew ga kumi Jesus, ga lawalawa, 13 ga lahi a mee matagidagi gi Annas. Go mee dela tamana dauaga a Caiaphas, dela di tagi aamua hai mee dabu di ngadau deelaa. 14 Ma go Caiaphas dela ne helekai hagamaamaa digau o Jew bolo ma koia e humalia tangada hua e dahi e made ang gi nia daangada huogodoo.

Peter e haga de iloo Jesus

15 Simon Peter mo tama agoago dela i golo ga loo adu i muli o Jesus. Di tagi aamua hai mee dabu e modongoohia tama agoago dela i golo. Tama agoago deelaa gu hana madalia a Jesus gi lodo di abaaba di hale tagi aamua hai mee dabu. 16 Peter le e duu hua i malaelae baahi di bontai, gei tama agoago dela e modongoohia di tagi hai mee dabu, ga hana gi muli ga helekai gi di ahina dela i di bontai, ga laha mai a Peter gi lodo. 17 Tama ahina nogo i di ngudu di bontai ga heeu gi Peter, “Ma kooe tangada e dahi i nia dama agoago a taane deelaa!” Peter ga helekai, “Deeai, hagalee ko au!” 18 Di madagoaa gu magalillili huoloo, gei nia hege mono gau hagaloohi ne akaa di nadau ahi belee haga mahana ginaadou, gei Peter ga hanadu, ga duu i baahi digaula belee haga mahana.

Di tagi aamua hai mee dabu e heheeu gi Jesus

19 Di tagi aamua hai mee dabu e heheeu gi Jesus i di gili nia dama agoago a maa mo nia agoago a maa. 20 Jesus ga helekai gi mee, “Au nogo helehelekai hua haga mmaa gi digau huogodoo. Au nogo agoago i lodo nia synagogee mo i lodo di Hale Daumaha i nia gowaa ala e lloomoi nia daangada gi di gowaa e dahi. Au digi helekai hagammuni. 21 Malaa, au heeu le e hagi mai eimaha? Heeu gi nia daangada ala ne longono ginaadou au. Heeu gi digaula be au ne helekai gi digaula bolo aha. Digaula e iloo agu helekai.” 22 Di madagoaa Jesus ne helekai beenei, tangada hagaloohi dela e duu i baahi o mee ga paa a Jesus, ga helekai, “Deenaa hua dau helekai e helekai gi tangada aamua hai mee dabu?” 23 Jesus ga helekai gi mee, “Maa au gu helekai hala, haga modongoohia ina gi digau huogodoo aanei di hala deelaa. Maa au e donu hua, malaa goe ne paa au eiaha?” 24 Annas ga lahi a mee gi Caiaphas, go tagi aamua hai mee dabu, gei mee e lawalawa huaigolo.

Peter e haga de iloo Jesus labelaa

25 Peter le e duu hua i golo, e haga mahanahana, gei digau ala i golo ga helekai gi mee, “Kooe labelaa tangada e dahi i nia dama agoago taane deelaa!” Gei Peter ga haga de iloo ia, ga helekai, “Deeai, hagalee ko au!” 26 Tangada e dahi i nia hege tagi aamua hai mee dabu, e dangada gi taane dela ne tuu dono dalinga go Peter, ga helekai aga, “Au gu mmada adu gi di goe madalia a mee i lodo di hadagee!” 27 Peter ga helekai labelaa, “Deeai!” Di madagoaa hua deelaa, teduu ga wolo.

Jesus i mua o Pilate

28 Heniheni loo, gei digaula ga lahi a Jesus i di hale o Caiaphas gi di hale gobinaa . Gei digau o Jew la digi ulu gi lodo di gowaa deelaa, idimaa, digaula belee haga madammaa gi mee ginaadou di miami Tagamiami Pasoobaa. 29 Pilate ga ulu gi malaelae, ga heeu, “Goodou e hai bolo taane deenei le e hala di aha?” 30 Digaula ga helekai gi mee, “Gimaadou hagalee laha mai a mee gi di goe, maa mee digi hai dana hala.” 31 Pilate ga helekai gi digaula, “Lahia a mee, gabunga ina gi hai be godou haganoho donu.” Digaula ga helekai gi mee, “Gimaadou digi dumaalia ginai e daaligi tangada gi made.” 32 (Di hai deenei ne hai bolo gi donu ai telekai a Jesus dono haga modongoohia aga di hagadilinga made dela ga made ieia.) 33 Pilate ga ulu gi lodo dono hale, ga gahigahi a Jesus, ga heeu gi mee, “Ma kooe dela go di king o digau o Jew?” 34 Jesus ga heeu, “Di heeu deenaa ne hanimoi i doo baahi, be hunu daangada ne hagi adu au gi di goe?” 35 Pilate ga helekai, “Goe hagabau bolo au tangada o Jew? Oo daangada donu mo nia dagi hai mee dabu ala ne laha mai goe gi di au. Goe ne hai dau aha?” 36 Jesus ga helekai, “Dogu henua la hagalee ni henuailala. Maa dogu henua la ni henuailala, digau ala e daudali au, gu heebagi gi dee lahi au gi digau aamua o Jew. Dogu henua la hagalee ni henuailala.” 37 Gei Pilate ga heeu gi mee, “Malaa goe di king?” Jesus ga helekai gi mee, “Goe dela e helekai bolo au di king. Au ne haanau ge ne hanimoi gi henuailala gi tadinga hua e dahi belee haga modongoohia di tonu. Be koai hua tangada ni di tonu, geia e hagalongo mai gi di au.” 38 Pilate ga heeu, “Di tonu la di aha?”

Jesus e hagi aga bolo e daaligi gi made

Pilate ga hana gi malaelae gi baahi digau o Jew, ga helekai gi digaula, “Au digi gida dagu mee e hagahuaidu iei mee. 39 Nnangaa hai godou mouli, au e wwede tangada e dahi i digau lawalawa i di madagoaa nia Pasoobaa huogodoo. Goodou e hiihai au gi haga mehede ina adu gi goodou di king o digau o Jew?” 40 Digaula ga wwolo gi nua gi telekai a maa, ga helekai, “Deeai! Hagalee go mee! Gimaadou e hiihai gi Barabbas (Barabbas la tangada huaidu).

John 19

1 Gei Pilate ga lahi a Jesus belee haga mamaawa. 2 Nia gau dauwa ga hai di nadau hau king gi di manga laagau duduia, ga dugu gi hongo di libogo o maa, ga haga ulu a mee gi di gahu mmee uli, 3 ga mmaanege mai ga helekai gi mee, “Di king o digau o Jew, goe gi mouli ga hana hua beelaa!” Digaula ga paapaa a mee. 4 Pilate ga ulu labelaa gi malaelae, ga helekai gi digau dogologo, “Mmada, au ga laha mai a mee gi kinei gi gidee goodou bolo au e deemee di gida dagu mee belee haga huaidu a mee.” 5 Gei Jesus ga ulu mai gi malaelae e ulu di hau duduia mo di gahu gono uli, Pilate ga helekai gi digaula, “Mmada! Deenei taane!” 6 Di madagoaa nia dagi hai mee dabu mono gau hagaloohi di Hale Daumaha ne gidee a mee, digaula ga wwolo, “Daudaulia a mee! Daudaulia a mee!” Pilate ga helekai gi digaula, “Goodou bida lahia a mee, daudaulia. Au digi gida dagu mee belee haga huaidu a mee.” 7 Digau o Jew ga helekai, “Di madau haganoho i golo, bolo taane deenaa le e hai gi made, idimaa, mee e helekai bolo ia di Tama ni God.” 8 Di madagoaa Pilate ne hagalongo gi nia helekai aanei, geia gu madagu huoloo, 9 ga ulu labelaa gi lodo dono hale, ga heeu labelaa gi Jesus, “Goe tangada mai hee?” Gei Jesus digi helekai. 10 Pilate ga helekai gi mee, “Goe hagalee helekai mai gi di au? Maanadu ina ogu mogobuna i golo e wwede goe, mo e daudau goe?” 11 Jesus ga helekai, “Goe oo mogobuna i ogu nua ne gowadu go God. Gei tangada dela ne gowadu au gi di goe, la koia gu ihala gi nonua.” 12 Di madagoaa Pilate ne longono ia nia helekai aanei, geia ga hagamaanadu dana hai belee hagamehede a Jesus, gei digau o Jew ga wwolowwolo ga helekai, “Maa goe ga hagamehede a mee, le e haga modongoohia, bolo goe hagalee di hoo ni di king damana o Rome, go Caesar. Tangada dela e helekai bolo ia di king, le e hai baahi gi di king o Rome!” 13 Di madagoaa Pilate ne longono ia nia helekai aanei, geia ga lahi a Jesus gi malaelae, ga noho gi lala gi hongo di lohongo gangada hai gabunga, i di gowaa dela e haga ingoo bolo di “Baba hadu” (e haga ingoo i telekai Hebrew bolo “Gabbatha”). 14 Di laangi deelaa la di laangi i mua di Pasoobaa, i mua di oodee. Pilate ga helekai gi digau o Jew, “Deenei di godou king!” 15 Digaula ga wwolo gi mee, “Daaligidia a mee gi made! Daaligidia a mee gi made! Daudaulia a mee!” Pilate ga heeu gi digaula, “Goodou e hiihai bolo au gi daudaulia di godou king? Gei nia dagi hai mee dabu ga helekai gi mee, “Di madau king le e dahi hua, go di king damana o Rome!” 16 Gei Pilate ga wanga Jesus gi digaula bolo gi daudaulia gi nua.

Jesus gu daudau gi nua

Digau dauwa ga lahi a Jesus. 17 Mee ga hana, e aamo dono loobuu, ga dau adu gi di gowaa dela e haga ingoo bolo “Di Gowaa Hangaibu Libogo” (e haga ingoo i telekai Hebrew bolo “Golgotha”). 18 Deelaa di gowaa ne daudau iei mee mono daane dogolua, tangada e dahi i di baahi gau donu, tangada e dahi i di baahi gau ihala, gei Jesus i mehanga meemaa. 19 Pilate ne hihi dana haga iloo, ga dogi gi hongo di loobuu, “Jesus o Nazareth, di king o digau o Jew.” 20 Digau o Jew dogologowaahee gu dau di maa, idimaa, di gowaa dela e daudau ai Jesus, la hagalee mogowaa i di waahale. Di haga iloo le e hihi i nia helekai Hebrew, Latin mo Greek. 21 Nia tagi hai mee dabu ga helekai gi Pilate, “Hudee hihia bolo “Di king o digau o Jew”. Hihia bolo “Taane deenei ne bida helekai boloo, Au go di king o digau o Jew”. 22 Pilate ga helekai gi digaula, “Agu mee ala gu lawa di hihi, le e dugu hua beelaa.” 23 I muli hua digau dauwa ne daudau a Jesus, gei digaula ga kae nia goloo o maa, ga wwae haa, tuhongo e dahi ni tangada dauwa e dahi. Digaula ga daa di gahu la tua o maa. Di gahu dela ne hai hua gi di gahu e dahi, ono duudagi ai. 24 Digau dauwa ga helehelekai i nadau mehanga, “Gidaadou hagalee hahaahi di maa. Gidaadou e hudihudi be di maa koai dela e hai mee gi di maa.” Deenei la ne hai bolo gi kila nia helekai di Beebaa Dabu: “Digaula gu duwwe ogu goloo i ginaadou, ge gu hudihudi i dogu gahu la tua.” Gei deenei di mee ne hai go digau dauwa. 25 Nia daangada ala e tuu hoohoo gi di loobuu o Jesus, la go tinana o maa, tuaahina ahina tinana o maa, mo Mary di lodo o Clopas, mo Mary mai Magdala. 26 Jesus gu gidee ia dono dinana mo dana dama agoago dela e aloho ieia ala e tuu i golo, ga helekai gi dono dinana, “ Mee go dau dama daane.” 27 Nomuli, gei mee ga helekai gi dana dama agoago, “Deenaa doo dinana.” Di madagoaa deelaa, gei tama agoago deelaa ga lahi tinana o Jesus gi dono hale belee noho i dono baahi.

Di made o Jesus

28 Jesus gu modongoohia ia bolo nia mee huogodoo gu lawa, gei mee ga helekai, “Au gu hiieinu,” bolo gi kila nia helekai di Beebaa Dabu. 29 Di boolo nogo i golo e honu i nia waini hui ngoohia. Digaula ga daalo di nadau liimi gi lodo, ga nnoo gi di gili di laagau hisop, ga togo gi nia malau ngudu o maa. 30 Jesus ga inu nia waini aalaa, ga helekai, “Ma gu lawa!” Geia ga bala dono libogo gi mua, ga made.

Di baahi o Jesus la gu daalo

31 Nia dagi o digau o Jew ga dangi gi Pilate, bolo gi dumaalia ang gi ginaadou gi hadihadia nia wae o digau ala gu daudau gi nua, gi dugu ia labelaa nia huaidina digaula gi daha mo nia loobuu. Digaula ne tangi gi mee, idimaa, di laangi deenei la di lima laangi, gei digaula e de hiihai bolo nia huaidina digaula e daudau huaigolo i lodo di Laangi Sabad, idimaa, di Laangi Sabad deelaa la di laangi e dabu. 32 Digau dauwa ga hula, ga hadihadi nia wae o tangada dela ne daudau matagidagi mo nia wae taane ne daudau madalia a Jesus. 33 Malaa digaula ga loomoi gi Jesus ga modongoohia bolo mee gu made, gei digaula digi hadihadia nia wae o maa. 34 Dahi dangada dauwa ga daalo di baahi o Jesus gi taalo, gei nia dodo mono wai gu hali mai. 35 (Taane dela ne gidee ia nia mee aanei, gu haga modongoohia nia maa bolo gi hagadonu goodou. Nia helekai a maa le e donu, gei mee e iloo ia bolo ia e helekai donu.) 36 Nia mee aanei la ne hai belee haga kila nia helekai di Beebaa Dabu: “Di iwi e dahi i ono iwi e mooho ai.” 37 Di gubu labelaa e dahi i golo, e helekai: “Nia daangada ga mmada gi mee ne daalo go digaula .”

Di danu o Jesus

38 I muli nia mee aanei, Joseph, tangada mai di guongo o Aremethea, ga helekai gi Pilate, be ia e mee di kae tuaidina o Jesus. (Joseph la tangada hai hegau ni Jesus, malaa mee hagammuni ia, idimaa, mee e madagu i nia dagi o digau o Jew.) Pilate ga helekai gi mee, bolo mee e mee di kae tuaidina o maa, malaa Joseph ga hana ga kae tuaidina o maa. 39 Nicodemus, taane dela ne hana gi baahi o Jesus dahi boo, ga hana madalia a Joseph, e kae ana pauna lolo kala e mada hidu maa lima madalia ia. Nia lolo ala ne unugi gi nia ‘myrrh’ mo nia “aloe”. 40 Nia daane dogolua aanei ga kae tuaidina Jesus, ga didi gi di gahu lenge mono lolo kala, gi hai be di hai o digau o Jew e hagatogomaalia tuaidina dangada e danu. 41 Di hadagee i golo i di gowaa ne daudau ai Jesus gi di loobuu, gei taalunga i lodo tadagee deelaa digi dugu loo tangada nolodo. 42 Idimaa di laangi deelaa la i-mua di Laangi Sabad, gei di lua deelaa le e hoohoo, meemaa ga dugu tuaidina o maa i golo.

John 20

Di angaa daalunga

1 Luada loo di laangi tabu, gei di maa e bouli huaigolo, gei Mary mai Magdala ne hana gi taalunga, ga gidee ia di hadu o taalunga la gu daa gi daha. 2 Gei mee ga lele gi Simon Peter mo dono ehoo dama agoago dela e aloho iei Jesus, ga helekai gi meemaa, “Digaula gu lahi di Tagi gi daha mo taalunga, gei gimaadou e de iloo di gowaa digaula ne dugu a mee!” 3 Gei Peter mo tangada agoago dela i golo ga hula gi taalunga. 4 Meemaa dogolua le e llele, gei di hoo dama agoago a Peter le koia e lele i Peter, gu dau i taalunga i mua. 5 Mee ga bala gi lala, ga mmada gi di gahu lenge, gei mee digi ulu gi lodo. 6 Simon Peter dela ne daudali mai a mee, ga dau adu gi taalunga deelaa, ga ulu gi lodo, ga mmada gi di gahu lenge dela e moe i lodo, 7 di gahu dela nogo didi di libogo o Jesus la hagalee i baahi di gahu lenge deelaa, e wini e dugu i tuai gowaa. 8 Gei tama agoago dela ne dau i taalunga i mua, gu ulu gi lodo labelaa, gu mmada, gu hagadonu. 9 (Meemaa digi modongoohia nia helekai di Beebaa Dabu ala e helekai bolo mee e hai loo gi mouli aga i di made.) 10 Gei nia dama agoago aalaa ga hula gi muli gi nau hale.

Jesus e haga gida gi Mary mai Magdala

11 Mary e duu i malaelae taalunga e dangidangi. Di madagoaa hua dela e dangidangi iei mee, gei mee ga bala gi lala, ga mmada adu gi lodo taalunga, 12 ga gidee nia daangada di langi dogolua e ulu nau goloo kene, e noho i di gowaa dela nogo dugu Jesus. Tangada e dahi i libogo, gei di hoo o maa i wae. 13 Meemaa ga heeu gi Mary, “Di ahina nei, goe e dangidangi di aha?” Gei Mary ga helekai gi meemaa, “Digaula gu lahi dogu Dagi gi daha, gei au e de iloo eau be digaula ne dugu a mee i hee!” 14 Mee ne helekai beenei, ga huli, ga mmada gi Jesus e duu i dono baahi, digi iloo bolo ma go Jesus. 15 Jesus ga heeu gi mee, “Di ahina nei, goe e dangidangi di aha? Ma koai dela e halahala kooe?” Gei Mary e hagabau bolo mee go tangada hai hadagee, geia ga helekai gi mee, “Meenei, ma kooe dela ne lahi a mee? Hagia mai di gowaa ne dugu a mee, au ga hana e lahi a mee.” 16 Jesus ga gahi a mee, “Mary.” Gei Mary ga huli adu gi mee, ga helekai gi mee i telekai Hebrew, “Raboni!” (Dono hadinga bolo “Tangada Agoago.”) 17 Jesus ga helekai gi mee, “Hudee bili mai, idimaa, au digi hana gi baahi dogu Damana. Hana gi baahi ogu duaahina, hagi anga ina gi digaula, bolo au ga hana gi baahi o mee dela go dogu Damana, mo di nadau Damana, go dogu God, mo di nadau God.” 18 Mary mai Magdala ga hana, ga hagi ang gi nia dama agoago a maa bolo ia gu gidee di Tagi, mee ga hagi ang gi digaula nnelekai a maa ala ne hai ang gi deia.

Jesus e haga gida gi ana dama agoago

19 Hiahi hua di laangi tabu deelaa, gei nia dama agoago a Jesus la ne dagabuli mai gi lodo di hale tai, idimaa, digaula e mmaadagu i digau aamua o Jew. Gei Jesus ga hanimoi, ga duu i nadau mehanga, ga helekai, “Di aumaalia gi madalia goodou.” 20 I muli hua dana helekai deenei, gei mee ga haga mmada digaula gi ono lima mo dono baahi. Gei nia dama agoago a maa gu tentene huoloo i di nadau gidee ginaadou di Tagi. 21 Jesus ga helekai labelaa gi digaula, “Di aumaalia gi madalia goodou. Gadoo be dogu Damana dela ne hagau mai au, gei au e hagau labelaa goodou.” 22 Mee ga dogi gi hongo digaula, ga helekai, “Goodou kae ina di Hagataalunga Dabu. 23 Maa goodou ga dumaalia gi nia huaidu o nia daangada, gei nadau huaidu la gu maahede. Maa goodou hagalee dumaalia gi digaula, gei nia huaidu digaula la hagalee maahede.”

Jesus mo Thomas

24 Tangada e dahi i nia dama agoago dilongoholu maa lua, go Thomas (dela e haga ingoo bolo Didymus), nogo hagalee i baahi digaula i di madagoaa Jesus ne hanimoi. 25 Nia dama agoago ala i golo ga helekai gi mee, “Gimaadou gu mmada gi di Tagi.” Thomas ga helekai gi digaula, “Maa au digi mmada gi nia lohongo baalanga, be e daalo dogu madaalima gi nia lohongo baalanga i ono lima mo dono baahi, au hagalee hagadonu.” 26 Muli di tabu e dahi, ana dama agoago ne dagabuli labelaa gi lodo di hale deelaa, gei Thomas gu madalia digaula. Nia bontai gu tai, gei Jesus ga duu gi baahi digaula, ga helekai, “Di aumaalia gi madalia goodou.” 27 Gei mee ga helekai gi Thomas, “Dugua mai doo madaalima, mmada gi ogu lima. Holo ina mai doo lima, daalo gi lodo dogu baahi. Hudee de hagadonu, hagadonu hua!” 28 Thomas ga helekai gi mee, “Dogu Dagi mo dogu God!” 29 Jesus ga helekai gi mee, “Goe ne hagadonu idimaa goe dela ne mmada mai? E maluagina go digau ala e hagadonu, gei digi mmada mai.”

Tadinga o di beebaa deenei

30 Jesus ne hai ana mogobuna haga goboina e logo i mua ana dama agago gei digi hihia gi lodo di beebaa deenei. 31 Gei nia mee aanei la ne hihi, bolo gi hagadonu goodou bolo Jesus la go di Mesaia, go Tama a God. Mai godou hagadonu a mee, goodou ga hai mee gi di mouli.

John 21

Jesus e haga gida gi ana dama agoago dogohidu

1 I muli hua nia mee aanei, Jesus ga haga gida gi ana dama agoago labelaa i di tai go Tiberias. Deenei dono hai: 2 Simon Peter, Thomas (dela e haga ingoo bolo Didymus), Nathanael (tangada mai Cana o Galilee), nia dama Zebedee, mo nia dama agoago dogolua i golo, nogo i di gowaa e dahi. 3 Simon Peter ga helekai gi digaula, “Au e hana e wagadaha.” Digaula ga helekai, “Gimaadou e hula dalia goe.” Malaa, digaula ga hula i di boodi, gei di boo deelaa, digi kumi nadau iga. 4 Di madagoaa di laa ne hobo, Jesus e duu i tongotai, gei nia dama agoago a maa digi iloo bolo ma go Jesus. 5 Gei Jesus ga heeu gi digaula, “Digau nei, goodou digi kumi godou iga?” Digaula ga helekai, “Hagalee loo.” 6 Gei mee ga helekai gi digaula, “Hudua di godou kau gi lala i di baahi gau donu o di boodi, gei goodou ga kumi godou iga.” Malaa, digaula ga hudu di nadau kau gi lala, gu deemee di hudi aga, i di maa gu hontula iga. 7 Tama agoago dela e aloho iei Jesus, ga helekai gi Peter, “Mee go Tagi!” Di madagoaa o Peter ne longono ia bolo ma go Tagi, geia ga didi dono gahu laa daha gi dono gili (idimaa, mee gu liagi gi daha ono goloo), ga hobo gi lodo tai. 8 Nia dama agoago ala i golo, ga aalo aga di nadau boodi gi tongotai, ga hudi aga di kau honu iga. Digaula hagalee mogowaa i tenua, holongo nia loho e madalima gi daha. 9 Di nadau dau i tongotai, digaula ga mmada gi di ahi e gaa e dunu nia iga nonua, mono palaawaa. 10 Jesus ga helekai gi digaula, “Gaamai hunu iga i godou iga ala ne kumi.” 11 Simon Peter ga hana gi hongo di boodi, ga hudi aga dana kau honu iga llauehaa, e lau madalima maa dolu, gi tongotai. Gei di kau deelaa la gu honu iga huoloo, gei di maa digi mahaa. 12 Jesus ga helekai, “Lloomoi, miami.” Tangada i ana dama agoago ne heeu gi mee be ia la koai ai, idimaa, digaula gu iloo bolo mee go Tagi. 13 Jesus ga hanadu, ga dahi aga nia palaawaa, ga wanga gi digaula, ga duwwe labelaa nia iga. 14 Deenei la di tolu holongo a Jesus ne haga gida gi ana dama agoago i muli dono mouli aga.

Jesus mo Peter

15 I muli hua di nadau miami, gei Jesus ga helekai gi Simon Peter, “Simon, tama a John, goe e aloho i di au laa hongo digau aanei?” Gei mee ga helekai, “Uaa, meenei Tagi, goe e iloo hua bolo au e aloho i di goe.” Jesus ga helekai gi mee, “Madamada humalia i agu damaa siibi.” 16 Mee ga heeu haga lua, “Simon, tama a John, goe e aloho i di au?” Gei mee ga helekai gi Jesus, “Uaa, meenei Tagi, goe e iloo hua bolo au e aloho i di goe.” Jesus ga helekai gi mee, “Madamada humalia i agu siibi.” 17 Jesus ga heeu haga dolu, “Simon, tama a John, goe e aloho i di au?” Peter gu manawa gee, idimaa, Jesus gu heeu haga dolu gi mee bolo mee e aloho i deia? Gei mee ga helekai gi Jesus, “Meenei Tagi, goe e iloo nia mee huogodoo. Goe e iloo hua bolo au e aloho i di goe.” Jesus ga helekai gi mee, “Madamada humalia i agu siibi. 18 Au e hagi adu gi di goe di tonu: Doo madagoaa nogo dulii, goe e hau goe e hana gi di gowaa dela e hiihai ginai goe. Doo madagoaa ma ga madua, gei goe ga holo oo lima gi daha, gei tangada ga nnoo oo lima, ga dagi goe gi di gowaa dela e de hiihai di hana ginai goe.” 19 (Jesus e helekai i nnelekai aanei e haga modongoohia di made a Peter belee gaamai di madamada gi God.) Nomuli, gei Jesus ga helekai, “Daudalia mai au.”

Jesus mo tama agoago dela i golo

20 Peter ga huli gi muli ga gidee ia tama agoago dela e aloho iei Jesus e daudali ginaua, go mee dela ne menege adu gi Jesus i di madagoaa digaula nogo miami ga heeu, “Meenei Tagi, ma koai dela ga hagi aga goe?” 21 Di madagoaa Peter ne gidee ia a mee, ga heeu gi Jesus, “Meenei Tagi, taane deenei le e hai behee?” 22 Jesus ga helekai, “Maa au ga hiihai mee gi mouli hua beelaa, ga dae loo gi dogu hanimoi, e hai dana aha adu gi di goe? Daudalia mai au.” 23 Malaa, di longo gu dele gi digau ala e hagadonu a Jesus, bolo tama agoago Jesus deenei, la hagalee made. Jesus la digi helekai bolo mee hagalee made. Mee ne helekai hua boloo, “Maa au ga hiihai bolo mee gi mouli hua beelaa, ga dae loo gi dogu hanimoi, e hai dana aha adu gi di goe?” 24 Mee go tama agoago Jesus dela nogo helehelekai i nia mee aanei. Go mee dela ne hihi nia mee aanei gi lala, gei gidaadou gu iloo hua bolo ana helekai le e donu.

Di hagaodi gi muli

25 Jesus gu hai ana mee labelaa e logowaahee. Maa nei bolo ne hihi gi lala hagatau, gei au bolo henuailala hagatau e deemee di daahi nia beebaa ala ma ga hihi ginai nia maa.