Tiraʹ Udip
1 Kena Allah nyelung uyan tanaʹ ini, un ca Laki iaʹ koʹ baʹan Tiraʹ cen kimet Allah. Tiraʹ ini un pemung ngan Allah. Atek kuaʹ Allah lete Tiraʹ ini pe. 2 Cen tading tading are, lepa ne Tiraʹ ini un pemung ngan Allah. 3 Man Tiraʹ ini lete Allah uyan ketoʹ naʹan inu ne. Ca inu pe abeʹ un nuyan tahaʹ awang neng ia. 4 Tiraʹ ini ne iaʹ puʹun udip, ngan udip ini te iaʹ ngkin dema palaʹ kelunan. 5 Dema ini iaʹ ngedema dalau ntem, ngan ntem abeʹ un senteng kelemataʹ dema ini ne. 6 Kun Allah cuk lawa ha nai. Ia ne ca kelunan ngadan ne Yaya. 7 Yaya nai tuman ke badaʹ tugen me kelunan neng puyan dema ini. Nai te Yaya ngan penco dau tugen ne, apan mung kelunan ke kenahan dau katuk ke ngan ngelan dema ini. 8 Abeʹ e Yaya iaʹ dema ini. Yaya nai apan ne badaʹ tugen dau ue neng dema ini. 9 Dema ini iaʹ atek dema lan, dema iaʹ nai kusun tanaʹ ini, iaʹ ngedema udip kelunan mung. 10 Tiraʹ idai are, lepa un kaʹ usun tanaʹ ini. Man ia lete Allah lepa uyan usun tanaʹ ini. Naʹ pe pekina, dulu kusun tanaʹ ini abeʹ tisen ia are. 11 Nai te ia palaʹ tanaʹ a tengen, un sepuʹo kelunan dina diaʹ anun ne tengen lete, abeʹ de ubaʹ alaʹ ia ne. 12 Un te palai diaʹ alaʹ ia, penco ngelan ia. Ina ukoʹ o naʹ penyukat mida sukat uyan ida diaʹ anak Allah. 13 Abeʹ de tai nuyan diaʹ anak Allah koʹ baʹan kelayen kelunan are, koʹ baʹan puyan le tading anak kuʹun iaʹ tuʹa le; bang Allah tengen iaʹ Amai re. 14 Tiraʹ idai are, lepa nai pekaliu ca usa kelunan, penco mudip neng ahang ilu. Ameʹ diaʹ taʹan serema peniga ha sangan pengelesau ngan isiu iaʹ telit. Bang ca ia le iaʹ Anak Amai Bio, ina ukoʹ un pekina uban puyan serema peniga ha. 15 Yaya lepa badaʹ tugen neng ia. Kun Yaya ngelengap kuma ha: “Ikem nawai dau isiu heʹ are iaʹ akeʹ kuma: ‘Laki iaʹ kenai bayaʹ neng akeʹ, ia iaʹ pelapa bioʹ neng akeʹ, uban ia iaʹ un kena heʹ nai pempet.’ Isiu ina sihoʹ neng Laki ini ne.” 16 Pengelesau iaʹ sangan neng ia, ngan cen ina ha naʹ peniga me ilu mung. Seʹ e lemuto naʹ pit peniga ha milu. 17 Cen Musa, Allah lepa naʹ Katuk Adet milu. Un sepuʹo cen Yesus Keristus kenai pengelesau ngan isiu iaʹ telit. 18 Abeʹ un aheʹ milu kelunan iaʹ lepa taʹan Allah. Bang ca Laki ini le iaʹ atek kuaʹ ngan Allah are, ia iaʹ un petemping ngan Allah lete, ia ne iaʹ atek peluhaʹ Allah milu.
Katuk Yaya Guru Batis
19 Kelunan Yahudi kaʹ lepoʹ Yerusalim cuk detaʹu ngan diaʹ Liwi tai palaʹ Yaya apan nte lemutu ia: “Aheʹ koʹ ne?” 20 Tegoʹ ina, abeʹ Yaya leko mipa ida, un sepuʹo tempa dau ue badaʹ mida, kuma ha: “Abeʹ keʹ Keristus iaʹ ke ngkang pungu udip.” 21 Penco dau re lemutu ia laʹa: “Moʹ aheʹ koʹ ne tupe? Moʹ abeʹ koʹ ca Ilia mo?” Un dau Yaya mipa ida: “Naʹun, abeʹ keʹ ina.” Un dau re neng ia laʹa: “Moʹ abeʹ koʹ pegawa bioʹ pe?” “Naʹun,” kun ne. 22 Un dau re pisiu ia pelaʹa: “Badaʹ ne mameʹ, aheʹ koʹ ne. Ameʹ ke ngeliwet ngkin ipa palaʹ diaʹ cuk ameʹ ne ʹo. Kumpin baʹan ncoʹ?” 23 Kun dau Yaya mipa: “Ukoʹ baʹan ini ne akeʹ: ‘Un ca usa ngelengap kaʹ tanaʹ lenga, Kun dau ue: Petelit ne janan iaʹ kukoʹ Tuhan ke nai.’ ” (Ini ne iaʹ ukoʹ baʹan dau pegawa Yesaya lepa pisiu re.) 24 Un sepuʹo ketoʹ kelunan Perisi dina ke cuk diaʹ lawa dina tai palaʹ Yaya. 25 Dau re lemutu ia: “Buk koʹ abeʹ un Keristus iaʹ ngkang pungu udip, ngan abeʹ koʹ Ilia, ngan abeʹ koʹ iaʹ pegawa bioʹ, moʹ inu adeʹ koʹ ngebatis dulu?” 26 Dau Yaya mipa: “Akeʹ iaʹ ngebatis dulu man sungai. Un sepuʹo un ca usa iaʹ nekejeng neng ahang ikem, abeʹ kem nyituk ia. 27 Ia ina iaʹ ke nai tebayaʹ akeʹ ne ʹo. Abeʹ pe akeʹ un tiga, di pe ke mubai tali sepatu ue, abeʹ pe akeʹ tekep.” 28 Ketoʹ puyan ini nuyan kaʹ lepoʹ Bitani, tahaʹ sek tau sungai Yardin, kukoʹ Yaya ngebatis dulu.
Anak Dumba Allah
29 Neng kenempam me, Yaya taʹan kenai Yesus palaʹ ia ngan kuma ha: “Ini ne atek Anak Dumba Allah iaʹ senteng mesau penyalaʹ kusun tanaʹ ne. 30 Ini ne iaʹ akeʹ badaʹ dalau heʹ pisiu are: ‘Un ca Laki iaʹ nai bayaʹ akeʹ. Ia iaʹ lapa bioʹ cen akeʹ, uban ia ne lepa un kena heʹ nai pempet kusun tanaʹ ini re.’ 31 Moʹ abeʹ keʹ putuk aheʹ e, un sepuʹo kenai heʹ ngebatis kelunan man sungai, apan lepoʹ Israil ke tisen neng ia.” 32 Pekini dau tugen Yaya: “Akeʹ lepa taʹan kenai Berua Tuhan cen lanit kuaʹ layan ca sui garaʹ are ngedung kempau ia. 33 Pa tegoʹ puyan ina abeʹ keʹ tisen ia lepe, un sepuʹo Allah iaʹ cuk akeʹ ngebatis kelunan man sungai, kun dau ue makeʹ: ‘Ikoʹ ke taʹan Berua Tuhan nai kentaʹ ʹo, ngedung kempau ca Laki, ia ne iaʹ ke ngebatis kelunan man Berua Buheʹ.’ 34 Akeʹ lepa taʹan ia, ngan badaʹ tugen mikem, ia ne iaʹ atek Anak Allah.”
Kelunan diaʹ ading bayaʹ katuk Yesus
35 Un neng kenempam me laʹa, Yaya ngan dua re diaʹ bayaʹ katuk ke 36 taʹan ketai Yesus masat lapa ida. Kun dau Yaya: “Ini ne iaʹ atek Anak Dumba Allah.” 37 Kun dua usa diaʹ bayaʹ katuk Yaya dina kenahan dau ue pisiu ini, penco tai re ngan Yesus. 38 Kun Yesus mupa taʹan kenai re bayaʹ ia, ngan lemutu ida: “Aheʹ iaʹ ikem pita tupe?” Kun dau re mipa ia: “Rabi, (sen ngadan ina ‘guru’,) kempi ukoʹ koʹ ngelineʹ?” 39 Kun dau Yesus mipa ida dua: “Nai ne naʹat te.” Sulo ketai re ngan Yesus, taʹan kukoʹ o ngelineʹ, penco re ngelineʹ ngan ne utung tau ina. (Kihoʹ kihoʹ tegoʹ jam pat tai tahup ne ina.) 40 Ca usa me dua dina diaʹ kenahan dau Yaya, penco tai ngan Yesus, ina ne Anderias cenganak Simun Peterus. 41 Pelapa Anderias tegoʹ diaʹ cenganak ke simun, kun ne badaʹ mia: “Un meʹ taʹan Mesias.” (Sen ngadan ina Keristus, Laki iaʹ ngkang pungu udip.) 42 Kun Anderias ngkin Simun palaʹ Yesus. Kun Yesus naʹat ia ngan kuma ha: “Ikoʹ Simun anak Yaya. Ngadan ncoʹ ʹo Kipas.” (Ngadan ini kuaʹ Peterus, sen ne “Batu.”)
Puyan Yesus mengin Pilipus ngan Natanil
43 Neng kenempam me, betep ne tekaʹ kimet Yesus penco ubaʹ tai kaʹ tanaʹ Galilia. Kun ne tegoʹ Pilipus ngan kuma ha neng ia: “Nai ne ngan nceʹ.” 44 Pilipus iaʹ nai cen Bit-saida, lepoʹ iaʹ ukoʹ Anderias ngan Peterus ngelineʹ. 45 Pelapa Pilipus petegoʹ ngan Natanil, kun ne badaʹ mia: “Un meʹ tegoʹ Laki iaʹ Musa badaʹ milu dalem Kitap Katuk Adet are. Un diaʹ pegawa nyurat neng ia lete. Ia ne Yesus anak Yusup lepoʹ Nasarit.” 46 Kun dau Natanil lemutu: “Un inu iaʹ tiga senteng nai cen Nasarit taʹin?” Dau Pilipus mipa ia: “Nai ne naʹat te ading.” 47 Dalau Yesus taʹan kenai Natanil palaʹ ia, kun ne pisiu puyan laki ina: “Atek ca kelunan Israil lan ini. Abeʹ un inu iaʹ palo neng ia.” 48 Natanil lemutu Yesus: “Kumpin ncoʹ tisen akeʹ?” Un dau Yesus mipa ia: “Akeʹ lepa taʹan ikoʹ dalau hoʹ kentaʹ kayu abung ahaʹ idai are, kena Pilipus mengin ikoʹ are.” 49 Un dau Natanil mipa ia: “Guru, ikoʹ iaʹ Anak Allah, ikoʹ iaʹ paren lepoʹ Israil.” 50 Un dau Yesus: “Un ncoʹ ngelan kuʹun dau puyan nceʹ bang badaʹ akeʹ lepa taʹan ikoʹ kentaʹ kayu abung ahaʹ idai? Ikoʹ ke taʹan iaʹ pelapa tiga cen ini ʹo.” 51 Sulo dau ue pisiu mida: “Atek lan dau heʹ badaʹ mikem, ikem ke taʹan langit pesik, ngan melikat Allah tai kempau nai kentaʹ neng Anan Sio ini.”
Puyan adet pepeto kaʹ lepoʹ Kana
1 Neng kedua tau uʹo ina, un dulu ti adet pepeto kaʹ lepoʹ Kana kaʹ tanaʹ Galilia. Ueʹ Yesus pe un kina. 2 Yesus pemung ngan diaʹ bayaʹ katuk ke un sihoʹ pengin lete neng adet pepeto ina. 3 Un dau ueʹ Yesus neng ia: “Lepa muʹo ne telang buaʹ anggur idai dulu nisep. Abeʹ un telang buaʹ anggur laʹa.” 4 Un dau Yesus mipa ia: “Abeʹ tekep koʹ cuk akeʹ uyan ini ueʹ. Tau heʹ ke uyan nyingan abeʹ awai nai lepe.” 5 Ina ukoʹ ueʹ Yesus badaʹ me diaʹ pegayeng neng amin dina: “Ti ne mele inu iaʹ ia cuk ikem uyan.” 6 Kelunan Yahudi dina iaʹ ngkang kadoʹ ukum adet, puyan ukoʹ baʹan muheʹ umpat de. Ina pukoʹ un nem nte tajau batu kukoʹ sungai kaʹ ina. Pengebioʹ ca ne senteng kukoʹ suheʹ dua puloʹ gilin sungai. 7 Un dau Yesus neng diaʹ pegayeng neng amin dina: “Nyangan ne tajau dina man sungai.” Penco re nyangan tajau dina pa sangan sada paʹ a. 8 Penco Yesus cuk ida ngan kuma ha: “Ngadai ne palai sungai ini, tai hem ngkin ne palaʹ laki iaʹ pengebioʹ ngkang adet bunut ini te.” Sulo tai re ngkin ne palaʹ ia. 9 Kun ne ten tekaʹ sungai ina iaʹ lepa pekaliu ne uban ne tai nuyan telang buaʹ anggur. Abeʹ e tisen cen mpi kenai telang buaʹ anggur ini. (Un sepuʹo diaʹ pegayeng neng amin dina, iaʹ lepa ngadai telang buaʹ anggur idai, ida tisen kidi.) Kun ne mengin laki iaʹ metip leto ina, 10 ngan kuma ha neng ia: “Dulu diaʹ ca mencai telang buaʹ anggur iaʹ tiga ading. Uʹo ina, dalau diaʹ sakai lepa nisep kadoʹ, lepa ina dulu mencai telang buaʹ anggur iaʹ malai. Un sepuʹo ikoʹ iaʹ ban peremun telang buaʹ anggur iaʹ tiga ini pa abeʹ naʹkini ne.” 11 Ini iaʹ ading Yesus uyan puyan nyingan. Ia uyan ne kaʹ lepoʹ Kana kaʹ tanaʹ Galilia. Kina ha peluhaʹ seʹ serema peniga ha, ngan diaʹ bayaʹ katuk ke dina ngelan neng ia. 12 Lepa ina, puke ne Yesus ngan ueʹ e, ngan diaʹ cenganak ke, ngan diaʹ bayaʹ katuk ke tai kaʹ Kapernaum. Sulo re ngelineʹ kina majan kediʹut de.
Yesus tai kaʹ Umaʹ Palan Allah
13 Abeʹ un majan laʹa lepoʹ Yahudi ke uyan Adet Bunut Paska. (Sen ne menting patai.) Ina ukoʹ Yesus tai kaʹ lepoʹ Yerusalim. 14 Dalem Umaʹ Palan Allah, Yesus taʹan dulu matu sapi, dumba, ngan sui garaʹ. Ngan pelaʹa, un pe dulu diaʹ seliwa ligit dina madung kata bijaʹ de. 15 Ina ukoʹ Yesus muyung ida man tali, apan nungkaʹ ida dina tai kelap cen Umaʹ Palan Allah ne. Mung sapi ngan dumba dina kelap. Kun Yesus puʹup bijaʹ kelunan diaʹ seliwa ligit dina are, mentung murat ligit de. 16 Kun ne cuk laki diaʹ matu sui garaʹ dina, un dau ue: “Tai ne, ngkin ida kelap cen umaʹ ini. Ayen uyan umaʹ Amai heʹ ne ukoʹ baʹan ca umaʹ kukoʹ dulu matu kujau re.” 17 Mung diaʹ bayaʹ katuk ke dina are, petawai dau dalem Kitap iaʹ kuma ha: “Ahaʹ Allah, dalem kimet ceʹ akeʹ malaʹ tekaʹ neng umaʹ koʹ, ukoʹ baʹan tekaʹ laʹang luten tutung dalem penawai heʹ.” 18 Un diaʹ lataʹ lepoʹ Yahudi penco nyakat Yesus ngan lemutu ia: “Inu puyan nyingan ncoʹ, iaʹ ikoʹ senteng peluhaʹ mameʹ uban tuman ncoʹ tekep ti puyan ini?” 19 Dau Yesus mipa ida? “Ngasing ne umaʹ Allah ini, ngan dalem telu tau akeʹ ke numpak medeng nge laʹa.” 20 Kun nte lemutu ia laʹa: “Ikoʹ ke uyan umaʹ ini dalem telu tau tuaʹ le? Dalem pat puloʹ nem uman ina le Umaʹ Palan ini senteng nuyan.” 21 Un sepuʹo umaʹ palan iaʹ Yesus pisiu, ina ne usa ha loʹ. 22 Ina ukoʹ dalau uʹo kenai ia beteʹ cen patai re, diaʹ bayaʹ katuk ke petawai dau Yesus pisiu ini. Sulo re ngelan dau dalem Kitap, ngan peging iaʹ Yesus lepa badaʹ lete.
Yesus tisen kelunan mung
23 Ngajan Yesus kaʹ lepoʹ Yerusalim dalau sihoʹ Adet Bunut Paska, kadoʹ kelunan ngelan neng ia uban nte taʹan diseʹ puyan nyingan iaʹ Yesus lepa ti. 24 Un sepuʹo usa Yesus tengen abeʹ un tekaʹ tapi ie neng ida, uban ne tisen puyan kelunan mung. 25 Abeʹ un titin aheʹ badaʹ ukoʹ baʹan tuk kelunan neng ia, uban Yesus tisen inu iaʹ dalem kimet de.
Yesus ngan Nikudimus
1 Un ca laki, ngadan ne Nikudimus, ca iaʹ pengebioʹ lepoʹ Yahudi. Ia kenahum neng mpun diaʹ Perisi. 2 Ca alem me Nikudimus tai palaʹ Yesus ngan kuma ha: “Guru, ameʹ tisen ikoʹ ca guru iaʹ nai kuʹun Allah. Abeʹ un aheʹ senteng ti puyan nyingan ukoʹ baʹan ncoʹ ti ne, buk Allah abeʹ un ngan ne.” 3 Un dau Yesus mipa ia: “Akeʹ badaʹ mikoʹ lan: ca usa pe abeʹ senteng taʹan puyan pengaren Allah buk ke abeʹ un numpak ke pempet neng ca udip iaʹ mading.” 4 Un dau Nikudimus lemutu Yesus: “Kumpin kelunan iaʹ lepa lataʹ senteng ke numpak pempet laʹa tupe? Atek abeʹ un nyatan kelunan senteng tai ngeliwet kaʹ dalem batek ueʹ e, numpak pempet ngedua liwai laʹa.” 5 Un dau Yesus: “Akeʹ badaʹ mikoʹ lan, ca usa pe abeʹ un senteng tai kaʹ dalem puyan pengaren Allah buk ke abeʹ pempet kuʹun sungai ngan kuʹun Berua Tuhan pelaʹa. 6 Singket usa kelunan iaʹ un usa un pempet cen tuʹa re, un sepuʹo singket diaʹ un udip berua nai pempet neng udip berua re kuʹun Berua Tuhan. 7 Ayen ncem mateng tecu kuʹun dau heʹ badaʹ mikem: ‘Tekep lete ikem mung ke pempet neng ca udip ia mading.’ 8 Ilu pekata ukoʹ baʹan keput bahiu. Mele kempi ie ubaʹ tai, ikem kenahan dau tuyau ue. Un sepuʹo abeʹ kem tisen cen mpi kenai ie, ngan kempi ketai ie. Kuaʹ ngan ina lete puyan singket usa kelunan diaʹ pempet kuʹun Berua Tuhan.” 9 Un dau Nikudimus lemutu: “Kumpin ne pekini tupe?” 10 Un dau Yesus mipa ia: “Ikoʹ ca guru lepoʹ Israil, abeʹ pe ikoʹ tisen ini tupe? 11 Akeʹ badaʹ mikoʹ lan, ameʹ pisiu inu iaʹ ameʹ tisen, ngan ameʹ badaʹ inu iaʹ ameʹ taʹan. Naʹ pe pekina, pabeʹ ca usa mikem diaʹ lataʹ dina pe abeʹ un ubaʹ alaʹ dau katuk meʹ. 12 Abeʹ kem un ngelan akeʹ dalau heʹ badaʹ mikem puyan katuk usun tanaʹ ini are. Buk pekina, abeʹ nyatan ncem ke ngelan dau heʹ buk keʹ ke badaʹ puyan surga mikem. 13 Ngan abeʹ un aheʹ iaʹ lepa tai kaʹ surga lepe, bang Anak Sio iaʹ lepa nai cen surga.” 14 Ukoʹ baʹan Musa mejung ncung ulai jangin kempau kayu tecek kaʹ tanaʹ lenga are, ngan pekina lete Anak Sio ketai pejung ʹo, 15 apan ketoʹ dulu diaʹ ngelan neng ia setneng un udip saheʹ kelineʹ iaʹ ngeirman. 16 Bioʹ puyan Allah malaʹ neng ilu kelunan kusun tanaʹ ini, ina ukoʹ o mencai Anak ke iaʹ bang ca ina le milu, apan mung kelunan diaʹ ngelan neng ia abeʹ un tai matai penco, un sepuʹo ida ke alaʹ udip saheʹ kelineʹ iaʹ ngeriman. 17 Abeʹ Allah cuk Anak ke nai pebetep ukum kusun tanaʹ ini, un sepuʹo Allah uyan ia Laki iaʹ keniga udip kelunan kusun tanaʹ ini. 18 Aheʹ diaʹ ngelan neng Anak ina, abeʹ un ukum penyalaʹ betep neng ia. Un sepuʹo aheʹ diaʹ abeʹ un ngelan, un ne ukum lepa betep neng ia uban ne are ngelan neng Anak Allah iaʹ bang ca ina le. 19 Pekini ne puyan ukum nuyan: dema lepa nai kusun tanaʹ ini, un sepuʹo kelunan malaʹ aleʹ neng puyan iaʹ mentem cen ʹo iaʹ dema, uban pemuyan nte jaʹat. 20 Aheʹ aheʹ iaʹ ti puyan jaʹat, ia miʹi neng puyan dema, ngan abeʹ un ubaʹ nai palaʹ dema uban ne abeʹ un ubaʹ pemuyan iaʹ jaʹat ina luhaʹ neng dulu. 21 Un sepuʹo aheʹ iaʹ ti puyan iaʹ telit lan, ia ubaʹ nai palaʹ dema apan dema ina ke peluhaʹ diseʹ pemuyan ne telit bayaʹ dau Allah.
Yesus ngan Yaya
22 Uʹo ina Yesus ngan diaʹ bayaʹ katuk ke tai masat kaʹ dale Yudia. Un pe kudaʹ kudaʹ majan ia ngelineʹ ngan nte kina, ngan ia ngebatis kelunan. 23 Un pe Yaya lete ngebatis kelunan kaʹ sungai Ainun, abeʹ un coʹ cen Salim, uban kadoʹ sungai kina, ngan kadoʹ pe kelunan tai palaʹ ia, ngan ia ngebatis ida. 24 Yaya pe abeʹ un awai sihoʹ sepin. 25 Un palai diaʹ bayaʹ katuk Yaya ne paseʹ ngan ca kelunan Yahudi, paseʹ kuaʹ baʹan adet de muheʹ inu re. 26 Sulo ketai re palaʹ Yaya ngan badaʹ mia: “Guru, masaʹ koʹ petawai laki iaʹ un ngan ncoʹ tahaʹ dipa Yardin are, iaʹ ikoʹ pisiu mameʹ de. Ia ngebatis kelunan naʹkini, ngan mung dulu tai palaʹ ia.” 27 Un dau Yaya mipa: “Aheʹ aheʹ pe milu kelunan ne, abeʹ un aheʹ senteng alaʹ gayeng buk Tuhan Allah abeʹ un naʹ a mia. 28 Usa hem tengen senteng nugen kumpin dau heʹ lepa badaʹ mikem: ‘Abeʹ keʹ Keristus iaʹ ngkang pungu udip, un sepuʹo Allah iaʹ cuk akeʹ nai tahaʹ tena neng ia.’ 29 Seleket laki iaʹ metip leto ina, anun ne lete leto ina. Tuyang laki iaʹ metip leto ina are, nekejeng kata ia ngan ngeringa dau ue, ngan banget tekaʹ kimet te kenahan dau isiu laki iaʹ metip leto ina are. Pekin ane puyan bangen nceʹ tengen iaʹ tai daʹam lan. 30 Tekep lete Yesus tai bioʹ, ngan akeʹ ini iaʹ ketai iʹut.”
Ia iaʹ nai cen surga
31 Aheʹ iaʹ nai cen mpau, ia iaʹ bioʹ cen ʹo mung dulu. Aheʹ iaʹ nai cen tanaʹ, ia iaʹ bang pekimet usun tanaʹ, ngan pisiu puyan pengudip kusun tanaʹ tuaʹ le. Aheʹ iaʹ nai cen surga, ina iaʹ tahaʹ mpau neng dulu mung. 32 Ia badaʹ inu iaʹ ia taʹan ngan kenahan, un sepuʹo abe un aheʹ iaʹ alaʹ dau katuk ke. 33 Aheʹ iaʹ alaʹ dau katuk ke, ida iaʹ ke tisen lan, uban Allah iaʹ puʹun puyan iaʹ telit. 34 Laki iaʹ Allah lepa cuk nai are, ia iaʹ penco dau isiu Allah, uban Allah iaʹ lebang naʹ Berua ha mia. 35 Amai Bioʹ iaʹ malaʹ neng Anak ke ngan mahung ketoʹ inu dalem gaham penyukat te. 36 Aheʹ iaʹ ngelan neng Anak ina, ia lete iaʹ un udip saheʹ kelineʹ iaʹ ngeriman. Aheʹ iaʹ muau bayaʹ dau Anak ina, nyahut te senteng ke alaʹ udip ne, bang kenca Allah iaʹ ke pencit neng ia pabeʹ bayaʹ.
Yesus ngan ca leto lepoʹ Samaria
1 Kelunan diaʹ Perisi kenahan dau denga puyan kadoʹ dulu diaʹ penat bayaʹ katuk Yesus cen ʹo Yaya, penco re alaʹ batis kuʹun ne. 2 (Iaʹ lan ne, abeʹ usa Yesus tengen iaʹ ngebatis dulu, bang diaʹ bayaʹ katuk ke le iaʹ ti.) 3 Midan Yesus kenahan dau isiu ina, sulo ketai ie mecin tanaʹ Yudia ngan tai uleʹ palaʹ tanaʹ Galilia. 4 Neng janan ne kina atek ke tai ngedalau dale Samaria. 5 Nai Yesus abeʹ kaʹ ca lepoʹ Samaria iaʹ ngadan ne Sikar, iaʹ abeʹ un coʹ cen lasan iaʹ Yakup lepa naʹ me anak ke Yusup cen naʹaʹ re. 6 Kina pe un lubang sungai Yakup. Kenai Yesus abeʹ kina tegoʹ beluaʹ tau, ngan lelat tekaʹ a masat. Penco ho madung kata lubang sungai ina. 7 -8 Ngajan ketai diaʹ bayaʹ katuk ke kaʹ lepoʹ, tai lemeli penguman, idi kenai ca leto Samaria ke alaʹ sungai kaʹ lubang ina. Un dau Yesus neng ia: “Naʹ ne sungai makeʹ, akeʹ nisep ading.” 9 Un dau leto Samaria ina mipa ia: “Ikoʹ ca kelunan lepoʹ Yahudi, ngan akeʹ ca leto lepoʹ Samaria. Moʹ inu senteng ngkoʹ nyat tisep neng akeʹ?” (Abeʹ lepoʹ Yahudi ubaʹ pekelet inu re ngan lepoʹ Samaria.) 10 Un dau Yesus mipa ia: “Awaʹ pe ikoʹ tisen inu iaʹ Allah naʹ me kelunan, ngan tisen aheʹ keʹ iaʹ nyat tisep neng ikoʹ ne, atek koʹ ke nyat neng ia lete, ngan ia pe naʹ sungai iaʹ mudip mikoʹ.” 11 Un dau leto ina pisiu Yesus: “Amai, abeʹ un kadai hoʹ, ngan dalem aleʹ lubang sungai ini. Kempi uban ncoʹ alaʹ sungai mudip ina tupe? 12 Tepun meʹ Yakup iaʹ naʹ lubang sungai ini mameʹ. Usa ha pe nisep sungai ini, ngan diaʹ anak, ngan pekina pe pakan ne. Ikoʹ kuma ikoʹ iaʹ ke pelapa bioʹ cen Yakup tupe?” 13 Un dau Yesus mipa ia: “Aheʹ kelunan diaʹ nisep sungai ini, atek de ke muhang lete laʹa. 14 Un sepuʹo aheʹ kelunan diaʹ nisep sungai iaʹ akeʹ naʹ ne, abeʹ de ke muhang laʹa. Sungai iaʹ akeʹ ke naʹ me kelunan, ina iaʹ nuyan seleket lubang tebut iaʹ peluput sungai mudip kaʹ dalem penawai ie, ngan naʹ udip saheʹ kelineʹ iaʹ ngeriman mia.” 15 Un dau leto ina pisiu Yesus: “Amai, naʹ ne sungai ina makeʹ, inu pe ninco heʹ nai alaʹ sungai kini laʹa ʹo.” 16 Kun Yesus badaʹ me leto ina: “Tai ne mengin laki hoʹ te, ngan ngkin ia uleʹ kini.” 17 Un dau leto ina pisiu mia: “Abeʹ un laki heʹ.” Un dau Yesus neng ia laʹa: ‘Lan dau hoʹ kuma ikoʹ abeʹ un laki, 18 un sepuʹo lepa ne ikoʹ pepeto ngan lema usa laki, ngan un laki iaʹ ngelineʹ ngan ncoʹ naʹkini ne, abeʹ ina atek laki hoʹ lan. Ikoʹ badaʹ makeʹ lan.” 19 Dau leto ina neng Yesus laʹa: “Amai, akeʹ taʹan ikoʹ ca pegawa bioʹ. 20 Un tepun meʹ lepoʹ Samaria lemameʹ Allah kusun mudung ini, un sepuʹo ikem kelunan Yahudi pisiu kaʹ Yerusalim kukoʹ ilu tekep lemameʹ Allah.” 21 Un dau Yesus neng leto ina: “Tiga hoʹ ngelan dau heʹ ne, atek nai lete tau tegoʹ kelunan ke lemameʹ Amai Bioʹ, abeʹ e kaʹ mudung ini, ngan abeʹ e kaʹ Yerusalim pe. 22 Abeʹ kem lepoʹ Samaria tisen lan aheʹ iaʹ ikem ke lemameʹ. Ameʹ Yahudi tisen aheʹ iaʹ ameʹ lemameʹ. Uban puyan iaʹ ke pudip kelunan nai cen lepoʹ Yahudi. 23 Un sepuʹo jakaʹ iaʹ ke nai uʹo ini, lepa un ne luhaʹ naʹkini, tegoʹ diaʹ lemameʹ lan, ke lemameʹ Amai Bioʹ man berua re ngan katuk iaʹ telit. Un kelunan diaʹ lemameʹ pekini puyan, ida dina iaʹ Amai Bioʹ ubaʹ lemameʹ palaʹ ia. 24 Allah ne iaʹ atek Berua, ngan aheʹ diaʹ lemameʹ neng ia, atek de ke lemameʹ dalem berua re, peging ngan katuk iaʹ telit.” 25 Un dau leto ina neng ia: “Tisen nceʹ uban Mesias, iaʹ ilu pisiu Keristus ne, atek ke nai ʹo. Buk ke nai, tegoʹ ina ha ke badaʹ mung naʹan inu milu.” 26 Un dau Yesus mipa ia: “Akeʹ ne ia, iaʹ pisiu ngan ncoʹ naʹkini ne.” 27 Tegoʹ ina, uleʹ ne diaʹ bayaʹ katuk Yesus ne, ngan atek tecu tekaʹ de taʹan Yesus pisiu ngan ca leto. Un sepuʹo pabeʹ ca usa pe abeʹ un kuma ha neng leto ina: “Inu iaʹ ikoʹ ubaʹ nyat neng Yesus tupe?” Pekina lete abeʹ un aheʹ lemutu neng Yesus kuma ha: “Inu adeʹ koʹ pisiu ngan ne?” 28 Kun leto ina mahung tajau sungai ie, penco tai uleʹ kaʹ lepoʹ o ngan pisiu me dulu kina: 29 “Un cha kelunan iaʹ badaʹ mung uban pemuyan nceʹ cen kena. Nai ne ikem naʹat ia ading. Un ne Kristus iaʹ ngkang pungu udip taʹin?” 30 Sulo ketai re mecin lepoʹ ina ngan tai palaʹ Yesus. 31 Ngajan ina lete diaʹ bayaʹ katuk Yesus temesen dau neng ia: “Guru, uman ading.” 32 Un sepuʹo dau Yesus mipa ida: “Un lete penguman akeʹ uman iaʹ ikem abeʹ un tisen.” 33 Sulo diaʹ bayaʹ katuk ke dina lemutu ida selepeʹ: “Un aheʹ nai ngkin penguman mia taʹin?” 34 Kun Yesus pisiu mida: “Penguman nceʹ ne keti bayaʹ pengubaʹ kimet ia iaʹ cuk akeʹ nai, ngan pedaʹam gayeng iaʹ ia cuk akeʹ ti. 35 Un dau ca isiu hem iaʹ kuma ha: ‘Pat bulan laʹa, ina meʹ majau.’ Un sepuʹo dau heʹ badaʹ mikem, ikem nugen naʹat diseʹ uma le ne ading, lepa mesak ne diseʹ padai iaʹ ilu tenup ke majau. 36 Kelunan diaʹ majau, ida iaʹ alaʹ suaʹ a, ngan ngkin padai seleket kelunan neng udip saheʹ kelineʹ iaʹ ngeriman, apan kelunan iaʹ nugan ngan kelunan iaʹ majau pemung le bangen. 37 Un ca isiu iaʹ lan iaʹ kuma ha: ‘Ca kelunan iaʹ nugan, un pe ca naʹan kelunan iaʹ majau.’ 38 Akeʹ cuk ikem tai majau neng ca uma iaʹ ikem abeʹ un pegayeng cen kena. Un kelunan diaʹ ca iaʹ pegayeng kina, ngan ikem iaʹ ke alaʹ bang cen gayeng nte.” 39 Kadoʹ kelunan lepoʹ Samaria ngelan neng Yesus uban kuʹun leto idai lepa pisiu iaʹ kuma ha: “Ia badaʹ ketoʹ pemuyan nceʹ iaʹ akeʹ ti cen kena.” 40 Ina ukoʹ dalau kenai lepoʹ Samaria dina palaʹ Yesus, kun nte ngelapen dau mapo ia ngelineʹ ngan nte. Sulo Yesus ngelineʹ ngan nte kina dua tau. 41 Kadoʹ kuʹo ke diaʹ ngelan Yesus kuʹun katuk ke. 42 Un dau re neng leto idai: “Naʹ kini ameʹ ngelan neng Yesus, abeʹ e kuʹun dau hoʹ badaʹ mameʹ le, un sepuʹo ameʹ tengen lepa kenahan dau ue, ngan tisen lan ban ia iaʹ atek Laki iaʹ keniga udip kelunan kusun tanaʹ ini.”
Yesus paget anak ca kelunan iaʹ pengebioʹ perinta
43 Lepa dua tau Yesus kina, sulo ho mecin tai kaʹ Galilia. 44 Uban Yesus tengen lepa badaʹ: “Abeʹ kelunan nyelama pegawa kaʹ lepoʹ o loʹ.” 45 Un sepuʹo tegoʹ ketai Yesus abeʹ kaʹ Galilia, kadoʹ dulu nyelama alaʹ ia, uban ida diaʹ lepa tai naʹat Bunut Paska kaʹ lepoʹ Yerusalim are, ngan ida lepa taʹan ketoʹ pemuyan iaʹ Yesus lepa ti dalau Bunut Paska ina. 46 Sulo ketai Yesus uleʹ palaʹ lepoʹ Kana kaʹ tanaʹ Galilia, iaʹ kukoʹ o pekaliu sungai tai nuyan telang buaʹ anggur are. Kina un ca laki iaʹ pengebioʹ perinta, un anak ke sakit kaʹ Kapernaum. 47 Tegoʹ o kenahan dau denga Yesus nai uleʹ cen tanaʹ Yudia tai palaʹ tanaʹ Galilia, penco ketai laki ina palaʹ Yesus, ngan mengin ia nai kaʹ lepoʹ Kapernaum ngan paget anak ke. 48 Un dau Yesus neng ia: “Pabeʹ ca usa mikem pe abeʹ un ngelan buk kem abeʹ un taʹan puyan nyingan ngan iaʹ salam diseʹ.” 49 Un dau laki pengebioʹ perinta ina neng ia: “Amai, nai ne serengan akeʹ ayen anak keʹ ke matai le ʹo.” 50 Kun Yesus badaʹ mia: “Tai ne uleʹ. Mudip te anak koʹ ne ʹo.” Laki ina ngelan ne dau tiraʹ Yesus ngan penco tai uleʹ ne pe. 51 Ngalang janan kun ne petegoʹ ngan diaʹ panyen amin ne iaʹ badaʹ mia kuma ha: “Mudip ne anak koʹ de.” 52 Kun ne lemutu ida: “Jam kudaʹ anak keʹ nai tiga?” Ngan un dau re: “Dalau jam ca, beluaʹ tau nyahap de ia nteng dadem.” 53 Kun amai ie petawai uban marung neng jam ina lete Yesus lepa badaʹ mia iaʹ pekini dau: “Mudip ne anak koʹ.” Ina ukoʹ o, peging ngan diaʹ amin ne, ngelan neng Yesus. 54 Ini ne kedua liwai puyan nyingan iaʹ Yesus ti lepa ha uleʹ cen tanaʹ Yudia tai kaʹ tanaʹ Galilia.
Puyan paget kelunan kaʹ sepan sungai
1 Uʹo ina un ca adet bunut lepoʹ Yahudi, ngan tai ne Yesus kaʹ lepoʹ Yerusalim. 2 Kaʹ Yerusalim un ca belau sungai nyeng kata Pamen Dumba. Pipa belau ina un lema re laga petem ngan sengau ue. Dulu pisiu belau ina kuma Bitisda. 3 Kina un pe ca peng bioʹ kelunan diaʹ sakit, meken kempau laga ina – diaʹ butaʹ, diaʹ apet, ngan diaʹ lemaʹ. Ida ngena sungai ina ke ngala, 4 uban tahaʹ palai un ca melikat Tuhan tai kaʹ dalem belau ina, ngan nekibai sungai kaʹ dalem me. Aheʹ cen ahang ida diaʹ sakit dina iaʹ ading tai kaʹ dalem belau ina, lepa melikat ina nekibai ie, ida iaʹ maget laho cen inu iaʹ penyakit de. 5 Un ca laki kina iaʹ lepa sakit telu puloʹ aya uman pengemajan ne. 6 Yesus taʹan ia meken kina ngan tisen ia ca laki iaʹ majan aleʹ sakit. Sulo dau Yesus neng ia: “Ubaʹ koʹ maget tupe?” 7 Kun laki iaʹ sakit ina mipa ia: “Amai, abeʹ un aheʹ iaʹ ke mepo mahung akeʹ kaʹ dalem belau ini tegoʹ sungai ini ngala ne, uban ngajan nceʹ ke ngiaʹ ke tai kaʹ dalem, dulu diaʹ ca pe ading tai neng akeʹ.” 8 Un dau Yesus neng ia: “Beteʹ ne, lemelen ngan ngayang pat coʹ, ngan tai masat.” 9 Pelapa maget ne laki ina, Kun ne lemelen pat te, penco tai ie masat. Puyan ini nuyan tegoʹ Tau Kelineʹ. 10 Ina ukoʹ diaʹ pengelataʹ adet lepoʹ Yahudi dina badaʹ me laki iaʹ lepa maget ina: “Ini ne Tau Kelineʹ, ngan puyan ncoʹ ngayang pat ina iaʹ ke ngesa adet le.” 11 Un dau laki ina mipa ida: “Laki iaʹ paget akeʹ ne, ia iaʹ cuk akeʹ ngayang pat ngan masat.” 12 Kun nte lemutu ia: “Aheʹ laki iaʹ cuk ikoʹ ngayang pat ngan masat ina?” 13 Un sepuʹo abeʹ laki iaʹ lepa maget ina tisen aheʹ e, uban kadoʹ dulu pempun kina, ngan Yesus pe lepa mecin ina. 14 Uʹo ina Yesus taʹan ia kaʹ dalem Umaʹ Palan ngan kuma ha: “Naʹat ading, lepa tiga ne ikoʹ naʹkini udai. Pet mung ne puyan penyalaʹ koʹ, ayen ti ie laʹa malap puyan iaʹ pelapa jaʹat nai nantaʹ ikoʹ ʹo.” 15 Penco tai laki ina mecin ngan badaʹ me diaʹ pengelataʹ adet lepoʹ Yahudi dina uban Yesus iaʹ lepa paget ia. 16 Uban tuman ini ne tading nte keloʹ nyakit Yesus, uban Yesus paget laki ina tegoʹ Tau Kelineʹ. 17 Un dau Yesus mipa ida: “Amai heʹ pesulo pegayeng, ngan akeʹ pe tekep pegayeng lete.” 18 Kuʹun isiu ini ne diaʹ pengelataʹ lepoʹ Yahudi dina tai pareng kuʹo ke tekaʹ kimet de ubaʹ lematai Yesus. Lan pe ia ngesa Tau Kelineʹ; abeʹ kuʹun ina tuaʹ le, un sepuʹo ia badaʹ Allah iaʹ Amai ie tengen. Man puyan ini ne ia uyan usa ha loʹ pekuaʹ ngan Allah.
Penyukat Anak Allah
19 Kun Yesus mipa ida: “Lan dau heʹ mikem, abeʹ Anak ini uyan inu man kimet te tengen, bang ia uyan ini iaʹ ia taʹan Amai ie uyan. Inu puyan iaʹ Amai ie uyan, atek Anak ke uyan lete. 20 Uban Amai ina malaʹ neng Anak ina, ngan peluhaʹ mia mung pemuyan iaʹ ia tengen ti. Atek ke ke peluhaʹ mia puyan iaʹ bioʹ cen ini iaʹ ia ke ti uʹo, ngan ikem mung iaʹ ke salam kuʹun ne. 21 Ukoʹ baʹan Amai meteʹ kelunan diaʹ matai ngan naʹ udip mida, pekina lete Anak ke ke naʹ udip me kelunan diaʹ ia ubaʹ pudip. 22 Abeʹ Amai ina tengen pebetep ukum neng dulu aheʹ aheʹ pe, un sepuʹo ketoʹ penyukat iaʹ ke pebetep ukum ia naʹ me Anak ke, 23 apan mung kelunan ke selama neng Anak ina, kuaʹ baʹan seʹ puyan nte selama neng Amai ina. Aheʹ klunan diaʹ abeʹ un selama neng Anak ina, abeʹ de selama neng Amai iaʹ cuk ia nai ne. 24 “Lan dau heʹ mikem, aheʹ iaʹ kenahan dau tiraʹ keʹ ngan ngelan ia iaʹ cuk akeʹ nai, kelunan ina ne iaʹ lepa alaʹ udip saheʹ kelineʹ iaʹ ngeriman, ngan abeʹ e ke sihoʹ puyan betep ukum penyalaʹ laʹa, un sepuʹo lepa ne ia lapa cen patai tai palaʹ udip. 25 Lan dau heʹ mikem, jakaʹ iaʹ kenai tegoʹ kelunan diaʹ matai ke kenahan dau isiu Anak Allah, ngan aheʹ diaʹ kenahan dau isiu ina, ida iaʹ ke mudip. Jakaʹ ina lepa nai abeʹ naʹkini. 26 Ukoʹ baʹan Amai ina tengen iaʹ puʹun udip, kuaʹ ina lete ia uyan Anak ke iaʹ puʹun udip. 27 Ngan ia lepa naʹ me Anak ke penyukat iaʹ ke pebetep ukum, uban ia iaʹ Anak Sio. 28 Ayen tecu tekaʹ neng puyan ini, uban jakaʹ iaʹ kenai ʹo tegoʹ mung kelunan diaʹ ban matai diaʹ un kaʹ dalem liang ke kenahan dau isiu Anak ina, 29 ngan ida iaʹ ke nai kawang cen dalem liang nte. Aheʹ diaʹ lepa uban uyan iaʹ tiga, ida iaʹ ke beteʹ ngan penco tai palaʹ udip. Un sepuʹo aheʹ diaʹ lepa uban uyan puyan jaʹat, ida lete iaʹ ke beteʹ ngan penco lenca neng ukum.”
Diaʹ badaʹ tugen neng Yesus
30 “Abeʹ keʹ senteng uyan inu man kimet ceʹ tengen. Akeʹ pebetep ukum bang bayaʹ dau Allah badaʹ makeʹ tuaʹ le. Ina ukoʹ teneng dau heʹ lemetep ukum, uban abeʹ keʹ uyan ne bayaʹ pengubaʹ kimet ceʹ tengen, un sepuʹo akeʹ bayaʹ dau pengubaʹ iaʹ cuk akeʹ nai ne. 31 “Buk ke badaʹ tugen neng puyan usa heʹ tengen, abeʹ tekep dulu ke ngelan dau heʹ badaʹ ina. 32 Un sepuʹo un ca usa iaʹ badaʹ tugen neng puyan usa heʹ, ngan akeʹ tisen uban lan inu iaʹ ia pisiu neng akeʹ. 33 Lepa ne ikem cuk diaʹ lawa hem tai palaʹ Yaya, ngan ia iaʹ penco isiu neng iaʹ telit lan. 34 Naʹ pe akeʹ pekina dau, abeʹ e uban nceʹ abeʹ un senteng alaʹ tugen cen kelunan. Akeʹ pekina dau ne apan ncem senteng alaʹ udip iaʹ ke pudip ikem dalem Tuhan. 35 Yaya iaʹ kuaʹ baʹan ca titiu iaʹ tutung menyerema le diseʹ, ngan nuat le ikem ubaʹ ke bangen neng dema ha. 36 Un sepuʹo akeʹ un ca naʹan puyan iaʹ badaʹ tugen neng akeʹ, bioʹ cen uʹo tugen iaʹ Yaya badaʹ neng akeʹ. Pemuyan iaʹ akeʹ uyan, ina pemuyan iaʹ Amai heʹ cuk akeʹ uyan. Pemuyan dina iaʹ badaʹ tugen neng akeʹ, ngan peluhaʹ uban Amai Bioʹ iaʹ cuk akeʹ nai. 37 Ngan Amai iaʹ cuk akeʹ nai, ia lete iaʹ badaʹ tugen neng puyan usa heʹ. Nyahut cem senteng kenahan dau isiu ue, ngan pekina pe taʹan silu nge. 38 Ngan abeʹ kem peremun dau katuk ke kaʹ dalem kimet cem, uban abeʹ kem ngelan ia, iaʹ Allah cuk nai. 39 Ikem pekalai Kitap uban ncem kuma dalem surat dina hem ke alaʹ udip saheʹ kelineʹ iaʹ ngeriman, ngan surat dina tengen ke badaʹ tugen neng akeʹ. 40 Petem kem abeʹ un ubaʹ nai palaʹ akeʹ ke alaʹ udip. 41 “Abeʹ keʹ un pita kelunan ke pada akeʹ. 42 Un sepuʹo akeʹ tisen ikem. Abeʹ kem un malaʹ neng Allah dalem kimet cem. 43 Akeʹ nai ngan penyukat Amai heʹ, un sepuʹo abeʹ kem ubaʹ alaʹ akeʹ. Tegoʹ ca usa nai ngan penyukat te tengen, ubaʹ kem alaʹ ia. 44 Uban ncem ubaʹ un pada cen ikem selepeʹ, un sepuʹo abeʹ kem un ubaʹ ke mita pada cen Allah iaʹ bang ca le ina. Buk pekina, abeʹ kem senteng ke ngelan. 45 Naʹ pe ia pekina, ayen ncem kuma akeʹ iaʹ ke mekem salaʹ mikem palaʹ Amai heʹ. Musa iaʹ ke mekem salaʹ mikem, Musa ina lete iaʹ ikem nebelum cen kena re. 46 Buk kimet cem lan ngelan Musa are, seʹ kem ke ngelan akeʹ lete ina, uban ia iaʹ lepa nyurat puyan nceʹ. 47 Un sepuʹo uban ncem abeʹ un ngelan puyan iaʹ Musa nyurat, abeʹ ne nyatan ncem ke ngelan dau inu iaʹ akeʹ pisiu.”
Yesus lemakan lema ibu usa kelunan
1 Lepa ina Yesus tai uleʹ kaʹ dipa leteng Galilia, (ia lete leteng Tiberias). 2 Un ca peng kelunan ia bioʹ le tai bayaʹ ia, uban nte lepa taʹan diseʹ puyan nyingan ne paget kelunan diaʹ sakit. 3 Tai kun Yesus madung kusun ca mudung, pemung ngan diaʹ bayaʹ katuk ke. 4 Adet Bunut Paska lepoʹ Yahudi kenai nyeng. 5 Kun Yesus naʹat pipa ia ngan taʹan kenai ca peng kelunan iaʹ bioʹ le palaʹ ia. Un dau ue neng Pilipus: “Kempi le ke lemeli penguman iaʹ senteng lemakan kelunan dini mung?” 6 Yesus pisiu ini uban ubaʹ ten Pilipus. Iaʹ lan ne, lepa tisen ne Yesus inu iaʹ ia ke ti. 7 Un dau Pilipus mipa ia: “Naʹ pe ia tahaʹ dumit le singket usa re, ina ha ke suheʹ dua ato ligit suaʹ luteʹ ke senteng penguman nte lete.” 8 Un ca laʹa me diaʹ bayaʹ katuk Yesus, Anderias iaʹ cenganak Simun Peterus, iaʹ kuma ha: 9 Ini ca demanai iaʹ un lema re luʹung ruti paun, ngan dua re usa atuk. Un sepuʹo uyan inu le ini me kelunan kadoʹ dini tupe?” 10 Kun Yesus badaʹ mida: “Cuk ne dulu madung ading.” Kadoʹ udu kina. Kun dulu madung ne. Pengekadoʹ laki kihoʹ kihoʹ lema ibu usa re. 11 Kun Yesus alaʹ ruti idai, penco ho nyuaʹ saheʹ kimet neng Allah, ngan patu ue me kelunan kadoʹ diaʹ madung kina ne. Pekina lete ia ti atuk didai, ngan alaʹ mele kumpin pengubaʹ de ne. 12 Tegoʹ de beso mung ne, kun Yesus pisiu diaʹ bayaʹ katuk ke ne: “Nemo mung ne diaʹ laʹa re ne, ayen ngeburaʹ a.” 13 Sulo re nemo ho mung, ngan nyangan puloʹ dua belatak man laʹa lema luʹung ruti paun didai, iaʹ kelunan dina lepa uman nte. 14 Dalau kelunan dina taʹan diseʹ puyan nyingan iaʹ Yesus lepa ti, un dau re: “Masaʹ lan ini pegawa bioʹ iaʹ tekep nai kusun tanaʹ ne.” 15 Lepa ne Yesus tisen kimet de ubaʹ nai alaʹ ia, uban nte ubaʹ mejen uyan ia iaʹ paren bioʹ, ina ukoʹ Yesus tai masat tengen kusun mudung.
Yesus masat kempau sungai
16 Tegoʹ tai tahup, kenai diaʹ bayaʹ katuk Yesus tai puno palaʹ leteng ina are, 17 ngan tai dalem alut, penco tai uleʹ kaʹ dipa leteng nyeripa lepoʹ Kapernaum. Keno ketai mentem ne, jawa pe nai Yesus palaʹ ida. 18 Sebiʹen kenai ca layam kasa ne, ngan leteng ina pe luyak aleʹ. 19 Dalau diaʹ bayaʹ katuk Yesus lepa lemesai kihoʹ kihoʹ telu batu, buk are pat batu pengecoʹ o, kun nte taʹan Yesus masat kempau sungai, nai nyeng kata alut, ngan daram tekaʹ de. Un dau Yesus mida: 20 “Ayen daram. Akeʹ ini.” 21 Ubaʹ ne ida alaʹ ia ngan nte kaʹ alut. Ngan tegoʹ ina, beliau dapit ne alut nte neng tanaʹ iaʹ kukoʹ de ketai ne.
Dulu pita Yesus
22 Neng kenempam me, un dulu diaʹ kadoʹ diaʹ petem ngelineʹ kaʹ dipa leteng ina taʹan bang ca le alut nahung laʹa. Ida lepa tisen ne Yesus abeʹ un tai dalem alut ngan diaʹ bayaʹ katuk ke, ban ida tengen ne tai mecin Yesus are. 23 Nai alut diaʹ ca cen Tiberias nyekakan kata kina, nyeng kukoʹ dulu uman ruti paun tegoʹ Yesus lepa nyuaʹ saheʹ kimet are. 24 Kun dulu diaʹ kadoʹ dina taʹan Yesus ngan diaʹ bayaʹ katuk ke abeʹ un kina, penco re ngedung kalut ngan tai kaʹ Kapernaum, tai mita Yesus.
Yesus iaʹ ruti pengudip
25 Kun nte taʹan ia kaʹ dipa leteng ina. Un dau re neng ia: “Guru, midan ban nai hoʹ kini tupe?” 26 Dau Yesus mipa: “Lan dau heʹ mikem, iaʹ ukoʹ kem nai pita akeʹ, abeʹ uban ncem tisen puyan nyingan nceʹ ina, un sepuʹo uban ncem lepa beso uman ruti, pa ina lene kimet cem. 27 Ayen bang pegayeng mita penguman iaʹ luhaʹ jaʹat, un sepuʹo pegayeng ne mita penguman iaʹ majan neng udip saheʹ kelineʹ iaʹ ngeriman. Peguman ini atek Anak Sio ke naʹ mikem, uban Allah, Amai Bioʹ iaʹ lepa nedanaʹ ia iaʹ tekep ke man puyan ini.” 28 Kun nte lemutu ia: “Inu puyan iaʹ ameʹ senteng ti apan meʹ ke mejo gayeng Allah?” 29 Un dau Yesus mipa: “Ini ne gayeng iaʹ Allah ubaʹ ikem ti: ngelan ne neng ia iaʹ Allah cuk nai ne.” 30 Dau re mipa: “Inu puyan nyingan iaʹ ikoʹ ti apan meʹ taʹan ne, ina le ameʹ ke ngelan ikoʹ? Inu iaʹ ikoʹ ke uyan tupe? 31 Un tepun meʹ cen naʹaʹ are lepa uman ruti kaʹ tanaʹ lenga, iaʹ kuaʹ baʹan dau dalem Kitap: ‘Cen surga ha naʹ ruti ida uman.’ ” 32 Un dau Yesus mida: “Lan dau heʹ mikem, inu iaʹ Musa lepa naʹ mikem cen naʹaʹ, abeʹ ina ruti cen surga. Amai heʹ iaʹ ke naʹ ruti lan mikem cen surga ʹo. 33 Uban ruti iaʹ Allah ke naʹ, ia ne iaʹ nai kentaʹ cen surga, ngan naʹ udip milu kelunan kusun tanaʹ.” 34 Kun nte lemutu ia: “Amai, pesulo ne naʹ ruti ini mameʹ.” 35 Kun Yesus pisiu mida: “Akeʹ ne iaʹ ruti pengudip. Aheʹ kelunan diaʹ nai palaʹ akeʹ, abeʹ lan nte ke laʹu. Ngan aheʹ kelunan diaʹ ngelan neng akeʹ, abeʹ lan nte ke muʹang. 36 Naʹkini akeʹ badaʹ mikem, ngan ikem lepa taʹan akeʹ, un sepuʹo abeʹ kem ubaʹ ngelan. 37 Singket usa kelunan, aheʹ diaʹ Amai heʹ naʹ makeʹ, atek de nai palaʹ akeʹ. Abeʹ keʹ ke nyekang aheʹ iaʹ ke nai palaʹ akeʹ, 38 uban akeʹ nai kentaʹ cen surga ke ti pengubaʹ ia iaʹ cuk akeʹ nai. Abeʹ keʹ ti pengubaʹ keʹ tengen. 39 Ia, iaʹ cuk akeʹ nai, ubaʹ akeʹ ti puyan pekini apan nceʹ ke petubo mung diaʹ ia naʹ makeʹ, ngan abeʹ un buhaʹ ca usa durat. Un sepuʹo ia ubaʹ akeʹ beteʹ ida mung neng udip tegoʹ tau iaʹ ke kuʹo ho. 40 Pekini ne puyan Amai heʹ ubaʹ apan mung aheʹ kelunan diaʹ taʹan ngan ngelan Anak ini, ida iaʹ senteng alaʹ udip saheʹ kelineʹ iaʹ ngeriman, ngan akeʹ ke pebeteʹ ida neng udip tegoʹ tau iaʹ ke kuʹo ho ʹo.” 41 Ina ne tading kelunan Yahudi kuheng dau neng Yesus, uban ne badaʹ: “Akeʹ ini ne ruti iaʹ nai cen surga.” 42 Ina ukoʹ de pekini dau: “Laki ini ne iaʹ Yesus anak Yusup sedeʹ? Ilu tisen amai ie ngan ueʹ e. Naʹkini kumpin puyan ne kuma ia nai cen surga?” 43 Un dau Yesus mipa ida: “Pekenaʹ ne nguheng kahang ikem selepeʹ. 44 Abeʹ un aheʹ senteng nai palaʹ akeʹ buk abeʹ un kimet te pihit kuʹun Amai Bioʹ iaʹ cuk akeʹ nai ne, ngan akeʹ ke pebeteʹ ia neng udip tegoʹ tau iaʹ ke kuʹo ho ʹo. 45 Un diaʹ pegawa cen naʹaʹ de nyurat: ‘Allah iaʹ pekatuk mung kelunan.’ Aheʹ aheʹ diaʹ kenahan dau Amai, ngan pekalai cen ia, ida iaʹ ke nai palaʹ akeʹ. 46 Abeʹ un nceʹ kuma ha ca usa iaʹ lepa taʹan Amai. Ia iaʹ nai cen Allah, bang ia tengen le iaʹ lepa taʹan Amai. 47 “Lan dau heʹ mikem, aheʹ diaʹ ngelan, ida iaʹ un udip saheʹ kelineʹ iaʹ ngeriman. 48 Akeʹ ne iaʹ ruti pengudip. 49 Cen naʹaʹ diaʹ tepun ncem uman ruti manaʹ kaʹ tanaʹ lenga are, un sepuʹo matai ne ida. 50 Ca naʹan pe ruti iaʹ nai cen surga. Aheʹ diaʹ uman ne, abeʹ de ke matai. 51 Akeʹ ne ruti pengudip iaʹ lepa nai cen surga. Buk aheʹ aheʹ iaʹ uman ruti ini, ia iaʹ ke mudip pabeʹ bayaʹ. Ruti iaʹ akeʹ ke naʹ, ina ne usa heʹ iaʹ akeʹ mencai ke uyan udip kusun tanaʹ ini.” 52 Ini ne penading iaʹ uyan kelunan Yahudi miʹa ngan paseʹ neng ahang ida selepeʹ. Dau re lemutu: “Inu senteng laki ini ke naʹ usa ha ilu uman?” 53 Un dau Yesus mida: “Lan au heʹ mikem, buk kem abeʹ un uman usa ngan nisep dahaʹ Anak Sio ini, abeʹ udip ke un neng ikem. 54 Aheʹ diaʹ uman usa heʹ ngan nisep dahaʹ keʹ, ida iaʹ un udip saheʹ kelineʹ iaʹ ngeriman, ngan akeʹ iaʹ ke pebeteʹ ia palaʹ udip tegoʹ tau iaʹ ke kuʹo ho ʹo. 55 Uban usa heʹ iaʹ atek ca penguman, ngan dahaʹ keʹ iaʹ atek ca tisep lan. 56 Aheʹ iaʹ uman usa heʹ ngan nisep dahaʹ keʹ, ia iaʹ mudip neng akeʹ, ngan akeʹ pe mudip neng ia. 57 Amai iaʹ mudip, iaʹ cuk akeʹ nai. Uban kuʹun ne lete akeʹ mudip ne. Pekina ne puyan aheʹ kelunan diaʹ uman akeʹ, ida lete iaʹ ke mudip kuʹun nceʹ. 58 Ini ne ruti iaʹ nai cen surga, abeʹ un kuaʹ baʹan ruti iaʹ tepun ncem lepa uman cen naʹaʹ de, penco matai. Un sepuʹo aheʹ iaʹ uman ruti iaʹ nai cen surga ini, ina iaʹ ke mudip pabeʹ bayaʹ.” 59 Yesus pisiu ini dalau ue pekatuk dulu kaʹ dalem amin sebayang, kaʹ lepoʹ Kapernaum.
Tiraʹ iaʹ ngkin udip saheʹ kelineʹ iaʹ ngeriman
60 Kadoʹ diaʹ bayaʹ katuk Yesus kenahan ini ngan pisiu: “Mahan aleʹ dau katuk ini. Aheʹ iaʹ senteng ke ngeringa dau ue tupe?” 61 Abeʹ un aheʹ iaʹ badaʹ me Yesus. Naʹ pe pekina, lepa tisen ne ia uban diaʹ bayaʹ katuk ke nguheng dau neng idi. Ini ukoʹ o pisiu mida: “Ini iaʹ uyan kimet cem tai luʹap tekaʹ tupe? 62 Buk pekina, kumpin ne puyan ncem buk kem ke taʹan ketai Anak Sio ini tai uleʹ kukoʹ o cen kena are? 63 Berua Allah iaʹ naʹ udip me kelunan. Penyukat usa kelunan abeʹ un inu iaʹ bang nge. Un sepuʹo ketoʹ tiraʹ diaʹ akeʹ lepa pisiu mikem, ina iaʹ atek Berua ngan udip. 64 Petem palai mikem abe un ngelan ne.” (Cen kena lene Yesus tisen aheʹ iaʹ abeʹ un ubaʹ ngelan, ngan aheʹ iaʹ ke naʹ ia me bunoʹ o.) 65 Kun dau ue laʹa: “Ini ne tuman nceʹ iaʹ akeʹ lepa badaʹ mikem are: abeʹ un aheʹ iaʹ senteng nai palaʹ akeʹ buk Amai Bioʹ abeʹ un pawang ukoʹ kenai re.” 66 Uban kuʹun ini ne kadoʹ diaʹ bayaʹ Yesus tai ngeliwet laʹa. Abeʹ de ubaʹ tai tugung ia laʹa. 67 Ina ukoʹ Yesus pisiu me diaʹ puloʹ dua usa diaʹ bayaʹ katuk ke ne: “Kumpin ncem tupe? Ubaʹ kem tai mecin akeʹ mo?” 68 Kun dau Simun Peterus mipa ia: “Ahaʹ Tuhan, palaʹ aheʹ meʹ ketai laʹa? Ikoʹ iaʹ mampin isiu iaʹ naʹ udip saheʹ kelineʹ iaʹ ngeriman. 69 Naʹkini ameʹ ngelan ngan tisen ikoʹ iaʹ atek buheʹ iaʹ nai cen Allah.” 70 Un dau Yesus mipa ida: “Lan lete akeʹ iaʹ lemileʹ ikem diaʹ ca puloʹ dua usa dini, belekaʹ uban un pe ca usa mikem iaʹ nuyan bali jaʹat.” 71 Dau ue pisiu pekina marung neng Yudas anak Simun Iskariut. Naʹ pe kenuen Yudas ne ca usa me diaʹ puloʹ dua bayaʹ katuk Yesus ne, ia iaʹ ke naʹ Yesus palaʹ diaʹ bunoʹ o.
Yesus ngan diaʹ cenganak ke
1 Lepa ina tai Yesua masat kaʹ tanaʹ Galilia. Abeʹ e ubaʹ masat kaʹ tanaʹ Yudia uban diaʹ lataʹ lepoʹ Yahudi pekimet ubaʹ ke lematai ia. 2 Uban nyeng laʹa lepoʹ Yahudi ke uyan Adet Bunut pekimet puyan udip de neng lepau cen naʹaʹ are, 3 ina ukoʹ cenganak laki Yesus kuma ha neng ia: “Mecin ne ikoʹ cen ini. Tai palaʹ lepoʹ Yudia apan diaʹ bayaʹ katuk koʹ ke taʹan diseʹ puyan gayeng iaʹ ikoʹ uyan. 4 Abeʹ un aheʹ nyuhuk pemuyan ne buk ke ubaʹ dulu ke tisen neng ia. Buk lan ncoʹ ti puyan nyingan ini, talan ne dulu mung tisen ikoʹ.” 5 Pa abeʹ diaʹ cenganak Yesus pe abeʹ un ngelan neng ia. 6 Dau Yesus mida: “Abeʹ un sukung neng penekep keʹ nai lepe. Ikem sepe, mele midan midan iaʹ tekep neng ikem ne. 7 Abeʹ dulu kusun tanaʹ ini miʹi neng ikem, un sepuʹo miʹi re neng akeʹ, uban nceʹ lemuto badaʹ uban pemuyan ne iaʹ jaʹat. 8 Tai ne ikem neng Adet Bunut ina. Abeʹ keʹ un ketai, uban abeʹ un sukung kaʹ penekep keʹ ke tai lepe.” 9 Ia pisiu pekini ngan sulo ho ngelineʹ kaʹ tanaʹ Galilia.
Yesus kaʹ Adet Bunut neng puyan lepau cen naʹaʹ
10 Uʹo lepa ketai cenganak Yesus palaʹ Adet Bunut ina are, tai lete Yesus pe. Abeʹ e un peluhaʹ ia tai, un sepuʹo nyuhuk le ketai ie. 11 Tegoʹ Adet Bunut ina, un diaʹ lataʹ Yahudi pita Yesus. Un dau re lemutu dulu: “Kempi ie?” 12 Dalau peng bioʹ, aleʹ dau dulu pisiu selem neng puyan Yesus. Un dau palai iaʹ kuma ha: “Tiga laki ini.” Un dau palai laʹa: “Abeʹ e tiga. Ina ha panyi dulu.” 13 Un sepuʹo abeʹ un ca iaʹ luhaʹ dau pisiu puyan ne uban nte takut diaʹ lataʹ lepoʹ Yahudi. 14 Nyeng ke pa beluaʹ Adet Bunut ina, tai kun Yesus pejakaʹ Umaʹ Palan ngan penco katuk me dulu. 15 Salam aleʹ tekaʹ diaʹ lataʹ lepoʹ Yahudi dina: “Kumpin ketai laki ini bioʹ aleʹ aleʹ penisen ne, buk ke nyahut te abeʹ un sekula ne?” 16 Un dau Yesus mipa: “Katuk iaʹ akeʹ penco ini, abeʹ e anun nceʹ tengen, un sepuʹo anun Allah iaʹ cuk akeʹ nai. 17 Aheʹ iaʹ un tekaʹ kimet ubaʹ ke ti pengubaʹ Allah, kelunan ina iaʹ ke tisen cen mpi kenai katuk keʹ, atek cen Allah buk ke are cen penyukat ceʹ tengen. 18 Kelunan aheʹ iaʹ pisiu man pengubaʹ a tengen, seʹ e ubaʹ pada ia loʹ. Un sepuʹo aheʹ iaʹ ubaʹ pada mia iaʹ cuk ia nai, laki ina iaʹ telit kimet, abeʹ un inu iaʹ palo neng ia. 19 Un Musa lepa naʹ adet mikem mo? Un sepuʹo abeʹ un ca usa mikem iaʹ atek bayaʹ adet ina. Inu adeʹ kem ubaʹ mita janan man lematai akeʹ?” 20 Un dau dulu diaʹ kadoʹ dina mipa: “Un bali neng ikoʹ. Aheʹ iaʹ mita janan ubaʹ ke lematai ikoʹ tupe?” 21 Dau Yesus mipa ida: “Un ca puyan iaʹ bioʹ akeʹ lepa ti, ngan ikem mung iaʹ salam kidi. 22 Musa iaʹ cuk ikem ti adet sunat neng anak laki hem. (Naʹ pe ia pekina, abeʹ e Musa iaʹ nading nge, un sepuʹo tepun ncem cen naʹaʹ te iaʹ nading adet ini me ikem.) Ina ukoʹ kem uyan adet sunat me anak laki hem tegoʹ Tau Kelineʹ. 23 Ikem nyunat anak laki hem tegoʹ Tau Kelineʹ apan ncem abeʹ un ke ngesa adet Musa. Buk pekina, inu adeʹ kem miʹa neng akeʹ uban nceʹ pedaʹam paget ca kelunan tegoʹ Tau Kelineʹ? 24 Ayen pebetep tiraʹ neng kelunan bayaʹ diseʹ puyan nte tuaʹ le. Pebetep ne tiraʹ bayaʹ puyan iaʹ teneng lan.”
Ia iaʹ ngkang pungu udip taʹin?
25 Un dau palai kelunan lepoʹ Yerusalim: “Maaʹ ini laki iaʹ ida ubaʹ ke lematai are. 26 Naʹat seʹ e, neng peng tuaʹ ne ia pisiu, ngan abeʹ un aheʹ iaʹ pisiu inu inu ke nyakat dau ue ne. Masaʹ diaʹ lataʹ lataʹ pe tisen lan ini ne Keristus iaʹ ngkang pungu udip? 27 Tegoʹ Laki iaʹ ngkang pungu udip ina nai, ca usa pe abeʹ un tisen cen mpi ie. Un sepuʹo tisen mung ne ilu cen mpi uban kenai laki ini are.” 28 Dalau Yesus pekatuk kaʹ dalem Umaʹ Palan Allah, bioʹ dau ue lemutu dulu: “Un ncem tisen akeʹ lan mo? Ngan un ncem tisen cen mpi kenai heʹ? Abeʹ keʹ nai man kimet ceʹ tengen. Naʹ pe pekina, ia iaʹ telit lan, ia iaʹ cuk akeʹ nai. Abeʹ kem tisen ia lepe. 29 Akeʹ iaʹ tisen ia, uban akeʹ iaʹ nai cen ia, ngan ia iaʹ cuk akeʹ nai.” 30 Penco re mita janan ubaʹ ke dakep ia, un sepuʹo ca usa pe abeʹ un mekem ujoʹ o neng ia, uban neng jakaʹ iaʹ penekep pe abeʹ melai nai lepe. 31 Un sepuʹo kadoʹ dulu diaʹ pepeng kina ke ngelan neng Yesus, ngan ida kuma ha: “Tegoʹ Laki iaʹ ngkang pungu udip nai ʹo, un ne ti puyan nyingan iaʹ lapa cen puyan nyingan iaʹ laki ini lepa ti ne taʹin?”
Ida cuk sedadu nai dakep Yesus
32 Kelunan Perisi kenahan dau dulu pisiu selem neng puyan ini are, ina ukoʹ de tai pemung ngan diaʹ detaʹu lataʹ ke cuk sedadu tai mapo Yesus. 33 Un dau Yesus: “Abeʹ keʹ kumpin majan ke ngan ncem laʹa, uban nceʹ ketai mecin ikem, tai palaʹ ia iaʹ cuk akeʹ nai. 34 Ikem ke pita heʹ ʹo, di le reʹ abeʹ kem senteng ke taʹan akeʹ pe, uban kempi ketai heʹ, abeʹ kem senteng tai.” 35 Kelunan lataʹ lepoʹ Yahudi pisiu kahang ida selepeʹ: “Kempi ia ketai iaʹ ukoʹ le abeʹ un senteng ke taʹan ia tupe? Un ne ubaʹ tai ngan lepoʹ ilu Yahudi diaʹ mudip kaʹ lepoʹ Gerika taʹin, ngan penco pekatuk dulu kaʹ lepoʹ Gerika? 36 Uban dau ue: ‘Ikem pita heʹ ʹo, di le reʹ abeʹ kem senteng ke taʹan akeʹ, ngan abeʹ kem senteng tai kukoʹ keʹ ne.’ Inu sen iaʹ baʹan ne tupe?”
Sungai Sio
37 Neng kebayaʹ tau Adet Bunut, ina ne iaʹ atek tau pengesin ne, tau ina ne Yesus nekejeng ngan pisiu bioʹ dau iaʹ kuma ha: “Aheʹ kelunan iaʹ muʹang, tiga ne ia nai palaʹ akeʹ ngan nisep. 38 Ukoʹ baʹan dau dalem Kitap: ‘Aheʹ kelunan iaʹ ngelan neng akeʹ, cen dalem penawai ie kenai kalo sungai iaʹ nyio ke ngkin udip.’ ” 39 Yesus pisiu ini neng puyan Berua Tuhan, uban aheʹ kelunan diaʹ ngelan neng ia, ida iaʹ ke alaʹ Berua ini ʹo. Tegoʹ Yesus pisiu ini, abeʹ Tuhan naʹ Berua ini lepe, uban abeʹ lepe Yesus luhaʹ ngan serema peniga ha.
Tekajaʹ kimet dulu
40 Kadoʹ dulu diaʹ kenahan dau ini iaʹ kuma ha: “Laki ini ne iaʹ atek pegawa bioʹ lan.” 41 Dau palai: “Ia iaʹ Keristus iaʹ ngkang pungu udip.” Un sepuʹo un dau palai pelaʹa: “Abeʹ Keristus un nai cen Galilia. 42 Un dau dalem Kitap iaʹ badaʹ Keristus iaʹ ke nai cen mela Daut, ngan nai pempet kaʹ lepoʹ Bitlahim, kukoʹ Daut mudip cen naʹaʹ.” 43 Ina ukoʹ tai tekajaʹ kimet dulu diaʹ kadoʹ uban kuʹun ne. 44 Un pe palai ubaʹ mapo ia, un sepuʹo pabeʹ ca usa pe abeʹ un mekem ujoʹ de neng ia.
Puyan diaʹ lataʹ Yahudi muau
45 Tegoʹ sedadu dina tai uleʹ, kun diaʹ detaʹu lataʹ ngan diaʹ Perisi dina lemutu ida: “Inu adeʹ kem abeʹ un ngkin Yesus?” 46 Un dau sedadu dina mipa: “Abeʹ un aheʹ iaʹ pisiu kuaʹ puyan laki ini lepe.” 47 Un dau Perisi dina lemutu: “Un uban ne peduncau ikem lete ina? 48 Kumpin, un ncem tisen ca usa mameʹ diaʹ lataʹ, mele ca usa mameʹ diaʹ Perisi ngelan neng ia mo? 49 Kelunan kadoʹ dini abeʹ de tisen Katuk Adet Musa, uban nte bang kentaʹ pudoʹ Allah tuaʹ le.” 50 Nikudimus lete ca usa Perisi dina, ia lete iaʹ lepa tai taʹan Yesus cen kena re, un dau ue mida: 51 “Bayaʹ adet le abeʹ le senteng metep ukum neng ca kelunan, kena le kenahan dau ue, ngan nugen inu iaʹ ban pemuyan ne iaʹ ia lepa uyan.” 52 Un dau re mipa ia: “Kumpin, ikoʹ lete ca nai cen Galilia mo? Nugen ne tiraʹ dalem Kitap, idi hoʹ tisen nyahut ca pegawa pe abeʹ un nai cen Galilia.”
Leto iaʹ pemung nyelem
1 Lepa ina mung dulu tai uleʹ kaʹ amin nte. Un sepuʹo Yesu tai palaʹ mudung Buaʹ Ampang. 2 Mempam neng ke nempam me, tai Yesus uleʹ palaʹ Umaʹ Palan Allah. Mung dulu diaʹ kadoʹ dina nai pempun teliling ia. Penco ho madung ngan pekatuk ida. 3 Diaʹ guru adet ngan diaʹ Perisi ngkin ca leto iaʹ ida lepa alaʹ dalau ue pemung nyelem ngan ca laki. Kun nte pejeng ia tahaʹ tena ida mung. 4 Un dau re neng Yesus: “Leto ini iaʹ ameʹ mapo dalem me pemung nyelem ngan ca laki. 5 Dalem adet le un Musa naʹ ca ukum adet iaʹ cuk ilu mukum leto iaʹ pekini puyan. Ilu lemulo ia man batu pa ha matai. Kumpin baʹan ncoʹ?” 6 Ida pisiu pekini uban nte ten ke makui tiraʹ neng ia, apan ukan nte ke mekem salaʹ me ia. Kun Yesus nuheng penco ngalung man ujoʹ o kaʹ tanaʹ. 7 Dalau re nekejeng kina ngan lemutu lemutu ia, penco kenai Yesus beteʹ ngan kuma ha neng ida: “Aheʹ iaʹ nyahut abeʹ un uyan penyalaʹ mikem, ia iaʹ senteng nading lemulo batu neng ia.” 8 Kun ne nuheng pelaʹa, penco ngalung kaʹ tanaʹ. 9 Tegoʹ de kenahan dau ini, ketoʹ de tai mecin petiyo petiyo ketai re. Un iaʹ bioʹ mida ina iaʹ ading tai. Yesus tengen lene nahung ngan leto ina pe petem nekejeng kina. 10 Penco kenai ie beteʹ ngan kuma ha neng leto ina: “Kempi ne ida dai? Abeʹ un ca usa pe iaʹ un nahung ke metep ukum neng ikoʹ?” 11 Un dau leto ina mipa ia: “Pabeʹ ca pe abeʹ un amai.” Dau Yesus neng ia: “Buk pekina, abeʹ pe akeʹ ke metep ukum neng ikoʹ. Tai ne, ngan ayen kanyam ti penyalaʹ laʹa.”
Yesus iaʹ atek pedema usun tanaʹ
12 Kun Yesus pisiu mida laʹa: “Akeʹ ne iaʹ ngedema usun tanaʹ ini. Aheʹ iaʹ bayaʹ akeʹ, ia iaʹ ke un dema iaʹ ngkin udip mia ngan nyahut te abeʹ un ke masat dalau ntem ne laʹa.” 13 Dau diaʹ Perisi neng ia: “Ikoʹ badaʹ tugen neng puyan ncoʹ loʹ, abeʹ e un lan.” 14 Dau Yesus mipa ida: “Naʹ pe akeʹ badaʹ tugen neng usa heʹ loʹ, atek lan dau heʹ uban nceʹ tisen cen mpi kenai heʹ ngan kempi ketai heʹ. Abeʹ kem tisen cen mpi kenai heʹ ngan kempi ketai heʹ. 15 Ikem metep tiraʹ bayaʹ puyan kelunan tuaʹ le, un sepuʹo akeʹ, abeʹ keʹ metep tiraʹ neng aheʹ aheʹ pe. 16 Buk keʹ metep ca tiraʹ, puyan tiraʹ keʹ un lan, uban abeʹ keʹ tengen iaʹ ti ie. Amai Bioʹ iaʹ cuk akeʹ nai, ia iaʹ un ngan nceʹ. 17 Dalem Katuk Adet cem ne ina lepa senurat, buk dua usa kelunan diaʹ nugen ca puyan, ngan kuaʹ dau re nugen ne, senteng ngkem ngelan dau re. 18 Akeʹ nugen neng puyan nceʹ tengen, ngan laʹa Amai iaʹ cuk akeʹ nai, ia pe badaʹ tugen neng puyan nceʹ lete.” 19 Dau re lemutu ia: “Kempi amai hoʹ tupe?” Kun Yesus mipa ida: “Abeʹ pe ikem tisen akeʹ. Amai heʹ pe ikem abeʹ un tisen. Buk ne ikem tisen akeʹ, ikem tisen lete Amai heʹ.” 20 Yesus pisiu dini mung dalau ue penco katuk kaʹ dalem Umaʹ Palan, dalem amin iaʹ kukoʹ buhan pencai ina. Ngan ca usa pe abeʹ un mapo ia, uban jakaʹ iaʹ penekep pe abeʹ melai nai lepe.
Ikem abeʹun senteng tai kukoʹ ketai heʹ
21 Dau Yesus neng ida laʹa: “Tai heʹ ke mecin ne ini. Ikem ke pita heʹ ʹo, un sepuʹo ikem ke matai lenca dalem penyalaʹ kem. Abeʹ kem senteng tai kukoʹ keʹ ne.” 22 Ina ukoʹ diaʹ lataʹ Yahudi kuma ha: “Dau ue: ‘Abeʹ le senteng tai kukoʹ o,’ baʹan ne. Inu iaʹ sen isiu ue ne tupe? Uban ne ubaʹ ke lematai ia loʹ taʹin?” 23 Un dau Yesus mipa: “Ikem nai cen ini, tahaʹ ntaʹ, un sepuʹo akeʹ iaʹ nai cen mpau. Ikem iaʹ puʹun udip kusun tanaʹ ini, un sepuʹo abeʹ puʹun udip keʹ kusun tanaʹ ini. 24 Ina iaʹ ukoʹ keʹ badaʹ mikem, ikem ke matai lenca dalem penyalaʹ kem. Buk kem abeʹ un ngelan ‘Akeʹ Iaʹ Lemuto Un’, ikem lete iaʹ ke matai lenca dalem penyalaʹ kem ʹo.” 25 Kun nte lemutu ia: “Aheʹ koʹ ne?” Dau Yesus mipa: “Ukoʹ baʹan dau heʹ mikem cen kena re. 26 Kadoʹ naʹan tiraʹ iaʹ tekep akeʹ ke badaʹ mikem, ngan metep ukum neng idi. Un sepuʹo ia iaʹ cuk akeʹ nai, ia iaʹ telit lan. Ngan inu iaʹ akeʹ lepa kenahan cen ia, bang ina le iaʹ akeʹ badaʹ mikem kusun tanaʹ ini.” 27 Abeʹ de tisen ia pisiu puyan Amai Bioʹ neng ida. 28 Ina ukoʹ Yesus kuma ha neng ida: “Tegoʹ kem ke mejung Anak Sio ini, ikem ke tisen ‘Akeʹ Iaʹ Lemuto Un’. Ina ukoʹ tegoʹ ina hem ke tisen abeʹ keʹ uyan inu man kimet ceʹ tengen, un sepuʹo bang akeʹ badaʹ inu iaʹ Amai Bioʹ pekatuk akeʹ le. 29 Ngan ia iaʹ cuk akeʹ nai, un pemung ngan nceʹ. Abeʹ e mahung akeʹ tengen, uban nceʹ lemuto uyan inu iaʹ sihoʹ neng pengubaʹ a.” 30 Kadoʹ diaʹ lepa kenahan dau Yesus pisiu ini, ina ukoʹ de penco ngelan neng ia.
Kelunan diaʹ takau ngan diaʹ peput
31 Ina ukoʹ Yesus pisiu me kelunan Yahudi diaʹ ngelan neng ia: “Buk kem bayaʹ dau katuk keʹ, ikem ne iaʹ atek kelunan diaʹ bayaʹ katuk keʹ lan ʹo. 32 Ikem ke tisen katuk iaʹ telit, ngan katuk iaʹ telit ina lete iaʹ ke nakau ikem.” 33 Dau re mipa Yesus: “Ameʹ ne iaʹ atek mela Ibrahim, ngan nyahut meʹ abeʹ un ulaʹ dulu ne. Inu iaʹ sen isiu hoʹ mameʹ kuma ha: ‘Ikem ke takau’?” 34 Kun Yesus pisiu mida: “Akeʹ badaʹ mikem lan, aheʹ aheʹ diaʹ uyan penyalaʹ, ida iaʹ ulaʹ penyalaʹ. 35 Abeʹ iaʹ ulaʹ lemuto un neng amin ne, un sepuʹo anak ke iaʹ lemuto un kidi pa majan. 36 Buk Anak Sio ini ke nakau ikem, ina le ikem ke takau lan. 37 Tisen te akeʹ ikem mela Ibrahim. Un sepuʹo ubaʹ kem mita janan man lematai akeʹ uban ncem abeʹ un ubaʹ alaʹ dau katuk keʹ. 38 Akeʹ penco neng puyan iaʹ Amai heʹ lepa peluhaʹ me akeʹ, ngan ikem ti puyan iaʹ amai hem lepa badaʹ mikem.” 39 Dau re mipa Yesus: “Ibrahim ia amai meʹ.” Un dau Yesus mipa ida: “Buk kem atek anak Ibrahim, ikem ti ne puyan kuaʹ baʹan iaʹ ia lepa ti ne. 40 Bang ca le puyan nceʹ neng ikem cen kena, badaʹ katuk iaʹ telit iaʹ akeʹ lepa kenahan cen Allah, un sepuʹo ubaʹ kem mita janan man lematai akeʹ. Abeʹ Ibrahim ti puyan pekini. 41 Naʹkini ikem ti puyan iaʹ amai hem lepa ti cen kena.” Dau re mipa Yesus: “Bang Allah tengen iaʹ Amai meʹ. Ameʹ diaʹ anak ke lan.” 42 Un dau Yesus mipa ida: “Buk lan Allah iaʹ amai hem, seʹ kem malaʹ neng akeʹ lete, uban akeʹ iaʹ lepa nai cen Allah, ngan naʹkini akeʹ lepa un kini. Ngan laʹa abeʹ keʹ un nai man pengubaʹ kimet ceʹ tengen. Ia iaʹ cuk akeʹ nai. 43 Uban inu adeʹ kem abeʹ un tisen sen isiu heʹ tupe? Ina ne uban abeʹ un metem seʹ kem ngeringa dau katuk keʹ. 44 Ikem iaʹ anak amai hem bali Sitan ina, ngan ikem iaʹ ubaʹ bayaʹ pengubaʹ amai hem, uban cen naʹaʹ ne ia ubaʹ lematai kelunan. Nyahut te abeʹ un pepo neng katuk iaʹ telit ne, uban ca bute katuk telit pe abeʹ un neng ia. Tegoʹ o badaʹ palo, ina ne sematu puyan ne, uban ia iaʹ atek puʹun palo, ngan ia pe iaʹ tuʹa mung palo ne. 45 Akeʹ pisiu iaʹ telit lan, ina iaʹ ukoʹ kem abeʹ un ngelan akeʹ. 46 Aheʹ mikem iaʹ senteng nugen inu iaʹ ke pedapit penyalaʹ neng akeʹ? Buk keʹ penjo isiu iaʹ telit lan, uban inu adeʹ kem abeʹ un ngelan akeʹ? 47 Aheʹ iaʹ nai cen Allah, ia ngeringa dau isiu Allah. Un sepuʹo ikem dini abeʹ kem nai cen Allah, ina ukoʹ kem abeʹ un ngeringa dau isiu heʹ.”
Yesus ngan Ibrahim
48 Un dau kelunan Yahudi mipa Yesus: “Lan te dau meʹ ading de kuma ikoʹ lepoʹ Samaria iaʹ un bali.” 49 Dau Yesus mipa ida: “Abeʹ keʹ un bali. Akeʹ nyelama Amai heʹ, un sepuʹo muau hem neng akeʹ. 50 Abeʹ keʹ pita selama me akeʹ tengen. Un ca iaʹ mita selama me akeʹ, ngan ia iaʹ ke metep tiraʹ mayo neng akeʹ. 51 Lan dau heʹ mikem, aheʹ iaʹ bayaʹ dau katuk keʹ nyahut te abeʹ un matai ne.” 52 Un dau kelunan Yahudi neng ia: “Naʹkini ne ameʹ tisen lan, ikoʹ atek un ca bali. Ibrahim pe lepa matai, ngan diaʹ pegawa pe lepa matai. Belekaʹ dau hoʹ kuma ha: ‘Aheʹ diaʹ bayaʹ katuk keʹ nyahut de abeʹ un ke matai ne.’ 53 Amai meʹ Ibrahim lepa matai. Kumpin, uban ncoʹ kuma ikoʹ pelapa bioʹ cen Ibrahim taʹin, ngan diaʹ pegawa pe lepa matai lete? Ikoʹ kuma aheʹ koʹ ne tupe?” 54 Dau Yesus mipa: “Buk keʹ ke nyelama usa heʹ tengen, tai pelolo ne puyan selama ina. Amai heʹ iaʹ nyelama akeʹ, ia lete iaʹ ikem kuma Allah hem ne. 55 Nyahut cem abeʹ un tisen ia lepe. Akeʹ iaʹ tisen ia. Buk keʹ badaʹ akeʹ abeʹ un tisen ia, diseʹ keʹ ke palo ukoʹ baʹan ikem ne ina. Un sepuʹo tisen nceʹ ia, ngan akeʹ bayaʹ pe dau isiu ue. 56 Amai hem Ibrahim saheʹ tekaʹ a pekimet ke taʹan tegoʹ udip keʹ, penco ho taʹan ne ngan bangen.” 57 Dau kelunan Yahudi neng ia: “Pabeʹ koʹ abeʹ un tai lema puloʹ uman pe. Un ncoʹ taʹan Ibrahim tupe?” 58 Un dau Yesus mipa: “Lan dau heʹ mikem, kena Ibrahim pempet are, un ne akeʹ.” 59 Kun nte alaʹ batu ke lemulo neng ia, un sepuʹo tai kun Yesus nyuhuk ia loʹ, penco ho mecin Umaʹ Palan.
Yesus paget ca kelunan iaʹ pempet butaʹ
1 Tai kun Yesus masat, penco kun ne taʹan ca kelunan iaʹ pempet butaʹ. 2 Kun diaʹ bayaʹ katuk ke lemutu ia: “Guru, penyalaʹ aheʹ iaʹ ukoʹ laki ini pempet butaʹ ne tupe? Penyalaʹ a tengen, buk ke are penyalaʹ diaʹ tuʹa?” 3 Un dau Yesus mipa: “Puyan ini abeʹ un sihoʹ ngan penyalaʹ a, pekina pe penyalaʹ diaʹ tuʹa. Uban ia butaʹ ne, apan puyan nyingan Allah kenai luhaʹ neng ia. 4 Atek le ke mejo gayeng Amai Bioʹ, ia iaʹ cuk akeʹ nai sukun ne tau ini caʹ dema. Buk ntem iaʹ kenai ʹo, abeʹ un aheʹ senteng pegayeng. 5 Uban ngajan nceʹ un kusun tanaʹ ini, akeʹ iaʹ ngedema usun tanaʹ ini.” 6 Lepa ha pekini dau, kun Yesus nunyai tanaʹ man julaʹ a, penco ngasaʹ kaʹ mata laki ina, 7 ngan badaʹ mia: “Tai ne muheʹ silung ngkoʹ ne kaʹ belau Siluam ina.” (Sen ngadan ini “Lepa Cuk.”) Penco ketai laki ina muheʹ silung nge, ngan nai uleʹ pelapa taʹan. 8 Kun diaʹ penyeng ngan ne, ngan dulu diaʹ malai taʹan ia bang nyat tuaʹ le cen kena kini are, lemutu ida selepeʹ: “Moʹ abeʹ laki ini iaʹ malai adung nyat tuaʹ idai?” 9 Dau palai: “Ia ne ini.” Un sepuʹo dau diaʹ ca laʹa: “Naʹun, abeʹ ini ia. Diseʹ layan ne le iaʹ ukoʹ diseʹ ia re.” Ina ukoʹ laki ina loʹ ne pisiu: “Akeʹ te ini.” 10 Kun nte lemutu ia: “Kumpin ban ketai mata hoʹ ne pesik udai?” 11 Dau laki ina mipa laʹa: “Un ca laki ngadan Yesus, ia iaʹ nunyai tanaʹ ngasaʹ kaʹ mata heʹ, ngan badaʹ makeʹ: ‘Tai ne muheʹ silung ngkoʹ ne kaʹ belau Siluam ina.’ Penco ketai heʹ, ngan selaho uʹo heʹ lepa muheʹ e akeʹ senteng naʹat.” 12 Dau re lemutu: “Kempi laki ina?” Kun ne mipa: “Awai, abeʹ keʹ tisen.”
Diaʹ Perisi nesek puyan paget
13 Kun nte ngkin laki iaʹ lepa butaʹ ina are palaʹ diaʹ Perisi. 14 Tegoʹ Yesus nunyai tanaʹ ngasaʹ kaʹ mata laki ina are, Tau Kelineʹ uban ne. 15 Kun diaʹ Perisi dina lemutu laki ina laʹa kumpin uban puyan ne paget mata ha. Kun laki ina badaʹ mida: “Ia naʹ tunyang kaʹ mata heʹ. Kun nceʹ muheʹ silung ngkeʹ. Na, naʹkini akeʹ senteng naʹat.” 16 Dau palai Perisi dina kuma: “Laki iaʹ ti puyan pekini, abeʹ e nai cen Allah, uban ne abeʹ un bayaʹ adet Tau Kelineʹ.” Un dau diaʹ ca: “Buk pekina, inu senteng ca kelunan penyalaʹ ti puyan nyingan kuaʹ baʹan ini ne?” Ina ukoʹ tai bese dua ne kimet de kahang ida. 17 Ina ukoʹ diaʹ Perisi dina lemutu laki ina ca liwai laʹa: “Adeʹ koʹ kuma ia mesik mata hoʹ. Kumpin kimet coʹ neng ia?” Dau laki ina mipa: “Ia ne iaʹ pegawa Tuhan.” 18 Un sepuʹo kelunan lataʹ Yahudi dina, abeʹ de ngelan laki ina un butaʹ cen kena ngan ia iaʹ senteng taʹan naʹkini, pa re mengin diaʹ tuʹa ha. 19 Kun nte lemutu ida dua peto: “Anak kem dua ini tupe? Caʹ kem kuma ia pempet butaʹ are? Kumpin uban ne senteng naʹat ne udai?’ 20 Un dau diaʹ tuʹa mipa: “Tisen te ameʹ ia anak meʹ, ngan laʹa ameʹ tisen pe ia pempet butaʹ. 21 Un sepuʹo abeʹ meʹ tisen kumpin puyan ne senteng naʹat naʹkini. Ngan laʹa, abeʹ pe ameʹ tisen aheʹ iaʹ mesik mata ha. Lemutu ia sedeʹ. Bioʹ ne ia ne, mencam mipa me ia tengen.” 22 Ina ukoʹ diaʹ tuʹa pekini dau, uban nte takut kelunan lataʹ lepoʹ Yahudi, diaʹ lepa pekuaʹ ayo metep tiraʹ iaʹ kuma ha: “Aheʹ iaʹ teto ngahaʹ kuma Yesus ina Keristus iaʹ ngkang pungu udip, ida iaʹ ke pesau cen amin sebayang.” 23 Ina iaʹ ukoʹ tuʹa laki ina re kuma ha: “Bioʹ ne ia ne, mencam mipa me ia tengen, lemutu ia sedeʹ.” 24 Kedua liwai ida numpak pe mengin laki iaʹ pempet butaʹ ina re laʹa, ngan kuma neng ia: “Teto dau hoʹ nyeripa Allah, badaʹ iaʹ lan mameʹ. Ameʹ tisen laki ini ca kelunan penyalaʹ.” 25 Dau laki ina mipa: “Awai, abeʹ pe akeʹ tisen mele ca kelunan penyalaʹ pe ia. Bang ca le iaʹ akeʹ tisen: ban cen kena re akeʹ butaʹ, belekaʹ naʹkini akeʹ taʹan.” 26 Kun nte lemutu ia pelaʹa: “Kumpin puyan ne mesik mata hoʹ, ngan inu ia ti neng ikoʹ?” 27 Dau ue mipa ida: “Lepa ne akeʹ badaʹ mikem. Ikem iaʹ abeʹ un kenahan dau heʹ. Inu adeʹ kem ubaʹ ngeringa ha pelaʹa? Mele uban ncem ubaʹ ke bayaʹ katuk ke lete ina taʹin?” 28 Sakit ne tekaʹ kimet de neng ia, penco dau re: “Ikoʹ bayaʹ katuk laki ina. Ameʹ bayaʹ katuk Musa, 29 ban meʹ tisen Allah lepa pisiu ngan Musa. Ukoʹ baʹan puyan laki ina re, pabeʹ meʹ abeʹ un tisen cen mpi kenai ie pe.” 30 Un dau laki ina mipa: “Muʹo ne tawai heʹ, ikem abeʹ un tisen cen mpi kenai ie, buk ia iaʹ mesik mata heʹ ne re. 31 Ilu pe tisen Allah abeʹ un ngeringa dau kelunan penyalaʹ, un sepuʹo ia ke ngeringa dau diaʹ tunuk neng ia, ngan tudep uyan inu iaʹ pengubaʹ a. 32 Cen tading udip kusun tanaʹ ini nyahut le abeʹ un kenahan dau ca usa iaʹ mesik mata kelunan iaʹ pempet butaʹ pe. 33 Buk laki ini abeʹ un nai cen Allah, abeʹ e senteng ke ti ca inu puyan.” 34 Kun nte nyakat ia: “Ikoʹ pe pempet ngan sangan kuʹun penyalaʹ, belekaʹ ikoʹ iaʹ pekatuk ameʹ.” Penco re pet ia tahaʹ awang amin sebayang.
Puyan berua diaʹ butaʹ
35 Yesus kenahan dau denga re pet ia kawang, penco ha tai naʹat ia. Kun ne tegoʹ ia, un dau ue neng ia: “Un ncoʹ ngelan neng Anak Sio tupe?” 36 Dau laki ina mipa ia: “Ahaʹ amai, badaʹ makeʹ apan nceʹ senteng ngelan neng ia.” 37 Dau Yesus neng ia: “Lepa ne ikoʹ taʹan ia. Ia ne iaʹ pisiu ngan ncoʹ naʹkini.” 38 Dau laki ina: “Ahaʹ Tuhan, akeʹ ngelan.” Penco ho sutlep nyelama Yesus. 39 Un dau Yesus: “Akeʹ nai kusun tanaʹ ini ke pasat ukum iaʹ telit apan diaʹ butaʹ ke taʹan, ngan diaʹ taʹan ke tai butaʹ.” 40 Un palai Perisi diaʹ un ngan ne kina ne kenahan dau ue pisiu ini ngan lemutu ia: “Moʹ abeʹ koʹ kuma ameʹ ke butaʹ pe?” 41 Kun Yesus mipa ida: “Buk berua hem butaʹ, abeʹ penyalaʹ ke dengkep neng ikem. Un sepuʹo uban ncem kuma ikem senteng taʹan, ina uban penyalaʹ petem dengkep neng ikem.”
Katuk katuk neng liwang dumba
1 “Lan dau heʹ mikem, laki iaʹ abeʹ un nai kaʹ dalem liwang dumba cen pamen, un sepuʹo ia laket ceng bese, ina ne kelunan diaʹ bekelau ngan belase. 2 Laki iaʹ tai kaʹ dalem liwang cen pamen, laki ina iaʹ tekep manan dumba dina, 3 ngan laki iaʹ mengau pamen liwang ina pe mesik pamen mia. Kun dumba dina kenahan dau ue mengin ida, mentung pisiu ngadan singket usa re, penco ho tai ngkin dia kawang. 4 Tegoʹ o ngkin ida kawang, ia tahaʹ tena mida, ngan ketoʹ dumba dina pe tai bayaʹ ia, uban nte nyituk dau isiu ue. 5 Un sepuʹo abeʹ de ubaʹ tai bayaʹ diaʹ ca, tai re ngasa kelap cen ia, uban nte abeʹ un nyituk dau isiu ue.” 6 Yesus badaʹ kata katuk ini mida, un sepuʹo abeʹ de tisen inu sen dau isiu iaʹ ia badaʹ mida.
Yesus iaʹ tiga puyan manan dumba
7 Un dau Yesus pisiu laʹa: “Lan dau heʹ mikem, akeʹ ne iaʹ pamen dumba. 8 Ketoʹ diaʹ nai tahaʹ tena neng akeʹ are, ina ne kelunan bekelau ngan belase. Abeʹ dumba un ngeringa dau re. 9 Akeʹ ne iaʹ pamen. Mele aheʹ diaʹ nai kaʹ dalem cen akeʹ, dina ne iaʹ ke un puyan iaʹ ke pudip ida. Ida senteng nai kaʹ dalem ngan tai kawang, ngan alaʹ penguman. 10 Kelunan diaʹ bekelau nai kaʹ dalem, bang ubaʹ tai ngelau ngan lematai ngan ngasing. Un sepe akeʹ nai apan dumba dina ke un udip, ngan udip iaʹ ngelento. 11 “Akeʹ ne laki iaʹ manan dumba ngan puyan tiga. Laki iaʹ tiga puyan manan dumba dina tenup ne tekaʹ kimet te ke matai tuman dumba dina. 12 Kelunan iaʹ ngimet metau ubaʹ alaʹ gaji, abeʹ e lan manan dumba dina, ngan abeʹ dumba dina anun ne. Tegoʹ o taʹan kenai asu lajam, penco ho ngasa kelap mahung dumba dina. Ina ukoʹ asu lajam ina penco nyepit dumba dina, muʹo purat ne ida. 13 Ina ukoʹ laki iaʹ ngimet metau ubaʹ alaʹ gaji ina kelap. Uban ne bang pekimet ubaʹ alaʹ gaji tuaʹ le, ina ukoʹ o abeʹ un nyingo dumba dina. 14 -15 Akeʹ ne laki iaʹ tiga puyan manan dumba. Kuaʹ baʹan Amai Bioʹ tisen akeʹ, ngan akeʹ tisen Amai Bioʹ, pekina pe akeʹ tisen dumba heʹ, ngan pekina lete ida tisen akeʹ. Ngan akeʹ un tenup tekaʹ kimet ke matai tuman ida. 16 Un te dumba diaʹ ca laʹa, diaʹ anun nceʹ, abeʹ de un kahum dalem liwang dumba ini lepe. Atek keʹ ngkin ida pe. Ida ke ngeringa dau heʹ, ngan tai nuyan ca le peng dumba dini, ngan ca lepe laki iaʹ manan ida. 17 “Amai Bio iaʹ malaʹ neng akeʹ, uban nceʹ tenup tekaʹ kimet ke mencai udip keʹ apan nceʹ ke alaʹ a ngeliwet laʹa. 18 Abeʹ un aheʹ iaʹ ke magang pengudip keʹ cen akeʹ, uban nceʹ mencai ie man tekaʹ pengubaʹ kimet ceʹ tengen. Un pe penyukat ceʹ ke naʹ a, ngan un pe penyukat ceʹ ke alaʹ a ngeliwet laʹa. Pekini ne puyan Amai heʹ cuk akeʹ uyan.” 19 Tai bese dua pe kimet kelunan Yahudi laʹa uban kuʹun dau puyan isiu ini. 20 Kadoʹ de pisiu kuma: “Ia un bali. Buling nge ne. Inu adeʹ kem ngeringa dau ue ne?” 21 Un pe diaʹ ca kuma ha: “Kelunan diaʹ un bali, abeʹ de senteng pisiu kuaʹ baʹan ini ne. Inu senteng bali mesik mata diaʹ butaʹ?”
Kelunan Yahudi miʹi neng Yesus
22 Ngajan sengim awang kaʹ Yerusalim, tegoʹ kenai tau bioʹ Adet Bunut Muheʹ Umaʹ Palan Allah, 23 tai kun Yesus masat kaʹ use Suliman neng Umaʹ Palan ina. 24 Tegoʹ ina, kelunan Yahudi kelimpun neliling Yesus, ngan lemutu ia: “Kudaʹ majan ncoʹ ke piduk ameʹ? Badaʹ ne lan mameʹ: Ikoʹ Keristus iaʹ ngkang pungu udip mo?” 25 Un dau Yesus mipa ida: “Lepa ne akeʹ badaʹ mikem, ikem iaʹ abeʹ un ngelan akeʹ. Gayeng iaʹ akeʹ ti man penyukat Amai heʹ, iaʹ nugen badaʹ akeʹ. 26 Un sepuʹo abeʹ kem ngelan, uban abeʹ kem dumba heʹ. 27 Dumba heʹ iaʹ ubaʹ ngeringa dau heʹ. Akeʹ tisen ida, ngan ida pe nai bayaʹ akeʹ, 28 ngan akeʹ ke naʹ udip saheʹ kelineʹ iaʹ ngeriman mida. Nyahut de abeʹ un ke matai ne laʹa. Ngan abeʹ un aheʹ iaʹ senteng ke magang ida cen akeʹ. 29 Atek bioʹ ne puyan iaʹ Amai heʹ lepa nulat makeʹ, ngan abeʹ un aheʹ senteng ke munan ida cen gaham Amai heʹ. 30 Amai Bioʹ kuaʹ ca le ngan nceʹ.” 31 Kun kelunan Yahudi penco alaʹ batu ca liwai laʹa, ubaʹ lemulo neng Yesus. 32 Dau Yesus neng ida: “Kadoʹ ne pemuyan iaʹ tiga akeʹ lepa peluhaʹ mikem cen kena, uban kuʹun pengecuk Amai Bioʹ neng akeʹ. Puyan iaʹ mpi iaʹ ukoʹ kem ubaʹ ke lemulo batu neng akeʹ tupe?” 33 Un dau diaʹ Yahudi mipa ia: “Abeʹ kuʹun pemuyan tiga iaʹ ukoʹ meʹ ubaʹ lemulo batu neng ikoʹ, un sepuʹo kuʹun ban puyan ncoʹ pejaʹat Allah. Ca kelunan tuaʹ le ikoʹ, belekaʹ koʹ loʹ uyan ikoʹ Allah.” 34 Un dau Yesus mipa: “Ini lepa senurat dalem Kitap Adet cem, dau Tuhan Allah kuma: ‘Ikem ne kelunan diaʹ seleket Allah. 35 Ilu tisen ne dau dalem Kitap iaʹ telit lan pa majan, ngan kelunan diaʹ alaʹ Katuk Adet te cen naʹa, Tuhan Allah pisiu ida kelunan diaʹ seleket Allah. 36 Ukoʹ baʹan akeʹ ne, Amai Bioʹ iaʹ lemileʹ akeʹ ngan cuk akeʹ nai kusun tanaʹ ini. Buk pekina, adeʹ kem kuma akeʹ pejaʹat Allah uban nceʹ badaʹ akeʹ iaʹ Anak Allah? 37 Buk lan nceʹ abeʹ un penco gayeng Amai heʹ, ayen ne ngelan akeʹ. 38 Un sepuʹo buk lan nceʹ penco gayeng Amai Bioʹ, kenuen pe ikem abeʹ un ngelan akeʹ, sukun ncem neglan gayeng ngkeʹ, apan ncem tisen ngan abeʹ un babak laʹa neng puyan Amai Bioʹ un dalem akeʹ, ngan akeʹ pe un dalem Amai Bioʹ.” 39 Un ca liwai laʹa ida ten ke mapo ia, un sepuʹo takau ue cen ujoʹ de. 40 Tai kun Yesus uleʹ laʹa kaʹ dipa sungai Yardin, iaʹ kukoʹ Yaya lepa ngebatis dulu cen kena. Kun en ngelineʹ kina. 41 Kadoʹ dulu nai palaʹ ia. Un dau re: “Abeʹ un Yaya uyan puyan nyingan, un sepuʹo mung dau diaʹ ia badaʹ neng puyan laki ini ne iaʹ lan.” 42 Kadoʹ dulu kina ngelan neng ia.
Puyan Patai Lasarus
1 Ca laki ngadan Lasarus, iaʹ mudip kaʹ Bitani, tai sakit ne ia. Bitani ne lepoʹ iaʹ ukoʹ Mariam ngan iaʹ sadin ne Marta ne mudip. 2 (Mariam ne iaʹ mubeʹ kenyo kaʹ taket Yesus are, ngan lemasa ha man puk ke. Lasarus iaʹ sakit ina, ia ne iaʹ cenganak ke.) 3 Kun nte dua diaʹ cenganak leto ne katu tiraʹ me Yesus kuma ha: “Tuhan sakit ne laki iaʹ ikoʹ malaʹ idai.” 4 Tegoʹ Yesus kenahan dau ini, un dau ue: “Abeʹ penyakit ini ke ngkin Lasarus matai. Ini ne puyan iaʹ ke peluhaʹ serema peniga Allah, ngan kuʹun ne lete Anak Allah ke alaʹ serema peniga ha.” 5 Ngan malaʹ tekaʹ kimet Yesus neng Marta re dua padeʹ, ngan Lasarus lete. 6 Tegoʹ Yesus kenahan dau denga Lasarus sakit, kun ne ngelineʹ dua tau kina laʹa. 7 Uʹo ina ha pisiu neng diaʹ bayaʹ katuk ke: “Tai ne ilu uleʹ palaʹ tanaʹ Yudia.” 8 Un dau diaʹ bayaʹ katuk ke mipa: “Guru, abeʹ lepe un majan uʹo lepa kelunan Yahudi ubaʹ lemulo batu neng ikoʹ. Adeʹ koʹ ubaʹ tai uleʹ kina laʹa?” 9 Dau Yesus: “Singket tau ne un puloʹ dua jam iaʹ dema. Abeʹ e pekina taʹin? Ina ukoʹ buk ca kelunan masat dalau beluaʹ tau, abeʹ e ke petampap, uban ne taʹan diseʹ dema usun tanaʹ ini. 10 Un sepuʹo buk ke masat ngahu, petampap te ia, uban abeʹ un dema neng usa ha tengen.” 11 Uʹo Yesus pekini dau, un dau ue laʹa: “Tuyang le Lasarus are lepa luntoʹ ne. Ina ukoʹ keʹ ke tai naga ia.” 12 Dau diaʹ bayaʹ katuk ke mipa ia: “Tuhan, buk ke lepa luntoʹ, seʹ e ke tiga en ina.” 13 Un sepuʹo sen dau Yesus ina ne badaʹ ban Lasarus lepa matai. Ida kuma ia badaʹ pengalai ie luntoʹ. 14 Ina ukoʹ Yesus badaʹ ngan iaʹ luhaʹ dau mida: “Lasarus lepa matai ne. 15 Naʹ pe kina, bangen tekaʹ keʹ keti ca bang mikem uban nceʹ abeʹ un ngan ne are, apan ncem ke ngelan neng akeʹ. Tai ne ilu palaʹ ia.” 16 Tumas, (iaʹ dulu pisiu anak pepit) un dau ue pisiu diaʹ kuaʹ ngan ne bayaʹ katuk Yesus: “Tai ne ilu mung serengan Guru lene, idi le pemung matai ngan ne ʹo.”
Yesus pudip diaʹ matai, ngan ia iaʹ atek udip
17 Tegoʹ Yesus abeʹ kina, tisen ne ia uban pat tau ne uʹo lepa dulu nanem Lasarus. 18 Pengencoʹ lepoʹ Bitani cen Yerusalim abeʹ un abeʹ dua batu. 19 Ngan kadoʹ kelunan Yahudi lepa nai pedenaʹ Marta re dua Mariam neng puyan patai iaʹ cenganak de dua ne. 20 Kun Marta kenahan dau denga Yesus nai, penco tai ie naʹat ia. Un sepe Mariam ina iaʹ ngelineʹ kamin. 21 Un dau Marta neng Yesus: “Tuhan, buk koʹ un kini are, abeʹ cenganak keʹ ne ke matai. 22 Un sepuʹo tisen nceʹ naʹkini, Allah ke naʹ mikoʹ inu iaʹ ikoʹ nyat neng ia.” 23 Dau Yesus badaʹ mia: “Atek cenganak koʹ ke beteʹ numpak mudip lete.” 24 Un dau Marta mipa: “Tisen te akeʹ ia kenai beteʹ numpak mudip tegoʹ le mung nai beteʹ numpak mudip neng tau iaʹ kebayaʹ ʹo.” 25 Dau Yesus neng Marta: “Akeʹ iaʹ pudip kelunan diaʹ matai, ngan akeʹ pe ngkin udip mida. Buk aheʹ diaʹ ngelan neng akeʹ, kenuen pe ia matai, atek ke nai mudip lete. 26 Ngan aheʹ kelunan mudip diaʹ ngelan neng akeʹ, nyahut de abeʹ un ke matai ne. Un ncoʹ ngelan dau ini tupe?” 27 Dau Marta mipa ia: “Ahaʹ Tuhan, akeʹ ngelan lete ikoʹ iaʹ Keristus iaʹ ngkang pungu udip, iaʹ Anak Allah, iaʹ ameʹ mengaʹ ke nai kusun tanaʹ ini.”
Yesus nange
28 Lepa Marta pisiu ini, tai kun ne uleʹ ngan nyelem mengin iaʹ cenganak ke Mariam. Kun ne badaʹ mia: “Ini Guru kini. Ina ha ubaʹ taʹan ikoʹ.” 29 Tegoʹ Mariam kenahan dau ini, busek ketai ie kawang naʹat ia. 30 (Abeʹ awai Yesus abeʹ kaʹ lepoʹ ini lepe, uban ne petem kaʹ ukoʹ Marta tegoʹ ia re lepe.) 31 Kelunan Yahudi diaʹ ngan Mariam kaʹ amin, diaʹ pedenaʹ ia neng puyan patai Lasarus are, kun nte taʹan Mariam busek diseʹ nai kawang. Penco tai re bayaʹ ia, uban nte kuma ia ketai nange kaʹ pulung. 32 Tegoʹ Mariam abeʹ kaʹ ukoʹ Yesus ne, kun ne taʹan ia, penco ho muʹup kaʹ taket te. Un dau ue: “Tuhan buk koʹ un kini are, abeʹ cenganak keʹ ne ke matai.” 33 Kun Yesus taʹan ia nange, ngan kelunan Yahudi diaʹ nai tugung ia ne pe nange. Tai kelesau pe tekaʹ a, ngan siʹet ne tekaʹ tawai ie. 34 Kun ne lemutu ida: “Kempi hem nanem ia?” Dau re mipa ia: “Tuhan, nai ne naʹat ading.” 35 Nange ne Yesus. 36 Ina ukoʹ kelunan Yahudi dina kuma ha: “Naʹat, malaʹ aleʹ diseʹ kimet te neng ia.” 37 Un dau palai mida: “Moʹ abeʹ ia iaʹ mesik mata laki butaʹ idai mo? Ke senteng lete ia are, mulen Lasarus ne matai?”
Lasarus ngeliwet nai mudip
38 Ca liwai laʹa siʹet tekaʹ kimet Yesus. Tai kun ne kaʹ pulung kukoʹ liang batu. Un ca batu bioʹ le kep paʹ lubang liang ina. 39 Penco dau Yesus: “Mesau ne batu kep liang ini.” Un dau Marta iaʹ cenganak neng laki iaʹ matai ina mipa: “Tuhan, jaʹat baʹoʹ ina ʹo. Pat tau ne lepa meʹ nanem ia.” 40 Dau Yesus neng ia: “Moʹ abeʹ keʹ un badaʹ mikoʹ re, buk koʹ ngelan, ikoʹ ke taʹan lete diseʹ serema peniga Allah ʹo?” 41 Kun nte mesau batu kep liang ina, penco Yesus naʹat kempau, ngan kuma: “Akeʹ nyuaʹ saheʹ kimet neng ikoʹ Amai, uban ncoʹ ngeringa dau heʹ. 42 Akeʹ tisen te ikoʹ lemuto ngeringa dau heʹ. Un sepuʹo akeʹ pisiu ini uban kuʹun kelunan dini, apan nte ke ngelan ikoʹ iaʹ cuk akeʹ nai.” 43 Lepa ha pisiu pekini dau, kun ne lemikaʹ bioʹ dau: “Lasarus, nai ne kawang.” 44 Laki iaʹ lepa matai ina nai kawang petem belasoʹ iʹuk ujoʹ o, ngan iʹuk taket te, ngan belasoʹ iaʹ bino silung nge. Dau Yesus cuk ida: “Sau iʹuk ke ne, pawang ne ia tai.”
Peseket ke lematai Yesus
45 Kadoʹ kelunan Yahudi, diaʹ lepa tai menoʹ Mariam ne, taʹan diseʹ pemuyan iaʹ Yesus ti, ngan ngelan neng ia. 46 Un sepuʹo ketai palai mida ngeliwet palaʹ diaʹ Perisi ngan badaʹ mida diseʹ puyan iaʹ Yesus lepa ti. 47 Ina ukoʹ diaʹ Perisi ngan diaʹ detaʹu lataʹ dina tai petiraʹ ngan Mpun diaʹ Pengelataʹ Lepoʹ ina, ngan kuma ha: “Inu ne iaʹ ilu ke ti, uban kadoʹ diseʹ puyan nyingan kuʹun laki ini? 48 Buk le ke pele diseʹ puyan ne pekini, mung dulu iaʹ ke ngelan neng ia ʹo, ngan perinta Rum ke nai beteʹ ngan nasaʹ Umaʹ Palan le ngan peging lepoʹ le mung.” 49 Un ca laki iaʹ Pengebioʹ Detaʹu re uman ina, ngadan ne Kayapas, iaʹ kuma ha: “Abeʹ kem tisen ca inu. 50 Moʹ abeʹ kem tisen mo? Tiga kuʹo pe ca usa matai tuman kelunan kadoʹ, cen uʹo lepoʹ ilu mung ke salai.” 51 Iaʹ lan ne, abeʹ e pisiu ini man kimet te tengen, un sepuʹo uban ia iaʹ Pengebioʹ Detaʹu uman ina, ia badaʹ kimet Allah neng puyan Yesus ke matai tuman kelunan Yahudi. 52 Abeʹ e tuman ida tengen le, un sepuʹo tuman mung anak Allah diaʹ purat kusun tanaʹ ini, apan ne ke ngkin ida pempun seleket ca le usa. 53 Cen tau ina ne kelunan lataʹ Yahudi peseket ke mita janan ubaʹ ke lematai Yesus. 54 Ina ukoʹ Yesus abeʹ un peluhaʹ tai masat kaʹ tanaʹ Yudia, penco tai ie mecin ngan tai kaʹ ca lepoʹ, ngadan Ipraim, kukoʹ o ngelineʹ ngan diaʹ byaʹ katuk ke are, iaʹ nyeng kata tanaʹ lenga. 55 Nyeng laʹa kelunan Yahudi ke ti Adet Bunut Paska, ngan kadoʹ dulu nai cen iʹut sungai tai kaʹ Yerusalim ke ti adet puyan buheʹ, kena Adet Bunut ina. 56 Dalau re pempun dalem Umaʹ Palan, ida mita Yesus. Kun nte lemutu ida selepeʹ: “Kumpin baʹan ncem, abeʹ nyatan ne nai neng Adet Bunut ini ʹo sedeʹ?” 57 Lepa ne diaʹ detaʹu lataʹ ngan diaʹ Perisi cuk dulu, mele aheʹ iaʹ tisen kempi Yesus, tai badaʹ mida apan nte senteng mapo ia.
Puyan ngelaʹang usa Yesus kaʹ Bitani
1 Nem tau kena Bunut Paska, tai kun Yesus kaʹ Bitani kukoʹ Lasarus mudip are, laki iaʹ Yesus pebeteʹ cen patai idai. 2 Ngajan Lasarus madung ngan Yesus kaʹ bijaʹ, kun nte petenup penguman mia kina, ngan Marta iaʹ mepo mencai ie mia. 3 Dalau ina ne Mariam alaʹ ca buhan kelaʹang iaʹ mahan suhaʹ a, kun ne mubeʹ e kaʹ taket Yesus, penco ho lemasa ha man puk ke. Pa libut amin tekaʹ kenai me baʹoʹ kelaʹang ina. 4 Un ca usa me diaʹ bayaʹ katuk Yesus ne, ngadan ne Yudas Iskariut, ia iaʹ ke mencai Yesus me dulu diaʹ bunoʹ o. 5 Un dau Yudas: “Uban inu abeʹ un matu kelaʹang ini ngan alaʹ suhaʹ a telu ato ligit, apan ligit, apan ligit ina ilu ke naʹ me dulu diaʹ kasip.” 6 Ia pisiu pekini dau, abeʹ uban ne lesau keluan kasip, un sepuʹo ia iaʹ bekelau, iaʹ mampin buhan ligit de telu, ngan mentung nge ngutip palai ligit dina. 7 Un dau Yesus mipa ida: “Talan ne leto ini tengen, inu puʹo ho pedemun kelaʹang iaʹ laʹa ne pa tau heʹ sihoʹ tanem ʹo. 8 Lemuto kelunan kasip un ngan ncem lete, un sepuʹo abeʹ keʹ un lemuto ngan ncem.”
Dau peseket neng Lasarus
9 Ca peng kelunan Yahudi iaʹ bioʹ le lepa kenahan dau denga Yesus un kaʹ lepoʹ Bitani, penco re tai kina. Abeʹ kuʹun Yesus tuaʹ le ida tai, ngan pelaʹa uban nte ubaʹ taʹan Lasarus iaʹ Yesus lepa meteʹ cen patai are. 10 Ina ukoʹ detaʹu lataʹ dina peseket mita janan ke lematai Lasarus lete. 11 Uban kuʹun Lasarus ne ukoʹ kadoʹ kelunan Yahudi muau neng diaʹ pengelataʹ de, ngan ngelan neng Yesus.
Luhaʹ diseʹ pengaren Yesus tai nyabeʹ Yerusalim
12 Kadoʹ kelunan diaʹ lepa nai kaʹ Yerusalim neng Bunut Paska ina. Neng kenempam me kadoʹ dulu diaʹ kenahan denga Yesus kenai kaʹ Yerusalim. 13 Ina ukoʹ de alaʹ daʹan nanga, ngan tai kawang, penco nyelalang Yesus, mentung ngelalo kuma ha: “Pempau Allah, Allah iaʹ naʹ peniga me Laki iaʹ nai dalem ngadan Tuhan. Allah naʹ peniga ha me Laki Paren lepoʹ Israil.” 14 Kun Yesus alaʹ ca pun keledai, penco madung kaʹ likut te, ukoʹ baʹan dau dalem Kitap kuma are: 15 “Lepoʹ Siun, ayen takut, Ini kenai Paren ncem, Ia iaʹ ngedung kempau likut anak pun keledai ini.” 16 Dalau ina, abeʹ diaʹ bayaʹ katuk ke tisen sen neng puyan ina. Neng kebayaʹ a, dalau Yesus lepa beteʹ neng serema peniga ha, ina le ida petawai dau dalem Kitap iaʹ badaʹ pekina puyan neng ia, ngan ida petawai lete puyan iaʹ ida lepa uyan neng ia ina are. 17 Kelunan kadoʹ diaʹ lepa ngan Yesus tegoʹ o pisiu mengin Lasarus nai kawang cen liang ngan meteʹ ia cen patai ie, ida ne iaʹ pedenga puyan ina me dulu. 18 Ina iaʹ ukoʹ ca peng bioʹ le nai palaʹ Yesus, uban nte kenahan dau ban denga ha lepa ti puyan nyingan iaʹ bioʹ ini. 19 Penco dau diaʹ Perisi dina pisiu neng ida semaheʹ: “Ikem ngina, pabeʹ ca inu pe ilu abeʹ un senteng ke un usun. Ikem naʹat tuaʹ ne, mung dulu kusun tanaʹ ini ne diseʹ tai bayaʹ ia.”
Kelunan Gerika mita Yesus
20 Un palai kelunan Gerika kahang dulu diaʹ tai lemameʹ tegoʹ Adet Bunut kaʹ Yerusalim re. 21 Nai kun nte palaʹ Pilipus, (laki iaʹ nai cen Bit-saida kaʹ tanaʹ Galilia,) un dau re: “Amai, ubaʹ meʹ taʹan Yesus.” 22 Penco ketai Pilipus badaʹ me Anderias, ngan mung nte dua tai badaʹ me Yesus. 23 Un dau Yesus mipa ida: “Lepa abeʹ ne jakaʹ iaʹ penekep Anak Sio ke alaʹ serema peniga ha iaʹ bioʹ. 24 Lan dau heʹ mikem, ukoʹ baʹan le ke pekata luang padai are. Ca bute padai ke nahung ca bute tuaʹ le, buk le abeʹ un lemahaʹ a kaʹ tanaʹ penco matai. Buk ke matai, ina le ia ke kadoʹ buʹan ne. 25 Aheʹ iaʹ malaʹ neng udip pe tengen kusun tanaʹ ini, ina iaʹ ke tepa neng udip lan ʹo. Aheʹ iaʹ miʹi neng udip pe tengen kusun tanaʹ ini, ina ia ke nalan udip pe saheʹ kelineʹ iaʹ ngeriman uʹo. 26 Aheʹ iaʹ badaʹ kimet te malaʹ akeʹ, atek ke nai bayaʹ akeʹ. Mele kempi ukoʹ keʹ, kina lete diaʹ pegayeng makeʹ un ngan nceʹ. Ngan Amai heʹ ke nyelama aheʹ iaʹ pegayeng makeʹ.”
Yesus badaʹ puyan patai ie
27 “Naʹkini ngeligaʹ lan ne tekaʹ tawai heʹ, ngan inu ne iaʹ baʹan nceʹ? Senteng ngkeʹ pekini dau taʹin: ‘Amai, ayen pawang puyan ini nai nantaʹ akeʹ?’ Un sepuʹo ini pe iaʹ ukoʹ keʹ nai, apan nceʹ ke sihoʹ puyan keta ini. 28 Naʹun. Atek pekini dau heʹ, Amai peluhaʹ ne serema peniga neng ngadan ncoʹ.” Pelapa dau tuyau pisiu cen langit iaʹ kuma ha: “Lepa ne akeʹ nyerema peniga ngadan nceʹ, ngan atek keʹ ke ti ne laʹa ʹo.” 29 Kelunan kadoʹ diaʹ nekejeng kina ne kenahan dau isiu ina ngan kuma ha: “Dau gerem langit ina.” Un dau diaʹ ca kuma: “Dau melikat pisiu ngan ne ina.” 30 Penco dau Yesus neng ida: “Abeʹ tuman akeʹ ne dau isiu ini pisiu are, un sepuʹo tuman ikem ne dau isiu ini nai. 31 Naʹkini ne kenai puyan iaʹ ke pebetep ukum kaʹ usun tanaʹ ini. Naʹkini lete ia iaʹ paren bioʹ kusun tanaʹ ini ke tai supeʹ ʹo. 32 Tegoʹ keʹ ke tai pejung kusun tanaʹ ini, atek keʹ ke menat kelunan mung nai palaʹ akeʹ.” 33 Man isiu ini Yesus peluhaʹ kumpin puyan ne ke matai ʹo. 34 Penco diaʹ kadoʹ dina nyakat ia: “Un dau neng Katuk Adet le iaʹ kuma Keristus, iaʹ ngkang pungu udip, ke mudip utung udip. Buk pekina, kumpin dau hoʹ kuma Anak Sio ke tai pejung kusun tanaʹ ne? Aheʹ iaʹ Anak Sio ini tupe?” 35 Dau Yesus mipa: “Kediʹut le laʹa un dema neng ahang ikem. Nudep ne peteneng udip kem dalau dema ne, apan ntem abeʹ un nai sebiʹen ikem ʹo. Uban aheʹ diaʹ masat dalau ntem, abeʹ de tisen kempi ketai re. 36 Ina ukoʹ ngelan ne ikem neng dema, apan ncem ke nuyan kelunan iaʹ dema ʹo.”
Kelunan Yahudi diaʹ muau
Lepa Yesus pisiu ini, penco ketai ie mecin cen ina, ngan pekelem cen ida. 37 Naʹ pia lepa uban ti mung puyan nyingan ini kaʹ tena mata re are, abeʹ de ngelan neng ia. 38 Ina ukoʹ lan te dau pegawa Yesaya pisiu cen naʹaʹ are: “Tuhan, aheʹ diaʹ ngelan dau katuk iaʹ ilu lepa badaʹ are? Palaʹ aheʹ Tuhan ke peluhaʹ diseʹ penyukat te?” 39 Ini ne puʹun nte abeʹ un senteng ke ngelan, uban Yesaya pe pisiu lete: 40 “Allah lepa ngebutaʹ mata re, Ngan mekep kimet de, Apan nte abeʹ un senteng naʹat, Ngan kimet de pe abeʹ un tisen. Ngan laʹa dau Allah, abeʹ de ubaʹ mupa tahaʹ akeʹ Apan nceʹ ke paget ida.” 41 Yesaya pisiu pekini dau uban ne lepa taʹan serema peniga Yesus, ngan penco badaʹ puyan ne. 42 Tegoʹ ina lete kadoʹ diaʹ lataʹ Yahudi ngelan neng Yesus, un sepuʹo kuʹun diaʹ Perisi dina, ina iaʹ ukoʹ de abeʹ un luhaʹ dau pisiu puyan ne, malap ida pesau cen amin sebayang. 43 Ida malaʹ puyan kelunan ke pada ida cen uʹo puyan Allah iaʹ ke pada ida.
Ukum tiraʹ iaʹ ke betep kuʹun isiu Yesus
44 Kun Yesus pisiu ngan bioʹ dau ue: “Aheʹ iaʹ ngelan neng akeʹ, abeʹ un ne ngelan neng akeʹ tuaʹ le, un sepuʹo ngelan lete neng ia iaʹ cuk akeʹ nai ne. 45 Aheʹ iaʹ taʹan akeʹ, ia taʹan lete ia iaʹ cuk akeʹ nai. 46 Akeʹ nai kusun tanaʹ ini ukoʹ baʹan ca dema, apan singket usa diaʹ ngelan neng akeʹ abeʹ un petem ngelineʹ dalau ntem. 47 Aheʹ diaʹ kenahan dau katuk keʹ, ngan abeʹ un ubaʹ bayaʹ a, abeʹ keʹ metep ukum neng ia. Akeʹ nai tuman ke pudip kelunan kusun tanaʹ ini, abeʹ e tuman nceʹ ke nai metep ukum kidi. 48 Aheʹ iaʹ nyekang akeʹ ngan abeʹ un alaʹ dau katuk keʹ, un lete ca iaʹ ke metep ukum neng ia. Isiu iaʹ akeʹ lepa badaʹ, ina iaʹ ke metep ukum neng ia tegoʹ tau iaʹ ke bayaʹ ʹo. 49 Lan te ia pekina uban abeʹ keʹ pisiu cen kimet ceʹ tengen. Amai Bioʹ iaʹ cuk akeʹ nai, ia iaʹ cuk akeʹ pisiu ngan naʹ isiu iaʹ akeʹ tekep ke penco. 50 Tisen te akeʹ ban pengecuk Amai Bioʹ iaʹ ke ngkin udip saheʹ kelineʹ ia ngeriman me kelunan. Ina ukoʹ mung isiu heʹ, ina ne isiu iaʹ Amai Bioʹ cuk akeʹ pisiu.”
Yesus muheʹ taket diaʹ bayaʹ katuk ke
1 Abeʹ ne tau iaʹ kena Adet Bunut Paska, lepa tisen ne Yesus uban ini ne jakaʹ iaʹ neng penekep pe ke mecin usun tanaʹ ini ngan tai palaʹ Amai Bioʹ. Lepa ne Yesus usun tanaʹ ini ngan tai palaʹ Amai Bioʹ. Lepa ne Yesus lemuto malaʹ neng ida diaʹ anun ne kusun tanaʹ ini, ngan sengarem tekaʹ kimet te malaʹ neng ida. 2 Yesus pemung uman ngan diaʹ bayaʹ katuk ke. Lepa ne Bali Sitan metep kimet te neng Yudas, anak Simun Iskariut, ke cuk ia mencai Yesus me diaʹ bunoʹ o. 3 Lepa tisen ne Yesus ban Amai Bioʹ lepa naʹ mung penyukat mia, ngan tisen pe Yesus ia nai cen Allah ngan ketai palaʹ Allah lete laʹa. 4 Ina ukoʹ Yesus beteʹ cen bijaʹ, ngan mesau sapai ie tahaʹ awang, penco mahat ca sedung kaʹ aking nge. 5 Kun Yesus mubeʹ sungai neng ca bisin, penco tai ie muheʹ taket diaʹ bayaʹ katuk ke, ngan pemuhang nge man sedung iaʹ un kaʹ aking nge. 6 Abeʹ kun ne palaʹ Simun Peterus iaʹ pisiu ia ne: “Tuhan, adeʹ koʹ ke muheʹ taket ceʹ?” 7 Dau Yesus mipa ia: “Naʹkini abeʹ koʹ tisen puyan nceʹ. Bayaʹ koʹ ke tisen ʹo.” 8 Penco dau Peterus: “Midan midan pe ayen ncoʹ peletoʹ ke muheʹ taket ceʹ.” Un dau Yesus mipa: “Buk keʹ abeʹ un ke muheʹ taket coʹ, abeʹ koʹ diaʹ bayaʹ katuk keʹ laʹa.” 9 Dau Simun Peterus mipa: “Ahaʹ Tuhan, buk pekina, ayen muheʹ taket ceʹ tuaʹ le udi, muheʹ pe ujoʹ keʹ, ngan muheʹ pe ulu heʹ lete.” 10 Un dau Yesus: “Aheʹ iaʹ lepa ntoʹ, buheʹ ne tipo usa ha, ngan abeʹ titin ne muheʹ usa ha laʹa pit taket te. Mung ngkem ne lepa buheʹ, bang ca le iaʹ abeʹ un buheʹ.” 11 Lepa tisen ne Yesus aheʹ iaʹ ke mencai ia me bunoʹ o, ina iaʹ ukoʹ o pisiu pekina dau: “Mung ngkem ne lepa buheʹ, bang ca le iaʹ abeʹ un buheʹ.” 12 Lepa Yesus muheʹ taket de, kun ne un tempan sapai ie laʹa, ngan tai ngeliwet palaʹ bijaʹ iaʹ kukoʹ o re. Kun ne lemutu ida: “Un ncem tisen sen puyan iaʹ akeʹ lepa ti neng ikem ne?” 13 Ikem pisiu akeʹ Guru ngan Tuhan. Teneng lete dau hem ti pekina, uban lan akeʹ lete, 14 akeʹ ne iaʹ Tuhan ncem ngan Guru hem. Ngan naʹkini lepa heʹ muheʹ taket cem. Ina ukoʹ tekep lete ikem muheʹ taket cem semaheʹ apan. 15 Lepa ne akeʹ uyan ca kata mikem, apan ncem senteng ti kuaʹ baʹan iaʹ akeʹ lepa ti mikem. 16 Lan dau heʹ mikem, abeʹ un ca ulaʹ iaʹ lapa bioʹ neng diaʹ tuʹa ha, ngan abeʹ un ca lawa iaʹ lapa bioʹ neng ia iaʹ cuk ia. 17 Naʹkini ikem tisen ne katuk telit ini. Bangen lan ne ikem buk kem naʹ pemuyan ncem kuaʹ ngan iaʹ penisen ncem. 18 “Abeʹ dau isiu heʹ sihoʹ neng ikem mung. Akeʹ tisen mung diaʹ akeʹ lepa lemileʹ. Un sepuʹo atek palup lan ne dau Kitap iaʹ kuma ha: ‘Laki iaʹ pemung uman ngan nceʹ, ia ne iaʹ ke ngeliwet nyakat akeʹ.’ 19 Akeʹ badaʹ puyan ini mikem naʹkini, kena ha ke palup, apan tegoʹ o ke palup ne ʹo reʹ, atek kem ke tisen ‘Akeʹ Iaʹ Lemuto Un’. 20 Lan dau heʹ mikem, aheʹ diaʹ alaʹ lawa heʹ, atek de alaʹ akeʹ lete. Aheʹ diaʹ alaʹ akeʹ, atek de alaʹ ia iaʹ cuk akeʹ nai lete.”
Yesus nekena badaʹ laki iaʹ ke mencai ia me bunoʹ o
21 Lepa Yesus pisiu ini, bahat ne tekaʹ tawai ie. Ina ukoʹ besut dau ue badaʹ a: “Lan dau heʹ mikem, un ca usa kahang ikem ne iaʹ ke mencai akeʹ me bunoʹ keʹ ʹo.” 22 Ina ukoʹ diaʹ bayaʹ katuk ke ne naʹat ida semaheʹ, mentung nte miat tekaʹ pekimet aheʹ iaʹ baʹan ne ne. 23 Un ca usa me ida diaʹ bayaʹ katuk Yesus madung temping ia, ia iaʹ Yesus malaʹ. 24 Kun Simun Peterus nungkit ia ngan kuma ha: “Lemutu ue ading, aheʹ iaʹ baʹan ne ne?” 25 Ina ukoʹ laki ina tai pesen temping Yesus ngan lemutu ia: “Tuhan, aheʹ iaʹ baʹan ncoʹ ne?” 26 Dau Yesus mipa: “Akeʹ ke metin ruti neng telang ʹo, ngan naʹ a me ia. Laki ina ne ia.” Ina ukoʹ Yesus alaʹ ca peʹ ruti, sulo metin ne neng telang, penco naʹ a me Yudas anak Simun Iskariut. 27 Selaho uʹo Yudas lepa alaʹ ruti ina, tai kun Sitan nesun neng ia. Dau Yesus neng ia: “Nyelarai ne ti iaʹ ikoʹ ke uyan.” 28 Neng ahang ida diaʹ madung kaʹ bijaʹ ina, ca usa pe abeʹ un tisen sen iaʹ Yesus pisiu neng ia. 29 Uban Yudas mampin buhan ligit idai, un palai diaʹ bayaʹ katuk ke dina kuma Yesus cuk ia tai lemeli penguman iaʹ tekep me bunut ina. Ngan laʹa ida kuma Yesus cuk ia tai naʹ ligit me kelunan diaʹ kasip. 30 Yudas alaʹ ruti ina ngan penco tai kawang. Ngahu ne ina.
Dau ukum mading
31 Lepa Yudas tai mecin ida, un dau Yesus: “Naʹkini ne kenai luhaʹ serema peniga Anak Sio ini. Ngan naʹkini lete serema peniga Allah ke luhaʹ cen ia. 32 Buk lan serema peniga Allah iaʹ luhaʹ cen ia, atek Allah loʹ iaʹ ke peluhaʹ serema peniga ha neng Anak Sio ini, ngan atek ke penco ke ti ie. 33 Ahaʹ anak keʹ, abeʹ keʹ majan ngan ncem laʹa. Ikem ke mita heʹ ʹo, un sepuʹo dau heʹ neng ikem naʹkini, kuaʹ dau heʹ neng kelunan Yahudi ading nte: ‘Abeʹ kem senteng tai kaʹ ukoʹ keʹ ne.’ 34 Dau ca katuk ukum mading iaʹ akeʹ naʹ mikem, ina ne malaʹ neng ikem semaheʹ. Kuaʹ baʹan puyan nceʹ lepa malaʹ neng ikem, pekina lete atek tekep kem ke malaʹ neng ikem semaheʹ. 35 Buk luhaʹ diseʹ kem malaʹ neng ikem semaheʹ, ina le dulu mung ke tisen ikem uban bayaʹ katuk keʹ.”
Yesus nekena badaʹ puyan Peterus ke nyepati ia
36 Kun Simun Peterus lemutu ia: “Tuhan, kempi ketai hoʹ?” Kun Yesus mipa ia: “Kempi kukoʹ ketai heʹ, abeʹ kem senteng nai bayaʹ akeʹ naʹkini. Uʹo hem ke nai bayaʹ akeʹ.” 37 Dau Peterus lemutu ia: “Tuhan, uban inu heʹ abeʹ un senteng nai bayaʹ ikoʹ naʹkini? Tenup ne tekaʹ kimet ceʹ ke matai tuman ikoʹ.” 38 Dau Yesus mipa ia: “Lan ncoʹ un tenup tekaʹ kimet ke matai tuman akeʹ mo? Lan dau heʹ mikoʹ, kena tekuʹuk iap, telu liwai hoʹ ke badaʹ kuma ikoʹ abeʹ un tisen akeʹ.”
Yesus iaʹ janan tai palaʹ Amai Bioʹ
1 Kun Yesus badaʹ mida: “Ayen ncem mentam pekimet. Ngelan ne neng Allah, ngan ngelan pe neng akeʹ lete. 2 Kadoʹ amin neng umaʹ Amai heʹ, ngan akeʹ iaʹ ketai petenup ca ukoʹ mikem. Abeʹ keʹ ke badaʹ ini mikem buk ke abeʹ un pe. 3 Uʹo heʹ lepa tai petenup ca ukoʹ mikem ne, akeʹ te iaʹ kenai ngeliwet alaʹ ikem, apan ncem pemung ukoʹ ngan nceʹ. 4 Tisen te ikem janan kukoʹ ketai heʹ ne.” 5 Dau Tumas neng ia: “Tuhan, abeʹ meʹ tisen kempi ketai hoʹ. Kumpin meʹ ke tisen janan tai kina tupe?” 6 Dau Yesus mipa ia: “Akeʹ ne iaʹ janan, ngan katuk iaʹ telit, ngan iaʹ atek udip. Abeʹ un aheʹ senteng tai palaʹ Amai Bioʹ buk ke abeʹ un kuʹun nceʹ.” 7 Dau Yesus neng ida laʹa: “Naʹkini lepa ne ikem tisen akeʹ, ina ukoʹ kem ke tisen Amai heʹ lete. Uʹo ini ikem iaʹ tisen ia. Ikem iaʹ lepa taʹan ia.” 8 Dau Pilipus neng ia: “Tuhan, peluhaʹ ne Amai Bioʹ mameʹ, ina le iaʹ atek pengubaʹ meʹ.” 9 Dau Yesus mipa ia: “Majan ne akeʹ lepa ngan ncem mung. Inu adeʹ koʹ abeʹ un tisen akeʹ lepe Pilipus? Aheʹ iaʹ lepa taʹan akeʹ, ia lete lepa taʹan Amai Bioʹ. Buk pekina, inu adeʹ koʹ kuma: ‘Peluhaʹ Amai Bioʹ mameʹ.’ 10 Pilipus, kumpin ncoʹ, abeʹ koʹ ngelan akeʹ iaʹ un dalem Amai Bioʹ, ngan Amai Bioʹ iaʹ un dalem akeʹ mo?” Sulo dau Yesus neng mung diaʹ bayaʹ katuk ke dina: “Mung isiu diaʹ ban akeʹ lepa pisiu mikem, abeʹ un nai cen akeʹ tengen. Amai Bioʹ iaʹ mudip dalem akeʹ, ia iaʹ penco gayeng nge tengen. 11 Ngelan ne akeʹ iaʹ un dalem Amai Bioʹ, ngan Amai Bioʹ iaʹ un dalem akeʹ. Buk kem abeʹ un ngelan puyan ini, ngelan ne kuʹun puyan nyingan iaʹ ikem lepa taʹan akeʹ uyan. 12 Lan dau heʹ mikem, aheʹ diaʹ ngelan neng akeʹ, ida ke ti lete pemuyan iaʹ kuaʹ baʹan akeʹ ti. Idi pe areʹ pelapa bioʹ cen ina pe ida ke ti, uban akeʹ iaʹ ke tai palaʹ Amai Bioʹ. 13 Ngan akeʹ ke ti lete inu inu iaʹ ikem nyat dalem ngadan nceʹ, apan serema peniga Amai Bioʹ ke luhaʹ cen Anak ke. 14 Buk kem nyat ca inu neng akeʹ dalem ngadan nceʹ, akeʹ ke ti lete.”
Petuket dau neng Berua Buheʹ
15 “Buk kem malaʹ akeʹ, atek kem ke bayaʹ dau katuk ukum keʹ. 16 Akeʹ ke nyat neng Amai Bioʹ, ngan ia ke naʹ ca laʹa iaʹ ke mepo ikem, ia ne Berua katuk telit iaʹ ke ngelineʹ ngan ncem putung udip. 17 Dulu kusun tanaʹ ini abeʹ un senteng alaʹ ia, uban dulu abeʹ un senteng taʹan ia ngan tisen ia. Un sepuʹo ikem tisen ia, uban ia iaʹ ngelineʹ ngan ncem, ngan mudip dalem ikem. 18 “Abeʹ keʹ un ke peterai ikem tengen. Atek akeʹ iaʹ ke nai ngeliwet palaʹ ikem. 19 Abeʹ un majan dulu kusun tanaʹ ini ke taʹan akeʹ laʹa. Un sepuʹo ikem iaʹ ke taʹan akeʹ, ngan uban nceʹ mudip, ikem ke mudip lete. 20 Tegoʹ tau ina ke nai ʹo, ikem ke tisen akeʹ iaʹ un dalem Amai heʹ. Ngan ikem iaʹ ke un dalem akeʹ, ukoʹ baʹan nceʹ un dalem ikem. 21 “Aheʹ iaʹ alaʹ dau katuk ukum keʹ ngan bayaʹ a, ia iaʹ malaʹ neng akeʹ. Atek Amai heʹ ke malaʹ neng ia iaʹ malaʹ neng akeʹ, ngan akeʹ lete ke malaʹ neng ia, ngan ke peluhaʹ akeʹ tengen neng ia.” 22 Yudas (abeʹ e Yudas Iskariut) iaʹ kuma ha: “Tuhan, inu senteng ngkoʹ ke peluhaʹ usa hoʹ tengen le neng ameʹ ngan abeʹ un neng dulu kusun tanaʹ ini?” 23 Dau Yesus mipa ia: “Aheʹ diaʹ malaʹ neng akeʹ, ia iaʹ ke bayaʹ dau katuk keʹ. Amai heʹ iaʹ ke malaʹ ia. Amai heʹ pemung ngan nceʹ ke nai palaʹ ia ngan mudip ngan ne. 24 Aheʹ iaʹ abeʹ un malaʹ neng akeʹ, abeʹ e bayaʹ isiu heʹ. Katuk diaʹ ikem lepa kenahan are, abeʹ e anun nceʹ, un sepuʹo nai ie cen Amai Bioʹ iaʹ cuk akeʹ. 25 “Lepa ne akeʹ badaʹ ini mikem ngajan nceʹ petem un ngan ncem re. 26 Ia iaʹ mepo ikem, ina ne Berua Buheʹ iaʹ Amai Bioʹ ke cuk nai dalem ngadan nceʹ, ia iaʹ ke pepo pekatuk ikem neng puyan inu inu, ngan uyan ikem ke petawai ketoʹ diaʹ akeʹ lepa badaʹ mikem. 27 “Akeʹ mahung denaʹ tawai ngan ncem. Pengedenaʹ tawai heʹ tengen iaʹ akeʹ naʹ mikem. Abeʹ keʹ un naʹ mikem kuaʹ baʹan usun tanaʹ ini ke naʹ mikem. Ayen ncem mentam pekimet, ngan ayen ncem takut. 28 Ikem iaʹ lepa kenahan dau heʹ pisiu neng ikem kuma ha, akeʹ iaʹ ketai mecin. Un sepuʹo atek keʹ ke nai ngeliwet palaʹ ikem laʹa. Buk kem malaʹ neng akeʹ, atek bangen ne tekaʹ kimet cem tisen akeʹ iaʹ tai palaʹ Amai Bioʹ, uban ia iaʹ pelapa bioʹ cen akeʹ. 29 Naʹkini akeʹ lepa badaʹ ini mikem kena mung puyan ini ke nuyan, apan tegoʹ puyan ini ke nuyan ʹo, atek kem ke ngelan. 30 Abeʹ keʹ un biʹen tekaʹ ke pisiu majan ngan ncem laʹa, uban iaʹ paren usun tanaʹ ini seʹ ke nai ne ia. Abeʹ un penyukat te neng usun akeʹ, 31 un sepuʹo atek dulu kusun tanaʹ ini ke tisen akeʹ malaʹ neng Amai Bioʹ. Ina iaʹ ukoʹ keʹ ti mung pemuyan nceʹ bayaʹ dau ia iaʹ cuk akeʹ. “Nai ne, tai nilu puke cen ini.”
Yesus inan anggur iaʹ lan
1 Akeʹ ne atek inan anggur iaʹ lan, ngan Amai heʹ iaʹ nubo pula. 2 Ia mutun mesau singket daʹan diaʹ abeʹ un buʹan neng akeʹ. Ngan singket daʹan diaʹ buʹan, ia ke metoʹ palai apan bada le daʹan ne, ngan tiga kenai buʹan ne sahu. 3 Lepa buheʹ ne ikem kuʹun katuk iaʹ akeʹ lepa pisiu mikem. 4 Kuaʹ baʹan daʹan neng inan ne, pekina lete ikem detem neng akeʹ, ngan pekina pe akeʹ ke detem neng ikem. Ukoʹ baʹan ca daʹan, abeʹ e senteng buʹan tengen. Ia bang buʹan buk ke detem neng inan ne tuaʹ le. Ngan pekina lete ikem, abeʹ kem senteng buʹan buk kem abeʹ un lemuto neng akeʹ. 5 “Akeʹ ne iaʹ inan, ngan ikem iaʹ daʹan ne. Aheʹ iaʹ detem neng akeʹ, pekina lete akeʹ neng ia, ia lete ke un sahu buʹan uʹo. Abeʹ kem senteng uyan ca inu buk kem tengen cen akeʹ. 6 Aheʹ iaʹ abeʹ un detem neng akeʹ, dulu ke pet kawang, ukoʹ baʹan ca utun daʹan iaʹ tai maʹang are. Daʹan dia pekina, dulu pempun ngan pet kaʹ luten apan ne tutung. 7 Buk kem detem neng akeʹ, ngan isiu heʹ pe detem neng ikem, ina le ikem ke nyat inu iaʹ ikem ubaʹ, ngan ikem ke un ne lete. 8 Pekini ne puyan serema peniga Amai heʹ ke luhaʹ kuʹun ban ncem ke un buʹan iaʹ sahu. Ngan pekini ne puyan ncem ke nuyan diaʹ bayaʹ katuk keʹ. 9 Akeʹ malaʹ neng ikem kuaʹ baʹan Amai Bioʹ malaʹ neng akeʹ. Tiga hem mudip detem dalem pengemalaʹ keʹ. 10 Buk kem bayaʹ dau katuk ukum keʹ, ikem ke mudip detem dalem pengemalaʹ keʹ, ukoʹ baʹan nceʹ bayaʹ dau katuk ukum Amai heʹ ngan mudip detem dalem pengemalaʹ a. 11 “Akeʹ badaʹ ini mikem apan pengebangen nceʹ ke un neng ikem, ngan laʹa apan pengebangen ncem ke daʹam. 12 Ini ne katuk ukum keʹ: malaʹ ne neng ikem semaheʹ, kuaʹ baʹan nceʹ malaʹ neng ikem. 13 Iaʹ pengebioʹ malaʹ ca kelunan neng diaʹ tuyang nge, ina ne mencai udip pe tuman ida. 14 Ngan ikem ne diaʹ tuyang ngkeʹ, buk kem ke ti bayaʹ dau katuk ukum keʹ. 15 Abeʹ keʹ un kuma ikem ulaʹ laʹa, uban iaʹ ulaʹ abeʹ un tisen inu pemuyan iaʹ tuʹa ha uyan. Un sepuʹo akeʹ pisiu ikem diaʹ tuyang ngkeʹ, uban mung dau diaʹ akeʹ kenahan cen Amai heʹ, akeʹ lepa badaʹ mikem. 16 Abeʹ e ikem iaʹ lemileʹ akeʹ, akeʹ iaʹ lemileʹ ikem, ngan peteneng ikem ke un buʹan iaʹ sahu. Ina ne buʹan iaʹ abeʹ un tisen tai jaʹat. Ngan pekina ne puyan Amai Bioʹ ke naʹ mikem, mele inu iaʹ ikem nyat neng ia dalem ngadan nceʹ. 17 Ina ukoʹ keʹ pekini dau cuk ikem: malaʹ ne neng ikem semaheʹ.”
Puyan miʹi kusun tana
18 “Buk dulu kusun tanaʹ miʹi neng ikem, atek kem petawai uban akeʹ iaʹ ida miʹi ading. 19 Buk kem tulat usun tanaʹ ini, ina le usun tanaʹ ini malaʹ neng ikem kuaʹ baʹan ne malaʹ neng diaʹ anun te tengen. Un sepuʹo akeʹ iaʹ lemileʹ ikem cen usun tanaʹ ini, ngan abeʹ kem un tulat te laʹa, ini iaʹ pukoʹ o miʹi neng ikem. 20 Petawai dau iaʹ akeʹ lepa badaʹ mikem: ‘Abeʹ ca ulaʹ tai pelapa bioʹ cen diaʹ tuʹa ha.’ Buk de ke nyakit akeʹ, atek de ke nyakit ikem lete. Buk de bayaʹ dau katuk keʹ, atek de bayaʹ dau katuk kem lete. 21 Mung puyan ini ida uyan neng ikem uban ncem anun nceʹ, uban abeʹ de tisen ia iaʹ cuk akeʹ nai. 22 Buk keʹ abeʹ un nai pisiu ida, abeʹ penyalaʹ de ke dengkep neng ida. Iaʹ lan ne naʹkini, abeʹ un ukan nte ke nyepati dau neng penyalaʹ de. 23 Aheʹ diaʹ miʹi neng akeʹ, ida miʹi neng Amai heʹ lete. 24 Buk keʹ abeʹ un nai uyan puyan nyingan kahang ida, ukoʹ baʹan abeʹ un aheʹ iaʹ lepa uyan cen kena re, abeʹ un penyalaʹ de dengkep neng ida. Iaʹ lan ne naʹkini, lepa ne ida taʹan pemuyan nceʹ, ngan ida miʹi neng ameʹ dua Amai heʹ mung. 25 Naʹ pe pekina, sematu ue lete, apan inu iaʹ lepa senurat dalem Katuk Adet de ke nuyan lan: ‘Abeʹ un inu laʹ pukoʹ de miʹi neng akeʹ.’ 26 “Nai te ia iaʹ ke mepo ikem ʹo, ina ne Berua katuk iaʹ telit. Ia iaʹ nai cen Amai Bioʹ. Nai te ia cen Amai Bioʹ uban akeʹ iaʹ cuk ia nai. Ngan ia iaʹ ke badaʹ puyan nceʹ, 27 ngan ikem lete ke badaʹ puyan nceʹ, uban ikem iaʹ lepa un ngan nceʹ cen kena re.
1 “Lepa ne akeʹ badaʹ ini mikem apan ncem abeʹ un tai luʹap tekaʹ kimet. 2 Dulu ke mesau ikem cen amin sebayang ʹo. Ngan un te kenai jakaʹ dulu diaʹ ke lematai ikem, ke pekimet ban kuʹun puyan ini re kuma ida ke penco gayeng Allah. 3 Atek de ke ti puyan ini neng ikem, uban nte abeʹ un tisen Amai Bioʹ, pekina pe akeʹ. 4 Nekena ne akeʹ badaʹ puyan ini mikem, apan ncem ke petawai dau iaʹ akeʹ lepa badaʹ mikem tegoʹ tau dulu ke ti puyan ini ʹo.”
Gayeng Berua Buheʹ
“Abeʹ keʹ un badaʹ puyan ini mikem cen kena re, uban nceʹ petem un ngan ncem. 5 Naʹkini ne akeʹ ketai palaʹ ia iaʹ cuk akeʹ nai. Un sepuʹo abeʹ un aheʹ mikem iaʹ lemutu akeʹ kuma ha: ‘Tai kempi hoʹ?’ 6 Naʹkini bahat ne tekaʹ tawai hem uban nceʹ lepa badaʹ ini mikem. 7 Un sepuʹo atek telit dau heʹ pisiu mikem, tiga kuʹo pe akeʹ tai puke, uban buk keʹ abeʹ un tai, abeʹ un iaʹ mepo ikem kenai palaʹ ikem. Un sepe buk keʹ tai puke uʹo, ina ne akeʹ ke cuk ia nai palaʹ ikem. 8 Ngan tegoʹ o nai uʹo, ia ke peluhaʹ me kelunan kusun tanaʹ ini uban nte salaʹ pekimet puyan penyalaʹ de, ngan puyan iaʹ teneng, ngan puyan Allah ke metep ukum kusun tanaʹ ini. 9 Ida salaʹ pekimet puyan penyalaʹ uban nte abeʹ un ngelan neng akeʹ. 10 Ngan ida salaʹ pekimet puyan iaʹ teneng, uban akeʹ ketai palaʹ Amai Bioʹ, ngan abeʹ kem ke taʹan akeʹ laʹa. 11 Ida salaʹ pekimet puyan iaʹ metep ukum, uban lepa betep ne ukum neng ia iaʹ ngaren usun tanaʹ ini. 12 “Kadoʹ lepe isiu iaʹ akeʹ ke badaʹ mikem laʹa, idi pe naʹkini abeʹ pe nyatan ncem senteng alaʹ dau heʹ neng ikem. 13 Un sepuʹo tegoʹ kenai Berua katuk iaʹ telit, ia iaʹ ke ngkin ikem ngedalau mung puyan katuk iaʹ telit. Abeʹ e ke pisiu cen kimet te tengen, bang ia badaʹ inu iaʹ ia kenahan, ngan ia ke badaʹ puyan iaʹ kenai bayaʹ. 14 Ia ke naʹ serema peniga makeʹ, uban ne ke alaʹ isiu heʹ, ngan penco ho mikem. 15 Ketoʹ inu iaʹ anun Amai heʹ, anun nceʹ lete ina. Ina iaʹ ukoʹ keʹ kuma Berua Buheʹ ke alaʹ iaʹ akeʹ naʹ mia, penco badaʹ a mikem.”
Puyan bahat kimet ngan puyan bangen tawai
16 “Abeʹ un majan laʹa abeʹ kem ke taʹan akeʹ. Abeʹ un majan uʹo ina ikem ke taʹan pe akeʹ laʹa.” 17 Un dau palai diaʹ bayaʹ katuk ke pisiu neng ida diaʹ ca: “Inu sen iaʹ baʹan ne milu ne tupe, iaʹ kuma ha: ‘Abeʹ un majan laʹa abeʹ kem ke taʹan akeʹ: abeʹ un majan uʹo ina ikem ke taʹan pe akeʹ laʹa?’ Ngan un pe dau ue laʹa kuma ha: ‘Uban nceʹ tai palaʹ Amai Bioʹ?’ ” 18 Dau re lemutu ida selepeʹ: “Inu sen dau ue kuma: ‘Abeʹ un majan laʹa?’ Abeʹ le tisen inu iaʹ baʹan ne.” 19 Lepa tisen ne Yesus ida ubaʹ lemutu ia, ina ukoʹ o kuma ha neng ida: “Un dau heʹ re: ‘Abeʹ un majan laʹa, abeʹ kem ke taʹan akeʹ, uʹo ina pelaʹa abeʹ un majan ikem ke taʹan pe akeʹ.’ Ini iaʹ ikem lemutu kahang ikem semaheʹ ne mo? 20 Lan dau heʹ mikem, ke nange hem ʹo, uban ke ngelumo akeʹ. Un dulu kusun tanaʹ ne, ida iaʹ ke bangen. Naʹ pe bahat kimet cem, puyan pengebahat kimet cem ina iaʹ ke tai pekaliu nuyan bangen ʹo. 21 Buk ca leto nyeng ke nganak, taru tekaʹ a pekimet uban tegoʹ ina ha ke sihoʹ tuyen. Lepa ne anak ke pempet, abeʹ ne ia nawai tuyen laʹa, uban bangen tekaʹ a kuʹun anak iaʹ lepa pempet kusun tanaʹ ini. 22 Pekini lete puyan neng ikem. Naʹkini bahat tekaʹ tawai hem, un sepuʹo akeʹ iaʹ kenai naʹat ikem laʹa. Ina le pengebangen tawai hem ketai daʹam lan. Ca naʹan pengebangen ina, abeʹ un aheʹ senteng mesau ue cen ikem. 23 “Tegoʹ tau ina lepa nai uʹo, abeʹ kem ke nyat ca inu neng akeʹ. Lan dau heʹ mikem, mele inu iaʹ ikem ke nyat neng Amai Bioʹ dalem ngadan nceʹ, ia ke naʹ lete mikem. 24 Pabeʹ naʹkini ne ikem abeʹ un nyat ca inu dalem ngadan nceʹ. Nyat ne, idi hem ke alaʹ a, apan pengebangen ncem ketai daʹam.”
Iaʹ un usun neng puyan usun tanaʹ
25 Man kata katuk akeʹ lepa badaʹ puyan ini mikem are. Un sepuʹo tegoʹ jakaʹ iaʹ kenai ʹo, abeʹ keʹ kanan isiu kata laʹa. Atek besut dau heʹ ke badaʹ puyan Amai Bioʹ neng ikem. 26 Tegoʹ jakaʹ ina ke nai ʹo, ikem ke nyat neng ia dalem ngadan nceʹ. Abeʹ keʹ kuma akeʹ iaʹ ke nyat neng ia tuman ikem, 27 uban Amai Bioʹ tengen iaʹ malaʹ neng ikem. Ia malaʹ neng ikem uban ncem malaʹ neng akeʹ, ngan ngelan neng akeʹ iaʹ uban lepa nai cen Allah. 28 Akeʹ lepa nai cen Amai Bioʹ, nai heʹ kusun tanaʹ ini. Naʹkini akeʹ ke mecin tanaʹ ini, tai palaʹ Amai Bioʹ.” 29 Penco dau diaʹ bayaʹ katuk ke neng ia: “Ahaʹ, besut dau hoʹ pisiu ameʹ naʹkini. Abeʹ koʹ man isiu kata laʹa. 30 Tisen ne ameʹ naʹkini iaʹ mung inu ne ikoʹ lepa tisen, ngan abeʹ titin kelunan ke peluhaʹ putu re neng ikoʹ. Kuʹun puyan ini ne ameʹ ngelan ikoʹ uban nai cen Allah.” 31 Dau Yesus mipa ida: “Lan ncem ngelan naʹkini taʹin? 32 Seʹ kenai ne jakaʹ a, ngan iaʹ lan ne lepa un ne naʹ kini, tegoʹ mung ngkem ke tai purat ʹo, semingket ketai hem palaʹ amin ncem tengen. Bang akeʹ tengen le iaʹ nahung laʹa. Un sepuʹo iaʹ lan, abeʹ keʹ tengen, uban Amai Bioʹ iaʹ un ngan nceʹ. 33 Lepa ne akeʹ badaʹ ini mikem apan ncem ke un denaʹ tawai kuʹun puyan ncem pebeka udip ngan nceʹ. Puyan usun tanaʹ ini iaʹ ke petuyen ikem, un sepuʹo ngebawaʹ ne ikem, lepa ne akeʹ nyupeʹ puyan usun tanaʹ ini.”
Yesus lemameʹ me diaʹ bayaʹ katuk ke
1 Lepa Yesus muʹo pisiu ini, kun ne nekadaʹ kempau naʹat langit, ngan kuma ha: “Amai, lepa abeʹ ne jakaʹ idai. Naʹ ne serema peniga me Anak koʹ, idi Anak koʹ ke naʹ serema peniga mikoʹ. 2 Ikoʹ iaʹ lepa naʹ penyukat me ia neng usun kelunan mung, apan ne sukat naʹ udip saheʹ kelineʹ iaʹ ngeriman me ketoʹ diaʹ ikoʹ naʹ mia. 3 Ngan ini ne udip saheʹ kelineʹ iaʹ ngeriman: ina ne puyan kelunan ke tisen ikoʹ tuaʹ le ia atek Allah lan, ngan ke tisen Yesus Keristus iaʹ ikoʹ ban cuk nai ini. 4 Akeʹ lepa peluhaʹ serema peniga hoʹ neng usun tanaʹ ini, ngan pelepa gayeng iaʹ ikoʹ cuk akeʹ ti are. 5 Amai, naʹkini akeʹ nyeripa ngejuma ikoʹ. Naʹ ne serema peniga makeʹ, kuaʹ baʹan iaʹ akeʹ lepa un ngan ncoʹ kena usun tanaʹ ini ke nuyan are. 6 “Lepa ne akeʹ petisen ikoʹ neng kelunan diaʹ ikoʹ lepa naʹ makeʹ cen ahang dulu kusun tanaʹ ini are. Ida diaʹ anun ncoʹ iaʹ ikoʹ lepa naʹ makeʹ, ngan ida bayaʹ lete isiu hoʹ. 7 Naʹkini ida tisen ketoʹ inu iaʹ ikoʹ lepa naʹ makeʹ, luhaʹ uban ne nai cen ikoʹ. 8 Ngan lepa pe akeʹ naʹ katuk iaʹ ikoʹ lepa naʹ makeʹ are me ida. Ida alaʹ lete dau ue, ngan tisen pe ida akeʹ iaʹ lan uban nai cen ikoʹ, ngan ida ngelan ikoʹ iaʹ lepa ban cuk akeʹ nai. 9 “Akeʹ lemameʹ me ida. Abeʹ keʹ un lemameʹ me dulu mung kusun tanaʹ ini, bang me kelunan diaʹ ikoʹ naʹ makeʹ, uban ida diaʹ anun ncoʹ. 10 Ketoʹ diaʹ akeʹ un, iaʹ anum, pekina pe ketoʹ diaʹ ikoʹ un, iaʹ anuk lete pe, ngan serema peniga heʹ iaʹ luhaʹ kuʹun nte. 11 Naʹkini ne akeʹ ke nai palaʹ ikoʹ. Abeʹ keʹ majan kusun tanaʹ ini laʹa, un sepuʹo ida diaʹ petem kusun tanaʹ ini. Amai iaʹ Buheʹ, petubo ne ida man penyukat ngadan ncoʹ, ina ne ngadan ncoʹ iaʹ ikoʹ lepa naʹ makeʹ are, apan nte ke pebulung neng ca le, kuaʹ baʹan tua pebulung neng ca le. 12 Ngajan nceʹ un ngan nte are, lepa ne akeʹ petubo ida man penyukat ngadan ncoʹ, ina ne ngadan ncoʹ iaʹ ikoʹ lepa naʹ makeʹ are. Ngan akeʹ nubo lete ida. Ca usa pe abeʹ un durat mida, sematu bang ca le laki iaʹ ke durat, apan ketai nuyan lan ne dau Kitap. 13 Ngan naʹkini akeʹ ke nai palaʹ ikoʹ. Dalau heʹ petem un kusun tanaʹ ini, akeʹ pisiu lete puyan ini, apan nte ke un pengebangen nceʹ sangan dalem kimet de. 14 Lepa ne akeʹ naʹ katuk koʹ mida, ngan dulu kusun tanaʹ ini iaʹ miʹi neng ida, uban abeʹ de anun usun tanaʹ ini, kuaʹ baʹan nceʹ iaʹ abeʹ un anun usun tanaʹ ini. 15 Abeʹ keʹ nyat ikoʹ ngelipau ida kusun tanaʹ ini, un sepuʹo akeʹ nyat ikoʹ menting ida cen Bali Jaʹat. 16 Kuaʹ baʹan nceʹ iaʹ abeʹ un anun usun tanaʹ ini, pekina lete ida abeʹ un anun usun tanaʹ ini. 17 Petengen ne ida mikoʹ, man sen katuk iaʹ telit lan. Isiu hoʹ iaʹ katuk telit. 18 Akeʹ cuk ida tai kusun tanaʹ ini, kuaʹ baʹan ncoʹ lepa cuk akeʹ nai kusun tanaʹ ini. 19 Ngan tuman ida pe akeʹ petengen usa heʹ me ikoʹ, apan ida lete iaʹ tengen diseʹ dalem katuk telit. 20 “Abeʹ keʹ un lemameʹ mida tuaʹ le. Un sepuʹo akeʹ lemameʹ pe me kelunan diaʹ ke ngelan neng akeʹ uban kuʹun tiraʹ de. 21 Akeʹ lemameʹ mida apan mung nte pebulung neng ca le. Amai, sukun ne ida kahum dalem tua, kuaʹ baʹan ikoʹ kahum dalem akeʹ, ngan akeʹ pe kahum dalem ikoʹ, sukun ne ida pebulung neng ca le, apan dulu kusun tanaʹ ini ke ngelan ikoʹ iaʹ cuk akeʹ nai. 22 Lepa ne akeʹ naʹ serema peniga mida, iaʹ ikoʹ lepa naʹ makeʹ, apan nte senteng ke pebulung neng ca le, kuaʹ baʹan tua pebulung ca le. 23 Akeʹ iaʹ kahum dalem ida, ngan pekina pe ikoʹ iaʹ kahum dalem akeʹ, apan puyan nte pebulung neng ca le ke dengkep lan. Idi dulu kusun tanaʹ ini ke tisen ikoʹ iaʹ cuk akeʹ, ngan ikoʹ iaʹ malaʹ ida ukoʹ baʹan ncoʹ malaʹ neng akeʹ. 24 “Amai, lepa ne ikoʹ naʹ ida makeʹ, ngan akeʹ pe keloʹ ida pemung ngan nceʹ kaʹ ukoʹ keʹ, apan nte senteng taʹan serema peniga heʹ, ina ne serema peniga iaʹ ikoʹ lepa naʹ makeʹ, uban ikoʹ iaʹ malaʹ neng akeʹ kena usun tanaʹ ini ke nuyan are. 25 Amai iaʹ teneng, abeʹ dulu kusun tanaʹ ini tisen ikoʹ, bang akeʹ iaʹ tisen ikoʹ, ngan ida dina pe diaʹ tisen ikoʹ iaʹ cuk akeʹ nai. 26 Akeʹ lepa petisen ikoʹ neng ida, ngan atek keʹ ke uyan pekina lemuto lete, apan puyan pengemalaʹ koʹ neng akeʹ senteng un dalem ida, ngan akeʹ lete senteng un dalem ida pe.”
Dulu mapo Yesus
1 Lepa Yesus pisiu dalem temameʹ e, tai kun ne mecin pemung ngan diaʹ bayaʹ katuk ke, tai tahaʹ dipa sungai iʹut ina iaʹ ngadan Kidrun, iaʹ kukoʹ un pula. Kina ketai Yesus pemung ngan diaʹ bayaʹ katuk ke ne. 2 Yudas iaʹ mencai Yesus me bunoʹ o, ia iaʹ lepa tisen kukoʹ pula ina, uban tajen liwai ne Yesus lepa pempun ngan diaʹ bayaʹ katuk ke dina. 3 Ina ukoʹ Yudas ngkin ca peng sedadu tai ngan ne kaʹ ukoʹ pula ina. Ngan un pe palai sedadu Umaʹ Palan, diaʹ detaʹu lataʹ ngan diaʹ perisi dina cuk nai, petem ngan gelam pepatai re, ngan kadoʹ naʹan titiu re. 4 Lepa ne Yesus tisen inu iaʹ ketai nuyan neng ia, ina ukoʹ o tai kaʹ tena, mentung nge kuma neng ida: “Aheʹ iaʹ ikem pita ne?” 5 Dau re mipa ia: “Yesus lepoʹ Nasarit.” Dau ue neng ida: “Akeʹ ne ia.” Un pe Yudas, iaʹ ke naʹ ia me diaʹ bunoʹ o ne, nekejeng ngan nte kina. 6 Tegoʹ Yesus pisiu kuma ha neng ida ne: “Akeʹ ne ia,” tai kun nte ngedut, ngan penco uʹang kaʹ tanaʹ. 7 Kun Yesus lemutu ida laʹa: “Aheʹ iaʹ ikem pita ne?” Dau re neng ia laʹa: “Yesus lepoʹ Nasarit.” 8 Dau Yesus neng ida: “Lepa ne akeʹ badaʹ mikem kuma: ‘Akeʹ ne ia.’ Buk pekina, uban ncem pita akeʹ, talan ne diaʹ ca dini tai.” 9 (Ia pisiu pekini apan inu iaʹ ia lepa pisiu ke nuyan lan: “Amai, pabeʹ ca pe diaʹ ikoʹ lepa naʹ makeʹ, abeʹ un durat.”) 10 Un Simun Peterus iaʹ mampin bahing, penco ho menat te, mihau tahaʹ taʹu telinga ca ulaʹ laki Pengebioʹ Detaʹu dina. Un ngadan ulaʹ ina Malekus. 11 Dau Yesus neng Peterus: “Meseʹ ne bahng ngkoʹ ne kaʹ sua ha. Un ncoʹ pekimet kuma akeʹ ke abeʹ un nisep sawan penaru iaʹ Amai heʹ lepa naʹ makeʹ are mo?”
Yesus nyeripa Anas
12 Mpun sedadu pemung ngan diaʹ lataʹ de dina ngan pulis lepoʹ Yahudi pe tai mapo Yesus ngan lemeka ia. 13 Penco tai re ngkin ia pabeʹ Anak ading. Anas iaʹ amai iban Kayapas iaʹ Pengebioʹ Detaʹu re uman ina. 14 Kayapas ne iaʹ lepa pekatuk kelunan Yahudi kuma ha: “Tiga pulang ca usa kelunan matai saliu dulu mung.”
Puyan Peterus nyepati Yesus
15 Simun Peterus, ngan ca mida diaʹ bayaʹ katuk Yesus, tai bayaʹ ia. Laki iaʹ ca ina un malai ngan iaʹ Pengebioʹ Detaʹu ina. Ina ukoʹ o tai ngan Yesus kaʹ use laki Pengebioʹ Detaʹu ina. 16 Un Peterus ina iaʹ ngelineʹ kata pamen liwang. Laki iaʹ ca are, iaʹ malai ngan laki Pengebioʹ Detaʹu ina, nai kun ne uleʹ kawang, penco ho pisiu ngan leto iaʹ ngkang alet pamen liwang ina, penco ngkin Peterus kaʹ dalem. 17 Un dau leto iaʹ ngkang pamen ina neng Peterus: “Moʹ abeʹ tene ikoʹ re ca me diaʹ bayaʹ katuk laki ina mo?” Un dau Peterus mipa: “Naʹun, abeʹ keʹ un bayaʹ katuk ke.” 18 Sengim ngajan ina, ina ukoʹ diaʹ ulaʹ ngan diaʹ mengau dina uyan luten man kayu arang, ngan nekejeng teliling nge uban nte mentu. Tai kun Peterus kempau, penco nekejeng mentu ngan nte.
Iaʹ Pengebioʹ Detaʹu ina lemutu Yesus
19 Iaʹ Pengebioʹ Detaʹu ina lemutu Yesus kumpin puyan diaʹ bayaʹ katuk ke, ngan kumpin puyan katuk ke ne. 20 Dau Yesus mipa: “Lemuto te akeʹ lepa pisiu neng peng dulu mung. Ketoʹ katuk keʹ lepa nuyan dalem amin sebayang, ngan dalem Umaʹ Palan, kukoʹ ketoʹ kelunan Yahudi malai nai pepeng are. Abeʹ keʹ un pisiu inu inu ne neng iaʹ suhuk. 21 Buk pekina, inu adeʹ kem lemutu akeʹ? Lemutu ne dulu diaʹ lepa kenahan dau heʹ. Lemutu ida inu iaʹ akeʹ lepa badaʹ mida. Tisen te ida inu iaʹ baʹan nceʹ.” 22 Tegoʹ Yesus pisiu ini, kun ca pulis diaʹ kina ne nepap ia, ngan kuma ha: “Makang lan pe ikoʹ pisiu pekini dau neng Pengebioʹ Detaʹu ini.” 23 Dau Yesus mipa ia: “Buk keʹ pisiu inu iaʹ salaʹ, badaʹ ne me dulu mung inu iaʹ ban salaʹ. Un sepuʹo buk teneng iaʹ akeʹ lepa pisiu, inu adeʹ koʹ nyakit akeʹ?” 24 Uʹo ina Anas cuk ia tai palaʹ Kayapas iaʹ Pengebioʹ Detaʹu ina, petem pebeka lepe ujoʹ o.
Peterus nyepati Yesus laʹa
25 Un lepe Peterus nekejeng kina, ina ukoʹ diaʹ ca kuma neng ia: “Moʹ abeʹ ikoʹ lete ca diaʹ bayaʹ katuk laki ina tupe?” Un sepuʹo dau Peterus nyepati ie, dau ue: “Naʹun, abeʹ keʹ un bayaʹ katuk ke.” 26 Un ca ulaʹ laki Pengebioʹ Detaʹu iaʹ pepanak ngan laki iaʹ Peterus mihau telinga idai, penco pisiu. Kun ne lemutu: “Lepa ne akeʹ taʹan ikoʹ pemung ngan ne kaʹ ukoʹ pula idai re taʹin?” 27 Dau Peterus kuma ha laʹa: “Naʹun, abeʹ e akeʹ.” Penco dau iap nekuʹuk.
Yesus nyeripa Pilatus
28 Laho laho mempam, kun nte ngkin Yesus cen amin Kayapas, tai palaʹ amin Gebenur ina. Un kelunan Yahudi dina, abeʹ de un tai kaʹ dalem amin Gebenur ina uban nte malap sihoʹ kesa, apan nte senteng tai uman Bunut Paska ina. 29 Ina ukoʹ Pilauts tai kaʹ awang palaʹ ida, mentung nge lemutu ida: “Inu salaʹ iaʹ ikem mekem me laki ini?” 30 Un dau ipa re neng Pilatus: “Abeʹ meʹ ke ngkin ia palaʹ ikoʹ buk ke abeʹ un ti puyan iaʹ salaʹ.” 31 Dau Pilatus kuma neng ida: “Tiga ne kem alaʹ ia, ngan pebetep ukum neng ia bayaʹ adet cem tengen.” Dau Yahudi dina mipa: “Abeʹ meʹ senteng naʹ ca kelunan neng ukum patai.” 32 Un pekina dau apan ke nuyan lan iaʹ baʹan dau Yesus cen kena are, tegoʹ o badaʹ puyan iaʹ ukoʹ o ke matai ʹo. 33 Tai kun Pilatus uleʹ liwet dalem amin Gebenur ina, pelapa mengin Yesus ngan lemutu ia: “Ikoʹ iaʹ paren bioʹ lepoʹ Yahudi tupe?” 34 Dau Yesus mipa ia: “Kumpin ne dau putu hoʹ ne, cen kimet coʹ tengen kenai ini, buk ke are nai cen dulu diaʹ ca iaʹ badaʹ puyan nceʹ mikoʹ?” 35 Dau Pilatus mipa: “Ban ncoʹ kuma akeʹ ca Yahudi mo? Lepoʹ koʹ loʹ lete ngan diaʹ detaʹu lataʹ de, ida iaʹ mencaʹ ikoʹ palaʹ akeʹ. Inu pemuyan ikoʹ lepa ti tupe?” 36 “Abeʹ puʹun pengaren nceʹ cen usun tanaʹ ini. Buk pengaren nceʹ un puʹun cen usun tanaʹ ini, kelunan diaʹ bayaʹ katuk keʹ ke nyakat apan kelunan Yahudi abeʹ un mapo akeʹ. Naʹun, abeʹ puyan pengaren nceʹ un nai cen usun tana ini.” 37 Ina ukoʹ Pilatus lemutu ia: “Buk pekina, paren bioʹ koʹ ne mo?” Dau Yesus mipa ia: “Ikoʹ kuma akeʹ ca paren bioʹ. Lan pe akeʹ pempet ngan nai kusun tanaʹ ini tuman ca le puyan, iaʹ ina badaʹ tugen neng katuk iaʹ telit. Aheʹ diaʹ ubaʹ alaʹ katuk iaʹ telit, ida iaʹ ngeringa dau heʹ.” 38 Dau Pilatus lemutu: “Inu iaʹ katuk telit tupe?”
Yesus sihoʹ ukum patai
Uʹo ina tai kun Pilatus kawang palaʹ kelunan Yahudi dina, ngan kuma neng ida: “Abeʹ keʹ tisen inu iaʹ puʹun ukoʹ le ke pesalaʹ ia. 39 Un sepuʹo kelayan adet cem, akeʹ ke nakau ca usa mikem cen amin sepin tegoʹ Bunut Paska. Ubaʹ kem akeʹ ke nakau paren bioʹ lepoʹ Yahudi ini mikem mo?” 40 Lemikaʹ dau re mipa ia: “Naʹun, abeʹ e ia. Barabas ameʹ ubaʹ.” (Barabas ne ca kelunan kejamun.)
1 Uʹo ina kun Pilatus alaʹ Yesus, cuk sedadu dina lemeta ia. 2 Kun sedadu dina uyan tapung suhaʹ, penco naʹ kaʹ ulu ue, ngan naʹ ca sapai dadoʹ silem le mia, 3 penco nai palaʹ ia ngan kuma ha: “Dadoʹ le udip paren bioʹ lepoʹ Yahudi.” penco ketai re kempau, nepap ia. 4 Tai kun Pilatus kawang ca liwai laʹa, ngan kuma neng dulu diaʹ kadoʹ: “Ikem naʹat, ini kenai heʹ ngkin ia kawang apan ncem taʹan. Abeʹ keʹ tisen inu iaʹ puʹun ukoʹ le ke mekem salaʹ neng ia.” 5 Penco ketai Yesus kawang, petem un sapai dadoʹ o iaʹ silem idai, ngan tapung suhaʹ a. Un dau Pilatus neng ida: “Naʹat, ini ne laki idi.” 6 Tegoʹ diaʹ detaʹu lataʹ ngan diaʹ sedadu dina lepa taʹan ia, penco re ngelengap: “Napek ne ia neng kayu tecek. Napek ne ia neng kayu tecek.” Dau Pilatus neng ida: “Buk pekina, ikem alaʹ ne ia ngan napek ia neng kayu tecek. Abeʹ keʹ tisen inu iaʹ puʹun le ke mekem salaʹ neng ia.” 7 Un dau kelunan Yahudi dina nyakat: “Un dau dalem Katuk Adet meʹ iaʹ kuma ha tekep tia sihoʹ ukum patai, uban ne badaʹ ia iaʹ Anak Allah.” 8 Tegoʹ Pilatus lepa kenahan dau re pisiu ini, tai takut kuʹo pe tekaʹ a. 9 Tai kun ne ngeliwet palaʹ amin Gebenur ina, mentung lemutu Yesus: “Cen mpi kenai hoʹ?” Un sepuʹo abeʹ Yesus un mipa. 10 Dau Pilatus neng ia: “Abeʹ koʹ ke pisiu me akeʹ tupe? Petawai, akeʹ iaʹ un penyukat iaʹ sukat ke nakau ikoʹ, ngan pekina pe penykat iaʹ sukat ke napek ikoʹ neng kayu tecek.” 11 Dau Yesus mipa: “Pukoʹ koʹ un penyukat neng akeʹ bang uban Allah iaʹ lepa naʹ ini mikoʹ. Ina ukoʹ kelunan iaʹ mencai akeʹ me ikoʹ, ia iaʹ nyalit neng penyalaʹ iaʹ baran neng uʹo penyalaʹ koʹ.” 12 Tegoʹ Pilatus lepa kenahan dau ini, miat tekaʹ a mita janan ke nakau Yesus. Un sepuʹo ngeliwet dau kelunan Yahudi dina ngelengap: “Buk ne ikoʹ ke nakau ia, abeʹ ne ikoʹ un tuyang Laja Kaisar laʹa. Aheʹ iaʹ badaʹ ia ca paren bioʹ, ia ne iaʹ bunoʹ Laja Kaisar.” 13 Tegoʹ Pilatus kenahan dau isiu ini, kun ne ngkin Yesus kawang, penco madung kempau adan batu iaʹ kukoʹ metep tiraʹ, iaʹ dulu kuma “Lasan Batu.” (Ngadan ne kuʹun Iberani, “Gabata.”) 14 Tegoʹ ina, nyeng beluaʹ tau, uban neng ke nempam ina uʹo ida pekimet ke uman Bunut Paska. Kun Pilatus pisiu me kelunan Yahudi dina: “Ini iaʹ paren bioʹ kem.” 15 Kun nte ngelengap laʹa: “Lematai ne ia, lematai ne ia, napek ke ia neng kayu tecek.” Dau Pilatus lemutu ida: “Ubaʹ kem akeʹ napek paren bioʹ kem neng kayu tecek mo?” Un dau diaʹ detaʹu lataʹ dina mipa: “Bang ca Kaisar le iaʹ paren bioʹ meʹ.” 16 Ina ukoʹ Pilatus naʹ Yesus mida apan nte ke napek ia neng kayu tecek.
Yesus tenapek neng kayu tecek
Penco re ngkin Yesus. 17 Tai kun ne kawang nyuʹun kayu tecek ke tengen, nai palaʹ kukoʹ iaʹ dulu kuma “Tekahing Ulu.” (Isiu Iberani ida kuma “Gulguta.”) 18 Kaʹ ina re napek ia neng kayu tecek. Un pe dua usa laki ida napek neng kayu tecek pipa ia, ngan Yesus tegoʹ beluaʹ ida dua. 19 Kun Pilatus nyurat ca surat, pedetem me neng kayu tecek ina. Un dau dalem surat ina: “Yesus lepoʹ Nasarit, paren bioʹ kelunan Yahudi.” 20 Kadoʹ kelunan Yahudi pecap surat ini, uban kukoʹ dulu napek Yesus neng kayu tecek ina abeʹ un coʹ cen lepoʹ. Surat ina pe senurat neng isiu Iberani, Latin, ngan isiu Gerika. 21 Dau diaʹ detaʹu lataʹ lepoʹ Yahudi dina neng Pilatus: “Ayen nyurat ‘paren bioʹ lepoʹ Yahudi,’ bang nyurat ‘laki ini iaʹ kuma ia paren bioʹ lepoʹ Yahudi.’ ” 22 Dau Pilatus mipa: “Inu iaʹ akeʹ lepa nyurat, lepa ne ina.” 23 Lepa sedadu dina napek Yesus neng kayu tecek, kun nte alaʹ gelam me petulat me pat usa sedadu dina. Ida alaʹ pe sapai dadoʹ o iaʹ nanyam pa tipo, abeʹ un jelut te. 24 Dau sedadu dina pisiu neng ida selepeʹ: “Ayen ne ilu lemerit te. Tiga le ti tenung. Naʹat mele aheʹ iaʹ ke un ne.” Puyan ini nuyan apan kenai nuyan dau isiu Kitap iaʹ kuma ha: “Ida petulat gelam ngkeʹ neng ahang ida tengen, Ngan ida nenung neng sapai heʹ ne.” Pekina ne puyan sedadu dina ti. 25 Un diaʹ nekejeng nyeng kata tecek Yesus, ina ne iaʹ ueʹ ngan iaʹ cenganak ueʹ e ne, ngan Mariam leto Kelupas, ngan Mariam Madalina. 26 Yesus taʹan diseʹ ban ueʹ e ngan iaʹ bayaʹ katuk ke, iaʹ ia malaʹ didai, nekejeng kina, ina ukoʹ o kuma neng iaʹ ueʹ: “Ueʹ, ini ne anak koʹ.” 27 Dau ue neng iaʹ bayaʹ katuk ke ne laʹa: “Ini ne ueʹ koʹ.” Cen uʹo ina, iaʹ bayaʹ katuk ke ina, ngkin leto ina mudip neng amin ne.
Puyan patai Yesus
28 Cen naʹkini ne Yesus tisen mung puyan iaʹ lepa nuyan, ngan laʹa apan isiu dalem Kitap ke nuyan lan. Ia kuma ha: “Muhang tekaʹ keʹ ne.” 29 Un ca bisin kina sangan kuʹun telang anggur iaʹ mesem ina. Kun nte mejep ca keruko abak neng telang anggur ina. Kun nte netuk keneng awe ca daʹan jelemutin, ngan mejung nge kaʹ paʹ a. 30 Cen ina ne Yesus nisep telang anggur ina ngan kuma ha: “Lepa palup ne udai.” Uʹo ina tai ulu ue petuheng, ngan penco matai.
Sedadu mesuk tegahang Yesus
31 Ina ukoʹ lepoʹ Yahudi lemutu Pilatus, nyat lesau neng ia, apan ne dayo ida lemutun taket kelunan iaʹ lepa sihoʹ ukum patai, ngan muno ida kentaʹ cen kayu salip. Ida ti puyan ini uban tegoʹ tau lema, abeʹ de ubaʹ patai ke petem neng kayu tecek tegoʹ Tau Kelineʹ, uban Tau Kelineʹ iaʹ kenai ina uʹo ke sihoʹ neng adet bioʹ iaʹ buheʹ. 32 Ina ukoʹ sedadu dina tai lemutun taket kelunan iaʹ ading, uʹo ina re ti iaʹ ca iaʹ sihoʹ ukum patai ngan Yesus. 33 Un sepuʹo nai kun nte palaʹ Yesus. Ida taʹan ia lepa matai, ina ukoʹ de abeʹ un lemutun taket te. 34 Penco ca usa me sedadu dina mesuk nyatap pe kaʹ tegahang Yesus. Serengan ina ne kenai dahaʹ ngan sungai musa kawang. 35 Laki iaʹ lepa taʹan puyan ini iaʹ nugen badaʹ a apan ikem lete ke ngelan. Isiu ue iaʹ telit lan, ngan ia tisen pe isiu ue iaʹ telit lan. 36 Ini ne lepa nuyan apan dau iaʹ dalem Kitap ke nai nuyan lan: “Pabeʹ ca tulang nge pe abeʹ un putun.” 37 Ngan un pe dau dalem Kitap diaʹ ca kuma ha: “Dulu ke naʹat ia iaʹ ida mesuk man nyatap.”
Puyan nanem Yesus
38 Lepa ina, Yusup, iaʹ nai cen lepoʹ Arimatia ina, lemutu Pilatus mele he senteng ke alaʹ patai Yesus. (Yusup ne ca iaʹ bayaʹ katuk Yesus lete, un sepuʹo selem puyan ne cen kena re, uban ne takut diaʹ lataʹ lepoʹ Yahudi.) Kun Pilatus badaʹ mia: “Senteng te ikoʹ alaʹ patai ie ne.” Penco ketai Yusup puke patai Yesus. 39 Un Nikudimus, iaʹ ading tai naʹat Yesus ngahu, penco ho tai ngan Yusup, ngkin kihoʹ kihoʹ nem puloʹ kateʹ kemanyan pekelet lisan tumu ngan lisan gareʹ. 40 Laki dua, diaʹ alaʹ patai Yesus ne, lemino ia man belasoʹ peging ngan kemanyan ina. Pekini ne puyan lepoʹ Yahudi petenup me kelunan diaʹ lepa matai kena re nanem ida. 41 Kukoʹ de lematai Yesus ne un pula kina. Un ca liang batu iaʹ mading kidi, abeʹ un awai dulu kanan ne lepe. 42 Ida mahung patai Yesus kaʹ dalem liang ina, uban liang ina nyeng kata kina, ngan laʹa uban neng kenempam me ke Tau Kelineʹ lepoʹ Yahudi.
Liang iaʹ kelangan
1 Laho mempam Tau Mingku, petem mentem lepe, tai Mariam Madalina kaʹ liang. Kun ne taʹan batu idai lepa ban lubit ne cen paʹ liang ina. 2 Tai kun ne ngasa palaʹ Simun Peterus ngan ca iaʹ bayaʹ katuk Yesus iaʹ Yesus malaʹ idai, penco badaʹ mida: “Lepa ne ida alaʹ Tuhan cen liang, ngan abeʹ le tisen kempi re mahung ia.” 3 Penco ketai Peterus ngan iaʹ ca iaʹ bayaʹ katuk Yesus idai mecin, ngan penco tai palaʹ liang ina. 4 Ngasa ketai re dua ne, un sepuʹo iaʹ ca idai muat ngasa neng ʹo Peterus, ina ukoʹ ia iaʹ ading abeʹ kaʹ liang. 5 Kun ne muʹup ngan taʹan belasoʹ memut idai, abeʹ sepe ia un tai kaʹ dalem. 6 Nai kun Simun Peterus bayaʹ ia laʹa, penco ketai ie kaʹ dalem liang. Ia taʹan diseʹ belasoʹ memut ina nahung kina. 7 Ngan belasoʹ iaʹ bino ulu Yesus are, abeʹ un ne nahung ngan belasoʹ memut ina, un sepuʹo petem kelelen lepe uban ne. 8 Un ca iaʹ bayaʹ katuk idai iaʹ ading abeʹ kaʹ liang are, tai pe ia kaʹ dalem. Kun ne taʹan, penco ngelan. 9 Un sepuʹo petem lepe ida dua abeʹ un tisen sen dalem Kitap iaʹ kuma ha: “Atek ke kenai beteʹ cen patai ʹo.” 10 Uʹo ina ketai diaʹ bayaʹ katuk dina uleʹ kumaʹ.
Puyan Yesus nai luhaʹ palaʹ Mariam Madalina
11 Un ne Mariam are nekejeng mentung nange kaʹ awang liang ina. Petem lepe ia nange, kun ne muʹup naʹat kaʹ dalem liang. 12 Penco ho taʹan dua re melikat kina, un gelam puteʹ le, madung kukoʹ uban patai Yesus are, ca tahaʹ ulu, ca tahaʹ taket. 13 Dau re lemutu ia: “Anak, inu adeʹ koʹ nange?” Dau ue mipa: “Lepa ne ida ngelipau Tuhan nceʹ. Abeʹ keʹ tisen kempi tai re mahung ia.” 14 Tegoʹ o pisiu ini, kun ne pupa ngan taʹan Yesus nekejeng kina. Un sepuʹo abeʹ e tisen ina Yesus. 15 Dau Yesus lemutu ia: “Anak, inu adeʹ koʹ nange? Aheʹ iaʹ ikoʹ pita ina?” Mariam kuma ia laki iaʹ mengau pula, ina ukoʹ o pisiu neng ia: “Amai, buk koʹ alaʹ ia, badaʹ ne makeʹ kempi hoʹ mahung ia, apan nceʹ tai alaʹ ia.” 16 Dau Yesus pisiu ia: “Mariam.” Kun Mariam mupa sileʹ ia, penco ti isiu Iberani: “Rabi.” (Sen ini “Guru.”) 17 Dau Yesus badaʹ mia: “Ayen mapo akeʹ, uban abeʹ un awai heʹ tai uleʹ palaʹ Amai Bioʹ lepe. Tai ne badaʹ me diaʹ cenganak keʹ te, akeʹ ke tai uleʹ palaʹ ia iaʹ Amai heʹ, ngan iaʹ Amai hem, iaʹ Allah heʹ, ngan iaʹ Allah hem, kun ncoʹ mida.” 18 Tai kun Mariam Madalina ne badaʹ me diaʹ bayaʹ katuk Yesus dina uban ia lepa taʹan Tuhan, ngan penco dau iaʹ ia lepa badaʹ mia idai are.
Puyan Yesus nai luhaʹ palaʹ diaʹ bayaʹ katuk ke
19 Tai tahup Tau Mingku, un diaʹ bayaʹ katuk Yesus dina un pempun dalem ca amin, ngan pamen ne pe tenalet uban nte takut kelunan lataʹ lepoʹ Yahudi. Nyeluman kenai Yesus nekejeng kahang ida. Un dau ue: “Denaʹ ne tawai hem.” 20 Lepa ha pisiu ni, kun ne peluhaʹ ujoʹ o ngan tegahang nge me ida. Pelapa bangen ne tekaʹ kimet diaʹ bayaʹ katuk ke dina taʹan Tuhan. 21 Kun Yesus pisiu me dia laʹa: “Denaʹ ne tawai hem. Kuaʹ baʹan Amai Bioʹ lepa cuk akeʹ nai, pekina lete akeʹ cuk ikem tai.” 22 Lepa ha pisiu ina, kun ne ngelaset nyelempau neng ida, ngan kuma ha: “Alaʹ ne Berua Buheʹ. 23 Buk kem sau penyalaʹ kelunan, pesau te ia. Buk kem abeʹ un mesau ue, abeʹ e ke pesau.”
Yesus ngan Tumas
24 Un ca usa me diaʹ puloʹ dua diaʹ bayaʹ katuk Yesus dina, ngadan ne Tumas (iaʹ dulu kuma pepit) iaʹ abeʹ un ngan nte tegoʹ Yesus lepa nai. 25 Ina ukoʹ diaʹ ca bayaʹ katuk ke dina badaʹ mia: “Un meʹ taʹan Tuhan.” Dau Tumas neng ida: “Abeʹ keʹ ke ngelan buk keʹ abeʹ un taʹan uban ilak tapek neng ujoʹ o, ngan abeʹ un naʹ buaʹ ujoʹ keʹ neng ilak ina, ngan naʹ ujoʹ keʹ pe neng ilak tegahang nge.” 26 Ca mingku uʹo ina, diaʹ bayaʹ katuk dina tai pepeng dalem amin laʹa. Tumas pe un ngan nte. Tegoʹ ina petem palet pe pamen. Un sepuʹo kenai Yesus nekejeng kahang ida ngan kuma: “Denaʹ ne tawai hem.” 27 Un dau ue neng Tumas: “Naʹ buaʹ ujoʹ koʹ ne kini, ngan naʹat seʹ ujoʹ keʹ ne. Uʹo ina mejo ujoʹ koʹ ne ngan naʹ a kaʹ tegahang ngkeʹ. Ayen ncoʹ kawaʹ laʹa, bang ngelan ne.” 28 Dau Tumas mipa ia: “Dui, iaʹ Tuhan nceʹ, ngan Allah heʹ.” 29 Dau Yesus neng ia: “Un ncoʹ ngelan uban ncoʹ lepa taʹan akeʹ mo? Bioʹ ne pengebangen kelunan diaʹ ngelan petem nte abeʹ un taʹan akeʹ.”
Iaʹ tuman ban Kitap ini
30 Kadoʹ pe puyan nyingan diaʹ ca Yesus lepa ti kata diaʹ bayaʹ katuk ke, iaʹ abeʹ un senurat dalem Kitap ini. 31 Un sepuʹo dini diaʹ lepa senurat apan ncem ke ngelan Yesus iaʹ atek Keristus iaʹ ngkang pungu udip, ngan iaʹ atek Anak Allah. Ngan kuʹun pengelan ncem ini pe ikem ke alaʹ udip dalem ngadan ne.
Yesus nai luhaʹ kata tujoʹ usa diaʹ bayaʹ katuk ke
1 Lepa ini, Yesus nai luhaʹ kata diaʹ bayaʹ katuk ke ca liwai laʹa kaʹ leteng Tiberias. Pekini ne puyan ne ti. 2 Simun Peterus, Tumas (iaʹ dulu pisiu pepit), Natanil ca iaʹ nai cen lepoʹ Kana tanaʹ Galilia, dua usa diaʹ anak Sapdi, ngan dua usa diaʹ ca diaʹ bayaʹ katuk Yesus, un pemung kaʹ ina. 3 Un dau Simun Peterus neng diaʹ ca: “Tai lemukat ceʹ ne.” Kun nte badaʹ mia: “Nai meʹ ngan ncoʹ ʹo.” Ina ukoʹ de tai kalut. Un sepuʹo putung alem ina pabeʹ ca inu pe ida abeʹ un alaʹ. 4 Tegoʹ kenai tau nyelat, Yesus nekejeng kaʹ sada bahi sungai. Abeʹ diaʹ bayaʹ katuk ke dina tisen ina Yesus. 5 Ina ukoʹ o kuma neng ida: “Anak, un ncem telu alaʹ atuk mo?” Dau re mipa: “Naʹun, pabeʹ ca inu pe ameʹ abeʹ un alaʹ.” 6 Un dau ue neng ida: “Muno pukat cem ne tahaʹ taʹu alut cem, ina le ikem ke alaʹ ʹo.” Penco re muno pukat de kaʹ sungai, abeʹ ne ida senteng menat te uleʹ laʹa, uban kadoʹ aleʹ atuk ida alaʹ kidi. 7 Un dau ca mida diaʹ bayaʹ katuk ke, iaʹ Yesus malaʹ idai, kuma neng Peterus: “Tuhan ne ini.” Tegoʹ Simun Peterus kenahan dau ina Tuhan, kun ne negahat tempan sapai ie neng ia, uban ne ngelusa, penco petuhun kaʹ dalem sungai. 8 Un palai diaʹ bayaʹ katuk dina nai man alut, menat pukat ina sangan kuʹun atuk. Abeʹ de un kumpin coʹ cen tanaʹ. Kihoʹ kihoʹ lema puloʹ depa le pengecoʹ o. 9 Tegoʹ de abeʹ kaʹ sada bahi, ida taʹan diseʹ baha luten. Un pe atuk ngan ruti kempau ue. 10 Un dau Yesus neng ida: “Ngkin palai atuk diaʹ tumpak ikem alaʹ dina.” 11 Penco ketai Simun Peterus kaʹ alut, menat pukat ina kusun tanaʹ sangan kuʹun atuk lataʹ. Pengekadoʹ atuk dina ca ato lema puloʹ telu re pemung. Naʹ pe ida kadoʹ ne, abeʹ pe pukat ina un berit. 12 Dau Yesus neng ida: “Nai ne uman.” Pabeʹ ca me diaʹ bayaʹ katuk dina pe abeʹ un tempa lemutu ia kuma ha: “Aheʹ koʹ ne?” uban nte tisen ia Tuhan. 13 Ina ukoʹ Yesus tai alaʹ ruti, penco naʹ mida. Pekina pe puyan ne neng atuk dina. 14 Ini ne iaʹ ketelu liwai Yesus nai luhaʹ kata diaʹ bayaʹ katuk ke, uʹo lepa ha nai beteʹ cen patai are.
Yesus ngan Peterus
15 Uʹo lepa re uman, dau Yesus neng Simun Peterus: “Simun anak Yaya, un ncoʹ malaʹ akeʹ lapa neng ʹo ida dini mo?” Dau Peterus mipa ha: “Ahaʹ Tuhan, tisen te ikoʹ akeʹ malaʹ neng ikoʹ.” Dau Yesus neng ia: “Nubo tiga le anak dumba heʹ ne.” 16 Kedua liwai Yesus kuma neng ia: “Simun anak Yaya, un ncoʹ malaʹ akeʹ mo?” Dau Peterus mipa ia: “Ahaʹ Tuhan, tisen te ikoʹ akeʹ malaʹ neng ikoʹ.” Un dau Yesus neng ia: “Nubo tiga le dumba heʹ ne.” 17 Ketelu liwai Yesus kuma ha: “Simun anak Yaya, un ncoʹ malaʹ akeʹ mo?” Tai bahat ne tekaʹ kimet Peterus uban Yesus lemutu ia telu liwai: “Un ncoʹ malaʹ akeʹ mo?” ngan Peterus kuma neng ia: “Tuhan, tisen mung ngkoʹ, tisen te ikoʹ akeʹ malaʹ neng ikoʹ.” Dau Yesus neng ia: “Nubo tiga le dumba heʹ ne. 18 Lan dau heʹ mikoʹ, dalau hoʹ iʹut te, malai pe ikoʹ negahat seketeng neng aking ngkoʹ, ngan tai kempi pengubaʹ koʹ ke tai. Un sepuʹo tegoʹ koʹ ke mukun ʹo, ikoʹ ke mejo lengen ncoʹ, ngan dulu diaʹ ca iaʹ ke lemeka ha, ngan tai ngkin ikoʹ kempi hoʹ abeʹ un ubaʹ ke tai.” 19 (Man isiu ini Yesus badaʹ kumpin puyan Peterus ke matai ngan ke nyerema peniga palaʹ Allah.) Sulo dau Yesus neng ia: “Nai ne bayaʹ akeʹ.”
Yesus ngan ca laki iaʹ uban bayaʹ ia
20 Kun Peterus pupa, penco taʹan ca laki iaʹ bayaʹ katuk Yesus, ngan ia iaʹ Yesus malaʹ idai, ia iaʹ pesen kata Yesus dalau re uman are, ngan lemutu ia: “Tuhan, aheʹ iaʹ ke mencai ikoʹ me bunoʹ koʹ ʹo?” 21 Tegoʹ Peterus taʹan ia, un dau ue pisiu neng Yesus: “Tuhan, kumpin puyan laki ini?” 22 Dau Yesus mipa ia: “Buk keʹ ubaʹ ia mudip pa kenai heʹ laʹa ʹo, mele inu pe ia pekina neng ikoʹ? Nai ne ikoʹ bayaʹ akeʹ.” 23 Ina ukoʹ denga ina tai purat ne kahang ida diaʹ bayaʹ Yesus ne kuma laki ini abeʹ un ke matai. Un sepuʹo abeʹ Yesus un kuma ia abeʹ un ke matai. Dau ue: “Buk keʹ ubaʹ ia mudip pa kenai heʹ laʹa ʹo, mele inu pe ia pekina neng ikoʹ?” 24 Ia ne laki iaʹ lepa badaʹ puyan dini, ngan ia lete iaʹ nyurat te, ngan tisen te ilu mung ban iaʹ ia badaʹ ina lan.
Iaʹ pengekuʹo isiu
25 Kadoʹ pemuhan diaʹ ca Yesus lepa ti. Buk ketoʹ dina lepa senurat tahaʹ ca tahaʹ ca, akeʹ ngihoʹ ketoʹ usun tanaʹ ini abeʹ un senteng ukoʹ Kitap diaʹ ke senurat dina. 2