Pa'pau Haji'na Isa Masihi nunaukiria Yahya
Pa'pau anjari rupa tau iamintu Isa
1 Nampa ri uru-uruna narie' memangmo nuniare'a Pa'pau. Na injo Pa'paua sipa'rurungangi Alla-taala na ia to'ji Alla-taala. 2 Iami nampa ri uru-uruna nasipa'rurungang Alla-taala. 3 Iami nipake ampanjari iangase'-ngase'na, na punna talia ia, anre' kale anjari battu ri sikuntuna numaenga nipanjari. 4 Ri iami rie' tallasa na injo tallasaya pannyinarii ri sesena rupa tau. 5 Pannyinariami a'sinara ri sassanga na anre' na'kulle nipa'rang ri sassanga. 6 Rie'mo se're tau arengna Yahya nunisuro battu ri Alla-taala. 7 Iami mae la'sabbi ri sesena pannyinaria sollanna iangase' tau a'tappa' gara-gara ia. 8 Injoka ia taliapi pannyinaria injo, mingka a'sabbinaja ri sesena. 9 Naia pannyinari nutoje'a nulansinarii ta'se'rea rupa tau larie'mi ri linoa. 10 Sintoje'na pannyinaria injo rie' memangmi ri linoa, na manna mamo iami nipapanjari lino, anre' kaleja nibateii. 11 Manna kampongna to'ji namangei anre'ja nitarima ri singkampongna. 12 Mingka sikuntu tau nuntarimayai, iamintu nutappa'a ri arengna, nidahu katojekang anjari ana' ri Alla-taala, 13 nunianakang talia battu ri rara na talia todo' battu ri massing a'ra' batang kale na talia pole battu ri kacinnaangna buru'ne, iajia nubattu ri Alla-taala. 14 Injo Pa'paua anjari rupa tau toje'mi, na maengmi a'bora ri tangnga-tangngata, nakiittemo kalompoangna iamintu kalompoangna Ana' tunggala nubattu ri Ammanna panno pa'kullena na kannabaangna. 15 Maengmi napa'sabbiang Yahya ri sesena na napa'pasangang angkua: “Iami inni kujojjokang ri angkuaku: ‘Larie'mi mae nuntolayaa, nurioloang anjari naia inakke, nasaba' ri tingang rie'ku, rie' memangmi ia.’” 16 Na battu ri kasangkakangna na ki'tarima ngase' toje' pa'kulle sisambe pa'kulle. 17 Kamuai injo nasaba' hukkung agamaya Musami nipapalante, naia to' isse' pa'kullea na kannabaanga Isa Masihimi nisuro ampanjarii. 18 Tingang maeng rie' tau angngittei Alla-taala ruanna Ana' tunggala'na nusipa'rurunganga, na iami ampa'piitteangi kariekangna Ammanna.
Kasabbiangna Yahya patanrai ere
19 Na innimi sabbina Yahya ri nimangeinna ri sikuntu pungkaha imang na tau Lewi nunisuroa ri pungkaha Yahudi nuri Yerusalem langkuta'nangi angkua: “Ie', inaiki gitte?” 20 Angngakui na anre' na'sassala iajia naakui toje'i angkua: “Ie', taliapa inakke Masihia.” 21 Alleang nikuta'nang poleangi: “Punna kamuai injo, apa pale'? Ie', maka igitte nabbi Ilyas?” A'pihalimi: “Ie', taliaa.” Nikuta'nangmi isse': “Maka igittemi nabbi nulabattua?” A'pihalimi: “Ie', talia to'pa.” 22 Alleang nakua ngase'mo: “Ie', inaiki pale', sollangku a'kulle ampauangi tau nunsuroaa mae? Apa kiare' ri sesena kalenta?” 23 A'pihalimi situru' pa'pauna nabbi Yesaya angkua: “Inakkemi sa'ra nu'patibong-tibonga ri pa'kasino-sinoanga angkua: ‘Pallambusangmi annorangna Puanga.’” 24 Rie' sikuntu tau nunisuroa ri tau Farisi 25 a'kuta'nangmi angkua: “Punna taliaki gitte Masihi iareka nabbi Ilyas iareka pole nabbi nulabattua, angnguraki pale' na kinnanrai ere?” 26 A'pihalimi Yahya angkua: “Naia inakke, ereji kupake antanraiki, mingka rie' a'bora tangnga ri sikuntuta intu nutala kibatei, 27 iami antolaa nurioloang anjari naia inakke. Naia ri seseku mangku anjari ata nunghungkarangi tulu' sandala'na, tala sirattanga.” 28 Inni anjari ri Betania ba'leangna kaloro Yordan nunapannanraia Yahya.
Isa Ana' Bimbala battu ri Alla-taala
29 Takkana ammuko naittena Isa ammaeii na nakuamo Yahya: “Ittemi, anjoke'mi mae Ana' Bimbala'na Alla-taala numpa'tanre'i dorakanna rupa taua. 30 Iami inni kujojjokang ri angkuaku ‘Larie'i mae antolaa nurioloang anjari naia inakke, nasaba' rie' memangmi ia ri tingang rie'kupa.’ 31 Manna inakke anre' to'ja kubateii ri bungasa'na, mingka sollanna nipa'lonara mange ri tau Israil, gara-gara iami injo na kumaeng mae annanrai na ere.” 32 A'sabbimi pole Yahya angkua: “Maengi kuitte Sumanga'na Alla-taala turung pa'pada janga-janga battu ri langi'a na'lerang ri ia. 33 Inakke tala kubateii ia; kedde' anre' napauanga nunsuroaa mae lannanrai na ere angkua: ‘Naia tau nunuittea napannurungi Sumanga' na a'danrang kunjo, iami lannanrai na Sumanga' Ci'nonga.’” 34 Nakuamo isse' Yahya: “Injomi maeng kuitte nakke na kusabbiangmo angkua iami injo Ana' Alla-taala.”
Papinahangna Isa nubungasaya
35 Takkana ammuko rie'i isse' Yahya sipammentengang rua papinahangna. 36 Na ri naittena Isa allallo nakuamo: “Ittemi, anjoke'mi mange Ana' Bimbala'na Alla-taala!” 37 Ri nalangngere'na papinahangna nuruaya nunakuanganga, tappa' napinahangi Isa. 38 Nidallekimi ri Isa, ka niittei amminahang nampa nikuta'nang: “Apa nuhoja?” A'pihalimi lapung tau rua: “Rabbi,” (nibattuangi guru) “ie', antere'ki ammantang?” 39 Nakuamo Isa: “Maemako na nuittei.” Amminahang toje'mi na naittemo pammantangangna, na injo alloa sipammantangangi. Naia injo hattua kulle kapang tette' appa'. 40 Sitau battu ri rua nullangngereai pa'pauna Yahya nampa amminahang ri Isa, iamintu Andreas, kakanna Simon Petrus. 41 Andreas ampihuntu'-huntulii rolo' Simon arinna to'ji nampa napangkuai: “Kuhuntulangmi Masihi” (nuniare'a tunipilea). 42 Na naurangmi arinna mange ri Isa. Ninyannyangmi ri Isa na nipangkuai: “Ikau Simon, ana'na Yunus. Ikau laniarengko Kefas” (battuangna Petrus). 43 Takkana ammuko napa'tappu'mi Isa la'lampa ri tana Galilea na nahuntului Filipus nanapangkuaimo: “Pinahangma!” 44 Injo Filipus tau Betsaidai, kampongna todo' Andreas na Petrus. 45 Nahuntulumi Filipus iNatanael na napangkuai: “Kuhuntulumi tau nunaukiria Musa ri kitta' hukkung agamaya na battu pole ri pa'pauna iangase' nabbi, iamintu Isa, ana'na Yusuf, tubattu ri Nazaret.” 46 Nakuamo Natanael: “Maka rie' a'kulleangna nuhaji' battu ri Nazaret?” Nipangkuaimi ri Filipus: “Maemako na nuittei!” 47 Naittemi Isa iNatanael ammangeii, nampa nakua ri sesena: “Ittemi, innimi tau Israil ma'tungka, tau nuanre' pa'rupa ruaangna!” 48 A'kuta'nangmi Natanael: “Ie', lanri antere'na pakua na kiisse'a?” Nipihalimi ri Isa: “Ri tingang nakeo'nu Filipus kuitteko ri tujunna poko' kaju araya.” 49 Nakuamo Natanael: “Rabbi, ie', igittemi Ana' Alla-taala, igittemi karaengna tau Israil!” 50 A'pihalimi Isa angkua: “Gara-gara angkuaku ri kau: ‘Kuitteko ri tujunna poko' kaju araya,’ na nutappa'a? Langngitteko nulompoangang naia inni.” 51 Nampa pole nakua: “Tojeng-tojeng kukua ri kau ngase': mulai kamunnina lanuittei langi'a ta'timba' na maleka'na Alla-taala nai' naung ammaeia inakke Ana' Tau.”
Ere anjari anggoro ri pa'buntingang ri Kana
1 Ri takkana embara rie'mo pa'buntingang ri kampong Kana nuri tana Galilea, na kunjoi anrongna Isa. 2 Nipasikeo'mi Isa na papinahangna todo' ri pa'buntinganga injo. 3 Na ri kalabbusang anggoro'namo nipangkuaimi Isa ri anrongna: “Kalabbusang inungangmi kodong.” 4 Nakuamo Isa: “Apamo kiminasai ri nakke, anrongku? Anre'pa narapi'i hattungku.” 5 Manna mamo kamuai injo nakuaji anrongna ri tu'patalaya: “Apa-apaji napauangko gaukangmi kamua injo!” 6 Rie' annang gumbang batu kunjo nunipa'sadia bajung pa'bissa-bissa situru' ada'na tau Yahudi, na a'kulle nimonei ta'se'rea rie' ruang embere lompo na rie' tallu. 7 Nakuamo Isa ri tu'patalaya injo: “Pannoi ngase'mi ere intu gumbanga.” Nabonei toje'mi aggenna panno. 8 Alleang nakuamo pole Isa: “Kunni-kunnina annyanru'mako sikiddi nampa nuerangangi nungkatojekiai pa'jagaanga.” Nanierangang toje'mo. 9 Napisa'ringimi patanna jaga ere numaenga nipanjari anggoro nanu anre' kale naisse'i kabattuangna, tu'patalayaji nunnyanru'a angngisse'i. Alleang nakeo'mi bunting buru'nea 10 nanapangkuai: “Massing-massing tau a'patala anggoro nuhaji'a rolo', somperepi taua angnginung nampa a'patala nukurang haji'a. Mingka bateta gitte anggoro haji' kinanro na nampami kipatala.” 11 Nunagaukanga Isa sumpae' ri kampong Kana nuri Galilea injomi tanra bungasa'na na kunjomi napa'piitteang kalompoangna, alleangna nitappa'i ia ri tumpinahangai. 12 Ri maengna injo sipa'lampa-naungangmi Isa na anrongna na kabusu arinna na tumpinahangai pole ri kampong Kapernaum na kunjo mange ammantang-mantang sikurang alloang.
Isa antangkasii rambangna balla' Alla-taala
13 Ri a'biringnamo allo lompo Pallingkainna tau Yahudi na'lampa nai' Isa ri kota Yerusalem. 14 Na ri kunjona mange nahuntulangmi ri rambangna balla' Alla-taala tu'balu' capi na bimbala na janga-janga na rie' pole tau a'cidong kunjo a'pa'sambe doi'. 15 A'bajumi Isa pa'peppe' battu ri tulu' nampa nausirii iangase'na battu ri rambangna antama' bimbala na capi, na napakahurui doi'na papa'sambea na napahuli'ngasa mejangna. 16 Nanapangkuai padanggang janga-jangaya: “Pansulu' ngase'mi intu, jako panjarii balla'na Ammangku pa'pasarang.” 17 Alleang taru'rangimi papinahangna angkua rie' ta'ukiri: “Pangngaingku ri balla'ta lampa'tappu'i nyahaku.” 18 Pungkaha Yahudi angngehai Isa nangkua: “Tanra apa kipiitteanga lampa'toje'i panggaukangta injo.” 19 A'pihalimi Isa: “Kipakaruttungi inni balla' Alla-taala na lakupaentengi amminro ilalang tallung alloji.” 20 Alleang angkuai pole tau Yahudi: “Patang pulomi angngannang taung nipaenteng inni balla'a nanu igitte antuke' lakipaentengi ilalang tallung alloji?” 21 Injoka nunakuanganga Isa balla' Alla-taala iamintu batang kalenna to'ji. 22 Na ri maengnamo a'tallasa amminro battu ri sikuntuna tau mate, nampami taru'rangi papinahangna angkua suang minto'i nakua kamua injo, alleang tappa' ngase'mi ri kitta' ci'nonga na ri sesena pole nunakuaya Isa. 23 Kabenranna Isa kunjo ri Yerusalem na narapi'i allo lompo Pallingkai, na battu ri sikuntuna tau nungngu'rangia injo, lohe tau a'tappa' ri arengna nasaba' naittemi tanra nusuanga nagaukang. 24 Mingka ia anre' na napa'pirannuangangi kalenna ri iangase'na, lanri naisse'na kariekangna ngase'. 25 Nampa pole lanri anre'naja naparallu tau ampa'sabbiangi ri sesena rupa tau, nasaba' iami angngisse'i bonena atinna.
Isa siurang Nikodemus
1 Narie'mo se're tau Farisi arengna iNikodemus pa'toa agama tuYahudi. 2 Namangeimi Isa ri bangngina nangkua: “O rabbi, ie', inakke ngase' angngisse'mi angkua igitte rie' mae anjari guru nunisuro ri Alla-taala, nasaba' manna sitau tala rie' a'kulle anggaukang tanra nukigaukanga gitte, ruanna Alla-taala anrurungangi.” 3 A'pihalimi Isa angkua: “Tojeng-tojeng kukua ri gitte: punna rie' tau anre' nianakang poleangi, anre' na'kulle angngittei pa'karaengangna Alla-taala.” 4 A'kuta'nangmi Nikodemus: “Antere'i pakua a'kulle nianakang taua punna toami? Maka a'kullei antama' poleang ri battangna anrongna nampa nianakang isse'?” 5 A'pihalimi Isa: “Tojeng-tojeng kukua ri gitte: punna anre' nianakangi taua ri ere na Sumanga'na Alla-taala, anre' na'kulle antama' ri pa'karaengangna Alla-taala. 6 Nunianakanga ri batang kale, batang kale to'ji, na nunianakanga ri Sumanga'a, sumanga' minto'i. 7 Jakimo bangngaki punna kupangkuaiki kamua inni: igitte ngase' anre' natangnga nianakang poleangta. 8 Ammiri'i anginga ri pammolona to'ji, na kilangngere sa'ranna, nanu anre' kiisse'i antere'i battu iareka lantere'i mae. Kamua to'mi injo kariekangna tau nunianakanga ri Sumanga'na Alla-taala.” 9 A'pihalimi Nikodemus angkua: “Antere'i pakua a'kulle anjari palakara injo?” 10 Nakuamo Isa: “Igittemi guru lompo ri Israil, na anre' pale' kiisse'i injo? 11 Tojeng-tojeng kukua ri gitte: inakke ngase' a'bicaraa ri sesena nukuisse'a na ku'sabbi ri sesena numaenga kuitte, mingka igitte ngase' anre' kitarimai kasabbiangku. 12 Pungku a'bicara ri sesena palakara lino na anre' kitappa', ante'i pakua a'kulle kitappa' pungku a'bicara ri sesena palakara suruga? 13 Na manna sitau tala rie' maeng nai' ri suruga, ruanna iami nunnurunga battu kunjo, iamintu inakke Ana' Tau nurieki to'ja ri suruga. 14 Pa'pada to'ji Musa a'palerang patung ulara kunjo ri pa'kasino-sinoang, kamua to'ma injo inakke Ana' Tau anre' natangnga nipairateku, 15 sollanna massing-massing tau nuntappa'a tala ancurui iajia ammuntului tallasa tala a'tappu'.” 16 Nasaba' kamuami injo lompona pammettana Alla-taala ri rupa taua ri linoa inni, alleangna napa'dahuangi mae Ana' tunggala'na sollanna massing-massing tau nuntappa'i anre' naancuru, iajia ammuntului tallasa tala a'tappu'. 17 Saba'na na nasuroi Ana'na Alla-taala mae ri linoa talia langhukkung rupa tau, iajia sollanna lanri ia napakasalama'i linoa. 18 Tau nuntappa'ai, anre' na lanihukkung; na tau nuandaya antappa'i, tappu'mi hukkungangna, nasaba' anre' namaeng a'tappa' ri arengna Ana' tunggala'na Alla-taala. 19 Innimi hukkungangna, iamintu rie'mi sinaraya mae ri linoa; manna kamuai injo nangaiangi rupa taua sassanga naia sinaraya, lanri kodina panggaukangna. 20 Nasaba' massing-massing tu'gau' kodi, nakaharisii sinaraya na andai namangei, sollanna anre' na'lonara panggaukangna. 21 Mingka tu'tallasaya situru' kannabaang ia ammangeii sinaraya, sollanna a'lonara angkua panggaukangna nagaukang ri Alla-taala.
Kasabbiangna Yahya ri sesena Isa
22 Ri maengna injo sipa'lampa-naungangmi Isa papinahangna ri tana Yudea na sipammantang-mantangang kunjo mange na annanrai ere pole. 23 Naia Yahya annanrai ere to'i ri Ainon ri ampi'na kampong Salim, nasaba' kunjo mange lohe ere, alleangna mange ngase'i taua kunjo a'polo'-polosang lanitanrai. 24 Nasaba' injo hattua anre'pa nipantama'i Yahya ri tarungku. 25 Alleang a'compa'mi pasibeserang ri sikuntuna papinahangna Yahya na se're tau Yahudi ri sesena ada' pa'pakaci'nongang. 26 Namangemo ri Yahya na angkua: “O rabbi, ie', naia tau numaenga sipambuakangki ri ba'leangna kaloro Yordan na nuri sesena ia maengki a'sabbi, ia annanrai to'i na iangase' tau ammangeii.” 27 A'pihalimi Yahya: “Tala rie' manna sitau a'kulle ampangngalleangi kalenna ruanna nunidahuang battu ri suruga. 28 Ikau ngase'mi a'kulle anjari sabbi ri numaenga kukua: ‘Inakke taliapa Masihia,’ iajia nisuroa amparioloii. 29 Bunting buru'neami ampupatai bunting bahinea, mingka parenreng bunting buru'nea ammenteng kaleji na a'pina'na'. Sanna' suara'na lanri nalangngere'na sa'ranna buntinga injo. Kamuami injo kasuarangku nasangka'mo. 30 Ia anre' natangnga pila' lompona na inakke pila' caddia. 31 Ia nunnurunga battu rate iami rateangna iangase'-ngase'na. Tubattua ri linoa, tau linoji na a'bicara palakara lino. Ia nunnurunga battu ri suruga iami iangase'-ngase'na. 32 Na numaenga naitte na nalangngere, iaji nasabbiang, injoka manna sitau tala rie' antarimai kasabbiangna. 33 Naia tuntarimayai kasabbiangna injo angngassaangmi angkua Alla-taalami annaba. 34 Kamuami injo nasaba' tunasuroa mae Alla-taala iami ampalantei pa'pauna, ka Alla-taalami andahuangi Sumanga'na na anre' anggana. 35 Nipettai Ana'a ri Ammanna na nipa'pirannuangangmo iangase'-ngase'na ri limanna. 36 Tutappa'a ri Ana'a ammuntului tallasa tala a'tappu', iajia tutala tunru'a ri Ana'a, anre' nalangngitte tallasa, pa'kalarronaji Alla-taala a'tarrusu rie' ri ia.”
Isa na bahine Samaria
1-3 Nalangngeremi tau Farisia angkua katambaang papinahangi Isa na annanrai loheang naia Yahya, manna mamo talia Isa to'ji annanrai, iajia papinahangnami. Ri naisse'namo kamua injo Puanga nasalaimi tana Yudea na amminro mange ri tana Galilea. 4 Na anre' natangnga numalona ri tana Samaria. 5 Alleang lantei ri se're pammantangang ri Samaria nuniarenga Sikhar ri ampi'na tana nunidahuangai Yusuf riolo ri Yakub ammanna. 6 Kunjoi buhungna Yakub, na gara-gara kamuana injo mangngangna Isa a'dakka, na'cidongmo kunjo ri batana buhunga. Injo hattua kulle kapang tette' sampuloi anrua ri tangnga alloa 7 narie' mange sitau bahine Samaria lannao' ere. Nipangkuaimi ri Isa: “Dahu saa ere inungta.” ( 8 Kamuai injo ka papinahangna a'lampai lammalli kanreang ri tau kunjoa mange.) 9 Nakuamo lapung bahine Samaria injo: “Ie', ante'i pakua igitte tau Yahudi angngera ere ri nakke bahine Samaria?” (Kamuai injo ka tau Yahudi andai sisambung tau Samaria. ) 10 A'pihalimi Isa: “Kedde' kiisse'i pa'dahuna Alla-taala na inaii numpangngeraiki angkua: ‘Dahu saa ere inungta,’ ma'nassa igitte lampangngeraii na nadahuki ere nu'pa'tallasa.” 11 Nakuamo injo bahinea: “Ie', anre' tao'ta, puang, na inni buhunga sanna' lantangna; punna kamuai injo, battu ri antere' to'ki lammuntulu ere nu'pa'tallasaya injo? 12 Ma'nassa anre'na kilompoang naia bohe loheku Yakub numpimanakanga inni buhunga na numaeng to'ji angnginung battu kunre siurang ana'na na olo'-olo'na pole?” 13 Nakuamo Isa: “Massing-massing tungnginungai inni erea latirereiji, 14 injoka tungnginungai ere nulakudahuangai, anre' kalemo nalatirere samalling-mallingna. Nanu ere nulakudahuangai lanjarimi timbusu ri batang kalenna, nullumpaimo naung su'rung ri tallasa tala a'tappu'a.” 15 Nakuamo injo bahinea: “Ie', kisareangma injo erea, puang, sollangku tala tireremo, na minjomo kumaei kunre lannao' ere.” 16 Nakuamo Isa: “A'lampamaki keo'i buru'nenta, na kinampa amminro mae kunre.” 17 A'pihalimi injo bahinea angkua: “Ie', anre' buru'nengku.” Nakuamo Isa: “Annaba toje'i pa'pauta angkua: ‘Anre' buru'nengku.’ 18 Pakunni, maengki a'buru'ne pillimang, na nurie'a ri gitte kunni-kunnina talia buru'nenta. Annaba toje'i pa'pauta sumpae'.” 19 Nakuamo injo bahinea: “Ie', kamunnina kuisse'mi, puang, angkua igitte sitauki nabbi. 20 Bohe loheku annyombai ri bulu' kunrea, mingka igitte tau Yahudi kikua anre' natangnga kunjota ri Yerusalem annyomba.” 21 Nipangkuaimi ri Isa: “E bahine, tappa'ma angkua larie' hattunna na lakisombai Ammanta taliamo ri bulu' kunrea mae na talia to'mo ri Yerusalem. 22 Naia igitte ngase' tuSamaria, kisombai nutala kiisse'a, naia inakke tau Yahudi kusombai nukuisse'a, kamuai injo ka kasalamakanga battui ri tau Yahudi. 23 Manna mamo, larie' hattunna na sintoje'na narapi'mi kunni-kunni angkua nuannabaya batena annyomba lanasombai Ammanta battu ri sumanga'na situru' kannabaang; nasaba' tunnyomba kamuaya injo nahojai toje' Ammanta. 24 Alla-taala sumanga'i na tunsombayai anre' natangnga nasombana ri sumanga'na situru' kannabaanga.” 25 A'pihalimi lapung bahine: “Ie', kuisse'mi angkua larie'i Masihi” (iamintu tunipilea); “sampang rie'mi, lanapa'pauangmi iangase'-ngase'na ri gitte mae.” 26 Alleang nipangkuaimi ri Isa: “Inakkemi ia nu'bica'-bicaraya ri gitte.” 27 Ri injomi hattua namminro papinahangna na abangnga'mi ri naittena sipa'bica'-bicara bahine. Manna mamo kamuai injo, tala rie'ja a'kuta'nang: “Apa pa'tujungta?” iareka: “Angngurai na ki'bica'-bicara ri ia?” 28 Natappa' nasalaimo gori-gorina lapung bahine na'lampa ri kamponga ampa'pauangi tau kunjoa angkua: 29 “Maeko ittei! Rie' se're tau ampauanga iangase' numaenga kugaukang. Maka tangnga ia iami Masihia?” 30 Na'lampa ansulu' ngase'mo taua lammangeii Isa. 31 Kabenranna injo na nikeokii ri papinahangna angkua: “O rabbi, ie', maemaki angnganre.” 32 Mingka nakuamo: “Rie' kanreang ri nakke nutala nuisse' kau.” 33 Gara-gara injomi nasikuta'nang papinahangna: “Maka rie' ampangngerangangi kanreang?” 34 Nipangkuaimi ri Isa: “Kanreangku iamintu anggaukangi a'ra'na nunsuroaa mae na ampa'maengi jamaangna. 35 Tangnga ia ikau to'ji suang angkua: ‘Ri patang bulangapi na narapi'i pa'katto’? Na toje' kupangkuaijako: ittemi ri ampi'nu na nunyannyangmo, adidimi kattoanga na kattoangnami. 36 Kamunnina memangmo na natarimai rere songo'na pakattoa na a'pa'se're pole bua bajung ri tallasa tala a'tappu', sollanna sikasuarangi palamung na pakatto. 37 Kamuami injo naannabamo pangngebaraya inni: ‘Rie' a'lamung na rie' a'katto.’ 38 Naia inakke kusuroko a'lampa a'katto ri nutala maeng nukaresoi kau; tau maraeng angkaresoii na ikau angkattoi karesoangna.” 39 Naia tau Samaria nukunjoa mange ri kamponga lohei a'tappa' ri Isa, gara-gara pa'pauna injo bahinea nungngakuii angkua: “Napauang ngase'a numaenga kugaukang.” 40 Na ri lantenamo ri Isa, naeraimi sollanna ammantang-mantangi rolo' kunjo. Nammantang toje'mo kunjo ruang allo. 41 Lanri kamuanami injo na loheangi isse' tau a'tappa' gara-gara pa'pauna to'ji Isa, 42 alleang angkuami iangase'na ri lapung bahine: “A'tappa' ngase'ma, mingka taliamo gara-gara pa'paunu kau, nasaba' inakke ngase' to'mo allangngerei na kuisse'mi angkua ia minto'mi injo Masihia iamintu papakasalama' rupa tau.” 43 Ri maengnamo ruang allo ta'salami Isa battu kunjo na a'lampa ri Galilea. 44 Nasaba' ia to'ji maeng a'sabbi angkua sitau nabbi anre' nipakatau ri sikuntuna singkampongna. 45 Na ri lantena ri Galilea niruppai haji'i ri tau kunjoa lanri maengnamo naitte ngase' nunagaukanga ri Yerusalem ri pangngu'rangiang Pallingkaia injo, ka iangase'na rie' to'i nai' kunjo ri pa'roa'-roakanga.
Katappakangna pungkaha kompi
46 Na amminro mangemi isse' iIsa ri Kana nuri tana Galilea, kua'mi injo mange maeng amminra ere anjari anggoro. Na kunjomi rie' sitau pajamana karaeng nugarring ana'na ri Kapernaum. 47 Ri nalangngere'na angkua rie'mi Isa ri Galilea battu ri tana Yudea, namangeimi na naera sanna' sollanna naungi nipakagassingang ana'na nasaba' lamatei kodong. 48 Alleang nipangkuaimi ri Isa: “Kedde' anre' ngase' kingngitte tanra na pa'pahangka anre' kale kitappa'.” 49 A'pihalimi injo pajamana karaenga angkua: “Puang, ie', naung saki kodong ri anre'napa namate ana'ku.” 50 Nipangkuaimi ri Isa: “A'tallasaji intu ana'ta, amminromaki!” Tappa' toje'i injo taua ri pa'pauna Isa, alleangna a'lampa. 51 A'tangnga annorangiji ri ammolo naungnamo na battu sikuntu atanna ampauangi angkua: “A'tallasaji ana'ta.” 52 Alleang a'kuta'nangmi ri sikuntuna tette' sikura nata'pinra gassing. A'pihalimi: “Ie', sikarie' ri tette' se'rena nalannya' bambangna.” 53 Iami injo na taru'rangi lapung amma angkua ri hattu injomi na nipangkuaii ri Isa: “A'tallasaji ana'ta.” Alleangna a'tappa'mi a'rurung iangase' bijanna. 54 Injomi tanra maka rua nunagaukanga isse' Isa ri Galilea ri battuna ri tana Yudea.
Isa a'pakagassing tau ri panrio-rioang Betesda
1 Ri maengna injo narapi'mi allo lompona tau Yahudi ri Yerusalem, na a'lampa nai' to'mi iIsa kunjo. 2 Kunjo mange ri ampi'na timuang Bimbala rie' panrio-rioang, basa Ibranina “Betesda,” narie' lima pa'la'-pa'la'langangna. 3 Kunjomi lohe ladda' tugarring ammene: rie' tuhuta na tukeppang na tupeso', nuntajangi geo'na ere panrio-rioanga injo. 4 Kamuai injo ka sikali-sikali nanaung maleka' ri panrio-rioanga angkaluerei erea; na tau nubungasaya naung ri panrio-rioanga ri maengnamo ta'kaluere erea gassingi manna kale garring angngura. 5 Na kunjo mange rie' se're tau tallung pulomi angkarua taung mallingna garring. 6 Ri naittena Isa lapung tau ammene kunjo na naisse'i pole angkua mallingmi kamua injo kodong, nakuta'nangmi: “Maka a'ra'ki gassing?” 7 A'pihalimi lapung tau garring injo: “Ie', puang, tala rie' tau ampanaunga kunjo ri panrio-rioanga sampang geo'mi erena, nampa pole ilalangku ammolo mange nakke, tappa' rie' tau maraeng naung amparioloia.” 8 Nipangkuaimi ri Isa: “A'kinrengmaki nakiangka'mo landang-landangta nampa ki'dakkamo.” 9 Injo memang hattua nagassing lapung tau nampa naangka'i landang-landangna na'dakka. Na injo alloa allo sattui. 10 Gara-gara injo na nigaratta'i tau beru nipakagassinga injo ri pungkahana tau Yahudi: “Allo sattui inni alloa, anre' nama'ring nuangka' landang-landangnu.” 11 Mingka a'pihalii: “Ie', tau numpakagassinga iami ampangkuaia: ‘Angka'mi landang-landangta na ki'dakkamo.’” 12 Nikuta'nangmi ri pungkahaya: “Inai pale' injo tau numpangkuaiko: ‘Angka'mi landang-landangta na ki'dakkamo’?” 13 Mingka injo tau beru nipakagassinga anre' naisse'i inai ampakagassingi, nasaba' alannya'mi Isa gara-gara tabbala'na tau kunjo. 14 Maengi injo nihuntulumi ri Isa ri rambangna balla' Alla-taala na nipangkuai: “E agassingmaki antuke'. Minjomo a'dorakai, ianna anjarii nukodiangangpa isse' ri gitte.” 15 A'lampami injo lapung tau ampauangi sikuntu pungkahana tau Yahudi angkua Isami numpakagassingai. 16 Gara-gara injo to'mi na nisessai Isa ri tau Yahudi na'kulle-kulleang anghunoi, nasaba' sangnging anggaukangi kamua injo ri allo sattua. 17 Mingka nipangkuaimi ri Isa: “Anjamaiji Ammangku su'rung kunni-kunni, kamua to'ma injo inakke.” 18 Iami injo na pila' a'kulle-kulleangmi pungkahana tau Yahudi langhunoi, na taliaji gara-gara napa'tanre'na hukkungna allo sattua, mingka lanri angkuana pole Alla-taalami Ammanna na gara-gara injo na napa'padaii kalenna Alla-taala.
Kasabbiangna Isa ri sesena kalenna
19 Alleang nipihali ngase'mi ri Isa angkua: “Tojeng-tojeng kukua ri kau ngase': anre' ku'kulle rie' kugaukang inakke Ana'a punna battu ri kalengku to'ji ruanna Ammangkumi kuitte rie' nagaukang; nasaba' nunagaukanga Ammaya kamua to'ji injo kugaukang Ana'a. 20 Kamuai injo ka napiitteanga iangase' panggaukangna Ammangku nasaba' sanna' nangaingku inakke Ana'na, onjongpa isse' lanapiitteanga panggaukang nulompoang naia injo sumpae', sollanna napakabangnga'ko. 21 Kamuai injo ka pa'pada to'ji Ammaya a'pahaung tumate na napa'tallasa pole, kamua to'ma injo Ana'a kupa'tallasai inai-nai kukaa'raki. 22 Nasaba' Ammaya anre' kale tau nahukkung, iajia maengmi napa'buang iangase' panghukkunganga ri nakke Ana'a 23 sollanna iangase' rupa tau ampakaiaa inakke Ana'a pa'pada batena ampakaiai Ammaya. Naia tau nutala ampakaiaa Ana'a, battuangna anre' todo' napakaiai Amma nunsuroaa mae. 24 Tojeng-tojeng kukua ri kau ngase': tau numpilangngerii pa'pauku na a'tappa' ri nunsuroaa mae, ammuntului tallasa tala a'tappu' na gara-gara injo na anre'mo na lanihukkung, iajia a'lette'mi battu ri kamateang mange ri tallasaya. 25 Tojeng-tojeng kukua ri kau ngase': larie' hattunna na narapi'mi kamunnina angkuaya iangase' tau mate lallangngerei sa'rangku Ana' Alla-taala, na nullangngereaa iaji la'tallasa. 26 Nasaba' pa'pada Ammaya rie' pa'patallasa battu ri kalenna to'ji, kamua to'mi injo nadahuanga Ana'na pa'patallasa ri kalengku todo'. 27 Na maeng to'ma nadahu katojekang langhukkung, nasaba' inakkemi Ana' Tau. 28 Na jakomo kabangngakangii injo, nasaba' larie' hattunna angkuaya iangase' tau mate nuilalang jera' lallangngerei sa'rangku 29 na laansulu', ri sesena nuhaji'a panggaukangna lanipahaungi la'tallasa tala a'tappu', na ri sesena nukodia panggaukangna lanipahaungi nihukkung. 30 Inakke anre' ku'kulle rie' kugaukang battu ri kalengku; iajia angngadelia situru' nukulangngerea, na katappukangkumi adele, nasaba' talia a'ra'ku to'ji kupinahang, kugaukangnaja a'ra'na Ammangku nunsuroaa mae. 31 Kuddeka a'sabbia ri sesena kalengku to'ji, kasabbiang injo tala annaba. 32 Rie' maraeng a'sabbi ri seseku, na kuisse'mi angkua kasabbiangna ri seseku annaba. 33 Naia ikau maengko a'suro tau ammangeii Yahya na iami ansabbiangi kannabaanga. 34 Injoka inakke anre' kuminasaiii kasabbiang nubattu ri rupa tau, iajia kupauangko pakunni sollanna ikau nipakasalama'. 35 IYahya pa'padai sulo nu'rinra na annyinari; naia ikau a'ra'jako ampakasuarai kalennu sinampe' ri sinara'na. 36 Naia inakke rie' kasabbiangku nulompoang naia anunna Yahya. Kamuami injo ka jamaang nunadahuanga Ammangku lampa'maengi—injomi kugaukang nakke na injomi a'sabbi ri seseku angkua Ammangkumi ansuroa mae. 37 Nampa pole Ammangku nunsuroaa mae injo, ia to'mi a'sabbi ri seseku. Tingang maeng kalepako kau allangngerei sa'ranna, manna pole angngittei tanja'na, 38 na pa'pauna tingang a'danrangi ri atinnu, nasaba' ikau anre' nutappa'i tunasuroa mae. 39 Nupa'pilajariji kitta'a nasaba' pangngare'nu kau punna kamuai injo batenu lammuntuluko tallasa tala a'tappu'. Nanu manna kitta'a a'sabbi to'ji ri seseku. 40 Manna kamuai injo andaijako mae ri nakke sollannu ammuntulu tallasa. 41 Inakke anre'ja kuminasaii pammujina rupa tau, 42 mingka kuisse'mako kau angkua anre' ri atinnu pammetta ri Alla-taala. 43 Naia inakke rie'a mae ilalang arengna Ammangku na manna kamuai injo anre' to'ja nutarimaa. Kuddeka rie' tau maraeng ammangeiko na ilalang arengna to'ji, lanutarimai. 44 Ante'ko pakua kau a'kulle a'tappa' na numassing sipatarimai kalejako pammuji na anre' nu'boja pammuji battu ri Alla-taala nutunggalaya? 45 Jako areki angkua inakke lampa'salako ri dallekangna Ammangku. Numpa'salayako iamintu Musa, nunuminasaia kau. 46 Nasaba' kedde' nutappa'i ia, ma'nassa tappa'nu todo' ri nakke ka nunaukiria ri sesekumi. 47 Mingka punna anre' nutappa'i nunaukiria Musa, antere'ko pakua lantappa'i pa'pauku?”
Isa a'pakanre limang sabbu tau
1 Ri maengna injo nata'sala kunjo Isa na a'limbang mange ri ba'leang tamparang labbana Galilea, nuniarenga pole Tiberias. 2 Na sitabbalang ladda' tau ampinahangi, nasaba' angngitteii tanra masagala nunagaukanga Isa lanri a'pakagassingna tau garring. 3 Nai'mi Isa ri buki' kunjoa na sipa'cidongang papinahangna. 4 Injo hattua a'biringmi narapi' allo lompo Pallingkainna tau Yahudi. 5 Ri a'sailena mange-mange Isa, angngittemi tabbala tau a'rurung-rurung ammangeii nanapangkuaimo Filipus: “Antere'maki lammalli kanreang sollanna angnganre ngase'i inni taua?” 6 (Angkuai kamua injo lanso'rii Filipus, nasaba' Isa to'ji angngisse'i nulanagaukanga.) 7 A'pihalimi Filipus: “Kanreang ruang bilangang salaka ballinna tala allabbangi ri inni taua, manna kale massing ta'sikiddinaji.” 8 Sitau battu ri sikuntuna papinahangna, iamintu Andreas russana'na Simon Petrus, angkua: 9 “Andeke' sitau buru'-buru'ne rie' limang batu rotinna na ruang kaju todo' juku'na. Mingka anre' kale matu-matunna ri tau tabbalaya inni.” 10 Nakuamo Isa: “Suro ngase'mi taua a'cidong.” Kunjo lohe ruku' ballo, iamo injo massing nacidongi—naia buru'ne nurie'a lohena kulle kapang limang sabbu. 11 Alleang naallemi Isa rotia nampa nasukkuri, na nataha-tahaang papinahangna na papinahangna todo' kamua injo mange ri tau a'cidonga. Kamua to'mi injo ri sesena juku'a, na sakanre-kanrena ngase' sanggenna hassoro. 12 Ri hassoro ngase'namo angkuami Isa ri papinahangna: “Pa'rappungmi pue-puenna nuta'sesaya sollanna tala rie' ta'pela'.” 13 Alleang napa'rappung toje'mi labbinna pue-puenna roti limaya sumpae' nunakanrea tau tabbala, injoka sampuloi anrua gandung bonena. 14 Gara-gara naittena tau tabbalaya tanra masagala nunagaukanga Isa na sipangkuaimi: “Inni toje'mi nabbi nulamaea ri linoa!” 15 Na gara-gara naisse'na pole Isa angkua a'ra'i iangase'na mae langngalle passai na ampanjarii karaeng, na'lampa sobbu-sobbumo nai' ri buki'a na kale-kalenna mami.
Isa a'dakka ri baho ere
16 Ri sa'ra'na alloa, naungmi papinahangna Isa ri biring tamparanga. 17 Nampa nai' ri lopia na'limbang ngase'mo ba'leang tamparanga mange ri Kapernaum. Sassangmi na tingang rie'pi Isa ri sikuntuna. 18 Onjongpa isse' tamparanga lompoi bombangna lanri ammiri' sarrona anginga. 19 Kulle kapang limami iareka annang kilo a'bise nampa naittei Isa a'dakka ri baho ere angngampikii lopinna. Alleangna malla' ngase'i. 20 Mingka nipangkuai ri Isa: “Minjomo mallaki, inakkemi rie'!” 21 Gara-gara injo na a'ra'i naruppai nai' ri lopinna na injo memang hattua natappa' lante lopinna ri puntana nulanamangeia.
Nihojai Isa ri tau tabbalaya
22 Takkana ammuko nataru'rangi tau tabbala nuriekiji ri ba'leang tamparanga angkua tala rie' lopi maraeng kua' injo ruanna nunapanaikia papinahanga mingka Isa anre' nasipantamakang papinahangna kunjo iajia iangase'naji a'lampa. 23 Injoka rie'mo sikurang batu lopi maraeng battu ri Tiberias allabu ambani kunjo ri bate pangnganreang roti nunasukkuria Puanga. 24 Gara-gara injo na ri naittena tau tabbalaya angkua anre'mi Isa manna pole papinahangna, nanai' to'mo ri lopi nusumpae'a la'lampa anta'leang ri Kapernaum langhojai Isa.
Isami kanreang nu'pa'tallasa
25 Ri nihuntulu'na Isa ri tau tabbalaya ba'leang tamparangmi, a'kuta'nang ngase'mi: “O rabbi, ie', sikuranta kilante kunre?” 26 A'pihalimi: “Tojeng-tojeng kukua ri kau ngase': nuhojaa, talia gara-gara nuittena tanra nukugaukanga, mingka gara-gara maengnu angnganre roti na sompere. 27 Minjomo anjamai ri sesena kanreang nusinampe'ji kaparrangangna. Iajia anjamamako ri sesena kanreang nuparrang sanggenna ri tallasa tala a'tappu' nulakudahuangako inakke Ana' Tau. Nasaba' inakkemi maeng niassaang ri Alla-taala Ammangku.” 28 Injoka a'kuta'nang ngase'mi: “Ie', apa lakuhaju kedde' sollangku a'geo' ri sesena panggaukangna Alla-taala?” 29 A'pihalimi Isa: “Panggaukangna Alla-taala iamintu tappa'mi ia nunasuroa mae.” 30 Angkua ngase'mi: “Ie', tanra apa pale' lakigaukang gitte sollangku angngittei nampa antappa'ki? Apa lakigaukang? 31 Ebara'na pakunni, bohe loheta maengi angnganre kanreang nuniareng manna kunjo ri pa'kasino-sinoanga, situru' nuta'ukiria ri kitta'a angkua: ‘Iangase'na nidahu kanreang battu ri suruga.’” 32 Nakuamo Isa: “Tojeng-tojeng kukua ri kau ngase': talia Musa andahuangko kanreang battu ri suruga iajia Ammangkumi andahuko kanreang ma'tungka nubattu ri suruga. 33 Nasaba' kanreang nubattua ri Alla-taala iamintu ia nunnurunga battu ri suruga nulampa'tallasai tau linoa.” 34 Angkua ngase'mi: “Puang, ie', kidahuangima naung kanreanga injo.” 35 Angkuami Isa: “Inakkemi kanreang nu'pa'tallasaya injo, na tumaea ri nakke anre' kalemo napa're isse', na tutappa'a ri nakke anre' kale to'mo natirere samalling-mallingna. 36 Mingka maengko kupauang angkua, manna kale nuittema andaijako a'tappa'. 37 Massing-massing tau nunadahuanga Ammangku lamaei ri nakke. Na ia numaea ri nakke anre' kale na lakupela'i. 38 Nasaba' annurunga battu ri suruga talia langgaukangi a'ra'ku to'ji, iajia a'ra'nami ia nunsuroaa mae. 39 Na innimi a'ra'na Ammangku nunsuroaa mae, iamintu battu ri sikuntuna tau nunadahuanga sollanna anre' narie' kupakata'pela', iajia lakupa'tallasai amminro ri allo anjorengang. 40 Inni toje'mi a'ra'na nunsuroaa mae, iamintu sollanna massing-massing tau nu'nyannyang mangea ri Ana'a na natappa' ammuntulumi tallasa tala a'tappu', na lakupa'tallasai amminro ri allo anjorengang.” 41 Sikunrarengimi pungkahana tau Yahudi ri sesena Isa lanri angkuana: “Inakkemi kanreang nunnurung battu ri suruga.” 42 Sipangkuaimi: “Tangnga ia inni Isa, ana'naji Yusuf, nukiisse'ja gitte ammanna na anrongna? Lanri antere'na kamua nangkua: ‘Nubattu ri suruga annurung’?” 43 A'pihalimi Isa: “Minjomo sipa'kunrarengangi. 44 Manna sitau tala rie' a'kulle mae ri nakke ruanna nirenrengmi ri Ammangku nunsuroaa mae, na nummaeia lakupa'tallasai amminro. 45 Rie' ta'ukiri ri kitta'na iangase'na nabbi angkua: ‘Iangase' rupa tau laniajarai ri Alla-taala.’ Kamuami injo na massing-massing tau nullangngereai Ammangku na a'pilajara battu kunjo, iami mae ri nakke. 46 Tala rie' manna sitau maeng angngittei Ammaya ruanna ia nubattua ri Alla-taala; iaji maeng angngittei Ammaya. 47 Tojeng-tojeng kukua ri kau ngase': tau nu'tappa'a ri nakke, a'tallasa tala a'tappu'i. 48 Inakkemi kanreang nu'pa'tallasaya injo. 49 Bohe loheta maengi angnganre manna ri pa'kasino-sinoanga mingka mateji. 50 Innimi kanreang nunnurunga battu ri suruga sollanna inai-nai angnganre battu kunjo tala lamatei. 51 Inakkemi kanreang nu'pa'tallasa nunnurung battu ri suruga. Punna rie' tau angnganre battu ri kanreanga injo la'tallasai samalling-mallingna. Na kanreang nulakupa'dahuanga injo salamangmi assingku nulakupa'buanga nakke ri sesena tallasa'na rupa taua.” 52 Ri nalangngere'na tau Yahudi kamua injo, sibeseremi angkua: “Antere' kamua inni taua na'kulle nadahuangki assinna lanikanre?” 53 A'pihalimi Isa: “Tojeng-tojeng kukua ri kau ngase': punna tala nukanrei assingku inakke Ana' Tau na tala nuinung todo' raraku, anre' tallasa ri kalennu. 54 Tau nusangnging angkanreai assingku na nungnginungai raraku a'tallasa tala a'tappu'mi nampa pole inakkemi lampa'tallasai amminro ri allo anjorengang. 55 Kamuami injo nasaba' assingkumi ma'tungka kanreang na raraku ma'tungka todo' inungang. 56 Tau nungkanreai assingku na nungnginungai raraku a'danrangmi ri nakke, na inakke ri ia. 57 Pa'pada to'ji Ammangku nu'tallasa na kunasuro mae, kamua to'ma injo inakke a'tallasaa gara-gara ia, na tau nungkanreaa ia to'mi la'tallasa gara-gara inakke. 58 Innimi kanreang nunnurunga battu ri suruga: talia pa'pada bohe lohenu angnganre manna nampa mate; tau nungkanreai la'tallasai samalling-mallingna.” 59 Iangase'mi injo sumpae' nakua Isa ri angngajara'na ri balla' pa'sambajangang ri Kapernaum.
Rie' papinahang ta'soro' boko
60 Ri nalangngere'namo pa'pauna Isa, lohe ri sikuntuna papinahangna angkua: “Sukkarai pa'paua injo sumpae', inaimo a'kulle allangngerei?” 61 Ri naisse'namo Isa ri atinna angkua a'kunrarengi papinahangna ri sesena injo, napangkuaimi iangase'na: “Maka injo pa'paua ampakasi'rikangko? 62 Na antere'mo pakua sallo' punna nuittema inakke Ana' Tau amminro nai' ri pammantangangku riolo? 63 Sumanga'aji a'pa'tallasa. Naia assia anre' kale matu-matunna. Pa'pauku nunakkea ampalante ri kau iamintu pa'pau nubattu ri Sumanga'na Alla-taala na nu'pa'tallasa. 64 Manna kamuai injo rie' ri sikuntunu teai a'tappa'.” Nakamuamo ka naisse'mi Isa nampa ri ammulanna angkua inai-naii tau tea a'tappa' na inai tau nulambalu'i. 65 Nakuamo pole: “Iami injo na kukua memang ri kau: manna sitau tala rie' a'kulle mae ri nakke ruanna nunipabbianga ri Ammangku.” 66 A'pakarammula injo hattua na lohe ri sikuntuna papinahangna ansalaii naamminro ri nunahokoia na andamo amminahang.
Pangngakuangna Petrus
67 Gara-gara injo na'kuta'nangmo Isa ri papinahangna nusampuloa anrua: “Maka a'ra' ngase' to'ko ansalaia?” 68 A'pihalimi Simon Petrus: “Ie', Puang, ri inaia pale' la'lampa? Nanu pa'pautaji a'pa'tallasa tala a'tappu'; 69 onjongpa isse' inakke ngase' a'tappa'ma na kuisse'mo angkua igittemi Masihia, Ana' Alla-taala nu'tallasaya.” 70 Nakuamo Isa: “Tangnga ia inakke to'ji maeng ampile ngase'ko nusampuloa anrua intu? Manna kamuai injo rie' se're ri sikuntunu urangnai Bellisi.” 71 Nunakuanganga iamintu iYudas, ana'na Simon Iskariot; nasaba' iami lambalu'i, manna mamo ta'rekeng papinahangi ri nusampuloa anrua injo.
Arinna Isa tala antappa'i
1 Ri maengna injo sumpae' nalabbangmi Isa tana Galilea, ka andai allabbangi tana Yudea, nasaba' pungkahana tau Yahudi nukunjoa a'kulleang anghunoi. 2 Injo hattua a'biringmi allo lompona tau Yahudi, iamintu allo lompo A'bora ri tarata'. 3 Kamuai injo na nipangkuaii Isa ri arinna: “Salai mami kunre na nu'lampa ri Yudea, sollanna naittei pale' papinahangnu iangase' panggaukang nunupa'piitteanga. 4 Punna rie' tau a'ra' ta'kapau-pauang, a'nassami anre' na'gau' sobbu-sobbu. Na ri sesenu punna a'ra'ko kamua injo, pa'piitteangmi pale' kalennu ri tau linoa.” 5 Nakua kamua injo nasaba' manna arinna tala a'tappa'ji ri ia. 6 Alleang a'pihalimi Isa: “Tingang narapi'pi kasampangangku, mingka ri sesenu sangnging rie' hattu. 7 Anre' nakullei tau linoa angkaharisiko kau, mingka inakkeji nakaharisi, nasaba' ri sesenami ku'sabbi nakke angkua kodii sikuntu panggaukangna. 8 A'lampa nai' ngase'mako kau ri pangngu'rangianga injo, inakke anre'pa ku'lampa nai' kunjo, ka anre'pa narapi'i hattu nusirattanga.” 9 Kamuami injo pa'pauna ri arinna, na ia ammantangiji ri Galilea. 10 Na ri a'lampa nai' ngase'namo arinna Isa ri pangngu'rangianga, nampa a'lampa nai' to'mi ia kunjo, na anre' nakaissengang iajia pa'padai nu'sobbu-sobbu. 11 Na ilalangna pangngu'rangianga injo na nitula'i Isa ri pungkahana tau Yahudi na sikuta'nang: “Antere'mi injo taua?” 12 Lohe pa'bisi'-bisikang battu ri sikuntuna tau tabbalaya ri sesena Isa. Rie' angkua: “Tau haji'i.” Rie' todo' ampangkuai: “Anre'! ka napa'lampa-salaii rajja'a.” 13 Mingka tala rie' manna sitau loloasa ambicarai ri sesena Isa lanri malla'na ngase' tau Yahudi ri pungkahana.
Kasabbiangna Isa ri sesena kalenna
14 Ri a'tangngaengnamo pangngu'rangianga na'lampa nai' Isa ri rambangna balla' Alla-taala angngajara kunjo. 15 Nabangnga'mo pungkahana tau Yahudi na sikuta'nang: “Antere'i pakua inni taua na lompo pangngisse'na nanu tala maeng a'sikola?” 16 Nipihalimi ri Isa: “Ajarangku talia nubattu ri nakke to'ji, mingka nubattu ri ia nunsuroaa mae. 17 Kuddeka rie' tau a'pa'tujung anggaukangi a'ra'na Alla-taala lanaisse'mi ri sesena ajarangku angkua maka nubattu ri ia iareka inakke a'bicaraa battu ri anungku to'ji. 18 Tau nu'bicaraya na battu ri kalenna to'ji napa'bojaangi kalenna areng haji', mingka tau numpa'bojaangi areng haji' nunsuroai, injo tau lambusui na tala rie' kajekkoang ri ia. 19 Tangnga ia maengmaki nadahuang Musa hukkung agamana Alla-taala? Manna kamuai injo tala rie' ri sikuntuta anggaukangi lapung hukkung. Angnguraki na ki'kulleang anghunoa?” 20 A'pihalimi tau tabbalaya: “Asetangangko! Inai pale' a'kulleang anghunoko?” 21 Nipihalimi ri Isa: “Nampami se're panggaukang maeng kupa'piitteang na injo ampakabangnga' ngase'ko. 22 Naia ikau maengmako nadahuang Musa parenta sunna' (nanu assala'na talia battu ri Musa iajia battu ri bohe lohe nurioloanga). Gara-gara injo na a'sunna'jako tau ri allo sattua. 23 Kamuai injo na punna rie' tau nusunna' ri allo sattui sollanna anre' nulingkaii hukkung agama nunapalantea Musa, angngurako pale' na nukakukukia gara-gara a'pakagassingku tugarring ri allo sattua? 24 Minjomo angngadelii situru' nuta'kaitteanga, iajia nusituru'a kalambusang.”
Pasisalaang ri sesena assala'na Isa
25 Gara-gara injo sumpae' narie'mo sikuntu tau Yerusalem sikuta'nang: “Maka tangnga ia innimi nu'kulleanga lanihuno? 26 Na andeke'mi loloasa a'bicara, na anre' todo' nipiranggaii. Kulle kapang naisse' tojeng-tojengmi pungkahata angkua ia toje'mi Masihia? 27 Mingka sampang Masihia rie', tala rie' angngisse'i assala'na manna sitau. Ri sesena inni taua niisse'ji assala'na.” 28 Iami injo na angngajariji Isa ri rambangna balla' Alla-taala, na'gora sarringmo: “Io, toje', nuisse'ja na nuisse' todo' assala'ku. Manna kamuai injo, rie'a mae talia battu ri kalengku to'ji, iajia nisuroa mae ri ia nutala nuisse'a kau, nanu iami annaba. 29 Naia inakke kubateimi ia, nasaba' battu kunjoi assala'ku, na iami ansuroa mae.” 30 Gara-gara injo na na'kulleangmo anjakkalai, mingka manna sitau tala rie' allimai, nasaba' anre'pa narapi'i hattunna. 31 Mingka ri sikuntuna tau tabbalaya lohe antappa'i na sangnging angkua: “Sampang Masihia rie' mae pale', maka langgaukangi loheang tanra naia numaengamo nagaukang inni taua?” 32 Ta'langngerangmi ri tau Farisia pa'bisi'-bisikangna tau tabbalaya ri sesena Isa; gara-gara injomi na tau Farisia siurang pungkaha imanga pole ansuroi sikuntu pajaga balla' Alla-taala lanjakkalai Isa. 33 Iami injo nangkuamo Isa: “Sinampe' mama anrurungang ngase'ko na maengpi injo la'lampama ri ia nunsuroaa mae. 34 Lanuhojaa, mingka anre' na lanuhuntulua, nampa pole ri antere'a rie' nakke, anre' nu'kulle kau mange kunjo.” 35 Gara-gara injo na sipangkuaimi pungkahana tau Yahudi: “Lantere' to'i mae a'lampa na tala lakihuntulu gitte? Maka la'pa'tujungi allampaii taunta nu'limbanga ri sikuntuna tau Yunani, langngajarai tau kaperea injo? 36 Apa pale' battuangna pa'pauna injo: ‘Lanuhojaa, mingka anre' na lanuhuntulua,’ na ‘Ri antere'a rie' nakke, anre' nu'kulle kau mange kunjo’?”
Ere nu'pa'tallasa
37 Ri allo katappusangna pangngu'rangianga iamintu allo nusanna'a nipokokang, ammentengmi Isa na'sa'ra lompo angkua: “Punna rie' tirere, mae laloi ri nakke na angnginung! 38 Naia tutappa'a ri nakke, la'rupai pa'pada nuta'ukiria ri kitta'a ri sesena, iamintue battu ri atinnami la'colo' ere nu'pa'tallasa.” ( 39 Nunakuanganga Isa ri sesena injo, iamintu Sumanga'na Alla-taala nulanatarimaya iangase'na nutappa'a ri ia; nasaba' injo hattua Sumanga' Ci'nonga tingang nidahuangpi, ka Isa anre'pa nipakalompoi.) 40 Ri nalangngere'namo tau tabbalaya pa'pauna Isa, lohemo ri sikuntuna sipangkuai: “Inni toje'mi nabbi nulabattua.” 41 Maraenga angkua: “Innimi Masihia.” Mingka maraenganga isse' angkua: “Ma'nassa Masihia anre' nabattu ri Galilea! 42 Tangnga ia nakua ri kitta'a Masihia nubattui ri tuhusengna karaeng Daud na battu pole ri kampong Betlehem, pa'rasangengna Daud?” 43 Alleangna a'compa'mi pasibeserang ri sikuntuna tau tabbalaya gara-gara Isa. 44 Rie' ri sikuntuna a'ra' anjakkalai mingka manna sitau tala rie' allimai.
Nialleangangi Isa ri Nikodemus
45 Ri amminronamo pajaga balla' Alla-taala ri pungkaha imang na tau Farisi nikuta'nangmi: “Angngurako na tala nuerangi mae?” 46 A'pihalimi: “Ie', tingang maeng rie' tau a'bicara kamua injo pa'pada ia!” 47 A'pihalimi tau Farisia injo: “Maka nipa'lampa-salai to'mako kau? 48 Tala rie' kale battu ri sikuntuna pungkaha antappa'i manna pole battu ri sikuntuna tau Farisi. 49 Mingka injo tau tabbalaya anre' nangngisse' hukkung agama, iami injo nanatora'mo tunra.” 50 Alleang iNikodemus sitaui battu ri sikuntuna numaengamo ammangeii Isa ri bangngina iami ampangkuaii simpadanna: 51 “Situru' hukkung agamata anre' nama'ring taua nihukkung ri anre'napa namaeng nilangngere palakarana na niisse' nunagaukanga.” 52 A'pihalimi iangase'na: “Bara' tuGalilea to'ko do? Paressami na nunanna'mo angkua tala maeng rie' nabbi battu ri Galilea!” 53 Alleang massing amminromi ri balla'na.
1 Naia Isa a'lampa kaleji ri buki' Zaitun.
Bahine kahuntulang a'paenteng lemo
2 Elekiji namangemo isse' Isa ri rambangna balla' Alla-taala, na iangase' rajja' mange todo'. A'cidongmi angngajarai iangase'na. 3 Injoka battui sikuntu guru agama na tau Farisi angngerang sitau bahine nukahuntulang a'paenteng lemo. Naparitangnga-tangngami lapung bahine injo 4 nampa a'kuta'nang lanso'rii Isa angkua: “Tungguru, ie', inni lapung bahine kahuntulangi a'paenteng lemo. 5 Ri sesena hukkung agamaya, Musami ansuroki angkua bahine kamuaya injo nirembasi batu sanggenna mate. Antere'i pakua pangnguppata gitte?” 6 Nakua kamua injo ka a'ra'i naso'ri Isa, sollanna ammuntulu annorang lampa'salai. Injoka a'bukku' kaleji Isa angngukiri ri tanaya na karamengna napake na anre' najampaii taua. 7 Mingka ri a'tarru'-tarrusu'na nikuta'nang, tappa' ammentengmi na angkua ri iangase'na: “Kuddeka rie' ri sikuntuta tala rie' dorakanna, iamo bungasa anrembasai batu intu bahinea.” 8 Nampa a'jukku'i angngukiri ri tanaya. 9 Ri nalangngere'na pa'paua injo na lanri natijjo'na ati caddina, naansulu' ta'sitau-taumo a'pakarammula ri nutoaya. Alleangna kalenna mami Isa na injo todo' bahine numaenga nipaenteng ri tangnga. 10 Ammentengmi Isa na anre'mo tau naitte ruanna lapung bahine. Alleangna a'kuta'nangmi: “E russana', antere' ngase'mi mae tunjojjo'aki? Anre'ja anghukkungki manna sitau?” 11 A'pihalimi: “Ie', anre'ja, Puang.” Nakuamo Isa: “Manna inakke anre' to'ja kuhukkungki. A'lampamaki, na minjomo a'dorakai isse'.”
Isami pannyinari lino
12 Alleang angkuai pole Isa ri tau tabbalaya: “Inakkemi pannyinari lino; tau numpinahangaa, anre' kalemo na'dakka ri nusassanga iajia larie'mo sinara ri tallasa'na.” 13 Nipangkuaimi ri tau Farisia: “Anre' naannaba kasabbiangta ka igitte to'ji ansabbiangi kalenta.” 14 A'pihalimi Isa: “Kuddeka kusabbiangi kalengku to'ji, annabai injo, nasaba' kuisse'ji kabattuangku na kuisse' to'ji nulakumangeia. Naia igitte anre' kale kiisse'i kabattuangku na anre' todo' kiisse'i nulakumangeia. 15 Na angngadeliki gitte situru' batena rupa tau mingka inakke manna sitau tala rie' kuadeli kunni-kunnina, 16 nampa pole kuddeka angngadelia, batekumi annaba, nasaba' inakke tala kalengkuji, mingka sipa'ruaa Ammangku nunsuroaa mae. 17 Ri kitta' hukkung agamata rie' to'ja ta'ukiri angkua kasabbiang annabaya battu ri ruapi tau. 18 Inakke to'ji a'sabbi ri sesena kalengku na manna Ammangku nunsuroaa mae a'sabbi to'ji ri seseku.” 19 Iami injo na'kuta'nang ngase'mo: “Antere'mi mae Ammanta?” A'pihalimi Isa: “Manna inakke manna pole Ammangku anre' kale kiisse'i gitte. Kedde' kiisse'a ma'nassa kiisse'na todo' Ammangku.” 20 Iangase'mi injo nakua Isa ri angngajara'na ri rambangna balla' Alla-taala ri ampi'na celenganga. Manna sitau tala rie' anjakkalai, ka tingang narapi'pi hattunna.
Isa la'lampa ri nuanre' na'kulle namangei tau
21 Nakuamo pole Isa ri iangase'na: “La'lampaa nakke na kulakihoja; naia igitte lamate doraka kalejaki. Pammantangang nulakumangeia nakke anre' ki'kulle ammangeii gitte.” 22 Iami injo na sipangkuaii pungkahana tau Yahudi injo: “Kuddeka lanahunoi kalenna lanri angkuana: ‘Pammantangang nulakumangeia nakke anre' ki'kulle ammangeii gitte’?” 23 Na nakuamo Isa ri iangase'na: “Igitte nubattu rahajaki, naia inakke nubattu ratea. Igitte nubattuki ri linoa inni, naia inakke taliaa nubattu kua' inni. 24 Iami injo na kupangkuaiki sumpae' lamate doraka kalejaki. Punna anre' kitappa'i angkua inakkemi ia, ma'nassa lamate doraka kalejaki.” 25 Nakuami iangase'na: “Inaiki pale' gitte?” A'pihalimi Isa: “Ia to'ji nusangnging kupauangaki nampa ri ammulanna. 26 Loheiji palakara lakupau ri seseta na lakuadeliangki. Mingka ia nunsuroaa mae nuannaba, iami injo na iaji nukulangngerea nakke battu ri ia kupalanteangki tau linoa.” 27 Anre' ngase' na'pahang angkua nunabicaraya Isa ri sesena Ammanna. 28 Gara-gara injomi nangkua Isa: “Kipairatepa inakke Ana' Tau, kinampa ambateia angkua inakkemi ia. Na inni pole, anre' kale kugaukang battu ri kalengku to'ji, iaji nusituru'a nunaajaranga Ammangku injoji kubicara. 29 Nunsuroaa mae iami anrurunganga. Tala maenga nasalai Ammangku na kalengku mami, nasaba' sangnging kugaukangangi nakke nunakasannangia.” 30 Ri angkuana Isa kamua injo, nalohemo tau a'tappa' ri ia.
Kannabaang lallappasaki
31 Nakuamo ri tau Yahudi nuntappa'ai: “Punna a'danrangjako ri pa'pauku, tojeng-tojengko papinahangku. 32 Gara-gara injomi na lanuisse'mo kannabaanga na iami lampalappasako.” 33 A'pihalimi iangase'na: “Inakke tuhusengna Ibrahim na tingang maeng rie' angngataia, manna sitau. Angngurai na kipangkuaia gitte: ‘Lanipalappasako’?” 34 Nakuamo Isa: “Tojeng-tojeng kukua ri kau ngase': massing-massing tau nu'dorakaimo naung, atannami dorakaya. 35 Naia ataya anre' na'danrang samalling-mallingna ri se're bija, mingka ri sesena ana'a samalling-mallingnai kunjo. 36 Gara-gara injo na punna inakke Ana'a ampalappasako, ma'nassa lappasa toje'nu. 37 Kuisse'ji angkua tuhusengnako Ibrahim, manna mamo a'kulleangjako anghunoa gara-gara anre' na'timbo pa'pauku ri atinnu. 38 Na nukuittea inakke battu ri Ammangku, iami kupau, na kamua to'mako injo kau nugaukangi nunuittea battu ri ammannu.” 39 A'pihali ngase'mi: “Ibrahim iami ammangku.” Nipangkuaimi ri Isa: “Kedde' ana'nako Ibrahim ma'nassa nugaukangna todo' pa'geo'na. 40 Injoka ikau a'kulleangnuja anghunoa, nanu inakkemi tau numpa'pauangai kannabaang nukulangngerea battu ri Alla-taala. A'kulleangnu kamuaya injo sumpae' anre' nagaukangi Ibrahim. 41 Ikau nugaukangnaja sikuntu pa'geo'na ammannu.” Iami injo na'pihali ngase'mo: “Inakke taliaa ana' buni. Se'reji ammangku iamintu Alla-taala.” 42 Nipangkuaimi ri Isa: “Kedde' toje'i Alla-taala Ammannu, a'nassami nupettaku, nasaba' inakke nubattua ri Alla-taala na kurie' mae. Kamuami injo ka kariekangku mae talia battu ri kalengku to'ji, iajia battu ri ia nunsuroaa mae. 43 Angngurai na anre' nupahangi bicarangku? Saba'na andako a'parrang allangngerei pa'pauku. 44 Ikau nubattuko ri Bellisi ka iami ammannu na nua'ra' anggaukangi kacinnaangna. Nanu iami pahuno tau nampa ri ammulanna na anre' na'danrang ri kannabaanga, nasaba' ri ia tala rie' kale kannabaang. Na sampang a'bura-burai, injo nuansulu' battu ri sippa'na, nasaba' iami pabura-bura na ia to'mi pole ammanna pabura-buraya. 45 Mingka gara-gara a'pauku nakke kannabaang, iami injo na nutea a'tappa' ri nakke. 46 Inai ri sikuntunu a'kulle ampa'rupai angkua a'dorakaa? Pungku a'pau kannabaang, angngurai pale' ikau na nutea a'tappa' ri nakke? 47 Tau battua ri Alla-taala nalangngerei pa'pauna. Naia ikau teako allangngerei ka taliako nubattu ri Alla-taala.”
Rie'mi Isa ri anre'napa Ibrahim
48 A'pihalimi pungkahana tau Yahudi ri Isa: “Maka tangnga ia annaba toje'ma inakke punna kuare'ki gitte tau Samaria na nusetangang?” 49 A'pihalimi Isa: “Inakke anre' kusetangang, iajia kupakaianaja Ammangku; naia igitte kitunai kaleja. 50 Talia inakke ampa'bojaangi kalengku areng haji'. Iajia rie' anghojaanga na ia to'ji nulangngadelia. 51 Tojeng-tojeng kukua ri gitte ngase': punna rie' tau anggaukangi pa'pauku anre' kale nalamate samalling-mallingna.” 52 Nipangkuaimi ri pungkahana tau Yahudi: “Nampami kuisse' setangang toje'ki. Nasaba' Ibrahim matemi, kamua to'mi injo iangase' nabbia, mingka igitte kikua: ‘Punna rie' tau anggaukangi pa'pauku anre' kale nalamate samalling-mallingna.’ 53 Maka lompoangki gitte naia bohe loheta Ibrahim numateamo? Nanu manna nabbia mate ngase'mi. Inai pale' kipasinrapangangi kalenta?” 54 A'pihalimi Isa: “Kedde' inakke to'ji ampakaiai kalengku, anre' kale matu-matunna. Ammangkumi sangnging ampakalompoa, na ri sesenami kikua gitte ‘Alla-taalakui ngase'.’ 55 Nanu igitte anre' kibateii, mingka inakke kuisse'ji. Kedde' kukua tala kuisse'i, pabura-bura to'ma pa'pada to'ji igitte ngase' intu. Mingka kuisse'ji ia na kugaukangmo pa'pauna. 56 Manna Ibrahim bohe loheta asuarai langngittei kariekangku mae, na ri naittenamo injomi nasuara.” 57 Iami injo na nipangkuaimi ri tau Yahudi injo: “Tingang ganna'pi amuru'ta limang pulo taung na pangngare'ta maengmi kiitte Ibrahim?” 58 Nakuamo Isa: “Tojeng-tojeng kukua ri gitte ngase': rioloangna Ibrahim na kurie' nakke.” 59 Gara-gara injo nangngallemo iangase'na batu lanarembasangi; mingka ta'sobbui Isa ri nasalainna rambangna balla' Alla-taala. Kamuami injo batena ansulu' battu ri sikuntuna.
Tau huta samulajaji nipakagassing
1 Na ri a'lampana Isa, nangngitte se're tau huta samulajaji. 2 A'kuta'nangmi papinahangna: “Rabbi, ie', inai a'doraka, ia to'ji inni taua iareka tau toana alleangna nianakang huta?” 3 Nipihalimi: “Talia ia a'doraka na talia todo' tau toana. Iajia sollanna panggaukangna Alla-taala a'kulle nipa'lonara ri kalenna. 4 Ilalangna riekiija allo anre' natangnga kugaukangna pa'geo'na ia nunsuroaa mae. Nasaba' labangngii na tala rie' manna sitau a'kulle anjama. 5 Ilalangku rie' ri linoa inni, inakkemi pannyinari lino.” 6 Ri maengnamo nakua kamua injo a'pe'rumi ri tanaya nampa napasileo'. Nampa napasapuangi leto'a matanna injo lapung tau huta 7 na napangkuai: “A'lampamaki a'pare'mu' ri panrio-rioang Siloam (battuangna nunisaluki).” A'lampa toje'mi injo lapung tau ampare'mukii rupanna. Nampa amminro nangngittemo. 8 Nipasibicaraimi ri pasiampikang balla'na siurang tau nusuanga angngittei numaeng huta angkua: “Tangnga ia innimi tau nubiasaya a'cidong angngera-ngera?” 9 Rie' pole angkua: “Ia toje'mi.” Na rie' todo' angkua: “Sintanja'naja.” Mingka injo to'ji taua angkua: “Ie', inakke toje'mi nukiare'a.” 10 Gara-gara injo na'kuta'nang iangase'na: “Antere'i pakua na nu'giling angngitte?” 11 A'pihalimi: “Rie' tau niareng Isa bede' alleo' tana nampa nasapuangi matangku na kunasuro angkua: ‘A'lampamaki ri panrio-rioang Siloam a'pare'mu'.’ Na ku'lampa toje', na ri a'pare'mu'ku tappa' angngittema.” 12 A'kuta'nang ngase'mi: “Antere'mi mae injo taua?” A'pihalimi: “Ie', isse'i kodong.” 13 Nanierangmo lapung tau maeng huta mange ri tau Farisia. 14 Na allo sattui ri alleo'na tana Isa na napakagassingi. 15 Nampa nikuta'nang isse' ri tau Farisia todo' ri sesena antere'i pakua na na'giling angngitte? A'pihalimi: “Nasapuii leto' matangku Isa, kunampa a'pare'mu' na kutappa' angngittemo.” 16 Gara-gara injo na rie' sikuntu tau Farisi angkua: “Injo taua talia nubattu ri Alla-taala nasaba' anre' najampaii allo sattua.” Na rie' maraeng isse' angkua: “Tala a'kulle tau dorakaya a'piitte tanra masagala kamua injo.” Iami injo naambua'mo pasisalaang ri sikuntuna. 17 Nampa napangkuaii pole lapung tau maeng huta: “Ikau, antere'i pakua pangnguppanu ri sesena injo taua ka matannumi napakagassing?” A'pihalimi: “Ie', sitaui nabbi.” 18 Mingka pungkahana tau Yahudi injo tala tappa'i ri sesena injo lapung tau maeng huta angkua a'giling angngitte kunni-kunnina, alleangna nakeo'i tau toana 19 nampa nakuta'nang: “Maka ana'nu toje' inni nunukuanganga kau nianakang huta? Punna kamuai injo, antere'i pakua na'giling angngitte kunni-kunnina?” 20 A'pihalimi lapung tau toana: “Ie', nukuisse'a ana'ku mintodo' inni na nuhuta samulajajia 21 mingka angngurai na'giling angngitte kunni-kunnina anre' kuisse'i nakke. Na anre' todo' kuisse'i inai ampahikkei matanna. Ia to'mo kikuta'nang ka lompomi ia, a'pihaliji intu ri sesena kalenna.” 22 Angkuai kamua injo tau toana, nasaba' malla'i ri pungkahana tau Yahudi ka naisse'mi maengi a'samaturu' angkua punna rie' tau angngakuii angkua injomi Masihia, niusiri battu ri pa'se'reang umma'a. 23 Iami injo nangkua tau toana sumpae': “Ia to'mo kikuta'nang ka lompomi ia.” 24 Na nikeo'i isse' lapung tau maeng huta nampa nipangkuaii: “A'pau kuntu tojengmako ri dallekangna Alla-taala. Nasaba' nukuisse'a inakke ri sesena injo lapung tau nu'doraka.” 25 A'pihalimi lapung tau maeng huta: “Ie', anre' kuisse'i a'dorakana tangnga a'dorakana. Na nukuisse'a iamintu maenga huta, na kunni-kunnina angngittema.” 26 Angkua ngase'mi isse': “Apa pale' nagaukangangko? Antere'i pakua batena na a'kulle a'bikke matannu?” 27 A'pihalimi: “Ie', maengmaki kupauang na anre' killangngere; angngurai na a'ra' kipilangngeri isse'? Bara' a'ra' to'ki gitte anjari papinahangna?” 28 Nigaratta'i na nipangkuai: “Ikaumo papinahangna. Naia inakke papinahangnaa Musa. 29 Kuisse'mi inakke angkua Alla-taala maeng a'bicara ri Musa, mingka ri sesena injo taua anre' kuisse'i ante'i battu assala'na.” 30 A'pihalimi: “Inni palakara nu'pakabangnga' na kikua gitte anre' kiisse'i ante'i battu assala'na, nanu iami na'kulle a'bikke matangku. 31 Niisse'mi angkua anre' nalangngerei Alla-taala tau a'dorakaya, iaji nungkangngalikangai na nunggaukangai a'ra'na. 32 Nampa ri uru-uruna linoa na tala maeng ta'langngerang angkua rie' a'pahikke mata tau huta samulajaji. 33 Punna pale' injo lapung tau talia nubattu ri Alla-taala, ma'nassa anre' na'kulle rie' nagaukang.” 34 A'pihali ngase'mi: “Apa nukua? Ikaumi intu tau sanna' dorakanu nianakang na a'ra' to'ko kau angngajaraa?” Natappa' nausiriji ansulu'. 35 Ta'langngerangmi ri Isa angkua niusirimi lapung tau huta ri iangase'na. Nahojami na ri nahuntulu'na napangkuaimi: “Maka a'tappa'ki gitte ri Ana' Alla-taala?” 36 A'pihalimi: “Ie', inai injo, puang, sollangku a'kulle antappa'i?” 37 Nipangkuaimi ri Isa: “Kiittemi na nusipa'bicara ia.” 38 Nakuamo: “Ie', a'tappa'ma, Puang!” Nasuju'mo ansombai. 39 Alleang nakuamo Isa: “Inakke rie'a mae ri linoa la'pa'tappu' palakara sollanna tuhutaya a'kulle angngitte na tungngittea lahutai.” 40 Ta'langngerangi pa'pauna Isa ri tau Farisi nusipa'rurungangai kunjo, iami injo nangkua: “Ma'nassa anre'ja nakke kuhuta, di'?” 41 A'pihalimi Isa: “Kedde' ahutaki anre' kisala, mingka lanri angkuata kunni-kunnina: ‘Angngitteja,’ injo battuangna salaijaki.”
Isa pakalahaki nuhaji'a
1 Tojeng-tojeng kukua ri gitte ngase': “Tau nuantama'a ri bara bimbalaya na tala numalo ri babaanga, mingka angngambi'i, injo taua palukka'i na parampo'. 2 Mingka nuantama'a na numalo ri babaanga, iami pakalahaki ma'tungkana bimbalaya injo. 3 Nitimbakangmi babaanga ri pakammi' baraya, na nilangngerei sa'ranna ri iangase' bimbala na anunna to'ji massing nakeo' arengna nampa napapinahangi ansulu'. 4 Sampang nahosso' ngase'i ansulu' anunna, a'dakka ri dallekangmi lapung pakalahaki, na nipinahang ri bimbalaya injo ka nirupai sa'ranna. 5 Iajia punna tau tala sika'biasaang anda kalei bimbalaya ampinahangi, napilarii pole injo taua, nasaba' anre' narupai sa'ra nukamuaya injo.” 6 Iami injo pa'rupamaang nacarita Isa, mingka anre' ngase' na'pahang nunakuaya. 7 Gara-gara injomi nangkua poleangmo Isa: “Tojeng-tojeng kukua ri gitte ngase': inakkemi pa'pada babaangna bara bimbalaya injo. 8 Iangase' tau numaenga ammangei bimbalaya niare'i palukka' na parampo', mingka anre' nipilangngerii sa'ranna. 9 Inakkeji babaang; punna rie' tau antama' na inakke naannori, lanipakasalama'i na laantama' ansulu' nammuntulu pangnganreiang. 10 Palukka'a tala rie'i mae ruanna la'lukka'naja nampa nasamballe na napa'tanre'. Naia inakke rie'a mae sollanna iangase'na a'tallasa, na ammuntulu ka'lappi-lappiang. 11 Inakkemi pakalahaki nuhaji'a. Naia nukamuaya injo napa'buangi nyahana gara-gara bimbala'na. 12 Naia tau nunipagajia nutalia todo' pakalahaki toje' na talia pole ia patanna, punna angngittei asu borong ammaeii lanumarii ansalai bimbalaya. Alleangna injo asu boronga anrangkangi bimbalaya nampa napa'sara'-saraeng. 13 Injo lapung tau numarii nasaba' tunipagajiji, na anre' nakatutuii bimbalaya. 14 Inakkemi pakalahaki nuhaji'a na kurupa ngase'i anungku na kunarupa todo'. 15 Pa'pada to'ji Ammangku anrupaa na ia kurupa todo', na kupa'buangi nyahaku gara-gara bimbala'ku. 16 Rie' maraeng bimbala'ku talia nukunre ri baraya; injo lapung bimbala anre' natangnga kupapinahangna todo' sollanna nalangngerei sa'rangku na lanjari se're kalahakiang na se're todo' pakalahakinna. 17 Saba'na na kunapetta Ammangku iamintu gara-gara kupa'buangna nyahaku sollanna kualle to'i amminro. 18 Manna sitau tala rie' a'kulle anghubbu'i nyahaku, mingka inakke to'ji ampa'buangi. Inakke to'ji atoje' ampa'buangi na atoje' pole angngallei amminro. Inni pa'suro nukutarimaya battu ri Ammangku.” 19 Iami injo nambua'mo isse' pasisalaang ri sikuntuna pungkahana tau Yahudi gara-gara injo pa'paua. 20 Tabbala ri sikuntuna angkua: “Setangangmi na pongoro, minjomo pilangngerii.” 21 Maraenganga angkua: “Injo talia pa'pau tusetangang; maka a'kullei setang a'pahikke sikuntu mata huta?”
Nipekkai Isa ri tau Yahudi
22 Injo hattua na narapi' allo lompo Niu'rangina pangngassaang poleangna balla' Alla-taala ri Yerusalem, na situjuangi pahosina. 23 A'dakka-dakkaimi Isa ri pa'la'-pa'la'langangna Sulaiman nukunjo ri balla' Alla-taala. 24 Kua'mi injo naniparitangnga-tangnga ri tau Yahudi nampa nikuta'nang: “Angngurai na kipabbiangji ta'bembang nyahaku ri seseta? Punna igittemi Masihia, kipauangma sillambusu.” 25 Nipihalii ri Isa: “Maengmi kupauangki, mingka tala a'tappa'ki. Panggaukang nukuhajua ilalang arengna Ammangku, injomi anjari sabbi ri seseku, 26 mingka igitte ngase' intu andaki a'tappa' nasaba' tala ta'rekengki bimbala'ku situru' numaengaki kupauang. 27 Nalangngerei sa'rangku bimbala'ku na inakke kurupa to'i na kunapinahang. 28 Na inakke lampa'tallasa tala a'tappu'i na a'nassami anre' kale nalaancuru samalling-mallingna, na manna sitau tala rie' lanrabbu'i battu ri limangku. 29 Nasaba' lompoangi Ammangku numaeng andahuanga bimbalaya naia iangase'-ngase'na, na manna sitau tala rie' a'kulle anrabbu'i battu ri limanna. 30 Inakke na Ammangku se'reji.” 31 Kamuami injo na anrappungi isse' batu tau Yahudi lanrembasai. 32 Na nipangkuai ri Isa: “Lohe panggaukang haji' maeng kupiitteangki battu ri Ammangku; antereamo ri sikuntuna injo ampasabakiki na lakirembasaa?” 33 A'pihali ngase'mi tau Yahudi injo: “Talia gara-gara panggaukang haji' na lakurembasiki, alle'naka gara-gara kielle'-elle'na Alla-taala na lanri kipasimpadainna kalenta ia, nanu igitte rupa taujaki.” 34 Nipangkuaimi ri Isa: “Tangnga ia ta'ukiri ri hukkung agamata angkua: ‘Kupa'pauangko inakke: “Ikau ngase'mi nunisombaya.”’? 35 Punna sikuntuna tau nuntarimayai pa'pauna nisabbu' nunisombaya—na injo nuta'ukiri ri kitta'a nuanre' na'kulle nipinra— 36 maka kipangkuaii gitte tau nunipakata'takkoa ri Alla-taala na nunisuroa mae ri linoa angkua ‘Angngelle'-elle'ki’ lanri angkuaku inakkemi ana' Alla-taala? 37 Jakimo tappaki ri nakke punna talia panggaukangna Ammangku kugeokang. 38 Mingka gara-gara kugaukangna toje', tappa'mi masagalaya injo, manna pole tala kitappa'a nakke, sollanna kiisse' na kitappa' angkua Ammangku ri nakke na inakke todo' ri ia.” 39 Kamuami injo na a'kulleang ngase'i isse' anjakkalai Isa, mingka alappasai battu ri limanna. 40 Alleang a'limbangi isse' Isa ri ba'leang kaloro Yordan, ri bate pannanraiang erena Yahya riolo, na kunjomi mange ammantang-mantang. 41 Tabbala tau ammangeii na sipangkuai: “Manna kale anre' na'piitte tanra masagala Yahya, mingka iangase' pa'pauna ri sesena inni taua annabai.” 42 Nalohemo tau mangea kunjo a'tappa' ri Isa.
Nipa'tallasai Lazarus
1 Rie' se're tau garring arengna iLazarus nummantang ri Betania, kampongna todo' Maryam na Marta russana' bahinena. 2 IMaryammi tau nulantikkoriai Puanga minnya'-minnya' na uhu'na napalu'lukangi bangkengna. Na Lazarus nugarringa arinnai. 3 Iami injo na nikarebaii Isa ri bahine ruaya angkua: “Puang, ie', agarringi andeke' aringku nukipettaya.” 4 Ri nalangngere'na Isa karebaya injo nakuamo: “Injo garringa anre'ja nangngerang kamateang, lanapa'kaitteangnaja kalompoangna Alla-taala sollanna battu ri injomi na kunipakalompo todo' inakke Ana' Alla-taala.” 5 Nipetta toje'i ri Isa iMarta na arinna na Lazarus pole. 6 Manna mamo, ri nalangngere'na Isa angkua garringi Lazarus, a'tungkaimi ammantang ruang allo isse' kunjo. 7 Ri maengnamo ruang allo nakuamo ri papinahangna: “Mae amminroki isse' ri tana Yudea.” 8 A'pihalimi papinahangna: “Rabbi, ie', beru maengki a'kulleang nirembasi batu ri pungkahana tau Yahudi, na kamunnina a'rakijaki amminro mange kunjo?” 9 A'pihalimi Isa: “Tangnga ia ta'sialloa sampuloi anrua jang? Punna rie' tau a'dakka ri allona tala ta'to'roi nasaba' nisinarii ri mata alloa. 10 Mingka punna rie' tau a'dakka ri bangngina lata'to'roi, nasaba' anre' kale narie' ansinarii batang kalenna.” 11 Kamuami injo pa'pauna Isa, na maengi injo angkuai pole: “Ta'tinroi Lazarus urangta, iami injo na kula'lampa anronrongi.” 12 Nakuamo papinahangna: “Puang, ie', punna tinronaja, battuangna lagassingji.” 13 Nabattuangii Isa tinro iamintu mate, nanu mingka pangngare'na ngase' tinro biasaji. 14 Gara-gara injo na'pau sillambusu Isa ri iangase'na angkua: “Matemi Lazarus. 15 Suaraa gara-gara ikau lanri anre'ku kunjo, sollannu a'kulle a'tappa'. Maemaki na nilampaii.” 16 Alleang Tomas nuniarenga pole iKambara angkua ri paranna papinahang: “Mae a'lampa'ki pale' gitte, sollanna sikamateang to'ki.” 17 Na ri lantenamo Isa kunjo mange, nahuntulangi Lazarus patang allomi maengna nikahangang. 18 Gara-gara sikaambaninna kampong Betania na Yerusalem, kulle kapang tallu kilo 19 natabbalamo tau Yahudi amminahang ri bahi'-bahine kunjoa mange numaea lampakarannui Marta na Maryam ri sesena kamateangna arinna. 20 Ri nalangngere'na Marta angkua larie'i Isa bede', ansulu'mi anruppaii. Naia iMaryam a'cidongji ri balla'a. 21 Nakuamo Marta ri siittena Isa: “Puang, kedde' rie'ki kunre mae, anre'ja namate aringku kodong. 22 Manna kamuai injo, kuisse'mi angkua lanadahuangki Alla-taala kamunnina apa-apa nukieraya.” 23 Napangkuaimi: “La'tallasaji amminro arinnu.” 24 A'pihalimi Marta: “Ie', kuisse'ji angkua la'tallasaji amminro punna nipa'tallasai tau matea ri hattu katappusang.” 25 Nakuamo Isa: “Inakkemi a'pa'tallasa na inakke to'ji tallasaya injo. Tau nu'tappa'a ri nakke la'tallasai manna kale namatemo, 26 na massing-massing tau a'tallasaya na a'tappa' ri nakke anre' kale nalamate samalling-mallingna. Maka a'tappa'jako ri sesena injo?” 27 A'pihalimi Marta: “Ie', kutappa'mi pole, Puang, angkua igittemi Masihia Ana' Alla-taala nularie'a mae ri linoa inni.” 28 Na ri maengnamo angkua kamua injo Marta, a'lampami nakeo' Maryam arinna nanabisiki angkua: “Rie'mi gurua kunre mae na nahojako.” 29 Ri nalangngere'na injo tappa' a'kinrengmi Maryam nampa allampaii. 30 Injo hattua tingang antama'pi Isa ri kamponga, kunjoiji ri panruppaiangna Marta. 31 Tau Yahudi nurie'a mae ri balla'na Maryam nunturungiai, angngittei tappa' a'kinreng na ansulu', iami injo na napinahang nangkua: “La'lampai kapang ri jera'a na kunjoi la'pirau.” 32 Ri lantenamo Maryam ri pa'buntulangna Isa naittei na'kulantu'mo ri dallekangnai na angkua: “Puang, kedde' rie'ki kunre mae, anre' kale namate aringku kodong.” 33 Ri naittena Isa angngarrang Maryam na tau Yahudi nunrurungangai angngarrang to'i, hattala pa'pisa'ringna na amasse to'i na a'kuta'nang: 34 “Antere'i pale' nukahangang?” A'pihali ngase'mi: “Ie', maemaki, Puang, na kiittei!” 35 Nangngarrangmo Isa. 36 Nakuamo tau Yahudi nukunjoa: “Itte sai batena napetta!” 37 Mingka rie' ri sikuntuna sipangkuaii: “Innimi tau numpahikkeai matanna tuhutaya, maka anre' na'kulle rie' nagaukang sollanna anre' to' namate inni taua?” 38 Nahattalamo pa'pisa'ringna isse' Isa, nampa lante ri jera'a injo. Naia injo jera'a sintoje'na goa nitongko' batu lompo babaangna. 39 A'suromi Isa: “Palette'mi injo batua!” A'pihalimi Marta kakanna lapung tau mate injo: “Ie', ahuru'mi, Puang, ka patang allomi.” 40 A'pihalimi: “Tangnga ia maengmi kupauangko angkua punna a'tappa'mako, lanuittei kalompoangna Alla-taala?” 41 Iami injo na nipalettekangmo batua battu ri pammeneangna tumatea injo, nanampa a'tingara Isa ri langi'a na angkua: “Ie', kusukkuriki, Ammangku, nasaba' maenga kilangngere. 42 Kuisse'mi nakke angkua sangnging kilangngerea, mingka kukua kamua injo gara-gara tau tabbalaya inni nuntammuia sollanna a'tappa' angkua igittemi ansuroa mae.” 43 Ri maengnamo angkua kamua injo, a'patibong sarringmi: “Lazarus, ansulu'mako!” 44 Ansulu' toje'mi tau matea injo, bangkengna na limanna ata'sekkokiji kaci na rupanna ta'tongkokiji. Nakuamo Isa ri iangase'na: “Hungkarangmi pa'roko'na sollanna loloasa a'dakka.”
A'samaturu'i pungkaha tuYahudi langhunoi Isa
45 Na ri naittenamo nunagaukanga Isa na tabbala tau Yahudi numangea ri Maryam a'tappa' ri ia. 46 Mingka rie' ri sikuntuna allampaii tau Farisia ampauangi ri sesena numaenga nagaukang Isa. 47 Iami injo na nipasipa'se'remo tupanritaya ri pungkaha imang na ri tau Farisi na sikuta'nang: “Apamo lakigaukang pale', nasaba' inni taua lohe nagaukang tanra masagala? 48 Punna nipabbiangji kamua injo, ma'nassa iangase' tau a'tappa' ri ia. Na kilanamaei pammarenta Roma angngancuru, manna balla' Alla-taalata manna pole iangase' singkampongta.” 49 Mingka sitau battu ri sikuntuna arengna iKayafas, imang lompo ri injo hattua, angkuai ri iangase'na: “Anre' kale ikau pangngisse'nu 50 na nutala taru'rangi angkua a'matu-matuangi ri gitte ngase' punna tau sitau angkamateangi umma'a naia sibatu kampong inni ancuru.” 51 Angkuai kamua injo, talia nubattu ri kalenna to'ji, iajia lanri iana imang lompo ri injo hattua ampa'pauangi palalo riolo angkua Isami langkamateangi sibatu kampong injo. 52 Na taliaji ri sesena injo sibatu kampong iajia sollanna napa'rappung to'i tuniare'a ana' ri Alla-taala nu'sara'-saraenga. 53 Gara-gara injo na a'pakarammula injo hattua na'samaturu' tau Yahudi langhunoi Isa. 54 Iami injo natala loloasamo a'dakkai ri sikuntuna tau Yahudi, iajia nasalaimi kua' injo nampa a'lampa ri sitangngana tana nuambania ri pa'kasino-sinoanga, iamintu kampong nuarengna Efraim. Kunjomi mange sipammantang-mantangang papinahangna. 55 Injo hattua a'biringmi allo lompo Pallingkainna tau Yahudi na tabbala tau a'lampa nai' ri Yerusalem nubattu ri kampong-kampong lanci'nongii kalenna ri anre'napa narapi'i allo lompoa injo. 56 Nahojaimi Isa na ri a'se'rena taua ri rambangna balla' Alla-taala sikuta'nangmi: “Antere'i pakua pangnguppanu? Tala larie'i kapang ri pangngu'rangianga inni.” 57 Kamua injo ka sikuntu pungkaha imanga na tau Farisia maeng amparentaangi angkua kuddeka rie' tau angngisse'i antere'i Isa, napau laloi sollanna a'kulle nijakkala.
Niminnyakii Isa ri kampong Betania
1 Na annang allo ri tingang narapi'napa allo lompo Pallingkai na'lampa Isa ri kampong Betania, kampongna Lazarus tumate numaenga nipa'tallasa amminro battu ri sikuntuna tau mate. 2 Kunjomi mange nitajai na Marta todo' anjampai. Sitau battu ri sikuntuna nu'cidonga sipangnganreang Isa iamintu Lazarus. 3 Nabattumo Maryam angngerang sicangko' minnya'-minnya' hau' ma'tungka nusuli' ballinna, nampa natikkoriangi bangkengna Isa na uhu'na napalu'lu'. Na nahauki sibatu balla'. 4 Injoka sitau battu ri papinahangna Isa iamintu Yudas Iskariot, ana'na Simon, nulambalu'i, angnginnyarangi: 5 “Angngurai na tangnga nibalu' mamo intu minnya'-minnya'a tallung bilangang salaka nampa ballinna nitaha-tahaangi tau kaasi-asia?” 6 Nakua kamua injo sintoje'na talia tau kaasi-asi nakamaseang, iajia ia palukka' na ia to' angkantiangi patti-patti pannanroang doi' na suangi angngalle sobbu battu kunjo. 7 Nakuamo Isa: “Kua'mi injo! Nasaba' mallingmi nananro ri sesena pangngahangangku. 8 Nasaba' tau kaasi-asia sangnging rie'ja ri sikuntunu, injoka inakke anre' na kukamua injo ri kau.” 9 Ri nalangngere'na angkua rie'i Isa kunjo, tabbala tau Yahudi ammangeii. A'lampai kunjo mange talia sangga ri sesenaji Isa iajia sollanna pole naittei Lazarus numaenga nipa'tallasa amminro battu ri sikuntuna tau mate. 10 Gara-gara injomi na napa'tappu'mo pungkaha imanga langhuno to'i Lazarus, 11 nasaba' gara-gara iami na tabbala tau Yahudi anghokoii na a'tappa' mange ri Isa.
Nigallarai Isa karaeng ri antama'na ri Yerusalem
12 Ri takkana ammuko na nalangngerei tau tabbala numaea ri pangngu'rangiang allo lompoa angkua ammolo mae to'mi Isa ri Yerusalem, 13 massing angngallemi ta'sipalapana raung kaluku lohe nampa ansulu' anruppaii na a'sa'ra lompo: “Pujimi! Ta'barakkakimi ia nurie'a mae ilalang arengna Puanga, iamintu karaengna Israil!” 14 Ammuntulumi Isa sikaju jarang balakang nampa nabai, situru' nuta'ukiria ri kitta'a: 15 “Jakomo mallaki, rajja'na Sion, anjoke'mi mae karaengnu a'bai ana' jarang pa'teke'.” 16 Injo hattua anre'pa na'pahang papinahanga ri sesena ngase'na nunjaria, nipakalomponapa arengna Isa nampami taru'rangi angkua injo rie'mi ta'ukiri ri kitta'a ri sesena na nunigaukangangai pole. 17 A'sabbimi tabbala tau numaenga rie' ri nikeo'na Lazarus ri Isa ansulu' battu ri jera'a iamintu ri nipa'tallasa'na amminro battu ri sikuntuna tau mate. 18 Gara-gara injo na'lampa to'mo tau tabbala numaraenga anruppaii Isa, nasaba' maengmi nalangngere angkua iami anggaukangi tanra masagalaya injo. 19 Iami injo nasipangkuaimo tau Farisia: “Nuitte to'ji angkua anre' kale rie' a'kulle nigaukang; ittemi injo sibatu lino ampinahangi.”
Isa ampa'nassai kamateangna
20 Ri sikuntuna nu'lampa nai'a la'sambajang ri allo lompoa injo rie' todo' tau Yunani. 21 Na injo tau namangeii Filipus nubattu ri Betsaida ri tana Galilea nampa naerai: “Puang, ie', a'ra'a nipasiisse' Isa.” 22 Mangemi Filipus ampauangi Andreas; Andreas to'pa na Filipus ampauangi Isa. 23 Injoka nipihalii ri Isa: “Narapi'mi hattungku nipakalompo Ana' Tau. 24 Tojeng-tojeng kukua ri kau ngase': pare silidde'a punna anre' na'dabbung ri tanaya na ancuru, siliddekiji; iajia punna ancurui, lalohe buana. 25 Tau numpokokangai tallasa'na, lakatanrengang nyahai, mingka tau nutala ampokokangai tallasa'na ri linoa inni, napakata'piarai bajung tallasa tala a'tappu'. 26 Na punna rie' a'ra' anjampaia, nalisa'pi baleku alleangna antere'-tere'a inakke kunjo to'i pajampaingku. Na punna rie' anjampaia lanipakaiai ri Ammangku. 27 Kunni-kunnina massei nyahaku kusa'ring na apamo lakukua? O Ammangku, ie', kipakasalama'ma kedde' battu ri nulanjaria sinampe'. Injoka gara-gara injomi na kurie'. 28 Ammangku, ie', kipakaiami arengta!” Kamuai injo nata'langngerangmo sa'ra battu ri suruga angkua: “Maengmi kupakaia, na lakupakaiai isse'!” 29 Na tau tabbala nukunjoa allangngerei sa'raya na rie' angkua ammunii gunturua. Rie' todo' angkua: “Sitau maleka' naurang sipa'bicara.” 30 A'pihalimi Isa: “Ata'langngerangi injo sa'raya talia ri seseku mingka ri sesenu. 31 Kamunnina mulaimi nihukkung tau linoa na lanipa'tanre'mi koasana numpatantangai. 32 Naia inakke, pungku nipairatemo battu ri linoa, lakurui' ngase'i taua mae ri nakke.” 33 Nakua kamua injo, lampa'nassami ri sesena kamateangna. 34 Injoka a'pihalimi tau tabbalaya: “Nukulangngerea nakke battu ri hukkung agamaya, Masihi la'danrang samalling-mallingna; antere'i pakua na kikua gitte: ‘Anre' natangnga nipairateku Ana' Tau?’ Nungngura pale' taunna nuniare'a Ana' Tau?” 35 Gara-gara injo na nipangkuaii ri Isa: “Sikiddi mami hattunna pannyinaria rie' ri sikuntunu. Ilalangna rie' pannyinaria injo, a'dakkamako sollannu anre' nukasassangang; nasaba' nu'dakkaya ri sassanga anre' naisse' lantere'i mae ammolo. 36 Tappa'mako ri pannyinaria injo ilalangna rie' ri kau, sollannu a'sinara.” Ri maengnamo angkua kamua injo Isa a'lampami ansobbuangi iangase'na.
Angngurai tau Yahudi natea a'tappa'
37 Manna kale a'piittei Isa siloheang tanra masagala ri dallekangna ngase', teaiji a'tappa' ri ia, 38 alleangna a'rupa pa'pauna nabbi Yesaya nungkua: “Puang, ie', inai antappa'i nukupa'pilangngerianga? na ri inaii limanna Puanga nipa'lonara?” 39 Gara-gara injo na anre' na'kulle a'tappa' pa'sabakeng numaenga to'mo naukiri Yesaya isse' nungkua: 40 “Napakahutami matanna iangase'na na napakaterasai atinna, ianna angngitteii matanna na angngissekii atinna, ianna ammolo maei na kupakagassing.” 41 Nakua kamua injo sumpae' Yesaya ri maengnamo naitte riolo kalompoangna Masihi, iami injo na'bicaramo ri sesena.
Pa'pauna Isa langhukkung
42 Manna mamo lohe ri sikuntuna pungkaha a'tappa' ri Isa, mingka gara-gara malla'na ri tau Farisi iami injo natea angngakui sillambusu, sollanna anre' nipalampai battu ri umma'a. 43 Nasaba' nangaiangi nipakaia ri paranna tau naia ri Alla-taala. 44 A'sa'ra lompomi Isa angkua: “Tau nuntappa'a, taliaji inakke natappa', iajia iami pole nunsuroaa mae; 45 na ia nungngitteaa, naitte to'mi ia nunsuroaa mae. 46 Naia inakke rie'ma ri sikuntunu rupa tau anjari pannyinari, sollanna massing-massing tau nu'tappa'a ri nakke, anre' na'danrang ri kasassangang. 47 Punna rie' tau allangngerei pa'pauku na anre' natappa'i, talia inakke langhukkungi, nasaba' kariekangku mae talia langhukkungi tau linoa, iajia lakupakasalama'i. 48 Tau numpekkayaa, na tala natarima pa'pauku, rie'mo langhukkungi, iamintu pa'pau numaenga kukua, iami langhukkung ri allo anjorengang. 49 Kamuai injo ka a'bicaraa talia nubattu ri nakke to'ji, iajia Ammangku nunsuroaa mae, iami andahuanga parenta ri sesena nusirattanga kupau na ri sesena pole bateku ampalantei. 50 Nakuisse'mo angkua parentana a'pa'rie' tallasa tala a'tappu'. Iami injo na ri sesena nukupaua inakke, situru'i nunapauanga Ammangku, kamua to'ji injo kupau.”
Isa ambissai bangkengna papinahangna
1 Ri anre'napa narapi' allo lompo Pallingkai, naisse'mi Isa angkua hattunnami lanahokoi linoa na amminro mange ri Ammanna. Sangnging napettai papinahangna nurie'a ri linoa na napettai sanggenna katappusang. 2 Ri maengna sipangnganreang Isa iangase' papinahangna na ri maengna to' Bellisi ampariatinnai Yudas, ana'na Simon Iskariot, pa'tujung ambalu'i Isa, 3 nampa pole ri naisse'namo Isa angkua niparilimannami iangase'-ngase'na ri Ammanna siurang naisse' to'mi angkua nubattui ri Alla-taala na lamminro mange to'ji kunjo, 4 na'kinrengmo na amposui ruang lalang pakeangna. Angngallemi silahara kaeng panjang nampa napakalu' ri aja'na. 5 Alleang anniri'mi ere ri kato'-katoang na ammulai nabissai bangkengna papinahangna na nalu'lu' kaeng nunapakalu'a ri aja'na. 6 Ri narapi'namo Simon Petrus na nikuta'nang: “Puang, ie', maka igitte lambissaanga bangkengku?” 7 A'pihalimi: “Nukugaukanga inni nakke anre'pa nuisse'i battuangna kau kamunnina, mingka lanupahangji ri maengna inni.” 8 Nakuamo Petrus: “Ie', anre' kale itteangna igitte lambissai bangkengku.” Nipihalimi: “Punna anre' kubissaangko, anre' kale pasisambungangnu mae ri nakke.” 9 Nakuamo Simon Petrus: “Puang, ie', aramaki sangga bangkengkuji, limangku pole na ulungku!” 10 Nakuamo Isa ri Petrus: “Tau numaenga anrio, anre'mo naparallu ambissaii ruanna bangkengna, ka tangkasa ngase'mi. Manna ikau, tangkasamako, mingka talia iangase'nu.” 11 Kamuami injo pa'pauna ka naisse'mi nulambalu'ai. Iami injo na angkua: “Talia iangase'nu tangkasa.” 12 Ri maeng ngase'namo nabissa bangkengna papinahangna, narunrung poleangmi pakeangna nampa amminro isse' ri pa'cidongangna. Nampa nakuta'nangi iangase'na: “Maka nupahangji battuangna nuberu maenga kugaukangangko? 13 Nusabbu'a kau guru na puang, annaba toje'mi injo pannyabbu'nu, nasaba' toje'mi nunuare'a injo. 14 Punna inakke ambissai bangkengnu, nanu inakkemi puang na gurunnu, sirattangpa isse' ri sesenu kau punnu sibissai bangkeng todo'; 15 nasaba' maengmako kupiitteii sollanna pa'pada bateku nakke anggaukang ri kau, kamua to'mako injo kau. 16 Tojeng-tojeng kukua ri kau ngase': ta'sitaua ata anre' nalompoang naia pungkahana, na ta'sitaua suro anre' nalompoang naia tunsuroai. 17 Na punna nuisse' ngase'mi injo, ta'barakkakimako punna nugaukangi. 18 Talia ri sesenu ngase' na kungkua. Naia inakke kuisse'mi inaii numaenga kupile. Mingka kamuami sollanna nipa'rupai pa'pauna kitta'a inni: ‘Tau nukuurangami sipangnganreang lanabaliangma.’ 19 Kukua memang kamunnina ri anre'napa nanjari, sollanna sampang anjarimi nutappa'ma angkua inakkemi ia. 20 Tojeng-tojeng kukua ri kau ngase': tau nuntarimayai nukusuroa, salamang inakkemi natarima, na ia nuntarimayaa, salamang iami natarima nunsuroaa mae.”
Isa angngisse'i pa'tujungna Yudas
21 Ri maengnamo angkua kamua injo Isa amassemi nyahana, na a'sabbi angkua: “Tojeng-tojeng kukua ri kau ngase': se're battu ri sikuntunu lambalu'a.” 22 Sinyannyangmi papinahanga nabata-batamo ka anre' naisse'i inaimo nakuangang. 23 Se're papinahangna Isa nunapae'nya', a'sanjengi ri sa'ri kanangna. 24 Iami nikode ri Simon Petrus sollanna a'kuta'nang ri Isa inaii nakuangang. 25 Kamuami injo na a'diampi' nampa a'kuta'nang: “Puang, ie', maka inai injo taunna?” 26 A'pihalimi Isa: “Iami intu nulakudahua inakke kanreang punna maengmi kupatittili.” Na ri maeng toje'namo napatittili nadahuangmi Yudas Iskariot, ana'na Simon. 27 Na ri maengnamo injo tappa' kajakkalangmi Yudas ri Setang. Iami injo nanipangkuaimo ri Isa: “Gaukang memangmi nulanugaukanga.” 28 Injo hattua manna sitau ri sikuntuna nusipangnganreanga tala rie' ampahangi battuangna nunipangkuaiangi Yudas ri Isa. 29 Lanri anjarina Yudas pakantiang doi'na ngase', iami injo narie' angngare'i nisuro angkua: “Hallimi apa-apa bajung kaparalluangta ri pangngu'rangiang Pallingkaia,” iareka na nisuro a'sidakka mange ri tau kaasi-asia. 30 Natarimaji Yudas kanreanga injo sumpae' natappa' ansulu', manna mamo injo hattua bangngimi.
Parenta beru
31 Ri a'lampanamo Yudas, nakuamo Isa: “Nipakalompo memangmi arengku kunni-kunnina inakke Ana' Tau, na Alla-taala nipakaia todo' ilalangku. 32 Na punna nipakaiai kamua injo, Alla-taala todo' lampakaiaa ri kalenna, na tappa' lanjarimo. 33 E ana'-ana'ku, sinampe' mama anrurungangko. Lanuhojaa, na pa'pada pa'pauku ri tau Yahudi, kamua to'mi injo kukua ri kau kunni-kunnina: ‘Anre' nu'kulle mange kau ri nulakumangeia nakke.’ 34 Rie' parenta beru kupalante ri kau ngase' iamintu sipettamako; pa'pada to'ji bateku ampettako, kamua to'mako injo batenu sipetta. 35 Lanri kamuanumi injo na lanaisse'mako iangase' tau angkua ikaumi papinahangku, iamintu punnu sipetta.”
Petrus lansassalii Isa
36 Nakuamo iSimon Petrus ri Isa: “Puang, ie', lantere'ki mae?” A'pihalimi Isa: “Ri nulakumangeia anre'pa nu'kulle ampinahanga kunni-kunnina, mingka lanupinahangja sallo'.” 37 A'kuta'nangmi Petrus: “Puang, ie', angngurai na anre' ku'kulle ampinahangki kunni-kunnina? Sadiama ampa'buangi nyahaku ri seseta!” 38 A'pihalimi Isa: “Maka sadia toje'mako ampa'buangi nyahanu ri seseku? Tojeng-tojeng kukua ri kau: anre' kale na'kokkoroa' janganga ri anre'napa nusassalia pintallung.”
Isa annorang mange ri Ammanna
1 “Jako ngase'mo runresaii nyahanu; tappa'mako ri Alla-taala na nutappa' todo' ri nakke. 2 Ri balla'na Ammangku ri suruga lohe pammantangang. Punna anre' nakamua injo, a'nassami kedde' kupauangnu. La'lampama kunjo mange ampa'sadiaangko. 3 Na pungku a'lampamo ampa'sadiaangko pammantangang, lamminroja mae na ampa'se'reko mae ri kalengku, sollanna ri antere'a inakke kunjo ngase' to'ko kau. 4 Na ri nukulampaia, nuisse'mi na nuisse' to'mi annorang lamangea kunjo.” 5 Nakuamo Tomas: “Puang, ie', anre' ngase' kuisse'i lantere'ki mae; punna kamuai injo, antere'i pakua pale' a'kulle kuisse' annorang lamangea kunjo?” 6 Nipangkuaimi ri Isa: “Inakkemi inni annoranga na kannabaanga na tallasaya. Manna sitau tala rie' a'kulle mange ri Ammangku, punna talia inakke naannori. 7 Kedde' nubatei toje'a, a'nassami nubateinna todo' Ammangku. Manna mamo mulaimi kunni-kunnina nubatei na nuittemo.” 8 Nakuamo Filipus: “Puang, ie', kijojjokang saa Ammanta na kusompere ngase'mo.” 9 Nakuamo Isa ri Filipus: “Mallingma rie' ri kau, Filipus, injoka tala nuisse'pa? Tau nungngitteaa, naitte to'mi Ammangku. Lanri antere'na kamua isse' nungkua kau: ‘Kijojjokang saa Ammanta’? 10 Maka anre' nutappa' angkua inakke rie' ilalangna Ammangku na Ammangku rie' ilalangku? Kamuai injo na nukupauangako nakke, talia nubattu ri kalengku to'ji, mingka Ammangku nu'danranga ilalangku, ia to'mi anggeokangi panggaukangna. 11 Tappa'ma angkua inakke rie' ilalangna Ammangku na Ammangku rie' ilalangku; iareka punna anre' nakamua injo pale', atappa' mamako ri nakke gara-gara panggaukanga injo. 12 Tojeng-tojeng kukua ri kau ngase': tau nutappa'a ri nakke lanagaukang to'i nukugaukanga nakke, onjongpa isse' nulompoang naia injo lanagaukang, lantarang a'lampaku ri Ammangku. 13 Na apa-apaji nuera na arengku nupake, lakugaukangi sollanna nipakalompoi arengna Ammangku ri ilalangku Ana'na. 14 Punna rie' nuera ri nakke na nupake arengku, inakkemi langgaukangi.”
Isa ampa'janjiangi Sumanga' Ci'nonga
15 “Punna nupettaa pale', gaukang ngase'mi parentaku. 16 Inakkemi langngeraangko ri Ammangku na lanadahuko patunrangi maraeng nula'danrang ri kau samalling-mallingna, 17 iamintu Sumanga'na nu'piitte kannabaang. Anre' na'kulle nitarima ri tau linoa, nasaba' anre' naittei na anre' to' nabateii. Mingka ikau nubateimi nasaba' a'danrangmi ri kau na larie'mi ri ilalangnu. 18 Tala kusalaiko pa'pada ana' kukang tappusu, mingka lakuinroijako. 19 Sinampe' mamaa na anre'mo na kulanaitte tau linoa, mingka ikau lanuitteija. Gara-gara a'tallasa'ku nakke na nula'tallasa todo' kau. 20 Ri injomi hattua na lanuisse' toje'mo kau angkua inakke rie' ri ilalangna Ammangku na pakunjo to'mako kau ri ilalangku na inakke ri ilalangnu. 21 Tau nuntarimayai parentaku na anggaukangi, iami ampettaa. Na tau numpettayaa lanipetta to'i ri Ammangku na manna inakke lakupetta to'ji nampa pole lakupa'lonarangi kalengku.” 22 Kamuai injo na Yudas nutalia Yudas Iskariot angkuta'nangi: “Puang, ie', apa maeng anjari alleangta lampa'lonarai kalenta mae ri nakke ngase' na talia mange ri tau linoa?” 23 A'pihalimi Isa: “Punna rie' tau ampettaa, lanagaukangi pa'pauku na lanipettai ri Ammangku, na inakke sipa'rua lammangeii injo taua na lasipa'danrangang. 24 Na tau nutala ampettayaa, anre' nagaukangi pa'pauku; nanu injo pa'pau nunulangngerea talia nubattu ri nakke to'ji, iajia nubattu ri Ammangku nunsuroaa mae. 25 Kupauang ngasekangko injo ilalangta sipa'rurungang. 26 Manna kamuai injo patunrangia, iamintu Sumanga' Ci'nong, nulanisuroa ri Ammangku naung mae ansambeanga, iami langngajarako ri sesena iangase'-ngase'na na lampau'rangiangko pole iangase' numaenga kupauangko. 27 Kasannangang kuhokoiangko iangase'nu. Kasannangangku kudahuangko na nukudahuangako anre' napada batena tau linoa a'dahu. Minjomo runresaii atinnu na minjo to'mo mallaki. 28 Maengmi nulangngere nukupauangako angkua: ‘La'lampaa rolo' nampa kuinroiko.’ Punna nupetta toje'a, ma'nassa suarangnu lanri angkuaku: ‘La'lampama ri Ammangku,’ nasaba' lompoangi Ammangku naia inakke. 29 Na kunni-kunnina kupauang memangko ri tingang anjarinapa sollannu a'tappa' sampang narapi'mi. 30 Anre'mo nalohe kubicara ri kau, nasaba' larie'mi nukoasana linoa. Manna kamuai injo, anre' kale koasana ri nakke. 31 Mingka sollanna naisse'mo tau linoa angkua kupettai Ammangku, iami injo na kugaukangi iangase'-ngase'na situru' nunasuroanga. Mae a'kinrengmako na ki'lampa battu kunre.”
Poko' anggoro nutoje'a
1 “Inakkemi poko' anggoro nutoje'a na Ammangkumi palamungna. 2 Massing-massing tangke nuri nakkea na tala ambua natotoi na massing-massing tangke numbuaya nabattasai sollanna horasang. 3 Ikau toje' tangkasamako gara-gara pa'pau numaengamo kupau ri kau. 4 A'danrangmako ri nakke na kula'danrang to' ri kau. Pa'pada to'ji tangkea anre' na'kulle ambua kale-kale punna anre' na'rakki' ri poko'a, kamua to'mako injo kau anre' na'kulle rie' nugaukang, punnu tala a'danrang ri nakke. 5 Inakkemi poko' anggoroa na ikau ngase'mi tangkea. Tau nu'danrangaji ri nakke na inakke ri ia, ambua horasai buana, nasaba' pantarangangku anre' na'kulle rie' nugaukang. 6 Punna rie' tau anre' na'danrang ri nakke, pa'padai tangke nunipela' ansulu' sanggenna rangko, nampa nipa'rappung na nibuang antama' ri apia alleangna a'kanre. 7 Punnu a'danrang ri nakke na pa'pauku a'danrang to' ri kau, lanuerai apa-apaji nunukaa'rakia na lanigaukangangko. 8 Lanri kamuanami inni na nipakalompoi arengna Ammangku iamintu punnu ambua horasa na kamua injo lanjariko papinahangku.”
Parenta sollanta sipetta
9 “Pa'pada to'ji Ammangku ampettaa, kamua to'mi injo inakke ampetta ngase'ko, iami injo na a'danrangmako ri pammettaku. 10 Punna nugaukangi kabusu parentaku, la'danrangko ri pammettaku, pa'pada to' inakke kugaukangi kabusu parentana Ammangku na ku'danrangmo ri pammettana. 11 Iangase' injo kupauangko sollanna a'danrangmo kasuarangku ri kau na sangka'mo kasuarangnu injo. 12 Innimi parentaku, iamintu sipettamako, pa'pada bateku ampettako. 13 Tala rie' pammetta rateangna inni iamintu punna rie' se're tau ampa'buangangi nyahana ri sesena urangna. 14 Ikau ngase'mi kai' lantangku punna nugaukangi nunakkea amparentaangko. 15 Anre'mo kuare' atako, nasaba' ataya anre' naisse'i nunagaukanga pungkahana, iami injo na kuare' kai'mako, nasaba' maengmako kupiissekang iangase' nukulangngerea battu ri Ammangku. 16 Talia ikau ampilea, iajia inakkemi ampileko. Na maengmako kupa'tantu sollanna ikau a'lampa lampangngasselanga bua na sollanna buanu injo nu'danrang. Kamuai injo sollanna nunueraya ri Ammangku na arengku nupake, lanadahuangmako. 17 Innimi parentaku ri kau, iamintu sollannu sipetta.”
Nikaharisii Isa na papinahangna ri tau linoa
18 “Punna nakaharisiko tau linoa, u'rangimi angkua rioloanga nakaharisi naia ikau. 19 Kedde' sijulu atiko tau linoa ma'nassa nangainnu niare' anunna. Mingka gara-gara tala sijulu atiko tau linoa—kamuai injo ka maengko kupile battu ri sikuntuna, gara-gara injomi na nunakaharisi linoa. 20 U'rangimi nunakkea maeng ampauangko: ta'sitaua ata anre' nalompoang naia pungkahana. Punna inakke nisessa, ma'nassa ikau lanisessanu todo'; kedde' nagaukangi pa'pauku, nagaukang to'mi pa'paunu. 21 Iangase' injo lanagaukang ri kau gara-gara inakke, nasaba' anre' naisse'i nunsuroaa mae. 22 Kedde' anre' kurie' mae na ku'bicara ri iangase'na injo, anre' nasala. Na sintoje'na kunni-kunnina anre'mo pangngalleangangna ri kalenna ri sesena dorakanna! 23 Tau nungkaharisiaa, nakaharisi to'mi Ammangku. 24 Kedde' anre' ku'geo' ri sikuntuna nutingang maenga rie' anggeokangi, ma'nassa anre' nasala. Mingka kunni-kunnina manna kale maeng naitte iangase'-ngase'na, a'kaharisiji manna ri nakke, manna pole ri Ammangku. 25 Kamuami injo na'rupamo pa'pau nuta'ukiria ri kitta' hukkung agamana, iamintu ‘Nakaharisia na tala rie' pa'sabakengna.’ 26 Mingka sampang kusuroangko naung mae patunrangia, nuansulu'a battu ri Ammangku, iamintu Sumanga' nu'piitte kannabaang, iami la'sabbi ri seseku. 27 Na ikau ngase' pole la'sabbi to'ko, nasaba' nampa ri ammulanna na nururunganga.”
1 “Kupauang ngasekangko injo sumpae', sollannu tala nipandulu'. 2 Kamuai injo ka lanipatompangiko tana ri umma'a. Na taliaji injo, larie' pole hattunna na massing-massing tau nunghuno ngase'ako lanaare'i kalenna anjampaii Alla-taala. 3 Lanagaukangi kamua injo lanri anre'na naisse'i Ammangku na manna pole inakke. 4 Kupauang ngasekangko injo, sollanna sampang narapi'mi hattunna, nuu'rangimi angkua maengmi kupauangko nakke.”
Jamaangna Sumanga'a
“Ri sesena injo anre' kupauangko ri ammulanna, nasaba' su'rung kunni-kunni riekija ri sikuntunu, 5 mingka kunni-kunnina la'lampama ri nunsuroaa mae. Na manna sitau ri sikuntunu tala rie' angkuta'nanga: ‘Lantere'ki mae a'lampa?’ 6 mingka gara-gara kukuana kamua injo ri kau na massei nyahanu. 7 Manna kamuai injo, kupauangko inakke nuannabaya iamintu: a'matu-matuangi ri sesenu pungku a'lampa nakke, nasaba' pungku tala a'lampa nakke, anre' nalarie' patunrangia mae ri kau, mingka pungku a'lampamo, lakusuromi ammaeiko. 8 Nanu punna rie'mi, lanapataru'rangimi tau linoa ri sesena doraka na ri sesena pa'pannabaang, nampa pole ri sesena hukkungang. 9 Pakunni, ri sesena doraka, iamintu lanri andana a'tappa' ri nakke. 10 Na ri sesena pole pa'pannabaang, iamintu lanri a'lampaku ri Ammangku na kunjo anre'mo nuittea. 11 Na ri sesena hukkungang iamintu lanri nihukkungnamo tukoasana linoa. 12 Loheiji lakupauangko kedde', mingka kunni-kunnina anre' nu'kulle antarima ngase'i. 13 Manna kamuai injo, sampang rie'mi ia nukukuanganga, iamintu Sumanga' nu'piitte kannabaang, lanaajarako ri sesena iangase' kannabaang. Nasaba' anre' nala'bicara battu ri kalenna to'ji, iajia battu ri nunalangngereaji injo to'mi lanapau nampa pole lanapa'nassaangko nulanjaria sallo'. 14 Iami lampakalompoa lanri naallena battu ri nukupupataia na lanapa'nassaangko sallo'. 15 Iangase' anunna Ammangku kupupata to'mi; gara-gara injo na kukua lanaallei battu ri nukupupataya nampa napa'nassaangko.”
Kamasseang lanjari kasuarang
16 “Sinampe' mami na tala nuittema na sinampe' mami to'mi pole na lanuittea isse', kamuai injo ka la'lampama ri Ammangku.” 17 Iami injo na rie' papinahangna sikuta'nang: “Apa battuangna nunakuanganga ri gitte: ‘Sinampe' mami na tala nuittema na sinampe' to' mami pole na lanuittea isse'’? Na apa pole battuangna: ‘La'lampama ri Ammangku’?” 18 Kamuai injo nasikuta'nangmo: “Apa nakuangang ri sesena pa'pau ‘sinampe' mami’ injo? Anre' ki'pahang ri sesena nunakuaya.” 19 Naisse'mi Isa angkua rie' a'ra' lanikuta'nangangi, iami injo na napangkuaimi: “A'nassami nupasikuta'nangi nukukuanganga sumpae': ‘Sinampe' mami na tala nuittema na sinampe' to' mami pole na lanuittea isse'.’ 20 Tojeng-tojeng kukua ri kau ngase': langngarrangko na nula'pirau kau, naia tau linoa lasuara kaleji; ikau lamasseko mingka kamasseangnu lata'pinraji anjari kasuarang. 21 Pakunni: ta'sitaua anrong asessai sampang lamana'i, nasaba' narapi'mi hattunna, mingka sampang ansulu'mi ana'na anre'mo nau'rangii pa'risi'na, lanri suara'na angnganakang se're tau mae ri linoa. 22 Kamua to'mako injo kau kunni-kunnina natora'ko kasessaang, mingka lakuitte poleangjako na injomi lampakasuarai atinnu na injo kasuarangnu anre' lanrabbu'i manna sitau battu ri kau. 23 Na ri injo hattua anre'mo lanupa'kuta'nangang ri nakke. Tojeng-tojeng kukua ri kau ngase': iangase' nunueraya ri Ammangku ilalang arengku lanadahuangko. 24 Su'rung kunni-kunni tingang maeng kalepako angngera ilalang arengku. Angngeramako na nula'tarima alleangna sangka'mo kasuarangnu. 25 Manna mamo injo sumpae' pangngebaraji kupake, mingka larie' hattunna na anre'mo kupa'pauangko na kamua injo, iajia lakupau sillambusangmako ri sesena Ammangku. 26 Ri injo hattua ikau to'ji langngera ilalang arengku. Na anre' kupangkuaiko lakupangngeraangko ri Ammangku, 27 ka ia to'ji ampettako lanri nupettaku kau na nutappa'na angkua inakke nuansulu'a battu ri Alla-taala. 28 Nubattua ri Alla-taala Ammangku na kumae ri linoa, na lakusalaimi pole linoa na kulamminro mange ri Ammangku.” 29 Nakuamo papinahangna: “Ittemi injo, a'pau sillambusuki kunni-kunnina na taliamo pangngebara. 30 Nampa ngase'ma angngisse' kunni-kunnina angkua igitte angngisse' iangase'-ngase'na; iami injo na anre' naparallu igitte nikuta'nang ri tau. Injomi na kutappa'mo angkua nubattuki ri Alla-taala.” 31 A'pihalimi Isa: “Maka tappa' toje'mako kunni-kunnina? 32 Pakunni, larie' hattunna na sintoje'na narapi'mi lanipa'sara'-saraengko na numassing amminro ri pammantangangnu, alleangna nusalaia kale-kalengku. Manna kamuai injo anre'ja nakale-kalengku, nasaba' Ammangkumi anrurunganga. 33 Iangase' injo kupauangko sollanna ri nakkejako ammuntulu kasannangang. Pakunni pole ri linoa asessa toje'ko. Manna kamuai injo, pa'tantangmi atinnu na nurannu, nasaba' kusaurumi koasana linoa.”
Pa'doangangna Isa ri sesena kalenna
1 Kamuami injo pa'pauna Isa nampa a'tingara ri langi'a na angkua:“O Ammangku, ie', narapi'mi hattunna; kipakalompomi arengna ana'ta, sollanna napakalompo to'i arengta. 2 Pa'pada to'ji maengmi kidahu katojekang ri sesena iangase' nu'tallasaya, iamintu sollanna napa'tallasa tala a'tappu'i iangase' tau numaenga kidahuangi. 3 Naia tallasa tala a'tappu'a iamintu punna nabateiki tau angkua igittemi Alla-taala nutunggalaya na annaba, na nabatei todo' Isa Masihi nukisuroa mae. 4 Beru maengmi kupa'piitteang inakke kalompoangta ri linoa lanri kupa'maengna jamaang nukisuroanga anggaukangi. 5 Na kunni-kunnina, Ammangku, igittemo ampakalompoi arengku ri dallekangta na bateta kipainroangma kalompoangku nurie'a ri rie'ku ri gitte ri tingang nipa'jarina linoa.
Pa'doangangna Isa ri sesena papinahangna
6 Maengmi kupa'nassa kalenta mange ri tau numaenga kisa'lakanga battu ri sikuntuna tau lino. Injo anuntai nukipa'pirannuangangianga na iangase'na anggaukangmi pa'pauta. 7 Nampami naisse' kunni-kunnina angkua iangase' numaenga kidahuang nubattu toje' ri gitte. 8 Kamuami injo ka pa'pau nukidahuanga maengmi kupalante ri iangase'na na natarimamo. Nampa pole naisse' tojeng-tojengmi angkua nubattua ri gitte, na natappa'mo pole angkua igittemi ansuroa mae. 9 Inakkemi a'doa ri sesena iangase'na injo. Talia ri sesena kabusu tau linoa kupa'doaang, iajia ri sesenami iangase' numaenga kidahuang. Kamuami injo ka iangase'na injo anuntai, 10 lanri iangase' anungku anuntami na anunta anungku to'mi, na nipata'kaitteangmo kalompoangku ri iangase'na. 11 Laanre'ma ri linoa inni, mingka iangase'na kodong riekiji ri linoa na inakke lakumangeiki. O Ammangku nuci'nonga, ie', kikatutuii na koasana arengta kipake numaenga kidahuang, sollanna a'se're to'i pa'pada igitte sipa'rua. 12 Ilalangku rie' ri sikuntuna ri linoa inakkemi angkatutuii na koasana arengta. Tau numaenga kidahuang kupiarai na manna sitau tala rie' ancuru ruanna iaji sitau nutoto'na mintodo' laancuru, sollanna a'rupa nuta'ukiria ri kitta'a. 13 Mingka kunni-kunnina kumangeiki na kupauang kamua injo, sollanna sangka' kasuarangku ri atinna ngase' nuri linoa. 14 Inakkemi maeng ampalanteangi pa'pauta ri iangase'na, alleangna nikaharisi ri tau linoa, nasaba' taliai nubattu ri linoa, pa'pada to'ji inakke taliaa nubattu kunjo. 15 Anre' na kuerai sollanna kialle battu ri linoa, iajia sollanna kikatutuii battu ri tungngodia. 16 Iangase'na injo sumpae' taliai nubattu ri linoa pa'pada to'ji inakke. 17 Kitakkomi iangase'na na kisangkaki ri kannabaangta. Pakunjo ka pa'pautami kannabaang. 18 Pa'pada to'ji inakke kisuroa mae ri linoa, kamua to'ma injo inakke ansuroi mange ri tau linoa; 19 kupakata'takkoi kalengku ri sesena iangase'na, sollanna nipakata'takko to'i ri kannabaang.
Pa'doangangna Isa ri sesena iangase' tutappa'a
20 Na taliaji ri sesena iangase'na kupa'doaang, mingka ri sesena pole ia nulatappa'a gara-gara pangngajarangna iangase'na. 21 Kamuai injo sollanna iangase'na anjari se're, pa'pada to'ji igitte, Ammangku, rie' ri nakke na inakke rie' ri gitte, sollanna todo' iangase'na a'se're ri gitte sipa'rua na natappa'mo tau linoa angkua igittemi ansuroa mae. 22 Na pakunni pole, inakkemi andahuangi kalompoang numaenga kidahuang, sollanna a'se're iangase'na pa'pada todo' igitte sipa'rua inni, 23 iamintu inakke rie' ri iangase'na na igitte todo' rie' ri nakke sollanna nisangkakii ri pa'se'reangna. Na sollanna pole naisse'mo tau linoa angkua igittemi ansuroa mae, na naisse' todo' angkua kipettai iangase'na pa'pada bateta ampettaa. 24 O Ammangku, ie', a'ra'ku sollanna ri antere'a rie' inakke, kunjo ngase' to'i ri nakke ia numaenga kidahuang, sollanna nanyannyangi kalompoangku nukidahuanga, lanri kipettaku nampa ri tingang anjarina linoa. 25 O Ammangku nuadelea, ie', toje' anre' naisse'ki tau linoa, mingka inakke kuisse'ki na inni taungku naisse'mi angkua igittemi ansuroa mae. 26 Na maengmi kupa'piissekang kalenta ri iangase'na na lakupakakamuaiji injo sollanna pammettata nukipapisa'ringianga rie' to'mi ri iangase'na; na inakke todo' rie' ri iangase'na.”
Nijakkalai Isa
1 Ri maengnamo angkua kamua injo Isa, sipansulukangmi papinahangna battu kunjo na a'limbang ba'leang kalo'-kaloro lupa nuniarenga Kidron. Kunjo mange rie' koko-koko naantama'mo ia a'rurung papinahangna. 2 Naia Yudas nulambalu'ai naisse' to'i kunjo, nasaba' a'lellengi Isa sipa'se'reang papinahangna kunjo mange. 3 Gara-gara injomi namangemo Yudas angngurang se're kompi tantara Roma na sikuntu pajaga balla' Alla-taala pole nubattua ri pungkaha imanga siurang pole ri tau Farisi sangka' romba na sulo na nutarang. 4 Naia Isa naisse' are ngase'mi nulantora'ai kalenna, iami injo na namangeii na nakuta'nang: “Inai kihoja?” 5 Nipihalimi: “Isa tuNazaret.” Nakuamo Isa: “Inakkemi ia.” Yudas numbalu'ai kunjo to'i a'rurung. 6 Ri angkuana Isa: “Inakkemi ia,” ata'soro' boko ngase'i na andulu'. 7 Alleang a'kuta'nang poleangi Isa: “Inai kihoja?” Nipihalimi ri iangase'na: “Ie', Isa tuNazaret.” 8 Nakuamo Isa: “Beru maengki kupauang angkua: ‘Inakkemi ia.’ Punna pale' inakke kihoja, pabbiangmi rolo' inni taua a'lampa.” 9 Kamuami injo sollanna a'rupamo pa'pau numaenga nakua Isa: “Battu ri sikuntuna nukipa'pirannuangangianga ri nakke, manna sitau tala rie' kupabbiang ancuru.” 10 Naia Simon Petrus nungngerang berang labbu anghubbu'i na nunauppaya naherang atannami imang lompoa na kettungmo toli kanangna. Arengna injo lapung ata Malkhus. 11 Gara-gara injo nangkua Isa ri Petrus: “Paribanoannami berangnu intu; maka anre' nalakupangnginungii cangkiri nunapabbianga Ammangku anjari ri nakke?”
Niadelii Isa ri pa'tupanritaangna tau Yahudi
12 Alleang nijakkalai Isa na nisekko' ri komandang kompina Roma na tantarana siurang sikuntu pajaga balla' Alla-taala nubattua ri pungkahana tau Yahudi. 13 Bungasa'na nierangi mange ri Hanas, nasaba' ia matoangna Kayafas. Naia Kayafas imang lompoi ri injo hattua. 14 Iami maeng ampangngajarii paranna pungkaha tau Yahudi angkua a'matu-matuangi tau sitau ancuru ri sesena kabusu umma'.
Petrus ansassalii Isa
15 Naia Simon Petrus a'rurung sitau papinahang maraeng ampinahang bokoi Isa. Injo lapung papinahang maraenga nuniisse' ri imang lompoa, iami injo naantama' todo' ri rambangna a'rurung Isa, 16 mingka Petrus kodong ammannyangji pantarang timuang. Gara-gara injomi na papinahang numaraenga sumpae', nuniisse'a ri imang lompoa, ansulu'i na sipa'bicara bahine pajaga timuanga; nampa naerang todo' iPetrus antama'. 17 Nanikuta'nangmo Petrus ri bahine patunrangi pajaga timuang angkua: “Maka tangnga ia ikau papinahangna to'ko injo taua?” A'pihalimi Petrus: “Taliaa!” 18 Kabenranna injo hattua na'parinra api ri sumi'a sikuntu ata siurang pajaga balla' Alla-taala, nasaba' hattu dingingi, na kunjo ngase'i a'rarang na mange todo' Petrus ri sikuntuna tau a'raranga. 19 Kabenranna injo nammulaimo niparessa Isa ri imang lompoa ri sesena papinahangna na ri sesena pole ajarangna. 20 A'pihalimi: “Ie', inakke a'pau sillambusua mange ri rupa taua. Sangnging angngajaraja nakke ri antere'-tere' balla' pa'sambajangang na manna ri rambangna balla' Alla-taala nusangnging napa'se'reia tau Yahudi, na kutingang maeng kale a'bicara sobbu-sobbu. 21 Ie', angngurai na kikuta'nanga? Iamo kedde' kikuta'nang tau maenga allangngerei pa'pauku. A'nassami naisse'na nukupa'pauanga nakke.” 22 Ri nakua kamuanamo injo, tappa' nitampilingmi ri pajaga nurie'a kunjo na nipangkuai pole: “Pakunjo batenu a'pihali ri imang lompoa?” 23 Na'pihalimo Isa: “Punna salai pa'pihalingku, sabbiangmi anterea salana. Mingka punna annabai, angnguraki kipeppe'a?” 24 Alleang nikiring ta'sekkokiji Isa ri Hanas mange ri Kayafas imang lompoa. 25 Kunjoiji Simon Petrus a'rarang na nipangkuai ri sikuntu tau kunjoa: “Maka tangnga ia ikau sitauko battu ri papinahangna to' injo tau?” 26 A'sassalami angkua: “Taliaa.” Kunjoi rie' sitau battu ri sikuntuna atanna imang lompoa nusibija ata nunitebba'a tolinna ri Petrus. Iami angkua: “Ambaa, inakke angngitteko sipa'rurungang ri koko-kokoa na injo taua.” 27 Iami injo na a'sassala poleangmo Petrus na tappa' a'kokkoroa'mo janganga.
Niadelii Isa ri Pilatus
28 Nierangi Isa battu ri Kayafas mange ri balla'na pammarentaya. Injo hattua nampami subu. Naia tau Yahudi anre' naantama' ri balla'na pammarentaya sollanna anre' niare' najisi na sollanna a'kulle angnganre Pallingkai. 29 Gara-gara injo naansulu'mo pammarenta Pilatus angkuta'nangi iangase'na angkua: “Apa nupa'salaangi intu taua?” 30 A'pihalimi: “Ie', kedde' taliai tau kodi, a'nassami anre' kujakkalangki!” 31 Angkuai Pilatus: “Punna kamuai injo, allemi kau nanuadeli to'mo situru' hukkung agamanu.” Nakuamo tau Yahudi:“Ie', inakke ngase' tala rie' katojekangku ammuno hukkungang.” 32 Kamuami injo sollanna a'rupamo pa'pauna Isa nunakuanganga ri sesena antere' a'pakua kamateangna sinampe'. 33 Naantama' poleangmo Pilatus ri balla'na nampa nasuro keo'i Isa na nakuta'nang: “Maka toje' ikaumi karaengna tau Yahudi?” 34 A'pihalimi Isa: “Pa'kuta'nangta injo maka battu ri atinta to'ji gitte iareka rie' tau maraeng ampauangki ri seseku?” 35 Nakuamo Pilatus: “Maka nuare'a inakke tau Yahudi todo'? Singkampongnu to'ji na pungkaha imang beru ampa'pijakkalangko mae ri nakke. Punna kamuai injo, apa pale' maeng nugaukang?” 36 A'pihalimi Isa: “Pa'karaengangku talia nubattu ri linoa inni; kedde' nubattu ri linoa, a'nassami a'balii taungku, sollangku anre' nipa'pijakkalanga ri pungkahana tau Yahudi. Kamuami injo ka pa'karaengangku toje' talia nubattu kunre mae.” 37 Lanri kamuanami injo na angkua Pilatus: “Punna kamuai injo, toje' ikau karaengko?” A'pihalimi: “Ie', igitte to'ji angkua inakke karaenga. Gara-gara injomi na kunianakang nakke na gara-gara injo to'mi pole na kurie' mae ri linoa inni, sollangku a'sabbi ri sesena kannabaanga; massing-massing tau nua'ra'a angngisse' kannabaanga iaji allangngerei ri pa'pauku.” 38 Nipangkuaimi ri Pilatus: “Apa pale' niare' kannabaang?”
Nihukkung matei Isa
Ri maengna angkua kamua injo, ansulu'mi isse' Pilatus ri pungkahana tau Yahudi na napangkuai: “Naia inakke, anre' kale kummuntulu nusala ri ia. 39 Mingka ri sesenu rie' kabiasaang ri allo lompo Pallingkai na kulappasangangko sitau tahangang. Maka nukaa'raki kulappasangangko karaengna tau Yahudi inni?” 40 Gara-gara injomi na'sa'ra lompo ngase'mo isse': “Jappemi intu ia, iBarabasmo!” Naia iBarabas sitaui parucca'.
1 Kamuami injo naantama'mo Pilatus angngallei Isa nampa nasuro poti-pari. 2 Angnganangmi tantaraya songko' a'katinting nampa napasongkokiang. Napapakeii baju toro kamummu', 3 nampa angkuaimi naung: “O o karaengna tau Yahudi, ie', kubarisallangiki.” Nampa a'para antampilingi. 4 Alleang ansulu'mi isse' Pilatus nanapangkuai tau Yahudi: “Andeke'mi kuerangangmako ansulu' sollanna nuisse'mo angkua anre' kale kummuntulu nusala ri ia.” 5 Naansulu' toje'mo Isa a'songko' a'katinting na a'baju kamummu'. Nakuamo Pilatus: “Andeke'mi taunna kodong!” 6 Ri niittena Isa ri sikuntuna pungkaha imang na ri sikuntuna pole pajaga, a'para a'sa'ra lompomi angkua: “Palangmi, palang lalomi!” Iami injo na nipangkuai ri Pilatus: “Allemi pale' na ikau to'ji ampalangi; naia inakke, anre' kale kummuntulu nusala ri ia.” 7 A'pihali terasami tau Yahudi: “Rie' atorangku ngase' nakke na situru' hukkung agamaku injo tau sirattangi nihuno, nasaba' naare'i kalenna Ana' Alla-taala.” 8 Ri nalangngere'na Pilatus kamua injo pila' malla'mi, 9 alleang sipantamakang poleangmi Isa ri balla'na na a'kuta'nang: “Battu antere' toje' assala'nu kau?” Injoka anre' nipihalimi ri Isa. 10 Iami injo nangkua Pilatus: “Andako ampihalia? Anre' kapang nuisse'i angkua inakkemi atoje' ampalangko na atoje' todo' allappasangko?” 11 Nipihalii ri Isa: “Ie', anre' kale katojekangta ri nakke inni punna anre' nidahuangki battu rate. Gara-gara injo na lompoangi kasalaangna tumbalu'aa ri gitte.” 12 Gara-gara injo na na'kulle-kulleang Pilatus allappasangi, mingka a'sa'ra lompoi tau Yahudi angkua: “Punna kilappasangi intu taua, igitte taliaki urangna karaeng Kaisar. Massing-massing tau nungngare'ai kalenna karaeng, anjari balii ri karaeng Kaisar.” 13 Ri nalangngere'na Pilatus injo, nasuro erangmi Isa ansulu' nampa a'cidong ri kadera pangngadelangna kunjo ri nuniarenga Dapara Batu na ri basa Ibranina Gabata. 14 Injo alloa pa'sadiaang allo lompo Pallingkai, kulle kapang tette' sampulo anrua tangngallo alloa. Nakuamo Pilatus ri tau Yahudi kunjoa: “Andeke'mi karaengnu!” 15 Na'sa'ra lompo ngase'mo angkua: “Pa'tanre'mi ia! Pa'tanre'mi! Palangmi!” Nipangkuaimi ri Pilatus: “Maka kupalangangko karaengnu?” A'para a'pihalimi pungkaha imanga angkua: “Anre' kale karaengku ruanna Kaisar!” 16 Gara-gara injo na nipa'buangi Isa ri Pilatus mange ri iangase'na lampalangi.
Nipalangi Isa
Kamuai injo naniallemo Isa na nirenreng. 17 Nasompo kale-kalemi palangna ansulu' mange ri se're pammantangang niare'a Pa'tanja'na Sai' Ulu na ri basa Ibranina Golgota. 18 Kunjomi nipasipalang rua tau maraeng ri kairi kanangna na Isa ri tangnga. 19 Nasuro pataba to'i Pilatus ukirang ri ulunna palangna Isa nuta'ukiri: “Isa tau Nazaret karaengna tau Yahudi.” 20 Injo lapung ukirang nibacai ri tabbala tau Yahudi, nasaba' pammalangangna Isa ambanii ri kotaya. Injo pa'paua niukirii ri basa Ibrani na basa Yunani na basa Roma. 21 Angkua ngase'i pungkaha imangna tau Yahudi ri Pilatus: “Ie', aki kedde' ukirii ‘Karaengna tau Yahudi,’ iajia ‘Nakua inni taua: “Inakkemi karaengna tau Yahudi.”’” 22 A'pihalimi Pilatus: “Nukuukiria iamo ta'ukiri.” 23 Ri maengnamo tantaraya ampalangi Isa, naallemi pakeangna nampa nataha appa' ta'sitaha se're tantara. Baju torona mamii. Naia injo lapung baju toro nuanre' jai'na, battu raha a'lampa nai' se'reji tannungang. 24 Alleang sipangkuaii: “Jakomo kikekkekii; a'dappu-dappueng mamaki langngisse'i inai langnguppai.” Kamuami injo alleangna a'rupamo nuta'ukiria ri kitta'a: “Massing nataha-tahai pakeangku na a'dappu-dappueng ri sesena bajungku.” Kamuami injo nunagaukanga tantaraya. 25 Na ri ampi'na palanga rie'i kunjo anrongna Isa siurang russana'na anrongna siurang pole Maryam bahinenna Klopas siurang Maryam Magdalena. 26 Ri naittena Isa anrongna na papinahangna nunapae'nya'a rie' ri ampi'na, napangkuaimi anrongna: “E anrongku, intumi anjari ana'ta!” 27 Nampa nakua to'mi ri lapung papinahang injo: “Intumi anjari anrongnu!” A'pakarammulai injo hattua lapung papinahang angngallei mange ri balla'na.
Isa mate
28 Ri maengnamo injo, nanaitte Isa angkua nipa'rupami iangase'-ngase'na, na nakuamo: “Atirerea!” kamuai injo alleangna a'rupamo nuta'ukiria ri kitta'a. 29 Na kunjo mange rie' mangko' panno cukka. Rie' batu monang niparikaju-kaju nampa nipatittili ri lapung cukka na nipamangeang ri babana Isa. 30 Ri maengnamo napisa'ringi Isa injo lapung cukka nakuamo: “Nipa'maeng ngase'mi.” Kamuai injo na'dundumo na napalembai nyahana. Lappe'na Isa nitobo' 31 Naia pungkahana tau Yahudi a'lampai angngera ri Pilatus sollanna bangkengna tau nipalanga nipolong nampa nipanaung bakkena. Kamuai injo sollanna tala rie' bakke ta'gentung ri palanga punna allo sattu, nasaba' allo pa'sadiaangmi, onjongpa isse' ka takkana ammuko allo sattu lompoi. 32 Iami injo na rie'mo mange tantaraya ampolongi bangkengna numaka se'rea na nuse'reanga nunipasipalanga Isa, 33 mingka ri lantena ri Isa naittei angkua matemi, kamuai injo na anre' napolongi bangkengna. 34 Manna mamo sitau ri sikuntuna tantaraya injo antobo'i lappe'na poke natappa' ansulu'mo rara siurang ere. 35 Naia tau nungngitteai injo iami a'sabbii na annaba toje'i kasabbiangna, sollannu a'tappa' ngase' todo'; na iami angngisse'i angkua nunapaua nuannaba. 36 Saba'na nanjari kamua injo alleangna a'rupamo nuta'ukiria ri kitta'a angkua: “Tala rie' bukunna manna se're lanipolong.” 37 Na rie' pole ta'ukiri angkua: “La'nyannyangi ri tumaenga nitobo'.”
Niahangangi Isa ri Yusuf
38 Ri maengna injo namange Yusuf angngerai ri Pilatus bara' nipabbiangji ampanaungi bakkena Isa. Naia Yusuf injo, tubattu ri Arimatea, nupapinahangna to'i Isa, mingka a'sobbu-sobbui, nasaba' malla'i ri pungkahana tau Yahudi. Na nitarima pangngerana ri Pilatus. Alleang mangemi ambule'i bakkena Isa. 39 Mange to'i kunjo Nikodemus, nubungasa ammangei Isa ri bangngina. Angngerangi sibuangang rutusu nuhau' napasilau' kaju tanning, lohena kulle kapang tallung pulo kilo. 40 Sipa'ruai angngalle bakkena Isa nampa napasikalo-kalo nuhau'a sumpae' ri balacu nuta'silamba'-lambara situru' ada'na tau Yahudi punna angngahangangi. 41 Ri ampi'na pammalangangna Isa rie' koko-koko na kunjo mange rie' pa'jerakang beru nutingang maeng nipangngahangangi. 42 Naia injo alloa allo pa'sadiaang ri sesena tau Yahudi na injo lapung jera' tala lerei battu kunjo, iami injo na nalabbiangi bakkena Isa kunjo.
A'tallasa amminrona Isa
1 Ri allonna aha' ri ele'-ele' kaleana na sassangiji na'lampa iMaryam Magdalena mange ri jera'a na naittei ta'dere'mi batu pa'jempangna. 2 Alleang numarimi amminro ammangeii Simon Petrus na namangei todo' papinahang maraeng nunapae'nya'a Isa, na ampauangi: “Naalle sobbu-sobbui tau bakkena Puanga ri jera'a na tala kuisse' antere'i nalabbiang.” 3 Na ansulu'mo Petrus a'rurung papinahang maraenga mange ri jera'a. 4 Sipanumariangmi lapung tau rua, mingka papinahang maraenga rioloangi na laccirang naia Petrus, alleangna rioloi lante ri jera'a. 5 A'jukku'mi na'boja antama' nanaitte pa'roko'na mami ta'labbiang kunjo na ta'silamba'-lambari, injoka anre' naantama'. 6 Alleang lante to'mi Simon Petrus antolai na tappa' antama' ri jera'a injo. Naitte-itteimi pa'roko'a ta'labbiang kunjo nuta'silamba'-lambari, 7 naia to' isse' pallohong rupanna nukunjoa ri ulunna Isa sumpae'na anre'i ri ampi'na pa'roko'a injo, mingka ri sa'rii nata'balu'mo. 8 Nampa to'mi antama' papinahang maraenga nurioloanga lante sumpae', naittemi nunjaria na natappa'. 9 Kamuai injo ka su'rung injo hattua tingang napahangpi bonena kitta'a nungkua, anre' natangnga a'tallasa'na amminro Isa battu ri sikuntuna tau mate. 10 Alleang amminromi lapung papinahang rua ri massing balla'na.
Napa'piitteangi kalenna Isa ri Maryam Magdalena
11 Naia Maryam nusumpae'a ammentengi pantarang jera' a'pirau na nadallekii. Kabenranna kamua injo na'jukku' a'boja antama' ri jera'a injo, 12 angngittemi rua maleka' ammakeang pute a'cidong ri bate pammonrangang bakkena Isa, sitau ri tuju ulu na sitauanga ri tuju bangkeng. 13 Nipangkuaimi ri maleka'a injo: “E russana', angngurako na nu'pirau?” A'pihalimi Maryam: “Ie', nasaba' bakkena Puangku naalle tau na tala kuisse' antere'i nalabbiang.” 14 Ri maengnamo angkua kamua injo a'saile bokomi nangngitte se're tau, nanu Isami, mingka anre' nabateii. 15 Nipangkuaimi ri Isa: “E russana', angngurako na nu'pirau? Inai nuhoja?” Pangngare'na Maryam injo lapung tau pakammi'na kokoa, iami injo na napangkuai: “Ie', puang, kuddeka igittemi angngallei, kipauang saa pallabbiangangta sollangku a'lampa angngallei.” 16 Nipangkuai isse' ri Isa: “Maryam!” Na tappa' nadallekimi na angkua: “Rabuni!” (battuangna tungguru). 17 Nakuamo Isa: “Jako karahaia ka anre'pa ku'lampa nai' ri Ammangku; a'lampa mamako ri pa'russanakangku nanupauang angkua: ‘Kunni-kunnina la'lampama nai' ri Ammangku nuAmmannu to'mi, na mange ri Alla-taalaku nuAlla-taalanu to'mi.’” 18 Iami injo na'lampamo Maryam Magdalena mange ri papinahanga na ampauangi angkua maengi naitte Puanga nampa napau to'i pole ri sesena nunisuroangai.
Napa'piitteangi kalenna Isa ri papinahangna
19 Ri bangnginamo ri allonna aha' na'se're papinahanga, na nasuling ngase'i anna'na ka malla'i ri pungkahana tau Yahudi. Ri injomi hattua narie' mange Isa tappa' a'bora tangnga na angkua: “Kasannangang mange ri kau ngase'!” 20 Na ri maengnamo angkua kamua injo napa'piitteang to'mo limanna na lappe'na pole. Nasanna'mo suara'na lapung papinahang lanri naittena Puanga. 21 Alleang nakuamo isse' Isa: “Kasannangang mange ri kau ngase'! Pa'pada to'ji Ammangku ansuroa mae, kamua to'ma injo inakke ri kau kusuroko mange.” 22 Na ri maengnamo angkua kamua injo naharrusimi nyaha na angkua: “Tarimami Sumanga' Ci'nonga. 23 Pakunni, punna nupammopporangi dorakanna parannu tau, nipammopporang to'mi, na punna nupa'tantui anre' nipammopporangi dorakanna parannu anre' toje' nipammopporangi.”
Napa'piitteangi kalenna Isa ri Tomas
24 Naia iTomas nuniarenga iKambara sitau papinahang ri nusampuloa anrua, anre'i ri sikuntuna ri rie'na Isa mange kunjo. 25 Iami injo na nipangkuaii ri paranna papinahang: “Inakke ngase' beru kuittei Puanga!” Mingka nakuamo Tomas: “Punna tala kuittepi ri limanna bate pakua na ampaucu'i karamengku kunjo na kamua to'mi limangku ri lappe'na, anre' kalepa kutappa'.” 26 A'bali alloi na'se're' isse' papinahanga kunjo na iTomas rie' to'mi ri sikuntuna. Ta'suling ngase' anna'a, na tappa' rie' isse' Isa a'bora tangnga ri iangase'na na angkua: “Kasannangang mange ri kau ngase'!” 27 Alleang napangkuaimi Tomas: “Ittemi limangku, na nupatonjomo karamengnu na nupaucu'mo limannu ri lappe'ku. Minjomo tangnga tappaki, iajia tappa' lalomako.” 28 A'pihalimi Tomas: “O Puangku, ie', Alla-taalaku!” 29 Nipangkuaimi ri Isa: “Gara-gara nuitteku na nu'tappa'. Ta'barakkakimi tau, manna mamo tala angngitte, mingka a'tappa'i.”
Pa'tujungna na niukirii pa'pau haji'a
30 Toje' loheiji tanra masagala maraeng maeng nagaukang Isa ri dallekangna papinahangna nutala ta'ukiri ri bo'-bo'a inni, 31 mingka iangase' nurie'a kunni maengmi niukiri, sollannu ngase' a'tappa' angkua Isami Masihia, Ana' Alla-taala, na sollanna pole battu ri katappakangnumi na nummuntulu tallasa tala a'tappu' ri arengna.
Napa'piitteangi kalenna Isa ri biring tamparanga
1 Maengi injo napa'piitteangi isse' kalenna Isa ri papinahangna kunjo ri biring tamparang Tiberias na pakunni batena. 2 Kunjo ri biring tamparanga a'se'rei Simon Petrus na Tomas nuniarenga iKambara, na Natanael nubattu ri kampong Kana nuri Galilea, na rua ana'na Zebedeus na rua pole papinahang maraengna. 3 Nakuamo Simon Petrus: “La'lampaa anjakkala juku'.” Nakua ngase'mo ri Petrus: “A'lampa ngase'a anrurungangko.” Iami injo natappa' ansulu' ngase'mo nampa nai' ri lopia, injoka situntung bangngi bilo juku' najakkala. 4 Ri lata'bassara'namo alloa rie'i Isa ammenteng ri biring tamparanga injo; mingka anre' nibateii ri papinahangna angkua injo Isa. 5 Na nipangkuaimi ri Isa: “E ana', anre' nummuntulu, di'?” A'pihali ngase'mi: “Ie', anre' apa-apa.” 6 Iami injo na nakuamo Isa: “Paka'rangmi jalanu ri kanangna lopinnu na nulammuntulu.” Alleang napaka'rang toje'mi jalana na anre'mo nakullei anrui'i jalana gara-gara lohena juku'. 7 Alleang angkuai papinahang nunapae'nya'a Isa ri Petrus: “E, injo Puanga.” Ri nalangngere'na Simon Petrus angkua injo Puanga, narunrungmi bajunna, nasaba' a'kale-kalei, nampa a'lumpa' naung ri tamparanga lammangeii. 8 Naia paranna papinahang nuriekiji ri lopia nahesso'mi jalana nupannoa juku', nasaba' anre' nalere battu ri biring kassi'a, kulle kapang limang puloji rappa. 9 Ri a'puntananamo angngittemi bara api nipa'se're na ri bahonna rie' juku' na rie' pole roti. 10 Nakuamo Isa: “Angngerangmako mae juku' nuberu nujakkalaya intu.” 11 Nai' poleangmi Simon Petrus ri lopia injo nampa nahesso' jala nupannoa juku' lompo lohena sibilangang limang pulo antallu kajunna, na manna lohe kamua injo anre'ja nakekke' jalana. 12 Nipangkuaimi iangase'na ri Isa: “Maemako a'kaddo'-kaddoro.” Tala rie' ri sikuntuna papinahanga abarani a'kuta'nang angkua: “Ie', inaiki gitte?” Kamuai injo ka naisse'mi angkua injo Puanga. 13 Mangemi Isa angngalle roti nampa nadahuang iangase'na, kamua to'mi injo ri sesena juku'a. 14 Iami inni numaka pintallunga napa'piitteang kalenna Isa ri papinahangna ri maengnamo nipa'tallasa amminro battu ri sikuntuna tau mate.
Isa siurang Petrus
15 Ri maengnamo a'kaddo'-kaddoro nipangkuaimi Simon Petrus ri Isa: “Simon ana'na Yunus, maka nupettaangja naia inni ngase'?” A'pihalimi Petrus: “Ie', Puang, kiisse'mi gitte ka urangtaa. Nipangkuaimi ri Isa: “Piarami ana' bimbala'ku.” 16 Nakuamo Isa numaka pinruanga: “Simon ana'na Yunus, maka nupettaja?” A'pihali Petrus: “Ie', Puang, kiisse'mi gitte ka urangtaa.” Nakuamo isse' Isa: “Kalahakimi bimbala'ku.” 17 Nakuamo Isa numaka pintallunga: “Simon ana'na Yunus, maka urangkujako?” Iami injo ampakamassei nyahana Petrus lanri angkuana Isa numaka pintallunga: “Maka urangkujako?” Iami injo na angkua to'mi: “Puang, ie', kiisse'ji gitte iangase'-ngase'na, kiisse' to'mi pole gitte angkua urangtaa.” Nakuamo Isa: “Piarami bimbala'ku.”
Kariekang ri bokona ri sesena papinahangna Isa
18 “Tojeng-tojeng kukua ri kau: ri rongonu ikau to'ji a'bida' jarre' na nu'lampa ri antere'-tere'ji mae nukaa'raki, mingka sampang toako, lanupatonjoi limannu nuruaya na lanasekko'ko tau nampa naerangko mange ri nutala nukaa'rakia.” 19 Napau kamua injo Isa lampa'nassai antere'i pakua batena lamate Petrus numpa'piitteangi kalompoangna Alla-taala. Ri maengnamo angkua kamua injo napangkuaimi Petrus: “Pinahangma.” 20 Ri a'sailena Petrus, naittemi papinahang nunapae'nya'a Isa amminahang todo', iamintu papinahang nuri sipangnganreang Pallingkainna riolo a'sanjengi ri barambangna Isa na angkua: “Inai lambalu'ki, Puang?” 21 Ri naittena Petrus lapung papinahang injo, a'kuta'nangmi ri Isa: “Puang, ie', apa lanjari sallo' ri boko mae ri sesena injo taua?” 22 A'pihalimi Isa: “Kedde' a'ra'ku sollanna a'tallasai sanggengku rie' isse', injo taliai pasilalongangnu. Naia ikau, pinahangma.” 23 Injomi nata'siaramo karebaya inni ri sikuntuna pa'russanakanga angkua injo lapung papinahang anre' nalamate. Nanu anre' nangkua Isa ri Petrus tala lamatei, iajia: “Kedde' a'ra'ku sollanna a'tallasai sanggengku rie' isse', injo taliai pasilalongangnu.”
Pa'pau katappusang
24 Innimi papinahang nunsabbiangai ri sesena iangase'na injo, nampa pole nungngukiria inni. Naniisse'moi angkua kasabbiangna annabai. 25 Loheiji pole maraeng numaenga nagaukang Isa, na pangngare'ku kedde' niukiri ngase'i ta'se're-se're, anre' na lanaruai lino iangase' kitta' nulaniukiria. Aming.