1

1 Enda jo sirorae iriri gitida, God da Geka nu irei. God da Geka amo, nu God ghae dabade iriari, a nengae mo dabakori. Nemo jo nunda nunda iraeri, o dombu eni iraeri. 2 Giti beká giti tuturoda mo, nengae dabade iriari. 3 God nunda Geka resena eimi, roera isasambu nune etiri sirorusira. Roera isasambu, utuda a endada irira amo, nunda Geka da fakina ainembo etiri sirorusira. 4 God da Geka resena einda jokáda mo, jebuga siroredo foa gheraira. Jebuga resena emo, nu kau usasa aminga ava, evetu genembo da jokáda janimberaira. 5 Usasa mo, tumba jokáda janimberaira. Jo tumbai fati soana ae eraira. 6 Avori, God nunda aghi kato javo John ava dirigetiri, 7 usasa einda beká ava sari ningoro dae sedo, evetu genembokena fusira. Ne John da geka ningido, usasa ainda bino ava tumondaoro dae sedo, God nu John dirigetiri fusira. 8 Usasa resena emo, na jo John dae saeri. John nu usasa ainda aghi katori. 9 Usasa amo, nu usasago bekári. Nu evetu genembo isambukena janimbari dae sedo, endada fusira. Usasa amo, na Iesu dae resena. 10 Numo God da Gekari. Geka eimi, enda etiri sirorusira. Nu vose fira enda eminda ireira avata, evetu genembo nu jo kasama ae iriari. 11 Numo, nunda natofo Jusi embokena fusira, avata ne nu ighagha useri. 12 Avata mave, nundae nati joká doruse nu tumondusera amo, God da sasingu aore dae sedo, nemokena fakina futusira. 13 God da sasingu sirorusera amo, jo nenda fakinaimi o evetu genembo da ujuimi, saoro siroraeri. Nemo, God da fakinaimi etiri siroruseri; ava sedo God mo, nenda Numamo bekári. 14 God da Geka setena amo, nu endada vosedo genembo beká jinetiri, namonde dabade iriari. Nu namonde dabade irise, geka beká sise, a sonembeari, nunda duro isagha eari namonde gido ghuseri. Nunda duro resena emo, nu God Afakena rurusira. Nu God da Mandi dabako tainako ava sedo, mutiri nune rurusira. 15 John nu Iesu dae sise, eminge sisira, "Na geka sedo ghusena amo, na genembo eindae sise, sedo ghuseni. Amo eviri: 'Genembo eni nanda amboda refira amo, nu ambori, na begori. Avata, numo teriago bekári, na kitakori. Ainda tuka mo: na jo sirorae iriana da gitida, nu irei,' " John nu Iesu dae aminge sisira. 16 Nunda sonemba tomanako bekáimi namonde esimbugurureari irá gheraera. 17 God nunda Agho Dari ava setiri, Moses gembu futusira. Avata sonemba a geka beká mo, jo Moses nune mutaeri. Iesu Keriso nune budo fira futusira. 18 Evetu genembo mave eniimi God jo ditii gae irera. Avata, God da Mandi dabako tainako, Numamoghae dabade irá gheraera aimi fira, God nu kau mavegori, ava nune setiri evetu genembo nininguseri. 19 Jusi embo ne, John kena ategi e ningoro dae sedo, fristi+ a Levi ondi+ mendeni, dirigetero Jerusalem ghedo fera, John kena buvudo ategi useri, "Ni mavejori?" 20 Aminge setero, John jo tofo jungutuse ighagha aeri. Nu isagha sisira, "God Genembo eni dirigari furare dae sisira amo, jo namo iraeri," aminge sisira. 21 Setiri, ne siseri, "Avori, se ningore! Ni, feroveta Elijah jovereghe furariá seraera amo, nimori, ai?" aminge setero, John mino eminge sisira, "Tefo! Na jo Elijah iraeri," setiri, ne sekago ategi useri, "Ni aminge saresa amo, ni mavejori? God amboda feroveta tomanako eni mutari furare dae sisira amo, nimori, ai? Se ningore!" aminge setero, nu sekago eminge sisira, "Tefo! Na jo numo iraeri." 22 Aminge setiri, ne siseri, "Gegenembo namane dirigetero ojera aikena jovereghe yarera amo, mino nange sareri? Ava sedo, ni tofo se ningore! Ninda saramana rejori?" ne aminge siseri. 23 Setero, John eminge sisira, "Nanda saramana beká aindae, feroveta Isaiah geka eminge gefusira: 'Na reighi uvu a evetu genembo irae da vasa eminda, beka fainghedo natofo isambukena seraena: "Bajari da emboro rerebevu dambu are!" ' Geka emo, God da feroveta Isaiah anakora nandae sisira," John aminge sisira. 24 Gegenembo John kena fera ategi usera amo, Moses da Geka kaifa kakato+ aimi dirigetero fuseri. 25 Ne sekago daba aindae, John kena ategi useri, "Ni eminge setesi: 'God Genembo eni dirigari furari seraera amo, jo nimo iraeri. A ni jo Elijah iraeri. A kotugo, God feroveta eni dirigari furariá seraera amo, jo nimo iraeri,' setesi. Avori, ni redae bafataito eraesi?" 26 Aminge setero, John minonda nemokena sisira, "Na tefo uvu vanemboimi bafataito eraena. Avata Genembo eni nenda jokáda fetirira amo, ne jo kasama ae ireva. 27 Na giti siroreteno, nu amboda sirorusira. Avata nu genembo teria bekári. Na jo numongo iraeri. Na taká sabua bekári," John aminge sisira. 28 Reighi Bethany aminda, geka ava se nininguseri. Reighi Bethany resena emo, nu uvu Jordan beina iji vitarikena, aminda irira. John nu vasa aminda bafataito edo ghusira. 29 Sifo atetiri, Iesu numokena ira buvurutiri gosuse, John natofo isambukena sisira, "God Sifi da Mandi eni, namonde evetu genembo da ari ekoko seghe fugutuse ambare dae sedo, mutiri fusira amo, ovia refirore. 30 Na Genembo eni nanda amboda refira, simutana, amo eviri. Na sife geka nundae simutani. Na giti siroreteno, nu amboda sirorusira. Avata nu teria bekári. Na jo numongo iraeri. Ainda beká mo: na jo sirorae iriana da gitida, nu irei,' amo na nundae simutani. 31 Nu furarira ava na kasama useni, avata nu mavejoá, na jo kasama ae useni. Avata na uvuimi bafataito udo refena ainda susu mo: na nange nunda kau mavega ava ijugaono Israel embo gi kasama aeteri!" 32 Aminge sedo, John geka eni Iesu dae sisira amo, eviri: "God da Asisi Kakara, kau ribo da kau aminga ava, vose fira numokena asugedo iriri, na gosumutani. 33 Na nu jo kasama ae umutani. Avata God na uvuimi bafataito aono dae sedo dirigusira aimi, namokena sisira, 'Asisi Kakara vose foa Genembo mavekena asugedo irari garesa amo, Genembo amo, nu Asisi Kakara da fakinaimi, evetu genembo bafataito use irarira.' 34 God rea sisira ava, isagha etiri gosumutani. Aindae na nemokena resena: nu God da Mandiri," John aminge sisira. 35 Sifo atetiri, John nunda ambo jimbi etoto naká ainde dabade vasa daba aminda irise, 36 Iesu fira darigiri gido, John sisira, "God Sifi da Mandi eni mutiri ambari dae refira amo, ovirere." 37 Aminge siri ningido, nunda ambo jimbi ne John dodo, Iesu de dabade iseri. 38 Nunda amboda ero, Iesu jovereghe gosusira amo, ne nunda amboda amboda fero gido, nendae ategi usira, "Ne rejoá kakova erevu?" aminge sisira. Setiri, ne mino siseri, "Rabai, ni reda irá gheraesi?" siseri. (Rabai resena emo, namondeda gekaimi 'ijuga kato' sise siseri.) 39 Setero, nu nemokena mino sisira, "Fuvu gaove!" Aminge sedo, ne dabade era, etoto naká amo ne Iesu da irari vasa ava gido kasama useri. Aminda nemonde dabade irero ungobu usira. (Amo kau, 4 koroko avavaga usira.) 40 Gegenembo etoto naká John da geka ningido, Iesu de dabade isera amo, eni Andrew ri. Andrew resena emo, nu Simon (o Peter seraera) ainda namendiri. 41 Andrew nu totoi ira, nunda koro Simon tambudo sisira, "Namane Keriso tamberi," aminge sisira. (Geka Keriso da tuka mo: God Genembo eni dirigari furarira, aindae namonde 'Keriso' seraera). 42 Aminge sedo, Andrew nunda koro Simon unumbe nengae Iesu kena iseri. Era buvero, Iesu nu Simon á tataseguse sisira, "Ni John da mandi Simon ri. Avata ninda javo seka, Cephas o Peter jijigherena." (Geka Cephas o Peter ainda tuka mo, ghamanari.) 43 Sifo atetiri, Iesu Frovensi Galilee aminda yari kotisira. Kotedo, Philip tambudo, "Fu, nangae yaore!" sisira. 44 (Philip resena emo, nu Andrew Peter ghae da reighi Betsaida, ainda genembo eniri.) 45 Setiri, Philip nu eredo ira Nathanael tambudo numokena sisira, "God da Agho Dari da buku jokáda, Moses i Genembo enidae gefusira. Genembo amo tamberi. Feroveta barago, Genembo daba aindae gefuseri. Amo, Nasareth embo genembo Joseph da mandi javo Iesu dae siseri." 46 Aminge setiri, Nathanael nu Philip da geka ighagha edo, dere jise eminge sisira, "Kote gi! Nasareth aminda ghedo, eveva eni furariá sise resesa?" aminge setiri, Philip mino sisira, "Avori, fu gase!" 47 Philip aminge setiri, Nathanael eredo Iesu kena isira. Iri, Iesu fuge Nathanael gido, eminge sisira, "Refira omo, Israel embo bekári. Numokena gungubo eni tefori," aminge sisira. 48 Aminge siri, Nathanael ningido ategi usira, "Ni nange na kasama eresi?" aminge setiri, Iesu mino sisira, "Philip jo ya nimokena buvae iriri, ni ika kayuyu duruda anumbireso geni." 49 Aminge setiri, Nathanael numokena sisira, "Ijuga Kato, ni God da Mandiri. Ni namonde Israel embo da kiniri." 50 Aminge setiri, Iesu numokena sisira, "Ni, kayuyu duruda anumbireso gido setena aindae tumonderesa, ai? Amo kitakori. Ni amboda roera mindafugo garesa." 51 Aminge sedo, nemokena sisira, "Geka beká resena! Amboda utu afigari, God da aneya Evetu Genembo da Korokena+, vose vitido ghururoro gareva," Iesu aminge sisira.

2

1 Sifo etoto naká ainda amboda, reighi eni javo Keina Frovensi Galilee aminda, evetu fitari da kirumo useri. 2 Iesu noi, nu ira kirumo ainda jokáda teterusira. Iesu barago, nunda ambo jimbi de dabade, ya anumbaoro dae sedo aghi useri. 3 Kirumo use, vaini (wine) mindero dadabetiri gido, Iesu noi numokena, "Vaini dadabetira," sisira. 4 Setiri, Iesu noikena sisira, "Aya ni redae namokena resesi? Nanda sifo jo foa buvae irira," aminge sisira. 5 Setiri, Iesu da noi saramana kakato aikena sisira, "Nu rea sarira, ava evu!" aminge sisira. 6 Jusi embo nenda agho dari kotise, ungo giti seghedo bayau amboda mindiraera. Ava kotise, uvu dimbari dae sedo, okia 6 aminda fitero irei. Okia amo ghamanaimi useri. Okia dabako ainda inono kau 100 lita (litres) avavagori. 7 Iesu nu eredo saramana kakato aikena sisira, "Okia mendeni tava edo bu yasivu! Uvu dimbu budo fuvu averegaovo, okia mindafué bedo are!" aminge setiri, ne okia tava edo, uvu dimbu budo era averegetero, vitifira okia mindafuá bekada gisisighusira. 8 Etiri gido, Iesu nemokena sisira, "Avori, uvu daba evia dimbu budo yasivu, kirumo da giti jighari aikena mutovo gare!" Iesu aminge setiri, ne eredo uvu dimbu budo, kirumo da giti jighari aikena iseri. 9 Era buvudo, mutero risira. Avata uvu amo anakora vaini (wine) jinetiri risira. Mindido, vaini (wine) amo reda ghe fusira ava, nu bunisira. (Avata saramana kakato uvu difusera aimi, nene kasama useri.) Giti jighari nu bunendo aghi etiri, genembo evetu fifitusira aimi fira buviri sisira. 10 "Evetu genembo isambu emingeraera. Ne giti vaini eveva janje araghari ava muteoro esa embo mindiraera. Avori, ne teria futo mindioro gido ainda amboda, ne tuturo edo vaini (wine) janje irae ava muturaera. Avata ni, vaini (wine) eveva janje araghari emo bu jighirasa, amboda erefutesi!" aminge sisira. 11 Iesu tano mindafugo evia, reighi Keina Frovensi Galilee aminda usira amo, nunda tano gitida etiri sirorusira. Nu aminguse, nunda duro ava ijugetiri, nunda ambo jimbi gido, nu tumonduseri. 12 Ainda amboda, Iesu nunda noi, jamena, a ambo jimbi ainde dabade reighi Keina ghedo era, reighi Kaponiam aminda buvudo, sifo tufako iriari. 13 Jusi embo da kirumo eni, javo Jarige Yari da Kirumo+ seraera, amo fira utua iri gido, Iesu Jerusalem isira. 14 Ira, God da Kambo+ aminda, evetu genembo mendeni burumakava (cattle), sifi (sheep), a ribo ava ofero tafusira. A mendeni nenda ghaghada anumbirise, esa embo da moni ava budo, Jusi embo da moni ainghae oriro ero tafusira. 15 Amingero gido, Iesu asi ava nunda ambídae budo aimi, sifi (sheep) nengae burumakavaghae (cattle) ava ondiri, God da Kambo+ jokáda ghe era buvurutuseri. A kotugo nu, evetu genembo moni oriro erusera, ainda ghagha jighi jovereghetiri, nenda moni ghasaghe endada vovosegusira. 16 Amingedo, nu jovereghe, evetu genembo ribo ava oriro erusera aikena sisira, "Nenda ribo bambudo yasivu! Erama eminda ofuse eove, nanda Afa da Kambo ombari vasa da kaugo eure!" 17 Aminge siri ningido, nunda ambo jimbi geka eni, God da Geka jokáda eminge gefusera, ava kotiseri: "Nanda dubo bari ninda kambokena mo mindafu bekári. Aimi, nanda ghamo jokáda avarakaimi avarigiri ambududu- rerena," geka ava kotiseri. 18 Etiri dadabetiri, Jusi embo numokena siseri, "Ni erekotesa, God amingaso dae setiri etesi. Ava sedo, tano eni aso namane gido, God ni amingaso dae setira, ava tumondarera!" 19 Aminge setero, Iesu sisira, "Avori, nanda tano ijugarena amo, eviri. Kambo emo de bejovo, sifo etodaba naká ainda jokáda nane sekago itarena." 20 Aminge setiri, ne siseri, "Amo nange resesi? Amo ni jo aso inono ae arira. God da Kambo+ emo ghaeko 46 ainda jokáda itutuseri," aminge siseri. 21 Avata Iesu nu tofo numoá kivo use, nunda tamodae nu budo ira 'kambo' sisira. 22 Ava sedo, Iesu ambarida ghe sekago jebuge eretiri gido, nunda ambo jimbi geka emo sekago kotiseri. Kotedo, God da Geka rea sisira, a Iesu rea sisira ava tumonduseri. 23 Jarige Yari da Kirumo+ ainda sifoda, Iesu nu Jerusalem aminda irei. Iesu nu tano mendeni mendeni urureari gido, natofo nu tumondedo ghuseri. 24 Avata Iesu ne jo tumonduse, nunda dubo joká jo nemokena afigae usira. Ainda beká mo: nu evetu genembo da dubo joká ava kasama edo ghusira. 25 Nu, mave jo foama evetu genembo da kotari ava, numokena osa sari da kaugo iraeri. Ainda beká mo: nu tofo evetu genembo da dubo joká gi kasama edo ghusira.

3

1 Jusi embo da bajari eni javo Nicodemus, ai irei. Moses da Geka kaifa kakato+ da eni mo numori. 2 Tumba eni, nu Iesu kena ira buvudo sisira, "Rabai (Ijuga Kato), namane kasama erera: God setiri ni ijuga kato edo fusesi. Tano a ari mendeni mendeni, nine easo gido dudukugheraera ava, mave jo tofo nunda fakinaimi ae arira. Ava sedo, ni amingeraesa amo, ni God da fakinaimi eraesa," nu aminge sisira. 3 Setiri, Iesu numokena sisira, "Na nimokena geka beká resena: mave nu jo sekago sirorae arira amo, nu jo God da natofo+ jokáda teredo, God da reighiá jo gae arira." 4 Aminge setiri, Nicodemus sisira, "Amo nange resesi? Genembo beká jo amingae arira. Nu jo jovereghedo noi da tininda teredo sekago sirorae arira." 5 Aminge setiri, Iesu sisira, "Na nimokena geka beká resena: mave jo sekago uvu a God da Asisiimi sirorae arira amo, nu jo God da natofo+ jokáda teredo, God da reighiá jo gae arira. 6 Ainda beká mo: evetu genembo da tamo mo, noi numamokena budo siroreraera, avata tamo da fakina aimi, evetu genembo da asisi jo jebugae arira. Amo, God da Asisi da fakina aimi, evetu genembo da asisi jebugarira. 7 Ava sedo, 'Ni sekago siroraetesi,' aminge seteno ningesa ava, erá buneose dae sise resena. 8 Yaura ava kote gi! Yaura nunda uju ava ya foa ghuse, javi ururari ningaresa. Avata, nu reda ghe foa gheraira, a reda ya gheraira, ni bunariri. Kau daba aminga ava, God da Asisi, nunda uju ava use, ya foa ghuse seari, evetu genembo mendeni jebugeraera." 9 Iesu aminge setiri, Nicodemus ategi usira, "Emo nangedo sirorerai?" 10 Setiri, Iesu sisira, "Ni, namonde Israel embo da ijuga kato mindafu eni nimorita. Nangetiraimi ni erebunesi? 11 Na nimokena geka beká resena. Namane seraera evia, jo kotae kotae sae eraera. Namane rea kasama usera a gosusera avanembo, nemokena seraera. Avata ne namanenda geka jo bae eraeva. 12 Na, oroko roera enda eminda irira aindae seraena, avata ni na jo tumondae eraesa. Ava sedo, roera utuda irira aindae, osa saono ningaresa amo, ábarago jo tumondae aresa tano. 13 A kotugo, roera utuda irira ava, genembo eniimi mave jo viti ya gae irira. O Evetu Genembo da Koro+ utuda ghe vose fusira aimi, nusuka aminda irise gosusira. 14 "Avori, God da uju mo: mave Evetu Genembo da Koro+ tumondarira amo, nu jebuga evovodae irari ava tuve barira. Ainda beká mo: God nunda ungo sokinembari, Evetu Genembo da Koro+ arafa dedo jighoro erari, mave ava gido tumondarira amo, nu jebugarira. Avori, Moses usira ava, kote gi! Nu reighi uvu a evetu genembo irae da vasa aminda, auri (bronze) aimi ove kevusira; jingabu da kau ava edo jighiri erorusira. Ere fetetiri, ava mave tumonduse gosusira amo, nu jebugusira. Kau daba aminga ava, mave Evetu Genembo da Koro+ gido, tumondarira amo, nu jebuga evovodae irari ava tuve barira. 16 Ainda beká mo: God nu evetu genembo dubo bu gogoghombuse, jebuga evovodae irari ava baoro dae sedo, nunda Mandi dabako tainako mutiri fusira. Fusira da beká mo: mave nu tumondarira amo, jo ambae arira. Nu jebuga evovodae irari ava tuve barira. 17 Ainda tuka mo: God jo, natofo da ari ekoko ijujedo sari amboro dae sedo, nunda Mandi dirigari furaeri. Nune sari natofo jebugaoro dae sedo, dirigetiri fusira. 18 Mave God da Mandi tumondarira amo, God nunda ari ekoko jo ijujari ambae arira. O mave God da Mandi jo tumondae arira amo, God anakora setiri nunda asisi ambududurusira. Ainda beká mo: nu God da Mandi dabako tainako ava jo tumondae usira aindae. 19 Ijujari ambarera da beká mo eviri: usasa mo endada vose fusira. Avata natofo ne, usasa amo imboe use, tumba ava dubo buraera. Ai resira amo: ne ari ekoko eraera. 20 Evetu genembo mave ari ekoko eraera amo, ne usasa imboe eraera. Aindae sedo, erama usasaimi janimbeuri, nenda ari ekoko ava geore dae sise, ne jo usasakena yae eraera. 21 Avata evetu genembo mave, ari eveva use irá gheraera amo, ne usasakena ya gheraera. Ainda beká mo: ne God da uju ava use ari eveva eraera ava, usasaimi janimbururari, natofo gi kasama aoro dae sedo, ne usasakena ya gheraera." Iesu aminge sisira. 22 Ainda amboda, Iesu nunda ambo jimbide dabade, Frovensi Judia aminda iseri. Nu namonde sifo mendeni mendeni aminda dabade irise, Iesu nu evetu genembo bafataito edo ghusira. 23 John Bafataito Ari Kato, numbarago frovensi daba aminda, reighi eni javo Inon aminda irise, uvu kafuru aminda irira ava sedo, aminda bafataito edo ghusira. Reighi Inon resena emo, nu reighi Salem da tingudari. John jo dibura ae irise, evetu genembo fureoro ne bafataito edo ghusira. 25 Amingiri, John da ambo jimbi mendeni tuturo edo, Jusi embo da genembo eninde beisiga useri. Ne beisiga usera da susu mo: ne ijuga eni, ungo seghari da agho dari aindae beisiga useri. 26 Aminguse, John kena era buvudo siseri, "Ijuga Kato, ni uvu Jordan beina onakena, genembo eni fira nimokena iriri, nundae geka sisesa amo, erekotesa? Nu tuturo edo bafataito iri, oroko evetu genembo isambu namonde dodo numokena ya gherera," aminge siseri. 27 Aminge setero, John eredo eminge sisira, "Resesa amo, jo namondeda sari da kaugo iraeri. Amo nu God sari da kaugori. 28 Na geka seno ne totofo niningusevu, 'God Genembo eni mutari sisira amo, jo namo iraeri. God, Genembo setena ainda gitida, na dirigetiri fuseni,' aminge seno niningusevu. 29 Genembo resena emo, nu kau genembo eni evetu fitido, nunda evetu seka aindae sedo ivuga eraira. O namo, na kau genembo evetu fitiraira ainda komana mave dengesida fetirise, nunda komana evetu fitiraira ainda beka nininguse, ivuga eraira. Na kau daba ava, nanda komana da bino aindae, nambarago ivuga e gogoghomberaena. 30 Nu teria ari, na jovereghe vosedo ijoghako arena!" aminge sisira. 31 Aminge sise, John sisira, "Genembo mave utuda ghe vose fusira amo, nu teria bekári. Eni jo numongo iraeri. Mave endada sirorarira amo, nu enda da tofori. Nu enda da bouvu a kotari aindae kotise a sise irarira. O genembo mave utuda ghe vose fusira amo, nu teriago a iká bekádari. 32 Nu rea gosusira a niningusira ava, osa seraira. Avata nunda geka, mave jo tumondae eraira. 33 O genembo mave nunda geka ningi tumondarira amo, nu tumonduse kasama arira: God da Geka mo, geka bekári. 34 Genembo God dirigetiri fusira aikena, God nunda Asisi da fakina isambu futusira. Aindae sedo, nu God da Geka ava, vironu seraira. 35 God nunda Mandi dubo ruruse, roera isasambu nunda ungoda fifitusira. 36 Mave God da Mandi tumondarira amo, nu jebuga evovodae irari, ava tuve barira. Avata mave God da Mandi da geka jo ningi tumondae arira amo, nu jebuga evovodae irari amo jo tambae arira. Numo taká evovodae, God da janje eko ava itatamuse irarira," John aminge sisira.

4

1 Evetu genembo Iesu tumondero bafataito etiri nunda ambo jimbi usera amo, digarigori. Evetu genembo John bafataito etiri nunda ambo jimbi usera amo, jo digari iraeri. Ainda bino ava setero Moses da Geka kaifa kakato+ ne nininguseri. (O emo, geka beká nemokena resena: Iesu nu tofo jo evetu genembo eni bafataito ae usira. Namane giti nunda ambo jimbi usera aimi, natofo bafataito edo ghuseri.) Geka rea se niningusera ava, Iesu nu kasama edo, eredo Frovensi Judia dodo, Frovensi Galilee aminda isira. 4 Galilee yari saresa amo, ni giti ya Frovensi Samaria ghedo yaresa. 5 Ava sedo Iesu Frovensi Samaria aminda sembise, reighi javo Saikar aminda buvurutusira. Namane Israel embo da abua Jacob, nunda mandi Joseph kena vare futusira, aminda ghe ya Saikar buvari amo, jo soka iraeri. 6 A kotugo vasa daba aminda, Jacob anakora uvu mindari da bako ghousa ava ghafusira. Namane erisera, aminda isonga buvurutuseri. Iesu nu, soro ghousa ava erisira ambudo, bako dengesida anumbusira. 7 Iesu nu aminda anumbiriri, namane eredo bayau ombari dae sedo era, reighi jokáda teretero, Samaria embo evetu eni, uvu dimbari dae sedo, reighida ghe buvudo fusira. Fira, Iesu nu aminda anumbiriri gosusira. Giri, Iesu numokena sisira, "Nandae uvu dimbu bofu mindone!" 9 Aminge setiri, evetuá numokena sisira, "Agá! Nimo Jusi embori. Namo nenda gitofu Samaria embo eveturi. Ava sedo, nangetirai uvu nane dimbu mutono mindari dae resesi?" aminge sisira. (Geka bekári: Jusi embo ne, Samaria embo imboe use jo nenda agha kofirida mindae edo ghuseri.) 10 Setiri, Iesu mino numokena sisira, "Nimokena God rea muturaira ava, kasama aetesa amo, a kotugo na mavejori, ava kasama aetesa amo, ni namokena benunu saso, na nindae jebuga da uvu ava mutaeteni." 11 Aminge setiri, evetuá sisira, "Bajari, nimokena mo, okia a asi tefori, a kotugo bako mo, ghousari. Ava sedo, jebuga da uvu setesa amo, reda baresi? 12 Bako emo, namondeda abua agira Jacob ghambu futusira. Nu uvu eminda dimbu mindido ghusira. A nunda vide jamena a nunda sino fuka barago, ne isambu uvu eminda dimbu mindido ghuseri. O ni, jebuga da uvu bari resesa amo, nange resesi? Ni erekotesa amo, namondeda abua Jacob nu ijoghakori, a nimoá teria sise resesa, ai?" aminge ategi usira. 13 Setiri, Iesu mino kasiai sisira, "Uvu evia, mave mindiraira amo, nu amboda sekago uvudae uju edo gharira. 14 O uvu nane mutono, mave mindarira amo, nu jo sekago uvudae dubo saghae arira. Uvu amo mindari, nunda dubo jokáda irise, kau uvu ghoghoroda buvariguse irarira. Irise, jebuga da uvu usegha da kaugo ava buvurutururari, genemboá rise, jebuga evovodae irari ava tuve barira." 15 Aminge setiri, evetuá sekago sisira, "Bajari, uvu resesa ava, bofu mindone! Amingarena amo, na jo sekago uvudae uju use, foa eminda dimbae arena," aminge sisira. 16 Nu aminge setiri, Iesu sisira, "Yasi, nivu bu furase!" setiri, evetuá sisira, 17 "Na genembo tefori," setiri, Iesu numokena sisira, "Ni 'genembo tefo,' setesa amo, geka beká setesi. 18 Avata ni gegenembo isambu ghabu soveni ava, bu dotutusesi. A kotugo, genembo oroko budo iresa amo, jo ninda genembo beká iraeri. Ava sedo, geka beká setesi. Ni genembo tefori." 19 Aminge setiri, evetuá sisira, "Bajari, na orokoá kasama erena amo, ni feroveta eniri. 20 Namane Samaria embo da abuamane rea sedo ghusera amo, eviri, 'Namane, doriri fetiriri eregosesa ominda God tumonde bainghedo ghaeteri.' Avata ne Jusi embo, nene seraeva amo, 'God tumonde bainghari da vasa beká mo, Jerusalem ri!' " 21 Evetuá aminge setiri, Iesu evetu aikena sisira, "Nanda geka evia tumondaso dae resena. Sifo eni amboda foa buvari gido, evetu genembo jo doriri fetirira ominda, a Jerusalem aminda nembo, God tumonde bainghae arera. 22 Ne Samaria embo mo, ne mavejo ava tumonde baingheraeva amo, ne jo kasama use tumondae eraeva. O namane Jusi embo, namane kasama eraera. Ainda beká mo: God da sonemba evetu genembokena amo, Jusi embo da jokáda sirorarira. 23 Kotugo, sifo eni foa buvarira, a kotugo saone, oroko ojira buvuruterira. Sifo aminda, God Afa da natofo beká, nu tumonde bainghari sarera amo, ne jo doriri fetirira ominda, o Jerusalem aminda nembo, God tumonde bainghae arera. Ne nenda reighida iroro, God da Asisi sonembururari, ne God da beká ava kasama edo, numoá tumonde bainghe gogoghombarera. Evetu genembo aminguse, bekáda bekáda tumonde bainghe gogoghomberaera amo, God Afa nu uju beká ava use, gari dae tava eraira. 24 God, nu Asisiri. Ava sedo, God da Asisi aimi sonembururari, evetu genembo God da beká ava kasama edo, numoá tumonde bainghaeteri," aminge sisira. 25 Setiri, evetuá numokena sisira, "God Genembo eni dirigari furare dae sisira, (ainda javo Keriso seraera), nu amboda foama, geka isambu da susu ava, nune sari ningaeteri," aminge setiri, 26 Iesu numokena sisira, "Genembo resesa aimi, nimokena geka emo resira. Amo namori," aminge sisira. 27 Nengae aminge sero, namane jovereghe fera, Iesu evetu ainghae geka sero tafuseri. Tambudo, nu evetu ainghae geka sisira, aindae manamana useri. Avata namane evetu aikena geka eni jo sae useri. "Ni rejo uju eresi?" ava jo sae useri. O Iesu kena barago, "Ni redae evetu ainghae geka resesi?" ava jo sae useri. 28 Ainda amboda, evetuá nunda uvu dimbari da okia aminda dodo, jovereghedo reighi jokáda ira natofokena sisira, 29 "Genembo eni ojighira, uvu vasada anumbirise, na rea edo ghusena, a nanda irari kau mavega, ava setiri ningeni. God Genembo eni mutari sisira, avose, numori tano. Fuvu, ya gaove!" 30 Aminge setiri, ne eredo Iesu gari dae fuseri. 31 Iesu gari dae fero, namane Iesu kena siseri, "Ijuga Kato, bayau bu mindi jebugase!" siseri. 32 Avata nu sisira, "Nanda bayau dombu eni irira ava, ne jo kasama ae ereva," aminge sisira. 33 Aminge setiri, namane tofo tofo se nininguseri, "Avose, bayau mutero mindido irira tano?" 34 Aminge setero, Iesu namanekena sisira, "Nanda bayau mo eviri. God na dirigetiri fusena, ainda uju ava use irena, a saramana nune futusira, ava aono dadabarira. Saramana amo, nanda bayauri. 35 Nenda kotari mo: tambuno avononde dadabari ainda amboda, vuji bambari da sifo foa buvarira. Avata na nemokena resena: vare gi simbugevu! Vuji bambari da sifo ojira buvirere. Evetu genembo aghi ari da sifo, oroko eviri. 36 Bayau mave bamburaira amo, nu saramana eraira aindae sedo, mino barira. Kau daba aminga ava, mave ya evetu genembo, God da natofo edo jebuga evovodae irari ava baoro dae sedo, aghi eraira amo, nu saramana eraira aindae sedo, mino barira. Kau vare jokáda bayau beká ari gido, vare govari kato nengae bayau bambari katoghae, dabade ivuga eraera aminga ava, genembo eni giti ya vironu sirurari, a kotugo genembo amboda ya evetu genembo aghi ari God tumondarera amo, nengae dabade ivuga arera. 37 Namonde eminge seraera, 'Genembo eni vare govari ainda amboda, genembo eniimi foama bayau bambarira,' seraera. A nu geka bekári. 38 Kau daba aminga ava, evetu genembo mendeni, ne giti era vareda saramana edo ghuseri. Avata ne nane amboda dirigeteno eva, evetu genembo giti era saramana edo ghusera, ainda mino ava nene ererureva," Iesu aminge sisira. 39 Avori, Samaria embo evetu setena amo, nu Iesu dae eminge sisira, "Na rea edo ghusena, a nanda irari kau mavega, ava setiri ningeni." Nu Iesu da bino aminge setiri ningido, Samaria embo digari reighi aminda, ne Iesu tumonduseri. 40 Ne ningido tumondusera ava sedo, ne era Iesu kena buvudo, nu nemonde itako avido yare dae benunu siseri. Aminge setero, namane namonde sifo etoto dabade aviseri. 41 Amingero, evetu genembo digari amo, Iesu da geka setiri niningusera aindae, tuturo edo numoá tumonduseri. 42 Tumondedo, evetu aikena siseri, "Orokoá, namane nu tumonderera. Jo ninda geka aindae tumondae erera. Iesu geka siri, namane totofo nininguse kasama eteri: genembo mave evetu genembo isambu sonembari jebugaoro dae sedo furariá seraera amo, numori, ava kasama eteri," aminge siseri. 43 Aminda irero, sifo etoto naká setena ava dadabetiri, Iesu namane namonde reighi aminda ghedo, Frovensi Galilee iseri. 44 Iesu nu sifo ghousa eminge sedo ghusira, "Feroveta da geka ava, evetu genembo isambu, ne ningido nu kakara eraera. Avata feroveta tofo nunda totofoi nu jo tumonduse kakara ae eraera," nu aminge sedo ghusira. 45 Avata, nu namonde dabade era, nunda Frovensi Galilee aminda teretero natofo gido, nati joká doruse fera nu ategi useri. Ainda susu mo: Jarige Yari da Kirumo+ ainda sifo aminda, nembarago Jerusalem aminda irise, Iesu rea usira ava, ne gosuseri. 46 Avori, Iesu nu sekago ira, reighi Keina aminda buvurutusira. Reighi aminda, nu giti setiri uvu jovereghedo vaini (wine) jinisira. Reighi daba aminda, gavana eni irei. Gavana resena einda mandi mo, nu reighi eni javo Kaponiam aminda kae budo fasirei. 47 Iesu nu Frovensi Judia ghedo, jovereghe ira Frovensi Galilee buvurutusira, ainda bino ava sero, gavana amo ningido eredo Iesu kena isira. Ira buvudo, Iesu kena sisira, "Nanda mandi kae eko budo, Kaponiam aminda irise, ambari dae erira. Ava sedo ni fu, nangae ya nanda mandi saso jebugare!" 48 Aminge setiri, Iesu numokena sisira, "Na kasama erena: na jo tano eni aono gi dudukughae areva amo, ne nanda geka jo tumondae areva," aminge setiri, 49 genemboá sekago sisira, "Bajari, erama nanda mandi ambeure dae sise resena! Fu nangae totoi yaore!" 50 Aminge setiri, Iesu numokena sisira, "Avori, yasi! Ninda mandi jo ambae arira!" setiri, genemboá nu Iesu da geka tumondedo, jovereghe isira. 51 Natida iri sifo atetiri, nunda saramana kakato mendeni fera soroda tafuseri. Tambudo siseri, "Ninda mandi anakora jebugetira. Jo ambae arira!" 52 Aminge setero, genemboá ategi usira, "Amo nanjigo tuturo umuta?" setiri, ne siseri, "Amo sife isonga, iji ira vekenengetiri 1 koroko tuturo edo, nunda tamo da vevera dadabumuta," 53 aminge setero, mandi ainda numamo kotisira, "Arie! Iesu, 'Ninda mandi jo ambae arira!' siri, nanda mandi sifo daba aminda jebugumuta," ava kotise, nunda natofode dabade Iesu tumonduseri. 54 Avori, Iesu Judia ghedo, jovereghe ira Frovensi Galilee aminda buvudo, nu uvu setiri vaini jinisira avo, kotugo gavana da mandi setiri jebugusira ainghae dabade ira tano etoto usira. Aminda Jebugusira.

5

1 Ainda amboda, Jusi embo da kirumo eni ari dae sedo, Iesu Jerusalem isira. 2 Jerusalem furu dighi birurughetero irei. Furu ainda guro eni 'Sifi (Sheep) da Guro' sedo ghusera, ainda dengesida uvu bogu eni irira, reighi Betsada aminda. Bogu resena einda dengesida, oro isambu ghabu soveni ava simbugetero iritirei. 3 Sifo aminda, kae evetu genembo digari ava, aminda fafasirero Iesu ira buvurutusira. Evetu genembo diti digoide, ata eko, a ungo ata dimbaride aimi aminda iriseri. (Kae evetu genembo aminda irise kaifa edo ghusera da beká mo, eviri. Sifo mendeni mendeni, Bajari da aneya eni vose foa, uvu bogu ava dereari dubinoghedo ghusira. Urureari ainda sifoda, mave giti uvu ainda jokáda vosedo ghusira amo, nu jebugedo ghusira. Kae rejo ava numokena irá ghedo ghusira amo, dadabedo ghusira.) 5 Genembo eni mo, ghaeko 38 ava kae budo aminda fasirei. 6 Genemboá sifo ghousa ambari ava kae budo fasireira ava, Iesu kasama edo, ategi usira, "Ni jebugari uju eresa, ai?" 7 Aminge setiri, genemboá sisira, "Bajari, na karona tefori. Ava sedo, uvu dubinoghururari garena amo, mave jo foa na sonembae arira. A gido, sifo reda uvu dubinoghururari gido, na javi e yari dae urureono, evetu genembo enii ya giti kosegeraira." 8 Aminge setiri, Iesu sisira, "Ere, ninda ghaito gaghe bu yasi!" 9 Aminge siri ainghae dabade, genemboá jebugusira. Jebugedo, nunda ghaito gaghe budo isira. Amo Jangutari da Sifo aminda sirorusira. 10 Ava sedo, genembo jebugusira amo, nunda ghaito fumbudo iri gido, Jusi embo da babojegari mendeni, ne ghoghora siseri, "Ni ninda ghaito jo gaghe fumbu yae aetesi! Oroko mo, Jangutari da Sifori. Aminguse, ni namondeda agho dari ava erebejesa." 11 Aminge setero, genemboá sisira, "Genembo mave namo setiri jebugetena aimi, 'Ninda ghaito gaghe bu yasi!' setiri, na amingerena." 12 Genemboá nu aminge setiri, ne ategi useri, "Genembo ninda ghaito gaghe fumbu yaso dae setira amo, mavejori?" 13 Aminge sisera avata, genembo jebugusira amo, nu Iesu jo kasama aeri. Ainda beká mo: evetu genembo digari ambari aminda irero, Iesu ira nenda jokáda tere baghimbusira. 14 Ainda amboda, Iesu genemboá God da Kambo+ jokáda tambudo sisira, "Ni jebugedo iresa. Amboda kae eko beká ava erá tambeóso dae sise, eminge resena: ninda ari ekoko vujegedo, doyaso dae resena!" 15 Aminge setiri, genemboá God da Kamboda+ ghe ira, Jusi embo da babojegari ava tava edo tafusira. Tambudo, genembo setiri nu jebugusira, amo Iesu ri, ava setiri ne nininguseri. 16 Ningido, ne tuturo edo, Iesu nu Jangutari da Sifo aminda setiri genembo jebugusira aindae, numokena fakarago use mema mutero itatamusira. 17 Amingero, Iesu nemokena sisira, "Nanda Afa sifo ghousa evia saramana eraira. A nambarago, kau daba evia use saramana eraena." 18 Iesu aminge siri ningido, Jusi embo nu daoro ambare dae kotiseri. Giti rea usira aindae, ne itako dubo mema useri. O aminge siri ningido, nange nu daoro ambaetira, ava kotise irá ghedo ghuseri. Ainda tuka mo: nu giti Jangutari da Sifo ainda agho dari ava bejisira. Avata amo kitakori. O amboda God ava tofo nunda Numamova sisira amo, nu tofo numoá God va sise sisira. 19 A gido, Iesu nemokena mino sisira, "Na geka beká resena! God da Mandi, jo rejo eni tofo nunda javoda ae eraira. Numamo urureari giraira, avanembo eraira. God Afa rea eraira, nunda Mandi barago, daba ava eraira. 20 Ainda beká mo: God Afa nunda Mandi dubo ruruse, nu tofo rea eraira ava, nunda Mandikena ijugeraira. O tano rea oroko gido ghereva emo, kikitakori. Gido dudukughaovo dae sedo, God amboda roera mindafugo eni nunda Mandikena ijugari gido, ari sirorarira. 21 Kau God Afa seari evetu genembo mendeni ambarida ghe jebugedo ereraera aminga ava, nunda Mandiimi seari, evetu genembo mavejoá nu uju eraira amo, jejebugaraera. 22 Kotugo God Afa jo tofo evetu genembo da ari ekoko ijujae eraira. Nunda Mandi kau numoá avaga kakara aoro dae sedo, God nu evetu genembo ijujari da saramana amo, nunda Mandikena futusira. Mave God da Mandi jo kakara ae arira amo, nu, God Afa barago jo kakara ae arira. Ainda tuka mo: God nunda Mandi dirigetiri, Numamo da javoda fusira. 24 "Na geka beká resena. Amo, mave nanda geka nininguse, God na dirigetiri fusena ava tumondarira amo, nu jebuga evovodae irari ava tuve barira. Amo kau nu anakora ambarida ghe jebuge erorusira, amingori. Ava sedo, genembo mave na tumondarira amo, jo mave eniimi nunda ari ekoko ijujae arira. 25 Na geka beká resena: sifo foa buvari dae erira, o saone, ojira buvira. Sifo aminda, ambari embo ne God da Mandi da beka ningarera. Kotugo mave nunda beka sirurari ningarira amo, nu jebugarira. 26 God Afa nu jebuga da susuri. Kotugo, nu setiri nunda Mandi kau daba aminga ava, jebuga da susu edo irira. 27 God da Mandi, nu Evetu Genembo da Korori+. Aindae sedo, God setiri nune evetu genembo da ari ekoko ijujarira. 28 Geka resena evia, ningido erá buneove! Sifo eni foa buvari dae erira. Sifo aminda, ambari embo isasambu, nunda beka sirurari ningido, 29 nenda ofofo gomoda ghe jebuge erarera. Mendeni, ari eveva edo ghusera amo, ne eredo, jebuga evovodae irari ava tuve barera. O mendeni, ari ekoko edo ghusera amo, ne eredo, nenda ari ekoko da bouvu ava fumbarera," aminge sisira. 30 Aminge sedo, Iesu sisira, "Na roera eni tofo nanda javoda ari saetena amo, jo inono ae aeti. Avata God nune seari, na evetu genembo da ari ava ijujeraena. Ava sedo, na evetu genembo da ari ava ijujeraena amo, na evevada seraena. Ainda beká mo: na jo nanda ujui sae eraena. God na dirigetiri fusena, ainda uju avanembo use irena. 31 "Namoá tumondaovo dae sedo, 'Tofo namoá eveva,' saetena amo, jo inono iraeri. 32 Avata mave eniimi nanda kau mavegori ava osa seraira. A na kasama erena, nu rea nandae seraira amo, geka bekári. 33 Ne nenda aghi kakato dirigetevo era John kena buvero, nu nandae sise, geka beká ava setiri nininguseri. 34 Amo, John nanda geka sonembusira. Avata amingusira amo, jo nune nanda geka sonembari inono ari da kaugo iraeri. Na John dae resena da susu mo: na uju erena, ne John da geka ningido, na tumondedo jebugareva. 35 John nu kau, arivo injibeoro usasa jaragheraira, amingori. Sifo tufako ne yama ivuga use, numokena usasa gido ghusevu. 36 Avori, John mo nanda geka jo teria futo sonembari da kaugo iraeri. Avata, nanda geka da sonemba kato teria beká eni irira. Nanda Afa tano a ari rea aono dae sisira ava, eono siroreari ne giraeva. Tano a ari eono siroreraira aimi ijugeraira amo, geka bekári: God Afa na nune dirigetiri fuseni. 37 A God Afa na dirigetiri fusena, nune tofo nanda geka sonemberaira. Avata ne na jo tumondae eraeva. Ai resira amo: ne jo nunda beka ningae ireva, nunda dombu jo gae ireva, a nunda Geka jo nenda dubo jokáda teredo iraeri. 39 Nenda kotari mo: God da Geka jokáda, ne jebuga tambareva. Ava sedo, ne aminda tegutuse ireva. A nu geka bekári: God da Geka amo nandae resira. 40 Avata, ne na imboe use, jo namokena foama jebuga bae eraeva. 41 Nandae sakai saovo dae, na jo sae erena. 42 Avata nenda janje joká amo na kasama erena. Nenda janje jokáda, ne God jo dubo bae eraeva. 43 Na Afa da javoda fusena avata, ne na jo tumonduse unumbae usevu. Mave tofo nunda javoda furaetira amo, ne nu tumondaetevu. Avata na Afa da javoda fusena amo, ne na jo tumonduse unumbae usevu. 44 Kotugo na kasama erena: ne jo totoi tumondae areva. Ainda beká mo: nenda kokomana nange nemokena sakai saetera ava kotise, ne God da usasa a duro, nusuka nune nemokena mutaetira ava, jo kotae eraeva. 45 Avata erá eminge koteove: na nasuka Afa da dombuda fete nenda ari ekoko ijujarena, erá aminge koteove! Ne, 'Namane Moses da Geka tumonderaera,' seraeva. Avata Moses nune eredo, God Afa da dombuda, nenda ari ekoko ava ijujarira. 46 Ainda beká mo: Moses nu nandae gefusira. Ne Moses tumondaeteva amo, nambarago tumondaetevu. 47 Avata ne, nunda geka gefusira ava, jo tumondae eraeva. Ava sedo, na eregosena, nanda geka barago jo tumondae areva," aminge sisira.

6

1 Ainda amboda, Iesu eredo Frovensi Galilee, uvu da teria irira, Genesaret o Taibirias seraera, aminda sekago sembisira. 2 Sembiri gido, natofo digarigoimi nunda amboda iseri. Ainda beká mo: Iesu tano eari, evetu genembo mendeni kae ekoko dombu eni eni budo iriara ava, jejebugeoro gi dudukughedo ghuseri. 3 Iesu namane budo, enda jiro fumbari aminda vitera anumbuseri. 4 Ainda sifo amo, namane Jusi embo da kirumo eni, javo Jarige Yari da Kirumo+ seraera, amo fira utua usira. 5 Avori, namane anumbetero, Iesu jovereghusira amo, evetu genembo digari ambariá numokena fero gido, nu Philip kena sisira, "Evetu genembo digari eregosesa omo, namonde farava reda ombu mutareri?" 6 (Aminge sisira amo, nu Philip dere gosuse sisira. Nu tofo amboda rea arira amo, kasama use ategi usira.) 7 Setiri, Philip sisira, "Evetu genembo digari bekári. Ava sedo, K2,000 aimi farava ombu mutoro mindarera amo, jo inono ae arira." 8 Aminge setiri, namanenda eni javo Andrew, amo Simon (Peter) da namendi, aimi eredo sisira, 9 "Mandi eni eminda fetirira emo, nu farava ghabu soveni a oka etoto ava budo ojighira. Avata evetu genembo rekato digari mo eviri. Ava sedo, jo inono ae arira." 10 Setiri, Iesu namanekena sisira, "Sevu, evetu genembo anumbaore!" (Aminge sisira da beká mo: vasa amo beraghago, kikisaghaeri.) Ava sedo, namane setero evetu genembo anumbuseri. Gegenembo aminda anumbusera amo, 5,000 da kaugori, evevetu a sasingu jo tegaeri. 11 Anumbetero, Iesu nu farava budo, God kena 'aiyakoe' sedo, evetu genembo anumbusera, aikena mutiri ruruseri. Amboda, oka budo kau daba ava use, ghasisira. Ghasetiri budo, ne uju usera aminga ava, mindero inono etiri dotero fasusira. 12 Mindero inono etiri gido, nu namanendae sisira, "Yasivu, bayau mindera da itogato, dabade edo bu furove! Erá soesa eore!" 13 Aminge setiri, namane, farava risera da itogato ava, rete budo kanda babai isambu 12 ava vendi budo fuseri. 14 Iesu rea etiri sirorusira ava gido, natofo aminda totorugusera aimi siseri, "Feroveta teria amboda sirorariá seraera amo, eviri," siseri. 15 Natofoi orokoá foama nu sandi budo, kini (king) are dae sedo, katiyavara arera ava, Iesu kasama usira. Aindae sedo, natofo dodo, nu nusuka enda jiro fumbari aminda ira vivitusira. 16 Ungobu iri, namane jovereghedo era, 17 ghakada+ vosedo sirige reighi Kaponiam aminda sembi yari dae ero, tumba jisira. Iesu nu jo foa namanekena buvaeri. 18 Amingero, yaura teria sufuse, aimi eva deretiri erorusira. 19 Eva yaura sufiri, namane davedo era, kafuru soroda (7 kirometa aminga ava) buvurutero, Iesu vose eva etoda fete deinghedo, namanenda ghakada+ vitari dae firi namane gosuseri. Gido, namane oju beká ava useri. 20 Amingero, Iesu namanekena sisira, "Namori! Erá oju eove!" 21 Aminge setiri, namane gido dubo jama use, nu ivugaghae tifuseri. Timbudo, namane era, fafo reda darari kotisera, aminda anakora tere dadoruseri. 22 Amingetero sifo atetiri, evetu genembo sovenikena irisera aimi, fuge ghaka+ dabako iriri gosuseri. Kotugo ne kasama useri, Iesu nu jo namane namonde dabade vendi sirigaeri. Nu aminda iriri, namane sirige dodo fusera ava, ne kasama useri. 23 Aminge kotise sero, ghaka+ mendeni reighi Taibirias aminda ghe fera teteruseri. Iesu bayau esimbuguse setiri, dige fasetiri risera da vasa, ainda tinguda tere dadoruseri. 24 Ne jo namane Iesu de dabade aminda iroro tambaeri. Amingedo, ne isambu Iesu tambari dae sedo, ghakada+ vose sirigedo reighi Kaponiam sembu fuseri. 25 Sembu fera aminda teredo, Iesu tambudo numokena siseri, "Ijuga Kato, ni nange nangedo ojesa eminda iresi?" 26 Aminge setero, Iesu mino nemokena sisira, "Nemokena geka beká resena. Ne namo tava ereva da beká mo: bayau esimbugeteno mindevo inono umutara ava kotise, na tava ereva. Na tano mendeni mendeni eono giraeva, a eni eteno gosumutava, ainda tuka ne jo kasama use furae ereva. Ne taká, bayau mindari ava kotise refeva. 27 Tamo da bayau ya masa edo dadaberaira aindae, erá tava use saramana eove! Bayau eni mo irira. God Afa nu Evetu Genembo da Koro+ dubo buraira, ava kasama aovo dae sedo, nunda fakina a tano, namokena mutiri eno eregoseva. Ava sedo, na jebuga da bayau nemokena mutarena amo, jebuga evovodae irari ava tuve bareva. Jebuga da bayau dabako evia tava use eindae, saramana use iraetevu!" 28 Aminge setiri aindae, ne ategi use siseri, "Namane God da saramana ari dae sarera amo, kau nange tuturo areri?" 29 Aminge setero, Iesu sisira, "God saramana ningiava aovo dae uju eraira amo, eviri. God mavejoá dirigetiri ojighira amo, nu tumondareva." 30 Aminge setiri, ne mino numokena siseri, "Ni tano rejoá aso sirorari gido, namane ni tumondareri? Ni rejo aresi? 31 Moses da sifoda, namondeda abuamane reighi uvu a evetu genembo irae da vasa aminda birurughuse, bayau tefo sirorureari bu mindido ghuseri. God da Geka aindae sise, eminge resira: 'Nu bayau utuda ghe muteari voseari bu mindido ghuseri,' God da Geka aminge resira." 32 Setero, Iesu nemokena sisira, "Geka beká ava nemokena resena! Bayau utuda ghe vose furureari nembuamane mindido ghusera amo, jo Moses nune mutari mindido ghaeri. Bayau utuda ghe vose foa gheraira amo, nanda Afa aimi muteari foa gheraira. 33 Bayau God muteari foa gheraira amo, genembori. Genembo resena emo, nu utuda ghe foa, nunda jebuga evetu genembokena muturaira. Bayau setena amo, numori." 34 Aminge setiri, ne numokena benunu siseri, "Bajari, bayau resesa amo, namanekena mutudo ghe, evovodae!" 35 Ne aminge setero, Iesu eminge sisira, "Namo jebuga da bayauri. Mave namokena furarira amo, nu jo sekago uvudae dubo saghae arira, o ighoi jo itatamae arira. 36 Na rea sisena amo, beká siroretira. Ne ditiimi na eregoseva. Avata nanda geka jo tumondae ereva. Afa nu mavejo ava, gategedo namokena mutarira amo, nu namokena furari bu tavo arena. 37 Mave namokena mutari furarira amo, na nu jo buregae arena. 38 Ainda beká mo: na jo nanda uju ava ari dae sedo, utuda ghe vose furaeri. God na dirigetiri vose fusena amo, nunda uju ava ari dae sedo fuseni. Afa da uju mo eviri: evetu genembo namokena futusira ava, jo eni kosasaghaono ya ambae arira. A kotugo, nunda uju mo: sifo gombuda na saono, ne ambarida ghe eredo jebuga tuve barera. 40 Ai resira amo: nanda Afa uju eraira, mave nunda Mandi gido tumondarira amo, nu jebuga evovodae irari ava tuve barira. Aindae sedo, sifo gombuda na saono, ne ambarida ghe jebuge eredo, jebuga tuve barera," Iesu, nu rea arira ava, tofo ijuguse aminge sisira. 41 Avori, Iesu nu, "Bayau utuda ghe vose fusira amo, namori," sisira aindae, ne tuturo edo dubo mema use tiriseri. 42 Aminguse siseri, "Genembo emo, nu taká Joseph da mandi Iesu ri. Nunda noi numamo namonde kasama erera. Ava nu utuda ghe vose furariá resira amo, nu nange nange kotise resi?" 43 Ne aminge setero, Iesu mino sisira, "Erá unongu sise tofo tofo se ningeove! 44 Ainda beká mo: mave jo tefo namokena furae arira. God Afa na dirigetiri fusena aimi, genembo eni unumbarira amo, nu namokena furarira. Furari, sifo gombuda na saono, ambarida ghe eredo jebuga evovodae irari ava tuve barira. 45 God setiri feroveta nunda Geka gefusera amo, eviri: 'God nu evetu genembo isambudae, dengoro indarira,' aminge gefuseri. Ava sedo, evetu genembo mave God Afa da geka ningido, nunda ijuga ava tumondarera amo, ne namokena furarera. 46 God da Geka ningiraera, resena emo, nenda dubo jokáda nunda Geka itatameraera, avata God jo ditiimi gae eraera. Ainda beká mo: jo mave God da dombu gae eraera, a geka dabade jo se ningae eraera. Avata na God Afa dirigetiri fusena amo, nasuka nane, Afa gosuseni. 47 Na nemokena resena: mave tumondarira amo, nu jebuga evovodae irari ava, anakora tambudo irira. 48 Namo jebuga da bayauri. 49 Nembuamane reighi uvu a evetu genembo irae da vasa aminda birurughuse, bayau javo 'mena' ava, mindido ghuseri. Rise iriara avata, ne rido fera sirivo useri. 50 Avata bayau God mutiri vose fusira amo, jo avavago iraeri. Ava mave bu mindarira amo, nu jo ambae arira. 51 Emo na tofo, nandae resena. Bayau utuda ghe vose fusira setena amo, tofo namoá seteni. Bayau evia, mave mindarira amo, nu jebuga evovodae irari ava tuve barira. Bayau evetu genembodae mutari resena emo, nanda tamo aindae resena. Evetu genembo jebugaoro dae sedo, nanda tamo mutarena," Iesu aminge sisira. 52 Ava setiri ningido, Jusi embo ne tuturo edo beisiga use, tofo tofo se nininguseri, "Nunda tamo mutari mindoro dae resira amo, kau nange nange genembo einda tamo mindareri?" 53 Aminge setero, Iesu nemokena sisira, "Na geka beká resena. Ne Evetu Genembo da Koro+ da tamo, jo bu mindae areva, a nunda ororo jo fumbu mindae areva amo, ne jebuga evovodae irari ava, jo tambae areva. 54 Avata mave, nanda tamo a nanda ororo bu mindarira amo, nu jebuga evovodae irari ava tambari, saono sifo gombuda nu ambarida ghe jebuge erarira. 55 Ainda beká mo: nanda tamo a nanda ororo amo, uvu bayau bekári. 56 Mave nanda tamo budo, nanda ororo fumbu mindarira amo, na nunda janje jokáda irarena. A numbarago nanda jokáda irarira. 57 God Afa jebuga irira aimi, na dirigetiri fuseni. Nunda jebuga da fakinaimi, nambarago jebuga irena. Kau daba aminga ava, mave na bu mindarira amo, nu nanda jebuga da fakinaimi, jebuga tuve barira. 58 Bayau utuda ghe vose fusira, ainda tuka seteno ningeva amo, eviri. Bayau nembuamane rise iriara, sirivo usera amo, jo nanda tamo a ororo evavago iraeri. Nanda tamo a ororo, mave bu mindarira amo, nu jebuga evovodae irari ava tuve barira," Iesu aminge sisira. 59 Ainda geka mo, Iesu nu reighi Kaponiam aminda, Kaponiam embo da dengoro indari kambo+ aminda, ijuguse sisira. 60 Iesu da dorevare digari, ne geka ava ningido siseri, "Emo ijuga fakaragori. E mave ningi kasama ari?" aminge beisiga useri. 61 Nunda dorevare mendeni nunda geka aindae beisiga usera ava, Iesu nu tamoi itatamusira. Itatamedo, nemokena sisira, "Geka emo ne imboe ereva. 62 Avata Evetu Genembo da Koro+ ne dodo jovereghe utuda viti yarira amo, ne ivuga areva, ai? A kote givu! 63 Jebuga mo, God da Asisi Kakara aimi muturaira. Jo evetu genembo da fakinaimi, aoro sirorari bari da kaugo iraeri. Geka resena emo, asisi da jebuga bekári. 64 Avata mendeni ne, aindae na jo tumondae eraeva," Iesu aminge sisira. (Mave ne Iesu jo tumondae arera, a mave numoá aito arira ava, Iesu anakora tuturoda kasama usira.) 65 Aindae sise, nu eminge sisira, "Na aindae siseni, 'Mave jo tefo namokena furae arira. Mavedae, God Afa guro afigarira amo, nu furarira. O mavedae, God guro jo afigae arira amo, nu jo furae arira,' " aminge sisira. 66 Geka evia sisira aindae, nunda dorevare mendeni Iesu ighagha edo ainda amboda, jo nemonde dabade deinghae edo ghuseri. 67 Ava gido, Iesu namane isambu 12 aikena ategi usira, "Nemo kote givu! Mendeni na doteri. Ne barago na doyareva, ai?" 68 Aminge ategi etiri, Simon Peter nu eredo eminge sisira, "Bajari, namane ni jo dodo mavekena yae arera. Jebuga bari da geka, nisuka nimokenari. 69 Namane ni tumonduse oroko kasama erera, God Genembo Kakara, evetu genembodae mutari sisira amo, nimori." 70 Aminge setiri, Iesu namanekena sisira, "Nanda ambo jimbi 12 gategusena, amo nemori. Avata nenda eni, nu Satan da genembo bekári." 71 Iesu nu aminge sisira amo, nu Keriot embo genembo Simon da mandi javo Judas dae sisira. Ainda beká mo: nu namane 12 ainda eni, avata nu amboda, Iesu nune aito usira.

7

1 Ainda amboda, Iesu nu Frovensi Galilee aminda, ya birurughedo ghusira. Nu Frovensi Judia aminda yari mo, jo uju ae usira. Ainda susu mo: Jusi embo aminda, ne nu daoro ambare dae kotedo ghuseri. 2 Avori, Jusi embo da kirumo eni ainda sifo ava fira buvurutusira. Kirumo resena einda javo mo, 'Dobo' jijighuseri. (Ainda beká mo: Jusi embo ne, God nunda sonemba anakora futusira, ava kotari dae sedo, dobo itido kirumo use aminda avido ghuseri.) 3 Kirumo da sifo fira utua etiri gido, Iesu da jamena numokena fera, dere jise siseri, "Ni erekotesa, ni genembo mindafu eko eniri. Ava sedo, eminda ghedo yasi, Frovensi Judia aminda buvudo, saramana ururaso, ninda dorevare ninda saramana amo gaore! 4 Mave genembo teria ari kotarira amo, nu saramana jo ufena ae arira. Ava sedo, ninda tano a ari eraesa ava, evetu genembo da dombuda ururaso ni gaore!" 5 Aminge sisera da beká mo: nunda jamena nembarago, nenda koro Iesu jo tumondae useri. 6 Iesu nemokena sisira, "Nanda sifo mo jo foa buvae irira. O nemo taká, sifo evia inono yareva. 7 Ne fisi da uju ava use ireva aindae sedo, evetu genembo ne jo imboe ae eraera. O namo, evetu genembo nenda ari ekoko aindae, dombuda sise irá gheraena. Aindae ne, na imboe eraera. 8 Ava sedo, ne kikiako yasivu kirumo aove! Nanda sifo jo foa buvae irira. Ava sedo, na jo yae arena," 9 Aminge sedo, nu Galilee aminda iriri ne iseri. 10 Iesu nu jo isaghada yari kotaeri. Ava sedo, nu kaifa iri, nunda jamena ero nu ufena amboda isira. 11 Jusi embo da babojegari ne kirumo da sifo aminda, Iesu kaifa use totofo se nininguseri, "Genemboé nangetiraimi jo furae iri?" siseri. 12 Natofo isasambu barago, ne Iesu dae beka sainghiako se nininguseri. Sero, mendeni eminge siseri, "Nu genembo evevari," siseri. O mendeni siseri, "Tefo, nu jo eveva iraeri. Nu natofo dereraira," ava siseri. 13 Beka sainghiako sisera da beká mo: ne Jusi embo da babojegari aindae oju use siseri. 14 Kirumo tuturo edo fira soroda buviri, Iesu ira God da Kamboda+ teredo, tuturo edo ijugusira. 15 Amingiri, Jusi embo da babojegari nunda geka ningi dudukughedo, tofo tofo se nininguseri, "Genembo omo, nu faiya jo teria ae ava, kasama emo, reda rurusi?" 16 Aminge setero, Iesu nenda geka da mino eminge sisira, "Na rea ijugeraena amo, jo nanda kotari iraeri. God na dirigetiri fusena ainda ijuga ava, nane ijugeraena. 17 Avori, nanda ijuga God kena foa gheraira o, na tofo nanda kotariimi ijugeraena amo, mave God da uju ari dae koteraira ainembo kasama arira. 18 Genembo mave tofo nunda javoda ijugarira amo, tofo numoá sakai sise, ari nunda duro gaoro dae, arira. O mave nu bajari dirigetiri fusira amo, nunda ghamo jokái futuse, nunda bajari da duro aindae sakai sarira. Aminguse, nu geka beká avanembo sarira, a evetu genembo jo derae arira. 19 Moses nemokena God da Agho Dari futusira. Avata ne isambu Agho Dari amo bejeraeva. Ava sedo, redae na Agho Dari bejariá sise, na daovo ambono dae seraevu?" 20 Aminge siri ningido, natofo isambu eredo siseri, "Nimo, sukarui asugetiri resesa. Eminda, mave enii ni jo daoro ambaso dae kotae irera." 21 Aminge setero, Iesu mino sisira, "Na tano mindafu eni eteno gido, ne dudukughusevu. 22 Kote givu! God setiri, Moses nu Agho Dari jokáda, sasingu vide jamena da vika mendo anoso gafugaoro dae sisira. (Geka beká mo: Moses nu geka amo bukuda gefusira avata, abuamane Moses da gitida, tuturo edo amingedo ghuseri.) Avori, ainda agho dari ava erá bejeóro dae sise, ne Jangutari da Sifoda, umbu mendeni vika da mendo anoso gafugeraeva. Aminguse, ne Jangutari da Sifo ainda agho dari ava bejeraeva. Ava sedo, na genembo eni Jangutari da Sifoda, seteno jebugusira amo, ne redae nandae janje eko use ghoghora sisevu? 24 Erá gido a ningido, totoi dudukugheove! Susu ijuje gi gogoghombedo, na ijujareva." 25 Iesu aminge siri ningido, Jerusalem embo mendeni, ne eminge kotise siseri. 26 "Givu! Genembo daoro ambare dae sise resera amo, genembo oviri. Nu natofo da dombuda eredo vironu resira ovia, mave jo imboe use buregae erira. Avose, namondeda babojegari kasama erera tanojo: God Genembo eni mutari furare dae sisira amo, numori tano. 27 Avata seoro ningiraera: God Genembo eni mutari furarira amo, reda ghe furarira ava, mave enii jo kasama ae arira. O namonde mo, Iesu da reighi ava kasama erera," mendeni ne aminge siseri. 28 Aminge setero ningido aindae, Iesu nu God da Kambo+ jokáda ijuguse, beka mindafu eminge sisira, "Ne erekoteva: na kasama ariva seraeva. A na reda ghe fusena, ne kasama ariva seraeva. A gido, ne aminge reseva. Avata na jo tofo nanda javoda furaeri. God na dirigetiri fusena amo, nu ari bekáda bekáda ari kato, a geka beká sari katori. Avata nemo, nu erebuneva. 29 O namo, nu kasama erena. Ainda beká mo: na nangae dabade iriana edo, na nune dirigetiri fuseni." 30 Aminge setiri ningido aindae, ne Iesu sandi bu koto ari kotiseri. Avata nunda sifo jo foa buvae iriri aindae, nunda tamo jo derae useri. 31 Avata evetu genembo digari kirumodae sedo totorugusera amo, ne Iesu tumonduse eminge siseri, "God da Genembo foa, tano a ari rea ava aetira amo, God da feroveta anakora gefuseri. Kotugo nene gefusera, a Iesu nune eraira amo, inonori. Jo bunari da kaugo iraeri. Ava sedo Iesu mo, numori, namane ava tumonderera," aminge siseri. 32 Natofo geka ava sainghiako sero ningido, Moses da Geka kaifa kakato+ a fristi+ da babojegari, nemonde dabade, Iesu kosege sandoro dae sedo, God da Kambo+ kaifa kakato ava mendeni, dirigetero iseri. 33 Amingero gido, Iesu sisira, "Na namonde sifo tufako dabade iria edo ne dodo, God na dirigetiri fusena, aikena jovereghe yarena. 34 Na kakova use irareva. Avata na vasa reda ya buvarena amo, jo nene aminda ya buvari da kaugo iraeri. Ava sedo, na jo tambae areva." 35 Aminge siri ningido, Jusi embo da babojegari ne tofo tofo se nininguseri, "Erá numo tambeóro dae sise, nu reda yari dae resi? Namondeda natofo Jusi embo mendeni, ne Greek embo da reighi mendeni aminda dighi anumbusera, aikena ya aminda irise, Greek embo ava dengoro indari dae resira, ai, nange resi? 36 Nu setira amo, 'Namonde numo kakova use irarera. Nu vasa reda ya buvarira amo, namonde jo aminda ya buvari da kaugo iraeri,' setira amo, redae seti?" ne bunise, vasa eni enda eminda ya irariá kotise siseri. 37 Kirumo sumbu nunda sifo reda dadaberaira, sifo amo sifo teriari. Sifo aminda, Iesu nu eredo beka mindafu sisira, "Mave nu uvudae uju arira amo, nu namokena foa bu mindarira. 38 Geka resena eindae, God da Geka barago eminge resira: 'Mave na tumondarira amo, nunda janje jokáda, jebuga da uvu kau usegha da kaugo ava buvarira. (Uvuá mave mindarira amo, nu jebuga evovodae irari ava tuve barira.)' God da Geka aminge resira." 39 Iesu aminge sisira da beká mo: nu Asisi Kakara dae sisira. Evetu genembo mave Iesu tumondarera amo, Asisi Kakara nemokena vose asugedo irarira, aindae sisira. Avata sifo aminda, God jo sari Iesu ambarida ghe jebuge eredo, ya nunda duro sekago jo bae irei. A gido, nunda Asisi Kakara barago, jo mutari vose foa evetu genembokena asugae irei. 40 Evetu genembo totorugusera, nenda mendeni geka ava ningido, eminge siseri, "Feroveta amboda furariá seraera amo, genembo oviri," mendeni aminge siseri. 41 A mendeni siseri, "God Genembo eni dirigari furare dae sisira amo, numori." Avata mendeni, geka giti sisera aindae sise, beisiga use eminge siseri, "God Genembo eni dirigari furare dae sisira amo, nu jo Frovensi Galilee ghedo furae arira. 42 God da Geka ijugerira amo: nu David da imemesiri ainda jokáda sirorarira. Nu David da reighi Bethlehem aminda sirorarira. Nu jo Frovensi Galilee aminda sirorae arira." 43 Aminge sise, Iesu mavejova sise, ne soroda sarigedo beisiga useri. 44 Aminge sise, mendeni ne Iesu sandi budo koto ari kotiseri. Avata mave jo ya nunda tamo derae usira. 45 Etero dadabetiri, God da Kambo+ kaifa kakato, ne eredo jovereghe era, fristi+ da babojegari a Moses da Geka kaifa kakato+ aikena buvero, ne ategi useri, "Ne redae Iesu jo sandi bu furae etevu?" 46 Aminge setero, God da Kambo+ kaifa kakato aimi siseri, "Iesu nunda vironu seraira, avaga mave eni jo giti siruroro ningaeri." 47 Aminge setero, Moses da Geka kaifa kakato+ ne ghoghora sise, eminge siseri, "Iesu vironu sise ne deretiri tumondereva, ava namane eregosera. 48 Namane kote givu! Namane babojegari a kokotofu, jo eniko nu tumondae irera. A Moses da Geka kaifa kakato+ barago, eniko Iesu jo tumondae irera. 49 O natofo teria, ne jo namane avavaga iraeri. Ne munju tefori. God da Geka Moses imi gefusira ava, ne jo tege kasama e gogoghombaeri. Ava sedo, God simbora etiri, nenda kotari ava baghimbusira," God da Kambo+ kaifa kakatokena aminge siseri. 50 Nicodemus giti tumbaghae Iesu kena isira amo, nu Moses da Geka kaifa kato+ eniri. Nicodemus nu babojegaride dabade totoruguseri. Nu eredo, nunda kokomana, Moses da Geka kaifa kakatokena eminge sisira, 51 "Seteva aindae resena. Kote givu! Namondeda agho dari resira: genembo eni mave jo foa dombu isagha edo geka sae arira amo, nunda ari ekoko jo ijujae arera. Nu foa fetedo sirurari nininguse, ijujarera amo avori." 52 Aminge setiri dadabetiri, ne, Nicodemus dere jise siseri, "Avose, Galilee embo eni nimori tano! Ni God da Geka tege kasama e gogoghombaresa amo, ni kasama aresa: Frovensi Galilee embo, ne ekokori. Ainda jokáda, God da feroveta eni jo sirorae arira, ava kasama aresa. Iesu nu Galilee embo ava sedo, nu jo feroveta iraeri, ava ni anakora kasama aetesi. Ni nunda geka erá sonembeóso dae resera," aminge siseri. 53 Ainda amboda kirumo dadabetiri gido, natofo taraghedo natida iseri.

8

1 Amingusera avata, Iesu nu enda jiro fumbari javo Orivi aminda vitisira. 2 Sifo atetiri ataeghae, Iesu jovereghedo Jerusalem ira, God da Kamboda+ teterusira. Teretiri, natofo aminda irisera aimi, numoá gido totorugetero, nu anumbe tuturo edo ijugusira. 3 Amingiri, Moses da Geka ijuga kakato a kaifa kakato+ evetu eni sandi budo fera setero, natofo da dombuda fefetusira. Evetu emo, nu yagera iri gido, sandi ruruseri. 4 Bu fera, setero fetiriri, Moses da Geka ijuga kakato a kaifa kakato+ Iesu kena siseri, "Ijuga Kato, evetu emo genemboghae yagera use fasirero tamberi. 5 God da Agho Dari Moses imi gefusira, ainda jokáda eminge resira: mave yagera arira amo, daoro ambarira. Ava sedo, namonde nange areri? Se ningore!" 6 Aminge sisera da beká mo eviri: Iesu geka sembae sirurari ningido, ijujedo numoá koto ari dae sedo aminguseri. Setero ningido, Iesu rosege, ungoimi endada geka gefusira. 7 Ne numoá jimbe jokáda edo ategi ero, nu gembiri dadabetiri, ere fetedo, sisira, "Avori, evetué daovo ambarira! Avata mave ari eko eni jo ae irarira aimi, giti tuturo edo ghamana afarira." 8 Aminge sedo, Iesu sekago rosege, ungoimi endada gefusira. 9 Gefiri, ne nunda geka setiri niningusera aindae, nu dodo nunda nunda iseri. Bebego ne giti ero, ambobo ne amboda era dadabetero, evetuá nusuka Iesu da dombuda fefetusira. 10 Era dadabetero, Iesu ere fetedo evetu aikena sisira, "Ninda ari eko ijujari kakato oroko redari? Ne geka eni sero niningeresa? Kote gi!" sisira. 11 Setiri, evetuá, "Tefo, Bajari, ne taragheteri," setiri, Iesu sisira, "Avori, nambarago nindae jo ghoghora sise ijujae arena. Yaresa avata, erá sekago amingeose dae resena!" 12 Iesu sekago natofokena sisira, "Na evetu genembo da usasari. Mave nanda amboda furarira amo, nu jo tumbada deinghae arira; nu usasada deinghuse irarira. Usasa aminda deinghuse, jebuga evovodae irari ava tuve barira." 13 Aminge setiri, Moses da Geka kaifa kakato+ numokena siseri, "Ninda geka tofo nimoá sonembuse seraesa amo, jo inono iraeri. A kotugo, ninda geka resesa amo, jo fetae arira." 14 Aminge setero, Iesu mino nemokena sisira, "Nanda geka tofo namoá sonembariá sise, ne aindae nanda geka gungubova reseva. Avata na eminge resena: na tofo amingarena amo, na geka beká sarena. Ainda beká mo: na reda ghe fusena, a na reda jovereghe yarena, ava na kasama erena. O ne a bunariri. 15 Ne totofo nenda uju ava use, evetu genembo da kotariimi ijujeraeva. O namo, na jo evetu genembo ijujae eraena. 16 Avata na ijujaetena amo, na geka bekáda bekáda sise, evetu genembo da ari ekoko ijujaeteni. Ainda beká mo: na jo nasuka iraeri. Afa na dirigetiri fusena amo, nu nangae irera. 17 Nenda agho dari eminge resira: koto ururoro, evetu genembo etotoimi, geka daba ava siruroro ningarera amo, nengae nenda geka ava tumondarera. 18 Na tofo na mavejori, ava sise irá gheraena. A kotugo, Afa barago, nanda geka nu sonemberaira." 19 Aminge setiri, ne ategi useri, "Nimamo resesa amo, oroko reda iri?" aminge ategi etero, Iesu mino nemokena sisira, "Ne na mavejoá jo kasama ae ireva. A gido nanda Afa barago jo kasama ae ireva. O na mavejoá kasama aeteva amo, nanda Afa barago kasama aetevu," 20 Iesu geka aminge sise, God da Kambo+ da natofoimi moni vendoro dae sedo, rooro fifitusera, ainda vasa aminda fefetuse sisira. Avata mave, jo foa nu sandaeri. Ainda beká mo: nunda sifo jo foa buvaeri. 21 Iesu sekago nemokena sisira, "Na ne dodo irurono, ne na tava areva. Avata na jo tambae irovo, God nenda ari ekoko jo kote doyae irari, ne sirivo areva. Na reda yarena, ne jo aminda yari da kaugo iraeri." 22 Aminge setiri, Jusi embo da babojegari ne tofo tofo eminge se nininguseri, "Nu reda yarira, aminda namane jo yari da kaugo irae resira omo, nange sise resi? Nu tofo de ambari dae resira, ai, nange ari dae resi?" ne bune jaredo, manamana use aminge siseri. 23 Setero, Iesu nemokena sisira, "Ne duru eminda sirorusevu. Na ikáda ghe vose fuseni. Nemo, nenda susu enda eminda irira. O namo, nanda susu jo enda eminda iraeri. 24 Na aindae seteni: God nenda ari ekoko jo kote doyae irari, ne sirivo areva. Ne, 'na Numori' ava jo tumondae areva amo, God nenda ari ekoko jo kote doyae irari, ne sirivo areva." 25 Aminge setiri, ne ategi useri, "Avori, geka bekáda se ningore! Ni mavejori?" aminge setero, Iesu minonda sisira, "Tuturoda fena ijuguse sisena, daba avori. 26 Na nemokena geka mendeni mendeni saeteni, a nenda ari ekoko mendeni aindae ijujaeteni. Avata mave na dirigetiri fusena amo, nu ari bekáda bekáda ari kato, a geka beká sari katori. Ava sedo, na numokena rea niningusena, avanembo seono ningiraeva," aminge sisira. 27 Avori, Iesu nu God Afa dae sisira ava, ne buniseri. 28 Ava gido, Iesu nemokena eminge sisira, "Ne na jighovo erono, daovo ambono gido, ne kasama areva: Evetu Genembo da Koro+ mo, namori. Kotugo na jo tofo nanda javoda saramana ae eraena, a na rea seraena amo, Afa ijugetiri kasama usena, ábarago ne kasama areva. 29 Kotugo, Afa na dirigetiri fusena amo, nu jo na doyari, na nasuka deinghae eraena. Nu nangae dabade irera. Ainda beká mo: na rea eraena aindae, nu ivuga eraira," 30 Iesu nu geka ava siri, evetu genembo digari nu tumonduseri. 31 Jusi embo da babojegari mendeni Iesu tumondusera aikena, nu eminge sisira, "Ne nanda geka ningido, aminguse irareva amo, ne nanda dorevare beká ava areva. 32 Edo, geka beká da susu, ava kasama e gogoghombareva. Geka beká aimi, ne vujegari jebugareva." 33 Aminge setiri, ne siseri, "Agá! Ni redae vujegari da geka resesi? Namane mo, abua Abraham da sasinguri; ava sedo, namane jo bundoro iraeri, a namane jo sabua+ iraeri." 34 Aminge setero, Iesu nemokena sisira, "Nemokena geka beká resena. Mave Ari Eko da saramana use irarira amo, nu Ari Eko da sabua+ edo irarira. 35 Genembo nunda sabua+ ava, jo evovodae bu jighirise, nemonde dabade irá ghae arira. O genembo ainda sasingu beká mo, nu jo doyae arira. Nu nemonde dabade irarera. 36 Ava sedo, ne bundedo irovo, God da Mandiimi, ne vujegedo, nenda ari ekoko kote doyarira amo, ne sabua+ da irari dodo, nunda sasingu beká edo, jebugari beká ava edo irareva. 37 Na kasama erena, ne Abraham da sasinguri. Ainda beká mo: ne nunda imemesiri jokáda sirorusevu. Avata ne nanda geka imboe use ireva aindae, ne na daovo ambono dae sedo kotise ireva. 38 Nanda Afa rea namokena ijugusira, ava vironu sise irena. O nemo, nimamo geka rea siri nininguseva, ava use ireva." 39 Aminge setiri, ne siseri, "Namanenda afa mo, Abraham numori," aminge siseri. Setero, Iesu nemokena sisira, "Ne Abraham da sasingu beká iraeteva amo, nu rea usira, ne kau daba ava use iraetevu. 40 O namo, God geka beká namokena sisira, avanembo nemokena sise irena. Avata ne na daovo ambono dae kotise ireva. Nembua Abraham jo amingae edo ghusira. 41 O nemo, nenda nimamo beká ainda saramana use ireva," aminge setiri, ne siseri, "Namanenda afa dabako, God numori. Namane nunda sasingu bekári." 42 Aminge setero, Iesu nemokena sisira, "Amo gungubori! Ne God Afa da sasingu iraeteva amo, ne na dubo baetevu. Ainda beká mo: na tofo God kena ghedo ojena irena. Na jo nanda javoda furae useni. Na God dirigetiri fuseni. 43 Ne nanda geka da tuka jo kasama ae eraeva da beká mo: ne ningarikena jo inono ae ireva. 44 Ai resira amo: nenda nimamo Satan da uju ava ari dae kotise ireva. Nu tuturoda fusira ai tano ghedo, evetu genembo deari ambudo ghuseri. Numokena geka beká eni tefori. Aindae nu geka beká a ari beká ava, imboe use irira. Nu tofo numoá gungubo katori, a gungubo isasambu da susu mo, numori. Ava sedo, nu gungubo sarira amo, erá buneove! Amo nunda ariri. 45 Na geka bekáda bekáda seraena, avata ne gungubo kato ainda sasingu ava sedo, ne na jo tumondae eraeva. 46 Givu! Na ari eko eni, eno gosusevu? Ava kote givu! Tefo! Na geka bekáda bekáda seraena. Ava sedo, ne redae nanda geka jo tumondae eraevu? 47 God da sasingu amo, ne God da Geka ava ningiraera. Avata ne jo God da sasingu iraeri. Ava sedo, ne nanda geka jo ningae eraeva," Iesu aminge sisira. 48 Iesu aminge setiri, Jusi embo da babojegari siseri, "Namanenda mendenii, sukaru nimokena asugedo irariá simutari. A namanenda mendeni simutara amo, 'Ni namondeda gitofu Samaria embo ainda kau, ava use iresa.' Aminge simutara amo, geka beká simutari. Ni aminguse iresa." 49 Aminge setero, Iesu mino nemokena sisira, "Namokena sukaru eni jo asugaeri. Na nanda Afa kakara use irena. Avata ne nandae aji seraeva. 50 Na jo tofo nanda durodae saramana ae eraena. Avata God nu nanda duro aindae koteraira. A amboda, nu foa geka bekáda bekáda ijujedo, na sonembarira. 51 Na nemokena geka beká resena: nanda geka mave ningido amingarira amo, nu jo ambae arira." 52 Aminge setiri, Jusi embo da babojegari numokena siseri, "Orokoá geka seso ningido, namane kasama e gogoghomberera: sukaru nimokena asugedo irira, amo geka bekári. Ni setesi, 'Nanda geka mave ningido amingarira amo, nu jo ambae arira.' Aminge setesa amo, jo geka iraeri. Namondeda abua Abraham mo, nu ambududurusira. A feroveta isambu, ne sirivo useri. Aminge setesa amo, inono, ni abua Abraham darigedo genembo teria etesi. A nu fiteso vose, genembo kitako etira. Amo jo geka beká iraeri. Ava sedo, isagha se ningore! Ni erekotesa, ni mavejori? Ava se ningore!" 54 Aminge setero, Iesu mino sisira, "Na tofo nandae sakai saetena amo, nanda sakai sari beká irae aeti. Nanda Afa nandae sakai seraira amo, 'Nu nenda God,' seraeva. Avata, nu nendae jo sakai sae eraira, nu nandae sakai seraira. 55 Ne God jo kasama ae ireva. Avata na God kasama eraena. Nu kasama use, nunda Geka ningido, amingeraena. Ava sedo, nu ighagha use, 'Na nu bunariri,' saetena amo, kau gungubo da kaugo aeti. Gungubo sari amo, nenda sariri; ava sedo, na jo amingae arena. Geka beká mo: na nu kasama use, nunda geka ningido, amingeraena. 56 Na siroreno, nembua Abraham na gido, ivuga usira, ivuga ambari ava usira." 57 Aminge setiri, Jusi embo da babojegari siseri, "Abraham anakora ambududurusira. Ni jo ghaeko 50 tambae iresa. Ava ni nange Abraham gariá resesi? A ni nange resesi?" 58 Aminge setero, Iesu mino nemokena sisira, "Geka beká nemokena resena! Abraham nu jo sirorae ireira ainda gitida, na Numori," aminge setiri, 59 ne Iesu daoro ambare dae sedo, ghamana rete ruruseri. Rete rurero gido, Iesu God da Kambo+ jokáda jungedo, ira isaghada buvurutusira.

9

1 Iesu namane namonde dabade ise, genembo eni diti digoide siroredo ireira ava, gosuseri. 2 Gido, namane ategi useri, "Ijuga Kato, genembo omo, redae diti digoide sirorusi? Noi numamo da ari ekoko, ai, tofo nunda ari ekoko aindae aminge sirorusi?" aminge setero, 3 Iesu sisira, "Tefo, ainda susu mo, jo ari eko dae aeri. Nu diti digoide sirorusira da beká mo: na ururono evetu genembo God da fakina ava gaoro dae sedo, nu aminge sirorusira. 4 Iji isonga irarira amo, God na dirigetiri fusena ainda saramana ava, namonde use irá ghedo gharera. Ainda beká mo: tumba jirari dae erira ainda jokáda, mave jo saramana ari da kaugo irae arira. 5 Avata namo, na endada irena emo, na kau evetu genembo einda usasari." 6 Aminge setiri dadabetiri, Iesu endada kosiva edo aimi budo, genembo diti digoide ainda ditida davedo, 7 genembo aikena sisira, "Yasi, reighi javo Sailoam da uvu bogu aminda, dombu seghase!" aminge sisira. (Sailoam resena, ainda tuka mo namondeda gekaimi, 'Dirigari Yari' seraera.) Aminge sisira aindae, genemboá nu eredo ira, uvu bogu aminda dombu seghetiri, diti afigetiri gosuse jovereghe fusira. 8 Nunda totofo a evetu genembo mendeni mave genemboá giti bayaudae benunu sirureari gido ghusera aimi, tofo tofo se nininguseri, "Genembo diti digoide giti eminda anumbirise, bayaudae benunu sedo ghusira amo, genembo oviri, ai?" ava sise manamana use, 9 mendeni, "Ai, numori," siseri. Kotugo mendeni siseri, "Tefo, jo numo iraeri. Omo nu kau nunda kaugori, avata jo numo iraeri," aminge sero, genemboá tofo sisira, "Namori." 10 Aminge setiri, ne ategi useri, "Ni nange nangedo diti eveva etiri eregosesi?" 11 Setero, genemboá sisira, "Genembo javo Iesu, namokena fira kosiva endada edo aimi budo, nanda ditida davedo setira, 'Yasi, reighi javo Sailoam da uvu bogu aminda, dombu seghase!' setira. Aminge setiri, na eredo aena segheno ainghae dabade, diti afigetiri eregosena," aminge sisira. 12 Setiri, ne ategi useri, "Iesu nu redari?" setero, nu sisira, "Na erebunena," sisira. 13 Aminge setero dadabetiri, ne genemboá unumbe budo, Moses da Geka kaifa kakatokena iseri. 14 Iesu genembo diti digoide ava, setiri diti eveva usira amo, Jangutari da Sifo aminda usira. 15 Ava kasama edo, Moses da Geka kaifa kakato+ nunda diti nange eveva usira, ava sekago sari ningi gogogho ari dae siseri. Setero, nu sisira, "Iesu endada kosiva edo aimi budo, nanda ditida davedo setiri, na aena dombu segheteno, diti eveva etiri eregosena." 16 Aminge setiri, Moses da Geka kaifa kakato+ mendeni Iesu dae siseri, "Nu Jangutari da Sifo ainda agho dari jo kaifa ae eraira, aindae namane kasama erera, nu jo God kena ghedo furaeri," mendeni aminge siseri. Avata mendeni mo eminge siseri, "Tefo, God sonembetiri amingetira tano. Ai resira amo: genembo nusuka nunda fakinaimi jo amingae arira. Evetu genembo ari ekoko eraera amo, jo ari aminga ava ae eraera." Aminge sise, ne soroda sarigedo beisiga useri. 17 Amingedo, Moses da Geka kaifa kakato+ sekago genembo aikena siseri, "Genembo setiri, ninda diti eveva etira. Ava sedo, se ningore! Ni erekotesa, nu kau mavegori?" aminge setero, "Nu feroveta eniri!" sisira. 18 Avata Jusi embo da babojegari genembo ainda geka ava, ne jo tumondaeri. Nu giti diti digoide irise jebugusira ava, ne jo tumondaeri. Aminguse, ne setero, genembo ainda noi numamo fera buvero, 19 ategi useri, "Sevu ningore! Geka bekári: genembo emo nenda mandiri? Nu diti digoide sirorusira reseva amo, nu nange jebugedo eregosi?" 20 Aminge setero, genembo ainda noi numamo siseri, "Avori, kasama evu! Nu namanenda mandiri. A nu diti digoide ava sirorusira. 21 Avata, nu nange jebugetira, a mave setiri jebugetira, ava namane erebunera. Nu genembori. Ava sedo, yasivu ategi aovo, tofo sari ningove!" 22 Aminge sisera da beká mo: genembo ainda noi numamo ne Jusi embo da babojegari aindae oju useri. Ainda tuka mo: ne geka setero fefetusira, amo eviri: "Mave, 'God Genembo eni dirigari furare dae sisira amo, Iesu numori,' sarira amo, namane nu imboe use buregaoro, nu jo foa dengoro indari da kamboda+ terae arira," 23 Aminge sedo ghusera ava ningido, genembo ainda noi numamo oju edo eminge siseri, "Nu genembori. Ava sedo, yasivu ategi aovo, tofo sari ningove!" Aminge sisera amo, ne oju use siseri. 24 Setero aindae, Moses da Geka kaifa kakato+ sekago aghi etero, genemboá jovereghe fira buviri numokena siseri, "Jebugetesa aindae, God da javo jighaso erarira amo, avori. O genembo Iesu da javo mo, erá jigheóso ereure dae sise resera. Namane kasama erera amo, nu ari eko embori." 25 Aminge setero, genemboá eminge sisira, "Nu ari eko embo reseva, ava na erebunena. Avata na dabako evia kasama erena. Na giti diti digoide iriana ava, nune setiri jebugeteni!" 26 Aminge setiri, ne ategi useri, "Iesu nange etiri ninda diti eveva eti?" 27 Setero, genemboá sekago nemokena sisira, "Na giti setena amo, ne ningari imboe etevu. Ava sedo, na redae sekago saono ningarevu? Nembarago nunda dorevare ari erekoteva, ai?" 28 Aminge siri ningido, ne tuturo edo nundae jijivu sedo siseri, "Ni Iesu da ambo jimbi eni aresa tano. Avata nu genembo kitakori. O namane mo, Moses da ambo jimbiri. 29 A Moses nu, feroveta teria eniri. God Moses ghae geka sisera ava, namane kasama erera. Nu genembo teriari. O Iesu mo, jo rejo eni iraeri. Nu reda ghe fusira amo, namane berefori." 30 Aminge setero, genemboá dudukughedo mino nemokena sisira, "Amo redae aminge resevu? Nu setiri nanda diti eveva etira. A gido, nu God da genembo eni, ava anakora kasama aetevu. 31 Kote givu! God evetu genembo ekoko ainda benunu jo ningae eraira, ava namonde kasama erera. Avata evetu genembo nu kakara use, nunda uju ava use irera amo, nenda benunu ava, nu ningiraira. 32 Utu enda etiri sirorusira, tano aminda ghedo ojira orokoé, genembo eni jo sari, evetu genembo diti digoide sirorusera ainda diti jo eveva ae irira. 33 Ava sedo, Iesu jo God kena ghedo furae aetira amo, roera nune eraira ava, nu jo edo ghae aeti." 34 Aminge setiri, ne numokena jijivu sise minonda siseri, "Nimbarago, emboroda bu undariri. Namane jo nine dengoro indae aresa!" aminge sedo, ne genemboá ondero ira buvurutusira. 35 Genembo ondisera ava ningido, Iesu ira numo tambudo sisira, "Ni Evetu Genembo da Koro+ ava tumonderesa?" sisira. 36 Setiri, genemboá mino numokena sisira, "Bajari, Evetu Genembo da Koro+ resesa, ijugaso gido tumondaone!" 37 Aminge setiri, Iesu numokena sisira, "Nu anakora eregosesere! Evetu Genembo da Koro+ setena amo, namori." 38 Aminge setiri, genemboá sisira, "Bajari, na ni orokoá tumonderena," aminge sedo, Iesu da dombuda kauboi dadarigusira. 39 Etiri, Iesu sisira, "Na endada vose fusena da beká mo: evetu genembo diti digoide ava, saono gaoro dae a dubo kotoro dae sedo fuseni. Avata evetu genembo mave nu eveva gariá erekotira amo, nu anakora tuturo edo, nunda munju eveva a kotari eveva aindae, gogore use irira. Evetu genembo avavaga, saono diti digoi aore dae a nenda kotari dadabare dae sedo, fuseni." 40 Aminge siri ningido, Moses da Geka kaifa kakato+ mendeni aminda fetirisera aimi, numokena ategi useri, "Ni mavedae resesi? Namanendae resesa, ai?" 41 Setero, Iesu mino nemokena sisira, "Ne diti digoide iraeteva amo, ne ari ekoko da mino eni jo bae aetevu. Avata ne eminge sise irá gheraeva, 'Namane gi gogogho eraera. Namanenda kasama teriari,' aminge sise irá gheraeva. Aindae sedo, na nemokena resena: nenda ari ekoko da mino jo dadabae, irari, amboda tambareva," aminge sisira.

10

1 Iesu aminge sise, kasia eni sisira, "Na nemokena geka beká resena. Mave, sifi (sheep) da karo dari birurughusera ava viti jarigarira, o beje terarira amo, nu bagia katori. Sifi (sheep) da numamo a kaifa kato jo amingae eraera. 2 Genembo guroda teterururari garesa amo, kasama aresa, sifi kaifa kato mo, numori. 3 Guro da kaifa kato nundae sedo, guro afigari teredo beka sirurari, sifi (sheep) nunda beka ningi kasama arera. Nu nunda sifi da javo sise atimbari ne ningido, nunda amboda amboda buvudo yarera. 5 O genembo eninda beka ningarera amo, jo nunda amboda yae arera. Genembo eninda beka ningarera amo, ne oju sumbarera, ne nunda beka bunari ava sedo," Iesu aminge sisira. 6 Iesu nu aminge setiri niningusera avata, kasia ainda tuka mo, ne bunariri. 7 Kasia da tuka bunisera aindae, Iesu tuturo edo sekago sisira, "Na nemokena geka beká ava resena. Namo inono, sifi da karo dari birurughusera ainda gurori. 8 Evetu genembo nanda gitida fusera, ne kau, bagia kakato da kaugori. Aindae sedo, sifi nenda beka jo ningae edo ghuseri. 9 O namo, gurori. Mave namokena terarira amo, nu jebuga evovodae irari ava tuve barira. Nu tere ya foa ghuse, bayau inononda tambarira. 10 Bagia kakato setena amo, ne bagia ari, sifi daoro ambare dae sedo, a de bejari dae sedo foa gheraera. O namo, jebuga mutono dubo jama use, irovo dae sedo fuseni. 11 "Tuka eni seteni. Kotugo eni mo eviri: sifi kaifa kato eveva setena amo, namori. Sonembari da emboro eni jo tambae arira amo, sifi kaifa kato eveva amo, nunda sifi sonembari dae sedo ambarira. 12 O genembo eni tefo moni bari dae sedo, sifi kaifa eraira amo, nu jo amingo iraeri. Sifi mo, jo nunda tofo iraeri. Ava sedo, sino gambari kato fururari garira amo, nu sifi do sumbarira. Sufuse doyari, sinoá foama sifi mendeni gambu rirurari, mendeni oju edo nunda nunda sumbarera. 13 Genemboá nu tefo moni bari dae sedo saramana eraira, a sifi nu jo dubo bae eraira; ava sedo, nu sifi dodo sumbarira. 14 Sifi kaifa kato eveva setena amo, namori. Kau namane Afaghae tofo tofo kasama eraera aminga ava, nanda sifi namane tofo tofo kasama eraera. A na, nemo sonembari dae sedo ambarena. 16 Nanda sifi mendeni, karo setena ainda jokáda irera. Kotugo, mendeni mo, karo eninda irera. Kotugo, mendeni karo eninda irera amo, ne foa dabade tataeteri. Ava sedo, na ya sifi (sheep) karo eninda irera ava bu furono, mendeni karo einda jokáda irera ainde dabade tatedo, nanda beka nininguroro, nane tavo ururono irarera. 17 "Nanda jebuga nu sekago barena, avata nanda mendeni sonembari dae sise, nanda jebuga dodo ambari dae erena. Nanda Afa aindae sedo na dubo buraira. 18 Na, nanda jebuga tofo mutarena. Na jo 'avori' sae aetena amo, mave enii jo nanda jebuga bari ambae aeteni. Nanda jebuga, nane tofo mutarena. Kotugo, nanda jebuga daba ava, tofo bu erarena. Ainda fakina ava, nanda Afa nanda ungoda fifitusira." 19 Iesu aminge sisira aindae, Jusi embo da babojegari sekago sarigedo beisiga useri. 20 Beisiga use, mendeni eminge siseri, "Sukarui numokena asugetiri daghusira. Nunda geka erá ningeove!" siseri. 21 Avata mendeni eminge siseri, "Tefo, genembo mavekena sukarui asugarira amo, jo geka evavago sae arira. A sukaruimi jo sari evetu genembo da diti eveva ae arira," aminge siseri. 22 Israel embo nenda gitofu ava de ondido, God da Kambo+ gitofui bebeta usera ava seghedo, ainda amboda sifo fitido, sekago Kambo aminda tuturo edo God tumonde bainghedo ghuseri. Ainda kiki ava kotise, ghaeko ava inono kirumo edo ghuseri. Ainda kirumo da sifo fira buvurutusira. Amo, baimara da sifo aminda edo ghuseri. 23 Kirumo da sifo buviri, vasa eni Kini (King) Solomon tefo yaura bari dae sedo God da Kambo+ dendeguda itutusira aminda, Jusi embo da babojegari Iesu kena fera totoruguseri. Nu aminda deinghiri, ne totorugedo numokena siseri, "Erá kivo eose! Isagha se, ningore! God Genembo eni dirigari furare dae sisira amo, nimori, ai?" 25 Aminge setero, Iesu nemokena sisira, "Na nemokena anakora siseni. Avata ne nanda geka jo tumondae ireva. Tano a ari mendeni nanda Afa da javoda eono gido dudukugheraeva aimi, nanda geka sonemberaira. 26 Avata ne jo nanda sifi (sheep) iraeri. Ava sedo, na jo tumondae eraeva. 27 O nanda sifi mo, ne nanda geka ningiraera. A ne, na kasama eraena. A kotugo, ne nanda amboda amboda foa gheraera. 28 Na nemokena jebuga evovodae irari mutarena aimi, ne jo ambae arera. Kotugo, nanda sifi mave enii, jo foa nanda ungoda saghimbe bae arira. 29 Ai resira amo: nanda Afa sifiá namokena futusira. A nunda fakina mindafu bekári. Jo maveda fakina amingo iraeri. Ava sedo, nanda sifi mave enii, jo foa Afa da ungoda saghimbe bae arira. 30 Namane Afaghae mo, tatedo dabako edo irera." 31 Iesu nu aminge siri ningido, Jusi embo da babojegari, sekago numoá ghamanai daoro ambare dae sise, ghamana retiseri. 32 Amingero, Iesu nemokena ategi usira, "God Afa seari, na tano eveva a ari eveva eono giraeva. Ari rejo ava usena aindae kotise, na daovo ambono dae resevu?" 33 Aminge setiri, Jusi embo da babojegari mino numokena siseri, "Tano a ari evevago eraesa aindae, ni jo daoro ambae aresa. Avata ni geka seso God da javo eko erira aindae sedo, ni daoro ambaresa. Ni taká genembo bekári. Avata ni aminge sise, ni inono God da kaugo use, God da javo eso eko erira," aminge siseri. 34 Setero, Iesu mino nemokena sisira, "Agho Dari God nemokena futusira ainda jokáda, God nu tofo evetu genembodae sisira: 'Na nemokena resena, "Ne totofo nemo goderi," ' aminge sisira. 35 Avori, namonde kasama erera: God da Geka nu evovodae irarira. Ava sedo, evetu genembokena God Afa Geka futusira aindae mo, 'Ne totofo nemoá goderi,' sisira amo, geka bekári. 36 Kotugo namo, God tofo nune gategedo na dirigetiri vose fuseni. Ava sedo, 'Na God da Mandiri,' sarena amo, erá buneove! Na aminge sirurono, God da javo jo eko ae arira. 37 A eni mo: na God da saramana jo ae aetena amo, ne na jo tumondae aetevu. 38 Avata nunda saramana eraena amo, nanda ari ava gido, na tumondaetevu. Nanda geka avanembo ningido, ne na jo tumondae areva, avata nanda ari ava gido, na tumondaetevu. Kotugo, na rea eraena, ava gosuse ne kasama e gogoghombaetevu: geka bekári, namane Afaghae tatedo nangae dabako edo irera," Iesu aminge sisira. 39 Setiri ningido, nu sekago sandi koto ari dae kotiseri. Avata nu ne kakagedo isira. 40 Amingedo, Iesu ira uvu javo Jordan sembudo, reighi John giti bafataito edo ghusira, aminda irei. 41 Nu aminda iriri, evetu genembo digari numokena iseri. Era, Iesu nemonde dabade irise, ne eminge sedo ghuseri, "John nu tano a ari mendeni jo ari gido dudukughae edo ghuseri. Avata, nu rea Iesu dae sisira amo, isagha etiri eregoserere. Amo geka bekári," 42 Aminge sise, evetu genembo digari aminda, Iesu tumonduseri.

11

1 Bethany embo genembo javo Lazarus, kae budo fasirei. Bethany resena emo, ade jamena etoto naká, Mary nunda aki Martha ghae da reighiri. 2 (Gagara Mary ira usu da mukai, Bajari da atada averegedo, nunda beoimi ghajisira, amo numori. Lazarus kae budo fasireira amo, Mary da mandakori.) 3 Kae biri gido, nunda ghaghasovu Iesu furare dae sedo aghi futuse siseri, "Yasi, Bajarikena eminge sase, 'Bajari, ninda komana dubo buraesa amo, nu kae budo fasirira,' " ne aminge sedo, nu diriguseri. 4 Setero ira aminge setiri ningido, Iesu sisira, "Lazarus kae budo fasirira amo, jo ambari dadabae arira. Ainda beká mo: evetu genembo God dae sakai saoro dae sedo, nu kae emo rurusira. Rea sirorarira ava gido aindae, God da Mandi dae sakai sarera," aminge sisira. 5 Iesu nu, Mary nengae Martha ghae, a Lazarus de dabade, dubo budo ghusira. 6 Avata, Lazarus nu kae rurusira ainda bino ava firi ningido, Iesu vasa daba aminda iriri, sifo etoto naká dadabusira. 7 Dadabetiri gido, namanekena sisira, "Fuvu namonde eredo, Frovensi Judia aminda jovereghe yaore!" 8 Setiri, namane bureguse siseri, "Ijuga Kato, sife nembo Jusi embo da babojegari, ni ghamanai dari dae siseri. Ni erama aminda yeóso dae resera!" 9 Aminge setero, nu namanekena sisira, "Sifo evia inono usasa janimberaira. Ava sedo, genembo deinghari sarira amo, usasa janimbururari evevada deingharira. Ainda beká mo: iji janimbururari, nunda emboro gi gogoghombuse deingharira. 10 Avata tumbaghae deinghari sarira amo, atada dimbu fugari durari dae arira. Resena einda beká mo: genembo aikena usasa tefori." 11 Iesu aminge sise ainda jokáda, Lazarus da geka setiri buvurutusira, "Namondeda komana Lazarus diti bainghetiri fase ravira. Namonde ya derono erarira," aminge sisira. 12 Setiri, namane siseri, "Bajari, amo evevari. Eveva avarira amo, nunda tamo aragharira," aminge siseri. 13 Avata Bajari nu kasia setiri, namane nu beká sariá kotiseri. Iesu nu ambari dae mo, avariá sisira. O geka bekári: Lazarus mo nu ambududurusira. 14 Namane bunero gido, Iesu namanekena isagha sisira, "Lazarus ambududu- rumuta. 15 Avata namonde eminda irero, nu ambududurumutara aindae, na ivuga erena. Ainda beká mo: ne nanda fakina ava gido tumondareva. Fuvu, namonde numokena yaore!" 16 Aminge setiri, namanenda genembo eni, Thomas (o Didymus sedo ghusera) aimi eredo namanekena sisira, "Fuvu, namonde ijuga kato einde dabade yaoro, daoro ambore!" aminge sisira. 17 Lazarus furugetero, sifo avononde naká dadabetiri, Iesu ira ava kasama usira. 18 Reighi Bethany ghedo, Jerusalem jo soka iraeri. Amo, ututu etodaba (3 kilometres) aminga yariri. 19 Lazarus ambududurusira aindae, Jusi embo digari, nange Mary nengae Martha ghae kena dubo jama mutaetera ava kotise, nemokena iseri. 20 Iesu fira utuako iri, ainda bino ava ningido, Martha nu ere Iesu tambari dae isira. Avata Mary nu kamboda fefetusira. 21 Martha nu ira, Iesu tambudo numokena sisira, "Ni eminda iraetesa amo, nanda mandako jo ambae aeti. 22 Avata na kasama erena: ni God Afakena rejodae benunu saresa amo, mutarira." 23 Aminge setiri, Iesu numokena sisira, "Ninda mandako ambarida ghe jebugedo erarira." 24 Aminge setiri, nu sisira, "Nu sifo gombuda jebuge erarira ava, na kasama erena." 25 Aminge setiri, Iesu sisira, "Ambarida ghe erari da fakina, a jebuga da fakina amo, nanda tofori. Mave na tumondarira amo, nu jebuga tuve barira. Mave na tumonduse enda eminda ambarira amo, nu sekago ambarida ghe jebugedo erarira. 26 Mave na tumondarira amo, nu jebuga evovodae irari ava tuve barira. Amo tumonderesa, ai?" 27 Aminge setiri, Martha sisira, "Ai, Bajari, na tumonderena. Ni God da Mandiri. A God Genembo eni mutari endada vose furariá seraera amo, nimori, ava na tumonderena," aminge sisira. 28 Setero dadabetiri ainda amboda, Martha jovereghe ira buvudo aghi etiri, nunda gagarako Mary fira buviri, ufena numokena sisira, "Ijuga kato ojighira; ni numokena yaso dae resira," 29 Aminge setiri ningido, Mary nu eredo sumbudo ira, 30 Iesu reighi jokáda jo terae iriri, nu tafusira. Martha Iesu vasa reda tafusira daba aminda, Mary ira nu tafusira. 31 Kotugo, Mary nu eredo kambo dodo sufiri gido, Jusi embo mendeni sonembedo sorara ari dae sedo fusera aimi, eredo nunda amboda iseri. Nu ya ofofo gomo gosuse, sorara ari dae ariá kotiseri. 32 Mary Iesu kena ira buvudo, nunda ata duruda du fasedo sisira, "Bajari, ni eminda iraetesa amo, nanda mandako jo ambae aeti." 33 Aminge sedo, tuturo edo sorara usira. A Jusi embo mendeni Mary da amboda fusera, nembarago sorara useri. Amingero gido, Iesu nu dubo mema teria beká ava usira. 34 Edo ategi usira, "Lazarus mo, reda furugusevu?" aminge setiri, ne siseri, "Bajari, fu gase!" 35 Aminge setero, Iesu nu tuturo edo sorara usira. 36 Amingiri gido, Jusi embo tofo tofo se nininguseri, "Lazarus ava dubo bu gogoghombusira, ava eregosera," aminge se nininguseri. 37 Avata mendeni ne siseri, "Nu setiri genembo diti digoide amo jebugusira. Ava sedo, nu eminda iraetira amo, nu sonembururari Lazarus jo ambae aeti." 38 Iesu sekago dubo mema teria beká ava etiri, ofofoda isira. Ofofo resena emo, bekuri. Ghamana teriai gagojuseri. 39 Aminda buvudo, Iesu kovionoghae sisira, "Ghamana mimevu esike yare!" setiri, ambari embo ainda aki Martha, nu eminge sisira, "Bajari, namane Lazarus furugetero, oroko sifo avononde naká dadabetira. A gido, nu masa erira." 40 Aminge setiri, Iesu numokena sisira, "Na seteni: ni tumondaresa amo, ni God da duro a fakina garesa." 41 Aminge setiri, ghamana mimetero esike isira. Etiri, Iesu nu dombu fainghedo sisira, "Afa, nanda benunu ningiraesa, aindae na aiyakoe resena. 42 Ni nanda geka sifo ghousa evia ningiraesa, ava na kasama erena. Avata evetu genembo eminda totorugetera, ne kau daba ava kasama aoro dae sise resena. Ni na dirigeteso fusena, ava kasama aoro dae sise, aindae benunu resena." 43 Aminge sedo, sekago beka mindafu kori sisira, "Lazarus, fu buvase!" 44 Setiri, Lazarus ambarida ghe jebuge ere fira buvurutusira. Nunda ungo ata, embo yokurai doghuseri. A dombu barago, emboi gagojuseri. Aindae sedo, Iesu sisira, "Yasivu, nunda yokura tamonda o vujovo deinghare!" sisira. 45 Iesu setiri Lazarus nu ambarida ghe jebuge erorusira. Ava gido, Jusi embo Mary sonembedo, sorara ari dae sedo fusera amo, digarigo ne Iesu tumonduseri. 46 Avata nenda mendeni jovereghe era, Moses da Geka kaifa kakatokena+ buvudo, Iesu rea etiri sirorusira ava, osa setero ne nininguseri. 47 Binoá ningido, Moses da Geka kaifa kakato+, a fristi+ da kokotofu kaniseremanede dabade, totorugedo geka se nininguse siseri, "Iesu tano a ari mendeni mendeni eari gido, natofo dudukugheraera, aindae namonde nangareri? 48 Eveva mo: namonde nu buregaeteri. Ainda beká mo: nu aminguse irarira amo, evetu genembo tomanako isambu numoá tumonduse, nunda amboda amboda iruroro gido, Rome embo ne janje ekoko edo, God da Kambo+ de bejedo, namondeda natofo soesa daoro sirivo arera," aminge nesuka se nininguseri. 49 Se niningero, genembo eni javo Caiaphas, aminda irei. Sifo aminda, ghaeko ainda jokáda, fristi+ da giti jighari, nune edo ghusira. Aimi eredo sisira, "Ne bunise reseva. 50 Namonde Jusi embo isambu dabade ambarera amo, eko bekári. Ava sedo, namonde genembo dabako daoro ambari, natofo tomanako isambu jebuga irarera amo, evevari. (Emo, na genembo Iesu dae resena.)" Caiaphas nu aminge sisira. 51 Avata nu jo nunda kotariimi saeri. Nu ghaeko aminda, fristi+ da giti jijighuse iriri gido, God setiri, nu kau feroveta da kaugo edo, geka aminge siri nininguseri. Iesu nange Jusi embo isambu aindae ambarira, ava osa setiri nininguseri. 52 Kotugo, nu jo Jusi embo nesuka nendae sedo, ambae arira. Numo, evetu genembo mendeni God tumonduse nunda sasingu edo irarera ava, bu tatari dabako aoro dae sedo, nu ambarira. Ava ari sirorare dae sise, God setiri Caiaphas Iesu da ambari aindae, osa setiri ne nininguseri. 53 Sifo aminda, Jusi embo da babojegari ne tuturo edo, Iesu daoro ambare dae sedo manaka garudo fuseri. 54 Aindae sedo, Iesu Frovensi Judia aminda, jo isaghada ya foa ghae edo ghusira, nu ufena ya foa ghedo ghusira. Nu ira vasa tomanako evetu genembo a uvu irae da vasa ainda tinguda, reighi javo Efream aminda, nu namonde dabade iriari. 55 Jusi embo da kirumo eni, Jarige Yari da Kirumo+ seraera, ainda sifo fira utuako usira. A gido, evetu genembo digari, nenda dubo joká ava, esimbugari dae sedo, nenda reighi reighi aminda ghedo Jerusalem iseri. 56 Natofo era, God da Kambo+ aminda totoruguse, Iesu tava use, tofo tofo se nininguseri, "Avose, sevu ningore! Genembo amo jo furae arira, ai?" siseri. 57 Aminge sisera da beká mo eviri: Iesu sandi koto ari dae sedo, Moses da Geka kaifa kakato+, a fristi+ da kokotofu eminge sedo ghuseri, "Iesu reda irira ava, genembo mave kasama arira aimi, foa sari ningore!" aminge sedo ghuseri.

12

1 Jarige Yari da Kirumo+ jo foa buvae iriri, sifo 6 ava fefetusira. Sifo aminda, Iesu eredo, Lazarus da reighi javo Bethany, aminda isira. Lazarus resena emo, Iesu setiri ambarida ghe jebuge erorusira, aindae resena. 2 Iesu ira buviri, nundae gumema useri. Lazarus nu Iesu ghae dabade anumbirero, Martha nu bayau iti futusira. 3 Amingero, Mary nu tamo davari da usu, botoro eni irisira ava, bu fusira. Usu resena, einda javo 'nard' seraera, ainda mino mo, tomanako bekári. Ava Mary budo fira, Iesu kena buvudo, nunda atada averegetiri dadabetiri, nunda beoimi ghajisira. Etiri, ainda munoimi ivegedo ira, kambo bedo iri fufuseri. 4 Etiri fufuse, namanenda eni, Iesu da ambo jimbi, javo Judas, eredo sisira, "Usu amo budo oriro edo, moni+ K3,000 aminga ava budo makasi embokena ghasaetera amo, avori. O orokoé, nange edo soesa averegetiri, na dubo mema ereni!" Judas resena emo, nu Keriot embori. Nune amboda Iesu ava budo, nunda gitofu da ungoda fifitusira. 6 Kotugo, moni budo makasi embokena ghasari da geka sisira amo, nu jo makasi embo sonembari dae kotise saeri. Nu bagia katori. A nune namanenda moni kaifa use, mendeni bagia edo ghusira. 7 Judas aminge setiri ningido, Iesu sisira, "Dovu! Usu mendeni fetetira ava, evetu aikena irari, amboda namo furugari dae sedo, bu davore! 8 Makasi embo ne sifo ghousa, nemonde dabade irá gheraeva. Ava sedo, nemo sonembari sareva amo, sonembuse irá ghareva. O namo, jo namonde sifo ghousa irae arera," aminge sisira. 9 Iesu nu reighi Bethany aminda iriri ava ningido, Jusi embo digari totorugedo Iesu tambari dae sedo iseri. Kotugo, jo Iesu vanembo gari dae sedo yaeri. Ne, Lazarus ambarida ghe jebuge erorusira, ainghae dabade gari dae sedo iseri. 10 Ágido, fristi+ da kokotofu, Lazarus barago daoro ambare dae kotiseri. 11 Ainda beká mo: nu ambarida ghe jebuge erorusira aindae, Jusi embo da natofo mokogo mo, nenda babojegari ighagha use, ne Iesu ava tumonduseri. 12 Sifo atetiri, evetu genembo Jarige Yari da Kirumo+ dae totorugusera amo, Iesu Jerusalem furari dae iri, ainda bino ava sero nininguseri. 13 Sero ningido, igi kau usu da ugiro avavagava gafe budo, Iesu tambari dae iseri. Aminda ise, nati joká dorudo iseri. Aminguse, beka teria sise siseri, "Orokaiva, orokaiva! Bajari dae sakai saore! Genembo emo Bajari da javoda refira aindae, sakai saore! Namonde Israel embo da kini (king) emo, God nu esimbugare! Orokaiva, orokaiva!" aminge sido iseri. 14 Iesu nu sino fuka javo donki (donkey) seraera ava tambudo, ainda gukada viti anumbetiri iseri. God da Geka rea resira, ava udo isira. Amo eviri: 15 "Enda jiro fumbari Saion+ embo, erá oju eove! Nenda kini (king), donki (donkey) seka ainda etoda anumbetiri, budo refira amo, oviri," God da Geka aminge resira. 16 Sifo aminda, namane God da Geka amo kotae useri. Avata Iesu nu utuda vitira, nunda usasa sekago rurusira ainda amboda, namane God da Geka amo kotiseri. Iesu amingarira aindae, ferovetaimi rea gefusera ava, namane kotiseri. A kotugo, namane nange nundae nati joká dorero, geka ferovetaimi gembero irira ava, beká usira, ábarago namane kotiseri. 17 Natofo tomanako Iesu unumbe budo era Jerusalem teterusera, ainda beká mo eviri: evetu genembo mendeni totorugedo irero, Iesu setiri Lazarus ambarida ghe jebuge eretiri ava gosuseri. Evetu genembo aimi, sifo aminda Iesu da bino ava osa siseri. 18 Iesu tano mindafu eni ava, Lazarus kena ari sirorari natofo gaoro dae sedo, etiri jebugusira. Ainda bino sisera aindae sedo, evetu genembo digari totorugedo, Jerusalem ghedo buvudo, Iesu tambari dae sedo fuseri. 19 Natofo amingero gido, Moses da Geka kaifa kakato+ tofo tofo se nininguseri, "Namonde rojeteri! Evetu genembo isasambu, nunda amboda semberi," aminge siseri. 20 Kirumo da sifo aminda, evetu genembo Jerusalem aminda, tumonde bainghari dae sedo totorugusera ainda jokáda, Greek embo mendeni fuseri. 21 Ne geka sari dae sedo, namanenda eni javo Philip kena fuseri. (Philip resena emo, nu Frovensi Galilee embori. Nunda reighi javo Betsaida ri.) Numokena fera buvudo siseri, "Kotofuko, namane Iesu gari dae uju erera." 22 Aminge setero ningido, Philip nu eredo, Andrew kena ira binoá setiri Andrew ningido, nengae Iesu kena iseri. 23 Era buvu setero ningido, Iesu sisira, "Sifo ojira buvira! Oroko God usasa tomanako, Evetu Genembo da Korokena+ mutari barira. 24 Na nemokena geka beká resena: farava vuji dabako esike irarira amo, nu taká dabako irarira. O, bu ya govarera amo, nunda gari a nunda kau amo dadabarira. Dadabarira avata, nunda fakinaimi, batuno edo vitido beká digarigo jigharira. 25 Kau daba aminga ava, mave enda eminda nunda uju ava use, nunda jebuga aindae kotise irarira amo, nu ambarira. O mave enda eminda nunda jebuga jo kotae edo, God da uju ava use irarira amo, nu jebuga evovodae irari ava tuve barira. 26 Na reda irarena amo, nanda saramana kakato vasa daba aminda irarera. Ava sedo, mave na sonembari sarira amo, nu nanda amboda amboda arira. A kotugo mave, na sonembarira amo, God Afa nu, genembo ainda javo jighari erarira." 27 "Oroko na dubo mema eretafena. Aindae na rejoá sareni? Saono, Afa sonembari na memaé darigaeteni, ai? Tefo, na jo aminge sae arena. Ainda beká mo: na memaé itatamari dae sedo fuseni. 28 Arie, Afa! Tofo ninda uju ava use, ninda javo jighaso erare!" aminge setiri, beka utuda ghe sisira, "Nanda javo jigheno eretira, kotugo, sekago jighono erarira." 29 Aminge setiri dadabetiri, mendeni ne sembae kotise siseri, "Barara fugetira." siseri. A mendeni mo, ne siseri, "Amo, aneya numokena siri ningeri." 30 Aminge sero ningido, Iesu nemokena sisira, "Beka rea setira amo, jo nane ningono dae saeri. Amo nene ningi kotovo dae setira. 31 Evetu genembo da ari ekoko ijujari da sifo ojira buvira. Oroko, Satan nu enda da bajari edo irira. Avata na nunda fakina ava daono bejarira. 32 Na arafa de jighoro erarena amo, na evetu genembo isambu baono namokena furarera." 33 Aminge sise, nu kau nange ambarira, ava sisira. 34 Setiri, natofo numokena siseri, "Namondeda Agho Dari ijugerira amo, God Genembo eni dirigari furare dae sisira amo, nu evovodae irarira. Avori, Evetu Genembo da Koro+ arafa darera resesa amo, ni mavedae resesi? Nu mavejori?" 35 Aminge setero, Iesu mino nemokena sisira, "Usasa sifo tufako nemokena irarira. Usasa janimbuse irarira amo, ainda jokáda deinghevu! Erama doyeóvo tumba nemokena fureure! Ainda beká mo: mave nu tumba jokáda deingharira amo, nu emboro kosasagharira. 36 Ava sedo, usasa jo darigae irari, ne sifo tufako aminda usasa amo tumondevu! Amingareva, ne usasa ainda natofo areva," Iesu aminge sisira. Iesu aminge setiri dadabetiri, nu eredo ira jungutusira, erá natofo numoá tambeore dae sedo. 37 Nu tano a ari teria nenda dombuda eari gido ghusera avata, ne nu jo tumondae useri. 38 Amingero, God da feroveta Isaiah rea sisira ava, beká sirorusira. Amo eviri: "Bajari, ninda fakina tomanako ava, ijugeteso ne gosuseri. A ninda bino, namane setero ne nininguseri. Avata, namanenda geka ne jo tumondae useri," Isaiah aminge gefusira. 39 Aindae sedo, ne tumondarikena jo inono ae useri. Ainda susu barago, Isaiah God da Geka ainda jokáda gefusira amo, eviri: 40 "Erama ditiimi geore dae sise, a jiro munjuimi koteore dae sise, God setiri ne diti digoi usira a kotari dadabusira. God eminge resira: 'Erama ditiimi gosuse, dubo joveregheóro seóno jebugeore dae sise, aminguseni,' aminge resira." 41 Isaiah aminge sisira da beká mo: Iesu nu jo endada vose furae iriri, Isaiah nu gosusira. Nu, Iesu duro a usasa, utu aminda ireira ava gido, aindae gefusira. 42 Avata sifo aminda, Jusi embo da babojegari mendeni, ne Iesu tumonduse iriari. Avata kotugo, ne evetu genembo da kotari aindae, oju edo ghuseri. O God da kotari aindae, ne itako oju edo ghuseri. Aminguse, ne Iesu tumondusera ava, kivo edo ghuseri. Ne Moses da Geka kaifa kakatodae+ oju use, kivo edo ghuseri. Ainda beká mo: Moses da Geka kaifa kakato+ eminge sedo ghuseri, "Mave Iesu tumondarira amo, namonde nu imboe use buregaoro, nu jo foa dengoro indari da kamboda+ terae arira," ne aminge sedo ghuseri. 44 Ainda amboda, Iesu beka mindafu sisira, "Mave na tumondarira amo, nu jo nasuka namoá tumondae arira. Nu, God Afa na dirigetiri fusena, ábarago tumondarira. 45 Kau daba aminga ava, mave nanda dombu garira amo, God na dirigetiri fusena, ainda dombu barago garira. 46 Na kau usasa aminga edo endada vose fusena ainda beká mo eviri: mave na tumondarira amo, nu jo tumbada irae arira. 47 "Mave nanda geka ningido, ava jo ae arira amo, nunda ari ekoko ava God amboda ijujarira. Jo nane, nunda ari ekokoá ijujae arena. Na evetu genembo sonembaono, jebugaoro dae sedo fuseni. Jo nenda ari ekoko ijujari dae sedo furaeri. 48 Avata mave na ighagha use, nanda geka jo tumondae arira amo, nunda ijujari kato irira. Sifo gombuda, na geka rea sedo ghusena aimi, genembo ainda ari ekoko ijujarira. 49 Ainda beká mo: na rejo eni nanda javoda jo saeri. Na rejo saetena amo, God Afa na dirigetiri fusena aimi ijugetiri kasama useni. Na nunda geka avanembo seraena. 50 Kotugo na kasama erena: nunda geka saono dae sisira amo, jebuga evovodae irari da susuri. Ava sedo, na rea seraena amo, Afa aminge saono dae sisira ava seraena.

13

1 Jarige Yari da Kirumo+ jo foa buvae iriri, sifo dabako dombuda fefetusira. Fetetiri, Iesu nu kasama usira amo, nunda sifo fira buvurutusira. Sifo resena emo, nu endada ghe jovereghe Numamokena yarira da sifori. Kotugo, evetu genembo mave enda eminda irise, nunda natofo usera ava, nu evovodae dubo budo ghusira. Ne jo doyae irise, nu ne dubo ruruse ambududurusira. Ainda geka ava oroko sari dae erena. 2 Sifo aminda ungobu iri, Iesu namonde dabade bayau mindari dae sedo anumbuseri. Anumbusera amo, Satan nu anakora nunda kotari eko ava, Keriot embo Simon da mandi javo Judas, aikena fitiri vovosusira. Kotari eko amo eviri: Iesu ava, nune aito are dae Satan sisira. 3 Avori, God Afa roera a fakina isambu Iesu da ungoda fifitusira ava, Iesu kasama usira. A nu God kena ghe fusira, kotugo sekago God kena jovereghe yarira amo, nu kasama usira. 4 Ava kasama use, Iesu nu namonde anumbirisera ava eredo, nunda embo koburu ava kosughe fitiri fasetiri, tamo ghajari bu ifuda avido, 5 uvu rooróda averegedo, tuturo edo namanenda ata seghuse, tamo ghajari aimi ghajido ira birurughusira. 6 Nu seghudo fira, Simon (Peter) kena buvurutiri gido, Peter numokena sisira, "Bajari, nine nanda ata seghari dae eresa, ai?" 7 Aminge setiri, Iesu numokena sisira, "Na rea erena ava, ni oroko erebunesa. Avata einda beká mo, amboda kasama aresa," aminge setiri, 8 Peter sekago sisira, "Tefo, jo itako doyono nanda ata seghae aresa!" aminge sisira. Setiri, Iesu mino sisira, "Na ninda ata jo seghae arena amo, ni jo nanda ambo jimbi irae aresa." 9 Aminge setiri ningido, Peter sisira, "Arie, Bajari! Aminge saresa amota, erá nanda ata vanembo segheose! Nanda ungo gifua isambu seghe!" 10 Aminge setiri, Iesu sisira, "Mave nu uvu anakora gutetira amo, nunda tamo evevari. Ava sedo, nu jo sekago tamo isambu gutae arira. Nu ata vanembo segharira amo, inono beká ava arira. Mendeni ne avori, avata nenda genembo dabako jo avori iraeri." 11 Iesu aminge sisira da beká mo: mave nu aito arira, ava nu kasama usira. Aindae, geka eminge sisira, "Mendeni ne avori, avata nenda genembo dabako jo avori iraeri." 12 Namanenda ata seghetiri dadabetiri, Iesu nunda embo koburuá sekago asugedo jovereghe ira, vasa daba aminda anumbusira. Anumbedo ategi usira, "Na rea etena amo, ne kasama ereva, ai? 13 Ne javono namoá gatise, 'Bajari' o 'Ijuga Kato' seraeva. A nu beká seraeva. 14 Na nenda Bajari a, nenda Ijuga Katori. Avata kotugo, nane nenda ata segheteni. Ava sedo, ne tofo tofo sabua+ edo, kokomana da ata seghedo ghaetevu. 15 Na amingetena ainda beká mo: na ijugaboro aono gido, etena avavaga aovo dae sedo, eteni. 16 Na nemokena geka beká resena. 'Sabua'+ seraera, a 'babojegari' seraera ainda tuka mo: sabua+ mo, ne gegenembo veveyakori, a babojegari, ne gegenembo babairi. Kau daba aminga ava, genembo mave aghi muturaira amo, nu teriari. O genembo aghi eraira amo, nu kitakori. Ne nanda sabua+ a nanda aghi kakatori. Ava sedo, na sabua+ edo, ne sonembarena amo, nembarago sabua+ edo, tofo tofo sonembuse irareva. 17 Avori, geka oroko setena ainda beká mo, ne kasama ereva. Eminguse irareva amo, ne ivuga use irareva. 18 "Na eminge resena emo, jo ne isambudae saeri. Evetu genembo nane gategusena amo, na kasama erena. Avata oroko rea sirorari dae erira emo, God da Geka irira ava, beká isagha are dae sedo sirorarira. Geka amo eviri: 'Genembo eni, namonde dabade bayau rise anumbirisera, aimi eredo na imboe usira,' God da Geka aminge sisira. 19 Geka einda beká jo sirorae irira. Avata, giti nemokena resena ainda susu mo: beká amboda sirorari gido, 'na Numori' ava tumondareva. 20 Na nemokena geka beká resena. Genembo eni dirigaono furarira ava, mave nati joká doruse, bu tavo arira amo, nu inono, namoá nati joká doruse, bu tavo arira. Kotugo, mave nandae nati joká doruse, bu tavo arira amo, nu inono, God Afa namo dirigetiri fusena ava, nati joká doruse, bu tavo arira," Iesu aminge sisira. 21 Ainda amboda, Iesu nu dubo mema mindafugo tafuse, eminge isagha sisira, "Na nemokena geka beká sari dae erena. Namonde anumbirera einda jokáda, genembo eniimi, namoá gitofukena aito arira." 22 Aminge setiri, nu mavedae sisira ava, namane bunise tofo tofo gosuseri. 23 Iesu nu namanenda eni dubo budo ghusira. Genemboá nu Iesu da dengesida anumbusira. 24 Ágido, Simon Peter nu ungoi farighedo, genembo aikena sisira, "Ategi e ningi! Nu mavedae resi?" 25 Aminge setiri, genemboá gisigisighedo ira, Iesu utua edo ategi usira, "Emo, mavedae resesi?" 26 Aminge setiri, Iesu sisira, "Na mavekena farava evia sukada fati mutarena amo, genemboá numori," aminge sedo, nu farava ava budo sukada fatido, Keriot embo Simon da mandi javo Judas kena futusira. 27 Mutiri biri, Satan fira, Judas da janje jokáda teterusira. Etiri, Iesu Judas kena sisira, "Ni rea ari dae erekotesa ava, totoi e!" 28 Iesu aminge sisira da beká ava, namane mave aminda irisera amo, jo kasama aeri. 29 Judas nu namanenda moni fendi bu deinghari da javo ava, nune kaifa edo ghusira. Ava sedo, namanenda mendeni kotisera amo: Judas nu namanenda moni budo, kirumo da bayau mendeni ofuse, o mendeni makasi embokena ghasare dae, Iesu sariá kotiseri. 30 Judas nu farava bu eredo, kamboda ghe bibitai ira buvurutusira. Buvurutusira amo, tumba jisira. 31 Judas ira buvurutusira ainda amboda, Iesu sisira, "Evetu Genembo da Koro+ da duro, oroko isagha etira. A nu oroko rea ururari aimi, God da duro barago isagha arira. 32 Na amingururono, natofo God da duro garera amo, God barago tofo ururari nanda duro isagha ari, evetu genembo garera. Orokoá erirere! 33 Nanda sasingu, namo, jo namonde dabade sifo ghousa irae arera. Na giti rea Jusi embo da babojegarikena sisena ava, kau daba ava oroko nemokena resena, 'Na reda yarena aminda, jo nene yari da kaugo mo iraeri.' 34 Avori, na nemokena agho dari seka erefutena. Ne tofo tofo dubo buvu! Na ne dubo buraena, kau daba aminga ava, ne tofo tofo dubo bareva! 35 Ne aminge dubo ruruse irareva amo, evetu genembo isambu kasama arera, ne nanda ambo jimbiri," aminge sisira. 36 Iesu aminge setiri, Simon Peter nu sisira, "Bajari, ni reda yari dae use resesi?" Setiri, Iesu numokena sisira, "Na reda yari dae erena aminda, ni jo oroko nembo nanda amboda yae aresa. Avata, sifo amboda, ni nanda amboda yaresa." 37 Aminge setiri, Peter ategi usira, "Bajari, oroko nangetirai, na ninda amboda jo yae aono dae resesi? Na nimo sonembuse ambarena!" 38 Aminge setiri, Iesu sisira, "Amo jo geka beká iraeri. Ni jo namo sonembuse ambae aresa. Na geka beká resena: kokora sifo jo karigae irari, ni na umbu etodaba naká ighagha aresa," Iesu aminge sisira.

14

1 Aminge sise, Iesu sisira, "Erá dubo mema eove, a erá dubo vevera eove dae resena! God Afa tumondevu! A nambarago tumondevu! 2 Nanda Afa da kamboda mo, vasa digariri. Na oroko yama, nendae sedo vasa esimbugarena. Emo geka bekári. Geka jo beká irae aetira amo, na jo aminge sae aeteni. 3 Na oroko yama nenda vasa esimbugedo, namonde dabade irari dae sedo, jovereghe foa ne unumbe budo, nanda vasada yarena. 4 Kotugo na reda yarena ainda emboro, ne kasama ereva." 5 Aminge setiri, namanenda eni javo Thomas, nu eredo ategi usira, "Bajari, ni reda yari resesa ava, namane erebunera. Ava sedo, ainda emboro namane nange kasama areri?" 6 Aminge setiri, Iesu mino numokena sisira, "Emboro Afakena amo, namori. Geka beká da susu, amo namori. A jebuga da susu barago, namori. Emboro Afakena setena amo, dabako tainako, namori, eni tefori. Na mavejoá unumbe bu yarena amo, ya God Afa kena buvarira. O mavejoá na jo unumbe bu yae arena amo, God Afakena jo ya buvae arira. 7 Ne na kasama use irareva amo, Afa barago kasama use irareva. Kotugo, ne na kasama ereva a, eregoseva. Ava sedo, oroko ei tano ghedo ise, 'Namonde God Afa gi kasama usera,' ava sido yareva," aminge sisira. 8 Setiri, Philip sisira, "Bajari, God Afa ijugaso gido, tumonde gogogho arera." 9 Aminge setiri, Iesu sisira, "Philip, namonde dabade sifo ghousa evia deingheraera. Ni na kasama eresa. Mave nu na giraira amo, nu God Afa barago giraira. Ava sedo, erá, 'God Afa ijugaso gaone!' ava seose! 10 Philip, na God Afaghae tatedo nangae dabade irera ava, ni tumondaetesi," Aminge sedo, namane isambukena eminge sisira, "Na geka nemokena sedo ghusena amo, jo tofo nanda geka iraeri. Amo Afa da gekari. Ainda beká mo: Afa nangae dabade tatedo irira amo, tofo nunda saramana ava use irira. 11 Namane Afaghae dabade tatedo irera ava, ne tefo tumondaetevu. O jo tefo tumondae areva amo, nane tano eono giraeva, aindae sedo, tumondaetevu! 12 Nemokena geka beká resena. Na tano eono giraeva ava, evetu genembo mave na tumondarera amo, ne kau daba ava tano use irarera. Kotugo, na oroko Afakena yarena. Ava sedo, tano nane eono giraeva amo, kitakori. O evetu genembo na tumonduse, tano rea use irarera amo, teriago bekári. 13 Ne nanda javoda rejodae benunu sareva amo, na amingarena. God da Mandi nunda javo jighovo erari, natofo God Afa da duro gaoro dae sedo, na amingarena. 14 Ne nanda javoda rejodae benunu sareva amo, na amingarena. 15 Kotugo, na dubo bareva amo, ne nanda agho dari kaifa use irareva," Iesu aminge sisira. 16 Aminge sise, Iesu sisira, "Na Afakena benunu saono Sonemba Kato eni mutari foa, nemonde dabade evovodae irareva. 17 Sonemba Kato resena emo, nu geka beká a ari beká da Asisi, aindae resena. Evetu genembo mave fisi da uju use irera amo, ne jo nu gido kasama ari da kaugo iraeri. Ava sedo, ne nu jo bae arera. Avata nene, nu kasama eraeva. Ainda beká mo: nu oroko nemonde dabade ireva, a kotugo, amboda nenda dubo jokáda irarira. 18 "Na jo dodo yaono ne babate ae areva. Na sekago jovereghe nemokena furarena. 19 Sifo tufako einda amboda, evetu genembo mave fisi da uju use irera amo, ne nanda dombu jo gae arera. Avata nene, na itatamuse irareva. Na jebuga irá gheraena ava sedo, nembarago jebuga tuve bareva. 20 Aminguse, sifo aminda ne kasama areva, 'Na Afaghae dabade tatedo dabako edo irena. A kau na nenda janje jokáda irarena, kau daba aminga ava, ne nanda janje jokáda irareva,' ava kasama areva. 21 "Mave nanda agho dari ningido, kaifa eraira amo, nu na dubo buraira. A na numoá dubo budo, numokena isagha aono nu na garira. Kotugo, nanda Afa barago numoá dubo barira." 22 Aminge setiri, Keriot embo Judas ainda nunombo mo, nu eredo ategi usira, "Bajari, ni nangetiraimi, isagha aso namane kikiako gareri, mendeni mo ni jo gae areri?" 23 Aminge setiri, Iesu sisira, "Mave na dubo barira amo, genemboá nu nanda geka ningido kaifa arira. Amingari, God Afa nu genemboá dubo barira. A namane Afaghae genembo aikena yama, namonde dabade irarera. 24 O mave, na jo dubo bae arira amo, nu nanda geka jo bu kaifa ae arira. Geka seono ningido ghuseva amo, jo nasuka nanda geka iraeri. God Afa na dirigetiri fusena, namane nangaeda gekari. 25 "Ne namonde dabade irise, na geka evia seteno niningereva. 26 Avata amboda, nenda Sonemba Kato God Afa nanda javoda dirigari furarira aimi, nune roera isambu ijugari gareva. A na rejo ava sedo ghusena amo, nune sekago sirurari nininguse kotareva. Sonemba Kato resena emo, God da Asisi Kakaradae resena. 27 "Na dubo jama nemokena mutudo, ne dodo yarena. Amo tofo nanda dubo jama ava erefutena. Amo dubo jama bekári. Jo dubo jama evetu genembo mendeniimi muturaera, ainda kaugo iraeri. Erá dubo mema eove! A erá dubo vevera eove dae resena. Erá oju eove! 28 Na eminge seno ningevu, 'Na ne dodo yarena, avata na sekago jovereghe nemokena furarena,' aminge seno ningevu. Ne na dubo baeteva amo, ne ivuga aetevu. Ainda beká mo: na God Afakena yarena. Numo teriari. O namo ijoghakori. 29 Emo jo sirorae irari, geka oroko resena einda susu mo: amboda, beká sirorari gido, nanda geka evia tumondaovo dae sise resena. 30 "Avori, na namonde jo geka ghousa beká sae arera. Ainda beká mo: enda da bajari Satan mo, nu furari dae erira. Nunda fakina jo namongo iraeri. 31 Avata, na God Afa dubo buraena ava, evetu genembo kasama aoro dae sedo, na, God Afa rea aono dae seraira, na jo doyae, ava eraena. "Avori, fuvu namonde yaore!" Iesu aminge sisira.

15

1 Aminge sise, Iesu sisira, "Na kasia eni sari dae erena. Namo, inono vaini (wine) buraera da asi amingori. Ainda susu beká mo, namori. Nanda Afa mo, nu inono, asi da kaifa kato amingori. 2 Nanda fatu eni, gharasa edo beká jo jighae arira amo, jore fugarira. O, nanda fafatu ningiá beká jigharira amo, fafatu amo sende simbugari, beká digarigo jigharira. 3 Na geka sedo ghusena aimi, nenda dubo joká anakora seghe simbugetiri eveva usira. 4 Ne namonde dabade tatedo irareva amo, nambarago namonde dabade tatedo irarera. Ne eregoseva: fafatu mo, jo nesuka ajagha irise, beká jighae arira. Susughae tatedo irise, beká jijighuse irarira. Nu susu tefo irarira amo, beká jo jighae arira, emboro eni tefori. Kau daba aminga ava, ne namonde dabade tatedo irareva amo, kau beká jighiraira, avavaga ava areva. 5 "Asi da susu setena amo, namori. Ne inono, nanda fafatu amingori. Mave namokena tatedo, nangae dabade irarira amo, nu beká digarigo jigharira. Ainda beká mo: na ne jo sonembae arena amo, nene rejo eni jo ae areva. 6 Mave jo namokena tatedo nangae dabade irae arira amo, God Afa nu gafugedo ajagha fugari fasarira. Fafatu gafuge fugeraera aminga ava, ari gharasa ari gido, bu ya avarakada dungarera. 7 Ne namokena tatedo, nanda geka nenda dubo jokáda kaifa use, rejodae uju ari benunu sareva amo, sirorari bareva. 8 Ne ari eveva use irareva amo, ne nanda amboda amboda ise amingareva. Kotugo, amingururovo aimi, evetu genembo God Afa da duro a usasa gido kasama arera. 9 Kau Afa na dubo buraira daba aminga ava, na ne dubo buraena. Ne nanda dubo bari jokáda irivu! 10 Kau na, nanda Afa da Geka a Agho Dari kaifa use, nunda dubo bari jokáda irena aminga ava, ne nanda geka, a agho dari kaifa use irareva amo, ne nanda dubo bari jokáda irareva. 11 "Na geka evia setena da beká mo: na uju erena amo, nanda ivuga nenda janje jokáda irari, ivuga e gogoghombuse iraetevu. 12 Nanda agho dari mo eviri: kau nane ne dubo buraena aminga ava, ne tofo tofo dubo ruruse irareva! 13 A dubo bari da teria mo eviri: genembo mave nunda kokomana dubo bu gogoghombarira amo, nunda jebuga ava, nunda kokomanadae sedo, futuse ambarira. 14 A nene nanda geka a agho dari kaifa areva amo, ne nanda kokomana areva. 15 'Ne nanda saramana kakato,' seraena avata, oroko mo, 'Ne nanda kokomana,' sarena. Ainda beká mo: saramana kato nu, nunda bajari da kotari isambu jo kasama ae eraira. O Afa rea namokena siri niningusena amo, isambu seteno, ne nininguse kasama usevu. Aindae sedo, 'Ne nanda kokomana,' sarena. 16 Nene na jo gategae usevu. Nane, ne gateguseni. Ari eveva a ari beká evovodae irari ava aovo dae sedo, nane ne gateguseni. Aindae sedo, nanda javoda rejodae benunu sareva amo, God Afa mutari bareva. 17 Avori, setena, geka daba ava resena: ne tofo tofo dubo buvu!" Iesu aminge sisira. 18 Aminge sise, Iesu sisira, "Kotovo dae resena: evetu genembo endada irise fisi da uju ava use irera aimi, giti na imboe edo ghuseri. Ava sedo, evetu genembo resena eimi, ne imboe arera amo, erá buneove! 19 Ne sekago jovereghe, evetu genembo setena, ainde dabade tatareva amo, evetu genembo ainde dabade tatedo, tofo tofo dubo bareva. Ainda susu mo: ne reighida evetu genembo da mendeni edo iraetevu. Avata, ne nane gategedo seteno, reighi da evetu genemboá dodo, ne esike ireva. Ne jo evetu genembo ainde dabade tatedo iraeri. Aindae sedo, evetu genembo fisi da uju use irera aimi, nemoá imboe eraera. 20 Na giti rea nemokena sedo ghusena, ava kotovo dae resena. Amo eviri: 'Kotofu mo, nu teriari. Nunda sabua+ mo, kitakori. Evetu genembo kotofuá jo kakara ae arera amo, nunda sabua+ barago jo kakara ae arera,' aminge sedo ghuseni. Ava sedo, namokena fakarago use bouvu muteoro mema itatameraena amo, kau daba aminga ava, nemokena fakarago use bouvu mutoro ne mema itatamareva. O, nanda geka mave ningiraera amo, ne geka rea sareva ábarago ningarera. 21 Kotugo, ne nanda natofo edo ireva aindae, nemokena rejo ava arera amo, ne nandae sedo arera. Ne amingarera da beká mo: God Afa na dirigetiri fusena amo, ne jo kasama ae irera. 22 Na jo foa evetu genembo setena aikena, vironu saono ningae edo ghaetera amo, God jo, 'Ne ari ekoko embo,' ava sae aeti. Avata na fena evetu genembo mavekena vironu sedo ghusena, aikena mo, darige yari da emboro eni tefori. 23 Mave na imboe eraira amo, nu God Afa barago imboe eraira. 24 Kotugo, geka eni mo kau daba avori. Na jo foa, ari a tano aono gi dudukughae edo ghaetera amo, God jo, 'Ne ari ekoko embo,' sae aeti. Avata na fena, ari a tano eono gido ghuseri. Avata ne, namane Afaghae dabade, ava imboe use irera. 25 A ne namane imboe eraera amo, nenda Agho Dari jokáda rea sisira ava, beká are dae sedo eraera. Amo eviri: 'Ne susu tefo na imboe edo ghuseri,' Agho Dari jokáda aminge sisira. 26 "Avori, Sonemba Kato setena amo, nu ari beká a geka beká da Asisi, aindae seteni. Numoá dirigaono, Afakena ghe vose foa nemokena buvudo, nandae sedo, nune ijugururari nininguse irareva. 27 Kotugo nembarago, nandae sedo ijugururovo evetu genembo ningido gharera. Ainda beká mo: na giti tuturoda vironu sisena ai tano ava, ne namonde dabade deingheraera."

16

1 "Na geka resena einda beká mo: erama oju edo na ighagha use, nenda tumondari doyeove dae sise seteni. 2 Jusi embo da dengoro indari kamboda+ erá tereove dae sedo, Jusi emboimi, ne ighagha edo buregarera. A amboda sifo foa buvarira aminda, evetu genembo mave, ne daoro ambareva amo, evetu genembo amo nenda kotari mo, ne God sonembuse ariá kotarera. 3 Avata ne amingarera da beká mo: ne na jo kasama ae irera, a Afa barago jo kasama ae irera. 4 Na oroko geka evia nemokena resena da beká mo: sifoá foa buvarira amo, na rea oroko resena evia, sekago kotise kasama areva," Iesu aminge sisira. Aminge sise, Iesu sisira, "Geka evia, na jo giti nemokena saono ningae useva da beká mo: ne namonde dabade iriari. 5 Avata oroko, God na dirigetiri fusena aikena jovereghe yari dae erena. Kotugo na reda yarena aindae, ne eni jo nandae ategi ae ireva. 6 Avata geka setena aindae, ne dubo mema teria futo use ireva. 7 Avata na nemokena geka beká resena. Na yarena amo, nenda evevadae sedo yarena. Ainda susu mo: na jo yae arena amo, Sonemba Kato setena, jo nemokena furae arira. O, na ne dodo yarena amo, na numoá dirigaono nanda vasa budo nemokena furarira. 8 Foama, evetu genembo fisi da uju use irera amo, ne nange roera isambu etodaba naká ainda beká kosasaghusera, ava ijugari kasama arera. Roera resena amo eviri: ari eko beká mo rejori, ari eveva mo mave erai, a God da ijujari mo kau mavegori. Roera etodaba naká setena, ainda beká amo kosasaghuseri. 9 Ne ari ekodae bunise irera setena amo, Sonemba Kato foa ijugururari, na jo tumondae use ari eko beká eraera, ava ne kasama arera. 10 Roera eni kosasaghusera amo, ari eveva mave eraira ava, ne bunise irera. Na jovereghedo yaono, na jo gae irovo Afakena irarena amo, Sonemba Kato setena aimi, foa ijugururari, 'Na eveva eraena,' ava kasama arera. 11 A kotugo, roera eni kosasaghusera amo, God evetu genembo ijujarira ava, ne bunariri. God nu enda da bajari Satan ijujedo, nunda ari ekoko tambudo ainda mino ava, mutari dae sedo simbugetiri irira ava, Sonemba Kato aimi foa ijugarira. Ijugari, God nune evetu genembo barago ijujarira, ava ne kasama arera. 12 "Na geka mendeni mendeni saetena avata, oroko jo saono nene ningari da kaugo iraeri. 13 Kotugo, ari beká a geka beká da Asisi setena, aimi foa buvarira amo, nu ari beká a geka beká da emboro isambu ijugururari kasama areva. Nu jo nunda geka ava sae arira. Nu rea ningarira, ava sarira. A kotugo nu amboda rea sirorarira, ava sari ningareva. 14 Nu nanda geka a ijuga ava ijuguse, nanda duro ava sakai sirurari ningareva. 15 Afakena rea irira amo, isambu nandari. Na aindae sedo eminge seteni, 'Asisi Kakara nanda roera a nanda geka budo, nemokena ijugarira,' " Iesu aminge sisira. 16 Aminge sise, Iesu sisira, "Sifo tufako einda amboda, ne nanda dombu jo gae areva. Avata kotugo, sifo tufako dadabarira ainda amboda, nanda dombu sekago gareva." 17 Aminge setiri ningido, namanenda mendeni ategi useri, "Ainda tuka mo rejori? Nu eminge setira, 'Sifo tufako einda amboda, ne nanda dombu jo gae areva. Kotugo, sifo tufako dadabarira ainda amboda, nanda dombu sekago gareva,' aminge setira. A eni kotugo eminge setira, 'Ainda beká mo, na nanda Afakena yarena,' aminge setira. 18 Avori, 'sifo tufako' resira, ainda tuka mo rejori? Namonde nunda geka da tuka jo kasama ae erera," aminge siseri. 19 Aminge sero itatamedo, namane rejodae numokena ategi ari kotisera ava, Iesu kasama usira. Kasama edo, namanekena sisira, "Na seteni, 'Sifo tufako einda amboda, ne nanda dombu jo gae areva. Kotugo, sifo tufako dadabarira ainda amboda, nanda dombu sekago gareva,' aminge setena aindae, ne se niningereva ava eregosena. 20 Na nemokena geka beká resena. Giti mo, ne sorara use dubo mema tafururovo, reighi da evetu genembo ne ivuga use irarera. Ne dubo mema use irareva, avata kotugo, sifo amboda nenda dubo mema jovereghari ivuga areva. 21 Evetu nunda fumbari da sifo utua ururari dubo mema arira, nu fumbari dae use mema tambarira aindae. Avata, mandi sasingu fumbari sirorari gido, nu jebugedo, nunda mema amo kotae arira. Ainda beká mo: nunda mandi sasingu siroretira ava gido, ivuga arira. 22 Ne kau daba ava ereva. Oroko ne dubo mema use ireva. Avata amboda, na furono ne na tambudo ivuga beká ava areva. A ainda ivuga mo, jo mave bu darigari da kaugo iraeri. 23 "Sifo aminda, ne jo namokena rejo enidae benunu sae areva. Na nemokena geka beká resena: ne nanda javoda, Afakena rea benunu sareva amo, nu mutari bareva. 24 Tuturoda ghedo fira tano oroko eminda, nanda javoda, rejo enidae jo benunu sae ireva. Nene benunu saovo mutari budo, ivuga beká ava aovo dae sise resena," Iesu aminge sisira. 25 Aminge sise, Iesu sisira, "Na geka emo giti kasiaimi, seono ningido ghusevu. Kotugo, sifo eni foa buvarira amo, Afa kau mavega amo, kasiaimi jo sae arena. Na ava isagha saono ne ningareva. 26 Sifo aminda, ne dambu nanda javoda Afakena benunu sareva. Na jo nemo sonembuse, Afakena benunu sae arena. Ne totofo benunu sareva amo, nu ningarira. 27 Ainda beká mo: Afa nune, ne dubo buraira. Ne na dubo buraeva, a kotugo na Afakena ghedo fusena, ava ne tumonderaeva; aindae sedo, God Afa ne dubo buraira. 28 Emo geka bekári: na God Afakena ghedo fena, enda eminda vovosuseni. A kotugo, na oroko enda emo dodo, Afakena jovereghe yari dae erena." 29 Aminge setiri ningido, namane numokena siseri, "Oroko resesa evia, namane kasama ari da kaugori. Amo, ni kasia dodo geka isagha seso ningido, 30 ni nisuka roera isasambu kasama eraesa, ava kasama erera. A evetu genembo nenda kotari jo nimokena saoro ningae irise, ne rejo uju eraera ava, ni giti kasama eraesa. Ava sedo, namane tumonderera amo, geka bekári: ni God kena ghedo fusesi." 31 Namane aminge setero ningido, Iesu mino namanekena kovionoghae sisira, "Orokoá ne na tumondereva, ai? Givu! 32 Sifo refara buvira oroko emo, ne isasambu oju edo, na dodo nunda nunda sumbudo, nenda nati nati yareva. Sufuse doyovo, na nasuka fetarena. Avata geka bekári: na jo nasuka fetae arena. Namo, Afaghae dabade fetarena. 33 Ne na tumonduse, dubo jama baovo dae sedo, nanda geka emo seteni. Enda eminda, nanda gitofu nemokena fakarago use, bouvu futururoro, ne mema itatamareva. Avata tumo fainghedo fakina use, ivuga aovo dae sise resena. Evetu genembo fisi da uju use irera, a kotugo nenda bajari, ainda fakina ava, nane anakora deteno bejisira," Iesu aminge sisira.

17

1 Iesu aminge sedo, nu dombu utuda fainghu- sira. Fainghedo sisira, "Afaé! Sifo buvira. Na nange aono, evetu genembo ninda duro gaetera, aindae resena. Ninda duro namokena futururaso, evetu genembo nanda duro gaore! Amingururaso, ninda duro ava isagha ijugaono gido sakai saore! 2 Nangaeda duro gaoro dae sedo, ni seteso, na evetu genembo isasambu da bajari edo irena. Na ainda bajari rurusena da susu mo: ni evetu genembo namokena futusesa ava, sonembaono jebuga evovodae irari ava baoro dae sedo futusesi. 3 Jebuga evovodae irari ava bari da emboro mo eviri. Afa, ni God bekári, a ninda Mandi Keriso futusesa amo, namori. Mave namane kasama arira amo, jebuga evovodae irari ava, nune tuve barira. 4 Ninda saramana ava use, ninda duro ijugeono evetu genembo gido ghuseri. Na aminguse, ninda saramana eteno dadabusira. 5 Afa, orokoé na ninda dombuda fetirono, nanda duro, a usasa sekago namokena mutaso bari dae resena. Enda jo sirorae iriri, na giti usasa a duroghae iriana ainda duro ava, sekago mutaso bari dae resena. 6 "Evetu genembo endada irero ni gido, nenda jokáda evetu genembo mendeni ava gategedo namokena futusesi. Muteso budo, ni mavejori, ava nane ijugeteno gido, ne kasama useri. Ne nine gategeteso ninda tofo usera, ava budo nandae futusesi. Ne ninda Geka kaifa eraera. 7 Kotugo, oroko ne kasama erera, rea isambu nandae futusesa, ainda susu mo nimori. 8 Ne ava kasama erera da beká mo: geka namokena futusesa ava, nemokena muteno ne ruruseri. Na nimokena ghedo fusena, amo geka beká ava ne kasama erera. A ni na dirigeteso fusena ava, ne tumonderera. 9 "Na oroko nendae sedo benunu resena. Na evetu genembo mendenidae, jo benunu sae erena. Avata gegenembo nine futusesa eindae, benunu resena. Ne ninda tofo ava sedo, benunu resena. 10 Ne nanda natofori. A nanda natofo amo, isambu nindari. Kotugo, ninda natofo amo, isambu nandari. A natofo setena aimi, nene nanda duro ijugaoro gido, nandae sakai sarera. 11 Avori, na oroko jovereghe nimokena yari dae erena. Na jo enda eminda irae arena. O nemo, doyono enda eminda irarera. Arie, Afa Kakara! Ninda javo namokena futusesa ainda fakinaimi, ne kaifa aso dae resena. Kaifa ururaso, ne dabade tatedo dubo dabako aeteri. Kau ni nangae tatedo dubo dabako edo irera, daba aminga ava, ne dabade tatedo dubo dabako aeteri. 12 Namane namonde enda eminda dabade irise, ninda javo namokena futusesa ainda fakinaimi, ne kaifa edo ghuseni. Ne, nane kaifa eno, mendeni ne eveva iriari. Avata, ninda Geka jokáda rea resira ava, beká are dae sedo, genembo dabako jebuga evovodae irari ava kosasaghusira. O mendeni, nane kaifa eono ne eveva iriari. 13 Na oroko nimokena yari dae erena. Kotugo na enda eminda irise, geka evia nimokena banunguse resena da beká mo: ne ningido nanda ivuga itatamuse, nandae ivuga beká ava aoro dae sise resena. 14 Na ninda geka muteno ne ningido, ruruseri. Budo irero, evetu genembo fisi da uju use irera aimi, tuturo edo nangaeda natofo imboe eraera. Kau na ari ekoko da emboro ava ighagha edo, ajagha fetirá gheraena aminga ava, ne ari ekoko da emboro ava ighagha edo, evetu genembo fisi da uju use irera, ainda jokáda ghe buvudo era, ajagha fetedo irera. Ne ajagha irera aindae sedo, evetu genembo fisi da uju ava use irera aimi, nangaeda natofo amo imboe eraera. 15 Na jo, nine saso endada ghe yaoro dae, benunu sae erena. Avata, erá Ari Eko da Numamo foa nemo dereure dae sise, nine kaifa ururaso eveva iroro dae benunu resena. 16 Kau na enda da irari ava imboe edo, ajagha feteraena aminga ava, ne evetu genembo da irari ava imboe edo, ainda jokáda ghe buvu fera ajagha fetedo irera. 17 Ninda geka bekáimi, nenda dubo joká seghaso, ninda natofo kakara a eveva irore! 18 Kau nine na dirigeteso, evetu genembo da jokáda vose fusena aminga ava, ne dirigeteno evetu genembo da jokáda iseri. 19 Ninda geka bekáimi aso, ne ninda natofo kakara a eveva aoro dae sedo, na tofo nanda dubo joká isambuimi nimokena erefutena. 20 "Na jo nemoá nembo kotise, aindae benunu sae erena. Evetu genembo amboda nenda vironu ningido aindae, namoá tumondarera ava kotise, nendae benunu resena. 21 Afa, nanda benunu mo eviri: nange ne dubo dabako aeteri! Kau ni nangae tatedo irera aminga ava, ne namonde dabade tataeteri. Nangaeda natofo dubo dabako edo iroro gido, evetu genembo endada irise, fisi da uju use irera amo, ni na dirigeteso fusena ava, ne kasama arera. 22 Ni nangae dabade tatedo dubo dabako edo irera. Nangaeda natofo kau daba aminga ava use, dubo dabako e gogoghombaoro dae sedo, na nemokena ninda duro a usasa namokena futusesa ava, nemokena muteno ne ruruseri. 23 Na nenda dubo jokáda irari dae, a kotugo ni nanda dubo jokáda iraso dae sedo, aminguseni. Kotugo, ne dubo dabako aoro dae resena, ainda beká eni mo eviri: na dirigeteso fusena ava, evetu genembo fisi da uju use irera aimi, kasama aeteri. A nangaeda natofo, kau namo dubo buraesa aminga ava, na ne dubo buraena, ava kasama aeteri. 24 "Afa, ni evetu genembo namokena futusesa aindae resena. Na uju erena amo, na vasa reda irarena, vasa daba aminda, ne namonde dabade iraeteri. Irise, ne nanda duro a usasa ava gosuse iroro dae, uju erena. Duro a usasa amo, ni enda jo ae irise ainda gitida, na dubo ruruse namokena futusesa, ava gosuse iroro dae uju erena. 25 "Arie, Afa Eveva Ari Kato! Evetu genembo endada irise, fisi da uju use irera amo, ne ni jo kasama ae eraera. Avata na ni kasama erena. A ni na dirigeteso fusena ava, gegenembo emo ne kasama erera. 26 Ni na dubo buraesa, ainda dubo bari nemokena irare dae, a na nenda dubo jokáda irari dae sedo, na, ni mavejori, ava ijugeono gido kasama edo ghuseri, a kau daba aminga ava, ijugururono gido kasama edo gharera," Iesu aminge benunu sisira.

18

1 Aminge benunu setiri dadabetiri, Iesu namane unumbe budo era, uvu javo Kidron sembiseri. Reighi aminda ika vuji bambari dae sedo, vare govetero irei. Namane aminda buvudo era, vareda teteruseri. 2 Namanenda genembo eni javo Judas, Iesu aito usira amo, numbarago reighiá kasama usira. Ainda beká mo: Iesu nu namonde dabade, aminda ya totorugedo ghuseri. 3 Aindae sedo, Judas isoro kakato mendeni budo, vare daba aminda iseri. Fristi+ da kokotofu a Moses da Geka kaifa kakato+ barago, God da Kambo+ kaifa kakato mendeni dirigetero, ne isoro kakatode dabade, Judas nune budo fusira. Ne nanefa, arivo, ambí, a goroba ava budo fera buvurutuseri. 4 Rea numokena sirorarira ava kasama edo, Iesu dombui isoro embokena ira fetedo ategi usira, "Ne mavejoá kakova erevu?" 5 Aminge setiri, ne siseri, "Iesu Nasareth embo, ava kakova erera," setero, nu sisira, "Amo namori," sisira. Judas aito ari kato amo, gitofude dabade fetirero, Iesu aminge sisira. 6 "Namori," siri, amboi era du fafasuseri. 7 Etero, Iesu sekago ategi usira, "Ne mavejoá kakova erevu?" setiri, ne siseri, "Iesu Nasareth embo ava kakova erera." 8 Setero, nu sekago sisira, "Na seteno ningeva, amo namori! Namo kakova areva amo, na evirere. Nanda mendeni eminda irera amo, dovu yaore!" aminge sisira. 9 (Nu aminge sisira da beká mo: nu giti sisira ava, beká are dae sedo sisira, amo eviri: "Afa, ni gegenembo namokena futusesa amo, kaifa eno eveva irera.") 10 Simon Peter kaiya irisira aimi budo, fristi+ da giti jighari da saramana kato ainda dengoro gimandukena ava, de gafugetiri dudurusira. Saramana kato ainda javo mo, Malchus ri. 11 Etiri, Iesu Peter kena sisira, "Erá amingeose! Ninda kaiya nunda voruda vendi! Mema da agha Afa namokena erefutira amo, erá na doyariá koteose! Amo, na mindarena," sisira. 12 Aminge setiri dadabetiri, isoro kakato nenda giti jigharide, a God da Kambo+ kaifa kakatode dabade Iesu sandi bundiseri. 13 Bundedo, giti mo Annas kena budo iseri. Annas resena emo nu, Caiaphas ghaeko aminda fristi+ da giti jighari edo ireira ainda atovori. 14 Caiaphas nu giti, Iesu daoro ambare dae kotise, Jusi embo da babojegarikena sisira, "Genembo eni natofo digari einda bouvu fumbari dae sedo ambarira amo, evevari. O natofo isambu ambarera amo, eko bekári," Caiaphas aminge sisira. 15 Simon Peter, nu Iesu da dorevare eni ainghae dabade Iesu da amboda iseri. Fristi+ da giti jighari a Iesu da dorevare resena emo, nengae minonde minonde kasama edo iriari. Ava sedo, nu Iesu de dabade ira, fristi+ da giti jighari ainda kambo dendegu, furu dighi birurughusera, aminda teterusira. 16 Avata Peter nu isaghakena fefetusira. Fetiriri, Iesu da dorevareá, jovereghedo ira buvudo, gagara guro kaifa edo ghusira, aikena geka sisira. Fristi+ da giti jighari nu kasama usira. Ava sedo, gagara aikena setiri ningiri, nu Peter unumbedo, nengae teteruseri. 17 Teretero, gagara guro kaifa edo ghusira aimi, eredo ategi usira, "Se ningone! Ni Iesu da ambo jimbi eniri, ai?" aminge sisira. Setiri, Peter sisira, "Tefo." 18 Sifo aminda yaura itatamuse aindae, saramana kakato a isoro kakato ne atomo budo fera, aimi avaraka usiseri. Usedo, ungo ata mesise aminda fetirero, Peter numbarago nemokena ira buvudo, nemonde dabade avaraka avise fefetuseri. 19 Avori, fristi+ da giti jighari nu, Iesu da ambo jimbi a nunda ijuga aindae sedo ategi usira. 20 Etiri, Iesu mino numokena sisira, "Na geka eni jo kivo aeri. Na sifo ghousa isaghada vironu sedo ghuseni. Na evovodae namonde Jusi embo da totorugari vasa aminda vironu sedo ghuseni, dengoro indari kamboda a God da Kambo+ aminda. 21 Ava sedo, redae namokena ategi eresi? Evetu genembo nanda geka niningusera, nemokena ategi aetesi. Na rea sisena ava, nene kasama erera." 22 Aminge setiri, kaifa kato eni aminda fetirisira aimi, eredo Iesu sovoda megha edo eminge sisira, "Ni fristi+ da giti jigharikena jo aminge sae aresa." 23 Setiri, Iesu minonda sisira, "Na geka eko rea seteno ningeva ava, osa saovo evetu genembo isambu ningarera. O na geka eko eni jo sae ava, ni redae na eredoresi?" 24 Aminge setiri, Annas nu, Iesu bundisera ava, seini (chains) jo vujae, ainghae dirigetiri budo, fristi+ da giti jighari Caiaphas aikena iseri. 25 Peter nu kau daba ava ungo ata mesise avaraka dengesida fetiriri, mendeni numokena ategi useri, "Se ningore! Ni genembo oinda eniri, ai?" aminge setero, Peter ighagha use sisira, "Tefo, na jo nunda eni iraeri." 26 Setiri, fristi+ da giti jighari da saramana kato enii eredo, Peter kena ategi usira, "Ni genembo ainghae vare jokáda geni, ai?" Genembo ategi usira, nu saramana kato da dengoro gafugusira, ainda nano namendi eniri. 27 Nu aminge ategi etiri, Peter sekago, "Tefo," sisira. Aminge siri, kokora sifo karigusira. 28 Ainda amboda, ne Iesu budo Caiaphas da kamboda ghedo era, Rome embo eni Frovensi Judia kaifa edo ghusira, ainda kambo tomanako aminda buvurutuseri. Amo, ataeghae beká useri. Jarige Yari da Kirumo+ nange mindaetera ava kotise, Jusi embo da babojegari ne kotofu da kamboda jo teraeri. Ainda beká mo: erá gitofu da kamboda teteruse bebeta eore dae sedo, ne oju useri. Bebeta arera amo, ne kirumo jo mindae arera. 29 Ava sedo, kotofu javo Pilate mo, nu kamboda ghe fira buvudo nemokena ategi usira, "Sevu ningone! Nu dara rea usira aindae, budo refevu?" 30 Setiri, ne mino numokena siseri, "Redae ategi eresi? Nu ari eko eni jo ae aetira amo, namane nimokena jo bu furae aeteri." 31 Aminge setero, Pilate nemokena sisira, "Avori, genembo emo, ne totofo budo, nenda Agho Dari aminda rea resira ava kotise, koto areva," aminge sisira. Setiri, Jusi embo da babojegari ne siseri, "Namane koto use, bouvu mendeni mendeni ava muturaera. Avata genembo daoro ambari mo, jo doyaso namane kikiako ae eraera. Amo nisuka eraesa," aminge siseri. 32 (Ne aminge sisera da beká mo: Iesu nu, nange ambaetira ava, tofo mandi ijugusira. Ainda beká sirorare dae sedo, God setiri, ne geka ovia siseri.) 33 Pilate nu jovereghe ira nunda kamboda teredo, Iesu setiri fira buviri, numokena sisira, "Se ningone! Ni Jusi embo da kiniri, ai tefo?" 34 Setiri, Iesu sisira, "Amo, nisuka ninda kotariimi ategi eresa? O evetu genembo mendeniimi setero ningido ategi eresa, ai?" 35 Setiri, Pilate sisira, "Na jo Jusi embo da eni iraeri. Na reda ghe kasama use sareni? Avata ninda natofo nenda fristi+ da kokotofude dabade, ni budo ojighera nanda ungoda fiteri. Ava sedo, se ningone! Ninda dara rejodae budo ojeri?" 36 Aminge setiri, Iesu sisira, "Reighi nane kaifa eraena amo, jo enda eminda iraeri. A nanda natofo jo budo eminda kaifa ae arena. Nanda reighi eminda iraetira amo, nanda natofo nandae sedo isoro aeteri. Erá na budo, Jusi embo da babojegari ainda ungoda fiteose dae sedo, ne isoro aeteri. Avata nanda reighi jo eminda iraeri," 37 Aminge setiri, Pilate nu aindae ategi usira, " 'Ninda reighi,' ava teria futo resesa, a gido, ni kini (king) eniri tano?" aminge sisira. Setiri, Iesu mino numokena sisira, "Ava nine resesare. Na geka beká a ari beká ijugari dae sedo, vose fena enda eminda siroruseni. Evetu genembo mave, ari beká a geka beká da amboda amboda eraera amo, nanda natofo mo nemori." 38 Aminge setiri, Pilate sisira, "Ari beká a geka beká resesa amo, rejori?" aminge sisira. Aminge sedo, Pilate jovereghedo ira, Jusi embo da babojegarikena buvudo sisira, "Nunda dara eni na jo tambaeri. Saono dibura ari o saono daoro ambari da beká eni jo tambaeri. 39 Avori, kote givu! Nenda kiki mo: na ghaeko evia inono Jarige Yari da Kirumo+ da sifo aminda, na dibura embo eni doyeono buvu ya gheraira. Ava sedo, nenda uju mo rejori? Na saono, Jusi embo nenda kini (king) ava foa isaghada buvare, ai? Sevu ningone!" 40 Aminge setiri, ne isambu koko sise mino eminge siseri, "Tefo, nu jo mutae aresa. Namane mo, Barabbas ava uju erera." (Genembo Barabbas sisera amo, nu tafasara kato eniri.)

19

1 Aminge setero, Pilate Iesu budo setiri, nunda isoro kakato ne asi ava, nenda ambídae budo aimi, Iesu doruseri. 2 Etero dadabetiri, isoro kakato asi titifaghae ava bu kefu edo, kini (king) da kekesa avavaga useri. Amingedo, bu Iesu da jiroda asugedo, embo unju tamo ghousago ava budo nunda tamonda asuguseri. 3 Asugedo, ne totorugedo numoá dere jise eminge sedo ghuseri, "Orokaiva! Jusi embo da kini buviro! Orokaiva!" aminge sedo ghuseri. Aminge sise, nunda sovoda megha edo ghuseri. 4 Amingero, Pilate sekago jovereghedo ira, natofokena buvudo sisira, "Givu! Nunda dara eni jo tambae eteni. Ava kasama aovo dae sedo, saono sekago foa buvarira." 5 Aindae Iesu sekago ira buvurutusira. Kekesa, asi titifaghaeimi kefu usera a, embo unju tamo ava asugedo, ainghae fira nemokena buviri, Pilate sisira, "Givu! Genembo evirere!" 6 Setiri, fristi+ da kokotofu a God da Kambo+ kaifa kakato ne Iesu gido, dabade koko sise siseri, "Arafa dege! Arafa dege!" setero, Pilate mino sisira, "Avori, nene budo arafa devu ambare! O namo, nunda dara eni jo tambaeri." 7 Aminge setiri, Jusi embo da babojegari, ne minonda siseri, "Namanenda Agho Dari resira amo, nu ambarira. Ainda beká mo: nu tofo mandi, 'Na God da Mandiri,' sedo ghusira." 8 Ne aminge sero ningido, Pilate nu oju beká ava usira. Nu giti itako oju usira. O amboda, ava ningido, nu oju beká ava usira. 9 Edo, nu sekago jovereghedo Iesu budo ira, nunda kamboda teredo Iesu kena ategi usira, "Se ningone! Ni reda ghe fusesi?" setiri, Iesu mino eni jo sae usira. 10 Etiri, Pilate numokena sisira, "Namokena geka eni jo sae aresa? Kote gi! Nimo arafa dari da fakina namokena irira. Kotugo, nimo doyono ya buvari da fakina barago, namokena irira," aminge sisira. 11 Setiri, Iesu mino numokena sisira, "Setesa ainda fakina ava, God nimokena futusira. Jo mutae aetira amo, ni jo bu jighirae aetesi. Ava sedo, genembo mave na ninda ungoda fitira, ainda ari eko mo, mindafugori. Nine saso ambarena ainda dara ava, jo nunda amingo iraeri." 12 Aminge setiri ningido, Pilate nu jovereghe ira buvudo, nu Iesu doyari yare dae sedo, emboro tava usira. Avata Jusi embo da babojegari ne minonda koko sedo siseri, "Iesu doyaso yarira amo, ni jo ninda natofo Rome embo da kotofuko ainda komana iraeri. Ai resira amo: mave nu kini (king) ariá sarira amo, nu inono, ninda natofo Rome embo da kotofuko ainda fakina ava ighagha use sarira. Aminguse numo, ne Rome embo da gitofu da kaugo arira," aminge siseri. 13 Aminge setero ningido, Pilate sekago setiri Iesu fira buviri, Pilate nu natofo ijujari da avo anumba aminda anumbusira. Anumbusira da vasa amo, Jusi embo da gekaimi, 'Gabata' sedo ghuseri. O namondeda gekaimi 'Ofotighi Ghamanai Esimbuguseri', aminge saeteri. 14 Isonga iri, Pilate ira aminda anumbusira. Sifo amo, Jusi embo nenda kirumo javo Jarige Yari da Kirumo+, aindae simbugeraera. Pilate anumbedo, Jusi embo da babojegarikena sisira, "Nenda kini (king) evirere." 15 Setiri, ne minonda koko sise siseri, "Dege ambare! Dege ambare! Arafa dege ambare!" setero, Pilate ategi usira, "Nenda kini ava arafa daono ambare dae reseva, ai?" Aminge setiri, fristi+ da kokotofu siseri, "Eminda namanenda kini eni tefori. Dabako irira amo, Rome embo da kotofuko ava, nu namanenda kiniri. Eni tefori." 16 Aminge setero, Pilate nu Iesu arafa daoro ambare dae sedo, nenda ungoda fifitusira. 17 Etiri, ne setero Iesu nunda korosi tofo fumbiri, budo iseri. Era, vasa eninda buvurutuseri. Vasa amo Jusi embo da gekaimi javo 'Golgota' seraera. O namondeda geka mo, 'Ambari Embo da Jiro Aghati' seraera. 18 Aminda buvudo, Iesu arafa dedo, gegenembo etoto naká ábarago sovenisoveni arafa detero, nemonde dabade fefetuseri. 19 Amingusera ainda amboda, Pilate geka eminge gembudo setiri, budo era Iesu da korosida doruseri: "Emo Nasareth embo genembo Iesu, Jusi embo da kiniri," aminge gefusira. 20 Ainda geka ava, Jusi embo digari aimi ne tegutuseri. Ainda beká mo: vasa aminda ghe ya Jerusalem buvari jo soka iraeri. Geka amo, Jusi embo da gekaimi, Rome embo da gekaimi a, Greek embo da gekaimi gefuseri. 21 Jusi embo digarii geka ava tegutero gido, Jusi embo da fristi+ da kokotofu era Pilate kena siseri, " 'Nu Jusi embo da kiniri,' ava erá seose! 'Nu tofo Jusi embo da kiniri, sisira,' ava gembu!" 22 Aminge setero, Pilate mino sisira, "Tefo! Na rea gembena, a gembeni! Ava irarira!" 23 Isoro kakato ne Iesu arafa dedo ainda amboda, nunda embo boka ava budo soro edo, diti isambu avononde naká fugutuseri. Fugedo, ne diti ava inono daba daba ruruseri, ne avononde naká ava sedo. Nunda tamo asugari ghousa barago ruruseri. Tamo asugari amo, jo avagaya iraeri. 24 Ágido, isoro kakato ne tofo tofo se nininguseri, "Namonde jo jighi torerae arera. Namonde mave kikindoro gae barira amo, tamo asugari evia nune barira," Amingusera da beká mo: God da geka rea aindae sisira ava, beká are dae sedo aminguseri. God da Geka sisira, amo eviri: "Nanda embo boka, tofo tofo soro edo ruruseri. A nanda tamo asugari ghousa ava bari dae sedo, kikindoro garuseri," God da Geka anakora aminge sisira, aindae isoro kakato ne aminguseri. 25 Amingero, Iesu da korosi dengesida, evevetu mendeni fetiriseri. Evevetu fetirisera amo, Iesu noi nunda gagarakoghae, noi da nunombo eni, amo Clopas noaro Mary, kotugo Iesu noi da nunombo eni, amo Magdara embo evetu javo Mary ri. 26 Iesu namanenda genembo eni dubo budo ghusira aimi, Iesu da noighae dabade fetirero gido, Iesu noikena eminge sisira, "Aya, ninda mandi avarere." 27 Aminge sedo, kotugo jovereghe nunda ambo jimbi aikena sisira, "Ninda nei avarere." Aminge setiri, nunda ambo jimbiá eredo Iesu da noi budo kamboda isira. Sifo aminda nu tuturo edo, nunda kamboda kaifa edo ghusira. 28 Ari rea nune aetira amo, etiri inono usira ava, Iesu kasama usira. Kasama edo, God da Geka eni rea resira, ava beká are dae sedo, Iesu eminge sisira, "Na dubo sagherira." 29 Setiri, vaini (wine) dokegha aghada averegetero fasirisira ava, ika eni javo hisofi seraera, ainda fatu ava budo, roera eni sofeya avavaga bu aminda vakimbedo, aimi fati budo, nunda békada fifituseri. 30 Fitero, vaini (wine) ava mindido, Iesu, "Inono etira!" sisira. Aminge sedo, nu tumo darido, ghamo asegari dotutusira. 31 Ainda amboda, Jusi embo da babojegari Pilate kena era ategi useri, nu 'avori' sari ningido, ne Iesu a tafasara kakato da ata de jojoregaoro totoi amboro, korosida ava bari dae sedo, ategi useri. Ne aminge benunu sisera da beká mo: sifo aminda Jusi embo nenda Jarige Yari Da Kirumo+ aindae simbugeraera. Ava sedo, sifo atarira amo, Jangutari da Sifo kakara bekári. Sifo aminda, tamo korosida irari ava, jo uju aeri. 32 Aindae, Pilate 'avori' setiri, isoro kakato era, tafasara kakato Iesu de dabade arafa dorusera, ainda ata de jojoreguseri. 33 De jojoregetero dadabetiri, fera Iesu kena buvurutusera amo, Iesu anakora ambiri gido, nunda ata jo de jorae useri. 34 Numo, isoro kato eniimi eredo nunda gorobai Iesu da reimada gae basetiri, uvu ororoghae baingoro edo vovosusira. 35 (Nane gosusena, evia tumondaovo dae sedo, resena. Na kasama erena. Nane resena emo, geka bekári.) 36 God da Geka rea resira ava, beká are dae sedo aminguseri. Amo eviri: "Nunda etu eni jo de jorae arera." 37 A vasa eninda resira: "Genembo nene gae basisera ava, fuge garera," God da Geka aminge resira. 38 Ainda amboda, Arimatia embo genembo javo Joseph, ira Pilate kena buvudo ategi usira, nu 'avori' sari ningido, Iesu da tamo bu ya furugari dae sedo. (Numo Iesu da dorevare eniri. Avata Jusi embo da babojegari aindae oju use, nu tofo kivo edo ghusira.) Benunu setiri, Pilate 'avori' setiri, nu ira Iesu da tamo budo isira. 39 Genembo eni javo Nicodemus, giti beká tumba eninda Iesu gari dae isira aimi, fiyogha etoto naká baingoro edo budo isira, eninda javo moor (myrrh), a eninda javo aros (aloes), ava dabade tate budo isira. Amo, 40 kiro (kilos) avavaga budo, nu Joseph da karona edo, nengae iseri. 40 Nengae Iesu da tamo budo, fiyogha aimi nunda tamo davuse, embo foyago budo nunda tamo doghuseri. Jusi embo ne ambari embo da tamo furugari dae sedo nange simbugeraera, ainda ari ava nene useri. 41 Iesu arafa dorusera aminda, vare irei. Vare jokáda, ofofo seka beku da kaugo ava, anakora fana ifuda basetero irei. Aminda ambari embo eni, giti jo fitaeri. 42 Sifo amo, Jusi embo nenda Jarige Yari Da Kirumo+ dae simbugeraera; a gido, Joseph nengae Nicodemus ghae, Iesu da tamo aminda furuguseri, vasa utuako ava sedo.

20

1 Fura Tomanako sifo jo atae iriri, Magdara embo evetu Mary setena aimi, eredo ofofoda ira, ghamana afufetero afigedo iriri gosusira. 2 Gido, jovereghe sumbu fira, Iesu da ambo jimbi mavejoá nu dubo budo ghusira, nengae Simon Peter ghaekena buvudo sisira, "Bajari da tamo ofofo jokáda ava budo aera. Budo aera reda fitera ava, namane erebunera," sisira. 3 Setiri, Iesu da ambo jimbi setena, nengae Peter ghae dabade eredo ofofoda iseri. 4 Nengae etoto naká sumbudo era, Iesu da ambo jimbi setena, nu Peter darigedo giti ofofoda buvurutusira. 5 Buvudo, ofofo békada fete ghounghedo, embo foyago avanembo fasiriri gosusira. Avata nu jo ya teraeri. 6 Amingiri, Peter nunda amboda fira, nu darigedo ira jokáda teterusira. Teredo, embo nunda tamo doghusera, a kotugo eni gifua doghusera, avanembo fafasirero gosusira. 7 Gifua doghari resena emo, jo embo giti setena ainghae dabade tate fasiraeri. Amo, nu ruvedo ajagha fasiriri gosusira. 8 Gosiri ainda amboda, Iesu da ambo jimbi setena aimi, ira teterusira. Tere ava gido, nu tumondusira. 9 (Avata Iesu, ambarida ghe eraetira ava, God da Geka ijugusira amo, nengae Peter ghae da jiro munjuda jo terae irei.) 10 Gero dadabetiri, nengae Peter ghae jovereghe natida iseri. 11 Mary nu isaghada fete sorara use, ghounghedo ofofo jokáda gosusira. 12 Fuge gosusira amo, aneya etoto naká embo foyago asugedo, aminda anumbirero gosusira. Iesu da tamo reda fasusira aminda, eni gifuakena, a eni atakena anumbirero gosusira. 13 Nu nemoá gosiri, ne ategi useri, "Evetu, ni redae sorara eresi?" setero, nu mino nemokena sisira, "Nanda Bajari budo aera. Avata vasa reda fitera ava, na erebunena." 14 Aminge sise jovereghusira amo, gukakena Iesu fetiriri gosusira avata nu bunisira. 15 Buniri, Iesu numokena ategi usira, "Evetu, ni redae sorara eresi? Ni mavejo ava kakova eresi?" Aminge setiri, nunda kotari mo, nu vare kaifa katova sedo, numokena eminge sisira, "Kaifa kato, ni Iesu da tamo bu ya reda fitaresa amo, vasaá saso ningido, na ya baone!" 16 Aminge setiri, Iesu numokena sisira, "Mary!" Setiri ningido, numokena jovereghedo, Jusi embo da gekaimi, "Rabonai!" sisira. (Ainda tuka mo, namondeda gekaimi, 'Ijuga Kato!' seraera.) 17 Setiri, Iesu numokena eminge sisira, "Erá nanda tamo jigheose! Ainda beká mo: na Afakena jo ya buvae irena. Nu, ni yasi! Nanda nano namendikena buvudo eminge se ningore, 'Na jovereghe yari dae erena, nanda Afa, a nenda Afakena, nanda God, a nenda God kena,' aminge se nanda ambo jimbi ningore!" 18 Aminge setiri ningido, Mary jovereghe ira, nu Bajari nange gosusira, a nunda geka ava namanekena setiri nininguseri. 19 Fura Tomanako daba aminda tumba jiriri, namane Iesu da ambo jimbi totorugedo, guro boragai gagojuseri. Ainda beká mo: namane Jusi embo da babojegaridae oju useri. Namane totorugedo aminda dabade edo irero, Iesu fira namanenda jokáda isagha e fetedo sisira, "Ireva. Erá oju eove! Dubo jama nemokena irare!" 20 Aminge sedo, nunda ungo tautai dorusera, a nunda reimada gorobai gae basisera da buvá ava, ijugetiri namane gosuseri. Namane nu gido, ivuga beká ava useri. 21 Ainda amboda, Iesu sekago namanekena eminge sisira, "Erá oju eove! Dubo jama nemokena irare! Kau nanda Afa namo dirigetiri fusena aminga ava, na ne dirigaono yareva." 22 Aminge sedo, nu fira namanekena nunda ghamo asegedo eminge sisira, "Asisi Kakara buvu! 23 Ne endada irise, evetu genembo da ari ekoko kote doyareva amo, God Afa utuda irise, evetu genembo daba ainda ari ekoko kote doyarira. O evetu genembo mendeni da ari ekoko jo kote doyae areva amo, God Afa barago, evetu genembo daba ainda ari ekoko, jo kote doyae arira," aminge sisira. 24 Namane Iesu da ambo jimbi 12 ava iriara amo, namanenda genembo eni, javo Thomas ri. (Nunda javo Rome embo da gekaimi, Didymus seraera. Ainda tuka mo: takegha sirorariri.) Thomas mo, Iesu fira namanekena buvudo isagha usira ainda sifoda, nu jo aminda iraeri. 25 Ava sedo, namane numokena siseri, "Bajari namanekena isagha etiri gosumutari." Setero, Thomas sisira, "Tauta nunda ungoda dorusera da buvá, a nunda reimada gae basisera da buvá ava, nanda ungoi jighi gae arena amo, na jo tumondae arena," aminge sisira. 26 Fura eni dadabetiri, namane Thomas de dabade sekago kamboda totorugedo, guro boragaimi gagojuseri. Avata Iesu sekago fira, namanenda jokáda isagha etiri gero eminge sisira, "Ireva. Erá oju eove! Dubo jama nemokena irare!" 27 Aminge sedo, Thomas kena sisira, "Ninda ungo sirege vivisedo itatame gi! Nanda ungo evirere! A kotugo ninda ungo, sekago sirege nanda reimada jighi gi! Erá buneose! Na tumondaso dae resena." 28 Aminge setiri, Thomas mino sisira, "Arie, nanda Bajari! Arie, nanda God! Na oroko ava tumonderena." 29 Setiri, Iesu numokena sisira, "Ni gosuse aindae tumonderesa. Avata, mave na jo gae irise, tumondarira amo, nu ivuga beká ava arira," aminge sisira. 30 Iesu ari mendeni mendeni a tano mendeni mendeni eari gido, namane dudukughedo ghusera amo, jo isambu buku einda jokáda gembaeri. 31 O, buku einda jokáda geka rea gembena, ainda susu mo: ne Iesu tumondaovo dae sedo gembeni. God Genembo eni mutari furare dae sisira amo, numori. Ava tumondaovo dae sedo gembeni. A kotugo, nu God da Mandi beká ava tumonduse, nunda javoda jebuga evovodae irari ava, baovo dae sedo gembeni.

21

1 Ainda amboda, Iesu namanekena sekago uvu da teria irira, javo Taibirias (o mokogo mo, namonde uvu da teria javo Galilee seraera), aminda isagha etiri gosuseri. Amo, emingusira. 2 Simon Peter, Thomas (o Didymus seraera), Nathanael (amo reighi Keina, Frovensi Galilee aminda irira, ainda genembo eniri), Zebedee da sasingu etoto naká (Amo namane koroghaeri.), namanenda kokomana etoto ainde dabade iriari. 3 Simon Peter eredo eminge sisira, "Na vose ya oka bambarena." Aminge setiri, namane isambu siseri, "Avori, namonde isambu yaore!" Aminge sedo, namane vosera ghakada+ vosedo, voto fugutero sifo atutusira ava, eniko jo baeri. 4 Sifo atutiri, Iesu fira uvu da teria ainda betuda fefetusira. Avata namane nu buniseri. 5 Aminda fetirise, eminge sisira, "Gigimasa, ne oka eni bevu?" aminge setiri, namane siseri, "Tefo, eniko jo baeri!" 6 Aminge setero, nu namanekena sisira, "Nenda voto voyuva gimandukena fugevu vosari oka barido baove!" aminge setiri, namane barido oka digariá jokáda edo, jumbari buniseri. 7 Amingusera ava gi kasama edo, Iesu nunda ambo jimbi dubo budo ghusira aimi, Peter kena sisira, "Omo Bajariri!" setiri ningido, Peter nunda tamo asugari ava asugedo, Iesu kena yari dae sedo, uvuda jorughe vosedo numokena isira. (Nunda tamo asugari bu asugusira setena ainda beká mo: nu oka bambari dae sedo, nunda tamo asugari kosughe fitiri irisira, ava bu asugusira.) 8 Namane mendeni voyuva jumbu vitéra ghonesada vivituseri. Namane jo soka iraeri, betuda ghedo 100 mita (metres) aminga ava vitera ghonesada vivituseri. 9 Namane ghaka+ darido, vivituse gosusera amo, Iesu nu farava dengesida fitido, avaraka usedo oka ingutiri gosuseri. 10 Gosero, Iesu namanekena sisira, "Oka bambeva ava, mendeni budo fuvu!" 11 Aminge setiri, Simon Peter jovereghe vosira ghakada+ vitido, sonembedo voyuva jumbu viti fera ghonesada ifarata useri. Ainda jokáda, oka babai a digari ambariá, isambu 153 ava bariseri. Oka digari, avata voyuva jo bejaeri. 12 Iesu namanekena sisira, "Fuvu, bayau mindove!" aminge setiri, namane oju use, nu mavejori, ava jo se ningae useri. Ainda beká mo: namane kasama useri, nu namanenda Bajariri. 13 Iesu ira, farava ava budo namanekena ghasisira. Kotugo oka budo, ari daba ava usira. 14 Iesu giti ambarida ghe jebuge erorusira, ainda amboda umbu etoto naká fira namanekena isagha etiri gosuseri. O sifo aminda amingusira, ainde dabade fira umbu etodaba naká usira. 15 Namane bayau mindero dadabetiri ainda amboda, Iesu Simon Peter kena sisira, "Simon, John da mandi, nimokena resena. Ni na dubo bu gogoghomberaesa, ai, roera a evetu genembo evia dubo buraesa?" aminge setiri, Simon numokena minonda sisira, "Ai, Bajari, redae resesi? Na ni dubo buraena amo, ni kasama eresa." aminge setiri, Iesu sisira, "Nanda sifi (sheep) da mandi sasingu ava, kaifa aso dae resena." 16 Aminge sedo, sekago ategi usira, "Simon, ni na dubo buraesa, ai?" aminge setiri, Simon sisira, "Ai, Bajari, redae resesi? Ni dubo buraena amo, ni kasama eresa." aminge sisira. Setiri, Iesu numokena sisira, "Nanda sifi ava kaifa aso dae resena." 17 Aminge sedo, giti umbu etoto naká sisira amo, sekago kau daba ava ategi usira, "Simon, ni na dubo buraesa, ai?" sekago aminge sisira. Setiri, umbu isambu etodaba naká kau daba ava ategi usira, aindae Peter dubo mema use sisira, "Bajari, ni roera isasambu kasama eraesa. Na ni dubo buraena amo, ni kasama eresa." Aminge setiri, Iesu numokena sisira, "Nanda sifi ava kaifa aso dae resena. 18 Na nimokena geka beká resena. Ni giti gimasada iriasa amo, ni eredo gogho edo, reda yari kotedo ghusesa amo, aminda ya foa ghedo ghusesi. O ni embako aresa amo, evetu genembo mendeni nimokena foa buvoro, ni ungo siregaso bundedo, vasa ni imboe aresa aminda, bu yarera." 19 (Iesu aminge sise, Peter nu nange nange ambududuruse, God da javo jighari erarira, ava ijugusira.) Ainda amboda, Iesu Peter kena sisira, "Nanda amboda amboda fu!" 20 Setiri, Peter jovereghedo, fuge gukakena gosusira amo, Iesu da ambo jimbi eni Iesu nune dubo budo ghusira, a kotugo mave bayau rise baghedo ira, Iesu kena nu mave aito arira aindae ategi usira, ava gosusira. 21 Peter fuge nu gido, eminge sisira, "Bajari, seteso ningeni. Kotugo, genembo emo nange ambari?" 22 Aminge setiri, Iesu numokena sisira, "Amo erá koteose! Nane saono irari, na jovereghe furarena amo, nanda sariri. Jo ninda iraeri. Ni taká nanda amboda amboda furaso dae resena." 23 Iesu aminge sisira, ainda bino ava ivegedo isira, nunda dorevarekena. Amo, genemboá jo ambae aetira ava tumonduseri. Avata kotugo, "Nu jo ambae irarira," ava Iesu jo saeri. Iesu eminge sisira, "Amo erá koteose! Nane saono irari, na jovereghe furarena amo, nanda sariri. Jo ninda iraeri," Iesu Peter kena geka aminge sisira. 24 Avori, geka Iesu Peter kena sisira amo, nandae sise sisira. Nane geka sise eregefena emo, namane kasama erera, geka bekári. 25 Avori, Iesu tano a ari mendeni mendeni usira amo, na jo gembaeri. O namonde nunda ari ava isasambu gembaetera amo, avose resena, enda emo bukuimi ganjibaeti. Avori, nanda geka tano eviri.