1

1 Ene busapa nayamopa Pii doko kareya. Pii doko Anatupa kareyambi. Pii doko Anatu dokonako angingyuo kareya. 2 Ene busapa nayamopa baa Anatupa kareyambi. 3 Anatumi keta bange peparae wasiya. Bange mendepe baa keta wasa nayamopa pulyiyande daa. 4 Baa letena renge doko renge kuiyuo kareya. Letena renge doko isa wambu keta yanga paupau lanyi peeyakamiya. 5 Iminjingi panda dokona yanga paupau lakamilyamopa iminjingi doko yanga paupau lenge doko kapa kunja nange. 6 Anatumi akali mende kingi Jone lenge doko pena leyamopa epeya. 7 Baa yanga paupau lenge dokona waili pii lao akali peparaeme pii doko kinyilyamo lao suu pyapala mona malnyale lao karala epeya. 8 Baa range yanga paupau lenge doko angingyuo kareyande daa. Baa yanga paupau lenge dokona lao waili pii minyuo epeyasa piya. 9 Yanga paupau lenge angi wambu peparaena suu pingi dokona yanga paupau lanyi peenge doko isa yuu dakena epo kareya. 10 Baame isa yuu dake wamba wasiyamo dokona epo kareyamopape isa wambu dupwame baalamo lao kando soo nyii nayami. 11 Banya yuu range dokona epeyamopape banya wambu dupwame baa yako lao nyii nayami. 12 Yako lao nyii nayaminyipape wambu baa yako lao nyepala banya kingi doko kapa ingingi lao suu pyapala mona maipa piyami dupwa Anatunya wane wanake ingyuo karena lapa piya. 13 Isa akalimi ranjama rongo pilyamo yanengena yulu palyuo manjo nyero lao suu pyapala manjo nyingi dopa pyuo manjo nyiyaminde daa. Anatumi nakama manjo nyiya. 14 Pii doko baa isa wambunya yongo nyepala namwa pipya role pyao kareya. Kinyinya rengepe mona keyange palyuo ipingi rengepe baa keta palyuo simbuyamopa ama yanga paupau lao kareyamo kandeyama. Baa Ikinyingi mendaki dokona Rakangeme yanga paupau lao karenge renge doko baa keta pyamaiyiyamo kareya. 15 Joneme baasa kando dopa lao pii ketae palyuo leya. Mendende enakana eparamo doko baa wambowana karenge dokona namba baapa manda manjo kapa kara nalyo leyo kande doko akali dakeŋe leya. 16 Mona keyange palyuo ipingi renge baa keta palyuo simbulyamopa imambunya renge keyange dupwa namwa peparae konda pyuole jepa pingi. 17 Mawa Pii doko Mosese keta jiya. Enakana dokopa mona keyange palyuo ipingi rengepe pii angi kinyinya renge dokope Yesu Koraisa baa keta paleyamopa epeya. 18 Mendeme Anatu kanda nange. lkinyingi mendaki iki doko Rakangena mona enge dokona karenge dokome baa apiyakalende lao rolo leya. 19 Juu wambumi purisi lapope Lipae rara dokona lapope Jerusaleme karo Jone baa apa pyuondepe lao piso sela pena leyami. 20 Dokopa Joneme kalyama napala dopa lao polo leya. Namba Koraisa daa, leya. 21 Dokopa nakamame piso soo, Dokonako suu pyao emba Ilainjape? leyami. Baame, Namba daa lyakande, leya. Anatunya pii nolako lao epara leyami emba akali dokope? leyami. Baa isingi lao, Daa leya. 22 Dokopa emba apipi lao rolo langipi. Piso sela pupwape lami dapwa nakama pii mende isingi lamairama ingilyamo. Emba rangesa suu pyao apiyakalende karene lao rolo langipi leyami. 23 Dokopa baa dopa leya. Anatunya poropeta akali Aisayame. Yuu muiyane dokona pii mende, Kamongona kata doko rolo pipwape, Lao karara leyamo doko namba, leya. 24 Dokopa Parisi akali dupwame pena leyamisa epo kareyami akali dupwa dee kamba piso siyami. Emba Koraisa ingya naope Ilalnja ingya naope Anatunya poropeta akali pii nolako lao karara leyami doko ingya naope pyuo karare ramo doko akipamo embame bapitisimo nyakamyuo karene? leyami. 26 Joneme nakama isingi dopa lamaiya. Namba ipwana bapitisimo nyakamyuo karo. Nyakamyuo karapunupape nakama karaminyi raka dokona mendali karamo doko nakama kando see nalyaminyi. 27 Namba wambole ipunupa enakana epelyamo dokosa leto. Banya kimbu suu lyolo doko namba kwaenge dokome kapa polaro ingya nalyamo leya. 28 Yuu Betaui ipwa Jotane dumarena singi Jone bapitisimo nyakamyuo kareya yuu dokona dopa lao kareyami. 29 Dokopa yangama dokopa baa kareyamo dokona Yesu epeyamo kandeya. Kandapala, Anatunya Sipisipi Ikyane isa wambu dupwana koo dupwa nyuo lanyakao para doko kandalapa. 30 Akalinde enakana eparamopa baa wambowana karenge dokona namba baapa manda manjo kara nalyo leyo kande doko lyakande. 31 Baa apisi lao soo gisa nayonopape Isaraele wambu baa soo nyinyale lao ipwa dokome bapitisimo nyakamyuo epeyo leya. 32 Lapala Jone dopa lao lao roleya. Imambu doko yaka wayamu dopale ingyuo yake panda piso lupyuo epo baa keta kareyamo kandeyo. 33 Nambame baa apa pyuonde lao soo gisa nayo. Soo gisa nayonopape namba ipwa dokona bapitisimo nyakamila puu leya dokome namba dopa langiya. Imambu doko lupyuo epo akali mende keta kareya kande dokomeko wambu dupwa Imambu Poo Pyasi dokome bapitisimo nyakamyuo karara langiya. 34 Dokonako ingyuo baa Anatunya Ikinyingi doko kandapala rolo leto, leya Joneme. 35 Dokona yangama dokopa Jonemoo banya disaepole lamape role pyao kareyami. 36 Dokopa Yesu kata epo peyamo kandapala, Anatunya Sipisipi Yakane doko karamo kandalapa leya. 37 Leyamopa disaepole akali dolapo pii doko sepala Yesu peyamo dokona enakana peyambi. 38 Yesu kapu kyuo nakamba enakana epeyambi doko kandapala nakamba lamaiyuo, Aki kotala epelyambinyi? leya. Dokopa nakambame baa lamaiyuo, Rapae (pii doko Mana Lenge dopakale), emba anja palenge? leyambi. 39 Baame nakamba lamaiyuo, Kandala mwua leya. Baa Paleya doko kandala papala poo keloke yuu kwuayamo dokopa baamoo role pyao peteyami. 40 Akali lama Jonena pii sepala Yesu peyamuli pyuo peyambi dokona mende Enduru lenge Saimone Pitana yangonge doko. 41 Baa aopa yangonge Saimone koto kando nyepala dopa lamaiya. Nambwa Mesaya doko kando nyelambano, leya. (Mesaya doko Koraisa dopale.) 42 Baame Yesu kareyamo dokona Pita lanyuo peya. Yesumi baa kandapala dopa leya. Emba Salmone Jonena ikinyingi lyasili. Emba kingi Sipasa larama leya. (Kingi Sipasa doko wambu kingi kana dopale.) 43 Dokona yangama dokopa Yesu Galili dokona paro lao suu pyapala Pilipa koto kando nyepala namba paronuli pyuo ipupi, lamaiya. 44 Pilipa baa yuu Betesaita range Enduru Pitapana yuu anda repe repe pyuo karenge dokonako palenge. 45 Pilipame Natauiele koto kando nyepala baa dopa lamaiya. Moseseme Lowa buku dokonape dee Anatunya poropeta akali dupwapeme pepa pyao akali mende epara leyami kande doko Yesu Nasarete range Josepena ikinyingi doko kando nyelamano leya. 46 Natauieleme baa lamaiyuo, Yuu Nasarete dokona aki renge keyange mende pulyingisi? leya. Pilipa baa lamaiyuo, Kandambana bwua leya. 47 Yesumi Nataniele epeyamo kandapala baasa kando lao, Doko Isaraele akali angiŋi panga see nange lyakande leya. 48 Natauieleme baa lamaiyuo, Apa pipyasa embame namba letepe? leya. Yesumi isingi lamaiyuo, Pilipame emba ene kee lapa napyamopa isa piki rengesa isarena pisipinyi dokona emba kandapu leya. 49 Natauieleme baa lamaiyuo, Rapu Pingi emba Anatunya Ikinyingilyamo emba Isaraele wambu dupwana Kiŋilyamo leya. 50 Yesumi baa dopa lamaiyuo, Namba emba isa piki lungwalungwa pisipinyi kandapu, lapunu pii dokona dopa lao suu pilipi? Dake kandapala letenyakao doŋo rengya yulu wakasa lapo kando sere leya. 51 Lapala baame dopa lamaiya. Kinyi kinyi langilyu, yake kata lumbwaramopa Ikinyingi Akali kararamo mare dokona Anatunya aŋala dupwa lupyuo epo pulyuo pao pyuo kararami kandare leya.

2

1 Yuu lama epo papeyamopa yuu Kena yuu Galili dokona singi dokona enda mende yapo nyiyami. Dokopa Yesunya endangi dokona role pyao peteya. 2 Dokopa Yesumoo banya disaepole pipya enda akalipa nyilyambinyi dokona kandala epena leyami. 3 Dopa piyambinyipa waene ipwange nao oteyamisa Yesunya endangi dokome baa lamaiyuo, Nakamana waene ipwange daalyamo leya. 4 Dokopa Yesumi baa dopa lamaiyuo, Embame namba aki mende pinya lao suu pilisi? Nambana yuu gii ene pyaka sepa nalyamo leya. 5 Leyamopape banya endangi dokome yulu pingi wambu dupwa dopa lamaiya. Baame nakama mende pipwa leya kande dokona palyuo pipwape leya. 6 Juu wambu dupwa nakamana yulu palengenyili pyuo yanenge wate pingi dokona lao kipwa pee kameya pakinyamange pyakambwaro kaname wasisi dusipa reteyaminyi siya. 7 Doko kandapala Yesumi lao, Pee dusipa ipwa kyano pyuo simbwalapape leya. Leyamo dokopa pee kambu dokona kyano pyuo simbuyami. 8 Dokopa, Epapu lama kamuo nyepala nenge nao petaminyi akali rapu pyuo petamo dokona minyuo pupwa leya. Dokopa minyuo peyami. 9 Dokopa nenge nao peteyami akali rapu pyuo peteyamo doko mee ipwa doko pao waene ipwange ingiyamo doko nakanju siya. Baa anjarae sipyamo nyimi lao soo gisa naya. (Soo gisa nayamopape yulu pingi wambu kamuyami dusipame soo gisiyami.) Baame soo gisa nayamo dokome enda yapo nyiyamo akali doko epena lapala 10 dopa lamaiya. Wambu peparaeme nakamana waene ipwange keyange doko wambo mokwa soo malngi. Mallyaminyipa wambu dupwame malu napelyaminyi dokopa enakana waene ipwange aeyange dupwa mokwa soo malngi kandale. Dopa pilyaminyipape embame dakepale waene keyange doko wambo mokwa soo mai napala ene dakepa mailinyi leya. 11 Yuu Kena yuu Galili siyamo dokona Yesumi yulu andake doko kanda soo lasaka piya. Dokome banya yanga paupau lenge yulu doko nolakaya. Dokopa banya disaepole dupwame baa kapa ingingilyamo lao suu pyapala mona maiyami. 12 Enakana baamoo endangimoo banya yangonge dupwape disaepole dupwa pipya yuu Kapaneame dokona lano peyami. Papala yuu dokona yuu lapo kareyami. 13 Dokopa Juu wambunya Pasopa nenge nenge gii doko pyaka siyamopa Yesu Jerusaleme dokona lalyuo peya. 14 Papala tembole anda dokona bulamakaope sipisipipi, yaka wayamupi ropo pingi akali dupwa dee kana yango alowa pingi akali dupwape pyuo peteyaminyipa kando nyiya. 15 Kando nyepala puu walenge lapo minyuo kambwa pyapala dupwa peparae sipisipipi bulamakaope tembole anda dokona kara nana lao pyaroko pyao ralinyi nembeya. Nembapala kana alowa pingi akali dupwana kana kulimbwanyi nembapala rate dupwa minyalyapala pyale lapa piya. 16 Pyale lapala yaka wayamu ropo pyao malngi akali dupwa kando dopa lamaiya. Bange dapwa minyuo pupwa. Nambana Rakanena anda dake bisinase anda ingyuo karaka nana leya. 17 Dokopa banya disaepole dupwame pii pyasi palenge dokona, Embena anda suu pyao yulu andake isare rao pyuo kararo, pii pyasi palenge doko suu piyami. 18 Baa dopa piyamo dokopa Juu wambu dupwame baa lamaiyuo, Renge andakende emba keta palipyamo pilyuŋu lao yulu andake mende pyuo lasaka pyaale leyami. 19 Yesumi isingi dopa lamaiya. Tembole anda dake pyao lalinyi nembarami ramo dokopa namba yuu remasa dee piru. 20 Dokopa Juu wambu dupwame dopa leyami. Tembole anda dake ee kana akalisa pao kisima ipisu pakinyamange pyakambwaro piyami kande doko kaepala embame yuu rema piru letepe? leyami. 21 Dopa leyaminyipape Yesumi banya yanenge doko suu pyao tembole anda doko makande minyuo leyasa piya. 22 Dokona suu pyao baa enakana kumuo paleyamopa minyalyuo nyepeyamo dokopa banya disaepole dupwame dopa leya kande lao suu piyami. Lao suu pyapala pii pyasi palenge dokope Yesu leyamo pii dokope pii kinyilyamo lao suu piyami. 23 Pasopa nenge nenge gii dokopa Jerusaleme karo yulu andake pipa pyuo kareyamo dupwa kandapala wambu malu dupwame banya kingi dokona kapa ingingi lao suu piyami. 24 Lao suu piyaminyipape Yesu nakamana mona anda kandenge dokome baa nakama pipa mona mendakinya palyapa nao kareya. 25 Baame isa wambunya monarena soo gisingi dokome mendeme isa akali dopa pyuo pingiŋi lao baa lamairami ingya naya.

3

1 Parisi akali mende Nikotimasa lengende kareya. Baa Juu wambunya akali mupwa ingyuo kareya. 2 Kukwa mendepa akali doko Yesu kareyamo dokona epapala dopa lamaiya. Rapu Pingi Anatumi emba puu leyasa mana lao epee doko namwa silyamano. Dokona lao embame yulu andake lasaka pyuo karene dupwa akali mendeme pyuo kararo laramopa Anatumi nyiso kara nara ramo baa pinya saka nara ingilyamo leya. 3 Yesumi baa lamaiyuo, Kinyi kinyi langilyu, mendalipi kyaka ingyuo manjo nyii nara ramo dokome Anatunya isingi yulu doko kando nyii nara leya. 4 Nikotimasame baa dopa lamaiya. Apa pyuo andapae doko dee manjo nyingi? Endanginya ingi anda dokona kamba pao paliramo kapa manjo nyingisi? leya. 5 Yesumi dopa lao isingi lamaiya. Kinyi kinyi langilyu, mendali ipwana palyuo nyuope Imambu dokomepe manjo nyii nara ramo dokome baa Anatunya isingi yulu dokona sukusa parande daa. 6 Yanenge karengendeme mandenge dokona yanengeko pyaka lyingi. Imambu dokome manjo nyingi dokopa imambu ingingi. 7 Emba kyaka ingyuo manjapenge ingilyamo lao karo dokona mona nemba napipi. 8 Porambalye doko mee maso epenge. Emba poo lao epelyamo mee singi. Doko anja piso epapala lao anjarena pelyamo lao see nange. Doko suu pyao Imambumi manjo nyingi wambu dupwa peparae kata mendaki dokonako ingyuo penge leya. 9 Nikotimasame lao, Doko apa pyuo pingi? leya. 10 Yesumi dopa lao isingi lamaiya. Emba Isaraele wambunya mana lenge ingyuo karene kande dokome pii doko soo nyii nalepe? 11 Kinyi kinyi langilyu, namwa soo gisilyamano dokona polo laope, angi kandenge doko rolo laoko pyuo karelyamanopape nakamame namwana pii doko soo nyepa nange. 12 Nambame isa yuunya yulu palengenyili pyuo langyalono dokopa pii doko kinyilyamo lao suu pyaa nalene dokona yake pandana yulu palenge dokona langirunu dokopa apa pyuo kinyilyamo lao suu pyarese? 13 Akali mende yake panda sukusa dokona pulyuo paa nange. Ikinyingj Akali yake panda dokona karo lupyuo epeya dokoko iki penge. 14 Dee, Moseseme yuu muiyane dokona kau doko ketae minyalyiya doko suu pyao Ikinyingi Akali ketae minyalyarami ingilyamo. 15 Dokome wambu baa kapa ingingi lao suu pyapala mona mairami dupwa kyaka palenge renge kulisa doko kapa nyerami ingilyamo leya. 16 Anatumi isa wambu dupwa ama mona retapala banya Ikinyingi mendaki dokoko jiya. Dokona baa kapa ingingi lao suu pyarami dupwa kwalu kwao kwaa napala kyakana renge palu palenge doko nyerami. 17 Dokonako ingyuo Anatumi Ikinyingi dokome isa wambu dupwa yapalya yapana pyuo lao koo keta palyala pena leyande daa. Baame isa wambu dupwa lete wai pyao nyera lao pena leya. 18 Baa kapa ingingi lao suu pyapala mona mairami dupwa kambuyanda pyuo lao koo keta paiyaramo kara narami. Mendeme baa kapa ingya nange lao suu pyapala mona mai nalyaminyi dupwa epapu kambuyanda pyuo koo keta palyapyamo karaminyi. Anatunya Ikinyingi mendaki dokona kingi doko kapa ingya nange lao suu pyapala karaminyi dokona kote pii palamo. 19 Yanga paupau lenge doko isa panda epeyamopape isa wambu dupwame baa mona mai napala yulu koo pingi dokome iminjingi yulu dupwa mona mailyaminyi renge dokona kote pii palamo. 20 Wambu yulu koo pingi dupwa peparaeme yanga paupau lenge doko awa napala nakamana yulu koo dupwa nolako see nana lao yanga paupau lenge dokona epa nange. 21 Dopa pilyaminyipape yulu angi rolae pyuo karenge dupwame yanga paupau lenge panda dokona pyuo karenge dokome wambu peparae nakama Anatunya yulu rolae pyuo karaminyi doko kandarami. 22 Enakana Yesumoo disaepole dupwa pipya yuu Jutia dokona peyami. Dokona baa nakama role pyao karo bapitisimo nyakamyuo kareyami. 23 Jone baame opetae bapitisimo nyakamyuo kareya. Doko yuu Ainone yuu Selima repeta ipwa malu siyamosa dokome yuu dokona bapitisimo nyakamyuo kareya. Dokopa wambu dupwa epo bapitisimo nyiyami. 24 (Jone karapusi anda dokona ene palipa nayamopa piya.) 25 Dokopa Jonena disaepole dupwape Juu akali mendemoo Juu wambumi misi yulunya yanenge wate pingi dokona lao apiyanda piyami. 26 Dokona lao Jone kareyamo dokona epapala baa dopa lamaiyami. Rapu Pingi, emba akali ipwa Jotane dumurena kareyambi dokosa kando lao rolee kande dokome dae karo bapitisimo nyakamyuo karapyamopa wambu peparae baa karapyamo dokona papa pyuo karaminyi kande, leyami. 27 Joneme isingi lao dopa leya. Yake panda rae dokome mende mai nara ramo doko wambu mendeme kapa nyera ingya nara. 28 Namba Koraisa daa. Banya lenge kambu dokona puu lapyasa epelyo leyo kande dokona lao nakama rangeme soo lalaminyi kandapi. 29 Akali enda nyera ingilyamo doko nyera. Dokopa banya andare dokome banya pii soo raerae minyuo karenge doko suu pyao namba epapu raeme kumuo karo. 30 Banya yulu doko ando nyimbu paramopa nambana yulu doko kukyu para ingilyamo leya. 31 Yake panda rae epelyamo doko peparaena ketae ingyuo karamo. Mee isa akali dupwa isa wambumi manjo nyisinde karenge dokome banya pii doko isa yuunya pii lao karenge. Yake panda rae epeya doko peparaena ketae ingyuo karamo. 32 Baa kandeyamo dupwa lao rolo karapyamopape mendeme banya pii doko yako lao sepa nalyaminyi. 33 Mendeme banya pii doko yako lao separa ramo dokome baa Anatu kinyi angilyamo lao soo giso parasa pira. 34 Dokona lao Anatumi mapanyi peeyamo epeyamo dokome Anatunyako pii lao karamo. Anatumi Imambu doko pingyapala malnginde daa. 35 Rakange dokome Ikinyingi doko mona retenge, dee, baame bange yulupi peparae banya kingi kape dokona reteya, 36 Ikinyingi baa kapa ingingi lao suu pyapala mona maiyuo karaminyi dupwa kyakana renge kulisa palu palenge doko nyerami. Mendeme Ikinyingi doko laramuli pyuo pyuo kara naramo doko kyakana palenge renge doko kando nyii nara ingyaramopa Anatunya imbu singi doko baa keta palira.

4

1 Parisi dupwame Joneme wambu mendasipa iki bapitisimo nyakamipyamopa Yesu baame andare nyakamilyamo lao soo manjo nyiyami. 2 (Yesu baa rangeme bapitisimo nyakamyuo kara naya. Banya disaepole dupwame nyakamiyami.) 3 Parisi dupwa soo karaminyi lao soo gisapala Kamongo dokome yuu Jutia yaki nyepala yuu Galili dokona peya. 4 Baa yuu Samaria yalo para ingiyasa. 5 Yuu Samaria dokona Jekopeme ikinyingi Josepe yuu mende maiya dusa ingyuo yuu anda malu palyuo karenge mende kingi Salka lenge dokona epeya. 6 Jekopena ipwa kamuo nyingi yuwale dokona siyasa Yesu kata pao makapala yuwale repeta dokona peteya. Andawal korakama ingiyamopa peteya. 7 Dokopa Samaria enda mende ipwa kamwala epeya. Yesumi baa lamaiyuo, Ipwa narole jii leya. 8 (Banya disaepole dupwa wambo anda malu palyuo karenge dokona nenge ropo pyala papeyami.) 9 Dokopa Samaria enda dokome baa dopa lamaiya. Akipamo emba Juu akali dokome namba Samaria enda doŋo ipwa naro jii leene? leya. Juu wambu dupwa Samaria wambu dupwa pipya role pyao kara nange kandale leya. 10 Yesumi isingi dopa lamaiya. Emba Anatumi renge keyange jingi dupwa soo giso apimi ipwa jii letamo lao sipili doko embame baa piso serenepa baame ipwa letena renge palenge lapo jipyali, leya. 11 Enda dokome baa lamaiyuo, Aeya, embena pee kamuri doko see nao ipwa kamungi yuwale doko ama kyuwa ingyuo pilya kande dokopa ipwa kyakange doko embame anjarae nyingisi? 12 Namwana rakange kyawa Jekopeme ipwa kamungi yuwale doko kyasiya dokome baa range ipwa kamuo neyamopa banya ikinyingi dupwame nao dee banya bulamakaope opetaeko nao kareyami akali dokopa emba wakasa ingyuo karepe? leya. 13 Yesumi baa dopa lamaiya. Ipwa dakena narami dokopa yango nano nano pira. 14 Ipwa namba malrunu mendeme narami dupwa yango nano ama pii naramopa mona dokona guu lao endangi palyuo karara. Dokome kyakana renge palu palenge dokome baa keta ranjo neta epara leya. 15 Enda dokome baa lamaiya. Aeya, namba ipwa yango nano pii naramopa dee dae kamwala epa nare lao ipwa doko jepe leya. 16 Yesumi baa dopa lamaiya. Emba papala akalinyi kee lapala dee dae epale puu leya. 17 Enda dokome isingi lamaiyuo, Namba akali kara nange leya. Yesumi baa lamaiya. Embame namba akali kara nange lalyane doko kinyi leene. 18 Emba wamba akali kingi paki nyepa pyuo petee, epapu nyuoko petene doko embena akalingi angi daa doko kinyi lalene kandapi, leya. 19 Enda dokome baa dopa lamaiya. Aeya, emba Anatunya poropeta akalilyamo lao soo manji nyilyu. 20 Namwana rakange kyawa dupwa yuu kyau dakena Anatu ketae pyambuo yako lao kareyami. Kareyaminyipape Juu nakambame lao dokopa Jerusaleme dokona akali dupwa Anatu ketae pyambuo yako lao karapenge ingilyamo letaminyi, leya. 21 Yesumi baa lamaiya. Enda, namba kinyi letene lao suu pyaa, yuu gii mende pyaka seramo dokopa yuu kyau dakenape Jerusalemepe dolaponako Rakange doko ketae pyambuo yako lao kararaminde daa. 22 Nakama Samaria wambu dupwame api mende ketae pyambuo yako lao karaminyi doko angi sepala pilyaminde daa. Lete wal pyao nyingi yulu doko namwa Juu wambu dupwa keta epelyamo dokona soo gisapala Anatu ketae pyambuo angingyuo lao karamano. 23 Dopa pyuo karamwanopape yuu gii mende pyaka sera ingyapyamo doko epapu pyaka silyamo dakepa wambu Anatu dokona angi rolae ketae pyambuo yako larami dupwame Rakange doko imambunya kulisa palyuo ketae pyambuo yako larami inguyamo. Dokonako ingyuo Rakange dokome wambu dopale baa ketae pyambuo kingi lao karamili lao koto karamo. 24 Anatu baa imambuŋu dokome wambu baa ketae pyambuo yako lao karaminyi dupwame imambunya kulisa palyuo ketae pyambuo kingi larami ingilyamo leya. 25 Enda dokome baa dopa lamaiya. Mesaya (Koraisa lenge doko) epara ingilyamo doko namba silyu. Baa epapala dokopa yulu peparae pano laralyamo leya. 26 Yesumi baa lamaiyuo, Embame baa epara lao karene doko epapala pii langyuo karamo leya. 27 Gii dokopako banya disaepole dupwa aopa epeyami. Baa enda mendepa pii lao pisambinyilamo lao mona nembeyami. Mona nembeyaminyipape mendeme, Aki nyipuli lao dopa pilinyi? laope, Baapa pii akinya lao petambinyi? laope laa nayami. 28 Dokopa enda doko ipwa pee doko yaki nyepala pao anda malu palyuo karenge dokona papala wambu dupwa dopa lamaiya. 29 Akalindeme nambana yulu pyuo karenge dupwana peparae polo lalamo doko kandala ipupwa. Baa Koralsape? leya. 30 Leyamopa anda malu palyuo karenge dokona wambu peparae anda yaki nyepala baa kareyamo dokona panya peyami. 31 Dokopa disaepole dupwame baa piso soo, Rapu Pingi, emba nenge lapo nalase leyami. 32 Leyaminyi dokopa baame nakama lamaiyuo, Namba nenge naro dalapo aeyapyamo peto doko nakama see nalyaminyi leya. 33 Dopa leyamo dokopa disaepole dupwa nakama lao, Mendeme baa nengende minyakamyuo imipi? leyami. 34 Yesumi nakama lamaiya. Namba mapanyi peeyamo doko laramuli pyuo pyuo karo banya yulu pyuo kondanyi nembaro doko nambana nenge. 35 Nakama, Kana kisima epo paparamopa ee jingi lyerama lenge kandale. Ee dupwa epapu dakepa jingi minyingi kondapapyasa lyerama ingilyamo doko lenge pendakae lapala kandalapa. 36 Ee range akali nyiso jingi lyakamyuo karamo akali doko epapu yole nyilyamo. Baa jingi lyuo kyakana renge kulisa palu palenge sukusa dokona malu palyuo retelyamo. Dokopa walngi randa lenge akali dokope jingi lyuo karara dokope role pyao raerae maiyuo kararambi ingilyamo. 37 Nakamame, Mendeme walngi randa lenge, wakale mendeme jingi lyingi lao karenge kandale. 38 Dokoŋo nakama renge pyuo piyaminde daa dokona jingi lyela pupwa leyo. Wambu wakale lapome renge pyuo wara pyuo kareyaminyi apo dokona epapu nakamame lyuo karaminyi leya. 39 Enda dokome, Baame namba yulu pyuo karenge dupwana peparae namba kando polo lalamo, leyamosa Samaria wambu malu anda repe repe pyuo karenge range dupwame baa kapa ingingi lao suu pyapala mona maiyami. 40 Dokopa Samaria wambu dupwame baa kareyamo dokona epapala role pyao karamanale lao baa piso siyaminyisa yuu dokona baa yuu lama kareya. 41 Dokopa banya pii doko sepala wambu konda pyuowale baa kapa ingingi lao suu pyapala mona maiyami. 42 Dupwame enda doko dopa lamaiyami. Epapu embena piiko minyuo baa kapa ingingi lao suu pyao karamande daa. Namwa rangeme banya pii soo nyelamano dokona baa angi isa wambu dupwana Lete Wai Pyao Nyingi akali angi ingyuo karamo doko soo gisilyamano, leyami. 43 Yuu lama epo papeyamopa yuu doko yaki nyepala baa yuu Galili dokona peya. 44 Dokona suu pyao Yesumi lao, Anatunya poropeta akali banya yuu range dokona wambu dupwame banya pii doko rape rape lao see nange leya. 45 Samaria yaki nyepala Galili epeyamo dokopa Galili wambu dupwame yako lao nyiyami. Wamba Jerusaleme dokona nenge nala pao kareyaminyi dokopa baame yulu pyuo kareyamo dupwa peparae kandeyaminyi dokome baa yako lao nyiyami. 46 Dokopa Yesumi yuu Kena yuu Galili silyamo dokona wambo ipwa doko nyuo waene ingiya dokona dee epeya. Dokopa yuu Kapaneame dokona gapomane akali mende kareya dokona ikinyingi doko anga piya. 47 Yesu Jutia karo Gaili dokona ipyalyamo lao sepala akali doko banya wane kwaeyamo siyasa baa kareyamo dokona papala pyuo nyakala lano ipili yaka lao piso sokondali piya. 48 Dokopa Yesumi baa lamaiyuo, Embame yulu angi andake nolakaenge lapo kanda nare ramo doko Anatu kapa ingingi lao suu pyaa nange leya. 49 Gapomane akali dokome baa lamaiyuo, Yangone, nambana wane kumapa nana lao lano ipu leya. 50 Yesumi baa lamaiyuo, Emba paale embena wane lete karara leya. Akali dokome Yesu pii kinyi langyalamo lao suu pyama kata nyuo peya. 51 Baa lano peyamo dokopa banya yulu pingi akali dusipa kandamae nyepala, Embena wane doko kyakapyamo karamo, lamaiyami. 52 Dokopa baame, Anjokorape ingyuo baa kyakalana pyase? lao nakama piso siya. Piso siyamo dokopa, Epapu neta dalyasa pakiki palipyamopa wane keloke dokopa yanenge isasa doko pyai napya leyami. 53 Rakange dokome gii dokopako Yesumi embena wane doko kyakara lapya kandapi lao soo manji nyiya. Dokopa baa rangemoo banya role paleyami dupwa pipya nakama peparae baa kapa ingingi lao suu pyapala mona maiyami. 54 Yesumi Jutia yaki nyepala Galili epo karo dokopa yulu doko lapo ingyuo pyuo lasaka piya.

5

1 Enakana Juu wambu dupwana nenge nenge yuu gii mende pyaka siyamopa Yesu Jerusaleme dokona lalyuo peya. 2 Jerusaleme dokona sipisipi potemo konanda pyuo papingi kambu repeta dokona ipwa pete mende siya. Doko Ipuru pii lao Betesaita lenge. Dokona anda kauwa kingi paki karenge. 3 Dusipana wambu anga pyao karalu karengepe lenge koope kimbu kwaengepe papae rambungipi ama malu ipwa doko mole mole minyilyape lao kando iso siyami. 4 Dokona lao Kamongona aŋala mendeme yuu gii lapona lupyuo pao ipwa pete doko kalumuli pipa piya. Ipwa doko kalumuli pipa piyamo dokona enakana wambu wambo lambwapa piyami dupwa anga rara wakale wakale piyamo dupwa peparae mee ingyapa piya. 5 Akali mende ee kana akalisa pao akalisa rema ipisu mange lama anga pyao kareyamopa siya. 6 Yesumi baa kandapala ee kana malu dokona siyamo doko soo gisapala baa lamaiyuo, Emba mee ingyapyamopa karapuli yaka lao suu pilisi? leya. 7 Anga pingi akali dokome isingi lamaiya. Yangone, ipwa kalumuli pipa pingi dokopa mendeme namba pete dokona lanyuo parami ingya nange. Ene lambuo pao karelyono dokopa mendali wambo pao pyaka napa pingi leya. 8 Yesumi baa lamaiyuo, Sipurapala embena luu palenge bange doko nyoko minyalu pena, leya. 9 Leyamo dokopa akali doko aopa mee ingiyamo dokopa banya luu palenge bange doko nyoko minyalu peya. Yulu doko koro petenge gii dokopa. 10 Juu wambu dupwame akali mee ingiyamo doko dopa lamaiyami. Epapu yuu koro petenge dokopa embena luu palenge bange doko kapa soo paa nare leyami. 11 Dopa leyaminyipape baame nakama dopa lamaiya. Akali namba pyuo nyipya dokome namba langyuo embena luu palenge bange doko nyoko minyalu puu lapyasa soo pelyo leya. 12 Nakamame baa piso soo, Embena luu palenge bange doko nyoko minyalu puu lapya akali doko apisi? leyami. 13 Yuu dokona wambu malu kareyamisa Yesu kolala puu pao peyamo dokona akali mee ingiyamo dokome apimi pyuo nyakapyape lao soo gisa naya. 14 Enakana dokopa baa tembole anda dokona kareyamopa Yesumi baa kando nyepala dopa lamaiya. Emba mee ingyapyamopa karene kande. Koo andake mende emba keta dee epa nana lao yulu koo dee kamba pyuo kara napipi leya. 15 Akali dokome pao Juu wambu dupwa lamaiyuo, Namba pyuo nyipya doko kingi Yesu, leya. 16 Dokopa Yesumi koro petenge dokopa yulu dopa piya dokona Juu wambu dupwame baa randa maiyuo kareyami. 17 Dopa piyaminyipape Yesumi nakama lamaiyuo, Nambana Rakangeme kaeya napala yulu pyuoko karapyamopa namba yulu pyuo karo leya. 18 Leyamopa baa koro petengena mawa pii doko kokwa siyamo dokona iki baa pyamwali lao suu pyao kareyaminde daa. Baa Anatu doko nambana Rakange leyamo dokopa baapa Anatupa mendarele leyasa piya dokona baa ama pyama lao, lao suu pyao kareyami. 19 Yesumi nakama dopa lamaiya. Kinyi kinyi langilyu, Ikinyingi baame yeelyo sisu lao mende pii nange. Rakangeme pyuo karenge kandelyamo yulu doko iki kapa pingi. Dokonako ingyuo Rakange pilyamuli pyuo Ikinyingi dokome pyuoko karenge. 20 Dokona lao Rakange baame Ikinyingi doko mona reto karapala baame pyuo karenge yulu dupwa peparae lasaka pingi. Enakana dokopa yulu kamame wakasa dupwa iasaka pyuo kararamopa nakama kando yamarangyuo parami. 21 Dokona suu pyao Rakange dokome wambu kumuo palenge dupwa lete minyalyuo nyingi doko suu pyao Ikinyingi opetaeme lapo letena renge malru lao suu pilyamuli pyuo malngi. 22 Rakange baame akali mende kando yapalya yapana pyuo laa nange. Baame wambu yapalya yapana pyuo lenge yulu doko Ikinyingi maiya. 23 Wambu peparaeme Rakange kando ketae pyambuo karaminyi dopako pyuo Ikinyingi ketae pyambuo karena lao maiya. Mendeme Ikinyingi kando ketae pyambuo kara narami dupwame Rakange mapanyi peeyamo doko ketae pyambuo kara naramisa pira. 24 Kinyi kinyi langilyu, mendeme nambana pii soo nyepala namba mapanyi peeyamo doko kapa ingingi lao suu pyao karaminyi dupwa keta kyakana renge kulisa doko palira. Kumungi renge doko yalo epo lete renge dokona karamo dokona baa keta kote pali nara ingilyamo. 25 Kinyi kinyi langilyu, yuu gii mende pyaka sera doko pyaka soo kaepyamopa wambu kumuo palaminyi dupwa Anatunya Ikinyingi pii laramo doko sepala lete parami. 26 Rakange letena renge renge kuiyuo karamuli pyuo Ikinyingi keta pyamaiyiya. 27 Baa Ikinyingi Akali ingilyamo dokona lao kote kapa lara inginyi pyambuya. 28 Pii dake sepala mona nemba nalapape. Yuu gii mende pyaka seramo dokopa wambu malu anda palaminyi dupwa peparae banya kambu dokona pii neta eparamo doko sepala lopo neta eparami. Wambu yulu keyange pingi dupwa lete karalu karalana lopo epo, wambu koo pingi dupwa kwao parami dokona lao lopo eparami. 30 Namba range sipurapala mende pii nange. Anatu baa namba langinginyili pyuo pakana palyuo kote lao rolenge dokome rolae ingyuo penge. Namba range suu pyao mende pii napala namba mapanyi peeyamo dokona pii sepala pinya lao suu pyao karo. 31 Namba rangesa lao laro ramo nambana pii doko bulumbulu mee pyara. 32 Mendalimi nambasa lao lao karenge doko banya pii doko pii kinyi lao soo gisilyu. 33 Jone kareyamo dokona lapo piso sela pena leyaminyipa baame pii kinyi dokona rolo leya. 34 Rolo leyamopape isa akalimi namba nyiso pii mende lamilinya suu pyaa nalyo. Pii doko nakama lete wal pyao paramiŋi lao karo. 35 Jone baa isareŋe rao sinyi piyamosa nakama dokona karalana rae maiyuo kareyami. 36 Dopa piyamopa nambame pii lao karenge dokome Jonena pii doko anale palamo. Dokona lao Rakange dokome yulu pyuo lumwa pipi lao jiyamo nambame pyuo karo dupwameko Rakange dokona namba mapanyi peeyaŋa lao lasaka pilyamo. 37 Doko Rakange namba mapanyi peeyamo dokome nambana lao lakaya. Banya pii lumbuo epenge doko nakamame see nange. Banya apiyakale lao nakamame angi kanda nange. 38 Baame mapanyi peeyamo dokona pii doko soo nyii nalyaminyi renge dokona banya pii nakamame monarena pali napyasa karaminyi. 39 Buku Baepole dokona letena renge kulisa kando nyerama lao suu pyapala nakama yaka letaminyi. Pii pyasi palipyamo yaka letaminyi doko nambasa suu pyao lenge. 40 Yaka letaminyipape letena renge doko karo namba piso sela epa nalyaminyi. 41 Isa akali dupwame namba lakandamili yaka lao suu pyao kara nalyo. 42 Doko nakamana monarena Anatunya mona retenge renge doko pali nalyamo doko soo gisilyu. 43 Nambana Rakangena kingi lao ipunupa namba yako lao nyii nalyaminyi. Mendeme banya rangena kingi lao epara ramo doko baa yako lao nyerami ingilyamo. 44 Yango nakamana kingi wambu yangome ketae pyambuo karamili yaka lao suu pyao karaminyipape Anatu mendaki karenge dokome nakamana kingi ketae pyambuo karapyali lao suu pyao kara nalyaminyi. Dokona lao nambana pii dupwa soo nyii narami ingilyamo. 45 Nambame nakama rakangena lenge kambu dokona karo kote lare lao suu pyaa nalapape. Mosese nakamame suu pyao karaminyi dokona baame nakama kando kote palyuo karara ingilyamo. 46 Mosesena pii piyamo doko kinyi lao siyamili doko baame nambana lao piyara piyaŋa dokona namba kinyiŋi lao soo nyimili. 47 Dokona suu pyao banya pii pyasi palenge dupwa kinyilyamo lao suu pyaa narami ramo dokopa apa pyuo nambana pii dupwa kinyilyamo lao suu pyaramisi? leya.

6

1 Dopa lapala Yesu ipwa Galili pete kingi Talpiriasa lenge dokona dumuwangu peya. 2 Dokopa anga pingi wambu dupwa keta yulu andake pyuo lasaka pipa pyuo kareyamo kandapala wambu ama malu baa peyamo dokona enakana peyami. 3 Yesu yuu kyau pyala pyana pyuo karenge dokona pulyuo pao banya disaepole dupwa pipya peteyami. 4 Juu wambunya nenge nenge Pasopa doko repetale pyaka siya. 5 Dokopa lenge pendekae lapala baa peteyamo dokona wambu ama malu dupwa epeyaminyi kandapala Yesumi Pilipa lamaiyuo, Wambu dupwa nenge narami lao borete apa pyuo ropo pyaramase? leya. 6 Yesumi mende piru lao suu pyapala Pilipa baame mee apa letape lao selena makande pyuo leya. 7 Pilipame baa isingi lamaiya. Kana 200 nyepala borete ropo pyao nyeramanopape wambu mendemepe kolekole pyuo nao pao suu larami ingya nalyamo, leya. 8 Banya disaepole kareyami dokona mende Enduru Salmone Pitana yangonge dokome baa lamaiya. 9 Wane mende dae karamo borete bali jingi dokome wasisi kingi pakipi oma lamape minyilyamo. Wambu ama malu karaminyi doko suu pyao dusipa iki apa pyuo kau lao mairamase? leya. 10 Leyamopa Yesumi, Wambu dupwa isa petena lalapape leya. (Yuu dokona rambi malu paleya.) Dokona akali akalisa pao kingi paki daako ama malu wakasa ( 5,000 ) ingyuo isa peteyami. 11 Dokopa Yesumi borete dusipa nyepala ange lao ateŋa lapala isa peteyami dupwa mokwa soo maiya. Dopako pyuo oma opetae naraminyili pyuo maiya. 12 Maiyamopa nao sikya piyamo dokopa baame banya disaepole dupwa dopa lamaiya. Mee raeyo see nana lao nao malasi silyamo dupwa yapo nyelapape leya. 13 Dokopa borete bali jingi dokome wasisi kingi paki dusipa nao malapala nembeyami dupwa yapo nyuo pisiki minyasi akalisa ipisu lama dusipana paki pyuo simbuo pyoko pyoko leyami. 14 Yulu andake dopa pyuo lasaka piyamo kandapala dokopa wambu dupwame Anatunya poropeta akali isa yuu dakena epara ingilyamo doko akali dakelamo leyami. 15 Banya isingi yulu pyuo karalase lao puu maiyala epanya piyaminyi kandapala yuu kyau pyalya pyana piyamo dokona baa yeelyo nyokonyuo peya. 16 Yuu kwualepalepa dokopa banya disaepole dupwa ipwa muiyane pete siyamo dokona lupyuo peyami. 17 Papala bote dokona pyakambuo pao pisipala yuu Kapaneame dokona panya ipwa pete suku suku peyami. Dokopa iminjareyamopa nakama peyami dokona Yesu ene epapa naya. 18 Dokopa porambalye andake minyapala ipwa doko pyakalya pyakana piya. 19 Nakamana bote doko yulu pyuo kilomita pakinyamange ingyuo peyaminyi dokopa Yesu ipwa dokona yana yana epo bote repeta epeyamo kandeyami. Kandapala pakayami. 20 Dokopa baame nakama lamaiyuo, Dake namba ipunu pilyamo. Paka nalapape leya. 21 Dokopa nakamame rae maiyuo baa bote dokona yako lao nyiyami. Dokopa nakama yuu panya epeyami dokona bote doko aopa epo pyaka siya. 22 Dokona yangama dokopa ipwa muiyane pete dorena wambu mee kareyami dupwame bote mendaki iki sipyamopa Yesu banya disaepole dupwa role pyao bote dokona paa napyamopa banya disaepole dupwa yeelyo kanjakala pumilyamo lao suu piyami. 23 Dee bote Talpitiasa range lapo epo Kamongo dokome ateŋa leyamopa borete nao peteyaminyi mare dokona repeta epo siyami. 24 Dokopa wambu dupwame Yesu banya disaepole dupwa pipya kara nayami doko kandapala bote dusipana nakama pyakambuo pao pisapala Kapaneame dokona Yesu kotala peyami. 25 Enakana Yesu pete dumuwangu kareyamo kando nyepala baa lamaiyuo, Rapu Pingi, anjokorape dae ipisi? leyami. 26 Yesumi nakama isingi lamaiyuo, Kinyi kinyi langilyu, yulu andake lasaka pipunu kandami dokona namba koto epa nalaminyi, Nakamame borete nao sikya pyuo puminyi renge dokona namba koto epelyaminyi. 27 Nenge rumbyara ingilyamo dupwa nyelana yulu pii nalapape. Nenge oo korokoro suiu soo sera doko nyelana yulu pipwape. Nenge doko lkinyingi Akali dokome nakama jera. Dokona lao Rakane Anatumi baa rombo palyiya leya. 28 Leyamopa nakamame, Namwa Anatunya yulu dokona apa pipala piramase? leyami. 29 Yesumi nakama isingi lamaiyuo, Anatumi mapanyi peeyamo doko kapa ingingi lao suu pyapala mona mairami yulu dokoko Anatumi pimili lao suu pilyamo leya. 30 Dokopa nakamame baa lamaiyuo, Dopa lalyane dokona suu pyao aki yulu andake mende namwa pii kinyi lalyane lao suu pyalapape lao lasaka pirisi? Embame aki yulu pingisi? 31 Namwana rakange kyawa dupwame yuu muiyane dokona nenge kingi myana lenge doko nao kareyami. Dokona suu pyao pii dopa lao pyasi palamo. Borete yake panda rae nena lao maiya leyami. 32 Dokopa Yesumi nakama dopa lamaiya. Kinyi kinyi langilyu, Moseseme borete yake panda rae doko nakama angi ingyuo jiyande daa. Nambana Rakangeme borete angi yake panda rae angi ingyuo joo karenge. 33 Dokona suu pyao Anatunya borete yake panda rae isa panda epeya dokome isa wambu kyakana renge doko joo karamo leya. 34 Nakamame baa lamaiyuo, Kamongo, embame borete doko yuu peparae joo karape leyami. 35 Yesumi nakama dopa lamaiya. Borete letena renge palenge doko namba karo. Mende namba karo dokona eparamo dokopa dee lopa nara. Mende namba kapa ingingi lao suu pyara dokome dee ipwa nano pii naramo karara. 36 Nakamame namba lengeme kandapala kando kaeyo kinyi lalyane lao suu pyaa nalyaminyi langyalono kandapi. 37 Rakaneme wambu namba jeramo dupwa peparae namba kararo dokona eparami. Dokopa mende namba kararo dokona epara ramo doko nambame ramanyi nemba naro. 38 Dokona lao namba yake panda karapala isa epo dokopa range suu piyunuli pyuo pila epeyonde daa. Namba mapanyi peeyamo dokome laramuli pyuo pyuo karala epeyo. 39 Namba mapanyi peeyamo dokome baame namba jeramo dupwana mende pyakuiyaka naramopa yuu gii otaramo dokopa minyalyuo nyere lao manjo karamo. 40 Dokona lao nambana Rakange dokome wambumi lkinyingi doko kandapala baa kapa ingingi lao suu pyapala mona mairami dupwa peparae keta letena renge kulisa palu palenge doko palira lao suu pyao manjo karamo. Yuu gii otaramo dokopa nambame nakama minyalyuo nyero, dokoŋo leya. 41 Baame, Namba borete yake panda rae lupyuo epeyo leyamo dokona Juu akali dupwame baa kando mumu leyami. 42 Baa Josepena ikinyingi Yesu lenge banya rakange endangipa dolapo namwame kando soo gisingi doko daande lyasilisi? Dokona epapu apa pisala namba yake panda karo lupyuo epeyo letase? leyami. 43 Yesumi nakama isingi lamaiya, Nakama mumu laa nalapa. 44 Rakange namba mapanyi peeyamo dokome kiyango pii nara ramo doko wambu mende namba karo dokona epanya saka nara. Epara ramo doko yuu gii otaramo dokopa nambame baa minyalyuo nyero. 45 Anatunya poropeta akali dupwame pepana pii mende pyao reteyami. Doko wambu peparae Anatunya mana nyerami ingilyamo, lao palamo. Rakange dokome mana lamailyamosa singi wambu dupwa peparae namba karo dokona epenge. 46 Wambu lapome Anatu kandenge dokonasa lao kara nalyo. Anatu mapanyi peeyamo doko iki baa kandenge. 47 Kinyi kinyi langilyu, wambu namba kapa ingingi lao soo karenge dupwa keta letena range palu palenge. 48 Namba lete palenge dokona nenge angi doko karapunu pilyamo. 49 Nakamana rakange kyawa dupwame yuu muiyane dokona nenge myana lenge doko nao karo pao kumuyami. 50 Borete dake yake panda rae epelyamo doko akali mendeme naramo dokome kuma nara. 51 Namba borete letena renge palenge yake panda rae karo. Wambu mendeme borete dake nara ramo doko baa karalu karara. Nambame isa wambu dupwa lete karalu karamili lao suu pyapala nenge borete makande pyuo nambana yongo malru leya. 52 Dokopa Juu wambu dupwame nakama lao apiyanda pyuo karo, Akali dake apa pyuo banya yongo doko nalapape lao jerase? leyami. 53 Dokopa Yesumi nakama dopa kamaiya. Kinyi kinyi langilyu, Ikinyingi Akali dokona yongo dokope ranjame dokope naa narami ramo doko nakama kete letena renge pali nara. 54 Wambu nambana yongo dokope ranjama dokopa nelyaminyi dupwa keta letena renge palu palenge. Yuu gii otaramo dokopa nambame baa minyalyuo nyero. 55 Dokona lao nambana yongo dokope nambana ranjama dokope nenge kulisa ingyuo pelyamo. 56 Wambu mendeme nambana yongo dokope nambana ranjama dokope narami ramo dupwa nambane arapu dokona kararaminyipa nambame nakama keta maralyuo kararo. 57 Lete karenge Rakange dokome namba mapanyi peeyapala dokome lete karo. Dopako pyuo wambu namba narami dupwa namba keta lete kararami leya. 58 Borete dake yake panda rae epeya doko. Rakange kyawa dupwame napala kumuyami dopale daa. Wambu mendeme borete dake narami dupwa lete karalu kararami leya. 59 Baa Kapaneame dokona mana lao karo dokopa sinakoke anda dokona karo leya. 60 Banya disaepole wambu kareyami dupwana malumi pii doko sepala, Pii doko kapa ingya nalyamo. Apimi kapa soo pisirase? leyami. 61 Dopa leyaminyipape Yesumi disaepole dupwame pii dokona mumu lalyaminyi lao monarena soo manjipala nakama dopa lamaiya. Pii doko awa nalyamipi? 62 Doko lkinyingi Akali wamba kareyamo panda dokona dee pulyuo paramo doko kandarami ramo doko apa lao suu pyaramipi? 63 Wambumi imambu paliramopa lete karenge. Yanenge yeelyo dokona renge mende pali nalyamo. Pii langyalono dupwa imambunya pii ingilyamo dokome soo nyepala lete parami. 64 Nakama karaminyi dupwana lapo kinyi lalenelyamo lao suu pyaa nao karaminyi leya. Wambu angi suu pyaa nao kareyami dupwape baa matarena isakalya pira ingiyamo akali dokope wamba kanda soo dokopa soo kaeyo kareyamo dokome leya. 65 Lapala baame dopa leya. Renge dokona lao Rakange dokome kapa laa nara ramo doko mende namba karo dokona epanya saka nara lalono leya. 66 Dopa leyamopa enakana banya disaepole kareyami dupwana malu nyokonyuo kaepala dee kamba baa role pyao papa nayami. 67 Yesumi akali akalisa ipisu lama kareyami dupwa lamaiyuo, Nakama opetae nyokonyuo kaepala paramisi? leya. 68 Saimone Pitame baa isingi lamaiya. Kamongo, api karara dokona paramase? Embame letena renge kulisa palu palenge dokona pii lao karapinyipa, 69 namwame emba kapa ingingi lao suu pyapala emba Anatunya Poo Pyasi dokolyamo lao soo nyepala karamano leya. 70 Yesumi nakama isingi lamaiya. Nakama akali akalisa ipisu lama karaminyi dupwa nambame yapalyuo nyiyunu dokona mende imambu koo daande lyasilisi? leya. 71 Jutasa, Salmone Isakeriote ikinyingi dokome baa matarena isakalya pira ingiyamo dokonasa leya.

7

1 Enakana Yesu yuu Galili dokona papyuo kareya. Jutia wambu dupwame baa pyao kumakalana pyuo kareyami dokona baa yuu Jutia dokona papyuo kara naro lao suu piya. 2 Juu wambu dupwame komaume kauwa anda pipala palyuo nenge nenge gii doko pyaka selana piya. 3 Dokopa banya yangonge dupwame baa lamaiyuo, Embena disaepole dupwame embena yulu pyuo karene dupwa kapa kandarami lao dae yaki nyepala Jutia dokona pupi. 4 Dokona lao akali mendeme banya kingi londena lao suu pyara ramo doko baa yalu pyuo pyuo kara nara. Yulu dupwa pyuo karare ramo isa wambu dupwame kandena lao pyuo neta pyape leyami. 5 Banya yangonge dupwame opetaeko baa kapa ingingi lao suu pyaa nayami. 6 Yesumi nakama lamaiyuo, Nakamana yuu gii malu sipyamopa nambana yuu gii doko pyaka sepa nalyamo. 7 Isa wambu dupwame nakama kando awa naa narami. Nambame isa wambu dupwame yulu koo pyuo karenge lao karo dokona namba awa nao karaminyi. 8 Nakama range nenge narami dokona pupwape. Nambana yuu gii pyaka sepa nalyamo dokona nenge narami dokona namba epapu paa naro leya. 9 Lapala yuu Galili dokona mee kareya. Yesumi Komaume Kauwa Anda Pipala Palyuo Nenge Nenge Dokona Kareya 10 Mee karapala banya yangonge dupwa nenge narami dokona lalyuo papeyaminyipa baa opetae kata mendena kolalyuo peya. 11 Nenge nao kareyami dokona Juu wambu dupwame baa anja karamo lao koto kareyami. 12 Dokopa mee wambu dupwame baasa kando mumu mamu lao lapome, Baa akali keyange, leyaminyipa lapome, Daa baame mee wambu dupwa suu longo nyuo karamo, leyami. 13 Leyaminyipa Juu wambu dupwa kando pakapala pii pyakamo laa nayami. 14 Nenge nao suku suku paleyami dokopa Yesu tembole anda dokona lalyuo pao mana lao kareya. 15 Juu wambu dupwame dopa pyuo kareyamo kando ayaka lao dopa leyami. Akali dake sukuli laa nange dokona apa pyuo soo gisilyase? leyami. 16 Dokopa Yesumi nakama isingi lamaiyuo dopa leya. Namba mana lao karo pii doko nambana daa. Doko namba mapanyi peeyamo dokona. 17 Akali mende baa laramuli pyuo pyuo karapuli lao suu pyara ramo doko mana pii doko Anatunya panda nambame iki sisu lao letepe lao soo gisara. 18 Mendeme sisu lao pii lara ramo doko baa range lakandamili lao suu pyao larasa pira. Dopa piramopape akali mendeme mapanyi peeyamo akali doko kando lakandamili lao suu pyao karara ramo doko akali angingyuo kararamopa baa keta panga singi yulu doko pali narasa pira. 19 Moseseme Mawa Pii doko nakama jii nayase? Jiyamopape nakama karaminyi dupwana mendeme Mawa Pii doko minya nange. Akipamo nakamame namba pyao kumakalana lao suu pyao karamisi? leya. 20 Wambu dupwame isingi lamaiyuo, Emba keta imambu koo mende palamo. Apimi emba pyao kumakalana lao suu pyao karamisi? 21 Yesumi nakama isingi dopa lamaiya. Nambame yulu mendaki pipunusa mona nembo karaminyi. 22 Moseseme yanenge awali lao pyakepanyi nembenge yulu doko jiya kande. (Doko Mosese baame angi jii nayamopa rakange kyawa dupwame jiyami.) Jiyaminyipa nakamame koro petenge dokopa wanena yanenge awali lao pyakepanyi nembenge. 23 Koro petenge gii dokopa Mosesena Mawa Pii doko kokwa see nao akalinya yanenge doko awali lao pyakepanyi nembarami ramo doko nambame koro petenge dokopa akali mendena yanenge peparae elya pipu doko kando akipamo namba keta imbuo karamisi? 24 Yanengena ketae yulu doko kando yapalya yapana pyuo suu pyao kara napala renge angi rolae yapo nyuo suu pyao karalapape leya. 25 Dopa lao kareyamo dokopa Jerusaleme range wambu lapome dopa leyami. Akali pyalana lao lomo karaminyi baa doko daase? 26 Dopa pilyaminyi doko baa dae pii lao panembena karapyamopa nakamame baasa kando pii mende laa nalyaminyi. Akali mupwa dupwame baa Koraisa angingyuo karamo lao soo gisapala kaelyamipi? 27 Dopa pipyamopape akali dake anja karo epeya lao soo gisilyamanopape Koraisa angi doko panaramo dokopa wambu mendeme baa anja karo epara lao see narama leyami. 28 Dopa leyami dokopa Yesu tembole anda dokona mana lao karo dokopa pii ketae palyuo dopa leya. Nakamame namba kando anja karo epee lao soo gisilyamisi? Dopa pyaaminyiko doŋo nambame sisu lao epeyonde daa. Namba mapanyi peeyapala angingyuo karamo doko nakamame kando see nalyaminyi. 29 Baame namba mapanyi peeyamo dokona karo epeyo dokome nambame baa kandenge leya. 30 Dokopa nakamame baa puu maiyalana suu pyao lao kareyaminyipa banya yuu gii doko ene pyaka sepa nayamo dokome wambu mendeme baa minyara nayami. 31 Minyara nayaminyipa wambu malu meeme baa angiŋi lao suu piyami. Akali dake yulu andake malu lasaka pyuo karamo doko Koraisa eparamo dokopa yulu kamame wakasa lasaka pyuo kararase? leyami. 32 Wambu malu mee pii dopale yalu pyuo lao kareyaminyi doko sepala Parisi akali dupwame purisi akali mupwape nakamana yanda singi lapo Yesu puu maipala nyela pena leyami. 33 Dokopa Yesu dopa leya. Yuu mendasipa iki dee nakama pipya kararama. Karapala namba mapanyi peeyamo karamo dokona paro. 34 Nakamame namba koto karapala kando nyii narami. Namba kararo dokona nakama epana saka narami leya. 35 Juu wambu dupwa yango sukusa dopa leyami. Namwame baa kando nyii narami lao anja paro lao suu pyao letase? Yuu kipwa kipwa Giriki wambu karenge dupwana Juu wambu lapo bolombalo lao papala karaminyi dupwana pao Giriki wambu dupwa mana lamairu lao panya karape? 36 Baame, Namba kotapala kando nyii narami lapala kararo dokona epana saka narami, lalamoko kandapi doko aki rengendena lalape? leyami. 37 Nenge nao kareyami yuu dusipana lumwa pingi yuu gii wakasa dokopa Yesu sipurapala pii ketae palyuo dopa leya. Wambu mendeme ipwa nano pyuo karara ramo doko namba karo dokona ipupwape. 38 Mendeme namba kapa ingingi lao suu pyaramo doko pii pyasi palengenyili pyuo banya monarena kyakana renge palenge ipwa guu lao pyasumakao karara leya. 39 Dopa lao wambu baa kapa ingingi lao suu pyao kareyami dupwame Imambu ene nyerami dokonako palyuo kongwalu pii leya. Anatumi Yesu ene yanga paupau lanyi pyambwapa nayamosa Imambu doko maipa naya. 40 Pii leyamo doko sepala wambu lapome, Akali dake Anatunya pii nolako lenge akali angi ingilyamo leyami. 41 Lapome, Dake Koraisalamo leyami. Leyaminyipa lapome, Koraisa baa yuu Galili rae epara ingilyase? 42 Koraisa Dapitinya para pyasi ingyuo yuu Beteleme taone Dapiti paleya dokona rae epara ingilyamo lao pii pyasi dokona pali nalyase? leyami. 43 Mee wambu dupwa dopa lao baa kando wakale wakale suu pyao kareyami. 44 Lapome baa puu maimwali yaka lao suu pyao kareyaminyipa mendeme baa minyara nayami. 45 Yanda singi dupwa purisi mupwa Parisi dupwape kareyami dokona laeyo epeyaminyipa nakamame, Akipamo baa lanyuo epa nalamisi? lamaiyami. 46 Yanda singi dupwame isingi lao, Baa letamo akali mendeme dopakale ingyuo laa nange leyami. 47 Parisi akali dupwame nakama lamaiyuo, Nakama opetaeko kyambo langalase? 48 Akali angi dupwape Parisi akali dupwape karaminyi dokona mendeme baa kapa ingingi lao suu pyao karamisi? 49 Doko wambu nakama lyingi lyangi kuiyuo karaminyi dupwame Mawa Pii see nao karaminyi dokome nakama keta koo palira ingilyamo leyami. 50 Leyaminyipape nakama dokona akali mende Nikotimasa lenge baa wambo Yesu kandala peya akali dokome sipurapala dopa leya. 51 Namwana Mawa Pii palamo dokona, Namwame akali mende koo pipyalyamo lapala mee langa kote laa nange. Dopa pipyalyamo lao piso soo otapala kote lenge. 52 Nakamame, Emba opetae Galili rangekose? leyami. Pii pyasi dupwa poraiyuo mana nyuo kandarenepa Gaiili range poropeta mende sipura nara ingilyamo lao kandare leyami.

8

1 Wambu peparae anda peyaminyi dokopa Yesu yuu Olipi Kyau dokona peya. 2 Wamba yangama dokopa tembole anda dokona dee kamba epeya. Wambu peparae baa kareyamo dokona epeyaminyipa baame isa pisipala mana lamaiya. 3 Dokopa enda mende akali kepo pyuo palipyamopa kando nyiyami doko Mawa Pii mana lengepe Parisi dupwapeme baa nyepala lanyuo epeyami. Lanyuo epo wambu peteyami dokona enda doko sukusa roya kareyami. 4 Dopa pipala Yesu dopa lamaiyami. Mana Lenge, enda dake akali kepo pyuo palipyamopa kando nyelaminyi lyakande. 5 Moseseme Mawa Pii pyao reto, Dopale pingi dupwa kaname pyao kumakalapape leya kande. Embame baasa kando apa lare? leyami. 6 Yesu koo mende larape lao kote lamwali yaka lao suu pyapala baa apa letape lao selana makande pyuo leyami. Dokopa Yesu pongwa napala kingi kyawa dokome yuu dokona kiki pyuo peteya. 7 Dokopa nakamame baa piso soo lao sulu siyami dokopa baame roya karapala nakama lamaiyuo, Nakama karaminyi dokona mende koo pali naya kande doko wambo sipurapala enda baa kaname pyalase leya. 8 Lapala dee kamba pongwa napala yuu dokona kingi kyawa dokome deeyako kiki pyuo peteya. 9 Dokopa pii leyamo doko sepala nakama mendaki mendaki lao andapae dupwa wambo peyaminyipa pao karo ote leyami. Dopa piyaminyi dokopa Yesu enda dokopa yeelyo kareyambi. 10 Yesu baame kandalyuo kandapala, Enda, wambu lao karalaminyi kandapi dupwa anjukunya kata pamipi? Nakama mendeme emba kote laa naramipi? leya. 11 Baa, Kamongo lapala, Mendeme laa naramilyamo leya. Dokopa Yesumi lao, Namba opetaeme emba koo pingiŋi laronde daa. Papala deeko kamba koo pyuo pisa napipi leya. 12 Yesumi nakama dee mende lamaiyuo dopa leya. Namba isa yuunya yanga paupau lenge renge karoŋo. Mendeme namba paronuli pyuo eparamo doko baa iminjinginya moko palyuo papi napala baa keta letena yanga paupau lenge renge doko palira leya. 13 Dokopa Parisi dupwame baa lamaiyuo, Emba rangeme namba dopa pyuondeŋe leene pii doko kinyi daa, leyami. 14 Yesumi isingi dopa leya. Namba rangena yulu suu pyao lapunupape nambana pii kinyi ingyuo pelyamo. Namba anja karo epeyo lao anja paro lao soo gisapala lao karo. Soo gisapunupape nakamame namba anja karo epee lao anja pare lao soo walengena palya nalyaminyi. 15 Nakamame yanengena ketae kando koo epengepe yapalya yapana pyuo lenge. Namba wambu koo epengepe yapalya yapana pyuo lao kara nalyo. 16 Lao kara nalyoŋo doko namba koo epengepe yapalya yapana pyuo lao kararo ramo doko namba iki laa nao karo namba mapanyi peeyamo dokopa laramba dokome rolae laro. 17 Nakamana Lowa dokona akali lamame mendakinya palyuo lao kararambi ramo doko pii kinyilyamo lao suu pyarami lao pyasi palamo kande. 18 Namba rangeme dopa pyuondeŋe lao karonopa Rakange dokome namba dopa pyuondeŋe lao karengeko leya. 19 Dopa leyamo dokopa nakamame baa lamaiyuo, Embena rakane anja karamo? leyami. Yesumi isingi lao, Namba kando soo rola naminyi doko suu pyao Rakange baa soo rola nalyaminyiko. Namba soo rolamili doko nambana Rakange baa opetae simili, leya. 20 Baame tembole anda dokona mana lamaiyuo karo dokopa kana mone retapa pingi anda dokona karo pii dasipa lao kareya. Lao kareyamopape banya yuu gii ene pyaka sepa nayasa mendeme baa puu mal nayami. 21 Yesumi dee pii mende lamaiyuo, Namba mendasa paronopa nakamame namba koto karo nakamana koo dupwa paleta kumarami. Namba parono dokona kapa epa narami leya. 22 Dokopa Juu wambu dupwame lao, Baa paro dokona kapa epa narama letamo doko rangeme pyapala kumuo parape? leyami. 23 Baame nakama dopa lamaiya. Nakama isa panda rae, namba ketae panda rae, nakama isa yuu dakena range, namba isa yuu dakena rangende daa. 24 Nakamame namba Baaŋa lao suu pyaa narami ramo doko yulu koo pyuo karaminyi dopako pyuo karo kuma rami ingilyamo. Dokona lao nakama koo paleta kumarami langyalono kandapi leya. 25 Nakamame baa lamaiyuo, Emba apisi? leyami. Yesumi nakama lamaiya. Wamba kanda soo piso langyuo kareyo kande dokoko. 26 Nakamasa lao koo koo lao pii malu laro ingilyamo. Ingyapyamopape namba mapanyi peeyamo doko kinyi angi lao karapyamopa baame namba pii langiyamo siyunuli pyuo isa wambu dupwa polo langyuo karo leya. 27 Baame Rakangesa lalyamo lao soo gisa nayami. 28 Dokopa Yesu dopa leya. Ikinyingi Akali minyalyuo nyerami dokopa namba Baaŋa lao soo manji nyerami. Namba range sisu lao mende pii nao Rakange dokome mana langiyamuli pyuo lao karee lao soo gisarami. 29 Namba mapanyi peeyamo doko nambapa karambano. Yuu peparae nambame baa rae mairali yulu dupwa pingi dokome namba yaki nyii nao karamo leya. 30 Dopa lao kareyamo dokopa wambu malumi baa kapa ingingi lao suu pyapala mona maiyami. 31 Dokopa Yesumi Juu wambu baa kapa ingingi lao suu pyao kareyami dupwa dopa lamaiya. Nakamame nambana pii kare kare soo soo kararami ramo doko nambana disaepole angingyuo kararamisa pira. 32 Dokopa pii angi kinyi doko soo gisaraminyisa pii kinyi dokome nakama kiiramo neta nyera leya. 33 Nakamame baa lamaiyuo, Namwa Aporakamena para pyasi ingyuo karamano. Yuu wamba akali mendeme puu maiyamopa kara nayama. Kiiramo neta nyera lalene kandapi doko apa piyandena lalese? leyami. 34 Yesumi isingi dopa lamaiya. Kinyi kinyi langilyu, wambu yulu koo pyuo karenge dupwa peparae koona kendemande ingyuo karaminyi. 35 Kendemande akali mendeme mende nyiso karara ramo doko banya ree palu ingyuo puu pao paa nara. lkinyingi dokome angingyuo karalu karara. 36 Dokona lkinyingi dokome nakama kiiramo nyera ramo doko nakama kinyi kinyi moko nyisi kararami. 37 Nakama Aporakamena para pyasi ingyuo karaminyi doko silyu. Silyuko doŋo nambana pii doko soo nyii nalyaminyi dokona nakamame namba apa pyuo pyamane lao karaminyi. 38 Nambana Rakangena lenge kambu dokona kandeyonuli pyuo lao karo, nakamame nakamana rakange langilyamo nyili pyuo pyuo karenge leya. 39 Dokopa nakamame baa lamaiyuo, Aporakame baa namwana rakange kandale leyami. Yesumi nakama dopa lamaiya. Nakama Aporakamena wane pili doko baa pyuo kareyamo doko suu pyao pyuo karamili. 40 Dokonako ingyuo Anatumi pii kinyi langiyamo doko nakama langipunupa nakamame namba apa pisala pyapamape lao karaminyi. Yulu dopale Aporakame pii naya kande. 41 Nakamana rakange pyuo kareyamuli pyuo nakamame pyuo karaminyi leya. Nakamame baa lamaiyuo, Namwa Anatu kaeyapala kura ipwa likya likya ingyuo kara nalyamano. Namwana Rakange mendaki angi doko Anatuko karenge leyami. 42 Yesumi nakama lamaiyuo, Anatu nakamana Rakange ingyapyali dokome namba mona retamili. Dokona lao Anatunya arokwa dokona karo epeyo. Namba rangeme sisu lao epeyonde daa. Baame namba mapanyi peeyamosa epeyo. 43 Namba lao karo doko akipamo soo gisa nalyamisi? Nakamame nambana pii doko selana epe nasingi dokona soo manja nalyaminyi. 44 Nakamana Rakange Satane dokona rango doko napala pyuo karamwali lao karaminyi. Baame ene busiyamo dokona piso epo wambu pyao kumakao kareyamoko karenge. Baa keta pii kinyi doko pali nalyamosa baame pii kinyi dokona mende suu pyao lara ingya nange. Baa renge kuiyuo kyambo lenge dokome kyambo lengena rakange kyawa ingyuo karamo. 45 Dopa pipyamopape nambame nakama pii kinyi langilyu dokona pii kinyilyamo lao suu pyaa nalyaminyi. 46 Nakama karaminyi dokona api mendeme namba kando koo piinyi kandeyo lao kapa neta pyaramisi? Namba pii kinyi laro ramo doko akipamo nambana pii kinyilyamo lao suu pyaa nalyamisi? 47 Anatunya ingyuo karaminyi dupwame Anatunya pii dupwa soo karenge. Nakama Anatunya ingyuo kara nalyaminyi dokona namba soo kara nalyaminyi leya. 48 Juu akaii dupwame baa lamaiyuo, Emba Samaria akali ingyuo imambu koo mendeme maralyipyamo karene lalamano doko kapa laa nalyamase? leyami. 49 Yesumi isingi lao dopa leya. Namba imambu koo maralyapyamo karonde daa. Nambame Rakanena kingi ketae nembo karo. Nakamame nambana kingi isa nembelyaminyi. 50 Dopa pilyaminyiko doŋo namba range ketae ululi karapuli lao suu pyao kara nalyo. Mendeme namba ululi karapiii lao suu pyao karamo dokome lao rolara. 51 Kinyi kinyi langilyu, mendeme nambana pii lengenyiii pyuo pyuo kararami ramo doko kumungi renge doko kanda nara. 52 Juu wambu dupwame baa lamaiyuo, Epapu emba imambu koo maraiyapyamo karene doko soo kaelyamano. Aporakame kumuya. Anatunya poropeta akaii dupwa kumuyamiko doŋo embame lao dokopa mendeme nambana pii lengenyiii pyuo pyuo karara ramo doko kumungi renge doko nakanju see nara laiene kandapi. 53 Namwana rakange Aporakame kumuya dokona suu pyao emba mupwa kamame wakasandelyamo. Anatunya akaii dupwako kumuyami kande. Emba range apiyakalende suu pyapala lao karese? leyami. 54 Yesumi isingi lao dopa leya. Namba range lao ketae pyambwapuii nambana pii doko kuiisa ingya napyaii. Nambana Rakange nakamame Anatu lenge dokomeko namba ketae pyambuo karamo. 55 Nakamame baa soo nyepa nange. Nambame baa soo nyingi. Nambame baa soo nyepa nange lapuii doko nakama kyambo lao karenge dokonako mendeke ingyuo karapuii. Dopa pipyamopape nambame baa angi soo nyepala banya pii lengenyiii pyuo pyuo lao karenge. 56 Nakamana rakange Aporakame dokome namba yuu gii eparo doko kandaro lao sepala monanda pyakaiyuo pyao kareya. Enakana angi kandapala mona paleyamopa kareya leya. 57 Dokopa Juu akaii dupwame baa dopa lamaiyami. Emba ee kana akaiisa pao akaiisa kingi paki ene karapa nalene kande doko embame Aporakame kandengese? leyami. 58 Yesumi nakama lamaiyuo, Kinyi kinyi langilyu, Aporakame ene karapa nayamopa namba kareyono doko erotonge mee karalu karenge. 59 Dopa leyamo dokopa nakamame baa kaname pyamanale lao lapo nyiyaminyipa Yesu yalu pipala tembole anda dokona potemo peya.

9

1 Baa katasa paole pyuo karo dokopa akaii mende lenge kwaesi manjinyi peeyami doko kandeya. 2 Dokopa banya disaepole dupwame baa piso soo, Rapu Pingi, akaii doko baa rangeme koo piyasa panda endangi rakangepame mende koo piyambisa baa lenge kwaesi manjo nyiyamisi? leyami. 3 Yesumi isingi lao Akali dokome koo mende pyuope endangi rakangepame koo mende piyambisa baa lenge kwaesi manjo nyiyaminde daa. Anatunya yulu andake baa keta maro lara ingiyasa lenge kwaesi manjo nyiyami. 4 Yuu yango karamo dakepa namba mapanyi peeyamo dokona yulu doko pyuo kararama ingilyamo. lminjaramo dokopa mendeme yulu kapa kando pii nange yuu gii doko oo epopyamo. 5 Namba isa yuu dakena kararono yuu gii dusipa isa wambu dupwana lao yanga paupau lakamyuo kararo leya. 6 Pii dopa lapala baa yuunya kepakali kyaso retapala awal kukuli lasi rukuraka pyuo pyakerena lao piya. Pipala awal dokome akali dokona lenge doko kisakamiya. 7 Kisakamipala baa lamaiyuo, Ipwa pete Silome lenge dokona poeyanyi nembala puu, leya. (Silome doko namwana pii Mapanyi Peenge dopale.) Pao ipwa poeyanyi nembapala kapu kyuo kata kapa kando epeya. 8 Dokopa anda maki palyuo penge wambu dupwame baa wamba bange jinya jinya lao peteyamo kandeyami dupwapeme lao, Akali wamba bange jinya jinya lao pisipya kandapi doko daase? leyami. 9 Lapome, Doko baalamo leyami. Lapome, Daako doŋo mee banya lenge kambu nyilyamo leyami. Baame, Namba lyakande, leya. 10 Nakamame baa lamaiyuo, Apa pipala lenge rapi? leyami. 11 Baame isingi lao, Akali Yesu lenge dokome awal pyakerena lapala nambana lenge doko kisakapala namba ipwa Silome dokona poeyanyi nembapala puu langipyasa namba pao poeyanyi nembapala lenge mee ingyapyamo kandapu leya. 12 Nakamame baa lamaiyuo, Baa anja karamo? leyami. Baame, Namba soo gisa nalyo, leya. 13 Akali wamba lenge kwaeyamo kareya doko Parisi akali dupwa kareyami dokona lanyuo epeyami. 14 Yesumi awai pyakerena lapala akali banya lenge doko yuu gii koro petenge dokopa pyuo elya pyakamiyapya. 15 Parisi dupwame, Apa pisala embena lenge rapi? lao baa dee kamba piso siyami. Dokopa baame nakama lamaiyuo, Baame nambana lenge dokona awal kisakapyamopa ipwa poeyanyi nembapala kapa kando karo, leya. 16 Parisi lapome, Akali dokome koro petenge mawa pii yalo pelyamo dokona Anatumi baa rombo palyiyande daalamo, leyami. Dopa leyaminyipa lapome, Akali koo pyuo karenge dokome apa pyuo yulu andake dopale lasaka pyuo kararase? leyami. Dopa lao nakama apiyanda piyami. 17 Dokopa nakamame akali lenge kwaeyamo doko kambako piso siyami. Emba baame lenge elya pyakapyamo doko baasa kando embame apa lao suu pilisi? leyami. Baa Anatunya poropeta akali, leya. 18 Akali doko wamba lenge kwaeyamopa kapa kandeya doko Juu wambu dupwame kinyi dopa pipyalyamo lao suu pyaa nayami. Suu pyaa napala akali lenge elya pyakamiya dokona endangi rakangepa dolapo epena lapala 19 piso soo, Nakambana ikinyingi lenge kwaesi manjo nyiyamba letambinyi doko dakese? Epapu baa apa pipala kapa kandelyase? lao piso siyami. 20 Banya endangi rakangepame isingi lamaiyuo, Akali dake nambwana ikinyingi lenge kwaesi manjo nyiyamba doko soo karambano. 21 Soo karambwanopape epapu apa pipala baa kandelyamo lao apimi banya lenge elya pyakamipyape lao nambwa see nalyambanoko. Baa piso selapape. Baa andapae dokome rangeme lara, leyambi. 22 Banya endangi rakangepame Juu wambu dupwa pakapala dopa leyambi. Juu wambu dupwame wambo mendakinya palyuo, Mendeme Yesu baa Koraisa, lara ramo doko baa sinakoke anda epa nana lao ralinyi nembarama leyami. 23 Leyamisa endangi rakangepame dokona pakapala lao, Baa andapae karamo dokona range piso selapape leyambi. 24 Dokopa dee kamba akali doko epena lapala baa lamaiyuo, Anatunya kingi lao pii rolae laroŋo lao kingi ketae nembo rolo lape. Akali doko yulu koo pingi doko silyamano leyami. 25 Dokopa baame lamaiyuo, Baa yulu koo pingipi mee lao see nalyo. Namba mendaki iki soo karo doko, nambana lenge kwaelyamopa karenge doko epapu kapa karo leya. 26 Nakamame baa lamaiyuo, Baame emba apa pyakapyase? Apa pisala embena lenge doko elya pyakapyase? leyami. 27 Baame nakama isingi dopa lamaiya. Wamba langyuo kaeyalono kandapi doko nakama nambana pii soo nyakayami. Akipamo nakamame dee kamba semana letamisi? Nakama opetae banya disaepole ingyuo karamwali lao suu pilyamisi? leya. 28 Dokopa nakamame baa kilya kandalya kandana pyuo lamaiyuo, Emba banya disaepole, namwa Mosesena disaepole ingyuo karamano. 29 Anatumi Mosese pii lamaiya doko soo gisilyamano. Soo gisamwanopape akali dae lao karamo doko anja karo epeya lao see nalyamano leyami. 30 Akali dokome dopa lao isingi lamaiya. Pii nangende pyaka selamolyamo. Baa dokome dopa lao isingi lamaiya. Pii nangende pyaka selamolyamo. Baa anja karo epeya lao see namiko doŋo baame nambana lenge elya pyakapya. 31 Anatumi yulu koo pingi wambu dupwana pii sakami nange. Sakami nalyamopape wambu mendeme Anatu ketae pyambuo yako lao karo baa letamuli pyuo pyuo karara ramo doko Anatumi dokonako pii sakamyuo karenge doko silyamano. 32 Isa yuu doko kanda soo ingiyamo dokopa piso epo wambu mendeme akali lenge kwaesi manjo nyiyaminyi mendena lenge elya pyakamiyami leyaminyi see nange. 33 Akali doko Anatumi rombo palyiyamopa epa nayali doko baame mende kapa pii napyali leya. 34 Nakamame baa kando lao, Koo andake pipala emba manjo nyiyami doko embame namwa mana langirisi? leyami. Lapala baa neta nembeyami. 35 Baa ramanyi nembeyaminyi doko Yesumi sepala koto kando nyepala baa lamaiyuo, Embame lkinyingi Akali kapa ingingi lao suu pyao karepe? leya. 36 Dokopa baa isingi lao, Rapu Pingi baa apisi lao rolo langyarene dokopa nambame baa kapa ingingi lao suu pyao kararo, leya. 37 Yesumi baa lamaiyuo, Embame baa kando karapinyi emba pii langyuo karamo doko leya. 38 Baame isingi lao, Kamongo, nambame kapa ingingi lao suu pyao karo, lapala baame Yesu mupwa lao pongwa naro peteya. 39 Dokopa Yesumi dopa leya. Isa yuu dakena kote lao rolala epeyo dokome wambu lenge raa nao kareyami dupwame kando soo kararaminyipa lenge rao kareyami dupwa lenge kwaeramo parami leya. 40 Parisi lapo baa kareyamo dokona repeta kareyami dusipame baa lamaiyuo, Namwa opetae lenge koonde karamase? leyami. 41 Yesumi nakama lamaiyuo, Nakama lenge kwao karo kata rolae kanda namili doko pii mende pali napyali. Nakamame range kando karamano letaminyi dokona yulu rolae kando kaeyo yalo karamisa pilyamo.

10

1 Yesumi dopa leya. Kinyi kinyi langilyu, mendalimi mena sipisipinya kakopasa kambu rolae dokona epa napala kata wakale mendena yalala epara ramo doko waa nao kendepo nengendeme pirasa pira. 2 Dopa piramopape mendali kata kolando penge dokona epara ramo doko sipisipinya rapu pinginde eparasa pira. 3 Baa epelyamosa kambu rapu pingi akali dokome kambu lumbwakamalngi. Sipisipi dupwame banya pii doko sakamilyaminyipa baame banya rangena sipisipi kingi lao gee lao penge. 4 Banya sipisipi kando gee lapala wambo pelyamopa banya sipisipi dupwa banya pii sepala baa pelyamuli pyuo pao karenge. 5 Nakama akali kanda nange dupwana pii see nange dokome akali kanda nange mende paramuli pyuo paa napala baa yaki nyepala ralo parami leya. 6 Yesumi dopa lao makande pyuo lamaiyamopa renge angi leyamo doko soo gisa nayami. 7 Soo gisa nayami dokona Yesumi dee lamaiyuo, Kinyi kinyi langilyu, namba sipisipinya kakota lumbungi kambu dowa dopale karo. 8 Namba epapa nayonopa wambo epeyami dupwame waa nao kendepo nao dopale epeyamisa piya. Dopa piyaminyipa sipisipi dupwame nakamana pii doko sakami nayami. 9 Namba kambu dowa doko. Mendeme namba keta epara ramo dokopa lete wai pyao papala baa potemo konando pyuo karo dokopa pama nenge nenge doko kando nao karara. 10 Waa nyingi akali dokome mee waa nyuo kokwa soo nembala epenge. Epelyaminyipape nambame nakama keta kyakana renge doko maiyuokondali pyaa epeyo. 11 Namba sipisipi dupwana rapu pingi angingyuo karo. Rapu pingi angi keyange doko sipisipi dupwana lao kumuo maira, kumakamingi. 12 Akali sipisipi range daa mee kanana rae maiyuo rapu pyuo karenge dokome yana suwa kararope andake nalana pingi doko epelyamo kandapala sipisipi dupwa yaki nyepala raio penge. Dokopa yana suwa kararope andake dokome sipisipi dupwa nao rokwapala bolombaio lanyi nembo pyuo karenge. 13 Akali doko baa kana iki suu pyao pyuo karo sipisipi dupwa suu pyaa nange dokome ralo penge. 14 Namba sipisipi angi keyange rapu pyuo karenge. Rakange dokome namba soo gisilyamopa nambame Rakange doko soo gisingi doko suu pyao nambame nambana range dupwa soo gisilyunupa nambana range dupwame namba soo gisingi. Dopa pilyamo dokopa nambame nambana sipisipi dupwa reke lao kapa kumakamairu ingilyamo. 16 Nambana sipisipi wakale lapo karaminyi dupwa kakopasa dakena kara naiyaminyi. Nakama dupwa opetae lanyuo eparo ingilyamo. Dokopa nambana pii sakarami. Dokopa rapu pingi mendakindeme rapu pyuo kararamopa rara mendaki ingyuo role pyao kararami. 17 Namba kapa kumakamairu dokona nambana Rakange dokome namba mona reto karamo. Letena renge dee kamba nyero lapala kapa kumakamairu. 18 Namba daa laronopa mendeme namba pyao kumakaraminde daa. Namba range maso kumuo mairu renge dokope dee kamba lete paro renge dokope namba range keta palamo. Nambana Rakangeme dopako piri langiyamuli pyuo piro leya. 19 Dopa leyamo dokopa Juu wambu dupwame lamasa lao paka lakyuo pii wakale wakale lao lao kareyami. 20 Lapome, Baa imambu koo mende paliPyasa kopyali minyapala lao karamo. Akipamo banya pii sakamairamase? leyami. 21 Lapome, Akali imambu koo palelyasa lao karenge banya pii dopale ingya nalyamo. Imambu koo dokome wambu lenge kwaenge doko kapa elya pyakamalngisi? leyami. 22 Anatu dokona suu pyao Jerusaleme dokona tembole anda elya pingi nenge nenge mange doko pyaka siya. Doko kupwa pingi kana dokopa 23 Yesumi tembole anda kambu kolandowame kingi Solomonena lenge dokona kata peya. 24 Dokopa Juu wambu dupwa baa kareyamo dokona karo awali lapala, Yuu akipare embame apa letepe lao walu lao papa lao kararamopa angi polo langya narese? Emba Koraisa ramo doko angi langipi, leyami. 25 Yesumi nakama isingi dopa lamaiya. Namba langipu doko kinyi lalyane lao suu pyaa nalyaminyi. Nambana Rakanena kingi lao yulu pyuo karenge yulu dupwa kandapala namba dopa pyuondelyamo lao soo gisarami ingyapya. 26 Nakama nambana sipisipi angi ingyuo kara nalyaminyi dokome kinyi lalyane lao suu pyaa nalyaminyi. 27 Nambana sipisipi dupwame nambana pii silyaminyipa nambame nakama kandenge dokome nakama namba moko minyuo epenge. 28 Dokopa nambame nakama letena renge kulisa palu palenge doko mallyunusa nakama kumalu kumuo kuma naraminyipa nambame minyaro kararonopa mendeme kingi raka lao nyii narami ingilyamo. 29 Nambana Rakaneme nakama namba jiyamo doko wakasa ingyuo karamo dokona mendeme banya kingi raka lao nyii narami ingilyamo. 30 Namba Rakanepa mendaki ingyuo karambano leya. 31 Leyamopa Juu wambu dupwame baa pyalana lao kana dee kamba nyiyami. 32 Dokopa Yesumi pii mende dopa lamaiya. Rakaneme renge kuipyamosa yulu keyange malu lasaka pipa pyuo karapu dupwana mende anjukunya lao namba pyalana pilyamipi? leya. 33 Juu wambu dupwame baa isingi lamaiyuo, Yulu keyange dupwana emba kaname pyalana pilyamande daa. Embame Anatunya lenge kambu dokona kokwa soo lao karo emba mee akali kinyi kinyi dokome, Namba Anatu dopakale lao karene dokona emba kaname pyalana pilyamano leyami. 34 Anatumi wambu banya pii soo kareyami dupwa Anatu ingyuo karaminyiŋi leyamo pii doko nakamana Lowa buku dokona pyasi palamo. Baepolena pii mende isa paa nange kande leya Yesumi. 36 Doko suu pyao Rakaneme rombo palyapala isa yuu dakena namba mapanyi peeyamo dokome namba Anatunya Ikinyingi lapunupa nakamana akipamo Anatunya lenge kambu dokona kokwa soo lapinyisa pipya letamisi? 37 Nambana Rakanena yulu dupwa pyuo kara naro ramo doko kinyi lalyane lao suu pyaa nalapape. 38 Dee yulu dupwa angi pyuo kararo ramo doko namba kando angilamo lao suu pyaa nayami kande doko yulu pyuo karo dupwa kando kinyilamo lao suu pyalapape. Dokome Rakane namba keta palipyamopa namba Rakanena dokona karene lao soo gisarami leya. 39 Dokopa dee kamba baa puu malnya lareyami dokopa baa kolala peya. 40 Papala dee ipwa Jotane yalo pao Jone wamba kanda soo wambu bapitisimo nyakamyuo kareya dokona pao kareya. 41 Dokopa wambu malu baa kareyamo dokona epapala, Jone yulu mende andake pyuo lasaka pii nayamopape baa akali dakesa pii leyamo dupwa peparae kinyi ingyuo pelyamo, leyami. 42 Dokopa yuu dokona wambu malumi baa kapa ingingi lao suu pyapala mona maiyami.

11

1 Akali mende Lasarasa lenge yuu Betaui range doko anga piya. Yuu Betaui doko Maria kakingi Mata dokopana yuu anda kuki lama malu palyuo karenge. 2 (Maria dokome Kamongo dokona mamba rendamu pingi mende kisakamipala banya kyawasi dokome kimbu pyao nembakamiya enda dokona pemalenge Lasarasa lenge doko anga piya.) 3 Anga piyamo dokona wana kakingipa dolapome wai nembo, Kamongo embame mona retenge doko anga pyapyamo silyamo, lao lamaiyambi. 4 Dokopa lamaiyambinyi pii doko sepala Yesumi dopa leya. Anga dokome kumarande daa. Anga doko mee ingyarasa wambumi Anatu lakandarami ingilyamo. Lakandarami dokopa banya lkinyingi doko opetae ketae pyambusi kararamosa pira. 5 Yesumi Matamoo banya kakingipi dee Lasarasamoo dusipa mona reteya. 6 Dopa pyuo kareyamopape Lasarasa anga andake pilyamo lao sepala yuu dokona yuu lama mee kareya. 7 Enakana disaepole dupwa lamaiyuo, Yuu Jutia dokona dee kamba paramano leya. 8 Disaepole dupwame baa lamaiyuo, Rapu Pingi, Juu wambu dupwame emba ene alembole kaname pyao kumakalana piyami kande dokona dee kamba yuu dokona panya letese? leyami. 9 Yesumi isingi lamaiyuo, Yuu yangenge dokopa keloke gii akalisa ipisu lama nyero pali nangese? Yuu yango karelyamo dokopa mendali kata para ramo doko yuu dakena yango karenge dokona lukumo see nange. 10 Dopa piramopape mendali kukwamana kata para ramo doko baa keta yango kara nalyamo dokona lukumo singi leya. 11 Dopa lapala nakama pii mende lamaiya. Namwana puu minyingi Lasarasa doko luu palyuo silyamo doko baa lenge rena lao pyaletala pelyo leya. 12 Disaepole dupwame baa lamaiyuo, Kamongo baa luu palira ramo doko mee ingyara leyami. 13 Yesumi Lasarasa kumuya dokona kongwalu palyuo leyamopape nakamame baa luu palamo lalyamo lao suu pyapala leyami. 14 Dokopa Yesumi nakama rolo lamaiyuo, Lasarasa baa kumasi silyamo. 15 Kumasi silyamo doŋo yuu mange dusipa namba baapa role pyao kara napusa nakama yulu andake mende kandarami dokona rae mailyu. Kandapala namba kapa ingingi lao suu pyarami ingilyamo. Baa silyamo dokona mwua, leya. 16 Tomasa kingi mende Reme Paka lenge dokome disaepole yango dupwa lamaiyuo, Namwa opetae baa pale pale kumarama mwua leya. 17 Yesu epapala dokopa Lasarasa yuu kisima malu anda dokona sipyalyamo lao siya. 18 Yuu Betaui doko yuu Jerusaleme kata makande pingi kilomita rema ingyuo repeta siya. 19 Dokopa Juu wambu malumi Mata Mariapa peteyambi dokona pemalenge kumuyamo dokona mona minyarambu pisa epeyami. 20 Dokopa Matame Yesu epeyamo doko sepala Maria anda mee peteyamopa baa katasa yako lao nyela peya. 21 Matame Yesu lamaiyuo, Kamongo, emba dae kareeli doko nambana pemalenge doko kuma napyali. 22 Doko epapu dakepa opetaeko embame Anatu mende pyakana lakare ramo doko Anatumi kapa pyakara doko silyu leya. 23 Yesumi baa lamaiyuo, Embena pemalenge dee sipurao epara leya. 24 Matame baa lamaiyuo, Rengya yuu lumwa piramo dokopa wambu sipurao eparami mange dokopa sipurao epara doko silyu, leya. 25 Yesumi baa dopa lamaiya. Sipurao epengepe lete karengepe renge dolapona namba renge kuiyuo karo. Akali mendeme namba kapa ingingi lao suu pyao mona jera ramo doko baa kumapalape mende lete karara. 26 Doko mendeme kumapa nao karo namba kapa ingingi lao suu pyao mona jera ramo doko baa kumalu kumuo kuma nara. Emba doko kinyi lalyane lao suu pyapelepe? leya. 27 Kinyi Kamongo, Koraisa Anatunya Ikinyingi isa yuu dakena epara ingiyamo doko embalyamo lao suu pyapelyo leya. 28 Pii dopa lapala pao kakingi Maria elya kalo kee lao dopa lamaiya. Mana Lenge dae epo karapala emba ipu letamo leya. 29 Dokopa pii doko sepala Maria waiya lao sipurapala Yesu kareyamo dokona peya. 30 Yesu anda lapo malu palyuo kareya dokona epapa napala Matame baa kando nyiya katasa dokona mee kareya. 31 Juu wambu Maria mona minyarambu andakare role pyao peteyami dupwame Maria baa sipurapala kamanda peyamosa kandapala baa malu anda dokona ee lala pwuamo lao sepala baa peyamuli pyuo peyami. 32 Dokopa Maria Yesu kareyamo dokona epapala baa lamaiyuo, Kamongo, emba dae kareeli doko nambana pemalenge kumapa nayali leya. 33 Maria baa ee lao mee wambu role pyao epeyami dupwa eeko leyamisa Yesumi kaepala banya monarena lulaka peyasa banya monarena pulunongo piyamo kareya. 34 Dokopa, Baa anja malu piyami? leya. Nakamame baa lamaiyuo, Kamongo, kandalase ipu, leyami. 35 Yesu ee leya. 36 Dokona Juu wambu dupwame, Baame baa apa pyuo mona reto karengepe lao kandalapa, leyami. 37 Dopa leyaminyipape lapome, Akali lenge kwaenge elya pyuo nyiya dokomeko akali dake kumapa nana kapa lara ingya nayase? leyami. 38 Dopa leyami dokopa Yesu kamba lulaka koo peyamopa malu anda peya. Malu pingi kananda dokona kana mendeme upi laro kareya. 39 Yesumi, Kana nyuo kakondalapape, leya. Mata akali kumuyamo dokona pemalenge dokome baa lamaiyuo, Kamongo yuu kisima baa kumuo palipya dokome rumbyuo al pyao pilyamo leya. 40 Yesumi baa lamaiyuo, Emba kapa ingingi lao suu pyare ramo dokopa Anatunya yanga paupau lenge doko kandare lao langi napusi? leya. 41 Dopa leyasa kana doko nyuo kakondeyami. Dokopa Yesumi kandalyuo kandapala dopa leya. Rakane embame nambana pii soo karalenelyamo lao ange leto. 42 Yuu peparae embame nambana pii soo karenge doko namba silyu. Sipunupape wambu dae karaminyi dupwa embame namba mapanyi peelyamo lao sinyale lapala ateŋa dake lalono, leya. 43 Dopa lapala pii porakaiyuo lao, Lasarasa, neta ipu leya. 44 Dokopa akali kumasi doko neta epeya. Banya kingi kimbupi komaumi yaki pyuo dee lenge kambu komau mendeme yaki pyuo pisala sereyami doko palepeta epeya. Yesumi nakama lamaiyuo, Baa anda pena lao komau doko polakamipape leya. 45 Dopa piyamo dokopa Juu wambu malu Maria role pyapeta epeyami dupwame baa piyamo doko kandapala baa kapa ingingi lao suu piyami. 46 Suu piyaminyipape lapome Parisi dupwa kareyami dokona pao Yesu dopa pipyaŋa lao lamaiyami. 47 Dokopa purisi akali mupwa dupwape Parisi dupwapeme wato andake lenge akali dupwa sukusa sukusa pyuo epena lapala, Namwa apa pirama? Akali dokome yulu andake malu lasaka pyuo karamo. 48 Baa pilyamo doko pyuo karalu karena larama ramo doko wambu dupwa peparaeme baako suu pyao kararami dokopa Orome akali dupwame epo namwana anda poo pyasi dokope namwana rara dupwape kokwa sinyi nembarami leyami. 49 Dopa leyaminyipa nakama peteyami dokona mende Kayapasa lenge baa ee kana dokona purisi mupwa wakasa ingyuo kareya dokome nakama dopa lamaiya. Nakamame mendekepe see nalyaminyi. 50 Namwa rara dupwa lemboke nyii nana laramanopa akali mendaki mende wambu dupwana lao kumara dokopa namwa keta kapa ingyuo palira doko soo gisa nalyaminyi leya. 51 (Baa range maso pii dake laa naya. Baa ee kana dokona purisi muwpa wakasa ingyuo karapala Yesu Juu rara dupwana lao kumara lao Anatumi pyongo piyamopa polo leya. 52 Juu wambu dupwanako iki daa Anatunya wane wanake raeyo petaminyi dupwa nyuo mendakinya ingyuo petena lao kumara renge dokona leya.) 53 Baa dopa pyuo polo lareyamo gii dokopa kanda soo nakama kaeya nao wato lao apa pyuo pyao kumakarama lao kareyami. 54 Dokopa Juu wambu kareyami panda dokona Yesu dee panembena papyuo kareyande daa. Kara napala yuu doko yaki nyepala yuu nemba nemba yuu muiyane repeta siyamo doko anda malu palyuo kareyamo yuu Eporaime lenge dokona peyamopa disaepole dupwa role pyao kareyami. 55 Dokopa Juu wambunya Pasopa nenge nenge gii doko pyaka selana piyasa wambu malu yuu nemba nemba karo Jerusaleme dokona lalyuo Pasopa nenge napa nayaminyi dokopa range poo pyalana lao peyami. 56 Dupwame Yesu anja karamo lao koto karo tembole anda dokona karapala nakama lao, Apa lao suu pilipi? Baa nenge nala eparape mee? lao kareyami. 57 Purisi akali mupwa dupwape Parisi dupwapeme lamaiyuo, Mendalimi baa mendasa karara ramo kandeyami kande dokopa namwa langya ipupwape lao puu maiyalana leyami.

12

1 Yuu gii pakinyamange epo paparamopa Pasopa nenge narami ingiyamopa Yesu baame yuu Betani Lasarasa lopo nyiyamo dokona peya. 2 Yesunya nenge rapa rapa pyakamiyaminyi dokopa Matame mokwa soo kareyamo Lasarasa taepo repeta Yesupa role pyao peteya. 3 Dokopa Mariame mamba luli lenge kana malumi ropo pingi dokona maki mendaki nyepala Yesunya kimbu dokona kulimbwakamipala banya kyawasi dokome kimbu dolapo pyao nembakamiya. Dokopa anda doko mambame kyaa pyuo simbuya. 4 Dopa piyamopape banya disaepole kareyami dokona mende Jutasa Isakeriote lenge baa mata kando lara ingiyamo dokome dopa leya. 5 Akipamo mamba dakeme ropo pyao kana malu ( 300 ) nyepala pendewa wambu dupwa mokwa soo mai napyase? leya. 6 Baame pendewa wambu dupwa suu pyao leyande daa. Baa mone singi bokote minyuo kareyamo dokome bokote dokona kana retapa pingi dupwa baa waa nyipulinya suu pyao leya. 7 Yesumi dopa leya. Enda baa pyuo petena, kando laa kaeyalapape. Namba malu pirami dokona lao silyamo dupwa mee retaro pisakana. 8 Pendewa wambu dupwa nakama pipya yuu peparae role pyapeta karenge. Nambamoo nakama pipya rakyame role pyapeta kararamande daa leya. 9 Juu wambu ama malu dupwame baa karamo leyaminyi doko sepala kandala epeyami. Baako yeelyo kandala epeyaminde daa, Lasarasa kumuo paleyamo minyalyuo nyiya doko opetae kandala epeyami. 10 Dokona purisi akali mupwa dupwame Lasarasa opetae pyao kumakarama lao wato leyami. 11 Baa lete kareyamo dokome Juu wambu malu nakama yaki nyepala Yesu kapa ingingi lao suu pyao kareyamisa dokona imbwuapala dopa pyuo wato leyami, 12 Dokona yangama dokopa wambu ama malu Pasopa nenge nenge dokona nala epeyami dupwame Yesu Jerusaleme epelyamo lao sepala, 13 isa bona dupwana yokonge nyepala baa epeyamo dokona kando nyela pao pii ketae palyuo dopa leyami. Anatu lakandamana. Kamongona kingi lao epelyamo Isaraelena Kiŋi doko keta renge keyange epakaminya leyami. 14 Dokopa Yesu donge kumambonande kando nyepala dokona peteya. Doko suu pyao pii pyasi mende palamo. 15 Doko yuu Sayone wanenge doko emba paka napipi. Embena Kiŋi doko donge kumambonandena piso epelyamo kande. 16 Pii doko banya disaepole dupwame renge soo gisapa nayami. Soo gisapa nayaminyipape enakana Yesu yake panda peyamo dokopa pii doko Baepolena pyasi paleyamuli pyuo piyamilyamo lao soo manjo nyiyami. 17 Lasarasa malu anda dokona kumuo paleyamo neta epena lao minyalyuo nyiya dokopa wambu malu role pyao kareyami dupwame banya yulu doko lao raeyami. 18 Yulu andake doko pyuo lasaka piya leyaminyi sepala dokona wambu malu baa epeyamo doko kandapala dopa pyuo lakandeyami. 19 Dokopa Parisi dupwame nakama lao lao, Mende piri ingya nalyamo kandelese? Wambu peparaeme baa rungi rungi pyao pelyaminyi leyami. 20 Wambu Pasopa nenge nenge yuu gii dokopa Anatunya kingi Jerusaleme lala lalyuo peyami dokona role pyao Giriki wambu lapo peyamioko. 21 Dupwame Pilipa yuu Galili dokona yuu Betesalta range doko kareyamo dokona pao lamaiyuo, Yangone namwa Yesu kandalana lao suu pilyamano leyami. 22 Dokopa Pilipa baame pao Enduru lamaiyamopa Enduru Pilipapa pakapala pao Yesu lamaiyambi. 23 Dokopa Yesumi pii mende nakama dopa lamaiya. Yuu gii lkinyingi Akali yanga paupau lara doko pyaka silyamo. 24 Kinyi kinyi langilyu, witi jingi mende yuunya pao kuma nara ramo doko baa etorenge suiu sera. Dopa piramopape endangi yuunya palyuo kene pyapala rumbingi dokopa jingi malu lyingi. 25 Mendeme range karamo dokona mona nyepala kyawa minyuo karalana suu pyara ramo doko letena renge dokona pyakuirasa pira. Mendeme rangena yulu dokona mona mal napala kame soo kaera ramo doko baa letena renge nyepala karalu karara ingilyamo. 26 Mendali nambana yulu pyuo karara doko namba paronuli pyuo epara ingilyamo. Dokome namba karare dokona nambana yulu pingi akali dokopa role pyao kararamba. Mendali nambana yulu pyuo kararamo doko Rakaneme baa ketae pyambwaramo karara. 27 Epapu namba monarena pulunongo pyapyamopa karo. Dokona apa larose? Rakane, yuu gii dakepa yulu palamo dokona namba keta pali nanale lao namba nyisape, larose? Daa, gii dakepana yulu palamo dokona palira lao epeyo. 28 Rakane, embena kingi ketae pyambuo karape leya. Dokopa yake panda dokona piso pii mende lao, Wamba dokopa nambana kingi doko ketae pyambuo kareyo. Deeko lao ketae pyambuo kararo leya. 29 Wambu malu doo kareyami dupwame pii doko sepala, Yuu gala lalyamo leyami. Wambu lapome, Aŋala mendeme baa lamailyamo, leyami. 30 Yesumi pii mende lao dopa leya. Pii doko namba reke lao lao epande daa. Nakamana lao lao epamo leya. 31 Epapu gii dakepa isa wambu dupwa lao yapalya yapana pira ingilyamo. Epapu isa wambu dupwana kamongo doko nyuo ralinyi nembara. 32 Namba nyuo ketae minyalyuo palyarami gii dokopa wambu peparae namba palirunu dokona sukusa sukusa pira leya. 33 (Baa apa pyuo kumuo yaso nao paro lao pii doko wambo leya.) 34 Dopa leyamo dokopa wambu malu kareyami dupwame baa dopa lamaiyami. Mawa Pii dokona Koraisa baa karalu karara lao palelyamopa namwa singi. Dokona apa pyuo lkinyingi Akali doko minyalyarami ingilyamo lalese? Ikinyuigi Akali doko baa apisi? leyami. 35 Yesumi nakama dopa lamaiya. Yuu gii mee lama nakama pipya yanga paupau lao karalopyamo. lminjasara lapala yango karamo dokopa kata nyuo puu pao parami. Mendali iminjilyamo dokopa kata penge doko anja pelyo lao see nao penge. 36 Yanga paupau lao karenge doko baa nakama sukusa karamo gii dusipana baa kinyi lao suu pyao karalapape. Dokome nakama yanga paupau lengena wane wanake ingyuo parami leya. Dopa lapala kanjakala pao nakama baa kanda nana lao yalu pyuo kareya. 37 Nakama kando kareyaminyipa baame yulu andake malu lasaka pyuo kareyamopape nakamame baa kapa ingingi lao suu pyao kara nayami. 38 Dopa piyaminyi doko Anatunya poropeta akali Aisaya lenge dokome pii mende leyamo dokona suu pyao piyamisa piya. Pii doko dapa lao palamo. Kamongo, namwa lalamano doko api mendeme kinyilyamo lao suu pyalamisi? Kamongona poralnya renge doko apimoo keta paneyamo kandeyamisi? lao palamo. 39 Renge dokona lao baa kapa ingingi lao suu pyaa nayami. Dokona lao Aisayame pii mende dopa leya. 40 Anatumi nakamana lenge koo inginyi pyambuo, mona kana pokwanyi pyambuo piyalyamo. Nakamana lengeme kando monarena soo giso pipala namba kararo dokona kapu kyepala pyuo elya pyuo nyakape lasarami lapala dopa piyalyamo, leya. 41 Aisaya baame Yesu yanga paupau laramo doko wambo kandapala baasa lao leyalyamo. 42 Dopa leyamopape Juu rapu pingi akali mupwa lapo dupwapeme baa kapa ingilyamo lao suu piyami. Lao suu pyapala sinakoke sukusa karamano doko ramanyi neta nembaraminyi lao nakamame Parisi akali dupwa kando pakapala dopa lao suu pilyamano lao polo laa nayami. 43 Anatumi nakama lakandara dokona poraiyuo mona nyuo kara napala isa akali dupwame nakama lakandarami dokona suu pyao kareyami. 44 Dokopa Yesumi pii ketae palyuo lao dopa leya. Mendalimi namba kapa ingingi lao suu pyara dokome nambako iki suu pyaa narasa pira. Namba mapanyi peeyamo doko suu pyao kararasa pira. 45 Doko suu pyao mendeme namba kandara dokome namba mapanyi peeyamo doo kandarasa pira. 46 Mendalimi namba kapa ingingi lao suu pyao karara doko iminjingi dokona pisu piso pisa nana lapala namba yanga paupau lao isa yuu dakena epeyo. 47 Wambu mendeme nambana pii dupwa sepala minya nao karara ramo dokopa nambame baa kando kote laa naro. Dokona ingyuo isa wambu dupwa kando yapalya yapana pyuo lala epeyonde daa. Nambame isa wambu dupwa nyiso pyuo nyela epeyo. 48 Mendalimi namba kando waso waso pii napala soo nembo pyuo karara ramo doko yuu gii lumwa pira dokopa pii lapunu dokomeko baa kando lara ingilyamo. 49 Dokona lao nambame sisu lao lapunde daa. Rakane namba mapanyi peeyamo dokomeko namba pii laro dupwa langipyamosa pilyamo. 50 Dokona suu pyao baame lalu lao leyamo pii doko kyakana renge kulisa doko sulu singi doko soo gisilyu. Dokona pii lao karo doko Rakaneme dopa lape lao lapyamuli pyuo leto leya.

13

1 Pasopa nenge repeta pyaka siyamo dokopa Yesumi isa yuu dakena yaki nyepala rakange keta paponolyamo lao soo manjo nyiya. Baame banya wamba mona reto kareya dopako pyuo mona reto karo kumuya. 2 Alemanji nenge napa nayaminyi Satane dokome Jutasa Isakeriote Saimonena ikinyingi dokona monarena kunji pyao Yesu mata kando lena leya. 3 Dokopa Yesu Rakaneme yulu peparae kingi rakana palyakayamopa karo epapala dee Anatu karamo dokonako parolyamo lao soo gisiya. 4 Soo gisapala nenge nao peteyaminyi dokona roya karapala banya komau sakisi doko koko retapala saole mende nyepala wapuya. 5 Wapupala disi mendena ipwa kulimbuo retapala disaepole dupwana kimbu dupwa wate pipapu saole wapuyamo dokome pyao nembapa pyakamiya. 6 Dopa pyuo karo Saimone Pita peteyamo dokona epeya. Dokopa Pitame baa lamaiyuo, Kamongo, embame nambana kimbu wate pyakarese? leya. 7 Yesumi baa isingi lamaiyuo, Pilyunu doko dakepa soo gisa nalene. Rengya sere leya. 8 Pitame baa lamaiyuo, Embame nambana kimbu wate pyaka nalu nao nare leya. Yesumi baa isingi lamaiyuo, Nambame emba wate pyaka naro ramo doko emba nambana mana nyii nare leya. 9 Saimone Pita baame baa dopa lamaiya. Kamongo, nambana kimbu yeelyo daa. Nambana kingipi ayembape opetaeko pyakape leya. 10 Yesumi baa lamaiyuo, Mendali wate pyuokondali piramo doko dee wate pira ingya nara. Kimbu iki dee wate pira ingyara. Dokopa banya yanenge peparae elyape sera. Sipyamopa nakama elyape karaminyipa mendaki iki karo pisipyamopa karamo leya. 11 (Akali dokome mata kando lara lao soo gisapala lao nakama peparae elyape daa leya.) 12 Nakamana kimbu wate pyakamipala banya komau dusipa nyepala wambo peteyamo dokona pisipala nakama lamaiyuo, Namba mende pyakalono doko nakama soo gisilyamisi? 13 Nakamame namba kando, Namwana Mana Lenge, Kamongo lenge kandale. Namba dopale ingyuo karo dokona kapa rolae letaminyi. 14 Nakamana Kamongo, Mana Lenge dokome nakamana kimbu wate pyakapu ramo dokona nakama rangeme mendeme mendena kimbu wate pyakamirami ingilyamo. 15 Nakama pipunyili pyuo pyuo kararami lao yulu doko lasaka pyano. 16 Kinyi kinyi langilyu, kendemande akali dokome wakasa ingyapala banya kamongo doko kando ulu pili londele lao kara nange. Dee mendeme akali mende wai pii minyuo pena laramo doko suu pyao minyuo paramo akali doko mapanyi peeyamo dokona kando ulu pili londele lao kara nangeko. 17 Pii doko soo gisapala kararami ramo doko nakama keyange keta palirami. 18 Nakama peparaesa kando laa nalyo. Nambame akali rombo palyiyu dupwa soo kaeyo karo. Pii pyasi palamo mende, Nambana nenge nao pisipyamo akali doko kapu kyepala kimbu yukaname namba kalyalana pira leyamo doko leyamuli pyuo pira. 19 Angi pyaka seramo dokopa namba baalyamo lao soo nyerami lapala ene pyaka sepa nalyamo dakepa dopa piraŋa lao langilyu. 20 Kinyi kinyi langilyu, mendeme namba pena laro doko yako lao nyeramo dokome namba yako lao nyerasa pira. Mendeme namba yako lao nyeramo dokome namba mapanyi peeyamo doko yako lao nyerasa pira, leya. 21 Yesu pii dopa lapala baa monarena randa piyamopa karapala dopa lao polo leya. Kinyi kinyi langilyu, nakama petaminyi dokona mendeme namba mata kando lara, leya. 22 DisaepoIe dupwame mendeme mendali kanda kanda pipala apisa letamo lao saka nayami. 23 Banya disaepole dokona mende Yesu mona reteya doko Yesunya paralisa peteya. 24 Akali doko Saimone Pitame gyaakai pipala, Baa apisa letase lao piso sepe leya. 25 Dokopa akali doko Yesunya kyangali dokona lalyuo sili lapala dopa pyuo piso, Kamongo, emba lalene doko apisi? leya. 26 Yesumi isingi lao, Borete kunjasi dake poeyapala mairunu akali doko leya. Lapala borete doko poeyapala Jutasa Saimone Isakeriotena ikinyingi doko maiya. 27 Borete doko maiyapeyamopa Satane Jutasa baa keta epo maralyiya. Yesumi baa lamaiyuo, Emba mende piri ingilyamo doko waiya lao pipi leya. 28 Dopa pyuo leyamopa nenge nao peteyaminyi dupwame baa pii lamaiyamo dokona renge angi doko soo gisa nayami. 29 Lapome Jutasa kana mone bokote minyuo kareya dokome Yesumi Pasopa nenge narama ingilyamo dokona ropo pinyale lalyamo panda pendewa wambu dupwa kana lapo mainyale lalyamo lao suu piyami. 30 Jutasame borete nyepala aopa kamanda peya doko kukwama. 31 Baa kamanda papeyamopa Yesu dopa leya. Epapu Ikinyingi Akalinya kingi ketae pyambusi silyamo. Dee baa keta Anatunya kingi doko ketae pelyamoko. 32 Dee dopako pyuo Ikinyingi Akali doko enakana Anatu baa keta kingi ketae pyambusi karara. Doko aopa pira ingilyamo. 33 Nambana wane dupwa namba yuu gii malu ingyuowale nakama pipya role pyapeta kara narama. Nakamame namba kotarami. Dokona suu pyao Juu wambu lamaipu dokoko epapu nakama langilyu, Namba panya karo dokona kapa epa narami. 34 Mawa pii enenge mende jilyu. Nakama yango mendali mona reto karalapape. Nambame nakama mona reto karenge dopako pyuo nakama yango mendali mona reto karalapape. 35 Nakama dopa pyuo yango mendali mona reto kararami ramo doko wambu peparaeme nakama nambana disaepolelamo lao kando serami leya. 36 Saimone Pitame baa lamaiyuo, Kamongo, emba anja parese? leya. Yesumi isingi lao, Namba paro dokona epapu moko minyuo eparami ingya nalyamo. Ingya napyamopape rakyame dokopa nakama eparami ingilyamo leya. 37 Pitame baa lamaiyuo, Kamongo akipamo emba pare dokona epapu kapa eparo ingya nalyase? Namba emba kumuo jero leya. 38 Yesumi baa isingi lamaiyuo, Embame namba kumuo jerese? Kinyi kinyi langilyu, kola kali pii lapa naramopa embame namba yuu remasa mata joo lare leya.

14

1 Nakama mona rando karo nalapape. Anatu kapa ingingi lao suu pyao namba opetaeko suu pyao karalapape. 2 Nambana Rakanena anda dokona panda malu silyamo. See napyali doko nakama kararami panda doko rapa rapa pyakala pelyo lapulisi? 3 Dokona suu pyao nakama kararami panda doko pao rapa rapa pyakapala namba kararo dokona nakama opetae kararama lapala dee kamba epo dokopa nakama nyuo nambana arapunya karako leya. 4 Dokona suu pyao nakamame namba anja paro kata doko singi kandale. 5 Tomasame baa lamaiyuo, Kamongo, emba anja pare lao see nalyamano dokona kata angi doko apa pyuo kando nyeparamase? leya. 6 Yesumi baa lamaiyuo, Namba kata angi dokope kinyinya renge dokope letena renge dokope karo. Mendali namba keta epa nara ramo doko Anatu karamo dokona kando nyii nara. 7 Namba soo gisamili doko nambana Rakane doko opetae soo gisamiliko. Doko namba kandapala dokome baa opetae kando soo gisilyaminyi. 8 Pilipame baa lamaiyuo, Kamongo, Rakange doko namwa lasaka pipi. Dokopa namwa mona seramopa kararama, leya. 9 Yesumi baa lamaiyuo, Pilipa namba nakama pipya yuu andarele karenge doŋo nakamame namba apisi lao soo gisa nalyamisi? leya. Mendalimi namba kandapala dokome baa opetae kando soo gisilyaminyi. Doko suu pyao namwa Rakange lasaka pipi letene doko akipamo letese? 10 Namba Rakanena arapunya karapunupa Rakane doko nambana keta karamo doko kinyilyamo lao suu pyaa nalyamisi? Pii langyuo karo doko namba rangeme sisu lao langyuo karonde daa. Rakane namba keta karapala banya yulu range pyuo karamo. 11 Namba Rakanena arapunya karapunupa Rakane nambana arapunya karamo langyalono doko kinyilyamo lao suu pyaa narami ramo doko dee nambana yulu andake dupwa kandapala kinyilyamo lao suu pyalapape leya. 12 Kinyi kinyi langilyu, namba kapa ingingi lao suu pyao kararami dupwame namba pyuo karo yulu dopale pyuo kararami. Nambame Rakane karamo dokona parono dokona yulu kamame wakasako ingyuo pyuo kararami. 13 Nambana kingi lao mende piso serami ramo doko namba pyakaro. Rakanena kingi doko namba keta ketae paramo karara. 14 Nambana kingi lao mende piso serami ramo doko namba pyakaro. 15 Nakamame namba kando mona reto kararami ramo doko nambana mawa pii dupwa elya pyuo minyuo kararamisa pira. 16 Dokopa nambame Rakane kando ateŋa lakao kararonopa baame Nyisingi wakale akali Kinyi lenge Imambu doko julu joo jera. 17 Isa wambu dupwame kanda napala see nao karaminyi dokome kapa nyerami ingya nalyamo. Nakama range baa soo gisilyaminyi dokona lao baa nakama pipya karaminyi. Kararaminyipa baa nakamana mona anda dokona epapala palira. 18 Nakama range iki karalapa lao yaki nyuo kaeyalu kaeyo kaeronde daa. Nakama kararami dokona epapala kaeyaro. 19 Rengya usale dokona isa wambu menge dupwame namba dee kanda nalominyi. Dopa piraminyipape nakamame namba kandarami. Namba angi lete karo dokona nakama opetae lete kararami. 20 Namba Rakanena arapu dokona karelyonopa nakama nambana arapunya karaminyipa namba nakama pipya karo pilyu doko yuu gii mende pyaseramo dokopa nakamame soo gisarami. 21 Mendeme nambana mawa pii soo nyepala suu pyao karamo dokome namba mona retapyamosa pilyamo. Dokona suu pyao mendeme namba mona retaramo doko nambana Rakane dokome baa mona reto kararamopa nambame baa mona reto nolakarono dokopa namba kandara leya. 22 Jutasa (Isakeriote doko daa) baame lamaiyuo, Kamongo, apa pyuo namwa yeelyo kando nolakapala isa wambu dupwa kando nolaka narese? leya. 23 Yesumi baa isingi lamaiyuo, Akali mendeme namba kando mona retara ramo doko nambana pii warombo soo karara. Dokopa nambana Rakangeme baa mona retaramopa baa karara dokona nambwa epo baamoo pipya role pyao palu palirama. 24 Mendeme namba mona reto kara nange doko nambana pii warombo soo kara napyasa pilyamo. Dokona suu pyao pii nakama silyaminyi doko nambanande daa. Rakane namba mapanyi peeyamo dokona pii. 25 Namba nakama pipya role pyao karamano dokopa pii dusipa langingi kandale. 26 Dopa pirunupape Nyisingi Imambu Poo Pyasi Rakaneme nambana kingi lao mapanyi peeyaramo doko pii peparae mana langyuo pii langilyu dupwa peparae nakama suu pyanyi pyambwakara. 27 Mona kyuu lao singi renge doko nakama keta palena lapala jilyu. Namba rangena mona kyuu lao singi renge doko nakama jilyu. Isa wambu dupwame mainginyili pyuo jilyunde daa. Nakama mona nemba napala paka nao karalapape. 28 Namba pao kaepala dee nakama kararami dokona eparo lapunu doko selaminyi kandapi. Namba angi mona retamili doko Rakane karamo dokona pelene lao rae maiyuo karamili. Namba Rakanepa manda manjo kara nalyo. 29 Kinyi leelyamo lao suu pyarami lapala ene pipa napyamopa dopa pira lao langyilyu. 30 Isa wambu dupwana kamongo doko epelyamo dokona nambame pii malu dee langyuo kararo ingya nalyamo. Baame namba kando koo mende kapa pii nange. 31 Pii nalyamopa nambame Rakane dokona mona reto karo doko isa wambu dupwa sinya lao nambame Rakane dopa piri lao lengenyili pyuo pyuo karo. Mona sipuralapa, leya.

15

1 Namba isa girapo marange angingyuo karelyonopa Rakange doko wangya dupwa pyakepanyi nembo elya pingi ingyuo karenge. 2 Nambana wangya jingi angi lyii nange dupwa peparae baame pyakepanyi nembalu nembo nembenge. Wangya jingi angi lyingi dupwa peparae jingi lyulu lyuo karena lapala baame elya pyuo pyakepenge. 3 Nambame pii langipu dokome nakama elya pisi karaminyi. 4 Nambapa karo paka lakyuo paa nalapape. Dokopa namba nakama keta kararo. Wangya mende marangena sisingi dokona piso ando kara nara ramo doko rangeme sisu lao jingi lyii nara doko suu pyao nakama nambapa pako kara narami ramo doko nakama elyape keta kara narami. 5 Namba girapo isa marange ingyuo karelyonopa nakama wangya ingyuo karaminyi. Akali nambana kararamopa namba banya mona anda palironopa jingi malu lyerasa pira. Dokona lao nakamame namba lakipa nyepala kararami ramo dokopa nakama mendepe pinya saka narami. 6 Akali mende wangya ingyuo namba marangena sisingi dokona piso ando kara nara ramo doko baa nembaraminyipa kyapwara. Wangya kyapulyamo dupwa yapo nyepala isare dokona pyambuo yangarami ingilyamo. 7 Nakama nambana kingi kapena kararaminyipa nambana pii dupwa nakama keta palira ramo doko mende pipuli yaka lao suu pyaraminyili pyuo piso selapape. Dokopa dokonako paiyuo pyakao karara. 8 Jingi malu lyuo karo nambana disaepole ingyuo kararaminyi dokome nambana Rakangena kingi ketae pyambwaramisa pira. 9 Rakaneme namba mona reto karapyamo doko suu pyao nambame nakama mona retoko karapu. Nambana mona kulisa retenge renge dokona sukusa karalu karo karalapape. 10 Nambame Rakanena pii lengenyili pyuo warombo soo karo dokopa baapa mona reto karambano doko suu pyao nakamame nambana pii warombo soo kararaminyipa nambapa mona reto kararamasa pira. 11 Nambana rae maingi renge doko nakama keta palyuo simbwaramopa parami dokona lao pii renge dusipa polo langyalono. 12 Nambame mawa palyuo dopa leto. Nambame nakama kando mona reto karapu doko suu pyao nakamame yango mendali mona retaro karalapape. 13 Mendeme banya puu minyingi dupwa ama wakasa mona retapala dokome nakama nyiso kumuo maira ingilyamo. 14 Nambame nakama pipya lao laronuli pyuo kararami ramo doko nambana puu minyingi ingyuo kararamisa pira. 15 Kendemande akali dupwame nakamana kamongo dupwa apa pilyaminyi lao soo gisa nange renge dokona nambame nakama kando kendemande ingyuo karaminyi lao laa nalyo. Laa napunupape nambana Rakane pii namba langiyamopa soo nyiya dupwa peparae nakama polo langyuo karapu dokona nakama nambana puu minyingi lalono kandapi. 16 Nakamame namba yapalyapa nayaminyipa nambame nakama yapalyuo nakama wangya ingyuo jingi lyuo karala paraminyipa jingi dupwa lyuo karalu karena lao rombo palyiyu. Dopa pyuo kararami dokopa Rakaneme mende pyakana lao piso seraminyili pyuo pyakao karara. 17 Mendeme mendali mona reto karalapape lao dokona mawa pii langilyu. 18 Isa enda akalipimi nakama awa nayami kande dokopa, namba wambo awa nayaminyili pyuowako awa nalyaminyi lao soo nyelapape. 19 Nakama isa wambunya yongo nyuo karamili dokopa isa wambu dupwame nakama namwana rangelyamo lapala mona reto karamili. Doko doŋo nambame nakama yapo nyiyunupa nakama mee sisi panda ingyuo karaminyipa isa wambu yango dupwa nakama kando awa nalyaminyi. 20 Wambo pii mende langyalono kandapi doko suu pyalapape Kendemande akali banya kamongo kando wakasa ingya nange langyalono. Doko suu pyao namba randa joo kareyami ramo doko nakama randa jooko kararami. Nambana pii minyuo kareyamili ramo doko nakamana pii minyuo pyuoko kararamili. 21 Nakama randa jerami dokopa namba mapanyi peeyamo doko soo gisa napala nakama namba reke lao randa joo kararami. 22 Namba epa napala koo keyangepe pakana palyuo mana lamai napuli doko nakama yulu koo kamenge pimisa pii mende pali napyali. Dakepa nambana pii see napala koo piyama larami ingya nalyamo. 23 Mendeme namba kando awa nara ramo doko nambana Rakange opetaeko awa narasa pira. 24 Nambame nakama pipya karo wambu mendeme yulu pii nange dopale pyuo kara nayoli doko nakama koo keta paa nayamili. Doko nakama nambana yulu andake dupwa kando kaepala nambapa nambana Rakangepa kando awa naoko karaminyi. 25 Namba kandakinyuo awa nayami, dopa lao Mawa Pii pyasi doko palamo pii dokona pyaka silyaminyi. 26 Kinyinya Renge Palenge Nyisingi Imambu doko Rakane keta karenge doko epara. Baa Rakane role pyao karenge doŋo nambame baa dae pena laronopa baame nambaŋa lao rolo langira. 27 Nakama wambo kanda soo nambamoo pipya kareyama dokona ingyuo nakama dopako pyuo nambana lao polo lao kararami.

16

1 Nakama suu longo paa nalapape lao pii dusipa peparae langyalono. 2 Kinyi kinyi langilyu, yuu gii epara ingilyamo dokopa nakama sinakoke anda dupwana neta nembarami. Mendeme nakama pyao kumakapala dokopa Anatunya yulu dokona pipusa pilyamo lao suu pyarami. 3 Rakangemoo nambamoo soo gisa napala dokona dopa pirami. 4 Dopa pirami doko nambwa Rakanepa soo gisa napala nakama pyarami yuu gii pyaka seramo dokopa dopa langii kande lao suu pyarami dokona langyalono. Wamba role pyao kareyama dokopa pii dapwa langya nayo. 5 Doko dakepa namba mapanyi peeyamo doko karamo dokona range pelyo. Paronopape nakama mendalimi anja pelene lao piso see nalyaminyi. 6 Epapu rolo langyalono dokona nakama monarena kondome kumulyaminyi. 7 Kondalyaminyako doŋo nakama kinyi langilyu, namba kanjakala parono dokopa nakama elyape keta palirami. Namba kanjakala paa naro ramo doko Nyisingi doko nakama keta epa nara. Paro ramo doko nambame baa nakama keta mapanyi peeyakaro. 8 Baa epapala dokopa isa wambumi yulu koo dokonape yulu rolae dokonape Anatunya kote pii dokona kyai pyuo suu pyaro karaminyi doko pananyi pyambwara. 9 Isa wambu dupwame namba kapa ingingi lao suu pyaa nalyaminyi dokona palyuo baame nakamana koo doko nolakakamira. 10 Namba Rakange karamo dokona paronopa nakamame namba dee kando narami dokona lao baame yulu rolae angi doko lasaka pira. 11 Anatumi isa wambu dupwana Kamongo doko kando kote lapyaŋa lao doko lyakai pyuo panaramo serami. 12 Nambame nakama pii malu langiru ingyapyamopape nakama kapa soo nyii narami ingilyamo. 13 Kinyi lengena Imambu doko epapala dokopa baame nakama pii kinyi peparae mana langira. Dokona lao baame range sisu lao larande daa. Baa renge seramuli pyuo polo langyuo karara. Baame ene pipa nalyamo dupwa wambo nolakao lao karara. 14 Baame nambana dupwa nyepala mana langyuo dokome namba keta pyambwarasa pira. 15 Rakangena kingi rakapana silyamo dupwa peparae nambanaŋa. Dokona lao Imambumi renge lamairunu dupwa nyepala nakama langira ingilyamo langyalono kandapi. 16 Rengya usale nakamame namba dee kanda narami. Dee mee mende usale dokopa namba kandarami, leya. 17 Leyamopa banya disaepole dupwana lapo nakama lao dopa leyami. Baame namwa langilyamo doko aki pii langilyase? Usale nakamame namba kanda narami, dee mee mende usale namba kandarami. Rakange karamo dokona paro ingilyamo dokona kanda narami langyalamo kandapi, leyami. Kandarami letamo doko akinde letase lao see nalyamano leyami. 18 Baame, Usale dokopa kandarami lalamo doko apa pyuondena lalamo kandapisi? Apa pyuondena lalamo lao saka nalyamano, leyami. 19 Yesumi baa piso selana leyami doko. Sepala baame nakama dopa lamaiya. Usale namba kanda narami, dee mee mende usale namba kandarami lalono dokona apa pyuondena lalepe lao nakama range sukusa piso silyamisi? 20 Kinyi kinyi langilyu, nakama ee lao ipwakuku nyeraminyipa neta wambu dupwame rae maiyuo kararami. Nakama kondo kararaminyipape enakana raeko maiyuo kararami. 21 Enda mende wane mata pilyamo dokopa rangena yuu gii doko pyaka sipyalyamo lapala mona randange. Dopa pilyamopape wane doko manjo nyepala dokopa raeko maipala baa randa neyamo dupwa nyuo kame singi. 22 Doko suu pyao epapu nakama kondome kumuo karaminyi. Dopa pilyaminyipape nambame nakama dee epo kandarono dokopa nakama monarena pyakalyuo pyaramo kararami. Dokopa mendalimi nakama monarena pyakalyuo pyaramo renge doko rekya lao nyeraminde daa. 23 Yuu gii dokopa nakamame namba mende piso see narami. Kinyi kinyi langilyu, Rakange doko kando mende piso serami ramo doko baame nambana kingi reke lao kapa jera. 24 Wamba nambana kingi dokona lao piso see nayami. Monarena pyakalyuo pingi renge dokome simbuo pyoko pyoko lena lapala piso selapape. Dokopa kando nyerami ingilyamo. 25 Nambame kongwaiu lalya lana pyuo langyalono. Yuu gii mendepa nambame kongwalu pii dupwa kaepala Rakange dokona rolae lao langiru. 26 Yuu gii dokopa nambana kingi lapala piso serami. Dokopa nambame nakamana lao ateŋa lakaro laa nalyo. 27 Nakamame namba mona reto Rakane karamo dokona karo epee lao suu pyao karaminyi dokona Rakane baa rangeme nakama mona reto karamo. 28 Rakane karamo dokona karo epapala isa yuu dakena epeyo. Dopa pipala isa yuu dake yaki nyuo Rakane karamo dokonako pelyo, leya. 29 Banya disaepole dupwame, Yuu gii dakepa emba kongwalu pii dokona kaepala rolae lalenelyamo doko kandelyamano. 30 Embame peparae soo gisingilyamo lao mendeme embena pii doko kinyi lyasilisi lao piso sepenge ingyapa nalyamo lao epapu namwa soo kaelyamano. Dokome emba kinyi Anatu karamo dokona karo epeelyamo lao suu pilyamano leyami. 31 Dokopa Yesumi nakama lamaiyuo, Epapu nakama kinyilyamo lao suu pilyamisi? 32 Yuu gii mende eparamo dokopa nakama bolombalo lao anda palengenyili pyuo paraminyipa namba iki kararo. Kinyi kinyi, yuu gii doko epapu pyaka silyamo. Namba iki kararoko doŋo Rakane nambapa kararamba dokome iki ingya nara. 33 Nambana arapu dokona kararami dokome nakama mona kui lao sinya lapala pii doko langyalono. Yuu dakena karo randa narami. Nambame isa yuu dake anamasi minyuo karo doko kandapala mona kuki palyuo karalapape, leya.

17

1 Yesumi pii dupwa lapala yake doko kandalyuo kandapala dopa leya. Rakane, yuu gii doko pyaka sipyalyamo. Embame embena lkinyi ketae pyambwarenepa baame emba ketae pyambwara ingilyamo. 2 Dokona lao embame wambu baa maiinyi dupwa peparae baame kyakana renge kulisa palu palenge doko maira lapala embame baa isa wambu dupwa peparae iso karena lee. 3 Isa wambumi emba Anatu angi karenge dokome Yesu Koraisa mapanyi pee doko kando serami doko kyakana renge kulisa doko nakama keta palira. 4 Isa yuu dakena karo yulu jiinyi doko nambame pyuo otapunupa dokome emba ketae pyambwasi karamo. 5 Rakane, isa yuu doko ene wasa nange siyamo dokopa embapa nambapa yanga paupau lao kareyamba dokona suu pyao embena lenge kambu seramo dokona kararonopa embame namba yanga paupau lanyi pyambwape. 6 Embame isa wambu lapo yapo nyepala namba jiinyi dupwa embena kingi lamaiyunupa soo nyiyami. Dupwa embena ingyuo kareyaminyipa embame namba jiinyipa embena pii doko warombo soo karaminyi. 7 Yulu jiinyi dupwa peparae embena ingilyamo doko soo kaelyaminyi. 8 Dokona lao nambame pii jiinyi dupwa nakama lamaiyunupa nakamame soo nyepala kinyi kinyi emba karenge dokona namba karo epeelyamo lao sepala embame namba mapanyi pee lao suu pyao karaminyi. 9 Nambame nakamana lao ateŋa lakamilyu. Mee isa wambu dupwana lao ateŋa lakami nalyo. Wambu embame jiinyi dupwa embena ingyuo karaminyi dokona nakama suu pyao ateŋa lakamilyu. 10 Nambana ingyuo karaminyi dupwa peparae embena. Dee embena ingyuo karaminyi dupwa peparae nambana. Dopa pyuo karo nakamame namba ketae pyambuo karaminyi. 11 Epapu isa yuu dakena angi ingyuo kara nalopono. Kara napala emba karene dokona eparo ingyapyamopa nakama isa yuu dakena karaminyi. Rakane poo pyasi embena kingi poral renge paleta lasi namba keta jiinyi dokome nakama kyawa minyuo karape. Minyuo kararenepa nambwa mendaki ingyuo karambano doko suu pyao nakama opetae mendaki ingyuo karenale. 12 Nakama pipya role pyao karamwano mange dokopa embena kingi yaki nyii nana lao embena arapu dokona karenale lao iso karapu. Nambame nakama rapu pyuo karapunupa nakama karaminyi dokona mende kwao pupyande daa. Akali mendakindeme kwao para ingingi doko Baepolena leyamuli pyuo isa peya. 13 Dopa pipyamopape epapu emba karene dokona epelyo. Doko nambana mona pyakalyuo pingi renge doko nakama keta palena lapala pii dapwa isa yuu dakena lao karo. 14 Nambame embena pii doko nakama lamaiyu. Namba dae yuu range ingya nao karo doko suu pyao nakama opetae mee sisi panda ingyuo karaminyi dokona isa wambu yango dupwame nakama epekanda nao karaminyi. 15 Nakama isa yuu dokona karaminyi dokona rekya lao nyakape lao ateŋa lao letonde daa. Koo dokome rambu lasara lao kyawa minyuo karape lao ateŋa leto. 16 Namba dae range ingya nao karo doko suu pyao nakama dae range ingya napyamoko karaminyi. 17 Embena pii kinyinya renge dokome nakama yapo nyerenepa embena ingyuo pena. 18 Embame namba isa yuu dakena mapanyi peene doko suu pyao nambame nakama isa yuu dupwana mapanyi pyambuyu. 19 Nakama embena wambu yapasi angingyuo pena lao namba range kame soo kaepala embena iki karo. 20 Akali dasipana iki ateŋa lakamilyunde daa. Nakamame pii lamairaminyi sepala namba kapa ingingi lao suu pyapala mona jerami dupwana opetaeko lakamilyu. 21 Nakama peparae mendaki ingyuo karamili lapala ateŋa lakamilyu. Isa wambu dupwa emba namba mapanyi peelyamo lao suu pinya lapala Rakane emba namba keta karapinyipa dee namba emba keta karo doko suu pyao nakama opetae nambwa keta karamili lao suu pyao leto. 22 Nambwa mendaki ingyuo karambano doko suu pyao nakama mendaki ingyuo karamili lapala embame namba yanga paupau lenge renge jiinyi doko nambame nakama maiyu. 23 Nakama mendaki ingyuo karamili lapala emba namba keta kararenepa namba nakama keta kararo. Dokopa isa wambu dupwame embame namba mapanyi peeyapala namba mona retenge doko suu pyao nakama mona reto kareneko lao soo gisarami. 24 Rakane, wambu namba jiinyi dusipa namba kararo dokona nakama opetae role pyao karamwali lao leto. Karo dokopa isa yuu ene pyuo wasapa naenepa embame namba mona retapala yanga paupau lenge renge jii doko nakama kandarami. 25 O Rakane rolae pingi doko, isa wambu dupwame emba soo nyepa naminyipa nambame emba soo nyuo kaepunupa wambu lapome iki embame namba mapanyi peelyamo lao soo gisilyaminyi. 26 Embena kingi doko namba lamaiyuo doko dee lamaiyuo karalu kararoko ingilyamo. Dokome embame namba mona reto karene doko nakamana ingyara. Ingyaramopa nambame nakamana mona anda kararo.

18

1 Yesu pii dokio lapala banya disaepole dupwa pipya netarena pao yuu pota Kitone lenge doko nyuo yalo ee mendena pao sukusa peyami. 2 Yesu banya disaepole dupwa pipya yuu gii malu yuu dokona malu palyuo pisipa piyami dokona Jutasa baa mata kando leyamo doko opetae yuu doko kando soo kareya. 3 Soo karapala baame purisi akali mupwa dupwape Parisi dupwapeme yanda singi lapope yanda singi mupwa mendasipape nyepala lambepe kendapulipi kakupi wua gelape lapo nyuo minyuo pao yuu dokona peyami. 4 Dokopa Yesu baa keta piramo yulu dupwa peparae soo gisapala lenge kambu siyamo dokona epapala nakama lamaiyuo, Api kotelyaminyi? leya. 5 Nakamame isingi lao, Yesu Nasarete range doko, leyami. Yesumi nakama lamaiyuo, Doko namba, leya. Jutasa baa mata kando leyamo doko nakama role pyapeta kareyami. 6 Doko namba, lamaiyamo dokopa nakamame matanono papala yuunya paro siyami. 7 Baame dee piso soo, Api kotelyaminyi? leya. Dokopa, Yesu Nasarete range, dokoŋo leyami. 8 Yesumi isingi lamaiyuo, Doko nambaŋa langyalono lao kandapi doko namba kotarami ramo doko akali dasipa mee neta pena kaeyalapape leya. 9 Baa wambo Anatu kando wambu jiinyi dusipana mendali kwao pakapyande daa, leyamo dokona palyuo leya. 10 Dokopa Salmone Pitame banya wua gela mandeyamo doko kolo nyepala purisi mupwa dokona kendemande akali dokona kale rolaerename doko pyao rekya lanyi nembeya. Kendemande akali dokona kingi Malakasa lenge. 11 Yesumi Pita lamaiyuo, Embena wua gela doko palenge dokona palyape. Rakaneme pee kapo namba jipyamo dokona naa narose? leya. 12 Dokopa yanda singi malu epeyaminyi dusipa dusipana mupwa dokomoo Juu wambunya yanda singi dusipapeme Yesu minyarapala puu maiyami. 13 Puu maipala Anasa kareyamo dokona lanyuo peyami. Anasa baa Kayapasana imwange ingyuo kareyamopa Kayapasa baame ee kana dokona purisi mupwa ingyuo kareyamo dokona Anasa dokona wambo lanyuo peyami. 14 Akali mendaki wambu dupwana lao kumara dokopa nakama kapa ingyuo palira leyamo pii doko Kayapasa ingyuo leya. 15 Saimone Pita disaepole mendepa Yesu peyamo dokona mata pyao peyambi. Disaepole mende doko purisi mupwa wakasa dokome kandenge dokona baa purisi mupwa dokona anda kamapi sukusa kapa peya. 16 Dokopa Pita baa kakota lumbungisa kareya. Dokopa disaepole mende doko purisi mupwa dokome kandenge doko netarena papala kendemande enda kakota lumbungi iso kareya doko lamaipala Pita sukusa epena leya. 17 Kendemande enda kakota lumbungi isa kareya dokome Pita lamaiyuo, Emba akali dokona disaepole mende daase? leya. Pita baa, Namba daa, leya. 18 Kendemande wambu dusipape yanda singi dusipape kupwa piyasa isare lengya rena lapala soo kareyami. Pita baa opetae nakama pipya karo isare soo kareya. 19 Dokopa purisi akali mupwa dokome Yesu banya disaepole dusipanape banya mana pii dokonape baa piso sepa piya. 20 Yesumi baa isingi lamaiyuo, Nambame isa wambu dupwa panembena karo lamaingi, sinakoke anda dupwanape tembole dokonape Juu wambu peparae elyambu pingi panda dusipanape namba mana lamaiyuo karo pii mende yalu pyuo lengende daa. 21 Akipamo namba piso silisi? Nambana pii siyami wambu dupwa nambame apa lenge lao piso sepe. Nambame lao karenge doko nakama soo kaenge, leya. 22 Dopa leyamo dokopa yanda singi kareyaminyi dokona mendeme kingi kapeme Yesu rakyuo pyapala, Embame dopa lao purisi mupwa doko isingi lamaingisi? leya. 23 Yesumi baa isingi lamaiyuo, Nambame kopetame lapu ramo doko pii kwaelyamo doko polo lalase. Rolae nembo lapu ramo doko akipamo namba rakyuo pyalese? leya. 24 Dokopa Anasame, Kayapasa purisi mupwa wakasa karamo dokona Yesu baa puu maisi piso karena lapala lanyuo pupwape, leya. 25 Salmone Pita baa isare soo kareya. Dokopa role pyao kareyami dupwame baa lamaiyuo, Emba doko banya disaepole dokona mende daase? leyami. Dokopa baame, Ama daa leya. 26 Purisi akali mupwa dokona kendemande mende Pitame kale pyao rekya lanyi nembakamiya dokona ree palu mendeme baa piso soo, Emba ee dokona baa role pyao karambinyi kandapu doko daase? leya. 27 Pitame dee Daako, leya. Aopa dokopa kola kali pii leya. 28 Dokopa wamba kukwa Kayapasana anda doko kaepala Yesu lanyuo kyapona kote singi anda dokona peyami. Nakama rangeme Juu wambunya yulu suu pyao namwa elyape ingya naramosa Pasopa nenge kapa naa nasarama lapala kyapona kote singi andakare dokona paa nayami. 29 Paa nayamisa Pailate nakama kareyami dokona kamanda papala, Akali dake kando aki yulu koo pipyaŋa lao epelyaminyi? leya. 30 Nakamame baa isingi lamaiyuo, Akali dakeme yulu koo mende pii nange pyali doko embena panda peeya namwali leyami. 31 Pailateme nakama lamaiyuo, Nakama range baa nyepala nakamana mawa pii dupwana lao range kambuyanda pipwape leya. Leyamopa nakamame namwa Juu akali dupwame akali mende pyao kumakarama ingyuo mawa pii dokona pali nalyamo leyami. 32 (Yesu wamba namba dopa pyuo isa dokona pyarami lao reteyamo dokona palyuo leyamisa piya.) 33 Pailateme kyapona kote singi anda dokona dee papala Yesu epena lapala, Emba Juu wambunya Kiŋisi? lamaiya. 34 Yesu isingi lao, Embame range maso letepe panda lapome namba lao langiminyi letese? leya. 35 Pailate isingi lao, Namba Juusi? Embena wambu dupwamepe purisi mupwa dusipamepe emba namba keta peeyalaminyi kandapi. Emba aki mende pipisi? leya. 36 Yesumi isingi lao, Nambana isingi yulu doko dae isa panda pali nalyamo. Nambana isingi yulu doko isa pandana yulu ingyuo pupyali doko nambana yulu pingi akali dupwame Juu wambu keta namba nyuo peeya nana lapala pyakando pimili. Nambana isingi yulu doko isa wambunya yulu dopale ingyuo paa nalyamo leya. 37 Leyamo sepala Pailateme Emba kiŋi lyasilisi? leya. Yesumi isingi lao, Embame namba kiŋi lalene kandapi. Kinyi lengena renge polo lao kararo renge mendaki dokonako isa panda dakena namba manjo nyiyami. Wambu kinyi lengena renge wambu keta karaminyi dupwa peparaeme nambana pii soo karenge, leya. 38 Pailateme, Kinyi lengena renge doko apiyakalese? leya. Dopa pyuo leyamopa Pailateme Juu wambu kareyami dokona neta papala, Akali doko yulu koo mende pipya lao soo kanda nalyo. 39 Dokoko doŋo nakamana yulu mende singi kandale doko nenge Pasopa nenge gii dokopa akali mendaki namba mokwakapa pingi. Doko suu pyao Juu wambunya Kiŋi doko mokwakapili lao suu pilyamisi? leya. 40 Dopa leyamo dokopa nakamame poralyuo kaeyo lapala, Akali dake daa, Barapasa mokape, leyami. Barapasa baa kendepo nenge akali ingyuo kareya.

19

1 Dokopa Pailateme Yesu nyuo pyaroko pinya leya. 2 Dokopa yanda singi dupwame nepereke lapome minyuo kamenyongwapala lengyapu pipala banya kyawa dokona pee pyakamipala baa komau konele mende bolembale lakamiyami. 3 Lakamipala baa kareya dokona epapala, Emba Juu wambunya Kiŋi doko karalenelyamo, lapala baa kingi kapeme piyami. 4 Juu wambu kareyami dokona Pailateme kamanda dee papala, Baa koo mende pii napyaŋa lao soo kandapilyamo lao selapase, lapala, Nakama karaminyi dokona baa potemo lanyuo epelyo kande, leya. 5 Dokopa Yesu nepereke lengyapu pisi pee piro karo komau konele bolembale laro karo piyamopa kamanda epeya. Pailateme nakama lamaiyuo, Akali laminyi doko dake, leya. 6 Purisi akali mupwa dupwape yanda singi dupwapeme wangonali pyuo lapala, Baa isa mamandona pyao palya, baa isa mamandona pyao palya, leyami. Pailateme nakama lamaiyuo, Nambame baa koo mende pii napyaŋa lao soo kandapunupape nakama rangeme baa nyepala isa mamandona pyao palyalapape, leya. 7 Juu akali dupwame baa lamaiyuo, Baa Anatunya lkinyingi ingyuo karo lapyamosa dokona namwana mawa pii mende palamo dokome baa kumara ingilyamo leyami. 8 Dopa leyaminyi sepala Pailate dee pakaya. 9 Pakapala kote singi anda dee kolando papala Yesu lamaiyuo, Emba anja karo epee? leya. Dopa leyamopa Yesumi isingi mende laa naya. 10 Dokona Pailateme baa lamaiyuo, Namba pii mende langiri ingya nalyase? Emba mokwaro dokope isa mamandona pyao palyaro dokope range doko namba keta palamo lao emba see nalese? leya. 11 Yesumi baa isingi lamaiyuo, Embame namba kando mende suu pilyu ote lao kapa piro lao karene renge porai doko Ketaerena dokome emba jii napyali doko embame mende piri ingya napyali. Dokona namba nyuo emba jipyamo akali doko koo wakasa pipya ingilyamo. 12 Dopa leyamo dokopa Pailateme baa mokwalana piya. Dopa piyamopape Juu wambu dupwame pii porakaiyuo kaeyo lapala, Akali doko embame mokware ramo doko embame Sisa puu minya naresa pira. Akali mendemepe namba kiŋi ingyuo karo larami dupwa Sisa kando sisu nyuo kararasa pira leyami. 13 Dopa leyaminyi sepala dokopa Pailate Yesu kamanda lanyuo papala panda mende Kaname Rambi Kwaasi lenge dokona pao peteya. (Panda doko Ipuru pii lao Gapara lenge.) 14 Pasopa nenge narama lao rapa rapa pingi andawai korokama towalo keloke ingyuowale gii doko pyaka siya. Baame Juu wambu dupwa lamaiyuo, Dake nakamana kiŋi akali, leya. 15 Nakamame wangonapi pyuo lao, Baa pyao nemba, pyao nemba, isa mamandona pyao palya leyami. Pailateme nakama lamaiyuo, Nakamana kiŋi doko isa mamandona pyao palyakarolyase? leya. Purisi mupwa dupwame isingi lamaiyuo, Sisa baa iki namwana kiŋi ingyuo karapyamopa mende kara nalyamo leyami. 16 Dokopa baa kapa isa mamandona pyao palyarami doko kapa lao nakama maiya. 17 Dokopa Yesu nyiyaminyipa baa range banya isa mamando doko soo netarena pao yuu kingi Kyawa Kuli lenge (Ipuru pii lao Golokota lenge) dokona peya. 18 Dokona baa isa mamandona pyao paiyiyami. Akali lama opetae Yesu kanya dokona paleyamopa dolapo parali dolapona pyao palyiyami. 19 Pailate baame pii renge dokona pepa pyapala isa mamando doko pyanyi palyiya. Yesu Nasarete range Juu wambunya Kiŋi lao pyasi paleya. 20 Yesu isa mamandona pyao palyiyami yuu doko anda malu palyuo karenge dokona repeta siyamo dokome Juu wambu malumi pii doko kando yaka leyami. Pii doko Ipuru pii Orome pii Giriki piipi dusipana lao pyasi paleya. 21 Dokopa purisi mupwa dupwame Pailate lamaiyuo, Juu wambunya Kiŋi, lao palyapi doko kaepala, Akali dakeme namba Juu wambunya Kiŋi lapya, lao pyape leyami. 22 Pailateme lao, Pii pyapu doko pyalu pyao pyapu, leya. 23 Yanda singi dusipame Yesu isa mamandona pyao palyapala banya komau dusipa nyepala nakama akaii kisima suu pyao bange kisimasa lao malu palyuo sereyami. Dopa piyaminyipape banya pee pingi londe doko kii pyuo wapwa napala mee wapwalu wapuo wapuyami doko kando dopa leyami. 24 Pilya namane, lapala apimi embone piso nyera lao yulu mende pyuo piyami. Pii pyasi doko, Nambana komau pingi dupwa mokwa soo nyiyami. Nyepala nambana komau doko apimi embone piso nyera lao mende pyuo piyami, paleya. Pii pyasi paleyamuii pyuo yanda singi dusipame piyami. 25 Dopa piyaminyipape Yesunya isa mamando repeta dokona banya endangimoo endanginya kakingi dokomoo Maria Kiliopasana etenge dokomoo Maria Makatala range dokomoo kareyami. 26 Yesumi banya endangipa disaepole mende baame mona reteya dokopa repeta kareyambinyi kandapala endangi lamaiyuo, Enda, embena ikinyi kandape leya. 27 Lapala disaepole doko lamaiyuo, Embena endakinyi dolo karamo kandape leya. Dokopa disaepole dokome enda doko banya anda dokona lanyuo pao piso karo piyambi. 28 Enakana Yesumi banya yulu peparae dupwana lumwa pyaamo lao soo gisapala pii pyasi paleyamuli pyuo dopa leya. Namba nano pilyamo leya. 29 Pere warake mendena waene ipwange kau pingi simbuo peteyamopa dusa siya. Siyamo dokona isa lumbi mende waene dokona poeyo nyepala isa kingi isope lenge dokona bwuakiki pipala banya kambu dokona suu leyami. 30 Yesumi waene kau pingi doko napala baame lao, Pyuo otalyano leya. Lapala ayemba pongwa napala kumuyamopa imambu rekya lao peya. 31 Yuu gii rapa rapa pingi angi doko pyaka siyasa koro petenge pyaka selana piyamo yanenge kaoma dusipa yuu gii koro petenge dokopa isa mamandona paiyuo kara nami lapala Juu akali dupwame Pailate piso soo, Nakamana kimbu pyao roo pyapala yanenge kaoma dusipa nyuo neta kakondenale leyami. 32 Dopa leyaminyi dokona yanda singi dusipame epapala akali dalya kaepeta paleyamo dokona kimbu wambo pyao roo pyapala akali mende baa role pyao isa mamandona pyao palyiyami dokona kimbu opetae minyuo roo piyami. 33 Roo pyapala, Yesu paleyamo dokona epapala baa kumapapyalyamo lao kandapala banya kimbu pyao roo pyaa nayami. 34 Roo pyaa nayaminyipape yanda singi dokona mendeme banya mamanda doko kakumi arikiya. Dokopa ipwange ranjamape pale pale epeya. 35 Dopa pyuo piyaminyi kandeya akali dokome nakama opetae kinyi leelyamo lao suu pyalapape lao rolo leya. Banya rolo lenge pii doko kinyi keta karelyamopa kinyi letono lao soo gisingi. 36 Kuli roo pyao pii nayami doko, Banya kuli mendepe roo pyao pii nara, lao Baepolena paleyamuli pyuo piyami. 37 Dee, pii pyasi mende dopa lao palamo, Akali mende arikyarami doko kando kararami. 38 Enakana dokopa Josepe Arimatia range doko Yesunya disaepole doŋo Juu wambu dupwa kando pakapala wakale mende ingyuo dupwana kareya dokome Pailate piso soo, Yesunya yanenge kaoma nyuo minyuo kakondarowale leya. Dokopa Pailate, Kapa leya. Dopa leyamo dokopa baame epapala banya yanenge kaoma doko nyuo minyuo peya. 39 Nikotimasa wamba Yesu kareyamo dokona kukwa mendepa epeya doko baame rendamu pingi bange mwua lenge dokopa luli lenge isa mendepa alose lenge dolapo minyuo kiminjasi ama kenda malu doko minyuo epeya. 40 Nakabame Juu wambunya wambu malu pinginyili pyuo Yesunya yanenge kaoma doko nyuo luli lenge bange palyuo komau keyange dokome yama piyami. 41 Baa isa mamandona pyao palyiyami yuu doko ee repeta. Ee dokona malu anda mende wambu mendali malu pipa nangende siya. 42 Juu wambu dupwame dee yangama dokopa koro andake pyaka sera lao rapa rapa pingi yuu gii doko pyaka siyasa malu anda doko repeta siyamosa Yesu dokona palyiyami.

20

1 Koro andake dokopa wamba kukwa yuu ene iminjo yango piyamo dokopa Maria yuu Makatala range doko malu piyami anda dokona epapala malu anda kambu dokona kana upi leyami doko nyuo kakondasi siyamo kandeya. 2 Kandapala makando Saimone Pita disaepole mende Yesu mona reteyamo dokopa kareyambinyi dokona peya. Papala nakamba lamaiyuo, Kamongo doko malu anda dokona neta nyimilyamo. Doko anja retami lao namwa see nalyamano leya. 3 Pii doko sepala Pita disaepole mende doko opetae potemo epapala malu piyami anda dokona peyambi. 4 Pao nakamba laparae makando papalape disaepole mende dokome Pita nyuo enakapala malu piyami anda dokona wambo epeya. 5 Epapala koko kandalana pangu sepala komau keyange dolapo siyamo kandeya. Kandapalape andakare paa naya. 6 Dokopa Saimone Pita baa enakana epapala malu anda andakare peya. Pao komau keyange angi yaki piyami doko kandeya. 7 Kandeyamopa komau kyawa yaki piyami dokopa komau wakale mende dokopa mendakinya see napala wakale dumbisale kyasala pao siyamo kandeya. 8 Dokopa disaepole mende doko malu anda dokona wambo epeyamo doko opetae kolando peya. Pao kandapala kinyi baa lopo pupyalyamo lao suu piya. 9 Baa kumuo palipala sipuro epara ingyara, lao pyasi palenge kandale pii doko yuu dokopa ene sepa nao kareyambi. 10 Disaepole dolapo doko kandapala dee kapu kyuo anda peyambi. 11 Maria malu anda dokona kama karo ee lao kareya. Ee lao karo malu anda dokona koko kandeya. 12 Dokopa aŋala kakepame lama wamba Yesunya yanenge siyamo dokona peteyambi kandeya. Mende kyawa siyamo dokona piso mende kimbu siyamo dokona piso piyambinyi kandeya. 13 Nakambame baa lamaiyuo, Enda apa pipyasa ee lao karene? leyambi. Dokopa baame nakamba lamaiyuo, Nambana Kamongo nyepala pumisa anja retami lao saka napala ee lao karo leya. 14 Dopa lapala kapu kyepala Yesu kareyamo kandeya. Kandapala Yesu baa lao see naya. 15 Yesumi baa lamaiyuo, Enda, emba apa pipyasa ee letene? Api kotelene? leya. Baame ee rapu pingi akalilyamo lao masapala doko lamaiyuo, Aeya, embame baa soo pare ramo doko dusa retapu lao namba langipi. Langirinyipa nyepala lanyuo paro leya. 16 Yesumi baa kando, Maria leya. Leyamopa Maria kapu kyepala Yesu baa kando Ipuru pii lao, Oraponai leya (pii doko Mana Lenge dopale.) 17 Yesumi baa lamaiyuo, Embame namba minya kae. Namba Rakane karamo dokona ene pulyuo papa nalyo. Nambanape nakamanape Rakange Anatu karamo dokona namba pulyuo pelyamo lao emba nambana yangonge dupwa lamaiyala puu leya. 18 Maria yuu Makatala range doko pao disaepole dupwa lamaiyuo, Nambame Kamongo doko kandalono, leya. Lapala, Baa pii lamaiyamo dupwa nakama lamaiya. 19 Koro andake alemanji dokopa disaepole dupwa Juu wambu dupwa kando pakapala kambu dowa dolapo pyao gii lapala peteyaminyipa Yesu epapala peteyaminyi raka dokona sukusa karapala nakama lamaiyuo, Mona kyuu lao singinya renge doko nakama keta palena, leya. 20 Dopa lapala baame banya kingi kapepe parali dokopape nakama lasaka piya. Dokopa disaepole dupwame Kamongo doko kandapala raeme kumuyami. 21 Yesumi nakama dee kamba lamaiyuo, Mona kyuu lao singinya renge doko nakama keta palena. Rakaneme namba mapanyi peeyamo doko suu pyao nambame nakama pupwa leto leya. 22 Baa dopa lapala nakama kando ŋee sepala dopa lamaiya. Imambu Poo Pyasi nyelapape. 23 Nakamame wambu mendena koo dupwa nyuo kame sakamirami ramo doko kame sakamisi sera. Mendena koo dupwa mee range keta palena kae larami ramo doko mee palu palira leya. 24 Akali akalisa ipisu lama kareyami dokona mende Tomasa lenge kingi mende Reme Paka lenge doko Yesu epeyamo dokopa baa nakama pipya kara naya. 25 Kara nayamo dokona disaepole menge dupwame baa lamaiyuo, Kamongo doko kandalamano lyakande, leyami. Lao karalu kareyaminyipape baa dopa leya. Banya kingi kapena nyili peteyamo mumbwange doko kandapala nambana kingi pambu dokome nyili peteyamo mumbwange dokona suu lao nambana kingi banya parali dokona minyando soo pii naro ramo doko anginde lalyaminyi lao suu pyaa naro, leya. 26 Yuu gii yanda ipingi nyero papeya mopa banya disaepole dupwa Tomasamoo pipya anda dokona dee kamba kareyami. Kambu dowa dolapo pyao gii lasi siyamopape Yesu epapala nakama kareyami sukusa dokona karapala, Mona kyuu lao singinya renge doko nakama keta palena leya. 27 Lapala Tomasa kando lamaiyuo, Embena kingi pambu doko dakena suu lapala, nambana kingi dolapo kandape. Kandapala embena kingi pyasinju lapala nambana parali doko minyando sepe. Soo neta nemba napala kinyi kinyi angiŋi lao suu pyao karape leya. 28 Tomasa baame sepala soo neta nemba nao isingi lamaiyuo, Emba nambana Kamongo, nambana Anatuŋu leya. 29 Yesumi baa dopa lamaiya. Embame namba kandapala kinyi angiŋi lao suu pilisi? Dokoko doŋo wambu namba kanda napala mee angiŋi lao suu pyao karenge dupwa elyape keta penge leya. 30 Yesumi disaepole dupwana lenge kambu dokona yulu andake malu piyami dupwa buku pyasi dakena pali nalyamo. 31 Pali napyamopape yulu lapona pyasi palamo dupwame nakama Yesu baa Koraisa Anatunya Ikinyingi lao suu pyaraminyipa banya kingi yaki nyii nalyaminyi dokona lao nakama keta kyakana renge paiipyali lapala pepa pyao retelyo.

21

1 Enakana ipwa muiyane pete Taipiriasa lenge maronge dokona disaepole dupwa baa kandena lao dee maro leya. Baame dopa pyuo maro leya. 2 Saimone Pitamoo Tomasa kingi Reme Paka lenge dokomoo Nataniele yuu Kena yuu Galili silyamo dokona range dokomoo Sepetena ikinyingi dolapomoo banya disaepole lama mendalapo pipya role pyao kareyami. 3 Saimone Pitame nakama lamaiyuo, Namba oma nyela pelyo leya. Leyamo dokopa, Namwa embamoo monale leyami. Potemo papala bote dokona pyakambuyami. Dopa piyamopape kukwa dokopa oma nyii nayami. 4 Yuu rombalo piyamo dokopa Yesu maronge dokona kareya. Dokopa disaepole dupwa baa Yesu lao soo rola nayami. 5 Dokopa Yesumi nakama lamaiyuo, Anemasipa, oma lapo nyilyamipi mee? leya. Nakama isingi lamaiyuo, Daa leyami. 6 Dokopa baame nakama dopa lamaiya. Nakamana oma nyuu doko kingi rolae dorename pyambwapala dokopa kapa nyerami leya. Dopa leyamo dokopa oma nyuu pyambwapala oma ama malu nyuu dokona kete pyaro kareyasa minyalyuo nyelana saka nayami. 7 Disaepole Yesumi mona reteya dokome Pita lamaiyuo, Baa Kamongo doko karalamolamo, leya. Dopa leyamo dokopa Saimone Pita baa Kamongo dokolyamo lao sepala banya komau doko waiya lao pee piya. (Baa yulu pyuo karalana komau kolo reteyamo doko.) Pipala ipwa dokona pyakala peya. 8 Dopa piyamo dokopa disaepole lapo dusipa nanesale kara napala bote dokona piso oma nyuu doko oma paleta ipyuo epeyami. 9 Nakama yuunya pyakala epo dokopa dokona isare rao ranga yuu lao siyamo oma rao soo borete opetae soo piyamo kandeyami. 10 Yesumi nakama lamaiya. Oma nyelaminyi dokona lapo minyuo ipupwape, leya. 11 Dokopa Saimone Pita bote dokona pyakalyarapala oma nyuu doko oma andake malumi kete pyao paleyamopa ipyuo epeya. Oma akalisa pao akalisa, dee akalisa kingi paki ipisu rema 153 ) nyuunya keta pyaro kareya. Nyuu doko rokoyaii doko rokwa naya. 12 Yesu baame, Nakama nenge nala ipupwape leya. Baa Kamongo dokolyamo lao sepala apipi lao piso serama ingya nalyamo lao elyapala kaeyami. 13 Dokopa papala Yesumi borete lapo nyepala nakama mokwa soo maiya. Borete maipala dopako pyuo oma maiyako. 14 Yesu kumuo palyuo lopo epapala range disaepole dupwa kandena lao yuu repo maro leya. 15 Nenge nao otapala Yesumi Saimone Pita lamaiya. Saimone, Jonena ikinyingi doko, akali dusipame namba mona retaminyipa embame namba wakasa mona reto karepe mee? leya. Dopa leyamo dokopa, Kinyi, Kamongo, nambame emba puu minyuo karo doko emba silinyi leya. Yesumi baa lamaiyuo, Nambana sipisipi ikyane dupwa mondo pyuo nenge maiyakao karape leya. 16 Lapala dee lapo pyuo piso siya. Saimone Jonena ikinyingi, emba namba mona reto karepe mee? leya. Leyamo dokopa, Kinyi, Kamongo nambame emba puu minyuo karo doko emba silinyi leya. Yesumi baa lamaiyuo, Nambana sipisipi dupwa rapu pyakao karape leya. 17 Lapala dee kamba repo pyuo piso siya. Saimone, Jonena ikinyingi, embame namba puu minyuo karese? leya. Baame repo pyuo, Embame namba puu minyuo karese? lamaiyamo dokopa Pita mona randaya. Randapala, Kamongo, emba peparae soo gisingi leya. Nambame emba puu minyuo karo doko emba kando silinyi lao kande, leya. Yesumi baa lamaiyuo, Nambana sipisipi nenge pyako karape, leya. 18 Kinyi kinyi langilyu, emba wanyanesa komau range wapuo kata pareli dupwana mee maso pingi. Dopa piinyipape emba emarene dokopa embena kingi pyasinju larenepa mendalimi emba komau wapwakapala paa naro lao suu pyarene mendasa emba soo parami leya. 19 Dopa leyamo dokopa, Yesumi Pita apa pyuo kumaramo dokopa baa Anatu ketae pyambuo para, doko wambo nolakao leyasa piya. Enakana baame baa lamaiyuo, Namba paronuli pyuo ipupi leya. 20 Pita kapu kyepala disaepole yango Yesumi mona reto kareya doko kandeya. Akali doko wambu nenge nao peteyami dokopa Yesunya kyangalisa pisipala baa lamaiyuo, Kamongo, emba mata kando lara doko apipi? leya. 21 Pita baa kandapala Yesu lamaiyuo, Kamongo, akali dake keta apa pira? leya. 22 Yesumi baa isingi lamaiyuo, Namba dee kapu kyuo eparono gii dokona lao lete iso karena laro ramo doko embena yulu daa. Embame namba paronuli pyuo epare leya. 23 Yesumi dopa pyuo leyasa wambu dupwame sepala disaepole doko kuma naralyamo lao kopetame suu pyao lapelape lalyalana pyuo lao kareyami. Lao kareyaminyipape Yesumi baa kuma nara leyande daa. Baame, Namba kapu kyuo eparono gii dokona lao lete iso karena laro ramo doko embena yulu daa, lao pii dokona lao leyasa piya. 24 Yesumi disaepole akali doko kando pii doloma leyamo doko baame pepa dake pyapala pii peparae dupwa mende kyambo leyande daa. Doko baa yulu peparae kandeyamuli pyuo rolae ingyuo pepa piya doko soo gisilyamano. 25 Yulu dusipa pepana pyao reteyamopape Yesumi yulu malu lapo opetae pyuo kareya dupwa peparaena bukunya piyali doko isa yuu dake bukumi kete pyao aopa iapyali lao suu pilyu.