The Old Testament of the Holy Bible
Orgahi-Orha'a Uplerlawna-Mempulwatnu Na'ohi-na'ara ntera-ndema nohkerna-rai miaran di nora mniotni
1 Ler ululu noha gergera-tatiah'i ma'ta (mulaliaini) Orgahi-Orha'a Uplerlawna-Mempulwatnu Nwahi' pa Na'ohi-na'ara lyanti me, nohkerna-rai miaran di. 2 Nohkeran di edon naplol ma'ta ne nahgali, melmela-kalkalma ntutuw nana-nkaduw nana hletan lawna-yoir lawna, ne Orgahi Nhiw Lululli mana Ndardarta la gergera-tatiah'i wawannu. 3 Orgahi-Orha'a Nhar lirni: "Mhita-mriepra". Noma hititni-repreparni nwo'ti wa. 4 Orgahi Namkek de hititni-repreparni de samoga, noka Nnawera-nnapakia lelerni la'a melmelli. 5 Noma Orgahi Nala lelerni pa nwawa lera, ne melmelli pa nwawa mela. Noka mela nla nhelma me repra nma nwo'ti wa, de lera idni hade. 6 Orgahi Nhar lirni: "Tertieri-tawtawa mpuo'ti-mpuanin la gergerni-taitiah'in di letgarni, totpa muwera-mupakia gera-tah'i la gera-tah'i." 7 Noma Nhi'a tertieri-tawtaw di pa nala na Nnawera-nnapakia gera-tah'i mak kdella yawa, la'a gera-tah'i mak kdella heyanna. Noma nlola. 8 Noma Nala tertieri-tawtaw de pa nwawa lyanti. Mela nla nhelma me repra nma nwo'ti wa, de lera wornu wa. 9 Orgahi Nhar lirni: "Gera-tah'i mak kdella lyanti nayanni, miwok la geni id to'a totpena kerkeranni nharigota." Noka nlola. 10 Noma Nala kerkeranni de pa nwawa nohkerna ne ger mak kawoka re nwawa lora. Namkek de honona re samoga. 11 Orgahi Nhar lirni: "Oruhwu-auguhwu, yawuli-yatniamin mak kodi o'olli, orwo'a-auwo'a maka wo'oni rodi o'olli mmiori-mdiaria totpa yawuli-yatniamni erla nohkerkeran di wawannu." Noma nlola. 12 Tani namoria oruhwu-auguhwu, yawuli-yatniamni re honona, me ora-au maka wo'oni kodi o'olli. Orgahi Namkek de honona re samoga. 13 Mela nla nhelma me repra nma nwo'ti, de lera wotellu wa. 14 Orgahi Nhar lirni: "Mak kodia hititni-repreparni mua mhita-mriepar la'a lyanit maran di ralamni totpa mniawera-mniapakia lera la'a mela. La'pa miy mak kodia hititni-repreparni mhi'a kniau mak ktutga lerlalawna, me lera-mela, me me'eta-anni mak kodi liarni. 15 Ne emeka hititni-repreparni la lyanit marna, de mhitwah'a-mrieparwah'a nohkerna-rai miaran di wali." Noma nlola. 16 Noma Orgahi Nhi'a hititni-reprepar lawanni rora, totpa lalawanni de nodi plola-ntaryat lia lera, me kdadiahani de nodi plolli la mela, ne Nhi' wali wtiona re wali. 17 Nken tiarga harella lyanit maran di totpa rhit wah'a-repar wah'a nohkerna-rai miaran di. 18 Ne totpa nodi plola-ntaryat lia lera me mela, ne totpa nnawera-nnapakia lelerni la melmelli. Namkek de honona re samoga. 19 Lera nla nhelma me repra nma nwo'ti, de lera wogatni wa. 20 Orgahi Nhar lirni: "La' gera-tah'i ralamni de, mormiorni-dardiarni mpiolwo'la-mlieklekru, ne onu-ma'nu mana mniemnema-mtiatiaiya la noha wawannu, pa mliereti-mlier lahwa darat letgara." 21 Noma Orgahi Na'ohi-na'ara i'na-ya'an lalawna mak kden la lora, ne mormiorni-dardiarni dom mak kwo'la-klekur la gera-tah'i ralamni, me onu-ma'nu. Namkeka de honona re samoga. 22 Noka Nara'a-napalga i'n lora-ya'an lora, me mormiorni-dardiarni dom mak kdella gera-tah'i ralamni Niwra: "Mpieha-mliawna, mi'itra-mitapal pa mimniota tah'i lawna." Ne Nara'a-napalga onu-ma'nu mana Niwra: "Mpieha-mliawna." 23 Lera nla nhelma me yawra nma nwo'ti, de lera wolimni wa. 24 Orgahi Nhar lirni: "Ha mormiori-dardiari honona, nhiuri-wnia'ana, mak kawrika-kawriai, kawlola-kawniai'ti, ne mak kpora-kdawra honona miopilgota lia nohkerna-rai miaran di." Noma nlola. 25 Orgahi Na'ohi-na'ara mak kpora-kdawra honona, nhiuri-wnia'ana honona, me mak kawrika-kawriai honona la nohkerkeran di wawannu. Noma Namkeka de honona re samoga. 26 Orgahi Nhar lirni: "Mai pia Tsi' wali rimormiori totpa emolmoll Ita, totpa rodi plola-rtaryat lia' ha mormiori honona, mak kdella nohkerkeran di uhunu-ewatni-ewatni-lahwani." 27 Noma Nhi'a rimormior die totpa emolmolan nek E'a, pa Nakoki-nayapia, de muanke'a nora patke'a. 28 Orgahi Nara'a-napalga re Niwra: "Mpieha-mliawna totpa mi'upa-mi'a'na pa mhi' penga nohmaran di, ne miodi plola-mtiaryat lia hamormiori honona mak kdella nohkerkeran di uhunu-ewatni-ewatni-lahwani." 29 Orgahi Nhar lirni: "Mhioratreria, agala yawuli-yatniamni mak kodi o'olli honona me, orwo'a-auwo'a maka kodi o'olli honona la' nohkerkeran di uhunu-ewatni-ewatni-lahwani, hare er maka mhi'a la yamananmi. 30 Mere la'a ha mormiori-dardiari honona re, mak kdena nohkerkeran di, de nhiuri-wnia'ana me, mak kpora-kdawra me, onu-ma'nu me, mak kawrika-kawriai Agala wewna me ortawi-autiawi motmota la yamananni." Noma nlola. 31 Noma Namkeka maka Nakoki-nayap niana honona re samoga. Lera nla nhelma me repra nma nwo'ti, de lera wonemni wa.
1 Emkadella lyanti nora nohkerkeran di yakokni-yayapni ntut lia honi-nte'ela walli, na'itar wutu mniotni re honona. 2 La'pa lera wo'itnu Orgahi Nahoru kniarni maka Ha Nhi' nan oleka re, dewade Nwatia kniarni la ler di, 3 Noka Nalernu ra'ani-pallu la lera wo'itnu di Naluli-nahona (sucikan), yoma la' ler de de Nayoli momuou kniarni maka Ha Nhi' nan oleka re. 4 Emkadella la'a lyanit marna nora nohkerkeran di yakokni-yayapni. La' ler maka Orgahi-Orha'a Uplerlawna-Mempulwatnu Nhi'a lyanti nora nohkerna-rai miaran di, 5 ruwnu-ahla hamonan ma'ta la noh di wawannu, yawuli-yatniamni id mana edonna rwo'ti-rwanin ma'ta la wo'or mou wawannu, yoma Orgahi edon Nalerun ma'ta otna la noha wawannu, ne riy maka kawuli-katniamni mana edonan ma'ta, 6 mere noha nodwa-rai nha'ara noka nape'er noh di wawannu tetema. 7 Noma Orgahi Nakoki-nayapi rimormiori de Nnairia wuw tanwioka-lai tanmiera, ne Neug aranni mak kala mormiorni la irannu hu'ulli pa nwal lia rimormiori.
Rimormiori rdella nhyi'a Eden ralamni
8 Nhi'noka Orgahi Nhi'a nhyi'a la Eden lowanni, la' walli tipru. La' gen die de Nken tiarga rimormior maka Ha Nhi' nan della hande. 9 Noka Orgahi Namoria orwo'a-auwo'a la nhyi' di ralamni, maka tamkeka de samoga pa ta'an wo'oni de mikmikarni, ne au mak kodi riy la mormiori-dardiari na'itra au mak kodia rira pa rat niohora kalwiedni-paitiotni me yatni-halli rdella nhyi' di letgarni. 10 Ne gerlawna ida nwau pua nwatiawu Eden lowanni totpena nape'era nhyi' de, ne ntaw Eden de, gerlawan de nahniakar la nhiakra wogata. 11 Idni de nwawa Pison, de de mak kwau pua kwakdiori Hawila yapatni tetema de maha genni. 12 Ne mah maka ktaw lowanni de samoga. La' hande de damri etla. Damri di nwawa bedola me nahuwu mikmikri. Ne watu krisopras mana etla hande. 13 Nhiakarni wornu nwawa Gihon, maka kwau pua kwakdioria Kusyi yapatni tetema. 14 Nhiakarni wotellu de nwawa Tigris, mak kwau lia Asyur lowanni walli tipru. Ne nhiakarni wogatni de Efrat. 15 Orgahi Nodia rimormior die pa Nken tiarga la nhyi'a la Eden lowanni totpa nwahi'a-nwayodi, ne namkek la nhyi' de. 16 Noka Nala lir dilla rimormior die: "Auwo' mak kdella nhyi' di ralamni honona de mu'un wewewar nek la, 17 mere au mak kodi riy pa rat niohora kalwiedni-paitiotni me yatni-halli de yana mu'un wo'oni, yoma ler maka mu'un la wo'oni, de hota mmuati tioto'a." 18 Orgahi Nal lirni: "Hota rimormior di inon wamueheni de, hota yata. Aghi'a talanwalli id la pa nla' wuiwialli-tnialwialli." 19 Orgahi Nayap niana oleka ha mormiori re honona rwatiawu topi-tani. Noka Nodia honona rpa Nala la rimormior die totpa Orgahi Namkeka rimormior die nala hamormior die kotni-nanni, ne emeka nan maka rimormior die nala la hamormiori re, hota emekwali nanni re. 20 Rimormior die nala nana la nhiuri-wnia'ana re honona, la'a onu-ma'nu honona, ne mak kpora-kdawra honona, mere e inon wamueheni meman nek de, edonna nlernana talanwalli wuiwialli-tnialwialli. 21 Noka Orgahi Nhi'a rimormior die pa nanin hala, la'pa nanin reria, Orgahi Naul doinia ruh'anu ida, noka Nala ihi na Nahew tiarga genni de. 22 Ne ntawua rur miaka Na'ala la' rimormior die, noma Na'ohi-na'ara patke'a ida, noka Nod tiemna la rimormior die. 23 Noka rimormior die niwra: "Inee! Hadi de ruri mak ktawu a ru'ru, ne ih miak ktawu ih'u. Hota rweta de patke'a, yoma Orgahi Na' nana la muanke'a." 24 Hade pede muanke'a ida hota naltarga amni nor inni pa nora hawni rla' wutg ida, totpa rrora rla' wutu ihi ida. 25 Rimormior die nora hawni rewre'wa pa ratliawihi, mere edonna rmola-rma'a.
Rimormiori rtuin la do'a-hala ralamni
1 Mere niy mak kodi pudi-akla la pora-dawra honona re, maka Orgahi Nakoki-nayapi, Nohi-na'ar nana. Lera ida ne, niy nmai pia natiana patke' de niwra: "Plolli de Orgahi Nal lirni de: "Orwo'a-auwo'a mak kdella nhyi' di ralamni honona de yana mi'in wo'oni, me?"" 2 Noka patke' de nwahla niy die: "Edonna. Orwo'a-auwo' mak kdella nhyi' di ralamni de ama'ana, 3 mere la'a au mak kdella nhyi' di letgarni de Orgahi lirni de yana ma'ana me mte'la la wo'oni mana yana, de de hota ammati." 4 Mere niy die nakot la patke' de: "Hota miy edonna mmiat miano, 5 mere Orgahi Nat niohora, lerni pa miy mi'in nana, de matmi hota naphyar pa miora Orgahi mimneha, miat niohora kalwiedni-paitiotni me yatni-halli." 6 Patke' de, namkek de auwo' de mikri-liamanni, me yamkekni samomuou ne nhi' nohor walia riy ralamni nala auwo' de onnila auwo' de nala kirkira ralma-rior samomuou (pengertian). Hade pede patke' de na'ala wo'oni pa na'ana, ne nal wal lia hawni maka nor rewre'wa talla, noma muanke'eni na'an walia. 7 Noma rrora matni rrepar nana pa ratga de ratliawihi, noka rla retia kar tawi pa rhi'a la wara. 8 La'pa ratlin nana Orgahi lakni yetanni mak kalala'a la nhyi' de ralamni la' lera nhierni, noma rimormior die nor hawni rade'a la'a or-au mak kdella nhyi' de ralamni hewnu. 9 Mere Nhar lirni pa Npolga muanke' de Niwra: "Adam ee! O' etla meni?" 10 Nwahla: "La'pa a'utlin nana O' etla nhyi' di ralamni, de a'umta'ata, yoma a'utliawihi, reiniande, a'ude' a'u." 11 Lirni: "He' ed mak kakot o' de, o' e mutliawihi? Yanhi'pa o' e mu'un la auwo' mak A'ukota yan memmemna mu'un dena?" 12 Muanke' de nwahla: "Patke' maka Mkienia la a o'nu di, ed mak kala au die wo'oni mai a'u, pa nhi'nande a'u'una." 13 Nhor nioka Nhar lirni la patke' de: "Hya' ed maka mhi'a dina?" Patke' de nwahla: "Niy die ed mak kodia kdiori-kdieha pa a'una."
Orgahi-Orha'a Nala wutwutu-kokgohu
14 Noka Nhar lirni la niy die: "Onnila omhi' nan emkade, la'a ha mormiori honona re o' ed mak klernana hoptutu-hoplera. Hota muwrika-muwriai, ne mu'una koda-awu la'a mormiormu-dardiarmu. 15 Aghi'a yawunu-yawenan la omuora patke' di, me la'a o duratmu-waitmu nora patke' di duratni-waitni. Duratni-waitni hota nhapar reri o'tamu la' noh marna, ne omuihi-mhuo'wa tikalli." 16 Lirni la patke' de: "Hota Aghi'u pa mumehra-mumau niohora ya'uhumu-ya'apanmu pa polpuol inmu-wakwak ammu, kennama hota o ralammu nala hapmu, ne nodi plolli tiy o' wawanmu." 17 Noka lirni la muanke' de: "Onnila omutlin nohora hapmu lirni, ne mu'un la auwo' mak Aghopna: "Yana mu'una," nhi'nande nohkerkeran di nhoptutu-nhopler la o hihi'imu, muodia prehena-maumu pa mpuahak lola ya'anmu-yemanmu la nohmaran di la'a mormiormu-dardiarmu. 18 Pu'na-kiarti, du'uta-penta ed mak kmori-kdari, ne yawuli-yatniamin mak kdena wo'orletna-kawurloini rla'a yaya'anmu, 19 muodia liwatmu-odapmu mualla muhaka yaya'anmu, nodia pa la'pa muti'ila-muwal lia eni-tani, yoma ra'na'nu la' hade, yoma o' de de eni-tani pa muwal lia eni-tani." 20 Muanke' de nanni Adama, ne nala hawni pa nwawa Hawa'a (nnia'eratni de mormiori-dardiari) yoma hade ed mak khi'a in la riy mak kmormiori-kdardiari honona. 21 Ne Orgahi Nala ha ulti pa Nhi'a hewewta-naniairi la rimormior die nor hawni, noka Nohoga la temni re. 22 Noka Nal lirni: "Plollolli de rimormior die nwali olek emekwali Ita pa nat niohora kalwiedni-paitiotni, yatni-halli, noma yanhi'pa ntan limni pa na'ala auwo' mak kodi riy la mormiori-dardiari pa na'ana, reiniande nmori aplahwa pa nodi liarni." 23 Hade pede Nhopan pa rlergot la nhyi' ralma la Eden lowanni pa, nanhyi'a-natlunnia tani. Tani ed maka Nnairi pa Nakok niana-nayap niana ir la, ne tani ed maka rimormiori ranhyi'a-ratlunnia. 24 Nhokar doinia rimormior re, nhor nioka Nwau tiarga hgera la nhyi' ralma walli tipru, de Uplerlawna hopopanni-lili'irnu mak katiaka gen lululi me wehla gai mormiori maka ktipna-khewra, totpa yana rawal lia auwo'a mak kodia riy la mormiori-dardiar die mak kdella nhyi' Eden letgarni.
Kain nora Habel
1 Nhi'noka Adam nor Hawa'a ranina, noka patke' de na'apun wa, noma nmor niana muanke'a ida rala pa nwawa Kain (nnia'eratni de, lernana a'na), noma patke' de niwra: "Orgahi Nara'a-napalga pa aliernana oleka muanke'a ida." 2 Nhor nioka na'a'na muanke'a id owa'ana rala pa nwawa Habel. Ne Habel nmori lawna noma nodi pipi-duma, Kain nmori lawna noma nhi'a mak kanhyi'a-katlunni. 3 Name'et doini-na'anin doinia la, noka Kain nala limtutnu, de nala tan die wullu-we'elli oke' pa rala la Orgahi. 4 Habel mana nala pipni-dumni re a'nani yanulu mak kapetna me kmou-kwitna nanpa nhi'a la limtutnu la Orgahi. Noma Orgahi Nreiniana-na'nana Habel nora limtutnu. 5 Mere Kain nora limtutnu de Orgahi edonna Nreiniana-na'nana. Hade pede Kain ralamni namehra doin la, nhi'nande gaini mana nmaluidioin la. 6 Orgahi Nal lirni la Kain: "Nihya'pa ralammu namehra doin la me gaimu nmaluidioin la? 7 Hota mhi' nana kalwiedni mana gaimu ematia' emkade, toh?! Mu'ererma, la'pa mhi' nana yatni-halli de, do'a-hala nwuw rieri olek la nhiari gaini. Do'a-hala niwra nodi plolli la o'a, mere mutekal pa muodi plolli la do'a-hala." 8 Noma Kain nakot la garni Habel niwra: "Mai pia tla'awa wo'ora-kawur letanni." Rla'awa pa la'pa rte'ela wo'ora letanni, dewade Kain nkakul wenna Habel. 9 Nhor nioka Orgahi Nal lir la Kain pa Natiana: "Kain ee! Garmu Habel etla meni?" Mere Kain nwahla niwra: "A'uplinga. A' di de mak katiak ga'ru id a'u?!" 10 Lirni: "Idee! Hya' maka ha mhi' nan olek dina? Garmu rarni de ndella tani wawannu pa nhaun mai A'u. 11 Noma dodo'ondi nek pa nodi liarni mormiormu-dardiarmu nwal lia udi mak khoptutu me nora mak khoplera pa rhawloiyu-rhawlakru la'a geni-tien di, mak kwer wawni pa nlumu niana-ntelan nana o garmu rarni la'a o hihi'imu-yapyapmu. 12 Omunhyi'a-mutlunin tan di mana, edon nala wullu-we'elli la tiy o'a. Mpual lia mak kawlari me mak kmor diada'du la nohkerkeran di wawannu." 13 Kain nakot la Orgahi: "Idee! A wutwu'tu-kokgoh'u de werta, pa takeni ukwar nana. 14 Dodo'ondi Mhuokar doini a lia tan di, ne hota a'u yade'a la gaimu ralamni, riy mak kawlari me mak kmor diada'du la nohkerkeran di wawannu, yanhi'pa he' maka kwatrom nan a' die, hota rwen a'u." 15 Orgahi lirni: "Edonna. He' maka kwenna o' de wniahlani ralamni re'eni wo'itu." Nhor nioka Orgahi Nkenia kniau la Kain, totpa he'-he' mak kwatrom nana de yana rwenna. 16 Noka Kain nwadur la Orgahi gaini, noka nhol lia Noda lowanni la Eden lowanni walli tipru.
Adam duratni Seta nora Enosa
17 Kain nor hawni ranina pa, nhi'noka patke' de na'apun wa, noma na'a'na nana muanke'a id pa rala nanni pa nwawa Henok. Ne Kain nhoi ruhuna-nwatat leta ida, pa nwawa Henok, nlernohora a'nani nanni. 18 Henok na'a'na Irad, Irad na'a'na Mehuyael, Mehuyael na'a'na Metusel, Metusel na'a'na Lamek. 19 Lamek nmehlima patke'a woru, ida nwawa Ada, me handina de Sila. 20 Ada na'a'na muanke'a id pa rala pa nwawa Yabal, hade ed mak khi' amni la'a mak khol lia lowna-krahana mak rhi'a la ha ulti, me mak khuri-kwa'ana nhiuri-wnia'ana. 21 Garni nanni Yubal, hade ed maka khi' am la mak kahe'i gitara (kecapi) me mak keu floiti. 22 Sila mana na'a'na wali, pa na'a'na nana muanke'a id pa ral nanni pa nwawa Tubal-Kain, hade ed mak khi' am la mak kwewla mnotna me pi'ra. Tubal-Kain garni patke'a de Naama. 23 Lamek tulu-petna pede lera ida nakot la hawni rora: "Ada muora Sila mitlin la a li'ru di. A ha'wu mimrio'a, mtia'wa tlinmi pa mitlin a li'ru di. Awuen oleka muanke' ida, mere nwano' to' a'u, awuenna tuwgari ida, yoma nkaklu a'u. 24 Yoma hota Orgahi Nwahla nan Kain ralamni re'eni wo'it die, mere A' di de wuahla re'eni terampwo'it wehrani wo'itu ralamni." 25 Adam nor hawni ranina, noka patke' de na'a'na nan owa'ana muanke'a ida, ral nanni pa nwawa Seta (nnia'eratni de, ra'a-palu) yoma riwra: "Orgahi Nara'a-napalga keke'enku' id to'a mai a'u, pa nwal lia Habel wniaunu, yoma Kain nwenan nana." 26 Seta na'a'na nana muanke'a ida pa rala pa nwawa Enosa. Ler de de na'nama rimormiori ratu rwet la Uplerlawna nanni de Orgahi-Orha'a Uplerlawna-Mempulwatnu, totpa ra'uli-rawedia.
Adam duratni-waitni
1 Hadi de Adam duratni-waitni horatni-hairni. Lerni pa Orgahi-Orha'a Na'ohi-na'ara rimormior die, de Nhi'a pa nal emolmolan neka E'a. 2 Na'ohi-na'ara hare de, muanke'a me patke'a. Nara'a-napalga rpa ra'upa-ra'a'na, ne Nal nanni rpa rwawa rimormiori, la'a lera Ha Na'ohi-na'ara re. 3 La'pa Adam nmor niana anni rahu ida terampwotelu dewade, na'a'na nana muanke'a id maka nal emolmolla e'a, noka nala pa nwawa Seta. 4 La'pa na'a'na nana Seta pa nhorwua noma Adam nmormior mia'ta pa anni rahu wo'awa owa'ana, de na'a'n owa'ana muanke'a me patke'a. 5 Pede Adam nte'ela mormiorni anni rahu wosiewa terampwotelu dewade, nmat wia. 6 La'pa Seta nmor niana anni rahu ida wehrani wolim wa dewade, na'a'na Enos. 7 Ne Seta nmormior niek pa nahor dioinia anni rahu wo'awa wehrani wo'itu. Na'a'na Enos pa nhorwua dewade, na'a'n owa'ana muanke'a me patke'a. 8 Pede Seta nte'ela mormiorni anni rahu wosiewa termida wehrani woru, noka nmat wia. 9 La'pa Enos nmor niana anni terampwosiew pa dewade, na'a'na Kenan. 10 Ne Enos nmormior mia'ta pa nte' nana anni rahu wo'awa termida wehrani wolima, la'pa na'a'na nan Kenan wa dewade, na'a'n owa'ana muanke'a me patke'a. 11 Pede Enos nte' nana mormiorni anni rahu wosiewa wehrani wolim wa dewade, nmat wia. 12 La'pa Kenan nmormior pia nte'ela anni terampwo'it wua dewade, na'a'na nana Mahalaleel. 13 Ne Kenan nmormior niek pa nte'ela anni rahu wo'awa terampwogata, la'pa na'a'na nana Mahalaleel dewade, na'a'n owa'ana muanke'a me patke'a. 14 Pede Kenan nte'ela mormiorni anni rahu wosiewa termid wa dewade, nmat wia. 15 La'pa Mahalaleel nmor niana anni terampwonema wehrani wolim wa dewade, na'a'na nana Yared. 16 Ne Mahalaleel nmormior niek pa nte'ela anni rahu wo'awa terampwotelu, la'pa na'a'n nan Yared pa nhorwua dewade, na'a'n owa'ana muanke'a me patke'a. 17 Pede Mahalaleel nte'ela anni rahu wo'awa terampwosiewa wehrani wolim wa dewade, nmat wia. 18 La'pa Yared nmormior niana anni rahu ida terampwonema wehrani woru, dewade na'a'na Henok. 19 Ne Yared nmormior niek pa nte'ela anni rahu wo'awa, la'pa na'a'na nan Henok wa dewade, na'a'n owa'ana muanke'a me patke'a. 20 Pede Yared nmormior pia nte' nana anni rahu wosiewa terampwonema wehrani woru dewade, nmat wia. 21 La'pa Henok mormiorni anni terampwonema wehrani wolim wa dewade, na'a'na Metusala. 22 Ne Henok nala' nohora Uplerlawna la'a mormiorni-dardiarni ralamni pa nte' nana anni rahu wotelg owa'ana, la'pa na'a'na nana Metusala pa nhor diewade na'a'n owa'ana muanke'a me patke'a. 23 Pede Henok mormiorni nte' nana anni rahu wotelu terampwonema wehrani wolima. 24 Ne Henok mormiorni de, nala' nohora Uplerlawna, noma edonna nden olek la wa, yoma Uplerlawna Nran doini oleka la nohkeran di wawannu. 25 La'pa Metusala nmor niana anni rahu ida terampwo'awa wehrani wo'it wua dewade, na'a'na Lamek. 26 Ne Metusala nmormior mia'ta pa nte' nana anni rahu wo'itu, terampwo'awa wehrani woru, la'pa na'a'na Lamek pa nhorwua dewade, na'a'n owa'ana muanke'a me patke'a. 27 Pede Metusala mormiorni la nte' nana anni rahu wosiewa terampwonema wehrani wosiew wa dewade, nmat wia. 28 La'pa Lamek nmor niana anni rahu ida terampwo'awa wehrani woru, dewade, na'a'n owa'ana muanke'a ida. 29 Noma nal nanni pa nwawa Nuh, yoma niwra: "Keke'en di hota nala ralam yahepru mai ita la' ita tulanni-kniarni, maka penpuenu-nanah nohora mehrani-maunu la tan miaka Orgahi nhi'a pa nhoptutu-nhopler de. 30 Ne Lamek nmormior mia'ta pa nte' nana anni rahu wolima terampwosiewa wehrani wolima, la'pa na'a'na nan Nuh dewade, na'a'n owa'ana muanke'a me patke'a. 31 Pede Lamek mormiorni nte' nana anni rahu wo'itu terampwo'itu wehrani wo'itu wa dewade, nmat wia. 32 La'pa Nuh nmor niana anni rahu wolim wa de, na'a'na oleka Yafeta, Sema, me Ham.
Rimormiori yatni-halli
1 La'pa rimormiori re rpeha-rlawan pa mutnu lawna la'a nohkerkeran di wawannu, ne ra'a'na nana a'na patke'a, 2 noma Uplerlawna upni-a'nani ramkeka de rimormiori upni-a'nani re samou-samoga re, dewade ra'ala hawni la'a patke'a re, he' maka ralamni rala. 3 Orgahi Nhar lirni: "Nhi'wu hota edonna nden nek la rimormiori ralamni pa nodi liarni, yoma rimormiori de ihi-rara to' hade, ne mormiorni hota nla' nan to'a anni rahu ida terampworu rmeh'a." 4 Ler de pa Uplerlawna upni-a'nani rora rimormiori a'na patke'a rmehlima. Ne patke'a re ra'upa-ra'a'na rimormiori mota (raksasa). Ler de de, ne la'pa ler li'ir rimormiori mota ri rdella noha wawannu. Hari de riy wedlu-wedlu, riy maka ra'ululi-rawedwedia la lerni de. 5 La'pa Orgahi Namkeka de, rimormiori yatni-halli lawan rehia la nohkeran di wawannu, ne ralma-riorni re honona rawo' mamainia yatni-halli, 6 dewade, Orgahi Na'ahankeran doin la, nihya'pa Nakoki-nayap niana oleka rimormior mak kdella nohkeran di wawannu, pa rodia ralam mehra-ralam mau lia. 7 Orgahi Nal lirni: "Akuh dioini-gho'or doin momuou mormiorni maka Agohi-ga'ar nan oleka la nohkeran di wawannu, la'pa rimormiori, me nhiuri-wnia'ana, hapora-dawra, mak kawrika-kawriai, onu-ma'nu, onnila A ralam meh'ru, nihya'pa Agohi-ga'ar nana oleka re." 8 Mere Orgahi Napal niana Nuha.
Nuh tuini-wedni
9 Nuh tuini-wedni hadi. Nuh di de rimormiori ploloi-plele'era, nakleha do'a-hala la'a rimormior wialli la' ler de. Ne Nuh di de natu natlina-natailla Uplerlawna. 10 Nuh na'a'n nana muanke'a riy wotelu, Yafeta, Sem me Ham. 11 Mak kdella nohkerkeran di de, rhi'a yatni-halli olek la Uplerlawna gaini, de rhi'a maka maklekla-makdiaini mak kpenpuenu-knanahala nohkerna wawannu. 12 Uplerlawna Namkek eti-lahwa nohkerkeran di, de plola pa yatni-halli lawan rehia, yoma rimormiori honona rhi'a yatni-halli la noh di wawannu. 13 Uplerlawna Nhar lirni la Nuh: "Aget tiarg oleka de Awuenna rimormiori honona, yoma nohmaran di npenpuenu-nanah olek la maklekla-makdiaini re, pede hota Awueyata-wuaniawua honona re, ra'itar wutu nohkeran di. 14 Mere muyap niana aupual liawna id totpa hota miodia, mniairi au gofira, konkon die mhi'a de nodia tertierni-tawtawni, ne miala pakla ma mhioda la tio'orni me ralamni. 15 Emkadilla konkonmu de yakokni-yayapni: plahwani re'a terampwo'awa wehrani wosiewa, weranni re'a termida wehrani wolima, ne tullu re'a wosiewa. 16 Mhi'a aupual liawna de romni pa murita, ne muhorga aupual liawan de, de la'pa akti woru rehenu la walli heyanna, ne mkenia nhiarni la heini, mhi'a aupual liawan de pa nodi darni heyanna, letgara me yawa. 17 Yoma plollolli de, hota Atiowru gera me opli nhia'a la noh di, totpa nweyata-nwaniawua mormiorni-dardiarni honona, hya'a-hya' to' pa mak kdella noh di wawannu, de hota rmat momuou. 18 Mere A gor o' de Aghi'a nnio'u ne hota omlia'awa aupual liawan de ralamni, omuora hapmu, a'namu, me yananmu. 19 Ne la'a mak kmormiori-kdardiari re honona, la'a hari honona de muodia tnialli id pa mlia'awa aupual liawna ralamni, totpa rmor niohor rewre'w o'a, muod miemna! 20 La'a onu-ma'nu re honona, nhiuri-wnia'ana re honona, hapora-dawra honona, la'a mak kawrika-kawriai, la'a hari honona de hota tnialli nenenna rmai tiemn o'a, totpa rmormiori. 21 Muwoka-mule'ega ya'ana-yemnu maka rimormiori ra'ana-remnu nor wutga maka nhiuri-wnia'ana ra'ana-remnu. 22 Noka Nuh nhi'a hare honona, emeka Uplerlawna lirni la, noma nhi' momuoga.
Gera ktiowru-opli nhia'a
1 Noka Orgahi Nhar lirni la Nuh: "Mlier la aupual liawan de ralamni, omuora rommu mniotni honona, yoma Alina-muat o' nanpena muplola-mumneha la'a tuw di. 2 La'a hamormiori maka ha ra'ana me maka ra rhoi-rtania (dipersembahkan) de, mua'ala tnialli wo'itu, mere la' maka edonna rnairia de, mua'ala tnialli ida. 3 Nor wali onu-ma'nu tnialli wo'itu, totpa ramoria duratni-waitni la'a nohkeran di wawannu. 4 Yoma tre' lera wo'it owa'an de, Atiowru gera me opli nhia'a la noh di wawannu pa lera-mela terampwogata, ne hota Akuhi-gho'or doin momuou mormiorni-dardiarni maka ghi' nan oleka la nohkeran di wawannu." 5 Noka Nuh nhi'a hya' maka Orgahi Nakot targa la. 6 Nuh mormiorni anni rahu wonema, ler di maka gera ktiowru-opli nhia'a npen niana noha wawannu. 7 Nuh nhi'a emeka Orgahi Nakot la, de nora hawni-a'nani me yananni pa rla'awa aupual liawna ralamni, yoma gera ktiowru-opli nhia'a npenpuen liola. 8 La'a hamormiori maka ha ra'ana me maka ra rhoi-rtania me maka edonna, la hamormiori honona 9 tnialli nenenna rma rwatroma Nuh pa rler la aupual liawna ralamni, emeka Orgahi Nakot targa la Nuh. 10 La'pa lardoini lera wo'it lia dewade, gera ktiowru-opli nhia'a npenpuen liola noha wawannu tetema. 11 La'pa Nuh mormiorni anni rahu wonema, la'a wolla wornu, la'a ler mak kod lia termida wehrani wo'itu, ler de de gera ktiowru-opli nhia'a. 12 Ne otan lawna mana ema rhuriernia nkaduw nana noha, lera-mela terampwogata. 13 La' ler de meman pa Nuh nora hawni-a'nani me yananni rewre'wa pa na'nama rla'awa aupual liawan de ralamni, 14 me hapora-dawra honona, me nhiuri-wnia'ana re honona, me mak kawrika-kawriai re honona, me onu-ma'nu re honona. 15 La'a hamormiori re honona de tnialli nenenna rma rwatrom Nuh pa rla'awa konkon die ralamni. 16 Hamormiori ri honona rler la rialma emeka Uplerlawna Nakot targa la Nuh, noka Uplerlawna Nho'la aupual liawna nhiarni lola tio'ora. 17 Lera-mela terampwogata ne gera ktiowru-opli nhia'a npenpuen liola noha, gera nha'at la heyanan pa nran nana aupual liawna, nhi'nande npal pia tullu la'a nohkerna wawannu. 18 La'pa gera ktiowru-opli nhia' de na'ititar rer lia pa nha'at pa narehi nan noha, dewade aupual liawan de lolioi-palpialia la'a gera wawannu. 19 Ne ger de nopli-nha' pa na'ititar to'ola wa pa npen niana noha, ne narehi dioini wo'or tutullu re honona, 20 Gera ktiowru-opli nhia'a di npupniahala wo'or tutullu na'nama npenu owa'ana pa nha'at nana re'a wolima. 21 Noka hamormiori re honona rmat miomuou wua, ra'itar wutu rimormiori honona re. 22 Mormiorni-dardiarni re rmat miomuou wa, mak kden keranni honona. 23 Emkadella Orgahi Nkuh dioinia-nho'or doinia Napo'oma-napaumu momuoga honona mak kdella noh di wawannu, eneknekto'a Nuh nora maka ha nodi rewre'wa re rmormior lia aupual liawna ralamni. 24 Ne ger de npen nian la noha wawannu lera rahu ida terampwolima.
Gera ktiowru-opli nhia'a nho'owa
1 Noma Uplerlawna Nhorat reria-nehla reria aupual liawna mniotni, noka Orgahi Nhi'a anni pa nten lia noha wawannu, nhi'nande gera ktiowru-opli nhia' de nho'owa. 2 Gera ktiowru-opli nhia' nho'owa, ne otan lawna mana npargetia la'a lyanti, 3 ne gera la' noha wawannu mana nkerkeran lol wa. Emkadella la'a ger de knieranni nla' nana lera rahu ida terampwolima. 4 Ndella wolan mak kod lia wo'itnu ralamni, la'a lera termida wehrani wo'itnu la' wolan de, dewade aupual liawan de nnen lia'a wo'ora tutnu la'a Ararata lowanni. 5 La'pa wolan mak kod lia termidni dewade ger de nkerkeran lola. Wolan mak kod lia termidni, la'a lera yanullu la wolan de, noma wo'ora wurannu rde rhar wia. 6 Lardoini lera terampwogat wa dewade, Nuh nhar dioini aupual liawna de folanni. 7 Noka nolin doinia akaka id la, ne ma'nu de nnem la'a-nnem mai, nhi'pa gera nkeran meman la noha wawannu. 8 Nhor nioka nolli owa'ana lmo'ma maru (merpati) ida totpa namkeka, yana ger de nkern olekwa la'a noha wawannu. 9 Mere lmo'ma maru (merpat) die edonna nlernana tniai genni, noka nawal wia pa nwatroma owa'ana Nuh la aupual liawan de ralamni, yoma la' noha wawannu de gergera-tatiah'ia, noka Nuh ntan limni pa ntoran nan ma'nu de, pa nodia nla'awa konkon ralamni. 10 Nwei nan owa'an lera wo'itu, nhor nioka nolli owa'ana lmo'ma maru (merpat) diella. 11 Rehgoru lera lia'ani na'nama lmo'ma maru die nawal pia nwatroma Nuh, ne nmai die ntotan nana saitun taw id maka na'nama net niana. La'a hade pede Nuh natga de gera nkern olekwa. 12 Nhi'noka nwei owa'an lera wo'it ralamni, noka nolin doini owa'ana lmo'ma maru diella, mere ma'nu de edon nawal wia. 13 La'pa Nuh umarnu rahu wonema wehrani ida, la' lera mulaliaini la wolla mulaliaini la' anin de, de gera nkeran momuou lia'a noha wawannu, noma Nuh nhar dioinia aupual liawan de kniaduwnu pa namkek la'a-namkek mai, plola pa noha wawannu nhi'pa nkeran wa. 14 La' wolla mak kod lia wornu, la'a lera mak kod lia terampworu wehrani wo'itnu, de noha wawannu nkern memn olekwa. 15 Noka Uplerlawna Nhar lirni la Nuh niwra: 16 "Hononmi mliergot la konkon di ralamni, omuora hapmu-a'namu mior wutga yananmu. 17 Miodgiota hapora-hadawra honona, me mhiuri-wnia'ana re honona, mak kawrika-kawriai honona me onu-ma'nu honona totpena honona re rpeha-rlawan la noh di wawannu." 18 Noka hare honona rlergot wa, 19 rima-rima rora mutwualli rlergot la aupual liawan de ralamni. 20 Noka Nuh nariria katri'ana id la Orgahi, na'ala id la hamormiori honona maka ha ra'ana re pa rhi'a la nhioi-tniani, pa rtunu-rharna la katri'ana wawannu. 21 La'pa Orgahi Na'irun nana nhioi-tniani re huwnu mikarni-liamanni dewade, Orgahi Nakot la ralamni Niwra: "Hota A'g edonna wueyat owa'ana nohkeran di onnila rimormiori tototni-rerieini. Rimormiori rwaror nana yotni-yatni la'a lera kuku'a-keke'a loloha-tawtiaw ma'ta la'pa nhamto'a-nhape'ewa mere hota A'g edonna wueyata-wuaniaw owa'ana mormiorni-dardiarni tetema, emeka ghi' nan-yap nian oleka diwa. 22 La'pa noh di ed ma'ta la, de lera yawuli-yatniamni me lera rieiki-wnio'ora, woki lerni-ha'ara lerni, lerwarnu me otna lerni, lelera me melmela edon eti nho' taru-ntaw tiaru."
Uplerlawna nnio'oni la Nuh
1 Noka Uplerlawna Nara'a-napalga Nuh nora likatni mniotni pa Nakot la re Niwra: "Midurti-miwaiti me mpieha-mliawna pa mimniot nohkerkeran di. 2 Ne hota nhiuri-wnia'ana, me onu-ma'nu, maka kawrika-kawriai, hapora-dawra, me i'na-ya'an lora honona re raunni-ramta'ata miy. Atieman targ olek harella limmi ralamni. 3 Ha mormiori-dardiari hota rla'a yamananmu. Agal olek hare honona tiy miy, emekwali orwo'a-auwo'a, yawuli-yatniamin motmota. 4 Toto'a de yana mi'ina ha'anna maka rarni ed ma'ta la, yoma mormiori nwatiawua rar de. 5 Mere la'a miy mormiormi de, he' maka ktowru miy rarmi de hota atio'ona wniahlani, ne la'a hamormiori mak klihira-knaiya miy die hota atio'ona. Hamormiori me rimormiori mak kwenna rimormiori wialli de, atio'ona nhiwni. 6 He' ed mak ktowur rimormiori rarni de, rarni mana hota rimormiori rtowria, yoma Aghi'a rimormiori rde emolmolannek A'u. 7 Ne miy midurti-miwaiti, mpieha-mliawna, nhi'nande ta'eni rwet nana liawanmi la nohkerkeran di wawannu. 8-17 Dodo'ondi de Aghi' wutga nnio'a-niatu pamuli-payala la miora duratmi-waitmi pa nodi liarni re, ror wutga hamormiori honona, mak kpora-kdawra, nhiuri-wnia'ana, mak kawrika-kawriai, onu-ma'nu, la'a hare honona mak klergot la aupual liawna ralamni di. Nnio' di de ndella dodo'ondi pa nodi liarni de A'g edonna tiowru gera me opli nhia'a pa nweyat noha-nwaniawu riai, ne mormiorni-dardiarni mana edon tiowru gera pa nweyata wa. Hota Awuahgera-wualai lyanit marna de Agala ohni, la'pa tamkek hade de itsorat nan A nnio'u di mak kdella pa nodi liarni. Hadi de kniau la A nnio'u, maka Aghi' tar oleka la mormiorni-dardiarni honona mak kden noha wawannu."
Nuh nor a'nani
18 Nuh a'nani mak khargot la aupual liawan de, de Yafet, Sema me Ham, Ham de Kana'ana amni. 19 Ne Nuh a'nani wotelu re, er mak kapeha-kalawna rimormiori la noh di wawannu tetema. 20 Noma Nuh nanhyi'a-natlunni. E' mak kanhyi' ulu lokrahi tniamni (anggur). 21 Lera ida ne nemnu lokrahi turnu pa nhor nioka nma'wu pa nhi'nande natliawihi lia hoiwiali nayanni maka rnairi ha ulti. 22 Noma Ham namkek nana amni molli-ma'ani, noka nla nwahauru la hyalli rora la tio'ora. 23 Nhi'noka Yafeta nora Sem ra' nana kok lawna id pa rta'ara la rrora wawayanni na'nama rrora rala' pa rod tio'orni, rrora ralla rahewu amni molli-ma'ani mere rrora edon rapal niana, nhi'pa rrora edon ramkek nana amni molli-ma'ani. 24 La'pa Nuh ma'wanu ngaidioin la, ne natlina hya' maka a'nani gari nakota de, 25 dewade niwra: "Kana'ana nhoptutu-nhoplera, nhi'a ata-wa'ara kdedeheni la'a hyalli re. 26 Mere lilili-maumuau, Sema Uplerlawanni, mere Kana'ana nhi'a at la Sema. 27 Uplerlawna pena Nala Yafeta lowanni-ahlani nawerna-naplahwa, mere rden la Sema krahanni." 28 Nuh nmormior mia'ta anni rahu wotelu terampwolima la'a gera ktiowru-opli nhia'a nhio'oni. 29 Pede Nuh mormiorni nla' nana anni rahu wosiewa terampwolima, noka nmat wia.
Yafet, Sem nora Ham duratni-waitni
1 Hadi de Yafeta, Sem nora Ham duratni-waitni. La'pa gera ktiowru-opli nhia'a nlardoinla, dewade rayor niana a'na muanke'a.
Yafeta duratni-waitni
2 Yafeta duratni-waitni de: Gomer, Magog, Madai, Yawan, Tubal, Mesek, nora Tiras. 3 Gomer duratni-waitni de: Askenas, Rifat, nora Togarma. 4 Yawan duratni-waitni de: Elisa, Tarsis, makden Kitim, nora makdena Dodanim. 5 Nwatiawua hari pa noha-rai lalawna mak kdena eni wawannu re rpeha-rlawna. Yafeta duratni-waitni hari pa ntikil reri lia yeheni me, nhapar rer lia hlorni (rima-rima ndella nohananni-taniaratni, ra'itar nohora yawalli, nlernohora luwnu-a'nani re).
Ham duratni-waitni
6 Hama duratni-waitni rde: Kusyi, Misraim, Put, nora Kana'an. 7 Kusyi duratni-waitni de: Seba, Hawila, Sapta, Ra'ema nora Sapteka, Ra'ema a'nani rde, Syeba nora Dedan. 8 Kusyi duratni-waitni id de nwawa Nimrota (nnia'eratni de malawna). Hadi ed maka kala' ul pua kodi plola-ktaryat lia nohkerkeran di wawannu. 9 Rimormiori me Orgahi mana ramkeka de, hadi de mak khiti ahu-kler lowna na'iwra-namuanu la nohkeran di wawannu, hade pede riy rwedi ltieri riwra: "Emolmolla Nimrota, mak khiti ahu-kler lowna." 10 Ululu de Nimrota lodna lie'enu me hairi liowni de, Babela, Ereka, nora Akada, honona rdella Sinear lowanni. 11 Nimrota ndella lowan de pa nla'awa Asyur, noka nwatatu lieta wolima, de Niniwe, Rehobot-Ira, Kala, 12 me leta Resen, mak kdella Niniwe nora Kala rletni, ne Niniwe de letlawna inhatta. 13 Misraim na'ana nana makdella Ludim, makdella Anamim, makdella Lebahim, makdella Naftuhim, 14 makdella Patrusim, makdella Kaftorim nora makdella Kasluhim. Makdella Kasluhim de, er mak kadurit nana makdella Filistin. 15 Kana'an na'a'na nana Sidon, a'nani yanulu, nora Heta, 16 me makden Yebusi, makdena Amori nora makdena Girgasi, 17 makden Hewi, makden Arki, makden Sini, 18 makdena Arwadi, makdena Semari, nora makdena Hamati. Rwatiawua hari pa makdena Kana'ana rpeha-rlawna. 19 Makdena Kana'ana lowanni-ahlani ndella Sidon pa nokru Gerar pa nokru Gasa, Sodom, Gomora, Adma nora Seboim nla tut lia Lasa. 20 Hare de Ham duratni-waitni pa ntikil reri lia yeheni me, nhapar rer lia hlorni (rima-rima ndella nohananni-taniaratni, ra'itar nohora yawalli, nlernohora luwnu-a'nani re).
Sem duratni-waitni
21 Yafeta kakni de Sem. Mere Sem ed mak kadurit nana Eber (makdella Yahudi) nor Eber duratni-waitni honona. 22 Sem duratni-waitni de: Elam, Asyur, Arpaksad, Lud, nora Aram. 23 Aram duratni-waitni de: Us, Hul, Geter, nora Masa. 24 Arpaksad na'a'na nana Sela, noka Sela na'a'na nana Eber. 25 Eber na'a'na nana muanke'a woru, id nanni Peleg (nnia'eratni de, rhakre'era), yoma la'a lerni de rhakre'era noh di. Peleg hyalli de nanni Yoktan. 26 Yoktan na'a'na nana Almodad, Selef, Hasar-Mawet nora Yerah, 27 Hadoram, Usala, nora Dikla, 28 Obala, Abimaela nora Syeba, 29 Ofir, Hawila, Yobab. Hare honona rde, Yoktan duratni-waitni. 30 Lowanni-ahlani rde ema rweran nana la Mesa la walli warta pa nokru Sefar, de wo'ora-kawru mak kdella walli tipru. 31 Hari honona rde Sem duratni-waitni pa ntikil reri lia yeheni me, nhapar rer lia hlorni (rima-rima ndella nohananni-taniaratni, ra'itar nohora yawalli, nlernohora luwnu-a'nani re). 32 Hare de Nuh upni-a'nani honona, duratni-waitni re, nlernohora hairni re, ne nwatiawua hari pa nawer nana-napak niana rimormior noh keran di honona la' lera gera ktiowru-opli nhia'a nhio'tarnu.
Koki-yap tutulu no' Babel
1 Ler de noh di mniotni de yawalli ida. 2 Noka rwaran pa rla'awa walli tipru, pa rlernana riwni-rai mtatanni la'a Sinear, noka rhol lia hande wa. 3 Lera ida rna'ohma pa idma nakot la ida: "Mai pia itsoi lieta-twatat ruhuna la'pa ttutin awru-tsaran watu." Edon rnairi watu me smen pa rhi'a mere rnairi tanmiera nor tera. 4 Lera ida pa rna'ohma owa'ana riwra: "Mai pia tsoi lieta-twatat ruhuna, me itwatatu ili nhioli liarni me watu diena pidarni pa ntut lia lyanti pa itahak kota-nana, totpa it yana tdurmue'era-tsakrie'era it la noh di uhunu-ewatni-ewatni-lahwani." 5 Noka Orgahi Nerun pa Namkeka letlawan dena me il tutullu-gen lolo'oni maka rimormiori rwatat nana. 6 Noka Nhar lirni: "Hari de hairi ida me yawala ida pa honona rnairia. Hadi de na'nama kniarni re yanullu, dodo'ondi, hya' maka ha rtetwiana-rtaiwian nana de, hota nla nlola, hadom edon ta'eni la' ira. 7 Nhi'p Iterun pa tiwru-tgora yawalli re, totpa idma edon rna'erit nan id yaltierni." 8 Emkade pa Orgahi Ntiwrie'era-nhawrie'era rpa rokru noh di uhunu-ewatni-ewatni-lahwani, nhi'nande tulla-kniarni mana edonna ntutu-nte'ela honi. 9 Hade nariei pede, nmai wia dodo'ondi mana let de nanni de rweta de riwra Babel (nnia'eratni de, tiwru-tgora), yoma la' hande de Orgahi Ntiwrie'era-nhawrie'era rimormiori wokni-le'enu, ne ntaw hande pa Orgahi Ne'era-nhakra rla noh di uhunu-ewatni-ewatni-lahwani.
Sema duratni-waitni
10 Hadi de Sema duratni-waitni. La'pa Sema umarnu anni rahu id wa noma nayor niana Arpaksad, de anni wornu rlardoini la gera ktiowru-opli nhia'a. 11 Sema nmormior mia'ta pa anni rahu wolima, la'pa nayor niana Arpaksad pa nhorwua dewade nayor niana Arpaksad wuliodani patke'a rora muanke'a. 12 La'pa Arpaksad umarnu anni terampwotelu wehrani wolim wa, dewade nayor niana Sela. 13 Arpaksad nmormior niekpa aninni rahu wogata wehrani wotelu, la'pa nayor niana Sela pa nhorwua dewade, nayor niana Sela wuliodani patke'a rora muanke'a. 14 La'pa Sela umarnu anni terampwotel wua dewade, nayor niana Eber. 15 Sela nmormior mia'ta pa aninni rahu wogata wehrani wotelu, la'pa nayor niana Eber pa nhorwua dewade, nayor niana Eber wuliodani patke'a rora muanke'a. 16 La'pa Eber umarnu anni terampwotelu wehrani wogat wa dewade, nayor niana Peleg. 17 Eber nmormior niek pa aninni rahu wogata terampwotelu, la'pa nayor niana Peleg pa nhorwua, dewade nayor niana Peleg wuliodani patke'a rora muanke'a. 18 La'pa Peleg umarnu anni terampwotel wua dewade, nayor niana Rehu. 19 Peleg nmormior niek pa aninni rahu woru wehrani wosiewa, la'pa nayor niana Rehu, dewade nayor niana Rehu wuliodani patke'a rora muanke'a. 20 La'pa Rehu umarnu anni terampwotelu wehrani wor wua dewade, nayor niana Serug. 21 Rehu nmormior niek pa aninni rahu woru wehrani wo'itu, la'pa nayor niana Serug pa nhorwua dewade, nayor niana Serug wuliodani patke'a rora muanke'a. 22 La'pa Serug umarnu anni terampwotel wua dewade nayor niana Nahor. 23 Serug nmormior niek pa aninni rahu woru, la'pa nayor niana Nahor pa nhorwua, dewade nayor niana Nahor wuliodani patke'a rora muanke'a. 24 La'pa Nahor umarnu anni terampworu wehrani wosiew pa dewade, nayor niana Terah. 25 Nahor nmormior mia'ta pa aninni rahu ida termida wehrani wosiewa, noma la'pa nayor niana Terah pa nhorwua dewade, nayor niana Terah wuliodani patke'a rora muanke'a. 26 La'pa Terah umarnu anni terampwo'it wua de nayor nian oleka Abram, Nahor nora Haran.
Terah duratni-waitni horatni
27 Hadi de Terah duratni-waitni. Terah nayor niana Haran, Abram, nora Nahor, ne Haran nayor niana Lot. 28 La'pa Terah nmormior mia'ta de Haran, Terah a'nani yanulu nmat tiar lia leta Ur, geni miaka Kasdima rdella, me leta maka rmor tiarga Haran la. 29 Abram nor Sarai rmehlima me, Nahor nor hyalli yanulu Haran a'nani patke'a nanni Milka rmehlima. Milka elli de, Yiska. 30 Sarai di nkerna (nakleha a'na). 31 Noka Terah nodia Abram nora hawni Sarai me hyalli a'nani Lot pa rla'awa. Rla'awa pa rewre'wa rto'or doinia leta Ur, gen miaka Kasdim rdella pa totpa rla'awa Kana'an lowanni, mere edon rodi liarni, ne rte'ela' leta Haran, noma rholi hande wa. 32 Terah umarnu anni rahu woru wehrani wolima, noka nmat tiar lia Haran.
Orgahi Npolga Abram
1 Orgahi-Orha'a Nhar lirni pa Nakot la Abram: "Abram ee! Mtio'or la hupmu-woinmu genni-tienni pa mlia'awa noh mak A'upili-uhniari lia o'a. 2 Pena A'ura'a-upa'lu, Atiera-die'mu pa mlier la pripanni-fa'anni pa mpial lia pepan mutu-le'u lialawna. Hota mhi' orkotkotni-ornananni la'a rimormiori, me la o' nanpena rimormiori rlernana ra'a-palu. 3 Hota A'ura'a-upalga mak kara'a-kapal o'a, ne ghoptutu-ghoplera mak khoptutu-khopler o'a (Aghi'a samomuou riy mak khi' samomuou o'a, ne Aghi'a yatyata riy maka khi' yatyat o'a). Yoma Awualiri o'a, ne onnila o' na'nama rimormior niohkeran di rlernana yara'a-yapalu." 4 Noka Abram nla'awa, nlernohora hya' maka Orgahi Nakot targa la, ne Lot mana nlernohor rewre'wa. Abram mormiorni anni terampwo'itu wehrani wolima, la' ler maka ha nwaran la Haran. 5 Abram nodia hawni Sarai, nora hyalli a'nani Lota, me re'eni-tniarnu honona me ata-wa'ara mak ha rlernana la'a Haran. Rwaran pa rla'awa Kana'ana nohananni-taniaratni, noka rdella hande wa. 6 Abram nala' pa nleretia lowan de, pa nte'ela geni id la Sikhem onni, la ora-au liawna la'a More genni. Mere la' ler de, de Makden Kana'ana re rhol lia lowan de. 7 Ler ida ne Orgahi Ntutga rupni la Abram, noma Nakot la: "Abram! Noh di, hota duratmu-waitmu ra'an lola-remun lola." Noma Abram nariri katri'ana id la Orgahi, mak na'nama ktutg oleka rupmi la' e'ewa. 8 Nhi'noka nwaran la hande pa nla'awa wo'or mak kdella leta Betel walli tipru. Noma nkeni hoiwiali maka rnairi ha ulti la gen die. Leta Betel ndella walli warta me leta Ai ndella walli tipru. Noka nwatatga katri'ana id la Uplerlawna gaini, ne nhoi lia kotni-nwet la nanni. 9 Nhor nioka Abrama nwaran wa pa nla' lolola olietni-patounu, pa nlorlor la Negep Lowanni.
Abrama ndella Mesir
10 Lerni pa lara nwewar nan noh de, dewade Abrama nla'awa Mesir pa ndella hande emeka do'ona-dakna, onnila lara lawna la noha. 11 Ler maka niwa nler la Mesir yapatni dewade nakot la hawni Sarai: "Sarai, o' di de mu'irnu hlioi-mat lawruru pa 12 hota la' de makden Mesir ramkek o' pa rpi'u-rga'u lia o'a pa rakota riwra hadi de e hawni noka rwen a'u me rayori o'a. 13 Mukot la ira miwra a patke'u atia' o'a mere a na'ru o'a, totpa ralewna a'u." 14 La'pa Abrama nler la Mesir noha ralamni, dewade makden Mesir ramkeka de patke' de na'irnu hlioi-mat lawruru, 15 ne la'pa Firaun tniutnu-nhianni-nhielli-liarni ramkek nana Sarai, noma ra'ulia la'a Firaun gaini ralamni, riwra: "Abram narni de, samounu di!" Nhi'nande patke' de rodia la ray likatni, de de Firaun likatni. 16 Firaun nhi' samomuou lia Abrama, yoma ralamni etla Sarai pede nala ata-wa'ara patke'a rora muanke'a ra'itra pipi-duma, sapi, keledai pata-muanu, me onta la Abram. 17 Mere Orgahi Nalernu nnieni-nhiena lawna la' Firaun, emkade wal lia ray romni mniotni, onnila Sarai, Abrama hawni de. 18 Hade pede Firaun npolga Abrama pa nakot la: "Hya' ed maka mhi' nana mai a'u dina de? Nihya'pa edon mukota plele'era, hade de hapmu? 19 Nihya'pa mukota miwra narmu, pa reiniande aga'ala pa ghi'a la ha'wu? Dodo'ondi, mua' owa'an hapmu pa mlia'awa." 20 Noka Firaun nhopna hopopanni pa rla rottiarga Abrama, nor rewre'wa hawni me hyonni-hyanni re honona.
Abraham nor Lot rwahakar talla
1 Noma Abrama ndella Mesir pa nla'awa Negep lowanni, nora hawni me re'eni-tniarnu honona, ne Lot mana nora talla. 2 Abram de pare'a-patniarga la nhiurni-wnia'anni, mahani, me maha wawahra harahu. 3 Nala' pa ndella gen id pa nokru gen dioma, ndella Negep pa nawal pia ndella Betel onni, gen miaka la' ler ululu de nkeni hoiwiali maka rnairi ha ulti, la'a Betel nora Ai rletni, 4 la' gen miaka ha nhi' nana katri'ana mak kala' ulia hande. La hande dewade Abrama npol lia Orgahi nanni. 5 Lot mana nor walia Abrama talla, me ntaru pipi-duma, me hoiwiali. 6 Mere gen die naklierta, pa edonna ntu'tu nana rrora pa rhol wut rewre'wa, yoma re'eni-tniarnu re harahu rehia, reiniande ta'en niana rhol wut rewre'wa. 7 Nhi'pede Abram hopopanni mak kodi pipni-dumni rora Lota hopopanni mak kodi pipni-dumni re rawo'ora. La' ler de de makdena Kana'ana me makdena Feris rhol lia lowan de wali. 8 Hade pede Abrama nakot la Lota: "Yanpa itro'a tler la yawunu-yawenna, ne la'pa mak kodi pi'pu-du'mu rora mak kodi pipmu-dummu re rawo'ora, yoma it di de riy id ita. 9 Gen di tetema nawnierne'era la tiy o'a. Samounu de itro'a twahakar wa. La'pa omuokur malwir die, agokur malganna, la'pa omuokur malganan de, agokur malwiru. 10 Noka Lota nran gaini pa namkek lolda-lolda, de rai mtatanni la Yordan de gerni harahu, emolmolla Orgahi nhyi'ini la' Eden, me emolmolla Mesir lowanni pa nokru Soar. Mere hadi namtemn ulu, ler maka Orgahi edonna nweyat ma'ta leta Sodom nora leta Gomora. 11 Nhi'pede Lota nwaliria rai mtatan la Yordana honona pa gahani, noka nwaran pa nokur tipru, pede rwahakar wa. 12 Abrama ndella Kana'ana nohananni-taniaratni, ne Lota ndella leta-let mak kdella rai mtatan la Yordan, pa rehgorgor Sodoma. 13 Mere makden Sodom re de riy kapliahan mera, ne rhi' do'a-ryap hiala la' Orgahi-Orha'a. 14 La'pa Lota nto'or targa Abrama dewade Orgahi Nakot la Abrama: "Mumkek lolda-lolda, ne mtia'wa matmu la gen miaka ha mtiutrier lia di, pa nokur tipru, warta, ra'i me tranna, 15 yoma gen di tetema maka mumkek nande hota Agala tiy o'a me gal wal lia duratmu-waitmu, pa nodi liarni. 16 Ne hota Aghi'a duratmu-waitmu liawanni pa emeka en liu'wu-tan miakmu, la'pa he' mak krekan nana en liu'wu-tan miakum de, de rrekan nan wali duratmu-waitmu. 17 Mpuahi'a-mpuayod wia, mula' etia noh di ewatni-lahwani, yoma hota la o' nanpa Agala nohanna-taniarat di." 18 Nhor nioka Abrama nwaran pa nawal wia pa nla nhol lia ora-au liawna aratni la'a Mamre, Hebron onni, noka nariria katri'ana id la Orgahi-Orha'a.
Abrama nalernu ray wogata mak kden tipru
1 Lera ida pa ray wogata mak kdella nohanna-taniarta la walli tipru rmai pia rora ray wolima handina ra'ara. Ray wolim di, rodi plola-rtaryat lia leta-leta rehgorgoru geni miaka Lota, Abram hyalli a'nani ndella. Ray wogat mak kwatiawu tipru de, de Kedorlaomer, Elam rayni, Amrafel, Sinear rayni, Ariok, Elasar rayni, me Tideal, Goyim rayni pa rmai pia rora 2 ray wolim di, Sodom rayni Bera, Gomora rayni Birsya, Adma rayni Syinab, Seboim rayni Syemeber, Bela rayni (Soar rayni), pa ra'ara. 3 Sodom rayni Bera nora talanwalli rawok la rai mtatan nwawa Sidim mak edon nagera-natah'i ma'ta. (Mere dodo'ondi nagera-natah'i oleka pede nanni Tah'i Mahana.) 4 Rawok la pa ra'ara, yoma anni termida wehrani wor die ray ri ratlina-ratailla Kedorlaomer, mere la'a anin mak kod lia termida wehrani wotellu dewade edonna ratlina-ratailla (rmalawna). 5 La'a anin mak kod lia termida wehrani wogatni dewade Kedorlaomer na'itra ray-ray miak kor rewre'wa e' pa rmai wia, noka ralernu riy harahu la' ar ralma, de makden Refaim la Asyterot-Karnaim, makden Susim la Hama, makden Emim la Syawe-Kiryataim 6 ne makden Hori la'a wo'orni-kawarnu mak kwawa Seir, me makden Hori mak kawlar pia nla'gennia El Paran, la'a wewan mou aratni. 7 Nhor nioka Kedorlaomer nor talanwalli re rawal pia rla'awa En Mispat, de Kadesy, ne ralernu momuou makden Amalek lowanni-ahlani, ne makden Amori, de mak kdella Haseson Tamar. 8 Emkade pa ray Kedorlaomer ralernu riy harahu mere Sodom rayni, de edon ralernu ma'ta. Noka Sodom rayni nora talanwalli, de ray-ray rwatiawu hairi wogata dom to'a de ray ror wutga mak klernohora re rlergot pa rohon ara 9 pa rlewru ray Kedorlaomer nor talanwalli la' rai mtatan la Sidim. Talanwalli re ray-ray ror wutga mak klernohora re rwatiawu hairi wotelu dom to'a. 10 Mere la'a rai mtatan la Sidim de nlol meni-meni nekpa rlernana loka kdieldelma-da'ala metmetma. (Sodom rayni rapal lia Kedorlaomer mere ta'eni ra'ar nana pa rawlari). La'pa Sodom rayni nora talanwalli rawlar wia, dewade riy dom rtopur tar lia loka kdelma-da'ala metma ralamni, ne dom rawlar pia rla'awa wo'ora hananni. 11 Sodom nora Gomora re'eni-tniarnu, ya'anni-yemannu re arwalli rheri-rhewat nana pa rla'awa. 12 Lota ndel wal lia Sodom pede Lota na'itar neka re'eni-tniarnu pa arwalli rodia pa rla'awa. 13 Mere Abrama, makdena Ibran die, nkeni oleka hoiwiali la ora-au liawna onni maka Mamre, makdena Amori gahani. Mamre di nora hyalli Eskol me Anera, de Abram nor ira rodia ihru ida-ralm ida. Noka mak kawlar pia nlewan la arralma nmai pia nwahauru hadella Abram niwra: "Abram ee! Rodi wlari oleka Lot wa." 14 La'pa Abram natlina rtoran nana hyalli a'nani, dewade npolu limni-rorni mak katu ka'ara, maka rmoria la romni nayanni, riy rahu wotelu termida wehrani wo'awa nhor nioka nor limni-rorni re rhokra arwalli rpa rodi liarni la Dan lowanni. 15 Ne la'pa lera nmella dewade nora limni-rorni rhakar talan pa rlewria arwalli re. Ralernu arwalli me rhokra pa rla'gennia Hoba, Damsik walli ra'i. 16 Rodia re'a-tniaru re honona pa rawal wia. Rodia Lot wali nora hawni na'itra atni-wa'arni me re'eni-tniarnu pa rodi rawal wia.
Abram nora Melkisedeka rwatroma
17 La'pa Abrama nalernu Kedorlaomer nora ray-ray miak kor rewre'wa talla pa nawal wia dewade, Sodom rayni nlergot pa nwatroma la rai mtatan la Syawe, (maka rwet walia de Ray). 18 Melkisedek, Salem (Yerusalem) rayni, nodia roti me anggur turnu la Abram. Melkisedek di, makpolu-makwaka la (imam) Uplerlawna mak kdella tutullu-lolo'oni. 19 Noka nwak la Uplerlawna pa Nara'a-napalga Abrama niwra: "Orgahi mak kdella tutullu-lolo'oni, maka'ohi-maka'ara lyanit marna nohkerna-rai miaran di pena Nara'a-napa'lu. 20 Ne ya'uli-yawed lia Orgahi mak kdella tutullu-lolo'oni mak kala arwalmi la o limmu ralamni." Noka Abrama nal doini nhiakra id la termidni la re'eni-tniarnu honona la Melkisedek. 21 Sodom rayni nwaka pa ntuwu-nhaiya nhernu-nwauga Abram ya'arni pa nakot la Abrama niwra: "Muala a rimormio'ru (li'mu-ro'ru) re mai a'u, ne mliernana re'a-tniaru ri honona." 22 Mere Abrama nakot la Sodom rayni de: "Aliokar la'a Orgahi mak kdella tutullu-lolo'oni, makohi-maka'ara lyanti me nohmaran di. 23 Hota A'g edon ga'ala hya'a-hya'a la re'emu-tniarmu re, nhor lawra patpati ida me, lakmu wniowni talli id mana edonna, totpa yana omiwra: "Aghi'a Abrama pa pare'a-patniarga." 24 Pa eitnek wa, hya' maka am ma'an nana-memun nana la'pa ama'ara de ndella. Ne la'a a talanwa'lu de, Aner nora Eskola me Mamre, muollia pa rima-rima pena ra'ala nhiakarni."
Orgahi Nor Abrama nnio' wutnu nnio'a la duratni-waitni
1 Lera ida ne Abrama ndarat nan de Orgahi-Orha'a Nhar lirni la Niwra: "Yan mumta'ata Abram. A' di de tiokmu-nhiepmu, onnila omliernohora A' di de wniahlamu hota inponni memna. 2 Abrama nwahla: "Matroma, O' nanpena mak kodi plola-ktaryatu, hya' maka hota Muala mai a'u, yoma hota muat die ukleha upa-a'na, ne mak kodi plolli la ro'mu di de Elieser, makden Damsika mniotni de. 3 O' edon Muala durti-wait mai a'u, nhi'nande a hopopnu ida nhi'a mak kodi plol la re'a-tnia'ru." 4 Mere Orgahi lirni: "Edonna, Elieser di edon nhi' mak kodi plolli la re'emu-tniarmu, mere a'na raralammu. E' nanpena mak kodi plol la re'emu-tniarmu." 5 Noka Orgahi Nodia Abram pa nlergot la tio'ora, na'nama Nal lir la: "Mpuatniar la heyanna. Wtion mak kden heyanna taken niana mriekan nana. Emkade wal lia hota o duratmu-waitmu." 6 Lira re honona Abram npesiaya pa nha'ar aranni la. Hade pede Orgahi Nreiniana-na'nan Abram de, mak kaplol la E yamkekni. 7 Noma Orgahi lirni owa'an la: "A' di de Orgahi-Orha'a Uplerlawna-Mempulwatnu mak kodi o' pa mliergot la leta Ur (gen miaka Kasdim rdella) totpa Agala geni di la o'a pa mhi'a la nhiakarmu." 8 Mere Abrama nakot la: "Matroma, O' mak kodi plola-ktaryatu. Mere emkameni totpena agat niohora hari honona a gah'u?" 9 Orgahi lirni la: "Agala kniau id tiy o'a. Mua'ala sapi rara ida, umarnu anni wotelu, pipi rara mak umarnu anni wotelu, duma ltiata id maka umarnu anni wotelu, loktieru ida me lmo'ma maru (merpati) trapriapi ida pa muodia mai A'u." 10 Noka Abram na'ala hare honona pa nala la Orgahi, nhartietia la woru, na'nama nwatemna deullu nenenan pa nken tiemna la deul walli onni, mere onu-ma'nu rde edonna nhartia. 11 La'pa onu-ma'nu dawra, rtailia nhiuri-wnia'ana re ananni, dewade Abrama nawohora re. 12 La'pa lera nmel wa de Abram nanin hal memna. Noka melmela-kalkalma nma kaduw nana nhi'nande Abrama namta'at wenna. 13 Orgahi Nhar lirni la Abrama: "Plollolli de, de duratmu-waitmu hota rhi' do'ona-dakan la noh meheni ida, maka gahani atia'a, ne hota rwa'ata-rwa'ara me ramuki-rama'ala, la'pa anni rahu wogata ralamni. 14 Mere hairi meni mak kwa'ata-kwawa'ara hare, hota Aghi'a pa hoptutu-hoplera totpena hota ir rlergot la hande, de rodi miemna-ral memna re'eni-tniarnu. 15 Mere o' di de hota muodi kalwiedni-paitiotni pa mlia' temna up ulmu-tgar ulmu mak kmati olekwa. Ne la'pa moratmu nhamra me nihimu ntuini nanpa omuerun la ketarmu me retru la lumanmu. 16 Mere tuwu wogatni nanpa hota duratmu-waitmu rawali owa'an mai handi, onnila makden Amori do'oni-halli edonna ntu'tu ma'ta pa Aghoptutu-ghoplera." 17 La'awa lera nmel wa noma Abram namkek de ai woka ida mokalli nlergot la ralamni nor wutga hulu nmormiori nlola nhiuri-wnia'ana ananni letgarni. 18 La' ler de de, Orgahi Nhi'a nnio'a id la Nora Abrama, lirni: "Agala gen dilla duratmu-waitmu. Noha di nden nek la Mesir gerlawanni de nodi liarni la gerlawlawan de, de gerlawna Efrata, 19 ne makden Keni re nohananni-taniaratni, makden Kenas, makden Kadmon, 20 makden Heta, makden Feris, makden Refaim, 21 makden Amori, makden Kana'ana, makden Girgasi, me makden Yebusi re nohananni-taniaratni de. Honona re Agala tiy o'a."
Hagar nora Ismail
1 Noma Sarai, Abrama hawni de nakleh a'na. Mere gahani ata patke'a ida nwatiawua Mesira, nanni Hagar, 2 pede Sarai nakot la Abrama: "Omuat niohora de Orgahi edonna Nal a' pua a'u'a'na. Hade pede pena omuora a'tu de mininmi. Matiala hade nanpa aliernana durti id mai a'u. Ne Abrama natlin la hawni lirni. 3 Nhi' pede Sarai na'ala atni Hagar noka nala la Abrama totpa nhi'a la hawa liahunu. La' ler de de Abram nhol lia Kana'ana anni termid olekwa. 4 Abrama nora hawa liahunu ranina, noka patke' de na'apun wa. La'pa na'eram nan de na'apun wa dewade edon natota-nawaw etia upni-matromni Sarai. 5 Noka Sarai nakot la Abrama: "Papa, erierannu-padpa'danu mak atiutulu-ukwar di de o kwarmu hade. A'g ed mak kala a'tu della riwpmu wawannu, mere na'nama na'eram nan de na'apun olekwa, dewade edon natota-nawaw nan a'u. Orgahi ed mak khi'a plola-mneha mai a'u me o'a." 6 Abrama nakot la hawni Sarai: "Atmu de etla limmu ralamni, mhi' to' hya'a-hya' maka ompuarora de samoga la wawannu." Mere Sarai nhi' yatyata Hagar pa reiniande nawlar wia pa nto'or doinia la. 7 Noka Uplerlawna Ntutga rupni emolmolan neka Uplerlawna hopopanni-li'irnu pa Nwatroma la'a gera ormata id onni la'a gen mak kerkerna, de de gera ormata mak kdella talan mak kokru Syur. 8 Niwra: "Hagar, Sarai atni nee, ompuatiawu meni pa omlia'awa la hanmeni?" Wniahlani: "Matroma, a'uwlar pia atio'or la a matro'mu patke'a." 9 Noka Orgahi hopopanni-lili'irnu Nakot la: "Muwal lia matrommu patke'a, nhi'in della pa la'pa mutlina-mutailla. 10 Hota Aghi'a duratmu-waitmu pa harahu, nhi'nande ta'eni rrekan nana, yoma liawanni memna. 11 O' e mu'apnu, ne hota mu'a'na nana muanke'a ida, ne mual nanni pa nwawa Ismail (nnia'eratni de, Orgahi Natlin nana) yoma Orgahi Nat niohora o ralam mehramu. 12 A'namu de hota yehwani o'ta-watnu emeka keledai pora, ne hota nhi'inde nora riy rawenna, reiniande hota nor inni-amni amni-hyalli rawenna." 13 Nhor nioka Hagar nal nana la Uplerlawna niwra: "O' de El Roi (nnia'eratni de Uplerlawna mak kamkek a'u)." Yoma lirni: "La' handi de a'umkek oleka Uplerlawna mak kamkek a'u mere a'g edonna muati miano!" 14 Hade pede ger de riy rala pa nwawa gera Ber Lahai-Roi (nnia'eratni de ger maka Uplerlawna mak kmormiori die Namkek a'u.) Ger di ndell ma'ta la leta Kadesy nora leta Bered rletni. 15 Nla'awa noma lera ida ne Hagar na'a'na nana muanke'a id la Abram, ne Abram nweta a'nani maka Hagar ntor doin de nanni Ismail. 16 La' ler de de Abram umarnu anni terampwo'awa wehrani wonema.
Kniau id la Orgahi-Orha'a nnio'oni nora Abrama
1 La'pa Abram aninni terampwosiewa wehrani wosiew wa, dewade Orgahi Ntutga rupni la, Nal lir la: "A' di de Orgahi-Orha'a Uplerlawna-Mempulwatnu mak kodi plola-ktaryatu, muor liola A ga'yu ralamni de yana mpua'eini-mpuahala. 2 Hya' maka A'ukot oleka de, dodo'ondi A'ukot owa'ana, de hota Aghi' nana nnio'a id mai A'u gor o'a, ne hota Aghi'u pa liawanmu." 3 Noka Abram nwaltior pa nuh' idma-nrama lia'ara, noka Orgahi Nal lirni la: 4-6 "Hade pede hota itro'a tsi'a nnio'a ida, hota omhi'a am la hairi liawanni. Duratmu-waitmu harahu memna pede hota rhi'a hairi liawanni ne hairi-hairi rayni. Hade pede o nanmu de hota edonna rwet hadella Abram, mere hota rwet hadella Abrahama (nnia'eratni de hairi-hairi rora rimormiorni amni.) 7 Agora o'a me duratmu-waitmu tsoratreria A nnio'u di la'pa nodi liarni totpena Aghi' Uplerlawan la omuora duratmu-waitmu re. 8 La'pa Kana'ana tetema, geni mak omdiella emolmolla do'ona-dakan di, de Aghi' pa muora duratmu-waitmu miy hanmi la'pa nodi liarni. Ne Aghi' Uplerlawan la duratmu-waitmu re. 9 Omuora duratmu-waitmu tuwu la' tuwu mtiorrer pitpitu nnio'u. 10 Hadi de nnio'u: de muanke'a meha-meha la' miy die de rsunta. 11 Rteti molli-ma'ani ulatni de, hade ed mak khi'a kniau la'a A nnio'u gor miy totpena rat niohora mliernohora A'u. 12 Muanke'a mak lerni wo'awa rde nhi'de rsunta, de muanke'a meha-meha tiy miy, tuwu la' tuwu, mak kmor lia rommi nayanni, me maka ral kupna ra rawel niana la do'ona-dakna. 13 Muanke'a honona rde nhi'de rsunta totpena kniau mak A nnio'u de nayamkek toto'ola inonmi pa nodi liarni. 14 Ne muanke' maka edonna rsunta, de riy mak emkare de, rhoiya la Uplerlawna mutnu atia'a. Yoma nhoitio'ora oleka nnio'u. 15 La'a hapmu Sarai, yana mpuet nanni de Sarai, mere nanni de Sara (nnia'eratni de, ray a'nani patke'a.) 16 Plollolli de hota A'ura'a-upalga pa gala a'na muanke'a id tiy, me hota Aghi'a pa nhi'a in la hairi liawanni me duratni-waitni rhi' ray-ray lia hairi liawanni." 17 Noka Abraham nuh idma-nrama lia'ara mere namali, ne nwarora-nwalai: "Emkade wal pia riy maka mormiorni nla nte' nana anni rahu id de na'a'na ma'ta, ne emkade wal lia Sara mak kmor niana anni terampwosiewa de nmor niana a'na ida?" 18 Noma Abrahama nakot la Uplerlawna: "Matroma, samounu de Omhi' wutga nnio'omu la Ismaila." 19 Mere Orgahi Nhar lirni: "Edon emkade, yoma Sara mak ka'a'n nana muanke'a id tiy o'a, ne hota mual nanni de Isak, ne hota Aghi' wutu A nnio'u la pa nla nodi liarni la Isak duratni-waitni. 20 La'a Ismail de, A'utlin oleka wakwakmu. Plollolli de hota Agala ra'a-palu la, pa Aghi'a pa na'upa-na'a'na, ne duratni-waitni harahu. Hota nadurit nana ray termida wehrani woru, ne hota Aghi'a pa nla'a hair lalawna. 21 Mere nnio'u hota Aghi' wutga la Isaka, mak hota Sara na'a'na nana tiy o'a la'a anin li'iru la'a wenu-wolla emolmolla ler di." 22 La'pa Orgahi Nahor lirni la Abrahama dewade, Orgahi Nha'at la Ilyamou-Watyatoha pa Nto'or doinia Abrahama la. 23 Nhor nioka Abrahama npolga Ismail ne riy honona maka rmor niana la romni nayanni rora maka ha nal kupan la nawel niana re, de muanke'a meha-meha la romni ralamni, noka nteti molli-ma'ani re tutnu la' ler de meman neka, emolmolla maka Orgahi Nakot targa la. 24 Abraham nmor nian oleka anni terampwosiewa wehrani wosiewa la' ler maka ha rsunta. 25 Ne Ismail aninni termida wehrani wotelu, la'a ler maka ha rsunta, 26-27 pa rora muanke'a honona re rtet wutga molli-ma'ani re tutnu.
Orgahi-Orha'a Nano' owa'ana a'na muanke'a id la Abraham
1 Lera ida ne Abrahama namtatan reria la hoiwiali nhiarni gaini la'a ora-au Tarbantin no'a Mamre genni onni, de lera nwawuau ro'onni. Noka Orgahi Ntutga rupni la, de 2 Abraham nran gaini, namkek nana riy wotelu rtutrier lia gaini ralamni. Namkek nana dewade nawlar pia ntawu hoiwiali nhiarni gaini pa nla nwatroma re, noka nwaltiora-nwaltiemna. 3 Noma niwra: "Am miy re, la'pa ralammi nal a'u die, awuak de yana mtio'or mai a'u. 4 Pena rala gera oke' pa mialla miohma doin lakmi la, pa tren kuku' la au di nayanni. 5 Mai pia temnu pleini pa miruri-milai owa'ana nhor nianpena mila' pa miodi liarmi. Miy mmiai olek la gen di pa aghoi-tiania miy." Rwahla riwra: "Ampayowa." 6 Noka Abrahama plet pa nla'awa hoiwiali pa nwatroma Sara pa nakot la: "Sara, mua'ala wetra' hota sak ida mak samomuou. Plet pa mriahmia la rot piopo'ola." 7 Noka Abraham nawlar tiemna nhiurni-wnia'anni re, noma na' nana sapi a'na molmola ida, pa nala la hopopanni re riy ida, noka pleta-plet pa nwenna na'nama ntunu-nahaga. 8 Nhor nioka Abraham na'ala uhu tiuru mak kami'na me uhu tiuru mak kmilu na'itar wutu sapi a'na, noka nhoiya la hare gaini. Me Abraham ntutrier niohora re la'a au nayanni, de e rara'an reri. 9 Noka ratiana Abrahama riwra: "O hapmu etla meni?" Noka Abrahama niwra: "Etla hoiwiali nayanni." 10 Noka Orgahi Nal lirni: "Mhoratreria me! Hota Amuai owa'an la anin li'iru pa itwatroma, de hapmu hota nmor nian muanke'a ida olekwa." Ne Sara e natlin reria la'a nhiar miak della Abraham to'orni. 11 Mere Sara nora Abraham rhamto'a-rhape' wal wia, ne Sara mana edon nlernan oleka karorta-kdeh wal wia. 12 Pede Sara namali ne ralamni niniha pa nwarora: "Agora Abraham mhamto'a-mhape'ewa ne hota a'u'a'na emkameni?" 13 Noka Orgahi Nhar lirni la Abrahama: "Nihya'pa Sara namali pa niwra: "Plola pa hota a'u'a'na, mere aghape' olekwa?" 14 Hya' to' maka rimormiori ta'eni rhi'a de, Orgahi Nhi' nana. La'a ler maka Aget tiarga de, anin li'iru, A'uwali owa'an pa itwatrom de Sara nmor nian a'na muanke'a ida olekwa." 15 Mere Sara nreher doinia, niwra: "A'g edon umali." Yoma namta'ata. Mere Orgahi Niwra: "Edonna, omumal tioto'a!"
Abraham yareini-yawakni wamueheni la Sodom
16 Noka riy mantetelu re rwaran la gen die, ne ramkek la leta Sodom. Ne Abrahama nala' wut lia re pa nod niohora. 17 Noka Orgahi-Orha'a Nwarora: "Nhi'pa A'ude'a la Abraham, hota Awueyata Sodom letni me yana? 18 Samounu de A'ukot nohora hadilla Abraham yoma Abraham di nla' nana hair lalawna mak kodi plolli-ktaryatnu, ne tototni-rerieini pa rimormiori nohkeran di wawannu rlernana ra'a-palu. 19 Awualir nian Abraham oleka wa, totpa nhopna duratni-waitni, totpa rlernohora talan mak Atiut tiarg oleka, de rhi' nana plola-mneha, ne totpa A nnio'u de ntutu-nte'ela Abraham (nor wutga duratni-waitni). Hade pede A'ukot nohora hya' maka Agiwa ghi'a di." 20 Nhor nioka Orgahi Nhar lirni: "Abraham! Plola pa riy rahu rpolpuolu-rwakwak mai A'u die, riwra, riy mak kdella leta Sodom nora Gomora do'oni-halli werat rehia. 21 Pede Amueh'a gerun pa A'umkek memna totpena Agat niohora de, plola pa hihi'ini-yapyapni nhiolli-lietni emolmolla maka riy rakot la mai A'u, me edonna." 22 Noka riy maroro'a re rhoitio'or la hande wa pa rala' pa rokru Sodom, mere Abraham naprir rier mia'ta la Orgahi gaini. 23 Abrahama nma nrehgor pua niwra: "Matromlawnu ne! Plola pa hota Omkuh dioinia-mhuo'or doini riy plollola ra'itar wutu mak khi' do'a-kyap hiala? 24 Emkameni la'pa riy plollola terampwolima mak erla let de ralamni? Plollola pa hota Omkuh dioini-mhuo'or doini gen diella, ne edonna Mual targa yariwa-yahai la, onnila riy plollola teram matlimlimni mak kdella ralamni? 25 Olie'tu la hihi'a-yapyapia mak emkade, Mpuenan wutu riy dodo'a-halala rora riy plollola-mneneha, nhi'nande mak kaplola re emekwali mak khi' hala! Olie'tu la hihi'a-yapyapia mak emkare tiy O'a! Yanhi'pa O' mak ktorna watghudi lokarni-tatiaili lahannu la noheri woru-lyanti nayanni edonna Muodi plollolli pa Mukmua?" 26 Orgahi Nhar lirni: "La'pa Aliernana riy plollola terampwolim la Sodom ralamni, de Agho' li'mu me Ariei ro'ru la gen die tetema, onnila hare." 27 Abrahama nwahla niwra: "Plola pa a'g e ghi' parania ino'nu pa ultier wut lia Orgahi, emkameni ho'mana koda-awu a'u. 28 La'pa nho' nana riy wolim la riy teram matlimlima mak kaplola rde, hota Mpueyata-mpuaniawua let de onnila riy matlimlima rena?" Lirni: "A'g edonna wueyata-wuaniawua, la'pa Aliernana terampwogata wehrani wolim la hande." 29 Abrahama nhauri owa'an lirni pa nakot la: "La'pa Omliernan to'a terampwogat la hande de?" Lirni: "A'g edonna wueyata-wuaniawua, onnila teram mandadatni re." 30 Lirni owa'ana: "Yana Matro'mu Nawunu-nawenan mai a'u, la'pa a'ultier nian ralamni owa'ana. La'pa Omliernan to'a terampwotel lia hande de?" Lirni: "A'g edonna ghi' nan emkade, la'pa Aliernana teram mantetellu re la hande." 31 Lirni: "Plollolli de, aghi' parania ino'nu pa ultier wut lia Matro'mu. La'pa Omliernan to'a terampwor lia hande de?" Lirni: "A'g edonna wueyata-wuaniawua, onnila teram maroro'oni re. 32 Lirni: "Matro'mu yan Nawunu-nawenan mai a'u la'pa a'ultier nian ralamni to' owa'an di pa onanwa. La'pa Omliernan to'a termid la hande de?" Lirni: "A'g edonna wueyata-wuaniawua, onnila teram memeheni de." 33 Noka Orgahi Nla'awa, la'pa Nahor dioinia lirni la Abrahama. Ne Abraham mana nawal pia nla'awa genni-tienni.
Rweyata-rwaniawua Sodom nora Gomora
1 Noka Orgahi hopopanni-lili'irnu rora rte'ela leta Sodom la lera lia'ani. Lota e nora ina-ama leta ramtatan wutga la Sodom puohrani gaini, ne la'pa Lota namkek nana re dewade naprir pia nwatroma, noka nwaltiora-nwaltiemna la hare gaini. 2 Noma niwra: "Am miy re, mai pia itwarini pleini totpa miroha-mirarmi pa repardoin nanpa mila' doin yala'ami la." Rwahla riwra: "Yan nekwa, pena amanin la wewan mou wawannu la let di letgarni." 3 Mere onnila Lota nwakwak memna noma rlernohora pa rla rlola likatni, nhi'noka rhoiya yamanna nora rot miaka na'nama rtunga mak edon rnairia tgo'a (ragi) la pa ra'ana. 4 Mere la'pa edon ranin ma'ta, dewade muanke' mak kdella Sodom re, ntawua trapriapni pa nodia la hamtoto'oni, la'pa leta tetema, id mana edonan nden hala, rma rpe'pa likit de. 5 Noka rhaun la Lota riwra: "Lot ee! Riy mak kmai lia o'ola mel di erla meni? Muodgiota mai am lia tio'or di, totpa amora mpadu'ul wutu." 6 Noka Lota nlergot pa naprir lia nhiari gaini na'nama nho'la taru nhiari la to'orni pa nakot la re, 7 niwra: "Ama-hyal miy re, yana mhi'a do'a-hala yatni-halli mai let di ralamni. 8 Mere mitlina, yana mi'ala muanke'a ri mere mi'ala a a'nu patke'a worg era ri, de muanke' id mana edonna nheik ma'ta la inonni, pena agodgiota tiy miy die, mhi' to'a hya'a-hya'a la wawannu re, plolli nek tiy miy wia. Hornama yan memmemna mhi' hadomdom la muanke'a ri, yoma ha rma ruwnu inonni la a liktu di." 9 Mere riwra: "Mriei lia walli! Ommuai handi de emek do'ona-dakna, ne miwra mhi'a mak kodi plola-mneha mai ami? Dodo'ondi amamuki-mama'alu nareh liawna riy maroro'a re!" Noka ratek la Lota, ne rwakrian pia totpa rleran doini nhiari la. 10 Mere riy maroro' mak kdella likti ralamni rtan limni pa rtoran Lot na'nama rodia pa rla'awa likti ralamni ne rho'la nhiari. 11 Dewade rwenta riy rahu mak kdella likti nhiarni gaini re matni, ntawua trapriapni pa nodia la hamtoto'oni, reiniande rlol to'a hgalli la nhiari yahakni. 12 Noka riy maroro'a re rakot la Lota: "Lupmu-rommu he' ed ma'ta la let dina? Yananmu, a'namu patke'a, a'namu muanke'a la'pa he'-he' to'a lupmu-rommu la' let di, muodia pa mliergot la gen di, 13 yoma hota ampeyata-mpaniawua gen di, yoma riy rahu rakot nohora oleka la Orgahi gaini, de riwra riy mak kdella handi de do'oni-halli de lawan rehia. Hade pede Orgahi-Orha'a Nhopan pa ama mpeyata-mpaniaw doinia la." 14 Lota nlergota, pa naltier wut lia panin raralamni re rora, mak hota kora a'nani patke'a rora rmehlima, niwra: "Mimata, plet pa mliergot la gen di, yoma Orgahi hota Nweyata-nwaniawu let di." Mere panin raralamni rora rwarora de panin Lota nkakrom to'a." 15 La'pa nmer la tipru dewade Orgahi hopopanni-lili'irnu rora rtekua Lota, totpa pleta, riwra: "Ple'etu! Mumat pa muodia hapmu me a'namu rora mak erla handi, totpa yana mmiati-mmiolu lia let di do'oni-halli wawannu." 16 La'pa Lota nhi' kuke' ma'ta dewade Orgahi hopopanni-lili'irnu rora rte'la la Lota nor hawni-a'nani limni noka rodia rla'awa leta to'orni onnila Orgahi Nal ralam kalwiedni rla. 17 La'pa ha rora rodia rla leta to'orni pa nhorwua dewade id niwra: "Miwlari, plet pa milewna inonmi. Yan mikillia to'ormi, ne yan memmeman neka mtiut tiarg lia meni-meni la rai mtatan la Yordana lowanni, mere plet pa miwlar lia wo'ora hananni, totpa yana mmiati-mmiolu." 18 Lota nakot la re: "Tuna, awuak pa yana emkade! 19 Plola pa aliernan oleka ralam kalwiedmu la' gaimu ralamni, ne mhi' oleka ra'a-pal liawna mai a'u, onnila mhilpai-mianatga a mormio'ru, mere hota a'uwlar mieman la wo'ora hananni de matmiat die nhapartikil nan a'u, pa nhi'nande hota amuati. 20 Mumkeka, let ku' ida e rehgorgoru lia hande. Ompuayow pa a'uwlar pia liawa let ku' de. A'uwlar lia let de, de mormio'ru hota ralewan nana." 21 Orgahi hopopanni de nakot la: "Wakwakmu de arieinian samomuoga, de let maka ha mukot de hota a'g edonna wuatiri-wualiakra. 22 Pletmi, miwlar lia hande, yoma la'pa o' edonna mlia' ma'ta hande, de a'g edonna ghi' nana hya'a-hya' doma." Hade pede let de nanni de rweta la Soar (nnia'eratni de, kuku'a). 23 Lera matni npah'a wa pa nhitwah'a noha wawannu, de Lota nte'ela Soar. 24 Nhorwua dewade Orgahi Nalernu otan lali me ai la'a Sodom nora Gomora wawannu, nwatiawu lyanti. 25 Dewade Nwatiri-nwaliakra leta-leta rena me rai mtatan la Yordan lowanni, me leta mniotni honona re, ra'itar wutu ora-au yawuli-yatniamni honona. 26 Mere Lota hawni mak kala'pa nlernohora nakillia to'orni, dewade nwaltiar lia riri kio'a ida. 27 La'pa yawyawar ma'ta pa Abraham nla'awa gen miaka ha ntutrier lia Orgahi gaini, 28 pa namkek la leta Sodom nora leta Gomora me rai mtatan la Yordan lowanni tetema, de namkek nana ai miokla ntawua tani wawannu pa nhopul la heyanna, emolmolla ai miokal mak ktutni auwru. 29 Emkadella lerni la Orgahi Nweyata-nwaniawua leta-let no'a rai mtatan la Yordan lowanni, ne Nwatiri-nwaliakra leta-let maka Lota ha ndella, noma Orgahi Nhoratnana Abrahama, noka Nodgiota Lota pa nlergot la gen miaka Ha nwatiri-nwaliakar de letgarni.
Lota nor a'nani patke'a rora
30 Noma lera ida ne Lota nlergot la leta Soar pa nora a'nani rora rhol lia wo'ora wurannu, yoma edonna nparan pia nhol lia Soar pede la nhol lia liena ida, nora a'nani patke'a rora. 31 Lera ida ne, yanulu nakot la gari: "It amni di nhamto'owa, ne a'na muanke'a hadamonan la gen di pa ratian ita, emeka noh tetema illu-yehwani samoga. 32 Samounu de tsi' pa tala lokrahi turnu (anggur) la pa it amni nemnu, totpa tora tanina, ne totpa tsauru it amni duratni-waitni." 33 Mel de pa rala lokrahi turnu la amni nemnu, noka yanulu nala' ul pua nla nora amni ranina. Ne e' mana naplin niohora nor a'nani ranina. 34 Repar noka yanulu nakot la gari niwra: "Worawia agor oleka it amni manin wutu. Nhi'pa mel di de tala lokrahi turnu la nemni owa'ana. Mlia'a rialam pa muora minin wutu, totpa tsauru it amni duratni-waitni." 35 Emkade wal lia mel de, pa rala lokrahi turnu la amni nemnu, na'nama gari namat pa nla nora amni ranin wutu. Ne amni naplin niohora nor a'nani ranina. 36 Noka Lota a'nani rora ra'apun wa. 37 Yanulu na'a'na nana muanke'a ida, ral nani pa nwawa Moab. Hadi ed mak kadurit nan makdena Moab. 38 Gari mana na'a'na nana muanke'a ida noka ral nani pa nwawa Ben Ami. Hadi ed maka kadurit nan makden Amon.
Abraham nora Abimeleka
1 Noka Abrahama nwaran la Mamre lowanni pa nokru Negep lowanni, ne nhol lia leta Kadesy nora Syura rletni. Nhor nioka ndella leta Gerar pa emeka do'ona-dakna. 2 Onnila Abrahama nakot nohora Sara, hawni de niwra: "E'a de na'ru", reiniande Gerar rayni de, nanni Abimelek nhopan pa ra'ala Sara. 3 Mere mela ida Orgahi Nmai lia Abimelek, la mi'ini id ralamni, pa nakot la: "Abimelek, toto' memna hota mmuati, onnila patke' mak omua'ala de, yoma ha nmehlim olekwa." 4 Mere Abimelek edon nor ma'ta Sara ranina-radera. Niwra: "Uplerlawna! Ompuenna riy mak kakleh do'a-hala?! 5 Abraham nakota mai a'u die: Hade de de e narni. Ne patke' de nmeh'a nekpa nakot walia de: Abraham de e narni, reiniande nden nek la a ralma plele'eru pa aghi'a hadi, ne a li'mu mana edon lok ma'ta la." 6 Orgahi Nhar lirni: "Agat niohor walia, de omhi'a la hade de ralammu naplele'era, pede A'u muana Aghoratre'ru pa yana mhi' do'a-myap hial mai A'u. Hade pede A'g edonna golin doinia la pa mtie'la la inonni. 7 Pede dodo'ondi meman pa mpuolan doinia riy de hawni, yoma hade de makwohorulu-ktatrulu id hade. Hade ed mak pena nsumbaini totpa ommuormiori aplahwa. Mere mhoratreria, o' edonna mpuolla-mpue'era hade, de hota omuora he'a-he'a mak klidan nohora o'a mmiati momuou. " 8 Repardoin yawyawar ma'ta de Abimeleka npolg awoka hopopanni-lili'irnu re pa nwahaur nohora hihi'a-yapyap diella honona re, noka riy rahu re ramta'at wenna. 9 Nhor nioka Abimelek npolga Abrahama pa nakot la niwra: "Hya'a nhiol miaka omhi'a mai am dina, ne hya'a do'a-hal mak aghi' oleka tiy o'owa, nhi'nande omrieiniana do'a-hal matmiat liawna la a ino'nu me a hai'ru? Nhiol miaka emkade de, de yana omhi'a. 10 O ralma-riormu emkameni pede mhi' nan hadena?" 11 Noka Abrahama niwra: "Awuarora de ya'unni-yamta'ata Orgahi hadamonan la gen di. Toto'ola riy hota rwen a lia a ha'wu wawannu. 12 Nhi'wali ne, e'a de a na'ru de, a'mu a'nani, toto'a i'nu a'nani atia'a, mere ler li'ir na'nama nla' a ha'wu. 13 Lerni pa Orgahi Nhopna pa aliergot la a'mu romni pa a'u la' wuewewar de, a'ukot la ha'wu: "Mtiutga ralam kalwiedmu mai a'u, itte'ela geni meni de, mukota la makden la gen die miwra: Abraham di de a na'ru."" 14 Nhi'noka Abimelek na'ala duma, sapi, ata patke'a rora muanke'a, noka nal momuoga la Abrahama. Hawni Sara mana napolla-nawe'er owa'ana la. 15 Ne Abimelek niwra: "Gen di agharia tiy o'a. Mhuol lia gen mieni mak o ralammu nala." 16 Noka lirni la Sara: "Agal oleka kupna maha wawahra riwnu id la narmu totpena mak kpoi rieri-kek reri rat niohora o plolmu-mnehemu." 17 Noka Abrahama npolu-nwak la Orgahi, noma Orgahi Nhi' kalwieda Abimelek nora hawni me atni-wa'arni patke'a, pa nhi'nande hota ra'upa-ra'a'na. 18 Yoma hya' maka Abimelek nhi'a la Sara nreiniande wonyira-melulu Orgahi Nhi'a pat mak kdena Abimelek re a'na genni ratniutwu (rakleh a'na).
Sara nmoria Isaka
1 Emolmolla hya' maka Orgahi Nakottarg oleka la de, Orgahi Nhi' samomuou Sara, ne Nhi'a pa 2 Sara na'apun wa pa na'a'na nana muanke'a id la Abrahama, la'a mto'oni-pe'eni lerni, la'a ler maka ha ret tiarga la nlernohora Orgahi lirni la. 3 Noka Abrahama nala a'nani mak na'nama ha rmor nian de pa nwawa Isaka (nnia'eratni de namali). 4 Nhor nioka Abrahama nsunta Isaka, la' lerni wo'awni, emolmolla hya' maka Orgahi Nhopan targa la. 5 Ne Abrahama umarnu anni rahu ida, la'a ler maka rmor dioinia a'nani Isak. 6 Sara niwra: "Orgahi Nhi' olek a' pua a'uhepru pa umali, nhi'nande riy mak katlin nana hadi mana honona ramali, onnila rahepru ror a'u. 7 He' ed mak wonyira-melulu nakot la Abrahama de Sara hota na'uhu keke'enku'a?! Mere plola pa a'u'a'na nan oleka muanke'a id la e'a la'a lera mto'oni-pe'eni."
Abraham nhokra Hagar nor Ismail
8 Keke'enku' de nlawlawan lol wa pa Abrahama nhi'a ya'anlawna-yemunlawna la'a ler maka rollia uhu la Isaka. 9 La' ler maka rhi' ya'anlawna-yemunlawna de Sara namkek nana, Ismail nora Isak, rahehe'i rieri. 10 Sara nawenna pa nakot la Abrahama: "Mhuokar doinia hopopanmu pat de na'itar wutu a'nani, yoma ata de a'nani ta'en niana nor wutu a'nu rla'a mak kodi plolli la re'emu-tniarmu." 11 Sara lirni nhi'nande Abraham ralamni nmawal doin la onnila Ismail mana, Abraham a'nani walia. 12 Mere Orgahi Nal lir la Abrahama: "Yan ralammu nmawal doin la onnila at de nor a'nani. Mere la'a hya'a-hya' maka dodo'ondi Sara nakot nohora tiy o' de, mliernohora honona re, de mhuokra hare pa rla'awa. Mhuokra pa rla'awa, yoma hota la'a Isak duratni-waitni nampena nnio'u ntutu-nte'ewa; de duratni-waitni rler la pripanni-fa'anni pa rtorna wut pepetna-taur lialawna me onnila hare de rimormiori nohkeran di rlernana yara'a-yapalu. 13 Mere duratmu-waitmu mak ktaw atmu de mana, pena ghi' walia pa nla'a hairi ida, yoma hade mana a'namu wali." 14 Repardoin yawyawar ma'ta de Abrahama na'ala yamanna me ger la ger geni ida maka ha rhi'a la ha ulti pa nala la' Hagar, nha'ar wutu wareher della Hagar wawayanni, nhor nioka nhopan pa patke' de nor a'nani rwaran wa. Noka Hagar nwaran wa pa nala' wewewar nekpa nla'awa gen mak kerkerna, nwawa Bersyeba. 15 La'pa ger maka nodia de nhorwua, dewade na'ala keke'enku' de pa nkenia la ruwnu-ahla id ralamni, 16 ne namtatan la olietkota, yoma niwra: "Nee! A'g edonna tiahan nan pa umkek rer a a'nu di nmati." La'pa patke' de namtatan reria ne nkakur doin la, nhi'nande lirni nhar miemna. 17 Orgahi Natlin nana keke'enku' de nkakru, noka Orgahi hopopanni-lili'irnu Nhaun la Hagar nwatiawu lyanti, Nakot la Niwra: "Hya' ed maka ralammu nmawal nohora Hagar e? Yan mumta'ata, yoma Orgahi Natlin nan oleka a'namu nkakru la'a gen miaka ha mudud tiarga de. 18 Mumata, mu'ala a'namu de, yoma hota Aghi'a pa duratni-waitni nla'a hair lawna ida." 19 Noka Orgahi Nwera Hagar matni, nhi'nande namkek nana gera ida. Noka nla nahara ger la ger geni, nhor nioka nala la a'nani de nemnu. 20 Emkade pa Orgahi Nlin reri-nmat reria keke'enku' de la'pa nla'awa tuw geni-lawan geni. Nhol lia gen mak kerkerna, ne nwara'pa pa nahaka ya'ana. 21 Nden nek la gen mak kerkerna la Paran lowanni, ne inni na' nana pat Mesir id pa nora rmehlima.
Abraham nor ray Abimelek rhi'a nnio'a ida
22 Lera ida ne ray Abimelek nora hopopanni Pikhol, de mak kod keki-rautu re o'tani, rmai pia rakot la Abrahama riwra: "Abraham ee! Omlia' meni-meni de Orgahi Nor o' talla. 23 Hade pede mpuet la Orgahi nanni pa mliokar mai a'u, de edonna mputra-mpualk a'u, onde a durtu-waitu. Itsi' nnio'a id totpa omhi'a samomuou mai a'u, me mhi'a samomuou lia riy honona mak kdella gen di, gen miaka omdiella emolmolla do'ona-dakna, emekwalima aghi' olek samomuounu tiy o'a." 24 Noka Abrahama niwra: "Aliokra." 25 Mere Abrahama naltieri niohora ralam mehrani la Abimeleka, la'a gera ida, maka Abimelek hopopanni re rwarui nian oleka. 26 Abimeleka nwahla: "A'uplin niohora he' ed maka khi' nan hade. Nhor wuali ne o' edon mukota ma'ta mai a'u, ne la'pa ler di meman mana a'g edon utlin ma'ta." 27 Noka Abrahama na'ala duma me sapi pa nala la Abimelek totpa rrora rhi'a nnio'a ida. 28 Abrahama ntau dioinia dum a'na rara wo'itu la'a duma re honona. 29 Noka Abimelek natiana Abrahama: "Rhi'a dum a'na mandidit muaka mtiau dioini rella hya'a?" 30 Nwahla: "Dum a'na mandiditu ri, Agala tiy o'a totpa nla'a kniau id la, de a'g ed mak kahi ger de." 31 Hade pede riy rweta gen diella Bersyeba (nnia'eratni de gera wo'itu), onnila riy marororo'a ri rwalokr olek la hande. 32 La'pa rhi' oleka nnio'oni rla Bersyeba dewade Abimelek nora Pikhola rawal lia makdena Filistina re genni. 33 Noka Abrahama ntamin targa au tamariska onni id la Bersyeba, ne nkola tieru-nawur nehla la Orgahi-Orha'a Uplerlawna-Mempulwatnu mak kden pa nodi liarni. 34 Ne Abrahama nholi mahnek memna la Filistin re geni.
Orgahi-Orha'a Niwra Nat niohor memna Abraham pesiayni
1 Lera ida ne Orgahi Niwra Nat niohora memna Abraham pesiayni pede nakot la Niwra: "Abraham ee!" Nwahla niwra: "Hya'a matroma." 2 "Mua'ala Isaka, a'namu muanke' memeh mak o ralammu nala de, pa mlia'awa Moria lowanni, ne mhi'a Isaka di pa nhi'a hoihoi-tantiani la wo'ora id wawannu, maka pena Atiutga tiy o'a." 3 Repardoin yawyawar ma'ta de Abrahama namat wa, nkenia keledaini wniowni, na'nama npolga hopopanni riy woru me Isaka. Noka naklihir targa au pa nodi wal lia hoihoi-tantiani re tniunnu-nhiaranni, noka rwaran pa rla'awa gen miaka Orgahi Nakot targa la. 4 La'pa lera wotellu de, Abrahama nran matni pa namkek nana gen die ndella olietni. 5 Noka Abrahama nakot la hopopanni re rora niwra: "Miora keledai di pa mdien nek la handi. Agora a a'nu di pa amla'awa hande. Amla mtunga hoihoi-tantiani la Orgahi, nhor diemade amawal tiy miy." 6 Noka Abrahama na'ala au maka ralla rtunga hoihoi-tantiani re, pa nlapra la a'nani wawayanni wawannu, mere la' limni ralamni de Abraham nih'ru nana ai me ta'wa. Emkadella pa rrora rala' wut rewre'wa. 7 Noka Isaka nakot la amni: "Ama." Abrahama nwahla: "Hya' ame?" Noma natiana niwra: "Mai handi de ai nora au er olek la wa, mere dum a'na etla meni pa rhi'a la hoihoi-tantiani tniunu-nhiarna?" 8 Abrahama nwahla: "Ama, Orgahi pena Nalla dum a'na pa rhi'a la hoihoi-tantiani tniunu-nhiarna la Orgahi." Emkadella pa rrora rala' rewre'wa. 9 Rte'ela gen miaka Orgahi Nakot targa la. Noka Abraham nariria katri'ana la' hande, nwatiernu au me nwutga a'nani, noka nlapra la katri'ana wawannu la'a au wawannu. 10 Nhor nioka Abraham netar limni pa na'ala ta'wa na'nama niwa nala rotna Isaka tiernu. 11 Mtatande nekpa Orgahi hopopanni Nden nek la lyanti pa Nhaun nohora Abraham, Niwra: "Hei! Abraham ee!" Abraham lirni niwra: "Hya' Uplerlawne!" 12 Noka Orgahi hopopanni Nal lirni: "Yana! Yana mpuenna a'namu de, yana mhi' la'a-mhi' maiya. Dodo'ondi de Agat niohor oleka wa, de mu'unni-mumta'ata A'u, yoma ralammu edon werwerta la muala a'na memehemu de mai A'u." 13 Noka Abraham nran gaini pa namkek nana duma ltiata ida mak dudallu nha'ar tar lia ruwnu-ahla ralamni. Abrahama la na'ala dum de pa nhi'a la hoihoi-tantiani, na nhernia a'nani. 14 Hade pede Abrahama nhi' gen die pa nwawa: "Orgahi Nwahi' targa olek wa." Onnila hade pede la'pa nmai lia dodo'ondi mana riy riwra: "La'a wo'or hananni mak Orgahi Nhopan pa Abraham nala hoihoi-tantiani de, hota Uplerlawna Nwahi' targa hya' maka rakleha." 15 La'pa re'eni wornu wa, pa Orgahi hopopanni Ndella lyanti pa Nhaun la Abrahama, 16 Niwra: "Aliokar de Awuet la A na'nu, de yoma onnila omliernohora A li'ru, ne ralammu edon werwerta la muala a'na memehemu de mai A'u, 17 pa hota Agala ra'u-pa'lu tiy o' pa harahu, ne ghi'a duratmu-waitmu re harahu memna emolmolla wtion no'a lyanti me emeka en nio'a eni wawannu, ne duratmu-waitmu hota rodi plolli-rtaryatnu la arwalli re letni-ruhunni. 18 Onnila o duratmu-waitmu na'nama rimormiori nohkeran di rlernana yara'a-yapalu. Hari honona hota Aghi'a onnila omutlina-mutailla li'ru-tu'nu." 19 Nhor nioka Abrahama nawal lia hopopanni re rora, noka rewre'wa pa rawal lia Bersyeba. Noma Abrahama nhol lia hande wa.
Nahor duratni-waitni
20 Lera ida ne Abrahama nlernana kota-de'eta riwra: "Yermu Milka mana na'a'na nan walia a'na muanke'a la hyalmu Nahora. 21-23 Nahora a'nani yanulu de nwawa Usa, mak klernohora Usa de, Busa, mak klernohora Busa, Kemuel, mak klernohora Kemuel de, Kesed, mak klernohora Kesed, Haso, mak klernohora Haso, Pildasy, mak klernohora Pildasy, Yidlaf, mak klernohora Yidlaf, Betuel, gari hoho'a hade. Hari honon rde Milka na'a'na nan la Nahora. Ne Kemuel nlawlawan lola pa hota nhi' am la makdena Aram." Noka Betuel na'a'na Ribka. 24 Ne Nahora hawa liahunu Reuma na'a'na nan wali a'na muanke'a re doma, yanulu nwawa Tebah, mak klernohora Tebah, Gaham, mak klernohora Gaham, Tahasy, mak klernohora Tahasy, Maakha.
Sara nmat pia radera la lienni
1 Sara nmormior niana anni rahu ida terampworu wehrani wo'itu. 2 Noka Sara nmat lia Kiryat Arba, maka ululu de nwawa Hebrona, la'a noha Kana'ana. Noka Abrahama nko'a-nkakru. 3 Nhor nioka Abrahama naprir pia nhoitio'or la hawni mak kmat die, noka nakot la ina-ama la Heta duratni-waitni niwra: 4 "A' di de do'ona-dakn a'u, ne la'a miy hononmi di, a' di de mak klaunu id a'u (pede ge'nu-tie'nu hadamonna pa atiamnia ha'wu). Mtiulan pa mi'olu lienmi mai let di mai a'u, totpa agodia ha'wu pa tiamnia la. " 5 Noka riy id la ina-ama re nwahla Abrahama niwra: 6 "Ama, mutlina! Amat niohora o' di de riy lawna ida la Uplerlawna gaini ralamni pa la mtiamnia hapmu della a hoi miamni-ketar mamni maka mpualir niana. Riy id mai am di ta'en niana nwayotil pa rala ketarni tiy o' pa mtiamnia hapmu de." 7 Nhi'noka Abrahama nwaltiora-nwaltieman la ina-ama re, 8 ne nakot la re: "La'pa miy mpiayow pa agodia ha'wu pa atiamnia la hande, de mrieiniana-mia'nana a wakwa'ku di pa mpiak lilili-maumuau lia Efron, Sohar a'nani, 9 totpa nala lienni la Makpela geni, mak kdella nhyi'ini onni de. Samounu de nal neka pa a'uwelia pa aghi'a la a lu'wu-a'nu ketarni la'a miy letgarmi, ne welli de apuair tetema." 10 La' ler de de Efrona e namtatna la Heta duratni-waitni ina-ama re letgarni. Noka Efrona de nwahla Abrahama, de ina-ama mak kawok la leta puohrani gaini re ratlin reria. 11 Efron niwra: "Edonna ama, mutlin mai a'u. Nhyi' de agala tiy o'a, me lien de mana agal walia tiy o'a. Ne ina-ama rlin reri-rmat reri mak a'ukot di pede hota mtiamnia hapmu la gen die." 12 Noka Abrahama nwaltiora-nwaltieman la ina-ama re, 13 ne nakot la Efron, de honona e ratlin reria, niwra: "Mitlin rerio! La'pa ompuayow de, apuairia nhyi'imu de welli. Mrieiniana hade mai a'u, totpena atiamni ha'wu la hande." 14 Efrona nwahla Abrahama: 15 "Ama, mutlina. Nohanna-taniarta di welli werta, de maha wawahra rahu wogata. Plol toto' it mamaini mere emkadella pa mpuair niek wa. Mpuairia pa mtiamin neka hapmu la hande." 16 Noka Abrahama nreiniana Efrona wakwakni, noma npairia maha wawahra la Efrona, liawanni emekwali maka ha nakot oleka re. Ina-ama mana ratlin reria de, maha wawahra rahu wogata, emolmolla mak kwadakna nhi'inde ret tiar lia. 17 Emkade nek la Efron nhyi'ini, nora lienni, na'itar wutu or-au ona mak kdella nhyi' di ralamni, lowan di honona mak kdella Makpela, la'a Mamre walli tipru 18 rala la Abrahama emolmolla tani ya'olu-yala'a, la'a Heta duratni-waitni gaini ralamni, de ina-ama mak kmai lia puohra leta gaini. 19 Nhor nioka Abrahama ntamnia hawni la'a liena mak kdella nhi'a Makpela, la'a Mamre walli tipru, de la'a leta Hebron la'a Noha Kana'ana. 20 Emkadella la'a Heta duratni-waitni re rala la' Abraham nhyi'a nora lien mak kdella hande pa nhi'a la hoini-kietar wamueheni.
Rwaka Ribka pa ramehlima la Isaka
1 Orgahi-Orha'a Nara'a-napalga Abraham la'a hya'a-hya' to'owa, ne Abraham mana nhamto' wal wia. 2 Noka lera ida ne Abrahama nakot la hopopanni mak khi' ulu-o'ta la re'eni-tniarnu honona niwra: "Samounu de mkienia limmu la a lennu onni (emeka nhi'inde itsi' pa twalokra), 3 totpa mliokar la Orgahi-Orha'a, Uplerlawan maka gahani lyanit marna-nohkeran di, de o' edon mua'ala patke'a Kana'ana mniotni mak adiella letgarni riy id pa mhi'a la a'nu hawni. 4 Mere omlia' meman la a le'tu-ruhunu, me lu'wu-a'nu, totpa mua'ala patke'a id la a'nu Isaka. 5 Noma hopopanni de nakot la: "Matroma, yanhi'pa patke' de nahmena nlernohor a pua mai let di pa nhi'de agodia a'namu di pa uwal lia letmu-ruhunmu mak ha mliergot la?" 6 Mere Abrahama nakot la: "Yana! Yana muodia keke'en de pa muwal lia hande. 7 Uplerlawna mak kodi plolli la lyanti, mak kpolg a lia a'mu romni me lu'wu-a'nu letni, maka Nlokar pa Nala nnio'oni mai a'u emkadi: "Pena Agal noh dilla duratmu-waitmu." Uplerlawan di hota ed maka khopna hopopanni-li'irnu nala' ul lia o'a totpa mua' nana patke'a id la la' hande pa mumehlima la a'nu. 8 Mere la'pa patke' de nahmen nor o' talla de o kwarmu la'a liokarmu mai a'u de nhorwua, hornama yan memmemna muodi a'nu pa mlia' hande." 9 Noka hopopan de nlapar limni la matromni Abrahama lenanni onni na'nama nlokra-nhaut niohora hade. 10 Nhor nioka hopopan de na'ala matromni ontani termida, ne rla'awa pa rodia yohya'a samomuou harahu maka matromni nala. Emkadella nwaran pa nokru Aram-Mesopotamia, la'a Nahora letni. 11 La hande, dewade nhi' pa ontani re rrena la leta to'orni, la'a gera id onni, la'a lera lia'ani, la'pa patke'a re rlergot pa rla rtip gera. 12 Noma hopopan de nsumbaini niwra: "Orgahiya, Uplerlawnu ne! O' ed mak khi' Uplerlawna la matro'mu Abrahama, Mhi' totpena ler di de aliernana a maimia'yu di onni-matni. Mtiutu ralam kalwiedmu la matro'mu Abrahama. 13 La' handi de a'g e tiutrier lia gera matni onni, ne hararar mak kdella let di rlergot pa rma rtip gera. 14 Mhi' pa nla nlol emkadi de, hararar meni mak a'ukot la giwra: "Mpuatir kuku' nana kekanmu pa totpa agemun la", noma nwahla: "Muemun la, ne ontamu re mana agalla remun wali," hade ed maka Mtiutmuata-mkiewra' nana pa rala la hopopanmu Isaka. La'pa emkade de agat niohora de Omtiutg oleka ralam kalwiedmu la matro'mu de." 15-16 La'pa edon nahor mua'ta lirni dewade Ribka nmai de nakwar nana kekanni. Noka Ribka nla ntip ger pa nahar la kekanni, na'nama nafia'at pa nmai owa'ana. Mere Ribka di, Betuela a'nani. Betuel di, Milka nor Nahor a'nani muanke'a, ne Nahor de Abrahama hyalli. Patke' hararar de samounu ne, hararara molanni. 17 Nmai nioka hopopanni plet pa la nwatroma pa nakot la: "Ine, mtiulan pa muala ger mak kden la kekan de oke' pa agemnia." 18 Nwahla: "Muemun la, tuna." Noma pleta-plet pa nalernia kekanni della limni wawannu na'nama nala nemnia. 19 La'pa nala hopopan de nemun pa nhorwua dewade nakot la: "Nhi'pa atip wuali ger la ontamu re remnia totpa honona re tiernu pe'era. 20 Nhor nioka pleta-plet pa nhuria ger mak kdella kekanni de la'a yemun geni, noka nawlari owa'an pa nokru ger de pa ntip gera, ntip lia hopopan de ontani honona. 21 Ne hopopan de namolmuolga pa nlina-nmata patke' de, totpa namkeka nana de Orgahi Nhi'a yala'ani pa na'eni me edonna. 22 La'pa onta re remun pa tiernu rpe'er wa dewade hopopan de na'ala krap muaha ida maka rnairi la'a irannu, de weratni syikal id rehenu, me lel miaha tnialli id de weratni syikal termida, 23 noma natiana: "Ina, he' a'nani o'a? La' ammu romni de geni erla pa amanin ami?" 24 Noka nwahla niwra: "Nara, a'mu de Betuela, Milka nora Nahora a'nani. 25 Wewan kerna harahu etla am die la' pa onta ra'ana me ranin la wawannu. Geni pa mininmi mana erla." 26 Noka hopopan de nwaltiora-nwaltieman me na'uli-nawedia Orgahi-Orha'a, 27 niwra: "Matroma! U'uli-uwedi O'a, mak khi' Uplerlawna la matro'mu Abrahama, O' maka Mua' owa'an la nhol kalwiedwedni la'a matro'mu de, ne mak kodi olek a lia talan mak kokru matro'mu inni-narni amni-hyalli romni di." 28 Nhor nioka hararar de nawlar pia nla nwahaur nohora hopopan della inni romni mniotni. 29-30 Ribka narni ida nwawa Labana. La'pa Laban namkek nana krapu la narni irannu me leli re la'a limni, ne natlin nana narni nwahaur nohora hya' maka hopopan de nakot la, noma Laban nawlari got pa nla nwatroma hopopan de, la'a gera wawannu. La'pa nlernana hopopan de e ntutrier mia'ta la onta-ontani re onni, la'a gera onni, 31 noma niwra: "Mmuai hyalia, o' maka Orgahi Nala ra'ani-pallu, nihya'pa omtiutrier lia tio'ora, awuahi' targ oleka roma tiy o'owa, me geni la onta-ontamu ri." 32 Hopopan de nla'awa Laban romni nayanni. Ralernia onta-ontani re wniowni me hya' maka rodia, ne rala wewan kerna rwa'ana onta-onta rena me rala gera pa hopopan de nora riy mak kor rewre'wa talla re ralla rohma doini lakni kdeheni. 33 Mere la'pa rhoiya yamanna la gaini ralamni, dewade hopopan de niwra: "Pap miy re, a'g edonna ukot ma'ta a yala'u onni, de a'g edon u'un ma'ta." Laban nwahla: "Demade mukota hyalia." 34 Noka niwra: "A' di, de Abrahama hopopanni a'u. 35 Orgahi Nala ra'ani-pallu la matro'mu de pa nre'a-ntaru. Nara'a-napalga de, Nala nhiuri-wnia'ana, leli-maha, ata-wa'ara patke'a rora muanke'a. 36 Ne Sara, matro'mu de hawni, la'pa nhape'ewa na'nama na'a'na nana muanke'a ida. Matro'mu de natemna re'eni-tniarnu re honona la a'nani de limni ralamni. 37 Matro'mu de na' olek la a liokru: "Yana mua'ala patke'a id la a'nu hawni la'a patke'a Kana'ana, maka aghol lia letni di, 38 mere mlia'awa a'mu romni me lu'wu-a'nu pa mua'ala patke'a id pa mumehlima la a'nu." 39 Mere awuahla giwra: "Yanhi'pa patke' de nahmen nor a' tialla pa ammai la handi?" 40 Mere lirni mai a'u die: "Orgahi maka amuor lia gaini ralamni, pena Nhopna hopopanni-lili'irnu pa ror o' talla, ne pena rhi'a yalolmu-yala'amu pa nawulu-nawe'ela, nhi'nande pena omua' nana patke'a id la a'nu hawni la'a lu'wu-a'nu me a'mu romni ralamni. 41 Mere la'pa omlia'awa la lu'wu-a'nu de ne mak kdella a'mu romni rahmena rala patke'a id tiy o'a, de omuaul doinia liokarmu de mai a'u." 42 Pede alia'awa. Ler di na'nama amuai pa tie' tar lia ger di matni, noka asiumbaini giwra: "Orgahi-Orha'a, maka khi' Uplerlawna la matro'mu Abrahama, Mpuayow nohor de Muala wulu-we'el la yalola-yala' mak a'ulohor nan di. 43 Mai handi pa atiutrier lia ger di matni onni. Wuakwak de la nlol emkadi, de hararara ida nlergot pa nma ntip gera, ne a'ukot la giwra: "Mtiulan pa muala ger no' kekanmu de oke' pa agemnu", 44 ne nwahla niwra: "Muemun la, ne pena atip wal ger la onta-ontamu remnia, emkade pa O'a Mtiutga patke'a id pa nla'a matro'mu a'nani hawni." 45 A li'ru la' ralmu edonna nhor mua'ta, dewade Ribka nmai pia nakwar nana kekanni, noma nla ntip gera. Li'ru la: "Mtiulan pa mual pa agemnu." 46 Pleta-plet pa nalernu kekanni della wawayanni, noma lirni: "Muemun la, ne onta-ontamu re mana pena agalla remun wali." Noka agemnu, me onta-onta re mana nalla remun wali. 47 Nhor nioka a'utiana giwra: "He' a'nani o'a?" Wniahlani: "A'mu Betuel, Nahor a'nani, mak Milka na'a'na nana." Noma akenia krapu la irannu me leli re la limni. 48 Nhor nioka aguh idma-riama lia'ar pa u'uli-uwedia Orgahi-Orha'a mak khi' Uplerlawna la matro'mu Abrahama, mak kodi a lia talla plollola pa ga'ala matro'mu hyalli upni pat di pa gala la a'nani. 49 Pede dodo'ondi, la'pa ralam kalwiedmi me wnia'ama-wniahyalmi la matro'mu de pa muala patke' di, de mikot memna mai a'u. Ne la'pa edonan mana mikot memna mai a'u, totpa hota awuaror nohora hya'a maka aghi' dina." 50 Noka Laban nora Betuel rwahla: "Hari honona de nwatiawua Orgahi-Orha'a. Ami edon mak kot nohora plolli-halli. 51 Mumkek la, hya' mak etla gaimu ralamni de, muodia pa mlia'awa, totpa nhi' haw la matrommu a'nani, emolmolan maka Orgahi-Orha'a Nakot targ oleka." 52 La'pa Abrahama hopopanni de natlin nana hare lirni-tunnu, dewade nuh' idma-nrama lia'ar la Orgahi-Orha'a. 53 Nhi'noka hopopan de nalgota leli-maha, me naniairia noma nal hare honona la Ribka. Nal walia limtutu-limho'a mak welli werta la Ribka narni me inni. 54 Nakot momuoga yala'ani onni pa nhorwua dewade, nor talanwalli re ra'ana-remnu, noka ranin la hande wa. Repardoin yawyawra pa ramatgot wa dewade hopopan de niwra: "Miolin doin a lia pa uwal lia matro'mu." 55 Mere Ribka narni me inni riwra: "Mualtarga hararar di pa amora mparin niana lera termid owa'ana, nhor niampena muora mlia'awa." 56 Mere hopopan de nwahla re: "Yana mineti a'u, yoma Orgahi Nhi' oleka yalo'lu-yala'u pa nawulu-nawe'ela. Miolli a lia, totpa a'uwal lia matro'mu." 57 Ribka narni me inni riwra: "Samounu de tpolu pleinia hararar de pa tatian nohora ralma-riorni." 58 Noka rpol Ribka pa rakot la: "Ompuayow pa muora riy di talan pa mlia'awa?" Nwahla niwra: "Wuayowa." 59 Noma rollia Ribka nora in mak katiak e'a, me Abrahama hopopanni de nora talanwalli rpa rla'awa. 60 Noma rwaka pa Orgahi-Orha'a Nara'a-napalga Ribka. Lirni rla: "Nara, ampakwak de ompueha-mliawan pa riwnu-riwnu, ne mpakwak de duratmu-waitmu rodi plolli la arwalli re letni-ruhunni." 61 Noma Ribka nora hopopanni-lili'irnu patke'a re rwahi'a-rwayod wia, noka rha'at la ontani re pa rlernohora hopopan de. Emkadella hopopan de nodia Ribka pa rawal wia. 62 Lera ida ne Isaka nmai olek pa ntawua gera nwawa Lahai-Roi. Yoma ndella Negep lowanni. 63 Lera ida de lera nhi'pa nheria wa noma Isaka nlergot pa nalala'a la wewna wawannu pa nwarora-nwalai. Nwatul gaini pa namkek de onta-onta e rmai nieka. 64 Ribka mana nwatul gaini pa la'pa namkek nana Isak wa, dewade nerun la onta wawannu. 65 Nakot la hopopan de: "He' ed muanke' mak kala'a la wewna wawannu pa kharan rer it dina?" Hopopan de nwahla niwra: "Matro'mu eda de." Noka Ribka nahew gaini (emolmolan neka patke'a mak kekeneka rmehlima nhi'inde rhi'a). 66 Nhor nioka hopopan de nwahaur nohora honona maka nhi' nana oleka la Isaka. 67 Noka Isaka nodia Ribka pa rla'awa inni hoiwialli, ne nora rmehlima. Isaka ralamni nal memna, ne ralamni mana namtierun wa, nhoratdoini inni matmiatni.
Abrahama duratni-waitni mak ktaw Ketura
1 Lera ida ne Abrahama nmehlima owa'ana patke'a ida de nanni Ketura. 2 Patke' de a'na yanulu de Simran, mak klernohora Simran de, Yoksan, mak klernohora Yoksan, Medan, mak klernohora Medan de, Midian, mak klernohora Midian, Isybak, mak klernohora Isybak de, Suah. Gari hoho'a hade. 3 Noka Ketura a'nani Yoksana nlawlawan lol pa na'a'na nana a'na yanulu rala pa nwawa Syeba, mak klernohora Syeba de, Dedan. Dedan di duratni-waitni de makden Asyura, makden Letusyi, ne makden Leuma. 4 Ketura a'nani nwawa Midian de, a'nani yanulu de Efa, mak klernohora Efa, de Efer, mak klernohora Efer, Henok, mak klernohora Henok, Abida, mak klernohora Abida, Elda'a. Gari hoho'a hade. Hare honona rde Abrahama nora Ketura duratni-waitni. 5 Mere Abrahama nala re'eni-tniarnu honona rla Isaka. 6 Mere Abrahama nmormior mia'ta de nal to'a limtutnu-limho'oni la Ketura a'nani me a'nani maka Abraham nlernana la hawa liahunu, ne nhopna rhoitio'or la a'nani Isaka, ne rwaran pa rla'awa la' lowan la walli tipru.
Abrahama nmat pia rtamnia
7 Abrahama mormiorni nla' nana anni rahu ida terampwo'itu wehrani wolima. 8 Noka nmat wia. Nmat lia, mto'oni-pe'eni, la'a mormiorni de ralamni penpuenu-tetema, noma rawok wutga la upni-tgarni. 9 Noka a'nani re, Ismaila nora Isaka rkenia la liena Makpela, la'a Sohar a'nani Efron nhyi'ini, nhyi' mak kdella Mamre walli tipru. 10 Nhyi' di, ed maka Abrahama nawel niana la Efron, makden Heta. La' hande de rtamin targa Abrahama nora hawni Sar la. 11 La'pa Abrahama nmat wia dewade Uplerlawna Nara'a-napalga Isaka, ne Isaka nhol lia gera mak kwawa Ber Lahai-Roi.
Ismail duratni-waitni
12 Hadi de Ismaila, Abrahama a'nani, mak Hagara pat Mesira, Sara atni na'a'na nan de, duratni-waitni. 13 Hari de Ismaila a'nani nanni. Ismaila a'nani yanulu de, Nebayot, mak klernohora Nebayot, de Kedara, mak klernohora Kedara, Adbeel, mak klernohora Adbeel de, Mibsama, 14 mak klernohora Mibsama, Misyma, mak klernohora Misyma, Duma, mak klernohora Duma, Masa, 15 mak klernohora Masa, de Hadada, mak klernohora Hadada, Tema, mak klernohora Tema, Yetura, mak klernohora Yetura, Nafisyi, mak klernohora Nafisyi, Kedma. Gari hoho'a hade. 16 Hare de rlawan pa rwal lia ray termida wehrani woru. Rima-rima rora duratni-waitni, letni-ruhunni, likatni-larni. 17 Ismaila mormiorni de anni rahu ida terampwotelu wehrani wo'itu. Nhor nioka nmat wia. Nmat wia noka rawok wutga la upni-tgarni. 18 Ismaila duratni-waitni ri rhol lia nohanna-taniarta nden nek la leta Hawila pa nodi liarni la Syura, mak kdella Mesir walli tipru pa nokru Asyur lowanni. Mere nhi'inde rora inni-amni amni-hyalli rawenna.
Esau nor Yakopa
19 Hadi de Abrahama a'nani Isaka duratni-waitni tuini-wedni. 20 Isaka aninni terampwogata, lerni la maka nor Ribka rmehlima. Ribka di narni nwawa Labana, ne amni nwawa Betuel. Betuel di, makdena Arama nwatiawua Padan Aram. 21 Isaka nsumbain la Orgahi, yoma hawni de nakleha a'na. Orgahi Nreiniana polpuollu-wakwakni, nhi'nande hawni Ribka na'apun wa. 22 Mere apannu mniotni rwayotli pede niwra: "A su'ku tia'ala pa a apnu ralamni emkadi. Nihya'pa emkadina?" Noka nwaka rorora-laliai la Orgahi niwra: "Matromlawnu ne! Nihya' pa apnu mniotni rwayotli?" 23 Orgahi lirni la: "Papay worga erla apanmu de ralamni, ne hota gari nadurit pa narehia yanulu hairni, ne a'na yanulu hota natlin la a'na gari." 24 La'pa lerni ntu'tu pa nmor wia, de ntor doinia a'nani de radio'a. 25 Rtor doinia yanulu de, wullu mermera emeka rala rain wulwulu la inonni tetema, nhi'nande rala pa nwawa Esau (nnia'eratni de, wulwulga). 26 Noka garni nlernohora, limni nte'la rer lia yanulu tikalli, nhi'nande rweta la Yakopa (nnia'eratni de, tikalli. Ha nnia'eratni dom de, pudi-akla.) La'a ler maka ha ra'a'na rde Isak umarnu anni terampwonema. 27 Noma keke'enku'a rora rlawlawan lol wa. Yanulu nhi'a mak khiti ahu-kler ahla, riy maka heparnu de ndella wo'ora-kawru, mere gari de riy id maka muli-mtie'ela, ne heparnu de ndella hoiwiali nayanni. 28 Isaka ralamni nala yanulu, yoma heparnu de na'ana hiti ahu-lier ahla eni, mere Ribka de ralamni nala gari. 29 Lera ida ne gari npipara wora mermera, noka yanulu nwatiawu wo'ora pa nmai die, de naplar memna. 30 Yanulu nakot la gari: "Ple'etu, muala pipar mermermu de oke' pa a'u'una, yoma a'uplar memna." Emkade pede nanni de rweta la Edom (nnia'eratni de, mermera.) 31 Mere gari nakot la niwra: "Ompuayow de, it amni nmat wia de, omuala yodmu mai a'u." 32 Yanulu niwra: "Yowa, pena agala. Yoma a'uplar memna, ne hota amuat die, a yo'du re rodia hya' unut mai a'u." 33 Gari niwra: "Mliokra plein mai a'u puena!" Noka yanulu nlokar la Orgahi totpa gari na'ala yodni. 34 Noka gari nala roti me wora della yanulu, nhor nioka na'ana-nemun pa nhorwua dewade naprir pia nla'awa. Emkadella, yanulu edon nwarei-nwadan nohora yodni de.
Isaka ndella makden Filistin re genni
1 Noma rehka-lara nwewar la gen de. Mere hadi de rehka-lara Abraham lerni atia'a. Rehka-lar di nhi'nande Isaka nla'awa Gerar makden Filistin rayni geni, la'a Abimelek Filistin rayni. 2 Noma Orgahi Ntutga rupni la, pa nakot la: "Isaka! Yana mlia'awa Mesira, mere mhuol lia gen meni maka pena A'ukota tiy o'a. 3 Mdiella gen di emeka do'ona-dakna, pena Ago'ru talla, ne A'ura'a-upa'lu, yoma Agala gen di tiy o'a me duratmu-waitmu, ne hota A'ugeni a liokru maka Aget tiarga la ammu Abrahama. 4 Pena Aghi'a duratmu-waitmu pa emolmolla wtion mak kdena lyanti, totpa Agala noha-rai di tetema la duratmu-waitmu, ne onnila duratmu-waitmu, nhi'nande rimormior nohkeran di rlernana ra'a-palu. 5 Hari honona hota ntutu-nte'ewa onnila Abrahama natlina-natailla A li'ru, ne nlernohora nhiopnu-li'iru, nnie'eru-tniatru me deulu-tatru tetema." 6 Pede Isaka nhol lia Gerar. 7 Noka makden hande ramkek de hawni samoga nhi'nande ratian nohora la Isaka, noma nakot nohora hawni niwra hade de e narni, yoma namta'ata nakota niwra hade de e hawni, yoma wniarorni: "Yanhi'pa let di mniotni rwenan nan a'u, onnila Ribka tototni-rerieini, yoma patke' de irnu hlioi-mat lawruru." 8 Ndella hande pa lardoinia wenu-wolla, me'eta-anni dom la, noma lera ida ne Filistin rayni Abimeleka namkek lola folla de Isak nora hawni Ribka rwamuri-rwale'era. 9 Noka Abimelek npolga Isaka pa nakot la: "Plollolli de hade de hapmu hade, mere mukot oleka miwra: Hade de o narmu." Isaka nwahla niwra: "A'ukot emkade yoma wniaro'ru: Yanhi'pa natota-nariei pia nhi'nande rwen a'u." 10 Mere Abimelek niwra: "Hya'a nhiol miaka omhi' nan oleka mai am dina? Emkameni la'pa riy id la makden gen di nora hapmu ranin wutu, nhi'nande pena ha natota-nariei pia omuodi am lia do'a-hala ralamni." 11 Noma Abimelek nala titni-kaini la letni mniotni niwra: "He' maka nhi' yatyat la riy di nor hawni de hota rwenan toto'a." 12 Noka Isaka nawuli-natniamin la lowna-ahla no' hande. La'a anin de neka, pa nlernana wullu-we'elli rahu id ralamni, yoma Orgahi Nala ra'ani-pallu la. 13 Pare'a-patniarga, ne la'pa re'eni-tniarnu nlawlawan lol to'owa pa ler la pripanni-fa'anni. 14 Ntarga nhiuri-wnia'ana, me hopopanni-lili'irnu liawanni, nreiniande makdena Filistin re ra'andoin gahani rla. 15 Hade pede gera honona re maka amni hopopanni-lili'irnu rah niana la amni Abrahama lerni, makden Filistin re rnakduran momuou ral tani. 16 Noma Abimelek nakot la Isaka: "Mpuaran pa mlia'awa meni-meni pa mtio'or doini am lia, yoma omurehi olek la re'emu-tniarmu." 17 Pede Isaka nwaran la hande wa pa nhor nioka nkeni krahanni la Gerar mtatanni, noka nhol lia hande wa. 18 Nhi'noka Isaka nahi owa'ana ger maka rah niana la amni Abrahama lerni maka Filistina mniotni rnakdurn oleka la lera Abrahama nmat wia de, rnairi owa'ana gera re nanni, rlernohora nan maka amni nala re. 19 La'pa Isaka hopopanni-lili'irnu rahai lia lowan de, de rlernana gera matni nopli-nopli. 20 Noma Gerar mniotni mak kodi pipi-duma re rora Isaka limni-rorni mak kod pipi-duma re rawo'ora, riwra: "Ger di de a han mamni." Noka Isaka nweta ger della Esek (nnia'eratni de, rawo'or nohora), yoma hare ror e rawo'or la hande. 21 Nhi'noka rahi owa'ana gera id owa'ana, mere rahankeran pa rawo'or wali. Noma Isaka nweta ger della Sitna (nnia'eratni de, rahankeran reri). 22 Rwaran la hande noka rahi ger id owa'ana, mere la'a ger di wawannu de edonna rawo'ora. Nala ger di pa nwawa Rehobot (nnia'eratni de, geni hgal liawna), ne niwra: "Dodo'ondi Orgahi Nal oleka geni ghal liawan di mai it pa totpa ta'upa-ta'a'na la gen di." 23 Ndella hande pa nla'awa Bersyeba. 24 Nmel wa noma Orgahi Ntutga rupni la Isaka, me niwra: "Isaka! A' di de Uplerlawna la ammu Abrahama. Yan mumta'ata, yoma Agor o' talla. Pena Agala ra'u-pa'lu tio'a, upe'era-ulawna duratmu-waitmu onnila Abrahama mak klernohora A'u." 25 Nhor nioka Isaka nariria katri'ana id la hande, ne na'uli-nawedia Uplerlawna-Mempulwatnu, nkeni krahanni la hande, ne hopopanni-lili'irnu re mana rahi ger la hande. 26 Lera ida ne Abimeleka nwatiawua Gerar pa nma nwatroma, nor rewre'wa kniarwialli Ahusat (mak kano'a-ka'atg e'a), me nor walia mak kodi keki-rautu o'tani Pikhol. 27 Mere Isaka nakot la re: "Nihya'pa mia mpiatrom a'u? La ler mak itto'or la de, ralammi ramehra mai a'u pa mhiopan pa aliergot la genmi de." 28 Rwahla riwra: "Ameh'a mat niohora de Orgahi Nor o' talla pede amiwra: Samounu de itla' wutu liokra ida pa itsi' nnio'a ida totpa it idma nhi' samomuou ida. 29 Lerni pa mdiella Gerar de ami edon mhi' yatyatni la miy mere amhi' pa mdiella mtiertierannu pede mpak pa miy mhi' emkade wali mai ami. Yoma amatga de Uplerlawna Nal oleka ra'ani-pallu tiy o'a." 30 Nhor nioka Isaka nhi'a ya'anlawna-yemunlawna re, noma ra'ana me remun wa. 31 Repardoin yawyawar ma'ta de rhi'a liokar wutu-nhiaut wutu. Nhor nioka Isaka nolin doinia rpa rla'awa, ne Isak mana nwarin liola kalwiedni-paitiotni mtiertierannu. 32 Ler de, de Isaka hopopanni-lili'irnu rma rwe'er nohora ger maka ha rahi oleka wa, pa rakot la riwra: "Amlernan olek gera wa." 33 Noma rweta ger della Syeba (nnia'eratni de, liokra). Nhi'nande let de nanni Bersyeba, nodia pa dodo'ondi. 34 La'pa Esau umarnu anni terampwogat wa dewade na'ala Yudita, Beeri makden Heta a'nani, me Basmata, Elon makden Heta a'nani pa nhi'a la hawni rora. 35 Patke'a rora rodia ihru mehra-ralam pahna la Isak nora Ribka.
Isaka nwaka Uplerlawna pa Nara'a-napalga Yakopa emeka a'na yanulu
1 La'pa Isaka nhamto'owa pa matni npon wa, dewade npolga a'nani yanulu Esau pa nakot la: "Ama!" Esau nwahla niwra: "Ee, Papa!" 2 Isaka naltier lia niwra: "Omuat niohora de aghamto' olekwa, nhi'nande hota a'uplin niohora a matmia'tu onni la' ler meni. 3 Hade pede la' ler di de, mua'ala ra'pa, la muhak nana porni-dawarni la'a wewna wawannu pa 4 mpuatunu-mpuatah'a la mikmikarni-lamliamanni emeka a ralmu nwakwaka totpena la'pa a'g edonna muat mia'ta de agala ra'a-pal tiy o'a." 5 La'pa Isaka naltier lia a'nani Esau, de Ribka natlin reria. Ne la'pa Esau nla'awa wo'or pa nhokra porni-dawarni ida totpa nodia la amni, de 6 Ribka npolga a'nani: "Yakopa mmuai! A'utlin nan ammu e na'ohma hyalmu Esau ha nlolola. 7 E na'ohma pa la nahaka pip piora-waw diawra mai pia rwatunu-rwatah'a pa ammu na'ana totpena nala ra'a-palu, re'a-tniaru, geni-tiena. 8 Pede dodo'ondi de, mutlina-mutailla li'ru mak aghopan targa tiy o'a. 9 Mlia'awa it genni mak it pipni-dumni rawok tar lia, ne mua'ala pipi a'na samomuou woru, pa atiunu-niahaga la mikmikarni-lamliamanni, emeka ha ralamni nwakwaka. 10 Muodia la ammu pa na'ana, totpena la'pa edonna nmat mia'ta de nara'a-napa'lu." 11 Noka gari nakot la inni Ribka: "Mere ka'ku, de riy wulwulga, mere a' di de ulti namdiddidni. 12 Yanhi'pa la'pa nteman nan a'u nwarora de aghi' pudi-akla, la'pa emkade de a'g edonna liernana ra'a-palu, mere liernana hoptutu-hoplera." 13 Mere inni nakot la niwra: "A'g ed mak kakwara hoptutu-hopler de ama. Mutlina-mutailla a li'ru, mlia la'pa mua'ala pipi a'na maroro'a re pa muodi muai pia awuahi'a-wuayodia pa mikmikri-lamliamni." 14 Noka gari nlernohora. 15 Nhor nioka Ribka na'ala Esau naniayarni mak samomuou muemna, maka namoin taru re la roma nayanni, noka nhopna Yakopa nnairia. 16 Ne pipi a'na de ulatni, de na'ala pa newan wutga la limni rora me tiernu la' geni mak kamdiddidin de. 17 Noka nala yamanna mikmikri-lamliamni me rot miaka ha nwatah' oleka de pa nala Yakopa. 18 Emkadella gari nla'awa amni genni, noka nakot la niwra: "Ama!" Amni nwahla niwra: "Ee! He' o' e?" 19 Nwahla: "Esau a'u. Awuahi'a-wuayodi oleka maka ompuakwaka. Mumat pa ma mu'una totpena nhor die mura'a-mupalg a'u." 20 Noka Isaka nakot la Yakopa: "To'a, o fiekatmu?" Nwahla niwra: "Yoma Orgahi-Orha'a, Uplerlawanmu de, Nhi' a' pua aliernana awuahakaka." 21 Noka Isaka nakot la: "Mua mriehgoru ama, totpena atieman la inonmu, toto' pa o' di de Esau me edonna." 22 Noka gari nrehgoru amni, noma amni nteman la inonni, noma niwra: "La'a lirmu di Yakopa lirni, mere limmu di Esau limni." 23 Nhi'nande Isaka edonna nat niohora, yoma limni wulwulga emolmolla a'nani Esau limni. Mere Isaka nwahi' pa nara'a-napalga. 24 Mere natian ma'ta: "Plola pa o' di de a'nu Esau o'a?" Nwahla niwra: "Yowa!" 25 Noka Isak nakot la niwra: "Muala yamanan de pa rehgoru, totpa a'u'una ha anna hiti ahu-lier ahla enmu, totpena agala ra'a-pal tiy o'a." Noma nala yamanna rpa rehgorgoru amni, noka na'ana, nod walia anggur pa nemun walia. 26 Noka Isak nakot la niwra: "Mua mriehgorgoru, pa mkinni a' wua ama." 27 Noka Yakopa nma nrehgorgoru na'nama nkinnia amni. La'pa Isaka na'irun nana naniayarni huwnu, dewade nwaka Uplerlawna pa Nara'a-napalga Yakop niwra: "Plollola la a'nu huwnu emolmolla wo'ora-kawru maka Orgahi Nara'a-napalu huwnu. 28 Orgahi-Orha'a Uplerlawna-Mempulwatnu, awuaka pa ler di lyanit marna ntowria otanni, nohkerna-rai miarna nmoria wullu-we'elli pripanni-fa'anni. 29 Awuak pa hairi-hairi pena ratlina-ratailla a'nu, ne mak kdella noha-rai re hota rwaltior la nayanni. Nla'a upa-matrom la amni-hyalli, ne inni a'nani re hota ratlina-ratailla e'a, he' ed mak kala hoptutu-hopler la' e' de, de O'a Mhuoptutu-mhuoplera, ne he' mak kala ra'a-pal la' e' de, de O'a hota Mura'a-mupalga." 30 La'pa Isaka nala ra'a-palu pa nhorwua, ne na'nama a'nani gari nlergot pa naltarga amni, dewade Esau nmai pia nodia hiti ahu-lier ahla enni. 31 E' mana npipar walia ha'anna hiti ahu-lier ahla enni maka mikmikarni-lamliamanni, noka nodia la amni. Nakot la amni: "Ama, mumat pa mu'una ha'anna hiti ahu-lier ahla enni, totpa mura'a-mupalg a'u." 32 Mere amni niwra: "He' ed o' dina de?" Nwahla niwra: "A' di de a'namu yanulu Esau." 33 Dewade amni nheduma, noka nakot la niwra: "He' ed mak khokar nana porni-dawarni de pa nodi oleka mai a'u wua? La'pa edonna mmuai mia'ta de a'un doini oleka, ne a'ura'a-upalg oleka wa, ne riy maka a'ura'a-upalga oleka de, hade ed maka klernana ra'a-palu." 34 La'pa Esau natlin nana amni lirni di, dewade napolu-natnian mieman la ralam mehrani ralamni, noka nakot la amni: "Ama, mura'a-mupal wali a'u mue!" 35 Amni nwahla: "Garmu nma nodi oleka pudi-akla, pa nlernan oleka ra'amu-palmu de." 36 Mere Esau nwahla niwra: "Inee! Nanni de naplol pa rweta la Yakopa (nnia'eratni de, pudi-akla), yoma nalahar nana olek a'u re'eni woru. A yo'du nte'la nan oleka wa, ne dodo'ondi, de nte'la nan owa'ana yara'u-yapa'lu wali. Ama, mukleha yara'a-yapalu dom to' mai a'u?" 37 Noka amni nakot la: "Plollolli de arian oleka garmu pa nla'a matrom la o wawanmu, ne amni hyalli-inni narni honona re agala pa rla'a ata-wa'ar la, ne agal oleka pa hota nlernana metma nora anggur turnu narehi-nalawna. Noma hota hya' ma'ta etla pa agala tiy o'a a'nu ne?" 38 Nwahla: "Toto' pa ra'a-pal die ida nmemeh'a taru? Muala ra'a-pal mai a'u ama!" Dewade Esau lirni naprahka la kniakru. 39 Noka amni nakot la niwra: "Plollolli de nhiol genmu hota olieta-patoga la nohanna-taniarat mak kawuli-kawe'el la noh di wawannu, ne geni miaka lyanit marna ntowria otanni mana olieta-patoga. 40 Hota muor lia wehlamu wawannu pa mu'ara, ne omlia' ata-wa'ar la garmu. Mere hota omurur matmiat pia muaul doinia kwar dilla wawayanmu."
Yakopa nawlar pia nla'awa Mesopotamia
41 Esau natatahana ralam mehrani la garni Yakopa, onnila ra'a-pal muaka amni nal oleka la, noma nakot la ralamni: "Lera-mela yaluli-yahon nohora a'mu matmiatni edon nalo'on wa. Ler yaluli-yahon nohora nhor niampena awuenna ga'ru." 42 La'pa rwahaur nohora Esau lirni la inni Ribka, dewade nhopan pa rpolga a'nani gari, na'nama nakot la: "Hyalmu yanulu nwaror pa nwen o'a pa na natepra hankeranni (ralam mehrani). 43 Pede dodo'ondi, mutlina-mutailla a li'ru ama, mpuahi'a-mpuayod pia muwlar pia mlia'awa yeimu Laban, la' Harana, 44 ne muora mhiol wut lia hande pa me'eta-anni naya'ida-nayaworu, la'pa hyalmu yanulu ahankeranni me 45 ralmha'arni namdiar wua, ne nhoratdoini-nehla doini hya' maka omhi' nana nhi'nanpena aghopna riy rtiy ra'lu la hande. Inee! Yanpa idma nwunu-nwen id la a ga'yu ralamni." 46 Hade pede Ribka nakot la Isaka: "A ralmu edon nala patke'a Heta re. La'pa Yakopa na' nana patke' Heta id mak kden gen di pa nora rmehlima, de samounu di amuat niek wa!"
1 Ribka lirni nrei pia Isaka npolga a'nani gari pa nano'a niwra: "Ama, memieheni me, yana mua'ala patke'a Kana'ana pa mhi'a la hapmu. 2 Mere mlia'awa Padan Aram la'a upmu Betuela romni, ne mua'ala yeimu Laban a'nani id la hande pa muora mmiehlima." 3 Nano'a pa nhor nia'nama nara'a-napalga pa niwra: "Awuakwak de Uplerlawna mak kodi plolli-ktaryatnu pena Nara'a-napa'lu, Nhi'u pa mu'upa-mu'a'na, mpueha-mliawna, totpa rawal lia hairi ida prirni. 4 Awuakwak de Uplerlawna Nala Abrahama ra'ani-pallu tiy omuora duratmu-waitmu, nhi'nande mliernana gen di pa gahamu, gen miaka miy mhiol lia emeka do'ona-dakna maka Uplerlawna Nal oleka la Abrahama." 5 Emkadella pa Isaka nolin doinia Yakopa, noka Yakopa nwaran pa nla'awa Padan Aram, nla'a yeini Laban romni. Laban di, Betuel makden Aram de a'nani. Laban narni de Ribka. Ribka a'nani de, Esau nor Yakopa. 6-7 La'pa Esau nat niohora amni nano'a garni pa yana na'ala pat Kana'ana pa nhi'a la hawni, noma amni nara'a-napalga garni, nhor nia'nama garni nla'awa Padan Arama totpa na'ala patke'a id la hande pa nhi'a la hawni, 8 nhi'nande Esau natga de amni ralamni edon nala patke'a Kana'ana re. 9 Hade pede nla'awa yeini Ismail, noka na'ala Ismail a'nani Mahalat pa nhi'a la hawni, na'itar wutu hawni rora. Ismail di de Abrahama a'nani, noka Ismaila na'a'na nana Nebayot nora garni Mahalat.
Yakopa nmi'a la Betel
10 Noma emkade pa Yakopa nwaran la Bersyeba pa nla'awa Haran. 11 La la'pa ntut tiar lia geni id la, yoma lera mana la nmel wa. Na'ala watu id la hande pa nhi'a la klunu, noka nanina la gen die. 12 Noma nmi'a. La mi'ini ralamni de, la'a noha wawannu de retna ida ntutrieri, wuwannu nla'gennia Ilyamou-Watyatoha, ne namkek nana Orgahi hopopanni-lili'irnu rernu-rha'at la retan de. 13 Orgahi Ntutrier lia retan de walli heyanna na'nama Nakot la: "Yakopa! A' di de Orgahi-Orha'a, mak kla' Uplerlawna la upmu-tgarmu Abrahama me la'a ammu Isaka. Ne gen miaka ha munin la di, de hota Agala tiy o'a, muora duratmu-waitmu. 14 Duratmu-waitmu emolmolla en liu'wu-tan miakmu, ne hota re'era-rhakra la tipru, ra'i, warta me tranna, ne onnila omuora duratmu-waitmu pa nohkerkeran di mniotni rlernana ra'a-palu. 15 Plollolli de Agor o' talla, mlia' lol meni-meni de, Atiokreri-gheprie'ru, ne hota Ago'du pa muwal lia noh di, yoma A'g edon galtar o'a, mere Aghi'a hya'a-hya' maka A'uno'targa tiy o'a." 16-17 La'pa Yakopa namat la yaninni, namta'at pa niwra: "Plollolli de Orgahi etla gen di, mere a'uplin niohora pa unin la. Gen di narehi-nalawan memna pa toto' meman pa Uplerlawna romni, Ilyamou-Watyatoha puohrani." 18 Repardoin yawyawar ma'ta de Yakopa na'ala wat muaka ha naklun die, nariria pa nhi'a la lairiri, noka nhuria wu'ru la watu wawannu. 19 Yakopa nweta gen diella Betel (nnia'eratni de, Uplerlawna romni). Mere Yakopa edon nanin ma'ta la hande de, de let mak rehgorgoru gen die rweta pa nwawa Lus. 20 Noka Yakopa nlokra: "Orgahi-Orha'a Uplerlawna-Mempulwatnu. La'pa O' pena Mtiok reri-mhiep rier a lia talan mak aliolola, Muala rot pia u'una, ne naniair pa aniairia, 21 la'pa agodia kalwieda-paitiota uwal lia a'mu romni, de O' pena a'u'uli-uwedi O nanmu. 22 Ne wat muaka upriria pa nla'a lairir di de pena nla'a geni miaka ra'uli-rawedi O' nanmu. La'a hare honona maka Omuala mai a'u rde agala nhiakra id la nhiakra termid ralamni (sepersepuluh) tiy O'a."
Yakopa ndella Laban romni
1 Nhi'noka Yakopa nwaran la hande pa nokru let Bani tipru. 2 Lera ida ne namkek nana gera id la wo'or letgarni, ne duma wokni wotelu ranin la onni, yoma la'a ger de wawannu de riy ralla dumni remnu. Ger de, tniutawnu de wat liawna ida. 3 Ne la'pa duma re wokni rheria la hande, demade mak kodi re rwaklol dioini wat diella ger de nurnu, demade ralla duma re remnu, nhor diemade rkeni owa'an wat diella ger de nurnu. 4 Noka Yakopa la' pa natiana la mak kodi re: "Ama-hyal miy re, miy mpatiawu meni?" Rwahla riwra: "Ampatiawua Haran." 5 Natian owa'an la re: "Miy miat niohora Nahor upni Labana?" Rwahla riwra: "Yowa, amatga." 6 Nhi'noka nakot la re: "Enkalwiedweda?" Rwahla riwra: "Nkalwiedweda. Mere mumkek la, Labana a'nani patke'a Rahela nmai niek di, nodia dumni." 7 Noka Yakop niwra: "Hyal miy re, ler lawan ma'ta pa edon rawok ma'ta nhiuri-wnia'ana. Mialla dummu re remun pleini, nhor diemade mlia miodi owa'ana re. 8 Mere rwahla riwra: "La'pa nhiuri-wnia'ana re wokni-wokni edon rawok momuou ma'ta de, ami edonna mhi' nan hade. Nanpena rwaklol dioini wat diella gera nurnu, demade amalla dum mamni re remnu. 9 La'pa nor ma'ta re raltiertier rier de, Rahela nmai wia pia nodia amni dumni, yoma e' mak kodia re. 10 La'pa Yakopa namkek nana Rahela, yeini Laban a'nani, nor wut lia dumni, dewade nma nwakriania, noma nwaklol dioini watu la gera nurnu, na'nama nalla Rahela dumni re remnu. 11 Dewade Yakopa nkinnia narni Rahela pa nkakur wah'a lirni. 12 Noka Yakopa nwahaur nohor la Rahela, e' de de Rahela amni narni Ribka, a'nani. Noma Rahela nawlar pia nla nwahaur la amni. 13 La'pa Laban natlin nana Yakopa, narni a'nani, dewade nawlar pia nla nwatroma, nrehgorga pa nkolla na'nama nkinnia, nhor nioka nodia pa nla'awa romni nayanni. Noma Yakopa nwahaur nohora inni-amni mormiorni-dardiarni la Labana. 14 Laban nakot la: "Ame, plollolli de o' di de ihyida-rar id wut mai a'u." Noma Yakopa nden wut lia pa nla' nana wolla id tututu. 15 Nhor nioka Laban nakot la Yakopa: "Hya' pa o' di de na'ru a'nani nekane hota omkiari momuou mai a'u. Mukot mai a'u hya' maka agala la prehenmu." 16 Laban a'nani patke'a woru. Yanulu nanni Lea, ne gari nanni Rahela. 17 Lea matni edonna samoga, mere Rahel de inonni, gaini honona samounu di! 18 Hade pede Yakopa ralamni nala Rahela, reiniande niwra: "Ame, akar tiy o' pa anni wo'itu totpa aliernana Rahela, a'namu gar die pa aghi'a la ha'wu. 19 Laban nwahla: "Ame, wakwakmu di, a'g edon wuayotlia. Samounu di, omuora mmiehlima totpa yanpa nor riy doma rmehlima. Mdien wut mai a lia gen di." 20 Pede Yakopa nkar niana anni wo'itu totpa nlernana Rahela, pa nhi' la hawni, mere anin mandiditu re nwarora de emekto'a lera wo'ira rmeh'a, onnila ralamni nal toto'a Rahela. 21 Nhor nioka Yakopa nakot la Labana: "Ame, awuak pa muala a pa'tu de mai a'u, totpa agora manin wutu yoma lera nnielu ntu'tu wa." 22 Noka Laban npolg awoka mak kden hande honona rpa rhi'a ya'anlawna-yemunlawna. 23 Mere la'pa nmella, dewade na'ala a'nani Lea pa nla nala la Yakopa. Noma Yakopa nor Lea ranin wutu. 24 Laban mana nal wali atni patke'a Silpa la'a a'nani Lea pa nhi'a la atni. 25 Mere repardoin de namkek de maka nora ranin wutu de, Lea. Noka Yakopa la nakot la Laban: "Hya' maka omhi'a mai a'u dina?! Akar tiy o' de totpa aliernana Rahela. Nihya'pa omuakal nan a'u?!" 26 Laban nwahla: "Ame, riy edonna rhi' tar tiarga nhiol mak emkarella a gen miamni di, de ramehlima gari nala' ulu yanulu. 27 Mupenu pleinia lera wo'it lia muora a'nu di mehlimmi, nhor diemade a'nu handina mana agala tiy o' pa emeka prehenmu nhierannu, hornama mkiari mai a'u pua anni wo'itg owa'ana." 28 Noma Yakopa nhi' emolmoll emkade, de napenga lera mandiditnu nora Lea mehlimni, nhor nioka Laban nal owa'an a'nani Rahel pa nhi'a la hawni. 29 Laban mana nal wali Bilha, atni patke'a la a'nani Rahela, totpa nhi'a la atni. 30 Noka Yakopa nor Rahel ranin wut wali. Mere rereh wiali ralamni nal memna Rahela, ematia'a Lea. Emkade nekpa nkari owa'an la Laban anni wo'itu.
Yakopa a'nani
31 La'pa Orgahi Namkek de Yakopa ralamni edon nala Lea, dewade Nhi'a Lea pa na'a'na, mere Rahel de nakleh a'na. 32 Lea na'apnu pa nmor niana muanke'a ida, nala nanni pa nwawa Rubena (nnia'eratni de, mumkeka, a'nu muanke'a hadi), yoma niwra: "Orgahi Ntolwiah'a-ntakarwah'a a meh'ru mai a'u. Plollolli la' ler di ha'wu hota ralamni nala a'u." 33 Na'apun owa'ana pa nmor niana muanke'a ida, noka niwra: "Orgahi Natlin nana de, a ha'wu di, ralamni edon nal a'u, pede Nal owa'ana keke'en di mai a'u." Noma nala keke'en de pa nwawa Simeona (nnia'eratni de, mak katlin nana). 34 Na'apun owa'ana pa nmor niana muanke'a ida, noka niwra: "Ralamni di, de ha'wu ralamni hota naknioholia mai a'u, yoma a'u'a'na nana muanke'a wotel lia." Nhi'nande nala keke'en de pa nwawa Lewi (nnia'eratni de, ralamni nakniohu). 35 Na'apun owa'ana pa nmor niana muanke'a ida noma niwra: "Ralamni di de a'u'uli-uwedia Orgahi-Orha'a," nhi'nande nala keke'en de pa nwawa Yehuda (nnia'eratni de, ra'uli-rawedia). Nhorwua dewade edon na'apun wa.
1 Rahela nwarora edon nlernana a'na, noka ralamni namehra doin la kakni, nhi'nande Rahela nakot la hawni Yakopa niwra: "Papa, mual a'na mai a'u. Er edonande amuati." 2 Noka Yakopa ahankeranni-ralmha'arni la'a Rahela, noka natiana: "A' di de Uplerlawna wniaunu a'u, pa atieri-tia'wu pa edon mu'a'na?!" 3 Rahela niwra: "La'pa emkade de, mua'ala Bilha di, a'tu patke'a hadi, omuora minin wutu totpa na'a'na totpena onnila Bilha aliernana durti-waiti." 4 Noma nala atni della Yakopa pa nhi'a la hawa liahunu. Noka Yakopa nora at de ranin wutu. 5 At de na'apnu pa na'a'na nana muanke'a id la Yakopa. 6 Rahela nakota la: "Uplerlawna Ntutg oleka de, a'g ed mak kaplola, yoma Natlina-nataili oleka a polpuo'lu-wakwa'ku, ne Nala muanke'a id mai a'u." Hade pede nala keke'en de pa nwawa Dan (nnia'eratni de, nakota mak kaplola). 7 Rahela atni pat di, Bilha na'apun owa'ana, noka nmor niana muanke'a wornu la Yakopa. 8 Rahel nakot niwra: "Agora ka'ku mparehi matmiati, ne a'ulernia la yawa." Noma nala keke'en de pa nwawa Naftali (nnia'eratni de, mparehi). 9 La'pa Lea namkek de e' edon na'a'na wal wia, dewade na'ala atni Silpa pa nala la Yakop pa nhi'a la hawa liahunu. 10 Noka Silpa, (Lea atni patke'a) na'a'na nana muanke'a id la Yakopa. 11 Lea niwra: "Yara'a-yapalu nmai wia." Noma nala keke'en de pa nwawa Gad (nnia'eratni de, pripanni-fa'anni). 12 Ne Lea atni Silpa na'a'n owa'ana muanke'a wornu la'a Yakopa. 13 Lea niwra: "A' di de uhepru! Plollolli de patke'a hota riwra a' di de uhepuepru." Noma nala keke'en de pa nwawa Asyer (nnia'eratni de, muki-hepru). 14 La'pa metma rieiki-wnio'ora lerni, pa Rubena nala'a la wo'ora, nlernana orwo'a-auwo'a Dudaima (maka ra'ana plet pa ra'apun wa) noka nodia pa nala la inni Lea. Mere Rahela nakot la Lea: "Ela, mtiulan pa mual nana orwo'a-auwo'a Dudaima mak a'namu nlernana re dom mai a'u." 15 Mere Lea nwahla: "Mua' nana ha'wu de edonna ntu'tu ma'ta?! Dodo'ondi miwra mua' owa'ana orwo'a-auwo'a Dudaima mak a'nu de nodia?!" Rahel nakot la: "Ela, emkade de mel di de muora Yakop minina, totpa ralla rhernu orwo'a-auwo'a mak a'namu nodia re." 16 La'pa lera nla'a, pa Yakopa nwatiawu wo'or pa nmai wia, dewade Lea nla' pa nwatroma noka nakot la: "Ee! Mai pia itanin la mel di, yoma plollolli de agal oleka orwo'a-auwo'a gala uweli o'a." Reiniande Yakopa nora Lea ranin wut lia mel de. 17 Noka Uplerlawna Natlin la Lea polpuollu-wakwakni, Lea na'apnu pa nmor niana a'na muanke'a mak wolimni la Yakopa. 18 Noka Lea niwra: "Uplerlawna Nal oleka a prehenu nhierannu, yoma agal oleka a'tu patke'a la ha'wu." Noma nala keke'en de pa nwawa Isakar (nnia'eratni de, prehenu nhierannu). 19 Nhor nioka Lea na'apun owa'ana pa nmor niana muanke'a mak wonemni la Yakopa. 20 Lea niwra: "Uplerlawna Nal oleka ra'a-pal samomuou mai a'u. Ralamni di de, ha'wu hota na'unni-namta'at a'u, yoma a'u'a'na nana a'na muanke'a wonem la." Noma nala keke'enku' de pa nwawa Sebulon (nnia'eratni de, ra'unni-ramta'ata). 21 Nhor nioka na'a'n owa'ana patke'a ida, ne nal nanni pa nwawa Dina. 22 Noka Uplerlawna Nhorat reri Rahela pa Natlin la polpuollu-wakwakni noka Nhi'a Rahela pa na'apun wa. 23 Rahela na'apun pa nmor niana muanke'a ida. Niwra: "Uplerlawna Nhap doini oleka a molmola-mama'u." 24 Noma nala keke'en de pa nwawa Yusupa (nnia'eratni de, hota aliernana owa'ana a'na ida) yoma niwra: "Wuakwak de Orgahi Na'itr owa'ana a'na muanke'a id mai a'u."
Yakopa nlernana nhiuri-wnia'ana
25 La'pa Rahela nmor niana Yusup dewade Yakopa nakot la Laban: "Ama, mhur dioini a lia pa uwal lia le'tu-ruhunu maka rteti a horu-rki'ira a kliawtu. 26 Muala ha'wu-a'nu re mak kla'a a prehenu nhierannu totpa amla'awa, yoma la'a me'eta-anin maka akari oleka tiy o'a." 27 Mere Laban nakot la niwra: "La'pa aliernana ralam kalwiedmu de, omdien nek la handi. A'umkek olek la ihriehera de Orgahi Nala ra'a-pal mai a'u onnila o'a. 28 Muetlia prehenmu maka apuairia tiy o'a, totpena agala." 29 Yakopa nwahla niwra: "Omueh'a muat niohora de emkamenila a knia'ru tiy o'a, ne emkameni la nhiurmu-wnia'anmu la'a li'mu ralamni, 30 yoma re'emu-tniarmu edon harahu plollola, la'a ler maka amuai tiy o'a, mere dodo'ondi de rpeha-rlawna toto'a, ne Orgahi Nala ra'ani-pallu tiy o'a la'a lera-ler mak adiella handi, pede hota mowen nianpena akar lia ha'wu-a'nu re tiernu-apannu?" 31 Laban niwra: "Hya' mak agala tiy o'a, Ame?" Yakopa nwahla: "Yana mual neka hya'-hya'a mai a'u, agiwra godi owa'ana pipmu-dummu, ne utiaka re, hornama omhur niohora hadi mai a'u. 32 Ler di hota aliola pipmu-dummu re letgarni, ne awuakei dioinia pipi me duma mak roriou-ponpona hongonu-laklaka, me dum a'na memetma, honona rde muala la a prehenu. 33 Ne plo'lu-mneh'u pena ralharia la ler li'iru, ler meni pa mua mtioli-mtiakar la a prehenu. La'pa pipi-duma mak edonna roriou-ponpona hongonu-laklaka me dum a'na maka edon memetma la temni rde, muat niohor neka de akamna' nana re." 34 Nhor nioka Laban niwra: "Itlernohor lirmu." 35 Mere ler de Laban nwakeiya pipi muan muaka roriou-ponpona, hongonu-laklaka me pipi rar mak roriou-ponpona, hongonu-laklaka, me maka memetamni la dum a'na re honona, nala la a'nani re ratiaka. 36 Nhor nioka Labana netlia genni olietni yala' laka lera wotel ralamni la'a enora Yakopa, noma Yakopa nod nieka pipi-dum mak kwarini re. 37 Mere Yakopa na'ala au akni la ora-au wotelu maka wo'rani wawahra emekto'a au knumu, nwih dodioinia au aki re ulatni pa hongonu-laklaka, nhi'nande wo'rani re nayamkeka. 38 Nkenia au aki rella yemun geni honona ralamni, la'pa rdella pipi-duma re matni taranni. Pipi-duma re la'pa rma remun de rmahru yalohora. 39 La'pa pipi-duma re ralohor la au aki re onni, de a'nani mana roriou-ponpona, hongonu-laklaka. 40 Nhor nioka Yakopa nker doinia pipi a'na-dum a'na rella pa rmemeh'a. Mere Yakopa nhi' pa pipi-duma mak kalohora re rapal lia pipi roriou-ponpona, hongonnu-laklakni re, me duma memetma la Laban pipni-dumni. Emkade pa nlernana pipni-dumni wokni-wokni pa nmeh'a gahani, ne edonna nkenia la Labana pipni-dumni. 41 Ne la'pa ler meni pa pipi tei mak karuri-ka'orta re rma ralohora, de Yakopa nkenia au aki rella pipi-dum mak kalohora re matni taranni, totpa ralohor de rehgorgorga ha'aki re. 42 Mere la'pa pipi-dum mak kakleh ruri rmai, de edonna nkenia ha'aki rella hande. Nhi'nande nhiuri-wnia'an mak kakleh ruri de Labana gahani, ne mak karuri de e gahani. 43 Dewade Yakopa re'eni-tniarnu na'ititar lol to'owa, ne ntarga ata-wa'ara patke'a rora muanke'a, pipi-duma rahu, onta me keledai.
Yakopa nawlar pia naltarga Labana
1 Yakopa natlin nana Laban a'nani re rakot emkadi la: "Yakopa na' momuou oleka it amni re'eni-tniarnu re honona, ne la'a it amni re'eni-tniarnu re, pa namoria re'eni-tniarnu. 2 Yakopa namkek nan walia Laban gaini de Labana ematia'a ululu wut lia e'a. 3 Noka Orgahi Nakot la Yakopa: "Muwal lia upmu-tgarmu letni-ruhunni, me lupmu-a'namu, ne pena Ago'ru talla." 4 Nhor nioka Yakopa nhopan pa rpolga Rahela nora Le' pa rmai lia wo'ora wawannu, la'a pipni-dumni genni. 5 Noka nakot la re: "A ha'wu miy re! A'umkek nan la ammi gaini de ematia'a ululu, mere a'mu Uplerlawanni e Nor a tialla. 6 Ne miy mieh' mana miat niohora, de akar tioto'ola ammi. 7 Mere ammi nakot nan a'u re'eni termid olekwa, de hota npairi a prehenu, mere re'eni termida olek hadi, de nalahar nan olek a wua, edon npairi a prehenu tetema emekto'a nakot targa olek mai a'u. Mere Uplerlawna edon Nolin doinia, pa nhi' yotyotni-yatyatni mai a'u. 8 La'pa Laban niwra: "Maka roriou-ponpona, hongonu-laklaka rde rhi'a la prehenmu", dewade pipi-duma re honona ra'a'na de roriou-ponpona hongonu-laklaka. 9 Emkadella pa Uplerlawna Na'ala ammi nhiurni-wnia'anni pa Nala mai a'u. 10 Ler ida ne la'a ler maka pipi-duma re ralohora, de ami'a, ne umkek nana ltiata maka kalohora re roriou-ponpona, hongonu-laklaka. 11 Ne Uplerlawna hopopanni Nakot mai a'u lia mi'u de ralamni: "Yakopa." Noma awuahla: "Yowa Matroma." 12 Noka Naltieri: "Mrian gaimu ne mumkeka, ltiata mak kalohora pipi-duma rde roriou-ponpona, hongonu-laklaka. Aghi'a pa pipi-duma re harahu yoma A'umkek oleka hya'a-hya' maka Laban nhi' oleka tiy o'a. 13 A' di de Uplerlawna mak khari inonni tiy o' la Betel de, la' meni maka mual wu'ru la lairiri, ne maka mhi'a liokarmu mai a'u. Pa dodo'ondi de mpuahi'a-mpuayod pia mpuaran la' let di, muwal lia ammu-hyalmu inmu-narmu letni-ruhunni."" 14 Noka Lea nor Rahela ratlina Yakopa wniahaurnu pa nhorwua dewade riwra: "Papa, hota ami edon mlernana nhiakar la am mamni re'eni-tniarnu. 15 Am mamni mana nrekan nana ami emolmolla do'ona-dakna pa na'olu ami olekwa, me kupna maka nlernana la inon mamni wawannu de, nhorwua olekwa. 16 Plollolli de re'a-tniaru maka Uplerlawna Na' nana la am mamni, honona rde amora a'na mamni gahani. Emkade pa samounu de, hya'a mak Uplerlawna Nakot targa de, omliernohora." 17-18 Noka Yakopa nwahi'a-nwayod pia nhor nioka nkenia re'eni-tniarnu ror wutga hawni-a'nani pa rha'at la onta wawannu, noka nher niana nhiurni-wnia'anni re honona pa nlernohor reria. Nodia re'eni-tniarnu, nhiurni-wnia'anni honona maka nlernana la Padan Arama, nwaror nana nla'awa amni Isak de, la'a Kana'ana nohananni-taniaratni. 19 La'pa Laban nla ntoria dumni re wullu la' ler de de, Rahela nte'la nana amni atiehrani (patung). 20 Nhi'wal pia Yakopa ntot wunwunmua Laban yoma edon nakot nohora wniarorni-wnialaini pa nawlar wia. 21 Emkadella pa nawlar niohora re'eni-tniarnu honona re. Nla la'pa nleretia gerlawna Efrata, na'nama rala' pa rokru Gilead wo'orni.
Labana nhokra Yakopa
22 La'a lera mantetellu pa rakot nohora Laban de Yakopa nawlari olekwa, 23 dewade nodia amni-hyalli rpa rhokra Yakopa, yala'a lera wo'it ralamni, noka ndamit nana la Gilead wo'orni. 24 Lera nmella dewade Uplerlawna Ntutga rupni la Laban la' mi'ini id ralamni, noma Nakot la: "Labana! Mutiak samomuoga, totpa yana mukot liryata-tunyata id la Yakopa." 25 Laban ndamit nana Yakopa la'a hoiwialli mak kdena wo'ora Gilead hananni, ne Laban nora amni-hyalli re mana rkeni hoiwialli la wo'or de wali. 26 Laban nakot la Yakopa: "Ame, hya' ed maka omhi' nana dina?! Mhuap nian a'u me mtitni-mtiauru a'nu patke'a re emeka mak ka'ara ra'ala riy pa rwutu-rkohoga! 27 Nihya'pa omliergot de muwunmua pa o' edonna mukot targ a'u, totpa agodi o' la muki-hepru, nhieka-tniapra tiwla-prai, ya'ana-yemnu komkoma-lewlewarni. 28 Ne edonna muala lera id pa akinnia u'pu rena me a'nu patke'a re. Hihi'imu-yapyapmu de podku-padku kniarni hade. 29 Agodi ruri-lai pia aghi' nana yotyotni-yatyatni tiy o'a, mere Uplerlawna maka ammu nkola tieru-nawur nehla, de Nakot mai a'u la'a mel worawi: "Mutiak kalwiedweda, yana mukota lir yata id la Yakopa". 30 Miwlar wia, onnila ralammu nakota nawal lia ammu romni, mere nihya'pa mkiamna'a a atieh'ru (patung)?!" 31 Noka Yakopa nwahla Laban: "Ame, a'uwlari yoma umta'ata, yoma wniaro'ru, yanhi'pa mua' owa'an la a'namu re. 32 Mere la'pa atiehramu re, muhaka samomuoga la handi, ne it amni-hyalli rlin reri-rmat reri yahakmu. La'pa omliernana atiehramu la handi, mu'ala, ne riy maka nkamna'a de itwenna." Nakot emkade yoma naplin niohora de, hawni Rahela ed maka na'ala atiehra re. 33 Emkadella pa Labana nler la Yakopa hoiwialli, la'a Lea hoiwialli, ne la'a hawa liahunu rora hoiwialli, mere edonna nlernana atiehra re. La'pa nhargot la Lea hoiwialli dewade nla'awa Rahel hoiwialli. 34 Mere Rahela na' olek la atiehra re pa nkenia la ontani wniowni nayanni, na'nama namtatan la wawannu. Laban nahak la hoiwiali honona de, mere edon nlernana atiehra re. 35 Noka Rahela nakot la amni: "Yana a'mu nawenna, yoma ta'en niana a'uprir lia gaimu ralamni, yoma a'g e liernana karorta-kdeha." Ne Laban nahak samomuoga, mere edonna nlernana atiehra re. 36 Noka Yakopa na'ahankeran pa nora Laban rawo'or wa. Nakot la Laban: "A do'a-ha'lu hya' pa 37 ompuahak la a hyo'nu-hya'nu re honona?! Mere hya' ed maka omliernana la'a yohya'a no' a hoiwia'lu ralamni?! Mkenia la it amni-hyalli gaini, totpa rawerta-ratailia itro'a. 38 La'pa anni terampwornu de agor o' talla, ne pipi-duma rara edon eti ralamni rwasioru ne pipmu-dummu ltiata mana a'g edonna u'un nan ida. 39 Nhiuri-wnia'ana mak kpora-kdawra rwenna pa rlihir matmata de a'g edon godia tiy o'a, mere amueh'a ghernia. Ne maka riy ha rkamna'a la lelerni me melmelli de ompuaka nhierannu mai a'u. 40 Kniari nodia a lia ler pitu-ler pahna, howna-kgar, unina-umat nohora kniari, 41 la'pa nte' nana anni terampworu die mak adiella rommu nayanni. Akar lia o'a anni termida wehrani wogata totpa liernana a'namu re rora, ne anni wonem pa totpa liernana nhiurmu-wnia'anmu, ne re'eni termida ralamni o' edon mpuairi a prehenu emekto'a mukot targa olek mai a'u. 42 La'pa Orgahi-Orha'a mak khi' Uplerlawan la a u'pu Abrahama ne mak a'mu Isaka na'unni-namta'ata de edon Nor a tialla, de omuolin doinia a' pua uwal niohora lima hgal tioto'a. Mere Uplerlawna Nlinwah'a-nmatwah'a a prehenu-ma'u, meh'ru-ma'u ne Neti olek la worawi die Nawenan la tiy o'a."
Yakopa nor Labana rhi'a nnio'a ida
43 Noka Laban nwahla Yakopa: "Patke'a ri a'nu, ne ha a'nani re a u'pu, ne nhiuri-wnia'ana ri de nhiuri-wnia'anu, la'pa hya' maka mumkek nan la handi de a gah'u. Mere emkameni pa a'unetia a'nu rina me a u'pu ri honona?! 44 Pede dodo'ondi mai pia tsi' wutu nnio'a ida, totpa nla'a lin reri-mat rer tiy o'a mai a'u." 45 Nhi'noka Yakopa na'ala wat liawna id pa nohor targa-nwau tiarga pa na'etga la hgera-lairiri. 46 Nhor nioka Yakopa nakot la amni-hyalli re pa rawok watu. Noka rla ral watu pa rhi'a katri'ana, noma ra'an la katri'an de onni. 47 Labana nala katri'an de pa nwawa Yegar-Sahaduta (yoma Laban yawalli de, nnia'eratni, lin reri-mat reri), mere Yakopa nakota Galeda (yoma Yakopa yawalli de nnia'eratni, lin reri-mat reri). 48 Noka Labana niwra: "Katri'an di ed mak kla' lin reri-mat rer lia omuor a'u la' ler di." Hade pede nweta katri'an della Galed. 49 Ne nala katri'an de wal pia nwawa Mispa (nnia'eratni de, geni mkek reri) yoma niwra: "Orgahi Natiak reria itro'a la'pa it idma olieta la ida. 50 La'pa omhi' yatyat la a'nu patke'a ri ne omua'ala hapmu dom to'a la a'nu re onni, de mhuoratreria, la'pa riy edonna rdella it onni, Uplerlawna ed mak klin reri-kmat rer a'u me o'a." 51 Nhi'noka Laban nakot la Yakopa: "Hadi de katri'ana, ne hadin de hgera-lairiri mak aghor taru-wuau tiarga la itro'a. 52 Katri'an di nora hgera-lairir di mak kla'a lin reri-mat reri, a'g edonna lieretia gen di pa alia o' de, la'pa ghi'a yotyotni-yatyatni, emekwalia o' mana edonna mlieretia handi pa omua mhi'a yotyotni-yatyatni mai a'u. 53 Awuakwak de Orgahi-Orha'a mak khi' Uplerlawan la upmu Abrahama me Nahor nora Terah uplerni totpena reti plollolli-rdawra mneneha mai ita." (Terah de, Abrahama nor Nahor amni). Noka Yakopa nlokar la Uplerlawna maka amni Isak na'unni-namta'at de nanni wawannu. 54 Noma Yakopa ndella wo'or de pa rotan pipi-rkoki diuma la'a Uplerlawna. Npolg awoka amni-hyalli pa nora ra'an wutu, noma ra'an pa nhorwua noma ranin la wo'or de. 55 Repardoin yawyawar ma'ta de Laban nkinnia upni-a'nani re, me nwak pa Uplerlawna Nara'a-napalga re, nhor nioka Laban nawal lia gen miak ha ndella.
Yakopa namta'ata nwatroma Esau
1 Yakopa nala' pa nodi liarni, noka nwatrom nana Uplerlawna hopopanni-lili'irnu. 2 La'pa Yakopa namkek nana re, dewade niwra: "Hari de Uplerlawna kekni-rautnu." Nhi'nande nweta gen diella Mahanaim (nnia'eratni de, makodi keki-rautu nhiakra woru). 3 Nhor nioka Yakopa nhopna hopopanni re rala' ul pua rwatroma kakni Esau, la'a Seir lowanni-ahlani, la'a Edom yapatni. 4 Nhopna re niwra: "Emkadilla, la'pa mikot la matro'mu Esau de miwra: "Emkadilla atmu Yakopa lirni: Adiella Labana emolmolla do'ona-dakna, me aghol lia hande pa nma ntut nian ler di. 5 Atiarg oleka ata-wa'ara patke'a rora muanke'a, hayori, keledai, pipi-duma, ne aghopan pa rwahaur nohor hadilla matro'mu, totpa aliernana ralam kalwiedwedmu."" 6 Hopopanni rlernohora lirni nhor nioka hopopna re rawal lia Yakopa pa riwra: "Amla' leka kakmu Esau. Dodo'ondi e' mana etla talan letgar pa nma nwatro'mu, nodia riy rahu wogata." 7 Noka Yakopa namta'at matmiati, noma nhakr etia riy mak kora e' talla, pipni-dumni, hayorni, keledaini me ontani rla'a wok lawanni woru. 8 Yoma wniarorni: "La'pa Esau nma nala wokni ida pa la' yaw de, de wokni id etla pa nlewna." 9 Noka Yakopa nhaut la: "Orgahi-Orha'a! Mak khi' Uplerlawna la u'pu Abrahama nora a'mu Isaka, maka kakot olek lirmu mai a'u: "Muwal lia letmu-ruhunmu, me ammu-hyalmu, inmu-narmu, lupmu-a'namu, ne pena Aghi'a samomuo'u". 10 Hopopanmu a' di, rimormiori tio' a'u pa emkameni pa aliernana ralam kalwiedmu. Mere ralam kalwiedmu aliernana oleka me Mdienrer lia mai a'u pede la'a ler maka alieretia gerlawna Yordan de, agod tio' a lie'enu mere ler di de, rimormio'ru rora nhiuri-wnia'anu mana riwnu-halli pede aghi'a la nhiakra woru. 11 Dodo'ondi mhedga a lia gera tlinni me mtiau a lia ai aratni totpena yana Esau wehlani latan nan a'u me terni ntuin nana agora ha'wu rora ri, me la' u'pu-a'nu re. 12 Yoma Mukot targ oleka mai a'u: "Toto' pa Aghi'a kalwieda-paitiot tiy o'a, ne Aghi'a duratmu-waitmu pa emeka eni mak kdena en hu'ula-ga'a laini, la'pa lawan rehia pa takeni rrekan nana."" 13 Noka mel de de ranin la gen miaka Yakop nsumbain de. Nhi'noka na'ala hya' maka nodia pa nhi'a la limtutnu-limho'oni la'a kakni Esau, 14 pipi rara rahu woru me pipi ltiata terampworu, duma rara rahu woru me duma ltiata terampworu, 15 onta maka kuh mua'ta a'nani terampwotelu ra'itar wutu a'nani, sapi rara terampwogata me sapi ltiata termida, keledai rara terampworu me keledai ltiata termida. 16 Nal momuog harella atni-wa'arni re pa ratiaka, wokni-le'enu re meha-meha, ne nakot la re: "Mila' ul lia, me mitiaka wokni ida rletni la wokni handina." 17 Nano'a mak kdella gai kenkenna: "La'pa ka'ku de nwatrom miy ne natian miy die niwra: "Matrommi he'a? Miokur meni? He' gahani nhiuri-wnia'an mak kala' ul lia gaimi rena?" 18 De mpiahla miwra: "Garmu mak khi' hopopna tiy o' de, gahani. Hari de limtutnu maka nala la matro'mu Esau, ne Yakopa nmeh'a ed ma'ta la li'iru."" 19 Emkade walia nnio'oni la hopopanni mak kodi wokni wornu, me wotelu la'pa riy honona maka klernohora nhiuri-wnia'ana. 20 Mere nano'a meman pa rakot la Esau de garni mak khi' hopopan la e'a ed ma'ta la li'iru pa nmai nieka. Yoma Yakopa nwarora: "Samounu de agala limtut muaka ha rodi rala' ulu re galla ghi' kalwied ralamni, nhor niampena a'umkek gaini, de ka'ku nod ralam kalwied pa nreinian a'u me edonna." 21 Pede limtutnu rde rodia rala' ulu, mere enmeh'a nanin la hoiwialli la mel de.
Yakopa nora Uplerlawna rwa'uta-rwatorna
22 La'a mel de de Yakopa namat pa nodia hawni re rora, hawa liahu rora me a'nani termida wehrani ida re, rleretia gerlawna Yabok la geni miaka nhi'inde riy rleretia. 23 La'pa nodia rpa rleret wia, dewade nod wialia maka gahani honona rpa nlereti. 24 Noka Yakopa nmeh'a o'ta watnu pa nwarini, ne muanke'a ida nora rwa'uta-rwatorna nek la mel tetema nodia pa lera matni npah'a. 25 La'pa riy de natga de ta'en niana nalernu Yakopa, dewade nrauti apitga Yakopa kowarni mak kod lia lenanni, nhi'nande kowarni toptopni natiaulu la, la'a rrora wnia'utni. 26 Noka riy de nakot la niwra: "Muolin doini a lia pa alia'awa, yoma lera matni npah'a oleka wa." Mere Yakopa nwahla niwra: "A'g edon golli o' la pa mlia'awa, la'pa o' edonna muala ra'a-palu mai a'u." 27 Riy de natiana niwra: "O nanmu he'a?" Nwahla niwra: "Yakopa." 28 Noka riy de niwra: "Nanmu yan neka rweta la Yakopa, mere rweta la Israel, yoma omuora Uplerlawna me rimormiori mpia'uta-mpiatorna ne omualernia re." (Yakop nnia'eratni de, pudi-akla mere Israel nnia'eratni de maka nor Uplerlawna rwa'uta-rwate'la). 29 Yakopa natiana: "Awuak pa mukot walia nanmu mai a'u." Mere nwahla niwra: "Nihya'pa omutiana a na'nu?" Noma nala ra'a-pal lia Yakopa la' gen die. 30 Yakopa nweta gen diella Peniel (nnia'eratni de, Uplerlawna gaini), yoma lirni niwra: "A'umkek oleka Uplerlawna gaini mere a'g edonna muati!" 31 La'pa nto'or doini Peniel de namkek de lera matni npah'a wa, ne Yakopa nala' teka-teka onnila kowarni natiaulu. 32 Hade pede makdena Israel re edon ra'ana ih miaka kaduw reria kowarni nodia pa ler di, yoma Enraut nana Yakopa diaini.
Yakopa nora Esau rkalwied owa'ana
1 Yakopa nran matni pa namkek de Esau nmai nieka, ne riy rahu wogata e rlelernohora. Noma Yakopa nhakra a'nani re dom pa rora Lea rala' rewre'wa, dom pa ror Rahela rala'a, ne dom pa rora hawa liahunu rora rala'a. 2 Nhopan pa hawa liahunu re rora, rora a'nani pa rdella gaini, nhor nioka Lea nora a'nani rdella to'orni, nhor nia'nama Rahel nora Yusupa rdella li'ir memna. 3 Ne Yakopa nmeh'a nala'a la gai kenkenna, ne nwaltiora-nwaltieman re'eni wo'it lia tani wawannu, nodia pa nla' nana kakni gaini ralamni. 4 Mere Esau nawlar pia nwatroma, nkolla pa nkinnia, noka rrora rko'a-rkakru. 5 Nhor nioka Esau nran matni pa namkeka patke'a re rora a'nani re noka natiana: "Hyalia, he'a riy mak kora o' talla rina?" Yakopa nwahla niwra: "Upa-a'na maka Uplerlawna Nara'a-napalga la a' di, hyalia." 6 Nhor nioka hawa liahunu rora a'nani re rrehgor pua rwaltiora-rwaltieman la. 7 Lea nora a'nani re mana rrehgor pua rwaltiora-rwaltieman la. Nhor nioka Yusup nora Rahel mana rrehgor pua rwaltiora-rwaltieman la. 8 Esau nakot la re: "O wniarormu emkameni pede mhuopan pa rodia nhiuri-wnia'ana rpa rwatrom ulg a lia dodo'ona?" Nwahla niwra: "Totpa rlernana matro'mu ralam kalwiedwedni." 9 Mere Esau nakot la: "A gah'u harahu garia, mua' reria hya' mak kdella limmu ralamni." 10 Mere Yakopa niwra: "Yana. Wuakwak de yan emkade. La'pa aliernan oleka ralam kalwiedmu, de mrieiniana-mua'nana a limtu'tu ri, yoma la'pa umkek nana gaimu de emolmolla umkek nana Uplerlawna gaini, onnila mpuayow pa mrieinian a'u. 11 Awuak de mrieiniana nhiu'ru-nhielmu di, mak agodi oleka tiy o'a, yoma Uplerlawna Nal oleka ra'ani-pallu mai a'u, ne atiarga haneka-harahu." Noka noria Esau pa nhi'nande nreiniana. 12 Esau niwra: "Samounu de twaran pa tla' rewre'wa, ago'ru talla." 13 Mere Yakopa nakot la: "Matro'mu natga de keke'enku'a ri rakleh ma'ta ruri, ne pi'pu-du'mu, me sapi re doma ruruh rer mia'ta, la'pa tmahrur rer lia lera id de hota honona re rmat miomuou. 14 Samounu de matro'mu nala' ul niek a lia, ne aghi' kuke' pa mnapla-mnapal pa godia ulakra nhiuri-wnia'ana mak kala'a la ga'yu, ne ulakra keke'enku'a re nodia pa atie'ela matro'mu genni la Seir." 15 Noka Esau niwra: "Emkade de agaltarga hopopnu-lili'iru re dom tiy o'a." Mere Yakopa niwra: "Yan nekwa! Hornama aliernan oleka matro'mu ralam kalwiedni." 16 Pede ler de meman pa Esau nawal pia nokru Seir wa. 17 Mere Yakopa nwaran pa nla'awa Sukota, noka nariria ohwialli, ne nhi' walia larma la nhiurni-wnia'anni. Nreiniande gen die rweta la Sukot (nnia'eratni de, ohwialli). 18 Rwatiawu Padan Aram pa rmai wia, de rodia kalwiedni-paitiotni pa rte'ela leta Sikhema la Kana'ana nohananni-taniaratni, noka Yakopa nkeni ohwialli la let de onni. 19 Nhor nioka nawel niana nohanna id la Hemor upni-a'nani. Hemor di, de Sikhema amni. Gen di miaka ha nawel niana pa nariria ohwialli la, de welli maha wawahra rahu ida. 20 Nariria katri'ana la hande, ne nweta pa nwawa El Elohe Israel (nnia'eratni de, Uplerlawna mak kodi plolli-ktaryatnu die, Nhi' Uplerlawna la Israel).
Dina nora Sikhem
1 Ler ida ne Dina, Lea a'nani patke'a maka na'a'na la Yakopa, nla ntomra-nnah'a patke' walli la'a leta Sikhem. 2 Ler de de tuwgari ida nwawa Sikhem namkek nana. Sikhem di de Hemor makden Hewi a'nani ida. Ne Hemor di de mak kla' ray la let de. Noka Sikhem namkek nana Dina dewade nodia wlaria pa nareta-nahawa dawdawra. 3 Sikhema ralamni nal matmiati hararar de nhi'nande naltier samomuou lia, totpena harar di ralam nal nan e'a. 4 Ralamni nal matmiatia pede Sikhem nakot la amni Hemor niwra: "Ama, mpaka hararar di pa aghi'a la ha'wu." 5 Noma Yakopa natlin nana de Sikhema nareta-nahaw dawdawra a'na pat di. Mere a'nani re er ma'ta la wo'ora pa ratiaka nhiurni-wnia'anni, pede Yakopa nheriaplin nieka hihi'a-yapyap die nodia pa hare rawali. 6 Noka Sikhem amni Hemora nla pa nwatroma Yakopa pa naltier niohora Sikhem wakwakni de. 7 Yakopa a'nani re rdella wo'ora pa ratlin nana Sikhem nareta-nahaw dawdawra ir narni pede pletpa rmai die ralamni ramehra ne rawenan doin la. Yoma Sikhema nhi' nan oleka kdeheni-ktiahlani la makden Israela. Nhiol miak emkade de yana rhi'a-ryapia. 8 Noka Hemora naltier lia Yakopa, ne Yakop a'nani re e ratlin reria. Hemora niwra: "Ama, a'nu Sikhem ralamni nala a'namu. Awuakwak de miala pa nhi'a la hawni. 9 Ne samounu de twahal keliau, miala harararmi mai ami, ne mia'ala a hararar mamni. 10 Mai pa itden wut lia handi pa mi'olu-mila' lola kperanni." 11 Noka Sikhem nakot la hararar de amni me narni re: "Pap miy re, awuakwak de aliernana ralam kalwiedwedmi, pena agala hya' to'a maka mpiaka. 12 Ne mikota agala leli-maha wo'ira-wo'ir mana pena agala tiy miy, mere miala hararar de pa aghi'a la a ha'wu." 13 Noka Yakopa a'nani re rwahla Sikhem nora amni Hemora de de rnairia pudi-akla. Yoma Sikhema nhi'a kdeh oleka ir garni Dina. 14 Noma rakot la Sikhem nora amni: "Ami edonna mhi' emkade, de mala a nar mamni la muanke' maka edonna rsunta, yoma nhiol miak emkade de molmola-mama'a mai ami. 15 La'a hadi nmeh'a to'owa de amreiniana wakwakmu, omuor ami tamneh wutu, de muanke'emi re honona rde rsunta. 16 Nhi'nanpena amala hararar mamni tiy miy, ne miala gahami mai ami, ne amora miy tsol wiutu, ne hota ita tla' wutu hairi ida. 17 Mere la'pa miy edon mitlin la a lir mamni, ne miy edonna rsunta, de hota ma' owa'an la nar mamni de pa amla'awa." 18 Noka Hemor nora a'nani rwayow nohora wakwakni re. 19 Sikhem de ralamni nalmatmiati Yakopa a'nani, pede edon nalo'on pa nlernohora Yakopa wakwakni. Sikhem mana orkotkotni-ornananni la luwnu-a'nani 20 pede nor amni nla'a letni puohrani gaini, na'nama raltier lia ina-ama leta riwra: 21 "Pap miy re! Yakopa nor upni-a'nani riwra ror ita tsol wiutu la'a kalwiedni-paitiotni, miollia rpa rdella gen di, me rala' wewewar la ralamni, gen di mana inponni ma'ta pa rdella toh?! Nhi'pa ta'ala harararni pa tsi'a la ita hawni, ne ital wali ita harararni la ira. 22 Onnila tatar di to' pa hare rwayow pa rora ita tden wutu totpa tla' wutu hairi ida, de de ita muanke'eni meha-meha mai it de, rsunta emekwali ir rhi'a gahani re. 23 Nhiurni-wnia'anni, re'eni-tniarnu re mana hota rla'a it gahani toh?! Hornama ita twayow nohora wakwakni re, totpa rora it tsol wiutu-tlet wutu." 24 Noma Hemor nora a'nani Sikhema wakwakni de, ina-ama mak kma kawok la let de puohrani gaini re rreiniana, noka rsunta muanke'a honona la' let de. 25 La'pa lera wotellu de, leta mniotni ramehra-ramau niohora ir sunatni, dewade Dina narni woru, Simeon nora Lewi rmai die, mak kdella leta raplin niohora. Simeon nora Lewi rmai pia ra'ala wehlani pa rwenan nana muanke'a honona la' let de. 26 Ne Hemor nora a'nani Sikhem mana, Simeon nor Lewi rala wehlani rwenan nan walia, noka ra'ala narni Din la Sikhem romni pa rodia rla'awa. 27 Nhor nioka Yakopa a'nani doma rmai. Iramkek nana mak kmati re inonni na'nama reyahru let de mniotni hyonni-hyanni, hewewatni-naniayarni pa rhi'a la ir gahani yoma rhi'a kdeh oleka ir narni Dina. 28 Nhiurni-wnia'anni, ne hya' mak kdella let de ralamni me to'orni de ra'ala pa rodi momuoga. 29 A'na patke'a, upni-a'nani, re'eni-tniarnu, rheri-rhewta, la'pa hya'a-hya' mak kdella roma ralamni. 30 Noka Yakopa nakot la Simeon nor Lewi: "A'na miy re, miy mhi' nana oleka matmiati-molmuol mai a'u, ne mhi' weyata a na'nu la noh di mniotni, la'a makdena Kana'ana me makdena Feris. Kennama it di riy doma rmeh' ita. La'pa rawok pa ral mai it de, toto' memna ral it la yawa, ne rahoru momuou ita, agora ro'mu mniotni." 31 Mere rwahla riwra: "Nihya'pa a gari miamni la rhi'a emolmolla patke' yata?"
Re'eni wornu Yakopa nhol lia Betel
1 Uplerlawna Nhar lirni la Yakopa: "Yakopa! Mpuaran pa mlia'awa la'a Betel, mdiella hande, ne muriria katri'ana id la A'u, mak kalhari inonni tiy o'a, la' ler maka omuwlar lia kakmu Esau." 2 Noka Yakopa nakot la romni mniotni me hare honona mak kora e' talla niwra: "Ina-nara ama-hyali miy re, mihal doini atiehra (patung) mak kdella letgarmi, mimou-miwitna inonmi me mhiernu naniayarmi. 3 Mai pia tla'awa Betel, totpa la'pa aghi'a katri'ana la Uplerlawna maka katlin la a wakwa'ku la'a lera alier la klieratni onnila a'uwlar lia hya'lu Esau, ne mak alia'a la meni-meni de Nor a' tialla." 4 Noka ra'ala atiehrani meheni re, pa rala la Yakopa, me krap mak della tlinni re (maka rnairia pa rpolu-rwak la atiehrani), noka Yakopa ntamnia la au lawna id nayanni makden leta Sikhem. 5 Nhorwua dewade rwaran wa, ne Uplerlawna Nhi'pa riy mak kdella let paheli-ruhun patarna re, ramta'at pa nhi'nande edonna rhokra Yakopa upni-a'nani. 6 Noka Yakopa nor mak kor e' talla rte'ela leta Betel, la'a Kana'ana nohananni-taniaratni. Let di, rwet wal pia nwawa Lusa. 7 Nariria katri'ana la hande ne nweta gen diella El Betel (nnia'eratni de, Uplerlawna, mak kdella Betel). Yoma Uplerlawna Ntutga rupni la'a e'a la hande, la'a ler maka nawlar dioini kakni la. 8 La'pa Ribka in liahunu nanni Debora nmati, dewade rtamnia la'a Betel tawnu, la'a au lawna ida nayanni, pede riy rweta la au lawna yapolu-yatniani. 9-10 La'pa Yakopa nma nwatiawua Padan Arama, noma Uplerlawna Ntutga rupni la, ne Nal nanni warwuaru me Nara'a-napalga, Niwra: "Yakopa! Nanmu Yakopa, mere dodo'ondi de nanmu atia' Yakopa, mere Israel." Emkadella pa Uplerlawna Nala pa nwawa Israel. 11 Uplerlawna lirni: "A' di de Uplerlawna mak kodi plolli-ktaryatnu. Mu'upa-mu'a'na, mpueha-mliawna hairi ida, la'pa hairi-hairi wokni-le'enu ida nwatiawu o'a, ne ray-ray mana rwatiawu o'a. 12 Ne noh di maka Agal oleka la Abrahama me Isaka, hota Agala tiy o'a me la'a duratmu-waitmu." 13 Uplerlawna Naltieri pa nhorwua noka Nha'at la Ilyamou-Watyatoha, Naltarga Yakopa la gen miaka Ha Nal lirni la. 14 Nhor nioka Yakopa nohor targa hgera watu lairiri la gen die, noka nala himima-rere'a anggur pa rhuria me nhuria wu'ru la wawannu. 15 Yakopa nweta gen die; la' meni mak Uplerlawna na'nama Nhar lirni de, la Betel (nnia'eratni, Uplerlawna romni).
Rmoria Benyamin de, Rahela nmati
16 Nhorwua dewade rwaran pa rto'or doinia Betel la. La'pa ir edon oliet ma'ta la Efrat wa dewade, Rahela namehra-namau niohora yayori a'nani mak kodi klieratni la. 17 La'a klieratni la ya'a'nani di, mak kodi mak ka'a'na niwra: "Mama, yan mumta'ata, ralamni di mliernan ma'ta a'na muanke'a." 18 La'pa nhi'pa nwaran doinia aranni honi pa nmati nala keke'en de pa nwawa Ben Oni (nnia'eratni de, a'nu umoria la meh'ru-ma'u ralamni), mere amni nal nanni pa nwawa Benyamina (nnia'eratni de, a'nu mak alililia). 19 Emkadella Rahela nmat wia noka rtamnia la talan mak kokru Efrata aratni. Efrat de, rwet wal pia nwawa Betlehema. 20 Nhor nioka Yakopa nohor targa hgera la hoini wawannu. Hade de Rahela ketarni lairirni nodia pa ler di. 21 Nhor nioka Yakopa (de, Israel) nwaran pa nla nkenia hoiwialli la'a yatiak geni nio' leta Eder onni. 22 aLa'pa Yakopa nhol lia let di de nhi'noka Ruben nora amni hawa liahunu Bilha ranina, noma Yakopa natlin nana hihi'a-yapyapi die.
Yakopa amni Isaka nmati
22 bYakopa a'nani muanke'a rde termida wehrani woru. 23 Yakopa hawni Lea, a'nani yanulu de, Rubena, mak klernohora Rubena de, Simeona, mak klernohora Simeona de, Lewi, mak klernohora Lewi de, Yehuda, mak klernohora Yehuda de, Isakar, mak klernohora Isakar de, Sebulon. Gari hoho'a hade. 24 Yakopa hawni Rahela, a'nani yanulu Yusupa, mak klernohora Yusupa de, Benyamina. Gari hoho'a hade. 25 Ne Yakopa hawa liahunu, de Bilha, Rahela atni patke'a, a'nani yanulu de, Dan, mak klernohora Dan de, Naftali. Gari hoho'a hade. 26 Ne Yakopa hawa liahunu, de Silpa, Lea atni patke'a, a'nani yanulu de, Gad, mak klernohora Gad, de Asyer. Gari hoho'a hade. Hare de Yakopa a'nani muanke'a, maka ra'a'na la'a Padan Arama. 27 Noka Yakopa nla'awa la' amni Isak la'a Mamre la'a Kiryat Arba onni. Mere dodo'ondi rweta de Hebron. Hebron di gen miaka Abrahama nora Isaka rdella emeka do'ona-dakna. 28 Isak mormiorni nla' nana anni rahu ida terampwo'awa. 29 Noka Isak mana nmat wia pa rtamin wutga la upni-tgarni re. Isaka nhamto' kolkuolu, la'pa umarnu ntutu'tu noma a'nani Esau nora Yakopa rtamnia.
Esau duratni-waitni
1 Hadi de Esau duratni-waitni. (Esau mana rweta pa nwawa Edoma). 2 Esau na'ala patke'a Kana'ana wotelu pa nhi'a la hawni. Idni de nwawa Ada, Elona makden Heta a'nani. Hawa wornu de nwawa Oholibama, Ana a'nani. (Ana di amni de Sibeon makden Hewi a'nani.) 3 Ne hawni wotellu de, Ismail a'nani nwawa Basmat. Basmat di, Nebayot garni. 4 Ada na'a'na Elifas la Esau, me Basmata na'a'na Rehuela, 5 me Oholibama a'nani yanulu de, Yeusi, mak klernohora Yeusi de, Yaelam, mak klernohora Yaelam de, Korah. Gari hoho'a hade. Hari de Esau a'nani maka rmor niana la Kana'ana yapatni. 6 Esau nodia hawni rena me a'nani patke'a rora muanke'a, me riy honona mak kdella romni nayanni, nhiurni-wnia'anni, me re'eni-tniarnu re honona maka nlernana la Kana'ana, noka nla'awa nohananni-taniaratni meheni pa naltarga garni Yakopa. 7 Onnila ir re'eni-tniarnu harahu rehi, nhi'nande ta'en niana rawok wutu, de gen miaka rahulti-rahamar la ta'en niana nawoka-nale'u niana re, yoma nhiurni-wnia'anni harahu rehia. 8 Noma Esau nhol lia Seir wo'orni. 9 Esau die, makdena Edom amni. Esau duratni-waitni makdena Edom, mak kdella la'a Seir wo'orni rweta la emkadi: 10 Esau hawni Ada a'nani de Elifasa. 11 Elifas di a'nani yanulu de Teman, mak klernohora Teman de, Omar, mak klernohora Omar de Sefo, mak klernohora Sefo de, Gatam, mak klernohora Gatam de, Kenas. Gari hoho'a hade. 12 Ne Elifasa hawa liahunu nanni Timna na'a'na nana Amalek. Hari de Esau hawni Ada upni re. 13 Esau hawni Basmata a'nani de Rehuel. Rehuela a'nani yanulu de, Nahata, mak klernohora Nahat de, Serah, mak klernohora Serah, Syama, mak klernohora Syama, Misa. Gari hoho'a hade. 14 Esau hawni Oholibama a'nani yanulu de, Yeusi, mak klernohora Yeusi de, Yaelam, mak klernohora Yaelam de, Korah. Gari hoho'a hade. Oholibama di amni, de Ana. Ana amni de, Sibeon. 15 Mak kla' o'ta-mata la Esau duratni-waitni luwnu-a'nani emkadi: Mak kla' o'ta-mata la Esau a'nani yanulu Elifasa duratni-waitni luwnu-a'nani re, de Teman, Omara, Sefo, Kenasa, 16 Korah, Gatama, me Amalek. Hari de luwu-a'na Elifasa o'tani-matni, la'a Edom nohananni-taniaratni. Hari honona Esau hawni Ada duratni-waitni. 17 Mak khi' o'ta-mata la Esau a'nani Rehuel duratni-waitni luwnu-a'nani re, emkadille: Nahata, Serah, Syama, Misa. Hari honona re Esau hawni Basmata duratni-waitni. 18 Mak khi' o'ta-mata la Esau hawni Oholibama a'nani muanke'a luwnu-a'nani re, emkadille: Yeusi, Yaelam, Korah. Hari honona Oholibama duratni-waitni. 19 Hari de luwu-a'na Esau, ne hare de luwnu-a'nani o'tani-matni.
Seir duratni-waitni
20 Makden Hor ida nwawa Seir. Seir di a'nani mak kdella Edom lowanni-ahlani la Kana'an yapatni, de: a'na yanulu Lotana, mak klernohora Lotan de, Syobala, mak klernohora Syobal de, Sibeona, mak klernohora Sibeon, de Ana, 21 mak klernohora Ana de, Disyona, mak klernohora Disyon de, Esera, mak klernohora Eser de, Disyana. Gari hoho'a hade. Hare de ed maka kla' o'ta-mata la Seir a'nani ri makden Hori. 22 Lotan di a'nani yanulu de, Hori, mak klernohora Hori de, Hemana. Gari hoho'a hade. Ne Lotan narni de Timna. 23 Syobal a'nani yanulu de, Alwana, mak klernohora Alwana de, Manaheta, mak klernohora Manahet de, Ebala, mak klernohora Ebal de Syefo, mak klernohora Syefo de, Onan. Gari hoho'a hade. 24 Sibeon a'nani yanulu de, Aya, mak klernohora Aya de, Ana. Gari hoho'a hade. Ana di ed mak klernana ger pahna matni la wo'orletna-kawurloini, la'a ler maka ha natiaka amni Sibeon keledaini. 25 Ana a'nani yanulu de, Disyon, mak klernohora Disyon de, Oholibama. Gari hoho'a hade. Oholibam di, Ana a'nani patke'a. 26 Disyon a'nani yanulu de, Hemdan, mak klernohora Hemdan de, Esyban, mak klernohora Esyban de, Yitran, mak klernohora Yitran, de Keran. Gari hoho'a hade. 27 Eser a'nani yanulu de, Bilhana, mak klernohora Bilhan de, Saawan, mak klernohora Saawan de, Akan. Gari hoho'a hade. 28 Disyan a'nani yanulu de, Us, mak klernohora Us de, Aran. Gari hoho'a hade. 29 Mak kla' o'ta-mata la makden Hori, de Lotan, Syobal, Sibeon, me Ana, 30 Disyon, Eser, me Disyan. Hari de makden Hori luwnu-a'nani o'tani-matni, la luwu-a'na honona la Seir lowanni-ahlani.
Ray-ray Edoma
31 Ray-ray miaka kodi plolli la Edoma, la' ler maka ray id mana edon nodi plolli ma'ta la Israela de: 32 de Beor a'nani Bela, ne letni nwawa Dinhaba. 33 La'pa Bela nmat wia dewade Serah a'nani Yobab makdena Bosra nwauga pa nhi' ray. 34 La'pa Yobaba nmat wia, dewade Husyama makdena Teman nwauga pa nhi' ray. 35 La'pa Husyama nmat wia Bedad a'nani Hadad nwauga pa nhi' ray. Hadi ed mak kalernu makden Midian la Moab lowanni, ne letni nwawa Awit. 36 La'pa Hadad nmat wia dewade Samla makdena Masreka nwauga pa nhi' ray. 37 La'pa Samla nmat wia, dewade Saula makdena Rehobot la'a gerlawna aratni nwauga pa nhi' ray. 38 La'pa Saula nmat wia dewade Ba'al-Hanan, Akbor a'nani nhi' ray pia nwauga. 39 La'pa Ba'al-Hanan nmat wia dewade Hadar nhi' ray pia nwauga. Letni nwawa Pahu, ne hawni nwawa Mehetabel. Mehetabel di, inni de Matred. Matred inni de, Mesahab. 40 Esau upni-a'nani luwnu o'tani-matni nanni, rlernohora luwnu-a'nani me letni-ruhunni, rnairi rima-rima nanni, de: Timna, Alwa, Yetet, 41 Oholibama, Ela, Pinona, 42 Kenas, Teman, Mipsar, 43 Magdiel, me Iram. Hari de luwu-a'na Edom o'tani-matni, rlernohora letni-ruhunni la'a nohananni-taniaratni. Emkadella Esau makden Edom amni duratni-waitni.
Yusup nora hyalli
1 Yakopa nhol lia gen miaka amni nhi' do'ona-dakan la de, la'a Kana'ana yapatni. 2 Emkadilla Yakopa duratni-waitni tuini. Yusup, la'pa umarnu termida wehrani wo'itu, tuwarwiar mia'ta de, nhi'de nora hyalli rodia pipi-duma. Yusup hyalli ri de, Yusup amni patke'a liahunu rora, Bilha nora Silpa, a'nani. Noka Yusup nwahauru hyalli re illu-wniehwa yatyatni la amni. 3 Yakopa (mak Uplerlawna Nal wal pia nwawa Israel) ralamni nala Yusup la'a a'nani re korni, yoma Yusup de a'nani maka rmor niana la mto'oni-pe'eni lerni, ne nhopna rhi'a rain samomuou lia pa nnairia, maka naplalahwa me limni mana naplalahwa. 4 La'pa hyalli re ramkeka de amni ralamni nal rehi Yusup la hyalli korni, reiniande sukni tia'ala pa edonna rora raltier samomuou. 5 Ler ida ne Yusup nmi'a, noka mi'ini de nwahauria la hyalli re, nhi'nande hare yeher to' pa sukni tia'ala. 6 Yoma lirni rla: "Hyal miy re, mitlin teka mi'u dina. 7 Umkek de it erla nhyi' ralma, ne twutwut rieri metma wnioranni, noka plin-plinnianama a gah'u rapriri, na'nama miy hononmi gahami rma rtuk lia a gah'u." 8 Noka hyalli re rakot la: "Hyalia, yanhi'pa omiwra mla' ray pa muodi plolli mai ami?" Pede yeher to'a Yusup hyalli re sukni tia'ala onnila mi'ini me lirni de. 9 Noka nmi' nan owa'ana mi'ini ida, pa nwahauru la hyalli re niwra: "Hyalia, mitlin mai a'u. A'g e mui' owa'ana, de lera, wolla me wtiona termida wehrani ida rtuk pua rru'u lia mai a'u." 10 La'pa nwahauru hadella amni me hyalli re, dewade amni nal lir la: "Ame, mi'a hya' maka omi' nan dena? Pena a'u me inmu me hyalmu re toto'a pa ampaltiora-ampaltieman la o'a?!" 11 Dewade hyalli re ra'andoin gahani rla, mere amni nhi' targa hadella ihranu-ralamni.
Ra'olu Yusup la Mesir
12 La'pa ler ida ne hyalli re e rodia amni pipni-dumni la'a leta Sikhem onni. 13 Noka Yakopa nakot la Yusup niwra: "Ama, muat niohora de hyalmu re e rodia pipi-duma la Sikhem onni. Mai pia mlia'a re." Yusup nwahla niwra: "Yowa ama." 14 Yakopa nano'a: "Mlia' pa mumkeka, la'pa hyalmu rena me pipni-dumni e rkalwieda-rpaitiota me edonna, de muodia kota mai a'u." Noka Yusup nlernohora amni nnio'oni pa nlergot la Hebron lowanni lala'pa nte'ela leta Sikhem onni. 15 La'pa Yusup nala' wewewar la wewna wawannu, dewade nwatrom nana muanke' ida, noka muanke' de natiana: "To'a, he' maka ompuahaka?" 16 Nwahla: "A'uhaka hya'lu re. Mtiulan pa mukot mai a'u, hare e rodi pipni-dumni la hanmeni?" 17 Noka muanke' de niwra: "Rwaran olek la handi wa, yoma a'utlin nana riwra rla'awa Dotana." Noka rwahaur pa nhorwua dewade Yusup nlernohora hyalli re pa ndamit nana rla leta Dotana onni. 18 Mere oliet ma'ta de ramkek nan oleka wa. Mere la'pa edonna rehgor mua'ta dewade ra'an lira-remun waw pa rahak talan pa rwenna. 19 Idma nakot la id pa riwra: "Mimkeka, it mak kmi'ini de nmai nieka. 20 Dodo'ondi mai pia twenna, ne tnakul targa la gera id ralamni, demade takota tiwra pora-dawra ida nlihir oleka. Ne hota nhi'nanpena tamkek de, mi'ini edon nagengeni." 21 La'pa Ruben natlin nana hare lirni die, nwaror pa nalewna Yusup la hare limni ralamni pa niwra: "Yana twenna. 22 Yana mtiowur rarni! Mhiopliala ger di mak kdella wo'orletna-kawurloini, mere yan memmemna mpiano'a." Ruben wniarorni de niwra nalewan Yusup la hare limni ralamni pa nodi nawal lia amni. 23 Emkadella pa Yusup nte' wut lia hyalli re dewade rlehwa doini Yusup rain samomuounu de. 24 Noma rodia pa rla rnakul targa la gera ralamni. Gera niahi mak kerna ida. 25 Nhor nioka ramtatna pa ra'ana. Noka rran gaini na'nama ramkek nana mutu ida, de Ismail duratni-waitni makden Midian, mak ka'olu-kala'a. Rwatiawua Gilead pa rokru Mesira. Hare ontani re e rodia damri rora ortawi-autiawi huwua mikmikri maka welli werta. 26 Noka Yehuda nakot la hyalli re: "Hyal miy re, ita unutnu hya'a, la'pa it twenna wunwunmua it garni dena?! 27 Mai pia ita'olga la Ismail duratni-waitni re, mere yana itwano'a, yoma ita hyalli me ita ihini-rarni walli." Ne hyalli re ratlin la lirni de. 28 La'pa makdena Midian re rlereti, dewade rran doinia Yusup la ger de ralamni ne ra'olga la hare, de welli maha wawahra (peraka) terampworu. Noka rod Yusup pa rla'awa Mesir wa. 29 Rodi Yusup rla'awa Mesir noka, la'pa Ruben nawal lia ger de, de namkek de Yusup edonna nden olek la ger de ralamni, dewade ralamni nmawal doin la pa nlihir'er rayanni, 30 noka nawal lia hyalli re pa niwra: "Hyal miy re, it garni de edonna nden olek la wa, pa dodo'ondi de aghi' hya'a?" 31 Nhor nioka ra'ala Yusup rayanni, noka rotna pipi ida tiernu na'nama rto'a rain della rara ralamni. 32 Rain plalahwa samomuou liawan de rhopna rla rottiarga la amni na'itra nnio'a: "Ama, hadi amlernana, pa mlioha-mlil tieka, yanhi'pa rain di de a'mu a'nani gahani me edonna?" 33 La'pa Yakopa nloha-nlili rain di dewade niwra: "Hadi de a'nu rayanni, pora-dawra ra'an nan oleka wa, toto' pa rlihir nana-rnai nian oleka Yusup wa." 34 Dewade Yakopa nlihir'era rayanni, ne nnairi naniairi yaluli-yahon la nehlani mak kwatiawu pipi ulti, noka naluli-nahona lera-mela onnila a'nani de. 35 A'nani honona, patke'a rora muanke'a rhi' pa totpa ralamni makdudu, mere nwayotli niwra: "Edonna, a'ulul niek pa la'pa amuat nianpena awuatrom a'nu." Emkadella amni nkakur nohora Yusup. 36 Mere makden Midiana ra'olga Yusup de la makden Mesira ida, nwawa Potifara. Potifar di nkar lia Firaun romni ralamni, de de mak khi' o'ta la mak katiaka Firaun romni.
Yehuda nora Tamar
1 La' ler de maka ra'olga Yusup de, Yehuda nto'or doinia hyalli rella pa nhol wut lia makden Adulam ida, nwawa Hira. 2 La' hande de makden Kana'ana ida nanni Syura. Noka Yehuda namkek nana Syur di a'nani hararara ida. Noka Yehuda nora hararar di rmehlima noka ranin wutu. 3 Patke' de na'apun wa pa na'a'na nana muanke'a ida pa nala pa nwawa Er. 4 Nhor nioka patke' de na'apun owa'ana noma na'a'na nana muanke'a id pa rala pa nwawa Onana. 5 Nhor nioka patke' de na'ana nan owa'ana muanke' ida, noma rala pa nwawa Syela. Yehuda nden ma'ta la Kesib de rmor dioini Syela. 6 Keke'enku'a re rlawlawan lol pa lera ida ne Yehuda na'ala patke'a ida nwawa Tamra pa namehlim wutga la a'nani yanulu Era. 7 Mere Era, Yehuda a'nani yanul die kapliahana la Orgahi gaini, nhi'nande Orgahi Nwenna. 8 Noka Yehuda nakot la Onana: "Ama, omuora yermu de muora mmiehlima, yoma o kwarmu hade la'a kakmu nhierannu totpena mimrio'a miwannia (mhi'a) kakmu duratni-waitni." 9 Mere Onan natga de hota e' edonna nlernana durti-waiti nhi'nande la'pa nor kakni hawni de ranin de, de nhopliala kotnu la tani wawannu totpa yana nala durit la kakni. 10 Mere maka ha nhi' nan de, de yata la Orgahi gaini, noma Orgahi Nwenan walia. 11 Noka Yehuda nakot la yananni Tamra niwra: "Ina, mdien nek la ammu romni emeka mak kapalu, mpuei niekpa a'nu Syela nlawna," yoma Yehuda wniarorni: "Yanhi'pa nmat wial pia emeka kakni rora." Noma Tamra nla'awa pa ndella amni romni. 12 La'pa anni ida-woru nlardoin la, dewade Yehuda hawni nmat wia. Nalul pia nhorwua dewade Yehuda nor wutu talanni Hira makdena Adulam de pa rla'awa Timna, la'a mak ktoria dumni wullu re genni. 13 La'pa rod kiota la Tamra riwra: "Yananmu e nala' pa nokru leta Timna pa nla ntoria dumni wullu." 14 Noma Tamra no'lu doinia naniairi palpuallu na'nama nnairia o'tani kniaduwni me wutnu, noka nla namtatna la nhiari mak kapal rieri leta Enaima, la'a talan mak kokru Timna, yoma namkek de Syela lawn olekwa mere edon rala e'ela Syela pa nhi'a la hawni. 15 La'pa Yehuda namkek nana dewade nwarora de patke' yatyata ida de, yoma nahew gaini. 16 Noka Yehuda nla napal lia patke' mak kdella talla aratni de na'nama niwra: "Mai pia agiwra gor o' manin wutu", yoma naplin niohora patke' de de yananni. Patke' de natiana: "Hya' maka omuala mai a'u la'pa itro' tanin wutu?" 17 Nwahla niwra: "Pena aghopan pa rodia pipi a'nu id la pi'pu-du'mu tiy o'a." Patke' de niwra: "Hornama omualtarga nhia'argeni (hadom la a'u), nodia pa la'pa rodia pipi a'na de mai a'u." 18 Natiana niwra: "Hya' maka agaltarga tiy o'a?" "Patke' de nwahla niwra: "Kniaumu (capmu), wuimu, me lie'en mak kdella limmu ralamni de." Noka Yehuda nal momuou harella na'nama ranin wutu. Noka patke' de na'apun wa. 19 Patke' de namat pa nla'awa la'pa no'lu doinia gaini kniaduwni me nnairi owa'ana naniairi palpuallu. 20 Noma Yehuda nala pipi a'na della talanni Hira totpa la npairia la patke' de, totpa na' owa'an la hyonni-hyanni re, mere edonna nlernan patke' de wa. 21 Hira natiantan nohora la'a patke' de genni la mak kdella gen die niwra: "Hyal miy re, patke' yatyat mak nhi'in della patung geni, mak dodo'on namtatan la talla mak kokru Enaim aratni de, etla meni?" Rwahla riwra: "Hyalia, patke' yatyata emkade edonan mai handi." 22 Nawal lia Yehuda na'nama niwra: "A'g edonna wuatrom nana, ne makden hande mana riwra patke' yatyata edonan la hande." 23 Noka Yehuda niwra: "Nhi'in della pa ntorreria yohya'a re, totpa yana itla'a riy wniarerni-wniahaurnu rahe'i-ramal lia, plola pa agiwra gal oleka pipi a'na de mere o' edonna mpuatrom nana." 24 La'pa lardoini wolla wotel wua dewade ralde'et la Yehuda riwra: "Yananmu Tamra, nahawyata, ne na'apnu olek la yahawyatni de." Noka Yehuda niwra: "Miodia patke' de totpa rtunga." 25 La'pa rodia pa rwenna, dewade patke' de nhopna riy rla'a yananni Yehuda pa rakot la: "Nwatiaga muanke' maka hyonni-hyanni ri pede a'u'apnu. Mlioha-mlilia, he' gahani kniau me wui di nora lie'en dina?" 26 Yehuda nloha-nlilia yohya'a re noka niwra: "A'g edonna, mere patke' de ed mak kaplola, yoma a'g edonna gala la a'nu Syela." Ne Yehuda edon nora patke' de ranin wutu owa'ana. 27 La'pa patke' de nmor wia, de na'a'na dio'a. 28 Ne la'pa nayor wia, de a'nani re ida limni nlergot ulu noka mak kodi nte'la la limni, na'nama nala ahwa mermera nkoh tiarga, na'nama niwra: "Hadi ed mak kala' ul pua klergota." 29 La'pa keke'en de nrei dioin limni, dewade hyalli nlergot wa dewade mak kodi niwra: "Omurur matmiat pia mpuakdieh'a la tio'ora." Noma nala keke'en de pa nwawa Peres (nnia'eratni de, nwakdieh'a pa nlergota). 30 Nhor nia'nama hyalli maka ha rala ahwa mermera rkoh limni de nlergota, noma rala pa nwawa Serah (nnia'eratni de, nlipa).
Yusup ndella Potifar romni
1 Ne Yusup de Ismail duratni-waitni rodi oleka la Mesir pa makden Mesir ida nwawa Potifara nawel niana. Potifar di de de nhi' o'ta la mak katiaka Firaun (ray Mesir) romni. 2 Noma ndella upni-matromni makden Mesir di romni. Mere Orgahi-Orha'a nora Yusup talla, nhi'nande nla'a riy mak kniarni la'a ga'a. 3 La'pa upni-matromni nat niohora de Orgahi nora Yusup talla, ne Orgahi Nhi'a hya' maka ha nkari pa nla' ga'a, 4 dewade Yusup nlernana upni-matromni ralam kalwiedni, ne nala plola-mneha la Yusup pa nodi plolli la romni me re'eni-tniarnu honona. 5 La'a ler maka ha nala plolli-mneheni la Yusup pa namkek la romni me re'eni-tniarnu, Orgahi Nala ra'ani-pallu la makden Mesir de rom de onnila Yusup rerieini, nhi'nande Orgahi ra'ani-pallu etla re'eni-tniarnu wawannu, la'a mak kden roma nayanni, me mak kden nhyi' ralma. 6 Hade pede re'eni-tniarnu honona rde Potifara nala la Yusup nodi plolli la. La'pa Yusup nodi plolli de, Potifara edonna ne'era-ntatra hadomdom pa, enekneka ya'anni-yemannu to'a. Yusup de inonni namuanmuanu me gaini mana samoga. 7 Lardoini lera wo'ira-wo'ir wa noka upni-matromni hawni namkeka Yusup de dewade nakot la: "Mai pia itro' tanin wutu." 8 Mere Yusup nwayotlia noka nakot la upni-matromni hawni de niwra: "La'a agodi plolli la handi, de u'pu-matro'mu de edon ne'era-ntatra hadomdom la rom di nayanni, ne nolin doinia re'eni-tniarnu honona la a li'mu ralamni. 9 La'a rom di nayanni mana edon narehi a lia plola-mneha, ne edonna nanetia hya'a-hya' to'ola li'mu ralamni, eneknek o'a, yoma o' de hawni o'a pa a'g edon liolla. Emkameni pa la'pa nhi'pa aghi' nana do'a-hal matmiat liawan dilla' Uplerlawna?" 10 La'a lera-ler to' pa patke' de naga'aga, mere Yusup edon natlin la gaga'anu de pa nanin la onni totpa rrora rdudu-rnei, ne e' mana edon nor wali upni-matromni hawni de nor wutga la kamri ida. 11 Lera ida ne Yusup nler la roma ralamni namkek la kniarni, ne la' rom de nayanni de hopopna riy id mana edonna ndella. 12 Noka patke' de nte'la la Yusup rayanni pa nakot la: "Mai pia muor a' pua tanin wutu." Mere Yusup no'lu dioini rain plalahwani pa nawlar pia nla'awa tio'ora, de patke' de nte'la reri rayanni. 13 La'pa patke' de namkeka Yusup no'lu dioini rain plalahwani pa nawlar pia nla'awa tio'or wa, ne e nte'la reri Yusup raini, 14 dewade npolga hopopna-li'iru honona la rom de pa nakot la re: "Mimkek la, Potifara nla nodia makdena Ibrani mniotni di totpa nahe'i-namal ita. Riy di nwakriani a'u totpa amro'a mdudu-mnei, mere aghaunu matmiati. 15 Ne la'pa natlin nana aghaun prakrahka dewade no'lu dioini rayanni la a o'nu pa nawlar pia nla'awa tio'ora." 16 Ne naltarga Yusup rayanni della onni pa nwei hawni nawali. 17 Lir mak edon kaplol de nekpa patke' de la nwahaur nohora la hawni Potifar niwra: "Ee! Ata Ibran miaka omuodi mmuai die, nmai lia a' pua naga'ag a'u. 18 Mere la'pa aghaunu matmiati dewade no'lu dioini rayanni la a o'nu na'nama nawlar pia nhargot wa. 19 Mtatan di pa Yusup upni-matromni natlin nana lir maka hawni ha nwahaur nohor de, emkade-emkadilla atmu de nhiolli mai a'u, dewade ahankeranni nha'at wa. 20 Noka upni-matromni nhopan pa rtorna Yusup pa rkenia la roma nhio'la ralamni, la'a ray ha nwutu-nkohu re genni ralamni. Emkadella Yusup ndella roma nhio'la ralamni la hande. 21 Mere Orgahi Nora Yusup talla, ne Nala ra'ani-pallu la, ne Nhi'a mak katiaka roma nhio'la o'tani pa ralamni nala Yusup. 22 Pede mak katiaka roma nhio'la o'tani nala mak kla'a roma nhio'la ralamni rella Yusup, ne tulla-kniari hya' mak kdella hande, de rala la ne'era-ntatra. 23 Ne mak katiaka roma nhio'la o'tani de edonna nhe'du nohora hya'a-hya' maka ha nateman targa la Yusup, yoma Orgahi Nor e' talla, ne hya' maka nhi'a rde nler la ga'a.
Mak karia roti nora mak khoi-ktani niemniara, mi'ini
1 La'pa hari honona re rla rlola, de mak khi' o'tani la mak katiaka ray Mesir yemyemannu me mak khi' o'tani la rotni, rhi'a Firaun (de raiya Mesir) pa rawenan la. 2 Noma Firaun nawenan doin la limni-rorni re rora pede 3 nhopna rho'la la mak kla' o'ta la mak katiaka ray, de romni, gen miaka ha rho'la Yusup la. 4 Mak khi' o'ta la mak katiaka ray nhopna Yusup totpa nhoi-ntania re. Emkadella pa rho'la nana la anni id nor woru. 5 La' mela id de, ray limni-rorni re rora rmi'a, ne rima-rima mi'ini rde nnia'eratni de to'a-to'a. 6 La'pa repardoin ma'ta, dewade Yusup nmai tiemna re, namkek nana rde e rmahru la ralam mawla. 7 Noka natiana la Firaun limni-rorni maka ha rho'la rewre'wa wutga la matromni romni de: "Nihya'pa ler di de gaimi rmaluidioinla?" 8 Rrora rwahla riwra: "Ami'a mere riy mak kwet nana nnia'eratni de hamonna." Dewade Yusup nakot la re niwra: "Edon miatga de Uplerlawna ed mak kakota mi'a ida nnia'eratni? Mikot mi'imi re mai a'u." 9 Nhi'noka mak khi' o'tani la mak khoi-ktania yemyemnu de nwahaur nohora mi'ini la Yusup, niwra: "To'a, la a mi'u de umkek nana anggur onni ida etla a ga'yu ralamni. 10 Anggur on de, de akni wotelg erla, ne na'nama onni de na'uhwu, deutnu nhargot wa ne unnu npenpuenu-nanahala gawarni. 11 Ne la'a li'mu ralamni de Firaun larni de, atiorreria. Anggur wo'a re aga'ala pa ariahmia la Firaun larni ralamni, na'nama agala la Firaun." 12 Yusup nakot la: "Hyalia, emkadilla mi'imu di nnia'eratni. Aki mantetelu rde, nnia'eratni de lera wotelu. 13 Lardoini ler mantetelu ri, de Firaun hota nhopan pa rodi o' pa mhuargot la nhio'la geni, ne nal owa'ana o'ola mtatangen ululu, ne hota o' ed mak kala Firaun larni emekto'a mak ler de la'a ler maka omlia'a mak khi'a yemyemannu. 14 Mere mhoratreri a'u, la'pa mlier la kalwiedni-paitiotni, de mtiutga ralam kalwiedmu mai a'u, de mpuahaur nohora a yeh'wu la Firaun, me ntulan pa nalgota a lia nhio'la gen di ralamni. 15 Yoma a' di de ha kniamna' nan a'u, rwur niana-rgalam nana a lia makdena Ibrani re nohoni, ne la' handi mana a'g edonna ghi' nana hya'a-hya' maka kpa'eini-kpahala, mak kreinian de plola pa rodi a lia nhio'la gen di lienni ralamni." 16 La'pa mak khi' o'ta la mak karia roti natlin nana mi'ini de nnia'eratni samou wa, dewade nakot la Yusup niwra: "A'u muana amui' wali. Umkek de a'g e tiutul niana kriou wotel die rpenpuen lia kuksi. 17 La'a kriou nio'a heyanna de Firaun kukasni rupni-rupni erla ralamni, maka mak khi' roti nhi' nana, mere onu-ma'nu ra'an doinia la la'a kriou nio'a a o'tu wawannu de." 18 Yusup nwahla: "Hyalia, emkadilla mi'imu de nnia'eratni, de kriou wotelu re, de lera wotelu, 19 La'a ler wotel ralamni di de Firaun nhopan pa rodi o' pa mhuargot la nhio'la geni, ne nwairi o'ola au riri ida, ne hota onu-ma'nu rtotna ihimu no' inonmu." 20 Noka la'pa lera wotellu dewade la nlola, de Firaun lera ha rmoria, pa Firaun nhi'a ya'anlawna-yemunlawna la mak khi' o'tani la kniarni ralamni. Na'nama nodgiota mak katiaka yemyemnu de nor wutga mak katiak roti die la ir honona gaini ralamni. 21 Mak katiaka yemyemun de, nal owa'ana pa nawal lia mtatangenni, nhi'nande nla nodi owa'ana Firaun larni la, 22 mere mak khi' o'ta la mak katiak roti die, rla rwairia emolmolla lira maka Yusup nakot oleka rla. 23 Mere mak khi' o'ta la mak katiak yemyemnu de edonna nhorat nan et miemna Yusup wa.
Firaun mi'ini
1 La'pa lardoini anni wor lia (ler maka Yusup nwet nana Firaun hopopanni rora mi'ini) noma Firauna nmi'a, de e ntutrier lia gerlawna Nila aratni. 2 Namkek la gerlawna Nila ralamni de hayori wo'itu mak kapetna me klita-kwora. Noka rlergot la gerlawna ralamni pa ra'an wewan no'a gerlawan de aratni. 3 Nhor nioka namkek nan owa'ana hayori dom pali, liawanni wo'itu rlergot la gerlawna Nila de ralamni. Hayori ri rpo'ora-rpaiti me inonni re yotyata. Noka rla rtutrier lia hayori mandiditu mak kala' ulu re onni, la'a gerlawan de aratni. 4 Hayori maka kpo'ora-kpaiti me inonni yotyata re ra'ana hayori mandidit muaka kapetna me mak inonni klita-kwora re. Dewade Firaun namat wa. 5 Nhor nioka nanin owa'ana noka nmi' owa'an re'eni wornu, namkek de metma harni wo'itu rhargot la onni ida de na'unu-nayeha. 6 Mere nhor nioka namkek nan owa'ana metma harni wo'itu dom to'a, maka anin tipru rhi'a pa rapliau. 7 Harni mak kilta re rtelan nan hare mandiditnu mak ka'unu-kayeha re. Dewade Firaun namat wa. Mere hadi e nmi' to'a. 8 La'pa yawyawar ma'ta de ralamni edon namtemna, noka nhopan pa rpolg awoka mak katga khi' ukru-rehera Mesir re honona. Firaun nwahaur nohora mi'ini rla mere riy id mana edon nala nnia'eratni la. 9 Noka mak khi' o'ta la mak katiaka yemyemun de nakot la Firaun: "Ler di de na'nama aghoratnana a do'u-ha'lu mak ululu. 10 Ler maka matro'mu nawenan la am die, noma rho'la agora mutwua'lu la mak katiaka ray romni ralamni, 11 de, la mela ida amro'a mi'a, mere rima-rima nor mi'ini me nnia'eratni. 12 La hande de, tuwgari Ibrani id nor rewre'w ami, mak katiaka ray romni hopopanni de, ampahaur nohora ami' mamni la, noka nwahaur nohora rima-rima mi'ini na'itra nnia'eratni memna. 13 Ne emolmolla maka ha nakota mai ami, emkadella pa la nlola de a'uwali owa'an la a mtatange'nu ne a mutwua'lu mana rla rwairi wenna." 14 Nwahauru pa nhorwua noka, Firaun nhopan pa rpolga Yusup. Pleta-plet pa ralgota la nhio'la geni ralamni, ni'ir doini nurnu wullu, me nhernu naniayarni noka nla'awa Firaun gaini. 15 Rla' noka Firaun nakot la Yusup: "A'g e mi'a, ne riy id mana ta'en niana nwet nana nnia'eratni, mere a'utlin nan olek o'owa, riwra hornama mutlin nan to'a mi'a, dewade omukota nnia'eratni." 16 Yusup nwahla Firaun: "Matroma, edonan toto'a mai a'u, mere Uplerlawna ed maka hota kade'et nohora lira wniahla kalwied la matro'mu Firaun." 17 Noka Firaun nakot la Yusup: "La mi'u di ralamni de a'g e tiutrier lia gerlawna Nila aratni, 18 Noka umkek de la'a gerlawna Nila ralamni de hayori wo'itu rhargot de rapetna me inonni rlita-rwora, ne ra'an wewan no'a gerlawan de aratni. 19 Mere nhi'noka umkek nan owa'ana hayori wo'itu rhargot de ulatni rwow rer tio'a rurni, ne rpo'ora-rpaiti, a'g edon umkek ma'ta maka yatni emkarella la'a noh Mesir di wawannu. 20 Hayori maka yata me kpo'ora re ra'ana hayori mandiditnu mak kapetna me mak klita-kwora re. 21 Mere apannu edonna rmarna, me ndella genni. Noka a'umat wa. 22 Amui' wali de metma harni wo'itu mak klipa-ka'ma rlergot la onni ida. 23 Mere nhi'noka umkek nan metma harni mak kerna me mak anin tipru nhi' apliaga de wo'itu, rhargota. 24 Harni mak kahgali me kilta re rlumu hare mandiditnu mak ka'unu-kayeha re. Ukot olek hadella mak katu re honona, mere id mana ta'eni nwet nana nnia'eratni mai a'u." 25 Noka Yusup nakot la Firaun: "Matro'mu Firaun mi'ini rora re ramneneha. Uplerlawna Nakot oleka la matro'mu Firaun hya' maka Uplerlawna Niwra Nhi'a-nyapia. 26 Hayori mandiditnu mak klita-kwora rde anni wo'itu, ne metma har mandiditnu re mana anni wo'it wuali, mi'a rora, ramneneha. 27 Hayori mandiditu mak kpo'ora me yata maka khargot la li'iru rde, de nnia'eratni de anni wo'itu, emekwali metma har mandiditnu mak kapliau me kahgali onnila anin tipru rde, nnia'eratni de hota anni wo'it die rehka-lara. 28 Emekto'a a'ukot olek la matro'mu Firauna, Uplerlawna Ntutga la matro'mu Firaun hya' mak pena Nhi'a. 29 Hota la'a anni wo'it ralamni de pripanni-fa'anni la noh Mesir di wawannu tetema. 30 Nhor diemade hota anni wo'it die rehka-lara, nreiniande hota rhorat doini anin mandiditu muaka kodi pripanni-fa'anni re, yoma lar de nhi'a noh di pa nkerna-nhau. 31 Hota edon ramkek nan etia pripanni-fa'anni korni-tre'eni onnila lar de, yoma lar matmiat miemna di. 32 La'pa Ntut lia mi' de re'eni wor lia matro'mu de nnia'eratni de, hade de Uplerlawna Net tiarg oleka, de edon nalo'ona ne Uplerlawna Nhi'a. 33 Hade pede samounu de matro'mu Firaun nwahak nana riy mak katu me maka wniarora plalahwani ida, pa mriana pa nhi'a mak kodi plolli la noh Mesir di wawannu. 34 Samounu wal die Matro'mu Firaun nhi' emkadi, de de mpuagamtatna mak katu klina-kmat la noh di, ne la'a anni mandidit muaka pripanni-fa'anni de rawoka id la nhiakra wolim la'a Mesir di wullu-we'elli. 35 Rawok memna yamanna hya'a-hya' to'a la'a anni-anni pripanni-fa'anni mak kala' ulu ri, ne la'a matro'mu Firaun plolli-mneheni de raniutnia metma wo'oni la leta-let lawna re emeka ha yaya'ana pa rwatierun targa. 36 Emkadella yaman ara re rla'a yamanna wniaho'a-wniatiernu totpa hota ra'ana la noh di la'a anin mandidit muaka lara ha nwewar nan la Mesir di tetema, totpa noh di yana npohra-niata onnila la lara."
Yusup nhi' mak kodi plolli-ktaryatnu la'a Mesir
37 Firaun nora tniutnu-nhianni-nhielli-liarni honona re rwayow nohora wakwak de yoma rlina-rmata de samoga. 38 Noka Firaun nakot la tniutnu-nhianni-nhielli-liarni re: "Ama-hyal miy re, hota it edon tlernana riy dom mak emekto'a Yusup di, de riy maka Uplerlawna Nhiwni Npenpuenu-nanahala ralamni." 39 Firaun nakot la Yusup: "Ama, onnila Uplerlawna Nakot momuou oleka hari tio'a, mak katu me mak ktarga wniarora-wnialai samomuou id mana ematia' o'a. 40 O' ed mak kla'a mak kodi plola-ktaryat lia ro'mu nayanni, ne lima-rora honona re ratlina-ratailla hopopna-lili'irmu, mere enekneka a' tio' pa a'g edon utlin la tiy o'a. 41 La hadi wawannu pede, atiutmuata-kiewra'u pa mlia'a mak kodi plola-ktaryat lia noha Mesir wawannu." 42 Nhor nioka Firaun nur dioinia kdieli maka nhi'inde ndidnia pa nodi plolli la kniarni wawannu, na'nama nohoga la Yusup okarni. Nhor nioka nala koka mnurnuhru la Yusup nnairia, ne nwairia wui miaha la tiernu. 43 Noka Firaun nhopan Yusup pa la nha'ata kereta, ne riy riarin nohor la Yusup de rhaun pa niwra: "Kalwiedoo!" Emkadella la'a Firauna nrana me ntutmuata-nkewra'a Yusup pa ndella Firaun walli malganna pa nodi plolli la Mesir wawannu. 44 Firaun nakot la Yusup: "Ama, omuatg olekaw de, a' di de ray Mesir, mere la'pa o' edon mpuayow nan riy, de riy id mana ta'en niana nwo'la-nlekur la Mesir di ralamni." 45 Noka Firaun nala Yusup pa nwawa Safnat-Pa'aneah, ne na'ala Potifera a'nani Asnat pa Yusup nhi'a la hawni. Potifer di, de makpolwunu-kwaklera no'a leta Ona. Emkade pa Yusup de emeka mak kodi plola-ktaryat lia noha Mesir. 46 Yusup aninni terampwotelu la'a ler maka Firaun nhi'a la hopopanni, noka Yusup naltaru Firaun pa la nwakdior momuou Mesir uhunu-ewatni-ewatni-lahwani. 47 Lowan de, nala wullu-we'elli nniutni-nniutni la'a anin mandidit muaka kodi pripanni-fa'anni de. 48 Noka Yusup nawoka hya'a-hya' maka ha rara'ana la Mesir wawannu la'a anin mandiditu re, na'nama rwaho'a-rwatiernia la leta-letlawna re. Lowan mak kdella letlawna re onni de wullu-we'elli rawoka la leta-leta re ralamni. 49 Emkade pa Yusup naniutnia metma rde harahu rehia pa emeka en liu'wu-tan miakum no' eni wawannu, nreiniande edon nrekn owa'ana, onnila harahu rehi pa ta'eni rrekan nana. 50 La'pa anni mandidit muaka kodi rehka-lara edonna nmai mia'ta de, Yusup hawni Asnata na'ana nana muanke'a wor lia Yusupa. 51 Yusup nweta a'nani yanul die Menasye, (nnia'eratni de, nhoratdoini), yoma niwra: "Uplerlawna Nhi' a' pua ghoratdoin memna a ralam meh'ru me a'mu romni." 52 Ne a'nani gari de nweta la Efraima (nnia'eratni de, pripanni-fa'anni liawanni) yoma niwra: "Uplerlawna Nhi' a' pua liernan pripanni-fa'anni la gen miaka aghoptutu-ghopler la." 53 La'pa anni mandidit muaka kodi pripanni-fa'anni la' Mesir de nlardoinla, 54 dewade anni mandidit muaka kodi rehka-lara nmai wia, la' noha-rai korni re lara nwewar nana, mere la' Mesir de yamanna erla emeka hya' maka Yusup nakot oleka la. 55 La'pa Mesir noh tetema nler la lara ne lima-rora rwak meman la Firaun pa nala yamanna, dewade Firaun nakot la makden Mesir re: "Mlia'awa Yusup de pa mhi'a hya' maka ha nakota tiy miy." 56 Lar de na'ititar lol to'owa pa nwewar nan noh Mesir tetema, pede Yusupa nhari dudanni (gudang) re honona pa na'olu metam la makden Mesir. 57 Ne la'a riy mak kdella noheri-woru lyanti nayanni mana rmai Mesir pa rawelia metam la Yusup, yoma lar de lawan rehi la nohkerna-rai miaran tetema.
Yusup hyalli re rla' Mesir
1 La'pa Yakopa natlin nana kota-de'et de metma harahu la Mesir, dewade nakot la a'nani re: "A'nami re! Nihya'pa miy idma namkek rer tio' ida?! 2 A'utlin oleka, de metma harahu la Mesir, mlia'awa hande pa miwelia metam mai ita, totpa it tmormiori, yana tmati." 3 Noka Yusup hyalli termida rla'awa pa rla rawelia metam la Mesir. 4 Mere Yakopa edon nolin Yusup garni Benyamin pa nor hyalli re talla, yoma nwarora de: "Yanhi'pa la'pa nler la yatyatni." 5 Pede la'a riy mak kma kawelia metma ri, de Yakopa (Israel) a'nani mana erla' wali, yoma lara mana nwewar nan wali noha Kana'ana. 6 Ler de de Yusup ntorn oleka Firaun limni walli malganna la'a noha Mesir, e' mak ka'olu metam la noha re mniotni. Pede la'pa Yusup hyalli rmai, rla rwaltior la e gaini ralamni na'nama ruh' idma-rrama lia'ara. 7 La'pa Yusup namkek nana hyalli rde, pletpa natga re, mere nhi' yehwani la hyalli re emolmolla riy meheni. Noka Yusup nhok temna re, niwra: "Mimpiatiawua hanmeni?" Rwahla riwra: "Ampatiawua Kana'ana pa ma mawelia yamanna matroma." 8 Plola pa Yusup natga re, mere ir edon ratga e'a. 9 Noka Yusup nhoratnana mi'ini la'a hare. Noma nakot la re: "Miy di de mak kwuw miy, miy e mihaka geni miaka makodi keki-rautu edon ratiaka." 10 Noma rwahla riwra: "Edonna matroma! Toto' memna ma mawelia ha yaya'ana to'a. 11 Am di nek de riy ida a'nani a hononami, ne am di de mak kwuw atia'a, mere riy ploloi-plele'era ami." 12 Mere Yusup nakot la re: "Edonna! Miy mmiai di de, miy e mimkeka noh di, yanhi'pa edon ratiaka." 13 Noka rwahla: "Edonna matroma! Atmu am di de riy termida wehrani worg ami, ampahyali, riy id la Kana'ana a'nani ami, mere gari hoho'a e nwarin wut lia a am mamni, ne riy id demade nmolg olekwa." 14 Noka Yusup nakot la re: "Edonna! Agatga de miy di de mak kwuw miy emeka a'ukot oleka tiy miy. 15 Aliokra la Firaun nanni, de hota atia'u miy, de de hota miy edon mpiaran la handi, la'pa hyalmi gari hoho' de edon miodia mai handi. 16 Mhiopna riy id tiy miy nla nala garmi de, mere miy korni de mpiarin pia rho'la miy la roma nhio'la. Totpa la'pa rwerta-rtaili lirmi plolli, plola pa naplola, me edonande plollolli de miy di de mak kwuw miy." 17 Noma rho'la rewre'wa rla lera wotel ralamni. 18 La'a lera nla'awa wotellu dewade Yusup nakot la re: "A'u'unni-umta'ata Uplerlawna pede aghopan pa mhi' emkadi, totpa miy di mmiormiori aplalahwa. 19 La'pa miy di de riy ploloi-plele'er miy, mialtarga riy id pa rho'la targa la nhio'la geni ralamni, mere miy mlia'awa pa miodia metma rpa ralla radarga lara la rommi mniotni. 20 Mere hyalmi gar die miod miemna mai a'u, totpa agatga de lirmi re plola pa naplola, ne yana rwenan miy." Emkadella pa rhi' nana. 21 Mere idma nakot la ida: "Toto' pa it takwara it do'oni-halli la it garni de. Itamkeka emkameni la ler ululu Yusup ralam mehrani, la'a nwak it ralam kalwiedwedni mai ita, mere it tahmena tatlin la polpuollu-wakwakni. Hade pede dodo'ondi de itlernan ralam mehrani wniahlani." 22 Noka Rubena nwahla re: "Hyal miy re, miat niohora de ukot oleka la ler ululu de: "Yana mhi' do'a-myap hial la tuwgar de", mere mihmen mitlin la li'ru-tu'nu. Ler di de Uplerlawna Nwaka rarni wniahlani mai ita." 23 Rakot emkade mere raplinga, de Yusup e nat niohora yawalli re, yoma nnairia mak kla'a lirletgara ida (juru bahasa). 24 Noma Yusup nwadur la gaini ralamni re na'nama nmeh'a nkakru. Nhor nioka nawali owa'an la re, ne nora rwahauru. Noka na'ala Simeon la ir mutnu de, noka nhopna rwutga Simeon la hare gaini ralamni. 25 Nhor nioka Yusup nhopna rahara metam la kadnu re, ne rima-rima kupanni re rkeni owa'ana la kadnu ralamni, ne wareherni la talan letgara mana ral walia hare. Emkadella ha rhi' nana rla. 26 Nhor nioka rrana metamni rella keledaini wawannu noka rwaran la hande wa. 27 Mela pa rden la rien geni, de la'pa riy ida newar kadnu pa niwra nalla keledaini na'ana, namkek de kupanni etla kadnu ralamni. 28 Noka nakot la hyalli re: "Mimkeka, rpolla a kupnu, etla ka'du ralamni." Noka ralamni re worworga, noma idma namkek la ida, de de rdiwra-rda'ala ne riwra: "Nee! Hya' ed mak Uplerlawna Nhi' nana mai it dina?" 29 La'pa rla'awa amni Yakopa la noha Kana'ana, dewade rwahaur nohora hya' maka rlernana, riwra: 30 "Riy mak kla'a upa-matrom la noha Mesir de nhoktemn ami ne nhi' am die emolmolla mak kla kwuw gen de. 31 Mere a lir mamni la, am di de riy ploloi-plele'er ami, mak kwuwu atia' ami. 32 Am di de riy termida wehrani woru ampahyali, mere riy ida nmolu olekwa, ne gari miamni e nora am mamni pa erla Kana'ana." 33 Noka riy de niwra: "La hadi wawannu de nanpa agatga de miy di riy ploloi-plele'er miy me edonna, la'a mak kwahyali miy, mialtarga riy id mai a'u, nhor nianpena miodia metammi ri pa mlia'awa pa midarga lara la rommi mniotni. 34 Dewade miodia hyalmi gar die mai a'u, nanpa agatga de miy di de mak kwuw atia'a mere riy ploloi-plele'er miy, ne pena apuolla hyalmi di tiy miy ne nhi'nanpena miy e mila' wewewar la noh di ralamni pa mpiadakna."" 35 Raltieri pia nhorwua noka la'pa rahgali kadnu rde ramkek de rima-rima kupanni genni erla kadnu ralamni, la'pa rora amni ramkek rewre'wa kupna re genni, dewade ramta'ata. 36 Ne amni Yakopa nakot la re: "A'na miy re, miy mhi' a' pua a'umolga a'nu re, Yusup edonan wa, pa Simeon mana edonan wa, dodo'ondi miwra miod wialia Benyamina. Rhi'a kwar lawan mai a'u." 37 Noka Ruben nakot la amni: "Papa, a'nu muanke'a rora pena mpuenna, la'pa a'g edon godia Benyamin tiy o'a. Mutiemna Benyamin la a li'mu ralamni, la' pena agodi uwal tiy o'a." 38 Mere Yakopa nwahla niwra: "Ama, a'nu di edon nor miy tialan pa mlia' rewre'wa, yoma kakni nmati olekwa, ne tre' ma'ta e nmemeh'a to'a, ne la'pa nlernana yatyatni-halalli yatlorni-yatra'ani la talan maka mliola, de de miy di ed mak kariei pia aghamtoto' nohor pa gerun la hoi-kietra ralamni de godia ralam mehra."
Yusup hyalli re rla' nan re'eni wornu la Mesira
1 Mere lar de lawan rehi ma'ta. 2 Pede la'pa metam maka ha rodia la Mesir de ra'ana pa nhorwua, dewade amni nakot la re: "A'nami re, mlia miweli owa'ana yamanna oke'a mai ita." 3 Noka Yehuda nwahla: "Ama, riy de nwagahniort ami niwra: "Miy di yana mimkek a ga'yu, la'pa garmi de edon nor rewre'wa miy talla." 4 Hade pede la'pa omuala gar miamni pa nor amtialla, de ampayow pa amla' hande ne amaweli yamanan tiy o'a. 5 Mere la'pa omuhmena mhuria pa nla'a, de am miana amahmena mla' hande, yoma riy de nakot olek la ami de: "Miy di yan mimkeka a ga'yu la'pa garmi de edon nor rewre'wa miy talla."" 6 Noka Yakopa niwra: "A'na miy re, nihya'pa miy miala wniarora-wnialai liawna mai a'u, onnila mikot la riy de, de garmi ida edama?" 7 Rwahla riwra: "Yoma riy de natiana plu'wu-plehu ami la'a a inon mamni me a am mamni-hyali miamni, lup muamni-rom mamni, de natiana emkadi mai am die niwra: "Ammi nmormior mia'ta? Garmi erla?" Ne amakot momuou oleka honona la emeka plollolli. Emkameni pa amla mparor nana de, pena nhopan pa amodia gar mamni de pa mla e'a?" 8 Noka Yehuda nakot la amni niwra: "Ame, muolin doin tuwgar die pa nor a' tialla, totpa ampahi'a-ampayod pia mla'awa, totpa tmormiori aplahwa, yana it hononita tmati. 9 A'g ed mak kakwar hade, la' pena mtio'ona hade mai a'u, la'pa a'g edon godia hade tiy o'a me awuagamtatna la gaimu ralamni, de a'g ed mak khi' do'a-kyap hial tiy o'a pa nodi liarni. 10 La'pa it edon palo'on it mana, it talanni re'eni worg olekwa." 11 Noka amni nakot la re: "La'pa hade emkade de, mhi' emkadi: Mia'ala noh di wullu-we'elli mak samomuou muemna la'a kadmi ralamni, ne miodia la riy de emeka limtutmi. Miala ortawi-autiawi oke'a pa rala ratiaka mehrani, me oke'a mak huwnu mikmikri, me gani oke'a, na'itra duhru-lawruru wo'oni. 12 Ne miod kupna, mi'itar la pa liawanni re'eni woru, kupan maka npolla la kadmi nurnu re, miodi owa'ana pa miwali, yanhi'pa nhiortaplin tio'a. 13 Miod wialia garmi de, pa miwal lia riy de. 14 Awuakwak de, Uplerlawna mak kodi plolli-ktaryatnu Nhi'a riy de ralamni pa nakwali, totpa ralam kalwiedwedni tiy miy, demade nolin doini hyalmi handin de nora Benyamina pa rawali. Mere la'pa rmol wua de, ah! Ariorta'ru olek hadewa." 15 Noka Yakop a'nani re ra'ala limtutnu rena, me kupna liawanni re'eni woru ralamni, na'itar wutu Benyamin wali pa rla'awa Mesir wa. La' noka rla rtutrier lia Yusup gaini ralamni. 16 La'pa Yusup namkek nana Benyamina nora re talla, noka nakot la mak khi' o'ta la e romni niwra: "Muodia riy ri, pa mlia'awa a ro'mu nayanni, mriotna nhiuri-wnia'ana id pa mpuahi' targa, yoma riy ri hota ror pa ma'an rewre'wa la lera pniahnani di." 17 Riy de nhi' emolmolla maka Yusup nakot targa la, de nodia riy re rla'awa Yusup romni nayanni. 18 Noka riy re ramta'at wenna, yoma rodia pa rla'awa Yusup romni nayanni. Riwra: "Mak katota-kariei pia rod it la handi, de la' kupan maka ha rpolla la'a it kadnu la ululu de. Rod it mai handi totpa rtorn ita pa rhi' it la ata-wa'ara, me it keledaini re mana ra'ala." 19 Hade pede rrehgoru mak khi' o'tani la Yusup romni. Riy de etla romni de nhiarni gaini, noma rakot la: 20 "Ampak pa maltieri matroma. Am di ululu de ma mawelia yamanna. 21 Mere la'pa am mte'ela gen miaka amanin la, ne am mpe'era kadu muamni nurnu, de mamkek nana rima-rima kupanni erla kadu nurnu de edonna npa'eini-npahala la maka ampairi oleka. Mere dodo'ondi amodia pa mawal wia. 22 Kupna handina re mana amod wialia pa ralla rawel yamanna, amaplin niohora he' ed mak kenia kupna rella a kad muamni." 23 Mere nwahla niwra: "Mmiolmiolmi, yan mimta'ata, mak kla' Uplerlawna la miy miora ammi, Nal oleka tiy miy re'a-tniaru mak kdella kadmi ralamni, kupanmi re aliernan oleka la dodo'ona." Raltieri pia nhorwua noka nalgota Simeon pa nod wutga rla. 24 La'pa riy de nodia rpa rla'awa Yusup romni nayanni, dewade nala gera pa ralla rohma lakni, ne keledaini re mana ralla ra'an wali. 25 Nhor nioka rwahi' targa limtutnu re, rweiya Yusup nmai lia lera pniahnani, yoma ratlin nan oleka de hota ra'an la hande. 26 La'pa Yusup npolan wa dewade rala limtutnu re rella Yusup la'a roma nayanni, noka rwaltiora-rwaltieman la. 27 Nhor nioka natiana re niwra: "Miy e mkialwiedweda? Emkameni la ammi de e nkalwiedwed pa edama?" 28 Rwahla riwra: "Matroma, atmu de, e nkalwiedweda." Nhor nioka ruh' idma-rrama lia'ar la Yusup wa. 29 La'pa Yusup nakillia de, namkek nana garni Benyamina maka rrora inni ida, noka niwra: "Hadi de gari hoho'omi maka ha mikotkota mai a'u hadina?" Noka lirni la Benyamina niwra: "Awuakwak de Uplerlawna Nala ra'ani-pallu tiy o'a ama!" 30 Noka plet pa Yusup nwaran la hande, yoma ralamni nmawal doin la, onnila ralamni nmayo'odoin la garni. Noma nahak gen pia la nkakur la. Noka nla'awa rialam la kamri pa nko'a-nkakur la hande. 31 Nhor nioka nla narar gaini noka nlergot wa. Natahan ralamni na'nama niwra: "Mhioi-mtian lia mei wawannu." 32 Noka rkenia Yusup ya'ana-yemannu la' genni ida, ne la'a hyalli re mana rwamueh' geni, ne makden Mesir mak ka'an rewre'wa re mana rwamueh' geni. Yoma makden Mesir re yana ra'an wut lia makden Ibrani, yoma yehwa mak emkade makden Mesir makriarni. 33 Yusup nhopan pa hyalli re ramtatna la Yusup gaini ralamni, ntawua yanulu pa nodia pa ntut lia gari, nhi'nande idma ramkek la id de ema rtaplelleltarga. 34 Noka ra'ala ya'ana-yemun mak kdella Yusup meini wawannu pa rkenia la hare meini wawannu. Mere maka Benyamina nlernana rde liawanni narehi re'eni wolim ralamni la hyalli re. Noka ra'an wutu-remun wut lia e'a, me ramuki-rahepur wut rewre'wa la.
Yusup larni nmolu noka rlernana owa'ana
1 Nhor nioka Yusup nhopna mak kla' o'ta la mak kar lia romni niwra: "Muahar metam la hare kadnu, wo'ira-wo'ir de nlernohor rurni pa rodia, ne mkienia rima-rima kupanni maka ral oleka a' die, la rima-rima kadnu nurnu. 2 Ne lari maha wawahra maka aniair de, mkienia la gari kenkenna kadnu ralamni la metma walli heyanna, ne kupna metamni welli wali." Noma nhi' emolmolla Yusup nhopan targa la. 3 La'pa lera matni npah'a, de riy rma rollia pa rla'awa ra'itar wutu keledaini re. 4 Mere la'pa na'nama rhargot la let de, edon oliet ma'ta, dewade Yusup nakot la mak kla o'ta la e romni de niwra: "Mlia' pa mhuokra riy re, ne la'pa mdiamit nana rde, mukot la re: "Nihya'pa miala yatni ma mpiahla riy kalwiedni? 5 Edon miatga de, lari die matro'mu nnairia pa nemun la, ne nhi' de nnairia pa nhi' rehera? Miy e mhi'a nhiol yatyata la ilu-yehwa mak emkare."" 6 Noka nla'awa. La'pa ndamit nana re dewade nakota hya' maka Yusup nakot targa la. 7 Rwahla riwra: "Matrome! Nihya'pa matro'mu nakota hihi'a-yapyap miak emkadena? Oliet am lia nhiol miak emkade. 8 Kupan makden kadu nurnu mana amodia mtawua Kana'ana pa mpolla! Nhi'wal pia amla mkamna'a maha-maha wawahra la matrommu romni?! 9 La'pa mliernana lari diella he'-he'ela atmu am di, de ndella pa nmati, ne am di pena am la'a atmu-wa'armu." 10 Noka Yusup hopopanni de nakot la re: "Yowa, hyal miy re, wakwakmi de samoga, mere la'pa aliernana lar diella he' de, hade nmeh'a nla' a'tu, ne korni miy die rolin miy lia' hala wawannu." 11 Noka pleta-plet pa rima-rima ralernia kadnu re nhor nioka rharia. 12 Noma mak kla' o'tani la rom de nloha-nlil samomuoga, nala' ul lia yanulu pa nod lia gari, dewade rlernana lari maha wawahra della Benyamina kadnu ralamni. 13 Dewade rlihirrawria rayanni re (yoma ralamni re rmawaldoinla), ne rima-rima rran owa'ana kadnu la keledaini re wawannu, ne rawal lia Yusup letni. 14 La'pa Yehuda nora hyalli re rte'ela Yusup romni ralamni, de Yusup ed ma'ta la hande, dewade honona rwaltiora-rwaltieman la gaini ralamni. 15 Yusup nakot la re: "Hya'a nhiol miaka ha mhi' nan dina? Miy edon miat niohora la'a riy ida emek a' di, de agatu ghi' rehera totpa agat niohora hya' maka miy mhi'a de?" 16 Nhor nioka Yehuda naltier pia niwra: "Hya' mak hota amakota la matro'mu, hya' maka hota ampahla, ne amala hya'a la ma mhi'a plola a inon mamni? Uplerlawna Nalhari oleka atmu a do' mamni-hal mamni. Noma am di de matro'mu atni ami, ami me riy maka rlernana lari diella." 17 Mere Yusup nwahla niwra: "Olieta mai a'u lia hihi'a-yapyap miak emkade. La'pa rlernana lari diella he' de, hade ed mak kla'a a a'tu, mere miy di mliol kalwiedni pa miwal lia ammi."
Yehuda nhernia Benyamina
18 Noka Yehuda naprir pia nwakriania Yusup na'nama niwra: "Mtiulan pa mrieililili-mua'mamuau atmu a li'ru, awuak de yana muwenna yoma matro'mu de emekwali Firaun. 19 Matro'mu natian olek la atmu ri: "Hyalmi me ammi ed ma'ta la?" 20 Noma ampahla matro'mu miwra: "Amtaru mua'ta ama mak khamto' olekwa, ne a'nani gari mana ed wal lia, maka rmor niana la mto'oni-pe'eni, kakni nmati olekwa, tre' ma'ta to'a ha nmeh'a la ir maka inni ida, nhi' pede a am mamni ralamni nal ralam kalwiedwedni nal toto'ola". 21 Noka matro'mu nakot la atmu am di niwra: "Miodia mai a'u totpa ma'tu namkek memna". 22 Mere ampahla matro'mu: "Tuwar die ta'en niana naltarga amni, yoma la'pa naltarga amni, de hota amni de nmat tioto'a". 23 Noka matro'mu nakot owa'an la atmu ami niwra: "La'pa garmi de edonna ma miora talla, de yana mia mimkeka ga'yu di owa'ana". 24 La'pa amawal lia atmu a am mamni, dewade ampahaur nohora matro'mu lirni della. 25 Noka lera ida a am mamni niwra: "A'na miy re, miwal pia miwel niana yamanna oke'ela mai ita". 26 Mere ampahla: "Ami edonna mla' hande. La'pa a gari miamni nor am tialla pa amla' rewre'wa, nanpena amla' hande, yoma am di ta'en niana amamkeka matro'mu gaini, la'pa gari hoho' mamni edon nor rewre'w amtialla". 27 Nhor nioka atmu a am mamni nakot mai ami: "A'na miy re, miat niohora de, ha'wu na'a'na nan keke'eni woru mai a'u. 28 Ida naltarg a'u olekwa, ne a'ukot olekaw de: "Toto' meman pa porni-dawarni rlihira-rnai oleka wa ne la'pa dodo'ondi mana edon umkek owa'ana." 29 La'pa mia' owa'an la keke'en di, ne hota nlernana yatyatni-halalli yatlorni-yatra'ani, hota miy mhi' a' pua aghamto' olekwa di pa muati, agodi ralam meh'ru." 30-31 Noma dodo'ondi, la'pa atmu alia'awa a a'mu, mere a gar miamni de edon nor rewre'wa am tialla, de la'pa a a'mu namkeka gari miamni de edon nora de hota nmati, yoma a'mu ta'en niana nmormior la'pa a gar miamni edon nora. Hota atmu am di mariei pia a' am mamni mak hamto'a de nmat die nodia ralam mehrani. 32 Mere atmu a' di, ukwar oleka gar mami della a'mu nora li'ru: "La'pa a'g edon godia pa uwal niohora la a'mu, de a'g ed mak khi' do'a-kyap hial la a'mu pa nodi liarni". 33 Hade pede, samounu de, atmu a' di wuarin pia ghi'a at la matro'mu, aghernia a gari miamni di, ne muollia gari miamni de nora hya'lu re pa rawal wia. 34 Yoma emkameni pa a'uwal lia a'mu la'pa tuwgar die edon nor a'u tialla? A'g edonna tiahan pa umkek reria yatyatni-halalli yatlorni-yatra'ani ntuin nan a'mu."
Yusup ntutga inonni la hyalli re
1 La' ler de de, Yusup ta'eni ntahan nana ralamni la'a hopopanni-lili'irnu rahu mak ktutrier lia onni, noka nhaun pa niwra: "Mhuopna riy honona ri rlergot la handi." Hade pede riy dom id mana edon nora Yusup rden rewre'wa hande, la'a ler maka ntutga rupni la hyalli re. 2 Mere nkakur doin la, nhi'nande makden Mesir me ray romni mniotni ratlin nohor wal lia. 3 Ne Yusup nakot la re: "Hyal miy re! A' di Yusup a'u! It amni e nmormior mia'ta?" Mere hyalli re ta'en niana rwahla, yoma rdella gaini ralamni de ramta'at wenna. 4 Noka Yusup nakot la hyalli re: "Mia mriehgorgorga." Noka rma rrehgoru. Nakot owa'an la re: "Hyal miy re, a' di de Yusup a'u, hyalmi a'u, maka mi'olga la Mesir de. 5 Mere ler di, de yana mimawal ralammi, ne yana miehela inonmi, yoma mi'olg a lia handi. Yoma Uplerlawna Nhopna a'ula' ul lia handi, totpa Nalewna riy mormiorni-dardiarni. 6 Yoma nala' nohora anni wornu la lar dilla noha di, ne tre' ma'ta anni wolim ma'ta de, riy ta'en niana rwal tiani me rreiki-rwo'ora. 7 Hade pede Uplerlawna Nhopn oleka a'ula' ul miy, totpa duratmi-waitmi ler li'iru mai noh di wawannu de ed ma'ta la, ne totpa ralewna mormiormi-dardiarmi, nhi'nande liawanni tiy miy mliernana mormiori-dardiari. 8 Pede plolli de, miy edonna mhiopn amuai lia handi, mere Uplerlawna mak khopna a'u. E'a ed mak kwagamtatna a'u emeka ama id la Firaun, ne matrom la romni nayanni honona, ne mak kodi plola-ktaryat lia Mesir noh tetema. 9 Plet pa mlia'awa it amni, ne mikot la: "A'namu Yusup lirni hadi, de Uplerlawna Nkeni olek Yusup pa emeka Mesir tetema matromni, omlia' pa mpuatrom Yusup, yana prei-pre'eta. 10 Hota mdiella Gosyen lowanni, ne hota mriehgorgorga Yusup, omuora upmu-a'namu, nhiurmu-wnia'anmu me re'emu-tniarmu honona. 11 La' hande pena Yusup ntera-ndem ita yoma lar di tre' ma'ta anni wolim ma'ta, totpa yana itler la rehka-lara, de de muor wutga rommu mniotni, ne it hononita mak kor o' talla." 12 Hyal miy re, mieh'a miala matmi mimkek oleka, ne la'pa ga'ru Benyamin wali, de de a' di de Yusup nmeh'a maka nakot oleka tiy miy. 13 Hade pede mpiahaur la'a it amni, de Mesir mniotni di ruh' idma-rrama lia'ara mai Yusup, me haneka-harah muaka mimkek oleka, nhor diemade plet pa miodia it amni mmiai wia." 14 Noka nkolla garni Benyamina tiernu, noka nkakur doin la, ne Benyamin mana nkakur la Yusup wawayanni wawannu. 15 Yusupa nkinnia hyalli re honona re, ne nkakur pa nkolla re. Nhor nia'nama hyalli re rora rwahauru. 16 La'pa rod kiota-ral de'et la Firaun romni ralamni de Yusup hyalli re rmai, Firaun nora tniutnu-nhianni-nhielli-liarni re rreiniana-ra'nana la'a kalwieda-paitiota ralamni. 17 Noka Firaun nakot la Yusup: "Mukot la hyalmu re pa rhi' emkadi. Rkenia ya'ana-yemun la nhiurni-wnia'anni re wawannu pa rla'awa Kana'an wa, 18 Rpolu amni, me romni mniotni honona rpa rma rwatrom a'u, pena agala hya' maka samounu meman la Mesir dilla miy, nhi'nande ir ror pa mi'in la noh di wullu-we'elli. 19 Aghopan wal pia mukot la re, miwra rhi' emkadi, irodia keretni no' Mesir re pa rodia hawni-a'nani, ra'ala ammi la hande pa rodi rmai wia handi. 20 Yana ralamni rmawal nohora hyonni-hyanni maka ha raltaru re, yoma hya' maka samounu meman la Mesir lowanni di de ir gahani hare." 21 Emkadella hya' maka Yakopa (Israel) a'nani re rhi'a-ryapia. Yusup nala kereta la, nlernohora Firaun nhiopanni, ne ral wali wareherni. 22 La'a hyalli re Yusup nala rima-rima gahani naniairi ida, Mere la' Benyamin de rala kupna harahu, de maha wawahra rahu wotelu me naniairi ananni wolim la. 23 Ne la' amni de na'enyatga keledai termida, rkenia hya' maka samounu meman la'a Mesir dilla wawannu, ne keledai rara termida, rodia metma, me roti la amni wareherni ne hya' hya' to'owa pa rnairia la talan letgara. 24 Nhor nioka nolin doinia hyalli re na'nama nano'a niwra: "Yana miwo'or la talan letgara." 25 Emkadella rwaran la Mesir pa rla'awa Kana'an wa, la amni Yakopa. 26 Rla' pa rwahaur la amni riwra: "Ama, Yusup e nmormior mia'ta, yaho'ma e' mak kodi plolli la Mesir noh tetema." Mere Yakopa ralamni nwoktiltilu, yoma edonna npesiay hare. 27 Mere la'pa rwe'er nohor samomuou Yusup lirni honona, ne la'pa namkek nana keret maka Yusup na'enyatu re totpa ralla rwatroma pa rodia, dewade Yakopa ralamni nmori owa'ana. 28 Yakopa naltieri niwra: "Dodo'ondi na'nama agat wua de, a'nu Yusup e nmormior mia'ta, agiwra lia umkeka, la'pa a'g edonna muat mia'ta di."
Yakopa nwaran pa nla'awa Mesira
1 Yusup nnio'oni na'itra hya' maka ha na'enyatga la amni, nreiniande Yakopa nwaran pa nodia re'eni-tniarnu honona noma rte' tar lia Bersyeba, noka nwunu-nwenan pa nhi'a la nhioi-tniani la mak kla' Uplerlawna la amni Isaka. 2 Noma mela ida Yakopa ndarat nana Uplerlawna lirni Niwra: "Yakopa! Yakopa!" Nwahla niwra: "Hya'a Matroma." 3 Noka Uplerlawna lirni: "A' di de mak khi' Uplerlawna la ammu A'u, yana mumta'ata mlia'awa la'a Mesir, yoma hota Aghi'u pa omuor duratmu-waitmu mlia'a hair lawna id la hande. 4 Amueh'a gor o' talan pa mlia'awa Mesir, ne A'g ed mak kodi o' pa kawali, ne Yusup limni ed mak kato'ma matmu ulatni." 5 Noka Yakopa nwaran la Bersyeba ne Yakopa a'nani re rodia amni ra'itar wutu ir hawni-a'nani, ne honona rnairia keret maka Firaun na'enyatua pa Yusup amni rodi rla'awa Mesir. 6 Rod wialia nhiurni-wnia'anni honona me re'eni-tniarnu maka ha rlernana la Kana'ana yapatni. Noka rte'ela Mesir wa de Yakopa nora duratni-waitni re honona. 7 Upni-a'nani re patke'a rora muanke'a, duratni-waitni re honona rodi momuoga la Mesir. 8 Yakopa, mak Uplerlawna Nwet walia nanni de Israel, duratni-waitni mak kmai lia Mesira de kotni-nanni emkadille: Yakopa a'nani yanulu de Rubena, 9 Ruben a'nani de: Henoka, Palu, Hesron ne Karmi. 10 Mak klernohora Ruben de, Simeon. Simeon a'nani rde: Yemuel, Yamin, Ohad, Yakhin me Sohar na'itra Saula. Mere Saul di, patke'a Kana'ana id a'nani. 11 Mak klernohora Simeon de, Lewi. Lewi a'nani de: Gersona, Kehat me Merari. 12 Mak klernohora Lewi, de Yehuda. Yehuda a'nani de: Er, Onan, Syela, Peres me Serah. Mere Er nora Onana rmat tiar lia Kana'ana. Peres a'nani de, Hesron nora Hamul. 13 Mak klernohora Yehuda de, Isakar. Isakar a'nani de: Tola, Pua, Ayup me Simron. 14 Mak klernohora Isakar de, Sebulon. Sebulon a'nani de: Sered, Elon, me Yahle'el. 15 Hare honona de, Yakopa hawni Lea duratni-waitni, maka nayor niana la'a Padan Aram na'itra Dina, de a'nani patke'a wali. Pede patke'a rora muanke'a honona de, liawanni de, terampwotelu wehrani wotelu. 16 (Yakopa hawa liahunu Silpa, a'nani yanulu Gad.) Noka Gad a'nani de: Sifyon, Hagi, Syuni, Esbon, Eri, Arodi me Areli. 17 Mak klernohora Gad, Asyera. Asyera a'nani de: Yimna, Yiswa, Yiswi me Beria. Serah de, hare narni patke'a. Noma Beria a'nani rde, Heber me Malkiel. 18 Hari honona de Silpa duratni-waitni de mak kayoria upa-a'na la Yakopa. Silpa de ata pat maka Laban nala la a'nani Lea. Silpa duratni-waitni honona de termida wehrani wonema. 19 Yakopa hawni Rahela a'nani de: Yusup nora Benyamina. 20 La'pa Yusup ndella Mesir, Yusup hawni Asnata na'a'na nana Menasye nora Efraim, la' ler maka Asnata amni Potifera nhi' rieher la leta Ona. 21 Benyamina a'nani de: Bela, Bekher, Asybel, Gera, Na'aman, Ehi, Rosyi, Mupim, Hupim me Ared. 22 Hari de Rahela duratni-waitni, maka na'a'na nana la Yakopa, honona re liawanni termida wehrani wogata. 23 Yakopa hawa liahunu Bilha, a'nani yanulu de Dan. Dan a'nani de: Husima. 24 Mak klernohora Dan, Naftalia. Naftalia a'nani de: Yahseel, Guni, Yeser me Syilem. 25 Hari honona de Bilha duratni-waitni mak kayor niana rella Yakopa. Bilha de ata pat maka Laban nala la a'nani Rahela. Bilha duratni-waitni honona de, liawanni riy wo'itu. 26 Riy honona mak kora Yakop pa rla'awa Mesir de a'na raralamni, edonna rrekan wutga la Yakopa a'nani re hawni. Liawanni honona de terampwonema wehrani wonema. 27 Yusup a'nani maka rayor niana la' Mesir de woru. Pede Yakopa luwnu mak kdella Mesir de honona, liawanni terampwo'itu. 28 Noka Yakopa nhopna Yehuda nala' ul pua nwatroma Yusup, totpa natiana Gosyen etla walli meni? Nhor nioka rte'ela Gosyen wa. 29 Noka Yusup nwahi'a keretni noka nla'awa Gosyen wa, nwatroma amni. La'pa nwatrom nana, dewade nkolla amni tiernu ne nkakur la amni wawayanni pa nodia pa mahneka. 30 Yakopa (Israel) nakot la Yusup: "Ama, dodo'ondi de awuayow pa muat wia, yoma a'umkek nana gaimu me agatga de o' e mmuormior mia'ta." 31 Nhor nioka Yusup nakot la hyalli rena me amni luwnu-a'nani re: "Ama-hyal miy re, a'ukotiwra lia'a Firaun de pa ukot targa la'a hya'lu me a'mu luwnu-a'nani mak kdella noha Kana'ana rmai olekwa, 32 hare de mak kodi pipi-duma, yoma hare honona rde maka khuri-kwa'ana nhiuri-wnia'ana. Nhiurni-wnia'anni me re'eni-tniarnu honona de rodi momuoga. 33 La'pa Firauna npolu pua natian miy die, hota niwra: "Mimkiari hya'a?" 34 Mpiahla miwra: "Atmu am di de a kniaria tnietihor mamni de amhuri-mpa'ana, la'a a kuku' memn ami, nodia pa dodo'ondi, emeka up mamni-tgar mamni rhi'a." Mikot emkade totpena Firaun nolin doin pa mdiella Gosyen lowanni. Yoma makodi pipi-duma de makden Mesir rmakriarnia re."
Yakopa nora Firauna
1 Nhor nioka Yusup nla nod kiota-nal de'eta la Firaun de: "Matrome, a'mu nor hya'lu re me nhiurni-wnia'anni me re'eni-tniarnu re honona, rtawua Kana'ana pa rmai olekwa, dodo'ondi de erla Gosyen lowanni." 2 La amni-hyalli re Yusup ntutga riy wolim pa nodia rla rharlira-rgotgai la Firauna. 3 Firaun natiana Yusup hyalli re niwra: "Ama-hyal miy re, miy kniarmi hya'a?" Rwahla Firauna: "Matroma, atmu am di de mak kodia nhiuri-wnia'ana, emeka up mamni-tgar mamni. 4 Ammai pia mdella noh di emeka do'ona-dakna, yoma la hande lowan poti-wewan mota nkerna-nhau niana ami pa mala mpua'ana nhiuri-wnia'an mamni ri, onnila lar de lawan rehia la Kana'ana. Hade emkade pede ler di de a wakwak mamni de, matro'mu nwayow nohor am pia, amdella Gosyen lowanni." 5 Noka Firauna nakot la Yusup niwra: "Ammu me hyalmu re rmai tiemn olek tiy o'owa. 6 Noha-rai Mesir nahniarniar tiy o'a. Mtiutga la ammu me hyalmu re gen miaka samounu muemna pa rdella' noha-rai di, de rdella la'a Gosyen lowanni. Ne la'pa omuatga de la' hare de riy mak katu ktorna nhiuri-wnia'ana, muala pa rhi'a mak katiaka nhiu'ru-wnia'anu." 7 Yusup nodia amni Yakop pa rla rhari lira-rgot gai lia Firauna. Noka Yakopa nwak pa Uplerlawna Nala ra'a-palu la Firauna. 8 Nhor nioka Firaun natian Yakopa: "Ame, mormiormu di anni wo'ir olekwa?" 9 Yakopa nwahla Firauna: "Anni-anni maka alioldoi-lioldai emeka do'ona-dakna de liawanni anni rahu ida terampwotelu. Anni mormio'ru ri, de hota edon naplahwa ne npenpuenu-nanahala ihru mehra-ralam mehra, edon nora u'pu-tga'ru re anin mormiorni rella lioldoini-lioldaini ramneneha." 10 Noka Yakopa nwaka Uplerlawna Nala ra'ani-pallu la Firauna, nhor nioka nwadur la Firaun gaini ralamni. 11 Yusup ntutga la amni me hyalli re, gen miaka ha rdella la'a noha Mesir, ne nala nohanna-taniarat dilla re, emolmolla Firaun ne'er targa. Gen di samomuou memna, ne nwawa Gosyen lowanni-ahlani, mak ler li'ir di rweta de Rameses. 12 Ne Yusup npiara-nlakoi amni, hyalli me romni mniotni re, nhakra yaya'anni de nlernohora a'nani re liawanni.
Yusupa hihi'ini-yapyapni
13 La' noha-rai de uhunu-ewatni-ewatni-lahwani de ha yaya'ana hamonna, yoma lar de lawan rehia, nhi'nande Kana'ana nora Mesir mniotni re rmatloi-rmatlawra. 14 Noka Yusup nawoka kupna mak kdella Mesir me Kana'ana honona, de kupna metma welli. Noka Yusup nodia kupna re honona la Firauna romni. 15 La'pa kupan no'a Mesir me Kana'ana rhorwua, dewade makden Mesir re honona rma rawok la Yusup gaini na'nama riwra: "Matrome, muala ha yaya'an mai ami! Nihya'pa hota ammat lia gaimu ralamni?! Yoma kupna hamon et wia." 16 Yusup nwahla niwra: "Ina-nara ama-hyal miy re, la'pa kupanmi rhorwua, miala nhiurmi-wnia'anmi, nanpena agala ha yaya'an tiy miy emeka nhiurmi-wnia'anmi re yawahlani." 17 Noka rodia nhiurni-wnia'anni rla Yusup, ne Yusup nala ha yaya'an la re, nala nawahla kuda-keledai, pipni-dumni, hayorni-orpaunu (sapi), pede nwahi' taru ha yaya'an la re, de de anin de ha yaya'an etla pa hare ra'ana yoma Yusupa nala yamanna nwahla nhiurni-wnia'anni honona. 18 Lardoini anin della, dewade rmai owa'an la, la'a anin mak kod lia wornu, noma rakot la: "Yana amade'a la matro'mu, la'pa a kupan mamni rhorwua ne la'pa a nhiuri-wnia'an mamni rla matro'mu gahani, de hya' mana edonna rwarin pia amala la matro'mu, enekneka a inon mamni me nohanna-taniarat mamni. 19 Amahmena ammati, amahmena a nohanna-taniarat mamni niata. Muwel ami me, nohanna-taniarat mamni, emeka ya'ana-yemnu nhierannu, noma ami me, nohanna-taniarat mamni rla'a ata-wa'ar la Firauna. Muala wini totpa ammormiori, yana ammati, ne totpa tani re yana rkerna-rkaulu." 20 Hade pede Yusup nawelia makden Mesir re tanni re honona rla Firauna, yoma makden Mesir re rima-rima ra'olga nhyi'ini, yoma lar lawan de nwewar nana re. Emkadella pa tani re Firaun nhi'a la gahani. 21 Ne la'a Mesir lowanni ntawua honi id pa nokru honi de, Yusup nwa'ata-nwa'ara riy honona. 22 Eneknek to' pa makpolwunu-kwaklera makden Mesir re nohananni-taniaratni de, Yusup edon nawelia, yoma makpolwunu-kwaklera rde rlernana nhiakra la'a Firauna, ne rmor lia nhiakra wawannu, hade pede edon ra'olga tanni re. 23 Yusup nakot la leta-leta mniotni re: "Ina-nara ama-hyal miy re! La' ler di, de a'uweli olek miy, me tanmi rella Firauna. Dodo'ondi, de agala wini tiy miy totpa mtiamnia la nhyi'imi re. 24 La'a wullu-we'elli, mhiakra la nhiakra wolima, nhor nioka miala ida la'a Firauna ne nhiakra wogat de rdella pa rla' win lia nhyi'imi re, me rla'a ha yaya'anmu la rommu mniotni honona." 25 Noka rakot la: "Matroma, ndella pa amla'a ata-wa'ar la Firauna, hornama amlernan oleka matro'mu ralam kalwiedni pa mtiera-mdiema a mormior miamni." 26 Emkadella pa Yusup nhi'a hadella tita ida, la'a Mesir lowanni-ahlani nodia pa dodo'ondi de, de nhiakra id la nhiakra wolimni nala la'a Firaun gahani, eneknek to'a makpolwunu-kwaklera re nohananni-taniaratni nanpa edonna rla'a Firaun gahani.
Yakop mormiorni korni
27 Noma makden Israel re, de Yakop nor duratni-waitni rden nek la Mesir la'a Gosyen lowanni, ne raweli tanni la hande. Ra'upa-ra'a'na ne rpeha-rlawan pa harahu. 28 Ne Yakopa nmormior mia'ta pa umarnu na'itar la anni termida wehrani wo'it lia Mesir nohananni-taniaratni, noma Yakopa anni-anni mormiorni-dardiarni ntut niana anni rahu ida terampwogata wehrani wo'itu. 29 La'pa ntut lia lerni pa Yakopa nwahi' pa nmat wia, dewade npolga a'nani Yusup pa nakot la: "Ame, la'pa aliernana ralam kalwiedmu de mkien limmu la a kowru onni ne mliokar mai a'u, de de omtiutga ralam kalwiedmu me, yehwa ploloi-plele'ermu mai a'u, de yana midera a lia liena ralamni la Mesir di. 30 Mere la'pa amuat pia uwok wutu u'pu-tga'ru, de mrian a lia Mesir di pa midera la liena la u'pu-tga'ru re hoini-kietarni." Nwahla niwra: "Yowa ama, pena aghi'a hya' maka mukot oleka re." 31 Nhor nioka Yakopa niwra: "Mliokar mai a'u." Noma Yusup nlokar la. Noka Yakopa nwaltior la lewnu o'tani walli pa na'uli-nawedia Uplerlawna.
Yakopa nwaka Uplerlawna pa Nara'a-napalga Menasye nor Efraima
1 Lera ida ne riy doma rakot la Yusup: "Ammu e namehra!" Hade pede nodia a'nani re rora, Menasye nora Efraima pa rla'awa amni genni. 2 La'pa rod kiota la Yakopa riwra: "A'namu Yusup e nmai o' de." Noka Yakopa nawoka rurni-laini korkorni honona pa namtatna la yanin genni wawannu. 3 Yakopa nakot la Yusupa: "Ama, Uplerlawna mak kodi plolli-ktaryatnu Ntutg oleka rupni mai a'u, me Nara'a-napalg a'u la'a leta Lusa (maka awuet la, de Betel), la'a Kana'ana yapatni. 4 Na'nama Nhar lirni de mai a'u Niwra: "A'g ed maka khi' o' pa mu'upa-mu'a'na, ne pena A'u ghi'u pa mu'itra-mulawna, ne duratmu-waitmu rla'a hairi wokni ida. Agala noha-rai di la omuora duratmu-waitmu pa mhi'a la gahami pa nodi liarni."" 5 Yakop nakot owa'an la Yusup niwra: "Ama, a'namu rora maka rayoria la Mesir di, la'pa a'g edonna mmuai mia'ta la Mesir di, de a gah'u hare, a gah'u Efraim nora Menasye emolmolla Ruben nora Simeona. 6 Ne a'namu maka omliernana la' li'iru, de gahamu hare, mere rlernana durmu-nhiakra re'a-tniaru de, la'a re'a-tniaru mak agala la ir hyalli Efraim nora Menasye. 7 Yoma ler ululu de, itwatiawu Padan Aram pa tmai, de itden ma'ta la talan letgara, la Kana'ana lowanni, rehgorga leta Efrata. Noka a ralmu nmawal doin la yoma a ha'wu Rahela nmati. Nhor nioka atiamnia la talan mak kokru Efrata aratni, de Betlehema." 8 Nakot pa nhorwua, noka la'pa Yakopa namkek tutga Yusup a'nani re, dewade natiana: "He' era rina?" 9 Yusup nwahla amni: "Hari de a a'nu maka Uplerlawna Nala mai a lia handi, ama." Noka Yakopa niwra: "Muodi mmuai a'u totpa awuaka Uplerlawna Nala ra'a-pal lia re." 10 Ne Yakop de matni npona, onnila nhamto'owa, pede ta'eni namkek nan samomuou. Noka Yusup nala pa rehgorga amni, noma amni nkolla rpa nkinnia re. 11 Noka Yakopa nakot la Yusup: "Ame, ler ululu de a'g edonna wuaror nana, de hota a'umkek nan owa'ana gaimu, mere ler di, de Uplerlawna Nal a' pua umkek o'a na'itar neka a'namu wali." 12 Noka Yusup nodgiota a'nani rella amni torni rletni, na'nama Yusup nwaltiora-nwaltieman la. 13 Nhor nioka Yusup ntorreria a'nani rora, limni malganna ntorreria Efraima, de Yakopa walli malwiru, ne Yusup limni malwiru ntorreria Manasye la'a Yakopa walli malganna, noka notlia rpa rwakriani. 14 Mere Yakopa netra limni malganan pa nlapra la Efraim o'tani wawannu, kennama a'na garia, ne limni walli malwir lia'a Manasye o'tani wawannu pede limni nhawlakra, kennama Manasye de a'na yanulga. 15 Nhor nioka nwaka Uplerlawna Nala ra'ani-pal lia Yusup niwra: "U'pu Abrahama me a'mu Isaka rmori olek la Uplerlawna gaini ralamni. Uplerlawan di emolmolla Uplerlawna mak kla'a makodi a'u la'a mormio'ru la ululu pa nod nieka pa dodo'ondi. 16 Ne Uplerlawna Ntutga rupni emolmolan neka Uplerlawna hopopanni-lili'irnu maka namori-nalewna a lia yatyatni-halalli yatlorni-yatra'ani honona. Awuakwak de Uplerlawan di ed mak kara'a-kapalga tuwgari ri, nhi'nande na'nu na'itra a'mu Isaka nor u'pu Abrahama nanni rwewar noha onnila hari, ne Nreiniande hari duratni-waitni ra'ititar rer lia pa rla'a wok lawna-le'u liawna la nohkeran di wawannu." 17 La'pa Yusup namkek de amni nlapra limni malganan la a'nani Efraima o'tani wawannu, nwarora de emkade de yata, noka nte'la la amni limni totpa nwareiya limni la'a Efraim o'tani wawannu pa nkenia la Manasye o'tani wawannu. 18 Nakot la amni: "Yana mhi' emkade ama, yoma hadi de yanulga, pa mliapra limmu malganan la o'tani." 19 Mere amni nwayotlia niwra: "Edonna. Agat muemna de hadi de yanulu, ne hade mana duratni-waitni hota nla'a hairi ida ne hota lawna la plola-mneha, emkameni mana garni plolli-mneheni narehi-nalawan la, ne garni de duratni-waitni hota nla'a hairi-hairi liawanni." 20 Noka nwak pa Uplerlawna Nala ra'ani-pallu la niwra: "La'pa makden Israel hota riwra rwaka Uplerlawna pa Nala ra'a-palu, de riwra: "Uplerlawna Nala ra'a-palu emeka Efraim nora Manasye ra'ani-pallu." Emkadella pa nala gari Efraim pa nala' ulu yanulu Manasye. 21 Nhor nioka Yakopa nakot la Yusupa niwra: "Ame, edon nalo'on wali de hota amuat wia, mere pena Uplerlawna Nor miy talla, ne Nod miy pia miwal lia upa-tgarmi re nohananni-taniaratni. 22 Ne dodo'ondi, agala wo'ora id wurannu la o'a, mak agala wehla me ra'pa la galla uwo'or nana la makdena Amori limni ralamni, yoma o' mak kodi plolli la hyalmu re wawannu."
Yakopa lirni korkorni la a'nani re
1 Nhor nioka Yakopa npolg awoka a'nani re na'nama niwra: "A'na miy re, mia miwoka, totpa arior taru-liai tiarga miy mormiormi. 2 Miwoka pa mitlina, a a'nu miy, mitlin la ammi a'u. 3 Rubena, o' de a'nu yanulu o'a. La'pa riy ramkek o' de, ramkek nana a ru'ru-la'yu, me wuhuru teklu, a yato'tu-yawa'wu, mak kala' ul lia ruri-lai ralamni. 4 Ompuo'la-mliekru de emeka gera matni mak kopli, nhi'nande o' edon mumtemna. Hota o' edonna mugengen wia, yoma, o' ed mak kor oleka hawa liah'u minin la a le'wu wawannu. Yoma ler maka omhi' emkade, de mhi' akdeha-aktiahli leka a le'wu wawannu. 5 Simeon nora Lewi, mimrio'a kekmi-rautmi de maklekla-makdiaini wuhura-tekla. 6 A'g edon gor la tnietwianmi-tniaiwianmi, yana agor la wokmi-le'emi re, yoma la'a yawunmi-yawenanmi ralamni de mpienna rimormiori, ne miy sukmi mriahi etia hayori orat lawanni. 7 Hota mimrio'a yawunmi-yawenanmi di de emolmolla nora nhoptutu-udi nhoplera. Yoma hankeranmi re tehra me kapliahana. Hota age'era-ghakra miy lia a u'pu-a'nu re. 8 Yehuda, hyalmu re hota ra'uli-rawe'du, limmu naterna arwalmu du'urnu, ne hyalmu re hota nwaltiora-nwaltieman la o'a. 9 Hota o' de emolmolla singa, la'pa nlernana ya'anni pa nla'aw la genni. Emeka riy ramta'ata rla ramata singa mak ka'ana, de riy edon paran pia ror o'a ra'ara. 10 Lodna-hairi mana edonna nwadur la o' limmu ralamni, edonan demade tita-kai kniaunu la'a lakmu rletni, nodia pa nmai maka Uplerlawna Ntutga pa nodi plola-ntaryat lia wawannu, nhi'nande riy mak kdella hairi-hairi re ratlina-ratailla. 11 Hota mlier la pripanni-fa'anni, de mkioh tiarga keledaimu la anggur ona onni, la anggur on maka rwalir niana. Ne hota muala anggur turnu mpuah'i naniayarmu. 12 Mlier la pripanni-fa'anni pede matmu hota nmermera rehi anggur, me nihimu re rwawahra, rehi uhu tiuru. 13 Sebulon, hota o' de omhuol lia eni hu'ula-ga'a laini, mhi'a loi-puou loi genni-pnial genni, ne tiemmu-lianmu hota nora leta Sidon rpahelieli. 14 Isakar, hota o' de emolmolla keledai maka rurni karuri, mak kakowa la yohya'a maka e nodia rletni, 15 mere la'pa mutlin nana-muat nana de, letni-ruhunni de samoga, noka mdiella la hande ne mhi' ata-wa'ar la hande yoma la gen die samoga. 16 Dan, hota o' de mak keti plollolli-kdawra mneneheni la limmu-rormu, yoma omlia' am la Israela luwnu ida. 17 Emolmolla niy miakdella talla aratni de nho'wa kuda tikalli, nhi'nande mak kha'a ntuin la li'irnu, o' de riy dom to'a mere murehi ara. 18 Uplerlawnu ne! Awuewiei-niarnara O ra'amu-palmu pa Omulewna a'u. 19 Gad, O' di hota riy yatyata wokni ida, rhokr o'a pa rwe'nu. Mere hota mpualdioinia pa mhuokra re. 20 Asyer, hota omliernana ya'anmu-yemanmu mikmikri me pripanni-fa'anni pa omuala la ray-ray ra'ana. 21 Naftali, hota o' emolmolla rusa rara mak katiewar doin la. Hota nayoria upa-a'na maka samomuou. 22 Yusup, hota o' de emolmolla orwo'a-auwo'a mak kamnornora mak kdella gera matni onni, tutnu-akni ntut lia lyanit pa narehia lutur lawna. 23 La'pa mak kwara'pa re rhokru pa rra'pa, 24 mere ra'pamu naruri-nalai, ne limmu rora naruri-na'orta onnila Uplerlawna mak karuri-kalai, maka apuesiaya Ntulan la o'a. Uplerlawan di mak kodia Israel, emeka riy ida mak kodi pipni-dumni. Uplerlawan Mak emeka ili-watu la Israel. 25 Yusup, mururi-mulai onnila mak kla' Uplerlawan la ammu Ntulan la o'a, de mak kodi plola-ktaryatu Nara'a-napa'lu, de Nala ra'a-palu mak kden lyanti me ra'a-palu mak kdella nohkerna nora ra'a-palu ya'uhu-ya'apnu. 26 A' di de ra'u-pa'lu narehi wo'ora-kawru re ra'ani-pallu la ululu-plialiaini, de samomuou meman la'a wo'ora-kawru maka ululu-plialiaini, hare honona rerun la o'tamu wawannu, o' mak kodi plolli la hyalmu re. 27 Benyamina, emolmolla ahu puor maka naplar memna, yawyawar de na'ana lierenni, ne la'a lera lia'ani de nhakra hya' maka nwarui nana, hota o' de murehi ara." 28 Emkadella pa Yakop nror targa la upni-a'nani re mormiorni re. Rima-rima nlernana ra'a-palu maka nror taru-nlai tiarga la. Hare de rla' Israel luwnu-a'nani honona, de luwnu-a'nani termida wehrani woru.
Yakopa nmat pia rtomna-rtamnia la hoini-kietarni
29 Nhor nioka Yakopa nano'a-na'atga a'nani re: "A'nami re, edon nalo'on ma'ta de, amuat pia uwok wutg a lia u'pu-tga'ru. La'pa amuat die midera a lia u'pu-tga'ru re onni la'a lien mak kdella Heta mniotni, nwawa Efrona nhyi'ini ralamni, 30 La'a hu'ula-liena no'a Makpela nhyi'ini ralamni, Mamre walli tipru, la'a Kana'ana lowanni-ahlani, nhyi' maka Abrahama nawel niana la Efrona, pa rhi'a la hoi-kietra wamueheni. 31 Rkenia Abrahama nora hawni Sara la' hande, rkenia Isaka nora hawni Ribka la' hande, ne a'udera Lea wal lia hande. 32 Nhyi'a nora lien de, de rawel niana la makden Heta." 33 La'pa Yakopa nano'a-na'atga a'nani rpa nhorwua dewade nran lakni la lewnu wawannu dewade nwaran doinia aranni la pa nmat wia.
1 Noka Yusup nlawra inonni la amni gaini wawannu, na'nama nkakru me nkinnia. 2 Ne Yusup nhopna hopopanni-lili'irnu mak khi'a koda-atiawi re, totpa rala koda-atiawi rtomna amni inonni. Noma rlernohora Yusup lirni. 3 Ir ralla koda-atiawi, pa rtomna inonni na'an lera terampwogata, rlernohora hya' maka nhi'inde makden Mesir rhi'a, ne makden Mesir rkakur nohora Yakopa mahnekni lera terampwo'itu. 4 La'pa lardoinia lera lului-nurnuhru re, dewade Yusup nakot la Firauna nhiutni-nhianni-nhielli-liarni: "Ama-hyal miy re, la'pa aliernana ralam kalwiedmi de mikot la Firaun, 5 de a'mu nhopna aliokar la, niwra: "Edon nalo'on de amuat wia, la'a ho'yu-kietru maka a'uwte'ta oleka la Kana'an de, midera a lia' hande. Hade pede miolli a lia pa lia'awa hande totpa a'udera a'mu la lien de, nhor diemade a'uwali owa'ana." 6 Noka Firauna nakot la: "Mlia'awa hande pa midera ammu la liena, emeka ha nhopna omliokar la." 7 Noka Yusup nala' pa nla'awa hande totpa nadera amni, ne nor rewre'wa Firauna tniutnu-nhianni-nhielli-liarni re honona wali, ina-ama mak kdella istanni ralamni, ne ulu-o'ta no'a Mesir re honona re, 8 na'itra Yusup romni mniotni, hyalli rena me amni romni mniotni, eneknek to'a a'nani me nhiurni-wnia'anni re, raltarga rla Gosyen lowanni. 9 La'pa kereta me mak kha' kuda, de de makodi keki-rautu, ror wal pia rla'awa hande, nhi'nande mutnu-taurnu re plahwani. 10 La'pa rte'ela Goren Ha'atad, la'a gerlawna Yordan walli, noma rhi'a yapolu-yatniani matmiati id la hande, ne Yusup nalul niana lera wo'itu lia amni de. 11 La'pa let de mniotni, makdena Kana'ana ramkeka yaluli-yahon la Goren Ha'atad de, dewade riwra: "Hadi de makdena Mesir yalulli-yahonni maka kokokna-rariarin matmiati." Hade pede rweta gen mak kdella Yordan walli de, Abel Misraim (nnia'eratni de, makden Mesir yalulli-yahonni). 12 Emkade pa Yakopa a'nani re rhi'a emeka amni nano' targa la ira. 13 A'nani re rrana pa rodia rla'awa Kana'ana lowanni ne rkenia la hu'ula-liena ralamni la'a Makpela, nhyi'ini maka Abrahama nawel nian oleka la Efrona makdena Heta de, pa rhi'a la hoi-kietra wamueheni, de nhyi' mak kdella Mamre walli tipru. 14 La'pa rkenia amni pa nhorwua dewade Yusup nawal lia Mesir wa, nora amni-hyalli rena me riy honona mak kor rewre'wa rla' hande pa rla rkenia amni la liena ralamni.
Yusup hyalli raplinga de Yusup nhoratdoini ir do'oni-halli olekwa
15 La'pa Yusup hyalli re rat niohora oleka de amni nmati olekwa dewade riwra: "Yanhi'pa Yusup naun targ ita! Pa nwahla ita nhiol yatni la e'a." 16-17 Hade pede rhopan pa rla rwe'era nnio' dilla Yusup: "La'pa it amni edonna nmat mia'ta de nano'targ oleka: "Emkadilla la'pa mikota la Yusup: Mhuoratdoini hyalmu re do'oni-halli, yoma rhi' oleka nhiol yata-liet yat la o'a. Noma dodo'ondi de, mhuoratdoini mak khima-kre'a ammu Uplerlawanni re do'oni-halli."" Yusup natlin nana hare lirni, de: "Mhuoratdoini hyalmu re do'oni-halli", de nkakur wa, (yoma hyalli re raplin ma'ta de nhoratdoin oleka ir do'oni-halli). 18 La'pa hyalli re rmeh'a rmai pia rwaltiora-rwaltieman la riwra: "Ammai pia mla' atmu-wa'armu." 19 Mere Yusup nakot la re: "Yan mimta'ata. Uplerlawna edon a'u. 20 Plollolli de miy e mpiarora-mpialaiya yotyotni-yatyatni mai a'u mere Uplerlawna Nwarora-nwalai niana kalwiedni-paitiotni, totpa Nhi' nana hya' maka Nhi'a la ler di, de Nalewna riy harahu mormiorni-dardiarni. 21 Pede yan mimta'ata, hota agala yaya'anmi me a'nami re yaya'anni re." Emkadella pa naltier samomuou la ira totpa nhi' ralamni re pa rahepru, totpa yana ralamni re worworga owa'ana.
Yusup nmat wia
22 Ne Yusup de nden nek la Mesir pa na'itar wutu luwnu-a'nani, ne Yusup nmormior niana anni rahu ida termida. 23 Pede Yusup nre'ela namkek nohora Efraima upni-a'nani la'pa ndait nana tuwu wotellu, me la' walia Yusup nakerna-nagatna Manasye upni (Makhir a'nani) la riwni wawannu. 24 Yusup nakot la hyalli re niwra: "Edon nalo'on ma'ta de amuat wia, plollolli de hota Uplerlawna Nlinreri-nmatrermi me Nod miy pia mhiargot la'a gen di pa mlia'a la gen miaka Nano'targa de Nnairi liokra la Abrahama me Isaka me Yakopa." 25 Yusup nakot la hyalli re honona niwra: "Plollolli de hota Uplerlawna Nlin reri-nmat rer miy pa mlia'awa Kana'ana. Hade pede dodo'ondi mliokar pa la' ler de de, miodgiota a ru'ru-kliaklu mak kdella handi pa mlia'awa." 26 Nhorwua dewade Yusup nmat wia, de mormiorni anni rahu ida termida. Rala koda-atiawi la inonni, ne rkenia la lumni la'a Mesir.
The New Testament of our Lord and Saviour Jesus Christ
E rhorat targa Yesus Kristus upni-tgarni kotni-nanni
1 Puk di de e rhorat targa Yesus Kristus upni-tgarni kotni-nanni. Yesus de, Daud di'nani-lohorni duratni-waitni me Abraham kotnu-turnu gerni-wniaunu (duratni-waitni upni-a'nani).
La'a Abraham lerni pa nma nte'ela Daud lerni, de Yesus upni-tgarni maka ha rhorat taru de emkadille
2 Abraham na'a'na nana Isaka, Isaka na'a'na Yakopa, Yakop na'a'na nana Yehuda nora amni-hyalli, 3 Yehuda nora Tamara ranina pede ra'a'n nana Peres me Serah. Peres na'a'na nana Hesron, Hesron na'a'na Rama. 4 Ram na'a'na nana Aminadaba, Aminadab na'a'n nana Nahasona, Nahason na'a'na Salmona, 5 Salmon nora Rahab rmehlima pede ra'a'na Boas, Boas nora Rut ra'a'n nana Obed. Obed na'a'na Isai, 6 ne Isai na'a'n nana ray Daud. Daud na'ala Uria hawni pa nora rmehlim pa ra'a'na Salomo.
La'pa ndella Daud lerni pa nma nte'el la'a ler maka Israel arwalli rhoplia ir la'a Babel, de e rhorat targa nanni re honona pa emkadilla
7 Salomo na'a'n nana Rehabeama, Rehabeam na'a'na Abia, Abia na'a'n nana Asa, 8 Asa na'a'n nana Yosafata, Yosafat na'a'na Yorama, Yoram na'a'na Usia, 9 Usia na'a'n nan Yotama, Yotam na'a'na Ahasa, Ahas na'a'n nan Hiskia, 10 Hiskia na'a'na Manasye, Manasye na'a'na Amona, Amon na'a'na Yosia, 11 Yosia na'a'na Yekonya na'itra amni-hyalli demade rhopliala' Babel.
La'a lerni la rhoplia Israel mutnu rella Babel pa la nte'ela ha rmoria Yesus de e rhorat tar nanni honona de emkadilla
12 La'a lerni la rhoplia Israel mutnu rella Babel de: Yekonya na'a'n nana Sealtiela. Dewade Sealtiel na'a'n nan Serubabel, 13 Serubabel na'a'na Abihud, Abihud na'a'n nan Elyakima, Elyakim na'a'na Asura, 14 Asur na'a'na Sedok, Sedok na'a'n nan Akima, Akim na'a'na Eliuda, 15 Eliud na'a'na Eliasara, Eliasar na'a'n nan Matana. Matan na'a'na Yakopa, 16 Yakopa na'a'na Yusup. Noka Yusup nor Maria rmehlima. Maria ed mak kayor niana Yesus, maka ha rwet la de, Ray maka Uplerlawna Nano'taru pa Namori-nalewna rimormiori. 17 Pede la Abrahama pa nma ntut tiar lia Daud, de tuwu nernu-nha' nana re'eni termida wehrani wogata. La'pa nwatiawua Daud pa la nte'ela Israel mutnu maka ha rhopliala' Babel, de tuwu termida wehrani wogat wali. Ne la'a lerni la ha rhopliala mutu Israel la'a Babel pa nmai wia la'a ler maka ha rmoria Yesus maka Uplerlawna Nano'taru pa Namori-nalewna rimormiori die mana, tuwu termida wehrani wogat wali.
Rmoria Yesus Kristus
18 Emkadille la'a maka ha rayoria Yesus Kristus. De la'pa inni Maria nora Yusup ra'an lira-remun waw pa hota rmehlim pa, mere edonna rawok ma'ta la yaninni pa emeka muanke' id nor hawni, dewade Maria na'apun wa onnila Uplerlawna Nhiwni ed mak kodi plolli. 19 Yusup mak kora Maria kanyah'a de, de riy ida maka ralamni kaplele'era. La' hade pede la'pa Yusup nat niohora Maria na'apnu mere e a'nani atia' hade dewade Yusup niwra nahmen doinia niah'ani Maria mere niwa nhi'a mtiel nekpa totpena yana nhi' amola-ma'a Maria la'a riy rahu gaini ralamni. 20 La'pa Yusup ntepartar mua'ta la wniarora-wnialai la' hade, dewade nanina noma nmi' nana emkadi: Nmi' nande Orgahi-Orha'a hopopanni ida nma nakot la niwra: ”Yusup ee, Daud duratni-waitni id o'a. Yana mumta'ata muora Maria mmiehlima. Yoma papay mak kden la Maria apannu de, de Uplerlawna Nhiwni mak kodi plolli pa Nhi' nan hade. 21 Hota Maria nayor niana a'n muanke'a ida. Ne hota o' ed mak kala papay die pa nwawa Yesus (nnia'eratni de Itmatromlawanni makamori-kalewna). Yoma hota E' ed mak kamori-kalewan nana E mutnu-rahanu la'a do'a-hala ralamni.” 22 Hare honona re rtutu-rte'ewa, totpena naplol la'a hya' ed maka Orgahi-Orha'a lirni ha nakota de pa makwohorulu-ktatrulu re rakot ulg oleka mai ita riwra: 23 ”Hota pat hararara mak edon nor wut mua'ta muanke'a ranin wutu na'apun pa nayor niana a'na muanke'a ida de hota rala pa nwawa Imanuel maka la'a yawal Ibrani de nnia'eratni de: Uplerlawna Nor it talla.” 24 La'pa Yusup namat wa noma nlernohora hya' ed maka Orgahi-Orha'a hopopanni nakot la e'a. De hota nora Maria rmehlim pa. 25 Mere Yusup edon nor eti Maria pa ranin wut lia' lera Maria na'apun pa edonna nayor mia'ta. Ne la'pa Maria nayoria papay die dewade Yusup nweta la Yesus.
Mak kwata'wa nohora wtiona re rwatiawua tipur pa rmai
1 Maria nmor tiarga Yesus la' leta Betlehem la'a Yudea nohananni-taniaratni la' lera ray Herodes nodi plolli pa nkukmu-nto'ma. La' ler de, de maka kwata'wa nohora wtiona lyanti lipni-laini rwatiawua tipur pa rmai lia Yerusalem. 2 Rmai die ratiantian lola riwra: ”Ee, keke'enku'a maka na'nama rmor niana totpena nla'a ray lia riy Yahudi re, etla hanmeni? Amamkek nan oleka wtionni la'a walli tipru pede ammai totpena amhu'ru-mhelam la gaini ralamni.” 3 La'pa ray Herodes natlin nana lir de dewade nhedum pa namta'at wenna, me riy honona mak kden la Yerusalem emkade wali. 4 La'pa Herodes npolg awok imam-imam re o'tani-matni honona nor wutga mak kwatutu agama deullu-tatarni pa natiana: ”La hanmeni hota rmor tiarga Ray Makamori-Kalewna maka Uplerlawna Nano'targa deno?” 5 Noma rwalolla riwra: ”Ama, la'a Betlehem, let mak kden la Yudea nohananni-taniaratni de. Yoma la' Puka ralamni de makwohorulu-ktatrulu ida e nhorat targa de niwra: 6 ”Betlehema mak kdena Yudea ne, o kuku'a-keke'u la'a leta-let no'a Yehuda ri, mere plollolli de mureh dioin ir la yoma hota o letmu de ed maka kalgot nana mak ktorna-krautu ida mak ktera-kdema A u'pu-a'nu Israel re.”’’ 7 La'pa nlernana lir maka ha rakot oleka re dewade Herodes nade'a ralma-riorni pa npolga mak kwata'wa nohora wtiona lipni-laini re pa nmeh'a natiana re pa nakot la niwra: ”Moweni mimkek nan ulga wtion de?” 8 Noka rwalol nohora dewade Herodes Nhopna mak kwata'wa nohora wtiona re rodi liarni la Betlehem pa rwahakhak papay die. Herodes nalahar pa niwra: ”Mlia'a pa mpiahaka plu'unu-plehenu keke'enku' de mere mhioratreria la'pa mliernana keke'enku' de miwal pia ma mikot mai a'u totpena a' muana lia' pa ghu'ru-ghelam la'a lakni nayanni wali.” 9 -10 Noma mak kwata'wa nohora wtiona lipni-laini re rla'awa, de rahepuepur memna yoma ramkek nana wtion maka ha ramkek ulg oleka la tipur matni. Wtion de nala ulg ir pa la la'pa ntut tiarga reparni la'a keke'enku' de genni walli heyanna. 11 Noma rhu'ru la likit de nayanni de ramkek nana keke'en de nora inni Maria. Noma rwaltiora-rwaltieman la keke'en de nayanni, na'nama rhar dioinia wareher genni pa rala maha, ayalli nora mur la'a keke'en de. 12 Ne hota la'a Uplerlawna Nano' targa ir la mi'ini ralamni totpena yana rawal lia' ray Herodes de, pede rwotar lol to'a talla dom pa rla'awa nohoni-raini.
Yusup nor wutga Maria me Yesus pa rawlar lia Mesir
13 La'pa mak kwata'wa wtiona re rla'awa dewade Orgahi-Orha'a hopopanni nma nami'a Yusup niwra: ”Yusup ee! Mumata! Plet pa mua'ala keke'enku' de nor inni pa mpiatitin pa mlia'awa Mesir, yoma hota Herodes e nahak reri keke'en de pa nwenna. La'pa mdien nek la hande pa mpiei rer nieka pa a'ukot la tiy miy nampena miwali owa'ana.” 14 Dewade Yusup namat doin la pa nodia keke'enku' de nor inni pa rwatitin la Mesir, la' mel de memna. 15 Ha rhol nieka la Mesir la'pa Herodes nmati. La' hade pede plola la hya' ed maka Orgahi-Orha'a Nakot oleka la makwohorulu-ktatrulu de lirni niwra: ”Apuolga A A'nu de mak kdella Mesir pa nhargota.” Herodes nahak pa nwunu-nwenna papay mak hota kla' ray 16 La'pa Herodes nat niohora mak kwata'wa wtiona mak kwatiawu tipru re ralahar olek e' wa dewade enawenan doin la. Noma nahak pa nwenna keke'enku' de pede enhopan pa rwunu-rwenan momuoga lokmera-papay muanke'a, maka ha rmor niana la ler de me la'pa rhol nian oleka noha wawannu anni wor tiututu. Yoma Herodes nlernohora ler meni maka mak kwata'wa wtiona re rakota la'a ler maka ha ramkek ulga wtiona. Rhi'a wniunu-wnienan lawan de la Betlehem (Rahel letni de) uhunu-ewatni nor wutga leta-leta mak rehgorgoru re wali. 17 La' hade hota plola la hya' maka makwohorulu-ktatrulu Yermia nakota niwra: 18 ”La'a leta Rama de hota tatlin nana yapolu-yatniani mak ko'a-kakru lol etnu liolli. Tatlin nana Rahel polpuolu-hawaun nohora upni-a'nani maka ha rwen oleka re. Riy riwra rhi' Rahel pa ralamni namtiern owa'ana, mere Rahel edonna nhe'du et miemna ir lirni.”
Rwatiawua Mesir pa rawali owa'an la Israel
19 La'pa Herodes nmat wia de Yusup ed ma'ta la Mesir, noma Orgahi-Orha'a hopopanni nma nami'a Yusup owa'ana 20 niwra: ”Yusup ee! Herodes nor rimormiorni mak kiwa kwenna keke'en de rmati oleka wa pa mumat doin pa mua'ala keke'enku' de nor inni pa miwal lia Israel wa.” 21 Dewade Yusup namat doin la pa nora keke'en de nor inni pa rawal lia Israel wa. 22 Mere la'pa Yusup natlin nan de Arkelaus ed mak kwau dioinia amni Herodes pa nhi' ray lia' Yudea, noma Yusup namta'ata nla'a. La'pa nlernan owa'ana talan la Orgahi-Orha'a la' mi' ralma noma rla'awa Galilea yapatni. 23 La Galilea de rhol lia let mak kwawa Nasareta. La hade de hota plola la lir maka makwohorulu-ktatrulu re rakotkota la'a keke'en de, riwra: ”Hota rwet E la riy mak kwatiawu Nasareta.”
Yohansi makharani nakot nohora Uplerlawna lirni-tunnu totpena nwahi' targa rira ihranu ralamni la Yesus maimiaini
1 Noma la' nte'ela lerni pa Yohansi makharani riy nma nlola wo'orletna-kawurloini la' Yudea yapatni. Enhar lirni pa 2 niwra: ”Ina-nara ama-hyali ee! Mhioitio'or doin-mtiahnei dioin do'omi-halmi re yoma hota edon nalo'on wali ne Uplerlawna Nwal lia Ray pa Nodi plolli la riy mormiorni!” 3 Makwohorulu-ktatrulu Yesaya nakot nohora Uplerlawna lirni la'a Yohanis di niwra: ”Hota riy ida e polpuolu-hawaunia la wo'orletna-kawurloini pa niwra: ”Mpiahi' targa talla la Orgahi-Orha'a, mpiale'era loini-talanni!”’’ 4 Yohansi naniayarni de ra' nana la onta wullu me rewni de ra' nana la ha ulti me ya'anni-yemannu de kongoha nora gani turnu. 5 Riy rahu rwatiawua Yerusalem, Yudea nohoni-raini re honona, me la' walia gerlawna Yordan plahwani honona rriw niana pa rmai pia ratlin la Yohansi ha nakotkota. 6 Noka ir rakota plele'er momuoga do'oni-halli re, ne Yohansi nharania re la' gerlawna Yordan. 7 Riy Parisi mana liawanni ror wutga Saduki rmai lia Yohansi totpena rharania. Mere la'pa namkek tut niana rmai wia noma Yohansi nakot la re: ”Hoi! Miy di de emolmolan nekama niy mak kodi nhienni yoma mhi' tukla-wahla. He' ed mak kiwra la'pa rharan nek miy demade hota Uplerlawna niukum lawanni mak kmai niek de hota edon nal miy?! 8 Mere mtiutga la nhioli-liet kalwiedwedmi totpena riy ratga de plol toto'a mhioitio'or doin-mtiahnei dioin oleka do'omi-halmi re wa. 9 Yana mpiarora de hota miy edonna mliernan niukum lawna yoma upmi-tgarmi de Abraham. Yoma Uplerlawna nekane Nodi plolli pa Na'ala watu-watu ri pa Nhi'a la Abrahama duratni-waitni. 10 Mhioratreri ee! Uplerlawna e Nwahi' meman targa pa Nukmua he' to'a mak edon kolin doinia do'oni-halli. Yoma emeknekama Nwahi' targa wro'onni pa na Netan dodioinia ora-au onni pa la ntut lia ga'arni re honona. La'pa ora-au muaka edon kawo'a samomuounu de hota Nhoi wro'onni la pa Nnaklia la ai ralamni. 11 A' di Agala gera ga gharani miy, totpena ntutga de miy mhioitio'or doin-mtiahnei dioin oleka miy do'omi-halmi, mere mak hota kmai pia klernohor a' di, de hota Nala Uplerlawna Nhiwni tiy miy me emekwalima Nala ai na Nharani miy. E Nareh dioin a'u. Hota awue'er doin lakni wniowni ho'mana a'g edonna puar nana. 12 Ne hota emolmolan nekama E' ed maka ktorreria totopa maka ra ralipra-ratai metma-wetra' lawna (gandum). Metma-wetra' lawan de hota rawoka la'a dudnu (kliala) ralamni, mere hota kownu re honona de rwalia la ai miaka takeni rwarum nana.”
Yohansi nharania Yesus
13 La' lerni de, Yesus Nwatiawua Galilea pa Nla'awa gerlawna Yordan pa Nma Nwak Yohansi pa nharani E'a. 14 Mere Yohansi edonna nreiniana wakwakni de. Yohansi nakot la: ”Ame, la'a plollolli de A'mu nanpena ed maka kharania a'u. Mere la' dodo'ondi de he' nakota de hota A'mu Nmai pia agharania?” 15 Mere Yesus Nakot la: ”Hyalia, emkadella la' dodo'ondi to'a. Yoma la emkade de hota itsi' momuog oleka hya' mak kaplol la Orgahi-Orha'a yamkekni.” Dewade Yohansi nharania Yesus. 16 La'pa rharania la gera ralamni pa nhorwua noma Yesus Nrei lia gera aratni emkadi de, plin-plinnianama lyanti ema rhar dioinia, ne Yesus Namkek de Uplerlawna Nhiw Lululli Nerun de emolmolla ma'nu lmo'ma maru (merpati) pa Ntai lia E wawannu. 17 Nhor nioma ratlin de Uplerlawna Nhar lirni la'a lyanti Niwra: ”A A'nu maka Asiayni inhatti. E' ed maka kla' nana A ralmu.”
Hegana amlawanni nta'aga Yesus
1 Nhor nioma Uplerlawna Nhiwni Nodia Yesus pa Nla'awa wo'orletna-kawurloini totpena hegana amlawanni nta'aga. 2 Yesus edonna Na'an nana lera terampwogata, mela terampwogata, pa Naplarlar memna. 3 Noma hegana amlawanni maka rweta la mak kta'aga nmai pia nakot la: ”Hoi! Uplerlawna A'nani O'a toh?! Mhuopan teka watgau ri rwal tiek la yamanna pa Omu'una.” 4 Noma Yesus Nakot la: ”Hota A'g edon liernohora o lirmu de, yoma la' Puka ralamni de nakot nohor oleka de: ”Rimormiori edonna rmormior die yoma la'a yamanna nmeh'a mere rimormiori rlernana mormiori, yoma la'a Uplerlawna lirni-tunnu honona.”’’ 5 Nhorwua demade hegana nodia Yesus pa nla'awa la Yerusalem, na'nama nkenia Yesus la Uplerlawna roma kreini wuwannu pa Ntutrier lia hande, 6 na'nama hegana nakot la Yesus Niwra: ”Plola O' di de Uplerlawna A'nani O'a de Mniehgerun tek la! Yoma la'a Puka ralamni de e niwra: ”Hota Uplerlawna Nhopna hopopanni pa rkim o'a totpena yana mtiuini ne watgau mana hota edonna rtai o'a.”’’ 7 Noma Yesus Nakot la Niwra: ”Mere la'a Puka ralamni wal miana e niwra: ”Yan memmemna rimormiori rta'aga Orgahi-Orha'a mak kla' ir Uplerlawanni (yoma ir rhi' hihi'a-yapyapi mak kpodpodku-kpadpadku dewade rwak la Orgahi-Orha'a pa Namori-nalewn ira).”’’ 8 Nhor nioma hegana nodi owa'ana Yesus pa rla'awa wo'or tutul liawna id hananni, na'nama ntut momuoga hairi-hairi (noha-rai) honona ror wut nieka re'eni-tniarnu re honona. 9 Noma hegana nakot la Yesus niwra: ”Hota agala hari honon tiy O'a, mere Ompuayow pa Mriu'u-mtiowar plein la a la'ku nayanni.” 10 Mere Yesus Nakot la: ”Rho'orgo'tu la a ga'yu ralamni hega'nu ne! La' Puka de e rhorat targ oleka: ”Riy honona rhu'ru-rhelam la Orgahi-Orha'a ir Uplerlawanni me ratlina-ratail tio'ola Ha Nakotkota.”’’ 11 Nhorwua noma hegana nhoitio'or la Yesus, ne Uplerlawna hopopanni re rma ramkek la E'a.
Yesus Nwaga kniarni la Galilea
12 Noma lera ida ne, Yesus Natlin nana rtorn oleka hyalli Yohansi pa rkenia la roma nhio'la ralamni pede Yesus Nwadur la Yudea yapatni pa Nwarei lia Galilea yapatni. 13 La' hande de Yesus Nlola leta Nasaret (de E geni ulullu) pa Nla' pa Ndella leta Kapernaum la'a danau Galilea aratni la'a Sebulon nora Naftali nohoni-raini. 14 Maka Yesus Nhi' nana re honona de ntutga de Uplerlawna lirni maka makwohorulu-ktatrulu Yesaya e nhorat targa de naplola, yoma Uplerlawna lirni emkadille: 15 ”Sebulon nor Naftali nohananni-taniaratni mak kden la talan mak klola danau Galilea aratni, la'a gerlawna Yordan walli warta, de Galilea gen miaka Yahudi atia'a rdel wal lia. 16 De lupmu-a'namu mak kden la melli-kalamni, rler olek la lelerni. La'pa mak kden la leta-ruhuna maka do'oni-halli harahu mak kodia matmiati-molmuolu, de rat niohora oleka talla pa rlernana mormiori-lelewanni.” 17 La'pa nte'ela lera-mela re wa, dewade Yesus Nmeh'a ed mak Nakota Niwra: ”Ina-nara ama-hyali, mhioitio'or doin-mtiahnei dioin do'omi-halmi, yoma ntutu-nte' olek pa hota Uplerlawna Nodi plolli la riy emeka ir Rayni.”
Yesus Npolga mak kahaka i'na-ya'ana riy wogata
18 La'pa lera ida ne Yesus Nalala' rer mia'ta la danau aratni la Galilea dewade Namkek nana riy woru, de Simon maka ha rpol walia la Petrus nor hyalli Andarias ratialtial reria i'na la'a danau de, yoma hare kniarni hade. 19 Noma Yesus Nakot la re: ”Ee, ma mliernohor A'g ee! Mai pia Awuatut miy totpena la' emkameni la miy mitial reri i'na la dodo'ondi, de hota emkade wal pia mihak rimormiori totpena hota rpesiay mai A'u.” 20 Noma rleretniekla rteman taru tialli, ne rlernohora Yesus. 21 Yesus Nodi liarni noma Namkek nana riy id nanni Yakowsi nor hyalli Yohansi ror wut nieka amni Sebedeus pa e rwalola tiala la puounu ralamni. Noma Yesus Npol walia re: ”Mmiai ee!” 22 Rleretniekla Yakowsi nor hyalli raltarga amni la puounu ralamni pa rlernohor walia Yesus lidanni de. Yesus Nwahaur nohora Uplerlawna yala'ani me Nhi' kalwieda rira mehrani-maunu 23 Noma Yesus Nwaloha-nwalakat la Galilea liewnu uhunu-ewatni Nwatutu-nwaye'ela gen maka nhi'inde Yahudi re rhi' kreini-iskolli re. Enakot nohora Kot Kalwieda-Paitiot de Niwra hota Uplerlawna Nodi plolli pa emeka Ray. Ne E Nhi' wal pia rira nnienni-nhienni mehrani-maunu honona rkalwieda. 24 Makden la Siria uhunu-ewatni ratlin nana Yesus hihi'ini-yapyapni, pa nhi'nande rira rhorat la pa rmai. Rma rodia riy mak klernana nnieni-nhiena, mehra-mau, no'a-rara, maka hegana nhu'r ralma, kapiphyaya'ala, riy mak inonni kmati. Rodi mak ksaki re honona pa Yesus Nhi'a pa rkalwieda momuou. 25 Riy rahu rlernohor reria Yesus la' ler de. Dom de rwatiawu Galilea liewnu, dom de rwatiawua leta maka ha rweta Leta Termida (Dekapolis), dom de rwatiawua letlawna Yerusalem. Dom de rwatiawua Yudea lowanni me dom mana e rwatiawu wal lia let maka kden la gerlawna Yordan walli.
Yesus Nakot nohora unut lawna mak kaplola
1 Lera ida ne, la'pa Yesus Namkek nana riy rahu rma rawoka dewade Enha'at la wo'ora hananni pa Namtatna pa Niwa Nwatutu-nwaye'a. Mak nhi'inde ha Nwatutu-nwaye'a re rlernohora reria E'a pa rmai pia rwakriania. 2 Noma Yesus Na'ona wniatutnu-wniaye'eni la'a ir honona Niwra: 3 ”Ina-nara ama-hyali mitlina, hota unut lawna la riy maka edon kpar la lirni-yatnu wamueheni mere rawniair to'ola Orgahi-Orha'a yoma riy mak emkare rre' temn olek la Uplerlawna horatni-hairni limni-rorni maka Enodi plolli la emeka Ray. 4 Ina-nara, hota unut lawna wal lia' riy maka ralamni kmayo'a-kmata'u yoma hota Uplerlawna ed maka khi' ralamni re pa rahepru. 5 Hota unut lawna wal lia'a riy maka khu'ru-khelma (rendah hati) la'a rimormior wialli yoma hota Uplerlawna ed mak kala hare honona maka Enakot targa la e'a. 6 Hota unut lawna la riy maka ralamni nwahak nekpa nhi' mak kaplol la Uplerlawna yamkekni, yoma hota Uplerlawna ed mak kapenu-kalawna ir ralamni wakwakni de. 7 Hota unut lawna wal lia'a riy maka ktutga ralam kalwiedni la rimormior wialli yoma hota Uplerlawna mana Ntutga ralam kalwiedni wal lia ira. 8 Hota unut lawna wal lia'a riy maka ralamni kaple'er reri, yoma hota riy de hota nor Uplerlawna la' geni ida. 9 Hota unut lawna wal lia'a riy maka kpolliohora rimormior wiali la'a yahuri-yawo'ora totpa rkalwieda owa'ana, yoma hota riy de Uplerlawna ed mak khor wut wualia ir la E upni-a'nani. 10 Ina-nara, hota unut lawna la'a riy maka kler la kropanni-krieutnu yoma nhi' mak kaplol la Uplerlawna yamkekni, yoma hota riy de nanni ed walia Uplerlawna limni-rorni mutnu-rahanu, maka Enodi plolli la' emeka Ray. 11 Unut lawna wal lia'a miy maka klernana nniahora-nniala'a yapolu-yaliella wniohora weyata-wniatra weyata yoma mliernohora Uplerlawna lirni-tunnu maka A'ukota tiy miy. 12 Makwohorulu-ktatrulu la'a miy upmi-tgarmi lerni ho'mana rlernan oleka yamuki-yama'ala re, pede la'pa mimlier la yamuki-yama'ala yapupu-yaheri, de mimuki-mihepur meman nohora, yoma miy siepmi-kaimi inpona la'a Ilyamou-Watyatoha (Sorga) maka hota Orgahi-Orha'a Nala tiy miy.”
Maklernohora Yesus re emolmolan nekama kio'a nora wa'du
13 ”Ina-nara ama-hyali, miy di de emeka kio' nohkerna wawannu. Mere la'pa kio' de edonna nmahana, de ta'en niana ra'itr owa'ana ha mahanni toh?! Kio' de hota nwalia hamamuamua. Edon rnair nan owa'ana noka rhopliala, pa riy rwatei-rwahapra la' tani wawannu. 14 Ne miy di mana emolmolan nekama repreparni mak khita-krepra la noha wawannu pede riy ramkeka. Miy emekwalima let maka kden la wo'ora wawannu, de edonna nayade'a. 15 It edonna tatlin etia de riy rtutni wa'du nanpena rala ktopra ra rkadwua pitpitga. Mere nhi'inde rkenia wa'du della wniatatgenni totpena lelera la riy honona mak kden la roma nayanni. 16 Emkade wal lia mormiormi de nrepar nana rimormior wialmi herni-gaini, totpena riy ramkek nana nhioli-liet kalwiedwedmi demade ra'uli-rawedia Amlawanmi la'a Ilyamou-Watyatoha.”
Wniatutu-wniaye'a la agama Yahudi deullu-tatarni
17 ”Ina-nara ama-hyali, yana mpiarora de Amuai pia hota ghap dioinia Musa deullu-tatarni nor wut walia makwohorulu-ktatrulu re wniatutnu-wniaye'eni, mere Amuai die totpena deulu-tatra re rtutu-rte'ewa la'a hya' maka Aghi' nana-yap niana re. 18 Hya' maka A'ukota di naplol memna. La' hade pede mhioratreria me! Lyanti nora nohkeran di e nayamkek ma'ta, de hota mak ha rhorat targa la Puka ralamni, hurpu nora titikni id mana hota taken niana rhap dioinia la deulu-tatra, la'pa rwei niek la lera maka hare honona maka Uplerlawna ha Nakotkota rtutu-rte'ewa. 19 La' hade pede la'pa riy ida edon nlernohora deulu-tatra re kuku' id ho'mana me nwatutga riy dom pa yana rlernohora deulu-tatar de, de hota nwal lia riy mak edon rwetwet la nanni la'a Uplerlawna mutnu-rahanu re, maka Uplerlawna Nodi plolli la pa emek ir Rayni. Mere la'pa rwaldioinia de, la riy maka klernohora deulu-tatra re, me nwatutu-nwaye'a riy dom pa rhi' emekwalima e'a, de hota nwal lia riy maka ha rwetwet la nanni la' Uplerlawna mutnu-rahanu re honona. 20 La' hade pede mhioratreria! Makwatutu-kwaye'a deulu-tatra agama re ror wutga riy Parisi re rlernohor walia agama deullu-tatarni mere edon rhi' mak kaplol la Uplerlawna yamkekni. Mere riy mak kla' Uplerlawna mutnu-rahanu maka Uplerlawna Nodi plolli la pa emeka ir Rayni de rala ralamni tetema pa rhi' mak kaplol la Uplerlawna yamkekni.”
Yana idma nahankerna-ralmha'ar la ida
21 ”Miy e miat niohor oleka wa la' it upni-tgarni lerni rlernan oleka deulu-tatar di, de yana mpiunu-mpienna yoma he'a e nwunu-nwenna de hota nler la niukamnu. 22 Mere dodo'ondi de A'ukot tiy miy, la'pa riy ida nawenan la rimormior wialli de hota nlernan wali niukamnu, me he' maka kwohora weyata-ktatar weyata riy niwra: ”O' di de riy podku-padku!” de hota rodia la letgar lawawna la'a mak khudi-kpar la agama deullu-tatarni. Ne he' ed mak kwarenna riy pa niwra: ”Mak kaplinu-kaplo'a o'a!” de hota rrinnia la ai mormiori ralamni. 23 La'pa it idma nor ida tawenna, de hade edon nla' nana Uplerlawna ralamni. La hade pede la'pa miy mana e miwra miala prehenmi-maumi dom la Uplerlawna la'a katri'ana wawannu, noma mhioratnana riy e rahankeran la miy 24 de yana miala pleinia prehenmi-maumi de mere mlia' pa miora pleinia riy de mkialwieda, nanpena miwal pia la'pa miala prehenmi-maumi de la Uplerlawna. 25 La'pa yanhi'pa riy doma e raklak miy, de miora riy de mpiak pa mkialwieda pleini la'a talan letgar memna totpena yana mlia' nek la letgar lawan de la'a makhudi-makpara gaini. Yoma la'pa edonan de hota riy de nal miy lia makhudi-makpara mak hota nal owa'an miy lia hgei mak kodi hapa'pani (polisi o'tani), noma hota hgei nho'la miy lia roma nhio'la ralamni. 26 Ne mhioratreria! Hota miy edon mliergot la roma nhio'la de ralamni, la'pa rwei pia mpiair dioinia papiairmi honona.”
Itolin doinia hya'-hya' mak kod it la do'a-hala ralamni
27 ”Miy e miat niohora oleka deulu-tatar di, de e niwra: Yana milira-miliai. 28 Mere dodo'ondi de A'ukot tiy miy, la'pa mimkek nan tututga patke' id pa na'hira-nadadia miy die, de miy die emekwalima miliai oleka patke' de wa, yoma mtieltel aparmi la'a patke' de. 29 La'pa matmi malganna nod miy lia do'a-hala de, de hota mkiopil doinia matmi della pa mhiopliala. Miolin doin neka matmi mak kodi miy lia do'a-hal de. Yanpa matmi de narieiniande miy inonmi honona rnaklia la ai mormiori ralamni (naraka). 30 La'pa limmi malganna ed maka khi' do'a-kyap hiala de mdieul dioinia pa mhiopliala. Miolin doinia la wa. Yanpa limmi wali de narieiniande inonmi tetema rnaklia la' ai mormiori ralamni.”
Yana idma nhopliala id la mehlima-marya'a
31 ”Deulu-tatar dom maka mitlin oleka de emkadi wali, de la'pa riy id niwra nhopliala patke'eni, de hota nala horta yapie'era la hawni patke' de. 32 Mere dodo'ondi de A'ukot tiy miy ta'en niana muanke' id nhopliala patke'eni eneknek to'ama hawa patke' de nor muanke' dom de ralira-raliai. Mere la'pa hawa patke' de edon nalira-naliai mere emkade ho'mana muanke'eni de enhoplial nek e' wa, hawa muanke' hihi'ini de nareiniande hawni patke' de pa nalira-naliai. Yoma la'pa hawni patke' de nmehlim owa'an de, hade de yalira-yaliai la Uplerlawna yamkekni. Ne muanke' mak kmehlimpa kora patke' maka kpaletan nohora muanke'eni, de nhi' wali yalira-yaliai lia Uplerlawna yamkekni!”
Yana mliokar pa miplol nohora lirmi-tunmi
33 ”Ina-nara ama-hyali, mimiat niohor wal lia' it upni-tgarni lerni de rlernan oleka deulu-tatar di, de hya' ed maka mikot targ oleka la Orgahi-Orha'a, la'pa mliokar nohora oleka wa, de mliernohora honona. Yana mpiera-mdiaiti hare. 34 Mere la'pa dodo'ondi mana A'ukot nohor la miy, de yan memmemna mliokra onde mpialokra pa ma miplol nohora lirmi-tunmi. Yana mliokra pa mpiet la lyanit lawna, yoma lyanit de Uplerlawna yaliwangenni (tahkta) inhatte! 35 La walia yana mpiet la nohkerna pa mliokra onde mpialokra, yoma nohkeran di de Uplerlawna E Nhapar reria nohkeran di. Onde mliokar de mpiet walia Yerusalem, yoma Yerusalem de mana, Uplerlawna mak kla' Ray Lialawna de genni-tienni. 36 Yana mliokra onde mpialokra de mniairia o'ta-wat wuamuehemi yoma morat lihirmi id ho'mana miy mieh'a nek de taken niana mhierun doinia pa nwawahra onde nmetmetma yoma it moratnu metmetma onde wawahra hota emkade pa nodi liarni. 37 Mere mpiet nek la: ”Yowa aghi'a hade,” onde ”A'g edonna ghi' hade,” totpena yana milahara rimormior wialmi. Mere la'pa miala hya'-hya' pa ma mpiayow nammi de hade de hegana amlawanni karkiarni hare.”
Nnio'a-niatu pa yana twahla rira hihi'ini-yapyapni yatyatni mai ita
38 ”Miatg olek walia deulu-tatar di niwra: Mata nherun mata, niha mana nherun niha. 39 Mere A'ukota la miy, yana mpiahla hankerna-ralmha'ara maka riy rhi'a tiy miy. La'pa riy rpahara kilmi malganna, de miala kilmi walli malwiru pa rpahar walia. 40 Ne la'pa riy rod miy lia letgar lawawna totpena rwarui-rwate'la naniair no' inonmi, de hota miy rain plalahwa samomuoumi de mial walia naniayarmi mak yatyat no' inonmi mak ha nwahaka de. 41 La'pa riy dom nmai pia namer matni pa nhopna mikwara e hyonni-hyanni pa mila' nana kilu id olietni, de mitahan rer lia pa mila' nana kilu woru. 42 La'pa riy rwak hadom tiy miy, de yan mitawra. Ne yana mpiayotlia rira mak kwak pa riwra ra'otna-ra'ar la tiy miy.”
Tsi' kalwiedwed la riy mak khi' yatyat ita
43 ”Miy e miat walia deulu-tatar di, de e niwra: Mhi' kalwiedweda rimormior wialmi ne mpiahla riy yatyata hihi'ini tiy miy. 44 Mere A'ukot hadi tiy miy lia' dodo'ondi de, mihaka mak khi' yatyat tiy miy pa mhi' samomuou rer lia. Msiumbainia riy maka kamuki-kama'ala miy. 45 Totpena mtiutga la ilu-wniehwami de, Uplerlawna mak kden la Ilyamou-Watyatoha upni-a'nani miy. Yoma Uplerlawna Nwer rer miatni la riy maka kyata-khala ror wutga riy maka kwehwa ploi-ple'era. E' ed maka khuriernia otna me nhi' lera pa nhit la'a riy mak kaplola ror wal lia riy mak khala. 46 Yoma la'pa miy mtiulla-msiayni to'a riy maka nhi'inde khi' kalwiedwed tiy miy de hota Uplerlawna edon Na'uli miy pa Nala hihi'imi de wniahlani. Yoma miy miatg olek de, riy yatyata emeka mak kawoka blastena, nek de e rtulla-rsayni walia mak khi' samomuou ira toh! 47 Ne la'pa miy makpesiay mtiutga nhiu'ru-nhielammi la miy mutwualmi to'a, de hihi'imi re edon nareh dioin riy mak kaplin niohora ma'ta Uplerlawna yoma rimormior mak kaplin niohor Uplerlawna nek de rhi' wali emkare. 48 La' hade pede mliernohora miy Amlawanmi la Ilyamou-Watyatoha yehwani mak kara'a-kapalga riy honona edonna nkei-nhelta rira gaini, yoma wniehwa-liakat de plol toto'a la Uplerlawna yamkekni.”
Nnio'a-niatu la riy mak ktulan la rimormior wialli mak kakleha-kaplara
1 ”Ina-nara ama-hyali, mhioratreria, yana mtiutga hihi'imi-yapyapmi mak kalwiedweda re la'a riy gaini ralamni. La'pa mimhi' emkade de hota miy edonna mliernana liwatmi-odapmi wniahlani la'a Uplerlawna miy Amlawanmi makdella Ilyamou-Watyatoha. 2 Pede la'pa miy miala hadom la riy mak kakleha-kaplara, de yana mpio'on nohora emekneka riy yatyata rhi' nana yoma riwra rtot inonni la riy kalwiedweda. Yana mliernohora riy maka rhi' harella gen miaka Yahudi re rhi' kreini-iskolli la me la' walia la'a loi liawna-talan lawna totpena riy ra'ulia re. Mitlina, mak emkare de ha rlernan oleka siewni la'a riy ya'ulli-yawedni. Mere ya'ulli-yawedni olek hadewa. Hota Uplerlawna edon Na'uli-nawed ira. 3 Mere la'pa miy miala hadom la riy mak kakleha-kaplara de, yana mkiokan nohora totpena miy mutwualmi ho'mana yana ratga. 4 Mhierer nohora neka hya' maka ha mhi'a re totpena yana riy ratga. Mak kat niohora de enekneka Amlawanmi no' Heyanan to'a. Enamkek oleka hya' maka ha mhierer nohora pa mhi'a re pede hota E' ed mak kala siepmi-kaimi.”
Yano'a-ya'atu la mak ksumbaini
5 ”La'pa msiumbaini de yana mliernohor riy mak ktutga yehwa mak kaplola mere la' ralamni de yatyatni-halalli ed ma'ta la (munafik). Ir suksukni de rsumbain de raprir lia riy gaini ralamni la'a krei me la' wal lia loi-talla aratni totpena plet pa riy ratg ira. Mhioratreria! Riy mak emkade rlernan oleka siewni-kaini la'a riy ya'ulli-yawedni. Mere ya'ulli-yawedni olek hade wa. Hota Uplerlawna edon Na'uli-nawedi ira. 6 Mere la' miy die, la'pa mimsiumbaini de, mhio'la rommi nhiarni nanpena mpiol lia Amlawanmi maka edon kayamkeka. Pede hota Amlawanmi Namkek reria miy hihi'imi-yapyapmi mak edonna kayamkek la rimormior wialmi re, ne E' ed mak kala miy kaimi. 7 La'pa mimsiumbain de yana miti'ila-miwal hya' maka mikota re pa plo'a-plahwa rehia, emeknekama riy mak kaplin niohora ma'ta Uplerlawna. Ha ratniekame ir wakwakni re hota Nayatlin nan olekwa yoma ira sniumbaini re plahwa. 8 Yana mliernohora re. Yoma miy edonna mpiak ma'ta hade wa de, Amlawanmi no' Heyanna Nat niohor olek hya' maka mikleh ma'ta. 9 Pede msiumbain de emkadilla: A Am mamni la Ilyamou-Watyatoha. O' de Mueh'a Mupriri-mukded la genmu-tienmu. Ampak de nhiu'ru-nhielma ya'unni-yamta'ata nmai reri O' dee! 10 Ampei-mnar reria lodanmu-hairmu. Ampaka pa O ralma-riormu de, mak kden la noha wawannu rlernohor reria pa emekwalima maka ha rhi'a la Ilyamou-Watyatoha. 11 Mhi' apehera a apun mamni la' yamanan mak Omual pa ama'an la' ler di. 12 Mumou-muwitna a do'a-hal mamni emekwalima am miana mhoratdoinia riy do'oni-halli mai ami. 13 Yana Muolin doin limmu-mpue'er rormu mai ami, yanpa la'pa hegana-kawnu rta'g am die, hota amler la do'a-hala ralamni. Mere Muwohor doinia hegana rurni-karatni mai ami. O' ed mak ktoran reria lodna-hairi me Mumrehi-mumda'ar nohora hititmu-repreparmu pa nodi liarni. Amin (Plola). 14 La'pa mhioratdoinia rira yatyatni-halalli do'oni-halli maka ha rhi' nan tiy miy die hota miy Amlawanmi no'a Ilyamou-Watyatoha ho'mana Namou-nawitna do'a-hala maka ha mhi' nan oleka re. 15 Mere la'pa miy edon mhioratdoinia rira do'oni-halli maka ha rhi' nan tiy miy die, de hota miy Amlawanmi mak kden la Ilyamou-Watyatoha mana edonna Namou-nawitna do'omi-halmi.”
Yano'a-ya'atu la mak katahan lara
16 ”La'pa mitahan lara, de yana mtiot pa mhi' malului gaimi pa riy ratga emeknekama riy mak kiwra ktutga yehwa mak kaplola mere la ralamni de yatyatni-halalli ed ma'ta la (munafik). Yana mliernohora ira yoma ir er maka khi' herni-gaini re totpena rtutga de ir ratahan lara. Mhioratreria, rimormiori ya'ulli-yawedni to'a ed maka khi' hare siewni-kaini. 17 Mere la'pa mitahan lara, de mirarga gaimi pa nmomuou, ne mhiola-mkia'ata moratmi, 18 totpena riy raplinga de miy e mitahan lara. Eneknek to'ama Amlawanmi no' Heyanna mak edonna kayamkek de nanpena Enat niohora miy e mitahan lara. E' ed maka kamkek reria hihi'imi-yapyapmi mak kayade'a pede hota Nal miy siepmi-kaimi.”
Mliernohora Uplerlawna ralma-riorni totpena hota mliernana re'a-tniaru mak kden la Ilyamou-Watyatoha
19 ”Yana miakokan nohora re'a-tniaru mak kden la nohkeran di wawannu yoma hota erieri nora karte'a ra'ana re, ne hota mak kamna'a rma rwuri-rgalam nana re. 20 La samomuounu de miwoka-mile'ega re'a-tniaru mak kdella Ilyamou-Watyatoha yoma erieri nora karte'a hota edonna ra'ana re. Me mak kamna'a re ho'mana edonna rmai pia rkamna' nana re. 21 Miwoka re'a-tniaru la'a Ilyamou-Watyatoha yoma hota la meni pa miy re'emi-tniarmi erla de hota miy ralammi et wal lia hande.”
La'pa it ralamni edonna nod rer lia re'a-tniaru Ilyamou-Watyatoha de emolmolan nekama it inonni mana melmela-kalkalma
22 ”It matni nhi' wa'du mormiori la it inonni. La'pa matmi yamkekni lelera, de inonmi tetema mana hitita-reprepra. 23 Mere la'pa matmi npon wa, de inonmi tetema mana melmela-kalkalma. Ne la'pa wa'du mak kden la inonmi ralamni de melmela de hota mel'uta-malien memna.”
Ononni de totpena twak la Uplerlawna pa Nodi plolli la it mormiorni
24 ”Ina-nara ama-hyali, riy ida ta'en niana natlin la matroma riy woru. Yoma hota natlin samomuou lia ida ne la handina de edonna natlin kalwiedwed la. Emkade wal lia miy. Hota ta'en niana mimpiaror to'a re'a-tniar nohkerna gahani me mial walia ihrami tetema pa mhima-mrie'a Uplerlawna kniarni. 25 La' hade pede mhioratreria, yana mimta'at nohora hya' maka hota ha mi'ina-miemnia onde la'a hya' ed maka ha mhiewta-mniairia. Miplinga de mormior die narehia ya'ana-yemnu, ne inonmi de nareh niana hewewta-naniairi?! 26 Mimkek tek la onu-ma'nu nemnema re. Ir edonna rawuli-ratniamni, me ir edonna rreiki-rwo'ora, me ira edonna rdudnu rieiki-wnio'orni re. La'pa emkade ho'mana Amlawanmi mak kden la Ilyamou-Watyatoha Ntera-ndem wali ira. Miplinga de Uplerlawna Nsaynia miy die nareh dioinia onu-ma'nu rena?! 27 Rimormiori maka ralamni worwuorga onde namta'ata matmiatni ho'mana takeni nhaur nan aranni totpena edonan nmati. 28 Hya'a nariei pia ralammi worworga la hewewta-naniayarmi? Mimkek la kihir mak kadeutu mak kmor lia rai mtatanni re. Kihir mak kadeutu re edonna rkari me edonna ratenni-ramairi. 29 Mere mhioratreria, ray Salomo mak kre'a-ktar die nek de edonna nhewta-nnairia naniairi samomuounu pa emeknekama kihir mak kadeutu re. 30 Wewna mak kden la rai mtatanni re rmor lia ler di mere repar dewade rrinnia la ai ralamni. Wewan nek de Uplerlawna Nahowna-nakgara pede samoga la yamkekni. Mere miy die edon mpiesiaya de wewna nekane Uplerlawna Ntera-ndema ne, yaho'ma miy?! 31 Ina-nara ama-hyali, Uplerlawna hota Ntera-ndem miy pede yan mimta'at nande miwra: ”Adoh hota ama'ana hya'a, me amemnu hya' ee? Onde hota amhewta-mnairia hya'a?” 32 -33 Riy maka kaplin mua'ta Uplerlawna nekane er mak kahakhak nohora hare honona. Mere miy die Amlawanmi no'a Ilyamou-Watyatoha Nat niohora oleka miy e mpiaka (perlu) hare honona. La' hade pede mihak ulga totpena Uplerlawna Nodi plolli la'a mormiormi-dardiarmi, me totpena mhi' hya' mak kaplol la E yamkekni, ne hota hya' maka mikleha de hota Enal momuoga tiy miy. 34 Hade pede yana ihrami ntepul nohora repar lerni yoma repar lerni de nodi wniaror warwuaru dom owa'an to'a. Ler di nodi oleka mehra-maunu pa twaror nohora.”
Yana pletpa mpiaghala rimormior wialmi
1 ”Ina-nara ama-hyali, yana plet pa mpiaghala rimormior wialmi totpena Uplerlawna mana edonna Nhudi-npar (Nukmua) wali miy. 2 Yoma la' emkameni la miwerta-mitailia riy doma demade Uplerlawna Nawerta-nataili miy emkade wali. Ne nhio'ota-liewta maka itnairia pa ta talewta it rimormior wialli demade Uplerlawna Nal hade pa na Nlewat wali ita. 3 Hya' mak karei pia mpiaghala rimormior wialmi onnila do'oni-halli mak edon kwerta, mere miy do'omi-halmi re nekane lawan rehia. La'pa mhi' emkade, de emekwalima miy e mimkek nana ai liu'wu mak kdella mutwualmi de matni ralamni, ne ai dieulu naniewat la miy mat wamueheni ralamni mere miy edonna mimkek nana. 4 Ralma-riormi emkameni pa mikot la mutwualmi miwra: ”Mai pia agal doinia ai liu'wu mak kden la o matmu de,” mere miplin niek la ai dieulu de e naniewat la orgahami matmi ralamni. 5 Hoi! Yana mtiota miy inonmi la riy kalwiedweda mere plollolli de riy yatyat miy. Milgot ulga ai dieulu mak kden la miy matmi de totpena mimkek samomuoga ai liu'wu mak kden la mutwualmi de matni pa milgota.”
Yawalliohora (perumpamaan) la'a yana takot nohora Uplerlawna lirni-tunnu la'a mak kahmen memna katlina
6 ”Yana miala hya' ed maka Uplerlawna gahani la'a riy mak kahmen memna kreiniana. Yoma itsi' emkade, de emolmolan nekama itala yamanna la ahu na'ana de hota ah die nwaldioinia pa ntowr ita. Ne emolmolan nek wali me tnaklia mutiara la wawi gaini noka hota nwatei-nwahapra mutiara de.”
Uplerlawna Natlina-natailia polpuolu-wakwaka
7 ”Ina-nara ama-hyali, la'pa mpiak la Uplerlawna, hota mliernana, mpiahaka, de hota mia' nana, mtiet la nhiari hota rhari nhiari tiy miy. La' hade pede mipe'el pa mpiak rer lia Uplerlawna. 8 Yoma riy mak kwaka de hota nlernana, mak kwahaka hota na' nana me riy maka ktet la nhiari de hota rhari nhiari la. 9 La' miy hononmi re, de la'pa ama-hyali id a'nani nwak yamanna la amni, dewade amni nal watu lia e'a?! 10 Onde la'pa nwak i'na dewade amni nal niy lia e'a?! 11 La'pa rimormiori miy maka khi'inde khi' do'a-kyap hiala nekane miatu miala ha samomuounu la miy a'nami re, yaho'ma miy Amlawanmi mak kden la Ilyamou-Watyatoha. Hota E' ed mak kalkal reria ha samomuou lia'a riy mak kwak la E'a.”
Deulu-tatra ononni
12 ”La'a hya'-hya'a honona de mhi' samomuou rira de emekwalima mimiwra irhi' samomuou tiy miy. Hade de Musa deullu-tatarni me makwohorulu-ktatrulu ha rwatutu-rwaye'a ononni.”
Yawalliohora la'a talan mak kokur Ilyamou-Watyatoha
13 ”Ina-nara ama-hyali, la mormiormi ralamni de mliola nhiar miaka kakmamah'a pa mlia'awa la mormiori-dardiari genni. Yana mliola talan mak kawerna-katpoini, yoma nhiar die ed maka tlol pa tla'awa ai mormiori ralamni (naraka). Ne riy rwakdie'da lola. 14 Mere talan lihir maka itlola pa itla'awa mormiori-dardiari genni de nhiarni nakmamah'a rehia pa nhi'nande riy doma rmeh'a mak kla' nana.”
La'a rira nhiolli-lietni re tat niohora kniarni re plolli-halli
15 ”Ina-nara ama-hyali, mi'ererma la riy mak ktot pa khi' inonni la emolmolla mak kakot nohora Uplerlawna lirni-tunnu. Hota rmai miy die rwehwa-rlakta emeka duma, mere erammi, ohpora-ahdiawra irhatta. 16 Hota la'a wniehwani-liakatni nekane miy e miat niohora ira kniarni plolli-halli. Itala au nor wo'oni pa tsi'a la yawalliohora. Ruwnu-penta de edon nawo'a lokrahi wio'a, ne ruwnu-ahla rurni-karkiaratni, de edonna tlernana kar wo'a. 17 La'a au muaka kpoti-kadwu de tlernana orwo'a-auwo' samomuou, ne la'a ora-au muaka khoptutu-khoplera de itlernana wo' maka kilta-kwatra. 18 Au muaka kpoti-kadwu, de edonna nawo'a kilkilta-kwatwatra ne au muaka khoptutu-khoplera edonna na'unu-nayeh nohora wo' samomuou. 19 Ne orona-augona maka edonna ka'unu-kayeha, de hota retan doinia pa rnaklia la ai ralamni. 20 Ora-au re emekwalima mak ktot pa khi' inonni de emeknekama mak kakot nohor Uplerlawna lirni-tunnu. Hota la' ira wniehwani nekane miy e miat niohora ir kniarni plolli-halli.” It ttutga de plol toto'a pa Uplerlawna mutnu-rahanu it wa yoma itlernohora E lirni 21 ”Riy harahu makpolu-makwak la A na'nu riwra: ”Matromlawna, Orgahi-Orha'u ne!” Mere hota riy doma rmeh'a to'a mak rre' teman la Uplerlawna mutnu-rahanu maka Enodi plolli la emeka ir Rayni. Uplerlawna mutnu-rahanu re eneknek to'ama riy meni maka klernohora A A'mu mak kden la Ilyamou-Watyatoha ralma-riorni. 22 Ne la'pa nte'ela A maimia'yu la re'eni wornu pa Aghudi-puar rimormiori de hota rira liawanni maka edonna katlina-katailla Uplerlawna rakot mai A'u riwra: ”Matroma, O edonna Mutlin ma'ta amodia O nanmu pa ma makot nohora Uplerlawna nnio'oni-niatnu? Ne la' walia ami e mpet walia Orgahi-Orha'a nanni pa ma mhokar doinia hegana-kawnu, me totpena amtutga hihi'a-yapyapi mak kamehi-kayona (mujizat).” 23 Mere hota Awualola plele'er la giwra: ”A'g e uplin niohora miy ee! Rho'orgot miy la handi! Miy er maka khi'a yatyatni-halalli!” 24 Pede la'pa riy ratlin nana A li'ru ri pa hota rlernohora, de ir emekwalima riy mak katu kwatatga romni rirni la watu wawannu. 25 La'pa otna nturu-anni nten pia nmai die nodia ihini-turnu pa nwayotil la rom de, mere rom de hota edonna nwalera yoma nawniatat lia watu wawannu. 26 Ne la'pa he' ed maka katlina A li'ru maka ukota ri, mere edonna nlernohora de emeknekama riy mak kpodku-kpadku maka kariria nek romni la eni wawannu. 27 La'pa nmai wia otna lerni de hota nodia anin lawna nor wut nieka ihini-turnu pa la'pa nwayotil la rom de, de hota rom de napru'wu la yawa, me rirni-awnu kdieulu-kliatna.”
Yesus plolli-mneheni
28 Nhorwua noma Yesus Nwati kniarni la wniatutnu-wniaye'eni re, ne rirahu mak kden la hande, rwer rer wiawni la'a wniatutnu-wniaye'eni re, 29 yoma Nodi plolli pa Nwatutu. Pede wniatutnu de ematia'a makwatutu-kwaye'a agama Yahudi wniatutnu.
Yesus Nhi' kalwieda riy maka klernan nnieni ulityata-temyata (kusta)
1 La'pa Yesus Nerun la wo'ora hananni, ne riy rahu rlernohora reria. 2 La' ler de nekpa riy mak kanieni ulityata-temyata nmai noma nwaltior tar lia Yesus gaini ralamni na'nama nwak la niwra: ”Amee! Mtiulan mai a'u. Agat niohora de Omuodi plolli pa Mhi' kalwied nan a'u, hornama Ompuayow nohora a wakwa'ku, up matro'mu nee!” 3 Noma Yesus Nran limni pa Nteman la riy de, pa Nakot la: ”Arieiniana o wakwakmu pa omkialwied wa!” Mtatande nekpa nnienni de nmolu. 4 Noma Yesus Nakot la: ”Mhuoratreria! Yana mukot harilla' riy dom owa'ana. Mere mliernohora hya' maka Musa ha ne'era-ntatar targ oleka, de mlia'a imam ida pa mpuak la totpena namkek memna de omkialwied olekwa. Me muala limtutnu emeka Musa nwatut tiarg oleka de totpa riy honona rat niohora de omkialwied olek wa.”
Yesus Nhi' kalwieda Perwira Roma hopopanni ida nnienni
5 La' noma Yesus Nler la Kapernaum, noma o'ta-mat la makodi keki-rautu rahu ida nma nwatroma, pa nwaka tniulan la pa nhi' kalwied nana e hopopanni mak kamehra la roma nayanni. 6 Perwira Roma nakot la Yesus Niwra: ”Ame! A hopopnu id la roma nayanni e naliu'ut nohora mehrani la'a genni.” 7 Yesus Nakot la Niwra: ”Hyalia, pen Atiy pia ghi' kalwieda ha nnienni della rommu nayanni.” 8 ”Yan nekwa Tuna! Perwira id a'u mere a'g edon lia' nana Tuna lewatni pa Tuna Nmai lia a ro'mu nayanni. Pen neka Tuna Nden nek la handi mere Nodi plolli pa Nhopna a hopopnu de nkalwieda la roma nayanni. 9 Yoma a' niek de utlin la mak kodi plolli mai a'u. Ne la'a a tniornu de ratlin mai a'u. Aghopan pa makodi keki-rautu ida nla'awa de hota nler pa nla'awa. Apuolga dom de, hota rmai. Ne la' walia aghopan pa a hopopnu de nhi' hya' to'a, de hota nlernohora.” 10 La'pa Yesus Natlin nana ha lirni de, noma Yesus Nwer rer wiawni yoma makodi keki-rautu o'tani de pesiayni de. Noma Yesus Nakot la mutlialawna maka e rlernohor E'a Niwra: ”Ina-nara ama-hyali, riy di de riy Israel atia'a id walia di me! Mpiesiaya! La'a riy Israel maka Awuatrom nan oleka re de A'g edonna liernan ma'ta maka pesiayni naruri emeka riy mak Israel atia' di! 11 Plola rirahu mak edon rwatiawu Israel mere rwatiawu tipru, warta pa rmai die, hota rora Abraham, Isak me Yakop rewre'wa pa ramuki-rahepru la'a ya'anlawna-yemunlawna la gen miaka Uplerlawna Ntorna-nraut de! 12 Mere makden Israel re, maka Uplerlawna Ntutga la ululu pa hota rre' teman la Uplerlawna horatni-hairni limni-rorni, de harahu re hota ema rwaldioinia pa rnaklia la melmelli-kalkalamni, la'a Uplerlawna genni de walli tio'ora. Hota la' hande de rpolpuol inni-rwakwak amni.” 13 Mere Yesus Nakot la perwir de: ”Mlia'a nek wa! Hya' ed maka ompuesiay die pen mumkek memna.” La'a mtatan de nekpa perwir de hopopanni nkalwied wa.
Yesus Nhi' Petrus yananni nora riy rahu pa rkalwied la nnienni-nhienni ralamni
14 Noma Yesus Nokria Petrus likatni. La' hande de Yesus Namkek de Petrus yananni ruru npahna nohora tema pniahnani la'a lewu wawannu. 15 Noma Yesus Nteman la patke' de limni, dewade nnienni de nmolu. Noma namat pa nwahi'a-nwayodia ya'ana-yemnu pa Yesus Na'ana. 16 La'pa lera ntuinia, dewade riy rmai die rodia rirahu maka hegana nhu'ru ralma. Noma Yesus Nhopan pa hegana-kawnu re rlergot la re, me Nhi'a riy honona pa rkalwied la nnienni-nhienni. 17 Hya' maka Yesus Nhi' nana re honona de ntutga de makwohorulu-ktatrulu Yesaya lirni naplola. Yoma Yesaya nhorat targa Uplerlawna lirni emkadille: ”E' ed mak kolin doin ita mehrani-maunu. Ne Nal it pa tkalwieda.”
Yesus Nahaka riy maka khoratdoini nohkeran di wniarorni-wnialaini pa ral ralam tetema pa rlernohor E'a
18 La lera ida ne rirahu rle'lu nana Yesus pede Yesus Nhopan pa maka ha Nwatutu-nwaye'a re rwahi' pa rleretia danau. 19 Yesus edon la' ma'ta, dewade makwatutu-kwaye'a Musa deullu-tatarni ida nmai pia nakot la niwra: ”Am tungkurge, a'g e giwra liernohor rer nek O' Ama pa tlol meni-meni.” 20 Noma Yesus Nakot la Niwra: ”Hyalia, Ohpora-ahdiawra hu'ulli-lienni erla, me onu-ma'nu nekane puonni erla, mere Rimormiori A'na A'u, A' die hota A'g edon liernan gen pia A'udera A o'tu. Ne hota omliernohor A' die hota o e mukleh wali geni.” 21 Noma mak klernohor reria E'a id nakot wal lia: ”Tuna, muolin doin a' pua ula' ulia la'pa arie'ela tiamnia a'mu nampena aliernohor reri O'a.” 22 Mere Yesus Nakot la: ”Hyalia, dodo'ondi de mliernohor reri A'u niek wa ne muolin doinia riy mak edon kpesiay A'u pede emekneka rmati olekwa pa orgahani rtamnia mak kmati re.”
Yesus Natutga anin lawna pa nwal lia lina-lera
23 La'pa Yesus Nha'at la puou, noma maka ha Nwatutu-nwaye'a re ror wali noma rhopal wa. 24 Noma plinu-plinnianamde anin lawna mak kodia kakmoranni nten pia nhi'nande nayo'ora la' danau pa yo'or mana rriw lia puou ralamni. Emkade ho'mana Yesus e nanin hala la puou ralamni. 25 Dewade maka ha Nwatutu-nwaye'a re rla' pa ramat doin Yesus riwra: ”Tuna, Mtiulan mai ita, hota puou di ntepar wa! Hota itmat wie!” 26 Yesus Niwra: ”Nihya'pa mimta'at wenanmi emkadena?! Miy edonna mpiesiay A'u.” Dewade Yesus Namat pa Nkamot targa yo'ora anin lawan de na'nama nleretniekla nalina-nalera la'a danau de ralamni. 27 Dewade maka Yesus ha Nwatutu-nwaye'a re honona rwer rer wiawni pa riwra: ”Riy meni hadina de pa yo'ora-anni nek de ratlina-ratailla?”
Yesus Nhi' kalwieda riy maroro' maka yatni-rha'ani ha rhu'ru ralma
28 La'pa Yesus Nte'ela danau walli, la'a Gadara yapatni, noma riy woru maka yatni-rha'ani rhu'ru ralma rmai pia rwatroma Yesus. Riy maroro'a re rawuwuhura, nhi'nande riy ramta'ata rlol hare onni. Rrora rlergot la hu'ula-liena la'a tniamin mat geni ralamni pa 29 rpolpuolu-rhawaunia pa riwra: ”Oi, Uplerlawna A'nani nee! Hota Omhi' nan ami emkameni ee! Yanhi'pa Omiwra Mukmua ami, mere lerni edonna ntutu-nte' ma'ta pa Uplerlawna Nhudi-npar ami.” 30 Gen di edon oliet la wawi wiok lawna mak kwayowar pa kahaka ya'ana-yemannu. 31 Noma yatni-rha'ani re rwak lilili-mamuau lia Yesus pa riwra: ”La'pa Omulgot am die, ampak pa Mhuopan pa am mhu'ru ralam la'a wawi re.” 32 Noma Yesus Niwra: ”Mlia'awa!” Dewade yatni-rha'ani re rlergot la'a riy maroro'a re inonni, pa rla' rhu'ru ralma wawi re, na'nama wawi honona re rawlar pia rla rlererun la weran teti pa rwuwul wenwenna la' danau de ralamni. 33 Mak khuri-kwa'ana wawi re rawlar pia rla rakot nohora wawi re rora riy maroro'a re la leta ralamni. 34 Ha narieiniande riy honona la let de ralamni rla rwahaka Yesus pa rora rwatrom memna. Noma rwak lilili-mamuau pua Yesus yan memmemna Nalo'on la' gen die ne plet pa Nwaran nek wa.
Yesus Nhi' kalwieda riy mak kaliu'uta ida
1 Noma Yesus Nha'at la puou na'nama rleretia danau pa rawal lia E letni-ruhunni. 2 La hande, riy rodia mak kaliu'uta ida de rran nan wut tio'a la u'tani maka nanin la pa rodia la Yesus de. La'pa Yesus Namkek tutga riy mak kmai re pesiayni raruri, noma Yesus Nakot la riy mak kaliu'ut de Niwra: ”Yana mumta'ata ama! Dodo'ondi de A'umou-uwitn oleka do'omu-halmu.” 3 Makwatutu-kwaye'a agama dom mak kden la hande rwaror E' de rimormior niek E' wa pa rwaror la ralamni de riwra: ”Inee! La'pa Enakot emkade de, riy de e Napolu-naliella Uplerlawna yoma Uplerlawna Nmeh'a Nodi plolli pa Namou-nawitna do'oni-halli!” 4 Mere ira ralma-riorni re, Yesus Nat niohora momuoga, pede Nakot la: ”Ee, hya' ed mak kariei pia mimpiaror nana ralma yatyata-halal dena?! 5 La'pa plet pa A'ukot nek la e'a giwra e do'oni-halli ramou-rawitn oleka de, miplin niohor ma'ta plollola pa e do'oni-halli ramou-rawitn oleka me edonna, mere la'pa Apuaran pia A'ukot la e' pa namat pa nala'awa de mimiat niohor memna A ru'ru-la'yu etla yoma mimkek nan memna. 6 Pede hota la' dodo'ondi de Agiwra tiut muemna tiy miy, la'a noh di wawannu de Rimormiori A'nani A'g ed mak kodi plolli pa umou-uwitna riy do'oni-halli.” Noma Yesus Nakot la mak kaliu'ut de Niwra: ”Hyalia, mumat doin la pa mpuopna u'tamu de pa mlia'awa rommu.” 7 Dewade mak kaliu'ut de namat doin pa nla'awa la romni nayanni. 8 La'pa riy rahu re ramkek memna hihi'a-yapyap die noma honona rwer rer wiawni, ne ra'uli-rawedia Uplerlawna yoma Uplerlawna Nal oleka plolli-mneheni mak emkadi la rimormiori mak kdella nohkerna wawannu.
Yesus Npolga Matius
9 La' noma Yesus Nhoitio'or la gen diewa. La'pa Yesus Nalala' rer mia'ta noma Namkek nana mak kawoka blastena id de nanni Matius. La' ler de de Matius e namtatna la gen miaka nhi'inde enawoka blasten la. Noma Yesus Npol lia: ”E! Mua mliernohor A'g ee!” Noma Matius naprir pia nlernohora Yesus. 10 La'pa Yesus e Nana'an rer lia Matius romni dewade riy harahu maka nhi'inde leta mniotni sukni atia'ala re, emeka mak kawoka blastena me riy mak ha riwra riy dodo'a-halala rmai pia rora Yesus me maka ha Nwatutu-nwaye'a re pa ra'an rewre'wa. 11 Riy Parisi mana ramkek wali hare. Noma ratiana riy maka Yesus ha Nwatutu-nwaye'a re riwra: ”Oi! Nihya'pa miy tungkurmi de Nora mak kawoka blastena, ror wutga mak khi' do'a-kyap hiala dom to'a re ra'an wutu?!” 12 La'pa Yesus Natlin nana yatianni re noma Yesus Nakot la re Niwra: ”Mak edonna kanieni edonna rma rwahaka dokter. Eneknekto'a mak kamehra nanpena ed mak kwahaka dokter. 13 Mpiaror kalwiedweda Puka lirni makden la tatar di: ”Rimormiori maka ktutga ralam kalwiedni la rimormior wialli khi' A ralmu pa uhepru de nareh dioin meman la riy mak kala prehenni-maunu mai A'u.” Yoma A maimia'yu di de A'g e edonna mua puolga riy mak kiwra irakleha do'a-hala, mere Amuai di totpa Apuolga riy dodo'a-halala pa rhoitio'or doini do'oni-halli re.”
Yawalliohora wotelu la'a Yesus wniatut warwuarnu edon nora agama wniatut ulullu ramneha
14 La'pa nhorwua noma lera ida ne mak klernohora Yohansi mak kharani rmai lia Yesus pa ratiana riwra: ”Nihya'pa amora riy Parisi re matahan lara (puasa), ne mak klernohora Tuna de ra'ana?” 15 Noma Yesus Nakot la Niwra: ”Emkameni la miy wniarormi dena de?! A' di de emeknekama muanke'a mak kiwra kmehlima. Riy maka rpol niana-rwak nana pa ra'ana-remun la yawoka-yale'u la mehlima-marya'a, de hota ralamni edonna rmolu-rhelam nohora muanke' maka kmehlima mak ktepartar mua't la ya'ana la' mei wawannu toh! Hade yala'ani atia' hade! Mere hota la'pa nte'ela la' lerni, nanpena ira'ala muanke'a maka kmehlim della mak ka'an wutu re onni. La' ler de nampena iratahan lara. 16 Riy edonna rga' pua rala kokanan warwuaru ra rlowna rain mak kawniali. Yoma kokanan warwuar die hota napliu'uta-napdiedan nana rain mak kawnial de ne hota na'itar la pritni. 17 Emkade wal lia riy edonna rga' pua rhuria anggur turu warwuarnu la' ha ulit mak mahneka. Yoma hota ulit mak emkade de hota npah'a pa ntowur doinia anggur tur diella me ulit de ho'mana ta'en niana rnair owa'ana. Anggur tur warwuarnu de rhuria la ha ulit warwuaru totpena rrora yana riata.”
Mak kodi plolli la Yahudi kreini-iskolli genni, a'nani nora pat mak kheik la Yesus raini
18 La'pa Yesus Nora mak klernohor reri Yohansi mak kharani e rwahagaur reri, o'ta-mata ida nmai pia nwaltior tar lia Yesus gaini ralamni. Na'nama nakot la Yesus: ”Tuna, a a'nu patke'a na'nama nmati. Mere awuak de, Mtiulan pa Mlia Mtieman la e'a totpena nmori owa'ana.” 19 Noma Yesus Naprir dioin la pa Nor rewre'wa maka ha Nwatutu-nwaye'a re pa rora riy mak kpol die pa rla'awa. 20 -21 Rla' pa rden ma'ta la talla letgarni, dewade patke'a mak khur riara la'a anni termida wehrani woru, nma nlernohora Yesus. Nwaror la ralamni: ”Hornama atieman to'ola raini plalahwani de, de hota akalwied wa.” Noma nlol Yesus to'orni pa na'nama nteman la Yesus raini plalahwani de tawnu. 22 Dewade Yesus Nkillia patke' de pa Nakot la: ”Yan mumta'ata. O pesiaymu e narur mai A'u ina, pa mkialwied wa!” Mtatande nekpa nnienni nmolu. 23 Nhor nioma Yesus Nodi liarni la o'ta-mat de romni. La'pa Namkek nan mak keu floiti, me riy rahu mak ko'a-kakur nohora mat die, noma 24 Yesus Nakot la re: ”Ee, hononmi mliergota! Yoma hararar de edonna nmati, hade e nanin to'a.” La'pa ratlin nana Yesus lirni de, noma honona riarin taru la yamalli. 25 La'pa honona re rlergot wa onnila Yesus nhiopanni dewade Yesus Nla'awa hararar de genni la'a rialma, na'nama na Ntorreria hararar de limni dewade nleretniekla nmori owa'an wa. 26 Nhor diewade riy rla' pa rodia kot della leta-leta la Galilea uhunu-ewatni-ewatni-lahwani honona.
Yesus Nhi' kalwieda riy woru mak matni kyata
27 La'pa Yesus Nto'or la gen die, pa Nalala' reri ne riy mak matni kyata worga e rlernohora reria Yesus. Rrora rhaun la Yesus riwra: ”Ray Daud upni-a'nani ne! Mtiulla-msiayn nan mai ami ee!” 28 La'pa Yesus Nte'ela roma ralamni dewade rrora rmai pia rwatroma Yesus. Noma Yesus Natiana re: ”Mimpiesiaya de hota Aghi' kalwied miy matyatmi rena?” Noma rrora rwahla Yesus lirni: ”Ampesiay O' Tuna!” 29 Dewade Yesus Nteman la rrora matni. Nakot la re Niwra: ”Yoma la' miy pesiaymi pa hya' ed maka ha mihaka de hota mliernana.” 30 Nleretniekla matni re ramkek wa. Noma Yesus Nano'a re Niwra: ”Mhioratrer memieheni memna A nnio'u di. Mlia' pa yan mikotkot harilla' he' to'a.” 31 Mere ir edon ratlin la lirni de mere rla'awa, pa rwahaur nohor momuoga re la'a leta-ruhuna la Galilea uhunu-ewatni-ewatni-lahwani honona.
Yesus Nhi' kalwieda mak kaplinu kaltieri
32 La'pa riy maroro'a re rlergot pa riwra rla'awa dewade riy rodia riy maka hegana-kawnu nhu'ru ralma id pa rmai lia Yesus. Riy de naplinu naltieri. 33 Yesus Nleretniekla Nhokar doinia hegana-kawnu de, ne mtatande nekpa riy de naltier kalwiedwed wa. Riy honona rwer rer wiawni pa riwra: ”La' a mormior miamni di, de ami edon mamkek ma'ta hihi'a-yapyap mak emkadi la'a Israel di.” 34 Mere riy Parisi riwra: ”Hegana amlawanni ed mak kala ruri-lai la Hade pede na Nhokra-nlai hegana-kawnu re.”
Mak kar lia Uplerlawna kniarni riy dom rmeh'a to'a pede kniarni nwerat rehia
35 Emkade mamain nek la Yesus Nla' pa Nler la leta-leta re honona. Nwatutu-nwaye' la'a gen miaka Yahudi re rhi' kreini-iskolli, me Nakot nohora Kot Kalwieda-Paitiota de hota Uplerlawna Nodi plolli emeka Ray. Enhi' kalwieda rirahu maka klernana nnieni-nhiena, mehra-mau hya'a-hya'a to'a. 36 La'pa Yesus Namkek la rirahu re, de Yesus ralamni ntuin doin la pa Niwra Ntulan la ira. Yoma honona re meh'a nalerlera, yoma rakleha riy mak ktutga talla mak kaplollol la' ira. Honona re emolmolla pipi-duma mak kakleha riy mak kodi. 37 Noma Yesus Nakot la talanwalli maka ha Nwatutu-nwaye'a re, Nnairia yawalliohora id pa Niwra: ”Emolmolan nekama wetra' harahu maka nkern olek la nhyi' ralma, mere mak kreiki-kwo'ora, edonna rtu'tu, emkade walia mak edon katlin ma'ta Uplerlawna lir kalwiedni de harahu wali mere mak kakot nohora Uplerlawna lir kalwiedni riy doma rmeh'a. 38 La' hade pede emolmolan nekama rwak la ora nhyi' de totpena nhopna mak kreiki-kwo'ora pa rla rreiki-rwo'ora, mpiak wal lia Uplerlawna totpena Ntutga riy pa rre'ela rakot nohora Uplerlawna lir kalwiedni la rimormiori mak edon katlin ma'ta.”
Mak kodia Uplerlawna Kot Kalwiedni riy termida wehrani woru
1 Nla' pa nte'ela lera ida, noma Yesus Npol wutga maka ha Nwatutu-nwaye'a re riy termida wehrani woru. Noma Yesus orgahani Nala ruri-lai la ir honona totpena rnairia pa ra rhokra-rlaiya hegana-kawnu me la' walia totpena ra rhi' kalwieda mak kler la nnieni-nhiena mehra-mau honona. 2 Riy maka Yesus ha Nwatutu-nwaye'a re maka Enhopan pa rodia Uplerlawna Kot Kalwiedni-Paitiotni de, riy termida wehrani woru. Hare nanni de: Simon maka ha rpol wual lia Petrus, nor walia hyalli Andarias, me Sebedeus a'nani Yakowsi nor hyalli Yohansi, 3 ra'itra Pilipsu, nora Bartolomeus me Tomsa me Matiusu maka kawoka blastena, me Yakowsi, Alpius a'nani, me Tadeus, 4 la'pa Simon mak kwayotil memna Romawi rodi plolli la Israel, la'pa Yudas Iskariot mak ka'olga Yesus.
Makodia Uplerlawna Kot Kalwiedni tulanni-kniarni
5 Riy termida wehrani woru mak kodia Uplerlawna Kot Kalwiedni re, Yesus Nhopn ir pa rhi'a hya'a maka Ha Nakota ri, de Niwra: ”Hyal miy re! Yana mlia'a riy maka edon kdella Yahudi genni, me yana mlia' wal lia riy Samaria genni-tienni. 6 Mere mlia' riy Israel re. Yoma Israel rwaltio'or doin olek Uplerlawna pa emolmolan nekama duma mak kawlar dioin oleka la'a matromni. 7 Mikot la re miwra edon nalo'on wali ne lerni ntutu-nte'ewa pa Uplerlawna Nodi plolli pa emeka Ray ida. 8 Mhi' kalwieda riy mak kamehra-kamau, mimoria riy mak kmati-kmolu, mhi' kalwieda riy maka kanienia ulityata-temyata me mhiokra-mliai dioinia hegana-kawnu. Miy edon mial hadomdom pa mliernan ruri-lai die, mere Uplerlawna ed mak kal nek rurni-laini honona tiy miy. Pede, la emkade walia mtiulan la rimormiori wialmi, de yana mhiopan pa rala miy kaimi. 9 Yana ma miodia kupan maha, kupan wawahra, onde kupan pi'ra. 10 Yan miod walia arkai onde naniayarmi ida-woru onde laka wniopmi woru totpena mhiernu la' talan ralma. Ne yan miod walia lie'enmi. Yoma riy mak kar lia Uplerlawna kniarni de rlernan liwatnu-odawni nhierannu la'a riy maka e rhima-rre' reria. 11 La'pa mtie'ela leta-ruhuna dom de mihak nana riy maka enreinian miy pia mpiak la pa miora mhiol wiutu. Mdien neka la ir romni la'pa kniarmi la' let de la nhorwua nanpena mpiaran la' rom de 12 La'pa mtie'ela romni nayanni de mpiak pa Orgahi-Orha'a Nala kalwieda-paitiot la. 13 La'pa rom de mniotni rreinian miy die hota plola pa hota rlernan Uplerlawna kalwiedni-paitiotni. Mere la'pa edonna rreinian miy die, mhiedg owa'an lirmi re maka mpiaka Uplerlawna Nhima-nre' ira. 14 La'pa mlier la roma-lewu onde leta-ruhuna maka edonna kreinian miy onde edonna katlina-katail tiy miy die mtio'or doin gen die, me mkiakan doinia awu mak kden la lakmi lia'armi totpa mtiutga de Uplerlawna Nwayotlia ira. 15 Mhioratreria! La'pa nte'ela' lera-mela hohoni maka Uplerlawna Nhudi-npara rimormiori la watghudi lokarni-tatiaili lahannu, de riy mak kden la leta-ruhuna maka edon kreinian miy er maka klernana Uplerlawna niukamnu mak kareh dioin miemna niukamnu maka riy yatyata-halala mak kden la leta Sodom nora Gomora hota rlernana.”
Yan mimta'ata la yamuki-yama'ala maka hota kmai nieka
16 ”Mhioratrer hadi! A'g e ghopan pa mlia'awa A arwa'lu geni pede hota miy die emeknekama pipi-duma mak kakleh ruri-lai pia mlier tar lia ohpora-ahdiawra letgarni mak kiwra klihir matmata-khaw riarara. Pede erammi la' temmi pa emeknekama niy, me mtiutga nhioli samomuou emeknekama lmo'ma maru. 17 Mi'ererma yoma hota riy mak edon kpesiay re rte'la miy pia rod miy lia mak khudi-kpara gaini. Hota rliwar miy lia' gen miaka Yahudi re rhi' kreini-iskolli la. 18 Ne hota ra'it miy lia'a o'ta-mat lalawna me la'a ray-ray re gaini ralamni yoma la' A rerie'yu. Hota emkade totpena mimliernan talan pa mikot nohor Kot Kalwieda-Paitiota la ira, ne la' walia totpena mak kaplin niohor Uplerlawna re ratlin nan A na'nu. 19 -20 Mere la'pa rod miy pia rhudi-rpar miy, de yan memmemna ihrami rteplu yoma mpiarora hya' maka hota miy mikota? Yoma hota la'pa ha ratian miy nanpena miy Amlawanmi Uplerlawna Nal miy pia miat nohora hya' ed maka ha mikota de. Yoma hya' mak ha mikota de edon nwatiawua miy wniaror wamuehemi, mere ha nwatiawu Uplerlawna Nhiw Lululli. 21 Hota la' ler de riy rala inni-narni makpesiay A'u pa rwenna. Emkade wal lia ama nek de nala a'nani makpesiay pa rwenna. Me upa-a'na nek de hota edon ratlin la inni-amni makpesiay pede rala inni-amni pa riy rwunu-rwenna. 22 Riy la' meni-meni to'a hota rahankeran rer tiy miy yoma miy mliernohor reri A'u. Mere la'pa he' ed maka ktorrer pitpitga pesiayni pa la ntutu-nte'ela honi de hota nlernana mormiori-lewlewna plalahwa pa nodi liarni. 23 Pede la'pa ramuki-rama'al miy lia leta ida, de mlia'awa la' leta id owa'ana. Mimpiesiaya, la'pa miy edonna mlia' ahor mua'ta leta-ruhuna re honona la'a Israel, de hota Rimormiori A'na Amuai wia. 24 A'n iskola edonna nareh dioin tungkurnu me maka ha rhopna-rli'iru mana edonna narehelia upni-matromni. 25 La'pa hota a'n iskola rlernan walia hya' ed maka tungkurnu de nlernana. Me hopopna-li'iru ida nlernana hya' ed maka upni-matromni nlernan walia. Emkade wal lia' Agor miy die. A'g ed maka emolmolan nekama mak khi' o'tani la romau ida me miy die emeknekama rom de mniotni. Ne mak edon kpesiay re rhoi A lia Be'elsebul (de hegana amlawanni), dewade hota emkameni owa'an la' miy?! Hota ha rhoi nanmi re de npohra-ngehpa memn owa'ana.”
Mak klernohora Yesus yana ramta'ata mere rla' pa rakot nohora Uplerlawna lirni-tunnu honona
26 ”Ina-nara, yan mimta'at rira, yoma mak kayade'a id mana la'a Uplerlawna lirni-tunnu hota edonna nayade' owa'ana. Ne maka kayawunmu hota rat niohora momuou. 27 Hya' ed maka A'ukot targa tiy miy la yawunamnu de mikot nohor momuoga totpena riy rat niohora. Ne hya' maka A'upupua la miy tlinmi ralamni me mak Awuahaur walia la mel'utni-malienni, de hota repra rauria de mkiakna la lol meni-meni to'a totpena riy rat niohora. 28 Yan mimta'ata hota riy rwunu-rwenan miy inonmi, yoma miy inonmi de hota riy rwenan nana, mere ta'en niana ir rhi' yawuhi-yawe'et la miy aranmi (jiwa) pa rla' Ilyamou-Watyatoha. Mimta'at la Uplerlawna, yoma E' ed mak kodi plolli pa kwenna inonmi dewade Nrinnia miy aranmi la'a ai mormiori ralamni (naraka). 29 Ma'nu prowta mak kakleh weli nekane, hota id mana edonna ntuin la tani wawannu, yoma Amlawanmi edonna Nwayow nohora. 30 Morat lihirmi la' o'tami ho'mana Uplerlawna Nat niohora momuoga. 31 La' hade pede yan mimta'ata. Uplerlawna Nsayn miy me Ntera-ndem miy nareh dioin meman la ma'nu prowta re.”
Yan itamta'ata takot nohora it pesiayni la'a riy gaini ralamni
32 ”La'pa he' ed maka kwayow nohor pesiayni mai A'u la'a rimormiori gaini ralamni de, hota A' muana wuayow nohora e'a la'a A A'mu mak kden la Ilyamou-Watyatoha gaini ralamni wali, Agiwra A mu'tu-rah'u id e'a. 33 Mere la'pa hameni ed mak kreher pa kiwra e' edonna nlernohor A lia rimormiori gaini ralamni, A muana hota Arieher doini wali e'a la'a A A'mu mak kden la Ilyamou-Watyatoha gaini ralamni.”
Yana it ralamni napal niana nohkeran di gahani mere itdenrer lia Uplerlawna
34 ”Yana mpiarora de Amuai die Agod niek riy mak kden la nohkeran di wawannu pa rora rimormior wialli re rkalwieda. Mere onnila A rerie'yu pede riy id nor rimormior wialli re rahuri-rawo'ora. 35 A maimia'yu di mak kariei pia ”a'na muanke'a nahal amni, me a'na patke'a nparwah'a inni me ina nora yananni patke'a idma nwohora-ntatr ida. 36 Yah! Mak khi' nana yawunu-yawenna yawunu-ya'ara de e nawniair meman la roma ralamni.” 37 Yoma riy maka khoratreria inni-amni pa nhortapling A' die, de riy de ta'en niana nre'ela' riy mak klernohor A'u, yoma nhiol die edonna nla' nana Uplerlawna ralamni. Emkade wal lia riy maka ralamni kod rer lia upni-a'nani ne edonna nken A lia nhioratni. 38 Ne la' walia riy mak edonna kre'ela pa kor wut A' pua tler la yamuki-yama'ala onde matmiati pa emolmolan nekama nhoi wawayanni la auwlakra pa nlernohor A'u, de hota nhiolli de edon naplola emeka riy mak klernohor reri A'u. 39 Riy maka nhoratrer tio'a mormiorni la nohkerna wawannu hota e' edon nler la mormiori-dardiari plalahwa pa nodi liarni. Mere la'pa riy maka khoratdoinia mormiorni la' noh di wawannu pa nlernohor reri A'u hota nlernana mormiori-dardiari pa nodi liarni.”
Uplerlawna Nala siewa-kai lia riy maka ktulan la rimormior wialli maka klernohor reri Uplerlawna
40 ”Riy meni ed maka kreinian miy, de hade emekwalima e nreinian olek A' wuali. Ne la'pa hameni nreinian A'u de emekwalima e nreinian oleka Uplerlawna mak khopan pa Amuai. 41 Riy maka kreiniana makwohorulu-ktatrulu ida, yoma niwa ntulan la e'a onnila makwohorulu-ktatrulu id hade, riy de hota nlernana siewa-kai emekwalima makwohorulu-ktatrulu re rlernana. Ne he' ed mak kreiniana-ka'nana riy id mak kaplol la Uplerlawna yamkekni yoma eniwra ntulan la e'a onnila riy mak kaplola hade, hota riy de nlernan wali siewa-kai emekwalima riy mak kaplola re rlernana. 42 Ne mpiesiayo! La'pa hameni ed mak kal ger la riy mak kakleha weli remnia pa na nawe'era tiernu yoma e nhoratreria makpesiay A'u id wali hade, riy mak kal ger de nek de hota nlernan memna siewni-kaini la'a Uplerlawna.”
Yohansi natian nohora Yesus plollolli
1 La'pa Yesus Nwatutga riy termida wehrani woru re pa nhorwua dewade Nhoitio'or la gen diewa pa la'pa Nodi liarni la Nwatutu-nwaye'a, ne Nakot nohora Uplerlawna lirni-tunnu la' leta-ruhuna la Galilea yapatni. 2 La' ler de Yohansi mak kharani etla roma nhio'la ralamni pa la'pa natlin tutga Yesus Kristus maka Uplerlawna Nano'targa de hihi'ini-yapyapni 3 noma nhopan doinia mutwualli doma mak klernohor reria e'a pa rla' pa ratian nohora Yesus plollolli. Riwra: ”Tuna, O di ed maka Uplerlawna Nano'targa O maimiaimu? Me yanpa maka ampei-mnara de riy dom to'a?” 4 Noma Yesus Nakot la: ”Hyal miy re, miwali owa'an la Yohansi pa mpiahaur nohora hya' ed maka ha mimkeka me mitlina. 5 De riy maka matni kyata ramkeka, maka lakni nmati, rala'awa, maka ulatni temni yata rkalwied wa, maka hatilu mana ratlina, mak kmati olekwa mana rmori owa'ana, me Kot Kalwieda-Paitiota mak kwatiawua Uplerlawna mana rakot nohora la maka kakleha-kaplara. 6 Ne la'pa riy honona mak edonna kwayotli A'u, mere rpesiay niek wa, hota rlernana unut lawna.” 7 La'pa riy maka Yohansi mutwualli re rawal wia. Dewade Yesus Nwahaur nohor Yohansi la'a riy rahu mak kden hande. Yesus Niwra: ”La' ler ululu de miy e mlia'a wo'orletna-kawurloini totpena mimkeka hya'a? Mpiahaka riy id maka o'tani wolwo'la pa emeknekama wewna lihira maka anni ha nten dioinia rena? 8 Mlia' pa mpiahaka hya'a pa mimkeka? Mpiahaka riy ida maka naniairi samoga? Riy mak emkare de ha rden la tuna ray romni-lewnu! 9 Pede mlia' de mpiahaka hya' pa mimkeka? Mlia' pa mpiahaka makwohorulu-ktatrulu ida toh?! Ha naplola. Ne Yohansi nek de nareh dioinia makwohorulu-ktatrulu re. 10 Yoma la' Puka ralamni de Uplerlawna Nakot nohora Yohansi kniarni, Niwra: ”Mhioratreria! Hadi ed maka Aghopna. Hota Aghopna hade pa nala' ulg O'a totpena nwahyar tialan pa Omliola.” 11 Mhioratreria! La' ululu la'pa ntutu-nte'ela ler di la' nohkeran di wawannu de riy id mana edonna nareh dioinia Yohansi makharani. Mere la'pa la' lera-mela ri maka Uplerlawna Nodi plolli pa emeka Ray, de E mutnu-rahanu mak kakleh weli id ho'mana nlernan yara'a-yapalu nareh dioinia maka Yohansi nlernana. 12 La' lera Yohansi nwaga kniarni pa nakot nohora de hota Uplerlawna Ntorna-nrautu pa emeka Ray pa la'pa nte'ela ler di, de riy maklekla-makdiaini rwahak talan pa rweyata-rwaniaga e wniatutnu de totpa rodi plolli la. 13 La'pa edon nte' ma'ta Yohansi maimiaini de, ha nahniort olek wal lia la'a Musa deullu-tatarni me la' wal lia makwohorulu-ktatrulu wniatutnu-wniaye'eni la'a hya' maka hota kayamkeka la' ler di, de hota Uplerlawna Nodi plolli pa emeka Ray. 14 Ne la'pa mimiwra mimpiesiaya hya' mak kaplola, hota miatga de Yohanis de Elia eda de maka ha rhorat targa la Puka ralamni de hota nmai. 15 La'pa miy tlinmi erla de mitlin reri! 16 Hota Agala yawalliohora hya' pa ga' ukot nohora rimormiori mak edon kpesiay A'u la lera-mela rina? Ir de emolmolla keke'enku'a woka woru mak kamtatna la'a ya'olgeni pa wokni ida npol lia wokni dom to'a yoma idma edonna nlernohora id lirni pede riwra: 17 ”Amnairi floiti me tiwla-prai pa amahe'i-mahepur nohor miy mere miy edonna mlioi-mhieka! Ampahniar nohor miy lia'a nhiara matmiati-molmuolu mere miy edonna mkio'a-mkiakru!” 18 Hade emekwalima Yohansi mak kmai noma natahan lara (puasa) me edonna nemnia anggur turnu noma riy riwra hegana e nhu'ru ralma e'a.” 19 Noma dodo'ondi Rimormior A'na A' Muai wia pa A'una-gemnu noma riy riwra: ”Mimkek to'ola hade. Ya'ante'eni ne, ma'wanu de, pa la' nor wutga mak kawoka blastena, me riy yatyata-halala rwatamputu.” Mere la'pa miy mpiayotlia Agora Yohansi hihi'ini-yapyapni ho'mana Uplerlawna kirkirni-ralma-rior samomuounu mak amlernohora de hota nayamkek la mak klernohora A wniatut muamni re nhiolli-lietni ilu-wniehwa samomuounu.”
La' leta-ruhuna mak edonna kpesiay
20 Noma Yesus Nhar lirni pa Nwaghala rimormiori mak kden la leta-ruhun maka Yesus Nhi' nan hihi'a-yapyapi mak kamehi-kayona (mujizat) harahu. Yoma ramkek memna hihi'a-yapyapi mak kamehi-kayona harahu re mere rahmen to'owa rhoitio'or doini-rtahnei dioin la ir do'oni-halli. 21 Yesus Niwra: ”Hoi! Makden Korasim nora Betsaid miy ree! Hota mlier la yatlorni-yatra'ani! Yoma miy edonna mpiadan nohora hihi'a-yapyapi mak kamehi-kayona maka ha mimkek oleka re. Makden la Tirus me Sidon edon ramkek nana hihi'a-yapyapi mak emkare la' ler ululu, mere la'pa Aghi' hihi'a-yapyapi mak kamehi-kayona mak emkare la mak kden la leta Tirus nora Sidon la' ler ululu, de ramkek nana neknanama plol toto' pa rnair oleka naniairi yaluli-yahona pa ra rtutga ralamni mawla la do'oni-halli me rhoitio'or doini-rtahnei dioini oleka do'oni-halli re. 22 Mhioratreria, la'pa ntutu-nte'ela watghudi lokarni-tatiaili lahannu la lera noha niatni de hota Uplerlawna niukamnu la' miy wawanmi nareh dioin la mak kden la leta Tirus nora Sidon re. 23 Ne hota mak kden la Kapernaum miy, la' wniarormi de hota rran tutul miy nanmi la tulu-lyanti? Hade edon emkade. Hota reriehenu rrinnia miy lia ai mormiori ralamni (naraka). Makden la Sodom edon ramkek nana hihi'a-yapyapi mak kamehi-kayona maka Aghi' nana re, mere la'pa hihi'a-yapyapi maka Aghi' oleka pa mimkek nana re, de Aghi' la' ler ululu pa makden Sodom ramkeka nana neknanama plol toto' pa rhoitio'or doin olek do'oni-halli. La'pa emkade de ir letni de edonna rtutin doinia la pede ed neka mla' dodo'ondi. 24 Mhioratreria! La'pa ntutu-nte'ela Uplerlawna maimiaini la' ler noha niatni, de Uplerlawna niukamnu la miy wawanmi, de nareh dioin la makden la Sodom re.”
Yesus ed mak kat niohor memna Uplerlawna
25 La' ler de Yesus Nsumbain pa Niwra: ”Ama, Orgahi-Orha'a mak ktorna-krautia nohmarna nora lyanti tulu. A'uli-uwedi O'a yoma wniarormu-wnialaimu, hihi'imu-yapyapmu, de O e Muwunmua la'a riy miaka kakriahlu la iskola me rwarora ir er mak katu, mere Omukota la riy maka nhiolli-lietni emeka keke'enku'a pa rlol yawa. 26 Yoma plol toto'a pa hade ed mak kla' nana A'mu O ralma-riormu.” 27 Nsumbain pa nhorwua noma Nakot owa'an la mak kden hande Niwra: ”A A'mu Nal oleka plolli-mneheni kirkira-ralma-rior samomuounu mai A' wua. Riy id mana edon nat niohora A'u eneknek to'ama A A'mu. Me riy id mana edonna nat niohora A A'mu eneknek to'ama E A'nani A'u, ne riy mak Agiwra ukot wahyaria A A'mu la ira.”
Parisi wniatutnu nodi kwar lawna mere Yesus wniatutnu edonna
28 ”Ina-nara, mmiai wia mai A' di wa, miy hononmi mak kakleha oleka ruri-lai wia la'a hya' ed maka ha mikwara re. Mai pia utih liwatmi me uwrien aranmi. 29 Mliernohora hya' ed maka A'ukota ne mitlin pa wuatutga tiy miy. Yoma A nhiolu-lie'tu de mnapla pa Agatu ghu'ru-ghelma, ne hota miy ralammi namtiertiernu. 30 Yoma hya' ed maka A'ukota, de nla' nana miy ralma-riormi, me kwar maka Aghopan pa ha mikwara re, rapranrana.”
Yesus Nodi plolli la Sabat lerni
1 Lera ida la' Sabat lerni (ler maka Yahudi yana rkar lia) de Yesus Nora maka ha Nwatutu-nwaye'a re rala'a la nhyi' wetra' lawna ida ralamni, noma maka ha Nwatutu-nwaye'a re rkura wetra' lawna re harni pa ra'ana emkade to'owa yoma raplara olek wa. 2 La'pa riy Parisi ramkek nana noma rakot la Yesus riwra: ”Mumkek la me! Maka Mpuatutu-mpuaye'a re rpera-rdaiti olek la it agamni deullu-tatarni, yoma ir e rkar lia'a Sabat lerni.” 3 Noma Yesus Nakot la re Niwra: ”Miy mpiaik nan olek la'a hya' maka Daud nhi'a la' lera e nora talanwalli re raplara toh! 4 Enler la Uplerlawna roma kreini ralamni pa enora mutu korni re ra'ana rot miaka rala oleka la Uplerlawna, kennama la'a it agamni deullu-tatarni de mak ka'ana roti re de eneknek to'ama imam-imam rmeh'a. 5 Ne miy mpiaik nan olek wal lia Musa deullu-tatarni toh! E rhorat targa la Musa pukni de imam-imam re rtepartarlia kniarni la'a Uplerlawna roma kreini nayanni la'a Sabat lerni. Emkade pede emekto'ama rpera-rdaitia deulu-tatra la'a Sabat lerni, mere Uplerlawna edonna Nwaghala ira. 6 Mere mhioratreria hya' maka ukota ri. La' handi de Ed maka Enreh wialia Uplerlawna roma kreini. 7 Ne la' Puka ralamni de e riwra: ”Rimormiori maka ktulla-ksayni rimormior wialli khi' A ralmu pa uhepru de nareh dioin meman la riy mak kala prehenni-maunu mai A'u.” La'pa plola pa miy e mnia'erit nan oleka lira re, de hota taken niana mpiaghala riy maka edonna khala. 8 A'ukot hari honona yoma Rimormiori A'nani A' die ed mak kodi plolli pa A'ukot nohora hya' ed mak kaplola onde nhala pa itsi'a la Sabat lerni.”
Yana tala Sabat lerni la hautu pa it edonna ttulan la rimormiori miaka kapolu-kawaka
9 Yesus Nto'or la hande ne Nla Nokria gen miaka nhi'inde Yahudi re rhi'a kreini-iskolli. 10 Nla' noma Nlernana riy maka limni walli kmati. La hande de riy doma e rahak kahelli-kaha'arni la Yesus totpena Nhi' de rodia la letgara lawawna, pede rmai pia ratiana Yesus riwra: ”Tuna, la' O wniarormu de itsi' kalwieda riy mak kamehra la'a Sabat lerni de lol talanni?” 11 Noma Yesus Nwahla Niwra: ”La'pa miy pipmi-dummi ida e ntuin tiar lia'a hu'ula-tpopoini id ralamni la'a Sabat lerni, de hota mimkek rer nieka dum de polpuolu-hawaunu la hu'ul de ralamni?! Edonan toh! 12 Ne rimormiori re, Uplerlawna Nsaynia hare pa nareh dioin pipdiuma. Pede itsi' kalwiedweda riy la Sabat lerni de ed mak klernohora Uplerlawna deullu-tatarni.” 13 Nhorwua noma Yesus Nakot la riy maka limni walli kmat die Niwra: ”Mpuetar limmu!” Noma riy de nwetar limni de mtatande nekpa nnienni nmolu pa emekwalima limni walli mak kmormiori die. 14 Mere riy Parisi re rhoitio'or la gen miaka Yahudi rhi' kreini-iskolli de, na'nama rna'ohma pa rwenna Yesus.
Uplerlawna ed mak kwalir niana Yesus mak kmai die
15 Yesus Nat niohor meman la'a Parisi re nnia'ohma yatyatni la E'a. Pede plet pa Yesus Nwaran la'a gen die ne rirahu rlernohor reria. Ne Yesus Nhi'a mak ksaki re honona pa rkalwied la nnienni-nhienni nora mehrani-maunu. 16 Mere Yesus Nahmen pa riy rla rwahaur nohora E'a. 17 Mere la' Yesus Nwatutu me Enhi' kalwieda rira la nnieni-nhiena pede nhi' aplola Uplerlawna lirni, maka makwohorulu-ktatrulu Yesaya ha nhorat targa la Puka niwra: 18 ”Hadi de A hopopnu maka Awualir niana. Riy maka Asiayni inhatta me khi' A ralmu pa nahepru. Hota Agala A Nhi'wu la E wawannu pede hota E' ed mak kakot nohora la'a rimormiori la'a noheri woru-lyanti nayanni de Niwra hota Enhi' riy pa ror owa'an Uplerlawna rkalwieda. 19 Hota E edonna Nhi' yawo'ora, onde polpuolu-hawaunu E tullu-petanni la'a loi liawna-talan lawna. 20 Emolmolan nekama au dieutu mak kerna mere edonna rtewar doinia la, me wa'du maka mormiorni nhelelma ho'mana edon rwenan nana, emkade wal lia A hopopnu de wniehwani-liakatni mnapal la' riy mak kakleha ruri-lai. Mere hota Ntekal rer niekpa totpa rimormiori ror owa'an E' pa rkalwied owa'ana. 21 Pa hota rimormiori la noheri woru-lyanti nayanni rha'ara aranni la E'a.”
Makden Parisi riwra Yesus Nora Be'elsebul (hegana amlawanni) rkar wiutu
22 La'pa nhorwua dewade riy rodia riy mat yata ida, me naplinu naltieri wiali yoma hegana-kawnu nhu'ru ralma. Noka Yesus Nhokar doin hegana-kawnu mak khu'r ralma pede riy de naltieri me namkek samomuou owa'ana. 23 Nhor nioma riy honona rwer rer wiawni pa riwra: ”Yanpa hadi ed maka ha riwra Daud duratni-waitni inhatta maka Uplerlawna Nano'taru?” 24 La'pa riy Parisi ratlin nan hare noma riwra: ”Oi! Riy di enekneka Nhokar doin to'a hegana-kawnu rella yoma Be'elsebul, hegana amlawanni de, ed mak kala ruri-lai la E'a.” 25 Mere Parisi ralma-riorni re Yesus Nat niohor momuoga. Noma Yesus Nakot la re Niwra: ”Hegana re emeknekama hairi ida. La'pa la hairi ida rimormiorni ema rhakre'era la wokni-wokni mak kahuri-kawo'ora, de hota hair de edonna namteman plalahwa. Me luwu-a'na ida onde leta-ruhuna la'pa rden rer lia yahuri-yawo'ora de hota rweyata-rwaniawua. 26 Emkade walia la hegana amlawanni tnioranni-riautnu. La'pa hegana woka-le'u ida, nhokra hegana woka-le'u dom to'a, de hota hegana tnioranni-riautnu ema reyapie'era. 27 La'pa mikot emkade mai A'u nnia'eratni de hota mak klernohora miy niek de rnairia hegana amlawanni plolli-mneheni pa Nhokar doinia hegana-kawnu. Mere mak klernohor miy nek de rat niohora wniarormi de nhala. 28 Mere Aghokra-liaiya hegana-kawnu yatni-rha'ani re de Aniairia Uplerlawna Nhiwni plolli-mneheni. Ne hade e ntut mueman de Uplerlawna ed mak kodi plolli pa emeka Ray, ne miy e mimkek nan oleka E rurni-laini. 29 Itala mak karuri-kalai ida pa itsi' la yawalliohora. De la'pa riy riwra reyahru mak karuri-kalai ida re'eni-tniarnu, pa'etnu de nwutu-nkohg ulga mak karuri-kalai die nanpena nler la mak karuri-kalai die romni ralamni pa na'ala hade re'eni-tniarnu. Hade emekwali Aghi'a la hegana amlawanni. 30 Riy mak edonna klernohor reri A'u de ir er mak khoklira-kpah'a waw mai A'u. Ne riy mak edonna ktulan mai A'u, de e' ed mak kweyata-kwaniawua A tulla-knia'ru. 31 La' hade pede totpena miatga, de la'pa riy rhi'a do'a-hala me napolu-naliella Uplerlawna, de hota Uplerlawna Namou-nawitna do'oni-halli re. Mere la'pa riy meni ed mak kapolu-kaliella Uplerlawna Nhiwni, de riy de, hota Uplerlawna edon Namou-nawitan la do'oni-halli de. 32 Ne la'pa riy ida nakot hadom pa na nweyata Rimormior A'na de nanni de hota Uplerlawna Namou-nawitna do'oni-halli de. Mere la'pa riy meni ed mak kapolu-kaliella Uplerlawna Nhiw Lululli, de Uplerlawna edon Namou-nawitna riy de do'oni-halli de la dodo'ondi, pa nden nek la pa Uplerlawna noh warwuarnu lerni Ntutu-nte'ewa.”
Riy yatyata nampena rakot nohora yatyatni-halalli yoma yatyata-halala nagengen lia ira
33 ”Miy miwra mliernana ha wo' samomuou, de mpiak la yawuli-yatniamin maka onni kpoti-kadwu. La'pa au muaka khoptutu-khoplera, de hota wo'oni mana yat walia. Orwo'a-auwo'a mak kyata onde samounu, de tamkek nek la wo'oni. 34 Miy die riy yatyat memna miy pede emkameni la hota miy mikot nohora hya' mak kalwiedweda?! Hya' ed maka klergot la it nurnu, de hade ed mak kwatiaga it ihranu ralamni. 35 Riy maka ralamni kalwieda-paitiota, de nhi'inde rakot nohora hya' ed mak kalwiedweda yoma ihranu ralamni npenpuen lia kalwiedwedni. Ne riy yatyata-halala, nanpena rakot nohora yatyatni-halalli. Yoma yatyata-halala nagengen lia ira. 36 Hade pede mhioratreria! La' pa nte'ela lera-mela noha niatni maka Uplerlawna Ntorna watghudi (Nukum rimormiori), de rima-rima hota nwalol nohora orgahani lirni-tunnu la' Uplerlawna gaini ralamni. La'pa lirni-tunnu maka riy edon rwaror nohora mere pleta-plet pa rakot nek wa, hade ho'mana rwalol nohora la Uplerlawna. 37 Yoma hota miy lirmi-tunmi maka mpiet la' lera-mela ri, er maka khi' aplol miy onde miy lirmi-tunmi re nekpa rwaghal miy lia' ler maka Uplerlawna Nhudi-npara rimormiori it la watghudi lokarni-tatiaili lahannu.”
Riy Parisi rwak pa Yesus Ntutga kniau ida
38 La lera ida noma makwatutu-kwaye'a agama ror wut nieka riy Parisi re rakot la Yesus riwra: ”Tungkurga, Mhi' teka hihi'a-yapyapi mak kamehi-kayona totpena ntutga de Uplerlawna ed mak kala plolli-mneheni tiy O'a.” 39 Yesus Nwahla: ”Adoh! Tuw di, de rimormiori yatyata-halala mak kahmena kpesiay A'u. Mhiopan pa Aghi'a hihi'a-yapyapi mak kamehi-kayona totpena mpiesiaya. Mere hihi'a-yapyapi mak kamehi-kayona kuku' nek ho'mana A'g edon tiutga tiy miy! Eneknek to'ama mak makwohorulu-ktatrulu Yunus ha nlernan de. 40 Yunus nhol niek la up worum lawna apannu ralamni la lera-mel pa wotelu. Emkade wal lia Rimormiori A'nani A' die hota ghol niana lera-mel pa wotelu la'a noha-rai apannu. 41 La' noha niatni, la' ler maka Uplerlawna lerni ntutu-nte'ela pa Nhudi-npara rimormiori la watghudi lokarni, de hota makden la Niniwe rtutrier pia hota rto'ona riy tuwu di. Yoma mak kden la leta Niniwe rhoitio'or doin-rtahnei dioinia do'oni-halli la' lera Yunus nakot nohora Uplerlawna lirni-tunnu la' ira. Mere la dodo'ondi de Agetla miy gaimi mere miy edon mitlin la A li'ru pa mhioitio'or doin-mtiahnei dioin do'omi-halmi re, kennama A' di de ureh dioinia Yunus de. 42 Ne la'pa nte'ela lera noha niatni, la' ler maka Uplerlawna Nhudi-npara rimormiori la watghudi lokarni de hota pat maran mak kwatiawua weli tranna (mata angin selatan) ntutrieri pia nto'on reria riy tuwu di. Yoma pat maran de nwatiawua noha honi-rai tawnu (olietlet) pa nmai pia natlin nana wniatutu-wniaye'a Salomo mak katu die. Mere la' dodo'ondi de Agetla miy gaimi ralamni mere miy edon mitlin A li'ru pa mhioitio'or doin-mtiahnei dioin do'omi-halmi, kennama A'ureh dioinia Salomo.”
Yatni-rha'ani nawal lia riy mak edon kpesiay
43 ”La'pa yatni-rha'ani nahniokar doin la'a riy ida ralamni, de loldoi-loldai lia wo'or kerkerna totpena nahak geni id owa'ana totpena nhu'ru ralma, mere hota edonna nlernana. 44 La' hade pede yatni-rha'ani de wniarorni de hota nawali owa'an la riy de. La'pa nawal wia de namkek de riy de nahgal tetema, ne nmou-nwitna emeka likti id maka ha rwahyar momuoga ne rwahi'a-rwayod tiarga. 45 Noma nla' owa'an pa nmai die nodia yatni-rha'ani wo'itu de yatni-halli nareh dioin memn owa'an la e'a. Dewade ha rler la riy de ralamni owa'ana. Pede la'awa hohoni, de riy de nler la polpuol inni-wakwak amni mak karehi owa'an la' ulul genni. Hota hade ed maka tamkek nan wal lia' riy yatyata-halala tuwu di.”
Mak katlina-katailla Yesus lirni, de Yesus inni nora amni-hyalli irhatta
46 La'pa Yesus entepartar mua'ta la wniahauru Nora riy mutlialawna re dewade inni nora a'nani re korni rmai wia. Noma rtutrier lia tio'or pa riwra rma rwatroma Yesus pa rwahaur wutu. 47 Noma riy id la riy mutlialawna re nakot la Yesus Niwra: ”Tuna, Tuna inni nora ammu-hyalmu e rtutrier lia tio'ora. Riwra rmai pia ror Tuna rwahauru.” 48 Noma Yesus Nnairia yawalliohora pa Nakot nohor plein la riy de, Niwra: ”A i'nu-na'ru a'mu-hya'lu la Uplerlawna yamkekni de he'a?” 49 Noma Yesus Ntutga mak klernohor reri e'a re, na'nama Nakot la Niwra: ”Hari, er maka a i'nu-na'ru a'mu-hya'lu. 50 Riy maka khi' nana A A'mu la'a Ilyamou-Watyatoha ralma-riorni, de hare er mak kla' A i'nu-na'ru a'mu-hya'lu.”
Yawalliohora la riy maka krinnie'era wini-hgona
1 La' ler de nekpa Yesus Nto'or la rom de pa Nodi liarni la' danau aratni pa Namtatna la' hande. 2 Riy harahu rwayotil pa rma rpepan nana Yesus, pa narieiniande Yesus Nwatitin genni la puou mak kapniali id wawannu pa Namtatna la' hande. Ne riy rariahu re rtutrier lia eni wawannu. 3 Noma Yesus Nnairia yawalliohora pa Nwatutu-nwaye'a la'a lira nnio'a-niatu harahu la'a riy rariahu re. Niwra: ”Mak kanhyi'a-katlunni ida nla' pa nrinnia winni-hgonni la nhyi'ini. 4 La'pa nrinnia wini-hgona re dom de rtuin la talla ralamni, noma onu-ma'nu rmai pia rtotan nan momuoga. 5 Dom de rtuin la watgau ralamni pa ntai tani oke' to'a. Plet pa nmor wia yoma tani mniha. 6 Mere la'pa lera nhit wa dewade rmakulli-rmarella pa rmat wia yoma ga'arni edonna nler plollol la tani ralamni. 7 Wini-hgon de, dom de rtuin la pu'na-kiarti pa nhi'nande ruwnu-ahla rururni-karkiaratni re rmor pia natolaw wenwenna pede ta'en niana ha rmori plollola. 8 Mere dom pal die rtuin la tan ihi wawannu pa rpoti-rkadwua pede dom de ra'unu-rayeh nohora wo'oni rahg ida, me dom pal die terampwonema. Ne la dom pal owa'an de rawo' nana terampwotelu. 9 Pede ina-nara, miy hononmi mhioratreria! La'pa miy tlinmi erla de, mitlin reri!”
Eneknek to'ama riy mak plollola pa kiwra klernohora Uplerlawna lirni-tunnu nampena er mak kna'erit nana E lirni de
10 Nhor nioma maka Yesus ha Nwatutu-nwaye'a re rma ratiana Yesus riwra: ”Ama, nihya'pa A'mu Naltier lia nhiopun lawna ralamni de A'mu Nnairia yawalliohora?” 11 Noma Yesus Nakot la Niwra: ”Aghi' emkade, yoma Uplerlawna edon Nal mutlialawna honona re pa rna'erit nan la' Uplerlawna tnioranni-riautnu pa emeka Ray. Mere miy die nanpena er maka Uplerlawna Nhu'ula tlinmi-nwe'er matmi totpena miat niohora la hya' ed maka riy raplin niohor ma'ta la'a Uplerlawna tnioranni-riautnu. 12 Yoma la' he' mak kiwra kna'erit nana de hota ra'itr owa'an la wniarorni-wnialaini pede hota nnia'eratni de narehi-nalawna. Mere la'pa riy mak kahmena kna'erit nana Uplerlawna lirni, de hya' mak enatg oleka de hota Uplerlawna Na' owa'ana. 13 La' hade pede Aniairia yawalliohora la'a nhiopun lawna gaini totpena mak kahmena rlernohora A'u, la'pa ramkek nana A hihi'u-yapya'pu ho'mana ta'en niana rna'erit nana. Ne la'pa ratlin nana A li'ru de mana raplinu-raplo' nohora. 14 La' hade de hota plola la Uplerlawna lirni maka makwohorulu-ktatrulu Yesaya nakot nohora niwra: ”Hota ir e ratlin reria mere raplinu-raplo'a. Ne la'pa ramkek reria ho'mana hota edon rna'erit nana. 15 Yoma ir ralma-riorni emeka ha kniukmu. Tlinni-matni mana ratniutwu. Ir rhi' emkade totpena yan ratlina, yan ramkeka, yan rna'erit nana totpena yan neka rawal mai A'u totpa hota A'g ed maka khi' ir pa rler la kalwiedni.” 16 Mere miy di de mliernan oleka unut lawna. Yoma rhu'ula tlinmi me rwe'er matmi pede mnia'erit nan oleka wa. 17 Mhioratreria, makwohorulu-ktatrulu harahu me la' walia riy doma maka khi' mak kaplol la Uplerlawna yamkekni la' ler ululu rwahak pa ramkek walia hihi'a-yapyap miak Aghi' nana, me rwahak pa ratlin wal lia' hya' ed maka Awuatut niohor di, mere A maimia'yu lerni edon ntutu-nte' ma'ta pede ta'en niana ramkeka onde ratlina.”
Yesus Nwale'er nohora yawalliohora la mak kanhyi' ida nrinnia winni-hgonni
18 ”Pede mitlina yawalliohora la'a mak kwarinnia wini-hgona nnia'eratni. 19 Wini-hgona mak ktuin la talla ralamni de emeknekama riy maka katlin olek la' Uplerlawna tnioranni-riautnu mere edonna rna'erit nana. Noma hegana amlawanni nmai pia nwarui-nwate'la nana lir maka ed olek la'a hare ihranu ralamni. 20 Wini-hgon mak ktuin la watwuatnu nnia'eratni de riy mak katlin nana lir kalwied de dewade leretniekla ralamni naplele'er pa nreiniana. 21 Mere lir kalwied de edonna naga'ar la' ihranu ralamni pede nhi'nande edon nalo'on wali ne nwal lia hamamuamua. La'pa nler la kropanni-krieutnu, onde yamuki-yama'ala yoma la'a kot de rerieini, dewade nleretniekla nwadur la pesiayni. 22 Wini-hgon mak ktuin la ruwnu-ahla pu'na-kiarti, de emeknekama riy mak katlin nana lir kalwied de, mere ralamni mak kod rer lia nohkerna rororni-lailiaini, hihi'ini-yapyapni me re'a-tniaru, tototni-wudwiudni emeka nutni-ndahla lir kalwied de nhi'nande nakleh wo'a. 23 Ne la'pa wini-hgon maka ktuin la tan ihi, de emeknekama riy mak katlin nana kot de pa rna'erit nana dewade rlernohor reria pede mormiorni re rdella plol wawna. Riy mak katlina dom de emeknekama wini-hgon mak kawo'a liawanni pa rlernana wo'oni nti'il nana ralamni re'eni rahu ida, dom pal die terampwonema, ne la' wal diom de terampwotelu.”
La' lera noha niatni Uplerlawna Nhopliala riy yatyat rewa
24 Yesus Nakot nohora yawalliohora id owa'an la'a nhiopun lawna id letgarni Niwra: ”Ina-nara ama-hyali, la'pa Uplerlawna tnioranni-riautnu la E rimormiorni de emekwalima yawalliohor di. De la' mak kanhyi' ida, ne'era wini-hgon samomuou la'a nhyi'ini id ralamni. 25 Ne hota la' mela nayaplin niohora, noma mak kanhyi' de eriaini nma nrinnie'era wewnihi winni la' wutga wini-hgon maka ora nhyi' de ne'er targ oleka re wawannu, dewade nmol wua. 26 Noma la'pa nte'ela lerni pa wini-hgona re rmor wia ne harni re mana rpoka-rpah'a wa, mere ramkek de, wewnihi mana rpoti-rkaduw wali. 27 Dewade ora nhyi' de hopopanni-lili'irnu rmai pia rakot la riwra: ”Matroma, o' edonna mtiamin neka wewnihi la o nhyi'imu, ne hya' nrei piede wewnihi e ndeha nana wetra' lawna, wini-hgon samomuou rena?” 28 Noma ora nhyi' de nwalolla niwra: ”A eria'yu kniarni hade.” Noma hopopanni re rakot la ora nhyi' de owa'ana riwra: ”La'pa Tuna nwayow de, amla' pa mpuh dioinia wewnihi rello?” 29 Mere ora nhyi'a nahmena ne niwra: ”Yoma hota la'pa mimpiuh dioinia wewnihi re de hota wetra' lawna re mana hota rawniuh wiali. 30 Miolin doinia la pa wewnihi nor wutga wetra' lawna re rmor wiutu totpena la'pa nte'ela lerni pa rreikia nanpena a'ukot la mak kreiki pa rwuhia wok momuoga wewnihi re ne rwatiehra totpena rhoklai la, nanpena rawok kalwiedweda wetra' lawanni re pa rkenia la dudnu.”’’
Uplerlawna mutnu-rahanu re ra'ititar rer lia liawanni me la' rurni-laini emolmolla sasawi ola mak kmori me tgo' mak kapetna wetra' hota (tarigu)
31 Yesus Nwahaur nohor owa'ana yawalliohora id la'a nhiopnu ralamni Niwra: ”Itala sasawi ola ida maka rtamnia la nhyi'ini pa twahaur nohora Uplerlawna tnioranni-riautnu la E rimormiorni. 32 Sasawi ol de ha luwlu'wu id hade la'a ha'ola korni mak kden la nohkeran di wawannu. Mere la'pa nmori, de hota npoti-nkadwu, pa nareh niana yawuli-yatniamni re korni. Hota olli-tapalli re rpoti-rkadwu pa nhi'nande onu-ma'nu rma rapuon la'a sasaw die tutnu-akni.” 33 Yesus Nakot nohor wal lia yawalliohora dom to'a la'a nhiopnu ralamni, Niwra: ”Ina-nara ama-hyali, la'pa Uplerlawna Ntorna-nraut de emeknekama tgo' maka a'na patke'a ida na' nana pa la nawotra-nawah'a wutga la wetra' ota kilu terampwogata pa nha'ata mneneha.” 34 La' wniatutnu honona la'a rirahu re, Yesus Nnairi mamainia yawalliohora. 35 Wniatutu-wniaye'a emkade naplol nohora Uplerlawna lirni maka makwohorulu-ktatrulu ida nhorat targa de: ”La'pa Agora ira mpahaur de Agala yawalliohora. Ne hota A'ukot nohora la'a hya' maka riy raplin niohor ma'ta la' ler maka Uplerlawna Na'ohi-na'ara nohkerna-rai miaran di la'pa ntutu-nte'ewa la ler di.”
Yesus Nakot nohora yawalliohora la wewnihi maka kmor tieman la wetra' lawan de nnia'eratni
36 Nhor nioma Yesus Nhoitio'or la riy rariahu re pa nhu'ru la roma ralamni. Noma maka Yesus ha Nwatutu-nwaye'a re rmai pia rakot la riwra: ”Tuna, ampak pa Mukot nohora teka yawalliohora wewnihi die nnia'eratni la' mai ami.” 37 Noma Yesus Nakot la re Niwra: ”Riy maka krinnie'era wini-hgon samomuou, de Rimormiori A'nani A'u inhatti. 38 Nhyi'a de nohkerna wawannu inhatte. Wini-hgona kalwiedweda, emeknekama Uplerlawna mutnu-rahanu. Wewnihi de riy maka klernohora hegana-kawnu ralma-riorni. 39 Eriai miak ktamnia wewnihi de hegana amlawanni inhatte. Ler maka ha rreiki-rwo'ora de rtut niohora lera hohoni inhatta maka Uplerlawna Nhudi-npara rimormiori la watghudi lokarni-tatiaili lahannu. Ne la'a riy maka kreiki-kwo'ora de Uplerlawna hopopanni-lili'irnu inhatte. 40 Ne la'pa wewnihi maka rwuh dioin la pa rhoklai la de emekwalima hota la'a hya' ed maka Aghi'a la'a lera hohoni. 41 De hota Rimormiori A'nani A'u ghopan pa A hopopnu re rawoka-rale'ga riy maka ktot pa khi'a A mu'tu-rah'u mak Agodi plolli pa emeka Ray ida, mere plollolli de ir er maka karei pia riy rler la do'a-hala ralamni, me ir er mak khi' yatyatni-halalli. 42 Hota hare honona re nekpa A hopopnu re ra'ala pa rrinnia la li'ina mak kdudmu-klairi ralamni ne la hande de tatlin nan to'a rpolpuol inni-rwakwak amni. 43 Mere la'pa riy mak kaplol la Uplerlawna yamkekni, de hota liplipa-kamka'ma, hitita-reprepra emeknekama lera la'a Uplerlawna, ir Amlawanni de genni maka Ntorna-nrautu emeka Ray. La' hade pede mniair tlinmi pa ma mitlina.”
Itmormior lia Uplerlawna tnioranni-riautnu ralamni de emeknekama itlernana re'a-tniaru tulliawna-welwierta
44 ”Hyal miy re, la'pa itmormior lia Uplerlawna tnioranni-riautnu ralamni de, it di de emeknekama riy ida mak kmai pia klernana re'a-tniar la tani niahi ralamni. Noma nahmena riy rlernana pede nade' owa'an re'a-tniar die la kdieldelamni. Nhorwua dewade nahepur nande nla' pa na'ol momuoga hyonni-hyanni honona na'nama nawal pia nma nawel tani nora re'a-tniar die. 45 Yawalliohor di mana nakot nohora la'a itmormior lia Uplerlawna tnioranni-riautnu ralamni. Lera ida mak ka'olu-kala'a ida nwahaka mutiara mak kalweli. 46 La'pa nlernana mutiara mak kalwel die noka nla' pa na'ol dioin momuoga hyonni-hyanni honona na'nama nma nawelia mutiara de.”
Yawalliohora la'a hota Uplerlawna Naliri-natoha riy yatyata la'a riy kalwiedweda
47 ”Hyal miy re, itnairia tiala maka ha rrinnia la'a danau ralamni pa ta takot nohora owa'ana it mormiorni la Uplerlawna tnioranni-riautnu ralamni. Makatiala ida nrinni tialli la'a gera ralamni dewade nlernana i'na-ya'ana palmuarnia (rupni-rupni). 48 La'pa tial de npen lia i'na-ya'ana noma makatial de nwe'eta tial della keranni. Nhor nia'nama nora riy dom to'a ramtatna pa ramou-ratoha i'na-ya'ana re honona. Samomuounu de ral to'a ne yatyatni de rhopliala. 49 Emkade wal lia la'pa lera hohoni ntutu-nte'ewa, de hota Uplerlawna hopopanni re rla ramou-ratoha riy yatyata la'a riy kalwiedweda mak kaplol la Uplerlawna yamkekni. 50 Nhor nia'nama riy yatyata re, hota Uplerlawna Nnaklia harella la'a li'ina maka klomlomra, ne la hande de tatlin nan to'a rpolpuol inni-rwakwak amni.”
Uplerlawna wniatutu warwuarnu nora wniatutu ulullu
51 Yesus Natiana maka ha Nwatutu-nwaye'a re Niwra: ”Dodo'ondi de, miy e mnia'erit nan nohora yawalliohora maka A'ukot nohora rina?” Noma rwahla Yesus lirni riwra: ”Yowa Tuna, Ami e matga re.” 52 Noma Yesus Nakot la re Niwra: ”Emkade pede miy emeknekama makwatutu-kwaye'a Musa deullu-tatarni ida maka kmormior olek la Uplerlawna tnioranni-riautnu ralamni yoma nat niohora Uplerlawna wniatutnu la' ululu gahani, me nat niohor walia A wniatut warwua'ru di. Emkade pede miy die emekwalima orroma ida mak kalgota re'eni-tniarnu, de warwuarnu nor wutga gakgakamnu.”
Rwayotlia Yesus la Nasaret
53 La'pa Yesus Nwatia lirni la yawalliohora re honona, noma Nhoitio'or la gen die. 54 Noma Nawal lia' E letni-ruhunni. La hande de, Nla' pa Nwatutu-nwaye'ela gen miaka Yahudi re rhi' kreini-iskolli la. Ne la'pa riy ratlin nana Yesus wniatutnu de, riy honona rwer rer wiawni pa riwra: ”Ha Nlernana kirkira-ralma-rior samomuou (hikmat) rilla' hanmenio? Ne Ha Nlernan walia plola-mneha pa Nhi' nana hihi'a-yapyapi mak kamehi-kayona rilla' hanmeni walio? 55 Itat niohora de makawte'ta-kaprahni id a'nani to'a Hade pa edonna nhal de Ha inni nwawa Maria, ne hyalli re de Yakowsi, Yusup, Simon nor Yudasa? 56 Ne Ha narni patke'a honona re nek de rden wal lia handi. Ne Ha Nlernan harella la' hameni ho'a?” 57 La' emkade pede honona re rwayotlia Yesus. Noma Yesus Nakot la re Niwra: ”La'a makwohorulu-ktatrulu maka klol meni-meni to' mana, rira rhu'ru-rhelam la, mere hota la' letni-ruhunni me luwnu-a'nani meman nek de riy id mana edonna natlin la.” 58 La' hade pede Yesus Nhi' hihi'a-yapyapi mak kamehi-kayona ida-woru tio'ola' hande yoma irakleh pesiay.
Rwenna Yohansi makharani
1 La' lera-wolla re de Herodes mak kodi plolli la Galilea la'pa natlin nana Yesus hihi'ini-yapyapni 2 dewade nakot la tniutnu-nhianni-nhielli-liarni niwra: ”Matialo'onama Yohansi mak kharani e inhatti! Enmati olek pa nmori owa'an pede nhi' neka hihi'a-yapyapi mak kamehi-kayona hya' to'owa.” 3 Enakot emkade yoma la ler ululu la'a Yohansi nmormior ma'ta de Herodes nhopan pa rtorna Yohansi na'nama rwutga pa rla rwi'it targa la roma nhio'la ralamni. Herodes nhi' emkade yoma la'a e hawni Herodias rerieini. Yoma Herodes hawni Herodias de, de Herodes hyalli Pilipsu haw ulullu. 4 Pede Yohansi nakot la Herodes niwra: ”Yan memmemna omuora Herodias mmiehlima. Hade edon lol deulu-tatra.” 5 La'a plollolli de Herodes niwra nwenna Yohansi mere namta'at rer lia rira yoma rwarora de Yohanis de makwohorulu-ktatrulu id eda de. 6 La'pa Herodes ler kalwiedni noma Herodias a'nani patke'a nloi lia makhopnu-makpepna gaini ralamni. Lioini-nhiekni de nla' nan meman la Herodes ralamni. 7 Nreiniande Herodes nlokar meman la pat harara mak kloi die gaini ralamni pa niwra hota enal hya'a-hya' to'ola hararar de wakwakni. 8 Nla' pa natlin la inni yawewalli noma hararar de nakot la Herodes niwra: ”Tuna, awuak pa mkien tio'a Yohansi makharani o'tani la totopa, pa muala mai a'u.” 9 -10 La'pa Herodes natlin nana hararar de wakwakni dewade ralamni ntuin doin la. Mere takotpa, nlokar pa lira olek hadewa ne mak kmai pia kor wutga Herodes pa ra'an de ratlin momuoga oleka re. Herodes nhar lirni totpena rla rotan doinia Yohansi makharani die o'tani la'a roma nhio'la ralamni na'nama rkenia o'tani la totopa pa rma rtemna la hararar de limni. 11 La'pa edon nalo'on ma'ta de rken nian Yohansi o'tani la totopa ralamni pa rma ralla pat hararar de. Nhor nioma pat hararar de nodia Yohansi o'tani pa nod tiargho'a la inni. 12 La'pa maklernohor reria Yohansi makharani ratlin nana, noma rma ra'ala Yohansi inonni pa rla rhuwria. Nhor nioka rla' pa rwahaur nohor momuoga harella Yesus.
Yesus Nalla riy riwnu wolima ra'ana-remnu
13 La'pa Yesus Natlin nana hyalli Yohansi nmati olekwa noma Nhoitio'or la' hande, ne Nmeh'a Nha'at la puou pa Nla'awa geni hgalgali ida. Mere la'pa rirahu ratlin nohora de Yesus Nhi' emkade dewade mak kwatiawua leta-ruhuna re rlidan lol keranni la eni plahwani pa rlernohora Yesus. 14 La'pa Yesus Nerun la puou pa namkek la riy rariahu re, de ralamni ntuin doin la pa Niwra Ntulan la ira. Noma Nhi' kalwieda riy mak kanieni-kahniena mak kden wut lia riy mutlialawna re. 15 Ne lera nheria pa mak Yesus ha Nwatutu-nwaye'a re rma rakot la Yesus riwra: ”Tuna, lera nheria wa. Ne la' gen di ho'mana olieta la leta pede Mhuopan nekpa ir orgahani rla rawelia ya'ana-yemnu la'a leta-leta re.” 16 Mere Yesus Nahmen pa Niwra: ”Pena mialla ra'ana.” 17 Noma rwalolla Yesus riwra: ”Tuna, a wareher mamni ri eneknek to'ama roti deulu wolima, me i'na wor tiututu.” 18 Yesus Nakot la re: ”Miod tieka mmiai!” 19 Nhor nia'nama Nhopan pa riy honona re ramtatn apitga la genni la' wewna wawannu. Noma Yesus Na'ala rot dieulu re wolima, me i'na rora, na'nama Nwatniar la heyanan, pa Na'uli-nawedi Uplerlawna. Na'nama Nhawi-nhawia roti re, me Nwikria i'na re noma Nala la maka ha Nwatutu-nwaye'a re pa rdurmu-rhakra la'a riy mutlialawna re honona. 20 Honona re ra'an pa rpehera. Ra'an pa rwair wa, noma maka Yesus ha Nwatutu-nwaye'a re, rwaho'a-rwatierun wa de rawok nana mak ha ra'an atre'a, de kriou penpuenu termida wehrani woru. 21 Mak ka'an momuou lia hande, la'pa edon nhal de muanke'a riwnu wolima, me edonna rhor wut mua'ta la patke'a ror wutga upni-a'nani.
Yesus Nala' lola tah'i ulti wawannu
22 Nhor nioma Yesus Nhopan pa maka ha Nwatutu-nwaye'a re rodi puou rleretia danau pa rala' ulia ne Nhopan pa riy mutlialawna re rawal wia. 23 La'pa honona re rla'awa dewade Yesus Nha'at la wo'ora id hananni totpa Nmemeh'a Nsumbaini. Yesus Nden nek la hande pa la' pa mela ndamit nana. 24 Ne tamkek la puou muaka Yesus mutwualli ha rodi re nner pa ed olek la danau letgarni, ne yo'ora-anni mak klol gaini newat nana. 25 La'pa repreparreria de Yesus Nala' lola tah'i ulti wawannu pa Nla Nlernohora puou mak oliet olek la E'a. 26 La'pa ir honona la puou die ramkek tutga E maimiaini de lola tah'i ulti wawannu, dewade honona re rhedu noka ramta'at wenna. Rhaun pa riwra: ”Ee! Hegan lora nmai niek ee!” 27 Mere Yesus Nleretniekla Nakot la re Niwra: ”Mmiolmiolmi, Yesus A'g inhatti. Yan mimta'ata.” 28 Noma Petrus nakot la: ”Matroma, la'pa plola pa Yesus O'a de Mhuopan pa a'ula' lola tah'i ulti pa atiy O'a!” 29 ”Mmuai ee! Yesus A'g hadi.” Dewade Petrus nerun la puou na'nama nala' lola tah'i ulti pa nla nwatroma Yesus. 30 Mere la'pa Petrus namta'at wenna la anni meranni mak kten lia danau de, reiniande Petrus nhudgauriernu, ne nhaun pa niwra: ”Mtiulan mai a'u Matrom ee!” 31 Noma Yesus Nleretniekla Nhoi limni pa Ntoran reria na'nama niwra: ”Petrusa o pesiaymu, wekwek ma'ta. Nihya'pa o ralammu worwuoru niohor A'u?!” 32 Noma rrora rha'at rewre'wa la puou ne anin lawan de mana namtie'ela wa. 33 Noka maka Yesus ha Nwatutu-nwaye'a re honona ra'uli-rawedia Yesus. Honona rakot la: ”Plola, O' di de Uplerlawna A'nani inhatti!”
Yesus Nhi' kalwieda riy mak kanieni la'a Genesaret
34 La' pa rleretia danau pa rte'ela danau aratni la'a leta Genesaret. 35 Ne la'pa makden hande ramkek tut niana mak kmai die Yesus inhatta, dewade rpo'on-rde'et nohora Yesus la leta-leta mak rehgorgoru honona re riwra: ”Ee Yesus Nmai niek ee!” Noma riy harahu rawoka maka kanieni-kahniena re honona pa rodia la Yesus. 36 Mak kodia mak kamehra-kamau re rpolpuol inni-rwakwak amni la Yesus pa riwra: ”Amee! Ampaka pa makamehra-kamau re rteman to'ola rayanmu tawnu, totpena rkalwieda!” Demade he'-he' mak kteman nan to'a rayanni tawnu re, honon rnek pa rler la kalwiedni-paitiotni.
Deulu-tatra maka upa-tgara rhi' nana
1 Lera ida ne Parisi wokni id nor wutga makwatutu-kwaye'a agama re rwatiawu Yerusalem pa rma rwahaka Yesus. Noma ratian Yesus riwra: 2 ”Nihya'pa riy maka Ompuatutu-mpuaye'a re rpera-rdaitia it upni-tgarni deullu-tatarni?! Ira'an de edonna rohma ulga limni.” 3 Noma Yesus Nakot la re Niwra: ”Ne hya'a nrei pia miy mpiera-mdiaitia Uplerlawna lirni-tunnu, la'a mtiot nan to'a upmi-tgarmi deullu-tatarni nanpena mliernohora?! 4 Yoma Uplerlawna Niwra: ”Mhiu'ru-mhielam la inmi-ammi,” ne ”la'pa hameni nwohora-ntatra inni-amni, de hota nlernana niukum matmiati.” 5 Mere mpiatutu-mpiaye' de edon nhala pa riy id nakot la inni-amni niwra: ”Agiwa galla miy, mere agal olek la Uplerlawna.” 6 Emkade pede mhiur niohora riy de, pa hota edon na'unni-namta'ata inni-amni. La' talan emkade pede miy edon mliernohora Uplerlawna lirni de, mere mliernohor to'a miy upmi-tgarmi deullu-tatarni. 7 Miy di mtiot pa mpial lia riy plollola mere plollolli de riy yatyat miy. Hota plol memna la' lir wowohorni maka Yesaya nakot nohora miy niwra: 8 ”Emkadilla Uplerlawna lirni: Rimormiori ri eneknek to'ama ral nurnu tutnu ra rha'wa nan to' A na'nu, mere ralamni re olieta mai A'u. 9 Hare kniola tiernu-niawur nehlani mai A' die hamamuamua re yoma ira rwatut tio'a rimormiori wniatutnu-wniaye'eni.”’’ La'a hya'a to'a ed maka khi' rira pa rakdieha-raktiahli 10 Nhor nioma Yesus Npol lia riy rahu mak kden handi pa rma rawoka ne Nakot la re Niwra: ”Mitlina totpena miatga. 11 Mak ita'ana edon nhi' akdieha-aktiahl ita. Eneknek to'ama yatyatni-halalli maka itakot nohora me tsi' nana. Hade ed maka khi' pa takdieha-taktiahli.” 12 Noma maka Yesus ha Nwatutu-nwaye'a re rmai pia ratiana Yesus riwra: ”Tuna, O e Muat niohora me edonna? Lira-tun muaka Omukota re de e nheik nana Parisi re nhiolli-lietni pa dodo'ondi de e rawenna.” 13 -14 Noma Yesus Nwahla lirni re pa Nakot la re: ”Hyal miy re, yana mkienia riy Parisi rella nhioratmi. Yoma ir emolmolan nekama yawuli-yatniamin maka A A'mu makden la Ilyamou-Watyatoha limni enni atia'a, pa hota rwuh dioinia la. Ha rhi'a o'ta-mata mak ktut tialla la riy dom to'a mere, ha rmeh'a nekane e rlola melli-kalamni, yoma emeka matni re yata. Ne la'pa riy mat yata ida ntut tialan la mat yat walli, de hota rewre'wa pa rtuin la hu'ula ralamni.” 15 Petrus nakot la Yesus niwra: ”Tuna, Mtiulan pa Mukot nohora yawalliohora de nnia'eratni mai ami.” 16 Yesus Niwra: ”Emkameni pede miy edonna miat mua'ta lira re nnia'eratni?! 17 Miy e miplin mua'ta de mak itlumu-ttella de hota ha nla'awa it apannu ne hota nlergot owa'ana?! 18 Mere mak klergot lola it nurnu, de ha nwatiawua it ralamni ne hade ed maka khi' rira pa rakdieha-raktiahli. 19 Yoma it ihranu ralamni ed mak kodia ralma-rior yotyota-yatyata, pa nhi'nande riy rwunu-rwenna, ralira-raliai, rkamnelu-rkamna'a, rod niana riy mak khala, la'pa rapolu-raliella rira. 20 Hare er maka khi' rira pa rakdieha-raktiahli ne edon riwra it edonna tohma ma'ta it limni pa ta'ana de hota nodi it la kdeha-ktiahli.”
Patke' mak Yahudi atia' de npesiay wiali
21 Nhor nioma Yesus Nhoitio'or la' gen die, ne Nla'awa leta Tirus nora Sidon yapatni. 22 Patke'a Kana'an ida nwatiawu hande pa nma nwahaka Yesus, ne nmai die nhaun lola niwra: ”Matroma, ray Daud upni-a'nani nee, Mtiulla-msiayn nan a'g ee! A a'nu patke'a hegana e rhu'ru ralma pa nler la polpuol inni-wakwak amni.” 23 Mere Yesus edonna Nwahla nana patke' de lirni. Noma maka Yesus ha Nwatutu-nwaye'a re rmai pia rakot la Yesus riwra: ”Tuna, Mhuopan pa patke' de nla'awa. Hade e nmemeh'a nekpa npeha retlia it to'orni di.” 24 Noma Yesus Nakot la patke' de Niwra: ”Uplerlawna Nhopna Amuai di, de Nhorat la riy Israel maka kler la klieratni, emeka duma ida mak kawlar dioinia matromni. A'g edon Muai lia mak Israel atia' re rerieini.” 25 Pat de nmai pia nwaltior la Yesus gaini ralamni na'nama niwra: ”Matrom ee, Mtiulan nan mai a'u ee!” 26 Yesus Nnairi yawalliohora pa Nakot la: ”Ine! Taken niana ra'ala papay ya'anni-yemannu pa rhopliala ahu gaini, ina.” 27 Noma patke' de nakot la Yesus niwra: ”Plola, plola Matroma. Mere ahu mana na'an walia yamanan lu'wu mak ktuin la matromni meini nayanni.” 28 Noma Yesus Nakot la patke' de Niwra: ”Ina, o pesiaymu e naruri. Emkade nek la'a hya' ed maka o ralammu nwaka.” Mtatande nekpa patke' de a'nani nkalwied wa.
Yesus Nhi' kalwieda riy Yahudi atia'a nnienni-nhienni
29 Noma Yesus Nhoitio'or la gen die na'nama Nawloh nohora eni la danau Galilea. Nhor nioma Nla' pa Nha'at la wo'ora id hananni pa Namtatna. 30 Riy rahu rmai pia rodia mak kala' waini-waini, mak matni kyata, mak lakni kmati, mak kaplinu kaltieri, me mak kamehra-kamau harahu wali. Rhoi tiaru-retar targa hare honona la Yesus gaini ralamni dewade Nhi' rpa rkalwied momuou. 31 Riy honona makden la hande, rwer rer wiawni la'pa ramkek tutga mak kaplinu kaltieri re raltieri, mak lakni kmati me mak kala' waini-waini re rarur wia pa rala'a wa, mak matni kyata re ramkek wa, dewade mak kden hande honona ra'uli-rawedia makden Israel re Uplerlawanni.
Yesus Nalla riy riwnu wogat ra'ana
32 Nhorwua noma Yesus Npol lia maka ha Nwatutu-nwaye'a re pa rma rawoka na'nama Niwra: ”A ralmu ntuin doin la' rimormior miutlialawna ri. Hari e rlernohor rer A lia lera wotelu mere ha rakleha yamanna. A'g edonna ga' pua golin doin hare pa rla' de apannu rahgali. Yanhi'pa gaini rmokal lol talan letgara.” 33 Noma maka ha Nwatutu-nwaye'a re ratiana: ”La'a gen hgal di de hota itlernana yamanan la hanmeni, pa itala la riy mutlialawna ri ra'ana?!” 34 ”La'a wareher genmi, rot wo'ir erla?” Noma rakot la Yesus riwra: ”Roti erla, mere eneknek wo'itu tiututu, me temtemanni i'na prowta ida-woru.” 35 Noma Yesus Nhopan pa riy mutlialawna re rakpernernia la tani wawannu. 36 Dewade Yesus Na'ala roti mieha re wo'itu nor wutga i'na re na'nama Na'uli-nawedia Uplerlawna. Nhor nia'nama Nhawi-nhawia re pa Nala la maka ha Nwatutu-nwaye'a re rhakre'era la rimormioria niutni-mdierna re. 37 Honona re ra'an pa rpehera, na'nama maka ha Nwatutu-nwaye'a re rwaho'a-rwatierun de rlernana maka ha ra'an atre'a, de kriou penpuenu wo'itu. 38 Rhor momuoga muanke' mak ka'ana re de riy riwnu wogata. Ne edonna rhor nohor ma'ta patke'a mak kor wutga upni-a'nani. 39 Nhorwua dewade Yesus Nhopan pa honona rawal lia' genni-tienni. Ne Yesus Nha'at la puou pa rla'awa Magadan yapatni.
Riy Parisi rwak pa Yesus Ntutga hihi'a-yapyapi mak kamehi-kayona
1 Lera ida ne riy Parisi ror wutga riy Saduki dom pa rma rtota Yesus la klieratni. Noma rhopan pa Yesus Ntutga hihi'a-yapyapi mak kamehi-kayona id totpena irat muemna de Yesus plolli-mneheni nwatiawua Uplerlawna. 2 Noma Yesus Nakot la re Niwra: ”La'pa lera nhi'pa ntopal la tah'i, noma miwra repar de otna edonan nturu yoma lyanti yamkekni nmera-nlairi. 3 Ne la' ler dom de la'pa yawyawar ma'ta demade lyanti yamkekni nmera-nlairi, mere nayawowta, de miwra hota otna ntur lia ler di, yoma lyanti nayawowta. Miatu mikwiet nana hota lera id de otna nturu me edonna, onnila mimkek la lyanti wowta-kakamni onde mounu-wahrani. Mere A wniatu'tu me hihi'a-yapyapi mak kamehi-kayona maka Aghi' nan oleka la' lera-mela ri, de ta'en niana mnia'erit nan walia. 4 Adoh! Tuwu di, de rimormiori yatyata-halala mak kahmena kpesiay A'u. Mhiopan pa Aghi'a hihi'a-yapyapi mak kamehi-kayona totpena mpiesiaya. Mere hihi'a-yapyapi mak kamehi-kayona kuku' nek ho'mana, A'g edon tiutga tiy miy! Eneknek to'ama mak makwohorulu-ktatrulu Yunus ha nlernan de.” La'pa Nakot emkade dewade Nto'or ir la hande pa Nla'awa.
Yana mliernohora Saduki rora Parisi hihi'ini-yapyapni mak edon kaplola
5 La'pa Yesus Nora maka ha Nwatutu-nwaye'a re rte'ela' danau walli, na'nama honona rheduma, yoma rhoratdoinia roti pa edonna rod wialia. 6 Noma Yesus Nakot la re Niwra: ”Hyalia, mhioratreria! Hota miy ererma la'a tgo'a Parisi rora Saduki.” 7 La'pa ratlin nana Yesus lirni de dewade idma nakot la ida riwra: ”Nakot emkade yoma ita edonna todia roti.” 8 Yesus Nat niohora hya' ed maka ha rakotkota pede Nakot la re: ”Nihya'pa miakokan nohora roti hadamonna?! Pesiaymi edon naruri mia'ta. 9 Miy ralma-riormi edonna nla' nan ma'ta?! Miy edonna mhioratnan ma'ta la' lera maka Aghawierie'er roti wolima pa Agaitiutur nana riy riwnu wolim dewade miy orgahami miwok nan korni kriou penpuenu re, maka ha ra'an atre'a?! 10 Miy edonna mhioratnan walia rot mieha wo'itu maka Agala tiutria riy riwnu wogata dewade miwok rehenu de kriou penpuenu re?! 11 Ne la'a hya' ed mak kriei pia miy edonna mnia'erit nana A li'ru, la'a A'g edonna muakokan nohora rot miaka ha miakokan nohora re?! Mere A'ukot nohora tiy miy die, nhiorta la' temmi la' tgo' riy Parisi rora riy Saduki re.” 12 Yesus Nakot emkadewa na'nama maka Yesus ha Nwatutu-nwaye'a re rat niohora, E edonna Ntut tiarga lir della' tgo'a maka ha rawnyah'a la roti mak kreiniande rot die nha'ata, mere Hade e ntarg hadella la'a riy Saduki rora riy Parisi wniatutnu-wniaye'eni mak kreiniande riy rahu rler la klieratni.
Petrus nwayow nohora Yesus de maka Uplerlawna Nano'taru inhatta
13 Yesus Nor mutwualli re rla'a Kaisarea Pilipi. La hande noma Enatiana mutwualli mak ha Nwatutu-nwaye'a re Niwra: ”Nhi'inde riy e riwra Rimormiori A'na A' die he'o?” 14 Noma mutwualli re rwet la riwra: ”Tuna, riy dom de riwra Yohansi makharani O'a, mak kmori owa'ana, dom de riwra makwohorulu-ktatrulu Elia. Dom de riwra makwohorulu-ktatrulu Yermia O'a onde makwohorulu-ktatrulu dom to'a.” 15 Noka Yesus Natian owa'ana: ”Mere A'utian tek miy. La' miy wniarormi de, A' di de he' A'u?” 16 Noma Simon Petrus nwet la: ”Matro'mu de, Uplerlawna-Mempulwatnu maka kden pa nodi liarni, A'nani. O' di de Ray mak kodi mormiori-lewlewna maka Uplerlawna Nano'taru (Mesias) O inhatti!” 17 Yesus Nwahla Niwra: ”Petrusa, Yunus a'nani o'a, omliernana unut lawna yoma A A'mu mak kden la Ilyamou-Watyatoha Nmeh'a nek ed maka kwe'era tiy o'a de A' di de Uplerlawna A'nani maka Nano'taru, yoma wniarora-wnialai die edon nwatiawu eti lia rimormiori nohkeran di. 18 Nanmu de Petrus (nnia'eratni de watu muetam kerna). A'ukot hadi totpa muatga, riy maka pesiayni naruri emekwali pesiaymu de hota rwal lia A mu'tu-rah'u. Emkade pede o' emeknekama watu maka ha rariria roma-lewu la'a wawannu totpa taken niana nlitri. Ne hota matmiati ho'mana taken niana rodi A mu'tu-rah'u re la yawa. 19 Hota A'g ed maka tiemna konsi mak kwatiawua Uplerlawna lodanni-hairni la o limmu ralamni pa hya' maka omliaran la mai nohkeran di wawannu de hota Uplerlawna mak kden la Ilyamou-Watyatoha Nwayow nohora. Ne la'pa ompuayow nan hadella noha wawannu, de hota Uplerlawna Nwayow nan wali hade.” 20 La'pa Nakot emkade pa nhorwua dewade Yesus Nwagahniorta maka ha Nwatutu-nwaye'a re totpena yan memmemna rwahaur nohor E'a la'a riy, riwra E' de Ray miak kodia mormiori-lewlewna maka Uplerlawna Nano'targa.
Yesus Nakot nohora kropna-krieutu mak kodia E' la matmiati
21 La' ler de de pa nodi liarni Yesus Nwe'er doin meman la maka ha Nwatutu-nwaye'a re, de Uplerlawna ralma-riorni totpena Nla' pa hota ntutu-nte'ela Yerusalem de Entutulu-nlelewua kropna-krieutu, yamuki-yama'ala yoma la'a ina-ama Yahudi ror wutga imam-imam o'tani-matni me makwatutu-kwaye'a agama. Uplerlawna Nala pa hota rwen E'a mere hota nodia lera wotellu owa'an de Uplerlawna Namori owa'an E la matmiatni ralamni. 22 Noma Petrus nheduma pa nte'la la Yesus pa rla'awa walli na'nama npolliohora Yesus pa nakot la: ”Matroma, awuakwak de Uplerlawna Nter dioini-nhal doinia mak Omukot de!” 23 Hya' maka Petrus rakota de edon nlernohora Uplerlawna ralma-riorni pede Yesus Nkillia Petrus na'nama Nakot la Niwra: ”Eh, mlia'awa walli hega'nu ne! Yana mhi'a yawuhi-yawe'et la A'u. Petrus, la'pa mukot emkade de mliernohora hegana amlawanni pa miwra mtiot nek A lia klieratni. La'pa omiwra hota A'g edon lier la yamuki-yama'ala de wniarormu de wniarora rimormioria de. Wniaror de edonna nwatiawua Uplerlawna.” 24 Nhor nioma Yesus Nakot la mak ha Nwatutu-nwaye'a re Niwra: ”Hyal miy re, mitlina. Riy meni mak kiwra klernohora A'u, de nhoratdoinia momuoga hya' ed maka e ralamni nod rer lia, ne nre' wut lia A' pua nler la yamuki-yama'ala onde matmiati pa emolmolan nekama nhoi wawayanni la auwlakra pa nlernohor A'u. 25 Yoma la'pa hameni maka edon nhoratdoinia mormiorni noh di wawannu de hota e' edon nler la mormiori-dardiari plalahwa pa nodi liarni. Mere la'pa riy maka khoratdoinia mormiorni la noh di wawannu, de hota nlernana mormiori-dardiari pa nodi liarni. 26 La'pa riy mak klernana nohkeran di re'eni-tniarnu honona mere hota edonna nlernana mormiori-dardiari plalahwa pa nodi liarni, de hota re'eni-tniarnu re nodi untu hya' la' riy dena?! Nohkeran di re'eni-tniarnu honona, ta'en niana nawel niana mormiori-dardiari plalahwa de mai rimormiori ita toh! 27 Hyalmi re, mial ralammi tetema pa mliernohor A'u yoma hota la' ler noha niatni de Rimormiori A'na A' die gor wutga Uplerlawna hopopanni-lili'irnu ammai die Agodia A A'mu plolli-mneheni. Hota la' ler de Amuai pia Awuahla rima-rima hihi'ini-yapyapni maka rhi' nana oleka wa. 28 Mhioratreria! Hota la'a miy hononmi la handi de riy dom de mak edonna rmati mia'ta mere hota ramkek ulu Rimormiori A'na A'u mak ktorna-krautia lodna-hairi maimia'yu.”
Maka Yesus ha Nwatutu-nwaye'a re ramkek nan memna Yesus hitni-reparni
1 Noma la'pa lera wonema rlardoinla noma Yesus Nodia Petrus nor Yakowsi me hyalli Yohansi pa rmeh'a rla'awa wo'or tutulu id hananni. 2 La'pa rwatniar temna Yesus de gaini to'ama. Yesus gaini emeknekama lera mak kreprepra me naniayarni liplipa-kamka'ma. 3 Plin-plinnianamde maka Yesus ha Nwatutu-nwaye'a re ramkek nan walia Musa, Elia, rora Yesus rwahauru. 4 Noma Petrus nakot la Yesus Niwra: ”Matroma, itden la handi de samoga, pa hota Matroma Nwayowa, de a'uriria hoiwiali wotel lia handi totpena id la Matro'mu, id la Musa, ne id wal lia Elia.” 5 La'pa Petrusa naltiertier mia'ta dewade kakam lawn ida mak khita-krepra npupun nana re noka ratlin nana lira ida nwatiawua kakam de ralamni pa niwra: ”A A'nu maka Asiayn memna inhatti. E' ed maka khi' nana A ralmu pa nahepru. Mitlin la E lirni.” 6 La'pa maka ha Nwatutu-nwaye'a re ratlina lir de dewade honona re rwaltiora-rwaltieman la tani wawannu yoma ramta'at wenna. 7 Mere Yesus Nmai pia Nkamit la re pa Niwra: ”Hyal miy re, Yan mimta'ata, mipriri!” 8 La'pa rkillia walli-walli mere edonna ramkek nana riy doma, eneknek to'ama Yesus Nmeh'a. 9 La'pa rwatiawua wo'ora pa rerun wa noma la'a talla ralamni de Yesus Nano'a re Niwra: ”La' de yan memmemna mikotkot nohora hya'a maka mimkeka re la'a riy. Mpiei niek pa nte'ela lerni mak Rimormiori A'na A' die hota ramori A lia matmiati ralamni.” 10 Noma maka ha Nwatutu-nwaye'a re ratiana riwra: ”Hya'a nrei pia makwatutu-kwaye'a agama re e riwra hota Elia nmai ulu nampena Ray maka Uplerlawna Nano'tar pua Namori-nalewna rimormiori Nmai?” 11 Noma Yesus Nakot la re Niwra: ”Plola hota Elia nmai ulu pa nwaho'a-nwatiernia hare honona. 12 Mere A'ukot tar tiy miy. Elia nmai olekwa mere riy id ho'mana edonna nat niohora de, ne irlernohora ir ralam wamueheni pa rhi' yatyat e'a. Ne hota rhi'a emkade wal lia' Rimormior A'na A' pua Alier la kropna-krieutu, yamuki-yama'ala, nniahora-nniala'a.” 13 Dewade maka ha Nwatutu-nwaye'a re rat niohor oleka Yesus lirni la'a Elia mak kmai olek de, de nnia'eratni Yohansi makharani.
Yesus Nhi' kalwieda keke'en maka hegana nhu'ru ralma
14 La'pa Yesus Nora maka ha Nwatutu-nwaye'a re wotelu rawal pia rla rler teman la riy rariahu re, noma muanke' ida nma nwaltiora-nwaltieman la Yesus gaini ralamni. 15 Nma nakot la niwra: ”Tuna, Mtiulla-msiayn nan la a a'nu yoma enapiphyaya'ala. Nler la polpuol inni-wakwak amni yoma la'a hegana-kawnu nhu'ru ralma pa nhi'inde e ntuin la ai ralamni onde la' gera ralamni. 16 Agodi oleka la maka A'mu ha Nwatutu-nwaye'a mere ir takeni ratowar nana (rhokar doinia).” 17 Noma Yesus Nakota Niwra: ”Hoi, Miy mak khi' do'a-kyap hiala me mak kakleha pesiay. Hota lera wo'ir owa'an pa Agor miy tialla me Agod niohor miy, nanpena mimpiesiay A'u?! Miodia keke'en de mmiai!” 18 Dewade Yesus Nhokar doinia hegana-kawnu mak khu'ru ralma pa la' ler de meman pa keke'en de nkalwied wa. 19 Nhorwua dewade maka Yesus ha Nwatutu-nwaye'a re rla' pa rora Yesus rmemeh'a la' gen ida na'nama ratiana Yesus riwra: ”Tuna, hya' nrei piede taken niana amhokar doinia hegana-kawun della?” 20 Noma Yesus Nakot la re Niwra: ”Yoma mikleh pesiay. Mhioratreria, la'pa miy pesiaymi de kuku'a emeknekama sasawi ola ida ho'mana de hota mikot la wo'or di pa nwarei genni de hota nwarei genni. Ne la'pa miy pesiaymi etla, de hya' to' mana hota miy e mhi' nana. 21Mere eneknek to'ama miy e mitahan lara me msiumbain pleini, nanpena mliernana plolli-mneheni pa mhiokar doinia hegana-kawnu mak emkadi. ”
Yesus Nakot nohor owa'an la'a matmiatni
22 La'pa Yesus Nor wutga maka ha Nwatutu-nwaye'a re rawok tar lia' Galilea, noma Yesus Nakot la re Niwra: ”Rimormiori A'nani A' die, hota ral A lia rimormiori limni ralamni. 23 Ne rwen A'u mere hota Uplerlawna Namori-nalewna owa'an A lia matmiati ralamni, la'a lera wotellu.” La'pa honona ratlin nana Yesus lirni de dewade rleretniekla ralamni rmawal doin la.
Krei yuranni papiairni
24 La'pa Yesus Nora talanwalli maka Nwatutu-nwaye'a re rte'ela leta Kapernaum noma mak kwahora krei yuranni re rmai pia ratiana Petrus riwra: ”O tungkurmu de nhi'inde Nala yuranni la krei toh?!” 25 Noma Petrus nwalolla: ”Yopme! Nhi'inde Npairia.” La'pa Petrus nmai lia roma nayanni pa edon nakot ma'ta krei yuranni dewade Yesus Nakot la Niwra: ”Petrusa, emkameni la o ralma-riormu? Hota he' ed maka ray-ray nohkeran di rhopan pa rpairi blastena? Ir mutnu-rahanu onde do'ona-dakna?” 26 Petrus niwra: ”Do'ona-dakna.” Yesus Niwra: ”Hade emkade demade yana itpair nek wa yoma ir mutnu-rahanu ita. 27 Mere totpena yanpa ralamni re ramehra (yoma it edon tpairi), pede mlia mnia'aili la danau de. Mu'ala kupan makdella i'n maka mliernan ul die wawni ralamni, ne hota mliernana dirham (kupna) wogata. Kupan de hota ntu'tu pa muala pa mla mpuairia itro'a yuranni la'a Uplerlawna roma kreini.”
Hota he' ed maka inponni rehi la Uplerlawna yamkekni
1 La' ler de de maka Yesus ha Nwatutu-nwaye'a re rmai pia ratiana Yesus riwra: ”Tuna, hota he' ed maka inponni kreh dioini la'a Uplerlawna mutnu-rahanu mak kmormior lia Uplerlawna tnioranni-riautnu ralamni?” 2 Noma Yesus Npol lia keke'enku' ida na'nama Nala pa ntutrier lia ir honona gaini ralamni. 3 Noma Yesus Nakot la re Niwra: ”Mhioratreria, eneknek to'ama mhiernu nhiolmi-lietmi me mpiali owa'an emekneka keke'enku'a mak klol yawa, de hota miy edon mrie' wut lia Uplerlawna mutnu-rahanu re. 4 Hade pede he' mak katu klol yawa pa emeknekama keke'enku'a di, hota riy de ed mak karehi-kalawan la'a Uplerlawna mutnu-rahanu ralamni. 5 Ne la'pa he' ed mak edon katulu-kapetan inonni me nreiniana-na'nana riy mak kakleha weli emolmolan nekama keke'enku' di, onnila A rerie'yu, de emekwalima e nreinian olek A wua.” 6 Mere la'pa he' ed mak kariei pia riy mak kakleha weli emeknekama keke'enku' di pa edonna rpesiay owa'an mai A'u, de Uplerlawna niukamnu la' riy de nareh dioin meman la'pa riy rkohg watga werwerta id la e tiernu totpa ntepar wenna la hletan lawna. 7 Inee! Hota nohkeran di nler la yatyatni-halalli yatlorni-yatra'ani yoma totota-wudwiudi yapi'u-yaga'u mak kodi riy la do'a-hala ralamni. Meman neka la totota-wudwiudi yapi'u-yaga'u honona erla, mere hota he' mak knairia hare pa ntota riy la do'a-hala ralamni, de riy de ed mak kler la yatyatni-halalli yatlorni-yatra'ani. 8 La'pa limmi-lakmi ed mak kodi miy lia do'a-hala de mdieul dioinia la pa misrala. Yanpa miodi limmi-lakmi re tetema pa rnakulta'ru la ai mormiori ralamni mak ta'eni rwarum nana. Samomuounu de miod lima-lak memehemi re pa mior tieman Uplerlawna la Ilyamou-Watyatoha. 9 Ne la'pa miy matmi ed mak kariei pia mlier la do'a-hala ralamni de mkiopil doinia la'pa mhiopliala. Yanpa matmi rora tetema pa rnaklia miy lia ai mormiori ralamni. Samomuounu de miod nieka matmi id pa mior tieman la Ilyamou-Watyatoha.”
Yawalliohora la'a dum mak kmolu
10 ”Hyal miy re, mitlina, yan memmemna mpiarwah'a makpesiaya A'u maka nhiolli-lietni de emeknekama keke'enku'a mak kakleha weli. Mhioratreria, yan mhi' emkade yoma Uplerlawna hopopanni-lili'irnu (malaikat) mak katiaka ira, nhi'inde rtutrier lia A A'mu Uplerlawna gaini ralamni la'a Ilyamou-Watyatoha pa rwak pa Uplerlawna Ntulan la ira. 11Me Rimormiori A'na A' die Amuai totpena A'umori-ulewna rimormiori la'a do'oni-halli ralamni. Ir emolmolan neka duma mak kawlar dioinia matromni . 12 Emkameni la miy wniarormi? La'pa riy ida hanni pipdiuma rahu ida, noma ida nmolu de hota emkameni la makhuri-kwa'an de hihi'ini-yapyapni? Nahmenmen nana, nteman targa pipdiumni terampwosiewa wehrani wosiewa re la'a wo'ora pa rwahak wewna pa ra'ana, ne nla nahak memna dum memeh mak kmol die. 13 Ne la'pa nlernana mak kmol die de plol toto' pa hota nahepur nohora dum memeh de, ne la' ler de edonna nhoratnana dum rariahu mak edonna kmolu re. 14 De hade emekwalima miy Amlawanmi mak kden la Ilyamou-Watyatoha, hota Nahmen meman pa riy rler la klieratni. Mak kakleh weli emekneka keke'enku'a re ho'mana edonna.”
La'pa inmu-narmu makpesiay ida nler la do'a-hala
15 ”La'pa miy mutwualmi makpesiay ida nhi'a do'a-hal tiy miy, de mlia' pa miora riy de mikot nohora do'oni-halli mak ha nhi'a, de yana riy ratga. La'pa enwayow nohora hya'a maka ha mikota la e'a, de hota miy e miple'er olekwa. 16 Mere la'pa edonna natlin la miy lirmi de mior owa'an riy ida onde wor pua mlia'a. Yoma la'a Puka ralamni e niwra hota riy ida onde woru rtutrier niohor miy nanpena mtiut halli de naplola. 17 Mere la'pa edonna nwayow nana hare lirni-tunnu demade mikot nohora halli la makpesiay wokni-le'enu. Ne la'awa hohoni pa edonna nwayow nan wal lia makpesiay wokni-le'enu, de yana miora mpiahaur wutu pa emeknekama nhi'inde miy mhi'a la mak kawoka blastena me riy mak kaplin niohora Uplerlawna. 18 Mhioratreria, hya' maka mliaran la nohkerna wawannu, de Uplerlawna la Ilyamou-Watyatoha ed mak kwayow nohor walia hade. Ne hya' maka mpiayow nohora la' nohkeran di de hota Uplerlawna la Ilyamou-Watyatoha Nwayow nohor walia hade. 19 Ne miat niohor walia la' nohkeran di wawannu de la'pa riy woru rna'ohma la' hadom wawannu pa rsumbain nohora, de hota A Amlawnu mak kden la Ilyamou-Watyatoha Nreiniana-na'nana sniumbain de pa hota Nwahla. 20 Yoma la' meni to' pa riy woru-wotelu rawok pa rkola tieru-rawur nehla la'pa rwet la A na'nu, de A'g e rie' wal lia mtatan de.”
Yawalliohora hopopna-lili'iru mak edonna khur niohora-kpat niohora rimormior wialli
21 La' noma Petrus nmai pia nakot la Yesus Niwra: ”Matroma, la'pa a'mu-hya'lu i'nu-na'ru rhi' do'a-ryap hial nan memna re'eni wo'ir la mai a' die, noma aghoratdoinia do'oni-halli, hota aghoratdoinia do'oni-halli la'pa re'eni wo'it muemna?” 22 Yesus Nakot la: ”Edon emkade! Yoma edonna ntut tio'ola re'eni wo'itu mere lera-lera nekpa mhioratdoinia e do'oni-halli. La'pa ntut lia re'eni terampwo'itu nti'il nana la re'eni wo'itu mana, hota mhuoratdoini e do'oni-halli tiy miy. 23 Yoma hota la'pa Uplerlawna Ntorna-nrautu la mutnu-rahanu mormiorni, de hota emeknekama wniahauru la'a yawalliohor di. De la'pa ray ida niwra nwatetar nohora hopopanni-lili'irnu re otanni-arni. 24 Demade rodia hopopna maka otanni-arni riwnu-halli. 25 Mere hopopan de taken niana npairi ahorga. Pede ray die nhopan pa ra'ol dioinia hopopna-lili'ir di nor wutga hawni-a'nani nor wut wualia hyonni-hyanni totpena ra rhernia otanni-arni re. 26 Noma hopopan de nuh' idma-nrama lia'ar la ray die, na'nama nwak la niwra: ”Matroma, awuak lilili-mamuau tiy o'a pa muala lera-mela mai a'u totpena apuair nana a otnu-a'ru re honona.” 27 Noma ray die ralamni ntuin doin nohora hopopan de wakwakni pa nhi'nande nhap dioinia hopopan de otanni-arni honona, ne nolin doinia pa nla'awa. 28 La'pa hopopan de nlergot wa, noka nwatrom nana e kniarwialli id maka na'otna dinar rahg ida la e'a. Onnila kupna oke' nmeh'a de pede nrahmia maka otan de tiernu pa nakot la: ”Hoi, mpuairia otanmu re mai a'u!” 29 Noma maka otan de nuh' idma-nrama lia'ar la, na'nama nwak lir la niwra: ”Heiwialia, awuak lilili-mamuau tiy o'a totpena mpuei pia repra-walin nanpena agherun momuoga re.” 30 Mere hopopan de nwayotli kniarwialli de wakwakni pa nreiniande nla nho'la targa la roma nhio'la ralamni, pa la'pa npair dioinia otanni re honona. 31 Mere la'pa hopopan de kniarwialli dom wal pia ramkek nana hihi'a-yapyap die, de ralamni rtuin doin la pa nreiniande rla rakot momuoga la'a ray. 32 Noma ray nhopan pa rpolga hopopan maka yatyata-halal de na'nama nakot la niwra: ”Hoi riy yatya'tu ne, ompuak lir mai a' puede agal o' pa yana mpuairia otanmu re. 33 Mere o ralammu edonna nolin doin nohora o kniarwialmu de wakwakni tiy o'a pa emekwalima aghi'a tiy o' de?!” 34 Pa reiniande ray die nahankerna, pa nhopan pa rken tiargho'a hopopan ralam yatyat della roma nhio'la ralamni totpena mak katiaka roma nhio'la ramuki-rama'ala pa la'pa npair nana momuoga otanni-arni honona. 35 Pede hyalmi re mitlina! Hota hya' maka ray die nhi'a la hopopan ralam yatyat de, emekwalia A A'mu makden la Ilyamou-Watyatoha hihi'ini-yapyapni tiy miy, la'pa miy edon mhioratdoinia rimormior wialmi do'oni-halli tiy miy.”
Yesus Nwahaur nohora mehlimlimni idma nahmen doin id la
1 La'pa Yesus Nwahaur nohor momuoga hare honona noma Nwatitin la Galilea yapatni pa Nla'awa Yudea yapatni la' gerlawna Yordan walli. 2 Riy rahu rlernohora reria Yesus pede Yesus Nhi' kalwieda ir la nnienni-nhienni. 3 Noma riy Parisi rmai lia hande pa rtota-rwudia. Ratiana Yesus riwra: ”Tuna, it agamni deullu-tatarni niwra riy rhopliala hawni patke'a de rlernohora neka ir ralma-rior wamueheni?” 4 Noma Yesus Nakot la re Niwra: ”Hoi, miy edonna mpiaik nan ma'ta la Puka ralamni de enakot nohora la' ler maka Uplerlawna Nakoki-nayapi nohkerna?! E ed maka khi'a-kyap niana rimormiori, de muanke'a nora patke'a. 5 E rhorat targa Uplerlawna lirni la' Puka ralamni de Niwra: ”La hade pede hota a'na muanke'a ida naltarga inni-amni pa la nora hawni patke'a rla' wutg ida totpa rla' ihyida-ralmida.” 6 Nhi'nande hare de riy worg atia'a, mere riy id to'a. La hade pede la'a patke'a rora muanke'a maka Uplerlawna Nwatiehra oleka, de yan memmemna riy ida ntota pa nreiyapie'era.” 7 Noma riy Parisi re ratian owa'ana riwra: ”Tuna, la'pa emkade, de hya'a ed mak krei piede Musa nhopan pa tala horta yapie'era la hawa patke'a maka it tahmen doinia la?” 8 Noma Yesus Nakot la re Niwra: ”Musa nhur niohora pa mihmen doinia miy patke'emi yoma miy o'ta tehrami lawan rehia. Mere Uplerlawna ralma-riorni la' ululu, mak Enakoki-nayapi nohkerna de ematia'a hade. 9 Mitlin A li'ru ri, muanke'a ida hawni edonna nalira-naliai, de muanke' de nakleha tnikilgeni pia nhopliala patke' de. Mere la'pa patke' de edon nalira-naliai, noma muanke' de nhopliala hawni pa nla nora patke'a id owa'an rmehlima, de emeknekama nalira-naliai lia Uplerlawna yamkekni.” 10 La' noma maka Yesus ha Nwatutu-nwaye'a re riwra: ”Matroma la'pa hota emkade, yana tmehlim nek wa.” 11 Noma Yesus Nwahla lirni re Niwra: ”Hota riy liawanni nekane edonna rwayow nohora miy wniarormi-wnialaimi de. Eneknek to'ama riy maka Uplerlawna Nal ruri-lai lia de pa yan rmehlima (me la'pa edon rmehlima edon ralira-raliai wiali). 12 Yoma la' riy doma, de edonna rmehlima, yoma ha niod miemna hade la inni apannu ralamni. La' dom pal die edonna rmehlima, yoma riy doma to'a rerieini. Ne dom pal die orgahi rahmena rmehlima, totpena yana nodia yawuhi-yawe'eta la ira kniarni la Uplerlawna mak kodia riy totpena rla' Uplerlawna mutnu-rahanu mak Enodi plolli la pa emeka ir Rayni. Pede riy maka Uplerlawna Nala ruri-lai lia de pa yana rmehlima, ir er maka kreiniana-ka'nana miy wniarormi de.”
Yesus Nran limni pa Nhilpai-nmanatga keke'enku'a
13 Riy rmai die rodia keke'enku'a la' Yesus totpena Yesus Nran limni pa na Nhilpai-nmanatga re, ne Nsumbainia re. Mere maka Yesus ha Nwatutu-nwaye'a re rawenan la mak kodia upa-a'na re. 14 Mere Yesus Nakot la maka ha Nwatutu re Niwra: ”Miolin doinia keke'enku'a re pa rmai A' die. Yana mpiayotlia re, yoma riy mak edon katulu-kapetna inonni mere plet pa rpesiay pia emeknekama keke'enku'a re er maka Uplerlawna Nwaliria pa rler teman la riy mak kmormior lia E tnioranni-riautnu ralamni.” 15 Noma Yesus Nran limni la keke'enku'a re o'tani wawannu pa Nhilpai-nmanatga re, nhor nia'nama Nwatitin la gen die. Itiwra tler wut lia Uplerlawna mutnu-rahanu de yana itsa'ar it aranni la'a it re'eni-tniarnu 16 La' lera ida ne tuwari ida nmai pia natiana Yesus Niwra: ”Am tungkurga, ilu-wniehwa samomuou hya' ed maka hota aghi'a totpena aliernana mormiori-dardiaria plalahwa pa nodi liarni?” 17 Noma Yesus Nakot la Niwra: ”Hya'a nrei piede o ma mutian nohora A' di la hya' mak samoga? Mutlina, mak plollol pa samomuou die enekneka Uplerlawna Nmemeh'a to'a. La'pa omuiwra mlier la mormiori plalahwa de mliernohora deulu-tatra maka Uplerlawna ha Nakotkota.” 18 Noma riy de natiana: ”Deulu-tatra meni ed maka hota aliernohor reria?” Noma Yesus Nakot la Niwra: ”Yana mpunu-mpuenna, yana mulira-muliai, yana mkiamnelu-mkiamna'a, yana muod niana riy mak khala, 19 muatu mu'unni-mumta'ata inmu-ammu, me muatu mtiulla-msiayni mura'a-mupal walia rimormior wialmu pa emekwalima mumkek rer lia inon wamuehemu.” 20 Noma tuwar die nwalolla Yesus pa niwra: ”Tuna, maka Mukot taru honona de, a'g e liernohor momuog oleka re. Ne hya' owa'ana ed maka a'g edon ghi' ma'ta?” 21 Noma Yesus Nakot la: ”La'pa omuiwra mlia' riy plollola-plele'er la Uplerlawna yamkekni, de mlia' pa mu'ol dioin momuoga re'emu-tniarmu re honona, pa muala welli kupna-kai la'a riy mak kakleha-kaplara, a'na ri'ini patyatni, ne hota omliernana re'a-tniaru la Ilyamou-Watyatoha. Mhi' hare honona nanpena ma mliernohor reri A'u.” 22 La'pa tuwar die natlin nana lira-tunu re dewade nla'awa de ralamni nmolu-nhelam doin la, yoma re'eni-tniarnu harahu rehia. 23 Yesus Nhar lirni la maka ha Nwatutu-nwaye'a re Niwra: ”Mhioratreria, hota riy makre'a-maktaru riwra rre' teman la Uplerlawna mutnu-rahanu, de rler la yawuhi-yawe'et lawna. 24 Mitlina, riy maka kre'a-ktaru mak kiwa rre' teman la Uplerlawna mutnu-rahanu mak Enodi plolli la emeka Ray, de hota emeknekama hayori lawna niwra nlola nhior lawra hu'ulli, mere taken niana.” 25 La'pa maka Yesus ha Nwatutu-nwaye'a re ratlin nana Yesus lirni-tunnu re dewade honona rwer rer wiawni. Noma rakot la: ”La'pa makre'a-ktaru re ta'en niana rla' Uplerlawna mutnu-rahanu de hota he' ed maka klernana mormiori-dardiari plalahwa de ho'a?” 26 Yesus Namkek la honona na'nama Nakot la Niwra: ”Ta'en niana rimormiori ramori-ralewna inonni. Mere Uplerlawna Nodi plolli pa Namori-nalewna ira, yoma Uplerlawna plolli-mneheni etla pa Nhi' nana-nyap niana hare honona.” 27 Noma Petrus nhar lirni pa nakot la Yesus Niwra: ”Matroma, a hononam di de ami e mto'or momuou lia haneknek wawannu pa ami e mlernohor O'a. Ne hota hya' ed maka amlernana?” 28 Yesus Nwahla lirni re Niwra: ”Mpiesiaya, hota la'a noh warwuar die Rimormiori A'nani A' die hota ed maka kaliwna la mtatangeni mak kamrehi-kamda'ar nohora liplipni-kamka'mani me la' ler de hota miy maklernohor reri A' muana mimtatan la ray liwangeni termida wehrani woru re hananni, totpena miodi plolli la Israel luwnu-a'nani termida wehrani woru re. 29 Ne la' pa he' ed mak kaltarga romni, nor wutga hawni-a'nani inni-amni inni-narni onde nhyi'ini, yoma la' A rerie'yu de hota riy de nlernan owa'ana rahu ida tni'illi. Ne hota nlernan walia mormiori-dardiari plalahwa pa nodi liarni. 30 Mere hota riy mutlialawna mak kla' orkotkota-ornanana onde mak kre'a-ktaru hota rtawli'iru ne mak kakleh weli onde mak edon kre'a-ktaru hota rala' ul tiargho'a.”
La'a Uplerlawna ralam kalwiedni pede mak ktawli'iru hota nwal lia' mak kala' ulu
1 Uplerlawna hihi'ini-yapyapni la E mutnu-rahanu mak Enodi plolli la pa emeka Ray, de hota emeknekama lira yawalliohor di. De or nhyi' ida, la'pa yawyawar ma'ta de, la' pa nla nahaka riy mak kar lia nhyi'ini-tlunanni. 2 Nla' pa nlernana riy mak kari, de net mieman la siewni-kaini dinar ida emeka nhi'inde riy rlernana la lera ida, ne rrana kniari la' ler de memna. 3 La'pa riy e rtepartarlia kniari la ler panpahna, mere ora nhyi'a-tlun de nla pa namkek de mak kakleha kniari dom de e rtepartarlia yahe'i la ya'olgeni. 4 Noma nakot la: ”Oi, mai pia mlia mkiar lia a nhyi'a-tlunnu. Pena agala siepmi-kaimi de lol talanni.” 5 Noma rlernohora pa rla'awa. La'pa lera nwawuau ro'onni (jam 12 ) noma ora nhyi' de nlergot pa npolg owa'an riy dom pa rma rkar lia nhyi'ini. Ne la'pa lera nhierni (jam 3 ) nhi' owa'an emkade. 6 La'pa la'awa lera nher wiarta (jam 5 ) nhi' owa'an emkade pa nla namkek de riy doma e rmeh'a raheiye'eya. Noma natiana re: ”Oi, hya'a nrei pia la' ler lawan di de miy edon mkiari mere mtiutrier niek wa?” 7 Noma mak kmeh'a katuttutrieri re rwalolla riwra: ”Ami edonna mlernana kniari.” ”Oi! La'pa emkade, de mai pia mlia mkiar lia a nhyi'a-tlunnu.” 8 Nla' pa lera nmella wa (jam 6 ) noma or nhyi' de nakot la mak kodia mat la kniar die niwra: ”Muwoka mak kari re pa mpuairia rima-rima siewni-kaini, de mpuau ulia la mak na'nama kar lia lera nhierni de, pa lorlor la mak kar lia yawyawra re honona.” 9 Noma mak kar lia lera nhierni re rala' ul pua rma ra'ala dinar ida (de kupna-kaini la' ler id gahani). 10 Lala'pa nhorwua noma mak kar lia yawyawra re rmai pia ra' walia kaini. Irwarora de ir rrana kniari la yawyawar ma'ta pede hota ir siewni-kaini re rarehelia mak na'nama kma kari re. Yah! Neknanama ha rlernan to'a kupna emekwali maka na'nama kari re. 11 Rla' pa ra'ala kupna re, de ha raltier yat la'a ora nhyi'-tlunni de. 12 Mak kar lia yawyawra re riwra: ”Hya'a nrei pia mak na'nama kar lia lera nhierni re rkar nian toto'a lera ho'ke'eni nmeh'a mere am die amkar lia ler pahna matmiat liawan de, ne a papiair mamni ramneneha?” 13 Noma ora nhyi' de nwalolla riy id la ira niwra: ”Harya, a'g edonna ghal nohora o'a. Yoma dodo'ona itwatetar la o kaimu de kupna dinar ida mere o' edonna mpuayotlia toh! 14 Mua' nek la kaimu di pa mlia'a nek wa. A ralmu naplele'er pa agala mak na'nama kari re kaini, de ror miy ramneneha. 15 Hya' ed mak krei pia taken niana age'era-ghakra a re'u-tniar wamueh'u?! Yanpa la' o wniarormu de yana aghi'a ralam kalwied la rira?!”’’ 16 Yesus Nwat lirni de pa Niwra: ”Pede miy miak katlin la yawalliohor di mhioratreria! Emeknekama mak kar lia' lera nhierni rlernana siewa-kaini ulu, emkade walia riy mak ktawli'iru hota rwal lia' mak kala' ulu, me mak kala' ulu rwal tiargho'ola mak ktawli'iru.” Y
esus Nwahaur nohora la' re'eni wotel lia' E matmiatni ralamni
17 La' lera ida pa Yesus Niwa Nla'awa la Yerusalem, noma Nden nek la talan letgar pa Npolg awoka maka ha Nwatutu-nwaye'a riy termida wehrani woru pa rmeh'a la' gen ida na'nama Nakot la Niwra: 18 ”Mitlina! Dodo'ondi de itsortut niana Yerusalem. Hota la hande de ra'ol Rimormiori A'na A' die la imam-imam o'tani-matni me la' walia makwatutu-kwaye'a agama pa ra'anlira-remunwawa pa hota ha rukum pen A'u. 19 Nhor niampena ral A lia riy maka Yahudi atia'a. Hota rhi' A lia hamalmialia, me rliwra-rkaklia A'u na'nama rla rwairi A lia auwlakar hananni pa Alier la matmiati-molmuol die. Mere hota la'pa lera nodia wotellu de hota Uplerlawna Namori-nalewan owa'an A lia matmiati ralamni.”
Yakobus nora Yohansi inni wakwakni la' Yesus
20 Nhor nioma Sebedeus patke'eni nor wutga upni-a'nani, Yakowsi nor Yohansi, rmai Yesus de. Noma pat de nler la Yesus gaini ralamni na'nama nwaltior la gaini pa npolu-nwak la. 21 Yesus Natiana: ”Ompuaka hya'a ine?” Noma pat de nwahla lirni niwra: ”Amee, awuak de la'pa Omlia' Ray de a a'nu rora ramtatna pa rhapetre'ru la'a O liwangenmu de totpa amlernan wali ya'uli-yawedi.” 22 Yesus Nakot la pat de a'nani rora Niwra: ”Miy miplin niohora miy wakwakmi de. Hota miy di de mpiaran pia mitahan nana kropna-krieutu nniahora-nniala'a maka Aliernan dena?” Noma rwahla Yesus yatianni de riwra: ”Hota amtahan nana.” 23 Yesus Nakot la re Niwra: ”Plola hota mlier la kropna-krieutu maka Aliernan de mere hota la'pa mak kamtatan la A wa'lu malwiru-malganna pa rhapet reri A' die, A'g edonna godi plolli pa wuet la riy meni ed mak kamtatan la gen die. La' geni-tiena re, de A A'mu nanpena ed mak kodi plolli pa Entutg he' ed mak kamtatan la. Ne Enwalir nian oleka hare la' ululu.” 24 La'pa riy mak ha Nwatutu-nwaye'a re korni riy termida re ratlin Yakowsi nora Yohansi wakwakni de ralamni ramehra la riy maroro'a mak kwahyali re. 25 Hade pede Yesus Npolg awoka momuoga honona na'nama Nakot la Niwra: ”Hyal miy re, miatg oleka de o'ta-mat lalawna me mak klernana gen tiutullu maka kodi plolli la' luwu-a'na mere raplin niohora Uplerlawna, de rtern apitga limni-rorni. 26 Yana mhi'a nhioli-liet mak emkare. Mpialdioinia de, la'pa he' mak kiwra klernana gen tiutullu, talanni, de nhoi-ntania rimormior wialli pa emeknekama hopopna ida nhoi-ntania matromni. 27 Ne la riy mak kiwra kala' ul miy, de nwahyar tialan pa makpesiay wialli rlola pa emolmolan nekama ata-wa'ara ida nhi'a la matromni. 28 Pa emekwalima Rimormiori A'na A' wuali. Yoma Amuai die, A wniaro'ru de totpa edonna rhoi-rtani A'u, mere Amuai die ghoi-tiania rimormiori, me gal ino'nu emeka tniuwu-nhiaiya pa A'ulewna rimormiori harahu mak kwatiawua hairi-hairi honona.”
Yesus Nhi' kalwieda riy woru mak matni kyata
29 La'pa Yesus Nor maka ha Nwatutu-nwaye'a re rwatitin la Yeriko de riy harahu rlernohor reria. 30 Mere riy woru mak matni kyata ramtatna la talan lawna aratni. La'pa ratlin nan tutga de Yesus e Nlola hande dewade rrora rhaun pa riwra: ”Matrome, Ray Daud upni-a'nani ne! Mtiulla-msiayn nan mai ami ee!” 31 Riy mutlialawan makden la hande rawenan la riy maroro'a re riwra: ”Hoi! Mmiolmiolmi!” Mere riy mat yata rora yeher to'a me rarur lia nhiaunu pa riwra: ”Matroma, Ray Daud upni-a'nani ne! Mtiulan-msiayn nan mai ami ee!” 32 Noma Yesus Ntut tiaru na'nama Npol lia mak matni kyata re pa Natiana re Niwra: ”Hya' ed maka mpiaka mai A'u?” 33 Noma rrora rwahla Yesus lirni riwra: ”Matrome, amiwra mamkek owa'ana!” 34 Yesus ralamni ntuin doin la' irrora yamkekni dewade Nteman la rrora matni pa mtatan de nekpa matni re raphyar wia. Noma rlernohor Yesus pa rla'awa.
Yesus Nler la leta Yerusalema ralamni de riy ra'uli-rawedia
1 La'pa Yesus Nora maka ha Nwatutu-nwaye'a re rhi' pa rwakriania Yerusalem noma rlola Betfagi la'a wo'ora Saitun hananni. Noma Yesus Nhopan pa maka ha Nwatutu-nwaye'a riy woru rala' ulu 2 pua rla'a let maka ir rwakrian olek de. Yesus Nano'a re Niwra: ”Hota la' de mimkek nan memna keledai ida e naknioh wut lia a'nani. Mlia' pa mlieretniekla miewar doinia pa miodi mmiai. 3 La'pa riy ida npolliohor miy, de mikot la miwra: ”Itmatromlawanni e Nwaka (perlu).” Ne hota riy de edonna nakotkot hadom la'a keledai re wawannu mere plet pa nollia pa miodi mmiai.” 4 La hade de hota ntuin tar lia makwohorulu-ktatrulu lirni niwra: 5 ”Mikot nohora harella Sion mniotni miwra: ”Mimkek ee! Hota Raymi e Nmai die, Entutga yehwa mnapnapla me nhiu'ru-nhielma pa Nha' nan to'a keledai a'na ida.”’’ 6 Nhor nioma talanwalli rora re rla'awa pa rhi'a hya' ed maka Yesus Nakota re. 7 La'pa rmai die rodia keledai de nor wutga a'nani de rewre'wa. Noma irrora ral walia rain plalahwani re ra rwowa keledai a'na to'orni totpena Yesus Nha'a nana. 8 Riy harahu la mutlialawna re rtutga nhiu'ru-nhielma la'a rala naniair plalahwa ra rwowa la' talla, me korni rtuhia ora tawi-au tiawi motmota pa ra re'era la talla, totpena keledai re rlola wawannu. 9 Riy rahu re la'pa rlol gaini me mak ktawli'iru pa rletgar nana Yesus. Ne rhaunu-rhaun pa riwra: ”Ya'uli-yawedi nden rer tiy O' ee! Ray Daud upni-a'nani maka Uplerlawna Nano'taru die! Ta'uli-tawedia tsu'ru-tselma O mak kmai pia kodia Orgahi-Orha'a nanni. Ta'uli-tawedi, tlilili-tmamuau O la tutullu-lolo'oni!” 10 La'pa Yesus Nler la leta Yerusalem ralamni dewade let de nler la kokokna-rariarin lawna. Leta Yerusalem mniotni riwra: ”He'a di?” 11 Riy rahu mak kor Yesus talan pa rmai re rwalolla riwra: ”Yesus makwohorulu-ktatrulu inhatta, Nwatiawua leta Nasaret la' Galilea yapatni oo!”
Yesus Nhokra-nlaiya mak ka'olu-kala'a la Uplerlawna roma kreini
12 Nhorwua noma Yesus Nla'awa Uplerlawna roma kreini herni-gaini pa Nhokra-nlaiya mak ka'olu-kala'a kaweli-kaphar la hande. Nte'la la mei-kader maka ha rwahernia kupna me mak ha ra'olu-rala'a ma'nu loktieru, pa Nkowa-nwalia. 13 Na'nama Nakot la mak ka'olu-kala'a kaweli-kaphara re Niwra: ”E rhorat targ olek la Puka ralamni Uplerlawna lirni de Niwra: ”Hota rweta A ro'mu de roma sniumbain geni de, mere miy mhi'a la roma kamnelu-kamna' geni!”’’ 14 Dewade riy maka matni kyata ror wutga maka lakni ktu'u-kwaini, rma rahaka Yesus la'a roma-krei. Ne Yesus Nhi' honona rpa rler la kalwiedni. 15 Mere imam re o'tani-matni rora makwatutu-kwaye'a agama deullu-tatarni re ralamni ramehra la Yesus hi'ini-yapyapni mak kamehi-kayona maka khi' kalwieda mak kamehra re. Ne rahankeran wal lia keke'enku'a re riarni-riarin la'a krei herni-gaini pa riwra: ”Mmuori-mdiari Ray Daud duratni nee!” 16 Noma ratiana Yesus riwra: ”Omutlin oleka lir maka ha rakota rena?” Yesus Nakot la re: ”Yowa, A'g e utlin wal lia. Oi, miy edonna mpiaik nan ma'ta harella' Puka ralamni?! De e rakot nohora Uplerlawna lirni mak Eniwra: Enwatutg oleka upa-a'na lokmera-papay re pa rat niohora ra'uli-rawedi E'a.” 17 Nhor nioma Yesus Nhoitio'or la hare pa Nlergot la letlawna Yerusalem pa Nokria leta Betania me Nanin tar lia hande.
Yesus Nwatut nohora it pesiayni la' Uplerlawna
18 La'pa repar yawyawar noma Yesus Nor mutwualli re rawal lia letlawna Yerusalem, ne Yesus Naplar oleka wa. 19 Noma Namkek nana kar ona id la' talla aratni, noma Nla Nwahak wo'oni pa Na'ana, mere kar on de nakleh wo'a. Mere tawni mamaini. Noma Yesus Nhar lirni la kar on de Niwra: ”Dodo'ondi mkieran wa pa hota omukleh wo' owa'an wa!” Noma kar on de nleretniekla napliau lia genni. 20 La'pa mak Yesus ha Nwatutu-nwaye'a re ramkek hade noma honona re rwer rer wiawni. Noma ratiana: ”Hya'a nrei pia kar on de nleretniekla nmat wia?” 21 Yesus Niwra: ”Mhioratreria, la'pa miy pesiaymi edonna nwalera de hota miy niek de mhi' walia hya' maka Aghi' oleka la'a kar on de. Ne hota hade edonna nmeh'a mere la'pa mikot to'ola wo'or di pa nwarei lia tah'i lawna hota narinni la' tah'i lawna ralamni. 22 Hya' to' pa mimpiaka la'a miy sniumbainmi de hota mimliernana, hornama pesiaymi yana nwalera.”
Ratian nohora Yesus plolli-mneheni de ha nwatiawua hanmeni?
23 La' noma Yesus Nawali owa'an la Uplerlawna roma kreini pa Nwatutu-nwaye'a. La'pa Ntepartarlia wniatutu-wniaye'a, dewade imam-imam o'tani-matni re ror wutga Yahudi in letni-am letni rmai pia ratiana Yesus riwra: ”Tuna, he' ed mak ktemna plola-mneh della O limmu ralamni pede Omhi' nan hihi'imu-yapyapmu rena?” 24 Noma Yesus Nwahla lirni re Niwra: ”A'g e giwra utian tek wali miy, la'pa mimpiet nana, de hota Awuahla miy la'a he'a plolli pede Aghi'a hihi'a-yapyapi re. 25 Pede A'utian tek miy, de hota Yohansi makharani de ha nlernana plol della he'a? Uplerlawna onde rimormiori?” Dewade honona re rwahu'ru ralma-riora wamueh'a pa riwra: ”La'pa itwet la Uplerlawna ed mak kala plolli la Yohansi de hota Eniwra: ”Ne hya'a nrei pia miy edonna mpiesiay e'a?” 26 Mere la'pa it twet la tiwra: ”Rimormiori plolli-mneheni hade,” de hota itamta'at rer lia rirahu yoma honona rpesiaya de Yohansi de makwohorulu-ktatrulu id hade.” 27 Pede honona rla' lir id pa rwahla Yesus riwra: ”Ami e maplinga.” Noma Yesus Nakot la re Niwra: ”Hade emkade de hota A' muana, edonna ukot wahyaria tiy miy la'a he'a mak kala plolli mai A' pua Aghi' hihi'a-yapyapi re.”
O'ta-mata Yahudi re nhioli la'a Uplerlawna de emolmolan nekama riy mak edon katlina-katailla amni
28 Noma Yesus Nakot owa'an la o'ta-mata re Niwra: ”Dodo'ondi de A'utian teka miy ralma-riormi la lira yawalliohor mak A'ukot di. De la' lera id pa muanke'a ida a'nani muanke'a riy woru. Noma muanke' de nla nakot la a'nani yanulu niwra: ”Ama, mlia mkiar lia nhyi'a-tlunni ralamni la ler di.” 29 Noma a'nani yanul die nahmena mere nwaror owa'ana, noma nla'a nhyi'-tlunni de ralamni. 30 Nhor nioma muanke' de nla nakot wal lia a'nani gari de emkade wali. Noma a'nani gar die nwayowa mere hota edonna nla'a. 31 Noma la'a keke'enku'a rora de he' ed maka klernohora amni nhiopanni?” Noma rwet la riwra: ”A'na yanulu.” Dewade Yesus Nakot la ir honona Niwra: ”Mpiesiaya, hota riy mak kawoka blastena, ror patke' yatyata, rala' ul miy pia rler wut lia Uplerlawna mutnu-rahanu mak Enodi plolli la pa emeka Ray. 32 Yoma Yohansi makharan die nmai pia nwatutu-nwaye' miy lia hya' mak kaplol la Uplerlawna yamkekni mere miy (emolmolan nekama a'na gari la'a yawalliohor de pa) edonna mliernohora Yohansi wniatutnu-wniaye'eni. Mere mak kawok blastena rora patke' yatyata rpesiaya me rlernohora Yohansi wniatutnu-wniaye'eni. Ne mimkek walia hare rhern oleka nhiolli mere miy ralammi edon nakwali et pia mliernohora Yohansi lirni de.”
Yahudi o'tani-matni re emolmolan neka maktimni-makdahara mak nhiol yata
33 Noma Yesus Nakot owa'an la ira: ”Mitlina yawalliohora id owa'an hadi. Ornoha ida nawuli-natniamin anggur wo'a la nhyi'ini-tlunanni ralamni. Nteman riwta la nhyi' de walli-walli. Ne nahia hu'ula maka rahmi anggur turnu la ralamni. Nhor nia'nama nariria yatiak geni. Nwahi'a pa nhorwua noma nala nhyi'-tlunni anggur della riy rtimnia. Ne nla nalaun la riy ornoha. 34 La'pa lerni nwakrian wia pa riwra rreiki-rwo'or wa, dewade ora nhyi' de nhopna hopopanni-lili'irnu re pa rmai pia ra'ala e nhiakarni la timanni-daharni. 35 Mere maktimni-kdahara re rwaldioin targho' pa rtorna ora nhyi'a hopopanni-lili'irnu re. Rwanalga riy ida, me rwenan nan ida. Ne rala watu ra rwatliewur wen id wali. 36 Noma ora nhyi' de nhopn owa'ana hopopanni-lili'irnu dom owa'ana, de narehia mak kala' ulu re. Mere mak ktimni-kdahara re rhokra-rlai rwunu-rwen owa'ana. 37 Hohoni dewade ora nhyi'-tlun de nhopna e a'nani yoma la'a wniarorni de: ”Matialo'onamde ha rhu'ru-rhelma a a'nu.” 38 Mere la'pa ramkek tut niana ora nhyi'-tlunni a'nani dewade idma nakot la ida riwra: ”Maka hota kodi plolli la ononni e inhatti! Mai pia itatuinia aranni totpena itlernana nhyi'a-tlunan di!” 39 Dewade rtorna riy de pa rnaklia la nhyi' de to'orni na'nama rwenna.” 40 Noma Yesus Natiana o'ta-mata re Niwra: ”La'pa hota ora nhyi' de nawal lia hande de hota nhi'a hya'a la maktimni-makdahara reno?” 41 Noma rwah'a lirni riwra: ”Tuna, hota ora nhyi' de nwunu-nwenna riy yatyata-halala re pa ir matmiatni nhi' it pa tamta'ata, ne nla nal targho'a nhyi'ini-tlunanni della riy dom to' pa rtimni-rdahar samomuoga pa rala ora nhyi' de nhiakarni la timanni-daharni.” 42 Noma Yesus Nakot la re: ”Miy edonna mpiaik ma'ta la maka rhorat targa la Puka ralamni (la'a wat muaka ha rtot nohora la Ray Makamori-Kalewna maka Uplerlawna Nano'tar dena)? De niwra: ”Wat muaka tukna edonna rnair nana pa rhi'a roma-lewu, mere rhopliala, de Uplerlawna Nnairi oleka pa Nhi'a la watu liar pianulu. Hadi ed mak Orgahi-Orha'a Nhi'a. Adoh ha samounu nee!” 43 Yahudi o'tani-matni miy, miy er mak edon mrieinian Ray Makamori-Kalewna. Hade pede mhioratreria! Hota miy edon mior wutga Uplerlawna mutnu-rahanu, mak Enodi plolli la pa emeka Ray. Mere hota Agala hairi dom pa rre'ela Uplerlawna mutnu-rahanu. Ir er mak klernohora Uplerlawna lirni-tunnu. 44 Mere riy maka kahmena kreinian A'u de hota rler la yatyatni-halalli yatlorni-yatra'ani pa emolmolan nekama riy mak ktuin pa ktaiya watu onde riy mak watu nwaklol niana, de hota ramkoha-ramnana pa rwal lia en liu'wu-tan miakmu.” 45 La'pa imam re o'tani-matni ror wutga riy Parisi re ratlin tutga yawalliohora maka Yesus Nakota re, de irat muemna Yesus lirni de e ntai ira. 46 Hade pede rwahak talan pa rtorna Yesus. Mere ramta'at rer lia' rirahu yoma rira liawanni rpolga Yesus la'a makwohorulu-ktatrulu id hade.
Uplerlawna Npolu-nwak pa riy honona rla' E mutnu-rahanu mere rirahu rahmena
1 Yesus Nnairia yawalliohora pa na Nwahaur la mutlialawna wokni-le'enu Niwra: 2 ”La'a Uplerlawna mutnu-rahanu, mak Enodi plolli la pa emeka Ray, de Uplerlawna hihi'ini yala'ani emeknekama yawalliohor di. De Uplerlawna emolmolan nekama ray id mak kiwra khi'a he'i-hepur nohora a'nani muanke'a mehlimni-marya'ani. 3 De ray die nhopan pa mak ktulla-kar lia e'a rla pa rpolga riy maka ray die ha npol niana-nwak nana oleka pa rma ramtatna. Mere maka rpol niana-rwak nana re rahmena rmai. 4 Noma ray die nhopan pa mak ktulla-kar lia E'a re dom to'a rla rhu'ru-rhelam la mak ha rpol niana-rwak nana re riwra: ”Mia mimtatanmi yoma nhioi-tniani la' mei wawannu namtemtemn olekwa. A pipi-du'mu mak kden la lowna-krahanu raknioki-ratnia'awa momuog olekwa me er olek la mei wawannu. Mai pia tamkek la it gaini.” 5 Mere mak ha rpol niana re edonna rga' niohor polpuolu-wakwak de pede rla'awa la'a kniar genni me dom de rla'awa nhyi' ralma. 6 Ne korni de rtoran targho'a ray die hopopanni-lili'irnu pa ralla yetni warna na'nama rliwar wenwenna re. 7 La'pa ray die natlin nan hare de nawenan doin la. Pa nreiniande nhopan pa ralgota limni-rorni mak ka'ara pa rwunu-rwenna riy yatyat mak kwunu-kwenna ray hopopanni re, na'nama rhoklai la ir letni. 8 Nhor nia'nama ray die npolga mak ktulla-kar lia e'a re pa niwra: ”Itwahi' oleka he'i-hepru la'a mehlima-marya' di mere maka apuolu-wuak ulu re ta'en niana ra'an wut mai a'u la mehlima-marya' di. 9 Pede mliergot pa mpiolu-mpiak he' to'a mak kden la loi liawna-talan lawna pa rma rahepur pa ra'ana-remun la handi.” 10 Dewade mak ktulla-kari re rla'awa pa rla rawoka-rale'ga riy mak kden la loi liawna-talan lawna re pa rriw niana momuoga pa rma rapenga geni-tiena maka ha rhi' targ oleka re. Riy kalwieda nor wutga riy yatyata er momuou lia hande. 11 Nhor nia'nama ray die nmai pia nlina-nmata mak kmai re honona la hande. La hande de ray namkek nana riy ida edonna nnairi naniair maka riy rnairia pa rahe'i-rahepur la mehlima-marya'a. 12 Noma ray nakot la riy de niwra: ”Hyalia, nihya'pa Ommuai handi de o' edonna mniairia naniairia muki-hepru la'a mehlima-marya' dina?” Mere riy de edonna nwalol hadoma. 13 Noma ray nakot la maktulla-makar lia hande niwra: ”Mpiutu-mkiohoga ha limni-lakni ne mrinnia la melmelli-kalkalamni la' lutur lawna to'orni. Hota la' hande de riy e rpolpuol inni-rwakwak amni.”’’ 14 Noma Yesus Nwatia lirni la'a yawalliohor de pa Niwra: ”La'a emkade wal pia polpuolu la' riy harahu pa rler teman la Uplerlawna mutnu-rahanu, mere mak ha rwaliri, de riy doma rmeh'a.”
Makden Parisi ratian nohora blastena totpena rtot Yesus la klieratni
15 Nhorwua noma riy Parisi rla' pa rawok pa rwahu'ria ralma-riora, totpena rna'aili Yesus. 16 Noma rhopan doinia ir mutwualli doma ror wut wualia riy mak kher lia Herodes totpa rla'a Yesus de pa ratiana riwra: ”Tungkurga, amatga de riy plele'er id O'a. O' e Mpuatut die, Mukot nohor plollolli la Uplerlawna ralma-rior kalwiedwedni la'a rimormiori. O' edonna Mhue'du nan etia riy ralma-riorni, yoma riy lalawna onde riy kuku'uni ho'mana O' edon Mpuadan nohora. 17 La' hade pede Mukot teka la mai ami, de la' O wniarormu de, la' it agamni deullu-tatarni de nakot am pia ampairia blastena la'a mak ktorna horta-hairi (Kaisar) onde yana?” 18 Mere yatianni re de Yesus Nat niohora ira nnia'ohma yatyatni honona. Pede Yesus Nwahla re: ”Oi riy kdior miera miy! Mtiut inonmi emeka riy mak samomuou mere plollolli de riy yatyat miy. Hya'a nrei pia miwra mtiot A'u?! 19 Mi'al tek la kupan maka ma mpiairia blasten la pa mtiut tieka la mai A'u.” Dewade rala kupan dinar id pa rtutga la Yesus. 20 Noma Yesus Natiana re: ”La kupan de he'a herni-gaini me he' nanni mak kden la kupan dena?” 21 Noma rwet la riwra: ”Ray mak ktorna horta-hairi Romawi (Kaisar) o'tani inhat ee!” Noma Yesus Nakot la re: ”Hade emkade, miala kupan maka ray herni-gaini etla de la'a ray, yoma hanni hade. Ne miala la Uplerlawna hya' maka Uplerlawna gahani wali.” 22 La'pa ratlin nana lira wniahla re honona, de honona rwer rer wiawni. Noma honona rwatitin la gen diewa pa rto'or la Yesus.
Yesus Ntekal reria Niwra riy mak kmati hota rmori owa'ana
23 La' ler de nekpa riy Saduki doma rmai pia ratian nohora Yesus la'a emkameni riy mak kmati hota rmori owa'ana, yoma Saduki re er mak edonna kpesiay riy mak kmati hota rmori owa'ana. 24 Riwra: ”Tungkurga, Musa wniatutnu-wniaye'eni la ita de emkadi: de la'pa muanke'a ida nmati me nakleh ma'ta a'na, de muanke'a mak mat die hyalli nor owa'ana yerni patyat de rmehlima, totpena rlernana hyalli mak kmati olek de duratni-waitni. 25 La' lera ida de muanke'a riy wo'itu rwahyal riaralma mak kdella it nohoni. Noma yanulu nmehlima mere nakleh ma't a'na dewade nmat wia. Pede hawni patke' maka ha nto'or nan de nora yerni muanke'a ida rmehlima. 26 La'pa edonna rlernan ma'ta a'na, de muanke' de nmat wia. Noma patke' de nor yerni id owa'ana. Mere emkade to' pa nodi liarni pa la ntut mueman la gari hoho'a. 27 La'awa hohoni noma pat de nmat wia mere nakleh etia a'na ida. 28 Pede la'pa la'awa lerni pa mak mati honona rmori owa'ana, de hota he' hawni patke'a dena? Yoma mak kwahyali re wo'itu meman pa rora pat de rmehlima.” 29 Noma Yesus Nwahla yatianni re Niwra: ”Oi, miy wniarormi nhala, yoma miplin niohora Puka lirni, me miplin wualia Uplerlawna plolli-mneheni. 30 Yoma riy mak kmati re hota rmori owa'ana, de hota edonna rmehlima, mere hota rmori-rdar lia Ilyamou-Watyatoha, emolmolan nekama Uplerlawna hopopanni (malaikat) la' Ilyamou-Watyatoha mak edon rmehlima. 31 Nah, la'a miy wniarormi de mak miwra riy hota edon rmori owa'an la matmiatni ralamni, de emeknekama miy edonna mpiaik nan ma'ta hya' maka Uplerlawna Nakot nohora la'a mak hota kmori owa'an la matmiati ralamni. 32 Yoma la' ler maka Abrahama, Isaka, me Yakopa rmati olek de Uplerlawna Niwra: ”A' di, de Abraham, Isak, me Yakop Uplerlawanni ma'ta A'u.” Ha nnia'eratni de Uplerlawna mutnu-rahanu mak kmati rmori owa'ana me Uplerlawna de ir Uplerlawanni. Uplerlawan de, riy mak kmati Uplerlawanni atia'a hade. E' de de, mak kmormiori Uplerlawanni E'a.” 33 La'pa riy mutlialawna re ratlin nana Yesus lirni-tunnu re, de honona re rwer rer wiawni.
Lira nhiopna ononni
34 La'pa riy Parisi ratlin tutga Yesus Nhi' nana riy Saduki re de rakleha lira waw la temni, dewade Parisi re rawok owa'an pa rna'ohma. 35 Noma tungkurga agama deullu-tatarni id la ira la nala yatiana id pa na nta'aga Yesus. 36 Niwra: ”Tungkurga, lira nhiopan meni ed maka khi' ononni la'a agama deullu-tatarni?” 37 Noma Yesus Nwahla lirni Niwra: ”’’Miala miy rurmi-laimi, ralma-riormi, ihrami-ralammi tetema pa mhima-mrie'a Uplerlawna Matromlawanmi de.” 38 Lira nhiopna, nhiedu tniehra ononni inhatta hade. 39 La' wornu mana emekwalima idni de. De niwra: ”Miatu mtiulla-msiaynia, mira'a-mipal wualia rimormiori wialmi pa emekwalima mimkek rer lia inon wamuehemi.” 40 Deulu-tatra agama maka Musa nor wutga makwohorulu-ktatrulu rwatutu re, on petanni-ga'ar lawanni (ononni) nwatiawua lira nhiopna ri.”
Ray mak kamori-kalewna de Daud duratni-waitni me la' walia Daud Matromlawanni
41 La'pa riy Parisi rden ma'ta la hande noma Yesus Natiana re: 42 ”A'utian tek miy. La'a miy wniarormi de Ray maka kamori-kalewan mak Uplerlawna Nano'tar die, de he' duratni-waitni hadena?” Noma riwra: ”Ray Daud duratni hade.” 43 Noma Yesus Niwra: ”Hade emkade, de hya' ed mak krei piede Uplerlawna Nhiwni Narialmua Daud pa nwet la Ray miaka kamori-kalewna de e Matromlawanni? Yoma Daud niwra: 44 ”Orgahi-Orha'a Nakot la a Matromlawnu (Yesus) Niwra: Muliwnu (Mumtatnu) la' A wa'lu malganna, la'pa A'utowra arwalmu pa ratniowar la O nayanmu.” 45 La'pa Ray Daud nwet la Ray Makamori-Kalewna, niwra e Matromlawanni, nihya'pa mikota ray Daud duratni E'a?” 46 Dewade Yesus Nwatia lirni mere riy id mana edonna naltieri eti la Yesus gaini ralamni. Ne la' ler de pa nodi liarni de riy id mana edonna nparan pia nhar lirni pa natiana Yesus.
Yana rlernohora Yahudi agamni o'tani-matni pa ratulu-rapetna inonni
1 Noma Yesus Nakot la maka ha Nwatutu-nwaye'a re ror wutga riy rahu re Niwra: 2 ”Makwatutu-kwaye'a agama me riy Parisi rodi plolli pa ra rwatutga Musa deullu-tatarni re. 3 La' hade pede miy e mliernohora hya' ed maka ha rwatutu-rwaye'a la'a Musa deullu-tatarni honona re. Mere yan memmemna mtiolliohora hya' maka ha rhi'a re. Yoma irmeh'a nek de edonna rlernohor hya' maka ha rwatutu-rwaye'a re. 4 Hare wniatutnu-wniaye'eni re emolmolan nekama rkeni kwar werwerta la riy wawannu, mere edon rtulan nan etia riy totpena rlernohora wniatutnu-wniaye'eni re. 5 Hya' maka ha rhi'a re de totpena riy ramkek ira. Ralma-riorni de totpa riy ramkek ir de emeka riy mak kape'el la agama. La' hade pede rhorta Itmatromlawanni lirni la hurup sapona-sapona dewade rtapla la limni me reranni, ne rnairia rain plalahwa nor tawnu plalahwani. 6 La'pa ramtatna la' yawoka-yale'u he'i-hepru la'a ya'anlawna-yemunlawna de rwahak genia samomuou totpa riy ra'uli ira, me rla'a Yahudi kreini-iskolli de rwahak geni mak kden la gaini. 7 Ir rahepru yoma mak kden la ya'olgeni rhi' ir la rekna-waiti me rhoi ir la ”Tungkuru”. 8 Mere miy die yan memmemna mtiolliohor ira yoma mtiot pa riy ra'uli-rawedi miy pa rhoi miy lia Tungkuru. Yoma miy Tungkurmi inhatta id to'a, ne miy hononmi de mpia'ina-mpianara. 9 Ne yan memmemna mi'uli-miwedia riy mak kden la nohkeran di pa mhioiya la Am plollola, yoma miy Amlawanmi mak kaplollola de ida nmemeh'a to'a, mak etla Ilyamou-Watyatoha. 10 Me yan memmemna mpiayow nohor pa ra'uli-rawedi miy pia rhoiya miy lia Matroma la'a noha wawannu, yoma Matroma eneknek to'ama riy ida, de A'g e inhatti maka ha rweta la Ray mormiori-lewlewna maka Uplerlawna Nano'taru. 11 Riy maka inponni karehi la'a wokmi-le'emi, de riy mak katu khoi-ktani la rimormior wialli. 12 Riy maka katulu-kapetna inonni la heyanan de hota Uplerlawna Nalernia, ne riy maka klol yawa de hota Uplerlawna Nrana la heyanna.”
Yesus Nawenan la riy mak ktota inonni emeka riy maka nhioli samomuou mere plollolli de riy yatyata ira
13 ”Tungkuru-tungkurga agama miora riy Parisi miy, adoh! Hota mlier la yatyatni-halalli yatlorni-yatra'ani. Miy mtiutga inonmi emeknekama riy samomuou, mere plollolli de riy yatyat miy (munafik). Miy e mtierteri-mtiatawa riy mak kiwra kler la Uplerlawna mutnu-rahanu. Mere miy mieh'a nekane mihmena mlier la Uplerlawna mutnu mak Enodi plolli la pa emeka ir Rayni. Ne riy mak kiwa kler la Uplerlawna mutnu demade mtieri-mtiawa. 14 Tungkuru-tungkuru agama miora riy Parisi miy, adoh! Hota mlier la yatyatni-halalli yatlorni-yatra'ani. Mtiutga inonmi de emeka riy kalwiedweda mere plollolli de riy yatyat miy (munafik). Miy e miohpa-milahara a'na riy patyata me mrieyahru romni-lewnu. Ne msiumbain de plo'a-plahwa la riy rahu gaini ralamni totpa ma mtiutwua miy do'omi-halmi. Mere hade mak kariei pia mliernana niukum mak hota kwerwerta nareh dioinia mak riy dom to'a rlernana. 15 Tungkuru-tungkuru agama me riy Parisi miy, adoh! Hota mlier la yatyatni-halalli yatlorni-yatra'ani. La'pa mimihak riy id to' pa nlernohora miy agammi deullu-tatarni de ho'mana miy e mlieretia hletna-yoiri me miy mhia'ata wo'ora-kawru. Mtiutga inonmi emeka riy kalwiedwed miy. Mere hota miy mrieiniande riy de do'oni-halli nareh dioin miy do'omi-halmi la re'eni woru totpena hota nler meman la ai mormiori ralamni. 16 O'ta-mata miy, de miy emolmolan nekama riy mak mat yata mak ktutga talla la riy dom to'a. Adoh! Hota mlier la yatyatni-halalli yatlorni-yatra'ani. Miy mpiatutga riy miwra la'pa rwet la Uplerlawna roma kreini pa rlokra de edonna nawniatiehra. Mere la'pa rwet la maha no' krei ralamni pa rlokra de ha nawniatiehra nohora liokarni. 17 Miy die mpiodku me matmi yata. Hota ha meni ed mak karehi? Maha no' krei ralamni onde krei die mak khi' pa maha de, Uplerlawna gahani?! 18 Mimpiatut walia hadilla rira. De la'pa rwet la katri'ana pa rlokra de edon nawniatiehra la liokar de. Mere la'pa rwet la prehena-mau maka rkenia la katri'ana wawannu pa rlokra de ha nawniatiehra nohora liokarni. 19 Adoh matmi re yatni ne ee! Hameni ed maka karehi, prehena-mau, onde katri'ana mak khi'a prehena-mau pa nwal lia Uplerlawna gahani?! 20 La' hade pede la' pa riy ida nlokar pa nano'taru hadom la katri'ana, nnia'eratni de e nano'targa hadella katri'ana nor wutga hya' mak kden la katri'ana wawannu de honona. 21 Ne la'pa hameni nlokra hadom nwet la roma-krei, nnia'eratni de enakot oleka hade la roma-krei nor wutga Uplerlawna mak kden la' roma-krei die. 22 Ne la'pa riy ida nlokra pa nwet la Ilyamou-Watyatoha, nnia'eratni de nlokra hadella Uplerlawna mtatangenni ne la' walia Uplerlawna mak kamtatan la' hande. 23 Tungkuru-tungkuru agama miora riy Parisi, adoh! Hota mlier la yatyatni-halalli yatlorni-yatra'ani. Mtiutga inonmi emeka riy kalwiedweda mere plollolli de riy yatyat miy. Yawuli-yatniamanmi emeknekama kio'a-kamlaka de nhi'inde miala nhiakra id ralamni la termida (sepersepuluh) la'a Uplerlawna. Miala de naplola mere miy edonna mpiadan nohora agama deullu-tatarni ononni emeknekama mtiulla-msiayni rimormior wialmi, mhioli-mliet la plol wawna, la'pa ida edon nollia ida. Maka plollola pa mhi' nana de, de hota mliernohor ononni maka ha rwahakhaka inhatta re nor wut wualia yana mhioratdoin wal pia miala nhiakra id ralamni la termida (sepersepuluh) la'a Uplerlawna. 24 O'ta-mata miy, miy die emeka riy mak mat yata mak ktutga talla la riy dom to'a. Yoma hya'a maka agama ononni de miy edon mpiadan nohora, mere hya' maka edon kwerat la Uplerlawna yamkekni de mimihakhak reria. Pa hota emolmolan nekama mi'na potpota mak kdella miy niemun genni ralamni demade mimtia'i doinia la, mere hayori demade mliumu-mtielan nana. 25 Tungkuru-tungkuru agama me riy Parisi miy, adoh! Hota mlier yatyatni-halalli yatlorni-yatra'ani. Mtiutga inonmi la riy kalwiedweda mere plollolli de riy yatyat miy. Mhi' emeknekama riy maka kwuri-kohma lola-wra'u wali to'orni mere ralamni re edonna rohma pa nakdeha-naktiahli ma'ta, yoma mtiot pa mpiehwa-mliakta emekneka riy kalwiedweda mere mimatmer la rira hyonni-hyanni me mimpiaror to' inon wamuehemi. 26 Parisi miy die, mpiaho'a-mpiahai niohora matmi yamkekni. Hota mhioitio'or doin-mtiahnei dioinia nhiolmi yatyata re, ne plol toto'a pa mpial lia riy kalwied wa. Totpa hota miy die emolmolan nekama riy mak ka'ala lolli-wra'nu me larni-kanni, pa nwuri-nohma momuoga ralamni re, totpena honona mana nmomuou. Yoma la'pa it ihranu ralamni nmou-nwitna de hota it wniehwani-liakatni hihi'ini-yapyapni mana rkalwiedwed wali. 27 Tungkuru-tungkuru agama miora riy Parisi miy, adoh! Hota mlier la yatyatni-halalli yatlorni-yatra'ani, yoma mtiutga inonmi emeka riy kalwiedweda mere plollolli de riy yatyat miy. Miy emeknekama hoi-kietra mak ha roh aur la pa yamkekni de samoga la tio'ora. Mere la' ralamni de npenpuen niohora riy rurni-kliakallu mak kahuwu-kawoini. 28 Hota emeknek walima mtiot pa mpiehwa-mliakat emekneka riy kaplele'era mere nhiolmi-lietmi de to'a yoma nhiolmi npenpuen niohora yatyatni-halalli. 29 Tungkuru-tungkuru agama me riy Parisi miy die, adoh! Hota mlier la yatyatni-halalli yatlorni-yatra'ani, yoma mtiutga inonmi de emeka riy ploi-ple'era, mere plollolli de riy yatyata-halal miy. Nhi'inde mpiedia hoi-kietra la'a makwohorulu-ktatrulu ululu me mhi' samomuou wat tiutulu-au pidara (tugu) la'a riy mak kaploloi-kaplele'era. 30 Me miwra: ”La'pa amor wut lia a up mamni-tgar mamni lerni mana, ami edonna mre' wut pua mpunu-mpenna makwohorulu-ktatrulu re.” 31 Mere la' miy lirmi re, mtiutga de miy di de riy mak kwunu-kwenna makwohorulu-ktatrulu duratni-waitni miy. 32 Pede ndella pa mhiaur nohora upmi-tgarmi do'oni-halli pa nodi liarni (totpena hota mlier la Uplerlawna niukamnu). 33 Miy die riy yatyat miy! Pa hota emkameni totpena miy orgahami milewna inonmi la'a niukmua ai mormiori ralamni?! 34 Mitlin samomuoga me! Hota A'u'enyatga makwohorulu-ktatrulu me riy maka ka'o'ta-kakriahlu me tungkuru-tungkuru totpa rwahak pa mhioitio'or doin-mtiahnei dioini do'omi-halmi. Mere hota mtiollia dom pa mpienna, me hota dom de mlia mpiairia la auwlakra hananni. Ne dom de hota miala ha ulti pa mliwra la'a Yahudi re kreini-iskolli genni me mtiota pa mhiokar reria la' leta id pa la' leta ida. 35 La' hade pede hota miy er mak kakwara wniunu-wnienna nwauga la ler maka upmi-tgarmi rwunu-rwenna Habel, ne rodi liarni la'a wniunu-wnienna la riy korni honona mak khi' mak kaplol la Uplerlawna yamkekni la' pa ntutu-nte'ewa la' ler maka rwenan walia makwohorulu-ktatrulu Sakaria, Berekia a'nani de, la'a Uplerlawna roma kreini nora katri'ana letgarni. 36 Pede mhioratrerio! Nee! Plol toto'a pa wniunu-wnienna honona re, de hota tuwu di rakwar reria do'a-hala re honona.”
Yesus ralamni Ntuin doin la leta Yerusalem
37 ”Neee! Makden Yerusalem miy ee! Miy er mak kwunu-kwenna makwohorulu-ktatrulu me mpiatliewur wenna riy maka Uplerlawna Nhopna rtiy miy die. Makden Yerusalem miy ee! A'g e uhak memna olek la re'eni wo'ir meman pa Agiwra ghi' miy pia emeknekama hiwi tei mak kreka-krek a'nani la liwarni nayanni, mere mihmena mitlin la A polpuo'lu. 38 La' hade pede mitlino! Hota Uplerlawna Nolin limni la miy letmi. 39 Pena miatgo, la' ler di pa ntutu-nte'ela ler mak Amuai owa'ana, de hota, miy edon mimkek eti A'u. La' A maimia'yu lerni de nampena miwra: ”Makodia Orgahi-Orha'a nanni Nmai wiee! Mai pia ta'uli-tawedi tlilili-tmamuawua!”’’
Yesus Nakot nohora la'a roma-krei namdierna
1 La'pa Yesus Nran lakni la Uplerlawna roma kreini noma maka ha Nwatutu-nwaye'a re rmai pia rakot la: ”Tuna, Mumkek tek la Uplerlawna roma kreini de inponni me naruri.” La ayat di de rakot nohora Uplerlawna roma kreini nor wutga roma-lewu mak kdella roma krei die walli. 2 Noma Yesus Nakot la re Niwra: ”Yowa, Uplerlawna roma kreini de inpona me naruri. Mere totpena miatga, hya' maka mimkeka ri, hota rweyata-rwaniawu momuoga. Wat muaka kapnidara re de hota id mana edonna nalliapar la id wawannu.”
Nniahora-nniala'a la makpesiay Yesus
3 Nhor nioma Yesus Nla'awa wo'ora Saitun noma Namtatna la hande. Noma maka ha Nwatutu-nwaye'a re rod tiemna pa ror Yesus rwahaur rewre'wa pa riwra: ”Tuna, Mpue'er nohor tek hare, mai ami hota mowen die itamkek mak Omukota re? Me hota hya' ed maka tamkek ulga totpena nwagahniort it la O maimiaimu me noha niatni nrehgor wua?” 4 Yesus Nakot la re Niwra: ”Mi'ererma! Yanpa riy rhi' aklierat miy la'a A maimia'yu de. 5 Hota rirahu rmai die rnairia A na'nu pa riwra: ”Ray Makamori-Kalewna maka Uplerlawna Nano'taru A'g inhatti!” Hota rirahu rpesiaya ir pa rler la klieratni. 6 Hota mitlina poka hidara yetni warna me mliernana kota-de'eta de rira riwra wunu-ara e nwewr olek la noha-rai, mere emkade ho'mana yan mimta'ata. Yoma hota hare honona de plollola pa itamkeka me itatlina, mere noha niatni edon ntutu-nte' ma'ta. 7 Hota hairi nor hairi rawunu-rawenna, me noha-rai nora noha-rai rawo'ora. Ne hota rehka-lara nwewar la noha-rai, me noha nruru (upkarururu) lol meni-meni. 8 Hare honona de tamkeka pleinia mere edon rler ma't la noha niatni. Ler maka mimkek la hare de eneknek to'ama mulaliaini, pa emekto'ama patke'a maka apannu namehra la mulaliaini, mere lerni edon ntu'tu ma'ta pa nayor a'nani. 9 Hota la' ler de rwatoran miy miak klernohor A'u pa ral miy lia riy yatyata-halala pa rnahora-rnala'a nanpena rwunu-rwenan miy. Hota la' noha wawannu de noha-rai honona rahankeran rer tiy miy yoma mimliernohor reri A'u. 10 La' ler de mana rirahu rhoitio'or doin-rtahnei dioin la pesiayni la A'u. Ne rwaldioinia pa rtorna riy makpesiay mia'ta yoma sukni tia'ala na'nama rala la riy yatyata re pa ramuki-rama'ala. 11 La' ler de wal pia riy rahu hota ralahar pa riwra ir de makwohorulu-ktatrulu ira pa rodi rirahu la klieratni. 12 Yatyata-halala na'ititar la liawanni pa narieiniande rirahu rakleha sniayni la rimormior wialli me edon ratlina-ratailla Uplerlawna. 13 Mere la'pa miy e mtiorrer pitpitga pesiaymi, de hota mliernana mormiori-lewlewna plalahwa pa nodi liarni. 14 Ne Kot Kalwieda-Paitiota la'a emkameni la Uplerlawna Nodi plolli pa emeka Ray, de hota rakotkot lola pa nwewar la noheri woru nayanni totpena riy honona ratga, nhor nianpena noha niata.”
Kropna-krieutu nniahora-nniala'a yamuki-yama'ala la riy mak kden la nohkeran di
15 ”Makwohorulu-ktatrulu Daniela nakot nohora la' ululu memna la'a hya' mak khi' akdeha-aktiahlia gen lululi la Uplerlawna roma kreini ralamni narieiniande Uplerlawna Nawenna. Pede la'pa hya' maka Daniela nakot nohora ntutu-nte'ela de, miy miaka mpiaik nana e lirni de mnia'erit nana lirni de nnia'eratni! 16 Pa miy mak kden la Yudea miwlar lia wo'ora hananni. 17 Me maka kateni anni la likti wawannu plet pa miwlari. Yana mhioratreria hya' mak kden la roma ralamni pa miodia. 18 La'pa miy mak kden la nhyi' ralma de yana miwali pia miala lawarmi-rayanmi la'a roma nayanni. 19 Adoh! La' ler de pat mak ka'uhu-ka'apnu, ne la'a pat mak nuh reria a'nani re rpolpuol inni-rwakwak amni. 20 Msiumbaini totpena yanpa miwlar liola otna-anni ralamni onde yanpa la'a Sabat lerni. 21 Yoma lera-mela mak kodi kropna-krieutu, nniahora-nniala'a, yamuki-yama'ala mak emkade, de it edon tlernan etia la'a ler maka Uplerlawna Na'ohi-na'ara nohkerna la'pa ntutu-nte'ela' ler di. Ne la'pa itleretia de, it edon tlernan emkade owa'ana. 22 La'pa Uplerlawna Nala ler de pa naplahwa de hota riy id mana edonna ntuin tar lia noha wawannu yoma rmat miomuou. Mere onnila Uplerlawna sniayanni la mutnu-rahanu maka Nwalir niana re to'a, maka nhi'nande ler de edonna nodi liarni. 23 La' ler de la'pa riy riwra: ”Mai pia tamkek ee! Ray Makamori-Kalewna maka Uplerlawna Nano'taru ed olek diwa,” onde dom e riwra: ”Ee, Ray Makamori-Kalewan de etla handelloo!” Yan mitlin la lirni re. 24 Yoma hota la lera re de rirahu ralahar pa riwra ir de de Ray Makamori-Kalewna maka Uplerlawna Nano'taru onde rtot inonni emeka makwohorulu-ktatrulu pa rnairia hihi'a-yapyapi mak kamehi-kayona mak riy edon ramkek taru pa rtutga rurni-laini totpa ra ra'ohpa-ralahara rira. Uplerlawna mutnu-rahanu maka Enwalir niana nekane, riwra rtot pa rler la klieratni. 25 Hade pede mhioratreria! Dodo'ondi de A'ukot oleka hari tiy miy wia totpena hota la'pa hare honona rtutu-rte'ewa de miy edon mlier la klieratni. 26 Pede la'pa riy rma rpo'on tiy miy riwra: ”A'g e wuatrom nana Ray Makamori-Kalewan della' wo'orletna-kawurloini,” de yana miora pa mlia'a. Onde la'pa riwra: ”Mai pia mlia mimkeka, e nade'a la rom id ralamni.” Yan memmemna mitail nohora. 27 Yoma hota Rimormiori A'na A maimia'yu de riy honona plet pa rat niohora. Yoma Amuai die, emeknekama hita-tlena nkaili la'a tipur matni, lairni ndain la warat matni. 28 Ne emeknekama tamkek nana iha lakma e ntapoi reria re, pa nahe' niohora ya'ana, tat niohora mak kmati-kmolu etla hande, de emkade walia la'pa Amuai owa'an de riy honona rat niohor memna.”
Rimormiori A'nani Nmai wia
29 ”La'pa ler maka riy rler la kropna-krieutu, nniahora-nniala'a de nlardoinla dewade leretniekla: ”lera nwamuela ne wolla mana nakleh lair wia. Hota wtiona mana pala tuinia. Ne maka kodi plolli la darta-lyanti mana hota nawniatiri-nawnialiakra.” 30 Nhor nianpena hya' mak ktutga Rimormiori A'na A maimia'yu de nayamkek la lyanti ne hota la' ler de noha-rai honona polpuolu-kakakria la noha wawannu. Hota honona ramkek reria Rimormiori A'na A' Muai pia Adien la kakma wawannu, de Agodia A plo'lu-mneh'u, A preh'u-mka'yu mak kamehi-kayona la liplipni-kamka'mani. 31 Hota Uplerlawna hopopanni neuga noknok lawna, ne Rimormiori A'na A' die ghopan pa A hopopnu mak kden la Ilyamou-Watyatoha rawoka-rale'ga A mu'tu-rah'u maka Uplerlawna Nwalir nian oleka, mak kdella noha uhunu-lyanti ewatni.”
La emkameni la hota tat niohora de edon nalo'on wali ne Yesus Nmai owa'ana
32 ”Mia'ala wniatutu-wniaye'a la kar on de. La'pa mtiamnia olli demade nmor wia, de miatg oleka lerwarnu nwakrian wia. 33 Hota emkade wal lia mimkeka hare honona mak A'ukot nohor olek diwa, de miatg oleka de lerni-melli nhi' pa nwakrian wia. 34 Totpa miatga! Riy la' tuwu di edon rmat mia'ta, de hare honona mak ukot nohor oleka di hota rtutu-rte'ewa. A li'ru ri raplola. 35 Hota lyanti nora nohkeran di mana rmolu-rhelam wa mere A li'ru-tu'nu de ndella pa nodi liarni.”
Yana minin matni yoma miy edonna miat niohora lerni-melli la Yesus maimiaini
36 ”Riy id ho'mana hota naplin niohora la'a hya' lera-hya' mela Rimormioria A'na A maimia'yu owa'ana. Uplerlawna hopopanni nekane raplinga, Uplerlawna A'nani A' ho'mana uplinga. Eneknek to'ama, A'mu la Ilyamou-Watyatoha nampena ed mak katga. 37 La'pa Rimormiori A'na A maimia'yu de rimormiori yehwani emolmolan nekama la it upni Nuh tuwnu la' ler ululu. 38 La' lera ger wawuau edonan ma'ta, de rimormiori rtepartarlia ya'ana-yemnu la lera-lera, me rmehlima-rmarya'a. Emkade nekpa nodi liarni pa la'pa nte' meman la Nuh nler la aupual liawna (batra) ralamni. 39 La'pa nte'ela ger wawuau liawan de nmai wia dewade nwau dioin rimormiori mak edon kla' teman la Nuh nor upni-a'nani, na'nama nhioratni rla' temni. Hota emkade walia la'awa lerni maka Rimormiori A'na A' Muai owa'ana. 40 Hota la' ler de de riy worg e rtepartarlia kniari la'a nhyi' ralma, de hota ralewna riy mak klernohor A'u mere mutwualli de edonna ralewan nana yoma edon npesiay A'u. 41 Ne la'pa patke'a worg e rtepartarlia rwotra wetra' lawna, de hota mak klernohor A' die ralewna, mere rhoitio'or doin mutwualli mak edon klernohora A'u. 42 Hade pede orahnioratmi! Yoma miy e miplinga Orgahi-Orha'a maimiaini. 43 Mhioratreria! Itala orrom id pa tsi'a la yawalliohora. La'pa orroma nat niohora hya'a lera-mela mak kamna'a nma nkamna'a la e romni, de hota edon nanina, me e natiak reri totpena mak kamna' de yana na'unut nan e'a. 44 La' hade pede miy miana emkade wali. Mitiak reria! Mitlin reri-mitail rer lia Uplerlawna lirni, yoma Rimormiori A'nani hota Amuai owa'an de, miy e miplin niohora ler meni-mel meni.”
Tatiak reria it nhiolli-lietni illu-wniehwani pa itweiya Yesus maimiaini
45 ”La' hade pede mhi' inonmi pa emeka hopopna-lili'iru maka riwra natu nhu'ru-nhelma me natu natlina-nataili. Hopopna mak emkade upni-matromni mana nran e' pa nla' o'tani la' hopopanni-lili'irnu korni totpena e' ed mak khakra mutwualli re ya'anni-yemannu la'a lelera-melmela. 46 Hota hopopan mak kdenrer lia kniarni de hota nlernan unut lawna, yoma matromni nawal pia nmai die nlernan entepartarlia tulla-kniari. 47 Mpiesiayo, hota upni-matromni de npesiaya riy de pede nran e' pa nwal lia mak klina-kmata la e re'eni-tniarnu honona. 48 Mere hopopan mak kyata-khala de hota nwarora la ralamni hota upni-matromni mahneka nanpena nawali. 49 Pede nliwra-nkaklia hopopan walli re, ne na'ana-nemun wut lia riy mak ktepartarlia kpehera-kma'wu. 50 Dewade upni-matromni de nawal pia nmai wia la'a lera-mel maka hopopan de naplin niohora. 51 Pa nhi'nande upni-matromni nukmua werwerta riy de ne nhokar doinia pa nre' wut lia riy mak ktot pa nhi'a plolli mere plollolli de riy yatyat ira (munafik). Hota honona re rpolpuol inni-rwakwak amni.”
Itwewiei-tnarnara Yesus maimiaini emeknekama hararara matlimlimni yatiakrerni
1 ”La'pa nte'ela Rimormiori A'na A maimia'yu de, de hota Orgahi-Orha'a yehwani la'a mutnu-rahanu maka Enodi plolli la ira pa emeka Ray, de emeknekama la'a yawalliohor di. De hota hararara termida maka ha rwalir tiar pua klernohor reria mak kmehlima, rla' pa rima-rima ra'al wa'danu pa rla' pa rwatroma a'na muanke'a mak kmehlim de. 2 Ne la'a harara termida re de riy wolima e rpodku ne riy wolim de ratu. 3 Harara matlimlima mak podku re rodia wa'danu genni mere edonna rodia wu'ru ya'itarni. 4 Mere harara matlimlimni mak katu re rodia wa'danu me rod wialia wu'ru ya'itarni. 5 La'pa a'na muanke'a maka kmehlim de nmai die mela nlawna, pa nreiniande hararar re rhoki-rtemna me ranina. 6 La'pa mela nletargara na'nama rira riarni-riarin nohora mak kmehlim de nmai wia. Riarin pa riwra: ”Nmai wia, muanke'a mak kmehlima nmai wio! Mai pia twatrome!” 7 Harara re termida ema rhedga mata pa ra'itra wu'ru la wa'danu re. 8 Noma harara mak podku re rakot la mak katu re riwra: ”Oi, mtiulan pa miwe'er nana a wa'du mamni ri, yoma a wa'du mamni ri wu'ranu nhi'pa nkeran wa.” 9 Mere harara mak katu re rakot la riwra: ”El miy re, yan miwenna mere taken niana yoma hota mal tiy miy, mere hota he' nal mai ami? Mlia miwelia la'a riy mak ka'olu wu'ru.” 10 Noma mak kpodku re rla rawelia la' mak ka'olu. La'pa ralala' ma'ta de muanke'a mak kmehlim de nte'ewa pa hararar mak katu re ror wutga mak kmehlima re pa rler la rialam la mak kmehlim de genni pa rho'la rwenta pinta puohra. 11 Nhor nia'nama hararar podku re rmai wia pa rtet la nhiari riwra: ”Tuna, tuna mhuar niana nhiari mai ami ee!” 12 Mere muanke'a muaka kmehlim de niwra: ”Plollolli de, a'uplin niohor miy.”’’ 13 Noma Yesus Nwatia lirni la lira yawalliohor de Niwra: ”La' hade pede yan mininmi mere mitiaktiaka, yoma miy edonna miat niohora lera-mel maka hota A maimia'yu de ntutu-nte'ewa.”
Mial ralammi tetema pa mhima-mrie'a Uplerlawna pa emolannekama hopopna ra'ititar rer lia matromni re'eni-tniarnu
14 Yesus Nakot owa'ana Niwra: ”Orgahi-Orha'a kniarni la'a mutnu-rahanu re maka Enodi plolli la pa emeka Ray, de hota emekwalima yawalliohor di wali. Yoma hota Rimormiori A'na A maimia'yu de emolmolan nekama hota a'na muanke'a ida niwra nla nhopal la olietleta pa hota nmai owa'ana. Edon nla nhopal ma'ta demade npolga hopopanni re na'nama nakot la re niwra: ”Mitiak reria a re'u-tnia'ru ri honona me mi'ititar la.” 15 Noma nala re'eni-tniarnu re la'a hopopanni re de nlernohora rima-rima rurni-laini. La' riy idni de nala talenta wolima (kupna 170 kilu). Ne la riy wornu de nala talenta woru (kupna 68 kilu). Ne la riy wotellu de nala talenta ida (kupna 34 kilu). Nhor nioma nhopal wa. 16 Dewade mak klernana kupna talenta wolima de nleretniekla nla na'olu-nala'a wa pa na'unut nana ralamni re'eni woru. 17 Emkade wal lia mak klernana kupna talenta wor die pa nlernana unatnu ralamni re'eni wor wuali. 18 Mere mak klernana kupna talenta ida, nla' pa nah tiani na'nama nhuwria kupan maha maka upni-matromni nala re! 19 La'pa mahnek meman na'nama upa-matrom de nawali pia rakot nohora maha re. 20 Noma maka klernana talenta wolim de nmai pia nala kupna talenta termid la upni-matromni de. Noma nakot la matromni niwra: ”Tuna, kupna talenta wolim maka omuala re de a'g e liernana untu talenta wolima pa erti.” 21 Noma matromni nakot la: ”Samoga! O' di de hopopna mak katlina-kataili pa o samo'wu. Yoma la' kuku'uni di de apuesiay olek o wa. Hota mak inponni ho'mana a'g e puesiay wialia o'a. Mmuai wia rialma pa ta'an wutu-temun wutu pa tamuki-tahepru.” 22 Noma hopopan mak klernana kupna talenta wor die mana nler walia rialam pa nakot la matromni de niwra: ”Tuna, kupna talenta woru mak omuala re de a'g e liernana owa'ana untu talenta woru pa erti!” 23 Noma tun die niwra: ”Samoge! O' di de hopopna mak katlina-kataili pa o samo'wu. Yoma la' ha kuku' di mere apuesiay olekwa pa hota la ha lalawna mana a'g edonna umta'ata. Mmuai wia rialma pa ta'an wut lia handi pa tamuki-tahepru.” 24 Nhor nioma hopopan mak klernana kupan talenta id de nmai pia nakot la upni-matromni de niwra: ”Tuna yan muwenna me. Agatga de riy o'ta tehra id o'a. Hota tuna nleretniekla netia ha wo'a maka tuna edonna ntamin nana, me tuna nwokwiok niek pa na'ana hawo'a-hawehra maka edonna mrieiki-mpuo'ora. 25 Pede a'umta'ata yanpa tuna nawenan mai a'u. Kupan maka tuna nala re de a lia gahia tani na'nama aghuwria pa orgahamu mumkek memna kupna talenta memeh'a maka omuala mai a' di, de edonna nayawo'a ne erti pa orgahamu mua'ala.” 26 Tun de nakot la: ”Hoi riy inon wertu ne, riy yatyata id o'a me! O' e muat wualia de a'g edonna uwuli-utniamni mere agetlia ha wo'a?! Me a'g e rieiki-wuo'ora la'a gen miaka awokwiok niek pa arieik wa?! 27 La'a plollolli mana omkienia a kupnu rella noha luwuaunu wniatierun lawanni (bank) totpena amuai emkadi de orgah'u ga' nana kupan de nor wutga rehenu-lawanni (bunga).” 28 Noma nakot la hopopanni dom to'a niwra: ”Oi, mua'ala kupna re la' e'a pa muala la riy maka gahani kupan talenta termida re. 29 Yoma he' mak khima-kre' a lia kalwiedwedni de ir er maka klernan owa'an pa ra'itar rer lia liawanni. Mere maka edon nhima-nre' a lia kalwiedwedni, de hota ha kuku' id etla limni ralamni ho'mana ra' momuou lia. 30 Ne hopopan maka edon kdenreri de ratra la'a melmelli-kalkalamni mak kden la pliorni, totpena nler la polpuol inni-wakwak amni.”’’
Watghudi la lera hohoni
31 ”La'pa Rimormiori A'na A Muai owa'an de hota Agodi plo'lu-mneh'u. Ne hota A hopopna-lili'iru honona rlidan nohora-rtaur nohora A'u. Hota A'umtatn A lia liwange'nu-mtatange'nu, maka hitita-homomra. 32 Hota rimormiori honona mak kwatiawua hairi-hairi honona rawowioin la A ga'yu ralamni. Nhor nianpena Awuahakra rimormiori honona re la'a nhiakra woru, de hota emeknekama makhuri-kwa'ana ral to'a duma wokni la'a pipi wokni. 33 Hota mak klernohora Uplerlawna ralma-riorni de Akenia la walli malganna ne mak edon klernohora re de Akenia la malwiru. 34 Nhor nia'nama Agodi plolli emeka Ray pa A'ukot la mak kden la A wa'lu malganna pa giwra: ”Hononmi mmiai, yoma A A'mu Nara'a-napalga miy. Mai pia mliola rialam la'a Uplerlawna gen warwuarnu maka Ha Nwahi' targa tiy miy la'a ler maka Uplerlawna Na'ohi-na'ara nohkerna-rai miaran di. 35 Yoma la' lerni la A'uplara, de mimial pa A'una, me A tie'ru kerna de mial pa Agemnu. Me la' lerni A'uhulti-uhamra, de mhiaria nhiari mai A'u. 36 A'uniki-ulai mere miala naniair mai A'u. Alier la nnieni-nhiena, miy er mak kodi atiawi mai A'u. Alier la roma nhio'la ralamni de ma mtiomra-mniah'a pa mtiulan mai A'u.” 37 Noma riy mak kholi-kleta la plol wawna rakot la: ”Matroma, mowenia mamkek nana Matro'mu Narehka-naplara pa amalla Matro'mu Na'ana-nemnu? 38 Ne mowenia itwatrom de, Matro'mu emeknekama mak kahulti-kahamra pa amreiniana Matro'mu la a rom mamni? Ne la' hanmeni la amlernana Matro'mu de Muniki-mulai piede amala naniair pa Omhu'ru la? 39 Me mowen pia amamkek nana Matro'mu temni nhi'a onde Mdiella roma nhio'la pede am tiy mtulan tiy O'a Matrome?” 40 Noma A'ukot la re: ”Totpena miatga, la'a hya' ed maka ha mhi'a la A i'nu-na'ru mak kakleha weli ho'mana hade emekwalima mhi' oleka harella mai A'u.” 41 Noma hota A'ukot la mak kden la A wa'lu malwiru re giwra: ”Ratar doin miy lia A wa'lu malwir di! Hota mlier la nhiorghala-wniaghala ralamni la ai mormiori mak kmormior pia nodi liarni maka ha rhi' targa la hegana amlawanni nor wutga hopopanni re, pa mior wutga la hande. 42 Yoma la' lerni la A'urehka-uplara de miy edonna mial pa a'una-gemnu. 43 La' lerni la A'uhulti-uhamra mana miy edonna mrieinian A lia miy likatmi. Uniki-ulai miana miy edonna mhierun nana A naniai'ru la A te'mu, me Adiella roma nhio'la me Alier la mehra-mau mana miy edonna mtiomra-mniah'a pa mtiulla-msiayn A'u.” 44 Noma mak kden la malwiru re rakot la riwra: ”Matroma, mowenia amamkeka Omuplara me tiermu kerna pa ami edonna mal pa Mu'una-muemnu? Onde O' emolmolan neka mak kahulti-kahamra onde mak kaniki-kalai onde mak kamehra-kamau me maka kden la roma nhio'la ralamni pa ami edonna mtomra-mnah'a pa mtulla-msayn O'a?” 45 Noma A'ukot la giwra: ”Totpena miatga, la'pa miy edonna mhima-mrie'a A i'nu-na'ru mak kakleh weli, de emekwalima miy edon mhima-mrie' olek A'u.” 46 Pede hota rala niukum lawna ra rukmua hare pa nodi liarni, mere la'pa riy mak kaplol la Uplerlawna yamkekni de hota rmormiori lia mormiori plalahwa pa nodi liarni.”
Wniarora-wnialai yatyata la Yesus
1 La'pa Yesus Nwatutga hare honona pa nhorwua noma Nakot la maka ha Nwatutu-nwaye'a re Niwra: 2 ”Hyal miy re, miatg oleka wa tre' ma'ta lera woru na'nama lerlalawna Yahudi ntutu-nte'ewa, de Paska lerni (maka Yahudi re rhoratreria tuini-wedni la' ler maka ha rlergot la Mesir). Ne hota la' ler de Rimormiori A'na A' die, ral A' pua la'pa rwairia A lia auwlakra hananni.” 3 La' ler de imam-imam o'tani-matni ror wutga Yahudi in letni-am letni rawok la Kayafas likatni, la'a imam lawna Kayafas genni. 4 E rawok pa rna'ohma Yesus pa rtorna wunwunmua totpena rwenna. 5 Mere riwra: ”Yan memmemna rhi'a la'a lera maka ha riwra ramuki-rahepur la re, yoma hota lima-rora kokokna-rariarni.”
Rhuria wu'ru huwua mikmikri la Yesus la'a Betania
6 La'pa Yesus Nden la leta Betania, la'a Simon maka ululu de klernana nnienia ulityata genni. 7 Noma patke' ida nmai Yesus de, de nodia potla ida maka ha rhi' nana la watu-watu mak welli werta, de npenpuen lia wu'ru huwua mikmikri mak welli werwerta wali. La'pa Yesus Nana'an reri dewade pat de nwalia wu'ru della Yesus o'tani wawannu. 8 La'pa maka Yesus ha Nwatutu-nwaye'a re ramkek nana hade dewade rawenna. Riwra: ”Hya' ed mak krei piede nhuri-nwal dioinia wu'ru mak kalwel wierwerat dena?! 9 La'pa na'olga wu'ru de ho'mana nlernan kupna harahu pa welli de hota rala la riy maka kakleha-kaplara.” 10 Mere Yesus Natg oleka hya' maka irakota noma Nakot la re: ”Hyal miy re, nihya'pa mikot emkade la patke' dina?! Hade nhi'a ha samomuou mai A'u. Miolin doin e' pa nhi' samomuou A lia dodo'ondi to'a 11 yoma A'g edon gor miy pia nodi liarni. Mere riy makakleha-kaplara re nhi'inde e ror wutga miy totpa mtiulan la' ira. 12 Ha nwalia wu'ru de pa na nwahi' A' pua rtamni A'u. 13 Mpiesiayo, la'pa rakot nohora Uplerlawna Kot Kalwiedni la noh di wawannu uhunu-ewatni, de irakot nohor walia patke' de hihi'ini-yapyapni totpa rira rhoratrereria e'a.”
Yudas na'olu Yesus la kupna pi'ra terampwotelu tututu
14 Noma la' riy id la'a riy termida wehrani woru maka Yesus ha Nwatutu-nwaye'a re de nwawa Yudas Iskariot nla imam re o'tani-matni pa 15 nod lir la re niwra: ”Am miy re, hota hya' ed maka miala mai a'u totpena agala Yesus tiy miy?” Noma rpair nieka kupan pi'ra terampwotelu tututu pa rala la Yudas. 16 Noma Yudas nla nwahakhak talla emkameni pa ntorna Yesus totpena nala la Yahudi o'tani-matni re.
Yesus Nora maka ha Nwatutu-nwaye'a re ra'an la Yahudi lerlalawanni
17 La'a lera yanullu la lerlalawna maka Yahudi re ha ra'ana roti mak kakleha tgo'a, noma maka Yesus ha Nwatutu-nwaye'a re rmai pia rakot la Yesus riwra: ”Tuna, hota ampahi' targa ya'anlawna-yemunlawna itodi itsoratreria it tuini-wedni la' Mesir de la' hanmeni?” 18 Noma Yesus Nakot la re Niwra: ”Mlia' letlawna pa mikot la riy ida maka A'ukot targ oleka tiy miy, pa mikot la miwra: ”Hyalia, it tungkurnu Niwra Ntu'tg olek la lerni pa hota Enmat wia. Pede Eniwra Nora maka ha Nwatutu-nwaye'a re rhi'a ya'anlawna-yemunlawna Paska la'a o rommu di.”’’ 19 Noma maka Yesus ha Nwatutu-nwaye'a re rhi'a hya' ed maka Yesus Nakota rella. Noma rla' pa rwahi'a-rwayod tiarga ya'ana-yemnia Paska. 20 La'pa nmel wa, noma Yesus Nora maka ha Nwatutu-nwaye'a termida wehrani woru re ra'an wut lia mei wawannu. 21 La'pa rtepartarlia ya'ana dewade Yesus Nakot la re: ”Mpiesiayo! Hota la' riy id tiy miy die hota eniwra na'olga A'u.” 22 La'pa ratlin nan hade de honona rmalui-rmaher doin la. Dewade rima-rima ratiana Yesus riwra: ”Matroma, hota a'g edonno?” 23 Yesus Niwra: ”Riy maka kor rewre'wa A' pua mto' wutga roti la'a lari niemun geni pa emeka tema raralamni nhi'inde rhi'a, de hota e' ed mak ka'olg A'u. 24 Plola, hota Rimormiori A'na A' die hota Amuati, emeknekama e rhorat targa la Puka ralamni. Mere hota la'pa he' ed mak ka'olga Rimormior A'na de, adoh! Riy de hota nler meman la yatyatni-halalli yatlorni-yatra'ani. Samomuounu de edon ra'a'n nan walia e' la noh di wawannu.” 25 Noma Yudas mak kiwra na'olga Yesus nakot la Yesus niwra: ”Tungkurga, a' niek de edonno?” Noma Yesus Nakot la: ”Plollolli de o'a!” 26 La'pa rara'an reri noma Yesus Na'ala roti, na'nama Na'uli-nawedia Uplerlawna. Nhor nioma Nhawi-nhawia rot die na'nama Nhakre'era la maka ha Nwatutu-nwaye'a re na'nama Niwra: ”Mia'ala pa mi'ina. Hadi de A ino'nu inhatti.” 27 Nhor nia'nama Na'ala lari maka rkeni anggur turnu na'nama Na'uli-nawedia Uplerlawna na'nama Nala maka ha Nwatutu-nwaye'a re, me Niwra: ”Hononmi mnimit la (miemnu). 28 Yoma A ra'ru inhatti maka khi'a aplola Uplerlawna nnio' warwuarnu me rar maka ha rhuria pa Namou-nawitna riy liawanni. 29 Mpiesiaya, hota A'g edonna gemnu owa'ana anggur turnu pa la'pa nte'ela' lerni Agor miy pia temun wutga anggur tur warwuarnu la'a A A'mu genni maka Ntorna-nrautu emeka Ray.” 30 Nhorwua noma honona rwahniara nhiara ya'uli-yawedi id la Uplerlawna. Nhor diewade honona rla'awa la'a wo'ora Saitun.
Yesus Nakot nohora hota Petrus nreher doinia E'a
31 Noma Yesus Nakot la maka ha Nwatutu-nwaye'a re Niwra: ”Hota la' mel di nekpa miy hononmi miwlar dioinia A lia yoma la'a rira hihi'ini yatyatni mai A'u. Yoma Puka ralamni de e nakot nohora Uplerlawna lirni niwra: ”Hota Awuenna makhuri-kwa'an de ne hota nhiuri-wnia'anni knunu-knera.” 32 Mere la'pa ramori-ralewna A'g owa'ana de hota A'g e ula' ul miy lia Galilea.” 33 Noma Petrus nakot la Yesus: ”Pen neka mutu korni hota rawlar dioinia O la Tuna, mere a' di de akti id mana a'g edonna wuadur la O' onmu.” 34 ”Mhuoratreria Petrusa. Plola la' mel di memna de hota hiwi lallu edonna nkukule' ma'ta de, hota omueh'a nekpa mrieher doin A lia' re'eni wotelu.” 35 Mere Petrus nakot la Yesus Niwra: ”La'pa it rewre'wa tler la wniunu-wnienna ho'mana hota a'g edonna ga' pua rieher doinia O'a Am ee!” Ne maka ha Nwatutu-nwaye'a re honona mana lirni emekwalima Petrus lirni.
Yesus Nsumbain la Getsemani
36 Nhor nioma Yesus Nora maka ha Nwatutu-nwaye'a re pa rla'awa geni ida mak kwawa Getsemani. La'pa rden la hande noma Enakot la ira: ”Mpiei pia mimtatan la handi. Pena A lia siumbaini.” 37 Noma Nakot la Petrus nora Sebedeus a'nani rora, de Yakowsi nor Yohansi pa rmemeh'a ror rewre'wa E' pa rla'a. La' mel de Yesus ralamni Nmayo'a-nmataw dioin la. 38 Noma Nakot la mutwualli re Niwra: ”A ralmu emeka nmolu-nhelma pa emeknekama hota Amuat mie! Mdien nek la handi pa mimatmat pa msiumbaini.” 39 Noma Yesus Nla oliet kuku'a la'a gen die na'nama Nler inonni pa Nwaltiora-nwaltieman la tani wawannu pa Nsumbain Niwra: ”Am ee! Awuak pa Ompuayow de, Muhal doinia kropna-krieutu mak hota Atiutulu-lielew niana ri. Mere yana Mliernohor maka A ralmu ha nwaka mere plolli nek tiy O'owa Ama!” 40 Nhor nioma Yesus Nawal pia Nla Ntomar la mutwualli re wotelu, mere Nla' de wotelu e ranin hala. Noma Yesus Nakot la Petrus Niwra: ”Eneknek to'ama jama id ho' pa taken niana mimatar nohor A'u?! 41 Mimatmat pa msiumbaini totpena yana hegana amlawanni nreh nian miy pia mlier la do'a-hala ralamni. Yoma plolli pa miy miwra mliernohor A ralma-rio'ru mere ta'en niana mhi' nana.” 42 Noma Yesus Nla Nsumbaini owa'ana pa Niwra: ”Ame! La'pa Omiwra yawuhi-yawe'et di ntut nian A'u, de taken niana Awuaniklia-wuayotlia de, mere nden nek la O wa Ama.” 43 Noma Yesus Nawali owa'an pa Nla Ntomar la mutwualli re wotelu mere e rtepartar yanina yoma matni werat rehia. 44 Pede Yesus Nal targ owa'ana la re'eni wotellu pa lirni la Amni de emkade wali. 45 Nhor nioma Nawali owa'an pa Nmai pia Nakot la mutwualli re Niwra: ”Minin ma'ta miy?! Mitlina! Nte'ela lerni wa pa Rimormiori A'na A' die ra'olga A lia riy maka khi' do'a-hala. 46 Mimata, mai pia tla' pa twatroma riy mak ka'olga A'u, nmai wia dee!”
Rtorna Yesus
47 La'pa Yesus Ntepartar mua'ta la yaltieri, dewade Yudas maka nhi'inde kre'ela maka Yesus ha Nwatutu-nwaye'a la riy termida wehrani woru re, enmai wia, de nor wutga riy mutlialawna woka ida, de rodia wehla plalahwa, me aukakaklu. Imam o'tani-matni re me Yahudi in letni-am letni er mak khopan pa mutu rmai pia rtorna Yesus. 48 Me Yudas mana Nakot targ oleka la mutnu re hota hya' ed maka ha nhi'a, niwra: ”Mitlina, tla' de, de la'pa hameni ed maka akinnia de E' inhatta pa mtiorna!” 49 Pa la'pa rte'ela gen die, dewade Yudas nod tiemna Yesus pa nakot la: ”Kalwied tungkurge!” Dewade nkinnia Yesus. 50 Noma Yesus Nakot la: ”Temana, pleta-plet pa omliernohora o ralma-riormu mak kariei pia ommuai handi!” Dewade riy mutlialawna re rma rwarui Yesus pa rtorna. 51 Noma Yesus mutwualli ida nleh dioinia wehlani pa ndawar doinia riy ida tlinni. Riy de nhi' hopopna la imam-imam re o'ta lawanni. 52 Noma Yesus Nakot la mutwualli de Niwra: ”Hoi! Mkieni owa'an wehlamu della paro'oni. Yoma riy meni mak kahe'iya wehla de hota wehla na'an owa'ana e'a. 53 Omuat niekame ta'en niana Agharia A li'ru la A A'mu totpena Nalewan nan A'u?! Hota Nleretniekla Na'enyatga hopopna (malaikat) mak ka'ara lidna termida wehrani woru rehenu totpa hopopanni-lili'irnu re rmai pa rtulan mai A'u. 54 Mere la'pa hota emkade, de hota emkameni la Puka lirni mak kakot nohora A matmia'tu mak emkadi, de hota ntutu-nte'ewa?” 55 Noma Yesus Nakot la riy mutlialawna re Niwra: ”Hoi hya' nrei pia miodia wehla ara me kakaklu re ma mtiorn A'u?! Yanpa la' miy wniarormi de A' di de riy yatyata-halala id A'u?! Lera-ler de A'g e wuatutu-wuaye'ela Uplerlawna roma kreini mere miy edonna mtiorn A'u. 56 Mere ha rhi' emkade totpa naplol nohor la makwohorulu-ktatrulu lirni la' Puka ralamni.” Nhor nioma maka Yesus ha Nwatutu-nwaye'a re honona rawlar dioin E' pa kni'ini-kniewarni.
Rodia Yesus pa rla'a mak ktorna agama watghudni
57 Mak ktorna Yesus re rodia Yesus pa rla'a imam-imam o'ta lawanni Kayafas de. La' hande de makwatutu-kwaye'a agama ror wut nieka Yahudi in letni-am letni re rawok tar momuog olekwa. 58 Petrus de nlernohor reria Yesus, mere edon nwakriania. Noma Petrus nwakdie'da wal pia nodi liarni la riwta ralamni la'a imam lawna romni, pa nre' pa namtatan wutga la' riy mak katiak la' hande. Petrus ralma-riorni de nlernohora, totpena nat muemna hya' maka hota ha rhi' nana la Yesus. 59 Imama re o'tani-matni la'pa mak ktorna agama watghudni honona, rahak riy mak kaprir niohora ira totpa ralahar pa rwaghal Yesus totpena rlernan talan pa rukum penna E'a. 60 Riy harahu rmai pia rakot nohora hya' ed maka edon kaplola, mere o'ta-mata re edonna rlernana wniatikilgeni totpena rwaghala Yesus. Noma la hohoni dewade riy woru rler la gaini. 61 Na'nama riwra: ”Hadi de ed mak kiwra E' ed mak karuri-kalai pia kweyata-kwaniawua Uplerlawna roma kreini de, me hota E rurni-laini etla pa Nariri owa'ana krei die la'a lera wotellu.” 62 Noma imam lawna naprir pia nakot la Yesus Niwra: ”Hoi, hota O edonna Mukot hadom pa Mpuahla nana lira mak kwatiawua etnu-liolli rena? Lira re raplola me edonna?” 63 Mere Yesus edon Nakot hadomdoma. Noma imam lawna nhari owa'an lirni pa niwra: ”Aliokar la Uplerlawna mak kden la Ilyamou-Watyatoha pa nodi liarni, totpa mutlina. Mpuer tek nurmu la a yatia'nu dina! Hota O' di de Ray Makamori-Kalewna O'a maka Uplerlawna ha Nano'taru, de, Uplerlawna A'nani?” 64 Noma Yesus Nakot la: ”Emeknekama o lirmu de. Mere miy hononmi mpiesiayo! Hota la' ler id de hota mimkek memna, Rimormiori A'na A'umtatan la Uplerlawna-Mempulwatnu mak kodi plolli walli malganna ne hota Amuai die Agodia kakma la'a lyanti tutulu.” 65 Dewade imam lawan de nawenan pa nlihira-nnaiya rain plalah wamueheni yoma nwarora de Yesus de rimormior tio' E'a, na'nama niwra: ”Adoh! Riy di e nalernu-naha'a Uplerlawna kotni-nanni yoma Enakot Niwra Uplerlawna A'nani E'a. Yan itwei pia riy rakot nohora E halli. Miy hononmi e mitlin walia E lirni de e Napolu-naliella Uplerlawna toh?! 66 Pa emkameni la miy ralma-riormi. Mietlia wa.” Noma honona riarin pa riwra: ”Ha Nhi' oleka do'a-hal la Uplerlawna! Niukamnu mak klol talanni de totpa rwunu-rwenna!” 67 Dewade krurui-kpirpir la Yesus gaini ralamni na'nama rdupla. Ne riy dom to'a rmai pia rpahara malwiru-malganna Yesus killi. 68 Rahe'i-ramal niohor E'a pa riwra: ”Hoi Ray Makamori-Kalewna nek O'a maka Uplerlawna Nano'taru demade Mpuet tek la, he' ed mak kpahara O'a dena!”
Petrus nreher doinia Yesus
69 Ne Petrus namtatan nek la'a riwta ralamni la'a imam lawna romni (totpa nat niohora hota rhi'a hya'a la Yesus). Dewade pat makhoi-ktani ida nmai pia nakot la Petrus niwra: ”Nhi'inde omuor wutga riy mak kor Yesus riy Galilea de mila' wutu.” 70 Mere Petrus nreher la' honona re gaini ralamni niwra: ”A'g e uplin niohora lirmu-tunmu de lie'erni.” 71 Noma Petrus nwatitin la hande pa nla'awa riwta nhiarni onni. Noma pat makhoi-ktani id to'a nlol hande pa namkeka dewade nakot la riy mak kden hande niwra: ”Emekneka riy di dodo'ona e nor walia Yesus mak kwatiawua Nasaret de talla.” 72 Noma Petrus nreher owa'an pa nlokra-nhautu niwra: ”Itmatromni Enamkek reri me a'g edonna gat niohora riy de halolola.” 73 Edon nalo'on wali ne riy mak kden hande rmai pia rakot la Petrus riwra: ”O inhatti manoo! Yana mriehera, yoma ami e matlina o niareimu-wniahaurmu pede o'a di mak klernohora Yesus inhatti!” 74 Noma Petrus ntan limni la heyanan pa nlokra-nhautu niwra: ”Uplerlawna Namkek reria me a'g edonna gat niohora riy de. Uplerlawna nhiakar lokarni mai a'u la'pa agat niohora riy de ha lolola.” Plinu-plinnianamde hiwi lallu nkukule'ewa 75 na'nam de Petrus nhioratni nko'i nana Yesus lirni de Niwra: ”Hota la hiwi lallu edon nkukule' ma'ta de hota omrieher nan olek A lia re'eni wotel wua.” Noma Petrus nlergot la gen die na'nama nahedge'du la kniakru.
`Rodia Yesus pa rla'awa la Pilatus 1 La'pa yawyawar ma'ta dewade imam-imam o'tani-matni honona rora Yahudi in letni-am letni rwahu'ru lira totpena retlia Yesus wnienanni. 2 Noma rwutga Yesus limni na'nama rodia la Pilatus, mak kla'a gubernur la Yudea la horta-hairia Romawi.
Yesus matmiatni
3 La'pa Yudas mak ka'olga Yesus de namkek de ir reti olek la Yesus niukamnu de hota rwenna, dewade Yudas ralamni nwaldioinia pa nmawal doinia la' Yesus. Noma Yudas npolan doin owa'ana kupan pi'ra terampwotelu rella imam re o'tani-matni rora riy Yahudi re in letni-am letni 4 pa nakot la re: ”Aghi' oleka do'a-hal wa pa a'u'olga Yesus, mere hade edon nhal nekane rukum penna.” Mere honona riwra: ”Amaplin niohora oleka hade wa. O yat wuamuehemu to' hade.” 5 Noma Yudas nrinnia kupna rella krei ralamni na'nama nla' pa orgahi nla nwair wen inonni. 6 Imama re o'tani-matni ratopla kupna re pa riwra: ”Kupna ri de, rara welli. Ne hota agama deullu-tatarni de niwra yana tal wutga la kupna krei.” 7 Noma honona rwayow pa rnairia kupna pi'ra re pa ra rawelia tan miaka riy mak kayapi kekna-rana, gahani de. Rawelia tan die pa rhi'a la do'ona-dakna tniamin matgenni. 8 La' hade pede la'awa dodo'ondi mana rweta tan die nanni de Rar Tani. 9 Ir hihi'ini-yapyapni de emekwalima la hya' maka, makwohorulu-ktatrulu Yermia lirni la Puka ralamni e niwra: ”Hota ira' nan neka kupan pi'ra terampwotelu tututu pa ra raweli E'a. Riy Israel nekane rwayow nohora E welli de. 10 Ne kupan de irnairia pa ra rawel tiani maka riy mak kayapi kekna-rana gahani pa emeknekama Orgahi-Orha'a Nakota mai a'u.”
Pilatus ntorna watghudi la Yesus lirni-tunnu
11 La' pa Yesus Ntutrier lia Pilatus makla' Gubernur la hande, gaini ralamni. Noma Pilatus natiana Yesus Niwra: ”Plola O' di de ray Yahudi id O'a?” Noma Yesus Nwalolla Niwra: ”Emek lir mak omukot de!” 12 Mere la'pa imama re o'tani-matni me Yahudi in letni-am letni re rwaghal E' la Pilatus gaini mere Yesus lir ta'a-waw ta'a. 13 Noma Pilatus nakot la niwra: ”O e Mutlin nana irwaghal o'ola lira-tunu harahu me edonna?!” 14 Mere ir yaklakni emkade ho'mana, Yesus lir ta'a-waw ta' to'owa, pede Gubernur Pilatus de nwer rer memna wawni.
Retlia Yesus niukamnu de rwenna
15 La'a Yahudi lerlalawanni di maka ha rhoratreria tuini-wedni, de Gubernur hairi Roma, Pilatus de, nhi'inde nolin doinia Yahudi id la'a roma nhio'la totpena nhi' ahepru Yahudi ralamni. Enolin doinia riy maka Yahudi mutlialawna re ha rwalir niana. 16 La' ler di, de riy maka Yahudi liawanni rwalir niana de Barabas. E' de mak kmalawna ray Romawi me Yahudi re rwetwet la e nanni. 17 Pede la'pa rirahu rawok taru, noma Pilatus natiana re niwra: ”Hota mimpiayow de he' ed maka agolin doinia pa nawok temn owa'an tiy miy, Barabas, onde Yesus maka ha rweta la Makamori-Kalewna maka Uplerlawna Nano'taru?” 18 Pilatus natian emkare la rirahu re yoma Pilatus e nat niohora ina-ama leta re mniotni rala Yesus la e'a, yoma honona re ralamni ramehra la Yesus. 19 Mere la'pa Pilatus namtatan ma'ta la liwangeni nhiudi-pniara, de Pilatus patke'eni na'enyatga nnio' id la Pilatus de niwra: ”Yan memmemna omrie'ela riy mak kwaghala riy di maka edonna khala. Yoma la' hade pede a'g e liernana mi'a-lo'a maka khi' amta'at a lia' orawi.” 20 Mere imama re o'tani-matni rora riy Yahudi in letni-am letni rtekal rer tio' la totpena rirahu rwaka Pilatus rolin doinia Barabas, ne rwahak pa rukum penna Yesus. 21 Noma Pilatus natian owa'ana re niwra: ”La' ha rora ri de mimpiak hameni pa a'ulgota?” Noma honona rhaunu: ”Barabas!” 22 ”Hade emkade, aghi'a hya'a la Yesus maka ha rweta la Ray Makamori-Kalewna maka Uplerlawna Nano'taru dina?” Noma honona rhaunu pa riwra: ”Mpuairia la auwlakra hananni!” 23 ”Mere halli hya'a pede?” Noma honona re yeher to' pa rhaunu-rhaunu riwra: ”Mpuairia la auwlakra hananni!” 24 La'awa hohoni de Pilatus nat muemna de taken niana e nhi' hadomdoma, onnila riy riwra rhi' kokokanni. Noma na'al gera pa nohma limni la rirahu re gaini ralamni (pa ntutga de, e' edon nre' wut pua nwaghala riy mak edon khal di), na'nama niwra: ”Hota a'g edonna ukwara hihi'a-yapyapi matmiat di la' hadi wawannu. Miy yat wamuehemi to' hade.” 25 Noma riy honon re rhaun pa riwra: ”Muolin doin nek la pena amor up mamni-a'na mamni mak kwara matmiatni de.” 26 Noma Pilatus nolin doinia Barabas la pa nala la ira, ne nhopan pa riy rliwra Yesus. Na'nama nala pa rla rwairia la auwlakra hananni.
Makodi keki-rautu re rahe'i-ramalia Yesus
27 La' noma makodi keki-rautu la'a Pilatus genni-tienni rodia Yesus pa rler la gubernur Pilatus romni na'nama rpolg awoka makodi keki-rautu korni re lidna-lidan pa rma rpepan reria Yesus. 28 Rte'la la Yesus naniayarni pa ro'lu dioinia, ne rohoga emeka ray-ray naniayarni plalahwa mak ungu la Yesus. 29 Noma rhi'a wutu-lai ida de rnairia pu'na-kiarit ruri pa rkow nana la Yesus o'tani. Nhor nia'nama rkenia lie'ena id la limni walli malganna, na'nama rwaltiora-rwaltieman la gaini ralamni pa rahe'i-ramalia pa rakot la riwra: ”Mmuormiori plalahwa Ray Yahu'du ne!” 30 Honona rakrui-rakpira na'nama ra'ala lie'en de pa ra rliwar reri o'tani. 31 La'pa rahe'i-ramalia na'nama ral doinia naniairia ungu della pa rohog owa'ana naniair wamueheni. Nhor nioma rodgiota pa rla rwairia la auwlakra.
Rwairia Yesus la auwlakra hananni
32 Makodi keki-rautu re rodgiota Yesus pa rler la talan letgara de rwatrom nana riy ida nwatiawua Kirene, nwawa Simona. Noma ha rhopan pa riy de nakwara Yesus auwlakarni. 33 La' noma rte'ela gen miaka ha rweta la Golgota, nnia'eratni de: Riy Ruri-Kliaklu Genni. 34 La' hande noma rala atiaw mak kmermeru id mak rawniah'a la anggur turnu pa rala Yesus Nemnia totpena mehrani nmolu. Mere la'pa Yesus Ndihmia anggur tur die, noma Nahmena Nemnia. 35 Nhor nia'nama rwairia Yesus la auwlakra hananni. Na'nama rdurmu-rhakra Yesus naniayarni de rnairia patui (undi). 36 Nhor nia'nama ramtatna pa ratiak reria la hande. 37 La Yesus o'tani wawannu de rhorat targa la auganna ida, de rakot nohora hya' maka Yahudi o'tani-matni re rto'on reri E halli pa rhorat de riwra: ”Hadi de Yesus, Yahudi Rayni inhatti.” 38 La' hande wali pia e rken wialia riy wor lia auwlakra yoma rrora rpera-rdaitia deulu-tatra hairi Roma. Rkenia id la Yesus walli malganna ne id la'a Yesus walli malwiru, ne Yesus Nden la letgara. 39 Mak klola hande rdik o'tani la me rwohora-rtatra me rahe'i-ramal lia Yesus. 40 Rakot la Yesus riwra: ”Oi! O ed mak kiwra kwaye'er doinia Uplerlawna roma kreini nampena Omuriria owa'ana la' lera wotellu. La' pa plola pa Uplerlawna A'nani O'a de Muerun la auwlakar de hananni, ne Mulewna inonmu.” 41 Emkade walia imama re o'tani-matni rora makwatutu-kwaye'a agama me riy Yahudi re in letni-am letni rapolu-raliella Yesus 42 riwra: ”E' de Namori-nalewna riy meheni, mere inon wamueheni de takeni Nalewan nana. La'pa ray Israel id E'a de tamkek teka hota Nerun la auwlakar de hananni totpena tpesiaya. 43 Enpesiaya Uplerlawna me Niwra E' de Uplerlawna A'nani E'a. Ne mai pia tamkek teka hota Uplerlawna Namori-nalewna E' me edonna?” 44 Riy maroro'a re la auwlakra re ho'mana rapolu-ralielan walia Yesus la auwlakra hananni.
Yesus Nwaran doinia aranni
45 La lera nwawuau ro'onni (jam termida wehrani woru) mere la'a noh de tetema nekpa mel'uta-maliena nodia pa lera nher miemna (jam wotellu). 46 La'pa edon nhal de jama wotelu, dewade Yesus Nhaun pa Niwra: ”Eli, eli lama sabaktani?” Ha nnia'eratni de niwra: ”Uplerlawnu ne, Uplerlawnu ne nihya'pa Omuolin limmu-mpue'er rormu mai A'u?” 47 Riy wo'ir mak erla hande e ratlin nana Yesus lirni, na'nama riwra Yesus e Npolga Elia. 48 Noma ir mutwualli ida plet pa nawlar pia nla na'ala kuliai, na'nama nto'a la anggur turnu mak milmilu na'nama nkenia la au tutnu pa ntania la Yesus nurnu totpena Nemnia. 49 Mere mak kden hande korni riwra: ”Twei pleini. Yanpa Elia nma ntulan la E'a?” 50 Nhor nioma Yesus Nhaunu owa'an dewade Nwaran doinia aranni. 51 La mtatande nekpa kok lawna maka ra rahew tiarga liolgeni la'a gen mak kmou-kwitna la Uplerlawna roma kreini ralamni totpa riy edon rler la rialam de, ema rlihirwah'a la' woru la' heyanna pa ntut mueman la yawa. Ne noha nruru me watu lialawna mana poka-pah'a. 52 Hoi-kietra ratpopoini ne Uplerlawna mutnu-rahanu harahu mak kmati olekwa re, de rmori owa'ana. 53 Rlergot la hoi-kietarni. Ne la' ler maka Yesus Nmori owa'an la matmiatni de ralamni, de mak kmori owa'ana re rodi liarni la'a Yerusalem, de Uplerlawna letni de. Ne la' hande mana rirahu ramkek ir wali. 54 La' ler de mak khi' o'tani la lidna makodi keki-rautu rahu ida me mak katiak reria Yesus la hande honona rdiwra-rda'ala yoma noha nruru die nor wut nieka hare honona mak ha ramkek nana re. Noma idma nakot la ida: ”Hadi plola! E' de de, Uplerlawna A'nani E'a.” 55 La' hande de patke' rahu e ror wal pia rden nek la oliet pa e ramkek reria. Ir de ed maka klernohor reria Yesus la' ler maka Nwatiawua Galilea pa Nmai totpena ramkek la ya'anni-yemannu, rpo'a-rpahi'a Yesus hyonni-hyanni. 56 La' ir mutnu de, Maria Magdalena, me Maria, de Yakowsi me Yusup inni, ror wut wualia Sebedeus hawni, de Yakowsi me Yohansi inni, e rtutrieri.
Rtamnia Yesus
57 La' lera ntuini de riy mak ktaru ida mak kwatiawua Arimatea nmai lia Pilatus. Nanni de Yusup. E' mana nhi'inde nlernohor reria Yesus. 58 Nmai pia nla nwak la Pilatus totpena na'ala Yesus inonni mak kmati olek de. Noma Pilatus nhopan pa rla rala Yesus inonni della. 59 Noma Yusup nla na'ala Yesus inonni na'nama nala kok lawna warwuaru mak kamnurnuhru pa na ntomna. 60 Na'nama nle'er targa la'a liena maka na'nama Yusup ha nawte'ta nande. Hoi-kietar de edonna rnairi et mia'ta la'a mati doma. Nhor nia'nama nwaklol tiarga wat liawna id pa na nherit targa lien de nhiarni pa nhor nioma nla'awa. 61 Maria Magdalena nora Maria id wal pia ramtatan la oliet kuku'a la hande pa ramkek rer lia lien de.
Parisi rwak pa ratiak toto' memna Yesus inonni la liena ralamni
62 La'pa repra wa, de Sabat lerni noma imama re o'tani-matni me riy Parisi re, rla' rewre'wa pa rla'a Pilatus de. 63 Noma rakot la Pilatus riwra: ”Tuna, ami e mhoratreri mia'ta la'a Yesus makalahar de Nmormiori mia'ta, de Nalahar pa Niwra la'pa lera wotellu de hota Enmori owa'ana. 64 La' hade pede ampak pa tuna nala mak katiaka re de ratiak toto' memna la'a lien de pa la'pa lera wotellu nlardoinla. Yanhi'pa la'awa lera wotellu noma maka ha Nwatutu-nwaye'a re rkamna'a mak kmat die inonni, totpena riwra Enmori olekwa. Ne hota putra-palka hohoni di de narehi owa'an la mulaliaini la' Eniwra E' de Ray maka Uplerlawna Nano'taru inhatta.” 65 Noma Pilatus nakot la re: ”Miodia makodi keki-rautu mak katiaka. Hononmi la mitiak apitga.” 66 Pede rla'awa la'a lien dewa pa rahro'pa targa lien de nhiarni me yatiaka npitu-nkor la totpena yana riy rma ra'ala mak kmat die inonni la'a lien de.
Yesus Nmor wia
1 La'pa Sabat lerni lardoin wa dewade yawyawar ma'ta la krei lerni, la'pa lera matni npah'a, de Maria Magdalena nora riy id wali mak kwawa Maria, rla' pa ramkek la lien de. 2 Dewade plinu-plinnianama noha nruru (upkarururu) mak karur miemna. Yoma Orgahi-Orha'a hopopanni ida nwatiawua Ilyamou-Watyatoha pa nernu. Nmai pia nwaklolia wat muaka ra rherit targa liena nhiarni de na'nama namtatn apitga la wat die wawannu. 3 Hopopan de gaini de emeknekama tlena, me naniayarni lelera. 4 Ne makodi keki-rautu mak katiak reria lien de rdiwra-rda'al nohora yamta'atni pa nhi'nande rtuini pa emekto'a riwra rmati. 5 Noma Uplerlawna hopopanni de nakot la patke'a re niwra: ”Yan mimta'ata. A'g e gatga de miy mia mihaka Yesus maka ha rwairia me inonni nmat lia auwlakra hananni. 6 Hade edonna Nden olek la handi wa. Ha Nmori olekwa emeka E lirni maka Ha Nakot oleka tiy miy lia ler ululu. In miy re, mai pia mimkek tek la gen miaka ha retar targa Yesus inonni de. Mimkeka, Ha inonni edon nden olek la wa. 7 Pede pena mlia' meman wa la pa mlia mikot nohora la E mutwualli maka nhi'inde ha Nwatutu-nwaye'a re, miwra: ”Yesus Nmori olekwa. Ne hota Enala'ul miy lia Galilea totpena miora mpiatrom la hande.” Hya'a ed maka a'ukota ri, de E nnio'oni tiy miy.” 8 Pleta-plet pa patke'a re rto'or la hoi die pa rawal wia. Ramta'at wenna mere la' ralamni re rahepuepru memna pa rawlar pia rla pa rakot nohora harella' riy maka Yesus Nwatutu-nwaye' oleka re. 9 Er ma'ta la talan ralma de plinu-plinnianama Yesus Nhar gaini la patke'a re pa Niwra: ”Kalwieda nar miy re!” Noma rmai pia rwakriania Yesus pa rwaltiora na'nama rkolla lakni pa ruh' idma-rrama lia'ar la. 10 Noma Yesus Nakot la re Niwra: ”Yan mimta'ata. Mlia pa mikot la A a'mu-hya'lu pa rla'awa la Galilea totpena twatrom la hande pa ramkek A'u.”
Mak katiaka liena rma rod kiota
11 La'pa patke'a re ralala' rer mia'ta dewade mak katiaka re doma rla rod kiot la leta la imama re o'tani-matni la'a hya'a maka ha ramkek oleka re. 12 Noma imam o'tani re rora riy Yahudi re in letni-am letni rna'ohma pa rala kupna riwnu-riwnu la mak katiak reria lien de. 13 Ne rano'a re riwra: ”Pen mikota miwra: ”Maklernohor reri Yesus re rma rwuri-rgalma melmel nana Yesus inonni, yoma amanin hal ami.” 14 Ne la'pa Gubernur Pilatus natlin nan de pena am ma'ursia pa yana gubernur de nukum miy.” 15 Noma mak katiak reria liena re, ra'al kupna-kai rewa ne rhi' emeka hya' ed maka o'ta-mata rakot la ira. Rla' rakot nohora riwra: ”Maklernohora Yesusa rma rwuri-rgalum nana Yesus inonni.” Ne lir de ed maka Yahudi rodi pa nwewar la noha uhunu-ewatni pa nma nte'ela ler di.
Yesus Nharia inonni la mak ha Nwatutu-nwaye'a re
16 Maka Yesus ha Nwatutu-nwaye'a termida wehrani ida re rla'awa la' wo'ora mak kden la Galilea pa emek la'a hya' ed maka Yesus Nano'taru re. 17 La'pa rwatroma Yesus la hande, noma rru'u-rtowar pa ruh' idma-rrama lia'ar la Yesus. Mere la ir de dom mana emeknekama edonna rpesiaya. 18 Noma Yesus Nwakriania na'nama Nakot la re Niwra: ”Plola-mneha la'a Ilyamou-Watyatoha nora nohkerna de ral oleka mai A wua. 19 La' hade pede mlia'awa pa miodkiota-mialde'et nohor A lia noheri woru-lyanit nayanni totpena riy mak kwatiawua noha-rai honona hota rpesiaya me rlernohor reri A'u. Mhiarania re de mpiet la Ama, A'na me Uplerlawna Nhiw Lululli nanni totpena riy ratga de ha rre' olek la A mu'tu-rah'u. 20 Mpiatutu-mpiaye'a re pa rlernohor hya' to'a maka A'ukot targa tiy miy. Ne mhioratreria, hota A'g edonna golin miy lia la'pa nodia la noha hohoni.”
Yohansi makharani nakot nohora Uplerlawna lirni-tunnu totpena nwahi' targa rira ihranu ralamni la Yesus maimiaini
1 La' hadi de rakot nohora Uplerlawna Kot Kalwiedni-Paitiotni maka rakot nohora Yesus Kristus, Uplerlawna A'nani. La' mulaliaini de, 2 makwohorulu-ktatrulu Yesaya ha nhorat targa Uplerlawna lirni maka e Nakot nohora Yohansi kniarni, de Niwra: "Mhioratreria! Hadi ed maka Aghopna. Hota Aghopna hade pa nala' ulg O'a totpena nwahyar tialan pa Omliola. 3 Hota e' de polpuolu-hawaunia la wo'orletna-kawurloini pa niwra: "Mpiahi' targa talla la Orgahi-Orha'a, mpiale'era loini-talanni!" 4 Emekto'a hya'a maka Yesaya nhorat targa nohora hopopna-lili'iru de, emkade pa Yohansi maka kharani riy nhar lia wo'orletna-kawurloini. Yohansi nhaun pa niwra: "Hoi! Mhioitio'ora-mtiahnei dioinia do'omi-halmi re pa mai pia rharan miy ee! Totpena hota Uplerlawna Namou-nawitan miy lia do'omi-halmi!" 5 Riy rahu rehi rwatiawua Yerusalem, me Yudea liewnu rriw niana pa rmai pia ratlin la Yohansi ha nakotkota. Noka ir rakota plele'er momuoga do'oni-halli re, ne Yohansi nharania re la' gerlawna Yordan. 6 Yohansi naniayarni de ra' nana la onta wullu me rewni de ra' nana la ha ulti me ya'anni-yemannu de kongoha nora gani turnu. 7 Lir di de Yohansi ed maka nakot niwra: "Hota Riy id mak kreh nian a'u Nmai pia klernohor a' di. Hota awue'er doin lakni wniowni ho'mana a'g edonna puar nana. 8 A' di agala gera ga gharani miy mere hota riy mak kmai die, Nala Uplerlawna Nhiwni tiy miy.
Yohansi nharania Yesus
9 Ler maka Yohansi nharanania riy de, Yesus Nmai de Nwatiawua Nasaret la Galilea. Nmai noka Yohansi nharani Yesus la gerlawna Yordan ralamni. 10 La'pa rharania la gera ralamni pa nhorwua noma Yesus Nrei lia gera aratni emkadi de, plin-plinnianama Namkeka lyanti nahniarti ne Uplerlawna Nhiw Lululli Nerun de emolmolla ma'nu lmo'ma maru (merpati) pa ntai lia wawannu. 11 Noma ratlin de Uplerlawna Nhar lirni la'a lyanti Niwra: "O' de A A'nu mak Asiayni inhatti. O' ed maka kla' nana A ralmu."
Hegana amlawanni nta'aga Yesus
12 Nhor nioma Uplerlawna Nhiwni Nodia Yesus pa Nla'awa wo'orletna-kawurloini. 13 La wo'orletna-kawurloini de Yesus Nor wutga pora-dawra, ne hegana amlawanni nta' niana la lera-mela terampwogata. Mere Uplerlawna hopopanni re rma ramkek la E'a.
Yesus Npolga makahaka i'na-ya'ana riy wogata
14 La'pa rtoran nana Yohanis wa pa rkenia la roma nhio'la ralamni dewade Yesus Nla'awa la Galilea lowanni pa Nakot nohora Uplerlawna Kot Kalwiedni-Paitiotni. 15 Niwra: "Ina-nara ama-hyali, lerni ntu'tu olekwa di! Ntutu-nte' olek pa hota Uplerlawna Nodi plolli la riy emeka ir Rayni. Pede mhioitio'or doini-mtiahnei dioini do'omi-halmi ne, mpiesiaya Uplerlawna Kot Kalwiedni-Paitiotni. 16 La'pa lera ida ne Yesus Nala' lola danau aratni la Galilea dewade Namkek nana Simon nor hyalli Andarias ratialtial reria i'na la'a danau de, yoma hare kniarni hade. 17 Noma Yesus Nakot la re: "Ee, ma mliernohor A'g ee! Mai pia Awuatut miy totpena la' emkameni la miy mitial reri i'na la dodo'ondi, de hota emkade wal pia mihak rimormiori totpena hota rpesiay mai A'u." 18 Noma rleretniekla rteman taru tialli, ne rlernohora Yesus. 19 Yesus Nodi liarni noma Namkek nana riy id nanni Yakowsi nor hyalli Yohansi e rwalola tiala la puounu ralamni. 20 Plet pa Yesus Npolga re Niwra: "Mmiai ee!" Noma raltarga amni Sebedeus la puounu ralamni na'itar wutu Sebedeus hopopanni-lili'irnu re, ne irrora rla rlernohora Yesus lidanni de.
Yesus Nodi plolli pa Nhokar gota hegana-kawnu, yatni-rha'ani
21 Nhor nioma rla'awa la leta Kapernaum. La'pa Sabat lerni, maka Yahudi re edonna rkar lia, ntutu-nte'ewa, dewade Yesus Nla'awa la gen miaka Yahudi nhi'inde rhi' kreini-iskolli pa Nwatut lia hande. 22 Riy rwer rer wiawni la wniatutnu-wniaye'eni de, yoma Nodi plolli (wibawa) pa Nwatutu. Pede wniatutnu de ematia'a makwatutu-kwaye'a agama Yahudi wniatutnu. 23 La'a gen miaka nhi'inde Yahudi rhi' kreini-iskolli la, de riy ida maka hegana nhu'ru ralma. Nhaunu-nhaunu pa niwra: 24 "Yesus Nasartu ne! Hota Omhi' nan emkameni mai ami oo! Ommuai pia mpieyat ami? A'g e gat niohora he' O'a! O' di de maran yamou-wuhur yatoha (yang suci) maka Uplerlawna Nwalir niana pa Nhopan pa Ommuai lia nohkerna wawannu!" 25 Dewade Yesus Nkamota Niwra: "Rhodal nurmu! Rhokargo'tu la'a riy di!" 26 Noma yatni-rha'ani de nkahyoi-nkada'al meman neka riy de, na'nama nhaun matmiati dewade nhargot meman la ralamni. 27 Riy honona rwer rer wiawni pa idma nakot la ida riwra: "Wniatut warwuaru hya'a eda dina? Naltier die Nodi plolli-ntaryatnu pa Nwatutu. Ne la'pa Nhokargota hegana-kawnu, yatni-rha'ani mana, ratlina-ratailla pa rlergota!" 28 La' hade pede pleta-plet pa Yesus kotni-nanni ema reyapie'era la Galilea uhunu-ewatni-ewatni-lahwani.
Yesus Nhi' kalwieda riy rahu mak kanieni
29 La'pa rhoitio'or la roma-lewu maka Yahudi re rhi' kreini-iskolli de, noma Yesus Nora Yakowsi me Yohansi rodi liarni la Simon nora Andarias likatni. 30 La' de Simon yananni entepartarlia yanina yoma temni npahna, noma rakot nohora patke' de mehrani la Yesus. 31 Pede Yesus Nla Nwakriania patke' de yanin genni, na'nama Nte'la la patke' de limni pa Nwagamata, dewade nnienni de nmolu. Noma nla nwahi'a-nwayodia ya'ana-yemun pa honona ra'ana-remnia. 32 La'pa lera ntuinia, dewade rodia riy honona mak kamehra me maka hegana ha nhu'ru ralma pa rla'awa Yesus. 33 Rirahu re rmai lia likit de pa rawok la nhiari gaini. 34 Noma Yesus Nhi'a riy harahu pa rkalwied la nnieni-nhiena, mehra-mau, me Nhokar dodioinia hegana-kawnu, yatni-rha'ani liawanni. Edon Nhur niohora hegana-kawnu re pa raltieri yoma rat niohora de Ray Makamori-Kalewna maka Uplerlawna Nano'targa E inhatta.
Yesus Nla Nakot nohora Uplerlawna Kot Kalwiedni
35 Repreparrer mia'ta, mela loka-lak ma'ta de, Yesus Namat pa Nla'awa tio'ora. Nla'awa la geni maka hgali, la'a leta to'orni na'nama Nsumbain la hande. 36 Mere Simon nora talanwalli rla rwahaka. 37 La'pa rwatrom nana dewade rakot la riwra: "Rirahu e rahak O'a." 38 Yesus Nwahla re Niwra: "Mai pia tokur geni dom to'a, tla'a let mak rehgorgoru re, totpena la' hande mana A'ukot nohora Uplerlawna Kot Kalwiedni-Paitiotni yala'ani, yoma maka katota-kariei pede Amuai olekwa di, de A'ukot nohora Kot Kalwieda-Paitiota della leta honona re." 39 Noma la'pa Nala' doinia Galilea uhunu-ewatni-ewatni-lahwani, me Nakot nohora Uplerlawna lir kalwiedni-paitiotni la roma-lewu maka Yahudi re rhi' kreini-iskolli, ne Nhokar dodioinia hegana-kawnu mak khu'ru ralma riy.
Yesus Nhi' kalwieda maka ulityata-temyata (lepra) ida
40 Lera ida ne riy mak kanieni ulityata-temyata nmai noma nwaltior tar lia Yesus gaini ralamni na'nama nwak la niwra: "Amee! Mtiulan mai a'u. Agat niohora de Omuodi plolli pa Mhi' kalwied nan a'u, hornama Ompuayow nohora a wakwa'ku di." 41 Yesus Nsaynia riy de pede Nran limni pa Nteman la riy de pa Nakot la: "Arieiniana o wakwakmu pa omkialwied wa!" 42 Mtatan de nekpa nnienni de nmolu. 43 Noka pleta-plet pa Nhopna riy de nla'awa ne Nano' matmiat memna riy de 44 Niwra: "Hyalia, mhuoratreria! Yana mukot harilla' riy dom owa'ana. Mere mliernohora hya' maka Musa ne'era-ntatar targ oleka, de mlia'a imam ida pa mpuak la totpena namkek memna de omkialwied olekwa. Me muala limtutnu emeka Musa ha nwatut tiarg oleka de totpa riy honona rat niohora de omkialwied olek wa." 45 Mere riy de nla'awa la'pa nwe'era Yesus hihi'ini de la he'a-he'a to'a. Hade ed mak karei pia Yesus ta'en niana Nhari wawah'a la leta-ruhuna re ralamni. Ndella leta to'orni, la'a gen miaka hgali. Mere riy rwatiawua meni-meni to' pa rma rapur temna.
Yesus Nhi' kalwieda mak kaliu'uta ida
1 La'pa lera woru-wotelu rlardoinla dewade Yesus Nmai owa'an la leta Kapernaum, noma rod kiota-ral de'eta de E' etla roma nayanni. 2 Noma riy rahu rma rawok la hande pa reiniande geni hamonna, la'a nhiari gaini ho'mana geni npenu. Dewade Yesus Nakot nohora Uplerlawna lirni la rirahu re 3 Noma riy doma rmai die e rodia mak kaliu'uta id la E'a, de riy wogata rhim nana. 4 Mere la' ler de de riy rahu rehia, pede edonna rlernan talan pa rodia la'a rialma. Noka rwaye'er doinia roma ritni mak kden la Yesus o'tani wawannu, nhorwua dewade ralernu mak kaliu'uta de na'itar neka u'tani maka enanin la wawannu. 5 La'pa Yesus Namkek tutga riy mak kmai re pesiayni raruri, noma Yesus Nakot la riy mak kaliu'uta de Niwra: "Ama, dodo'ondi de A'umou-uwitn oleka do'omu-halmu." 6 Dewade makwatutu-kwaye'a agama mak kamtatna la hande rwarora-rwalai la ralamni riwra: 7 "Nihya'pa riy di Naltieri emkadena? Enapolu-naliella Uplerlawna! Yoma atiaru Uplerlawna nanpena Namou-nawitna rira do'oni-halli." 8 La' ler de meman pa ira ralma-riorni re, Yesus Nat niohora momuoga, pede Nakot la: "Ee, hya' ed mak kariei pia mimpiaror nana yatiana rena?! 9 La'pa plet pa A'ukot nek la mak kaliu'uta di giwra e do'oni-halli ramou-rawitn oleka de, miplin niohor ma'ta plollola pa e do'oni-halli ramou-rawitn oleka me edonna, mere la'pa Apuaran pia A'ukot la e' pa namat pa npopna u'tani pa nala'awa de mimiat niohor memna A ru'ru-la'yu etla yoma mimkek nan memna. 10 Pede hota la' dodo'ondi de Agiwra tiut muemna tiy miy, la'a noh di wawannu, de Rimormiori A'nani A'g ed mak kodi plolli pa umou-uwitna riy do'oni-halli." Noma Yesus Nakot la mak kaliu'ut de 11 Niwra: "Hyalia, mumat doin la pa mpuopna u'tamu de pa mlia'awa rommu." 12 Dewade mak kaliu'ut de namat doin na'nama npopna u'tani pa nla'awa la'a hare gaini ralamni. Riy honona la hande mana rwer rer wiawni, ne ra'uli-rawedia Uplerlawna. Rwer rer wiawni pia riwra: "It edonna tamkek ma'ta hihi'a-yapyapi maka itamkeka la' ler di!"
Yesus Npolga Lewi
13 Noma Yesus Nla' owa'an la danau aratni, ne riy harahu rmai tiemna dewade Nwatutga re. 14 La'pa Yesus Nalala' rer mia'ta noma Namkek nana mak kawoka blastena id de nanni Lewi, Alpius a'nani. La' ler de de Lewi e namtatna la gen miaka nhi'inde enawoka blasten la. Noma Yesus Npol lia: "E! Mua mliernohor A'g ee!" Noma Lewi naprir pia nlernohora Yesus. 15 La'pa Yesus e Nana'an rer lia Lewi romni dewade riy harahu maka nhi'inde leta mniotni sukni atia'ala re, emeka mak kawoka blastena me riy mak ha riwra riy dodo'a-halala rmai pia rora Yesus me maka ha Nwatutu-nwaye'a re pa ra'an rewre'wa, yoma riy harahu mak emkare nhi'inde rlernohor reri Yesus. 16 Riy Parisi dom makla' walia makwatutu-kwaye'a agama ramkek wali hare. Noma ratiana riy maka Yesus ha Nwatutu-nwaye'a re riwra: "Oi! Nihya'pa miy tungkurmi de Nora mak kawoka blastena, ror wutga riy mak khi' do'a-kyap hiala dom to' pa re ra'an wutu?!" 17 La'pa Yesus Natlin nana yatianni re noma Yesus Nakot la re Niwra: "Mak edonna kanieni edonna rma rahaka dokter. Eneknek to'a makamehra nanpena ed mak kwahaka dokter. Amuai die A'g edonna mua puolga riy mak kiwra irakleha do'a-hala, mere Amuai di totpa Apuolga riy dodo'a-halala pa rhoitio'or doini do'oni-halli re."
Yawalliohora wotelu la'a Yesus wniatut warwuarnu edon nora agama wniatut ulullu ramneha
18 Ler ida ne, maklernohora Yohansi makharani rora Parisi mniotni ratatahan reri lara, ne riy rmai pia ratiana Yesus riwra: "Nihya'pa maklernohora Yohansi re rora riy Parisi ratahan lara, ne maklernohor reri O'a de ra'ana?" 19 Noma Yesus Nakot la Niwra: "Emkameni la miy wniarormi dena de?! A' di de emeknekama muanke'a mak kiwra kmehlima. Riy maka rpol niana-rwak nana pa ra'ana-remun la yawoka-yale'u la mehlima-marya'a, de hota edonna ratahan lara la'pa muanke'a muaka kmehlima ntepartar mua't la ya'ana la' mei wawannu toh?! Hade yala'ani atia' hade! 20 Mere hota la'pa nte'ela la' lerni, nanpena ira'ala muanke'a muaka kmehlim della mak ka'an wutu re onni. La' ler de nampena iratahan lara." 21 Riy edonna rga' pua rala kokanan warwuaru ra rlowna rain mak kawniali. Yoma la'pa emkade de kokanan warwuar die hota napliu'uta-napdiedan nana rain mak kawnial de ne hota na'itar la pritni. 22 Emkade wal lia riy edonna rga' pua rhuria anggur tur warwuarnu la'a ha ulit mak mahnek oleka. Yoma anggur tur warwuarnu de hota nhi' nana ha ulit mahnek de ema reye'era pa anggur tur de rhur dioinia ne ha ulit de ho'mana ta'en niana rnair owa'ana. Anggur tur warwuaru de rhuria la ha ulit warwuaru."
Yesus Nodi plolli la Sabat lerni de ler maka Yahudi yana rkar lia de
23 La lera id la' Sabat lerni, de Yesus Nora maka ha Nwatutu-nwaye'a re rala'a la nhyi' wetra' lawna ida ralamni, ne maka ha Nwatutu-nwaye'a re rkura wetra' lawna re harni pa ra'ana. 24 Noma riy Parisi rakot la Yesus riwra: "Mumkek la me! Nihya'pa maka Mpuatutu-mpuaye'a re rpera-rdaitia it agamni deullu-tatarni yoma ir e rkar lia'a Sabat lerni?!" 25 Noma Yesus Nakot la re Niwra: "Miy mpiaik nan olek la'a hya' maka Daud nhi'a la' lera e nora talanwalli re raplara mere rakleha yamanna toh! 26 La' ler maka Abiatar nhi' imam o'ta lawanni, de Daud nler la Uplerlawna roma kreini ralamni na'nama na'ana rot miaka ha ral oleka la Uplerlawna. Nhor nia'nama nal walia roti rella' mutu korni pa ra'an wal lia. Mere la'pa deulu-tatra agama, de mak ka'ana roti re de eneknekto'a imam-imam rmeh'a. 27 Uplerlawna Nhi'a Sabat lerni totpa Ntulan la rimormiori. E' edonna Nhi'a Sabat de emeka ler mak kla kwar lawna la rimormiori wawannu. 28 La hade pede Rimormiori A'nani A' die mana, A'g ed mak kodi plolli pa A'ukot nohora hya' ed mak kaplola onde nhala pa itsi'a la Sabat lerni."
Yesus Nhi' kalwied riy id la Sabat lerni
1 La lera id de Yesus Nla owa'an la gen miaka nhi'inde Yahudi rhi'a kreini-iskolli. La' noma Namkek nana riy ida etla hande de limni walli nmati. 2 La hande de riy doma riwra rahaka kahelli-kaha'arni la' Yesus totpena Nhi' de rodia la letgara lawawna (hakim). Pede honona rkil rer lia hota Nhi' kalwieda makamehra-kamau la Sabat lerni me edonna? 3 Noma Yesus Nakot la riy maka limni walli kmat die Niwra: "Mai pia mtiutrier lia riy honona gaini ralamni." 4 Nhor nia'nama Yesus Natiana riy mak kden la' hande niwra: "La'a agama deullu-tatarni de rakot targa hota it tsi'a hya'a la Sabat lerni? Hota it tsi'a samomuounu me onde tsi'a yatyatni? Tamori-talewna rimormior me onde twaror nohora wniunu-wnienna la it rimormior wialli?" Mere ir rherier tio'owa. 5 Yesus ralamni nmawal doin la onnila hare o'ta watu, noma nod niek ralmha'arni pa Namkek la riy nenenan gaini na'nama Nakot la riy de Niwra: "Mpuetar limmu!" Noma riy de nwetar limni de mtatande nekpa nnienni nmolu. 6 Nhor nioka riy Parisi re rhoitio'or la gen miaka Yahudi rhi' kreini-iskolli dewa, na'nama ror wut nieka Herodes mniotni rna'ohma pa rwenna Yesus. 7 -8 Noma Yesus Nora maka ha Nwatutu-nwaye'a re rwadur la danau aratni, mere mak kdena Galilea harahu rma rlernohora re, ra'itar mak kdena letlawna Yerusalem ror wutga Yudea korni re wali, makden Idumea, makden Yordan walli, me mak kwatiawu Tirus me Sidon. Honona re rmai tiemna yoma ratlin nan oleka hya'-hya' maka Yesus Nhi' nana. 9 Noka Nhopan maka ha Nwatutu-nwaye'a re rwahi'a puou id la, yoma riy rahu re nhi'pa rma rhopun E'a. 10 Yoma Nhi' riy rahu pa rkalwieda, reiniande makamehra-kamau honona rma rwayotli-rwadahla la onni pa riwra rho'a-rhaiya Yesus totpa ir inonni meheni rkalwied walia. 11 Riy maka hegana nhu'ru ralma ramkek nan Yesus, dewade rma rwaltiora-rwaltieman la gaini ralamni na'nama hegana re rhaun matmiati: "O' de Uplerlawna A'nani inhat O'a!" 12 Mere Nano' matmiati pia yan memmemna rakot nohora he' E'a.
Yesus Nwaliria riy termida wehrani woru pa Nwatutu-nwaye'a re
13 Lera ida Yesus Nafia'at la wo'ora id hananni, noka Npolg awoka riy maka Eniwa Nhi'a la maka ha Nwatutu-nwaye'a re. 14 Nwaliri-nwalioh nan walia riy termida wehrani woru la' hare honona. Noma Npolga hare la "Mak Ha Nwalir niana pa rodia Uplerlawna lirni-tunnu." Yesus Nakot la: "Awualiri miy totpena Alia' meni-meni to' de miy miora A' tialla, totpena Aghopna mlia mikot nohora Uplerlawna lirni 15 ne Agala A ru'ru-la'yu totpena miy mhiokargota hegana-kawnu." 16 Riy mak termida wehrani woru ri nanni: Simon mak Yesus Nal walia nani Petrus, 17 Sebedeus a'nani Yakowsi nora hyalli Yohansi mak Yesus Nala nanni Boanerges maka nnia'eratni de kukru-gauru a'nani, 18 Andarias, Pilipsu, Bartolomeus, Matius, Tomsa, Yakowsi, de Alpius a'nani, Tadeus, Simon maka ha rweta la riy mak kwayotil memna hairi Romawi rodi plolli la Israel, 19 la'pa Yudas Iskariot maka na'olga Yesus.
Makden Parisi riwra Yesus Nora Be'elsebul (hegana amlawanni) rkar wiutu
20 Nhor nioka Yesus Nla'awa roma id ralamni. Noma riy rahu rma rhopun temna, nhi'nande Yesus Nora maka ha Nwatutu-nwaye'a re edon ra'an eti. 21 La'pa luwnu-a'nani ratlin nana Yesus edade, noka rmai pia riwra ra'ala, yoma riy rakota riwra: "O'tani leplep olekwa." 22 Makwatutu-kwaye'a agama mak kwatiawua Yerusalem riwra: "Riy di, Be'elsebul nhu'ru ralma. Enhokar doin hegana-kawnu rella yoma Be'elsebul, hegana amlawanni de ed mak kala ruri-lai la E'a." 23 Yesus Npolg awoka re na'nama Nnairia yawalliohora pa Nakot la re: "Hegana woka-le'u ida edon nhokra hegana woka-le'u dom to'a toh?! 24 Hegana re emeknekama hairi ida. La'pa la hair ida rimormiorni ema rhakre'era la wokni-wokni mak kahuri-kawo'ora, de hota hair de edonna namteman plalahwa. 25 Me luwu-a'na ida nden rer lia yahuri-yawo'ora de hota rweyata-rwaniawua luwu-a'na de. 26 Emkade walia la hegana amlawanni tnioranni-riautnu. La'pa hegana woka-le'u ida, nhokra hegana woka-le'u dom to'a, de hota hegana tnioranni-riautnu ema reyapie'era ne nanewar doin la, pa hota edon nodi plolli owa'an wa. 27 Itala mak karuri-kalai ida pa itsi' la yawalliohora. De la'pa riy riwra reyahru mak karuri-kalai ida re'eni-tniarnu, pa'etnu de nwutu-nkohg ulga mak karuri-kalai die nanpena nler la mak karuri-kalai die romni ralamni pa na'ala hade re'eni-tniarnu. Hade emekwali Aghi'a la hegana amlawanni. 28 Mitlina, A'ukot hadi totpa mhioratreria, de la'pa riy rhi'a do'a-hala me napolu-naliella Uplerlawna, de hota Uplerlawna Namou-nawitna do'oni-halli re. 29 Mere la'pa riy meni ed mak kapolu-kaliella Uplerlawna Nhiw Lululli, de riy de, hota Uplerlawna edon Namou-nawitan la do'oni-halli de, mere rwaghala onnila nhi' do'a-nyap hial maka kodi liarni." 30 Yesus Nakot emkade yoma rakot olekwa riwra: "Yesus de, hegana nhu'ru ralam nana."
Mak katlina-katailla Yesus lirni, de Yesus inni nora amni-hyalli irhatta
31 Noka Yesus inni me a'nani korni rmai wia. E rtutrier mia'ta la tio'or wa dewade, rhopna riy rla rpolu Yesus. 32 Rirahu e ramtatna pa rpepan reria Yesus, noma rakot la: "Tuna, Tuna inni nora amni-hyalli e rtutrier lia tio'ora, rwahak talan pa rwatro'mu." 33 Noma Yesus Nnairia yawalliohora pa Nakot nohor pleini, Niwra: "A i'nu-na'ru a'mu-hya'lu la Uplerlawna yamkekni de he'a?" 34 Namkek la riy mak kamtatna pa kpepan reria re, noma Nakot la ira: "Hari, er maka a i'nu-na'ru a'mu-hya'lu. 35 Riy maka khi' nana Uplerlawna ralma-riorni, de hare er mak kla' A i'nu-na'ru a'mu-hya'lu."
Yawalliohora la riy maka krinnie'era wini-hgona
1 Noma Yesus la Nwatut owa'an la danau aratni. Riy harahu rwayotil pa rma rpepan nana Yesus, pa narieiniande Yesus Nwatitin genni la puou mak kapniali id wawannu pa Namtatna la' hande. Ne riy rariahu re rtutrier lia eni wawannu. 2 Noma Yesus Nnairia yawalliohora pa Nwatutu-nwaye'a la'a lira nnio'a-niatu harahu la'a riy rariahu re. La' wniatutnu de ralamni E Niwra: 3 "Mitlina! Mak kanhyi'a-katlunni ida nla' pa nrinnia winni-hgonni la nhyi'ini. 4 La'pa nrinnia wini-hgona re dom de rtuin la talla ralamni, noma onu-ma'nu rmai pia rtotan nan momuoga. 5 Dom de rtuin la watgau ralamni pa ntai tani oke' to'a. Plet pa nmor wia yoma tani mniha. 6 Mere la'pa lera nhit wa dewade rmakulli-rmarella pa rmat wia yoma ga'arni edonna nlera plollola tani ralamni. 7 Wini-hgon de, dom de rtuin la pu'na-kiarti pa nhi'nande ruwnu-ahla rururni-karkiaratni re rmor pia ratolaw wenwenna pede ta'en niana ha rmori plollola pede rakleh wo'a. 8 Mere dom pal die rtuin la tan ihi wawannu pa rmori samomuou. Rpoti-rkaduw pede dom de ra'unu-rayeh nohora wo'oni terampwotelu, me dom pal die terampwonema. Ne la dom pal owa'an de rawo' nana rahg ida. 9 La'pa miy tlinmi erla de, mitlin reri!"
Yesus Nnairia yawalliohora re pa Nakot nohora la' riy mak kahmena kpesiay
10 La'pa Yesus Nora maka ha Nwatutu-nwaye'a re termida wehrani woru ror wutga maklernohor reri E'a riy dom to'a rmeh'a taru, dewade ratian nohor E'a la'a yawalliohor re. 11 Noma Yesus Niwra: "Uplerlawna Nhu'ula tlinmi-nwe'er matmi totpena miat niohora la hya' ed maka riy raplin niohor ma'ta la'a Uplerlawna tnioranni-riautnu. Mere eneknek to'a rala yawalliohora re rwatutga riy mak kakleha pesiay. 12 Totpa: "Hota ramkek reria mere emkade ho'mana edonna rna'erit nana. Ira e ratlin reria mere emkade ho'mana raplinu-raplo' nohora totpa yana rwaldioinia pa Uplerlawna Namou-nawitna do'oni-halli."
Yesus Nwale'er nohora yawalliohora la mak kanhyi' ida nrinnia winni-hgonni
13 "Noma Yesus Nakot la re: "Edonna mnia'erit nana lira yawalliohor dina?! La'pa miy edonna mnia'erit nana de hota emkameni pede miy mnia'erit nana lira yawalliohora re korni?! 14 Mak ke'er wini-hgona re emeknekama riy mak kakot nohora Uplerlawna lirni. 15 Wini-hgona mak ktuin la talla ralamni de emeknekama riy maka katlin oleka Uplerlawna lirni na'nama hegana amlawanni nmai pia nwarui-nwate'la nana lira-tun diella mak katlin oleka re. 16 Wini-hgon maka ktuin la watwuatnu nnia'eratni de riy dom maka katlin nana lir kalwied de dewade rleretniekla ralamni naplele'er pa rreiniana. 17 Mere lir kalwied de edonna naga'ar la'a ir ihranu ralamni pede nhi'nande edon nalo'on wali ne nwal lia hamamuamua. La'pa rler la kropanni-krieutnu, onde yamuki-yama'ala yoma la'a kot de rerieini, dewade rleretniekla rwadur la pesiayni. 18 Wini-hgon maka ktuin la ruwnu-ahla pu'na-kiarti, de emeknekama riy dom maka katlin nana lir kalwied de, 19 noma nohkerkerna rororni-lailiaini, hihi'ini-yapyapni me re'a-tniaru tototni-wudwiudni la'pa ralam mak kod rier lia hihi'a-yapyapi korni nmai pia nutni-ndahla lira di, de nhi'nande nakleh wo'a. 20 Ne la'pa wini-hgon maka ktuin la tan ihi, de emeknekama riy dom maka katlin nana lir de noma rreiniana pa rlernohor reri, pede mormiorni re rdella plol wawna. Riy mak katlin dom de emeknekama wini-hgon mak kawo'a liawanni pa wo'oni nlernana nti'il nana ralamni re'eni terampwotelu, dom pal die terampwonema, ne la' wal diom de rahu ida."
Rala tlin tetema pa ratlin samomuoga Uplerlawna lirni-tunnu totpena hota yeher to' pa rat niohora
21 Noka Yesus Nakot la re: "Riy edonna raltarga ktopra ra rtutwua wa'du mormiori, onde rwatatga wa'du della' lewnu nayanni. Wa'du de rkeni hadella la'a wniatatgenni. 22 Emkade wal lia' Uplerlawna lirni-tunnu, yoma E lirni mak kayade'a honona re mana hota rakot nohora, me mak kayawunmu momuou hota nawnie'era ne rat niohor memna. 23 He'a tlinni erla de totpa ratlina! 24 Mpiahniorat la hya' maka A'ukota ri, yoma la riy mak klernohora hya' maka enatlina de, hota ra'itr owa'an la wniarorni-wnialaini. 25 Riy mak kiwra kna'erit nana, de hota ra'itr owa'an la wniarorni-wnialaini mere la'pa riy mak kahmena kat niohora Uplerlawna lirni, de hya' mak enatg oleka de hota Uplerlawna Na' owa'ana."
Uplerlawna mutnu-rahanu re ra'ititar rer lia liawanni me la' rurni-laini emolmolla winni-hgonni mak kmori
26 Noka Yesus Nakot la re Niwra: "Ina-nara ama-hyali, la'pa Uplerlawna Ntorna-nrautu de emekwalima yawalliohora di. De la' mak kanhyi' ida, ne'era winni-hgonni la tani ralamni. 27 Noma nmela de nanina me, leler demade namata, ne winni-hgonni re rmor pia ral uhwu, ral uhwanu pa ratultul liola, riy de naplin niohora liawanni re. 28 Nohkerkeran di mana nmeh'a nekpa nal wo'oni, nhiwni ulu, noka wo'oni, nhor demade o'olli mak kden la harni ralamni. 29 La'pa wo'oni de ngatan wa, dewade matromni de nma nhei dioinia la, yoma reiki lerni nma ntutu-nte'ewa."
Uplerlawna mutnu-rahanu re ra'ititar rer lia liawanni me la' rurni-laini emolmolla sasawi ola mak kmori
30 Yesus Nakot owa'ana: "Tnairi hya'a ta twatutu niohora Uplerlawna tnioranni-riautnu la E rimormiorni wawannu, onde tnairi yawalliohora hya' pa takot nohora? 31 Sasawi ola ida maka rtamnia la nhyi'ini de emolmolan nekama Uplerlawna tnioranni-riautnu la E rimormiorni. Sasawi ol de ha luwlu'wu id hade la'a ha'ola korni mak kden la nohkeran di wawannu. 32 Mere la'pa nmori, de hota npoti-nkadwu, pa nareh niana yawuli-yatniamni re korni. Hota sasawi olli-tapalli re rpoti-rkadwu pa nhi'nande onu-ma'nu rma rapuon la'a sasaw die tutnu-akni." 33 Yesus Nnairia lira yawalliohora mak emkade mamaini totpa Nakot nohora Uplerlawna lirni la riy rahu re. La'pa Nwatutu de E Nlernohora hya' maka irna'erit nana. 34 La' wniatutnu honona la'a rirahu re, Yesus Nnairi mamainia yawalliohora. Mere la'pa E nor wutga maka ha Nwatutu-nwaye'a re rmeh'a de Enwe'er doin momuoga totpena rna'erit nana.
Yesus Nadarga anin lawna pa nwal lia lina-lera
35 Ler de pa la'pa lera nheria dewade, Yesus Nakot la maka ha Nwatutu-nwaye'a re Niwra: "Mai pia todia puou pa tla'awa danau de walli." 36 Yesus Namtatan ma'ta la puou ralamni de, dewade maka ha Nwatutu-nwaye'a re rto'or doinia rirahu re pa rha'at la puou pa ror rewre'wa Yesus la puou ralamni. Puou dom mana ror ir pa rhopal wa. 37 Noma anin lawna mana nten wia ne, yo'ora mana rriw lia puou ralamni nhi'nande puou npenpuen la tah'i. 38 Ler de de Yesus Nanin hala, Naklun reria la'a puou li'ir tutnu. Noma maka ha Nwatutu-nwaye'a re ramata noka rakot la: "Tuna O edonna Mhe'du nana ita, tsi' pa tepar wa?!" 39 Noma Namat pa nkamot targa anni me Nakot la tah'i de: "Hadewa, mulina-mule'ru!" Dewade anni mana edon nteni ne tah'i de mana nalina wa. 40 Noma Nakot la re, "Nihya'pa mimta'at wenan miy emkadena?! Edonna mpiesiaya ma't A'u?!" 41 Ir honona ramta'at wenna, noma idma nakot la ida riwra: "Riy di de he'a pede yo'ora-anni nek de ratlina-ratailla?"
Yesus Nhokar doini hegana-kawnu la Garasa
1 Yesus Nora maka ha Nwatutu-nwaye'a re rhopal pa rodi liarni la' danau Galilea walli, la'a riy Gerasa genni-tienni. 2 La'pa Yesus Nerun la keranni, dewade muanke' maka yatni-rha'ani ha rhu'ru ralma ida nlergot la hu'ula-liena la'a tniamin mat geni ralamni pa nma nler temna. 3 Riy de nhol lia hu'ula-liena mak kden la tniamin mat geni ralamni, ne riy id ho'mana edon narur pia nwut niana, rnairi wutwutu mnotna ho'mana ta'eni. 4 Yoma nhi'inde riy e rwutu-rkohog e limni-lakni, de rnairia wutwutu mnotna, mere na'ed lia inonni pa nwuhi eti-lahwa re la'a limni, me nweyata ranti la'a lakni. Riy id mana ta'en niana ntoran nana. 5 Lelera-melmel de, nden to'ola tniamin mat geni ralamni me la'a wo'ora-kawru pa nhaunu-nhaunu me nal watu na ntu'tu nlakwehi tio' inonni. 6 La'pa namkek nana Yesus Nwatiawua oliet pa Nmai wia dewade nawlar pia la nwatroma. Noka nwaltiora-nwaltieman la Yesus gaini ralamni. 7 -8 Yesus Nakot la Niwra: "Hega'nu ne! Mhuargot la riy di ralamni!" Dewade riy de nhaunu-nhaunu pa niwra: "Yesus ee! O' de Uplerlawna mak kden la tutullu-lolo'oni A'nani O'a! Hota Omhi' nana a'g emkameni ee! Omliokar pa mpuet la Uplerlawna nanni totpena yana Mukmua a'u." 9 Noma Yesus Natiana riy de Niwra: "O nanmu he'a?" Noma riy de nwalolla niwra: "A na'nu Legion yoma am di de yatni-rha'ani liawanni. (Nanni de nnia'eratni keki-rautu woka liawanni). 10 Noma nwakwak rer lia Yesus totpena Yesus yana Nhokar gota hare pa rhoitio'or doini la lowan de. 11 La' hande de e rehgorgorga gen miaka wawi wok lawna e rwayowar pa rahak pa ra'ana-remun la wo'ora hananni. 12 Noma yatni-rha'ani re rwak lilili-mamuau lia Yesus totpena rhopan nekpa irler la wawi re inonni ralamni. 13 Yesus Nwayowa, dewade rlergot la riy de inonni, pa rla' rhu'ru ralma wawi re, na'nama honona re rawlar pia rla rlererun la weran teti pa ema rwuwul wenwenna la' danau de ralamni. Wawi honona re la'pa edon nhal de riwnu woru. 14 Nhor nioka mak khuri-kwa'ana wawi re rawlar pia rla rod kiota la'a ir letni me gen miaka rehgorgoru. Noma riy rlergot pa rma rpoi-rkeka (ramkeka) hya' maka ha rakota re. 15 Riy rawok la Yesus onni pa ramkek memna riy maka yatni-rha'ani rlergot la de, e namtatan reria, nnairi oleka pola-raini me wniaror samomuou ed olek la ihranu ralamni. Noma riy honona re ramta'at wenna. 16 Riy mak kden hande maka ramkek oleka Yesus Nhokar doinia yatni-rha'ani re, rwahaur nohor hadel la'a riy mak kmai re, ne rwahaur nohor walia wawi re. 17 Nhor na'nama riy mak kden hande rwak lilili-mamuau pua Yesus yan memmemna Nalo'on la' gen die ne plet pa Nwaran nek wa. 18 La'pa Yesus Nha'at owa'an la' puou ralamni de, riy mak yatni-rha'ani re ha rlergot la de, nwak la Yesus totpena nlernohor rer wialia Yesus. 19 Mere Yesus Nahmena, pa Nakot la Niwra: "Samomuounu de muwal lia genmu-tienmu, me mukot nohora Orgahi-Orha'a ralam kalwiedni tiy o'a, me la'a hare honona mak samomomuou memna maka Enhi'a-nyapi la o'a." 20 Dewade riy de nla'awa la'pa nakot nohora hare honona la mak kdena Dekapolis la'a hya'a maka Yesus ha Nhi'a la e'a. Ne riy honona mak katlin nan de rwer rer wiawni.
Yesus Nhi' kalwieda Yairus a'nani me patke'a maka khur riara
21 Noma Yesus Nodi puou pa Nlereti owa'an la danau walli, dewade riy rahu lidna-lidan pa rmai pa rpe'pa reri E'a la gera aratni. 22 Noma edon nalo'on wali ne Yairus makhi' o'tani la'a gen maka Yahudi re rhi' kreini-iskolli de nmai wia. La'pa namkek nana Yesus dewade nwaltior la Yesus nayanni 23 na'nama nwak lilili-mamuau lia Yesus, niwra: "Tuna, a a'nu patke'a namehra pa trema-trema hota nmat wia. Awuak de, Mtiulan pa Mlia Mtieman la e'a totpena nkalwied owa'ana, totpa yana nmati." 24 Noka Yesus Nor riy de pa rla'awa. Riy rahu lidna-tauru rlernohora pa idma rde'da la'a rde'da mai ida. 25 La' riy rahu re, de patke' mak khur riara la'a anni termida wehrani woru, e nor wali. 26 La'pa tilti'ila-walwial tiarga la yakrui-yagapnu la mak katu kakrui-kagapnu (dokter) pa nareiniande nahor dioini momuoga re'eni-tniarnu pa npair la makakrui-kagapnu, mere mehrani de edon nkalwied eti, mere yeher to' pa na'itar la. 27 Natlin oleka hya'a mak Yesus Nhi'a, noma nwakriania Yesus la mutu letgarni. Ndella Yesus to'orni na'nama nteman la Yesus raini plalahwani. 28 Yoma nwaror la ralamni: "Hornama atieman to'ola raini plalahwani de, de hota akalwied wa." 29 La'pa mtatande nekpa rarni mak kawdiadia'i de nkeran wa, ne nat niohor memna inonni nkalwied wa. 30 Mtatande nekpa Yesus Na'eram nana de rurni-laini nlergota la inonni, noka Nheri gaini pa Namkek la riy rahu re, na'nama Natiana re: "He' ed maka kteman la A rainu?" 31 Maka ha Nwatutu-nwaye'a re rwahla: "Omumkeka de riy rahu ri rpakdie'da la'a O hermu-gaimu, mere Mutian owa'ana he' ed mak kteman la O rayanmu?!" 32 Noka Namkek la'a-Namkek mai totpena Nahaka he' ed maka khi' nana hihi'a-yapyap di. 33 Patke' de namta'ata pa nruru yoma nat niohora hya' ed maka khi' olek la inonni, dewade nla nwaltiora-nwaltiemna la Yesus gaini ralamni na'nama nakota plele'er nohora hya'a maka nhi' oleka wa. 34 Noma Yesus Nakot la Niwra: "O pesiaymu e narur mai A'u ina pa mkialwied wa! Mlia'awa pa mmuori-mdiar lia kalwiedni-paitiotni." 35 La'pa Yesus enaltiertier mia'ta de dewade riy dom rwatiawu Yairus romni pa rmai rakot la Yairus de niwra: "Tuna, a'namu nmati olekwa pa yana mpuaka tungkur die pa nla'a o rommu nayanni." 36 Mere Yesus edonna nhe'du nohora lirni re mere Nakot la Yairus Niwra: "Yan mumta'ata. Mpuesiay niek wa." 37 Noma Yesus edonna Nhur niohora riy id wali pa Nora talla, atiaru Petrus, Yakowsi nor wutga hyalli Yohansi. 38 La'pa rte'ela Yairus romni, ramkek nan de riy rahu mak kokna-krarnia. Rko'a-rkakur nohora mat die. 39 Noma Yesus Nla'awa rialam pa Nakot la re: "Nihya'pa mimkiokna-mriarni mkio'a-mkiakru?! Hararar de edonna nmati, hade e nanin to'a." 40 La'pa ratlin nana Yesus lirni de, noma honona riarin taru la yamalli. Noma Nhokar doin hare honona, na'nama Nod hararar de inni-amni ror wutga Petrus, Yakowsi me Yohansi pa ror rewre'wa rla'awa la hararar de genni la'a rialma, 41 na'nama Ntorreria hararar de limni na'nama Nakot la Niwra: "Talita kum", nnia'eratni de: "Ina, a'ukot tiy o' de, mumat wa!" 42 Mtatande nekpa hararar de naprir pia nala'awa. Hararar de umurnu termida wehrani woru olek wa. Riy mak kden la hande rwer rer wiawni la'a hihi'-yapyap die. 43 Mere Yesus Nlaran pa yan memmemna rakota hadella hehe'a. Na'nama Yesus Nhopan pa ralla harar de pa na'ana.
Rwayotlia Yesus la Nasaret
1 Noma Yesus Nor wutga maka ha Nwatutu-nwaye'a re Nhoitio'or la gen die noma rawal lia' Yesus letni-ruhunni. 2 La'awa Sabat lerni dewade la Nwatutu-nwaye'ela gen miaka Yahudi re rhi' kreini-iskolli. Ne la'pa ratlin nana Yesus wniatutnu de, riy harahu rwer rer wiawni pa riwra: "Ha Nlernana wniatutnu-wniaye'eni rilla' hanmenio? Kirkira-ralma-rior samomuou hya' hadina? Nlernana plola-mneha pa Nhi' nana hihi'a-yapyapi mak kamehi-kayona la hanmeni? 3 Itat niohora de mak kawte'ta-kaprahni id to'a hade pa edonna nhal de Ha inni nwawa Maria, ne hyalli re de Yakowsi, Yoses, Yudas nora Simona? Ne ha narni patke'a re nek de rden wal lia handi." La' emkade pede honona re rwayotlia Yesus. 4 Noma Yesus Nakot la re Niwra: "La'a makwohorulu-ktatrulu maka klol meni-meni to' mana, rira rhu'ru-rhelam la, mere hota la' letni-ruhunni me luwnu-a'nani meman nek de riy id mana edonna natlin la." 5 Ne onnila irakleha pesiay pede Yesus ta'en niana Nhi' hihi'a-yapyapi mak kamehi-kayona la' hande, enekneka Enlapar limni la'a makamehra doma pa Nhi'a pa rkalwieda. 6 Mere Yesus Nwarora: "Wah! Nihya'pa riy korni mak kdella A le'tu ri rahmena rpesiaya A'u?!"
Yesus Nhopna maka ha Nwatutu-nwaye'a termida wehrani woru re
6 Noma Yesus Nalala'a la'pa Nwatutu-nwaye'ela leta ida nhor diemade leta ida. 7 Noma Yesus Npol wutga maka ha Nwatutu-nwaye'a re riy termida wehrani woru. Noma Yesus orgahani Nala ruri-lai la ir honona totpena rnairia pa ra rhokra-rlaiya hegana-kawnu, nhor nioka Nhopna rla'a de riy maroro'a rala' wutu. 8 Yesus Nakot la re Niwra: "Hyal miy re, yana miodia hadomdoma la' yala'ami de eneknek to'ama lie'ena. Yan miodia ya'ana-yemnu, arkai, onde kupna. 9 Mniairia laka wniowa mere yan miodia hewewta-naniairi ida-woru pa mhiernu miy rayanmi la' talan ralma. 10 Hota la roma-lewu maka riy rreiniana-ra'nan miy, de mdien nek la ir romni la'pa kniarmi la' let de la nhorwua nanpena mpiaran la' rom de. 11 La'pa mlier la gen ida maka edonna kreinian miy onde edonna katlina-katail tiy miy die, mtio'or doin gen die, me mkiakan doinia awu mak kden la lakmi lia'armi totpa mtiutga de Uplerlawna Nwayotlia ira." 12 Yesus Naltier pa Nhorwua noma riy maka ha Nwatutu-nwaye'a re rla rod kiota-ral de'eta Uplerlawna lirni riwra: "Mhioitio'or doin-mtiahnei dioini do'omi-halmi re!" 13 Rhokar gotgota hegana-kawnu rahu, ne rawu'ru-ralena la riy rahu makamehra-kamau re, ne rhi'a pa rkalwieda.
Rwenna Yohansi mak kharani
14 Ray Herodes mak kwenna Yohansi, mana natlin nohor walia Yesus, yoma nanni nwewar noha. Riy doma rakot nohora Yesus riwra: "Matialo'onama Yohansi mak kharani e inhatti! Enmati olek pa nmori owa'an pede nhi' neka hihi'a-yapyapi mak kamehi-kayona hya' to'owa." 15 Dom de rakot nohora Yesus riwra: "Hade de Eli edade," me dom de owa'ana riwra: "Makwohorulu-ktatrulu edade, emekwalima makwohorulu-ktatrulu la'a ululu genni." 16 Mere la' pa Herodes natlin nana lir de, dewade niwra: "Hade de Yohansi maka Aghopan pa riy rdawr eti tiernu, mere nmori owa'ana!" 17 Enakot emkade yoma la ler ululu la'a Yohansi nmormior ma'ta de Herodes nhopan pa rtorna Yohansi na'nama rwutga pa rla rwi'it targa la roma nhio'la ralamni. Herodes nhi' emkade yoma la'a e hawni Herodias rerieini. Yoma Herodes hawni Herodias de, de Herodes hyalli Pilipsu haw ulullu. 18 Pede Yohansi nakot la Herodes niwra: "Yan memmemna omuora hyalmu hawni de mmiehlima. Hade edon lol deulu-tatra." 19 Lirni de narieiniande Herodias, Herodes hawni de, na'andoin gahani la Yohansi, ne nwaror pa nwenna, mere ta'en niana, 20 yoma hawni Herodes napili-nahniari Yohanis di onnila natga de, Yohanis di de riy plollola-mneneha, nakleha do'a-hala, pa nhi'nande nliwan reria. Mere la'pa Herodes natlin nana Yohansi lirni noma Herodes namta'ata, mere ralamni nahepur to'ola yatlina la Yohansi lirni. 21 Mere Herodias nwewiei-nnarnara lerni pa nwunu-nwenna. Lerni nmai wa la' Herodes ler kalwiedni. La' ler de Herodes nhi'a muki-hepru ya'anlawna-yemunlawna la tniutnu-nhianni-nhielli-liarni, o'ta-mata mak kodi kekni-rautnu, me riy lalawna la Galilea. 22 La' ler de de Herodias a'nani patke'a nloi lia makhopnu-makpepna gaini ralamni. Lioini-nhiekni de nla' nan meman la Herodes nora makhopnu-makpepna re ralamni. Nreiniande Herodes nakot la hararar de niwra : "Ralammu nwaka hya'a-hya'a to'a, pena agala tiy o'a." 23 Noma Herodes nlokar memna la pat hararar de gaini ralamni niwra: "Hya'a-hya' to' maka mpuaka de agala tiy o'a, la'pa a plo'lu-mneh'u (hai'ru) di walli mano omliernana!" 24 Harar de la' pa natian nohora inni niwra: "Hya' ed maka hota awuaka?" Inni nwahla niwra: "Yohansi makharani de o'tani!" 25 Noma harar de pleta-plet pa nla'awa ray Herodes pa nwaka: "Tuna, awuak pa la' dodo'ondi de mkien tio'a Yohansi makharani o'tani la totopa, pa muala mai a'u." 26 La'pa Herodes natlin nana hararar de wakwakni dewade ralamni ntuin doin la. Mere takotpa, nlokar pa lira olek hadewa ne mak kmai pia kor wutga Herodes pa ra'an de ratlin momuoga oleka pa nhi'nande Herodes nahmena nwayotlia wakwakni. 27 Herodes pleta-plet pa nhar lirni totpena rla rotan doinia Yohansi makharani die o'tani la'a roma nhio'la ralamni na'nama rkenia o'tani la totopa pa rma rtemna la hararar de limni. 28 La'pa edon nalo'on ma'ta de rken nian Yohansi o'tani la totopa ralamni pa rma ralla pat hararar de. Nhor nioma pat hararar de nodia Yohansi o'tani pa nod tiargho'a la inni. 29 La'pa maklernohor reria Yohansi makharani ratlin nana, noma rma ra'ala Yohansi inonni pa rla rhuwria.
Yesus Nalla riy riwnu wolima ra'ana
30 La'awa lerni pa maka Yesus ha Nhopan pa rodia Uplerlawna lirni-tunnu re rawal pia rakot nohora hya'a maka ha rwatutu me rhi' nana re honona la Yesus. 31 Noka Yesus Nakot la re: "Mai pia tla'awa gen miaka hgali totpa tmeh'a, ne tren kuku' it la' hande." Yoma riy rahu maka kla'a-kmai re, nhi'nande ya'ana mana ta'en niana. 32 Noma irmehmeh'a rodi puou pa rla'awa gen miaka hgali. 33 Mere la'pa rwaran wa dewade, riy rahu ramkek nohora pa rat niohora gen miaka ir rokria de. Pede riy rahu rlol keranni pa rmai tiemna, rwatiawua letni-ruhunni la meni-meni pa rala' ulga re. 34 La'pa Yesus Nerun la puou pa namkek la riy rariahu re, de ralamni ntuin doin la pa Niwra Ntulan la ira yoma ir rakleha riy mak ktutga talla mak kaplollol la' ira. Honona re emolmolla pipi-duma mak kakleha riy mak kodi. Noma Nwatutga ir la'a nnio'a-niatu harahu. 35 Ne lera nheria pa mak Yesus ha Nwatutu-nwaye'a re rma rakot la Yesus riwra: "Tuna, lera nheria wa. Ne la' gen di ho'mana olieta la leta 36 pede Mhuopan nekpa ir orgahani rla rawelia ya'ana-yemnu la'a leta-leta re mak rehgorgoru." 37 Mere Yesus Nakot la: "Pena mialla ra'ana." Noma rakot la riwra: "Ita'ala kupna-kai maka riy nhi'inde rlernana la wolla wo'awa gahani memna pa itaweli roti totpa talla ra'ana?!" 38 Noka Nakot la: "Roti wo'ir mak miy miodi rena? Mimkek teka!" La'pa ramkeka pa nhor nioka riwra: "Roti wolima me i'na woru." 39 Nhor nia'nama Nakot la maka ha Nwatutu-nwaye'a re pa rhopna riy honona re ramtatna momuoga la wewna motmota wawannu, ne rnawera la wokni-wokni. 40 Noka hare mana rawok pa ramtatna. Wokni dom de, terampwolima me wokni dom owa'an de rahu ida. 41 Noma Yesus Na'ala rot dieulu re wolima, me i'na rora, na'nama Nwatniar la heyanan pa Na'uli-nawedia Uplerlawna. Na'nama Nhawi-nhawia roti re na'nama Nala la maka ha Nwatutu-nwaye'a re rhakre'era la'a riy mutlialawna re honona. Nal walia i'n de pa nhakre'era la riy rahu re. 42 Honona re ra'an pa rpehera. 43 Ra'an pa rwair wa, noma maka Yesus ha Nwatutu-nwaye'a re, rwaho'a-rwatierun wa de rawok nana roti me i'na mak ha ra'an atre'a, de kriou penpuenu termida wehrani woru. 44 Mak ka'an momuou lia hande, la'pa edon nhal de muanke'a riwnu wolima, me edonna rhor wut mua'ta la patke'a ror wutga upni-a'nani.
Yesus Nala'a lola tah'i ulti wawannu
45 Nhor nioma Yesus Nhopan pa maka ha Nwatutu-nwaye'a re rodi puou rleretia danau pa rala' ulu E'a la Betsaida, ne Nhopan pa riy mutlialawna re rawal wia. 46 Dewade Yesus Nha'at la wo'ora id hananni totpa Nsumbaini. 47 Mere la'pa mela ndamit nana, de maka Nwatutu-nwaye'a re puounu ed olek la danau letgarni, ne Yesus Nmemeh'a Ndella keranni. 48 Noma Namkek de, maka Nwatutu-nwaye'a re ta'eni rwain nana puounu, yoma anni mak klol gaini newat nana. La'pa repreparreria de Yesus Nala' lola tah'i ulti wawannu pa Nla Nlernohora puou mak oliet olek la E'a. Nalala'a pa Nwakriania na'nama Ntot pa Nala' ulu ira. 49 La'pa ir honona la puou die ramkek tutga E maimiaini de lola tah'i ulti wawannu de rhoiya la hegan lora, reiniande honona re polpuollu-hawaunnu, 50 yoma honona re ramta'at wenna onnila hya' maka ha ramkek nan de. Mere Yesus Nleretniekla Nakot la re Niwra: "Yan mimta'ata, Yesus A'g inhatti." 51 Noka Nha'at la ira puounu, ne anin lawan de mana namtie'ela wa, dewade maka ha Nwatutu-nwaye'a re rwer rerer wiawni, 52 yoma raplin niohora la' emkameni la Yesus Nhi' nan hade. Yoma la' ler ululu maka ramkeka roti maka rehenu la riy riwnu wolima re mana raplin nohor yala'ani, mere ralamni ratehra to'owa.
Yesus Nhi' kalwieda riy mak kanieni la'a Genesaret
53 La' pa rleretia danau pa rte'ela danau aratni la'a leta Genesaret na'nama rapnial lia hande. 54 La'pa rerun la puou, mak kden hande ramkek tut niana mak kmai die Yesus inhatta. 55 Noma rawlar pia rla'awa leta-ruhun maka rehgorgoru pa rhim nana mak kamehra-kamau, mak kanin rer tio'ola u'ti wawannu re, pa rodia la Yesus la'a geni-tien maka ratlin nana Ndella. 56 La' meni-meni maka Yesus Nla'a de, la'a let paheli-ruhun patatra re, de rken tiarga mak kamehra-kamau re la ya'olu-yala'a geni ralamni. Mak kodia makamehra-kamau re rwak lilili-mamuau lia Yesus totpa makamehra-kamau re rteman to'ola Yesus rayanni tawnu totpena rkalwieda. Dewade he'-he' mak kteman nan to'a Yesus rayanni tawnu re, honona rnek pa rler la kalwiedni-paitiotni.
La'a hya'a to'a ed maka khi' rira pa rakdeha-raktiahli
1 Lera ida ne Parisi wokni id nor wutga makwatutu-kwaye'a agama re rwatiawua Yerusalem pa rma rwahaka Yesus. Rma rpepan reria noma 2 ramkek de maka Yesus ha Nwatutu-nwaye'a dom de ra'ana mere edon rohma limni emeka hya' maka upni-tgarni rwatut tiarga la' ululu. 3 Parisi mniotni ra'itra Yahudi re korni rlernohora hya' mak upni-tgarni rdeul taru-rtatar targ oleka wa pa ra'ana de rohma limni. 4 Ne la'pa rwatiawua ya'olu-yala' geni de edon rohma limni ma'ta de, ta'en nian ra'ana. Nhioli-lieta, pa'etu-parahmani korni maka upni-tgarni rwatut tiarga oleka re, rlernohora momuoga, emekto'a rohma lari (niemun geni), kekna-rana, me hewewta-naniair pi'ra. 5 La' hade pede Parisi mniotni rora makwatutu-kwaye'a agama ratiana Yesus: "Nihya'pa riy maka Ompuatutu-mpuaye'a re edon rmor niohora it upni-tgarni deullu-tatarni?! Ira'an de edonna rohma ulga limni." 6 Yesus Nwahla re Niwra: "Plol memna la' lir wowohora maka Yesaya nakot nohora miy miak mtiot pa mpial lia riy plollola mere plollolli de riy yatyat miy. Niwra: "Emkadilla Uplerlawna lirni: Rimormiori ri eneknek to'ama ral nurnu tutnu re rha'wa nan to' A na'nu, mere ralamni re olieta mai A'u. 7 Hare kniola tiernu-niawur nehlani mai A' die hamamuamua re yoma ira rwatut tio'a rimormiori wniatutnu-wniaye'eni." 8 Uplerlawna lirni-tunnu de, miy edon mhie'du nana, mere rimormiori deullu-tatarni nanpena mtie'la rer pitpitga. 9 Miy edon mliernohora Uplerlawna lirni de, mere mimliernohor to'a miy upmi-tgarmi deullu-tatarni. 10 Yoma Musa niwra: "Mhiu'ru-mhielam la inmi-ammi, ne la'pa hameni nwohora-ntatra inni-amni, de hota nlernana niukum matmiati." 11 Mere mpiatutu-mpiaye' de edon nhala pa riy id nakot la inni-amni niwra: "Agiwa galla miy, mere agal oleka la Uplerlawna." 12 Noma mhur niohora riy de, pa hota edon na'unni-namta'ata inni-amni. 13 La' talan emkade pede miy edon mliernohora Uplerlawna lirni de, mere mliernohor to'a miy upmi-tgarmi deullu-tatarni maka mpiatutu-mpiaye'a re. Ne mpiatutu deulu-tatra harahu mak emkade wali mak kreiniande riy edon ratlina-ratailla Uplerlawna lirni." 14 Nhor nioma Yesus Npol lia riy rahu mak kden handi pa rma rawoka ne Nakot la re Niwra: "Hononmi mitlina totpena miatga. 15 Mak ita'ana edon nhi' akdeha-aktiahl ita. Eneknek to'ama yatyatni-halalli maka itakot nohora me tsi' nana. Hade ed maka khi' pa takdeha-taktiahli. 16He' tlinni erla de, totpa natlin reri! " 17 Nhor nioka Yesus Nhoitio'or doin riy rahu re pa Nla'awa roma ida nayanni, na'nama maka Nwatutu-nwaye'a re ratiana riwra: "Tuna, Mtiulan pa Mukot nohora yawalliohora de nnia'eratni mai ami." 18 Yesus Niwra: "Miy die emek ir wal pia edonna miat mua'ta lira re nnia'eratni?! Miy e miplin mua'ta mak itlumu-ttella de edon khi' akdeha-aktiahl ita?! 19 Yoma maka itlumu-ttella de edonna la'awa it ihranu ralamni mere, la'awa it apannu ralamni ne hota nlergot owa'ana!" Emkade de Yesus Nakot Niwra ya'ana-yemnu honona de, raya'ana-rayemun momuou. 20 Yesus Nakot la: "Mak kwatiawua it ralamni ed maka khi' rira pa rakdeha-raktiahli. 21 Yoma it ihranu ralamni ed mak kodia ralma-rior yotyota-yatyata, pa nhi'nande riy ralira-raliai, rkamnelu-rkamna'a, rwunu-rwenna, 22 riy ralamni rapal niana re'a-tniaru kupna-kai, rahankerna-raralmha'ara, pudi-akla ohpa-lahara, pareta-pahawa, ihru yata-ralam yata, rapolu-raliella rira, tulu-petna, raplin niohora talan plollola. 23 Do'a-hala honona re rwatiawua riy ihranu ralamni, pa rhi' rira pa rakdeha-raktiahli."
Patke' mak Yahudi atia'a de npesiay wiali
24 Nhor nioma Yesus Nhoitio'or la' gen die, ne Nla'awa leta Tirus yapatni. Nla'awa roma ida nayanni, ne nahmen pa riy rat niohora, mere maimiaini de ta'en niana rawunmua. 25 Noka patke'a ida maka a'nani patke'a hegana nhu'ru ralma, natlin nana Yesus etla hande, noka plet pa nmai pia nwaltiora-nwaltiemna la Yesus lakni onni. 26 Patke' de Yahudi atia'a, mak kwatiawua Fenisia yapatni la'a Siria. Nwak la Yesus niwra: "Tungkurg ee, Mtiulan pa Mhuokar doini hegan mak khu'ru ralma a a'nu." 27 Yesus Nnairi yawalliohora pa Nakot la: "Ndella pa papay ra'an pa rpeher ulu, yoma taken niana ra'ala papay ya'anni-yemannu pa rhopliala ahu gaini, ina." 28 Noma patke' de nakot la Yesus niwra: "Plola, plola Matroma. Mere ahu mak kdella mei nayanni mana na'an walia yamanan lu'wu maka keke'eni re ratunia." 29 Noka Yesus Nakot la patke' de: "Onnila lirmu di, mlia' meman la dodo'ondi, yoma hegan de ema ratargot oleka la a'namu ralamni." 30 Patke' de nawal lia roma nayanni. La' de nlernana a'nani e nanina la lewu wawannu, ne hegan de ema ratargot oleka wa.
Yesus Nhi' mak khatilu-khamanu pa nkalwied wa
31 Noma Yesus Nwaran la Tirus, ne la Nlola Sidon nhor diewade Nlola Dekapolis lowanni pa Nokria danau Galilea. 32 La' hande de riy rodia mak khatilu-khamanu id la, ne rwak la riwra: "Tungkurg ee, Mtiulan pa Mliapar limmu la riy di wawannu." 33 La'pa Yesus Nahala la riy rahu re totpa rmeh'a, na'nama Ntuwnu okarni la riy de tlinni hu'ulli, na'nama Nakrui la pa Nteman la'a riy de namni. 34 Nhor nioka Yesus Nwatniar rer lia lyanti, ne Nhedga aranni na'nama Nakot la: "Efata!" nnia'eratni de "Muphyar wia." 35 Noma riy de tlinni naphyar wia ne, mtatan de nekpa namni wniutnu mana natiewar doin la, ne naltier samomuou wa. 36 Dewade Yesus Nano'a mak kdella hande pa totpa yana rwahaur nohora la riy. Mere yeher to' pa Nano'a la ira, yeher neka rla rwahaur nohora la'a meni-meni. 37 Riy mak katlin nan de rwer rer wiawni pa riwra: "Yesus hihi'ini-yapyapni honona re, samomuou memna! Mak khatilu mana Nhi'a pa ratlina, me maka khamanu mana Nhi' pa raltieri."
Yesus Nalla riy riwnu wogat ra'ana
1 Lera ida ne riy rahu rawoka owa'an la Yesus onni. Riy rahu re rakleh yamanna pede Yesus Npol lia maka ha Nwatutu-nwaye'a re pa rma rawoka na'nama Niwra: 2 "A ralmu ntuin doin la' rimormior mutlialawna ri. Hari e rlernohor rer A lia lera wotelu mere ha rakleha yamanna. 3 La'pa Agolin doin hare pa rla'awa de apannu rahgali, yanhi'pa gaini rmokal lol talan letgara, yoma dom de rwatiawua geni-tiena mak olieta." 4 Noma maka ha Nwatutu-nwaye'a re ratiana: "La'a gen hgal di de hota itlernana yamanan la hanmeni, pa itala la rirahu ri ra'ana?!" 5 "La'a wareher genmi, rot wo'ir erla?" Rwahla riwra: "Wo'itu." 6 Noma Yesus Nhopan pa riy mutlialawna re rakpernernia la tani wawannu. Dewade Yesus Na'ala roti mieha re wo'itu na'nama Na'uli-nawedia Uplerlawna. Nhor nia'nama Nhawi-nhawia re pa Nala la maka ha Nwatutu-nwaye'a re rhakre'era la rimormioria niutni-mdierna re. 7 Maka Yesus ha Nwatutu-nwaye'a re rodia i'na prowta ida-woru wali. Dewade Yesus Na'uli-nawedi owa'an Uplerlawna, nhor nia'nama Nhopan pa rhakra i'na rella. 8 Rirahu re ra'an pa rpehera, na'nama maka ha Nwatutu-nwaye'a re rwaho'a-rwatierun de rlernana maka ha ra'an atre'a, de kriou penpuenu wo'itu. 9 Rhor momuoga mak ka'ana re la'pa edon nhal de riy riwnu wogata. Nhorwua dewade Yesus Nhopan pa honona rawal lia' genni-tienni, 10 Na'nama Yesus Nora maka ha Nwatutu-nwaye'a re rha'at la puou pa rla'awa Dalmanut yapatni.
Riy Parisi rwak pa Yesus Ntutga hihi'a-yapyapi mak kamehi-kayona
11 Noma riy Parisi rma ratian la'a-ratian mai Yesus. Riwra rtota Yesus la klieratni pede rhopan pa Yesus Ntutga hihi'a-yapyapi mak kamehi-kayona id totpena irat muemna de Yesus plolli-mneheni nwatiawua Uplerlawna. 12 Noma Yesus Nhedga aranni Niwra: "Adoh! Nihya'pa rimormiori la lera-mela ri rhopan pa Aghi'a hihi'a-yapyapi mak kamehi-kayona?! Mere mitlino! Hihi'a-yapyapi mak kamehi-kayona kuku' nek ho'mana, A'g edon tiutga tiy miy." 13 Nhor nioka Nto'or doinia ir la hande pa Nha'at owa'an la puou pa rleret lia walli.
Yana mliernohora Parisi hihi'ini-yapyapni mak edon kaplola
14 La' noma maka Yesus ha Nwatutu-nwaye'a re rhortaplin pa edon rodi wareherni (roti), enekneka ida nmeh'a la puou ralamni. 15 Noma Yesus Nwagahniorta re Niwra: "Hyalia, mhioratreria! Hota miy ererma la'a tgo'a Parisi rora ray Herodes." 16 Noma rwarora pa idma nakot la ida riwra: "Nakot emkade yoma itakleh roti." 17 Yesus Nat niohora hya' ed maka ha rakotkota pede Nakot la re: "Nihya'pa miakokan nohora roti hadamonna?! Miy ralma-riormi edonna nla' nan ma'ta?! Ralammi ratehra to'owa. 18 Matmi reprepra mere edon mimkek nana, ne mtiaru tlina mere edon mitail nana. Miy edonna mhiorat nan ma'ta?! 19 La' lera maka Aghawierie'er roti wolim pa Agaitiutur nana riy riwnu wolima, de miy orgahami miwok nan korni kriou penpuen re, maka ha ra'an atre'a re wo'ira?" Rwahla riwra: "Kriou termida wehrani woru." 20 "Ne la' walia rot mieha wo'itu maka Agala tiutria riy riwnu wogata, dewade miwok rehenu de kriou penpuenu re wo'ira?" Rwahla riwra: "Kriou wo'itu." 21 Noma Nakot la re: "Miy ralma-riormi edonna nla' nan ma'ta?!"
Yesus Nhi' kalwieda mat yatni id matni
22 Nhor nioka Yesus Nora maka ha Nwatutu-nwaye'a re rte'ela leta Betsaida. La' hande de, riy rodia maka matni yata id pa rla rwak la Yesus pa, totpa Nteman nana la. 23 Yesus Nte'la la mat yata de limni pa Nodgiota la leta to'orni. Noma Nakrui lia riy de matni, ne Nteman limni la riy de matni, noma Natiana Niwra: "Mumkek oleka hadomdoma?" 24 Riy de namkek la gaini, nhor nioka niwra: "A'umkek nan riy, yoma a'umkeka riy ralala'a, mere yamkekni emolmolan to'a orona-augona." 25 Yesus Ntemn owa'an limni la riy de matni, dewade riy de ntot pa niwra namkeka na'nama riy de matni nkalwied wa, nhi'nande namkek nana hya'a-hya' de reprepra. 26 Nhor nioka Yesus Nhopan pa riy de nla'awa romni mere Nakot la: "Mlia' de yana mliola leta de ralamni pa mpiahauria hadi!"
Petrus nwayow nohora Yesus de maka Uplerlawna Nano'taru inhatta
27 Noma Yesus Nor mutwualli re rla'a leta-ruhun mak kdella leta Kaisarea Pilipi onni. La' talan letgara Enatiana mutwualli mak ha Nwatutu-nwaye'a re Niwra: "Nhi'inde riy e riwra A' die he'o?" 28 Noma mutwualli re rwet la riwra: "Tuna, riy dom de riwra Yohansi makharani O'a, mak kmori owa'ana, dom de riwra makwohorulu-ktatrulu Eli. Dom de riwra makwohorulu-ktatrulu dom to'a." 29 Noka Yesus Natian owa'ana: "Mere A'utian tek miy. La' miy wniarormi de, A' di de he' A'u?" Noma Petrus nwet la: "Matro'mu, O' di de Ray mak kodia mormiori-lewlewna maka Uplerlawna Nano'taru (Mesias) O inhatti!" 30 Noma Yesus Nakot la maka ha Nwatutu-nwaye'a re Niwra: "Maka Petrus nakota de naplol memna mere yan memmemna mikot nohor ma'ta hadella riy doma."
Yesus Nakot nohora kropna-krieutu mak kodia E' la matmiati
31 La' ler de de pa nodi liarni Yesus Nwe'er doin meman la maka ha Nwatutu-nwaye'a re, de Uplerlawna ralma-riorni totpena Rimormiori A'na E' de hota Ntutulu-nlelewua kropna-krieutu, yamuki-yama'ala, me hota ina-ama Yahudi rora imam-imam re o'tani-matni, me makwatutu-kwaye'a agama rwayotli E'a. Ne Uplerlawna Nala pa hota rwen E'a mere la'pa nodia la lera wotellu owa'an de Enmori owa'an la E matmiati ralamni. 32 Nakota ploloi-plele'era lir di. Noma Petrus nheduma pa nte'la la Yesus pa rla'awa walli na'nama npolliohora Yesus pa nakot la: "Matroma, awuakwak de Uplerlawna Nter dioini-nhal doinia mak Omukot de!" 33 Hya' maka Petrus rakota de edon nlernohora Uplerlawna ralma-riorni pede Yesus Nkillia maka ha Nwatutu-nwaye'a re na'nama Nawenan la Petrus Niwra: "Eh, mlia'awa walli hega'nu ne! La'pa omiwra hota A'g edon lier la yamuki-yama'ala de wniarormu de wniarora rimormioria de. Wniaror de edonna nwatiawua Uplerlawna." 34 Noka Yesus Npolga riy mutlialawna rora maka ha Nwatutu-nwaye'a re pa Nakot la Niwra: "Riy meni mak kiwra klernohor A'u, de nhoratdoin momuoga hya' ed maka e ralamni nod rer lia, ne nre' wut lia A' pua nler la yamuki-yama'ala onde matmiati pa emolmolan nekama nhoi wawayanni la auwlakra pa nlernohor A'u. 35 Yoma la'pa hameni maka edon nhoratdoinia mormiorni noh di wawannu de hota e' edon nler la mormiori-dardiari plalahwa pa nodi liarni. Mere la'pa riy maka khoratdoinia mormiorni la noh di wawannu onnila A'u me Uplerlawna Kot Kalwiedni-Paitiotni rerieini, de hota nlernana mormiori-dardiari pa nodi liarni. 36 La'pa riy mak klernana nohkeran di re'eni-tniarnu honona mere hota edonna nlernana mormiori-dardiari plalahwa pa nodi liarni, de hota re'eni-tniarnu re nodi untu hya' la' riy dena?! 37 Nohkeran di re'eni-tniarnu honona, ta'en niana nawel niana mormiori-dardiari plalahwa de mai ita toh?! 38 La'pa he' maka kmola-kma' pa kreinian A'u me kwayow nana A li'ru-A tu'nu la' riy yatyata-halala mak kahmena pesiay gaini ralamni la'a lera-mela ri, de hota Rimormiori A'na A' muana, muola-mua' wal pia rieinian riy della, la' ler maka hota Amuai owa'an de godia A A'mu plolli-mneheni hititni-repreparni pa Agor wutga Uplerlawna hopopanni (malaikat) mak edon kheik la do'a-hala ralamni Ammai die."
1 "Mhioratreria! Hota la'a miy hononmi la handi de riy dom de mak edonna rmati mia'ta mere hota ramkek ulu Uplerlawna Nodi plolli pa emeka mak ktorna-krautu."
Maka Yesus ha Nwatutu-nwaye'a re ramkek nan memna Yesus hitni-reparni
2 Noma la'pa lera wonema rlardoinla noma Yesus Nodia Petrus nor Yakowsi me Yohansi pa rmeh'a rla'awa wo'or tutulu id hananni. La'pa rwatniar temna Yesus de gaini to'ama. 3 Ne naniayarni hitita-reprepra. Riy id la nohkerkeran di wawannu mana edonna namkek taru naniair wawahra mak emkade. 4 Plin-plinnianamde maka Yesus ha Nwatutu-nwaye'a re ramkek nan walia Elia, Musa rora Yesus rwahauru. 5 Noma Petrus nakot la Yesus Niwra: "Tungkurga, itden la handi de samoga, pa hota Ompuayowa de amariria hoiwiali wotel lia handi totpena id la O'a, id la Musa, ne id wal lia Elia." 6 Nakot emkade yoma naplin niohora hota hya' maka ha nakota yoma ramta'at wenna. 7 Dewade kakam lawn ida npupun nana re noka ratlin nana lira ida nwatiawua kakam de ralamni pa Niwra: "A A'nu maka Asiayn memna inhatti. Mitlin la E lirni." 8 Plin-plinnianamde la'pa rkillia walli-walli ir edonna ramkek owa'ana riy doma, eneknek to'ama Yesus Nmeh'a. 9 La'pa rwatiawua wo'ora pa rerun wa noma la'a talla ralamni de Yesus Nano'a re Niwra: "La' de yan memmemna mikotkot nohora hya'a maka mimkeka re la'a riy. Mpiei niek pa nte'ela lerni mak Rimormiori A'na A' die hota muori owa'an la matmiati ralamni." 10 Pede ir edon rakot nohor memna hade la'a riy doma, mere idma rwahu'ru ralma-riora la ida riwra: "Yesus lirni Niwra: "Ramori E la matmiati ralamni" nnia'eratni de hya'o?" 11 Noma maka ha Nwatutu-nwaye'a re ratiana riwra: "Hya'a nrei pia makwatutu-kwaye'a agama re e riwra hota Elia nmai ulu nampena Ray maka Uplerlawna Nano'tar pua Namori-nalewna rimormiori Nmai?" 12 Noma Yesus Nakot la re Niwra: "Plola hota Elia nmai ulu pa nwaho'a-nwatiernia hare honona. Mere nihya' pede ha rhorat targa la Puka ralamni riwra Rimormior A'na A'u hota Alier la kropna-krieutu, yamuki-yama'ala, nniahora-nniala'a me rwayotlia A'u? 13 Mere A'ukot tar tiy miy. Elia nmai olekwa, ne irlernohora ir ralam wamueheni pa rhi' yatyat e'a, rlernohora hya'a maka ha rhorat targa la Puka ralamni la'a e wawannu."
Yesus Nhi' kalwieda keke'en maka hegana-kawnu ha nhu'ru ralma
14 Noma Yesus Nor wutga ir wotelu rawali owa'an la riy maka ha Nwatutu-nwaye'a re korni. Na'nama ramkek de riy harahu er walia la hande, ne makwatutu-kwaye'a agama e rora maka ha Nwatutu-nwaye'a re rawo'or nohora. 15 La'pa riy rahu re ramkek nana Yesus wa dewade rheduma, noka rmahrur pua rwatroma. 16 Dewade Yesus Natiana re, "Hya'a mak miwo'or nohora?" 17 La'a riy woklawan de ralamni de muanke' ida niwra: "Tungkuru, a a'nu di agodia tiy O'a, yoma hegana nhu'ru ralma pa naplinu naltieri. 18 Ne la'pa hegan de nhu'ru ralma, a'nu di de nalitria pa lakweheiya la nohmarna, aparni nou-natna, nut nihini me inonni nweher wenna. Awuak olek la maka Ompuatutu-mpuaye'a re totpa rhokar doinia hegana-kawun della mere taken niana irhokar doinia la." 19 Noma Yesus Nakota Niwra: "Hoi, miy mak kakleha pesiay. Hota lera wo'ir owa'an pa Agor miy tialla me Agod niohor miy, nanpena mimpiesiay A'u?! Miodia keke'en de mmiai!" 20 Noma rodi keke'en de. La'pa hegan de namkek nan Yesus dewade, plet pa nkarwa'ga keke'en de la tani wawannu pa limni-lakni totok la wewehera, nwakloli-nwaklali, ne aparni mana nou-natna. 21 Noka Yesus Natiana keke'enku' de amni niwra: "Anni wo'ir olek la hadi nlernana hadina?" Wniahlani: "Nlernana hadi la' ler maka kuku' ma'ta. 22 Nhi'inde hegan de na'ita la ai ralamni onde la' gera ralamni pa ntota pa nwenna. Hade pede la'pa Tuna Nodi plolli pa Mtiulan mai ami, de Mtiulan-msiayn nan ami ee!" 23 Yesus Nakot la: "Lirmu miwra: "La'pa Agodi plolli?!" Uplerlawna Nodi plolli pa Nhi' nana hya'a-hya' to'owa, hornama riy rpesiay E'a." 24 Na'nama keke'en de amni nhaun pa niwra: "Apuesiay olekwa. Mere Mtiulan la a pua a ralmu yana worwuorga mere yeher to'a a pesia'yu naruri." 25 La'pa Yesus Namkeka riy harahu rma rhopnu-rpepan wa dewade, Nhok temna hegan de Niwra: "Hega'nu na maka khi' riy pa rhatilu-rhamanu, Aghopnu, mhuargot la la keke'en di, ne yan muwali owa'an la ralamni!" 26 Noka hegan de nhaunu-nhaunu me nkahyoi-nkada'ala nan memna keke'en de na'nama nlergot la ralamni. Keke'en de, tamkek de emek mati, nhi'nande riy rahu riwra: "Nmati olekwa!" 27 Mere Yesus Nte'la la keke'enku' de limni pa namata, dewade nmeh'a naprir wia. 28 La'pa Yesus ed olek la roma nayanni, ne maka ha Nwatutu-nwaye'a re rmeh'a rora, dewade ratiana riwra: "Tuna, hya' nrei piede taken niana amhokar doinia hegana-kawun della?" 29 Nwahla re Niwra: "Eneknek to'ama msiumbaini plein, nanpena mliernana plolli-mneheni pa mhiokar doinia hegana-kawnu mak emkadi."
Yesus Nakot nohor owa'an la'a matmiatni
30 Yesus Nora maka Nwatutu-nwaye'a re rwaran la hande pa rlola Galilea lowanni, ne Yesus Nahmena riy rat niohora eda de, 31 yoma entepartarlia wniatutu-wniaye'ela maka ha Nwatutu-nwaye'a re. Nakot la re: "Rimormiori A'nani A' die, hota ral A lia rimormiori limni ralamni. Ne rwen A'u mere hota Amuori owa'an la matmiati ralamni, la'a lera wotellu." 32 Mere maka ha Nwatutu-nwaye'a re edonna rna'erit nana Yesus Nakotkota re. Ne ir nek de ramta'at wali pia edonna ratian la'a-maiya Yesus ralma-riorni.
Riy mak ed maka inponni la Uplerlawna yamkekni de riy mak katu klol yawa
33 La' noka Yesus Nora maka ha Nwatutu-nwaye'a re rmai lia leta Kapernaum. La'pa Yesus ed olek la roma ralamni, dewade Natian nohora maka ha Nwatutu-nwaye'a re: "Hya'a maka miwo'or nohora la talla letgarni dena?" 34 Mere ir edon rwahla E lirni yoma la'a talan letgar de rawo'or nohora he' ed maka inponni narehi lia ir mutnu ralamni. 35 Noma Yesus Namtatna na'nama Npol wutu maka ha Nwatutu-nwaye'a termida wehrani woru re pa Nakot la re: "He' mak katu klol yawa me natu nhima-nre'a e rimormior wialli ed maka inpon rehia la Uplerlawna yamkekni." 36 Noma Yesus Ntorreri keke'enku' ida limni na'nama Nala pa ntutrier lia ir honona gaini ralamni, nhor nioka Nkorreri keke'enku' de pa Nakot la re: 37 "Hyal miy re, hota he' mak kreiniana-ka'nana keke'enku'a emeka hadi onnila A rerie'yu de emekwalima nreinian olek A wua. Ne la hameni mak kreiniana A'u, de emekwalima nreinian olek walia Uplerlawna mak khopn A'u."
Riy mak edonna khoklira-kpah'a waw la Yesus hota ir er maka ktulan la E'a
38 Yohansi Niwra: "Tungkurga, ami e mamkeka riy rhokra hegana-kawnu, de e rwet la Tuna nanni pede ami e mlarna de yoma it mutwualli atia'a hade." 39 Noma Yesus Niwra: "Yana mliarna de, yoma hameni mak khi' hihi'a-yapyapi mak kamehi-kayona, de e rwet la A na'nu edonna plet pa rwaldioinia pa napolu-naliella A na'nu. 40 Yoma hameni mak edonna khoklira-kpah'a wawa la ita de nnia'eratni de ir er maka ktulan la ita. 41 Mhioratreri, plolli pa he'a nala gera pa miy miemnu totpa natihliutu-nawriena aran miy onnila miy di de maklernohor Kristus, hota nlernan memna siewni-kaini la'a Uplerlawna."
Yana mhi' pa keke'enku'a me riy mak kakleha weli pa edonna rpesiay owa'ana
42 "He' ed mak kariei pia riy mak kakleha weli emeknekama keke'enku' di pa edonna rpesiay owa'an mai A'u, de Uplerlawna niukamnu la' riy de nareh dioin meman la'pa riy rkohg watga werwerta id la e tiernu totpa ratepar wenna la hletan lawna. 43 La'pa limmi ed mak kodi miy lia do'a-hala de mdieul dioinia la. Yanpa miodi limmi rora re pa rnakulta'ru la ai mormiori ralamni 44maka ta'eni rwarum nana me oranni mak kden hande mana edonna nmati . Samomuounu de miod lim memehemi pa mior tiemna Uplerlawna la Ilyamou-Watyatoha. 45 La'pa lakmi ed mak kodi miy lia do'a-hala de mdieul dioinia la. Yanpa miodi lakmi re rora pa rnakulta'ru la ai mormiori ralamni. Samomuounu de miod lak memehemi pa mior tieman Uplerlawna la Ilyamou-Watyatoha. 46Yoma ai mormiori die ta'eni rwarum nana me oranni mak kden hande mana edonna nmati. 47 Ne la'pa miy matmi ed mak kariei pia mlier la do'a-hala ralamni de mkiopil doinia. Yanpa matmi rora tetema pa rnaklia miy lia ai mormiori ralamni. Samomuounu de miod nieka matmi id pa mior tieman la Uplerlawna la lodanni-hairni. Yoma: 48 "Ai mormior die ta'eni rwarum nana me oranni mak kden hande mana edonna nmati." 49 Rima-rima de rala ai ra rakio'a. 50 Kio' de plola pa samoga, mere la'pa kio' de edonna nmahana, de ta'en niana ra'itr owa'ana ha mahanni toh?! La' mormiormi ralamni de mhi'a-myapia de emolmolan nekama kio'a, me yana idma nawo'or nohor ida."
Yesus Nwahaur nohora mehlimlimni idma nahmen doin id la
1 La'pa Yesus Nwahaur pa nhorwua noma Nwatitin la leta Kapernaum de pa Nla'awa noha Yudea, la' gerlawna Yordan walli. Ne la' hande mana riy rahu rmai tiemna, ne emekwali yehwa ululu de Nwatutg owa'an ira. 2 Noma riy Parisi rmai lia hande pa rtota-rwudia. Ratiana Yesus riwra: "Tuna, la'pa muanke'a ida nhopliala hawni patke'a de, lol tatra me edonna?" 3 Mere Nwahla Niwra: "Hya' ed maka Musa ne'er taru-ntatar targa tiy miy?" 4 Rwahla riwra: "Musa nwayow nohor pa tsi'a horta yapie'era la hawa patke'a maka it tahmen doinia la." 5 Noma Yesus Nakot la re Niwra: "Onnila o'ta tehrami lawan rehi nreiniande Musa nhorat taru nnie'era-tniatar di tiy miy: 6 "Mere la' ler maka Uplerlawna Nakoki-nayapi nohkerna E' ed maka khi'a-kyap niana rimormiori, de muanke'a nora patke'a." 7 "La hade pede hota a'na muanke'a ida naltarga inni-amni pa la nora hawni patke'a rla' wutg ida 8 totpa rla' ihyida-ralmida." Nhi'nande hare de riy worg atia'a, mere riy id to'a. 9 La hade pede la'a patke'a rora muanke'a maka Uplerlawna Nwatiehra oleka, de yan memmemna riy ida ntota pa nreiyapie'era." 10 La'pa ira rmai lia roma nayanni, dewade maka ha Nwatutu-nwaye'a re ratian wali Yesus la'a mak kapie'er la mehlima-marya'a. 11 Noma Yesus Nakot la: "La'pa muanke' ida nhopliala hawni de pa nla nora patke'a id owa'an rmehlima, enhi' do'a-hala la hawni patke'a de, yoma nhopliala hawni patke' de emeknekama nalira-naliai lia Uplerlawna yamkekni. 12 Ne la'pa patke' ida nhopliala hawni muanke'a pa nla nora muanke'a dom to' id owa'ana rmehlima, hade de yalira-yaliai lia Uplerlawna yamkekni."
Yesus Nran limni pa Nhilpai-nmanatga keke'enku'a
13 Doma rmai die rodia upni-a'nani la Yesus totpena Nran limni pa na Nhilpai-nmanatga re, mere maka ha Nwatutu-nwaye'a re rawenan la re. 14 La'pa Yesus Namkek nana hihi'ini re dewade Nawenna pa Nakot la re: "Miolin doinia keke'enku'a re pa rmai A' die. Yana mpiayotlia re, yoma riy mak edon katulu-kapetna inonni mere plet pa rpesiay pia emeknekama keke'enku'a re er maka Uplerlawna Nwaliria pa rler teman la riy mak kmormior lia E tnioranni-riautnu ralamni. 15 Mhioratreria, riy maka edonna kpesiay Uplerlawna pa emeknekama keke'enku'a rpesiay, de hota edonna rler wut lia Uplerlawna mutnu-rahanu." 16 Noma Yesus Nkolla keke'enku'a re, na'nama Nran limni la wawannu re pa na Nhilpai-nmanatga.
Riy mak kre'a-ktaru re olieta-patou mueman pa rler wut lia Uplerlawna mutnu-rahanu
17 Ler maka Yesus Nwaran pa Nodi liarni la yala'ani de, riy ida nawlar niohora pa nwatroma, na'nama nwaltior la gaini ralamni pa natiana niwra: "Am tungkurga, mak kalwiedweda O'a! Hota aghi'a hya' totpena aliernana mormiori-dardiaria plalahwa pa nodi liarni?" 18 Noma Yesus Nakot la Niwra: "Hya'a nrei piede omhuari lirmu mai A die muiwra A' di de riy kalwied id A'u? Riy honona edonna rkalwieda, eneknek to'ama Uplerlawna Nmeh'a nanpena Nkalwiedweda. 19 Ne orgahamu muat niohora Uplerlawna riorni-liaini (deullu-tatarni) niwra: "Yana mpunu-mpuenna, yana mulira-muliai, yana mkiamnelu-mkiamna'a, yana muod niana riy mak khala, ne mputra-mpalka, muatu mu'unni-mumta'ata inmu-ammu."" 20 Noma riy de Nakot la Yesus niwra: "Tungkuru, maka Mukot taru honona re de aliernohora momuog oleka la'a adien ma'ta la tuwari-laweru lewatni la'pa ntutu-nte'ela' ler di." 21 Yesus Namkek tertehra riy de ne Nsaynia. Nakot la: " Hyalia, id edama pa yana mhuoratdoinia. Hota mlia'awa pa mu'ol dioin momuoga re'emu-tniarmu pa muala welli kupna-kai la'a riy mak kakleha-kaplara, a'na ri'ini patyatni, ne hota omliernana re'a-tniaru la Ilyamou-Watyatoha. Mhi' hare honona nanpena ma mliernohor reri A'u." 22 Mere la'pa riy de natlin nana lira-tunu re dewade gaini nwahra pa nla'awa de ralamni nmolu-nhelam doin la, yoma re'eni-tniarnu harahu rehia. 23 Yesus Namkek la maka ha Nwatutu-nwaye'a mak kdella walli-walli re na'nama Nhar lirni la re Niwra: "Riy mak kre'a-ktaru riwra rre' teman la Uplerlawna mutnu-rahanu, de rler la yawuhi-yawe'et lawna." 24 Maka ha Nwatutu-nwaye'a re rheduma yoma lirni de. Mere Yesus Nakot owa'ana: "U'pu-a'nu miy re, riy mak kha'ar aranni la'a re'a-tniaru riwra rre' teman la Uplerlawna mutnu-rahanu, de rler la yawuhi-yawe'et lawna. 25 Yoma riy mak kre'a-ktaru mak kiwa rre' teman la Uplerlawna mutnu-rahanu mak Enodi plolli la emeka Ray, de hota emeknekama hayori lawna niwra nlola nhior lawra hu'ulli, mere taken niana." 26 La'pa maka Yesus ha Nwatutu-nwaye'a re ratlin nana Yesus lirni-tunnu re yeher to'a pa honona re rwer rer wiawni. Noma rakot la: "La'pa makre'a-ktaru re ta'en niana rla' Uplerlawna mutnu-rahanu de hota he' ed maka klernana mormiori-dardiari plalahwa de ho'a?" 27 Yesus Namkek la honona na'nama Nakot la Niwra: "Ta'en niana rimormiori ramori-ralewna inonni. Mere Uplerlawna Nodi plolli pa Namori-nalewna ira, yoma Uplerlawna plolli-mneheni etla pa Nhi' nana-nyap niana hare honona."
Itlernohora Yesus de de, tlernana hya'a
28 Noma Petrus nhar lirni pa niwra: "Matroma, a hononam di de ami e mto'or momuou lia haneknek wawannu pa ami e mlernohor O'a!" 29 Yesus Nwahla lirni de Niwra: "Mpiesiaya, la' pa he' ed mak kaltarga romni, nor wutga hawni-a'nani inni-amni inni-narni onde nhyi'ini, yoma la' A rerie'yu me la'a Kot Kalwieda rerieini 30 de hota riy de nlernan memna wniahlani la Uplerlawna la' lera-mela ri. De nlernana rahu ida tni'illi la'a romni nor wutga hawni-a'nani inni-amni inni-narni la'pa nhyi'ini, me nlernan walia yamuki-yama'ala. Ne hota la' ler maka kmai die e nlernan walia mormiori-dardiari plalahwa pa nodi liarni. 31 Mere hota riy mutlialawna makla' orkotkota-ornanana onde mak kre'a-ktaru hota rtawli'iru ne mak kakleh weli onde mak edon kre'a-ktaru hota rala' ul tiargho'a."
Yesus Nwahaur re'eni id owa'an la'a E matmiatni
32 Noma Yesus Nora maka ha Nwatutu-nwaye'a re e ralala' rer pia rokru Yerusalem, ne Yesus Nala'a la gaini. Pede maka Yesus ha Nwatutu-nwaye'a re ema rtaplelleltarga, ne riy rahu maka klelernohora pa ktawli'iru re, ramta'at wali. Ralamni owa'ana Yesus Nawoka-nale'ga maka ha Nwatutu-nwaye'a re riy termida wehrani woru pa rmeh'a la' gen ida na'nama Nakot nohora la'a hya'a maka hota riy rhi' nana la E'a. 33 Lirni: "Mitlina! Dodo'ondi de itsortut niana Yerusalem. Hota la hande de ra'ol Rimormiori A'na A' die la imam-imam o'tani-matni me la' walia makwatutu-kwaye'a agama pa ra'anlira-remunwawa pa hota ha rukum pen A'u. Nhor niampena ral A lia riy maka Yahudi atia'a re. 34 Hota rhi' A lia hamalmialia, me rakrui lia A ga'yu ralamni. Hota rliwra-rkaklia A'u me rwen A'u mere la'pa lera nodia wotellu, noma hota Amuori owa'an la matmiati ralamni."
Riy mak katu klol yawa me nhima-nre'a er maka inpona la Uplerlawna yamkekni
35 Noka Yakowsi nora Yohansi, Sebedeus a'nani re rmai tiemna Yesus pa rakot la: "Tungkuru, ampak de Omhur niohora a wakwak mamni ida!" 36 Nwahla re Niwra: "Hya' ed maka mpiaka pa Aghi'a tiy miy?" 37 Noka riwra: "Mpuayow nohor pa amor O'a mamtatan pa mhapetre'ru la geni hitita-homomarmu ralamni, totpa amlernan wali ya'uli-yawedi." 38 Mere Yesus Nakot la re: "Miy miplin niohora miy wakwakmi de. Hota miy di de mpiaran pia mitahan nana kropna-krieutu nniahora-nniala'a maka Aliernan dena?" 39 Noma rwahla Yesus yatianni de riwra: "Hota amtahan nana." Yesus Nakot la re Niwra: "Plola hota mlier la kropna-krieutu maka Aliernan de, 40 mere hota la'pa mak kamtatan la A wa'lu malwiru-malganna pa rhapet reri A' die, A'g edonna godi plolli pa wuet la riy meni ed mak kamtatan la gen die. Mere he' ed mak kamtatan la geni-tien de, Uplerlawna Nwalir nian oleka hare la' ululu." 41 La'pa riy mak ha Nwatutu-nwaye'a re korni riy termida re ratlin Yakowsi nora Yohansi wakwakni de ralamni ramehra la riy maroro'a re. 42 Hade pede Yesus Npolg awoka momuoga honona na'nama Nakot la Niwra: "Hyal miy re, miatg oleka de maka ha rhoiya la o'ta-mat lalawna me mak klernana gen tiutullu maka kodi plolli la' luwu-a'na mere raplin niohora Uplerlawna, de rtern apitga limni-rorni. 43 Yana mhi'a nhioli-liet mak emkare. Mpialdioinia de, la'pa he' mak kiwra klernana gen tiutullu, talanni, de nhoi-ntania rimormior wialli pa emeknekama hopopna ida nhoi-ntania matromni. 44 Ne la riy mak kiwra kala' ul miy, de nwahyar tialan pa rimormior wialli rlola pa emolmolan nekama ata-wa'ara ida nhi'a la matromni. 45 Yoma Rimormiori A'na A'u nek de Amuai die A wniaro'ru totpa edonna rhoi-rtani A'u, mere Amuai die ghoi-tiania rimormiori, me gal ino'nu emeka tniuwu-nhiaiya pa A'ulewna rimormiori harahu mak kwatiawua hairi-hairi honona."
Yesus Nhi' kalwieda riy maka matni kyata
46 Noma Yesus Nora maka ha Nwatutu-nwaye'a re ralala'a pa rte'ela leta Yeriko, de riy rahu lidna-tauru. La'pa rwaran la Yeriko, de riy ida mak matni kyata e namtatan pa nmeh'a nawakwaka la talla aratni. Riy di de, nanni Bartimeus, Timeus a'nani. 47 La'pa natlin nana riy mak kmai, de Yesus mak kwatiawua Nasaret, dewade mak matni kyat de nhaun pa niwra: "Yesus, Ray Daud upni-a'nani ne! Mtiulla-msiayn nan a'g ee!" 48 Riy harahu mak kden la hande rawenan la riwra: "Hoi! Molmuo'lu!" Mere yeher to'a ma narur lia nhiaunu pa niwra: "Ray Daud upni-a'nani nee! Mtiulan-msiayn nan a'g ee!" 49 Noma Yesus Ntut tiaru na'nama Nhopan pa rla rpolga mak matni kyat de. Dewade rla rpolga riwra: "Ee! Mutetehra ralammu pa muprir pia mmuai, yoma Npolg o'a." 50 Noka mat yat de no'lu dioinia rain plalahwani, na'nama naprir pia la nwatroma Yesus. 51 Yesus Natiana Niwra: "Hya' ed maka mpuaka mai A'u?" Noma mat yat de nakot la Yesus Niwra: "Tungkurga, awuak de a'umkek owa'ana!" 52 Noma Yesus Nakot la Niwra: "Hademkade de mlia'awa. Yoma ompuesiay A'u pede mkialwied wa!" La'a mtatan de nekpa matni re raphyar wia, noma riy de nlernohor reri Yesus la talla ralamni.
Yesus Nler la leta Yerusalema ralamni de riy ra'uli-rawedia
1 La'pa Yesus Nora maka ha Nwatutu-nwaye'a re rhi' pa rwakriania Yerusalem noma rlola Betfagi nora leta Betania mak kdella wo'ora Saitun hananni. Noma Yesus Nhopan pa maka ha Nwatutu-nwaye'a riy woru rala' ulu 2 pua rla'a let maka ir rwakrian olek de. Yesus Nano'a re Niwra: "Hota la'pa mimtie'ela hande de hota mimkek nan memna keledai a'nani ida e nakniohu. Keledai de edonna rwatutu ma'ta nhia'ani. Ne mlieretniekla miewar doinia la pa miodia la handi. 3 La'pa riy ratian miy lia hya'a nrei pia mimpie'er doinia keledai dena? De mikot la miwra: "Itmatromlawanni e Nwaka (perlu) de! Ne hota Nnairia pa nhorwua de plet pa Enhopan pa amodi mai owa'ana."" 4 Dewade riy maroro'a re rla'awa, la' pa rlernana keledai trapriapi ida nakniohu lia puohra gaini walli tio'ora, la' talla aratni. La'pa e rewar rer mia'ta keledai a'na de, 5 noma riy dom mak ktutrier lia hande ratiana re: "Hoi! Hya'a nrei pia mimpie'er doini keledai a'na dena?" 6 Noka rwahla re rlernohora hya' maka Yesus Nakot targ oleka la ira. Noma riy re rollia ir pa rwe'er doini keledai de pa rodia. 7 Nhor nioka rodia keledai della Yesus nhor nia'nama rala ir rain plalahwani ra rwowa keledai de to'orni totpena Yesus Nha'a nana. 8 Riy harahu rtutga nhiu'ru-nhielma la'a rala naniair plalahwa ra rwowa la' talla, me korni rtuhia ora tawi-au tiawi motmota la'a nhyi'ini pa ra re'era la talla, totpena keledai de nlola wawannu. 9 Riy rahu re la'pa rlol gaini me mak ktawli'iru pa rletgar nana Yesus. Ne rhaunu-rhaun pa riwra: "Ya'uli-yawedi nden rer tiy O' ee! Ta'uli-tawedi, tsu'ru-tselma O' mak mai pia kodia Orgahi-Orha'a nanni! 10 Ya'uli-yawedi la Ray Daud upni-a'nani mak kmai pia Ntorna-nrautu! Ta'uli-tawedi, tlilili-tmamuau E la tutullu-lolo'oni!" 11 La' pa rte'ela Yerusalem dewade Yesus Nla'awa la Uplerlawna roma kreini. La' hande de Nlili-nloh momuoga, mere yoma lera nhi'pa nmel wa de Nlergot pa Nora maka ha Nwatutu-nwaye'a termida wehrani woru re rokru leta Betania.
Yesus Nlokar wenna kar on ida
12 La'pa repar wa noma Yesus Nor mutwualli re rhoitio'or la leta Betania pa rla'awa dewade Yesus Naplar olek wa. 13 Noma Yesus Ndella oliet pa Namkek nana kar ona ida mak katawi olek wa, noma Nla Nwahak wo'oni pa Na'ana, mere kar on de nakleh wo'a. Mere tawni mamaini yoma kar wo'a lerni edon ntut ma'ta. 14 Noma Yesus Nhar lirni la kar on de Niwra: "Dodo'ondi mkieran wa pa hota omukleh wo' owa'an wa!" Ne maka ha Nwatutu-nwaye'a re mana e ratlin reria.
Yesus Nhokra-nlai mak ka'olu-kala'a la Uplerlawna roma kreini
15 La'pa rte'ela la'a Yerusalem noma Yesus Nla'awa Uplerlawna roma kreini herni-gaini na'nama Nhokra-nlaiya mak ka'olu-kala'a kaweli-kaphar la hande. Nte'la la mei-kader maka ha rwahernia kupna me mak ha ra'olu-rala'a ma'nu loktieru, pa Nkowa-nwalia. 16 Ne edonna Nhur dioinia riy pa rodia yohya' maka ha ra'olga pa rleret lia Uplerlawna roma kreini herni-gaini. 17 Noma Nakot la mak ka'olu-kala'a kaweli-kaphara re Niwra: "Edon miat niohora hya' maka ha rhorat targa la Puka ralamni la'a Uplerlawna lirni?! De Niwra: "Hota rweta A ro'mu de roma sniumbain geni la'a noha-rai honona la'a nohkerna-rai miaran di." Mere miy e mhi'a la roma kamnelu-kamna' geni!" 18 Imam-imam o'tani-matni rora makwatutu-kwaye'a agama ratlin nan hade dewade rahak talan pa rwenna Yesus, yoma ramta'at E'a, onnila ramkeka riy rahu e rwer rer wiawni la E wniatutnu de. 19 Lera la nhelma dewade Yesus Nor wutga maka ha Nwatutu-nwaye'a re rwaran la let de.
Yesus Nwatut nohora it pesiayni la' Uplerlawna
20 Repardoin de Yesus Nora maka ha Nwatutu-nwaye'a re ralala' reri de ramkek de kar on de nkern olekwa, nla meman la ga'arni. 21 Noma Petrus nhoratnana Yesus Nlokar oleka kar on de, noka nakot la Yesus: "Tungkuru mumkek la kar on maka Mliokar de nmati olekwa." 22 Yesus Nakot la re: "Miy pesiaymi narur lia Uplerlawna! 23 Mhioratreria, he' nakot to'ola wo'or di pa nwarei lia tah'i lawna hota narinin la' tah'i lawna ralamni, hornama pesiayni edonna nwalera mere npesiay toto'a. 24 Mhioratreria! Hya' to' pa mimpiaka la'a miy sniumbainmi de hota mimliernana, hornama pesiaymi de yana nwalera. 25 Ne la'pa msiumbaini, de mhioratdoini riy do'oni-halli, hihi'ini-yapyapni tiy miy, totpa Ammi mak kdella Ilyamou-Watyatoha mana Namou-nawitna do'omi-halmi. 26Mere la'pa miy edon mhioratdoinia rira do'oni-halli tiy miy die, Amlawanmi mak kden la Ilyamou-Watyatoha mana edonna Namou-nawitna do'omi-halmi."
Ratian nohora Yesus plolli-mneheni de ha nwatiawua hanmeni?
27 Noka Yesus Nora maka ha Nwatutu-nwaye'a rte' owa'an la Yerusalem. La'pa Yesus Nalala'a la Uplerlawna romni herni-gaini dewade, imam-imam o'tani-matni re me makwatutu-kwaye'a agama, ror wutga Yahudi in letni-am letni rmai pia 28 ratiana Yesus riwra: "Tuna, he' ed mak ktemna plola-mneh della O limmu ralamni pede Omhi' nan hihi'imu-yapyapmu rena?" 29 Noma Yesus Nwahla lirni re Niwra: "A'g e giwra utian tek miy la'pa mimpiet nana, de hota Awuahla miy, de la'a he'a plolli pede Aghi'a hihi'a-yapyapi re. 30 Pede A'utian tek miy, de hota Yohansi makharani de ha nlernana plol della he'a? Uplerlawna onde rimormiori?" 31 Dewade honona re rwahu'ru ralma-riora wamueh'a pa riwra: "La'pa itwet la Uplerlawna ed mak kala plolli la Yohansi de hota Eniwra: "Ne hya'a nrei pia miy edonna mpiesiay e'a?" 32 Mere yana it twet la tiwra: "Rimormiori plolli-mneheni hade."" Rakot emkade yoma ramta'at rer lia rirahu yoma honona rpesiaya de Yohansi de makwohorulu-ktatrulu id hade. 33 Pede honona rla' lir id pa rwahla Yesus riwra: "Ami e maplinga." Noma Yesus Nakot la re Niwra: "Hade emkade, de A' muana edonna ukot wahyaria tiy miy la'a he'a mak kala plolli mai A' pua Aghi'a hihi'a-yapyapi re."
Yahudi o'tani-matni re emolmolan neka maktimni-makdahara mak nhiol yata
1 Noka Yesus Nwahaur la imam o'tani-matni, makwatutu deulu-tatra, ror wutga ina-ama leta re Nnairia lira yawalliohora. Niwra: "Ornoha ida nawuli-natniamin anggur wo'a la nhyi'ini-tlunanni ralamni. Nteman riwta la nhyi' de walli-walli. Ne nahia hu'ula maka rahmi anggur turnu la ralamni. Nhor nia'nama nariria yatiak geni. Nwahi'a pa nhorwua noma nala nhyi'-tlunni anggur della riy rtimnia. Ne nla nalaun la riy ornoha. 2 La'pa ntutu la lerni-melli pa riwra rreiki-rwo'or wa noma ora nhyi' de nhopna e hopopanni-li'irnu id pa nmai pia na'ala ora nhyi'a nhiakarni la timanni-daharni. 3 Mere mak ktimni-kdahara re rwaldioin targho' pa rtorna ora nhyi'a hopopanni-li'irnu de, rwanalga me rhopan pa nawal die nhapirteum nan to'a. 4 Noma ora nhyi' de nhopn owa'ana hopopanni id owa'ana. Mere emkade walia rliwra-rkaklia o'tani na'nama rahe'i-ramalia. 5 Noma ora nhyi'-tlunni de na'enyat owa'ana hopopanni id to' pa nmai owa'ana, ne riy di mana rwenan nana. Ne korni mana harahu wali, dom de rliwra-rkaklia, dom de rwunu-rwenna. 6 Korkorni de tre' ma'ta to'a a'na mak nsayn memna o'ta wat memeheni. Dewade ora nhyi'-tlunni de nhopna e a'nani yoma la'a wniarorni de: "Matialo'onamde ha rhu'ru-rhelma a a'nu." 7 Mere mak ktimni-kdahara re idma nakot la ida riwra: "Maka hota kodi plolli la ononni e inhatti! Mai pia itatuinia aranni totpena hota nhyi'a-tlunan di it gahani!" 8 Dewade rtorna riy de na'nama rwenna pa rnaklia la nhyi' de to'orni." 9 Noma Yesus Natiana la mak katlina re Niwra: "Nah! La'pa ora nhyi' de nawal pia nmai de hota hya' ed maka ha nhi'a la maktimni-makdahara reno? Hota nma nhapartikil nohora re ne hota nwenna re, totpena nal to'a la riy doma rtimnia." 10 Noma Yesus Nakot la re: "Miy edonna mpiaik ma'ta la maka ha rhorat targa la Puka ralamni (la'a wat muaka ha rtot nohora la Ray Makamori-Kalewna maka Uplerlawna Nano'tar dena)?! De niwra: "Wat muaka tukna edonna rnair nana pa rhi'a roma-lewu, mere rhopliala, de Uplerlawna Nnairi oleka pa Nhi'a la watu liar pianulu. 11 Hadi ed mak Orgahi-Orha'a Nhi'a. Adoh ha samounu nee!"" 12 Yahudi o'tani-matni rat niohora la yawalliohora maka Yesus Nakota de, de Enakot nohor ira, pede rwahak talan pa rtorna Yesus. Mere ramta'at rer lia' rirahu pede rhoitio'or doin la Yesus pa rla'awa.
Makden Parisi ratian nohora blastena totpena rtot Yesus la klieratni
13 Nhorwua noma rhopna Parisi dom ror wutga riy mak kher lia Herodes dom totpa rla'a rna'aili Yesus. 14 -15 Rmai pia ratiana riwra: "Tungkurga, amatga de riy plele'er id O'a. O' edonna Mhue'du nan etia riy ralma-riorni, yoma riy lalawna onde riy kuku'uni ho'mana O' edon Mpuadan nohora. Mere O' e Mpuatut die, Mukot nohor plollolli la Uplerlawna ralma-rior kalwiedwedni la'a rimormiori. La' hade pede Mukot teka la mai ami, de la O wniarormu de, la' it agamni deullu-tatarni de nakot am pia ampairia blastena la'a mak ktorna horta-hairi Romawi (Kaisar) onde yana?" Mere Yesus Nat niohora irtutga inon emeka riy mak samomuou mere plollolli de riy yatyat ira pede Nakot la re: "Hya'a nrei pia miwra mtiot A'u?! Mi'al tek la kupan dinar id pa A'umkek teka!" 16 Dewade rala kupan pi'ra id pa rtutga la Yesus. Noma Yesus Natiana re: "La kupan de he'a herni-gaini me he' nanni mak kden la kupan dena?" Noma rwet la riwra: "Ray mak ktorna horta-hairi Romawi (Kaisar) o'tani inhat ee!" 17 Noma Yesus Nakot la re: "Hade emkade, miala kupan maka ray herni-gaini etla de la'a ray, yoma hanni hade. Ne miala la Uplerlawna hya' maka Uplerlawna gahani wali." La'pa ratlin nana lira wniahla re honona, de honona rwer rer wiawni.
Yesus Ntekal reria Niwra riy mak kmati hota rmori owa'ana
18 Noma Saduki riy doma rmai pia ratian nohora Yesus la'a emkameni la riy mak kmati hota rmori owa'ana, yoma Saduki re er mak edonna kpesiaya riy mak kmati hota rmori owa'ana. 19 Riwra: "Tungkurga, Musa e nhorat targa mai ita, de emkadilla: La'pa muanke' ida nmati mere nakleh ma'ta a'na, de muanke'a mak kmat die hyalli nor owa'an yerni patyat de rmehlima, totpena rlernana hyalli mak kmati olek de duratni-waitni. 20 Mere la' lera ida, de muanke'a riy wo'itu rwahyal riaralma. Noma yanulu nmehlima, mere edonna nlernan ma'ta a'na, ne nmat wia. 21 -22 Noma garni mak klernohor hyalli nora yerni rmehlima mere edonna nlernan wal mia'ta a'na noma nmati owa'ana. La'pa emkade walli la'a hyalli re korni re ror owa'an yerni de rmehlima mere id mana nakleh ma'ta a'na de rmat wia pa emkade mamain pa nodi liarni pa la ntutu mueman la gari hoho'a. La'awa hohoni noma pat de mana nmat wia, mere nakleh etia a'na ida. 23 Hota la'pa la'awa lerni pa mak kmati honona rmori owa'ana, de hota he' hawni patke'a dena? Yoma mak kwahyali re wo'itu meman pa rora pat de rmehlima." 24 Noma Yesus Nwahla yatianni re Niwra: "Oi, miy wniarormi de nhala, yoma miplin niohora Puka lirni, me miplin wualia Uplerlawna plolli-mneheni. 25 Yoma riy mak kmati re hota rmori owa'ana, de hota edonna rmehlima, mere hota rmori-rdar lia Ilyamou-Watyatoha, emolmolan nekama Uplerlawna hopopanni (malaikat) la' Ilyamou-Watyatoha mak edon rmehlima. 26 Nah, la'a miy wniarormi de mak miwra riy hota edon rmori owa'an la matmiatni ralamni, de emeknekama miy edonna mpiaik nan ma'ta Orgahi-Orha'a lirni maka Musa nhorat taru, maka enatlin nana la' ler maka nlernan ai la'a pu'na-kiarti ralamni de. Orgahi-Orha'a lirni emkadi: "A' di de Abraham, Isak me Yakop Uplerlawna ma'ta A'u." Nakot emkade kennama Abraham, Isak me Yakopa rmati olekwa. 27 Ha nnia'eratni de Uplerlawna mutnu-rahanu maka kmati rmori owa'ana me Uplerlawna de ir Uplerlawanni. Uplerlawan de, riy mak kmati Uplerlawanni atia'a hade. E de de, mak kmormiori Uplerlawanni E'a. Pede miy wniarormi de nhal toto'a."
Lira nhiopna ononni
28 Noma tungkurga agama ida maka kmai pia natlin nana Yesus nora Saduki mniotni rawahla lira, ne nat niohora Yesus Nala wniahlani naplollol meman la riy re, dewade natiana Yesus niwra: "Tungkurga, lira nhiopan meni ed maka khi' ononni la'a agama deullu-tatarni?" 29 Yesus Nwahla: "Lira nhiopna, nhiedu tniehra ononni inhat de emkadi: "Mitlina, Israel mniotni miy, Orgahi-Orha'a Uplerlawna-Mempulwatnu id to'a. Enekneka E'a makla' it Matromni. 30 Miala miy rurmi-laimi, ralma-riormi, ihrami-ralammi tetema pa mhima-mrie'a Uplerlawna Matromlawanmi de." 31 La' wornu de emkadi, de niwra: "Miatu mtiulla-msiaynia mira'a-mipal wualia rimormiori wialmi pa emekwalima mimkek rer lia inon wamuehemi." Lira nhiopna dom de edon rarehia lira nhiopna ri." 32 Noka makwatutu-kwaye'a agama de nakot la Yesus: "Plollolli hade Tungkuru, lirmu de plola, Uplerlawna de ida Nmeh'a to'a. Enekneka E'a makla' it Matromni. 33 Ne plola pa itala it rurni-laini, ralma-riorni, ihranu-ralamni tetema pa tsima-tre'a Uplerlawna it Matromlawanni de, me tatu ttulla-tsaynia, tara'a-tapal wualia it rimormior wialli pa emekwalima itamkek rer lia it inon wamueheni. Itsi'a hade de narehi-nalawan meman la it prehenni-maunu honona maka itiwra talla Uplerlawna." 34 Yesus Nwarora riy de lira wniahlani de nodia wniarora-wnialai samomuou, noma Nakot la: "O edon oliet la riy maka Uplerlawna Nodi plolli la emeka ir Rayni." Ne riy id mana edonna nparan pia nhar lirni pa natiana Yesus.
Ray maka kamori-kalewna de Daud duratni-waitni me la' walia Daud Matromlawanni
35 Lera ida ne, Yesus Nwatut lia Uplerlawna roma kreini de Niwra: "Hya'a nariei pia makwatutu-kwaye'a agama re riwra Ray Makamori-Kalewan maka Uplerlawna Nano'taru, de Daud duratni-waitni hade? 36 Daud nmeh'a nek de, Uplerlawna Nhiwni Narialmua pa nakot nohora Uplerlawna lirni la Ray Makamori-Kalewan de niwra: "Orgahi-Orha'a Nakot la a Matromlawnu (Yesus) Niwra: "Muliwnu (Mumtatnu) la' A wa'lu malganna, la'pa A'utowra arwalmu pa ratniowar la O nayanmu." 37 La'pa Ray Daud nmeh'a neka nwet la Ray Makamori-Kalewna, niwra e Matromlawanni, de nihya'pa mikota ray Daud duratni E'a?" Riy mutlialawan re rahepur nohora yatlin la.
E rwagahniorta riwra Erammi la'a makwatutu-kwaye'a agama re oo!
38 La'a wniatutnu ralamni de Yesus Niwra: "Erammi la'a tungkurga agama re! Nhi'inde rala' nohora raini plalahwani totpena riy ramkek de riy mak inponni ira me ir suksukni de riy ral ir la rekna-waiti la'a ya'olu-yala' geni. 39 Rler la Yahudi kreini-iskolli ralamni de rtota gen miak kden la gaini me la'a he'i-hepru la'a ya'anlawna-yemunlawna, de rahak geni samomuou totpa riy ra'uli ira, nanpena ramtatna la' hande. 40 Rhi' aplinu-aplo' neka palpuallu, ne rwarui-rwate'la hyonni-hyanni honona. Mere rsumbain de plahwani, totpena riy rwarora riy samomuou ira. Hota riy mak emkare ed maka klernan niukum maka reh miemna la riy dom to'a."
Palpuallu ida kupan pi'rani la krei ktoparni (peti derma)
41 Noma Yesus Namtatna pa Napal reria krei ktoparni, pa Namkek de riy rahu rkenia kupan la krei ktoparni. Namkek la mak ktar kupna-kai rala pripan narehi-nalawna. 42 Noma a'na riy patyata ida nmai pia nken wialia sena wor lia'a ktopar de ralamni. 43 Noma Npolga maka ha Nwatutu-nwaye'a re na'nama Nakot la re: "Mitlina, patyat di ed mak kenia liawanni la'a riy honona. 44 Yoma rirahu mak keni olekwa re narehi-nalawna yoma re'eni-tniarnu harahu. Mere patyat di de nakleha-naplara mere mak ha nala re de, eneknek hare to'a pede nwatul nana pa nal momuoga."
Yesus Nakot nohora roma-krei yapru'ranu me riy rpolpuol inni-wakwak amni
1 La'pa Yesus Nran lakni la Uplerlawna roma kreini noma maka ha Nwatutu-nwaye'a ida nakot la: "Tungkurga, Mumkek tek la Uplerlawna roma kreini de samomuounu, me watgau lawna maka ha rnairia pa rariria roma krei die!" 2 Noka Yesus Nakot la Niwra: "Yowa, Uplerlawna roma kreini de inpona me naruri. Mere hya' maka mimkeka ri, hota rweyata-rwaniawu momuoga. Wat muaka kapnidara re de hota id mana edonna nalliapar la id wawannu." 3 Nhor nioma Yesus Nla'awa wo'ora Saitun noma Namtatna pa Napal rer lia Uplerlawna roma kreini. Dewade Petrus, Yakowsi, Yohansi me Andarias rmai pia ror Yesus rwahaur rewre'wa pa riwra: 4 "Tuna, Mpue'er nohor tek hare, mai ami hota mowen die itamkek mak Omukota re? Me hota hya' ed maka tamkek ulga totpena nwagahniort it la hota lera-mela inhatta?" 5 Yesus Nakot la re Niwra: "Mi'ererma! Yanpa riy rhi' aklierat miy la'a A maimia'yu de. 6 Hota rirahu rmai die rnairia A na'nu pa riwra: "Makamori-Kalewna maka Uplerlawna Nano'taru A'g inhatti!" Hota rirahu rpesiaya ir pa rler la klieratni. 7 La'pa mitlina poka hidara yetni warna me mliernana kota-de'eta de rira riwra wunu-ara e nwewr olek la noha-rai, yan mimta'ata. Yoma hota hare honona de plollola pa itamkeka me itatlina, mere noha niatni edon ntutu-nte' ma'ta. 8 Hota hairi nor hairi rawunu-rawenna, me noha-rai nora noha-rai rawo'ora. Ne hota noha nruru (upkarururu) lol meni-meni, me rehka-lara nwewar la noha-rai. Hare honona de tamkeka pleinia mere edon rler ma't la noha niatni. Ler maka mimkek la hare de eneknek to'ama mulaliaini, pa emekto'ama patke'a maka apannu namehra la mulaliaini, mere lerni edon ntu'tu ma'ta pa nayor a'nani. 9 Mi'ererma yoma hota riy mak edon kpesiay re rte'la miy pia rod miy lia mak khudi-kpara gaini. Hota rliwar miy lia' gen miaka Yahudi re rhi' kreini-iskolli la. Ne hota ra'it miy lia'a riy o'ta-mat lalawna me la'a ray-ray gaini ralamni yoma la' A rerie'yu. Hota emkade totpena mimliernan talan pa mikot nohor Kot Kalwieda-Paitiota la ira. 10 Ne Kot Kalwieda-Paitiota de hota rakotkot lola pa nwewar la noheri woru-lyanti nayanni totpena noha-rai honona ratga nhor nianpena noha niata. 11 Ne la'pa rtoran nan miy pia rod miy lia watghudi lokarni, de yan memmemna ihrami rteplu yoma mpiarora hya' maka hota miy mikota? Mere la'pa ratian miy, mikot neka hya' ed maka Uplerlawna Nal miy la' ler de memna pa mikota. Yoma hya' mak mikota de edon nwatiawua miy wniaror wamuehemi, mere ha nwatiawu Uplerlawna Nhiw Lululli 12 Hota la' ler de riy rala inni-narni makpesiay a' pua rwenna. Emkade wali ama nek de nala a'nani makpesiay pa rwenna. Me upa-a'na nek de hota edon ratlin la inni-amni makpesiay pede rala inni-amni pa riy rwunu-rwenna. 13 Riy la' meni-meni to'a hota rahankeran rer tiy miy, yoma miy mliernohor reri A'u. Mere la'pa he' ed maka ktorrer pitpitga pesiayni pa la ntutu-nte'ela honi, de hota nlernana mormiori-lewlewna plalahwa pa nodi liarni."
Rimormiori hota rler la kropna-krieutu nniahora-nniala'a polpuol inni-wakwak amni
14 "La'pa mimkek nana hya' mak khi' akdeha-aktiahlia gen lululi la Uplerlawna roma kreini ralamni narieiniande Uplerlawna Nawenna de napriri-nakded la genia mak yan memmemna ha naprir lia, de miy miaka mpiaik nan hadi de mhioratreria! Miy mak kden la Yudea miwlar lia' wo'ora hananni. 15 Me maka kateni anni la likti wawannu plet pa miwlari. Yana mhioratreria hya' mak kden la roma ralamni pa miodia. 16 La'pa miy mak kden la nhyi' ralma de yana miwali pia miala lawarmi-rayanmi la'a roma nayanni. 17 Adoh! La' ler de de pat mak ka'uhu-ka'apnu, ne la'a pat mak nuh reria a'nani re rpolpuol inni-rwakwak amni. 18 Msiumbaini totpena yanpa miwlar liola otna-anni ralamni. 19 Yoma lera-mela mak kodi kropna-krieutu, nniahora-nniala'a, yamuki-yama'ala mak emkade, de it edon tlernan etia la'a ler maka Uplerlawna Na'ohi-na'ara nohkerna la'pa ntutu-nte'ela' ler di. Ne la'pa itleretia, de it edon tlernan emkade owa'ana. 20 La'pa Orgahi-Orha'a Nala ler de pa naplahwa de hota riy id mana edonna ntuin tar lia noha wawannu yoma rmat miomuou. Mere onnila Orgahi-Orha'a sniayanni la E mutnu-rahanu maka Nwalir niana re to'a, maka nhi'nande ler de edonna nodi liarni. 21 La' ler de la'pa riy riwra: "Mai pia tamkek ee! Ray Makamori-Kalewna maka Uplerlawna Nano'taru ed olek diwa", onde dom e riwra: "Ee, mimkek teka! Ray Makamori-Kalewan de etla handelloo!" Yan mitlin la lirni re. 22 Yoma hota la lera re de rirahu ralahar pa riwra ir de de Ray Makamori-Kalewna maka Uplerlawna Nano'taru onde rtot inonni emeka makwohorulu-ktatrulu pa rnairia hihi'a-yapyapi mak kamehi-kayona pa rtutga rurni-laini totpa ra ra'ohpa-ralahara rira. Uplerlawna mutnu-rahanu maka Enwalir niana nekane riwra rtot pa rler la klieratni. 23 Hade pede mhioratreria! Dodo'ondi de A'ukot oleka hari tiy miy totpena hota la'pa hare honona rtutu-rte'ewa de miy edon mlier la klieratni."
Rimormiori A'nani Nmai wia
24 "Mere la'pa ler maka riy rler la kropna-krieutu, nniahora-nniala'a de rlardoinla dewade: "lera nwamuela me wolla mana nakleh lair wa. 25 Hota wtiona mana pala tuinia. Ne mak kodi plolli la darta-lyanti mana hota nawniatiri-nawnialiakra." 26 La'awa ler de dewade rimormiori ramkek reria Rimormiori A'na Amuai owa'ana pa Adiella kakma wawannu, de Agodia A plo'lu-mneh'u, A preh'u-mka'yu mak kamehi-kayona la liplipa-kamka'mani. 27 Hota Rimormiori A'na A die ghopan pa A hopopnu mak kden la Ilyamou-Watyatoha rawoka-rale'ga A mu'tu-rah'u maka Uplerlawna Nwalir nian oleka de, mak kdella noha uhunu ewatni-lyanti nayanni. 28 Mia'ala wniatutu-wniaye'a la kar on de. La'pa mtiamnia olli demade nmor wia, de miatg oleka lerwarnu nwakrian wia. 29 Hota emkade wal lia mimkeka hare honona mak A'ukot nohor olek diwa, de miatg oleka de lerni-melli nhi' pa nwakrian wia. 30 Totpa miatga! Riy la'a tuwu di de edon rmat mia'ta, de hare honona mak ukot nohor oleka di hota rtutu-rte'ewa. A li'ru ri raplola. 31 Hota lyanti nora nohkeran di mana rmolu-rhelam wa mere A li'ru-tu'nu de ndella pa nodi liarni. 32 Riy id ho'mana hota naplin niohora la'a hya' lera-hya' mela Rimormioria A'na A die maimia'yu owa'ana. Uplerlawna hopopanni nekane raplinga, Uplerlawna A'nani A' die ho'mana uplinga. Eneknek to'ama, A'mu la Ilyamou-Watyatoha nampena ed mak katga."
Yana minin matni yoma miy edonna miat niohora lerni-melli la Yesus maimiaini
33 "Hade pede orahnioratmi! Yoma miy edonna miat niohora lera-mel maka hota A maimia'yu de ntutu-nte'ewa. 34 Alia'awa la' Ilyamou-Watyatoha pa Amuai owa'an de, emolmolla riy id nhopal la olietleta. Nto'or la romni-lewnu ne naltarga la hopopanni-lili'irnu limni ralamni, rima-rima nora kniarni. Ne nano' taru mak katiaka nhiari totpa natiak samomuou e maimiaini. 35 Emkade walia orahnioratmi pa mimtiaka yoma miy miplin niohora ler meni pa Matrommi Nati'ila-nawal wia, la'pa lera nmel wa, edonan de mel letgara, edonan de mela nhawulla walli, edonan de yawyawar melmel ma'ta. 36 Yanpa plinu-plin pa Amuai die, Aliernana mtieparla yanina. 37 Hya' maka A'ukota tiy miy di, A'ukot targa la riy honona: Orahnioratmi!"
Wniarora-wnialai yatyata la Yesus
1 Tre' ma'ta lera woru de lerlalawna Paska (de la'a ler maka Yahudi re rhoratreria ir tuini-wedni la ler maka ralewan la'a kokohoga la'a Mesir ), me lerlalawna Yahudi maka ra'ana rot miaka edonna rnairia tgo'a nhi' pa nrehgor wua. Noma imam-imam o'tani-matni re rora makwatutu-kwaye'a agama rwahak talan pa rtorna Yesus pa rwenna la'a wunwunamnu. 2 Mere riwra: "Yan memmemna rhi'a la'a lera maka ha riwra ramuki-rahepur la re, yoma hota lima-rora kokokna-rariarni."
Rhuria wu'ru huwua mikmikri la Yesus la'a Betania
3 La'pa Yesus Nden la leta Betania, pa Na'an rerer lia'a Simon maka ululu de klernana nnienia ulityata de genni. Noma patke' ida nmai Yesus de, de nodia potla ida maka ha rhi' nana la watu-watu mak welli werta, de npenpuen lia wu'ru huwua mikmikri narwastu, mak welli werwerta wali. Noka patke' de nhi' wah'a potal de nurnu na'nama nwalia wu'ru della Yesus o'tani wawannu. 4 Riy dom mak kden handi rawenna pa idma nakot la ida, riwra: "Hya' ed mak krei piede nhuri-nwaldioinia wu'ru mak kalweli wierwerat dena?! 5 La'pa na'olga wu'ru de ho'mana nlernan kupna nareh dioin kupna-kai (gaji) la anni ida gahani, pa welli de hota rala la riy mak kakleha-kaplara." Dewade rpolliohor memna patke' de onnila hihi'ini de. 6 Mere Yesus Nakot la re: "Nihya'pa mikot emkade la patke' dina?! Miolin doin e' pa nhi' samomuou A lia dodo'ondi to'a, 7 yoma A'g edon gor miy pia nodi liarni. Mere riy makakleha-kaplara re nhi'inde e ror wutga miy totpa la' lera-lera nekpa mtiulan la' ira mliernohor to' neka miy sukmi. 8 Patke' di nhi' nan hya' mak samomuou mai A'u nlernohora e rurni-laini. De enwalia wu'ru de pa na nwahi' A' pua rtamni A'u. 9 Mpiesiayo, la'pa rakot nohora Uplerlawna Kot Kalwiedni la noh di wawannu uhunu-ewatni, de irakot nohor walia patke' de hihi'ini-yapyapni totpa rira rhoratrereria e'a."
Yudas nwayop pa na'olga Yesus
10 Noma la' riy id la'a riy termida wehrani woru maka Yesus ha Nwatutu-nwaye'a re de nwawa Yudas Iskariot nla imam re o'tani-matni, yoma nwaror nana nla na'olga Yesus la ira. 11 Honona re ralamni re rahepru la'pa ratlin nan edade, ne rwanel tiar pua pena rala kupan la Yudas. Noma Yudas nla nwahakhak talla emkameni pa ntorna Yesus totpena nala la Yahudi o'tani-matni re.
Yesus Nora maka ha Nwatutu-nwaye'a re ra'an la Yahudi lerlalawanni
12 La'a lera yanullu la lerlalawna maka Yahudi re ha ra'ana roti mak kakleha tgo'a, ler de wal pia nhi'inde rteti-rlaiya dum a'na maka ha riwra ra'an la'a Paska lerni de, noma maka Yesus ha Nwatutu-nwaye'a re rakot la Yesus riwra: "Tuna, hota ampahi' targa ya'anlawna-yemunlawna itodi itsoratreria it tuini-wedni la' Mesir de la' hanmeni?" 13 Noma Yesus Nakot la maka Nwatutu-nwaye'a re riy woru Niwra: "Mlia' pa la'pa mlier la leta ralamni, de muanke'a ida na nodia ger kekna ida hota nwatrom nan miy. Enlol meni-meni mana mimrio'a mliernohor reria. 14 Ne mikot la orrom maka ha mtawniokur nan de miwra: "A tungkur mamni Natian o'a la'a gen mieni ed mak rwahi' targ olek pa Enora maka ha Nwatutu-nwaye'a re rewre'wa pa ra'an yamanan Paska?" 15 hota orrom de ntutga gen liawna mak kden la roma la' heyanna, de npenpuen niohora meini-kaderni me lola-wra'u pa nwahi'a-nwayod tiarg oleka. Pena mpiahi'a ya'ana mai it la' hande." 16 Noma maka Nwatutu-nwaye'a re rora rla'awa ne la'pa irte' tar lia let lawan de rlernana hya' maka Yesus ha Nakotkota re! Noma rrora rwahi'a-rwayod tiarga ya'ana-yemnia Paska. 17 La'pa nmel wa, noma Yesus Nora maka Nwatutu-nwaye'a termida wehrani woru re rmai rewre'wa. 18 La'pa ra'an wut lia mei wawannu dewade Yesus Nakot la re: "Mpiesiayo! hota la' riy id tiy miy mak ka'an wut mai A'u hota eniwra na'olga A'u." 19 La'pa ratlin nan hade de honona rmalui-rmaher doin la. Dewade rima-rima ratiana Yesus riwra: "Hota a'g edonno?" 20 Yesus Niwra: "Riy maka hota na'olga A'u, de riy id tiy miy termida wehrani woru miy maka kor rewre'wa A' pua mto' wutga roti la'a lari niemun geni pa emeka tema raralamni nhi'inde rhi'a. 21 Plola, hota Rimormiori A'na A' die hota Amuati, emeknekama e rhorat targa la Puka ralamni. Mere hota la'pa he' ed mak ka'olga Rimormior A'na de, adoh! Riy de hota nler meman la yatyatni-halalli yatlorni-yatra'ani. Samomuounu de edon ra'a'n nan walia e' la noh di wawannu."
Mei Perjamuan
22 La'pa rara'an reri noma Yesus Na'ala roti, na'nama Na'uli-nawedia Uplerlawna. Nhor nioma Nhawi-nhawia rot die na'nama Nhakre'era la maka ha Nwatutu-nwaye'a re na'nama Niwra: "Mia'ala pa mi'ina. Hadi de A ino'nu inhatti." 23 Nhor nia'nama Na'ala lari maka rkeni anggur turnu na'nama Na'uli-nawedia Uplerlawna na'nama Nala maka ha Nwatutu-nwaye'a re, ne honona remun wut lia lar die. 24 Noma Nakot la re: "A ra'ru inhatti maka khi'a aplola Uplerlawna nnio' warwuarnu me rar maka ha rhuria yoma riy liawanni rerieini. 25 Mpiesiaya, hota A'g edonna gemnia anggur turnu owa'ana la'pa nte'ela' lerni Agemun anggur tur warwuarnu la'a A A'mu genni maka Ntorna-nrautu emeka Ray."
Yesus Nakot nohora hota Petrus nreher doinia E'a
26 Nhorwua noma honona rwahniara nhiara ya'uli-yawedi id la Uplerlawna. Nhor diewade honona rla'awa la'a wo'ora Saitun. 27 Noma Yesus Nakot la maka ha Nwatutu-nwaye'a re Niwra: "Hota miy hononmi miwlar dioinia A lia. Yoma Puka ralamni de e nakot nohora Uplerlawna lirni niwra: "Hota Awuenna makhuri-kwa'an de ne hota nhiuri-wnia'anni knunu-knera." 28 Mere la'pa ramori-ralewna A'g owa'ana de hota A'g e ula' ul miy lia Galilea." 29 Noma Petrus nakot la Yesus: "Pen neka mutu korni hota rawlar dioinia O la Tuna, mere a'g edonna wuadur la O' onmu." 30 Noma Yesus Nakot la Niwra: "Mhuoratreria Petrusa, plollolli de la' ler di, la'a mel di memna hota hiwi lallu edonna nkukule'a re'eni wor mua'ta de hota omueh'a nekpa mrieher doin A lia' re'eni wotelu." 31 Mere Petrus ntekal reria Niwra: "La'pa it rewre'wa tler la wniunu-wnienna ho'mana hota a'g edonna ga' pua rieher doinia O'a Am ee!" Ne maka ha Nwatutu-nwaye'a re korni mana lirni emekwalima Petrus lirni.
Yesus Nsumbain la Getsemani
32 Nhor nioma Yesus Nora maka ha Nwatutu-nwaye'a re pa rla'awa geni ida mak kwawa Getsemani. La'pa rden la hande noma Enakot la ira: "Mpiei pia mimtatan la handi. Pena A lia siumbaini." 33 Noma Nakot la Petrus, Yakowsi nor Yohansi pa rmemeh'a ror rewre'wa E' pa rla'a. La' mel de Yesus ralamni Nmayo'a-nmataw dioin la. 34 Noma Nakot la mutwualli re Niwra: "A ralmu emeka nmolu-nhelma pa emeknekama hota Amuat mie! Mdien nek la handi pa mimatmat pa msiumbaini." 35 Noma Yesus Nla oliet kuku'a la'a gen die na'nama Nler inonni pa Nwaltiora-nwaltieman la tani wawannu, na'nama Nwakwak pa la'pa Uplerlawna Nwayowa de hota E' edon Nler la kropna-krieutu maka Uplerlawna Nwaror nan-nwalai nian oleka de. 36 Niwra: "Am ee! Hadom edon ta'eni tiy O'a. Awuak pa Muhal doinia kropna-krieutu mak hota Atiutulu-lielew niana ri. Mere yana Mliernohor maka A ralmu ha nwaka mere plolli nek tiy O'owa Ama!" 37 Nhor nioma Yesus Nawal pia Nla Ntomar la mutwualli re wotelu, mere Nla' de wotelu e ranin hala. Noma Yesus Nakot la Simon Petrus Niwra: "Simon omuninha'lu? Eneknek to'ama jama id ho' pa taken niana mumatar?!" 38 Noma Nakot la ir honona Niwra: "Mimatmat pa msiumbaini totpena yana hegana amlawanni nreh nian miy pia mlier la do'a-hala ralamni. Yoma plolli pa miy miwra mliernohor A ralma-rio'ru mere ta'en niana mhi' nana." 39 Noma Yesus Nla Nsumbaini owa'ana pa lirni la Amni de emeka dodo'on de wali. 40 Noma Yesus Nawali owa'an pa nla ntomar la mutwualli re wotelu mere e rtepartar yanina yoma matni werat rehia. La'pa ramata de raplin niohora rala lira hya'a la ralla rwahla Yesus lirni. 41 Nhor nioma Yesus Nla' owa'an pa Nmai re'eni wotelu, na'nama Nakot la mutwualli re Niwra: "Minin ma'ta miy?! Hadella wa! Nte'ela lerni wa pa Rimormiori A'na A' die ra'olga A lia riy maka khi' do'a-hala. 42 Mimata, mai pia tla' pa twatroma riy mak ka'olga A'u, nmai wia dee!"
Rtorna Yesus
43 La'pa Yesus Ntepartar mua'ta la yaltieri, dewade plinu-plinnianama Yudas maka nhi'inde kre'ela maka Yesus ha Nwatutu-nwaye'a la riy termida wehrani woru re, enmai wia, de nor wutga mutu ida, de rodia wehla plalahwa, me aukakaklu. Imam o'tani-matni re ror wutga makwatutu-kwaye'a agama me ina-ama leta Yahudi er mak khopan pa mutu rmai pia rtorna Yesus. 44 Me Yudas mana Nakot targ oleka la mutnu re hota hya' ed maka ha nhi'a, niwra: "Mitlina, tla' de, de la'pa hameni ed maka akinnia de E' inhatta pa mtiorna la'pa miodia de mitiaktiak reria!" 45 Pa la'pa rte'ela gen die, dewade Yudas nod tiemna Yesus pa nakot la: "Tungkurga!" Dewade nkinnia Yesus. 46 Dewade riy mutlialawna re rma rwarui Yesus pa rtorna. 47 Noma Yesus mutwualli ida mak ktutrier lia hande nleh dioinia wehlani pa ndawar doinia riy ida tlinni. Riy de nhi' hopopna la imam-imam re o'ta lawanni. 48 Noma Yesus Nakot la riy mutlialawna re Niwra: "Hoi hya' nrei pia miodia wehla ara me kakaklu re pa ma mtiorn A'u?! Yanpa la' miy wniarormi de A' di de riy yatyata-halala id A'u?! 49 La' lera-ler nek de A'g e gor miy pia it rewre'wa la'a Uplerlawna roma kreini, de A'g e wuatutu-wuaye' miy, mere miy edonna mtiorn A'u. Mere ha rhi' emkade totpa naplol nohor la Puka lirni." 50 Nhor nioma maka Yesus ha Nwatutu-nwaye'a re honona rawlar dioin E' pa kni'ini-kniewarni. 51 La ler de tuwgari ida e nlernohor reri Yesus, de nnair nan to'a kok lenan ananni id pa nahewu inonni. Riy maka rodi wehla-kakaklu re rtota pa rtoran nana, 52 mere naul doinia kok della pa natliawih pia nawlar wia.
Rodia Yesus pa rla'a mak ktorna agama watghudni
53 Noma rodia Yesus pa rla'a la imam-imam o'ta lawanni gaini. Ne imam-imam o'tani-matni ror wut nieka ina-ama Yahudi me makwatutu-kwaye'a agama re rawok momuou wal lia hande. 54 Petrus de nlernohor reria Yesus, mere edon nwakriania. Noma Petrus nwakdie'da wal pia nodi liarni la riwta ralamni la'a imam lawna romni, pa nre' pa namtatan wutga la' riy mak katiak la' hande pa nor wali ir pa namriri ai. 55 Imama re o'tani-matni la'pa mak ktorna agama watghudni honona, rahak riy mak kaprir niohora ira (saksi) totpa ralahar pa rwaghal Yesus totpena rlernan talan pa rukum penna E'a mere o'ta-mata re edonna rlernana wniatikilgeni totpena rwaghala Yesus. 56 Riy harahu rmai pia rakot nohora hya' ed maka edon kaplola, mere lirni-tunnu re idma edon nora ida ramneneha. 57 Noma riy dom rtutrier pia ralahar pa rwaghal Yesus, riwra: 58 "Amatlin nana oleka riy di Nakota Niwra hota E' ed maka Nweye'era Uplerlawna roma kreini maka rimormiori limni enni die, me hota E Nariri krei id owa'ana la'a lera wotellu, maka rimormiori limni enni atia' hade." 59 La' handi mana lirni re edon ramneha. 60 Noma imam lawna naprir lia woka-le'u die letgarni pa nakot la Yesus Niwra: "Hoi, hota O edonna Mukot hadom pa Mpuahla nana lira mak kwatiawua etnu-liolli rena? Lira re raplola me edonna?" 61 Mere Yesus Nherer tio'owa. Noma imam lawna nhari owa'an lirni pa niwra: "O' di de Ray Makamori-Kalewna O'a maka Uplerlawna Nano'taru, de Uplerlawna maka ha ra'uli-rawedia A'nani?" 62 Noma Yesus Nakot la: "A'g e inhatti. Ne hota la' ler id de hota mimkek memna, Rimormiori A'na A'umtatan la Uplerlawna-Mempulwatnu mak kodi plolli walli malganna ne hota Amuai die Agodia kakma la'a lyanti tutulu." 63 Dewade imam lawan de nawenan pa nlihira-nnaiya rain plalah wamueheni yoma nwarora de Yesus de rimormior tio' E'a, na'nama niwra: "Yan itwei pia riy rakot nohora E halli. 64 Miy hononmi e mitlin walia E lirni de Enapolu-naliella Uplerlawna yoma Enakot Niwra Uplerlawna A'nani E'a toh?! Pa emkameni la miy ralma-riormi? Mietlia wa." Noma honona rla' lir id pa retlia de niukamnu mak klol talanni de totpa rwunu-rwenna. 65 Dewade dom de krurui-kpirpir la Yesus ne rtutwu apitga Yesus matni pa rdupla, na'nama rakot la riwra: "Makwohorulu-ktatrulu O'a, pa Mpuet tek la he' ed maka kdupla O'a dena!" Noma mak katiaka re mana rdupla E'a.
Petrus nreher doinia Yesus
66 Ne Petrus namtatan ma'ta la yawa, la'a riwta ralamni la'a imam lawna romni (totpa nat niohora hota rhi'a hya'a la Yesus). Dewade pat mak khoi-ktani ida nmai wia. 67 La'pa namkek nana Petrus namriri ai noma namkek tertehra na'nama nakot la niwra: "Nhi'inde omuor wutga riy mak kor Yesus riy Nasaret de mila' wutu." 68 Mere Petrus nrehera, niwra: "Eee! A' niek de uplinu-uplo' nohora riy de me a'uplin niohora lirmu-tunmu de lie'erni." Noma Petrus nwatitin la hande pa nla'awa riwta nhiarni onni dewade hiwi mana nkukule'ewa . 69 Noma pat makhoi-ktani de nlol hande pa namkek owa'an Petrus dewade nakot owa'an la riy mak kden hande niwra: "Emeknekama dodo'ona riy di nor walia Yesus talla." 70 Noma Petrus nreher owa'ana. Edon nalo'on wali ne riy mak kden hande rakot la Petrus riwra: "O inhatti manoo! Yana mriehera, yoma riy Galilea id o'a." 71 Noma Petrus ntan limni la heyanan pa nlokra-nhautu niwra: "Uplerlawna Namkek reria me a'g edonna gat niohora riy maka omukotkot nohora de. Uplerlawna nhiakar lokarni mai a'u la'pa agat niohora riy de ha lolola." 72 Plinu-plinnianamde hiwi lallu nkukule' nan re'eni wornu wa na'nam de Petrus nhioratni nko'i nana Yesus lirni de Niwra: "Hota la hiwi lallu edon nkukule' ma'ta re'eni wornu de hota omrieher nan olek A lia re'eni wotel wua." Noma Petrus nahedge'du la kniakru.
Rodia Yesus pa rla'awa la Pilatus
1 Repreparrer mia'ta de, imam-imam o'tani-matni ror wutga Yahudi in letni-am letni me makwatutu-kwaye'a agama la'pa mak ktorna watghudi agama Yahudi honona re rwahu'ru lira totpena retlia Yesus wnienanni. Noma rwutga Yesus limni na'nama rodia la Pilatus. 2 Noma Pilatus natiana Yesus Niwra: "Plola O' di de ray Yahudi id O'a?" Noma Yesus Nwalolla Niwra: "Emek lir mak omukot de!" 3 Imama re o'tani-matni rwaghal E' la'a lira-tunu harahu. 4 Pilatus natian owa'ana niwra: "O' Edonna Muala lira wniahlani?! Mutlin la irwaghal O'ola lira-tunu harahu." 5 Mere Yesus lir ta'a-waw ta' to'owa, pede Gubernur Pilatus de nwer rer wiawni. 6 La'a Yahudi lerlalawanni maka ha rhoratreria tuini-wedni, Pilatus nhi'inde nolin doinia Yahudi id la'a roma nhio'la totpena nhi' ahepru Yahudi ralamni. Enolin doinia riy maka Yahudi mutlialawna re ha rwalir niana. 7 Ne ler de riy ida nwawa Barabas, e rho'la wutga la riy mak kmalawna horta-hairi Romawi doma. Barabas nor talanwalli re rmalawna ray ne rwunu-rwenan riy la kokokna-rariarni id ralamni. 8 Noma riy rahu rmai pia rwak totpena Pilatus nolin doinia riy ida emekto'a nhi'inde de e nhi' taru-nyap tiarga la lerlalawan de. 9 Pilatus natiana re: "Hota miy mpiayow de agolin doinia Ray Yahudi di tiy miy?" 10 Pilatus natian emkare la rirahu re yoma Pilatus e nat niohora imam-imam o'tani-matni re rala Yesus la e'a, yoma honona re ralamni ramehra la Yesus. 11 Mere imama re o'tani-matni rtekal rer tio' la totpena rirahu rwak la Pilatus pa nolin doinia Barabas nek wa. 12 Noma Pilatus natiana niwra: "Hade emkade, aghi'a hya'a la Yesus maka mpieta la Yahudi Rayni dina?" 13 Noma rhaunu pa riwra: "Mpuairia la auwlakra hananni." 14 Noka Pilatus nakot la re: "Mere halli hya'a pede?" Noma honona re yeher to' pa rhaunu-rhaunu riwra: "Mpuairia la auwlakra hananni!" 15 Noma Pilatus niwra nhi' amikri riy rahu re ralamni pede nolin doinia Barabas la pa nala la ira, ne nhopan pa riy rliwra Yesus. Na'nama nala pa rla rwairia la auwlakra hananni.
Makodi keki-rautu re rahe'i-ramali Yesus
16 La' noma makodi keki-rautu rodia Yesus pa rler la gubernur Pilatus romni na'nama rpolg awoka makodi keki-rautu korni re lidna-lidan pa rmai wia. 17 Rohoga emeka ray-ray naniayarni plalahwa mak ungu la Yesus. Noma rhi'a wutu-lai ida de rnairia pu'na-kiarit ruri pa rkow nana la Yesus o'tani. 18 Nhor nioka rhaunu riwra: "Mmuormiori plalahwa Ray Yahu'du ne!" 19 Ra'ala lie'ena pa rliwar reri o'tani me rakrui-rakpira, na'nama rwaltiora-rwaltieman la gaini ralamni pa rahe'i-ramalia Yesus. 20 La'pa rahe'i-ramalia na'nama ral doinia naniairia ungu della pa rohog owa'ana naniair wamueheni. Nhor nioma rodgiota pa rla rwairia la auwlakra.
Rwairia Yesus la auwlakra hananni
20 Rohog owa'ana naniair wamueheni. Nhor nioma rodgiota pa rla rwairia la auwlakra. 21 Ler de de rwatrom nana riy Kirene ida, nwawa Simona, de Aleksander nora Rufus amni. La' ler de Simon etla' talan letgara pa niwa nla'awa la' let lawna Yerusalem. Noma ha rhopan pa riy de nakwara Yesus auwlakarni. 22 Rodia Yesus pa rla'awa gen miaka ha rweta la Golgota, nnia'eratni de: Riy Ruri-Kliaklu Genni. 23 Noma rala atiaw maka ha rweta la mur, mak rawniah'a la anggur turnu pa rala Yesus Nemnia totpena mehrani nmolu. Mere Nahmena Nemnia. 24 Nhor nia'nama rwairia Yesus la auwlakra hananni. Na'nama rdurmu-rhakra Yesus naniayarni de rnairia patui (undi) totpena ratetra rima-rima nhiakarni. 25 Lera nha'at la jama wosiewni dewade, rwairia wa. 26 Rhorat targa la auganna ida, de rakot nohora hya' maka Yahudi o'tani-matni re rto'on reri E halli pa rhorat de riwra: "Yahudi Rayni inhatti." 27 La' hande wali pia e rken wialia riy wor lia auwlakra yoma rrora rpera-rdaitia deulu-tatra hairi Roma. Rkenia id la Yesus walli malganna ne id la'a Yesus walli malwiru, ne Yesus Nden la letgara. 28 Totpa naplola la Puka lirni mak kiwra: "Ratniekame E' de riy mak kpera-kdaiti deulu-tatra." 29 Mak klola hande rdik o'tani la me rwohora-rtatra me rahe'i-ramal lia Yesus. Rakot la Yesus riwra: "Oi! O' ed mak kiwra kwaye'er doinia Uplerlawna roma kreini nampena Omuriria owa'ana la' lera wotellu. 30 Muerun la auwlakar de hananni, ne Mulewna inonmu." 31 Emkade walia imama re o'tani-matni rora makwatutu-kwaye'a agama rapolu-raliella Yesus pa idma nakot la ida riwra: "E' de Namori-nalewna riy meheni, mere inon wamueheni de takeni Nalewan nana. 32 Tamkek teka hota riy di maka ha rhoiya la riy makamori-kalewna maka Uplerlawna Nano'taru, Israel Rayni de hota Nerun la auwlakar de hananni totpena tpesiaya." Riy maroro'a re la auwlakra re ho'mana rapolu-ralielan walia Yesus la auwlakra hananni.
Yesus matmiatni
33 La lera nwawuau ro'onni (jam termida wehrani woru) mere la'a noh de tetema nekpa mel'uta-maliena nodia pa lera nher miemna (jam wotellu). 34 La'pa jama wotelu, dewade Yesus Nhaun pa Niwra: "Eloi, eloi lama sabaktani?" Ha nnia'eratni de niwra: "Uplerlawnu ne, Uplerlawnu ne nihya'pa Omuolin limmu-mpue'er rormu mai A'u?" 35 Riy wo'ir mak erla hande e ratlin nana Yesus lirni, na'nama riwra: "Idee! Ha e Npolga Elia." 36 Noma riy ida nawlar pia nla na'ala kuliai, na'nama nto'a la anggur turnu mak milmilu na'nama nkenia la au tutnu pa ntania la Yesus nurnu totpena Nemnia. Niwra: "Twei pleini. Yanpa Elia nma nalernia E'a." 37 Nhor nioma Yesus Nhaunu owa'an dewade Nmati wia. 38 Noma plinu-plinnianamde kok lawna maka ra rahew tiarga liolgeni la'a gen mak kmou-kwitna la Uplerlawna roma kreini ralamni totpa riy edon rler la rialam de, ema rlihirwah'a la' woru la' heyanna pa ntut mueman la yawa. 39 La' ler de mak khi' o'tani la lidna makodi keki-rautu rahu ida, e naprir pia napal reri Yesus. La'pa namkek nana Yesus matmiatni emkade dewade niwra: "Hadi plola! E' de de, Uplerlawna A'nani E'a." 40 La' hande de patke' dom e ror wal pia rden nek la oliet pa e ramkek reria. La' ir mutnu de, de Maria Magdalena, me Maria, Yakowsi mak tuwgar de me Yoses inni, nor wali Salome e rtutrieri. 41 Ir de ed maka klernohor reria Yesus la Galilea totpena ramkek la ya'anni-yemannu, rpo'a-rpahi'a Yesus hyonni-hyanni. Me patke' harahu er wal lia hande mak kor rewre'wa Yesus pa rmai lia Yerusalem.
Rtamni Yesus
42 La ler de ntuin tar la' ler maka rwahi' targa hare honona pa rwei-rnara Sabat lerni (ler maka Yahudi re edon rkar lia) yoma repar de Sabat de ntutu-nte'ewa. Pa la'pa lera ntuini de 43 noma riy id la hande de nanni Yusup nhi' parani inonni pa nla nwak la Pilatus totpena na'ala Yesus inonni mak kmati olek de. Yusup de riy mak kwatiawua leta Arimatea, maka nhi'inde nre' wal pia nla'a riy mak ketlia lira-tunu la agama hanni, ne riy maka ha rwetwet la nanni. Nhi'inde ralamni nod rer lia wniei la Uplerlawna hota Ntorna-nrautu emeka Ray. 44 Pilatus nwer rer wiawni la'pa natlin nana Yesus Nmati olekwa. Noma npolga makodi keki-rautu o'tani de pa natiana de plollolli de Yesus Nmati olekwa me edonna? 45 La'pa natlin nana makodi keki-rautu o'tani lirni niwra Yesus Nmati olek wa, dewade nwayow pa nala mat diella Yusup. 46 Yusup la nawelia kok lawan wawahra mak kamnurnuhru nhor nia'nama nla nalernia Yesus mak kmati olek della la'a auwlakra hananni. Na'nama nala kok lawan wawahra mak kamnurnuhru na ntomna. Nhor nia'nama nla nle'er targa la'a liena maka ha rawte'ta nande. Nhor nia'nama nwaklol tiarga wat liawna id pa na nherit targa lien de nhiarni. 47 Maria Magdalena me Maria, Yoses inni, ramkek nohora nle'er targa Yesus la' hoi-kietra meni ralamni.
Yesus Nmori owa'an wa
1 La'pa Sabat lerni nlardoinla dewade Maria Magdalena nor wutga Maria, Yakowsi inni, me Salome pa rla rawelia wu'ru mikmikri lamliamni pa rodia la lien maka ha rkenia Yesus inonni totpa ralla rawu'ru Yesus inonni. 2 La'pa yawyawar ma'ta la krei lerni, de lera matni ri'ini npah'a nana dewade a'na patke'a re rla'a Yesus hoini. La'a talla ralamni de 3 idma nakot la ida: "Hota he' ed maka kwaklol dioini wat liawna maka ralla rherit targa hoi de nhiarni mai ita?" 4 Mere la' pa rwakriania hoi die onni dewade ramkek de wat liawan maka ha ra rherit targa hoi die nhiarni ema rwaklol dioin oleka wa. 5 Noka rler la hoi de ralamni, ramkeka tuwgari ida nnairi rain wawahra plalahwa pa e namtatna la walli malganna, nhi'nande rheduma. 6 Mere tuwgar die nakot la patke'a re niwra: "Yan mimta'ata. Miy mia mihaka Yesus makden Nasaret, maka ha rwairia me inonni nmat lia auwlakra hananni. Ha Nmori olekwa pa edonna Nden olek la handi wa. In miy re, mimkek tek la gen miaka ha retar targa Yesus inonni de. 7 Pena mlia' pa mikot nohora la Petrus me e mutwualli korni maka nhi'inde Yesus Nwatutu-nwaye'a re, miwra: "Hota Yesus Nala' ul miy lia Galilea totpena miora mpiatrom la hande, nlernohora hya' maka Enakot targa tiy miy."" 8 Noma patke'a re rlergot wa pa rawlar pia rto'or doinia hoi diella, de ramta'at wenna pa honona rdiwra-rda'ala me ralamni worwuorga. Edon rakot eti hya'a-hya'a la he'-he'a, yoma ramta'at wenna la hya'a maka ramkek nana.
Yesus Ntutu rupni la riy
9 La'pa Yesus Nmori owa'an olekwa la' pa yawyawar ma'ta la krei lerni de, noma Nala' ul pua Ntutga inonni la Maria Magdalena, maka la' ler ululu de Yesus Natargota hegana wo'it lia ralamni. 10 Noka patke' de nla nwahaur nohora la maka klelernohor reri Yesus. Hare de ertepartarlia kniakru me yaluli-yahona. 11 Mere la'pa ratlin nana de, Yesus Nmori owa'ana ne patke' de namkek nan oleka de, edonna rpesiaya. 12 Noma Yesus Ntutga inonni la maklernohor reri E'a riy woru la' ler maka ralala' rer lia leta-leta to'orni re, Nherun doinia gaini la. 13 Noma rawal pia rwahaur nohora la mutwualli re korni, mere mutwualli re mana edonna rpesiaya. 14 Nhor nioka Entutga gaini la maka Nwatutu-nwaye'a termida wehrani ida re de, e rara'an reri, noka Npolliohora yoma rakleha pesiay me ralamni re tehrani pede rahmena rpesiaya riy maka kamkek ulga E'a la'pa Nmori owa'ana la matmiatni ralamni, de lirni. 15 Noma Yesus Nakot la re: "Mlia'awa la nohkerkeran di uhunu-ewatni-ewatni-lahwani pa mikot nohora Uplerlawna Kot Kalwiedni-Paitiotni dilla rimormiori honona. 16 He' ed maka kpesiaya pa rharania de, hota nler la mormiori-dardiari plalahwa, mere he' maka edonna kpesiaya de nlernana matmiati plalahwa la'a ai mormiori ralamni. 17 Riy maka kpesiaya de hota rhi'a hihi'a-yapyapi mak kamehi-kayona mak ktutga Uplerlawna rurni-laini, de hota rala A na'nu rahokra hegana-kawnu, raltier die rnairia yawala maka riy raplinga. 18 Hota rte'la la niy mere edon nhi' hadoma, ne la'pa ra'an nana-remun nana ya'an molmuolu-yemun matmiati ho'mana edon nhi' hadoma mere naprir rer mia'ta. Hota rtan limni la mak kamehra-kamau wawannu de rkalwied wa." 19 La'pa Itmatromni Yesus Naltier lia pa nhorwua dewade, ema rran nana pa Nokru Ilyamou-Watyatoha, la'pa Namtatan la Uplerlawna walli malganna. 20 Nhor nia'nama maka Yesus ha Nwatutu-nwaye'a re rla rwe'er nohora Orgahi lirni la nohkerkeran di uhunu-ewatni-ewatni-lahwani, ne Orgahi mana Ntulan wutu-Nkar wiut lia ira, ne Nala ruri-lai lia ira pa rhi'a hihi'a-yapyapi mak kamehi-kayona totpena Nhi' aplola E lirni.
1-2 Topilsu, maka agatu ghu'ru-ghelma. Riy rahu rhorat targ oleka Yesus hihi'ini-yapyapni maka Enhi' nan la a letgar mamni. Rhorat de rlernohora hya' maka ami makpesiay die matlin nan olekwa la'a riy mak kamkek memna Yesus hihi'ini la mulaliaini me rakot nohora E lirni-tunnu. 3 Pa a' muana awuarora de hota samoga pa aghi' wali horta pa ga ukot nohor kalwiedweda hare honona la' Tuna, yoma a'utiana prorowta memna hare honona ndella onni pa la ntut lia hohoni, pede dodo'ondi de agat niohor memna. 4 Pede agiwa ghi'a horat di, totpena la'a hya' maka ha rwatutu-rwaye' olek la Tuna, la'a Yesus hihi'ini-yapyapni, de dodo'ondi de Tuna nat niohor memna ha raplol momuou.
Rakot nohora ler ha rmoria Yohansi makharani
5 Tuna, la' lerni la Herodes Nhi' ray lia Yudea, de makpolu-makwak la Uplerlawna la rimormiori rerieini (de imam) ida nwawa Sakaria. Enkar wut lia la imam-imam re maka ha rweta la Abia tatarwalli (golongan). Patke'eni nanni Elisabeta ne Elisabet mana Harun (de imam mak kala' ul muemna de) duratni-waitni id e'a. 6 Irrora mormiorni-dardiarni de naplol la Uplerlawna yamkekni, yoma irrora ratu rhu'ru-rhelam (ratlina-rataili) la Orgahi-Orha'a lirni-tunnu me deullu-tatarni. 7 Mere irrora rakleh a'na yoma Elisabeta nkerna, ne rrora rhamto'a-rhape'ewa. 8 La' lera ida ne, maka ha rweta la Abia tatarwalli (golongan) rlernana nhiakra yatiaka, noma Sakaria nala'a kniarni de emeknekama makpolu-makwaka la Uplerlawna gaini ralamni. 9 La' ler de imam-imam re rhedga patui (cabut undi) totpa rwalir niana he' ed mak hota ktutnia ayalin la Orgahi-Orha'a roma kreini ralamni pa emeknekama nhi'inde ha rhi'a de. Noma Sakaria nlernana. 10 Pa la' pa ntepartarlia ntutnia ayalin la rialam de, ne riy rahu e rsumbain la pliorni. 11 Noka plinu-plinnianama Orgahi-Orha'a hopopanni ntutu gaini la Sakaria. Hopopan de ntutrier lia katri'ana maka ha rtutnia ayalin la de, walli malganna. 12 La'pa Sakaria namkek nana hopopan de, dewade nhedum pa namta'at wenna. 13 Mere hopopan de nakot la niwra: ”Hei! Sakaria yan mumta'ata! Uplerlawna e Natlin oleka o sniumbainmu. Hota o patke'emu Elisabeta nmor nian a'na muanke'a ida, ne mual nanni de Yohansi. 14 Hota omumuki-muhepur toto' meman nohora de, ne la'pa rmoria de riy rahu hota rahepur nohor walia. 15 Yoma hota la'a Orgahi-Orha'a yamkekni, de a'namu de nla'a riy orkotkota-ornanan ida. Hota yan memmemna nemnia anggur turnu onde arka. Ne hota Uplerlawna Nhiw Lululli Nodi plolli la e'a, la' meman la' ler maka ha rmor nian memna e'a. 16 Ne hota Israel mutnu liawanni ratlina-ratailla e lirni-tunnu pa rapali owa'an la Uplerlawna, ira Matromlawanni dee! 17 Hota nlernohora makwohorulu-ktatrulu (nabi) Elia yehwani la' ler delloo! Yoma Uplerlawna Nhiw Lululli Naruri-nalai nian e'a. Pa hota enala' ul pua nwalipra-nwahyaria Orgahi-Orha'a talanni totpena Israel rimormiorni re rwahi' targa la Orgahi-Orha'a maimiaini. De e' ed maka khi'a pa riy maka kor inni-amni onde upni-a'nani rahuri-rawo'ora hota rkalwied owa'ana. Ne riy mak edonna katlina-katailla Orgahi-Orha'a de Enwatut pua ratu ratlina-ratail owa'an la Orgahi-Orha'a, pa emeknekama riy mak kaplol la Uplerlawna yamkekni.” 18 Sakaria nakot la hopopan de niwra: ”Hota emkameni la agat memna hya' mak omukot de naplola? Yoma aghamtoto'owa ne pa'tu mana nhape'ewa.” 19 Noma Uplerlawna hopopanni de nwahla lirni niwra: ”A' di de Gabriel a'u. A'g ed maka khi' hopopan la Uplerlawna. A'g ed mak khima-kre' (melayani) memn E'a la' gen tutullu-lolo'oni. Me E' ed maka khopn a' pua agodia kot kalwied dilla mai o'a. 20 Mhuoratreria! Hota ompual lia mak khakamu yoma o' edonna mpuesiay a li'ru. La'pa nte'ela lerni maka Uplerlawna Nakot targa pa a li'ru ri ntutu-nte'ewa, nanpena multieri owa'ana.” 21 La'pa palo'on ho'a mana riy rtepartarlia wniei Sakaria. Honona re rwarora riwra: ”Sakaria mahnek rehia la'a Uplerlawna roma kreini ralamni. Nihya'pa emkadeno?” 22 Ne la'pa nlergot wa de ta'en niana nakot hadomdom la' mak kwei re. Mere nal to' limni na nawal hatilu. Yoma nwali olek la mak khakamu. La'pa ramkek emkade noma ratg oleka Sakaria, de matni ri'ini npah'a nan hadom la'a krei ralamni. 23 La'pa yatiakni nhorwua la'a Uplerlawna roma kreini ralamni noma Sakaria nawali owa'an la e romni nayanni. 24 La'pa edon nalo'on wali ne hawni Elisabet na'apnu, dewade edonna nlergot nana wolla wolim la roma nayanni. 25 Noma niwra: ”Hota la'awa hohoni di, de Orgahi-Orha'a Ntutga ralam kalwiedni pa Ntulan la mai a'u yoma Nhi' a pua a'u'a'na pede a'g edonna muola-mua'a owa'an la'a rira gaini ralamni.”
Rakot nohora hota rmoria Yesus
26 La'pa lerni la Elisabeta na'apun wa, ne la'pa wolanni wonem pa noma Uplerlawna Nhopan pa hopopanni Gabriel nla'a Nasaret, let mak kden la Galilea nohoni. 27 Nhopan doinia Gabriel nmaiya hararara mak kwawa Maria mak kor Yusup, ray Daud duratni-waitni, de ranyah'a tar oleka. Ra'an lira-remun waw pa hota rmehlima, mere Maria edon nor muanke' id mana rawok ma'ta la yaninni. 28 Hopopan de nma nakot la Maria niwra: ”Maria ee! Kalwiedo! Orgahi-Orha'a Nara'a-napa'lu ne hota E Nor o' talla!” 29 La'pa natlin nana hopopan de lirni dewade Maria ralamni worwuorga pa nwaror la'a-mai lia ihranu ralamni niwra: ”Ha wniak kalwiedni de nnia'eratni emkamenio?” 30 Noma hopopan de nakot la niwra: ”Yan mumta'ata Maria, yoma Uplerlawna Nara'a-napa'lu! 31 Hota omu'uhu-mu'apun nana a'na muanke'a ida, ne muala pa nanni Yesus. 32 Hota nwal lia riy lalawna ida, ne hota rweta la Uplerlawna mak kden la tutullu-lolo'oni A'nani. Orgahi-Orha'a Uplerlawna-Mempulwatnu hota Nhi' E' pa Nla' Ray, pa emekwalima E upni-tgarni ray Daud. 33 Me hota plol toto'a pa Enodi plolli la'a Israel duratni-waitni pa nodia liarni.” 34 Noma Maria nakot la Uplerlawna hopopanni de niwra: ”Mere, a'g edon gor ma'ta muanke'a ida manin wutu pa hota emkameni pede a'u'a'na?” 35 Noma hopopan de nakot la niwra: ”Hota Uplerlawna Nhiw Lululli Nmai tiemn o' de. Ne Uplerlawna mak kden la tutullu-lolo'oni plolli-mneheni hota nwewarna'nu. La' hade pede hota papay miaka mu'uhu-mu'apun de rweta la Uplerlawna A'nani. Ne hota Enakleha do'a-hala. 36 Mhoratreria! Hota Elisabet, elmu mak nhape' olek de, na'apn olek pa wolanni wonem pa. E' ed maka ha riwra nkeran pa nakleh a'na mere hota nayori a'na. 37 Yoma hadoma edonna ta'enia la Uplerlawna.” 38 Noma Maria nakot la niwra: ”A' di de Orgahi-Orha'a hopopanni a' pua nden nek la Uplerlawna lirni mak omukota re.” Noma Uplerlawna hopopanni de nhoitio'or la Maria pa nla'awa.
Maria nla ntomra-nnah'a la Elisabeta
39 Noma Maria nwahi'a-nwayodia pa nhorwua noma pleta-plet pa nokria leta ida mak kden la Yudea, la'a gen miaka kden la wo'ora hananni. 40 Nla' noma nokria Sakaria romni pa nwak kalwieda la elli Elisabet. 41 Ne la'pa Elisabet natlin tutga Maria wniak kalwiedni dewade papay mak kden la Elisabet apannu ralamni de nlekru hmuakmuakru. Dewade Elisabeta ihranu ralamni npenpuen olek la Uplerlawna Nhiw Lululli. 42 Noma Elisabet nhar lirni pa niwra: ”O' di de mlier la pripanni-fa'anni (berkat) mak karehi-kalawan la'a maka patke'a honona rlernana. Tertera-demdema (berkat) nwewar nana a'na maka ha muor nian de! 43 A' di de he' a'u pede Uplerlawna Nhi' a pua aliernan nhiu'ru-nhielam di maka a Matromlawnu inni nmai a' diena?! 44 Agat niohora a Matromlawnu eda de la apanmu ralamni yoma la'pa utlin nana ompuak kalwieda, dewade papay mak kden la a apnu di nlekru hmuakmuakru yoma nre'ela nahepru. 45 Mlier la unut lawna yoma mpiesiay oleka de maka Orgahi-Orha'a Nakot tiy o'a hota nayamkeka.”
Maria na'uli-nawedia Uplerlawna
46 Maria na'uli-nawedia Uplerlawna pa niwra: ”A'u'uli-uwedia O'a Matroma. 47 Ne a ralmu nahepuepru yoma Uplerlawna O'a ed mak kamori-kalewn a'u. 48 Yoma O' ed mak khoratreri a'u, hopopanmu a' di, maka kakleha weli. La' ler di pa hota tuwu nernu-nha'ata de hota rimormiori nohkerna wawannu riwra a'g e lier la unut lawna. 49 Yoma Uplerlawna-Mempulwatnu mak kodi plola-ktaryat O'a Mhi'a-myap nieka hihi'a-yapyap miaka samomuou memna mai a'u. Nanmu nden la mounu-wahrani hitni-lomarni yoma O' de mak kakleha do'a-hala. 50 Tuw nernu-nha'ata, mere Orgahi-Orha'a O'a ed mak ktutga ralam kalwiedmu la' riy maka ka'unni-kamta'ata O'a. 51 Mniairia limmu mak karuri-ka'orat de pa na Nwekapie'era riy mak katulu-kapetna. 52 Mulernia ray-ray rella la' mtatangenni mere Mrian tultulga riy mak klol yawa. 53 Omuala mak kalwiedwed la mak kakleha-kaplara, mere makre'a-maktaru de edon rlernan hadom mere Mhuokar doinia la. 54-55 Orgahiya, O' edonna Mhuortaplinga hya' ed maka Muno' taru la makden Yahudi upni-tgarni Abraham, Isak, me Yakop. Pede Omtiutga ralam kalwiedmu la Abraham nora duratni-waitni makden Israel ami makhi' hopopanmu-lili'irmu. Ralam kalwiedmu de nodi pa nodi liarni.” 56 Maria naltier pa nhorwua noma nden wut lia Elisabeta la'pa edon nhal de wolla wotelu nhor diewade nla'awa.
Rmoria Yohansi makharani
57 Nte'ela lerni pa Elisabeta nmoria a'nani, noma nmor niana muanke' ida. 58 Elisabeta rom heiwialli re ror wutga inni-narni re ratlin nana de Orgahi kalwiedni mak kreh mieman de la'a Elisabet, noma honona re rmai pia rahepur nohora Elisabeta. 59 La'pa keke'en de umarnu lera wo'awa noma rom heiwialli ror wutga inni-narni rmai totpena rsunta keke'eni de, noma inni-narni riwra ral nanni pa nlernohora amni Sakaria. 60 Mere inni nahmena niwra: ”Rwet neka la Yohanis wa.” 61 Noma riy rakot la riwra: ”Nihya'pa emkadena? La miy upmi-tgarmi de riy id mana edonna nwawa nan de.” 62 Noma rawala hakamu lia Sakaria riwra rala hya' nan la a'namu dina? 63 Noma Sakaria nwaka watu-le'g id pa nhorat la, de nhorta: ”Nanni de Yohansi.” Honona re rwer rer wiawni. 64 La'pa nwet nanni la Yohansi dewade Sakaria mana lirni nawali owa'an la genni pa na'uli-nawedia Uplerlawna. 65 Rom heiwialli re honona ramta'at wenna. Ne riy harahu mak kden la Yudea la wo'ora re uhunu-ewatni idma rwahaur nohor ida la' papay die. 66 Riy honona rwarora la' ralamni, riwra: ”Hota keke'en de lawan de la'a hya' o?” Yoma ramkek de Orgahi-Orha'a e Natiak reria de!
Sakaria nwahaur nohora maka Orgahi-Orha'a Nakota
67 Uplerlawna Nhiwni Nodi plolli la Yohansi amni Sakaria pa nwahaur nohora hya' maka Orgahi-Orha'a Nakot targa la e'a niwra: 68 ”Mai pia ta'uli-tawedia Orgahi-Orha'a Israel Uplerlawna-Mempulwatnu. Yoma Enmai pia Ntuwu-nhai (menebus) mutnu-rahanu re. 69 Hota Nala de muanke' ida metam keranni (mak karuri-kalai pa) Nma Namori-nalewn ita. E' de Uplerlawna hopopanni Daud di'nani-lohorni duratni-waitni. 70 Pa hota emekneka Orgahi-Orha'a Nano'targ oleka la ululu memna lola makwohorulu-ktatrulu (nabi) maka Ha Nwalir niana pa rakot nohora re. 71 Totpena hota Nma Namori-nalewn it la'a ita arwalli mak ktern ita. 72 Nmai pia Ntutga ralam kalwiedni la it upni-tgarni Abraham, Isak, me Yakopa yoma E' edonna Nhortaplinga nnio' maka Enmemeh'a Nano'targa la ira, pa dodo'ondi de Nmai pia Nhi' memna. 73 Nnairi liokra pa naplol nohora nnio'oni de la it amni Abrahama, 74 de hota Nalewn it la'a it arwalli, totpena yan tamta'ata la tsima-tre' E'a, 75 totpena itwal lia E rimormiorni mak kakleha do'a-hala me mak kden la plol wawna pa nodi liarni. 76 Mere la'pa Yohansi a a'nu o'a de hota rhoi o la makwohorulu-ktatrulu makhi' hopopna-lili'iru la'a Uplerlawna mak kden la tutullu-lolo'oni. Yoma hota o' e mula'ul pua mpualipra-mpuahyaria Orgahi-Orha'a loini-talanni. 77 Hota mhi' emkade la'a mukot nohora la E mutnu-rahanu ita, miwra hota Uplerlawna Namou-nawitn it do'oni-halli, ne emkade pede hota tler la yamori-yalewna. 78 Ne hota tler la yamori-yalewan de yoma it Uplerlawanni, ralam kalwiedni mak kareh mieman de mai ita. Yoma hota la' E kalwiedni de pede hota Ray Makamori-Kalewna ida Enwatiawua Ilyamou-Watyatoha (Sorga) pa Nmai pia emeknekama lera mak khitit la yawyawra. 79 Totpena riy mak kden la melmelli-kalkalamni me ramta'ata hota rmati, de hota rlernana lelerni. Pa hota emkade pede E' ed mak kodia it la'a loi-talla maka kod it pa itora Uplerlawna tkalwieda owa'ana.” 80 Sakaria naltier pa nhorwua noma la' pa Sakaria a'nani de nlawlawan lol wa me pesiayni la'a Uplerlawna mana narur wia, noma nmeh'a ndel la'a wo'orletna-kawurloini. Nden nek la' hande pa nte'ela lerni-melli dewade ntutga rupni la'a riy Israel rewa.
Rmoria Yesus
1 La' ler (maka na'nam ha rmor nian Yohanis) de Kaisar Agustus (makhi' ray lia lodna-hairi Romawi) nakot lirni pa mak kden la Romawi lodanni-hairni totpena honona rma rakot nanni pa rhorta totpa rhor (rekna) momuoga kuku'uni-lalawanni honona (sensus). 2 Sensus di ed mak kala' ulu la' ler maka Kirenius nhi'a gubernur la' Siria na'nama rhi'a sensus di. 3 La' ler de de riy honona rawal lia letni-ruhunni, totpena rhorta nanni la mak ktoran leta horta hairni. 4 Pa hota Yusup mana nden la Nasaret la' noha Galilea pa nokria noha Yudea, pa nla' let Betlehem maka ha rmor tiarga ray Daud, yoma Yusup nwatiawua Daud luwnu-a'nani. 5 Noma Yusup nor niah'ani Maria mak ka'apuapun rer die rmai rewre'wa pa rhorat walia nanni la hande. 6 La'pa rdella Betlehem dewade Maria wolanni ntu'tu wa pa hota nayor wia. 7 Noma nayor dioinia a'na yanullu muanke'a ida, de nala koka na ntomna na'nama nadud tiarga la duma ya'an genni maka ha rala wewnihi ra rwowa, yoma ir edonna rlernana geni-tiena la' geni miaka ha rpairi pa ranin la hande. 8 La' mel de de makodi duma ertepartarlia yatiaka dumni re la'a wewna wawannu mak edon olieta la Yusup nor Maria genni. 9 Noma plinu-plinnianama Orgahi-Orha'a hopopanni Ntutga rupni la ira, ne Orgahi-Orha'a hitititni reprepar nana ir honona pa reiniande honona ramta'at wenna. 10 Mere hopopan de nakot la re niwra: ”Yan mimta'ata! Yoma a'g e godia kot kalwiedweda id tiy miy! Hota hadi de nodia hepuepru la riy honona. 11 La' ler di de rayori oleka papay id la Daud letni (leta tniet ohorni), mak kodia miy lia mormiori-lewlewna. E' ed maka ha riwra Ray Makamori-Kalewna maka Uplerlawna Nano'taru, de Itmatromni. 12 Ne hota la' hadi pede hota miat niohora memna a li'ru ri raplola: de hota mlia' pa mliernana papay ida de e rala koka ra rtoman targa me radud tiarga la duma ya'an geni maka ha rala wewnihi ra rwowa.” 13 Plin-plinnianamde Uplerlawna hopopanni re ema riw niana pa nor wutga hopopna mak kala' ul die raloi lirni pa ra'uli-rawedi Uplerlawna riwra: 14 ”Uplerlawnu nee! Ama'uli-mawed reri O la O genmu-tienmu la' tutullu-lolo'oni. Hota kalwieda-paitiota la'a nohkerna wawannu la'a rimormiori miaka Uplerlawna ralamni nala.” 15 Dewade Uplerlawna hopopanni-lili'irnu re honona rwarei lia gen die wa pa rawal lia Ilyamou-Watyatoha, noma makodi duma re idma nakot la ida riwra: ”Mai pia tla' teka Betlehema pa tamkeka maka Orgahi-Orha'a Nakot mai ita rena!” 16 Pede honona radil doin la (ririri pa rla'awa) pa rla de rhor niana mdududga Maria nora Yusup me papay die maka e radud tiarga la dum ya'an gen die. 17 La'pa ramkek nana papay die noma rla' rwahaur nohora la' riy, la'a hya' maka hopopna re rakota la ira la'a ke'enku' de. 18 Ne riy honona mak katlin nana de rwer rer wiawni la mak ha rwahauru re. 19 Mere Maria nwarora-nwalai niohora hare honona pa nwatierun targa la ihranu ralamni. 20 Noma makodi duma re honona rawal pia rla ramkek la nhiurni-wnia'anni. Ne ra'uli-rawedia rlilili-rmamuawua Uplerlawna kotni-nanni, yoma la'a hya' maka hopopna rakota la ira pa rla' pa rlina-rmat (ramkek) meman oleka de. Hya' maka ha ramkeka de emekwalia maka Uplerlawna hopopanni-li'irnu nakota la' ira.
Rala Yesus nana tniet ohorni (nanni)
21 La'pa Yesus Nler la lera wo'awni dewade o'ta-mata krei rma rsunta. Ne inni-amni rhi' nanni pa nwawa Yesus. Yoma nan de ed maka Uplerlawna hopopanni ha rakota la' lera Maria edonna na'apnu ma'ta.
Rodi Yesus la Uplerlawna roma kreini
22 Noma la la'pa nte'ela la' lerni pa Yusup nor Maria rlernohora Musa deullu-tatarni pa rhi' amou-awitna inonni re la'a Uplerlawna roma kreini, pede rod walia a'nani Yesus la Yerusalem pa ral wali a'na de la Orgahi-Orha'a la' hande, 23 pa emekneka Orgahi-Orha'a nnio'oni maka Nakot taru la' Musa deullu-tatarni de Eniwra: ”Riy honona a'na muanke'a yanullu de ed maka rala la Orgahi-Orha'a orgahani.” 24 Ir mana e riwra ral walia himima-rere'a la Orgahi-Orha'a la E roma kreini totpa rhi' amou-awitna inonni rlernohora maka ha rakot targa olek la'a Orgahi-Orha'a deullu-tatarni ralamni de niwra la'pa rhi' amou-awitna inonni (mere rakleha-raplara), hota ral neka ma'nu loktieru id nora tnialwialli, onde lmo'ma maru trapriapi woru. 25 La' ler de wal pia riy id etla la' Yerusalem de, nwawa Simeon. Hade ed maka nhi'inde ntutga nhiolia samomuou la rimormior wialli, me natu na'unni-namta'ata Uplerlawna lirni-tunnu, deullu-tatarni, ne nwei rer niek la' lerni-melli maka hota Uplerlawna Namori-nalewna Israel. Uplerlawna Nhiw Lululli Nor reria talan wutu. 26 Ne Uplerlawna Nhiw Lululli Nakot olek la wa Niwra hota e' edonna nmat mia'ta yoma edonna namkek ma'ta Ray Makamori-Kalewna maka Orgahi-Orha'a Nano'tar die! 27 La' ler de Uplerlawna Nhiw Lululli niodni pa Simeon nler la Uplerlawna roma kreini, dewade nwatrom tut niana Yusup nora Maria rod wialia a'nani Yesus maka lokmermer ma'ta de pa rma rlernohora Musa deullu-tatarni. 28 Dewade Simeon na'ala keke'en de na'nama nakiria pa na'uli-nawedia Uplerlawna niwra: 29 ”Orgahi-Orha'a nu ne! Uplerlawna-Mempulwatnu mak kdella tutullu-lolo'oni mak kodi plola-ktaryatu, hya' maka Omukottaru mai a'u ntutu-nte'ewa, pede ndella pa hopopanmu a' di alier la matmiati yoma a ralmu di namtiertiernu olekwa. 30 Yoma agal memna ma'tu olli rora pa ga umkeka riy maka Omtiutga olek pa Nma Namori-nalewna rimormiori de! 31 Makamori-Kalewan de, O' e Mpuahi'a-mpuayod tiarg oleka wa totpena Nma Nod tiemna luwu-a'na mak kden la lodna-hairi re honona totpa honona re ramkek nan memn E'a. 32 Pa emeknekama hulu mak kodia lelerni la Yahudi atia'a totpena rat niohora O'a. Ne onnila hihi'ini pede riy honona rhu'ru-rhelam la mutmu-rahamu Israel.” 33 Keke'en de inni-amni rwer rer wiawni la'a hya' maka Simeon ha nakota la keke'en de riorni-liaini. 34 Simeon nwaka Uplerlawna totpa Nala tertera-demdema la ira, noma nakot la Maria niwra: ”La' keke'en di de Uplerlawna Ntutmuata-nkewra'a oleka E' pa hota la'pa nlawan oleka de, Nalernia Israel uhunu-riwni (harahu) dom mak kahmena rpesiaya me Israel uhunu-riwni dom de Nrana pa rwakriania Uplerlawna. Hota riy ramkek nana E hihi'ini-yapyapni onde ratlin nan E lirni mak ktutga Uplerlawna ralma-riorni mere rimormiori liawanni hota rwayotlia E'a. 35 Ne hota la' hade pede Uplerlawna Nalharia riy harahu ralma-riorni pa riy dom to'a rat niohora ir ralma-riorni wali. Ne hota Maria, o ihramu-ralammu mana nmawal doin meman la pa emeknekama wehla ploklokra maka ha ra rteti-rlaiya pa ra rkokia la ihramu-ralammu.” 36 Me la' hande de patke'a makwohorulu-ktatrulu id etla nhape' olekwa, nanni Hana. Fanuel, Asyera duratni-waitni, de a'nani. Nmehlim pa mahnekni anni wo'itu mere hawni nmati. 37 Pa napatyata, me nmormior nan oleka anni terampwo'awa wehrani wogata, ne nhi'inde nhol lielera-melmel to'ola' Uplerlawna roma kreini. Lelera-melmela de nden nek la hande pa nkola tieru-nawur nehla la Uplerlawna me natahan lara. 38 Simeon naltier pa nhorwua na'nama hape' de nma nhuru nana harella hande, pa na'uli-nawedia Uplerlawna me naltier niohor la keke'en de la'a riy honona mak kden la hande maka rwewiei niohora hota Uplerlawna Nwe'er doin mak kden Israel re la'a wutwutu-kokgohu.
Rawal lia Nasaret
39 La'pa Yusup nor Maria rhi' ahorga deulu-tatra Orgahi-Orha'a hanni, noma rawal lia Nasaret, ir let wamueheni de la Galilea lowanni. 40 Keke'en de na'ititar rer lia liawanni nora rurni-laini, me la' wniarora-wnialai samomuounu, ne Uplerlawna ralamni nala!
Rlernana Yesus la Uplerlawna roma kreini ralamni Natian rer lia'a-mai makwatutu-kwaye'a agama re
41 La' anni-anni nekpa Yesus inni-amni rla'a Yerusalem totpena rhi' nohora Yahudi ler kalwiedweda Paska (maka rhoratreria tuini-wedni la'a ler maka rlergot la Mesir). 42 La'pa Yesus Nmormior niana anni termida wehrani woru noma nor rewre'wa inni-amni rla'a Yerusalem totpena rhi' nohora lerlalawan de pa emekwalima la anni-anni inni-amni rhi'a de. 43 La' pa lerlalawan de nhorwua noma rpolan wa. Mere Yesus, keke'enku' de, Nwarin mia'ta la Yerusalem mere inni-amni raplin niohora. 44 Inni-amni ratniekame Enor la mutlialawna re pa rala' wutu pede rodi liarni la'a yala'a la'a lera ida. Dewade inni-amni rwahak la'a-mai nieka Yesus la'a mutlialawan de la'a inni-narni ror wutg riy maka irat niohor oleka. 45 Mere inni-amni edonna rlernana ha lolola. Pede la' lera wornu de inni-amni rawali owa'an la' Yerusalem pa rwahaka. 46 La' lera wotellu la'a wniahakni de na'nama rlernana E' la Uplerlawna roma kreini de Enora makwatutu-kwaye'a agama ramtatan wut pua Natlina-natailla re, ne Natian la'a-mai makwatutu-kwaye'a agama re. 47 Riy honona mak katlin reria re rwer rer wiawni la keke'enku' de, yoma Nwet la mak ha ratiana la E'a, de kriahi-kriahaya. 48 Inni-amni mana rwer rer wiawni la' a'nani de. Noma inni nakot la niwra: ”Ama, nihya'pa Omhi'a-myapia emkadilla mai ami? Agor ammu mdiwra-mda'al la o yahakmu.” 49 Noma Yesus Nakot la Niwra: ”Ina, nihya'pa omuora a'mu mihak A'u la meni-meni? Miy e miplinga de hota A'g etla A A'mu romni nayanni?!” 50 Mere inni-amni raplin niohora a'nani de lirni nnia'eratni. 51 Nhor nioma Yesus nor rewre'wa inni-amni re pa rla'awa la Nasaret ne natu natlina-natailla inni-amni. Ne hare honona de er momuou lia inni ihranu ralamni. 52 Yesus la' pa Nlawlawan lol wa ne Na'ititar rer lia wniarora-wnialai samomuounu me yeher to' pa Nla' nana Uplerlawna Nor walia rimormiori ralamni.
Yohansi makharani nakot nohora Uplerlawna lirni-tunnu totpena nwahi' targa rira ihranu ralamni la Yesus maimiaini
1 La'pa Kaisar (ray) Tiberius nodi plolli nana anni termida wehrani wolim pa, Pontius Pilatus nhi'a gubernur la Yudea, ray Herodes nod plolli la Galilea. Ne Pilipsu, Herodes hyalli, de nodi plolli la noha Iturea me Trakonitus, la'pa Lisanias demade nodi plolli la'a Abilene. 2 Ne la'a makla' o'ta tutulu la imam-imam honona re, de Hanas nor Kayafas. La' anin de ralamni nekpa Uplerlawna Nhar lirni la Yohansi, Sakaria a'nani mak kden la wo'orletna-kawurloini. 3 Noma Yohansi nlol meni-meni to'owa la'a gerlawna Yordan uhunu-ewatni-lahwani pa nakot nohora Uplerlawna lirni. Yohansi nhaun pa niwra: ”Hoi! Mhioitio'ora-mtiahnei dioinia do'omi-halmi re pa mai pia rharan miy ee! Totpena hota Uplerlawna Namou-nawitan miy lia do'omi-halmi!” 4 Yohansi hihi'ini-yapyapni mak emkade de hota emolmolan nekama mak ha rhorat targa la makwohorulu-ktatrulu Yesaya Pukni ralamni de e riwra: ”Hota riy ida e polpuolu-hawaunia la wo'orletna-kawurloini pa niwra: ”Mpiahi' targa talla la Orgahi-Orha'a, mpiale'era loini-talanni. 5 Mtiwria pen tani la elaw maka katro'a-kakdielma re, me mtiurwaneha wo'ora tutulu kyawyawa re. Me loi-talan maka koili-kaili mana mhi' wale'era, me talan maka katro'a-kakdielma mana mpianeha wawannu. 6 Totpena rimormior nio' nohkerna wawannu honona ramkek memna, la emkameni Uplerlawna Namori-nalewna rimormior la noha wawannu.”’’ 7 Noma riy harahu ema rtiwur nana pa rma rahaka Yohansi pa rharania. Noma Yohansi nakot la dom de niwra: ”Hoi! Miy di de emolmolan nekama niy mak kodi nhienni yoma mhi' tukla-wahla. He' ed mak kiwra la'pa rharan nek miy demade hota Uplerlawna niukum lawanni mak kmai niek de hota edon nal miy?! 8 Mere mtiutga nhioli-liet kalwiedwedmi, totpena riy ratga de plol toto'a mhioitio'or doin-mtiahnei dioin oleka do'omi-halmi re wa. Yana mpiarora de hota miy edonna mliernan niukum lawna yoma upmi-tgarmi de Abraham. Yoma Uplerlawna nekane Nodi plolli pa Na'ala watu-watu ri pa Nhi'a la Abraham duratni-waitni. 9 Mhioratreri ee! Uplerlawna e Nwahi' meman targa pa Nukmua he' to'a mak edon kolin doinia do'oni-halli. Yoma emeknekama Nwahi' targa wro'onni pa na Netan dodioinia ora-au onni pa la ntut lia ga'arni re honona. La'pa ora-au muaka edon kawo'a samomuounu, de hota Nhoi wro'onni la pa Nnaklia la ai ralamni.” 10 Noma riy lia mutlialawna re ratiana Yohansi riwra: ”Hade emkade, de hota amhi'a hya'a wa?” 11 Noma Yohansi nakot la re niwra: ”La riy maka hanni raini woru, de nal id la'a riy mak kakleh raini. Ne la' riy maka ya'anni-yemannu erla de nhakra la mak kakleha.” 12 Me mak kawoka blastena mana rmai pia totpena Yohansi nharania re. Noma ratiana Yohansi riwra: ”Tungkurga! Hota emkameni wal miai ami?” 13 Noma Yohansi nakot la niwra: ”Yan memmemna mimpiak de narehi-nalawan la maka miy o'tami ha nhopan pa mlia miwoka.” 14 La' hande mana makodi keki-rautu ratian nohor walia emkameni la ira? Noma Yohansi nakot la re niwra: ”Yan memmemna mpiarui-mpiate'la rira kupanni-kaini yoma mtiota-mpiud riy de la hal wawna. Mere mi'ina-miemun neka kaimi la' liwatmi-odapmi welli!” 15 La' ler de riy rwei rieri Ray Makamori-Kalewna maka Uplerlawna Nano'taru pa rwarora: ”Yanpa Yohanis di, de ed maka ha rakota riwra Ray Makamori-Kalewna maka it twei-tnara inhattio?” 16 Noma la' hade pede Yohansi nakot la re niwra: ”Ina-nara ama-hyali, a' di agala gera ga gharani miy, mere hota riy mak kmai die, Nala Uplerlawna Nhiwni tiy miy me emekwalima Nala ai na Nharani miy. E Nareh dioin a'u. Hota awue'er doin lakni wniowni ho'mana a'g edonna puar nana. 17 Ne hota emolmolan nekama E' ed maka ktorreria totopa maka ra ralipra-ratai metma-wetra' lawna (gandum). Metma-wetra' lawan de, hota rawoka la'a dudnu (kliala) ralamni, mere hota kownu re honona de rwalia la ai miaka takeni rwarum nana!” 18 Pa emkade mamain la Yohansi nano'a-na'atga rira la'a hya' to'a, la' ler maka ha nakot nohora Kot Kalwieda-Paitiota de la' ira. 19 Mere Herodes mak kodi plolli la Galilea de, Yohansi namer matni pa npolliohora, yoma nor owa'ana yerni Herodias rmehlima, me npolliohor walia Herodes yatni-halli dom to'a honona maka ha nhi' oleka wa. 20 Mere Herodes edonna nmaltier eti, ne yeher to'a me nhi' rereria yatni-halli la'a enken tiarga Yohansi la roma nhio'la ralamni.
Yohansi nharania Yesus
21 La'pa edon rken mia'ta Yohansi la roma nhio'la ralamni, de la'pa Yohansi entepartar ma't la nhiarania riy harahu re, noma Yesus Nmai wial pia rharania wa! Ne la'pa Yohansi nharania Yesus pa nhorwua noma Yesus Nsumbain reri dewade lyanti nhar dioinia. 22 Pa Uplerlawna Nhiw Lululli Nerun de emolmolla ma'nu lmo'ma maru (merpati) pa ntai lia wawannu. Noma ratlin de Uplerlawna Nhar lirni la'a lyanti Niwra: ”O' de A A'nu mak Asiayni inhatti. O' ed maka kla' nana A ralmu.”
E rhorat targa Yesus Kristus upni-tgarni kotni-nanni
23 La' lera Yesus Nwau kniarni de tuwnu la'pa edonna rhal de anni terampwotelu. La'a rira wniarorni de E' de Yusup a'na raralamni. Yusup amni de Eli. 24 Eli amni de Matat, Matat amni de Lewi, Lewi amni de Malki, Malki amni de Yanai, Yanai amni de Yusup. 25 Yusup amni de Matica, Matica amni de Amos, Amos amni de Nahum, Nahum amni de Hesli, Hesli amni de Nagai, 26 Nagai amni de Maat, Maat amni de Matica, Matica amni de Simei, Simei amni de Yosek, Yosek amni de Yoda, 27 Yoda amni de Yohanan, Yohanan amni de Resa, Resa amni de Serubabel, Serubabel amni de Sealtiela, Sealtiel amni de Neri, 28 Neri amni de Malki, Malki amni de Adi, Adi amni de Kosam, Kosam amni de Elmadam, Elmadam amni de Er, 29 Er amni de Yesua, Yesua amni de Elieser, Elieser amni de Yorim, Yorim amni de Matat, Matat amni de Lewi, 30 Lewi amni de Simeon, Simeon amni de Yehuda, Yehuda amni de Yusup, Yusup amni de Yonam, Yonam amni de Elyakim, 31 Elyakim amni de Mela, Mela amni de Mina, Mina amni de Matata, Matata amni de Natan, Natan amni de Daud, 32 Daud amni de Isai, Isai amni de Obed, Obed amni de Boas, Boas amni de Salmon, Salmon amni de Nahason, 33 Nahason amni de Aminadab, Aminadab amni de Admin, Admin amni de Arni, Arni amni de Hesron, Hesron amni de Peres, Peres amni de Yehuda, 34 Yehuda amni de Yakop, Yakop amni de Isak, Isak amni de Abraham, Abraham amni de Terah, Terah amni de Nahor, 35 Nahor amni de Serug, Serug amni de Rehu, Rehu amni de Peleg, Peleg amni de Eber, Eber amni de Salmon, 36 Salmon amni de Kenan, Kenan amni de Arpaksad, Arpaksad amni de Sem, Sem amni de Nuh, Nuh amni de Lamek, 37 Lamek amni de Metusala, Metusala amni de Henok, Henok amni de Yared, Yared amni de Mahalaleel, Mahalaleel amni de Kenan, 38 Kenan amni de Enos, Enos amni de Set, Set amni de Adam, ne Adam amni Uplerlawna-Mempulwatnu.
Hegana amlawanni nta'aga Yesus
1 Uplerlawna Nhiw Lululli Nodi plolli la Yesus la' ler maka Nlergot la gerlawna Yordan. Noma Uplerlawna Nhiwni Nodia Yesus la wo'orletna-kawurloini. 2 La'pa Nden la hande noma hegana amlawanni nta' niana la lera-mela terampwogata. La lelera-melmel de Yesus edonna na'ana hadomdoma, pede la'a lera terampwogata hohoni de Naplar memna. 3 Noma hegana nakot la Yesus niwra: ”Hoi! Uplerlawna A'nani O'a toh?! Mhuopan teka watgau di pa nwal lia yamanna pa Omu'una.” 4 Noma Yesus Nakot la Niwra: ”Hota A'g edon liernohora o lirmu de, yoma la' Puka ralamni de nakot nohor oleka de: ”Rimormiori edonna rmormior die yoma la'a yamanna nmeh'a.”’’ 5 Noma hegan de nodia Yesus la wo'or tutul liawna id hananni, ne mtatande nekpa hegana ntutga hairi-hairi (kerajaan) mak kden la noha wawannu honona la' Yesus, 6 na'nama niwra: ”Hota agala pa Muodi plolli la hairi-hairi re me Mliernana hairi-hairi re re'eni-tniarnu, yoma la' hare honona rala oleka mai a'u pede agiwa gala la he' to' de plolli nek ma' a wua. 7 Hairi-hairi honona re hota agala tiy O'a pa Omuodi plolli la, hornama Omtiuk pua Mhu'ru la a la'ku nayanni.” 8 Noma Yesus Nakot la Niwra: ”Mere etla Puka ralamni de e niwra: ”Riy honona rhu'ru-rhelam la Orgahi-Orha'a Uplerlawanni, me ratlina-ratail to'ola Ha Nakotkota.”’’ 9 La'pa nhorwua noma hegana amlawanni de nodia Yesus pa nla'awa la'a Yerusalem na'nama nkenia la Uplerlawna roma kreini wuwannu pa Ntutrier lia hande na'nama hegana nakot la Yesus niwra: ”Plola O' di de Uplerlawna A'nani O'a, de Mnieh gerun tek la handina! 10 Yoma la'a Puka ralamni de e niwra: ”Hota Uplerlawna Nhopna pa hopopanni ratiak reri o'a. 11 Hota rkim o'a totpena yana mtiuini ne watgau mana hota edonna rtai o'a.”’’ 12 Noma Yesus Nakot la: ”Mere etla Puka ralamni de e niwra: ”Yan memmemna rimormiori rta'aga Orgahi-Orha'a makla' ir Uplerlawanni (yoma ir rhi' hihi'a-yapyapi podpodku-padpadku dewade rwak la Orgahi-Orha'a pa Namori-nalewn ira)!”’’ 13 La'pa hegana amlawanni de ntot la'a-maiya Yesus dewade nto'or la pa nwei lerni-melli dom to' owa'ana.
Yesus Na'on ulga kniarni la Galilea
14 Nhor nioma Yesus Nawal lia Galilea ne Uplerlawna Nhiwni Nodi plolli la. Nwewar la gen die uhunu-ewatni-lahwani, de npe'era-npah'a la Yesus kotni-nanni. 15 Enwatutu-nwaye'a la'a roma-lewu muaka nhi'inde Yahudi rhi' kreini-iskolli, ne riy honona ra'uli-rawedia E'a.
Edonna rreiniana Yesus la Nasaret
16 Noma Yesus Nla' owa'an la leta Nasaret, la'a gen miaka Enor inni-amni rdella la' ler maka Ha Nlalawan lola de. La'a Sabat lerni maka Yahudi edon rkar lia de, de Yesus Nla'a roma-lewu maka nhi'inde Yahudi rhi' kreini-iskolli, pa emeknekama nhi'inde Enhi' nana. Noma Enaprir pia Npaikia Puklawna. 17 Ne rala makwohorulu-ktatrulu Yesaya Pukni. La'pa Enweran doinia Puka pniopan della dewade Nahak pa Nlernana ayat id totpena Npaikia la rira gaini ralamni. Ayat de lirni emkadi: 18 ”Orgahi-Orha'a Nhiwni etla A ino'nu. Yoma E' ed mak ktutmuata-kewra' A'u totpena ukot nohora Kot Kalwied della mak kakleha-kaplara. E' ed mak khopn a pua ukot nohora la'a riy maka rwutu-rkoh tiaru hota rolin doin ir la, me rwe'era aphyaria mak matni kyata, me rolin doinia la maka rutni-rdahla re. 19 Ne totpena ukot nohora Orgahi-Orha'a wennu-wolanni maka kmai nieka di maka hota Entutga ralam kalwiedni la E mutnu-rahanu.” 20 Yesus Npaik pa nhorwua noma Npopn owa'ana Puk della genni, ne Nal owa'ana la' mak ktorna Puka re, nhor nioma Namtatna totpa Nwatutu-nwaye'a re. Riy honona mak khi'a krei re rwatniar reria Yesus. 21 Dewade Nakot emkarella Niwra: ”Hya' maka Apuaik oleka ri de Aghi' olek la dodo'ondi memna.” 22 Lira-tun muaka Ha Nakota re narieiniande irwer rer wiawni la ne rwarora de samoga re pede irarian la heyanna pa rre'ela rhi' nohor walia E'a (menyokong). (Mere nhorwua noma emeknekama ralamni re rakwali pa edon rpesiaya,) pa idma nakot la ida: ”Hade de Yusup a'nani to' neka hadi toh?!” 23 Noma Yesus Nakot la re Niwra: ”Agatga de miy miwra mikot la mai A lia hya' mak riy nhi'inde riwra: ”La'pa plollolli de dokter o'a de orgahamu mhi' kalwied teka orgahamu.” Yoma miy wniarormi de la'pa plollolli de Agodi plolli pa ghi' oleka hihi'a-yapyapi mak kamehi-kayona (mujizat) la Kapernaum emeka mitlin nana oleka, de hota Atiut walia A plo'lu-mneh'u pa ghi' tek walia hihi'a-yapyapi mak kamehi-kayona la'a A let wamueh'u dina. 24 Mere mhioratreria me! Hota la' makwohorulu-ktatrulu ida, riy edon rreiniana-ra'nana la' e let wamueheni, yoma mak kden la e letni re edonna rpesiaya. 25 Mimpiesiay A li'ru di! La'a Elia lerni, de otna edonna ntur niana anni wotel riehenu, pa nhi'nande lar lawna nwewar noha. La' ler de patyata harahu la'a Israel. 26 La' emkade ho'mana Uplerlawna edonna Nhopna Elia nla'a riy id la'a patyata re, mere eneknek to'ama nla' patyata id la'a Sarfat la'a genia Sidon. 27 Emkade walia la'a makwohorulu-ktatrulu Elisa lerni de mak kden la Israel liawanni rlernana nhieni ulityata-temyata ho'mana riy id edonna nkalwied eti eneknek to'ama Na'aman, de riy Siria ida.” 28 La'pa iratlin E lirni mak emkade dewade hare honona la'a gen die ralamni rawenan doin la. 29 Honona raprir pia rhokar doinia Yesus la'a leta to'orni, pa ra rpuitia la'a tuini werna ida, maka ha rariria letni de. La ralma-riorni totpena rotliernia Yesus la'a tuini werna kdieldelam de ralamni. 30 Mere Yesus Nala'a la riy mutlialawna re letgarni pa nadil doin la (Nla'awa).
Yesus Nodi plolli pa Nhokar gota hegana-kawnu, yatni-rha'ani
31 Nhor nioma Yesus Nla'awa la leta Kapernaum la Galilea. La hande de Enwatutga riy rahu la'a Sabat lerni, maka Yahudi edon rkar lia de. 32 Riy rwer rer wiawni la wniatutnu-wniaye'eni de, yoma Nodi plolli (wibawa) pa Nwatutu. 33 La'a gen miaka nhi'inde Yahudi rhi' kreini-iskolli la, de riy ida maka hegana nhu'ru ralma. Nhaunu-nhaunu pa niwra: 34 ”Hoi, Yesus Nasartu ne! Hota Omhi' nan emkameni mai ami oo! Ommuai pia mpieyat ami? A'g e gat niohora de he' O'a! O' di de maran yamou-wuhur yatoha (yang suci) maka Uplerlawna Nwalir niana pa Nhopan pa Ommuai lia nohkerna wawannu!” 35 Dewade Yesus Nkamota Niwra: ”Rhodal nurmu! Rhokargo'tu la'a riy di!” Noma yatni-rha'ani de nhi' riy de pa ntuini la tani wawannu la'a riy honona gaini ralamni, nhor nia'nama yatni-rha'ani de nhargot wa, mere riy de edonna na'eram nana mehra-mau kuku' eti. 36 Riy honona rwer rer wiawni me idma nakot la ida riwra: ”Ha yaltierni de Nodi plolli la hegana-kawnu, yatni-rha'ani pa ema rho'or dodioinia!” 37 La' hade pede yeher to'a me Yesus kotni-nanni ema reyapie'era la geni-tiena re honona mak rehgorgoru.
Yesus Nhi' kalwieda riy rahu mak kanieni
38 La'pa Yesus Nhoitio'or la roma-lewu maka Yahudi re rhi' kreini-iskolli de, noma Nodi liarni la Simon romni. La' de Simon yananni entepartarlia riuru npahna nohora tema pniahnani, noma rwaka Yesus pa Ntulan la. 39 Pede Yesus Nla Nwakriania patke' de yanin genni, na'nama Nkamota ruru pniahna della' patke' de, dewade nnienni de nmolu. Noma namat meman pa nla nwahi'a-nwayodia ya'ana-yemnu pa honona ra'ana-remnia. 40 La'pa lera ntuinia dewade riy rahu rodia inni-narni honona maka kler la nnieni-nhiena mehra-mau pa rma rahaka Yesus. La' pa Yesus Nran limni la mak kanieni re riy nenenna wawannu, dewade honona re nnienni rkalwied wa. 41 Yatni-rha'ani, hegana-kawnu re mana rlergot momuou lia riy harahu me yatni-rha'ani polpuolu-hawaunia riwra: ”Amatg oleka de Uplerlawna A'nani O' ee!” Mere Yesus Nkamota re totpena yana rakot nohor E'a, yoma hegana-kawnu re rat niohora de Ray Makamori-Kalewna maka Uplerlawna Nano'targa E inhatta.
Yesus Nla Nakot nohora Uplerlawna Kot Kalwiedni
42 La'pa lera matni nra'pa gota dewade Yesus Nhoitio'ora la let dewa, ne Nokria geni hgali ida. Riy rahu rtepartarlia yahakni, pa la'pa rlernana de honona rwak memna E'a totpena yana Nwarei lia ir onni. 43 Mere Yesus Nakot la Niwra: ”Kot Kalwieda-Paitiota maka rakot nohora emkameni la Uplerlawna Nodi plolli la riy pa emeka ir Rayni, de hota A'ukot nohora la miy edonna mieh'a mere A'ukot nohor walia la leta-leta korni dom to' wali. Yoma la hade pede Uplerlawna ed mak khopan pa Amuai lia nohkeran di wawannu!” 44 La' hade pede Yesus Nla' pa Nokru roma-lewu dom to'a maka Yahudi re rhi' kreini-iskolli la, la'a Yudea liewnu, pa Nakot nohora Uplerlawna Kot Kalwiedni la' hande.
Yesus Nwaliri-nwalioha mak kala' ul pua klernohor E'a
1 La lera ida, Yesus Enaprir rier lia danau Genesaret eni wawannu pa Nakot nohora Uplerlawna Kot Kalwiedni, ne riy rahu rwakdieh'a pa rmai pia ratlina E lirni. 2 Noma Yesus Namkek de mak kla' lora puounu worga rapniali ne matromni re rerun la pa rtepartarlia ramoga tialli rella eni wawannu. 3 La' noma Yesus Nha'at la puou id de, maka riy ida nwawa Simon gahani, na'nama Yesus Nwak pa Simon nahlera puounu de keke'ela' lora. Na'nama Yesus Namtatna la puou die ralamni pa Nwatutu-nwaye'a riy rariahu re. 4 La'pa Yesus Nwatut pua nhorwua. Noma Nakot la Simon Niwra: ”Mpuehelia pupallu pa mutial i'na.” 5 Noma Simon nakot la niwra: ”Tuna, orawia mel matmiat liawan de amahak i'na mere ami edonna mliernan et hya' doma! Mere yoma Tuna e Nhopna, pede agiwa lia' tieka.” 6 La'pa ir Simon rinni tialli, dewade tialli nma nwenna la i'na, pa reiniande tiala natpoini-nahliawra. 7 Pede rkawlia mutwualli puou handina de pa rma rre'ela, ramoga i'na la tiala. Noka rmai pia rwatierun nana la puou re pa narieiniande nhi'pa rtepra. 8 La'pa Simon Petrusa nlina-nmata (namkeka) hare honona dewade nwaltiora-nwaltieman la Yesus nayanni na'nama nakot la niwra: ”Yan muor nek a' tialan wa Matroma, yoma a' di de, riy dodo'a-halal id a'u.” 9 Nakot emkade yoma Simon nor neka mutwualli la' puounu de, rwer rer wiawni la i'n mutlialawna maka rlernana re. 10 Emkade walia Simon mutwualli la' puou handina, de Yakowsi nor Yohansi, Sebedeus upni-a'nani re. Noma Yesus Nakot la Simon Niwra: ”Yan mumta'ata Simona! Mai pia Awuatut o'a totpena emkameni la omultial reri i'na la dodo'ondi, de hota emkade wal pia mihak nohor rimormiori totpena hota rpesiay mai A'u.” 11 Dewade Simon nora mutwualli re rtitin targa loini-puounu dewade raltarga hare honona pa rla rlernohor reria Yesus.
Yesus Nhi' kalwieda maka ulityata-temyata (lepra) ida
12 La'awa lera ida, de Yesus Nden la leta ida la geni dom to'a. Muanke' ida ed walia la hande la' inonni tetema de nanienia ulityata-temyata (lepra). La'pa mak kanienia ulityat de namkek tut niana Yesus dewade nwaltiora-nwaltieman la Yesus na'nama nwak la Yesus niwra: ”Amee! Mtiulan mai a'u. Agat niohora de Omuodi plolli pa Mhi' kalwied nan a'u, hornama Ompuayow nohora a wakwa'ku, up matro'mu nee!” 13 Noma Yesus Nran limni pa Nteman la riy de pa Nakot la: ”Arieiniana o wakwakmu pa omkialwied wa!” Mtatande nekpa nnienni de nmolu. 14 Noma Yesus Nawewla eda riy de Niwra: ”Mlia'awa, mere yana mpuahauria la riy meni-meni. Mere mlia' mliernohora hya' maka Musa ha ne'era-ntatar targ oleka, de mlia'a imam ida, pa mpuak la totpena namkek memna omkialwied olekwa. Me muala limtutnu emeka Musa nwatut tiarg oleka de totpa riy honona rat niohora de omkialwied oleka la nnienmu.” 15 Mere Nlarna pa naltieri ho'mana, kota la Yesus hihi'ini-yapyapni re yeher to'a me nayapie'er la wniahauru. La' hade pede rirahu rmai totpena ratlin la Yesus wniatutnu me rwak pa Yesus Nhi' kalwieda ir la nnienni-nhienni. 16 Ne lera dom de Yesus Nla Nsumbain la geni-gen miaka namtiertiernu.
Yesus Nhi' kalwieda mak kaliu'uta ida
17 La'awa la' lera ida, de Yesus e Nwatutu-nwaye' rer lia gen ida, ne riy Parisi dom rora tungkurga agama re e ramtatan walia la hande. Parisi rora makwatutu-kwaye'a agama re rmai die dom de rwatiawua Yerusalem, dom de rwatiawua leta-let honona mak kden la Yudea, me Galilea. La' ler de de Orgahi-Orha'a plolli-mneheni e npenpuen lia Yesus pa Nhi'a mak kanieni re honona rpa rler la kalwiedni. 18 La' ler de wali pia riy doma rma rodia riy maka kaliu'uta ida de rran nan wut tio'a la u'tani maka nanin la. Riy mak kodia re rwahak talan pa rler la roma ralamni totpena rle'er memna mak kaliu'ut della, la'a Yesus gaini ralamni. 19 Mere la' ler de de riy rahu rehia, pede edonna rlernan talan pa rodia la'a rialma, pa narieiniande rodia pa rha'at la roma wuwannu na'nama rwaye'er doinia roma ritni. Na'nama ralernu mak kaliu'uta de na'itar neka u'tani totpa nle'era la Yesus gaini raralamni la'a mutu letgarni. 20 La'pa Yesus Namkek tutga riy mak kmai re pesiayni raruri, noma Yesus Nakot la riy de Niwra: ”Hyalia, dodo'ondi A'umou-uwitn olek o do'omu-halmu!” 21 Dewade makwatutu-kwaye'a agama rora riy Parisi rwarora-rwalai la ralamni riwra: ”He' eda riy dina de pede Enparan pia Enaltier emkade pa Napolu-naliella Uplerlawna?! Yoma atiaru Uplerlawna nanpena Namou-nawitna rira do'oni-halli.” 22 Mere Yesus Natg oleka hya' ed maka ha ratiana re pede Nakot la re Niwra: ”Ee, hya' ed mak kariei pia mimpiarora-mpialai yatiana rena?! 23 La'pa plet pa A'ukot nek la e'a giwra e do'oni-halli ramou-rawitn oleka de, miplin niohor ma'ta plollola pa e do'oni-halli ramou-rawitn oleka me edonna, mere la'pa Apuaran pia A'ukot la e' pa namat pa nala'awa de mimiat niohor memna A ru'ru-la'yu etla yoma mimkek nan memna. 24 Pede hota la' dodo'ondi de Agiwra tiut muemna tiy miy, la'a noh di wawannu, de Rimormiori A'nani A'g ed mak kodi plolli pa umou-uwitna riy do'oni-halli.” Noma Yesus Nakot la mak kaliu'ut de Niwra: ”Hyalia, mumat doin la pa mpuopna u'tamu de pa mlia'awa rommu.” 25 Mtatande nekpa riy de namat doin la'a riy mutlialawna re gaini ralamni pa npopna u'tani dewade nla'awa la roma nayanni. Ntiy die na'uli-nawed reri Uplerlawna. 26 Ne riy honona la hande mana rwer rer wiawni, ne ra'uli-rawedia Uplerlawna la' genni-tienni Ilyamou-Watyatoha. Noma ramta'at pa riwra: ”It edonna tamkek ma'ta hihi'a-yapyapi maka itamkeka la' ler di!”
Yesus Npolga Lewi
27 La'pa Yesus Nlergot wa noma Namkek nana mak kawoka blastena id de nanni Lewi. La' ler de de Lewi e namtatan la gen miaka nhi'inde enawoka blasten la. Noma Yesus Npol lia Niwra: ”E! Mua mliernohor A'g ee!” 28 Noma Lewi naltarga re'eni-tniarnu honona na'nama nlernohora Yesus. 29 La'pa nhorwua noma Lewi nhi'a ya'anlawna-yemunlawna pa rora Yesus ra'an wutu. Maka nhi'inde kawoka blastena re liawanni rmai wial pia rora riy rahu mak kden la hande rawok pa ra'ana-remun rewre'wa la hande. 30 Mere riy Parisi makla' makwatutu-kwaye'a agama ror wutga Parisi doma ramkek nana Yesus hihi'ini-yapyapni de pa rwaror la ralamni de mehra rehia pede rpolliohora maklernohor reria Yesus riwra: ”Oi! Nihya'pa miy hononmi miora maka kawoka blastena ror wutga riy mak khi' do'a-kyap hiala doma mi'in wutu-miemun wutu?!” 31 Noma Yesus Nakot la re Niwra: ”Mak edonna kanieni edonna rma rahaka dokter. Eneknekto'a makamehra nanpena ed mak kwahaka dokter. 32 Amuai die A'g edonna mua puolga riy mak kiwra irakleha do'a-hala, mere Amuai di totpa Apuolga riy dodo'a-halala pa rhoitio'or doini do'oni-halli re.”
Yawalliohora wotelu la'a Yesus wniatut warwuarnu edon nora Yahudi agama wniatut ulullu ramneha
33 Noma riy Parisi re rakot la Yesus riwra: ”Maklernohora Yohansi ror maklernohor riy Parisi la' lera dom de ratahan lara me rsumbaini. Mere maklernohor reri O'a re ra'ana-remun to'owa.” 34 Noma Yesus Nakot la re Niwra: ”A' di de emeknekama muanke'a mak kiwra kmehlima. Riy maka rpol niana-rwak nana pa ra'ana la yawoka-yale'u la mehlima-marya'a, de hota edonna ratahan lara mere ra'ana-remnu ramuki-rahepru. 35 Mere hota la'pa nte'ela la' lerni, nanpena ira'ala muanke'a maka kmehlim della mak ka'an wutu re onni. La' ler de nampena iratahan lara.” 36 Dewade Yesus Nwahaur nohora yawalliohora id owa'an la ira, Niwra: ”Riy edonna rga' pua rlihira kokanan warwuaru pa ra rtapla la rain mak kawniali. Yoma rweyat oleka kokanan warwuar die. Me kokanan warwuar die la'pa rlowan wutga la pola-rain mak kawniali de hota nmeh'a namemieheiya. 37 Emkade wal lia riy edonna rga' pua rhuria anggur tur warwuarnu la'a ha ulit mak mahnek oleka. Yoma anggur tur warwuarnu de hota nhi' nana ha ulit mahnek de ema reye'era pa anggur tur de rhur dioinia ne ha ulit de ho'mana ta'en niana rnair owa'ana. 38 Anggur tur warwuaru de rhuria la ha ulit warwuaru. 39 Ne riy honona mak nhi'inde remun anggur tur mak gakmu de rahmena remun owa'ana anggur warwuaru yoma rwarora de mak gakmu ed mak samomuou rehi.
Yesus Nodi plolli la Sabat lerni de ler maka Yahudi yana rkar lia de
1 La lera id la' Sabat lerni, de Yesus Nora maka ha Nwatutu-nwaye'a re rala'a la nhyi' wetra' lawna ida ralamni, noma maka ha Nwatutu-nwaye'a re rkura wetra' lawna unnu-unnu pa rwakliaria la limni na'nama ra'ana. 2 Noma riy Parisi dom mak kden la hande rakot la riwra: ”Hoi! Nihya'pa mpiera-mdiaitia it agamni deullu-tatarni yoma miy e mkiar lia'a Sabat lerni?!” 3 Noma Yesus Nakot la re Niwra: ”Miy mpiaik nan olek la'a hya' maka Daud nhi'a la' lera e nora e talanwalli re raplara toh?! 4 Enler la Uplerlawna roma kreini na'nama na'ala rot miaka ha ral oleka la Uplerlawna, na'nama na'ana. Nhor nia'nama nal walia roti rella' mutu korni pa ra'an wal lia. Mere la'pa deulu-tatra agama, de mak ka'ana roti re de eneknekto'a imam-imam rmeh'a. 5 A'ukot hari honona yoma la'a Rimormiori A'nani A' die, A'g ed mak kodi plolli pa A'ukot nohora hya' ed mak kaplola onde nhala pa itsi'a la Sabat lerni.”
Riy maka limni walli kmati
6 La lera id la' Sabat lerni id to' wali, ne Yesus Nla Nwatutu-nwaye'ela' gen miaka nhi'inde Yahudi rhi'a kreini-iskolli. La' noma Namkek nana riy ida etla hande de limni walli malganna nmati. 7 Tungkurga agama dom rora riy Parisi riwra rahaka kahelli-kaha'arni la' Yesus totpena Nhi' de rodia la letgara lawawna (hakim). Pede honona rkil rer lia hota Nhi' kalwieda makamehra-kamau la Sabat lerni me edonna? 8 Mere la'a ira wniarorni-wnialaini re, de Yesus Natg oleka re! Dewade Yesus Nakot la riy maka limni walli kmat die Niwra: ”Ee! Muprir pia mua mtiutrier lia riy honona gaini ralamni!” Noma riy de naprir pia nma ntutrier lia hande. 9 Nhor nia'nama Yesus Nakot la riy mak kden la' hande Niwra: ”Hota A'utian tek miy, la'a agama deullu-tatarni de rakot targa hota it tsi'a hya'a la Sabat lerni? Hota it tsi'a samomuounu me onde tsi'a yatyatni? Tamori-talewna rimormior me onde twaror nohora wniunu-wnienna la it rimormior wialli?” 10 Nhor nia'nama Yesus Namkek la riy nenenan gaini ne Nakot la riy de Niwra: ”Mpuetar limmu!” Noma riy de nwetar limni, dewade mtatande nekpa nnienni nmolu. 11 Mere, yeher to'ama makwatutu-kwaye'a agama re rora riy Parisi re humra-kailia la yawenna, ne rawok pa rna'ohma Yesus la' yatyatni wa.
Yesus Nwaliria riy termida wehrani wor pua rodia Uplerlawna lirni-tunnu
12 La'awa ler id de noma Yesus Nafia'at la wo'ora id hananni pa Nsumbaini. La' mel tetem de Ensumbain nek la Uplerlawna pa nodi liarni. 13 Nsumbain nekpa la'pa repra rauria, noma Npol lia maka klernohor reri re na'nama Nwaliri-nwalioh nana riy termida wehrani woru la' hare honona. Noma Npolga hare la Mak Ha Nwalir niana pa rodia Uplerlawna lirni-tunnu. La' hare honona nanni de erti la: 14 Simon, mak Yesus Nal walia nanni Petrus, me Simon hyalli de Andarias. Nwalir walia Yakowsi me Yohansi, Pilipsu, me Bartolomeus, 15 Matius, me Tomsa, Yakowsi, de Alpius a'nani, me Simon maka ha rweta la riy mak kwayotil memna hairi Romawi rodi plolli la Israel, 16 la'pa Yudas, de Yakowsi a'nani, me Yudas Iskariot, maka na'olga Yesus.
Yesus Nwatutu-nwaye'a me Nhi' kalwieda riy makanieni
17 Nhorwua noma Yesus Nora makodia E lirni-tunnu re rerun rewre'wa pa rtutrier lia la'a mtatanni ida. La' hande mana rirahu maklernohor reria liawanni er wal lia me rira liawanni mak kwatiawua meni-meni to'a, la'a Yudea liewnu, Yerusalem, me la leta-let mak kden la Tirus me Sidon la eni wawannu. 18 Honona rmai totpena ratlin la Yesus me totpena nnienni re mana Yesus Nhi' kalwied walia. Me la'a riy meni maka hegana-kawnu, yatni-rha'ani rhu'ru ralma mana Yesus Nhokar doinia la. 19 Riy honona rahak pa rho'a-rhaiya Yesus, yoma la' inonni de e Nodialgota plola-mneha pa Nhi' kalwieda ir honona.
Yesus Nakot nohora hya' ed maka kod unut lawna mai ita la'pa itpesiay Yesus
20 Yesus Nlina-nmata maka ha Nwatutu-nwaye'a re noma Nakot la re Niwra: ”Hyal miy re, hota unut lawna la'a miy mak kler la kleha-lara, yoma miy di de mrie' teman la Uplerlawna horatni-hairni limni-rorni maka Enodi plolli la emeka Ray. 21 Hyal miy re, hota unut lawna la'a miy miak kakleha-kaplara, yoma hota mliernana penpuenu-tetema la'a Uplerlawna pa ralammi namtiernu! Hota unut lawna la mak ko'a-khera miy de yoma hota Uplerlawna Nal miy pia mimlier la he'i-hepru. 22 Hyal miy re, hota mlier la unut lawna yoma riy rahankeran tiy miy, rwayotil miy, riy rahe'i-ramal miy, onde rapupu-raher miy, yoma la' Rimormior A'nani A rerie'yu. 23 Yoma la' ululu nek de Yahudi upni-tgarni rhi' emkade wali la makwohorulu-ktatrulu. Pede la'pa hihi'a-yapyapi re rodi liarni pa mimliernan walia, de yana ralammi rmawla, mere mlioi-mhiek nohora he'emi-heparmi, yoma miy siepmi-kaimi inpona la'a Ilyamou-Watyatoha (Sorga) maka hota Orgahi-Orha'a Nala tiy miy. 24 Mere makre'a-ktaru miy lia' dodo'ondi, de hota mimlier la yatyatni-halalli yatlorni-yatra'ani, yoma mimliernan oleka rehenu lawanni. 25 Mak kler la ya'an penpuenu-tetema la' dodo'ondi de hota mlier la yatyatni-halalli yatlorni-yatra'ani yoma rehka-lara. Miy maka kahepuepru la dodo'ondi de hota mlier la yatyatni-halalli yatlorni-yatra'ani, yoma hota mlier la ralam mawla, ne koko'a-kakakarmi. 26 La'pa rirahu ra'uli miy, de hota mlier la yatyatni-halalli yatlorni-yatra'ani, yoma emkade walia, la ululu de miy upmi-tgarmi ra'uli makwohorulu-ktatrulu putputra-palpalka.”
Tsi' samomuoga it arwalli
27 ”Mere la'pa mak katlin la A lia dodo'ondi, de mitlina A nnio'u di! Hota mira'a-mipalga miy arwalmi me mhi' samomuoga riy maka kahankeran rer tiy miy. 28 Mpiak la Uplerlawna pa Ntera-ndema maka klokra-khaut miy me msiumbainia riy maka khi' yatyat miy. 29 La'pa riy rpahara kilmi malganna, de miala kilmi walli malwiru pa npahar walia. La'pa rwak nana miy raini plalahwami de miolin doin walia rain rialammi pa ra' wal lia. 30 La'pa riy rwak hadom tiy miy, de miala la, ne la'pa rwarui miy gahami, de yana mpiak neka wa. 31 Mhi' samomuou rira de emekwalima mimiwra irhi' samomuou tiy miy. 32 Yoma la'pa mira'a-mipalga, mtiulla-msiayn to'a maka nhi'inde kara'a-kapalga, ktulla-ksayn miy de hota Uplerlawna edonna Na'uli-nawedi miy. Riy maka khi' do'a-hala nek de rara'a-rapalu, rtulla-rsayn walia riy maka kara'a-kapalga, ktulla-ksayni ira toh! 33 Ne la'pa mimhi' samomuounu to'ola riy maka khi' samomuou tiy miy, de hota Uplerlawna edonna Na'uli-nawedi miy. Riy mak khi'a do'a-hala nek de rhi' samomuou wal lia mutwualli toh! 34 Ne la'pa mimial to'a kupan la' riy maka ka'otan pa hota nhernia, de hota Uplerlawna edonna Na'uli-nawedi miy. Riy maka khi' do'a-hala nek de nal walia kupan pa mutwualli ra'otna, nanpena nwak owa'an nhierannu la! 35 Mere rwaldioinia de, miatu mira'a-mipalga miy arwalmi ne mhi' kalwiedweda re. Mialla ra'otna me miy edon mpiaror nana hota nherni owa'ana. Yoma la'pa emkade, de hota miy siepmi-kaimi inponni ne hota mtiutga la ilmi-wniehwami de Uplerlawna mak kden la tutullu-lolo'oni, upni-a'nani miy. Yoma Uplerlawan de Ntutga ralam kalwiedni la riy maka kaplinu kwak kalwieda la E'a me la' walia riy yatyatni. 36 Pede mhi'a nhioli-lieta kalwiedwed la'a rimormior wialmi pa emekwalima Uplerlawna, miy Amlawanmi de mak kden la Ilyamou-Watyatoha Nden rer lia kalwiedwedni.”
Yana plet pa mpiaghala rimormior wialmi mere mipepe'el pa mhioitio'or doinia do'a-hal wamuehemi
37 ”Yana plet pa mpiaghala rimormior wialmi totpena Uplerlawna mana edonna Nhudi-npar miy. Yana mtio'on reria riy la do'a-hala wawna totpena Uplerlawna mana yana Nto'on wali miy! Mere mhioratdoinia rira do'oni-halli tiy miy totpena miy miana, Uplerlawna Namou-nawitna miy la do'omi-halmi. 38 Mialla' rira totpena Uplerlawna mana Nal tiy miy de narehi-nalawna. Hota rtailia penpuenu tetem oleka miy gahami wa, yoma tatiaili maka ha mniairi pa ma mtiail pa mialla rira, de hota Uplerlawna na Ntail pa Nala tiy miy.” 39 Nhorwua noma Yesus Nakot nohor owa'ana yawalliohora id owa'an la ira totpena yana plet pa rwaghal rimormior wialli, Niwra: ”La'pa mak matni kyata ida ni'it la mat yat walli, de hota nahmenmen nanama, rora rewre'wa pa rtuin la hu'ula ralamni. 40 A'n iskola edonna nareh dioin tungkurnu. Mere la'pa a'n iskol de nhi' ahorga iskolli de hota emekwalima e tungkurnu. 41 Hya' mak karei pia mpiaghala mutwualmi onnila do'oni-halli mak edon kwerta mere miy do'omi-halmi nekane lawan rehia. La'pa mhi' emkade, de emekwalima mimkek nana ai liu'wu mak kdella mutwualmi de matni ralamni, ne ai dieulu naniewat la miy mat wamueheni ralamni mere miy edonna mimkek nana. 42 Ralma-riormi emkameni pa mikot la mutwualmi miwra: ”Mai pia agal doinia ai liu'wu mak kden la o matmu de,” mere miy orgahami miplin niek la ai dieulu de e naniewat la miy matni mere miy edon mimkek nana?! Hoi! Yana mtiota miy inonmi la riy kalwiedweda mere plollolli de riy yatyat miy. Milgot ulga ai dieulu mak kden la miy matmi de totpena mimkek samomuoga ai liu'wu mak kden la mutwualmi de matni pa milgota.”
La'a rira nhiolli-lietni re tat niohora riy de ihranu ralamni
43 ”Au muaka kpoti-kadwu de edonna nawo'a wo' kilta-watra me emkade walia au muaka khoptutu-khoplera, edonna na'unu-nayeh nohora wo' samomuou. 44 La'pa tlernana au id wo'oni de itat niohor oleka ha onni wa. Edonna rlernana kar wo'a la' au rururi-karkiarti ralamni, me edonna rlernan walia lokrah wio'a la'a ruwnu-penta ralamni. 45 Hota emkade walia riy maka ralamni kalwieda-paitiota, de hota ntutga nhioli-lieta kalwieda-paitiota yoma ihranu ralamni npenpuenu tetema la kalwieda-paitiota. Ne riy yatyata-halala nampena nodgiota nhioli-lieta yatyata yoma yatyatni-halalli nagengen lia e'a. Yoma la'a hya' maka klergot la it nurnu de ha nwatiawua it ihranu ralamni.”
Riy maklernohor reria Uplerlawna lirni de emeknekama riy mak kariria roma la watu wawannu
46 ”Nihya'pa mimpiolga A' die: ”Matroma, Matroma!” Mere miy edonna mliernohora hya' ed maka A'ukota tiy miy?! 47 Hota Agala yawalliohora id pa A'ukot nohora riy mak kmai A'u re, ne la'pa ratlina A li'ru de rlernohor reria. 48 Maklernohor reri A li'ru re, de emekwalima riy mak hota kariria roma de nahia kdieldelma, na'nama nwatatga la watu wawannu. Pa la'pa gera nwau me ger wawuau liawna nwayotil la rom de, de edonna nwo'la-nwaini, yoma e rwatatga la watu wawannu. 49 Mere riy maka katlina A li'ru-tu'nu ne edonna nlernohora, de emekwalia riy maka kariria romni de edonna e rwatatga la watu wawannu, pede la'pa ger wawuau liawna nwayotil la roma de nleretniekla napru'wu la yawa ne pala patia!”
Yesus Nhi' kalwieda makodi keki-rautu Roma o'tani lili'irnu-hopopanni
1 La'pa Nwatia lirni la'a hya' maka Ha Nakot nohora la'a riy harahu re, dewade Yesus Nla'awa la leta Kapernaum. 2 La' hande de, de riy ida makhi' o'ta-mat la makodi keki-rautu Roma rahu ida. Riy de lili'irnu-hopopanni maka nhi'inde ha nsayni ida e namehra werwerta. 3 La'pa makodi keki-rautu o'tani de natlin nan de Yesus etla hande, dewade nhopna Yahudi in letni-am letni wo'ir pa rla rpolga Yesus totpena Nmai pia Nhi' kalwieda e hopopanni de. 4 La'pa rte'ela Yesus de noma rhu'ru-rhelam pa rwak toto' meman la Yesus totpa Nla Ntulan la makodi keki-rautu o'tani de. Rakot la Yesus riwra: ”Amee! Hota lol talanni pa Mtiulan la makodi keki-rautu o'tani de yoma riy samomuou e'a! 5 Yoma hade ed maka khi' samomuoga it luwnu-a'nani ne nariria roma id maka itsi' krei-iskola.” 6 Pede Yesus Nor rewre'wa re pa rla'awa. La'pa Yesus Nhi' pa Nwakrian lia rom de, noma makodi keki-rautu o'tani de nhopan doinia e mutwualli rla' rwatroma pa ratutga Yesus totpa yana Yesus Nla'a makodi keki-rautu o'tani romni de. Makodi keki-rautu o'tani lirni de emkadilla Yesus: ”Tuna, yana miodi liarmu la a ro'mu nayanni yoma a'g edon lia' nana Tuna lewatni pa Tuna Nmai lia a ro'mu nayanni. 7 La' hade pede a'u mana edon puaran pia ama wuatrom Tuna. Pen neka Tuna nden nek la handi mere Nodi plolli pa Nhopna a hopopnu de nkalwieda la roma nayanni. 8 Yoma a' niek de utlin la mak kodi plolli mai a'u. Ne la'a a tniornu de ratlin mai a'u. Aghopan pa makodi keki-rautu ida nla'awa de hota nler pa nla'awa. Apuolga dom de, hota rmai. Ne la' walia aghopan pa a hopopnu de nhi' hya' to'a de hota nlernohora.” 9 La'pa Yesus Natlin ha lirni de Yesus mana Nwer rer wiawni yoma makodi keki-rautu o'tani pesiayni de. Noma Nkillia mak kden hande honona mak klernohor reria na'nama Nakot la Niwra: ”Ina-nara ama-hyali, riy di de riy Israel atia'a id walia di me! Mpiesiaya! La'a riy Israel re honona nekane A'g edonna liernan ma'ta riy maka pesiayni naruri emeka riy mak Israel atia' di!” 10 La'pa mak ha rhopna re rawali owa'an la makodi keki-rautu o'tani romni de li'iru-hopopan de mana nkalwied olekwa.
Yesus Namori owa'ana patyata id a'nani
11 La'pa edonna nalo'on wali ne Yesus Nora maka ha Nwatutu-nwaye'a re, me riy rahu wal pia ror rewre'wa Yesus pa rokria leta Nain. 12 La'pa Yesus Nhi' pa Nte'ela letlawna puohrani onni de rwatrom nan neka riy rakwar nana loi mati pa rlergot wal lia puohra leta. Matia maka ha riwra rla rtamin de, de patyata ida a'nani muanke'a memeh'a inhatta toto'a. Rira liawanni mak kden la let de, rlernohor reria patyat de. 13 La'pa Itmatromni Yesus Namkek tutga patke' de dewade Yesus ralamni nmolu-nhelam doin la pa nakot la Niwra: ”Yana Nkakru ina!” 14 La' noma Yesus Nla Nwakriania mak kgolan mati re na'nama Nteman la loi miat die, dewade mak kgolan mati re mana rtut tiaru. Dewade Niwra: ”Hei! Tuwari-lawe'ru nee, A'g e umat o'a!” 15 Dewade plin-plinnianamde tuwari-lawer muaka kmati olekwa de namat pa namtatna ne nwahaur wa. Noma Yesus Nakot la inni Niwra: ”Ina, o a'namu nmori oleka di pa muodi mlia'awa!” 16 Riy honona mak kden la hande ramta'at wenna ne rleretniekla ra'uli-rawedia Uplerlawna. Noma idma nakot la ida riwra: ”Hadi de makwohorulu-ktatrulu inponni id hadi, pa Nhari oleka inonni mai it wa! Ee! Uplerlawna Ntutg olek plolli-mneheni pa Ntulan la mutnu-rahanu it wa.” 17 Rakot nohora Yesus hihi'ini-yapyapni la Yudea uhunu-ewatni-lahwani me nodi liarni la' geni-tien mak kden la hande pa lolda-lolda.
Yohansi makharani nhopan pa riy ratian nohora Yesus
18 Maklernohor reria Yohansi rma rakot la Yohansi la'a hya' maka Yesus Nhi'a-nyapia. 19 Noma Yohansi nhopan doinia riy wor pua rla ratian nohora Itmatromni Yesus. E' de maka Uplerlawna Nano'taru onde rwei mia'ta riy dom to'a? 20 Noma rla' pa rlernohora Yohansi lirni pa riwra: ”Tuna, Yohansi makharani nhopna ama matian O'a, de O' di ed maka Uplerlawna Nano'targa O maimiaimu? Me yanpa maka ampei-mnara de riy dom to'a?” 21 La' ler de, de Yesus e Nhi' kalwieda rirahu mak kanieni-kahniena mak kamehra-kamau, me Nhokar doinia yatni-rha'ani la' riy me Nhi'a rirahu matni mak kyata pa ramkek owa'ana. 22 Pede Yesus Nwalolla mak ha rhopan doinia Niwra: ”Hyal miy re, miwali owa'an la Yohansi pa mpiahaur nohora la'a hya' ed maka mitlin me mimkeka, de riy maka matni kyata ramkeka, maka lakni nmati rala'awa, maka ulatni temni yata rkalwied wa, maka hatilu mana ratlina, mak kmati olekwa mana rmori owa'ana, me Kot Kalwieda-Paitiota mak kwatiawua Uplerlawna mana rakot nohora la maka kakleha-kaplara. 23 Ne la'pa riy honona mak edonna kwayotli A'u, mere npesiay niek wa, hota rlernana unut lawna.” 24 Nhorwua noma maka Yohansi nhopna re rawal wia, noma Yesus Nwahaur nohora Yohansi la'a riy rahu mak kden hande. Yesus Niwra: ”La' ler ululu de miy e mlia'a wo'orletna-kawurloini totpena mimkeka hya'a? Mpiahaka riy id maka o'tani wolwo'la pa emeknekama wewna lihira maka anni ha nten dioinia rena? 25 Mlia' de mpiahaka hya'a pa mimkeka? Mpiahaka riy ida maka naniairi samomuounu me nmori-ndar niohora re'eni-tniarnu? Riy mak emkare, ha rden la tuna ray romni-lewnu! 26 Pede mlia' de mpiahaka hya' pa mimkeka? Mlia' pa mpiahaka makwohorulu-ktatrulu ida toh?! Ha naplola. Ne hota Yohansi nek de nareh dioinia makwohorulu-ktatrulu re. 27 Yoma la' Puka ralamni, de Uplerlawna Nakot nohora Yohansi kniarni, Niwra: ”Mhioratreria! Hadi ed maka Aghopna. Hota Aghopna hade pa nala' ulg O'a totpena nwahyar tialan pa Omliola.” 28 Mhioratreria! La' ululu la'pa ntutu-nte'ela ler di la' nohkeran di wawannu de riy id mana edonna nareh dioinia Yohansi makharani. Mere la'pa la' lera-mela ri, maka Uplerlawna Nodi plolli pa emeka Ray de, E mutnu-rahanu mak kakleha weli id ho'mana nlernan yara'a-yapalu nareh dioinia maka Yohansi nlernana.” 29 Riy harahu re la'pa ratlin nana Yesus lirni de ir er maka kreiniana Uplerlawna lirni-tunnu. Mak kawoka blastena nekane rreinian walia. Ir honona rreiniana yoma ir er maka Yohansi nharania re la' ler ululu! 30 Mere riy Parisi rora makwatutu-kwaye'a agama rahmena-rapraiya Uplerlawna wniarorni-wnialaini la'a ir inonni. Yoma ir er maka rahal olek inonni la Yohansi yanpa nharania ira. 31 Noma Yesus Nakot owa'ana Niwra: ”Hota Agala yawalliohora hya' pa ga' ukot nohora rimormiori mak edon kpesiay A'u la lera-mela rina? 32 Ir de emolmolla keke'enku'a woka id mak kamtatna la'a ya'olgeni pa rpol lia wokni handina yoma idma edonna nlernohora id lirni, pede riwra: ”Amnairi floiti me tiwla-prai pa amahe'i-mahepur nohor miy mere miy edonna mlioi-mhieka! Ampahniar nohor miy la'a nhiara matmiati-molmuolu mere miy edon mkio'a-mkiakru!” 33 Hade emekwali Yohansi makharani nmai die noma natahan lara (puasa). Me edonna nemni anggur turnu. Ne mimiwra hegana e nhu'ru ralma. 34 Noma dodo'ondi Rimormior A'na A' Muai die, de A'una-gemnu. Noma mikot la mai a'u miwra: ”Tamkek to'ola hade. Ya'ante'eni, ne ma'wanu de, pa la' nor wutga mak kawoka blastena me riy yatyata-halala rwatamputu.” 35 Mere la'pa miy mpiayotlia Agora Yohansi hihi'ini-yapyapni ho'mana Uplerlawna kirkirni-ralma-rior samomuounu mak amlernohora de hota nayamkek la riy mak klernohora A wniatut mamni re nhiolli-lietni ilu-wniehwani samomuounu.”
Patke' yatyat ida nhuria wu'ru la Yesus lakni pa ntutga nhiu'ru-nhielamni
36 Lera ida ne Simon, riy Parisi ida, npolu-nwaka Yesus pa Nma pa ra'an rewre'wa. Noma Yesus Nla'a Simon romni nayanni pa rawok pa ra'ana-remun wutu. 37 La'a let de, de patke' yatyata ida nhol wial lia hande. La'pa patke' de natlin tutga Yesus entepartarlia ya'ana-yemnu la'a riy Parisi die romni nayanni, noma nmai die nod miemna wu'ru hup mikmikri la'a potla id ralamni mak ha rhi' nana la watu-watu mak welli werta. 38 Nmai nioma ntutrier lia Yesus to'orni la' lakni onni na'nama nko'a-nkakur pa luini-nuhranu nape'era-napahia Yesus lakni, noma nala moratnu na naha kerna luini-nuhranu della Yesus lakni nhorwua noma nkinnia na'nama nhuria wu'ru della. 39 La'pa riy Parisi mak kpolu-kwaka Yesus ramkek nana patke' de hihi'ini-yapyapni de noma nwaror la ralamni niwra: ”La'pa Yesus de plol toto'a makwohorulu-ktatrulu id hade, de hota Natg oleka patke' meni ed maka kheik la E de! Yoma patke' yatyata ida de.” 40 Noma Yesus Nakot la Simon Niwra: ”Simon, A'g e giwra ukot hadom tiy o'a.” Noma Simon niwra: ”Mukota tungkurga!” 41 Dewade Yesus Nakot la Niwra: ”Riy worga e ra'otan kupan la'a riy ida. Riy id e na'otna kupna-kai (gaji) la lera rahu wolima gahani, ne mutwualli de na'otan walia kupna-kai la lera terampwolima gahani. 42 La'pa nte'ela lerni maka ha rakot taru pa rpolla kupna re noma edonna rpolan nana yoma rakleh kupan wa. Mere orgahi edonna nto'ona ne nleretniekla nhap dioinia otanni re. Pede ompuaror teka! Hota hameni ed maka ralamni etla riy maka kal otan kupna rena?” 43 Noma Simona nwet la niwra: ”La' a wniaro'ru de, mak ralamni etla riy dewa de mak ka'otna kupna liawanni.” Noma Yesus Niwra: ”O ralma-riormu plola!” 44 Dewade Yesus Nkillia pat de, na'nama nakot la Simon Niwra: ”Mumkek to'ola patke' de, Simona. Ompuak pa Amuai, mere o edonna mpuahi' ger dom pa Agalla wuri-gohma A la'ku pa emeknekama nhi'inde itsi' nana, mere pat di nala luini-nuhranu na nohma A la'ku ne nala moratnu na naha kerna. 45 Dodo'ona Amuai die, o' edonna mkinni A'u pa mpuak kalwieda mai A'u pa emeknekama nhi'inde itsi' nana. Mere pat di nkinin la'a-mai A la'ku la' dodo'on memna. 46 O edonna mhu'ru-mhuelam la mai A lia muala wu'ru dom pa ma muneg A'u, mere pat di nhuri oleka wu'ru hup mikmikri la' A la'ku. 47 Pede, ompuesiaya, plola la hade nhiolli-lietni kalwiedwed de mai A'u, ntutga de do'oni-halli mutliawanni re ramou-rawitna olekwa! Yoma hota la'pa rira do'oni-halli oke'a nmeh'a noma rhap dioinia de hota riy die ntutga ralam kalwieda oke'a nmeh'a. Mere la'pa rira do'oni-halli mutliawanni re e ramou-rawitna, de riy de ntutga ralam kalwiedwed meman wa.” 48 Noma Yesus Nakot la pat de Niwra: ”Ina, o' do'omu-halmu ramou-rawitna momuog oleka wa.” 49 Dewade riy honona mak ka'an wut lia Yesus la hande idma nakot la ida riwra: ”Hota he' eda riy di pede Nparan pia Niwra Namou-nawitna do'a-halo?” 50 Mere Yesus Nakot la patke' de Niwra: ”Yoma la o pesiaymu mai A'u ina, pede omlier olek la mormiori-lewlewna. Mlier olek la kalwiedni-paitiotni pa mlia'awa!”
Patke'a maka khima-kre'a Yesus re
1 Noma la la'pa Yesus Nokria leta-ruhuna re, pa Nakot nohora Uplerlawna Kot Kalwiedni-Paitiotni, Niwra Uplerlawna hota Nodi plolli emekneka Ray. Ne maka Yesus ha Nwatutu-nwaye'a riy termida wehrani woru re, ror rewre'wa E' talla. 2 Emkade walia la'a patke' dom maka Yesus Nhi' kalwied oleka la yatni-rha'ani ha rhu'ru ralma, me mak kler la nnieni-nhiena korni, pa rkalwied olekwa. Patke' mak kler nohor reria de Maria maka nhi'inde ha rpol wualia la Magdalena, maka Yesus Nhokar doinia yatni-rha'ani wo'itu la inonni, 3 me Yohana, Khusa makla' o'tani la mak kar lia ray Herodes nhiol genni, hawni de, me Susan, ror wut wualia patke' liawanni dom pali. Rlernohor Yesus de rnairia kupna-kai wamueheni pa ra rhima-rre' nohora Yesus Nora maka ha Nwatutu-nwaye'a re.
Yawalliohora la'a mak ke'era wini-hgona la'a nhyi' ralma
4 Rira liawanni rwatiawua leta-leta re rapur pa rma rahaka Yesus. Ne la'pa rawok taru, na'nama Yesus Nakot nohora yawalliohor dilla, Niwra: 5 ”Mak kanhyi'a-katlunni ida nla' pa nrinnia winni-hgonni la nhyi'ini. La'pa nrinnia wini-hgona re dom de rtuin la talla ralamni. Pa wini die riy rhapar nana, dewade onu-ma'nu rmai pia rtotan nan momuoga. 6 Ne la' dom de rtuin la watwuatnu pa la'pa rmor die nleretniekla rapliau yoma tani pahna. 7 La' walia dom de rtuin tar lia pu'na-kiarti ralamni pede rmor riewre'wa wut lia pa narieiniande idma natolaw wenwen ida pede ta'en niana rmori plollola. 8 Mere dom de rtuin la tan ihi pa rmor die rpoti-rkadwu me ra'unu-rayeh nohora wo'oni rahg ida.” La'pa Nakot nohora yawalliohor de pa nhorwua noma Yesus Nakot owa'an la Niwra: ”La'pa miy tlinmi erla de, mitlin reri!”
Yesus Nnairia yawalliohora re pa Nakot nohora la' riy mak kahmena kpesiay
9 Maka Yesus ha Nwatutu-nwaye'a re ratiana riwra: ”Tuna, la' yawalliohora di nnia'eratni de emkame?” 10 Noma Yesus Niwra: ”Uplerlawna Nhu'ula tlinmi-nwe'er matmi totpena miat niohora la hya' ed maka riy raplin niohor ma'ta la'a Uplerlawna tnioranni-riautnu. Mere rala yawalliohora ra rwatutga riy mak kakleha pesiay, totpena: ”Hota iramkek reria, mere emkade ho'mana edonna rna'erit nana hota hya' ed maka ha ramkeka, hota iratlin reria mere emkade ho'mana raplinu-raplo' nohora.”’’
Yesus Nwale'er nohora yawalliohora la mak kanhyi' ida nrinnia winni-hgonni
11 ”Mere la'a yawalliohora de nnia'eratni de emkadilla: Wini-hgona, de Uplerlawna lirni-tunnu irhatta. 12 Wini-hgon maka ktuin la talla ralamni de emekwalima mak katlin oleka lira-tun diewa, mere hota hegana amlawanni nmai pia nwarui-nwate'la nana lira-tun diella mak katlin oleka re totpa yana rpesiaya pa hota edonna rlernan walia mormiori-lewlewna. 13 Mak ktuin la watwuatnu de emeknekama riy maka katlin nana lira kalwiedwed de dewade leretniekla ralamni raplele'er pa rreiniana mere edonna naga'ara la'a ir ihranu ralamni. Rpesiay tio'ola lera ho'ke'eni de to'a, ne la'pa hegana amlawanni nma nta'aga dewade rwaldioinia pa edonna rpesiay owa'ana. 14 Wini-hgon mak ktuin la ruwnu-ahla pu'na-kiarti de emeknekama riy maka katlin nana lir de, mere ralamni worwuorga yanpa hota e ruk lia re'eni-tniarnu la noha wawannu onde rwaror nohor mamaini la hya' maka ir ralamni nala pa narieiniande ir pesiayni edon la' ga'a, pa emeknekama wini-hgon mak edon rawo' nan walia ha'ola-hawo'a mak kerna-kgatna. 15 Mere wini-hgona mak ktuin la tan ihi, hota emeknekama riy maka plele'era me kalwiedweda. Iratlin nan Uplerlawna lirni de ne rkenia la ralamni, ne rhi' nohor neka pa rlol kalwiedwedni.”
Rala tlin tetema pa ratlin samomuoga Uplerlawna lirni-tunnu totpena hota yeher to' pa rat niohora
16 ”Edonna rlernan ma'ta riy rtutin wa'du nanpena rala ktopra ra rkadwua pitpitga, onde rwatatga wa'du della' lewnu nayanni. Wa'du de rkeni hadella la'a wniatatgenni totpena hameni maka kler la roma ralamni de namkek reria lelerni. 17 Emkade walia la Uplerlawna lirni-tunnu, yoma E lirni mak kayade'a honona re mana hota nayamkek wa, me mak kayawunmu momuou hota nawnie'era ne nat niohor memna. 18 La' hade pede mpiahniorat la hya'a maka A'ukota ri, yoma la riy mak kiwra kna'erit nana, de hota ra'itr owa'an la wniarorni-wnialaini mere la'pa riy maka kahmena kat niohora Uplerlawna lirni, de hya' mak ha nwarora de enatg oleka de hota Uplerlawna Na' owa'ana.”
Mak katlina-katailla Yesus lirni, de Yesus inni nora amni-hyalli inhatta
19 Yesus inni nora a'nani korni rmai Yesus de, mere ta'en niana rwakriania Yesus yoma riy rahu rehia. 20 Noma riy dom de e rakot la Yesus riwra: ”Tuna, Tuna inni nora ammu-hyalmu e rtutrier lia tio'ora! E riwra rora O'a rwatroma.” 21 Mere Yesus Nnairia yawalliohora pa Nakot nohora pleini la ira. Niwra: ”Riy meni maka katlina-katailla Uplerlawna lirni-tunnu, me nlernohora, de ir er maka Aghi'a la A i'nu-na'ru a'mu-hya'lu.”
Yesus Natutga anin lawna pa nwal lia lina-lera
22 La'pa la'awa lera ida noma Yesus Nakot la maka ha Nwatutu-nwaye'a re Niwra: ”Mai pia todia puou pa tla'awa danau de walli.” Noma honona rha'at la puou pa rla'awa. 23 La' pa rhopopal reri ne Yesus nanin hala. Plinu-plinnianama kakmoran lawna nte'prernia la' danau de, pa yo'orni-ananni nwakloli-nwaklalia puou me yo'or mana rriw lia puou ralamni pa npenpuen lia tah'i. 24 Dewade maka Yesus ha Nwatutu-nwaye'a re rla ramat doin Yesus riwra: ”Tungkurga ee! Hota itmati!” Dewade Yesus Namat pa Nkamot targa yo'ora anin lawan de dewade nleretniekla nalina-nalera la'a danau de ralamni. 25 Noma Yesus Nakot la maka ha Nwatutu-nwaye'a re Niwra: ”Nihya'pa miy edonna mpiesiay A'u?” Ir honona rwer rer wiawni me ramta'at wenna, noma idma nakot la ida riwra: ”Riy di de he'a pede lirni-yatnu natutga yo'ora-anni me yo'ora-anni mana ratlina-ratailla?”
Yesus Nhi' kalwieda riy maka yatni-rha'ani ha rhu'ru ralma
26 Yesus Nora maka ha Nwatutu-nwaye'a re rhopal pa rodi liarni la'a riy Gerasa genni-tienni, la' danau Galilea walli. 27 La'pa Yesus Nerun la keranni, dewade muanke' maka yatni-rha'ani ha rhu'ru ralma ida nma nler temna. Riy de mak kwatiawu leta maka rehgorgor die, mere edonna napola-naraini me nahmena namteman la roma nayanni la mahnek memna. Nhi'inde nhol tio'a hu'ula-liena mak kden la tniamin matgeni. 28 La'pa namkek nana Yesus dewade nhaunu-nhaunu na'nama nwaltiora-nwaltieman la Yesus gaini ralamni na'nama nhaun pa niwra: ”Yesus ee! O' de Uplerlawna mak kden la tutullu-lolo'oni A'nani O'a! Hota Omhi' nana a'g emkameni ee! Awuakwak pa yana Mukmua a'u.” 29 Riy de Nakot emkade yoma Yesus Nhopan pa nhiw yatni-rha'ani de nlergot la e'a. Yoma nhi'inde nhiw yatni-rha'ani de nma nhu'ru ralma pede riy e rwutu-rkohog e limni-lakni, de rnairia wutwutu mnotna ne yatiaka npitu-nkor la ho'mana, na'ed lia inonni pa nwuhi eti-lahwa re la'a limni-lakni, dewade nhiwa-nhion yatni-rha'ani de nodia la wo'orletna-kawurloini. 30 Noma Yesus natiana eda riy de Niwra: ”O nanmu he'a?” Noma riy de nwalolla niwra: ”A na'nu Legion.” Nanni de nnia'eratni makodi keki-rautu woka liawanni yoma nhiwa-nhion yatni-rha'ani liawanni rler olek la la'a e ihranu ralamni. 31 Noma nhiwa-nhion yatni-rha'ani re rwakwak rer lia Yesus totpena Yesus yana Nho'or targ ir la'a hu'ula-liena matmiati-molmuolu mak kodia niukum lalawna pa nodi liarni. 32 La' hande de e rehgorgorga gen miaka wawi wok lawna rwayowar pa rahak pa ra'ana-remun la wo'ora hananni. Noma nhiwa-nhion yatni-rha'ani re rwak lilili-mamuau lia Yesus totpena rhopan nekpa irler la wawi re inonni ralamni. Noma Yesus Nwayowa. 33 Dewade rlergot la riy de inonni, pa rla' rhu'ru ralma wawi re, na'nama honona re rawlar pia rla rlererun la weran teti pa ema rwuwul wenwenna la' danau de ralamni. 34 Mak khuri-kwa'ana wawi re rlina-rmat memna hya' maka wawi re rhi' oleka rewa. Nhor nioka rawlar pia rla rod kiota la'a ir letni me gen miaka rehgorgorga. 35 Noma riy rlergot pa rma rpoi-rkeka (ramkeka) hya' maka ha rakota re. Riy rawok la Yesus onni pa ramkek memna riy maka nhiwa-nhion yatni-rha'ani ha rlergot la de, e nawiatur targa la Yesus lakni onni pa natlin rer lia. Ramkek de riy de nnairi oleka pola-raini me wniaror samomuou ed olek la ihranu ralamni. Noma riy honona re ramta'at wenna. 36 Ne riy mak kden hande pa ramkek oleka Yesus Nhokar doinia nhiwa-nhion yatni-rha'ani re, de rwahaur nohor hadel la'a riy mak kmaiya re, riwra Yesus Nhi' emkameni pede riy de nler la kalwiedni-paitiotni. 37 Nhor na'nama riy honona mak kden la Gerasa uhunu-ewatni rwak lilili-mamuau pua Yesus yan memmemna Nalo'on la' gen die ne plet pa Nwaran nek wa, yoma riy rahu ramta'at wenna. La' hade pede Yesus Nha'at la puou pa Nla'awa. 38 Mere edon Nla' ma'ta de riy maka kalwied olekwa de nwak la Yesus totpena nlernohor rer wialia Yesus. Mere Yesus Nakot la Niwra: 39 ”Yana, mere samomuounu de muwal lia genmu-tienmu, me mukot nohora la'a hare honona mak samomuou memna maka Uplerlawna Nhi'a-nyapi la o'a.” Dewade riy de nla'awa la'pa nakot nohora hare honona la letni uhunu-ewatni-lahwani honona la'a hya'a maka Yesus Nhi'a la e'a.
Yesus Nhi' kalwieda Yairus a'nani me patke'a maka khur riara
40 Yesus Nwatiawu danau walli pa Nmai owa'ana, noma riy harahu mak kden hande rhimlolioi-rlakdardara yoma rwei niek E'a. 41 Noma edon nalo'on wali ne Yairus makhi' o'tani la'a gen maka Yahudi re rhi' kreini-iskolli de nmai pia nwaltior la Yesus nayanni na'nama nwak lilili-mamuau lia Yesus, totpena Yesus Nodi liarni la' e romni nayanni. 42 Yoma a'nani pat hararara memeh'a maka na'nama tuwnu anni termida wehrani woru, trema-trema hota nmat wia. Ne la'pa Yesus Enalala' rer mia'ta pa edonna nte' ma'ta la Yairus romni nayanni, ne rira liawanni rpakdie'da lola etnu-liolli pa rma rherit nana Yesus walli-walli. 43 La' riy rahu re, de patke' mak khur riara la'a anni termida wehrani woru, e nor wali. Nnienni-nhienni de narieiniande nahor dioin momuoga re'eni-tniarnu pa na npair la makakrui-kagapnu (dokter) mere edonna nkalwied eti. 44 Noma pat de nlernohora Yesus pa nwakrian pa ndella Yesus to'orni na'nama nteman la Yesus raini plalahwani tawnu. La'pa mtatande nekpa rarni mak kawdiadia'i de nkeran wa pa nkalwied wa. 45 Noma Yesus Natiana Niwra: ”He' ed maka kteman la A rainu tawnu?” Mere mak kden hande honona rwair wawayanni pa riwra: ”Ami edonna.” Noma Petrus niwra: ”Tuna, rirahu e rlernohora rer lia' O to'ormu pa rpakdie'da.” 46 Noma Yesus Nakot la re Niwra: ”Mere hota riy doma rtot A' pua rteman la A rainu tawnu. A'g e gat niohora de yoma emeknekama A ru'ru-la'yu e nlergot la A ino'nu ralamni.” 47 Noma pat de namta'at pa ndiwdiwra yoma ratg oleka e hihi'ini-yapyapni, pede nleretniekla nmai pia nwaltiora-nwaltieman la Yesus nayanni na'nama nwahaur nohora la'a rirahu re gaini ralamni la'a maka ha nhi'a re pede nnienni nleretniekla nkalwied wa. 48 Noma Yesus Nakot la Niwra: ”O pesiaymu e narur mai A'u ina pa mkialwied wa! Mlia'awa pa mmuori-mdiar lia kalwiedni-paitiotni.” 49 La'pa Yesus e Naltiertier mia'ta de dewade riy ida nwatiawu Yairus romni pa nmai nakot la Yairus de niwra: ”Tuna, a'namu nmati olekwa pa yana mpuaka Tungkur die pa Nla'a o rommu nayanni.” 50 La'pa Yesus Natlin nana noma Nakot la Yairus Niwra: ”Yan mumta'ata. Mpuesiay niek wa. Ne hota a'namu de nler la kalwiedni.” 51 La'pa rte'ela Yairus romni nayanni noma Yesus Nlaran pa riy id mana yana nler la rialma, eneknek to'ama Petrus, Yohansi, Yakowsi ne keke'en mak kmati olek de inni nor amni nanpa rler la rialma. 52 La' ler de riy honona mak kden la hande ertepartar olek la knio'a-kniakru la patke' de matmiatni. Mere Yesus Nakot la Niwra: ”Yana mkiakru. Yoma hararar de edonna nmati, hade e nanin to'a!” 53 Riy honona riarin taru la yamalli yoma ratg oleka de hararar de nmati olekwa. 54 Mere Yesus Ntorreria hararar de limni na'nama Nakot la Niwra: ”Ina, mumata!” 55 Hararar de aranni la' owa'an la temni, pa mtatande nekpa namat doin la wa. Na'nama Yesus Nhopan pa ralla na'ana. 56 Inni-amni rwer rer wiawni la'a keke'en de! Mere Yesus Nlaran pa yana rakota hadella hehe'a.
Yesus Nhopan doinia talanwalli re termida wehrani woru
1 Yesus Npol wutga maka ha Nwatutu-nwaye'a re riy termida wehrani woru, na'nama Nala plolli-mneheni me rurni-laini la ir honona re, totpena ra rhokra-rlaiya hegana-kawnu yatni-rha'ani me ra rakalwieda mak kanieni-kahniena. 2 Nhor nia'nama Nhopan pa rla rhi' kalwieda riy mak kanieni-kahniena, ne rla' pa rakot nohora emkameni la hota Uplerlawna Nodi plolli pa emekwalima Ray. 3 Yesus Nakot la re Niwra: ”Hyal miy re, yan miodia hadomdoma la' yala'ami de. De yana miodia lie'ena onde arkai. Yana miodia ya'ana-yemnu, onde kupna, onde hewewta-naniairi ida-woru pa mhiernu miy rayanmi la' talan ralma. 4 Hota la roma-lewu maka riy rreiniana-ra'nan miy, de mdien nek la ir romni la'pa kniarmi la' let de la nhorwua nanpena mpiaran la' rom de. 5 Ne la'pa la let id de riy edonna rreiniana-ra'nan miy, de mtio'or doin let de, mkiakan doinia awu mak kden la lakmi lia'armi totpa mtiutga de Uplerlawna Nwayotlia ira.” 6 Yesus Nakot pa nhorwua noma maka ha Nwatutu-nwaye'a re rwaran wa pa rla'awa la' leta-ruhuna re pa rakot nohora Kot Kalwieda-Paitiota me rhi' kalwieda mak kamehra-kamau mak kden la meni-meni, la'a nnienni-nhienni re.
Herodes nwarora la'a-mai nohora Yesus
7 La'awa lerni pa Herodes maka kodi plolli la Galilea natlin nana Yesus hihi'ini-yapyapni re honona. Dewade Herodes nwarora la'a-mai nohora Yesus di he'a? Yoma natlin de riy doma rakot nohora Yesus riwra: ”Yohansi makharani die e nmori owa'an la matmiatni ralamni eda de.” 8 Dom de mana riwra: ”Elia nayamkek owa'ana eda de,” me dom de owa'an riwra: ”Makwohorulu-ktatrulu la'a ululu genni mak kmati olekwa re e rmori owa'ana eda de.” 9 Noma Herodes niwra: ”Mere a'g ed mak khopan pa riy rdawr eti oleka Yohanis de tiernu ne he' targho' riy de maka ha rakot nohora Nhi' hihi'a-yapyapi mak kamehi-kayona dino?” Noma Herodes nwahak talan pa namkeka Yesus.
Yesus Nalla riy riwnu wolima ra'ana-remnu
10 La'awa lerni pa maka Yesus Nhopan pa rodia Uplerlawna lirni-tunnu re rawal pia rakot nohora hya'a maka ha rhi' nana re honona la Yesus. Noma Yesus Nhopan pa ir honona rora E' pa rla' rewre'wa la leta Betsaida onni, totpa rmeh'a rden to'ola la'a gen hgalgali. 11 Mere la' pa riy harahu re rat niohora, noma rmai pia rlernohor reria Yesus, noma Enreiniana re. Dewade Nakot la re la'a hota emkameni pa Uplerlawna Nodi plolli de emeknekama Ray. Ne E' wal pia Nhi' mak kamehra-kamau re pa rler la kalwiedni. 12 La'pa lera niwa ntuinia, noma maka ha Nwatutu-nwaye'a re termida wehrani woru rmai pia rakot la Yesus riwra: ”Tuna, gen di olieta la leta! Mhuopan nekpa riy harahu ri rla'awa totpena rwahak ya'ana-yemannu me yanin genni la'a leta-ruhuna la'a gen miaka itdella di walli-walli dom to'a.” 13 Mere Yesus Nakot la: ”Pena mialla ra'ana.” Noma maka ha Nwatutu-nwaye'a re rakot la Yesus riwra: ”Tuna, a wareher mamni ri eneknek to'ama roti deulu wolima, me i'na wor tiututu. Yanpa Omiwra amla mawelia yamanan pa riy mutlialawna ri ra'ana?” 14 La'pa edon nhal de rrekan nana muanke' mamaini, de riy riwnu wolima. Noma Yesus Nakot la maka ha Nwatutu-nwaye'a re Niwra: ”Mhiopan pa honona re ramtatan momuoga ne rnawera la wokni-wokni. La'pa edon nhal de, rima-rima wokni, de riy terampwolima.” 15 Noka maka Yesus ha Nwatutu-nwaye'a re rhi'a hya'a maka Yesus Nakota la ira. La'pa rirahu re ramtatna momuoga, 16 noma Yesus Na'ala rot dieulu re wolima, me i'na rora, na'nama Nwatniar la heyanan pa Na'uli-nawedia Uplerlawna. Na'nama Nhawi-nhawia roti re, me Nwikria i'na re noma Nala la maka ha Nwatutu-nwaye'a re rhakre'era la'a riy mutlialawna re honona. 17 Honona re ra'an pa rpehera. Ra'an pa rwair wa, noma maka Yesus ha Nwatutu-nwaye'a re rawok nana mak ra'an atre'a, de kriou penpuenu termida wehrani woru. Petrus nwayow nohora Yesus de Raya Makamori-Kalewna maka Uplerlawna Nano'taru inhatta 18 La'pa lera ida ne Yesus Nora maka ha Nwatutu-nwaye'a re rmemeh'a taru, ne Yesus e Nsumbain reri. Nhorwua noma Yesus Natiana re Niwra: ”Nhi'inde riy e riwra A' die he' o?” 19 Noma mutwualli re rwet la riwra: ”Tuna, riy dom de riwra Yohansi makharani O'a, dom de riwra makwohorulu-ktatrulu Elia, mak kmori owa'ana, me dom to' owa'an riwra O' de makwohorulu-ktatrulu dom to'a la ululu geni pa kmori owa'ana.” 20 Noka Yesus Natian owa'ana: ”Mere A'utian tek miy. La' miy wniarormi de, A' di de he' A'u?” Noma Petrus nwet la: ”Matro'mu, O' di de Ray mak kodia mormiori-lewlewna maka Uplerlawna Nano'taru (Mesias) O inhatti!” 21 Noma Yesus Nakot la maka ha Nwatutu-nwaye'a re Niwra: ”Maka Petrus nakota de naplol memna mere yan memmemna mikot nohor ma'ta hadella riy doma. 22 Mere mhioratreria! Uplerlawna ralma-riorni olek pa Rimormiori A'na A' die hota tiutulu-lielewua kropna-krieutu, yamuki-yama'ala, me hota ina-ama Yahudi rora imam-imam re o'tani-matni, me makwatutu-kwaye'a agama rwayotli A'u. Ne Uplerlawna Nala pa hota rwen A'u mere la'pa nodia la lera wotellu de Uplerlawna Namori owa'an A lia matmiati ralamni.” 23 Nhor nioma Yesus Nakot la riy honona mak kden la hande Niwra: ”Riy meni mak kiwra klernohor A'u, de nhoratdoin momuoga hya' ed maka e ralamni nod rer lia, ne lera-ler nekpa nre' wut lia A' pua nler la yamuki-yama'ala onde matmiati pa emolmolan nekama nhoi wawayanni la auwlakra pa nlernohor A'u. 24 Yoma la'pa hameni maka edonna nhorat doinia mormiorni noh di wawannu de hota e' edon nler la mormiori-dardiari plalahwa pa nodi liarni. Mere la'pa riy maka khoratdoinia mormiorni la noh di wawannu pa nlernohor reri A'u hota nlernana mormiori-dardiari pa nodi liarni. 25 La'pa riy mak klernana nohkeran di re'eni-tniarnu honona mere hota edonna nlernana mormiori-dardiari plalahwa pa nodi liarni, de hota re'eni-tniarnu re edon nodi unut hadom la' riy de. 26 La'pa he' maka kmola-kma' pa kreinian A'u me kwayow nana A li'ru-A tu'nu la' lera-mela ri, de hota Rimormiori A'na A' muana, muola-mua' wal pia rieinian riy della, la' ler maka hota Amuai owa'an de godia A plol wamueh'u me la' walia A A'mu plolli-mneheni hititni-repreparni pa Agor wutga Uplerlawna hopopanni (malaikat) mak khita-krepra me edonna kheik la do'a-hala ralamni Ammai die. 27 Mhioratreria! Hota la'a miy hononmi la handi de riy dom de mak edonna rmati mia'ta mere hota ramkek ulu Uplerlawna Nodi plolli pa emeka mak ktorna-krautu.”
Maka Yesus ha Nwatutu-nwaye'a re ramkek memna Yesus hititni-repreparni
28 La'pa Yesus Nwatutu-nwaye' nana hare honona pa nhorwua, noma lera wo'itu-wo'awa rlardoinla na'nama Yesus Nodia Petrus, Yohansi me Yakowsi pa rha'at la wo'ora id hananni totpa la'pa rsumbaini. 29 La'pa Yesus e Nsumbain reri dewade plinu-plinnianama Yesus gaini to'a me naniayarni hitita-reprepra. 30-31 Na'nama riy worga rayamkek la' hitita-reprepra mak kwatiawu Ilyamou-Watyatoha, de Musa nor Elia pa ror rewre'wa Yesus rtepartarlia wniahaur nohora la'a Yesus matmiatni maka nwakrian wia, la'a leta Yerusalem. Hota Yesus Nler la matmiat die totpa Uplerlawna wniarorni-wnialaini la' ululu de ntutu-nte'ewa. 32 La' ler de, Petrus nora mutwualli re rleretniekla ranina wa, mere plinu-plinnianama ramat doin la wa pa ramkek de Yesus inonni nhita-nrepra ne Musa nora Elia rtutrier niohora. 33 Ne la'pa Musa nora Elia riwra rhoitio'or la Yesus pa rla'awa, noma Petrus nakot la Yesus Niwra: ”Tuna, itden la handi de samoga, pa hota Tuna Nwayowa de amariria hoiwiali wotel lia handi, totpena id la Tuna, id la Musa me id wal lia Elia.” La'pa Petrus Naltier emkade edonna nwarora pleinia ne nanni nekpa naltier wia. 34 La'pa Petrus naltiertier rieri, dewade kakam woka de nmai pia npupun nana ira pa ramta'at wenna. 35 Noma ratlin nana lira id nwatiawua kakam de ralamni pa niwra: ”Hadi de A A'nu maka Awualir nian inhatti, pa mitlin la' E lirni.” 36 La'pa lir de nhorwua dewade ramkek de Yesus Nmeh'a Nden la hande. La' ler de de, riy maka Yesus ha Nwatutu-nwaye'a wotelu re edonna rakot nohora la riy ida hya' maka ir ramkek nana la'pa la ntutu meman la ler maka Yesus Nmori owa'ana.
Yesus Nhi' kalwieda keke'en maka hegana-kawnu ha nhu'ru ralma
37 La'pa repar wa dewade Yesus Nora maka ha Nwatutu-nwaye'a wotelu re rerun la wo'or de pa rmai wia, noma rirahu rma rahaka Yesus. 38 La'a riy woklawan de ralamni de muanke' ida nhaun pa niwra: ”Tungkurga Mtiulan pa Mkil nian la a'nu! A a'nu ha nmemeh'a to'a, Tungkurga! 39 La'pa hegana-kawnu rhu'ru ralma, dewade nhaunu klellelu, ne inonni toktokla wewuehera me aparni nou-natna. Hegana-kawnu de nahmena nollia la, ne niwra nweyata-nwaniawua! 40 Awuak olek wal lia maka Ompuatutu-mpuaye'a re totpa rhokar doinia hegana-kawun della mere taken niana irhokar doinia la.” 41 Noma Yesus Nakot la Niwra: ”Hoi! Miy mak khi' do'a-kyap hiala me mak kakleha pesiay. Hota lera wo'ir owa'an pa Agor miy tialla me Agod niohor miy, nanpena mimpiesiay A'u?! Muodia a'namu de pa mmuai!” 42 La'pa keke'en de nala' pa nma nwakriania Yesus, de hegana-kawnu de mana nkarwa'ga keke'eni de la tani wawannu pa limni-lakni totok la wewuehera. Mere Yesus Nakot la: ”Hoi! Hegana-kawnu ne mliergota la'a keke'en de ralamni!” Mtatande nekpa hegana-kawnu nlergot la wa pa keke'enku' de nkalwied wa. Noma Yesus Nal owa'an keke'en della la amni. 43 Riy honona rawera-rawer wawni la Uplerlawna plolli-mneheni maka ha ramkek nana la Yesus hihi'ini-yapyapni de. La ler de rimormiori honona la hande e rwer rer mia'ta wawnia la'a maka Yesus Nhi' nana-nyap nian de, mere Yesus Nakot la maka ha Nwatutu-nwaye'a re Niwra: 44 ”Mtia'wa kalwiedweda tlinmi me yana mhioratdoinia A li'ru-tu'nu ri. Rimormiori A'na A' die hota ral A lia rimormiori limni ralamni.” 45 Mere maka ha Nwatutu-nwaye'a re edonna rna'erit nana Yesus ha Nakotkota re. E lirni de, e rkukum tar mua'ta nnia'eratni totpena yana rat niohora Yesus lirni de lie'erni. Ne ir nek de ramta'at wali pia edonna ratian la'a-maiya Yesus ralma-riorni.
Riy mak katu kreiniana-ka'nana riy mak kakleha weli ed maka inpona la Uplerlawna yamkekni
46 Noma maka Yesus ha Nwatutu-nwaye'a re rahuri-rawo'or nohor lir mak kiwra hota ir he' ed maka inponni nrehi? 47 Yesus Natg oleka honona re ralma-riorni, la' hade pede Ntorreri keke'enku' ida limni na'nama Nala pa ntutrier lia E onni. 48 Noma Nakot la maka ha Nwatutu-nwaye'a re Niwra: ”Hyal miy re, hota he' mak kreiniana-ka'nana keke'enku'a emeka hadi onnila A rerie'yu de emekwalima nreinian olek A wua. Ne la hameni mak kreiniana A'u, de emekwalima nreinian oleka Uplerlawna mak khopn A'u. Yoma riy maka khima-kre'a riy mak kakleh weli de ir er maka inpona la Uplerlawna yamkekni.”
Riy mak edonna khoklira-kpah'a waw tiy miy hota ir er maka ktulan la miy
49 Yohansi Niwra: ”Matroma, ami e mamkeka riy nhokra hegana-kawnu, de e nwet la Matro'mu nanni pede ami e mlarna de yoma it mutwualli atia'a hade.” 50 Noma Yesus Niwra: ”Yana mliarna de, yoma hota hameni mak edonna khoklira-kpah'a wawa la riy id de nnia'eratni de ir er maka ktulan la riy de.”
La leta id la Samaria rahmena-raprai niana Yesus
51 La'pa nhi'pa nte'ela lerni pa Yesus Narian pa Nla'awa Ilyamou-Watyatoha dewade orgahani Netlia lirni de emkameni ho'mana Nla'a Yerusalem. 52 Noma la'pa Nalala' rer mia'ta Nhopan pa riy rala' ulg E'a. Riy maka Ha Nhopan pa kala' ulu re totpena rla rwahi'a-rwayod lia Yesus maimiaini la'a let id mak kden la Samaria. 53 Mere riy mak kden la let de rahmena-rapraiya Yesus maimiaini la' hande yoma ratga de, Yesus e Nharan reria Yerusalem. 54 Mere la'pa maka ha Nwatutu-nwaye'a re, de Yakowsi nor Yohansi namkek nan hade noma rakot la riwra: ”Matroma, Ompuayow de ampaka ai pa nwatiawua lyanti pa nernu totpena nram doinia let di nora rimormiornio?” 55 Noma Yesus Nkillia re na'nama Nawenan la re. 56 Nhor nioma rla rlol to'a leta dom to'a.
He' mak kiwra khi'a Yesus talanwalli de hota nhoratdoin nohkeran di wniarorni-wnialaini pa nlernohor memna E'a
57 La'pa Yesus Nora maka ha Nwatutu-nwaye'a re rala' pa rodi liarni, noma riy doma nakot la Yesus niwra: ”Tuna, a'g e giwra liernohor rer nek O' Tuna pa tlol meni-meni.” 58 Noma Yesus Nakot la Niwra: ”Hyalia, Ohpora-ahdiawra hu'ulli-lienni erla me onu-ma'nu nekane puonni erla, mere Rimormiori A'na A' die hota A'g edon liernan gen pia A'udera A o'tu. Ne hota omliernohor A' die hota o e mukleha wali geni.” 59 Noma Yesus Nakot wal lia riy id to'a Niwra: ”Mliernohora A'u.” Mere riy de niwra: ”Tuna, Muolin doin a' pua la'pa arie'ela tiamnia a'mu nampena aliernohor rer O'a.” 60 Noma Yesus Nakot la Niwra: ”Muolin doinia riy mak edon kpesiay A'u pede emeknekama rmati olekwa pa orgahani rtamnia mak kmati. Mere o'a de mlia' pa mukot nohora la riy honona miwra Uplerlawna emeknekama Ray miaka kodi plolli.” 61 La' riy id mana nwak pa nakot la Yesus niwra: ”Tuna, a ralmu naplele'er pa aliernohor Tuna mere Ompuayowa agora pleini a i'nu-a'mu wair nanpena amuai!” 62 Noma Yesus Nakot la riy de Niwra: ”La'pa riy ida ntepartarlia wnial tani, ne nkillia to'orni, de hota e kniarni de edon naplola. Ne hota emkade walia la riy mak kiwra kla' Uplerlawna mutnu-rahanu maka Enodi plolli la emeka Ray. La'pa riy de nwaror to'a neka inni-narni onde re'eni-tniarnu de hota kniarni la Uplerlawna edon naplola.”
Yesus Nhopan doinia riy terampwo'itu pa rla' rakot nohora emkameni Uplerlawna Nodi plolli pa emeka Ray mak ktorna-krautu
1 La'pa nhorwua noma Itmatromlawanni Nwalir niana, maklernohor E'a riy terampwo'itu, na'nama Nhopan doinia pa rala' ulga E' pa rla'a geni-tien honona maka Yesus hota Niwra Nla'a. Rla'a de rima-rima nor talanwalli id pa rala' wutu. 2 Nakot la re Nnairia yawalliohora id pa Niwra: ”Emolmolan nekama wetra' harahu maka nkern olek la nhyi' ralma, mere mak kreiki-kwo'ora, edonna rtu'tu, emkade walia mak edon katlin ma'ta Uplerlawna lir kalwiedni de harahu wali mere mak kakot nohora Uplerlawna lir kalwiedni riy doma rmeh'a. La' hade pede emolmolan nekama rwak la ora nhyi' de totpena nhopna mak kreiki-kwo'ora pa rreiki-rwo'ora, mpiak wal lia Uplerlawna totpena Ntutga riy pa rre'ela rakot nohora Uplerlawna lir kalwiedni la rimormiori mak edon katlin ma'ta. 3 Dodo'ondi mirian wa! Mere mhioratreria! A'g e ghopan pa mlia'awa A arwa'lu geni pede hota miy die emeknekama pipi-duma mak kakleh ruri-lai pia mlier tar lia ohpora-ahdiawra letgarni mak kiwra klihir matmata-khaw riarara. 4 Mlia' de yan mia miodia kupna genni, onde arkai onde lakmi wniowni pa ma mhierun doin maka ha mniairia de, ne yana mrien mahneka la talan letgar yoma miora riy mpiahauru. 5 La'pa mimlier la roma id ralamni, de mhiar ulga lirmi pa miwra: ”Kalwieda la miy hononmi!” 6 La'pa mliernana riy maka kreinian miy lia nhiolia samomuou, de hota plol toto'a pa riy de nlernana kalwieda-paitiota. Mere la'pa edonan de Uplerlawna edon Nal kalwiedni la' riy de. 7 La'pa riy rreinian miy, de mdien nek la la rom dewa. Mi'ina-miemnia hya' maka ha nhoi-ntania tiy miy, yoma riy meni mak ktulla-kari de hota nlernan siewni-kaini la'a liwatnu-odawni. Yana mpiatitin la'a-mai genmi-tienmi. 8 La'pa mimlier la leta ida, ne let de mniotni rreiniana-ra'nan miy, mi'ina-miemun de yana mmiakriarnia. 9 Mhi' kalwieda riy mak kamehra-kamau la'a let de ne mikot la let de mniotni miwra: ”Ntutu-nte' olek pa hota Uplerlawna Nodi plolli pa emeknekama Ray.” 10 Mere la'pa miy mmiai wia la' leta ida, ne let de mniotni edonna rreiniana-ra'nan miy, demade mlia'awa la talla ralamni, ne mikot la miwra: 11 ”Hoi! La'pa miy kodmi-awmi re nek de e ratniapal la'a lak mamni, amkakan doinia totpena nwagahniorat miy la'a Uplerlawna Nwayotli miy, yoma mikleha pesiay. Mere mhioratreria! Ntutu-nte' olek pa hota Uplerlawna Nodi plolli pa emeknekama Ray.” 12 Mhioratreria! La'a lera-mela nte'ela noha niatni, leta-ruhuna maka edon kreinian miy er maka klernana Uplerlawna niukamnu mak kareh dioin miemna niukamnu maka riy yatyata-halala mak kden la leta Sodom hota rlernana.”
La' leta-ruhun mak edonna kpesiay
13 ”Hoi! Mak kden Korasim nora Betsaid miy ree! Hota mlier la yatlorni-yatra'ani. Yoma miy edonna mpiadan nohora hihi'a-yapyapi mak kamehi-kayona maka ha mimkek oleka re. Mak kden la Tirus me Sidon edon ramkek nana hihi'a-yapyapi mak kamehi-kayona mak emkare la' ler ululu, mere la'pa Aghi' hihi'a-yapyapi mak kamehi-kayona mak emkare la mak kden la leta Tirus nora Sidon la' ler ululu de ramkek nana neknanama plol toto' pa rnair oleka naniairi yaluli-yahona pa ra rtutga ralamni mawla la do'oni-halli me rhoitio'or doini-rtahnei dioini oleka do'oni-halli re. 14 Mere la'a miy die hota la'pa ntutu-nte'ela la'a lera noha niatni, de hota Uplerlawna niukamnu la' miy wawanmi nareh dioin la mak kden la leta Tirus nora Sidon re. 15 Ne hota mak kden la Kapernaum miy, la' wniarormi de hota rran tutul miy nanmi lia Ilyamou-Watyatoha? Hade edon emkade. Hota reriehenu rrinnia miy lia ai mormiori ralamni (naraka).” 16 Noma Yesus Nakot la maka ha Nwatutu-nwaye'a re Niwra: ”La'pa he' mak katlin tiy miy, de hota riy de natlin mai A'u. Ne la riy maka kwayotil miy, de hare e rwayotlia A'u. Ne la'a riy maka kwayotlia A'u, de hare er maka kwayotlia Uplerlawna maka khopan pa Amuai.”
Riy teram mandiditu maka Yesus Nhopna re rawali owa'ana
17 Noma riy teram mandiditu (terampwo'itu) re rla' rhi' kniarni nhor diewade rawali pia rmai die, rahepuepur reri pa riwra: ”Matrom ee! Amla' de nhiw yatni-rha'ani mana ema rdopal dodioinia yoma ampet la Orgahi-Orha'a O nanmu!” 18 Noma Yesus Nakot la re Niwra: ”Yowa ne, A'umkek nana hegana amlawanni ema rwaliernia la'a lyanti, de emeknekama tlena. 19 Ne totpena miatga, de Agal oleka ruri-lai tiy miy wia totpena ma mpiahapra niy nora hodai, me la' walia miy arwalmi de hegana amlawanni mana, mtiewra rurni-laini. Hota hadoma ta'en niana nhi' wano'a-warar miy. 20 La'pa emkade ho'mana yana mihepur nohora yatni-rha'ani e rlola miy nayanmi. La' samomuounu de mihepru, yoma miy nanmi e rahniorat la'a Ilyamou-Watyatoha.”
Yesus ralamni Nahepru
21 La' ler de meman pa Yesus Nahepuepru yoma Uplerlawna Nhiwni ed mak kodi plolli la E'a, pa Nhar lirni la Uplerlawna. Niwra: ”Ama, Orgahi-Orha'a mak ktorna-krautia nohmarna nora lyanti tulu! A'u'uli-uwedi O'a yoma wniarormu-wnialaimu hihi'imu-yapyapmu de O e Muwunmua la'a riy maka kakriahlu la iskola me rwarora ir er mak katu, mere Omukota la riy maka nhiolli-lietni emeka keke'enku'a pa rlol yawa. Yoma plol toto'a pa hade ed mak kla' nana A'mu O ralma-riormu.” 22 Nsumbain pa nhorwua noma Yesus Nakot la mak kden hande Niwra: ”A A'mu Nal oleka plolli-mneheni kirkira-ralma-rior samomuounu mai A' wua. Riy id mana edon nat niohora A'u eneknek to'ama A A'mu. Me riy id mana edonna nat niohora A A'mu eneknek to'ama E A'nani A'u, ne riy mak Agiwra ukot wahyaria A A'mu la ira.” 23 Noma Yesus Nkillia maka ha Nwatutu-nwaye'a re rmemeh'a pa Nakot la Niwra: ”Miy e mliernana oleka unut lawna, yoma miy e mimkek oleka A hihi'u-yapya'pu re. 24 Mpiahniorta, A'ukot emkade yoma makwohorulu-ktatrulu harahu me la' walia ray-ray la' ler ululu rwak pa ramkek walia hihi'a-yapyap miaka Aghi' nana, me rwak pa ratlin walia la'a hya' ed maka Awuatut niohor di, mere A maimia'yu lerni edon ntutu-nte' ma'ta pede ta'en niana ramkeka onde ratlina.”
Mhi' kalwiedweda la'a he'a-he' to'owa
25 La' lera ida noma makwatutu-kwaye'a agama deullu-tatarni ida nta'aga Yesus. Ntutrieri pa natiana Yesus niwra: ”Tungkurga, aghi'a hya'a totpena aliernana mormiori-dardiar plalahwa pa nodi liarni?” 26 Noma Yesus Nakot la Niwra: ”O ralma-riormu emkameni la hya' maka ha rakota la Puka ralamni?” 27 Noma riy de nwet la niwra: ”E rhorat targa la Puka ralamni totpa agala a ru'ru-la'yu, ralma-rio'ru la'pa a ih'ru-ralmu tetema pa aghima-rie'a Uplerlawna Matromlawnu de. Me totpa agatu tiulla-siaynia ura'a-upal wualia rimormior wia'lu pa emekwalima a'umkek rer lia a inon wamueh'u.” 28 Noma Yesus Nakot la Niwra: ”Mak ompuet la re raplola pa mliernohora re, totpena mliernan mormiori-dardiari.” 29 Mere tungkur agam de niwra ntot pa riy rwaror de, riy samomuou id e'a. Pede natiana Yesus niwra: ”Hota rimormior he' ed maka atiulla-siaynia?” 30 Noma Yesus Nakot la Niwra: ”Muanke' Yahudi ida nwatiawua Yerusalem pa niwra nla'a Yeriko. Nla' pa nler la talan letgar wa noma riy rwuri-rgalmua lawra-rayanni hyonni-hyanni honona me rliwra-rkakul nan de tete'-omiomia pa na'uhi-naklela la genni. 31 Ne edon nalo'on wali ne Yahudi kreini o'tani-matni (imam) ida nleret liola hande. La'pa namkek nana riy de, dewade nwotar doin la talla walli pa nodi liarni. 32 Emkade wal lia riy Lewi ida mak khi'inde khima-kre'a Yahudi kreini o'tani-matni la Uplerlawna roma kreini nayanni, nlol wal lia hande, ne nma nwakriania pa la'pa namkek nana riy de namno'a-namrara dewade nwotar doin la talla walli owa'an pa nodi liarni. 33 Mere edon nalo'on wali ne riy Samaria ida (maka nhi'inde Yahudi re rmakriarnia) la'a yala'a plalahwa nleret liola hande noma la'pa nkil tiar la riy Yahudi de dewade ralamni ntuin doin la pa 34 nwakriania na'nama nala arka me wu'rg atiawi na nagapnia no'oni-rarni na'nama newan pitga nhor nioma nkenia la keledai hananni pa nodi liarni la rom maka riy rpairia pa ranin la, na'nama nhapo'a-nhakal lia hande. 35 La'pa repar noma nala kupan pi'ra (dinar) woru, de lera woru kaini, la'a ora roma sniew de, na'nama nakot la niwra: ”Mhi' kalwiedwed hadi ne la'pa hya' to' maka ka'an kupna, de hota a'uwali owa'an pa mua puairia.” 36 La'pa nhorwua noma Yesus Nwati ltierni la yawalliohor de na'nama Natiana hadilla riy de Niwra: ”La'a riy mantetellu re de hameni ed maka khi'a rimormior wialli pa emolmolan neka e nhi' la inon wamueheni?” 37 Noma makwatutga agama mak katian de nwet la niwra: ”Riy maka ktulla-ksaynia la riy de!” Noma Yesus Niwra: ”La'pa emkade demade mlia'awa, ne mhi' walia emkadella la he'-he' to'a”
Yesus Nla Ntomra-nnah'a la Marta nora Maria
38 Nhor nioma Yesus Nora maka ha Nwatutu-nwaye'a re rodi liarni noma rte'ela la' leta ida. La' let de, de patke' ida nwawa Marta nmai pia npolu-nwaka Yesus totpena Nla e romni nayanni. 39 Marta elli id ed wal lia nanni Maria. Maria di, e namtatan nohora Itmatromni Yesus pa natlina-natailla Yesus lirni-tunnu. 40 Mere Marta nmakokan nohora tulanni-kniarni la romni nayanni. Noma Marta nla' pa nakot la Yesus niwra: ”Matroma, O edonna Mpuolliohora Maria pa nma nor a'u pua amkari? Enamtatan rer tio'a. Mhuopan pa nma nor a'u pua amkar lia handi.” 41 Noma Itmatromni Nakot la Marta Niwra: ”O e muakokan nohora haneknek wawannu, Marta. 42 Mere maka Uplerlawna Nwahaka de nwal tio'ola ida nmeh'a taru, de hya' maka Maria ha nwalir nian de. Pa hota A'g edonna wuayotil targ e' pa edonna natlin rer lia A li'ru-tu'nu ri.”
Yesus Nwatutu-nwaye'ela sniumbaini
1 La'awa la lera ida noma Yesus Nsumbain la geni ida. Nsumbain pa nhorwua noma maka ha Nwatutu-nwaye'a ida nakot la niwra: ”Matroma, Mpuatut tiek am lia sniumbaini pa emekwalima Yohansi nwatutga la maka ha nwatutu-nwaye'a re pa rsumbaini.” 2 Noma Yesus Nakot la re Niwra: ”La' miy sniumbainmi de mikot emkadilla: ”A Am mamni la Ilyamou-Watyatoha ! O' de Mueh'a Mupriri-mukded la genmu-tienmu. Ampak de nhiu'ru-nhielma ya'unni-yamta'ata nmai reri O' dee! Ampei-mnar reria lodanmu-hairmu. Ampaka pa O ralma-riormu de, mak kden la noha wawannu rlernohor reria pa emekwalima maka ha rhi'a la Ilyamou-Watyatoha . 3 Mhi' apehera a apun mamni la' yamanan mak Omual pa ama'an la' lera-lera. 4 Mumou-muwitna a do'a-hal mamni yoma am miana mhoratdoinia riy do'oni-halli mai ami. Ne yana Muolin doin limmu-mpue'er rormu mai ami, yanpa la'pa hegana-kawnu rta'ag am die, hota amler la do'a-hala ralamni.”’’ 5 Noma Yesus Nakot owa'an la maka ha Nwatutu-nwaye'a Nnairi yawalliohora Niwra: ”La'pa riy id tiy miy nla'a mutwualli romni la' mela letargara, pa niwra: ”Hyalia, mual nana roti meheni wotel pa ama'ana pleinia, 6 yoma a mutwua'lu id nwatiawu gen olieta pa nma nlola a ro'mu nayanni mere a yamanan mamni nhorwua!” 7 Taplin niohora mutwualmi maka mimlia' mpiak la de nwalol tiy miy niwra: ”E! Yana muriei a'u! Agho'la wuent oleka a ro'mu nhiarni pa agora u'pu-a'nu manin olek am pia. A'g edonna ga' pua umat nohora miy polpuolmi-wakwakmi re!” 8 La'pa emkade de hota emkameni tiy miy? La'pa miy mutwualmi ir ho'mana hota edonna namat pa nal hadom tiy miy. Mere mimpiesiaya, la'pa miy edonna mmiola-mmia'a mpiakwak to'owa, de hota namat pa nala hare honona mak ha mpiaka re. 9 Pede Awuagahniorat miy Agiwra, mpiaka la Uplerlawna, hota mliernana, mpiahaka hota mia'nana. Mtiet la nhiari hota rhari nhiari tiy miy. 10 Yoma riy mak kwaka de hota nlernana, mak kwahaka hota na' nana me riy maka ktet la nhiari de hota rhari nhiari la. 11 La' miy hononmi re, ama-hyali id a'nani nwaka pa na'ana i'na, de amni edon nal niy lia toh! 12 Onde rwaka hiwi ternu pa ra'ana, miy edonna miala hodai! 13 La'pa rimormiori miy mak khi'inde khi' do'a-hala nekane miatu miala ha samomuounu la miy a'nami re, yaho'ma miy Amlawanmi mak kden la Ilyamou-Watyatoha! Hota E' ed mak kala E Nhiwni la'a riy maka kwak la E'a.”
Riy riwra Yesus Nora Be'elsebul (hegana amlawanni) rkar wiutu
14 La' lera ida ne Yesus Nhokar doinia hegana-kawnu la'a riy mak kaplinu kaltieri (hakamu). La'pa hegana-kawnu de nlergot wa dewade riy de naltier kalwiedwed wa pa rirahu re rwer rer wiawni la. 15 Mere la' dom de e riwra: ”Be'elsebul, hegana amlawanni de ed mak kala ruri-lai la Hade pede na Nhokra-nlai hegana-kawnu re.” 16 Me riy dom de rtota Yesus la klieratni pede rhopan pa Yesus Ntutga hihi'a-yapyapi mak kamehi-kayona totpena irat muemna de Yesus plolli-mneheni nwatiawua Uplerlawna. 17 Mere ira ralma-riorni re, Yesus Nat niohor momuoga. Pede Nakot la re Niwra: ”Hegana re emeknekama hairi ida. La'pa la hairi ida rimormiorni ema rhakre'era la wokni-wokni mak kahuri-kawo'ora, de hota hair de edonna namteman plalahwa. Me luwu-a'na ida nden rer lia yahuri-yawo'ora de hota rweyata-rwaniawua luwu-a'na de. 18 Emkade walia la hegana amlawanni tnioranni-riautnu. La'pa hegana woka-le'u ida, nhokra woka-le'u dom to'a, de hota hegana tnioranni-riautnu ema reyapie'era. A'ukot emkade yoma miy e miwra A'g e ghokar doinia yatni-rha'ani Aniairi Be'elsebul plolli-mneheni. 19 La'pa mikot emkade mai A'u nnia'eratni de hota mak klernohor miy niek de rnairia hegana amlawanni plolli-mneheni pa Nhokar doini hegana-kawnu. Mere maklernohor miy niek de rat niohora wniarormi de nhala. 20 Mere Aghokra-liaiya hegana-kawnu yatni-rha'ani re de Aniairi Uplerlawna plolli-mneheni. Ne hade e ntut mueman de Uplerlawna ed mak kodi plolli pa emeka Ray ne miy e mimkek nan oleka E rurni-laini. 21 Itala mak karuri-kalai ida pa itsi' la yawalliohora. Hegana amlawanni de emeknekama mak karuri-kalai ida mak knairia keki-rautu penpuenu-tetema na natiaka romni, totpa yana riy ra'ala re'eni-tniarnu. 22 Mere A' die de emeknekama riy ida mak kmai, mak rurni-laini nareh mieman la e'a pa Atiowar nana na'nama Awuarui-wuate'la momuoga e kekni-rautnu maka enwarora de hota ed mak katiak nana e re'eni-tniarnu me Age'era-ghakre'era hyonni-hyanni re honona. 23 Mhioratreria! Riy mak edonna rlernohor reri A'u, de nnia'eratni de ir er maka khoklira-kpah'a waw (malawna) mai A'u. Ne riy edonna rhima-rre' A'u, nnia'eratni de hare er maka rweyata-rwaniawua A tulla-knia'ru!”
Yatni-rha'ani nawal lia riy mak edon kpesiay
24 ”La'pa yatni-rha'ani nahniokar doin la'a riy ida ralamni, de loldoi-loldai lia wo'or kerkerna totpena nahak geni id owa'ana totpena nhu'ru ralma mere hota edonna nlernana. La' hade pede yatni-rha'ani de wniarorni de hota nawali owa'an la riy de. 25 La'pa nawal wia, de namkek de riy de nmou-nwitna olekwa emeka likti id maka ha rwahyar momuoga ne rwahi'a-rwayod tiarga. 26 Noma nla' owa'an pa nmai die nodia yatni-rha'ani wo'itu de yatni-halli nareh dioin memn owa'an la e'a. Dewade ha rler la riy de ralamni owa'ana. Pede la'awa hohoni, de riy de nler la polpuol inni-wakwak amni mak karehi owa'an la' ulul genni.”
Hornama itatlina-tatailla Uplerlawna
27 La'pa Yesus Naltier rereri die dewade patke' ida la rirahu re letgarni nhaunu pa nakot la Yesus niwra: ”Eee! Inmu maka ka'uhu-ka'apnu O'a la' ler ululu, de nlernan unut lawna!” 28 Mere Yesus Nakot la Niwra: ”La' plollolli de la'a riy mak klernan unut lawna de he'-he' to'a maka katlina-katailia Uplerlawna lirni-tunnu!”
Rirahu rwak pa Yesus Ntutga hihi'a-yapyapi mak kamehi-kayona
29 La'pa rirahu e rpepan reria Yesus noma Nakot lirni Niwra: ”Tuwu di, rimormioria yatyata-halala. Yoma rhopan pa Atiutga hihi'a-yapyapi mak kamehi-kayona (mujizat) id la ira totpena rpesiay A'u. Mere hihi'a-yapyapi mak kamehi-kayona kuku' nek ho'mana A'g edon tiutga la ira. Eneknek to'ama mak makwohorulu-ktatrulu Yunus ha nlernan de. 30 Yoma Yunus mak kdella i'na apannu ralamni de emeknekama hihi'a-yapyapi mak kamehi-kayona (mujizat) id la'a letlawna Niniwe de, ne emkade wal lia Rimormior A'nani A' die hota Awual lia hihi'a-yapyapi mak kamehi-kayona id la' rimormiori la'a tuw di onnila hya' maka hota Aliernana. 31 La'awa lera noha niatni, la' ler maka Uplerlawna Nhudi-npara rimormiori la watghudi lokarni, de hota pat maran mak kwatiawua weli tranna (mata angin selatan) ntutrieri pia nto'on reria riy tuwu di. Yoma pat maran de nwatiawua noha honi-rai tawnu (olietleta) pa nmai pia natlin nana wniatutu-wniaye'a Salomo mak katu die. Mere la dodo'ondi de Agetla miy gaimi ralamni mere miy edon mitlin A li'ru pa mhioitio'or doin-mtiahnei dioin do'omi-halmi kennama A'ureh dioinia Salomo. 32 La'pa la'awa lera noha niatni, la' ler maka Uplerlawna Nhudi-npara rimormiori la watghudi lokarni, de mak kden la Niniwe re mana hota rtutrieri pa rto'ona riy mak kmormior lia dodo'ondi. Yoma mak kden la Niniwe rhoitio'or doin-rtahnei dioini ir do'oni-halli, la' lera Yunus nakot nohora Uplerlawna nnio'oni-niatnu la ira. Mere la' dodo'ondi de Agetla miy gaimi ralamni mere miy edonna mitlin A li'ru pa mhioitio'or doin-mtiahnei dioin la do'omi-halmi, kennama A' di de ureh dioini Yunus de.”
Uplerlawna lirni-tunnu de emeknekama wa'du mak khitita-kreprepra
33 ”Edonna rlernan ma'ta riy rtutin wa'du de rade'a-ramoinia la hadom ralamni, onde rala ktopra ra rtutwua ai miormior die. Nhi'inde rkenia wa'du la'a wniatatgenni totpena hameni maka kler la roma ralamni de namkek reria lelerni. 34 Matmi de emekwalima wa'du la inonmi. La'pa matmi reprepra, de hota inonmi tetema mana nreprepra. Mere la'pa matmi yata, de emekwalima inonmi tetema mana nmela-nkalma. 35 La' hade pede orahnioratmi la' temmi. Yanpa maka mimpiarora de lelerni de mak kden tiy miy mere plollolli de melli-kalamni hade. 36 Pede la'pa inonmi tetema lelera, me oke' mana edonna melmela-kalkalma, de hota inonmi de tetema nhitita-nreprepra pa emeknekama nden la wa'du taranni.”
Yesus Nwaghala riy Parisi rora makwatutu-kwaye'a agama
37 La'pa Yesus Naltier pia nhorwua, noma riy Parisi ida npolu-nwak pa nhi'a nhiollia pa ra'ana-remnu. Pede Yesus Nlernohora la' romni nayanni pa Namtatan wutga na'nama ra'ana. 38 Riy Parisi die nheran doin la yoma Yesus edon Nlernohora agama deullu-tatarni maka la'pa Na'an de Nwuri-nohma limni ulu. 39 Noma Itmatromlawanni Nakot la Niwra: ”Plola la riy Parisi miy die mhi' emeknekama riy maka kwuri-kohma lola-wra'u to'orni mere ralamni re edonna rohma pa nakdeha-naktiahli ma'ta, yoma mtiot pa mpiehwa-mliakta emekneka riy kalwiedweda mere riy yatyatni-halalli miy, mak kamatmer la rira hyonni-hyanni. 40 Miy podakmi lola miy tiermi! Miplinga de Uplerlawna ed maka khi' nana tio'ora me rialma?! 41 Mere hota mial ralammi tetema pa mira'a-mipalga la riy mak kakleha-kaplara, ne la'pa mhi' emkade de hota inonmi tetema nor wutga ihrami-ralammi momuou rmou-rwitna. 42 Mere hota riy Parisi miy die, adoh! Hota mlier la yatyatni-halalli yatlorni-yatra'ani! Yawuli-yatniamanmi re emeknekama dwa'na, laso'a me korni-tre'eni de nhi'inde miala nhiakra id ralamni la termida (sepersepuluh) la'a Uplerlawna. Miala de naplola, mere miy edonna mtiutga nhiolia plola-mneha la rimormior wialmi, me edon mtiut walia ralam kalwiedmi la Uplerlawna. Maka plollolli de totpena mhi' samomuou lia Uplerlawna Nor rimormior wialmi me yana mhioratdoin wal pia miala nhiakra id ralamni la termida (sepersepuluh) la'a Uplerlawna. 43 Riy Parisi miy die, adoh! Hota mlier la yatyatni-halalli yatlorni-yatra'ani! La'pa mlier la Yahudi kreini-iskolli de mpiahak gen miak kden la gaini, ne mihepru yoma mak kden la ya'olgeni rhi' miy lia rekna-waiti. 44 Adoh! Hota yatyatni-halalli yatlorni-yatra'ani e nhortiut nian miy! Mtiutga inonmi emeka riy kalwiedweda mere miy ralamni de npenpuen lia yatni-halli. Emkade pede miy emeknekama hoi-kietra maka riy raplin niohora etla hande pede rlola wawannu yoma raplin niohora hoi eda de maka kpenpuen nohora hya' maka kahuwu-kawoini.” 45 Noma tungkurga agama ida nakot la Yesus niwra: ”Tungkurga, la'pa Omukot nohora lir de, de O' e Mupolu-mulielan wali ami.” 46 Noma Yesus Nakot la Niwra: ”Hota mlier wal lia yatyatni-halalli yatlorni-yatra'ani, yoma tungkuru miy die nhi'inde miala wniatutu-wniaye'a emolmolan nekama mkienia kwar werwerat rehi la riy wawannu, mere miy edon mtiulan et miemna la riy totpena rlernohora wniatutmi-wniaye'emi re. 47 Adoh! Hota mimlier la yatyatni-halalli yatlorni-yatra'ani yoma miy e miwra mtiutga inon wamuehemi samomuounu yoma mpiedia hoi-kietra la'a makwohorulu-ktatrulu ululu re. Mere miy die mana emolmolan nekama miy upmi-tgarmi maka rwen oleka makwohorulu-ktatrulu la' ler delloo! 48 Miy orgahami mtiutga de miy e mpiayow nohora orgahami upmi-tgarmi hihi'ini-yapyapni. Ir er maka kwunu-kwenna makwohorulu-ktatrulu re, pa hota plola miy er mak khi'a makwohorulu-ktatrulu hoini-kietarni re. 49 La' hade pede Uplerlawna mak katu hya'a-hya'a honona de Niwra: ”Hota A'u'enyatga makwohorulu-ktatrulu rora riy makodia A li'ru-tu'nu, ne hota miy mak kmormior lia dodo'ondi mpienna doma, ne la dom de mimuki-mima'ala. 50 Emkade pede hota miy mak kdella nohkerna la'a lera-mela ri hota er maka kler la niukum werwerat memna yoma miy er mak kakwara riy mak kakot nohora Uplerlawna lirni-tunnu de wniunnu-wnienanni la'a ler maka Uplerlawna na'nama Nakoki-nayapi nohkeran di pa la'pa ntutu-nte'ela lera-mela ri. 51 Hota mikwara Habel wniunnu-wnienanni pa nla ntut lia wnienna la makwohorulu-ktatrulu Sakaria, maka ha rwenna la Uplerlawna roma kreini nora katri'ana (mesbah) letgarni. Mpiesiaya! Plol toto'a pa wniunu-wnienna honona re, de hota tuwu di rakwar reria do'a-hala re honona. 52 Tungkuru agama miy, hota mimlier la yatyatni-halalli yatlorni-yatra'ani, yoma emeknekama miy er mak ktorreria konsi pa ma mhiaria rira o'tani-kriahlanu la'a Uplerlawna yala'ani, mere emeknekama miy nek de mhioplial oleka konis de. Miat niohora nhioli-lieta ilu-wniehwa pa rlernohora Uplerlawna mere miy orgahami nek de edonna mliernohora Uplerlawna talanni de. Ne miy orgahami mana ed maka mtierteri-mtiatawa riy dom maka kiwra kat niohora.” 53 La'pa Yesus Nto'or la'a gen die dewade tungkurga agama rora riy Parisi re roir reria Yesus. Honona re rtot pa rna'aili-rna'ailia Yesus totpena Nakot momuoga hya'a-hya' to'a. 54 Ne la' hade de ir honona rta'wa reria tlinni la Yesus lirni-tunnu re totpena yanpa Yesus Nweta hya' maka edon kla' nana ir o'tani-matni ralamni de demade pleta-plet pa rla' rwaghal Yesus la' ira. Lir mak kiwra ”la Ilyamou-Watyatoha” me lir mak kiwra ”Ampaka pa O ralma-riormu de, mak kden la noha wawannu rlernohor reria pa emekwalima maka ha rhi'a la Ilyamou-Watyatoha” de rden to'ola Puklawna ida-woru la' ululu gahani.
Yana mliernohora Parisi re nhiolli-lietni
1 La' ler de wal pia, rimormiori riwnu-halli rmai pia rawoka, de idma mpakdie'da la ida. Noma Yesus Nakot ulga la maka ha Nwatutu-nwaye'a re Niwra: ”Mierammi la' temni la'a riy Parisi re. Yanpa mimliernohora ir wniehwani-liakatni maka rtota inonni samomuou mere plollolli de riy yatyat ira (munafik). Ir wniehwani re emeknekama tgo'a maka oke' to'a maka ha rkenia la wetra' ota (tarigu) pa nhi'nande nha'at momuou. 2 Mere hihi'ini-yapyapni maka kayade'a, hota rayamkek momuou, ne maka kayawunmua hota rat niohora momuou. 3 Ne hota hya' maka miy mipupua la rira tlinni ralamni me maka ha mpiahaur walia la mel'utni-malienni, de hota repra rauria, de riy rat niohora yoma hota rkakna la lol meni-meni to'owa.”
Tamta'at reria Orgahi-Orha'a
4 ”A talanwa'lu miy hononmi mhioratreria! Yan memmemna mimta'ata riy rwunu-rwenan miy inonmi. Yoma hota rwenan to'a miy inonmi, mere ta'en niana ir rhi' yawuhi-yawe'et la miy aranmi (jiwa) pa rla' Ilyamou-Watyatoha. 5 Mai pia ukot nohora hota he' ed maka mimta'ata. Mimta'at de, mimta'ata Uplerlawna. Yoma la'pa Nwunu-nwenan riy inonni, de Enodi plolli pa Nnaklia aranmi la ai mormiori ralamni (naraka). Mpiesiaya A li'ru di. Uplerlawna nanpena mimta'ata. 6 La'pa ma'nu prowta mak kakleha weli id ho'mana hota Uplerlawna edonna Nhortaplinga de. 7 La'pa mortu lihirmi la' o'tami ho'mana Uplerlawna Nat niohora momuou. La' hade pede yan mimta'ata. Yoma Uplerlawna Nsayn miy me Ntera-ndem miy nareh dioin meman la ma'nu prowta re.”
Yan itamta'ata takot nohora it pesiayni la'a riy
8 ”Mhioratrer samomuoga! Riy maka kwayow nohor pesiayni mai A'u la'a rimormiori gaini ralamni, de hota Rimormior A'na A' die mana hota wuayow nohor e'a la'a Uplerlawna Nora E hopopanni-lili'irnu re gaini ralamni, Agiwra A mu'tu-rah'u id e'a. 9 Mere la'pa hameni ed mak kreher pa kiwra e' edon nlernohora A lia rimormiori gaini ralamni, de hota Rimormiori A'na A' die mana hota rieher doin walia e'a la'a Uplerlawna Nor E hopopanni re gaini ralamni. 10 La'pa he' ed mak kapolu-kaliella Rimormior A'na A' die, de hota Uplerlawna Namou-nawitna do'oni-halli de, mere la'pa hameni ed mak kapolu-kaliella Uplerlawna Nhiw Lululli, de hota Uplerlawna edon Namou-nawitna do'oni-halli de. 11 La'pa rod miy lia'a geni-tien maka Yahudi rhi'a kreini-iskolli de, pa rhudi-rpar miy lia, onde rodi miy la'a o'ta-mat lalawna gaini ralamni onde mak ktorna horta-hairi pa rhudi-rpar miy, de yan memmemna ihrami rteplu la'a hota mniairia hya' lir pa mia mhieri-mhielta inonmi. 12 Yoma la'a hya' ed maka hota ha mikota, de Uplerlawna Nhiw Lululli maka Nkar lia miy ralamni pa mikota hare, la' ler maka ha rod lia'a-rod maiya miy lia re!”
Riy mak kre'a-ktaru mak khortaplinga Uplerlawna
13 Noma riy id la'a riy mutlialawna re nakot la Yesus niwra: ”Tungkur Yesus e! Mtia' tieka lirmu la hya'lu totpena nal teka amro'a ina-am mamni re'eni-tniarnu oke'a mai a'u.” 14 Noma Yesus Nakot la Niwra: ”Hyalia, he' ed maka kran A' pua A lia godi plolli pa ghakra mimrio'a re'emi-tniarmi?!” 15 La'pa nhorwua noma Yesus Nwagahniorta riy honona mak kden la hande pa Niwra: ”Erammi la temmi! Yan memmemna mpial lia riy maka kapal niana kupna-kai, re'a-tniaru. Yoma rira mormiorni edonna nawniair la re'eni-tniar wamueheni, kennama re'eni-tniar liawan memna.” 16 Noma Yesus Nakot nohora yawalliohora dilla ira, pa Niwra: ”La' riy makre'a-maktaru ida gahani nhyi'a-tlunni maka kpoti-kaduw nohora yawuli-yatniamni mak kodia pripanni-fa'anni. 17 Noma nwarora de: ”Hota gen mieni owa'an pa akenia noh di wullu-we'elli? La' dodo'ondi de aghi' hya'o?” 18 Noma nmeh'a nekpa naltiertier lia orgahi niwra: ”Dudnu-dudnu honona, aghopan nekpa rweyata-rwaniawua, ne awuatatg owa'ana warwuarnu maka inponni. Totpena la' honona re de awuatierun tar momuoga metma wetra' lawna re honona, me re'a-tniaru re korni re honona wali. 19 Nhor nianpena a orgah'u ukot owa'an la'a a orgah'u giwra: Adoh! Aliernana oleka pripanni-fa'anni la'a hare honona mak samomuou, pede hota awuatierun targa hare honona. A'g edon kari owa'ana mere awuei tio' pa a'una-gegemnu me ghi' hya' mak khi' a ralmu pa nahepru.” 20 Mere Uplerlawna hota Nakot la riy de Niwra: ”Hoi! Podkge! Hota mel di meman pa omuat wia. Ne hota he' ed maka klernan o re'emu-tniarmu maka ha muwoka totpena orgahamu mu'un lola-muemun lola reno?!” 21 Emkadella la'a riy maka kmeh'a kwahak pa nre'a-ntaru, mere nahmena nwahaka re'a-tniar inhatta maka samoga la Uplerlawna yamkekni.”
Pesiay la Uplerlawna, yana mimta'at la miy mormiormi
22 Noma Yesus Nakot la maka ha Nwatutu-nwaye'a re Niwra: ”La' hade pede mhioratreria, yan mimta'at nohora hya' mak hota ha mi'ina-miemnia, me hota ha mhiewta-mniairia. 23 Yoma mormior die narehia ya'ana-yemnu, ne inonmi de nareh niana hewewta-naniairi. 24 Mimkek teka la ma'nu kakaka. Ir edonna rawuli-ratniamni me edonna rreiki-rwo'ora me rakleh walia dudnu-dudnu pa rwatiernia ya'ana-yemun la. La'pa emkade ho'mana Uplerlawna Ntera-ndem wali ira. Ne Uplerlawna Nsaynia miy die nareh dioin la onu-ma'nu re! 25 Rimormiori maka ralamni worwuorga onde namta'ata matmiatni ho'mana takeni nhaur nan aranni oke' nmeh'a totpena edonan nmati. 26 Ne la'pa hade nek de kuku' ho'mana takeni miy e mhi' nana, hya' ed mak karei pia mimta'ata nohora miy mormiormi la'a hare honona maka mi'ina-miemun me maka mhiewta-mniairi?! 27 Mimkek la kihir mak kadeutu re mormiorni. Kihir mak kadeutu re, edonna rkari, me edonna ratenni-ramairi. Mere mhioratreria, ray Salomo mak kre'a-ktar die nek de edonna nhewta-nnairia naniairia samomuounu pa emeknekama kihir mak kadeutu re. 28 Wewna mak kden la rai mtatanni re rmor lia ler di, mere repar dewade rhoklai la. Wewan nek de Uplerlawna ed maka nhi'inde Nahowna-nakgara pede samoga la yamkekni. Mere miy die edon mpiesiaya de wewna nek de Uplerlawna Ntera-ndema ne hota yaho'ma miy?! 29 Yana wniarormi-wnialaimi nod rer tio'ola hya' maka hota ha mi'ina-miemnia, me yana mimta'at nohora. 30 Yoma riy mak kaplin niohor ma'ta Uplerlawna, nek de er maka kahakhak nohora hare honona. Mere miy Amlawanmi Nat niohor olekwa de miy e mpiaka (perlu) hare honona. 31 Pede mpiahak ulga totpena Uplerlawna Nodi plolli la'a miy mormiormi-dardiarmi, ne hota hya' maka mikleha de hota Enal momuoga tiy miy.”
Re'a-tniaru mak kden la Ilyamou-Watyatoha
32 ”La' miy mutmi de riy doma rmeh'a mere emkade ho'mana yan mimta'ata. Yoma miy Amlawanmi ralamni napranrana (nahepru) pa Nal miy pia mior E' pa miodi plolli. 33 Mi'ol dioini miy re'emi-tniarmi pa mial welli la maka a'na riy kapatyata. Emkade pede miwok wutga re'a-tniaru plollola la Ilyamou-Watyatoha, mak emolmolan nekama kupna genni mak edonna kyata. Re'a-tniar die la Ilyamou-Watyatoha, de taken niana rahor doinia la, makamnelu-kamna'a taken niana rwuri-rgalam nana, ne erieri edonna na'an wal lia. 34 Pede miwoka re'a-tniaru la'a Ilyamou-Watyatoha yoma hota la meni pa miy re'emi-tniarmi erla de hota miy ralammi et wal lia hande.”
Miy mak khima-kre'a Uplerlawna kniari de hota mkiar samomuou
35 ”Yan minin matmi mere mpiahi' pa mkiar lia Uplerlawna kniarni pa emeknekama riy maka raini nden rer lia temni, me wa'duni mana yana nmati. 36 Mhi' emolmolan nekama hopopna-lili'iru mak edonna kanin matni la rwei-rnara tunni npolan la'a yawok mehlima. Totpena la'pa tunni de nmai pia nkorkor la nhiari, de nleretniekla rhari nhiari la tunni de. 37 Eee! Hopopna-lili'iru re rlernana unut lawna, yoma tunni de nmai die e ramatmat ee! Mpiesiayo, hota tun de nek de nwahi'a-nwayod pia nhima-nre' hopopanni re. Hota nwak pa hopopanni-lili'irnu de ramtatna pa ra'ana ne orgahani nhima-nre'a re. 38 Eee! Rlernan unut lawn ee! Yoma ir tunni de nmai die nlernana ir mat lia wniei la'a mela letgargarni, onde repreparreria ho'mana edonna ranin ma'ta. 39 Mhioratreria, yawalliohora id owa'an hadi. La'pa orroma nat niohora hya'a lera-mela mak kamna'a nma nkamna'a la e romni, de hota e natiak reri totpena mak kamna'a yana na'unut nan e'a. 40 Ne hota miy miana emkade walia. Mitiak reria! Mitlin reri-mitail rer lia Uplerlawna lirni, yoma Rimormiori A'na A' die hota muai owa'an de emeknekama makwuri-kgalmu la melmela mak riy raplin niohora.”
Mak khima-kre' samomuou Uplerlawna kniarni me maka edonna khima-kre' Uplerlawna
41 Noma Petrus natiana la Yesus: ”Matromlawnu ne, hota wniatut die Matro'mu Nal to'a ma' ami, onde la' riy honona wali?” 42 Noma Itmatromni Nakot la Niwra: ”Hota la' he' tiy miy, mhi' inonni pa emeka hopopna-lili'iru maka khu'ru-khelma me natu natlina-nataili? Hopopna mak emkade upni-matromni mana nran e' pa nla' o'tani la' hopopanni-lili'irnu korni totpena e' ed mak khakra mutwualli re ya'anni-yemannu la'a lelera-melmela re. 43 Hota hopopan mak kdenrer lia kniarni de hota nlernan unut lawna, yoma matromni nawal pia nmai die nlernan entepartarlia tulla-kniari. 44 Mpiesiayo, hota upni-matromni de npesiaya riy de pede nran e' pa nwal lia mak klina-kmata la e re'eni-tniarnu honona. 45 Mere la'pa hopopna-lili'iru de nwarora la ralamni hota upni-matromni mahneka nanpena nmai. Pede nliwra-nkaklia e kniarwialli re patke'a rora muanke'a, ne na'ana-nemun pa npehera-nma'wu. 46 Dewade upni-matromni de nawal pia nmai wia la'a lera-mel maka hopopan de naplin niohora. Pa nhi'nande upni-matromni nukmua werwerta riy de ne nhokar doinia pa nre' wut lia riy maka edonna ka'unni-kamta'ata Uplerlawna. 47 Riy maka kat niohora tunni ralma-riorni, mere edonna nwahi'a-nwayodi pa nlernohora upni-matromni de ralma-riorni, de hota rliwra mantiarga la genni. 48 Mere la' riy mak kaplin niohora upni-matromni ralma-riorni, nwehwa sal, pa upni-matromni nliwra-nkaklia, hota liwliwarni edonna nwerta. Yoma riy maka Uplerlawna Nala ruri-lai onde Uplerlawna Nal oleka pa nodi plolli la rimormior wialli, de hota la'pa edon natlin la Uplerlawna lirni de, hota Uplerlawna Nto'on reri narehia riy dom to'a.”
Yesus Nmai die narieiniande rimormiori edonna rkalwieda mere rahuri-rawo'ora
49 ”Amuai pia ghakra rimormiori mak khi' samomuou la' riy mak khi' yatyatni pa emeknekama ai mak ka'an ora-au mak edon karuri me mak karuri de edon na'ana. A ralmu edon namtemna yoma A'g edon ghi' hade pa nhorwua. 50 Amueh'a neka hota lier la yamuki-yama'ala la'pa matmiati-molmuolu. Ne A ih'ru-ralmu teptieplia yoma A'g edonna Aliernan ma'ta re! 51 Yanpa miy miatniekame Amuai die Agod niek riy mak kden la nohkeran di wawannu pa rora rimormior wialli re rkalwieda. Hota edon emkade, mere mpiesiaya! Onnila A rerie'yu pede riy id nor rimormior wialli re rahuri-rawo'ora. 52 La'pa lera-mela ri de roma ida mniotni riy wolima de hota riy wotelu rpesiay A'u me korni de edonna, onde riy woru rpesiaya mere korni edonna, nhi'nande la' rom de rahuri-rawo'ora. Hota emkade pa nodi liarni. 53 Hota ama nora a'nani muanke'a rawowo'ora. Ina nora a'nani patke'a mana rawo'ora. Hota ina nora yananni patke'a idma nwohora-ntatr ida.”
Edon rna'erit nana Yesus hihi'ini-yapyapni
54 Yesus Nakot wal lia' rirahu Niwra: ”La'pa mimkek nana kakma nha'a la warta, de hota mlieretniekla miwra: ”Hota otna,” ne plola otna nturu. 55 Ne la'pa mieram nana anni nten lia tranna, de miwra: ”Hota lera nhit panpahna.” Ne plola pahna. 56 Hoi! Miy die mtiot inonmi emeka riy mak kat niohor Uplerlawna yala'ani de mere plollolli de miplin niohora! La'pa mimkek la'a kakam larlara onde mieram nana anni nteni, de miat niohora hota otna onde hota pahna. Ne nihya'pa mimkek nana A hihi'u-yapya'pu me mitlin la A li'ru-tu'nu mere edonna mnia'erit nana?!”
Miora arwalmi mkialwieda
57 ”Nihya'pa miy orgahami edonna mpiaror nohora hya' mak kaplola totpena mliernohora? 58 La'pa he' ed maka kod miy la'a watghudi lokarni (hakim), de mpiahak talan pa miora riy de mkialwied nohora lira-tun die la'a talan letgar memna. Yoma la'pa edonan de hota riy de nhed miy lia'a makhudi-makpara mak hota nal owa'an miy lia hgei mak kodia hapa'pani (polisi o'tani) ne hota hgei de nho'la miy lia roma nhio'la ralamni. 59 Mimpiesiayo, hota miy edon mliergot la roma nhio'la ralamni la'pa rwei pia mpiair dioinia papiairmi honona.”
Mak edonna khoitio'or doin-ktahnei dioinia do'oni-halli de hota rler la yatyatni-halalli yatlorni-yatra'ani
1 La' ler de, riy rwahauria la Yesus la'a riy Galilea dom maka Pilatus nwunu-nwenna, la'pa rtepartarlia rala nhioini-tnianni (persembahan) la Uplerlawna. 2 La'pa Natlin samomuoga wniahaur de noma Yesus Nakot la re Niwra: ”Yoma riy Galilea rlernan yawunu-yawenna mak emkade, de hota mpiarora de hare do'oni-halli re rarehelia riy mutlialawan mak kden la Galilea korni rena?! 3 Wniaror de nhala! Mere mpiahniorta! La'pa miy edonna mhioitio'or doini-mtiahnei dioinia miy do'omi-halmi, miy hononmi nek de hota mlier wal lia matmiati-molmuolu plalahwa. 4 Emkade wal lia' riy termida wehrani wo'awa, maka rom tutulu ida napru'wu pa nutin wenna ir la Siloam, la'a Yerusalem letni. Hota miatniekame hare do'oni-halli rarehia mak kden la Yerusalem korni pede rom tutul die nutin wenna re?! 5 Wniaror de nhala. A'ukot owa'ana ralamni tiy miy. La'pa miy edonna mhioitio'or doini-mtiahnei dioini do'omi-halmi, miy hononmi nek de hota mlier walia matmiati-molmuolu plalahwa.”
Riy mak edon khoitio'or doin do'oni-halli pa rhi' kalwieda de hota emolmolan nekama kar ona ida maka kakleha wo'a pa retan doin la
6 Hade nhorwua noma Yesus Nwahaur nohora walia yawalliohor di. Niwra: ”La'a nhyi'a lokrahi ida de ora nhyi' de ntamin walia kar ona ida. La'pa lera ida noma ora nhyi' de nla nwahaka kar de wo'oni, mere edonna nlernan et wo'oni ida la. 7 Noma nakot la riy mak katiaka nhyi' de niwra: ”Tamkek la anni wotel mak klardoini olekwa de amua wuahaka kar de wo'oni. Mere a'g edonna liernan etia wo'oni ida. Pa mhioi wro'ona la! Samomuounu de ittamnia onni id owa'an mak hota kmori la tan ihi di!” 8 Mere mak katiaka nhyi' de nwak lir la niwra: ”Yana Tuna, ndena plein la pa tamkek teka la anin dina. Tuna! Pena a'uwlia' tani la walli-walli, nanpena akenia pip tie' la! 9 Yanpa anin li'ir di nanpena nawo'a mere la'pa tamkek la pa edonna nadeutu nanpena tuna nhopan pa retan doinia la.”’’
Yesus Nhi' kalwieda patke' maka to'orni kokioili la'a Sabat lerni maka Yahudi edon rkar lia de
10 Lera ida, la' Sabat lerni (maka Yahudi edon rkar lia de) de Yesus Ntepartarlia wniatutu la'a gen miaka nhi'inde Yahudi rhi'a kreini-iskolli de. 11 La' hande de patke'a ida enado'or nohora mehrani la'a anni termida wehrani wo'awa yoma hegana nhu'r ralma. Patke' de to'orni nkokioili ne taken niana nwalle'era onni pa ntutrieri kdededa. 12 La'pa Yesus Namkek tar lia dewade Npolga pa Niwra: ”Ina, mmuai ee!” Nmai noma Nakot la Niwra: ”Dodo'ondi de Aghi' kalwied o'a!” 13 Noma Yesus Nran limni la patke' de wawannu dewade mtatan de nekpa nnienni-nhienni nmolu, ne pat de mana na'ulia-nawedia Uplerlawna-Mempulwatnu. 14 La' noma o'ta-mat la gen miak Yahudi rhi'a kreini-iskolli de nawenan doin la yoma Yesus Nhi' kalwieda makamehra la'a Sabat lerni. La hade pede o'ta-mat de nawenan pa nakot la riy honona mak kden la re niwra: ”Hoi! Mitlin pa a'ukota. La'a krei id ralamni de itkar lia lera wonema, pa la' lera matnemnema re de mai pia mhi' kalwieda mehra-maumi re! Mere mitlina! Yan memmemna mmiai lia' Sabat lerni emeka ler di. Mhioratreri oo!” 15 Noma Itmatromni Yesus Nakot la, Niwra: ”Hoi! Miy mtiota inonmi de emeka riy kalwiedweda mere la' plolli de miy edon pusin nohora hya' ed mak kaplola (munafik)! La'a Sabat lerni de miy hononmi miewar doinia nhiurmi-wnia'anmi pa miodia pa mlia mtip ger la remnia. 16 Nah, mai handi de Abrahama duratni-waitni patke'a ida e namehra nan la anni termida wehrani wo'aw memna yoma la'a wutwutu-kokgohu la hegana amlawanni. Pa emkameni owa'an pa mikota yana twe'er doinia la'a wutwutu-kokgohonu la'a Sabat lerni dina?!” 17 Yesus lirni de Nhi' amola-ma' memna riy maka nhi'inde rora Yesus rwa'eriai mere la riy dom to'a re rahepur nohora Yesus hihi'ini-yapyapni mak samomuou memna re. Uplerlawna limni-rorni ra'ititar rer lia liawanni me la rurni-laini, emolmolla sasawi ola nmori onde tgo'a nhi' pa wetra' ota (tarigu) nha'ata 18 Noma Yesus Natiana Niwra: ”La'pa Uplerlawna tnioranni-riautnu la E rimormiori wawannu de emkameni la yala'ani? Hota Agala yawalliohora hya'a pa Aga ukot nohora harena? 19 Hota ha yala'ani emeknekama yawalliohor di. La'pa ha rtamni sasawi ola ida la nhyi'ini, sasawi ol de nmor pia olli-tapalli re rpoti-rkadwu, ne onu-ma'nu rma rapuon la'a sasaw die tutnu-akni.” 20 Ralamni owa'an pa Yesus Natiana Niwra: ”Hota Agala yawalliohora hya' pa ga ukot nohora Uplerlawna tnioranni-riautnu la E rimormiori wawannu? 21 Uplerlawna rimormiorni yehwani emolmolan nekama tgo' maka a'na patke'a ida na' nana pa la nawotra-nawah'a wutga la wetra' ota kilu terampwogata pa nha'ata mneneha.”
Mpiakdie'da lola nhiar miaka kakmamah'a
22 La'a talla plahwani maka Yesus Nlola pa Nla'awa la' Yerusalem de Yesus Nwatutu-nwaye' lolola la'a leta-ruhun maka Ha Nlolola re! 23 Noma riy ida natiana niwra: ”Tuna, hota riy doma rmeh'a mak klernana mormiori-dardiari plalahwa pa nodi liarni?” Noma Yesus Nakot la mak katlina re Niwra: 24 ”Mihak totpena dodo'ondi de mpiakdie'da lola nhiar miaka kakmamah'a, yoma mhioratreria, hota rirahu riwra rlola mere hota edonna rlernana. 25 Yoma hota orroma namat pa nkahro'pa nhiarni. Pa hota miy miak edon kla' ma'ta la rialam de e mtiutrier pia mtiepartarlia mkorkora nhiari pa miwra: ”Tuna mhuar niana nhiari mai ami ee!” Mere hota tun de niwra: ”A'g e uplin miy, me hya' noh miy?” 26 Noma hota mimpiahla lirni miwra: ”O e muplin niohora ami? Ami e mak kor O' pa ka'ana-kemun wutu, me tuna O' orgahamu ed maka kwatutu-kwaye' wali am lia loi-talan mak klola a let mamni ralamni, noma O' edonna Mhua'wa nan ami?!” 27 Mere hota tun de nakot owa'ana niwra: ”A'g e uplin miy di de me miy e mpiatiawu hya' noha-hya' rai? Rhokar doin miy lia handi, miy maka khi'a yatyatni-halalli!” 28 Ne hota la'pa mimkek tutga Abraham nora Isak me Yakop me la' walia makwohorulu-ktatrulu re honona ramuki-rahepur la'a Uplerlawna geni miaka Ntorna-nrautu emeka Ray. Mere miy die mpiolpuol inmi-mpiakwak ammi onnila rnaklia miy lia Uplerlawna geni de walli tio'ora! 29 Hota riy mak edon kwatiawu Israel mere rwatiawua tipru, warta, ra'i, tranna hota rmai pia ramuki-rahepru la'a ya'anlawna-yemunlawna la gen miaka Uplerlawna Ntorna-nraut de! 30 Plol meman la, hota riy maka ktawli'iru la rira yamkekni rmai die rwal tiargho'ola mak kala' ulu me mak kala' ulu rwal tiargho'ola riy mak ktawli'iru.”
Yesus ralamni nmolu-nhelam doin la'a Namkeka Yerusalem
31 La' ler de mana riy Parisi wo'ira rmai pia rakot la Yesus riwra: ”Mpuaran pa Mlia'awa la'a gen dom to'a, yoma Herodes e niwra nwen O'a.” 32 Noma Yesus Nakot la re Niwra: ”Mlia' pa mikot la Herodes mak kputra-kpalka klili-kdiori de, miwra hota A'g edon umta'ata e'a, mere la' ler dina me repar de hota Agiwra ghokar doinia yatni-rha'ani me Aghi' kalwieda ma'ta mak kamehra-kamau ne hota la lera wotellu de hota A'uhorga A knia'ru. 33 La' emkameni ho'mana hota Agodia lia'ru pa Akari la ler di, ne repar de nodi liarni pa repra owa'an pa walli owa'ana. Nhorwua nanpena Alia' Yerusalem. La' ler de na'nama ratuinia A arnu (mati) la Yerusalem. Yoma riwra rwenna makwohorulu-ktatrulu ida, de nhi'inde ratuin nieka la'a Yerusalema letni ralamni, edonna la'a Yerusalem to'orni. 34 Neee! Makden Yerusalem miy ee! Miy er mak kwunu-kwenna makwohorulu-ktatrulu re me mpiatliewur wenna riy maka Uplerlawna Nhopna rtiy miy die. Makden Yerusalem miy ee! A'g e uhak memna olek la re'eni wo'ir meman pa Agiwra ghi' miy pia emeknekama hiwi tei mak kreka-krek a'nani la liwarni nayanni mere mihmena mitlin la A polpuo'lu! 35 La' hade pede mitlino! Hota Uplerlawna Nolin limni la miy letmi. Pena miatgo, la' ler di pa ntutu-nte'ela ler mak Amuai owa'ana, de hota miy edon mimkek eti A'u. La' A maimia'yu lerni de nampena miwra: ”Makodia Orgahi-Orha'a nanni Nmai wiee! Mai pia ta'uli-tawedi, tlilili-tmamuawua!”’’
Yesus Nhi' kalwieda mak kanieni ida la'a Sabat lerni maka Yahudi edon rkar lia
1 La'a Sabat lerni noma Yesus la' Na'an la'a riy Parisi makhi' o'ta-mata ida romni. La'pa Yesus Nler la rom de nayanni de o'ta-mata Yahudi ramkek rer lia Yesus. 2 La' Yesus gaini ralamni riy ida limni-lakni rpetan wenna. 3 Noma Yesus Natiana makwatutu-kwaye'a agama rora riy Parisi mak kden la hande niwra: ”Emkameni la it agamni deullu-tatarni? Nhi'inde la'a Sabat lerni de ita tsi' kalwied wal lia riy maka kamehra-kamau me edonna?” 4 Mere makwatutu-kwaye'a re rora riy Parisi re mtulu-mtie'ela. Dewade Yesus Nran limni la riy de wawannu ne Nhi' kalwieda la nnienni-nhienni de, na'nama Nhopan pa nla'awa. 5 La'pa nhorwua noma Yesus Nakot la riy mak kden hande niwra: ”Agal teka yawalliohor di tiy miy. La'pa miy a'nami ida onde miy pipmi-dummi ida ntuin tar lia gera tnipu id ralamni la'a Sabat lerni de hota milgota toh!” 6 Mere la' riy id mana edon nakot hadomdom pa nwahla Yesus yatianni de.
Yana mrian atulu inon wamuehemi
7 Noma Yesus Nkillia riy maka ha rpol niana la'a ya'anlawna-yemunlawan de pa Namkek nana rwaliria gen miaka kden la gaini. La' hade pede Yesus Nwatutga ir honona, 8 Niwra: ”La'pa rpolu-rwak miy pia mlia'a mak kawok mehlima, de yana mtiota liwangeni-mtatangenia samomuounu nanpena mimtatan la. Yoma yanpa e rpol niana-rwak nan walia riy maka orkotkota-ornanana mak karehi wialia miy. 9 De hota nhi'nande ora kniari maka kpol niana-kwak nana mimrio' de hota nleretniekla nma nakot la o'a niwra: ”Yan muwenna yoma gen miaka ha mumtatan la de matromni ed olek la wa.” Pa narieiniande hota ommuola-mmua' nohora mpuatitin genmu la rira to'orni la' kokio'oni delloo! 10 Mere samomuounu de, la'pa riy rpolu-rwak nan miy de mlia' mimtatan la kokio'oni totpena pen neka orroma nma nakot tiy o niwra: ”Harya, mmuai mpuatitin la'a gen miakden la gaini.” La' hade nanpena riy honona rta'wa rer miatni la miy yoma rma rwak pa mlia mimtatan la gaigaini. 11 Yoma la' he' to'a maka kran inonni pa katulu, de hota Uplerlawna Nalerun la yawa. Mere la'pa riy maka kalernia inon wamueheni de hota nawniatniara.”
Miatu mira'a-mipalga la riy maka taken niana rwoili-rwahla nhiolmi-lietmi mak samomuou
12 Noma Yesus Nakot la orroma Niwra: ”La'pa ompuolu-mpuak nana riy totpena rma ra'ana melmela onde lelera, de yana mpuolu-mpuaka tupualmu-lawalmu onde inmu-narmu onde rom heiwialmu mak kre'a-ktaru, yanhi'pa hota ir mana rpolu-rwak walia o'a, pa hota la' hade de, o' ed maka klernan wniahlani. 13 Mere la'pa miwra mhi'a ya'ana-yemnu la'a mutliawna, de mpuolu-mpuaka riy maka kakleha-kaplara, maka limni-lakni kalmati, mak ktu'u-kwaini me riy maka matni edon kamkeka. 14 Ne hota omliernan pripanni-fa'anni. Yoma riy maka ompuolu-mpuak pa ka'ana-kemnia oleka re taken niana rwoili-rwahla o nhiolmu-lietmu re. Mere hota o kalwiedmu de Uplerlawna-Mempulwatnu orgahani ed maka kwahla hare honona la'a lerni maka riy mak kaplola la Uplerlawna yamkekni rmori owa'ana.”
Uplerlawna Npol niana rimormiori rmai pia ror E' la geni ida mere riy dom rwayotlia E wakwakni
15 La'pa riy mak ka'an rereri ida natlin reria Yesus Nakot emkare, noma nakot la Yesus niwra: ”La'pa hameni ed maka hota kor rewre'wa Uplerlawna pa ra'an wutu la' Uplerlawna geni maka Entorna-nrautu, de hota ha nlernana unut lawna!” 16 Mere Yesus Nnairia yawalliohor id pa Nwahla riy de Niwra: ”La lera ida, de riy ida nhi'a ya'ana-yemnu lawna pa npolu-nwak rira riwnu-halli pa rma ra'ana-remnu. 17 La'pa nte'ela lerni-melli pa riwra ra'an wa de hota ora kniar die nhopan pa mak ktulla kniari nla npolg awoka mak ha rpol niana-rwak nana re pa rma ra'an wa yoma wra'u rahnioi olekwa. 18 Mere hota mak ha rpolu-rwaka re honona nekpa riwra ora kniari yan nawenna. Riy id niwra na'nama ira rawel niana tani anna oke'a pa e rla rhi' nohora, pa yan miwenna me hota ami edonna mtiy. 19 Ne dom pal die riwra: ”Hota ami edonna mtiy yoma na'nama ami e mawel niana hayori termida pa ami e miwra mamkeka pa mta' tieka.” 20 Ne la' dom pal die riwra: ”Yana miwenna hota ami edonna mtiy lia ler di yoma ami e mhi' nohora a mehli'mu.” 21 Noma mak kla kpol die nla' pa nakot la tunni, la'a lir maka ha rakotkota re. Ora kniar die nawenan doin la, ne nhopan pa mak kar lia de plet pa nla npolu la' riy meni to' maka kwehwet lia loi liawna-talan lawna, me talla mak kden la rom lawna rletni-rletni la'a let lawan de totpena mak kakleha-kaplara re honona re rmai rewre'wa wut lia maka limni-lakni kalmati, me mak ktu'u-kwaini, mak edonna kamkeka re pa ra'ana-remunia handi. 22 Nla npolga pa honona rmai wia, noma nla nakot la tunni de niwra: ”Tuna, maka a lia puolu re honona e ramtatn oleka wa, mere geni e rahgali liawanni ma'ta.” 23 Noma tunni de niwra: ”Mlia' pa mliola loi liawna-talan lawna, me mliol wal lia loi-talla kuke'a re la'a leta to'orni, pa mlioh momuoga uhunu-ewatni ne mtieka kuku'uni-lalawanni re rma rapenga a ro'mu di. 24 Ne mhuoratreria, riy maka ha rpol ulga re id mana hota edonna nma natniapal la mai handi pa nora ra'an rewre'wa la' mei di wawannu.”
La'pa mihmena mhioratdoin hare honona pa mliernohora Yesus, de takenia mimlier teman la maka klernohor E'a
25 Rira liawanni ror Yesus rala' wutu. Noma Yesus Nkillia pa Nakot la re Niwra: 26 ”La'pa riy riwra rlernohora A'u, mere rhoratreria inni-amni, hawni-a'nani, inni-narni, onde la'pa inon wamueheni pa nareh dioini A'u, ho'mana hota taken niana rma tieman mai A'u. 27 Riy mak edonna kre'ela pa kor wut A' pua nler la yamuki-yama'ala onde matmiati pa emolmolan nekama nhoi wawayanni la auwlakra pa nlernohor A'u, de hota edonna nler teman la mak klernohor reri A'u. 28 La'pa riy id tiy miy niwra nariria roma tutul liawna ida de nhi'inde nhor (nrekan) ulga e kupanni mak hota ha nalgota pa na naweli-nala'a hare honona, totpena nat niohor oleka hota kupna ntu'tu pa nhi'a kniar die me edonna. 29 Yoma hota kupna edon ntu'tu pa nariria rom tutulu, mere rom tutul die watu liar pianullu rkari oleka wa, de hota riy ramkek la de ramalia. 30 Hota riy riwra: ”Mkil tio'ola hade, niwra nariri likti mere takeni nhi' nana.” 31 La'pa ray ida kekni-rautnu riy riwnu termida ne niwra nora ray miaka kekni-rautnu riwnu terampworu ra'ara, de pa'etnu pa ray die nwarekna rurni-laini maka hota nnairia la ar ralma de hota naruri-nalai pia nal arwalli la' yawa me edonna? 32 La'pa natga de hota nakleh ruri, de hota nala' ul pua nhopna rla rakot la arwalli de pa rkalwied nek wa. 33 Ne hota emkade wal tiy miy, mimpiaror pleini miy rurmi-laimi. Yoma ta'en niana riy id tiy miy nlernohora A'u, la'pa nhoratreria inni-amni, hawni-a'nani, inni-narni la'pa inon wamueheni nora hare honona maka ralamni nod rer lia de. Mere mhioratdoin hare honona totpena mliernohor A'u.”
Riy maka edon nhoratdoin momuou pa rlernohora Yesus de emeknekama kio' maka edonna kmahana
34 ”Kio'a de plola pa samoga, mere la'pa edonna nmahana, de ta'en niana ra'itr owa'ana ha mahanni toh?! 35 Hota nakleha perkun wa. Yoma nakleh perkun la'a nhyi'a, me rhi'a la tan mi'na pa ra rapoti-rakadwua yawuli-yatniamni ho'mana taken nian wa. La' hade pa rhoplial neka wa. La'pa miy tlinmi erla, de mitlin reri!”
Uplerlawna Nahepur nohora riy mak khoitio'or doin do'oni-halli pa emekneka dum mak kmolu mere rlernan owa'ana
1 La' lera ida ne, mak kawoka blastena rirahu me maka ha riwra mak khi' do'a-kyap hiala rmai momuou pua ratlina Yesus Nwatutu-nwaye'a. 2 Noma riy Parisi rora tungkurga agama re kunkunu-kekehena pa riwra: ”Ah! Riy de Nreinian neka riy yatyata-halala, ne Nor wut walia re pa ra'ana-remun wutu!” 3 La' hade pede Yesus Nakot nohora yawalliohor dilla ira: 4 ”Yawalliohor id di tiy miy wia. La' riy id tiy miy de hanni pipdiuma rahu ida. Noma plin-plinnianama ida nmolu me. De hota riy de nhi' emkameni? Nahmenmen nana, nteman targa pipdiumni terampwosiewa wehrani wosiewa re rwahak pa ra'an la wewan mou wawannu, ne nla nahak memna dum memeh mak kmol die pa nlernana. 5 Ne la'pa nlernana, de hota nahepur nohora pa nmai die nakwar nana. 6 Nmai na'nama npolga mutwualli re rora rom heiwialli re pa nakot la re: ”A'g e uhepur nohora pipdiuma maka aliernan olek di, mai pia tamuki-tahepur nohora.” 7 Mimpiesiayo, emkade walia Uplerlawna Nora hopopanni-lili'irnu la'a Ilyamou-Watyatoha hota ramuki-rahepru nohora riy ida, yoma riy de nhoitio'or doin oleka la'a do'oni-halli. Uplerlawna yaheparnu onnila riy de, nareh dioinia yaheparnu la riy terampwosiewa wehrani wosiew mak edon rhoitio'or doini-rtahnei dioini do'oni-halli yoma rden olek la plol wawna.”
Uplerlawna Nahepur nohora riy maka khoitio'or doin do'oni-halli pa emeknekama kupna mak kmolu mere rlernan owa'ana
8 ”Yawalliohora id owa'ana la patke'a ida nhi' targa kupna-kai la' lera termida gahani, noma lera ida kupna id nmolu. Noma hota pat de nhi' emkameni? Hota ntutin wa'du ne nhera-nhapua romni nayanni na'nama nwahak la'a-maiya kupan de totpena nlernan memna. 9 Pa la'pa nlernana kupan de, de hota npolga la mutwualli rora rom heiwialli re pa nakot la re: ”A'g e uhepur nohora a kupnu maka aliernan olek di, mai pia tamuki-tahepur nohora.” 10 Hota emkade wal lia Uplerlawna Nora hopopanni-lili'irnu ramuki-rahepur nohora riy yatyata-halal ida nhoitio'or doini do'oni-halli. Mpiesiaya lir di!”
Uplerlawna Nahepur nohora riy mak khoitio'or doin do'oni-halli pa emeknekama ama ida nahepur nohora a'nani
11 Yesus Nakot owa'an lirni Niwra: ”Muanke'a ida a'nani muanke'a woru. 12 Noma gari nakot la amni niwra: ”Tuna, mhuakar pa muala it re'eni-tniarnu re dom mai a'u.” Noma amni nhakra re'eni-tniarnu re la'a a'nani rora. 13 Edon nalo'on wali ne a'nani gari nal doin momuoga nhiakarni pa nla nhopla-nlar la olietlet wa. Nla'awa pa nkalge'era kupna-kaini re la'a patke' yata me la'a hihi'a-yapyapi yatyata-halala dom pali. 14 La'pa nhor momuou dewade nhortiut niana rehka-lar lawna nwewar wal lia noha wawannu pa narieiniande naniki-nalai wia. 15 Pede nla' nwak pa nkar lia'a riy ornoh ida. Noma ornoh de nhopan pa la nwa'an waw lia'a nhyi'-tlunni ralamni. 16 La'pa naplar rehia, noma niwra na'an meman wawi re yamananni, mere riy edon rala hadomdom pa na'ana-nemnu. 17 La'awa hohoni dewade nhioratni nla'awa temni pa niwra: ”Eh! La' a ro'mu de rirahu e rkar lia a a'mu onni, me e rtikil wutu-rhal wutga ya'ana-yemnu la' lelera-melmela, ne hya' ed mak khi'a a' pua trema-trema amuat lia lara?! 18 A'uwal niek la a a'mu onni wa. Ne pena awuaka lilili-mamuau lia e'a. Yoma aghal olek la Uplerlawna Nora a'mu e'a. 19 Yana npol a lia a'nani, mere nhi' a lia mak kar lia e'a.” Nwaror emkade pa nhorwua 20 noma nadil doin la pa nawal lia amni de. Mere la'pa oliet ma'ta de, amni namkek nan oleka wa. Amni ralamni nmolu-nhelam nohora pa nawlar pia nwatroma na'nama nkolla pa nkinnia. 21 Noma nakot la amni niwra: ”Ama, aghi' oleka do'a-hal la omuora Uplerlawna. Yana mpuol a lia o a'namu.” 22 Mere amni edonna natlin la a'nani de lirni ne npol lia mak ktulla-kar lia hande pa niwra: ”Pleta! Mlia mtie'la nana pola-rainia samomuou pa miodi mmiai totpena ha nnairia. Miohu kdieli la okarni me mhioin lakni wniowni. 23 Nhor nianpena mlia mriotna hayori a'na maka inonni kapetpetan de totpena ita'ana-temun nohora ha maimiaini de, ne tamuki-tahepru. 24 Yoma a a'nu di de emeknekama ha nmati olekwa mere nmori owa'an, me riwra ha nmolg olekwa mere tlernan owa'ana!” Dewade honona re rlernohora E lirni pa ramuki-rahepur nohora. 25 La'pa ertepartarlia yamuki-yahepru, mere kakni ed hala la'a nhyi' ralma. La'pa kakni de nmai wia ne natlin de tiwla-prai yetni-warna me nhieka lelana nmori. 26 Pede npolga mak ktulla-kari re id pa natiana niwra: ”E rhi'a hya'a la' roma nayanni?” 27 Noma mak ha natian de nwalolla niwra: ”Tuna garni e nawali olekwa! Ne tuna amni nhopan pa rwen oleka hayori a'na pepetan lawna id pa ra'ana yoma tuna garni de nawali owa'an pa nmai die nkalwiedweda!” 28 Dewade kakni nawenan pa naya'ala pa edonna nwakriania roma onni. Noma amni nleretniekla nla noh lili-noh mauga pa nodia la rialma. 29 Mere nakot la amni niwra: ”La' anni-anin de a'g e ukdieha-uktiahli nohora kniari emekto'ama hopopna-lili'iru ga umkek to' ama! Ne a'g edonna ugai pietan tar tiy o' ama. Ne yawar pa omhi' emkade mai a'u? La'pa pipi a'na ku' id mana o edonna muala pa agora a tupwa'lu-lawa'lu re mahepur nohora ya'anni-yemannu. 30 Mere a'namu de nkalgar doinia kupanmu-kaimu la'a patke' yatyata, ne la'pa nmai wia noma muakokan nohora wnienna hayori a'na pepetan lawan de pa mhi' nohora!” 31 Noma amni nakot la niwra: ”Amee! Hyalmu hade ee! Kakni o' de nhi'inde omdien rer lia a o'nu, ne hya' maka a gah'u de o gahamu hare ee! 32 Mere mai pia tahepuepur nohora garmu yoma emekneka riy mati oleka hade wa, mere ne! E nmormiori, me emek mak kmolg olekwa mere ee! E nawali owa'an pa nma nora ita twatrom owa'ana!”’’
Itnairia it kupanni-kaini re'eni-tniarnu pa todi Uplerlawna kniarni la'a ga'a
1 Noma Yesus Nnairia yawalliohora pa Nakot la maka ha Nwatutu-nwaye'a re Niwra: ”La' mak kre'a-ktaru ida nnairia riy id pa nhima-nre'a la'a e re'eni-tniarnu. Noma mak ktar die nlernana nur lia rira de riwra: ”Eh, Mak khima-kre' de para'a la kupna-kai.” 2 Pede npolga mak kar die pa nakot la niwra: ”A'g utlina o' de maka para'a kupna-kai id o'a. La' dodo'ondi de mual momuou tieka puk otna-ara re pa a'umkek teka! Hota dodo'ondi de ompuair wa la'a o kniarmu la'a a re'u-tnia'ru re.” 3 Dewade mak kar lia kupna genni de nla'awa, noma wniarorni naplahwa pa niwra: ”Hota dodo'ondi de aghi'a hya'o? Hota la dodo'ondi de a tu'nu de nwaliernia a lia knia'ru. La'pa wnial tiani mana a'ukleh oleka rur wia. La'pa aghi'a mak kmeh'a kawakwaka ho'mana amuola-mua'a. 4 Aniair teka akal ida totpa la'pa rwalernia a lia a knia'ru, de hota rirahu edonna rwayotlia a lia'a ir romni nayanni.” 5 Noma mak kar lia kupna genni de npolga riy honona maka khi' otna-ar la'a e tunni de. Noma nakot la riy mak kala' ulu niwra: ”O otanmu wo'ir la'a a tu'nu?” 6 Noma riy de nwalolla niwra: ”A otnu wu'ru nora kuhi rahu ida.” Noma mak kar die nakot la maka otan de niwra: ”Muala pukmu di pa ple'etu pa mumtatnu pa mhuorat la pukmu de otanmu de wu'ru nora kuhi terampwolima.” 7 Nhor nioma natian owa'an riy id owa'an niwra: ”Ne hota o' de otanmu wo'ir la a tu'nu?” Noma riy de nwalolla niwra: ”A ha'nu de metma wetra' lawna kadu riwnu ida.” Noma mak kar lia kupna genni de nakot la niwra: ”Muala pukmu di pa mhuorta otanmu de wetra' lawna kadu rahu wo'awa.” 8 (Dewade nhi' emkade owa'an la wotellu-wogatni). Noma mak kre'a-ktar die na'uli-nawedia mak khima-kre'a e re'eni-tniarnu mak knair pudi-akal de yoma la'a e wniarorni mak emkade pede nlernana rira ralam kalwiedni pa hota rtulan la e'a.” Noma Yesus Nakot owa'an lirni la mak katlina re niwra: ”Agala yawalliohor di tiy miy, yoma rimormiori mak edon kpesiaya natu nahak talan pa nlernan untu la ir rimormior wialli pa narehelia rimormior miaka kmori-kdar lia' lelerni. 9 Pa hota mitlina! Hota miy miana mniairi nohkeran di re'eni-tniarnu pa mtiulan la rimormior wialmi pa ma mpiahaka totpa riy rahu rtelan nana-raut nan miy, totpa la'pa nohkeran di re'eni-tniarnu nhorwua ne mmiati olek wa, de hota ral ralamni tetema pa rreiniana-ra'nan miy lia Ilyamou-Watyatoha.”
Riy maka ha rpesiaya la'a nohkerna re'eni-tniarnu hota er maka Uplerlawna ha Npesiaya la re'a-tniaru Ilyamou-Watyatoha
10 ”Mhioratreria! Riy maka ha rpesiay oleka la ha kuku' id to'a, de hota rpesiay wialia la ha lalawna. Mere la'pa riy maka edonna rpesiaya la ha kuku' ida, de hota edonna rpesiay wiali la ha lalawna. 11 La'pa ta'en nian rpesiay miy lia re'a-tniar nohkerna wawannu de ta'eni rpesiay wiali miy lia re'a-tniaru la'a Ilyamou-Watyatoha. 12 La'pa ta'en niana rpesiay miy lia'a yohya'a maka riy dom to' gahani de, de hota he' gaga'anu pa nala miy yohya' gah wamuehemi rena?! 13 Nhi'inde riy ida ta'en niana natlin la matromni riy woru. Yoma hota natlin samomuou lia ida ne la handina de edonna natlin kalwiedwed la. Emkade walia la miy. Hota ta'en niana mimpiaror to' neka re'a-tniar nohkerna gahani me mial walia ihrami tetema pa mhima-mrie'a Uplerlawna kniarni.” 14 Riy Parisi re ratlina momuoga lira-tun muaka Yesus ha nakota re. Noma ramalia Yesus yoma ralamni re rod rer lia kupna-kai. 15 Mere Yesus Nakot la re Niwra: ”Miy di de mtiut inonmi la riy yamkekni pa emeknekama riy plollol miy. Mere la'a Uplerlawna matni de Enamkek eti-lahwa miy pa Nat niohora ihrami ralamni yatyatni re mak kod rer niek la kupna. Ne la'a hya' maka rimormior nhi'inde rahakhaka de hota ha yatyat hade la Uplerlawna matni yamkekni.”
Uplerlawna deullu-tatarni ndella pa nodi liarni
16 ”Deulu-tatra maka Musa ha nala me wniatutu-wniaye'a makwohorulu-ktatrulu de e rwatutu la la'pa ntutu-nte'ewa la Yohansi makharani lerni. Nwaga (mulaliaini) la' Yohansi lerni de Kot Kalwieda-Paitiota mak rakot nohora Uplerlawna hota Ntorna-nraut de emekwalima Ray ida nwewar la noha pa nodi liarni. Ne rirahu rwaleran totpa rler wut lia Uplerlawna mutnu-rahanu. 17 Mere emkade ho'mana Uplerlawna deullu-tatarni ndella pa nodia liarni. La'pa nohkerna nora lyanti rmadger de me hota lera edonna npahna nana, mere hurpu nora titikni id mana maka Uplerlawna Nhorat targa la deullu-tatarni hota edon rwun dioin meman wa. 18 La'pa he' ed maka kpera-kdaitia deulu-tatra pa nhopliala hawni patke'a ne nla nora patke'a id owa'an rmehlima, de emeknekama nalira-naliai lia Uplerlawna yamkekni. Ne la' walia riy maka kmehlimpa kora patke'a maka kpaletan nohora muanke'eni de nhi' wali yalira-yaliai lia Uplerlawna yamkekni.”
Riy mak ktaru mak edon klernohora Uplerlawna nora mak kakleha-kaplara id mak klernohora Uplerlawna
19 Noma Yesus Nnairia yawalliohora id owa'an pa Niwra: ”La'a makre'a-maktaru ida, de nnairia hewewta-naniairia mak welli werwerta. Enre'a-ntar pua na'an lawna-nemun lawna la'pa nmor niohora yohya' hya' to'a mak samomuou honona la lera-lera. 20 La'a romni nhiarni gaini, de rwatat tiarga riy mak kakleha-kaplara ida, de nanni Lasarus. La' inonni tetema de penpuen lia keri-ga'ara. 21 Lasarus nakleha-naplar meman pa nwakwak meman pa na'ana yamanan lu'wu mak kuru-karga la mak ktar die meini nayanni. Ne edon emkade to'a mere ahu-ahu re mana lera-ler nekpa rma rrama Lasarus kerni-ga'arni mak kalui-kawdia'i de! 22 Noma edonna nalo'on wali ne mak kakleha-kaplar de nmat wia, pa Uplerlawna hopopanni rma ra'ala, pa rodia la gen samomuou mak kden la Abrahama onni, la'a Ilyamou-Watyatoha. Ne riy mak kre'a-ktar die mana nmat wiali noma rtamnia. 23 Pede nhiwni pepe'etu-papatla la ai mormiori ralamni (naraka) pa polpuol inni-wakwak amni. Ne la'pa namkek nan tutga Abrahama la' heyanan delloo, de matni nki'ir nan walia Lasarus e nor rewre'wa Abrahama la' hande. 24 Noma nhaun la niwra: ”Am Abraham ee! Mtiulla-msiayn nan a'g ee! Mukot la Lasarus pa nto' okarni la gera pa nodi nmai pia na nawe'er nan to'a a na'mu tutnu. Yoma a ta'eni tiahan nana ai di pahnani oo!” 25 Mere Abrahama nakot la niwra: ”Amee! Takot pa! Mhioratreria, la'pa omdien ma'ta la nohkerna wawannu de omtieman nana mak samomuou honona mere Lasarus di de nakwara kleha-lara, mehra-mau, lui-nuhru. Mere ama, mkil tio'ola la' dodo'ondi, de Lasarus ralamni namtiertiernu yoma hota edon nlernan owa'ana mehra-mau lului-nurnuhru. Ne o' de mu'uhi-muklel la genmu la' hande. 26 La' walia la' omuor am die de e rhi' targ oleka hu'ul matmiat liawna ida maka ta'en nian itlola. Pede miy edon mmiai, me am miana edonna mtiy miy die wa.” 27 Noma mak ktar die nakot la niwra: ”Emkade de, ama, awuak lilili-mamuau tiy o'a totpena mtiulan pa mhuopna Lasarus nla a a'mu la roma nayanni. 28 Yoma tre' ma'ta a hya'lu riy wolima. Mhuopan pa Lasarus nla nwagahniorta re pa yan rlernohora a nhio'lu-lie'tu pa rma rlernan walia gen miaka ai mormiori pahnani. Gen di de ta'en niana it tahan nana.” 29 Noma Abrahama nakot la niwra: ”Ama, mak kwarini re rtorreri oleka Musa pukni, me makwohorulu-ktatrulu pukni walia. Ndella pa rlernohor neka puka re lirni.” 30 Mere riy mak kre'a-ktar die nwaklir la Abrahama niwra: ”Hota hade edonna ntu'tu ma'ta am ee! Mere la'pa riy mak kmati ida nmori owa'an pa nodia lir la ira de hota rpesiaya rpa rhoitio'or doinia do'oni-halli re honona.” 31 Noma Abrahama nakot la niwra: ”La'pa ir edonna ratlin la Musa deullu-tatarni lira nnio'oni-wawa niatnu, me makwohorulu-ktatrulu re lirni-tunnu, de hota la'pa riy ida nmori owa'an la matmiati ralamni pa nma nodia kot la ira, de hota ir mana edonna rpesiay wial lia.”’’
Yan memmemna mriei pia riy rler la do'a-hala ralamni
1 Noma Yesus Nakot la maka ha Nwatutu-nwaye'a re Niwra: ”Totota-wudwiudi, yapi'u-yaga'u mak kodi riy lia do'a-hala ralamni er olekwa. Mere he' mak knairia hare pa ktota riy lia do'a-hala ralamni, riy de ed maka kler la yatyatni-halalli yatlorni-yatra'ani. 2 Samomuounu de rkohg wutga watu werwerta id la e tiernu totpa ntepar wenna la hletan lawna! Yoma hota nmormior die pa narieiniande makpesiay id to' pa nler la do'a-hala ralamni hota nler la Uplerlawna niukum lawanni. 3 La' hade pede nhiorta la' temmi! La'pa inmi-narmi e rhi'a do'a-hala, de mpiolliohora. La'pa rhoitio'or doin do'oni-halli de, de hota miy edonna mtio'on reria. 4 Ne la'pa la' lera id ho'mana, riy ida e nhi' nan do'a-hala re'eni wo'itu tiy miy, de hota mhiur niohora pa mhioratdoinia e do'oni-halli re, yoma e nmaimiai rer pia nwak lilili-mamuau (maaf) tiy miy.”
La' pesiay
5 Noma riy maka Yesus Nhopan pa rodia Uplerlawna lirni-tunnu re rakot la Yesus riwra: ”Matroma, Mhi' aruria a pesiay mamni.” 6 Noma Itmatromni Nakot la re Niwra: ”La'pa miy pesiaymi inponni emeknekama sasawi ola ida de hota mhiopan pa nu'nu on lawna ida mak kdella keranni de pa la nawniau lia tah'i lawna, de hota nlernohora.”
Lira yawalliohora la'a mak khima-kre'a Uplerlawna kniarni de, nhiolli-lietni
7 Yesus lirni: ”La'pa miy die mhiopna hopopanmi pa nwal tian lia nhyi' ralma onde nhi' makodi nhiuri-wnia'ana. La'pa ntulla-nkar pia nawal wia, de hota mikot hya' lir la mak ktulla-kar dieno? Hota miy edonna miwra: ”Plet pa ma mu'una.” 8 Mere hota miwra: ”Ple'etu pa mlia' mpipara, dewade mupola-murainia kalwiedwe'du pa mua mhuoi wra'u pa a'una, pa nhor nianpena mu'una.” 9 Hopopan de edonna nlernana ya'uli yoma natu nhu'ru-nhelam, natlina-natailla tunni de! 10 Emkade wali miora Uplerlawna. La' mimliernohora hare honona maka Uplerlawna Nhopan pa mhi'a, de mikot neka miwra: ”Am di de hopopna-lili'iru to' ami pa amlernohora hya' maka ha rhopan pa amkari.”’’
Yesus Nhi' kalwieda riy termid la nnienni
11 La'a yala'a plahwani pa nokria Yerusalem de Yesus Nlola Samaria nora Galilea mneheni. 12 La'pa rler la leta id wa dewade riy maka kanienia ulityata-temyata riy termida rmai die rtutrier lia olietlet 13 na'nama rhaun pa riwra: ”Yesus Matrom ee! Mtiulla-msiayn nan ami ee!” 14 La'pa Yesus Namkek nana re noma Nakot la re Niwra: ”Mlia' imam-imam re pa mpiak pa ramkek teka inonmi rena (pa emeknekama Musa deullu-tatarni nakot la mak kmou olek la ulityata-temyata)!” Dewade honona re rla'awa. Rla' de, de nnieni-nhiena ulityata re ema rhai dioinia la inonni tetema. 15 La'pa riy id la'a riy termida re natga e nkalwied olekwa la'a nnienni, dewade nawali pia nhaunu pa na'uli-nawedia Uplerlawna, de nahepur nohora. 16 Ne nmai pia nwaltiora-nwaltieman la Yesus gaini ralamni na'nama na'uli-nawedia. Riy de Yahudi atia'a e'a mere mak kden Samaria ida de. 17 Noma Yesus Nakot la Niwra: ”Riy mak kalwieda re, riy termid miy! Ne riy wosiew erla meni? 18 Hya'a nrei pia eneknek to'ama dakan di nmeh'a nma nawali owa'an pa nma na'uli-nawedia Uplerlawna?!” 19 Noma Yesus Nakot la riy de Niwra: ”Muprir pia mlia'awa! Yoma ompuesiay olek A wua pa mkialwied wa.”
La'awa lerni la Uplerlawna Nmai pia Na'ala kniarni pa emeka mak ktorna-krautu
20 Lera ida ne riy Parisi doma ratiana Yesus riwra: ”Hota mowen nianpena Uplerlawna Nmai pia Na'ala kniarni pa emeka mak ktorna-krautu la nohkerna wawannu?” Noma Yesus Nwalolla Niwra: ”Uplerlawna Na'ala kniarni de edonna Nalharia pa rimormiori matni ramkek nana. 21 Ne hota riy raplin niohora rwahauria Uplerlawna lodanni-hairni etla handi onde la' hande. Yoma Uplerlawna tnioranni-riautnu pa emeka Ray, la dodo'ondi ed olek la' rira ihranu ralamni.” 22 La'pa nhorwua noma Yesus Nakot la maka ha Nwatutu-nwaye'a re Niwra: ”Hota la' pa nmai wia lerni pa mimpiahak toto' memna pa mior rewre'wa Rimormior A'na A' die la ler ho'ke'eni to'a, mere hota miy edonna mliernana A'u. 23 Ne hota riy riwra: ”Eee! Mimkeka la hande onde mimkeka la handi. Rimormiori A'na Nmai oleka dee!” Mere yan memmemna mliergot pa mihaka ha lolola! 24 Yoma hota Rimormiori A'na A maimia'yu, edon emkade. Mere emkameni la nwatlena la lyanti maka ni'it nana lairni la lyanti honi pa nla ntut lia honi de hota riy honona ramkek memna, de hota emkade wal lia Rimormiori A'na A maimia'yu la re'eni wornu. 25 Mere Uplerlawna Nror targ oleka pa A'ula' ul pua Alier nek la kropanni-krieutnu, nniahora-nniala'a, yamuki-yama'ala me hota riy la' tuwu di de hota rwayotli A'u plein nampena la la'pa ntutu-nte'ela lerni Amuai owa'ana. 26 La'pa Rimormiori A'na A' die maimia'yu, de hota la' ler de rimormiori yehwani emolmolan nekama it upni Nuh tuwnu la' ler ululu. 27 La' ler de riy edon rwaror nohora Uplerlawna niukamnu mere rtepartarlia ya'ana-yemnu me, rmehlima-rmarya'a. Emkade nekpa nodi liarni pa la'pa nte' meman la Nuh nler la aupual liawna (batra) ralamni, dewade ger wawuau liawna nma nwau dioinia rimormiori re honona. 28 Me hota emekwalima la'a Lota lerni wali. Ler de de riy rtepartarlia ya'ana-yemnu, ya'olu-yala'a, yanhyi'a-yatlunni, me rariria roma-lewu. 29 Mere la'pa Lota rlergot la let Sodom, de la' ler de nekpa ai liali nwatiawu lyanti pa nlomar dodioinia rira honona. 30 Hota emkade walia la'a ler maka Rimormiori A'na A' die maimia'yu pa riy ramkek meman A'u. La' ler de riy edon rwaror nohora A maimia'yu mak Agodia watghudi lokarni. 31 Hota la' ler de de yana miy ralammi nko'i nana nohkerna gahani. Miy maka kateni anni la likti wawannu, de yana mierun pa mlia mia'ala hyonmi-hyanmi la'a rommi nayanni. Emkade walia la'a miy mak kden la nhyi' ralma de yana miwali owa'an la roma nayanni. 32 Mhioratreria la'a wnieyata-wnianiawua maka Lota patke'eni ha nlernan oleka wa yoma ralamni nod rer lia la nohkerna gahani. 33 La'pa hameni maka kiwra ktorrer pitpitga nohkeran di hyonni-hyanni, wniarorni-wnialaini, hihi'ini-yapyapni hota edon nler la mormiori-dardiari plalahwa pa nodi liarni. Mere la'pa riy maka khoratdoin hare honona pa nlernohor reri A'u de hota nlernan mormiori-dardiari pa nodi liarni. 34 Mpiesiaya, la' ler maka Amuai owa'an de, la' mel de de riy woru ranin wut lia' lewu wawannu, de hota ralewna riy mak klernohor A'u mere mutwualli de edonna ralewan nana yoma edon npesiay A'u. 35 Ne la'pa patke'a worg ertepartarlia wetra' lawna wniotarni de hota mak klernohor A' die ralewna, mere rhoitio'or doin mutwualli mak edon klernohora A'u. 36Riy woru rkarkiar rier lia'a nhyi' ralma de hota ralewna ida me rhoitio'or doin mutwualli la .” 37 Noma maka Yesus ha Nwatutu-nwaye'a re ratiana Yesus riwra: ”Maimiaimu de hota ha nayamkek la' hanmeni?” Noma Yesus Nwahla: ”Hota emeknekama la'pa mak kmati-kmolu de raniewat la meni-meni, de riy rat niohora yoma ramkek nana iha lakma e ntapoi reria re, pa nahe' niohora ya'ana, de hota emkade walia la'pa Amuai owa'an de riy honona rat niohor memna.”
Yan itsoratdoin tsumbain reri yoma itpesiay meman de hota Uplerlawna Ntulan mai it wa
1 La'pa nhorwua noma Yesus Nwahaur nohora yawalliohora id la'a maka ha Nwatutu-nwaye'a re, totpena rsumbain rer lia Uplerlawna. Yana rwarora-rwalai die Uplerlawna edonna Natlin la ir polpuollu-wakwakni yoma E' edon Nal ma'ta hya' mak rwaka. 2 Yesus Nakot la re Niwra: ”La' leta ida, de mak ktoran reria watghudi ida mak edonna kamta'ata Uplerlawna me edonna nwadana rimormior wialli. 3 La' hande mana patyata ida maka lera-ler nekpa nla nwak la mak ktoran watghudi die totpena nod nian e la'a lirni-tunnu. Nakot la mak ktoran watghudi niwra: ”Mtiulan mai a'u, yanpa a eria'yu na'ala a hyo'nu-hya'nu.” 4 Mere mak ktoran watghudi die nahmena nreiniana pat de wakwakni. Mere la'awa hohoni noma mak ktoran watghudi nwarora de niwra: ”A'g edonna umta'ata Uplerlawna, me riy id mana a'g edonna wuadana, 5 mere lera-ler nekpa patyat di emeka nmai pia nariei mamainia a'u. Pa emkadella pa aliernohora, yoma hota a'uhmena mere lera-ler nekpa nma nhi' a ralmu pa wolwo'la.”’’ 6 Noma Itmatromni Nakot la re Niwra: ”Mitlina samomuoga mak ktoran watghudi mak edon neti rira lirni-tunnu la talan plollola, lirni enakota hya'a? 7 Nah hota yanpa mimpiarora de Uplerlawna hota edonna Nod niana E upni-a'nani maka Ha Nwalir niana de lirni-tunnu, maka lera-ler nekpa rpolpuolu-rwakwak mamainia la E'a? E' edon Ntot pa Nahe' niohora ma'ta re. Plol toto'a Entulan la' ira! 8 Mpiesiaya, hota nleretniekla Nod niana re. Mere la'pa Rimormiori A'na A' die muai owa'an de, de hota emkameni? Hota la' ler de de Awuatrom nana riy mak kha'ar rer aranni mai A'u me edonna?”
Riy maka kalernia inonni la Uplerlawna gaini ralamni er maka Enreiniana-na'nana
9 Yesus Nakot nohor walia yawalliohora dilla la rira. Maka Ha Nakot nohora de lirni nwau lia'a riy maka kalernia rimormior wialli, mere orgahi rwarora de la' ir inon wamueheni de e raplol la Uplerlawna yamkekni. 10 Yesus Niwra: ”La' ler ida ne riy woru rla rsumbain la Uplerlawna roma kreini. La' riy id de riy Parisi me la' id de riy maka nhi'inde kawoka blastena. 11 La' noma riy Parisi die ntutrier pia nsumbain nohora inon wamueheni. Nsumbain pa niwra: ”Uplerlawnu ne! A'u'uli-uwedi O'a, yoma a' di de ematia'a riy dom maka kamnelu-kamna'a, mak khi' do'a-kyap hiala onde mak kalira-kaliai. A'u'uli-uwedi O'a yoma a'g edonna emeknekama riy mak kawoka blasten di. 12 A di de utahan nana lar la re'eni wor lia' krei id ralamni, ne agal walia a liwtu-odwu kupanni tiy O'a, de agal nhiakra id la nhiakarni termida (sepersepuluh).” 13 Mere mak kawoka blasten de ntutrier tio'ola olieta ne taken nian pa nwatniar meman la lyanti. Ne nho'a-nhaiya ihranu pa niwra: ”Uplerlawnu nee! Mtiulla-msiayni a'u. A' di de riy mak khi' do'a-hala id a' di!”’’ 14 Yesus Nakot la mak katlin reri re Niwra: ”Mpiesiayo, riy maka kawoka blasten de ed maka Uplerlawna Nreiniana emeka riy mak kaplol la E yamkekni mere riy Parisi die edonna. Yoma la' riy maka kapo'ona-kalawna inonni, de hota Nalernia la yawa me la'pa riy maka kalernia inonni de hota Nrana la tutullu.”
Uplerlawna Nreiniana riy maka pesiayni emeknekama keke'enku'a pesiayni
15 Doma rmai die rodia upni-a'nani la Yesus totpena Nran limni pa na Nhilpai-nmanatga re. La'pa maka ha Nwatutu-nwaye'a re ramkeka re noma rawenan la re. 16 Mere Yesus Nawoka-nale'ga keke'enku'a re na'nama Nakot la maka ha Nwatutu-nwaye'a mak kden hande Niwra: ”Miolin doinia keke'enku'a re pa rmai A die. Yana mpiayotlia re, yoma riy mak edon katulu-kapetna inonni mere plet pa rpesiay pia emeknekama keke'enku'a re er maka Uplerlawna Nwaliria pa rler teman la riy mak kmormior lia E tnioranni-riautnu ralamni. 17 Mhioratreria, riy maka edonna kpesiay Uplerlawna pa emeknekama keke'enku'a rpesiay, de hota edonna rler wut lia Uplerlawna mutnu-rahanu.”
Riy maka kre'a-ktaru re olieta-patou meman pa rler wut lia Uplerlawna mutnu-rahanu
18 Riy id la makla' o'ta-mat la Yahudi natiana Yesus niwra: ”Am tungkurga, mak kalwiedweda O'a! Hota aghi'a hya' totpena aliernana mormiori-dardiaria plalahwa pa nodi liarni?” 19 Noma Yesus Nakot la Niwra: ”Hya'a nrei piede omhuari lirmu mai A die muiwra A' di de riy kalwied id A'u? Riy honona edonna rkalwieda, eneknek to'ama Uplerlawna Nmeh'a nanpena Nkalwiedweda. 20 Ne orgahamu muat niohora Uplerlawna riorni-liaini (deullu-tatarni) niwra: ”Yana mulira-muliai, yana mpunu-mpuenna, yana mkiamnelu-mkiamna'a, yana muod niana riy mak khala, ne muatu mu'unni-mumta'ata inmu-ammu.” 21 Noma riy de nakot la Yesus niwra: ”Tuna, maka Mukot taru honona re de aliernohora momuog oleka la'a adien ma'ta la tuwari-laweru lewatni la'pa ntutu-nte'ela' ler di.” 22 La'pa Yesus Natlin nana hade noma Yesus Nakot la: ”Id edama pa yana mhuoratdoinia. Hota mu'ol dioin momuoga re'emu-tniarmu pa muala welli kupna-kai la'a riy mak kakleha-kaplara, a'na ri'ini patyatni, ne hota omliernana re'a-tniaru la Ilyamou-Watyatoha. Mhi' hare honona nanpena ma mliernohor reri A'u.” 23 Mere la'pa riy de natlin nana lira-tunu re dewade ralamni nmolu-nhelam doin la, yoma re'eni-tniarnu harahu rehia. 24 Yesus Namkek rer lia riy de dewade Niwra: ”Riy mak kre'a-ktaru riwra rre' teman la Uplerlawna mutnu-rahanu, de rler la yawuhi-yawe'et lawna. 25 Yoma riy maka kre'a-ktaru mak kiwa rre' teman la Uplerlawna mutnu-rahanu mak Enodi plolli la emeka Ray, de hota emeknekama hayori lawna niwra nlola nhior lawra hu'ulli, mere taken niana.” 26 Riy maka katlin reria Yesus lirni re, riwra: ”La' pa mak kre'a-ktaru re ta'en niana rla' Uplerlawna mutnu-rahanu de hota he' ed maka klernana mormiori-dardiari plalahwa de ho'a?” 27 Noma Yesus Nwalolla, Niwra: ”Ta'en niana rimormiori ramori-ralewna inonni. Mere Uplerlawna Nodi plolli pa Namori-nalewna ira.” 28 Noma Petrus nhar lirni pa niwra: ”Matroma, a honon am di de ami e mto'or momuou lia haneknek wawannu pa ami e mlernohor O'a!” 29 Noma Yesus Niwra: ”Mpiesiaya! La'pa riy mak kaltarga romni nor wutga hawni-a'nani, inni-amni, inni-narni yoma nma nhima-nre'a Uplerlawna kniarni totpena Uplerlawna Nodi plolli la riy harahu mormiorni, 30 de hota riy de nlernan memna wniahlani la Uplerlawna la' lera-mela ri, de narehi-nalawan la'a hya' maka ha nal targ oleka, ne hota la' lera maka kmai die e nlernana mormiori-dardiari plalahwa pa nodi liarni.”
Yesus Nwahaur re'eni id owa'an la'a E matmiatni
31 Yesus Nawoka-nale'ga maka ha Nwatutu-nwaye'a riy termida wehrani woru pa rmeh'a la' gen ida na'nama Nakot la Niwra: ”Mitlina! La' dodo'ondi de itsortut niana Yerusalem. Hota tla' hande, de hya' maka makwohorulu-ktatrulu ha rhorat taru la'a Rimormior A'na A' die, pa hota ntutu-nte'ewa. 32 Hota ral A lia riy maka Yahudi atia'a. Hota rhi' A lia hamalmialia, rapolu-raliel A'u, me rakrui lia A ga'yu ralamni. 33 Hota rliwra-rkaklia A'u me rwen A'u, mere la'pa lera wotellu, dewade hota Amuori owa'an la matmiati ralamni.” 34 Lira re honona de, riy maka Yesus ha Nwatutu-nwaye'a re id mana edonna rna'erit nana. Yoma lira re nnia'eratni de emeka ha rawunum targa la ir honona pa raplin niohora hya' ed maka Yesus Nakota reno?
Yesus Nhi' kalwieda riy maka matni kyata
35 La'pa Yesus Nhi' pa Nte'ela la' Yeriko, noma Namkek de mak matni kyat ida e namtatna pa nmeh'a nawakwaka la talla aratni. 36 La'pa mak matni kyat de natlin nan de rirahu e rla'a-rmai, noma natiana re niwra: ”Miy e mhi' hya'a?” 37 Noma maka ha natiana re riwra: ”Yesus mak kwatiawu Nasaret de ed mak kwehweti.” 38 Noma mak matni kyat de nhaun pa niwra: ”Yesus, Daud upni-a'nani ne! Mtiulla-msiayn nan a'g ee!” 39 Dewade riy mak kala' ulu Yesus pa rden la mak matni kyat de onni rawenan la riwra: ”Hoi! Molmuo'lu!” Mere yeher to'ama narur lia nhiaunu pa niwra: ”Daud upni-a'nani nee! Mtiulan-msiayn nan a'g ee!” 40 Noma Yesus Ntut tiar pua Nakot la riy mak kden hande pa rodia riy mat yat della E'a. La'pa nmai wia, noma Yesus Natiana Niwra: 41 ”Hya' ed maka mpuaka mai A'u?” Noma mat yat de nakot la Yesus niwra: ”Matrome, awuak de a'umkeka owa'ana!” 42 Noma Yesus Nakot la Niwra: ”Hademkade de mumkek wa. Yoma ompuesiay A'u pede mkialwied wa!” 43 La'a mtatande nekpa matni re raphyar wia, noma riy de nlernohora Yesus. Nalala' reri de na'uli-nawedia Uplerlawna. La'pa rirahu ramkeka hihi'a-yapyap die dewade honona wal pia ra'uli-rawedia Uplerlawna la genni-tienni.
Sakeus nhoitio'or doini nhiolli-lietni ululu pa nlernohor Yesus
1 La' pa Yesus Nte'ela la'a Yeriko, de edonna Nwarin tiaru, mere Nodi liarni la leta ralamni. 2 La'a let de de riy id makla' o'tani la mak kawoka blastena e nre'a-ntaru. Rpolga nanni de Sakeus. 3 Sakeus de nwahak talan pa namkek memna Yesus herni-gaini. Mere rirahu rehia, ne e lakni pukpukelma la' riy honona, pa narieiniande edon namkek nan walia Yesus. 4 Pede nawlar pia nala' ulga riy honona, me nha'at la kar ona ida hananni maka sapon lawna totpena Yesus kekwal die nlol hande namkek nan Yesus. 5 La'pa Yesus Nler la au muaka Sakeus handella hananni de noma Yesus Nwatniar reria Sakeus pa Nakot la: ”Sakeus ee! Plet pa muernu! Yoma hota A'g e tiy o rommu nayanni la' ler di pa unin la hande!” 6 Noma Sakeus nleretniekla nwasiorgerun pa nma nwatroma Yesus de kaniha-kamal niohora yoma hota Yesus Nanin la e romni. 7 Rirahu ramkek hade de raltier yata riwra: ”Cih! Ha nihya'pa Nla Nora riy maka khi' do'a-hala de rla rwatamputu la romni nayanni?!” 8 Mere rla' noma Sakeus ntutrier niek la romni nayanni pa nakot la Itmatromlawanni Niwra: ”Matroma hota plollol meman pa a re'a-tnia'ru korni, de nhiakra id la nhiakra woru (setengah), de agiwra gala la mak kakleha-kaplara, ne la'a riy meni to' maka nhi'inde agakal nan kupanni re hota apuol owa'an la ralamni re'eni wogat la.” 9 Noma Yesus Nakot la Niwra: ”La' ler di de omuora rommu mniotni honona mliernana mormiori-lewlewna la'a Uplerlawna yoma o' mana mtiutga inonmu la' ler di pa emeka Abraham duratni-waitni mak kaplola. 10 Ne Rimormiori A'na A' die muai die mua uhaka totpena ulewna rira mak kto'or doin olek la Uplerlawna emeka pipi-duma mak kawlari olek la matromni, totpena ir do'oni-halli edon rod ir la Uplerlawna niukamnu.”
Maka ha rpesiaya la ha kuku'a hota rpesiay wialia la ha lalawna
11 La'pa riy e ratlin ma'ta la Yesus wniahaurnu de, dewade Nhaur lirni owa'an pa Nakot nohora yawalliohora ida. Yoma la' ler de E' ed olek la'a Yerusalem onni, pa riy ratniekame hota Uplerlawna Nleretniekla Na'ala kniarni de emeknekama Ray no' noha wawannu. 12 Yesus Nwahaur pa Niwra: ”La'awa lerni de hota marna ida niwra nla'a noha olietleta ida totpena hota rrana pa nla'a ray, nhor nianpena hota nawali. 13 Mere edonna nla' ma'ta de npolga mak kar lia e'a riy termida pa nala kupan mina la nenenna re! (Rima-rima rlernan kupan maha de emeknekama riy kupna-kaini lera rahu id gahani.) Na'nama nakot la re: ”Mpiadakna kupna ri pa la'pa amuai owa'ana.” Noma nwaran wa. 14 Mere noh de mniotni de sukni atia'ala e'a. Pede la'pa nwaran wa noma rhopan pa riy rla' pa rod lir la riwra: ”Amahmen pa riy di nla' ray mai ami.” 15 Mere emkade ho'mana, maran de nrana pa nla' ray, nhor nia'nama nawal lia nohoni. Nawal wia dewade npol lia mak ktulla-kar lia e'a re pa rma rlol gaini totpena e nat niohora ira unatnu la wniadakanni de wo'ir maka irlernan oleka wa. 16 Dewade mak kala' ulu nmai pia nakot la niwra: ”Tuna, kupan mina maka omual de a'u'itar la re'eni termid wa.” 17 Tunni de niwra: ”Samog ee! O' di de mak kar siamomuou id o'a. Yoma ha kuku' ida mere nariei pia apuesiay o'a. Pede hota agal o' pa muodi plolli la letlawan termida.” 18 Noma mak ka'an kai wornu de nmai pia nakot la tunni de niwra: ”Tuna, kupan mina maka omual ma' a die a'u'itar la re'eni wolim olek wa.” 19 Noma ray die nakot la niwra: ”Hota omuodi plolli la letlawna wolima.” 20 Nhor nioma mak ka'an kai lia de dom de nmai pia nakot la tun de niwra: ”Tuna, kupan mina maka muala re a'g e muanatga apitu la kokanna ralamni pa er tiy! 21 Yoma a'umta'at la tuna, yoma nhi'inde tuna nhopan pa mak kar lia e'a de, rkari werwerta. Ne orgahamu nhi'inde mua' nek la kupan maka riy dom to'a rkenia la noha luwuau wniatierun lawanni (bank). Ne tuna niwra nwokwiok niek pa nawoka noh timni-rai timni maka tuna edonna nodia liwtu-odaw la yatniamanni.” 22 Noma ray die nakot la mak ka'an kai lia de niwra: ”Riy yatya'tu ne! Hota agukum o'a nlernohor rer lia o orgahamu lirmu. O e muatga de a' di de riy maka khopan pa riy mak kar lia a'u re rkari werwerta ne umatmera-wulkga'ul la'pa uwoka-ule'ga noha timanni-daharni maka a'g edonna godia a liwtu-odwu. 23 O ralma-riormu emkade noma nihya'pa o edonna mkien nieka a kupnu della la'a noha luwuaunu wniatierun lawanni (bank) totpena amuai emkadi de orgah'u ga' nana kupan de nor wutga rehenu-lawanni (bunga)?!” 24 Dewade ray die nakot la riy maka ktutrier wutwut lia hande pa ra'ala kupan de, ne rala la riy maka ka'itar kupan mina la re'eni termida re! 25 Mere mak ktutrieri re rakot la tun de riwra: ”Tuna, hade nlernan oleka kupna re'eni termida wa.” 26 Mere ray die nakot la re niwra: ”Mhioratreria! He' mak khima-kre' a lia kalwiedwedni de ir er maka klernan owa'an pa ra'itar rer lia liawanni. Mere maka edon nhima-nre' a lia kalwiedwedni hota ha kuku' id etla limni ralamni ho'mana ra' momuou lia. 27 Ne miod dodo'on memna a arwa'lu maka kahmena aghi'a ray lia ira re pa ma mpiakriani! Mituinia honona re aranni la a ga'yu ralamni.”’’
Riy ra'uli-rawedia Yesus la'pa Nler la leta Yerusalem ralamni
28-29 La'pa Yesus Nakot targa hare honona nhor nia'nama Nden la gaigaini la mutlialawna pa rtawniokria letlawna Yerusalem. La'pa rwakriania leta Betfagi nora leta Betania, mak kdella wo'ora Saitun hananni, noma Nhopan pa maka ha Nwatutu-nwaye'a riy woru rala' ulu pua rla'a let maka ir rwakrian oleka de. Yesus Nano'a re Niwra: 30 ”Hota la'pa mimtie'ela hande de hota mimkek nana keledai a'nani ida e nakniohu. Keledai de edonna rwatutu ma'ta nhia'ani. Ne mlieretniekla miewar doinia la pa miodia la handi. 31 La'pa riy ratian miy lia hya'a nrei pia mimpie'er doinia keledai dena? De mikot la miwra: ”Itmatromlawanni e Nwaka (perlu) de!”’’ 32 Dewade riy maroro'a re rla'awa. La' de rlernana emolmolan nekama maka Yesus ha Nakotkota re. 33 La'pa e rewar rer mia'ta keledai a'na de, noma keledai matromni de ratiana re: ”Hoi! Hya'a nrei pia mimpie'er doini keledai a'na dena?” 34 Noma rwahla riwra: ”Yoma Itmatromni e Nwaka de!” 35 Nhor nioka rodia keledai della Yesus nhor nia'nama rala ir rain plalahwani ra rwowa keledai de to'orni dewade rhima Yesus pa Nha'ata la keledai a'na de wawannu. 36 La'pa Nha' nana keledai a'na de pa nlola talan lawna, de rirahu rala naniair plalahwa ra rwowa la talla totpena keledai a'na maka Yesus Nha' nan de nlola wawannu. 37 La'pa tre' ma't oke'a pa Yesus Nte'el la' Yerusalem, la'a talan maka kwatirierun la wo'or Saitun, dewade mak klernohora Yesus rirahu re honona ralamni re rahepuepru pa emariarin nana la ya'uli-yawedia la Uplerlawna yoma la'a hihi'a-yapyapi mak kamehi-kayona (mujizat) honona maka Yesus Nhi' oleka re pa ir ramkek nana. Riarni-riarin la nhiaunu pa riwra: 38 ”Ra'yu nee! Ma'uli-mawedi, mhu'ru-mhelma O mak kmai pia kodia Orgahi-Orha'a nanni! Dodo'ondi de Uplerlawna mak kden la Ilyamou-Watyatoha Nora rimormior nohkeran di tkalwied owa'ana. Mai pia ta'uli-tawedia, tlilili-tmamuau E' la tutullu-lolo'oni!” 39 Noma riy Parisi doma mak kden wut lia rirahu re rakot la Yesus riwra: ”Tungkurga, Mhuopan pa maklernohor reri O'a re ramolmuolga!” 40 Noma Yesus Nwahla lirni re Niwra: ”Mpuesiay A'go, hota hare rherier wia mere hota watgau ri rhaur la polpuolu-hawaunu re!”
Yesus koko'a-herer nohora Yerusalem
41 La'pa Yesus Nwakriarian liol wa la'a letlawna Yerusalem, dewade Namkek reria let de na'nama Nkakur nohora. 42 Noma Nakot la Yerusalem Niwra: ”A ralmu e ntuin tiy o'a Yerusalem ee! Awuak memna totpa o' nek de, muat nohora he' mak la' ler di de kodi plolli pa nodia kalwiedni-paitiotni tiy o'a. Mere la' dodo'ondi de loi-talan la kalwieda-paitiot de emeka ha yawunamnu la o matmu yamkekni. 43 Pede hota la' lera ida, hota o arwalmu lol walli-walli pa rariria luturwatu-werantuini pa rle'lu reri o'ola letgara totpena riy mak kden la o ralammu de yana rawlari. 44 Hota rweyata-rwaniag wutga omuora rimormiormu. Lutur lawanni id mana edonna napniadar la id wawannu. Hota omuora rimormiormu mimliernan hade yoma miy edonna mrieiniana-mia'nan Uplerlawna la' lera maka Niwra Nma Namori-nalewna miy.”
Yesus Nhokra-nlai mak ka'olu-kala'a la Uplerlawna roma kreini
45 Yesus Nla'awa Uplerlawna roma kreini herni-gaini na'nama Nhokra-nlaiya mak ka'olu-kala'a kaweli-kaphar la hande. 46 Yesus Nakot la mak ka'olu-kala'a re Niwra: ”E rhorat tar olek la Puka ralamni Uplerlawna lirni de Niwra: ”Hota A ro'mu de sniumbain genia de, mere miy e mhi'a la roma kamnelu-kamna' geni!”’’ 47 La' lera-ler nekpa Yesus Nwatutu-nwaye'ela Uplerlawna roma kreini. Mere imam-imam o'tani-matni rora makwatutu-kwaye'a agama me Yahudi o'tani-matni rwaror pa rwenna Yesus. 48 Mere edonna rlernan ma'ta talan pa rwenna yoma rirahu rmaimiai rer pia ratlina-ratailia lirni-tunnu, ne lirni-tunnu re rla' nana rira ihranu ralamni.
Ratian nohora he' ed mak ktemna plola-mneha la' Yesus limni ralamni pede Enhi' nana hihi'ini-yapyapni re
1 La'awa la' lera ida, de Yesus Ntepartarlia wniatutu-wniaye'a me Nakot nohora Kot Kalwieda-Paitiota mak kwatiawu Uplerlawna la'a riy mak kden la Uplerlawna roma kreini de. Noma imam-imam o'tani-matni re me makwatutu-kwaye'a agama, ror wutga Yahudi in letni-am letni rmai pia 2 rakot la Yesus riwra: ”Tuna, Mukot nohora tek la mai ami, de he' ed mak ktemna plola-mneh della' O limmu ralamni pede Omhi' nan hihi'imu-yapyapmu rena?” 3 Noma Yesus Nwahla lirni re Niwra: ”A'g e giwra utian tek wali miy. Mikot nohor teka! 4 Yohansi makharan die, ha nlernan plol della he'a? Uplerlawna onde rimormiori?” 5 Dewade honona re rwahu'ru ralma-riora wamueh'a pa riwra: ”La'pa itwet la Uplerlawna ed mak kala plolli la Yohansi de hota Eniwra: ”Ne hya'a nrei pia miy edonna mpiesiay e'a?” 6 Mere la'pa itiwra rimormiori plolli-mneheni hade de hota riy honona rala watu ra rwatliewur wen ita yoma riy rpesiaya de Yohansi de makwohorulu-ktatrulu id hade!” 7 Pede honona rla' lir id pa rwahla Yesus riwra: ”Ami e maplinga de ha nlernan plol della he'a.” 8 Noma Yesus Nakot la re Niwra: ”Hade emkade, de A' muana edonna ukot wahyaria tiy miy la'a he'a mak kala plolli mai A' pua Aghi'a hihi'a-yapyapi re.”
Yahudi o'tani-matni re emolmolan neka maktimni-makdahara maka nhiol yata
9 Dewade Yesus Nwahaur nohor la ira, la'a yawalliohora id la'a rirahu re Niwra: ”Ornoha ida nawuli-natniamin anggur wo'a la nhyi'ini-tlunanni ralamni. Nhor nia'nama nala nhyi'-tlunni anggur della riy rtimnia. Na'nama nla nlaun la riy ornoha pa mahnek meman la hande. 10 La'pa ntutu la lerni-melli pa riwra rreiki-rwo'or wa, noma ora nhyi' de nhopna e hopopanni-li'irnu id pa nmai pia na'ala ora nhyi'a nhiakarni la timanni-daharni. Mere mak ktimni-kdahara rwaldioin targho' pa rwanalga ora nhyi'a hopopanni-li'irnu de na'nama rhopan pa nawal die nhapirteum nan to'a. 11 Noma ora nhyi' de nhopn owa'ana hopopanni id owa'ana. Mere emkade walia rliwra-rkaklia na'nama rahe'i-ramalia pa rhopan pa nawal die nhapirteum nan to'a. 12 Nhor nioma ora nhyi'-tlunni de na'enyatg owa'an hopopanni mak la'pa re'eni wotellu, mere ha nlernan walia liwliwra-kakaklu pa namno'a-namrara na'nama rte'la la'pa rhopliala la nhyi'a to'orni. 13 La' pa hohoni dewade ora nhyi'-tlunni de nhar lirni pa niwra: ”Hota a'uhak owa'an hya' tallo? Hade emkade de pena A'u'enyatga a a'nu maka a siayn memna. Meman neka la hota e' de hare rhu'ru-rhelma.” 14 Mere la'pa ramkek tut niana ora nhyi'-tlunni de a'nani de dewade idma nakot la ida, riwra: ”Maka hota kodi plolli la ononni e inhatti! Mai pia itatuinia aranni totpena nhyi'ini-tlunanni di, it gahani!” 15 Dewade rnaklia riy de la nhyi' de to'orni na'nama rwenna.” Noma Yesus Natiana la mak katlina re Niwra: ”Nah! La'pa ora nhyi' de nawal pia nmai de hota hya' ed maka ha nhi'a la maktimni-makdahara reno? 16 Hota nma nhapartikil nohora re ne hota nwenna re, totpena nal to'a la riy doma rtimnia.” La'pa riy mak katlin nan hade, de rna'erit nana lir de nnia'eratni, noma rakot la Yesus riwra: ”Hota emkameni ho'mana hota yana rhi' emkade!” 17 Noma Yesus Namkek tertehra na'nama Nakot la re Niwra: ”La'pa emek miy lirmi re pa hota edon emkade, de emkameni targho'ola Puka lirni (la'a wat muaka ha rtot nohora la Ray Makamori-Kalewna maka Uplerlawna Nano'tar dena)? Yoma e rakot taru la Puka de: ”Wat muaka tukna edonna rnair nana pa rhi'a roma-lewu, mere rhopliala, de Uplerlawna Nnairi oleka pa Nhi'a la watu liar pianulu.” 18 Riy honona mak ktuin pa ktaiya wat die onde riy maka wat die nwaklol niana de hota ramkoha-ramnana pa rwal lia en liu'wu-tan miakmu.”
Makden Parisi ratian nohora blastena totpena rtot Yesus la klieratni
19 Makwatutu-kwaye'a agama me imam-imam re o'tani-matni rat niohora la yawalliohora maka Yesus Nakota de, de Enakot nohor ira. Pede rwahak talan pa rtorna Yesus la' ler de memna, mere ramta'at rer lia' rirahu. 20 Pede ramkek rer lia Yesus yanpa hota Nhi' hala. Rhopna riy pa rla ratian la'a-mai Yesus emeka e riwra rat niohora Yesus lirni-tunnu mere plollolli de e riwra rtot e' pa Nweta lir maka edonna klola o'ta-mata re wniarorni, nanpena o'ta-mata re rla rwet targa la mak kodi plolli doma maka kden la gubernur tnioranni-riautnu. 21 Noma riy maka ha rhopna re rma rakot la Yesus riwra: ”Tungkurga, ami e matga de O' di de nanpena maka kakot nohora hya' ed mak kaplollola. Amatga de riy plele'er id O'a. O' e Mpuatut die Mukot nohora plollolli la Uplerlawna ralma-rior kalwiedwedni la'a rimormiori, de O' edonna Mhue'du nan etia riy ralma-riorni yoma riy lalawna onde riy kuku'uni ho'mana O' edonna Mpuadan nohora. 22 La' hade pede Mukot teka la mai ami, la' it agamni deullu-tatarni nakot am pia ampairia blastena la'a mak ktorna horta-hairi Romawi (Kaisar) onde yana?” 23 Mere ir ralma riorni mak edon kaplola de Yesus Nat niohor oleka re pede Nakot la re: 24 ”Mi'al tek la kupan dinar id pa mtiut tieka mai A'u, de he'a herni-gaini me he' nanni mak kden la kupan de?” Noma rwet la riwra: ”Ray mak ktorna horta-hairi Romawi (Kaisar) o'tani inhat ee!” 25 Noma Yesus Nakot la re: ”Hade emkade, miala kupan maka ray herni-gaini etla de la'a ray, yoma hanni hade. Ne miala la Uplerlawna hya' maka Uplerlawna gahani wali.” 26 Pede ta'en niana rtot Yesus la hala wawannu la riy mutlialawna gaini ralamni. Honona re mtulu-mtie'el tar momuoga yoma rwer rer wiawni la'a Yesus lirni-tunnu maka ha ratiana re honona.
Yesus Ntekal reria Niwra riy mak kmati hota rmori owa'ana
27 Noma Saduki riy doma rmai pia ratian nohora Yesus la'a emkameni la riy mak kmati hota rmori owa'ana, yoma Saduki re er mak edonna kpesiaya riy mak kmati hota rmori owa'ana. 28 Riwra: ”Tungkurga, Musa e nhorat targa mai ita, de emkadilla: La'pa muanke' ida nmati mere nakleh ma'ta a'na, de muanke'a mak kmat die hyalli nor owa'an yerni patyat de rmehlima, totpena rlernana hyalli mak kmati olek de duratni-waitni. 29 Mere la' lera ida, de muanke'a riy wo'itu rwahyal riaralma. Noma yanulu nmehlima, mere edonna nlernan ma'ta a'na, ne nmat wia. 30 Noma garni mak klernohor hyalli nora yerni rmehlima mere edonna nlernan wal mia'ta a'na noma nmati wali. 31 La'pa emkade wali la'a hyalli re korni re ror owa'an yerni de rmehlima mere id mana nakleh ma'ta a'na de rmat wia pa emkade mamain pa nodi liarni pa la ntutu mueman la gari hoho'a. 32 La'awa hohoni noma pat de mana nmat wia, mere nakleh etia a'na ida. 33 Pede la'pa la'awa lerni pa mak kmati honona rmori owa'ana, de hota he' hawni patke'a dena? Yoma mak kwahyali re wo'itu meman pa rora pat de rmehlima.” 34 Noma Yesus Nakot la re Niwra: ”Riy maka kmormior mia'ta la nohkeran di, de e rmehlima. 35 Mere riy maka ha rwalir nian pa hota rmori owa'an la matmiatni pa rdella Ilyamou-Watyatoha, de hota edonna rmehlim owa'ana. 36 Yoma yehwani re emeknekama Uplerlawna hopopanni-lili'irnu pa hota edonna rlernan owa'an matmiati la'a Uplerlawna gen warwuarnu. Rwet olek ir la Uplerlawna upni-a'nani, yoma Uplerlawna Namori-nalewn olek ir la' matmiati ralamni. 37 Nah! Miy die edon mimpiesiaya de hota mak kmati rmori owa'ana, mere Musa orgahani nek de enakot momuoga de hota riy mak kmati mana rmori owa'ana. Yoma e nhorat taru Orgahi-Orha'a lirni maka Musa natlin nana la' ler maka Musa nlernan ai la'a pu'na-kiarti ralamni de. Orgahi-Orha'a lirni emkadi: ”A' di de Abrahama, Isaka me Yakopa Uplerlawna ma'ta A'u.” Nakot emkade kennama Abraham, Isak me Yakopa rmati olekwa. 38 Uplerlawna upni-a'nani honona la'pa rmati oleka ho'mana Uplerlawna Natga hota rmori owa'ana. Uplerlawan de, riy mak kmati Uplerlawanni atia'a hade. E' de de, mak kmormiori Uplerlawanni E'a.” 39 Noma makwatutu-kwaye'a agama dom rakot la Yesus riwra: ”Am tungkurg ee, mak ompuet la re, id mana edonna nhal eti!” 40 Dewade riy id mana edonna nparan pia nhar lirni pa natiana Yesus.
Ray maka kamori-kalewna de Daud duratni-waitni me la' walia Daud Matromlawanni
41 Noma Yesus Natiana re: ”Hya'a nariei pia riwra Ray Makamori-Kalewan maka Uplerlawna Nano'taru, de Daud duratni-waitni hade? 42 Daud nmeh'a nek de e nhorat targa la'a Puka Masmur la'a Uplerlawna lirni la Ray Makamori-Kalewan de niwra: ”Orgahi-Orha'a Nakot la a Matromlawnu (Yesus) Niwra: Muliwnu (Mumtatnu) la' A wa'lu malganna. 43 La'pa Aghi'a arwalmu re pa rwaltior la O lakmu nayanni.” 44 La'pa Ray Daud nwet la Ray Makamori-Kalewna, niwra e Matromlawanni, de nihya'pa mikota ray Daud duratni E'a?”
E rwagahniorta riwra Erammi la'a makwatutu-kwaye'a agama re oo!
45 La'pa rirahu ertepartarlia ratlin la Yesus lirni-tunnu, noma Yesus Nakot la maka ha Nwatutu-nwaye'a re Niwra: 46 ”Erammi la'a tungkurga agama re! Nhi'inde rala' nohora raini plalahwani totpena riy ramkek de riy mak inponni ira me ir suksukni de riy ral ir la rekna-waiti la'a ya'olu-yala' geni. Rler la Yahudi kreini-iskolli ralamni de rtota gen miak kden la gaini me la'a he'i-hepru la'a ya'anlawna-yemunlawna, de rahak geni samomuou totpa riy ra'uli ira, nanpena ramtatna la' hande. 47 Ra'ohpa-ralahara a'na riy patyata me reyahru romni-lewnu. Ne rsumbain de plo'a-plahwa la rirahu gaini ralamni totpa ra rtutwua ir do'oni-halli. Mere hade mak karei pia rlernana niukum mak hota kwerwerta maka nareh dioin niukum maka riy dom to'a rlernana.”
Palpuallu ida kupan pi'rani la krei ktoparni (peti derma)
1 La'a Uplerlawna roma kreini de Yesus Nran matni pa Namkek la mak ktar kupna-kai rkenia kupan la krei ktoparni. 2 Yesus Namkek walia a'na riy patyata ida nken wialia sena wor lia'a ktopar de ralamni. 3 Noma Yesus Niwra: ”Mitlina, patyat di ed mak kenia liawanni la'a riy honona. 4 Yoma rirahu mak keni olekwa re narehi-nalawna yoma re'eni-tniarnu harahu. Mere patyat di de nakleha-naplara mere mak ha nala re de, eneknek hare to'a pede nwatul nana pa nal momuoga.”
Yesus Nakot nohora roma krei yapru'ranu me riy rpolpuol inni-rwakwak amni
5 Noma maka Yesus ha Nwatutu-nwaye'a re dom rwahaur nohora Uplerlawna roma kreini samomuounu nee! Yoma rnairia watgau samomuou pa rariria me rkenia himima-rere'a mak samomuou memna la ralamni. Mere Yesus Nakota la re Niwra: 6 ”Hota la'pa nte'ela lerni de hya' maka ha mimkeka re de hota rweyata-rwaniawu momuoga. Wat muaka kapnidara re de hota id mana edonna nalliapar id wawannu.” 7 Dewade maka ha Nwatutu-nwaye'a re ratiana Yesus riwra: ”Tungkuru, hota mowen die itamkeka maka Omukota re? Ne hota hya' ed maka tamkek ulga totpena nwagahniort it la hota lera-mela inhatta?” 8 Yesus Nakot la re Niwra: ”Mi'ererma! Yanpa rhi' aklierat miy la'a A maimia'yu de. Hota rirahu rmai die rnairia A na'nu pa riwra: ”Makamori-Kalewna maka Uplerlawna Nano'taru A'g inhatti! Ne lera noha niatni nwakrian wia!” Mere yan memmemna mliernohor oo! 9 Me la'pa riy rodia kota-de'eta wunu-ara la'a hairi-hairi onde la'a leta-leta, yan mimta'ata. Yoma hota hare honona re de nayamkek ulu, mere noha niatni de edon ntutu-nte' ma'ta. 10 Hota hairi nor hairi rawunu-rawenna, me noha-rai nora noha-rai rawo'ora. 11 Ne plinu-plinnianama lol meni-meni to' pa upkarururu mak karuri. Rehka-lara me nnieni-nhiena mana, nwewra noha-rai. Ne la'a lyanti mana tamkek neka yamta'ata hya' mak kamehi-kayona karieiniande riy ramta'at meman la hota hya' ed mak kmai nieka. 12 Mere la'pa hare honona edonan ma'ta de, hota rtoran miy pia rnahora-rnala'a, ramuki-rama'al miy. Me rod miy lia watghudi lokarni la'a geni-tien maka nhi'inde Yahudi rhi'a kreini-iskolli la re pa rho'la tar miy. Ne hota rnun miy lia ray-ray gaini ralamni, me la' walia o'ta-mat lalawna re dom pali, yoma mimliernohor reri A'u. 13 Hade ed maka hota mimliernan talan pa mikot nohor Kot Kalwieda-Paitiota la ira. 14 Mimpiaror samomuou plein totpa hota yana ihrami rteplu la'a hya'a ed maka hota ha miwra mikot pa ma miod niana inonmi. 15 Yoma hota A orgah'u ed mak kala lira mak kodi kirkira-ralma-rior samomuou tiy miy, totpena miy arwalmi id mana, edonna nlernan talan pa namer matni pa nreher doinia ha mikota re. 16 Hota inmi-ammi inmi-narmi lupmi-rommi me tupwalmi-lawalmi nekane e rehera-rwat dioin miy lia ne rwunu-rwenna riy dom makpesiay. 17 Ne riy la' meni-meni to'a hota rahankeran rer tiy miy, yoma mimliernohor reri A'u. 18 Mere rwunu-rwenan miy inonmi ho'mana ta'en nian memna rhi' oruli-augewat la miy pa mlier wutga Uplerlawna la Ilyamou-Watyatoha. 19 Pa la'pa miy e mtiorrer pitpitga pesiaymi, de hota mliernana mormiori-lewlewna plalahwa pa nodi liarni.”
Yesus Nakot nohora la'a Yerusalem ntuin la yatyatni
20 ”La'pa mimkek neka mak kawunu-ka'ara rmai pia rle'lu reria leta Yerusalem, de hota mimpiahniorat nana, hota edon nalo'on wali ne rweyata-rwaniaga let de. 21 A'ukot tiy miy totpena la' ler de hota miy mak kden la Yudea miwlar lia' wo'ora hananni. Mak kden la leta ralamni, de rawlar dioinia leta, ne mak kden la leta to'orni yana rler la leta ralamni. 22 Yoma la' lera-mela re de hota niukum lawna nmai wia, totpena la' hade pa mak ha rakot targa la Puka ralamni de ntutu-nte'ewa 23 Adoh! La' ler de pat mak ka'uhu-ka'apnu, ne la'a pat mak nuh reria a'nani re rpolpuol inni-rwakwak amni. Hota mak kden Israel nohoni rlernan kropna-krieutu, nniahora-nniala'a, yamuki-yama'ala yoma Orgahi-Orha'a hota Nukmu luwnu-a'nani de. 24 Hota rdawar wenna doma ne rodia dom de ran nan wutwutga limni pa rodia la Yahudi atia'a honona nohoni. Ne riy mak Yahudi atia'a de hota rwatei-rwahapra Yerusalem pa nodia la'pa lera-mela wo'ira maka Orgahi-Orha'a Nakot targa oleka wa la Yahudi atia'a re.”
Rimormiori A'na de maimiaini
25 ”Hota la'a lyanti de tamkek nan memna maka kamehi-kayona (ajaib) la lera, wolla, me wtiona mak karieiniande riy ramta'at wenna la'a hya' mak hota kmai nieka. Maiya noh wawannu de makden la hairi-hairi hota ramta'at nande rhakomu-rhakam niohora yo'or lawna-anin lawna yetanni. 26 Hota rimormiori ramta'at nande rtuin pa raplin niohora inonni yoma ramta'ata hota hya' ed maka kwal lia riwtu-hora mai noheri wor dino? Yoma maka kodi plolli la'a darta-lyanti mana hota nawniatiri-nawnialiakra. 27 La'awa ler de dewade rimormiori ramkek reria Rimormiori A'na Amuai owa'ana pa Adiella kakma wawannu, de Agodia A plo'lu-mneh'u, A preh'u-mka'yu mak kamehi-kayona la liplipa-kamka'mani. 28 La'pa mimkek nan hare honona dewade mhi' aruri miy ihrami-ralammi me mihepuepur nohora yoma hota edon nalo'on wali ne mlier la mori-lewna.”
Yawalliohora la'a kar ona
29 Noma Yesus Nwahaur nohora yawalliohora Niwra: ”Mimpiaror teka la'a kar ona nor wutga ora-au re korni. 30 La'pa mimkek nekpa uhwanu re rden la, de miatga lerwarnu nwakrian wia. 31 Hota emkade wal lia mimkeka hare honona mak A'ukot nohora olek diwa de miatg oleka de, edon nalo'on wali ne Uplerlawna Nte'la la lodanni-hairni pa emekwali Ray. 32 Totpa miatga! Riy la' tuwu di de edon rmat mia'ta, de hare honona mak ukot nohor oleka di hota rtutu-rte'ewa. A li'ru ri raplola. 33 Hota lyanti nora nohkeran di mana rmolu-rhelam wa mere A li'ru-tu'nu de ndella pa nodi liarni.”
Nhioratmi nden rer lia temmi
34-35 ”Erammi la temmi, yanpa mpiehera-mia'wu la ya'ana-yemnu pa mhi' yatyatni-halalli, onde mpiarora-mpialaiya mormiormi pa mhiortaplinga hya' mak kla' nana Uplerlawna riorni pa narieiniande mhioratdoin walia ler maka hota plin-plinnianama nte'a hmuakur wa. Yoma hota ler de nte'ewa de rimormior honona mak kden la noha wawannu di mtatan de rheduma emekwalima hiwi maka ma'nu ha nlakam nana. 36 Nhioratmi la temmi me msiumbain rer lia Orgahi-Orha'a totpena la'pa ntutu-nte'ewa la riwtu-hora ri, mimlier la yamori-yalewna me totpa la' ler de mitatahan nek ralamni la' hare honona me mdien rer lia pesiaymi, totpena hota la' ler maka Rimormiori A'na A' die Muai godia watghudi lokarni, mlia' meman pa mipal wiut lia A' die edon mimta'ata, mere mimuki-mihepru nohora.” 37 Yesus Nwatut lia Uplerlawna roma kreini la lera-lera, ne la'pa mel wa demade Nla'awa la'a wo'ora Saitun ne Nanin la hande. 38 Pa la' yawyawar la'a lera-ler nekpa riy honona rma rapur temna la krei totpena ratlin la Yesus Nakotkota.
Rwahak talan pa rtota Yesus la yatyatni
1 La' lerlalawan Yahudi maka ra'ana rot miaka edonna rnairia tgo'a, de nhi' pa nrehgor wua. Ler de ed maka ha rweta la Paska lerni, (de la'a ler maka Yahudi re rhoratreria ir tuini-wedni la ler maka ralewan la'a kokohoga la'a Mesir). 2 Noma imam-imam o'tani-matni re rora makwatutu-kwaye'a agama rwahak talan pa rwenna Yesus la'a wunwunamnu, yoma ramta'at rer lia rirahu, yanpa hota rhi' kokokna-rariarni.
Yudas nwayop pa na'olga Yesus
3 Noma hegana amlawanni narialmua Yudas maka ha rwet walia la Iskariot. Yudas di de riy id la maka Yesus ha Nwatutu-nwaye'a re termida wehrani woru inhatta re. 4 Noma Yudas nla' pa nora imam-imam o'tani-matni me o'ta-mat la maka katiak reria Uplerlawna roma kreini, pa nora rwahu'ru ralma-rior la'a talan emkameni totpena e' ed maka kodia Yesus pa na'olga la ira. 5 Honona re ralamni re rahepru me rwayop pa rla lir ida totpena hota ral kupan la Yudas. 6 Yudas Nwayow nohora nnia'ohma-nniakat de noma la'pa e nwahakhak talla emkameni pa ntorna Yesus totpena nala la imam-imam o'tani-matni rora makwatutu-kwaye'a agama re de yana riy ratga.
Rwahi' targ yamanna Paska
7 La' pa nte'ela lerlalawna maka Yahudi re ha ra'ana roti mak kakleha tgo'a. La' ler de meman wal pia nhi'inde rteti-rlaiya dum a'na maka ha riwra ra'an la'a Paska lerni de. 8 Noma Yesus Nhopan pa Petrus nora Yohansi rla pa rwahi' targa ya'ana-yemnia Paska maka ha riwra ra'ana. 9 Noma Petrus nora Yohansi ratiana Yesus riwra: ”Tuna, Omiwra hota ampahi' targa ya'ana-yemnu rella hanme?” 10 Noma Yesus Nakot la Niwra: ”Hota la'pa mlier la leta ralamni, de muanke'a ida na nodia ger kekna ida hota nwatrom nan miy. Enlol meni-meni mana mimrio'a mliernohor reria pa miora mlia'awa la'a rom maka ha ntawniokur nan de, 11 ne mlia' pa mikot la orrom de miwra: ”A tungkur mamni Natian o'a la'a gen mieni ed mak rwahi' targ olek pa Enora maka ha Nwatutu-nwaye'a re rewre'wa pa ra'an yamanan Paska?” 12 Hota orrom de ntutga gen liawna mak kden la roma la' heyanna, de npenpuen niohora meini-kaderni me lola-wra'u. Pena mpiahi'a hare honona la' hande.” 13 Noma Petrus nora Yohansi rla'awa de rlernana hya' maka Yesus ha Nakotkota re! Noma rrora rwahi'a-rwayod tiarga ya'ana-yemnia Paska.
Mei Perjamuan
14 La'pa nte'ela lerni pa riwra ra'ana Paska de, noma Yesus Nora maka ha Nwatutu-nwaye'a termida wehrani woru re makodia E lirni, ra'an wut lia mei wawannu. 15 Noma Yesus Nakot la re Niwra: ”Hyalmi ree! A ralmu niwra Agor wut meman miy pia ita'ana Paska dilla mei di wawannu, la'pa nhor nianpena alier la kropanni-krieutnu. 16 Pena mpiesiay A'go, hota A'g edonna 'un owa'ana ya'an Paska di pa la'pa ntutu-nte'ela' ler maka mimlier la yamori-yalewna la'a Uplerlawna genni maka Ntorna-nrautu emeka Ray.” 17 La'pa nhorwua noma Yesus Nrana lar miaka anggur turnu handella, na'nama Na'uli-nawedia Uplerlawna nhor nia'nama Niwra: ”Mia'ala hadi pa riy nenenna remnu! 18 Yoma totpa miatga, hota A'g edonna gemnia anggur turnu owa'ana la'pa nte'ela' lerni Agor Uplerlawna mutnu-rahanu honona temun wutga anggur tur warwuarnu la'a A A'mu genni maka Ntorna-nrautu emeka Ray.” 19 Nhor nioma Yesus Na'ala roti, na'nama Na'uli-nawedia Uplerlawna, noma Nhawi-nhawia rot die na'nama Nhakre'era la maka ha Nwatutu-nwaye'a re na'nama Niwra: ”Hadi de A ino'nu inhatti mak Agala la miy rerieimi. Mi'in hadi totpena nhioratmi nden reri la A matmia'tu pa nodi liarni.” 20 Emkade walia la'pa ra'an pa nhorwua, noma Na' owa'an lari maka rkeni anggur turnu na'nama Niwra: ”Anggur tur di A ra'ru maka ha rhuria yoma miy rerieimi totpa rhi' aplola Uplerlawna nnio' warwuarnu tiy miy. 21 Mere miy mhioratrerio! Riy mak ka'olga A' di de e nor wutga it la mei di. 22 Plola, hota Rimormiori A'na A' die hota Amuati, emeknekama Uplerlawna Nakot tar oleka de. Mere hota la'pa he' ed mak ka'olga Rimormior A'na de, adoh! Riy de hota nler meman la yatyatni-halalli yatlorni-yatra'ani.” 23 Noma ir idma napal lia id pa ratian lol etnu-liolli riwra hota he'a mai it de maka khi'a-kyapia maka Yesus Nakota re?
Rawenan nohora hota he' ed maka inponni karehi
24 Noma maka ha Nwatutu-nwaye'a re rawo'or pa idma nakot la ida riwra: ”La it di de he' ed maka inponni kareh it hononit la handino?” 25 Yesus Nakot la re Niwra: ”Ray-ray la'a luwu-a'na mak edonna kat niohora Uplerlawna, de rwatei-rwahapra limni-rorni mere iriwra ir orgahi de maka ktulan la limni-rorni. 26 Mere yana mliernohora hare nhiolli. Mere riy meni la'a miy die maka inponni, de hota mpialdioinia pa mhi'a inonmi emeka riy kuku' selma ida. Ne miy mak kodi plolli de hota mpialdioinia pa mtiutga inonmi emeka mak ha rhopna. 27 A'utian tek miy, la' miy wniarorni de he' ed mak inponni, la'pa mak ka'an la mei wawannu onde la'a riy maka khoi-ktania e'a? Meman nek la mak ka'an la mei to'a! Emkade walia la'a miy matrommi A' die, A'g ed maka inponni mere Amueh'a neka tiutga A ino'nu tiy miy de, A'g ed makhi'a mak khoi-ktani miy. 28 La' ler maka Alier olek la kropna-krieutu, de miy er maka mdien rer wut mai A'u. 29 Ne la'pa emkameni la A A'mu Nal mai A pua Atiorna-riautu, de hota emkade wal pia Agala tiy miy pia mior rewre'w A' pua mtiorna-mriautu. 30 La'pa A lia' oleka Ray wia, de miy miana hota mior A' pua ta'ana-temnu tamuki-tahepur rewre'wa. Ne hota miy er maka kamtatan la'a ray liwangeni termida wehrani woru re hananni, totpena miodi plolli la Israel luwnu-a'nani termida wehrani woru re.”
Yesus Nakot targa hota Petrus nreher doinia E'a
31 Noma Yesus Nakot la Simon Petrus Niwra: ”Mere Simon ee! Mutlin reri o! Uplerlawna Nwayow nohora hegana amlawanni pa nta'ag miy hononmi pa emeknekama ramoga wetra' lawna la'a ulatni nor ihini, totpena samomuounu lol to'ola yatyatni. 32 Mere Asiumbaini olek o'owa Simona totpa pesiaymu yana nmadwuri. Ne la'pa omuwali owa'an mai A' die mhi' arur miemna hyalmu re.” 33 Noma Petrus nwahla Yesus lirni niwra: ”Matroma, hota la' emkameni ho'mana a'g edonna wuadur la roma nhio'la ralamni, ne amuat niohora Matro'mu!” 34 Noma Yesus Nakot la Niwra: ”Mhuoratreria Petrusa, hota hiwi lallu edonna nkukule' ma'ta la' ler di de hota omueh'a nekpa mrieher doin A lia' re'eni wotelu.”
Rwahi' targa ir inonni yoma hota rler la kropna-krieutu
35 Nhor nioma Yesus Nakot la re Niwra: ”La' ler maka Aghopan miy pia mlia' mikot nohora Kot Kalwieda-Paitiota de, A'g edonna wuayopa miodia kupan geni, arkai, onde laka wniowa pa mhierun doin laka wniowni maka miy mniairi de. La' ler maka miy edon miodi hare, de mikleha hadomdoma?” Honona riwra: ”Edonna, Matroma!” 36 Yesus Nakot la re Niwra: ”Mere la' dodo'ondi de he'a kupan genni onde tangkunu etla de miodia re, me he' mak kakleha wehla plalahwa de mi'ol dioinia raini plalahwami re pa ma miwelia wehla plalahwa. 37 Yoma mpiesiayo, la' Puka ralamni de e rhorat targa Yesaya lirni la'a A'u niwra: ”Hota riy rhi' A' pua emeka mak kpera-kdaitia deulu-tatra id A'u.” Ne hota Alier la hare honona maka e rhorat targa. Meman nek la hya' ed maka ha rhorat tar lia' Puka ralamni pa rakot nohor A'u, de hota itamkek memna la dodo'ondi.” 38 Maka ha Nwatutu-nwaye'a re riwra: ”Matroma, wehla ya'ara worg erti!” Noma Yesus Nakot la re Niwra: ”Hare nek wa!”
Yesus Nsumbain la'a wo'ora Saitun
39 Noma Yesus Nhoitio'or la Yerusalem pa Nla'awa wo'ora Saitun emeknekama lera-lera Ha Nhi'a. Ne maka ha Nwatutu-nwaye'a re mana rarian nohor walia E wa. 40 La'pa rte'ela hande, noma Nakot la re Niwra: ”Msiumbaini totpena yana hegana amlawanni nreh nian miy pia mlier la do'a-hala ralamni.” 41 Nhorwua noma Enwatitni owa'an genni olietni edonna nhal de pera terampwolim rehenu, na'nama Nwaltior pa Nsumbaini. 42 Npol lia Uplerlawna Niwra: ”Am ee! Awuak pa Ompuayow de, Muhal doinia kropna-krieutu mak hota Atiutulu-lielew niana ri. Mere yana Mliernohor maka A ralmu ha nwaka mere plolli nek tiy O'owa Ama!” 43Dewade Uplerlawna hopopanni ida nwatiawua Ilyamou-Watyatoha pa nmai pia na'itar la rurni-laini. 44 Yesus ralamni nmayo'a-nmataw dioin la pa nhi'nande Narur lia sniumbaini. Liwatnu nadwia'i la tani, de emeknekama rara. 45 La'pa Nsumbain pa nhorwua, noma Nawal pia Nla Ntomar la mutwualli re, mere Nla' de wotelu e ranin hala, yoma ralamni rmolu-rhelam doin la. 46 Noma Npol lia re pa Nakot la: ”Nihya'pa mininmi?! Mimat pa msiumbaini totpena yana hegana amlawanni nreh nian miy pia mlier la do'a-hala ralamni!”
Rma rtorna Yesus
47 La'pa Yesus entepartar mua'ta la yaltieri, dewade plinu-plinnianama riy lidan lawna ida nmai wia. Ramkek la lidan lawan de, ir mutwualli Yudas ed mak klidan nana re. Yudas de riy id la maka Yesus ha Nwatutu-nwaye'a termida wehrani woru re inhatti! Rmai pia rwakrian wia noma Yudas la' pa nkinnia Yesus. 48 Mere Yesus Nakot la Yudas Niwra: ”O e mniairia kinin de pa mu'olga Rimormior A'na A' dina, Yudasa?!” 49 La'pa maka Yesus ha Nwatutu-nwaye'a re ramkek memna hihi'a-yapyap miaka hota ha rhi'a re noma rakot la Yesus riwra: ”Matroma, amtemna wehla rilla pa amdawar wen ira?” 50 Noma maka ha Nwatutu-nwaye'a ida nleh dioinia wehlani pa ndawar doinia riy ida tlinni walli malganna. Riy de nhi' hopopna la imam-imam re o'ta lawanni. 51 Mere Yesus Nakot la re Niwra: ”Hadewa la hihi'a-yapyap miak emkade!” Noma Nteman la hopopan de tlinni dewade tlinni nkalwiedweda la' genni. 52 La'pa nhor nioma Yesus Nakot la imam-imam re o'tani-matni re rora mak katiaka roma krei o'tani-matni me Yahudi in letni-am letni mak kmai pia riwra rtorna Yesus la hande, Niwra: ”Hoi! Hya' nrei pia miodia wehla ara me kakaklu ma mtiorn A'u?! Yanpa la' miy wniarormi de A' di de riy yatyata-halala id A'u?! 53 La' lera-ler nek de A'g e gor miy pia it rewre'wa la'a Uplerlawna roma kreini, mere miy edonna mtiorn A'u. Mere la' dodo'ondi de Uplerlawna Nhur niohor miy pa mliernohora miy ralma-rior yatyatmi de, yoma ler di ed maka Uplerlawna Nhur niohora hegana amlawanni mak kar lia melmelli-kalkalamni pa nodi plolli.”
Petrus nreher doinia Yesus
54 Dewade rtorna Yesus pa rodia la imam-imam o'ta lawanni romni. Ne Petrus nlernohor reria mere edon nwakrian lia. 55 La'pa rte'ela hande noma rhokla ai lia rom de herni-gaini letgarni noma ramtatna pa ramriri ai, noma Petrus nla' pa namtatan wutga pa nre'ela namrir wutga ai lia riy mak kden la hande. 56 Edon nalo'on wali ne pat mak khoi-ktani ida namkek nana Petrus namtatan la' ai onni noma namkek tertehra na'nama nakot la niwra: ”Riy di nhi'inde nor Yesus rala' wutu!” 57 Mere Petrus nrehera, niwra: ”Eee! A' niek de uplinu-uplo' nohora riy de!” 58 La'pa edon nalo'on wali ne riy id owa'ana namkek nan Petrus na'nama nakot la Petrus niwra: ”Emeknekama dodo'ona o e muor walia Yesus talla.” Mere Petrus nwalolla niwra: ”Edonna, A'g edonna!” 59 Edonna nhal de jama id owa'an ne riy id owa'an nakot la niwra: ”Plol toto'a riy di de ed maka nhi'inde kora Yesus talla, yoma riy Galilea eda de.” 60 Mere Petrus nwalolla niwra: ”A'g e uplin niohora hya'a maka mukota re!” Pa la'pa Petrusa naltiertier mia'ta, de edon nalo'on wali ne hiwi lallu nkukule'ewa. 61 Noma Yesus mana Nakillia Petrus handedena. Noma Petrus nhioratni nko'i nana Itmatromni lirni la e'a, Niwra: ”Hota hiwi lallu edonna nkukule' ma'ta, la ler di de o' e mrieher nan olek A lia re'eni wotel wua”. 62 Noma Petrus nlergot la gen die na'nama nahedge'du la kniakru.
Rahe'i-ramali me ramuki-rama'ala Yesus
63 Riy maka katiaka Yesus, rahe'i-ramali Yesus me ramuki-rama'ala. 64 Rtutwu apitga Yesus matni na'nama rakot la riwra: ”Makwohorulu-ktatrulu O'a, pa Mpuet tek la he' ed maka kdupla O'a dena!” 65 Ral neka lira-tunu yahe'i-yamali pa ra rwohora-rtatra Yesus.
Rodia Yesus la maketlia lira-tunu agama
66 La'pa yawyawar ma'ta de Yahudi in letni-am letni rora imam-imam o'tani-matni me makwatutu-kwaye'a agama re rawok pa retlia Yesus lirni-tunnu. Noma mak katiaka Yesus rlidan nana E' pa rodia la maketlia agama lira-tunu re gaini ralamni. 67 Rakot la Yesus riwra: ”Mpualol tek la mai ami. Hota O' di de Ray Makamori-Kalewna O'a maka Uplerlawna Nano'taru?” Noma Yesus Nakot la re Niwra: ”La'pa A'ukot ho'a mana hota miy edonna mpiesiay A'u. 68 Ne la'pa A'utian miy ho'mana, hota miy edonna mpiet nana. 69 Mere hota edon nalo'on wali ne Rimormiori A'na A' die hota umtatan la'a Uplerlawna-Mempulwatnu mak kodi plolli la haneknek wawannu, de walli malganna pa Agor Uplerlawna Modi plolli.” 70 Noma honona ratian Yesus riwra: ”Hade emkade O' di de Uplerlawna A'nani toto' O'a?” Noma Yesus Nwalolla Niwra: ”Inhatta! Mimpiet nan oleka wa.” 71 Dewade riwra: ”Yana itwahak owa'an mak ktutrier (saksi) niohora lira-tunu ri. E lirni nek de nwaghal olek E inon wamueheni!”
Rodia Yesus la Pilatus de
1 Noma mak kdena re honona raprir pia rodia Yesus la Pilatus de. 2 La'pa rte'ela Pilatus gaini na'nama honona rto'on reria Yesus pa rakot la riwra: ”Ama, amlernan oleka la' riy di de Nodia lima-rora (masyarakat) la talla klierta ralamni yoma Entot ir pa rmalawna hairi Romawi. E' ed maka khi'a rira pa yana rpairia blasten la'a mak ktorna horta-hairi Romawi me Eniwra E' de ray ida E'a, maka Uplerlawna Nano'taru pa Namori-nalewna E rimormiorni.” 3 Noma Pilatus natiana Yesus niwra: ”Plola O' di de ray Yahudi id O'a?” Noma Yesus Nwalolla Niwra: ”Emek lir mak omukot de!” 4 Dewade Pilatus nakot la imam-imam o'tani-matni re rora riy mak kden la hande honona niwra: ”A'g edonna liernan etia hala kuku' la'a riy di totpena nlernana niukmu.” 5 Mere riy rariahu re edonna rwadura ne ramera-ramer matni pa riwra: ”Wniatutnu-wniaye'eni de e nwewr olek la'a Yudea pa nareiniande riy kokokna-rariarni. Enwag ulga la Galilea dewade Nhi' owa'ana la Yudea pa dodo'ondi Nmai meman la handi!”
Rodia Yesus la Herodes de
6 La'pa Pilatus natlin nan Yesus Nwatiawu Galilea, noma natiana niwra: ”O! Hota riy di de makden Galilea eda di?” 7 La'pa rakota riwra Yesus de ha Nwatiawua leta-ruhuna maka Herodes nodi plolli la, dewade Pilatus nhopan pa rodia la Herodes de. La' lera de mana Herodes ed walia la Yerusalem. 8 Noma Herodes la'pa matni namkek nana Yesus dewade nahepur wenna yoma la' mahnek memna ralamni nwakwak de pa enor rwatroma. E wakwakni de totpena Yesus Ntutga hihi'a-yapyapi mak kamehi-kayona pa enamkek memna, yoma enatlin olek la'a hihi'a-yapyapi mak kamehi-kayona maka nhi'inde Ha Nhi' nan de. 9 Noma Herodes natian la'a-maiya. Mere Yesus Nherieri tio'owa. 10 Imam-imam re o'tani-matni rora makwatutu-kwaye'a agama re, pa honona rewre'wa rtutrier lia hande pa rotil reria hala la Yesus de rkamota-rkama'ara. 11 Dewade Herodes nora makodi keki-rautu mak katiak Herodes rod lia'a-rod miai Yesus la yahe'i-yamali. Rohoga rain plalahwa la Yesus pa emeka ray-ray naniayarni, nhor nioma ra'enyatg owa'ana la'a Pilatus. 12 La ululu de Herodes nora Pilatus emeknekama pat eriariai mere la' ler de meman pa rwali owa'an la emeknekama am nora hyalli.
Retlia de rukum penna Yesus
13 Pilatus nawoka-nale'ga imam-imam o'tani-matni, in letni-am letni ror wut nieka lima-rora honona. 14 Na'nama nakot la re niwra: ”Mimiottiarga Hadi pa Nmai a' die me miwra E' ed maka khi' pa rirahu rmalawna horta-hairi Roma. Pa la'pa dodo'ondi de a'utian momuog olekwa la miy gaimi ralamni. Mere hala id mana a'g edonna liernana emeka mikot olek la mai a'u. 15 Hade emekwalima Herodes ralma-riorni, yoma Herodes nek de na'enyat owa'an pa nmai it di. Tamkek nan memna la' riy di, de edonna nhi' nana hadom de npa'eini-npahala totpena rukum penna. 16 La' hade pede hota aliwra nanpena agolin doinia la.” 17 Yoma nhi'inde la'a lerlalawna Paska Pilatus nollia riy Yahudi maka ha rukmu re id la la' pa nler la lima-rora. 18 Dewade riy honona maka kden la hande riarin tar lia nhiaunu riwra: ”Rwenna Yesus de! Ne muolin doin Barabas la!” 19 Barabas di de ed maka e rho'la taru la roma nhio'la yoma narieiniande riy rmalawna horta-hairi Romawi la'a kokokna-rariarni la leta ralamni la'pa nwunu-nwenna rimormiori. 20 Mere Pilatus niwra nolin doinia Yesus. La hade pede nakot owa'an hade la riy honona re. 21 Mere rhaun-rhaun pa riwra: ”Rla rwair neka wa! Rla rwairia la auwlakra hananni!” 22 Pilatus nakot lira re'eni wotellu de niwra: ”Mere halli hya'a pede? A'g edonna liernana do'a-hal maka kariei pia totpena rukum penna di! Pede hota aliwar nek wa nanpena agolin doinia la.” 23 Mere honona edonna rwayow o'tani. Rhaun-rhaun matmiati pa riwra: ”Rla rwairia, rla rwairia la auwlakra hananni!” Pa la'awa hohoni dewade mak khaunu re ra'unut wa. 24 Pede Pilatus natrernia niukum matmiati la Yesus, yoma riy honona wakwakni inhatta. 25 Ne Pilatus nolin doinia Barabas maka ha rwaka, kennama e' ed maka ha rho'la taru yoma nhi' kokokna-rariarni ne nwunu-nwenna rimormiori. Mere Pilatus nala Yesus la ira totpa rodia la'pa plolli nek la ira wniahi'ini wa.
Rwairia Yesus la auwlakra hananni
26 Noma ra'ala Yesus pa rodi rla'awa. Rla' noma rwatrom nana riy Kirene ida, nwawa Simona la' talan letgara pa niwa nla'awa la' letlawna Yerusalem. Dewade rte'la la Simon na'nama rtekua pa nre'ela nakwara auwlakar de pa nlernohor reri Yesus. 27 Rirahu rlernohor reria Yesus pa rala' wutu. Me la' lidan lawan de, patke'a doma e ror wali pa koko'a-herer nohora Yesus. 28 Mere Yesus Nkillia na'nama Nakot la re Niwra: ”Pat Yerusalem miy re yana mkiakur nohora A'u. Mkiakur nohor neka miora upmi-a'nami. 29 Yoma hota nte'ela la' lerni de riy riwra: ”Adoh! Patke' mak kakleha upa-a'na re ra'unut matmiati ee!” 30 La' ler de mana hota riy rakot la wo'ora re riwra: ”Wo'ormi re mtiuin pa miutin wen ami,” me rakot wali la'a wo'or kuke'a re riwra: ”Mia mpiupun wen ami ee!” 31 Yoma la'pa riy rhi' emkadi mai A'u mak kakleha do'a-hala de, hya' ho'a ha rhi'a la' riy dodo'a-halal miy re! A' die nek de emeknekama ora-au muaka kmormior mia'ta pa ai edon na'an doinia la. Mere miy miaka khi'a-kyapi do'a-hal miy re hota emolannekama ora-au muaka kerna-khag olekwa pa rhoplial walia la ai mormiori ralamni de nram doin momuoga la!” 32 La hande mana hota rod wialia riy yatyata worg maka e riwra rla rukum penna nohor wali Yesus. 33 La'pa rte'ela gen miaka ha rweta la Riy Ruri-Kliaklu Genni, dewade rla rwairia Yesus la auwlakar hananni me rla rwairia riy maroro'a re, id la malganna, id la malwiru ne Yesus Nden la letgara. 34 Noma Yesus Nsumbain la Niwra: ”Amee! Yana mtio'ona harilla' do'oni-halli wawannu, yoma hari e raplin niohor ma'ta hya' maka ha rhi'a re ee!” Noma rdurmu-rhakra Yesus naniayarni de rnairia patui (undi). 35 Rirahu mak ktutrier lia hande ramkek momuoga. Yahudi o'tani-matni nek de mana ertepartarlia rwali-rwalliohora Yesus pa riwra: ”Hota la'pa plola la Enhi'a Ray Makamori-Kalewna, maka Uplerlawna orgahani Nwalir niana, de tamkek teka hota Nodi plolli pa Nalewna E inon wamueheni pa emeknekama Enamori-nalewn oleka riy meheni?” 36 Makodi keki-rautu re mana rre' wal pia rwali-rwalliohora Yesus. Rmai pia riwra rala anggur turnu mak milmilu la Yesus. 37 Noma rakot la: ”La'pa O' di de riy Yahudi Rayni id O'a, de Mulewan teka inon wamuehemu.” 38 La'a auwlakra walli heyanna, la Yesus o'tani de e rhorat targa: ”Yahudi Rayni inhatti.” 39 Riy yatyat id mak kden la auwlakra hananni de nre' wal pia napolu-naliella Yesus pa niwra: ”O' di de Ray Makamori-Kalewn id O'a, pa Mulewan teka O muor ami!” 40 Mere riy yatyat mak handina de npolliohora mutwualli de niwra: ”Hoi! O' nek de e rukum temna la E'a ne hota o' mana muati wial wia. Ne o' edonna mumta'ata Uplerlawna niukamnu?! 41 Itro'a tlernana niukum di mak lol talanni yoma la'a itro'a do'oni-halli mak kariei. Mere E' de Nakleh do'a-hala kuku'a.” 42 Noma nakot la Yesus niwra: ”Yesus, Mhuoratreri a'u la'pa Omhi'a Ray mak ktorna-krautu lodanmu-hairmu.” 43 Noma Yesus Nakot la: ”Mpuesiayo, ler di meman pa omuor rewre'wa A lia Firdaus.”
Yesus Natuinia aranni
44 Edonna nhal de la'pa lera nwawuau ro'onni (jam termida wehrani woru) mere la'a noh de tetema nekpa mel'uta-maliena nodia pa lera nher miemna (jam wotellu) 45 yoma lera edonna nhita-nrepra. Noma plin-plinnianamde kok lawna maka ha ra rahew tiarga liolgeni la'a gen mak kmou-kwitna la Uplerlawna roma kreini ralamni totpa riy edon rler la rialma, de ema rlihirwah'a la woru. 46 Dewade Yesus Nhaun matmiat pia Niwra: ”Am ee! Aghoiya A ino'nu pa Mkienia la limmu rora ralamni!” La'pa Naltier pia nhorwua noma Nmat wia. 47 La'pa makhi' o'tani la lidna makodi keki-rautu, mak katiak reri Yesus de, namkek memna hare honona dewade na'uli-nawedia Uplerlawna pa niwra: ”Plol toto'a la Ha Nakleh do'a-hala!” 48 La'pa rirahu mak kawok la hande ramkek momuoga hare honona dewade honona rla'awa de ralamni rmolu-rhelam doin la. 49 Mere Yesus loiwialli-talanwalli re honona, me la' walia a'na pat maka kwatiawua Galilea pa klernohor E'a, rtutrier niek la oliet pa ramkek momuoga hare honona.
Rtamni Yesus
50-51 Noma riy id la hande de nanni Yusup. E' de riy mak kwatiawua leta Arimatea la'a Yudea. E' de riy samomuou ida, mak kden la plol wawna la Uplerlawna yamkekni. Ne nhi'inde ralamni nod rer lia wniei la Uplerlawna hota Nwalia Ray id pa Nma Ntorna lodna-hairi. E' mana nhi'inde nre' wal pia nla'a riy maketlia lira-tunu la agama hanni, mere la' ler de e edonna nre' pa nwayow nohora maketlia lira-tunu re lirni pa rwenna Yesus. 52 Noma Yusup di nla' pa nwak la Pilatus totpena na'ala Yesus inonni mak kmati olek de. 53 Nhor nia'nama nla nalernia Yesus mak kmati olek della la'a auwlakra hananni. Na'nama nala kok lawan wawahra mak kamnurnuhru na ntomna. Nhor nia'nama nla nle'er targa la'a ketar maka ha rawte'ta nana. Hoi-kietar de edonna rnairi et mia'ta la'a mati doma. 54 La ler de, ler maka rwahi' targa hare honona pa rwei-rnara Sabat lerni (ler maka Yahudi re edon rkar lia), yoma nhi' kuku' owa'an de Sabat de ntutu-nte'ewa. 55 La' ler de de a'na pat mak kwatiawua Galilea pa klernohora Yesus rmai pia rlernohora Yusup totpena ramkek memna hota nle'er targa Yesus la' hoi-kietra meni ralamni. 56 Nhorwua noma rla'awa pa rwahi'a-rwayod tiarga wu'ru mak kahuwu mikmikri totpena rma rawu'ru-ragania Yesus mak kmati olek dewa. Mere la'pa nte'ela la'a Sabat lerni maka Yahudi edon rkar lia, dewade honona re rrena pleini, yoma rlernohora agama deullu-tatarni lirni.
Yesus Nmori owa'an wa
1 La'pa yawyawar ma'ta la krei lerni dewade a'na patke'a re rodia wu'ru mak kahuwu mikmikri re pa rla'a lien maka ha rkenia Yesus inonni, totpena riwra rla rawu'ru-ragania Yesus maka nietra olek la'a hoi ralamni de. 2 Rla pa rwakriania hoi die onni dewade ramkek de wat liawan maka ha ra rherit targa hoi die nhiarni ema rwaklol dioin oleka wa. 3 Dewade rodi liarni pa rler la tiamin mat gen die ralamni, mere edonna ramkek nana Itmatromlawanni Yesus inonni, mak kmati olek dewa la' hande. 4 Rtutrier die rmeh'a rahihi'a la genni yoma wniarorni la maka ha rwahaka de. Noma plinu-plinnianama riy woru rlipa-rka'ma nohora naniayarni pa rtutrier wiut lia ira. 5 Ir rheduma, ne rwaltiora-rwaltieman tar lia la'a riy maroro'a re gaini ralamni. Mere riy maroro'a re rakot la ira riwra: ”Hya' nrei pia mpiahaka riy mak kmormiori la'a riy mak kmati re wokni-le'enu?! 6 Mak ha mihak de edonna Nden olek la handi wa yoma Nmori olekwa! Yanpa mhioratdoinia E nnio'oni mak kakot nohora hota Nmori owa'ana. Enakot nohora hade tiy miy la' ler maka miora mdien ma'ta la' Galilea. 7 E lirni la' ler de de Niwra hota Rimormiori A'na de rala la'a riy mak penpuen lia do'a-hala, totpena rla rwair wenna. Mere la'pa nodia ler wotellu de hota Nmori owa'ana.” 8 Dewade a'na patke'a re nhioratni nla'awa temni la'a nnio' de. 9 La'pa rpolan wa, noma rakot momuoga hya' maka ha ramkeka rella' maka rlernohor reria Yesus re termida wehrani ida re ror wutga maklernohor reri re honona. 10 A'na pat maka kodia kot de la'a makodia Yesus lirni-tunnu re rora riy korni, de Maria Magdalena, Yohana, Yakowsi inni Maria, me la' walia a'na patke'a dom pali mak kor ir talla. 11 La'pa makodia Yesus lirni-tunnu re rora riy korni ratlin nana patke'a re lirni mere lirni re edon rla' nana ira ralma-riorni pede edonna rpesiaya re. 12 Mere Petrus nleretniekla namat pa nawlar lia'a hoi-kietar de, la' noma nru' pua namkek la lien de ralamni, ne namkek nan to'a kok lawan wawahra de. Dewade nawal wia de nwarora-nwalai nieka hya'a maka ha rhi' oleka rewa.
La' Emaus la talan letgara
13 La' ler de nekpa maklernohor reria Yesus riy woru, ralala' rer pia riwra rla'a let maka kwawa Emaus. Let de olietni la'a Yerusalema, la'pa edonna nhal de yala' nana kilu termida wehrani ida. 14 La' talla plahwani de e rwahagaur nohora la'a hya' maka ha ramkek oleka rewa la'a Yesus matmiatni. 15 La'pa rwahaur reri ne idma nal ralma-rior la ida, dewade Yesus Nmeh'a Nma Nala' wut lia irrora. 16 Ramkek rer toto'a Yesus, mere la'a Uplerlawna hihi'ini pede nhioratni re emeka ha kniukmu la'a Yesus eda de. 17 Noma Yesus Nakot la Niwra: ”Hya' ed maka ha mpiahaur lolola rina?” Noma rrora rtut tiaru de, gaini nmalui dioin la. 18 Dewade mak kwawa Ekliopsa natiana Yesus niwra: ”Ama, yanpa O' de do'ona-dakna id memeh'a la'a Yerusalem di maka kaplin nohora hya' maka ha rhi' la'a melul diena?!” 19 Noma Yesus Niwra: ”Hya' ed mak ha rhi' nana la Yerusalem de?” Rrora riwra: ”O e muplin niohora hya' maka ha rhi'a la Yesus riy Nasaret de? Makwohorulu-ktatrulu id eda de, Ntutga plolli-mneheni la'a wniatutu-wniaye'a me hihi'a-yapyapi mak kamehi-kayona (mujizat). Ne nhiolli-lietni de edonna nhala la'a Uplerlawna nor riy honona yamkekni. 20 Imam-imam o'tani-matni, me mak kodi plolli la mai ami rala pa rukum penna la'a auwlakra hananni. 21 Mere la'pa edon rwunu-rwen ma't E'a de ami e mha'ar a aran mamni la E'a totpa E' ed maka kwe'er doin luwu-a'na Israel it la kokgohonu. Ne rerehniana la' ler di lera wotellu la'a maka ha rwunu-rwenna Yesus mere Uplerlawna edonna Namori-nalewn luwu-a'na Israel ma'ta. 22 A kniarwial miamni a'na patke'a wo'ira mana e rhi'a pa amheduma yoma yawyawar ma'ta de rla'a hoi wawannu 23 mere edonna rlernana inonni maka ha rle'er targa la hande. Pede rawal pia e rwahaur nohora de ir rlernan to'a Uplerlawna hopopanni-lili'irnu doma. Ne hopopna re riwra Yesus Nmori olekwa. 24 Ne a mutwual miamni riy wo'ira rla'a, pa ramkek olek walia de plola la a'na patke'a re lirni, mere eneknek to'ama Yesus nampena edonna ramkek nana.” 25 Noma Yesus Nakot la re Niwra: ”Miy podakmi nee! Miy edon mimpiesiaya makwohorulu-ktatrulu lirni-tunnu. 26 Hota plol toto' meman de Makamori-Kalewan de Nler la kropanni-krieutnu ri pa Nmati, nampena Nmori owa'ana me Nlernana ya'uli-yawedi yoma Uplerlawna lirni mak makwohorulu-ktatrulu rakot targa emkade toh?!” 27 Nhorwua noma Yesus Nakot nohora ir la'a hya' maka ha rhorat targa la Puka ralamni la'a E hihi'ini-yapyapni, nwaga la Musa Pukni ralamni, me la' walia makwohorulu-ktatrulu korni Pukni ha rakotkota. 28 La'pa rwakriarian liolol wa la'a let maka ha ra'oin nan de. Dewade Yesus Ntot pa Nodi liarni. 29 Mere rrora rwakwak Yesus pa Nwarini plein riwra: ”Ama, twarini pleini, yoma ler ntuini olekwa ne mela ndamit nan O wa, pa tanin nek wa.” Pede Yesus Nod niohora re pa rwarin lia mel de. 30 La'pa riwra ra'an wut lia mei wawannu, dewade Yesus Na'ala roti na'nama Na'uli-nawedia Uplerlawna na'nama Nhawi-nhawia pa Nala la ira. 31 Dewade rrora matni ema rwe'er doinia pa ratga Yesus eda de! Mere Nleretniekla ema Nwatlen nana. 32 Noma idma nakot la ida: ”La'pa emkameni ho'mana lir maka Ha Nwahaur nohora mai it la' talan letgar de me maka Enakot nohora Puka lirni mai ita nhi' it pa it ralamni nahepuepru!” 33 La'a mtatande nekpa radil doin meman pa rawal lia' Yerusalem. La'pa rte'ewa, de rlernana mdudud niana maklernohor reria Yesus riy termida wehrani ida re e ror walia maklernohor reria Yesus korni dom pa e rawok taru. 34 Noma rleretniekla mak kawok taru re rakot la riy maroro'a re pa riwra: ”Ee! Plola! Itmatromni Nmormior owa'ana! Entutg oleka inonni la Simon Petrus!” 35 Dewade maklernohor reria Yesus riy maroro'a re wal pia rwahaur nohora hya' maka ha ramkek la'a talan letgara, me emkameni la irat niohora Yesus de la'pa na'nama Ntepartarlia Nlihira-nhawia roti la ir gaini ralamni.
Yesus Nharia inonni la'a maklernohor reria
36 La'pa rtepartar mua'ta la wniahauru, dewade plinu-plinnianama Yesus Nmeh' Ntutrier lia ira letgara-mneneheni na'nama Nwak kalwieda la ir honona Niwra: ”Awuak pa Uplerlawna Nala kalwiedni-paitiotni tiy miy!” 37 Honona re rhedu hmuakmuakur pa ramta'ata, yoma ratniekame yanpa mati lianu (bontiana hantu). 38 Noma Yesus Nakot la re: ”Nihya'pa mimta'ata me miy ralammi worwuorga?! 39 Mimkek la A li'mu-la'ku ri totpena miatga A' orgah'u inhatti. Mhiai tek la A ino'nu, yoma mati lianu rakleh ruri-kliaklu, emeka A ino'nu di!” 40 Noma Ntutga limni-lakni la' ir honona. 41 Ne irahepuepru mere rwer rer mia'ta wawni pede emeknekama ir edonna rpesiay toto' ma'ta. Dewade Yesus Natiana re Niwra: ”Miy yamananmi etla? Mial oke' mai A'u.” 42 Noma rala i'na tniunu tnieti id la. 43 Yesus Na'ala i'n de na'nama Na'ana la ir gaini ralamni. 44 La'pa nhorwua noma Yesus Nakot la re Niwra: ”A'ukot oleka tiy miy wia la' lera itden wut mua'ta la geni ida giwra hare honona mak ha rhorat targa la Puka Musa, onde Puka makwohorulu-ktatrulu me la'a Puk Masmur ralamni mai A'u de hare edonna rhala ne plol toto'a pa rtutu-rte'ewa.” 45 Nhor nioma Yesus Nharia ir ralma-riorni totpena rna'erit nana hya' maka Yesus Nakot nohora Puka lirni. 46 Nakot la re Niwra: ”La'a Puka ralamni de e rhorat targa de: Ray Makamori-Kalewan de hota Nler la kropanni-krieutnu pa Nmati, me hota nleretniekla nodia owa'an lera wotellu pa Nmori owa'ana. 47 Ne hota maklernohor reri A'u de rnairia A plola-mneh'u pa rla rakot nohora la'a rimormiori nohkerna wawannu la'a hairi-hairi me noha-rai honona rpa rhoitio'or doini-rtahnei dioinia do'oni-halli totpena hota Uplerlawna Namou-nawitna do'oni-halli re. Ne lir kalwied de rakot nohora de rwag ulga la'a Yerusalem nanpena nwewar noheri woru-lyanti nayanni. 48 Miy er mak kamkek memna A matmia'tu-mormio'ru pa mlia' mikot nohora la' meni-meni to'owa. 49 Ne hota A' mana pena u'enyatga Uplerlawna Nhiwni maka A A'mu Nano'targa tiy miy. Mere mpiei niek la' let di, pa la'pa Uplerlawna Nala E rurni-laini tiy miy!”
Yesus Narian pa Nla'awa Ilyamou-Watyatoha
50 La'pa nhorwua noma Yesus Nodgiot ir pa rla'a leta Betania onni. Rla'awa la hande noma Yesus Nran limni pa na Ntera-ndema re. 51 La'pa Nran rer mia'ta limni pa na Ntera-ndema re dewade Narian pa Nla'awa Ilyamou-Watyatoha, pa rmemeh'a rtutrier lia hande. 52 Honona re rru'u-rtowar la E'a nhor nioma rawal lia Yerusalem de, ralamni rahepur memna. 53 Ne lera-lera nekpa e rawok tar lia Uplerlawna roma kreini pa ra'uli-rawed reria Uplerlawna.
Yesus Kristus de emeknekama Uplerlawna lira-nnio'oni me lelerni la'a rimormiori nohkerna wawannu
1 Ululu meman la'a noha-rai edonna nwo'ti-nhar mia'ta, de (Yesus) maka rweta la' Uplerlawna Lira Nnio'oni-Wawa Niatnu de ed olek la wa. E' de e Nor wutga Uplerlawna la' lir ida, ne E' wal pia Uplerlawna inhatta. 2 Ululu de Enor wut lia Uplerlawna pa 3 Ena'ohi-na'ara, Nakoki-nayap miemna haneknek wawannu mak kden la noheri woru-lyanti nayanni, Nlernohora Uplerlawna lirni. 4 La'a rimormiori noh keran di honona re de mormiorni onni-ga'arni nwatiawu E'a ne la'a mormiori-dardiari plollola inhat de pede rimormiori ramkek la lelerni. 5 E' de rwet walia la'a Lelerni de. Yoma E' ed mak khi'a repreparni la melmelli-kalkalamni ralamni, ne melmel de edonna nwarehi nana pa nkaduw nana Lelerni de. 6 Noma Uplerlawna Nhopan doinia riy ida de nwawa Yohansi 7 totpa nma nakot nohora Lelerni de yala'ani, me la'a Yohansi lirni de pede riy honona rlernan talan pa rpesiaya. 8 Yohansi meman nek de Lelerni atia' hade, eneknek to'ama e nma nakot nohora to'a Lelerni de. 9 Yoma Lelerni mak kaplola, de maka Nhita-nrepar nana rimormiori honona hota Nerun la nohkerna wawannu. 10 Enmai die pa ed olek la noha wawannu. Uplerlawna Na'ohi-na'ara nohkeran di de Nor wutga E'a mere emkade ho'mana nohkeran di edon rwayow nohora E'a. 11 E' orgahi Nmai lia E let wamueheni mere E luwnu-a'nani harahu edonna rreinian E'a. 12 Mere he'a-he' maka e rreinian E' pa rpesiaya de hota Enala rpa rre'ela Uplerlawna upni-a'nani. 13 Ir edonna rwal lia Uplerlawna upni-a'nani de yoma rlernohora rimormiori nhioli emeka muanke' id nor hawni ranina yoma wniarorni-wnialaini pa hota ha rayor nian keke'enku'a ida. Yoma mormior warwuar die edon nwatiawua rimormiori mere ha nwatiawu meman la Uplerlawna. 14 E' maka ha rweta la Uplerlawna Lirni la'a rimormiori (de E' de Uplerlawna wali E'a) mere Nwali olek la rimormior pa Enden wut lia mai ita la' noh keran di la' ler ho'ke'eni, ne la' ler de itamkek memn oleka E preheni-mkaini, de preheni-mkaini la Wutmueha-Laimieha mak kwatiawua Amlawanni la Ilyamou-Watyatoha. La' E' pede it tat niohor memna hya' ed mak kaplol la' Uplerlawna, me tat niohora E ralam kalwiedni mak kareh mieman de mai ita. 15 Noma lera ida ne Yohansi Nmai die nakot nohora E'a, de nhar lirni pa niwra: "Hadi ed mak a'ukot nohor oleka la' miy, de agiwra hota Enmai die ntawli'ir mai a'u, mere E tullu-petanni nareh dioin a'u, yoma a i'nu edon nmor dioin ma'ta a'u de E' ed olek la wa." 16 E' de npenpuen niohora kalwieda-paitiota. Ne la' E ralam kalwiedni de pede E' ed mak ktowr reria ra'ani-pallu pripanni-fa'anni mai ita. 17 Orgahi-Orha'a deullu-tatarni de itlernana la Musa. Mere itat niohora hya' ed mak kaplol la' Uplerlawna me la' E ralam kalwiedni mak kareh mieman de mai ita yoma Yesus Kristus e Ntutga hade mai ita. 18 La riy id mana edonna ramkek ma'ta Uplerlawna, atiaru Uplerlawna A'nani, Wutmueha-Laimieha, mak kora Amni Uplerlawna-Mempulwatnu rla' ihru ida-ralm ida. Ne Wutmueha-Laimieha de ed mak kalharia (ktutga) E Amni mai ita.
Yohansi nakot nohora inon wamueheni
19 Yohansi nakot nohora inon wamueheni de emkadi: La' ler ida ne in letni-am letni mak kodi plolli la Yahudi, mak kden la Yerusalem, rhopna imam-imam o'tani-matni pa rora riy makden Lewi rla ratiana Yohansi riwra: "O' di de he' o'a?" 20 Noma Yohansi nakot eti-kriahaya niwra: "A' di de Ray mak kamori-kalewna maka Uplerlawna Nano'taru atia' a'u." 21 "Hade emkade de o di de he' o'a? Yanpa makwohorulu-ktatrulu Elia o'a?"
Mere Yohansi niwra edonna.
"Yanpa Makwohorulu-ktatrulu maka ha rano'taru inhat o'a?" Yohansi niwra edonan wali. 22 "Demade mukot teka la mai ami he' o' dina de? Totpena amakot nohor o la'a riy mak khopan pa ama matian o'a." 23 Yohansi nakot la niwra: "A' di de riy mak kpolpuolu-khawaunu lola wo'orletna-kawurloini pa giwra: "Mpiale'era Orgahi-Orha'a loini-talanni."" Hya' ed maka Yohansi nakota de, de makwohorulu-ktatrulu Yesaya lirni la'a ululu memna. 24 Noma riy Parisi maka ha rhopan pa rma ratiana re 25 ratiana Yohansi riwra: "La'pa o' di de Ray Makamori-Kalewn atia' o'a, onde Elia atia' o'a ne Makwohorulu-ktatrulu maka ha rano' taru atia' walia o'a, ne hya'a nrei pia omhuarani riy?" 26 Noma Yohansi nakot la niwra: "A' di de agala gera ga gharania riy. Mere miy e mior wutga riy maka miy mieh'a nekane edonna miat niohor ma'ta E'a. 27 Hota Nmai pia Nlernohor a'u, mere awue'er doin lakni wniowni ho'mana a'g edonna puar nana." 28 La' hare honona de rhi' nana la leta Betania la'a gerlawna Yordan walli tipru, la'a gen miaka Yohansi nharani riy.
Yesus de emeknekama dum a'na maka ha rhi'a la tniuwu-nhiai la'a rimormiori do'oni-halli
29 La'pa repar dewade Yohansi namkek de Yesus Nmai wia, noma Yohansi nakot la niwra: "Mimkek ee! Uplerlawna Dum A'nani mak kuhi-kho'ora rimormiori do'oni-halli Nmai olek dee! 30 Hade ed maka a'ukota, mak ktawli'ir la mai a'u, mere inponni rehi a'u yoma a i'nu edonna ntor ma'ta a lia nohkerna wawannu de E' ed olek la wa. 31 La ler ululu de a'uplin mua'ta de he' eda makla' Uplerlawna Dum A'nani dena. Mere amua gal ger la ga gharani riy totpena atiutg E' la riy Israel re totpena rat niohora. 32-33 La' ler ululu de a'g edonna gat niohor ma'ta he' E'a. Mere Uplerlawna mak khopan pa agala gera ga gharania riy, de ed maka kakot mai a'u Niwra: "La'pa mumkek nana Uplerlawna Nhiw Lululli Nerun pa nden la riy ida, de hota hade ed mak kala Uplerlawna Nhiwni ka kharani." Noma la'pa ntutu-nte'ela' lerni de na'nama a'g e umkek de Uplerlawna Nhiw Lululli Nerun de emolmolla ma'nu lmo'ma maru mak kwatiawua lyanti, pa Ntai lia E wawannu (pa agat niohor E'a). 34 Pede la dodo'ondi de a'g ed maka kamkek olek memna la a ma'tu. Hade emkade pede a'g ed maka kakot nohora tiy miy die, la E' de de Uplerlawna A'nani E'a."
Mak kala ul pua klernohora Yesus
35 La'pa repar wa, noma Yohansi nora riy woru maklernohor reri e'a re rawali owa'an la gen die. 36 Noma Yohansi namkek nana Yesus nwehweti dewade nakot la re niwra: "Mimkeka Uplerlawna Dum A'nani inhatta!" 37 La'pa riy maroro' mak klernohor reria Yohansi ratlin nana ed lir de noma rora rla' pa rlernohora Yesus. 38 Noma Yesus Nkillia to'orni, de Namkek nana rrora e rlernohor reria E'a. Noma Yesus Natiana re Niwra: "Miy e mihaka hya'a?" Noma rrora riwra: "Rabi (Tungkurga), O genmu etla hanmeni?" 39 Noma Yesus Nakot la Niwra: "Ma mieh'a mimkeka." Noma rlernohora pa rla ramkeka Yesus genni. La' lera lia'ani (jam 4 ) de, noma ror rewre'wa Yesus pa rden wutu pa la'pa mela ndamit wa. 40 La' riy id la'a riy maroro'a ri, de Andarias, Simon Petrus hyalli. 41 La' pa nora Yesus rwahaur la genni nhorwua noma Andarias pleta-plet pa nla owa'an pa nla nwahaka hyalli Simon pa nakot la niwra: "Hyalia, ami e mpatrom nan oleka Mesias!" Mak ha nwet la Mesias de yawala Ibrani, mere la'a yawala Yunani de riwra Kristus, (de nnia'eratni de Ray maka Uplerlawna Nano'taru pa Namori-nalewna rimormiori). 42 Noma Andarias nodia Simon la' Yesus de. Noma Yesus Nkillia Simon na'nama Nakot la Niwra: "O' di de Simon, Yonas a'nani. Pena rwet o la Kefas maka la' yawal Yunani de rweta la Petrus," (de nnia'eratni de watu muetam kerna).
Yesus Npolga Pilipsu nora Nataniel
43 La'pa repar wa noma Yesus Nwaror pa Nla'awa Galilea. Noma Nwahak pa la'pa Nwatrom nana Pilipsu noma Nakot la Niwra: "Pilipsu, mua mliernohor A'u!" 44 Pilipus di de riy Betsaida ida di, ne Andarias nora Petrus mana rwatiawu wali hande. 45 Noma Pilipsu nla nwatrom nana Nataniel pa nakot walia niwra: "Eh, ampatrom nan oleka Ray Makamori-Kalewna maka Musa nakot nohora la Puk maka ha rhorat targa Uplerlawna deullu-tatarni me la' walia maka makwohorulu-ktatrulu ha rhorat tar walia. Hade de Yesus mak kwatiawua Nasaret, Yusup a'nani!" 46 Mere Nataniel nwahla lir de niwra: "Ah, Nasaret de kuku' nekane, Ray Makamori-Kalewna de Nwatiawu handena?!" Noma Pilipsu nakot la: "Mai pia mueh'a mumkek memna." 47 La'pa Yesus Namkek de Nataniel nmai wia, noma Nakot nohor Nataniel Niwra: "Mimkek la, makden Israel plollolli inhatta id nmai wiee! E' de maka ka'ohpa-kalahar atia' e'a." 48 Noma Nataniel natiana la Yesus niwra: "Tuna, la emkameni pede omuat niohor a yeh'wu?" Noma Yesus Nakot la Niwra: "Eh, Pilipsu edonna npol mua't o'a, de A'g e umkek nan o la' kar on id nayanni." 49 Noma Nataniel nakot la niwra: "Tungkurga, O' di de Uplerlawna A'nani O'a. O' ed mak khi' Ray lia Israel luwnu-a'nani." 50 Noma Yesus Nakot la Niwra: "O e mpuesiay yoma dodo'ondi de A'ukotiwra A'umkek olek o'a la'a kar on id nayanni?! Hya' maka kareh dioin memna A hihi'u-yapya'pu de, hota mumkek memna. 51 Plola mpiesiayo, hota mimkek nana lyanti naphyariari ne Uplerlawna hopopanni (malaikat) re hota rernu-rha'ata pa rmai lia Rimormiori A'nani A' die!"
He'i-hepru la'a makmehlim la leta Kana
1 La'pa lera woru rtaw dioinia pa lera wotell wua noma e rhi'a he'i-hepur la mak kmehlima la'a leta Kana, de Galilea letni ida. Ne Yesus inni ed wal lia hande. 2 Yesus Nora maklernohor reria re, rlernan walia polpuolu la'a he'i-hepur de. 3 La'pa anggur turnu maka ha remnia la he'i-hepur de nhorwua, noma Yesus inni nakot la niwra: "Yesus! Hare anggur turnu nhorwua." 4 Noma Yesus Nakot la Niwra: "Yan mukot mai a'u, ina. Edonna nte' ma'ta la Uplerlawna lerni pa Agharia ino'nu." 5 Mere Yesus inni nakot la mak ktulla-kari re: "Mliernohor neka hya' mak Ha Nakota tiy miy." 6 La hande de e rwahi' targa kuhi wonema, maka ha rhi'a la' watu, maka nhi'inde rken ger la pa rlernohora agama Yahudi deullu-tatarni pa ra rwuri-rohma. Kuhi re mniotni de edonna nhal de, ida, de na'nana potla rahu rehenu (100 liter). 7 Noma Yesus Nakot la mak ktulla-kari re, Niwra: "Mhiur ger la' kuhi re." Dewade rhur ger la kuhi re wonema pa rpenpuenu. 8 Noma Yesus Nakot la re: "Mia'ala ger de oke' la dodo'ondi wa pa miala la mak khi' o'tani la'a he'i-hepru." Noma rodia ger della la'a mak khi' o'tani la he'i-hepur de. 9 La'pa nto' targa nurnu la ger maka kwali olek la anggur de, de naplin niohora anggur de nwatiawua hanmeni, atiaru mak ktulla-kari mak khuri-kwalia gera la kuhi re nanpena rat niohora re. Noma mak khi' o'tani la he'i-hepur de nla nrehgorga a'na muanke'a mak kmehlim de. 10 Na'nama nakot la: "Nhi'inde la'a kniari emkari, de ral ulga anggur tur mikmikri, la'pa remun pa rmah wenna nanpena rala maka niemannu namnapnapla. Mere hadi de miy e mide' targa anggur tur mikmikir di pa na'nama milgota." 11 Hadi ed maka Yesus Nhi'a hihi'a-yapyapi mak kamehi-kayona (mujizat) mulaliaini mak ktutga Uplerlawna rurni-laini, ne Nhi' nan hade la'a leta Kana, Galilea letni de. La' hade totpena Entutga E preheni-mkaini la nohkerna wawannu. Dewade mak klernohor reri re rpesiay tioto' memna E'a. 12 Nhorwua noma Yesus Nora inni, amni-hyalli, me la' walia maklernohor reri E'a re rla'awa la'a leta Kapernaum. Rden nek la' hande pa lera ida-woru.
Yesus Nhokra-nlai mak ka'olu-kala'a la Uplerlawna roma kreini
13 La'pa Paska lerni nwakrian wia (de la' ler maka Yahudi rhoratreria tuini-wedni la' ler maka rwe'er doin la wutwutu-kokgohu la' Mesir) noma Yesus Nla'awa la Yerusalem. 14 La'a Uplerlawna roma kreini mak kden la Yerusalem de walli-walli, de Yesus Nhortiut niana rimormiori mak ranie'er la krei die herni-gaini pa hoi-wiatria pa ra'olu-rala'a pipi-duma, hayori-orpau me onu-ma'nu me rwahernu-rwahala kupna-kai. 15 Dewade Yesus Ntal niana tali id pa na Nhokra-nlai mak ka'olu-kala'a ror wutga nhiuri-wnia'an mak kden la hande, ne Nliwra pa kurna-kiatra re. Mei-kader no' hande maka rnairia ra rwahernu-rwahala kupna, de Nte'la rpa Nkowa-nwalia re pa nhi'nande kupna-kai re knunu-knera. 16 Noma Nakot la mak ka'olu-kala'a ma'nu lmo'ma maru re Niwra: "Hoi! Mrian doinia harella handi. Yan memmemna mhi'a A A'mu romni dilla ya'olu-yala'a geni!" 17 Noma maklernohor reri re rhoratnana la' Puka lirni niwra: "Mak A ralmu ha nko'i reria de totpena O rommu ed mak rimormiori rnairia pa rkola tieru-rawur nehla nek tiy O'a Uplerlawnu ne! Ne maka A ralmu nko'i reria de hota nod A lia matmiati-molmuolu ralamni." 18 Noma ina-ama ror wutga o'ta-mat let Yahudi re rapal lia Yesus pa rawowo'ora. Rakot la Yesus riwra: "Omhi' teka hihi'a-yapyapi mak kamehi-kayona (mujizat) la am di, totpena amatga de O hihi'imu-yapyapmu ri de e lol talanni." 19 Noma Yesus Nakot la re Niwra: "Hihi'a-yapyapi mak kamehi-kayona maka Atiutg tiy miy die de emkadi: hota mpieye'era Uplerlawna romni di, ne la' pena A'uriri owa'an la lera wotellu." 20 Noma riwra: "It upni-tgarni rkaria Uplerlawna roma kreini di la'a anni terampwogata wehrani wonema, ne Omiwra hota Omuriri tio'a la lera wotellu?!" 21 Mere e raplin niohora la Uplerlawna romni maka Yesus Nakot de, de E inon wamueheni inhatta. 22 Hade pede la'pa Yesus Nmori owa'an la matmiatni ralamni, de maklernohor reria re nhioratni e ndawar nana hya'a maka Nakot taru ri. Pede la' ler de meman pa rpesiay tioto' memna hya' ed maka Puka ha nakota, me la' walia maka Yesus Nakota de.
Yesus Nat niohora riy honona
23 La'pa Yesus ed ma'ta la'a Yerusalem yoma Yahudi lerlalawanni Paska de edonna nhor mua'ta, de riy harahu rpesiaya Yesus, yoma la'a hihi'a-yapyapi mak kamehi-kayona maka Nhi' nana re pa Ntutga Uplerlawna rurni-laini. 24 Mere Yesus Nmeh'a nekane edonna Npesiay ma't hare, yoma Enat niohor oleka rimormiori yehwani. 25 E' edonna Nwahaka lira yano'a-ya'atu la'a rimormiori yehwani la'a riy meni-meni to'a yoma E' nek de e Nat niohora rimormiori ihranu ralamni.
Yesus Nakot nohor la Nikodemus la'a mormiori-dardiari mak kod pia nodi liarni
1 Noma riy ida nanni Nikodemus, de riy Parisi ida mak kre' teman la mak ktorna watghudi la agama Yahudi. 2 La' mela ida de enmaiya Yesus pa nakot la niwra: "Am tungkurga, ami e matg oleka de Uplerlawna ed mak khopn O' pa Omua Mpuatutu-mpuaye'a rimormiori. Yoma riy meni ho'mana edon nhi'a hihi'a-yapyapi mak kamehi-kayona mak ktutga Uplerlawna rurni-laini emeka Omhi' nana re, atiaru me nodia Uplerlawna plolli." 3 Mere Yesus Nakot la Niwra: "Mpuesiaya, hota riy id mana edon rler wut et mieman la Uplerlawna mutnu-rahanu, maka Uplerlawna Nodi plolli la pa emeka ir Rayni, atiaru me, rmori owa'an e'a." 4 Nikodemus nwahla: "Tuna, hota emkameni owa'an pa rmori owa'an rimormiori ida mak khamto'a-khape'ew olekwa re? Plollola pa ta'en niana nla' owa'an la inni puhunni apannu ralamni pa rmori owa'an la re'eni wornu toh?!" 5 Yesus Nwahla Niwra: "Mpuesiaya, eneknek to'ama riy rmor niana la re'eni wornu, maka rnairia gera ra ramou-rawitna me la'a Uplerlawna Nhiwni Narialmua, demade nre' wut lia Uplerlawna mutnu-rahanu, mak Uplerlawna Nodi plolli la pa emeka ir Rayni. 6 Yoma rimormiori inonni de it inni ed maka nmor niana, mere mormiori-dardiari plalahwa de nwatiawua Uplerlawna Nhiwni. 7 Yana mpuer rer wiapmu la'pa Agiwra rayori owa'an miy hononmi nanpena mlier wut lia Uplerlawna mutnu. 8 Itala anni pa tsi'a la yawalliohora: La'pa anni nten liol meni-meni de plolli nek la et nnieni. Hota itatlina anni tnienni, mere itaplin niohora anin de nwatiawua hanmeni pa nla hanmeni. Hota emkade wal lia riy maka riwra Uplerlawna Nhiwni Nayor niana. Yoma it edon todi plolli la Nhiwni de onde tat niohora E yala'ani mere itamkek memna E limni enni la'a rimormiori nhiolli-lietni." 9 Noma Nikodemus nakot la niwra: "Hota hade emkameni totpena naplol la O ltiermu dena?" 10 Yesus Nakot la Niwra: "O' di de tungkurga Israel id o'a maka riy rhu'ru-rhelma. Ne hya' nrei pia omuplin niohora di? 11 Mpuesiayo! Amaltier di de amakot nohora hya' maka ami e mat niohora, ne amakot nohora hadoma de la'a hya' maka amamkek walia la a mat mamni. Mere miy e mihmena mrieiniana hya' maka amakot nohora. 12 Miy edonna mpiesiaya la'a hya' maka A'ukot nohora tiy miy la'a hya' mak kwatiawua nohkeran di. Ne hota emkameni targho'ola A'ukot nohora la Ilyamou-Watyatoha yala'ani?! 13 La' riy id mana edonna nha'at ma'ta la Ilyamou-Watyatoha pa nerun olek la noha wawannu di pa rakot nohora Ilyamou-Watyatoha gahani. Enekneka Rimormiori A'nani A' die mak kerun pa kakot nohora re. 14 Ne hota emekwalima Musa nwairia niy pi'ra la'a ai lioha id la wo'orletna-kawurloini (totpena he' ed mak kwatniar reria niy pi'ra de, hota rler la yamori-yalewna la'a niy mak kihi ira), de hota emkade wal lia, Uplerlawna Nror targ oleka de rla rwairia Rimormiori A'nani A'u la au hananni. 15 Totpena riy honona mak kpesiay A' die rlernana mormiori-dardiari pa nodi liarni. 16 De yoma Uplerlawna sniayanni la'a rimormiori nohkeran di inponni memna, pede Enala Wutmueheni-Laimieheni A' die, totpena ha meni mak kpesiay A' die hota edonna nler la matmiati-molmuolu pa rrinnia la ai mormiori ralamni mere nlernana mormiori plalahwa pa nodi liarni. 17 Yoma Uplerlawna Nalernia A'nani A' die, de edonna muai pia tiorna watghudi la nohkeran di. Mere Amuai die totpena A'umori-ulewna rimormiori. 18 Riy maka kpesiay A' die hota edonna rukmua. Mere riy mak edonna kpesiay Uplerlawna Wutmueheni-Laimieheni A'u de rto'on reria oleka yoma edonna npesiay Uplerlawna Wutmueheni-Laimieheni. 19 Rto'on reria, yoma A'u maka rweta la Lelerni de muai olek la nohkerna wawannu, mere rimormiori rreiniana-ra'nana ma'ta ha melmelli de. Ha rreiniana-ra'nana melmelli de yoma hihi'ini-yapyapni re lola yatyatni-halalli ralamni. 20 Rimormior miaka khi' yatyatni-halalli, rahankeran rer lia Lelerni de, pa rahmena rma rrehgorga Lelerni, yanhi'pa riy ramkek nana ir yatni-halli. 21 Mere mak kden la plol wawna, de nma nrehgorg Lelerni de, totpena riy ramkek nan memna de hya' mak ha nhi' nana re, de e nlernohora Uplerlawna ralma-riorni."
Yesus Nareh dioinia Yohansi makharani
22 La'pa nhorwua noma Yesus Nora maka ha Nwatutu-nwaye'a re rla'awa la Yudea liewnu. Enden nek la hande pa Nalera-namel nohora re, me la' hande de Enharan wialia riy. 23-24 La' ler de wal pia Yohansi edonna nla ma'ta roma nhio'la ralamni. Mere enharan wali riy la'a leta Anon mak edon olieta la'a leta Salim, yoma la' hande de ger lawna etla. Ne rirahu rma rod niohor e'a totpena rlernana nhiarani. 25 Noma maklernohor reri Yohansi re dom rora riy Yahudi dom to'a, de rahuri-rawo'or la'a deulu-tatra mak kakot nohora ramou-rawitna. 26 Noma rla rakot la Yohansi riwra: "Tungkurga, o' e mhuoratrer mia'ta riy maka kora o' pa kden la gerlawna Yordan walli dena, maka omukot nohora la rira. Riy de ed mak omtiutga mai ami me la' walia la' riy dom to'a, la ler ululu toh! La' dodo'ondi de Enharan wiali riy, ne riy liawanni e rla' E' de, me edon rmai owa'an o'a!" 27 Noma Yohansi nakot la re niwra: "Emkadella wa. Yoma rimormior id ho'mana ta'en niana rhi' hadomdoma, eneknek to' pa la'pa rlernana ra'a-palu (karunia) la Uplerlawna, nanpena rwo'la-rlekur la hare honona. 28 Miy orgahami nek de mitlin oleka la mak a'ukota re agiwra a' di de Ray miak kamori-kalewna atia' a'u toh! Rhopan nek a' pua a lia ulga E'a. 29 Ne la' dodo'ondi de A ralmu nahepuepur reri yoma Mak awuahi' targa talla la E' de Enmai olekwa di. A' niek de emolmolannek to'ama muanke'a pliolioini. Ne E' de emolmolan nekama muanke'a mak kiwra kmehlima. A'g wuahi' targa hare honona la'a muanke'a mak kmehlima de mehlimni-marya'ani. Ne la'pa lerni ntu'tu pa muanke' de nor hawni rler la ihyida-ralmida de a'uhepuepur nohora. 30 Uplerlawna ralma-riorni de totpa rimormiori ya'ulli-yawedni la E'a na'ititar rer lia, mere totpa yeher to' pa A' die Adien la li'iru. 31 E' ed mak kwatiawu heyanna, pa ed maka kareh momuou lia riy honona. Mak kwatiawu nohkerna wawannu de riy nohkerna, pede naltier die nakot nohora nohkerna gahani. Mere E mak kmai die Nwatiawua heyanan pa tullu nareh dioinia hare honona. 32 Pede Naltier die Nakot nohora maka Namkeka me maka Natlina, mere rimormiori nohkeran di edonna rpesiaya hya' ed maka Ha Nakota re. 33 Mere riy meni mak pesiaya maka Ha Nakot nohora re de, hare er mak kwayow nana Uplerlawna lirni re er mak kaplola. 34 Yoma Yesus, maka Uplerlawna Nhopan pa Nmai die ed mak kakot nohora Uplerlawna lirni-tunnu, yoma Uplerlawna Nal oleka E Nhiwni pa Napenga ihranu ralamni. 35 Ne Uplerlawna, Amlawanni de Nhi' kalwiedweda A'nani de, ne Nal oleka plola-mneha pa Ntorna-nrautia hare honona. 36 Pede riy maka kpesiaya Uplerlawna A'nani de, de hota nlernan mormiori plalahwa pa nodi liarni. Mere la'pa riy maka edonna klernohora A'na de hota edonna nlernana mormiori-dardiari pa nodi liarni, mere hota la' lera-mela ri de Uplerlawna Nto'on olek ir la hala pa rden rer niek la Uplerlawna niukamnu pa nodi liarni."
Yesus Ntutga inonni la'a pat Samaria pa emeka Ray Makamori-Kalewna inhatta
1-3 Noma riy Parisi re ratlin nan de riy liawanni rlernohor reria Yesus me rwak pa Nharania, de liawanni reh dioinia la mak klernohor Yohansi. Mere la'a plollolli de Yesus edonna Nharani, mak kharani de riy maka Yesus ha Nwatutu-nwaye'a re. Mere la'pa Itmatromni Natga de riy Parisi ratlin oleka hya' ed maka Enora E limni-rorni rhi' oleka re, noma Nwatitin la Yudea pa Nawali owa'an la'a Galilea (yanpa Parisi re rhi' yatyat la E'a). 4 La' yala'ani plahwani de hota Enlol wal lia Samaria. 5 Noma la'pa nte'ela Samaria letni mak kwawa Sikhar. Let de edonna olieta la' gen miaka Yahudi re upni-tgarni Yakop nala la a'nani Yusup pa nhi'a la gahani la' ler ululu. 6 La' hande, de Yakop gera tnipnu etla. Pa Yesus Nala' nan de nmah wenna, noma Namtatna pa Nrena la'a gera tnipu die onni. La'pa edonna nhal de lera nwawuau ro'onni. 7-8 Dewade maka Yesus ha Nwatutu-nwaye'a re rodi liarni la leta ralamni pa rla rawelia ya'ana-yemnu. Edon nalo'on wali ne pat Samaria ida nma tip gera. Noma Yesus Nakot la Niwra: "Ina, mtiulan pa muala ger de oke' pa Agemnio?" 9 Noma pat Samari' de nakot la niwra: "Tuna O' de riy Yahudi id O'a, ne a' di de Samaria id a'u. Ne emkameni owa'an pa Mpuak ger la mai a'u?" Enakot emkade yoma nhi'inde makden Yahudi rmakriarnia makden Samaria pa edon rora pa rwatamputu. 10 Noma Yesus Nakot la Niwra: "Ine, la'pa omuatga de he' to'a A' di me muat niohora Uplerlawna ra'ani-pallu maka Enala rimormiori, de hota omueh'a neka ed mak kwaka la A' pua omuemnia. Ne hota A'g ed mak kala ger mormiori-laliahu della' o'a." 11 Noma pat Samari' de nakot la niwra: "Hota Tuna nakleh kewtu ne ger di mana kdielma pa hota Tuna Nlernan ger mormior dilla hanme? 12 Yakop, a upa-tgar mamni de ed mak kala gera tnip dilla mai ami. E' nek de nma nala ger di pa nemnia me la' walia upni-a'nani ror wutga nhiurni-wnia'anni mana remnu ger di. Pa Tuna yanpa Natniekame Tuna inpona narehia Yakopa?!" 13 Noma Yesus Nakot la: "Hota he' ed mak kemun ger di de hota nahekru tiernu (tiernu nkern) owa'ana. 14 Mere la'pa he'a nemnia ger mak hota Agala, de edon nwahak owa'an ger pa nemnia. Yoma ger mak hota Agal di, de nwal lia ger ormata la inonni tetema, ne nwahi'da pa nwau liora, totpena riy de nlernana mormiori-dardiari plalahwa pa nodi liarni." 15 Noma pat de nakot la niwra: "Tuna, emkade de, Muala ger de mai a'u, totpena yana a tie'ru nkern owa'ana. Ne totpena yana uprehen nek la mua tipua ger di wa." 16 Noma Yesus Nakot la Niwra: "Mlia' pa mpuolga muanke'emu pa mrio'a mmiai." 17 "A'ukleha muanke'a tune!" Yesus Nakot la: "Plola la o lirmu. 18 Yoma omuehlim nan oleka re'eni wolim pa. Ne muanke' maka omuora mhiol wiut lia dodo'ondi, de o muanke'emu atia' hade." 19 Noma pat de nakot la Yesus niwra: "Na'nama agatga tuna de makwohorulu-ktatrulu id O'a. 20 Makden Samari' ami, up mamni-tgar mamni rhoi lima-rtan riora la Uplerlawna la wo'or di. Mere tuna luwnu-a'nani (Yahudi) riwra atiaru la' to'a Yerusalem nanpena rira rpolu-rwak la Uplerlawna." 21 Yesus Niwra: "Mpuesiay A'uo, la' lera ida de hota riy rpolu-rwak la it Amlawanni de edonna rmai lia wo'or di, me Yerusalem nek de edonan wali. 22 Riy Samaria miy die mpiolu-mpiak la'a Uplerlawna maka miplin niohora onni-ga'arni (talanni). Mere riy Yahudi am die ampolu-mpak la Uplerlawna mak ami e mat niohora yala'ani, yoma hota mori-lewan de ha nwatiawua riy Yahudi ami. 23 Mere la'pa nte'ela lerni-melli mak kmai, me plollolli de ed olekwa di, de riy rpolu-rwak la it Amlawanni Uplerlawna rnair talan mak kaplollola, yoma Uplerlawna Nhiwni Ntulan la ira totpena ratu rpolu-rwak la it Amlawanni. Yoma riy mak kola tieru-kawur nehla la Uplerlawna rnair talan emkade, de ir er maka Uplerlawna Nwahaka inhatta. 24 Yoma Uplerlawan de Nhiw to' hade ne he' ed mak kiwra kola tieru-kawur nehla la E'a, de Nlernohora E Nhiwni me la'a hya' ed mak kaplola." 25 Noma pat Samaria de nakot la Yesus niwra: "A'g e gat niohora Ray Makamori-Kalewna mak riwra Kristus hota Nmai. La'pa Enmai die hota Enod kiot la mai it la' hare honona." 26 Yesus Niwra: "A' di de E inhatta. Mak kaltiertier rieri A'g inhatti pa gor o' pa maltieri." 27 La'pa rwahagaur reri dewade maka Yesus ha Nwatutu-nwaye'a re rmai wia, ne rwer rer wiawni, yoma Yesus nora pat Samaria ida e rwahauru. Mere riy id mana edonna nkokan nohor patke' de la'a ratiana hya' ed maka ha nwahaka? Onde nihya'pa Yesus Nor pat Samari' de raltieri? 28 Dewade patke' Samaria de naltarga kewatnu pa nawal lia letni pa la nakot nohora hya' maka ha natlin nana la gera wawannu de, la'a letlawan de ralamni. Nakot la mak kden la leta ralamni niwra: 29 "Ee! Mai pia tla pa mimkeka riy mak kakot nohora a nhio'lu-lie'tu honona. Matialo'onama riy de Ray Makamori-Kalewna inhatta?" 30 Dewade mak ha nakot la re rawlar pia rla rod tiemna Yesus la'a leta to'orni. 31 Mere la'pa edon rte' ma'ta la Yesus, de maka Yesus ha Nwatutu-nwaye'a re rwahi' pa rora Yesus ra'ana-remnu. Rakot la Yesus riwra: "Tungkurga, it ta'an wa." 32 Mere Yesus Nakot la re Niwra: "A wareheru etla, mere miy e miplin niohora de!" 33 Noma maka ha Nwatutu-nwaye'a re idma natian ida niwra: "Yanpa riy dom rodia wareher la E'a?" 34 Noma Yesus Nakot la Niwra: "La'pa Aliernohora Uplerlawna mak khopn A'u de ralma-riorni, me ghi' ahorga kniar mak Enala mai A'u, hade nhi' A ralmu pa uhepru, emeknekama riy mak kaplar de na'an yamanna pa npeher wa. 35 Nhi'inde miy e mikota miwra: "Hota tre' ma'ta wolla wogat pa noha reiki-wo'ora." Mere A'ukot tiy miy. Mimkek la Samaria re mak kmai nieka yoma riwra rpesiay A'u! Ir emolmolan nekama nhyi'a-tlunni mak kwahi' pa rreikia wa yoma rwahi' pa rpesiay A'u! 36 Dodo'ondi meman pa emeka reiki-wo'ora lerni. Ler di meman pa Uplerlawna Nala riy pa rpesiaya pa emeknekama kniarmi wniahlani. Ne hota riy mak kpesiaya re rler la mormiori-dardiari plalahwa pa nodi liarni. Totpa hota emeknekama la'a riy mak ktamni nhyi'a, rora mak kreiki-kwo'ora de ralamni rahepru yoma rler rewre'wa la kalwiedweda la'a pripanni-fa'anni. 37 Pa hota naplol la yawalliohor de mak kiwra: Ida ntamni, ida nreiki. 38 Yoma Aghopan pa mlia'a nhyi'a-tlunan mak miy edonna miprehen la, totpa hota mliernana pripanni-fa'anni. Riy dom to'a rala' ulu pua raprehen olek la hare wa. Mere miy er mak klernana pripanni-fa'anni la' ira kniarni." 39 Mak kden la Samaria liawanni rpesiaya Yesus yoma la'a pat de lirni niwra Yesus Nakot momuoga hya' maka nhi'inde pat de nhi' nan oleka re. 40 Pede la'pa riy Samaria re rma rwatrom nana Yesus noma rwak la Yesus pa Ntulan pa Nora ir pa rhol wiutu. Pede Enor ir pa rhol wiut lia' lera woru. 41 Ne la'a lira-tunu maka orgahi Nmeh'a Nwatutga la ira, pede rirahu rpesiay walia Yesus. 42 Noma rakot la pat de, riwra: "La'a ler di de ampesiaya, de ami edonna mhapar rer tio'ola hya' ed mak omukota mai ami, yoma ameh'a matlin memna la E'a, ne amatg olek walia la E' de, de plola Makamori-Kalewna rimormiori nohkerna inhatta."
Yesus Nhi' kalwieda riy mak kar lia ray nhiol genni id a'nani
43 La'pa Yesus Ndella leta Sikhar la' ler woru, noma Nla'awa la Galilea, (de E let wamueheni). 44 Yesus Nmeh'a nek de Enakot oleka Niwra: "La' makwohorulu-ktatrulu id nek de hota edonna rhu'ru-rhelam la let wamueheni." 45 Mere la'pa Yesus e Nte' tar lia Galilea de mak kden la hande rala ralamni rapranran pa rreiniana-ra'nana Yesus, yoma la' ler ululu de e rawok tar lia Yerusalem, la'a Yahudi ler kalwiedni Paska, noma ramkek oleka hare honona maka Yesus Nhi' nana re. 46 Nhor nioma Yesus Nawal lia' leta Kana la Galilea maka la' lera Nhi' oleka gera pa nwal lia anggur turnu de. Mere la' leta Kapernaum de riy ida mak kla' ray tniutnu-nhianni-nhielli-liarni ida, maka a'nani ida temni nhi'a. 47 La'pa natlin nana Yesus Nwatiawua Yudea pa etla' Galilea dewade nla'awa Yesus pa nwakwak la totpena Yesus Nla'a Kapernaum totpena Nhi' a'nani de pa nkalwieda, yoma nhi'pa nmat wia. 48 Noma Yesus Nakot la mak temni nhi' de amni niwra: "La'pa miy edonna mimkek ma'ta hihi'a-yapyapi mak kamehi-kayona, mak ktutga Uplerlawna rurni-laini pede riy ema rtaplelleltarga, de hota miy edonna mpiesiaya." 49 Keke'enku' de amni niwra: "Tuna, plet pa itla'a, yanpa a a'nu nmati." 50 Noma Yesus Nakot la Niwra: "Hyalia, mlia' nek wa, o a'namu nkalwied olekwa." Noma riy de npesiay Yesus lirni de pede nla'awa. 51 La'pa riy de ed ma'ta la talan letgara, dewade riy mak ktulla-kar lia e romni rma rwatroma pa rodia kot la riwra: "Tuna a'nani nkalwied olekwa." 52 Noma riy de natiana re niwra: "Lera emkameni de a a'nu nkalwied wa?" Noma rwahla riwra: "Wonyira la' lera nwawuau ro'onni (pukul satu)." 53 Noma keke'en mak temni nhi' de amni, nwahniorat nana la'a ler de meman pa ed maka Yesus Nakot la e'a Niwra: "A'namu nkalwied olekwa." Dewade la ler de pa riy de nora romni mniotni honona rpesiay Yesus. 54 Hade ed maka Yesus Nhi' hihi'a-yapyapi mak kamehi-kayona mak ktutga Uplerlawna rurni-laini la' re'eni wornu, la'a Galilea, la' ler maka Nwatiawua Yudea pa Nmai die.
Yesus Nhi' kalwieda riy mak kamehra la Betesda
1 La'pa nhorwua noma la'pa nte'ela riy Yahudi lerlalawanni, noma Yesus Nla'awa la' Yerusalem totpena Namuki-nahepur nohora ler kalwied de la' hande. 2 La' Yerusalem nhiarni mak ha rweta la Duma Nhiarni, de gera tliwu (kolam) id etla hande. Ger de, ed maka ha rweta la'a yawala Ibrani de riwra Betesda. La hande de roma nhieunu (teras rumah) wolima. 3 La hande de riy harahu mak kamehra-kamau, de mak matni kyata, mak limni-lakni kloi, me mak kaliu'uta de nhi'inde e rdudu-rdera. Honona re e rwei ger mak katliw die nwo'la. 4 Yoma la' lera dom de Orgahi-Orha'a hopopanni nerun la gera tliw die nanpena nawo'la gerni. Ne la'pa mak kamehra mak kala' ulu pa kler la gera tliw die, la'pa ger de nwo'la, hota riy nnienni hya' to'a mana, nmolu. 5 Noma la' gen die de muanke' ida e naliu'ut nohora nnienni la'a anni terampwotelu wehrani wo'awa. 6 Noma la'pa Yesus Namkek nana e nanina, ne Natga de e naliu'ut nohora nnienni la'a mahnek memna, noma Yesus Nakot la Niwra: "Oi, omuiwra mkialwieda me edonna?" 7 Noma mak kamehra de nwalolla niwra: "Amee! La' handi de a rimormio'ru hadamonna pa ntitni a lia gera tliw die ralamni totpena liernana ger de wnio'lani. Ne la'pa awuahi' pa giwra uwrik la gera tliw die, de ta'en mieman pa aliernana, yoma rira rala' ul muamaini a'u." 8 Noma Yesus Nakot la Niwra: "Emkade de mumat wa pa mpuopna u'tamu pa mula'awa!" 9 Pa mtatan de nekpa nnienni de nmolu. Na'nama npopn u'tani pa nala'awa. La' ler de ntai miemna la Sabat lerni (maka Yahudi re edonna rkar lia de). 10 La' hade pede o'ta-mata makden la Yahudi e rakot la mak nnienni na'nama kalwied de riwra: "Oi! Yana pleta-plet pa mpuopna u'tamu de pa mriana. O e muplinga de ler di de Sabat lerni pa yana riy rkar lia?!" 11 Noma riy de nwalolla re niwra: "Mere riy maka khi' kalwieda a nnie'nu de, ed mak khopan pa apuopna u'tu pa a'ula'awa." 12 "He' ed mak kparan pia khopna omriana o u'tamu pa mula'a wa?" 13 Mere riy mak kalwied la nnienni de, e naplin niohor ma'ta riy maka khi' kalwied e'a nanni. Yoma Yesus edonna Nayamkek olek la' riy mutlialawna re wa. 14 Nhor nioma edon nalo'on wali ne Yesus Nwatrom nan riy della' Uplerlawna roma kreini na'nama Yesus Nakot la Niwra: "Mutlin rerio! La' dodo'ondi de omkialwied olekwa. Mere yan memmemna mhi' do'a-hal la inonmu. Yanhi'pa hota mlier la yatyatni-halalli yatlorni-yatra'ani pa hota nareh dioin nnienmu mak kala' ulu die." 15 Noma riy de la' meman wa, pa nla nakot nohor harella' o'ta-mata Yahudi re niwra Yesus nanpena ed mak khi' e' pa kalwied la e nnienni-nhienni. 16 Pede Yahudi re o'tani-matni rhi' yatyatni la Yesus, yoma ratga Yesus Nhi' kalwieda riy nnienni la'a ler maka riy Yahudi re yana rkar lia. 17 Mere Yesus Nakot la Yahudi re Niwra: "A A'mu e Nkar pia nodi liarni me edonna Nrena. Ne A' muana emkade wali." 18 La'pa Yesus Nakot emkade wa de yeher to'a pa o'ta-mat Yahudi re riwra rwenna Yesus. Riwra rwenna Yesus, de edonan to'ola Nkar lia Sabat lerni, mere la walia yoma Yesus Niwra Uplerlawan de E Amni. Nnia'eratni de hota Eniwra E' mana emekwalima Uplerlawna.
Plola-mneh maka Uplerlawna A'nani Nlernana
19 Yesus Nakot emkarilla ira niwra: "Mpiesiayo! Hota Uplerlawna A'nani A' di, de edonna godi plolli pa ghi' mak Agiwra ghi'a. La'pa hya' ed maka Aghi'a de, de A'umkek nohora A A'mu Nhi' hare. Yoma la'pa hya' maka A A'mu Nhi'a, de hota A' muana tiolliohora re. 20 Yoma A A'mu Nhi' kalwied mai A'u, ne Ntut wualia hya' to' mak E Nhi' reria mai A'u. Me hota Entut wualia tulla-kniar mak kareh dioin la hihi'a-yapyap miak kamehi-kayona mak Aghi'a ri, pa hota yeher to' pa mpier reria wapmi. 21 Tulla-kniar mak kareh dioin de, de emkadi: de A A'mu de Namoria riy mak kmati ne Nala mormiori-dardiari plalahwa la ira. Ne hota emkade wal lia E A'nani A' die, de gala mormiori plalahwa la' he' to'a mak Agiwra gala la. 22 A A'mu de nek de edonna Ntorna watghudi la rimormiori ida yoma plola-mneha honona de, Enal oleka la E A'nani A'u. 23 A A'mu de Nhi' hare honona totpena riy honona ratu rhu'ru-rhelam la A' pua emekwalima ratu rhu'ru-rhelma la E'a. Riy mak edonna khu'ru-khelam la A'u, de hota edonna nhu'ru-nhelam pal lia A A'mu mak khopn A' pua Amuai. 24 A li'ru-tu'nu ri raplola: de la'pa riy mak katu katlina-katailla A li'ru, ne npesiaya A A'mu, mak khopn Amuai, de hota nmormiori plalahwa pa nodi liarni. Hota edonna nlernana niukmu yoma matmiati edon nodi plolli owa'an la e'a, mere enlernan oleka mormiori plalahwa. 25 Mpiesiaya! Hota lerni-melli rwakrian wia me plollolli de ed olek di wa, de riy mak emeknekama rmati olekwa yoma edon rpesiay mia'ta, hota ratlin nana Uplerlawna A'nani A li'ru ne hota mak katlin la re rmormiori. 26 Yoma A A'mu de mormiori onni-ga'arni inhatta pede Nhi' walia A' pua emkade wali, pa Alia' walia mormiori onni-ga'arni inhatta. 27 A A'mu de Nal A' pua tiorna watghudi la rimormiori wawannu, yoma A' die de maka ha rweta la Rimormiori A'na A'u. 28 Yana mpier rer wiapmi la A li'ru-tu'nu ri. Hota lerni-melli rmai wia de riy mak kmati oleka re ratlina A li'ru 29 dewade rlergot la hoini-kietarni ralamni. Ne la'pa riy meni mak khi' samomuounu de hota ramat pa rmormior pia nodi liarni. Mere la'pa mak khi'a yatyata-halala hota ramat pa rlernana niukamnu. 30 Hya' to' maka Aghi'a de, A'g edonna liernohora A ralma-rior wamueh'u. Atioran watghudi de A'g e liernohor to'a hya' maka Uplerlawna Nakota. Ne Agetlia plol toto'a la tatiaili pniarni me watghudi lokarni, yoma A'g edonna liernohora a ralma-rior wamueh'u mere Aliernohora A A'mu, mak khopn A'u, ralma-riorni."
Maktutrier nohora (saksi) Yesus plollolli de er olek wa mere Yahudi re rahmena rpesiaya
31 "Hota la'pa A orgah'u ukot nohora A inon wamueh'u, de hota mak ukota re riy id mana edonna npesiaya. 32 Mere la'pa Uplerlawna Enakot nohora A'u pua rira ratlin nana, de Agatga de maka Nakot nohora la mai A die ha rpesiaya re. 33 Mere miy die mi'enyat wualia riy pa rla ratlin la Yohansi makharani lirni, ne Yohansi ed mak kakot nakot nohor olek A plolo'lu. 34 Mere mai A' die, de A'g edonna wuahaka rimormiori id pa rakot nohora mak Aghi'a-yapi re, mere A'ukot nohora Yohansi lirni de tiy miy totpena miy er mak katlina, me mpiesiaya de, totpa hota Uplerlawna Namori-nalewan miy. 35 Yohanis de emeknekama wa'du mak kmor pia morni nlipa-nka'ma la'a Uplerlawna talanni mak kaplola, ne miy mieh'a nek de ralammi kalwieda la mimkeka morni lipni-kailli de la' ler ho'ke'eni. 36 Mere kniar maka A A'mu Nhopan pa A mua ghi' ahorga di nareh dioinia Yohansi lirni maka enakot nohora A' die. Ne kniar die entutga de A A'mu ed mak khopn A'u. 37 Ne A A'mu mak khopna A' mana Enakot nohora wali A'u. Miy edonna mitlin ma'ta E lirni onde mimkeka E inonni. 38 Lirni-tunnu re mana edonna nawniatierun la miy ihrami ralamni, yoma miy edonna mpiesiay A'u maka E orgahani Nhopan de. 39 Miy mpial lia'a-mpial miaiya Puka, yoma miy e miatniekame mhi' emkade totpena mliernan talan mak kod miy lia mormiori plalahwa pa nodi liarni. Ne Puk de ho'mana e nakot nohor wali A'u. 40 Mere miy edonna mpiakriania A'u, totpena mliernan mormiori plalahwa de. 41 A'g edonna wuahaka ya'uli-yawedi la rimormiori nohkerna. 42 Mere Agat niohora miy. Agatga de mimikleha nhiol kalwied la' Uplerlawna. 43 Amuai die agodia A A'mu plolli-mneheni, mere la' hade ho'mana miy edonna mrieiniana A'u. Mere la'pa riy meheni rmai pia rodia plol wamueheni demade miy miwa mrieiniana. 44 La'pa mihak to'a ya'uli-yawedmi mak kwatiawua mutwualmi, mere miy edonna mihak pa mliernan nan kalwieda la Uplerlawna memeh'a inhatta, ta'en nian hota mpiesiay wali A'u. 45 Mere yana mpiarora hota la' lera id de A'g ed mak kwaghal miy lia A A'mu gaini ralamni. Mere Musa maka miy mhia'ara aranmi la de, nanpena hota ed mak kwaghal miy. 46 Yoma Mus de nhorat tar wali A lia Puka ralamni. Hade emkade pede la'pa miy mpiesiay Musa lirni-tunnu de hota mpiesiay walia A li'ru-tu'nu. 47 Mere miy edonna mpiesiaya mak Musa ha nhorat taru re, pede hota emkameni la mpiesiaya A li'ru-tu'nu mak A'ukota?"
Yesus Nalla riy riwnu wolim ra'ana
1 Noma la' lera ida de Yesus Nleretia danau Galilea, maka nhi'inde ha rwet walia la danau Tiberias. Yesus Nte'ela danau de walli, 2 ne rirahu rlernohor reria, yoma ramkek lola hihi'a-yapyapi mak kamehi-kayona maka Enhi' kalwied la riy mak kamehra-kamau totpa Ntutga Uplerlawna rurni-laini. 3 Noma Yesus Nha'at la wo'ora hananni na'nama Nor wutga maka ha Nwatutu-nwaye'a re ramtatan wut lia hande. 4 La' ler de, de nhi'pa nte'ela riy Yahudi lerlalawanni maka rweta la Paska. 5 Noma Yesus Nkillia walli-walli to' de rirahu ema rlidan nan pa rmai wia. Noma Nakot la Pilipsu Niwra: "Pilips ee! Hota itawelia ya'ana-yemun la hanmeni totpena rimormior mutlialawna ri rre'ela ra'ana-remnu?" 6 Yesus Nat oleka hota hya' ed maka Niwa Nhi'a mere Nakot emkade totpena Niwa na Nta'ga Pilipsu. 7 Noma Pilipsu nakot la niwra: "Ita'ala kupna-kai lia wolla wo'awa gahan memna pa itaweli roti demade itnakutla ho'mana, edonna ntu'tu!" 8 Noma maka Yesus ha Nwatutu-nwaye'a id wali de mak kwawa Andarias, Simon Petrus hyalli, nakot la niwra: 9 "Tuna, mai handi de tuwari id enodia roti meha wolima, me i'na woru. Mere hare ho'mana edonna ntu'tu la riy mutlialawna re!" 10 Noma Yesus Niwra: "Mikot la hare honona pa ramtatna." Yoma la' gen die de wewna kpauga (harahu), pede rirahu rakperna la wewna wawannu. Rhor (rrekan nana) muanke'a honona mak kden la hande de edonna nhal de a'na muanke'a riy riwnu wolima, mere edon rhor wutga patke'a rora upni-a'nani. 11 Noma Yesus Na'ala rot die na'nama Na'uli-nawedia Uplerlawna, na'nama nhawi-nhawia rot diella' riy mutlialawna re, na'nama Nal owa'an la i'n de pa nhakre'era la riy rahu re. Riy honona re ra'an pa rlernohora ir sukni. 12 La'pa ra'an pa rpeher wa na'nama Yesus Nakot la maka ha Nwatutu-nwaye'a re Niwra: "Miwoka ya'ana-yemnu maka ha ra'ana atre'a re, yanpa rhi'a la gera niaini." 13 La'pa rawok nana roti mak ha ra'an atre'a re de rlernana kriou termida wehrani woru. 14 La'pa riy mutlialawna re ramkek tutga Yesus hihi'ini-yapyapni mak kamehi-kayona, mak ktutga Uplerlawna rurni-laini de, noma riwra: "Plola hadi de Makwohorulu-ktatrulu ida maka Uplerlawna Nano'taru!" 15 Yesus Nat niohora iriwra rmai pia rtekua E' pa Nla' Ray lia ira, pede Yesus Nwatitin pa Nla'awa wo'ora hananni pa Nmemeh' taru lia' hande.
Yesus Nala' lola tah'i ulti wawannu
16 La'pa lera niwa nmel wa, noma maka Yesus ha Nwatutu-nwaye'a re rerun la danau de. 17 Pa la'pa rha'at la puounu pa rleretia danau de pa rokria leta Kapernaum. Lera ntuinia wa, mere Yesus edonna Nden ma'ta la ira. 18 Edon nalo'on wali ne danau de nayo'ora yoma anin lawna nteni. 19 La'pa rhopal pa olietni edonna nhal de kilu wolima onde wonema, (pa rler la danau de letgarni) dewade ramkek de Yesus Nma Nharan nana ir puounu de Nlola tah'i ulti wawannu. Honona ramta'at wenna. 20 Mere Yesus Nakot la re Niwra: "Ee! Yan mimta'ata! A'g eda di!" 21 Noma rahepur pa rreiniana Yesus pa ror wutga la puou noma plin-plinnianama ira puounu de nton la leta maka rharan reria pnialgenni.
Riy rwahaka Yesus
22 La'pa repar wa dewade riy harahu mak kden ma'ta la danau walli de rma rwahaka Yesus yoma e rat niohora la'a wonyir de puou ida nmeh'a napnial lia hande. Ne ir ratga de maka Yesus ha Nwatutu-nwaye'a re er mak kodia puou die, mere Yesus edon Ndella puou die wawannu pa hota emkade de Yesus etla meni? 23 Nhor nioma riy dom rodi puou rwatiawua leta Tiberias pa rma rapniali de edon olieta la gen miaka wonyir de Yesus Nwak kalwieda la Uplerlawna nhor diewade Nal roti la riy mutlialawna re ra'ana. 24 La'pa riy mutlialawna re ramkek de Yesus Nora maka ha Nwatutu-nwaye'a re edonna rdella gen die, noma ir mana rha'at wal lia riy mak kwatiawua leta Tiberias puounu re pa rleretia danau de pa rla rahaka Yesus la leta Kapernaum.
Yesus de yamanna mak kodia mormiori-dardiari
25 La'pa irwatrom nana Yesus la'a danau walli noma rakot la Yesus riwra: "Am Tungkurga, mowenia omtie'ela handina?" 26 Mere Yesus Nakot la Niwra: "Toto'a ne, miy mihak A' die de edonna riwra yoma miy mnia'erit nana hihi'a-yapyapi mak kamehi-kayona mak ktutga Uplerlawna rurni-laini maka Aghi'a re, mere mpiahak A' die yoma mhiorat la ya'ana-yemnu mak kapeher miy. 27 Mere yana mipepe'el pa mpiahak to'a yamanan maka plet pa nhor pua ngehpa. Mipepe'el pa mihaka ya'ana-yemnia mak edonna kgehpa, mak kodia mormiori-dardiar pa nodi liarni. Yamanan de, hota Rimormiori A'nani A' die, de ed mak kal hade tiy miy. A A'mu Uplerlawna ed mak kala plola-mneha mai A'u pa Aghi' hade." 28 Noma rakot la Yesus riwra: "Hota amhi'a hya' totpena nla' nana Uplerlawna ralma-riorni?" 29 Noma Yesus Nakot la Niwra: "Hadi ed mak Uplerlawna Nwahaka tiy miy, de totpena mpiesiay tioto' memna A'u maka Uplerlawna Nhopn Amuai die!" 30 Noma riwra: "La' hade emkade de hota O' nek de Omuala hya'a onde Omhi' hya'a pa amamkeka totpena ampesiay O'a? 31 A up mamni-tgar mamni ra'ana yamanna maka ha rweta la manna, la'a wo'orletna-kawurloini. E rhorat tar muemna la'a hade la' Puka ralamni riwra: "Enala yamanan mak kwatiawua Ilyamou-Watyatoha pa ira'ana."" 32 Noma Yesus Nakot la ira Niwra: "Mpiesiaya! Musa edonna nala yamanan de, mere A A'mu. Ne E' wal pia ed mak kala Yamanna inhatti mak kwatiawua Ilyamou-Watyatoha tiy miy. 33 Yoma Yamanna inhatta maka Uplerlawna Nal de, ed mak kwatiawua Ilyamou-Watyatoha de, ne Nerun totpa Nodia mormiori-dardiari plalahwa la mak kden la nohkerna wawannu." 34 Rakot la: "Tuna, demade Mual mamain neka yamanan de mai am pia!" 35 Noma Yesus Nakot la Niwra: "A' di de Yamanan de mak kodia mormiori-dardiari pa nodi liarni. Riy mak kmai A' die de edonna rlernan yaplara pa nodi liarni. Ne mak kpesiay A' die, hota tiernu edonna nkerna pa nodi liarni. 36 Mere emeknekama A'ukot oleka tiy miy wia, de miy e mimkek olek A'u ho'mana miy edonna mpiesiaya. 37 Mere riy honona mak A A'mu Nala mai A'u, de hota plol toto' pa rmai A' die. Ne hota A'g edonna wuayotlia riy meni to'a mak kiwra kmai A' die. 38 Yoma A' di de Awuatiawua Ilyamou-Watyatoha pa Agernu de A'g edonna ghi' hadom de Agodia A ralma-rior wamueh'u. Mere Aliernohora Mak khopna A' die ralma-riorni. 39 Ne Mak khopn A' die wniarorni: de totpena riy honona maka Nala mai A' die, id mana hota edonna nler la matmiati-molmuolu pa nodi liarni, mere totpena A'g ed mak kamori owa'an ir la'a lera-mela noha niatni. 40 Yoma hota plola la' A'mu ralamni Nwahaka totpena la riy meni ed mak kna'erit nana A' die E A'nani A'u, me npesiaya, de hota nlernan mormiori-dardiari plalahwa ne hota A'g ed maka kamori owa'an e' la'a ler noha niatni." 41 Dewade riy Yahudi kukunu-mamatia la Yesus yoma lirni Niwra: "A' die Yamanan mak kwatiawua Ilyamou-Watyatoha pa Agernu." 42 Pa idma nakot la ida riwra: "Hota hadi de Yesus maka Yusup a'nani inhatta toh?! Inni-amni de itatga, ne hya' nariei pia Eniwra Enwatiawua Ilyamou-Watyatoha pa Nernu?!" 43 Noma Yesus Nakot la Niwra: "Yana kukunu-mamatmi! 44 Riy id mana hota edonna nmai A' die la'pa A A'mu mak khopna Amuai edonna Nottiar hadella mai A'u. Ne la'pa he' ed mak kmai die hota A'g ed mak kamoria hadella' lera noha niatni. 45 Etla la Puka makwohorulu-ktatrulu lirni de e niwra: "Uplerlawna hota Nwatutu-nwaye'a ir honona." Ne riy honona maka A A'mu Nwatutu-nwaye'a me iratlina-ratailla E lirni de hota rmai wiali A' die. 46 Mere wniatut die edonna ntutga riy de namkek oleka Uplerlawna. Eneknek to'ama A'u mak kwatiawu Uplerlawan de ed mak kamkek oleka A A'mu de wa. 47 Mpiesiayo! Riy makpesiay A' die ed mak klernana mormiori plalahwa pa nodi liarni. 48 A' di de Yamanan mak kodia mormiori. 49 Miy upmi-tgarmi ra'ana yamanna maka rweta la "manna" la'a wo'orletna-kawurloini, mere emkade ho'mana rmat wiali. 50 Mere la' miy gaimi ralamni de Yamanan mak kwatiawua Ilyamou-Watyatoha inhatta eda di, ne he' na'ana hade de hota edonna nmati. 51 A' di de Yamanan maka kwatiawua Ilyamou-Watyatoha, Yamanan mak kodia mormiori inhatta. Riy meni mak ka'an nana Yamanan di, de hota nmormiori plalahwa pa nodi liarni. Yamanan mak A'ukota di de A ih'u-ra'ru inhatti, mak hota Agala la rimormiori nohkeran di rerieini totpa hota rlernana mormiori-dardiari." 52 La'pa ratlin tutga lir de, dewade riy Yahudi re idma nahuri-nawo'or la id wa. Pa idma nakot la ida riwra: "Hota emkameni la riy di Nala ihini-rarni de pa ita'ana?" 53 Noma Yesus Niwra: "Pena mpiesiayo, la'pa miy edonna mi'ina Rimormiori A'na A' die A ih'u, ne miemn A ra'ru, de hota miy edonna mliernana mormiori plalahwa. 54 Riy mak ka'ana A ih'u me kemnia A ra'ru de hota nlernan mormiori plalahwa, ne A'g ed mak kamoria la'a lera noha niatni. 55 Yoma a ih'ru-ra'ru de ya'ana-yemnu toto' memna. 56 Riy mak ka'ana A ih'u me kemni A ra'ru, de hota nor A die ihru ida-ralm ida. 57 A A'mu mak mormiori onni-ga'arni inhatta, hade ed mak khopna A'u, ne A' muana Amuori onnila E'a. Emkade wal lia riy mak ka'ana A ih'u me kemni A ra'ru, de hota Agala mormiori-dardiari plalahwa la ira. 58 A' die, de ed makla' Yamanan mak kwatiawua Ilyamou-Watyatoha, mak ematia'a yamanan "manna" maka upmi-tgarmi ha ra'ana re. Yoma la'pa ra'an nana ir yamananni de ho'mana, rmat wiali. Mere riy mak ka'an Yamanan di de hota nmormior plalahwa pa nodi liarni." 59 Hare honona de Yesus Nwatutu-nwaye'a momuoga, la'a roma-lewu maka Yahudi re rhi' kreini-iskolli la' leta Kapernaum.
Lira mak kodia mormiori plalahwa
60 La'pa ratlin nana Yesus lirni-tunnu re noma mak klernohor reri Yesus re harahu idma nakot la ida riwra: "Wniatutu-wniaye' di werat rehia! Hota he' ed maka kreiniana wniatutu rina?" 61 Yesus Nmeh'a Nat niohora maklernohor reri harahu re idma e kukunu-mamatia la ida. Noma Nakot la: "Yanpa hya' maka A'ukota ri narieiniande miwenan mai A'u? 62 La'pa A'ukot emkade nek de miwenna, de hota emkameni owa'ana la'pa mimkek reria Rimormior A'nani A' die gha'at owa'an la gen tiutullu? 63 Mak khi'a rimormiori pa rmori, de Uplerlawna Nhiwni. Rimormiori rurni-laini die nakleha perkuna pa nodi mormiori-dardiari plalahwa de. Ne lira-tunu maka A'g e ukota tiy miy ri, de Uplerlawna Nhiwni lirni-tunnu ne lira re er mak kodia mormiori-dardiari. 64 Mere, miy mutwualmi dom nek de edonna rpesiaya." Yesus Nakot emkade yoma la'a mulaliaini de Yesus Natga de hameni mak edonna kpesiaya me hameni mak hota ka'olga E'a. 65 Noma Yesus Nakot owa'ana: "La hade pede A'ukot oleka tiy miy giwra, hota riy id mana edonna nwakriani A'u, atiaru me A A'mu ed mak ktulan la ir pa rmai." 66 La'pa Yesus Nakot emkade dewade maklernohor reri harahu re rhoitio'or doin Yesus wa. 67 Noma Yesus Natiana maka ha Nwatutu-nwaye'a termida wehrani woru re Niwra: "Yanpa miy miana e miwra mhioitio'or wal lia mai A'u?" 68 Noma Simon Petrus nakot la niwra: "Matroma, hota amlernohora he' owa'ana?! Matro'mu lirni nekane er mak kodi mormiori-dardiari pa nodi liarni. 69 Ne ampesiay oleka O'owa, ne amatga de O inhatta Makakleha do'a-hala mak Uplerlawna ed mak khopan pa muai." 70 Noma Yesus Nakot la Niwra: "Nee! A orgah'u ed mak kwalir niana riy termida wehrani woru miy. Mere hota la' miy hononmi de hota la riy id de, nlernohora hegana amlawanni tototni-wudwiudni." 71 Mak Yesus Nakot de, de Yudas, Simon Iskariot a'nani. Yoma emkameni ho'mana Yudas de, nre' temn olek la riy termida wehrani woru maka Yesus ha Nwatutu-nwaye'a re, mere hota e' ed mak ka'olga Yesus.
Yesus amni-hyalli edon rpesiay wiali E'a
1 La'pa nhor nioma Yesus Nalala'a la' Galilea. Yesus Nahmena Nla'a Yudea, yoma makla' Yahudi o'tani-matni la' hande e rna'ohma pa rwen E'a. 2 Mere la'pa nwakrian wia la' lera yamuki-yahepru la Yahudi lerlalawanni maka nhi'inde ha rariria ohwiali, 3 noma Yesus amni-hyalli rakot la Yesus riwra: "Yesus ee! Yana Mdiella Galilea, Mai pia itla'awa Yudea, totpena riy harahu maklernohor rer O'a re ramkek memna O hihi'imu-yapyapmu mak kamehi-kayona. 4 Yoma hota riy mak kwahaka rimormiori ya'ulli-yawedni de hota edonna nade'a-namoin nana hihi'ini-yapyapni. Pede la'pa Muatu Mhi' nan hihi'a-yapyapi mak kamehi-kayona, de hota Mlia' totpa noheri woru-lyanti nayanni ramkek nana." 5 Rakot emkade yoma la' amni-hyalli re, nek de edonna rpesiay E'a. 6 Pede Yesus Nakot la re: "Hyal miy re, edon nte' ma'ta lera-mela maka Uplerlawna Ntutga pa hota Alia'a. Mere la' pa miy die, mlia'a la lera-mela hya' to'a. 7 La' nohkeran di mniotni de hota edon rwayotil miy. Mere la' A' di de nohmarna mniotni nahmena-naprai A'u, yoma nhi'inde A'g e ukot nohor mamaini ira yatni-halli. 8 Mere la'pa miy die, de hota mlia' pa mior wut lia riy pa mihe'i-mihepru. Mere mai A' die, A'g edonna lia' ma'ta, yoma lera-mela maka Uplerlawna Ntutga mai A'u, edon nte' ma'ta." 9 Lirni emkade la'a hyalli re, ne edonna Nwaran la Galilea.
Yesus Nwatutu-nwaye'a la' Yahudi lerlalawanni
10 Mere la'pa amni-hyalli re rla rler teman la muki-hepur de noma lera woru-wotelu rtaw doinia na'nama Yesus Nmeh'a Nla' he'i-hepru, mere riy id mana edonna nat niohora. 11 La'a muki-hepur de plahwani, de o'ta-mata Yahudi re rwahaka E' riwra: "Riy de etla hanmeni?" 12 Rirahu la mutlialawna re rapupu-raheria Yesus ha Nlolola. Dom de e riwra Hade samoga. Dom de riwra Hade yata, yoma Entota riy la klieratni. 13 Mere rwahaur de ramta'ata rwet la Yesus nanni totpena rira yana ratlin nana, yoma ramta'at rer lia Yahudi re o'tani-matni. 14 La'pa ertepartarlia yamuki-yahepru la'a lera wotellu-wogatni la'a lerlalawan de, dewade Yesus Nmai pia Nodi liarni la Uplerlawna roma kreini pa Nwatutu-nwaye'a. 15 Yahudi o'tani-matni re honona rwer rer wiawni, yoma rwaror de riy di, edon Nlernan ma'ta krei-iskola agama re wniatutnu-wniaye'eni, pede emkameni pa Natu Nwatutu-nwaye'a oleka pa emkade? 16 Noma Yesus Nakot la re Niwra: "Hya' mak Awuatutu-wuaye'a ri, de A wniatu'tu atia' hare, mere Mak khopn A die wniatutnu hade. 17 Riy mak kiwra klernohora Uplerlawna ralma-riorni, nanpena er mak kat niohora A wniatu'tu di nwatiawua Uplerlawna onde nwatiawu tio'a A ralma-rior wamueh'u. 18 Riy meni mak knairia wniatut wamueheni, de nwahaka e nan wamueheni. Mere riy meni mak kwahaka Uplerlawna mak khopna e'a, nan kalwiedni, de ha ndella ploloini-mneneheni. E' edon npudi-nakla rira. 19 Miy e mliernan oleka Uplerlawna deullu-tatarni maka Musa nala tiy miy toh?! Mere riy id tiy miy miana edonna mitlina-mitail plollol la' deulu-tatar de, yoma la'pa plol toto' pa mliernohora deulu-tatar de, de hya'a nrei pia miwra mpien A'u?" 20 Noma rirahu riwra: "Hegana-kawnu nhu'r ralm O' ee! He' ed mak kiwra kwen O'a?" 21 Noma Yesus Nakot la Niwra: "Eneknek to'ama Aghi' hihi'a-yapyapi mak kamehi-kayona id la' Sabat lerni de, de mimpier rer wapmi yoma A'g e kari la' ler de. 22 Mere hota miy mieh'a neka msiunat la'a Sabat lerni totpena yana mpiera-mdiaitia deulu-tatra sunat maka Musa nal tiy miy. Ne sunat de nek de Musa deullu-tatarni atia' walia hade, mere it upni-tgarni (Abraham, Isak, me Yakopa) deullu-tatarni. 23 La'pa miy mhiur niohor riy pa rsunat keke'enku'a la Sabat lerni totpena yana rpera-rdaitia Musa deullu-tatarni la'a sunat, nihya'pa miwenan mai A'u yoma Aghi' kalwieda riy mak kamehra de pa inonni tetema nkalwieda la'a Sabat lerni?! 24 Yana mniairia hya' maka mimkeka onde mitlin to'a pa mhiudi-mpiara A'u mere mhiudi-mpiar de mliola plollolli-mneneheni."
Rira ratiana: Plola la Yesus de Ray Makamori-Kalewna maka Uplerlawna Nano'taru inhatta?
25 Dewade mak kden la Yerusalem dom de riwra: "Yanpa Hadi ed maka ha rahak pa riwra rwenna? 26 Tamkek la Naltier die Nto'pi-ngaur to'a maka Ha Nakotkota la'a mutlialawna ralamni, ne riy id mana edonna npolliohor nan lirni. Yanpa it o'tani-matni re rat niohora oleka la' hade de Ray Makamori-Kalewna inhatte? 27 Mere la'pa Ray Makamori-Kalewan de Nmai die hota riy id mana naplinga Ha Nwatiawu meni pa Nmai. Mere riy di genni-tienni de it tatga." 28 Yesus Nwatuttut rier mia'ta la'a Uplerlawna roma kreini, dewade Nhaun pa Niwra: "Miy e mikota de miy miatga he' A'u me Awuatiawua la' hanmeni pa Amuai. Mere A'g edonna godia ralma-rior wamueh'u pa Amuai, mere Uplerlawna ed mak khopan pa Amuai, de E' ed mak ha rpesiaya. Mere miy die de edonna miatg Uplerlawna. 29 Mere A' die Agatga E'a, yoma Awuatiawu E'a, ne E nekpa ed mak khopna Amuai." 30 Yesus Nakot emkade de riy rwaror pa riwra rtorna wa mere riy id mana edonna nte'la la E'a. Yoma edonna nte' ma'ta la lerni maka Uplerlawna Ntutga oleka wa. 31 Ne rirahu la'a nhiopnu-pniepan de na'nama rpesiay E'a pa riwra: "Plol toto'a pa Ray Makamori-Kalewna eda di. Yoma la'pa Ray die Nmai, de hota hihi'a-yapyapi mak kamehi-kayona maka Nhi' nan de edon nareh dioin maka riy di Nhi' nan oleka re!"
Rwahak talan pa rtorna Yesus
32 Riy Parisi re ratlin nana rirahu e rapupu-raheria lir emkari la'a Yesus, noma rla' pa rora imam Yahudi o'tani-matni re rpolga mak katiaka Uplerlawna roma kreini me rhopan pa rla' rtorna Yesus. 33 Noma Yesus Nakot la riy mutlialawna re Niwra: "Hota la' lera ho'ke'eni di nmeh'a to' pa Agora miy, nhor diewade A'uwali owa'an la' E' maka khopan pa muai. 34 Hota mimihak A'u mere miy die edonna mpiatroma A'u yoma hota ta'en niana mlia' nan gen miaka Adiella." 35 Noma o'ta-mata Yahudi idma natian ida, riwra: "Hota riy di Niwra Nokur meni pede hota it edonna tlernana? Yanpa Niwra la' teman la riy Yahudi mak klaun la riy ornoha, totpena Nla Nwatutga riy Yahudi atia'a la' hande? 36 Hade Niwra hota itahaka E'a, mere hota it edonna twatrom nana me hota taken niana itla'a gen miaka Endella de! Lirni re nnia'eratni hya'a de?"
La' lerlalawna maka Yahudi rnairia gera rhoratreria tuini-wedni, de Yesus Niwra E' ed mak kala gera-lahu mormiori inhatta
37 Noma la'pa la'awa la' ler maka rwewiei-rnarnar memna, de lera hohoni la' ler kalwied de. Noma Yesus Ntutrieri na'nama Nhaunu pa Niwra: "Riy maka tiernu kerna de nmai pia totpena Agalla nemnu. 38 La'pa hameni ed maka kpesiay A'u, hota enlernana hya' maka kahniorat tar la Puka ralamni de niwra: "Hota nwatiawua riy de ihranu ralamni, de emeknekama ger ormata nwahi'da pa nwau liora mak kodia mormiori plalahwa pa nodi liarni."" 39 Yesus Nakot hade de Enakot nohora Uplerlawna Nhiwni mak hota riy maka kpesiay E'a rlernana. Yoma la lera re de Uplerlawna Nhiwni edonna Nerun ma'ta yoma Yesus edon Narian ma'ta la heyanna pa Nlernana ya'uli-yawedi. 40 Rirahu ratlina-ratailia Yesus lirni-tunnu pa doma riwra: "Matialo'onama Makwohorulu-ktatrulu maka Uplerlawna Nano'taru pa nmai e inhatti!" 41 Dom de riwra: "Ray Makamori-Kalewna maka Uplerlawna Nano'taru inhatti." Mere dom de edon rpesiaya pa riwra: "Ray Makamori-Kalewan nek hadina ne nwatiawu Galilea liewnu?! 42 La'a Puka ralamni de niwra hota Ray Makamori-Kalewan de edon nwatiawua Galilea mere Daud duratni-waitni hade, pa hota Enwatiawua Betlehem pa nmai, yoma Daud nohoni-raini etla hande." 43 La'awa hohoni dewade rirahu rawo'or nohora Yesus. 44 Dom de riwra rtorna, mere limni edonna rlok la inonni.
Yahudi o'tani-matni edonna rpesiaya
45 La' hohoni dewade mak katiaka Uplerlawna roma kreini, maka rhopan pa rla rtorna Yesus, rawal wia. Noma imam-imam re o'tani-matni ror riy Parisi re ratiana re riwra: "Nihya'pa miy edonna miodi Hade pa mmiai?" 46 Noma maka ha rhopna re rwalolla riwra: "Ami edonna matlin ma'ta riy raltier die emek E'a!" 47 Noma Parisi re rakot la: "Hoi! Yanpa Enwotar nan olek miy wiali pa miy miana mlier la klieratni? 48 Mimkek teka, la'a o'ta-mata mak kodi plolli la mai ita me riy Parisi re, e rpesiaya riy de? 49 Edonna toh?! Mere riy mutlialawna ri podaknu pa edonna rat niohora Musa deullu-tatarni. Ir rmeh'a neka er mak kpesiaya. Ne hota ir nekane rlernana Uplerlawna niukamnu!" 50 La'pa riy Parisi id mak kden la hande nwawa Nikodemus, maka kmai olek la Yesus la' ler dello! Noma nakot la Parisi re korni niwra: 51 "Ama-hyali miy re! La'a niukmu yala'ani plollolli de miala pa riy rwalol nohor pleini hihi'ini-yapyapni de nanpena mietlia niukamnu." 52 Noma Parisi re rwohora-rtatra Nikodemus riwra: "Hoi! Yanpa riy podku-padku mak kwatiawua Galile' id o'a pa hota emekwali Yesus de. Hota mlia' pa mpuahaka la' Puka ralamni. Puka ralamni de edon riwra mak kden la Galilea hota rla'a makwohorulu-ktatrulu!" 53 La'pa rwahaur pa nhorwua noma honona rla'awa romni.
Rlernana pat mak kaliai ida
1 Mere Yesus Nla'awa wo'ora Saitun. 2 La'pa repar yawyawar ma'ta de Yesus Nla' owa'an la'a Uplerlawna roma kreini, ne rirahu rma rahaka me rhopun reria. Noma Yesus Namtatna pa Nwatutga re. 3 Nwatuttut rieri, noma makwatutu-kwaye'a agama me riy Parisi rodia pat mak kaliai id pa rla'a Yesus de. Noma rhopan pa pat mak kaliai die ntutrier lia letgara-mneneha. Pat de ed maka makwatutu-kwaye'a agama re rtorna yoma nora muanke' ida ralira-raliai rereri. 4 Noma rakot la Yesus riwra: "Tungkurga, amlernan pat di nalialiai rereri. 5 Hota la'a deulu-tatra Musa de pat maka emkade, de rwatliewria pa nmat miemna. Pa hota emkameni la Tuna wniarorni?" 6 Mere irakot nek emkade, totpena rna'ailia Yesus pa ra rwaghala. Mere Yesus Nru'r rier tio'owa, ne Nal okarni na Nhorat la tani. 7 La'pa roir reria, noma Yesus Ntutrieri pa Nakot la re Niwra: "La' miy di, de he' nakleha do'a-hala, de na'ala watu pa na nwa'al ulga pat de." 8 Noma Yesus Nru'g owa'an ne Nhort owa'an la tani. 9 La'pa ratlin nana Yesus Nakot emkade dewade honona rapi'ir lolol wa, de maka hamtoto'oni rala' ulu na'nama tuwawiarni. Pa la'awa hohoni, dewade tamkek nan to'a Yesus Nora patke' de, rmemeh'a la' hande. 10 Noma Yesus Ntutrier owa'an pa Nakot la patke' de Niwra: "Ina, hare honona erla me? Riy id mana edonna nukmu o'a?" 11 Noma pat de nwalolla niwra: "Edonna Tuna." Noma Yesus Niwra: "Demade hota A' niek de, edonna gukum wali o'a. Dodo'ondi de, mlia'a nek wa, ne yana mpuehw owa'ana nhioli-lieta re."
La' Yahudi lerlalawanni maka ha rhoratreria tuini-wedni rnairia wa'du, de Yesus Niwra E' de mak karepar nana nohkerna wawannu inhatta
12 La' pa Yesus Naltier lia rirahu Niwra: "A'g ed mak karepar nana noha wawannu. Ne riy meni mak klernohor A'u, de hota edonna nlol melmelli, mere nmormior lia' lelerni mak kodia mormiori plalahwa pa nodi liarni." 13 Noma Parisi rakot la riwra: "Dodo'ondi de O' e mukot nohor inon wamuehemu ha nlolola pede lir maka Omukota re edonna rpesiaya." 14 Noma Yesus Nakot la Niwra: "La'pa Amueh'a ukot nohora ino'nu ha lolola ho'mana, hya' maka A'ukota de naplola. Yoma Agat niohora A ino'nu di, ha nwatiawu mueni, me hota A'uwal lia' hanmeni. Mere miy e miplinga Awuatiawu hanmeni me hota Alia'awa la' hanmeni. 15 Miy e mtiorna watghudi de mliernohora rimormiori yehwani. A' die edonna tiorna watghudi la rimormiori ida. 16 Mere la'pa Atiorna watghudi la' riy ida de Agukum riy id de edonna nhala, yoma A'g edonna mueh'a mere A'g e gora A A'mu mak khopna A'u am rewre'wa talla. 17 La'a miy deulu-tatar wamuehemi, de e rhorat targa la: La'pa mietla riy ida plolli-halli de riy woru onde narehi, e rtutrier nohora (saksi). 18 Emkade pede mak kakot nohora Aliolola, de hota riy woru, de idni de A'u me wornu de A A'mu mak khopan pa Amuai." 19 Noma ratiana Yesus riwra: "Hota Ammu de etla hanmeni?" Noma Niwra: "Miy edonna miatg A'u onde A A'mu. Yoma la'pa miy miatg A'u, de emekwalima miy miatga A A'mu wali." 20 Yesus Nwatut niohora hare honona de la'a kah kupan genni onni la'a Uplerlawna roma kreini. Mere la' riy id mana edonna ntorna Yesus yoma edonna nte' ma'ta la lerni-melli.
Riy honona mak edon kpesiay Yesus de hota rmat lia do'oni-halli ralamni
21 Noma Yesus Nakot owa'an la' ira: "Hota Alia'awa, ne mihaka A'u ho'mana hota miy edonna mliernana A ge'nu, mere hota mmiat lia do'omi-halmi ralamni." 22 Pede makla'a o'ta-mat la Yahudi idma ratian ida: "Yanpa Ha Niwra Nwen inonni yoma Eniwra la'a gen miaka Enla' de it edonna tlernohora." 23 Noma Yesus Nakot owa'an la ira Niwra: "Mimpiatiaw yawa, de la'a nohkeran di wawannu. Mere A' die edonna. Awuatiawua heyanna. 24 La' hade pede A'ukot olek tiy miy, hota miy mmiat lia do'omi-halmi ralamni. Yoma la'pa miy edonna mpiesiay A' die E' inhatta maka A'ukot oleka tiy miy, hota plol toto'a pa mmiat lia do'omi-halmi ralamni." 25 Noma ratiana Yesus riwra: "Hota plollolli de he' O'a?" Noma Yesus Nakot la re Niwra: "A'g ed maka nhi'inde A'ukot oleka tiy miy wia! 26 Harahu maka Agiwra ukota tiy miy me totpa Agetlia halmi re. Mere hota A'g edon liernohora A ralma-rior wamueh'u. Mak khopan pa Amuai die lirni-tunnu ed maka kden la plol wawna. Ne A'ukot nohora la'a nohkerna mniotni re, la'a hya' mak A'utlin nana la E'a." 27 Makden Yahudi re raplin niohora ma'ta E yaltierni della ira, de Enakot nohora Amni Uplerlawna. 28 La hade pede Yesus Nakot la ira, Niwra: "Hota la' miy er mak kariei piede Rimormiori A'na A' die urian la heyanna. Ne la' ler de nanpena miatga de A'g inhatta, maka ukot olek tiy miy, ne hota miat wualia de hya' mak Aghi'a re, de A ralma-rior wamueh'u atia'a. Hya' maka ukota re de A A'mu e Nwatut niana noma Aliernohora. 29 Ne E' ed mak khopn A'u. E edonna Naltarga Amueh'a mere Nor A' tialla yoma nhi'inde Aliernohora E ralma-riorni." 30 La'pa Yesus Nakot hare honona de nek de rirahu rpesiaya. 31 Noma Yesus Nakot la riy Yahudi mak kpesiay E'a re Niwra: "La'pa mliernohor reria A wniatu'tu-wniaye'u, de hota plol toto' pa mpiali olek la maklernohor reri A'u inhatta. 32 Ne la'pa emkade de hota miat niohor hya' ed mak kaplola pa narieiniande rwe'er doin miy lia wutwutu-kokgohomi." 33 Noma rakot la Yesus riwra: "Am di de Abraham duratni ami. La' ululu meman pa la'pa ntutu-nte'ela dodo'ondi, de riy edonna rodi plolli mai ami! Pa hota emkameni pa Omukota Miwra hota rwe'er doin am lia wutwutu-kokgoh mamni?" 34 Noma Yesus Nwahla Niwra: "Plola la'a A li'ru ri. La'pa riy mak khi' do'a-kyap hiala de nwal lia do'a-hala atni-wa'arni. 35 Pede mak khi' do'a-kyap hiala ida de emeknekama ata-wa'ara ida mak kakleha gen temtemna. Mere la'pa nwal lia a'na raralma ida, de namtemteman la genni pa nodi liarni. 36 La hade pede la'pa Uplerlawna A'nani A' die Awue'er doin olek miy lia do'a-hala, de hota toto' meman pa rwe'er doin olek miy wia. 37 Plola, Agat niohora miy di de Abrahama duratni-waitni. Mere miy miwra mpien A'u, yoma mihmena mrieiniana A wniatu'tu-wniaye'u. 38 Hya' maka A'umkeka la A A'mu, de hade ed mak A'ukota. Mere miy di de mliernana wniatutu-wniaye'a la miy ammi." 39 Noma rwahla Yesus lirni riwra: "A am mamni de Abrahama." Mere Yesus Nwahla: "La'pa miy ammi toto'a Abraham, de hota mtiolliohora hya' maka Abraham ha nhi'a. 40 Mere A'uno' miy lia hya' mak kaplola maka A'utlina la Uplerlawna, mere miy miwra mpien A'u. Abraham edonna nhi' mak emkare. 41 Mere miy nhiolmi-lietmi hihi'imi-yapyapmi rlernohora miy ammi dom to'a." Noma rwahla Yesus lirni riwra: "Am di de a'na let atia' ami. A am mamni de Uplerlawna Nmeh'a." 42 Noma Yesus Nakot la re: "La'pa plola la miy ammi Uplerlawna, de hota miy mhi' kalwiedwed A'u yoma A' di de Awuatiawu E'a. A'g edonna godia A ralma-rior wamueh'u pa Amuai. Mere E' ed maka khopan pa Amuai. 43 Hya'a nariei piede miy edonna mnia'erit nana A'ukotkota? Yoma mihmena mrieiniana A wniatu'tu-wniaye'u. 44 Miy ammi de hegana amlawanni, ne hota mliernohora ha ralma-riorni. Yoma hegan de yehwani de la' ululu meman pa ntutu-nte'ela lera-mela ri, nwunu-nwenan mamaini. Ne la' walia Enputra-npalka, na'ohpa-nalahara yoma edon nden etia la plol wawna. Ohpa-lahara re honona rwatiawua e'a pede la'pa ena'ohpa-nalahara de nlernohor neka e yehwa wamueheni inhatta. 45 Mere A' di de ukot nohora mak kaplola, hade pede miy edonna mpiesiay A'u. 46 La' miy hononmi de riy id mana ta'en niana nakot nohor A do'a-ha'lu. Ne la'pa A'ukot nohora mak kaplola, de hya' nrei piede miy edonna mpiesiay A'u? 47 Riy mak kwatiawua Uplerlawna, de natlin la Uplerlawna lirni-tunnu. Mere miy di de edonna mpiatiawua Uplerlawna pede mihmena mitlina-mitailla."
Yesus inponni nareh dioin la Yahudi upni-tgarni Abraham maka ha rhu'ru-rhelma
48 Noma riy Yahudi re rakot la Yesus riwra: "Hoi! Maka amakot oleka de O' de makdena Samaria id O'a, ne hegana e nhu'ru ralm O'a, a lir mamni re naplollola!" 49 Noma Yesus Nakot la re Niwra: "Hegana edonna rhu'ru ralm A'u. Mere A'g ghu'ru-ghelam la A A'mu mere miy e mipolu-miliell A'u. 50 A'g edonna uhaka riy pa ra'uli-rawedi A'u. Mere Riy id ed ma'ta la mak kwahak pa ra'uli-rawedi A'u, ne E' ed mak ktorna watghudi. 51 A li'ru ri plola, de la'pa riy mak katlin mai A'u, de hota edonna nmati ne nmormior pia nodi liarni!" 52 Noma riy Yahudi re rakot la Yesus riwra: "Ami e matlina O lirmu ri la' dodo'ondi, de amatga de plol toto'a la hegana e nhu'ru ralm O'a. Abraham nek de nmati, emkade walia makwohorulu-ktatrulu re honona. Mere O lirmu niwra riy mak klernohora O lirmu, de hota edonna nmati. 53 La'pa Abrahama, nek de nmati olekwa, ne makwohorulu-ktatrulu mana rmati olekwa, ne hota hya' owa'an O'a? Ah, O' di de taken niana inponmu narehia a am mamni Abrahama!" 54 Noma Yesus Nakot la re Niwra: "La'pa A orgah'u uhaka riy rhu'ru-rhelm A'u de hota nhiu'ru-nhielam de nakleh weli. Mere A A'mu maka miy miwra miy Uplerlawanmi nek de ed mak kwak pa rimormiori rhu'ru-rhelm A'u. 55 Mere plollolli de miy niek de edonna miatga E'a. Mere A' di nanpena ed mak kat niohora E'a. La'pa Agiwra A'g edonna gatg E'a, nnia'eratni A'g ulahara, pa emekwali miy e mhi' nana. Mere plollolli de Agat niohora memna E'a me Aliernohora E lirni-tunnu. 56 Ne la' walia miy ammi Abraham niwra namkek memna A le'ru-me'lu me ralamni nahepuepur nohora. Meman neka de enamkek oleka A' wa ne ralamni kalwieda!" 57 Noma riy Yahudi rakot la Yesus riwra: "Omhuol niana nohkerna wawannu de edonna nla' ma'ta anni terampwolima, ne omumkek oleka Abrahama?!" 58 Yesus Nakot la re Niwra: "Plola la A li'ru ri. La' ler Abraham inni edonna ntor ma'ta Abrahama la nohkerna wawannu di de A' inhatti A'g ed olek la wa." 59 Dewade riy Yahudi re ra'ala watu pa riwra ra rwa'ala (yoma la' E lirni emkade de emeknekama Niwra Uplerlawna E'a), mere Yesus Nade'a pa Nhoitio'or la Uplerlawna roma kreini pa Nla'awa.
Yesus Nhi' aphyaria mak matni kyata pa namkek owa'ana
1 La'pa Yesus Nalala' reri ne Namkek nana muanke' ida mak matni kyat meman la apun ralma. 2 Noma maka ha Nwatutu-nwaye'a re ratiana riwra: "Tungkurga, nihya'pa ha inni ntor hade de matni niat memna? Yanpa e do'oni-halli onde inni-amni do'oni-halli?" 3 Noma Yesus Nakot la re Niwra: "Ha matni niat de, ha do'oni-halli edon nariei, onde inni-amni do'oni-halli, mere hade emkade totpena riy ramkek memna Uplerlawna plolli-mneheni la e inonni. 4 La'pa Amuormior mia'ta, de emeknekama lera ed ma'ta pa it tkarkiar reria Mak khopn A' die kniarni. Yoma hota mela nma ndamt ita, pa nhi'nande riy id mana edonna nkari. 5 Pa la'pa A'g e muormior mia'ta la nohkeran di wawannu, de Aghi' hitita-reprepar la noh di wawannu." 6 La'pa Nakot emkade noma Nakrui lia tani, na'nama Nkoiri-nwalia pa Noha la riy de matni. 7 Noma Nakot la riy de Niwra: "Mlia' pa mura'ru la gera tliwu (kolam) Siloam." Yoma Siloam de nnia'eratni de "Mak Ha Nhopan pa Nmai". Pede riy de la'pa nararga gaini. Noma nawal lia romni de matni namkek olek wa. 8 Noma e rom heiwialli re rora riy mak nhi'inde ramkek nande nmeh'a nawakwaka re riwra: "Yanpa hade ed mak nhi'inde kawiatur targa pa nmeh'a nawakwak dena?" 9 Ne la' dom de riwra: "Riy de inhatta." Mere la' dom de riwra: "Hade edonna. Mere gaini nhi'pa ramneh wa." Mere orgahani niwra: "A'g inhatta!" 10 "La' emkameni pede o matmu de namkeka?" 11 Noma nakot la re niwra: "Riy maka nanni Yesus de ed mak Nkoiri-nwalia tani pa noha la ma'tu na'nama Nhopan pa a lia urarga a ga'yu la gera tliwu Siloam. Noma alia'awa pa a'urarga a ga'yu pa a ma'tu naphyar wia." 12 Noma ratiana riwra: "Riy de etla meni?" Noma nwalolla niwra: "A'uplinga."
Riy Parisi ratian nohora he' mak khi' kalwieda riy mak mat yat de
13-14 La' ler maka Yesus Nala kruini na Nawoh'a tani pa Nhi' kalwieda riy mak matni kyat de, ntai mdududga Sabat lerni (maka Yahudi re yana rkar lia de). Dewade irodia riy mak dodo'ona matni kyat de la riy Parisi. 15 La' noma Parisi re ratian nohora mak matni kalwied olek de riwra: "La'pa emkameni pede o matmu naphyar wia?" Noma nwalolla niwra: "Riy de Na'ala tani mak Nkoiri-nwal die na'nama Noha la ma'tu me nhor nioma a lia urar dioinia a ga'yu dewade a ma'tu ramkek meman wa." 16 Mere riy Parisi re dom riwra: "Mak khi' kalwieda ha matni di, hade edonna Nwatiawua Uplerlawna yoma edonna Nhu'ru-nhelma la'a Sabat lerni." Mere dom de riwra: "Mere taken niana riy mak khi' do'a-hala rhi'a-ryapia hihi'a-yapyapi mak kamehi-kayona mak ktutga Uplerlawna rurni-laini mak emkade!" Noma honona re hururi-wowo'ora. 17 Noma riy Parisi re ratian owa'ana riy de riwra: "O' nek de ed mak kler la kalwiedni. Pede mukot teka, hota emkameni la o wniarormu la riy mak khi' o matmu pa kalwied dena?" Noma niwra: "Agatga de makwohorulu-ktatrulu id hade." 18 Mere makhi'a o'ta-mat la Yahudi re rahmena rpesiaya de ululu de riy de matni niata mere dodo'ondi de namkek olekwa. La' hade pede la'pa rhopan pa rla rpolga riy de inni-amni. 19 Noma ratian nohora: "Plola a'nami di de mak miwra ha nmor niohora mat yatni? Ne emkameni pede dodo'ondi de matni nkalwied wa?" 20 Noma inni-amni riwra: "Plola a a'na mamni hadi, ne ha matni niat la'a apun ralam memna. 21 Mere la'a hya'a nrei piede dodo'ondi de matni nkalwied wa, ami e maplinga. Ne he' ed mak khi' kalwieda ha matni pa namkek wa, hade nek de ami e maplinga. Mitian neka e orgahi wa. Ha tuwnu nkern olekwa pa hota orgahi pen neka nwahauria." 22 Inni-amni rakot emkade yoma ratga de he' to'a maka kwayow nohora Yesus Niwra Yesus de Ray Makamori-Kalewna, hota Yahudi o'tani-matni rlarn ir pa rler owa'an la gen miaka nhi'inde Yahudi rhi' kreini-iskolli. 23 La' hade pede riy de inni-amni riwra: "Ha nlawn olekwa pa mitian nek orgahi wa." 24 Noma rpolg owa'ana riy maka dodo'ona matni kyat de pa ratian owa'ana riwra: "Mliokar memna, totpena yana mulahara, yoma amatga mak kaphyaria o matmu de, mak khi' do'a-hala hade." 25 "Ha Nhi'a do'a-hala me edonna, de a'uplinga. Mere maka agatga de, de ululu de a ma'tu yata mere dodo'ondi de a'g e umkek olekwa!" 26 Noma rakot owa'an la riwra: "Enhi'a hya' tiy o'a pede o matmu re raphyari?" 27 Noma riy de nakot la re niwra: "A'ukot oleka honona tiy miy wia mere mihmena mitlina. Hya' nariei pia miwra mitlin owa'ana? Yanpa miwra mliernohor wali E'a?" 28 Dewade honona rapolu-raliella riy de pa rakot la: "Hoi! O' ed mak klernohora E'a. Am die edonna. Amlernohor to' Musa. 29 Amatga de Uplerlawna Naltieri olek la Mus wa. Mere la riy de, ami e maplin niohora Ha Nwatiawu meni pa Nmai!" 30 Noma riy de nakot la re: "Ah! A'g edon nia'erit nan miy ralma-riormi! Yoma plollolli de mimkek oleka Enhi' a ma'tu pa rkalwieda mere mitian nohor ma'ta Ha Nwatiawu hameni pa Nmai?! 31 Itatga de Uplerlawna edonna ntail nohora mak khi' do'a-hala, eneknek to'ama riy mak khu'ru-khelam la Uplerlawna pa nlernohora E ralma-riorni. 32 La' ululu ma'ta la' noha knieranni, de edonna ratlin ma'ta riy maka matni kyat la apun ralma de riy rhi'a pa nkalwieda. 33 La'pa riy de edonna Nwatiawu Uplerlawna, de taken niana Nhi' hare honona." 34 Noma Parisi riwra: "O' di de mak penpuen lia do'a-hala la' lera inmu ha nayoria o' de, pa hota emkameni pa omuiwra mpuatutg ami?!" Dewade la' ler de meman pa rlarna e' pa yana nla' owa'an la gen miaka Yahudi re rhi' kreini-iskolli.
Mak kiwra klernohora Yesus, de hota Entutga talan plollola la ira, mere mak kiwra ir orgahi rat niohor oleka, hota yeher to' pa rler la melmelli-kalkalamni
35 La'pa Yesus Natlin nande rlarn oleka riy della gen miaka Yahudi re rhi' kreini-iskolli. Noma Yesus Nwahaka riy de pa Nakot la Niwra: "O e mpuesiaya Rimormiori A'nani de me edonna?" 36 Noma riy de niwra: "Tuna, he' hade pede? Mtiulan pa Mukot a'u totpena apuesiaya." 37 "Omumkek olek E'ewa. E ed mak e Nor o pa kaltier di!" 38 "Apuesiay O'a Matroma!" Dewade nru' pua ntuk lia Yesus gaini ralamni. 39 Yesus Nakot la Niwra: "Amuai lia nohkeran di wawannu totpena Atiutga he' ed mak kaplola me he' ed mak khala. Atiutga talan la riy mak kaplin niohora Uplerlawna, pa emolmolan nekama Aghi' mak matni kyata pa ramkek memna. Mere riy mak kiwra ir inon wamueheni rat niohora oleka Uplerlawna, de hota yeher to' pa rler la melmelli-kalkalamni pa emeknekama mak matni kamkeka de mak kwaldioinia pa rwaho'a-rwahai." 40 La'pa riy Parisi mak kden la hande doma ratlin nana Yesus Nakot emkade noma ratiana Yesus riwra: "La' O ralma-riormu de ami e maplin niohora Uplerlawna pa emekwalima mak matni yat wali?!" 41 Noma Yesus Nakot la re Niwra: "La'pa mpiayow nohora de miy matmi niata, de Uplerlawna edon Nwaghal miy. Mere yoma mikot la miwra mimkeka me miatga, hade nnia'eratni de miy er ma'ta la do'a-hala wawannu."
Yesus de emekwali makodi duma kalwiedwed inhatta me mak klernohor reri E'a rakniau reria E lirni
1-2 "Mitlin rer lia A li'ru mak kaplollola ri! La'pa riy meni mak klola lutru ktema pa kler la duma riokni ralamni, de makwuri-makgalmua hade. Mere riy maka kmai pia klola nhiari, de makodi duma inhatta. 3 Mak katiaka riokni nhiarni, nhari nhiari la makodi duma inhat de, ne pipni-dumni re rlernohora makodi duma die yoma ir rakniau reria matromni lirni. Enpolu nenenna nanni pa nodgiota re. 4 La'pa rodgiota pipni-dumni dewade makodi duma inhat de nala' ulu nampena pipni-dumni rlernohor reria, yoma duma re rakniau reria lirni. 5 Hota ir edonna rlernohora riy meheni, mere rawlar dioin la la'pa edon rakniau reria riy de lirni." 6 Yesus Nakot nohora lira yawalliohor de, mere ir edonna rna'erit nana Yesus ha nakotkota. 7 La' hade pede Yesus Nakot lira ralamni owa'an la ira niwra: "Plola la A li'ru ri. A' di de emeknekama duma riokni nhiarni. 8 He' to'a mak kala' ul A'u totpa rwal lia makodi duma, de emeknekama makwuri-kgalmu irhatta. Mere hota pipi-duma re edon rlernohora et miemna ir lirni-tunnu. 9 A' die emeknekama nhiari. He'a nmai pia nlol A' die hota nlernana yamori-yalewna. Hota e' de emolmolan nekama pipi-duma mak edon kamta'ata mere nhu'ru rlol nhiar die pa nla'a-nmai die nlernan ya'ana-yemnu, tertera-laliahu. 10 Makamnelu-kamna'a, de nma nkamna' to'a ne nma nwunu-nwenna, onde nma nweyata-nwaniawu. Mere Amuai die, totpena rimormiori rlernana mormiori-dardiari maka penpuen niohora Uplerlawna ra'ani-pallu. 11 A' di de makodi duma kalwiedweda inhatti. Makodi duma kalwiedwed de nhur dioinia inonni pa ntuwu-nhaiya pipni-dumni. 12 Mere riy mak kodi duma yoma na'an kai lia pipi-duma re matromni de, la'pa namkek tutga hapora-hadawra mak klihir matmata-khaw riarara nmai wia de hota makodi duma die nawlar wia, yoma pipi-duma re e gahani atia' ira. Ne hota pipni-dumni re kurna-kiatra pa hapora-hadawra nma nlihira-nnaiya. 13 Mak ka'ana siewa-kai re nawlar wia yoma na'an to' siewa-kai, ne e' edonna nwo'la nohora pipi-duma re. 14 Mere A' di de makodi duma kalwiedwed A'g inhatti. Agat niohora A pi'pu-du'mu, ne A pi'pu-du'mu ho'mana rat niohora A'u, 15 pa hota emekwalima A A'mu Natg olek A' wua, ne Agat niohora A A'mu. Ne hota Agala A ino'nu ga tiuwu-ghai niana A pi'pu-du'mu re. 16 A pi'pu-du'mu er walia mak edon ror ma'ta dum wok di pa rawok wutu. Hota Agodia re pa ror wutga A du'mu ri. Ne hota ratlin la A li'ru pa ir rora wokni di rla'a liewr id pa rler la rioka ida, me A'g ed mak kla' makhuri-makwa'ana mak ktorna re. 17 A A'mu Nsayni A'u, yoma Agala ino'nu pa rwunu-rwenna, totpena hota Amuori owa'ana. 18 Riy id mana hota edonna nwunu-nwen A'u. Mere Awuayow nohora Agal A ino'nu di, de plolli nek la A orgah'u wa. A'g ed mak kodi plolli pa Agala A ino'nu pa rwunu-rwenna, ne Agodi plolli pa hota Amuori owa'ana, yoma kniar die ed mak A A'mu Nala mai A'u." 19 La'pa Yesus Nakota lir de dewade riy Yahudi re rawo'or owa'ana. 20 Rirahu riwra: "Hade e nga'u yoma hegana nhu'ru ralma, pa yan tatlin la!" 21 Mere la' riy dom de e riwra: "Riy mak hegana nhu'ru ralma de edonna raltier die emkade. Taken niana hegana nhi' kalwieda riy mak matni yata."
Riy Yahudi rahmena rreiniana Yesus
22 Noma la'pa nte'ela lerlalawna maka riy Yahudi rtepartarlia yamuki-yahepur nohora ir tuini-wedni maka rhoratreria Uplerlawna roma kreini yamounu-yawitanni la'a Yerusalem. La' ler de wal pia tah'i muti lerni. 23 Noma Yesus Nla'-nmai lia Uplerlawna roma kreini nhieunu (teras rumah) maka rweta la Salomo genni. 24 La' ler de riy Yahudi rma rawok la Yesus onni pa rpepan reria na'nama ratiana riwra: "Mowen nianpena Mukot nohora he' O'a totpena yana amparor nohor reri O'a? Mukot doin memna la'pa plol toto'a de Ray Makamori-Kalewna id O'a!" 25 Noma Yesus Nakot la re Niwra: "A'g e ukot olek miy wia mere miy die edonna mpiesiaya. Hihi'a-yapyap miak kalwiedweda, maka Aghi' reri totpa Aliernohor reria A A'mu nhiopanni de, hare er mak ktutga he' A'u. 26 Mere miy edonna mpiesiaya yoma miy edonna mlier wut lia A pipi-du'mu. 27 A du'mu re ratlin la A li'ru. Agatga re, ne irlernohor A'u. 28 Agala mormiori-dardiari la ira, ne hota ir edon rler la matmiati plalahwa mere rmormior pia nodi liarni. Riy id mana edonna nlernan talan pa na'ala harella' A li'mu ralamni. 29 A A'mu mak kal olek harella' mai A'u, de Nareh dioinia haneknek wawannu. Pede riy id mana edonna narur pia nwarui niana harella' A A'mu limni ralamni. 30 Agora A A'mu de lir ida." 31 Noma riy Yahudi re ra'ala owa'an watu yoma riwra ra rwa'ala Yesus. 32 Mere Yesus Nakot la re: "Miy e mimkek oleka hihi'a-yapyapi mak kamehi-kayona mak karehi-kalawna harahu, maka A A'mu Nhopna Aghi'a. Pa la'a hihi'a-yapyap mak kamehi-kayona meni ed maka kariei pia miy miwa mpia'ala A'u?" 33 Noma Yahudi re rwalolla riwra: "Hihi'a-yapyapi mak kamehi-kayona maka Omhi' nande edonna ratota-rariei pia ampa'ala O'a, mere yoma Omhi' lir yat la Uplerlawna. Rimormiori id nek O'a ne, Omhi' inonmu de emekneka Uplerlawna." 34 Noma Yesus Nakot la Niwra: "Miy e mitlin oleka maka miy Puk deulu-tatarmi de e rhorat targa, de Uplerlawna lirni Niwra: "Miy die rpol miy lia Uplerlawna a'nani". 35 Itatga la Puka lirni maka ha rhorat taru re rnairia pa nodi liarni. La' hade pede la'pa riy maka klernana Uplerlawna lirni-tunnu deullu-tatarni nek de, er maka Uplerlawna Nwet la niwra: Uplerlawna a'nani, 36 nihya'pa miy e miwra A'g e wuohora-tiatra Uplerlawna la'pa A'g e ukota Uplerlawna A'nani A'u? Uplerlawna nekane ed maka Nwaliri-nwalioh nan A'u me Nhopan pa muai. 37 La'pa A'g edonna ghi' nana tulla-kniar miaka A'mu Nala pa Aghi' nande yana mpiesiay A'u. 38 Agat niohora mihmena mpiesiaya A li'ru maka nhi'inde A'ukot tiy miy, mere yoma mimkek nan oleka hihi'u-yapya'pu mak kalwiedweda re mak Aghi' nan oleka, hota mpiesiay A'u. Hota la' hare pede miat tioto' meman de Agora A A'mu de riy id ami." 39 Dewade rawenan pa honona re rwahak pa rtorna Yesus, mere ta'en niana rtorna E'a. 40 Noma Yesus Nawali owa'an la gerlawna Yordan walli, la' gen miaka Yohansi nharan ulia de, pa Nden la hande wa. 41 Rirahu rma rre' teman Yesus la hande, na'nama rakota riwra: "Yohansi nmeh'a neka edonna nhi'a hihi'a-yapyapi mak kamehi-kayona mak ktutga Uplerlawna rurni-laini, mere hya' maka Yohansi nakota nohora la' riy di, de naplola." 42 Noma rirahu la hande rpesiaya Yesus.
Lasarus matmiatni
1-2 La' ler de, de muanke' ida nanni Lasarus nor rewre'wa narni Maria nora Marta rhol wiutu la' leta Betania. Mari di de ed mak khuria wu'ru hup mikmikri la' Itmatromni lakni, ne nala moratnu na nkuhi akerna. Noma la ler ida de Lasarus e namehra. 3 Pede narni rora rhopan pa rla rod kiot la'a Yesus onnila Lasarus mehrani-maunu. Pa la'pa rla rakot la Yesus: "Matroma, Maria nora Marta narni mak Omsiayn de e namehra." 4 Pa la'pa Yesus Natlin nana lir de noma Nakot la Niwra: "Hota nnien die edonna nodia matmiati la' Lasarus. La' hare honona de itamkeka totpena ya'uli-yawedi nden rer lia Uplerlawna, me totpena nden rer wial lia Uplerlawna A'nani A'u." 5 Yesus Nsayn reria Marta, Maria nora narni Lasarus. 6 Mere la'pa Yesus Natlin nana Lasarus e namehra de, noma Entot pa Nden nek la hande pa mahnekni lera worg owa'ana. 7 Lera woru nte' doin la dewade Nakot la maka ha Nwatutu-nwaye'a re Niwra: "Mai pia tawal lia Yudea." 8 Noma rakot la riwra: "Tungkurga, na'nama riy Yahudi riwra rwatliewria O'a la' hande totpa rwunu-rwenn O'a, noma dodo'ondi Omuiwra muwali owa'ana?!" 9 Noma Yesus Nnairia yawalliohora (totpa ratga de la'pa hota ror E' talla de hota edon rler la kropna-krieutu yoma lerni edon ntutu ma'ta) Nakot la Niwra: "Miplinga de la' lera ida, de lera nhita-nrepra jama termida wehrani woru?! Riy maka kor rewre'wa A' tialla de emeknekama nalala' lola lelerni, pede edonna ndunti-nwetru, yoma e namkek reria noha wawannu. 10 Mere mak kala'a la lera mel'utni de hota ndunit taru, yoma noha melmela-kalkalma." 11 Yesus lirni emkadella ira na'nama Nakot owa'an la re Niwra: "It talanni Lasarus e nanin oleka wa, mere pena A lia umata." 12 Noma maka Yesus ha Nwatutu-nwaye'a re rakot la riwra: "Matroma, la'pa Lasarus nanina de hota plet pa nkalwieda." 13 La'pa Yesus Niwra "e nanina" de Yesus ralma-riorni de Lasarus nmati olekwa. Mere iratniekame Yesus ralma-riorni, de Lasarus e nanin toto'a. 14 La hade pede Yesus Nto'pi-ngaur lirni Niwra: "Plollolli de Lasarus nmati olekwa, 15 mere hota hadi nwal lia talan pa mimpiesiaya. La' hade pede A ralmu e nahepru kennama A'g edonna lia'a hande wonyira-melulu pa Aghi' kalwied e'a. Mere dodo'ondi de mai pia tla teka Lasarus mak kmat die!" 16 Noma Tomsa, maka rhoiya la A'na Dio' de nakot la mutwualli maka Yesus ha Nwatutu-nwaye'a re niwra: "Mai pia tlernohora Yesus la Yudea, la'pa tmat niohora E'a." 17 La'pa Yesus Nte'ela Betania noma rakot la Yesus de riwra, rkenia olek Lasarus inonni la liena ralamni pa lerni wogat olek la hande wa. 18 Mere leta Betania di, de olietni la Yerusalem, de edon nhal de kilu wotelu. 19 Pede riy Yahudi liawanni rma rod niohora Marta nora Maria totpena ramatar nohora yoma narni nkurn olekwa. 20 La'pa Marta natlin nana Yesus Nmai nieka, dewade nla nwatroma Yesus, mere Maria edon nlergot ma'ta. 21 Noma Marta nakot la Yesus niwra: "Matroma, la'pa ler de Matro'mu etla handi mana taken niana a na'ru de nmati. 22 Mere Agat niohora meman de la' dodo'ondi wali pia Uplerlawna hota Nal to'a hya'a mak Matroma Nwaka la E'a." 23 Yesus Nakot la Niwra: "Marta, o narmu de hota nmori owa'ana." 24 Marta nwalolla: "Matroma, Agatga de hota Lasarus nmori owa'an la'a lera noha niatni maka ramoria mak kmati rella matmiatni ralamni." 25 Noma Yesus Nakot la Marta Niwra: "A'g ed mak kamoria mak kmati me gal mormiori lia ira pa nodi liarni. Riy mak kpesiay A' die hota matmiati edon nodi plolli la mere rmori owa'an la'a matmiatni ralamni. 26 Ne mak kmormiori mia'ta, makpesiay A'u, de hota rler la mormiori plalahwa pa nodi liarni. Hota ompuesiay lir maka A'ukota re me edonna?" 27 Marta niwra: "Matroma apuesiaya, Matro'mu de Uplerlawna A'nani mak khi'a Ray Makamori-Kalewna maka Uplerlawna Nano'taru pa Nmai lia nohkeran di wawannu."
Yesus Nkakru
28 La'pa Marta nakot emkade noma nla npolga elli Maria pa napup lia tlinni niwra: "Tungkuru Nmai olekwa ne e Natian o'a." 29 La'pa Maria natlin nan hade noma namat doin pa nla nwatrom Yesus. 30 La hade de Yesus edonna nler ma'ta la leta ralamni. Enden ma't la leta to'orni maka Enor Marta rwatrom pa rwahauru. 31 Riy Yahudi maka ramatar nohora Maria la' roma nayanni, la'pa ramkek nana Maria pleta-plet pa namat doin wa pa nlergot wa, noma rla rlernohora Maria yoma ratniek yanpa Maria nla nkakur la Lasarus hoini wawannu. 32 La'pa Maria nte' tar lia Yesus onni noma nwaltior la Yesus gaini ralamni na'nama nakot la niwra: "Matroma, la'pa Omdien la handi mana la ler de, a na'ru de edonna nmati." 33 La'pa Yesus Namkek nana Maria nkakru, me la' walia riy Yahudi mak kor rewre'wa Mari' talla re honona rko'a-rkakur wali, dewade Yesus mana ralamni nmayo' doin wali. 34 Noma Yesus Natiana re Niwra: "Miy e midera Lasarus inonni la hanmeni?" Noma rwalolla riwra: "Ma Mumkeka Matroma." 35 Noma Yesus Nkakur wa. 36 Noma Yahudi re riwra: "Mimkek to'ola hade e Nsayn wenna Lasarus." 37 Mere la' dom de e riwra: "Hade nhi'a mak matni kyata pa rkalwieda ne nihya'pa E edonna Nhi' Lasarus pa edon nmati?"
Yesus Namori owa'ana Lasarus
38 Noma rla'awa lien maka rkenia Lasarus inonni de. La'pa rte'ela hande Yesus ralamni nmolu-nhelma. La' hande e rala wat liawna id la ra rherit targa lienni de nhiarni. 39 Yesus Nakot la re Niwra: "Mpiaklol doinia wat diel la'a nhiar de gaini." Noma Lasarus mak kmat die narni Marta nakot la niwra: "Matroma, rader olek hadella' melul handena, la lera wogat olekwa pa hota inonni ngehpa-nta'l olekwa!" 40 Noma Yesus Nakot la Marta Niwra: "A'g e ukot oleka hare tiy o'owa Marta. La'pa ompuesiaya de hota o' e mumkeka Uplerlawna preheni-mkaini." 41 Noma rte'la la wat liawan de pa rwaklol dioinia. Nhor nia'nama Yesus Nwatniar la lyanti na'nama Niwra: "Ama, A'u'uli-uwedi O'a yoma Omutlin olek la mai A wua. 42 Agatga de O tlinmu e Natnia'wa rer lia A li'ru, mere A'ukot nohora harilla' rimormiori mak kden la handi, totpena rpesiaya O' nanpena ed maka khopn A'u." 43 La'pa Nakot emkade, na'nama Nhaun matmiat pia Niwra: "Lasarus ee! Mliergot pa mmuai ee!" 44 Noma Lasarus mak kmati olek de nlergot wa. Limni-lakni e ratnioman ma'ta la koka, ne gaini e natniutuw la kokanan maka ra rtutuw gaini. Yesus Niwra: "Miewar doinia kok lawan della totpa nala' de yana nawuhi-nawe'eta."
Rna'ohma pa rwenna Yesus
45 Riy Yahudi harahu maka kma kamatar nohora Maria, de rpesiaya Yesus, yoma ramkek oleka Yesus hihi'ini-yapyapni re honona. 46 Mere riy dom pal lia ira, de rla rod lir la riy Parisi la'a hya' maka Yesus Nhi'a-nyap niana re. 47 Hade pede riy Parisi rora imam re o'tani-matni, rpolg awoka mak ktorna watghudi la agama Yahudi honona pa rawok wutu. Honona rwaror pa riwra: "Hota itsi'a hya'a la Hadena? Riy di Nhi' neka hihi'a-yapyapi mak kamehi-kayona mak ktutga E rurni-laini. 48 La'pa it edonna tatut niana hade, de hota rirahu rpesiaya, pa reiniande kokokna-rariarni lalawna, ne la'awa honi de hota mak kodi plolli la hairi Roma rmai pia hota rwakloli-rwaklalia Yahudi itora it roma kreini di." 49 Riy id etla hande, nanni Kayafas, la' anin de, nhi'a o'ta-mata lalawna la imam-imam re, pede niwra: "Hoi! Miy e miplinga hadomdoma. 50 Miy e miplinga de la' samomuounu de rirahu nariei pia riy ida nmati, mere yana riy ida nariei pa it luwnu-a'nani namkoha-namnanna." 51 Kayafas enakot hade, mere ha wniaror wamueheni atia' hade mere yoma Uplerlawna Nariei. Enakot nohora hare yoma la'a anin de ralamni de, E de, o'ta lawna la imam-imam re, pa lirni de nror targa (nakot targa) Yesus matmiatni de yoma la'a Yahudi rerieini. 52 Ne edonna ntut nian to'a riy Yahudi rmeh'a mere la' walia Uplerlawna upni-a'nani mak kden la meni-meni totpa hota rawok wutga la ida. 53 La'pa ler de meman pa mak kodi plolli la Yahudi re rla lir id pa riwra rwenna Yesus. 54 La' hade pede Yesus Nahmena Nayamkek la riy mutlialawna riy Yahudi nhiopannu-pniepanni. Yesus Nwaran la hande pa Nla'awa la' let maka ha rweta la Efraim mak rehgorgorga wo'orletna-kawurloini. Yesus Nor wutga maka ha Nwatutu-nwaye'a re rden la hande wa. 55 La' ler de de nhi' pa nwakriania lera-mela Yahudi lerlalawanni Paska. Pa rirahu rwatiawua leta-ruhuna re pa rtawniokria Yerusalem totpena rlernohora riy mutlialawna wokni-le'enu pa ramou-rawitna inonni totpa rwei lerlalawan mak hota ha rhi'a de. 56 Noma la'pa rawok la Uplerlawna roma kreini de rahakhak reria Yesus pa idma nakot la ida riwra: "Emkamenila miy ralma-riormi? Matialo'onama E' edonna Nmai lia'a lerlalawna ri?" 57 Irakot emkade yoma la imam-imam re o'tani-matni rora riy Parisi ralgot oleka tita la'a riy meni mak kat niohora Yesus handen la, de plet pa nma nakot totpena rla rtorna.
Maria nhuria wu'ru hup mikmikri la' Yesus la Betania
1 Tre' ma'ta lera wonem pa lerlalawna Paska, noma Yesus Nla'a leta Betania, la Lasarus letni maka Yesus Namori Lasarus la' matmiatni ralamni de. 2 La hande de riy rhi' ya'anlawna-yemunlawna pa rhoi-rtania Yesus, ne Marta ed mak kamkek la hare pa ra'ana. Lasarus nor wutga mak kmai re pa ra'an rewre'wa wut lia Yesus. 3 Edon nalo'on wali ne Maria nodia wu'ru hup mikmikri narwastu, mak welli werta, edonna nhal de potla nwatniarnara (stenga liter), na'nama nhuria wu'ru della' Yesus lakni, nhor nioma nala moratnu na naha kerna. Noma wu'ru de huwnu mikmikarni nawah'a nana rom de tetema. 4 Mere Yudas Iskariot, riy id la riy maka Yesus ha Nwatutu-nwaye'a re, maka hota e' nekpa nwaldioin pa na'olga Yesus, de edon nwayow nan pat de hihi'ini de pa niwra: 5 "Hoi! Nihya'pa edonna na'ol nieka wu'ru de pa welli de hota rala la riy mak kakleha-kaplara?! Hota welli de nla' nan meman la kupna-kai (gaji) la anni id gahani." 6 Yudas lirni de edonna ntar lia riy mak kakleha-kaplara, mere yoma riy kamna' mera id e'a. E' ed maka ktorreri Yesus Nora maka ha Nwatutu-nwaye'a re kupanni, ne nhi'inde ena'ala kupna la'a kaha pa enken wiutga la e kupan wamueheni. 7 Mere Yesus Nakot la Niwra: "Miolin doin e' pa nhi' samomuou A lia dodo'ondi to'a. E' edon na'olu hup mikmikar de yoma niwra nwahi' tar A pua rtamni A'u. 8 Hota A'g edon gor miy pia nodi liarni. Mere riy mak kakleha-kaplara re nhi'inde e ror wutga miy totpa mtiulan la' ira." 9 Riy rahu ratlin de Yesus etla' Betania, noma irla' wal lia hande. Rla' de, edonna riwra rwatrom to'a Yesus mere e riwra ramkek walia Lasarus maka Yesus Namoria la matmiatni ralamni de. 10 Hade wal pia ed mak kariei pede imam o'tani-matni re rna'ohma pa rwenan walia Lasarus. 11 Yoma la' e' pede Yahudi harahu rawlar dioinia ir la, ne rla rpesiaya Yesus.
Riy rahe'i-rahepur nohora Yesus maimiaini la Yerusalem
12 La'pa repar wa, dewade rirahu mak kmai Yerusalem totpena ramuki-rahepur nohor lerlalawna Paska de, ratlin de Yesus hota Nmai wialia Yerusalem, ne ed ma'ta la talan letgara. 13 Noma rla ra'ala korma tawni na'nama rla pa rwatroma Yesus, ne he'i-hepur nohora la loi liawna-talan lawna ralamni. Rhaunu-rhaun pa riwra: "Ya'uli-yawedi nden rer tiy O' ee! Ta'uli-tawedi, tsu'ru-tselma O' mak kmai pia kodia Orgahi-Orha'a nanni! Ta'uli-tawedia, tlilili-tmamuawua O' ee, makla' Israel Rayni!" 14 La' ler de Yesus Nmai die Nha' nana keledai a'na ida, maka Nwak nana la' riy ida. Pede plola la Puka lirni mak kiwra: 15 "Makden Sion ee! Yan mimta'ata! Mimkek la Raymi Nmai nieka de e Nha' nana keledai a'na ida!" 16 La' ler de maka Yesus ha Nwatutu-nwaye'a re id mana edon rat niohora hare honona nnia'eratni. Mere la'pa Uplerlawna Nhi' pa riy ra'uli-rawedi Yesus onnila E matmiatni nhor nioma Nmori owa'ana, na'nama ratga la'a hya' ed maka ha rhi' nana la E'a, de honona erla Puka ralamni. 17 Riy mak kden wal lia' ler maka Yesus Npolga Lasarus la liena ralamni totpa Namori owa'an e' la matmiatni, er mak kodi liarni pa rla rakot nohora hya' maka Yesus Nhi' nana re honona. 18 La' hade pede rirahu rma rlernohora Yesus yoma ratlin nana de hade ed mak khi' nana hihi'a-yapyapi mak kamehi-kayona mak kareh mieman de mak ktutga Uplerlawna rurni-laini. 19 Noma riy Parisi re idma nakot la ida riwra: "Ah! Hota it edonna tsi' hadompa! Tamkek nek la rimormiori honona rla pa rlernohor E' wee!"
Hota Uplerlawna Ntutga Yesus preheni-mkaini la'a riy makden hairi-hairi honona lola E matmiatni la ir do'oni-halli wawannu
20 Mak kla'a Yerusalem totpena rla' rkola tieru-rawur nehla la Uplerlawna la' lerlalawna dom de e rwatiaga Yunani. 21 Noma rodi liarni la Pilipsu pa rwahak hadom la e'a. Pilipus di makdena leta Betsaida la' Galilea yapatni id e'a. Ratiana Pilipsu riwra: "Hyalia, ami e miwra mpatroma Yesus." 22 Dewade Pilipsu la nakot harella Andarias noma rrora rla rakota la Yesus riwra: "Matroma, makden Yunani rwahak pa rwatrom O'a." 23 Dewade Yesus Nakot la rrora Niwra: "Nte' olek la lerni pa Uplerlawna Nran Rimormiori A'nani A'u lia heyanna totpena rimormiori ramkek memn A'u me ra'uli-rawedi A'u. 24 Plola la A li'ru ri honona. Hota A ino'nu di emeknekama wetra' lawna olli. La'pa wetra' lawna ola ida edonna rtamin nana la tani ralamni, de hota olli de edon na'itra-nalawna. Mere la'pa rtamnia olli de nanpena hota na'ona-natawi, nahara-nadewtu, me nawo' nana wetra' lawna. 25 Emkade wal lia rimormior miy, de riy maka ralamni tetema nden rer lia mormiorni, de hota mormiorni de nmol wua. Mere la'pa riy maka ralamni edonna nden rer lia mormiorni la' noh di wawannu, de hota nlernan mormiori-dardiari pa nodi liarni. 26 Riy meni ed mak kar lia A knia'ru de nlernohor reri A'u totpena nor A' pua amden wut lia geni ida. Ne A A'mu Nhi' wali e' pa nlernana ya'uli."
Yesus Nakot nohora E matmiatni ralamni
27 "A ih'ru-ralmu wolwo'la yoma la'a tututu-wawuau mak kmai niek di, pa hota Agiwa Awuaka hya'a la' A A'mu la' dodo'on dino? A li'ru nek hadilla' A A'mu, Amee! Mulewna A lia' dodo'ondi wo? Mere hota emkameni pa A'ukot emkade yoma matmiat die ed mak katota-kariei, pede Amuai." 28 Noma Yesus Nwak la Uplerlawna Niwra: "Amee, Mtiut niek O plolmu-mnehemu la rimormiori honona totpena nanmu nden rer niek la tutullu-lolo'oni." Yesus Nakot emkade dewade plin-plinnianama lira ida nwatiawu lyanti pa Niwra: "Akeni oleka A na'nu la tutullu-lolo'oni, ne hota A'g ed mak ktutulg owa'ana la' gen tiutullu." 29 Riy honona mak kden la hande ratlin nana lir de. Dom de riwra kukru-gauru de. Mere dom de riwra Uplerlawna hopopanni e nwahaur la E'a. 30 Noma Yesus Nakot la re Niwra: "Lir de nayatlina, de hade edonna ntarga hadella mai A'u, mere lir de e rtarga hade tiy miy. 31 La' dodo'ondi de nte'ela lerni-melli pa rhudia nohkeran di la' watghudi liokarni. La' dodo'ondi de hegana amlawanni mak kodi plolli la noha wawannu di de rrinin gota la tio'ora. 32 Mere A' di, la'pa rrana tutullu A'u, de hota A'uwoka momuoga riy honona mai A'u." 33 Yesus Enakot emkade totpena e rat niohora E matmiatni ha nlolola la auwlakra hananni. 34 Riy mak kden la hande rakot la riwra: "La'a Puka ralamni, de e niwra: Ray Makamori-Kalewna Nmormiori plalahwa pa nodi liarni. Ne emkamenila O lirmu niwra hota la'a Rimormiori A'na O' de, rhi' O' pa rran tutu'lu? Hota he' eda Rimormiori A'na deno?" 35 Noma Yesus Nakot nohor inon wamueheni pa Niwra: "Edon nalo'on wali ne Riy mak ha rhoiya Lelerni, mak kden la miy letgarmi de, Nmol wua. Pede dodo'ondi mila' nohora Leler de, yanpa hota mela ndamit nan miy. Riy maka klol melli, de hota naplin niohora, e etla hanmeni. 36 A'ukot tiy miy totpa mpiesiaya Leler de, yoma Leler de ed ma'ta tiy miy, de totpena hota rhoi miy lia upa-a'na lelera!" La'pa Yesus Nakot emkare dewade Enwatitin la hande wa, ne edonna Ntut gaini la ir wa.
Makden Yahudi liawanni edon rpesiay Yesus
37 La' emkameni ho'ola Yesus Ntutga hihi'ini-yapyapni mak kamehi-kayona harahu mak ktutga Uplerlawna rurni-laini, la'a Yahudi re gaini ralamni, ho'mana edonna rpesiaya. 38 Mak kariei pede ir edon rpesiaya, de totpa naplol nohora Yesaya makwohorulu-ktatrulu die lirni. Yoma la' ululu de e niwra: "Matroma, hota he' ed maka kpesiaya a lir mamni rina de? Emeknekama riy id mana edonna rwayow nohora de O plolmu-mnehemu ed mak karia honona ri!" 39 Ne Yesaya nhorat tar walia hya' mak kariei pia ir honona edonna rpesiaya, niwra: 40 "Uplerlawna ed mak khi' nana ir matni, me ir ihranu-ralamni pa ratehra, totpena yan ramkeka, me ralma-riorni mana yana rwarora, me yan rawali owa'an la E'a totpena yanpa E' ed mak khi' ir pa rler la kalwiedni." 41 Yesaya nakot emkare yoma enamkek oleka Yesus preheni-mkaini pa nakot nohora la E'a. 42 Riy harahu edon rpesiaya emeka Yesaya nakot oleka de, mere emkade ho'mana, riy rahu, la'pa Yahudi o'tani-matni harahu mana rpesiaya Yesus. Mere ir edonna rparan pia rakota la nurnu yoma ramta'at la yanpa riy Parisi rlarna pa ir ror wutga la krei-iskola. 43 Ir edon rakota la nurnu yoma Yahudi o'tani-matni re ralamni nko'i reria totpa ir rimormior wialli ra'uli-rawed rieria ira, mere ir edon rwaror nohora Uplerlawna ya'ulli-yawedni la' ira.
Yesus lirni ed mak ha rnairia pa ra rukum rimormiori
44 Noma Yesus Nhaun pa Niwra: "Riy mak kpesiay A'u, de edonna npesiaya A o'ta wa'tu di to'a, mere npesiay wialia E' mak khopn A'u. 45 Ne riy mak kamkek A'u, de enamkek oleka Mak khopna A die. 46 Amuai noha wawannu di, de Agodia lelerni, totpena riy honona makpesiay A'u yana rdella melmelli. 47 Amuai noha wawannu, de A'g edonna muai pia tiorna watghudi la riy mak edon klernohora A li'ru maka enatlin nan oleka re, mere Amuai die totpena A'umori-ulewna rimormior noh di mniotni. 48 Mere la' lera-mela noha niatni hota A li'ru ed maka rnairia pa ra rukum rira maka kwayotlia A'u yoma rahmena rreinian A li'ru. 49 Yoma A'g edonna godia A ralma-rior wamueh'u, mere A A'mu mak khopn A'u, E' ed mak khopan la'a hya' maka A'ukota tiy miy. 50 Ne Agat niohora la'pa hya' maka Nhopan pa A'ukota, de hade nodia mormiori plalahwa pa nodi liarni. Pede A'ukot nohora hya' maka A A'mu Nwatutga mai A'u."
Yesus Nwuri-nohma maka ha Nwatutu-nwaye'a re lakni
1 La'pa lerlalawna Paska nwakrian wia, de Yesus e Nat niohora de nte' olek la lerni-melli pa Nwaran la nohkeran diwa totpena Nawal lia E Amni. Yesus ed mak khi' kalwiedwed la riy mak E mutnu-rahanu la noha wawannu, me dodo'ondi lerni ntutu-nte' olek di pa Entutga E ralam kalwiedni mak karehi-kalawan de la' ira yoma hota Nmat lia ir rerieini. 2 La'pa lera nheria, Yesus Nora maka ha Nwatutu-nwaye'a re ra'ana-remun rewre'wa. La' ler de la' hegana amlawanni nkar lia Yudas, Simon Iskariot a'nani de ralamni pede nwaror oleka totpena hota nwaldioin pa na'olga Yesus. 3 Yesus Natg oleka de Amni Ntutg oleka E' pa Enodi plolli la nohkerna-rai miarna. Enat niohor walia de Enwatiawu Uplerlawna pa Enmai lia nohkeran di, ne hota emkade walia Enawali owa'an la Uplerlawna. 4 La hade pede Entutrier pia No'lu dioinia raini plalahwani pa Na'ala koka mnurnuhru ida Nwatiehra la nehlani. 5 Nhor nia'nama Nhuri gera la wra'u tani id na'nama Nohma maka ha Nwatutu-nwaye'a re lakni me Nala kok maka kawniatehra la nehlani de na Naha' kerna. 6 La'pa Nte'ela Simon Petrus, noma Petrus natiana: "Matroma, he' nakot pa Matro'mu ed mak kohma a la'ku di?" 7 Noma Yesus Niwra: "La' dodo'ondi de o' edonna mnia'erit nana ma'ta hya' maka Aghi'a ri. Pena omuatga." 8 Petrus niwra: "Yana Matroma. Ralul pia Matro'mu Nohma a la'ku!" Mere Yesus Nakot la Niwra: "La'pa A'g edonna gohma lakmu, de emekwalima omukleha nhiakra mai A'u." 9 Noma Simon Petrus nakot la niwra: "Hademkade yan Matro'mu Nohma a la'ku to'a mere a li'mu nora a o'tu wali!" 10 Yesus Niwra: "Riy mak karoh olek inonni de rmomuog olekwa. Pede yana rohma inonmi, eneknek to'ama rohma lakni. Miy di de miou-mpitna olekwa mere miy hononmi edonna." 11 Yesus Nakot emkade yoma Yesus Nat niohora he' ed mak kawaldioinia pa na'olga E'a. La hade pede Eniwra: "Miy miou-mpitna olek wa mere miy hononmi edonna." 12 Dewade Yesus Nohma ir honona lakni, nhor nia'nama Nhu'rg owa'an la raini plalahwani de na'nama Namtatna owa'ana la genni. Noma Natiana re: "Miy e mnia'erit nana maka na'nama Aghi'a tiy miy rena? 13 Miy e mpiolga A die tungkuru onde matroma ne hade naplola, yoma A' die de miy tungkurmi me miy matrommi. 14 Pa la'pa A' die mak kla' matroma me tungkuru tiy miy ed mak kohma miy lakmi, de hota emkade wali pia miy miana mtiutga nhiolmi mak klol yawa me mak katu khima-kre'a la rimormior wialmi pa miy idma nohma id lakni. 15 A'g ed mak ktutga loi-talan de tiy miy, totpena miy wial miana, mhi'a hya' maka Aghi' olek di tiy miy wia. 16 A li'ru ri raplola! Mimliernohora A nhio'lu di maka Aliola yawa me ghima-rie' rira, yoma miy edon mireh dioin A'u. Miy die de A hopopnu-lili'iru me mak Aghopna. Ne la' hopopna-lili'iru ida de edonna narehelia upni-matromni, me la' walia mak ha rhopna ida de edon nareh niana mak khopan de mere nhu'ru-nhelam pa nlernohora matromni hihi'ini-yapyapni me nhiopanni. 17 Pa la' dodo'ondi de miy miat momuog olek hari honona maka Atiutga tiy miy, pede miy miana mliernohora re, totpa hota miy e mliernan wali unut lawna la'a Uplerlawna!"
Yesus Nakot nohora Yudas nnia'ohmani
18 "Mere riy id tiy miy hota edon rlernohora re pede hota edon nlernan wali unut lawan de. Awualir olek miy wia ne A'g e gat niohora la' miy hononmi yehwami. Mitlina, hota riy id tiy miy ed mak khi' emeknekama ha rhorat targa la Puka. De Puka lirni emkadilla: "La'a he' ed mak kor A'u ka'ana roti, de e' ed mak kmalawna la A'u". 19 A'ukot tiy miy lia' dodo'ondi memna la'a hya' maka hota ha rhi'nande, totpena hota la'pa mimkek nana hare honona maka A'ukot oleka tiy miy wia, de hota mpiesiay miemna de A'g E' inhatta maka A'ukot oleka de tiy miy. 20 Plola la A li'ru ri, hameni mak kreiniana riy mak Aghopna re, de enreinian wali A'u, me ha meni mak kreinian A'u, de enreinian walia Uplerlawna mak khopan pa Amuai." 21 La'pa Yesus Nakot emkade noma ralamni nmolu-nhelma. Noma Nto'pi-ngaur la Niwra: "Mpiesiayo! Hota la' riy id tiy miy die hota niwra na'olga A'u!" 22 Dewade maka ha Nwatutu-nwaye'a re idma namkek la ida. Ne honona rwer rer wiawni yoma iraplin mua'ta he' ed maka ha nakot nohor deno? 23 Riy id la maka ha Nwatutu-nwaye'a re, de riy maka Yesus Nsaynia de namtatna la Yesus walli. 24 Noma Simon Petrus nahe' miatni la mutwualli maka Yesus Nsaynia de totpena natiana Yesus la'a he' eda riy deno? 25 Noma Petrus mutwualli de napup lia Yesus niwra: "Matroma, Mtiulan pa Mukota riy della mai a'u." 26 Noma Yesus Nakot la Niwra: "Riy maka Agala rot miaka Atio' la A la'ru mniotni de e' inhatta!" Noma Yesus Na'ala rot anna ida, na'nama Nto'a la larni ralamni pa Nala la Yudas, Simon Iskariot a'nani de. 27 La'pa Yudas nte'la nana rot diewade hegana amlawanni nhu'ru ralma. Pa Yesus Nakot la Niwra: "Plet pa mhi'a hya' maka omuiwra mhi'a re!" 28 La mak ka'ana-kemun la hade id mana edonna nat niohor etia la'a hya' mak kariei piede Yesus Nakot harella Yudas. 29 Dom e rwarora yanpa Yesus Nhopan pa Yudas nla nawel hadom pa rhi'a la' lerlalawan de, onde yanpa ral kupna oke'ela' riy mak kakleha-kaplara, yoma Yudas nanpena ed mak ktorreri ir kupanni mak kden la kaha. 30 La'pa Yudas nte'la nana rot die dewade nlergot wa. Ne lera mana nmel wa.
Yesus tit warwuarnu
31 La'pa Yudas nla'awa noma Yesus Niwra: "Ntutu-nte' oleka la lerni pa rimormiori ramkek nan Rimormiori A'nani A' di rrana la' heyanna totpa rimormiori ra'uli-rawedi A'u. Me onnila A hihi'u-yapya'pu mak Agiwra ghi'a di, pede Uplerlawna nanni de ha ra'uli-rawedia la tutullu-lolo'oni. 32 Ne onnila A hihi'u-yapya'pu ed mak kariei, pede Uplerlawna nanni de rran atulga la lyanti, pede hota E' wal pia ed mak kareiniande riy ra'uli-rawedia A'u, ne edon nalo'on wali ne Uplerlawna Nhi' hade. 33 Upa-a'na miy hononmi, hota A'g edonna gor miy pia mholi plalahwa. Ne emeknekama maka A'ukot targa la Yahudi o'tani-matni, de A'ukot wali tiy miy lia dodo'ondi, de hota miy mpiahak A'u mere la gen miaka Alia'a de hota miy edonna mpiakriania. 34 Upa-a'na miy re, tit warwuaru di ed mak Agala tiy miy, de totpa miy idma mhi' kalwiedwed ida pa emeka nhi'inde Aghi' kalwiedwed miy die. 35 La'pa miy idma nhi' kalwiedwed ida, de hota riy honona ratga de miy er mak klernohor reri A'u."
Yesus Nwagahniorta Petrusa yoma hota Petrus nreher doin Yesus la
36 Noma Simon Petrus niwra: "Matroma, hota Matro'mu Niwra Nla' meni?" Noma Yesus Nakot la Petrus niwra: "Petrus, hota Alia' la' dodo'ondi de hota o edonna mliernohora A'u! Hota nhoru olekwa, nanpena omliernohor owa'an A'u." 37 "Matroma, nihya'pa A'g edonna liernohor O la' dodo'on dina?! A' di de wuayow nohor pa hota amuat lia O wawanmu Matroma." 38 Noma Yesus Nakot la: "Plola o e muiwra mmuat lia' A wawnu, Petrusa?! Mhuoratreria Petrusa, hota hiwi lallu edonna nkukule' ma'ta de omueh'a nekpa mrieher doin A lia' re'eni wotelu."
Yesus ed maka khari talan pa itla' E Amni de
1 Yesus Nakot la re Niwra: "Upa-a'na miy re, yan ihrami re rteplu. Pesiaymi narur lia Uplerlawna, me narur wial mai A'u. 2 Gen riahu erla A A'mu romni de. Alia' hande totpena Awuahi' targa geni tiy miy. A'ukot nohor gen die tiy miy, yoma plollola de genmi erla hande. 3 La'pa Awuahi' targa genmi re, nanpena hota A'uwal pia mua wuatrom miy totpa Agod wali miy lia hande, totpena Adiella hanmeni de miy er wal lia. 4 Mimiat niohora talanni la'a gen miaka Alia' de." 5 Noma Tomsa nakot la Yesus niwra: "Matroma, ami e maplinga gen miaka Matro'mu Niwra Nla' de, pa hota emkameni pa amatga talanni?" 6 Noma Yesus Nakot la Niwra: "Amueh'a nekpa ed mak khi' talan la'a riy mak kiwra kla' Uplerlawna. Onnila A' pua rimormiori rat niohora hya' ed mak kaplol la' Uplerlawna, me rler la mormiori-dardiari plollola. La'pa riy id mana niwra nmai A'mu de, eneknek to'ama nor A' tialla, nanpena nwatrom nan A A'mu. 7 Upa-a'na miy re, la'pa miy e miatg olek A wua, de hota emkade wal lia miatg oleka A A'mu. Pa la' dodo'ondi de miy e miatg olek E wa, ne mimkek olek E wa." 8 Noma Pilipsu nakot la Yesus niwra: "Matroma, Mtiut tieka Ammu de la mai ami, totpena ralam mamni namtemna." 9 Mere Yesus Nakot la Niwra: "Pilipsia! Itsol wiut olek la' mahnek memna. Ne o' edonna muat mua'ta A'u?! Riy maka kamkek olek A wua, de enamkek oleka A A'mu wali wia. Noma o' e muiwra Mtiut tieka Am dena?! 10 Pilipsia, o' edonna mpuesiaya de Agora A A'mu de riy id ami, me Amro' de Mla' lir ida?! La'a hya' maka A'ukota tiy miy, de A lir wamueh'u atia'a hade, mere A'mu nor A' die plola Ampal lia ida, me hya' maka Aghi' nan de E' ed mak ktulla-karia hare honona. 11 Mpuesiay A' li'ru mak ukota giwra: Agor A A'mu de riy id ami, me A A'mu de nor A' die Mla' lir ida. Onde mpuesiay miemna A lia'a hihi'a-yapya'pu mak kamehi-kayona mak Aghi' oleka re. 12 Plola la' A li'ru ri. Riy mak kpesiay A'u, de hota rhi'a hihi'a-yapyap miaka Aghi' oleka re. Meman neka la hota enhi' de nareh wial lia' hya' ed mak Aghi'a, yoma hota Alia' pa gor A A'mu la' geni ida. 13 Ne hya' to' pa miy mpiaka de yoma mlia' olek A mu'tu, hota A'g ed maka kwahi'a-kwayodia hare tiy miy totpena ya'uli-yawedi nden rer lia A A'mu onnila A hihi'u-yapya'pu de. 14 A'ukot owa'an tiy miy, mpiaka hya' to'a, yoma mlia' oleka A mu'tu, ne hota A'g ed mak kwahi'a-kwayodia harella tiy miy."
Yesus Nano'targa Uplerlawna Nhiwni mak kmai pia Nhi' aruri-alai makpesiay re ihranu ralamni
15 "Upa-a'na miy re, riy maka ksayni A' die hota e' wal pia ed mak katlina-katailla A li'ru-tu'nu. 16 Ne hota A'g ed mak kwak la A'mu ne hota Enala Nhiw Lululli pa Nhernu-nwaug A' pua Naruri-nalai nian miy, ne hota Nor wut miy pia nodi liarni. 17 Nhiw Lulul die Nwatiawu Uplerlawna, mak kakot nohora hya' ed mak kaplol la' Uplerlawna. Nohkerna ta'en niana rreinian E'a, yoma edonna ramkeka onde ratga E'a. Mere miy e miatga E'a. Yoma Enor miy tialla, me hota miora E' de ihru ida-ralm ida. 18 Hota A'g edonna ultar miy pia emeknekama a'na riy patyata. Hota A'uwali owa'ana tiy miy. 19 Tre' ma'ta oke' to' pa nohkeran di edonna namkek nan A wua. Mere miy die hota mimkek owa'an A'u. Ne yoma Amuori owa'ana, de hota miy miana mmiormior owa'an wali. 20 Hota la'pa nte'ela ler maka Amuori owa'ana, de hota miy e miatga de Agora A A'mu de riy id ami, ne miora A' muana itwalia ida. 21 Riy mak kreiniana A li'ru-tu'nu me nlernohora, de e' ed maka ksayni A'u. Ne hota A A'mu mana Nsaynia riy mak ksayni A'u. Ne A' muana siayn reria riy de, ne Agharia A ino'nu la e'a." 22 Dewade Yudas, maka Yudas Iskariot atia'a, natiana Yesus niwra: "Matroma, Omuiwra Mtiut tio'a O inonmu mai ami, ne nihya'pa O' edonna Mtiutga la noh di liewnu?" 23 Noma Yesus Nakot la Niwra: "Riy mak ksayni A'u de hota rlernohora A wniatu'tu-wniaye'u. Pa hota A'mu mana Nsaynia riy de, ne hota Agora A'mu Mahak reria riy de pa Amora Mhol wiutu. 24 Riy mak edonna ksayni A'u, de hota edonna nlernohora A wniatu'tu. Wniatutu-wniaye' maka mitlina re hare edonna rwatiawu A'u, mere ha rwatiawua A'mu mak khopan pa Amuai. 25 Hare honona de A'ukot momuoga tiy miy, la' ler maka A'g e gor ma'ta miy pia tden wutu. 26 Mere la'pa A lia A'mu de, A'mu Nala Nhiw Lululli pa Nma Nala ruri-lai tiy miy. Hota Nhiw Lulul die Nmai lia A na'nu wawannu. Ne E' ed mak kwatutga haneknek wawannu tiy miy, ne Nwagahniorta miy lia hya' maka Awuatutg olek tiy miy wia. 27 Hota Agal miy pia mlier la ralam mtiertierannu pa emeknekama A ralmu mana namtiertiernu la' haneknek wawannu. Ralam mtiertierannu mak emkade, nohkerna naplin niohora ma'ta de. Pede upa-a'na miy re, yana mpiarna plahwa-plahwa me yana msiusa onde mimta'ata. 28 Mitlina A li'ru mak A'ukot oleka de hota Alia'awa, mere hota A'uwal tiy miy. La'pa msiayni A'u, de hota mihepru onnila Alia'a A'mu de, yoma E inponni reh dioin A'u. 29 A'g e ukot ulga hare tiy miy lia' dodo'ondi, mere la hare id mana edon tamkek ma'ta. Totpena la'pa mimkeka la repra onde walli, de mpiesiaya. 30 A'g edonna ultier pia naplahwa, yoma lera nnielu inhatti pa hota hegana amlawanni mak kodi plolli la noha wawannu de nmai wia. Mere hota e' edonna nodia plolli mai A'u. 31 Mere hota Aghur niohora pa Alier la matmia'tu ralamni totpa Aliernohora hya' ed maka A'mu Nhopan mai A'u. Totpena la' hade pede nohkeran di mniotni ratga de A'g e siaynia A A'mu. Ne emkade nekwa pa mai pia twatitin la handi wa!"
Yesus emeknekama anggur (lokrahi) ona plollolli inhatta, me rimormiori re emeknekama tutnu-akni
1 Noma Yesus Nnairia lir yawalliohora pa Nakot owa'ana Niwra: "A' di de anggur (lokrahi) ona plollolli inhat A'u. Me A A'mu de ora nhyi'a inhatta. 2 A tu'tu-a'ku rimormiori miy. La'pa A tu'tu-a'ku mak kakleh wo'a, de hota Ora nhyi' de e Nhamin doinia la, ne la ak miak kawo'a de Enamou dioinia tawni la, totpena na'unu-nayeh owa'ana. 3 Miy di de er mak kmou-kwitna olekwa yoma la'a A wniatu'tu tiy miy. 4 Yana olietmi mai A'u me hota A' wual pia edon oliet tiy miy. Yoma ta'en niana miy mhi' hihi'a-yapyapi mak kalwiedweda atiaru mior A' tialla. Pa hota emeknekama ha'aki ida mak edon kawo'a, atiaru ak die natniapal rer lia onni. 5 A' di de emeknekama anggur ona A'u, me miy die emeknekama anggur on de tutnu-akni miy. Riy mak kden rer lia mai A'u, me A' muana dien rer lia e'a, de hota emeknekama tutu-aki mak ka'unu-kayeha, yoma A'g edonna gor miy, de hota emeknekama mikleh wo'a. 6 Riy maka edonna kden rer miai A'u, de emekwalima anggur aki mak edon ka'unu-kayeha maka rhamin doinia la, me la'pa nkern olekwa de rawoka pa rnaklia la ai ralamni. 7 La'pa mdien rer mai A'u, me mhioratreria mak Awuatut niana re, de hya' maka mpiahaka de, mpiaka la A'mu, ne hota Enala tiy miy. 8 Ne la'pa hihi'imi-yapyapmi re de emeknekama tutu-ak mak wo'oni harahu, de hota la' hade pede riwra plola miy er maklernohor reri A'u. Emkade pede hihi'imi-yapyapmi re hota rodia ya'uli-yawed lia A A'mu. 9 Emekwalima A'mu Nsayni A'u, de A' muana A'g e siayn wali miy. Pa hota miy miana mdien rer lia A sniaynu. 10 De, la'pa mliernohora hya' mak A'ukot taru, de miy e mdien reri olek la A sniaynu, pa emekwalima A'g e dien rer lia A A'mu sniayanni, yoma Aliernohora hya' ed maka Nhopna mai A'u. 11 La' hari honona de A'ukot momuoga tiy miy totpena A ralam yahepru de etla miy ralammi, ne miy miana mihepur toto' memna. 12 Upa-a'na miy re, mitlina-mitailla hya' mak A'ukota di, de emkadilla: hota miy idma nhi'a kalwiedwed ida, pa emeka hya' maka nhi'inde Aghi'a tiy miy die. 13 Riy maka khoi inonni la matmiatni yoma la'a talanwalli rerieini, de e ed mak ktutga tniulanni-sniayanni maka kreh dioinia tniulla-sniayni re honona. 14 Upa-a'na miy re, la'pa mliernohora hya' ed maka A'ukot tiy miy, de hota miy die mpiali olek la A talanwa'lu. 15 Pede hota A'g edonna puol miy lia A hopopnu, yoma hopopan de naplin tiar lia hya' maka upni-matromni nhi'a. Mere Apuol miy lia' A talanwa'lu, yoma hare honona maka utlin nana la A'mu, de A'ukot oleka tiy miy wia. 16 Miy edonna mpialir nian A'u, mere A'g ed mak kwalir nian miy, ne Aghopan pa mlia mhi' hihi'a-yapyapi mak kodi liarni pa emeknekama tutu-ak mak ka'unu-kayeh rer niohora wo' samomuounu. La'pa mhi' emkade de hota A'mu Nala hya' maka mpiaka la E'a onnila mlia' olek A mu'tu-rah'u. 17 Me Aghopan miy, upa-a'na miy re, totpa miy idma natu ntulla-nsayni ida."
Nohkeran di e nahankeran tiy miy
18 "Upa-a'na miy re, la'pa nohkeran di sukni tia' tiy miy, de mhioratreria, A'g ed maka hare sukni tia' ulia. 19 La'pa nohkerna gahani miy, de meman neka la nohkerna nsayn miy, yoma mlier la nohkerna gahani! Mere A'g ed maka kwalir nian miy lia' nohkeran di, pede miy di de nohkerna gahani atia'a miy. La' hade pede nohkeran di gaini npetan rer tiy miy. 20 Mhioratreria la'a hya'a maka A'ukot taru oleka re giwra: Riy rnahora-rnala' olek A'u, de hota rnahora-rnala' wali miy. La'pa irlernohor A wniatu'tu, de hota rlernohora walia miy wniatutmi yoma hopopna edonna narehelia upni-matromni. 21 Hota rnahora-rnala' miy yoma mliernohora olek A wua. Ir rhi' emkade yoma ir edonna ratga E'a Mak khopn A'u. 22 La'pa A'g edonna muai pia ukot nohor ma'ta Uplerlawna talanni la ir de, de hota Uplerlawna edonna Nwaghal ira. Mere la' dodo'ondi de A'ukot nohora olek la ira, mere ir edon rlernohora A li'ru, pede hota emkameni owa'an pa ir riwra ir edon rhala?! 23 Riy maka ralamni edon nreinian A'u de hade edonna nreiniana A'mu wali. 24 La'pa A'g edon ghi' ma't hihi'a-yapyapi mak kamehi-kayona mak riy edon ramkek taru re la'a ir wokni-le'enu de hota Uplerlawna edon Nwaghal ira. Mere iramkek oleka hihi'a-yapyapi mak Aghi' nan la dodo'ondi, mere ir sukni atia' ma'ta mai A'u me la' walia A'mu. 25 Ha rhi' nan emkade totpa plola la hya' maka kden la' ir Puk deullu-tatarni mak kiwra: "Irahankeran la mai A' die rakleha wniatikilgeni (alasan)." 26 Upa-a'na miy re, hota Aghopan doinia Maka rhoiya la Mak khi' aruri-alai die tiy miy. Enwatiawua A'mu pa ntiy. De rwet Hadella Nhiw Lululli mak kakot nohora hya' ed mak kaplol la Uplerlawna. La'pa hota Enmai die Enakot nohor walia A'u. 27 Ne hota miy miana er mak kakot nohora walia A lia' rira, yoma miy er mak kor rewre'w A'u lia' ler maka Atie'la la A knia'ru la' nohkeran di."
1 "Upa-a'na miy re, la' hare honona de A'ukota tiy miy, totpena yana miwlar dioinia pesiaymi pa hota mlier la klieratni. 2 Yoma hota ralgot miy lia'a gen miaka Yahudi re rhi' kreini-iskolli. Ne plollolli de hota ntutu-nte'ela lerni-melli de, pa riy mak kwenan miy re ratniekame e rhi' emkade yoma Uplerlawna hopopanni ira. 3 Mere plollolli de, ir rhi' hare tiy miy, yoma ir edonna rat niohora ma'ta Agora A'mu. 4 Upa-a'na miy re, la' dodo'ondi de A'ukot nohor kropna-krieutu polpuol ina-wakwak ama honona re tiy miy, totpena la'pa ler meni miy mliernan hare, de yana mhieduma, mere mhioratreria hare honona de A'ukot ulg oleka tiy miy wia. La' mulaliaini de A'g edonna ukot hare honona tiy miy, yoma A'g e gor ma'ta miy pa tsol wiut pua Atiulan tiy miy."
Uplerlawna Nhiwni ed mak khi' aruri-alai lia riy makpesiay Yesus re
5 "La'pa dodo'ondi wa de Agiwra lia'awa la Uplerlawna mak khopn A'u, pa Agor E' pa Mhol wiutu, mere hota riy id tiy miy miana edon natian nohora hota Alia' hanmeni. 6 La' dodo'ondi de miy ralammi nmolu-nhelam meman nohora lir maka A'g e ukot oleka de giwra hota Alia' E' de. 7 Mere upa-a'na miy re, mpiesiayo! Onnila miy rerieimi pede samounu de, Alia' nek wa! Yoma la'pa A'g edonna lia'a, de hota Uplerlawna Nhiwni mak kodi ruri-lai tiy miy die, hota edon Nmai. Mere la'pa Alia'awa, de totpena Aghopan doinia pa Nmai wia. 8 La'pa Enmai die, de hota Enakot nohora riy mak kden la nohkeran di wawannu de Niwra irhi' oleka do'a-hala, me Enakot nohor wal lia' hya' mak kaplol la Uplerlawna yamkekni, la'pa Nakot nohora wal lia' Uplerlawna niukamnu. 9 Yoma Enmai die, de Nakot la riy Niwra e rhi' oleka do'a-hala yoma ir edon rpesiay A'u. 10 Ne Nakot nohora wali A hihi'u-yapya'pu re er mak kaplol la Uplerlawna yamkekni. Hota irat niohora A'g ed mak kaplol la Uplerlawna yamkekni yoma Alia' A'mu de, ne la' ler de miy edonna mimkek olek A wua. 11 Ne Uplerlawna Nhiwni de ed mak kakot nohora Uplerlawna niukamnu yala'ani la' rimormiori nohkeran di. Yoma nla'aw olek la lerni pa Uplerlawna Nukmua hegana amlawanni mak kodi plolli la nohkerna wawannu. 12 Upa-a'nami re, harahu er ma'ta la pa Agiwra ukota tiy miy, mere la' dodo'ondi de ta'en niana mnia'erit nana, pede yan nekwa. 13 Mere la'pa Nhiw die Nmai wia, de hota E' ed maka kakot nohora hya' ed mak kaplol la' Uplerlawna, ne hota E' ed mak kawiru-kawewal miy, totpena miat niohora momuoga plollolli ha nlolola. Hota E Naltier die E' edonna Nlernohora E ralma-rior wamueheni, mere Nakot nohora hya' maka Natlin nana, me Enakota tiy miy la'a hya' maka hota kmai lia repra-walli. 14 E' mana hota Nhi' pa Aliernana ya'uli-yawedi, yoma lir maka Nakota la tiy miy die Nlernan harella mai A'u. 15 Maka plollola re honona mak kwatiawua A'mu de, A' muana ukot nohor mamainia hare. La' hade pede A'g e ukota tiy miy giwra la'a lira hya' maka Nhiwa Nakota tiy miy, de Ha Nlernan harella mai A'u."
Hota mlier la riwtu-hora mere emkade ho'mana hota ralammi nler la yamuki-yahepru
16 "Hota edon nalo'on wali ne miy edonna mlina-miat (mimkeka) A wua, mere edon nalo'on wal pia mimkek owa'an A'u." 17 La' pa Yesus Nakot emkade pa nhorwua noma riy wo'ira maka Yesus ha Nwatutu-nwaye'a re, idma natian ida riwra: "La'a hya' pede Niwra hota edon nalo'on wali ne it edonna tlina-tmat (tamkek) E'a, nhor nioma Niwra mere hota edon nalo'on wal owa'an pa itamkek owa'an E'a, me Enakot walia Niwra onnila Nawal lia Amni?" 18 Idma natiantan rer ida riwra: "La'pa Niwra edon nalo'on wali, de ha nnia'eratni de hya'a de?" 19 Yesus Nat niohora de iriwra ratian E'a pede Enakot la re Niwra: "Dodo'ona A'ukot oleka tiy miy Agiwra: "Edon nalo'on wali, ne hota miy edonna mimkek A'u. Ne la' walia hota edon nalo'on wal owa'an pa mimkek owa'an A'u." Hade ed maka miy mitiana toh?! 20 Mpiesiayo, hota la' ler maka Alia'awa, de mkiakur nande mipolu-mitniani mere nohkeran di mniotni de hota plele'u-tartiarni (ramuki-rahepru). Hota miy ralamni rkakru, mere kniakurmi de hota nwal lia yahepru-yamali. 21 Itala patke'a ida pa tsi'a la yawalliohora. Pat mak ka'apnu la'pa nhi' pa nmor wia, de polpuolu-hawaun nohora apun mehrani. Mere la'pa ntor doinia a'nani, dewade mehra-mau re lol hamamuamua. Yoma ntor oleka rimormiori id la'a noha wawannu, pede narieinian de kaniha-kamal niohora a'nani de. 22 Hota emkade wali tiy miy. La' dodo'ondi de miy ralammi rmayo'a-rmatau niohor A'u. Mere la'pa Amuai owa'an pa gor miy twatroma, de hota miy kaniha-kamalmi, ne la' riy id mana hota edonna nwarui niana niniha-malmial die tiy miy. 23 Hota la' ler de miy edonna mitian la'a-mitian mai owa'an A'u. Mpiesiayo, hota la' ler de miodi liarmi pa mpiak nek la A'mu, ne hya' ed maka ha mpiaka la E'a, yoma mlier olek la A mu'tu, de hota E' ed mak kala tiy miy. 24 La ululu memna pa nodia la' ler di de miy mlia' A mu'tu-rah'u, mere miy edonna mpiak mia'ta hadom la A A'mu. Mere A'ukot to miy, la dodo'ondi de mpiak nek wa ne hota mliernana, totpena hota mimuki-mihepur toto' memna. 25 A'ukota hari honona tiy miy die A'g e niairia lira yawalliohora. Mere edon nalo'on wali ne A'g edonna niairia lira yawalliohora owa'ana, mere A'ukot nohora A'mu de tiy miy die, Atio'pi-gauria li'ru-tu'nu. 26 Pa hota A'g edonna wuak la A'mu la'a miy rerieimi, mere la' ler de hota miy mieh'a neka miodi liarmi pa mpiak nek la A'mu, yoma miy er maklernohor reri A'u. Ne hota Enatlin tiy miy. 27 Yoma A'mu nek de Ensayn wenna miy. Ensayn miy, yoma mimsiaynia A'u ne mpiesiay wialia de A' di de wuatiawu Uplerlawna. 28 Plola! Awuatiawua A'mu de pa Agerun la noh di wawannu. Mere la dodo'ondi de Awuatitin la' noha wawannu pa uwal lia A'mu de." 29 Noma maka Yesus ha Nwatutu-nwaye'a re rakot la Yesus riwra: "Dodo'ondi de Matro'mu Nto'pi-ngauria lira ri de edonna Nnairia oleka yawalliohora. 30 Ne amatga de ami edon matian la'a-mai lia Matro'mu mana, Matro'mu Natg oleka hya' mak kdella a ihru mamni-ralam mamni maka amiwra matiana. Hade ed mak kariei piede amatga, de Matro'mu Nwatiawu Uplerlawna pa Nmai." 31 Yesus Nakot la re Niwra: "Hota mpiesiaya la dodo'ondi wa?! 32 Mhioratreria! Hota la'pa nte'ela lerni, ne ed olekwa di pa miwlar dioinia A lia pa miwal lia genmi-tien wamuehemi, ne miltarga Amuemeh'a. Mere A'g edonna muemeh'a yoma A'mu e Nor A' tialla. 33 A'ukot hare honona totpena mlier la ralam mtiertierannu yoma mior olek A' pua twal lia id wa. La' noh keran di wawannu de hota mlier la kropna-krieutu, mere mhi' ralammi re pa raruri! Yoma A'utowr oleka nohkeran di rurni-laini."
Yesus Nsumbaini totpena Nor Amni rlernan ya'uli-yawed lia E matmiatni me la' Enarian owa'an la Ilyamou-Watyatoha
1 La'pa Nakot hare honona pa nhorwua dewade Yesus Nwatniar la heyanan na'nama Niwra: "Ama, dodo'ondi de nte' olek la lerni-melli mak Ompualir niana. Awuak pa A'mu Ntutga A preh'u-mka'yu totpa hota ha ramkek nana. Ne hota la' hade pede A'namu A' mana hota godi ya'uli-yawed tiy O'a. 2 Ama, Omual olek A' pua Agodi plolli la rimormiori nohkerna wawannu re, totpena la'a plola-mneha mak A'mu Nala A' die, de A'g ed mak kala mormiori plalahwa pa nodi liarni la'a riy honona maka A'mu Nala mai A'u. 3 Ne mormiori plalahwa de nnia'eratni de totpena rimormiori ratga A'mu, de Uplerlawna-Mempulwatnu inhatta, ne totpena rat niohor walia A'u, de Yesus Kristus, maka A'mu e Nhopan nana. 4 Ama, Agodi oleka ya'uli-yawedi tiy O'a la nohkerna wawannu di, la'a Aghi' ahorga tulanmu-kniarmu mak A'mu Nala pa Akari. 5 Ama, Awuak pa Muod owa'an A pua Agor O' pa itden rer lia ita ya'ulli-yawedni plolli-mneheni wawannu emekwalima la' ler maka noha gergera-tatiah ma'ta."
Yesus Nsumbain reri makpesiay E'a
6 "Ama, mutmu-rahamu mak kden la noh di wawannu maka Muala mai A'u, de A'g e ukot nohor oleka A'mu la ir wa. Ne ir rlernohor olek A'mu lirni-tunnu. 7 Dodo'ondi de iratg oleka lira-tun maka A'ukot nohor oleka la ira me hare honona mak Aghi'a, de plol toto'a rwatiawu A'mu. 8 Yoma A'ukot olek la ir wa lira-tun muaka A'mu Nala mai A'u, ne rreinian oleka lir de wa. Iratga de plola Awuatiawua A'mu, me rpesiaya de A'mu ed mak khopn A'u. 9 Ama, Asiumbain la ira. A'g edonna siumbain la nohkeran di, mere Atiot nan to'a riy mak A'mu Nala mai A'u re, yoma A'mu gahani ira. 10 Riy mak A gah'u honona re, de A'mu gahani walia re, ne rimormiori mak A'mu gahani honona re de Agah'u walia re. Ne la'a ir pede Alier la ya'uli-yawedi. 11 Dodo'ondi Amuai A'mu de. Hota A'g edonna diel owa'an la nohkerna wawannu. Mere hota ir er ma'ta la' nohkerna wawannu. A'mu mak kden mou-witna plola-mneha wawannu! Muala plolmu-mnehemu, prehemu-mkaimu ma Mhuapet reria re. Plolmu-mnehemu de inhatta ed maka A'mu Nal olek mai A'u. A'mu, Muala plolmu-mnehemu de totpena nreiy awutga rla ida, pa emekwalia Agora A'mu wal die ida. 12 La' lera-mela ri mak Agor wut ma't ira de Agala O rurmu-laimu plolmu-mnehemu maka A'mu Nala mai A'u pa ga' utiak ira. A'utiaka rpa honona rden la kalwiedwedni, enekneka riy id maka rakot targ oleka de pa (na'olga A'u) ne nler la matmiati-molmuolu plalahwa pa rrinnia la ai mormiori ralamni. Had emkade totpena maka rhorat targa la Puka ralamni de rtutu-rte'ewa. 13 Dodo'ondi A'g e muai O' de Ama, A'g e ukot nohora A wakwa'ku honona ri tiy O'a, la' A'g ed ma'ta la noha wawannu, totpena rahepuepur toto' memna emekwali mai A'u. 14 A'ukot nohora oleka A'mu lirni-tunnu la ir wa, ne nohkerna rahankeran rer lia ira, yoma ir de nohkerna gahani atia' ira, pa emekwalima A' muana nohkerna gahani atia' wali A'u. 15 A'g edonna wuak pa totpena A'mu Na'ala ir la' nohkeran di wawannu, mere Awuak totpena A'mu Natiak ir la' hegana amlawanni mak khi' yatyatni-halalli. 16 Emekwalima la' A' di de, nohkerna gahani atia' A'u, la'pa ir mana nohkerna gahani atia' wali ira. 17 Muala O lirmu-tunmu mak kden la plol wawannu ma mhi' ir la' O gah wamuehemu mak kakleha do'a-hala, Ama. 18 Emeknekama A'mu Nhopna Agerun la noha wawannu, de emkade wal lia Aghopan pa e rla rakot nohora A'u la noha wawannu. 19 Ir er mak karei pia Agala A ino'nu la A'mu pa liernohora A'mu ralma-rior wamueheni, totpena hota ir mana rla' walia A'mu gah wamueheni pa rhima-rre' A'mu, yoma ir pesiayni la O lirmu-tunmu mak kden la plol wawannu. 20 Ama, A'g edonna siumbain to'ola la' hari rmeh'a, mere la' walia la' riy maka klernohora ir lirni pa rpesiay A'u. 21 De Awuak la A'mu totpena ir honona rla lir ida emeka itro'a. Awuak de ir ror it pa riy id ita totpena nohkeran di npesiaya de, A'mu ed mak khopn A'u. 22 Aghi' pa rlernan walia ya'uli-yawedi pa emeknekama A'mu Nhi' A' pua Alier la ya'uli-yawedi, totpena irden rer lia ida, emekwali itro' pa twalia id wali. 23 De Agor ira, me A'mu nor A'u totpena la' it de plol toto' pa twal lia ida. Totpena nohkeran di natga, de A'mu O' ed mak khopn A'u me A'mu ed mak ksaynia ira, pa emekwalima Omsiayn wali A'u. 24 Ama, Awuak de, riy mak A'mu Nala mai A'u re, er wal lia A ge'nu, totpena ramkek memna ya'uli-yawedi mai A'u, mak A'mu orgahani Nala mai A'u, yoma A'mu ed mak ksayni A'u, la' nohkerna gergera-tatiah mia'ta. 25 Ama, O' ed mak ktutga plolmu-mnehemu la yaweratni-yatailli. Nohkerna edonna natg O'a, mere A'g e gatg O'a, ne hari mana iratga de A'mu ed mak khopn A'u. 26 A'ukot nohor olek A'mu la ir wa, ne hota ghi' hare pa nodi liarni, totpena iratu rsaynia ir rimormior wialli pa emekwalima A'mu Nsayn wali A'u, me totpena Agor ir pa mden rer lia lir ida me woka-le'g ida."
Rtorna Yesus
1 La'pa Yesus Nsumbaini emkade, dewade Nora maka ha Nwatutu-nwaye'a re pa rla'awa la' gera tliwu (kali) Kidron walli la'a nhyi'a mak kpenpuen niohora au saitun. Noma Yesus Nora mak ha Nwatutu-nwaye'a re rler la nhyi' de ralamni. 2 Mere Yudas mak ka'olga Yesus de nat niohor oleka gen diewa, yoma nhi'inde Yesus Nora maka ha Nwatutu-nwaye'a re mana rawok la hande wali. 3 Pa Yudas nmai die ni'it nana riy makodi keki-rautu Romawi lidanni ida me la' walia maka nhi'inde katiaka Uplerlawna roma kreini, pa rmai rewre'wa yoma imam-imam re o'tani-matni rora riy Parisi er mak khopna. Rmai die rawtutu'tu la keki-rautu, me hulu-wa'du. 4 Yesus Nat niohora momuoga hya' maka hota ha rhi'a la E'a. Noma Yesus Nla Nwakriania ira pa Natiana re Niwra: "Miy e mpiahak he'a?" 5 Noma rwahla riwra: "Amahak Yesus riy Nasaret de." Dewade Yesus orgahani nekpa Nwalolla Niwra: "A'g inhatti." Nakot emkade de Yudas mana et wal lia hande. 6 La'pa Yesus Niwra: "A'g inhatti", dewade honona rod wikni ne rwag onni la tankierna yoma rlitri-rpurna. 7 La'pa ralamni owa'an pa Yesus Natiana re Niwra: "Miy e mihak he'a?" Noma rwalolla riwra: "Yesus riy Nasaret de." 8 Yesus Niwra: "A'ukot oleka de A'g eda di. Ne la'pa plol toto'pa miy e mpiahak A'u, de miolin doin mak Awuatutu-wuaye'a re pa rla'awa." 9 Yesus Nakot emkade, totpena lir maka Yesus Nakot ulu re raplola. Yoma Eniwra: "Riy maka Omuala mai A'u re, A'utiaka ir honona pa rden la kalwiedwedni." 10 Dewade Simon Petrus mak ktorreria wehla plalahwa de nleh dioinia wehlani pa ndawar doinia Malkus tlinni walli malganna. Malkus di ed makla' hopopan la imam-imam re o'ta lawanni. 11 Noma Yesus Nakot la Petrus Niwra: "Hoi! Mkienia wehlamu della paro'oni! O' edon muat niohora de Awuayow pa Alier la kropna-krieutu maka A'mu Nakot targa mai A'u?!"
Rodia Yesus pa rla rtutga la Hanas
12 Noma makodi keki-rautu Romawi ror wutga ir o'tani me la walia mak katiak reria Yahudi kreini re rtorna Yesus pa rwutga. 13 Rodi ulga Yesus la' Kayafas pananni Hanas de. La' anin de Kayafas ed makhi' o'ta lawna la'a imam-imam re. 14 Ne e' ed maka kano'a-ka'atg ulg oleka mak kodi plolli la Yahudi niwra: "Miolin doinia la pa riy ida nmat lia'a luwu-a'na riwnu-halli wawannu."
Petrus nreher doinia Yesus
15 La' ler de de Simon Petrus nora mutwualli id mak kre' wut lia riy mak Yesus ha Nwatutu-nwaye'a re rlernohor reria Yesus. Imam-imam o'ta lawanni de natg oleka Simon Petrus mutwualli de pede enlernohor Yesus pa nla'awa la'a makla' o'ta lawna romni gaini, la riwta ralamni. 16 Mere o'ta lawanni naplin niohor ma'ta Petrus, pede Petrus nwei tiar la'a riwta to'orni la' nhiari onni. Dewade Petrus mutwualli de nla pa nakot la hopopan pat mak katiaka nhiari, totpena nodia Petrus pa nre'ela nmai lia rialma. Noma nmai lia rialma. 17 Noma pat mak katiaka nhiar die nakot la Petrus niwra: "Oi, A'g edon ghal de, O' di de maklernohor reria Yesus id wali o' toh?!" Noma Petrus nrehera niwra: "Ow, A'g edonna!" 18 La' mel de, de woki lawan rehia, nhi'nande mak katiaka re rora mak ktulla-kar lia hande radunia ai kwiari me rtutrier pia ramriria, noma Petrus mana nre' teman la ira pa namriri ai.
Imam-imam o'ta lawanni natian nohora Yesus
19 La' ler de Hanas makla' imam-imam o'ta lawanni, natian nohora maka Yesus ha Nwatutu-nwaye'a re la' Yesus me la' walia E wniatutnu-wniaye'eni. 20 Noma Yesus Nwalolla Niwra: "Nhi'inde A'ultier die Atio'pi-gauria A li'ru-tu'nu la'a mutlialawna gaini ralamni. Nhi'inde A'g e wuatut lia' gen miaka Yahudi rhi'a kreini-iskolli me la' wal lia Uplerlawna roma kreini, maka nhi'inde riy Yahudi rden mamain la. Nhi'inde A'g edonna ukot targa lir yawunwunamnu. 21 Noma hya' nrei pia tuna natian A'u? Mutian neka ir wa maka nhi'inde kden pa Awuatutu-wuaye'a. Hota irwahauria de plola!" 22 La'pa Yesus Nakot emkare, dewade riy mak katiaka ida nwalo'ma Yesus nurnu na'nama nakot la niwra: "Oi, O nurmu fiekatni la imam o'ta lawanni de nee! O edonna mumta'ata de?" 23 Noma Yesus Nwalolla Niwra: "La'pa A li'ru ri rhala de mikot teka hameni ed mak khala. Mere la'pa mak A'ukota ri raplola, de hya'a ed mak krei piede ompualo'ma A nu'ru?" 24 Nhor nioma Hanas nhopan pa rodia Yesus de limni nawniut niek pa rokria Kayafas makla' imam o'ta lawanni wali.
Petrus nreher doini owa'an Yesus
25 La' dodo'on de meman pa Petrus, namrir mia't ai dewade rira rakot la riwra: "Yanpa o' di de maklernohor reri E'a id o'a?" Mere Petrus nreher pa niwra: "A'g edonna!" 26 Noma makla' hopopna-lili'iru id la imam-imam o'ta lawanni de nmai lia Petrus. De e hyalli de ed maka Petrusa ha ndawar doin tlinni walli malganna, pede nakot la Petrus niwra: "A'g e umkek walia omuor Yesus la'a nhyi' de maka mel de miy e miwok tar lia de, pa yana mriehera." 27 Mere Petrus nrehera owa'an pa niwra: "Edonna!" Dewade plinu-plinnianamde hiwi lallu nkukule'ewa.
Rodia Yesus la Pilatus gaini
28 La'pa yawyawar ma'ta de, makden Yahudi rodia Yesus rwatiaga Kayafas genni pa rokria gubernur hairi Roma genni. Riy Yahudi nek de edonna rparan pia rler la gubernura romni nayanni. Yanhi'pa hota rla' hande de rlernana maka rmakriarnia, yoma Yahudi agamni deullu-tatarni emkade. Yoma la'pa rlernan maka rmakriarnia dewade hota ta'en niana rla' pa ra'an la mei Paska. 29 La' hade pede Pilatus nlergot pa nla natiana re niwra: "Hota hya' hala maka miy ma mtio'ona riy dina de?" 30 Noma honona riarin tar pua riwra: "Hade edonna Nhal mana ami edonna mga' pua amodi E la pap gubernura." 31 Noma Pilatus nakot la niwra: "Mieh'a mia'ala, pa mietlia do'oni-halli, de mliernohora miy orgahami deulu-tatarmi." Mere Yahudi re riwra: "Hota ami edonna modi plolli pa mukum penna rimormiori." 32 Rakot emkade totpena hya' ed maka Yesus Nakot oleka la'a E matmiatni yala'ani hota naplola. 33 Dewade Pilatus nawal lia rialam pa npolga Yesus pa natiana niwra: "Plola O' di de ray Yahudi id O'a?" 34 Noma Yesus Nwalolla Niwra: "Hadi de o tianmu hadina? Onde yanpa riy rod niur tiy o' pa mutian A'u?" 35 Noma Pilatus nakot la: "Mmueh'a mumkeka a' de riy Yahudi id a'u?! Mak kodi O'ola mai a'u, de O rimormiormu owa'an rora imam o'tani-matni re. Hya' ed mak Mhi'a pede emkadina?" 36 Noma Yesus Nakot la Niwra: "A plo'lu-mneh'u maka A hai'ru nlowlia de edonna nwatiawu noh di wawannu, yoma la'pa A hai'ru nwatiawu nohkeran di, A li'mu-ro'ru re hota rwadupla-rwahya'ala pa rma rod nian A'u totpena yana riy rod A lia o'ta-mata Yahudi. Mere plola A hai'ru de edonna nwatiawua noh di wawannu." 37 Noma Pilatus natian owa'an niwra: "Emkade de, O' di de ray id O'a?" Noma Yesus Nakot la Niwra: "O e mukota de ray id A'u, ne lirmu de naplola. Rmori A pua diella nohkeran di totpena Aghi'a Ray. De A maimia'yu di la' nohkeran di wawannu de totpena A'ukot nohor rer tio'a hya' ed mak kaplola. Ne riy honona mak kwahaka hya' ed mak kaplola, de er maka katlina-katailla mai A'u." 38 Noma Pilatus natian nohor la'a lir de niwra: "Ha? Mere emkameni pa itat niohora hya' ed mak kaplola?"
Rukum penna Yesus
Noma Pilatus nlergot owa'an pa nakot la Yahudi re niwra: "A'g edonna liernana riy di halli! 39 La'pa lernana lerlalawna Paska, de nhi'inde Agolin doinia riy id la roma nhio'la tiy miy. Pede dodo'ondi de miy mpiayow pa agolin doinia Ray Yahudi di tiy miy?" 40 Dewade honona riarin pa riwra: "Yana! Yan muolin hadella, muolin neka Barabas!" Barabas di de riy id mak kmalawan la hairi Roma.
1 La'pa nhorwua noma Pilatus nhopan pa limni-rorni rliwra-rkaklia Yesus. 2 Noma makodi keki-rautu re rhi'a wutu-lai ida de rnairi pu'na-kiarit ruri pa rkow nana la Yesus o'tani, nhor nia'nama rohoga emeka ray-ray naniair plalahwani mak ungu pa Nnairia. 3 Riy rla'a-rmai lia Yesus gaini ralamni na'nama rakot la riwra: "Mmuormiori plalahwa Ray Yahu'du ne!" Nhorwua demade rpahara klili-kdioria. 4 Nhor nioma Pilatus nlergot owa'an pa nakot la riy mutlialawna re niwra: "Mimkek memna agodia hadi tiy miy totpena miat muemna, de A'g edon liernana riy di halli." 5 Noma Yesus Nlergot de Nnairia wutu-lai rururi-karkiarti me Nnairia naniairi plalahwa hor ungu. Na'nama Pilatus nakot la re niwra: "Mimkek la riy dee!" 6 La'pa imam re o'tani-matni rora mak katiak reri Uplerlawna roma kreini re ramkeka Yesus noma rhaun pa riwra: "Mlia mpuairia la auwlakra, mlia mpuairia la auwlakra!" Mere Pilatus niwra: "Mia'ala pa orgahami mlia mpiairia la auwlakra hananni, yoma a'g edonna liernan riy di halli kuku' eti." 7 Riy Yahudi re rwahla Pilatus lirni riwra: "La'a a deulu-tatar mamni de riy mak emkare de rukum penan memna, yoma Eniwra E de Uplerlawna A'nani E'a." 8 La'pa Pilatus natlin nan rakot emkare, noma Pilatus yeher to'ama namta'ata. 9 Noma nler owa'an la rialma, ne la'pa rodia Yesus pa rler la rialma, noma Pilatus natiana niwra: "O' di de makden meni id O'a?" Mere Yesus lir ta'a-waw ta' to'owa. 10 Pede Pilatus natian owa'ana: "O' edonna Multier mai a'u? Totpa Muatgo, a'g ed mak kodi plolli pa agolin doin O'ola la' lira tunmu wawannu me a' niek pa kodi plolli pa wuairi O' la' auwlakra." 11 Noma Yesus Nakota la Niwra: "La'pa Uplerlawna edonna Nala plola tiy o' pa omukmua A'u, de o' edonna muodi plolli mai A'u. Pede la'pa riy mak kal A lia o'a pa mukmua A'u, de hota e do'oni-halli narehi-nalawan tiy o'a." 12 La'pa Pilatus natlin nan maka Ha Nakota re, dewade nahak talan totpena na nolin doin Yesus, mere riy Yahudi re rhaunu-rhaun pa riwra: "La'pa tuna nod nian hade, de tuna edon nkar wiut lia Kaisar, hairi Roma rayni de! Riy maka kwet inonni la ray, de hota e' ed maka kora ray Kaisar kwahapra lia'ara." 13 La'pa Pilatus natlin nan lira re, dewade nodgiota Yesus la pliorni dewade Pilatus namtatan la liwangeni nhiudi-pniara, la'a gen miaka ra'atria watu, maka ha rweta la yawala Ibrani de riwra Gabata. 14 La' ler de nhi' pa lera nwawuau ro'onni, la' ler maka ha rwahi'a-rwayod tiarga pa rwei repar de, de la'a Sabat lerni maka ktuin tiaru lia lerlalawna Paska. Nhor nioka Pilatus nakota la'a riy mak kden la hande niwra: "Miy raymi inhatti!" 15 Mere rhaunu-rhaun pa riwra: "Mpienna! Mpienna! Mlia mpiair wenna la auwlakra hananni!" Noma Pilatus natiana re niwra: "Hota a'g ed mak kla kwair wenna miy raymi la auwlakra hananni?" Noma imam re o'tani-matni re riwra: "Eneknek to'ama amatg de a ray miamni de ray Kaisar!" 16 Dewade Pilatus nala Yesus la ira, totpena rla rwairia Yesus la auwlakar hananni. Noma ra'ala Yesus pa rodi rla'awa.
Rwairia Yesus la auwlakra hananni
17 Rla' de Yesus orgahani Nmeh'a Nakwar nana auwlakarni pa Nokria gen miak ha rweta la Riy Ruri-Kliaklu Genni, maka la yawala Ibrani de rweta la Golgota. 18 Hota la' gen die nanpena rla rwairia Yesus la auwlakra hananni. Ne rwair taru wuali riy wor lia auwlakra hananni, id la malganna, id la malwiru ne Yesus Nden la letgara. 19 Pilatus nhopan pa rhorat targa la auganna ida, de riwra: "Hadi de Yesus, riy Nasaret, Yahudi Rayni inhatti". Nhor diewade rpasna la Yesus auwlakarni. 20 Riy Yahudi harahu rpaikia maka ha rhorat tar die. Yoma gen miaka ha rkenia Yesus auwlakarni de edonna olieta la letlawna onni. Ne mak ha rhorta re de rnairia yawala Ibrani, yawala Latin me yawala Yunani. 21 Noma imam re o'tani-matni re rakot la Pilatus riwra: "Yana mhuorta emkade. Mere mhuorat neka miwra: Riy di Niwra A' di de Yahudi Rayni A'u." 22 Mere Pilatus nakot la niwra: "Maka ghorat taru de yana riy rhap dioinia la. Ndella pa hota emkade nekwa!" 23 La'pa makodi keki-rautu re rkenia Yesus la' auwlakra, dewade ra'ala Yesus naniayarni pa rhakra la nhiakra wogata totpena rima-rima gahani. Ira ra' wal lia koka plalahwani, mak emeka nhiekru yoma edonna rhor nana. 24 Noma makodi keki-rautu re idma nakot la ida riwra: "Yana iteti-tlaiya raini plalahwa di. Mai pia tsedu patui niohora totpena he' ed maka klernana." La' hade de totpa hota ntu'tu la Puka lirni niwra: "Hota ir er maka khakre'era A naniai'ru, ne rhed patui la A rainu." Pede makodi keki-rautu re rhi' emkade. 25 La'pa rhi' hare de Yesus inni nor walia elli, me Maria, Eklopsa patke'eni, me Maria Magdalena e rtutrieri la'a auwlakra onni. 26 La'pa Yesus matni nki'ir nana riy id maklernohor reri E'a maka Ensaynia de nora Yesus inni rtutrier lia' hande noma Yesus Npol lia inni niwra: "Ina, hota a'namu eda di!" 27 Nhor nioma Yesus nakot la riy de niwra: "Hyalia, hota o inmu hade." La' dodo'on de meman pa riy de na'ala Yesus inni pa nora rhol wiutu.
Yesus matmiatni
28 Yesus Natga de hare honona maka Uplerlawna Nhopna Enhi' de Enhi' pa nhorwua la dodo'ondi wa, ne totpena hya' maka Puka ralamni ha nakot taru re de honona ntutu-nte'ewa, pede Niwra: "Atie'ru kerna." 29 La hande de lari ida npenpuen lia anggur turu mak milmilu, noma ra'ala kuliai id na'nama rto'a la anggur tur milmil die na'nama rhoinia la ora id maka ha rweta la hisop pa rtapla la Yesus nurnu. 30 Noma Yesus Ndihmia anggur tur milmil die nhor nioma Nhar lirni Niwra: "A tulla-knia'ru ntutu-nte' olek wa." Dewade Yesus o'tani nariu'u wua ne Nwaran doin aranni.
Rkoki-rgauria Yesus
31 La' ler de, de reparni de la' Sabat lerni. Ne rerehnian de Sabat de ho'mana ntuin taru lia'a Yahudi lerlalawanni Paska. Mak kodi plolli la riy Yahudi re rahmen pa mak kmat lia auwlakra hananni re rawniair nek la auwlakra hananni la'a Sabat lerni maka ha rwei-rnara. La' hade pede riy Yahudi rwak la Pilatus totpena nwayow pa rtewar watwiat riy mak kden la auwlakra lakni totpena plet pa rmati nanpena ralernia. 32 Pede makodi keki-rautu re rla' pa rtewar wat ulga riy maroro'a maka kletgar reria Yesus re, lakni. 33 Mere la'pa rwakriania Yesus, pa riwra rtewar lakni, mere rla' de ramkek de Nmati olekwa, de edonna rtewar Yesus lakni. 34 Mere makodi keki-rautu id de nho'ora welhara la Yesus ruh'anu nayanni pa rara nawniah'a wutu gera nwau gota. 35 Mimpiesiaya, a'g ed mak kamkek memna hihi'a-yapyap die, me orgah'u ed mak kakot nohora lir mak kaplol di. Agatga mak a'ukota re de plola, ne a'ukot nohora hadi totpa la' miy miana mpiesiaya de. 36 Makodi keki-rautu re edon rtewar wat Yesus lakni totpena hya' maka ha rakota la Puka ralamni de ntutu-nte'ewa. Yoma la' Puka ralamni de niwra: "Hota la'pa rurni-kliakallu id mana edonna rtewar wati." 37 La Puka ralamni mana rhorat targa de riwra: "Hota riy ramkek nan memn E'a maka ha rkoki-rgaur nana."
Rkenia Yesus la'a liena ralamni
38 La'pa nhorwua noma Yusup mak kwatiawua Arimatea nma nwak la Pilatus pa nadera Yesus inonni la e tiamin matgenni. Yusup di de maklernohor reria Yesus ida de, mere edon nakot nohor e pesiayni pa riy ratlin nana yoma namta'at reria Yahudi o'tani-matni. Noma Pilatus nwayow nohora, pa Yusup nla nala Yesus inonni mak kmati olek de pa nadera la'a liena ralamni. 39 La' noma Nikodemus mak kmai Yesus la' mela id la'a mahnek meman de, nor rewre'wa Yusup talla. De la' ler de Nikodemus e nodia wu'ru mikmikri oke'a nor wutga ha'aki ayalli oke'a me ortawi-autiawi maka huwnu mikmikri pa rnairia ra rawu'ru-ragania (rohala) Yesus inonni. Hare weratni edonna nhal de kilu terampwotelu. 40 Noma irrora ra'ala Yesus inonni de na'nama rala kok lawna mnurnuhru (kafan) ra rtoman wutga la wu'ru mak kahuwu mikmikri re pa rtot nohora Yahudi nhi'inde ha rhi'a la mati-molu. 41 Edon olieta la'a gen miaka ha rkenia Yesus auwlakarni de, de nhyi' id geni hade. La lutur-le' die ralamni, de lien mak edonna rken mia'ta mati-molu etla hande. 42 Yoma la ler de, ler maka rwahi' targa hare honona pa rwei-rnara Sabat lerni (ler maka Yahudi edon rkar lia), la' hade pede rla' rkenia Yesus inonni della hande, yoma lien de rehgorgoru.
Liena maka nahgali
1 La'pa yawyawar ma'ta la krei lerni, dewade Maria Magdalena nokria lien maka ha rkenia Yesus inonni. Nla' noma namkek de wat liawan maka ha ra rherit targa hoi die nhiarni ema rwaklol dioinia la walli. 2 Pede nawlar pia nla nahaka Simon Petrus me maklernohor reri Yesus id to'a, maka Yesus Nsayni. Noma Maria Magdalena npol lia re niwra: "Eee! Riy ra' olek la Itmatromni inonni. Ne amaplin niohora etla meni ee!" 3 Pede Petrus nora mutwualli de la pa ramkeka la hoi die ralamni. 4 Irrora rawlari mere Petrus mutwualli nala' ulga Petrus la hoi-kietar de. 5 Mutwualli de nla' noka nru' pua namkek la lien de, de namkek nan to'a kok lawna wawahra nayadera mere e edonna nler la rialma. 6 Simon Petrus ntawli'ir pa nlernohora, noma nodi liarni la lien de ralamni. La' noma namkek nana kok lawan de nayadera. 7 Mere namkek nana kokanan maka ra rwatiehra Yesus o'tani edonna nden wut lia' kok lawan de, mere napniopan la geni id to'a. 8 Nhor nioma Petrus mutwualli mak kala' ul die, nler walia lien de ralamni. La'pa namkek nan tutga, na'nama npesiaya de Yesus Nmori owa'ana. 9 Yoma la' pa emkameni ho'mana la' Puka ralamni de ha rakot targa de hota Yesus Nmori owa'an la matmiati ralamni, de la'pa la' lera-mela ri ho'mana maklernohor reri Yesus re edonna rna'erit nan ma'ta lir de nnia'eratni. 10 La'pa nhorwua noma irrora rla'awa ir romni.
Yesus Ntutga rupni la Maria Magdalena
11 Mere Maria Magdalena ntutrier niek la liena onni pa nahe'i kniakru. La'pa nkakakur reri de nru' pua natot la lien de ralamni. 12 Noma namkek nana Uplerlawna hopopanni woru rlipa-rka'ma nohora naniayarni pa ramtatan la gen miaka rkenia Yesus inonni la. Rrora ramtatna de ida nden la gen die o'tani me ida nden la lakni. 13 Noma hopopna re ratiana riwra: "Hya'a nariei pia omkakru ine?" Noma Maria nakot la niwra: "Ra' oleka a Matro'mu, pede pa a'g e uhaka." 14 La'pa nakot emkade dewade namkek la to'orni de Yesus e Ntutrieri, mere naplinga de Yesus inhatta. 15 Noma Yesus Natiana Niwra: "Nihya'pa omkakru ine? Ne omuhaka he'a?" Mere Maria nhoi hade la ora nhyi' de pede nakot la: "Ame, yanpa o' e mpuatitnia Ha genni mai handi, de mtiulan pa mukot mai a'u totpena a lia gala." 16 Noma Yesus Nakot la Niwra: "Maria!" Noma Maria napal lia Yesus pa niwra: "Rabuni!" de nnairia yawala Ibrani nnia'eratni de tungkurga. 17 Mere Yesus Niwra: "Yana mtieman la A'u ina, yoma A'g edonna gha'at ma't la heyanan la' A'mu de. Mere mlia' pa mukota la A A'mu-hya'lu rora A i'nu-na'ru, muiwra A'g e giwra gha'at la heyanan pa lia A'mu mak miy Ammi wali die, me A Uplerlawnu, me miy Uplerlawanmi wal die. 18 Dewade Maria nla' pa nod kiota la maklernohor reria Yesus re niwra: "Ee! A ma'tu mak kamkek memna Yesus!" Dewade nakot nohora Itmatromlawanni Yesus nnio'oni la ira.
Yesus Ntutga rupni la maklernohor reri E'a
19 La'pa krei lerni de la'pa nmel wa, dewade maklernohor reri Yesus re rawok la roma ida, ne rkahro'pa targa nhiari re honona, yoma ramta'at rer lia Yahudi re o'tani-matni. Dewade plinu-plinnianama Yesus Ntutrier lia ira letgara-mneneheni na'nama Nwak kalwieda la ir honona Niwra: "Awuak pa Uplerlawna Nala kalwiedni-paitiotni tiy miy!" 20 La'pa Nakot emkade dewade Ntutga lo'mani ralamni me ruh'anu nayanni la ira. La'pa ramkek nana Itmatromni de, dewade ralamni rahepuepur nohora. 21 Noma Yesus Nakot owa'ana lira ralamni la ira Niwra: "Mdien la kalwiedni-paitiotni. Emeknekama A'mu Nhopn A'u, de emkade wal lia Aghopan miy." 22 Dewade Neu tiarga aranni la ira, ne Nakot la Niwra: "Mrieiniana Uplerlawna Nhiwni de. 23 La'pa mikot la rira pa rhoitio'or doinia ir do'oni-halli. La'pa ir edon ratlin la lirmi re, pa narieiniande miy mtio'on rer mia't ir la do'oni-halli, de hota Uplerlawna mana edonna Namou-nawitna ir do'oni-halli. Mere la'pa ir ratlin la miy lirmi pa rto'or doinia ir do'oni-halli, narieiniande miy edon mtio'on rer owa'ana ir do'oni-halli, ne hota Uplerlawna mana Namou-nawitna ir do'oni-halli re."
Yesus Ntutga rupni la Tomsa
24 Tomsa, maka ha rweta la A'na Dio'a e' mana riy id wal lia riy termida wehrani woru maklernohor reria Yesus. La' lera Yesus Nayamkek la e mutwualli re, de Tomsa edonna nden wut lia ira. 25 Pede maklernohor reria Yesus korni re rakot la Tomsa riwra: "Tomsa, Amamkek oleka Itmatromni!" Mere Tomsa nakot la re niwra: "La'pa a'g edonna gala ma'tu umkek nana lo'mani maka ha rroh nan de, me la walia ruh'anu nayanni mak ha rho'or nana me a'g edonna gal ma'ta a li'mu di ga ghai niana, de a'g edonna puesiaya!" 26 La'pa krei ida nto'or doin la, dewade maklernohor reri re e rawok owa'an la gen die ne Tomsa mana ed wal lia, ne nhiari re honona de rkahro'pa tar momuoga. Mere plinu-plinnianama Yesus Ntutrier lia letgara-mneneh na'nama Niwra: "Upa-a'na miy re, mdien rer lia kalwieda-paitiota!" 27 Nhor nia'nama Yesus Nakot la Tomsa Niwra: "Tomsa, mumkek la A lo'mu ralamni, ne mtieman rer lia. Ne mrian limmu pa mhuai lia A ruh'u nayanni mak kamno' di. Yan ralammu worworga mere mpuesiaya, de A'g inhatti." 28 Dewade Tomsa nhar lirni pa nakot la Yesus niwra: "Matromlawnu nee! Uplerlawnu nee!" 29 Noma Yesus Nakot la Niwra: "Ompuesiaya, yoma mumkek memna A'u toh! Mere la'pa riy mak edon kamkeka mere natlin nan ne npesiaya de hota riy de nlernana pripanni-fa'anni la Uplerlawna."
E rhorat targa hare honona totpena miy mpiesiaya
30 Yesus Nhi'a hihi'a-yapyapi mak kamehi-kayona mak ktutga Uplerlawna rurni-laini dom to' wali la'a maklernohor reria re gaini ralamni, mere edonna rhorta la Puk di yoma harahu rehia. 31 Mere honona re maka e rhorat targa ri de totpena miy mpiesiaya, la'a Yesus de Ray Makamori-Kalewna inhatta! Uplerlawna A'nani hade, ne la'a mpiesiaya de pede mlier la mormiori-dardiari plalahwa.
Yesus Ntutga rupni la maklernohor reri E'a re riy wo'itu
1 La'pa nhorwua noma Yesus Ntutg owa'an rupni ralamni owa'an la maklernohor reri E'a re la'a danau Tiberias. Emkadilla wniahaurnu. 2 La' ler ida, la'pa Simon Petrus, Tomsa, a'na dio' de, Nataniel mak kwatiawu leta Kana la Galilea, Sebedeus upni-a'nani rora re, ror wutga riy woru maklernohor reria Yesus dom wal pia e rawok taru. 3 Dewade Simon Petrus nakot la talanwalli re niwra: "Agiwra lia' lora." Noma mutwualli re rakot la riwra: "Hade emkade, de amor wali." Noma rodi puou pa rla'awa. Mere la' mel lawan de, edonna rlernan etia i'na ida. 4 La'pa lera nhi' pa matni npah'a wa, dewade ramkek de Yesus e Ntutrieri lia eni wawannu, mere edonna rakniau niana. 5 Noma Yesus Nhaun la re Niwra: "Hyal miy re! Miy e mliernan i'na me edonna?" Noma rwalolla riwra: "Makleh eni, Tuna." 6 Yesus Nakot la re Niwra: "Demade mietar darmi la puoumi walli malganna totpena mliernan i'na." Noma hare retar dar della puou walli malganna, dewade takeni rwahed niana dar die, yoma i'na npenpuen lia ralamni. 7 Noma riy id la maka Yesus ha Nwatutu-nwaye'a re maka Nsayn rehia de, nakot la Petrus niwra: "Mimkek to'ola, Itmatromlawanni hade!" La'pa Simon Petrus natlin nan mutwualli de lirni de dewade nhu'ru la rayanni, yoma edonna narain plollol ma'ta, dewade nehgerun la tah'i. 8 Ne maklernohor reri re korni, rodi puou rlernohora la keranni ne rwahedged liola dar miaka kpenpuen lia i'na re, yoma ir edonna olieta la keranni, la'pa edonna ghal de olietni la keranni de re'a terampwonem rehenu (100 meter). 9 La'pa rerun la puou, pa rla'awa keranni de ramkek de i'na ed olek la ai kwiari ralamni me roti mana er olek wal lia hande. 10 Noma Yesus Nakot la re Niwra: "Miod tieka i'n mak na'nama mliernana re dom la handi." 11 Dewade Simon Petrus nha'at la puou, na'nama nhedga darni la keranni de enni i'na rahu ida terampwolima wehrani wotelu de i'n lawan mamaini. Ne la'pa i'n rahu emkade ho'mana dar die edonna napriti. 12 Dewade Yesus Nakot la re Niwra: "Mai pia ta'ana!" Mere maklernohor rer riy id mana edonna nparan pia natiana la Am de he'a? Yoma ratga de Orgahi-Orha'a inhatta. 13 Noma Yesus Nwakriania re na'nama Na'ala roti re pa Nalla' ira. Na' walia i'na re pa Nalla re. 14 La' ler di Yesus Nayamkek nana re'eni wotellu la'a maklernohor reri E'a re, la' ler maka Enmori owa'an la matmiati ralamni.
Yesus Natian nohora Petrus sniayanni la E'a
15 La'pa ra'an pa nhorwua, noma Yesus Nakot la Simon Petrus Niwra: "Simona, Yohansi A'nani ne, hota o e msiayn rehi A lia hari honona?" Noma Petrus nakot la niwra: "Matroma, orgahamu Muatga de asiaynia Matro'mu." Noma Yesus Nakot la Niwra: "Had emkade de muodia A du'mu ree!" 16 La'pa Yesus Nakot owa'an la re'eni wornu de Niwra: "Simona Yohansi a'nani ne, plol toto'pa o e msiayni A'u?" Noma Petrus nakot la niwra: "Plola Matroma, Matro'mu Natga de a'g e siayni O'a Matroma." Noma Yesus Niwra: "Muodia A du'mu re." 17 Yesus yatianni re'eni wotellu Niwra: "Simona Yohansi a'nani nee! Plol o' e msiayni A'u?" Dewade Petrus ralamni nmayo'a yoma tiana re'eni wotel muemn olekwa. Noma Petrus nwalol owa'an la niwra: "Matroma, Matro'mu Natg oleka haneknek wawannu. Matro'mu Natga de a ralmu e nod rer lia Matro'mu." Noma Yesus Nakot la Niwra: "Demade, mhilpai-muanatga A du'mu re." 18-19 Noma Yesus Nnairia lira pa na Ntutga hota Petrus matmiatni ha lolola totpena nodia ya'uli-yawed lia Uplerlawna-Mempulwatnu, Niwra: "Hota plola la' A li'ru-tu'nu ri! La' lera omhuatriapriap mia'ta, de o orgahamu omhi'a hya' to'a, de nden nek la o ralma-riormu. Mere hota la'pa omhuamto'owa de hota omtiania o limmu pa rwutga ne rodi o' pa rlola meni-meni mak omuhmena mliola. Mere la kropna-krieutu, wniunu-wnienna hya' ho'mana mdien rer lia pesiaymu pa mliernohora A'u." 20 La'pa Petrus nkillia to'orni de namkek nana riy id la maka ha Nwatutu-nwaye'a re maka Yesus Nsaynia de e nlernohor reri ira. Riy de ed maka la' ler dello, e namtatan la Yesus onni pa ra'an wutu Paska ne natian Yesus niwra: "Matroma hota he' ed mak kwaldioin pa ka'olga O'a?" 21 La'pa dodo'ondi de Petrus namkek la riy de noma Petrus natiana Yesus niwra: "Matroma emkameni la hadena?" 22 Noma Yesus Niwra: "Omliernohora nek A' wua. Yana mpiaror nohora A ralma-rio'ru la mutwualmu. La'pa Awuaror pa hota enmormior niek pa nwei pia A'uwali owa'an pa Amuai, la' hade de yana ralma-riormu nla' nana de!" 23 Dewade lira la' lira la'a maklernohor reri Yesus re riwra, ir mutwualli de hota edonna nmati. Mere Yesus edon Nakot Niwra: "Hota mutwualmu de hota edon nmati." Eneknek to'a Niwra: "La'pa la' nan A ralma-rio'ru de e nmormior niek pa nwei pia A'uwal pia Amuai, yana wniarormu nla' nan hade." 24 Ne a' di de maklernohor reri Yesus maka rwarora hota edon nmati. A'g ed mak kakot nohora hya' maka Yesus Nhi'a-nyapi ri honona. Ne a'g ed mak khorta hare honona la' Puka di ralamni. Ne itatga la'a hya' maka a'ukota de ha naplola.
Lira hohoni
25 Yesus hihi'ini-yapyapni harahu ma'ta pede la'pa rhorat targa hare honona la puka re, de awuarora de geni-tiena la nohkeran di wawannu edonna rtu'tu pa rwahi' targa puka re.
Yesus Ntutga Enmori owa'an la matmiati ralamni ne Nakot targa hota Uplerlawna Nhiw Lululli Nmai
1 Hya'lu Topilsu. La'a puka yanulnulu de, aghorat targ oleka, hya'a-hya'a mak Yesus Nhi' oleka me Nwatutg oleka la'a lerni la Enariri kniarni 2 la'pa ntutu-nte' wal lia ler maka Narian pa Nla'awa Ilyamou-Watyatoha. Mere edon Narian ma'ta la heyanan de, Uplerlawna Nhiw Lululli Nodi plolli la Yesus pa Nano'a-na'atga makodia Uplerlawna lir kalwiedni mak Nwalir niana. 3 De la ler mak Enlernana yamuki-yama'ala, la la'pa Nmati dewade, Nmori owa'an pa lerni terampwogat ma'ta la noha wawannu de, Yesus mana Ntutga rupni re'eni wo'ir memna la mak Enhopan pa rodi Uplerlawna lir kalwiedni, ne Ntutga de Nmori owa'an olek la matmiatni ralamni totpena rpesiay miemna. Iramkek memna Yesus, ne Yesus Nakot nohora la ira, la emkameni la Uplerlawna Nodi plolli pa emek Ray ida. 4 Ne la' lerni Enora ir ra'an wutu rewre'wa, de Enakot lir dilla ira: "Hyal miy re, yan mihgalia (mliergot la) Yerusalem di. Mpiei lia handi pa A'mu Nal memna E' Nhiw Lululli mak Enettiarg oleka wa, mak A'ukot oleka tiy miy lia' ler ululu. 5 Yoma A'ukot oleka tiy miy die Giwra: "Yohansi nharania de nnairi gera. Mere hota ler wo'ir wal pia Uplerlawna Nala Nhiw Lululli pa Nodi plolli la miy."
Yesus Narian pa Nla'awa Ilyamou-Watyatoha
6 La' lerni la Yesus Nora mak Enhopan pa rodia Uplerlawna lir kalwiedni re rawok taru, noma ratiana Yesus riwra: "Matroma, hota la' hadi de Matro'mu Niwra Nhi' mak kodi plolli la hairi Israel totpena makden Roma edon nodi plolli mai ita?" 7 Noma Yesus Nwahla lirni re: "A A'mu nanpena ed mak kmeh'a ketlia ler meni-mel mueni. Yana mihak nohora hade yatianni yoma A'mu nanpena Nodi plolli. 8 Mere hota miy di de, mliernana ruri-lai la' ler maka Uplerlawna Nhiw Lululli Nerun la miy wawanmi. Ne hota miy mhi'a riy maka ktutrier (saksi) niohora A lia'a A li'ru-tu'nu la Yerusalem, Yudea uhunu-ewatni, Samaria ne nla' pa ntutu-nte'ela noheri woru-lyanti nayanni." 9 La'pa Yesus Nakot emkade pa nhorwua noma E' ema rran nana pa Nha'at la Ilyamou-Watyatoha. Ir orgahi ramkek memna la matni, pa la'pa kakma mana npupniahala Yesus la heyanna pa nod hial memna yamkekni re. 10 La'pa irwatniar rer mia'ta la lyanti maka Yesus Narian de, de plinu-plinnianamde riy woru rnair wawahrani pa rtutrier lia ir onni. 11 Rrora rhar lirni riwra: "Hoi Galile' miy re! Nihya'pa mimtiutrieria tehra la hande pa mpiatniar rer lia lyanti?! Yesus mak mimkeka Narian pa Nla'awa Ilyamou-Watyatoha de, mimkek memn oleka me?! Hota Nawali pa Nmai die emkade owa'ana, emek ha mimkek de."
Rwahaka Yudas wniaunu
12 Nhorwua noma makodi Uplerlawna lir kalwiedni re, rwatiawu wo'or Saitun pa rawal lia Yerusalem. Wo'or Saitun de olietni la Yerusalem, de kilu ida. 13 Rodi liarni la roma tniau tiar geni ida. Noma rha'at la gen miak kden la heyanna, maka ir genni oleka wa. La' ir honona de Petrus, Yohansi, Yakowsi, Andarias, Pilipsu, Tomsa, Bartolomeus, Matius, Yakowsi, Alpius a'nani, Simona mak kwayotlia memna Romawi rodi plolli la Israel, ne Yudas, Yakowsi a'nani. 14 Ir honona de nhi'inde rla'a ihru ida-ralm id la sniumbain la' Uplerlawna. Nhi'inde ror wut wali Yesus hyalli re, Yesus inni Maria me, patke'a korni wali pa rsumbaini. 15 La'pa la'awa lera ida, ne makpesiay re e rawok taru, de ir honona de edonna nhal de riy rahu ida terampworu. Noma Petrus naprir pia niwa naltieri. Lirni niwra: 16 "Ina-nara ama-hyali, hya' maka ha rhorat tar lia' Puk lawna ralamni de Uplerlawna Netlia pa hota ntutu-nte'ewa. De la it upni-tgarni lerni de, Uplerlawna Nhiw Lululli Napre'et Daud nurnu pa nakot nohora oleka Yudas mak kla' o'tani pa rtorna Yesus de. 17 Yoma Yudas de, it mutwualli ida de, ne hade wnialir nian walia pa it tora tkar wiutu. 18 Yudas di de, naweli oleka tani, nnairi kupna maka nlernana la'a ya'olu Yesus, la riy mak kodia Yesus pa rwenna. Yudas nmati lia' hande, de namehi-nayona, nlererun de o'tani nala' ulu me apannu nahniarti, me tnie'eni nripu. 19 Kuku'uni-lalawanni la'a Yerusalem natlin nan memna hya' mak Yudas nhi'a oleka, pede tan die rweta la Akaldama, nnia'eratni de rar tani. 20 Yoma la'a puk Masmur ralamni de e rhorat targa de lirni emkadi: "Yeheni mana rdi'na, lia'arni mana rlo'wa. Ahu edonna ntowru. Hiwi edonna nkukule'a. (Genni nahgali ne riy edonna rdella.)" La'pa e rhorat tar wualia de emkadi wali: "Mollia la la'pa wikgeni mana riy rta'wa hgerla (rwarui-rwate'la). (Mollia pa riy dom to'a rla'a mtatanni.)" 21-22 La hade pede itwalir niana riy ida totpena nwauga Yudas pa nor rewre'wa it pa tsi'a tlin nohora-mat nohora, de Itmatromni Yesus Nmori owa'an olek la matmiatni ralamni. Twaliria riy de, de tamkek riy maka itor oleka tlernohor reria Yesus la meni-meni maka la' lerni meman la Yohansi nharani, pa la'pa nte' meman la Yesus Narian la noha wawannu pa Nokria Ilyamou-Watyatoha, de mak itden wal die." 23 Noma riy mak kawok taru re rtut niana riy woru, id nanni Yusup. Rwet walia la Barsabas onde Yustus. Ne rwalir walia Matias. 24-25 Noma rsumbain nohora pa, rwaka plolli-mneheni la Uplerlawna. Rsumbain pa riwra: "Orgahi-Orha'a Omuat niohor oleka la riy honona ihranu ralamni. Yudas ntuini olek la genni, emolmolla makodia Uplerlawna lir kalwiedni pa e nmati olekwa, ne nla'awa geni maka hota nlernana hihi'ini-yapyapni wniahlani. Pede Matro'mu, orgahamu Mtiutga he'a mak O ralammu nala pa nkar lia kniarmu di. La' riy maroro'a ri de, Mtiutga riy id pa nwauga Yudas." 26 Rsumbain pa nhorwua, noma rhedga patui la riy maroro'a re nanni. Noma rlernana Matias nanni. Pede rrana Matias pa nla'a mak Yesus Nhopan pa rodi Uplerlawna lir kalwiedni nor rewre'wa mutwualli termida wehrani ida re.
Uplerlawna Nhiw Lululli Nernu
1 La'pa Pentakosta lerni nte'ewa, dewade riy makpesiay honona rawok la geni ida. 2 Plinu-plinnianama ratlin de emek anin lawna nwatiawua Ilyamou-Watyatoha, pa nteni lia'a rom maka ira rawok tar lia de. 3 Noma ramkek de, emeka ai lomarni nhakre'era pa ntai lia ira riy nenenna. 4 La' ir honona, de Nhiw Lululli Nodi plolli pede rna'ona ltierni rella la'a yawala dom to'a, yawetni re rlernohora neka hya' maka Nhiw Lululli yawewalli la ir namni. 5 La' ler de de, Yahudi rirahu rwatiawua hairi-hairi la meni-meni to' pa e rawok tar lia Yerusalem. Ir honona re, er mak ka'unni-kamta'ata Uplerlawna. 6 La'pa ratlin nana mak kyetin de, dewade riy harahu rawok la hande. Riy honona rheduma, yoma makpesiay re raltier die rnairi ir yawalli. 7 Riy honona ema rtaplelleltarga noma riwra: "Hei, hari de riy makdena Galilea ri. 8 Mere emkameni pede ir rawal targho'a it yawalli? 9 Riy Yahudi ita, itwatiawua Partia, Media, Elam, Mesopotamia, Yudea, Kapadokia, Pontus, Asia, 10 mak kwatiawu Firgia, Pamfilia, Mesir ne geni-tien mak kden la Libia mak rehgorgorga Kirene. Me doma e rwatiawu walia Roma, de 11 riy Yahudi, me riy maka Yahudi atia'a mak kla oleka agama Yahudi, me Yahudi mak kwatiawua Kreta, ne Arpa er wal lia. It hononit tatlina ir rawal it yawalli la hya'a-hya'a maka Uplerlawna Nhi' nana, de mak it takenia twaror nana la ita kriahlanu, de Uplerlawna hihi'ini mak kodi it pa ta'uli-tawedi E'a." 12 Honona re ema rtaplelleltarga pa idma natian ida: "Hya' ed mak katota-kariei piede emkadino?" 13 Mere riy dom pal pia e rwaliktia'a pa ramola-rama'a riwra: "Ah, hare e rma'wu to' pede rhi' emkade."
Petrus nakot nohora Yesus lirni-tunnu la mutlialawna gaini
14 Noma Petrus naprir niohora makodi Uplerlawna lir kalwiedni korni termida wehrani ida re, pa nakot la riy rahu mak kawok taru re. Nhaun pa nakot la re: "Ina-nara ama-hyali, Yahudi me Yerusalem uhunu-riwni makpoi-makeka, hononmi mitlina me mhioratreri la eda di. 15 Ami edon ma'an nana-memun nan pa nhop ihru-nha' rernu emeka ha mikota re. Yoma lera yawyawar ma'ta (jam sembilan). 16 La'a hya' mak ha rhi'a di, de Uplerlawna Nhopan pa makwohorulu-ktatrulu Yoel nakot nohor oleka, niwra: 17 "Uplerlawna lirni: La'pa la'awa lera hohoni de, hota Aghuriernia A Nhiw Lulu'lu la riy mak kdella nohkerna-rai miaran di honona. La'pa upmu-a'namu patke'a rora muanke'a totpena rakot nohora hya'-hya' maka A'ukota la ira, pa rakota la miy. Tuwu hararara-hatrapriapi, hota rdarat nana hya' maka Agala pa iramkeka. Inmu-ammu hota rmi'a mi' maka Agala pa ir rmi'a. 18 La'pa atmi-wa'armi patke'a rora muanke'a makpesiay A'u muana, Aghuriernia A Nhiw Lulu'lu la'a ler de neka. Hota irakot nohora hya' mak A'ukota la ira. 19 Hota Aghi'a hya'a maka riy ramkeka de rheduma, nden la lyanti me hya'a-hya'a maka taken niana riy rwaror nana la'a yawa, la' noha wawannu, totpa Atiutga A ru'ru-la'yu. Hota rara nora ai, me mokla-mahu liawna la' nohkerna wawannu. 20 Hota lera nmati (makarau), wolla nmermer pa emeka rara na'nama Orgahi lerni ntutu-nte'ewa, de ler maka hota Uplerlawna Ntutga rurni-laini, hititni-homhomarni ne Nhudi-npara la riy honona. 21 Ne la'pa Orgahi lerni edon ntutu-nte' ma'ta de, he' mak kwaka yamori-yalewna la Orgahi-Orha'a de hota nmori-nlewna." 22 Ina-nara ama-hyali, riy Israel miy re, mitlina la'a hya'a mak a'ukota ri. Yesus makden Nasaret de, Uplerlawna-Mempulwatnu Ntutmuata-nkewra'a pa Nmai lia tiy miy. Ne totpena miy hononmi miatga de, Uplerlawna ed mak khopna Yesus di pa Nmai, de Uplerlawna Nala rurni-laini la Yesus di, totpa Nhi'a hihi'a-yapyapi mak kamehi-kayona mak ktutga Uplerlawna rurni-laini, pede riy ema rtaplelleltarga. Hare honona de miy hononmi miatg oleka toh?! 23 Nlernohora E wniaror wamueheni, pa Uplerlawna Netlia de Nala Yesus la' miy. La'pa Nala la' miy, noma orgahami miala la riy mak edonna klernohora Uplerlawna deullu-tatarni pa rla rwairia la auwlakra hananni. La'a ululu memna Uplerlawna Nat niohora hare honona hota ntutu-nte'ewa. 24 Hoi-kietra rlumu-rtella Yesus, mere edonna Ndella matmiati ralamni yoma Uplerlawna, orgahi Namori owa'an la genni. Hade emkade, yoma taken niana matmiati nodi plolli la' Yesus. 25 La Yesus mak Uplerlawna Namori-nalewan di, de Daud nhorat tar wual lia, de niwra: "Nhi'inde A'umkek mamainia Orgahi-Orha'a Ntutrier lia A ga'yu. E Nden rer lia A o'nu, totpena riy edonna rawo'l A'u. 26 Hade pede A ralmu nahepru, A nu'ru na'uli-nawedia E'a. Ne Agha'ara ino'nu la Uplerlawna, de hota Amuormiori. 27 Yoma O' edonna Mtio'or doinia A lia noh mati-rai miolu. O' edonna Muolin doinia lili'irmu-hopopanmu A'u mak katlina-katailla O'a, de Alier la noh mati-rai miolu, pa ih'u ngehpa-nta'lu. 28 O' ed mak kharia talan mai A'u, mak kod A lia mormiori. A yahepru de emekneka opli mak kha'a yoma O' e muor A' tialla." 29 Ina-nara ama-hyal miy re, mhiuria a' pua ukot nohora ploloi-plele'era Daud it upni-tgarni maka ha rtota-rwawa de hihi'ini-yapyapni, maka miat niohora oleka re. Enmati olekwa me rkenia la liena olek wali wia. Hoini-kietarni de, ed ma'ta pa itamkek walia. 30 Mere la'pa Daud di nmormior mia'ta de, makwohorulu-ktatrulu id wali e'a, ne nat niohora oleka Uplerlawna nnio'oni maka Enlokra-nhautu pa Nano'targa la Daud pa Niwra: "Hota la'a riy id la o duratmu-waitmu de, Ariana pa Nla'a Ray." 31 Uplerlawna Nhiw Lululli Nodi plolli la Daud, pede natg olek wal lia hya' maka Uplerlawna hota Nhi'a-nyapia. La' hade pede e nakot targa, hota Ray Makamori-Kalewna maka Uplerlawna Nano'tar die, hota Nmori owa'an la matmiatni ralamni. De Daud niwra edonna raltarga Ray Makamori-Kalewan de pa nden la noh mati-rai miolu pa inonni ngehpa-nta'la tar lia genni. 32 Ina-nara ama-hyali, Yesus di ed maka Uplerlawna Namori owa'ana la matmiatni ralamni. A hononami mamkek memna la a mat mamni. 33 Uplerlawna Nran E' pa Namtatan la gen tutullu, ne Ntemna lodna-hairi la limni, ne Nlernan walia Uplerlawna Nhiw Lululli mak Amni Nano'targa mai am di. Ne Uplerlawna Nhiw Lululli inhatta maka Yesus Nhurriernia oleka mai ami, de ed maka mitlin nohora-miat niohora la dodo'ondi. 34 Daud meman nek de edon narian pa nla'awa Ilyamou-Watyatoha pa nhi'a ray. Mere Daud niwra: "Orgahi-Orha'a Nakot la a Matromlawnu (Yesus): 35 Muliwna (Mumtatnu) la' A wa'lu malganna, la'pa A'utowra arwalmu pa ratniowar la O nayanmu." 36 La hade pede Israel hononmi, totpena miatga de maka mlia mpiairia la auwlakra de, de Yesus inhatta maka Uplerlawna Ntutmuata-nkewra'a pa Nhi'a Itmatromni me Ray makamori-kalewna ita." 37 La'pa mak kawok taru re ratlin nana emkade de ralamni rtuindoin la. Noma ratiana Petrus nora kniarwialli makodi Uplerlawna lirni re, riwra: "Ama-hyal miy re, emkade de hota amhi'a hya'a wa?" 38 Petrus nakot la re: "Miy hononmi mhioitio'ora-mtiahnei dioinia do'omi-halmi. Ne rwet la Yesus Kristus de, pa ra rharan miy, totpena Uplerlawna Namou-nawitna do'omi-halmi. Ne hota mliernana Uplerlawna Nhiw Lululli. 39 Yoma Uplerlawna Nhiw Lululli maka Uplerlawna Nano'tar die, de ed maka miy gahami, pa nodi liarni la' miy duratmi-waitmi. Me la walia riy maka kden la olietleta, maka it Orgahani-Orha'ani Uplerlawna-Mempulwatnu Npol wiali, totpa rmai E' de, rlernan walia Uplerlawna Nhiwni de." 40 Emkadella mak Petrus nakot nohora la ira. Me nal walia lir rahu pa nano'a-na'atga re, totpena rpesiaya Yesus, totpena Uplerlawna Namou-nawitna do'oni-halli. Nakota re totpa yana rlernohora riy tuwu di nhiol yatyatni yoma hota Uplerlawna Nukmua riy mak edon kaplola re. 41 Riy re liawanni rpesiaya Petrus lirni-tunnu re, noma rla' pa rharania re. Rhor (rrekna) momuoga mak ka'itar la riy makpesiay re la ler de, de riy riwnu wotelu. 42 Rod nieka lierlernohorni pa ratlina-ratailla makodia Uplerlawna lir kalwiedni re pa rla ihru ida-ralm ida. Ne nhi'inde ra'an wutu-remun wutu me rsumbain la Uplerlawna rewre'wa.
Riy makpesiay Uplerlawna, de wniehwani-liakatni
43 Makodia Uplerlawna lir kalwiedni re rhi'a-ryap nieka hihi'a-yapyapi mak kamehi-kayona mak ktutga Uplerlawna rurni-laini, nhi'nande riy honona ema rtaplelleltarga, ne ra'unni-ramta'ata Uplerlawna. 44 Makpesiay honona ihru ida-ralm ida pa nodi liarni, ne hya' maka etla ira, de honona rnair rewre'wa. 45 Lera dom pa riy ra'ol diodioinia yohya'a mak ir gahani, de rhakar welli la ir honona, la' rima-rima rlernana hya' maka irakleha. 46 Lera-ler nekpa rawok la Uplerlawna romni kreini, ne la'pa ra'ana-remun rewre'wa la ir romni, me ramuki-rahepru, la' walia ratu rhu'ru-rhelma. 47 Ra'uli-rawedia Uplerlawna la' lera-lera. Ir yehwani de rla' nana riy honona ralamni. La' lera-ler nekpa riy ra'ititar rer lia yoma Orgahi-Orha'a Nala la ira, riy maka kwahaka mormiori-lewlewna la Uplerlawna.
Rhi' kalwieda riy mak inonni kmati
1 La'a lera ida Petrus nor Yohansi rla Uplerlawna roma kreini la' lera nhierni, (jam 3 ) rla' pa rsumbaini, yoma makden Yahudi nhi'inde rsumbain la' lera nhierni de. 2 La'a Uplerlawna roma kreini, de puohra liawanni ida maka ha rweta la Puohra Samomuou. La'a puohra de, e rken tiarga muanke'a ida, de ndel meman la apun ralma pa rmor dioinia de edonna nala'a. Lera-ler nekpa rodia la hande, totpena nwaka kupan la mak kla'a krei. 3 La'pa namkek nana Petrus nora Yohansi rmai pia riwra rler la Uplerlawna roma kreini, noma nwak kupna la rrora. 4 Noka Petrus nora Yohansi ramkek tutga muanke' de, noma Petrus nakot la: "Mumkek mai ami!" 5 Noma muanke' de namkek la rrora, natniekamde hota rrora ral hadom la e'a. 6 Mere Petrus nakot la: "A'ukleh et miemna kupna-kai. Mere hya'a maka ed mai a'u, de hota agal hade tiy o'a pa dodo'ondi, a'ukot tiy o' de Yesus Kristus mak kwatiawua Nasaret de Nodi plolli pa mula'awa!" 7 Noma Petrus ntorreria muanke' de limni walli malganna pa nhi'a pa ntutrieri. Mtatande nekpa lakni oratni mana naple'era, me torni mana naruri pia naprir wia. 8 Nhi'nande pleta-plet pa naprir lia genni pa nala' meman wa. Nhorwua noma nor wutga Petrus me Yohansi rala'a la Uplerlawna roma kreini pa nla'a-nmai nneniehu-ntertera, me na'uli-nawedia Uplerlawna. 9 Riy honona ramkek reria nala'a olekwa, ne na'uli-nawedia Uplerlawna, 10 na'nama ratga de muanke' mak kmeh'a kawakwaka inhatta, maka nhi'inde kden lawan la Puohra Samomuou la'a Uplerlawna roma kreini gaini. Riy honona ema rtaplelleltarga, pa rheran doin la.
Petrus nakot nohora Yesus lirni-tunnu
11 Muanke' de ntorreria Petrus nor Yohansi limni pa nlernohor reria re. Ne la'pa ir wotelu rte'ela kalarei maka rweta la Salomo Kalareini de, riy honona rma rpepan reria la pa ramkek ira, yoma ema rtaplelleltarga. 12 La'pa Petrus namkek nana riy rahu re, noma nakot la re: "Israel miy re! Nihya'pa mimpier rier wiapmi la mak emkadina?! Ne la' hya' pede mimkek reri ami? Yana mimpiarora de hadi nala' olekwa, de yoma amodi plolli onde la'a am di de riy ploloi-plele'era la Uplerlawna. 13 Mere mitlina. Uplerlawna mak Abrahama, Isak, Yakop, me it upni-tgarni ha rkola tieru-rawur nehla la de, ed maka Nhi' pa hopopanni Yesus Nlernana ya'uli-yawedi. Yesus de ed maka miy miala la mak kodi plolli, me mhiedga la Pilatus gaini yoma mihmena mrieiniana-mia'nana Yesus emek Ray ida pa mitlin la lirni, la lerni la Pilatus niwa nolin doini Yesus. 14 Riy di maka ploloi-plele'era me Nakleha do'a-hala, mere mriehera. Ne miy mhioka temna ne mioir reria totpena Pilatus nolin doinia riy makwunu-makwenan la' miy. 15 Mimpienna E'a. Mere la' E' pede, rimormiori rler la mormior plalahwa pa nodi liarni. Ne Uplerlawna Namori oleka pa Nmori lia matmiatni. Ameh'a meman nek de mlin nohora-mmat nohora de Yesus Nmori owa'ana la matmiatni ralamni. 16 Miy hononmi mimkek oleka la matmi la'a hya' maka itamkeka la riy di. E nkalwied olek la'a liuta-kperanni, yoma Yesus Nkar lia ralamni pa npesiaya, noka la'a e npesiay Yesus pede, nkalwied wa pa hononmi mimkeka. 17 Ina-nara ama-hyali miy hononmi, dodo'ondi agatga la'a hya' maka miora miy o'tami-matmi mhi' oleka la Yesus de, de miplin niohora de Yesus de Ray mak kamori-kalewna ita. 18 Mere Uplerlawna ed maka Nhur niohora pa mhi' emkade, yoma Nakot targ oleka la ululu memna, la'a makwohorulu-ktatrulu honona lirni, de hota Ray Makamori-Kalewan de Nmai die Nler la yamuki-yama'ala pa hota Nmati. 19 La' hade pede awuak de mhioitio'ora-mtiahnei dioinia do'omi-halmi re, ne mai pia mliernohora Uplerlawna totpena Namou-nawitan miy lia'a do'omi-halmi. 20 Ne hota Orgahi-Orha'a Nhi' aruri miy ralamni me Nhi' aruri-alai miy pesiaymi totpena naruri-na'orta. Ne hota Nhopna Yesus Nmai lia miy, yoma la' miy rerieimi, de Uplerlawna Ntutmuata-nkewra'a Yesus pa la'a Ray mak kamori-kalewna miy. 21 Hota Endella genni la Ilyamou-Watyatoha, pa la'pa Uplerlawna Nhi' nohkerkeran di pa warwuarga, emeka Uplerlawna Nakot targa la makwohorulu-ktatrulu mak khima-kre' E'a, de lirni la'a ler ululu. 22 Ina-nara ama-hyali, makwohorulu-ktatrulu Musa mana nakot oleka de: "Orgahi-Orha'a Uplerlawna-Mempulwatnu maka mkiola tieru-miawur nehla, de hota Nhopan doinia makwohorulu-ktatrulu id la' miy hairi wamuehemi, pa emekwalia Enhopn Musa a'u. Hononmi mitlin la hya' maka makwohorulu-ktatrul die, ha nakota honona re. 23 La'pa riy meni edonna natlina-natailla makwohorulu-ktatrul die, riy de hota rreidioinia la Uplerlawna mutnu, pa nler la niukum matmiati-molmuolu. Hade pede mhioitio'ora-mtiahnei do'omi-halmi." 24 Yaho'ma makwohorulu-ktatrulu mak ululu honona, nwauga la Samuel lerni pa, la'pa mak ktaw ler li'iru, honona re rakot nohora Yesus hihi'ini-yapyapni la it tuwnu di. 25 Ne nnielu-niau maka Uplerlawna Nakota la makwohorulu-ktatrulu lirni, me la'a upmi-tgarmi re, nnio'oni de e ntai miy wiali. Yoma Uplerlawna Nakot la Abraham de emkadi: "La'a o duratmu-waitmu de, hota Agala hairi-hairi honona pa remun la ger tliwtliwu, me rler la wewan potpioti (rlernana ra'a-palu)." 26 La' hade pede Uplerlawna Ntutmuata-nkewra'a hopopanni de, pa nmai ul miy die, totpena mliernana ra'a-palu. Ra'a-palu de yala'ani, de Uplerlawna Nkar lia ralammi totpa miy hononmi mhioitio'ora-mtiahnei dioinia do'omi-halmi."
Rodia Petrus nora Yohansi la o'ta-mat agama gaini
1 La'pa Petrus nora Yohansi raltiertier mia'ta dewade imam-imam re ror mak khi' o'tani la mak katiaka Uplerlawna roma kreini, me riy makden Saduki rma rawenan la Petrus nor Yohansi. 2 Rawenan la yoma rrora rwatutu-rwaye'a Yesus lirni-tunnu, ne riwra Yesus Nmori owa'an la matmiatni ralamni pede hota mak kmati olekwa mana hota rmori owa'ana. 3 La'a lir de, pede rte'la la rrora pa rla rwi'ita la roma nhio'la. Ne yoma rtorna rrora de lera nmel olek wa, pede rwei pia repra nanpena rwalol nohora. 4 Mere riy mak kpesiay olek makodia Uplerlawna lir kalwiedni wniatutnu-wniaye'eni de, de edonna nhal de riy riwnu wolima. 5 Repar noma mak ktorna agama watghudi, de Yahudi in letni-am letni, rora makwatutu-kwaye'a agama, rawok momuou lia Yerusalem. 6 Imam o'ta lawanni Hanas me, e huwnu-woinni de Kayafas, Yohansi, Aleksander, me huwnu-woinni dom pali, er wal lia hande. 7 Ir rodia Petrus nora Yohansi la hare gaini, na'nama ratiana irrora: "Ee, mimrio'a mhi' emkameni pede riy maka inonni kmat die nkalwieda? He' mak kala ruri-lai tiy miy pede mhi' hadena?" 8 Petrus mak Uplerlawna Nhiw Lululli Nodi plolli la, nakot la re: "U'pu-matro'mu mak kodi plolli la Yahudi ita, me la' wali u'pu-matro'mu korni mak ktorna agama watghudni. 9 U'pu-matro'mu mak khopan pa a'ultieri pede reiniande awualol nohora hihi' mamni-yapyap miamni. Miodi am lia watghudi lokarni me tatiaili pniarni, yoma la'a kalwied mamni la amhi' kalwieda mak inonni kmati. Ne u'pu-matro'mu riwra ratian walia pa rat niohora la emkameni riy de nkalwied la mehrani-maunu. 10 Hade pede a'ukota hadi, totpa u'pu-matro'mu la'pa Israel wal miana, miy hononmi miatga, riy di naprir lia it gaini la dodo'ondi, de onnila ruri-lai me plola-mneha Yesus Kristusa riy Nasaret de. U'pu-matro'mu hononmi er mak kakot pa rla rwairia E la auwlakar de. Mere Uplerlawna Nmeh'a Namori owa'ana la'a matmiatni ralamni. 11 Yesus de inhatta, maka ha rakotkota la Puklawna ralamni de emkadilla lirni: "Wat muaka tukna-tukna miy edonna mniair nana pa mhi'a roma-lewu, mere misrala, de Uplerlawna Nnairia olek pa Nhi'a la watu liar pianulu." 12 La'pa he'a maka klernohora Yesus, de talla kmeh'a inhatta pa tler la mormiori-dardiar plalahwa ralamni. Yoma la'a noheri woru-lyanti nayan di, eneknekto'a Yesus Nmeh'a maka Uplerlawna Ntutmuata-nkewra'a pa Namori-nalewna rimormiori ita." 13 Makhudi-makpara honona re rwarora-rwalaiya, de Petrus nora Yohansi parania la ltierni-tianni re, emkameni ho'mana edon la' meman la iskola, nhi'nande hare ema rtaplelleltarga. Makhudi re rwaror owa'ana, de irrora ratu raltieri-raltiani yoma nhi'inde ror oleka Yesus pa rlidan wutu. 14 Ne ramkek rer miemna riy mak kalwied olek la nnieni-nhien de, e ntutrieri lia honona re gaini ralamni, pede ir edonna rhi'a kokokna-rariarni doma. 15 Noma rhopan pa Petrus nora Yohansi rlergot la hande totpena o'ta-mata re rakot nohora hya'a mak hota rhi'a. 16 Nhor nioka idma nakot la ida: "Hota itakota hya'a la ha rora? Yerusalem uhunu-riwriwni rat momuog oleka la irrora mak khi' nana hihi'a-yapyapi mak kamehi-kayona (mujizat) mak riy edon ramkek taru, pa nhi'nande riy honona ema rtaplelleltarga. It edonna treher doinia hade. 17 Mere totpa la'pa mak ha rhi' nana la riy di yana nwewar la noheri woru, de mai pia takot la irrora totpena yan memmemna rrora rakot nohora Yesus la he'a-he'a." 18 Noma rpolg owa'ana makodia Uplerlawna lir kalwiedni rora, pa rmai owa'an la rialma, ne rwagahniorta re pa, yan memmemna rwatutu-rwaye' de rakot nohora Yesus la he'a-he'a. 19 Mere Petrusa nora Yohansi rwalolla: "La'a wniaror wamuehemi de, hya'a mak kaplol la Uplerlawna yamkekni? Amlernohor miy me, amlernohora Uplerlawna? 20 Hota ami edonna mren am lia yaltieri la'a hya' mak amamkek oleka, me hya' maka amatlin oleka." 21 Maktorna agama watghudni re honona edonna rlernana talan pa rukmua Petrus nora Yohansi yoma yeher to'a pa riy honona ra'uli-rawedi Uplerlawna. Pede rho'or temna rrora na'nama rwagahniorta, noma rolin doinia rrora la. 22 Riy honona ratga de, hadi de Uplerlawna hihi'ini-yapyapni yoma riy maka kler olek la kalwieda la mehrani-maunu ralamni de, anni terampwogat rehenu.
Makpesiay honona rwaka ruri-lai la Orgahi-Orha'a
23 La'pa rolin doinia Petrus nora Yohansi noma, rawali owa'an la mutwualli re, me rwahauru momuoga la'a hya' maka imam-imam o'tani-matni re, rora Yahudi in letni-am letni rakota la ira. 24 La'pa mutwualli re ratlin ha rakota re, noma honona rewre'wa rsumbain pa rakot la Uplerlawna, riwra: "Matroma! O' ed maka kodi plolli la hanek-harahu wuawannu, O' nanpena ed mak kakoki-kayapi nohkerna-lyanit marna, la'pa gera-tah'i nor wutga ihini-turnu. 25 O' Nhipmu Napre'et up mamni-tgar mamni ray Daud mak kla' hopopanmu de nurnu, pa Omiwra: "Nihya'pa hairi-hairi maka Yahudi atia'a rahankerna, me la'a hya' pede makden Yahudi rna'ohma ha tia'ta'a? 26 Ray-ray marna-wuhura noha wawannu, me maktorna-makrautu rla' lir id pa ratlinnon keran la Orgahi-Orha'a, me riy maka Ha Nano'targa pa la'a Ray la yamori-yalewna, totpa rora ra'ara!" 27 Maka Daud nakota naplola, yoma la' toto' meman la Herodes me Pontius Pilatus rna'ohma pa rora makden Israel me makden Israel atia'a pa rla' lir ida la'a let di. Rna'ohma la wniatromni pa rlewria Yesus, hopopanmu mak kakleh do'a-hal de, maka Omtiutmuata-mkewra'a oleka la Ray, pa Namori-nalewan rimormiori. 28 Honona rla' lir id pa rhi'a hya' maka Mula'ul pua Omukot tar oleka pa hota ntutu-nte'ewa. Ne la'pa hya'a maka Mukot taru re de riora-liai wamuehemu la' liwangenmu-mtatangenmu. 29 Dodo'ondi de ampak de matmu reprepar la tulu lyanti, me tlinmu mana Mhuer tiarga la polpuol muamni. Yan Muolin limmu me, Mpue'er rormu la ami yoma e rna'ohma pa rhi' yatyatni mai ami. Ne Mpualoi-mpuahyaria talla mai hopopanmu ami totpena amparan pia amodia nanmu pa nla nwewar la noha wawannu. 30 Muala rurmu-laimu mai ami totpena amhi'a riy mak kamehra pa rkalwieda, la'pa amhi'a hihi'a-yapyapi mak kamehi-kayona mak ktutga O rurmu-laimu pede riy ema rtaplelleltarga. Yoma Yesus, hopopanmu mak kakleha do'a-hala de ed mak kodi plolli mai ami." 31 La'pa rsumbain pa nhorwua dewade gen miak ha rdella, de nwolwo'la. Uplerlawna Nhiwni Nodi plolli la ira pa Napre'et nurnu-nwaran namni re honona, pa la' pa rakot nohora Uplerlawna lirni de edonna rmakukga (ramta'ata).
Makpesiay re honona rla' ihru ida-ralm ida
32 Makpesiay honona re rla'a ihru ida-ralm ida. Riy id mana edonna nahora-natawlia ida. Hya' maka riy ida hyonni-hyanni de, honona rnair rewre'wa. 33 Rnairia plola-mneh lawan de pa makodia Uplerlawna lir kalwiedni ral kota-ral de'et la pa nodi liarni, rakot nohora la'a Itmatromlawanni Yesus de, Nmori olek owa'an la matmiatni ralamni. Ne Uplerlawna Ntera-ndem reri makpesiay honona re. 34 La'a riy id la ir mana edon nakleha-naplara, yoma la'a ir pa he'a nohananni etla me he'a romni etla, de orgahi na'olga pa weli kupna de, rodia 35 pa rawoka la makodi Uplerlawna lir kalwiedni re wokni letgara. Nhorwua demade kupan yawoka re ra'ala pa ra rhima-rre'a maka kakleha-kaplara. 36-37 Emkade wal lia' Yusup. E' wal pia na'olga nohananni, pa welli de nala la makodia Uplerlawna lir kalwiedni. Yusup de, de riy Lewi ida duratni-waitni mak kwatiawua Siprus. Makodia Uplerlawna lir kalwiedni re, rpolga Yusup de Barnabas, nnia'eratni de mak khi' aruri rira ralamni.
Ananias nora Safira
1 La'a riy la hande, de muanke' ida nwawa Ananias. patke'eni nwawa Safira. Ler ida ne nor hawni ra'olu nohananni ida. 2 Welli kupna, noma nade' korni me, nal korni la makodia Uplerlawna lir kalwiedni. Nhi' hare de patke'eni nat niohor walia. 3 Noma Petrus nakot la: "Ananias, nihya'pa omuolin hegana amlawanni nwawa Setan pa nodia plolli la' o ralammu, pa la'pa o' muakla oleka Uplerlawna Nhiw Lululli pa o' e muwunum targa kupna korni pa o wamuehemu?! 4 Tan die o gahamu. La'pa omu'ol ho'mana o gahamu ha welli. Ne hya' nrei pia o ralma-riormu nod o' la ralma-rior dena?! O' edonna mulahar rimormiori mere o' e mulahara Uplerlawna!" 5 La'pa Ananias natlin nana lir de, dewade napru'wu la yawa dewade nwaran doinia aranni (nmati). Riy honona ratlin tar hade de ramta'at wenna. 6 Hatrapriapi rma rtomna Ananias inonni pa rodgiota, rla pa rkenia la liena ralamni. 7 La'pa edon nalo'on wali (jam wotelu) rlardoinla, dewade patke'eni nma nler la rialma. Edon nat mua'ta hya' maka muanke'eni nlernan oleka wa. 8 Petrus nakot la: "Mukot nohor teka tan miaka omuor muanke'emu mi'ol die weli irhatti na?" Safira niwra: "Plola welli irhatti." 9 Noma Petrus nakot la: "Nihya'pa omuora muanke'emu mlia' ralm id pa mtia'ga Orgahi-Orha'a Nhiw Lululli? Mumkek oo! Mak kla' ktamni o muanke'emu e rmai wia de. Hota ir wal pia rodgiot o'a." 10 La'a mtatan de nekpa Safira nlitir la yawa, de natuinia aranni la'a Petrus gaini ralamni. Pede la'pa tuwari re rler la rialam de rlernan neka pat de nmati olekwa. Noma ra' wal lia pa rodi rla rkenia la muanke'eni onni. 11 Riy makpesiay re honona rora riy meheni-letanni la'pa ratlin nana hihi'a-yapyap die, de ramta'at matmiati.
Maka Yesus Nhopan pa rodi Uplerlawna lir kalwiedni de hihi'ini-yapyapni nodia preheni-mkaini
12 Noma makodia Uplerlawna lir kalwiedni re rhi'a hihi'a-yapyapi mak kamehi-kayona harahu, mak ktutga Uplerlawna rurni-laini nhi'nande riy ema rtaplelleltarga. Makpesiay honona nhi'inde rawoka-rale'elia Uplerlawna roma kreini, la gen miaka rweta la Salomo Kalareini. 13 Ne mak edonna kpesiay mia'ta, de ir edonna rparan pia rler wut lia' ir la rialma. Mere makpesiay re honona de, mak kden hande ratu ra'unni-ramta'ata me rhu'ru-rhelma re. 14 Ne makpesiay Yesus ra'ititar rer lia' patke'a rora muanke'a. 15 Riy ramkek nana makodi Uplerlawna lirni de rhi'a hihi'a-yapyapi mak kamehi-kayona harahu re pede rla' pa rkeni mak kamehra-kamau re la lewu, onde rkenia la u'ti pa rodia la talla ralamni, totpena la'pa Petrus edon nteman la ira, hornama nwehweti de memannu ntaiya. 16 Riy rwalidlidan pa rmai rwatiaga leta-leta mak rehgorgorga Yerusalem pa rmai. Rmai die rora mak kamehra-kamau, me maka hegana ha rhu'ru ralma dewade honona rler la kalwiedni.
Rnahora-rnala'a makodia Uplerlawna lir kalwiedni
17 La'pa edon nalo'on wali ne imam lawna, me mutwualli re honona la'a riy Saduki mniotni re, ralamni ramehra rehia. 18 Makodia Uplerlawna lir kalwiedni re, de riy Saduki rtorna pa rwi'ita la roma nhio'la. 19 Mere la'pa nmel wa, dewade Orgahi hopopanni-lili'irnu ida nma nhari roma nhio'la nhiarni pa nodgiota makodia Yesus lirni-tunnu rella tio'ora. Orgahi hopopanni-lili'irnu de nakot la re: 20 "Mlia' pa mtiutrieri lia Uplerlawna roma kreini, ne mikot nohor momuoga mormiori-dardiari warwuaru la riy mak kden hande." 21 Noma makodia Uplerlawna lir kalwiedni re rlernohora Uplerlawna hopopanni-lili'irnu de yawewalli. Yawyawar ma'ta de rla'awa Uplerlawna roma kreini pa rpanulga la wniatutu-wniaye'ela hande. Edon nalo'on wali ne imam lawna me riy Saduki re, rmai owa'an pa rpolga o'ta-mata Yahudi korni honona pa rma rawoka. Ir honona er mak ketlia agama Yahudi lirni-tunnu. Rmai totpena ramtatan wut rewre'wa pa rakot nohora riy makodi Uplerlawna lir kalwiedni re. Noma rhopan pa rla rala makodi Uplerlawna lir kalwiedni re la' roma nhio'la, pa rma rwatrom la mak kla o'ta-mata re gaini. 22 Mere la'pa riy maka ha rhopna re rte'ela roma nhio'la ralamni, de edonna rlernana makodi Uplerlawna lir kalwiedni re la hande. Noma rawal pia rla rakota o'ta-mata mak ktorna agama watghudni re, 23 riwra: "Tuna sukni de amla'a roma nhio'la, mere ami edonna mlernan hare, ne nhiari nhio'lani mana e npit wuenna. Me mak katiaka roma nhio'la mana e npitu-nkora. Mere la'pa amhari nhiari pa ampahaka, de riy id mana edonna nayoh'a-nakpiatlia rialma." 24 La la'pa perwira mak kla' o'tani la Uplerlawna roma kreini yatiakni, ne imam-imam o'tani-matni ratlin nana mak kla kala re lirni, de honona re ralamni worworga, ne riwra la'pa rmolu emkadi de hota emkameni owa'ana? 25 Edon nalo'on wali ne muanke' id nma nodia kot la'a mak ktahana re niwra: "Mitlina am miy re, riy maka tuna-tuna ha rtahana re, e rtepartarlia wniatutu-wniaye'ela Uplerlawna roma kreini." 26 Noma o'ta-mata la mak katiaka Uplerlawna roma kreini nor wutga limni-rorni rla rala re, mere irla' de rwanapal lirni la re, yoma ramta'ata yanhi'pa rimormior riahu re ral watu rwatliewur wenna re. 27 Rodia rpa rmai wia noma rottiarga la o'ta-mata lalawna mak ktorna agama watghudi gaini. Noma imam lawna nakot la re: 28 "Hoi, ampolliohora olek miy wia pa yana mpiatutu-mpiaye', de yana mhieik la riy de nanni. Mere miy edonna mhie'du nan kuku' a lir mamni. Miy e mpiatutu-mpiaye' de nwewr olek la Yerusalem. Rerehniana miwra la a hihi' mamni pede riy de nmati." 29 Petrus nora mutwualli rwalolla: "Am miy re, amlernohora Uplerlawna. Mere ami edonna mlernohora rimormiori ida. 30 Amlernohora Uplerlawna, pa makot nohora Yesus, yoma Yesus maka mlia mpiairia la auwlakra hananni, de Uplerlawna mak it upni-tgarni rkola tieru-rawur nehla la, Namori olek owa'ana la'a matmiatni ralamni. 31 Ne Uplerlawna Nal olek walia E' la gen tutulu, pa E' ed mak ktoran reria krita o'tani-hairi lia wuwannu (nodi plolli) me totpa E' ed maka kamori-kalewna ita, totpena hairi Israel nlernan talan pa rhoitio'ora-rtahnei lia do'a-hala, ne totpena Uplerlawna Namou-nawitna do'oni-halli. 32 Ami er mak khi' tlin nohora-mat nohora la'a hare honona. La'pa Uplerlawna Nhiw Lululli, maka Uplerlawna Nala la riy emekto'a ami mak katlin la E lirni, E' mana Nakot nohora Yesus hihi'ini-yapyapni me ralma-riorni di." 33 La'pa o'ta-mata mak ktorna agama watghudni ratlin nan emkade, dewade yeher to'a me ralamni re ramehra, noma rawali owa'an pa rna'ohma wniunu-wnienna la makodi Uplerlawna lir kalwiedni re. 34 Mere la' o'ta-mata mak ktorna agama watghudi, de riy Parisi id ed walia nanni Gamaliel. Gamaliel de, de makwatutu-kwaye'a agama ida de. Tungkur maka nhi'inde makden Yahudi honona rhu'ru-rhelma. Naprir pia nhopna rodia makodia Yesus lirni-tunnu re pa rla'awa tio'ora pleini. 35 Nhor nioma nakot la o'ta-mat la woklawan de niwra: "O'ta-mata ina-ama Israel, la'pa hya' maka hota miy e mhi'a la hari, de nhioratmi la' temmi. Yanpa hari rwatiawua Uplerlawna. 36 Yoma aghoratrer mia'ta la ululu de Teudas nmai die nhi' inonni de emeka o'ta-mata lawna ida pede edonna ghal de riy rahu wogata rler wut lia pa rmalawna makden Roma o'tani-matni re. Mere rwenna Teudas, ne mak kler wut lia re to'a-taiya, ne e hihi'ini mana nwal lia hamamuamua. 37 Hade nhorwua noma la'pa ntutu-nte'ewa la ler maka rrekna rimormiori honona, de Yudas riy Galile' de nmai owa'ana, ne yoma riy ratlina ltierni-tianni, noma riy rahu rlitna-rtaur wut lia pa rmalawan la Roma. Mere plinu-plinnianamde, riy rwenan nana Yudas. Noma mak klidna-ktaur wut lia re, to'a-tai wialia. 38 Pede la' dodo'ondi de itwera it matni la'a yohya'a mak emkadi. A'ukot targa la miy, yana itseik la rimormiori ri. Miolin doinia ir la. Yoma la'pa wniatutnu me yehwani nwatiawua rimormiori, de (hota emolmolan neka Teudas me Yudas hihi'ini de) hota nwal lia hamamuamua. 39 Mere la'pa ha nwatiawua Uplerlawna, de hota ta'enniana mial ir la yawa. Ne hota miy di ed maka kora Uplerlawna idma nodlia'a-nodmiai ida." Gamaliel yano'oni-yanatnu, de o'ta-mata mak ktorna agama watghudni re rreiniana-ra'nana. 40 Noma rpolga makodia Uplerlawna lir kalwiedni rpa rliwra-rkaklia. Nhor nioma rano'a rpa yan memmemna rwatutga riy pa ratga Yesus, nhor nia'nama rolin doinia rla. 41 Makodia Uplerlawna lir kalwiedni re rlergot la gen die, rahepur toto' memna yoma ratga de Uplerlawna Ntutmuata-nkewra'a ira, pa rlernana yamuki-yama'ala, me yamola-yama'a, la'a Yesus rerieini. 42 Me la'a lera-ler nekpa la Uplerlawna roma kreini, me riy romni-lewnu npenpuen lia riy mak katlina ira wniatutnu-wniaye'eni, la'a Kot Kalwieda-Paitiota la' Yesus de E' de Ray Makamori-Kalewna mak Uplerlawna Nano'taru, inhatta.
Rwalir riy wo'itu pa rkar wiutu
1 Maklernohora Yesus ra'ititar rer lia liawanni. La' ler de, de Yahudi mak kawal Yunani rora Yahudi mak kawal Ibrani edon rkalwieda. Maka Yunani re riwra: "A'na pat mamni mak kapalu, edonna rlernana yamanna la' lera-lera maka ha rhakar targ oleka la'a riy nenenna." 2 La' hade pede makodia Uplerlawna lir kalwiedni termida wehrani woru re, rawoka makpesiay Yesus re honona pa rakot la: "La'pa amakokan nohora rira ya'ana-yemannu de hota ta'en niana amakot nohora Uplerlawna lirni-tunnu. Amhi' emkade hota edon naplola. 3 Hade pede mai pia mpialiri-mpialioha riy wo'itu la' miy, la' riy maka edonna klernan ma'ta nan yata, me riy maka Uplerlawna Nhiw Lululli Nodi plolli la, pa ratu rwarora-rwalai samomuou totpena amtutga pa nhi'inde rwahora liolla riy honona. 4 Demede am di de msumbaini, me makot nohora Uplerlawna lirni-tunnu nmeh'a." 5 Honona re rwayow la hya' maka ha rakota re. Noma rwaliria Stefanus, riy maka pesiayni narur mieman la Yesus, ne Uplerlawna Nhiw Lululli Nodi plolli la. Rwet walia Pilipsu, Prokorus, Nikanor, Timon, Parmenas, me Nikolaus mak kwatiawua Antiokia mere riy Yahudi atia'a de, mere nla oleka Yahudi agamni. 6 Riy mandiditu re, rodia la makodia Yesus lirni-tunnu, noma rsumbainia pa rwaka Orgahi-Orha'a pa Nala ruri-lai lia ira kniarni ralamni. 7 Emkadella Uplerlawna lirni nwewar la meni-meni, ne mak klernohora mana ra'ititar rer lia' Yerusalem. Ne imam-imam liawanni mana, rpesiay Yesus wali, me rlernohor E wniatutnu.
Rtorna Stefanus
8 Uplerlawna Nala rurni-laini la Stefanus pede Stefanus nodi plolli pa nhi' neka hihi'a-yapyapi mak kamehi-kayona mak ktutga Uplerlawna rurni-laini, pede riy ema rtaplelleltarga. 9 Mere riy mak kden la hande dom mana rora Stefanus rawahla lira. Ir de nhi'inde rhi'a krei lia riy maka klergot olek la ata-wa'ara geni, de kreini-iskolli, de riy Yahudi mak kwatiawua Kirene, me Aleksandaria, ror wutga Yahudi mak kwatiawua Kilikia, me Asia. 10 Yoma Uplerlawna Nhiw Lululli Napre'et nurnu, me Nwaran namni la lir marna pede riy re taken niana rala Stefanus la yawa. 11 La' hade pede rtot wunwunamnu pa ra'hira riy ida-woru, pa rakot nohora Stefanus la mutlialawna gaini riwra: "Amatlina, de riy de, napolu-naliella Musa nora Uplerlawna." 12 La' emkadella rodia nur lia riy rahu, rora Yahudi in letni-am letni me makwatutu-kwaye'a agama Yahudi rla rtorna Stefanus, pa rodia la o'ta-mata mak ktorna agama watghudni. 13 Me rpol wualia mak ktutrier niohora re (saksi) pa rla' walia mak ktorna agama watghudni de totpena rodia lira wotwotar la Stefanus. Mak ktutrier niohora re rwohora Stefanus riwra: "Riy di inhatta, mak edon nrena la yapolu-yaliella Uplerlawna roma kreini nora Uplerlawna deullu-tatarni maka Musa nakota. 14 Yoma niwra: "Hota Yesus riy Nasaret de, Nalitria Uplerlawna roma kreini dilla yawa, ne Nherun doinia deulu-tatra maka Musa nalerun targa la mai ita."" 15 Riy honona mak kawok tar lia re rakillia Stefanus. Ne la' ler de de, Stefanus gaini yamkekni emeka Uplerlawna lili'irnu-hopopanni gaini.
Stefanus naltier lia mak ktorna agama watghudni gaini
1 Noma imam lawna natiana Stefanus: "Stefanus, hya' maka ha rakota re raplola me rhala?" 2 Stefanus nwalolla niwra: "Ina-ama ama-hyali, o'ta-mata hononmi. Awuaka lilili-mamuau pua mtiulan pa mitlina hya' mak a'ukota ri. La'a lerni la it upni-tgarni Abraham edonna ntawu pua la' ma'ta leta Haran, de Uplerlawna mak kdella tutullu-lolo'oni Nma Nakot la e' la' Mesopotamia liewnu Niwra: 3 "Abrama! Mliergot la letmu-ruhunmu, multar wualia inmu-narmu. La mliaun la riy ornoha maka hota Atiutga tiy o'a." 4 Noma Abraham nran lakni la Kasdim yapatni la Mesopotamia pa nwatitin la Haran. La'pa Abraham amni nmat nioma, Uplerlawna Nhopan pa Abrahama nla'a Israel yapatni di, maka ina-nara, o'ta-mata miy hononmi e mhiol lia di. 5 La' ler de de, nohanna oke' mana Uplerlawna edonna Nala la Abrahama nwamueh'a. Mere Uplerlawna Enakot targa: "Hota la' tan die, de Agala la omuora duratmu-waitmu." Mere la' ler de Abraham nakleh ma't a'na. 6 Noma Uplerlawna Nakot emkadilla e'a: "Hota o duratmu-waitmu rden la noha id de, emekneka riy mak klaunu pa rahulti-rahamra. La'a noh de mniotni, hota rodi plolli la ira, me rhopna-rli'iru, de edonna ral liwatnu-odawni yawahlani ne rnahora-rnala'a re, pa nahor tuw niana anni rahu wogata. 7 Mere hota Agukmua hairi mak kwa'ata-kwa'ara hare. Ne hota irlergot la gen die pa rma rkola tieru-rawur nehla la A'u mai handi." 8 La'pa Nakot emkade noma rhi' nana kniohlima la'a nnio'oni id la Abraham, de sunat. La'pa rayoria Isak wa dewade nmai pia lerni wo'awni na'nama Abraham nsunta. La'pa la la' lolol wa de Isak nsunta a'nani Yakop. Ne Yakop nsunta a'nani termida wehrani woru re, maka rweta la riy mak kadurit nana Yahudi mut riwnu-halli. 9 Mak kadurit nana ita re, ralamni mehra la garni Yusup noma ra'olga. La'pa riy rwa'ata-rwa'ara la Mesir, mere Uplerlawna edonna Nolin lima-nwe'er ror la Yusup. 10 Ne Nwe'er doinia la wutwutnu-kokgohonu. Uplerlawna Ntutrier lia reranni kiorni-matni rletni, pa la'pa maka yade' la rai gerni mana nayamkek la, me mak kagaur la hletan lawna mana nakwiet nana. Hade pede marna ornoha-wuhur orrai Firaun ralam kalwiedni la, pede ntut lia matni-nkew la ra'ani pa nla o'ta-mata id la Mesir, ne nodi plolli la ray Firaun atni-wa'arni nor wutga likatni nora mniotni honona. 11 Nhorwua noma Mesira liewnu me nwewar walia Kana'an uhunu-ewatni de rehka-lar matmiati. It upni-tgarni yamananni nhorwua, 12 pede la'pa ratlin de metma (gandum) etla Mesir, noma Yakop nhopan doinia a'nani, it upni-tgarni re, rla rawelia hande. 13 La'pa rawali owa'an la re'eni wornu, dewade Yusup ntutga rupni la hyalli re. Noma Firaun na'nama natga la Yusup hyalli er walia. 14 Noma Yusup na'enyat kot la amni Yakop, de niwra e' e nmormior mia'ta pa plet pa amni nora upni-a'nani, me duratni-waitni honona mak kden la Kana'an de rla' nek wa la'a Mesir. Yakop nora upni-a'nani honona re, de riy terampwo'itu wehrani wolima. 15 Noma it upni-tgarni Yakop nor upni-a'nani rwatitin la Mesir, noma name'eta-na'anin lol wa, la la'pa lerni la Yakop nora it upni-tgarni rmat lia hande. 16 Mere rodia pa rkenia la liena la Sikhem, la'a tniamin mat geni maka Abraham nawel niana la Hemor upni-a'nani mak kden la Sikhem. 17 La'pa nhi'pa nwakriania lerni maka Uplerlawna Nano'targa la'a Abraham, de Yakop (Israel) upni-a'nani na'ititar rer lia liawanni. 18 La'pa nmai wia hohoni de, dewade ray miaka edonna nat niohor ma'ta Yusup nhernu-nwau pua ntorna Mesir. 19 La' ray die kniukamnu-tnio'mani de, ntot Yahudi re la klieratni. Enahora-nala'a it upni-tgarni, de nhopan pa it upni-tgarni re rhopliala papay mak na'nama ha rmor niana re la gera ralamni totpena rmati. 20 La'pa nla'awa la' ler de, dewade rayoria Musa. Ne Uplerlawna ralamni Nal e'a. Noka Musa wolanni wotel lia amni limni ralamni. 21 La'pa ta'en niana rlahu nana noma rla ranera, noka Firaun a'nani patke'a nlernana pa nhi'a la a'nani. 22 Nhioli lieta-ilu wniehwa, lira-yatu krei-iskola hairi Mesir, de Musa nwatut lia rpa nat momuou honona. Me nhar lir maranni de watu poka-pah'a, ne nodi plolli pa nhi' hya'-hya' to'owa. 23 La'pa Musa tuwnu anni terampwogata dewade ralma-riorni nko'i nana wniatroma la e nohwalli Israel mak kdella Mesira. 24 Noma nhor tut niana plollola e nohwalli ida, de makden Mesir ida nahora-nala'a. Noma Musa nahankeran pa nwenna riy Mesir de, yoma nod niana e nohwalli de. 25 La'a Musa wniarorni de, hota nohwalli re rat niohora, de Uplerlawna yala'ani la mak emkade totpena, e' ed mak kolin doini nohwalli re la wutwutu-kokgohu. Mere Musa hihi'ini-yapyapni de, hamamuamua la nohwalli re wniarorni-wnialaini. 26 Repar dewade, Musa namkek nan owa'ana e nohwalli Israel woru rtepartarlia yawenna. Noma Musa nwaduran pa nla npolliohor rrora totpena rkalwieda. Musa nakot la re: "Hei, mimrio' de, riy id nor hyalli. Hya'a nrei pia mrio' miwo'ora?!" 27 Mere riy mak kohma mutwualli ida notil doinia Mus la' wali, na'nama nakot la Musa: "Oi! He' ed maka kran o' la o'tani pa omuodi plolli me mpuolliohor ami?! 28 Yanhi'pa omiwra mpunu-mpuenan owa'an a lia dodo'ondi, pa emekwalia wonyira ompuenna riy Mesir dena?" 29 La'pa Musa natlin nana hya' maka ha nakota de, dewade Musa nawlar lia Mesir pa nla'awa Midian yapatni. Nden nek la hande emekneka riy mak klaunu, pa nahulti-nahamra pa nmehlima, ne nlernana a'na riy woru. 30 La'awa anni terampwogat wa dewade Uplerlawna hopopanni-lili'irnu ida nmaiya Musa la wo'orletna-kawurloini mak rehgorgorga wo'or Sinai. Uplerlawna hopopanni-lili'irnu de, nden la ai mormiori ralamni, de ai miormiori miak kden la ahla ralamni. 31 Musa ema rtaplelleltarga pa namkeka hade. Noma nla nwakriania totpena namkek kalwiedweda hade de hya'a de. Edon nalo'on wali ne, Orgahi-Orha'a Nhar lirni la Niwra: 32 "Uplerlawanmu A'g inhatti! Upmu-tgarmu Abraham, Isaka, Yakopa Uplerlawanni A'u." Musa natlin hade, dewade mtatande nekpa ndiwra-nda'ala genni, pa nahmena namkek la Uplerlawna mak kden la ahla mak ai ha na'an la ralamni de. 33 Edon nalo'on wali ne Orgahi-Orha'a Nhari owa'an lirni: "Muo'lu dioinia lakmu wniowni della. Yoma gen miaka omuprir lia de, Uplerlawna mounu-wahrani etla hande. 34 A'g umkek reria u'pu-a'nu makdena Mesir e rlului-rnurnuhru nohora yamukni-yama'alli. Utlin oleka polpuollu-wakwakni, pede Agerun la heyanan pa Agolin doin ir la wutwutu-kokgohu. Mai pia omlia muwal lia Mesir la dodo'ondi memna." 35 Ama-hyal miy re, mitlina. Mus di, riy Israel re edonna rtelan nana-raut nana oleka la' ler maka riy maroro'a re rawo'ora, ne rwayotlia pa rakot la: "Oi! He' ed maka kran o' la o'tani pa omuodi plolli me mpuolliohor ami?!" Mere la' e' nanpena Uplerlawna Ntutga rupni emeka E hopopanni-lili'irnu mak kden la ruwnu-ahla maka ai ha nmormior lia, pa Nhopna e nla' o'tani me namori-nalewna. 36 Mus de, ed mak kla o'tani pa nodgiota hairi Israel pa rlergot la Mesir me nhi' to'a hihi'ini-yapyapni mak riy edonna ramkek taru mak ktutga Uplerlawna rurni-laini, nhi'nande riy ema rtaplelleltarga la Mesir, me la Hletan Mermera, ne la' walia wo'orletna-kawurloini, pa nalo'on nana anni terampwogata. 37 Mus wal pia ed mak kakot la hairi Israel niwra: "Hota Uplerlawna Nal owa'ana riy id tiy miy, de makwohorulu-ktatrulu maka ha rwalir niana la miy orgahami emekwalia Uplerlawna Nwalir niana a' di." 38 Musa nanpena ed mak kora hairi Israel re la'pa rawoka la wo'orletna-kawurloini ne mak kor Uplerlawna hopopanni-lili'irnu rwahauru la wo'or Sinai. Nhor nioka Musa nakot E lirni la it upni-tgarni re wali. E' ed mak Uplerlawna Nala kot mak kodia mormiori-dardiari pa enakota mai ita. 39 La' emkade ho'mana it upni-tgarni re edonna rtelan nana-raut nana Musa lirni-tunnu. Rwayotil Musa, ne riwra rawal lia Mesir. 40 Hade pede rakot la Harun: "Haruna, mukoki-muyapi nieka uplera-upmati marna-ornoha mai ami, totpena amkolla pa nmeh'a nodi ami. Yoma amaplin niohora de, Mus de mak kodi am pia mlergot la Mesir, de etla walli meni." 41 La' hade pede rna'ona la rhi'a uplera-upmati ida, de rtot nohora sapi a'na pa nhi'inde rodia nhioi-tniani la. Ne ramuki-rahepur nohora ir limni enni de. 42 Noma Uplerlawna Nhur dioinia rpa Nhoitio'or la re, pa rwatniar la heyanan pa rpol lia wunu-rwak la lera. La' hade de, plol meman la maka ha rhorat targa la makwohorulu-ktatrulu pukni ralamni de emkadille: "Oi Israel miy re! Miy mkiok pipi-mriotan duma, me mhioi-mtiania la anni terampwogata mak ha mdiella wo'orletna-kawurloini de, mere edonna mial hare mai A'u. 43 Rom ku'a (kemah) atiehra mak kwawa Moloka ed maka miodia pa mimniair de, nor wutga atiehra wtiona, de uplermu mak kwaw Refan. Miy mieh'a neka mhi' hare totpena mhioi-mtiania. La hade pede hota Agolin doin miy lia pa arwalmi rod miy lia gen olietlet memna la Babel." 44 Uplerlawna romni (Kemah) maka nhi'inde Uplerlawna Nlola pa Nmai lia it upni-tgarni, de Kemah mak kden la wo'orletna-kawurloini. Uplerlawna Nhopna Musa nariria Kemah de, de nlernohora hya' maka Uplerlawna Nhi'a me Ntutg olek la Musa pa Musa nod niohora. 45 Nhorwua noma it upni-tgarni rodia Kemah de pa rlol meni-meni to'a pa la' lerni la it upni-tgarni rora Yosua de, rod nieka de la' pa rwarui niana it nohoni di, la'a hairi-hairi maka Uplerlawna Ndi'na-nlo'wa la ir gaini ralamni. Kemah de nden nek la pa, mai pia Daud tuwnu nlernana. 46 Uplerlawna ralamni nala Daud, pede Daud nwak la Uplerlawna totpena enhi' walia roma-krei id la Uplerlawna maka Yakop nor upni-tgarni ha rkola tieru-rawur nehla la de. 47 Mere Salomo ed mak kariria roma-krei die. 48 Mere Uplerlawna mak kden la tutullu-lolo'oni edonna Nhol lia rom maka rimormiori rhi' nana yoma la'a makwohorulu-ktatrulu lirni la'a Puka ralamni niwra: 49 "Uplerlawna lirni nekane emkadilla: A liwange'nu de nawniau lia Ilyamou-Watyatoha, ne A lia'aru de nhapar reria noh marna. Ne hya' rom ed maka miwra miriria mai A'u?! Hota la' gen mieni ed mak Adien la?! 50 Miplinga de, Amueh'a ed mak kakoki-kayap niana penpuenu-tetema rina?!" 51 Oi! O'ta tehra-tlinnon kerna etla' miy, hota taken niana mitlina-mitailia Uplerlawna lirni-tunnu. Uplerlawna Nhar lirni mere tlinmi rahniodla pitu. Mikot oleka miwra a' di mak kapolu-kaliella (kwohora-kweyata) Uplerlawna roma kreini me Musa deullu-tatarni. Mere hota miy mieh'a miora upmi-tgarmi mlia'a lir ida, pa edon mitlin la Uplerlawna Nhiw Lululli. 52 Miy upmi-tgarmi rhi' yatyat la makwohorulu-ktatrulu honona mak kmai re. Hare mana rwen oleka maka Uplerlawna Nhopan pa rma rakot nohora la'a hota Uplerlawna Hopopanni Ploloi-Plele'era ida Nmai. Mere la'pa Nmai wia noma miy miala la makden Yahudi atia'a pa mpienna. 53 Uplerlawna hopopanni-lili'irnu rma rakot oleka la'a deulu-tatra maka Uplerlawna Nakota-nalde'et taru, mere miy edonna mliernohora honona re."
Ral watu ra rwatliewria Stefanus
54 La'pa o'ta-mata mak ktorna agama watghudni re ratlin targa hya' maka Stefanus nakotkota re edonna rla' nana ir ralamni, dewade rahankeran doin la pa rhoktemna Stefanus. 55 Mere Uplerlawna Nhiw Lululli Nodi plolli la Stefanus pa nwatniar la lyanti, ne namkek de de hititni-repreparni nle'lu reria Uplerlawna, ne Yesus Naprir rier lia gen tiutulu la'a Uplerlawna walli malganna. 56 "Mimkek ee! A'g umkeka Ilyamou-Watyatoha ema rhar dioinia, me Rimormiori A'nani de Ntutrier lia Uplerlawna walli malganna." 57 O'ta-mata re ral okarni ra rhodla tlinni na'nama polpuolu-hawaunia, rhaul temna pa rtorna Stefanus. 58 Rte'la la Stefanus pa rnunia la letlawna to'orni, na'nama ral watu ra rwatliewria. Riy maka dodo'ona rtutrier niohora pa rodia lira wotwotar la Stefanus la o'ta-mata re, ro'lu ir rain plalahwani, pa rala la tuwari ida namkek rer lia. Tuwar die nanni de Saulus. 59 Ertepartarlia Stefanus wniatliewurnu mere Stefanus npol lia Yesus: "Orgahi-Orha'a nee! Yesus e! Mhuoi limmu pa Muala a arnu." 60 Noma nwaltior pa nhaun la Orgahi-Orha'a niwra: "Orgahi-Orha'a nee, yana Mpuahla mak khi' a'u ri do'oni-halli." La'pa nakot emkade dewade nwaran doini aranni.
1 Saulus mana nwayow nohora Stefanus wnienanni.
Ramuki-rama'ala makpesiay Yesusa la' Yerusalem
Ler de de rna'ulga yamuki-yama'al lawna la makpesiay Yesus la' Yerusalem. Ir honona re'era-rhakra la Yudea nora Samaria liewnu enekneka mak Yesus Nhopan pa rodi Uplerlawna lir kalwiedni re, de edonna re'era-rhakra. 2 Mere riy mak ka'unni-kamta'ata Uplerlawna re, rtamnia Stefanus inonni, ne rapolu-ratnian niohora matmiatni. 3 Mere Saulus ntot la'a-ntot mai pia nnahora-nnala'a makpesiay Yesus re, ne ntawu roma id pa nokur korni re ni'ita-nnunia patke'a ror muanke'a, nodgiota pa nma nala rpa rkenia la nhio'la geni-wnienat geni ralamni.
Makdella Samaria ratlin la Uplerlawna Kot Kalwiedni-Paitiotni
4 Noma maka ha re'era-rhakra re, rala' doin noh de uhunu-ewatni-ewatni-lahwani pa rod kiota-ral de'et nohora Uplerlawna Kot Kalwiedni la'a Yesus. 5 Noma makpesiay Yesusa id de nwawa Pilipsu, nla'awa leta id la Samaria pa nod kiota-nal de'et nohora Ray mak Uplerlawna Nano'taru pua Namori-nalewna rimormiori la' mak kden hande. 6 La'pa riy rahu re ratlin nana Pilipsu wniahaurnu, me ramkek nohora mak ha nhi' nana re, de hihi'a-yapyapi mak kamehi-kayona (mujizat), mak ktutga Uplerlawna rurni-laini, dewade honona ral ralam tetema rreiniana-ra'nana hya' maka ha nakot nohora re. 7 Yoma la'a riy rahu mak yatni-rha'ani, hegana-kawnu rhu'ru ralma rde, yatni-rha'ani, hegana-kawnu re ema ratargota, de polpuolu-hawaun memna re, ne mak kaliu'uta re liawanni, mak ktu'u-kwaini re rkalwieda. 8 Hade pede la' let de ralamni de muki-hepru nmeh'a nniata.
Simon mak khi' ukru-rehera
9 Noma riy ida nwawa Simona, mahneka meman pa nhi' ukru-rehera la' let de, pa nhi'a Samaria liewnu de, mniotni pa rhe'du hmuakmuakru. Simon di natulu-napetna inonni pa niwra: "A' di de, riy mak kla' orkotkotni-ornananni." 10 Riy honona, kuku'uni-lalawanni rlernohora ne riwra: "Riy di de, Uplerlawna rurni-laini maka riy ratga de Rurliawna-Lailiawna." 11 Ne rlernohor reria, yoma mahnek memna, nala ukru-rieherni na nahed wuenna re. 12 Mere dodo'ondi de, ir rpesiaya Pilipsu, mak nakot nohora Uplerlawna Kot Kalwiedni-Paitiotni, la' Uplerlawna Nodi plolli emeka Ray, ne nakot wal lia Yesus de Ray Makamori-Kalewna mak Uplerlawna Nano'taru, dewade patke'a rora muanke'a rala inonni pa rharania. 13 Simona nmeh'a nek de npesiaya, ne la'pa rharan dioinia, dewade nor mamaini Pilipsu talla, ne ema nhed wenna la'pa namkek nana Pilipsu hihi'ini-yapyapni maka riy edon ramkek taru, mak ktutga Uplerlawna rurni-laini. 14 La'pa makodi Uplerlawna lir kalwiedni mak kdella Yerusalem ratlin nana de makden Samaria rreinian oleka Uplerlawna lirni, dewade ir rwahor nana Petrus nor Yohansi pa rla' hande. 15 Noka rla'awa. La'pa rte'ela hande dewade, irrora rsumbain la Uplerlawna riwra: "Orgahi-Orha'a Uplerlawna-Mempulwatnu, ler di ampolu-mpak la O'a totpa makden Samaria ri rlernana Nhiw Lululmu." 16 Yoma Uplerlawna Nhiw Lululli edon Nerun ma'ta la riy id la ir mutnu, rharan tio' ir la Itmatromni Yesus nanni wawannu. 17 Nhor nioka rrora rran limni pa rlapra la hare wuwannu, noka rlernana Uplerlawna Nhiw Lululli. 18 La'pa Simon namkek de rlernana Uplerlawna Nhiw Lululli, onnila makod Uplerlawna lirni re rran limni, nwatania kupanni la ira, 19 ne niwra: "Ama, mial wali ruri-lai die mai a'u, totpa la'pa arian li'mu pa kuowa la he'-he' wuwannu, de nlernana walia Uplerlawna Nhiw Lululli." 20 Mere Petrus nakot la niwra: "Hoi! Rrinin wutga omuora kupanmu de la ai mormiori ralamni (binasa), yoma wniarormu de, de hota mual kupanmu muwel nian walia rurni-laini, pa mrian limmu la he'-he' wuwannu de nlernana Uplerlawna Nhiw Lululli. 21 O' edonna muor wutga am lia riora ida pa muala Uplerlawna Nhiw Lululli la riy, yoma ralammu edonna naploi-naple'er la Uplerlawna yamkekni. 22 Dodo'ondi mhioitio'ora-mtiahnei dioinia do'omu-halmu dilla, ne mpuolu-mpuak la Orgahi-Orha'a, totpa matialo'onama Uplerlawna Namou-nawitna do'omu-halmu onnila ralma-riormu de. 23 Yoma agatga, de ralammu namehra rehi (iri hati) emolmolla eru mernu, ne ralammu nawniotar la do'a-hala ralamni." 24 Simona nwahla: "Emkade de, mpuolu-mpuak la Orgahi-Orha'a mai a'u, totpa yana amuat pia alier la ai mormiori ralamni, ne hota a kupnu nhorwua." 25 Noma la'pa Petrusa me Yohansi rwair la yodkiota-yalde'et nohora Orgahi-Orha'a lirni, dewade ir rawal lia Yerusalema, ne la'a ir lala'ani de, de ir rod kiota-ral de'et nohora Uplerlawna lir kalwiedni-paitiotni la'a leta-ruhun liawanni no'a Samaria.
O'ta-mata ida mak kwatiawu Etiopia
26 Nhor nioka Orgahi-Orha'a hopopanni-lili'irnu (malaikat) ida nakot la Pilipsu niwra: "Pilips ee! Mumat pa mpuaran pa muokru tranna, mliernohora talan mak kerun la Yerusalem pa nokru Gasa." Talan de talan mak kdella wo'ora-kawru. 27 Hade pede Pilipsu nwaran wa. La'a talan letgara nwatroma makden Etiopia ida, riy lalawna, makhi' o'ta la Sri Kandake, Etiopia Ratnu kupna-kaini. Riy de nla'aw Yerusalem pa nla nkola tieru-nawur nehla la Uplerlawna la hande, demade nawali owa'ana. 28 La'pa riy de etla yala'ani ralamni pa nawal wia, ne namtatan reria la keretni ralamni, de e npaikpiaik rieria makwohorulu-ktatrulu Yesaya pukni. 29 Noka Uplerlawna Nhiw Lululli Nakot la Pilipsu: "Pilipsia, mlia' hande pa mriehgorga keret de onni." 30 Pilipsu plet-plet pa nla'awa hande ne natlin de o'ta-mat de e nteparla pniaiki makwohorulu-ktatrulu Yesaya pukni. Pilipsu nakot la: "Tuna, omnia'erat nana hya' mak ha mpuaik dena?" 31 Nwahla: "Hyalia, emkameni pa ania'erit nana, la'pa riy edon re'er nohora mai a'u?!" Noka nwak pa Pilipsu nha'at la heyanna me namtatan la onni. 32 Lir maka ha npaik de, emkadille: "Hota emolmolla duma id mak ha rodia la riotan geni, ne emeka dum a'na mak kakleh lir la'a mak ktori wullu gaini, emkade wal lia E'a, edonna Nhar lirni. 33 Riy rhi' amola-ma'a E'a. Emeka E' de erierannu-padpa'danni id E'a la niukamnu, nalla' wawannu de mak edon naplola. Ne riy id mana edon nwahaur nohora duratni-waitni yoma rwatul doini olek aranni mai noh di wawannu la'a lera edon na'upa-na'a'na ma'ta." 34 Noma o'ta-mat de nakot la Pilipsu: "Hyalia, A'utian tek o'a, makwohorulu-ktatrulu die ha nakot nohor he'a pede emkadena? Nakot nohor inon wamueheni me nakot nohor riy dom to'a?" 35 Noma Pilipsu nhar lirni nnairia Puka lirni dilla, pa nwahaur nohora Uplerlawna Kot Kalwiedni la'a Yesusa lirni-tunnu honona. 36 Ira rhaur la yala'ani re, ne rte'ela geni id maka gera etla. Noka o'ta-mat de nakot la: "Ee mumkeka, la' hande de gera ette, ne hya' owa'an ed mak khi' oruli-augewat pa edonna mhuarania a'u?!" 37Pilipsu nwahla: "Toto' pa ralammu tetema npesiaya, de nlola." Nwahla: "Apuesiaya Yesus Kristus de Uplerlawna A'nani." 38 Noka o'ta-mat de nhopan pa ratutga keret de, ne irrora rerun la gera ralamni, Pilipsu me o'ta-mat de rewre'wa, ne Pilipsu nharania wa. 39 Ne la'pa ir rwatulgot la gera ralamni pa rha'at la heyanna, plinu-plinniana Orgahi-Orha'a Nhiw Lululli Natiarmua Pilipsu pa emek nwatlena, ne o'ta-mat de edon namkek nana owa'an wa. Mere o'ta-mat de nala' doini yala'ani, de nahepuepur reri. 40 Mere la' de Pilipsu etla Asdod. Dewade Pilipsu nala' etia yapatni de, ne nod kiota-nal de'et nohora Uplerlawna Kot Kalwiedni-Paitiotni la leta-leta re honona, nodia pa la ntut lia Kaisarea
Saulus nhoitio'ora-ntahnei dioinia do'oni-halli
1 La' ler de, Saulus nakot mamain de niwra nwunu-nwenna makpesiay Itmatromni Yesus re. Noka e nla nhar lirni-ngot gai lia imam lawna, 2 ne nwaka horta mak ha rtapla hiwliai (rurni-laini) la e' pa nodia la o'ta-mata la gen miaka Yahudi re rhi' kreini-iskolli la leta Damsik, totpa la'pa nwatrom nana he'-he' mak klernohora Yesus talanni, de ntorna rpa nodia la Yerusalem. 3 Ne la'pa nharan rer mia'ta let Damsik pa niwa nwakrian wa, dewade plinu-plinniana tlena ida nwatiawu lyanti nlair nana Saulus. 4 Napru'wu la tani wawannu ne, natlin nana lira ida nakot la: "Saulus, Saulus ee! Hya' nrei pia omumuki-muma'al A'u?!" 5 Saulus nwahla: "He' O'a Matrome?" Niwra: "A' di de Yesus, mak omumuki-muma'al de. 6 Mere omumat meman la dodo'ondi, ne mlia'awa la' leta ralamni, la' hande hota rakot tiy o' pa omhi' hya'a." 7 Noma talanwalli mak ktutrieri re, ema rtaplelleltarga re, yoma plola pa ratlin nana lir de, mere edon ramkeka riy id wali. 8 Saulus mana namat pa ntutrieri, noka nwer matni, mere edon namkek nana hadomdoma. Pede ira rnaheman nana pa ralakra la'a leta Damsik ralamni. 9 Nalo'on nan lera wotel die edon namkek eti, ne edon na'ana-nemnu wali. 10 La' Damsik de, riy id makpesiay Yesus etla, nwawa Ananias. Ananias di ndarat nana lira ida, de Itmatromni Niwra: "Ananias!" Nwahla niwra: "Hya' Matroma?" 11 Itmatromni lirni: "Oi! Plet pa mlia'awa diwa. Muodi liarmu la Yudas romni la talla mak kwawa Talan Plele'era. Mutian nan mak kwawa Saulus la' hande. Riy de ha nwatiawu leta Tarsus. Ne dodo'ondi de ntepartarlia sniumbaini. 12 Ne e' mana ndarat nan wali o'a, de namkek nana riy ida nwawa Ananias nler la rialma ne nlapar limni la wuwannu, totpa e matni naphyari owa'an la genni." 13 Mere Ananias namta'at nlernohora Itmatromni lirni pa niwra: "Matroma, a'utlina la' riy rahu rwahauria riy di hihi'ini-yapyapni la yamukni-yama'alli la'a riy makpesiay O' la Yerusalem. 14 Ne dodo'ondi e nmai olekwa la handi, de nodia horta mak imam-imam o'tani-matni ha rtapla hiwliai lia, pa nodia totpa na nwatorna riy honona mak ka'uli-kawedia O' nanmu." 15 Mere Itmatromlawanni lirni: "Mlia'awa, yoma Awualir oleka e' wa totpena nhima-nre'a A knia'ru, pa nwahaur lol A lia hairi-hairi korni rora ir rayni me Israel mniotni wali. 16 Ne hota Amueh'a nekpa tiutga la'a liwtu-odwa mehra-mau honona maka e ntutulu-nakwara, onnila A na'nu." 17 Noma Ananias nla'awa meman la pa nler la rom de ralamni. Nlapar limni la Saulus wuwannu pa niwra: "Saulus, o' mak dodo'ondi de mpuesiay olek la Yesus, Itmatromni Yesus mak kalhari olek inonni tiy o'a la talan mak omliola de, ed mak khopn amuai olek di totpa o matmu namkek owa'ana, me Uplerlawna Nhiw Lululli Nodi plolli tiy o'a." 18 Mtatande nekpa ha wawahra ida nal doin la Saulus matni, ne matni naphyari owa'an la genni. Noma namat wa pa nhor nioma rharania. 19 Ne la'pa na'an pa nhorwua, dewade naruri owa'an la genni.
Saulus ndella makpesiay re letgarni
19 Noma lera ida-woru Saulus ndella leta Damsik nor wutga makpesiaya Yesus. 20 Ler de meman pa nakot nohora Yesus la gen miaka Yahudi rhi' kreini-iskolli de ralamni, niwra Yesus de, hade de Uplerlawna A'nani (Wutmueha-Laimieha). 21 Riy honona ema rtaplelleltarga ratlina Saulus, pa idma nakot la ida: "Hadi ed mak knahora-knala'a riy honona makpesiay Yesus la Yerusalem toh?! Nhi' wal pia nmai die totpa ntorna makpesiay Yesus pa rodia la imam-imam o'tani-matni toh?!" 22 Mere Saulus rurni-laini na'ititar rer lia, ne ltierni la' riy ralamni. Ntutga de plol toto'a de, Yesus de, Ray mak Uplerlawna Nano'taru pa Namori-nalewna rimormiori. Nhi'pede Yahudi makden la Damsik edonna rlernan talan pa rhoklira-rpah'a waw la. 23 La'pa lera nla'a-nmai wia dewade, Yahudi o'tani-matni re rna'ohma totpa rwenna Saulus. 24 Mere wniarora-wnialai di naphyar lia Saulus. Lelera-melmel de Yahudi mniotni re ratiak apitga leta puohrani re honona, totpa rwenna Saulus. 25 Mere la'a mela ida, makpesiay Yesus de rkenia Saulus la lo'ora ralamni pa rhuriernia, lola lutur leta hu'ulli ida.
Saulus la Yerusalem
26 Noma Saulus nokria Yerusalem. La'pa nte'ela hande wa dewade, Saulus e natekal pa nler wut lia makpesiay Yesus re, mere honona re ramta'at la e'a, yoma edonna rpesiay mia'ta, de e' de npesiaya olek Yesus wa. 27 Mere hohoni de Barnabas nreinian e' pa nodia la maka Yesus Nhopan pa rodi Uplerlawna lir kalwiedni re temanni, ne nwahaur nohor la emkameni la Saulus namkek nana Itmatromni la talan letgara, de Itmatromni Nora raltier wiutu. Barnabas nakot nohor wal lia ira, emkameni la Saulus nparani pa, nla nwatut niohora Yesus la'a Damsik. 28 Hade pede Saulus nora rpa rden rewre'wa la Yerusalem, ne Saulus nala' wewewar pa nodia paranni pa nakot nohora Itmatromni Yesus la hande. 29 Lerlera e' mana nora makden Yahudi mak kawala Yunani re rawahla lira, mere ir rahak talan pa rwenna. 30 La la'pa riy makpesiay korni ratga de rahak talan pa rwenna Saulus, noma rodia pa rla'awa la Kaisarea. Nhorwua noma rhopan Saulus pa nha'at la kapli id pa nla'awa Tarsus. 31 La'a lera wo'ira-wo'ir ralamni de makpesiay Yesus makden Yudea uhunu-ewatni-ewatni-lahwani me makden Galilea rora Samaria edon rlernana yamuki-yama'ala pede rdella' mtiertierannu ralamni. Rmor liola ya'unni-yamta'ata Itmatromni, ne Uplerlawna Nhiw Lululli Nhi' aruri ir pesiayni pede liawanni na'ititar lol to'a.
Petrusa nhi' kalwieda Eneas
32 Petrus nla'a meni-meni pa ntomra-nnah'a makpesiay Yesus. La'a lera ida, e nla nwaloha-nwalakat la Uplerlawna mutnu-rahanu makden leta Lida. 33 La' hande, de nwatrom nana muanke' ida nwawa Eneas, mak kanin tar niek la genni wawannu anni wo'awa, onnila nakliu'uta. 34 Noka Petrus nakot la: "Eneas, Yesus Kristus Nhi'u pa mlia'a kalwiedni. Mumat wa pa mpuaho'a-mpuatiernu dudgenmu!" Mtatande nekpa Eneas namat wa. 35 La'pa riy harahu makdella Lida me Saron ramkeka Eneas, dewade riy liawanni rpesiaya Itmatromni.
Petrusa namoria Dorkasa
36 Patke'a id la Yope nwawa Tabita. Riy de, riy makpesiay Yesus. Nan yawetni la yawala Yunani de Dorkas (nnia'eratni de rusa.) Nhiolli-lietni samoga, pa la nara'a-napalga riy maka kakleha-kaplara. 37 Mere la' ler de de namehra pa nmati. La'pa raroh mat die pa nhorwua, dewade retra la kamir mak kden heyanna. 38 Leta Yope edon oliet wal lia' leta Lida. Pede la'pa makpesiay Yesus la Yope ratlin nana de Petrus etla Lida, dewade rhopan doinia riy wor pua rodia lira-nnio' di riwra: "Tuna, pleta-plet pa mlia' a gen miamni." 39 Dewade Petrusa namat doin la, pa nla nlernohora re. Rla rte'ela hande wa, dewade rodia Petrus la mak kmati die geni no' heyanna. Patyata re honona rtutrier lia onni pa rteparla knio'a-kniakru, me rtutga rayanni me yohya'a honona la', maka Dorkas ha nhor nana-nka'at nana la ira, la'a ha nmormior mia'ta. 40 Mere Petrusa nhopan pa honona re rlergot momuou, noma nwaltior pa nsumbaini. Nhor nioka e napal tiemna mat die na'nama nakot la: "Tabita, mumat wa!" Noka Tabita nwer matni ne la'pa namkek nana Petrus wa dewade namat pa namtatna. 41 Noma Petrusa nte'la la limni, me nhi'a pa napriri. Nhor nioka npolga patyata re, me makpesiaya Yesus korni, noka ntutga la, de patke' de e nmormiori. 42 Hihi'a-yapyap die nwewar la Yope tetema, pede riy rahu mana rpesiaya Itmatromni. 43 Nhorwua dewade Petrusa ndella Yope, pa lera na'ida-naworu owa'an la'a riy id romni nwawa Simon. Riy de mak ktulla-karia ha ulti.
Petrus nora makden Yahudi atia'a, mak nhi'inde Yahudi makriarnia, de rwatroma
1 La'a Kaisarea, riy ida mak Yahudi atia'a nwawa Kornelius. Riy de nhi' o'tani la makodi keki-rautu rahu ida. Enodi plolli la makodi keki-rautu rwatiawua Itali. 2 E' de nora romni mniotni re, riy mak ka'unni-kamta'ata Uplerlawna ne nhiolli-lietni nlernohora Uplerlawna ralma-riorni. E' mana nhi'de ntulan la riy Yahudi mniotni mak kakleha-kaplara, ne e nkol reri-nawur rer miamain la Uplerlawna. 3 La' lera ida, lera nhierni (jam wotelu), de matni ri'ini npah'a nan pa namkek nan samomuou Uplerlawna hopopanni ida nmai pia npolga, niwra: "Kornelius ee!" 4 Mere Kornelius namkeka hopopan de, de namta'at wenna, noka niwra: "Hya'a matrome?" Hopopan de nwahla: "Polpuolmu-wakwakmu me ralam kalwiedmu la mak kakleha-kaplara Uplerlawna Nreinian oleka, ne Uplerlawna Nhoratre'ru. 5 Dodo'ondi mhuopna riy rla' Yope pa rpolga Simona maka ha rpol wal lia Petrus. 6 E' e ntawu tiar lia riy mak ktulla-karia ha ulti id romni, nwawa Simona. Riy die nhol lia' eni gaini." 7 La'pa Uplerlawna hopopanni naltier pia nhorwua na'nama nla'awa, noma Kornelius npolga hopopanni woru me makod kekni-rautnu ida mak nhi'inde natiak e'a, maka nhiolli-lietni nlernohora Uplerlawna ralma-riorni. 8 Kornelius nwahaur momuoga hya' maka ha namkek nan rella, na'nama nhopna rla'awa Yope wa. Noka rla'awa. 9 Rla'awa, noma reparni lera nwawuau ro'onni, la'pa ralala' rer mia'ta pa rwakrian lia Yope, dewade Petrusa nha'at la roma hananni pa nsumbaini. 10 Noma naplar memna, ne niwra na'ana. La'pa rwahihi' rer mia'ta ya'anni, dewade matni repar nana yamkeka ida. 11 Namkek nana lyanti nahniarti, ne hadoma emeka kok lihira wewerna pa rhuriernia la nohkerna, natniakloi lia uhunu re wogata. 12 La' ralamni de nhiuri-wnia'ana, porni-dawarni, mak kawrika-kawriai me onu-ma'nu honona erla. 13 Noka Petrus natlin nande, lira ida niwra: "Petrusa mumata! Mpunu-mpuen hare pa mu'una." 14 Petrus nwahla: "Uhmena, Matroma. A'g edon u'un etia hya' mak khaliarna me hya' mak rmakriarnia." 15 Mere lirni owa'an la: "Hya' maka Uplerlawna Ntutg oleka pa ra'ana, de yan memmemna mukot miwra haliarna." 16 Yamkek de nati'ila-nawal niana re'eni wotel muemna, nhor diewade kok de narian pa nla'awa Ilyamou-Watyatoha. 17 Petrusa naplo' tar lia hya' maka ha namkek de. Petrusa ntepartarlia wniaror ma'ta, dewade riy mak Kornelius ha nhopna, rma rwahak nohora Simon romni, ne rte'ela puohrani gaini. 18 Noka rpolga riy pa ratiana: "La handi de riy mak ktaw tiar lia e nwawa Simon Petrus etla handina?" 19 Petrus e ntepartar mua'ta la nwaror nohora mak ha matni ri'ini npah'a nana re nnia'eratni. Dewade Uplerlawna Nhiw Lululli Nakot la: "Ee Petrus! Riy wotelg e rtepartarlia o yahakmu. 20 Oi, plet-plet pa muerun la yawa me yan mumta'ata mliernohora re. Yoma A'g ed mak khopna re." 21 Noma Petrusa nerun pa nakot la re: "A'g ed mak a'mu-hya'lu rahaka. La'a hya' pede mihak a'u hyalmi re?" 22 Rwahla lirni: "Perwira Kornelius nhopna ammai handi. Riy ploloi-plele'era id hade, ne ha natu namta'at Uplerlawna, ne makden Yahudi honona ratota-rawawa. Uplerlawna hopopanni-lili'irnu ida, nhopna e nwaka tuna pa nla'a e romni, totpena natlin nana hya' maka matro'mu nakota la e'a." 23 Noma Petrusa nwak la hare pa rla'awa rialma, totpena rwarini plein la hande. Repar dewade Petrus namat pa la nod tiemna re, nor walia riy dom makpesiay lia Yope pa rlernohora. Noka rla'awa. 24 Rla'awa noma lera ida nlardoinia la, dewade rte'ela Kaisarea. La hande Kornelius nor wutga inni-narni me Kornelius mutwualli mak ha rpolu-rwak nana honona rwewiei Petrus. 25 La'pa Petrusa nte'ewa pa niwa nler la rialma dewade, Kornelius nla' pa nwaltiora-nwaltieman la Petrus gaini ralamni. 26 Mere Petrusa nran apriria (nhi'a pa ntutrieri) me nakot la: "Mupriri-kdededa, upler atia' a'u, a' niek de rimormiori wial a'u." 27 Nor Kornelius raltiertier mia'ta dewade, Petrusa nler la roma ralamni de namkek de riy rahu rawok olek la hande. 28 Noma nakot la re: "Ina-nara ama-hyali, orgahami miatga, la'a makden Yahudi re deullu-tatarni, de rahmen pa ma rtomra-rnah'a riy mak Yahudi atia'a onde rora rwatamputu emeka aghi'a di. Mere na'nam di Uplerlawna Nhopn olek la mai a'u la a yamke'ku ralamni pa, u'una ha mormiori mak kakdeha-kaktiahli. Ha nnia'eratni de totpa, yana awuarora de, Yahudi atia'a re rakdeha-raktiahli. 29 Hade pede la'pa tuna nwak pa totpa amuai, de a'g edonna wuayotlia. Pa la'pa dodo'ondi agiwa gat memna la'a hya' pede tuna nwak pa amuai?" 30 Kornelius nwalolla: "Tuna, melulu handena de lera emkadi, de lera nhierni (jam 3 ), asiumbain rerer lia' a ro'mu. De plinu-plinniana muanke' ida naprir lia a ga'yu, naniayarni nlipa-nka'ma. 31 Nakot niwra: "Kornelius! Uplerlawna Nreinian oleka polpuolmu-wakwakmu, ne Nhoratreria o' la ralam kalwiedmu la riy mak kakleha-kaplara. 32 Hade pede mhuopan pa riy rla'a Yope, pa rpolga riy mak kwawa Simon Petrus. Riy de e ntawu tiar lia riy mak ktulla-karia ha ulti romni. Riy de nanni Simon, ne rom de ndella eni gaini." 33 La hade pede pleta pa aghopna rtiy rpolga matro'mu, ne matro'mu ralam kalwiedni pa nmai wia. Pa dodo'ondi a hononami mawok tar lia handi la Uplerlawna gaini ralamni, totpena matlina-matailia lirmu-tunmu mak Uplerlawna Nhopna tuna nakota la' ami."
Petrus naltier lia' nhiopun lawna
34 Noma Petrus nakot lirni: "Ina-nara ama-hyali, dodo'ondi na'nama agatga plola la'a Uplerlawna hihi'ini-yapyapni namneneha la riy honona. 35 Uplerlawna Nreililili-na'mamuau niana he'a-he'a la'a hairi hya' to'a maka'unni-makamta'ata Uplerlawna, me mak kwehwa-klakat la ploloi-plele'era. 36 Ina-nara ama-hyali, miatg oleka Uplerlawna Kot Kalwiedni-Paitiotni maka Nakot targa la Israel re. Nakot targa de onnila Yesus, maka Uplerlawna Nano'tar pua Namori-nalewna rimormiori, de itkalwied olek la Uplerlawna. Ne Yesus di de, Yahudi me Yahudi atia'a Matromni. 37 Hononmi miatg oleka la hya' maka rhi' ulga la Galilea la'pa la Yudea liewnu, la' ler maka Yohansi nhaun pa niwra: "Mhioitio'ora-mtiahnei dioinia do'omi-halmi, me miala inonmi pa rharania." 38 Miy miatga la' ler de Uplerlawna Nwalir Yesus makden Nasaret de, pa Nala Nhiw Lululli la, me totpa Ntorna plola-mneha. Miat wualia de la'pa Yesus de Nla'a meni-meni de totpena Nhi' kalwieda-paitiota, e Nhi' kalwieda riy honona maka hegana amlawanni nodi plolli la, yoma Uplerlawna Nora talla. 39 Ina-nara ama-hyali, am di nekpa, ed mak klin nohora-kmat nohor memna hya'-hya' to'a maka Ha Nhi'-nyapi lia Yerusalem me Yahudi letni korni. Emkade ho'mana rwal dioinia pa rla rwairia la auwlakra, ne ratuin doin memna aranni. 40 Mere la'pa nodia lera wotellu, dewade Uplerlawna Namoria owa'ana la matmiatni ralamni, ne Ntutga Yesus la riy totpena ramkek nana de Nmori owa'ana. 41 Mere edon Ntutga Yesus la riy honona, mere am tio'a maka Uplerlawna Nwalir niana mulaliaini, totpena mhi' tlin nohora-mat nohor la. La'a am di maka ma'an wutu-memun wutu nor E'a, la'a E Nmor owa'an la matmiatni ralamni. 42 Ne Enhopan pa amakot nohora lir kalwieda la riy, ne amala tlin nohora-mat nohora, de E' nanpena Uplerlawna Nrana pa Ntorna watghudi lokarni la riy mak kmormior mia'ta, ne riy mak kmati olekwa. 43 Makwohorulu-ktatrulu honona raltier lia E' wawannu. Ira raltier niohora riwra riy honona makpesiay Yesus de, hota Uplerlawna Namou-nawitna do'oni-halli, onnila Yesus plolli-mneheni."
Uplerlawna Nhiw Lululli Nala' ul pua Nerun la mak Yahudi atia'a wawannu
44 Petrus naltiertier mia'ta, dewade Uplerlawna Nhiw Lululli Nerun la riy honona wawannu mak katlina kota-de'et de. 45 Yahudi mniotni mak kpesiay Yesus mak klernohora Petrus pa rmai, honona ema rtaplelleltarga ramkeka Uplerlawna mana Nal walia Nhiw Lululli la riy mak Yahudi atia'a. 46 Yoma ratlina ri'a re, raltier die rawala yawal dom pa ra'uli-rawedia Uplerlawna. Noma Petrus nhar lirni: 47 "Mimkeka, Uplerlawna Nhurriernia E Nhiw Lululli la mak Yahudi atia'a ri, pa emekwali Yahudi ita. Hade emkade pede hota Yahudi re ta'en niana rteri-rtawa rpa rharania." 48 Noma Petrus nhopan pa rharania re, de rweta la Yesus Kristus. La'pa nhorwua noma rwaka Petrus totpena nwarini plein nor ir la lera ida-woru.
Petrus nakot nohora yala'ani la makpesiay Yesus no' Yerusalem
1 Noma mak Yesus Nhopan pa rodia Uplerlawna lirni, me riy korni mak kpesiay Yesusa la' Yudea liewnu ratlin nana riy maka Yahudi atia'a mana rreinian oleka Uplerlawna lirni-tunnu. 2 Pede la' pa lerni la Petrus nte'ela Yerusalem, Yahudi mak kpesiay olekwa re, rawo'or nohora Petrusa. 3 Ratiana Petrusa riwra: "Nihya'pa omlia'a Yahudi mniotni atia'a romni-lewnu?! O' mana mlier wut lia ira, pa omuora mi'in wutu-miemun wutu!" 4 Hade pede Petrusa nwahaur la ira, hya'-hya' honona maka e namkek nana, de nwaga la onni, pa la' pa nhoru, 5 de niwra: "Lera ida, asiumbain rer lia' leta Yope, de a ma'tu nrepar nana yamkek ida, de hadom emeka koka lihira wewerna ida ralernia la lyanti, natniakloi lia uhunu re wogata, noka ralernia de kok de etla a o'nu walli. 6 La'pa a'umkek reria la' ralamni de, umkek nana nhiuri-wnia'ana, makpora-kdawra, makawrika-kawriai, me onu-ma'nu. 7 Noka a'utlin nana lira ida niwra: "Oi, mumata Petrusa. Mpunu-mpuenna hare pa mu'una." 8 Mere awualolla: "Taken niana Matroma. A'g edonna 'un targa ya'ana-yemnu haliarna, me maka ha rmakriarnia." 9 Mere lirni owa'ana nwatiawu lyanti: "Hya' maka Uplerlawna Ntutga oleka pa ra'ana, de yan memmemna mukot miwra haliarna." 10 Dewade hya' maka umkek nana de nati'ila-nawal niana re'eni wotel muemna, nhor diewade kok de narian pa nla'aw owa'an la Ilyamou-Watyatoha. 11 La' ler de meman nekpa riy mantetelu mak kwatiawua Kaisarea, mak ha rhopan pa rma rwatrom a'u mana rte'ela rom mak adiella. 12 Noka Uplerlawna Nhiw Lululli Nhopna agora ir pa mla'awa, de yan umta'ata. Noma makpesiay wonema ri ror pa amla' rewre'wa la' pa amte'ela riy de romni. 13 Noma Kornelius nwahaur nohora mai ami, emkameni la namkek nana Uplerlawna hopopanni-lili'irnu ida ntutga rupni la romni ralamni pa niwra: "Mhuopna riy rla' Yope, rla rpolga muanke' ida mak kwawa Simon Petrus. 14 Hota nalde'et la tiy o'a lir mak kodia mormiori-dardiari tiy o'a, me rommu mniotni." 15 Noma la'pa a'ultieri lira ida-woru emkade, de Uplerlawna Nhiw Lululli Nerun la ir wawannu, emolmolan wali maka Nhi' nana mai it la' ler ululu. 16 Noka aghoratnana hya' maka Itmatromni Nakot targa de: "Yohansi nharania de nnairi gera mere miy die Uplerlawna Nala Nhiw Lululli pa Nodi plolli la miy." 17 Pede plolli de Uplerlawna Nal wal lia Nhiw Lululli la riy maka Yahudi atia'a re, emekwali ita la' ler maka it tpesiay Itmatromni Yesus Kristus. Hade pede emkameni pa atieri-tiawa Uplerlawna?!" 18 La'pa makden Yahudi ri makpesiay Yesus ratlin nan Petrus lirni re honona, dewade ir edonna rakot hadomdom owa'ana. Mere ra'uli-rawedia Uplerlawna pa riwra: "Hade emkade, de riy maka Yahudi atia'a mana Uplerlawna Nal wal lia rpa rhoitio'ora-rtahnei dioinia do'oni-halli, ne rre' pa rlernana mormiori-dardiari plalahwa."
Riy makpesiay Yesus no' Antiokia
19 Lerni pa rwen oleka Stefanus wa, ir mana ramuki-rama'ala riy makpesiay Yesus re pa rhokar la'a-rhokar maiya, nhi'nande ir ema kurge'era-karge'era lol meni-meni. Dom rawlar pia rla' genni Fenisia, Siprus me Antiokia. Ira ralde'et nohora Uplerlawna lirni la'a makden Yahudi mniotni rmeh'a. 20 Mere la'a makpesiay rde, dom de rwatiawua Siprus, me Kirene, pa rla'a Antiokia de rod kiota-ral de'et wali Kot Kalwieda-Paitiota la'a Itmatromni Yesus Kristus della makden Yahudi atia'a. 21 Uplerlawna plolli-mneheni etla hare wawannu, nhi'nande riy rahu rpesiaya, ne rala inonni rla Itmatromni. 22 Kotlola-de'etlol la hihi'a-yapyapi re, nodia pa la' memna makpesiay Yesusa no'a Yerusalema. Noma rwahor nana Barnabas pa nla'awa Antiokia. 23 La'pa Barnabas nte'ela hande, ne namkek memna emkameni la Uplerlawna Nara'a-napalga riy re, dewade nahepur wenna. Noka nwak totpa hare ra' rer pitpit lia Itmatromni, ral ralamni tetema. 24 Barnabas di de, riy ralam samomuou ida de, ne Uplerlawna Nhiw Lululli Nodi plolli la, ne npesiay matmiatia Itmatromni, nhi'nande riy rahu rpesiaya Itmatromni Yesusa. 25 Nhor nioka Barnabas nla'a Tarsus pa nahaka Saulus. 26 La'pa nwatrom nan Saulus dewade nodia Saulus pa nla'awa Antiokia rora makpesiay Yesus no' hande, pa rawok wut lia anin tetema ida ne rwatutu riy liawanni. Ler di la'a Antiokia na'nama riy makpesiay Yesus rweta rla riy Kristen. 27 La' ler de de makwohorulu-ktatrulu doma rwatiawua Yerusalem pa rmai Antiokia. 28 La' hare mutnu de riy id etla, nwawa Agabus. Onnila Uplerlawna Nhiw Lululli rororni, Agabus naprir pia nala lira nnielu, de hota lar lawna nma nwewar nan noha-rai tetema. Ne hade nla' lola la' ler maka Kaisar Klaudius nodi plolli. 29 Noma makpesiay Yesus re ra'an lira-remun waw pa ra'enyatga himima-rere'ela makpesiay makdella Yudea, rima-rima ra'enyat die rlernohora rurni-laini. 30 Noka rhopan pa Barnabas nora Saulus pa rla rodia himima-rere'a rella makpesiay Yesus ullu-o'tani la hande.
Yamuki-yama'ala na'ititar rer lia
1 La' ler de nekpa ray Herodes nmaklekal wa pa nhopna rtorna makpesiay Yesus, totpena ramuki-rama'ala. 2 Yoma titni de, Yohansi hyalli mak kwawa Yakowsi rala wehla ya'ara ra rdawar wenna. 3 La'a Herodes yamkekni, illu-wniehwani de nla' nana riy Yahudi ralamni pede nhi' owa'ana emkade. Nhopan pa riy rla rtorna Petrus wali. Rla rtorna Petrus la'a lerlalawna roti mak edonna rnairi tgo'a. 4 La' pa rtoran nana Petrus, noma rodia la roma nhio'la ralamni. Rhor nana riy termida wehrani wonema, pa rwahernu-rwahal la yatiaka Petrus. Yatiaka ralamni de mak kla'a rialma riy wogata-wogata. La'pa lerlalawan Paska maka Yahudi rhorat tuini-wedni la ler maka rlergot la Mesir, de nwair wa, nanpena Herodes niwa netlia Petrusa hihi'ini-yapyapni la mutliawna gaini. 5 Pede Petrus ndella roma nhio'la ralamni, mere makpesiay Yesus mak kawoka re, e rpolpuolu-rwakwak pa nodi liarni la Uplerlawna yana Nolin limni-nwe'er rorni la Petrusa. 6 La'awa lera nmel wa Herodes edonna nakot nohor ma'ta Petrus la mutliawna gaini, de Petrus e nanin ma'ta, me rala ranti woru ra rwutu-rkohoga limni nora mak katiaka limni wali malwiru-malganna. La walia mak katiaka riy dom to'a, e ratiak reria roma nhio'la nhiar liawanni. 7 Plinu-plinnianama Orgahi-Orha'a hopopanni-lili'irnu ntutga rupni pa ntutrier lia Petrusa onni, ne la' gen die hitita-reprepra. Uplerlawna hopopanni-lili'irnu de nawo'la Petrus pa namat memna, noma nakot la Petrus: "Ee, plet pa mumata!" Mtatande nekpa ranti natior dioin la Petrusa limni. 8 Nhior nioma Orgahi-Orha'a hopopanni nakot la: "Mhu'ru la naniayarmu (rayanmu), me mpuatiehra lakmu wniowni." Noma Petrusa nlernohora lir de pa nhi'a. Nakot wal lia Petrusa: "Mhu'ru wal lia rain lawanmu ne mliernohor a'u." 9 Petrusa nlernohora pa rlergot la roma nhio'la ralamni. Mere Petrusa natniekamde, e ndarat nan to'a. 10 La'pa rto'or doin oleka yatiak geni wor wua dewade, rte'ela nhiari mnotna mak kapal reria letlawna, noma nhiari rho'pani ema rtew dioinia. Noma rhargot pa rlernohora talla ida pa ntut lia honi. Rala' rerer mia'ta de plinu-plinniana Orgahi-Orha'a hopopanni de nwatlena. 11 Emkade na'nama Petrusa hmuakarnu la' temni. Na'nama natga de plol toto'a pa Orgahi-Orha'a mak khopna hopopanni pa nodia la Herodes plolli, me nodgiota la Yahudi re wniaror yatyatni. 12 La'pa nwarora emkade, dewade nla'a Maria romni. Mari' di, Yohansi inni. Yohansi di mak ha rpol wual lia' Markusa. La' hande riy rahu rawok pa rtepartarlia sniumbaini. 13 Petrusa nkorkor la puohrani, noma patke' ida nmai pia niwa nhari nhiari. Patke' di Maria hopopanni, de, nwawa Rode. 14 La'pa Rode natga de lir de, Petrus lirni de nahepur nande edonna nhar wialia nhiari ne pleta-plet pa nawal lia rialma pa nakot la hare niwra: "Ee, Petrusa etla tio'ora." 15 Rakot la: "Omga'u." Mere Rode ntekal reria pa nakot la re: "Petrus toto' hade." Pede mutwualli re rakot la Rode riwra: "Edonna. Uplerlawna hopopanni-lili'irnu mak katiaka Petrus hade." 16 Petrus nodi liarni to'ola nhiari kniorkorni. La'pa ir rla rharia nhiari pa ramkek nan Petrus de rhed muemna. 17 aPetrus nayer limni la totpena ramolmuolga. Noma Petrusa nwahaur nohor la'a Orgahi-Orha'a hihi'ini-yapyapni emkameni pede nlergot la roma nhio'la ralamni. Noma Petrus nakot la re: "La' pa mikota la Yakowsi nora mutwualli korni wali." Nhorwua noma Petrus naltaru ira ne nla'awa geni dom to'a. 18 Repar yawyawar ma'ta de lima-rora makodi keki-rautu mak katiaka re rkokna-rrarin nohora Petrusa molmuollu. 19 Herodes nhopan pa rahaka samomuou Petrus mere, riy edonna rlernana. La' pede Herodes natian la'a-natian mai mak katiaka Petrus, na'nama nhopan pa rwunu-rwenan mak katiaka re.
Herodes matmiati
19 Noma Herodes nwatiawu Yudea pa nla'awa Kaisarea pa nden la hande. 20 Herodes nawunu-nawenan la riy makdena Tirus me makdena Sidon. Hade pede rma rawok pa rwatrom la Herodes gaini ralamni. Rla' ulga Blastus mak kla'a o'tani ida la Herodes rom rayni, pa rwak la pa nherlia ira. Nhorwua noma, la rwak la Herodes pa rkalwieda, yoma ir letni ya'anni-yemannu de nawniair to'ola noha-rai mak Herodes handella. 21 La'a lera ida maka ha rakot targ oleka wa, de Herodes nnairia rain plalahwani mak ktutga de E' de ray, me nla'awa liwangenni pa nakot lirni la'a riy mutlialawna gaini ralamni. Nakot lirni pa nhorwua 22 noma riy mutlialawna re riwa rhi' amikria Herodes ralamni pede rpolu-rhaunu pa riwra: "Hadi de upler lirni. Rimormiori lirni atia' hadi." 23 La'a mtatande nekpa Orgahi-Orha'a hopopanni nalernia mehra lawna la Herodesa yoma, nakleha nhiu'ru-nhielam pa, edon na'uli-nawedia Uplerlawna-Mempulwatnu. Noma Herodesa nmat die, yoma gargara ra'an doinia la. 24 Mere Uplerlawna lirni-tunnu npehpeh lol pa nawerna-naplahwa lolola, ne makpesiay re yeher to'a pa na'ititar rer lia. 25 Ne la'pa Barnabas nora Saulus rodia himima-rere'a la makpesiay Yesus pa nhorwua, dewade rpolan la Yerusalem de rodia Yohansi maka ha rwet walia Markus pa ror rewre'wa talla.
Barnabas nora Saulus rwalir niana pa rhopna
1 La'a riy mak kpesiay Yesus mak kden la Antiokia, de makwohorulu-ktatrulu rora mak kwatutu-kwaye'a erla hande, de Barnabas, Simeon maka rweta la Niger (nnia'eratni de, riy metmetma), Lukius mak kwatiawua Kirene, Menahem maka rlahu wut niohora la raiya Herodes, me Saulus. 2 La'awa lerni pa makpesiay rkola tieru-rawur nehla la Orgahi-Orha'a ne ratahan lara, noma Uplerlawna Nhiw Lululli Nakot la ira: "Awualir nian oleka Barnabas nor Saulus. Hade pede mtiutmuata-mkiewra'a hare, totpa rkar lia' A knia'ru ralamni." 3 Rsumbaini me ratahan lara pa nhorwua noma rran limni la Barnabas nor Saulus o'tani totpa rrana rpa rkar lia Uplerlawna kniarni, na'nama rhopan pa rla rhi' kniarni de.
La'a Siprus
4 Barnabas nora Saulus rla'awa Seleukia, yoma Uplerlawna Nhiw Lululli nhiopanni. Rden la hande pa rhopal pa rla'awa noha Siprus. 5 La'pa rla'awa la'a Salamis, dewade rakot nohora Uplerlawna lirni la' gen miaka Yahudi re rhi' kreini-iskolli. Yohansi maka ha rwet walia Markus nre'ela kniarni re, la' talla ralamni. 6 La'pa rala'a la kniari la noha Siprus ewatni-lahwani, pa rla rtut lia'a leta Papos. La hande de rwatrom nana Yahudi ida, nwawa Bar Yesus. Kniarni de, nhi' ukru-rehera mak kamehi-kayona, ne nalahar pa nakotiwra e' de makwohorulu-ktatrulu id e'a. 7 Sergius Paulus, mak khi' ulu-o'ta la gen die, nora Bar Yesus de rora nhi'inde rwatamputu. Mak khi' ulu-o'ta de, de riy mak katu. Npolga Barnabas nor Saulus yoma niwra nor wal pia natlina Uplerlawna lirni-tunnu. 8 Mere Bar Yesus, mak kwawa la yawala Yunani de Elimas de nnia'eratni de mak khi' ukru-rehera, nhi' oruli-augewat la Barnabas nora Saulus. Ntekal rer lia, totpa mak khi' ulu-o'ta de yana npesiaya Yesus. 9 Mere Saulus maka rpol wualia la Paulus de, Uplerlawna Nhiw Lululli Nodi plolli la pa namkek tutga mak khi' ukru-rehera mak kamehi-kayon de. 10 Na'nama Saulus nakot la: "Ee mak kodia kdiori-kdieha putra-palka hegana upni-a'nani o'a. He'-he' mak hihi'ini-yapyapni illu-wniehwani naplol la Uplerlawna gaini, de omhi' oruli-augewat la hare. Omhi'a-myapi, edonna mrie'nu la mpueyata-mpuaniawua Orgahi-Orha'a wniarorni-wnialaini mak kiwra kodia rimormiori la kalwiedni-paitiotni. 11 Pen mumkek la dodo'ondi. Orgahi-Orha'a hota Nukmu o'a. Hota omlier la melli-kalamni. Hota omuplinga tipru-warta ra'i-tranna la dodo'ondi." Edon nalo'on wali ne Bar Yesus yamkekni de emolmolla ponpona-mamuahu, memetma nwow nana e matni, pa nala' de dudunti-wetwetria hoho'a-hayaya, pa nahaka mak kalakra. 12 La'pa o'ta-mat de namkeka hya' maka Uplerlawna Nhi'a la Bar Yesus dewade o'ta-mat de npesiaya Yesus. Me nwer rer wiawni la wniatutu-wniaye'a re la'a Orgahi-Orha'a yala'ani.
Paulus nwatutu-nwaye'ela Antiokia me Pisidia
13 Rwatiawua Papos noma Paulus nora kniarwialli re rhopal pa rla'a leta Perga, la Pamfilia. La hande noma Yohansi maka ha rwet walia Markus naltar ira ne nawal lia Yerusalem. 14 Rden la Perga noma rodi liarni la leta Antiokia la Pisidia. La'pa Sabat lerni (de ler maka riy edonna rkar lia), noma rla'awa pa ramtatna la gen miaka Yahudi re rhi' kreini-iskolli. 15 La'pa rpaiki ahorga Musa pukni, me makwohorulu-ktatrulu pukni, noma roma kreini de o'tani-matni rhopan pa riy ratiana Paulus nora talanwalli re, riwra: "Ama-hyal miy re, la'pa miwa miala nnio'a-niat diom pa mhi' aruri a pesiay mamni, de ampak pa mikota." 16 Noma Paulus naprir pia nayer limni la totpena ramolmuolga, na'nama nakot lirni: "Ina-ama krei, ama-hyali ina-nara la'pa a'na mak kden la Israel di, ne mak Israel mutnu atia'a, la'pa it hononit di mak ka'unni-kamta'ata Uplerlawna. Mtiulan pa mhieri tlinmi la lir mak a'ukota ri. 17 Uplerlawna maka makden Israel ita tkola tieru-tawur nehla. Ne Nwalir niana-nalioh nana it upni-tgarni, me Napeha-nalawna rla Mesir, la gen miaka rdella emolmolla mak kahulti-kahamra. Noma Uplerlawna plolli-mneheni pa Nodgiot ir la'a Mesir. 18 Ne Uplerlawna Nod niohor neka ira wniehwani-liakatni la'a wo'ora-kawru la' anni terampwogata ralamni. 19 Noma hairi wo'itu rimormiorni de, Uplerlawna Nkuhi-nho'ora la'a noha Kana'ana, totpena hairi Israela nanie'era-nahniakar la hande, totpena Kana'an de Israel gahani. 20 Lerni pa Israela mniotni rla'awa Mesir nhi' na'nama rmai owa'an la Kana'ana, pa rhi'a noh della ir gahani, de mahnekni la'pa edon nhal de anni rahu wogata terampwolima. La la'pa rhakar doinia noh Kana'an uhunu-ewatni, dewade Uplerlawna Nhopan pa rrana mak ktorna deulu-tatra. Noma la'awa me'eta-anin nlol wa pa la' pa Samuel lerni. Samuel de mak ktorna deulu-tatra hohoni. Makwohorulu-ktatrulu id wali hade. 21 Nhor nioma Israel mniotni rwak walia Samuel pa nrana ray ida. Noka Uplerlawna Ntutga Saul, Kisa a'nani la'a Benyamina duratni-waitni. Noka Saul nla' nan ray anni terampwogata. 22 Noma Uplerlawna Nalernia Saul la' mtatangenni, dewade Nran owa'an Daud pa nla' ray lia ira. Uplerlawna Nakot nohora Daud, Niwra: "Agat niohor Daud, Isai a'nani de, nla' riy mak khi' amikri A ralmu. Hota e' ed mak klernohora A ralma-rio'ru." 23 Hota Daud nadurti-nawait nana riy maka Uplerlawna Nwalir oleka wa, la'a Israel hairni rerieini, de hota riy de nodia rimormiori la mormiori-dardiari, emekwalia hya' maka Uplerlawna Nano'targ oleka wa. De Yesus de ed maka Ha Nakota. 24 La la'pa Yesus edonna Nkar mia'ta E kniarni, de Yohansi nhaun olek la Israel rimormiorni, totpena rhoitio'ora-rtahnei dioinia do'oni-halli ne rharania re. 25 Ne nhi'pa la ler la kniarni hohoni, Yohansi nhi'inde nakot la riy niwra: "La'a miy wniarormi de a' di de he'a? Maka mimpiei-mniar de a'g edonna. Mhioratreria, hota riy de, amuai ulu nanpena Ha Nmai. Hota awue'er doin lakni wniowni ho'mana a'g edonna puar nana." 26 Ina-nara ama-hyali, Abrahama duratni-waitni, me maka Yahudi atia'a, de riy honona mak ka'unni-kamta'ata Uplerlawna. Uplerlawna Na'enyat oleka kota la'a Yesus mak kamori-kalewan de mai ita. 27 Riy mak kden la Yerusalem rora ir o'tani-matni edonna rhe'du nana Yesus de ed mak kamori-kalewna. Ir edonna rna'erit nana makwohorulu-ktatrulu wniatutnu, maka rpaikia la'a Sabat lerni pede irukmu Yesusa. Mere la'a hihi'ini-yapyapni re, pede hya' maka makwohorulu-ktatrulu ha ror taru re, Israel mniotni rhi' nana-ryap niana. 28 Kennama edonna rlernan walia hadom la E'a, retlia nekpa rukum wenna. Noka rwak la Pilatus pa totpena rwenna. 29 Ne la'pa rhi'a-ryapia hare honona mak ha rhorat targa la Puk Lululli la E wawannu, noma iralerni owa'ana la' auwlakra hananni pa rla rade'a la liena ralamni. 30 Mere Uplerlawna Namori owa'ana la matmiatni ralamni. 31 Nhor owa'ana de, nalera-namela, noma Ntutga-nharia inonni la riy mak kora lek E' talla rwatiawua Galilea pa rokria Yerusalem. Hare er maka la'pa dodo'ondi, de irden wal pia rlin nohora-rmat nohora E'a la'a Israel mniotni. 32 Hade pede dodo'ondi, de amakot nohora Kot Kalwieda tiy miy, la'a hya' maka Uplerlawna Nano'targa la it upni-tgarni, 33 E Nhi' oleka hade mai ita la'a Namoria Yesus owa'an la'a matmiatni ralamni. Ina-nara ama-hyali, la Puka ralamni wal pia, de rhorat targa la'a Yesus Nmori lia matmiati-molmuolu ralamni. Yoma la'a Puk Masmur (onni woru) ralamni de, e rhorat targa Uplerlawna lirni la'a Yesus, de: "A a'nu O'a. La'a ler di de, Atiutga la riy honona de, O' Ammu A'u." 34 Uplerlawna Namori owa'ana Yesus la'a matmiatni ralamni. Pa hota dodo'ondi de edonna Nler la matmiati-molmuolu ralamni. La eda de pede Uplerlawna Nhar lirni: "Pena Agala Nnio' Lululli plollolli tiy O'a. Hota Aghapartiklia mak A'ukottarg oleka la Daud." 35 Emkade wal lia' Masmur onni (pasal) dom to'a Daud nakot la Uplerlawna: "O' edonna Mhur niohora hopopanmu mak katlina-katailla O'a de inonni ngehpa la matmiati-molmuolu." 36 La'a lirni de Daud edon nakot nohora inon wamueheni yoma lera ida nmat wia pa rtamin wutga la upni-tgarni. Yoma la'pa Daud nhi' oleka hya' maka Uplerlawna Nhopna e nhi'a, dewade nmati ne inonni mana napiat olekwa la'pa ngehpa-nta'la. 37 Miy hononmi mitlina. Daud edon nakot nohora inon wamueheni, mere nakot nohora Yesus mak Uplerlawna Namori owa'ana la matmiatni ralamni, de Yesus edonna Nler la matmiati-molmuolu ralamni pa Ngehpa. 38-39 Ina-nara ama-hyali miy re, la hade pede amakot nohora tiy miy totpa miatga, de lol Yesus wawannu de, it do'oni-halli honona ramou-rawitna. Ne riy nenenna mak kpesiay Yesusa, Uplerlawna Netlia de, hare de edon rhala. Mere la'pa itlernohora Musa deullu-tatarni to'a, de la Uplerlawna gaini de it edon taplol ma'ta. 40 Hade pede mpuahniorta me! Yanhi'pa makwohorulu-ktatrulu lirni ntuin tar tiy miy. Har lirni re riwra: 41 "Mimkek kalwiedweda he' maka nhi'inde kwatei-kwahapra A li'ru. Hota miy mhiedu, noma mmiati pa mlia' ai mormiori ralamni. Yoma hota la' ler maka mmiormior mia'ta de, de hota A'g e tiepartarlia ghi' hadomdoma mak kodia miy lia kropna-krieutu luilui-nunuhru. La'pa riy rakot nohora hota Aghi' emkade tiy miy, ta'en niana mpiesiaya." Mitlina olek me mhioratreria samomuou." 42 Nakot pa nhorwua noma, la'pa Paulus nora Barnabas rlergot la gen miaka Yahudi rhi'a kreini-iskolli de, dewade riy mak kden la krei die rwak pa rrora nanpena rawali owa'an la Sabat mak kmai, totpena rhauri aplahwa wniahaur dodo'ona. 43 La'pa riy rlergot la krei die ralamni, noma riy Yahudi liawanni rora mak Yahudi atia', mak kla' oleka Yahudi kreini (agamni) rlernohor reria Paulus nora Barnabas. Makodia Uplerlawna lir kalwiedni ri, rwagahniort owa'ana mak klernohora re, totpena rapniapan rer miamain la Uplerlawna kalwiedni. 44 La'pa Sabat mak kmai owa'ana, de trema-trema riy honona mak kden la letlawan de rma ratlina Itmatromlawanni lirni-tunnu. 45 La'pa riy Yahudi ramkek nana riy liawanni rmai, dewade ir rahankeran doin (iri hati) la. Ir rwohor weyata-rtatar waniawua Paulusa, me rahmena-rapraiya hya' mak ha nakotkota re. 46 Mere Paulus nora Barnabas edonna rwadur la ltierni mak kaplola re pa rakot la re: "Uplerlawna Nhopan pa amakot nohor ulu Uplerlawna lirni-tunnu la Yahudi miy, mere mihmena mrieiniana, pede orgahami mtiut tiarga de, Uplerlawna edon Nwalir nian miy pia mliernana mormiori-dardiari plalahwa pa nodi liarni. Pa dodo'ondi amhoitio'or tiy miy, pa la' pa amakot nohora Uplerlawna lir kalwiedni la mak Yahudi atia'a re. 47 Yoma Orgahi-Orha'a Nhopna ami, Niwra: "Atiut olek miy lia lodna-hairi dom to'a, pa miodia la lelerni. Totpena miy er mak kodia mormiori-dardiari la noheri woru-lyanti nayanni."" 48 La'pa riy maka Yahudi atia' ratlin nana lira re, de ralamni rahepuepru pa ra'uli-rawed reria Orgahi-Orha'a, onnila E lirni. Ne riy maka Uplerlawna Nwalir oleka pa rlernana mormiori-dardiari plalahwa de, honona rpesiaya. 49 Orgahi-Orha'a lirni nwewar la noh de ewatni-lahwani. 50 Mere o'ta-mata mak kden la let de, rora patke'a marna-wuhura mak kamta'ata Uplerlawna re, Yahudi mniotni rodia lir yawewal yatyat la. Ir wal pia rhi'a kokokna-rariarin la Paulus nor Barnabas. Noma rhokar doinia irrora la' noh de. 51 Makodia Yesus lirni rora rlergot wa, noma rrora rkakan doinia lakni makamnu la riy mak kden hande, totpena rtutga Uplerlawna Nwayotli ira, noma rla'awa Ikonium. 52 Mere la'a Antiokia de makpesiay re ramuki-rahepru, me Uplerlawna Nhiw Lululli Nodi plolli la.
La'a Ikonium
1 Noma la' pa Paulus nora Barnabas rte'ela Ikonium dewade, hya' maka rhi' oleka la Antiokia de rhi' owa'an la hande, de rrora rla'awa la gen miaka Yahudi re rhi' kreini-iskolli, ne rodi plolli pa raltier niohor Yesus la' hande, reiniande makden Yahudi, me Yahudi mniotni atia'a, harahu rpesiay Yesus. 2 Mere Yahudi mniotni mak kahmena kpesiay re, rawewla maka Yahudi atia'a, pa rhi'a ralam mehra rer lia riy mak kpesiay lia Yesus. 3 Mere riy harahu rpesiaya, pede Paulus nora Barnabas rden la hande pa mahneka. Ne rrora rparan pia raltier niohora la'a Itmatromni Yesus wniahaurnu. Itmatromlawanni wal pia, Ntut muemna hya' mak ha rakotkota la' E ralam kalwiedni de, plola, yoma E Nal ir pa rodia plolli, totpena rhi'a-ryapia hihi'a-yapyapi mak kamehi-kayona, mak tutga Uplerlawna rurni-laini nhi'nande riy ema rtaplelleltarga. 4 Mere let de mniotni idma edonna ntelan nana-naut nan ida. Doma rler wut lia Yahudi mniotni, me dom de rher lia irrora. 5 Noma Yahudi mniotni, rora ir o'tani-matni, me Yahudi mniotni atia'a re, rla'a lira id pa rtota la klieratni, pa riwra ra'ala watu ra rwatliewur wenna makodia Uplerlawna lir kalwiedni rora re. 6 Mere makodia Uplerlawna lirni re ratlin nan hade pa rat niohor wal lia. Noma rawlari lia leta Listra me leta Derbe mak kden la Likanonia, ne rla' walia geni-tiena mak rehgorgor lia leta-leta re. 7 La hande, rakot nohor walia Kot Kalwieda-Paitiot de.
La'a Listra me Derbe
8 Noma muanke' id la Listra, de lakni nmati nod miemna la apun ralma pa edonna nala' taru, yoma lakni nakleh ruri. Riy de namtatna la hande, 9 pa natlin la Paulus wniahaurnu. Paulus namkek tutga riy de, Paulus nat niohor memna riy de npesiaya e lirni, pa hota ha nler la kalwiedni. 10 Noma Paulus nhaun pa nakot la: "Mupriri pia mtiutrier kdededa!" Dewade pleta-plet pa riy de naprir pia nala'awa. 11 La'pa riy rahu ramkek Paulus hihi'ini-yapyapni de, noma rhaun pa rawala Likanonia, riwra: "Marna-ornoha rhar pia rerun weee!" 12 Noma rpolga Barnabas della ir uplerni Seus, ne Paulus demade rpolga la ir uplerni Hermes, yoma e' ed mak kaltieri. 13 Makpolwunu-wakler la marna Seus mak roma polu-wak genni la leta gaini, nmai pia nodia lembu ltiata re, me au dieutu re pa nokria puohra. Niwa la'pa nlernohor wut lia riy mutlialawna re, pa la' pa nala limtutnu totpa rhi'a la nhioi-tniani la makodia Uplerlawna lirni rora re. 14 La'pa Barnabas nora Paulus ratlin nana hya' mak ha riwa rhi'a re, dewade rrora rlihira-rnaiya naniayarni, pa rawlar lia mutlialawna re letgarni, ne rhaun pa rakot la re: 15 "Hoi, nihya'pa miy mhi' ha rina?! Am di de rimormior ami, it rewre'wa pa tamneneha. Ammai handi, de amodia Kota Kalwieda-Paitiot tiy miy, totpena mhioitio'or doini-mtiahnei dioinia la mhioi-mtiania uplera mak edon kaplola, ne mai pia mliernohora Uplerlawna mak kden pa nodi liarni. Yoma E' de maka Na'ohi-na'ara nohkerna-lyanit marna, la'pa gera-tah'i nor wutga mniotni. 16 It upni-tgarni lerni de Uplerlawna Nhur niohora rimormiori la hairi-hairi pa rmor niohora kirkira-ralma-rior wamueheni, pa rpolu-rwak la atiehrani (uplerni). 17 Mere Uplerlawna nekane Nala lin nohora-mat nohora la inon wamueheni, totpena riy rlernohor E'a, yoma Nhi' kalwieda-paitiota mai ita, de e Nhuria otna la'a lyanti pa nturu, me tani nalgota wullu-we'elli mai pia treikia. Enala ya'ana-yemun mai ita pa niniha-malmial ita." 18 Mere lira-tunu emkade ho'mana, makodia Uplerlawna lirni rora re, nhi'pa trema-trema taken niana ir rwayotil nana limtut mak ha rala pa rhi' nhioi-tniani la ira, yoma rwaror ma'ta de irrora de uplerni-upmatni. 19 Noma Yahudi mak kden la Antiokia me mak kwatiawu Ikonium dom pali, rma rod nur lia riy liawanni makden Listra pa rawali totpa rler teman la Yahudi re owa'ana. Ral watu ra rwatliewur wenna Paulus, nhor nioma ra'ita la leta to'orni. Ratniekamde Paulus ha nmati oleka wa. 20 Mere la'pa riy mak kpesiay re e rtutrier niohor ma'ta, dewade naprir wia pa nler owa'an la leta ralamni. Repar dewade, nora Barnabas rla'awa Derbe.
Paulus nora Barnabas rawal lia Antiokia
21 La'a Derbe Paulus nora Barnabas rakot nohor Kot Kalwieda-Paitiot de, ne riy rahu rpesiaya Yesus. Nhor nioma rla'awa Listra pa nhorwua noma Ikonium, noma rla'awa leta Antiokia. 22 La'a leta-leta re de, rhi' aruria mak kpesiay Yesus re ihranu ralamni, ne rano'a-ra'atga rpa yana rwadur la pesiayni la' Yesus. Riwra: "Ina-nara ama-hyali, it di tlernan ulu mehra-mau liawanni, nanpena itler la Uplerlawna genni mak Enodi plolli pa emeka Ray." Emkadella makodia Uplerlawna lirni re wniatutnu-wniaye'eni la makpesiay Yesus la'a leta-leta re. 23 Paulus nora Barnabas rrana mak khi' o'tani-matni la' makpesiay Yesus re totpena rima-rima wokni o'tani-matni erla. Noma rsumbaini me ratahan lara pa rala o'ta-mata re la Itmatromlawanni maka ha rpesiay oleka de. 24 Nhorwua dewade Paulus nora Barnabas rodi liarni la Pamfilia, rleretia Pisidia. 25 Me rla' pa rakot nohora Uplerlawna lirni la'a Perga, noma rla'awa Atalia la eni wawannu. 26 Rden la hande pa rhopal pa rawal lia Antiokia. Let de ed maka ir genni ululu mak kal ir la Uplerlawna lo'mani ralamni, totpena rkari ahorga kniarni mak na'nama ha rkaria. 27 La'pa ha rte'ela Antiokia, noma rawoka makpesiay Yesus la hande. Ne rwahaur nohor hya' maka Uplerlawna Nhi' oleka la ira kniarni ralamni, de la'a emkameni la Uplerlawna Nhar tialan la riy maka Yahudi atia' totpena rpesiay Yesus. 28 La'a let de, Paulus nora Barnabas ror wutga makpesiay rden la hande pa mahneka.
Rwahu'ria ralma-riora la'a Yerusalem
1 Lera ida ne riy wo'ir meman pa rwatiawu Yudea pa rmai lia Antiokia, me rwatutga Yahudi atia'a mak kpesiay mai Antiokia de, riwra: "La'pa miy edonna mtiolliohora ma'ta Musa tatarni pa rsunta, de hota edonna mliernana mormiori mak kodi liarni." 2 Noka Paulus nor Barnabas rawenan toto' meman la re, la'a wniarorni-wnialaini re. Nhor diewade makpesiay Yesus la hande, retlia Paulus nor Barnabas, rora riy dom makpesiay makden Antiokia rewre'wa, pa rla'a Yerusalem totpa rora makodi Uplerlawna lir kalwiedni, me o'ta-mata krei rwahu'ru ralma-riora la'a sunat la hande. 3 Makpesiay Yesus mak kden la Antiokia rlidan nohora pa rlergot la leta, nhor diewade Paulus nora talanwalli re rodi liarni la'pa rlola Fenisia me Samaria. La hande rwahaur nohora Yahudi atia'a re ral oleka inonni pa rpesiay Yesus. La'pa ratlin nana kot de, de makpesiay re rahepur memna. 4 Rla' pa rte'ela Yerusalem, dewade makpesiay Yesus la' hande rreiniana-ra'nana nora kalwiedni. Emkade wal lia makodia Uplerlawna lirni me o'ta-mata krei honona. Noma rwahaur nohor la, hya' maka Uplerlawna Nhi'a-nyapia la ira kniarni ralamni. 5 Mere Parisi mniotni dom mak kpesiay oleka Yesus raprir pia rwahla mak ha rakota re. Riwra: "Riy maka Yahudi atia' mak kpesiay oleka re musti rsunta, me rlernohora Musa tatarni korni walli." 6 Noma makodia Uplerlawna lirni re, rora o'ta-mata krei rawok pa rwahaur nohora lirni ri. 7 Nalo'on meman la rwahu'ru ralma-riora, pa la'awa hohoni noma Petrus naprir pia nakot lirni: "Ina-ama ama-hyal miy re, it hononit tatg oleka la ler mak itto'or doini olek de, Uplerlawna Nwalir nian a lia hononmi, totpena a'g e mak kodia Kot Kalwieda-Paitiot della' riy maka Yahudi atia', totpena ratlina pa rpesiaya. 8 Ne Uplerlawna, mak katga riy ihranu ralamni de Ntutg oleka de Nreiniana ira, de Nal walia E Nhiw Lululli la ira, emekwalia maka Nal oleka mai ita. 9 Uplerlawna edonna Naheri-nahelta itor ira, pede Enamou-nawitna ira ihru kdeheni-ralma kdeheni, yoma rpesiay olekwa. 10 Pa dodo'ondi, nihya'pa miwa mikot la mak Yahudi atia' re, de hota rlernohora Musa deullu-tatarni honona, totpa rler la mormiori-dardiari plalahwa?! Wniarormi-wnialaimi emkade, reiniande hota Uplerlawna Nawenan tiy miy, onnila la'pa mhiopan pa rlernohora Musa deullu-tatarni honona, de mial owa'ana kwar werwerat la mak Yahudi atia'a. Kwar werwerat de it upni-tgarni, me it nek de taken niana takwar nana. 11 Yana itsopan pa rlernohora Musa deullu-tatarni honona, yoma it tpesiaya onnila Itmatromni Yesus ralam kalwiedni pede itler la mormiori-dardiari plalahwa. Mak Yahudi atia'a nek de emkade wali." 12 La'pa riy mak kden la yawoka-yale'u die ema rwun wuenna, Barnabas nora Paulus rwahaur nohora hya' maka Uplerlawna Nhi'a-nyapia la ira kniarni ralamni de, hihi'a-yapyapi mak kamehi-kayona (mujizat), mak ktutga Uplerlawna rurni-laini pede riy ema rtaplelleltarga. Hare honona de ir rhi' nana, yoma Uplerlawna hihi'ini-yapyapni la'a riy mak Yahudi atia'a. 13 La la'pa rwatia wniahaurnu, noma Yakowsi Nakot la re: "Ina-nara ama-hyali mitlina mai a'u. 14 Simon Petrusa na'nama nakot nohora la'a ler mak itto'or doini de, Uplerlawna Nala' ul pua Ntutga plollolli totpa riy ramkeka, de Nreililili-Na'mamuau niana riy maka Yahudi atia'a. La'a Uplerlawna wniarorni de, Nala riy dom to' pa rler wut lia E'a. 15 La' eda de, de naplol memna yoma makwohorulu-ktatrulu ror targ oleka wa. Yoma e rhorat targa emkadi: 16 "Hota A'uwali owa'ana. Pa hota A'uriri owa'ana Daud romni mak klitri. Napru'wu-namdierna, ne A'uyapi owa'an la genni. 17 Totpena riy korni re honona mana rma rahaka Orgahi-Orha'a, de riy honona mak Yahudi atia'a, mak Apuolu pa rler wut mai A'u. A' di de Orgahi-Orha'a. Hadi de A li'ru me hota Aghi' emkadi. 18 A'ukot targ olek hadella ululu." 19 Hade emkade, pede awuarora de, yana itsi'a riy mak Yahudi atia' re, maka rmai lia Uplerlawna limni ralamni, pa rlernohora Musa deullu-tatarni honona, nhi'nande rler la klieratni. 20 Mere ita'enyat nieka horta id la ira, pa takot nohora Musa deullu-tatarni ida-woru mak hota rlernohora, de de ya'ana-yemnu mak ha ral oleka la rhoi-rtani uplera-upmati, la' walia ha ihi mak edonna rotna tiernu de, yana ra'ana, me yan remun rarni. Ne yana ralira-raliai. 21 Musa deullu-tatarni ri hare ratlin nana oleka la'a ler ululu la'pa dodo'ondi. Yoma tatarni de, rpaikia la'a roma-lewu maka Yahudi re rhi' kreini-iskolli de ralamni la'a Sabat-Sabat lerni, ne ralde'eta la leta-leta re honona."
Horta la'a mak Yahudi atia'a maka kpesiay olekwa
22 Makodia Uplerlawna lirni, me o'ta-mata krei ror wutga makpesiay Yesus retlia riy ida-woru lia ir mutnu, mak hota rawal lia Antiokia, pa rlidan nohora Paulus nor Barnabas. Noma rwaliria Silas nora Yudas mak ha rpolga la Barsabas. Riy maroro'a ri de riy orkotkotni-ornananni la maka kpesiay Yesus no' Yerusalem. 23 Ral walia horta id pa ra rodia, de lirni emkadilla: "La'a riy honona tiy miy, ina-nara ama-hyali mak kwatiawua hairi-hairi dom to'a mak Yahudi atia'a, makpesiay mak kden la Antiokia, Siria me Kilikia.
Makodia Uplerlawna lirni amora o'ta-mata krei korni, a hononami makot kalwedo!
24 Amatlina de, riy doma mak kwatiawu ami e rtiy pia rhi' adwiorin miy, rnairia wniatut wamueheni nhi'nande miy ralammi worworga. Ami edonna mhopna hare. 25 Hade pede, amaltier olek pa ampaliri riy mak kmai tiy miy lia hande. Hota rmai die rora Paulus me Barnabas mak kden la a ralam mamni. 26 Paulus me Barnabas di, de er maka edon kwadana matmiati-molmuolu, onnila Itmatromni Yesus Kristus rerieini. 27 Amatlin de, riy mak ami edon mhopna rodia wniatut wamueheni tiy miy, pede amala Yudas nora Silas, pa rtiy miy die. Pena ira er mak kakota a lir mamni mak ed walia horat mak irodia de. 28 Uplerlawna Nhiw Lululli Natg oleka ne, a miana ampayow nohora, totpena yana amala deulu-tatra mak werwerta, mere amhorat to'a deulu-tatra ri to'a. 29 Deulu-tatra ri, de yana mi'in nana-miemun nana ya'ana-yemnu, maka ha rodia la nhioi-tniani. Yana mi'ina ha ihi, me yana miemun rar maka kwatiawua nhiuri-wnia'ana mak edonna rotna tiernu me rkokia apannu. Me olietmi la yalira-yaliai. La la'pa olietmi la maka amakota ri, de miy miplol olekwa. Emkade nekwa pa it kalwiedni." 30 Noka rano'a-ra'atga maka ha rhopan re pa nhorwua, na'nama maka ha rhopna re rla'awa la Antiokia. La'pa rte'ewa, noma rpolg awoka makpesiay Yesus mutnu honona, na'nama rala horat de. 31 La'pa makpesiay Yesus re rpaikia horat de, rahepur nohora meman la horat de lirni. Yoma horta lirni nla' nana ir ralamni. 32 Yudas nor Silas mana nhi'inde rakot nohora Uplerlawna lirni-tunnu pede ir wal pia raltieri plalahwa memna totpena rodia amni-hyalli inni-narni re la ga'a pa rparani. 33 La'pa Yudas nora Silas rwarin tiar pua lera na'ida-naworu, noma riy makpesiay lia Antiokia re, rhopn owa'ana rora rawal lia Yerusalem, me rano'a la'pa rwak kalwieda la mak khopna ira re. 34Mere Silas netlia lirni de hota e nwarin niek la Antiokia. 35 Noka Paulus nora Barnabas rwarin tiar wual lia Antiokia, rwatutu-rwaye'ela Orgahi-Orha'a lirni-tunnu rora riy liawanni mak kden hande.
Paulus nora Barnabasa rwahakar talla
36 Noma lera ida ne Paulus nakot la Barnabas niwra: "Hyalia, mai pia tawalia pa ttomra-tnaha it inni-narni makpesiay Yesus la'a leta-leta honona, mak itakot nohora oleka Orgahi-Orha'a lirni, totpena tamkek teka emkameni la ira." 37 Barnabas ralamni la teman la' Yohansi maka rwet walia Markus pa nodia. 38 Mere, Paulus nwarora de yan rodia Markusa, yoma ululu de Markus nahmena nora ir pa rkar wiutu pede nal tar olek ir la'a Pamfilia. 39 Noma Paulus nora Barnabas rawenan pa, nhi'nande rora rwahakar talla. Barnabas npolga Markus pa rrora rhopal la Siprus. 40 Mere Paulus na'ala Silas pa nora talla. Edonna rla' ma'ta de ama-hyali, ina-nar no' hande rsumbaini, pa rala irrora la Orgahi-Orha'a limni ralamni. 41 Noma rloh doin momuoga Siria nora Kilikia. Rrora rhi' aruri riy mak kden la hande pesiayni.
Timotius nlernohora Paulus nora Silas
1 Noka Paulus nodi liarni la Derbe nhorwua noma, Listra. La hande de, riy ida mak kpesiay Yesus nwawa Timotius. Inni de pat Yahudi ida makpesiay oleka Yesus mere amni de makden Yunani. 2 La'a riy mak kpesiay mak kden la Listra me Ikonium, de rwetwet nek la Timotius nanni, yoma ralamni kalwieda. 3 Paulus ralamni nod lia Timotius pa nora talla. Hade pede Paulus nsunta Timotius. Nhi' eda de yoma riy Yahudi mak kden la gen die honona ratga de Timotius de amni de makden Yunani. 4 La'a leta-leta maka ha rtomra-rnah'a re, de rakot nohora lira maka makodi Uplerlawna lirni ror wutga o'ta-mata krei la Yerusalem ha ret tiarg oleka re, la'a hya' maka yana ra'ana-remnu, me oliet ir la yalira-yaliai, totpena ina-ama ama-hyali makpesiay oleka re rlernohora hya' maka ha rhi' targ oleka re. 5 La' hade pede makpesiay Yesus re pesiayni yeher to'a pa naruri-na'orta, ne lera-ler nekpa makpesiay re rma ra'ititar rer lia liawanni.
La'a Troas de Paulus ndarat nana yamkeka ida
6 Uplerlawna Nhiw Lululli edonna Nwayow nohora Paulus nora Silas ra rhakra Uplerlawna lirni-tunnu la'a Asia yapatni. Pede yala'ani re rodi liarni la noha Firgia me Galatia. 7 La'pa rte'ela' Misia nhiakarni noma riwra rler la Bitinia yapatni, mere Yesus Nhiw Lululli Nleretia pa yana rla hande. 8 Hade pede rleretia Misia pa rodi liarni la Troas. 9 Nmel nana la Troas, dewade Paulus ndarat nana Makedonia mniotni riy ida naprir lia e gaini pa nwak lilili-mamuau lia niwra: "Ee, mtiulan pa mmuai handi pa mtiulan mai ami!" 10 La'pa ndarat nan hade, noma ampahi'a-mpayodi pia amodi liar mamni la Makedonia. Yoma la'a a hmuakur mamni amparora-mpalai die, Uplerlawna Nhopna ami er mak kakot nohora Kot Kalwiedni la riy mak kden hande.
Lidia npesiaya Uplerlawna la'a Pilipi
11 Amto'or la Troas me amhopal pa modi liarni la Samotrake. Ne repar noma amla'awa la'a Napolis. 12 Ampatiawu hande pa amla'awa letlawna Pilipi, la Makedonia yapatni. Pilipi de lodna-hairi Roma yapatni. Amparin tiar lia hande lera ida-wor wuali. 13 La'pa la'awa Sabat lerni, noma amla'awa gerlawna aratni la'a leta puohrani wali tio'ora, yoma amna'erit nana la hande, de Yahudi kniola tieru-niawur nehla genni etla. La'a gen die wal pia amamtatnami, ne amora patke' mak kawok la gen die pa maltieri. 14 La'a patke'a honona re, de riy id de rpolga la Lidia, makdena Tiatira ne kniarni de na'olu-nala'a kok ungu mak welli werta. Patke' di nhi'inde nkola tieru-nawur nehla la Uplerlawna. Noma Itmatromni hihi'ini-yapyapni pa nreiniana hya' maka Paulus ha nwatutu-nwaye'a la e'a. 15 E nor wutga rompalli honona re pa rharania. Nhiaranni nhorwua, noma Lidia nakot mai ami: "Nar miy re, la'pa miatga toto' memna a' di de riy mak kpesiay Yesus id a'u, de mtiulan pa tla tlola a ro'mu nayanni pleini." Nwakwak nekpa totpa amlola romni nayanni, pede ampayow pa mlernohora wakwakni.
Rho'la Paulus la roma nhio'la la Pilipi
16 La'a lera ida, amiwa mla mkola tieru-mawur nehla noma ampatrom nana patke' ata-wa'ara ida. Patke' de hegana nhu'ru ralma pa natu nakwiet nana hya'-hya' mak hota ktai ita, nhi'nande riy ral kupan la pede nodia unut lawan la upni-matromni re. 17 Hararar de nlernohor reria amor Paulus pa nhaunu-nhaunu niwra: "Hoi, hari de, Uplerlawna-Mempulwatnu mak kdella tutullu-lolo'oni hopopanni hari. Ha rmai pia rakot nohora loi-talla plele'era la ina-nara miy, totpena mlier la mormiori-lewlewna." 18 La'pa lera wo'ir meman pa hararar de polpuolu-hawaunia. Noma Paulus nwarora de lawan rehi, dewade Paulus napal tieman pa nakot la: "Ee, hegana mak khu'ru ralma patke' di, agala Yesus Kristus pa aghokar doin o' la'a hararar di ralamni." La'a mtatan de nekpa, hararar de nhiu'ru ralamni ema rho'or doinia la. 19 La'pa upni-matromni re rwarora de hota ir edonna rlernan kupan wa, noma rte'l la Paulus nor Silas pa ri'ita la ya'olu-yala'a geni, pa rodia la makodi plolli totpa retlia (ra'ursia) halli. 20 Rodia Paulus nora Silas pa rottiarga la o'ta-mata hairi Roma. Noma rakot la re: "Ri'a ri, makden Yahudi re. Rma rkokna-rrarin la let di. 21 Yoma rawewal wal riy pa rala nhiolli-lietni me deullu-tatarni pa rarehia deulu-tatra makden Roma ita. Mere ira deullu-tatarni de yan tatlin la, me yana tlernohora." 22 Riy rahu re wal pia rho'or temna Paulus nor Silas, ne o'ta-mata hairi Roma wal pia rhopan pa riy rlihira-rnaiya rrora naniayarni me rwanalga re. 23 Rwanalu rrora pa nhor nioma, rwi'ita rrora la roma nhio'la. Noma rhopan pa makhi'a o'tani la roma nhio'la, natiak matmiat memna re. 24 Yoma mak katiaka roma nhio'la o'tani namta'ata o'ta-mat leta lira nhiopanni, pa nreiniande la nwi'it wutu Paulus nora Silas la kokio'oni. Ne rnairi ranti pa rwutga rrora lakni. 25 La'pa edon nhal de, mela letargara Paulus nora Silas rtepartarlia sniumbaini, me ramuki-rahepur la wniahniara pa ra'uli-rawedia Uplerlawna ne riy mak ha rho'la taru re korni mana e ratlin rer wiali. 26 Plinu-plinnianamde noha nruru, (upkarururu) la'pa roma nhio'la wniatatgenni mana nwo'la-nwaini. Roma nhio'la nhiarni honona ema rhar tiar momuoga, ne riy honona mak ha rranit taru re mana ema rwe'er doin momuoga. 27 Mak khi' roma nhio'la o'tani nhed pua namat wa. La'pa namkek nana nhiari honona rahniari, dewade nleh dioinia wehla plalahwani pa niwa nwen inonni, yoma natnieka riy mak kahnio'la honona rawlar olekwa. 28 Mere Paulus npolliohora, nhaun pa nakot la: "Ee, yana mpuen inonmu. A hononami erla handi." 29 Roma nhio'la o'tani nwak ai (hulu) pa nawlar lia rialma, ne ndiwra-nda'al pa nwaltior tar lia Paulus nora Silas gaini ralamni. 30 Noma la nodia pa rlergota na'nama nakot la re: "Upa-matrom miy re, hota hya' mak aghi'a totpena alier la mormiori-lewlewna la' Uplerlawna gaini ralamni?" 31 Paulus nora Silas rwahla lirni: "Ama, mpuesiaya Itmatromni Yesus pa hota ommuori-mliewna, muor wutga rommu mniotni honona." 32 Noma Paulus nora Silas rakot nohora Orgahi-Orha'a lirni-tunnu la'a roma nhio'la o'tani de, nor wutga romni mniotni honona. 33 Noma la' mel de meman nekpa makhi' o'tani la roma nhio'la de nodia ir la' pa nohma dodioinia no'oni-rarni re kdeheni-ktiahlani. Nhorwua noma rharan miemna hare honona mak kden la rom de nayanni. 34 Nhorwua noma nodia Paulus nora Silas pa rla' pa nhoi-ntania ya'ana-yemun la e romni. E nor wutga romni mniotni honona, ralamni re rahepur memna yoma rpesiaya oleka Uplerlawna. 35 Repardoin, dewade o'ta-mata hairi Roma rhopan pa makodi keki-rautu rla rakot la totpena Paulus nora Silas rlergot la roma nhio'la ralamni. 36 Makhi' o'ta la roma nhio'la geni nodia kot della Paulus pa nakot la: "A o'ta-mat mamni, rhopan pa rollia u'pu-matro'mu la handi. Mlia'awa ler di wa. Mliola kalwiedni." 37 Mere Paulus nakot la makodi keki-rautu re: "Eh, Am di de makden lodna-hairi Roma molanni ami, mere edonna mhiudi-mpiar wali ami. Amlernana liwliwra-kakaklu la mutlialawna gaini ralamni, nhor nioma mrianti wali am lia roma nhio'la ralamni. Ne rhopan pa amla'awa, de edonna rkokan nohora ami?! Amahmena. Mhiopan pa o'ta-matmi re rmeh'a rmai handi pa ralgot ami!" 38 Polisi rla rakot lira rella o'ta-mata hairi Roma re. La'pa ratlin nana Paulus nor Silas, de lodna-hairi Roma upni-a'nani hare, dewade o'ta-mata re ramta'at wenna yoma hya' maka ir rhi'a re edon lol Roma deullu-tatarni. 39 Noma rla' pa ruh' idma-rrama liar la Paulus nora Silas, na'nama ralgota rrora la roma nhio'la de ralamni, na'nama rwak la pa rlergot la let de. 40 Paulus nora Silas rto'or la roma nhio'la, dewade rlola Lidia romni. La'pa rrora makpesiay re rwatrom la hande, noma ral owa'ana nnio'a-niat lia totpena rhi' aruri ir pesiayni. Nhor nioma Paulus nora Silas rwaran wa.
La'a Tesalonika
1 Paulus nora Silas rla' pa rodi liarni, la' pa rlola Ampipolis me Apolonia noma rte'ela Tesalonika. La hande de, gen miaka Yahudi re rhi' kreini-iskolli etla. 2 Pede Paulus nla'a krei die emolmolan wali maka nhi'inde e nhi'a la Sabat lerni totpa nora mak kden hande rwahu'ru ralma-riora no' Puka ralamni. Noma enhi' nan emkade la'a krei wotel ralamni. Nhapar rer lia hya' mak rakot targa la Puka ralamni 3 pa nwe'er nohora memna niwra: "Ina-nara ama-hyal miy re, Ray Makamori-Kalewan mak Uplerlawna Nano'tar die (Mesias), Uplerlawna Netlia pa hota Nler la yatlorni-yatra'ani pa Nmati, la'pa Nmori owa'an la matmiatni ralamni emekto'a rakot nohora la Puka ralamni. Ina-nara ama-hyali, dodo'ondi a'ukot tiy miy die, Yesus de Ray Makamori-Kalewna inhatta." 4 Noma riy Yahudi wo'ira rpesiaya pa rlernohora Paulus nora Silas, me emkade wal lia riy Yunani mutlialawna mak ka'unni-kamta'ata Uplerlawna me patke'a liawanni wali maka nhi'inde riy rwetwet ir nanni (orang penting). 5 Mere Yahudi korni re ralamni ramehra rer lia. Rpol wutga riy nhiol yata mak kdella ya'olu-yala' genni totpa rhi'a kokokna-rariarni. Pede letlawan de tetema kokokna-rariarnia, ne rawlar pia rler temna riy makpesiay id romni, nwawa Yason pa rahaka Paulus nora Silas totpena rodgiota la tio'ora, pa rapalia la' mutlialawna. 6 Mere la'pa edonna rwatrom nana Paulus nor Silasa, noma rte'la la Yason, me makpesiay riy wo'ir wal pia rodia pa ra'ita la o'ta-mata makodi plolli la let de. Rhaun pa riwra: "Am miy re, hari er mak khi'a kokokna-rariarin la' meni-meni. Dodo'ondi de, rmai wialia it letni di. 7 Ne Yason mana nreinian wali olek ir wa pa rden la romni. Ir honona edonna rlernohora deulu-tatra maka Kaisar (ray Roma) ha ntatar targ oleka la maiye lodna-hairi Roma, yoma irakota riwra: "Ray id ed ma'ta de nwawa Yesus."" 8 Lirni re rhi'nande riy rahu rora o'ta-mata makodi plolli la let de, pa rler wut niohora ira, totpa ralamni ramehra rer lia Paulus nor Silasa. 9 Hade pede o'ta-mat leta rhopan pa Yason nor wutga makpesiay korni re pa ral kupna ra rmolu-rmati, totpena rolin doinia ir la.
La'a Berea
10 La'a mel de meman pa makpesiay lia let de rhopan pa Paulus nor Silas rla'awa Berea. Rla'awa noma la'pa rte'ewa dewade, Paulus nor Silas rokria gen miaka Yahudi re rhi' kreini-iskolli. 11 Riy mak kden la Berea rreh wialia makden Tesalonika yoma ral toto' memna ralam kalwiedni pa rreiniana Uplerlawna lirni pa rahepur memna la yatlina, me lera-ler nekpa rpaik la Puk lawna, totpena rat niohora walia hya' maka Paulus ha nwatutu-nwaye'a re raplola. 12 Hade pede riy Yahudi harahu mak kden hande rpesiaya. Patke' Yunani liawanni maka rwetwet la nanni re, me muanke'a Yunani liawanni rpesiay wali. 13 La'pa Yahudi mak kden la Tesalonika ratlin nana Paulus e nakot nohora Uplerlawna lirni-tunnu la'a Berea, dewade rmai wia Berea pa rawewla rirahu rpa rawenan la Paulus. 14 Pleta-plet pa makpesiay Yesus mak kden la Berea rhopan pa riy wo'ira rlidan nohora Paulus la' eni wawannu, pa rokru leta Atena, ne Silas nora Timotius de rwarin tiar lia Berea. 15 La'pa rottiarga Paulus la Atena, noma mak klidan nohora re rawal lia Berea, me rodia Paulusa nnio'oni la Silas nor Timotius de niwra: "Hyal miy re, pleta-plet pa mimrio'a mai pia mhiapartikil nohor a'u."
La' Atena
16 La'pa Paulus e nwei reria Silas nora Timotius la' Atena de ralamni nmayo'a, yoma namkek la let de, de npenpuen niohora atiehra maka ha rhoi-rtania. 17 La hade pede la'a gen miaka Yahudi rhi' kreini-iskolli, Paulus nora Yahudi re rwahu'ru ralma-rior wut wual lia Yunani mak ka'unni-kamta'ata Uplerlawna. Emkade wal lia' gen miaka ha ra'olu-rala'a la mana Paulus nora makden hande, rwahu'ru ralma-rior la lera-ler neka. 18 Makwatutu-kwaye'ela mak kor la Epikuros, me mak kor la Stoa, rora Paulusa rawahla lira. Ir wokni de idma nakot la ida riwra: "Ee, riy di yatnu oke'a nmeh' to'a, mere nurnu lawna. Ha nakot nohora hya'a?" Dom rakot wali: "Yanhi'pa hadi e nakot nohora nhioi-tniania uplera-upmati hairi dom to'a?" Rakot emkade, yoma Paulus nwahaur nohora Kot Kalwieda-Paitiota la'a Yesus, me la' walia tmori owa'an la matmiati ralamni. 19 Noma rodia Paulus pa rla'awa wniatrom genni la'a wo'or ku'a. Gen die rweta la Areopagus. Rakot la Paulus la hande, riwra: "Tuna, amiwa mat wualia wniatutga warwuar muaka omukota re. 20 Yoma hya' maka omukota re de, amatlina, mere edonna nla'a wniaror mamni. Hade pede mukot teka nnia'eratni." 21 Rakot emkade, yoma riy honona mak kden la Atena di, me do'ona-dakna mak kden hande, nhi'inde ramtatan mamain pa ratlina wniatutu-wniaye'a maka na'nama iratlin nana noma rwahaur nohor walia. 22 Noma Paulus naprir lia riy mak kawok tar lia Areopagus de gaini, noma Paulus nakot la re: "Ama-hyal miy re, miy hononmi makden Atena miy. A'umkeka de la' miy wniehwami-liakatmi la'a hya'-hya' to'a, miy agammi de, edonna mhioratdoinia. 23 A'ulala' pa a'umkek la miy letmi di walli-walli de, umkek nana gen miaka mhioi-mtiania uplera-upmati. A'umkek wal lia' geni ida, de katri'ana ida. La katri'ana de rhorat targa riwra: "Rala la Uplerlawna maka it edon tat niohora." Ina-nara ama-hyali, Uplerlawna maka mkiola tieru-miawur nehla la, mere edonna miat niohora de, Hade ed maka a'ukota la miy. 24 E' ed mak Na'ohi-na'ara nohkerkeran di nor wutga mniotni honona. E' de Orgahi-Orha'a maka liwangenni ntut lia lyanti, me lia'arni nhapar rer lia nohkerna. E' edonan Ndella roma-roma nhioi-tniani uplera-upmati maka rimormiori rhi' nana. 25 Me E' edonna Nwak pa rimormiori rhima-rre' E'a, yoma E' nampena mak kala aran mormiori, me hare honona la'a rimormiori. 26 Ntawua rimormiori o'ta watu ida, (nwawa Adam) E' Nhi'a hairi-hairi honona, ne Nhi' pa riy rholi-rlet la nohkerkeran di wawannu tetema. E' wal pia ed maka ketlia ululu, moweni hota rmor lia, me rmati, me hota rdella hanmeni. 27 Uplerlawna Nhi'a-nyap hare totpena la'pa rimormiori e rwahak E'a, de hota irwatrom nan E'a la'a ler maka irwahaka. Mere plolli de, Uplerlawna edon olieta mai it inonni. 28 Emeka nhi'inde riy rakota riwra: "Itden la nohkeran di pa tmormiori, yoma E' ed mak kodi plolli mai ita." Emekwalima mak katu khorta puka, makden Atena di riwra: "It hononit di, E a'nani ita." 29 Ama-hyali miy re, onnila Uplerlawna a'nani ita, pa yana twarora de Uplerlawna emekwalia uplera-upmati maka ra' nana la leli-maha, la' walia watu maka rimormiori rhi'a pa rtot nohora yatnu pa rakoki-rayap niana. 30 La' lera maka itto'or doin de, ita hihi'ini-yapyapni podku-padku maka tsi' nana yoma taplin niohora Uplerlawna ralma-riorni, de Uplerlawna Nhortapling oleka la, mere dodo'ondi, Enhopan pa riy honona rhoitio'ora-rtahnei dioinia do'oni-halli. 31 Yoma Enet tiarg olek la' lera ida, de hota Enhudia noheri woru-lyanti nayanni la'a watghudi lokarni-npara la tatiaili lahannu. Uplerlawna Ntutg oleka riy ida pa hota Nhi' mak ktoran watghudi die. Uplerlawna Namori owa'ana oleka riy de la'a matmiatni ralamni totpena riy honona ratga de Uplerlawna ed maka Ntutmuata-nkewra'a riy de." 32 Noka la'pa riy re ratlin nana hota riy rmori owa'an la matmiati ralamni, dewade riy dom la hande rahe'i-ramalia Paulus. Mere dom pal pia riwra: "Tuna, ampak owa'an pa mpuahauria." 33 Mere Paulus nwatlirni pa rrena pleini, nhor nioka nla'awa. 34 Mere la' hande wal pia riy doma e rlernohora Paulus me rpesiaya Yesus. Ir de de Dionisius, id la o'ta-mat Areopagus me patke'a id nanni Damaris ne riy dom pali.
La'a Korintus
1 Nhorwua noma Paulus nlergot la Atena, ne nla'awa la leta Korintus. 2 La hande, Paulus nwatrom nana Yahudi ida nwawa Akwila, maka rmor lia Pontus. Akwila di de na'nama nwatiawua Italia pa nora patke'eni Priskila rmai. Rmai wia Korintus, yoma Kaisar (ray) Klaudius nhopna Yahudi honona rhargot la letlawna Roma. Noma Paulus la ntomar la irrora. 3 Nhi'noka nden wut lia hare pa rkar wiutu, yoma rora Paulus mensiarni re ramneneha. Kniarni re nhi'inde rala ha ulti pa rhi'a larma. 4 La'pa nhi'inde Sabat lerni, Paulus nla' mamain pa nor mak kden la gen miaka Yahudi re rhi' kreini-iskolli de rwahu'ru ralma-riorni. Paulus nakot nohora Uplerlawna lirni, totpena nhi'a Yahudi rora mak Yahudi atia'a rpa rpesiaya Yesus. 5 La'pa Silas nora Timotius rwatiawu Makedonia pa rmai wia, dewade lera-ler nekpa Paulus nakot nohora Uplerlawna lirni la'a riy Yahudi niwra: "Ina-nara ama-hyal miy re, Yesus de ed mak Uplerlawna Nano'taru pa Namori-nalewna rimormiori." 6 Mere nhi'inde riy Yahudi rhi' amola-ma'a mamainia, pede Paulus nkakan doini awu la naniayarni, totpa nhi'pa nakot la re: "Hoi, la'pa mlier la Uplerlawna niukamnu, de orgahami to'a. A'g edon gor la. Ler di pa nla nodi liarni de alia' uhak neka makden Yahudi atia'a." 7 Hade pede Paulus nhoitio'or la ira, dewade la' pa nwatutu-nwaye'ela roma ida mak kden la gen miaka Yahudi re rhi' kreini-iskolli de walli. Orrom de, de riy mak kola tieru-kawur nehla la Uplerlawna, me Yahudi atia' de. Rpol nianni de Titius Yustus. 8 Mere Krispus, makla' o'tani la krei nor wutga romni mniotni de, me makden Korintus riy rahu wal pia, la'pa ratlin nana kot maka Paulus ha nakot de, rpesiaya Itmatromni Yesus nhor nioka rharania. 9 La'pa la mela ida, Paulus ndarat nana lira ida, de nwatiawua Orgahi-Orha'a de Nakot la Paulus: "Paulus ee! Yan mumta'ata. Mpuahaur pa nodi liarni, yana mrie'nu. 10 Yoma A'g e gor o' talla. Riy id mana hota edonna nheik la inonmu. Mpuahaur pa nodi liarni yoma la'a let di, de rimormiori liawanni hota rmai lia A li'mu ralamni." 11 La hade pede Paulus nden nek la' Korintus pa anni id rehenu. Me nwatutu-nwaye'a Uplerlawna lirni-tunnu la ira. 12 Lerni la riy ida nwawa Galio nhi'a Gubernura la'a Akhaya, noma makden Yahudi re rla' lira ida, pa rlewria Paulus pa rodia la watghudi lokarni. 13 Rwaghala Paulus de riwra: "Tuna, riy di nawewla riy rahu totpena rkola tieru-rawur nehla la Uplerlawna mere wniatutnu edon nora Musa deullu-tatarni ramneneha." 14 La'pa Paulus niwra naltieri na'nama Galio nakot la re: "Ee Yahudi miy! La'pa hya' maka mimikota ri, de lira helkiai-hakpera id hadi, onde lira tniutin leta-wnienan marna id hadi, mana awuei pia mikot lir maranmi. 15 Mere lir di de, mikot nohora to'a riy nanni me lirni, me deulu-tatar wamuehemi. Pen orgahami mietlia. A'g e edonna wuayow nohora miy pia agetlia lira-tunu mak emkadi." 16 Noka Galio nhokargota re. 17 La' noma rirahu re rtorna Sostenes makla'a o'tani la krei die, pa rwanalga la mak ktoran watghudi pepanni gaini. Mere Galio edonna nhe'du nan memna ira yahak kahelli-kaha'arni re.
Paulus nawal lia Antiokia
18 Noma Paulus nalo'on ma'ta la Korintus, dewade nakot tar lia makpesiay nio' hande pa irwarini, noma e nora Priskila, me Akwila pa rhopal pa rokru Siria. Mere edon rhopal ma'ta de, Paulus liokarni ida la Uplerlawna nhorwua pa, ni'ir doinia moratnu la'a leta Kengkrea (nlernohora Yahudi deullu-tatarni). 19 La'pa nte'ela Epsus, noma Paulus naltarga Priskila, me Akwila ne nla'awa Yahudi kreini-iskolli genni pa rwahu'ru ralma-rior wut lia Yahudi mak kden hande. 20 Noka Yahudi rwak pa Paulus nalo'on taru plein la hande, mere nahmena. 21 La'pa emkade mere e nla'awa, de nakot tar lia re: "Ina-nara ama-hyali, la'pa Uplerlawna Nala a' pua amuormior die, hota a'uwali owa'an la handi." Noma nawliohor tar pua nha'at la kapli pa nla'awa. 22 La la' pa nerun la Kaisarea, noma nla'awa Yerusalem pa npahar tar lia makpesiay Yesus mutnu limni mak kden hande, noma nodi liarni la Antiokia. 23 La la'pa nden nek la hande la' lera ida-woru nhor nioka nla' pa ntomra-nnah'a la makden Galatia, me Firgia liewnu totpena nhi' aruria makpesiay lia hande pesiayni. 24 La ler de de, makden Yahudi ida mak ha rmori la'a leta Aleksandaria nwawa Apolsu, nmai lia leta Epsus. Apolus de riy mak katu pa natu naltieri, me nat niohor memna Puka lirni. 25 La' walia rwatutg olek walia pa nat niohora Itmatromni Yesus nhiornu-tnia'anu (loini-talanni). Apolus di nwatikil la wniatutu-wniaye'a la' Yesus. La'pa nwatutu-nwaye'ela Yesus wniatutnu-wniaye'eni de, edon nhala mere nat niohor to'a hya' maka Yohansi nwatutu la' lera maka nharani riy. 26 Apolsu nmai pia nwahauru la'a Yahudi kreini-iskolli geni ralamni de nurnu kerna la'a ltierni. Ne la'pa Priskila nora Akwila ratlin nana wniatutnu, noma rrora rodia pa rla'awa ir romni na'nama rrora rakot nohora Uplerlawna loini-talanni totpa rhaur la pa rhi' aplola hya'a mak nat niohora oleka wa. 27 Nhorwua noma Apolsu niwa nla'awa la Akhaya. Pede makpesiay Yesus la'a Epsus ntulan la e'a, de ra'enyatga horat la inni-narni makpesiay no' Akhaya totpena rreiniana Apolsu. Ne la'pa Apolsu nte'ela Akhaya ntulan memna riy maka Uplerlawna Nara'a-napalga pa rpesiay olek Yesus wa. 28 Yoma la'a nur kieranni, pede Apolsu nala Yahudi rella yawa, pa nterna pniok lirni-pniah'a wawni re la'a mutlialawna gaini. Ne Apolsu ntekal reria la'a hya' maka ha rhorat targa la Puk lawna ralamni, mak ktutga Yesus de Ray mak Uplerlawna Nano'taru pa Namori-nalewna rimormiori.
Paulus Kniarni la Epsus
1 La'pa Apolsu nden ma'ta la Korintus, de Paulus nlola Galatia me Firgia pa nmai wial lia Epsus. La hande de, nwatrom nana riy dom pali makpesiay. 2 Noma natiana re: "Ina-nara ama-hyali, miy mrieinian Uplerlawna Nhiw Lululli olekwa la ler mak mimpiesiaya?" Noma rwahla lirni: "Edonan ma'ta. Uplerlawna Nhiw Lululli de ami edonna matlin ma'ta." 3 "La'pa emkade de mimpiesiay hya'a la' ler mak rharani miy?" Rwahla riwra: "Ampesiay hya' maka Yohansi nwatutga." 4 Noma Paulus nakot la: "Ina-nara ama-hyali, lerni pa Yohansi ha nharania rira de, nakot la re niwra: "Mimhioitio'ora-mtiahnei dioinia oleka do'omi-halmi." Mere Yohansi e nakot walia la riy Israel, niwra: "Miy miana mpiesiay walia riy mak ktawli'iru mai a' di," hade de Yesus." 5 La'pa ratlin nan hade, noma rharania rde la Yesus nanni wawannu. 6 Ne la'pa Paulus nran limni la ir wawannu de, Uplerlawna Nhiw Lululli Nodi plolli la ira, noma rmeh'a raltiertieria la yawala mak ha raplinu, me rakot nohora kot mak rlernana la Uplerlawna la' ler de. 7 La' rawok ir de, de la'pa edon nhal de riy termida wehrani woru. 8 La'a wolla wotel ralamni de, Paulus edonna natota-nawawet lia riy ida ne naltier die nto'pi-ngauria lirni la mak kden la Yahudi kreini re, me nor ira rawahla lira totpena nhedu-ntehra ir la'a hya' maka e nakot nohora la' Uplerlawna Nodi plolli pa emek Ray de naplola. 9 Mere riy wo'ir erla hande, de rhi' ralam tehra pa rahmena rpesiaya. La'a riy honona gaini ralamni, de mak edonna kpesiay re rahe'i-ramalia hya' mak ha rwatutu-rwaye'a re la'a Uplerlawna, de hota Namori-nalewna rimormiori la'a Yesus wawannu. La hade pede Paulus nhoitio'or la ira, ne nora makpesiay Yesus pa rla'awa rialam la'a Tiranus wniatutnu genni. La' hande de lera-ler nekpa nora mak kden hande rwahu'ru ralma riorni. 10 Nhi'a-nyap niek emkade pa la anni wor muemna, pede harahu rehi mak kden la Asia yapatni la'a riy Yahudi, me Yahudi atia'a mana harahu ratlin la Itmatromlawanni lirni-tunnu mak ha rwatut lia re.
Skewa upni-a'nani
11 Noma Uplerlawna Nal Paulus pa nodia plolli, totpena hihi'a-yapyapi mak kamehi-kayona mak edonna tamkek taru (mujizat) de 12 hya' mak Paulus ha nnairia re emek lenso, rewa, la'pa rod harella mak kamehra-kamau re, de rleretnekpa rkalwied wa me hegana lo'orni-mawalli mana rlergot la riy mak hegana rodi plolli la. 13 La hande de Yahudi maka nhi'inde kalala' pa rhokra-rlaiya hegana-kawnu, yatni-rha'ani maka khu'ru ralma riy. Ratlin nana Paulus nakot nohora Yesus, na'nama irnair walia Itmatromni Yesus nanni pa ra rhokra hegana-kawnu re, riwra: "Amal Yesus nanni maka Paulus nakot nohora pa amhokar miy lia riy di." 14 Skewa, Yahudi ida, makla'a imam o'tani-matni ida, a'nani muanke'a riy wo'itu de mana rnairia Yesus nanni pa ra rhokra hegana-kawnu. 15 Lera ida ne, riwra rnairia Yesus nanni pa rhokar doini hegana-kawnu mak khu'ru ralma riy ida. Mere la'pa rhopan pa hegana-kawnu nlergot la riy de, dewade hegana-kawnu de nakot la riy mandiditu re riwra: "Hoi, agat niohora Yesus, me agat niohora walia Paulus. Mere miy di de, he' miy?! Uplerlawna edon Nala rurni-laini pa mhiokargot a'u." 16 Dewade riy mak ha nhiu'ru ralam de nkarma riy mandiditu re pa ramno'a-ramrara, me ratliawihi pa rawlar dioinia rom della. 17 Riy honona la'a Yahudi me maka Yahudi atia'a mak khol lia Epsus la'pa ratlin nana hade de honona ramta'at wenna. La hade pede Yesus nanni mana riy ra'unni-ramta'ata rhu'ru-rhelma. 18 Riy rahu mak kpesiay Yesus rmai pia rwahaur nohora do'oni-halli la' mutlialawna gaini, la'a hya' maka rhi' nan oleka wa. 19 Yoma nhi'inde nala' nohora hegana-kawnu me du'ula-we'erni. Noma rawoka pukni re honona, na'nama rtutnia la riy rahu gaini. La'pa rrekan nana puk ku'uni (notes) re honona welli werta, de kupan maha wawahra riwnu terampwolima, (de kupna-kai maka riy termida wehrani wonema rlernana la anni termida). 20 Emkadella Uplerlawna Ntutga preheni-mkaini (rurni-laini) la mak kden hande, pede Orgahi-Orha'a lirni-tunnu mana nwewar la gen die, me mak kpesiay Uplerlawna lirni re na'ititar rer lia liawanni.
Kokokna-rariarin lawna la Epsus
21 La' hade pa nhorwua noma Uplerlawna Nhiw Lululli Nodia Paulus pa netlia, de hota nleretia Makedonia, me Akhaya pa nodi liarni la Yerusalem. Noka Paulus nakot la makpesiay re, niwra: "Hota alia'awa Yerusalem nhor nianpena alia'awa la' letlawna Roma wali." 22 Noma netlia pa, la' riy woru mak ktulan la, de Timotius nora Erastus. Paulus nhopan pa rla'awa Makedonia, ne hota e nwarin tiar lia la'a Asia yapatni lera na'ida-naworu. 23 La' ler de, kniokna-riarin lawna la Epsus, yoma wniatutu-wniaye'a la' Yesus loini-talanni. 24 Yoma la'a let de, de riy ida makhuria mah wawahra nwawa Demetrius, nwewla rom ku'a-lewu ku'a mak ha rhoi-rtani la upler Artemis. La' mensiarni de nodia unut lawna la'a limni-rorni honona. 25 La' hade pede, nawoka-nale' momuowua limni-rorni rora makhuria mah wawahra honona pa nhar lirni: "Ama-hyal miy re, miatga la'a kniar di, pede itlernana kupna-kai. 26 Dodo'ondi de, mitlin nohora-miat nohora la'a Paulus lira kdiorni-kdieheni, de niwra nhioi-tniani miaka rimormiori ha rakoki-rayapi niana re, de hare honona rhala. Ne e' mana nreinian olek riy liawanni pa rlernohora e wniatutnu-wniaye'eni. Edonna nden la Epsus to'ola handi, mere trema-trema la'a Asia liewnu wali. 27 Hota ita kniarni de nteri-ntawa, me nodi it la nan yata. Hade edonna nmeh'a, mere upler Artemis roma nhioi-tniani lawanni wal pia riy edonna rwarekna, me hota riy rwatei-rwahapra upler Artemis tullu-petanni. Hota rhi' emkade, kennama nhioi-tniani die, ed mak ha ra'uli-rawedia la'a Asia la'pa noheri woru-lyanti nayanni." 28 La'pa ratlin nana lirni de, dewade ralamni ramehra pa polpuolu-hawaunia pa riwra: "Artemis mmuormiori! O' de, a atiehra mamni o'a, mai Epsus dilla." 29 La' pa kniokan lawan de nwewar la letlawna uhunu-ewatni-ewatni-lahwani. La' noma mak kawoka-kale' pua kokna-rarni re, rtorna riy woru. Id nanni Gayus nora id nanni Aristarkus, yoma ha rora de makden Makedonia mak nhi'inde rora Paulus rala' wutu. Rodia rrora pa rokria leta yawok genni mak inponni. 30 Noma Paulus niwra nlernohora walia ir rora pa nla'awa rialma, mere mak kpesiay Yesus la hande rahmena. 31 Makhi' o'ta-mata la'a Asia yapatni, mak kora Paulus rwatalla re, mana rhopan pa rakot la Paulus totpena yana Paulus nayamkek la gen die. 32 Edon nalo'on wali ne, mak kawoka-kale'u re rhi'a kniokan lawna. Polpuolu-hawaunia mere hya' maka rhaunu re, de edon ramneneha pa emeka riy mak kga'u. Riy harahu raplin niohora hya' maka rerieinian pede irawoka. 33 Noka Yahudi ral riy ida mak kwawa Aleksander la mutlialawna gaini, totpena nakot nohora Yahudi wniarorni-wnialaini me riy wo'ira nano'a-na'atga, de hya' maka hota nakot la re. Noka Aleksander nayer limni la mutlialawna gaini totpena ramolmuolga, totpa nlernana nhiapargeni pia nod niana Yahudi re la plol wawna. 34 Mere la'pa riy harahu re ramkek nana Yahudi eda de, dewade honona rahmena ratlin e lirni pede riarin taru riwra: "Uplera-upmati atiehra Artemis mmuormiori! Makden Epsus aran lawna o'a!" Rhaunu-rhaunu emkade pa la'pa edon nhal de jam woru. 35 Nhi'noka ama-yei leta mak kwatutu-kwaye'a leta pa'etnu-parahmani (yortulsi) nalina-nalera re, noma nakot la re: "Ina-nara ama-hyali makden Epsus miy, mhieri tlinmi-mtiatar matmi. Miy hononmi la'pa riy meni-meni miatg oleka, de Epsus nanpena let maka kawilla-kayomtia roma nhioi-tniani Artemis, me atiehra Artemis, (de watu lilili-mamuau) mak kwatiawu lyanti pa ktuini. 36 Riy id mana edon nwayotlia hade. Hade pede hononmi yana mkiokna-mriarni. 37 Dodo'ondi miodia oleka ir rora pa mmiai handi, mere a'utian tek miy. Hari mak kreyahru oleka genia ha nhioi-tniani, onde rapolu-raliella upler Artemis pede miodi mmiai a'u?! Mimiatga de hari edon rhi' hadomdoma. 38 Demade, la'pa hadom edon nla' nana Demetrius nor maktulla-makar lia e'a re ralamni, de rodi nieka lira-tun della' watghudi lokarni. Yoma o'ta-mata mak ktorna watghudi edonna rwayotlia re. 39 Ne la'pa hya' maka miy ralammi nala pa mhi'a la lira-tunu de, miodia la o'ta-mata mak nhi'inde rawoka re, totpena rhudia la watghudi lokarni. 40 Yoma la'pa mkiokokna-mriariarni emkadi, de hota o'ta-mata rtut it la mak khala. Ne hota itakleha wniatikilgeni kuku' pa ta twahaur la." 41 Nwahaur nohor la hare honona pa nhorwua, noma yortulsi nhopan pa mutlialawna re ranewar wa.
Paulus la nkar lia Makedonia me Yunani
1 La'pa kokokna-rariarin lawna la Epsus namtierun wa, noma Paulus nawoka-nale'ga makpesiay Yesus pa nala lira nnio'a-niat lia re pa nhi' aruria ir ralamni, nhor diemade nakot tar lia re dewade la' pa nodi liarni pa nla'awa Makedonia. 2 Nalala' pa ntomra-nnah'a la'a makden Makedonia liewnu pa nano'a-na'atga liawanni la makpesiay Yesusa, totpena yana rwadur la pesiayni. Nhorwua noma nodi liarni la Yunani. 3 Ndella Yunani pia nalo'on nana wolla wotelu. La'pa niwa nhopal la Siria, noma natlin nana makden Yahudi riwa rla' lir id pa rwen e'a. La' hade pede e netlia hota nawali pia la nlola Makedonia. 4 Sopater, Pirus a'nani mak kden la Berea la'pa ror rewre'wa Paulus talla. Emkade walia Aristarkus nora Sekundus riy mak kden la Tesalonika, me Gayus makden Derbe, Timotius, Tikhikus me Trofimus riy mak kden la Asia yapatni. 5 Irala' ulga am pia rwei lia' Troas. 6 La la'pa lerlalawna roti mak edonna rnairia tgo'a nhorwua, noma amhopal pa mto'or doinia Pilipi. Tre' ma'ta lera wolim pa amawok owa'an la Troas. Amparin tiar lia Troas krei id ralamni.
Paulus la ntomra-nnah'a la makden Troas la' ler hohoni
7 Krei lerni pa nmel wa, noma amawok pa ama'an rewre'wa emeka riy nora hyalli. Paulus nora rwahaur wutu, yoma hota repar de eniwa nla'awa. Paulus naltier niande la'pa mela letargara. 8 La' kamri gen nio' heyanna, nniawok gen miamni de, leler momuou lia' wa'du. 9 Tuwari ida nanni Etikhus namtatna la'a folla. Yoma Paulus wniahaurnu plahwa, noma tuwari die nhoki ntemna pa nanin tar muemna la folla nhi'noka ntuin pa nalla yawa. La rom tutul die dadanni wotelu. La'pa rmai pia irrana, de nmati olekwa. 10 Mere Paulus nerun pa nakowa la tuwari die na'nama nkorreria. Na'nama Paulus niwra: "Ee, yan mimta'ata, e nmormior owa'ana." 11 Nhor nioma Paulus nha'at owa'an la heyanan pa nhakra roti pia ira'an rewre'wa. Nwahaur pa nodi liarni la repardoin yawyawra, noma Paulus nla'awa. 12 Riy rla rottiaru tuwar diella romni yoma nmormior mia'ta, ne ralamni re rahepuepur memna.
Paulus ndella Troas pa nla'awa Miletus
13 Noma amha'at la kapli totpena amhopal pa mala' ulga Paulus la leta Asos. Mere Paulus nwaror oleka yala'ani onni, de e nlol keranni. La Asos nanpena Paulus hota nha'at la kapli pa nor rewre'wa ami. 14 La'pa ampatrom la Asos, noma amora Paulus mha'at la kapli pa amora mhopal pa mla'awa leta Metilene. 15 Amden la hande pa repar wa, dewade amhopal pa amte'ela' gen miaka kapal reria noha Khios. La'pa walin de amte'ela Samos. Lera id owa'an de amte'ela Miletus.
Paulus nano'a-na'atga makpesiay o'tani-matni
16 Paulus neti olek la, hota edonna nlola Epsus totpena yana nahe'i miamain la'a geni-tien mak kden la Asia. Nmahrur niohor totpena pleta-plet pa nla Yerusalem pa nlernana lerlalawna Pentakosta. 17 Hade pede Paulus nden la Miletus (pa niwa nala nnio'a la makden Epsus), pede nwaka o'ta-mata la' makpesiay Yesus pa rma rwatrom e'a. 18 La'pa rmai wia dewade Paulus nakot la re: "Am miy re, mimiatga emkameni la amuormior di, la' lera yanulu maka atie'ela Asia la'pa ntutu-nte'ela ler maka awuaran wa. 19 A'ului-unuhru nohora a nhiu'ru-a nhielmu, pa akar lia Itmatromni kniarni. Alier la yatyatni-halalli yatlorni-yatra'ani la'a Yahudi wniaror yatyatni mai a'u. 20 Mimiatga de a'g edonna umta'ata ukota la' miy, la'a hya' mak kodia unut tiy miy. Awuatutu-wuaye' tiy miy lia'a yawoka-yale'u lalawna gaini, me la'a roma-lewu. 21 La'pa Yahudi miy, la'pa Yahudi atia'a nhi'inde a'ukot mamain tiy miy, totpena mhioitio'ora-mtiahnei dioinia do'omi-halmi totpa mlier la Uplerlawna limni ralamni, me mpiesiaya Itmatromni Yesus Kristus. 22 Dodo'ondi aliernohora Uplerlawna Nhiw Lululli pa alia'awa la Yerusalem, me a'uplinga hota hya' maka aliernana la hande. 23 Agat tio'a de, la'a leta-leta re de Uplerlawna Nhiw Lululli Nakot targ a' pua hota alia'a roma nhio'la, me hota alier la kropna-krieutu. 24 Mere a'g edonna wuadan nohora a mormio'ru di, hornama akari ahorga kniar miaka Itmatromni Yesus Nal pa akaria ne, adien rer lia kniari pa la'pa la'awa a mormio'ru hohoni pa ukot nohora Uplerlawna Kot Kalwiedni-Paitiotni de mak kakot nohora Uplerlawna Nhi' samomuou lia rimormiori. 25 Atiomra-niah' oleka ina-nara ama-hyali hononmi, me a'ukot nohor oleka emkameni la Uplerlawna Nodi plolli emolmolla Ray ida. Dodo'ondi de, a'g edonna ghe'du nan miy wia, wniatroma-tniahnei edonan mai it wa. 26 La' hade pede a'ukota ploloi-plele'era la' miy lia ler di, la'pa miy edon mliernohor a lira-nnio'u pa hota la' ler ida mlier la yatyatni-halalli pa rrinnia miy lia ai mormiori ralamni, de orgahami to'a. 27 Yoma a'g edonna uwlar tiar lia a knia'ru maka a'ukot nohora tiy miy Uplerlawna ralma-riorni honona mak Enhopan pa awuahaur nohora. 28 Am miy re, yanin edonna-yamat edonna la' miy. Ne emolmolla riy mak katiaka nhi'inde natiak reria dumni, hota miy die la'a riy mak katiaka riy makpesiay Yesus. Hade pede mitiak makpesiay Yesus honona, maka Uplerlawna Nhiw Lululli Nal oleka la' miy pia mitiaka. Makpesiay ri, Uplerlawna Nala Wutmueha-Laimieha pa la'pa rtowr riarni, me Nler la matmiati-molmuolu ralamni totpena rla' E gahani. 29 Awuaran kuku' la handi, de hota riy rmai tieman tiy miy. Ne emolmolla ahpuora-ahdiawra rlihir matmata-rhaw riarara, ri'a re hota rhi'a yatyat la makpesiay re. 30 Ntawua krei mutnu ralamni nekane, riy wo'ir mana hota rakot nohora kot mak kodia lir kdiori. Ir rhi' emkade, totpena riy makpesiay Yesus rler la klieratni, me rlernohor re. 31 La hade pede yan mininmi la yatiaka. Mpiahniorta. La'a anni wotelu die ului-unuhru. Lera nhaur mela, edon rien a lia nnio'a-niat tiy miy hononmi. Emkade wal lia hota mitiaka riy makpesiay. 32 Am miy re, dodo'ondi de agotil miy lia Uplerlawna, totpena E' ed mak kwilla-kmata miy. Ne totpena mkiol pitpit lia E nehlani totpa yana mhiortaplinga mliernohora E Kot Kalwiedni-Paitiotni mak Nakot nohora oleka tiy miy wia, de emkameni Nhi' samomuou mai ita. Uplerlawna ed mak kodi plolli pa Nhi' aruri miy, ne hota mdiunit nana-mpietur nana ra'ani-pallu mak Enken tiarga la'a riy mak E Nhi' la E kamieheni. 33 Am miy re, la'a mormio'ru ralamni atiutg oleka talan tiy miy. Net niana-npat niana a wniaro'ru pa miala kupna-kai, hewewta-naniairi mai a'u. 34 Ne mimieh'a miatga de, ndella a ruri-lai wamueh'u, pa akar (ha ulti pa ghi'a larma) pa agala utu'tu agora a mutwua'lu mak klernohora a'u ya'an mamni-yemun mamni, hewewat mamni-naniair mamni. 35 La'a hihi'u-yapya'pu honona de, agal oleka talan tiy miy, de la'a kniar werwerta emkade de tkar pia tatwaran nana riy mak edonna ktaru me riy mak kakleha ruri. Ne yana tsoratdoini hya' maka Itmatromni Yesus Nmeh'a Nakot targ oleka wa, Niwra: "Italla riy, hota itlernana Uplerlawna ra'ani-pallu liawanni. Mere la'pa twei pia riy ral mai ita de itlernan to'a Uplerlawna ra'ani-pallu oke' nmeh'a." Mitlina oleka me mhioratreria it kalwiedni." 36 La'pa Paulus nwahaur pa nhorwua, dewade ir honona rewre'wa pa rwaltiora-rwaltieman pa rsumbaini. 37 Ir honona rko'a-rkakru me rhedge'du memna, me rkorreria Paulus pa rkinnia yoma niwa nla'awa. 38 Mak kwarini honona ralamni rmawal doin la, yoma Paulus niwra: "Hota miy edonna mimkek olek a wua." Noma rlidan nohora pa rottiarga la kapli.
Paulus nla'awa la'a Yerusalem
1 Noma amawliohor tar lia o'ta-mata la makpesiay Yesus mutnu makden Epsus re pa amla'awa. Amhopal pa modi liar mamni la noha Kos. Ne repar noka amte'ela noha Rodos. Amdella hande pa mhopal pa amla'awa Patara herni. 2 La'a Patara, noma amha'at owa'ana kapli ida mak kiwa kla'awa Fenisia. Ne amhopal pa 3 amamkek rer miemna noha Siprus dewade a kapil mamni nhalil niana Siprus la malwiru, mere modia liar mamni pa mdawar reria Siria. Noma kapil mamni natrernia watgornihini pa amerun la Tirus. Kapil mak amodia, nalernia yodni la hande. 4 La hande pa amla mtomra-mnah'a riy maka kpesiay lia Yesus, pa amora mparin tiar lia krei id ralamni. Onnila Uplerlawna Nhiw Lululli Nakot la re, hota Paulus nlernana yatyatni-halalli yatlorni-yatra'ani pede irano'a-ranatga Paulus, totpena yana la'a Yerusalem. 5 Mere la'pa a ler mamni ntu'tu la hande, noma amaltarga ira, ne mala' pa amodi liar mamni. Riy makpesiay mak kden hande honona rora hawni-a'nani rlidan nohora am pia amler la leta herni wali tio'ora. A honona mpaltiora-mpaltiemna la'a eni ga'arni pa msumbaini. 6 Nhorwua noma am idma nawliohor targ id pa irwarini, ne amha'at la kapli. Noma honona re rla'awa la ir romni nayanni. 7 Noka ampatiawu Tirus pa ammai wia la'a Ptolemais. La' hande de amla mtomra-mnah'a mutwual miamni makpesiay, totpa am idma nawliohor tar lia ida, noma ranet tiarga am lia lera ida. 8 Repar wa, dewade amha'at la kapli pa amhopal pa amla'awa Kaisarea. Amte'ela hande pa mla'a riy ida mak nhi'inde nakot nohora Uplerlawna lirni kalwiedni-paitiotni la riy mak edon ratlin ma'ta Yesus lirni-tunnu. Ha nwawa Pilipsu, noka amden la romni nayanni. E' wal pia ed maka ha rwalir wialia la'a riy mandiditu la'a Yerusalem, totpa nkar lia Itmatromlawanni kniarni ralamni. 9 A'nani hararara riy wogata. Itmatromlawanni Nal oleka ruri-lai penpuenu pa nhi'inde rakot nohora Uplerlawna lirni-tunnu maka Enalharia la' ira. 10 A ler mamni na'ida-nawor lia hande, noma makwohorulu-ktatrulu ida nanni Agabus nwatiawua Yudea pa nmai wia. 11 Nmai tieman la ami noma na'ala Paulus rewni pa Agabus na nwutga e inon wamueheni limni-lakni na'nama nror targa pa niwra: "Hadi ed maka Uplerlawna Nhiw Lululli Nakot targa, de rew di matromni hota rwutu-rkohoga la'a Yerusalem pa emek a'g e ghi'a di. Mak kwutu-kohu re, riy Yahudi me hota rala rew di matromni la riy mak Yahudi atia'a." 12 La'pa amatlin nan hade, noma amora a mutwual miamni re honona mak kden la Kaisarea mpak lilili-mamuau lia Paulus pa yan memmemna nhapar la Yerusalem. 13 Mere nakot mai ami: "Ina-nara ama-hyali, la'a hya' pede mkio'a-mkiakru emkadena pa la'pa mhi'a a ralmu nmayo'a?! Awuayow olek pa hota alier la wutwutu-kokgohu, me la'pa rwen a lia Yerusalem la'a Itmatromni Yesus kniarni wawannu, de a'g edonna wuadur nana pera ida." 14 Lirni emkade, pede ami edonna mpak owa'an pa yana nla'awa Yerusalem. Mere makot miwra: "Hya' maka Orgahi-Orha'a Nwarora-nwalaiya hota Nwayow pa rhi' nana-ryap niana." 15 Amden nek la hande, pa lera wo'ir memna, noma ampahi'a-mpayod pia amla'awa la Yerusalem. 16 Nhi'noka riy makpesiay wo'ir meman la Kaisarea, pa ror pa rottiar am lia' Manason romni. Yoma amparor olek pa hota amtaw tiar lia e' de. Manason de, de riy Siprus ida de, mahneka memna ha nlernohora Yesus wniatutnu-wniaye'eni.
Paulus nma ntomra-nnah'a Yakowsi
17 La'pa amte'ela Yerusalem noma a mut muamni mak kden hande rahepur nohor ami. 18 Repar noma Paulus nor am pia mla mtomar la Yakowsi. O'ta-mata la makpesiay Yesus mutnu re honona, erla hande wali. 19 La'pa Paulus nwak kalwied la ir pa nhorwua, noma Paulus nakot nohora hya'-hya' maka Uplerlawna Ntutga la e' pa nhi'a la riy maka Yahudi atia'a. 20 La'pa ratlin oleka Paulus wniahaurnu de noma honona re ra'uli-rawedia Uplerlawna. Nhorwua noma rakot la Paulus: "Heiwialia! Heiwia'lu erammu la'a temmu, yoma Yahudi riwnu-halli olek pa rpesiay Yesus. Mere ir honona de riy mak khu'ru-khelma matmiati lia Musa deullu-tatarni. 21 Ne dodo'ondi de, ratlina lir kdiori, de hyalia mpuatutga Yahudi honona mak kahulti-kahamra la'a hairi-hairi dom to'a, totpena yana rlernohora Musa deullu-tatarni. Ne ratlin nana heiwia'lu muala ralma-rior la ira, totpena yana rsunta upni-a'nani me yana rlernohora Yahudi pa'etnu-parahmani. 22 Plola pa riy Yahudi mak kpesiay oleka re hota ratlin nan la'a heiwia'lu ed olek la handi, pa hota itsi' emkameni mai ita? 23 Mai pia itsi' emkadi, totpa tler la kalwiedni. La' a mut muamni de riy wogata e rlokra-rhautu olek la Orgahi-Orha'a. 24 Pede dodo'ondi, omuora riy mandadata ri mlia' pa ra ramou-rawitna miy riewre'wa. Muala kupan pa raweli himimni-rere'eni pa rodia la imam totpena ri'ir moratnu re (emeka nhi'inde rhi'a, la'pa liokra ida nhorwua). La' emkade, totpena riy honona rat muemna la'a hya' mak iratlina re, de honona rhala. Yoma heiwia'lu nek de nlernohora Musa deullu-tatarni. 25 Mere la'a riy Yahudi atia'a makpesiay oleka Yesus de ami edon mpak pa rlernohora hade, yoma ita'enyat oleka horta la ira la'a hya' maka ha reti oleka wa totpena yan memmemna ra'ana-remnia ya'ana-yemnu maka ha ra rhoi-rtani lia uplera-upmati. Yan memmemna remun rara, me yan ra'an ha ihi maka riy edon rotna tiernu-rkokia apannu, me yan ralira-raliai." 26 La'a repar lerni noma Paulus nora riy mandadata re rla' pa ror rewre'wa Paulus pa ramou-rawitna inonni re. Noma Paulus nla'awa Uplerlawna roma kreini pa nakot nohor la imam, totpena lera wo'it owa'an nanpena yamou-yawitan de nhoru, me rima-rima hota rodia nhioi-tniani pa rala la Uplerlawna.
Rtorna Paulus la'a Uplerlawna roma kreini
27 La'pa la'awa lera wo'it pua nhi'pa nhorwua, de Yahudi mak kwatiawu Asia riy wo'ira ramkek nana Paulus la'a Uplerlawna roma kreini. Noma ra'hira riy rahu pede rtorna Paulus. 28 Noma rhaunu-rhaunu pa riwra: "Israel miy re, mtiulan nan mai ami ee! Ha rlerna inhattioo! E' ed mak kwatutu-kwaye'ela meni-meni to'a, pa riy honona edonna ratlin la hairi Israel, me yana rlernohora Musa deullu-tatarni me napolu-naliella Uplerlawna roma kreini. Ne yeher to'a nodi owa'ana riy mak Yahudi atia' pa rma rhi' akdeha-aktiahlia Uplerlawna romni mak kmou-kwitan di." 29 Rakot emkade yoma iramkek nana dodo'ona Trofimus makden Epsus de nor rewre'wa Paulus la letlawna ralamni, ne ratniekamde Paulus nodia riy de pa nla'awa la Uplerlawna romni kreini. 30 Letlawna mniotni honona kokokna-rariarin nohora re, rawlar tipru-warta pa rawoka. Noma rtorna Paulus ne ri'ita la tio'ora. Ler de meman pa rho'la Uplerlawna romni nhiarni. 31 La'pa riwra rwenna Paulus, dewade riy rla rakota mak kodia keki-rautu Roma o'tani riwra: "Ee! Makden la Yerusalem uhunu-riwni rler la yawenan lawna!" 32 Mtatande nekpa o'ta lawna nora makodi keki-rautu ror o'tani rhapartikil nohora la'a yawenan lawna genni. La'pa ramkek nana o'ta lawna de nora makodi keki-rautu rpitu-rkor pa rtopur pa rmai wia, dewade wnianalu la Paulus rho' taru. 33 Makodi keki-rautu o'ta lawna nhopan pa rtoran reria Paulus pa rrantia Paulus limni malwiru-malganna la mak katiaka riy woru. Noma o'tani de natiana: "Riy di de he'a? Hya'a pede emkadina?" 34 Mere riy mak kden hande rhaunu pa doma rakot emkadina, dom de rakot emkade. Kokokna-rariarin rehia pede o'tani de edonna nlernana he' ed mak khala. Emkade pede o'tani nhopan pa rodia Paulus la mak kodi keki-rautu yatiak genni. 35 Rodia pa rte'ela retna, noma riy rahu rod lia'-rod miaiya pa riwra rliwra-rkaklia, pede mak kodia keki-rautu re rakwara Paulus pa rhapet reria. 36 Riy rahu mak kokna-krarni re rlernohor reria Paulus pa rhaunu-rhaunu riwra: "Mpienan memna hade!"
Paulus nwak pa naheri-nahelta inonni
37 La'pa riwa rte'ela makodi keki-rautu yatiak genni, noma Paulus nakot la makodia keki-rautu o'tani: "Matroma, mpuayow pa ukot li'ru." Noma makodi keki-rautu o'tani nheduma pa natiana: "Eh! O muat niohora yawal Yunani? 38 Hade emkade de o' di de mak kmalawna hairi Roma o'a? Riy makden Mesir maka ktut iwarni-wo'orni, me nodia wlaria riy riwnu wogata mak kmalawna pa rler la wo'ora-kawru la' ler ululu?" 39 Mere Paulus nwahla niwra: "Edonna matroma. Riy Yahudi id a'u, makden leta Tarsus la' Kilikia. Let maka nakota-nanana. Mtiulan pa mrieinian a' pua ultier lia riy maka kokokna-rariarni re." 40 La'pa o'tani de nwayow nohora Paulus, dewade Paulus ntutrier lia retna na'nama nayer limni rla totpena riy harahu re ramolmuolga. Dewade honona ema rwun wuenna. Noma Paulus nnairia yawala Ibrani pa na naltieri pia nakot la re:
1 "Ina-ama, ina-nara miy hononmi maka aguh idma-riama lia'armi. Awuak pa agheri-ghelta a ino'nu la' miy. Awuak pa mtia'wa reri tlinmi mai a'u." 2 Yoma ratlina Paulus naltier die nnairi yawala Ibrani, pede yeher to' pa mtulu-mtie'ela re.
Paulus nakot la
3 "A' di de riy Yahudi id a'u. A i'nu ntor a lia Tarsus noha-rai Kilikia. Mere ramori-ralawna a lia mai Yerusalem la handi, me tungkuru Gamaliel mak kwatutga plu'unu-plehenu a lia' deulu-tatra maka Musa nala la it upni-tgarni. Emolmolan walia miy hononmi la'a ler di wali, aghu'ru-ghelam matmiati Uplerlawna deullu-tatarni honona. 4 Aniahora-niala'a la'pa awunu-wuenna riy mak klelernohora Yesus yala'ani de. La'pa patke'a rora muanke'a, honona rde atiorna pa awui'ita la roma nhio'la. 5 Imam o'ta lawna, me ina-ama honona mak ktorna agama watghudni pena rtutrier wial (saksi) pia rat niohora a hihi'u-yapya'pu. Yoma ir er mak kala horta-hairi pa agodia la Yahudi mak kden la Damsik. Atiorreria horat re totpena awuatorna riy makpesiay Yesus ne agodi muai Yerusalem di pa rukmua. 6 La' lerni mak a lia Damsik de, pa tre' ma't oke' pa alier la Damsik, la' lera nwawuau ro'onni, dewade plinu-plinnianamde tlen lawna ida layarni la lyanti pa nle'lu reri a'u. 7 Dewade a'upru'wu tar lia tani wawannu pa utlina lira id nakot mai a'u: "Saulus, Saulus ee! Hya' nrei pia omumuki-muma'al A'u?!" 8 Noma a'utiana: "He' o'a matroma?" "Yesus. A'g inhatti. Riy Nasaret mak omumuki-muma'al de." 9 Agor rewre'wa riy mak kden hande mamkeka tlen lawan de. Mere ir edonna rna'erit nana lir mak kaltier mai a'u. 10 Noma utian owa'ana: "Hota hya' maka aghi'a Matromlawnu ne?" Noma Itmatromlawanni Nakot mai a'u: "Mumat doin la pa mlier la Damsik. La'a hande nanpena Uplerlawna na Nakot o kniarmu." 11 A ma'tu npona, yoma tlena lipni-layarni nweyat targa. Noma a mutwua'lu re rnahemna a'u pua amler la leta Damsik ralamni. 12 Riy id la hande de nwawa Ananias. E' de riy plele'era ne natlina-natail la'a deulu-tatra Musa. La' walia riy Yahudi honona la'a Damsik de ratu ra'unni-ramta'ata de. Enmai pia namkek a'u, 13 noma ntutrier lia a wa'lu pa nakot mai a'u: "Saulus, hyalia, mpuer matmu." La'a mtatande nekpa umkek nan e'a. 14 Noma nakot mai a'u de niwra: "Hyalia, Uplerlawna la it upni-tgarni ed mak kwalir o' totpena omuat niohora E yala'ani. Ne totpa mumkek la Riy Ploloi-Plele'era mak Uplerlawna Nano'targa pa Namori-nalewna rimormiori me totpa mutlin nana E lirni. 15 Hota o' ed mak ktutrier (saksi) pa mukot nohora la riy honona la'a hya' maka mumkeka ne hya' maka mutlina. 16 Dodo'ondi yana ralammu worworga. Mupriri, ne mlia' pa rhara'nu. Mpuol lia Itmatromni, totpena Namou-nawitna do'omu-halmu.""
Uplerlawna Nhopan pa Paulus nakot nohora Yesus yala'ani la riy maka Yahudi atia'a
17 "A'uwal lia Yerusalem, ne la'pa asiumbain rer lia' Uplerlawna roma kreini, de Uplerlawna Nhiw Lululli Napenga a ralmu pa 18 a'umkek nana Itmatromni noma Nakot mai a'u: "Mupleta! Mliergot la Yerusalem diwa. Yoma hota riy mak kden la handi edonna ratlin la hya' maka omukot nohora la'a A wawnu." 19 Noma awuahla: "Edonna emkade Matroma, hota ratlin mai a'u, yoma irat muemna la a' die ed mak kwahu'ru Yahudi kreini-iskolli genni re pa atioran makpesiaya O'a re pa aliwra-kaklia re. 20 Nhi' wal pia Stefanus mak kakot nohora O lirmu de rwenan nana, de atiutrier wiali me awuayow wal pia rwen e'a. A'g ed mak katiaka mak kwenna re rayanni." 21 Mere Itmatromni Nakot owa'an la mai a'u: "Mlia'awa, yoma hota A'g ed mak khopan pa omlia'a gen miaka oliet memna, la'a riy maka Yahudi atia'a."" 22 Riy harahu mak katlina re edonna rwadur ma'ta la genni. Mere la'awa honi pa Paulus nakot nohora niwra Uplerlawna Nhopan pa Paulus nla nakot nohora Uplerlawna lirni la Yahudi atia'a, dewade rawenan doin la, nhi'nande rhaun pa riwra: "Mpienna, mpienna riy mak emkade. Yana twayow pa nmormiori." 23 Rawenan pa rhaun reri tio'owa, ne ro'lu rain lawan wamueheni re pa rkakna, me rnaklia koda-awu la' heyanna. 24 Dewade Komandan la makodia keki-rautu la Roma nhopan pa rodia Paulus la makodi keki-rautu yatiak genni totpena rnairi ha ulti pa rliwra-rkaklia ne ratian nohora plolli-halli. Hya' mak krei pede Yahudi re polpuolu-hawaunia re? 25 Mere la'pa rwutga Paulus pa riwa rliwra, noma Paulus nakot la o'ta-mata la makodi keki-rautu rahu ida mak ktutrier lia hande: "Hairi Roma deullu-tatarni nwayow nohora pa makden hairi Roma, la'pa edonna rat mua'ta plolli-halli de rliwra-rkaklia?!" 26 Makodi keki-rautu rahu ida o'tani natlin nana dewade nla nakota la e' o'tani niwra: "Matroma, hota itsi' hya'a? Riy di mak kden la hair lawna Roma id e'a." 27 Noma o'tani de nla'a Paulus de pa natiana niwra: "Mukot nohora teka, o' di de makden Roma id o'a?" Noma Paulus nwayowa niwra: "A' di de makdena hair lawna Roma molanni id a'u." 28 O'tani de nakot owa'ana: "La'pa agiwra u'itra-ulawan la Roma mutnu de, apuair werwerta." Noma Paulus nakot la: "Mere a' di de rtetia a horu-rki'ira a kliawtu la' Roma." 29 La'pa ratlin tutga Paulus lirni dewade makodia keki-rautu mak kiwra katiana Paulus plolli-halli re honona rwadura, ne o'tani mana namta'at wenan wali yoma e' ed mak kenia ranti la Paulus limni. Natniekamde Paulus de Roma atia' de.
Rodi Paulus la krei Yahudi o'tani-matni
30 O'tani la makodi keki-rautu re nahak pa nat muemna hya'a rerieini pa Yahudi rwaghala Paulus. La hade pede repar noma nhopan pa rpolga imam-imam o'tani-matni honona, ror rewre'wa o'ta-mata mak ktorna agama watghudni re korni honona pa rma rawoka. Me nwe'er doin Paulus pa nodia la ir honona gaini.
1 Noma Paulus namkek tutga ina-ama mak ha rpol niana re pa nakot la re: "Ama-hyal miy re, nodia pa ler di, awuarora de ukleh hal la Uplerlawna la'a a mormio'ru-dardia'ru ralamni." 2 Rnahmi rer lia lir de pede imam lawna, Ananias nhopna mak kaprir lia hande rkiria lo'mani (rpahara) la Paulus nurnu. 3 Noma Paulus nakot la imam lawna niwra: "Hota Uplerlawna Nwalo'ma o hgotmu, de (nurmu) yoma mputra-mpualka pa mtiot pa mhi' inonmu de riy plele'era. Mumtatan la hande pa muetlia a ha'lu, mliernohora Musa. Mere inon wamuehemu nek de muwlar dioinia Musa deullu-tatarni, pa mhuopna riy rwalo'ma a ga'yu." 4 Riy mak ktutrier lia hande riwra: "Yana muhe'i-mumalia imam lawna la Uplerlawna." 5 Paulus nakot la re: "Oh a'uplingoo! Ama-hyal miy re, a'uplinga de, riy de makla' imam lawna. Puklawna e nakota de: "Yana mihe'i-mimalia o'ta-mata hairi nayanni."" 6 Paulus nat niohora de la' mak kawok taru re, de riy Saduki, me riy Parisi erla pede Paulus nakot la mak kawok taru re: "Ama-hyal miy re, a' di de riy Parisi id a'u, me plola pa Parisi duratni-waitni a' di. Mimihak a plo'lu-a ha'lu la handi, yoma apuesiay hota mak kmati, hota rmori owa'ana." 7 La'pa nakot emkade dewade Saduki rora Parisi idma nod lia'a-nod miai ida, pa nhi'nande woka-le' die nwal lia woka-le'u wor wua. 8 Yoma riy Saduki ralma-riorni de mak kmati re taken niana rmori owa'ana, me Uplerlawna hopopanni-li'irnu rora hmuakarnu (mati lianu) hadamonna. Mere riy Parisi rpesiay hare honona de erla. 9 La'pa kniokna-riarni na'ititar rer lia, Parisi riy wo'ira mak kla'a makwatutu-kwaye'a agama raprir pia rawahla lira re. Riwra: "La'a wniaror mamni de riy di edonna nhala kuku' eti. Yanhi'pa hmuakarnu onde Uplerlawna hopopanni-lili'irnu ror toto' e' pa raltieri." 10 Yawenan lawan de pede makodi keki-rautu o'tani de namta'at pa yan kekwal die riy ru'uta-rtorna Paulus la letgara pa nhi'nande nmati. Pede e nhopan pa makodi keki-rautu re ra'ala Paulus la mutu letgarni pa rodia la ir yatiak genni (markasni). 11 La'pa lera nmel wa dewade Itmatromni Yesus Naprir lia Paulus onni me Nhar lirni niwra: "Mutehra ralammu. Emolmolla omukot nohora A'g olek la Yerusalem hota omlia mukot nohora wal lia letlawna Roma." 12 Repar doini de riy Yahudi rawok pa rpanulga nnia'ohma-nniakatni. Ir rlokar rwah'a inonni, riwra hota ir edonna ra'ana-remnu la'pa lerni pa edonna rwenan ma'ta Paulus. 13 Ir wokni-le'enu de de riy o'ta terampwogat rehenu. 14 Rla'a imam-imam o'tani-matni, me Yahudi in letni-am letni pa rakot la: "Am miy re, a hononam di, amlokra-mhautu oleka inon mamni hota ami edonna ma'ana-memun ma'ta, la'pa nte'ela lerni pa ampenan Paulus de. 15 Ne dodo'ondi de miora mak ktorna agama watghudni re korni mlia' totpena mpiak la makodi keki-rautu o'tani mak kwatiawua Roma, mpiak la e'a, pa nodia Paulus pa nma ntut gaini owa'an la miy, emolmolla miy miwra mitian owa'ana plolli. Ne la'pa la talan letgara nanpena ampenna." 16 Mere ira nnia'ohmani de Paulus narni a'nani muanke'a natlin nohora noma nla nakota Paulus la makodi keki-rautu yatiak genni. 17 Noma Paulus npolga makla' o'ta la makodi keki-rautu rahu ida, na'nama nakot la: "Tuna, mtiulan pa muodia tuwari di mlia'a miy o'tami de. Yoma e niwa nakot hadom la miy o'tami de." 18 Noma nodia tuwari die la'a o'ta lawna pa nakot la: "Ama, Paulus mak ha rho'la tar die npol pua agodia tuwari di pa amuai a'mu la' handi. E niwa nakot hadom la a'mu." 19 Noma o'ta lawan de ntorreria tuwari die limni pa nodia la wali pa natiana: "Omuiwra mukota hya' mai a'u?" 20 Noma tuwari die nwalolla: "Tuna, riy Yahudi re rna'ohma olekwa pa hota rwak la tuna totpa repar lerni de muodia Paulus la ina-ama mak ktorna agama watghudi re, totpena emolmolla iriwra ratiana plu'unu-plehenu owa'ana. 21 Yana mliernohora ir wakwakni de, yoma riy terampwogata rehenu e rwuw rer lia talan letgara pa hota rwenna la hande. Honona re rwalokr olekwa, pa hota edonna ra'ana-remnia hadoma la' ler maka edonna rwenan ma'ta Paulus. Ir honona e rwei tio' pa tuna nwayow nana ir wakwakni." 22 Noma o'ta lawan de nakot la: "Ama, yan memmemna omukot hadella' riy ida, maka mukot oleka mai a'u la ler di." Noma nhopan pa tuwari die nla'awa.
Ra'enyatga Paulus la Feliks
23 Nhorwua noma o'ta lawanni de npolga makodi keki-rautu o'tani woru pua nakot la: "Mpiahor doinia makodi keki-rautu riy rahu woru, rora mak kodia kuda ya'ara terampwo'itu, me makodia tera-ra'pa riy rahu woru pa rarian pa rla'awa Kaisarea la jam wosiewa mela. 24 Mial walia kuda pa Paulus nha'at la me mitiak kalwieda pa miodia la Gubernur Feliks." 25 Me Komandan nal walia horta id pa rodia. La horat de Komandana nakot emkadilla: 26 "Gubernur Feliks maka aghu'ru-aghelma (ahormata-kanala). Klaudius Lisias, awuak kalwieda tiy o'a. 27 Riy di, riy Yahudi rtorn oleka wa me tre' kuku' nekpa rwenna, mere a'uplet nohora a lidnu ne ulewna, yoma utlina de Paulus di riy Roma ida de. 28 La'pa agiwa gat wual lia' halli hya', pede agodi e' la Yahudi o'tani-matni mak ktorna agama watghudni. 29 Mere utlina de nakleha do'a-hala mak krei totpena rodia niukum matmiati onde rodia la roma nhio'la. Lir mak ha rodi re, de edonna tlernana la lodna-hairi niukamnu maka rdeul taru-rtatar taru. Mere rawo'or nohor neka Musa deullu-tatarni mak ir memeh'a nanpa rlernohora. 30 La' walia riy rma rakot mai a'u, de Yahudi re rna'ohma yatyatni la riy di. Hade pede aghopan pa rodia rmai wia tuna Gubernura. Ne aghopan wal pia mak kaklaka e'a re, ror wal pia, rmai totpena rakot nohora la'a hya'a rerieini pa e raklaka hadi totpena tuna nmeh'a natlin walia." 31 Noka makodi keki-rautu re radil doin wa. Ra'ala Paulus la mel de meman pa rodi rla'awa leta Antipatris. 32 Repar noma kud ya'ara lidanni nodia Paulus pa rodi liarni. Ne korni re rawal lia makodi keki-rautu yatiak genni. 33 La'pa kud ya'ara re lidanni nte'ela Kaisarea noma rodia horta pa rala la Gubernur, ne ral walia Paulus la. 34 La'pa Gubernur de npaikia horat pa nhorwua, noma natiana Paulus: "Ee, ompuatiawu hya' noha (propinsi)?" "Tuna, awuatiawua Kilikia." La'pa natga Paulus de nwatiawua Kilikia, 35 noma nakot la: "Emkadewa, hota a'g ed mak ketlia o lirmu-tunmu mere, twewiei niohora mak kaklak o'a re." Noma nhopan pa ratiak reria Paulus la ray Herodes romni.
Yahudi rodia Paulus la Gubernur Feliks
1 La'pa lera wolimni, dewade imam o'ta lawna Ananias nor nhielli-liarni o'ta-mata Yahudi re rwatiawua Yerusalem pa rla'awa la Kaisarea, rora mak kod lira ida nwawa Tertulus. Ir honona rla raklaka Paulus la Gubernur Feliks. 2 La'pa rpolga Paulus pa nmai wia na'nama Tertulus nteran Paulus la gubernura gaini. Tertulus niwra: "Matroma, la mahnek memna o kniukammu-tnio'mamu di nodia gen mamni la linni-lerni mounu-wahrani. Me la'a o ralma-riormu pa amler olek la kalwiedni. 3 Hare honona de amreiniana-ma'nana la o kalwiedmu mak amtutul rewre'wa, me ama'uli o'a la' hya'a-hya'a to'a. 4 Awuak pa matro'mu natlin dodo'on to'a lir mak amodi ri. Ne, totpa yana matro'mu kniarni namdierna. 5 Riy di de amdu'du nana-mreran nana ha do'oni-halli de, riy di ed mak kodia riwtu-hora. La' meni-meni to' pa ha nhi'a kokokna-rariarni la Yahudi makden hande, me nodgai lia woka ida mak klernohora riy id wniatutnu makden Nasaret. Ha wniatutnu-wniaye'eni de edon lola deulu-tatra Roma. 6 Rereh wiali e ntot pa nhi' akdeha Uplerlawna roma kreini pede amtorna. A wniaror mamni de pena ameh'a mhudia la a agam mamni watghudni lokarni. 7 Mere Komandan Lisias nwaruiya la ami. 8 Ne nhopan pa ma maklaka me mpatrom la matro'mu gaini. La'pa matro'mu nwahak hadi plolli-halli, de matro'mu nmeh'a natlina e lirni, hota mak ha nakota re de emekwalia maka makota ri." 9 Yahudi mak kden la hande rlernohora hya' maka Tertulus ha nakota re pa yeher to' pa rakot walia Paulusa yatni-halli.
Paulus naheri-nahelta inonni la Feliks gaini
10 Noma Gubernur de nran limni la Paulus pa nhopan Paulus pa naltieri. Noma Paulus nakot la re: "Agatga tuna ntorn oleka watghudi la'a noh di, de mahnek memna. Hade pede a'g edon umta'ata niahelta ino'nu la hal wawna la'a tuna gaini ralamni. 11 Pena tuna nmeh'a natiana rira totpa tuna nat niohora hya' maka a'ukota di naplola. De edonna narehelia lera termida wehrani woru mak klar olekwa de, alia kola tieru-gawur nehla la' Yerusalem. 12 Mak kwaghala a'u re, edonna rlernana Yahudi id mana gora pa mawo'ora, onde ramkek aghi' ma'ta woka-le'u id pa ghi'a kokokna-rariarni la Uplerlawna roma kreini, la' walia Yahudi kreini-iskolli genni re, onde la leta ralamni. 13 Hade pede ir mana edonna rte'la rer lia a li'mu la'a hya' maka irodia la tuna gaini. 14 Mere meman neka la, awuayow la' tuna gaini de plola pa aliernohora Yesus wniatutnu pa akola tieru-gawur nehla la a u'pu-tga'ru Uplerlawanni. Yesus wniatutnu de, Yahudi ri riwra nhala. Mere emekwali hare, apuesiay mia'ta hya' maka ha rhorat targa la Musa pukni me la'a makwohorulu-ktatrulu pukni ralamni. 15 Emek ir wali, a' muana gha'ara ino'nu la Uplerlawna, de hota riy honona rmor lia matmiati ralamni. Riy mak kaploloi-kaplele'era me riy mak khi' do'a-hala mana hota rmori owa'an la matmiati ralamni (totpena hota Uplerlawna Nhudi riy honona la watghudi lokarni). 16 La'pa hade pede aniaduran meman la ralma mou-witna la'a Uplerlawna ne uploi-uple'er meman la rimormiori. 17 La'awa anni wo'ira, de a'g edonna dien la Yerusalem. A'uwal lia hande pa agodia kupan la riy Yahudi maka kakleha-kaplara. Nhi' wal pia agodi nhioi-tniani la Uplerlawna. 18 La'pa a'g e ghi' rerer mia'ta hade, dewade irwatrom a lia Uplerlawna roma kreini pa aghi' ahor muemna yamou-yawitna, de riy rahu edon ror a'u, me kokokna-rariarnia edonan la hande. 19 Mere la Yerusalem, de Yahudi riy wo'ira erla, mak kwatiawua Asia yapatni. Toto'a, de hare er mak krei pia riy rkokokna-rrariarni. La'pa ir riwra rwaghala a' die, hota ir nekpa rod a lia tuna gaini. 20 Onde mak kden la gen di, dodo'ondi rakot memna a ha'lu mak ina-ama Yahudi rlernana la'a ler maka ir rodia a lia mak ktorna agama watghudni gaini. 21 La'pa a'g edonna ghal de, e rte'la rer lia a li'ru la'a mak aghaun pa ukota la hare gaini giwra: "Miod a lia watghudi lokarni la ler di, yoma apuesiaya la rimormiori mak kmati olekwa mana hota ramori owa'ana."" 22 Feliks di nat niohor oleka liawanni la Yesus wniatutnu-wniaye'eni. Noka niwra: "Hadewa pleini. Itwei pleinia Komandan Lisias nmai nianpena agetlia o plolmu-halmu." 23 Nhor nioka nhopan doinia perwira mak katiaka Paulus de totpena yana nolin doinia Paulus mere yana nanetia (nlarna) Paulus pa nora mutwualli re idma namkek la ida totpa rtulan la e'a.
Rodia Paulus la Feliks nora Drusila gaini
24 La'pa lera wo'ir dewade Feliks nmai wia nor rewre'wa hawni Drusila makdena Yahudi ida de. Noma Feliks nhopna rla rpolga Paulus totpa nmai, pa nakot nohora pesiay lia Ray mak Uplerlawna Nano'targa pa Namori-nalewna, de Yesus. 25 La'pa natlin nana Paulus nwahaur nohora la'a ploloi-plele'era nhioli-lieta, ne tatehra it ralamni la do'oni-halli, ne nakot walia hota Uplerlawna Nhudia it hononita la watu lokarni me Npara la tatiaili lahannu. Feliks natlin nana, dewade ihranu ndiwra pa niwra: "Emkade de, hadewa plein la o wnialolmu pa yana plahwa, plet pa muprir pia mlia'awa. La'pa a'uhe'i miamain nanpena apuolg o'a." 26 Feliks wniarorni de hota nlernan kupan la Paulus. La' hade pede nhi'inde npolga Paulus pa rwahauru. 27 La'pa anni woru rtaw doin la dewade Perkius Festus nherun-nwauga Feliks la Gubernur. Ne yoma Feliks niwa nwokmarga riy Yahudi re ralamni pede nahmena nalgota Paulus la roma nhio'la ralamni.
Paulus naheri-nahelta inonni la Gubernur Festus gaini
1 La'pa Festus na'nama lera wotellia' propinsi de pa nodi plolli la, dewade nden la Kaisarea pa nokria Yerusalem. 2 Noka imam-imam o'tani-matni rora Yahudi in letni-am letni raklaka Paulus la Festus. 3 Mere rnori-rtama Festus totpena Festus nhuria ralamni pa nhopna riy rodia Paulus la Yerusalem. Yoma rna'ohma olek pa totpena rwenna Paulus la talan letgara. 4 Mere Festus nakot la re niwra: "Paulus e nahnio'la ma'ta la Kaisarea pa hota edon nalo'on wali ne a'uwal lia Kaisarea. 5 Ne emkadella pa miala o'ta-mata wo'ir pa ror a tialla la' Kaisarea totpa rto'on reria Paulus la a ga'yu pa tamkek teka he' mak khala." 6 La'pa Festus nden nek la Yerusalem pa hota lera wo'awa, onde termid owa'ana nanpa nawal lia Kaisarea. La'pa nawal lia Kaisarea pa repar dewade nhopan pa rpolga Paulus pa nma npesiar la Festus totpena rhudi-rpara. 7 Paulus nmai wia dewade Yahudi mak kwatiawua Yerusalem re rpepan nana pa rakota lira-kdiori werwerta. Mere riy id mana edon nakot nohora Paulus halli onni, yoma hare honona de ha wniaror nan to'a de. 8 Paulus naheri-nahelta inonni pa niwra: "Tuna, la'a Musa deullu-tatarni de a'g edonna ghelkiai me la'pa Uplerlawna roma kreini nora ray Roma hairni mana a'g edonna ghakpera." 9 Mere Festus nwarora pa nwokmarga Yahudi re pa natiana Paulus niwra: "Ompuayow de muor a' tialan pa tla'a Yerusalem totpa rhudi lia a ga'yu la' lir mak ha ra rto'on reri o'a re?" 10 Paulus nwalolla: "Tuna, dodo'ondi de a'getla watghudia ray Roma, pa agatga de watghudi lioklokarni e' inhatti. Me tuna nat muemna oleka la agora Yahudi re de, unhala-gemnhala, ukleh do'a-ukleh hal la re. 11 La la'pa aghelkiai-ghakpera deulu-tatra, ne aghi'a-yapia do'a-hal mak edon nlewan la niukum mak kodia matmiati, de aghuria ino'nu pa rla rukum pen a'u. Mere Yahudi ri rakleha nhiapargenni lia mai a'u. Riy id mana mak klernohora Roma deullu-tatarni ta'en niana nodi plolli pa notlia a lia ira. Dodo'ondi de awuak pa mua mpuesiar la Kaisar (ray liawna) la Roma." 12 La'pa makano'a-ka'atu Festus re rora raltier pia nhorwua, noma Festus nakot la Paulus: "Ompuak pa rodi o' la watghudi Kaisar pa ampayowa."
Festus nakot nohora Paulus la'a ray Agripa nora narni Bernike
13 La'pa edon nalo'on wali ne ray Agripa me narni Bernike rma rpahar la Festus limni la Kaisarea. 14 Rden nek la hande pa mahneka pede Festus nwahaur nohora Paulus lirni-tunnu la ray Agripa, niwra: "Hyalia, mai handi Feliks e ntahan targa riy id la roma nhio'la. 15 Ler adien la Yerusalem de, imam-imam o'tani-matni rora Yahudi ina-ama leta rwak pa agetlia riy de lirni-tunnu pa giwra e' de nhala. 16 Mere a'ukot la re: "La'a makden Roma taken niana ret wuamueh'a la lira-tunu ida pa rodia la nhio'la, mere ratlin walia mak khi' lira-tun die pa nakot nohora ha lolola, ne maka rto'on reri de naheri-nahelta inonni." 17 Pa la'pa rmai nioka, repar meman pa aghopan pa rpolga riy de pa rodia la ga'yu pa rhudia. 18 La'pa mak kaklaka re rtutrieri pa rakot lirni, agatniekamde hota rakot nohora riy de halli maka itwarora de nhala. 19 Mere ir yaklakni de rakot nohora to'a iror riy de ralma-riorni edon ramnehela ir agamni. Irawo'or nohora riy ida mak kwawa Yesus. Riy di Nmati olekwa mere, Paulus nakota niwra plollolli de Nmori owa'ana. 20 La' hade pede a wniaro'ru naktem la ir yaklakni la Paulus. Noma a'utiana Paulus la'pa nwayow de rla rpesiar la (rodi la watghudi lokarni la) Yerusalem. 21 Mere Paulus nwak pa nden nek la roma nhio'la pa nwei mieman pa Kaisar netlia lirni. La' hade pede aghopan pa yana nlergota plein la roma nhio'la ne nwei pia aliernana talan nanpena u'enyatga la Kaisar." 22 Noma Agripa nakot la Festus: "A' muana giwra utlin teka lirni." Festus niwra: "Dema repar nanpa tuna natlin lirni." 23 La'pa repar noma Agripa nor Bernike rmai die rtutga ir tullu-petanni. Rmai pia rodia liarni la mak ktorna watghudi tniau geni, me ror walia o'ta-mata lalawna la'a makodi keki-rautu me ina-am lalawna la'a letlawan de. Festus nhar lirni pa nhopan rodia Paulus pa rler la rialma. 24 Noma Festus nakot la: "Maran lawna Agripa nora mak kpenpuenu-knanaha mak utota-uwawa, riy di de, riy Yahudi liewnu rto'on reri hadilla mai a'u. Mak kden handi rora Yerusalem liewnu rteran nihini la hadi yaklakni. Rto'on reria me polpuolu-hawaunu nohora pa riwra: "Mpuenan memna hade!" 25 Mere a'g edonna liernan ma'ta la'a hya' totpena aghapar rer lia pa rodia la wniair wenna. Ne, enmeh'a nwak pa e lirni-tunnu di rodia la Kaisar pede aghopan pa ir rodia. 26 Mere a'g edonna wuahi' ma'ta a hortu-hai'ru pa a'u'enyatga la Kaisar totpa ukot nohora e yala'ani. La' hade pede atiut e' la tuna-tuna miy hononmi la' walia tun lawan mak ktoran reria lodna-hairi tuna Agripa. A ralma-rio'ru de totpa la'pa hadi nhor die de aliernan halli totpena akenia la horta. 27 Yoma a wniaro'ru de ita'enyatga riy mak khala ida pa la'pa rukmua de, itakot momuowua halli honona la' horta ralamni totpa rat mieman nohora."
Paulus naheri-nahelta inonni la hal wawna la'a Agrip gaini
1 Noka Agripa nakot la Paulus: "A'g ed mak khopan pa mhuar lirmu totpena mniahelta inonmu la hala." Noma Paulus nayer limni rla totpena nwak pa naltieri niwra: 2 "Marna-wuhura Agripa maka aghu'ru-ghelma tiutulu-ukwara (ahormata-kanala). Aliernana unut lawna yoma tuna meman pa mak khopna a'ultieri pia ukot nohora lira-tun muaka Yahudi ri ra rto'on reri mai a'u. 3 Uhepur memna yoma tuna wal pia nat momuou Yahudi re deullu-tatarni la'pa hya' ed maka nhi'inde ha rawo'or nohora. Pede awuak pa matro'mu ntulan pa natlin kalwiedweda lir mak a'ukota ri. 4 Yahudi honona rat niohor oleka a mormio'ru la tuwari lewatni la' adien ma'ta la let mak ha rmori a'u. Rat niohora walia la'a lerni la tuwari-lawer mua't a'u, de amuori-diari, me pueha-liawan nohora a mormio'ru la Yerusalem. 5 Yoma honona re rat niohora olek a lia mahneka memna ne la'pa riy id ir mana rwayow nohora, de ratga rakot nohora a nhio'lu-lie'tu la ulul geni, de aghi'a ino'nu emek riy Parisi pa aghu'ru-ghelam matmiati ir deullu-tatarni honona, mak ha ror taru-rtatar targ olek la a agam mamni. 6 Ne dodo'ondi pa uprir lia handi, de totpena rhud a lia watghudi, yoma apuesiaya nnielu-niau muaka Uplerlawna Nano'targa la a up mamni-tgar mamni. 7 Nnielu-niau die wal pia ed maka lodna-hairi termida wehrani woru la'a Israel e rwuwu-rwei reria, de hota Uplerlawna Namori owa'an riy mak kmati. Me rkola-tieru lelera-melmel la Uplerlawna. A'u muana wuwu-wiei nnielu-niau die, mere riy Yahudi ri rhapartiklia a pesia'yu di pa rwaghal a'u, tuna. 8 Nihya'pa ina-nara Yahudi miy ta'en niana mpiesiaya de hota Uplerlawna Namori owa'ana riy mak kmati?! 9 Ululu a' mueman nek de wuarora-wualaiya de aghi'a yatyatni hya' to'a pa atieri-tiawa etia Yesus mak kwatiawua Nasaret de wniahaurnu. 10 Ne naplol la hade yoma aghi' hadella Yerusalem. Ler de awuak horta mak ha rtapla hiwliai la'a imam-imam o'tani-matni. Riy liawanni mak Uplerlawna mutnu-rahanu, a'g ed mak ka'ita la roma nhio'la ralamni. Rerehniande a'g ed mak kwayow nohor pa rhudia la niukum matmiati. 11 Nhi'inde aniahora-niala'a riy liawanni la'a Yahudi kreini-iskolli genni re, me umuki-uma'ala totpena rtikil doinia pesiayni. A ralmu nha'ar doin meman la ira pa ghapartikil nohora memna la leta-let mak ha rden la hairi dom to'a. 12 Lera ida ne, de agodia horat maka imam-imam o'tani-matni ha rtapla hiwliai pa godi lia Damsik totpa umuki-uma'ala mak kpesiay Yesus re. 13 Ne la'pa adien ma'ta la talan letgara, de lera nwawuau ro'onni. Noma tuna, umkek nana wriai liawna id la lyanti de hitni-reparni rehia lera. Wriai hita-repar, de nle'lu rer a'u me riy maka agora talla re wali. 14 A honona mapru'wu la yawa. Noma utlina lira id nakot mai a'u de nnairia yawala Ibrani pa npol mai a'u niwra: "Saulus, Saulus ee! Hya'a nrei pia omumuki-muma'al A'u?! Pena orgahamu mumkek mehramu, yoma o matrommu ed maka ha mumuki-muma'ala de." 15 Noma utiana: "He' O'a Matrome?" Noma Itmatromlawanni Nwahla li'ru: "A' di de Yesus, mak omumuki-muma'ala. 16 Mumat pa mupriri. Atiutga ino'nu tiy o'a yoma Agiwra rian o' pa mlia'a hopopan mai A'u. Mlia' pa muod kot la riy dom to'a la'a hya' maka omutlin nohora-mmuat nohora ler di la A wawnu, ne la'a hya' mak hota Atiutga la o'a la'a ler li'iru. 17 Hota Agolin doin o' la'a hairi Israel me la' walia hairi-hairi dom to'a mak Yahudi atia'. Ghopna mlia' ir de 18 pa mpuer matni me mhu'ula tlinni re, totpena rhargot la melmelli pa rler la lelerni, yoma hegana amlawanni edon nodi plolli owa'an la ira, mere rler la Uplerlawna limni ralamni. La'pa rpesiay A'u totpena A'umou-uwitna do'a-hal maka ir rhi' oleka re, ne hota hare rwal lia Uplerlawna limni-rorni maka Ha Nwalir niana.""
Paulus nakot nohora e kniarni
19 "Tuna Agripa, aliernohor memna hya' maka aliernan oleka la Yesus lirni la yamke'ku de. A'g edonna ude'a Uplerlawna lirni la riy, 20 mere ukot la re totpa rhoitio'ora-rtahnei dioinia do'oni-halli re, me rma rodia inonni la Uplerlawna. Lera-lera nekpa hihi'ini-yapyapni nhiolli-lietni re ploloi-plele'era totpa rtutga la mormiorni-dardiarni ralamni, de rhoitio'ora-rtahnei oleka do'oni-halli pa rmai lia Uplerlawna limni ralamni olekwa. La'a hari de a'ukot ulga la Damsik, pa nhorwua noma la Yerusalem me la'a Yudea uhunu-ewatni me la' walia riy mak Yahudi atia'a. 21 La' hade pede riy Yahudi rtorna a lia Uplerlawna roma kreini, ne rna'ohma pa rwen a'u. 22 Mere Uplerlawna edonna Nolin limni mai a' pua, la'pa ler di de a'g e tiutrier mia'ta pa ukot nohora la riy lalawna honona, me riy ku'uni-ke'eni honona. La' to'a hya' mak a'ukota ri, de edonna nhal la makwohorulu-ktatrulu lirni, me la' walia Musa lirni, 23 de emkadilla, hota Ray mak ha rnel tiar die pa Namori-nalewna rimormiori de hota Nler la yamuki-yama'ala la'pa Nmati, me hota Enpanulga la Nmori owa'an la matmiatni ralamni. Totpa la' hade pa Enakot nohora Uplerlawna Kot Kalwiedni mak emolmolla lelerni totpa riy Yahudi me riy maka Yahudi atia'a rler la mormiori-lewlewna ralamni." 24 La'pa Paulus nakotkot reria nniaheri-nniahelatni de, dewade Festus nhaun pa nakot la: "Hoi, o e mga'u Paulusa. Lirmu-yatmu rodi olek o' la leplepa-kakakma pi'u-ga'u." 25 Mere Paulus nakot la: "A'g edonna ulepa-ukakma tuna. Maka ukota ri, de lira plola me ha rlergot lola o'ta kriahlu mak kamtemtemna. 26 Marna Agripa natga plu'unu-plehenu olek hare wa. La hade pede apuaran pia ukot momuoga a li'ru la'a Yesusa. Agatga de hari id mana edonna nayade' la matro'mu, yoma hari honona de edonna rhi'a la'a gen miaka kayade'a. 27 Marna-wuhura Agripa mak a'u'unni-umta'ata ghu'ru-ghelma (ahormata-kanala) la'a moratmu tutnu me lia'armu nayanni. Matro'mu npesiay hya' maka lerni la makwohorulu-ktatrulu rakot taru re toh?!" 28 Noma Agripa nwahla Paulus tianni: "La' o wniarormu de alia' agama Kristen de hakampa?" 29 Paulus niwra: "La'pa dodo'ondi me mahnek ma'ta, pena awuak la Uplerlawna totpena marna-wuhura nora tuna-tuna hononmi mak katlin oleka re, de awuak lilili-mamuau pua mliernohor a'u. Meman neka la'a ranti di, de taken niana mliernohor a'u." 30 La'pa nhorwua noma ray liawna, me Gubernur me Bernike me riy honona rtutrier pia 31 rla'awa tio'ora pa idma nakot la ida: "Riy de, edonna nhi'a-nyapia lira-tun muak kodia la niukum matmiati, onde rkenia la roma nhio'la." 32 Noma Agripa nakot la Festus: "Festus, plollolli de riy di rolin doinia la wa. Mere nwak olek pa rhudi-rpara lirni-tunnu la watghudi Kaisar, rieiniande hota nla'a Kaisar."
Paulus nwair watgornihini pa nla'awa Roma
1 La'pa retlia pa hota am mhopal la Italia noma rala Paulus nor wutga riy ida-woru mak kden la roma nhio'la la Yolius, makla' o'ta la makodi keki-rautu rahu ida (perwira). Makodi keki-rautu rahu ida re la resimen di nhi'inde rweta la Resimen Kaisar. 2 Amha'at la kapil mak kwatiawu Adramitium pa amloh momuoga hera-nan mak kden la Asia yapatni. Aristarkus makden Makedonia ida, nwatiawua Tesalonika pa nor rewre'wa wali am tialla. 3 La'pa repar wa de amte'ela Sidon. Yolius nhi' kalwiedweda Paulus, de nhur dioinia Paulus pa nla ntomra-nnah'a mutwualli mak kden hande, totpena niwa nwak hadom la re, de nlernana. 4 Ampatiawu hande pa amhopal pa nodi liarni. Yoma anni nlola a gai rieran mamni, pede ampapan nohora noha Siprus totpena yana amlernana anni. 5 Nhorwua noma amleretia Kilikia nora Pamfilia rletni pa amte'ela leta Mira la' Likia yapatni. 6 La' hande noma Resimen Kaisar o'tani de nwaten am lia kapil mak kwatiawu Aleksandaria ne mak kiwra nla'awa Italia. 7 Mahnek am lia nhiopal ralma, neknanamde amte'ela olieta la leta Knidus. Yoma anni lawan rehia, a kapil mamni nnera pa amlola wali tranan la noha Kreta, pa amleretia Salmone tutnu, totpena amayehew lia anni. 8 Yo'ora-anni natutga am lia noh de onni pa mahnek memna, neknanamde amte'ela geni ida nanni Her Linni. Edon olieta la leta Lasea. 9 Mahnek memna am lia nhiopal ralma pede la'pa amte'ela hande, de lerlalawna maka nhi'inde riy Yahudi ratahan lara nhorg olekwa, pede woki lerni oleka. Hota ami edonna mlernan oleka lina-lera la mai nhiopla emkadi, pede Paulus nala nnio'a-niat lia re niwra: 10 "Ama-hyal miy re, la a wniaro'ru de yana itsopal pa tod ita liarni. Yoma hota emkadi mamaini, de itlernana kowlora-pah'a meti. Hota it yodni-yalli rmolu me it kapalli niata. Rerehniande it aranni mana nmolu." 11 Mere perwir de npesiay tio'a yormudi nora orkapli ne edonna natlin la Paulus lirni kuku'a. 12 Pnialgen mak kden hande yata yoma kapli-kapli taken niana rapnial lia la'pa nmai lia woki lerni. La emkade pede kapli matrosni liawanni rwayow pa rhopal pa rodi liarni, yana rapnial lia pnialgeni die yoma riwra rtota pa rodi liarni la Feniks totpena rden nek la hande pa rawait nohora woki lerni nlardoinla. Feniks de pnialgenia mak kden la Kreta napal tiarga tranna-warta, nora ra'wiarta.
Me'et lawna-anin lawna lol lora
13 La' ler de de anni newnewlia tranan deulu pede mak kar lia kapli ratnieka e nalina pa rwairi owa'ana watgorniha pa rhopal pa rpapan nohora noha Kreta. 14 La'pa edon nalo'on wali ne anin lawna maka nhi'inde riwra kakmorna mak kwatiawua noha wali tipru, pa lol noha wawannu pa nmai die nodia oranni. 15 Yoma kapli ta'en niana nawtutg anni pa nhopal pa nodi liarni, de amolin doini kapli pa nner to'a pa nlernohora anni. 16 A kapal mamni nayahew nian olek la noha'na Kauda walli tranna, mere nhi'pa trema-trema am ta'eni amhed nian a iskut mamni. 17 La'pa amhedga kapli iskutni nhor diemade rnairi tali pa rala rewan nan kapli inonni pa ralla rhi' aruria de. Onnila ramta'ata ranera pa rnen tiar lia lai Sirtis, ralernia kapli larni ne kapli nnera pa nlernohora anni. 18 Yo'ora-anni yeher to'a na'ititar rer lia pa la'awa repar noma rhoplierliernia yohya'a kapli mniotni la tah'i lawna. 19 Lera id owa'an dewade mak kar lia kapli rmeh'a rhoplierliernia kapli manarni la tah'i lawna. 20 La' krei ida-woru rlardoinla ami edonna mamkek nana lera-wtiona, ne yo'ora-anni nten pia nodi liarni pede amparora de tah'i nlol oleka tier muamni. 21 Mahnek meman wal pia ya'an edonna-niemnu edonna. Noma Paulus la ntutrier lia hare gaini pa nakot la re: "Ama-hyal miy re! La'pa mliernohor oleka a li'ru pa edonna tsopal lola Kreta mana, it edonna tlernana ruki me riwtu-hora ri honona. 22 Mere dodo'ondi de awuak lilili-mamuau tiy miy yan mimta'at kuku' eti. Yoma la' miy hononmi de taken niana riy id mana nmati. Mere it kapalli di nanpa hota natniepar wehlihi me nadgaur wat muetma. 23 Yoma orawia umkek nana Uplerlawna mak akola tieru-gawur nehla de, me mak aghi' hopopan la de, hopopanni-lili'irnu nma nakot mai a'u. 24 niwra: "Paulus! Yan mumta'ata yoma Uplerlawna Netlia de hota o' mlia mpuatrom la Kaisar gaini pa netlia o plolmu-halmu. Me hota Uplerlawna ralam kalwiedni pa riy honona maka muora mhiopal wutu ri edonna rler la yatyatni yoma la o'a." 25 La' hade pede apuaran pia ukot miy, yan mimta'ata. Yoma apuesiaya Uplerlawna, de hya' to'a maka hopopanni-lili'irnu nakot olek mai a'u de hota Uplerlawna Nhi' nana-nyap niana. 26 Mere hota itakniekar la noha id metni wawannu." 27 Amloloi-mpalpial niana lera-mela pa termida wehrani wogata la'a Adria lorni. Edonna ghal de mela letgara ne mak kar lia kapli ra'eram nana kapli e nrehgor oleka noha metni kerna. 28 Pede rhurgernia watliota pa ra rlot haru kdielamni, de kdielamni re'a terampwogata. Edon nalo'on wali ne rlot owa'ana de kdielamni re'a termida wehrani wo'awa. 29 Pa ramta'at hota kapli nakniekar la nana wawannu noma ralernia watgorniha wogata la kapli li'irnu pa ra rpal tiarga. Me edon ranin matni pa rwei-rnara repar rauria. 30 Mak kar lia kapli rwaror wunwunamnu pa rawlar dioinia kapalli. Ralernia iskutni de rtot pa ralernia lol kapli gaini pa emolmolla e ralernia watgorniha. 31 Noma Paulus nakot la perwira nor wutga limni-rorni mak kden kapli niwra: "Ama-hyal miy re, la'pa mak kar lia kapli re rawlar dioinia kapalli di, hota miy hononmi edonna mliewan la matmiati." 32 La' hade pede lima-rora makodi keki-rautu re rtetietia iskuta talli pa nanera. 33 La'pa reprepar reria, dewade Paulus nhopan pa a hononami ma'ana-memnu. Paulus niwra: "Ama-hyali miy re, la'a lera-mela termida wehrani wogat memna de ama-hyali miy hononmi edonna mi'ina yoma mimta'at memna. 34 Pa a'ukot tiy miy, mi'in tek oke'a totpena mia'ala rurmi-laimi. Yoma hota hononmi mlier owa'an la kalwiedni me edonna hoho'a-wakwakmi la hanekneka." 35 La'pa nakot hade pa nhorwua noma na'ala roti na'nama na'uli-nawedia Uplerlawna la riy honona gaini pa nhorwua noma nhakre'era pa na'ana oke'ela. 36 Hononami mahmuakr owa'ana ne mor pa ma'an rewre'wa. 37 Riy honona mak kden la kapil de, de riy rahu woru terampwo'itu, wehrani wonema. 38 La'pa hononami ma'an pa mpeher wa, noma rhopliala kapli yodni wetra' lawna la' tah'i lawna totpena kapli napranrana.
Kapli nakniekra
39 La'pa lera matni npah'a dewade mak kar lia kapli ramkek noha nkerna-nhau mere raplin mua'ta hya' noha de. Ramkek nana her lelie'u id nora eni plalahwa. Ratekal pa ra rpal lia hande. 40 Noma rtetietia watgorniha re wogata talli pa rolin doinia la. Kopiau talli nek de rtet dioin wal lia. Nhor nia'nama rhedga lar no'a kapli gaini la heyanna totpena anni nodia la keranni. 41 Mere kapli nawa'u tar lia lai kierna wawannu nhi'nande kapli edonna nwo'la, pede li'irnu de yo'ora natipu-nato' weyata la geni. 42 Makodi keki-rautu re rwaror pa rwunu-rwenna riy nhio'la re, yanhi'pa rnan pia rawlari. 43 Mere makhi' o'tani la makodi keki-rautu re nodi etia ira wniarorni, yoma niwa nalewna Paulus. Nhopan pa mak katu knani rala' ul pua rnehgerun pa rnan lia keranni. 44 Ne totpa korni re rnan niohora kapli ananni, dom de rodi ordeulu-audeulu mak kdella kapli pa rmai lia keranni. La emkade pede a hononami mlewan la keranni.
La'a Malta
1 La'pa honona amlewan la keranni na'nama amatga de noh de nanni Malta. 2 Riy mak khol lia noh de ratu rholi-rlet la mai ami, de radunia ai pa amamriria, yoma otna nturu pa woki lawna. 3 Paulus nawoka ora-au pa nkenia la ai. Noma naplin niana niy ida nawrikgot la ai pahnani pa nihiya Paulus limni. 4 La'pa noh de mniotni ramkek nana niy die natniakloi lia Paulus limni noma idma nakot la ida: "Hei, matiala riy di mak kwunu-kwenna rimormiori id hadi. Yoma nlewan olek lol lora, mere hegana patke'a marna-ornoha (dewa) edonna nolin nihini la." 5 Mere Paulus nkakan doinia niy diella ai ralamni. Ne edonna na'eram nana mehrani wali. 6 Ir wniarorni de hota edon nalo'on wali ne Paulus limni npetna, onde plinu-plinnianamde hota Paulus nlitir pa nmati. Mere la'pa rwei pia mahnek rehia ne Paulus edon nlernana hadomdoma, noma rwaldioinia ralma-riorni pa riwra Paulus di, de hegan marna muanke'a ornoha ida di. 7 Edon olieta la hande, de Publius mak kodi plolli la noh de, nohananni id etla hande. Nrei kalwieda-paitiot nan am pia amden la romni la'a lera wotelu. 8 La' ler de de Publius amni e namehra-namau lia nnienia tema pniahna me wniahiwra-wnialalli. Paulus nla kamri pa namkeka mak kamehra de, noma nsumbain la, pa nran limni la wawannu noma nkalwied wa. 9 La'pa ornoha ramkek emkade noma mak kamehra-kamau honona rmai momuou pua Paulus nsumbainia re pa rkalwieda. 10 Rodia himimni-rere'eni mai ami me la'pa amiwa mhopal wa, de rodia hya'-hya' maka ampaka la ira, totpena la kapli de ami ma'ana lol lora.
Ampatiawua Malta pa amhopal pa amla'awa Roma
11 Amden la hande pa wolla wotelu, noma amhopal pa amla'awa amodia kapli mak kwatiawua Aleksandaria, mak kapnial niek la' noh de la'a woki lerni. Kapil de nnairia kniau mak kakot nohora hegana marna ornoha maka kadio'a, de Kastor nora Poluks. 12 Amhopal la'pa amapnial lia leta Sirkus pa lera wotelu. 13 Amden la hande pa amhopal la noha plahwani pa amla'awa Regium. Repar dewade anni nteni nwatiawua tranna, pa lera wor wua dewade amte'ela leta Putioli. 14 La hande de ampatrom nana riy ida-woru maka kpesiay Yesus. Noka rpolg am pia amden wut lia ira pa malo'on nana krei ida ralamni. Noma amokru letlawna Roma. 15 Makpesiay Yesus riy ida-woru mak kden la Roma ratlin nan am nioma rmai wia geni miaka kwawa Ya'olgeni Apius, me la'a gen id wali nanni Roma Tniau Geni Wotelu totpa rwatrom ami. La'pa Paulus nwatroma re, noma nwaka kalwieda-paitiota, me na'uli-nawedia Uplerlawna me ralamni naruri-nalai toto' la Uplerlawna.
La'a Roma
16 La'pa rte'ela Roma noma makodi keki-rautu o'tani nhuria Paulus pa nden la roma ida nor wut lia makodi keki-rautu ida totpena natiak reria Paulus. 17 La'pa lera wotel wua noma Paulus npolga Yahudi o'tani-matni mak kdella la gen die. La'pa rawok wa noma nakot la re: "Ama-hyali, miy hononmi. A'g edonna ghi' do'a-uyap hial la'a ita hair wali, la' wali a'g edonna udunti-uwetria ita deullu-tatarni mak itlernana la it upni-tgarni. Emkade ho'mana rtorna a lia Yerusalem pa rodi a lia riy mak kden Roma. 18 La' pa rhudia a lia o'ta-mat lalawna gaini mere riwa rol a lia yoma a'g edonna ghi'a-yapia do'a-hal mak kod a pua rukum pen a'u. 19 Mere yoma Yahudi rhoka-rhoka a'u, nhi'nande awuak de rod niek a lia mak ktorna watghudia la'a Kaisar Roma. Mere a'g edonna tio'ona a hair wa'lu. 20 Ne la' hade pede awuak pa itwatrom la handi pa twahaur nohora a wniu'tu-knioh'u onnila Ray mak kamori-kalewna Israel mak Uplerlawna Nano'taru rerieini." 21 Noma rakot la Paulus: "Ami edonna mlernan ma'ta horta-hairi mak kwatiawua Yudea pa nakot nohora o' la hadi. Yahudi id mana mak kmai oleka de edon nwahaur nohora o halmu wali. 22 Mere amiwra matlin walia omukot nohora pesiaymi de yala'ani. Yoma amatlin oleka de riy makden la meni-meni to' pa rhi' amola-ma'a o wniatutmu mak omuora mutmu re miodia." 23 Noma rora Paulus rna'ohma targa lera id pa rwatrom owa'ana. La' ler de de riy rahu rmai lia rom maka Paulus handella. Yawyawar ma'ta pa nodia pa lera nhierni, Paulus nwahaur nohor la emkameni Uplerlawna Nodi plolli de emekwalia Ray. Nwahaur de nahmir rer lia hya' maka ha rakot targa la Musa pukni ralamni me la' walia mak ha rhorat targa la makwohorulu-ktatrulu pukni re. Paulus naduran memna la totpena rpesiay Yesus de, Ray maka Uplerlawna Nano'taru pua Namori-nalewna rimormiori. 24 E rpesiay walia hya' maka Paulus ha nakota. Mere riy doma edonna rpesiay walia. 25 La'a wniarora-wnialai mak kapahokar tar die pa nreiniande ranewar wa. Mere edon rla' ma'ta de Paulus nakot nohora emkadilla niwra: "Emkadilla plollolli meman la Uplerlawna Nhiw Lululli lirni la it upni-tgarni. Yoma Uplerlawna Nhiw Lululli Napre'et Yesaya nurnu pa niwra: 26 Uplerlawna lirni: "Mlier pa mlia'awa mukot la hair di, hota mitlin pa nodi liarni mere miplinu-miplo'a. Hota mlina-miat reria mere miplinga hota hya'a de. 27 Yoma la'a hair Israel ri ra'o'ta tehra. Yatlinni nmanu wa me yamkekni npon wa. Rhi' emkadi totpena matni yan namkeka me tlinni yan natlina. Wniarorni yan naplahwa ne yan ralamni nakwiali pa nawal mai A'u totpena hota A'g ed maka khi' kalwieda." 28 Hade pede totpa ama-hyali miy hononmi miatga, de la mak ha rakot nohora la yamori-yalewna mak kwatiawua Uplerlawna (maka mihmena mitlina ne mliernohora), dodo'ondi alia' pa a'ukot oleka la hairi-hairi mak Yahudi atia'a. Ne hota ratlina ne rlernohora." 29La'pa Paulus nakot emkade noma riy Yahudi re ranewar wa de rawo'or nohora Paulus lirni. 30 Paulus nalo'on nana anni woru la' Roma, ndella rom mak orgahani npairia. Ralamni naple'er meman la riy rahu mak ktomra-knah'a e'a. 31 Nparan mieman la nakot nohora la emkameni la Uplerlawna Nodi plolli emeka Ray ne la'a Itmatromni Yesus Kristus. Paulus nakot nohora hare de edon namta'ata haneka-harah wawannu. Mere riy id mana edonna nhi'a yawuhi-yawe'eta la gaini.
1-7 Ina-nara ama-hyali miy hononmi mak kden la Roma! Mak khorat horat di, de a'u, Paulusa, mak kla' Yesus Kristus hopopanni-lili'irnu. Uplerlawna orgahani ed mak kwaliri-kwalioh nan a' pua Nhopn a lia ukot nohora Kot Kalwieda-Paitiota de, mak kwatiawua Uplerlawna. Kot Kalwieda-Paitiot de Uplerlawna ed mak kano'targ hade la' ululu memna la'a makwohorulu-ktatrulu (nabi). Ir er maka rhorat tar la Puk Lululli ralamni. La'a Kot Kalwieda-Paitiota de enakot nohora A'nani, Itmatromlawanni Yesus Kristus. La'pa tamkek la rimormiori wawannu, de E' de ray Daud duratni-waitni E'a. Mere la'pa tamkek la Orgahi-Orha'a, de E' de Uplerlawna A'nani E'a. Uplerlawna ed mak ktut muemna hade la' ler maka e Nnairi E Nhiw Lululli pa Namori owa'an Yesus la matmiati ralamni. Uplerlawna Ntut wualia ralam kalwiedni mai a pua Nwalir nian alia' mak kodia E lirni-tunnu, totpena hota awuatutu-wuaye'a hairi-hairi maka Yahudi atia'a re pa ratu ratlina-ratailla E lirni-tunnu onnila ir pesiayni la E'a, totpena Enlernana ya'uli-yawedi. Uplerlawna Ntutga ralam kalwiedni de mai a'u onnila Yesus Kristus hihi'ini mai a'u. Ne mak kden la Roma miy miana, Uplerlawna Npolg olek wali miy pia mlier teman la Yesus Kristus mutnu-rahanu. Pede ina-nara ama-hyali maka Uplerlawna Nsaynia, me maka Uplerlawna Npolga pa mhi'a E mutnu-rahanu, agal horat di tiy miy. Awuak de Uplerlawna, it Amlawanni de, Nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy.
Paulus ralamni nahepru onnila inni-narni la'a Roma pesiayni me niwra la ntomra-nnah'a ira
8 Ina-nara ama-hyali, maka a'ukot ulga de, onnila Yesus Kristus hihi'ini mai ita pede a'u'uli-uwedi it Uplerlawanni, yoma la'a meni-meni to' pa rakot nohora la'a miy pesiaymi e naruri olek la Yesus Kristus de pede riy ratlin nana. 9 Asiumbain de aghorat rer miy. Uplerlawna orgahani ed maka Ha Natlin reria li'ru ri. Id mana edonna u'itra-ulawna. Uplerlawan de ed maka aghima-rie'a E kniarni de agal toto' memna a ralmu pa agala ukot nohora Kot Kalwieda-Paitiota la'a A'nani Yesus Kristus. 10 Uplerlawna Nat niohor de nhi'inde asiumbain rer miy. Ne awuak de hota Uplerlawna Nal talan ma' a pua totpena atiy tiomra-niah'a miy. Yoma mahnek oleka la a'g edon liernan talan pa atiy. 11 Yoma awuakwak totpa alia' miy die totpena aghi' aruri miy pesiaymi. 12 A ralma-rio'ru de totpena a pesia'yu nod miy lia ga'a me miy pesiaymi de nhi' a pua uhepur nohora Uplerlawna totpena it rewre'wa pa idma nhi' arur nian ida. 13 Awuak de ina-nara ama-hyali miy hononmi totpena miat memna, de liawanni olek maka giwra tiy miy die, mere a'g edon liernan talla. Mere agiwra tiy totpena a li'ru-tu'nu nodi miy pesiaymi la ga'a pa emekwalima a knia'ru maka kodi olek riy maka Yahudi atia'a la'a geni-tiena dom to'a pa rla ga'a. 14 Yoma Uplerlawna Nhopan pa alia ukot nohora Kot Kalwied de la riy maka kwatiawua hairi meni-meni to'a, mak kla' olek la iskola onde mak edon kla' ma'ta, mak klernohora makden Yunani nhiolli-lietni me edonna. 15 La' hade pede awuakwak totpa alia ukot nohora Kot Kalwieda-Paitiot di tiy miy la letlawna Roma wali.
Kot Kalwieda Paitiot de Uplerlawna rurni-laini edade pa nod it la yamori-yalewna
16 A'g edon muola-mua'a la ukot nohora Kot Kalwieda-Paitiot de. Apuesiay memna, de kot de de Uplerlawna rurni-laini edade totpena na Namori-nalewna makpesiay honona, la'a makden Yahudi re, me makden la Yahudi atia'a wali. Kot Kalwied mak kodi yamori-yalewan de rakot nohor plein la makden Yahudi re nhor diewade la'a riy maka Yahudi atia'a re wali. 17 Kot Kalwied de Uplerlawna rurni-laini edade yoma la'a kot de Uplerlawna Nakot nohora emkameni la Enetlia rimormiori pa emeka riy mak kaplol la E yamkekni, totpena tora E' pa it idma nla'a-nmai id de la'a kalwiedni-paitiotni. Talla kmeheni de: itpesiay to'a la Uplerlawna. Hade emekwalima e rhorat targa la Puka ralamni de riwra: ”Riy maka Uplerlawna Netlia de ror E'a rkalwied owa'ana onnila ir pesiayni la E'a de hota rmormiori pa nodi liarni.”
Uplerlawna Nwaghala rimormiori yoma irat niohora E'a mere rahmena ra'unni-ramta'ata
18 Uplerlawna-Mempulwatnu mak kden la Ilwo'itu-Darwionema, Ilyamou-Watyatoha Nalharia oleka de, hota hankeranni-ralmha'arni ntuin meman la riy maka kahmena katlina-katailla E'a, me la' walia riy mak khi'a-kyapi do'a-hala. Ir hihi'ini-yapyapni yatyatni-halalli de nwal lia oruli-augewat la pa rahew niana rimormiori gaini totpa edon ramkek nan talla plollola la Uplerlawna. 19 Yoma rimormiori rat niohora Uplerlawna ed rer lia yoma Uplerlawna Nmeh'a neka ed mak kalhari olek hadella' rimormiori it wa. 20 Yoma la' lerni la' Uplerlawna Nakoki-nayapia nohkerna, Uplerlawna yehwani maka ta'en niana tamkek nana, de emekto'a E yehwa Uplerlawanni me E plolli-mneheni mak kodi liarni, de rimormiori rat niohora, yoma ramkek nana hya' ed maka Ha Nakoki-nayapi re. La' hade pede rimormiori ta'en niana rwatikil pa riwra iraplin niohora Uplerlawna. 21 Yoma plollolli de rimormiori re ratg oleka Uplerlawna etla. Mere hota emkade ho'mana rakleha nhiu'ru-nhielam ya'unni-yamta'ata la E'a, me rakleh walia nhiorat pa ra'uli-rawedia (rwak terima kasi la) E'a. Rwaldioinia de rimormiori wniarorni-wnialaini rwal lia makpodku, me ralma-riorni re rwal lia melmelli. 22 Riwra ir er mak katu, mere raplin nieka la podaknu lola lelli. 23 Ir edonna rkola tieru-rawur nehla la'a Uplerlawna-Mempulwatnu mere maka ha rkola tieru-rawur nehla la de, de uplera-upmati maka rna'ihla la rimormiori, ma'nu, hamormior miaka kodia lakni wogata, me toki mlawa, niy rehla mak kawrika-kawriai. Ir rhi'a emkade kennama Uplerlawna-Mempulwatnu ed mak kodi plolli pa nodi liarni mere rimormiori nora hamormior honona re hota edon nalo'on wali ne rmati. 24 La' hade pede Uplerlawna Nolin doini rla ralam wamueheni maka kodia ir la ralam yatyata maka kakdeha-kaktiahli re pede hota orgahi idma nhi'a la ida hya' mak kodi molmola-mama'a. 25 Hya' ed mak kaplola la'a Uplerlawna, de ir edon rlernohora, mere rwaldioinia pa rhi'a mak edonna kaplola. Ir edonna rkola tieru-rawur nehla la Makakoki-Kayapia nohkeran di nor lyanti, mere e ra'targho'ola mak Ha Nayap niana pa irkola tieru-rawur nehla la. La' plollolli de Makakoki-Kayap die nampena ed maka ra'uli-rawedia pa nodi liarni. Amin (Plola). 26 Rimormiori rhi' emkare, pede Uplerlawna Nolin doinia rpa rlernohor neka ira ralam yatyata maka kakdeha-kaktiahli re. Pa hota patke'a re nekane edonna emekneka maka rimormiori ha rhi' taru, pa a'na muanke'a nhi'inde ralamni nala a'na patke'a, mere la hadi de a'na patke'a idma ralamni nal ida. 27 La'pa a'na muanke'a mana emkade wali. Ir edonna rlernohora plollolli pa ratiana a'na patke'a mere orgahi ralamni na'hira pa ra'oin nan targho'a a'na muanke'a wali. Idma nhi' amola-ma' ida. La' hade pede irlernana hihi'ini-yapyapni de wniahlani maka edonna npa'eini-npahal la'a ira nhiolli-lietni mak kpohra-kgehpa de. 28 Ne la' wali de, rimormiori re edonna rhe'du nana Uplerlawna pede Uplerlawna Nhur dioinia ir la kirkirni-ralma-riorni yatyatni-halalli mak kakdeha-kaktiahli pa reiniande ir edon rhi'a-ryapia plollolli. La'a plolli de yana ir rhi' emkade. 29 Ir ihranu ralamni re rpenpuenu tetem la yatyatni-halalli mak kpenpuen niohora ralma-riora wniunu-wnienna, kokokna-rariarni, putra-palka, ra'ante'a-rakamna'a, id ralamni nod rer lia ida hyonni-hyanni, me idma na'un tar ida, idma nod niur lia ida. 30 Rape'el toto' meman la rwahaur pa ralernia rira nan kalwiedwedni. Ne ratulu-rapetna me rakleha yatota-yawawa mak kodia ir la ralam mehra la Uplerlawna, ne rpo'on atulu-apetna inonni. Ratu rwahaka hihi'a-yapyapia warwuaru pa ra rna'ohma yatyatni-halalli. Rhoklira-rpah' waw la inni-amni. 31 Raplinu rwaror nohora hya'-hya'a mak kaplola. Ta'en niana riy rpesiay ira. Ir rakleha nhiol kalwiedweda la ir rimormior wiali pa edon rtutga sniayanni la. 32 Iratga de Uplerlawna deullu-tatarni niwra la'pa he' ed mak klernohora nhioli-lieta yatyata re, de hota rukum penna de. Emkade wal ho'mana ir rhi' ma'ta yotyotni-yatyatni ne rerehnian de irwayow nohora riy meheni mak khi' walia nhioli-lieta re.
Yana mpiaghala rimormior wialli mere edon mhiopliala do'a-hal wamuehemi, yoma Uplerlawna Nukmua riy honona de edon Namkek la rira gaini
1 Pede ina-nara ama-hyali, hota emkameni la miy miwra mpiaghala rimormior wialmi?! Miy mieh'a nek de e mikleha nhiapargen pia mpiatikil la plol wawna, yoma miy orgahami nek de mhi' nhioli-lieta emeknekama ir rhi' walia. Pede la'pa mpiaghal riy meheni, de miy orgahami e mieti olek walia niukum la miy inon wamuehemi. 2 Ina-nara ama-hyali, itatga de hota la'pa Uplerlawna Nala niukamnu la riy maka khi'a-kyapia nhioli-liet yatyata re, de Uplerlawna niukamnu de naplol toto' memna. 3 Pede la'pa mtio'ona riy meheni la'a ir hihi'ini mak yatyata-halala, mere hota orgahami er mak khi' nan yatyatni-halalli re wali, hota emkameni la'a miy wniarormi de hota Uplerlawna edonna Nukum miy?! 4 Onde yanpa mpiarwah'a Uplerlawna ralam kalwiedni me la' walia E ralma nhiurniohorni tiy miy pa miy edon mliernohor E'a? Yanpa miplin niohor ma'ta de Uplerlawna Ntutga ralam kalwiedni mak karehi miemna de, yoma Enwahaka miy totpa mhioitio'or doini-mtiahnei dioinia do'omi-halmi re. 5 Mere rwaldioinia de miy o'ta tehra pa miy edonna mpiayow pa miolli nhiolmi. La' hade pede orgahami mi'itar rer lia do'omi-halmi niukamnu werweratni la'a lera hohoni, mak hota Uplerlawna Ntutga hankeranni me Netlia niukamnu de ndella plol wawna. 6 Yoma hota Uplerlawna Nwahla rira do'oni-halli de emekwalima ha rhi' nan oleka wa. 7 De hota la'a riy maka khi'a-kyap reria hihi'a-yapyapi plollolli yoma irahniar pia hota rlernana ya'uli-yawedi la'a Uplerlawna la genia hitita-repreparni mak kodi liarni, de hota Uplerlawna Nala mormiori plalahwa la' ira pa nodi liarni. 8 Mere la'pa riy maka khorat rer tio'a mormior wamueheni, ne edonna nlernohora Uplerlawna lirni mak kaplola mere nhi'a-nyap reria yatyatni-halalli, de hota Uplerlawna Nala niukum werwerta la ira. 9 Riy honona maka ralamni nod rer lia yatyatni-halalli, de hota rlernana mehra-mau liawna la'pa rpolpuol inni-rwakwak amni. Plol toto'a de mak klernan niukamnu de riy Yahudi miy, mere riy Yahudi atia' rlernan wali. 10 La'pa riy maka kden rer lia wniehwa-liakta kalwieda-paitiota de hota rlernana ya'uli-yawedi la genia hitita-reprepra me kalwiedni-paitiotni la'a Uplerlawna. Plol toto'a de mak klernana hadi de Yahudi miy, mere riy Yahudi atia'a rlernan wali. 11 Yoma Uplerlawna Nhi' la hare honona de ramneneha momuou.
Hota Uplerlawna Nukmua riy honona
12 Riy mak khi' do'a-kyap hiala, de hota ha rlernan Uplerlawna niukamnu pa rler la matmiati-molmuolu plalahwa pa edon ror wutga Uplerlawna la' geni ida. Makden Yahudi atia'a re raplin niohora agama Yahudi deullu-tatarni, pede rukmua ir de edonna rlernohora agama Yahudi deullu-tatarni. Mere riy Yahudi mak kat niohor oleka deulu-tatar de, hota rala deulu-tatar de pa ra rukmua re. 13 Yoma Uplerlawna edon Nwahaka mak katu agama deullu-tatarni mere edonna rlernohora. Enwahak riy mak klernohora hya'-hya' honona maka ha rakot targa la deulu-tatar de ralamni. 14 Meman neka la riy maka Yahudi atia'a raplin niohora agama Yahudi deullu-tatarni. Mere la'pa irmeh'a riwra rlernohora hya' ed mak kden la plol wawna de ha ntutga de Uplerlawna deullu-tatarni de namtemtemn olek la'a ir ihranu ralamni, kennama iraplin niohor ma'ta agama Yahudi deullu-tatarni de. 15 Yahudi atia'a re yehwani ed mak ktutga de Uplerlawna Nkeni oleka hya' maka deulu-tatar ha nakota de la ir ihranu ralamni. Yoma la ir wniarorni re, irmeh'a nek de lera dom de rwaghala inon wamueheni me lera dom de rhi' aplola inon wamueheni re. 16 Ne hota la' pa lerni ntutu-nte'ewa, de Uplerlawna hota Nala plolli-mneheni pa Kristus Yesus Ntorna watghudi ne Netlia rimormiori honona hihi'ini-yapyapni kirkirni-ralma-riorni. Mak kayade'a mana Enetlia honona. Ne watghudi lokarni de ed mak a'ukot nohora la' ler maka a'ukot nohor Kot Kalwieda-Paitiot de la' meni-meni to'a.
Yahudi re rat niohora agama deullu-tatarni mere rhi' ma'ta hala la Uplerlawna yamkekni
17 Mere la'pa dodo'ondi de, a nnio'u-nia'tu hadi tiy ina-nara ama-hyal mak Yahudi miy. Miy miwra riy Yahudi miy pa miy miwniair la agama Yahudi deullu-tatarni, me miy e mpiarehi inonmi yoma mimpiarora de miora Uplerlawna mlia' ihru ida-ralm ida. 18 Mliernana wniatutu-wniaye'a la deulu-tatra re, pede miat niohora Uplerlawna ralma-riorni, me miat niohora hameni mak kaplola, hameni edonna. 19 La' miy wniarormi de miy er mak kalakra riy mak matni yata me miodia lelerni la riy mak kden la melli-kalamni. 20 Mimpiarora de miy er maka kwatutu-kwaye'a makpodku me mimlia' tungkur lia riy maka emeknekama keke'enku'a pa raplin niohor ma'ta deulu-tatra. Mimpiaror emkade yoma mak Yahudi miy er maka klernana deulu-tatra agama mak kakot nohora kirkira-ralma-rior samomuou me hare honona maka plol memna. 21 Oi! Miy e mpiatutu-mpiaye' riy meheni. Mere hota emkameni la miy orgahami?! Miy mpiatut rira pa yana rkamnelu-rkamna'a, noma orgahami nekpa mkiamnelu-mkiamna'a?! 22 Mpiatut rira pa yana ralira-raliai mere orgahami milira-miliai?! Miy e mpiatut rira pa yana rkola tieru-rawur nehla la uplera-upmati, mere miy orgahami er maka ka'ala uplera-upmati re la'a gen maka riy rkola tieru-rawur nehla la re totpa mi'olga re?! 23 Mimpiarehia miwra mimliernan oleka deulu-tatra Musa mak kwatiawu Uplerlawna. Noma orgahami nekpa mipolu-miliella Uplerlawna yoma miy edonna mliernohora deullu-tatarni de! 24 Hade emeknekama maka ha rhorat targa la Puk ralamni de eniwra: ”Yoma la Yahudi miy wniehwami-liakatmi re, pede hairi-hairi korni ra'udlia kdedeha-ktialtiahli Uplerlawna nanni.”
Makden Yahudi re rsunat olek wa mere Uplerlawna Nwaghal ma'ta ira
25 La'pa mitlina-mitailla agama Yahudi deullu-tatarni, de hota sunat totpena mtiutga Uplerlawna gahani miy de e nperkun tiy miy. Mere la'pa miy edonna mitlina-mitail la'a hya' ed maka ha rakot nohora la deulu-tatar de, hota sunat de mana edonna nodia hadomdom tiy miy. De hota miy die emolmolan nekama makden Yahudi atia'a maka edon ha rsunat yoma Uplerlawna gahani atia' ira. 26 La'pa Yahudi atia' ida edonna rsunta, mere natlina-natailla Uplerlawna deullu-tatarni, de hade edonna nwal lia hadom la Uplerlawna gaini ralamni. Hota la Uplerlawna yamkekni, de emeknekama Yahudi atia' re ha rsunat oleka. 27 Me hota riy Yahudi atia'a maka edonna rsunat ma'ta mere emkade ho'mana rlernohora Uplerlawna deullu-tatarni, de nhiolli-lietni re ntutga de Yahudi miy halmi. Yoma mliernan olek ulu deulu-tatra agama Yahudi, mere e rsunat olek miy ho'mana, miy e mpiera-mdiaiti oleka deulu-tatar de. 28-29 Yoma maka ha riwra Yahudi plollolli, (de Uplerlawna mutnu inhatta de), de yana riwra hornama rsunat inonni. Yoma sunat mak kaplollola de edon rhi' to'a la inonni pa rlernohora agama deullu-tatarni. Mere sunat mak kaplol memna de, de Uplerlawna Nhiwni kniarni la it ihranu ralamni, nayamkeka la it mormiorni ralamni. Ne Yahudi plollola de, riy maka khernu oleka yehwani. Riy mak emkare de rlernana ya'uli la Uplerlawna, kennama la rimormiori de edonna.
Makden Yahudi rlernan oleka unut lawna la Uplerlawna mere Uplerlawna Nwaghal ma'ta ira
1 Mere yanpa hota Yahudi dom de ratiana riwra: ”La'pa sunat de edon nodi Yahudi it pa tora Uplerlawna tkalwieda de hota sunat de nodi hya' unut mai ita? Ne hota tlernan unut hya'a onnila it di de makden Yahudi ita?” 2 Plollolli de Yahudi it di tlernana unut lawna. La'a idni de, yoma la' ler ululu de Uplerlawna Nakot targa E lirni-tunnu la makden Yahudi ita. 3 Mere hota emkameni la'a riy Yahudi re korni mak edonna kdenrer lia (setia) Uplerlawna nnio'oni? Yanpa onnila ir hihi'ini pede Uplerlawna edonna Ndenrer lia hya' ed maka Ha Nakot targ olek wa? 4 Hade edon emkade! Yoma Uplerlawan de oraplola-oramneha de! La'pa riy honona rwotra-rtalia ho'mana, Uplerlawna Nden rer lia plol wawna. Hade emeknekama ha rhorat targ oleka la'a Uplerlawna la Pukni ralamni de riwra: ”Hya'a maka Omukota de nden rer lia plol wawna. Ne hota Omuplola la'a nhiudi-pniara.” 5 Mere yanpa Yahudi dom de riwra: ”Am mhi' mak edon kaplola de ttutga de Uplerlawna ed mak kden rer lia plol wawna. Pede nihya'pa Uplerlawna Nukm owa'an ami?” Oi! Plola lir de rimormiori wniarorni hade! 6 La'pa emkameni mana hade ematia'a hade, yoma la'pa rwarora riwra Uplerlawna edonna Nantorreria plolli-mneheni pa Nukm ita, de hota emkameni targho'ola Entorna watghudi la rimormiori honona la nohkeran di wawannu?! 7 Mere yanpa Yahudi riy dom to'a e riwra: ”La'pa ami edon mdenrer lia (setia) Uplerlawna lirni-tunnu de nareiniande Uplerlawna yeher to' pa Nlernan ya'uli-yawedi onnila Enhi' nana hya' maka Enakot targa de. Mere hya' nariei pede Uplerlawna Nto'on reri Yahudi am lia a do'a-hal mamni?” 8 Ine! La'pa itwaror emkade de emekwalima itakotiwra: ”Samounu de emkadille: Itsi' yatyatni-halalli totpena hya' ed mak kaplola nayamkek memna.” Plola pa riy dom de rto'on reri a' pua e rapolu-raliella a'u, riwra a'g ed mak kakot emkade! Mere riy mak kakot emkare, hota rlernan niukmu la Uplerlawna mak edon kpa'eini-kpahala.
La' riy id mana edonna nhi' nana Uplerlawna ralma-riorni
9 Nah! La'pa emkade de hota la Uplerlawna yamkekni de Yahudi ita tareh dioinia Yahudi atia'a rena? Plollolli de hade edonna emkade. A'ukot nohor oleka wa giwra riy Yahudi miy onde Yahudi atia'a, hononmi de do'omi-halmi nodi plolli la miy mormiormi. 10 Hade emeknekama ha rhorat targa la Puka ralamni riwra: ”Riy id mana edonna nden rer lia plol wawna. 11 Riy id mana edonna nna'erit nana Uplerlawna talanni, ne riy id mana edonna nwak pa nat niohora E' pa nhu'ru-nhelam la. 12 Riy honona rhoitio'or doin olek la Uplerlawna. Honona re rler olek la klieratni. Plol toto' pa riy id mana edonna nhi'a-nyap miemna plola-mneha.” 13 ”La'pa raltier die ir lirni re emolmolla hoi-kietra mak kwer reria wawni mak kalgot neka lira-tunu yatyata-halala. Ne putra-palka nwailiola wawni re ralamni.” ”Me nurnu rage'a yapupu-yaheri emeknekama niy miaka kodi nhienni.” 14 ”Nurnu re rpenpuen lia nhiorghala-wniaghala, nora yahe'i-yamali yapolu-yaliella.” 15 ”Pleta-plet pa rler la wniunu-wnienna rimormiori. 16 Rweyata-rwaniawu me rhi'a rimormior wialli pa rler la polpuolu-wakwaka lol meni-meni to'a. 17 Matni riat la loi-talla mak kod ir pa ror wutga mutwualli re rkalwieda.” 18 ”Ne rakleha ya'unni-yamta'ata la Uplerlawna.” 19 Ne, itatga la lira-tunu ri, de e rhorat targa la Puka ralamni pa rakot nohora la riy Yahudi miy maka klernana deulu-tatar de. La' hade pede riy honona, la'pa Yahudi onde Yahudi atia'a rakleha nhiapargenni (talla) pa rakot nohora de irdella plol wawna la Uplerlawna yamkekni. Uplerlawna Net tiarg oleka de rimormiori honona penpuen lia do'a-hala ralamni. 20 Hota riy id mana edonna nlernan talan pa nora Uplerlawna rkalwieda onnila Uplerlawna Netlia de riy de edon nhala, yoma riy de nhi'a-nyapia haneknek wawannu maka e rakot nohora la agama deullu-tatarni. Mere plollolli de la'a deulu-tatar maka Uplerlawna Nala mai rimormior ita, de it tat niohor memna it do'oni-halli.
Onnila it pesiayni la'a Yesus pede Uplerlawna hota Nhi' totpena itora E'a tkalwieda
21 Mere la' lera-mela ri, de Uplerlawna Ntutg olek talan mai it pa itor owa'ana E' pa tkalwieda. Ne la talan de, it edonna tlernohora agama Yahudi deullu-tatarni. Mere Musa pukni re, me makwohorulu-ktatrulu pukni re e rakot nohor walia Uplerlawna talanni mak kaplol de. 22 De hota Uplerlawna talanni de totpena rimormiori rora Uplerlawna rkalwied owa'ana, hornama rimormiori rpesiaya Yesus Kristus. Uplerlawna hihi'ini de la'a rimormiori honona ramneneh momuou, edonna la'a wniarorni to'a-taiya. 23 Yoma riy honona rler olek la do'a-hala ralamni, me nhiolli re oliet meman la Uplerlawna plolli-mneheni nhiolli-lietni mak kmou-kwitna. 24 Pede Uplerlawna sniayanni de it edonna twahla nana mere Nal to'a la rimormiori ita totpa tor E' pa tkalwied owa'ana. Yala'ani de emkadilla: Rimormiori rler la yamori-yalewna la'a Kristus Yesus mak ktuw niana-nhai nian ita. 25 De Uplerlawna Nala Yesus totpa Nhuria rarni pa Nler la matmiati ralamni emeka hopopa-hegeuru hoihoi-tantiani (persembahan) maka ktuw niana-khai nian ita, totpena la' hade pede rimormiori nawnie'er doin olek la do'a-hala, hornama ta tsa'ar to' it aranni la E' mak kmat lia it rerieini. Uplerlawna Nhi' emkade totpena Ntutga E plolli-mneheni la yaweratni-yatailli (nawerta-natailla plol wawna). Yoma la'a ler ululu Uplerlawna Nod niohora do'a-hala maka rimormior ha rhi'a re. E' edonna Nukum ma'ta ira. 26 Mere dodo'ondi de la'a Yesus matmiatni de Ntutga hankeranni-ralmha'arni la do'a-hala, totpena Ntutga plolli-mneheni la yaweratni-yatailli, yoma edon Nhoratdoin rira do'oni-halli. Ne la'a Yesus matmiatni itamkek meman walia de Enodi plolli pa Netlia hameni mak kpesiay Yesus de pa hota ror E' pa rkalwied owa'ana. 27 La' hade pede itakleh memna nhiapargen pia tatulu-tapetan la it hihi'ini-yapyapni yoma itwaror it hihi'ini-yapyapni re nod it pa tor owa'an Uplerlawna tkalwieda. La' hya' pede emkadeno? Ina-nara ama hyali, hade emkade yoma itler pa tor owa'ana Uplerlawna tkalwieda hornama itpesiaya Yesus Kristus. It edonna tora Uplerlawna tkalwied owa'ana onnila tlernohora hya' maka e rhorat targa la agama Yahudi deullu-tatarni. 28 Yoma la'pa riy maka itiwra kor oleka Uplerlawna rkalwied owa'ana, de edon riwra yoma enlernohor oleka hya' ed maka ha rhorat targa la agama Yahudi deullu-tatarni, mere yoma la' pesiayni la Yesus Kristus. 29 Yahudi miy yana mpiarora de Uplerlawan de Yahudi rmeh'a Uplerlawanni? Miat niohora de Uplerlawan de Yahudi atia'a Uplerlawanni walia hade toh! Yowa, plola pa Yahudi atia'a mana Uplerlawanni E'a. 30 Miat niohora hade yoma Uplerlawan de Ha Nmeh'a to'a. Ne Uplerlawan de ed maka khi' pede, riy Yahudi ror owa'ana E' pa rkalwieda, yoma la' pesiayni re. Maka Yahudi atia'a mana, Enhi' pa ror owa'an E'a pa rkalwieda owa'ana, hade ho'mana yoma la'a pesiayni. 31 Yanpa miy miwra hadi nnia'eratni de yoma itpesiay oleka Yesus Kristus pede itsopliala agama Yahudi deullu-tatarni?! Hota edon emkade! Mere plollolli de la'a it pesiayni de nariei pede twayow nohor walia deulu-tatar de.
La'a Abraham mormiorni de tamkek nan memna hota rimormior ror owa'ana Uplerlawna rkalwieda onnila pesiay
1 Ina-nara ama hyali, itat niohor memna it pesiayni yala'ani la'a Abraham, makden Yahudi upni-tgarni mak kala' ul memn ita. Mpiaror tek la! La' talan emkameni pede Abraham nler wut lia riy mak kaplol la Uplerlawna yamkekni onnila Uplerlawna Netlia e edon nhala? 2 Abraham edon nlernan wniatikilgen pia enwarehi e inonni la Uplerlawna yoma Abraham hihi'ini atia'a ed mak karei pia Uplerlawna Nreinian e'a. 3 Yoma la'a Puka ralamni de e riwra: ”Abraham npesiay Uplerlawna, ne la' pesiayni de pede Uplerlawna Nreiniana-na'nana e' pa emeka riy mak kaplol la Uplerlawna yamkekni.” 4 La'pa riy mak kari, hota rlernan kaini, de kaini de edonna emekneka hya' maka ha ral to'a, mere kaini de kniarni wniahlani. 5 Mere la'pa itakot nohora rimormiori rora Uplerlawna de hota emkadi: La'pa riy dom de edonna rahnia'ar la ira hihi'ini-yapyap wamueheni pa nodia yamori-yalewna, mere rpesiay to'a Uplerlawna, yoma E' ed maka ketlia mak khi' do'a-kyap hiala pa rwal lia mak kaplol la E yamkekni onnila pesiay die, hota Uplerlawna Nreinian ira. Mere Uplerlawna edonna Nreinian ira onnila e rhi'a-ryapia hya' ed mak kaplola. 6 Emkade walia ray Daud nakot nohora la'a riy maka kahepru yoma Uplerlawna orgahani Na' nan oleka riy di pa emeka riy mak kaplol la E yamkekni, de edonna namkek la riy de hihi'ini-yapyapni. Daud niwra: 7 ”Unut lawna la riy maka Uplerlawna Nhap dioinia do'oni-halli pa Nhoratdoin oleka. 8 Unut lawna la'a riy maka Uplerlawna edonna Natian la'a-natian mai do'oni-halli.”
Abraham nor Uplerlawna rkalwieda sunta atia'a mere onnila pesiayni
9 Lir mak kiwra unut lawan de, e rakot to' hadella' Yahudi maka ha rsunat nan to'a? Onde lir de e rakot walia hadella Yahudi atia'a mak edonna klernohora sunat? Mpiaror tek la wniahaurnu di, de onnila Abraham pesiayni la Uplerlawna pede Uplerlawna Nreiniana-na'nana e pa emeka riy mak kaplol la Uplerlawna yamkekni. 10 Ne la' ler meni ed maka Uplerlawna Netlia pa Nreiniana Abrahama? La' ler maka Abraham edonna rsunat ma'ta onde rsunt oleka wa? Plola, la ler de maka Uplerlawna Nreiniana Abraham de edonna rsunat ma'ta e'a toh! 11 Uplerlawna Nreiniana Abrahama onnila pesiayni, nhorwua na'nama rsunat e'a. Ne sunat de emeknekama kniau ida mak ktutga, de e' de mak kaplol la Uplerlawna yamkekni, yoma pesiayni la Uplerlawna. Ne Uplerlawna Nreinian meman e' de la' lera e' edonna nlernohor ma'ta deulu-tatra sunat. Pede hota Abraham nhi' am la Yahudi atia' honona maka kler wut lia Uplerlawna mutnu, mak Enetlia de ror E rkalwied owa'ana yoma irpesiaya Uplerlawna kennama ir edonna rlernohor ma'ta sunat deullu-tatarni. 12 Abraham nla' walia am la Yahudi maka klernohora deulu-tatra sunat hornama ir mana rlernohora ir upni-tgarni Abraham pa rpesiay Uplerlawna. Rpesiay Uplerlawna pa emekwali Abraham pesiayni la' ler maka e' edonna nlernan ma'ta deulu-tatra sunat.
Abraham nlernan Uplerlawna nnio'oni yoma pesiayni la Uplerlawna
13 Uplerlawna nnio'oni la'a Abraham nora duratni-waitni niwra: ”Hota nohkeran di de Abraham o gahamu.” Uplerlawna edonna Nano' emkade yoma Abraham nlernohora agama Yahudi deullu-tatarni, mere onnila Abraham npesiay Uplerlawna. Ne la' Abraham pesiayni de pede Uplerlawna Nreiniana-na'nana Abraham, emekwali riy mak kaplol oleka la Uplerlawna yamkekni. 14 Yoma la'pa Yahudi re rlernana hya' ed maka Uplerlawna Nano'taru onnila rlernohora agama Yahudi deullu-tatarni, de hota pesiayni la Uplerlawna nakleh et miemna perkuna. Ne hota nnio'oni de mana nwal lia hamamuamua yoma hota ir edonna rlernan walia. 15 Yoma rimormiori honona rpera-rdait neka agama deullu-tatarni. Ne hota pniera-dniaiti la agama Yahudi deullu-tatarni ed mak kod riy lia Uplerlawna niukum lawanni. La'pa deulu-tatra hadamonan de pniera-dniaitia mana hadamonan wali. 16 La' rimormiori pesiayni la Uplerlawna pede hota irlernana hya' ed maka Uplerlawna Nakot targ oleka la ira, totpena Uplerlawna Nal nnio'oni de la makpesiay re honona onnila E ralam kalwiedni Nmeh'a to'a. Ne edonna Ntot nan to'a Yahudi makpesiay maka klernohora agama Yahudi deullu-tatarni, mere Nal wal lia Yahudi atia' maka kpesiaya Uplerlawna, pa emekwalima la'a Abraham pesiayni la E'a. Yoma Abraham ed mak khi'a am la rimormiori it hononita maka kpesiay. 17 Yoma hota emekwalima Uplerlawna lirni la Abraham: ”Abraham, Aghi' oleka o' pa omhi' am la hairi liawanni.” Abraham npesiaya de la emkameni ho'mana hota Uplerlawna Nhi' hya' ed mak Ha Nano'taru oleka de. Yoma Uplerlawna ed mak kodi plolli pa Namoria riy mak kmati-kmolu me Uplerlawna maka kakota pa hya' mak edonna kdena mana hota rdena. 18 Abraham nha'ar to'a mormiorni la Uplerlawna, me pesiayni nden rer lia Uplerlawna pa edonna nwaler nan kuku'a, kennama hya' maka Uplerlawna Nano'targa de emeka ta'enia ha rhi' nana. Hade pede Abraham nla' am la hairi-hairi, pa hota emekwalima e rhorat targa Uplerlawna lirni la Abraham la' Puka ralamni, de e riwra: ”Hota o duratmu-waitmu riy harahu.” 19 La' ler de de Abraham natga de hota enakleh a'na wa, yoma tuwnu nhamto'owa. Mormiorni nla' nan oleka anni nhi' pa la'awa rahu ida. Ne hawni Sara mana nkern pa nakleh a'na. Mere emkade ho'mana pesiayni de naruri-na'orta. 20 Entoran rer pitpitga pesiayni de la'a hya' ed maka Uplerlawna Nakot de. Yeher to'ama pesiayni naruri me enodia ya'uli-yawedi la Uplerlawna. 21 Enpesiay mieman de hota Uplerlawna Nodi plolli pa Nhi' nana hya' ed maka Ha Nakota. 22 La hade pede ha rhorat targa la Puka ralamni: ”Uplerlawna Nreiniana-na'nana Abraham pa emeka riy mak kaplol la E yamkekni”. 23 Me lira-tunu maka ha rhorat targa ri, de edonna rtot nan to'a Abraham nmeh'a, 24 mere la' it wali. It mana, hota Uplerlawna Nreinian wali ita emekwalima riy maka kaplol la E yamkekni, yoma it pesiayni la Uplerlawna maka kamori-kalewan nana Yesus, Itmatromlawanni de la'a matmiatni ralamni. 25 Yesus de, rala olek hade pa totpena rwenna yoma la'a it do'oni-halli rerieini. Mere Uplerlawna ed mak kamori-kalewn owa'ana totpena Nahak owa'ana talan pa itora Uplerlawna tkalwieda.
Itahe'i-tahepur nohora hare honona maka itlernana onnila itor owa'ana Uplerlawna tkalwieda
1 La' hade pede ina-nara ama-hyali, onnila it pesiayni la Yesus Kristus pede itor olek Uplerlawna tkalwied owa'ana. Ne la' hade pede hota itora E'a tmor wiut lia mtiertierannu onnila Yesus Kristus, Itmatromlawanni hihi'ini de mai ita. 2 La'a Yesus hihi'ini pede la' lera-mela ri, de itlernan oleka talla pliora pa Uplerlawna Ntutga E ralam kalwiedni mai ita onnila it pesiayni. Me ita tahepuepur wali yoma itsa'ar it ralamni de hota la' ler mak kmai die, de itre'ela tlernana Uplerlawna plolli-mneheni me ya'ulli-yawedni! 3 Ne hade edonna nmeh'a mere hota tamuki-tahepur nohor lol walia it luini-nuhranu, yoma itatg oleka de, hota la'a lui-nuhru de pa yeher to'a itatu tatehra it ralamni la kropna-krieutu polpuol ina-wakwak ama. 4 Ne hota la'a itatu tatehra it ralamni di, de it tden rer lia plol wawna la Uplerlawna yamkekni. Ne la'pa it nhiolli mak emkade, hade ed maka kod it pa tsa'ar it aranni la Uplerlawna de hota Enhi' nana hya' maka Ha Nakot targ oleka wa. 5 Ne nhia'ar aran gen die mak itsa'ar tar it aranni hamamuamua atia' hade. Yoma hota plola pa Uplerlawna Nala hare honona maka Ha Nano'targa. Itat niohora hade yoma Uplerlawna Nal oleka sniayanni namniota it ihranu ralamni. Uplerlawna Nhi' hare, de Nala E Nhiw Lululli pa Ndella it ihranu ralamni. 6 Uplerlawna Ntutga E ralam kalwiedni mai ita yoma la' ler maka Uplerlawna Nwalir targ oleka de, de la' ler maka itakleha ruri-lai onnila do'a-hala nutni-ndahl ita, de Yesus Kristus Nmeh'a Nmati, yoma la' it mak kahmena katlina-katailla E'a de rerieini. 7 Nhi'inde la'pa ntut niana riy maka kmor lia yatlina-yatailia deulu-tatra id ho'mana riy rahmena rod niana pa rmat lia e wawannu. Mere la'pa nlernan riy mak nhi'inde ktutga ralam kalwied la rimormior wialli de matialo'onama riy rmat lia wawannu. 8 Mere Uplerlawna hihi'ini narehelia hade, yoma la' ler maka itden meman ma'ta la do'a-hala ralamni, de Uplerlawna Ntutga sniayanni la ita, la'a Yesus Kristus Nmat lia it rerieini. 9 Ina-nara ama hyali, itor owa'ana Uplerlawna tkalwieda yoma la'a Yesus Kristus Nhuria rarni pa Nmat lia it rerieini. Ne la'a itat niohor Enhi' emkade mai ita, de yeher to' pa itat niohora de hota Enamori-nalewn it la Uplerlawna hankeranni-ralmha'arni mak hota ktuin la nohkerna. 10 La' lera Uplerlawna Nahankeran la it de, E' ed maka kalwied nan ita onnila A'nani Nler la matmiati. Yaho'ma la' lera-mela ri de maka itor oleka E' pa tkalwied wa?! Hota yeher to'a pa ramori-ralewn it la'a Uplerlawna hankeranni-ralmha'arni onnila A'nani Nmormiori owa'ana toh! 11 Ne hota ita'uli-tawed niohora Uplerlawna onnila E kalwiedni maka Ha Ntutga mai ita onnila Itmatromlawanni Yesus Kristus. Yoma la'a Yesus Kristus de, pede la dodo'ondi de Enod miemn it pa itora Uplerlawna tkalwieda.
Rakot nohora Adam nora Yesus Kristus hihi'ini re wniahlani
12 Ina-nara ama-hyali, twaror tek la hare honona nnia'eratni. Do'a-hala nler la nohkerna wawannu de onnila Adam, riy memeh'a de, do'oni-halli. Ne la' do'oni-halli de, pede matmiati mana nhar wiali. Narieiniande matmiat die nwewar nan rimormiori honona, yoma rimormiori honona rler olek la do'a-hala. 13 Deulu-tatra agama Yahudi edonna ral ma'ta, de do'a-hala ed olek la mai nohkeran di wawannu. Mere edonna rwaghal ma'ta rimormiori re do'oni-halli yoma deulu-tatra hadamonan ma'ta. 14 Mere la' Adam lerni meman pa nmai lia Musa lerni, de matmiati-molmuolu nlola tipru-warta ra'i-tranna, de rimormiori honona rmati. La'pa riy maka edonna khi'a do'a-hala maka Adam nhi' nan de de, ir mana rler walia riwtu-hora matmiati-molmuolu ralamni la'a do'a-hala rerieini. Hota la'a Adam de hihi'ini pede rimormiori honona rlernana wniahlani. Emkade wal lia la Yesus Kristus mak ktawli'ir de, hota la' E hihi'ini pede rimormiori honona rlernana wniahlani. 15 Mere irora hihi'ini de edon ramneha. Yoma mak Uplerlawna Nala de nareh miemna hya' maka Adam npera-ndaitia. La' Adam de, riy ida nmeh'a de, mere la' pnierni-dniayatni tonekwane riy honona rler la matmiati. Mere hota la Yesus Kristus de, de riy ida nmeh'a wali E'a, mere la' E ralam kalwiedni mai ita pede hota Uplerlawna Nhuri-ntowria sniayanni la riy harahu me Nal ir pa ror E'a rkalwied owa'ana. 16 Wniahla maka Uplerlawna Nala la rimormiori re, onnila Yesus Kristus hihi'ini de, ematia'a wniahla maka rimormiori ha rlernana la'a maka Adam ha nhi' nan de. Yoma la'pa Adam de pnierni-dniayatni nhorwua, de wniahlani de, ha retlia rimormiori do'oni-halli pa rukmua (tniu'tu la'a mei wawannu). Mere la emkameni ho'mana la riy honona rhi' do'a-ryap hiala, mere Uplerlawna Nwahla la ira, de Nala ir pa ror E'a rkalwied owa'ana yoma Enetlia de ir raplol olek la E yamkekni. 17 La emkameni mana Adam de riy ida nmeh'a to'a mere la'a pnierni-dniayatni tonekwane matmiati-molmuolu nwewar la meni-meni to'a. Mere itat memna la'a Yesus Kristus hihi'ini, pede riy maka Uplerlawna Ntutga ralam kalwiedni mak kareh mieman de totpa ror E'a rkalwied wa de, hota rmormiori-rdardiar pia nodi liarni la'a Ilyamou-Watyatoha me rora Uplerlawna pa rodi plolli-rtaryatnu. 18 Pede emeknekama Adam pnierni-dniayatni la' raralamni to'a, mere narieiniande rimormioria nohkerna wawannu rlernana niukmu, hota emkade walia la'a Yesus Kristus hihi'ini id to'a, maka Nlernohor Uplerlawna ralma-riorni, de nreiniande riy honona rlernan talla pa iror E' rkalwieda ne irlernana mormiori-dardiari plalahwa mak kodi liarni. 19 Ne emekwalima la'pa riy honona rler la do'a-hala ralamni la' Adam nmeh'a maka kakleha ya'unni-yamta'ata. Emkade walia la' riy honona makpesiay mana hota ror owa'ana Uplerlawna rkalwieda, onnila Yesus de Nmeh'a yatlinni-yatailli la'a Uplerlawna lirni-tunnu. 20 Rala agama deullu-tatarni de totpena yeher to' pa rimormiori rat niohor memna ir rhi' oleka do'a-hala. Mere la'pa yeher to'ola rimormiori rhi' do'a-ryap hala, de Uplerlawna ralam kalwiedni nareh niana do'a-hala. 21 La ululu de la'pa rimormiori rhi' do'a-hala de hota rler la matmiati ralamni mere dodo'ondi de Uplerlawna Ntutga tniulanni-sniayanni pede Enal talan pa itor owa'an E' pa tkalwieda. Hota la' hade pede itler la mormiori pa nodi liarni onnila Itmatromlawanni Yesus Kristus hihi'ini de mai ita.
Emeknekama riy mak kmati olekwa ta'en niana nlernohora yapi'u-yaga'u, de hota it ralamni mana edon nod rer owa'an la do'a-hala
1 Ina-nara ama-hyali, yanpa hota riy ida nwarora niwra: ”Hota la'pa plola pa Uplerlawna Ntutga ralam kalwiedni la mak khi' do'a-kyap hiala, de hota samounu de itsi' neka do'a-hala pa nodi liarni totpena hota yeher to'a pa Uplerlawna Nsayn reri ita.” 2 Hota edon emkade! Yoma do'a-hala edonna nodi plolli owa'an la mai ita. Pede la'pa emkade, hota emkameni pa itsi' rereri owa'ana do'a-hala?! 3 Mhioratreria, la'a lera rharani ita totpena itor Kristus Yesus tla' ihru ida-ralm ida, de e rhi' hade totpena emeknekama rwatiehra wut it tora Kristus la matmiatni. 4 Pede nhiaran die, de emeknekama rhuwur wutg it la Kristus. Totpena hota emeknekama Kristus Nmori owa'an la' E Amni plolli-mneheni maka khitita-kreprepra, hota it di de emekwali E'a, pa itler la mormiori warwuaru mak ematia' ululu de. 5 Pede itora Kristus tler olek la id wa, yoma emeknekama itmat niohora E'a. Pa hota naplol meman walia de hota itler la ida yoma itler la mormiori warwuaru emekwali E'a. 6 Itatg oleka de ita yehwani rimormiorni la ululu geni ha rwenan olek wutg la Kristus la'a auwlakra hananni totpena it edon tlernohora owa'ana it yehwa rimormiorni mak kod it la do'a-hala. La' talan mak emkade pede do'a-hala mana edonna nodia plolli owa'an mai ita. 7 Yoma it di de emolmolan nekama riy ida mak kmati, pa rolin doinia la do'a-hala ralamni. 8 It tmat niohora Kristus de, de itpesiay wiali de hota itora E pa tmori-tlewan rewre'wa. 9 Itpesiay hade yoma itat niohora de Kristus mana Uplerlawna Nalewn oleka la matmiatni ralamni, pa hota edonna Nmati owa'ana. Matmiati hota edonna nodi olek plolli la E wa. 10 Kristus Nmat lia do'a-hala wawannu totpena matmiatni de nala do'a-hala la yawa. Nmat raralamni to'a, edon Nmati owa'ana. Ne Nmormiori owa'an de totpena nodi ya'uli-yawedi la Uplerlawna. 11 Hota emkade walia, ina-nara ama-hyali, hota miatu mpiaror nohor inon wamuehemi de pa emeka riy maka do'a-hala edon nodi plolli owa'an la, mak kor oleka Kristus Yesus rla' ihru ida-ralm ida pede la'a mormiormi ralamni de miodia ya'uli-yawedia la Uplerlawna. 12 Pede yan memmemna miolin doinia do'a-hala pa nodi plolli la miy inonmi mak hota kmat die. Yana do'a-hala nodi plolli la miy pia hota mliernohora ralma-riora yatyatmi re. 13 Yana mhiuria limmi-lakmi, tutu'umi-niernieranmi la'pa miy inonmi tetema totpa do'a-hala nodi plolli pa nnairia na nhi'a-nyapi yatyatni-halalli. Mere mial inonmi la Uplerlawna pa emeknekama miy mmiati oleka pa rwatitni olek miy lia mormiori ralamni. Mial inonmi tetema pa mlier wut lia Uplerlawna totpena Nnair miy pia mhi'a-myapia hya' mak kaplol la E yamkekni. 14 Hota mhi' emkade yoma do'a-hala edon nodi olek plolli owa'an tiy miy, yoma miy edonna mliernohora owa'ana agama Yahudi deullu-tatarni totpa mior Uplerlawna mkialwied owa'ana. Mere Uplerlawna ed mak kodi plolli tiy miy. La'a E ralam kalwiedni pede Ntulan la tiy miy totpena miy edon mhi' owa'ana do'a-hala.
Yan memmemna do'a-hala nodi plolli mai ita pa emeknekama marna e nodi plolli la atni-wa'arni
15 Yanpa hota riy ida nwahla a li'ru niwra: ”La'pa it edon tlernohor owa'an Yahudi deullu-tatarni, mere Uplerlawna Ntulla-nsayn ma'ta ita onnila E ralam kalwiedni de, hota emeknekama Uplerlawna Nhur niohora it pa itsi'a do'a-hala?” Hota awuahla lir de. Yan memmemna itsi' emkade! 16 Totpena miatga, la'pa miy mpiak la riy id pa mkiar lia, de mitlina-mitailla riy de, yoma miy mlia' oleka hopopna la e wa. Emkade walia la do'a-hala me tlina-taili la Uplerlawna. La'pa miala inonmi pa mhi' do'a-myap hiala, de hota do'a-hala ed mak kodi plolli tiy miy. Ne hota hade ed mak kodi miy lia matmiati-molmuolu plalahwa. Mere la'pa mial inonmi la Uplerlawna pa mitlina-mitailla de hota emeknekama hya' ed mak kaplollola nodi plolli tiy miy pia miy mmiormior lola plollol wawannu. 17 Mere ta'uli-tawedia Uplerlawna, yoma la ululu de do'a-hala nodi plolli tiy miy, mere dodo'ondi miy miala ralammi tetema pa mitlina-mitailla wniatutu-wniaye'a plollola maka ha rakot nohor olek tiy miy wia. 18 Miy di er maka Uplerlawna Nwe'er doin la do'a-hala, me la' dodo'ondi de miy e mlia' riy maka Uplerlawna Nodi plolli la pa miy mdien rer lia plol wawannu. 19 Ina-nara ama-hyali, onnila miy ralma-riormi la'a Uplerlawna yala'ani de emeka lokmera-papay ma'ta miy, pede agala lira yawalliohor di la'a hopopna-lili'iru totpena plet pa miy mnia'erit nana lir de wniahaurnu. Ululu de mial inonmi pa emeknekama miy e mhi'a ata-wa'ara la'a do'a-hala nareiniande hota yeher to' pa yatyatni-halalli maka kakdeha-kaktiahli na'ititar rer lia. Emkade walia la dodo'ondi de hota miatu mial inonmi pa mhi' hopopan la Uplerlawna totpena miy mhi' mak kaplol la E yamkekni totpena la mormiormi de mlia' E kamieheni maka kakleha do'a-hala. 20 Lera mitlin ma'ta la do'a-hala, de hya' mak kaplola edon nodi plolli ma'ta tiy miy. 21 La' ler de de hya' untia ed maka ha mliernana la do'a-hal maka khi' amola-ma' miy? Hadamonna toh!? Yoma hihi'a-yapyapi re er mak kod riy lia matmiati-molmuolu plalahwa. 22 Mere dodo'ondi de Uplerlawna Nwe'er doin miy pia do'a-hala edon nodi plolli owa'an tiy miy, me mlia' oleka hopopan la Uplerlawna. Ne unut lawan maka ha mliernan de, totpena mpial lia Uplerlawna mutnu mak kakleha do'a-hala. Pede hota mlier la mormiori plalahwa mak kodi liarni. 23 Yoma do'a-hala wniahlani de matmiati-molmuolu plalahwa. Mere Uplerlawna Nara'a-napal niana mormiori plalahwa pa nodi liarni la riy mak kor wutga Kristus Yesus, Itmatromlawanni tla' ihru ida-ralm ida.
It edon tawniatiehra wutga la deulu-tatra pa emeknekama patke' mak kmehlima edon nawniatiehra wutga la'a hawni mak kmati olekwa
1 Ina-nara ama-hyali, aghorta hadi tiy miy mak kat niohor oleka deulu-tatra. Pede miy miat memn oleka de la'pa riy ida nmormior mia'ta de riy de natlina-natailla deulu-tatra. Nmat wia nampena edon natlin owa'an la deulu-tatar de toh! 2 Mimpiaror teka! La'a deulu-tatra ralamni de e riwra: Patke' maka kmehlim olek wa de, la'pa hawni nmormior mia'ta, de patke' de e nawniatiehra ma'ta la mehlimni. Hawni nmat wia nampena patke'eni edon nawniatiehr olekwa. Emkade pede pat de nolin lim oleka la deulu-tatra mehlima. 3 Mere la'pa hawni muanke'a e nmormior mia'ta mere patke'eni nora muanke'a dom to'a, de patke' de rweta la mak kalira-kaliai. Mere la'pa hawni muanke' de nmati olekwa, de deulu-tatra mehlima hadamonna olek la patke' de wa. Ne la'pa e nmehlim owa'an pa nora muanke'a dom to'a ho'mana, yaliai atia'a de. 4 Ina-nara ama-hyali, hade emkade wali mai ita. It edon tawniatiehra wut olek walia la deulu-tatra. Yoma emeknekama yehwa rimormiori ululu rwatiehra wutga la' Yesus Kristus la auwlakra hananni pa itmati niohora. Pede la' lera-mela ri de deulu-tatra edon nodi plolli olek la ita. Mere hota E' de maka ha ralewan nana la matmiati ralamni, gahani olek it wa totpena itla' walia riy mak khi'a-kyapia mak kalwiedwedni pa ta'uli-tawedi Uplerlawna la'a it mormiorni di. 5 Yoma ululu de itmormior die tlernohor to'a it yehwa rimormiori. Ne la'pa itat niohora deulu-tatra agama, de it ralamni yeher to' pa nwarora yatyatni mak ka'hira ita ralma-riorni pa nod it la do'a-hala mak hota kod matmiatni plalahwa mai ita. 6 Mere la' dodo'ondi de rwe'er doin olek it la agama Yahudi deullu-tatarni. Yoma emeknekama itmati olek wa pede ita edon tawniatiehr olek la deulu-tatra. Pede la dodo'ondi meman pa itatu tsima-tre'a Uplerlawna. Mere it edonna tsima-tre'a Uplerlawna la'a tatlina-tatail nohora deulu-tatra agama pa emeka la' ler ululu de. Mere itlernohor oleka talan warwuaru pa tsima-tre'a E'a, onnila Uplerlawna Nhiwni rurni-laini himimni-rere'eni mai ita.
La'a agama deullu-tatarni de itat niohora plolli-halli pede do'a-hala nlernan talan pa nodi plolli mai ita
7 La'pa hade emkade, yana itwarora tiwra yanpa deulu-tatra de ha yatyata de onnila narieiniande riy do'oni-halli na'ititar rer lia. Mere agatga de hota edon emkade. Yoma mimkek nek la deulu-tatra yala'ani la a mormio'ru lera-lera. Deulu-tatar de ha yatyat atia'a, mere hade ed maka kwatutu-kwaye' a pua agatu wuarora-wualai niohora do'a-hala yala'ani. Yoma a'g e uplin niohora la'pa a ralmu e nala rira hyonni-hyanni de hade edon naplola, mere la'a agama deullu-tatarni niwra: ”Yan memmemna ralammi e nala riy hyonni-hyanni,” na'nama agat niohora hade nhala. 8 La'a agama deullu-tatarni pede do'a-hala nlernan talan pa nwalia a nhiortu pa hota awuaror nan nek la riy hyonni-hyanni pa hota yeher to' pa a ralmu nal nana hare. Mere la'pa agama deullu-tatarni hadamonna de hota do'a-hala nakleha talla pa nodi plolli mai ita. 9 La' ululu ammormior die a'g e uplin niohor ma'ta agama deullu-tatarni pede a'g edon wuaror nohora a do'u-ha'lu. Mere la'pa deulu-tatra agama nhar wia dewade emeknekamde a ih'ru-ralmu nahmuakru pa nwarora do'a-hala la a mormio'ru. Do'a-hala re rnutni-rdahl a'u 10 pede hota alier la matmiati-molmuolu plalahwa. Pede na'nama agat niohora de Uplerlawna Nala deulu-tatra pa nodi mormiori-dardiari mere rwaldioinia de deulu-tatar de hota nodi a lia matmiati-molmuolu plalahwa. 11 La'a agama deullu-tatarni pede do'a-hala nlernan talan pa nod a lia putra-palka yoma awuarora de la'a agama deullu-tatarni yala'ani pede aliernana yamori-yalewna, mere plollolli de hota nod a lia matmiati-molmuolu plalahwa. 12 Pede ina-nara ama-hyali, agama deullu-tatarni de ha yatyat atia' hade, mere ha nwatiawua Uplerlawna me hya' ed maka deulu-tatar de nakota, de ha rwatiawua Uplerlawna pede naplola me kalwieda. 13 Mere yanpa mimpiarora deulu-tatra samomuou de hota ed mak kodi a lia matmiati-molmuol plalahwa de. Mere agatga edon emkade! Yoma hya' mak kodi a pua alier la do'a-hala ralamni, de a ralma-rior wamueh'u mak kwaror reria do'a-hala. Yoma la'pa utlin nana deulu-tatra agama mak kalwiedwed de, yeher to' pa a ih'ru-ralmu ed mak kod rer a lia do'a-hala ralamni mak kodi matmiati-molmuolu. La' hade emkade totpena tamkek memna a hihi'u-yapya'pu de do'a-hala toto'a hade, me totpena do'a-hala de yatyatni-halalli nayamkek memna onnila ta'en niana aliernohora deulu-tatra.
Awuayow nohora agama deullu-tatarni ho'mana edon nod ruri-lai mai a pua aghi' nan nhioli-liet kalwiedweda
14 Itat niohora de agama Yahudi deullu-tatarni de ha nwatiawua Uplerlawna Nhiw Lululli, mere a' di de rimormior miaka kakleh ruri-lai id memna a' pua ta'en niana aghi' hya' mak kaplola. Hota emeknekama rtekua riy id pa nhi'a hopopna-lili'iru ata-wa'ara, emkade walia de do'a-hala nodi plolli mai a'u. 15 Amueh'a nek de uplin niohora hya' nariei pede aghi' emkarena. Yoma hya' ed mak kaplola maka a ralma-rio'ru niwra nhi'a, de edonna ghi' nana, mere do'a-hala maka a ralmu edonna nal nana demade aghi' nana. 16 Ne la'pa aliernohora a ralma-rior wamueh'u mere narieiniande a ralmu nmawla, de hade ed mak ktutga de a'g e wuayow nohora agama Yahudi deullu-tatarni. 17 La' hade de a'g edonna liernohora hya' maka a ralmu ha nala pa aghi' nana de, mere onnila do'a-hala mak kden la a ih'ru-ralmu ed maka kawewal nan a'u. 18 Agat niohora la' a ino'nu di de kalwiedwedni oke' mana hadamonan meman la a ih'ru ralmu la'a a yehwa rimormio'ru di. Yoma plollolli de a'g e wuaror nan walia nhioli-lieta kalwiedwedni mere hota a'g edonna ghi' nan walia. 19 De a'g edonna ghi' kalwiedwedni maka agiwra ghi'a. Mere a ralma-rio'ru nawnial dioin pa aghi' targho'a hya' mak kyata-khala, mak a ralmu edonna na'oin nana. 20 Pa hota la'pa aghi' nana hya' ed maka a ralmu edonna na'oin nan de, hade ed mak ktutga de a'g edonna liernohora a wniaro'ru pa aghi' nan hare, mere aghi' emkade yoma do'a-hala ed maka kodi plolli la a'u. 21 Pede awuarora de hota nhi'inde emkadille: la'pa agiwra ghi'a samomuou, demade enekneka maka ghi' nana de yatyatni-halalli. 22 Yoma a ralma-rio'ru de, nwayow nohor meman la Uplerlawna deullu-tatarni 23 mere emkade ho'mana, la a ino'nu di, de do'a-hala mak kden rer lia a ih'ru ralamni la'a a yehwa rimormio'ru di edon namneh nohora deulu-tatra maka a ralma-rio'ru ha nko'i nana pa emekanekama rrora e ra'ara. Ne hota emolmolan nekama a'uwniatiehra wut lia do'a-hala maka kagengeni la'a a ih'ru ralmu. 24 Inee! A ralma-rio'ru nodi a lia kropna-krieutu yoma a ralma-rio'ru edon namtemna! Hota emkameni la a mormio'ru dina? Hota he' ed maka kamori-kalewna a inon mak kod a lia matmiati-molmuolu plalahwa dina de? 25 Mere hota a'u'uli-uwedia Uplerlawna yoma E' ed mak kodi plolli pa Namori-nalewn a lia do'a-hala mak kodi plolli la a ino'nu yoma la'a Yesus Kristus Itmatromlawanni. La' hare honona pede ina-nara ama-hyali, itamkek memna de, (la'pa Yesus Kristus edon Ntulan ma'ta a' die) de hota agal toto' memna a ino'nu tetema pa agiwra liernohor reria Uplerlawna deullu-tatarni de mere a yehwa rimormio'ru di natlin to'a la do'a-hala.
Uplerlawna Nhiw Lululli Nala rurni-laini mai ita totpena itmormiori-tdardiari lola Uplerlawna ralma-riorni
1 La' hade pede, ina-nara ama-hyali, la'a it maka kor wutga Kristus Yesus la' olek la id wa, de dodo'ondi de meman pa Uplerlawna niukamnu edonna ntai owa'an ita. 2 Yoma la'a Kristus Yesus hihi'ini pede Uplerlawna Nhiw Lululli mak kala mormiori-dardiari ed maka kharia talan warwuaru mai ita. De la' Nhiwni kniarni la it ihranu ralamni de, pede Nhiwni de ed maka kolin doinia it la do'a-hala mak kodia matmiati-molmuolu plalahwa. 3 Yoma agama deullu-tatarni ta'en niana nwe'er doin it la do'a-hala, totpena do'a-hal edon nodi plolli owa'an mai ita, yoma rimormiori rakleh ruri-lai pa rlernohor reria agama deullu-tatarni. Mere Uplerlawna ed mak kwe'er doin ita totpena do'a-hala edon nodi plolli owa'an mai ita, yoma Enhopan doinia E A'na wamueheni pa Nmai lia nohkeran di totpa hota Nwal lia hoihoi-tantiani (persembahan) pa Ntuw niana-nhai nian ita. La' ler de de A'na de Nwal lia rimormiori pa emekwali ita, mak khi' do'a-kyap hiala (mere E edon Nhi' do'a-hala). La' talan mak emkade pede Uplerlawna ed maka Nukmua E A'nani la rimormior ita rerieini. 4 Uplerlawna Nhi' emkade totpena Nhar tialla totpena itlernohor reri E ralma-riorni maka kayamkek la agama Yahudi deullu-tatarni. Itsi' emkade itlernohora Uplerlawna Nhiw Lululli wniayownohorni. It edon tlernohora it yehwa rimormiorni mak kod it la yatyatni-halalli. 5 Riy maka kmori-kdari rlernohora yehwa rimormiorni de, de nwaror mamain to'a yehwa rimormiorni maka yotyotni-yatyatni maka ka'hira la ralma-riorni. Mere riy maka kmori-kdar lia Uplerlawna Nhiw Lululli wniayownohorni, de nwaror nana mamainia hya' ed maka Uplerlawna Nhiwni Ha Nwayow nohora. 6 La la'pa ralma-riormi de nden rer mamain la yehwa rimormiormi mak kod miy lia do'a-hala, de hota mlier la matmiati-molmuolu plalahwa. Mere la'pa ralma-riormi nden rer mamain la Uplerlawna Nhiwni wniayownohorni de miy ihrami ralamni hota namtiertiernu, me hota mmiormiori pa nodi liarni. 7 Riy maka ralma-riorni nden rer lia ralma-rior rimormiorni mak kodi do'a-hal de, de riy de hota nora Uplerlawna ra'ara yoma riy de edonna nru'u-ntowar la Uplerlawna deullu-tatarni. La'pa niwra nlernohora deulu-tatra de nek de ta'en niana. 8 Riy mak kmori-kdari rlernohora yehwa rimormiorni, ta'eni nhi' nana hya' ed mak kla' nana Uplerlawna ralam kalwiedni. 9 Mere miy edonna mmiormiori pa mliernohora yehwa rimormiormi mak kodi miy lia do'a-hala. Miy e mliernohora Uplerlawna Nhiw Lululli yala'ani, yoma Uplerlawna Nhiwni ed mak kagengen lia miy inonmi. Mpiahniorta! Riy mak kakleha Yesus Kristus Nhiwni de, riy de, Yesus Kristus gahani atia' e'a. 10 Hota miy inonmi nmati yoma la' do'a-hala mere la'pa Yesus Kristus etla miy ralammi de hota miy mliernan mormiori plalahwa pa nodi liarni. Hota mliernan mormior die, yoma Uplerlawna Net olek la de mlier wut lia mak kaplol la E yamkekni pa mior E' pa mkialwied owa'ana. 11 Uplerlawna Nhiwni, mak kamori-kalewna Yesus la matmiatni ralamni, etla miy ihrami ralamni, pa hota Uplerlawna mak kamori-kalewna Yesus Kristus la matmiatni de, hota ed maka kamori-kalewan walia miy inonmi mak kler la matmiati ralamni. Hota Enhi' nana de yoma Nhiwni mak kmormior lia miy inonmi de. 12 La' hade pede, ina-nara ama-hyali, itlernana Uplerlawna Nhiwni mak khopna pa itsi'a-tyapia samomuou. Mere edonna Nhopn it pa totpena itlernohor it yehwani rimormiorni mak kodi it la do'a-hala ralamni. 13 Yoma hota la'pa miy e mliernohora yehwa rimormiorni de hota mlier la matmiati-molmuolu plalahwa. Mere la'pa mdien rer lia Uplerlawna Nhiwni de, totpa la talan emkade pede miy edon mliernohor owa'ana nhiolmi-lietmi maka khi' do'a-hal de, de hota mlier la mormiori plalahwa.
La'a Uplerlawna Nhiw Lululli hihi'ini pede itat nohora Uplerlawna upni-a'nani ita
14 Riy maka Uplerlawna Nhiwni Nodia de Uplerlawna upni-a'nani irhatta. 15 Itamkek memna hadi yoma Uplerlawna Nhiwni maka Enala mai it de, hota edonna Nhi' it pa tamta'ata pa emeknekama upa-matroma mak khi' atni pa namta'ata. Rwaldioinia de, Uplerlawna Nhiw Lululli Nhi' itla' Uplerlawna upni-a'nani. Pa hota la' Nhiw de hihi'ini de, pede itpolga Uplerlawna la it Amni maka Nsayni ita. 16 Uplerlawna Nhiwni orgahani ed mak kar lia ita ralma-riorni pa Nakot nohora it di de Uplerlawna upni-a'nani ita. 17 Ne la' it de E a'nani ita, de hota it er maka klernana ra'ani-pallu pripanni-fa'anni la E'a pa emeka re'a-tniaru maka ina-ama rhi'taru la'a upni-a'nani. Hota itlernan hya' ed maka Uplerlawna Nhi'targa la'a Yesus Kristus. Itora Yesus Kristus rewre'wa pa itler la kropna-krieutu yawuhi-yawe'eta pede hota it mana tler walia ya'uli-yawedi pa emekwalia E'a.
Mormiori-dardiar warwuaru mak khitita-kreprepra mak itwei-tnara de narehi lawlawan memna la it luini-nuhranu la'a dodo'ondi
18 Ina-nara ama-hyali, mormiori-dardiari maka khita-krepra klipa-ka'ma maka hota Uplerlawna Nala de, hota narehi lawlawan meman la'a lui-nuhru polpuolu-wakwaka honona maka itlernan olek la' lera-mela ri. Pede la' a wniaro'ru de la'pa itwaror nohora hare honona mak hota Uplerlawna Nala de, de it luini-nuhranu ri edon rrekan nan wali. 19 Hya'-hya' honona maka Uplerlawna Nakoki-nayap niana la noheri woru-lyanti nayanni mana rwewiei-rnarnara la'a hya' ler ed maka Uplerlawna hota Ntutga de upni-a'nani ita. 20 Yoma noh di nor mniotni e rolin doini oleka pa hota edon nlernan samomuounu maka Uplerlawna Nwaror nan ulga pa noh di nlernana. Mere emeknekama noh di mniotni edonna nodia ralma-rior wamueheni mere onnila Uplerlawna ed maka kolin doini nohkeran di pa emkade. Mere la'pa emkade ho'mana emeknekama maka Ha Nakoki-nayap niana re nhia'argenni eda di, 21 de totpa hota Uplerlawna Nollia noh di mniotni pa edonna rler owa'an la wnieyata-wnianiawu, matmiati-molmuolu, gehpa-ta'la totpa hota ror wutga Uplerlawna upni-a'nani rler la ha samomuou meman de. 22 Ita tatga de, la' ululu memna la'pa ntutu-nte'ewa la dodo'ondi mana, ora-au, nhiuri-wnia'ana la'pa hare honona maka Uplerlawna Nakoki-nayap niana emeknekama e rkoko'a-rherera yoma e ramehra, pa hota emeknekama patke'a ida mak kamehra-kamau niohora nayoria a'nani. 23 Ne edon riwra hare to'a mere makpesiay it hononit mana it ihranu ralamni e nko'a-nkakur wali. Yoma itlernan oleka Uplerlawna Nhiwni maka Uplerlawna Nala mai ita pa emeka ra'ani-pallu mak kala' ulu, mere ita twewiei-tnarnar ma'ta ler maka Uplerlawna Nala ra'ani-pallu korni maka Uplerlawna Nano'targa la E a'nani ita, de hota itlernan inon warwuaru mak hota edon kmati owa'ana. 24 Yoma mulaliaini la' ler maka itpesiay de it tsa'ar it aranni la' hota itlernan hya' ed maka Uplerlawna Nano'taru de mai ita. Mere la'pa hya' ed mak it tsa'ar it aranni de, itlernan oleka wa, de it edon twaror owa'ana hade. Yoma riy edonna rha'ar aranni la hya' maka ha rlernana oleka hade wa. 25 Mere hya' maka itsa'ar ma'ta it aranni la pa hota itlernana, de twewiei niohora.
Uplerlawna Nhiw Lululli Ntulan la ita la'pa itsumbaini
26 Emekwalima itsa'ar it ralamni la' hade, de hota emkade walia itsa'ar it ralamni la Uplerlawna Nhiwni Naruri-nalai me Ntutga talan mai ita, la'pa takleha ruri-lai onde itaplin niohora yala'ani. Yoma taplin niohora ma'ta emkameni la itsumbaini. Mere la'pa it ralma-riorni naplahwa pa itodia la Uplerlawna yoma it ralma-riorni de ta'en niana itakot nohora, de Uplerlawna Nhiw Lululli Nmeh'a ed maka kwak la Uplerlawna mai ita. 27 Ne hota Uplerlawna, mak kat niohora rimormiori it ralamni, pena E nekpa Nat niohora Nhiwni yala'ani plolli la it polpuolu-wakwakni, de Uplerlawna Nat niohora de Nhiwni de Nlernohora Uplerlawna ralma-riorni pa Nwak la Uplerlawna onnila makpesiay polpuollu-wakwakni. Hare honona mak kalwiedweda la'pa kropna-krieutu, lui-nuhru mak itlernana la it mormiorni di Uplerlawna Nnairia pa Nod it la kalwieda-paitiota 28 Ina-nara ama-hyali, it hononit maka ralamni nden rer lia Uplerlawna, maka Uplerlawna e Npolga pa tlernohora E ralma-riora maka Enwaror nan olekwa, itatga de hya' mak kalwiedweda la'pa kropna-krieutu, lui-nuhru maka itlernana la it mormiorni di, de hota Uplerlawna ed maka khi'a totpena nod it la kalwieda-paitiota. 29 Yoma Uplerlawna Nwalir nian oleka it maka Enat niohor meman la ululu de hota itpesiay E'a, pa tlernohora E A'nani Yesus de yehwani-liakatni. Pede tor Yesus de twahyali, ne Uplerlawna Nhi' Yesus la a'na yanulu la makpesiay it hononita. 30 Uplerlawna Nwalir niana olek ita me Npolg it pa itpesiay E'a. Noma Nhi' it wal pia itor E' pa tkalwied owa'ana. Ne hota it yehwani nlernohor E yehwani mak samomuou memna me narehi-nalawna.
Itler la hya'-hya' ho'mana Yesus Kristus Ntut ma'ta E sniayanni mai ita
31 La' hade pede itat niohor meman de, onnila Uplerlawna hihi'ini-yapyapni mak karehi memna re mai ita, pede ta'en niana riy id mana natowar nan it la' yawa, yoma Uplerlawna Nod nian ita. 32 Itat niohora hade yoma Uplerlawna A'na wamueheni nek de, E' edonna Nreiya la gera tlinni-ai aratni (Nalewna) mere Nalla pa rira rwunu-rwenna E' la it rerieini. Enala A'nani mai ita pede itat niohora memna hota Nal to'a hya'a maka takleha la it mormiorni-dardiarni. 33 It er maka Uplerlawna Nwalir niana, pede ta'en niana riy rwaghal it la Uplerlawna gaini ralamni. Yoma Uplerlawna ed maka ketlia de it er mak kaplol la E yamkekni. 34 Toto'a pa ta'en niana riy id mana rwaghal ita. Yoma Kristus Yesus Nmeh'a ed mak kod nian ita. E' ed maka kmati olekwa la it rerieini, mere Enmori owa'ana pa Nora Uplerlawna la' gen miaka ha ra'uli-rawedi. Ne la' hande de Nsumbain reri it la' Uplerlawna. 35 La'pa riy id mana onde hya'-hya' to'a de ta'en niana rhi' oruli-augewat la Kristus sniayanni de mai ita. La'pa itler la lui-nuhru, yamuki-yama'ala, yakropna-yakrieutu, rehka-lara, takleha-taplara onde itler la hya' to'owa mak kodi it la kropna-krieutu lawna, la'pa rala wehla ra rwunu-rwen it ho'mana Uplerlawna Ntut rer ma'ta sniayanni la it mormiorni. 36 Hade emekwalima Daud lirni la Uplerlawna maka ha rhorat targa la Puka ralamni riwra: ”Lelera-melmel de, amapalia matmiati-molmuolu la' O rerieimu Uplerlawnu nee! Rhi' am die emeknekama duma maka ha riwra rotna tiernu.” 37 Mere itlernan hare honona ho'mana edon ratowar nan ita. Mere it di de emolmolla neka me mak karehi meman la ara la'a hare honona de yoma Kristus mak ktulla-ksayni ita. 38 Yoma apuesiay memna la'pa itmati onde itler la kropna-krieut la it mormiorni di, la'pa Uplerlawna hopopanni-lili'irnu onde hegana-kawnu yatni-rha'ani, la'pa hya' ed maka ha rhi' nana la lerni-melli ri onde la' ler mak itapal rieri, la'pa makaruri-kalai maka ktorna-krautu la nohkeran di 39 onde mak kodi plolli mak kden la lyanit marna uhunu-ewatni-ewatni-lahwani onde hya'-hya' la'a noheri woru-lyanti nayanni tetema, hare honona re ta'en niana rhi' oruli-augewat la Uplerlawna sniayanni mai ita. Sniayanni de ed maka Uplerlawna Ntut la it di la'a Itmatromni Kristus Yesus hihi'ini la it rerieini.
Paulus ralamni nmalui dioin onnila e mutwualli makden Yahudi harahu re rwayotlia pesiay la'a Yesus
1 Ina-nara ama-hyali, hya' ed maka agiwra ukot di de ha plollola de. A'g edonna ulahara. Yoma a' di de Yesus Kristus gahani a'u me a ih'ru ralmu de, Uplerlawna Nhiwni ed mak kodi plolli, me Enhi' a' pua agatga de a li'ru ri ha raplola. 2 Pede hota miy miat meman de la' lera-lera nekpa a ralmu nmalui dioin me ihru-ralmu naklierta 3 yoma la'a a i'nu-na'ru a'mu-hya'lu la'a makden Yahudi, a mutwua'lu re rwayotlia Yesus. A ralmu naplele'er pa Uplerlawna Nukmu a'u me Nhopliala a lia Yesus Kristus onni hornama hade nod ir la yamori-yalewna. 4 Yoma makden Yahudi re rlernan oleka unut lawna. Ir er maka Israel nadurit nana yoma Uplerlawna ed maka kwaliri ir pa Nhi'a la a'nani me Entut walia E plolli-mneheni mak khitita-kreprepra la ira. E' ed maka kakot targ nnio'oni re la ira, me Nal walia agama deullu-tatarni la ira. Uplerlawna ed mak kwatut ir la talla plollola pa rkola tieru-rawur nehla la E'a. Nnio'a harahu er maka Uplerlawna Nano'targa la ira. 5 Yahudi re upni-tgarni de Abraham, Isak, me Yakopa maka nhi'inde rwetwet la kotni-nanni. Ne mak kareh mieman de, Yesus Kristus Nwatiawu walia ira. Yesus de Uplerlawna inhatta mak karehelia hare honona, pede ya'uli-yawedi etla E'a pa nodi liarni Amin (Plola).
Eneknekto'a riy dom to'a la Abraham duratni-waitni re er mak kla' wutga riy maka Uplerlawna Nwalir niana totpa rlernana hya' maka Nakot targa
6 Ina-nara ama-hyali, la' emkameni ho'mana Yahudi re harahu rwayotlia Yesus Kristus de, mere hade edon nhi' oruli-augewat la Uplerlawna nnio'oni maka Ha Nakot targ oleka la Abraham, Isak me Yakopa. Yoma eneknekto'a riy dom to'a la makden Yahudi maka Israel nadurit nana re er maka Uplerlawna Nwalir niana pa Nhi'a la E gahani totpa rlernana hya' maka Uplerlawna Nakot targa. 7 Emkade walia Abraham duratni-waitni dom de edon rla' wutga la' riy maka ha rhoiya la Abraham upni-a'nani maka Uplerlawna Nwalir niana totpa rlernana hya' ed maka Ha Nakot targa. Mere Uplerlawna Nwalir nian Isak pa nlernan nnio' maka Enakot targa oleka, yoma lirni la Abraham Niwra: ”Isak to' pa ed maka kadurit nana o upmu-a'namu mak klernan A nnio'u di”. 8 Hade nnia'eratni de Abraham duratni-waitni maka rweta la Uplerlawna upni-a'nani, de mak ha riwra duratni-waitni mak ha rano'taru, ne edon riwra duratni-waitni honona. 9 Uplerlawna nnio'oni la Abraham de emkadilla: ”Anni id owa'an de Amuai ne, la' ler de Sara na'a'n nan oleka a'na muanke'a ida.”
La'pa Uplerlawna Nwaliri rimormiori totpena rlernana hya' maka Enakot targa, de Uplerlawna Nlernohor E ralma-rior wamueheni
10 Ne hota emkade wali la Ribka lerni, de Ribka mana na'a'na walia a'na dio'a muanke'a woru. A'na dio'a re amni de Isaka, makden Yahudi upni-tgarni de. 11 Mere la'pa a'na dio'a re edonna rmor nian ma'ta, ne edonna rhi' nan ma'ta hadomdom pa yamkekni samoga onde yata, de Uplerlawna Nwaliri oleka matni enni pa nodi liarni. Totpa Ntut memna, de Uplerlawna Nwalir die 12 edonna Namkek la rira hihi'ini-yapyapni mere Nlernohora hya' ed maka Uplerlawna Ntota pa Npol niana onnila E ralma-rior wamueheni. Yoma Ribka a'nani rora edon rhi' ma'ta hya' mak kaplola onde mak khala mere Uplerlawna Nakot oleka la Ribka: ”Hota a'namu gari nodi plolli la' yanulu.” 13 Hade emekwalima Uplerlawna lirni maka ha rhorat targa la'a Puka ralamni de Niwra: ”Yakop (a'na gari) de hota A'ura'a-upalga mere Esau (a'na yanullu) de hota A'g edonna tiutga A ra'u-pa'lu.” 14 Hya' ed maka hota itwarora la dodo'ondi? Uplerlawna wnialirni-wniayohoni de itlernan plolli-mneheni me edonna? Meman nek la Uplerlawna Naplola-namneha! 15 Yoma Uplerlawna Nakot la Musa: ”Hota Atiutga A sniaynu la'a riy maka hota A ralmu ha nala, me hota tiutga A ralam kalwie'du la'a riy maka Agiwa tiutga la.” 16 Pede Uplerlawna Nwalir riy, de edonna nawniair la rimormiori ida wniaror wamueheni mak kod ir pa rhi'a-ryapi hadom pa totpena hota Uplerlawna Nreinian ira, mere nawniair to'ola Uplerlawna ralma-rior wamueheni pede Uplerlawna Ntutga sniayanni la riy de. 17 Itamkek memna hade la Puka ralamni maka e rhorat targa Uplerlawna lirni la ray Mesir, de Niwra: ”A'g ed maka kran o' la ray, yoma la'a A ralma-rio'ru di to'a, de totpa la' o wawanmu de hota Atiutga A plo'lu-mneh'u (ru'ru-la'yu) me Aghi'a A na'nu pa riy ra'uli-rawedi la'a noheri woru-lyanti nayanni.” 18 Pede ina-nara ama-hyali, itamkek memna de Uplerlawna Niwra Ntutga sniayanni la' riy ida, de hade ed maka Uplerlawna Nhi'a. Me la'pa Uplerlawna Niwra Natehra riy ida ralma-riorni emekwalima ray Mesir de, de hade ed maka Uplerlawna Nhi' nana.
Uplerlawna Nlernohora ralma-rior wamueheni pa Ntutga ralam mehrani la rimormior doma, me Ntutg walia ralam kalwieda la riy dom to'a
19 Dodo'ondi de yanpa hota riy id tiy miy die nakota mai a'u, niwra: ”La'pa Uplerlawna ed maka Ha Nror targa hare honona, hya' ed mak kariei piede Uplerlawna Niwra Nwaghala ma'ta rimormiori it di la' it do'oni-halli? Riy id mana edonna nwayotlia Uplerlawna ralma-riorni toh?!” 20 Mere hota awuahla riy de yatianni: Miy die rimormior tio' miy. Ne miy di de yana mpiaran pia mpiahla Uplerlawna lirni! Mpiaror teka! Hota plol walia la rana ida natian walia riy maka kar niana ran de pa niwra: ”Nihya'pa omkiar a' die emkadina de?” 21 Miplinga de riy mak kakoki-kayapia ran de, ed maka kodi plolli pa Nakokoma-napapala tan miera de plolli nek la e ralma-riorni?! La'a tan wioka ida, de riy maka kar die nodi plolli pa nhi'a rana woru, de ida samoga, korni de edon samoga toh! 22 Emkade walia hya'a ed maka Uplerlawna e Niwra Nhi'a de hota Nhi'a. E ralma-riorni totpena hota Entutga hankeranni-ralmha'arni la mak khi' do'a-kyap hiala ne Enala plolli-mneheni (rurni-laini) na Nukmua re. Mere Enhur rierer niohor ma'ta ralmha'arni la'a riy maka Enwahi' targ oleka pa hota Ha Nukmua pa rler la matmiati-molmuolu plalahwa. 23 Uplerlawna ralma-riorni de totpena la' talan mak emkade pede Entutga ra'ani-pallu mak karehi-kalawna la riy maka Nsaynia re, de la riy maka Ha Nwahi' targ oleka totpena rlernana mormiori-dardiari la Ilyamou-Watyatoha mak liplipa-kamka'ma. 24 Ne hota it di de er maka Ha Npolg oleka wa. Edonna ntot nan to'a Yahudi re rmeh'a mere la'a riy dom maka Yahudi atia' mana, Npol wualia.
La'a Puka ralamni rakot targ oleka Uplerlawna Nwalir nian makden Yahudi atia'a totpa rwet wal lia E upni-a'nani
25 Rakot nohora walia hadi la'a Hosea Pukni ralamni; de e rhorat targa Uplerlawna lirni (la'a Yahudi atia'a re), Niwra: ”Riy maka edonna kler wut lia A mu'tu-rah'u de hota Awueta la a mu'tu-rah'u. Durti-waiti maka A'g edonna tiutga A ralam kalwie'du mana hota Awualdioinia pa Atiutga A ralam kalwie'du la.” 26 Me e rhorat targ walia riwra: ”La' ululu Uplerlawna Niwra: ”Miy edonna mior wut lia A mu'tu-rah'u,” mere la' dodo'ondi, Nwet ir la Uplerlawna mak kden pa nodi liarni upni-a'nani.” 27 Makwohorulu-ktatrulu Yesaya nhar lirni pa nakot nohor walia Israel rimormiorni niwra: ”Riy Israel miy die rimormiormi emeknekama en liu'wu-tan miakmu. Mere hota riy dom rmeh'a er maka kler la mormiori-lewlewna. 28 Yoma Orgahi-Orha'a hota plet pa Nteta tniu'utu lawna la mei me Nhudi-npara la'a watghudi lokarni, la'a riy mak kden la nohkerna wawannu.” 29 Emkade walia hya' ed maka Yesaya nror targa niwra: ”Uplerlawna-Mempulwatnu maktorna-makrautu haneknek wawannu de edonna Nal taru it duratni-waitni riy ida-woru re mana, hota Yahudi it di mana tmat momuou pa emekwalima mak kden la leta Sodom nora Gomora maka Uplerlawna Nweyata-nwaniawua.”
Yahudi re rhal talla, yoma edon rlernohora talla plollola pa ror Uplerlawna rkalwieda, onnila pesiay
30 Pede ina-nara ama-hyali, ha nnia'eratni de emkadilla: Riy makden Yahudi atia'a, edonna rwahak pa rora Uplerlawna rkalwied owa'ana. Mere la' lera-mela ri onnila ir pesiayni la Yesus Kristus pede Uplerlawna Nor wut ir pa rkalwied owa'ana. 31 Hota rwaldioini owa'ana de riy Yahudi e rha'ar tar aranni la deulu-tatra totpena irora Uplerlawna rkalwied owa'ana. Mere ira edonna rlernan talan pa rora Uplerlawna rkalwied owa'ana. 32 Hya'a nrei pia ir edonna rlernan talan pa rora Uplerlawna rkalwieda? Yoma hihi'ini-yapyapni de edonna rha'ara aranni la Uplerlawna talanni mak kaplola, de ir edon rpesiaya Yesus Kristus, mere rlernohor neka agama deullu-tatarni. La' ir wniarorni de totpa hota Uplerlawna Nreinian ira. Irwayotil talan onnila Yesus pa hota emeknekama rtuini-rdai lia wat muaka kaniewta. 33 Ne la Puka ralamni e rakot nohor Yesus de emkadilla: ”Mimkek la hadi! De la'a Sion de A'g e wuatatg oleka watu id wa. Wat die watu nniuli-nniewta narieiniande irwetur tar lia pa rlerwah'a gaini. Mere riy korni makpesiay la' E'a, edon ramta'ata rha'ar aranni la, yoma hota Enhi' nan maka Enakot targ oleka re.”
1 Ina-nara ama-hyali, a ralmu nwak toto' memna pa totpena a hairwia'lu Yahudi rimormiorni rlernana mormiori-lewlewna, pede a' muana siumbain rer mamain ir la Uplerlawna. 2 Hya' maka ukot di naplola: de Yahudi re irape'el olek pa rhu'ru-rhelam la Uplerlawna deullu-tatarni. Mere raplin niohora talla plollola maka Uplerlawna Nala pa ror E' pa rkalwieda. 3 Rtot pa raplinu Uplerlawna ralma-riorni la' emkameni totpena rkalwied owa'ana. Ne iriwra rlernohora ira ralma-rior wamueheni pa ror E' pa rkalwieda, pede ir edonna rreiniana talan maka Uplerlawna Ntut oleka de. 4 Mere la'a Yesus Kristus hihi'ini la matmiatni pede riy edon rlernohor owa'ana agama deullu-tatarni totpena ror Uplerlawna rkalwieda. Pa hota la E'a pede riy honona maka kpesiaya re hota rora Uplerlawna mana rkalwied olekwa.
Uplerlawna Nodi plolli pa Namori-nalewna he'-he' to'a makpesiay
5 Ina-nara ama hyali, la'a Musa Pukni ralamni de enhorat targa la'a riy mak kiwra kora Uplerlawna rkalwieda yoma rlernohora agama deullu-tatarni, eniwra: ”Enekneka riy maka edonna kpera-kdaitia agama deullu-tatarni id to' la' mormiorni ralamni nampena nler la mormiori plalahwa pa nodi liarni.” 6 Mere la'pa riy maka kora Uplerlawna rkalwieda yoma la'a pesiayni la Yesus Kristus, de ed walia la Puka ralamni de niwra: ”Yana mpiarora-mpialaiya la'a ralammi, hota he' ed maka kler la Ilyamou-Watyatoha,” nnia'eratni de hota he' nodia Yesus Kristus pa Nernu totpa enakot nohora mai ita la kot maka kakot nohora yamori-yalewna. 7 Onde: ”He' ed maka hota kerun la noh mati-rai miolu?” Nnia'eratni de he' nma nrana Yesus Kristus la matmiatni ralamni totpena Nakot nohora kot dena. 8 Mere Musa nakot neka niwra: ”Kot mak kodia mormiori-lewlewan de edon oliet tiy miy. Hota mpiarora-mpialaiya la miy ralammi de. Me miatu mikot nohora.” Ne kot de ed maka amakot nohora walia totpa hota mimpiesiaya; de nhi'inde amiwra: 9 La'pa miy nurmi nwayow nana Yesus la rira gaini ralamni pa miwra: ”Yesus de Orgahi-Orha'a inhatta,” me mpiesiaya la miy ralammi de Uplerlawna ed maka kamori-kalewna Yesus la' matmiati ralamni, de hota mimliernana mormiori plalahwa. 10 Yoma la'a mimpiesiaya la ralammi pede Uplerlawna Nreiniana-na'nana miy pa emeknekama riy maka kora Uplerlawna rkalwieda. Ne la'a nurmi mak kwayow nohora Yesus de Orgahi-Orha'a inhatta pa hota Namori-nalewna miy. 11 Ina-nara ama-hyali, itat niohora hade naplola yoma la'a Puka ralamni e rhorat targa: ”La' riy maka kpesiaya de hota edon ramta'ata rha'ar aranni la, yoma hota Enhi' nan maka Enakot targa oleka re.” 12 Hota Uplerlawna Ntut momuoga hadella riy honona. E yamkekni edonna to'a-taiya la'a riy Yahudi nor wutga rira dom to'a. Yoma E' de Orgahi-Orha'a inhatta la'a rimormiori honona. E' ed mak ktutu sniayanni pa Nala yara'ani-yapallu narehi-nalawna la'a riy honona maka kwaka tniulla-sniayn la E'a. 13 Hade emeknekama e rhorat targa la Puka ralamni de e riwra: ”Hota Orgahi-Orha'a Nala yamori-yalewna plalahwa la he'-he' mak kwaka yamori-yalewan de la' E'a.” 14 Mere hota emkameni la riy rwak Uplerlawna pa Namori-nalewna ira la'pa ir edon rpesiay ma'ta la Uplerlawna? Ne emkameni la irpesiaya la Uplerlawna mere ir edon ratlin nohor ma'ta E'a? Ne hota emkameni la iratlin nohora Uplerlawna mere riy edon rmai pia rakot nohora E'a la' ira. 15 Ne emkameni walia riy rodi kota la' ira la'pa ir edon rhopan pa rmai? Pede emeknekama e rhorat targa la Puka ralamni de niwra: ”Ha ramuki-rahepur nohora riy mak kmai pia kodia Kot Kalwieda-Paitiota mak kwatiawua Uplerlawna.” 16 Mere Israel duratni-waitni re ratlin nana Kot Kalwied de, mere eneknek to'ama Israel duratni-waitni dom to'a rreiniana-ra'nana Kot Kalwieda-Paitiot de pa rpesiaya. Yoma emeknekama makwohorulu-ktatrulu Yesaya lirni niwra: ”Orgahi-Orha'u ne! Enekneka riy ida-woru rmeh'a er maka kpesiaya a Kot Kalwiedwed mamni di!” 17 La' hare honona pede itat niohora de riy e rpesiaya yoma iratlin nana Kot Kalwieda-Paitiota la'a Yesus Kristus, maka ha rakot nohor oleka re.
Makden Israel ratlin nan Kot Kalwieda-Paitiot de mere rirahu re rahmena rpesiay
18 Mere yanpa plola de Israel re edonna ratlin ma'ta kot de me? Hota edon emkade! Plola ratlin oleka wa. Yoma Puka enakota niwra: ”E rakot nohor oleka la hare honona la' noheri woru-lyanti nayanni. Pa lirni-tunnu honona de nwewr olek la noheri woru-lyanti nayanni.” 19 Mere yanpa hota riy Israel re edon rna'erit nana lira-tunu maka ha ratlin nana rena? Hota edon emkade wali! Ira rna'erit nana yoma Yahudi atia'a nek de rna'erit nan oleka wa. Itat niohora hade yoma Musa ed maka kakot nohor ulga ha yala'ani, de Musa nwahaur nohora Uplerlawna lirni mak kiwra: ”Hota Aghi' Yahudi miy pia ralammi ramehra (cemburu), yoma A'ura'a-upalga Yahudi atia'a maka ha mpiarwah'a re. Ne Aghi' Yahudi miy pia miwenna, la'a Atiera-diema Yahudi atia'a re maka mimpiarora de raplinu-raplo'a.” 20 Makwohorulu-ktatrulu Yesaya mana, nparan tioto' meman pa nakot nohora Uplerlawna lirni la'a Israel duratni-waitni atia'a re, niwra: ”Hota riy maka edonna kwahak A'u, er mak kwatrom A'u. Yoma Atiutga A ino'nu la ir maka edonna kwahaka A'u.” 21 Mere la'a Israel duratni-waitni wniahaurnohorni, Yesaya nakot nohora Uplerlawna lirni Niwra: ”La' lelera-melmel de Awuak la A mu'tu totpa ror A'u mkalwieda owa'ana mere rahmena ra'unni-ramta'ata me rahmena ratlin la A li'ru-tu'nu.”
Makden Israel harahu rahmena rpesiay mere Uplerlawna Nwalir nian Israel dom pa rpesiaya
1 Pede, hota la'pa emkade de, yanpa Uplerlawna edonna Nreiniana-na'nan oleka mutnu-rahanu Israel? Meman nek la edon emkade! Amueh'a nek de Israel duratni-waitni a'u, yoma Abraham duratni-waitni a lia mutga Benyamin. 2 Uplerlawna edonna Nhopliala mutnu-rahanu, maka Ha Nwalir nian oleka la'a ululu memna. Ina-nara ama-hyali, mhioratreria la hya' ed maka ha rakot targa la Puka ralamni la' Elia, la' lera ha naklaka Israela re la'a Uplerlawna. Elia nakot la: 3 ”Matromlawnu ne! Riy rwen oleka makwohorulu-ktatrulmu re! Ne rweyata-rwaniawua katri'ana maka ha ral nhioi-tniani la O'a. Enekneka amuemueh'a, me iriwra rwenan walia a'u!” 4 Ne hya' ed maka Uplerlawna hota Ha Nakota la Elia? Uplerlawna Nwahla Eli lirni Niwra: ”Hota edon emkade! Yoma A'g e wualir niana riy riwnu wo'itu pua ultarga la' Awuameh'u. Ira edonna rru'u-rtowar ma'ta la uplera-upmati Ba'al.” 5 Pede hota emkade walia la dodo'ondi. Uplerlawna e Nwalir dioinia Israel riy doma pa E gahani yoma la'a E sniayanni la ira. 6 Enwalir nian ira onnila sniayanni la' ira. E' edonna Namkek la ira hihi'ini-yapyapni. Yoma maka ha riwra sniayanni plollola de edonna namkek la riy hihi'ini-yapyapni wniehwani-liakatni. 7 Pa hota emkameni? Riy Israel honona edonna rlernan talan pa ror Uplerlawna rkalwieda emeknekama hya' ed maka ha rwahakhaka, enekneka (cuma) Israel riy dom to'a maka Uplerlawna Nwalir niana. Mere la' Israel mutu korni honona re Uplerlawna Nhi' pa ra'o'ta wat muomuou lia'a Uplerlawna polpuollu. 8 Pa emeknekama ha rhorat targa la'a Puka ralamni niwra: ”Uplerlawna Nhi'a ira wniarorni-wnialaini pa nwal lia riy podku, ne la ululu la'pa dodo'ondi meman pa tlinni-matni ratniutwu.” 9 Daud nakot walia: ”Miollia pa mukni-heparnu ya'anlawna-yemunlawna re plinu-plinnianama rwal lia klierat lawna. 10 Miollia pa yamkekni re rmela-rka'ara, me mtieman targa re totpena rodia pa to'orni rkokioil nohora re pa nodi liarni.”
Onnila Yahudi rahmena rpesiaya pede Kot Kalwieda-Paitiot de rodia la'a Yahudi atia'a pa rpesiay
11 Pede hota emkameni owa'ana? Yanpa la' lerni la Yahudi mutnu rler la klieratni de emeknekama e rtuini-rdai pa ta'eni raprir nian owa'ana? Mere hota edon emkade! La'a ir do'oni-halli maka edon rreinian Yesus Kristus de, pede hairi dom to' mutnu-rahanu mana rreiniana Yesus Kristus de pa rlernana yamori-yalewna. Totpa hota la' hade pede riy Yahudi mana ralamni rahniar wialia Uplerlawna ra'ani-pallu la'a Yesus Kristus maka riy mak kden la hairi dom to'a re rlernan oleka pede Yahudi mana riwra rlernana pa rpesiay wiali. 12 Yahudi atia'a mak kden la nohkeran di de, rlernana ra'ani-pallu mak karehi-kalawna yoma Yahudi re do'oni-halli maka rwayotil oleka yamori-yalewna, onnila Yesus Kristus hihi'ini. Pede la'pa Yahudi honona maka Uplerlawna Nwalir tiaru rwaldioinia pa rreiniana-ra'nana Yesus Kristus totpa ror Uplerlawna rkalwied owa'ana, hota yeher to'a pa Uplerlawna kalwiedni-paitiotni na'ititar rer lia nohkeran di wawannu.
Nnio'a-niatu la makden Yahudi atia'a totpena yana rparwah'a makden Yahudi mere totpa Yahudi atia'a re ratiak reri ir pesiay wamueheni
13 Mere dodo'ondi, a'g e ultier niohora hari tiy ina-nara ama-hyali miy, miaka edonna kler wut lia riy Yahudi. A' di de ghi'a riy makodia Uplerlawna lirni-tunnu la'a miy maka Yahudi atia'a, de akar toto' memna yoma awuarora de ha samomuou eda kniar di. 14 Agha'ar reria a arnu totpena la a knia'ru di ed maka karieiniande a mutwua'lu Yahudi re orgahi ralamni rahniar wal lia ra'a-palu maka Yahudi atia'a miy mliernana, totpena la talan de Uplerlawna Namori-nalewan nan ira. 15 La'pa Uplerlawna Nwayotlia Yahudi re nareiniande Nharia loi-talla la hairi-hairi dom to'a miy pa mior Uplerlawna mpiali owa'an la kalwiedni. Yaho'ma la' ler maka Uplerlawna Nreinian olek Yahudi re onnila ir pesiayni de. Hota hade emekwalima riy mak kmati rmori owa'ana! 16 Ne Abraham, Isak me Yakopa de Uplerlawna gahani ira, pede hota emkade walia, ir duratni-waitni mana, Uplerlawna gahani walia ira. Itala yamanna pa tawalliohor teka (contoh). Nhi'inde la'pa Yahudi re rala prehenni yanullu la Uplerlawna, de hota nnia'eratni de prehenni korni mana Uplerlawna gahani walia. Hota hade emekwalima ora-au id wali. De la'pa au ga'ar de ha samoga de, de hota onni tutnu-akni mana samou walia de. 17 Hota tawalliohora riy Yahudi la'a Saitun tutnu-akni maka rhamin doin la au Saitun ida. Ne Yahudi atia' miy re emolmolan nekama Saitun akni maka rhamin doinia la wo'ora-kawru pa rma rtapla la'a nhiamin gen die, la'a Saitun tutnu-akni mulaliaini de letgarni. Pa hota emolmolan nekama tutnu-akni maka rhamin doin la de nlernana ruri-lai la au Saitun de, de hota miy mliernan walia ra'a-palu yoma Uplerlawna nnio'oni la Yahudi re upni-tgarni. 18 La' hade pede yan memmemna mpiarwah'a nana riy Yahudi maka Uplerlawna Nwayotlia, la'pa emkameni la ir de emekwalima Saitun akni maka ha rhamin dodioinia. Mere la'pa mimiwra mrian inonmi la Yahudi re, mhioratreria! Miy di de emeknekama ha ak tio'a miy. Ne au aki ho'mana hota edonna nalla ga'arni na'ana, mere ga'ar de ed mak kalla ha'akni de na'ana. 19 Mere yanpa hota riy Yahudi atia' id tiy miy die mpiahla li'ru miwra: ”Yowa, mere Yahudi re hota emeknekama au tutnu-akni maka ha rhamin doinia re totpena ha rtapla ha'aki id owa'ana la au die. Ne a' die hota emeknekama ha'aki maka ha rtapal walia la au onni de”. 20 Hade plola. Mere mhioratreria me! Rhopliala Yahudi re yoma rakleh pesiay. Ne rreinian targho' miy, yoma la'a pesiaymi. La' hade pede yana yehwami natulu-napetan la Yahudi re. Mere mhi' yehwami de mliol yawa, me mimta'ata mhiopliala miy pesiaymi. 21 Yoma la'pa Uplerlawna Nakleha sniayanni la'a riy Yahudi mak kakleha pesiay, pa Nhopliala pa emeknekama rhopliala au tiutu-aki la mulaliaini de, de hota Enhoplial wali miy yoma mikleha pesiay. 22 Pede ina-nara ama-hyali, itatga de Uplerlawna kalwiedni de inpona. Mere hankeranni lawan walia. Entutg hankeranni la Yahudi maka edon kpesiay. Mere Entutga ralam kalwiedni la Yahudi atia' miy maka kden rer lia E kalwiedni. Mere la'pa miy edonan mdien rer lia pesiaymi, de miy miana hota rhoplial wal miy. 23 Ne la'pa riy Yahudi re ir rolin doinia nhiolli-lietni la'a kleh pesiayni re, de hota Uplerlawna Nreinian owa'an ira, yoma Uplerlawna ed maka kodi plolli pa Nreinian owa'ana re. 24 Yoma makden Yahudi atia'a miy emekwalima hatutu-ha'aki maka ha rhamin doini la au saitun mak kdella wo'ora, maka edon rtera, mere emkade ho'mana rtapal wutga la au saitun maka ha rterter reria emolmolan walia makden Yahudi, de Israel duratni-waitni re. La'pa Uplerlawna Nreinian Yahudi atia'a miy onnila miy pesiaymi de, hota yeher to'a pa Enreiniana-na'nana owa'an Yahudi re onnila ir pesiayni. Yoma ir er maka Uplerlawna Ntera-nlahu, me ir er maka Uplerlawna Nakot targ ulu oleka E nnio'oni la.
Uplerlawna sniayanni la'a rimormioria nohkerna wawannu
25 Ina-nara ama-hyali maka Yahudi atia' miy, a'ukot nohora tiy miy die la'a Uplerlawna ralma-riorni maka ululu de riy raplin niohora ma'ta, totpena la lera-mela ri, de miat niohora memna. A'ukot nohora hadi yoma a'uhmena miy mrian atulu inonmi. De hota Uplerlawna wniarorni de emkadi: Israel duratni-waitni harahu re ra'o'ta tehra. Mere wniehwani re hota nodi liarni la'pa ntut lia ler meni maka Yahudi atia'a honona maka Uplerlawna Npolga oleka re hota rpesiaya E'a. 26 Nhor nioka Israel duratni-waitni honona hota rlernana yamori-yalewna. Pa hota emeknekama ha rhorat targa la'a Puka ralamni de e riwra: ”Hota Ray Makamori-Kalewna Nwatiawua Sion pa Nmai. Hota Nmai pia Nrei dioinia do'a-hala la'a Yakop duratni-waitni. 27 Hota A nnio'u maka A'ukot targa la' ir de, totpa A'g ed maka khap doinia ir la do'oni-halli.” 28 Ina-nara ama-hyali makden Yahudi atia'a miy, la'pa rakot nohora la'a riy Yahudi edonna rreiniana-ra'nana Kot Kalwieda-Paitiota mak kwatiawua Uplerlawna, de hota Yahudi re emekwalima Uplerlawna arwalli. Mere la' ir edon rreiniana de, hade nareiniande mimliernan unut lawna yoma la' hade pede miy er maka mliernana yamori-yalewna. Mere la'pa rakot nohora Yahudi emeka riy maka Uplerlawna Nwalir niana de, Uplerlawna Nhi' kalwiedwed ma'ta la riy Yahudi re, yoma Uplerlawna Nhorat nan ma'ta E nnio'oni la'a ira upni-tgarni Abraham, Isak me Yakopa. 29 Yoma la'pa Uplerlawna Nwaliria riy ne Nala ra'ani-pallu la riy de, hota Uplerlawna edonna Nwali owa'an lirni pa Nherun doinia hya' maka Ha Nhi' olek de. 30 Ler ululu de Yahudi atia' miy edonna mitlina-mitaili la'a Uplerlawna, mere la' dodo'ondi de Uplerlawna orgahani Ntutga ralam kalwiedni tiy miy, yoma la'a riy Yahudi edonna ratlina-ratailla E'a. 31 Emkade walia la dodo'ondi de Yahudi re rlernan walia Uplerlawna ralam kalwiedni onnila Yahudi atia' miy. Yoma ir edon ratlina-ratailla Uplerlawna nareiniande Uplerlawna Ntutga ralam kalwiedni la'a Yahudi atia' miy. Ne onnila miy owa'an pede Yahudi re rlernan walia Uplerlawna ralam kalwiedni. 32 Yoma Uplerlawna Nhur dioinia rimormiori honona rpa ratlinnon kerna yoma do'a-hala nodi plolli la ira. La' hade pede Enlernan talan pa Entutga sniayanni la riy honona.
Ya'uli-yawedi la Uplerlawna onnila E ralam kalwiedni la'a rimormior ita
33 Uplerlawna-Mempulwatnu, O' ed mak kden la tutullu-lolo'oni! O kirkirmu-ralma-riormu wniatetmu-wnianehemu narehi-nalawan memna. Ralma-riormu ta'en niana amparor nana. Hota he' ed maka kakot nohora lira-tun muaka Ompuetla? Me he' wal pia mak kna'erit nana la'a hya' maka Mhi' nan oleka rena? 34 Hota emeknekama ha rhorat targa la Puka ralamni riwra: ”He' ed maka kat niohora Orgahi-Orha'a ralma-riorni? He' ed maka hota kano'a-kanatga E'a? 35 He' ed mak kara'a hadom la Orgahi-Orha'a? Pede nwahaka wniahlani? Riy hadamonan meman la!” 36 Yoma Uplerlawna ed mak kakoki-kayapi hare honona. E' ed mak kodi plolli la hare honona, me Enakoki-nayapi hare honona pa nodia ya'uli-yawedi la E'a. Pede ina-nara ama-hyali, mai pia ta'uli-tawedi tamuki-tahepur la Orgahi-Orha'a Uplerlawna-Mempulwatnu pa nodi liarni. Amin (Plola).
Mormiori mak kaplola la Uplerlawna yamkekni
121 Ina-nara ama-hyali, la'a Uplerlawna kalwiedni mai ita pede awuak de, totpena miala inonmi la Uplerlawna, de mhi' inonmi de pa emeknekama hoihoi-tantiani, mak kmormiori, maka miala la Uplerlawna gahani, me mak kodia ralam kalwieda la E'a. Maka a'ukot di kniola tieru-niawur nehla yala'ani mak plollolli memna la Uplerlawna de. 2 Yana mliernohora rimormiori nohkeran di wniarorni-wnialaini. Mere miollia pa Uplerlawna Nhi' pa wniarora warwuaru na nherun doinia la wniaror ululmi de totpa hota la' hade pede miy miat niohor memna Uplerlawna ralma-riorni mak kodia kalwiedni me nden rer lia plol wawna. Mak klernohora E ralma-riorni de, hihi'ini re rla' nana E ralamni.
Mniairia ra'a-palu (karunia) maka Uplerlawna Nal tiy miy pia idma ntulan la ida
3 Ina-nara ama-hyali, Uplerlawna ed mak kala sniayanni la' mai a' pua A'g ed mak kodi E lirni. La' hade pede a'uno'a-unat miy hononmi pa yana mitulu-mipetna inonmi. Mere mimpiaror nohora inon wamuehemi de lol talanni, nlernohora ra'a-palu miaka Uplerlawna Nal tiy miy onnila mpiesiay E'a. 4 It inonni de lima-laka erla. La'pa ita tutu'uni-niernierannu nek de erla. Ne ita limni-lakni la'pa it tutu'uni-niernierannu re kniarni harahu, mere edonna ramneha. 5 Hota emkade wal lia mak kpesiay. Riy rahu ita, mere emkade ho'mana emeknekama it di de inona ida yoma it hononit tor Yesus Kristus tla' ida. Me it idma ntulan la ida pa emekwalima it limni-lakni tutu'uni-niernierannu la inona ida. 6 Onnila it di de rima-rima tlernana ra'a-palu (karunia) maka Uplerlawna Nala mai ita, de Nlernohora E sniayanni, de hota itnairia pa ta tulan la it rimormior wialli. Ra'a-palu honona re edon ramneha. Riy maka klernan ra'a-palu pa nakot nohora kot mak kwatiawua Uplerlawna, de hota nakot nohora hade, de nlernohor neka lira maka ha npesiaya de Uplerlawna Nal oleka la e wa. 7 Riy maka klernan ra'a-palu pa na nhima-nre'a la rimormior wialli, de hota nhima-nre'a toto' meman la rimormior wialli. Riy maka klernan ra'a-palu pia nwatutu-nwaye'a, de riy de nape'el pa nwatutu wali. 8 Riy maka klernan ra'a-palu pa nhedu-ntehra rimormior wialli, de nape'el pa nhi' emkade. Riy maka klernan ra'a-palu pia nara'a-napalga rimormior wialli, de nhi' emkade, de ntutga ralam kalwiedni. Riy maka klernana ra'a-palu pa ra rtorna-rrautu, de napepe'ela pa ntorna-nrautu rimormior walli. Riy maka klernana ra'a-palu pia ntulla-nsayni la rimormior wialli, de ntulan la rimormior wialli de, nala ihru ploi-ralma ple'era nahepuepur nohora.
Idma nhi' kalwiedwed ida
9 Miala ihru ploi-ralma ple'era pa ma mtiulla-msiayni, mira'a-mipalga rimormior wialmi. Mhiopliala kirkir yata-ralma rior yata, ilu-yehwa yatyata-halala, mere mtiorrer apitga kalwiedni-paitiotni. 10 Mihmiakur pa mtiutga kalwieda-paitiota la'a mutwualmi re pa hota emeka mior ir pa mpia'ama-mpiahyali mpia'ina-mpianara. Me mipepe'el pa idma nhu'ru-nhelam la ida. 11 Mkiar lia Orgahi-Orha'a kniarni de mipepe'ela. Yana miodia inon werta pa ma mkiari. 12 Mihepuepru yoma mhia'ar reri aranmi la Orgahi-Orha'a, la'pa mlier la kropan lawna onde lui-nuhru mhiur niohora ralam mehrami me mdien rer lia sniumbaini. 13 Mtiulan la makpesiay walmi mak kakleha-kaplara. Ne mrieiniana-mia'nana do'ona-dakna mak kwatiawua gen dom to'a la'a miy likatmi ralamni. 14 Mpiak la Orgahi-Orha'a totpena E' ed maka ktera-kdema riy mak kodi miy lia lui-nuhru. Yana mpiak la Uplerlawna pa rlernana miy nhiorghalmi-wniaghalmi. 15 Mihepur nohora riy maka kler la muki-hepru, me mrie'ela mkiakur nohor walia riy mak ko'a-kakru. 16 Miora rimormior wialmi re idma nkalwieda-npaitiot ida. Yan memmemna mtiutga tulmi-petanmi. Mere hota miora riy mak kakleh weli de mpiahaur wutu. Yan memmemna mpiar rer lia lirmi-yatmi pa mtiern rira. 17 La'pa mliernana riy rhi' yatyatni la miy, de yana mpiahla nohora hya' ed maka ha nhi'de. Miala samomuounu pa ma mpiahla. La hya' honona maka ha mhi' nan de, mhi' reria totpena riy honona ramkek nana de miy die rimormiori samomuou miy. 18 Mipepe'el memna totpa yan miora riy dom miwunu-miwenna. 19 Ina-nara ama-hyali mak kden rer lia a ralmu, yan memmemna mpiahla rira nhiolli-lietni mak kpa'eini-kpahala. Mere mial neka la Uplerlawna pen neka E' ed maka Nukmua re! Yoma la'a Puka lirni de e rhorat targa la Orgahi-Orha'a lirni Niwra: ”A'g ed mak kwahla! A'g ed mak hota gukmua re!” Orgahi-Orha'a lirni hade! 20 Mere hota mliernohora Puka lirni mak kiwra: ”La'pa o' arwalmu naplara, de muala na'ana, ne tiernu kerna, de mual ger la nemnu yoma la'pa miy mhi' emkade, de hota e' ed maka kmola-kma'a pa nherun doin hihi'ini-yapyapni.” 21 Pede yan memmemna miala yatyatni ma mpiahla rira hihi'ini yatyatni la' miy, yoma la'pa emkade de nnia'eratni de rira nhiolli-liet yatyatni ratowar nan olek miy. Mere miatu miala samomuounu pa ma mpiahla. Emkade pede hota mitowar nan ira nhiolli-liet yatyatni de.
Tlernohora lodna-hairi (kerajaan) riorni-liaini
1 Ina-nara ama-hyali, it hononita de hota tatu tsu'ru-tselam la lodna-hairi nayanni. Yoma lodna-hairi honona re rlernana tniorna-riautu rella Uplerlawna limni ralamni, ne la'a lodna-hairi dodo'on gahani ri, e rala' nohora tnioranni-riautnu de ha nwatiawua Uplerlawna. 2 La' hade pede he' ed mak katlinnon keran la lodna-hairi yawewalli, de emekwalima enatlinnon keran la Uplerlawna yawewalli. Ne ir hihi'ini mak emkare nareiniande hota irlernana niukmu. 3 Yoma riy maka katu khu'ru-khelam la lodna-hairi yawewalli de hota edonna namta'ata hadomdoma la'a lodna-hairi. La' to'a riy maka khal nohora lodna-hairi yawewalli nanpena namta'ata. Pa la'pa miy miwra mhi' totpena yana mimta'ata mak ktorna lodna-hairi, de yana mpiera-mdiaitia lodna-hairi riorni-liaini. Ne hota la'pa emkade, de hota mliernana ya'uli la'a mak ktorna lodna-hair de. 4 Yoma maktorna-makrautu re de Uplerlawna Nmeh'a hopopanni hare, pa rkaria kalwiedwed tiy miy. Mere la'pa miy mhi' yatyatni-halalli, de hota plola pa mimta'at ira. Yoma ira rlernohora ira tnioranni-riautnu pa rukum miy. Ir de Uplerlawna hopopanni ira maka ketlia niukmu maka Uplerlawna Nala la'a he'a-he' mak khi' hala. 5 Hade pede miatu mitlina-mitailla lodna-hairi yawewalli, de edon riwra mhi'a to'a yoma mihmena mliernan niukmu, mere la' walia yoma miat niohor oleka de hihi'a-yapyap die, ed mak kaplollol memna. 6 La' hade wal miana ed mak karei piede mpiairi blastena. Yoma maktorna-makrautu re er maka kala'a nohora Uplerlawna tulanni-kniarni de. 7 Pede miala la maktorna-makrautu maka plollola pa miala re, de hota mpiairi blastena la lodna-hairi, hya' to'a maka ha rakot oleka tiy miy wia, de yana mhi'a tlinnon kerna, me miatu mitota-miwawa, mhiu'ru-mhielam la' mak kala' nohora horta-hairi maka lodna-hairi ha nakota.
It idma tsi' kalwiedwed ida yoma hota edon nalo'on wali ne Yesus Nmai owa'ana
8 La'pa mhi'a otna-ar la riy ida, de pleta-pleta pa mhierun momuoga re. Id wal die mhi'a pa nodi liarni, de totpena miy idma ntutga ralam kalwiedwedni la ida pa nodi liarni. Yoma riy maka ksaynia rimormior wialli, de hota e nhi' nan olek Musa deullu-tatarni honona. 9 Yoma la agama Yahudi deullu-tatarni niwra: ”Yana milira-miliai, yana mpiunu-mpienna, yana mkiamnelu-mkiamna'a, yana ralammi niwra gahami emekwalima rira gahani.” Deulu-tatra wogata re la'pa deulu-tatra honona de er momuou lia deulu-tatra mak kiwra: ”Mtiulla-msiayni, mura'a-mupal wualia rimormiori wialmu pa emekwalima mumkek reria inon wamuehemu”. 10 Yoma riy mak ktulla-ksayni, kara'a-kapalga riy meheni, de hota hihi'a-yapyapi mak kodia yatyatni id mana, hota edonna nhi'a la riy meheni de. Pede la'pa itlernana riy maka ksaynia rimormior wialli de hota riy de wal pia ed maka klernohor oleka agama deullu-tatarni honona. 11-12 Pede mtiulla-msiayni, mira'a-mipalga rimormiori wialmi, yoma miy e mhioratreria lera-mela meni hari. La'a ler maka na'nama itpesiaya de rlardoin memn olekwa. Ler maka hota Orgahi-Orha'a Nmai pia Nalewn ita de e rrehgorg olekwa. Ntutu-nte' olek meman la' ler maka twehwa-tlakat la plollol wawannu. Hota emeknekama la'pa mela nhi' pa nrepar wa de riy ramat la dudu ralamni, de hota emkade walia la'a Orgahi-Orha'a maimiaini rehgoru olekwa pede yana itsi'a nhioli-lieta melmelli gahani. Hota itwehwa-tlakat la leler gahani de emeknekama keki-rautu maka it tnairia. 13 Hota tsi'a-tyapia lelera gahani de emkadille: yanpa la'pa itsi' ya'anlawna-yemunlawna de nodi it la pehera-ma'wu pa taplinu todi it inonni pa it idma nalira-naliai ida, onde twehwa yatyatni-halalli. Yana tahuri-tawo'ora, yana it idma nahmena namkek ida kalwiedni. 14 Mere tlernohor neka Yesus Kristus hihi'ini-yapyapni, nhiolli-lietni. Ne hota hihi'ini-yapyapni, nhiolli-lietni de, emeknekama keki-rautu ar ralma maka it tnairia. Ne yan memmemna tlernohora ita yehwa rimormiorni mak kod it la do'a-hala, yoma itwaror nan hya' la' it ralamni de itiwra tsi' memna.
Yana mpiaghala inmi-narmi yoma miora wniarormi edon ramneneha
1 Ina-nara ama-hyali, la' riy makpesiay mak kaplinu-kaplo'a la'a wniaror samomuou hya' ed maka Uplerlawna Nwayow nohora, de miatu mrieiniana-mia'nana samomuoga. Yana miora mihuri-miwo'or nohora hya' mak kpa'eini-kpahala la Uplerlawna yoma riy de enwaror nan hade la e ihranu ralamni. 2 Mimkek nohor tek la! Riy makpesiay dom de wniarorni niwra na'an hya'-hya' to'a. Mere la riy doma de enaplin niohor ma'ta hya' ed maka Uplerlawna Nwayow nohora pa niwra e' de enekneka ena'an to'a ortawi-autiawi. 3 Riy maka ka'ana hya' to'a, de yana nparwah'a nana riy mak ka'ana ortawi-autiawi. Ne la' walia mak ka'ana eneknek ortawi-autiawi to'a de yana nwaghal walia mak ka'ana haneknek wawannu. Yoma riy de ed maka Uplerlawna Nreinian oleka walia. 4 Ta'en niana riy ida netlia riy dom to'a hopopanni de plolli-halli, yoma hopopan de tlinni-tailli npa'eini-npahala ho'mana pen neka upni-matromni nmeh'a neka ed mak ketlia. Emkade walia Orgahi-Orha'a Nla' oleka makpesiay wialmi upni-matromni. Hota E' ed mak ketlia makpesiay wialmi lirni-tunnu. Hota Ntulan la hopopanni de totpena hihi'ini re rla' nana Orgahi-Orha'a ralamni. 5 La' riy dom de wniarorni de riwra: ”Ler memeh'a di, de narehelia lera korni,” mere dom de riwra: ”Lera re honona ramneneha la Uplerlawna yamkekni”. Mere mak kaplola de, de totpa rima-rima nlernohora hya' ed maka ha nwarora de plola la Uplerlawna ralma-riorni, de edonna nlernohora riy dom to'a mak ktot nan e'a pa e nlernohora ir wniaror wamueheni. 6 Riy maka kwaliri-kwalioha lera maka ha napili-nahniari de, enhi' emkade totpena na napilia-nahniaria Orgahi-Orha'a la' ler de. Riy maka ka'ana-kemnia haneknek wawannu mana ha nhi' emkade totpena na napili-nahniaria Orgahi-Orha'a wali, yoma ena'uli-nawedia Uplerlawna la' ya'ana-yemun de. Emkade walia maka ka'ana-kemni ortawi-autiawi, nhi' emkade totpena e' mana nhu'ru-nhelam palia Orgahi-Orha'a me nsumbain pa nwaka kalwieda la E'a. 7 Itsi' emkade yoma riy id mana edonna nmormior pia nlernohora e ralma-rior wamueheni. Me riy id la mai it mana edonna nmat die nlernohora E ralma-rior wamueheni. 8 Yoma itmormiori la'pa ita tmati ho'mana hade nlernohora Orgahi-Orha'a ralma-riorni. La' hade pede Orgahi-Orha'a gahani ita, la'pa tmormiori onde tmati oleka wa. 9 Hade rerieini pede Yesus Kristus Nmati olekwa mere Nmori owa'ana, totpena Enla' Matromlawanni mai ita, la'pa itmormiori ma'ta onde itmati oleka wa. 10 Yesus Kristus Nmeh'a ed mak kla' Matromlawanni la' makpesiay hononita, pa hota hya' ed mak krei pia miy mak ka'an eneknekto'a ortawi-autiawi, de miy e mpiaghala mak kpesiay wialmi mak ka'an hya'-hya' to'a? Ne hya' ed mak krei pia miy mak mi'ina-miemun hya'-hya' to' de miy e mpiarwah'a nana mak edon ka'ana? It hononit di de hota ittutrier lia Uplerlawna gaini ralamni pa Enmeh'a maka Nhud it la watghudi lokarni. 11 Hota emeknekama ha rhorat targa la Puka ralamni de riwra: ”Orgahi-Orha'a Nlokar pa Niwra: ”Hota plol toto' memna de riy honona rru'u-rtowar la A ga'yu ralamni. Ne riy honona mana namni ra'uli-rawedia A na'nu de Uplerlawna-Mempulwatnu.”’’ 12 La' hade pede erammi la' temni. Rima-rima natiak la hihi'a-yapyap wamueheni yoma hota mpialol nohora la'a Uplerlawna.
Yanpa miy hihi'imi-yapyapmi re rodi miy inmi-narmi la klieratni
13 La' hade pede yan memmemna idma nwaghal owa'an ida. Ne mitiak rer wiali totpa wniehwami-liakatmi yana nhi' pa makpesiay wialmi rler la do'a-hala ralamni. 14 Ina-nara ama-hyali, yoma agor oleka Orgahi-Orha'a Yesus mla' lir id wa pa apuesiay memna, de yamanna hya' to'a mana edonna nwal lia mak Uplerlawna Nlarna. Mere la'pa riy ida wniarorni-wnialaini de yamanan de Uplerlawna Nlarna, la' e' de plol toto'a pa yamanan de e rlarna. 15 Ne la'pa mi'in hadoma pa inmi-narmi mak pesiay ramkek nana, pa hota pesiayni re wolwo'la yoma la' ir wniarorni de ra'an yamanan de do'a-hala hade, de mi'in yamanan de miy edon mtiutga ralam kalwieda la' ira. Pede yan memmemna mi'ina-miemun neka hadomdoma la makpesiay gaini, la'pa mi'in emkade la' ir gaini hota nodia ir la klieratni. Yoma Yesus Kristus mana Nmati olekwa la ir rerieini. 16 La' hade pede la'pa miy hihi'imi-yapyapmi de hota narieiniande makpesiay wialmi pesiayni wolwo'la, kennama la miy wniarormi de hihi'imi de edon nhala la Uplerlawna yamkekni, samounu de yana mhi' hihi'-yapyap die totpa yan riy rwaghal yehwami de. 17 Yoma la'pa Uplerlawna Nodi plolli pa emeka Ray la' it mormiorni-dardiarni, de Uplerlawna Nwahaka de hornama itsoli-tliet la plol wawna. Me totpa idma nkalwied la' ida me itamuki-tahepru yoma Uplerlawna Nhiwni mak kdella it ralamni. Ne hota hya' ed maka ha ta'ana-temnia, de edonna rakot nohora de. 18 Riy maka klernohora Yesus Kristus mak ktutga nhioli mak emkadi, de hota Uplerlawna ralamni nala de. Ne rimormior wiali miana ralamni nal walia. 19 La' hade pede itwahak neka pa totpena yana idma napie'er la ida, me totpena trewre'wa tler la ga'a la it pesiayni. 20 Yanpa la' ya'ana to' nekane mpieyata-mpianiaga hya' maka Uplerlawna Nkar niana la riy mak kpesiay die ihranu ralamni. Meman nek la ya'ana-yemnu honona de Uplerlawna edonna Nlarna. Mere la'pa mi'in hadoma de hota narieiniande riy makpesiay dom ra'an walia pa hota la wniarorni de enhi' nan oleka do'a-hala, de hota mi'in hade de nhala. 21 Samounu de yana ta'ana hamormiori ihini me temni anggur onde hya' to'a ed maka ha tiwra tsi' momuowua la'pa itsi' emkade hota nodi it makpesiay wialli de pa rler la do'a-hala ralamni. 22 Pede ina-nara ama-hyali, ndella pa Uplerlawna Nmeh'a neka ed mak kat niohora miy wniarormi-wnialaimi la'pa hya' mak kaplol me nhala. Ne hota riy maka wniarorni de nden rer lia plollolli de hota enla' nana Uplerlawna ralamni, yoma enlernohor neka hya' ed maka ha nwarora de naplola la Uplerlawna yamkekni pa hota e edonna nwaghal inon wamueheni. 23 Mere riy maka kwaror nana: ”La'pa a'una hade, de hota aghi' oleka do'a-hala.” Mere nwaror emkade ho'mana hota na'an yamanan de, de hota Uplerlawna ed maka kwaghala de. Yoma la'pa riy de na'an yamanan de edonna ntikil rer lia e pesiayni onnila na'an yamanan de edon nhala. Yoma hya'-hya' maka itsi'a-ityapia de itpesiaya de hihi'a-yapyap die nhala Uplerlawna yamkekni, de hota it hihi'ini-yapyapni de do'a-hala hade.
Mhi' makpesiay wialmi pa ralamni ramtiertiernu me yana mtiot nana inon wamuehemi
1 Ina-nara ama-hyali, la' it maka katu kwarora-kwalai samomuou la hya' ed maka Uplerlawna Nwayow nohora, de yana itwaghala riy mak rlarna ya'ana-yemnu yoma raplinu-raplo' nohor ma'ta mak kaplola me mak khala. Mere miod niohor ira. Yana itlernohora ita ralma-rior wamueheni pa itot nan to'a hya' ed maka itwarora la it ralamni. 2 Mere rima-rima nwahak inni-narni makpesiaya re kalwiedni, totpena ir pesiayni na'ititar rer lia. 3 Yoma Yesus Kristus mana edonna Nwaror to'a E inon wamueheni. Yesus lirni la Uplerlawna maka ha rhorat targa la Puka ralamni de Niwra: ”Yapolu-yaliella maka ha rakota tiy O' de ha ntuin mai A'u.” 4 Mak ha rakot targa la Puka ralamni honona de ral harella re rwatutg ita. Totpena la'a wniatutu-wniaye'a maka itlernana la Puka ralamni de hota itatu ta ttahan it ralamni me yeher to'a pa it pesiayni la'a ga'a, pa hota itsa'ar reri it aranni la Uplerlawna de hota Ha Nhi' nan hya' ed maka Ha Nakot targa oleka wa. 5 Uplerlawna ed mak katehra it ralamni me Nhi' aruri-alai ita totpena it pesiayni la' ga'a. Twak la E'a pa Entulan tiy miy totpa miy hononmi miatu mmiormior la'a ihru ida-ralm ida pa emeknekama Kristus Yesus. 6 Totpa hota mlia ralm id la ya'uli-yawedi la Uplerlawna-Mempulwatnu, de Itmatromni Yesus Kristus Amlawanni de.
Yahudi me Yahudi atia'a idma nreinian id la kalwiedni, emeknekama Yesus Nreinian olek miy hononmi
7 La' hade pede, idma nreinian id la ralam kalwieda, pa hota emekwalima Yesus Kristus Nreinian olek miy die. Totpa hota la' hade pede miodi ya'uli-yawedi la Uplerlawna. 8 Yana mhioratdoinia de, Yesus Kristus Nmai totpa la' hya' ed maka Ha Nhi' nana la Yahudi re rerieini de Ntutga de Uplerlawna Nhoratreria nnio'oni la ir upni-tgarni, Abraham, Isak, me Yakopa. 9 Ne Yesus hihi'ini de wal pia nhi'a Yahudi atia' re pa ra'uli-rawedia Uplerlawna yoma Entutga ralam kalwiedni la' ira. Hade ed maka Daud Nror targa. Ne Daud lirni la Uplerlawna de ha rhorat targa la'a Puka ralamni de niwra: ”La' hade pede hota la'pa agetla la'a hairi-hairi maka Yahudi atia'a letgarni hota awuatunu-wuahniara pa a'u'uli-uwedi, lilili-mamuau O nanmu totpa ratlin nana.” 10 Ehorat targa de emkadi wali: ”Makden la hairi-hairi Yahudi atia' miy hononmi, hota miora Uplerlawna mutnu-rahanu Yahudi mimuki-mihepur nohora Uplerlawna.” 11 Me hadi wali: ”Yahudi atia' miy hononmi mpiatunu-mpiahniara pa mi'uli-miwedi mlilili-mmamuawua Orgahi-Orha'a!” 12 Ne hadi mana Yesaya enakot walia: ”Hota Isai duratni-waitni ida Nmai pia Nodi plolli la hairi-hairi Yahudi atia'a. Ne hota ir rha'ar aranni la E'a.” 13 Ina-nara ama-hyali, awuak pa Uplerlawna, mak khi' pa riy rha'ar aranni la E'a, pena Nala ralam yahepru, kalwieda-paitiota la' miy miak e mpiesiay reri E'a. Totpena hota Uplerlawna Nhiwni plolli-mneheni nkar lia miy ihrami-ralammi pa hota yeher to'a me mhia'ar aranmi la Uplerlawna.
Paulus nakot nohora kniarni yala'ani
14 Ina-nara ama-hyali, agat meman nohora de miy e mhi' mamainia kalwiedwedni. Miy die miatu hya' maka kla' nana Uplerlawna ralamni liawanni pede miy idma natu nwatutu-nwaye' ida. 15 Mere emkade ho'mana, la' horat di ralamni, de apuaran pia a'ukot ploloi-plele'era la'a lira-tunu ida-woru totpa emeknekama aghi' miy pia mpiaror nohor owa'an la hare. A'g e ukot nohora hare honona yoma la'a Uplerlawna sniayanni pa E' ed mak kala kniar de la mai a'u, 16 de totpena a'g ed mak khima-kre'a Yesus Kristus tulanni-kniarni la'a Yahudi atia'a rerieini, pa emeknekama awual lia imam id la ir rerieini. Yoma ukot nohora Kot Kalwieda-Paitiota mak kwatiawua Uplerlawan la ira totpena la'a irpesiaya de, a'g ed mak karei pia ir de emeknekama hoihoi-tantiani la'a Uplerlawna, maka E ralamni Nala me maka Nmeh'a gahani yoma Uplerlawna Nhiwni Naliri-nalioh nan ir la Uplerlawna. 17 La' hade pede, yoma agor oleka Kristus Yesus mla' ida, pede a ralmu nahepur nohora a knia'ru di la Uplerlawna. 18 Apuaran pia eneknekto'a ukot nohora la'a hya' ed maka Kristus Nhi' nana la'pa e Nnair a lira-tu'nu nor wut wualia a tulla-knia'ru pa narieiniande Yahudi atia'a re rlernohora Uplerlawna. 19 La'a Uplerlawna Nhiwni plolli-mneheni pede aghi'a hihi'a-yapyapi mak kamehi-kayona mak ktutga Uplerlawna rurni-laini. Kot Kalwieda-Paitiota la'a Kristus de, de a'ukot nohor olek la riy mak kden la Yerusalem, la'pa nodi liarni la makdena Ilirikum pa a knia'ru la' hande nhorwua olekwa. 20 Yoma la'a mulaliaini la'pa dodo'ondi, a wniaro'ru de totpena ukot nohora Kot Kalwieda-Paitiota mak kwatiawua Uplerlawna la'a gen miaka riy edonna ratlin nohor ma'ta Kristus totpena la'a a knia'ru de, de emekto'ama a'g edon ulair nohora rira watu liar yanullu, maka rira dom to'a limni enni. 21 Rwaldioinia de aghi' emeknekama e rhorat targa la Puka ralamni de e riwra: ”Totpa hota riy meni ed maka edonna katlin ma'ta kota la Uplerlawna, de hota rna'erit nana pa rat niohora!”
Paulus hota nodia patuini-paro'onni la Yahudi makpesiay la' Yerusalem, nhor diewade nla' Roma
22 Nhi'inde alia ukot nohora Uplerlawna Kot Kalwiedni la gen miaka edon ratlin ma'ta, pede hade ed maka khi' yawuhi-yawe'eta pa a'g edonna tiy miy die. 23 Mere la dodo'ondi de a knia'ru la' geni-tiena ri rhorg olekwa. Ne onnila wenu-wolla rahu anni-anin rahu de agiwra tiy miy die, 24 de pena la'pa alia'a Spanyol de hota liola miy letmi totpena a'umuki-uhepur nan oke'a yoma agor miy. Nhor demade miy mtiulan mai a'u totpena agodi lia'ru la Spanyol. 25 Mere la' dodo'ondi de agiwra lia'a la Yerusalem totpena agodia himima-rere'a maka riwra rala la Uplerlawna mutnu-rahanu mak kden la hande. 26 Yoma krei mutwualli la'a Makedonia me Akhaya, rmeh'a ret olek la totpena rala patuini-paro'onni la'a Yahudi mak kakleha-kaplara la Yerusalem, mak kla' olek la Uplerlawna mutnu-rahanu. 27 Yahudi atia'a re mak kden la Makedonia me Akhaya ralamni raplele'era retlia de hota rhi' emkade. Hota plola la' ira patuini-paro'onni re totpena rhima-rre'a mak kakleha-kaplara re la'a Yerusalem, de lol talanni. Yoma emeknekama Yahudi atia'a re e ra'otan la Yahudi re. Yoma riy maka Yahudi atia'a re rre' pa rlernan oleka sniayanni maka Uplerlawna Nakottarga la Yahudi re, yoma Yahudi re rakot nohora Kot Kalwieda la' ira pede hota emkade walia riy maka Yahudi atia'a re wal pia rala yohya'a hya' to'a la'a riy Yahudi mak kakleha-kaplara. 28 Pede la'pa aghi' ahorga a knia'ru di maka agala patuini-paro'ona maka ha rawok nana honona pa rala la mak kden la Yerusalema re, de hota agodia lia'ru la Spanyol mere liol taru miy letmi! 29 Agat niohora de, la'pa alier teman tiy miy die, de hota a'g e godia Yesus Kristus tniulanni-sniayanni mak karehi-kalawan de tiy miy. 30 Ina-nara ama-hyali, Itmatromlawanni Yesus Kristus gahani ita me Uplerlawna Nhiwni ed mak ktulan ita totpena it idma nara'a-napalg ida. La' hade pede awuak de hononmi mhi' emekwali a pua msiumbain rer wali a lia a knia'ru di. 31 Msiumbaini totpena Uplerlawna Nalewna a lia mak kden la Yudea mak edon kpesiay, yanpa rhi' yatyat a'u. Me msiumbain walia totpena a knia'ru mak hota agodia himima-rere'a la Uplerlawna mutnu-rahanu la Yerusalem, de mak kden hande rreiniana-ra'nana, de ralamni ramtiertiernu. 32 Totpena hota la'a miy sniumbainmi emkade mai a'u, de hota Uplerlawna Nala pa aliernan talan pa atiy miy die, agodia ralam hepuepru. Ne it rewre'wa pa it ralamni namtiertiernu me tahepru. 33 Awuak la Uplerlawna, mak ktorreria kalwiedni-paitiotni pena Nlin reria-nmat rer miy hononmi la' hande. Amin (Plola).
Paulus nwak kalwieda la inni-narni amni-hyalli
1 Ina-nara ama-hyali, agiwra ukot nohora tiy miy lia it narni Febe nhiol samounu de. Enla' oleka mak khima-kre'a krei mutnu la'a leta Kengkrea. 2 La'pa entiy miy die, totpena mrieiniana-mia'nana e' pa emeknekama Orgahi-Orha'a rimormiorni idma nreinian ida, mliernohora hya' mak kaplol la riy makpesiaya. Mtiulan la e'a, pa la'pa enwak hadom de mialla. Yoma nhi'inde e ntulan la riy rahu, emekwalima nhi'inde ntulan mai a'u wali. 3 Ina-nara ama-hyali, mtiulan pa mpiak walia a kalwie'du la Priskila nora Akwila, a mutwua'lu maka kar rewre'w a lia Kristus Yesus kniarni. 4 La'a iriwra ralewn a'u pede trema-trema ir mati. Awuak terima kasi npenpuenu-nanahala ira, ne a'g edonna mueh'a mere Yahudi atia' honona mana mak kla' oleka krei mutnu. 5 Mpiak walia kalwie'du la krei mutnu maka kawok tar lia Priskila nora Akwila rom wamueheni. Kalwieda la Epenetus maka kden rer lia a ralmu. E' ed maka kala' ul pua kpesiaya Yesus Kristus la'a Asia. 6 A kalwie'du walia Maria, mak kar tioto' memna yoma la' miy. 7 Mpiak walia a kalwie'du la a hairwia'lu Andronikusa me Yuniasa. La' lera a'g edonna puesiay mia'ta Yesus Kristus ir er maka rala' ul pua rpesiay Yesus Kristus. Ir de de riy makodia Uplerlawna lirni-tunnu, maka riy rwetweta la ir nanni. La' ler ululu de agor rewre'wa wali ir pa mla'a roma nhio'la. 8 A kalwie'du walia Ampliatus maka asiayn de, yoma la'a enor a' pua amora Itmatromlawanni mla' id olekwa. 9 A kalwie'du walia Urbanus it mutwualli mak kar lia ita kniarni, la'a Yesus Kristus, me la'a Stakis mak kden rer lia a ralmu. 10 A kalwie'du walia Apeles. Enler la kropna-krieutu lui-nuhru la pesiayni rerieini mere endenrer (setia) mamain la Yesus Kristus. Kalwieda walia Aristobulus romni mniotni honona makpesiay. 11 Ne la' walia a hairwia'lu Herodiona. A kalwie'du walia la ina-nara ama-hyali maka it pesiayni ida mak kden la Narkisusa romni. 12 A kalwie'du la it narni Trifena nora Trifosa, maka kar toto' meman la Orgahi-Orha'a me la' walia it narni Persis maka a'g edonna ghoratdoinia. E' mana nkar tioto' meman la Orgahi-Orha'a kniarni. 13 A kalwie'du la Rufus nor inni maka aghi'a de emekwalima a in raralmu. Rufus de ed mak riy rwetwet la nanni onnila nkar toto' memna la Itmatromni kniarni. 14 Ne mikot nohor walia a kalwie'du la Asinkritusa, Flegon, Hermes, Patrobas, Hermas, me it inni-narni amni-hyalli honona mak kawok wut ir pa nhi'inde rkola tieru-rawur nehla la' geni ida. 15 Kalwieda la Filologus me Yulia me la' walia Nireus, nora narni patke'a me Olimpas me la' walia riy makpesiay re honona mak kor wut ira pa nhi'inde rkola tieru-rawur nehla la' geni ida. 16 It idma twapahar lima-tware'et mat la ida, de emeknekama twa'ina-twanar la it pesiayni ralamni. Krei mutnu-rahanu mak kler wut lia Yesus Kristus, honona e rwak kalwied tiy miy hononmi.
Nnio'a-niatu hohoni
17 Ina-nara ama-hyali, awuak tiy miy die orahnioratmi la'a riy maka kiwra khi' apie'era makpesiay re me rhi'a makpesiaya Orgahi-Orha'a pa ihranu ralamni wolwo'la, yoma rwatutga hya' ed maka edonna nor Uplerlawna lirni-tunnu maka mimieh'a miatg oleka re ramneha. Totpena olietmi la riy mak emkare. 18 Yoma la'pa riy mak emkare de hota edonna rhima-rre'a Yesus Kristus Itmatromlawanni tulanni-kniarni. Mere ha rhi' to' pa totpena ira hlie'wani ntepra. Hota ral nek nur mi'nani pa rpudi-rakla riy maka kaplinu-kaplo' nohora ir wniehwani mak edon kaplola. 19 Ina-nara ama-hyali, riy honona ratlin nan oleka yatlinmi-yatailmi la'a wniatutu-wniaye'a Kot Kalwieda-Paitiota mak kwatiawua Uplerlawna. Ne a' muana a ralmu nahepur nohor memna hya' ed maka ha mhi'a re. Mere awuak pa yeher to'a pa hota miatu mpiarora-mpialai la kirkira ralma-riora samomuou totpena miatu mhi' nan kalwiedwedni, ne yana mhi' nan hya' maka kyata-khala. 20 Ne Uplerlawna mak kala kalwiedni-paitiotni la rimormiori, hota edon nalo'on wali ne E' ed mak katowra hegana amlawanni la miy lakmi nayanni. Awuak de pen neka Itmatromlawanni Yesus Nanaloi-nanatar nan miy lia hande. 21 Timotius, a kniar wia'lu e na'enyat wualia wniak kalwiedni tiy miy. Emkade walia a hairwia'lu Lukius, Yason, me Sosipater. 22 A'u Tertius mak khorta Paulus lirni la horat di ralamni, de awuak kalwieda wali tiy miy pia emeknekama miy hyalmi la'a pesiay ida. 23 Gayus mana nwak walia kalwieda tiy miy. Paulus, a'u de a'g e diella e romni ne it mutwualli mak kpesiay re amhi'a krei lia e rom de walli. Erastus de ed mak ktorna kupan leta. E mana e na'enyatga kalwiedni wal tiy miy. Emkade walia ita hyalli Kwartus. 24 Awuak de pen neka Itmatromlawanni Yesus Kristus Nanaloi-nanatar nan miy hononmi la' hande.
Ya'uli-yawedi nden rer lia Uplerlawna-Mempulwatnu
25 Ina-nara ama-hyali, Uplerlawna ed mak kodi plolli pa Nhi' aruri miy pesiaymi yoma mitlin oleka Kot Kalwieda-Paitiota mak kwatiawua Uplerlawna, maka a'ukot nohora tiy miy die la'a Yesus Kristus. A'ukot nohora hade de edonna nhal la'a hya' maka Uplerlawna Niwa Nhi'a mere la'a ululu memna pa ntutu-nte'ela lera-mela ri rimormiori raplin niohora ma'ta de. 26 Mere dodo'ondi de Uplerlawna Nalharia! Uplerlawna-Mempulwatnu mak kden pa nodi liarni Nareiniande rakot nohora Kot Kalwieda-Paitiot de la'a makwohorulu-ktatrulu Pukni re me Enhopan doin wali am pia ma makot nohora lir de la' meni-meni, totpa la' dodo'ondi de rimormiori nohkerna wawannu rat niohora de, totpena hota riy honona rlernan talan pa rpesiay Uplerlawna ne ratu ratlina-ratailla E'a. 27 Ya'uli-yawedi nden rer lia O'a. O' de Uplerlawna inhatta. O' de ed mak ktorna kirkira-ralma-rior reheni-lawanni. Mai pia ta'uli-tawedi E' pa nodi liarni, de onnila Yesus Kristus hihi'ini. Amin (Plola)! A nhiu'ru-nhielam mamni tiy miy, Paulus, makodia Yesus lirni-tunnu.
Paulus nwak kalwieda
1-3 Ina-nara ama-hyali makden la Korintus. Miy di de krei wokni-le'enu mak Uplerlawna Npolga pa mlier la E mutnu mak kakleh do'a-hala. Mlier la E mutnu mak kakleh do'a-hala yoma miora Kristus Yesus mlia' ihru ida-ralm ida, de mior wutga mak kden meni-meni to'a, mak kola olek la Itmatromni Yesus Kristus tiernu. E' de ed maka it hononita Matromlawanni E'a. Paulus a'u me it mutwualli Sostenes, ampak de Uplerlawna, it Amlawanni de, nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy. Agodi plolli pa ghorta horat di, yoma a' di de maka Kristus Nhopan pa agodia Uplerlawna lirni-tunnu. Yoma Uplerlawna Nmeh'a Nran a lia E wniaror wamueheni.
Ra'a-palu (karunia) mak Uplerlawna Nala mai ita onnila itora Kristus tla' ida
4 Ina-nara ama-hyali, nhi'inde asiumbain rer pia a'u'uli-uwedia Uplerlawna mak akola tieru-gawur nehla la de yoma la'a E kalwiedni-paitiotni pa mliernan oleka ruri-lai la'a Uplerlawna, de lola Kristus Yesus. 5 A'u'uli-uwedia Uplerlawna yoma, onnila miora Kristus mlia' ihru ida, pede la' mormiormi-dardiarmi de mliernan mamainia E rurni-laini pa la' hya'a-hya'a to'a de miatu mikot nohora Uplerlawna lirni, me mlier la kirkira-ralma-riora samomuou la hare honona. 6 Ne la'a ruri-lai miaka ha mliernana re, pede hya' maka amakot nohora tiy miy la'a Kristus, de miat niohora de hade plola. 7 Mliernan oleka ruri-lai maka Ha Nala tiy miy die, pede la' lera-mela ri maka mpiewiei-mniarnar reria Orgahi-Orha'a Yesus Kristus maimiaini de mniair reria ruri-lai re honona. 8 Ne hota Uplerlawna Nmeh'a Nhi' aruri miy pia la'pa ntutu-nte'ela lerni-melli la' E maimiaini, totpena la'pa Orgahi-Orha'a Yesus Kristus Nmai owa'ana, de ta'en niana rto'on miy lia do'a-hala yoma mikleh oleka hala. 9 Hota Uplerlawna e Nhi' aruri-alai miy yoma edon Nhoratdoin E nnio'oni. E' de Uplerlawna E inhatta, mak kpol nian miy pia mlier teman la A'nani Yesus Kristus, Itmatromlawanni de, pa miora mlia' ihru ida-ralm ida.
Krei wokni-le'enu rahuri-rawo'ora pa to'a-taiya
10 Ina-nara ama-hyali, a'ultier di awuet la Yesus Kristus nanni totpena lira mak a'ukota tiy miy, mpiesiaya pa mliernohora. De awuak totpa miy hononmi yana mihuri-miwo'ora totpena yana to'a-tai miy. Mere totpa hononmi mlia' lir ida. 11 Ina-nara, a'ukot emkade yoma Klo'a rimormiorni rma raklak miy mai a'u riwra miy e mihuri-miwo'ora, 12 de rakotiwra, riy dom tiy miy riwra rlernohora Paulus a'u, dom de riwra rlernohora Apolsu, dom de riwra irlernohora Petrus, me la'pa dom to' de riwra irlernohora Yesus Kristus! 13 Mikot lira emkade de Yesus de e rhakar la'a-maiya! Paulus a' di edonna rwair wen a lia auwlakra yoma la' miy rerieimi! Me rharan miy miana edonna rwet la a na'nu toh! 14 A'u'uli-uwedia Uplerlawna yoma a'g edonna gharan mia'ta riy id tiy miy lia hande, enekneka agharania Krispus nor Gayus rmeh'a to'a. 15 Yanpa hota riy riwra agharania hare totpena irlernohora a'u. 16 O, yowa Stefanus me romni mniotni de a'g ed mak kharania. Mere a'g e ghoratreria de riy dom palia la hande de a'g edonna gharan mia'ta. 17 Yoma Yesus Kristus Nal a' die a'g edonna muai pia gharan riy. Mere Nal to' a' pua ukot nohora Kot Kalwieda-Paitiot della lol meni-meni. Hade ho'mana yana aniairia rimormiori nohkeran di kirkirni-ralma-rior samomuounu. Yanpa hota maka ukot nohora Yesus Kristus matmiatni la' auwlakra hananni, de hota ler la hamamuamua.
Uplerlawna Ntutga rurni-laini kirkirni-ralma-riorni la'pa lirni-yat wamueheni onnila Yesus Nmat lia it rerieini
18 Rimormior miak kharan nan matmiati-molmuolu plalahwa pa hota rrinnia la ai mormiori ralamni, de er mak kiwra kot maka ha mpahaur nohor la Yesus matmiatni la' auwlakra hananni de lir podpodku hade. Mere la'pa it hononita mak kharan nana yamori-yalewna, la it wniarorni de, emekneka Uplerlawna Nmeh'a Nala kot de pa Nod it la yamori-yalewna. 19 Yoma emeknekama la'a Puklawna lirni de Uplerlawna lirni mak kiwra: ”La' riy mak knairia rimormiori nohkerna kirkira ralma-rior samomuounu de hota Awueyata-wuaniaga kirkirni-ralma-riorni. Ne riy mak katu liawanni, de e lirni-yatnu mana A'uhmena-uprai.” 20 Pede riy mak katu kwarora-kwalaiya, me riy mak katu kwatutu-kwaye'a agama deullu-tatarni, la'pa riy mak katu kawo'or pa nod niana ir mutwualli wniarorni-wnialaini la'a lera-mela ri, de Uplerlawna Ntutga oleka de ira lirni-yat wamueheni mak klernohora nohkeran di wniarorni de hota nwal lia hamamuamua toh! 21 Uplerlawna Nhi' hade e Nlernohora E kirkirni-ralma-rior samomuou wamueheni. Wniarorni de totpa rimormiori kirkirni-ralma-riorni la'pa lirni-yatnu emkameni ho'mana hota taken niana rodi ir pa rla' Uplerlawna. Mere Enala lira-tunu la'a Yesus matmiatni mak amakot nohora di mere rimormiori nohkerna ha riwra hamamuamua de Nala na Namori-nalewna riy mak kpesiay. 22 Makden Yahudi rwak pa ramkek memna hihi'a-yapyapi mak kamehi-kayona nanpena rpesiaya. Ne makden Yunani mana rwahak lira-yatu la'a wniatutu-wniaye'a iskola totpena irpesiaya. 23 Mere am di de makot nohor to'a Yesus Kristus matmiatni yala'ani la auwlakra hananni totpena Namori-nalewn ita me E wniatutnu-wniaye'eni. Kot de ed mak khi' yawuhi-yawe'et la makden Yahudi re ralma-riorni. Noma riy mak Yahudi atia'a re riwra lir podpodku re! 24 Mere hota la' riy mak Uplerlawna Npol nian oleka re, de la'a makden Yahudi me mak Yahudi atia'a re, de Uplerlawna Ntutga rurni-laini me kirkira-ralma-rior samomuounu onnila Nala Yesus Kristus pa Namori-nalewna ira. 25 Yoma hya' maka Uplerlawna Nhi' nana Nlernohora E ralma-rior wamueheni, de rimormiori rwarora-rwalaiya de ha podku re. Mere Uplerlawna hihi'ini-yapyapni nlernohora E kirkirni-ralma-rior samomuounu, de narehi-nalawan meman la rimormiori nohkerna wniarorni-wnialaini. Ne Uplerlawna hihi'ini la'a Yesus matmiatni, de rimormiori riwra hihi'ini de nakleha ruri-lai. Mere hihi'ini de nodi plolli pa nareh niana rimormiori rurni-laini honona.
Uplerlawna Npol it pa Nhi'a la a'nani de E edon Nwalir lia riy orkotkotni-ornananni
26 Ina-nara ama-hyali, mhioratreria la emkameni la' lerni Uplerlawna Npol miy. La' makpesiay miy die enekneka riy ida-woru rmeh'a er mak katu la rimormior yamkekni, onde er mak kodi plolli, onde rla' marna-wuhura. 27 Mere plola la Uplerlawna Nwaliria mak riy riwra podku-padku totpena rhi' amola-ma'a mak katu. Ne Uplerlawna Nwalir wialia riy mak kakleha weli mak edon kla' nana riy rieknenni pa na namola-nama'a mak ha rwetwet la nanni. 28 Uplerlawna Nwalir niana makla' hopopna-lili'iru ata-wa'ara, maka ha rmakriarnia, maka rimormiori nohkeran di rwarora de edon nodi untu. Mere Nwaliria re totpena na nweyata maran penpuenu-wuhur tetema tullu-petanni. 29 Uplerlawna Nhi' hade totpena riy id mana edonna natulu-napetan la Uplerlawna gaini ralamni. 30 Mere Uplerlawna Nmeh'a Nna'ohma pede ina-nara mieh'a miora Kristus Yesus her wiutu. Ne la'a itpuit la Yesus mak kmati lia it rerieini de pede itat niohora Uplerlawna kirkirni-ralma-rior samomuounu mai ita la'a Yesus matmiatni de. Yoma Yesus matmiatni de pede Uplerlawna Nhi' it pa totpena itora E' pa tkalwieda. Ne Enhi' it la E mutnu-rahanu maka Nwalir niana pa Ntuwu-nhaiya la do'a-hala ralamni. 31 Pede ina-nara ama-hyali, emekwalima maka rakot targa la Puka ralamni, de yana mpio'on atulga inon wamuehemi. Mere mikot nohora hya' maka Orgahi-Orha'a Nhi' nana la miy rerieimi totpa riy ra'uli-rawed E'a.
Paulus edon ntutga lira-yatu mak katulu-karehi inonni la' ler maka enakot nohora Yesus Kristus
1 Ina-nara ama-hyali! La' ler amuai pia ukot nohora tiy miy lia'a Uplerlawna nnia'ohmani maka rimormiori nohkerna ha raplin mua'ta, de a'g edonna niairia lira wniarora-wnialai maka rimormiori nohkeran di e rwaror nana, onde a'g edon niairia lir marna mak samomuou. 2 Yoma ageti olek la de la'pa agor aplahwa nohor miy die, hota a'g edonna wuahauru nawerna-naplahwa nohora hadom tiy miy, enekneka a wniahauru ononni de la'a Yesus Kristus matmiatni la' auwlakra hananni. 3 La' lerni adien wut tiy miy die, a'g edonna utulu-upetan pa atiutga a lira-yat wuamueh'u, mere a li'ru-tu'nu lolioi-hayaiya me a'g e umta'at wenna pa adiwra-dia'ala. 4 La' lira-tun muaka a'ukota tiy miy, de a'g edonna liernohora rimormiori wniarorni-wnialaini pa nia'ail miy totpena mliernohor a'u. Mere ukot nohora Uplerlawna lirni de, Uplerlawna Nhiw Lululli Nmeh'a ed mak ktutga plolli-mneheni (kuasa) pa na Nkar lia riy mak katlin la a li'ru-tu'nu de ihranu ralamni. 5 Aliernohora hare honona totpena miy pesiaymi de nawniair to'ola Uplerlawna plolli-mneheni. Yanpa hota nawniair la rimormiori wniarora-wnialai wamueheni.
Maka Uplerlawna Nna'ohma la'a E wniarora-wnialai samomuounu, de totpa Yesus Nmat lia it do'oni-halli rerieini
6 Mere la' riy maka pesiayni namtemtemn oleka, de amakot nohora Uplerlawna lirni de amnairia kirkira-ralma-rior samomuou (hikmat). Mere kirkira-ralma-rior mak amnairia de, kirkira-ralma-rior nohkerna hanni atia'a onde lira yatu mak kwatiaga o'ta-mata la' lera-mela ri mak hota la' lera dom de rmati. 7 Mere kirkira-ralma-rior maka amakota re de ha nwatiawua Uplerlawna, maka la' ler ululu, de nohkerna naplin niohor ma'ta. La' Uplerlawna kirkira-ralma-rior samomuounu de Enet tiarg oleka la' ler maka Uplerlawna edonna Na'ohi-na'ar ma'ta nohkeran di, totpa hota onnila Yesus Kristus hihi'ini pede itlernana E ra'ani-pallu (ra'ani-pallu) mak kalwied memna. 8 Riy mak kodi plolli la nohkeran di, de riy id mana edonna nat niohora Uplerlawna ralma-riorni la'a Yesus Makamori-Kalewan de. Yoma rat niohora mana hota ir edonna rla rwairia Orgahi-Orha'a maka ha ra'uli-rawedi diella' auwlakra hananni. 9 Mere iraplin niohora pede naplol la hya' maka e rakot targ oleka la Puka ralamni de riwra: ”La'pa hya' maka rimormiori edonna ratlin nan ma'ta ne edon ramkek nan ma'ta de onde edonna nla' nan ma'ta la rimormiori wniarorni, de hade ed maka Uplerlawna Nwahi' targa la'a riy mak kal ralamni tetema la E'a.” 10 Rimormiori raplin niohor ma'ta nnia'ohma de, mere Uplerlawna Nhiw Lululli Nakot oleka Uplerlawna nnia'ohmani la'a Yesus Kristus de la mai ita. Yoma Uplerlawna Nhiw Lululli de ed mak ktolwiah'a-ktakarwah'a hya'a-hya'a to'owa pa la'pa nod wialia la'a hya' mak kayade' ma'ta la Uplerlawna wniarorni-wnialaini. Mere Nhiw Lululli Nat niohor oleka wa. 11 Yoma mak kat niohora riy ida ihranu ralamni de enekneka riy de orgahani nmeh'a. Emkade walia enekneka Uplerlawna Nhiw Lululli Nmeh'a Natga Uplerlawna ihranu ralamni. 12 Ne it mana edonna tlernana nohkerna ralma-riorni, mere tlernana Uplerlawna Nhiw Lululli totpena tat niohora Uplerlawna ra'ani-pallu, yamori-yalewna maka Ha Nala mai ita nwatiaga Yesus Kristus. 13 Pede amakot nohora hya' maka Uplerlawna Nara'a-napalga mai ita de, ami edonna mnairia lira-yat mamni mak kwatiaga rimormiori, mere a lir mamni-tun mamni maka Uplerlawna Nhiwni Nwatutu-nwaye' mai ami, pa amakot nohora Uplerlawna la'a riy maka Uplerlawna Nhiwni etla ralamni. 14 Mere riy maka kakleha Uplerlawna Nhiwni, de riy de edonna nreiniana Uplerlawna Nhiwni de Ha Nakotkota. Yoma ta'en niana nna'erit nana pede nwarora lir de hamamuamua re, yoma riy maka Uplerlawna Nhiwni Nodi plolli la nanpena rna'erit nana lira-tunu re. 15 Yoma riy maka Uplerlawna Nhiwni Ndella, nanpena nat niohora hya' ed mak kaplola honona. Mere riy maka Nhiwni edonna Ndella de, id mana edonna nlernana ralma-riora pa rwaror nana riy maka Uplerlawna Nhiwni Ndella de, hihi'ini-yapyapni. 16 Yoma emekwalima la'a Puka ralamni lirni mak kiwra: ”He' ed mak kat niohora Orgahi-Orha'a ralma-riorni pede e' ed mak katu kano'a-ka'atga?!” Mere it maka E Nhiw Lululli Nodi plolli, it nanpena er mak kat niohora Yesus Kristus ralma-riorni.
Yana ra'uli mak khima-kre'ela Uplerlawna kniarni pa narieiniande krei wokni-le'enu to'a-taiya
1 Ina-nara ama-hyali, la' ler maka agor wut miy die, ta'en niana a'ultier pia emeka agora riy maka Uplerlawna Nhiwni Nodi plolli la, a wniahauru. Mere a'ultier tiy miy die, emeknekama mliernohora to' nohkeran di gahani, de la'pa a'ultier tiy miy mak na'nama mpiesiay, de aniairia lir maka plet pa mnia'erit nana pa emeka patke'a ida naltier lia papay mak na'nama ha rmor nian de. 2 Ululu de, la'pa awuatutu-wuaye' miy, de emolmolan nekama a'u'oka-uweher miy, de gala yamanna maka miy miatu mi'in oleka wa. Yoma la' ler de miy ta'eni mnia'erit nan ma'ta wniatutu-wniaye'a, mak ha rakot nohora la riy maka Uplerlawna Nhiwni Nodi plolli la. La' dodo'ondi meman mana miy edonna mnia'erit nan ma'ta la' hade! 3 Emkade yoma miy edonna miolin ma'ta nhioli-lieta nohkeran miy de! A'ukot emkade yoma hota la'pa ralammi namehra (iri hati) la rimormior wialmi, me mhi'a kokokna-rariarni, de hota hare ed mak kariei pia nayamkek memna de miy edonna miolin doin ma'ta nhioli-lieta nohkerna pa emekwalima riy maka kaplin mua'ta Uplerlawna toh! 4 Yoma riy dom riwra amlernohor neka Paulus, ne dom de riwra amlernohor neka Apolsu. Wniehwami emkade ntutga de plol toto'a de miy edonna miolin doin ma'ta nhioli-liet nohkeranmi de! 5 La'a plolli de Apolsu de he'a de? Ne Paulus a' muana he' walia a'u? Eneknek am di Uplerlawna hopopanni mak kod miy lia pesiay la Yesus Kristus. Am mala' nohora tulla-kniar miaka Orgahi-Orha'a Ntutga la rima-rima kniar miamni. 6 De la Uplerlawna kniarni ralamni de a'g ed mak kakot nohora Yesus Kristus lirni-tunnu pa emolmolan nekama mak kawuli-katniamni la nhyi'ini ralamni. Ne Apolsu ed mak kwatut miy pia emeknekama mak kal ger la ktera nhyi' de. Mere Uplerlawna Nmeh'a nanpena ed mak kar lia miy ihrami-ralammi pa emeknekama Namori yawuli-yatniamin de. 7 Pede mak kodi plolli la' kniar die Uplerlawna yoma E' ed mak khi'a pa kmori. La' am die mak ktamni me mak ktera, de ami edonna mla'a rieknenni. 8 Amro' rewre'wa pa mla' liewr ida la kniari id ralamni. Ne hota rima-rima amlernana a liwtu-odaw mamni wniahlani. 9 Yoma am di de riy mak kar riewre'wa la Uplerlawna kniarni. Mere miy di de emekwalima Uplerlawna nhyi'ini-tlunanni. Miy miana emolmolla Uplerlawna romni wali. Enmeh'a nekpa gahani miy! 10 Ina-nara, la' ruri-lai miaka Uplerlawna Nara'a-napalga mai a' di, aniairia la ukot nohor ulu Yesus Kristus tiy miy. La' hade a'g emolmolan nekama riy ida mak katu kariri roma-lewu, mak kwatatga roma watu liar yanullu. Ne riy dom to' wal pia rma rwatutu miy die emeknekama riy maka kariria roma la watu liar yanul die wawannu. Mere mhioratreria. Hota rima-rima ntaru samomuou mat la kniarni la'a watu liar yanullu wawannu de. 11 Yoma Yesus Kristus Nmeh'a neka ed maka Uplerlawna Nala pa emeknekama watu liar yanulu maka miriria miy pesiaymi la. Yana riy rwatut die e rnairi wniatatgeni dom to'a, yoma nhiapargen id mana hadamon eti. 12 Mak kmai pia kwatut miy die, dom de rnairia lira-tunu mak kaplollola mere dom mana rnairi lira-tun rimormiori mak edon nodi unut doma. Hade emeknekama riy mak kariri roma-lewu la watu liar yanul die wawannu, de dom de e rnairia leli-maha, dom de rnairia mah wawahra, dom de e rnairia wat mi'na, dom de rnairia riri-au, dom de rnairia wewan kerna onde wewna tniena. 13 Rima-rima tulanni-kniarni de hota twei pia tamkek memna la ler maka Yesus Kristus maimiaini la re'eni woru. Yoma hota la' ler de de, ai ed maka kta'aga tulla-kniari re rurni-laini totpa rima-rima kniarni de hota nayamkek memna. 14 La'pa ai edon na'ana tulanni-kniarni de hota riy de nlernana prehenni. 15 Mere la'pa kniarni de ai nram doinia, de hota edon nlernana prehenni-maunu la Ilyamou-Watyatoha. Mere hota Uplerlawna Nala yamori-yalewna la e'a onnila pesiayni, mere e hihi'ini-yapyapni edon naplol la noha wawannu pede e yaliewanni de emekto'a enawlar liola ai mormiori ralamni mak trema-trema namutni-naki'ir e'a. 16 Miy e miatga de miy di de Uplerlawna romni miy, toh! Ne Uplerlawna Nhiwni e Nor miy tialla. 17 Mere la'pa riy ida mak kwatutga hya' mak edon kaplola pa nweyata-nwaniawua Uplerlawna romni de, riy de mana Uplerlawna ed mak kweyata-kwaniaw wualia riy de. Yoma miy die Uplerlawna romni mak E orgahi Ha Nwalir niana la E gahani. 18 Yana riy id tiy miy die nalahar inon wamueheni yoma nwarehi inonni onnila e' ed mak katu nohkerna wniarorni-wnialaini. Mere samounu de nawnial doin la pa nla' mak podku-padku la nohkeran di wniarorni-wnialaini totpena hota nla' mak katu la Uplerlawna yamkekni. 19 Yoma la' Uplerlawna yamkekni, rimormior wniarorni-wnialaini lirni-yatnu re honona wniaror podpodku maka rwal lia hamamuamua. Hade emeknekama ha rhorat targa la Puka ralamni riwra: ”Riy mak katu la rimormiori nohkeran di wniarorni-wnialaini samomuounu de, hota Uplerlawna Nhi' pa Nwal lia hamamuamua la'pa riy e nrana inonni la lira-yat wamueheni de. Hota emeknekama riy orgahi yatnu nwutu orgahani.” 20 E rakot walia Puka ralamni de emkadi wali: ”Orgahi-Orha'a Natga riy mak katu nohkeran di wniarorni-wnialaini lirni-yatnu re honona wniaror podpodku maka rwal lia hamamuamua.” 21-22 La' hade pede yana mhierlia o'ta-mata mak kwatutu miy pia nareiniande miy to'a-tai miy onnila mi'uli-miwedi o'ta-mata doma, me la' dom de edonna. Yoma ir honona de nek de rhima-rre' miy. La'pa a'u muana, onde Apolsu, me Petrusa a honon ami mhima-mre' miy totpena amod miy lia kalwiedwedni. La'pa nohkeran di, onde matmiatmi-mormiormi, la'pa lera-mela ri pa lera-mel mak kmai, hare honona re de, nodi miy lia kalwiedwedni. 23 Ne miy di de mak khima-kre'a Yesus Kristus. Ne Yesus Kristus mana ed mak khima-kre'a Uplerlawna.
Mak khima-kre'a Uplerlawna kniarni rlernohora talan mak kaplol la Uplerlawna yamkekni
1 Hade pede, ina-nara mpiet am lia Yesus Kristus hopopanni-lili'irnu mak khima-kre'a E kniarni, mak Entutga pa amakot nohora hya' ed maka Uplerlawna Nhi' nana, mere la' ululu de rimormiori raplin mua'ta. 2 La'pa riy ida nala kniari la'a mak ktulla-kari ida, de mak ha rwahaka la mak ktulla-kari de ononni de tlina-taili ndenrer lia upni-matromni mak ha nkar lia. 3 Mere ina-nara mai a' die la'pa mhiudi-mpiar a'u onde rod wali a'u la watghudi lokarni pa rwahaka a ha'lu, de a'g edonna pusin nohora. Meman neka la a'g edon ghudi-puar nana a inon wamueh'u. 4 A'g edonna wuaror nana a'g e ghal la' hadomdoma. Mere hota hade edonna nrei pia ntutga de a'g edonna ghala. Orgahi-Orha'a Nmeh'a nanpa ed maka kmeh'a Ntutga a plo'lu-ha'lu. 5 La' lerni-melli mak Orgahi-Orha'a Nmai pia Netlia hare honona re edonna nte' ma'ta. La' hade pede yana riy id mana pleta-plet pa nwaghala rimormior wialli. Mpiei pleini la'pa Orgahi-Orha'a Nmai niana. Hota E' ed mak kalharia hya' mak kayawunmu. E' ed mak kweye'er targa ralma-riora mak kayamoin la rimormiori ihranu ralamni. La' ler de nanpena rima-rima nlernan ya'ulli-yawedni la Uplerlawna. 6 Ina-nara ama-hyali, la'a hya' mak a'ukot oleka re, de aniairia agora Apolsu pa emeka nhior lawra ni'ita ahwa lioda (contoh) la tiy miy. Totpa hota la'a mpiaror nohora a li'ru de hota mnia'erit nana hya' maka rhorat targa la Puka. Ne la'pa mliernohora lir de, hota miy edon mi'uli-miwedia o'ta-mata doma me mipolu-milielan doma. 7 Yoma he' ed mak khi' nan miy pia mriehelia miy mutwualmi?! Miplinga, de maka ha mliernana hare honona rde rwatiawua Uplerlawna?! Pede la'a hya' owa'an pa mhi' inonmi de tulu-petna pa emolmolla hya' mak kden la miy re Uplerlawna edon Nala tiy miy?! 8 Meman neka la miy edonna mpiolu-mpiak hadoma yoma la' miy wniarorni de mliernan oleka ruri-lai, kirkira-ralma-rior samomuou honona. Mtiaru kirkira-ralma-riora pede orgahami mtiutg inonmi emeka ray. Ne am di de edonna. Kalwieda la'pa plol pa mlia' ray totpena amlernan walia talan pa amalair nohor miy pia trewre'wa todi plolli 9 yoma am die mak kakleha weli. La' a ralma-rio'ru de, ami maka Yesus Nhopan pa amodia Uplerlawna lirni-tunnu, de Uplerlawna Nal am pia emolmolla am tutu he'i-hepru id la rimormiori nohkerna rora Uplerlawna hopopanni-lili'irnu gaini ralamni. Ami emolmolla riy maka ha retli oleka niukum matmiati mai am lia'a mutlialawna gaini ralamni. 10 De, rimormiori nohkeran di ramkek am die rwaror ampodku-mpadku onnila a hihi' mamni la'a Yesus Kristus rerieini. Mere miy die e mpiarora de miy er mak katu yoma miora Yesus Kristus de mlia' ihru ida-ralm ida. Riy edon ratlin la ami, mere e ratlina-ratail tiy miy. Riy rapolu-raliel ami ne ra'uli-rawed miy. 11 Mahnek oleka la a rehka-lar mamni, maniki-malai, ramuki-rama'al ami, la'pa amakleha rom wamueh'a mamni wali. 12 Amaliwtu-ma'odaw nohora yamanna wra' muamni yahakni. La'pa riy rapolu-raliel ami mere ampak pa Orgahi-Orha'a Ntera-ndema re. La'pa riy ramuk-rama'al ami, amatu mhur niohora. 13 Riy rahe'i-ramalia ami, de amala samomuounu ma mpahla. Rhi' am die emolmolan neka ami edonna marehelia haga'u-hamda'ara nohkeran di, pa la'pa dodo'ondi mana e rhoi mia't am lia noha kdeheni-ktiahlani. 14 Aghorta hari tiy miy de ralul pia agiwra ghi' amola-ma' miy, mere awuagahniorat miy emekwalima a'na raralmu memna. 15 Yoma la'pa mior Yesus Kristus mlia'a ihru ida la' pesiaymi de miy ammi de riy ida nmeh'a, kennama miy tungkurmi riy riwnu-riwnu. Yoma la'pa miora Yesus Kristus de mlia'a ihru ida-ralm id wa, de a'g ed mak khi'a ina-am tiy miy yoma a'g ed mak kodia Kot Kalwieda-Paitiot la'a Yesus Kristus de tiy miy. 16 Onnila' hade pede awuak de mliernohora a yeh'wu. 17 Ne totpena mliernohora a yeh'wu pede aghopna Timotius pa ntiy. La'pa rweta la mak klernohora Yesus Kristus, de aghi'a Timotius de emekneka a'na raralmu mak edonna kmol lia a ralmu. E' de riy mak khi' hadom de klola Orgahi-Orha'a ralamni. Hota e' ed mak kwagahniorat miy lia'a yehwa maka aliernohora yoma agor oleka Yesus Kristus mla' ihru ida-ralm ida. A yehwa la'a a mormio'ru de nora hya' ed maka agala ga wuatutu-wuaye'a la'a krei wokni-le'enu la meni-meni to'a, de ramneneha. 18 Mere riy dom la' miy die ratulu-rapetna olekwa. Yoma wniarorni de ratniekamde hota a'g edonna tiy miy die. 19 Mere la'pa Orgahi-Orha'a Nal talan mai a' die hota edonna nalo'on wali ne atiy miy die. Mpiei pia hota amuai die umkek walia riy mak katulu-kapetna re hihi'ini-yapyapni, de rakot nohora ir rurni-laini to'ola nurnu onde plol toto'a pa raruri-ralai yoma Uplerlawna Nhiwni Nodi plolli la. 20 Yoma la'pa Uplerlawna Nodi plolli la riy ida mormiorni, de Uplerlawna Ntutga ruri-lai la riy de mormiorni totpena nwehwa-nlakat la plol wawna. Hota riy de edon nakot to'a la' nurnu niwra enaruri-nalai. 21 Pede mpialir nieka hya' maka ralammi ha nala. Mhioratreria, mhierun doinia nhiolmi-lietmi mak katulu-kapetna de totpena yana amuai die a'uwenan la' miy. Mere amuai die agodi mnapla me kalwied nohora wniatutu-wniaye'a tiy miy.
Yana mitulu-mipetan la'a miy pesiaymi mere mhiopliala do'omi-halmi honona
1 Nee! A orgah'u utlin memn oleka la'a miy die de doma e ralira-raliai, rareta-rahawa. De riy id tiy miy de enor owa'ana ina nhia'nanni (ibu tiri) raliai. Riy mak kaplin mua'ta Uplerlawna nekane nhiolli ematia' emkade, ne emkameni ho'ola miy?! 2 Mere miy die edonna mmiola-mmia'a mere mpiehwa-mliakta natulu-napetan ma'ta la pesiaymi die! Mere mak kaplollolli de totpena miy ralammi rmawal la riy de nhiolli-lietni pa mhiokar gota la'a miy wokmi-le'emi. 3 Ina-nar miy re! Meman nek la a'g edon gor miy lia hande, mere emkade ho'mana emeknekama agor miy lia hande pa agetlia de riy mak kwehwa nhioli-lieta yatyata re pa rukmua! 4 La'pa miwoka-mile' wa la Yesus Orgahi-Orha'a nanni ralamni, ne mriekan walia a'g etla hande. Ne hota la'a Yesus Orgahi-Orha'a plolli-mneheni pa 5 hononmi mhiokar doin e la krei wokni-le'enu pa mial riy della hegana amlawanni totpena hota la' nohkeran di, de e nler la lui-nuhru, yatyatni-halalli yatlorni-yatra'ani. Mhi' emkade totpa hota nreiniande enhoitio'or doini do'oni-halli totpa nler la yamori-yalewna la' ler mak Orgahi-Orha'a Nmai owa'ana. 6 Mere miy die yana wniehwami-liakatmi natulu-napetna la'a pesiaymi. Yanpa miplin niek la hala id to' nekane narieiniande yatni-halli na'ititar rer lia?! Hade emeknekama mak nhi'inde ha riwra de, hota rkeni tgo'a oke' to'ola wetra' ota (tarigu) mere hota nwah'a petna honona. 7 La' hade pede mhiopliala nhioli-lieta yotyota-yatyata honona, totpena emeknekama la' Paska lerni Yahudi re rhopliala roti mak knairi tgo'a. La' talan emkade pede miy mpial lia riy mak kakleha do'a-hala. Yoma plollolli de miy er mak kden la plol wawna onnila Yesus Kristus Nwali olek la duma maka ha rhi'a la hoihoi-tantiani la Paska Yahudi. Ne miy miana emeknekama roti mak kakleha tgo' maka Yahudi re ra'an la' ler de. 8 La' hade pede la' it mormiorni di, itsi' emeka ha rhi'a la Yahudi lerlalawanni de, de emeknekama ir edon ra'an rot miaka rala tgo'a ra rawniah'a de hota yana tsi'a do'a-hala la'pa yatyatni-halalli. Mere itsi' to'a hya'a mak kaplola-kamneh'a emeka ta'ana rot miaka edonna rnairi tgo'a. 9 Ina-nara, la a hortu mak kala' ulu de a'g e ukot nohor tiy miy de yan memmemna mior wutga riy makalira-kaliai re mpiatamputu. 10 Mak a'ukota re de a li'ru edon ntaiya riy mak kaplin niohor ma'ta Uplerlawna pede nhi'inde ralira-raliai onde ir ralamni rapal niana kupna-kai, re'a-tniaru onde mak ka'ana rira liwatnu-odawni onde mak kru'u-ktowar la uplera-upmati. A'g edonna ukota pa mihal doin riy mak edon kpesiay mak khi' emkade. La'pa miy edon mhiol lia nohkeran di wawannu nanpena mliernan talan pa mihal doin mak edon kpesiay riwnu-halli re. 11 Mere a ralma-rio'ru, de yana miora riy mak kakota kiwra ir de makpesiay, mere ralira-raliai onde ralamni rapal niana kupna-kai re'a-tniaru onde rru'u-rtowar la uplera-upmati, onde rahe'i-ramali riy onde rpehera-rma'wu onde mak ka'ana rira liwatnu-odawni. La'a riy mak emkare, yana mrie' teman la re. La'pa mimtatan wutu pa mi'ina-miemnu ho'mana, yana. 12-13 Yoma la'a riy mak edonna kpesiay mia'ta, de a'g edonna puaran pia ukot nohora re. Uplerlawna nanpena ed mak kodi plolli pa ketlia ir do'oni-halli. Mere makpesiay miy er maka mieh'a mietlia riy mak kler olek la krei wokni-le'enu do'oni-halli, yoma emeka ha rhorat targa la Puka ralamni de riwra: ”Mhiokar doinia riy mak khi' do'a-kyap hiala la'a wokmi-le'emi ralamni.”
Yana makpesiay re rodia mutwualli la'a mak kho'ota-klewta mak kaplinu Uplerlawna
1 Ina-nara, la'pa miora inmi-narmi makpesiay re miwo'ora, de hya'a nrei pia mpiaran pia la miklaka krei wialmi de la' makho'ota-klewta mak kaplin mua'ta Uplerlawna totpena iretlia?! Nihya'pa edonna mpiaka Uplerlawna mutnu-rahanu pa retlia lira-tunu rena de?! 2 Miplinga de hota Uplerlawna rimormiorni er mak kodi plolli pa ketlia nohkeran di halli?! Hota makpesiay it de, er maka ketlia nohkeran di do'oni-halli, yaho'ma lira-tun muaka ha riwra lirmou-aparputi rina?! 3 Miy e miplin mua'ta de hota it er mak ketlia Uplerlawna lili'irnu-hopopanni (malaikat) halli?! Yaho'ma rimormiori lira-tunu maka ir rhi'a lera-lera rina?! 4 Pede hota emkameni la lira-tun mak emkare, de miala la riy mak kaplin niohora Uplerlawna yala'ani pa retlia?! 5 A'ukot emkade totpa aghi'a amola-ma'a miy. Yanpa riy mak katu hadamon wal lia' miy pa retlia lira-tunu mak mutwualmi re ha rhi' nana re, 6 pede miala mutwualmi lirni-tunnu de pa makho'ota-klewta retlia?! Ne hade edon nmeh'a mere makho'ota-klewta de makpesiay Uplerlawna atia' e'a! 7 La'pa miodia riy lirni-tunnu la makho'ota-klewta retlia, hade nnia'eratni de mlier toto' olek la hala ralamni. Emkade pede emeknekama ra'unut nan olek miy. Samomuounu de riy rhi' yatyatni tiy miy onde rhi' aruki miy. Mere ralul pia yana miy er mak ktot nan riy dom la klieratni yoma miodia la nhio'ota-liewta. 8 Mere la'pa miodi riy la nhio'ota-liewta de miy er mak ktot riy de la yatyatni pa mieh'a mtiot aruki e'a, kennama maka mtiot la klieratni de, mak pesiay wialmi re! 9 Yana miakal nan inon wamuehemi. Miy e miat niohora de riy mak edonna klernohora Uplerlawna wniayowni hota edonna rrekan wutga la Uplerlawna mutnu-rahanu mak Enodi plolli la pa emeka ir Rayni toh?! Yoma riy mak kalira-kaliai, riy mak kru'u-ktowar la uplera-upmati, mak kaliai mehlimlimni, mak khi' nhiolia yotyota-yatyata mak kodia molmola-mama'a la'a muanke'a nora muanke'a maka ha wniadu'ula, 10 mak kamnelu-kamna'a, mak ralamni napal niana kupna-kai re'a-tniaru, mak kpehera-kma'wu, mak kapolu-kaliella, ne mak ka'ana rira liwatnu-odawni, riy honona mak emkare de hota edonna rrekan wutga la Uplerlawna mutnu-rahanu maka Enodi plolli. 11 Ne la' ululu de la' riy dom tiy miy, nhiolli-lietni emkade wali. Mere lera-mela ri de mlier olek la yamou-yawitna la'a do'a-hala ralamni. Mlier olek la Uplerlawna gah wamueheni mak kakleha do'a-hala. Enetlia de miy edon mhial owa'ana onnila Itmatromni Yesus Kristus hihi'ini-yapyapni, me Uplerlawna Nhiw Lululli rurni-laini.
Yana mniairi inonmi pa ma milira-miliai, mere mpiehwa-mliakat la inonmi totpa Uplerlawna Nlernana ya'uli-yawedi
12 Ina-nara, doma rakot wal die riwra it inonni di edonna la'a rieknenni la'a pesiay. Emkade hota plolli nek la e ralma-riorni la'a hya' maka ha niwa nhi'a la e inonni. Mere hihi'a-yapyapi re honona edonna rperkuna. A'g edonna wuayow pa gala a ino'nu la'a hya'a-hya' to' pa nodi plolli la. 13 Dom mana riwra: ”Ya'ana-yemnu de nla' to' it apannu ne it apannu de ed mak kwatierun neka ya'ana-yemnu. La' ler mak it mat die ya'ana-yemnu nor wut wuali it apannu de hota it edonna tnairi owa'ana, pede it apannu la'pa it inonni tetema itnairia pa tsi' hadom de plolli nek la ita.” Mere a'ukot tiy miy die, edon emkade. Plollolli de yana itnairia it inonni de pa ta talira-taliai. Mere itnairia it inon pa ta'uli-tawedi Orgahi-Orha'a. Ne Orgahi-Orha'a mana hota ed mak ktera-kdema inon de. 14 Uplerlawna Nodi plolli pa Namori-nalewn oleka Itmatromni Yesus inonni la'a matmiatni. Ne hota emkade wal lia Uplerlawna Namori it inonni la matmiati ralamni wali. 15 Ina-nara ama-hyali, miatga la' miy inonmi de Yesus Kristus inonni wali hade toh?! Pede hota emkameni la itnairi it inonni pa itora patke' yatyata tanin wutu?! La'pa emkade de emeknekama Yesus nor pat de ralira-raliai. La'pa emkameni ho'mana yan memmemna mhi' emkade! 16 Onde matialo'onamde miy e miplin mua'ta la'a riy mak kor patke' yatyata ralira-raliai de hota emekwalima nora rla' ihyida-ralmida?! Yoma etla Puka ralamni de e rakot nohora riwra: ”Ha ror rla' wutu ihyida-ralmida.” 17 Mere riy mak klernohor oleka Orgahi-Orha'a nor olek E' pa rla' wutga ihru ida-ralm ida. 18 Pede olietmi la yehwa yalira-yaliai. Yoma la'a do'a-hala re honona maka riy rhi' nana de, eneknek to'ama yalira-yaliai mak khi' do'a-hal la rira inon wamueheni. 19 Ina-nara, miatga oleka de la'a miy inonmi de Uplerlawna Nhiw Lululli romni eda de toh?! Ne Nhiwni die nor miy tialla. Ne Uplerlawna ed mak kala Nhiwni de tiy miy. Miy inonmi de wamuehemi atia' hade. Mere Uplerlawna gahani hade. 20 Yoma Uplerlawna Naweli olek miy wia ne npairia mati olek miy wia. La' hade pede mpiehwa-mliakat la inonmi de totpena miodi ya'uli-yawedi la Uplerlawna.
Mehlima-marya'a yala'ani
1 Ina-nara ama-hyali, dodo'ondi agiwra wuahla yatianmi re maka ha mkienia la horatmi ralamni, de: la'pa muanke'a ida edonna nmehlima de hade samoga? Meman nek la hade samoga. 2 Mere riy harahu nhi'inde ralira-raliai. La' hade pede samounu de muanke'a hawni etla ne patke'a mana hawni etla totpena yana rler la yapi'u-yaga'u pa rwaror yotyota-yatyatni pa ralira-raliai. 3 Muanke'a mak kmehlim olekwa de, yana nwayotlia hawni patke'a la'pa niwra nora pa ranin wutu me patke'a mak kmehlim mana yana nwayotlia muanke'eni la'pa niwra nora pa ranin wutu. Mak kmehlim oleka re hihi'ini-yapyapni mak kaplola de emkade. 4 Rhi' emkade yoma patke'a inonni de, inon wamueheni atia' hade. Inonni de, muanke'eni gahani wali hade. Emkade wal lia muanke'a inonni de, inon wamueheni atia' hade, mere inonni de patke'eni gahani wali hade. 5 Pede yan memmemna idma nwayotlia hawni wakwakni pa ranin wutu, enekneka la ler ho'ke'eni maka ha rnairia pa rsumbaini yoma irrora rla' lir id pa rhi' emkade. Mere yan nalo'ona. Nhor diewade hota idma nwakriani owa'an id la pa emeknekama mak kmehlima-kmarya'a. Yana idma olieta la ida totpena yana hegana amlawanni (Setan) napi'u-naga' nian miy yoma la'a miy edon mtiahan nana ralam na'hirmi. 6 Mere la'pa a'ukot emkade de ralul pia agiwra ghopan pa riy honona rmehlima, mere a'ukot to'a la'a ralma-rior wamueh'u. 7 Mere a' die, agiwra totpa riy honona emekwali a' pua edonna rmehlima. Mere Uplerlawna Nmeh'a neka ed mak kala rima-rima ra'ani-pallu (karunia). La' riy id de Nala ra'a-palu pia hota edonna nmehlima. La' riy dom de, Nala ra'a-palu pia nmehlima. 8 Nah, la'a riy mak edonna kmehlim ma'ta, me la'a pat mak kapalg olekwa, de mitlina a nnio'u di. Ralma-riora samomuou nden tiy miy die, miprirtiuw pua emek a'u. 9 Mere la'pa miy edonna mirur nian la ralam na'hirmi de mmiehlim nek wa. Yoma la'a samomuou owa'an de mmiehlima, yanhi'pa na'hirmi nha'at la temmi. 10 Ne la'pa mak kmehlim olekwa, de mitlina mak a'ukota ri! La'a plollolli de a'g edonna ukot nana lira di mere lir di Orgahi-Orha'a lirni hadi. La'a a'na patke'a mak kmehlima ida de yana nahmen doin hawni. 11 Mere la'pa la hadom pa nahmen doin olek la muanke'eni, de yana nwarora-nwalai owa'ana mehlima, enekneka nawali owa'an la muanke'eni ululu de. Ne muanke'a ida de yana nahmen doin hawni. 12 A nnio'a-nia'tu la riy dom pal tiy miy die mitlina. Hadi edonna nwatiawua Orgahi-Orha'a Yesus lirni mere a'g ed mak ukot nan lir di. De la'pa makpesiay ida nmehlim olek wa pa nor patke'a maka edonna kpesiay mia'ta mere emkade ho'mana patke' de nwayow pa nora e' pa rden wut mua'ta, de yan memmemna muanke' de nasrala patke' de pa nodia pa la nmati. 13 Ne la'pa patke'a makpesiay ida nmehlim olek pa nora muanke'a maka edonna kpesiay mia'ta mere emkade ho'mana nwayow pa nora patke' de rden wut mua'ta, de yan memmemna patke' de nasrala muanke' de pa nodia pa la nmati. 14 Yoma hawa patke'a makpesiay olek de narieinian de mehlimni de nakleha do'a-hala la Uplerlawna yamkekni. Emkade wal lia hawa muanke'a makpesiay olek de narieiniande mehlimni de nakleha do'a-hala la Uplerlawna yamkekni. La'pa edon emkade hota upa-a'na re edon rden wal lia Uplerlawna limni ralamni. 15 Mere la'pa riy mak edonna kpesiay mia'ta, nahmen doinia hawni patke'a makpesiay, onde hawni patke'a mak edon kpesiay, nahmen doinia hawni muanke'a mak pesiay olekwa, de miollia pa emkade. La'pa emkade, de hota hawni makpesiay de edonna ha wniatiehra wutg owa'an la hawni mak edon kpesiay. Yana makpesiay ntekal hawni mak edon kpesiay pa yana nla'a. Yoma Uplerlawna Nahmena yahuri-yawo'ora. 16 Miollia pa hapmi de nla'a yoma miplin niohora de hapmi mak edon kpesiay de hota nlernohora miy pia npesiaya, pede hota nler la mormiori-lewlewna ralamni. Yanpa hota edonna.
Rima-rima nden nek la genni-tienni (kedudukan) maka ndella la' ler maka nlernan polpuolu la'a Uplerlawna
17 Mere ina-narmi re, yana mpiahak talan pa mhierun doin mormiormi mak emkameni mana la' ler maka Uplerlawna Npol nian miy pa mpiesiay E'a. Yoma mormior mak emkade ed maka Itmatromlawanni Nala tiy miy. Hade ed maka a'uno'a-unatga la krei wokni-le'enu honona la meni-meni to'a. 18 Yawalliohorni (umpamni) de; la'pa rsunat oleka riy ida la' lera enlernana Uplerlawna polpuolu pa Nhi'a la E gah wamueheni de, yan memmemna riy de nwahak talan pa nhap dioinia sunat de enni. Hade emkade wal lia' riy maka edonna rsunat ma'ta la'a lera enlernan oleka Uplerlawna polpuolu de yana enwak pa rsunat e'a. 19 Yoma tlernohora deulu-tatra sunat onde it edonna tlernohora ho'mana rrora rewre'wa pa edonna rla yawuhi-yawe'eta. Hornama tlernohora Uplerlawna lirni-tunnu mak Ha Nakota. 20 Pede yana mpiahak talan pa mhierun doin genmi-tienmi la' ler maka rima-rima nlernana polpuollu la Uplerlawna. 21 Emkadi owa'ana. La' ler maka Orgahi-Orha'a Npol nian miy pia mlia' E gah wamueheni de, la'pa miy die ata-wa'ara hopopna-lili'iru miy die, yana mpiarora-mpialai lia ralammi pa miayo'a-miatau yoma ata-wa'ar miy. Mere yanhi'pa hota rran tutul miy pia mpial lia riy lalawna doma, de yana mpiayotlia. 22 Miy mhi' ata-wa'ara onde ata-wa'ara atia' miy, de la Uplerlawna yamkekni de edonna nhi' hadoma. Yoma riy makpesiay makhi' ata-wa'ara la'pa makpesiay hononmi, de Itmatromni Nwe'er doini oleka. Yoma Nwe'er doini olek miy lia do'a-hala ralamni. Ne la'pa makhi' ata-wa'ar atia' miy, la'pa miy hononmi makpesiay de mpiali olek la Itmatromni Yesus Kristus atni-wa'arni hopopanni-lili'irnu pa mhima-mrie' E kniarni. 23 Uplerlawna Naweli olek miy hononmi ne miy welmi ho'mana rwaphar eti olekwa. Hade pede yana mitlin la rimormior wialmi pa rwa'ata-rwa'ar miy mere mitlina-mitailla Orgahi-Orha'a. 24 Ina-nara ama-hyali, la' hadi nnia'eratni, de totpa yana mtiekal pa mhierun doin genmi-tienmi mak emkameni la' ler maka Uplerlawna Npol nian miy pa mpiesiay E'a, me totpena miora Uplerlawna mlia' ihru ida-ralm ida.
Wniatutu-wniaye'a la' riy mak edon kmehlim ma'ta
25 Twahaur la riy maka edonna kmehlim ma'ta. La' hade de a'g edon liernana lira la Orgahi-Orha'a, mere onnila Orgahi-Orha'a ralam kalwiedni mai a' pua Nal a pua a lia' riy maka ha rpesiaya pede ukot nohora nnio'a-niat di tiy miy. 26 Tsoratnana hota la' lera-mela ri de itler la kropanni-krieutnu, pede awuarora la samomuounu de miprirtiuwu. 27 La'pa miy miaka patke'emi er olek la, de yana mihak talan pa misrala pat de. La'pa miy e mikleh ma'ta patke'a de yan mihaka mehlimmi. 28 Mere la'pa miy mmiehlim de do'a-hal atia' hade. Emkade wal lia harara ida mak kiwra kmehlima, de ralul pia itiwra hade enhi'a do'a-hala. Mere riy mak kmehlima, de hota rapal niana kropan lawna. Ne awuak pa totpena yana mlier la kropan lawan de. 29 Ina-nara, a ralma-rio'ru de emkadi: It ed olek la klieratni yoma lera-mela rwakrian dioin la, pede yanpa nohkeran di yala'ani de nhi' yawuhi-yawe'et la miy pa hota miy edon mial ralammi tetema pa mkiar lia Uplerlawna kniarni. Pa la ler di la'pa nodi liarni muanke' mak mehlim olekwa de yana rwaror to'a ir mehlimni. 30 Riy mak kakru de mhi' emeknekama ralam mawalmi de edon nhi' yawuhi-yawe'eta. Ne riy mak kahe'i-kahepur de, totpa he'i-heparnu de edon narieiniande nhortaplinga Uplerlawna kniarni. Riy mak kaweli yohya'a de yana rhoratreri hyonni-hyanni re pa rhortaplinga Uplerlawna kniarni, yoma hyonni-hyanni re hota edonna nden rer lia pa nodi liarni. 31 Hya' maka riy rwarora-rwalai niohora la'pa tulanni-kniarni, me hare honona la nohkeran di wawannu de yana riy rha'ar aranni la. Yoma hota edon nalo'on wali ne nohkeran di nor wutga hya' maka tamkeka re hota edonna rden olekwa. 32 Awuak de yana mlier la ralma worworga onnila mpiaror harahu la nohkeran di yala'ani. La' riy mak edon kmehlima de edon nler la ralma-rior emkade, mere nwaror to'a Uplerlawna kniarni. Yoma enwaror nohora emkameni la hota nhi' amikria Orgahi-Orha'a ihranu ralamni. 33 Mere riy mak patke'eni ed olek la de hota nwaror harahu la nohkeran di yala'ani. Yoma nwahak de totpena nhi' amikria hawni patke'a ihranu ralamni. 34 La'awa hohoni de hota ralma-riorni nahniakra. Mere pat maka hawni nmati olekwa, onde patke'a mak edonna nmehlim ma'ta hota wniarorni nden rer mamain la Orgahi-Orha'a pede nal inonni me ralam tetema pa nhima-nre'a me totpa yehwani nlernohor E'a. Mere patke'a maka hawni ed olek la de ralma-riorni nden rer lia nohkeran di yala'ani yoma ralma-riorni nhoratrer lia hawni muanke'a totpena nhi' amikria e ihranu ralamni. 35 Aghorta hari honona tiy miy totpena orgahami mlier la kalwiedwedni. A'g edon ghorat lira ri pa aliarna miy, mere totpena miy wniehwami nod miy lia kalwieda-paitiota me ralma-riormi mana edonna nahniakra mere nden rer lia Orgahi-Orha'a. 36 La'pa muanke' ida niwra nmehlima nora patke'a maka ha rnelu tiaru pua hota rmehlima, ne patke' de tuwnu nkern olekwa, miollia pa rmehlima. Yana rwei mia'ta la'pa muanke' de hihi'ini-yapyapni edon lol talanni la patke' de. Mere rmehlim nek wa. Mehlim de do'a-hal atia' hade. 37 Mere la'pa riy de edonna nwayow pa hota nora pat mak hota ha niwra nor rmehlima, hya' maka ha nhi'a re de naplola, hornama edon nmehlima de nlernohora e ralma-rior wamueheni.Yana riy roir reri e'a totpa yana nmehlima. 38 Pede plolli meman de riy mak kora pat de rmehlima de hihi'ini-yapyapni de samoga. Mere mak edonna kor patke' de rmehlima, de hihi'ini-yapyapni de narehi owa'ana la' mak mehlima. 39 Patke' mak kmehlima ida e nawniatiehr olek la muanke'eni la'pa muanke'eni nmormior mia'ta. Mere la'pa muanke'eni nmati, de pat de mana nakleh oleka yawuhi-yawe'eta pa niwa nmehlim owa'an de plolli nek la e' wa, hornama nora makpesiay ida rmehlima. 40 Mere hota na'unut memna, de la'pa edonna nmehlim owa'ana. Ne a ralma-rio'ru de, mak a'ukot di nwatiaga Uplerlawna Nhiwni.
Yana ra'ana yamanan ha rhoi-rtania la uplera-upmati mak riy mak edon kpesiay ma'ta Uplerlawna ha rhoi-rtania
1 Ina-nara ama-hyali, la' hadi de a'ukot nohora la'a ya'ana-yemnu mak ha rhoi-rtani. Miy die mitulu-mipetna inonmi pa miwra: ”Makpesiay it hononita tat niohora oleka de itler la kirkira-ralma-rior samomuou (hikmat) la hare honona.” Mere a'ukot tiy miy die kirkira-ralma-rior mak emkade nariei piede riy ratulu-rapetna. Mere la'pa ittulla-tsayni it rimormior wialli de, de itod ir la' pesiay mak karuri-kalai. 2 Riy mak katniekamde enatu liawanni la'a Uplerlawna yala'ani, de plollolli de enaplin mua'ta Uplerlawna yala'ani. 3 Mere riy mak kal ralamni tetema la Uplerlawna, de Uplerlawna Nat niohor memna e'a. 4 Ina-nara, agiwra ukot nohora tiy miy lia uplera-upmati me yamanna mak riy rhoi-rtania. Makpesiay it de tat niohora uplera-upmati re edon naplola me edon rodi plolli. Ne itatga de Uplerlawna Nmemeh'a to'a pa Nodi plolli. 5 Meman nek la riy rhoi-rtania uplera-upmati harahu, mak kden la lyanti me mak kden la nohkerna wawannu, 6 mere la makpesiay it de, Uplerlawna Nmemeh'a to'a. E' ed mak khi' Am la' it hononita. E' ed mak ka'ohi-ka'ara. Ne itmormiori-tdardiar pia tsima-tre' E'a. Ne Orgahi-Orha'a mana ida Nmemeh'a to'a, de Yesus Kristus. La' E' pede hare honona erla. Ne la'a E hihi'ini pede itler la yamori-yadari. 7 La'pa emkade ho'mana makpesiay honona edon rat momuou mua'ta uplera-upmati re de edon naplola me edon rodi plolli. Yoma la ululu de la' ler maka edonna rpesiay ma'ta, de ir er mak kru'u-ktowar la uplera-upmati. La' hade pede la' dodo'ondi mana la'pa ir ra'ana nhioini-tnianni mak riy mak edon kpesiay re ra'olga re, de la ira wniarorni de, ir rhi' oleka do'a-hal la ir inonni. Irwaror emkade yoma pesiayni re edon rarur mia'ta. 8 Mere plolli de ya'ana-yemnu nek de edonna nodia taliorta-lakatrai lia it tora Uplerlawna. La'pa ita'ana yamanan de, it edonna tlernana hadomdom pali. Rwaldioinia de la'pa it edon ta'ana yamanan de mana it edonna truk wiali. 9 Mere erammi! Yanpa riy doma rler la do'a-hala ralamni onnila rlernohora miy hihi'imi-yapyapmi. Meman neka la Uplerlawna Nwayow nohora hihi'imi-yapyapmi de, mere la' ir yamkekni de do'a-hala eda de. 10 Miatu oleka uplera-upmati re edon naplola me edon rodi plolli, mere la'pa riy mak kaplinu kwalir nian hya' ed mak khala onde hya' ed mak kaplola de, enamkek rer miy mi'ina-miemnu hya' ed mak ha rhoi-rtania la roma nhioi-tnian die, miy hihi'imi-yapyapmi de narieiniande hota enparan pia ena'an walia ya'ana-yemun de. 11 Ne la' hade pede hya' maka miat niohora de, nariei pia riy mak kaplinu kwalir ma'ta plolli-halli nler la matmiati-molmuolu plalahwa. Ne riy de mana ed maka Yesus Kristus Nmati olek la e rerieini. 12 Ne la'pa mhi' do'a-myap hiala mak emkade la inmi-narmi, de miy er mak karieiniande la' ir wniarorni de ir rhi' oleka do'a-hala. La'pa miy e mhi' do'a-myap hial la inmi-narmi, de emeknekama mhi' olek la Yesus Kristus. 13 Hade pede la'pa ya'ana-yemnu nariei pia a hya'lu nler la do'a-hala, de hota a'g edonna puaran pia a'un owa'an ha'anan mak ha rhoi-rtania de. Yanpa hota a'urieiniande a hya'lu de nler la do'a-hala ralamni.
Paulus nahmena rira rala limtutnu la e'a maka nhi'inde irala la riy makodi Uplerlawna lirni-tunnu
1 Yanpa mpiarora de ta'en niana aliernohora mak awuarora de naplola?! Yanpa mpiaror a' di de riy mak Yesus Kristus Nhopan pa godia Uplerlawna lirni-tunnu atia' a'u, yoma miatniekamde a'g edonna umkek meman ma'ta Yesus Itmatromlawanni de?! Yanpa miplin mua'ta la'a Orgahi-Orha'a tniultulanni-rere'eni mai a' pua a'ukot nohor E' la tiy miy pia dodo'ondi de miat niohora E'a?! 2 Matialo'onamde riy dom to'a rahmena rreiniana-ra'nan a' pua emeka riy makodia Uplerlawna lirni, mere plollolli de miy di de ta'en niana mpianikli-mpiayotli a'u. Yoma amueh'a neka ed mak kakot nohora Uplerlawna lirni-tunnu tiy miy pia mpiesiaya, ne la' talan emkade pede Orgahi-Orha'a Ntutga de a' die ed mak kodia Uplerlawna lirni-tunnu a'u. 3 La'pa he' ed maka kiwra kwaghal a' die hota a'g ed mak kakot emkadilla: 4 Plol toto'a pa nlol talla pa amlernana ya'ana-yemnu la'a a liwtu-odwu yawahlani toh! 5 Me la'pa a ha'wu patke'a etla de ha nlernan walia yawahlani emkade wali. Onde yanpa la miy wniarormi de taken niana amodia hawa pat mamni pa amora mkar wiut lia a knia'ru dina pa emekwalia Itmatromlawanni Yesus hyalli re nora Petrusa me makodia Uplerlawna lirni-tunnu korni ha rhi' nan de?! 6 Onde la miy wniarormi de enekneka agora Barnabas am meh'a er maka mak kokan nohora a apun mamni?! 7 Mpiaror teka! Edon rakota de mak kawunu-ka'ara re rmeh'a nekpa orgahi ed mak kmakokan nohora ya'ana-yemannu la'a riy mutlialawanni ira! Ne edon riwra mak kanhyi' orwo'-auwo' ida nawuli-natniamnia orwo'a-auwo'a mere edonna na'ana nhyi'ini de mniotni! La' walia de edon riwra mak khuri-kwa'ana duma ida edonna nemnia dumni re uhunu turnu! 8 Takot nohora hari de it edon tlernohora rimormiori wniarorni, mere la' Puka nek de e rakot walia. 9 De la'a Musa Pukni ralamni de e rakota riwra: ”Hayor miaka ktepartarlia kwatei-kwahapra metma onde wetra' lawna totpena ema rkur dodioinia la' harni, de yana mpiatiehra nurnu, mere miollia pa na'ana metam de.” Ina-nara, onnila hya' pede Uplerlawna Ha Ntar nur lia de? Onnila Nwaror nohor to'a hayori? 10 Onde hade ed maka ha rakota la mai rimormior ita? Yowa ne, e rakot hadella mai ita. Yoma la'pa riy ranhyi'a ne riy maka kamoga wetra' lawanni, de hota rhi' emkade yoma rha'ar aranni de hota rlernana wnioilli-wniahlani la'a prehenni-maunu. Ne hota emkade wal lia am piali. 11 La'pa mak ke'era wini-hgona nek de nreikia wullu-we'elli, yaho'ma am die mak kakot nohora Uplerlawna lirni-tunnu tiy miy. La'pa amlernana ya'ana-yemnu lawra-raini pa emeka a kniar miamni liwtu-odwa yawahlani la' miy, de hota emkameni la mpiarora de hade edon naplola?! 12 La'pa riy dom to'a mak kakot nohora Uplerlawna lirni-tunnu rlernan hare tiy miy die yaho'ma ami mak kakot ulga Uplerlawna lirni tiy miy?! Meman nek la Uplerlawna wniayowni de hota amlernan hari la' miy, mere emkade ho'mana ami edonna malair nohor hare tiy miy die, mere rwaldioinia de ami e mtutulu-mlelew nieka hare honona, yoma uhala yanhi'pa la'pa awuaka a prehenu-ma'u de hota lira-tunu la Kot Kalwieda-Paitiota la'a Yesus Kristus de nlernana talan mak kler tar lia yawuhi-yawe'eta. 13 Ina-nara, miat memn oleka de, imam-imam mak kpolu-kwak la Uplerlawna romni ralamni de rlernan yamananni la roma-krei die toh! De riy mak rala nhioi-tniani la katri'ana wawannu, ha rlernan oke'ela ha'anan maka riy ral de pa rhi'a la yamananni. 14 Emkade wal lia Orgahi-Orha'a Nakot oleka de, he' ed mak kakot nohora Kot Kalwieda-Paitiot de, de e' ed mak klernana yamananni la prehenni-maunu re. 15 Ho'mana mai a' die, a'g edonna wuak pa riy rala a prehenu-ma'u honona re. Ne a'g edonna gala horat di tiy miy totpena mpiaro'on mai a'u. Yoma uhal rer lia yanpa la'pa awuak tiy miy die hota a'g edonna liernan wniatikilgen pia a ralmu nahepru yoma la'pa ukot nohora Uplerlawna Kot Kalwiedni-Paitiotni, de a'g edonna wuei pia riy rala a liwtu-odwu wniahlani. La'pa a'g edon liernan wniatikilgeni pa a ralmu nahepru onnila' hade, de awuak pa amuat niek wa. 16 La'pa a'ukot nohora Uplerlawna Kot Kalwiedni de ta'en niana urehi-ulawna a ino'nu, yoma Uplerlawna ed mak khopna. La'pa a'g edon ukot nohora de hota aliernan Uplerlawna niukamnu. 17 Mere la'pa mak a'ukot nohora Kot Kalwied de, yoma apuar la ralma-rior wamueh'u mana hota aliernan a prehenu-ma'u wniahlani. Mere plollolli de ukot nohora Kot Kalwied de onnila a kwa'ru hade, yoma Uplerlawna ed mak ktut pua agala kniar die. 18 Hade emkade de hota rala hya'a pa emeka a ka'yu? Mak aliernan de, de ralam hepueparnu yoma la'pa ukot nohora Kot Kalwieda-Paitiota, de a'g edonna tieku rira pa rpairi a'u. A ralma-rio'ru de totpa ya'ana-yemnu onde lawra-raini maka plollolli pa hota mak kar lia Uplerlawna kniarni rlernana, de hota awuayotlia totpena yana nhi' yawuhi-yawe'et la Uplerlawna lirni-tunnu mak a'ukot nohora de. 19 Meman nek la a' di de riy id mana hopopanni atia' a'u. La'pa emkade ho'mana, awuehwa-liakat de aghu'ru-ghelam nohora rira honona ralma-riorni totpena aghi' ino'nu de emekwalima ata-wa'ar la'a riy honona. Aghi' emkade totpena a'u'unut nana riy harahu meman pa rler la mormiori-lewlewna ralamni. 20 Yoma la'a Yahudi gaini ralamni de aghi'a ino'nu de emekneka Yahudi. Aghi' emkade totpena a'u'unut nana ir pa rler la Yesus Kristus limni ralamni. Yoma la'a riy mak kmor niohora Musa deullu-tatarni de atiolliohor ira de emekwalima a'g e liernohora ira. Meman nekla a'g edonna gor ira mawniatehra wutu la deulu-tatra agama. Mere aghi'a emkade totpena aghedga ir pa rler wut lia mak klernohor oleka Yesus Kristus. 21 La'pa riy maka Yahudi atia'a de aghi'a de emolmolla Yahudi atia'a mak kaplin niohora Musa deullu-tatarni. Aghi' emkade totpena aghedu ir pa rlernohora Yesus Kristus. Mere la' hare honona de edonna nhi' yawuhi-yawe'et la a'u la'a tli'nu-tai'lu la Uplerlawna lirni-tunnu riorni-liaini. Mere aghi' emkade de un lira-gemun waw la Yesus Kristus. 22 Adien teman la riy mak kaplin niohora ma'ta rwaliria hya' ed mak kaplola me hya' ed mak khala, de a'g edon ghi' hya' ed maka ha rwarora de nhala, totpena aghi' aruri ir pesiayni. La' talan emkade pede la a hihi'u-yapya'pu la haneknek wawannu la' riy honona totpena emkameni ho'mana aghedg oleka riy dom la ir pa rmai lia mormiori-lewlewna ralamni. 23 Aghi'a-yapia hare honona totpena Uplerlawna Kot Kalwiedni-Paitiotni de, yeher to' pa riy rpesiaya, ne hota ra'ititar rer lia liawanni, totpena hota agor rewre'wa ir pa mlernana Uplerlawna ra'ani-pallu la'a Kot Kalwied de.
Itlernohora riy mak kawlar lia wniarehi, nhiolli-lietni
24 Ina-nara ama-hyali, miy e miat niohora la'a yakirna-yawakra (wniarehi la yawlari) de mak kiwra kawlari honona rre'ela rawlari, mere mak klernan siewa-kai die hota riy id tututu. Hota emkade wal lia miy die, miatu mhiaran reri miemna maka mihniari la'a Uplerlawna de emeka mak kawlari nawlar toto' memna, totpena miy miana mliernana siewa-kai maka hota Uplerlawna Nala. 25 La riy maka ha rwatutga pa niwra nler la wniarehi la' hya'a to'a (perlombaan) mana, natga inonni halolola la wniarehi yala'ani totpena na'untu. Ha nlernohora wniarehi yala'ani yoma la'a wniarorni de na'oin nana hota rala siewa-kai. Mere edon nalo'on wali ne siewa-kai die nmolu . Mere itodia it inonni la plol wawna la'a haneknek wawannu yoma ita'oin nana hota itlernana siewa-kai maka Uplerlawna Nala. Siewa-kai die edon nmolu mere nden nek la pa nodia liarni. 26 La' hade pede a' die a'g emolmolan nekama mak kawlari ida mak kharan nana memna maka nahniari, onde emekwalima mak kwata'u rurni-laini la wniadupla-wniahia'ala pa edonna nwadupal lol to' etnu-liolli. 27 A'g emolmolan nekama riy mak khoi tiarga inonni pa rtu'tu-rlewria de ral toto' meman la totpena inonni namnotna, totpa hota enlernana siewni-kaini. Me emekwalima aghi' walia a ino'nu pa emeka upa-matroma nhi'a la atni-wa'arni. Aghi' emkade totpena yanpa ukot nohora Uplerlawna lirni-tunnu della' rira, mere hota nwaldioinia pa nler la hohoni de Uplerlawna Nwayotlia a' pua a'g edon liernana sie'wu-ka'yu.
Rwagahniorat pa yana rre' pa rhoi-rtani la uplera-upmati
1 Ina-nara ama-hyali, mhioratreria hya' maka it upni-tgarni rhi' oleka la' lerni rlernohor reria Musa. Rala' lola kakma ida nayanni ne rleretia Hletan Mermera de rlola mounu-wahrani. 2 Ne la'pa hare honona rewre'wa pa rala'a la kakma nayanni me gera tah'i lawan de ralamni, de emeknekama rharani olek ir rla'a Musa limni-rorni. 3 Honona rewre'wa pa rlernana yamanna maka Uplerlawna Nhiw Lululli Nala. 4 Honona re rewre'wa pa remnia gera maka Uplerlawna Nhiw Lululli Nala la ira. Ger de nwau liola watu wo'a ida. Watu wo'or de na'erit nohora Yesus Kristus e' inhatta, mak kor ir talla. 5 La'pa emkade ho'mana yoma ira wniehwani-liakatni pede Uplerlawna ralamni edonna nala rira liawanni la ira. Ne la' hade pede Uplerlawna Nwunu-nwenna ir la' meni-meni to'a narieiniande riy mak kmati re, de hoi-lie'era lol etnu-liolli la wo'orletna-kawurloini. 6 Ina-nara, hare honona de rhi'a tui ida la ita totpena twahniorta totpena yana it ralamni nko'i reria yohya' mak kyata, emeka ir rhi' nana. 7 Yan itsi' emek riy dom la ira pa tru'u-ttowar la uplera-upmati. Itat niohora ha rhi' emkade, yoma la' Puka ralamni de niwra: ”La hair de rimormiorni de namtatan pa na'ana-nemnu nhor diewade loloi-hekek nohora uplera-upmatni.” 8 Me yan itlernohora ira yalira-yaliaini mak ir mutwualli dom ha rhi' oleka wa, mak karieiniande rimormiori riwnu terampworu wehrani wotelu la ira, rmat lia lera ida, la'a hihi'ini-yapyapni re. 9 Yan ittot pa ta'aga Orgahi-Orha'a pa emekneka riy dom la ira, pa nhi'nande niy nihiya ira nhi'nande rmati. 10 Yana miltieri yata emeknekama riy dom la ira mak kreiniande Uplerlawna Nhopna hopopanni mak kodi plolli la riy aranni nwenan nana re. 11 Hare honona de iramkek memna totpena emekwalima hya' mak tamkek oleka pa yana tlernohora. Ne hare honona de e rhorat tar wual lia, totpena ita mak kmor lia lera-mel maka kwakriarian wia la lera-mel noha niatni twahniorat la it inonni. 12 La' hade pede miy miaka edonna katiak reria hihi'imi-yapyapmi yoma mpiarora miy pesiaymi de naruri-nalai miemn olekwa, de erammi la temmi, yanpa hota mlier la totota-wudwiudi ralamni pa mhi' do'a-myap hiala. 13 La' totota-wudwiudi maka mliernana de emekwalima maka nhi'inde rimormiori ha rlernan oleka wa. Mere Uplerlawna Ndenrer pia Ntulan tiy miy. Hota E' edonna Nolin doin limni la miy pia totota-wudwiudi narehia miy rurmi-laimi. Mere la'pa mlier la totota-wudwiudi dewade Enal walia talan tiy miy, totpena miruri-milai. 14 La' hade pede ina-nara mak kden rer lia a ralmu, awuak tiy miy die oliet miy la riu'u-tniowra la uplera-upmati. 15 A'g e ultier tiy miy di, de emekneka a'g e ultier lia riy mak katu kwarora-kwalai samomuou ida. Pede awuak de miwierta-mitail kalwiedwed la a li'ru-tu'nu ri honona. 16 La' lerni ita'ala Yesus larni mak ha rhuria anggur la me ta'uli-tawedia Uplerlawna, de itsoratreria Yesus Kristus rarni. Miplinga de it hihi'ini de ha ntutga de it rewre'wa tor oleka Yesus Kristus de tla ihru ida-ralm ida, yoma la'a E rarni maka rhur lia it rerieini?! Ne la' walia itwahakra rot die pa ita'an rewre'wa, de miplinga de tor rewre'wa E' pa inon ida?! 17 Yoma hota ntuin tar lia rot mieha de. Ne la' rot die pa it hononita traut la pa ita'an la, pede it honon twal lia inona ida. 18 Ina-nara, mpiaror tek la riy Israel re la'pa ral nhioi-tniani la Uplerlawna la'a katri'ana wawannu nhor diewade rewre'wa pa ra'an ha'anan maka ha ral de. Miplinga de ira'an hade ha nnia'eratni de ir rewre'wa pa ror Uplerlawna rla' ihru ida-ralm ida?! 19 La'pa a'ukot emkade yanpa mpiarora de maka ha rodia la uplera-upmati re de nodi unut hadom la rimormiori onde uplera-upmatni rurni-laini etla. 20 Edonna! Mere la'a hya' maka ha rodia la'a gen miaka ha riwa rala la uplera-upmatni re de edonna rodia harella Uplerlawna, mere ral harella hegana-kawnu yatni-rha'ani. Ne a'uhmen pa mlier wut lia hegana-kawnu re. 21 Pede miy mior olek Orgahi-Orha'a mlia' ihru ida-ralm ida yoma miemn oleka Orgahi-Orha'a larni me mi'ina rotni, de yan memmemna mior hegana-kawnu mlia' lir ida yoma mi'ina ha'anna maka ha rala la uplera-upmati. Hade edon naplol la makpesiay Uplerlawna. 22 Onde yanpa itiwa tahak pa Orgahi-Orha'a Nahankeran rer mai ita?! Mpiarora de miy rurmi-laimi rreh dioinia Orgahi-Orha'a pede hota edonan Nukum miy?!
Nnio'a-niatu la'a ya'ana-yemun nhioi-tniani mak ha ra'olga onde ha ra'ana la rira romni
23 Nhi'inde riy riwra: ”Amhi' neka hya' to'owa maka amparora de naplola.” Mere a'ukota de: La' hare honona re edonna rtulan la miy. Riy riwra: ”Hota amhi' neka haneka-harahu wuawannu,” mere a'ukota de: Honona re edonna rod miy pesiaymi la ga'a. 24 Yana riy ida nwehwa-nlakat de e nlernohor to' e wniaror wamueheni, mere nwehwa-nlakta de nhoratrer wialia hya' ed maka hota kodi e rimormior wialli pesiayni la ga'a. 25 Pede hota miy mi'ina hya' to' maka miwelia la'a ya'olgeni. Mere yana mpiata'wa (mitian nohora) hya' maka ha miwra mi'ina miwra: ”Ral oleka ha'anan de la uplera-upmati me edonna?” Nhi'inde riy ratian emkade yoma rwaror nohora de la'pa ra'an hade, de rhi' oleka do'a-hala. 26 Mere yana mpiaror nohora hade, yoma e rhorat targa la Puka de riwra: ”Nohkeran di nor wutga mniotni de Orgahi-Orha'a gahani hade.” 27 Pede la'pa mak edonna kpesiay mia'ta ida nhoi lia pa mi'ina, me mpiayow pa mlia'a, de yana mpiayotlia ya'an de ne mi'ina. Yana mpiata'wa hya' ed maka ha miwra mi'in de yoma miy mpiaror nohora la'a ralammi de, yanpa mi'in hade de nhala. 28 Mere la'pa riy riwra: ”Maka miy miwra mi'ina re de nhioi-tniani korni-tre'eni hare,” de yan mi'ina, yoma msiaynia riy de maka ralma-rior wamueheni nakot hade nhala. 29 Meman nek la miy edon mpiarora hade nhala mere mliernohora e lir wamueheni mak kakota hade de nhala. Mere yanpa riy id tiy miy niwra natian a'u niwra: ”Hya'a nrei pia a ralma-rio'ru de riy rpolliohora?! 30 Yoma a'u'uli-uwedia Uplerlawna la yamanan de nhor diewade a'una, noka hya'a nrei piede riy rwaghala a lia ya'ana-yemun dena, kennama asiumbain pa wuak olek kalwieda la Uplerlawna?!” 31 Mere ina-nara ama-hyali, a'ukot tiy miy die la'a hya' maka miwra mhi'a, la'pa mi'ina onde miemnu, de mhi'a totpena hare honona de rodia ya'uli-yawedi la Uplerlawna-Mempulwatnu. 32 Yanpa hya' maka ha mhi'a re narieiniande riy rler la do'a-hala ralamni. La'pa Yahudi onde Yahudi atia'a, la' wal lia' krei mutnu pepanni mana yana mhi' emkadella. 33 Mliernohor a yeh'wu. Yoma aniaduran pa atiutga kalwiedni-paitiotni la'a hya' to'a totpena riy honona ralamni rahepur pa ir pesiayni yeher to'a pa naruri-nalai wia onnila a hihi'u-yapya'pu re honona. A'g edonna ghorat la inon wamueh'u. Awuarora honona kalwiedni-paitiotni totpena rler la mormiori-lewlewna ralamni.
1 Mliernohora a yeh'wu pa emekwalima aliernohora Yesus Kristus.
La' krei-iskola yala'ani de patke'a rhu'ru-rhelam la muanke'a
2 Ina-nara ama-hyali, a'u'uli miy yoma miy e mhioratreria a yeh'wu me wniatutu-wniaye'a maka ha rala mai a'u noma awuatutu-wuaye' tiy miy, ne miy e mliernohora re. 3 Mere agiwra ukota totpena miat wualia la' hadi: de la'a maka khi' o'tani la patke'a de muanke'a. Ne mak khi'a o'tani la a'na muanke'a de Yesus Kristus. Ne makhi' o'tani la Kristus de Uplerlawna. 4 Ne la'pa muanke'a ida nsumbaini onde la'pa nakot nohora Uplerlawna lirni-tunnu maka Enalharia, la' woka-le' lialawna, ne nnairia karpusa, de rwet hadella riy maka kapolu-kaliella e o'tani de Yesus Kristus. 5 Ne la'pa patke' ida nsumbaini onde la'pa nakot nohora Uplerlawna lirni-tunnu mak Enalharia la e'a la'a krei wokni-le'enu ne edonna nnairia tutullu, de rweta riy della pat maka kamola-kama'a muanke'a mak khi' o'tani la e'a. Hade emekwalima patke' yatyat mak ki'ir oleka moratnu pa ntutga nhiolli yata. 6 Pede la'pa patke' ida nahmena nnairia tutullu de ndella pa hota rtor dioin nek moratnu. Mere la'pa rtori patke' id moratnu onde ri'ir doinia wuwannu, de yamola-yama' id hadella e'a, la' hade pede plolli de patke'a re rnairia tutullu. 7 Mere a'na muanke'a de yana rnairia karpusa, yoma enamemia Uplerlawna la e inon wamueheni yoma enodi plolli pa emekwali Uplerlawna. Yoma e'a, pede riy ra'uli-rawedi Uplerlawna. Mere a'na patke'a de hota nnairia tutullu totpa riy ra'uli a'na muanke'a. 8 Yoma la' ler ululu de a'na muanke' de edonna ra' nana la' patke'a. Mere patke'a ed maka ha ra' nana la a'na muanke'a ruh'anu. 9 Muanke'a mana edonna rhi'a totpena nhima-nre' patke'a, mere rhi'a patke' de totpena nhima-nre' muanke'a. 10 La' hade pede patke'a ida, de nnairia tutullu totpena ntutga de e etla muanke'a limni ralamni, totpena Uplerlawna hopopanni (malaikat) mak kamkek reri mana rahepru. 11 La' hade ho'mana, la'a it mak kor oleka Orgahi-Orha'a tla' lir ida, de patke'a, muanke'a pa it idma nhima-nre' ida. 12 Yoma la' ler ululu de Uplerlawna Na' nana patke'a upni-tgarni de la muanke'a ruh'anu, la'pa emkameni ho'mana la' ler de pa nma ntut lia ler di mana, patke'a ed mak kmor niana muanke'a honona re. Irora la'pa haneka-harahu wuawannu honona rwatiawua Uplerlawna. 13 Ina-nara ama-hyali, miwierta-mitail tek hadina. Nhi'inde patke'a ida nsumbain la Uplerlawna la mutlialawna, mak lol talanni de totpena nnairia o'tani tutullu toh! 14 Mpiaror tek la'a riy rahu yamkekni de muanke'a maka moratnu plahwa de nodia yamola-yama'a toh! 15 Mere la'a pat maka moratnu plalahwa de riy ra'uli. Yoma Uplerlawna Nala mortu plalahwa la e' pa emeka tutullu. 16 La' hade pede, riy riwra rawo'or nohor hade, de a li'ru niwra ami onde krei dom to' mutnu, a hononami die rewre'wa pa mhi' emkade mamaini.
La' Orgahi-Orha'a mei yawahrani wawannu
17 Ina-nara, la'a mak itiwra takot nohora di, a'g edonna u'ul miy yoma miy yawokmi pa mkiola tieru-miawur nehla la Uplerlawna, de edonna nodia miy la kalwiedwedni mere nodi miy lia yatyatni. 18 Wokmi-le'emi emkade narieiniande to'a-tai miy. La' hade pede dodo'ondi de agiwra ukot nohora. Yoma a'utlin nan oleka miy yehwami emkade nareiniande awuarora de maka utlina re yanpa ha raplola. 19 Meman neka miy to'a-tai miy emkade totpena hota tamkek la ha meni ed mak kaplola la Uplerlawna yamkekni. 20 Emkade ho'mana a'g edon u'ul miy yoma la lera ha miwok pa mi'in la Orgahi-Orha'a meini wawannu, de mpiehwa-mliakat de emeknekama Orgahi-Orha'a meini atia'a ed maka ha mi'in la de. 21 Yoma la'pa mi'in wa de rima-rima mpiaruiya yamananmi, nhi'nande riy doma edonna rlernana ya'ana kennama dom ra'an nande rpehera-rma'wu. 22 Hya' ed maka kreiyo?! Miy mikleh rom wamueh'a?! Nihya'pa miy edon mi'ina-miemun la handena?! Onde yanpa miy e miwra mhi' amola-ma'a krei wokni-le'enu, atia' de mhi' amola-ma'a riy mak kakleha kaplara?! Hya' owa'an mak hota a'ukota tiy miy? Miy mpiarora de hota a'u'ul miy yehwami rena?! A'g edonna wuayow a o'tu la miy hihi'imi-yapyapmi re! 23 Yoma a wniatu'tu tiy miy lia' emkameni la ra'ana-remun la Orgahi-Orha'a meini, de aliernan harella Orgahi-Orha'a orgahani. De la'a mel maka Yudas na'olga Yesus Itmatromlawanni mere edon nhi' ma'ta de, Yesus Nora riy maka ha Nwatutu-nwaye'a re ra'an wutu, noma Yesus Na'ala roti 24 na'nama orgahani Na'uli-nawedia Uplerlawna noma Nhawi-nhawia rot die pa Nhakre'era, na'nama Niwra: ”Hadi de A ino'nu mak Agala la miy rerieimi. Mi'in hadi totpena nhioratmi nden reri la A matmia'tu pa nodi liarni.” 25 Emkade walia la'pa ra'an pa nhorwua noma Na' owa'an lari maka rkeni anggur turnu na'nama Niwra: ”Anggur tur di, A ra'ru mak khi' aplol nana Uplerlawna nnio' warwuarnu. La' ler meni to' pa miy miemun hadi de mhi'a re totpena mhioratreria A matmia'tu.” 26 Plola la'pa ler meni-meni to' pa miy mi'ina roti me miemnia anggur tur die, de miy e mikot nohora Orgahi-Orha'a matmiatni la'pa ntut lia ler maka Enawali owa'ana. 27 La' hade pede riy ra'ana Orgahi-Orha'a rotni me remnia Orgahi-Orha'a niemannu de rlernohora yehwani mak edon kla' nana Orgahi-Orha'a ralamni, de riy de nhi' do'a-hal olek la Orgahi-Orha'a yoma rakleha yatota-yawawa la E inonni me rarni. 28 Hade pede rima-rima nloha-nlili pleinia inonmi nanpena mi'ina-miemun la Orgahi-Orha'a meini. 29 Yoma la'pa riy ra'ana-remun la Uplerlawna meini ne rakleha yatota-yawawa la'a roti nor anggur maka rnawalia la Orgahi-Orha'a inonni nor rarni maka Enala la it rerieini, de riy de e na'ana-nemun nan oleka niukamnu mak hota Uplerlawna Nala pa Ntutulu-nakwara. 30 Hade ed mak kariei pia la' miy die, riy rahu rler la nnieni-nhiena pa riy harahu re pala matia. 31 Mere itatu tlili-tloha it inonni ulu, de hota it edonna tler la Uplerlawna niukamnu. 32 Mere la'pa Uplerlawna Nukum it la dodo'ondi, de Nal it pa tler la mehra-mau onde tmati, de emolannekama Enliwr ita, totpena yana itor wutga rimormiori nohkerna mak edonna kpesiay, pa hota tler la niukum lawna pa rrinnia la ai mormiori ralamni. 33 La' hade pede, i'nu-na'ru, la'pa miwok pa mi'in la Orgahi-Orha'a meini, de miy idma nwei ida. 34 La'pa he' e naplara, de na'ana plein la romni nayanni nanpena la na'an la Uplerlawna meini wawannu. La'pa miatu mhiu'ru-mhielam nohora Uplerlawna meini wawannu, de hota kreimi-iskolmi edonna nodia miy lia do'a-hala pa mlier la niukamnu. A nnio'a-nia'tu dom pali pena amuai pa a'ukot nohora tiy miy ne mpiei nieka.
Ra'a-palu (karunia) maka Uplerlawna Nhiwni Nhurriernia mai ita
1 Ina-nara ama-hyali, agiwra miat niohor memna la'a ra'a-palu maka Uplerlawna Nhiwni Nala de yala'ani. 2 Mhioratreria la lerni la miy edonna miat niohor ma'ta Orgahi-Orha'a, de miy e mitlin la yapi'u-yaga'u pa mliernohora riy mak kru'u-ktowar la uplera-upmati makla' atiehra mak ktilu-kmanu pa mhi'a la rupni-rupni hya' to'owa. 3 Onnila ululu de miy e mhi' emkade pede dodo'ondi a'ukot hadi totpa miat niohora talla maka mliernohora pa mniaheri-mniahelta hameni ed mak Uplerlawna Nhiwni Nodi plolli. De riy maka Uplerlawna Nhiwni Nodi plolli la, de riy de ta'en niana napolu-naliella Yesus. Riy id mana edon nlernohor reria Yesus emeka e Matromlawanni atiaru Uplerlawna Nhiwni etla riy de ralamni. 4 Ina-nara, ra'a-palu miaka Uplerlawna Nhiw Lululli Nala re to'a-taiya, mere ha rwatiawua Uplerlawna Nhiw memeheni ida. 5 Tulla-kniari to'a-taiya pa ta tsima-tre'a Itmatromlawanni mere Itmatromlawanni mak itsima-tre' de Riy memeh'a de. 6 Tulla-kniari la Itmatromlawanni de yala'ani harahu mere mak kala ruri-lai la riy mak kar die, de Uplerlawna orgahani owa'ana. 7 Makpesiay honona rlernana ruri-lai mak kwatiaga Uplerlawna Nhiwni, maka nawniatniatia riy nenenna totpena hota la' hade pede it hononita tler la kalwiedni onnila it idma ntulan la ida. 8 La' riy ida de Nhiw die Nala ruri-lai totpena nakot nohora kirkira-ralma-rior samomuou mak kwatiawua Uplerlawna. La' dom to'a de Nhiw die owa'an pa Nala ruri-lai totpena nakot nohora Uplerlawna yala'ani, de riy rna'erit nana. 9 Nhiw memeh de wal pia Nal wal lia ruri-lai la riy id to' wali pa narur lia pesiayni la Yesus Kristus, ne la' dom to'a, de Nhiw die Nala ruri-lai pa nhi' kalwieda riy mak kamehra-kamau. 10 La riy doma de Nala ruri-lai pa nhi'a hihi'a-yapyapi mak kamehi-kayona (mujizat), ne la' doma de Nala pa nakot nohora Uplerlawna lirni-tunnu maka Uplerlawna Nalhari oleka la e'a. La' dom to' de Nhiw die Nodia ralma-riora pa na naheri-nahelta hameni maka Uplerlawna Nhiwni Nala onde hameni mak edonna. E Nal walia ruri-lai pa na naltieri de yawala maka taplinga, ne dom pal die ratu rakot nohora yawala re nnia'eratni. 11 Hare honona de, Nhiw memeh de owa'an pa kniarni hare. Rima-rima rlernana Uplerlawna rurni-laini de rlernohora Nhiw die ralma-rior wamueheni.
Makpesiay re emeknekama inona ida
12 Ina-nara, twalliohor tek la! La' it inonni di, de inona ida mere nawniair la lima-laka irnu-mata la'pa tutu'u-nerniernu honona. Hare honona etla inona ida. Emkade wal lia makpesiay. Riy harahu mere itawniair la inona ida de Yesus Kristus. 13 Yoma la' ler maka rharani ita, la'pa riy Yahudi, la' walia maka Yahudi atia'a, ata-wa'ara, la' walia marna-wuhura, de it hononit di, de er mak Uplerlawna Nhiwni Nhi'a pa tla' liewr ida pede emolmolan nekama Yesus Kristus inonni inhatta. Ne E Nhiwni memeh de ed maka Uplerlawna Nala pa Ndella it hononita ihranu ralamni. 14 Ina-nara, tamkek la inona ida. La'a inon de nmeh'a, de edonna nawniair la'a lima-laka ida nmeh'a, mere lima-laka irnu-mata la'pa tutu'u-nerniernu korni. 15 Yanpa laka ida niwra e' de lima atia'a e'a pede e' edonna nler wut lia inona. Hade mana edon ntutga de edonna nwatiawua inon de. 16 Onde yanpa tlina nakot la e' de mat atia' e'a pede hota e' de edonna nwatiawua inon de. Hade mana edonna ntutga de tlin de edonna nwatiawua inon de. 17 Mpiaror tek la, la'pa inon tetem de mata honona, de hota emkameni la inon de yatlinni?! Onde la'pa inon tetem de tlina honona de emkameni la ya'irannu?! 18 Mere tamkeka de Uplerlawna ed mak kakoki-kayapia lima-laka irannu-matni re la'pa tutu'u-nerniernu honona la inona. Ne rima-rima kniarni de rlernohora Uplerlawna ralma-riorni. 19 La'pa honona re de nwaltiar lia ida nmeh'a de hota hameni ed maka rhoiya la inona?! 20 Mere plollolli de lima-laka tutu'u-nerniernu harahu mere inona de ida nmeh'a. 21 La emkade pede mata edon nakot la lima niwra: ”O' edon muod unut hadom la inon di”. Onde o'ta nakot la laka niwra: ”O' edon muodi unut hadom la inon di.” 22 Rwaldioinia de lima-lak tutu'u-nerniernu mak kakleh ruri la inona, de plola pa hota itnair walia. 23 Ne lima-laka tutu'u-nerniernu mak itwarora de edon samoga de, hare er maka tamkek (taru kira) la samounu. Ne tutu'u-nerniernu maka yan riy ramkek nana, de itnairia lawra-rainia pa ittutwua. 24 Mere lima-lak tutu'u-nerniernu maka samog olek la yamkeka, de edonna nla' nana wniarora-wnialai. Yoma Uplerlawna ed mak kakoki-kayapi it inonni pniadarni pede lima-laka tutu'u-nerniernu mak edonna naruri-nalai onde yamkekni edon samou, de ramkek samomuou lia pa narehia tutu'u-nerniernu korni. 25 La' hade totpena inon de yana ne'era-nhakra mere lima-laka re mana idma namkek la ida. 26 La'pa lima-laka ida nler la mehra-mau, de plet pa korni re wal pia rakwara mehra de. La'pa rhi' samomuou lia lima-laka ida, de korni re rkalwied wali. 27 Emkade walia miy. Miy hononmi rewre'wa pa mlia' liewr ida pede miy emolmolan nekama Yesus Kristus inonni miy. Me rima-rima mana kniarmi to'a-taiya pa emeknekama lima-laka rahu tutu'u-nerniernu la inona id wali. 28 Pa la'a krei wokni-le'enu, de Uplerlawna Ntutg oleka rima-rima kniarni. Yanullu (pertama) de maka Yesus Nhopan pa rodia Uplerlawna lirni-tunnu, wornu de makwohorulu-ktatrulu, wotellu de mak kwatutu-kwaye'a, noma mak khi' hihi'a-yapyapi mak kamehi-kayona (mujizat), nhor nioma mak klernana plolli pa nodia mak kamehra la kalwiedni, la'pa mak katu ktulan la rimormior wialli, mak kod gai lia rira liawanni (natu na'ursia administrasi), me mak kaltieri pia rnairia yawala-yawala mak itaplinu. 29 La' hare honona re rlernana ruri-lai mak to'a-taiya. Mere yanpa la miy wniarormi de hare honona rla'a makodia Uplerlawna lirni. Edonna toh!? Hare honona edon rla' makwohorulu-ktatrulu onde tungkuru-tungkuru. Hare honona edonna rodi plolli pa rhi'a hihi'a-yapyapi mak kamehi-kayona (mujizat), 30 onde totpena rodia kalwieda la mak kamehra-kamau, onde totpena raltieri de rnairia yawala-yawala maka taplinga, onde totpena honona re rakot nohora yawal de nnia'eratni. Rima-rima rurni-laini erla. 31 Mere hota miy ralammi nwak toto' memna totpena mliernana rurni-laini mak ktulan meman la rimormior wialli.
Uplerlawna Nhiwni Nal ruri-lai pia tsi' kalwiedweda la it rimormior wialli de, hade nareh dioin la ruri-lai korni maka Enal mai ita
Mere hota la hadi de atiutga talan tiy miy mak samomuou mak karehi ruri-lai re.
1 Ina-nara, la'pa riy ida nlernana ruri-lai pa naltier lia rimormiori yawalli maka ha raplinu onde Uplerlawna hopopanni-lili'irnu yawalli, mere edonna nhi' kalwiedweda riy meheni, de lirni re emeka sraki miak kayetin to'a. 2 Eradonde riy ida nlernana ruri-lai pede natu nakot nohora lira-tun muaka Uplerlawna Nalharia la e'a, ne nat niohora Uplerlawna lirni-tunnu loini-talanni maka riy edonna rwaror nana, me pesiayni narur mieman la Uplerlawna pa nwarei wo'ora la walli, mere edonna nhi' kalwiedweda riy meheni, de riy de edonna la' hadomdoma. 3 Eradonde riy ida nala re'eni-tniarnu honona re na nara'a-napalga a'na riy patyata, ne nal walia inonni la ai na'ana. Mere e' edonna nhi' kalwiedweda riy meheni, de riy de edon rlernana unut doma. 4 Riy maka khi' kalwiedweda riy meheni, de tamkek la de natu nod niohora e rimormior wialli. Edonna naralmha'ara mere natu nhu'ru-nhelma rimormior wialli la'pa rhi' yatyatni la' e'a, pede nhi' samomuou lia ira. Me e ralamni edon nala riy gahani. Riy de, edonna nodia po'ona-pei pa nwarehi-nwatal lia mormiorni-dardiarni. 5 E lirni onde yehwani edonna maklekla, me edonna ntutg okarni pa riy rlernohora e ralma riorni. Riy de edonna pleta-pleta pa nahankeran pa nwarora-nwalai niana yata-hala pa na nwahla rira wniehwani-liakatni. 6 Riy mak khi' kalwiedwed riy meheni, de edonna na'oin nana yatyatni-halalli, mere ralamni na'oin nan to'a hya' ed mak kden la plol wawannu. 7 Ne hota enatu natahan ralamni la' haneka-harahu wuawannu. Edon nagai pietan la rimormior wialli mere natu nod niohora. La' hya'-hya' to'owa de edon pleta-plet pa natniekamde e rimormior wialli plol toto'a pa niwra nhi' yatyat la e'a. Hota nwak mamain totpena e rimormior wialli nler la kalwiedni-paitiotni. 8 Nhiolia kalwiedwed de hota nden la pa nodi liarni. Mere ruri-lai honona mak Uplerlawna Nhiwni Nala mai ita la'pa twahaur nohora Uplerlawna lirni-tunnu mak Enalhari oleka, italtieri yawala-yawala mak itaplinga, itlernana kirkira-ralma-riora la Uplerlawna yala'ani hota honona re edon nden pa nodi liarni. 9 Yoma it lirni-yatnu, kirkira-ralma-riorni maka itnair la' lera-mela ri, me la'pa ta takot nohora lira-tunu mak Uplerlawna e Nalharia, de hare honona edon raplol ma'ta. 10 Hota la'awa la' ler maka itler la Ilyamou-Watyatoha, nanpena Uplerlawna Nhi' aplola hare honona. Ne ruri-lai mak itnair la lera-mela ri, de hota ha molga re, yoma edon raplol ma'ta. 11 Tamkek nek la' lera lokmer ma't a'u, de a'ultier die emekneka lokmera-lokpaumu. A wniarora-wniala'yu de nayalokmer ma'ta. Mere dodo'ondi de aliawan wa. A yaltie'ru me wniaro'ru mak lolioi-hayaiya de usral oleka wa. Emkade wal lia' ruri-lai re mak Uplerlawna Nhiwni Nala la' lerni di mak itden ma't la nohkeran di. 12 Miy mpiaror tek la dodo'ondi, de it kirkirni-ralma-riorni, de emolmolan nekama riy mak kamkeka memannu-tatarni mak kpona-kmahu la'a totmemi. Mere hota la'pa tler la Ilyamou-Watyatoha de itat niohor momuou yoma tamkek memna Uplerlawna. Dodo'ondi de a'g edonna gat muomuoga. Mere hota la Ilyamou-Watyatoha de agat momuoga pa emekwalia Uplerlawna mana Nat niohor olek walia a ino'nu. 13 Pede la' ler di pa la'pa nodi liarni itsi'a-tyap rieria lir mantetelu ri, de itpesiay reri Uplerlawna, me tsa'ar reri it aranni la E'a, me la'pa tsi' reri kalwieda-paitiota. Mere mak kareh dioinia hare wotelu de totpa tsi' kalwiedweda it rimormior wialli rora Uplerlawna.
Rakot nohor la ler meni nampena rnairia ruri-lai mak kwatiawua Uplerlawna Nhiwni pa raltier lia yawala maka riy edon rna'erit nana (Bahasa Roh)
1 Ina-nara ama-hyali, mpiaduran meman pa miatu mhi' kalwiedweda rimormiori wialmi. Ne ralammi nwak toto' memna pa mrieiniana ruri-lai re la Uplerlawna Nhiwni. Mak kareh mieman de mliernana ruri-lai pa ma mikot nohora Uplerlawna lirni-tunnu mak Enalharia totpena riy rna'erit nana. 2 Hota miy e mpiak toto' memna pa mliernan ruri-lai die, yoma riy mak klernan ruri-lai pa nwahaur de nnairia yawala mak edonna tna'erit nana (bahasa Roh), de riy de edonna nwahaur la rimormiori, mere hade e nwahaur to'ola Uplerlawna. Riy dom mana edonna rna'erit nana ha lirni, mere la'a Uplerlawna Nhiwni pede enakot nohora lir maka Uplerlawna Nmeh'a Natga mere riy raplin niohora. 3 Rwaldioinia de riy mak kakot nohora Uplerlawna lirni-tunnu mak Uplerlawna Nalharia la e'a, totpena hota riy rna'erit nana, de hota lirni de ennairi pa na naruri-nalai makpesiay, me na nhi' ir pa rahepru me nod ir pesiayni la ga'a. 4 Pede riy mak kaltier pia knairia yawala maka riy raplinu, de lira re ha rhi' arur tio'a ir orgahi irmeh'a. Mere riy mak kakot nohora Uplerlawna lirni-tunnu, de ntulan la krei wokni-le'enu totpena la' ga'a. 5 Eh! Agiwra totpa hononmi miltier die miala yawal mak riy raplinu. Mere samounu de, mikot nohora Uplerlawna lirni-tunnu totpa riy rna'erit nana. Yoma Uplerlawna lirni-tunnu maka ha rakot nohora totpa riy rna'erit nana de narehia lira-tun muaka ha rakot nohor de rnairia yawala maka riy raplinu, enekneka lira-tunu die, de orgahi nakot nohora nnia'eratni totpena ntulan la krei wokni re. 6 Ina-nara, mimkek nek la'pa a maimia'yu di pa agodia yawala-yawala maka riy raplinu tiy miy, de hota hade nakleh memna perkuna kuku' tiy miy. Ematia'a amua ukot nohora Uplerlawna lirni-tunnu tiy miy mak Enalhari oleka mai a'u, onde awuatutu-wuaye' miy lia talan plollola onde ukot tiy miy totpena wniarormi-wnialaimi la'a Uplerlawna hihi'ini-yapyapni re na'ititar rer lia. 7 Tawalliohora emeka tiwla-prai la'pa hya'-hya' to'a maka ha ralira pa ra rwatunu-rwahniara mak kakleha arna, emekwali floiti. La'pa joranni la'pa yetanni tahe'iya pa edon naplola, de emkameni la riy rat niohora hya' ed maka twahniar dena?! 8 Yawalliohorni id owa'ana, la'pa mak ka'ara rega noknoka mere edon rega pa naplola, de he' wal pia nat niohora ntutu-nte' olek la lerni pa rwaran pa nler la ar ralma?! 9 Emkade walia la'pa miala yayohi-yaltieria maka riy raplinu, hota riy id mana edonna rna'erit nan et miemna hya' mak ha mikotkota. Lirmi-tunmi re hota hamamuamua, me edonna lol talan mak kaplola. 10 Mpiaror tek la, la' nohkeran di, de yawala-yawala harahu, mere la' yawala re honona de e rodia nnia'eratni wali toh! 11 Mere la'pa a'g edonna nia'erit nana riy id yawalli, de emekwalima a' die dakna id la e'a me emekwalima e' mana dakan wali a'u la e'a pa idma edon nna'erit nan ida. 12 Pede mpiak pa mliernana ruri-lai pia mikot nohora Uplerlawna lirni maka Enalharia de totpa riy rat niohora nnia'eratni. Yoma a'umkek tiy miy die, miy e mpiadieh'a pa mliernana ruri-lai mak Uplerlawna Nhiwni Nala re. Mere ononni meman de mihak pa mliernan ruri-lai miak kodia krei mutnu pa rla' ga'a yoma rna'erit nana lirmi-tunmi re. 13 La' hade pede riy mak kaltier pia knairia yawala maka riy raplinu, de hota nwak la Uplerlawna totpena enlernana ruri-lai pia nakot nohora yawalli de nnia'eratni. 14 A'ukot emkade yoma hota la'pa a'u onde he' to'a rsumbain de rnairia yawala maka riy raplinu de meman neka la a ralam mamni ed mak ksumbain de, mere a ralma-rior mamni edon nala'a, pa ami edon mna'erit nana hya' ed mak amakota. 15 Hota itsi' hya'a? Hadi ed mak itsi'a. La'pa la' gen meni onde ler meni, de la'a Uplerlawna Nhiwni, pede itsumbain la'a yawala mak itaplinu mere Uplerlawna Nmeh'a Natga. Ne la' geni doma onde lera dom nampena itsumbain de it ralma-riorni nala' pa itna'erit nana momuoga. La' emkade walia la' ler id pa itwahniara la yawala maka itaplinu mere hota la ler dom pa itwahniara de it tna'erit nana hya' ed mak itwahniara. 16 Itawalliohor owa'ana la'pa hota mi'uli-miwedia Uplerlawna la krei wokni-le'enu, de miala yawala maka riy raplinu, ne riy mak katlina de edonna nna'erit nana yawal de mak kwatiawu Uplerlawna Nhiwni, pede ta'en niana nweta ”plola” (amin) la' miy sniumbainmi de, yoma e' ta'en niana nna'erit nana hya' ed mak ha mikotkota. 17 Meman nek la miy sniumbainmi la'a Orgahi-Orha'a pa mi'uli-miwedia E', de naplola, ho'wal miana sniumbainmi de edonna nperkun la mak katlina re. 18 Ina-nara, a'u'uli-uwedia Uplerlawna, yoma amueh'a nek de ultier die niairia yawala maka riy raplinu pa nareh mieman la miy hononmi. 19 Ho'wal miana, la'a yawoka-yale'u pa tkola tieru-tawur nehla Orgahi-Orha'a, de awueta lira ida-woru rmeh'a maka riy rna'erit nana, de ha rareh mieman la aniairia lira riwnu-halli re maka riy raplin niohora ha nnia'eratni. A ralmu napranran pa a'ultieri pia niairi yawal mak riy rna'erit nana totpena agala ga wuatutu riy. 20 Ina-nara ama-hyali, yana mniairia ralma-riora lokmera-papay pa mpiaror nohora ruri-lai mak Uplerlawna Nala ri mere mpiaror nohora de emekwalima ina-ama. Ne yana ralammi nko'i nana yayatni-halalli. 21 Mpiaror tek la hya' maka e rhorat targa la Puka ralamni de riwra: ”Orgahi-Orha'a Nhar lirni Niwra: ”Hota Aniairi yawala maka dakna re ha rakota pa Aga wuahaur la a mu'tu-rah'u, mere emkade ho'mana hota edonna ratlin la A li'ru-tu'nu re.” 22 Pede la' Puka de lirni de itat niohor memna, de ruri-lai miaka itlernana pa ta taltier die tnairia yawala maka riy raplinu, de hade emekneka kniau lia mak edonna kpesiay totpena iramkek memna Uplerlawna rurni-laini pa rwagahniort ira. Edonna ral hadella makpesiay. Ne ruri-lai maka itlernan pa takot nohora Uplerlawna lirni-tunnu totpa rna'erit nana, de rakot nohora hadella riy makpesiay totpa pesiayni la' ga'a. Edonna rakot nohora hadella riy mak edonna kpesiay. 23 Pede totpena miat niohora ha meni mak kod riy pesiayni la ga'a de mpiaror tek la hadi! La'pa yanpa yawoka-yale'u dom la krei wokni-le'enu, me miy mak kden hande hononmi mniairia yawala maka riy raplinu, ne plinu-plinnianama riy mak kaplin niohora plollol ma'ta Uplerlawna talanni doma rmai onde riy mak edonna kpesiay mia'ta pa ratlin nana yawala maka riy raplin niohora de, de hota riwra: ”Eh! Hare de rpi'u-rga'u!” 24 Mere la'pa mikota de Uplerlawna lirni-tunnu totpena riy rna'erit nana, pa rhortut nian miy, hota hare honona maka ha mikota re ntut niana ir do'oni-halli, ne hota nhi'nande ir rhoratnana ir do'oni-halli pede rwahniorat la mormiorni. 25 Hota hya' maka kayawunum la ir ralamni de orgahi rhoratnana de Uplerlawna Nat niohora momuoga re, pa reiniande rru'u-rtowra, me ruh' idma-rrama lia'ar la Uplerlawna pa riwra: ”Plol toto' pa Uplerlawna Nor makpesiaya re talla!” 26 Ina-nara ama-hyali, hare honona nnia'eratni emkame? La'pa miwoka-mile' pua mhi'a krei-iskola, de rima-rima rurni-laini erla, de doma rwahniara, doma rwatutu-rwaye'a totpena tat niohora Uplerlawna talanni, doma e rakot nohora Uplerlawna lirni-tunnu mak Uplerlawna Nalharia la' ira, doma e rakot nohora de rnairia yawala maka riy raplinga, me doma rakot nohora yawala re nnia'eratni. Mere hare honona de rhi' totpena rodi it hononit pesiayni la ga'a. 27 La'pa doma e riwra raltier lia' yawala maka riy raplinga, de riy woru onde riy wotelu tututu, pa idma nhernu-nwaug ida. Ne riy id etla pa nakot nohora lir de nnia'eratni. 28 La'pa riy edonna rler pa rakot nohora ha nnia'eratni, de riy mak katu kawala maka riy raplinu de muli-mtie'ela la woka-le' die ralamni. Emkadella pa miy ralammi ed mak kakot nek hadella Uplerlawna. 29 Riy woru onde wotelu tutut pua rakot nohora Uplerlawna lirni-tunnu maka Nalharia la ira, de idma nhernu-nwaug ida, ne korni re hota ratlina me rawerta-ratailia lira re plollolli. 30 Mere la'pa riy id mak kamtatna pa natlin reri, plinu-plinnianamde nlernana Uplerlawna lirni-tunnu, de riy maka kaltiertier reri, nho' taru, totpena riy de naltieri. 31 Hade emkade, onnila miy hononmi miatu mikot nohora Uplerlawna lirni-tunnu re, idma nhernu-nwauga ida totpena riy honona rlernana wniatutmi-wniaye'emi ne yeher to' pa miy hononmi pesiaymi naruri-na'orta. 32 Hota mhi' emkade yoma mak kakot nohora Uplerlawna lirni-tunnu, ratu rodi inonni la plollolli totpena la'pa raltier die lol talanni. 33 Yoma Uplerlawna edonna Nwaror nana kokokna-rariarni la'a krei ralamni mere E ralma-riorni totpa itsi' honona tlol talanni. Emekneka maka Uplerlawna mutnu-rahanu wokni-le'enu honona rhi'a re, 34 patke'a re hota ratu rtulu-rte'ela la'a woka-le'ga krei. Yana rwayow pa raltieri. Mere hota rdella hawni muanke'a limni ralamni. Onnila agama deullu-tatarni ed mak kakot olek hadewa. 35 La'pa patke'eni re iriwra rat niohora hadomdoma, de mpiei piena hota muanke'emi nakot nohora la' rom wamuehemi. Yoma la'pa patke'a ida naltier lia krei wokni-le'enu wniatromni, de hota nhi' amola-ma'a enor hawni. 36 Nihya' pede miy edon mliernohor a li'ru ri?! Uplerlawna lirni ed mak kwatiawu miy?! Onde mieh'a to' pa er mak klernan oleka Uplerlawna lirni-tunnu re?! 37 La'pa riy dom e rwarora de ir rlernana ruri-lai la Uplerlawna pa irakot nohora Uplerlawna lirni-tunnu, onde rlernana ruri-lai dom to'a la Uplerlawna Nhiwni, de hare hota rwayow nohora a li'ru-tu'nu ri ha rwatiawua Uplerlawna. 38 Mere la'pa hameni edonna nreiniana-na'nana a li'ru di, de yana nhioratmi ndella riy de! 39 Yoma hota la' hade pede ina-nara ama-hyali, ralammi nwahak toto' meman pa mhi'a riy mak kakot nohora Uplerlawna lirni-tunnu. Mere yana mliarna pa riy rala yawala mak riy raplinu die pa ra raltieri. 40 Mere hare honona de mhi'a pa lol talanni.
Yesus Nmori owa'an la matmiatni ralamni
1 Ina-nara ama-hyali, dodo'ondi de agiwra ukot nohor owa'an Kot Kalwieda-Paitiot mak kwatiawua Uplerlawna, mak ululu ukot nohor oleka tiy miy die. La' ler delloo, mrieinian Kot de, me Kot de emeknekama tikilgeni id la miy pesiaymi miak karuri. 2 La'pa mtiorrer apitga Kot Kalwied de, hota hade ed mak kalewan miy. Mere la'pa mpiesiay hya' mak edon kaplola, de miy pesiaymi de edon nod unut hadom tiy miy. 3 Yoma hya' maka aliernana la Orgahi-Orha'a de a'ukot owa'an tiy miy, de ha ononni meman de Yesus Kristus Nmat lia it do'oni-halli rerieini pa emeka ha rhorat targ oleka la' Puka ralamni. 4 La'pa rtamni olek E wa, nhor nioma Uplerlawna Namori owa'ana E la' lera wotellu. Hade mana e rakot tar wualia la Puka ralamni. 5 Ne la' ler maka ramoria Yesus owa'ana, de Entutg owa'an rupni la Petrusa, nhor nioma la' walia mak Enhopan pa rodia Uplerlawna lirni-tunnu re termida wehrani woru. 6 Nhor nioma la' ler ida de Entutg owa'an rupni la maklernohor E'a re, riy rahu wolim rehenu. La' mak kamkek E'a honona re, de rirahu e rmormior mia'ta, enekneka riy ida-woru rmeh'a rmati olekwa. 7 Hade nhorwua noma Entutg owa'ana rupni la Yakowsi nhor nioma la' walia makodia Uplerlawna lirni-tunnu re honona. 8 La'awa hohoni dewade Entut walia rupni mai a'u. Mere la' ler de a'umuki-uma'ala riy makpesiay pede alia' makodi Uplerlawna lirni de, de a'g emolmolan nekama papay miaka ha rmoria de nhal wolla maka ratniekamde hota plet pa nmati. 9 A'ukot emkade yoma plollolli de edon lol talla pa rwet a lia makodia Uplerlawna lirni-tunnu yoma umuki-uma'al oleka Uplerlawna mutnu-pepanni wokni-le'enu. Pede a' die de makodia Uplerlawna lirni-tunnu mak klol yawa memn a'u. 10 Mere la'a Uplerlawna sniayanni pede a yeh'wu nakwali pede la'pa dodo'ondi de alia' mak Yesus Nhopan pa godi Uplerlawna lirni-tunnu. Ne Uplerlawna kalwiedni mai a' die, edonna lola hamamuamua. Mere akar die nareh miemna a mutwua'lu makodia Uplerlawna lirni-tunnu re honona. Mere la'a plolli de a'g edonna ghi'a-yap niana hare honona mere Uplerlawna ed mak kor a' tialan pa narieiniande hare honona rla' ga'a. 11 Pede ina-nara ama-hyali, la'pa mliernana Kot Kalwieda-Paitiota mai a'u onde mliernana la'a makodia Uplerlawna lirni-tunnu dom to'a, hare honona edonna rla' lira, mere onni-ga'arni de miy mpiesiay oleka hya' maka amakot nohora tiy miy.
Uplerlawna hota Namori-nalewna rimormiori it la' matmiati ralamni
12 Amakot oleka tiy miy de Yesus Kristus de ramori owa'an E'a la matmiatni ralamni, pa nihya'pa la' riy dom tiy miy de e riwra riy mak kmati re hota edonna ramori owa'ana re?! 13 La'pa plola riy mak kmati re edonna ramori owa'ana, nnia'eratni de emekwalima Yesus Kristus nek de edon ramori olek wal lia' matmiatni ralamni. 14 Ne la'pa edon ramori Yesus Kristus la matmiatni ralamni de hota la' lir maka amakota re me miy pesiaymi re, hamamuamua yoma mikleha nhia'argeni. 15 La'pa hya' wal die am die mpal lia mak kputra-kpalka. Yoma la'pa makpesiay re edonna ramori owa'ana, de nnia'eratni de Yesus Kristus mana, Uplerlawna edon Namor owa'an la matmiatni ralamni. Pede la' ler maka amakota miwra: ”Uplerlawna Namori Yesus,” de ampudi-makla olek miy lia'a Uplerlawna hihi'ini. 16 Yoma la'pa riy mak kmati re edon ramori owa'ana, de la'a Yesus Kristus mana edon ramori owa'an wal lia' matmiatni ralamni. 17 Ne la'pa Yesus edon ramori owa'ana la matmiatni ralamni, de pesiaymi re edon nodi unut hadom tiy miy. Hade emekwalima miy er ma'ta la do'a-hala ralamni, ne hota miy mmiati pa nodi liarni. 18 Hade emekwalima riy mak kpesiay mak kmati olekwa. Ir mana rrinni olek la ai mormiori ralamni. 19 Ina-nara, riy dom de wniarorni de niwra itsa'ara it aranni de hota Yesus Kristus Nodi unut mai ita mere ntut tio'ola lera-mela mak itdella nohkeran di wawannu. La'pa ir wniarorni de naplola de hota riy makpesiay er maka ruki liawlawan memna. Mere hota edon emkade! 20 Mere plol memna la Yesus Kristus de ramori ulu olek la'a matmiati ralamni, pede itatga de riy mak kmati olekwa mana hota ramori owa'ana. 21 Onnila riy ida nakleha tlina-tailla Uplerlawna pede nohkeran di nler la matmiati. Mere riy id owa'an nariei pede rimormior nohkerna hota ramori owa'an la matmiati ralamni. 22 Yoma rimormiori honona Adam duratni-waitni, ne hota emekwali Adam mak edon katlin la Uplerlawna lirni, de duratni-waitni it hononita tlernohora e' pa hota tmati miomuou. Emkade wal lia hota riy honona mak kor Yesus Kristus rla' ida de hota ramor owa'an it la matmiati ralamni. 23 Mere hota mak ramori owa'ana de, idma nlernohora ida. Mak kala' ulu, de Yesus Kristus, nhorwua nanpena twei owa'ana hota Enmai, dewade Uplerlawna Namori owa'an makpesiay ita. 24 Nhorwua dewade noha niatni. La' ler de de hota mak kodi plolli la nohkerna-rai miaran di nor wutga mak kden la lyanti Ili wio'itu-Dari wionema mana Yesus Naru'u-natowra rurni-laini preheni-mkaini honona. Noma Yesus mak khi'a Ray Nal owa'ana tnioranni-riautnu della E Amni Uplerlawna. 25 Mere edon nte' ma'ta la' lera noha niatni de Yesus Kristus hota Nodi plolli la'pa nte'ela lerni maka Enaru'u-natowar momuoga E arwalli totpena rru'u-rtowar la E'a. 26 Ne matmiati die emeknekama arwalli maka raru'u-ratowra la hohoni meman de. 27 Itat niohora hade yoma la' Puka lirni de niwra: ”Uplerlawna Nhi' oleka hare honona de hota rru'u-rtowar la E'a.” Mere Uplerlawna Nmeh'a to' pa edonna Nru'u-ntowar la Yesus Kristus. Mere E' ed mak khi' hare honona pa rru'u-rtowar la Yesus. 28 Mere la'pa hare honona rru'u-rtowar la Yesus, dewade Enmemeh'a nekpa hota Nru'u-ntowar la Amlawanni Uplerlawna mak karu'u-katowra oleka hare honona pa kru'u-ktowar la Yesus. Pede la' hohoni de Uplerlawna Nmemeh'a ed mak kodi plolli la hare honona. 29 Mere la'pa miy wniarormi mak kiwra mak kmati re hota edonna rmori owa'ana de naplola, de hya' nrei pia rharania rira la mak kmati re rerieini? La'pa riy rmat pia nodi liarni hota edon nodi unut pa rhi' emkade toh?! 30 Ne la'pa riy rmat pia nodi liarni de hya' nrei owa'an pa amiwra mapal lia matmiati la' lelera-melmela? 31 Ina-nara ama-hyali, lera-ler nekpa alier la kropna-krieutu maka trema kod a lia matmiati ralamni mere a'utahan nan a ralmu yoma la'a Kot Kalwieda rerieini. A'ukot hade naplola! Yoma emekwali a li'ru maka nhi'inde a'ukota re raplola, de giwra: a ralmu nahepru la'a miy yoma mpiesiay oleka Itmatromni Kristus Yesus. 32 Ne hota la'pa it makpesiay edon tler la yamori owa'ana mere tlernan neka untu la' nohkeran di to'owa, de hota hya' ed mak kariei piede alia lier nek la riy yatyata-halala mak kden Epsus dina pa rhi' yatyatni mai a'u?! Makden Epsus re emeknekama ohpora-ahdiawra mak klihira-knai a'u. La'pa riy mak kmati re edonna rmori owa'an de samomuounu de tlernohor neka lir maka nhi'inde ha rakota de riwra: ”Mai pia ta'ana-temun la'pa itsi' to'a hya'-hya' mak it ralamni ha nko'i nana yoma repar de itmat wia.” 33 Mere la' plollolli de hota edon emkade, pede yana mliernohora rira lira wniahaurnu mak edon kaplola re. Mhioratreria!”La'pa miora mutwualmi maka yehwani yata re nhi'inde mihe' wiutu, de hota irod wali miy lia yatyatni-halalli.” 34 Oi! Mpiahniorta la dodo'ondi, ne yana mhi'a do'a-hala. Plola pa miy dom de edonna rat niohor ma'ta Uplerlawna talanni. A'ukot emkadi totpena mmiola-mmia'a.
Inon warwuaru maka itlernan la ler maka ramori owa'an ita
35 Matialo'onamde doma edon rpesiaya de hota mak kmati re rmori owa'ana, pa ratiana riwra: ”Emkameni la ramori owa'an mak kmati? Hota inon de namkoha-namnanna ne inon meni ed maka ramori owa'ana?” 36 Mak kakot emkade podaknu! Inon mak ha rtamni de lol to'a la inon mak ha ramoria. Tamkek tek la. La'pa miwra miwuli-mitniamnia wini-hgona id la miy nhyi'imi ralamni, de win die hota edon nmori, la'pa edonna rtamin ulga. 37 Ne la'pa miy mtiamin de miy edon mtiamnia wini-hgon de onni me tawni. Mere hya' maka mtiamin de win-ol de to'a, la'pa matialo'onama wetra' lawna onde win diom to'a. 38 Mere Uplerlawna mak kmeh'a khi'a wini-hgon de onni, tawni de yamkekni emolmolla hya' mak kla' nana E ralamni. Ne wini-hgona re honona edon nora wini-hgona dom to' de onni, tawni re ramneha. 39 Hamormiori inonni edonna ramneh momuou. Rimormiori inonni yamkekni, lol to'a la nhiuri-wnia'ana. Onu-ma'nu mana lol to'am la i'na-ya'ana. I'na-ya'ana mana inonni lol to'am la' hare honona. 40 Emkade wal lia' haneka-harahu wawannu no'a lyanti me mak kdella nohkerna wawannu. Makden la lyanti, de rima-rima rodia lipni-kail wamueheni ne mak kden la nohkerna wawannu mana samomuounu ed walia. 41 Lera lipni-kailli hitni-lomarni lol to'am la wolla lipni-kailli. Ne ha rora lipni-kailli lol to'am la wtiona lipni-kailli. Ne wtiona nek de rod wialia lipni-kail wamueheni. 42 Emekwalima hare honona idma lol to'am la ida, de emkade wal lia hota la'a mak kmati re yamorni owa'an de inon mak ha rtamni de lol to'am la inon maka ha ramoria. Inon mak kdena hoi-kietar de hota ed mak kyata, mere inon mak ramori owa'an de hota edonna niata. 43 La' lera ha rtamin mat die, inon de yamkekni yata yoma plet pa namkoha-namnanna. Mere la'pa ramori owa'an e'a, inonni nwaldoinia de samomuounu memna. Inon mak kmat die nakleh ruri mere rwaldioinia pa nwal lia inona mak karuri-kalai. 44 Inon mak ha rtamnia de ha nwatiawua nohkerna. Mere la'pa ramoria de rlernan inon mak kwatiaga Uplerlawna Nhiw Lululli. Emekwalima inon mak kwatiawu nohkerna etla, de emkade wal lia inona mak kwatiawua Uplerlawna etla. 45 Puka lirni e niwra: ”Uplerlawna Nakoki-nayap nian Adam riy mak kala' ulu die totpa nmormiori.” Adam de, Adam mak kala' ulu. Mere Yesus Kristus, maka rweta la Adam mak ktawli'iru, de ramori owa'an E la' matmiatni ralamni totpa Nal walia mormiori plalahwa pa nodi liarni la makpesiay E'a. 46 Mere inon maka Uplerlawna Nal ulu mai ita de inona maka kwatiaga nohkerna. Nhorwua na'nama Enala inon mak ktawli'iru, de inon mak hota kdella Ilyamou-Watyatoha. 47 Adam mak kala' ul die ra' nan hadella tani. Mere Adam re'eni wornu de nwatiawua Ilyamou-Watyatoha. 48 Riy mak kden la nohkeran di, Adam mak kala' ulu de, nadurti-nawait nana re, pa hota inonni re emekwali Adam mormiorni la' nohkeran di. Emkade wal lia riy honona mak kora Adam mak ktawli'iru mak kwatiawua Ilyamou-Watyatoha de rla' ihru ida-ralm ida, de hota emekwali E' pede rlernan inon mak kden rer lia Ilyamou-Watyatoha. 49 Pede emekwalima it inonni la dodo'ondi de yamkekni de emeknekama Adam mak kwatiawua nohkerna, de hota emkade wali pia it inon warwuarnu yamkekni emeknekama Adam mak kwatiawua Ilyamou-Watyatoha. 50 Pede ina-ama, a'ukot tiy miy die, inon mak kden la nohkeran di hota edon nler la Uplerlawna genni ralamni maka Enodi plolli la'pa emeka ray. Yoma it inonni di, mak hota kler la matmiati pa namkoha-namnanna, ta'en niana nler la gen miaka rmormiori pia nodi liarni. 51 Mere mitlina! A'ukot nohora tiy miy la'a hya' maka ha yawunmua la ler ululu, mere la' dodo'ondi de Uplerlawna Nalharia. De hota it hononit di de edonna tmat miomuou. Mere hota it hononit de emeka ha nnio'luga. 52 De la'pa itatlina noknoka mak ktawli'iru lirni de hota plinu-plinnianamde it emek ha nnio'luga. Yoma la'pa tatlin nana noknok de lirni, de riy mak kmati re hota ramori owa'ana rpa rlernan inon warwuar die rmor pia nodi liarni, ne it hononit mak kmormiori mia'ta, de emeka ha nnio'luga pa itlernan walia inon warwuaru pa emekwali ira. 53 Yoma it inonni mak kwatiawua nohkerna, mak hota kmat die pa namkoha-namnanna, de hota rala inona Ilyamou-Watyatoha mak edon kmati, pa ra rherun doinia la. 54 La'pa la'aw ler de de, plola pa ntutu-nte' olek la' Puka lirni mak kakota kiwra: ”Rdi'na-rlo'w oleka matmiati pa hota itler la mormiori pa nodi liarni!” 55 ”Oi! Matmiatia, emkameni la o rurmu-laimu?! Oi! Matmiatia o li'irmu nhienni etla me?!” 56 Yoma emeknekama hodai ida li'irnu nhienni ed mak kodi matmiati, de emkade wal lia do'a-hal de ed mak kod it la matmiati, me riora-liai agama ed mak kala ruri-lai lia do'a-hala, yoma la'a riora-liai die itat niohora plolli-halli. 57 Mere itwak kalwieda la Uplerlawna. Yoma Enwe'er doin olek it la it do'oni-halli re, ne hota it edon tmat pia nodi liarni, onnila'a Yesus Kristus Itmatromlawanni hihi'ini la it rerieini. 58 La' hade pede awuak pa ina-nara miy mak kden rer lia a ralmu, miruri-milai tioto' memna la pesiaymi totpa yana riy rod miy lia klieratni. Mial ralammi tetema pa mkiar lia Orgahi-Orha'a kniarni. Yana miapuhuna-miaprai. Yoma miatg oleka la hya' maka mhi' nan de la'a mkiar lia Orgahi-Orha'a kniarni, de hota hare honona re rodi unut lawna.
Rawoka patuini-paro'ona pa rala la makpesiay wialli
1 Ina-nara, dodo'ondi de twahaur nohor la'a kupan mak itiwa tala la Uplerlawna mutnu-rahanu la'a Yerusalem. A'ukot hari totpena mliernohora hya' mak a'ukot oleka la krei mutnu mak kden la Galatia. 2 De nhi'inde la'pa krei lerni de mhioratreria pa rima-rima nala kupna mliernohora liawanni maka mliernan oleka la kniarmi ralamni de, pa mhi' tar kupna re totpa mia mpiei a'u totpena la'awa lerni amuai die yana twei pia rawok owa'ana. 3 Ne hota atie'el hande, de a'g ed maka khopan pa riy maka mtiutg oleka re, pa rottiarga kupna rella Yerusalem. Hota agal ir horatni maka kakot nohora ir yala'ani pa ir nenenna rodia. 4 Ne la'pa a'umkek emkameni nanpena agor ir talla.
Paulus wniarorni
5 Ina-nara, a ralmu-rio'ru de hota aliola Makedonia, ne hade nhorwua nanpena amua tiomar tiy miy. 6 Matialo'onamde agor miy pia twarin tiaru plein la lera ida-woru onde agor miy la'pa tah'i muti ngai nianpena a lia geni dom to'a maka agiwra lia'a, totpena hota mhima-mrie' a'u lia a yalo'lu-yala'u. 7 Mere la dodo'ondi de a'g edonna mua tiomar ma'ta tiy miy, yoma a'uhmen gor miy pia lera ida-wor tio'a, mere la'pa Orgahi-Orha'a Nal talan mai a'u de la'pa mak awuatiawu Makedonia de awuarin tiar pua nalo'on nan oke'a. 8 Mere dodo'ondi de agetla let Epsus ne hota adiella handi la'pa aliernana Pentakosta lerni. 9 Yoma atiulla-kari pia nodi liarni la Uplerlawna kniarni mak Enala mai a'u la' handi. A knia'ru di riy rahu e rreiniana-ra'nana lol kalwiedni. Mere riy rahu mana e riwra rtot a lia yatyatni wali. 10 La'pa Timotius ntiy miy die, de mpiatroma la kalwiedwedni totpena ralamni edonna worworga tiy miy, yoma e' emekwali a' pua nkar lia Orgahi-Orha'a kniarni! 11 Yan memmemna makden hande doma e rparwah'a nan e'a. Mhima-mrie'a lol kalwiedwedni totpena plet pa enmai a' die, yoma a'g e wewiei enora makpesiay dom pali mak kiwra kmai handi. 12 La'a it amni-hyalli Apolsu, de awuagahniort olek e' wa, totpena enor mutwualli rtiy pia rtomra-rnah'a tiy miy. Mere ralamni worwor mua'ta pa ntiy miy die. Mere la'pa nlernan talla de hota enmai.
Horta wniatni
13 Riyorahniorat miyo! Mtiorrer pitpitga miy pesiaymi de. Yan mimta'ata mere miruri-milai lia pesiaymi. 14 Hya' ed maka ha mhi'a de honona rlol kalwiedni. 15 Miy miat niohora Stefanus nora romni mniotni er mak kala' ul pua kpesiay lia'a Akhaya liewnu. Ir ralamni raplele'er la kniar di pa riwra rhima-rre'a Uplerlawna mutnu-pepanni. Ina-nara, a'ukot tiy miy 16 totpena mitlina-mitailla ira ror wut wualia riy korni mak kor rewre'wa ir pa ral ralamni tetema pa rhima-rre'a Uplerlawna kniarni. 17 La' ler maka Stefanus, Fortunatus me Akhaikus rmai a'u de a ralmu nahepru. Yoma tultulla-rere'a maka miy edonna miala mai a'u de irhi' nana la miy nanmi wawannu. 18 Irhi' nande a ralmu nahepur reri. Emekwalia ir rahepur wal lia miy. Riy mak emkare er mak tsu'ru-tselma. 19 Krei wokni-le'enu la Asia liewnu e rwak kalwieda tiy miy. Akwila nora Priskila ror walia makpesiay wokni mak kawok tar lia ir rom wamueheni mana e rwaka lir kalwieda tiy miy yoma miora walia Itmatromlawanni mlia' ihru ida-ralm ida. 20 La'pa it inni-narni amni-hyalli makpesiay honona mai handi mana rwak kalwieda tiy miy. Hota miy idma nwak kalwieda la ida, idma nhar lirni la ida, mpiapahar lima, mpiare'et mat la ida totpena lol talan la riy makpesiay. 21 A'u Paulus wuak walia kalwieda-paitiota tiy miy, ne amueh'a nek ed mak khorta kalwied di. 22 Mak edonna kapal reria Orgahi-Orha'a Yesus, ndella pa hota rler la Uplerlawna niukamnu pa rrinnia la ai mormiori ralamni. Awuak pa Orgahi-Orha'a Nmai owa'ano! 23 Awuak de Itmatromni Yesus Nala ra'ani-pallu nanaloi-nanatar nan miy. 24 Hota a ralmu nden rer lia miy hononmi mak kora Kristus Yesus mlia' olek ihru ida-ralm ida. A kalwied mamni tiy miy, Paulus
Paulus nwak kalwieda
1 Ina-nara ama-hyali makpesiay, makden la letlawna Korintus la'pa Uplerlawna mutnu-rahanu honona makden la Akhaya liewnu. Paulus, maka Kristus Yesus Ntut niana pa agodia Uplerlawna lirni-tunnu onnila Uplerlawna ralma-rior wamueheni, a'g inhatti. Agora it hyalli Timotius ma'enyatga horat di tiy miy. 2 Ampak de Uplerlawna, it Amlawanni de Nora Itmatromlawanni Yesus Kristus pena ed mak kala ra'ani-pallu me kalwiedni-paitiotni nanaloi-nanatar nan miy.
Uplerlawna ed mak kdenrerlia (setia) pa Nhi' aruri makpesiay ita
3 Ya'uli-yawedi nden rer tiy O'a Uplerlawna-Mempulwatnu, de Itmatromni Yesus Kristus Amni mak Yesus wal pia Nkola tieru-nawur nehla de. Ina-nara, mai pia ta'uli-tawed E'a. E' de it Amlawanni mak ktut reria ralam kalwiedni mai ita. La'a hya'-hya' to'a de Enala ralam yahepru me ruri-lai. 4 E' ed mak khi' aruri ami la'a hya'a-hya' maka khi' akropna-krieutu la'a a mormior miamni, totpena ruri-lai maka amlernan la Uplerlawna mana, amal walia ma maruri-malai riy maka kler la kropna-krieutu la hya' to'owa. 5 Yoma kropna-krieutu la'pa nniahora-nniala'a maka Yesus Kristus Nlernana, de am miana mlernan memn olek wal lia wa. Ne la'pa amler la lului-nurnuhru la'a kropna-krieutu nniahora-nniala'a de, hota Yesus Kristus de mana Naruri-nalai nan meman ami. 6 Ne la'pa amlernana kropna-krieutu, de hade ed mak karuri-ka'orat nan miy, me nod miy totpena mlier la mormiori-lewlewna. Me la'pa amlernana ruri-lai, ha yala'ani de totpena miy miana mliernan walia ruri-lai mai ami pede hota miatu mitahan rer nieka kropna-krieutu nniahora-nniala'a emeknekama mak amlernan walia re. 7 Pede ampesiay mieman de hota miy miana miatu mitahan ralam mawalmi. Amparor emkade yoma amatga de emekwalima mlier olek la riwtu-hora emekto'ama amlernan olek walia de, de hota emkade wal pia la'a Uplerlawna Nariei piede miy mana miruri-mi'orta emekwalima amlernan walia. 8 Ina-nara ama-hyali, totpena miat niohor walia yakropna-yakrieutu mamni la Asia yapatni. Kropna-krieutu mak amlernan de ha werat rehi la' a wawain mamni pa a ta'eni mtahan nana, pa nhi'nande amatniekame hota ammati. 9 Meman nek la a wniaror mamni de emolmolla rukum pen olek am pia. Mere la' hade totpena yana ampar rer lia a ruri-lai wamueh mamni mere totpena amha'ar rer lia a aran mamni la Uplerlawna mak kodi plolli pa Namori riy mak kmati. 10 La hohoni de E' ed mak kalewn olek am lia yatyatni-halalli mak kodia la matmiati-molmuolu ralamni. Me E' ed mak amha'ara a aran mamni la, pa hota Enamori-nalewn owa'an am lia hare honona. 11 Ne hota miy miana msiumbain rer lia ami. Mhi' emkade hota riy rahu ra'uli-rawedia Uplerlawna onnila Uplerlawna Natlin la miy sniumbain rariahu miy re pa Entutga ralam kalwiedni pa Nhima-nre' ami.
Hya' nrei pia Paulus nherun doinia wniarorni mak eniwra nla' Korintus
12 Ina-nara ama-hyali, a ralam mamni nahepru yoma amparora de, a wniehwa-liakat mamni la it rimormior wialli de, amden rer lia plol wawna. Yoma amodia ihru ploi-ralma ple'era la'a rira, emeka hya' mak kla' nana Uplerlawna ralamni. Ampehwa-mlakat de ami edonna mnairia rimormior kirkirni-ralma-riorni mere Uplerlawna tultulanni-rere'eni mai ami. Mere agat niohora de a wniehwa-liakat mamni la' miy die nareh mieman la maka mhi'a la riy korni. 13-14 Mimkek nek la a horat mamni re tiy miy. Hare honona mak amkenia la horta pa mala tiy miy, de amal to'a hya' maka hota plet pa mpiaikia pa mnia'erit nana. Meman neka hota la dodo'ondi de miy edonna mnia'erit nan plollol ma't am lia hihi'a-yapyap miamni. Mere awuak de totpena la' ler maka hota kmai mnia'erit nan a plollol mamni. De a ralma-rio'ru totpa hota la'pa ntutu la lerni pa Orgahi-Orha'a Yesus Nmai pia Nodia watghudi lokarni, de miy ralammi nahepuepru la' a reriei miamni, pa emekwalima la' ler de a ralam mamni nahepuepur la miy rerieimi. 15 Yoma la' apuesiaya de hota miy ralammi nahepuepur nohora ami pede la' ler delloo, a'ukot targa de amua tiomra-niah'a tiy miy. Awuarora de hota a mua tiomra-niah' ul miy nanpena alia' gen dioma nanpena a'uwali owa'ana totpena mliernana himima-rere'a re'eni woru la a maimia'yu. 16 De agiwra liol pa atiomar tiy miy, la' ler mak agiwra lia'a Makedonia me nhor diewade aliol owa'an miy die. Ne hota la' hade pa mtiulan wali a' pua agodi lia'ru la Yudea. 17 Meman neka la a wniaro'ru la' ler de emkade, mere rwaldioinia de a'g edon tiy tiomar tiy miy pia emeka ukot targ oleka. Pede yanpa hota mpiarora de a'g e gherun doinia a wniaro'ru, de ha nnia'eratni de a wniaro'ru de edon namtemna yoma aliernohora rimormiori nohkeran di hi'ini, pede mikota a'ulahar miy. 18 Mere emeknekama hota hya' ed mak Uplerlawna Nakot targa de hota Enhi' nana, de emkade walia hya' maka amakot targa tiy miy die, ami edon malahar miy. 19 Ina-nara, hota mpiesiay a li'ru ri yoma Uplerlawna A'nani, de Yesus Kristus, a'g ed mak ukot nohora tiy miy, agor Silas me Timotius. Yesus Kristus de plol toto' pa Enhi' nana hya'a-hya' to'owa maka Enakot taru. Edon Nakota nhor diemade edon Nhi'a. 20 Yoma Uplerlawna nnio'oni honona re, hota plola pa Uplerlawna Nhi' nana, onnila Yesus Kristus hihi'ini-yapyapni la it rerieini. La' hade pede la' Yesus Kristus de pede twet la ”plola” (amin) yoma plola pa hya' ed maka Nakot targa hota Enhi' nana. Ne la'pa itwayow nohora Yesus plolli de ed mak kodia ya'uli-yawedi la Uplerlawna. 21 Ne Uplerlawna ed mak kmeh'a khi' ami me la' walia miy pia ittutrier tiertehra pa tora Yesus Kristus tla' ihru ida-ralm ida. E' wal pia ed mak kwalir nian it pa tler wut lia E'a. 22 Ne Uplerlawna Ntutga de E gahani ita yoma Enala Nhiwni pa Ndella it ihranu ralamni. Enala Nhiwni de totpa tat niohora hare honona maka Nakot targa hota Nal momuoga. 23 Ina-nara, Uplerlawna ed maka ktutrier niohor (saksi) a'u. E' ed mak kat niohora a ih'ru-ralmu ha nakotkota. Plollol memna de la ler de a'g edonna tiy Korintus de yoma la'a a'uhmena ghi' miy ralammi pa rmayo'a la'a a'uwenna tiy miy onnila miy do'omi-halmi. 24 A'g e ukot emkadi ralul pia a'g emolmolan nekama mak kodi plolli la miy pesiaymi. Mere agiwra tiutga a ino'nu emeka riy mak kiwra ktulan miy totpena ralammi nahepru la'a miy pesiaymi de, yoma miy e mtiutrier tiertehra olek la miy pesiaymi.
1 La' hade pede la' ler delloo, ageti olek la a yala'u de hota a'g edonna mua liol owa'ana re'eni wornu la' miy die. Yanhi'pa alia' hande hota agodi owa'an miy lia lului-nurnuhru yoma la' ler de miy e mhi' reria do'a-hala. 2 Yoma hota la'pa aghi' miy pia milui-minuhru, de hota he' owa'an pa mak kod a lia muki-hepru? Enekneka miy maka aghi' olek ralammi pa lului-nurnuhru re. 3 Pede a'g edon lia'a mere rwaldioinia de a'u'enyatg horta id tiy miy pa awuagahniorat miy lia hare honona. Totpa hota la'pa a mua tiomar owa'an tiy miy die, miy edon miod owa'an a lia lului-nurnuhru onnila miy wniehwami-liakatmi re. Yoma plollolli de miy er mak kod a lia ralma hepru. Ne apuesiaya de, la'pa a ralmu nahepur de hota miy hononmi wal pia mrie'ela yahepru. 4 Mere aghorta horat de tiy miy de a ralmu nmayo' doin, ne uhedge'du la kniakru. A'u'enyatu horat de a'g edonna wuahaka totpena mlier la ralam mawla, mere aghi' emkade totpena miy e miat niohora a ih'ru-ralmu di de enden rer tiy miy.
Ral doinia kwara la mak khi' do'a-kyap hiala yoma nhoitio'or doin olek la do'oni-halli
5-6 Ina-nara ama-hyali, agiwra ukot nohor owa'an la riy mak khi' do'a-kyap hiala de mak a'ukot nohor oleka tiy miy lia'a horta ralamni. Agat niohora la riy harahu tiy miy die mtiutg hal olek e'a pa miukmua. Hade ntut tiar lia hadewa. Riy de nodi a lia lui-nuhru yoma hihi'ini-yapyapni ululu de, mere miy die er maka riy de nodi miemna la lui-nuhru yoma hihi'ini-yapyapni ululu de. Onde enodia riy dom la tiy miy die la lui-nuhru. A'ukot emkade yoma a'uhmena u'itra-ulawan la e hihi'ini mak edon kaplola mak e nhi' nan de. 7 Mere miy e mhi'a-myapi oleka mak kaplola pa miukmua oleka riy de, la' hade pede la' dodo'ondi meman pa awuak pa mhioratdoinia e do'oni-halli, me mial lir la pa her walia ralamni nmawla. Yanpa edon emkade hota ralam mawla narieiniande pesiayni nmadwuri. 8 La' hade pede ina-nara, awuak de mtiutg owa'ana ralam kalwiedmi la e'a totpena nat niohora de, plola la miy msiayni e'a. 9 Ne hade edon nmeh'a mere ina-nara la' ler delloo, agala horat mak ukot nohora hare honona de tiy miy die, de a'g e giwra tia'u wali miy, de hota miy mial toto' ralammi pa mliernohora hya' maka a'ukota tiy miy re me edonna? 10 Ne miy e mliernohor oleka a li'ru pa miukmua riy de pede la dodo'ondi de, awuak pa mhioratdoinia riy mak khi' do'a-hal tiy miy die do'oni-halli. Ne hota la'pa miy e mhi' emkade, de a' muana ghoratdoin walia riy de do'oni-halli. Meman neka la e nhi' do'oni-halli de mai a'u de edon nwerta. Mere emkade ho'mana hota a' muana ghoratdoinia e do'oni-halli la'a Yesus Kristus gaini ralamni. Ne aghi' emkade la'a miy rerieimi. 11 Aghi' emkade totpena hegana amlawanni yana nnairia it ralamni mak kahmena nhoratdoin riy do'oni-halli pa nlernana talan pa npudi-nakla ita. It tat niohora oleka hegana amlawanni ralma-riorni mak emkade.
Paulus ralamni wolwo'la la'a Troas yoma edon nlernan ma'ta kota-de'eta mak Titus nodia nwatiawua Korintus
12 La lera alia'awa la Troas, de totpena a'ukot nohora Kot Kalwieda-Paitiota la'a Yesus Kristus, Orgahi-Orha'a Nal oleka talan mai a' pua akari lia hande. 13 Mere emkade ho'mana a ralmu edon namtemna, yoma a'g edonna gora it hyalli Titus mpatrom la hande. La' hade pede awuak tar lia makden hande pa alia'awa la Makedonia.
Uplerlawna ed mak ktutga Paulus pa nakot nohora E lirni-tunnu
14 Mere emkade ho'mana awuak kalwieda la Uplerlawna-Mempulwatnu yoma a arwal miamni re ta'en niana rhi' tertieri-tawtawa mai ami, onnila amor oleka E A'nani Yesus Kristus mla' ihru ida-ralm ida. Ne Uplerlawna Nnairi ami mak ululu de mhi' E arwalli pa mla' makot nohora Yesus Makamori-Kalewan de la' meni-meni to'a! 15-16 Amakot nohora Yesus Kristus de, am die emeknekama mak ktutnia ayalin mak kahuwua mikmikir la Uplerlawna. La'a riy maka klol talla mak kod lia matmiati-molmuolu plalahwa pa rrinnia la ai mormiori ralamni, de lir mak amakota re de emekwalima ha mati, mak kahuwu-kawoin pa kwayotil rimormiori, mere la'pa la' riy mak klol talla mak kod lia yamori-yalewna, de mak amakota re emolmolla huwu-woini mak mikmikri-lamliamnia la'a mormiori-dardiari ralamni pede riy rreiniana. Nah, hota he' ed mak ktaru ruri-lai pia nmeh' nkar lia kniar dina?! 17 Riy rahu rakot nohora Uplerlawna lirni-tunnu pa rahak to' kupna. Mere am die ematia' emkade. A ralma-rior mamni de edonna nkoili-nkaili, mere amakot nohora Uplerlawna lirni-tunnu de amdella ploloi-plele'era wawannu pa emeka mak kor oleka Yesus Kristus mla' ihru ida-ralm ida. Uplerlawna Nmeh'a ed mak kamkeka a ralam mamni. Amakot nohora Uplerlawna lirni de emeka Uplerlawna ed mak khopna ami.
Makden Korintus re emeka horta mak ktutga Paulus, de ed maka khima-kre'a Uplerlawna kniarni la ploini-ple'erni
1 Ina-nara, a'ukot emkade, de hade emeknekama a orgah miamni e mtota a ya'ul miamni owa'ana?! Onde yanpa mpiarora de riy rakot nohora a yehwa mamni la horta ralamni pa na'enyat lia miy nanpena mrieinian ami, onde miy mtiota a ya'ul miamni la horta pa mi'enyat lia riy dom nanpena rreinian ami?! Meman neka la riy doma nhi'inde e rhi' emkade mere ami edonna. 2 Yoma miy die nekpa emolmolan nekama horta mak kakot nohora a plollol mamni. Miy emolmolan nekama horta mak rhorta la a ihru mamni ralamni, yoma miy e mdien rer lia a ralam mamni. Ne la'pa amla' meni-meni to' mana riy honona ratlin nohora miy pia rat niohora miy pesiaymi. 3 Miy mormiormi de, ntutga de Yesus Kristus Nkar lia miy ihrami ralamni, me ntut wualia de e Nnair ami pa am makot nohora Uplerlawna lirni-tunnu tiy miy. Emkade pede miy die emolmolan nekama horta mormiori mak Yesus Kristus orgahani ed mak khoratnana. Edon rhorat hade rnairia tinta. Mere rnairia Uplerlawna makden pa nodi liarni Nhiwni. Edon rhorat walia de rnairia watu-le'u, mere rken tiar hadella rimormiori ihranu ralamni. 4 Amparan pia amakota miwra: Miy die emolmolan neka a horat mamni, yoma eneknek to'ama amora Yesus Kristus mla' ihru ida-ralm ida me ampesiay tioto' memna Uplerlawna. 5 Amakleha nhiapargen pia am makot nohora a rur miamni-lai miamni la'a tulla-kniari ri, mere plollolli de Uplerlawna ed maka kala ruri-lai mai ami. 6 E' ed mak khi' aruri-alai am pia mre'ela makot nohora Uplerlawna nnio'a warwuarnu. Nnio' warwuaru die ed mak kahnia'ar la Uplerlawna Nhiwni. Edonna emeka mak ha rhorta la deulu-tatra ralamni. Yoma deulu-tatra mak kahniorat de, riy mak edonna rlernohora de hota nodia la matmiati. Mere onnila nnio' warwuaru mak itlernan la'a Yesus Makamori-Kalewan de, pede Uplerlawna Nhiwni ed mak kala mormiori-dardiari mak kodi liarni mai ita.
Nnio'a warwuaru onnila Yesus hihi'ini de nareh dioini deulu-tatra maka Musa nala
7 Deulu-tatra maka ha rhorta-rle'ega la watu-le'u, nodia mak edon katlin la matmiati. Emkade ho'mana la'pa Musa nakot nohora deulu-tatar de Uplerlawna hitni-reparni ndain la Musa herni-gaini. Hitita-reprepar de lomra-kaili pede ta'en niana riy Israel ramkek reria Musa gaini. La'pa liplipa-kamka'ma de ngai dioin la nhelelma, ho'mana ta'en niana ramkek reria Musa. 8 La'pa Uplerlawna Ntutga plolli-mneheni hititni-repreparni mak karehi-kalawna la' ler maka Enala deulu-tatar ululu die hota yaho'ma la'a nnio'a warwuaru mak Uplerlawna Nhiwni Nal de. Hota ha nareh liawlawan owa'an la plolli-mneheni hititni-repreparni. 9 La'pa deulu-tatra maka Musa Nala na netlia rimormiori do'oni-halli nodi plolli-mneheni hititni-repreparni, yaho'ma la nnio'a mak kariei piede rimormiori rora Uplerlawna rkalwied owa'ana onnila Yesus. 10 Musa deullu-tatarni nodia plolli-mneheni hititni-repreparni. Mere emeknekama la'pa lera nha'ata de it edon tamkek owa'an wa'du hitni-reparni, de emkade walia nnio'a warwuaru onnila Yesus de plolli-mneheni nareh nian meman la Musa deullu-tatarni. 11 Musa deullu-tatarni rnairia pa edon nalo'ona mere nodia plolli-mneheni hititni-repreparni. Pede hota emkameni la'a nnio'a onnila Yesus hihi'ini mak karuri-ka'orta pa nodi liarni? Hota plolli-mneheni hititni-repreparni nareh miemna! 12 La' hade pede ina-nara, yoma la'a a nhia'ar aran gen miamni emkade, pede amparan pia ma makot nohora nnio' warwuaru die. 13 Ami ematia' Musa mak knairia koka pa na ntutwua gaini totpena riy Israel yana ramkek nana Orgahi-Orha'a lipni-ka'mani la Musa gaini mak kgai dioin lolol la, la'a ler maka Musa nakot nohora deulu-tatra la ira. 14 Iratlin nan Musa lirni mere riy Israel re ralma-riorni re ratniutwu. Ne la'pa dodo'ondi mana la'pa rpaikia puka deulu-tatra, mere ralma-riorni re honona ratniutuw ma'ta. Yoma emeknekama edonna ral doini ma'ta kok maka Musa na nahew herni-gaini pede edon rna'erit nan ma'ta. Hade emkade yoma eneknekto'a itor olek Yesus Kristus tla' ralm ida nanpena itna'erit nana Uplerlawna nnio'oni mai ita. Emkade de emeka kok mak ha ral doinia totpa ramkek memna. 15 Pede la'pa ntutu-nte'ela dodo'ondi, la'pa irpaikia Puk maka Musa nhi' nana, de emeknekama e rnair ma'ta koka tiutuw gai die, pede ralma-riorni re ratniutwu, 16 mere la'pa riy ida npesiaya la Orgahi-Orha'a, de emeknekama koka tniutuw gai die ral doinia oleka wa. 17 Awuet la Orgahi-Orha'a de hadi de nnia'eratni de Orgahi-Orha'a Nhiw Lululli. Ne la'pa Uplerlawna Nhiwni Ndella riy ida ralamni, de do'a-hala edon nodi plolli owa'an la e'a me e' edon nwali owa'an la ata-wa'ara la agama deullu-tatarni totpena nlernana yamori-yalewna. 18 Ne hota emeknekama ral doin kok maka ha ra rtutuw gaini de, makpesiay ralma-riorni edon ratniutwu owa'ana, mere tat niohor memna Orgahi-Orha'a preheni-mkaini mak khitita-kreprepra. Pa hota Orgahi-Orha'a plolli-mneheni de nayamkek la it inonni. Yoma Orgahi-Orha'a, de Nhiw Lululli de ed maka Nkar lia it ihranu ralamni, pede ita wniehwani-liakatni de yeher to' pa nlernohora E wniehwani-liakatni. Ne lera-ler nekpa Uplerlawna wniehwani-liakatni mak kalwiedwed meman de narehreh liol pa hota na'ititar rer lia nayamkek memna la' it mormiorni ralamni.
Uplerlawna lirni-tunnu nodia tulliawna-welwierta, mere riy makodia lirni-tunnu re rakleha ruri-lai wamueh'a
1 Pede ina-nara ama-hyali, amakot nohora nnio' warwuaru la Yesus Kristus, yoma Uplerlawna ralam kalwiedni pa Nala kniar die mai ami. La' hade pede ami edon mrei lia li'iru mere amru'rer tio'ola tulla-kniari. 2 La' ler mulaliaini de ametlia de totpa hota ami edonna modi riy la hya' mak edon kaplola. Yehwa mak edon kaplola de nhi'inde riy e rhi'a la yawunwunamnu ne hota nodia ir la molmola-mama'a. Mere ami edonna mhi' emkade. La' amkar die ami edonna mputra-mpalka Uplerlawna lirni-tunnu. Mere amhima-mre' Uplerlawna de amala ralma ploi-ple'era ma mlernohora E ralma-riorni. La' hade de totpa riy honona rat niohora de a kniar miamni di nden nek la plol wawna. 3 Mere emkade ho'mana la'pa Kot Kalwieda-Paitiota mak amakot nohor de riy dom edonna rna'erit nan ma'ta, de hade emkade yoma riy re rahmena rpesiaya pa rna'aran reri olek talan mak kodi ir la matmiati-molmuolu plalahwa pa hota rrinnia la ai mormiori ralamni. 4 Hegana amlawanni, mak kodi plolli la nohkeran di, ed mak ktutuw targa rimormior miak kakleh pesiay matni. Hade ed mak khi'a oruli-augewat la mak edonna kpesiay re, totpena yana ramkek nana lelerni la Kot Kalwieda-Paitiot de. Yoma Kot Kalwieda-Paitiot de ed mak kakot nohora Yesus Kristus. Ne Uplerlawna plolli-mneheni, wniehwani-liakatni, mormiorni-lewlewanni la'pa hare honona etla Yesus wniehwani-liakatni. 5 Yoma lir maka amakot nohora re de ami edon makot nohora ami pa emeka miy matrommi, mere ampahaur nohora Yesus Kristus de, de Itmatromlawanni Orgahi-Orha'a inhatta, ne am die enekneka mak khi' hopopna tiy miy onnila E'a. 6 Amakot nohora Yesus yoma la' ler ulul mueman de Uplerlawna Nhar lirni Niwra: ”Lelerni nhita-nrepar la melmelli ralamni!” Dodo'ondi mana Uplerlawna ed mak khi' nan walia E lelerni de pa nrepar la' it ihranu ralamni totpena it ralma-riorni lelera pa tat niohora Uplerlawna preheni-mkaini hititni-lomlomarni onnila itamkek memna hade la'a Yesus Kristus de. 7 Mere a inon mamni, mak edon karur die, hota emolmolan nekama wra' muaka ha ra' nana la tan miak kakleh weli die, pa hota edon nalo'on wali ne npah'a nana. Emkade ho'mana ami er mak kodia Kot Kalwieda-Paitiota mak ktulliawna-kwelwierta, (mak kakot nohora Yesus Kristus). Hade yala'ani emkade totpena riy rat niohor memna la'a ruri-lai mak kareh mieman de, mak kod it la kniarni di, de plol toto'a ha nwatiawua Uplerlawna limni ralamni, ne edonna nwatiawu ami. 8 Hade nayamkek la'a rnahora-rnala'a am lia lol etnu-liolli ho'mana Uplerlawna edon Nolin am pia amla yawa. Kropna-krieutu nutin-ndahla am pia amaplin niohora de hota ami e mhi'a hya'a mere ami edon mparei lia a gen miamni mere amha'ar reri a aran mamni la Uplerlawna. 9 Amler la kropna-krieutu nniahora-nniala'a ho'mana, mere Uplerlawna edon Nolin limni-nwe'er rorni mai ami. Ne la' lera dom de rwakloli-rwaklali am lia tan kierna wawannu, ho'mana ami ed ma'ta di! 10 Yesus Nlernana nniahora-nniala'a mak kod E lia matmiatni. Nhi'inde ami e mlernan walia nniahora-nniala'a, yamuki-yama'ala maka trema kodi am lia matmiati totpena la' emkade pede riy ramkek memna Yesus e Nmormior mia'ta, onnila ramkek nan E tultulanni mai ami. 11 La' a mormiori miamni de, de amler nek la yatlorni-yatra'ani maka trema-trema amler la matmiati, yoma Yesus Nhopan pa amakot nohora Uplerlawna lirni-tunnu, totpena Yesus mormiorni mana nayamkek la a inon mamni mak hota kmat die. 12 Hade nnia'eratni de lera-lera nekpa trema amuati totpena mliernana mormiori plalahwa pa nodi liarni. 13 Ne onnila amkenia matmiati la a gai miamni pede ami e mhi'a emek Puka lirni, niwra: ”A'g e gatga Uplerlawna Nodi plolli pa hota Nalewn a'u, la' hade pede a'ultieri.” A pesiay miamni de wuhurni-tekalli emekwalima lir de wali. Pede amakot nohora Uplerlawna lirni-tunnu. 14 Yoma ampesiaya de Uplerlawna, mak kamori Itmatromlawanni Yesus la matmiatni ralamni, hota Namori owa'an wali ami yoma amor Yesus mlia' ihru ida-ralm ida, ne na Nodia it rewre'wa pa tla tora E' pa twatroma. 15 Amler la kropna-krieutu honona re de, e rperkun tiy miy. Ne hota riy ra'ititar rer lia rmai pia rat niohora Uplerlawna ralam kalwiedni. Ne hota la' hade totpa rira liawanni mana rsumbain pa rwak kalwiedwedni la Uplerlawna. La' hade pede ya'uli-yawedi nden rer lia Uplerlawna-Mempulwatnu. 16 La' hade pede ina-nara ama-hyali, ami edon mriei lia li'iru. Meman nek la a inon mamni mehrani-maunu na'ititar rer lia onnila kropna-krieutu nniahora-nniala'a lawan rehia, nareiniande hota ammati. Mere emkade ho'mana la' a ihru mamni-ralam mamni de yeher to' pa naruri-na'orta me nodia ruri-lai warwuaru la' lera-ler neka. 17 Yoma kropna-krieutu nniahora-nniala'a mak amlernan de emolmolan neka malui-mahera oke' to'ola ler ho'ke'eni di. Mere hota ha nodi am lia unut lawna pa nodi liarni. Unut lawan de nareh mieman walia malui-mahera mamni mak amlernan olek di. 18 Pede ina-nara ama-hyali, ami edonna mparor nohora hya' mak kayamkek la' nohkeran di, mere amparor nohora hya' ed makdella Ilyamou-Watyatoha, mak edon kayamkek ma'ta. Mak kayamkeka re, hare emeknekama lawra-raini wniali re, mere mak edon kayamkeka re ha rden nek la pa nodi liarni.
Paulus natahan ralamni la kropna-krieutu la Uplerlawna kniarni ralamni yoma la'pa nmati ho'mana hota enlernana inon warwuaru
1 Ina-nara, a'ukot emkade yoma amatga de, la'pa itmati, it inonni de hota emolmolan nekama hoiwiali ida maka rholi-rlet la pa hota edon nalo'on wali ne rweye'er doinia. Ne amatga hota Uplerlawna ed mak kala roma-lewu warwuaru mai ita. Hade de rimormiori edonna rkar niana, mere inon warwuaru maka Uplerlawna Nwahi' taru la'a Ilyamou-Watyatoha la'pa tsol lia hande pa nodi liarni. 2 Mere la' lera-mela ri, de kropna-krieutu nodi it pa it ralamni malui-mahera. It ralamni malui-mahera yoma it ralamni nod reria it inon warwuarnu mak hota tlernana la Ilyamou-Watyatoh de. 3 Itwak pa la'pa itmat die hota itlernana inon warwuaru. Yanpa itmat die itla' nhiwa mak kakleha inona pa emeknekama riy ida mak kakleha lawra-raini pede ratliawihi. 4 La'pa itden ma'ta la nohkeran di, de itpolpuolu-tsawaun ita, yoma ita kwarni werta. Edon riwra itwahak pa tmati pa tolin doinia it inonni mak kwatiawua noh di wawannu, mere yoma itiwra totpena plet pa itlernana inon mak kwatiawua Ilyamou-Watyatoh de, totpena it inonni mak hota kmat die, nhernu-nwauga la inon warwuaru mak kmormiori pa nodi liarni. 5 Mak kwahi'a-kwayodia ita pa hota itlernan hade, de Uplerlawna orgahani Nmeh'a, me Enala E Nhiwni totpena itat niohora la'a hare honona maka Nakot targa mai ita hota itlernan momuoga. 6 Hade ed mak karuri-kalai nian ami pede ami edon mrei lia' li'iru. Ami e matu walia de la'pa ammormior mia'ta la' nohkeran di, de amora Orgahi-Orha'a edon mhol riewre'wa ma'ta la Ilyamou-Watyatoha. 7 Yoma la' a mormior miamni la nohkeran di, de ami e mpesiay to'a Yesus Kristus. Mere ami edonna mamkek nan ma't E'a. 8 Pede amler la kropna-krieutu ho'mana a ihru mamni-ralam mamni edonna nwaler nan oke'a. Mere a ralam mamni niwra maltaru nieka a inon mamni diwa, totpena amora Itmatromlawanni mden wutu. 9 Hade pede ina-nara ama-hyali, ampahak toto' memna totpena la' hare honona mak amhi'a re hota rla' nana Uplerlawna ralamni, la'pa amden ma'ta la nohkeran di onde la'pa am mor E' la Ilyamou-Watyatoha. 10 Yoma hota edonna nhal kuku' et lia la'pa it hononita tawok tar lia Yesus Kristus mak ktorna watghudi lokarni gaini ralamni totpena hota rima-rima rlernana nhiolli-lietni wniahlani la mak nden ma'ta la nohkerna wawannu de. Nhioli-lieta yatyata onde samomuounu rlernan momuoga wniahlani honona.
Paulus nwak pa riy rpesiaya Yesus Kristus totpena rora Uplerlawna rkalwieda
11 Ler maka rhudi-rpar ita hota e nrehgor wa, pede onnila amatu ma'unni-mamta'ata Orgahi-Orha'a, ampak reria rira totpena rpesiay walia Yesus Kristus. Ne a hihi'-yapyap mamni honona re rdella plol wawna. Uplerlawna Nmeh'a ed mak kat niohora a ihru mamni-ralam mamni, me agha'ara a ralmu tiy miy die miy miana miat wualia a ihru mamni-ralam mamni wali. 12 La'pa a'ukot emkade, de a'g edonna wuak pa mimi'uli-miwed owa'an ami. Enekneka agiwa ukot nohora a yehwa mamni mak samomuounu pa hota mhiapar rer lia, totpena hota miatu mpiahla riy mak raklak am pia yoma ramkek to'ola rira herni-gaini mere edonna ramkeka rira yehwani. 13 Yanpa riy rwarora de a hihi'a-yayap miamni la'a Uplerlawna kniarni ralamni, de ntutga de ampi'u-mga'u olekwa. Mere plollolli de amhi' emkade totpena a yehwa mamni de rla' nana Uplerlawna ralamni. Ne la'pa la' riy yamkekni de ami e msamomuou, de a yehwa mamni de totpena nod miy pesiaymi la ga'a. 14 Amhi' hare honona onnila Yesus Kristus sniayanni la it hononita. Yoma amatga de la'pa riy ida nmati, yoma la'a riy honona rerieini, de hade emekwalima riy honona re e rmati olekwa. 15 Ne Yesus Kristus Nmat die yoma riy honona rerieini, totpena la mormiorni ralamni de, rmormiori die yana rtot to'a ira inon wamueheni, mere totpena riy rmormiori die hihi'ini-yapyapni re rla' nana Yesus Kristus ihranu-ralamni. E' ed mak kmati mere kmori owa'ana de yoma la'a ir rerieini. 16 La' hade pede ami edonna mnairi rimormior wniarorni pa amparor nohora rimormiori mormiorni. Ululu amnair hade pede amparor nohora Yesus Kristus de mere dodo'ondi de edon olekwa. 17 Pede hota emkade walia de riy mak kor oleka Yesus Kristus kla' ihru ida-ralm ida, de hota nwali olek la rimormiori warwuaru toto' memn hade. Nhiolli-lietni ululu de nmolg olekwa. Hare honona de rwal lia warwuarnu. 18 Hare honona de Uplerlawna ed mak khi' nana re. La'a Yesus Kristus pede Uplerlawna Nhi' it pa tor owa'ana E' pa tkalwieda. Noma Nhopn am pia amla makot nohora la rira de hota ir wal pia rora Uplerlawna rkalwieda. 19 De hota la'a Yesus Kristus hihi'ini pede Uplerlawna Nhi'a rimormior it pa tor owa'ana E' pa tkalwieda-tpaitiota. Uplerlawna Nhi' hare de edon Nwarora do'a-hal mak rimormior it tsi' nan oleka la E'e wa. Ne ami er mak mlernan oleka nhiopna la Uplerlawna totpena ami er mak kakot nohor walia de hota rimormiori ror Uplerlawna rkalwieda. 20 La' hade pede am di de Yesus Kristus hopopanni ami inhatti. Emeknekama Uplerlawna Nmeh'a neka Naltier lia tiy miy lia a lir mamni. La'a Yesus Kristus rerieini pede ampak lilili-mamuau tiy miy pia mrieiniana-mia'nana Uplerlawna ralma-riorni, totpa mior E' pa mkialwieda-mpiaitiota. 21 Yesus Kristus Nakleh do'a-hala, mere Uplerlawna Nal E' pa Nakwara it do'oni-halli totpena it mana tor owa'an Uplerlawna tkalwieda-tpaitiota yoma la' itor oleka Yesus Kristus ihru ida-ralm ida.
1 Ina-nara ama-hyali, yoma ami er mak kora Uplerlawna mkar wiutu pede ampak tiy miy totpena yan memmemna Uplerlawna ralam kalwiedni mak Enal oleka tiy miy wia hota edon nwal nian la hadom la miy mormiormi ralamni. 2 Mere mpiahniorta la'a hya' maka ha rhorat targa la' Puka ralamni, de Uplerlawna lirni Niwra: ”Awualir nian oleka ler ida pa A'utlin o sniumbainmu, totpa A'umori-ulewna o'a.” Pede oo! Mpiahniorta la dodo'ondi! Ler maka Uplerlawna Nwalir niana pa Namori-nalewna rimormiori, de lera inhat hadi wa!
Paulus nlernana kropna-krieutu yamuki-yama'ala la'a Uplerlawna kniarni ralamni
3 Ina-nara ama-hyali, amahmen pa riy riwra la a tulla-kniar miamni mak amakot nohora Uplerlawna lirni-tunnu, de ami edon mdella ploini-ple'erni. La' hade pede la a kniar miamni ralamni de la'a hya'a-hya' to'owa, de ampehwa-mlakta totpena yana a hihi' mamni de nhi' yawuhi-yawe'eta la riy ida pesiayni. 4 La' hare honona de amtutga mai am di de Uplerlawna hopopanni makdella plol wawna ami. De la' Uplerlawna kniarni ralamni de amler la kropna-krieutu, nniahora-nniala'a, lului-nurnuhru ho'mana amatu mhur niohora ralam mamni mehrani. 5 Amhur niohora ralam mamni la' amler la yamuki-yama'ala, la'pa rtorna am pia rken am lia roma nhio'la ralamni. Lera dom de la'pa a'ukot nohora Uplerlawna lirni-tunnu de rhi' kokokna-rariarni. Amkar die maplin niohora lelerni hameni, melmelli hameni, lera dom de yanin edonna-yamat edonna, lera dom de ami edonna ma'ana-memnu hadomdoma. 6 La' a yehwa mamni de amtut muemna la am di de Uplerlawna limni-lakni ami. Yoma amakot nohora Uplerlawna Kot Kalwiedni de amat niohor Uplerlawna ralma-riorni la'pa talanni. Amkar die mala ihru ploi-ralma ple'era mamni. Am miana mholi-mlet samomuou pa la'pa riy rhi' yatyatni mai am die emkameni ho'mana, ami e mhu'ru-mhelma ira. Ne amha'ara wali aran mamni la Uplerlawna Nhiw Lululli rurni-laini. La' hya'-hya' honona re ampehwa-mlakat kalwiedweda la a rimormiori wial miamni. 7 Hota riy ramkek nana de Uplerlawna lim ho'oni-lak ga'arni (hopopanni) am di yoma amakota ploi-ple'era Uplerlawna Kot Kalwiedni. Ne Uplerlawna plolli-mneheni nkar lia a ihru mamni totpena amakot nohora Uplerlawna Kot Kalwiedni. La'pa amakot nohora Uplerlawna lirni-tunnu la riy mak kiwra klernohora onde la' mak kahmena kreinian am die, ne a yehwa-liakat mamni mak kalwiedwed de hota emek a keki-raut mamni pa ama mpadu'du-mpaleran pa ma mpatemna-mpahala a inon mamni yoma ta'en niana rwaghal am lia a yehwa-liakat mamni. 8 Amakot nohora Uplerlawna lirni pa nodi liarni, la'pa riy rahe'i-ramali ami onde rhu'ru-rhelm ami, la'pa rapupu-raheri ami onde ra'uli ami, la' emkameni ho'mana amden to'ola plol wawna mere rto'on reri am lia mak ka'ohpa-kalahara. 9 Amakot nohora Uplerlawna lirni, la'pa riy riwra iraplin niohor ma't ami, mere plollolli de rat niohor memn ami. La'pa ratniekamde hota ammati mere ami e mormior mia'ta di! La'pa ramuki-rama'ala ami ho'mana, a aran mamni etla genni. 10 Rhi' ako'a-her ami ho'mana amamuki-mahepur rer mia'ta. Ratniekame amakleha-maplara, mere amodi riy rahu pa rlernana Uplerlawan ra'ani-pallu, re'eni-tniarnu. Ratniekame riy mak kakleha yohya'a ami, mere la'a plollolli de a gah mamni haneknek wawannu! 11 Ina-nara ama-hyali makden la Korintus miy hononmi, ampe'er momuou hare honona tiy miy wia. Amakot nohora oleka tiy miy lia a ralma-rior mamni honona, me la' a ralam kalwied mamni tiy miy. 12 Amtutg oleka a ralam kalwied mamni tiy miy, mere miy edon mtiutga ralam kalwiedmi de mai ami. 13 Pede ina-nara, dodo'ondi de mitlin nekpa a'ultier die emolmolla ina-ama ida naltier lia upni-a'na wamueheni. Ampak pa mtiutga ralam kalwiedmi de mai ami pa emeka amhi' olek la tiy miy wia.
Yana miora mak edon kpesiay mlia' ihru ida-ralm ida yanpa hota mrie'ela pa mhi' do'a-myap hiala
14 Ina-nara ama-hyali, yan memmemna mior wutga riy mak edon kpesiay Yesus mlia' ihru ida-ralm ida. Mpiaror tek la! Nhi'inde mak khi' hihi'ini-yapyapni mak kalwiedweda rawok wut wual lia' mak khi' yatyata-halala?! Edon riwra lelerni nler teman la melmela toh?! 15 Riy edonna rlernan ma'ta Yesus Kristus Nora hegana amlawanni rla' lir ida. Ne a'utian tek miy lia emkameni la makpesiay mutnu-rahanu yehwani. Ir yehwani rora riy mak edonna kler wut lia makpesiay re ramneneha me edonna? Edonna toh! 16 Hota rkenia gen miaka rru'u-rtowar la uplera-upmati la Uplerlawna roma kreini ralamni? Edonna toh?! Ne it di de emeknekama Uplerlawna mak kden pa nodi liarni romni kreini ita, yoma Endella it ihranu ralamni. Yoma emeknekama Uplerlawna orgahani lirni, Niwra: ”Hota A'g ed mak kawniotra-kawniah'a temna ira, me Agor ir pa mhol wiutu. Hota A'g ed mak kla'a Uplerlawan la ira. Ne A mu'tu-rah'u irhatta.” 17 ”Orgahi-Orha'a lirni Niwra: La' hade pede mhioitio'or la riy mak kaplinga Uplerlawan de, ne yana mriehgoru-mpiakriani. Yan memmemna mhieik la hya' mak kakdeha-kaktiahli re, ne hota Arieiniana-ga'nan miy.” 18 ”Hota A'g ed mak khi' Am tiy miy ne miy er mak kla' upa-a'na la mai A'u. Orgahi-Orha'a, Makodi plolli la haneknek wawannu lirni hade!”
1 Uplerlawna nnio'oni re Enakot targ harella mai ita. La' hade pede, ina-nara ama-hyali mak kden rer lia a ralmu, mai pia itto'or doin-ttahnei dioin do'a-hala hya'-hya' to'owa, de la'pa hya' maka itsi'a-tyapia onde hya' maka itwaror nohora la' it ralamni de, totpena tamou-tawitn olek la hya' ed mak kodia kdeheni-ktiahlani mai it inon tetemni de. Ne itatu ta'unni-tamta'ata Uplerlawna. Hota la' hade pede yeher to' pa it nhiolli-lietni wniehwani-liakatni de nden reri lia plol wawna.
Paulus Nahepuepur nohora makden Korintus wniehwani-liakatni
2 Ina-nara, ampak pa miy ihrami-ralammi rreiniana-ra'nana ami. Yoma amakleh do'a-hal tiy miy, me la riy id tiy miy miana, ami edonna mtota la klieratni. Amaplinu mparora-mpalai miy re'emi-tniarmi kupanmi-kaimi. Meman nek la, la riy id tiy miy miana ami edon mhi' emkade. 3 A'ukot emkade ralul pia awuaghal miy. Mere emekwalima mak a'ukota la ulul geni, de la'pa ammormiori mia'ta onde la'pa kniar di nod am lia matmiati ralamni, am di de amhoratreri miy. 4 Apuesiay mieman miy. Ama'uli meman miy yoma wniehwami-liakatmi. Amlernan kropna-krieutu ho'mana a ralmu namtiertiernu yoma la miy wniehwami-liakatmi re. Miy nhiolmi re ed mak khi' a pua a'uhepuepru. 5 A'ukot emkade yoma la'pa amte'ela Makedonia ho'mana a ralam mamni edon namtiernu. Yoma la'a hya' to' mana amlernana yatlorni-yatra'ani. Yoma amlernan yahuri-yawo'ora ne la a ralam wamueh mamni mana yamta'ata ndella yoma amparor nohor miy. 6 Mere Uplerlawna, mak khi' ahepru riy mak ralamni nmolu-nhelma, ed maka kal Titus nmai pia nhi' ahepru a ralam mamni pede ami edonna mparora rupni-rupni. 7 Amahepur de edonna mhoratnana Titus nmeh'a to'a mere amahepur walia yoma enakot nohor la mai ami die, e' mana ralamni nahepur nohor miy. Enakot nohora niwra miy ralammi e nmormior pia mior a' pua twatroma-tahnei. Me nakot nohora miy mhioratnana do'omi-halmi la' ululu pa ralammi rmawal doinia, ne la dodo'ondi de miy miana mial toto' memna miy ralammi pa miod nian a'u. Hade ed mak khi' a yahepru pa na'ititar rer lia liawanni. 8 A hortu lirni mak u'enyatga tiy miy lia ler delloo, nhi' amehra miy ralammi ho'mana, a'g edonna gehel nohora horat de lirni. Plola la' lera aghorta horat de, a' muana gehel wali yoma agat muemna de hota miy ralammi nmayo'a. Mere plollolli de hota miy mayo'omi la' lera ho'ke'eni nmeh'a. 9 Emkade ho'mana la' lera-mela ri, de a ralmu namtiertiernu olekwa. Mere a ralmu edon namtiertiernu yoma la'a miy ralam mayo'omi la' ler ululu die, mere yoma la'a ralam mayo'omi de nod miy pia mhioitio'or doin do'omi-halmi. Yoma plollolli de miy ralam mayo'omi de nlol memna Uplerlawna ralma-riorni pede hade ed mak kariei piede amiwra ami edonna mhi' arukia miy. 10 Yoma la'a ralam mayo'a mak klol memna Uplerlawna ralma-riorni, nodia nhiernu-wniau la'a riy ihranu-ralamni totpena nhoitio'or doin do'oni-halli. Ne hihi'a-yapyap die ed mak kodia riy la mormiori-lewlewna. Ne hota riy edonna rpili-rehela ralam mayo'oni de. Rwaldioinia de riy ralam mniolu-nhielma mak klernohora rimormiori ralma-riorni edon rodi riy pa rhopliala do'oni-halli pede hota rler la matmiati plalahwa. 11 Ina-nara, mpiaror tek la! Ralam mayo'omi de mak klol memna Uplerlawna ralma-riorni nod rer miy lia samomuounu. De ralam mayo'omi nareiniande mipe'el pa mhi' owa'an makdella plol wawna me totpa mipe'el pa mimou-miwitn owa'an miy nanmi la'a hya' ed mak khi' akdieh miy re! Miwenan la mak khi' do'a-hal de! Me mimta'ata de hota do'a-hala de nodia niukmu! Ralam mayo'omi de narieiniande miy ralammi nden rer lia a'u totpena twatroma me totpa mipe'el pa mliernohora a li'ru-tu'nu. Ne hade edon nmeh'a mere la'pa mpiaran pia miukmua riy mak khala wali! La' hare honona de mtiutga de miy edonna mhiala. 12 A hortu emkade tiy miy ho'mana, plollolli de a'g edonna ghi' to' hadella' riy mak khala, me edonan ghi' walia la' riy mak kaplola la' do'a-hala de. Mere plollolli de aghorta horat de la' miy hononmi totpena miy orgahami miat niohora de msiayn memn ami. Ne Uplerlawna mana Nat niohor olek hade wali. 13 Miy hihi'imi-yapyapmi re nhi'nande a ralam mamni rahepur reri. Amahepur reri lia' hade. Mere hade edonan nmeh'a mere amamuki-mahepur meman nohor walia Titus yaheparnu onnila miy. Yoma miy hononmi mana mhi' e ralamni pa namtierun wa. 14 Yoma la' ler maka e' edon ntiy mia'ta de a'u'uli oleka miy lia e gaini ralamni. Ne la'pa nte'ela tiy miy die, miy e mhi' emeka a'ukot olek la e'a, pede la' emkade pede miy edon miod a lia molmola-mama'a. Hya' to' mak amakot oleka tiy miy die ha raplola. Emkade walia hya' maka amakot pa amran miy lia heyanna la'a Titus gaini de miy e mhi' oleka re, pede ha ntutga de a lir mamni mak amran miy die ha naplol wali. 15 La' dodo'ondi de yeher to'ama e nsayn miy, yoma nhoratnan la'a miy nhiu'ru-nhielammi la e wniatutnu-wniaye'eni, ne la' walia emkamenila miy mrieiniana-mia'nana e'a, de miatu mi'unni-mimta'ata. 16 A ralmu nahepur memna yoma mlia' riy mak apuesiaya la'a hya'a-hya' to'owa.
Riy makpesiay rwaro'ona kupna pa hota rala la mak kakleha-kaplara la'a Yudea
1 Ina-nara ama-hyali, la'pa upa-a'na hononmi, ampak tiy miy totpena miat niohora walia la emkameni la' Uplerlawna Nal kalwiedni nkar lia'a krei mutnu-pepanni mak kden la Makedonia re ihranu-ralamni. 2 De e rta'g olek harella kropna-krieutu mak kwerwerta. Mere la'a kropna-krieut mutliawna re ho'mana, de yeher to'a me rahepuepur reri me nhiolli re samoga pa rhi' patuini-paro'on la' makden Yudea, de edonna rhoratnana ir kleheni-larni. 3 A'g e gat niohora ira paro'onni de edon nodia kniunu-kniehen nohor kupna-kaini mere rala de narehi-nalawna. Ir edon rhoratnana ira kleheni-larni. Ir rala paro'on emkade de rlernohora ralma-rior wamueheni. 4 Irwakwak memna mai ami pia irre'ela rhima-rre'a Uplerlawna mutnu-rahanu mak kden la Yudea. 5 Ira nhiolli-lietni la patuini-paro'onni de nareh mieman la mak ampakwaka. Yoma la' patuini-paro'onni de rlernohor ulga Itmatromlawanni ralma-riorni. Irlernohora E'a pede rhi'a-ryapi wialia hya' maka amakota la' ira. 6 La' hade pede amakot nohor la Titus totpena e' ed mak knalima-knalak nohora miy lia Korintus totpena mhi' ahorga patuinmi-paro'onmi totpena mtiutga ralam kalwiedmi. Yoma la' ler ululu de miora Titus mpiewlo'ona patuini-paro'onni de. 7 Miy yehwami samomuou olek la haneknek wawannu, onnila la'a pesiaymi mak karuri, miatu mpiatutu-mpiaye'a, la'pa miy kirkira-ralma-riora samomuoumi (hikmat) pede mipepe'el la mliernohora Uplerlawna. La'pa miatu msiayni mai ami. Pede ampak tiy miy totpena emekwalima mhiol samomuou lia hare honona hota emkade walia mipepe'el pa mi'itar rer lia la nhioli mak kara'a-kapalu la rimormiori wialmi. 8 A'ukot nohor hadi de a'g edon ghopan miy. Mere ukot nohor to'a makden Makedonia wniehwani-liakatni mak kala ralam tetema pa khima-kre'a rimormior wialli, totpena a'umkek teka de hota mliernohor ira me edonna. Totpa hota agat niohor walia de plol toto'a pa miatu mira'a-mipalga miy rimormior wialmi me edonna. 9 Awuak pa mpiaro'on kupan de yoma miy e miat niohor walia de Itmatromlawanni Yesus Kristus e Nara'a-napal wualia ita. Yoma E' de ed mak kre'a-ktar lia'a Ilyamou-Watyatoha, mere Nhi' inonni de emekwalima rimormiori mak kakleha-kaplara, yoma Nhoratnan miy, totpena kleheni de nod miy lia Uplerlawna ra'ani-pallu, re'eni-tniarnu. 10 Pede a'uno'a-unatu emkadi tiy miy wia totpa miy e mhi'a hya' mak kaplola, de la' anni itto'or la de miy er maka ma mpiewlo'ona ulga wniaro'on kupan de. Ne hade edon nmeh'a mere miy er maka kwaror nan ulga paro'on de! 11 Pede dodo'ondi de mipepe'el la kniarmi pa mhi' ahorga totpena mliernohor neka nhiolmi de la' mulaliaini. Mere la'pa mial kupna de mliernohora neka miy rurmi-laimi. 12 Yoma la'pa miy ralammi naplele'er nohora hya' ed maka miala, de hota Uplerlawna Nreiniana de, yoma edonan Nwaka hya' maka edon kden tiy miy. 13-14 A'g edonna ukot emkadi totpena atio'on rer miy pia mial memna nhi'nande hota mikleha. Mere a'umkek la dodo'ondi de mliernana pripanni-fa'anni, pede hade edon nhala de mitu'tu makden Yahudi kleheni-larni de lola miy patuinmi-paro'onmi. Emekwalima la'pa mimikleha ne irpehera, de hota ir er mak khima-kre' miy. La'pa miy idma nara'a-napalg ida totpena miy riewre'wa la walli-walli pa gahami etla. 15 Hade emeknekama mak ha rhorat targa la Puka ralamni de niwra: ”Riy mak klernana liawanni, hota edonna narehi-nalawna, mere riy maka klernan oke'a nmeh'a de hota edonna nakleh memna.”
Rhopna Titus nora riy woru rla rala kupan paro'ona la Korintus pa rodia la makden Yudea
16 Awuak kalwieda la Uplerlawna, yoma E' ed mak khi' Titus pa ralamni napranran pa ntiy pia ntutu-nhan miy, pa emekwali a ralmu naplele'er pa atiulan tiy miy wiali. 17 A'ukot emkade yoma Titus edon nhorat to'ola a wakwak mamni la e'a pa ntiy, mere e' nek de nodia ralma ple'era pa niwra ntutu-nhan miy. La' e ralma-rior wamueheni enetlia de hota entiy miy lia hande! 18 Pa hota amal walia riy id pa nor e' talla pa rtiy miy die. Riy de, de krei mutnu wokni-le'enu honona ra'ulia la yehwani-liakatni wniatutnu-wniaye'eni, yoma irat niohor olek walia enkar samomuou la nakot nohora Kot Kalwieda-Paitiota. 19 Riy mak amakota di, krei-krei mutnu-pepanni rwalir nian oleka pa ror am tialan pa hota am rewre'wa pa amodi patuini-paro'ona maka rala la makakleha-kaplara la Yudea. Totpena hota la' hade pede Orgahi-Orha'a orgahani Enlernana ya'uli-yawedi la rimormiori. Me hota riy ramkek walia de ami e mala a ralam mamni tetema pa ma mtulan la it rimormior wialli. 20 Amhi' hare honona de amparekan samomuoga. Yanpa riy rwaghal am lia nhiakra patuini-paro'ona mutliawna re. 21 Amiwra mhi' hadom de lol toto' memna rimormiori nora Itmatromlawanni ralma-riorni. 22 Ne hota amal walia riy id pa nor walia Titus nor talanwalli de, pa hota ir wotelu rtiy ulga miy die, pa rawoka miy kupna paro'onmi re. Riy de, amamkek olek la' re'eni wo'ir memna de nape'ela pa nhima-nre'a Uplerlawna kniarni. Ne la' dodo'ondi de e ralamni naplele'er memna totpena nhima-nre' miy. Yoma enpesiay miemna hota miy miala kupan paro'on de. 23 La'pa rakot nohor la Titus, de a heiwia'lu inhatta hade, mak kor rewre'wa a' pua amkar wiutu totpena amtulan tiy miy. Ne la' a talanwali miamni rora mak kor e' pa rtiy miy die, de ir er maka krei mutnu rhopan pa rla'a, de la'a krei-krei re nanni wawannu, me ir wal pia yehwani-liakatni rodia ya'uli-yawedi la Yesus Kristus. 24 Pede amha'ara a ralam mamni tiy miy totpena mtiutga miy kalwiedmi la ira, totpena hota krei mutnu re rat niohora de lira mak amakota re la'pa amran miy lia ira, de ha raplol momuou.
Rodia patuini-paro'ona la ira mutwualli
1-2 Ina-nara ama-hyali, agatga de miy ralam kalwiedmi pa miala himima-rere'a mak hota ra'enyatga la Uplerlawna mutnu-rahanu makden la Yudea re, pede plollolli de yana aghorta emkadi. Yoma agatga miy ralammi kalwiedni de pede a'g e u'uli olek miy lia' riy Makedonia. A'ukot la ira, giwra: ”La'a anni itto'or la de, de it inni-narni amni-hyalli makden leta Korintus, la'a Akhaya, de ralamni re raplele'er pa e rawokwok reri kupna maka riwra rala.” Reiniande rira liawanni la' Makedonia ralair niohora miy pia riwra rawok targ kupna wali. 3 Mere dodo'ondi de aghopan doini Titus pa nora talanwalli rora rtiy miy die pa rhedu-rtehra miy, totpena lir mak amakot oleka pa ma'uli miy re, de hota edon lol hgalli. Mere totpena miy e mhi' ahorga patuini-paro'on de. 4 Yanpa hota la' ler li'iru de la'pa am tiy miy die, de riy Makedonia mak kor a' tialla, la'pa irlernan miy edonna miwok ma'ta kupna, de hota emkameni la mai ami ee?! Yoma amakot la ir de: ”Makden Korintus re rape'ela pa rawok tar kupna!” Mere la'pa liol maka ha mpiettaru re edon rawok ma'ta, de hota miy miana yeher to' pa mmiola-mmia' wali toh?! 5 La hade pede agetlia de aghopan doin memna ir Titus rala' ul a' pua rtiy totpena rawoka-rale'ga liol maka ha mpiettaru re. Aghi' hade totpena hota la'pa am tiy miy, de honona e rawokwok olekwa. La'pa emkade hota ramkeka de, hya' maka ha miala re, de emeka ha nwatiawua ihrami-ralammi maka ploloi-plele'era. Yanpa rwarora de miala onnila amteku miy.
Mial ralam plele'er pa ma mira'a-mipalu rimormior wialmi
6 Mhioratreria! La' hadi de emolmolan nekama mak kawuli-katniamni. Yoma riy mak krinnia wini-hgona oke'a la'a nhyi'ini ralamni, de la'pa la'awa rieiki-wnio'ora de hota nlernan walia oke' to' wali, emeknekama hya' maka e nawuli-natniamin nana re. Mere he' maka krinnia wini-hgona yawuli-yatniamni liawanni la'a nhyi'ini de, hota la'awa rieiki-wnio'ora de nlernan walia liawanni. 7 Mere he' mak kiwra kal kupan de yana ralam nwerta onde yoma rtekua na'nama nala, mere hota enal de nlernohora hya' ed maka enmemeh'a enwaror nan oleka, yoma Uplerlawna ralamni Nala riy mak kala ihru ploi-ralma ple'era pa na nara'a-napalu rimormior wialli. 8 Uplerlawna ed mak kodi plolli pa Nhuri-nwalia pripanni-fa'anni totpena mliernan rehenu-lawanni, me totpena ma mira'a-mipal walia rimormiori wialmi. 9 Hade emolmolan nekama maka rhorat targa la' Puka ralamni la'a mak kala himima-rere'a la mak kakleha-kaplara, de niwra: ”Hota emeknekama ha rkarga wini-hgona, enara'a-napalga mak kakleha-kaplara. Ne ralam kalwiedwedni de edonna nho'a, mere nodi liarni.” 10 Uplerlawna ed mak kala wini-hgona la'a riy mak kanhyi'a-katlunni, me ya'ana-yemnu mai it hononita. Enatnieman targa wini-hgona yawuli-yatniamni liawanni la'a riy mak kanhyi'a, pa la'pa la'awa rieiki-wnio'ora de hota nlernan walia liawanni. Emkade wali E' ed mak khi' ralam kalwiedmi pa yeher to'a miod reri kalwieda-paitiota la rimormior wialmi. 11 Yoma hota Enal miy pede mliernan hare honona totpena hota la hya'-hya' to'owa de miruri-milai pia mira'a-mipalga mutwualmi de, yana kukuhi-helelatmi. Ne hota miy limtutmi mak amodia la Yudea, de nhi'nande hota riy rahu ra'uli-rawedia Uplerlawna. 12 Yoma la'a nhiolia kalwieda-paitiotmi de, de hota Uplerlawna mutnu-rahanu la Yudea rlernana hya' maka rakleha. Ne hade edon nmeh'a, mere hota riy harahu ra'uli-rawedia Uplerlawna yoma la'a miy kalwiedmi de. 13 Ne la'a miy kalwiedmi de pede makpesiay liawanni hota ra'uli-rawed reria Uplerlawna yoma rlina-rmat nana miy tlinmi-tailmi la'a Kot Kalwieda-Paitiota mak kakot nohora Yesus Kristus, maka mliernohor olek de. Ne la' walia ir mana ra'uli-rawedia Uplerlawna yoma la'a ralma plele'er pa pletleta-pranranmi pa mdiurmu-mhiakra hya' to' makden tiy miy lia ira, me la'pa la' riy dom to'a. 14 Ne hota la'pa irsumbain rer miy lia Uplerlawna ir ralamni de rden rer lia tiy miy, yoma la'a E ralma kalwiedni mak kareh mieman de, mak kar lia miy ihrami ralamni. 15 Mere ina-nara ama-hyali, mai pia ta'uli-tawedia Uplerlawna yoma Enal olek walia mai ita hya' maka ita taken niana tpar nana tulliawanni-welwieratni!
Paulus naheri-nahelta inonni la'a hihi'ini-yapyapni la'a Uplerlawna kniarni ralamni
1 Ina-nara, la' miy mutwualmi re de nhi'inde riwra: ”Paulus de, la'pa nor it pa tor rewre'wa la gen ida, de enaltier die emeknekama namta'ata. Mere la'awa olieta nampena nodi paranni pa nhopn ita”. Mere a nhio'lu edon emkade yoma umta'ata. Mere ina-nara ama-hyali, a'u Paulus de a'g e ghu'ru-ghelma, me aniairia lira mnapnapla pa emeka Yesus Kristus yehwani pa awuak hadi tiy miy. 2 La'pa atiy miy die awuak de yana mhi' a ralmu pa nleretniekla namehra pa awuenan tiy miy. Yoma a'g e wuaror nana hota atiy die, a'g edonna ghur niohor riy dom tiy miy mak kiwra amkar die amlernohor to'a rimormiori nohkerna ralma-rior wamueheni. 3 Am di de, plola pa am die rimormior ami, mere ami edon mnairia rimormiori nohkerna yala'ani pa matowar nan riy mak kmalawan la Uplerlawna lirni-tunnu mak kaplola. 4 Keki-rautu maka amnairia la a wniadu'du-wnialeran mamni di, de edonna ma' nana harella nohkeran di wawannu, mere Uplerlawna mak kodi plolli la nohkerna-lyanit maran di ed mak kala hare la ami. Yoma plolli-mneheni maka Ha Nala mai am die, de hota amala ma mawiru-mawewla mak kmalawna Uplerlawna lirni-tunnu, pa emeka keki-rautu maka rnairia pa ra rwakoha-rwananna geni-tien mak karur miemna. 5 Amnairia E plolli-mneheni emekneka makodi keki-rautu rweyata-rwaniawua lutur watu-werna tuini maka kle'lu reria arwalli letni me rtorna arwalli, de amala Uplerlawna plolli-mneheni ma matowra riy kospo'ona mak ktota riy la klieratni pa hota edon rat niohor Uplerlawna. Amatowra ir ralma-riorni mak edon kaplola, me amhi'a re pa rru' rieri-rtowar rer lia Yesus Kristus. 6 Ne amhi' wali miy pia mhiu'ru-mhielm owa'an la Yesus Kristus, nhor diewade ami er mak ketlia riy mak kakleh ma'ta ya'unni-yamta'ata re do'oni-halli pa rlernana niukmu. 7 Ina-nara, mpiaror samomuou la'a hya' ed mak kaplola, maka plollolli de miat niohor oleka de. La'pa riy ida ntutga inonni de niwra Yesus Kristus limni-rorni olek e wa, hota e' mana nhorat nan walia ami, Yesus Kristus limni-rorni wali ami, pa emekwali e'a. 8 Pa la'pa ukot harahu rehi la Uplerlawna plolli-mneheni maka Enal mai ami ho'mana, a'g edonna muola-mua'a la' hade. Yoma Enala hade pa ma mhedu-mtehra miy lia kalwiedwedni, me edon riwra Nal hade pa ma mpeye'er miy pesiaymi. 9 A'ukot emkade yoma uhmen memna miwra agala a hortu ga umta'ata miy lia hande. 10 Yanpa hota mimpiesiay riy mak kiwra: ”Paulus horatni re lirni maklekla emeka enodi plolli, mere la'pa nden wut lia mai ami, de yamkekni emeka mak edon karuri me naplinu-naplo'ola wniahauru.” 11 La'pa riy mak kakot emkare, hota mpiaror samomuou walia a yehwa mamni la'pa amtiy miy die! Yoma hota a yehwa mamni la' miy de maklekal walia, pa emekwalima a horat mamni tiy miy! 12 Ami edon makot nohora a kniar mamni di pa emeka amal wutga a inon mamni nor wutga mak khi' inonni pa katulu re ramneneha. Yoma ir rmeh'a nekpa rta'u-rta'g o'tani la riy maka hihi'ini-yapyapni ror wutga ir hihi'ini-yapyapni ramneneha. Ir rhi' emkade de podaknu re, yoma rwarora de riy rora ir pa ramneha nanpena rla' riy orkotkota-ornanana emekwali ira! 13 Mere am di de edonna mhi' targa nhioli-liet mak emkare. Yoma la'pa a orgah miamni makot nohora kniar miaka Uplerlawna Nala la' am die, de ami edonna mpo'on-mpei niohora riy doma kwarni (kniarni). Mere amakot nohor to'a Uplerlawna kniarni maka Nala mai ami. Ne hota miy miana, Uplerlawna Nal pa ampatutu-mpaye'a miy lia a kniar miamni die. 14 Pede la'pa amakot nohora a maimiai miamni tiy miy onnila Kot Kalwieda-Paitiota mak kakot nohora Yesus Kristus de rerieini, a lir mamni de edon nhala. Yoma plollolli de ami er mak kala' ul tiy miy pa amakot nohora Uplerlawna lirni de. 15 Ne am miana edonna mtota ya'ul miamni la'a tulla-kniari mak riy dom to'a rhi' nana la' geni-tien wamueheni. Mere amha'ara a aran mamni la, hota miy pesiaymi de mlier to'ola ga'a totpena hota Uplerlawna Nhi'a a kniar miamni la tiy miy die nawerna-naplahwa. 16 Totpa hota la' hade pa amla makotkot lol owa'an Kot Kalwieda-Paitiot de la'a leta-ruhuna dom to'a maka riy dom edon rkar mia'ta la. Yoma mahmena mhi' inon mamni pa natulu-napetna la'a tulla-kniar miaka riy dom to'a rhi' nan oleka la geni-tien wamueheni re. 17 Pa hota emekneka maka rhorat targa la Puka ralamni de niwra: ”Yana mpio'on atulga inon wamuehemi. Mere mikot nohora hya' maka Orgahi-Orha'a Nhi' nana totpa riy ra'uli-rawed E'a.” 18 Yoma riy mak ka'ulia inon wamueheni, de hota edonna rden la plol wawna la Uplerlawna yamkekni, mere enekneka riy maka Orgahi-Orha'a Nmeh'a Na'ul nian to'a.
Paulus nahmen memna irlernohora tungkuru-tungkuru mak edon kaplola
1 Ina-nara, dodo'ondi de aliernohora riy mak kpo'on apenu-alawna inonni totpena agiwra u'uli-uwedi a knia'ru la'a Uplerlawna kniarni. Mere agat niohora de itpo'on atulga it inonni de hihi'a-yapyapi podpodku-padpadku hade. Mere mhiur niohor owa'an a li'ru ri emeka miy e mhiur niohor oleka hya' maka ukot oleka de. 2 Ina-nara, a'utiak reri miy emekwalima Uplerlawna Nmeh'a nek de Natiak reri miy. Yoma a'uhmen memna mhioitio'or doin la Yesus lirni-tunnu pa mliernohora hya' mak edon kaplola. Emkade pede a' die de emolmolla ama ida me miy die emolmolla a a'nu pat hararara ida mak kaplinu mua'ta nohkerna yala'ani pa a'utiak reria. Noma agolin li'mu la a'na muanke'a id pa hota nora rmehlima. Ne hota muanke' de ntot nohora Yesus Kristus inhatta. 3 Mere a ralmu wolwo'la la' ralma-riormi, yanhi'pa ralma-riormi naheri-nawalia pa mhioitio'or doini-mtiahnei dioinia Yesus Kristus, pa hota emekwalima la' ululu la Hawa'a, de niy npudi-nakal nana. La'pa emkade de hota miy edonna mial owa'an ralma ploi-ple'er pa mliernohor toto' Yesus Kristus. 4 A'ukot emkade yoma la' yamkekni de emolmolan nekama miy e mliernohor rer tio'a riy mak kmai pia kakot nohora Yesus dom to'a, mere Yesus mak amakot nohora tiy miy die ematia' hade. Miy edon mpiayotlia riy mak kakot nohora nhiwa nora kot kalwieda-paitiot mak edon nora Uplerlawna Nhiwni nora Kot Kalwieda-Paitiota mak amakot nohor oleka tiy miy de ramneneha. 5 Mere la' a wniaro'ru de maka rhoiya la ”makodi Uplerlawna lirni-tunnu maka orkotkotni-ornananni” re edon nareh nian a'u. 6 Matialo'onama a'g e uplinu ultier mia'ta, mere la'pa ralma-riora la'a Yesus lirni-tunnu de, de e npenpuenu tetem la a ih'ru-ralmu. La hade, de amtutg olek la miy wia la'a hare honona maka amakot nohora me amhi' nana. 7 Meman neka la lera a'ukot nohora Kot Kalwieda mak kwatiawua Uplerlawan de tiy miy, de a'g edonna ghopan pa mimsiewa-mkiai a'u. Mere aghi' a ino'nu pa emek miy hopopanmi-lili'irmi totpa aghima-rie' miy. Yoma akar pia agala utu'tu a ya'anu-yemnu hewewtu-naniairnu totpa hota ukot nohora Uplerlawna lirni tiy miy. La'pa aghi' hade de a'g e ghal tiy miy?! 8 La' lera awuatutu miy, de krei wokni-le'enu dom to' er mak kal patuini-paro'onni mai a'u. Hade emkade de emolmolan nekama a'g e tiot arukia krei-krei re totpena aghima-rie' miy. 9 La' ler mak adien wut lia miy la'pa aliernana kleha-lara ho'mana a'g edonna wuaka limtut id tiy miy pia aghi' awerta miy. Yoma hya' mak a'uhaka, de itpesiay wialli la'a Makedonia rawok momuoga pa rodia mai a'u. A'utiak kalwiedwed hare honona, totpena yana atiot aruki miy, me a'uhmen atiot aruki miy pia nodi liarni. 10 Ina-nara, emeknekama Yesus Kristus lirni honona raplollola, me E' ed mak kden rer lia a ih'ru-ralmu de, a li'ru di de naplol memna, de hota a'g edonna wuak memna kupna tiy makden Korintus miy, la'pa riy dom to'a makden la Akhaya liewnu. Yanpa hota la' hade pede ta'en nian a'ukot nohor owa'ana giwra a'g edon wuak kupan tiy miy. 11 Hya'a nrei piede a'g edon wuak kupan tiy miy? Yanpa mpiarora yoma a'g edonna siayni miy?! Plol toto'a Uplerlawna Nat niohora de a'g e gatu siayn miy. 12 Mere a'g edon wuaka kupan tiy miy me hota emkade pa nodi liarni, totpena maka ha rhoiya la makodia Yesus Kristus lirni-tunnu, rakleha nhiapargen pia rpo'ona apenu-alawna inonni me riwra irkari emekwalima ami, yoma nhi'inde rwahak pa miy miala ir siewni-kaini. 13 Yoma riy mak emkare, riwra irmeh'a er maka Yesus Kristus Nhopna pa rodi Uplerlawna lirni-tunnu, totpena riy rpesiay ira, mere edon naplola. Irkar lia Uplerlawna kniarni, de edon rlol talla mere ra'ohpa-ralahar to'a. 14 Tamkek irhi' emkade, de yana twer reri it wawni yoma hegana amlawanni nek de nawiru-nawalia inonni pa emeknekama Uplerlawna hopopanni-lili'irnu maka khita-krepra ida. 15 La' hade pede yana mpier rer wiapmi la'a hegana limni-rorni mak ktot pa rakot nohora Uplerlawna yala'ani pa emeka riy makdella plol wawna. Mere hota la'awa hohoni nanpena irlernana mdududga hihi'ini-yapyapni re wniahlani!
Paulus nakot nohora tututnu-wawuaunu la' tulanni-kniarni ralamni totpa ntutga de e' ed makodi Yesus lirni-tunnu inhatta
16 Ina-nara, awuak owa'an de yana riy dom tiy miy die e rhoi a lia riy podku yoma a li'ru mak emkadi. Mere la'pa plola pa la miy wniarormi, de riy podku a'u, de hota emkameni la mitlin la riy dom to' mak kran inonni emeknekama riy podku nhi'inde rhi'a, mhiur dioin wali a' pua awuahaur nohora a hihi'a-yapya'pu oke' tiy miy. 17 La' hadi de hota awuet la hya'-hya' ed maka aghi' nan oleka wa, mere Orgahi-Orha'a edon Nhopan pa a'ukot hadi. Meman neka la' hadi de a'g e ukot nohor la plollol genni, mere ultier die emeknekama mak podku nhi'inde rhi'a. 18 Yoma la riy rahu tiy miy die e rakot nohora ir hihi'ini-yapyapni de rlernohora nohkeran di yala'ani, pede a' muana giwra ukot nohor walia a li'ru-tu'nu. 19 Hota ukot nohora a li'ru-tu'nu re yoma la miy wniarormi de miy er mak ktaru kirkira-ralma-riora samomuou pede miod niohora rira lirni-tunnu, kennama riy podku lirni-tunnu hare. 20 Ne hade edon nmeh'a mere miolin doin nek ir pa rodi plolli tiy miy, onde ra'ana miy liwatmi-odapmi onde ratulu-rapetan nande rwatei-rwahapar miy. 21 Ne emolmolan nekama mpiarora de plollolli de hota amuola-mua'a yoma a'g edon puaran pia a'g e ghi' yohya' mak emkare. Mere la'a hya' maka riy dom to'a rparan pia rwareheya, de a' muana awuareh wialia. Mere la'pa awuareh wialia de awuarora de a'g e ghi' emolmolla mak podku rhi'a. 22 Iriwra ir de makden la Ibrani ira?! A' niek de Ibrani id a'u. Onde makden Israel mak Uplerlawna Nwalir niana harena?! A' niek de emkade wali. Yanpa Abraham duratni ira?! A' niek de Abraham duratni wali a'u. 23 Mak kre'ela ktulla-kar lia Yesus Kristus kniarni ira? Inee! Hota awuahaur emkadi de emeknekama a'uplinu-uplo'a. Mere plola, la a' di de riy mak ktulla-kar pia kareh momuou lia' hare honona. Atiulla-kar die a'g edonna umkek lera pa arien a'u. Ne alier la kropna-krieutu lui-nuhru pa a'ureh wial lia ir wali. Yoma re'eni wo'ir memna riy rod a lia roma nhio'la onde ramuki-rama'al a'u la'pa alier la nniahora-nniala'a. Nhi'inde alier la yatyatni-halalli yatlorni-yatra'ani mak emkari, de trema-trema amuati. 24 La re'eni wolima de riy Yahudi rtorn a' pua rala ha ulti ra rliwar nan a lia re'eni terampwotelu wehrani wosiewa. 25 Makden Roma rala ora-au ra rliwar nan a lia re'eni wotelu. Ralamni de riy ral walia watu ra rwatopri a'u yoma riwra rwatliewur wen a'u. Re'eni wotel lia lol lora de kapli-kapli maka agodia re rpah'a nana, me ralamni de aliolioi-pialpial lol lora nan lera ida-mel ida. 26 A'g edon rien a lia a yalo'lu-yala'u mere alia'a-muai tio'owa. Ne la' a yala'u de aliernana riwtu-hora liawanni, emkameni la gerlawna, la riy mak kwarui-kwate'la la talla ralamni, la makden Yahudi rhi' gahani, emkameni walia riy Yahudi atia'a, la' walia mak kden la letlawna mak khi' kokokna-rariarni. Alier la riwtu-hora la wo'ora-kawru letgarni, la' lora, ne la' walia riy mak ktot pa riwra ir de makpesiay ira, mere rhi' neka yatyatni-halalli. 27 Akar tioto' meman la pa lera dom de yanin edonna-yamat edonna, ya'an edonna-yemni edonna. Lera dom de woki nwah' a'u yoma a'ukleha lawra-raini. 28 Ne hade edon nmeh'a mere la' lera-ler nek de a ralmu worworga, yoma aghoratnan walia krei-krei re honona. 29 La'pa utlin nana ir pesiayni edon naruri, de a' muana a ralmu wolwo'la. Ne la'pa utlin nana ir e rtuini olek la do'a-hala, de a ralmu nmolu-nhelma. 30 Nhi'inde miy e mitlin la rira rpo'on-rpei tiy miy, pede dodo'ondi de agiwra wuarehi wali a'u totpena mitlina. Mere hota apuo'on nohor to'a hya' mak a takeni ghi' nana. 31 Uplerlawna-Mempulwatnu, de Itmatromni Yesus Amlawanni me Uplerlawanni, ed mak katga de a'g edonna u'ohpa-ulahara. E' ed mak riy ra'uli-rawedia pa nodi liarni. 32 Mere a' die ukleh ruri. La' ler maka adiella' leta Damsik ralamni, de riy mak ray Aretas nrana la mak ktorna-krautu (gubernur), de ed mak khopan pa makodia keki-rautnu rhapet apitga puohra leta totpena la'pa aliergota de rtorn a'u. 33 Mere riy dom de rala lo'ora ida ra rhurierni a' liola lutur leta hu'ulli ida. Hade pede uwlar dioinia gubernur de pa aliewan wa.
Paulus nlernana nnieni ida totpena yana nrana inonni yoma hya' maka matni npah' nana
1 Ina-nara ama-hyali, plollolli de itpo'on lawna de edon nodia unut mai ita. Mere yoma miy mitlin la rira po'onni pede hota apuo'ona tiy miy wiali. Mere hota apuo'on nohor to'a hya' maka Orgahi-Orha'a Nala pa riy matni ri'ini rpah' nana. 2 Yoma la' anni termida wehrani wogata mak itto'or la de, makpesiay ida de narian pa nla'awa Ilyamou-Watyatoha. Riy di narian toto'a onde matni ri'ini npah'a nan to'a Ilyamou-Watyatoha uplin niohora de. Uplerlawna ed mak katga de. 3-4 A'ukot owa'an ralamni, agatga de riy di de rrana pa rkenia la Ilyamou-Watyatoha. Mere la'pa hadi narian toto'a onde la'pa matni ri'ini npah'a nan to'a Ilyamou-Watyatoha de uplinu-uplo' nohora hade. Uplerlawna Nmeh'a nek ed mak katga de. La' hande, de riy de natlin nohora hadom maka rimormiori raplinu rwet tar mua'ta, me lira-tunu maka rlarna pa rimormior ratlin nana. 5 La riy de hihi'ini-yapyapni ed mak agiwra upo'on arehi-alawna wniahaurnu, mere a'g edonna upo'ona-ulawna a inon wamueh'u. La' a ino'nu de hota awuahaur nohora hya' ed mak atia'eni ghi' nana nanpena a upo'on arehi-alawna. 6 Mere plollolli de riy de a'u. La'pa agiwra upo'ona arehi-alawna la' mak a'umkek nande ho'mana, mak a'ukota de lol talanni yoma ha toto' hade. Mere hota a'g edonna wuahauria owa'an hade, mere agho' tar lia wniahauru mak emkade, totpena riy edonna ratot nana a nhio'lu-lie'tu yoma a ma'tu npah' nana maka upo'ona-ulawan nohora, mere onnila ramkek nan memna a wniehwa-liaktu mak kden rer lia plol wawna onde e ratlin nana a li'ru mak kwatiawua Uplerlawna. 7 Meman neka la a ma'tu npah'a nana mak karehi-kalawan la Ilyamou-Watyatoha. Mere Uplerlawna Nal a' pua alier la mehra-mau ida, mak emolmolla hegana amlawanni karkiarni. Mehra-mau de werat rehia narieiniande apuolpuol i'nu-wuakwak a'mu. Hade emkade totpena yana apuo'on arehi-alawna la'a hya'a mak a ma'tu npah'a nan la Ilyamou-Watyatoha. 8 La'pa asiumbain nana re'eni wotel lia Orgahi-Orha'a giwra: ”Uplerlawnu ne! Muheri tlinmu-mutatar matmu la'a a wuakwa'ku di. Apuolu-wuak tiy O'a totpena nnien di narian la a ino'nu.” 9 Mere Orgahi-Orha'a edon Nwayow nohora a wakwa'ku. Mere Nakot mai a'u Niwra: ”Hota A'g edon rian mehra-mau die la inonmu, mere hota Atiulan nek la tiy o'a. Hade nekpa hade wa. Yoma la'pa omlier la kropanni-krieutnu, de A ru'ru-la'yu yeher to'ama nayamkek la inonmu.” La hade pede nhi'inde a'upuo'on reria a lia' ta'eni-mai tia'eni. Yoma la'pa atia'eni a'u, de Yesus Kristus rurni-laini nkar lia a ino'nu. 10 Hade pede uhepur nohora la'a hya'a honona mak aliernana yoma la'a Yesus Kristus rerieini, la'pa alia' ta'eni-muai tia'eni, onde riy rapupu-raheri a'u onde la'pa alier la kleheni-larni, kropna-krieutu, nniahora-nniala'a, riwtu-hora. Yoma la'pa a takeni ghi' nan hadoma, dewade Uplerlawna tutulanni-rere'eni ed mai a'u.
Paulus ihranu ntepul la riy makden la Korintus
11 Apuo'on arehi-alawna a hihi'u-yapya'pu emeknekama riy mak kpodku nhi'inde rhi' nana, mere yoma miy yatotmi-yarieimi pa aghi' emkade. Yoma plollolli de miy er mak ka'ulia a'u. Yoma la' emkameni ho'ola a' di lia' ta'eni-muai tia'eni, mere a'g edonna wuayow pa riy maka mpiet la ”makodi Uplerlawna lirni mak orkotkotni-ornananni,” de mi'uli-miwedi ir pa narehi a'u. Mere miy edon mi'ulia a'u. 12 Yoma la' ler maka adien wut tiy miy die atiutg oleka de makodi Uplerlawna lirni-tunnu plollolli a'u yoma a'utatahan ralmu la haneknek wawannu pa aghi'a-yapia hihi'a-yapyapi mak kamehi-kayona, mak ktut toto' memna Uplerlawna rurni-laini nhi'nande riy ema rtaplelleltarga. 13 Pa a'utian tek miy! Hya' ed maka a'g edonna ghi' ma'ta tiy miy maka aghi'a la krei wokni-wokni dom to'a? Enekneka a'g edonna tiot aruk miy lia'a a sie'wu-ka'yu toh?! Yanpa mpiarora de aghi' hala yoma a'g edonna wuak kupan tiy miy?! 14 Dodo'ondi de re'eni wotellu hadi wa pa agiwra tiy wualoha-wualakat la miy die. Ne hota atiy miy die, a'g edonna uhaka miy totpena atiot aruki miy. Yoma a'g edonna uhaka hya' ed mak ha mhi'taru re, mere a'uhak miy totpa aghima-rie' miy. Yoma a'g emolmolan nekama miy ammi. Ne edonna riwra upa-a'na ed mak kahaka tiernu-apannu pa nala lahga inni-amni, mere ina-ama ed mak kahaka upa-a'na tiernu-apannu. 15 Pede a ralmu nahepru la'pa agala a gah'u honona tiy miy miana, a'g edonna wuaror nana re, rerehniana agal a inon tete'mu pa ghima-rie' miy. La'pa a kalwiedwe'du tiy miy emkare, ho'mana taken niana mhi' kalwiedwed a'u?! 16 Dodo'ondi de, mpiayowa de miat niohor oleka la' a'g edon ghi' awerat miy lia'a awuak kupna tiy miy. Mere hota riy e riwra: ”Meman neka la Paulus de edon nwak kupna mere plollolli de nhi' wunwunamnu pa nkiwti-nkiwti ita prehenni kuku' pa nken lia sakni”. 17 Oi! Ralma-riora mak emkade hota edon nla' nana rira o'tani kriahlanu. Nhi'inde mak aghopan pa rtiy die aghopan pa e rawok kupan mai a'u?! 18 A'g e ghopan pa Titus e ntiy ntomar tiy miy. Me aghopan walia ita makpesiay wialli dom to'a nor rewre'wa e' pa rtiy. De hota mimkek teka! Titus e ntiy miy die nawoka liola de enarehi-nalawna totpena ena'ala rehenu?! Edonna toh?! Ne amro'a wniaror mamni la'pa kniar miamni de talla kmeh'a pa amdella plol wawna la'a hya'-hya' honona toh! 19 Matialo'onama la'a ralma-riormi, de la horat di ralamni, de ami e mparor mamaini talan pa amakot nohora a plol mamni? Miy e miplinga de lirmi onde wniarormi de nhal toto' memna. Uplerlawna e Nat niohora la'a hya' ed maka makota re honona, de emeka Yesus Kristus hopopanni-lili'irnu rhi' nana. Ne la'a hya' ed mak amhi'a re onde amakot nohora re ama mhedu-mtehra miy pesiaymi de totpena la' ga'a. Yoma miy er mak kden rer lia a ralm mamni. 20 Yoma a'g e umta'ata de la'pa atiomra-niah'a miy lia hande, yanpa hota ita wniatromni de nodia a ralmu pa nmawal doin la miy hihi'imi re, me hota miy miana edon mrieiniana a hihi'u-yapya'pu la' ler de. Yanpa hota amuai die aliernana yahuri-yawo'ora, ihru yata-ralam yata, pleta-plet pa rira rarni nha'ata, to'a-taiya, yalernu-yaha'a, yapupu-yaheri, riy po'ona nor walia kokokna-rariarni. 21 A'umta'at wal lia la'pa amuai die, yanhi'pa Uplerlawna ed mak kalernia a lia miy gaimi ralamni, ne hota apuolpuolu-kakakria a'u yoma riy dom tiy miy die e rhi'a-ryapia nhioli-lieta mak kakdeha-kaktiahli, ralira-raliai, raret yata-rahaw yata. Irhi' yatyata-halal de la' ler ululu, ne edonna rolin ma'ta.
Lira nhiedu-tniehra hohoni nora wniak kalwieda
1 Ina-nara, a tallu re'eni wotellu hadi wa pa atiomtomar rer tiy miy. Ne hota amuai die, aghi' emeknekama rhorat targa la' Puka ralamni de niwra: ”La' mak khi' lira-tunu ida, de mak ktutrier niohora mak khi' lira-tun die, mande riy woru onde riy wotellu, nanpena ramtatan la lira-tun die”. 2 Yoma awuagahniort olek miy lia' lera amua tiomar tiy miy lia re'eni wornu. Ne la'pa la' ler di mak it idma oliet la' ida, de awuagahniort owa'an miy lia'a hota a'uwali owa'an tiy miy die la re'eni wotellu, de hota agukmua riy honona mak khi' oleka do'a-hala, la'pa mak khi' do'a-kyap hiala la'a ler ululu onde mak khi' do'a-kyap hiala lera-mela ri. 3 Hota aghi' emkade yoma miy orgahami er mak kwak a' pua tiutga de Yesus Kristus ed mak khopan pa ukot nohora E lirni-tunnu tiy miy. Ne la'pa Yesus Kristus niwra Netlia miy do'omi-halmi, de edonna Nala lira mnapla mere Ntutga preheni-mkaini la'a miy hononmi. 4 Hota plol memna, la lera rkenia la auwlakra de, nmatlawra, ho'mana la' dodo'ondi de Enmori olekwa, yoma la'a Uplerlawna plolli-mneheni. La' amora Yesus Kristus amla' ihru ida-ralm ida pede a inon mamni mana emeknekama inonni mak kakleh walia ruri-lai, mere la'a E plolli-mneheni pede ammormiori-mdardiari. Ne la'a E plolli-mneheni de pede amukmua miy. 5 Mtia'u tieka inon wamuehemi, hota plola la mormiormi di, de miy e mpiesiay reria Yesus Kristus me edonna? Meman neka la hota mimi'eram reria la miy mormiormi, de Yesus Kristus etla miy mormiormi. Onde yanpa mimtiot pa mpiesiay tio'a. 6 Ne agha'ara a ralmu de la'pa miy miana mtia'ga ami de mimkek memna plollolli de Yesus Kristus hopopanni ami. 7 Ina-nara ama-hyali, amsumbain la Uplerlawna, totpena E' ed mak ktulan tiy miy pa yana mhi' do'a-myap hiala. Ampak nekpa totpena miy mhi' hadom de mliernohora Uplerlawna ralma-riorni. Ononni hade. La'pa ami edon mlernan talan pa mtutga a plola-mneh' mamni emeka makodi Yesus lirni-tunnu pa mukmua miy, emkade nekwa. Hade edon nla' a wniaror mamni. 8 Yoma am di de edonna mhi' hya'-hya' to'a maka klol to'am la'a ha plollola. 9 A ralam mamni nahepur toto' memna la'pa miy pesiaymi naruri, kennama ami edon mtutga a plola-mneh mamni tiy miy, pede la' riy yamkekni, de ami emeknekama mak la' ta'eni-mai ta'eni ami. Ne amsumbain de totpena mpiali owa'an la rimormiori makdella plol wawna la Uplerlawna yamkekni. 10 La' hade ed mak awuarora, pede a'u'enyatga horat di tiy miy la'a ler mak a'g edonna dien wut ma'ta tiy miy. Emkade totpena la'pa atiy die, yana aniairia Orgahi-Orha'a plolli-mneheni pa amuaklekal tiy miy. Yoma plola-mneh de Orgahi-Orha'a Nala a' pua ga ghedu-tiehra miy, mere edonna riwra gala pa awueyata miy pesiaymi. 11 La' hohoni de, ina-nara ama-hyali, awuak pa hononmi mihe'i-mihepru ne mihak pa mpial lia rimormior makden la plol wawna la hya'-hya' to'owa. Mrieiniana-mia'nana a lira nnio'a-wawa nia'tu di honona tiy miy. Mlia'a ihru ida-ralm ida la yawoka-yale'emi. Me yana mihuri-miwo'ora. Ne hota Uplerlawna mak ktorreria kalwieda-paitiota me maka ralamni nsayn miy hota Nor miy tialla. 12 Ne hota miy idma nwak kalwied la ida, idma nhar lirni la ida, mpiapahar lima-mpiare'et mata la ida, totpena lol talan la miy pesiaymi. Me Uplerlawna mutnu-rahanu honona makden handi de e ra'enyatg wali lira kalwieda tiy miy. 13 Pena Itmatromni Yesus Kristus Nala ra'ani-pallu tiy miy, Uplerlawna pena Nala sniayanni tiy miy pia Nhilpai-nmanat miy, ne Uplerlawna Nhiw Lululli mana pena Nor rer miy tialla! A kalwied mamni tiy miy, Paulus
Paulus nwak kalwieda la makden Galatia
1-3 Ina-nara ama-hyali, krei mutnu-pepanni makden la Galatia yapatni. Paulus a'g inhatti. Agora ita inni-narni makpesiay honona mak kor wut a lia handi, de ampak de Uplerlawna it Amlawanni de Nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy. Aga'ala kniari pa a'ukot nohora Yesus lirni-tunnu, de la' rimormiori id mana edonna ntutmuata-nkewra'a nan (ntutga) a'u, mere onnila Yesus Kristus Nora it Amlawanni Uplerlawna maka kamori-kalewan nan owa'ana E la matmiatni ralamni, ed mak ktutmuata-kewra'a nan a'u. 4 Yesus e Nhu'ru-nhelam nohora Uplerlawna ralma-riorni pede E' orgahi Nala inonni pa Nler la matmiati ralamni onnila it do'oni-halli, totpena itlernana yamori-yalewna. Enhi' hade totpena yana tlernohora riy nohkeran di yatyatni-halalli maka rhi'a-ryap niohora la lera-mela ri. 5 Haleluya la'a Uplerlawna la'pa nodia pa nodi liarni, Amin (Plola).
Paulus nawenna onnila makden Galatia rhoitio'or doin oleka Kot Kalwieda-Paitiota plollolli inhatta!
6-7 Agheduma tiy miy hononmi! Yoma Uplerlawna Npolga miy pia mlia' E mutnu onnila Yesus Kristus mormiorni-lewlewanni maka mliernana yoma Yesus Kristus Ntulla-nsayn nan miy. Mere la' lera-mela ri, de mipleta-plet pa mhioitio'or la Uplerlawna, pa mliernohora owa'ana mak ha riwra kot kalwieda, mere kot de lol to'a la Uplerlawna Kot Kalwiedni mak kaplola mak kakot nohora Yesus Kristus. Mak ha riwra kot kalwied de, plollolli de Kot Kalwieda-Paitiota atia' hade. Riy mak kakot nohora kot kalwieda-paitiota de tiy miy, de e rnairia kdiori-kdieha pede narieiniande miplin niohora talla mak kaplola me mak khala. 8 Ina-nara mitlina! La'pa am die, onde hopopna-lili'iru mak kwatiawua Ilyamou-Watyatoha ho'mana er mak kakot nohora kot mak klol to'a la Kot Kalwieda maka amakot ulg oleka wa de, ndella pa amler la Uplerlawna niukamnu pa rrinnia am la ai mormiori ralamni (naraka). 9 Amakot ulg oleka hare wa me dodo'ondi de a'ukot owa'an la hade: de la'pa hameni nwahaur nohora mak ha riwra kot kalwieda-paitiota tiy miy, mere lol to'a la mak amakot oleka, maka mrieinian olekwa de, awuak pa Uplerlawna Nukmua rpa hota rrinnia la ai mormiori ralamni! 10 A'ukot emkade de a'g edon wuaka a nan wamueh'u onnila awuaka ya'uli la'a rimormior wialli yoma hade edon ndella ralma-rio'ru. Mere hornama hya' maka awuaror nan de nla' nana Uplerlawna ralamni. Pede la'pa atiot pa rimormior wia'lu ra'uli a' pua emeknekama a nhio'lu la ler maka a'g edon puesiay ma'ta de, yana rhoi a lia Yesus Kristus lili'irnu-hopopanni.
Yesus Nmeh'a ed mak kwalir nian Paulus pa nla nodia Uplerlawna lirni-tunnu
11 Ina-nara ama-hyali miy hononmi, totpa miatga, de Kot Kalwieda-Paitiota mak a'ukot nohora de hade edonna nwatiawua rimormiori nurnu. 12 Yoma a'g edon liernan hade la' riy ida wniatutnu-wniaye'eni onde riorni-liaini. Mere Yesus Kristus Nmeh'a ed mak kakot a lia' hare honona. 13 Mitlin nan oleka a mormio'ru la ulul toh! De la' ler maka aliernohora agama Yahudi deullu-tatarni. La' ler de a'g ed mak kwahak toto' meman pa a'umuki-uma'ala me kweyata-kwaniawua Uplerlawna mutnu-rahanu. 14 La'pa rakot nohora agama Yahudi kniarni yala'ani, de a'g ed maka klernohora Yahudi deullu-tatarni de pa nareh dioin mak kor wutu a lia tuwu ida yoma agala a ralmu tetema pa aliernohor reria deulu-tatar de, me agod niana de (membela). 15-16 Mere Uplerlawna Nwaliri olek a lia a i'nu apannu ralamni. Me la' E ralam kalwiedni pede Npol a pua aliernohora E'a. Ne Uplerlawna Ntutga A'nani mai a'u Nlernohora E ralma-rior wamueheni, totpena a'ukot nohora E A'nani Kot Kalwiedni la Yahudi atia'a re. Ne la' ler maka Uplerlawna Ntutga A'nani mai a'u dewade a'g edonna lia wuahaka wniatutu-wniaye'ela' riy ida totpena nwatutu a lia Yesus lirni-tunnu. 17 Ne a'g edonna lia' meman la Yerusalem totpa mak kala' ul a lia makodia Yesus lirni-tunnu re rwatut a'u. Mere alia' meman la noha Arpa (Arab) na'nama uwal lia leta Damsik owa'ana.
Paulus edon nlernana plolli-mneheni pa nodia Uplerlawna lirni-tunnu onnila o'ta-mata krei er mak ktutga e'a, mere onnila Yesus ed mak ktutga
18 La'pa anni wotelu rlardoinla noma a lia' Yerusalem, totpena awuatroma Petrus. Agora Petrus mden wut pua lera termida wehrani wolim tututu. 19 A'g edonna gora makodia Yesus lirni-tunnu korni re mpatroma-mtahnei wiutu, enekneka Yakowsi, Itmatromni Yesus hyalli raralamni de. 20 Hya' ed maka aghorat taru ri de ha raplola. Uplerlawna Nat niohora, de a'g edonna ulahara. 21 La'pa nhorwua noma agodi lia'ru la noha Siria, me la' walia noha Kilikia. 22 La' lera-mela re makpesiay Yesus Kristus, de wokni-le'enu makden Yudea re, edonna rat niohor ma't a'u. 23 Mere ha ratlin nan to' a la' rira wniahaurnu, de riwra: ”Paulus maka ululu kamuki-kama'ala ami, ema rwaldioinia pa nakot nohora pesiay la Yesus Kristus. Pesiay die ed mak ululu ha niwa nweyata-nwaniawua.” 24 La' hade pede honona re ra'uli-rawedia Uplerlawna-Mempulwatnu yoma la'a hya' maka Enhi' nana la a mormio'ru ralamni.
Petrus, Yakowsi me Yohansi rwayow nohora Paulus kniarni mak enakot nohor Kot Kalwieda la Yahudi atia'a
1 La'pa anni termida wehrani wogat wa noma a'uwal lia Yerusalem gor rewre'wa Barnabas. Me agod walia Titus. 2 Alia'a Yerusalem, yoma Uplerlawna ed mak khopna. Alia' pa aghi'a wniatroma-tniahnei id la ir Petrus maka miy mpieta la krei o'tani-matni. Alia' pa a'ukot nohora Kot Kalwieda-Paitiot maka a'g e ukot nohora la'a Yahudi atia'a re. Mere a'ukot nohora hare honona la ir Petrus, makla' miy o'tami-matmi re to'a totpena rla' ulga pa rwayow nohora A knia'ru de. Yoma a'g e umta'ata yanhi'pa Yahudi dom to'a riwra rwayotli a knia'ru la'a Yahudi atia'a rerieini reiniande a prehenu de hamamuamua. 3 Titus mak kor a' tialla de Yunani id hade, mere emkade ho'mana ir Petrus edonna rtekal memna Titus pa nlernohora deulu-tatra sunat. 4 Mere riy dom de rwakdior pia rtot pa rler teman la makpesiay totpena rwuw ami yoma riwra rhi' yawuhi-yawe'et la it pesiayni onnila Kristus Yesus. Ir wniarorni de totpena rtot it pa tlernohor owa'ana Yahudi deullu-tatarni. Ne la' talan emkade pede riwra rhi' it pa it edon tsa'ar owa'an it ralamni la Kristus hihi'ini pa tler la yamori-yalewna, mere rhi' pa agama deullu-tatarni hota nodi plolli owa'an mai ita. Ir er mak ktekal memna Titus pa rsunta. 5 Mere ami edon mpayow nohor memn ira. Yoma ami e miwa mhi'a totpena yana riy rwotra-rtalia Uplerlawna Kot Kalwiedni-Paitiotni, maka mpiesiay oleka de. 6 Ina-nara, la'a miy wniarormi de miy o'tami-matmi Petrus, Yakowsi, me Yohansi er maka ra'uli, mere la a yamke'ku de ha ramneneh momuou yoma Uplerlawna edon Namkek la rira gaini. Ne la' ler de nekane miy o'tami-matmi re edon ral walia lira-nnio'a wawa-niat warwuaru mai a'u totpa a'ukot nohora walia hade la'pa awuatutu riy. 7 Rwaldioinia de mak khi' o'ta-mata re, ir er maka kpesiaya de Uplerlawna ed maka ktutmuata-kewra' a pua ukot nohora Kot Kalwieda-Paitiot della riy maka Yahudi atia'a, emekwalima Uplerlawna E Nhopna olek walia Petrus pa nodia Kot Kalwieda-Paitiot della riy Yahudi. 8 Yoma Uplerlawna ed mak kala ruri-lai la Petrus pa nwalia makodia Yesus lirni-tunnu la riy Yahudi. Emkade walia Uplerlawna Nal walia ruri-lai mai a pua a ghi' walia makodia Yesus lirni-tunnu la riy maka Yahudi atia'a. 9 Yakowsi, Petrus me Yohansi maka miy mhioiya la krei wokni-le'enu o'tani-matni mak karehi-kalawna, nekane rreiniana agora Barnabas wali pa emeka ira kniarwialli. Pede rwapahar lima la' a rerie'yu. Yoma rwarora de Uplerlawna ed mak kala kniar werwerat de la a'u. Noma amla' lira ida pa hota amkar lia' riy maka Yahudi atia'a me irkar lia riy Yahudi. 10 Ir wotelu makhi' o'ta-mat la Yahudi miy re edon rakota riwra a knia'ru maka a'ukot nohora Kot Kalwieda la Yahudi atia'a nhala, mere rwak nek totpena yana amhi' mat yat la riy mak kakleha-kaplara. Mere plol toto'a de a ralmu naple'er pa agiwra ghi' emkade.
Paulus npolliohora Petrus yoma Petrus nahmena nor mak Yahudi atia'a rwahauru yoma ir edon rlernohora deulu-tatra agama
11 La'pa Petrus nma nte'ela Antiokia, noma agora mawo'ora yoma a'umkek memna e hihi'ini nhala. 12 Yoma la'pa nor ulga Yahudi atia'a ramtatan pa ra'an wutu, mere la'pa Yahudi doma mak kor wutga Yakowsi la Yerusalem rmai pia rte'ela Antiokia noma Petrus nwaldoinia pa nahmena nora Yahudi atia'a re rewre'wa pa rwatamputu owa'ana, yoma namta'ata Yahudi mak kwatiawua Yerusalem re. Yahudi re er mak ktekal reria riy totpa rlernan deulu-tatra sunat. 13 Noma ina-nara ama-hyali Yahudi dom pal miana rlernohora Petrus pede rahmena rora Yahudi atia'a rwatamputu, kennama iratg oleka it edon tler la Uplerlawna mutnu-rahanu onnila itlernohora Musa deullu-tatarni mere onnila tlernohora Yesus Kristus. La'pa Barnabas mana nlernohor walia ir Petrus hihi'ini mak edon kaplol de. 14 La'pa a'umkek de ir edon rlernohora Kot Kalwieda-Paitiota lirni mak kaplola dewade apuolliohora Petrus la'a mutu pepanni-taurnu ralamni, agiwra: ”Hyalia emkameni pede omtiekal reria Yahudi atia' re pa rlernohora Musa deullu-tatarni totpena miora mpiatamputu, mere Yahudi o' nekane nhi'inde o' edon mliernohora Musa deullu-tatarni?!”
Itor owa'an Uplerlawna tkalwieda hornama itpesiaya Yesus Kristus
15 Makden Yahudi atia'a er mak edon klernohora agama deullu-tatarni pede rweta la' mak khi' do'a-hala. Mere it di de Yahudi inhat mak kat niohora agama deullu-tatarni. 16 La'pa hade ho'mana it mana tat walia de, riy ror owa'ana Uplerlawna rkalwieda yoma la'a pesiayni la Yesus Kristus ne yoma edon riwra e nlernohor oleka agama deullu-tatarni. Pede itmeh'a nek de tpesiaya Yesus Kristus totpena hota Uplerlawna Nreiniana-na'nana ita pa emeka riy mak kaplol la E yamkekni, yoma la it pesiayni. Edon riwra yoma la'a it ya'unni-yamta'atni la agama deullu-tatarni. Yoma riy id mana edon nora Uplerlawna rkalwieda onnila nlernohora deulu-tatra. 17 Mere la'pa Yahudi doma rhoi it la mak khi' do'a-kyap hiala yoma itsa'ar it ralamni la Yesus Kristus totpena tora Uplerlawna tkalwieda, ne it edon tlernohora owa'ana agama deullu-tatarni, hade nnia'eratni de Yesus ed maka kariei piede itler la do'a-hala? Edonan nekane! 18 Mere la'pa aliernohora owa'ana agama deullu-tatarni yoma la a wniaro'ru de totpa agora Uplerlawna mkalwieda, de emekwalima a'uriri owa'ana hya' maka a'g e wuaye'er targ oleka. Ne hota plol toto'a de a'g ed mak khi' do'a-kyap hiala. 19 La' ler maka aliernohora agama deullu-tatarni de, hade edon nodi a pua agora Uplerlawna mkalwieda. La' hade pede a'g edon liernohora owa'an agama deullu-tatarni, yoma emeknekama amuati olek la deulu-tatra yala'ani. La' talan emkade pede hota la a mormio'ru ralamni de aghima-rie' Uplerlawna. 20 Dodo'ondi, emekwalima agor wut Yesus Kristus ammati rewre'wa la auwlakra hananni. Pede a'g e edonna liernohora a nhio'lu-lie'tu ululu, mere Yesus Kristus ed mak kmormior lia a ih'ru ralamni. Mormiori warwuaru mak aliernan di yoma apuesiay lia Uplerlawna A'nani. E' ed mak ktutga ralam kalwiedni mai a' pua Nmat lia a wawannu. 21 A'g edonna wuayotlia Uplerlawna sniayanni mai a'u. Yoma la'pa itora Uplerlawna tkalwied owa'ana, yoma la'a agama deullu-tatarni yatotni-yarieini, de hade emolmolan nekama Yesus Kristus matmiatni la'a auwlakar hananni de hamamuamua.
Makden Galatia re rlernana Uplerlawna Nhiwni me ra'ani-pallu onnila ir pesiayni to'a
1 Hoi, ina-nara ama hyali makden la Galatia! Miy podakmi-padukmi lawan rehia! Miy e mliernohora oleka he' yawewalli?! Miat niohor oleka talan plollola yoma a'ukot nohor oleka Yesus Kristus matmiatni la auwlakra hananni yala'ani tiy miy wia. 2 Mikot tek a lia'a hya'a rerieini pede mliernan Uplerlawna Nhiw Lululli? Miy edon mliernana Uplerlawna Nhiwni yoma mliernohora agama deullu-tatarni toh?! Mere onnila mitlina-mitaili Kot Kalwieda-Paitiot mak kwatiawua Uplerlawna me mpiesiay olek la Yesus Kristus de. 3 Mlier olek la mormiori warwuaru la'a Uplerlawna Nhiw Lululli, pede hya' ed mak kariei owa'an pa miy miwra mpial lia riy mak kaplol la Uplerlawna yamkekni onnila rurmi-lai wamuehemi? Nihya'pa podakmi re emkadena de? 4 Miy mlier olek la nniahora-nniala'a la'a Kot Kalwieda-Paitiota rerieini. Ne dodo'ondi meman pa miwra mliernohora agama deullu-tatarni?! Hota emkade de nniahora-nniala' maka ha mliernan de hamamuamua. Mere awuak de hota edon emkade! 5 Ina-nara, Uplerlawna Nala E Nhiw Lululli tiy miy me Nhi'a hihi'a-yapyapi mak kamehi-kayona (mujizat) pa mimkek memna toh! Mere a'utian tek miy. Uplerlawna Nhi' emkade yoma miy mliernohor oleka agama deullu-tatarni? Edonna toh! Enhi' emkade yoma miy e mitlin oleka Kot Kalwieda-Paitiot de, ne mpiesiaya Yesus Kristus.
Uplerlawna Nreinian Abraham emeka riy mak kaplol la E yamkekni onnila e pesiayni
6 Hadi ed maka ha rhorat targa la Puka ralamni la Abraham de e riwra: ”Abraham npesiaya Uplerlawna, ne pesiayni de ed mak kariei pede Uplerlawna Nreililili-na'mamuau niana Abraham de pa emeknekama riy mak kaplol la E yamkekni.” 7 Hade pede mhioratreria, riy maka kpesiaya Uplerlawna de Abrahama duratni-waitni inhatta. 8 Ne Uplerlawna Nror targ oleka hota Enreiniana Yahudi atia'a mak kpesiaya Uplerlawna emeka riy mak kaplol la E yamkekni. E rhorat ul muemna oleka lir kalwieda-paitiot di la Puka ralamni, yoma rhorat targa Uplerlawna nnio'oni la Abrahama Niwra: ”Hota la o rerieimu pede A'g ed mak kala yara'u-yapa'lu la riy honona la' nohkeran di wawannu.” 9 Abrahama npesiaya pa nlernana Uplerlawna ra'ani-pallu. Emkade walia riy honona makpesiay, de hota ror wutga Abrahama rlernana yara'a-yapalu mak kwatiawua Uplerlawna.
It edon tlernan yara'a-yapalu maka Uplerlawna Nano'taru onnila tlernohora agama deullu-tatarni
10 Mere riy mak kha'ara aranni la deulu-tatra agama, de hota honona rden la nhiorghala-wniaghala nayanni. Yoma Puka lirni e nakota de: ”He' mak kiwra kor Uplerlawna rkalwieda onnila rlernohora agama deullu-tatarni, de deulu-tatra kuku' id ho'mana hota rhi' nan momuoga. La'pa edonan de Uplerlawna Nhorghala-nwaghal ira.” 11 Riy id mana ta'en niana rlernohora agama deullu-tatarni honona, la'pa rmori e'a pa la'pa ntutu-nte'ela' ler maka ha nmati toh! Pede riy id mana edon nora Uplerlawna rkalwied, la' onnila nlernohora agama deullu-tatarni. Itat muemn hade onnila e rhorat tar niohor olek hade wa la Puka ralamni de riwra: ”Enekneka riy maka kpesiaya Uplerlawna, pede hota nor Uplerlawna rkalwieda owa'ana, ne hota nmormiori plalahwa pa nodi liarni.” 12 Mere la'pa riy ida nha'ar e aranni la deulu-tatra, de nnia'eratni edonna nha'ar aranni la Yesus Kristus pa Namori-nalewn e'a. Yoma la' Puka ralamni de e riwra: ”Riy maka klernohora agama deullu-tatarni de hota (musti) rlernohora deulu-tatra honona la ir mormiorni.” 13 Mere Yesus Kristus Nal inonni pa Ntuwu-nhai it la'a it do'oni-halli. La' talan emkade pede Nwe'er doin it la deulu-tatra mak kodi riy lia nhiorghala-wniaghala (kutuk), ne E inon wamueheni ed maka kler la Uplerlawna nhiorghalli-wniaghalli la'a it rerieini. Yesus Kristus de e riwra maka nhiorghala-wniaghala la'a it rerieini, yoma la'a Puka ralamni de e riwra: ”Nhiorghala-wniaghala la riy mak kmat lia a'uriri hananni.” 14 Kristus Yesus Ntuwu-nhai ita totpena Yahudi atia' mana rlernan walia yara'a-yapalu maka Uplerlawna Nano'targa la Abraham de onnila Kristus hihi'ini. Ne totpena la' it pesiayni pede itlernan walia Uplerlawna Nhiwni maka Nano'tar die.
Agama deullu-tatarni mak ktawli'iru de edon nherun doinia Uplerlawna nnio'oni mak kala' ulu la'a Abraham
15 Ina-nara ama-hyali, mai pia mitlin teka hya'a maka awuahaur nohora ri, de a'ukot nohora hya'a maka lera-lera rimormiori itsi'a. La'pa riy rwatiehra wutga nnielu-niau ida, ne nnio'a-niatu nnielu-niau die remni olek arak la hade wa, de hota riy id mana taken niana nlereti owa'an nnio'a-niatu nnielu-niau die onde rherun doinia hya' maka ha rakot oleka wa. Emkade wal lia' Uplerlawna nnio'oni. 16 La Puka ralamni ha rhorat targa la'a Uplerlawna nniellu-niaunu maka Enakot targa la Abraham nora duratni-waitni ida. Edon rhorat targa la Puka de nnielu-niau la Abraham duratni-waitni harahu, mere la'a duratni-waitni id tututu. La' hade de Yesus Kristus. 17 Maka agiwa ukot nohora la' hadi de, de Uplerlawna Nakot targ ulga nnio' de la Abraham. Dewade anni rahu wogata terampwotelu rlardoinla nanpena Uplerlawna Nala Musa deullu-tatarni. Pede Musa deullu-tatarni maka Enala la hohoni de edonna nherun doin E nnio'oni mak kala' ulu die. 18 Yana mpiarora de itlernan yara'a-yapalu yamori-yalewna maka Uplerlawna Nakot targa onnila mliernohora agama deullu-tatarni, yoma la'pa emkade hade nnia'eratni de it edonna tler la yara'a-yapalu yamori-yalewna onnila Uplerlawna nnio'oni. Mere plollolli de itlernan yara'a-yapalu yamori-yalewan di onnila Uplerlawna nnio'oni, emeknekama Abrahama nlernan walia, onnila Uplerlawna nnio'oni la e'a yoma Uplerlawna orgahani ralam kalwiedni.
Uplerlawna Nala agama deullu-tatarni totpena itat niohora do'a-hala
19 La'pa hade emkade de la'a hya' owa'an pa Uplerlawna Nal owa'an agama deullu-tatarni? Plollolli de Uplerlawna Na'itra agama deullu-tatarni la' E nnio'oni ululu totpena itat niohora do'a-hala. Agama deullu-tatarni de rnair to' hade pa la'pa ntut tiar lia Abrahama duratni-waitni id hota Nmai, de Yesus inhatta maka Uplerlawna Nakottarga. La' ler maka Uplerlawna Nala agama deullu-tatarni la Yahudi re, E hopopanni-lili'irnu er mak kodia la Musa nampena Musa nhi' pamuli-payala pa Nakot nohora deulu-tatra de la makden Yahudi. 20 Yoma nhi'inde la'pa rimormiori rhi'a nnielu-niau, de ha rpolga riy dom pa rhi'a lir letgara la nnielu-niau die. Mere la'pa Uplerlawna Nala nnielu-niau mak kala' ulu die la Abraham, E edonna Nnairi riy pa nhi'a lir letgara la E nnio'oni-niatnu de, yoma E orgahani Nodi plolli pa Nala nnio'a-niatnu die. 21 Mere yanpa mpiarora de agama deullu-tatarni hota nora Uplerlawna nnio'oni edon ramneneha? Mere hota edonna emkade. Yoma Uplerlawna Nnairia deulu-tatra nora E nnio'oni de. Mere la'pa plola pa Uplerlawna Nala agama deullu-tatarni totpena nodia mormiori plalahwa, de hota rimormiori nora Uplerlawna rkalwieda wali yoma rlernohora agama deullu-tatarni de. Mere hota edon emkade! 22 Deulu-tatra ta'en niana rodi mormiori-lewlewna yoma la'a Puka ralamni de e rakota riwra: rimormioria nohkerna wawannu de rawniutu-raknioholia do'a-hala ralamni pede ta'en niana ratlin la deulu-tatra. La' hade pede mormiori-dardiari warwuaru maka Uplerlawna Nano'taru onnila pesiay, de Enala la riy mak kpesiay lia Yesus Kristus. 23 La'pa lera-mela maka Yesus Kristus edon Nmormior mia'ta la' nohkeran di, de agama deullu-tatarni di ra rle'lu targa rimormiori totpena ratiak ita pa la'pa nte'ela lerni maka Yesus Nmormiori totpena it pesiay E'a. 24 Agama de deullu-tatarni ratiaka rimormiori pa nodia pa la'pa nte'ela ler maka Yesus Kristus de Nmai totpena la' ler de rimormiori rora Uplerlawna rkalwied owa'ana, yoma ir pesiayni la Yesus Kristus. 25 La' lera-mela ri, de nte' olek la lerni pa rimormiori rpesiay oleka Yesus Kristus. La' hade pede agama deullu-tatarni mana edonna natiak olek it wa.
Uplerlawna Nhi' olek it la upni-a'nani onnila Yesus hihi'ini
26 Ina-nara, miy hononmi mpiali oleka la Uplerlawna upni-a'nani onnila miy pesiaymi la Kristus Yesus. 27 Miy hononmi de rharani olek miy wia, totpa miora Kristus mlia' ihru ida-ralm ida. Mrieiniana-mia'nan oleka Kristus nhiolli-liet wamueheni totpa lera-lera nekpa mliernohor reria, pa emolmolan nekama rain maka miy mniairi la' lera-lera. 28 Emkadewa de hota Uplerlawna edonna Naheri-nahelta oleka Yahudi nora Yahudi atia'a, me la'a hopopna-lili'iru, ata-wa'ara onde marna-wuhura, patke'a rora muanke'a. Hononmi de mlia' oleka ihru ida-ralm ida la pesiaymi la'a Kristus Yesus. 29 Miy di de Yesus Kristus gahani miy, pede emekwalima Abrahama duratni-waitni wal miy. Ne hota miy mliernan walia ra'a-palu honona maka Uplerlawna Nano'taru.
1 La' hadi de hya' maka agiwra ukot de emkadille: de la'pa riy ida mak ktorna-ka'a re'eni-tniarnu mere tuwnu natriapriap mia'ta, de riy de emeknek to'ama hopopna-lili'iru ata-wa'ara mak edonna klernan hadoma. La'a plollolli de riy de ed maka ktorna-ka'a re'eni-tniarnu re honona, mere kuku' ma'ta pede edon nlernan ma'ta re'eni-tniarnu re. 2 Me riy ratiaka keke'enku' de me rodi plolli la totpena rwatutu-rwaye'a. Ne ratiak walia re'eni-tniarnu pa la'pa nte'ela tuwnu maka amni nanet tiar lia die. 3 Hade emekwalima rimormior ita, la' ler maka Yesus Kristus edon Ntuwu-nhai nian ma'ta ita. La' ler de de nohkerna wniarorni-wnialaini me deullu-tatarni nodi plolli mai ita. Emkade pede it di de emolmolan neka mak edon kler ma'ta tuwu mak kerkerna pede riy rodi plolli la ita. 4 Mere la'pa nte'ela lerni dewade Uplerlawna Nhopna A'nani Ntopur la nohkerna wawannu. Patke' ida ed maka kmoria A'nani de, me A'nani de Nmori-ndar lia agama deullu-tatarni. 5 Nmai pia E' ed maka kwe'er doin riy maka kmor lia agama deullu-tatarni ralamni, totpena it mana tler la Uplerlawna upni-a'nani. 6 Ne miy die Uplerlawna a'nani olek miy wia pede Uplerlawna Nhopna E A'nani Nhiwni pa Nler la ina-nara miy ihrami ralamni. Ne la' it ralamni mana E A'nani Nhiwni de Nmemeh'a ed maka kler wut lia it nhiwni pede itpolu-twak la Uplerlawna de emeka Ama mak itsayni. 7 Pede dodo'ondi de miy di de hopopna-li'iru ata-wa'ar atia' olek miy wia, mere miy di de a'na olek miy wia, pede Uplerlawna hota Nala ra'a-palu honona tiy miy maka Nano'targa oleka la'a upni-a'nani.
La' ler ululu de makden Galatia rreiniana-ra'nana Paulus pa rlernohora mere nihya'pa dodo'ondi de rahmena ratlin la?
8 Ina-nara, ululu de, miy edonna miat mua'ta Uplerlawna pede miy mpial lia hopopan pa mitlina-mitailla uplera-upmati, mere plollolli de Uplerlawna atia'a hade. 9 Mere dodo'ondi de miy miatg oleka Uplerlawna onde samomuounu de itakot tiwra Uplerlawna ed mak kat niohora miy wia. Noma hya'a nrei owa'an pede miy miwra miwali owa'an la nohkeran di wniarorni-wnialaini me deullu-tatarni mak kakleha ruri me hamamuamua?! Nihya'pa miy miwra mpiali owa'an la hopopna-lili'iru ata-wa'ara la'a wniarorni me deullu-tatarni rena?! 10 Dodo'ondi de mimuki-mihepur nohora lerlalawna maka agama deullu-tatarni ha raluli-rahon nohora la'a lera-mela, wenu-wolla, la'pa me'eta-anni. 11 A ih'ru e wolwo'la, yanhi'pa a prehenu-ma'u la' miy di de nwal lia hamamuamua. 12 Ina-nara ama-hyali! Awuak lilili-mamuau tiy miy, totpena mliernohora a'u yoma a'g edonna gha'ara a arnu la agama deullu-tatarni. Yoma aliernohor oleka Yahudi atia' miy nhiolmi la' ululu, de mak edon klernohora deulu-tatra. Ina-nara mikleha hal mai a'u la' ler ululu. 13 Miy mhioratrer mia'ta la' ler ululu de, onnila mehra-mau mak aliernan de pede a'ula' ul pua ukot nohora Kot Kalwieda-Paitiot de tiy miy. 14 La' ler de de a'umehra-umau mak emkade mere miy edonna mmiakriarni a'u yoma a ino'nu de mak khi' hegan la miy. Ne miy edonna mpiayotli a'u, mere mrieinian a' pua emeknekama mrieiniana Uplerlawna hopopanni ida, onde emekwalia mrieiniana Kristus Yesus de inon wamueheni. 15 La' ler mak agodia Kot Kalwieda-Paitiot de mihepuepur reri. Mere la lera-mela ri, de mukmi-hepurmi de etla me? Agat niohora de, la' ler ululu de, miwra mhi' hya'-hya' to'owa totpena mtiulan mai a'u. Sniayanmi mak emkade narieiniande mimiwra mkiopil matmi pa miala mai a'u totpa ma mtiulan nan a'u. 16 Hya' ed mak kariei piede dodo'ondi de mhi' a'u emeknekama arwalmi yoma a'ukot nohora ha plollola tiy miy?! 17 Mak kwatutu rira pa rlernohora deulu-tatra re e rlekur wenna pa mliernohor ira. Mere ralma-riorni re yata. Ir e rwahak totpena rleretia it pamulli-payalli totpena mial toto'a ihrami ralamni penpuenu tetema pa mliernohor ira. 18 Plola, ha samoga pa mial ralammi tetema pa mlier la ga'a, hornama mliernohora hya' mak kaplola. Ne mial ralammi tetema de la'pa nodi liarni, yanpa adien to' pa emkade mere atio'or wa dewade onanwa. 19 U'pu-a'nu mak kden rer lia a ralmu, emeknekama patke' mak kler la mehra-mau yoma niwa nmori a'nani de, agala a ru'ru-la'yu mehra-ma'u pa god miy pesiaymi la ga'a. Ne hota aghi' emkade pa nodi liarni la'pa ntutu-nte'ela lerni maka Yesus Kristus nhiolli-lietni nayamkek la miy mormiorni. 20 Awuakwak de agor miy lia hande totpena aniairi lir dom to'a pa twahaur nohora. Yoma emkadi de a'uplin niohora hya' nariei piede mliernohora lira-tunu mak edon kaplola re!
Rakot nohora Hagar emeka riy mak klernohora deulu-tatra agama me Sara emeka riy makpesiay Yesus
21 Ina-nara ama-hyali mak kiwra kmori-kdar lia Musa deullu-tatarni, yanpa miplin niohor ma'ta hya' maka e rhorat targa la Mus Pukni?! 22 La' hade de e rhorat targa riwra: Abraham a'nani riy woru. Id inni de ata-wa'ara. Id inni de marna-wuhura. 23 A'na maka inni ata-wa'ar de nmoria de, yoma la' rimormiori wniayow wamueheni. Mere la' rimormioria marna-wuhur de, nmoria a'nani de yoma Uplerlawna ed mak kano'targa la' Abraham. 24 Abraham hawni rora re er maka rhi'a la lira yawalliohora. Patke'a rora de emekto'a nnio'a woru. Abraham hawni mak kwawa Hagar emekto'a nnio'a ida. E' de, emekto'a wo'or Sinai, (la' gen miaka Uplerlawna Nala agama deullu-tatarni). Hagar de nwal lia in la' riy honona makla' emolmolan neka ata-wa'ar la agama deullu-tatarni. 25 Pede Hagar de emekwalima wo'or Sinai inhatta makden la noha Arpa (Arab). Ne Hagar de emekwalima let Yerusalem wali. Yoma makden hande rwal lia ata-wa'ar la agama deullu-tatarni. 26 Mere Abraham hawni marna-wuhur de mak kwawa Sara emekto'a nnio'a wornu. E' de, de emolmolan neka leta Yerusalem makden la Ilyamou-Watyatoha. E' ed maka kwal lia in la it hononita mak edon kla' ata-wa'ar la agama deullu-tatarni. 27 Yoma emekto'a rhorat targa la' Puka ralamni de e riwra: ”Muhepur toto' memna pat mak a'na genni nkeran pa kakleh a'na, mumuki-muhepru kennama o' edonna mliernan ma'ta mehra ya'a'na. Yoma pat maka muanke'eni edon napal niana ho'mana, nlernana upa-a'na rahu pa nareh dioinia pat maka muanke'eni ndella onni.” 28 Pede ina-nara miy die, mpiali olek la Uplerlawna upni-a'nani onnila Uplerlawna nnio'oni la Abraham, pede miy emolmolla Sara a'nani Isak maka Uplerlawna Nano'targa. 29 La' ler delloo, de Hagar a'nani maka kmor die onnila rimormiori ralam wamueheni, de namuki-nama'ala Sara a'nani, maka ha rmoria de yoma Uplerlawna Nhiw Lululli yodni, emkade wal lia' dodo'ondi, de mak kha'ar aranni la deulu-tatra pa rler la yamori-yalewna de rnahora-rnala'a ita mak kha'ar it aranni la' pesiay la' Uplerlawna. 30 Mere e rhorat targa la Puka ralamni de, e riwra: ”Mhiokargota at patke' de nor wutga a'nani. Yoma ha a'nani hota edonna nor wut lia a'na pat maran de pa rlernan amni re'eni-tniarnu.” 31 Hade pede ina-narmi miy re, it di de ata patke'a a'nani atia' ita, makhi' ata-wa'ar la' agama deullu-tatarni. Mere it di de emeka pat marna upni-a'nani pede itsa'ar it aranni la' pesiay la Uplerlawna.
mhia'ar aranmi la deulu-tatra
1 Ina-nara, Yesus Kristus Nwe'er doin olek it la agama deullu-tatarni. La' hade pede mtiutrier pitpitu me yana mpiayow nohora riy pa rhi' owa'an miy lia deulu-tatra atni-wa'arni. 2 Ora nhioratmi. A orgah'u Paulus ed mak kakota di! La'pa mpiayow pa rsunat miy (totpa miora Uplerlawna mkialwieda), hade nnia'eratni de, hya' maka Yesus Kristus Nhi' nana la it rerieini nakleh eti perkun la' tiy miy. 3 Ne a'ukot owa'an ralamni la' miy, la'a riy maka kwak pa rsunta (totpena nora Uplerlawna rkalwieda) de nnia'eratni de hota e orgahani nlernohora agama deullu-tatarni honona. La'pa edonan de hota edon nora Uplerlawna rkalwieda. 4 La'pa mpiaka pa mior Uplerlawna mkialwieda yoma mliernohora agama deullu-tatarni, nnia'eratni de mior oleka Yesus Kristus yala'wutmi npahokar tar wua. La' talan emkade pede mhioitio'or doin la Uplerlawna sniayanni mai ita. 5 Mere la' am die, la'a Uplerlawna Nhiwni kniarni la' a ralam mamni pede amawniair la Uplerlawna, de hota amora E'a mkalwieda onnila a pesiay mamni la Yesus Kristus. 6 Yoma la'pa itora Kristus Yesus ihru ida, de tlernohora onde edonna tlernohora deulu-tatra sunat, de edonna nodi oruli-augewta pa itora Uplerlawna tkalwieda. La'a plollolli de enekneka pesiay la Kristus, ne it pesiayni de ed maka riy ramkeka la ita kalwiedni la it rimormior wialli. 7 Ululu de mpiesiaya Yesus Kristus la talan plollola, mere la'pa dodo'ondi de miy edon mliernohora hya' mak kaplol owa'ana. He' ed mak kaga'u nian miy?! Miy die emolmolan nek wali me mak kawlari ida, nwaleran pa nler ul lia hohoni mere mak kawlari dom to' rhi'a tertieri-tawtawa. 8 Plola pa tertieri-tawtaw de edonna nwatiawua Uplerlawna mak kpolg olek miy pia mlia' E upni-a'nani. 9 Riy rwatutu-rwaye'a mak khala oke' to' ho'mana hota wnieyata-wnianiawua momuou. Hota emolmolan nekama rkeni tgo' oke' to'ola wetra' ota mere hota nwah'a petna honona. 10 Emkade ho'mana, apuesiaya la Orgahi-Orha'a de hota miy edonna mliernohora riy meheni ralma-riorni. Mere la'pa he' maka khi' miy ralammi pa worworga de hota Uplerlawna ed mak kukmua. 11 Ina-nara, alier la nniahora-nniala'a yoma awuatutu giwra onnila Yesus matmiatni la auwlakra hananni pede itora Uplerlawna tkalwied owa'ana. A wniatu'tu de nareiniande makden Yahudi re rawenna. Mere la'pa aliernohora a nhio'lu la ler maka a'g edon pesiay pa a'g e wuatutu mua'ta de rsunta nanpena rkalwied la Uplerlawna, de hota makden Yahudi edon rnahora-rnala' a'u yoma edon rawenan la'a hya' maka awuatutu re. 12 Ne! Awuak totpa mak kaga'u nian miy onnila rwatutu sunat, de hota rmeh'a neka rtet dioin memna ir orgahani molli-ma'ani momuou! 13 Mere ina-nara, Uplerlawna edon Npolga miy pia mpial lia hopopan la' deulu-tatra, mere Npolg olek miy pia mpial lia riy maka ha rwe'er doinia la deulu-tatra. Mere yanpa mhiapar rer lia lewlewanmi de pa mhi'a-myap nieka yatyatni-halalli maka miy ralammi nko'i nana. Rwaldioinia, la' plollolli de, idma ntutga ralam kalwiedni la ida yoma idma natu nhima-nre' ida. 14 Agama deullu-tatarni honona er momuou lia deulu-tatar di: ”Miatu mtiulla-msiaynia mira'a-mipal wualia rimormior wialmi pa emekwalima mimkek reria inon wamuehemi.” 15 Mere la'pa miodi liarmi la miy idma nhi' yatyat la ida pa emeknekama oha nor ahu idma nho'wa-nrautu ida, de erammi, hota la' mormiormi de idma nweyata-nwaniawu ida.
Yana mhi'a-myapia yatyatni-halalli maka miy ralamni nko'i nana mere mliernohora Uplerlawna Nhiwni
16 Ina-nara, hade pede a'ukot tiy miy die, mliernohora Uplerlawna Nhiw Lululli ralma-riorni. La'pa miy e mhi' emkade de hota miy edon mhi'a-myapia yatyatni-halalli maka miy ralammi nko'i nana. 17 Yoma yatyatni-halalli maka miy ralammi nko'i nana nora Uplerlawna Nhiwni wniayownohorni edon ramneneha. Yoma rimormiori ralma-riorni me Uplerlawna ralma riorni emeknekama ra'ara la ihrami ralamni pede ta'en niana mhi'a hya' maka miy miwra mhi'a. 18 Mere la'pa mliernohora Uplerlawna Nhiwni lirni, miy edon miwniatiehr wut lia deulu-tatra totpena mlia' nan Uplerlawna ralamni. 19 Yatyatni-halalli maka rimormiori ralamni re nko'i nana de, hota itamkek memna la ira wniehwani-liakatni: emeka nhiol yatyata mak kakdeha-kaktiahli mak ka'hira ralma-riora pa naplinu nodi inonni me nalira-naliai, 20 la'pa nhioi-tniani la uplera-upmati, ne lira-yatu nohkerna, idma edon ntelan nana-naut nan ida, la'pa idma nwuwu id la'a yahuri-yawo'ora, payah'a, plet pa rarni nha'ata, ne ntota-nwud tio'ola inon wamueheni, me ntet liodna-nlihir altawi. 21 Me la' walia naralam mehra yoma ta'en niana namkek rira kalwiedni, npehera-nma'wu, na'ana-nemnia lawan rehia pede hota nreiniande hihi'a-yapyapi yatyata-halala, ne la' hya'a-hya' to'a. La' hare honona de a'ukot miy lia dodo'ondi, emekwalima maka ler ululu a'ukot oleka re giwra: Riy mak mormiorni emkare de hota edon rler wut lia Uplerlawna lodanni-hairni limni-rorni. 22 Rwaldioinia de, la'pa riy maka Uplerlawna Nhiwni Narialmua hota idma nara'a-napalg ida, ramuki-rahepru, ne ramtiertierun la hare honona, edonna rwahla yatyat la ir rimormior wialli, riy idma nhi' kalwiedweda ida, me riy idma ndenrer lia (setia) ida. 23 Ratu rwehwa-rlakta mnapnapla, ne ratga rodi inon wamueheni. Agama deullu-tatarni edonna nwaghala riy mak khi' emkare. 24 Riy mak kla' oleka Kristus Yesus limni re rolin doinia nhioli-lieta rimormiori me ralam mak ka'hira mak kodi yatyatni-halalli la'a hya'a-hya' to'a. Hota emeknekama nhioli die ramati oleka la auwlakar hananni. 25 Uplerlawna Nhiwni Nal oleka mormiori warwuaru mai it wa. Hade pede mai pia itlernohor reria Uplerlawna Nhiwni nnio'oni-niatnu. 26 Yana mitulu-mipetna me mhi'a wniaror yatyat la rimormiori wialmi totpena miora mihuri-miwo'ora onde idma nhi' ralam mehra la ida.
Idma nhima-nre' ida
1 Ina-nara ama-hyali, la'pa mliernana makpesiay id mak khi' do'a-kyap hiala, de miy miak klernohor reria Uplerlawna Nhiwni lirni er maka mino'a-mi'atga totpena nawal lia kalwiedni. Mere mino' de miatu mhiu'ru-mhielma, ne mitiaka yanhi'pa riy de nod wali miy lia klieratni. 2 Mlier pa idma natu nhima-nre' ida la'pa rler la hoho'a-tawtawu pa emeknekama riy maka kakwara ha werwerta pa idma ntulan la ida. La' talan emkade pede mitlina-mitailla Yesus Kristus nhiopanni. 3 La'pa riy mak kwarora de enareh dioinia e rimormior wialli, mere plollolli de edonna, de emeknekama e nalahar oleka e inon wamueheni wa. 4 Mere rima-rima hota rawerta-rataili hihi'a-yapyap wamueheni. Ne la'pa hihi'ini samoga de hota nahepur nohora. Mere yana enwarora de hya' maka ha nhi' nana de samomuounu nreh dioini la' riy dom to'a hi'ini-yapni. 5 Yoma rima-rima rmeh'a rakwar to'a kwar wamueheni. 6 Awuak pa miy miala kupna-kaimi onde ya'ana-yemanmi, lawra-rayanmi oke'ela riy mak kwatutga Yesus Kristus wniatutnu tiy miy. 7 Erammi, yanhi'pa mpiotar nan (milahara) inon wamuehemi yoma mpiarora de mhi' nan do'a-hal hya' to'owa mere Uplerlawna hota edonna Nukmua miy. Miy edonna mirehia Uplerlawna pa mpiutra-miakla E'a. Emolmolan nekama hya' ed maka riy rtamin la' nhyi' ralma hota ra'ana ha wo'oni, emkade wal lia hya' ed maka miy mhi' nan de, hota mliernana wniahlani. 8 La'pa hameni rhi' yatyatni-halalli maka ir ralamni nko'i nana, de hota rler la nhiolli-liet wamueheni de nhierannu, de de rler la matmiati-molmuolu plalahwa pa rrinnia la ai mormiori ralamni. Mere, hameni rhi' pa rlernohora Uplerlawna Nhiwni talanni, de hota rlernana mormiori-dardiari plalahwa pa nodi liarni mak kwatiawua Uplerlawna Nhiwni. 9 La' hade pede ina-narmi re, yana twaror nana inon yamawu la'a nhioli-lieta kalwiedweda re. Yoma la'pa itape'el nohora kniari re, de hota, la ler maka Uplerlawna Netlia de, itlernana ita prehenni. 10 Hade pede la'pa ita tmormiori mia'ta de, tsi' kalwiedweda it rimormior wialli, reriehenu de la'a makpesiay wialli.
Mhioratreria, ne kalwiedoo!
11 Paulus a'g ed maka ghorta di, de pniaikni edonna nhelelma, pede mpier matmi me mhioratreria. 12 Riy meni maka kran inonni la'a makden Yahudi gaini ralamni, de ir er maka kwatikil pa mliernohora sunat. Mere ha rhi' emkade totpena riy Yahudi re edon ramuki-rama'al ira. Yoma he' mak kakot nohora riwra rimormiori nohkerna rler la yamori-yalewna hornama rpesiay to'a Yesus Kristus matmiatni la auwlakra hananni, de hota Yahudi re ramuki-rama'ala. 13 Riy maka klernohora deulu-tatra sunat ho'mana edonna rlernohora deullu-tatarni honona. Mere irwatikil pa mliernohora sunat, totpena hota rran atulu ir inonni riwra miy di de mliernohor olek la ir wniatutnu sunat. 14 Mere a' di de, a'uhmen memna rian a ino'nu pa ukot nohora ha kuku'a id tiy miy. Eneknek to'a la'pa ukot nohora Itmatromni Yesus Kristus Nmat tiar lia auwlakra hananni. La' E matmiatni emkade pede a'g edon wuaror nan owa'ana nohkeran di wniarorni-wnialaini. Ne rimormior nohkerna di mana edon rna'erit nana a wniaro'ru. 15 Rsunat me edon ho'mana hade edonna nla' hadoma. Mak Uplerlawna e Nahaka de twal lia rimormiori warwuaru. 16 Awuak pa Uplerlawna Nala kalwieda-paitiota me Ntera-ndem la E sniayanni la'a riy maka mormiorni nlernohora mamain la wniatutnu maka na'nama a'ukota di. Ir er mak kre'ela Uplerlawna rimormiorni plollola. 17 Ne hota, riy id mana yana nwahak hal owa'an mai a'u. Yoma riy ramkek la Yesus kniaunu la a ino'nu di mak ktutga a' di de Yesus gahani a'u. Kniau die no'a enni la'a ramuki-ramal a'u yoma Yesus Kristus rerieini. 18 Ina-nara, awuak de Itmatromlawanni Yesus Kristus Nala ra'ani-pallu nanaloi-nanatar miy. Amin (Plola).
Paulus nwak kalwieda la'a makden Epsus
1 Ina-nara ama-hyali, miy hononmi makla' Uplerlawna mutnu-rahanu la Epsus. Miy er mak kdenrer lia pesiaymi (setia) la Yesus yoma miora Kristus Yesus mlia ihru ida-ralm ida. A' di de Paulus maka Kristus Yesus Nhopan pa godia Uplerlawna lir kalwiedni, Nlernohora Uplerlawna ralma-riorni. 2 Awuak de Uplerlawna, it Amlawanni de, Nora Itmatromni Yesus Kristus pena ed mak kala ra'ani-pallu me kalwiedni-paitiotni nanaloi-nanatar nan miy.
Ta'uli-tawedia Uplerlawna onnila E kalwiedni mai ita
3 Ta'uli-tawedi, tlilili-tmamuawua Orgahi-Orha'a Uplerlawna-Mempulwatnu la'a tutullu-lolo'oni. E' de de Itmatromni Yesus Kristus Amni maka Yesus wal pia Nkola tieru-nawur nehla de. E' ed mak kal oleka pripanni-fa'anni honona mak kwatiawua Ilyamou-Watyatoha mai ita. Pripanni-fa'anni re E Nhiwni Nodia mai ita, yoma la'a it di de tor oleka Yesus Kristus tla oleka ihru ida-ralm id wa. 4 Yoma noha gergera-tatiah'i ma'ta, de Enwalir nian ita totpa Nhi' it la E kamieheni mak kakleha do'a-hala kuku' eti la E yamkekni onnila itor Yesus Kristus tla'a ihru ida-ralm ida. Me la' E' orgahani sniayanni pede 5 Enwarora-nwalai oleka la' ler ululu memna de hota Nhi' it la a'na wamueheni pa emolmolan nekama riy ida na' nana a'na id pa nhi'a la a'na liahunu. La' talan emkadi pede Nhi' it la a'na wamueheni, yoma Yesus Kristus hihi'ini. Uplerlawna hihi'ini ri honona rlernohor E ralma-rior wamueheni me nhi' amikri E'a. 6 E wniarorni de totpena hota ra'uli-rawedi E' la tutullu-lolo'oni yoma E ralam kalwiedni mai ita maka kareh miemna. Ne Entut muemna E ralam kalwiedni de mai ita yoma itor E A'nani maka Enlililia, de ihru ida-ralm id wa. 7 Nlernohora E ralam kalwiedni maka kareh mieman de pede A'nani Yesus Nhuria rarni pa Nler la matmiati onnila it rerieini. Ne la' talan emkade pede Uplerlawna Ntuwu-nhai ita. De Enamou-nawitn olek it do'a-hala yoma itor E A'nani de tla ihru ida-ralm ida. 8 E Nhuri-ntowria E ralam kalwiedni mai ita me Nharia it ihranu ralamni totpa itlernana kirkira-ralma-rior samomuou totpa itat niohora memna E wniarorni-wnialaini. 9 Uplerlawna E orgahi Nakot it la'a hya' maka E ralamni niwra nhi'a lola Yesus Kristus hihi'ini-yapyapni. Ululu de riy raplin niohor ma'ta Uplerlawna wniarorni de. 10 Uplerlawna wniarorni de totpena la'pa ntutu-nte'ela lerni nampena Enhi' pa hare honona la'a Ilyamou-Watyatoha, me la nohkerna wawannu honona de rla' wutg ida pa Yesus Kristus Nodi plolli la. 11 Uplerlawna ed maka khi' hare honona de Nlernohora orgahi ralma-rior wamueheni. Nwalir nian olek am lia ululu memna yoma la E ralma-riorni de totpena hota amler wut lia E mutnu-rahanu, yoma amor Yesus mla' ihru ida-ralm ida. 12 Totpa am die mak kha'ar ulu a ralam mamni la Yesus Kristus de hota ma'uli-mawedi mlilili-mmamuawua Orgahi-Orha'a Uplerlawna-Mempulwatnu la tutullu-lolo'oni. 13 La' miy miana mlier olek la makpesiay Yesus Kristus, la ler maka ha mitlina Uplerlawna nnio'oni mak kaplola la'a Kot Kalwieda-Paitiota mak kodia miy lia mori-lewan de. Miy e mpiesiay oleka Yesus, pede Uplerlawna Nala kniau wamueh'a tiy miy, hade de Nhiw Lululli maka Ha Nano'taru. 14 Nhiw die ed mak karur nian ita pa hota it er maka tlernana hya' maka Uplerlawna Nano'targa mai ita makla' E mutnu-rahanu. Hota itlernana hare honona maka Uplerlawna Nano'taru mai ita, la' ler maka Uplerlawna Nwe'er doin it do'oni-halli honona pa nodi liarni. Ya'uli-yawedi nden rer lia Uplerlawna O'a, yoma tulmu nden la tutullu-lolo'oni!
Paulus sniumbainni
15 Ina-nara, mlier olek la pesiay mak emkade! Pede maka a'utlin nana mpiesiaya Itmatromni Yesus ne la' walia miy kalwiedmi la Uplerlawna mutnu-rahanu honona 16 a'g edonna rien et a lia u'uli-uwedia Uplerlawna, yoma miy hihi'imi-yapyapmi re. Ne awuetwet nek rer lia miy nanmi la'a a siumbainu. 17 Asiumbain de totpena it Amlawanni maka ha ra'uli-rawedi, maka Itmatromni Yesus Kristus Nkola tieru-nawur nehla de, pena Nala Nhiwni tiy miy. Nhiw die ed mak kod miy lia ralma-rior samomuou totpena hota la'pa Enakot nohor Uplerlawna tiy miy die, de miat niohor memn E'a. 18 Awuak wal lia de pena Uplerlawna ed mak kharia ihrami-ralammi totpena hota miat niohora yamori-yalewna maka mpiewiei-mniarnara, maka Uplerlawna Ntutg oleka la miy pa mliernana onnila Npolg miy pia mlia' E mutnu-rahanu, ne totpena miat niohor memna la ra'ani-pallu, pripanni-fa'anni, kalwiedni-paitiotni maka Uplerlawna Nhi' targ oleka la'a E mutnu-rahanu. 19 Ne awuak walia totpena miat niohora Uplerlawna rurni-laini mak kareh miemna maka Nnairia pa na Ntulan la it mak kpesiay. Uplerlawna rurni-laini plolli-mneheni mak kar lia it ihranu ralamni de, ed maka 20 Uplerlawna Nnairia pa na Namori-nalewn owa'an Yesus la matmiati ralamni, me Narian owa'an la gen miaka ha rhu'ru-rhelma la Ilyamou-Watyatoha, la'a Uplerlawna liwangen tiutullu de walli malganna. 21 Pede la' hohoni dewade Yesus Kristus de Nareh mieman momuoga hya' to'a mak kdella Ilyamou-Watyatoha, me mak kdella nohkerna wawannu. E' ed mak ktorna-krautia o'ta-mata lodna-hairi honona. La'pa makden la noha darni wo'itu mana Enodi plolli la. E' ed mak kodi plolli la lera-mela ri me mak kamtatan la liwangen tiutullu la' lera-mela maka kmai niek pa nodi liarni. 22 Uplerlawna ed maka karu'u-katowar nana hare honona totpena Yesus ed mak kodi plolli la haneknek wawannu, ne Uplerlawna Nala Yesus la makpesiay re honona pa Nhi' o'tani la. 23 Makpesiay wokni-le'enu re de, de Yesus Kristus inonni inhatta. Emeknekama rhuria ger la lari ida totpa lari die penpuenu tetema, de E' ed mak ktowria mormiorni-dardiarni, rurni-laini, kirkirni-ralma-rior samomuounu la'a riy mak pesiay la meni-meni to'a, yoma E' ed mak kala mormiori-dardiari tertera-demdema la haneknek wawannu.
Uplerlawna ed mak kamori-kalewn it la do'a-hala ralamni
1 Ina-nara ama-hyali, ululu de, miy mmiormiori mere emeka mmiati olekwa yoma la'a do'omi-halmi de mpiera-mdiaitia Uplerlawna nnio'oni-niatnu. 2 La' ler de de, miy e mtiaur rer lia nohkeran di yatni-halli, me mliernohora hegana amlawanni mak kodi plolli la darta-lyanti maka ha riwra noha utnu-liannu. Hegana amlawanni de ed mak kodi plolli la'a riy maka kmalawna Uplerlawna. 3 La ululu genni de it hononit di de emekwalima mak klernohora nohkerna gahani. Tmori niohora ita nhiolli-lietni yatyata maka it inonni ha nwahaka me mak ka'hira it ralma-riorni. La' ler de de itler wutg olek la riy maka klernana Uplerlawna ralam mehrani. 4 Mere Uplerlawna Nsayn toto' memn ita pa Nhuria ralam kalwiedni mak kareh mieman de mai ita, 5 yoma la'a plollolli de itmormiori mia'ta, mere it do'oni-halli lawan rehi pa emeknekama itmati olekwa yoma la'a it pniera-dniayatni. Mere la' ler maka Enamori owa'an Yesus Kristus la matmiatni ralamni, de emeknekama Enamor owa'an wali it la it matmiatni. Pede enekneka Uplerlawna ralam kalwiedni pede itlernana mormiori-lewlewna la E'a. 6 Uplerlawna Namori owa'an it tor rewre'wa Kristus Yesus pa trewre'wa tsa'at la Ilyamou-Watyatoha pa tlernana plola-mneha, ya'uli-yawedi, yoma itora Kristus Yesus tla ihru ida-ralm ida. 7 Uplerlawna Nhi' hare honona totpena la'a lera-mela ri pa la'pa nodi liarni, de Ntut muemna Uplerlawna sniayanni mak kareh mieman de totpa honona ramkeka. Sniayn de Uplerlawna Ntutga la E ralam kalwiedni mai ita onnila Kristus Yesus. 8 La'a Uplerlawna ralam kalwiedni pede E Nalewan miy onnila miy pesiaymi la Yesus. Ne miy lewlewanmi de edon riwra yoma la'a riy ruri-lai wamueheni, mere hade nwatiawua Uplerlawna sniayanni 9 totpa hota riy id mana edonna nwaror nana tulu-petna yoma wniarorni de enmeh'a namori-nalewna e inon wamueheni onnila e hihi'ini-yapyapni wamueheni. 10 Yoma Uplerlawna Nmeh'a neka ed maka khi' it la rimormiori warwuaru, me onnila itor Kristus Yesus tla ihru ida-ralm id wa, pede Uplerlawna Nhi' it pa totpena hota itsi' hihi'a-yapyapi mak kodia kalwieda-paitiota. Hihi'a-yapyapi re er maka Uplerlawna Nror targ oleka la' ululu geni pa hota itsi' nana.
Kristus ed mak khi' kalwied Yahudi me Yahudi atia'a
11 Ina-nara ama-hyali maka Yahudi atia'a, mhioratreria mormiormi la ululu genni. De Yahudi maka kiwra rsunat olek ir wa pede rwaror Uplerlawna mutnu ir meh'a to'a, er maka rhoi miy lia riy maka kaplin niohor ma'ta Uplerlawna yoma edonna rsunat ma't miy. Mere plollolli de rimormiori er maka khi' nan to'a sunat de. 12 La' ler miy edon mpiesiay ma'ta de miy edon mhia'ar ma'ta aranmi la'a Kristus me miy edon mior wutga makden Yahudi la'a Israel, pede miy edon miwniatiehra wut lia'a hya' maka Uplerlawna Nano'taru la' Abraham nora duratni-waitni. Mimdiella noh di de, miplin nohor ma'ta Uplerlawna pede mikleha hadom maka mhia'ar aranmi la totpa nodi yamori-yalewna tiy miy. 13 Ululu de oliet miy la Uplerlawna, mere dodo'ondi de onnila Kristus Yesus Nhuria rarni pa Nler la matmiatni la miy rerieimi pede mpiakrian olek la Uplerlawna, yoma miora Yesus mlia' ihru ida-ralm ida. 14 Mpiakrian olek la yoma Yesus ed mak kmeh'a khi' kalwied ita. De E' ed maka kawok wutga riy Yahudi rora riy Yahudi atia'a pa rla' wutga E mutnu-rahanu yoma Enhi' kalwieda ir la ir ralam mehrani. Yoma emeknekama Yesus Nweyata-nwaniawu oleka lutur lawan maka ha rala ra rtawetia Yahudi nora Yahudi atia'a. 15 E' orgahani Nala E inonni pa Nler la matmiati ralamni totpena Nhap dioinia Agama Yahudi deullu-tatarni riorni-liaini. E wniarorni de totpena Yahudi mak klernohora deulu-tatra me Yahudi atia'a mak edon rlernohora deulu-tatra, hota rler wut lia ida, pa emeka rla' hairi warwuaru mak kor wut E' pa heri ida. La' talan mak emkade pede Yesus Nhi' kalwieda rimormiori. 16 La'a E matmiatni la auwlakra hananni, pede hairi rora re yawunnu-ya'arni rkalwiedwed owa'ana. Ne la' E matmiatni de pede Nawoka-nale' niana hairi rora re pa rla' heri ida me Nhi'a rpa ror Uplerlawna rkalwied wa. 17 Yesus Nmai pia Nodia Kot Kalwieda-Paitiot de pa na Nakot nohora kalwieda la mak kahuri-kawo'ora, de la'a Yahudi atia'a miy maka ululu de oliet memna la Uplerlawna, me la' walia riy Yahudi maka kwakrian oleka Uplerlawna wa. 18 La'a Yesus hihi'ini de pede makden Yahudi ami me miy miak Yahudi atia'a trewre'wa pa tlernana talan pa twakriania it Amlawanni de, yoma la'a Uplerlawna Nhiw memeheni de niodni. 19 La' hade pede ina-nara mak Yahudi atia'a miy, do'ona-dakna atia' olek miy wa. Mere nwaldioinia de miy hononmi de mlier olek la Uplerlawna lodna-hairni limni-rorni. Miy di de Uplerlawna mutnu-rahanu me romni mniotni olek miy wia. 20 Ina-nara, nhi'inde rira rariria roma ida, de rkenia watu liar yanulu me wniatatgeni nhor diemade rwed lutru-rlapar wat lia. Emkade walia Kristus Yesus Nmeh'a neka emolmolan nekama watu liar pianulu la'a miy pesiaymi, me makwohorulu-ktatrulu, me mak kodi Uplerlawna lirni-tunnu tiy miy re, emekwalima pesiaymi de wniatatgenni. Me miy die emeknekama watu-watu maka ha rnairia pa ra rwedlutria likit de. 21 Me emolmolan nekama watu-watu harahu rwal lia' likti ida mak karuri-kalai, yoma rwed reria lutru-rlapar reria watu re la watu liar yanulu die wawannu, emkade walia Yahudi makpesiay ror wutga Yahudi atia' makpesiay rla' wutg ida onnila Itmatromni hihi'ini. Pede la hairi rora re rla' wutga ida pa rwalia la roma ida maka Itmatromlawanni Nmeh'a gahani. 22 Me onnila miora Yesus mlia' ihru ida-ralm ida de miy miana mrie'ela Uplerlawna mutnu-rahanu pa mlia' heri wiutu totpena Uplerlawna Nden rer lia miy wokmi-le'emi lola E Nhiw Lululli.
Paulus kniarni mak enodia Kot Kalwieda-Paitiot de la'a riy maka Yahudi atia'a
1 Ina-nara ama-hyali, la' Uplerlawna kalwiedni de mai ita, pede Paulus a' di asiumbain la Uplerlawna la'a miy rerieimi. A' di maka rken a lia roma nhio'la ralamni yoma la'a Kristus Yesus rerieini. Yoma a'ukot nohora E lir kalwiedni de tiy makden Yahudi atia' miy. 2 Mitlin memn oleka de, la'a Uplerlawna kalwiedni pede Nal oleka kniar die mai a'u totpena agodi miy pesiaymi la' ga'a. 3 De Uplerlawna Nalhari (Nakot) olek mai a'u lia hya' maka rimormiori raplin niohora ma'ta la'a E kniarni la Yahudi atia'a re. Aghorat tar oleka hade la heyanan de, de edon naplahwa, 4 ne la'pa mpiaik nana, de hota miy miat niohora oleka de, de ania'erit nan memn oleka hya' maka Uplerlawna Niwa Nhi'a la'a makden Yahudi atia'a lola Kristus hihi'ini-yapyapni. 5 La' ululu de rimormiori raplin niohor ma'ta hya' maka Uplerlawna Niwa Nhi'a lola Kristus, mere la' lera-mela ri de Uplerlawna Nhiwni Nalhari (Nakot) momuog oleka hade la'a riy maka Ha Nwalir niana oleka re, de la'a makodia Uplerlawna lir kalwiedni ror wutga makwohorulu-ktatrulu re. 6 Hya' maka Uplerlawna Niwa Nhi'a de emkadilla: de la'a riy maka Yahudi atia'a rpesiay olek la Kot Kalwieda-Paitiot de, pede hota ir mana er maka klernana yara'a-yapalu maka Uplerlawna Nhi' targa la Yahudi re. Me hota riy mak Yahudi atia'a rre'ela pa ror wutga Yahudi re, rwal lia emolmolan nekama inon wamueh'a ida de limni-lakni, tutu'uni-niernierannu. Ne Yahudi atia' wal pia rlernana hya' maka Uplerlawna Nano'taru la E mutnu-rahanu yoma ror Kristus Yesus rla' ihru ida-ralm ida. 7 Ne Uplerlawna Ntutg a pua alia' mak khima-kre' E'a la'a a'ukot nohora Kot Kalwieda-Paitiot de onnila Nhuri-nwalia kalwiedni mai a'u me la'a E rurni-laini mak kar tioto' meman la a ralmu. 8 La Uplerlawna mutnu-rahanu honona de, a di de ed mak kakleha weli. Mere emkade ho'mana Uplerlawna ralam kalwiedni pede Nala kniar di mai a'u, de totpa ukot nohora Kot Kalwieda-Paitiota la riy maka Yahudi atia'a. De a'ukot nohora la yara'ani-yapallu, pripanni-fa'anni, kalwiedni-paitiotni mak edonna nhoru eti mak itlernana la'a Yesus. 9 Ne Enala kniari mai a'u totpena la a' pua riy honona rat niohora la' talan emkameni pede hya' maka Uplerlawna Nror targa oleka di, de hota Uplerlawna Nhi' nana. Ululu-plialiaini Uplerlawna mak kakoki-kayap niana nohmarna nora lyanti ha nkadkaduw nana ed maka nawunum tar mua'ta la'a hya' ed maka Ha Niwa Nhi'a. 10 Mere la' E wniarorni de totpa la lera-mela ri, de mak kodi plolli la darta-lyanti maka ha riwra noha utnu-liannu hota rat niohora Uplerlawna wniarorni-wnialaini kirkira-ralma-rior samomuou. Ne hota irat niohora hadi de onnila ramkek nana Uplerlawna hihi'ini-yapyapni la'a Yahudi me Yahudi atia'a makpesiay re. 11 Uplerlawna Nhi' hare de Nlernohora hya' ed maka Ha Nwaror targ oleka wa la' noha gergera-tatiah'i ma'ta. Ne la' Itmatromlawanni Kristus Yesus matmiatni demade hota hya' ed maka Uplerlawna Nwaror targa oleka de, ntutu-nte'ewa. 12 Ina-nara, yoma itora Kristus tla' oleka ihru ida-ralm id wa, ne la'a it pesiayni la' E'a pede it edon tamta'ata trehgorgoru Uplerlawna. 13 La' hare honona maka a'ukot nohora oleka di, pede awuak pa ina-nar miy re, yana ralammi nmawal mai a'u, yoma alier la kropna-krieutu la roma nhio'la ralamni la'a miy rerieimi. Mere hare honona de yala'ani emkade, totpena miy mlier la kalwiedni-paitiotni.
Yesus Kristus sniayanni
14 Ina-nara, la'a Uplerlawna ralam kalwiedni de mai ita pede awualtiora-wualtieman la Orgahi-Orha'a, it Amlawanni gaini ralamni pa awuak la E'a. 15 E' de, makpesiay re honona mak kdella Ilyamou-Watyatoha me mak kden ma't la nohkeran di wawannu Amni eda de. Makpesiay honona re emekwalima makwa'ina-makwanara. 16 Asiumbain la de awuak pa Uplerlawna mak kden la tutullu-lolo'oni mak kodi plolli-ktaryatnu me ralam kalwiedni de mak karehi-kalawna pa Nala E Nhiw Lululli na Naruri-nalai niana miy ihrami-ralammi 17 totpa la' miy pesiaymi la'a Kristus Yesus, pede E' mana Nden rer lia miy ihrami-ralammi. Me awuak wali pia miruri-milai lia mormiormi pa mtiutga ralam kalwiedmi totpena hota miy pesiaymi de emolmolan nekama wini-hgona maka ha rtamnia de ga'arni nwahipni la nohkerna onde emeknekama roma ida wniatatgenni me riri tniutgeni-nhia'argeni pede taken niana rom de rawo'la nana. 18 Emkade pede hota miy mior rewre'wa Uplerlawna mutnu-rahanu honona pa mnia'erit nana Kristus de sniayanni inponni mai ita ne E sniayanni de nden nek la pa nodi liarni. 19 Sniayanni de inponni nareh dioin rimormior ita kirkira-ralma-rior samomuounu. Emkade ho'mana awuak pa miat niohora Kristus kalwiedni de, totpena hota Uplerlawna yehwa-liakta nhioli-liet wamueheni mak karehi-kalawan de yeher to' pa nden rer lia miy ralamni. 20 Ina-nara ama-hyali, mai pia ta'uli-tawedi Uplerlawna-Mempulwatnu yoma Uplerlawna Nodi plolli pa Nhi' nana hya' maka Eniwra Nhi'a. Me E wniarorni la hihi'ini-yapyapni mai it de nareh dioin la hya' maka itwarora pa twak la E'a, Enhi' hare honona yoma E plolli-mneheni ed mak kar lia it ihranu ralamni. 21 Mai pia ta'uli-ta'wedi tlilili-tmamuawua Uplerlawna-Mempulwatnu makdella tutullu-lolo'oni onnila E plolli-mneheni mak kar lia makpesiay honona re ihranu ralamni. Mai pia ta'uli-tawedi Uplerlawna onnila Kristus Yesus hihi'ini. Ya'uli-yawedi nden rer lia O'a Uplerlawnu Neee! La' dodo'ondi pa nodi liarni. Amin (Plola).
Idma nhi'a-nyapia id la emeka riy makla' olek la ihru ida-ralm ida
1 La' Uplerlawna kalwiedni-paitiotni de mai ita pede, ina-nara ama-hyali miy, awuak tiy miy die totpena mmiori-mdiar niohora nhioli-lieta mak klol talla pa makpesiay rhi' nana, yoma Uplerlawna ed mak kpolg olek miy pia mlia' E gah wamueheni. Awuak hadi tiy miy onnila a' di de mak kden la roma nhio'la id a'u yoma agodia Orgahi-Orha'a tulanni-kniarni. 2 La' hade pede lera-ler nekpa idma natu nhu'ru-nhelm ida (lol yawa), idma ntutga yehwa mnapla la ida. La'pa riy rhi'a yatyat tiy miy onde ir wniarorni-wnialaini dom to'a la' miy wniarormi ho'mana mitatahan ralammi me mhiur niohora-mpiat niohora onnila miy ralam kalwiedmi. 3 Mpialiewan toto' meman pa totpa miy mak kpesiay mlia'a ihru ida-ralm ida. Yoma miy er maka Uplerlawna Nhiw Lululli Nhi' olek miy pia mlia' wut lia ida. Pede yana miwo'ora mere idma nmor kalwiedwed la ida. 4 Yoma makpesiay re emeknekama inona ida nmeh'a to'a, me mliernana Nhiw Lululli ida. La' emkade walia Uplerlawna Npol miy die totpena mpiewiei-mniarnara yamori-yalewna ida. 5 Me Orgahi-Orha'ami ida Nmeh'a, pesiay de ida, nhiarani mana ida. 6 Makpesiay hononmi Amlawanmi ida de Uplerlawna Nmemeh'a. E' ed maka kar die kte'la momuou lia hare honona, me kodi plolli la haneknek wawannu. Me E' ed mak kden rer lia makpesiay miy hononmi ihrami-ralammi. 7 Mere ina-nar miy re, la it di de rima-rima tlernana ruri-lai maka Yesus Kristus Nala totpa idma ntulan la ida pa emolmolan nekama Yesus e Nwaror nana-nwalai nian oleka wa. 8 Pede la'a Puka ralamni de e rhorat targa riwra: "La' lerni la Enha'at la gen tiutulu de E na nodia lidna-tauru maka Enal olek la yawa pa Ntorna, me Nma Nala limtutnu la'a E rimormiorni." 9 La'pa itiwra Enha'ata, de nnia'eratni mana emekwalima la ulul de Enernu olek la geni kyawyawa la'a noha wawannu. 10 Me E' mak kerun de mana E' ed maka kha'at olek la gen miaka kden la tutul memna la'a tulu-lyanti totpa nodi plolli-ntaryatnu la tulu-lyanti, me nohkerna-rai miarna wawannu. 11 E' ed mak kala yara'a-yapalu la'a rimormiori. Rima-rima rlernana ir ruri-lai wamueheni. Enala riy dom pa rodia Uplerlawna lirni-tunnu, dom to' de Nala pa rwal lia makwohorulu-ktatrulu, dom to' de rla'a rakot nohora Kot Kalwieda-Paitiota la'a riy maka edon katlin ma'ta, dom de rwal lia o'ta-mat la krei wokni-le'enu (pendeta) mak kwatutu makpesiay re. 12 Enala rurni-laini re totpena makpesiay re ratu rkar lia Uplerlawna kniarni yoma idma natu nhima-nre' ida pa idma naruri-nalai nian id pesiayni, yoma ir honona de emolmolan nekama inona ida la'a Yesus Kristus. 13 La' hade de hota it hononit de twal lia riy ida yoma la'a it pesiayni ida, me tamneneha la'a wniarora-wnialai la' Uplerlawna A'nani. Pede hota itwal lia rimormiori miaka wniarorni-wnialaini emeknekama ina-ama la' pesiay, me ita nhiolli-lietni na'ititar rer lia emekwalima Yesus Kristus. 14 Emkade pede hota it di de papay-lokmera atia' olek it wa. Yoma riy mak kla' papay-lokmera la' pesiay, de ratlin la riy maka kanur mi'na nohor ir wniatutnu-wniaye'eni pa rodi riy la klieratni. Riy maka katlin la ir nur mi'nani de hota emekwalima kapli ida maka yo'ora-anni nod lia'a-nod miaiya. 15 Mere ita edon tatlin la riy mak nur mi'na. Hota rwaldioinia de itakot nohora hya' ed mak kaplola. Ne la'pa itakot nohora hya' mak kaplola de it idma ttut reria ralam kalwied la ida totpa edonna nalo'on wali ne itler la plola-mneha la' hare honona totpa it yehwani samomuounu de na'ititar rer lia emekwalima Yesus Kristus. Ne E' ed maka khi' o'tani la makpesiay re honona. 16 E' ed maka khi' makpesiay miy re pa mlia' wutga ida me E plolli-mneheni nkar lia miy mormiormi ralamni. Pede miy idma natu ntulan-nsayn la ida pa narieiniande miy pesiaymi naruri me nla' ga'a. Yoma miy die emolmolan nekama lima-laka irnu-mata rawniutu-rakniohu la'a inon tetema ida, mere rima-rima rhi' nan to'a kniar wamueheni totpa idma ntulan la ida.
Miolin doin nhiolia rimormiori ululmi me mhi'a-myapia la plol wawna
17 La' hade pede awuet la Orgahi-Orha'a nanni pa ukot nohora me atiekal reria la' yakotnohorni. Yana mmiori-mdiar owa'an pa emeknekama rimormior mak kaplin niohor ma'ta Uplerlawna yoma nhiolli-lietni re rlernohora wniarora-wnialai podpodku-padpadku. 18 Yoma o'ta tehra re pede rakleh etia o'ta-kriahlu la Uplerlawna wniarorni. La' hade pede wniarorni re rler olek la melmelli-kalkalamni mak kreinian ir pa raplin niohora mormiori maka Uplerlawna Nala. 19 Emkade pede irakleha molmola-mama'a la'a temni pede rlernohora nhiol yatyatni hya' to'owa mak ka'hira ralma riorni. Ne ralamni re rapal niana nhiol yatyatni mak ka'hira re pede rahmena rolin doin yatyat della. 20 Mere la' ler maka rwatutu miy lia Yesus Kristus yala'ani de edon rwatutu olek miy pia mhioli-mlieta mmiori-mdiar lia yatyata mak emkade. 21 Agat niohor meman de riy mak kakot nohor ulga Uplerlawna lirni de tiy miy die, rwatutu-rwaye'a hya' ed mak kaplola la'a Yesus. Rwatutu miy onnila mpiali oleka riy mak kor E' pa mlia' ihru ida-ralm ida. 22 Ha rwatutg olek miy pia miolin doinia nhiolia rimormioria ululmi mak kler olek la wniarora-wnialai mak kodia miy lia klieratni mak kodia matmiati-molmuolu plalahwa, 23 me totpena miala inonmi pa Uplerlawna Nherun doin ihrami-ralammi totpa miy wniarormi-wnialaimi rwal lia mak warwuaru. 24 Rwatut wali miy pia mpial lia rimormiori warwuaru maka Uplerlawna Nhi' nana de Nlernohora E yehwa wamueheni mak kaplola-kaple'era, me kmou-kwitan la do'a-hala ralamni. 25 La' hade pede miy hononmi yana mi'ohpa-milahara. Mere mikot nohora ploini-ple'erni la mutwualmi yoma la it hononit di de Yesus inonni inhatta. 26 La'pa miwenna, de yana yawenanmi de nodia miy lia do'a-hala ralamni me yana idma naun tar niek id pa la'pa lera ntuin nohora 27 totpena yana hegana amlawanni nhi'a la hautu. 28 Mak kalim yata de nolin doinia nhiolli-lietni di, me nwahaka kniari totpena nape'ela kniari pa nlernana yamanna wra'anu, totpa nre'ela ntulan walia riy mak kakleha-kaplara. 29 La'pa miltieri die yana miltieria wniahoiti-wniarenna yapupu-yaheri onde yapolu-yaliella la' miy nurmi. Mere mniair neka lira-tun mak kodia nnio'a-niatu, mak kodia riy la kalwiedwedni. Mikot nohora hya' maka ir ratlin la totpa lira-tunu kalwiedwed de, naruri-nalai nian ir pesiayni. 30 Yana mhi' pa Uplerlawna Nhiw Lululli ralamni Nmawal doin la onnila nhiolmi-lietmi re. Yoma Uplerlawna Nala Nhiwni pa Nakniau ita la'a E gahani, totpena hota la' ler maka Yesus Nmai owa'an pa Namori-nalewn ita, Ha Ntutga de it er maka Ha Nwe'er doinia la do'a-hala ralamni pa nodi liarni. 31 Mhiopliala hankerna-ralmha'ara, yawunu-yawenna, ralam mehra. Yana polpuolu-hawaun nohora wniahoiti-wniarenna, yapupu-yaheri, yapolu-yaliella, liokra-nhiautu. Yatyat id ho'mana yana mhi' nana. 32 Rwaldioin la de, idma nhi' kalwieda-paitiot ida. Idma ntulla-nsayni ida. Ne it idma nhoratdoin ida do'oni-halli, pa emolmolan nekama Uplerlawna Nhoratdoinia me Namou-nawitna oleka it do'oni-halli, onnila Yesus Kristus matmiatni la' it rerieini.
Mai pia tmori-tdar lia lelerni ralamni
1 Ina-nara ama-hyali, miy di de Uplerlawna a'na sniayanni miy. Hade pede mirur mieman la pa mliernohora Uplerlawna yehwani. 2 Mormiormi de, mliernohora kalwieda-paitiota talanni emekwalima Yesus Kristus mana Nhi' kalwiedwed walia ita. E Nhur dioinia inonni pa rwenna onnila it rerieini de pa emeknekama nhioi-tniani (persembahan) mak kamikri-kaliamnia Uplerlawna ralamni. 3 Miy di de Uplerlawna mutnu-rahanu miy. Hade pede olietmi la nhioli-lieta maka yana Uplerlawna mutnu-rahanu rhi' nana re, yoma edon lol talanni. De emeka nhioli-lieta mak kodia yalira-yaliai onde pareta-pahawa mak edonna kla' riy ihranu ralamni yoma nhioli-liet de emeka kdeha-ktiahli. Me yan memmemna ralammi rapal niana kupna-kai re'a-tniaru. La'a do'a-hal mak emkare de yana mhio'la kotni-mhiai lia memannu. 4 Yan walia milgota lir yata la'a miy nurmi. Yana mikot nohora hadom mak kakleha nhiu'ru-nhielma onde kakleha kuna, onde mpiahoiti-mpiarenna. Yoma hade edon lol talanni pa mikot emkare. Rwaldioinia de msiumbain pa mi'uli-miwed reria Uplerlawna. 5 Mitlina kalwiedweda inmi-narmi re! Riy maka ralira-raliai la'pa rhi' kdeheni-ktiahlani la'a yareta-yahawa onde napal niana kupna-kai re'a-tniaru, hota ir edonna rre'ela Uplerlawna Nora Yesus Kristus mutnu mak kla Uplerlawna lodna-hairni limni-rorni. Mhioratreria! Riy mak kapal niana nohkerna gahani re emekwalima mak kola tieru-kawur nehla la uplera-upmati. 6 Yan mitlin la lir wotwotarni mak kiwra yalira-yaliai, pareta-pahawa, wniahoiti-wniarenna la'pa hare honona do'a-hal atia' hade. Yoma Uplerlawna hankeranni-ralmha'arni hota ntai tiemna riy honona mak edon katlina-katailla E'a pa rhi' nan do'oni-halli re. 7 Pede yana mliernohora ir pa mpiehwa-mliakat la do'a-hala ralamni. 8 Yana mhi' emkare yoma miy niek de ululu de mdien wal lia melmelli-kalkalamni. Mere la dodo'ondi de mlier olek la Itmatromlawanni mutnu-rahanu pede emekwalima miy ed olek la lelerni. La' hade pede mdien rer lia lelerni. 9 Yoma mimdiella lelerni de hota miy e mhi' nana hare honona mak kodia kalwieda-paitiota me mak kaploi-kaple'er la Itmatromlawanni yamkekni. 10 Mhi'a-myap die mpiahak la'a hya' ed maka hota Itmatromlawanni ralamni Nala. 11 Yana mliernohora riy pa mpiehwa-mliakat la melmelli-kalkalamni. Wniehwa-liakta mak emkare edon perkuna. Hade pede mikot nohora hihi'a-yapyapi re yatyatni-halalli totpena yana riy rhi'a-ryap niohora. 12 Hya' maka riy yatyata-halala rhi'a la yawunamnu de rakdeha-raktiahli pa it nekane tmola-tma'a takot nohora. 13 Mere la'pa takot nohora hihi'a-yapyapi maka rhi'a la melmelli-kalkalamni yatyatni-halalli totpena yana riy rhi'a-ryap niohora de emeknekama it ttutni wa'du pa ramkek la mela ralamni. 14 Yoma hya' maka hitita-reprepra nhi'nande riy ramkek la melmelli. La' hade pede riwra: "Mumat doin la yaninmu ralamni, ne mmuori-mliewan la' matmiatmu ralamni. Ne hota Yesus Kristus Nodia lelerni la miy." 15 Mimkek kalwiedwed la' mormiormi wawannu. Yana miplinu-miplo'a la mormiormi ralamni. Mhi' inonmi de emeknekama riy mak katu. 16 Mpiehwa reri-mliakat rer lia nhioli-lieta mak kodia kalwieda-paitiota yoma la' lera-mela ri, de riy harahu rden nek la do'a-hala ralamni. 17 La' hade pede yana mpiodku mere mpiaror kalwiedweda hya' ed maka Orgahi-Orha'a ralamni Nala. 18 De yana mi'ina-miemun pa mpiehera-mia'wu. Yoma hota la' hade pede ta'eni miod nian inonmi pede mhi'a saworni-sawarna, mpiehwa yatni-halli. Rwaldioinia de mial inonmi pa Uplerlawna Nhiwni Nodi plolli la. 19 Mpiahniara ya'uli-yawedi la Uplerlawna de miodia wniatunu-wniahniara krei-iskola totpa idma nhi' aruri id pesiayni. Miala ihru-ralma ploi-ple'era me mi'uli-miwedia Orgahi-Orha'a. 20 La'a hya' to' mana mi'uli-miwed reri Uplerlawna it Amlawanni de onnila miora Itmatromlawanni Yesus Kristus mlia' ihru ida-ralm ida.
Nnio'a-niatu la'a mak kmehlima-kmarya'a
21 Itsu'ru-tselma ta'unni-tamta'at olek la Yesus Kristus pede hota it mana idma natu nhu'ru-nhelma, natlina-natailla ida. 22 Patke'a nhu'ru-nhelma natlina-natailla muanke'eni pa emekwalima tsu'ru-tselma tatlina-tatailla Orgahi-Orha'a. 23 Yoma muanke'a ed mak khi' o'tani la hawa pa emekwalima Yesus Kristus mak khi' o'tani la makpesiay re mutnu-pepanni. Me E' nek mana ed mak kamori-kalewna makpesiay re. Ne ir er mak kwalia olek la E inon wamueheni. 24 Emekwalima makpesiay re mak kru'u-ktowr olek la Yesus Kristus, de hawa patke'a mana natlina-natailla hawni muanke'a la' hya' to'owa. 25 Hawa muanke'a re, mtiulla-msiaynia patke'emi re (me mpiahi' pa mmiat lia ir wawannu), emekwalima Yesus Kristus Nsaynia makpesiay mutnu pede Nal inonni pa rwenna la'a hare rerieini. 26 Yesus Nhi' emkade totpena Nhi' ir la E rimormiorni ne Namoga makpesiay re la'a do'a-hala ralamni, yoma Nnairia gera pa na Nharania, me Nakot nohora Uplerlawna lirni-tunnu la ira. 27 Enmeh'a neka Nhi' emkade totpa Nhi' makpesiay re la E gah wamueheni mak kmou-kwitan la E yamkekni yoma rakleha do'a-hala kuku' eti. Emkade pede makpesiay re emolmolan nekama patke' maka liplipa-kamka'ma nohora lelli-kdielli, lawra-raini yoma ntutu-nte' olek la lerni pa nora muanke'eni de rmehlima. 28 Hawa muanke'a re, miatu mtiulla-msiayni hapmi pa emeknekama Yesus Nsayni mutnu-rahanu. Mtiulla-msiaynia patke'emi de emekwalima miy orgahami mimkek la inon wamuehemi. Yoma riy maka ktulla-ksayni hawni de, emekwalima ensaynia inon wamueheni. 29 It edonna twatrom nan ma'ta rimormiori ida mak edon natiak rer lia e inon wamueheni. Rwaldioinia de rima-rima ramkek rer lia, me natiak reria ir inon wamueheni pa emekwalima Yesus Kristus wal pia Ntera-ndema makpesiay re wokni-le'enu. 30 Entera-ndem ita yoma it di de emeknekama Yesus Kristus inonni limni-lakni tutu'uni-niernierannu ita. 31 Ina-nara, la' Puka ralamni de riwra: "La' hade pede hota a'na muanke'a ida naltarga inni-amni pa la nora hawni rla' wutga ida totpa rla' ihru ida-ralm ida." 32 Hya' maka a'ukota de nnia'eratni kdielma. Ne a'g e gala mehlim de la yawalliohora la'a Yesus Kristus loini-talanni la'a makpesiay re wokni-le'enu. 33 Mere a'ukot walia mehlim de tiy miy giwra: hawa muanke'a miy die miatu mtiulla-msiayni hapmi pa emekwalima mimkek la inon wamuehemi. Me la'a hawa patke'a miy miana mhiu'ru-mhielam la hapmi.
Nnio'a-niatu la upa-a'na rora inni-amni
1 Upa-a'na, yoma miora Itmatromni Yesus mlia' lir ida pede mitlina-mitailla inmi-ammi yoma hade naplol la Uplerlawna yamkekni. 2-3 Mhiu'ru-mhielam la inmi-ammi nayanni totpena mliernana Uplerlawna ra'ani-pallu me mdien aplahwa la nohkerna wawannu. Yoma Uplerlawna Nakot targa oleka ra'ani-pallu me mormiori plalahwa de la upa-a'na maka katlina-katailla Uplerlawna riorni-liaini di. Riora-liai di, de nala' ulga riora-liai honona mak Uplerlawna Nal walia ra'ani-pallu la he' mak katlina-katailla riora-liai die. 4 Ne makla'a ama miy die, de yana miaklekal la miy upmi-a'nami pa narieiniande a'nami de nahankeran rer lia miy. Mere mitiak rer kalwiedweda miy a'nami re me mpiatutu-mpiaye'a totpa rlernohora hya' mak kla' Itmatromlawanni ralamni.
Nnio'a-niatu la hopopna-li'iru, ata-wa'ara nora upa-matromni
5 Ina-nara ama-hyali makla'a hopopna-lili'iru, ata-wa'ara, de miatu mhiu'ru-mhielma mi'unni-mimta'at la upmi-matrommi la' nohkerna wawannu di. Mial ralammi tetema pa mhima-mrie'a hare pa emekwalima mi'unni-mimta'ata Yesus Kristus orgahani. 6 Yana mpiei pia matrommi erla romni nayanni nampena mkiar toto'a totpena ra'uli miy. Mere miala ralammi tetema pa mhima-mrie'a upa-matrommi re pa emolmolan nekama mhima-mrie'a Yesus Kristus. La' talan emkade pede mial ralammi tetema pa mliernohora Uplerlawna ralma-riorni. 7 Yana prei-pre'et nohora tulanmi-kniarmi, mere mhi' nana re pa emekwalima miy e mhima-mrie'a Orgahi-Orha'a E orgahani. 8 Yoma miat memn oleka de, hopopan miy onde upa-matroma ho'mana, hota Orgahi-Orha'a Nala rima-rima kniar kalwiedwedmi wniahlani. 9 Ne riy mak kla'a upa-matroma miy miana, de mhi' wali nhioli-lieta kalwieda-paitiota la'a hopopanmi re. Yana miwenan la ata-wa'armi re pa miaklekla-makdiainia re. Mhioratreria, mior hare de, miy o'tami ida. La' hade de Orgahi-Orha'a makden la Ilyamou-Watyatoha. Ne E' edonna Naheri-nahelta rira herni-gaini.
Itnairia Uplerlawna kekni-rautnu pa ttutrier tiertehra la it pesiayni
10 Ina-nara ama hyali, mitlin la a li'ru hohoni di, onnila miora Orgahi-Orha'a mlia' olek la ihru ida-ralm ida pede hota miatu miruri-milai niohora ruri-lai mak kareh mieman de, maka ha mliernana la'a E'a. 11 Emolmolan nekama mak ka'ara re rnairi keki-rautu ar ralma honona totpa ra ratutga tertieri-tawtaw mak kwatiawu arwalli, de miy miana mniairia Uplerlawna kekni-rautnu totpena mtiutrier tertehra la' ler maka hegana amlawanni niwa ntot nan miy lia klieratni. 12 Yoma it edonna tora rimormiori ta'ara mere itora hegana amlawanni nora e hopopanni-lili'irnu mak kodi plolli la nohkeran di melmelli-kalkalamni nora darta-lyanti. 13 Hade pede mniairia Uplerlawna kekni-rautnu honona totpena la'pa nte'ela lerni maka ha mliernana kropna-krieutu, nniahora-nniala'a onde totota-wudwiudi, yatyatni-halalli de miatu mtiutrier tertehra la pesiaymi. Ne la'pa nhorwua de inonmi e narur mia'ta yoma mniairia Uplerlawna kekni-rautnu re. 14 La' hade pede mtiutrier tertehra la' pesiaymi, yoma mtiut nieka ralma ploi-ple'era. Yoma ploloi-plele'er de emeknekama mak ka'ara ida rewni mak no' e nehlani. Me mhioli-mlieta la plol wawna pa emek kla' nana Uplerlawna ralma-riorni. Yoma hade de emekwalima rain mnotna la inonmi. 15 Mial ralammi naplele'er pa mikot nohora Kot Kalwieda-Paitiot de yoma hade emeknekama miy lakmi wniowni totpena yana mtiuini. 16 La' walia de, la' lelera-melmel de mtiorrer pitga miy pesiaymi la Itmatromlawanni. Yoma miy pesiaymi de ed mak kei dioinia hegana ra'pihini mak klomlomra. 17 Yamori-yalewna maka mrieinian oleka de hota emolmolan neka hya' maka ha nahewu o'tami totpena yana arwalli kekni-rautnu ntaiya. Me mniairia Uplerlawna lirni-tunnu maka E Nhiw Lululli Nala tiy miy pia emeka wehla ara. 18 La' lera-mela me la'pa la hya' to' de msiumbain la Uplerlawna la'a E Nhiw Lululli niodni. La' meni-meni to'a me la hya' to'a de mrian ralammi la Uplerlawna pa msiumbain rer lia me mpiaka tniulan la E'a. Yan memmemna minin halmi, mere msiumbain rer niek la Uplerlawna mutnu-rahanu honona. 19 Me msiumbain walia mai a'u totpena la' lera-lera hya' to'a de Uplerlawna Ntera-ndem a lia lira-tunu mak ukotkota re totpena apuarani pia a'g e ukot nohora Kot Kalwieda-Paitiot de maka ululu rimormiori raplin niohor ma'ta, mere la' dodo'ondi de Uplerlawna Nalharia oleka. 20 Onnila Kot Kalwieda-Paitiot de pede awual lia mak ha rhopan doinia ida (pengantara), pa agetla roma nhio'la ralamni. Mere msiumbaini totpena apuaran pia ukot nohora Kot Kalwieda-Paitiot de yoma hade emeka klernohora Uplerlawna ralma-riorni.
Kalwieda hohoni
21 Ina-nara ama-hyali, Tikhikus, it hyalli mak kden rer lia it ralamni, me mak ralamni nod rer lia (setia) pa nhima-nre'ela Orgahi-Orha'a kniarni hota nakot nohora miy lia'a hya' ed maka aghi'a totpena miy miana miat niohor walia a kalwie'du me a tulla-knia'ru. 22 La' hade pede aghopna e' pa ntiy totpena nakot nohora a kalwied mamni de tiy miy totpena nhi' miy ralammi pa naruri-nalai. 23 Awuak de Uplerlawna-Mempulwatnu it Amlawanni de me Itmatromlawanni Yesus Kristus Nala kalwiedni-paitiotni me Nhi'a makpesiay wokni-le'enu honona pa idma nara'a-napal ida, me totpena rpesiay meman la E'a. 24 Miy hononmi maka ralammi napal niana Itmatromlawanni Yesus Kristus la'pa nodi liarni, de awuak pa Uplerlawna Nala ra'ani-pallu tiy miy. A kalwie'du Paulus
Paulus nwak kalwieda
1 A' di Paulus mak kal horat di tiy miy, ina-nara ama-hyali mak kla' olek la Uplerlawna mutnu, miy hononmi makden la Pilipi me mak kor oleka Kristus Yesus kla'a lira ida. Ina-nara mak khima-kre'a jema'ata nora o'ta-mata krei la'pa makpesiay hononmi. Paulus agora Timotius makhi' Kristus Yesus li'irnu-hopopanni 2 ampak de Uplerlawna it Amlawanni de Nora Itmatromni Yesus Kristus pena ed mak kala ra'ani-pallu me kalwieda-paitiota tiy miy.
Paulus nsumbain la makpesiay
3 Nhi'inde aghoratrer miy, de a'u'uli-uwedia Uplerlawna mak akola tieru-gawur nehla, onnila miy pesiaymi. 4 Nhi'inde asiumbain rer miy hononmi de agodia ralma hepuepru. 5 A'u'uli-uwedia Uplerlawna yoma la' ler mak na'nama mpiesiaya pa nma nte' nan la' ler di, de miy e mhima-mrie' olek a' pua takot nohora Uplerlawna Kot Kalwiedni la'a Yesus. 6 Uplerlawna Nmeh'a ed mak Nkar lia miy ralammi. Ne apuesiay wialia, de hota E' ed mak Nkar lia miy ralammi pa nodi liarni la' pa la nte'ela' ler maka Kristus Yesus Nawal pia Nmai. 7 Plol toto'a, de atiarga ralma yahepru to' la'a miy. Yoma miy hononmi er mamain la a ralmu. Yoma la'pa adien la roma nhio'la pa awualeran pa a'ukot nohora Uplerlawna Kot Kalwiedni la'a Yesus de naplola, de miy hononmi mhima-mrie' a' pua akari kniar di, maka Uplerlawna Nara'a-napal mai a'u. 8 Uplerlawna Nat niohora de a'g e giwa muai tiy miy die, agodia Kristus Yesus ralma kalwiedni-paitiotni. 9 Asiumbainia miy de, de awuak de ralammi naple'er la Uplerlawna Nora it rimormior wialli ne ralma-riormi mana naplahwa me nhioratmi mana namtemtemna la genni. 10 La'pa emkade de hota miy miatu mpialir oleka samomuounu ne hota miy mormiormi mana nmou-nwitna totpa mikleha do'a-hala kuku' eti la'pa ntutu-nte'ela lerni la' Kristus Nawal pia Nmai. 11 Hota Kristus Nkar lia miy ralammi pede, mormiormi-dardiarmi penpuenu-nanah samomuou meman la nhiolmi-lietmi ilu-wniehwami pede mak kamkeka nhiolmi-lietmi re hota rodia ya'uli-yawedi la'a Uplerlawna-Mempulwatnu.
Itmormior die tler la Kristus
12 Ina-nara ama-hyali miy hononmi, agiwra miatga de kropna-krieutu mak aliernan oleka di, edon rla' oruli-augewat la a'ukot nohora Uplerlawna Kot Kalwiedni la'a Kristus Yesus. Mere rwaldioinia la de, hare honona de, ed mak katota-kariei pia rira liawanni ratlina la' Kot Kalwied de. 13 De kropna-krieutu mak aliernan oleka nhi'nande riy makodi keki-rautu mak katiaka ray romni, me riy dom pali mai let di, rat momuoga la'a Kristus kniarni rerieini pede alia'a roma nhio'la. 14 Me la'a a rerie'yu la' roma nhio'la, pede makpesiay oleka Kristus harahu mana yeher to'ola pesiayni raruri owa'an la Orgahi-Orha'a pede rparan pia rakot nohora Uplerlawna lirni, de edon rwadura. 15 Plola la riy dom e rakot nohor wali Kristus, yoma la' ir ralamni ramehra, riwra totpena riy ratlin la ira wniatutnu pa edon ratlin mai a'u. Mere la'a dom pal die, rakot nohora Kristus yoma ralamni raplele'era mai a'u. 16 Riy mak emkare de, hare er mak katlina-katailla Uplerlawna me ralamni kalwieda mai a'u. Iratga de Uplerlawna ed mak ktut a' pua a'g ed maka ktutga talla Kot Kalwied la'a Yesus, de naplol memna. 17 Mere riy dom to' de rakot nohora Kristus de ralamni nkoili. Rakot nohora de rtot to' inon wamueheni. Rwarora de talan di ed maka hota kod a lia klieratni la'a roma nhio'la ralamni. 18 Mere emkadella wa. Yoma hota emkameni ho'mana la'pa ralamni raple'era onde ralamni rkoili ho'mana hota Kot Kalwiedni la'a Kristus de rakotkot lola pa nodi liarni pede a'uhepuepur nohora. Ne hota a ralmu nahepuepru pa nodi liarni. 19 Yoma agat niohora hota la'a miy sniumbainmi me la' walia Nhiw Lululli maka Yesus Kristus Nala de tultulanni mai a'u, de kropna-krieutu maka aliernan oleka di, hota nhi'nande alier la yamori-yalewna. 20 Maka a ralmu nmormior lia, me agha'ara a ralmu de totpena yana a'uwlar dioinia a knia'ru. Rwaldioinia owa'ana de agha'ara a arnu, totpena la'a lera-lera emkade mamain pa nodi liarni aliernana talan pa apuaran lia pede a ru'ru-la'yu honona la'pa amuati-muor miana alier pa alia'a totpena Kristus Nlernana ya'uli-yawedi. 21 La a mormio'ru ralamni de hornama agor Kristus mla' ihru ida-ralm ida me a hihi'u-yapya'pu nodi ya'uli-yawedi la E'a. Ne la'pa amuat die a'untu hade yoma agor Kristus plola pa mden wutu. 22 Mere hota la' a mormio'ru mai nohkeran di pa akar lia Kristus kniarni ralamni, pede a'uplin niohora hameni maka awualiri. 23 Hota e rhed a' liola talla woru. Awuak de amuati totpena ultarga nohkeran di pa a lia gora Kristus, yoma samomuounu inhatte! 24 Mere hota miy rerieimi de ndella pa samomuounu de adien nek la nohkeran diwa. 25 Apuesiaya hade emkade. La' hade pede agatga de hota agora ina-nara miy hononmi, totpena aghima-rie' miy pia miruri-milai me yeher to'ola mihepru la'a pesiaymi la' Itmatromlawanni ralamni. 26 De la'pa hota a'uwal tiy miy die, mihepuepur nohora a'u, yoma Kristus Yesus Nolin doini a' pua arie' teman la miy. 27 Hornama dodo'ondi de miy mormiormi die mliernohora hya' maka ha rakot nohora la' Uplerlawna Kot Kalwiedni la'a Kristus, totpa la'pa arie' teman tiy miy, me edonna, a'utlin de mimtiutrier tiertehra la ihru ida-ralm ida pa mriewre'wa miod niana Kot Kalwieda-Paitiota maka mpiesiay olekwa. 28 Mlier la ga' de yan mimta'ata arwalmi. La'pa mhi' emkade, de hota iratga, de hota rler la matmiati-molmuolu plalahwa pa rrinnia la ai mormiori ralamni. Mere miy di die hota miatga de, hota Uplerlawna Nmeh'a neka Namori-nalewan miy. 29 Uplerlawna ed mak kala kalwieda-paitiota tiy miy pia mpiesiay Kristus, me mak kal kalwieda-paitiot pa mlier wal lia kropanni-krieutnu onnila E rerieini. 30 La' hade pede dodo'ondi de mliernohora olek a' pua mlier la kropna-krieutu, de arwalmi rhi' oruli-augewat la Uplerlawna Kot Kalwiedni la'a Kristus, emekneka rhi' olek a lia ler mak adiella Pilipi, de mieh'a mimkeka, ne emekneka dodo'ondi rhi' owa'an la let di pa mitlin nohora.
Tlernohora Yesus nhiolli-lietni pa tlola yawa
1 Kristus Ntutga ralam kalwiedni mai ita, ne itahepru yoma Nara'a-napalga ita. Enhi' aruri it pesiayni, me itora Uplerlawna Nhiw Lululli tla' ihru ida-ralm ida. 2 La' hade pede dodo'ondi mhi' teka a ralmu pa nkalwied nohora hihi'imi-yapyapmi rina. Mmior nohora mlia'a ihru ida-ralm ida, idma ntulla-nsayni ida me mlia' lir ida la hya'-hya' to'owa. 3 La'pa mhi' hadom de yana mtiot to' inon wamuehemi. Ne yana mitulu-mipetna inonmi. Mere mpialdioinia totpena rima-rima natu nhu'ru-nhelam lol yawa ne natga de mutwualli ed maka samounu rehia. 4 Mimkek la rira kleheni-larni de emekwalia mimkek la inonmi. 5 Mhioli-mliet de mliernohora Kristus Yesus wniehwani-liakatni. 6 La'awa plollolli de E' de emekwalia Uplerlawna, mere E' edonna Nala hadella hautu pa Namtatna pit niohora. 7 Mere nwaldioinia de Enolin doinia hare honona, ne Nhi'a inonni de emolmolla ata-wa'ara lili'iru-hopopna ida. Emekwalimde rimormiori mak itamkek memna. 8 Natu Nhu'ru-nhelma, pede Nwo'la-nlekur de Nlernohora Uplerlawna ralma-riorni pa la'pa Nala inonni pa rwenna. Ne matmiatni meman nek de emolmolan neka riy mak klernana nhiorghala-wniaghala la auwlakra (salipa) hananni. 9 La' yoma Kristus hihi'ini-yapyapni de nla' Uplerlawna ralamni, pede Uplerlawna Nran tutulga E'a totpena ra'uli-rwedi E'a, ne Nal walia pa Ntorna-nrautia plola-mneha maka katulu-kapetna la'a hare honona. 10 Pede hota riu'u-tniowra la' Yesus di de hanek-harahu wuawannu mak kdella Ilyamou-Watyatoha me mak kdella nohkerna wawannu. Ne la'pa makden la noha wikni-ray gerni mana rru' pua ruhulia idamni me rwaltior pa rram la lia'arni. 11 Hota honona re rru'u-rtowar pa rhoi lia Yesus Kristus kotni me rwet la nanni, de riwra E' de Orgahi-Orha'a Itmatromlawanni. La' hade pede Uplerlawna-Mempulwatnu makla' Am la Yesus hota Nlernana ya'uli-yawedi.
Hita-repra emolmolla ai mormiori lelera la nohkerna wawannu
12 Yesus Nhu'ru-nhelma pa Nlernohora Uplerlawna wniarorni la'pa Nmati. La' hade pede ina-nara mak kden la a ralmu, miy hononmi la'pa emkamenila mhiu'ru-mhielma, mitlina-mitailia Uplerlawna la' lera itden wut mua'ta de, emkade wali hota miy hononmi miodi ralam ya'unni-yamta'ata pa mpialeran toto' memna totpena hihi'imi-yapyapmi rla' Uplerlawna ralamni, emekneka riy mak Uplerlawna Nalewn oleka rhi' nana. Miatu mhi'a-myapia emkade la ler maka itden wut mua'ta, ne reriehenu meman la mak dodo'ondi, it idma olieta la ida. 13 Yoma Uplerlawna ed maka Nmeh'a Nkar lia miy ralammi pa hihi'imi-yapyapmi rlernohora E ralma-riorni/Yoma Uplerlawna ed maka Nmeh'a Nkar lia miy ralammi totpena miwra mhi' hihi'a-yapyapi mak klernohora E ralma-riorni me Ntulan miy totpena mhi' nana re. 14 La' hade pede la' mormiormi-dardiarmi honona de, yana miy idma nkunu-nkehena ida, me yana mihuri-miwo'ora. 15-16 Mhi' emkade, de emekwalima mtiutg oleka Uplerlawna upni-a'nani mormiorni-dardiarni, momuounu-witwitanni, me nhiolli-lietni mak kakleha do'a-hala kuku' eti mak kmor lia plol wawna la'a riy yatyata-halala ha rden la. Mhi' inonmi pa emekneka ai mormiori mak kodia lelerni la' noha wawannu pa mikot nohor ir la kot mak kodia mormiori-dardiari. Hota la' miy mormiormi mak emkade de, aghi'a la' a nhiaparge'nu pa uhepur nohora, la' lerni la Kristus Nawal pia Nmai. Hade edon nhala mere naplol toto' meman la, de a liwtu-odwu mak kodia hini-turnu. 17-18 Yanpa hota rwen a'u, ne a ra'ru hota nwalia emeka hoihoi-tantiani la' Uplerlawna. La'pa ha yala'ani emkade a' muana u'uli-uwedia Orgahi-Orha'a. Emekwali a'u, de miy miana mpiesiay matmiati Yesus pede mial oleka inonmi tetema la' Uplerlawna totpena mimliernohora E ralma-riorni, nhi'nande a'u'uli-uwedia Uplerlawna. Ne miy miana mi'uli-miwedia Uplerlawna la' hari honona, pede agor wal miy pia tler la he'i-hepru.
Timotius nora Epafroditus
19 Agha'ar a arnu la' Itmatromlawanni Yesus himni-re'eni mai a'u pa alieretniekla gala Timotius pa ntiy miy die, totpa nakot nohor a'u totpena mlier la ralma hepru. Ne la'pa nmai owa'ana, de alier la ralma hepru la miy kotmi mai a'u. 20 La'a Timotius nanpena agora de ihru ida-ralm ida, pa plol toto' meman la' amparora miy hononmi kalwiedmi. 21 La' mutu korni de rmakokan nohor to'a inon wamueheni ne edon rhe'du nana Kristus Yesus ralma-riorni. 22 Mere miy hononmi orgahami mimkek walia Timotius kalwiedni. Nor a' pua ampaliewan la kniarni pa amakot nohora Uplerlawna Kot Kalwiedni la'a Itmatromlawanni, de amro'a emolmolla riy id nor amni. 23 La' emkade pede agha'ar a arnu la Orgahi-Orha'a, de la' ler meni hota agat niohora hota rolin doin a lia roma nhio'la me edonna, nanpena agal Timotius pa ntiy tieman tiy miy die. 24 Apuesiaya hota la' Itmatromlawanni sniayanni hota edonna nalo'on wali ne amuai tieman tiy miy wiali. 25 Ne la'a it mutwualli Epafroditus maka miy mhiopan pa nma nhima-nre' a'u, de a'g ed maka ktutmuat owa'ana pa nawal tiy miy die. Enre' olek la a' pua ampaleran wut lia a knia'ru, me nkar lia Uplerlawna kniarni ralamni emolmolan neka riy ida mak ka'ara pa natu natahan ralamni la'a hya'-hya' to'owa. 26 Eniwra nwatrom miy hononmi ne ralamni nmolu-nhelam doin la yoma mliernana oleka e kotni de enamehra. 27 Plol toto'a de la' enamehra, me trema-trema nmati. Mere Uplerlawna sniayanni pa Nhi' kalwieda. Nhi' kalwied e' de, Uplerlawna Nsayni wali a'u totpena yana a ralmu nmawal doin la e'a. 28 La' hade ed maka a ralmu napranran pa aghopan pa enawal tiy miy totpena mihepur nohora, ne a ralmu mana namtiertiernu. 29 Awuak pa miora Epafroditus di mpiatrom de mihepuepru nohora maimiaini, emeknekama riy id nor wuiliodan walli la'a pesiay ida la Itmatromlawanni. Miatu mi'unni-mimta'ata he'a-he' to'a, emekwalia Epafroditus. 30 Yoma nhi'pa nmat lia' ler maka nkar lia Kristus kniarni rerieini. Edon namta'ata matmiati mere nkeni matmiati la' gaini totpa nhima-nre' a'u la Pilipi miy nanmi wawannu.
Mak ktulliawna-kwelwierta, de totpena itat niohora Yesus Kristus Itmatromlawanni
1 La'pa a li'ru korkorni de ina-nara ama-hyali mitlina, miy hononmi mimuki-mihepru yoma miora oleka Itmatromlawanni mlia'a ihru ida-ralm ida. A ralmu edon nwerta pa a'ukot nohora owa'ana la hya' maka a'ukota la' horta ralamni, la tiy miy lia ler maka itto'or la de. Yoma la'pa mliernohor a li'ru de hota riy ta'en niana rhi' yatyatni tiy miy. 2 Miy hononmi mitlina. Mi'ereram toto' meman la riy maka kwo'la-klekur la yatyatni-halalli. Emekto'a riy ida mak kiwra ndawra riy inonni, de ir riwra rhi'a yatyat tiy miy pia riwra miy di de rsunta plein nampena mlia' Uplerlawna limni ralamni. 3 Plollolli de it di neka, maka kla' olek la Uplerlawna limni ralamni. Ir de edonna. Yoma it edon tsi' emeka hare pa tsunat to' it inonni mere it illu-wniehwani emeka riy mak kla' olek la Uplerlawna limni ralamni pede tkola tieru-tawur nehla la Uplerlawna, de Uplerlawna Nhiw Lululli Ntulan mai ita. Ne ta'uli-tawedi Kristus Yesus yoma Nmeh'a neka Nkar lia it ralamni. It edon tsa'ar it aranni la rimormiori ita pa todi it la mormiori-dardiari. 4 A'g edon wuarora emeka wniatikilgeni, hya' maka nohkerna gahani pa alier la Uplerlawna limni ralamni yaho'ma nohkerna gahani harahu rehi etla mai a'u. Yanpa riy dom to'a rwarora de hota rha'ar aranni la' inon wamueheni me hihi'ini wamueheni. Mere a' di de urehi momuou ir honona. Mitlina. 5 A i'nu ntor a lia noha wawannu pa a le'ru wo'awa dewade rsunta a wua. Rmor a lia' Israel. Benyamina Ibrani mniotni rarni e nakpalpala a rernu. A' di Ibrani molanni a'u. Rakot nohor la nhiu'ru-nhielma la' agama deullu-tatarni la Yahudi, de a'g ed maka kler la Parisi mutnu temanni. 6 Awualeran meman totpa agodi Musa deullu-tatarni la ga'a pa umuki-uma'ala makpesiay Yesus. Yoma awuarora de makpesiay re rhopliala Musa deullu-tatarni. La'pa rakot nohora nhiu'ru-nhielma la Yahudi deullu-tatarni de, ta'en niana riy raklak a'u yoma aliernohora Musa deullu-tatarni honona. 7 Mere hari honona maka ululu de awuarora kodi unut mai a'u, de la' dodo'ondi de agatga de hamamuamua re, yoma agiwra gat niohora Kristus totpa gora mla' ihru ida-ralm ida. 8 Rerehniana, haneka-harahu wawannu mak umkeka re agatga de edon rod unut mai a'u, yoma maka awuarora ri de tulliawna-welwierta, de totpena agat niohora Kristus Yesus a Matromlawnu. Hade pede agolin doinia haneknek wawannu. Awuaror la' hare honona re, de emeka haga'u-hamda'ara, totpena aliernana Kristus. 9 Ne plol toto' meman pa agora Yesus de mla' ihru ida-ralm ida. Loi-talla plola la' Uplerlawna de a'g edonna liernohora agama deullu-tatarni. La' taliorta-lakatrai (loi-talla plol de) ha nwatiawua Uplerlawna, yoma onnila tpesiaya Kristus. Emkade mamain pa la' Uplerlawna yamkekni de a lia riy mak kden la plol wawna la Uplerlawna ralma-riorni. 10 Mak agiwra gatga la' ihrieherni memna (plollol memna), la' totpena agat niohora Kristus, de totpa plolli-mneheni mak kamoria E' la'a matmiatni ralamni de nkar lia a ralmu. A'g edon umta'ata lier la kropna-krieutu emeka Enlernana, ne a'g edon umta'ata pa emek E' pa lier la matmiati-molmuolu ralamni. 11 Yoma apuesiaya de hota amueh'a nek de ramoria a lia matmiati ralamni.
La it pesiayni de itwaleran emekneka mak kawlari ida
12 Plollolli de a nhio'lu-lie'tu wniehwa-liaktu edon naplol ma'ta la genni mere agodi lia'ru pa lier la ga'a totpena emekto'a riy ida nwarui-nwate'la siewa ida, de awualeran pa totpa agor Kristus Yesus mla' ihru ida-ralm ida. Yoma hade mak kariei pia E' orgahani Nwarui-nwate'la nan a' pua Nhi' a lia gahani. 13-14 Plola la ina-nara miy hononmi de, a'g e edonna wuaror la' a nhio'lu-lie'tu wniehwa-liaktu naplol meman ma'ta. Mere hota aghi' owa'an emkadi. De emolmolan neka mak kawlari ida nhortaplinga hya' maka nhoitio'or la, pa nwaleran pa nhapartiklia maka nhokra. Emkade walia a'uwlari mamain pa gharan rer nian hohoni totpa plol toto'a a wniehwa-liaktu de emekwali Kristus wniehwani-liakatni. La' hade pede Uplerlawna hota Npol a' pua agor wut la E' la Ilyamou-Watyatoha pa nodi liarni, onnila Kristus Yesus hihi'ini. 15 Dodo'ondi de, it hononit de mak lokmera-papay atia'a ita la' it pesiayni, hota itsi'a-tyap emek na'nama a'ukota oleka re. Mere la'pa la' miy die, miy wniarormi dom to'a, pena Uplerlawna ed maka Ntutga a li'ru ri raplola. 16 Hornama it tlernohor talan maka Uplerlawna Ntutg oleka mai ita. 17 Ina-nara ama-hyali miy hononmi, awuak de mliernohor a'u. Ne amal olek walia loi-talla plollola pa mlina-miat reria riy mak klernohora talan mamni. 18 Mliernohor ami yoma riy liawanni rahmena ratlina-ratailla wniatutu la'a Yesus Nmat lia auwlakra hananni la'a it do'oni-halli rerieini. Lera-ler a'ukot oleka hadi tiy miy wia. Ne la' ler di de ukot owa'ana de ako'a-kakur nohora. 19 Rimormiori mak emkare de, hota la' hohoni dewade rler la matmiati-molmuolu plalahwa pa rrinnia la ai mormiori ralamni. Yoma ratulu-rapetna inonni la'a ir hihi'ini-yapyapni mak kodia molmola-mama'a. Ir rhi' neka yatyatni-halalli mak ka'hira ralma-riorni. Ir edon rlernohora Uplerlawna ralma-riorni mere ralma-riorni re nko'i nan to'a hya' maka nohkerna wniahakni. 20 Mere it di de lodna-hairi Ilyamou-Watyatoha etla it limni ralamni. Nwatiawu walia hande Makamori-Kalewna, de Itmatromlawanni Yesus Kristus hota Nmai. E' ed maka itwewiei-tnarnara. 21 It inonni maka tani na'an di hota Yesus ed maka Nawilu-nawalia it inonni pa emekwali E'a, de samomuou memna. Hota Enhi'a hare, yoma E' ed mak ktorna plola-mneha pa Nhi'a hya'a-hya' to'owa.
Itmor niohora Uplerlawna wniarorni-wnialaini
1 Ina-nara ama-hyal miy re. A ralmu napal nian miy, pa giwra umkek miy wia. Hihi'imi-yapyapmi nodia a lia yahepru pa a'u'uli-uwed reria Uplerlawna. Atiutga oleka talan maka hota mliola. La' hade pede ukot nohor tiy miy mak kden la a ralmu, la riy id tiy miy miana yan memmemna mpiadur la miy pesiaymi la' Itmatromlawanni. 2 Na'ru Eoudia me na'ru Sintike! Awuakwak tiy miy die, yan mihuri-miwo'ora mere mlia' rer lia ralm ida emekto'a nhioli-lieta ilu-wniehwa la riy makpesiay oleka. 3 La' walia kniarwia'lu maka kdenreri (setia), awuak wal tiy o' pa mrie'ela mhima-mrie'a patke'a rora re, totpena rla' ralm ida. Irora de, raprehena-ramau nohor oleka a wua, pa rre'ela rakot nohora Uplerlawna Kot Kalwiedni-Paitiotni emekwalimde Klemen nor wut wualia riy honona re wal pia mak kor a' pua mkari rewre'wa. Honona nanni re Uplerlawna Nken tiarg oleka la puka mak rhorat targa riy nanni mak hota rler la mormiori-dardiari plalahwa pa nodi liarni. 4 Ampakwak de, ralammi rahepru, yoma mliernohor oleka Orgahi-Orha'a. Ukot owa'an tiy miy mimuki-mihepur reri. 5 Mdien rer lia ralam kalwieda la' riy honona pa la'pa rhi' yatyatni tiy miy die miy edonna mpiahla. Hota edon nalo'on wal pia Orgahi-Orha'a hota Nawal pia Nmai. 6 Yan memmemna ralammi wolwo'la la hadomdoma. Mere la'a hya'a to' pa, mrian ralamni la' Uplerlawna me mikot nohora hya' ed maka nodi miy lia ralam wolwo'la. Ne mi'uli-miwedia Uplerlawna yoma E' ed maka Nara'a-napalu miy. 7 Ne hota Uplerlawna Nala kalwiedni-paitiotni la ihrami-ralammi pa miy ralam namtiertiernu, totpena Natiaka kirkirmi-ralma-riormi onnila miora Kristus Yesus mlia' ihru ida-ralm ida. Uplerlawna kalwiedni-paitiotni de narehelia rimormiori kirkirni-ralma-riorni honona. 8 Demade hononmi mkienia mak kalwieda-paitiota la' ihrami-ralammi. Mpiaror nohora hya' mak kaplola, de mak kodi ya'uli-yawedi, hya' maka samomuou ne mak kakleha do'a-hala. Mpiaror nohora hare, yana mpiaror nohora yatyatni-halalli. 9 Mpiehwa-mliakta de mliernohora hya'-hya' honona maka aghi'a me awuatut tiy miy. Ne hota Uplerlawna mak kala ralam mtiertiernu hota Nor miy tialla.
Paulus nreilili-na'mamuaga himima-rere'a mak kwatiawu krei mutnu
10 A'u'uli-uwed reri Orgahi-Orha'a yoma la' mahnek memna la' wniarormi mai a lia dodo'ondi. Plollolli de miy edon mhioratdoinia a lia mere miy edonna mliernana talan ma'ta pa mi'enyatg owa'an kupna mai a'u, nodia pa dodo'ondi. 11 Ralul (a'uhmen memna) pia a'ukot nohora a kleh'u-la'ru. Yoma la hare honona de agatu utahan a ralmu. 12 La'pa alier oleka la kleha-lara onde alier la re'a-tniaru a'g edon awuaror nohora hare. La' hare honona de a ralmu nahepru. 13 Yoma Kristus Nhi' aruria a'u pede atiutulu-ukwar nana hari honona. 14 Mere miy di de, mhima-mrie' a lia ler maka aliernana kropna-krieutu. La'pa hya' maka ha mhi' oleka re de ha samomuoga re. 15 Ina-nara, ama-hyali makpesiay la Pilipi, miy hononmi! Miy miat niohor oleka la lerni la, awuaran la' Makedonia, de la' ler maka na'nama a'ukot nohor oleka Uplerlawna Kot Kalwiedni-Paitiotni de tiy miy. La' ler de miy mieh'a er mak kparan pia mrie'ela mhima-mrie'a a'u pa mi'enyatu kupna totpena a'ukot nohora Uplerlawna Kot Kalwiedni. 16 Ne la' ler maka adiella Tesalonik meman nek de, mak alier la lehka-lara, de mi'enyatg oleka patuini-paro'onni re'eni ida-wor mueman mai a'u. 17 A'g edon ukot emkade totpena awuak pa mrie'ela miala patuini-paro'onni mai a'u, mere totpena Uplerlawna Nala pripanni-fa'anni tiy miy yoma mtiulan olek la a wua. 18 Aliernan oleka narehi-nalawan walia ntutul tutawnu, yoma miy enyatmi mai a'u, de aliernan oleka la Epafroditus. Pa dodo'ondi de aliernan oleka pripanni-fa'anni. Hya' maka miy miala mai a'u re de, emekneka prehena-mau maka huwnu mikarni la' Uplerlawna pa Nreiniana-na'nana. 19 Uplerlawna-Mempulwatnu maka guhulia idamni-riama lia'arni dudanni ntutul tutawnu lele'namni, hota Nal tiy miy pia Narehi-nalawna la miy klehemi-larmi, onnila Kristus Yesus Nmat lia it hononit rerieini. 20 La' hade pede ta'uli-tawedi tlilili-tmamuawua Uplerlawna-Mempulwatnu makla' Am la it hononita. E' ed mak itkola tieru-tawur nehla la. Mai pia ta'uli-tawedi tlilili-tmamuau E'a pa nodi liarni. Amin (Plola).
La' hohoni de a kalwie'du tiy miy
21 Mikot la Uplerlawna mutnu-rahanu mak kor oleka Kristus Yesus kla' ihru ida re honona, miwra awuak a kalwie'du. Ne inmi-narmi makden wut lia mai a lia' handi rwak walia kalwiedni la miy hononmi. 22 La' walia riy honona makden la let di uhunu-ewatni mak kla' oleka Uplerlawna mutnu, reriehenu wal lia mak kar lia Kaisar (ray) romni. 23 Ampak pa Itmatromlawanni Yesus Kristus Nala ra'ani-pallu tiy miy. Amin (Plola). Paulus agora Timotius ampak kalwieda tiy miy hononmi, Paulus
Paulus nwak kalwieda la makden Kolose
1-2 Ina-nara ama-hyali Uplerlawna mutnu-rahanu makden Kolose mak kor oleka Kristus Yesus mlia' ihru ida-ralm ida me makden rer lia E lirni-tunnu. A' di de, Paulus maka Kristus Nhopan pa nodia Uplerlawna lir kalwiedni, yoma Uplerlawna Nmeh'a Nran a'u la'a E wniaror wamueheni. Agor wutga ita hyalli Timotius ampak de Uplerlawna, it Amlawanni de pena E' ed mak kala ra'ani-pallu me kalwiedni-paitiotni tiy miy.
Paulus nsumbaini
3-4 Amatlin olek la miy die mpiesiay oleka Kristus Yesus me miatu mtiulla-msiaynia Uplerlawna mutnu-rahanu honona. La' hade pede nhi'inde la'pa amsumbain tiy miy, de ama'uli-mawedia Uplerlawna, Itmatromni Yesus Kristus Amni de, la'a miy rerieimi. 5 Miy e mpiesiay oleka, me miy e mtiulla-msiaynia Uplerlawna mutnu-rahanu re yoma mhia'ara aranmi la yamori-yalewna maka Uplerlawna Nhi'targ oleka la Ilyamou-Watyatoha. Rakot nohor oleka yamori-yalewan de tiy miy lia' ler maka mitlin nohor walia Uplerlawna wniatutnu mak kaplollola, de Kot Kalwiedni de. 6 Kot Kalwied de mana ha nwewr olek la noha-rai di tetema. Ne la' ler maka ha mitlin nana Kot Kalwied de me mnia'erit nana plollola Uplerlawna ralam kalwiedni tiy miy, de mpiesiaya me nhiolmi-lietmi mana ndella plol wawannu. Emkade walia la' meni-meni to'a, de Kot Kalwiedni di nodia rimormiori la nhioli-lieta ilu-wniehwa kalwiedweda, me maka kpesiay mana na'ititar rer lia liawanni. 7 Kot Kalwied de ed maka Epafras, kniarwial miamni mak kden rer lia a ralam mamni, ha nakot tiy miy. E' ed mak kdenrer pia ntulan mai ita yoma nora ami mkar wiut lia Kristus kniarni, la' miy rerieimi. 8 Ne Epafras de mana ed mak kakot nohora mai am lia' emkameni la Uplerlawna Nhiwni ed mak kodi plolli la miy pede miy die idma ntulla-nsayni ida. 9 La' hade pede la' ler maka amatlin nohora miy pesiaymi de pa la'pa ntut lia dodo'ondi memna, amken rer miy lia sniumbain mamni ralamni. Nhi'inde ampak la Uplerlawna totpena mliernan kirkira-ralma-riora, wniarora-wnialai samomuou mak kwatiawua E Nhiw Lululli totpa miat niohor memna Uplerlawna ralma-riorni. 10 La' emkade de hota mormiormi e rlernohor oleka Itmatromlawanni ralma-riorni, me la' hya'-hya' to'owa de miy mhi' mamainia mak klola E ihranu-ralamni pa hota nhiolmi-lietmi ilmi-wniehwami honona re, rden la plollol wawannu. Me miy o'ta-kriahlu miy re yeher to' pa naphyar wia pede miat niohor memna Uplerlawna. 11 Me ampak de Uplerlawna-Mempulwatnu mak kodi plolli mak kdella tutullu-lolo'oni Narur nian miy totpena mlier la kropna-krieutu mana yana mpiadura mere miatu mhiur niohor ralam mehrani me miatu miodia ralma hepuepru. 12 Me totpa miatu mi'uli-miwedia it Amlawanni. Yoma E' ed maka khima-kran miy pia mliernana hare honona maka Uplerlawna Nhi'targ oleka la'a E mutnu-rahanu pa rlernana la E lodna-hairni la hititni-repreparni. 13 E' ed mak kahal doinia melmelli-kalkalamni tnioranni mai ita pa Nken it la lelerni A'nani maka E' orgahani Nsayn de, lodna-hairni. 14 Yoma E A'nani Ntuwu-nhai it pa Nwe'er doin olek it la wutwutu-kokgohu, pede dodo'ondi de it do'oni-halli re ramou-rawitn oleka wa.
Yesus Kristus ed mak kodi plolli la haneknek wawannu
15 Ina-nara ama-hyali, itat niohor memna Uplerlawna plolli-mneheni, nhiolli-lietni, illu-wniehwani, kennama ita edon tamkek nan E'a, yoma riy ramkek memna Uplerlawna nhiolli-lietni de la'a Yesus Kristus de mormiorni-dardiarni la' nohkeran di. Yesus de Wutmueha-Laimieha inhatta mak kodi plolli la haneknek wawannu! Edonna rhi' temn E' la'a maka Uplerlawna Nakoki-nayapi, mere E' ed olek la wa. 16 Yoma E' ed maka Uplerlawna Nhopan pa Nakoki-nayapia haneknek wawannu makden la Ilyamou-Watyatoha nora nohkeran di wawannu, de hya'a-hya'a mak kayamkeka me mak edon kayamkek taru mak kodi plolli la noh di utnu-liannu. Noha lyanti ha nkadkaduw nan di Yesus Kristus Nakoki-nayap niana totpena Yesus Kristus de Nlernan ya'uli-yawedi la'a ir honona mormiorni-dardiarni. 17 Hare honona edonna rho'a-rwanin ma'ta de, Yesus Kristus de ed mak kden ulu, me la'pa Uplerlawna Na'ohi-na'ar hare honona pa nhorwua de Yesus ed maka Ntorna-nrautu hare honona. 18 Me E' de rna'etga la o'ta ne mutnu-rahanu de inonni tetema. Yoma E' ed maka Uplerlawna Namori-nalewn ulga la'a matmiati ralamni, totpena E' ed mak kala' ul pua nodi plolli la haneknek wawannu. 19 Yoma Uplerlawna Nmeh'a ralma-riorni totpena Uplerlawna plolli-mneheni, yarurni-yalaini, yamorni-yadarni, nhiolli-lietni, illu-wniehwani la'pa hare honona de, ed maka etla E A'nani Yesus Kristus. 20 Uplerlawna Net tiarg olek pa Nal A'nani de totpena makden la nohkerna wawannu honona me la' walia makden la Ilyamou-Watyatoha rkalwied owa'an la Uplerlawna. Ne Uplerlawna Nhi' hade de lola A'nani rarni mak khuria la'pa Nmati lia auwlakra hananni onnila it rerieini.
21 Mere miy die, ululu de miy olietmi la Uplerlawna pa miy mhi' Uplerlawna la arwalmi, onnila ralma-riormi nden rer lia yatyata ralamni pa mhi'a-myap niohora. 22 Mere la' lera-mela ri de la A'nani matmiatni, pede Uplerlawna Nhi'a pamuli-payala tiy miy, totpa miy mior owa'ana E' pa mkialwieda, totpena hota la'pa mliernan polpuolu la E gaini ralamni, de ta'en niana raklaka miy, yoma mikleha do'a-hala kuku' eti. 23 Mere miy erammi. Mdien rer lia pesiaymi de, me mtiutrieri pitpit niohora. Mhia'ar toto' memna aranmi la yamori-yalewna maka ha rakot nohora la Uplerlawna Kot Kalwiedni. Uplerlawna Kot Kalwiedni maka ha mitlin de, ha rakot nohor oleka pa nwewar la nohmarna uhunu-ewatni-lahwani. Ne la' Paulus a' muana awuali olek la mak khima-kre' la Orgahi-Orha'a tulanni-kniarni pa a'ukot nohora Kot Kalwied de.
Paulus tulanni-kniarni la'a krei wokni-le'enu
24 Dodo'ondi de a ralmu nahepru onnila alier la kropna-krieutu la'a miy rerieimi. La'a a ino'nu mehrani-maunu, de u'itar wutga hya' ed maka Yesus Kristus Namehra-namau niohora la'a makpesiay re, de aliernan kropna-krieutu mak Uplerlawna Nror targ oleka wa. Ne makpesiay re wokni-le'enu de emeka E inon wamueheni. 25 La' Uplerlawna nhiopanni, pede a' die ghi'a hopopna la'a makpesiay re wokni-le'enu pa a'ukot nohora tiy miy lira honona mak kwatiawua Uplerlawna, 26 de lira maka anni-anni me wenu-wolla ululu Uplerlawna Nawunum targa la'a riy honona. Mere la' dodo'ondi de rakot nohora la E mutnu-rahanu. 27 Maka Uplerlawna Niwra Nakota-nalde'eta, de Yahudi atia' mana hota rlernana Uplerlawna kalwiedni-paitiotni, ra'ani-pallu, pripanni-fa'anni mak samomuou memna. Uplerlawna ralma-riorni maka ululu de ha rawunum targa mere dodo'ondi rakot nohor de emkadi: de Yahudi atia' miy miana, Yesus Kristus etla miy ihrami ralamni, pede miat muemn oleka de hota miora Uplerlawna la'a geni miaka khitita-kreprepra. 28 Yesus Kristus ed maka amakot nohora la rimormiori honona. Ampagahniorta ir de amala wniatutu-wniaye'a mak kodia kirkira-ralma-rior samomuou. A ralma-rior mamni de totpena rimormiori id mana yana nden hala, mere honona rde ratlin la a wniatutu-wniaye' mamni pa hota rakleha do'a-hala kuku' eti la Uplerlawna yamkekni yoma rora Yesus Kristus rla' lir ida. 29 La' hade pede a' muana wualunni-wualeran toto' meman la a knia'ru de agal toto' memna a ih'ru-ralmu kirkira-ralma-rio'ru maka Yesus Kristus Nal de, me E rurni-laini mak kari tioto' meman la a ralmu. 21 Ina-nara ama-hyali, a'g e giwra totpa miat niohora la emkameni la awualeran toto' meman la a knia'ru la miy rerieimi, me la' walia makden la Laodikia rerieini me la' walia riy rahu mak edon kat niohor ma't a'u, rerieini. 2 Awualeran toto' memna la miy hononmi rerieini de totpena aghi' arur niana miy ihrami-ralammi, me totpena idma nara'a-napalg ida pede miy mlia' wutg ida. La' hade totpena ralma-riormi naphyari pia miat niohor memna Yesus Kristus E orgahani maka ululu de Uplerlawna edon Nakot nohora ma'ta. 3 Yoma Uplerlawna kirkira-ralma-riorni, lira-yatnu, me wniarorni-wnialaini maka kayade'a la ululu geni de itat niohora onnila itora Yesus Kristus tla' ida. 4 A'ukot nohora hari totpena yan memmemna mpialer la pesiaymi, yoma nur mi'na muaka kodi miy lia ohpa-lahara. 5 Yoma la'pa a' oliet a lia tiy miy miana, agat niohora de a'g e dien rer lia miy onni. Ne a ralmu nahepru yoma mhi'a-myapi die lol talanni, me mirur olek la pesiay la Yesus Kristus.
Mormior miak lol talanni
6 La' hare honona pede ina-nara ama-hyali a'ukot hadi tiy miy: miy e mliernan oleka Kristus Yesus emekwalima miy matrommi, pede hota emkade wal pia mliernohora E'a pa miy mmiori-mdiar lia plol wawna pa emeka riy mak kor olek Yesus rla' ihru ida-ralm ida de rhi' nana. 7 Miga'ar temn olek la E'a, pede hota yeher to' pa mpialiewna totpena pesiaymi la Yesus Kristus la' ga'a me pesiaymi narur lia wniatutu-wniaye'a maka ha rwatut tiarg oleka tiy miy die. Ne ihrami ralamni mana rahepur nohor la pa mi'uli-miwedia Uplerlawna.
Yana mitlin la wniatutu-wniaye'a mak edon kwatiawua Yesus
8 Erammi la temmi! Yanpa riy doma rawilu-rawewla miy pia mlier la klieratni. Lira-tunu re hare edonna rwatiawua Yesus Kristus. Mere ha rwatiawua rimormiori nohkerna ralma-riorni maka rwahaur nohor neka rimormiori deullu-tatarni mak edon kaplola me rakleha kuna. 9 Yana mliernohora lira-tunu mak edon kaplola re yoma la'a Uplerlawna plolli-mneheni, rurni-laini, la'pa yehwani-liakatni honona erla Yesus Kristus nhiolli-lietni. 10 Ne la' walia miora Yesus Kristus ralm id wa, pede miy miana mliernan olek walia ruri-lai, lira-yatu, kirkira-ralma-riora samomuou. Yesus Kristus ed maka kodi plolli la hare honona mak kodi plolli-ktaryatnu la nohkeran di utnu-liannu. 11 Ne, la' walia miora Yesus Kristus mlia' ihru ida-ralm ida pede emolmolan nekama rsunat olek miy wia. Sunat maka rimormiori limni enni atia' hade, mere maka Yesus Kristus orgahi Nhi'a la'pa Enolin doinia miy lia nhioli-liet yatyata-halala maka ululu de kodi plolli tiy miy. 12 Yoma la'a lerni maka ha rharan miy die emekwalima e rhuwur wutg olek miy lia Yesus Kristus. Ne la'a nhiaran die wal pia, miy miana mliernohor walia Yesus Kristus de pa mmiori owa'ana, yoma miy e mpiesiaya Uplerlawna plolli-mneheni (rurni-laini). Ne Uplerlawna ed mak kamori-kalewna Yesus Kristus la matmiatni ralamni. 13 Ululu de mmiormiori mere emeka mmiati olekwa yoma la'a do'omi-halmi re. La' ler de Yesus Kristus edon Nolin doin ma'ta miy lia nhioli-liet yatyata-halala mak ululu de kodi plolli tiy miy, pede emolmolan neka edon rsunat ma'ta miy. Dewade emeknekama Uplerlawna Namori-nalewna miy die la' ler maka Enamori-nalewn olek Yesus la matmiatni ralamni. Ne Uplerlawna Namou-nawitna do'omi-halmi re honona. 14 Emkade pede Uplerlawna Nwun dioinia agama Yahudi deullu-tatarni nora plolli-mneheni. Yoma emolmolan nekama Enhap doin olek it nanni la horta otna-ara mak klaklak ita onnila it do'oni-halli. Yoma emolmolan nekama horat mak kaklak ita, de ha rtapal wutga la auwlakra hananni de pede Nhayamoga yaklaka re honona mai ita. 15 La'a auwlakar de, Uplerlawna Natowar nana makodi plolli, mak ktorna-krautu la nohkerna utnu-liannu totpa riy honona ramkek memna Uplerlawna Nal olek ir la yawa. 16 La' hade pede ina-nara ama-hyal miy re, yana mitlin la mak kwaghal miy yoma mi'ina-miemnu ya'ana-yemnu maka ha rlarna onde la' walia yoma miy edon mihepur nohora lera-mela maka lerlalawna la agama yatotni-yarieini, emeka lerlalawan wolla warwuaru onde la' walia Sabat lerni, (de ler maka Yahudi edon rkar lia). 17 Yoma hare honona de emeknekama memannu tatar to'a la'a Yesus Kristus inhatte mak hota kmai nodia E kalwiedni-paitiotni me pripanni-fa'anni. 18 Pede yana mitlin la mak kwaghal miy onnila miy edon mliernohora ira wniehwani maka rtot pa rtutga nhioli mak klol yawa, me rkola tieru-rawur nehla la Uplerlawna hopopanni-lili'irnu (malaikat). Yanpa mitlin la riy mak edon kaplola re, de miy edon mliernan siewa maka Uplerlawna Nala. Yoma riy mak edon kaplola re rtot pa rakot nohora toto'a hya' ed maka ha rdarat nana pa ratulu-rapetan la mormiorni mere tulu-petan nwatiawua nohkerna wniarorni-wnialaini to'a. 19 Riy mak emkare de edonna rlernohora Yesus Kristus wniatutnu. Mere Yesus ed makhi' o'ta la E mutu-rahu wamueheni. Yoma Yesus tnioranni-riautnu de, makpesiay re rla' wutga ihru ida-ralm ida totpena ir pesiayni re yeher to' pa naruri-nalai pa rlernohora Uplerlawna ralma-riorni. Ir emolmolan nekama inona ida maka limni-lakni irannu-matni rawok pa rwo'la-rlekur de rlernohora o'ta-kriahlu ralma-riorni. 20 Ina-nara, mior oleka Yesus Kristus mlia' ihru ida-ralm ida. Ne la' E matmiatni pa emeknekama miy miana mmiati olek wa totpena yana mpiaror nohora owa'ana nohkeran di wniarorni-wnialaini me deullu-tatarni. Pede ina-nara hya' nrei piede miy e mhioli-mlieta pa emeka riy maka nohkeran di nodi plolli ma'ta la? Nihya'pa miy mliernohora deulu-tatra mak emkadina de, 21 maka ha riwra: ”Yana mheik la hadi, yan mi'ina hade, yana mliok la hade?” 22 Deulu-tatra maka ha rwatutu-rwaye'a re, rlernohora mamainia rimormiori ralma-riorni, maka rakot nohor to'a hya' maka edon nalo'on wali ne rhorwua, emeknekama ya'ana-yemnu maka la'pa ta'an doini-temun doin de nhorwua. 23 La' riy yamkekni de deulu-tatra mak emkade nodia kirkira-ralma-riora samomuou, yoma riy mak klernohora re rape'el la krei-iskola pa rkola tieru-rawur nehla rlernohora rimormiori wniarorni-wnialaini, me la'pa riy ramkek reria, de rtutga nhioli mak klol yawa, me rnahora-rnala'a ir inon wamueheni. Mere deulu-tatra re rakleha ruri-lai pia rhi' nan rimormiori pa rwali nhioratni me rolin nhioli-liet yatyatni mak ka'hira ralma-riorni la hya'a-hya'a to'a.
Miolin doinia nhiolia yatyatmi ululu yoma mpiali olek la rimormiori warwuaru
1 Ina-nara ama-hyali, la' dodo'ondi de, emolmolan nekama Uplerlawna Namori-nalewn olek mior rewre'wa Yesus Kristus la matmiati ralamni pede mliernan oleka mormiori warwuaru. Hade pede miatu mihak rer tio' hya' ed mak kden la Ilyamou-Watyatoha, la' gen miaka Yesus Kristus Namtatan la Uplerlawna walli malganna pa Nor rewre'wa Uplerlawna rodi plolli. 2 Ralma-riormi nod rer lia hya' mak kden la Ilyamou-Watyatoha me yana nhioratmi nden rer lia nohkeran di yala'ani. 3 Yoma mior rewre'wa Yesus mmiati olek pa miy edon mpiaror nan oleka nohkeran di gahani. Ne mior rewre'wa E' mmiori owa'an totpa miora Uplerlawna mlia' ihru ida-ralm ida. Ne riy mak edon kpesiay re edon rna'erit nana miy mormiormi warwuarmi di. 4 Mormiormi onni-ga'arni de nwatiawua Yesus Kristus. Ne hota Nmai owa'an de Enhita-nrepra namrehi-namda'ara. La' ler de mana hota miy mior E' talan wali. 5 La' emkade pede miolin doini hihi'imi-yapyapmi yatyatni-halalli mak kwatiawua it nhiolia rimormiorni. Yan memmemna milira-miliai, mireta-mihawa, me mhi' nana nhiol yatyata mak ka'hira ralma-riora onde mipal niana nohkeran di ralma-riorni me hyonni-hyanni. Yoma itapal nian nohkeran di hyonni-hyanni de emekwalima it tru'u-ttowr olek la uplera-upmati. 6 Yana mhi' emkare, yoma do'a-hala mak emkare er mak khi' pa Uplerlawna nahankerna-ralmha'arni nha'ata la riy mak edon katlina-katailla E'a. 7 Ululu de miy niek de miy ralammi nden rer lia nhiol mak emkade. 8 Mere dodo'ondi de mhioitio'ora-mtiahnei lia hare honona. Yana miwunu-miwenna, yanpa plet pa rarmi nha'ata, onde miaun targa. Yan memmemna mpiahoiti-mpiarenna onde idma nwohor weyata-ntatar weyata ida. 9 Yana idma na'ohpa-nalahar ida, yoma mormior ululu rora nhiolmi lietmi-ilu wniehwami ululu re, misral oleka wa. 10 Ne Uplerlawna Nhi' miy pia dodo'ondi mpiali olek la rimormiori warwuaru. Ne hota Uplerlawna Nhi' emkade pa nodi liarni totpa mliernohor reri E orgahani nhiolli lietni-illu wniehwani. Totpena la' mormior warwuarmi di, de miat nohor memna Uplerlawna. 11 Pede la'a miy mormior warwuarmi di, de mhioratdoin momuoga wniarora-wnialai maka rnaheri-rnahelta (nniawera-nniapakia) rira herni-gaini, de la'a wniarora-wnialai la'a Yahudi molla rora Yahudi atia'a, riy maka rsunat oleka me maka edon rsunat ma'ta. La' dodo'ondi de edonna rnawera oleka rira la mak kdella her li'iru-tat tio'ora, mak kpora-kdawra, mak marna-wuhura, ata-wa'ara. Rwaldioinia de hornama Yesus Kristus Nmeh'a neka ed maka kodi plolli la haneknek wawannu me E' ed mak kden la makpesiay hononit ihranu ralamni. 12 Ina-nara ama-hyali, mpiali olek la Uplerlawna mutnu-rahanu maka Ha Nwalir niana pa mlia' E gah wamueheni, maka Ensaynia. La' hade pede mormiormi de idma sniayni ida, me idma nhi' kalwied ida. Ne miy miana miatu mhiu'ru-mhielma, mtiutga ilu-wniehwa mnapla la ida. 13 Idma natu nhur niohora-npat niohora ida, yoma la' riy ida nhoratdoin oleka, me miollia oleka ida do'oni-halli. Orgahi-Orha'a Nhuria ralamni pa Enamou-nawitna miy lia do'omi-halmi, pede miy miana mhiur niohora-mpiat nohora (mhioratdoinia) rira do'oni-halli. 14 Onni-ga'arni meman de, idma natu nhi' kalwied ida, yoma ralam kalwied de ed mak khi' wutga miy pia mlia' ihru ida-ralm ida emek kla' nana Uplerlawna ralamni. 15 Yesus Kristus ed mak khi' itora it rimormior wialli pa tkalwieda. Pede dodo'ondi de mpialerna totpa idma nkalwied la ida. Yoma Uplerlawna Npolga miy pa mhi' emkade, yoma emolmolan nekama miy mlia' olek la inona ida. Ne mi'uli-miwed reria Uplerlawna. 16 Mhioratreria Yesus Kristus lirni-tunnu me mliernohor reria yoma miatu mkien reri E lirni-tunnu la miy ihrami ralamni. Emkade pede idma natu nwatutg ida, me idma nano'a-na'atg ida nnairia kirkira-ralma-rior samomuounu. Me miatu mpiatunu-mpiahniara pa mi'uli-miwedia Uplerlawna de miala tunu-nhiara krei-iskola pa idma nodi id pesiayni la ga'a. Mpiatunu-mpiahniara de miodia ralma kalwieda (terima kasi) la Uplerlawna. 17 La' hya' ed mak miltieri-mitiana onde mhi'a-myapia de, mhi' emeknekama mak kla' nana Yesus Kristus ralamni, pa emolmolan nekama mak klernohor E'a rhi' nana. Me mhi' hare de mi'uli-miwed reria Uplerlawna-Mempulwatnu it Amlawanni de, lola Yesus Kristus.
Upa-a'na, ina-ama me ata-wa'ara nora matromni re mormior warwuarnu
18 Ina-nara patke'a miy, die miatu mhiu'ru-mhielma hapmi muanke'a yoma nhioli-lieta inhatta olek hade wa la'a riy mak kor olek Itmatromlawanni rla' ihru ida-ralm ida. 19 Ama-hyali maka kmehlima olekwa. Miatu mtiulla-msiaynia hapmi. Yana mmiaklekal la. 20 Upa-a'na, miatu mi'unni-mimta'ata mitlina-mitailla inmi-ammi la hya'-hya' to'owa yoma hade de ed mak kla' nana Orgahi-Orha'a ralamni. 21 Ama miy miana, yana mmiaklekal la a'nami rpa ir ralam ramehra yoma hota ralma-riora worworga pa kirkirni-ralma-riorni edon ramtemna. 22 Ina-nara ama-hyali mak kla'a hopopna-lili'iru ata-wa'ara, miatu mitlina-mitailla upmi-matrommi la' nohkeran di wawannu la'a hya'-hya' to'owa. Yana mtiot pa mimta'ata yoma e ratiak reri miy. Yana mtiot ya'ulmi la ira. Mere mi'unni-mimta'ata de mial ihru ploi-ralma ple'era yoma miy e miatu mhiu'ru-mhielm olek la Itmatromlawanni. 23 Kniari hya' to' maka upmi-matrommi nala tiy miy die, yana hermi-gaimi rpetna, mere mtiulla-mkiar die miala ihru ploi-ralma ple'era me mhima-mrie'a emeknekama miy edon mhima-mrie'a rimormiori mere Itmatromlawanni. 24 Mhi' emkare de onnila miat niohor oleka de hota miy mliernana miy kaimi la Itmatromlawanni maka Nhi'targ oleka pa emeka wniahlani, yoma plollolli de Itmatromni Yesus Kristus ed maka miy e mhima-mrie'a. 25 Ne la'pa riy maka khi'a hala, de riy de orgahi ed mak ktutulu-kakwara hade yoma Orgahi-Orha'a edonna Nkei-nhelta rira herni-gaini.
1 Ina-ama makla'a upa-matroma la' hopopna-lili'iru ata-wa'ara re, mhi' samomuou lia atmi-wa'armi re. Mhioratreria! Miy miana emekwalia hopopna-lili'iru ata-wa'ar la Uplerlawna la'a Ilyamou-Watyatoha.
Paulus nwak pa rsumbain reri e'a
2 Ina-nara ama-hyali, yan mininmi la sniumbaini. Mere mi'ererma. Me miatu msiumbain de mi'uli-miwed reria Uplerlawna. 3 Msiumbain rer wali ami totpena Uplerlawna Nal am pia amakot nohora lira-tunu mak kodia lir yawunum la'a Yesus Kristus yala'ani maka ululu de Uplerlawna edon Nakot nohora ma'ta. La' hade pede dodo'ondi de e rkeni a lia roma nhio'la ralamni. 4 Msiumbain reri mai a'u totpena Uplerlawna Nala lirni-tunnu mai a'u pa a'ukot nohora Yesus Kristus yala'ani de rira rna'erit nana, yoma hade ed mak kla' nan Uplerlawna ralamni.
Makpesiay nhiolli-lietni illu-wniehwani la' ler maka iror wutga mak edon kpesiay
5 La'pa mior wutga riy maka edonna kpesiay de, miala yehwami-liakatmi, ltiermi-tianmi, me kirkira-ralma-rior samomuou ma mtiutga hya' ed mak kaplol la ira. Mhioratreria, totpena la'pa mior mak edon kpesiay re, de mniairia ler de pa mtiutga nhiolmi-lietmi mak kaplola onde mikot nohora Uplerlawna lirni-tunnu. 6 Ne la'pa miltier die, mhiu'ru-mhielma me mniairia lira mak kla' nan ir ralamni. La' talan emkade pede miat niohor la emkameni la mpiahla nana hya'-hya' maka ratiana tiy miy la'a miy pesiaymi de.
Paulus nwak kalwieda la ira
7 Tikhikus, de a hyal miamni mak kden rer lia ralam mamni, hota nodi kota-nal de'eta tiy miy la'a hare honona maka aliernan oleka la' handi. Endenrer lia (setia) nhima-nre'a la a kniar mamni la'a Orgahi-Orha'a. 8 Hya' mak karei pia aghopan pa ntiy die totpena miat niohor ami emkameni la' handi, ne totpena miy miana ralammi yana nmawla. 9 Hota Onisimus nor Tikhikus talan pa rtiy hande. Onisimus de emekwali miy pia mpiatiawua leta ida. E' de it hyalli maka tsaynia me mak itpesiaya yoma nhiolli-lietni samoga. Enor Tikhikus hota er mak kakot nohora hya'-hya' maka amhi' nana re honona la' handi. 10 Aristarkus makden rewre'wa la mai a lia roma nhio'la ralamni, nwak kalwieda tiy miy. Emkade walia Markus, Barnabas garni de yoma rrora upni ida. Miy e mliernan horat mak a'ukot nohor Markus de tiy miy. La'pa hota entiy miy die, miy mpiatrom nan e' la kalwiedni. 11 Me Yesus maka nanni walia Yustus e na'enyat wualia kalwieda tiy miy. Enekneka ir wotelu rmeh'a, maka kwatiawua makden Yahudi re, pa ror a' pua mala' nohora a kniar mamni la Uplerlawna. Ir er mak ktulan mai a'u pede a ralmu nahepru. A kniar miamni de totpena riy ratlina-ratailla Uplerlawna pa emeka ir Rayni. 12 Epafras na'enyat wualia kalwiedni tiy miy. E' mana emekwali miy pa mpiatiawua leta ida. Enkar wial lia Kristus Yesus tulanni-kniarni. Nhi'inde nsumbain mamain tiy miy. Nwak rer mamain la Uplerlawna totpena pesiaymi naruri-na'orta me totpena miat niohor memna Uplerlawna lirni-tunnu nnia'eratni, me hya' ed maka Uplerlawna ralamni Nala. 13 Amueh'a nek de umkek memna la e nkar tioto' meman pa nodia miy miora makden la leta Laodikia, me leta Hierapolis pesiaymi la'a ga'a. 14 Dokter Lukas maka itsayn de, me Demas e ra'enyat wuali kalwiedni tiy miy. 15 Mtiulan pa mikot walia a kalwied mamni la' it inni-narni amni-hyalli makpesiay, makden la leta Laodikia me la' walia it narni Nimpa, me la krei mutnu mak khi'a krei lia Nimpa romni nayanni. 16 La'pa mpiaik ahorga horat di la krei mutnu gaini ralamni la leta Kolose, demade mial walia horat di la'a makdena Laodikia rpaikia la krei mutnu makden la Laodikia totpena honona ratlin nan walia. La'pa emkade walia miy miakden la Kolose mpiaik walia horat maka a'uenyat oleka la krei mutnu la Laodikia. 17 Me mikot la Arkhipus pa nhi' ahorga e kniarni maka Orgahi-Orha'a Nala yoma nora Orgahi rla' ihru ida-ralm ida. 18 A'u Paulus wuaka kalwieda-paitiot tiy miy, ne amueh'a neka ed mak ktulsi kalwied di. Yana mhiortaplinga de a'g ed ma'ta la roma nhio'la ralamni. Awuak de Orgahi-Orha'a Nala ra'ani-pallu nanaloi-nanatar nan miy. A kalwied mamni, Paulus
Paulus nwak kalwieda
1 A' di, Paulus. Aghorta horat di tiy miy ina-nara ama-hyali la'a krei mutnu makden la Tesalonika, mak kler olek la Uplerlawna makla' Am la it hononita, me Itmatromi Yesus Kristus mutnu-rahanu. La a wotel am di de Paulus, Silas, me Timotius, ampak de Uplerlawna it Amlawanni de Nora Itmatromni Yesus Kristus pena ed mak kala ra'ani-pallu me kalwieda-paitiota tiy miy.
Makden Tesalonika pesiayni nora wniehwani-liakatni
2-3 Amhoratreria emkameni pa mkiari lia Uplerlawna kniarni ralamni yoma mpiesiay E'a, ne ralammi kalwiedni, pede mhi' nhiurliwtu-wnialodaw la tniulan la riy. La' walia mtiutulu-mikwara yamuki-yama'ala, yoma mhia'ara toto' miy aranmi la Itmatromni Yesus Kristus, yoma hota Nawali pia Nmai pa Nalewna miy. La' hade pede ina-nara la'pa amsumbain la Uplerlawna, de nhi'inde amakot nohora wniehwami-liakatmi re, pa ama'uli-mawed reri Uplerlawna, makla' am la it hononita, onnila miy hononmi wniehwami-liakatmi re. 4 Ina-nara ama-hyali mak Uplerlawna ralamni Napal niana! Amatga de Uplerlawna Naliri-nalioh nan oleka miy pa mlier la E'a. 5 Yoma la'pa amakot nohora Uplerlawna Kot Kalwiedni-Paitiotni, de ami edonna mparla a yatu wamueh' mamni mere Uplerlawna Nhiw Lululli Nodi plolli la a wawan mamni, pede nur mamni nkerna la plol wawna. Hade pede amat muemna de Uplerlawna plolli-mneheni Nkar lia miy ihrami ralamni. Ne miy miana miat wualia de la' lera amden wut tiy miy a hihi'a-yapyap mamni wniatutu-wniaye' mamni onnila miy rerieimi. 6 Amatga de Uplerlawna Naliri-nalioh nan miy, yoma la' ler maka itto'or doin la de, maka mlier olek la nununi-wawuaunu, de wniehwami-liakatmi re rlernohora agora Itmatromlawanni wniehwa-liakat mamni la' ler maka amlernana yamuki-yama'ala. Wniehwami-liakatmi re rlernohora wniehwa-liakat mamni, yoma la' lera mliernan yamuki-yama'ala, onnila amodi Uplerlawna Kot Kalwiedni la' tiy miy, ho'mana Uplerlawna Nhiw Lululli Nodi plolli la miy, pede miodia niniha-malmiali ma mrieiniana-mia'nana. 7 La'a hade pede miy emolmolla nhior lawra nora ahwa lioda (contoh) la'a riy maka kpesiaya Yesus, la'a Makedonia me Akhaya liewnu. 8 Yoma onnila mikot nohora Uplerlawna Kot Kalwiedni, pede Orgahi-Orha'a nanni nwewar la Makedonia me Akhaya ne hade edonna nmeh'a, mere hya'a maka ha mpiesiaya la Uplerlawna de nwewar la noha kperanni pede ami edonna makot nohora owa'an la' ira. 9 Yoma riy liawanni rakot nohora miy lia' lerni ha mrieinian am die pa makot nohora Uplerlawna Kot Kalwiedni. Rwahaur nohor la lera mtikil doinia atiehrami pa miwaldioin pa mlia' hopopna-lili'iru la Orgahi-Orha'a Uplerlawna-Mempulwatnu, de Uplerlawna inhatta hade, mak kodi plolli-mneheni. 10 Rakot nohor walia la'a hota emkamenila mhia'ar aranmi la Uplerlawna Wutmueheni-Laimieheni Nwatiawua Ilyamou-Watyatoha de, de Yesus maka Uplerlawna Namoria la matmiatni ralamni. Yesus E' inhatte, maka kamori-kalewn it la Uplerlawna ralam mehrani maka hota ntuin la noh marna.
Paulus na'ala kniarni la Tesalonika
1 Ina nara-ama hyal miy re, miy mieh'a miatga la'a tniomra-nniah'a mamni tiy miy die edonna nwalia la hamamuamua. 2 Hononmi miatga de la'a lerni mak ami edonan mte' ma'ta la Tesalonika, de amlernana yamuki-yama'ala la'a Pilipi, me a tlin mamni npen lia yahe'i-yamali. La'pa emkamenila mutlialawna rhi'a oruli-augewat la ami, mere tniomra-nniah'a mamni edonna nlol hamamuamua yoma ita Uplerlawanni Nal oleka iwarni pa ma mpadieh'a, me ma mparan pia makot nohora E Kot Kalwiedni-Paitiotni tiy miy. 3 Ina-nar miy re, la'pa amakot nohora Kot Kalwieda-Paitiota, de ami edonna modia riy la talla palkiolatni, onde ami edonna modia kdiori-kdieha yoma ami edon mparora yatyatni-halalli. 4 Rwaldioinia la de, la' am di de, Uplerlawna Nawerta-nataili olek ami, totpa Nat niohor memna a ihru mamni-ralam mamni. Nhior nioka Ntutmuata-nkewra' olek am pia, pa makot nohora Kot Kalwieda-Paitiot de. Pede hya' to'a maka amakota re de, nlola Uplerlawna ralma-riorni pede nhi' amikria E' ralamni. Ne ami edon modia lira wonikri-woliamni la riy. Mere Uplerlawna Nmeh'a neka Nat niohora a ihru mamni-ralam mamni. 5 Miat niohor walia de, ami edonna modia nur mi'na pa amlernana kupna-kai, onde ami edon mtiota-mpiudi riy. Uplerlawna e Nlin nohor-nmat nohor ami. 6 Am miana edon mpaka ya'uli-yawed la riy nekneka wawannu, onde amteku miy pia mi'uli-miwedi ami yoma ami er makodia Yesus lirni-tunnu tiy miy. 7 Mere amden wut tiy miy die, ampehwa-mlakat de emolmolla it inni ida e na'oka-nawehera a'nani de amodi lira mnapla. 8 A sniayn mamni di tiy miy, nhi'nande amahepur pa ama makot nohora Uplerlawna Kot Kalwiedni-Paitiotni tiy miy. Mere hade edonna nmeh'a, mere la' lera-ler to' pa amtulan la' miy, la tulla-kniari, kleha-lara, la'pa hya' to'owa. Yoma a ralam mamni nmolu-nhelam nohor miy. 9 Matiala ina-nara e mhioratrer mia'ta la' ler maka amden wut miy pia amakot nohora Kot Kalwieda mak kwatiawu Uplerlawna tiy miy, de amkar lia lelera-melmela, totpena ma matu'utu ya'an mamni-yemun mamni, hewewat mamni-naniair mamni totpa yana miala hare honona mai ami. 10 Ina-nara ama-hyali mak kpesiay oleka talla yamori-yalewna, amatga la a inon mamni de mpehwa ploi-ple'er pa amakleha do'a-hal la tiy miy. Maka ha rweta la do'a-hala de am edonna mho'ola kotni-mhai lia memannu (do'a-hala de ami edon mheik la). Hononmi mlin reri-miat reri ami, la'pa Uplerlawna ora kniari mana matni reprepra-tlinni natnia'wa. 11 Miat niohor olek walia, de mpahi'a-mpayodia miy inon wamueheni, de emekneka ama ida e nwahi'a-nwayodia a'na wamueheni. 12 De am mala nnio'a-niatu mak kodi miy lia ga'a, me amdeh'a miy lia plol wawna, totpena wniehwami-liakatmi re rla'a Uplerlawna ralamni emek riy mak kla' oleka Uplerlawna limni ralamni nhi' nana-nyap niana. Yoma Uplerlawna Npolu miy pia Nhi' miy lia kamieheni pa mrie'ela miwierat la Uplerlawna geni mak samomuou muemna mak Enodi plolli la emeka Ray. 13 Ina-nara ama-hyali, id wali etla la' hadi, de nod miamainia am lia ya'uli-yawedi la Uplerlawna. De de la' lerni la amakot nohora lir maka kwatiawu Uplerlawna tiy miy, de mimlieretniekla mrieiniana-mia'nana pa emolmolan nekama Uplerlawna Nmeh'a Nakot nana. Ne plol toto' pa lir de rimormiori nohkerna lirni atia'a de, mere Uplerlawna lirni. Ne, onnila Uplerlawna lirni de, pede Uplerlawna e Nkar lia makpesiay Kristus miy ihrami-ralammi. 14 Ina-nara, amatga de mpiesiay oleka Uplerlawna lirni, yoma yamuki-yama'ala mak ha mliernana la' ler maka mrieinana-mia'nana Uplerlawna lirni, de ita mutu kreiwialli makden la' Yudea mak kler olek la Kristus Yesus de, mana rlernan olek walia emkade. Yoma rlernan kropna-krieutu la Yahudi mak edon kpesiay ma'ta. Emkade walia Tesalonika miy mliernana kropna-krieutu la makden Tesalonika mak edon kpesiay. 15 Yahudi mak edon kpesiay re er maka kwenna Itmatromni Yesus Nor makwohorulu-ktatrulu (nabi). La' ir wal pia rhokargot ami. Rhi' riy honona la arwalli pa Uplerlawna mana edonna Ntelan nana-naut nana re. 16 Yoma ir er maka kteri-ktaw ami, totpena yana amakot nohora Kot Kalwieda mak kodia yamori-yalewna la' riy maka Yahudi atia'a. Hota emkade mamain pa Yahudi re ra'ititar rer lia do'oni-halli, nhi'nande la'pa rhor wutga do'oni-halli re, de ntut mueman la' liol genni. Ne la'pa la'awa dodo'ondi wa, de Uplerlawna ralam mehrani pede lodanni mana nweher nana liol genni me nwair doinia wniau genni (rlernana Uplerlawna niukum lawanni).
Paulus ralma-riorni ndawar rer mamainia makden Tesalonika
17 Ina nara-ama hyali, miy hononmi, la'pa emkameni pa riy rhi' la'a-rhi' mai ita, totpa it idma olieta-patoga mai ida la'a lera ho'ke'eni di, mere makaltieri riwra lyanti ntuini etia it yamkekni mere tah'i lawna ed mak khaur reria noha-rai, am mhorat nan meman miy die, de amiwra plet pa amawali owa'an tiy miy. 18 De amparor pa mtiy mtomar tiy miy ne a orgah'u uhak meman talan pa atiy miy die mere hegana amlawanni nteri-ntaw ami. 19 Amiwa mtiy miy, yoma plollolli de miy er maka kwarana a aran mamni pa miod am lia ralam hepru. Yoma hota Orgahi-Orha'a Yesus Nmai tieman pa tora tapal wiutu, de miy di ed maka karur nian am lia tnikilgeni-nhia'argeni la Uplerlawna gaini ralamni. 20 Edonna nhal et miemna la' miy pede a tnikilgen miamni naruri, me a nhia'algen miamni naplola. Miy miod am lia yamuki-yahepru lawna.
1 Ina-nara, yoma ayaherer mamni ndawar rer miamainia miy lia Tesalonika, de la'pa la'aw hohoni dewade, am ta'eni mtahan nana a ralam mayo' mamni pede ametlia pa ameh'a mparin tiar lia' Atena, 2 ne ami e mhopan pa it hyalli Timotius ntiy miy die. Yoma Timotius di, e nkar wialia Uplerlawna kniarni pede amora mkar wiutu pa makot nohora Kot Kalwieda-Paitiota la'a Kristus. Amhopna e ntiy die, totpena nhedu-ntehra miy pia mpiesiay reria Yesus Kristus. 3 La'a emkade totpena la'pa riy id la miy miana edonna mpiadur la li'iru, onnila yamuki-yama'ala. Yoma orgahami miat wualia la'a yamuki-yama'ala kropna-krieutu re, de Uplerlawna Nror targ oleka hadella mai ita. 4 Plol toto' de la'a lerni la itden wutu, de nhi'inde amakot nohor oleka miwra hota itler la lui-nuhru, polpuol ina-wakwak ama, ne dodo'ondi orgahami mimkek toto' memna de yala'ani de emekto'a amakot oleka. 5 La' hade pede, la'pa a ta'en niana utahan nana a ralmu, dewade amueh'a neka ghopan doinia Timotius pa ntiy miy yoma a'umta'at pa yanpa mpiadur la li'iru la pesiaymi la Uplerlawna onnila ramuk-rama'al miy. Aghopna Timotius ntiy, yoma totpena agat muemna, la'a emkamenila miy pesiayni la Yesus Kristus pa mlier la ga'a. A'g e umta'ata yanpa hegana amlawanni mak khi'inde nodi it la totota-wudwiudi ralamni, nkar lia miy ralammi pa mhi'a de lol to'ama, pa a prehen mamni hamamuamua.
Timotius nodia makden Tesalonika kotni la Paulus
6 Ne na'nam di Timotius nwatiawua miy die pa nmai owa'ana, pa nakot olek am pia la' lira mak kla' it ralamni, de emkamenila miy pesiaymi la' Kristus yala'ani, ne miy idma yara'a-yapalmi la' rimormior wialmi. Enakot nohor walia la'a nhi'inde miy ralma-riormi ndawar rer miamainia ami, yoma la' a kalwied mamni tiy miy. Ne miy e miherer pa itwatrom pali, emekwalima am piali. 7 La' hade pede, ina-nara ama-hyali miy hononmi, mitlina me mimkeka la' ler di, de amler la kropanni-krieutnu la'pa polpuol ina-wakwak ama mere nwaldioinia de amamuki-mahepru. Yoma matlin nana miy kotmi, de miy pesiaymi la' Yesus Kristus de, ed maka kod am lia ihru ploi-ralma ple'era mai ami. 8 Pede la'pa dodo'ondi de, hota a ralmu namtiertiernu hornama mtiutrier kdeded toto'ola Orgahi-Orha'a. 9 A kalwied mamni-paitiot mamni penpuenu-nanahala Uplerlawna yoma Uplerlawna kniarni la miy ihrami-ralammi nod miamainia am lia ralam hepuepru pa ma'uli-mawedia Uplerlawna-Mempulwatnu. 10 La'a lelera-melmel de amsumbain la' E'a pa ampak toto' meman la totpena amlernana talan pa it idma nwatroma-ntahnei ida, totpena amhi' aplola hya' mak edon ntut ma'ta pa nhi' arur miy lia pesiaymi la'a Yesus Kristus. 11 Dodo'ondi ampakwak de Uplerlawna-Mempulwatnu Nmeh'a neka, makla' Ama la' it hononita, me Itmatromni Yesus pa Nwalle'era talla mai ami totpena twatroma-ttahnei owa'ana. 12 Me ampak rer lia Orgahi-Orha'a pa Nhi' miy pia idma nhilpai-nmanat ida, ne yeher to'ama nhiol kalwiedmi re mana mtiut walia la riy honona, pa emekwalia a nhiol mamni tiy miy. 13 La' nhiol kalwiedmi mak emkade, pede Orgahi-Orha'a hota Nhi' aruria miy ihrami-ralammi pa edonna mlier la do'a-hala ralamni, pa la'pa hota la' ler maka Itmatromni Yesus Nmai pia Nlidan nana-ntaur nana E hopopanni-lili'irnu nor wutga riy honona mak kla' oleka E limni ralamni, de hota miy di de mikleha do'a-hala kuku' eti la'a Uplerlawna makla' Am la it hononita gaini ralamni.
Mormiori-dardiari maka kla'a Uplerlawna ralamni
1 La'a hare honona de ami e mal walia olek la' miy wia ina-nara ama-hyal miy re la'a loi-talla maka emkameni, totpena mormiormi-dardiarmi re rlernana Uplerlawna ralamni. Meman neka la mormiormi-dardiarmi ntutg olek hade wa. Mere hota dodo'ondi de, onnila miora Itmatromni Yesus mlia' ihru ida-ralm ida pede ampaka toto' tiy miy pia yeher to'a pa mlier la ga'a, yana mpiadur la' lir maka amakota re. 2 Yoma miatg oleka loi-talan mak amakot oleka la' miy wia, de amlernohora Itmatromni Yesus plolli-mneheni (kuasa). 3 Uplerlawna ralma-riorni de emkadille, totpena E Nhi' miy lia E kamieheni mak kakleha do'a-hala. De olietmi la yalira-yaliai. 4 De totpa miy hononmi miat niohora pa yana mpiehwa hakomu-hakam lia heri-tio'ora pa milira-miliai. Mere milola-mila'a, de miatu mi'unni-mimta'ata rira inni-narni, de totpa ilmi-wniehwami ndella plol wawna la' patke'emi-muanke'emi re. 5 Yana mhi'a saworni-sawarna emekneka riy mak kaplin niohor ma'ta Uplerlawna pa nhi'inde ralira-raliai. 6 La'a loi-talla maka emkade pa riy id mana yana saworni-sawarna inni-narni patke'a rora muanke'a makpesiay, onde nwaror yatyatni pa na nwotra inni-narni. Mitiak samomuou! Yoma la' ler ululu, de amakot oleka tiy miy wia de hota Orgahi-Orha'a Nukmua riy mak kalira-kaliai. 7 Yoma Uplerlawna Npol it de, edonna Npol pua mai pia talira-taliai. Mere Enpol totpena Nhi' it la E kamieheni mak kakleha do'a-hala. 8 La' hade pede riy meni mak kwanikli-kwayotlia wniatutu-wniaye' di de, hade edonna nwayotlia wniarora rimormior wialli, mere e' e nwayotlia Uplerlawna mak kal tiy miy, E Nhiw Lululli mak edonna kwotar la do'a-hala ralamni. 9 Ina-nara ama-hyali, hota ami edonna makot nohor la'a horta ralamni, la'a emkameni pa mpiehwa-mliakta kalwiedwed la'a inmi-narmi maka it tor wutga pa pesiay ida. Yoma miy orgahami mliernan olek la Uplerlawna plolli-mneheni (kuasa), pa idma nla'a-nmai id la nhioli kalwieda-paitiota. 10 Ne plol toto'a de nhioli-liet emkadi, de mtiutg oleka la it inni-narni honona makden la Makedonia. Mere ina-nar miy rooo! Ampakwak de nhiolmi mak kalwieda-paitiot di, yeher to'a pa ra'ititar rer lia. 11 Mimtie'el nohora, ne mihmiakur la kniari pa mliernana ya'ana-yemnu. Ne yana mi'itra-milawan la rira lirni-tunnu mak kodia miy lia klieratni. Yoma amakot oleka tiy miy wia, de orgahami mtiulla-mkiari pia mi'ina-miemnu. 12 La'pa mhi' emkade de, hota miy edonna mhia'ara aranmi la riy meheni, ne reriehenu de riy mak edonna kpesiay Yesus Kristus hota ramkek tiy miy, de ratu rhu'ru-rhelma.
Itmatromni Yesus maimiaini
13 Ina-nara ama-hyali miy hononmi, amiwra makot la tiy miy totpena miat muemna de, la'pa makpesiay ida nmati olekwa de, yana miy ralammi nmayo'a, emeka riy maka edon kpesiay Yesus ma'ta pa rakleha nhia'ar gen lia temni. 14 Yana ralammi nmayo' emkade, yoma itpesiay oleka, la' Yesus Nmati olekwa, noma Nmori owa'ana. La' hade pede itpesiay walia onnila Yesus hihi'ini-yapyapni de, pede hota Uplerlawna Namori owa'ana riy honona mak kpesiay, mak kmati olekwa, totpena rmori niohor Yesus. 15 La'a makpesiay mak kmat die, hadi ed maka Orgahi-Orha'a Nmeh'a Nwatutu-nwaye'a, pede amiwra makot la tiy miy, de hota Itmatromni Yesus Nmai, de hota makpesiay mak kmormior mia'ta la'a ler de meman neka edonna nala' ul pua nwadieh'a genni. 16 Mere hota Itmatromni Yesus Nwatiawua Ilyamou-Watyatoha pa Nmeh'a Nernu pa Nhopan doin makpesiay mak kmati olekwa pa ramori owa'ana, de hota Uplerlawna hopopna-lili'iru o'ta lawanni mana nhar lirni de nahmuakmuakru, ne Uplerlawna noknokni mana nalira totpena ra rpanulga. Pede riy makpesiay re mak kmati oleka re ramori plein ulga la matmiati ralamni. 17 Nhorwua de makpesiaya mak kmormior lia ler de hota ror rewre'wa pa itarian momuou lia darta-kakma ralamni totpena tora Orgahi-Orha'a Itmatromlawanni twatrom la darat letgara, pa tor wutga Orgahi-Orha'a tden wut pua nodi liarni. 18 La' hade totpena miy idma nahepur nan ida ralamni de miala nnio'a-niatu muaka amakota la'a Yesus maimiaini ri la tiy miy.
51 Ina-nara ama-hyali miy hononmi makden la Tesalonika. La' horta ralamni di ami edon makot nohora de hota moweni onde wenu-wolan meni pa hya' maka amakota re rtutu-rte'ewa. 2 Yoma hota miy mieh'a miat olek walia la'a plollolli de, hota Itmatromni de Nmai emolmolan nekama mak kwuri-kgalmu mak kamnelu-kamna'a la mela letargara. 3 La' ler de riy riwra noha e namtie'te'ela yoma kokokna-rariarni, wunu-ara hadamonna la nohkerna wawannu. Mere la'pa nte'ela ler dewade plinu-plinnianamde rler la yatyatni-halalli yatlorni-yatra'ani, ne la'pa riy id mana, emolmolla i'na maka edonna klewan la dari matni. 4 Mere la'a ler de pa Yesus Nmai owa'ana, hota makpesiay miy edonna mhiedu, yoma miy edonna mmiori-mdiar lia melmelli-kalkalamni pa mak kwuri-kgalmu nhi' miy pia mhieduma. 5 Yoma miy hononmi de riy maka kmori-kdar lia noha lelerni. Rhor nan olek miy lia noha hititni-repreparni, it edonna tler wut lia riy maka kmor lia melmelli-kalkalamni, onde riy mak rhor wutga la riy mel'utni-malienni. 6 La' hade pede it di yana tlernohora riy mak edon kpesiay mia'ta pa tmeh'a tanin ita. Mere twerwer it matni ne ta'ereram la it temni ne tatu todi it inonni. 7 Yoma nhi'inde mela nahaya rira matni ne mak kemun nana mana rpehera-rma'wu. 8 Mere it di de, tla' oleka noha lelerni mak kodia hititni-repreparni. La' hade pede ta'ereram la it temni ne tatu todi it inonni. Emekneka mak ka'ara nnairi tera-ra'pa pa natiak inon wamueheni, itatiak it pesiayni de it hmuakarnu yana nwaler la' Orgahi-Orha'a, ne ittulla-tsaynia it rimormior wialli, me tsa'ar it aranni la Uplerlawna maka hota kamori-kalewna ita. 9 Hota itler la yamori-yalewna yoma Uplerlawna Nwalir ita de edonna ntot it la'a niukmu, mere Nwalir it totpa itler la yamori-yalewna onnila Itmatromni Yesus Kristus. 10 De Yesus Enmat die yoma it rerieini. Totpena la'pa hota Enmai, de la'pa itmati oleka me edonna, de itlernana mormiori pa tler wut lia E'a. 11 Hya' maka a'ukota di naplola. La' hade pede mhioratreria, mpiahu'ru ralma-riora, totpa mhi' arur miatmiati hmuakarmi emekneka maka miy e mhi'a oleka re.
Paulus nnio'oni-niatnu korkorni
12 Ina-nara ama-hyali miy hononmi, ampak de mi'unni-mimta'ata riy mak kar tioto' meman la' Uplerlawna kniarni onnila miy rerieimi. Ir er mak kla' ina-am tiy miy la'pa rano'a-ra'atga miy onde rpolliohora miy pia rhi' aruri miy pesiaymi. 13 Miatu mhiu'ru-mhielma, de miatu mtiutga ralam kalwiedmi la' ira, yoma mhioratnana rkar lia Itmatromni kniarni ralamni. Yana mihuri-miwo'ora, mere mdiella mtiertierannu ralamni. 14 Ampak wal tiy miy totpena mpiolliohora riy maka kahmena kari. Mino'a-mi'atga, mial lir la' mak kamta'at lawna re. Mhima-mrie'a mak kakleha ruri-lai, ne miatu mhiu'ru-mhielma la rimormiori wialmi la'pa rhi' yatyatni la' miy. 15 Mitiak reria totpena yana idma nwahla id la yatyatni-halalli. Rwaldioin la de hota wniarormi nod rer lia wniehwa-liakta kalwieda-paitiota la'a makpesiay me la'pa riy honona. 16 Miy mhiakur rer lia muki-hepru, 17 ne mirur lia sniumbaini. 18 La'a hya'a to'a miodia ya'uli-yawedi la Uplerlawna yoma nhioli-lieta ilu-wniehwa emek hari, de er mak Uplerlawna Nahaka tiy miy, emekwalia riy maka kmori-kdar wut lia Kristus Yesus. 19 Yana miodi plolli la Uplerlawna Nhiw Lululli, 20 de yana mpuar nana hya'a maka Uplerlawna Nhiw Lululli Nhopan pa riy rakota. 21 Rwaldioin la de nnio'a-niatu honona miwierta pleinia la ralammi, ne la'pa kalwieda de mliernohora. 22 Mihaldoini inonmi la'a nnio'a-niatu mak kodi miy lia yatyatni-halalli honona. 23 Dodo'ondi ampak de Uplerlawna mak kala kalwiedni-paitiotni, Nmeh'a neka na Nhi' miy pia mlia'a riy maka toto' meman pa kla' E kamieheni. De de ampak la Uplerlawna pa Nlin reri-nmat rer miy la' ihrami-ralammi ulatmi-temmi, totpa yana mhieik la do'a-hala pa la ntutu-nte' meman la' ler maka hota Itmatromlawanni Yesus Kristus Nmai owa'ana. 24 Uplerlawna ed mak kpolg oleka miy wia, totpa mhi' E kamieheni mak kakleha do'a-hala, ne plollol de hota Enhi' nana yoma hya' ed maka Enakot targa hota plol toto' pa Nhi'a. 25 Msiumbain reri ami, ina-nara ama-hyal miy re. 26 Mpiatroma-mtiahnei die idma nhar lirni la ida, mpiapahar lima, mpiare'et mat la ida emeka mpia'ina-mpianar la'a wutu ida-lai ida (kristen). 27 La'a Itmatromni Yesus plolli-mneheni (kuasa) pede awuak de, totpena mpiaikia horat di la'a ina-nara ama-hyali mak kpesiay oleka E'a. 28 Mpak de Orgahi-Orha'a Itmatromlawanni Yesus Kristus, Nala ra'ani-pallu nlernohor reri miy. A kalwied mamni, Paulusa, Silas, Timotius
Paulus nwak kalwieda
1 A' di Paulus, aghorta di tiy miy, ina-nara ama-hyali la'a krei mutnu makden la Tesalonika. Miy miak kla' oleka Uplerlawna, makla' Am la it hononita, me Itmatromni Yesus Kristus mutnu-rahanu. La' am di de Paulusa, Silas, me Timotius, 2 ampak de Uplerlawna it Amlawanni de Nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy.
Paulus na'uli-nawedia Uplerlawna onnila makden Tesalonika pesiayni
3 Ina-nara ama-hyali, ama'uli-mawedia Uplerlawna, onnila miy pesiaymi. Ne meman neka la a kniar miamni de ha yala'ani de emkade. Yoma miy pesiaymi di yeher to' pa narur lia Yesus Kristus, ne nhi' wal pia miy rur wial lia nhiolia kalwieda-paitiot la' idma ntulla-nsayni ida. 4 Miy kalwiedmi emkade pede nhi'inde amla mtomra-mnah'a la Uplerlawna kreini mutnu, de ameh'a neka mpahaur nohor mamain miy lia ira. Amahepur nande amakot nohor miy pesiaymi la'a Yesus Kristus, la'pa mlier wal lia kropna-krieutu nniahora-nniala'a nodia pa la' dodo'ondi, mere la' hare honona de miy edonna mpiadura. 5 Mlier la kropna-krieutu nniahora-nniala'a, mere miy edon mpiadura, pa nmeh'a namemieheiya, de hota la'pa Uplerlawna Nhudi-npara rimormiori la watghudi lokarni, de Uplerlawna hihi'ini-yapyapni de naplola, edon nhala. Pa hota Uplerlawna Netlia de, miy er maka Uplerlawna Ntutga pa mlier la gen miaka Uplerlawna Nodi plolli emeka Ray pa nodi liarni. Yoma dodo'ondi mlier olek la liwtu-odwa lui-nuhru, yoma Uplerlawna Nodi plolli mai miy lia nohkeran di. 6 Hya'a maka Uplerlawna Netlia la'pa Nhudi-npara rimormiori la watghudi lokarni, de naplol memna. Hota naplola pa Nwahla riy maka knutin-kdahla miy, de nhiolli-lietni. 7 Ne la'pa miy lia dodo'ondi, de mlier la kropanni-krieutnu emekwalia ami. Pena Uplerlawna ed mak kakerna it liwatnu-odawni la'a ler maka hota Orgahi-Orha'a Yesus Nwatiawu Ilyamou-Watyatoha pa Nmai. Hota Nmai die tamkeka ai maka nlomlomra la lyanti, de Enor rewre'wa E hopopanni-lili'irnu mak karuri-kalai pa rerun la nohkerna-rai marna wawannu. 8 Enerun de totpena Nukmua riy mak edonna kwarei-kwadana Uplerlawna, mak edonna kwehwa-klakta pa rlernohora Kot Kalwieda-Paitiota maka rakot nohora Yesus Itmatromlawanni. 9 Riy mak emkare hota rlernana niukum matmiati-molmuolu mak kodi liarni, pa rreidioinia la Orgahi-Orha'a herni-gaini, me hota Enolin limni la pede hota edon ramkeka Itmatromlawanni plolli-mneheni tutullu-lolo'oni. 10 La' hare honona de hota Enhi'a la'a lera Ha Nmai die, totpena Nlernana ya'uli-yawedi lilili-mamuawua onnila hya' maka Ha Nhi' nan oleka la ita mak kla' E kamieheni, makpesiay E' de rerieini. Hota miy wal pia mlier wut lia makpesiaya re, yoma mpiesiay oleka hya' maka amakota tiy miy. 11 Emkade pede nhi'inde amsumbain reri miy. Amsumbain totpena Uplerlawna maka tkola tieru-tawur nehla la de, Netlia de miy er maka mliernana hya' maka Npol miy pia mliernana. Ampak la Uplerlawna totpa wniarormi-wnialaimi kalwieda-paitiota, me nhioli-lieta honona maka miy pesiaymi nodi miy lia de, Uplerlawna plolli-mneheni nodi miy totpa hota mhi' nana-myap niana. 12 Amsumbain emkade totpena hota Itmatromlawanni Yesus Nlernana ya'uli-yawedi onnila miy, me totpa Yesus mana Nran miy nanmi la' heyanna yoma ita Uplerlawanni Nora Yesus Kristus ralam kalwiedni tiy miy.
Rimormioria ralam yatyata
1 Ina-nara ama-hyali, la'a Orgahi-Orha'a Itmatromlawanni Yesus Kristus maimiaini ne la' walia it tor E'a tawok wut pua tden la geni ida, hadi ed maka awuak pa mhioratreria. 2 Yan memmeman neka mimta'at pa mhiakomu-mhiakam niohora rira rodia lira riwra Orgahi-Orha'a Yesus maimiaini ntutu-nte'ewa. Matiala mak kodia kota-de'eta de riwra lir de nhapar rer lia hya' maka amror targa, onde a wniatut muamni-wniaye' mamni, onde riwra de naplol wali, yoma ami e mhorat walia hadella a horat mamni ida. 3 La'pa emkameni ho'mana, yan memmemna mitlin la rira lira kdiorni. Yoma la'pa edonna nla' ma'ta la ler maka Yesus Nmai pa nma nte'ewa de hota riy rahu rhoitio'ora-rtahnei lia Yesus Kristus, ne rimormior yatyata amlawanni mak kmalawna Uplerlawna, mak hota kler la matmiati-molmuolu plalahwa pa rrinnia la ai mormiori ralamni, hota npehela ga'a pa Uplerlawna Nhur niohora pa riy yatyat de ntutga rupni. 4 Nodia po'onni pa hota natulu-napetna inonni la'a geni-tien maka rimormiori rsumbain la, onde la'a hya'a maka rimormiori rkola tieru-rawur nehla la de. La' pa na'ala genni la Uplerlawna roma kreini nayanni me nakot nohora niwra e' de de Uplerlawn e'a. 5 Matiala mhioratreria la' hare honona re de, a'ukot nohor olek harella tiy miy wia la'a ler maka itden wut die toh?! 6 Ne dodo'ondi miatg oleka la'a hya' ma'ta mak karuri-kalai mak kla' oruli-augewat la riy yatyat de maimiaini, totpa la'pa ntutu-nte' walia ler maka Uplerlawna Net tiarg oleka pa hota rimormior yatyata amlawanni de ntut walia rupni. 7 De hegana amlawanni maka khi'a riy pa rmalawna Uplerlawna de e nwewlona la kniarni mere edon nayamkeka, ne edonna nhewar ma'ta. Yoma mak khi' oruli-augewat la yatyatni-halalli de nhi' emkade pa nodi liarni la'pa ntutu-nte'ewa la' ler maka Uplerlawna Netlia. 8 Nanpena riy yatyat de nayamkeka. La'pa Itmatromlawanni Yesus Nte'ewa de, hota E' ed maka kharlirni pa Nalernia riy yatyata amlawanni de la yawa me Nala preheni-mkaini mak khita-krepra na Nwunu-nwenna la gaini ralamni. 9 Mere la'pa Itmatromni Yesus edon Nmai mia'ta de, riy yatyat de hota nhar niohora ruri-lai plola-mneh lawna maka hegana amlawanni ha nala. Hota enhi' neka hihi'a-yapyapi mak kamehi-kayona, mak ktutga rurni-laini, totpa riy ema rtaplelleltarga. Mak ha nhi' nana honona re penpuenu-nanahala putra-palka. 10 Riy maka plollol pa hota rlernana matmiati-molmuolu plalahwa, de hota riy yatyat de, e nnairia pudi-akla yatyata hya' to'a, pa na ntot memna ir la klieratni. Honona re hota rler la matmiati-molmuolu plalahwa pa rrinnia la ai mormiori ralamni, yoma rwanikli-rwayotlia Kot Kalwieda-Paitiot mak kwatiawu Uplerlawna pa na namori-nalewna ira. 11 La' hade pede Uplerlawna Naltarg ir la klierat lawanni, pede ir mana rpesiay pudi-akla ohpa-lahara re. 12 Totpa riy honona maka ralamni na'aw niana do'a-hala me edonna kpesiay la'a hya'a ed mak kaplola, de hota rler la niukum matmiati-molmuolu.
Rwaliri miy de totpa ramori-ralewan miy
13 Ina nara-ama hyali maka Orgahi-Orha'a ralamni nala, nhi'inde ama'uli-mawedia Uplerlawna onnila miy. Ne meman neka a sniumbain mamni yala'ani emkade. Yoma la mulaliaini de, Uplerlawna Nwalir nian miy pia hota Namori-nalewan miy. Uplerlawna Nhiw Lululli Nhi'a miy totpena mlier wut lia E mutnu mak kakleha do'a-hala, ne la' walia mpiesiaya Kot Kalwieda-Paitiota mak kwatiawu plollola Uplerlawna. La' talan emkade, pede mlier la yamori-yalewna. 14 Yamori-yalewan de ed mak kariei pia Uplerlawna Nala Kot Kalwieda-Paitiota mak amakot nohor de pa na Narieinian miy, yoma E ralma-riorni de totpena mrie' wal pia mliernana ya'uli-yawedi emeka hya' maka Itmatromlawanni Yesus Kristus hota Nlernana. 15 La' hade pede ina-nara ama-hyali miy hononmi, mhioratreria totpena mtiutrier tertehra. De hya'a maka ampatutg oleka la tiy miy wia, de amodia wniahauru, onde amkenia la horta ralamni mana, mtie'la rer pitpit lia hare honona. 16-17 Dodo'ondi ampak la Itmatromlawanni Yesus Kristus Nmeh'a neka nora Uplerlawna-Mempulwatnu makla' Am la it hononita pa Nahepur nan miy, ne Naruri-na'orat nan miy ralammi totpena mkiar pia mikot nohora hya'-hya' to' maka kalwieda-paitiota, ne nhioli-lieta kalwieda honona re hota mhi' nana-myap niana. E' ed maka Nsayni ita, ne la'a E ralam kalwiedni, pede Enhi' pa ita nhia'argenni naruri, me totpa it edonna twaler la it genni pa nodi liarni.
Paulus nwak pa rsumbain nohor e'a
1 Ina-nara ama-hyali, la'pa la'awa lira korkorni de, a'ukot tiy miy, msiumbain la mai ami, ina-nar miy re. Msiumbain de totpena lir mak kwatiawu Orgahi-Orha'a de nwaleran pa nodi liarni la' noha uhunu-ewatni, ne rimormiori riwnu-halli rreiniana-ra'nana emekwalima la' lerni makden Tesalonika miy mrieiniana pa mpiesiaya. 2 Msiumbain wal lia Uplerlawna totpena Namori-nalewna am lia riy yatyata-halala. Msiumbain emkade yoma eneknekto'a riy dom to'a maka kreiniana-ka'nana lira-nnio'a mak kwatiawu Orgahi-Orha'a de pa rpesiaya. 3 Mere Orgahi-Orha'a Ndenreri (setia). E' ed maka hota karuri-ka'orat nan miy me Nhopun rer miy lia hegana amlawanni. 4 Me a pesiay miamni npenpuenu tetema la Orgahi-Orha'a la miy wawanmi. Ampesiaya de mliernohora oleka hya' maka amakot tar tiy miy, ne hota yeher to' pa mliernohora a lir mamni. 5 Ampak de pena Itmatromni Nodia miy totpena miat niohora Uplerlawna ralam kalwiedni tiy miy. Ne ampak wal pia Enhi' aruri miy pesiaymi totpena la'pa mlier la nniahora-nniala'a miy edon mpiadura, emekwali Yesus nhiolli la' ler ululu.
Yana inon werta la tulla-kniari
6 Ina-nara ama-hyali makden la Tesalonika uhunu-riwni, la'a Itmatromni Yesus Kristus plolli etla mai ami, pa dodo'ondi amhopan miy pia olietmi la inmi-narmi makpesiay maka inon werta la tulla-kniari pa edon nlernohora wniatutu-wniaye'a maka amal olek la ira. 7 Amhopan mhi' emkade yoma mimkek olek ami la ler mak itden wut die. Ami edonna prei-pre'et am lia kniari. Hade pede miy orgahami miatga pa mliernohora talan mamni. 8 Ami edonna mpokwiok niek pa ma'an nana-memun nana rira ya'ana-yemannu mere lelera-melmel de amtepartarlia kniari werwerta, totpena yana amtot arukia hari tiy miy. 9 Amkaria emkade, de yana mpiarora de ami e mamta'ata mpaka tniulan tiy miy. Mere amkar pia amtutga a talan mamni tiy miy pede hota mliernohora. 10 Yoma la' lerni maka itden wut mua'ta de am miana amala tit di tiy miy, de mak edonna kari de yana rre'ela na'ana. 11 Amakot hari yoma ami e matlina de miy e mior walia riy prei-pre'eta mhiol wiutu. Ir edonna rtulla-rkaria hadomdoma, mere rwei niek pa rtar nur lia rira. 12 Yoma amora ir rewre'wa la pesiay ida pa amhopna ira ne amano' targa re, totpena rkar die yana rahuri-rawo'ora, yana rod niuru, mere rtulla-rkar pia rwahaka ya'ana-yemun wamueheni. 13 Ne la'pa ina-nara miy, yan memmemna mipre'et la nhioli-lieta mak kalwieda. 14 Yanpa hota riy dom la tiy miy die edonna rlernohora hya'a mak amakota re la horta ralamni di. Mhioratreria riy mak emkare. Ne yana miora mpiatamputu totpena nmola-nma'a. 15 Mere yana mimola-mima'a pa emeka arwalmi. Mere mino'a-mi'atga de emekwalima miy narmi ida.
Lir kalwieda hohoni
16 Riy Orgahi-Orha'a ed maka Nmeh'a neka ktoran reria ita kalwiedni-paitiotni. Ampak de pena Enalnal reria E kalwiedni-paitiotni la'a haneka-harah wuawannu. Ampak de Itmatromlawanni Orgahi-Orha'a pena Nor wut miy hononmi talla. 17 A'u Paulus wuaka kalwieda-paitiot tiy miy, ne amueh'a neka tiulsi kalwied di emeka nhi'inde aghi'a la horta-horta honona totpena ntutga de, a'g ed maka ka'enyatu horat di. Mimkeka emkameni pa nhi'inde a nhiortu di. 18 Ampak de Itmatromlawanni Yesus Kristus Nala ra'ani-pallu nlernohor reri miy hononmi. A kalwied mamni tiy miy, Paulusa, Silas, Timotius
Paulus nwak kalwieda
1-2 A' di Paulus, mak kal horat di tiy o'a a'nu Timotius. La'a it pesiayni la Uplerlawna, de o' emeka a a'na raralmu o'a. Ama, Uplerlawna Makamori-Kalewna ita me Kristus Yesus mak itsa'ar it aranni la, ed maka Ntutmuata-nkewra' a' pua a lia makodia E lir kalwiedni. Awuakwak de Uplerlawna it Amlawanni de Nora Itmatromni Yesus Kristus ralma kalwiedni pa Nala ra'ani-pallu me kalwieda-paitiota nanaloi-nanatar nan o'a.
Nhiorta la' temmu la'a wniatutu-wniaye'a mak kodia klieratni
3 Ama, awuak de omdien atehra la Epsus, emeka ukot olek tiy o'a, la' ler maka alia'awa Makedonia. Yoma la' Epsus de riy ida worga e rwatutu-rwaye'a riy la talan mak edon kaplola, pa awuak de, o' ed mak kodi etia re. 4 Mukot la ira totpena hadewa la wniahaur nohora tuntunu, me di'na-lohora (silsilah) maka plalahwa. Yoma hare honona de hota rerieiniana yawenan lawna, ne hota edonna rhi' aruria it pesiayni. Mere it pesiayni de ed mak kodia Uplerlawna kniarni la'a ga'a. 5 A yano'u di nnia'eratni, totpena riy ralamni re ramou-rawitna, me ploloi-plele'era, me toto' meman la' pesiayni la Itmatromlawanni. Hota la'a nhioli-lieta ilu-wniehwa kalwieda-paitiot emkadi, pa riy rhi' samomuou lia rimormior wialli. 6 Mere riy dom mana edonna rmori-rdar lia nhioli-lieta kalwieda-paitiot di, mere e raklierat olek la yawahla lira-tunu mak edon klol talla. 7 Ira rwarehelia la' mak kwatutu-kwaye'a Uplerlawna deullu-tatarni, mere kennama raltier die emeka riy mak nurnu kerna la plol wawannu, de plollolli de raplin niohora lira-tunu me deulu-tatra maka ir e rakot nohora oleka mai makpesiay ita. 8 Itat niohora de, la'pa rnairi deulu-tatra la riy mak khi' do'a-kyap hiala, de deulu-tatar de yala'ani de nodia kalwiedni mai rimormiori. 9 Yoma la' deulu-tatra yala'ani, edonna rtot hade la rimormioria kalwiedweda, mere rhi' hade la mak kmalawna, mak edon ka'unni-kamta'ata Uplerlawna, mak khi' do'a-kyap hiala, mak klernohor neka nohkerna wniarorni, mak kwunu-kwenna inni-amni, mak kwunu-kwenna haneknek wawannu, 10 la' mak kalira-kaliai, mak kwadu'ula, mak kamnelu-kamna'a rimormiori, mak ka'ohpa-kalahara, mak kod niana riy mak khala, me la'a he' to' pa maka khi'a-kyapia hya'a maka edonna kamnehela wniatutu-wniaye'a mak kaplola. 11 Wniatut die, hade etla Kot Kalwieda ralamni mak kwatiawua Uplerlawna. Uplerlawna Nmeh'a neka Ntutmuata-nkewra' a' pua ukot nohora la'a E Kot Kalwiedni-Paitiotni. Uplerlawna mak kdella tutullu-lolo'oni, ne maka ha ra'uli-rawedia.
Ya'uli-yawedi onnila mormiori-dardiari kalwieda-paitiota maka Uplerlawna Nala
12 A'u'uli-uwedia Itmatromni Kristus Yesus, maka kal ruri-lai mai a'u pa akar lia E kniarni, yoma Enlina-nmat a' die plola mai a lia kniarni di pede Ntutmuata-nkewra' a'u. 13 Enamkek rer a lia ululu de a'g ed maka upolu-uliella E nanni, ne a'g ed maka umuki-uma'ala, nniahora-nniala' E'a. Mere Uplerlawna Ntutga ralam kalwiedni mai a'u, yoma la' ler de de, a'g edonna puesiay mia'ta pede a'g edonna gatga hya'a maka aghi'a-yapia. 14 Ne reh wial die, Nala kalwieda-paitiota pripanni-fa'anni pa Nala Ntera-ndem a'u pua aliernana ruri-lai pa apuesiaya, me agatu tiulla-siayni la a mutwua'lu. Ruri-lai die, Nal hadella it hononita mak kor oleka Kristus Yesus kla' lir ida. 15 Hota itpesiay miemna lira mak a'ukota di yoma ha naplola; de Kristus Yesus, Ntopur la noha wawannu di totpa Namori-nalewna mak kler la do'a-hala ralamni. Ne a' wual pia riy maka khi' do'a-hala yatyat memna. 16 Mere emkade ho'mana Yesus Kristus de Ntutga ralam kalwiedni mai a'u, totpa la talan emkade pede riy honona ramkek nana yehwa mnapalli memna mai a'u maka takenia ukwar nana do'u-ha'lu maka kaniutni-kamdierna. Totpa ratga de E' wal pia Ntutga ralam kalwiedni la riy honona maka hota kpesiay E'a totpena rlernana mormiori plalahwa pa nodi liarni. 17 La'a Orgahi-Orha'a Uplerlawna-Mempulwatnu, Ray maka edonna rwaliri nhierannu-wniaunu, mere mak kodi plolli pa nodi liarni, Uplerlawna mak kmormiori lia tulu-lyanti, maka riy ta'en niana ramkek nana, Uplerlawna inhatta hade. Mai pia itlilili-tmamuawua, ta'uli-tawedia lelera-melmela pa nodi liarni. Amin (Plola). 18 A'nu o'a Timotius, hya' maka a'ukot targa la horat di la tiy o'a, de omhi'a totpena emeka mliernohora Uplerlawna nnio'oni maka ha ror targa la krei mutnu ralamni la'a o' kniarmu la' ler maka o'ta-mata krei rran limni la o wawanmu. Mua'ala nnio' de pa mhi'a la warehermu la Uplerlawna kniarni ralamni, totpa emeka mak ka'ara ida nnairia tera-ra'pa pa nala arwalli la yawa. (Yoma nnio' de emeka keliau mak katnioran la limmu malwiru, me halwa'armu maka mkiol reria la limmu malganna). 19 Ne la Uplerlawna kniarni ralamni di de, mtie'la rer pitpit lia pesiaymu mak kaplollola, me ralammu mak kaploi-kaple'era (pa emeka mtiamin taru ika me mhuapar reri yehemu pa mliop termu-mriun wehlamu). Mere hota la' riy dom de, rhoitio'or doinia pesiayni me ralam ploloi-plele'era, pede pesiayni emeka hawnie'era. 20 La' era re de, de rwet la Himeneus me Aleksander. Riy maroro'a re de, agukmua oleka wa pa agotlia la hegana amlawanni, totpena Uplerlawna Nwatut irrora hadewa la yapolu-yaliella la E'a.
Jema'ata re sniumbaini
1 La'a li'ru di onni-ga'arni de totpa msiumbain la Uplerlawna, de mpiolu-mpiak nohora inon wamuehemi nora riy dom to'a kleheni-larni, me mi'uli-miwedia Uplerlawna onnila E hihi'ini. Msiumbain nohora riy honona 2 emeka ray-ray, me riy maka ktorna-ka'a. Msiumbain emkade totpena it mormiorni di, nler la lina-lera, ne itmor niohora ralma ploi-ple'er la Uplerlawna, me riy id mana naploi-naple'er la rimormior wialli. 3 It sniumbaini emkade, ed maka kod rimormior it la kalwiedni. Ne hade nlola Uplerlawna mak kalewn ita, ralamni. 4 Yoma Enwahak de, totpena riy honona rlernana mori-lewna me rat niohora hya' mak kaplola. 5 Uplerlawna ida Nmeh'a, ne mak khi' taliorta-lakatrai (klol letgara) la'a Uplerlawna Nora rimormior nohkerna de, ida Nmeh'a wali, de Kristus Yesus. E' de rimormiori id E'a. 6 Enal inonni pa na Ntuwu-nhaiya riy honona la do'a-hala ralamni. La' hade wal pia, la' ler maka Ha Nwarekna plollola, de Uplerlawna Ntutga de, Enala Yesus pa Nerun la nohkeran di totpa riy honona rler la mormiori-dardiari wawannu. 7 Me la'a hade rerieini pa Uplerlawna Ntutmuata-nkewra' a'u, pa a lia god kiota-gal de'eta Uplerlawna Kot Kalwiedni maka rakot nohora mormiori-lewlewan di, me totpa awuatutga la riy Yahudi atia'a la' pesiay mak kaplol di. Hya' maka a'ukota ri de, de ha plollola re, me a'g edonna ulahara.
Nnio'oni la'a sniumbaini
8 Ama, awuak de totpena la' meni-meni to' pa rkola tieru-rawur nehla, de a'na muanke'a rsumbaini, de rala ihru ploi-ralma ple'era, me yana rwarora-rwalaiya yawunu-yawenna la ralamni. 9 A'ukota totpena a'na patke'a rhewta-rnairia lawra-raini mak ktutga nhioli-lieta kalwiedweda. Yana rnairia lawra-raini mak ka'hira muanke'a. Yana rtet mioratnu de edonna nlola pa'etnu-parahmani onde rnairia leli-maha, mutiara, onde hewta me naniair mak welli werta. 10 Kalwiedni de twaldioinia pa a'na patke'a re nhiolli-lietni illu-wniehwani kalwiedweda, totpena la' talan mak emkade pede riy rwarora de a'na patke'a re samomuou yoma nor ira kreini-iskolli re ramneneha. 11 La'pa mak kodi plolli pa nakot nohora Uplerlawna lirni, nwatutu-nwaye'a, de a'na patke'a re rwatut lia mtie'ela, ne ratlina-rataili. 12 A'g edonna wuayow pa a'na patke'a rwatutga a'na muanke'a onde rodi plolli la hare, mere a'na patke'a re ramolmuolga la wniatutu ralamni. 13 Yoma maka Uplerlawna Nkokoma-npapala yanulu, de Adam ne la'pa hohoni noma Hawa'a. 14 Ne Hawa'a nanpa ed maka ha rakal nana pede rtolkiaiya Uplerlawna riorni-liaini. 15 La'pa emkade ho'mana, hota a'na patke'a rtor a'nani de rler la mormiori-lewlewna hornama pesiayni narur lia Yesus Kristus, ne natu ntutu reria nhioli-lieta kalwieda-paitiota la rimormior wialli, la' walia la' mormiorni de, hewewta-naniayarni me nhiolli-lietni rlernohora Uplerlawna ralma-riorni.
Mak kla'a Penatu'a Samasa
1 La' lir di de ha plollol memna pede mpiesiaya. De a'na muanke'a ida mak kiwra kla'a Penatu'a Samasa, de riy de ralamni nodi olek la tulla-kniar miaka tulliawna-welwierta. 2 A'na muanke'a mak kla'a Penatu'a Samasa de, riy mak ta'en niana riy raklaka la hala, yoma nakleha do'a-hala kuku' eti. De nmehlim mana nor tutga patke'a ida nmeh'a, ne natu nodia inonni, natu nhioli-lieta totpena riy ratu rhu'ru-rhelma, natga niniha-malmiali la riy mak kanin tar lia romni, me natu nwatutu-nwaye'a. 3 Yana twaliria muanke'a mak kma'wu, onde muanke'a mak kahuri-kawo'or lawna mere ta'ala riy mak khu'ru-khelma mak kodi lira mnapla, ne riy mak kor rimormior wialli rmori kalwiedweda, me riy maka ralamni edonna nden rer lia kupna-kai. 4 Ne natu na'ohma-nakatlia romni nayanni, me nwatutu-nwaye' a'nani pa ratu ratlina-ratailla e'a. 5 Yoma muanke'a mak kaplinu kna'ohma-knakat lia romni nayanni de, hota emkamenila nwatutga krei mutnu?! 6 Twaliria Penatu'a Samasa de, yan ta'ala riy mak na'nama kler teman la pesiay la' Yesus Kristus. Yanpa hota nwal lia riy mak katulu-kapetna, pede Uplerlawna Nukmua emeka Nukmu oleka hegana amlawanni la ulul genni onnila tullu-petanni. 7 Ra'ala riy maka riy honona ratu ra'unni-ramta'ata la'a leta ralamni. Mak edon kpesiay mana hota ra'unni-ramta'at e'a. Yoma la'pa edon emkade, de hota riy rapolu-raliella pa reiniande ntuin la hegana niaohmannu.
Mak khima-kre'a jema'ata
8 Emkade walia mak khima-kre'a re de riy mak ta'en niana riy raklaka la hala yoma riy kalwiedweda, pede riy ratu rhu'ru-rhelma ne ralma plele'era, me ralamni edon nden rer lia kupna-kai, me edonna ka'ana-kemnia tgo' arka lawan rehia. 9 Rawur rer pitpit lia ihru ploi-ralma plele'era penpuenu tetema la'a Uplerlawna wniatutnu-wniaye'eni maka ululu de riy raplin niohora, mere dodo'ondi de Uplerlawna Ntut tiarga. 10 La' hare honona de, rawerta-ratailia nhiolli-lietni re, pa la'pa rden la plol wawan de, nanpena ir rre' pa rhima-rre'ela jema'ata ralamni. 11 Hawni patke'a mana tamkeka de riy maka samomuou, pede riy ratu rhu'ru-rhelma. Yana rla' riy maka nhi'inde kod niuru onde riy mak kemun lawna arka, mere riy mak katu kodia inonni la haneknek wawannu totpa riy rpesiay ira. 12 Mak khima-kre'ela jema'ata re, de natu na'ohma-nakatlia romni nayanni, ne hawni patke'a mana enekneka riy ida. 13 Riy maka khima-kre'a jema'ata la kalwiedwedni, de hota riy ra'unni-ramta'ata la kniarni ralamni, ne hota rparan pia rakot nohora pesiayni la Kristus Yesus.
It agamni wniatutnu
14 Agha'ara a ralma-rio'ru la Uplerlawna, de hota edon nalo'on wali ne Uplerlawna Nal talan pa ama tiomra-niah'a tiy o'a. La' emkade ho'mana aghi' horat di wal tiy o'a, pa a'ukot nohor nhioli-lieta kalwiedweda. 15 Totpena la'pa yanpa ukri'ita, de pena omuatga la emkamenila it yehwani la' maiya Uplerlawna mutnu-rahanu ita. Uplerlawna de ed mak kden pa Nodi liarni. Ne makpesiay it de, emolmolan nekama Uplerlawna romni. Yoma emolmolan nekama roma ida wniatatgeni, me riri tniutgeni-nhia'argeni nreiniande takenia rom de rawo'la nana, de makpesiay it hononita de er maka kod rieria Uplerlawna wniatutnu plollola totpa taken niana rawilu-rawalia la' genni. 16 Ne riy id mana ta'en niana nwanikli-nwayotlia, de it agamni wniatutnu de mak samomuou muemna. Wniatutnu di ed maka riy raplin niohora pa la'awa lerni maka Uplerlawna Nwalir niande pa Nalharia. Wniatut di wal pia ed mak kodi it la mormiori-dardiari mak kla' Uplerlawna ralamni, yoma rakot nohora Yesus de riwra: Entota inonni de emekneka rimormiori, ne Uplerlawna Nhiw Lululli mana Ntut wuali E plollolli. Uplerlawna hopopanni-lili'irnu mana rlina-rmat walia plolli-mneheni. Kotni de nwewar la noheri woru-lyanti nayanni pede rimormioria nohkerna wawannu rpesiaya, ne E' de Narian pa Nla'awa Ilyamou-Watyatoha la'a gen miaka khitita-reprepra.
Makwatutu-kwaye' mak edon kaplola
1 Uplerlawna Nhiw Lululli Nalkota-nalde'eta matraralma, niwra hota la'a ler hohoni de hota riy dom de rhoitio'or la Yesus wniatutnu mak kaplola, pa hota ratlina-ratailla hegana-kawnu yawirnu-yawewalli mak kodia klieratni, ne hota rlernohora wniatutu-wniaye'a yatyatni-halalli de, 2 maka riy tukla-wahla, putra-palka ha rwahauru. Ralma-riorni re rko'i nan oleka melmelli-kalkalamni. 3 Rwatut riy pa yana rmehlima, ne yana ra'ana mak ir rahmena ra'ana. Mere yamanan de Uplerlawna ed mak khi' nana, pa riy ra'ana. Ne makpesiay Yesus it mak kat niohora Uplerlawna wniatutu plollolli, de ta'uli-tawedia Uplerlawna nanpena ta'ana yamanan de. 4 Haneknek maka Uplerlawna Nhi' nana re, de kalwied momuoga re, ne id mana edonna naliarna pa yana ra'ana. Mere la'a hya'a maka Uplerlawna Nala re, de hornama ta'uli-tawedia Uplerlawna nanpena tsoi lim pa ta'ala. 5 Yoma Uplerlawna Nhar lirni pa Niwra yamanan de kalwieda, me yoma it sniumbaini, de nareinian de, yamanan de kalwied momuoga pa ta'ana.
Kristus hopopanni-lili'irnu mak kar lia E kniarni ralamni, wniehwani-liakatni
6 La'pa ompuatutu-mpuaye'a hya' maka a'ukota ri la'a inmu-narmu maka muor wutga la pesiay ida, de hota mlia' riy mak kar samomuou lia Kristus Yesus kniarni ralamni, mak kamor rieria Uplerlawna lirni-tunnu la o' ihramu-ralammu me wniatutu-wniaye'a plollola maka mliernohor oleka wa. 7 Olie'tu la yatui-yawedi mak edon kperkuna pa hota rmalawan la Uplerlawna wniatutnu-wniaye'eni. Mere emolmolan neka mak kawlari ida, la lera-lera nwadieh'a totpa inonni yeher to' pa naprana, hota mpuadieh'a totpa la'a mormiormu ralamni nhiolmu-lietmu wniehwamu-liakatmu rlernohora Uplerlawna ralma-riorni. 8 Yoma la'pa it inonni naprana, de nodi untu oke'a mai ita, yoma inona prana nodia it la untu la' tuw di mak itden ma't la nohkerkeran di. Mere la'pa itwadieh'a totpa la' it mormiorni ralamni de itlernohora Uplerlawna ralma-riorni, de hade ed mak kodi unut la hya'-hya' to'owa, yoma hota nodia untu la nohkeran di, me la'pa la' Ilyamou-Watyatoha wali. 9 Hota itpesiay miemna lira mak a'ukota di yoma ha naplola. 10 Itat niohora de hota itlernan untu la Ilyamou-Watyatoha. La' hade pede twadieh'a la ga'a, yoma itahnia'ar to'ola Uplerlawna mak kden la lyanti lawna E'a. E' ed mak kodi plolli pa Namori-nalewna rimormiori, la rimormiori mak kpesiay E'a. 11 Mpuatut momuoga la jema'ata re, ne mhuopan pa rlernohora. 12 Yana muolin doinia riy id pa nparwah'a nan o'a, yoma hota la' rira wniarorni de o' ed ma'ta la nih wawahra-narun mermera lewatni. Mere rwaldioinia de o' emekneka nhior lawra ni'ita ahwa lioda (contoh) la'a riy maka kpesiay, de, la' ltiermu-tianmu, wniehwamu-liakatmu, la'a tulla-sniayanmu la mutwualmu, la' momuoumu-witwitanmu, me la pesiaymu la Yesus. 13 A'utkot tiy o' de mupe'el pa mpuaiki Puklawan de la mutlialawna gaini, me mukot nohor Puk de lirni. Ne muno'a-mu'atga ir pa rler la ga'a. Mhi'-mhi' reria hare, pa la'awa lerni mak amuai olek de. 14 Yan inon wertu la mniairia ruri-lai maka Uplerlawna Nhiw Lululli Nal tiy o'a, ruri-lai miaka omliernana la' lerni o'ta-mata jema'ata rran limni la o wawanmu, la' ler mak ha ror targa Uplerlawna nnio'oni la o kniarmu. 15 Mlia' pa mliernohora a li'ru de, yana inon wertu mere mupe'el nohora re, totpena riy honona ramkek nohoru de mlier la ga'a. 16 Mutiak kalwiedweda nhiolmu-lietmu wniehwamu-liakatmu, me mutiak walia totpa wniatutmu nden nek la plol wawannu. La'a hare honona de mdien reri, yoma la'pa omhi' emkade, de hota emekwalima o' inon wamuehemu, me la' walia riy mak katlin tiy o' mana o' e mulewn oleka.
Nnio'a-niatu la'a patyata me la'a o'ta-mata krei
1 La'pa mpuolliohora riy maka yanulga la o'a, yana lirmu nmaklekal la. Ne mual lir la de emekneka o' e muora ammu. Mhi'a tuwari-laweru de emolmolla hyalmu. 2 Me ina-nara pat yanulnulu de emekneka inmu, ne a'na gari pat hararara re de mhi'a la emek garmu pa muatu mhu'ru-mhuelma re.Yana mpuehwa-mliakta nhioli-liet mak edon kaplol la' ira. 3 Mhu'ru-mhuelma me mtiulla-mrie'ela patyata mak plollolli de napatyata. 4 Mere la'pa patyata ida upni onde a'nani etla de, mual lir la totpena ratu rtulla-rkari, ragera-ra'ai pa ramkek la ira romni mniotni kleheni-larni totpena ratu rwahla inni onde upni prehenni-maunu. Makpesiaya wniehwa-liakta onni-ga'arni hade. Hota rhi' emkade yoma wniehwa-liakta emkadi de hota nlola Uplerlawna ralamni. 5 Patyata maka inonni ktuin taru, pa na'a'na riy napatyata, nakleha mak ktip gera-kwati au muati, ne nawniair to'ola lyanit marna. Lelera-melmel de polpuol inni-wakwak amni la Uplerlawna-Mempulwatnu maktera-makdema, kawilla-kayomtia dudnu tutul tiutwu-lele'nama. 6 Mere patyata maka khi' mamaini yatyatni-halalli mak ka'hira ralma riorni, de plollolli de ha nmati olekwa mere itamkeka de e nmormior mia'ta. 7 Ama, hota mual lir la patyata inni-narni re totpena ramkek la patyat de kleheni-larni, totpa riy ta'en niana raklak ir la hala, yoma ir mormiorni de rakleha do'a-hala kuku' eti. 8 Yoma la'pa riy ida nahmena ntera-nlahga inni-narni, reriehenu romni wamueheni mniotni, de nwayotlia it pesiayni. La'pa riy mak emkade yatni-halli nreh wialia mak edon kpesiay (hindu-halaiki). 9 It twet wutga la patyata totpa hota ittulan la ira, de patyata maka tamkeka de edonna npa'eini-npahal la'a hya'a maka itakota ri: Rhorat wutga la patyata maka kmor nian la anni terampwonema me nmehlim nan toto' ralamni. 10 Ne itatga de e' de pat maka kwehwa-klakta rimormiori wniehwani. Tamkeka de emolmolla ntera-nlah wua samomuou upni-a'nani olekwa, niniha-malmial niohora riy maka kmai pia kanin tar lia romni nayanni, nhoi-ntania riy makpesiay, nhima-nre'a riy mak kakleha, ne nape'ela nhi' haneka-harahu wuawannu mak kla' riy ralamni. 11 Yana mhiorat wutga patyata mak edon nhape' ma'ta yoma hota rwaror nana hya' mak ka'hira ralma-riorni, pa rahak owa'ana mehlimni pede rto'or la Yesus Kristus. 12 Pa hota Uplerlawna Nukmua, yoma rhortapling oleka nnio'a-niatu maka rakot targ olek la E'a. 13 La' walia rahe' miamain pa ranina-ramat la riy romni-lewnu. Ne yatyatni walia la'a nhi'inde nurnu re rapran la yapupu-yaheri la rira, ne rwotra-rtal lia riy halli me rwahor ralma-rior la lira-tunu mak ira edonna ror la. 14 La' hade pede agiwra ramehlim owa'ana patyata mak edon nhape' ma'ta totpena rlernana upa-a'na de, de ramkek la mehlimni kalwiedni-paitiotni pa totpa mak edon pesiay re edonna rlernana talan pa rahe'i-ramali ita. 15 Yoma patyata dom de e rler targ olek la hegana amlawanni liol genni. 16 La'pa a'na patke'a makpesiay ida, la' romni nayanni de patyata id etla, de yana nollia limni la hima-re'ela' patyata de, ne yana nran wawayanni pa jema'ata ramkek to'ola. Hade emkade pede jema'ata namkek to'ola patyata maka plollolli de patyat memna. 17 Ne la'pa jema'ata o'tani-matni maka kar pia lol talanni de, rwahla prehenni-maunu re la ralamni re'eni woru de, ne rerehniana o'ta-mata mak kape'el pa rakot nohora Uplerlawna lirni me rwatutu-rwaye' nohora de. 18 Yoma la'a Puka ralamni de e rhorat targa: ”Hayor miaka ktepartarlia kwatei-kwahapra metma onde wetra' lawna totpena ema rkur dodioinia la' harni, de yana mpiatiehra nurnu, mere miollia pa na'ana metam de.” Emkade wal lia' Puka ralamni de e rhorat targ walia de: ”Riy mak kari de yana tapre'et nohora twahla prehenni.” 19 Yana tatlin pa twaghala o'ta-mata ida, atiaru mak ktutrier niohor pa e nhi' hal de riy woru, onde narehelia hare. 20 Mak khi' do'a-hala de, tpolliohora la jema'ata nhiopannu ralamni, totpena mutu korni mana ramta'at la nhioli-lieta mak khala. 21 La'a Uplerlawna gaini ralamni, Kristus Yesus, me Uplerlawna hopopanni-lili'irnu maka ha rwalir niana, a'ukot tiy o' de mliernohora a li'ru di, ne (la'pa muetlia o'ta-mata krei plolli-halli de) yana muheri-muhelta inonmu la riy halli wawannu. 22 Yana pleta-plet pa mrian limmu la riy wawannu pa na'ala Itmatromni kniarni. La'pa riy rhi'a do'a-hala de yana mrie'ela. Mutiak kalwiedwed inonmu, totpena ploi-ple'eru la hare honona. 23 Onnila omumehra lawna, awuak de yana muemnia gera nmeh'a mere muemun walia arka oke'a pa nodgiota anin yata la apanmu. 24 La' ler maka edon rhudi-rpar ma'ta riy do'oni-halli, de riy rden la hala wawannu de nmeh'a namemieheiya. Mere doma do'oni-halli mak dodo'ondi edon nayamkeka hota nalharia pa rat wualia. 25 Emkade walia nhioli-lieta kalwiedweda de nayamkeka, me mak edonna kayamkeka kuku' eti mana edonna nayade' pa nodi liarni.
Nnio'a-niatu la'a ata-wa'ara
1 Ama, mukot la hopopna-lili'iru ata-wa'ara makpesiay totpa hota rat niohora de ir upni-matromni rla' geni pa rlernana nhiu'ru-nhielma. La' talan emkade totpena yana riy ralernia Uplerlawna nanni onde ita wniatutnu-wniaye'eni. 2 Ne ata-wa'ara maka matromni makpesiay, de yana nalernia upni-matromni yoma ir rewre'wa pa makpesiay ira. Rwaldioin la de ratu rhu'ru-rhelma me yeher to'a pa ramkek la matromni de samounu, yoma ir upni-matromni de rora ir rewre'wa pa pesiayni ida me matromni de Uplerlawna ralamni nala. Hari de mak ompuatut ir pa ir rhi'a ne mpuakwak pa ir rlernohora re.
Wniatutu-wniaye'a mak hala, ne re'a-tniaru maka kaplola
La' hari honona di mpuatutga la re, me muno'a-mu'atga re. 3 Ne he'a nwatutga wniatutu dom to'a la wniatutu ri pa edonna nlernohora ita wniatutnu mak kaplola mak kwatiaga Itmatromni Yesus Kristus me mak kwatutga it pa tlernohora Uplerlawna ralma-riorni, 4 de riy de emeka kospo'ona ida de. Mere riy maka kaplinu-kaplo'a id hade, e ralamni nko'i nan la nhiok lira-pah'a wawa me yahuri-yawo'ora ne rhi'a lira mak kodi mak katlin la wniatutnu de la yalernu-yaha'a pa to'a-taiya, yapupu-yaheri, id ralamni nal nana id gahani me idma edon npesiay ida. 5 Me yahuri-yawo'or matmiati-molmuolu, yoma wniarorni-wnialaini re tututu-wawuaga, la' walia yoma ir edon rlernan etia wniatutu mak kaplol owa'ana. Ratniekamde hota lol agama loini-talanni pa hota rler la re'a-tniaru kupna-kai. 6 Meman neka la, la'pa itlernohora Uplerlawna ralma-riorni me it ralamni nahepur nohora hya' maka it gahani, de itlernana unut lawna. 7 Yoma la' ler maka rtor doin ita, de itakleha lawra-raini. Ne hota la' ler mak hota it mat die, yohya' id mana ta'enia itodia la noh mati-rai miolu. 8 La' hade pede hornama ya'ana-yemnu, hewewta-naniairi erla de hadewa. 9 Mere riy mak kiwa ktaru, de dodo'on nekpa nlernohora me ema rtuin targa la klieratni la'a ralamni yapalli. Ne la'a podaknu mak kodia wnieyat lawna, ralma yapalia haneka-harahu wuawannu, de ha nodia it la yatyatni-halalli yatlorni-yatra'ani. Hare emolmolla i'n maka kiwa kte'la la ainiara naplin niek la ema rhewra kenna. 10 Yoma tmat lia kupna wawannu, de do'a-hala honona rha'at la it reranni. La' riy dom de rhokar kupna nande rawlar dioinia it agamni wniatutnu, pa reiniande rler tar lia kleha-lar lawna pa rko'a-rkakur la lelera-melmela.
Paulus nnio'oni la' Timotius
11 Mere o' di de Uplerlawna gahani o'a mak kla' E hopopanni-lili'irnu, muhal doinia hare honona. Muhak toto' meman pa mpual lia riy makden la plol wawna la'a Uplerlawna matni yamkekni, mpuesiaya Yesus Kristus, muatu mhima-mrie' riy walmu la kleheni-larni, murur lia mutahan nana ralammu la nniahora-nniala'a, ne mhuoli-mlieta mnapal la riy. 12 Emolmolan neka mak kawlari ida nwaleran pa nlernana siewa mak ha ralla mak karehi, de mpualeran la pesiaymu la Yesus Kristus. Mpuo'la-mliekur toto'ola kniarmu, totpena muakokan nohora siewa mormiormu-dardiarmu mak kodi liarni. Yoma la' hade pede Uplerlawna Npolg o'a la'a ler maka omliernohora me mpuayow la riy rahu gaini ralamni pa mpuesiay Yesus Kristus. 13 Ne dodo'ondi de, la' Uplerlawna mak kala mormiori la' haneknek wawannu, me la'a Kristus Yesus mak ktutrier pia kakot nohora plollolli la' Pontius Pilatus, awuak tiy o' pa 14 mliernohora nnio'a-niatu ri honona de mual toto' ralammu pa naploi-naple'era nmou-nwitna pa nodi liarni totpa mukleha do'a-hala kuku' eti pa nla ntut tiaru-nte' tar mueman la'a ler maka hota Itmatromni Yesus Kristus Nmai owa'ana. 15 Maimiaini de pena Uplerlawna ed mak kmeh'a ketlia ler meni. E' ed maka ha ra'uli-rawedi ra'unni-ramta'ata. E' nanpena mak kodi plolli Enmemeh'a to'a. E' de Ray miak kamtatan rer lia lodanni-hairni, me Matromlawan la upa-matroma honona. 16 Enmeh'a nanpena matmiati-molmuolu edonna nodi plolli la. Enmori-ndar lia liplipni-kamka'mani ralamni, ne riy id mana edonna nwakriania. Rimormiori id mana edon namkek targa de. Mai pia tlilili-tmamuau lia, ta'uli-tawedia pa nodi liarni. Amin (Plola). 17 Mak kre'a-ktar lia noh di wawannu de, ompuak la totpena yana po'ona tniarnu, ne yana rha'ar aranni la yohya' mak edon kamtemna, emekwalima re'a-tniaru. Mukot la re pa rha'ar aranni la Uplerlawna-Mempulwatnu mak kala hare honona mai ita, de narehi-nalawna, totpena ta'ana-temnia, tsewta-tnairia pa it ralamni nahepuepru. 18 Mpuak la re totpena rtutga kalwiedni liawanni totpena tlina-tmat nana ralam kalwiedni, me yara'ani-yapallu. 19 La' eda de pede, emeknekama mak kre'a-ktaru re rawok wutga kupna-kai pa rwewiei-rnarnara ler maka kmai die, de mukot la re totpena hota rawok wutga hihi'ini-yapyapni kalwiedwedni totpa hota irlernana tnikilgeni-nhiapargeni la Orgahi-Orha'a gaini ralamni la'a ler maka hota Nmai die. Emkade mamain de hota ir rlernana mormiori plalahwa mak itiwra mormiori plollola. 20 Ama, wniatutu plollola mak omliernana re, de mutiak kalwiedweda Timotius. Oliet memnu la wniahaur mak edonna klol talla yoma edon nlernohora Uplerlawna ralma-riorni, me pniok lira-pniah'a wawa, mak kakot nohora nhiortaplinu maka ha rweta la lira-yatu mere edon nora Uplerlawna lirni-tunnu ramneneha. 21 Yoma riy rakota riwra, ira rlernana lira-yatu re pede rwaldioinia pa rmalawna la wniatutu-wniaye'a agama mak irpesiay ulga. Ama, awuak de Itmatromlawanni Nala ra'ani-pallu nanaloi-nanatru miy. A kalwie'du tiy miy, Paulus
Paulus nwak kalwieda
1-2 A'nu Timotius mak kden rer lia a ralmu. Mak khorta horat di, de a'u Paulus. Nlernohora Uplerlawna ralma-riorni pede Kristus Yesus Ntutmuata-nkewra' a' pua a lia makodi Uplerlawna lir kalwiedni totpa a'ukot nohora mormiori-dardiar miaka Uplerlawna Nano'taru. Mormiori-dardiar die hota itlernana yoma itora Kristus Yesus tla' lir ida. Awuak de Uplerlawna it Amlawanni de Nora Itmatromni Kristus Yesus ralma kalwiedni pa Nala ra'ani-pallu me kalwieda-paitiota nanaloi-nanatru o'a.
Tden rer lia Uplerlawna kniarni ralamni
3 A'u'uli-uwedia Uplerlawna, maka aghima-rie'a kniarni de emekwalia ululu la u'pu-tga'ru. Aghima-rie'a de agodi ihru ploi-ralma plele'era. Asiumbaini la lelera-melmela de a'u'uli-uwed reria Uplerlawna onnila o' pesiaymu. 4 Asiumbain de aghoratreria ralam mayo'omu la' ler maka itsakar talla. La' hade pede a ralmu nmormior pia itwatroma, totpena a ralmu namtemna. 5 Aghoratnana la' o pesiaymu toto' la Yesus Kristus, emolmolan walia upmu Lois makpesiay ulga, nanpena inmu Eunike pesiayni. Ne a ralmu nat muemna de omuor ira mimneneha. 6 Hade ed mak kariei pia awuagahniorta o'a, totpena emeka nhi'inde riy ramor rieria ai totpena yana ai nmati, de hota mniair rieria ruri-lai miaka Uplerlawna Nala tiy o' la' lera ariana a li'mu la' o wawanmu. 7 Yana mumta'ata mniair rieria ruri-lai die yoma la'a Nhiw Lulul miaka Uplerlawna Nala mai ita, de edonna Nod it la yamta'ata. Mere Nhiw Lulul die Nhi' it pa taruri-talai me Nodia it pa itsima-tre'a la it rimormior wialli me totpa tatu todi it inonni la hanek-harahu wuawannu. 8 Hyalia, onnila Uplerlawna Nhiw Lululli Ntulan mai ita, pede yana tmola-tma'a la takot nohora Itmatromlawanni ne yan walia mmuola-mmua'a la' mai a'u, yoma onnila edonna aghi'a yatyatni pa a'utnioran la roma nhio'la, mere yoma Yesus tototni-rerieini. Yana mmuola-mmua'a mere lol Uplerlawna rurni-laini makden tiy o'a de hota mrie'ela pa muor rewre'wa a' pua ttutulu-takwara nniahora-nniala'a yamuki-yama'ala onnila takot nohora Uplerlawna Kot Kalwiedni. 9-10 Uplerlawna Namori-nalewna ita ne Npolg it pa tla' E gah wamueheni mak kakleha do'a-hala. Enhi'a hare honona de edonna Namkek la hya' maka it tsi'a-tyapi oleka la'a it mormiorni di, mere Nhi' hare honona de Nhapar rer lia E kalwiedni maka Ha wniaror oleka la ler maka Uplerlawna edon Nakoki-nayap mia'ta nohkerna. Mere la'pa dodo'ondi na'nama Uplerlawna Ntutga kalwiedni-paitiotni de mai ita, de tamkek nek la Kristus Yesus maimiaini, de emekneka Makamori-Kalewna mak katowar oleka matmiati la' yawa, ne Nodia mormiori-dardiari pa Nmai. Enayakot olek la' mormiori-dardiari mak kodi liarni de la' E Kot Kalwiedni-Paitiotni ralamni. 11 La'a Kot Kalwieda-Paitiot de, pede Uplerlawna Ntut a' pua a lia makodi E lir kalwiedni pa a'ukot nohora lir de me awuatutga la riy. 12 La' hade pede atiutulu-lielewua yamola-yama'a lui-nuhru (la' roma nhio'la di ralamni) mere a'g edon muola-mua'a, yoma a lia maka ha rtoran reria a'u, yoma apuesiay toto' meman la Yesus Kristus. Ne apuesiay miemna Enatiak reri E Kot Kalwiedni-Paitiotni mak Enhopan pa a'ukot nohora la'pa ler maka hota Nmai owa'ana ntutu-nte'ewa. 13 Timotius, ompuatutu-mpuaye'a de mliernohora wniatutu plollola maka awuatutu-wuaye' tiy o'a. Ne yan memmemna mpualer la pesiaymu onde ralam kalwiedmu. Itlernan oleka ruri-lai pa tsi' hari honona yoma itler wutg olek la Kristus Yesus. 14 Mpuatutu-mpuaye'a lir kalwiedni de, Uplerlawna Nhiw Lululli mak kodi plolli la' it mormiorni, himni-re'eni mai ita pa mutiak kalwiedweda wniatutu mak kalweli, maka Uplerlawna Nhopna omukot nohora. 15 Omuat niohora olek la'a Asia di yapatni de riy honona raltarga a'u. Figelus nor Hermogenes nek de raltarg a'u wali. 16 Mere awuak de pena Orgahi-Orha'a ralam kalwiedni pa Nmeh'a Nwoili-nwahla Onisiforus romni mniotni. Yoma Onisiforus nodia a lia muki-hepru. Alia' oleka roma nhio'la mere Onisiforus edonna nmola-nma'a la' hade. 17 Nte' tar lia letlawna Roma dewade nodi liarni pa nwahak a'u. 18 Ne omuat mueman walia la Epsus de e ntulan mai a'u. Pena Itmatromlawanni Nhoratreria la hihi'ini-yapyapni de pa Nhi' samomuou lia'a e'a la' ler maka hota Itmatromlawanni ed mak ktorna watghudi mai riy nohkerna honona.
Kristus limni-rorni maka kdenreri (setia)
1 Mere a'nu Timotius o'a, mdien rer lia ruri-lai maka itlernan oleka wa onnila Kristus Yesus ralam kalwiedni mai ita, la' ralam kalwiedni mak itlernana yoma it tor oleka Yesus de ihru ida-ralm ida. 2 Wniatutu-wniaye'a mak kaplola maka ha mutlin oleka, maka awuatutu-wuaye'ela riy rahu re pa ratlin nohora-rmat nohora oleka ha plollolli, de mukot nohor la riy maka ha mpuesiaya totpa hota rla' maka katu kaltieri-katiani pa nodia la riy dom owa'ana to'a. 3 Hyalia, hota omlier la kalwieda-paitiota yoma omutlin a lira wnialliohoru di emkadille, de hota mliernohora nhiolia mak ka'ara ida mak katu ntutulu-nlelewua haneknek wawannu. Pede hota emeka Kristus Yesus limni-rorni makdenreri, muatu mtiutulu-mlielewua hya'-hya' honona pa muor rewre'wa ami. 4 Me hota mliernohora nhiolia emekwalima mak kodi keki-rautu ida mak ktorna kniarni de edonna nwo'la-nlekur la inon wamueheni, yoma nwo'la-nlekur de totpena nhi' plollolli la e o'tani Komandan de ralma-riorni. Emkade walia o'a la' Uplerlawna kniarni ralamni. 5 Yana mliernohora nhioli emekwalima mak kawlari ida mak edonna nlernana wutu-lai miaha, yoma edonna natlina-natailla wniatutu-wniaye'a. Hota omliernohora hya' honona maka Uplerlawna Nakot targa de, totpena omliernana siewa mak hota Enala. 6 Mak kmaliwtu-kma'odaw la'a yawuli-yatniamni, de e' ed mak ka'an ulga nhyi'ini mniotni. Emkade walia o'a, muatu mtiulla-mkiari werwerta la Uplerlawna kniarni ralamni, totpena hota omliernana kniarmu wniahlani. 7 Mpuaror kalwiedweda hya' mak a'ukota ri. Yoma hota Itmatromlawanni nanpena ed mak kala wniarora-wnialai tiy o'a la'a hari honona. 8 La'pa mului-munuhru polpuol ina-wakwak ama de mhuoratreria Yesus Kristus, Daud duratni-waitni, yoma Uplerlawna Namori owa'an E' la matmiatni ralamni. Uplerlawna Kot Kalwiedni di ed maka nhi'inde a'ukot nohora la riy. 9 Ne la'pa mlier la kropna-krieutu de mhuoratreria a' wuali yoma alier la kropanni-krieutnu onnila a'ukot nohora Kot Kalwieda-Paitiot de. Rerehnian de rwutu-rkoh a' die emekneka riy makwunu-makwenna id a'u. Mere emkade ho'mana Uplerlawna lirni-tunnu de edon natniutwu. 10 Hade pede a'g edonna wualer la nniahora-nniala'a kropanni-krieutnu honona, mere awualeran pa a'ukot nohora Uplerlawna Kot Kalwiedni totpa hota riy maka Uplerlawna Nwaliri oleka yoma ralamni Nala, de irlernan walia yamori-yalewna onnila Kristus Yesus, me rler la E genni tutullu-lolo'oni la Ilyamou-Watyatoha pa nodi liarni. 11 Ama mdienrer (setia) lia hare honona, yoma lir di de naplol memna pede mpuesiaya, de: la'pa itawlar dioini it do'oni-halli totpa emeka tmat niohora olek E' wa, de hota itmor niohora walia E'a. 12 Ne la'pa ittutulu-takwara nniahora-nniala'a mere it edon twaler la pesiayni de hota itor E' pa todi plolli. Mere la'pa itreher doin E' la de hota Enreher doin wali ita la. 13 It edonna tdenrer lia E'a, mere Endenreri, yoma nhiolli-lietni nden nek la pa nodi liarni.
Yana ratlin la wniatutu-wniaye'a mak edon kaplola me mak kawo'or nohora tuntunu
14 Timotius, la' pa mukot momuoga hari. Muala lira nnio'a-wawa niat lia jema'ata re, de mpuet la Uplerlawna nanni totpena yana rahuri-rawo'or nohora lira-tunu. Hare edonna rperkuna mere rweyata-rwaniawua rira pesiayni. 15 Mhi' arur miatmati totpa mlia' mak kwatutga wniatutu mak kaplola mak kwatiawua Uplerlawna. La' talan emkade, pede hota edon mmuola-mmua'a me totpena wniatutmu de nla' Uplerlawna ralamni. 16 Mere wniahaur maka edonna klol talla, ne maka itatlina de edon nor Uplerlawna wniatutnu ramneneha, de mriei lia wali, totpena yan mutlina. Wniahauru mak emkare, de rodia riy pa yeher to'a rler la yatyatni. 17 Wniatutu-wniaye'a mak emkare de emekneka no' mak ka'an lola rialma (kanker) pa nhewra. Hare emekwalima Himeneus nora Filetus. 18 Hare e rwir olek la walli pa emekwalima riy mak kiwra poka ina, mere pok ihi nhiwar la' walli. Rhi' pa makpesiay oleka dom mana raplinu-raplo' nohora ir pesiayni. Rakot nohora riwra mak kmor lia matmiati ralamni de ntutu-nte' olek wa. 19 Mere Uplerlawna kniarni la makpesiay re ralamni de, taken niana rawilu-rawalia la' genni. Hya' maka Uplerlawna Nhi' nana de, emolmolan nekama rariria roma ida wniatatgenni pa ta'en niana rom de rawo'la nana. Ne mak e rhorat tar lia watu liar yanulu de niwra: ”Itmatromni Nat niohora E rimormiorni. Ne he' to'a mak kiwra ir mana Itmatromni hanni ira, de hota yana rhi' owa'ana do'a-hala.” 20 Ama, mutlin la a lira wnialliohoru di. La'a rom lawna id ralamni de itamkek nana lola-wra'u harahu. Dom de e rala maha, dom de rnairia mah wawahra. Mere dom mana rhi'a de rnairia ora-au onde tani. Lola-wra'u mak samomuou memna re, emeka maha onde mah wawahra, de rnairia la woka-le'u mak emkameni memna. Ne lola-wra'u maka rhi'a la ora-au onde tani, de rnairia pa lera-lera nek la rodia rhopliala haga'u. 21 Emkade wal pia la'pa riy ida edon natlin la wniatutu mak edon kaplola de, pena nla' riy maka ha rwalir nian pa nkar lia Uplerlawna kniarni ralamni. Hota emeka lola-wra'u mak welli werta maka rnairia la woka-le'u mak emkameni memna, hota riy de nla' Uplerlawna gahani maka nperkun la E'a. Nhi'targa pa Uplerlawna Nnairia e' la kniari hya' to'a maka kodia la kalwiedni. 22 Ama, olie'tu la he'i-hepru tuwari-laweru hararara-hatrapriapi mak kod o la yatni-halli. Mupepe'ela totpa mhuoli-mlieta la plol wawna, ompuesiay mieman la Yesus wniatutnu plollolli, muatga mtiulla-msiaynia rimormior wialmu, me yana mhi'a kokokna-rariarni. Mere mkialwied nohora riy mak ksumbain la Orgahi-Orha'a de rala ralma ploi-ple'era. 23 Yana mlier wut lia nhiok lira-pniah'a wawa la'a wniahauru podku-padku mak edon kperkuna. Yoma muatga la' wniahaur mak emkade rhi' to'a yahuri-yawo'ora. 24 Mere riy mak kar lia Uplerlawna kniarni de edonna nkar lia kniokna-riarni, yahuri-yawo'ora. Mere natu nhu'ru-nhelma la'a rimormior wialli, ne nwatutu-nwaye'a riy, ne edon nawenan taru. 25 Natu nhu'ru-nhelma, la npolliohora maka o'ta watu, totpena twak de riy maka ha npolliohor de rleretniekla rhoitio'or doini-rtahnei dioini do'oni-halli pa rlernohora Uplerlawna wniatutnu plollola. 26 La'pa emkade de hota rhedum la do'oni-halli, ne rtikli etia hegana tniokalli tali. Yoma hegana amlawanni npudi-nakla ir oleka wa, totpa rlernohora e wniarorni-wnialaini.
Riy nhiolli-lietni la lera hohoni
1 Mhioratreri hadi, la'pa nmai wia lera hohoni maka ha rakot tar die, de hota itler la lui-nuhru polpuol inni-wakwak amni. 2 Yoma rimormiori hota edonna namkek la rimormior wialli ne nhorat nan to'ola inon wamueheni. Nhiolli-lietni de nwarekan to' kupna, me natulu-napetna inonni pa polpuolu-hawaun nohora re'eni-tniarnu me inon wamueheni. Rwahauria rira kleheni-larni me rapolu-raliella Uplerlawna nanni. Upa-a'na edon ratlin la inni-amni pa rora rahuri-rawo'ora. Rakleha ralam kalwied la'a riy mak khi' kalwied la ira, ne rakleha ya'unni-yamta'ata la Uplerlawna. 3 Rakleha tniulan la mutwualli. La inni-narni nek de edonna. Idma edonna ntelan nana-naut nan ida. Rapupu-raheria rimormior wialli, me ralernu-raha'a rira nan kalwiedni. Edonna rhol lia mtiertierannu, mere rler teman la riy halli pa rliwra-rkaklia rimormior wialli. Yoma raplin niohora rodia inon wamueheni la plol wawna, me ralamni edon ral nana hya' mak kaplola. 4 Rhol lia tulu-petan la rimormior wialli. Ne la' riy gaini ralamni rtot pa rhi' samomuou, mere rla'awa la geni ida, dewade rahe'i-ramalia onde rhi' yatyat ira. Ir edon rwaror samomuou mere pleta-plet pa rhi' do'a-ryap hiala hya' to'owa. Rler la nohkerna mukni-heparnu mere edonna rapal niana Uplerlawna gahani. 5 Tamkek la de rape'el la rkola tieru-rawur nehla mere ir edon rreiniana-ra'nana Uplerlawna Nhiw Lululli pa Nodi plolli la ira pede la' mormiorni-dardiarni ralamni de edon rlernohora Uplerlawna ralma-riorni. Muha'lu la' riy mak emkade. 6 Yoma la era re de, riy dom mak kwatutu wniatutu mak edon kaplola. E rtota kmamah'ani la roma-lewu pa rwaka pat mak ka'a'na riy kapatyata mak podku-padku ne mak kler olek la do'a-hala liawanni pa rapali tio' la hya'-hya' to'a mak ka'hira ir ralma-riorni. 7 A'na patke'a re rwak la ira totpena rwatut ir la Uplerlawna yala'ani. Mere ta'en niana a'na patke'a re rna'erit nana wniatutu-wniaye' plollola doma. 8 La' emkamenila Yanes nora Yambres rmalawan la Musa la'a ululu de, emkade wal lia mak kwatutga riy pa rmalawan la Uplerlawna wniatutnu plollola. Irwaror to'a yatyatni-halalli me ir pesiayni mak edon kaplola de nareiniande Uplerlawna Nwayotlia ira. 9 Ne hota ir edonna rler la ga'a, yoma noha mniotni rat momuoga ir podaknu-padaknu emolmolan walima riy ramkek memna Yanes nora Yambres podaknu.
Paulus nnio'oni-niatnu la' Timotius pa ndenrer lia kniarni maka rakot nohora Uplerlawna lirni
10 Mere o' di de muat niohor oleka wniatutu-wniaye'u, nhio'lu-lie'tu me a mormio'ru onni. Orgahamu e mumkek memna a pesia'yu la Yesus ne a kalwie'du la riy neknek wawannu. Omuat wualia aghur niohora rira me atiahana a ralmu pa a'urur lia tiutulu-lielewua 11 nniahora-nniala'a, polpuol i'nu-wakwak a'mu honona. La' hare honona de rhi' harella Antiokia, Ikonium me la' Listra. Nniahora-nniala'a mai a'u emkade ho'mana, mere Itmatromni Nrei a lia gera tlinni-ai aratni (Nalewna a'u). 12 Meman neka la he' mak kiwa klernohora Uplerlawna ralma-riorni yoma nora Kristus Yesus rla' lir ida, de hota nler la yawuhi-yawe'eta. 13 Ne riy mak kden la hala wawannu me riy mak ka'ohpa-kalahara, hota ra'ititar rer lia maklekalli-makdiainni. Rputra-rpalka riy mere rwaldioinia de riy rputra-rpalk owa'ana ira. 14 Mere emkade ho'mana Timotius o'a, mtiorrer rer pitpitga wniatutu-wniaye'a mak kaplola mak ha mliernan oleka, me maka ha mpuesiaya penpuenu tetema, yoma omuat niohora am di maka mpatutga oleka tiy o'owa, de ampatutga lira-tunu plollola. 15 Mhuoratreria la'a lera omdien ma'ta la lokmera-papay de omuatg oleka Puk Lululli die lirni. Ne Puk Lululli die ed maka kodi o' la wniarora-wnialai la'a mormiori-dardiari mak kodi liarni, onnila pesiaymu la Kristus Yesus. 16 Hare honona maka ha rhorat targa la Puk lawan de, de nwatiaga Uplerlawna, ne hota nperkun la'a wniatutu-wniaye'a plollola, pa ra rpolliohora me ra rwale'era riy mak khala. Ne ra rwatutga rimormiori totpena mormiorni nlola Uplerlawna ralma-riorni. 17 Emkade pede Puka Lululli die, de rtutu-rhana riy mak kar lia Uplerlawna kniarni, totpa rwahi'a pa rhi'a hihi'a-yapyapi mak kod lia kalwiedni honona.
1 Yesus Kristus hota Nawali owa'ana la' noh di wawannu pa Ntoran watghudi la'a mak kmati me mak kmormiori. Ne hota Enmai die, Nodi plolli pa emek Ray. La' hade pede awuak lilili-mamuau tiy o'a, la'a Uplerlawna Nora Kristus gaini ralamni. 2 Mlier pa mlia mukot nohora kot mak kwatiawua Uplerlawan de. Ne mpuakdieh'a pa mlier la ga'a totpena riy ratlin nana. Ratlina onde rahmen ratlina, rwayowa onde rahmena. Mlier pa muhmuakur la re, de mpuolliohora riy mak khala, ne muodia la ga'a. Mpuatutu-mpuaye'a de, mutatahan ralammu. 3 Yoma hota la'pa nte'ela lerni, de riy rahmena-rapraiya wniatutu-wniaye'a mak kaplola. Mere rwaldioinia pa rmeh'a rhi' to' gahani. Ne rawoka-rale'ga tungkur riahu pa rwatutga hya' maka ir ralamni nko'i nana pa ratlin la. 4 Hota rhodla tlinni la hya' mak kaplola, mere hota rheri tlinni la wniahaur tuntunu. 5 La'pa emkade ho'mana muatu muodia inonmu la'a hya' to'a me emkameni to'a. Murur lia yatahan ralma la' nniahora-nniala'a, lui-nuhru. Mkiari pia muodi liarmu pa emekwalia riy mak kakot nohora Kot Kalwieda-Paitiot de la riy mak edon katlin ma'ta, ne mula' kalwiedwed nohora kniarmu dom pali la Uplerlawna kniarni ralamni (emekwalima mlia mtiomra-mniah'a riy mak kamehra-kamau, mtiulan la riy kleheni-larni, me mak ka'a'na riy kapatyata). 6 Mpualeran la kniarmu de, yoma awuarora la mai a' die, hota edon nalo'on de amuat wia, yoma rhi' a pua a lia emeknekama prehena-mau la Uplerlawna. 7 Hota amuat wia. Mere la' a'ukot nohora Uplerlawna lir mak kalwiedweda, de a nhio'lu de emolmolan neka mak kawlari ida nhoitio'or doin hya'-hya' honona pa nwaleran pa nler ul lia hohoni. Aliernohor reria Yesus Kristus wniatutu plollolli pa la nte'ela honi. 8 Ne hota emeka e rwahi' targa wutu-lai la riy maka ka'unut la mak kawlari, de la'pa ler maka rhudi-rpara rimormiori la watghudi lokarni ntutu-nte'ewa, de Itmatromni mak ktorna watghudi plollolli de, ed maka kowa wut muaha-lai miaha la a o'tu yoma a nhio'lu-lie'tu plollola la' Uplerlawna gaini ralamni. Ne hota a'g edonna mueh'a ed mak klernana unut de, mere hota riy honona mak kawuwu-kawei Itmatromni.
La'a wniatutu-wniaye'a hohoni
9 Timotius, mpualeran pa pleta-plet pa mmuai a' die. 10 Yoma Demas nahal doini olek a lia wa, yoma ralamni napal rieria nohkerna wniarorni. Enla' olek wa Tesalonika. Mere Kriskes enla' olek la Galatia ne Titus nla'a Dalmatia (pa rhima-rre'a Yesus kniarni la' hande). 11 Enekneka Lukas nor a' tialla. Mpuatroma-mtiahnei Markus ne muora talla pa mmiai. Yoma e' ed maka nperkun pa nhima-nre' a lia a knia'ru di. 12 La'pa Tikhikus de, a'g e ghopna nla'a Epsus. 13 Ne la'pa ommuai, de muodia raini otna maka a'ultarga la Troas la'a Karpus romni. Muod wialia a pu'uku, mere reriehenu de, muod wialia puk maka rhi' nana la ha ulti re. 14 Aleksander mak kwewla pi'ra-tnier die nhi'a-nyapi oleka nhioli-lieta dukduka-dakdakni mai a'u. Pena Itmatromlawanni ed maka kwoili-kwahla nhiolli-lietni de. 15 O' mana mu'ererma la Aleksander de. Yoma hade ed maka karalam tehra-o'ta wat lia Kot Kalwied-Paitiot de. 16 Hyalia, la lerni la ukot nohora plo'lu-ha'lu mulaliaini (la' Kaisar roma watghudni-lokarni), de riy id mana edonna nrehgorg a'u. Honona re rhoitio'or mai a'u. Mere twakwak de Uplerlawna yana Nwaghala ir la hari honona. 17 Mere Itmatromlawanni Nrehgor reri a'u. Enala rurni-laini mai a'u, pa a'g edonna umta'ata ukot nohora Kot Kalwied de, totpena riy Yahudi atia'a honona mana ratlina, ne a' muana Uplerlawna Nalewn a lia matmiati ralamni pa emeka ralewna pipi a'na, totpena singa ta'en niana rlihir nana-rnai niana. 18 Meman nek la Itmatromlawanni ed mak katiak a lia'a tniorna malwiru-malganna. E' ed mak hota kodia kalwiedwed a' pua kler la Ilyamou-Watyatoha la'a E lodanni-hairni. Mai pia ttutulu-tlelewua, ta'uli-tawedia pa nodi liarni. Amin (Naplola).
Lir kalwieda hohoni
19 Awuaka kalwie'du la Priskila nora Akwila me Onisiforus romni mniotni. 20 Erastus nwarin lia Korintus, ne Trofimus de ultarga yoma namehra tar lia Miletus. 21 Mihak talan pa miplet la woki lerni pa twatroma. Ebulus, Pudes, Linus, me Klaudia, rwak kalwieda tiy o'a. Emkade wal lia ina-nara maka itora la pesiay ida. 22 Twak de Itmatromlawanni Nor o' talla. Me E' wal pia Nala ra'ani-pallu tiy miy me Nanaloi-nanatru miy. A kalwied mamni tiy miy, Paulus
Paulus nwak kalwieda
1 A' di de Paulus. Aghi' horat di la o'a, a'nu Titus, yoma Paulus a' di de Uplerlawna hopopanni id a'u, me a'g ed maka Yesus Kristus Nhopan pa godia Uplerlawna lir kalwiedni-paitiotni. Uplerlawna Nwalir nian a' pua Nhopna aghima-rie'a riy maka Uplerlawna Nwalir niana re, totpena pesiayni re rla' ga'a. A' di wal pia ed mak kodia ir la Uplerlawna wniatutnu-wniaye'eni plollola, totpena hota rmor niohora Uplerlawna ralma-riorni. 2 Ne onnila rpesiaya me rat niohora Uplerlawna wniatutnu plollola de pa hota rdella nhia'argeni wawannu, de hota rlernana mormiori-dardiari plalahwa mak kodi liarni. Uplerlawna ed mak kano'targ oleka mormiori-dardiari die la' ululu memna maka Uplerlawna edon Nakoki-nayap mia'ta nohkerna, ne Uplerlawna hota edonan Nwotar lirni. 3 Uplerlawna mak kamori-kalewna ita, Nmeh'a neka ed mak khopan pa agod kiota-gal de'eta lirni de. Entutmuata-nkewra' olek a'u totpa la'pa ntutu-nte'ewa la' ler maka Uplerlawna Nwalir niana pa na'nama rimormiori ratlin nana nnio'oni, de a' wual pia ed mak kakot nohora. 4 Titus, ama, Aghi' horat di la o'a, yoma o' di de a a'na raralmu o'a yoma itro' di de it pesiayni id la Yesus. Awuak de Uplerlawna it Amlawanni de me Kristus Yesus mak kamori-kalewna ita pena ed mak kala ra'ani-pallu me kalwieda-paitiota tiy o'a.
Titus kniarni la Kreta
5 Ama, la' ler maka itto'or doin la de, agodia lia'ru ne ompuarin lia noha Kreta totpa omhi' ahorga hya' maka edonna kamteman ma'ta. De totpena omriana ina-ama krei la'a leta-leta honona re. Ne omhuoratreria hya' maka a'uno' taru olek tiy o'a ri. 6 It ttutga riy ida pa nla'a o'ta-mata, ina-ama krei de ttutga riy mak ta'en niana riy raklaka la do'a-hala, yoma riy de nakleha do'a-hala kuku' eti. De de riy maka hawa patke'a ida nmeh'a, me upni-a'nani mak klernohor olek Yesus Kristus. Yana ra'ala riy maka upni-a'nani rlernohor neka nohkerna hihi'ini-yapyapni to'a onde o'ta watnu pa edon ratlin la inni-amni pede riy raklak ira. 7 Penatu'a Samasa re, de ra'ala riy mak hota rodi plolli la Uplerlawna kniarni pede twalir die riy mak kakleha do'a-hala pede taken niana riy raklaka la halli wawannu, de twalir mak edonna kwarehi-kwatalu pede nahmena nlernohora riy ralma-riorni, onde riy maka kahuri-kawo'or lawna onde mak kma'wu, onde mak ktokal limni-kwe'el lakni onde ralamni nden rer lia kupna-kai. 8 Ta'ala riy maka niniha-malmiali niohora riy mak kma kwaloha-kwalakta, mak ralamni nala hya' maka kalwieda-paitiota, maka katahan ralamni la do'a-hala, mak kakleha do'a-hal la Uplerlawna, me la rimormior wialli. Ne tamkek la riy mak katu kodi inonni la hanek-harahu wuawannu. 9 Ta'ala riy maka ralma-riorni edonna nwaler la pesiayni la Yesus Kristus wniatutnu-wniaye'eni plollola mak ampatutga olekwa. Totpa hota natu nhi' arur lia makpesiay re pesiayni la plol wawannu, ne totpa natu nano'a-na'atga mak kamatmera la e wniatutnu, totpa irat niohora ir wniarorni de edon naplola. 10 Yoma riy rahu mak khi' oruli-augewat la Yesus wniatutnu maka plollola, de reriehenu riy Yahudi, ir er maka edon ratlin la wniatutu plollola, mere rputra-rpalka riy dom to'a, de rodia ltieria mak edonna klol talla. 11 Rimormiori mak emkare, de plet pa rhodal nurnu re, yoma ira rla'a-rmai lia likti-lara harahu pa rwotra-rtalla likatni mniotni re, pede riy mutliawanni rler la wniatutu-wniaye'a mak edonna klol talla. La' plollolli de yana rwatut emkade. Rwotra-rtalla riy liawanni yoma ra rahak to' kupna. 12 La' lera ida ne, riy id la makden Kreta niwra: "Riy makdena Kreta ita, de tpultra-tpalka ta'ohpa-talahara. Emolmolan nekama pora-dawra ida nlihir matmata-nhaw riarara duma a'na, de nhi'inde itsi' yatyata la riy. Ne it wal pia inon werta la kniari." Mak kakot emkade de makwohorulu-ktatrulu id e'a. 13 Ne hya' maka makwohorulu-ktatrulu die nakota la'a makden Kreta nhiolli-lietni re, de ha plollola re. La' hade pede o' orgahamu ed mak kpolliohora makden Kreta re pa yana rolin doinia wniatutu-wniaye'a kalwiedweda. 14 Ne yana ratlin la tuntun Yahudi onde deulu-tatra mak kwatiawua riy mak kwayotlia wniatutu-wniaye'a plollola re. 15 Hya'a-hya' to'owa momuou-witwitna plollola-mneneha la'a riy mak kaplola-kamneh'a. Mere la'pa riy maka ralamni nkoili ne nakleha pesiay, de, mak ko'i nana plola-mneha okuku' mana edonna nden la ihranu ralamni. Yoma ihranu ralamni re npenpuenu-nanahala wniarora-wnialai kdeha-ktiahli. 16 Nhi'inde iriwra ir nanpena rat niohora Uplerlawna. Mere wniehwani-liakatni de edonna ntutga. Rhi' pa emeka Uplerlawna makriarni ne edonna ratlina-ratailla E'a. Rta'en niana rhi' nana hya'-hya' hadomdom maka kalwieda-paitiota.
Rlernohora wniatutu-wniaye'a mak kaplollola
1 Mere Titus, o' di nhi'inde mpuatutu-mpuaye'a wniatutu-wniaye'a plollola. 2 De muno'a-mu'atga hamtoto'a totpena ratu rodia inonni pa yana nanni rtuini. Ra' rer tioto'a wniatutu-wniaye'a mak kaplol la Uplerlawna, ratu rtulla-rsayni rira ne ratu ratahana hya'-hya' to' pa yana rwaler la pesiayni. 3 Me emkade wal lia hapepe'a re totpena nhiolli-lietni re raplola pa emeka riy mak kla' olek la Uplerlawna limni ralamni. De, ir de yan memmemna rapupu-raheria rimormior wialli, ne yana rmat lia tgo'-arka. Ir wal pia er maka kwatutu-kwaye'a a'na patke'a la loi-talla samomuou. 4 La' emkade totpena irwatutga a'na patke'a pa ratu rholi-rlet la hawni-a'nani. 5 De totpa a'na patke'a re rwal lia riy mak katu rodi inonni, me rmori-rdar lia plola-mneha mou-witna pa yana ralira-raliai. Rhi'a in samomuou lia romni mniotni ne ratu rhu'ru-rhelma hawni muanke'a. La'pa nhiolli-lietni illu-wniehwani emkade, de riy edonna ralernu-raha'a lir mak kwatiawua Uplerlawna. 6 Emkade walia pa nhi'inde muno'a-mu'atga la hatrapriapi totpena ratu rodi inonni la hanek-harahu wuawannu. 7 Nla'a hya' to' pa Titus o'a, mhi'a inon wamuehemu, de emeka nhior lawar mak ki'ita ahwa lioda (contoh) la'a samomuounu. La'pa ompuatutu-mpuaye'a kalwieda-paitiota mutota plein gaimu la totmemi nanpena mpuatutu-mpuaye'a rira. La' wniatutmu ralamni de, muploi-muple'er la haneknek wawannu. 8 Mpuatutu-mpuaye'a hya' maka kdella plol wawannu totpa riy edon rlernan nhiapargenni pa rapolu-raliella o wniatutmu de. La' talla emkade pede eriaimu re rmola-rma'a yoma rakleha nhiapargen pia rakot nohora it halli. 9 Mpuatutu-mpuaye'a ata-wa'ara lili'iru-hopopna pa nhi'inde ratlina-ratailla upni-matromni la haneknek wawannu, ne nhi'a upni-matromni ralamni pa nkalwieda. Ne yana rora upni-matromni rawahla lira. 10 Atia'a de rkamna'a upni-matromni hyonni-hyanni. Nhi'inde irtutga la ir inonni wniehwani de samomuou totpa tunni npesiay ira, totpena wniehwani re rodia rira pa rwarora Uplerlawna mak kamori-kalewn ita, de wniatutnu de naplola. 11 Mpuatutu-mpuaye'a hari honona yoma Uplerlawna Ntutg oleka kalwiedni-paitiotni la riy honona pa Namori-nalewna noheri woru-lyanti nayanni. 12 Uplerlawna kalwiedni de ed mak kodi it la loi-talla, totpena la'a it mormiorni di, de yana tsoitio'ora-ttahnei lia Uplerlawna ralma-riorni me yana it ralamni nko'i nana nohkeran di yatyatni-halalli. Totpa tmor lia noh di wawannu, de tatu todi it inonni pa tla' riy ploloi-plele'era mak hihi'ini-yapyapni nla' Uplerlawna ralamni la dodo'ondi 13 maka it twei tio' la lera-mel maka ha twei-tnara, de ler mak kodi it la ralam hepuepru. Hota la' ler de nohkerna hota namkeka Yesus Kristus, de de Uplerlawna-Mempulwatnu, mak kamori-kalewn ita, reheni-lawanni. 14 Enal oleka inonni mai ita totpa na Ntuwu-nhai it la'a do'a-hala ralamni, totpa do'a-hala edon nodi plolli mai ita. Ne Enhi' it la E gah wamueheni mak kakleha do'a-hala ne, mak kape'el toto' la nhioli-lieta kalwieda-paitiota. 15 Mpuatut momuou lia hari honona, muno'a-mu'atga ne mpuolliohora mak edon klernohora re, de muodia Uplerlawna plolli-mneheni. Yana muolin doinia riy id pa edon pusin nohora o lirmu.
Nnio'a-niatu korkorni
1 Nhi'inde mpuagorahniorta krei upni-a'nani totpena ratu rhu'ru-rhelma, me ratlina-ratailia o'ta-mata mak kodi plolli la horta-hairi (kerajaan), ne rwahi' tar pua rhi'a-ryapia hihi'ini-yapyapni kalwiedweda. 2 Mukot la ir pa yana rapupu-raheria rira, onde rora rira rahuri-rawo'ora, mere ratu rhu'ru-rhelma. Rholi-rlet de rwehwa-rlakat lol yawa, ne yana rwehwa maran la' rira. 3 Yoma ululu, pa emeka riy mak edon kpesiay de itden nek la klieratni. Itpodku-tpadku la Uplerlawna ralma-riorni me tatlinnon kerna, ta'o'ta watu. Itsi'a yatyata-halala hya' to'a mak ka'hira it ralma-riorni yoma do'a-hala nodi plolli mai ita. Tmori-tdar lia wniaror yatyata-halala, me itahmen tamkek rira kalwiedni. Ne hya' reh wiali, de it id mana edon ntelan-naut nan ida. 4 Kennama itden ma't la do'a-hala ralamni, mere Uplerlawna mak kamori-kalewn ita Ntutga ra'ani-pallu, me ralam kalwiedni mai ita, 5 de Enrei it la gera tlinni-ai aratni, onnila it edonna tsi' oleka kalwieda-paitiota, mere onnila E' orgahani ed maka ralam kalwiedni Nal ita. Ne la' talan emkadi pa Uplerlawna Namori-nalewna ita, de Nwuri-nohm it la'a do'a-hala ralamni pa takleha do'a-hala, me E Nhiw Lululli Nodi it la yamori-yadari warwuaru. 6 Ne Uplerlawna Nalernia Nhiw Lululli mai ita totpena Nkar tioto' memna la it ralamni, de lol Yesus Kristus mak kamori-kalewna ita hihi'ini-yapyapni. 7 Uplerlawna Nhi' eda de totpa onnila Uplerlawna kalwiedni mai ita, pede Enetlia de, itakleh hala, ne itla' emeka a'nani yanulu mak nhi'inde klernana re'a-tniaru. Nhi' it la a'nani pede itsa'ar it aranni la Uplerlawna de hota itler la mormiori-dardiari mak kodi liarni. 8 Lir di de lira plol toto'a pede mpiesiaya. Ne la'a wniatutmu de, omukot nohor reria hya' maka a'ukota ri, totpena riy mak kpesiay Uplerlawna de, ralamni toto'ola, pa rwaleran la'a hihi'a-yapyap miak kalwiedweda. Yoma lir mak a'ukot oleka ri, de rodi unut la rimormiori honona. 9 Ama, olie'tu la yahuri-yawo'ora mak edon kaplola, pa rawo'or nohora durti-waiti (silsilah) ne rkokna-rrarnia la'a deulu-tatra agama. Hare honona de edon rodia unut la rimormior ita. 10 Riy mak kwatutga wniatutu-wniaye'a mak edon kaplola pa mak kariei pia krei upni-a'nani kni'ini-kniewarni, yoma rpesiay wniatutnu mak edon kaplola re, de ompuolliohora rde re'eni ida la'pa woru. Ne la'pa edon ratlin la lirmu, demade yana makpesiay rrehgorga pa ratlin la ir wniatutnu. 11 Yoma hota omuatga riy de nmeh'a neka nhoitio'or doinia wniatutu-wniaye'a plollola, pa nhi' do'a-nyap hiala. Riy de ntutga do'oni-halli yoma e nat niohora makaplola-makhala mere emkade ho'mana yeher to'a pa do'oni-halli na'ititar rer lia.
Nnio'a-niatu korkorni
12 Ama, hota agal Artemas, atia'a de Tikhikus pa ntiy o'a, demade mpualeran pa muplet pa mmuai a' die la'a leta Nikopolis, yoma a'g e wuaror pa hota wuarin lia hande la'a woki tah'i muti lerni. 13 Mere la'a Senas mak katga deulu-tatra de, me Apolsu, muhmuakur toto' meman pa mura'a-mupalga ir la'a ya'ana-yemnu, lawra-raini totpena hota la'pa rarian la hande, de hare honona er olek la. 14 Makpesiay re hota rwaleran pa rhi'a-ryapia hihi'ini-yapyapni mak kalwiedweda, de rala ra tu'tu rira kleheni-larni. La' talan emkade, pede mormiorni-dardiarni re edon rla hamamuamua. 15 Ama, agora it inni-narni honona mak kor a'u mden wiutu er mak kwaka kalwieda la o'a. Mtiulan pa mukot walia a kalwied mamni la riy mak ralamni nal ita, de it mutwualli mak itora pesiay ida. Ampak de Orgahi-Orha'a pena Nala ra'ani-pallu tiy miy hononmi la hande. A kalwied mamni la miy, Paulus
Paulus nwak kalwieda
1 Heiwia'lu Filemon! Paulus a' di mak katnioran la roma nhio'la ralamni yoma la'a Kristus Yesus tulanni-kniarni, me it hyalli Timotius, amro'a ama'enyatga horat di tiy heiwia'lu mak kden la a ralam mamni, mak kor am pia mkar wiutu, 2 me la' walia ita kreiwialli mak kahniopun rer lia' rommu nayanni. Me ami edonna mhortaplin wualia it narni Aphia nor it heiwialli Arkhipus mak emekwali ami, pa emeka mak ka'ara ida, natu ntutulu-nlelewua nniahora-nniala'a la' Uplerlawna kniarni ralamni. 3 Ampak de Uplerlawna it Amlawanni de, nora Itmatromni Yesus Kristus, pena ed mak kala ra'ani-pallu me kalwieda-paitiota tiy miy.
Filemon hmuakarnu nodia yara'a-yapalu
4 Heiwia'lu Filemon, la' a sniumbainu lelera-melmel de a'u'uli-uwed reri Uplerlawna mak akola tieru-gawur nehla de. 5 Yoma la' a yatli'nu de, o' e muhmuakur toto' la pesiaymu la Itmatromlawanni Yesus, ne muatu mtiulla-msiayn walia mutlialawna mak kla' olek la Uplerlawna mutnu. 6 Awuak la Uplerlawna totpena onnila o pesiaymu la' Yesus me la' walia omnia'erit nan memna it rurni-laini ra'ani-pallu re honona mak Uplerlawna Nara'a-napalga mai ita, pede hota omuora makpesiay re yeher to' pa mlia' ihru ida-ralm ida. La' talan emkade pede Uplerlawna Nlernana ya'uli-yawedi la makpesiay E'a. 7 Heiwia'lu Filemon, la'a yara'amu-yapalmu la mutlialawna mak kler olek la Uplerlawna mutnu pepanni-taurnu ralamni re de, nrei a lia hepur lawna ne nod wiali a' pua a hmuakru naruri owa'an la genni, yoma la' o hihi'imu-yapyapmu mak kareiniande riy mak kler olek la Uplerlawna limni ralamni rahepur wenna.
Paulus nwak pa Filemon nreiniana atni-wa'arni Onisimus pa emeka hyalli id la pesiay ida
8-9 Heiwia'lu, agatga de onnila a' di de maka Yesus Nhopan pa godia Uplerlawna Kot Kalwiedni, de agodi plolli pa aghopna heiwia'lu nhi'a hya' maka hota mhi'a. Mere emkade ho'mana onnila' mtiulla-msiayni la mutlialawna makpesiay re pede awuak to' tiy o'a. Awuak lilili-mamuau tiy o'a, totpa mrieiniana-mua'nana a li'ru di. A' di de hamtoto' olek a'u ne mumkek memna de a'g ed ma'ta la roma nhio'la ralamni onnila Kristus Yesus lirni-tunnu. 10 Heiwia'lu, ukota ralma-rio'ru di tiy o'a la' a a'nu. Meman neka la e' de a a'nu raralma atia'a mere la roma nhio'la ralamni di a'g ed maka ukot nohora mormiori-dardiari warwuaru la e'a, ne dodo'ondi npesiay walia pede enhi' a a'nu la it pesiayni di. Miat niohora olek e' wali yoma nanni de Onisimus (maka nnia'eratni de nperkuna). 11 Ululu omuora atmu Onisimus di mdien wut die, edon nodia unut tiy o'a. Mere la' lera-mela ri, de hota edon nodia unut la o' mueh'a, mere hota nperkun matmiat mai itro'a. 12 La'pa dodo'ondi de Onisimus di maka a ralmu nal de, de aghopan pa nawalia owa'an tiy o'a. 13 La' a wniareknu de agiwa ultarga totpena nwaug o'a pa nhi'inde nhima-nre' a lia'a a knia'ru di, la ler mak adien ma'ta la roma nhio'la ralamni onnila a'ukot nohora Uplerlawna Kot Kalwiedni. 14 Mere a'g edonna get mia'ta la hadomdoma, yoma heiwia'lu edonna nakot ma'ta ralma-riorni. Awuak lilili-mamuau tiy o'a, totpena mueh'a mhuria ralammu ne yana atiekga o'a. 15 Mere yanpa Uplerlawna Nolin doinia Onisimus olieta-patoga tiy o' di, de, edonna nodia la wenu-wolla, totpena npesiay Itmatromni Yesus pa hota omual owa'an e'a pa la'pa mmuati-mmuor niohora edon ntut tio'ola nohkeran di, mere la' pa ntut mueman la Ilyamou-Watyatoha pa nodi liarni. 16 Lera-mela de hota nwehwa-nlakat tiy o' de edon emeka atmu-wa'armu to'a mere hota wniehwani-liakatni tiy o' de kalwiedni narehi owa'an la hade, yoma hota e' de, de nor o' pa mpia'ama-mpiahyal lia' pesiay ida. E' de nden nek la a ralmu ne meman neka la hota reriehenu pa o ralammu nal walia e'a, emeka atmu-wa'armu me emekwalima riy mak kwa'ama-kwahyali, kwa'ina-kwanar la' Itmatromlawanni. 17 La' hade pede la'pa ompuarora heiwialmu a lia la' it pesiayni, me kniar wialmu la Uplerlawna kniarni ralamni, de awuak de mrieinian owa'ana Onisimus pa emekwalia o e mrieinian a'u. 18 Ne la'pa e nhala, onde e nhi' nana otna-ar tiy o'a, de pena a'g ed maka khernu-kwauga tiy o'a. 19 La'pa emkade nekwa, ne amueh'a kenia la handi, Paulus a orgah'u hadi, pena hota aghernu-wuaga otna-ara re honona. Hota a'g edonna wuahniort la'a o' nek de yanpa o' e mu'otan mai a'u. La'a nnia'eratni de, o' ed mak kwaka terima kasi lawlawan mai a'u, yoma omlia' oleka makpesiay. 20 Heiwia'lu awuak owa'an pa mtiultulan pa mrieiniana Onisimus. Mrieiniana a wakwa'ku di pa emeka twa'ina-twanara la Yesus Kristus loini-talanni, totpena hota la' hihi'imu-yapyapmu de pa alier la ralma hepuepru onnila itla' id la Yesus Kristus. 21 Aghi'a horat di de a ralmu napranrana, yoma agatga de hota heiwia'lu nreiniana hya' maka awuaka. Nareh wiali die, agatga de hota heiwia'lu nhi'a de reh wial hade. 22 Ne awuak walia hadi tiy o'a, de pena mtiulan pa muhgalia o rommu kamarni id mai a'u, yoma agha'ar a arnu la Uplerlawna de hota la' miy sniumbainmi re, ed mak kottiarg owa'an a lia miy hononmi.
Lir kalwieda hohoni
23 Epafras e nor a lia'a roma nhio'la, yoma la'a Kristus Yesus rerieini. E' wal pia e nwak kalwieda tiy o'a. 24 Me a kniarwia'lu Markus, Aristarkus, Demas, me Lukas e ra'enyat wut lir kalwiedni tiy o'a. 25 A honon ampak de Itmatromlawanni Yesus Kristus Nala ra'ani-pallu nanaloi-nanatar nan miy. A honon kalwied mamni, Paulus
Yesus Enarehi mieman la makwohorulu-ktatrulu
1 Ina-nara ama-hyali, la' ululu ma'ta de Uplerlawna Naltier rer lia it upni-tgarni de Nlola makwohorulu-ktatrulu. La' ler meni na'nama Uplerlawna Naltier lia makwohorulu-ktatrulu re, Nala deulu-tatra onde ler dom de Nala nnio'oni, ler dom de hihi'a-yapyapi mak kamehi-kayona (mujizat) la'pa dom to' owa'ana. 2 Mere la'pa ntut lia lera-mela ri mak hota kod lia noha niatni, de Enaltier mai ita de Nlol nohor neka E A'nani. La' A'nani de pede Uplerlawna Nakoki-nayapi nohkerna-rai miaran di honona. Ne Uplerlawna Nakot targa de hota A'nani de ed mak kodi plolli la haneknek wawannu. 3 Me E' mana ed maka ktut niana Uplerlawna plolli-mneheni, tutullu-lolo'oni la'pa liplipa-kamka'mani la'a Ilwo'itu-Darwionema. E' ed maka ktolliohora (klernohora) Uplerlawna nhiolli-lietni illu-wniehwani honona. E' ed maka kariwa-kahaiya noh maran di nora mniotni honona de Nnairia lirni-tunnu mak kodi plolli-mneheni. E' ed mak kamou-kawitna rimormiori la do'oni-halli na'nama Nla' Enamtatna la Uplerlawna-Mempulwatnu walli malganna la Ilyamou-Watyatoha totpena Nlernana ya'uli-yawedi.
Yesus Enarehi-nalawan la Uplerlawna hopopanni-lili'irnu (malaikat)
4 Ina-nara ama-hyali, la'a A'na de ed maka klernana liwangen tiutul die, pede hota Enareh dioinia Uplerlawna hopopanni-lili'irnu (malaikat) honona. Pede emeknekama E genni-tienni maka Uplerlawna Nala la de, de nareh mieman la Uplerlawna hopopanni-lili'irnu re genni-tienni. 5 Itat niohora hade, yoma Uplerlawna Niwra: ”A A'nu O'a. La'pa ler di de A'ukota de Aghi' Am tiy O'a.” Uplerlawna mana Nakota Niwra: ”A' die de E Amni. E' de A A'nu.” Mere edon Nakot memna lir mak emkade la hopopna-lili'iru id wali. Mere Nakot nek hade la Yesus. 6 Ne la'pa Uplerlawna Nhopan doinia Wutmueha-Laimieh de pa Nerun la nohkerna-rai miaran di, E' mana Niwra: ”A hopopnu-lili'iru miy hononmi, mriu' pua miuh' idma-mriama A A'nu lia'arni.” 7 Mere la' Uplerlawna hopopanni-lili'irnu re de, Uplerlawna Nakot nohora Niwra: ”Aghopan doin A hopopnu-lili'iru rpa hota e rhima-rre'a A' die emeka anni mak kteni me ai mak kmori.” 8 Mere la A'nani de de Uplerlawna Nakot la: ”Uplerlawnu ne, lodanmu-hairmu nawniau kdededa pa nodi liarni. Omtiorna-mriautu de nodi plola-mneha. 9 Rhi'ina-rella (hya' mak kaplola) nden rer lia O ralammu, yoma O' edonna Mkaw niana yatyatni. La' hade pede Orgahi-Orha'a O Uplerlawanmu, Nwaliri O'a pa Omdiella tutullu-lolo'oni totpa rira ratota-rawaw O'a, rahepru-rayak niohor O'a. Genmu-tienmu de nareh dioinia mutwualmu re.” 10 Uplerlawna Enakot walia la A'nani: ”O' de Orgahi-Orha'a O'a. La'a nomlerni la' noha gergera-tatiah'i ma'ta de O' ed mak kakoki-kayapia noh maran di me O orgahamu ed maka khi' nana lyanti. 11 Hota hare honona re rmol wua, emeka raini mak kawnial wia, mere O' di de Omdiella genmu. 12 Nohkerna-rai miaran di hota Omhi'a pa rmolu wa emeknekama rain maka rti'ila pa edon rnairi owa'ana. Na'nama O ed mak kala warwuarnu ma Mhuerun doinia. Mere O' edonna Mhuerun doinia oke' eti. Me O mormiormu edonna la ntutu-la nte'ewa mere nodia pa la nodi liarni.” 13 La A'nani nampena Uplerlawna Nakota Niwra: ”Muliwna (Mumtatnu) la A wa'lu malganna, la'pa A'utowar arwalmu re honona la lakmu nayanni.” La'pa la Uplerlawna hopopanni-lili'irnu (malaikta) id mana Uplerlawna edonna Nakot lir mak emkare. 14 Pede hota itwarora de hya' er Uplerlawna hopopanni (malaikta) rina? Ir honona de nhiw maka khima-kre' Uplerlawna, maka Enhopan pa rma rtulan la' riy maka hota klernana mormiori-lewlewna.
Yana mhioitio'or doinia pesiaymi
1 La' hade pede ina-nara ama-hyali, hota yeher to' pa ittorn apitga Kot Kalwieda-Paitiota la' yamori-yalewna maka tatlin olek de, totpena yana tsoitio'or doinia it pesiayni. 2 Yoma itat niohora Musa deullu-tatarni maka Uplerlawna hopopanni-lili'irnu (malaikat) re rakot nohora la it upni-tgarni re, id mana edonna nhala pede hota rlernohora re. Ne la'pa la' riy maka kpera-kdaitia edonna ratlina-ratailla de, hota rlernan memna niukmua mak edonna kpa'eini-kpahala. 3 Emkade walia yamori-yalewna maka Orgahi-Orha'a Yesus Nala de. La'pa it edon tsa'wu nana mormiori-lewlewna de mak karehia Musa deullu-tatarni, de nnia'eratni de itlawra niukum lawan de la it wawayanni. Yoma Orgahi-Orha'a Yesus ed mak kala' ul pua kakot nohora mormiori-lewlewan de! Ne riy mak katlin ulu re rakot nohor oleka lir de plollolli mai ita. 4 Ne Uplerlawna Nre' wal pia Nhi' aplola riy maka kakot nohora mormiori-lewlewna lirni, yoma Nhi' neka hihi'a-yapyapi mak kamehi-kayona, mak ktutga Uplerlawna rurni-laini nhi'nande riy ema rtaplelleltarga. Ne Nhi' aplol walia ir lirni mak kakot nohora mormiori-lewlewan de yoma Uplerlawna Nhiw Lululli Nhakra rurni-laini la makpesiay honona rlernohora Uplerlawna ralma-riorni. Yesus Nwal lia rimormior totpena Nhar tialan la rimormiori rora Uplerlawna rkalwied owa'ana 5 Ina-nara, twahaur nohora noh marna-rai miaran mak hota kmai die. La' ler de Uplerlawna hopopanni-lili'irnu (malaikta) atia'a er maka Uplerlawna Nala pa rodi plolli la noha-rai die, mere Enala la rimormiori ita. 6 Itat niohora hade yoma Puka id ralamni de enakot nohora niwra: ”Rimormiori die hya'a de Uplerlawnu ne, pede Omiwra mhuoratreria? Rimormiori pa nden la rimormiori, ne nihya'pa Mhilpai-muanatga e'a? 7 La' lera ho'ke'eni de hopopna-lili'iru rareh nian oke'ela rimormior die. Ne Omuala pa Namtatna la liwangeni-mtatangeni tiutulu maka ha ratota-rawawa totpena Nlernana ya'uli-yawedi. 8 Ne la' walia Omtiowar targa (Omkienia) hare honona la E lakni nayanni pa enodi plolli la haneknek wawannu.” Nah, La'pa riwra Uplerlawna ed mak khi'a rimormior pa nodi plolli la haneknek wawannu, nnia'eratni de la'a hya'-hya' to' mana er momuou lia rimormior limni ralamni. La' hade ho'mana it edonna tamkek la dodo'ondi de rimormiori e nodi plolli la haneknek wawannu. 9 Mere hota itamkek memna, de lira re honona rtutu-rte'ewa la'a Yesus mormiorni. La' lera ho'ke'eni de hopopna-lili'iru rareh nian oke'ela E'a la' ler maka Enden ma'ta la nohkerna wawannu, mere la' dodo'ondi de Uplerlawna Nala pa Namtatan la liwangeni tutullu mak ha ratota-rawawa totpena Nlernan ya'uli-yawedi. Enler la' gen die, onnila Enler olek la yamuki-yama'ala mak kod lia matmiati. Enmat lia it hononita do'oni-halli rerieini totpena hota la' hade pede Uplerlawna Ntutga E ralam kalwiedni la' rimormior it hononita. 10 Uplerlawna ed mak kakoki-kayapia hare honona. Ne hare honona er mak kariei pia Uplerlawna nanni ra'uli-rawedia. Pa hota plola la E wniarorni totpena Nhi'a Yesus, mak khar tialla pa Nodi rimormior it la yamori-yalewna, pa nler la kropna-krieutu, liwliwra-kakaklu, yamuki-yama'ala. Totpena la' Enlernan kropna-krieutu re pede Yesus Nla' mak katu khima-kre' rimormior ita, mak kakleha ruri-lai. Ne la' talan de pede Nod riy harahu pa hota ror rewre'wa E la' geni hitita-reprepra liplipa-kamka'ma. 11 Yesus Namou-nawitna rimormior ita do'oni-halli. Pa hota E' Maka Kamou-Kawitna, nor wutga it maka Ha Namou-nawitna, it rewre'wa pa Amni ida. La' hade pede Yesus edonna Nmola-nma'a la Niwra it di de, E inni-narni amni-hyalli. 12 Itat niohora hade yoma Yesus Nakot olek la Uplerlawna: ”Hota A'ukot nohor O' la'a A i'nu-na'ru a'mu-hya'lu. La'a ira nhiopannu-pniepanni de, Awuahniar pa A'u'uli-uwedi O'a.” 13 Yesus Enakot walia Niwra: ”Hota Agha'ara A arnu la Uplerlawna.” ”A'g inhatti, Agor wutga upa-a'na maka Uplerlawna Nala mai A'u.” 14 Yesus Nmeh'a nek de Nwal lia rimormiori totpena emekwali ita. Mormiorni emkade totpena hota Enmati. Totpena la'a E matmiatni de pede Enlernan talan pa Ntu'tu-nlewria hegana amlawanni mak kodi plolli la matmiati. 15 La' talan emkade pede Enolin doin rimormiori it la yamta'ata la'a matmiati mak kodi plolli la'a it mormiorni-dardiarni di. Yoma yamta'ata la'a matmiat die, de emolmolan nekama upa-matroma maka kwa'ata-kwa'ar ita la it mormiorni di ralamni. 16 Pa hota ina-nara, nayamkek memna de Yesus edon Ntulan la Uplerlawna hopopanni-lili'irnu (malaikat) mere mak Ha Ntulan la, de it hononita, makla' Abrahama duratni-waitni. 17 Hade ed mak kariei pede Uplerlawna Nal Yesus pa Nwal lia rimormiori piede Nlernan totota-wudwiudi maka nhi'inde itlernan walia. Totpena la' hade pede Enla' walia makpolu-makwaka la Uplerlawna la it rerieini (imam), de makpolu-makwaka tutullu mak kawe'ena-kamtemna (setia), me mak ktulla-ksaynia rimormiori ita. Totpa hota, emekwalima makpolu-makwak la Uplerlawna rhi'nande, de Entuwu-nhai it pa hota it do'oni-halli nawnie'er doin olek la. 18 Ne la' yoma E nek de Nlernan walia yamuki-yama'ala me totota-wudwiudi, la' hade pede E' mana Natu Ntulan walia ita maka klernana totota-wudwiudi.
Yesus Enarehi-nalawan la Musa
1 Ina-nara ama-hyali, mak Uplerlawna Nkamieh niana miy yoma mlia' temn olek la'a riy maka Uplerlawna Npol niana pa mlier la Ilyamou-Watyatoha, a'ukota pa mpiaror nohor teka Yesus dina! Yoma E' ed makodi Uplerlawna lirni-tunnu mai ita, me la' walia Nhi' makpolu-makwak la Uplerlawna la it rerieini (imam). E' ed maka itpesiaya. 2 Yesus di, e Ndenrer lia (setia) Uplerlawna mak ktutmuata-kewra' E'a, pa emekwalima Musa la ululu de nawe'ena-namtemna la Uplerlawna mutnu-rahanu honona pa emeknekama riy ida nawe'ena-namtemna la kniarni la upni-matromni romni. 3 Mere Yesus di ed maka klernana nhiu'ru-nhielma, yatota-yawawa de narehia Musa emeknekama riy maka kariria roma ed maka klernana ya'uli-yawedi nhiu'ru-nhielma, de narehia rom maka ha narir die. 4 Roma re honona, rimormiori er mak karia re, mere mak khi'a haneknek wawannu de Uplerlawna orgahani Nmeh'a. 5 Musa nawe'ena-namtemna pa nhima-nre'a Uplerlawna mutnu-rahanu, mere e genni-tienni de emekto'ama hopopna-lili'ir id neka mak khima-kre'a la matromni romni. Ne Musa hihi'ini-yapyapni de ntut muemna hya' mak hota Uplerlawna Nalharia la'a tuw li'iru. 6 Mere Yesus Kristus Narehia Musa, yoma Endenrer lia Uplerlawna pa emekneka a'na id mak kodi plolli la amni romni. Ne hota it di de er mak ha riwra Uplerlawna romni mniotni it irhatti, hornama yana itamta'at pa twalera mere itsa'ar rer mia't it ralamni la hya' maka hota Uplerlawna Nala mai ita. Hade ed mak khi' it pa tahepuepur nohora.
Yana o'ta tehra emeka makden Yahudi la'a wo'orletna-kawurloini
7 Pede ina-nara ama-hyali, mliernohora hya' ed maka Uplerlawna Nhiw Lululli Nakota, Niwra: ”La'pa la'a lera-mela ri, de miy e mitlin nana Uplerlawna lirni de 8 yan memmemna miy o'ta tehra pa emekneka upmi-tgarmi, la' ler maka rta'aga Uplerlawna, yoma rmalawan pa rtut o'ta kpaunu la E'a la wo'orletna-kawurloini. 9 La'a wo'orletna-kawurloini de, miy upmi-tgarmi ramkek nana A hihi'u-yapya'pu mak kamehi-kayona la anni terampwogat memna, mere emkade ho'mana rta'aga me rtot ma't A'u yoma rhi' ma'ta o'ta tehrani-ratlinnon keran mai A'u! 10 La' hade pede A'uwenan la ira pa A'ukota giwra ir ralamni rod rer mia'ta la dodo'a-halala pede irakleh oleka tlina-tail la'a A li'ru-tu'nu. 11 A'uwenan pa Aliokra re giwra: ”Oi! Hota miy edonna mliernana gen miaka A'ukot targ oleka la riy makpesiay totpa hota ror A' pua mren ami la geni kalwie'du.”’’ 12 Pede ina-nara ama-hyali, mpiahniorta. Mitiak reria totpena yana riy dom la' miy wokmi-le'emi ihranu-ralamni re rod rer ir la do'a-hala pede rakleha pesiay nareiniande rawlar dioinia Uplerlawna, de la'a Orgahi-Orha'a, mak kden pa nodi liarni! 13 Mere hota lera-mela ri, de la' ler maka ha riwra ”Lera yamori-yalewna inhatti,” hota miy idma nhedu-ntehra reri ida totpena pesiaymi la'a ga'a. Totpena hota la' hade pede riy id tiy miy miana edonna mliernohora lir wokmaru mak kodi miy lia do'a-hala pa mtiutga o'ta tehra-tlinnona kpau lia Uplerlawna. 14 Yoma it di de tlernan hare honona maka Yesus Kristus Nhi' nan de, hornama itatorrer pitpitga ita pesiayni maka itlernan oleka la mulaliaini de la'pa ntutu-nte'ela hohoni. 15 Ina-nara, mhioratreria hya' ed maka ha rakot targa la Puka ralamni, Niwra: ”La'pa mitlin nana Uplerlawna lirni la' lera-mela ri, de yana mhi' tehra ralamni pa mtiolliohora upmi-tgarmi, maka la' ler ululu rhi' tlinnon keranni-o'ta kpaunu lia Uplerlawna.” 16 He' ed mak katlina Uplerlawna lirni, mere ratlinnon kerna-o'ta kpau? De ir honona re, de riy maka Musa ha nalewna pa nodgiot ir la Mesir irhatti toh! 17 Ne riy meni er maka Uplerlawna Nawenan la anni terampwogata deno? Enawenan la'a maka Musa nodia re mere rhi' do'a-hala, pede Nukum wenwenna ir la wo'orletna-kawurloini! 18 La' ler de Uplerlawna liokarni de emkadi: ”Oi! Hota miy di edonna mliernan gen miaka A'ukot targ oleka la makpesiay, totpa hota ror A' pua mtu'u-mren am lia gen die!” Ne hota he' ed mak Uplerlawna lirni ha ntai lia dino? Maka Uplerlawna lirni ha ntaiya de, la' riy maka katlinnon kerna-ka'o'ta kpau lia Uplerlawna. 19 Pede ina-nara ama-hyali mpiahniorta! Yoma itat niohora memna, ir de edonna rlernan gen die, yoma ir rakleha pesiay lia Uplerlawna.
La'pa it edon tpesiay Uplerlawna de hota it edon tor wutg E'a pa tren ita
1 Ina-nara miy, la' lera-mela ri Uplerlawna nnio'oni de nden ma'ta. De la'a nnio'oni maka Ha Niwra he' to' makpesiay E'a de hota rler pa ror E' pa rtu'u-rrena la'a kniarni. La' hade pede ina-nara, erammi la' temmi totpena yana riy id tiy miy miana edonna nler la tniu'u-rien de maka Uplerlawna Nano'taru. 2 Yoma ha rakot nohora mai ita Uplerlawna Kot Kalwiedni, pa emeka ha rakot nohora la it upni-tgarni la' ler ululu. Mere nnio' de edon nodi unut oke'ela ira, yoma ir edonna rpesiaya. 3 Mere it makpesiay nampena er maka kler la rien de. Rien de ed maka Uplerlawna Nakota la'a mak edon kpesiay, Niwra: ”A'g e uwenan pa Aliokra re hota ir edonna ror A' pua mren wut lia' geni ida.” Uplerlawna lirni emkade mere Nwahi' targ oleka tniu'u-rien de la'a riy makpesiay re, la'a ler maka Ha Nakoki-nayapia nohkerna-rai miarna pa nhorwua. 4 Itat niohora Uplerlawna Nwahi' targ oleka tniu'u-rien de, yoma la'a Puka ralamni niwra: ”La'a lera wo'itnu de Uplerlawna kniarni nhorwua pede Nrena.” 5 Mere mhioratreria Uplerlawna lirni, Niwra: ”Hota ir edonna ror A' pua mren wut lia' geni ida.” 6 La' hade nnia'eratni de riy hota rler la tniu'u-rien de mere mak kala' ul pua katlina Kot Kalwieda-Paitiot de, edonna rlernan gen die yoma rahmena ratlina-ratailla. 7 La' hade pede Uplerlawna ed maka kwalir niana lera nnielu id owa'ana totpa riy rlernana rien de. Lera maka Ha Nwalir niana de, lera-mela ri honona maka ha rweta la: ”Lera Yamori-Yalewna inhatti”. Yoma la'pa me'eta-anni rlardoin meman la Musa lerni de, Uplerlawna Nakot nohora ler de la'a Daud pa nhorat targa la Pukni ralamni. Lirni de ed maka ukot nohor olek di. Niwra: ”La'pa mitlin nana Uplerlawna lirni la' lera-mela ri, de yana miy ralam tehra.” 8 Ne la' ler maka Yosua nodi Israel re la noha-rai Kana'an ralamni de, Israel re rler olek la riena, mere plol toto'a riena inhatta maka Uplerlawna Nano'taru atia'a hade. Yoma la'pa rien inhatta hade hya' owa'ana ed mak kariei piede Uplerlawna Nakot owa'ana la'a rien de la' ler li'iru maka ntu'tu-nte' olek la Daud lerni?! 9 Pede ina-nara, nayamkek meman de Uplerlawna Nwahi' targ oleka riena totpa mak kla' E mutnu-rahanu ror E' pa rren rewre'wa, pa emekwalima Uplerlawna mana Nren wal lia' lera wo'itnu de. 10 Yoma riy mak kler la riena, maka Uplerlawna Nano'targa de, de hota nren wal lia' e kniarni honona pa emekwalima Uplerlawna Nhi'a la' Ha Na'ohi-na'ara nohkerna-rai miaran di pa nhoru. 11 Hade pede mai pia tal ralam tetema pa tler la tniu'u-riena maka Ha Nano'taru inhatta de. Yanhi'pa it doma tler la klieratni pa ittuini, yoma itlernohora mak kahmena katlina-katailla Uplerlawna la' ler ululu de nhiolli-lietni. 12 Hota twaleran pa tlernohora Uplerlawna lirni, yoma Uplerlawna lirni-tunnu de ha naruri-na'orta pa emolmolan neka wehla ara, mak kaplokar la to'orni-gaini. Lir de emeknekama wehla ar maka nuh'a la arna nora nhiwa rieiwiutnu la'pa nodi liarni la'a ruri toptopa me kriahlu yoma Uplerlawna Nawerta-nataili rimormiori wniarorni-wnialaini mak kayade'a. 13 Rimormiori id mana edonna nayade'ela Uplerlawna matni yamkekni. Haneknek wawannu de emeka halyehwa pa nayamkek momuou lia E gaini ralamni. Ne it mana hota twalol nohor ploini-ple'erni la' hare honona maka itsi'a-tyapia la'a E'a.
Yesus Npolu-nwak la Uplerlawna la it rerieini emeknekama kniarni maka Yahudi imam o'ta lawanni nhi'inde nhi'a
14 Ina-nara ama-hyali, Yesus de, Uplerlawna A'nani inhatta, ed mak khi' makpolu-makwak la Uplerlawna la it rerieini (imam). Ne E' ed mak kler olek la Ilyamou-Watyatoha pa Nwak it la Uplerlawna gaini ralamni. La' hade pede ina-nara ama-hyali, hota itatorreri apitga hya' ed maka itwayow nohor pa tpesiaya oleka de. 15 Yoma Yesus, makhi' makpolu-makwak la Uplerlawna la it rerieini Natu Ntulla-nsayn meman nohora ita mak kler la do'a-hala ralamni onnila takleha ruri-lai. Enat niohora Ntulan la ita yoma la' ler maka Enden rer lia nohkeran di wawannu de Enler walia la norniori-tamtama, yapi'u-yaga'u, pa emekwali ita. Mere la' E' de edonna Nhi' do'a-nyap hiala. 16 La' hade pede yana tamta'ata. Mere mai pia tla tora Uplerlawna mak ktorna-krautu, mak kal reria E ralam kalwiedni, de twatrom rer lia kniola tieru-niawur nehla. Totpena la'pa itler la totota-wudwiudi onde kropna-krieutu de hota Uplerlawna Ntutga sniayanni mai ita me Ntulan la ita.
Uplerlawna Ntutmuata-nkewra'a Yesus pa Nhi' makpolu-makwak la E'a la rimormiori rerieini pa nodi liarni
1 Ina-nara, hota itakot nohora yala'ani la'a makla' o'ta-mata la makpolu-makwak la Uplerlawna la Yahudi re rerieini. Riwra rrana makla' o'ta-mat de, rwaliri rimormiori ida noma rrana totpa kniarni de, de npolu-nwak la Uplerlawna onnila rimormiori re rerieini. Enla' makpolu-makwak la de totpa na'ala rimormiori prehenni-maunu la'pa nhioini-tnianni pa nla Nala la Uplerlawna totpa Uplerlawna Namou-nawitna ir do'oni-halli. 2 Ne rimormiori mak kla' o'ta la makpolu-makwak la de nakleh walia ruri-lai. La' hade pede la'a kniar die natu nhu'ru-nhelam la'a riy mak kler la klieratni yoma e raplinu-raplo' nohora pesiayni yala'ani onde yoma rakleha ruri-lai. 3 Ne yoma e' nek de nakleh ruri-lai pia nhi'inde nler walia do'a-hala ralamni wali, pede e' edonna nal to'a rira nhioini-tnianni onnila ir do'oni-halli mere e nek de nal walia nhioini-tnianni la'a e do'a-hal wamueheni. 4 Ne la' riy id mana, edonna nwaliria inon wamueheni pa nhi' o'ta-mat la makpolu-makwak la Uplerlawna la rimormiori rerieini. Mere riy mak la'a makpolu-makwak la de, de Uplerlawna ed mak kpolg hade. Hade emekwalima la'a Harun la' ler ululu. 5 Pa hota Yesus Kristus mana hota emkade wali. E' edonna Nmeh'a pa Nran inonni pa Nhi'a o'tani la makpolu-makwak la Uplerlawna, totpena Nlernana ya'uli-yawedi, nhiormata-knianala, ya'unni-yamta'ata. Mere Uplerlawna ed mak kran E'a. Yoma Uplerlawna Nakot la: ”A A'nu O'a. La' ler di de Atiutga de A'g ed mak khi' Am la O'a.” 6 La Puka lirni dom de Uplerlawna Enakot nohora la' hade wali, de emkadilla: ”O' di de makpolu-makwak la Uplerlawna la rimormiori rerieini pa nodi liarni, emekwalima Melkisedek makla' makpolu-makwak la Uplerlawna la' ululu de.” 7 Ne Yesus mana la'pa Enmormior lia' nohkeran di, de Ensumbain de Nko'a-nkakru, Npolu-nhaunu la Uplerlawna yoma Uplerlawna nanpena ed mak kodi plolli pa Namori-nalewna Yesus la'a matmiati ralamni. Yoma E' de Nhu'ru-nhelam la Uplerlawna, pede Uplerlawna Nreiniana-na'nana E lirni. 8 Yesus de Uplerlawna A'nani inhatta! Mere emkade ho'mana, Enwatut lia yatlina-yataili la Uplerlawna la'pa Enlernana yamola-yama'a, nniahora-nniala'a, yamuki-yama'ala la'a mormiorni ralamni nodia pa la'pa nmati. 9 Ne la' talan emkade pede Enhi' mak kat niohora memna talla mak kaplol pa Nwak la Uplerlawna la rimormior rerieini. Noma Yesus Nal mormiori-lewlewna plalahwa pa nodi liarni la'a riy mak katu katlina-katailla E'a. 10 Ne Uplerlawna mana Ntutmuata-nkewra' E' pa Nhi' o'ta-mat la makpolu-makwak la Uplerlawna la rimormiori rerieini pa emekwalima ray Melkisedek la' ler ululu.
Hota mpialiewan pa pesiaymi la'a ga'a yanpa hota mhioitio'or doin pesiaymi
11 La'pa rakot nohora Yesus nor Melkisedek genni-tienni la'a makpolu-makwak la Uplerlawna, de hadi nnia'eratni harahu maka amiwa makot nohora tiy miy, mere hota amakota hya'a? Yoma la' lera-mela ri de yeher to' pa miy nhioratmi lolioi rehi pede hota miy edonna mnia'erit nana. 12 Plollolli de nte' olek la lerni pa mhi' tungkuru, mere tamkek la miy di, de miplin mua'ta liawanni pa nhi'nande riy meheni mana e rwatutu ma'ta miy lia Uplerlawna wniatutnu-wniaye'eni onni-ga'arni maka ha rakot nohora nhioitio'ora-tniahnei dioinia do'a-hala ralamni me Uplerlawna Ntorna watghudi la ler hohoni. Pa hota hya'a maka ha rwatutu-rwaye'a la miy die emeknekama uh tiuru maka papay remun ma'ta yoma raplinu ra'ana-remun ma'ta ya'ana-yemun tertehra. 13 Yoma riy mak klernan mamainia Uplerlawna wniatutnu-wniaye'eni onni-ga'arni onnila ir emeknekama papay la'a pesiayni, de nakleh ma'ta ralma-rior la makhala-makaplola. 14 Mere wniatutu-wniaye'a mak kakot nohora ita nhiolli-lietni mak kaplola mak khi' aruri it pesiayni la ga'a, de emeknekama ya'ana-yemnu tertehra, maka ina-ama gahani. Riy makla' ina-ama la'a pesiay nampena er maka kat niohora makhala-makaplola yoma nhi'inde rwatutu-rwaye' reri inon wamueheni la' hya' ed maka plola, totpena rtolliohor reria pa rtutga la mormiorni ralamni.
1 La' hade pede ina-nara ama-hyali, yana itwatut mamaini wniatutu-wniaye'a onni-ga'arni la'a Yesus Kristus. Mere la' pa itwatut wal lia hya' ed mak khi' aruri it pesiayni pa nla' ga'a. Yana tden rer niek la wniatutu onni-ga'arni mak ha rakot nohora nhioitio'or-tniahnei dioinia do'a-hala ralamni mak hota kodia riy pa rler la matmiati ralamni, me wniatutu mak ha rakot nohor neka riy pesiayni la Uplerlawna. (Meman nek la wniatutu samomuou walia hade mere mai pia itwahaka wniatutu-wniaye'a maka kodi riy pesiayni la ga'a). 2 Yana tden rer lia wniatutu la'a rwuri-rohma me rharani la'pa rran lim la riy wawannu, onde la'pa rimormiori rmori owa'an la matmiatni ralamni de Uplerlawna Nhudi-npara rimormiori la watghudi lokarni-tatiaili lahannu (niukum lawna), pa wniahlani re hota nodi liarni. 3 Mere, mai pia plet pa twaleran totpa it pesiayni la'a ga'a hornama Uplerlawna Nal talan mai ita. 4 Yoma riy mak pesiayni edon kler la ga'a mere rwayow pa rhoitio'ora-rtahnei dioin la Yesus Kristus Kot Kalwiedni, ta'en niana rod owa'an ir pa rhoitio'or doin-rtahnei dioinia owa'an la do'oni-halli. La ululu de, irden olek la Uplerlawna lelerni ralamni ne rlernan walia E himimni-rere'eni. Ir mana rlernan walia Uplerlawna Nhiwni. 5 Ir rat niohora la'a ira mormiorni de, Uplerlawna lirni de samoga. Ne ir mana ramkek oleka hihi'a-yapyapi mak kamehi-kayona mak kwatiawu Uplerlawna plolli. Hota Uplerlawna Ntutga plolli-mneheni de la'a tuwu mak hota kmai nieka. 6 Mere rwayow pa rhoitio'ora-rtahnei Yesus Kristus de! Hota ta'en niana ir rhoitio'or doin-rtahnei dioinia owa'an la do'oni-halli. Yoma emeknekama ir rkeni owa'an Uplerlawna A'nani la auwlakra, me rhi'a pa Enlernana yapolu-yaliella la'a mutlialawna gaini. Hihi'ini-yapyapni de hota nodi ir la klierat lawna. 7 Itamkek nohor tek la (umpamni)! Riy maka kat niohor oleka Uplerlawna hihi'a-yapyap kalwiedwedni re honona la'a ira pede e rhi' nana hya' mak kla' nan E ralamni, de E' ed maka ktera-kdem ira. Ir emolmolan nekama tani maka kdihmia ger otna maka nhi'inde otna ha ntur mamain la wawannu, dewade yawuli-yatniamni rmor lia wawannu totpena ora nhyi' de na'an lola-nemun lola. 8 Mere mak khoitio'or la Uplerlawna de emolmolan nekama tan miaka kdihmia otna maka ha ntur mamain la wawannu pa namor nieka du'uta-penta, wewnihi la'pa rururni-karkiaratni pa rmori. Hota ir emolmolan nekama tan miak edonna rperkun wa, pa hota Uplerlawna ed maka Nukmua. La' hohoni de rhokla ai pa ai na'an amutni-aki'ira. 9 Mere ina-nara ama-hyali mak kden rer lia a ralmu, la'pa amakot emkade ho'mana, ami e mpesiay mia'ta miy. Ampesiay die hota miy edon mhi' emkade, mere hota miy mhi' nana hya' mak kla' nana Uplerlawna ralamni pa emeknekama riy maka ha ramori-ralewn oleka wa. 10 Uplerlawan de, Uplerlawna maka kodi rhi'ina-rella (plola-mneha etla E'a). Hota E' mana edonna Nhortaplinga miy prehenmi-maumi mulli-pe'elmi la'a E kniar ralamni. Ne Nhoratrer mia'ta miy ralam kalwiedmi maka ha mtiutga la E'a, la'a mira'a-mipalga, mhima-mre'a miy pesiay wialmi la ululu me la'pa dodo'ondi wali. 11 Mere ampak memna la' miy hononmi totpa rima-rima mdien rer lia ralam kalwiedni pa la'pa nhoru, totpena hota miatu mueman de hota mliernana hya' ed mak ha mpiahaka, mak Uplerlawna Nano'targ oleka tiy miy. 12 Ampak de totpena yana miapuhuna-miaprai lia' pesiaymi. Mere totpena la'a mormiormi ralamni de, miy pesiaymi naruri me mpiei-mniar reria Uplerlawna maimiaini. Totpa hota emeknekama mliernohora riy makpesiay la' ululu, maka onnila pesiayni re raruri me rden rer lia wniei la Uplerlawna pede hota rlernana hya' ed maka Uplerlawna Nano'targa la ira.
Tatorrer apitga Uplerlawna nnio'oni yoma hota edonna rherun doinia
13 Ina-nara, tsoratreria la Abraham lerni. La' lerni de Uplerlawna Nano'targa Abrahama, de Enlokar nohora, totpa Nhi' aruri owa'an maka Ha Nakot taru re. Yoma hadoma edonna narehia Uplerlawna, pede Enlokar de Nwet la E orgahani nanni. 14 Niwra: ”A orgah'u uno'targa de hota A'g ed mak ktera-kdema, me Aghi' o duratmu-waitmu pa rwal lia riy mutlialawna.” 15 Ne la'pa Abraham nwei-nnara hya' ed maka Uplerlawna Nano'tar lia e' de, plola pa ha nlernana hya' ed maka Uplerlawna Nano'taru die. 16 Nhi'inde riy rlokra, de rwet la mak katulu-karehi nanni, totpena riy rat niohora de plol toto' pa ha nhi' nan hya' ed mak ha nakot targa de, de riy id mana edon rawo'or nohora. 17 Hota emkade walia Uplerlawna. Eniwra Nhi' aruri owa'an E nnio'oni totpa riy maka hota kreiniana-ka'nana E nnio'oni, de rat niohora E nnio'oni de hota E' edonna Nhernu-nwau dioinia oke' et lia. La' hade pede Ena'itr owa'an liokra la'a E nnio'oni de. 18 Uplerlawna taken niana Nkei nnio'oni, me la'pa liokarni ho'mana edonna. Ha maroro'a re edon rherun doin oke' et lia. La' hade pede Uplerlawna Nala nnio'oni me liokarni de mai ita, mak itsa'ar it aranni la E'a, totpena hota yeher to' pa tarur pia tatorreria ita nhia'argenni de, la' maka Uplerlawna Nano'targ oleka mai ita. 19 Ita nhia'argenni di naruri-na'orta pa emolmolan nekama watgorniha maka kaniohor apitu la' lai wikwikni, me emekwalia tniorreria pitpitu, yoma itat niohora de hota Uplerlawna Nhi' memna hya' ed maka Ha Nakot targ oleka. La'a nhia'argen die, pede emolmolan nekama tler olek la Uplerlawna genni la' Ilyamou-Watyatoha pa emekwalima o'ta-mat la makpolu-makwak la Uplerlawna de rler meman la gen lululi la kok lawna to'orni la Uplerlawna roma kreini ralamni. 20 Yesus Nhar tiarga talla mai ita, yoma Enla' olek pa Nhi'a o'ta-mat la makpolu-makwak la Uplerlawna la it rerieini. Ne hota Enhi' makpolu-makwak la Uplerlawna la'pa nodi liarni, pa hota emekwalima Melkisedek la' ler ululu de.
Melkisedek mak khi' imam o'ta lawanni de enarehi-nalawan la Lewi duratni-waitni mak khi' imam o'ta lawanni
1 Ina-nara, twahaur nohor Melkisedek la' ler ululu. E' de ed makla' ray lia leta Salem me nla' walia makpolu-makwak la Uplerlawna-Mempulwatnu makden la tutullu-lolo'oni, la'a rimormiori rerieini (de imam). La' ler ululu maka Abraham nora ray-ray ra'ar pa ray re rla' yawa noma Melkisedek nmai pia nwatroma Abraham noma Melkisedek nwak la Uplerlawna pa Ntera-ndema Abraham. 2 La' noma Abraham mana nala nhiakra ida la termid ralamni (sepersepuluh) la'a hya' maka Abraham na'unut nana la ar ralma de pa nala la'a Melkisedek. Ne Melkisedek nnia'eratni id de: ”Ray rhi'ina-rella (adil),” ne yoma e' de ray miak kwatiawua Salem pede nanni nnia'eratni id wal die ”Ray mak kodia kalwieda-paitiota,” (yoma Salem nnia'eratni de ”kalwieda-paitiota”). 3 Rwahaur la Melkisedek di, de raplin niohora inni-amni onde upni-tgarni ha rlolola me edonna rwahaur nohor walia la'a hya' wolla maka Melkisedek di rmoria la noha wawannu, la' walia ha matmiatni de hya' lera-hya' wolla. Pede emeknekama E' de makpolu-makwak la Uplerlawna la rimormiori rerieini maka kodi liarni pa la nhoru pa emeknekama Uplerlawna A'nani. 4 Mpiaror teka, de Melkisedek di de riy lalawna id hadi. Itat niohora hade yoma Abraham, it upni-tgarni maka rwetwet la nanni nek de nala nhiakra ida la'a nhiakra termida ralamni (sepersepuluh) la'a hya'-hya' maka ha na'unut nana la ar ralma. 5 La'a deulu-tatra agama Yahudi, de Musa nakot targa niwra: Makpolu-makwaka (imam) la Lewi duratni-waitni, de er mak kawoka patuini-paro'ona la'a mutu Israel prehenni-maunu enni, la'a nhiakra id la nhiakra termida ralamni (sepersepuluh) la' ir inni-narni amni-hyalli re owa'ana, kennama ir rewre'wa pa Abraham duratni-waitni ir honona. 6 Mere Melkisedek de Lewi duratni-waitni atia' hade mere enlernana nhiakra id la'a nhiakra termid ralamni la'a hya'a-hya' maka Abrahama ha na'unut nana la'a ar ralma. Ne nwak la Uplerlawna pa Ntera-ndema Abraham. Melkisedek de nwak pa Uplerlawna Ntera-ndem Abrahama maka la' ler ululu nlernan oleka Uplerlawna nnio'oni. 7 Plollolli de mak ktera-kdema rira ha narehelia mak ha ntera-ndema. 8 Ne la'pa Lewi duratni-waitni makpolu-makwak la Uplerlawna (imam) rlernana durmu-nhiakra la patuini-paro'ona de hota ha rmat wiali. Mere la'a Puka ralamni de Uplerlawna Nakot nohora Melkisedek de emeknekama enmormior pia nodi liarni. 9 Ne itwahaur nohor owa'ana de Lewi duratni-waitni maka nhi'inde kawoka patuini-paro'onni la'a riy Israel re, de emeknekama ror rewre'wa Abraham pa e rpair wali nhiakar de la Melkisedek la' ler ululu de. 10 Yoma la' ler maka Abrahama nala nhiakar de la' Melkisedek, de Lewi nora duratni-waitni edonna rayor nian mia'ta, mere yoma Abraham duratni-waitni ira pede emeknekama ror rewre'wa Abraham rala nhiakar de la' Melkisedek.
Uplerlawna Nherun doinia agama deullu-tatarni yoma Enrana Yesus pa Nhi'a imam ida emolmolan nekama Melkisedek
11 Nah, Lewi duratni-waitni makla' makpolu-makwak la Uplerlawna la Yahudi re rerieini er mak ktorna Yahudi agama deullu-tatarni. Mere la'pa plollolli pa irodi plolli pa rhi' nan hare honona maka Uplerlawna Nwaror targa de, hota hya' owa'an ed mak kariei piede Uplerlawna Ntutmuata-nkewra'a makpolu-makwak la Uplerlawna id owa'an pa Nmai, maka Lewi nora Harun duratni-waitni atia' E'a?! Mere E' de emolmolan nekama Melkisedek. 12 Me la'pa makpolu-makwak la Uplerlawna mtatangenni de nhierannu-wniaunu de hota rherun doinia, agama deullu-tatarni mana rherun doin walia. 13 Itat niohor agama deullu-tatarni rherun doinia yoma maka Uplerlawna Ntutmuata-nkewra'a de, Lewi duratni-waitni atia' E'a. Ha Nwatiawua durti-waiti dom to'a, ne agama deullu-tatarni edonna nakot nohor ma'ta riy id la E luwnu-a'nani duratni-waitni pa rrana E la' makpolu-makwak la Uplerlawna totpa nala nhioi-tniani la katri'ana wawannu. 14 Yoma Itmatromlawanni inhatta ed mak kla' makpolu-makwak la Uplerlawan de la it rerieini. Ne riy honona rat wualia, la'a Itmatromlawanni de Nwatiawua luwu-a'na Yehuda. Ne Musa edonna nwet tar lia luwu-a'na Yehuda re pa rla'a makpolu-makwak la Uplerlawna. 15 La'pa Itmatromlawanni Enmai pia Nhi' makpolu-makwak la Uplerlawna pa emolmolla Melkisedek la' ler ululu de, de nayamkek memna la'a hya' ed maka ha rakota la'a agama deullu-tatarni rherni oleka wa. 16 Rran Itmatromlawanni pa Nla' makpolu-makwak la Uplerlawna, de edonna rnairia deulu-tatra maka rimormiori ha rhi' nana yoma iramkek nek la rimormiori upni-tgarni, mere ramkek la Itmatromlawanni plolli-mneheni pa Namori-nalewna yoma E' ed mak kden pa nodi liarni. 17 Yoma hota emeknekama hya' ed mak ha rhorat targa la' Puka ralamni de niwra: ”O' di de makpolu-makwak la Uplerlawna id O'a, pa nodi liarni, emekwalima Melkisedek makla' makpolu-makwak la Uplerlawna.” 18 Rakot emkade yoma la' dodo'ondi de deulu-tatra ululu mana treiya la' walli, yoma nakleh oleka nhiapargen wia pa rhapar lola. 19 Yoma deulu-tatra agama Yahudi, edonna nhi' nana ha kuku id et pia nod it pa tor Uplerlawna tkalwieda. Mere dodo'ondi de itlernana nhia'argenia warwuaru ida la'a Yesus, mak karehi-kalawan la ulul gahani de, totpena twakrian reria Uplerlawna.
Yesus de Narehi-nalawan la Lewi duratni-waitni makhi' imam
20 Ne ina-nara, itat niohor walia, de Yesus kniarni la'a Npolu-nwak la Uplerlawna la it rerieini, de narehia Lewi duratni-waitni kniarni yoma Uplerlawna Nala Yesus pa Nhi'a la makpolu-makwak la E'a de Enlokar nohora. Mere edonna rnair ma'ta liokra emkare pa ra rlokra makpolu-makwak la Uplerlawna maka ha rran ulu re. 21 Mere rrana Yesus pa Nla'a makpolu-makwak la Uplerlawna, de rnairia liokra maka Uplerlawna Nakota la E'a, Niwra: ”Orgahi-Orha'a Nlokr olekwa me hota E' edonna Naheri-nawalia E lirni. O' di de makpolu-makwak la Uplerlawna id O'a pa nodi liarni pa nodi liarni.” 22 La' Uplerlawna liokarni mak emkade la'a Yesus pede itat niohora nnio'a warwuaru di onnila Yesus hihi'ini, narehi-nalawan la' deulu-tatra ulul die, ne hota ntutu-nte'ewa. 23 Ina-nara, hadoma ed ma'ta. De makpolu-makwak la Uplerlawna (imam) korni re, riy rahu yoma hare honona rmati pa idma nhernu-nwauga ida, pede rima-rima kniarni re edonna nodia pa la nhoru. 24 Mere Yesus de Nmormior pia nodi liarni pede Nhi'a makpolu-makwak la Uplerlawna (imam) de, riy id mana edonna nhernu-nwauga. 25 La' hade pede la'a Yesus Nmeh'a neka nanpena ed mak kodi plolli pa Namori-nalewna la'pa nodi liarni, la'a riy honona maka kwahaka mormiori la Uplerlawna, de nla lol E'a. Yoma E edon Nmati pa hota rhernu-rwaug owa'an E'a, mere Enden nek la pa nodi liarni totpena la' lera-lera nekpa nodia la'pa nodi liarni de E ed makpolu-makwak la Uplerlawna la it rerieini. 26 Ne Yesus de mana ed mak kla' imam o'ta lawanni inhatta pede it mana tahak memna. Yoma E' de Uplerlawna gahani mak kakleha do'a-hala. Ralma yata kuku' to' mana edon nayamkek et lia. Uplerlawna Ntaw doin E' la riy mak khi' do'a-kyap hiala. Me Nkenia la gen tiutullu-lolo'oni mak ktullu kareh dioinia lyanit marna. 27 E' ematia'a imam o'ta lawanni re korni, pa la' lera-ler de ra rwahi'a-rwayodia nhioi-tniani, ral ulga la'a do'a-hal wamueheni rerieini nhor nioma ral owa'ana nhioi-tniani la'a luwu-a'na do'oni-halli wali. Mere Yesus Nala hoihoi-tantiani eneknekto'a raralamni nmemeh'a pa nodia pa la nhoru. La'a ler de de E orgahani ed maka khur dioinia inonni pa Nhi'a la hopopa-hegeuru hoihoi-tantiani. 28 Riy maka deulu-tatra agama Yahudi nrana pa rhi' makpolu-makwak la Uplerlawna la'a Yahudi re rerieini, de rakleh ruri-lai pede rhi'a-ryapia do'a-hala. Mere la'pa Musa nala deulu-tatra agama de nhor pua lera nla'-nmai nioka Uplerlawna Nhi'a nnio' id owa'an la Yahudi re, de Nlokar nohora. Emkade pede E' ed maka krana E A'nani pa Nla'a makpolu-makwak la Uplerlawna la rimormiori rerieini. E A'nani de Nakleha do'a-hala kuku' eti pede Nodi plolli-mneheni la'a kniar die nodia pa nodi liarni.
Yesus Ndella Ilyamou-Watyatoha pa Nwak la Uplerlawna onnila it rerieini, nlernohora Uplerlawna nnio'a warwuarnu mai ita
1 Ina-nara, la' lira ri onni de nnia'eratni emkadilla: Itlernan oleka imam o'ta lawanni makpolu-makwak la Uplerlawna la it rerieini. Enamtatna la Uplerlawna-Mempulwatnu walli malganna la Ilyamou-Watyatoha pa rewre'wa rodi plolli. 2 Entulla-nkar die emeka imam o'ta lawanni la'a kniola tieru-niawur nehla geni inhatta la'a Ilyamou-Watyatoha, maka Orgahi-Orha'a orgahani ed mak khi' nan de. E' edonna Ntulla-nkar lia Uplerlawna roma kreini ralamni la nohkeran di wawannu maka rimormiori rhi' nana la kok lawan (Kemah) de. 3 Nhi'inde rrana imam o'ta lawna de totpa nala nhioi-tniani onde prehena-mau la Uplerlawna. Pede hota emkade walia Yesus, ita imam o'ta lawanni de. E' mana Nal walia hanni hadom pa rhi'a la hoihoi-tantiani. 4 Ne la'pa E' ed ma'ta la noha wawannu mana, E edonna Nhi' memna imam o'ta lawanni. Yoma imam o'ta lawanni mak kden olek la re er mak kala nhioi-tniani pa emeka deulu-tatra agama Yahudi ha rakot targ oleka. 5 Mere plollolli de kniar miaka imam-imam re ha rkari la roma-krei die ralamni, emekwalima hya'a makden la Ilyamou-Watyatoha memannu-tatarni pa nhi'inde rlernohora. Hade ed mak kariei piede Uplerlawna Nakota la Musa la'a ler ululu delloo! Yoma la' ler de Musa niwa nariria Orgahi-Orha'a roma kreini maka ha rhi'a la kok lawna pa rhi' emeka hoiwialli (Kemah), Uplerlawna Nakot emkadilla Musa Niwra: ”Mhioratrer momuoga hare, muriria hade de mliernohora kniola tieru-niawur nehla genni la Ilyamou-Watyatoha maka Atiutg olek tiy o'a la'a wo'ora hananni.” 6 Mere kniari makpolu-makwak la Uplerlawna la it rerieini (imam) di maka Yesus Nlernan de, nareh mieman la imam honona re kniar samounu. Emkade walia nnio' mak ktawli'iru maka Yesus Nhi'a de totpena itora Uplerlawna tkalwied owa'ana, de naruri-na'orta rehia deulu-tatra ulul die, yoma nodia kalwieda-paitiota mak kareh mieman la' ululu gahani de. 7 Yoma la'pa deulu-tatra mak kala' ulu nodi plolli pa nod it pa tor Uplerlawna tkalwieda, hota hya' owa'an ed mak kariei pia Uplerlawna Nala nnio' dino?! 8 Yoma la' emkameni ho'mana riy rlernana deulu-tatra ulul die, Uplerlawna Nwaghal ma't ira yoma edonna rlernohora de. La' hade pede Nhar lirni Niwra: ”Mitlin tek A li'ru ri! Hota lerni-melli nte'ewa, de A'g ed maka khi'a nnio'a warwuaru la'a hairi Israel nora hairi Yehuda. 9 De ematia'a deulu-tatra maka Agala la Yahudi upni-tgarni pa rlernohora la' lera A'ulakra la Mesir pa rlergota. Yoma la' ler de ir edonna ratlina-ratailla deulu-tatra maka Agala ira, pede la' ler de Agolin doin a li'mu la ira. 10 Mere dodo'ondi de A'ukot targa hadi, de hota Agora Israel duratni-waitni tetema mhi' wutu nnio'a la lera-mel mak kmai nieka ri. Hota Akenia A rio'ru-lia'yu la ira o'tani kriahlanu, me Aghorat targa la ira ihranu ralamni. Hota A'g ed maka khi'a Uplerlawan la ira, me ir rwal lia A mu'tu-rah'u. 11 Hota ir edonna rwatutg owa'an ira luwnu-a'nani walli, onde rwe'er nohora la inni-narni totpena ratga Orgahi-Orha'a. Yoma ir honona kuku'uni-lalawanni, patke'a rora muanke'a, maktaru-makakleha hota ratg olek A' wua. 12 Yoma hota A'g ed maka kwe'er ir la'a do'oni-halli ralamni, ne ghortaplinga ir do'oni-halli.” 13 Hade pede ina-nar miy re, Uplerlawna Nwet la nnio' warwuaru die, yoma nnia'eratni Uplerlawna Nhi'a deulu-tatra mak kala' ul die de nwal lia ngakum olekwa! Ne maka ha mahneka de, de hota nmol wua.
Geni mak kmou-kwitan de memannu-tatarni la hya' mak kden la Ilyamou-Watyatoha
1 Ina-nara ama-hyali, la'pa itakot nohora Musa deullu-tatarni la' mulaliaini. Deulu-tatar de ed mak kwahaur nohora kniola tieru-niawur nehla me la' walia roma-krei maka Israel rimormiorni ha rakoki-rayap niana pa rkola tieru-rawur nehla la. 2 Rariria roma-krei die, ha rnairia kok lawna maka ha rhi'a emeka hoiwialli. Ne kamir no' gaini la roma-krei die rweta la Geni Makmou-Kwitna. La' hande de e rken tiarga wa'du wniatatgeni me e rken tiar walia mei, nora roti la wawannu, mak ha rhoi-rtania la Uplerlawna. 3 La' walia rialma, la'a kok tniawa wornu de to'orni, de kamri ida de rweta la Genia Momuou-Witwitan Memna. 4 La'a gen die de rkenia katri'ana maka rala maha ra rhi' nana totpena rtutnia ayalli (kemenyan) la, me luwuau nnio' taru maka ha ral maha ra rwow nan ulatni. La'a luwuau die ralamni, de kekna maha maka kamniota manna, Harun lie'enni maka ka'uhwu olekwa, me watu maroro'a maka e rhorat targa Uplerlawna riorni-liaini termida rella wawannu. 5 La'a luwuau die wawannu, de e rken tiarga atiehra woru mak knair liwarni maka rtolliohora Uplerlawna hopopanni-lili'irnu, nnia'eratni de Uplerlawna mak kodi plolli-mneheni etla hande. Atiehra rora liwarni ranieh'a la luwuau die tutawnu wawannu, de la' gen miaka rwe'er doinia rira do'oni-halli. Mere hare honona la' roma-krei die ralamni yamkekni nora kniarni de ta'en niana awuahaur nohor wal lia. 6 Emkade pede rkeni hare honona la genni-tienni, demade lera-ler nekpa imam-imam re rla'a roma-krei die ralamni, la'a walli gaini totpena rtulla-rkari. 7 Mere mak kodi liarni la Gen Momuou-Witwitan Memna la' ralamni, de eneknek to'ama imam-imam re o'ta lawanni. Enmemeh'a nla' hande, anni id de nla' nan ralamni. Ne nla' hande, de nodi miemna rara, totpena na nhoi-ntania Uplerlawna, la'a do'a-hal wamueheni me riy mutlialawna re do'oni-halli maka raplin niohora rhi' nan oleka wa. 8 Enmeh'a nla' hande pa nhoi-ntania totpa Uplerlawna Nhiw Lululli Ntut rer miemna talan maka itmemeh'a tlol pa tla'awa la'a Uplerlawna Geni Momuounu-Witwitanni Memna, de edonna naphyar mia'ta la rimormior ita yoma roma-krei ululu de rnair rer mia'ta. 9 Me prehena-mau, nhioi-tniani maka riy rodia pa rala la'a roma-krei die ralamni ta'en niana ra rwe'er doin riy la'a do'oni-halli ralamni yoma hare de memannu-tatarni to'a la hya' mak hota kmai. 10 Yoma hya' maka deulu-tatra de ha nakot nohora, de eneknekto'a la ya'ana-yemnu, me la' walia hya' to' maka ha riwra rhi'a la yamou-yawitna la rimormiori inonni, mere edon namou-nawitan walia rira ihranu ralamni. Ira rlernohor neka deulu-tatar de pa la'pa ntutu-nte'ewa la' Uplerlawna nnio' warwuarnu lerni.
Yesus Nal inonni emeka hopopa-hegeuru hoihoi-tantiani de narehelia hoihoi-tantiani agama deullu-tatarni
11 Pede la' ler maka Yesus Kristus Nmai wia, de emeka makpolu-makwak la Uplerlawna la it rerieini, de imam o'ta lawanni mak kodia ra'a-palu, kalwieda-paitiota, yamori-yalewna la'a nnio' warwuar die, de E' edon Nler la roma-krei ralamni maka rimormiori rkar niana la nohkeran di wawannu, mere Enler la kniola tieru-niawur nehla geni mak kareh miemna, maka Orgahi-Orha'a orgahani Nwahi'a-nwayodia la Ilyamou-Watyatoha. 12 Mere Enler la kniola tieru-niawur nehla geni mak kmou-kwitan memna, maka plollolli inhatta, de E' edon Nlernohora imam o'ta lawanni Yahudi hihi'ini pa Nodia pipi-duma rarni, onde hayori a'na rarni totpena Nhi'a la nhioini-tnianni. Mere Enod tio'a E rar wamueheni pa Nler la hande eneknek to'ama raralamni nmemeh'a, totpena Nal hade pa na Ntuwu-nhai it pa Nwe'er doin it la'a wutwutu-kokgohu ralamni pa la'pa nodi liarni. 13 Pipi-duma rarni nora hayori ltiata rarni me la' walia hayor a'na rara mak ha rtunu-rharna awnu, rnairia pa rwektia la riy inonni totpena rhi' amou-awitna riy mak ta'en niana rre'ela krei-iskola yoma ir de inonni rakdieha-raktiahli. 14 La'pa pipi-duma nor wutga hayori rarni rnairia pa rhi' amou-awitna it inonni de hota yeher to' pa Yesus Kristus rarni ed maka kuhi-kho'or it ihranu ralamni la'a do'a-hala mak kod lia matmiati, totpena hota itkola tieru-tawur nehla la Uplerlawna, de Uplerlawna inhatta, mak kdella pa nodi liarni. Yesus Kristus orgahani Nhoi-ntania inonni mak kakleha do'a-hala kuku' eti la Uplerlawna, yoma Uplerlawna Nhiw Lululli makden pa nodi liarni Nala E rurni-laini la E'a. 15 La' hade pede Yesus Kristus Nwal lia taliorta-lakatrai (lol letgara) la'a nnio' warwuaru totpena riy maka Uplerlawna Npol niana, de rlernana Uplerlawna ra'ani-pallu, yamorni-yalewanni la'pa hare honona maka Enano'targ oleka la ira me mak kod pia nodi liarni. Hare honona de hota irlernana yoma Yesus Nmati totpena Ntuwu-nhai ira. Totpena la' talan emkade pede Nwe'er doin olek ir la do'a-hala maka irhi' nana la' ler maka rlernohor ma'ta deulu-tatra la mulaliaini de. 16 Ina-nara, la'pa riy ida edon nmat mia'ta mere nhi'taru horta na natniemna re'eni-tniarnu la'a duratni-waitni upni-a'nani (warisan), ta'en niana rnairia horat de la'pa edon rat niohor memna riy mak khi' horat de nmati olekwa. 17 Yoma la'pa riy maka khi'a horat de e nmormior mia'ta, de horat de edonna rnairia. La'pa mak khi' horat de nmat wia nanpena horat de rnairia. 18 La' hade pede deulu-tatra la mulaliaini nek de edonna rhi'a, eneknek to'ama e rnairia ha mormiori mak kmati oleka rarni. 19 La' ler ululu de, la' mulaliaini de Musa ed mak kakot nohora momuoga deulu-tatra maka Uplerlawna Nala la hairi Israel, la'pa nhorwua noma Musa na'ala hayori a'na rarni me pipi rarni na'nama na'itar wutga gera, nhorwua noma Musa na'ala au hisop akni nora dum wulu muermerni na'nama nto'a au nor dum wul die la'a rar maka kawniah' olek la gera na'nama nkarga la Puka mak kapniopna mak Uplerlawna deullu-tatarni riorni-liaini rdella de, me la' walia la riy Israel wawannu wali. 20 La'pa nhi' rerer hare dewade Musa niwra: ”Rar di ed maka rnairia pa rhi' aruri Uplerlawna nnio'oni. Ne Uplerlawna Nhopan pa miy hononmi mliernohora deulu-tatar de.” 21 Nhor nioma emekwalia Musa nhi' olek la Puk mak kapniopan de, de nkarga rar de la'a Orgahi-Orha'a roma kreini, me yohya'a honona maka ha rnairia la roma-krei die ralamni pa rkola tieru-rawur nehla la Uplerlawna. 22 Meman nekla agama Yahudi deullu-tatarni nhopan pa trema honona re de rnairia rara pa ra ramou-rawitna yoma yamou-yawitan la rira do'oni-halli de eneknekto'a rnair rara. 23 La' hade pede hare honona maka rnairia la roma-krei die pa ra rkola tieru-rawur nehla la Uplerlawna de, rnairia pipi onde hayorni rarni pa ramou-rawitna re. Maka rnairia pa rkola tieru-rawur nehla de memannu-tatarni la'a hya' ed makden la Ilyamou-Watyatoha. Mere la'a hya' ed maka rnairia pa ramou-rawitna la Ilyamou-Watyatoha de hade inponni narehelia pipi hayori rarni maka ha rhoi-rtania pa ra ramou-rawitna. 24 Yoma Yesus Kristus edonna Nler la Geni Momuou-Witwitan Memna la'a roma-krei, maka rimormiori limni enni, mak ha rna'etga la'a Geni Momuou-Witwitan Memna maka plollolli. Mere Enler la kniola tieru-niawur nehla Geni Momuou-Witwitna inhatta la'a Ilyamou-Watyatoha. Totpa la' lera-mela ri de E' ed mak kwak la Uplerlawna la'a it rerieini. 25 Yahudi re makla' imam o'ta lawanni de, la anni-anin nek de rler la Gen Momuou-Witwitan Memna, la'a roma-krei die ralamni de rodia hayori onde pipi-duma rarni. Mere Yesus Kristus edonna Nlernohor imam o'ta lawanni hihi'ini-yapyapni re. Enla'a Ilyamou-Watyatoha totpena Nhoi-ntan niek la E inonni raralamni nmeh'a. 26 Yoma la'pa anni-anni nekpa Nhi' inonni la hoihoi-tantiani, de hota Enlernan nekneka kropna-krieutu yamuki-yama'ala la'a lerni Uplerlawna Nakoki-nayapia nohkeran di pa nodi liarni. Mere la' lera-mela ri maka rweta la ler maka hota kod lia lera noha niatni, de Enmai pia Nhoi-ntania inonni de raralamni nmeh'a totpena Nkuhi-nho'or doinia it do'oni-halli. 27 Ne hota emeknekama Uplerlawna Nakota de hota rimormiori rmat die raralamni nmeh'a pa nhorwua nanpena Uplerlawna ed maka khudi-kpara re, 28 hota emkade walia Yesus Kristus mana Nmat pia raralamni nmeh'a wali pa Nhi'a inonni la hopopa-hegeuru hoihoi-tantiani totpena na Nwuri-nohma doinia rirahu re do'oni-halli. Ne hota Enawal pia Nmai lia re'eni wornu. De hota edonna Nmai totpena Nhi' aplol owa'ana do'a-hala, mere totpena Namori-nalewna riy mak kwei rieri-knar reria E'a.
Yesus Nal inonni emeka hoihoi-tantiani de Ntuwu-nhai nian ita do'oni-halli pa nodi liarni
1 Ina-nara, agama Yahudi deullu-tatarni de emekneka memannu-tatarni to'a la ra'a-palu, kalwieda-paitiota, yamori-yalewna mak hota Uplerlawna Nalharia. It edon tlernan hare honona la'a deulu-tatar de. La' hade pede deulu-tatar de ta'en niana nhi' aplola-amneh'a riy mak kmai pia kola tieru-kawur nehla la Uplerlawna de rodia nhioini-tnianni la' anni-anin neka. 2 Yoma hota plollolli pa deulu-tatar de ed maka khi' amou-awitna riy yoma rala nhioi-tniani re la'a re'eni id ralamni, hota hya' owa'an ed mak kariei piede la' anni-anin neka pa rmai owa'an pa rala nhioi-tniani yoma rakwar ma'ta ir do'oni-halli la wawayanni? Hota la'pa deulu-tatar de nhi' aplola do'oni-halli de edon rodi owa'an nhioini-tnianni toh?! 3 Mere tamkek memna nhioi-tniani maka ha rodia pa ra rhoi-rtan lia anni-anin de, nreinian to' pa anni-anin de ir e rhoratreria ir de, de riy mak khi' reri-kyap reri do'a-hala. 4 Yoma plola la hayori ltiata rarni me pipi rarni mana hota edonna nwuri-nohma do'a-hala. 5 La' hade pede la' lerni Yesus Kristus Nmai lia nohkerna wawannu, Enakot la Uplerlawna: ”Uplerlawnu ne! O edonna Mpuak nana nhioi-tniani, patuini-paro'onni maka ha rhoi-rtani. Mere rwaldioinia de O' ed maka khi' taru-kyap tiarga inona mai A'u pa emeka hoihoi-tantiani mak hota Agal tiy O'a. 6 O' edonna Mpuaka nhioi-tniani maka ha rtunu-rharna la katri'ana wawannu onde nhioi-tniani korni maka ha rala rwauga do'oni-halli. 7 Noma A'ukota: ”A'g inhatti Uplerlawnu ne! Amuai die totpena liernohora O ralma-riormu pa emeka rakot oleka la Puka mak kapniopan de ralamni mai A'u.”’’ 8 Yesus Kristus Nakot ul lia Uplerlawna: ”O edonna Mpuaka nhioi-tniani patuini-paro'onni maka ha rhoi-rtani onde hoihoi-tantiani maka ha rtunu-rharna la katri'ana wawannu, la'pa nhioi-tniani korni maka ha rala pa ra rhernu-rwau dioini do'a-hala. Hare honona edon rhi' ralammu pa nahepru.” Yesus Kristus Nakot emkade ho'mana nhioi-tniani re honona de ra rhoi-rtania, yoma rlernohora agama Yahudi deullu-tatarni olekwa. 9 Nhorwua noma Yesus Nakot la: ”A'g inhatti Uplerlawnu ne! A'g e muai die totpena Aliernohora O ralma-riormu.” Pede Uplerlawna Nkuhi-nho'or momuoga patuini-paro'ona, nhioi-tniani mak ha rhi' nana la ululu re honona, ne Nherun doinia pa Nala Yesus Kristus na Nwauga pa Nhi'a la hopopa-hegeuru hoihoi-tantiani. 10 Yesus Kristus Nlernohora oleka Uplerlawna ralma-riorni de pa Nala inon wamueheni raralamni nmeh'a pa emeka hoihoi-tantiani mai ita. La' E inonni maka Ha Nal de, pede itla' Uplerlawna gahani mak kakleha do'a-hala. 11 Yahudi mak kla' imama makpolu-makwak la Uplerlawna la rimormiori rerieini, rala' nohora tulanni-kniarni la lera-lera, me rhi' mamain neka nhioi-tniani re. Mere nhioi-tniani me patuini-paro'ona re edonna rwal nian la hadoma pa rala ra rkuhi-rho'ora do'a-hala. 12 Mere Yesus Kristus enekneka Nal inon wamueheni pa Nhi'a la hoihoi-tantiani la Uplerlawna, totpena na Nhernu-nwauga do'a-hala re pa nodi liarni. La'pa Nala hoihoi-tantiani pa nhorwua dewade Yesus Kristus Naliwna la Uplerlawna walli malganna, totpena Nlernana ya'uli-yawedi. 13 Ne mulaini la' ler de pa Yesus Kristus Nwei niek la ler maka hota Uplerlawna Naru'u-natowar momuoga Yesus arwalli re honona. 14 Yesus Nwei nieka yoma eneknekto'a Enala hoihoi-tantiani raralamni, mere la' hade mana, Yesus Kristus Nhi' aplola-amneh olek pa nodi liarni la riy maka Nkuhi-nho'or la'a do'a-hala ralamni. 15 La' hade walia ed maka Uplerlawna Nhiw Lululli Nakot nohora ha plollolli mai ita. Enakota Niwra: 16 ”Orgahi-Orha'a lirni: Dodo'ondi de A'ukot targa hadi, de hota Agora ira mhi' wutu nnio'a warwuaru la' lera-mel mak kmai nieka ri. Hota Akenia A rio'ru-lia'yu la ir ihranu ralamni, me Aghorat targa la ira o'tani kriahlanu totpena rat niohora pa rlernohora re.” 17 Noma Orgahi-Orha'a Nakot nohor wal lia: ”Orgahi Aghoratdoin memna do'oni-halli re ror wutga nhioli-liet yatyatni re honona.” 18 Pede ina-nara ama-hyali, la'pa Uplerlawna Namou-nawitna memna it do'oni-halli de, nnia'eratni de yana tsi' owa'an nhioi-tniani maka ha rala ra rhernu-rwauga it do'oni-halli.
Mai pia twakrian reria Uplerlawna-Mempulwatnu
19 La' hade pede ina-nara ama-hyali, hota emkameni mai ita? Hota it edon tamta'at owa'an pa twakriania Uplerlawna, yoma emeknekama tler olek la genia mak kmou-kwitan memna la'a do'a-hala, onnila Yesus rarni mak kakhuri olek la it rerieini. 20 Yesus ed maka khar tialan warwuaru die mai ita, mak hota kodi it la mormiori-dardiari. Enhar tialan la genia momuou-witwitan de la'a Enal inonni pa rwunu-rwenna. E inonni de emeknekama kok lawna maka ra rahew tiarga liolgeni la kamir mak momuou-witwitan meman de la'a krei ralamni, noma kok de emalihirwah'a la woru. 21 Pede ina-nara, onnila la' dodo'ondi de tlernan oleka makpolu-makwak la Uplerlawna la it rerieini id olek wa maka karehi-kalawna, me mak kodi plolli la'a Uplerlawna romni mniotni, 22 la' hade pede mai pia itwakrian reria Uplerlawna. Itwakrian reria Uplerlawna de tal toto' memna it ihranu ralamni maka ha rwaloi-rwale'er oleka la'a do'a-hala pa emeknekama ra rkarg olek rara la, nor wutga it pesiayni mak karuri, me it inonni maka ral oleka gera ra ramou-rawitna la'a nhiarani ralamni. 23 Mai pia itorreria pitpitga ita pesiayni la Yesus maka itwayow nohor oleka la rira gaini ralamni, yoma Uplerlawna nanpena ed maka kdenreri (setia), ne hota E' edonna Nhortaplin maka Ha Nano'taru re. 24 Ne it mana it idma natu nhedu-ntehra ida totpena idma natu ntulla-nsayn ida me totpena tsi'a-tyapia kalwiedwedni. 25 Mai pia tape'el la yawoka-yale'u la'a kniola tieru-niawur nehla la Uplerlawna. Yana mliernohora riy mak kahmena rawok pa rkola tieru-rawur nehla la Uplerlawna. Mere yeher to' pa it idma nhedu-ntehra ida totpa pesiayni la' ga'a, yoma miat mueman nohora de Orgahi-Orha'a maimiaini la'a re'eni wornu de nrehgorgoru olekwa!
Yan memmemna mhioitio'or doin pesiaymi la'a Yesus
26 Yoma la'pa kot maka kaplola-kamneh'a mak kwatiawua Uplerlawna rakot oleka la mai ita, mere ita o'ta tehra ma'ta pa it edonna tollia it do'oni-halli, ne ittot pa tsortaplinu-twaliateman nohora, de hota maka ha rnair pa ra rhoi-rtani hadamon olekwa pa ra rhernu-rwauga it do'oni-halli. 27 Mere eneknekto'a twei pia itwatrom la Uplerlawna watghudni-lokarni nora ai mormiori mak kodia E ralam mehrani mak hota ktutni-kharna momuou riy maka khoklira-kpah'a waw la E'a. 28 Riy maka edonna klernohora deulu-tatra Musa, de rukum penan memna, de edonna rtutga sniayni la ira. Ne la'pa riy woru-wotelu niek de er mak kamkek memna riy de nhi' do'a-hala pa rre' wal pia rwaghala e'a, hota makhudi-kpara netlia de riy de nhala. 29 La'pa emkade la'a Musa deullu-tatarni de, hota yeher to' pa werat rehia maka rala rukmua la' riy maka kwatei-kwahapra Wutmueha-Laimieha, maka kpar la pihini petanni-lia'arni weranni la'a Yesus rarni maka Uplerlawna Nano'targa pa Ntuwu-nhai ita totpa it do'oni-halli re honona ema rwuri-rohma dodioinia, me maka kapolu-kaliella Uplerlawna Nhiwni mak kala sniayanni mai ita. 30 Yoma it tat niohora Uplerlawna ed mak kakot tiwra: ”Hota A'g ed mak kwahla me A'g ed mak kukmua.” Me Nakot walia: ”Hota Orgahi-Orha'a Ntorna watghudi la'a E mutnu-rahanu.” 31 Adoh! La'pa itler la Uplerlawna mak kden pa nodi liarni niukamnu de, itamta'at wen ita! 32 Mere ina-nara ama-hyali miy, mhioratreria la' ler delloo, la' ler maka mliernan oleka Uplerlawna Kot Kalwiedni. La' ler de mliernan walia kropna-krieutu pa mpiolpuol inmi-mpiakwak ammi, mere miy edonna mpialer la miy pesiaymi. 33 Lera dom de riy rapolu-ralielan miy, ne rwehwa yotyota-yatyat tiy miy, de emeknekama oha-ahu la'a mutlialawna gaini ralamni. Lera dom de miy miana mtiulla-msiayn nohora riy mak kler la yapolu-yaliella, kropanni-krieutnu mak emeknekama mliernan oleka de. 34 Me mtiulla-msiaynia riy mak kler la roma nhio'la ralamni. Ne la'pa rwarui-rwate'la nana miy hyonmi-hyanmi, de miy edonna mikotkot hadom la re mere miy ralammi rahepur reri, yoma miy e miat niohora de miy re'emi-tniarmi ed ma'ta, ne narehi-nalawan meman la'a re'emi-tniarmi maka ha rwarui-rwate'la nan oleka re. Ne hota re'emi-tniarmi mak karehi-kalawan de nodia pa nodi liarni. 35 Pa hota ina-narmi re! Yana mpialer la miy pesiaymi. Yoma la'pa miy pesiaymi naruri, de hota miy siepmi-kaimi maka rwahla tiy miy lia Ilyamou-Watyatoha, hota nareh liawlawna. 36 Pede mdien rer niek la pesiaymi totpena la' emkade pede mhi' nana-myap niana hya' ed maka Uplerlawna Nwahaka tiy miy. Ne hota la'pa miy e mhi' nan emkade de hota mliernana hya' ed maka Uplerlawna Nano'targa tiy miy. 37 Mhi' emkade, yoma la'a Puka ralamni de, e niwra: ”Hota E' mak kmai die Nmahrur pua Nmai wia. Hota maimiaini E' edon Nelga mahnekneka. 38 Ne A mu'tu-rah'u makden la plol wawna, hota rmori-rdari lia ir pesiayni wawannu pa nodi liarni. Mere la'pa riy dom la ira e rod lia li'iru la pesiay, de hota A ralmu namehra la ira.” 39 Mere it makpesiay di, de riy mak kaplinu kod lia li'iru la'a pesiay, pa hota it edon tler tar lia Uplerlawna niukamnu me edonna rrinni it la ai mormiori ralamni. Rwaldioinia de, it nanpena er mak kpesiaya Uplerlawna, pede it di de ed mak klernana mormiori-lewlewna.
Tlernohora riy mak pesiayni naruri
1 Ina-nara ama-hyali, mai pia twahaur nohora pesiay. La'pa pesiay nden la ita, itat niohora de hota it tlernan memna hya' ed mak itwakwak pa tlernana, mak edonna kayamkek ma'ta. 2 Yoma onnila it upni-tgarni mak kden la ululu pesiayni re pede Uplerlawna Nwayow nohora re. 3 Ne yoma la'a it pesiayni, pede itat niohora de la'a nohkeran di ed maka Uplerlawna Nal nek lirni pa na Na'ohi-na'ara de. Emkade pede hya' ed maka kayamkeka, de Ha Nhi'a la'a hya' ed maka edon kayamkeka. 4 La'a Habel pesiayni de, pede nala limtutnu la Uplerlawna mak karehia kakni Kain limtutnu. Yoma la'a pesiayni de, pede Uplerlawna Nreiniana-na'nana Habel pa emeka riy mak kaplol la Uplerlawna yamkekni. Ntut muemna Enreinian Habel yoma Enreiniana patuini-paro'ona maka Habel ha ntunu-nharan de. Ne Habel nmati-nmolg olekwa, mere emkade ho'mana emeknekama enano'a-na'at mua'ta it la dodo'ondi memna, yoma entutga pesiayni talan mak kaplol de pa itlernohora. 5 Yoma la'a Henok pesiayni, pede edonna nmati mere narian mormior lia nohkerna wawannu pa rodia la Uplerlawna. Riy id mana edonna rlernan owa'an e'a yoma Uplerlawna ed maka kran mormioria de. Itat niohora Uplerlawna Nran e'a onnila pesiay yoma la'pa edonna rran nan ma'ta Henok, de Uplerlawna Nakota Niwra: ”Henok de nhi' nan oleka hya' mak kla' nan A ralmu.” 6 Ne la'pa pesiay edonna nden mai ita, de Uplerlawna ralamni edonna Nal nan memn ita. Yoma riy maka Uplerlawna Nreiniana de, eneknekto'a mak kwahak E'a, yoma npesiaya de Uplerlawna etla me npesiaya de hota Uplerlawna ed mak kala ra'ani-pallu la riy mak kal ralamni tetema pa nwahak E'a. 7 Yoma la'a Nuh pesiayni, pede nlernohora Uplerlawna lirni. Uplerlawna Nakot momuou hya'a-hya'a mak hota Uplerlawna Nhi'a la'a ler li'iru. Nuh edonna namkek ma'ta mak emkade, mere emkade ho'mana Nuh na'unni-namta'ata Uplerlawna pa natlina-natailla ne nakoki-nayapia aupual liawna mak hota kamori-kalewan nan owa'an enora e romni mniotni. Hota la' e pesiayni de pede Uplerlawna Nwet e la riy mak kaplol la E yamkekni. Ne la' hade wal pia nohkerna nlernana niukmu, yoma rahmena ratlin la Uplerlawna lirni pa emeka Nuh nhi' nan de. 8 Yoma la'a Abraham pesiayni, pede nlernohora Uplerlawna la'pa Uplerlawna Npolga pa Nhopna nla'awa noh lawna-rai liawna ida maka Uplerlawna Nano'targa la. Noma Abraham nlernohora Uplerlawna lirni pa nla'awa, kennama naplin niohora hota e nla'aw hanmeni. 9 La'a Abraham pesiayni pede e' de emolmolla do'ona-dakna la'a gen miaka Uplerlawna Nano'targa la e'a. Abrahama ndella hande de nakleh ma'ta likti temtemna mere nhol niek la hoiwialli (tenda). Hota emkade wal lia e upni-a'nani Isak nora Yakop, yoma gen miaka Uplerlawna Nano'taru la Abraham, de ir wal pia er mak klernana gen die wali. 10 Abraham natahan ralamni la'a mormiorni mak emkade yoma entepartarlia wniei la'a leta warwuaru maka Uplerlawna Nmeh'a Nariria Nlernohora E ralma-rior wamueheni, mak hota emekneka roma maka ha rariria la watu liar pianulu mak karuri-ka'orta pa edonna nwo'la la' genni pa nodi liarni. 11 La'a Abraham pesiayni, pede enlernana duratni-waitni la Sara, maka yamkekni de rora rhamto'a-rhape'ewa, la'pa reriehenu de Sar nek de nkeran la ya'a'na. Mere irlernan a'na yoma Abraham npesiay toto' memna hota Uplerlawna edonna Nhortaplinga nnio'oni. 12 Pede la' ler de, de Abrahama nhamto'owa pa edonna nlernan a'na yoma inonni nmati, la'pa emkade ho'mana e o'ta watnu nmeh'a mere e' ed mak klernana durti-waiti mak kaniutni-kamdierna, pa emeknekama eni-tani, me wtion mak kden la lyanti maka takeni rrekan nana liawanni. 13 La' hari honona edonna rwaler la pesiayni la'pa rmat niohor memna. Ir edonna rlernana hya' maka Uplerlawna Nano'taru re, mere eneknek to'ama ratlina me rhoratreria. Ne la' hade pede iriwra ir de do'ona-dakna makahulti-kahamar to' ira la'a nohkeran di wawannu. 14 Riy mak kakot emkare de rtutga de ir er mak kat niohor oleka geni-tiena maka hota irhi'a la ira gen wamueheni. 15 Gen miaka irlergot olek la de, ir edonna rwaror nan hade, yoma hota irwaror nan hade, de hota irlernan talan rahu pa rawal lia gen die. 16 Mere tamkek la de ira rapili-rahniaria geni mak samomuounu rehia nohkerna gahani, makden la'a Ilyamou-Watyatoha. La hade pede Uplerlawna edonna Nmola-nma'a Natlina ir riwra E' de ira Uplerlawanni, yoma Uplerlawna Nhi' targ oleka leta id la ira. 17-18 La'a Abraham pesiayni de, pede la' ler maka Uplerlawna Nawerta-natailia e pesiayni, de nhi' a'nani Isak la paro'onni pa niwra nhi'a la hoihoi-tantiani la Uplerlawna. Abraham nlernan oleka Isak maka Uplerlawna Nano'targ oleka la e'a, Niwra: ”Hota a'namu Isak de ed mak kadurti-kawait nana durti-waiti maka A'uno'targa tiy o'a.” Mere emkade ho'mana Abrahama nhur dioin a'na memeheni de pa niwa ntunu-nharna la katri'ana wawannu 19 yoma Abraham npesiaya de hota Uplerlawna ed maka hota kodi plolli pa Namori owa'an Isak la matmiatni. Ne plollolli de la' ler maka ha niwa nhi'a Isak la hoihoi-tantiani, de emeknekama Uplerlawna Enamori owa'an Isak la matmiatni ralamni yoma Uplerlawna Nalewna Isak la matmiati la'a Enala pipi pa nhernu-nwauga Isaka. 20 Yoma Isak pesiayni pede la'pa Isak nhamto' olekwa, de enano'a-na'atga e a'nani Yakop nora Esau lia tertera-demdem maka hota a'nani rora rlernana la Uplerlawna la' tuw li'iru-a'na ga'a. 21 Yoma la'a Yakop pesiayni, pede Yakop la'pa nhi'pa nmat wia, de Yakop nwaka Uplerlawna pa Ntera-ndema Yusup a'nani rora, me nnairia lie'enni pa nhi' arur inonni pa napriri, pa nkola tieru-nawur nehla la Uplerlawna. 22 Yoma la'a Yusup pesiayni pede nhi'pa nmat wia, noma nakot nohora de hota Israel re rlergot la' noh Mesir emeka Uplerlawna Nakot targ oleka, me nakot tar walia e nnio'oni, la'pa enmati die, rwahi'a-rwayodi samomuoga e inonni, pa rodia rlergot la Mesir. 23 Yoma la'a Musa inni-amni pesiayni pede rade'a-ramoinia Musa la lera rmor dioinia de, la'a wolla wotelu ralamni. Yoma irwarora de la Uplerlawna yamkekni de ir a'nani de samoga, hade pede ir edonna ramta'ata ray titni maka enhopan pa rwunu-rwenna makden Israel a'na muanke'a maka na'nama rayor niana. 24 Yoma la'a Musa pesiayni pede la'pa enlawan wa de nahmena rpolg e la ray Mesir upni-a'nani. 25 Mere e ralamni nod reria Uplerlawna mutnu-rahanu pa enor wutga ir pa rlernana yamuki-yama'ala. Enwarora de yamuki-yama'al de samounu rehia la'pa enor wut riy maka enekneka lera ho'ke'eni to' pa rlernana yamuki-yahepru la'a do'a-hala ralamni. 26 Musa nwarora de hota nlernana yalernu-yaha'a yoma la'a Ray Makamori-Kalewna maka Uplerlawna Nano'taru rerieini, de ha welli narehi-nalawan la re'a-tniaru maka hota nlernana la Mesir. Yoma Musa nha'ar aranni la siewa-kai maka hota Uplerlawna Nala la' ler li'iru. 27 Yoma la'a Musa pesiayni pede e nlergot la Mesir. La' de edonna namta'ata ray yawenanni. Mere Musa nru' rer niek pa nler la ga'a yoma emeknekama enamkek oleka Uplerlawna mak kayade' de! 28 Yoma la'a Musa pesiayni pede e nhopan pa makden Yahudi re rhi'a Paska. De Enhopan pa rkarga rara pa ra rakniaga la'a Israel re romni nhiarni, totpena Uplerlawna hopopanni-lili'irnu maka Nhopan pa nwunu-nwenna rimormiori, nmai die yana nwenna Israel re a'na yanullu. 29 Yoma la'a Israel re pesiayni pede rleretia Hletan Mermera (Laut Merah), de emeknekama ir e rlol to'a tan kierna wawannu. Mere Hletan Mermer de nlumu-ntella riy Mesira honona mak kla klernohora Israel re pa rta'aga Hletan Mermer de yahlerni. 30 Yoma la'a riy Israel pesiayni pede rwakdior niana leta Yeriko la'a lera wo'itu, dewade Yeriko watu liarni-il pidarni ema rgor diodioinia la. 31 Yoma la'a Rahab, patke' yatyat de pesiayni, pede e' edonna nlernana wnienan wutu la'a riy maka khok lira-kpah'a waw la Uplerlawna, yoma enpesiaya Uplerlawna pede nreiniana-na'nana riy Israel mak kla kwuwu lia'a leta Yeriko. 32 Nah! La'pa ultier pia godia lia'ru la' hare honona, hota mahnek rehia pede a'g edonna ukot nohor plu'unu-plehenu la'a Gideon, Barak, Simson, Yefta, Daud, Samuel, la'pa makwohorulu-ktatrulu dom to'a pesiayni. 33 Mere la'a ir pesiayni pede dom de raru'u-ratowra hairi-hairi, dom de rla' mak ktorna-krautu mak kodia rhi'ina-rella, dom de rlernana hya' maka Uplerlawna Nano'taru la ira. Dom de er mak kato'ma singa re nurnu. 34 Dom de er mak kwarmua ai miak klomlomra, me dom de ralewan nan inonni la riy mak kiwra kala wehla plalahwa pa rdawar wenna re. Dom de rakleha ruri-lai mere rwaldioinia de Uplerlawna Nhi' ir pa raruri-ralai. Dom de ra'iwar la ar ralma, pede raru'u-ratowra arwalli maka kwalitna-kwatauru mak kwatiawua noha dom to'a. 35 Yoma la'a doma pesiayni pede patke'a dom a'nani mak kmati olekwa rmori owa'ana. Ne la' riy dom pal owa'an de rwayow nohora ir inon wamueheni matmiatni. Irlernan yamuki-yama'ala, nniahora-nniala'a onnila pesiay mere rahmena rwayow pa rollia ir la, yoma ira wniarorni de hota rmori owa'an la' mormiori plalahwa ralamni mak samomuou muemna. 36 La' dom pal miana rhi'a la yahe'i-yamali, rliwra-rkaklia me rala ranti mnotna ra rwutga, me rkenia la roma nhio'la ralamni. 37 Dom pali die rala watu ra rwatliewria pa rmat miemna. Dom pal die rala niadi ra rad wienwenna, me doma de rala wehla ara ra rdawar wenwenna re. Dom de rmeh'a ralala'a pa rhewta-rnairia pip ulti-dum ulti, rakleha-raplar nohora neka yamuki-yama'ala, nniahora-nniala'a. 38 Ir den nek la wo'orletna-kawurloini, me la' walia hu'ula-liena. Mere plollolli de ir de de riy mak kla' nan memna Uplerlawna ralamni pede rarehi-ralawan la rimormiori nohkeran di. 39 Uplerlawna nek de Nwayow nan olek ir honona yoma ir pesiayni re. Mere emkade ho'mana la' ler de ir edonna rreiniana-ra'nan ma'ta hya' maka Uplerlawna Nano'tar lia re! 40 Yoma Uplerlawna e Nwarora-nwalaiya samomuounu mai ita, de itor ir rewre'wa pa tlernana hya' maka Uplerlawna Nano'taru re, totpena it rewre'wa pa twal lia riy makdella plol wawna la E yamkekni.
Mliernohora Yesus nhiolli-lietni nora hihi'ini-yapyapni
1 Pede, ina-nara ama-hyali, it di de hota emeknekama mak kwarehi la yawlari. Me makpesiay la' ler ululu re emekneka mak kawlari pa rler olek la hohoni yoma ir mak ktutga pesiay mak kaplola mai ita, ne dodo'ondi de ramkek itawlari. La' hade pede emeknekama mak kawlari ida nhoplial momuoga hya' mak khi' awert e'a ne nwaleran pa nler ulu lia hohoni, de hota tape'el pa itsopliala hya' ed maka khi'a yawuhi-yawe'et mai ita, me la'a do'a-hala maka kden rer miamain la it ralamni. Ne mai pia tatehra it ralamni pa tler wut lia wniarehi ralamni, tlernohora nek talla maka Uplerlawna Ntutga mai ita. 2 Yan tamkek la wali-wali, mere tta'wa tar it matni la Yesus, yoma E' ed mak ktutga talan mai it la it pesiayni la' mulaliaini nodia pa la nhoru. Yesus ed mak ktahan reria liwliwra-kakaklu me rkoki-rta'wa la auwlakra hananni! E' edonna Nwaror nana matmiatni la auwlakra hananni ed mak kodia molmola-mama' la E'a. E wniarorni Nden rer tio'ola he'i-hepur lawna mak hota ha rtemna la E limni ralamni la' Ilyamou-Watyatoha. Ne la' dodo'ondi, de E' e Naliwna la liwangen miak kden wut lia Uplerlawna liwangeni tiutullu, la' wali malganna, pa Enor wutga Uplerlawna rtorna-rraut la' hande! 3 Pena mpiaror teka E hihi'ini-yapyapni de totpena hota miy edon mimta'ata pa miwlar lia pesiaymi. Yoma E' mana Nler la yamuki-yama'ala, nniahora-nniala'a la' riy dodo'a-halala mak khoklira-kpah'a waw la E'a.
Riy maka Uplerlawna Nhi'a la a'nani de Enwatutu me Enliwra pa emekneka ama ida nor a'nani
4 Ina-nar miy re, la'a lera-mela ri maka mpialiewan pa mhioitio'or doin miy do'omi-halmi de miy edonna mliernan ma'ta wniunu-wnienna emeka Yesus Nlernana. 5 Me miy mhiortapling oleka Uplerlawna nnio'oni-niatnu tiy miy mak khi' aruri miy ihrami-ralammi. Enakot nohora hade yoma Enatga de E a'nani miy. Niwra: ”Upa-a'na miy re, yana mpiarwah'a Orgahi-Orha'a wniatutnu-wniaye'eni la miy. Yana ralammi nmolu-nhelma la'pa Enpol niohor miy. 6 Yoma riy maka Ensaynia de, Orgahi-Orha'a ed maka Nwatutga. Ne E' wal pia ed mak kliwra-kaklia riy maka Enatga de E a'nani.” 7 Pede ina-nara ama-hyali, la'pa mlier la kropna-krieutu nniahora-nniala'a, mitatahan nek ralammi. Mpiaror teka, de emeknekama Uplerlawna ed maka kliwra-kaklia miy pa emeka ama ida nor a'nani. Yoma mowen niana ama ida edon nukmua a'nani?! 8 Ne la'pa miy edonna mliernana niukum pa emekwalia Uplerlawna a'nani re honona nhi'inde rlernana, de nnia'eratni de emeknekama miy die E a'na raralamni atia' miy. 9 Hya' reh wial die la'pa rima-rima amni makden noha wawannu de etla, de e' ed mak kamota-kama'ara me nliwra-nkaklia upni-a'nani. Ne la' ler de ir upni-a'nani ratu nhu'ru-nhelam la ira. La'pa emkade, de hota emkameni owa'an la it Amlawanni makden la Ilyamou-Watyatoha? Hota yeher to' pa itsu'ru-tselma tatlina-tatailla totpena tlernana mormiori-dardiari toh! 10 Yoma rima-rima amni makden la noha wawannu rwatutu-rwaye' upni-a'nani de rlernohora hya' maka irwarora de ed maka kaplola, ne edonna nodia pa la nhor wuali. Mere Uplerlawna Nwatutu-nwaye' it de Nahaka totpena it orgahani tlernana kalwiedwedni, totpena hota itlernan walia mou-witna la it do'oni-halli pa emeka E wniehwani wali. 11 Plola, la' lera rliwra-rkakli ita de itkakru yoma ita ralamni nmolu-nhelma. Mere la'pa it treiniana liwliwra-kakakul de pa itlernohora, de la'awa honi demade niukum de ed mak kodi it pa tmormior lia plol wawna me khi' it pa it ralamni namtiertiernu.
Wniehwa-liakta mak kaplola la'a riy mak klernan oleka Uplerlawna nnio' warwuarnu
12 Pede ina-nara ama-hyali, miy pesiaymi de emolmolan nekama mak karehelia yawlari, pede mpia'ur limmi mak kal mat die pa naruri, me tormi mak kdiwdiwra totpa nmaklekla pa naruri. 13 Muwlar die mliola loi-talan mak kaplele'era la'a rai mtatanni, totpena mak klernohor rer miy mana lakni mak kyata nkalwied owa'ana. 14 Ne mpiahak meman pa miora riy honona mkialwieda. Me mial inonmi la Orgahi-Orha'a pa mdien rer lia mou-witna la'a do'a-hala ralamni. Yoma riy id mana hota edonna namkek nana Orgahi-Orha'a, enekneka riy mak kakleha do'a-hala, mak kla' olek la Orgahi-Orha'a gahani. 15 Hota idma nano'a-na'atga ida totpena yana riy id mana nhoitio'or doin la e pesiayni la'a Uplerlawna onnila ralam kalwiedni mak ktuwu-khai olek do'omi-halmi. Yanpa hota riy maka khoitio'or doini e pesiayni de ralamni namehra rehia noma nlergot pa hota nodia makpesiay harahu totpena rhi' nana hya' mak edon kla' nana Uplerlawna ralamni. Riy mak kodia makpesiay wialli la' klieratni de emeknekama yawuli-yatniamni maka kmeru, mak kodia mermernu-kapkapalli. 16 Mitiak kalwiedwed reria totpena yana milira-miliai. Me yanpa miy edonna mhia'wa nana Uplerlawna nnio'oni pa emeka Esau nhi' nan de. Yoma Esau e na'ol dioinia hya' maka Uplerlawna Nala, la e garni, de nala e yanullu niodni na nherun nana yamanna tutwu ralamni to'a. 17 Yana mhi' emkade yoma miy e miat niohor oleka de, hota la'pa Esau niwra nlernan owa'an tniera-diem della amni, amni nwayotlia. Nko'a-nkakru nwahak talan pa nlernana ho'mana, nakleh oleka talan wa.
Itlernana nnio' warwuaru mak karehi-kalawna la Musa deullu-tatarni
18 Ina-nara ama-hyali, miy edonna mliernana hya' maka Israel rlernana la Musa lerni, la'pa riwra rrehgoru Uplerlawna. La' ler de rmai niek la' wo'ora Sinai, la'a ai mak klomlomar la. Irlernan to'a mel'utni-malienni, me anin lawna. 19 Ir e ratlin nana noknoka mak kajorni, me Uplerlawna lirni mak katro'ona. Ler maka Israel re ratlin nana lir de noma rwak de totpena lir de yan memmemna iratlin owa'ana. 20 Yoma ir ta'en niana rtahan nana lir mak khopna ir de, Niwra: ”La'a mak kmormiori hya' to' pa nlok la wo'or di, la'pa rimormiori onde hamormiori nmeh'a to'a ho'mana, de edonna rsayni owa'ana mere ral meman watu ra rwatliewur wenna.” 21 Hya' maka Israel ramkek nana de ramehi-rayon rehia, la' pede Mus nek de niwra: ”A'umta'ata me adiwra-dia'ala!” 22 Mere rwaldioinia de la' miy die, miy mmiai olek la wo'ora Sion, de la'a Uplerlawna mak kden pa nodi liarni letni maka riwra Yerusalem, mak kden la Ilyamou-Watyatoha. Miy mmiai pia mpiatrom nana Uplerlawna hopopanni-lili'irnu riwnu-halli mak kawoka-kale'u pua rahe'i-rahepur rer lia ya'uli-yawed lia Uplerlawna. 23 Miy mpiatrom nana Uplerlawna upni-a'nani yanulnullu wokni-le'enu, de it inni-narni makpesiay irhatta maka ha rhorat targ oleka kotni-nanni la' Ilyamou-Watyatoha. Mmiai pia mior Uplerlawna mak ktorna watghudi la rimormiori nohkeran di wawannu pa mpiatrom nana. Mpiatroma riy mak kmormior lia' nohkeran di la' ler ululu, mak kaplol la Uplerlawna yamkekni, pa dodo'ondi de e rwali olek la mak edon khal kuku' eti. 24 Miy mmiai oleka pa miora Yesus inhatta mpiatroma. E' ed maka kwal lia taliorta-lakatrai (lol letgara) la'a nnio'a warwuar die. Ne E rarni mak khuri die ed mak hota mhia'ar aranmi la, mak edon nora Habel rarni rwatutur wutu. Yoma Habel rarni nwak nekpa rukmua, mere Yesus rarni ed mak kodia pa rwe'er doinia la do'a-hala.
Yan memmemna mpiarwah'a Uplerlawna nnio' warwuarnu onnila Yesus
25 La' hade pede nhioratmi nden la temmi. Yanhi'pa miy edonna mhia'wa nan Uplerlawna lirni. Yoma riy maka edonna kha'wa nan Uplerlawna lirni, maka Musa makdella nohkerna wawannu de nakot nohora, de rlernan meman niukamnu. Pede hota yaho'ma it di, mak katlina Uplerlawna lirni nwatiawu mueman la Ilyamou-Watyatoha. La'pa itahmena tatlin la E'a, de hota emkameni la ita mormiorni-lewlewanni?! 26 La' Musa lerni de, Uplerlawna lirni yetanni emekto'a noha nruru (upkarururu) pa nohkerna-rai miarna uhunu-ewatni, ewatni-lahwani wolwo'la-wawiainia. Mere la dodo'ondi de E Nano'targa: ”Ralamni owa'ana, hota A'g ed maka khi'a nohkerna-rai miarna, me lyanit marna pa wolwo'la-wawiainia.” 27 Uplerlawna lirni de Entutga de hota hare honona maka ha rakoki-rayap nian de, hota rawo'la-rawaini me rweyata-rwaniawua, totpena hare honona mak klernohora Uplerlawna ralma-riorni rmeh'a ed mak kdena, yoma ta'en niana ha rawo'la nana pa rweyata-rwaniawua. 28 Pede ina-nara, mai pia ta'uli-tawedi Uplerlawna yoma hota tlernana hair warwuaru id la E'a de mak ta'en niana rweyata-rwaniawua. Ta'uli-tawedi E'a, yoma kniola tieru-niawur nehla mak emkade ed mak kla' nana E ralamni. La'a it ya'ulli-yawedni, kniola tieru-niawur nehlani de tatu tsu'ru-tselma, ta'unni-tamta'at la E'a. 29 Tatu tsu'ru-tselma, ta'unni-tamta'ata, yoma it Uplerlawanni de Nodi plolli pa Nukmua rimormiori, pa emeknekama ai miaka kamutni-kaki'ira.
Emkameni la itsi'a Uplerlawna ralamni pa nkalwieda
1 Ina-nara ama-hyali, la' mormiormi-dardiarmi de idma nhi' reria kalwiedwed ida totpena emeknekama makpesiay mak kwa'ina-kwanara de lol talanni. 2 Yana mpiayotlia riy maka kma kwaloha-kwalakta, mere mrieiniana-mia'nana re. Mhioratreria! La' ler ululu de riy raplin niana ira e rreiniana Uplerlawna hopopanni-lili'irnu (malaikat) la ir romni nayanni. 3 Hota mhioratreria riy maka kden la roma nhio'la ralamni, emekwalima miy erla roma nhio'la de wali totpena mtiulan la ira. Me mhioratreria pa mtiulan walia riy maka klernana nniahora-nniala'a, de mhiorat nan inonmi emekwalima ira. 4 Riy honona rtutga ya'unanni-yamta'atni nhiu'ranu-nhielamni la'a mehlima-marya'a. De yana muanke'a onde patke'eni nalira-naliai lola tio'ora. Yoma riy mak khi' akdeha-aktiahli mehlimni-marya'ani pa ralira-raliai, de hota Uplerlawna orgahani ed mak khudia harella watghudni lokarni. Emkade wali patke' ida onde muanke' id mak kakleha hawa mere ralira-raliai liola tio'ora de hota Uplerlawna ed mak kod ir la watghudi lokarni. 5 Yan memmemna mhia'ara mormiormi la kupna-kai, re'a-tniaru, mere ralammi rahepuepur nohora hya' mak ed olek la tiy miy. Yoma Uplerlawna Nmeh'a neka Nakot oleka wa: ”Hota A'g edonna ghur dioinia o'a, onde ultarga o' pa mueh'a taru.” 6 Pede it mana tparan pia tiwra: ”Orgahi-Orha'u ne! O ed maka ktulan rer mai a'u pede a'g edonna umta'ata. Hota hya' ed maka rimormiori nohkerna rhi'a mai a'u?!” 7 Yana mhiortaplinga mak khi'a o'ta-mat tiy miy la' ler maka itto'or olek de, mak kakot nohor olek tiy miy la Uplerlawna lirni-tunnu. Mimkek samomuoga, kalwieda-paitiot mak ha rhi' nana la ir mormiorni re, ne mimkek nohora ira pesiayni yala'ani pa mhi' wal lia. 8 Mliernohor reri ir pesiayni yala'ani yoma Yesus Kristus edonna Nwali lia'a-nwali maiya, la ululu memna, la' dodo'ondi E inhatta pa nodia liarni. 9 Pede yan memmemna mitlina-mitailla wniatutu-wniaye'a rupni-rupni mak kodi miy la'a klierat lawanni. Mere it tala it ihranu ralamni tetema de la Uplerlawna Nmeh'a, totpena Enaruri-nalai niana it la'a E kalwiedwedni Nmeh'a. Yana itsa'ar it aranni la deulu-tatra mak kakot nohora ya'ana-yemnu maka rha'ar ir aranni la pa nodi ir pesiayni la'a ga'a. Yoma riy mak klernohora deulu-tatra ululu la'a ya'ana-yemnu re, edonna rlernana hadomdom pali. 10 Yoma Yesus Nmat pia Namou-nawitna it la it do'oni-halli ralamni. Ne la' E hihi'ini mak emkade pede emeknekama Enwal lia ita hoihoini-tantianni makden la katri'ana wawannu. Mere riy maka klernohor ma'ta deulu-tatra pa rwahaka yamou-yawitna la'a do'a-hala, de edonna rla'a rieknenni pa rre'ela rkamit nan oke'ela' hoihoi-tantiani makden la katri'ana wawannu mak it gahani de. 11 La'a Orgahi-Orha'a romni (Kemah) mak ululu de, pipi-duma rarni maka ha rala pa ra rwahla do'a-hala, de imam o'ta lawanni nodia la Geni Momuou-Witwitan Memna la do'a-hala. Mere pipi-dum de inonni mak kmati olekwa de ra'ala pa rtunu-rharna la leta to'orni. 12 Pa hota emekwalima Yesus. E' orgahani rarni de ed maka ra rkuhi-rho'ora E mutnu-rahanu re do'oni-halli. Mere E nek de Nler la kropna-krieutu la'pa Nmat lia leta to'orni. 13 La' hade pede mai pia tlola E talla warwuarnu mak hota kod it pa tlernan walia E yamolli-yama'ani emekwalima Enlernana la'a leta tio'orni. 14 Yoma mai nohkeran di de hota it edonna tlernana geni-tiena mak kden rer pia nodi liarni. Mere itsa'ar it aranni la'a geni-tien mak hota kmai. 15 Onnila Yesus Nla' makpolu-makwak la Uplerlawna la it rerieini, pede itlernan talan pa ta'uli-tawedi Uplerlawna. Pede mai pia ita'uli-tawed rer mamainia Uplerlawna kotni-nanni. Yoma ta'uli-tawedi Uplerlawna de emeknekama itsoi-ttania prehena-mau la Uplerlawna, emeka riy mak kwayow nohora E'a emeknekama ir Uplerlawanni. 16 Yana mhiortaplinga pa mpiehwa-mliakat la plol wawna me mira'a-mipalga la rimormior wialmi, yoma wniehwa-liakta mak emkade, de emeknekama itsoi-ttania patuini-paro'ona mak kla' nana Uplerlawna ralamni. 17 Mliernohora mak khi'a o'ta-mat la miy lirni-tunnu, ne mhiu'ru-mhielam la re. Yoma hota ir nanpena er mak kakot nohora ir tulanni-re'eni tiy miy lia' Uplerlawna. Miatu mitlina-mitailla ira, totpa hota ir mana rtulla-rkar die ral toto'a ralamni tetema, mere la'pa miy edonna mitlina-mitailla ira, de hota ir ralamni edonna ramtemna me rkar die edon naplola pa hota kniarni re edon nodia unut tiy miy. 18 Msiumbain mai ami. Yoma amatga de amhi' hya' to' de ndella plollol wawannu me ampak de hota emkade pa nodi liarni. 19 Awuak lilili-mamuau tiy miy, totpena msiumbainia a lia Orgahi-Orha'a Uplerlawna-Mempulwatnu de mpiak totpena Enodia a' pua a tiy miy die.
Sniumbaini hohoni
20 Uplerlawna Namori-nalewn oleka Itmatromni Yesus la'a matmiati ralamni. La'a matmiatni de pede Enhi' oleka Makodi Duma O'ta Lawanni la'a ita mak ha riwra E dumni ita. Ne E rarni mak katiowur de wali pia ed maka karur niana nnio'a mak kodi liarni, mak Uplerlawna Nano'targa la mai ita. Pa awuak de Uplerlawna mak kala kalwiedni-paitiotni, 21 hota E' ed mak kala himimni-rere'eni, rurni-laini hya' to'ola miy totpena la' hya' to' maka ha mhi'a de nlola E ralamni me totpa it hononita tla' riy maka E ralamni nala, lola Yesus Kristus tutulanni-rere'eni. Mai pia tlilili-tmamuau ta'uli-tawedi E' la' dodo'ondi pa nodi liarni. Amin (Plola).
Horta lirni wniatni
22 Ina-nara ama-hyali, awuak tiy miy die mtiulan pa mitlin samomuoga a yano'u-ya'atu ri, yoma a hortu di tiy miy die edonna nawerna-naplahwa. 23 Agiwra ukot wali tiy miy die totpa miat niohora de, ita mutwualli Timotius nlergot olek la roma nhio'la ralamni. Ne la'pa edon nalo'on wali pia e nma nwahak a'u, de hota agor rewre'wa pa mla mtomar tiy miy. 24 Hota mikot nohora a kalwie'du la miy o'tami-matmi re honona me la' walia Uplerlawna mutnu-rahanu re honona. Me mliernan walia it inni-narni, amni-hyalli makden la Itali re kalwiedni. 25 Pena twak la Orgahi-Orha'a pa Nala ra'ani-pallu nanaloi-nanatar nan miy hononmi.
Yakowsi nwak kalwieda
1 Ina-nara ama-hyali, Yahudi miy mak kler olek la Uplerlawna mutnu pepanni-taurnu ralamni, makpeha-maklawan la'a noheri woru-lyanti nayanni. A' di de Yakowsi, awuak kalwieda-paitiota la miy hononmi. A'g ed mak kre'ela khi'a hopopan la Uplerlawna lirni-tunnu me arie'ela ghima-rie'a lidna-tiauru nohora Itmatromni Yesus Kristus.
Pesiay mak kodi it la kirkira-ralma-riora
2 Ina-nara ama-hyali miy hononmi. La'pa mormiormi-dardiarmi rler la kropanni-krieutnu polpuol inni-wakwak amni, de yana ralammi nmawla mere mihepuepru nohora. 3 Yoma unut lawn olek hade tiy miy wia. Ina-nara miatga oleka, de la'pa itler la kropna-krieutu mere emkade ho'mana it pesiayni narur lia Orgahi-Orha'a, de hota yeher to' pa itatu tatahan it ralamni la kropna-krieutu polpuol ina-wakwak ama hya' to'owa. 4 Ne hota la'a tatahan ralamni nek emkadi, la hohoni de hota itla' riy mak kden la plol wawna, de de riy mak kler la plolli-mneheni la hya'-hya' to'owa. 5 Mere la'pa riy id tiy miy die naplin niohora hota nwehwa-nlakta emkameni la' kropna-krieutu ralamni, de mikot la pa e nwak nek talla la Uplerlawna. Ne plol toto' pa hota Uplerlawna Nala o'ta-kriahlu la e'a, yoma Uplerlawna ed mak kala himima-rere'a la he'-he' to'a, lola Uplerlawna ralma plele'erni pede edon Nawenan la riy mak kwak la E'a. 6 Hornama riy meni mak kwak la E' de, de pesiayni namtemna. Yoma mak pesiayni edon kamtemna, de emekneka yo'or tah'i lawna maka anni nod lia'-nod miaiya. 7 Riy mak emkade, de yana nwarora de hota Orgahi-Orha'a Nwahla polpuollu-wakwakni, 8 yoma riy de emekwalima damdiamu kleh ga'ara pede ralamni worworga.
La'a kleha-lara me re'a-tniaru
9 Ina-nara makpesiay miy, mak kakleha-kaplara de yana ralammi rmawla, mere mihepru yoma Uplerlawna Nwalir nian miy pia mhi' E limni-rorni. 10 Ne makpesiay mak kre'a-ktaru, de mihepru yoma (Uplerlawna Nhi' totpena miy edon mhia'ara aranmi la re'emi-tniarmi, mere mhia'ara aranmi tetema la Uplerlawna. Yoma) hota Uplerlawna orgahi ed maka kalernia makre'a-ktaru miy genmi. Mak kre'a-ktaru re hota emolmolla wewan deutu mak kapi'ira. 11 Yoma la'pa lera nhit panpahna de wewan de hota napliau, ne deutnu mana napi'ir doin nohora samounu. La' walia makre'a-maktaru re hota rler la matmiati-molmuolu la' ler maka ir er ma'ta la wniadakanni ralamni.
Totota-wudwiudi nora norniori-tamtama
12 Mak katehra nan ralamni la'a kropna-krieutu ralamni, de hota nler la unut lawna. Yoma la'pa nlewan la yatehra ralma la'a kropna-krieutu re, de hota emolmolan nekama mak kawlari ida mak kler ulu la' honi klernana siew de, hota e nlernana mormiori-dardiari maka Uplerlawna Nano'targ oleka wa la'a riy meni-meni maka ralamni nden rer lia Uplerlawna. 13 La'pa riy ida nler la yapi'u-yaga'u, yan niwra yapi'u-yaga' die ha nwatiawua Uplerlawna. Yoma ta'en niana Uplerlawna Natlina-natailla' yapi'u-yaga'u (yoma Uplerlawna edonna nora yatyatni-halalli rla' lir ida) pa Ntota-nwudia riy ida. 14 Mere hota yapi'u-yaga' die nwatiawu riy de ihranu ralamni. Yoma wniaror yatyata ed olek la. Ne la'pa riy de niwra nlernohora wniaror yatyat de, hade de emolmolan nekama i'n mak kiwra nte'la la' ainiara mere naplin niek la ema rhewra kenna. 15 Ne la'pa tlernohora yatyata-halal mak kden olek la it ihranu ralamni de, de hota itler la do'a-hala ralamni. Ne la'pa do'a-hal de na'ona-naga'ar la it ihranu ralamni, demade nod it la matmiati-molmuolu ralamni. 16 Yan memmemna i'nu-na'ru a'mu-hya'lu mak kden rer lia a ih'ru-ralmu mpiaror mak edon kaplola. 17 Yoma hya' maka itlernana kalwiedweda la'pa ra'a-palu honona re, hade nwatiawua Ilyamou-Watyatoha, maka Uplerlawna mak kwoili-knatria, demade orgahi ed mak kalernia. E' ed maka kwahi'a-kayapia lera-wolla la' lyanti. E' de de Uplerlawna maka nhiolli-lietni ndel to'ola genni, pede edon emeka lera-wolla pa nernu-nha'ata. 18 Nlernohora E ralma-rior wamueheni, pede Nhopan pa rakot nohora Uplerlawna Kot Kalwiedni-Paitiotni mai ita, totpa la' talan emkade pede hota Nhi' itla' E a'nani. Totpena hota itlernan gen miak katulu-karehi la'a ha mormiori honona maka Ha Nakoki-nayap niana re.
Tatlina me tlernohora
19 Ina-nara ama-hyali maka kden reria la a ralmu, mhioratrer hadille. Miatu mitlina fiekta mere yana pleta-plet pa miltieri onde miwenna. 20 Yoma la' riy mak kawenna de, edonna nhi'a-nyap tiarga kalwiedwedni mak kla'a Uplerlawna ralamni. 21 La' hade pede do'a-hala honona, la'pa hya'-hya' to'owa mak kpa'eini-kpahala it ralamni de, tsopliala walli. Yana tatulu-tapetna it inonni mere mai pia it tala ihru ploi-ralma ple'era pa treiniana-ta'nana Uplerlawna lirni-tunnu maka Ha Nohor taru-ntamin tar lia it ralamni, yoma lira-tunu maka Uplerlawna orgahi Nala re, de e npapan targa ruri-lai mak hota nal it la mori-lewna. 22 Ne mliernohora hya' maka Uplerlawna Nakota. Yan mitlin to'a Uplerlawna lirni-tunnu mere edon mliernohora, yoma hota la'pa edon mliernohora, de miy mi'akal to'a inon wamuehemi. 23 Yoma riy maka katlina Uplerlawna lirni-tunnu mere edonna nlernohora de emeknekama riy mak kamkek gaini la totmemi. 24 Namkek toto'a mere nla'awa demade nhortaplinga rupni. 25 Mere Uplerlawna deullu-tatarni naplele'era ne nala ruri-lai na npapna, totpena na nwe'er doini rimormiori la' do'a-hala ralamni. Ne riy maka edon nhoratdoin hya' maka natlin oleka la de, ne nwaror reri-nwalai reri samomuowa pa nlernohora deulu-tatra re, de hota riy de ed maka klernana Uplerlawna ra'ani-pallu. 26 La'pa riy ida nwarora de, e' de riy mak kape'el la kniola tieru-niawur nehla la Uplerlawna, mere edonna natiak namni wnialawarni, de riy de orgahani enakal nan owa'ana inon wamueheni. Lia'a kreini de nwal lia hamamuamua. 27 Agama wniatutnu yala'ani mak kaplol meman la geni la'a Uplerlawna it Amlawanni de yamkekni, de totpa itsima-tre'a la a'na riy patyatni mak kakleha-kaplara. Me tatu tatiak reri kalwiedweda totpena yana tlernohora rimormiori nohkerna ralma-riorni.
Yana tnaheri-tnahelta rira
1 Ina-nara ama-hyali miy, miy mpiesiay oleka la Orgahi Yesus Kristus mak kodia Uplerlawna plolli-mneheni hititni-repreparni. La' hade pede yan memmemna mpiar la lirmi-yatmi pa mniaheri-mniahelta rimormior wialmi. 2 Yoma hota riy makre'a-maktaru ida hitita-reprepar nohora lelli-kdielli hewewta-naniayarni pa nmai lia yawoka-yale'u, ne edon nalo'on wali ne riy makakleha ida nmai, die nnairia pritni-phiaratni. 3 Pede hota miy mhiu'ru-mhielma riy mak kamrehi-kamda'ar nohora naniayarni de. Noma mikot la miwra: ”Mmuai lia mtatangen dilla.” Mere hota mikot la makakleha-kaplar de miwra: ”Hoi, muprir niek la hande” onde: ”Muwiatru la a la'ku onni.” 4 Nhioli-liet mak emkade, de miy mhieri-mhielta rimormiori wialmi me miy milernu-miha'a rimormiori de mniairia ralma-rior yatyata. 5 Ina-nara ama-hyali mak kden la a ralmu, mhioratreria. Miat memn oleka de, riy mak kakleha-kaplara la nohkerna wawannu di, de hota Uplerlawna Nwaliria pa nwal lia mak ktarga pesiay miak karuri. Riy mak emkare, de hota rhor temna la Uplerlawna mutnu mak kor rewre'wa E'a, ne mak Enodi plolli la pa emeka Ray, yoma emekneka hya' maka Uplerlawna Nano'targa la'a riy maka ralamni kden rer lia E'a. 6 Mere miy die mpialdioinia pa mipolu-miliella riy mak kakleha-kaplara. Mere miatg memn oleka, de makre'a-maktaru ri, ir er maka kutni-kdahla miy me ir er maka ka'ita miy lia watghudi gaini. 7 Ne hya' wali die, ir er maka kamola-kama'a Yesus kotni-nanni ya'ulli-yawedni. Ne miy di de Uplerlawna gahani miy. 8 La'pa mhi' oleka deulu-tatra mak karehi, maka e rakot nohora la'a Puk lawna ralamni, de emkadilla lirni: ”Mtiulla-msiaynia mira'a-mipal wualia rimormiori wialmu de emekwalima miy e mimkek inon wamuehemi,” de mhi' nan oleka plollolli. 9 Mere la'pa miy mhieri-mhielta rimormiori wialmi la'a yamkek matmi, de mhi' oleka do'a-hal la inonmi. Ne deulu-tatra Uplerlawna niwra miy er maka kadunti-kawetria deulu-tatra. 10 Riy mak khelkiai-khakpera Uplerlawna deullu-tatarni id neka, de emekneka riy maka kadunti-kawetria deulu-tatra re honona. 11 Yoma Uplerlawna ed maka Nakot niwra: ”Yana milira-miliai.” Ne E' mana Niwra: ”Yana mpiunu-mpienna.” Pa la'pa hota miy edonna milira-miliai mere miy mpiunu-mpienna, de emekwalima miy e midunti-miwetri olek walia Uplerlawna deullu-tatarni. 12 La' hade pede la'a ltiermi-tianmi, wniehwami-liakatmi, hihi'imi-yapyapmi re honona, de mhi'a-myapia emolmolla riy mak hota Uplerlawna Nhudi-npara Nlernohora Yesus Kristus deullu-tatarni maka ha ra rwe'er doinia rimormiori. 13 Yoma hota la'a riy maka edon kat niohora sniayni la rimormior wialli la' dodo'ondi neka, de hota Uplerlawna edon Ntutga sniayanni la, la'a ler maka Nhudi-npara riy honona la'a watghudi lokarni. Mere la'pa riy id mana natu ntutga sniayanni la rimormior wialli, de hota Uplerlawna Ntutga sniayanni la' e'a.
Two'la nohora pesiay
14 Ina-nara ama-hyali, pe'el walia pa tiwra: ”A' die riy maka kpesiay id a'u.” Mere edonna ttutga la wniehwani-liakatni?! Hota pesiay miak emkade ta'en niana nodia it la mormiori-dardiari toh! 15 Emekwalima la'pa ina-nara makpesiay ida nakleha lawra-raini. Ne e' nekpa ya'ana-yemannu nek de kawawa la lera-lera. 16 Hya' ed maka kperkun pede mikot la miwra: ”Kalwieda tiy o'a muora ya'anmu-yemanmu nora naniayarmu re.” Hota miala hya'a wniaror pa mikota lir mak emkade la' e'a, mere miy niek de edonna miala hya' maka ena'an pa namoria aranni?! 17 Emkade wal lia pesiay. La'pa edonna tsi'a-tyapia kalwiedweda pa talharia it pesiayni, de it pesiayni de nakleh perkuna. 18 Matialo'onama riy ida niwra: ”La' doma wniarorni de riy er rha'ar to' aranni la pesiayni. Ne dom to' mana e rahnia'ar to'ola wniehwa-liakta.” Hota a'g ed maka kakwiet nana yatian de: Mtiut tieka la mai a'u, emkamenila tamkeka riy maka ktarga pesiay mere edon rtutga la nhiolli-lietni ne hota atiut wal lia nhioli-lieta pa itat niohora pesiay. 19 Miy mpiesiaya la Uplerlawna de Ntuin to'ola riy ida toh?! Pesiay mak emkade plol toto'a. Mere hegana-kawnu yatni-rha'ani mana rpesiay emkade wal piede ramta'at Uplerlawna, de rdiwra-rda'ala. 20 Miy mpiodku-mpiadku me! Hota hya' owa'an pa rakot owa'an tiy miy totpa miatga, de pesiay die etla hanmeni, de nhioli-lieta ilu-yehwa nlernohor reria? Ne pesiay maka edon rhi'a-ryapia nohora nwal lia hamamuamua. 21 Mimkek to'ola Abraham, it upni-tgarni de. Uplerlawna Netlia de e' de riy mak kaplol la Uplerlawna yamkekni, yoma la'a nhiolli-lietni la'a lera nal a'nani Isak pa nhi'a la hoihoi-tantiani toh! 22 La' hadi de nayamkek meman mai ita, de Abraham pesiayni de talanwalli ilu-wniehwa totpena yana naheri-nawalia. Ne, ilu-wniehwa mak klernohor reria Abraham pesiayni, de hade ed mak kariei pede pesiayni de plol toto' la Uplerlawna yamkekni. 23 Me Abraham illu-wniehwani la' ler maka enal a'nani, de nlernohor memna Puka lirni mak emkadilla: ”Abraham npesiaya Uplerlawna, ne la'a pesiayni pa Uplerlawna Nreiniana-na'nana pa emeka riy mak kaplol la Uplerlawna yamkekni.” Hade pede rwet la Abraham de, de Uplerlawna heiwialli. 24 Pede miatga de naplol meman la' lera-mela ri, de Uplerlawna Nreiniana-na'nana rimormiori pa emeka riy mak kaplol la Uplerlawna yamkekni yoma hya' maka riy rhi'a-ryapia, de edonna rtut tio' pesiayni. 25 Ina-nara tamkek wal lia Rahab, patke' yat de. Emekwali Abraham, de Uplerlawna Nreiniana-na'nana Rahab pa emeka riy mak kaplol la Uplerlawna ralma-riorni, yoma la'a nhiolli-lietni mak kaplola la' ler maka enade'a riy Israel mak kmai pia klina-kmata noha Kana'ana, ne nal talan la ir pa rmori-rlewna. 26 Ina-nara a'ukot olek la'a hare honona totpa miatga, de emeka inon mak kakleha aranni nmati, emkade walia pesiay miaka edonna rhi'a-ryap niohora, de pesiaya mak kwal lia hamamuamua.
It namni wnialawarni
1 Ina-nara ama-hyali, miy hononmi mitlina. Awuak totpa riy harahu lia'a miy die, yana mlia' tungkuru. Miatg oleka de, he'a la' tungkuru de hota Uplerlawna Nhudia la' watghudi lokarni, nareh miemna mak edonna kla' tungkuru. 2 La'pa it hononita, de nhi'inde tsi' mak edon kaplola, mere riy mak edonna khi' do'a-kyap hial la'a wniareini-wniahaurnu de, hota riy de nden la plol wawna me e' ed maka katu kodia inonni la haneknek wawannu. 3 Itala kuda ida pa itsi'a la yawalliohora. La'pa itkeni tali la kuda nurnu totpena nlernohor ita, de emekwalima it todi plolli la kud de inonni tetema. Mere tali nek de kuku'a. 4 Tamkek la kapli ida. De ha matmiat liawna id hade, me anin lawna nod lia'-nod miaiya, mere yormudi ed maka na ntorreria kapil de ulanni pa kawehwa reria kapil de gaini, kennama ulanni kuku'a. 5 Tamkek wal lia' orun lawna-wewan lawna. Mere ai kwiar ku' ida nmor die, hota nlomar doin momuoga la. Hare honona re emekwalima it namni. It namni de kuku' selma mere nran tutulu it inonni la hya' maka hota kod it la lira-tunga matmiati-molmuolu. 6 It namni nwalawar de emekwalia ai wnialawarni. La' it inonni di, de it namni de ed maka kpoti-kaduw nana yatyatni-halalli la' it inonni tetema me la'a it mormiorni-dardiarni tetema. La'pa takot yatyatni la mak katlina la it wniahaurnu, de emeka ai liali makden la naraka wikni de hota nram doin momuowua. 7 Yoma hota la'a hamormiori riwnu-halli honona maka klihir matmata-khaw riarara re, me onu-ma'nu, mak knema-ktai, mak kawrika-kawriai, me i'na-ya'ana mana rimormiori namar niana re, ne hota rmar nian owa'ana. 8 Mere hota la' it namni de, riy id mana edonna namar niana. Emeka maka klihir matmat-khaw riarara, rlihira-rnaiya ya'ana, de ta'en niana rimormiori nodi plolli la, ne emolmolannek walima niy ida nho'owa, de hota riy de nmati, it namni de nodi riy lia yatyatni-halalli yatlorni-yatra'ani. 9 It namni nekpa itala pa ta'uli-tawedia Orgahi-Orha'a it Amlawanni de. Mere hota it namni de nekpa ita tlokra-tsautia it rimormior wialli, maka Uplerlawna Nakoki-nayap niana de emekwali E'a. 10 It namni de na'uli-nawedia Uplerlawna, demade nwaldioinia pa nlokra-nhaut rira. Ina-nara, la'a plollolli de yana tsi' emkade. 11 Mimkek teka la ger ormata ida, de e nopilgota ger or mi'na nora ger mahana?! 12 La'a kar ona ida de edonna nawo'a korma. Ne lokrahi ida de edonna nawo'a kar wo'a. Opil tah'i edonna nopilgota ger wo'ora turnu. Emkade walia, edon naplola pa it namni de na'uli-nawedi Uplerlawna nhor nioka nlokra-nhautia it rimormior wialli.
Lira-yatu mak kwatiawua heyanna
13 La'pa mliernana riy id tiy miy die mak kiwra: ”A' di de mak katu, mak ktarga kirkira-ralma-rior samomuou,” de mikot la pa ntutga wniehwa-liakta kalwieda-paitiota me natu nlol yawa pa nhu'ru-nhelma rimormior wialli totpa hihi'ini-yapyapni plol toto' pa emeka riy mak ktarga kirkira-ralma-rior samomuou. 14 Mere la'pa riy de ralamni namehra namkeka riy doma samounu me ntota-nwudi tio'ola inon wamueheni, de yana na'akla pa nwarehi inonni la mutwualli niwra e' de mak katu. 15 Lira-yatu mak emkare de hade edonna nwatiawu Ilyamou-Watyatoha mere ha nwatiawua nohkerna wawannu me nko'i nana nohkerna gahani pa nler teman la ralam yatyatni maka hegana amlawanni karkiarni enni. 16 Yoma la'pa riy ralamni namehra yoma ramkeka riy doma samounu me rtota-rwud tio'ola ir inon wamueheni, de hota nodi niek riy lia riwtu-hora kokokna-rariarni me nhioli-lieta yatyata-halala. 17 Mere riy maka kwarora-kwalai niana lira-yatu mak kwatiawu Uplerlawna, de hota mormiorni de namou-nawitan la Uplerlawna yamkekni. Ne riy de mana ralma ploi-plele'era la rimormior wialli pede edon nawenan taru mere nor rimormior wialli nkalwiedweda. E' mana natu natlina-nataili me hota yehwani mnapla pede natlin la riy dom to'a wniarorni-wnialaini. Hota natu ntut reri ralam kalwiedni, me nhima-nre' reria e rimormior wialli. Ne edon nniaheri-nniahelta rimormior wialli onde ntukla-nwahla riy. 18 Emolmolan nekama mak kawuli-katniamni nape'el pa nawuli-natniamnia la'a nhyi'ini, hota nlernana rieiki-wnio'ora, de hota emkade wal lia' riy maka kwahaka kalwieda-paitiota la rimormior wialli, de hota riy rahu rlernohora e' pede ir nek de rhi' samomuou lia ir rimormior wialli.
Uplerlawna edon Natlin la mak klernohora nohkerna ralma-riorni polpuollu-wakwakni
1 Ina-nara mitlina. Miatg oleka de, mihuri-miwo'ora, mpiadupla-mpiahia'ala onnila mpiaror nohora nohkeran di wniarorni-wnialaini mak edon nora Uplerlawna ralma-riorni ramneneha! 2 Hota mpiaror pa mia'ala, mere taken niana mia' nana noma mpiarora wniunu-wnienna. Mpiaror nana pa mliernana hyoni-hyani re'a-tniaru, geni-tiena mere miy edonna mia' nana hya' maka ha mihaka. Noma mihuri-miwo'or nohora pa mpiadupla-mpiahia'ala. Hare honona de hota edonna mliernana yoma edonna mpiak harella Uplerlawna. 3 Ne la'pa mpiak olek ho'mana, hota edon mliernan walia yoma wniaror maka ha mniair pa me mpiak de, nhala. Hya' maka ha mpiak de, de mtiot nan to' inon wamuehemi. 4 Miy die edonna mdien rer lia Uplerlawna lirni-tunnu. Miy e miat memn oleka de, la'pa miy e mpiapan rer lia nohkerna, de mlia' Uplerlawna arwalli toh? Pede la'pa he' mak kulit rer lia nohkerna, de e' ed maka ka'aw niana Uplerlawna-Mempulwatnu pa nora ra'ara. 5 Puklawna lirni niwra Nhiw Lululli maka Uplerlawna Nalernia la it wawannu, de Nahmen memna itlernohora nohkerna gahani, mere itden rer tio' E'a. Yana mpiarora de Puka lirni de edon naplola! 6 Mere Uplerlawna Nala ruri-lai totpa Nreh niana it ihranu-ralamni yatni-halli. La' hade pede e rhorat tar wualia la Puklawna ralamni de: ”Uplerlawna Nwayotlia riy mak katulu-kapetna, mere Nwaldioinia pa Nara'a-napalga riy mak katu khu'ru-khelma.” 7 Hade emkade pede mhiu'ru-mhielma Uplerlawna pa mliernohora E nnio'oni-niatnu. La' talan emkade pede miy edon mliernohora hegana amlawanni ne hota hegana honona re rawlar dioini miy lia. 8 Mriehgor rer lia Uplerlawna ne E' mana hota Nrehgor rer tiy miy. Miy miak khi' do'a-kyap hiala! Mhio'a-mhiaiya limmi la do'omi-halmi ralamni, me mimoga ihrami-ralammi la'a mak kawu'u-kahana, yoma miy ralammi worworga la miy pesiaymi. 9 Mlier toto' meman la ralma kwali, ne mkio'a-mkiakur nohora pa mipolu-mitniani. Miy hepurmi re rwal lia knio'a-kniakru, ne yamuki-yahepurmi re mana rwal lia lui-nuhru. 10 Mhiu'ru-mhielam la Orgahi-Orha'a totpena E' ed maka kran miy lia gen tiutulu.
Nnio'a-niatu totpena yana tapolu-taliella it rimormior wialli
11 Ina-nara ama-hyali hononmi mitlina. Yana idma napolu-naliella ida onde idma nwaghala ida, onnila miy hononmi re de makpesiay rewre'wa miy. La'pa hameni napolu-naliella ida me idma nwaghal ida, de emekwalima e' ed mak kaliella me kwaghala Uplerlawna deullu-tatarni. Hade nnia'eratni de, miy edonna mliernohora deulu-tatra re, mere miy er mak kodi plolli la deulu-tatra. 12 La'a plollolli de riy memeh' de ed maka kodi plolli pa Ntorna watghudi la rimormiori hononita. E' ed mak kala deulu-tatra me mak khudi-kpara rimormiori ita. E' de Uplerlawna mak kodia plolli pa Namori-nalewna me Nodi plolli pa Nala matmiati-molmuolu plalahwa pa rrinnia rimormiori la ai mormiori ralamni (naraka). Hya' miy piede, miy miwra mpiaghala rimormiori wialmi?!
Yana mhioratdoin Uplerlawna la kirkirmi-ralma-riormi
13 I'nu-na'ru a'mu-hya'lu (makla' makwadakna miy), nhi'inde miwra: ”La' ler di onde repra de hota amla'a leta ida ne hota amden nek la hande pa anin penpuenu ida totpena ampahak untu.” Mitlin pa a'ukota. 14 Hya' maka hota ha mliernana la repra, de miy niek de hota miplin niohora. Miy emolmolla ai miokla mak kmokla-kmahu mere tamkek owa'an de nmol tietema. 15 La'a plollolli de mikot emkadilla: ”La'pa Orgahi-Orha'a orgahani ralamni nal am die, hota ammormiori plalahwa pa amhi'a hanek-harahu wuawannu.” 16 Mere miy mitulu-mipetna inonmi. Mitulu-mipetna inonmi de nhal wa. 17 Ina-nara a'ukot tiy miy die, he' mak kat niohora hya' mak kaplola ri, mere edon nhi' nana-nyap niana de, e' de e nler olek la do'a-hala ralamni.
Nnio'a-niatu la'a riy maka kre'a-ktaru
1 Mak kre'a-ktaru miy, mtia'wa tlinmi la a li'ru ri. A'ukot tiy miy totpa hota mkio'a-mkiakru mipolu-mitniani yoma hota mlier la kropna-krieut lawna mak kodia miy lia lui-nuhru. 2 Re'emi-tniarmi rwal lia gepgehpani-taltia'lani. Naniayarmi re de erieri na'an ahorga. 3 Lelmi-mahami de rakarte' momuou, ne la' ler mak hota Uplerlawna Nhudi-npara rimormiori la watghudi lokarni de re'emi-tniarmi mak rakarte' momuou re, hota rtutrier niohora miy pia mlier la niukum lalawna. Hota mlier la yatyatni-halalli yatlorni-yatra'ani pa emolmolan nekama hya'-hya' to' maka ai na'an doinia la. Mkio'a-mkiakru yoma miy e miniutin targa re'emi-tniarmi pa ma mpieiya ler mak kiwa kte'ela lera noha niatni de. 4 Miy miak edonna kpairia rira liwatnu-odawni la'a nhyi'a-tlunni mak ha rkari re, de mitlina ira luini-nuhranu yoma edonna mpiair ma'ta. Rhaun pa riwra: ”Mutlin mai ami Matromlawnu nee!” De nhiaunu re, rayatlin momuou lia Orgahi-Orha'a Uplerlawna-Mempulwatnu Makodi plolli. 5 Miy e mrie'a-mtiarg olekwa ne, miy mi'ina-miemni oleka nohkeran di wullu-we'elli. Miy emeka nhiuri-wnia'ana maka riy rwa'ana pa rhi' apetna inonni totpa lerni ntu'tu wa dewade rwunu-rwenna pa ra'ana. 6 Miy miana e miukum penna riy mak kakleha do'a-hala, mak edonna kmalawan tiy miy.
Ralam tehra la kropna-krieutu ralamni
7 Ina-nara ama-hyali miy, la' yoma mak kre'a-ktaru mak knahora-knala'a miy die hota kler la niukum lalawna, la' hade pede mhiuria ralammi pa twei nieka Orgahi-Orha'a maimiaini. Mimkek nek la mak kanhyi'a-katlunni ida wnieini la nhyi'ini-tlunanni la'pa nmai wia rieiki-wnio'ora mak kla' mormiorni. Nwei niek la ototna la'pa lelpawu pniaharni ne la'pa otna la'a ora-au radeutu. 8 La'pa miy miana miatu mhiuria ralammi me yan mimta'ata, mere mtiutrieri tertehra yoma la'a ler maka ha rnel tiaru hota Orgahi-Orha'a maimiaini mana e rrehgor wua. 9 Yana mhi'a gai huplu-gai pietna me yana idma nwaghal ida. Yanhi'pa Orgahi Nukum miy. Maktoran watghudi Nwahi' pa Nmai wia. 10 Ina-nara ama-hyali mhioratreria makwohorulu-ktatrulu mak kakot nohora Orgahi-Orha'a lirni-tunnu. Ir ratehra nek ralamni la' kropna-krieutu ralamni. 11 Mimkek nohora ira wniehwani-liakatni. Riy mak katu khur niohor ralam mehrani, de la' it wniarorni-wnialaini de ir er mak klernan untu. Miy e mitlin olek Ayupa nhur niohora, ne miat niohor wal lia' hohoni de Orgahi-Orha'a Nara'a-napalga owa'an e'a. Pede mimkek oleka de Orgahi-Orha'a nanpena ed mak ktulla-ksayni rimormior nohkerna wawannu. 12 Ina-nara ama-hyali miy! Maka reriehenu pa mhioratreria de, la'pa mikot pa miwra hota aghi'a emkadi-emkade, de yan memmemna mliokra pa miala nohkerna-rai miarna onde Ilyamou-Watyatoha onde hanek-harahu wuawannu pa ma mpiow nammi. Mere mikot neka miwra ”Yowa, pena aghi'a,” onde ”Hota a'g edon ghi'a.” Ne hota hya' maka mikota re hota plola pa mhi' nana re totpena yana nod miy lia Uplerlawna niukamnu.
Itler la hya' to'a de itsumbaini
13 La'pa rlernana riy id tiy miy die, e hoho'a-wakwaka, de mikot la pa nsumbaini. La'pa la miy miana dom e ramuki-rahepru, de mikot la re pa ramuki-rahepur nohora Uplerlawna, de rwahniar pa ra'uli-rawedia. 14 La'pa riy dom de e namehra, de mikot la pa npolga o'ta-mata krei totpena rsumbain la mak kamehra de, ne roha wu'ru la inonni de rwet la Orgahi-Orha'a nanni. 15 La'pa he' mak ksumbain de npesiay memna, de hota Orgahi-Orha'a ed mak kodia kalwieda la mak kamehra-kamau de. Ne la'pa riy de nhi' do'a-nyap hiala, de hota Uplerlawna ed maka Namou-nawitna do'oni-halli de. Ne hota mak kamehra-kamau die nler la kalwiedni. 16 La' hade pede mpiayow nohora do'omi-halmi ne idma nsumbain ida, totpena mlier la kalwiedni-paitiotni. Ne la'pa riy maka khi'inde klernohora Uplerlawna ralma-riorni, de sniumbaini de nodia plola-mneh lawna. 17 Mimkek tek Elia. E' de rimormiori emekwalia ita. Elia nsumbain toto' meman pa yana otna ntur lia nohkerna wawannu. Noma otna edonna ntur niana anni wotel riehennu. 18 La'awa honi noma nsumbaini owa'ana. Noma lyanti nhurgernia otna ne nohmarna mana nodia rieiki-wnio'or lawna la rimormiori. 19 Ina-nara ama-hyali, la'pa riy id tiy miy die nhoitio'or doinia Uplerlawna wniatutnu-wniaye'eni mak kaplol de, mere riy ida nodia riy de pa napalia owa'an Uplerlawna, 20 mhioratreria. Riy maka kawilu-kawewla riy mak kler olek la do'a-hala ralamni pa napal lia Uplerlawna loini-talanni, de riy de ed maka kamori-kalewan nana riy della matmiati-molmuolu ne nreiniande do'a-hal mutlialawna mana rawnie'er dodioin la. Kalwie'du tiy miy hononmi, Yakowsi
Petrus nwak kalwieda
1-2 Ina-nara ama-hyali maka Uplerlawna Nwalir niana la'a rira liawanmi mak kahulti-kahamra mak kanie'er la Pontus, Galatia, Kapadokia, Asia me Bitinia. A' di de Petrus. Yesus Kristus Nhopn a' pua agodia Uplerlawna lirni-tunnu. Awuak de Uplerlawna ed mak ktowria ra'ani-pallu me kalwiedni-paitiotni tiy miy. Ina-nara, miy er maka Uplerlawna it Amlawanni de Nwalir niana pa mrie'ela E mutnu-rahanu Nlernohora E ralma-riorni la ululu memna. Ne la'a Uplerlawna Nhiwni pede Nhi' olek miy pia mpial lia E mut wuamueheni, totpena miy miana miatu mi'unni-mimta'ata Yesus Kristus lirni-tunnu. Yoma Ennairia E rarni pa na Nwuri-nohma do'omi-halmi.
Itarur niek la it pesiayni me tahepur nohora yoma hota itlernan yamori-yalewna maka Uplerlawna Nala
3-4 Ina-nara ama-hyali, mai pia ta'uli-tawedi tlilili-tmamuawua Uplerlawna-Mempulwatnu, de Itmatromni Yesus Kristus Amni mak Yesus wal pia Nkola tieru-nawur nehla de. Ita'uli-tawedia Uplerlawna yoma Ensayn toto' memn ita pede Nal it pa tler la mormiori warwuaru. Itlernan mormior warwuaru de yoma Enamori owa'ana Yesus Kristus la matmiatni ralamni. Ne Uplerlawna hihi'ini de ed mak kodia it la nhia'argen miak karuri. Itsa'ar it ralamni la E'a yoma hota Enal it pa tmormiori-tdardiari pia nodi liarni. Mormiori-dardiar die emolmolan nekama re'a-tniaru maka Uplerlawna Nwahi' targa oleka la Ilyamou-Watyatoha pa hota Nala mai ita. Ne hade de hota emolmolan nekama re'a-tniaru maka ta'en niana niata onde ngehpa onde nmadwuri. 5 Miy mpiesiay lia Uplerlawna. Ne la' miy pesiaymi de pede Enala plolli-mneheni natiak reri miy pia la'pa ntutu-nte'ela' lera noha niatni. Totpena la' Yesus maimiaini mak kodia mormiori-lewlewan de, de miy miana mrie' pa mlier la mormiori-lewlewna. 6 Mere hota la' lera ho'ke'eni di de mlier la lui-nuhru la'a yamuki-yama'ala, kropna-krieutu, nniahora-nniala'a. Mere la'pa emkade ho'mana hota mihepur toto' meman la lui-nuhru re, yoma mhioratreria mormiori miaka Uplerlawna Nwahi' targa pa hota mliernana. 7 Hota mlier la yamuki-yama'ala nniahora-nniala'a totpena mtiut muemna de miy e mpiesiay toto' memna Orgahi-Orha'a me edonna. Mpiaror tek la maha, maka hota la' lera id de niat weyata. Mah de nek de rala ai ra rhudia. Mere miy pesiaymi hota narehi maha welli. Pa emkade walia hota rala kropna-krieutu ra rhudia miy pesiaymi de totpena rat niohora pesiaymi de plollolli me rurni-laini. Ne la' pesiaymi mak karur die, pede hota mliernan ya'uli-yawedi, yatota-yawawa la' ler maka Yesus Kristus Nmai owa'an pa rimormiori honona rlina-rmat (ramkek memna) E'a. 8 Ina-nara, la' ululu de miy edon mlina-miat Yesus Kristus de, mere emkade ho'mana mial ralammi pa nod rer lia E'a. Ne la'a dodo'ondi de miy edon mimkek nan walia mere mimpiesiay E'a ne mimuki-mihepur nohor memna, 9 yoma miy e mlier la mormiori-lewlewna. Mlier la mormiori-lewlewan de yoma miy mpiesiay E'a. 10 Mormiori-lewlewan di maka Uplerlawna Nal tiy miy die, ed maka makwohorulu-ktatrulu rakot nohora la' ululu. La' ler ululu de rpaiki Uplerlawna nnio'oni-niatnu pa rwarora-rwalai niohora 11 totpa irat muemna hota emkameni la, me mowen nianpena ha rdunti-rwetria Kristus de pa nhor diewade ra'uli-rawed E'a la gen tiutullu. Rwaror nohora hade yoma Kristus Nhiwni mak kdella ir ihranu ralamni Nakot olek la ir de hota Kristus de Nler la kropna-krieutu nanpena Nler la ya'uli-yawedi. 12 La' ululu meman de Uplerlawna Nakot targ olek walia la makwohorulu-ktatrulu re la'a mormiori-lewlewan di, Niwra E nnio'oni maka nhi'inde makwohorulu-ktatrulu e rakot nohora, hota edon ntuin la' makwohorulu-ktatrulu re lerni mere la' miy lermi. Ne la'pa ntutu-nte'ela lera-mela ri, Uplerlawna Nhiw Lululli mak kwatiawua Ilyamou-Watyatoha Nala plolli-mneheni pa riy rma rakot nohora Kot Kalwieda-Paitiota la'a mormiori-lewlewan di tiy miy wia. Ne Uplerlawna hopopanni-lili'irnu la Ilyamou-Watyatoha ho'mana rlina-rmata totpa rna'erit nan nohora Uplerlawna hihi'ini-yapyapni la'a mormiori-lewlewan di.
Onnila hare honona maka Uplerlawna Nhi' nana tiy miy die pede mliernohora E' mak kakleha do'a-hala
13 Ina-nara ama-hyali, yoma la' hare honona maka Uplerlawna Nhi' nana tiy miy die, pede mpiahi' targa pa mliernohora Uplerlawna lirni, miodi inonmi re la plol wawna, la'pa mhia'ara pitga inonmi la'a mormiori-dardiari yara'a-yapalu mak hota Uplerlawna Nala tiy miy la' Yesus Kristus maimiaini de. 14 Mitlina-mitailla Uplerlawna miy Amlawanmi de, ne yana mliernohora nhiol yatyata mak ka'hira ralma-riormi la' ululu, la' lera miy edon miat mua'ta Uplerlawna. 15 Rwaldioinia de la' hya' to'owa la mormiormi de yana mhi' do'a-myap hiala, emeknekama Uplerlawna nhiolli mak kakleha do'a-hala. E Nmeh'a ed maka kwalir nian miy pia Nhi' miy lia E gah wamueheni mak kakleha do'a-hala. 16 Pede yana mhi' do'a-myap hiala yoma la'a Puka ralamni de e rhorat targa Uplerlawna lirni Niwra: ”Yana mhi' do'a-myap hiala yoma A'ukleha do'a-hala.” 17 Miy msiumbain de nhi'inde mpiet la Uplerlawna de miy Ammi toh! Ne miy Amlawanmi de ed maka hota Na' reria watghudi la rimormiori de edonna Nwaliria matni enni, mere nlola rhi'ina leltiutu-relan mahmera (nhudi-npara rimormiori nlernohora ir hihi'ini-yapyapni). La' hade pede miatu mi'unni-mimta'ata Uplerlawna pa mhiol lia plol wawna la mormiormi tetema la' nohkeran di, yoma miy mormiormi di, de emolmolan nekama riy mak klaun la riy nohoni la ler ho'ke'eni to'a. 18 Mhi' emkade yoma miy e miat niohora hota Uplerlawna Nala hya' pa Ntuwu-nhai miy totpena ra ralgot miy lia'a mormiori-dardiar miak edon kperkuna, maka upmi-tgarmi re rhakar nohora. Uplerlawna edon Nala leli-maha mak hota tani ha na'ana onde karte'a ha nweyata pa na Ntuwu-nhai miy. 19 Mere Enala maka ktulliawna-kwelwierta, de Yesus Kristus rarni inhatta. E orgahani Nmeh'a maka Nwal lia Duma mak kakleha do'a-hala kuku' eti, pa rhi'a la hopopa-hegeuru hoihoi-tantiani la Uplerlawna. 20 Yesus Kristus ed maka Uplerlawna Ntutmuata-nkewra'a la' ululu memna, la' ler maka Uplerlawna edonna Nakoki-nayap mia'ta nohkeran di. Ne la'pa la' ler di maka nhi'pa la'awa noha niat wa, Uplerlawna Nhopan doin E' pa Nmai wia totpena mlier la mormiori-lewlewna ralamni. 21 Uplerlawna ed maka kamoria Yesus Kristus la matmiati ralamni, ne ema Nran nana la' gen tutulu. Ne la' Yesus Kristus hihi'ini-yapyapni la miy rerieimi, pede mpiesiay lia Uplerlawna. Emkade pede mpiesiaya me mhia'ara aranmi la Uplerlawna de hota Namori-nalewan miy. 22 Ina-nara, la'a lera-mela ri de mimou-miwitna oleka inonmi onnila mitlina-mitail olek la Uplerlawna Kot Kalwiedni, pede dodo'ondi de miatg oleka pa mtiulla-msiayni makpesiay wialmi pa emeka riy id nora hyalli. Pede a'ukot tiy miy die, hota miala ralammi tetema pa miy idma mtiulla-msiayn ida. 23 Yoma miy mlier olek la mormiori-dardiari warwuaru die edon onnila rimormiori nohkeran di mak hota edon nalo'on wali ne rmati. Mere rwaldioin la de onnila Uplerlawna miy Amlawanmi makden pa nodi liarni de Nala E lirni-tunnu mak kodi plolli pa na Namori-nalewan miy. Yoma E lirni de nodia mormiori-dardiari, ne lir de ed mak kodi plolli pa nodi liarni. 24 Yoma emeknekama ha rhorat targa la Puka ralamni de e niwra: ”Rimormiori riwnu-halli honona de emeknekama wewna me tullu-petanni, preheni-mkaini nor wutga rurni-laini re, emeknekama wewan deutu. Yoma hota rimormiori honona re rmati-rmolu me tullu-petanni re nhorwua pa emeknekama wewna mak kapliau wua pa dewatnu mana napi'ir wa. 25 Mere Orgahi-Orha'a lirni-tunnu de nden nek la pa la nodi liarni.”
Ne lira tun die, de Kot Kalwieda-Paitiota maka ha rakot targa tiy miy.
1 Mitlin oleka hya' maka Uplerlawna Nhi'a tiy miy pede awuak pa mhioplial momuoga yatyatni-halalli mak kden la inonmi re; de yana mpiutra-mpialka, miklili-mikdiori, mi'ohpa-milahara, yana mtiot pa mpial lia riy samomuou. Yana miy ralam mehra la'a hya' maka rimormior wialmi gahani onde mipupu-miheri, milernu-miha'a, mipolu-miliella rimormiori wialmi. 2 Mliekur pa mitlin la Uplerlawna lirni-tunnu maka plollola pa emolmolan nekama papay miaka na'nama ha rayor niana nahakhak uh pua nuhu, totpa la'a lira-tun die miy pesiaymi de hota yeher to' pa naruri-nalai pia la'pa ntutu-nte' meman la ler maka hota Yesus Kristus e Nmai owa'ana pa Namori-nalewan miy. 3 Ina-nara, mpialiewan pa mitlin la Uplerlawna lirni-tunnu yoma miy orgahami miatg oleka de Orgahi-Orha'a kalwiedni-paitiotni tiy miy.
Yesus Kristus de emeknekama watu liar pianulu
4 Mpiakrian reri Yesus Kristus de mak kod riy la mormiori-dardiari. E de, de emolmolan nekama watu liar pianulu maka tukna-tukna re rasrala yoma ratniekame edon perkuna. Mere la'a Uplerlawna yamkekni de E' ed maka ktulliawna-kwelwierta, maka Uplerlawna Nwalir niana. 5 Me miy die mana mlier olek la mormiori warwuaru pede miy die emolmolan nekama watu-watu maka ha rnairia pa rariria roma-krei ida, yoma la' miy ralammi re Uplerlawna Nhiw Lululli Ndella. Enhi' miy totpa hota mpial lia riy maka Uplerlawna Nwaliri-nwalioha pa Nhi'a la E gah wamueheni maka ktulla-kar lia E'a emeka imam pa miala himima-rere'a la E'a, maka E ihranu ralamni nala. Himima-rere'emi re rla' nana E ralamni onnila Yesus Kristus hihi'ini-yapyapni la miy rerieimi. 6 Yoma la'a Puka ralamni de e rhorat targa Uplerlawna lirni (maka Enakot nohora Yesus Kristus, de entot nohora E la watu liar pianulu ida). Uplerlawna lirni de Niwra: ”Mimkek ee! Awualir nian oleka watu mak karuri-kalai id pa ghi'a la watu liar pianulu la' A ge'nu la'a Sion. Ne he' maka kpesiay E' de, yan mimta'ata mhia'ara aranmi la, yoma hota Enhi' nan maka Enakot targ oleka re.” 7 E' de mak ktulliawna-kwelwierta la'a he' mak kpesiay lia E'a. Mere mak edonna kpesiay Yesus hota rhoratreria Puka lirni mak emkadilla: ”Wat muaka tukna edonna rnair nana pa rhi'a roma-lewu, mere rasrala, de Uplerlawna Nnairia olek pa Nhi'a la watu liar pianulu.” 8 Ne ntuin tar walia mak edon kpesiay Yesus, de Puka lirni mak emkadilla: ”Watu die watu nniuli-nniewta narieiniande irwetur tar lia pa rlerwah'a gaini.” Irwetur tar lia yoma ir edonna ratlina-ratailla Uplerlawna lirni-tunnu. Hade ed maka Uplerlawna Nrora-nlai tiarg olek hadewa. 9 Mere miy di de Uplerlawna Nwalir nian olek miy wia me mpiali olek emeka imam mak khima-kre'a ray kniarni. Miy mrie' wut olek la makden la luwu-a'na hairi-hairi mak kakleha do'a-hala. Mlier olek la Uplerlawna mutnu totpa miy er mak kakot nohora E hihi'ini-yapyapni totpena riy ra'uli-rawedi E'a. Yoma E' ed maka kpolgot miy lia melmelli-kalkalamni pa mlier la lelerni mak kodia kalwiedni-paitiotni. 10 La' ler ululu ma'ta, de miy edonna mlier ma'ta la Uplerlawna mutnu-rahanu. Mere la dodo'ondi de rwet olek miy lia Uplerlawna mutnu-rahanu. Ululu de miy edon mliernan ma'ta Uplerlawna ralam kalwiedni, mere la' dodo'ondi de mliernan olek hade wa.
Mmiori-mdiari emeka Uplerlawna mutnu-rahanu
11 Ina-nara ama-hyali mak kden rer lia a ralmu, miy di de do'ona-dakan miy, me makahulti-kahamra miy lia nohkeran di wawannu. La' hade pede awuak de yan memmemna mliernohora nhiol yatyata mak ka'hira ralma-riormi. Yoma la'pa mliernohora hare ta'en niana mliernohora Uplerlawna ralma-riorni, yoma emeknekama la' miy ralammi re miy e miwunu-mi'ara. 12 Mere mpialiewan totpa nhiolmi-lietmi re rden la plol wawna. Ne hota la'pa riy mak kaplin niohor ma'ta Orgahi-Orha'a re rwaghal miy ho'mana, hota ramkek nana nhiolmi-lietmi mak kalwiedweda re pede hota la' ler maka Orgahi-Orha'a Yesus Nmai owa'an de, ira'uli-rawedia Uplerlawna yoma la'a miy nhiolmi-lietmi re.
Mhiu'ru-mhielam la maktorna-makrautu
13 Ina-nara ama-hyali, awuak totpa miy mhiu'ru-mhielam la ina-ama, o'ta-mata rimormiori nohkerna wawannu totpena nhiolmi-lietmi de nodi ya'uli-yawed lia Orgahi-Orha'a. Mhiu'ru-mhielam la ray mak ktorna-krautu la'a ina-ama, o'ta-mata rimormiori nohkerna honona, 14 ne la' walia mak ktorna-krautu la hairi-hairi noha-rai yapatni (gubernur), maka ray de ha ntutga pa rukmua mak kadunti-kawetria deulu-tatra nohkerna, me totpa ra'uli riy mak khi'a kalwiedni-paitiotni. 15 Yoma Uplerlawna Nwahaka totpena nhiolmi-lietmi kalwiedweda re ed maka kato'ma targa riy mak podku lirni-tunnu mak ha nakota lol nurnu. Ta'en niana irakot nohora yatyatmi-halalmi yoma mikleha do'a-hala. 16 Mmiori-mdiari mpiehwa-mliakta pa emolmolan nekama riy maka Uplerlawna Nwe'er doin oleka la wutwutu-kokgohu ralamni. Mere yana mpiarora de rwe'er olek miy pede hota mhi'a-myapia owa'an la do'a-hala. Mere mpiehwa-mliakat de mtiutga inonmi de emeka Uplerlawna limni-tutnu miy. 17 Miatu mhiu'ru-mhielma rimormior wialmi me miatu mira'a-mipalga makpesiay wialmi. Mi'unni-mimta'at la Uplerlawna, me mitota-miwawa ray mak ktorna-krautu.
Ata-wa'ara rlernohora matromni lirni me nhur niohora ralam mehrani emekwali Yesus hihi'ini la it rerieini
18 Ina-nara ama-hyali, miy hononmi mak la' ata-wa'ara, hota mial ralammi tetema pa mhiu'ru-mhielam la upmi-matrommi. Yana mhi' nan to'a la matrommi mak khi' kalwiedwed miy onde mak kaltieri mnapnapal la tiy miy. Mere mhiu'ru-mhielam walia upmi-matrommi maka kahankerna-karalmha'ara. 19 Yoma la'pa miy hihi'imi-yapyapmi re raplol ho'mana mere upmi-matrommi re rnahora-rnala'a miy, miatu mhiur niohora ralam mehrani-mitehra ihrami ralamni pa mtiutga wniehwa-liakta samomuou totpa mhi' amikria Uplerlawna ralamni. La'pa emkade de hota hya' maka ha mhi'a re de raplol la Uplerlawna yamkekni. 20 Mere la'pa miy edon mliernohor upmi-matrommi lirni pa narieiniande enliwra-nkaklu miy mere miy edon mpiahla, de Uplerlawna edon Na'uli-nawedi miy lia hihi'imi-yapyapmi de. Mere la'pa mdiella plol wawna mere emkade ho'mana ramuki-rama'al miy, nhiolmi-lietmi mak katu khu'ru-khelam nohora ma'ta de ed mak kaplol la Uplerlawna yamkekni. 21 Uplerlawna Npol miy totpa mhiur niohora ralam mehrami la'a kropna-krieutu maka miy mliernana onnila miy hihi'imi mak kalwiedweda re. Yoma Yesus Kristus Nmeh'a nek de Nlernana kropna-krieutu yoma la'a miy rerieimi. Ne la' hade wal pia Yesus Enala talan tiy miy totpena mtikil rer lia E yeheni 22 maka ha rakot nohora la Puka ralamni riwra: ”E edonna Nhi' targ eti do'a-hala, me la' riy id mana edonna natlin etia E naltieri lalahara.” 23 La'pa riy rwahoiti-rwarenna, mana edonna Nwahla. Ler maka ha rliwra-rkaklia, mana edonna Nakota hota Nukmua ira. Mere Notil to'a lirni-tunnu me nniahora-nniala'a rella Uplerlawna, mak ktorna rhinleltiutu-relan mahmera (mak khudi-kpara la plol wawna). 24 Yesus Kristus Nmeh'a nekpa Ntutulu-nlelewua it do'oni-halli la'a auwlakra hananni, totpena itawnie'er la do'a-hala ralamni, ne tmori-tdar die itsi' mak kaplol la Uplerlawna yamkekni. Yesus Kristus no'oni-rarni ed mak kala ulti mnapla-tema mnapal tiy miy. 25 Yoma ululu de miy emeka dum mak khal talla. Mere la dodo'ondi de miy e miwali olek la lowna-krahana ralamni yoma mliernohor oleka Yesus makheri-maklai (gembala) me mak ktera-kdem miy aranmi.
Nnio'a-niatu la patke'a nora hawni muanke'a
1 Hawa patke'a miatu mhiu'ru-mhielma mitlina-mitailla muanke'emi re pa emekwalima ata-wa'ara rhu'ru-rhelma ratlina-ratailla upni-matromni, totpena la'pa hapmi muanke'a re edon rpesiaya Uplerlawna Kot Kalwiedni, miy edon mpiatutu niohora kot mak kwatiawua Uplerlawna la' ir ho'mana, rmeh'a rwaldioinia pa rpesiaya yoma ramkek nan oleka nhiolmi-lietmi 2 mak kaploi-kaple'era me nhiu'ru-nhielammi. 3 Yana mtiutga iran hloimi-matlawrurmi (miy gai samomuoumi) yoma mniairia nhiolmi-knia'atmi, leli-maha onde lawra-rainia wel wierwerta. 4 Rwaldioinia de mtiut nieka miy samomuoumi de lola nhiolmi-lietmi mak kaploi-kaple'era. Mtiut nieka yehwa mnapla me yehwa maka edonna kawunu-kawenna. Nhioli-lieta re hota ed mak kodia wel wierta la Uplerlawna yamkekni me nden nek la pa nodi liarni. 5 Nhioli-lieta samomuou mak emkade ed maka patke' ululu mak kla' olek la Uplerlawna gahani me maka kha'ar reria aranni la E'a nhi'inde rhi'a. Ir er maka rhu'ru-rhelam la hawni muanke'a. 6 Sara mana emkade wal pia natu nhu'ru-nhelam la hawni Abraham. Nhu'ru-nhelam pa npolga Abraham de niwra: ”Matroma”. Ne miy miana emekto'ama Sara la'pa mliernohor e nhiolli mak khi' samomuou die, de yan mpadura. 7 Me la'pa hawa muanke'a miy. Miy miana mhi' samomuou lia hapmi de. Yoma miat niohora hapmi patke'a rakleha ruri-lai manmuanu pa emekwali miy. Miatu mhiu'ru-mhielam nohora yoma hota miy rewre'wa pa mliernana mormiori-dardiari plalahwa pa nodi liarni. Miy mliernana mormiori-dardiar die onnila Uplerlawna ralam kalwiedni pede Nara'a-napalga hade tiy miy. Mhi' samomuou lia hapmi de totpena yanpa nhioli-lieta mak edon kaplola nodia yawuhi-yawe'et la miy sniumbainmi.
It idma tsi' kalwied ida emeka tsi' ihru ida-ralm ida
8 La' dodo'ondi awuak de miy hononmi mlia' ihru ida-ralm ida, mtiutga ralam kalwiedmi la riy mak kler la lui-nuhru, mhi' hadom de idma nhi' kalwiedwed la ida emekwalima patke'a ida nor elli, muanke'a id nora hyalli. Me idma nsayn reri ida. Yana idma nparwah'a ida, mere idma natlina-natailla ida. 9 Yan memmemna idma nwahla yatyatni-halalli la ida. Onde idma nwahla ida wniahoiti-wniarenanni yapollu-yalielli. Mere miatu mpiahla riy yatni-halli de mpiak la Uplerlawna pa Nala kalwiedni-paitiotni la ira. Yoma Uplerlawna Npol miy pia mhi' emkade, totpena hota miy miana mliernan walia kalwiedni-paitiotni la Uplerlawna. 10 Yoma Puka lirni de niwra: ”Riy maka kiwra uhwanu nwalapi me ga'arni nwahipni totpena ndunit nana-nwetur nan pripanni-fa'anni, de natiak nurnu-tiernu totpena yana nhi'a nur ghala-tier ghala onde ohpa-lahara, klili-kdiori. 11 Nhopliala yatyatni-halalli, ne nwehwa-nlakat la kalwiedni-paitiotni. Nwahakhak toto' memna totpena yan nora riy dom to' pa rawunu-rawenna. 12 Yoma Orgahi-Orha'a Nlin reri-nmat reria riy mak khi' mak kaplol la E yamkekni. Ne Orgahi-Orha'a Nta'wa taru tlinni la ira sniumbainni. Mere Orgahi-Orha'a Nora mak khi'a yatyatni-halalli rwahapra lia'ara-rwadawar wehla.”
La'pa mlier la kropna-krieutu de miatu miod inonmi la plol wawna
13 Ina-nara, la'pa miy mpialiewan pa mhi'a-myapia kalwiedweda, de hota riy edon rhi' yatyat tiy miy toh! 14 Mere emkade ho'mana, la'pa hota mlier nek la kropna-krieutu, polpuolu-wakwaka yoma miy mhi'a-myapia kalwieda-paitiota, de hota mliernana unut lawna! Ina-nara, yan mimta'ata rira, me yana ihrami rteplu. 15 Mere mhioratreria Yesus Kristus de Orgahi-Orha'a E inhatti pa mi'unni-mimta'at E'a. Ne mpiahi' targa totpena la'pa he' to'a pa natian nohor miy lia' Kot Kalwiedni-Paitiotni maka miy mhia'ar aranmi la, de mpiahla lirni. Mere mniair nieka lira mnapla, me mhiu'ru-mhielam nohor lirmi pa mikot nohora. 16 Mhi'a hya' maka miat niohora de ha naplola totpena hota riy mak kapupu-kaheri miy nhiol kalwiedmi yoma mpiesiay oleka Yesus Kristus de, hota orgahi rmola-rma'a la' ir lir wamueheni re. 17 La'pa Uplerlawna Nakot targa pa it tler la kropna-krieutu de onnila ita nhiol kalwiedwedni de ha samomuou hade. Hornama yana itler la kropna-krieutu onnila it tsi'a yatyatni-halalli. 18 Yoma Yesus Kristus Nhi' emkade wali. Enmeh'a nekane ed mak kmat die eneknek raralamni, yoma la'a rimormiori do'oni-halli. E' ed mak kakleha do'a-hala mere Ntutulu-nlelewua matmiati la'a riy riwnu-halli mak khi' do'a-kyap hiala re. Yesus Kristus de Nhi' hade totpena E' ed mak kodia miy lia Uplerlawna. Rwunu-rwenna E inonni mere la'a Uplerlawna Nhiw Lululli pede Uplerlawna Namori owa'an E' la matmiati ralamni. 19 La'a Uplerlawna Nhiwni plolli-mneheni pede la' pa E Nakot nohora kot mak kwatiawua Uplerlawna la'a do'a-hmuakarnu mak kwatiawua riy mak kmati olekwa pa ema rho'la tar wua pa rwewiei nieka Uplerlawna niukamnu. 20 Do'a-hmuakarnu ri ha rwatiawua riy mak edon ka'unni-kamta'ata Uplerlawna la' ululu memna la' lera Nuh tuwnu. La' ler de maka Nuh nakoki-nayapia aupual liawna (batra), de Uplerlawna Nwewiei niohora rira totpena rhoitio'ora-rtahnei do'oni-halli re. Mere eneknekato'a riy wo'awa mak kler la yamori-yalewna. Rler la aupual liawan de ralamni ne aupual liawan de nanera la tah'i ulti pa nalewna ir la'a gera ktiowru-opli nhia' lawan de. 21 La'a tui die wniahaurnu emeknekama yawalliohora la'a nhiarani maka la' dodo'ondi de rnairia pa ra ralewan wali miy. Yawalliohora gera ktiowur de pa emeknekama ger maka ha rnairia pa ra rharan miy. Ger de edonna rnairia pa ramou-rawitna inonmi mak kakdeha, mere ger de ha ntut mueman (nnia'eratni) de mpiaka Uplerlawna pa Namou-nawitna miy ihrami-ralammi. Nhiarani mak emkade ed mak kamori-kalewan miy. Yamori-yalewan de mimliernana onnila Yesus Kristus Nmori owa'an la matmiatni ralamni, 22 ne Nha'at olek la Ilyamou-Watyatoha. Pa la'pa dodo'ondi de Enamtatan la Uplerlawna walli malganna, de gen miaka ra'uli-rawed E' la. Me Yesus Kristus inhatti ed mak kodi plolli la Uplerlawna hopopanni-li'irnu (malaikat) honona, me Enodi plolli wali la' mak kodi plolli ror wutga mak karuri-kalai honona makden la nohkerna wawannu-lyanti nayanni la'pa noha darni wo'itu nora noha utnu-liannu.
Uplerlawna hota Nhudi-npara rimormiori pede miatu mtiutullu kropna-krieutu me mhi'a-myap reri hya' mak kaplola
1 Ina-nara ama-hyali, Yesus Kristus inonni namehra-namau niohor oleka kropna-krieutu liwliwra-kakaklu. La' hade pede mpiahi' targa inonmi pa mimliernan walia emkade wali. La' talan emkade pede mitiak rer lia miy pesiaymi. Yoma riy maka klernana kropna-krieutu la'a ulatni-temni, de hota nolli nhiolli la'a do'a-hala. 2 La' hade pede mormiormi-dardiarmi la noh di wawannu de, nlernohor oleka Uplerlawna talanni me edon nlernohor owa'ana nhioli yatyata mak ka'hira la rimormiori ralma-riorni. 3 Awuak totpena hadewa la nhiolmi-lietmi ululu die, yoma la'a ulul ma'ta de mahnek memn oleka la miy mhi'a-myapia hya' maka miy ralammi nala, pa emekwalima riy maka kaplin niohor ma'ta Uplerlawna. Mhi'a ya'anlawna-yemunlawna nhi'nande mpiehera-mia'wu la'pa miplinu miodia inonmi pa mhi'a saworni-sawarna (yatni-halli) me mpiehwa-mliakta pora-dawra. Miy e mliernohora neka ralam ya'hira pa milira-miliai. Miy miana mhioi-mtiania uplera-upmati pa mpiera-mdiaiti olek la Uplerlawna deullu-tatarni. 4 Mere la'pa la dodo'ondi de riy maka edonna katga Orgahi-Orha'a rwer rer wiawni la miy me rapolu-raliella, rahe'i-ramali miy, yoma miy edonna mliernohor owa'an ir pa mhi' nan do'a-hal rariahu pa idma nutin-ndahla ida. 5 Mere hota ir er maka rwalola plele'era do'oni-halli re la Uplerlawna, maka kwahi' targa olek pa hota Nhudia mak kmati me mak kmormiori la watghudi lokarni. 6 La' hade pede Kot Kalwieda-Paitiota mana Yesus Nakot nohora la do'a-hmuakarnu mak kwatiawua riy mak kmati oleka re totpena la emkameni ho'mana Uplerlawna Nukmua ir pa inonni rmati lia do'oni-halli rerieini, de hota nhiwni rmormior lia Ilyamou-Watyatoha.
La'a ra'a-palu (karunia) mak Uplerlawna Nala mai ita pede idma ntulla-nsayn ida
7 Ina-nara ama-hyali, nohkerna-rai miaran di de hota nwakrian pia nler la hohoni (noha niata). La hade pede mpiaror samomuou me miatu miodi inonmi totpena mrian ralammi la Itmatromlawanni pa msiumbain rer lia. 8 Ononni de, it idma nsayn toto' memn ida. Yoma la'pa it idma nsayn ida de, hota riy idma natu nhud niohora-npat niohor walia ida do'oni-halli yatyatni-halalli re. 9 Awuak pa idma natu nreinian id pa nanin la roma nayanni de yana nodia heri huplu-gai pietna. 10 Ina-nara, Uplerlawna Nal oleka ra'a-palu (karunia) la miy hononmi totpa hota mkiar lia E kniarni. Rima-rima ra'ani-pallu re edon ramneha. La hade pede miy hononmi miatu mniairia ra'a-palu maka ha mliernan de pa ma mtiulan la rimormiori wialmi. La talan emkade pede riy rnairia ra'a-palu mak edonna kamneh'a re pa rhi'a kniarni maka ha rhakar targ oleka re, 11 de riy maka klernana ra'a-palu pa nodia lira-tunu la' rimormior wialli de, hya' ed maka ha nakota-nalde'eta re, de ntolliohor mamaini Uplerlawna lirni-tunnu. Me la' walia riy maka klernana ra'a-palu pia khima-kre'a rimormior wialli, de nnairia ra'a-palu maka kwatiawua Uplerlawna orgahani totpa ntulan la rimormior wialli. La' talan emkade pede Uplerlawna Nlernana ya'uli-yawed lia rimormiori maka kamkek nana miy hihi'imi-yapyapmi honona re. Uplerlawna hota Nlernana ya'uli-yawedi die onnila Yesus Kristus hihi'ini-yapyapni. E' nanpena ed mak ktorna-krautu, ne E' inhatta ed maka ha ra'uli-rawedia pa nodi liarni. Amin (Plola).
Hota unut lawna la'a riy mak klernana kropna-krieutu onnila ir pesiayni
12 Ina-nara ama-hyali mak kdella a ralmu, la' dodo'ondi de mlier olek la kropna-krieutu totpena hota mtiut memna de miy e mpiesay toto' memna me edonna. Pede yana mpier rer wiapmi la'a kropna-krieutu re. Yana mpiarora de makpesiaya demade edonna nler la kropna-krieutu, yamuki-yama'ala. 13 Mere mihepuepur nohora yoma miy miana emekwalima Yesus Kristus pa mlier la kropna-krieutu, nniahora-nniala'a, totpena la'pa Yesus Kristus Nmai owa'an pa rurni-laini hititni-repreparni nayamkek wa, de hota miy miana er maka kahe'i-kahepur meman nohora. 14 La'pa riy rahe'i-ramal miy die yoma miy e mliernohora Yesus Kristus, miy e mi'unut la' hade, yoma Uplerlawna Nhiwni mak kodia plolli-mneheni etla miy ralammi. 15 Mere yan memmemna mliernana kropna-krieutu yoma mpiunu-mpienna, onde mkiamnelu-mkiamna'a onde hya'-hya' to'owa maka kpera-kdait la mak ktorna-krautu deullu-tatarni. La'pa mrie' teman nek la rira halli, ho'mana yana. 16 Mere la'pa mliernana riwtu-hora mak kakropna-kakrieutu yoma la'a miy pesiaymi ed mak kariei, de yan memmemna mmiola-mmia'a. Mere mi'uli-miwedia Uplerlawna, yoma miy e miwo'or kota-miwo'or nan la Yesus Kristus. 17 Yoma nte'ela lerni pa Uplerlawna Nhudia nohkerna la watghudi lokarni, ne Uplerlawna Nhudi-npara mutnu-rahanu re ulu. Uplerlawna nekane Nhudi-npara E a'nani ita, emkameni ho'ola riy mak edonna kpesiaya Uplerlawna Kot Kalwiedni dena?! 18 La'a Puka ralamni e rhorat targa la: ”Riy kalwiedweda ho'mana rlola pleini riwtu-hora kropna-krieutu nampena rler la mormiori-lewlewna. Yaho'ma la'a riy mak khi' do'a-hala, me kaplin niohor ma'ta Orgahi-Orha'a?!” 19 Hade pede la'pa mlier la lului-nurnuhru yoma la'a Uplerlawna Nror targ olek hadella miy, mhia'ar tar tio'ola mormiormi la Uplerlawna mak kakoki-kayap niana miy, yoma Enakot targ oleka pa hota edon Nolin doin limni tiy miy, ne hota Enhi' nan hya' maka Enakot targa de. Ne la' lelera-melmel neka pa mhi' rer nieka hihi'a-yapyapi kalwiedweda.
Nnio'a-niatu la o'ta-mata krei nora krei mutnu
1 Awuak pa ina-ama krei miy (penatua), de mtia'wa tlinmi la a li'ru-tu'nu maka ha mpiaiki ri. Aghorta hadi pa agala tiy miy, de a'g emekneka miy pia tla' rewre'wa la ina-ama krei. Ne a'g ed mak kamkek nana Yesus Kristus Nler la nniahora-nniala'a. Ne la' walia hota la' ler maka Yesus Kristus Nmai owa'ana, de nodia preheni-mkaini hititni-repreparni pa rimormiori nohkeran di ha rlina-rmat meman de, de hota a'g ed mak kre'ela liernana Uplerlawna plolli-mneheni me ya'ulli-yawedni. 2 Hyal miy re, awuak de miodi plolli la krei mutnu maka Uplerlawna Nala tiy miy pia emolmolan nekama mak khuri-kwa'ana duma mutlialawna-taurlawna, nhuri-nwa'ana dumni re la kalwiedwedni. Mhima-mrie'a krei mutnu re yoma ralammi nala kniar die, yoma kniar mak emkade ed mak kla' nana Uplerlawna ralamni. Yana miapuhuna-miaprai niohor kniarmi de. Me yana mkiar pia emeka ina-ama krei mak kwahak to' kupna-kai, mere mhi'a de miodia ihrami ralamni tetema la kniar die pa mimkek la krei mutnu-rahanu. 3 Yana mitulu-mipetna inonmi pa mhiopan la'a-mhiopan mai krei mutnu re, mere mtiutu loi-talla mak kodia la kalwieda-paitiota totpena rlernohora. 4 Ne mhi' emkare totpa la'pa nte'ela ler maka makhuri-kwa'ana Amlawanni Nmai wia, de hota mimliernan walia wutu-lai makhita-makrepra me lomarni edonna nmalmu. 5 Emkade walia ina-nara ama-hyali mak hatrapriapi miy, mhiu'ru-mhielam mitlina-mitailla yanulnullu-manatnatnu. La'pa miy hononmi de, yan mitulu-mipetna, mere idma natu nhu'ru-nhelam la ida (lol yawa). Yoma la Puka ralamni de niwra: ”Uplerlawna Nwayotlia riy mak katulu-kapetna, mere Nwaldioinia pa Nara'a-napalga riy mak katu khu'ru-khelma.” 6 Hade pede mhiu'ru-mhielam nohora inonmi (lol yawa) la'a Uplerlawna mak kodi plolli pa Namori-nalewan miy, totpena la'pa ntutu-nte'ela lera Ha Nwalir tiarga de, E' ed mak kran miy nanmi la' heyanna. 7 Yana ralammi namta'at la hadomdoma, mere la' hya' to' pa mrian ralammi la' Uplerlawna pa msiumbain nohora re, yoma E' ed maka ksayni miy. 8 Yan minin matmi, mere mimatmata, yoma hegana amlawanni nhi' miy lia e arwalli. E' de emolmolan nekama ohpora-ahdiawar maka homoma-lala'a pa napolu-nawaka hya' maka niwra nlihir matmata-nhaw riarara. 9 Mtiayawa lakmi la gaini ralamni, me mhi' arur matmata pa mdien atehra la pesiaymi wawannu. Yoma miy e miat niohor walia miy mutwualmi makpesiay la'a meni-meni to'a nek de e rlernan wali kropanni-krieutnu pa emekwali miy. 10 Mlier olek la kropna-krieutu ho'mana hota edon nalo'on wali ne Uplerlawna-Mempulwatnu mak ktutga E ralam kalwiedni la rimormiori la'a hya'a-hya'a to'owa, de Enmeh'a neka ed maka khi' miy pia mlier owa'an la kalwiedni. Hota Naruri-na'orat nan miy totpena mtiutrieri kdededa. E' ed mak kpolg olek miy pia mrie'ela mliernana E plolli-mneheni, hititni-repreparni mak kodi liarni onnila Yesus Kristus hihi'ini. 11 E' ed maka ktorna-krautia hare honona la'pa nodi liarni. Amin (Plola).
Kalwieda la horta hohoni
12 A horat ku'u di nekpa u'enyatga tiy miy, de Silwanus a hya'lu maka apuesiaya ed mak ktulan la a' pua tiulsi hadi. La'a horat di de agiwra ghi' totpena miy pesiaymi de la' ga'a. Ne la'a horat di wal pia a'ukot nohora Uplerlawna talla plollolli-mneneheni (benar) mak ktutga E ralam kalwiedni mai ita. Mtiorrer pitpitga pesiaymi onnila E kalwiedni de. 13 Ina-nara, krei Babel mutnu maka kre' wut miy lia riy maka Uplerlawna Nwalir niana re, de rwak kalwieda tiy miy. Emkade walia Markus mana nwak kalwieda tiy miy. E' de emeknekama a a'nu mak kden rer lia a ralmu. 14 Ina-nara, awuak pa idma nwak kalwied la ida de, mial toto' memna ralma kalwieda. Awuaka Orgahi-Orha'a pa Nala kalwiedni-paitiotni la'a miy hononmi, mak kla' oleka Yesus Kristus limni ralamni. Nhiu'ru-nhielam mamni, Petrusa
Petrus nwak kalwieda
1 Ina-nara ama-hyali, miy miak kler la pesiay mak ktulliawna-kwelwierta pa emekwalima amlernan walia la' ler ululu. Yesus Kristus de, de Uplerlawna makhi' Ray lia mormiori-lewlewna inhatta. Ne E' ed mak kariei piede itpesiay E'a, yoma E ed mak kden nek la plol wawna. A' di de Simon Petrus, Yesus Kristus hopopanni-lili'irnu mak Enhopan pa agodia Uplerlawna lirni-tunnu. 2 Awuak de Uplerlawna ed mak ktowria ra'ani-pallu me kalwiedni-paitiotni tiy miy. Hota mliernan hare yoma miat niohora oleka Uplerlawna me Yesus Itmatromlawanni de.
Ita nhiolli-lietni samomuou mak kod reria it pesiayni la'a ga'a
3 Ina-nara ama-hyali, itat niohor oleka Orgahi-Orha'a. La' hade pede Enal E plol wamueheni pa na Naruri-na'orat nan ita, totpa tatu tmori-tdari, tsi'a-tyapi, twehwa-tlakat la plol wawna pa nla' nana E ralamni la hya'a-hya' to'owa. Orgahi-Orha'a nhiolli-lietni kalwiedweda nareh dioin momuou hare honona. Ne la' E nhiolli mak emkade pede Npolg olek it pa totpena itla' E gah wamueheni. 4 La'a E nhiolli mak kalwiedwed meman de pede Enano'targ oleka mai ita yamori-yalewna nora ra'ani-pallu mak ktulliawna-kwelwierta. La' yamori-yalewna nora ra'ani-pallu maka Ha Nano'taru die pede miy mliernan talla pa miolin doinia nhioli-lieta, ilu-wniehwa mak kden rer lia wniarora-wnialai nohkerna yatyatni mak kod riy lia yatyatni-halalli, me hota mliernan nhiolia mak kaplola, de Uplerlawna nhiolli-lietni mak kaplola inhatti. 5 La hade pede mpialeran toto' meman totpa pesiaymi de ra rnawalia mormiormi-dardiarmi mak kalwiedweda. Ne hade edon nmeh'a to'a mere totpa miat niohor walia hya' mak kaplola me hya' ed mak khala. 6 Me miatu miodi plolli la miy inonmi, me miatu mpialeran toto' memna totpa miy pesiaymi edon nwalera. Yana mhi' to' hari mere miatu mliernohor walia Uplerlawna ralma riorni, 7 miatu mtiulla-msiayni makpesiay wialmi, la' walia miatu mtiulla-msiayni rimormior wialmi honona. 8 Yoma la'pa mi'itar reria-milawan reria nhioli lieta-ilu wniehwa samomuou ri honona, de hota miy mormiormi maka miat niohora oleka Itmatromni Yesus Kristus de, edon nwal lia hamamuamua mere pesiaymi la' ga'a. 9 Mere la'pa makpesiay die nakleha nhioli-lieta ilu-wniehwa mak kalwiedweda re de, emolmolan nekama riy de yamkekni nmalmualmu onde matni yata yoma emeknekama nhortaplin niohor walia de Uplerlawna Nwuri-nohma oleka e do'oni-halli la' ululu. 10 La' hade pede ina-nara miy, mpialiewan toto' meman totpa nhiolmi-lietmi ilu-wniehwami mak kalwiedweda re erla miy mormiormi, totpena la talan emkade pede mtiut mueman de, plollolli de mior wutga riy maka Uplerlawna Nwalir nian oleka, maka Npolga pa Nhi'a la E limni-rorni. Yoma la'pa mpiehwa reri-mliakat reria emkade la mormiormi, de hota miy edon mpiadur la pesiaymi. 11 Ne hota Uplerlawna Nreiniana-na'nana Nreililili-na'mamuau miy lia' ler maka mlier la Orgahi-Orha'a Yesus Kristus Ray Makamori-Kalewna lodna lie'enu-hairi liowni la Ilyamou-Watyatoha. Ne hota Enodi plolli la pa nodi liarni.
Petrus nakot nohora la' hya' mak kariei piede na'enyatga horat di
12 Miy miat niohor olek walia hare honona, me mpiesiay toto' meman walia ha plollolli. Mere emkade ho'mana agiwa wuagahniorat rer miy lia' hare. 13 Yoma la'pa a'g e muormiori mia'ta de awuarora de lol talanni pa awuagahniorta miy lia' hare. 14 Yoma agat niohora de hota edon nalo'on wali ne amuat wia, emeka hya' maka Itmatromlawanni Yesus Kristus Enakot nohora oleka la mai a'u. 15 Pede awualeran pa ukot nohora hari honona tiy miy totpena la' ler maka amuati oleka wa, de miy edon mhioratdoinia.
Hya' maka Petrus nakota de ha nwatiawu meman la Uplerlawna
16 Ina-nara ama-hyali, la'pa amakot nohora Orgahi-Orha'a Yesus Kristus hota Nmai die Nodia plolli-mneheni, preheni-mkaini, hitita-reprepra de amakot nohora E plolli-mneheni, preheni-mkaini maka a mat mamni namkek memna. Ami edonna mparor neka lira klili-kdiori ka'ohpa-kalahar pa ampahaur nohora la tiy miy. 17 Mere ami er wal lia hande pa amamkek memna Yesus Amni Uplerlawna Nmeh'a Nhi' pa A'nani Yesus Nlernana ya'uli-yawedi, yatota-yawawa. La' ler de amatlina lira nwatiawua Uplerlawna mak kden la Ilia Hititia-Wat rieprepra (Ilyamou-Watyatoha) pa Nhar lirni la E'a Niwra: ”A A'nu maka Asiayni inhatti. E' ed mak khi' A ralmu pa uhepuepru.” 18 Am meh'a neka matlin rer miemna lir de nwatiawua Ilyamou-Watyatoha la' ler de, maka amor E' pa mden la wo'or maka Uplerlawna Nwaliri-nwalioha nana. 19 Ina-nara, la' hya' maka Uplerlawna Nakota la wo'or hananni de, ntut muemna de hya' mak makwohorulu-ktatrulu rakot nohora olek ulga la'a Yesus Kristus de ha naplollola. Pede mtia'wa tlinmi la lirni de, yoma lir de ntutga talan mak kaplola tiy miy pia emolmolan nekama wa'du mak kmormior lia melmelli. Hota lir de ntutga talan tiy miy pia la'pa ntut mueman la' ler maka Yesus Kristus Nmai owa'an pa hota miat nohor memna E'a. Ha maimiaini de emolmolan nekama lera maka matni npah'a ne wtion repra mana maka khita-krepra. 20 Ina-nara, ononni la'a hya' maka a'ukot olek honona re, de totpa mhioratreria de makwohorulu-ktatrulu lirni la Puka ralamni, edonna rwatiawua makwohorulu re lir wamueheni mere ha rwatiawu Uplerlawna. 21 Yoma ita edonna tlernan ma'ta lira mak kwatiawua Uplerlawna maka rimormioria nohkerna rmeh'a rwaror nana. Mere Uplerlawna Niwra Nakot hadom de, Nala E Nhiw Lululli pa Nodi plolli la rimormiori nanpena nakot nohora hadella rimormior wialli.
Tungkuru-tungkuru mak edon kaplola
1 La' ululu de makwohorulu-ktatrulu mak edon kaplola rawniotra-rawniah'a wut lia Israel mniotni. Ne emkade wal pia hota la' lera-mela ri tungkuru-tungkur mak edon kaplola rler teman tiy miy. Hota ir er maka khi'a wunwunamnu pa rwatutu-rwaye'a rira totpena rod ir la klieratni. Ir wniatutnu de ed maka ktot rimormiori la matmiati-molmuolu plalahwa. Me hota tungkuru mak edon kaplola ri nek de ir reher doinia ir Matromni Yesus mak kodi plolli, maka ktuwu-khai olek ir wa. La hade pede narieiniande hota plinu-plinnianamde rler la matmiati-molmuolu plalahwa pa rrinnia la ai mormiori ralamni. 2 Hota riy rahu rlernohora tungkuru mak edon kaplola re yehwani mak kodia nhioli yatyata-halala mak ka'hira ralma-riorni la pohra-gehpa. Me nhiolli-lietni re hota rhi'a riy pa rapolu-raliella talan mak kaplola mak kod it la Uplerlawna loini-talanni. 3 Tungkuru-tungkuru re ralamni re rod rer lia kupna-kai re'a-tniaru, pede rwahaur neka hya' maka edon kaplola maka irmeh'a neka rwaror nana, totpena rlernana kupna tiy miy. Mere la' mahnek memna mak ktoran watghudi Nhi'targ oleka ir genni, ne matmiati-molmuolu plalahwa mana e nmat lia wniei lia ira. 4 Ina-nara, mpiaror tek la Uplerlawna hopopanni-lili'irnu (malaikat) mak khi' do'a-hala. Uplerlawna hopopanni-lili'irnu re nek de Uplerlawna edonna Nhortaplinu niukamnu, mere Nhopli-nnaklia ir la'a hu'ula-lien lawna mak ktuini eti, la melli-kalamni totpena yana rwadur la gen die pa la nte'ela ler meni maka mak ktoran watghudi hota Nmai. 5 Emkade wal lia' nohkeran dilla ler ululu, de Uplerlawna edonna Nollia niukum lawna. Uplerlawna Nala gera ktiowru-opli nhia'a la'a makden la nohkerna wawannu mak kahmena katlina-katailla E'a. Mere enekneka Nuh (mak kakot nohora mormiori-dardiar maka kaplol la Uplerlawna yamkekni totpena riy rat niohora) nor wut wualia e rom pali re wo'itu er maka kler la mormiori-lewlewna. 6 Ne hota emekwalima Sodom nora Gomora. Uplerlawna Nukmua leta rora re, de Nhokla ai pa na ntutin doinia totpena tamkek memna, hota hya' ed maka riy mak edon katlina-katailla Uplerlawna hota rlernana. 7 Mere la' ler de Uplerlawna Namori-nalewna Lota makden la plol wawna. Lot ralamni namehra-namau niohora riy mak kdunti-kwetria hya' mak kaplola yoma ir yehwani nodi nhioli yatyata-halala mak ka'hira ralma-rior la pohra-gehpa. 8 Yoma Lot de riy mak kden la plol wawna pa la'pa enora riy yatyata re rhol wiutu, de la' lera-ler nekpa tlinni-matni rpen lia nhioli-lieta mak kodia yata-hala, pede e ralamni de namehra-namau niohora. 9 Ina-nara la' hare honona pede tamkek memna, de Orgahi-Orha'a Nodi plolli pa Nalewna riy maka klernohora Uplerlawna wniarorni-wnialaini, la'pa irlernana dundunti-wetwuetru. Ne Orgahi-Orha'a Nodi plolli wal pia Nukum reri riy yatyata-halala re la' lera-mela ri, me la' walia la ler maka Enhudi-npar ir la watghudi lokarni tatiaili-lahannu la lera noha niatni. 10 Mak khi' do'a-kyap hiala honona hota rler la niukamnu, mere niukum werweratni hota rala la riy maka khoratreria ralma-riora yatyata-halala mak ka'hira ir inonni la'a nhioli-lieta kdeha-ktiahli me ralernu-raha'a hya' mak inponni la' ira. Tungkuru ri rpar la ir tullu-petanni pa narieiniande edonna ramta'ata rapolu-raliella Uplerlawna hopopanni-lili'irnu maka khitita-kreprepra. 11 Mere Uplerlawna hopopanni-lili'irnu mak karuri-ka'orat memna nareh doin la tungkuru maka edonna kaplola ri, nek de edonna rapolu-raliella mak kodi plolli re la'a Orgahi-Orha'a gaini ralamni. 12 Mere tungkuru re gahani lawan rehia! Irapolu-raliella de rakot nohora hya' ed maka iraplinu rna'erit nohora. Emkade pede ir emolmolan nekama nhiuri-wnia'ana mak edon rwaror nohora hadomdoma mere rlernohora ralma-rior wamueheni nek wa pede rneh pua rwadudlu-rwarerna nohora hya' maka ha raplinga loini-talanni. Ne emolmolan neka nhiuri-wnia'ana maka ha rhuri-rwa'ana totpena hota rtorna nhor diemade rotna tiernu, de hota tungkuru re rlernan matmiati-molmuolu plalahwa. 13 Tungkuru-tungkuru re hota rlernana mdududga yatyatni-halalli wniahlani. Yoma la'pa lerlera ho'mana ir heparnu de totpena rhi'a hlie'wani pa rtepra, me inonni pa raprana. La'pa ror miy ramtatan wut lia ya'ana ralamni, de tamkek la yehwani de nhi' it pa tiwra tamota yoma rma'wu nohora yehwa yatyatni. 14 Matni re rod reria patke'a yoma la ralma-rior yatyatni. Ne hota rwehwa-rlakat mamain la do'a-hala ralamni. Ir rareiniande riy mak pesiayni edon narur mia'ta de, totpa rler la klieratni. Me tungkuru re lera-lera nekpa yeher to' pa ralamni rod rer tio' la kupna-kai re'a-tniaru. La' hare honona pede Uplerlawna Nhorghal olek ir wa. 15 Yoma ir rhoitio'or doinia talan mak kaple'era pa rlernohora talan makwohorulu-ktatrulu Bileam, de Beor a'nani de talanni. Bileam di ralamni nod reria kupna-kai maka wniaror yatyatni enni. 16 Mere Bileam nlernana kniamota la e hihi'ini-yapyapni yatyat de la' keledai mak kaplinu kaltieri. Mere la' ler de keledai nora Bileam raltieria rimormiori yaltierni pa nkamota pa narieiniande Bileam de nolin doinia nhiolli-lietni mak kpodku-kpadku de. 17 Tungkuru-tungkuru mak edon kaplola re ralahar pa rakot targa de hota irodi unut la' mak klernohor ira, mere hota ir edon rod unut hadomdoma. Emkade pede ir emolmolan nekama ger ormata maka riy riwra ra'al gerni la, mere ger de nkern olekwa, onde wowta kakma mak anin lawna nod lia'a-nod miai mere hota otna edonna ntur wali. Hota Uplerlawna Nukum ir la gen miaka mel'uta-maliena. 18 Ir kospo'onni pa rala nur mi'nani pa rano' targa hya'-hya' to'a mere lir to'a de. Rtot riy pa rlernohora ir wniatutnu-wniaye'eni mak kiwra it tlernohora to' neka hya' mak ka'hira it ralma-riorni maka rimormior nohkerna wniayowni. Emkade pede raweyat targa riy mak na'nama khoitio'or doin ir do'oni-halli pa rpesiay. Mak kpesiay re emeka i'n mak kiwa kte'la la ainiara, naplin niek la ema rhewra kenna. 19 Tungkuru re rwatutu-rwaye'a rira riwra rolin doin olek it la deulu-tatra pede dodo'ondi de itlernohor nek la it ralma-rior wamueheni. Mere tungkuru re nek de rwali olek ata-wa'ara la nhioli-lieta yatyata-halala mak kweyata-kwaniaga. Yoma emeknekama la'pa hya' ed mak kal it la yawa, de emekwalima hade atni-wa'arni olek it wa. 20 Riy mak kat niohora olek Itmatromlawanni Yesus Kristus Makamori-Kalewna ita pede Uplerlawna Nalewna oleka la nohkerna wutwutnu-kokgohonu mak khi' akdeha rimormiori nohkerna ralma-riorni, mere hota riy de nawali owa'an pa nlernohora nohkeran di yatyatni-halalli, de hota hihi'ini-yapyapni yatyatni-halalli narehi owa'an la' mak ha nhi' ul die. 21 Ri'u nee! Ommuat tiek wa! Ommuai pia muatg oleka Uplerlawna lirni-tunnu maka ha rakot nohora tiy miy wia, noma O edonna mtielan nana-muaut nan walia hade! Samounu de muplin niek ma'ta talan de mak kod o'a totpa mpual lia riy mak kaplollol la' Uplerlawna yamkekni! 22 Nee! Hota tungkuru re rawali owa'an la do'oni-halli re edonna nhal et lia lir maka nhi'inde ha rwet la riwra: ”Ahu nanpena na'an owa'ana motni” me ”Waw miaka itaroh oleka mana, nawal pia nwakloli-nwaklali owa'an la loka-da'la ralamni”.
Yana mitlin la'a riy mak kiwra hota Orgahi-Orha'a edon Nmai owa'ana
1 Ina-nara ama-hyali, mak kden rer lia a ralmu. Hadi de a hortu re'eni wor tiy miy wia. La'a hortu woru ri, de a'g e tiekal rer tiy miy lia wniarora-wnialai mak kaploi-kaple'era. 2 De a'g e tiekal pa mhioratreria lira-tunu maka makwohorulu-ktatrulu maka Uplerlawna Nwaliri-nwalioha re rakota la' ler ululu. Me totpa mhioratreri wiali Itmatromlawanni Makhi' Ray lia mormiori-lewlewan de lirni-tunnu. Lirni-tunnu de ed mak riy mak kodia Uplerlawna lirni-tunnu re (rasul-rasul) rakot nohor oleka tiy miy wia. 3 A'ukot hadi totpa mhioratreria, hota nhi'pa ntutu-nte'ela lera noha niatni, de riy maka khorat to'ola yatyatni-halalli mak edon kla' nana Uplerlawna ralamni, de hota rmai wiali. Hota ir er maka kapolu-kalielan Uplerlawna lirni 4 pa riwra: ”Orgahi-Orha'a Nano' de hota Enmai, mere dodo'ondi de etla meni?! It inni-amni it upni-tgarni rmat momuou olek wa. Mere hanek-harahu wuawannu de er ma'ta la pa emekwalima la' ler maka Uplerlawna Nakoki-nayap niana noh marna-lyanit maran di.” 5-6 Irakot emkade, de rtot pa rhortaplinga de Uplerlawna Nukmu oleka nohkeran di re'eni id ralamni la gera ktiowru-opli nhia'a. Yoma noh marna-lyanit maran di, de Uplerlawna ed maka kakoki-kayapi niana de Nnair E lirni. Ne Nhi' nohkeran di de nwatiawua gera me Nnairia gera pa na Nhi' nohkeran di. Me Uplerlawna Nnair wali gera, mak hota kwal lia gera ktiowru-opli nhia'a pa Nweyata-nwaniawua nohkeran de la ulul genni. 7 Ne emeka la' ler ululu de Uplerlawna Nnairia E lirni pa Nakoki-nayap niana nohkeran di, de Ennair ma'ta E lirni pa Entera-ndema nohkerna totpena la'pa nte'ela ler noha niatni de hota Enala ai na nram doini nohkerna nora lyanit marna pa Nukmua riy yatyata re honona mak edon klernohora E ralma-riorni. 8 Ina-nara mak kden la a ralmu, mhioratreria! La'a Orgahi-Orha'a yamkekni la lera ida de emekwalima anni riwnu ida.Yoma la' lera ida onde anni riwnu ida yamkekni la Orgahi-Orha'a de ramneneha. 9 La' hade pede la'pa itwei mia'ta de edon ntutga Orgahi-Orha'a Nalo'on nohora maka Ha Nakot targ oleka. Meman neka la riy doma nhi'inde rwaror emkade. Mere plollolli de Enwei mia'ta yoma Enwahak pa riy honona rhoitio'ora-rtahnei lia do'oni-halli re. Yoma Enahmen meman pa riy ida nler la matmiati-molmuolu plalahwa pa rrinnia la ai mormiori ralamni. 10 Mere hota Orgahi-Orha'a ler maimiaini de emeknekama mak kwuri-kgalmu la mela plin niohora. La'awa ler de, de hota tatlin de ai sapon lawna ida yetanni demade lyanti nmol wua. La lera-wolla mak kden la lyanti honona mana rmutni-rki'ira. La' walia hanekneka makden la nohkeran de wawannu de emeka ha wniatlena. 11 Yoma la' hare honona wniatni de rakot targ olek hare wa, pede ina-nara, hota emkameni la miy mormiormi? Mai pia mliernohora Uplerlawna ralma-riorni pa emeka E kamieheni mak kakleha do'a-hala nhi'inde rhi'a. 12 Mai pia mhioli-mliet la plol wawna la' lera-mela ri maka mpiei-mniara Yesus maimiaini maka Uplerlawna Ntutg olek lerni de. Me mkiar totpena plet pa ler de ntutu-nte'ewa. La' ler de de lyanti ema rtutin doinia, me la' walia lera-wolla mak kden la lyanti de hota rmadger momuou yoma pahnani lawna. 13 Mere emkade ho'mana, twewiei-tnarnara nohkerna nora lyanit marna warwuaru maka Uplerlawna Nano'taru. Nohkerna nora lyanit maran de, it genni-tienni mak warwuaru hade. Ne hota riy mak kdella hande enekneka riy mak kaplol la Uplerlawna yamkekni.
Mpiehwa-mliakat rer lia plol wawna la'a lera-mela ri maka mpiei-mniar reria Orgahi-Orha'a maimiaini
14 La' hade pede ina-nara ama-hyali mak kden rer lia a ralmu, yoma la' lera-mela ri, miy mpiei-mniara ler hohoni me nohkerna warwuaru die, mpialiewan toto' meman pa miy mpial lia riy mak kakleha do'a-hala kuku' eti la' Orgahi-Orha'a yamkekni me totpa miora E' pa mkialwiedweda. 15 Mhioratreria! Orgahi-Orha'a e Nhur niohora ma't ita, de emekwalima Enala talan mai ita totpena tlernana mormiori-lewlewna. It mutwualli Paulus mak itsayn de mana, nal oleka horat tiy miy die nakot emkade wali. Enhorta horta re de, enlernana kirkira-ralma-rior samomuou die la Uplerlawna. 16 La'a Paulus horatni honona rde, enakot nohor mamainia wniatutnu ri. La' horatni lirni dom de riy edonna rna'erit nana. Ne lir mak riy de edonna rna'erit nana, ed maka riy podku ror wutga riy maka pesiayni edon kamtemtemna rwotra-rtal tiarga. La'a Puka lirni-tunnu dom to' mana ir rhi' walia emkade wali. Mere hya' ed maka ir rhi'a, de hota natota-nariei pia irmeh'a rler la matmiati-molmuolu plalahwa. 17 Ina-nara ama-hyali mak kden la a ralmu, miat niohora oleka tungkuru mak edon kaplola re ha rlolola, pede erammi la temmi. Yana mliernohora ir pa rtot miy lia klieratni. Ir er maka kadunti-kawetria hya' mak kaplola. Ne la'pa mliernohora de hota miolin doin pesiaymi mak karur die pa mlier la klieratni. 18 Hade emkade pede mpiehwa-mliakat la plol wawna totpena Yesus Kristus de Orgahi-Orha'a Makhi' Ray lia mormiori-lewlewan de yeher to'a pa Ntutga ralam kalwiedni tiy miy. Ne hota mlier pa mihaka totpena miat niohor E'a. Enden rer lia ya'uli-yawedi la' dodo'ondi, pa nodi liarni pa la nhoru. Amin (Plola). A kalwied mamni, Petrus
Yesus ed maka ha rweta la Uplerlawna Lira Nnio'a-Wawa Niatnu mak kodia mormiori
1 Horat di, de enakot nohor la Mak ha rweta la Uplerlawna Lira Nnio'a-Wawa Niatnu mak kodia mormiori. E' ed mak kden la'a ululu memna, la'a noha gergera-tatiah'i ma'ta. Mere ameh'a neka matlin nana E lirni, me a mat mamni ri mak kamkek E'a, me la' walia a lim mamni er mak ktorreria. 2 De la' ler maka Uplerlawna Nalharia Lira Nnio'a-Wawa Niatnu mak kodia mormiori di, a mat mamni de er maka kamkek la. La' hade pede amakot nohora E plollolli me amakot nohor walia E' ed mak kala mormiori plalahwa pa nodi liarni. E ed maka kora it Amlawanni Uplerlawna de rhol wiutu la'a noha gergera-tatiah'i mata. Mere dodo'ondi de Uplerlawna Nalharia mai ami. 3 Hya'a maka amamkeka la a mat mamni me amatlin nana E lirni de amakot nohora walia tiy miy, totpena mrie'ela am pia it tora Yesus Kristus tora Amni tler la ihru ida-ralm ida. 4 Amhorta hari tiy miy totpena it rewre'wa pa tamuki-tahepru toto' memna.
He' mak kmori-kdar lia lelerni de ha nwatiawua Uplerlawna
5 Ina-nara ama-hyali, amlernan lir di la Yesus Kristus pa amakot tiy miy, de Uplerlawna momuounu-witwitanni emeka lelerni me la E' de, it edon tlernana melmelli-kalkalamni. 6 Pede la'pa itakot tiwra itor wutga E'a, mere it er ma'ta la melmelli-kalkalamni, de it twali olek la mak kputra-kpalka ka'ohpa-kalahara. Ne it edon tlernohora Uplerlawna wniatutnu plollolli. 7 Mere la'pa tmori-tdar lia lelerni, pa emekwalia Uplerlawna, de hota itor wutga it pesiay wialli re tla' ihru ida-ralm ida, ne hota Uplerlawna A'nani Yesus rarni de ed mak kwuri-kohm it la do'a-hala honona. 8 La la'pa he' niwra e' edonna nhi' do'a-nyap hiala, de e orgahani to' pa nwutu inon wamueheni ralamni. Ne Uplerlawna lirni-tunnu plollolli mana edon nden la riy de ihranu ralamni. 9 Mere la'pa itwayow reria it do'oni-halli la Uplerlawna de hota Uplerlawna Nwe'er doinia it la wutwutu-kokgohu ralamni, me Nwuri-nohm it la'a it do'oni-halli, yoma E edonna Nhoratdoinia E nnio'oni, ne Nhi'a-nyapia hadom de lol talanni. 10 Mere la'pa itiwra it edonna tsi' do'a-tyap hal la E'a, de emekwalia ita ttut lir la E'a tiwra Enputra-npalk ita, me hota la' hade pede la' it ihranu ralamni de edonna nko'i nan etia Uplerlawna lirni-tunnu.
Yesus Kristus Nwe'er doin it la do'a-hala ralamni
1 U'pu-a'nu mak kden la a ralmu, a'u'enyat nnio'u-nia'tu mak emkadi tiy miy, totpena yana miodia inonmi la do'a-hala ralamni. Mere la'pa riy meni nler olek la do'a-hala ralamni, de yan mimta'ata yoma it hononita tlernan oleka riy id mak ktulan la ita, de Yesus Kristus mak kakleha do'a-hala. E' ed mak kod nian it la'a E Amni Uplerlawna. 2 Hota la E matmiatni la it do'oni-halli rerieini pa Nhi' mak ktuw nian-khai nian ita totpena Nwe'er doinia it la do'a-hala ralamni. Ne hota it edonna tmeh'a mere rimormiori no' nohkerna wawannu honona wali (mak kreinian E'a). 3 Itat niohor meman de itatg oleka Uplerlawna, hornama itlernohor reria Uplerlawna lirni-tunnu. 4 La' riy doma de riwra: "A'g e gat niohora Uplerlawna." Mere edonna rlernohora Uplerlawna lirni-tunnu, de hota rweta riy della maka ka'ohpa-kalahara, ne Uplerlawna lirni-tunnu plollolli mana edonna nden la riy de ihranu ralamni. 5 Mere la'pa riy ida nden rer lia Uplerlawna lirni-tunnu ralamni, de nnia'eratni de plollola pa entutga ralam kalwiedni la Uplerlawna. Ne hya' ed mak ktutga itora Uplerlawna ihru ida-ralm ida de emkadille: 6 de edon nakot to'a la nurnu niwra Uplerlawna mutnu-rahanu e'a mere e nhapartiklia Yesus Kristus ha Nala' lola.
He' mak ktulla-ksaynia inni-narni makpesiay nnia'eratni de nler olek la lelerni
7 Ina-nara ama-hyali mak kden rer lia a ralmu, La'pa a'ukot tiy miy pia idma nhi' kalwied id de, hya' ed maka aghorta de ralul pia rhoiya la nnio'a-niatu warwuaru id hade, mere hade de nnio'a-niatu maka ha mitlin oleka la' ler ululu, la' ler maka mrieiniana Yesus Kristus pa mimpiesiaya. 8 La' hade ho'mana nnio'a-niatu mak aghorta la' miy di, de ha warwuaru mua'ta walia. Yoma na'nama itamkek nana nnio'a-niatu yala'ani la Yesus Kristus hihi'ini-yapyapni, wniehwani-liakatni. Ne ramkek nan walia la' miy mormiormi ralamni. Yoma miy edon mdien olek la do'a-hala ralamni, mere milola-mila'a olek la' talan lelerni. Hade emkade, de emeknekama melmelli-kalkalamni ema rlar doinia la ne repra mana nhar wia. 9 Riy mak kiwra e' de nler olek la lelerni, mere edonna nor ma'ta inni-narni makpesiay re rkalwieda, de hota riy de emeknekama mak kwaho'a-kwahai mia'ta lol melmelli. 10 Mere riy maka ktulla-ksayn reria inni-narni, de nler olek la lelerni, pede hya' maka ha nhi'a-nyapi mana edonna nodi rimormior de pa nler la do'a-hala ralamni. 11 Mere la'pa riy mak edonna nora inni-narni rkalwieda de emekwalima riy mak kwaho'a-kwahai liol melli, ne hota naplin niohora enlol walli meni. Yoma melmelli-kalkalamni nahewu nan e matni. 12 Aghorta lira-tunu ri tiy miy, mak emolmolan nekama a u'pu-a'nu (la'a pesiay), yoma do'omi-halmi de ramou-rawitn olek wa, la Yesus Kristus hihi'ini. 13 Aghorta hari tiy miy mak emolmolan neka ina-ama (la pesiay) yoma miy e miat niohora E'a maka kden ulg olek la'a ululu, la noha gergera-tatiah'i ma'ta. A'ukot nohora hari tiy miy mak emolmolan neka tuwari-laweru (yoma mpio'la-mliekur rehi la pesiaya), yoma miy er mak katowra hegana amlawanni de. 14 Agal horat di tiy miy mak emolmolan neka a u'pu-a'nu (la pesiay) yoma miat niohor oleka Uplerlawna makhi' Am lawan tiy miy. Aghi' horat tiy miy mak emolmolan neka ina-ama (la pesiay) yoma miy er mak kat niohora Yesus Kristus makden la ululu, la noha gergera-tatiah'i ma'ta. Agal horat di tiy miy maka emolmolan neka tuwari-laweru miy, yoma pesiaymi naruri me Uplerlawna lirni-tunnu erla miy ihrami ralamni. Ne miy mitowr oleka hegana amlawanni de.
Yana mial ralammi la nohkeran di
15 Upa-a'na miy re, yana mial ralammi la nohkeran di nora mniotni. Yoma la'pa mial ralammi la nohkeran di, de taken niana mial ralammi tetema pa mliernohora Uplerlawna. 16 Yoma nohkeran di re'eni-tniarnu preheni-mkaini ed maka rimormiori ramkeka noma ralma-riorni nko'i nana. Ne hihi'a-yapyapi, re'a-tniaru, preheni-mkaini re rodia rimormiori pa rhi' atulu-apetna inonni. Nohkerna gahani honona ri, hare edonna rwatiawua Uplerlawna it Amlawanni de, mere ha rden to'ola nohkerna wawannu. 17 Hanek-harahu mak etla nohkerna ralamni maka rimormiori ha rwahaka re hota rmol wua. Mere riy maka klernohora Uplerlawna ralma-riorni de, de hota nmormiori plalahwa pa nodi liarni.
Mi'ererma la riy mak kmalawna Yesus Kristus
18 A'ukot la upa-a'na mak kden la a ralmu miy, de hota noha niatni mana nhi'pa ntutu-nte'ewa. Rakot ulg olek hari tiy miy wia, de hota riy metam keranni ida mak kmalawna Yesus Kristus hota nmai wia la' lera-mela hohoni ri. Ne dodo'ondi de ho'mana riy mak kmalawna Yesus Kristus harahu er olek di. Hade ed mak kwahniort ita totpa itat niohora lera noha niatni de hota nrehgor pua nte'ewa. 19 Mak kmalawna Yesus re de riy mak kre' wal it pa tla'a krei mutnu mere dodo'ondi de rto'or olek mai ita. Meman neka la rwatiawua krei mutnu mere makpesiay plollolli atia' ira. Yoma la'pa rpesiay toto' meman mana, ir edonna ral targ ita. Mere rhoitio'or mai ita, ne ir hihi'ini de ntutga ir de makpesiay atia' ira. 20 Mere (Yesus Kristus) Mak kakleha do'a-hala ed mak kalernu Uplerlawna Nhiw Lululli la miy wawanmi. Ne la' hade pede miy hononmi miat niohor oleka Uplerlawna wniatutnu plollolli. 21 Pede aghi' horat di tiy miy de a'g edonna wuarora de miplin niohora lira-tunu maka plollola mere la' yoma miy e miat niohora olekwa, me onnila miy miana miat niohor walia Uplerlawna lirni-tunnu mak kaplol de, edon nodia wniatutu-wniaye'a maka putputra-palpalka. 22 Riy meni maka edonna kwayow nohora Yesus, de riy de mak kputra-kpalka inhatta. Riy de niwra: "Yesus de, Uplerlawna edon Nano'targa pa Namori-nalewna rimormiori." Riy mak emkare rwali olek mak kmalawna Yesus Kristus. Ir edonna rwayow nohora Yesus Kristus Nor Amni. 23 Yoma riy mak edonna kwayow nan Uplerlawna A'nani de edon nora Amni Uplerlawna pa rla' lir ida. Mere he' maka kwayow nana Uplerlawna A'nani de emekwalima nreinian oleka Uplerlawna wali pa rla' lir ida. 24 La' hade pede wniatutu-wniaye'a mak kaplola mak ha mitlin oleka la' ler maka na'nama miy mpiesiay die, mitiak kalwiedwed harella inonmi. La'pa mliernohor kalwiedweda lira-tunu re, de hota miy mior wutga Uplerlawna nor A'nani mlia' lir ida. 25 Ne la'pa itora Uplerlawna A'nani tla' lir ida, de E' ed mak kano'targa mai ita, de hota itmormiori-tdardiar plalahwa pa nodi liarni. 26 Aghorta hari tiy miy totpa aga wuahniorta miy lia' riy maka hota klekur wenna pa rodia miy lia klieratni. 27 Mere la'pa twahaur la miy inon wamuehemi, de Yesus Kristus Nhuri oleka Nhiw Lululli tiy miy wia. Ne onnila Uplerlawna Nhiwni de Nden rer tiy miy, de hota riy meheni ho'mana edonna rwatutu-rwaye'a mak ha riwra wniatutu warwuaru tiy miy. Mere Nhiwni ed maka kwatut miy lia'a hya'a-hya' to'a, ne hya' maka Ha Nwatutu-nwaye'a re, hare raplol momuou ne edon nheik nan etia mak edon kaplola. La' hade pede mliernohora Uplerlawna Nhiw Lululli yawirnu-yawewalli pa mlia mior wutga Yesus Kristus mmiori-mdiar wiutu. 28 Hade pede upa-a'na mak kden rer lia a ralmu, lera-lera nekpa mriehgorga Yesus Kristus, totpena la'pa lerni la Yesus Nwatiawua Ilyamou pa Nmai, de hota twatrom de yan tamta'ata ne yan tadede' ita. 29 Miatg oleka de Uplerlawna Nden nek la plol wawna. Hade pede miat niohor walia Uplerlawna upni-a'nani re, de eneknek to'ama riy mak kden wal lia plol wawna.
He' ed mak kla' Uplerlawna upni-a'nani
1 A a'nu miy re, mpiaror nohora Uplerlawna, it Amlawanni de kalwiedni mak karehi-kalawan de mai ita pede Nwayow pa Nhi' it la upni-a'nani! Ne naplol pa it di de Uplerlawna upni-a'nani ita. Mere makdella nohkeran di mak edonna kpesiay Uplerlawna, hota edonna rwayow nan it la'a Uplerlawna upni-a'nani, yoma iraplin niohor ma'ta Uplerlawna. 2 Makden la a ralmu miy, it di de Uplerlawna upni-a'nani olek it wa. Mere Uplerlawna edon Nakot ma'ta pede taplin niohora it illu-wniehwani, it irannu-gaini la' ler maka Yesus Kristus Nmai owa'an de. Mere itatga de la' ler maka Ha Nmai die, twalia pa it emolmolannek E'ewa yoma la' ler de itamkek memna E' inhatta. 3 La' hade pede riy honona mak kha'ar aranni la Yesus maimiaini de, ir er maka katiak reria ir momuounu-witwitanni totpa emolmolan nekama Yesus de momuounu-witwitanni wali. 4 Mak kler la do'a-hala ralamni re er mak ktolkiai-khakpera Uplerlawna riorni-liaini. Yoma do'a-hal de ed mak kpera-kdaitia Uplerlawna deullu-tatarni. 5 Miy e miatga Yesus Kristus de Nmai olek pa Nhap dioinia rimormiori do'oni-halli. Ne la'a E inonni de do'a-hala edonna nheik nana. 6 La' hade pede riy honona maka kor wutga Yesus ihru ida-ralm ida de hota edonna rhi' reria do'a-hala. Mere riy maka khi' reri do'a-hala, de nnia'eratni de riy de naplin niohora Yesus Kristus nhiolli-lietni me edon nat mua'ta wali Yesus. 7 Hade pede upa-a'na miy re, yana mliernohora he' to' mak kiwra kod miy lia klieratni. Yoma riy maka klernohora Uplerlawna lirni-tunnu de e' ed mak kaplol la Uplerlawna yamkekni pa emolmolan neka Yesus. 8 Mere riy maka khi'inde khi' do'a-kyap hiala de hegana amlawanni a'nani e'a. Yoma hegana amlawanni natnioman la do'a-hala la' ler maka Uplerlawna Nakoki-nayap niana nohkeran di pa nodi liarni. Ne Uplerlawna A'nani Nmai totpena Nmeh'a nweyata-nwaniawua hegana kniarni. 9 Riy maka kwali olek la Uplerlawna upni-a'nani, de edonna nhi' reria do'a-hala yoma Uplerlawna yehwani etla e'a. Taken niana nhi' reria do'a-hala yoma e Amni de Uplerlawna. 10 Mere la'pa hameni mak edon khi'a-kyapia hya' mak kaplola la Uplerlawna yamkekni onde edonna nhima-nre'a inni-narni makpesiay re, de riy de Uplerlawna upni-a'nani atia' hade. Emkade pede itat niohora Uplerlawna upni-a'nani me hegana amlawanni upni-a'nani.
Idma ntulla-nsayn ida
11 Upa-a'na miy re, la' ler maka mrieiniana Yesus Kristus pa mpiesiaya de rakot targ oleka tiy miy wia, totpena miy idma nara'a-napalga ida. 12 Yan mhi' emolmolla Kain maka khi' hegana la amni pa nwenna hyal raralamni. Hya' ed mak kariei pia Kain nwenna hyallio? Yoma hya' maka Kain ha nhi'a de nhala, mere hya' maka hyalli ha nhi'a re de raplol la Uplerlawna yamkekni. 13 La' hade pede upa-a'na miy, la'pa rimormiori nohkeran di nagai pietan tiy miy de yan mhiedu. 14 Upa-a'na miy re, itatga de itlergot olek la matmiati ralamni ne it tler olek la mormiori ralamni pa hota itmormiori plalahwa pa nodi liarni. Itat niohor hade, yoma itatu tsi' kalwiedweda la it inni-narni makpesiay. Mere la'pa he' maka khi' yatyatni la'a inni-narni amni-hyalli, de plol toto'a riy de ed ma'ta la matmiati ralamni. 15 Yoma hameni mak kahankeran rer lia amni-hyalli inni-narni makpesiay re, de la Uplerlawna yamkekni de, riy de emekwalima riy mak kwunu-kwen oleka rimormior wialli. Ne miat niohora walia la' pa riy mak kwunu-kwenna re, de hota edon mormior plalahwa pa nodi liarni. 16 Yesus Kristus Nmeh'a Nal inonni pa rwunu-rwenna onnila it rerieini. Ne E' hihi'ini-yapyapni de ed mak ktutga loi-talan mai ita totpena itat niohor walia la'a itsi' kalwiedwed la it inni-narni makpesiay re. 17 La'pa mak ka'ana-kemnu ida namkek reria mutwualli mak kakleha-kaplara mere edonna ntulla-nsaynia, de hota emkameni la e niwra e nhima-nre' Uplerlawna?! 18 Upa-a'na miy re, yana takot to'ola it nurnu onde tanur mi'na tiwra ittulla-itsayni it rimormior wialli. Mere mai pia ittut muemna it ralam kalwiedni la'a wniehwa-liakta mak kala ya'ana-yemnu lawra-raini la mak kakleha-kaplara.
Itparan lia Uplerlawna gaini ralamni
19 Upa-a'na miy re, la'pa ittulla-tsayni it inni-narni makpesiay re, de itat niohora de itler olek la Uplerlawna a'nani lewatni makden la plol wawna, pede it ihranu ralamni nekane namtiertiernu la Uplerlawna gaini ralamni. 20 Mere la'pa mtiulla-msiayni rimormior wialmi mere mimta'at ma'ta yanpa hota Uplerlawna edon Nreinian miy, a'ukot tiy miy die yan mimta'ata, yoma Uplerlawna ralma-riorni nareh nian ita, ne E' ed mak kat niohora it ralma-riorni wniehwani-liakatni plollolli. 21 Makden la a ralmu miy, la'pa it ralma-riorni edonna nwaghal ita, de itparan pia tor Uplerlawna tapal wiutu pa itkola tieru-tawur nehla. 22 Ne la'pa itwak hadom la E'a de hota itlernana yoma itsi' hya' mak kla' nana E ralamni me itlernohor memna E nnio'oni-niatnu. 23 Maka Ha Nano'a-na'atga mai ita, de totpa it pesiayni narur tioto' la' E A'nani Yesus Kristus ne it mana idma nara'a-napalga ida pa tlernohora Yesus Kristus lirni-tunnu mai ita. 24 Rimormiori honona mak katlina-katailla Uplerlawna lirni-tunnu rora Uplerlawna rla' ihru ida-ralm ida. Ne la'a Uplerlawna Nhiw Lululli mak Enal oleka la ita pede itat niohor memna Uplerlawna Nor it de emek neka ihi nor kuku.
Takniau reria wniatutu mak kaplola me mak khala
1 Makden rer lia a ralmu miy, yan memmemna mpiesiaya he'-he'a to'a mak kiwra la ihranu ralamni de e npenpuen lia Uplerlawna Nhiw Lululli pede riwra rwatut miy. Mere mhiudi-mpiar teka plein nhiwni de plollolli, de nhiw maka kden la ir de plola pa nwatiawua Uplerlawna, me yanpa edonna. Yoma la' meni-meni to'a de riy harahu rtot pa rwal lia makwohorulu-ktatrulu mere ha rod tio' riy la klieratni. 2 Mhiudi-mpiar tek ira totpena miat niohora la wniehwani de Uplerlawna Nhiw Lululli mak hameni. De riy maka kwayow pa kakot nohora Yesus Kristus Nerun la nohkeran di de emolmolla rimormiori, de riy de lirni de nwatiawua Uplerlawna Nhiw Lululli. 3 Mere riy maka edonna nwaror nana Yesus Nmai die emolmolla rimormiori, de riy de Uplerlawna Nhiw Lululli edonna nden la ha ralamni. Mere nhiwa mak kden la riy de, emolmolan wali makden la riy metam keranni mak hota kmai pia kora Yesus Kristus kwahapra lia'ara-kwatoran wehla (ra'ara). Mitlin oleka de hota nhiwa-nhion yatyat de nmai. Ne plollolli de la lera-mela ri de ed olek la nohkeran di wawannu. 4 Mere upa-a'na miy, Uplerlawna Nherti olek miy wia. Ne miy di ed mak ktowra (kwayotlia) olek makwohorulu-ktatrulu mak edon kaplola re. Yoma hota Uplerlawna Nhiw Lululli mak kden tiy miy, de Narehi mieman la hegana amlawanni mak kodi plolli la riy maka nohkerna gahani re. 5 Makwohorulu-ktatrulu mak edon kaplola re rora nohkerna rla' lir ida, pede raltier niohora mamaini nohkerna yala'ani. Ne riy nohkerna mana rheri tlinni la ira wniatutnu-wniaye'eni. 6 Mere makodi Uplerlawna lirni-tunnu am die, de Uplerlawna upni-a'nani ami. Ne riy mak katg oleka Uplerlawna de hota ratlin mai ami. Mere riy maka Uplerlawna gahani atia'a de ed mak edon katlin mai ami. La' emkadella tamkek nana (takniau reria) riy maka Uplerlawna Nhiw Lululli Nodi plolli la pa Nwatutu-nwaye'a ha plollola onde maka hegana amlawanni nden la pa nodia kdiori-kdieha pa nodi it la klieratni.
Uplerlawan de kalwieda-paitiota inhatta
7 U'pu-a'nu mak kden rer lia a ralmu, mai pia it idma nhi' kalwied ida yoma kalwieda ha nwatiawua Uplerlawna. Riy maka khi' kalwied la e rimormior wialli de Uplerlawna upni-a'nani hade, me enat niohora Uplerlawna. 8 Riy mak edonna ktulla-ksayni e rimormior wialli, de edonna nat niohora Uplerlawna yoma Uplerlawan de kalwieda inhat E'a. 9 Ne Uplerlawna Ntutga sniayanni de mai ita, yoma E' ed mak khopan pa E A'nani memeheni de, Wutmueha-Laimieh de, Nerun la nohkerna wawannu, totpena itlernana mormiori la A'nani de. 10 Kalwieda de edonna nwatiawu ita pa it ttutga la Uplerlawna, mere Uplerlawna ed maka ksayn ita pede Nhopna A'nani pa Nmai, totpena la' E matmiatni de pede Ntuw niana-nhai nian ita totpa itawnie'er la do'a-hala ralamni. 11 U'pu-a'nu mak kden la a ralmu, onnila Uplerlawna ralam kalwiedni mak kareh mieman de mai ita pede it mana ttut wual hadella it rimormior wialli. 12 Riy id mana edonna namkek ma'ta Uplerlawna, mere la'pa it idma nhi' kalwiedwed la ida, de itor Uplerlawna tla ihru ida-ralm ida. Ne E kalwiedni nkar lia it ralamni pede it idma ntulla-nsayni ida me it tsima-tre' it rimormior wialli me Uplerlawna wali, pa emekwalima hya' mak kla' nan Uplerlawna ralamni. 13 Uplerlawna Nal oleka Nhiw Lululli mai ita. La' talan emkade pede itat niohora la' it mormiorni di tor oleka Uplerlawna pa twal lia ida me emekwalima Enmai tiemn ita. 14 Ne hya' wali de a orgah miamni nek de mamkek oleka Uplerlawna A'nani, ne amod kiot la' riy amiwra E Amni ed maka khopan pa Nmai pia Namori-nalewna nohkeran di mniotni. 15 Pede he' ed mak kiwra Yesus de Uplerlawna A'nani, de riy de mana nor oleka Uplerlawna ihru ida-ralm ida. 16 It orgahani mana tat wualia Uplerlawna Nsayn ita me itsa'ar it aranni la E kalwiedni de. Yoma Uplerlawan de kalwieda inhatta pede riy mak khima-kre' reria Uplerlawna me e rimormior wialli de, riy de nora Uplerlawna rla' ihru ida-ralm ida. 17 Upa-a'na miy re, ittulla-tsayni it rimormior wialli pa emekwalima mak kla' nana Uplerlawna ralamni totpena itparan pia pa twatrom la Uplerlawna la' lerni la Nhud it la watghudi lokarni, yoma it mormiorni mai nohkeran di de emekwalima Yesus Kristus mormiorni-dardiarni. 18 Riy maka Uplerlawna kalwiedni nwah'a nana, de edon namta'at eti yoma kalwieda plolli mak kla' Uplerlawna ralamni ed maka kdeh'a doinia (kahal doini) yamta'ata la ihranu ralamni. Nhi'inde rimormiori ramta'ata Uplerlawna yoma rwaror nohora la'a E' ed mak ktorna watghudi gaini ralamni. Pede he' maka kamta'at Uplerlawna nhiudni-pniarni de, Uplerlawna kalwiedni edon penpuen ma't la ihranu ralamni. 19 Itsi' kalwied la rira me itsima-tre'a Uplerlawna yoma Uplerlawna ed mak kala' ul pua Ntutga kalwiedni mai ita. 20 Mere la'pa he' mak kiwra: "A di de ghima-rie'a Uplerlawna," mere edonna nora inni-narni makpesiay re rkalwieda, de riy de nalahara. Yoma riy maka edonna khima-kre'a inni-narni amni-hyalli maka kayamkeka de hota emkameni la enhima-nre'a Uplerlawna mak edonna kayamkeka?! 21 Ne lira-nnio'a nwatiawua Uplerlawna pa nmai it de niwra: La'pa he' mak kiwra nhi' kalwiedweda Uplerlawna de nhi' wal lia inni-narni amni-hyalli.
It ta'unut nana nohkerna
1 Upa-a'na miy re, he'-he' to' mak kpesiay Yesus de Ray miaka Uplerlawna Nano'taru pa Namori-nalewna rimormior inhatta, riy de ed maka rhoiya la Uplerlawna upni-a'nani. La'pa itsi' kalwieda la riy inni-amni, de hota itsi' kalwied walia riy de walli. 2 Emkade walia la'pa itsi' kalwieda la Uplerlawna me tatu tatlina-tatailla E lirni-tunnu de, de itat niohor walia itsi' kalwied walia la' Uplerlawna upni-a'nani. 3 Yoma la'pa itlernohora Uplerlawna lirni-tunnu de emekwalima itsi' kalwieda la Uplerlawna. Ne E lirni-tunnu edonna nhi' awert ita. 4 Yoma he' to' mak kla' Uplerlawna upni-a'nani, de e' ed maka karu'u-katowra (kwayotlia) nohkeran di yatni-halli yoma npesiay Yesus Uplerlawna A'nani de. 5 Hota he' ed maka kparan pia katowar nana nohkeran dina de? Riy mak katowra nohkeran di, de enekneka riy mak kpesiay Yesus riwra: "Yesus de Uplerlawna A'nani inhatta."
Plol toto' pa Yesus Kristus ed mak kodia mormiori plalahwa
6 Yesus Kristus ed mak kmai lia nohkerna pa rala gera rharania me totpena Nmati ne rarni naktiowur doin la. Enmai die edonna rharania la gera nmeh'a to'a mere Nala inonni pa rwenna ne rarni naktiowur doin walia. Ne Uplerlawna Nhiwni ed mak kaplol nohora Yesus. Yoma Uplerlawna Nhiwni de edon Nakot targa lir lalahara. 7 Pede mak ktutrier niohora (saksi) Yesus Kristus de wotelg hare, 8 de Uplerlawna Nhiwni, gera nhiarani me Yesus rarni. Mantetelu re rewre'wa pa lir ida. 9 Nhi'inde itpesiay rimormior mak ktutrier nohora (saksi) pa rala lin nohora-mat nohora hihi'a-yapyapi ida, mere lira maka Uplerlawna Nakota de ed maka karuri-kalai pia krehi rimormiori lirni yoma Uplerlawna E'a. Ne E nakot nohora la A'na wamueheni wawannu. 10 La' hade pede riy makpesiay Uplerlawna A'nani de, nat niohor memna hya' ed maka Uplerlawna Nakota re la'a A'nani naplola. Mere riy maka edonna kpesiay Uplerlawna, de emeknekama nhoi Uplerlawna la mak ka'ohpa-kalahara, yoma edon npesiay hya' maka Uplerlawna Nakot nohora la A'nani wawannu. 11 Ne emkadilla maka Uplerlawna Nakot nohora re, de Uplerlawna Nal olek mormiori mak kodi liarni mai ita, ne A'nani ed mak kodia mormiori die. 12 Riy maka kora Uplerlawna A'nani rla ihru ida-ralm ida, hota rmormiori plalahwa pa nodi liarni. Riy mak edon nora Uplerlawna A'nani ihru ida-ralm ida de edon nler la mormiori die.
Itparan pia itsumbain la Uplerlawna la it mutwualli rerieini
13 Agal horat la makpesiay Uplerlawna A'nani miy, de totpena miatga de miy di de mliernan oleka mormiori-dardiari plalahwa pa nodi liarni. 14 Hade pede itparan pia tsumbain la Uplerlawna yoma itpesiaya de hota Enreiniana-na'nan it sniumbainni la'pa itwak to'a hya' maka kla' nana E ralamni. 15 Pede hota la'pa itsi' emkade, de tat muemna de Enal olek hya' maka twaka la E'a. 16 Pede la'pa mimkek nana ita inni-narni ida nler la do'a-hala, mak edon nodia riy della matmiati-molmuolu plalahwa, de msiumbain la Uplerlawna totpa Namori-nalewna, ne hota Uplerlawna Ntemna mormiori plalahwa della e limmi ralamni. Hadi ed maka ha mhi'a la riy maka do'oni-halli edonna nodia matmiati plalahwa. Mere do'a-hala id ed ma'ta mak kodi riy pa rler la matmiati-molmuolu plalahwa. La eda de, de a'g edonna ukot nohor tiy miy, totpena msiumbain la Uplerlawna. 17 Nhioli-liet mak khala honona de do'a-hala hare. Mere do'a-hala honona re edonna rodia riy la matmiati-molmuolu plalahwa.
It tor wutga Uplerlawna inhatta tla' ihru ida-ralm ida pede oliet it la uplera-upmati
18 Itatg oleka la riy honona mak kla' oleka Uplerlawna upni-a'nani de hota edonna nhi' reri do'a-hala, yoma Uplerlawna A'nani Nahlili-nalakam reria re, pede hegana amlawanni edon na'ala rpa nodia la klierat lawna. 19 Riy mai nohkeran di, de rru'g olek la hegana nayanni. Mere itatga de, it di de Uplerlawna gahani olek it wa. 20 Tatga de Uplerlawna A'nani Nmai olek wa me Nakot nohor hare honona mai it wa totpena tat niohora Uplerlawna mak kaplola inhatta. Ne itora Uplerlawna inhatta tla' ihru ida-ralm ida, me tor wut wualia A'nani Yesus Kristus tla' lir ida. Hade ed mak ha rweta la Uplerlawna mak kaplola inhatta me E Nmeh'a neka ed mak kala mormiori plalahwa pa nodi liarni. 21 Hade pede upa-a'na mak kden rer lia a ralmu, awuak tiy miy die totpena olietmi la kniola tieru-niawur nehla la uplera-upmati! A kalwie'du, Yohansi
Wniak kalwieda
1 La'a patke'a mak Uplerlawna Nwalir niana me la' walia upni-a'nani, kalwiedo! A' di de mak khi' o'ta-mat la krei wokni-le'enu me mak kal toto' memna a ralmu tiy miy. Hota A'g edonna mueh'a mere la' walia riy honona mana mak kat niohor oleka Uplerlawna lirni-tunnu mak kaplola, ir ralamni rden rer walia tiy miy wiali. 2 Yoma Uplerlawna lirni-tunnu mak kaplola nden rer lia it hononit ralamni. Ne hota itmor niohor E lirni-tunnu de pa nodi liarni. 3 Awuak de Uplerlawna, it Amlawanni de, nor E A'nani Yesus Kristus rtutga ralam kalwiedni mai ita pede rala ra'ani-pallu me kalwiedni-paitiotni mai ita maka kpesiaya Uplerlawna lirni-tunnu mak kaplola, me ksayni rimormior wialli.
Mliernohora Uplerlawna lirni-tunnu me mpiayotlia lira-tunu mak edon kaplola
4 A'uhepur memna yoma a'utlin nan de a i'nu upni-a'nani doma e rlernohora Uplerlawna talanni mak kaplola pa rhi' nana hya' maka Uplerlawna Nakot targa la mai ita. 5 La' hade pede, awuak pa i'nu makden rer lia a ralmu la'pa makpesiay re honona pa mdien rer lia nhioli-lieta kalwieda. Yana mpiarora de hya' maka a'ukota di lira nnio'a-wawa niatu warwuaru hadi. Mere itlernan olek hade wa la'a ler maka tler la pesiayni de, de totpena it idma nhi' kalwiedwed ida. 6 Kalwieda-paitiota yala'ani de totpena tmormiori lia Uplerlawna lirni-tunnu. Uplerlawna lirni-tunnu maka mitlin oleka la ler mak na'nama mpiesiaya, de totpa mhi' kalwiedweda rimormior wialmi. 7 Mhioratreria! Riy liawanni rhoitio'or doin oleka krei-krei re pa rla rodia kdiori-kdieha la' noheri woru. Hare er mak kiwra Yesus Kristus de Nler la nohkeran di de edonna Nwal lia rimormiori. Riy mak kakot emkade de riy kdiori-kdieha irhatta, ne ir er mak kora Yesus Kristus rwahapra lia'ara-rwadawar wehla (ra'ara). 8 La' hade pede mi'ererma, yanpa irod miy lia klieratni pede hota miy edon mliernana wniahlani maka Uplerlawna Nala la riy mak khima-kre' E'a. Mitiak reria totpena hota mliernan pripanni-fa'anni re honona. 9 Riy mak edonna ktorreria Yesus Kristus lirni-tunnu, mere rlernohora wniatutu-wniaye'a doma to'a, riy de edonna nor la Uplerlawna. Mere riy maka kden rer lia tlina-taili la Yesus lirni-tunnu, de riy de nora Uplerlawna me A'nani rla' ihru ida-ralm ida. 10 Emkade pede riy rmai pia rodia wniatutu-wniaye' maka Yesus edonna Nakot targa tiy miy, de yan memmemna mrieiniana la rommi nayanni pa ranin la hande. Me yan memmemna mpiak kalwied la emeka mpia'ina-mpianar la'a woka ida. 11Yoma la'pa itreiniana riy mak emkare, de emekwalima it tor ir pa lir id la yatyatni-halalli.
Lira hohoni
12 Harahu meman pa agiwra ukota tiy miy, mere awuarora de yana ghi' horta. Ne pena alier teman nek la miy lia hande totpena amueh'a ultier niohora hare honona totpena it rewre'wa tamuki-tahepru toto' memna. 13 Patke' mak kor miy pia mpia'ina-mpia'ela maka Uplerlawna Nwalir niana de, upni-a'nani e rwak kalwieda tiy miy! A kalwie'du, Yohansi
Wniak kalwieda
1 Hya'lu Gayus mak kden rer lia a ralmu! A'g ed mak khi' nana horat di lirni. A' di de mak khi' o'ta-mat la krei wokni-le'enu, me mak kal toto' memna ralamni tiy o'a. 2 Asiumbain de awuakwak pa hya'lu nden la kalwiedwedni me inonmu yana namehra mere mururi pa emekwalima pesiaymu naruri olek wali. 3 A'ukot hadi yoma a'uhepur meman la'a makpesiay doma rmai pia rwahaur nohora o' de, riwra omdien rer lia Uplerlawna lirni-tunnu mak kaplola. Ne plollolli de o mormiormu de nlernohora Uplerlawna wniatutnu-wniaye'eni. 4 La'pa a'utlin nana a u'pu-a'nu he' to'a makpesiay pa rlernohor reria Uplerlawna talanni de, ed maka katota-kariei pia a ralmu nahepur memna.
Mhima-mrie'a makod kiota-kal de'eta Yesus lirni-tunnu
5 Hya'lu makden rer lia a ralmu, o kalwiedmu pa mdien rer lia ra'amu-palmu himimmu-rere'emu la mutwualmu makpesiay, mak kla'a-kmai re, kennama o edon muat niohor ma'ta hare. 6 It mutwualli re rwahaur momuog oleka o kalwiedmu honona la krei mutnu mai handi. Awuak hota mtiulan owa'an la ira totpena rlernan talan pa rodi liarni la'a Uplerlawna kniarni ralamni. Emkade pede mhi' samomuou ira yoma hade ed maka kla' nana Uplerlawna ralamni. 7 Yoma rla' pa rod kiota-ral de'et la Yesus Kristus lirni-tunnu la riy mak edon kpesiay ma'ta. Mere rahmena rwak pa riy mak edon kpesiay ma'ta re rala kniar die wniahlani la ira. 8 La' hade pede it makpesiay, de tre' pa tara'a-tapalga tsima-tre'a ita mutwualli mak kakot nohora Yesus lirni-tunnu totpena la' talan emkade pede itre' wal lia ir pa takot nohora Uplerlawna wniatutu plollolli.
Yana rtolliohora nhioli-liet yatyata
9 A'g u'enyatg oleka horta id la krei mutnu la' hande, mere Diotrefes mak kiwra kla o'tani la krei mutnu, nahmena nlernohor ami. 10 La' hade pede pena atiy pia a'ukot nohora Diotrefes hihi'ini-yapyapni yatyatni totpena krei mutnu rat niohora de nhi'inde enapolu-naliella ami. Ne hade edon nmeh'a mere la lera it mutwualli mak rod kiota-ral de'eta Yesus lirni-tunnu rmai, noma Diotrefes edonna nreiniana re. Ne la'pa it inni-narni mak kiwra kreiniana mak kod kiota-kal de'eta Yesus lirni re, Diotrefes la npolliohora ina-nara re me nhopan pa rlergot la roma-krei. 11 Hyalia mak kden la a ralmu, yan memmemna mtiolliohora nhioli-liet yatyata. Mere mliernohora hya' maka kodia kalwiedni. Riy maka kholi-klet kalwiedweda re, Uplerlawna gahani hare. Mere riy maka khi'a-kyapia yatyatni-halalli de, hare raplin mua'ta Uplerlawna. 12 Mere hyalia, makpesiay honona re ra'ulia Demetrius. Ne e' mana nlernohor mamaini Uplerlawna lirni mak kaplola pede ntutga e' de riy samomuou e'a. Am miana ma'uli wiali e'a. Ne totpa hya'lu nat wualia, de hya' maka amakota re de riy rpesiaya re yoma ha plollola re. La' hohoni la horat di ampak kalwieda 13 Harahu memna agiwa ukot nohora tiy o'a mere awuarora de yana akenia la horta. 14 Awuak de hota edon nalo'on wali ne itwatroma, ne totpena itapal wiut mueman pa twahauru. 15 Awuak de Orgahi-Orha'a pena Ntemna kalwiedni-paitiotni (damai sejahtera) la limmu ralamni. Mutwualmu makden la handi, rwak walia kalwieda tiy o'a. Mpuak walia a kalwie'du nenenan la makpesiay makden la hande. A kalwie'du, Yohansi
Paulus nwak kalwieda
1 Ina-nara ama-hyali mak Uplerlawna Npolga totpa mpial lia E mutnu. Miy er maka it Amlawanni Uplerlawna Nsayni yoma miora E' pa mlia' ihru ida-ralm ida, me Enatiak reri miy totpena Nhi' miy pia mpial lia Yesus Kristus gah wamueheni. Mak khima-kre'a Yesus Kristus tulanni-kniarni, a'u Yudas, Yakowsi hyalli. 2 Awuak de Uplerlawna hota e Ntut muemna ralam kalwiedni tiy miy pia Nhurriernia kalwiedni-paitiotni tiy miy. Ne hota Entulan miy pia miatu mtiulla-msiayn meman walia rimormiori wialmi.
Mi'ereram la'a tungkuru mak edon kaplola
3 Ina-nara ama-hyali mak kden rer lia a ralmu, agiwra meman pa aghi' horat di tiy miy de a'g e ukot nohora mormiori-lewlewna maka it rewre'wa tlernan olek de. Mere awuaror owa'an de a ralmu ed mak khopan pa uno'a-unat plein miy lia tungkuru mak edon kaplola re. Pede agal horat di tiy miy totpena yeher to' pa miod niana lira-tunu mak kaplola maka mpiesiay oleka de. Uplerlawna Nal olek lirni-tunnu re tiy miy wia. Ne Uplerlawna lirni-tunnu re ha rden rer niek la ler maka Ha Nala la' E mutnu-rahanu, la'pa ntutu-nte'ela lera-mela noha niatni. Hade pede mtiorrer pitpitga hare. 4 Uno'a-unat hadi tiy miy yoma riy doma rlol wunwunamnu pa rler teman tiy miy totpa rwatut miy lia klieratni. Ir rahmen memna ratlina-ratailla Uplerlawna. Ir er maka kwotra-ktal tiarga Uplerlawna wniatutnu la'a E kalwiedni mai ita. Ir riwra onnila Uplerlawna ralam kalwiedni pede Enamou-nawitna it do'oni-halli, la' hade pede hota la'pa itsi'a-tyapi nieka yalira-yaliai yaretyata-yahawyata de hota Uplerlawna edonna Nukm ita. Ne irwayotlia Yesus Kristus mak kodi plolli la haneknek wawannu. Mere Itmatromlawanni E' inhatta. La ululu memna de Puka lirni enakot nohora tungkuru re niukamnu. 5 Ina-nara miy miat niohor memn oleka la'a hya' maka riy mak kmormiori lia ler ululu ha rlernan de. Mere awuagahniort owa'ana miy lia hade. Orgahi-Orha'a Namori-nalewna Israel mutnu-rahanu makden la Mesir, mere emkade ho'mana la'pa Orgahi-Orha'a Namori-nalewna ir pa nhorwua na'nama Nkowa-nwalia mak kakleha pesiay la' ir mutnu temanni. 6 Mhioratrer wial wia Uplerlawna hopopanni (malaikat) maka kpera-kdait doinia ir genni-tienni, pa narieiniande genni re rahgali. Uplerlawna ed mak kenia ranti la hopopan re limni dewade Nkenia la gen miaka mel'uta-maliena. Hota rwutu-rkohoga pa nodi liarni. Rden nek la hande pa rwei lia lera hohoni maka ha retlia ira niukamnu. 7 Mhioratrer wialia leta Sodom nora Gomora, nor wutga leta-let maka kpahelieli re. Hota emkade walia la' ira. Ira mniotni rhi'a-ryap nieka nhioli-lieta yatyata-halala, yoma ralira-raliai, raretyata-rahawyata, rwadu'ul wutu pede rala ai mormiori ra rtunu-rharna totpena ra rwahniorta rimormiori re honona la'a Uplerlawna niukum lawanni la ai mormiori ralamni mak kod pia nodi liarni. Niukum de ed maka riy yatyata-halala hota rlernana. 8 Emkade wal lia riy mak kmai ktieman tiy miy ri, rhi'a-ryapia yatyatni-halalli. Iralahar pa riwra Uplerlawna Nala mi'ini pa Nwayow nohora ir yehwani yatyatni re pede orgahi rhi' owa'an nhiol yatyata mak ka'hira ralma-riorni. Irahmena ratlina-ratailla he' ed maka inponni la' ira me rapolu-raliella Uplerlawna hopopanni-lili'irnu maka khitita-kreprepra. 9 Mere Mikhail, makhi' o'tani la Uplerlawna hopopanni-lili'irnu (malaikat) re honona mana, edonna nhi' targa nhioli-lieta mak kapolu-kaliella. La' lera Mikhail nora hegana amlawanni rawo'or nohora hota he' ed maka klernan Musa mak kmat die inonni, de Mikhail edonna nparan pia nala lir yalernu-yaha'a pa nwaghala hegana amlawanni. Enekneka Mikhail nakot la: "Hota Orgahi-Orha'a Nkamota-nkamara o'a!" 10 Mere riy maka kmai ktieman tiy miy re, rnairia lira-tunu yalernu-yaha'a hya' maka iraplinu rna'erit nohora. Ne irlernohor neka hya' mak ka'hira ralma-riorni emeknekama oha-ahu maka kakleh wniarora-wnialai mak khe'du nan ira. Do'a-hala ri er mak kareiniande irlernana tniu'tu-liewru (hukum berat) mak kwakoha-kwananna. 11 Hota rmat wie! Iremun la Kain, mak khi' yatyatni la hyalli de larni. Ir emolmolan neka Bileam pa rtota riy lia klieratni yoma rwahak neka kupna-kai. Hota rlernana yatyatni-halalli yatlorni-yatra'ani pa emekwalima riy de mak kwawa Korah maka kmalawan la o'ta-mata mak kodi plolli la' ler ululu. 12 La'pa miy makpesiay miwok pa mi'ina-miemun pa mhioi-mtiania yamanna mak ktutga miy idma ntulla-nsayni ida, de tungkuru mak edon kaplola re rler teman tiy miy. La' ya'ana mutu pepanni de ir edon rwarei-rwadan nohor walia miy onde Uplerlawna. Wniehwani de ra'ana roro'a-rawriawnu ne idma edon nwei ida. Edon rtulan la ir rimormior wialli mere rwaror nohor neka inon wamueheni. Ir er maka kweyata-kwaniawu pua emeknekama watu lalawna mak karei piede puou-kapli rler la kowlora-pah'a meti. Ir edon rod unut hadoma pede emeknekama kakam larlara-anin tentieni mak edon katuru onde nor hoptutu-udia hoplera mak edon kodi wo'oni pede hota rwuh dioin la nor wutga onni-ga'arni. 13 Ira rla'a-rmai niohora ira nhiolli-lietni mak kamola-kama' pa emolmolla yo'or meti nhia' lawna pa ownu loi-pal lia. Ir rhoitio'or doin oleka hya' maka kaplola, emeknekama wtiona maka ktuini la'a genni-tienni. Uplerlawna Nwahi' targa oleka ir geni la mel'uta-maliena pa nodi liarni. 14 Henok de, Adam duratni-waitni wo'itnu de enwohor targ olek hare wa la'a nur wuowohorni niwra: "Mimkek la, hota Itmatromlawanni Nmai die nora hopopanni-lili'irnu (malaikat) riwnu-riwnu mak kakleha do'a-hala. 15 Ha rmai die totpena Orgahi-Orha'a Ntoran watghudi la riy honona. Hota E' ed maka kukmua riy dodo'a-halala yoma nhioli-lieta mak edon kla' nan Uplerlawna ralamni. Me E' ed mak kukmua riy maka edon klernohora E ralma-riorni me rhoklira-rpah'a waw la Uplerlawna pa ralernu-raha'a." 16 Makwohorulu-ktatrulu maka mak edon kaplola ri raltier yata me rwaghala riy meheni. La' hare mormiorni irlernohora neka nhiol yatyata mak ka'hira ralma-riorni. Ratulu-rapetna inon wamueheni, ne ranur mi'na totpa rlernana mak ha rwahaka.
Nnio'a-niatu nora wniahniorta
17 Mere ina-nara, mak kden rer lia a ralmu, Itmatromni Yesus Kristus Nhopan doinia riy mak kodi Uplerlawna lirni-tunnu re pa rtiy miy die. Mhioratreria hya' maka ha rakota de hota ntutu-nte'ewa, 18 de riwra: "Hota la'pa noha nhi'pa niat wa dewade riy maka kapolu-kalielan la Uplerlawna lirni rma rrehgor wua. Rmai die rhorat to'ola yatyatni-halalli mak edonna kla' nana Uplerlawna ralamni." 19 Ir irhatti mak kodia miy makpesiay lia to'a-taiya. Ir edonna rlernana ruri-lai la Uplerlawna Nhiwni, mere eneknek to'ama rlernohora nohkerna wniaror yatyatni. 20 Mere ina-nara ama-hyali miy mak kden rer lia a ralmu, mpialiewan pa mlier la ga'a la'a miy pesiaymi la Uplerlawna lirni-tunnu mak edon nhal eti. Hota mial inonmi totpa la'pa msiumbain de Uplerlawna Nhiwni Nodi miy. 21 Mdien rer lia Uplerlawna ralam kalwiedni pa mpiei reria mormiori-dardiari plalahwa pa nodi liarni mak hota Itmatromni Yesus Kristus Nala yoma ralam kalwiedni. 22 La'pa mliernana riy maka ralamni worworga la pesiayni, de msiaynia re pa mtiutga loi-talan la. 23 Milewna riy mak katlin la tungkuru mak edon kaplola re pa emeka mhiedu riy de la'a ai aratni. La'pa riy dom to' mana mtiulla-msiayni mere mi'ererma totpena yana mhi' do'a-hala emekwalima ira, mere oliet miy la nhioli-lieta yatyatni-halalli re, pa emolmolan nekama nhi'inde miy sukmi tia'ala mtieman la naniairi maka rawoha-rwannia la kdeheni-ktiahlani.
Sniumbain mak kodia ya'uli-yawedi
24-25 Mai pia ta'uli-tawedi Orgahi-Orha'a Uplerlawna-Mempulwatnu la tutullu-lolo'oni. E' nanpena ed mak katiaka totpena yana mtiuini, ne E nanpena ed mak kod miy lia E gaini ralamni, de mikleha do'a-hala kuku' eti me mimdien rer lia ralma hepuepru. Hota mior wutga E' la E genni la hititni-repreparni, homomarni-laliairni ralamni. E inhatte Uplerlawna-Mempulwatnu maka kamori-kalewna ita, yoma ita talair nohor A'nani Yesus Kristus, Itmatromlawanni. Mai pia ta'uli-tawedi tlilili-tmamuau E'a onnila E preheni-mkaini, rurni-laini, plolli-mneheni. Enmeh'a ed mak kodi plola-ktaryatu la'a noha gergera-tatiah'i ma'ta, la' pa dodo'ondi pa nodi liarni. Amin (Plola). A kalwie'du, Yudasa
Puka mak kakot nohora hya' ed mak kler pa kmai wia
1 La' puk di de lirni e nwahaur nohora la'a hya' maka Yesus Kristus Nalharia (Nakot nohora) la mak khima-kre'a E kniarni, la'a hya' maka Uplerlawna Netlia de hota kler pa kmai wia. Uplerlawna ed mak kalharia hare honona la A'nani Yesus Kristus ne Ntutmuata-nkewra'a Yesus pa Nalharia hya' mak hota kayamkeka ri la mak khima-kre'a E kniarni. Noma Yesus Kristus Nhopan doinia hopopna mak kwatiawua Ilyamou-Watyatoha pa nma nakot nohor hare honona la a'u, Yohansi mak khima-kre'a E kniarni. 2 Noma Yohansi awuahaur momuoga hya' maka alina-muat nana (umkek nana) re, de Uplerlawna lirni-tunnu maka Nakot taru noma Yesus Kristus Nalharia. 3 Puk di, de makwohorulu-ktatrulu (nabi) lirni hadi, ne he' mak kpaikia puka la nhiopun lawna me mak katlina puk di lirni pa rlernohor reria, de hota rler la unut lawna yoma hota edonna nalo'on wal pia hare honona maka rakot nohora la' puk di de nwakrian wia.
A kalwie'du la krei mutnu re wo'itu
4 Ina-nara ama-hyali mak kler temn olek la mutu krei mandiditu makden la Asia. A'u Yohansi awuaka, de hota Uplerlawna Nala ra'ani-pallu me kalwiedni-paitiotni tiy miy. Uplerlawna ed mak kdena la'a dodo'ondi, E' nekpa ed makden olekwa, ne hota Nden pa nodi liarni. Me awuak pa mliernan walia ra'ani-pallu me kalwieda-paitiota la' (Uplerlawna Nhiw Lululli) mak ha rhoiya la nhiw mandiditu mak kaprir lia Uplerlawna liwangenni gaini. 5 Me mliernan wal lia' Yesus Kristus mak kdenrer miamaini (setia) pa Nakot nohora Uplerlawna lirni-tunnu mak kaplola. E' ed mak ha ramor ulga la matmiatni ralamni. Ne E' wal pia mak kodi plolli la lodna-hairia noheri woru-lyanti nayanni. Yesus ed mak ktulla-ksayn ita pede Nala rarni na Ntuwu-nhai nian it pa Nwe'er doin it la do'a-hala ralamni. 6 Ne Enwalir nian it pa tler la hairi ida maka Ntutmuata-nkewra'a pa tla'a imam-imam mak khima-kre'a Uplerlawna, Yesus Amni de. La' hade pede mai pia ta'uli-tawedi Wutmueha-Laimieha Yesus Kristus, makdella tulu-lyanti. La' E' nampena Nmeh'a Nodi plolli pa nodi liarni. Amin (Plola). 7 Mhioratreria! Hota Yesus Nmai die lol kakma ralamni. Riy nohkerna honona ramkek rer wiali E'a, la'pa maka la' ler ululu de kho'ora tera la ihranu matni me kliwra diwdiwra rohmera la lo'mani pa rwunu-rwenn E' mana, hota rden wal pia rwatniar reria. Rimormioria nohkerna wawannu honona hota rapolu-ratniani, rko'a-rkakru. Yah! Plol toto' pa hota emkade. Amin (Plola). 8 Uplerlawna Orgahi-Orha'a ed mak kdena la' dodo'ondi, mak kden olekwa ne mak kden pa nodi liarni. E' ed mak ktorna nohkerna tirni me, krautia lyanit marna ga'arni. E' ed mak kharlirni pa Nakot emkadi: ”A'g e ed mak ha rweta la Alpa nor Omega yoma A'g ed mak kala' ulu me A' wal pia ed mak kden la li'iru.”
Yohansi ndarat nana Yesus Kristus
9 Inmi-narmi Yohansi a'u, it hononita tler la liewr ida la'a it pesiayni la Yesus Kristus pa reiniande tler la kropna-krieutu, lui-nuhru, mere tarur niek pa tatahan it ralamni. It rewre'wa pa tla' riy mak Uplerlawna Nodi plolli la emeka Ray. Itler la hari honona yoma itler wutg olek la Yesus. Ina-nara, rolin targa a lia'a noha Patmos yoma awuahaur nohora Uplerlawna lirni-tunnu maka Nakot taru, noma Yesus Nalharia mai a'u. 10 La'awa krei lerni, dewade Uplerlawna Nhiwni Nhu'ru ralm a'u noma utlin nana lira ida nhaun de emolmolla noknoka ida pa e naltier lia a to'oru. 11 Lir de niwra: ”Mhuorat lolola hya' ed maka mumkeka ne mu'enyatga la krei mandiditu la leta-leta ri, de Epsus, Smirna, Pergamus, Tiatira, Sardis, Filadelfia, me Laodikia. 12 Noma a'ukillia a to'oru pa utapnia he' ed mak kaltier lia a' diena. Noma umkek nana wa'du wniatatgenni wo'itu maka rhi' nana la maha. 13 La' letgar la wa'du wniatatgenni re de, riy ida e Ntutrier lia de yamkekni emeknekama mak ha rweta la Rimormiori A'na. Naniayarni de raini plalahwa. La'a ihranu de rala maha ra rwowa. 14 Moratnu wahrani emekneka duma wullu ne matni lomarni-dainni emeka ai mormiori. 15 Lakni lipa-nka'ma pa emeka pi'ra maka ai ha na'an nana. Lirni emeka ger wawuau mak kayorni. 16 Limni malganna Ntorreria wtiona wo'itu ne la'a nurnu de nage'gota wehla ya'ara ida, naplokra la to'orni-gaini. Gaini reprepar momuou pa emeka lera hititni-repreparni la lera nwawuau ro'onni. 17 La'pa umkek tutga de upru'ru tar lia gaini ralamni de ukleh lira wawa. Mere Nlapra limni malganan la a wawnu pa Niwra: ”Yan mumta'ata. Mak kden ulu A'u me mak kden li'iru A'u. 18 Mak kmormiori pia nodi liarni. Amuati olekwa, mere oh! Dodo'ondi Amuor pia nodi liarni. A'g e ed mak kodi plolli la matmiati ne god plolli la noh mati-rai miolu pa A'umori owa'ana riy mak kmati olekwa re pa emolmolan nekama riy mak ktorna konsi, de nodi plolli pa nharia nhiari totpa riy rlergot la roma nhio'la. 19 La' hade pede mhuorta momuoga hare honona maka mumkeka re; la'a hya' maka ha mumkeka ri, me mak hota mumkek owa'ana. 20 Wtiona re wo'itu de nnia'eratni, de Uplerlawna hopopanni-lili'irnu la'a krei wokni re wo'itu, ne wa'du wniatatgenni re wo'itu re, de nnia'eratni krei wokni wo'itu irhatta. Hade de nnia'eratni la' wtion mandiditu mak omumkek oleka la A li'mu walli malganan de, ne la'a wa'du wniatatgenni wo'itu mak ha rwewal nana la maha.”
Wutmueha-Laimieha nnio'oni la makden leta Epsus
1 Noka Wutmueha-Laimieha Nakot mai a'u niwra: ”Lira mak hota mhuorta la'a hopopna-lili'iru la'a krei mutnu la' leta Epsus, de lirni emkadilla: A'g ed mak ktorna wtiona wo'itu la li'mu malganan de, ne Alioha-lilia pa alina-muata kmeha-kmeh la wa'du wniatatgenni maka rwewal nana la' maha re pa giwra: 2 Agat niohora ilmi-wniehwami, de mial ralam tetema pa mhima-mrie'a Uplerlawna kniarni, ne la kropna-krieutu, lui-nuhru ralamni de miy e mitahan ralammi. Agat niohora walia de miy edonna mhiur niohora riy yatyata-halala. Ne riy mak kran inonni de emekwalimde makodia Uplerlawna lirni-tunnu mere edon raplola, miwerta-mitaili olek ir pa mliernan ir de riy maka ka'ohpa-kalahara. 3 Agat niohora de riy rnahora-rnala' miy emkade ho'mana mtiahan nek ralammi pa edon mpiadur la mhima-mrie'a A knia'ru onnila mpiesiay mai a'u. 4 Mere A lira pniolliohoru tiy miy. Yoma la' lera-mela ri, de miy edon mtiutga ralam kalwiedwedmi pa emek ululu. 5 La' hade pede mpiahniorat la' temmi me mpiaror nohor owa'an ralam kalwiedmi la' ler ulul die. Mhioitio'or doin-mtiahnei dioin la nhiolmi-lietmi dodo'ondi mak kod miy lia do'a-hala, ne mipali owa'ana nhioli-liet ululmi. La'pa edonan de hota a'g ed mak kmai pia kwuh dioinia wa'du wniatatgenmi de la' genni-tienni. 6 Mere twaror owa'ana, de miy kalwiedmi oke' etla, yoma, miy sukmi atia'a la'a riy mak klernohora Nikolaus wniatutnu mak edon kaplola, mak A' muana ralmu edon nla' nana. 7 La'pa he' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re. La' hameni ed maka ka'untu la do'a-hala ralamni de, de hota Awuayow nohora pa nre'ela na'ana auwo'a mak kodia mormiori-dardiari mak kmor lia Uplerlawna nhyi'ini maka rweta la Firdaus de.”
Wutmueha-Laimieha nnio'oni la leta Smirna
8 Noka Wutmueha-Laimieha Nakot owa'an mai a'u Niwra: ”Lira mak hota omhuorta la hopopna-lili'iru la'a krei mutnu la' leta Smirna, de emkadilla: A'g ed Mak kden ulu me Mak ktawli'iru, Mak kmati olekwa mere kmori owa'ana giwra: 9 Agat niohora klehemi-larmi nora polpuolmi-wakwakmi yoma riy rnahora-rnala' miy. Agat niohor miy klehemi-larmi mere la'a plollolli de la'a Uplerlawna yamkekni de mlier olek la pripanni-fa'anni. A'utlin oleka yapupu-yaheri maka rotil targa tiy miy. Nhi'inde iriwra ir de de Uplerlawna mutnu inhatta ira. Mere plollolli de ir nanpena Uplerlawna mutnu atia'a pa rler teman la hegana amlawanni (Setan) wokni-le'enu. 10 Yan mimta'at la nniahora-nniala'a mak hota edon nalo'on wali ne mliernana. Erammi la' temmi! Hota hegana amlawanni nareiniande rwi'it targa miy dom la'a roma nhio'la ralamni. La' talan emkade pede rawerta-ratailia miy pesiaymi. Hota mi'uhi-miklel nohora kropna-krieutu la lera-mela termida, pa emeka hya' maka Uplerlawna Neti oleka. Yan memmemna mhiur dioinia A lia ralma-riormi nodia pa mmiati, kennama riwra rwunu-rwenan miy. Yoma hota emolmolan nekama mak ka'untu la mak kawlari, de hota rala siewa id la, de hota A'g ed mak kala mori-lewna tiy miy pa Agala wuahla prehenmi-maumi. 11 La'pa he' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re. Hameni ed mak ka'untu de hota naplin niohor oleka matmiati re'eni wornu.”
Wutmueha-Laimieha nnio'oni la leta Pergamus
12 Noka Wutmueha-Laimieha Nakot owa'an mai a'u Niwra: ”Lir mak hota omhuorta la hopopna-lili'iru la'a krei mutnu la leta Pergamus de lirni emkadilla: A'g ed mak ktorna wehla ara mak kamnarat la to'orni-gaini. A nnio'u emkadi: 13 Agat niohora miy genmi-tienmi la gen miaka riy dodo'a-halala ha rden la pede emeknekama mdiella gen miaka ha rwau tiarga hegana amlawanni liwangenni-mtatangenni yoma hegana nodi plolli la' hande. Mere miy edon mliernohora hare mere mdien rer lia A'u. Ne la' ler maka ha ratuinia Antipas mak kdenrer pia nod nian A' die aranni la miy letmi de, miy miana edonna mrieher doini wali A'u. 14 Mere ena'ida-nawor mueman la mak kamehra a ralmu, yoma la' riy dom tiy miy die e rlernohora Bileam wniatutnu-wniaye'eni. Yoma Bileam ed maka kwatutga riy ida mak kwawa Balak totpa nhi' adwiorin targa hairi Israel re pa rtuin la do'a-hala ralamni. De de noria pa ra'ana ya'ana-yemun maka rala ra rhoi-rtania uplera-upmatni me nna'ohma la yalira-yaliai. 15 La' emkade wal lia riy dom tiy miy die e rlernohora wniatutu-wniaye'a mak edon kaplola maka Nikolaus limni-rorni ha rwatutu. 16 Dodo'ondi A'ukot tiy miy totpa mhioitio'ora-mtiahnei lia do'omi-halmi re. La'pa edonan de, edon nalo'on wali pia hota Aghapartikil nohora miy lia genmi, pa Agala wehla ara, maka A'ukloman rer die pa gatipna-ghewra miy mak edon mhioitio'ora-mtiahnei dioinia do'omi-halmi re. 17 La'pa he' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re. Riy mak ka'untu, de hota A'g ed mak kal ir pa ra'ana manna mak kayade'a, ne hota Agal walia wat wawahra nenenna la' ir honona. La'a wat die e rhorat targa nan warwuaru ida, maka riy id mana hota napling et miemna nan de. Nte' nan toto'a mak klernan wat die nanpena nmeh'a natga, nan de.”
Wutmueha-Laimieha nnio'oni la leta Tiatira
18 Noka Wutmueha-Laimieha Nakot owa'an mai a'u Niwra: ”Lira mak hota omhuorta la hopopna-lili'iru la'a krei mutnu la' leta Tiatira de emkadilla: A' di de Uplerlawna A'nani, Wutmueha-Laimieha. A ma'tu hitita-reprepra pa emekneka ai, me A la'ku nmatliairi-nmatliairi pa emekneka pi'ra maka ai ha na'ana. A nnio'u emkadi: 19 Agat niohora hya' maka ha mhi'a honona re. Agat niohora la miy die, miatu mtiulla-msiayni rimormiori wialmi. Mdien rer miamain la miy pesiaymi mai A'u. Mhi' arur miatmata la' A knia'ru, ne miatu miod niohora lui-nuhru, polpuol ina-wakwak ama. Agat niohora la miy die de, mipe'el la A knia'ru, pede nod miy lia ga'a, ne nareh mieman la ululu. 20 Mere A ralmu werta tiy miy yoma mhiur niohora Isabel mak kiwra e' de makwohorulu-ktatrulu (nabi) id e'a. Enwatutga A li'mu-ro'ru pa ralira-raliai, me nodi wialia pa ra'ana-remnia hya' maka rhoi-rtania la uplera-upmati. 21 A'ukot olek la e' pa totpena pletpa nhoitio'or doin do'oni-halli re. Mere ralamni edonna nwayow pa nollia nhioli la yalira-yaliai me nhioini-tnianni la uplera-upmati. 22 Mhioratreria! Hota A'g ed mak klakdiwra e la'a lewnu wawannu pa herieri-walwialia pede edon nanin matni. Hota la' eda de, pa mak ha nora ralira-raliai wiutu re, honona rewre'wa pa rler la nnien miak werta. La'pa ir edon rolli nhioli maka patke' de nwatutga, de hare honona de hota Aghapartikil nohora A li'ru. 23 Mak klernohora e' pa emeka riy ida nlernohora inni-amni, de hota Ariahmi wenwenna, totpena krei mutnu honona re rwera matni pa ratga de A' di de ed maka kat niohora rimormiori ihranu ralamni. Ne Awuahla doin memna riy nenenna hihi'ini-yapyapni. 24 Wniatutu-wniaye' yatyata maka riy rwatutu ed mak ha rakal nana pa rwet la de, hegana amlawanni (Setan) lira-yatga mak rawunmua. Mere makden Tiatira miy dom de edonna mliernohora wniatutu-wniaye' yatyat de, pede A'ukot tiy miy, hota A'g edonna u'itra-ulawna kwara maka etla miy wawayanmi. 25 Mere la' dodo'ondi de la'pa ntut mueman la ler maka hota Amuai die, mtiorrer pitpitga la' pesiaymi me mliernohor reria A li'ru-tu'nu. 26-27 La'pa mak ka'untu, maka la'pa rodi liarni la'a rhi'a-ryapia hya' maka A ralmu nala, de hota Agala rpa rlernana plola-mneha emekwalia hya' maka Aliernana la A'mu. Hota Agal walia ir pa rlernana plola-mneha la hairi-hairi mak kmalawan la Uplerlawna, de rnairia lie'ena mnotna. ”Ne hota rnairia lie'en de pa ra rweyata hairi-hairi re, de emolmolla ran tan miaka ha rliwar wawah'a.” 28 Hota Agal walia wtion mak kreprepar la tipru la' riy mak ka'unut nana re. 29 La'pa he' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re.”
Wutmueha-Laimieha nnio'oni la leta Sardis
1 Noka Wutmueha-Laimieha Nakot owa'ana mai a'u Niwra: ”Lir maka omhuorta la hopopna-lili'iru la'a krei mutnu la' leta Sardis, de lirni emkadille: A'g ed mak ktorna Uplerlawna nhiw mandiditnu, me wtiona mandiditu, A nnio'u emkadi: Agat niohora hya' maka mhi' oleka wa. Riwra miy e mmiormiori. Mere miy de e mmiati olekwa. 2 La' hade pede mimata, nhioratmi la' temmi! Yan mimatia ralma-riormi makden ma'ta la temmi. Mere mhi' aruri miy pesiaymi. Yoma aliernana la hya' ed maka ha mhi'a re, de id mana edon naplol la Uplerlawna yamkekni. 3 Hade pede mhioratreri owa'ana hya' maka rwatutg oleka tiy miy wia la ulul geni. Ne la' walia la'a hya' maka mitlin oleka wa. Mliernohor rer maka A'ukota re, me mhioitio'or doinia do'omi-halmi re. La'pa edonna mpiahniorat de, de hota Amuai die emeka mak kamnelu-kamna'a pa hota miplin niohora Amuai lia hya' lera. 4 Mere la'a miy mutmi makden la Sardis, de korni e ratiak ma'ta ihranu ralamni pa rmou-rwitna, pa emeknekama riy ida natiaka naniayarni totpena yana rakdieha-raktiahli. Hota ir er mak kor A' pua mnairia naniair wawahra pa mala' wutu. Yoma ir nanpena er mak Uplerlawna Ntutga pa rlernan hade yoma edonna rpa'eini-rpahal la Uplerlawna ralma-riorni. 5 La'pa he' to' wal pia ed mak ka'untu de hota ir rre' teman la riy maka rohoga raini wawahra la inonni. Ir nanni de hota A'g edonna kwun dioinia (kuh dioin) la puk maka ha rhorat targa riy mak kler la mormiori-dardiari pa nodi liarni re nanni. Ne hota la' A'mu nor hopopanni-lili'irnu gaini ralamni, de A'ukot nohora giwra A'uaw nian olek ir wa. 6 La'pa he' mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re.”
Wutmueha-Laimieha nnio'oni la'a leta Filadelfia
7 Noma Wutmueha-Laimieha Nakot owa'an mai a'u Niwra: ”Maka omhuorta la hopopna-lili'iru la'a krei mutnu la leta Filadelfia lirni de emkadille: A' di de riy mak kden la mou-witna, ploi-ple'era. Ne A' di, ihini-iparni A' inhatta. A'g ed mak ktorna konis ripu mak Daud gahani. La'pa Aghari nhiari de, riy id mana ta'en niana nho'la. Ne la'pa Agho'la nhiari, de riy id mana ta'en niana nharia. A nnio'u emkadi: 8 Agat niohora hihi'imi-yapyapmi. Agat niohora miy rurmi-laimi edonna la ntutu-nte'a yoma riy ida-woru rmeh'a miy. Mere miy e mliernohor olek A wua la A wniatu'tu-wniaye'u. Me mdien rer miamain mai A'u. Mhioratreria! Aghar tiarg oleka nhiari id tiy miy wia. Ne la'pa riy id mana hota edonna nho'la nhiar die tiy miy. 9 Mhioratrer hadi! Riy mak kla oleka hegana mutnu, mak ka'ohpa-kalahar pa riwra ir de nanpena Uplerlawna mutnu maka ha wnialir tiaru, A'ukot targa de hota Aghi'a pa rmai pia rru'u-rtowar la miy lakmi nayanni. Ne totpa rwayow nohora de miy nanpena er mak A ralmu napal niana. 10 Mliernohor oleka A li'ru mak A'ukot nohora la'a yatahan ralma la kropna-krieutu ralamni. La' hade pede A' muana hota ghilpai-muanatu miy lia' noha riokatni la tipru-warta, me ray rilla ra'i-tranna. Hota ral kropna-krieutu matmiat liawan de pa ra rta'ga rimormioria nohkerna wawannu. 11 Hota Alier pa muai wia. Mitiak rer kalwiedweda hya' maka miy hanmi, totpena yana riy id mana na'ala hya' maka ha mi'unut nana. 12 Riy mak ka'untu, de hota Aghi'a pa nden nek la' A Uplerlawnu romni ralamni pa nodi liarni pa emeka riri tniutu mak ta'en niana riy rawo'la nana, makdella rom de ralamni. Ne hota riy de nden nek la Uplerlawna lodna lie'enu-hairi liowni pa naterna apitga. Hota Aghonin targa la inonni, de Uplerlawna mak A'u'uli-uwedia nanni me Yerusalem warwuaru nanni totpa rat niohora de Uplerlawna gahani e'a me Yerusalem warwuaru de e let wamueheni. Yerusalem de, hota nwatiawua Ilyamou-Watyatoha pa Nernu, de Uplerlawna ed mak kal hade. Ne hota Aghorat walia A nan warwua'ru la inonni yoma A gah'u e'a. 13 He' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona.”
Wutmueha-Laimieha nnio'oni la leta Laodikia
14 Noka Wutmueha-Laimieha Nakot owa'an mai a'u Niwra: ”Lira mak hota omhuorta la'a hopopna-lili'iru la'a krei mutnu la' leta Laodikia de emkadilla lirni: A' di de mak ha riwra Amin, Makden la Plol wawna, A'g ed mak kdenrer (setia) pa A'ukot nohora Uplerlawna gahani honona totpena riy rat niohora ha raplola, me Uplerlawna Nor A' pua Makoki-mayapi nohkerna nora lyanti. A nnio'u emkadi: 15 Agat niohora hihi'imi-yapyapmi re. Agat niohora de miy edon mrieher A'u mere miy wal pia edon mtiorrer pitpit lia miy pesiaymi la' A'u pede miy die emolmolan neka gera mak edonna nwoki mere edonna npahna wali. Agiwra totpa miy mpioki onde mpiahna. 16 Mere miy edon mrieher A'u me miy wal pia edonna mtiorrer pitpit lia miy pesiaymi la' A'u pa miy die emeka gera mak mamamtu. La' hade pede hota A'umot doin miy lia A wa'wu. 17 Mikota miwra miy e mrie'a-mtiaru, pede hare honona mliernan oleka, mere miy e miplin niohor miy e mikleha-miplar nande mikleha hewewta-naniairi pa mitliawihi, ne matmi ryata. 18 La' hade pede A'uno' miy totpena miwelia A mah'u, yoma A mah'u de maha ihini, totpena mtiaru. Miweli wialia naniair wawahra la mai A'u totpena mniairia, de ma mihewua miy inonmi mak kamola-kama' miy die. Ne miwel wialia wu'ru-atiawi totpena ma mpianapal matmi totpena mimkeka. 19 Riy mak Asiaynia re ir er maka nhi'inde Apuol niohora me Awuale'era mak khala. La' hade pede inonmi re rapepe'ela, ne mhioitio'or doin-mtiahnei dioin do'omi-halmi. 20 Mitlina! A'g ed mak kaprir lia nhiari gaini pa tiet la nhiari. He' natlin nana A li'ru, dewade nhari nhiari, de hota A lia' rialam pa Awuatroma me Agor rewre'wa ma'an wutu. 21 He' ed mak ka'untu de Aghopan pa namtatan wut muai A'u lia A mtatange'nu pa emekwalia A'u'untu olekwa pa Agora A'mu mamtatan wut lia mtatangenni. 22 La'pa he' ed mak katlin olek hari, de mhioratreria hya' maka Uplerlawna Nhiw Lululli Nwakdie'eta la krei wokni-le'enu honona re.”
Nhiu'ru-nhielma la' Ilyamou-Watyatoha
1 Nhorwua noma Yohansi a'u adiarat nan id owa'an to'a. De a'umkek la Ilyamou-Watyatoha (Sorga) de nhiari ida nahniari. Nhor nioma a'utlin owa'ana lira mak utlin oleka la'a lir maka a'utlin de emekneka noknoka lirni. Lir de nakot mai a'u: ”Mai pia mhua'at la handi pa Atiutga hya' maka hota kler pa kmai.” 2 La'pa mtatan de nekpa Uplerlawna Nhiwni Nodi plolli mai a' pua umkek la Ilyamou-Watyatoha de Riy ida e Namtatna la mtatangenni ida. 3 Riy de Nhita-nrepra liplipa-kamka'ma ne lipni emekwali watu motmota mak kwawa Yaspis me watu mermera mak kwawa delima. Ne ohni ida horni emek watu motmota mak liplipa-kamka'ma pa nle' niana liwangeni-mtatangen die. 4 La' liwangen die lie'enu ralamni de mtatangen tiutulu terampworu wehrani wogata e rle' reria. La' hare de o'ta-mata riy terampworu wehrani wogata e raliwan targa la mtatangeni re, de honona rnairia wawahrani. Ne rawutu-ralaiya wutu-lai miaha. 5 La'a liwangen tiutul die hitita-repreparni rpira-ra'pa emek hita-tlena, me kukru-gauru yetni warna. Me la'a liwangen tiutul die gaini, de hulga mormiori wo'itga e rawniau. Hare de nnia'eratni de Uplerlawna Nhiw Lululli maka riwra Uplerlawna nhiwni mandiditnu. 6 La' liwangen tiutul die gaini wali, de hadom yamkekni emolmolla hletan lawan mak kamememi ne nheik nohora la watgai liplipa (kristal). La' liwangeni die walli-walli de hamormiori wogata e rhapet reria. Ne la to'orni-gaini de rpenpuen lia matni. 7 Hamormiori re ida, de gaini emekneka ohdawra (yoma emolmolan neka singa mak kodi plola-ktaryat lia hamormiori dom to'a). Hamormiori wornu de, gaini emekneka hayori muanu (yoma hamormiori die naruri-nalai), hamormiori wotellu de, gaini emekneka rimormiori herni-gaini (yoma emolmolan neka rimormiori pede wniarorni plalahwa). Hamormiori wogatni de, gaini na'erit nohora (emekneka) iha (rajawali) mak knema-ktai (yoma nnem de meranni pa nla'aw la meni-meni to'a). 8 Hamormiori re wogata, la' nenenan de, rnairi liwarni wonema. La' inonni re honona me la' walia liwarni re walli-walli rpenpuen lia matni. La' lelera-melmel de hamormiori re edonna rher rer lia wniatunu-wniahniara pa riwra: ”Lilili-mamuau lia' O genmu-tienmu Orgahi O'a, Uplerlawna O'a, lilili-mamuau lia tutulmu-lolo'omu. Yoma O' ed mak kodi plolli la haneka-harahu wuawannu. Mak kmou-kwitna inhat O'a. Maka ploloi-plele'er O'a. Omdiena, Omdien olek la me Omdien nek la pa nodi liarni.” 9 Emkade pede hamormiori re wogata rwahniara nhiar ya'uli-yawedi nhiu'ru-nhielma la'a E' makden la liwangen tiutul die pa nodi liarni. Ne la'pa hamormiori re rwahniara, de 10 o'ta-mata riy terampworu wehrani wogata re, rwaltior tar lia Uplerlawna mak kamtatan la liwangen die gaini ralamni. E' ed mak kodi plolli pa nodi liarni. Nhor nioma honona rnaklia wutnu-laini re la'a liwangen tiutul die gaini pa rakot la: 11 ”Ee Matroma O'a, de a Uplerlawan mamni O' ee! O' nanpena ed maka ma'uli-mawedi mhu'ru-mhelma la'a tutulmu-lolo'omu onnila O plolmu-mnehemu, yoma O' ed mak kokoma-kpapala, kakoki-kayap niana haneka-harahu wuawannu ri. Me O ralma-rior wamuehemu wal piede reinian haneka-harahu wuawannu ri, rler la mormiori.”
Dum A'na Nmeh'a ed makodi plolli pa Nwe'er doini puk mak kapniopna
1 La'awa honi de a'umkek nana la Uplerlawna mak kamtatan la gen tiutul die limni malganna ralamni, de Entorreria puka pniopna ida. Ne la' puk de ralamni de npenpuen niohora nhiorta lie'u la walli-walli ne e rala hiwliai (cap) wo'itu ra rtapal targa la. 2 Noma umkek walia Uplerlawna hopopanni mak karuri-kalai ida npolu-nhaun pa niwra: ”He' nodi plolli pa nhau diodioinia hiwliai maka ha ra rkulit targa puka pniopan dena de?” 3 Mere riy ida la Ilyamou-Watyatoha, onde riy id la'a nohkerna wawannu, onde mak kdella nohkerna wikni-la ray gerni mana edonna rparan pia nheik la puk de pa nharia me nkillia puk de ralamni. 4 La' hade pede A'uhedge'du la kniakru yoma la riy id mana taken niana nharia puk de pa nkillia ralamni. 5 Noma riy id la' o'ta-mata re nhar lirni pa nakot mai a'u: ”Oi! Yana muhe'du la kniakru. Mkillia! Yesus mak ha rwet la de Singa mak kwatiawu Yehuda luwnu-a'nani me mak ha rwet wal lia, Daud duratni-waitni inhatta, ed maka ka'unut lawn olekwa. La' hade pede E' nanpena hota ed mak kodi plolli pa khau dioinia hiwliai mak ha ra rkulit taru re wo'itu pa nkillia puk de ralamni.” 6 Noma a'umkek walia Dum A'na ida Naprir lia liwangen tiutul die onni. Me hamormiori re wogata mana rora o'ta-mata re honona pa rle'lu reria. Tamkek la Dum A'na de, emekneka e rwunu-rwenn oleka wa. Dum A'na de dudallu wo'itu me matni mana wo'itu. Matni mandiditu re nnia'eratni de Uplerlawna Nhiw Lululli maka ha rweta la nhiw mandiditu, maka Dum A'na Nhopan pa Nla' nohkerna uhunu-ewatni. 7 La' noma riy mak kamtatan la liwangen tiutul die, Nala puk maka pniopan de, mak Enantorreria la limni walli malganan della' Dum A'na de. 8 La'pa Dum A'na de Nreinian puk de, dewade hamormiori re wogata me o'ta-mata terampworu wehrani wogata re honona rwaltiora-rwaltieman la gaini ralamni. Ir honona rewre'wa pa rtorreria hadom emeka gitara me lari miaha mak kpenpuen lia ayalli maka rtutnia. Ayalli de, nnia'eratni de Uplerlawna mutnu-rahanu re sniumbaini. 9 Honona re rwahniara nhiar warwuaru ida de riwra: ”O' nanpena ed mak ka'ala puk de me O' wal pia ed maka khar dioinia hiwliai miaka ha ra rkulit targa puka pniopan de. Yoma la' O wnienanmu me rarmu mak kaktiowur doin la pa rimormioria nohkerna mak kwatiawua hairi-hairi nor wutga noh pa'etu-rai piatatra nor wut nieka leta-leta ror wutga wniareini-wniahaurnu re, Muweli momuog olek ir pa Muala la Uplerlawna-Mempulwatnu. 10 O' ed mak kwalir nian oleka ir pa rler la hair ida maka Mtiutmuata-mkiewra'a pa rhi'a o'ta-mata (imam) mak khima-kre'a it Uplerlawanni, me Mual walia ir pa rodi plolli la nohkeran di wawannu.” 11 Nhor nioma A'umkek owa'an, de utlin reria Uplerlawna hopopanni rhar lirni de riwnu-halli rmariohmu. Honona rpepan reria yaliwangen tiutul die nor wutga hamormiori re wogata me o'ta-mata re honona. 12 Ne rarur mieman la wniahniara riwra: ”Dum A'na mak ha rwen olek de nampena ed maka ha tsu'ru-tselma, me ta'uli-tawedia la'a tutullu-lolo'oni, la'a re'eni-tniarnu, rurni-laini, kirkirni-ralma-riorni!” 13 Noma a'utlin walia mak kmormior lia Ilyamou-Watyatoha, mak kden nohkerna, ne mak kden la noha wikni-ray gerni. Rrekan neka la hya' mak kdella lyanti nayanni, rwahniar momuou pa riwra: ”Mak kamtatan la liwangen tiutul die nor wut walia Dum A'na de, hare nanpena er maka ha ra'uli-rawedi, ha rhu'ru-rhelma pa nodi liarni me er maka kmeh'a wal pia kodi plolli la haneka-harahu wuawannu pa nodi liarni!” 14 Noma hamormiori re wogata rwahla riwra: ”Amin (Plola).” Ne o'ta-mat no' hande honona re rru'u-rtowar tar momuou.
Puk maka ha rkulit taru hiwliai
1 Nhorwua noma a'umkek nana Dum A'na de Nreye'era hiwliai mak kakniulti ida la kniulit taru re wo'itu. Noma a'utlina hamormiori id la hamormior wogata re nhar lirni, niwra: ”Mmuai!” Lirni prahkani emekneka kukru-gauru. 2 Noma a'umkek la de kuda wawahra ida! Ne mak kha' kud de, ntoran reria ra'pa, ne ral walia wutu-lai maha id la e'a. Ne nler pa nmai die emolmolla mak ka'unut la wunu-ara. Nmai nioka nla'awa la nohkerna wawannu totpa narehi la wunu-ara owa'ana. 3 Nhor nioma Dum A'na de Nreye'er hiwliai mak kakniulti wornu. Noma a'utlin de hamormiori wornu de niwra: ”Mmuai!” 4 Noma kuda id owa'an pa nlergota. Kud de inonni mermer mutmutni. Ne mak kha' kuda rala pa nodi plolli pa e' ed maka ktiwrie'era nohkeran di kalwiedni-paitiotni, totpena rimormiori idma nwunu-nwen ida. Pede rala pa ntoran reria wehla ya'ara inpon lawna ida. 5 Noma Dum A'na de Nreye'era owa'ana hiwliai maka kniulti wotellu. Ne a'utlin de hamormiori la'pa wotellu niwra: ”Mmuai!” Noma a'umkek nana kud memetma ida, de riy ida e nha'a nana. Mak kha' de e nodia tatiaili ida totpena nawerta-nataili ya'ana-yemnu, yoma ya'ana-yemun de hota edon ntu'tu. 6 Ne a'utlina hadom emeka rimormiori lirni nwatiawua hamormiori wogata re letgarni. Lir de niwra: ”Metma mak samomuou, de welli werat rehia, de weratni tatia'u ralamni, de welli emekwalia kai la lera ida, ne metma mak kyata welli werat wali, yoma tatia'u re'eni wotelu de welli emekwalia kai la lera ida. Mere yanpa mpieyata-mpianiaga saitun re rora anggur wo'a (lokrahi) la'a nhyi' ralma. La' saitun de rlernana wu'ru me la' anggur wo'a de anggur turnu.” 7 Noma Dum A'na de Nreye'era hiwliai mak kakniulti la puk de wogatni. Ne a'utlin de hamormiori mak wogatni de nhar lirni pa niwra: ”Mmuai!” 8 Noma a'umkek nana kuda ida de nmota-nma'ara. Riy mak kha' nan de nwawa Maka'ala Riy Aranni (Matmiati). La' to'orni de Noha Mati-Rai Miolu e nlernohor reria. Rimormiori miakden la nohkeran di de rtaw dioinia id ralamni la'a nhiakra ralamni re'eni wogat la (seperempat), pa rala la Maka'ala Riy Aranni (Matmiati) me Noha Mati-Rai Miolu die totpena rala rwenna rimormiori re la ar ralma, la rehka-lara, la nnieni-nhiena, me la' walia la'pa oha-ahu rlihir motmota-rhaw riarara. 9 Nhorwua noma Dum A'na de Nreye'era hiwliai mak kakniulit la puk de wolimni. Noma umkek de rimormiori do'oni-hmuakarnu erawioyoin la wat katri'ana nayanni. Rimormiori re er mak kler la wniunu-wnienna onnila rdenrer lia yakotnohorni la Uplerlawna lirni-tunnu. 10 Rpolu-rhaun pa riwra: ”E! Matromlawnu ne! Orgahi-Orha'a O'a. Mak kmou-kwitna, kaploi-kaple'era id O'a, Makodi plolli la haneknek wawannu. Mmuormior lia lyanit lawna. Mupriri-mukded la genmu-tienmu pa Mlin reri-muat reri ami. Me yan Muolin limmu-mpue'er rormu onde Mpuer matmu la mai ami. Ne hota hya' lera-hya' wolan nanpena Mhudi-mpuara rimormiori nohkerna wawannu makwunu-makwen ami rina de?” 11 Noma Uplerlawna Nala rain plalahwa wawahra pa rima-rima rnairia gahani. Ne Nhopan pa honona re rahe'he'elia hande pa rwewiei niohora mutwualli korni mak khima-kre'a Uplerlawna lirni-tunnu, mak hota riy yatyata re rwunu-rwenna pa emekwalia rwunu-rwenna olek ir wa. Yoma Uplerlawna Nror targa (Nakot targa) oleka de ha meni mak khima-kre'a E'a de mak hota riy yatyata re rwunu-rwenna. 12 Noma a'umkek walia Dum A'na de Nreye'era owa'ana hiwliai maka kakniulit la puka wonemni. Dewade noha nruru-rai nwo'la, tah'i nwo'la-yo'ora napeha. Lera mana yamkekni nmati. Me wolla mana nmermera laliairia pa emeka rara. 13 Wtiona pala tuinia la noha wawannu de emekneka kar wo' mak edonna kgawar ma'ta ha riurga yoma anin lawna nodia me'etni. 14 Lyanti yamkekni emekneka kartasa pniopna pa nmol tietema ne wo'ora tutulu re ror wut nieka noha-noha re rmol lia genni-tienni. 15 La' dewade mak khi' ray lia nohkeran di wawannu, riy mak orgengeni, mak kodia ahu namni la ar ralma, makre'a-maktaru, mak o'ta-mata lola etnu liolli, ne mak kla' hya'a-hya' to'owa, mak kla' ata-wa'ara, me marna-wuhura mana ema rkor niana pa rade'a-ramoinia la hu'ula-ka'ara pa emekneka hunu-hliai makden la leri-watu rletni. 16 Rpolpuolu-rhawaunia la wo'ora-kawru me watu lawna pa riwra: ”Wo'ora-kawru, watu liawnu nee! Mutlin mai ami, Mtiuin nan am lia handi pa mude' am lia Hade mak kamtatan la liwangen tutul die, me la' walia Dum A'na mak kahe' yawenan de. 17 Ler matmiat liawna inhatti wa! Dodo'ondi de Hare er mak ktowrernia yawenanni pa riy id mana edonna ntahan nan pa ntutrier la gaini ralamni.”
Uplerlawna mutnu riy riwnu rahu ida terampwogata wehrani wogata
1 Nhorwua noma a'umkek nana Uplerlawna hopopanni re wogata rhapet reria nohkeran di uhunu re wogata, ne rtorn apitga anni re matni wogata, totpena yana anni rten liola lora me ra'a (keranni) pa yana ora-au rwo'la-rwaini. 2 Dewade a'umkek nana Uplerlawna hopopanni id owa'ana nmai die nwatiawu tipru, nmai die nodia Uplerlawna mak kden pa nodi liarni, hiwliaini (kniau) maka rtapla la reranni-kiorni. Uplerlawna hopopanni de nhaun wah'a noha pa nakot la hopopan mandadata re mak kodi plolli pa rweyata-rwaniaga la lora me ra'a. 3 Hopopan de niwra: ”Yana mpieyata plein la lora me ra'a (keranni) nor wutga ora-au re honona. Mpiei piena amtapla kniau la mak ktulla-kar lia Uplerlawna tulanni-kniarni re reranni-kiorni totpena yana rler wutga la wnieyata-wnianiawu!” 4 Noma a'utlin nan lirni niwra: ”Hota maka rtapla la reran kiorni, de riy riwnu rahu ida terampwogata wehrani wogata. La' hare honona re, de ra' nan harella la Israel (Yakopa) duratni-waitni riy termida wehrani woru re. 5 La durti-waiti ida, de e ra' nana riy riwnu termida wehrani woru, hota la'a Yehuda, Ruben, Gad, 6 Asyera, Naftali, Manasye, 7 Simeona, Lewi, Isakar, 8 Sebulon, Yusup, me Benyamina.”
Rimormiori emekneka eni-tani
9 La hadewa de a'umkek nan owa'ana rimormiori emekneka en liu'wu-tan miakmu, la'pa riy id mana edon nat niohora riy wo'ira rimormiori mutlialawna re. Hare e rwatiawua nohkeran di hairni-hairni honona, la'pa noh pa'etu-rai piatatra nora leta-leta ror wut nieka wniareini-wniahaurnu. Rimormiori re honona de ema rnanin nana la naniairi raini plalahwa wawahra. Ne honona re rtorreria koram tawi pa rtutrier lia liwangen tiutulu nor wutga Dum A'na de gaini ralamni pa rapal wiutu. 10 Rhaun wah'a noha pa riwra: ”It mormiori-lewlewanni di, ha nwatiawua Uplerlawna-Mempulwatnu it Orgahi-Orha'ani mak kamtatan la liwangen tiutul die hananni me la' walia Dum A'na de.” 11 Uplerlawna hopopanni-lili'irnu honona rtutrier wutwut pua rpepan reria liwangen tiutul die ne o'ta-mata me hamormiori re wogata wali. Noma hare honona e rwaltiora-rwaltieman la liwangen tiutul die gaini pa ra'uli-rawedia Uplerlawna. 12 Honona re riwra: ”Amin (Plola)! Uplerlawna-Mempulwatnu mak ama'uli-mawedi mhu'ru-mhelma muh' idma-mrama lia'ara, Omdien la liwangenmu-mtatangenmu, Mutulu-mupetna Mupriri-mukded la'a genmu-tienmu. O' nanpena plollolli me kirkirmu-ralma-riormu ed mak ama'uli-mawedi la'a genmu-tienmu makden la tutullu-lolo'oni. O' ed mak ktorna plolli-mneheni pa nodi liarni. O' ed mak ama'uli-mawedi mhu'ru-mhelma pa nodi liarni. Amin.” 13 La'a o'ta-mata re honona, de ida nmai pia natian a'u niwra: ”Riy mak knairia naniairia plalahwa wawahra ri ir he'a, me ha rwatiawu hanmeni?” 14 Noma awuahla la lirni: ”A'uplinga tuna. Tuna nmeh'a nanpena natga hare.” Noma nakot mai a'u niwra: ”Hari er mak kler la kropna-krieutu matmiat liawan de. Ral oleka Dum A'na rarni pa ra rpah'ia hare naniayarni pa nwal lia wowo'a-wawahrani. 15 La' hade pede Irtutrier lia Uplerlawna liwangen tiutul die gaini. Ne rhima-rre'a me rkola tieru-rawur nehla la E'a la' lelera-melmela la Uplerlawna romni nayanni. Ne ed Mak kamtatan la liwangen tiutul die, hota Nden wut lia ira totpena Ntera-ndema. 16 Hota la' yaplara me tier kerna mana ir edonna ra'eram nana. Ler pahna lawna mana hota edonna nhit nana re. 17 Yoma Dum A'na makden la liwangen tiutul die onni, hota ed mak klernohor rer ira. Hota E' ed mak kodia ir la ger ormat mak kodia mormiori-laliahu. Ne Uplerlawna-Mempulwatnu ed mak knah dioinia lui-nuhru mak kden la ir matni.”
Hiwliai mak ha rtapal taru re wo'itnu
1 La'pa Dum A'na de Nreye'era hiwliai mak ha rkulti re wo'itnu, dewade Ilyamou-Watyatoha mana ema mtie'el plalahwa la'pa edon ghal de itrekan pa nla' nana riwnu ida rahu wo'awa (setengah jam). 2 Dewade a'umkek nana Uplerlawna hopopanni wo'itu mak kaprir lia Uplerlawna gaini. Noka rima-rima rlernana noknoka ida. 3 Hopopna id to' wal die nodia lari ida maka rwewal nana la maha pa nmai pia ntutrier lia katri'ana gaini. Lar die nhi'inde rnairia pa rtutnia ayalli. Noma rala ayalli (kemenyan) liawanni meman la e'a totpa nor wutga Uplerlawna mutnu sniumbaini re enhi'a la nhioi-tniani la Uplerlawna la' katri'ana maha makden la liwangeni tiutul die gaini. 4 Noma ayalli mak kdella lari miaha de ralamni maka hopopan de ntorreria, de rtutnia. Ne mokalli nor wut nieka sniumbaini re rha'at pa la ntut mueman la Uplerlawna gaini ralamni. 5 La' noma hopopan de na'ala lari die pa nala ai miakden la katri'ana de pa narialmua lar die. Noma nwa'ala la nohkerna wawannu. Dewade kukru-gauru hita-tlena mana pro'a-prahka. Ne layera mana nwadawra malwiru-malganna pa nwal lia upkarururu. Noma noha nawnieta-rai nadwiera.
Uplerlawna hopopanni ralira noknoka
6 Nhorwua dewade Uplerlawna hopopanni wo'itu mak ktorreria noknoka re, rwei tiarg olek pa riwra rega noknokni re wa. 7 Hopopan mak kala' ulu nega noknokni dewade otna anni tah'i muti (hujan es) nawah'a wut nieka ai nor wutga rara pa nwal lia ger otna pa ema rtowriernia nohkerna wawannu. Nohkerna nhiakra ralamni la re'eni wotel die (sepertiga), ai na'ana mutnia. Emkade wal lia wewan mota me ora-au mana nhiakra ralamni re'eni wotel die ai namutni-naki'ira. 8 Hopopna la' wornu nega noknokni dewade ha matmiat liawna ida, de yamkekni emekneka wo'or lali ida, maka rnakul targa la hletan lawna. Tah'i lawan nhiakra ralamni re'eni wotel die (sepertiga) nwal lia rar mermera. 9 Pede hletan lawna-yoir lawan de nhiakra ralamni la re'eni wotel die, hamormiori honona pala matia. Emkade wal lia loi-puou, motru-kapli. 10 Uplerlawna hopopanni wotellu, nega noknokni dewade wtion lawna ida, de emekneka wtiona watliairi pa ema rwaliernia la nohkerna, de ntuin tar lia ger ormata me gerlawna re la'a nhiakra ralamni re'eni wotelu (sepertiga). 11 Wtion de nanni Absintus (Ha mermueru). Pede nhiakra id la wotel ralamni la ger maka wtion de ha ntuin nana, de woliamanni emekneka ha mermueru. La' pede rimormiori liawanni pala matia, yoma remun gera ha'er die. 12 Nhor nioma Uplerlawna hopopanni wogatni de nega noknokni dewade emeka hadom ntaiya nhiakra id la wotellu ralamni la'a lera, wolla, me wtiona pede nhiakra id la re'eni wotellu (sepertiga) de nmati. La' nhiakra id la re'eni wotelu (sepertiga) la ler lawan de, de la' ler ho'ke'eni la' lera nenenna edonna lelera, emkade wal lia' melmel gahani. 13 Noma a'umkek nana me a'utlin de ih lawna ida nnem tutul lia heyanna pa nhar lirni pa nhaunu niwra: ”Mmiati, mmiati. La'pa Uplerlawna hopopanni re wotelu dom to' wal pia hota rega noknokni, de rimormiori makden la nohkerna wawannu rler la lui-nuhru, polpuol ina-wakwak ama.”
1 Noma Uplerlawna hopopanni maka wolimni nega noknokni ne a'umkek de wtiona ida maka ema rwalliernia la lyanti pa ntuin olek la noha wawannu. Noma ir rala konsi-ripu la wtion de, la'a hu'ul matmiat liawna ida mak edon tamkek wikni me it edon tla' nan ralamni. 2 Noma wtion de ed maka kharia hu'ul matmiat die, dewade mokla-mahu nlergot la ralamni, de emolmolla li'ina lawna id mokalli mak kopli-kha'a. Lera matni me darat lawna mana ai miokla mak kwatiawua hu'ul lawan de npupniahala pede melmela-kalkalma la nohkerna wawannu. 3 Noma la' mokla-mahu ralamni de kongoha-kongoha rtaiyerun la noha wawannu. Kongoha re de Uplerlawna Nala pa rodi plolli, pa emekwalima hodai. 4 Nlarna rpa yana rweyata-rwaniawua wewna onde ora-au, onde yawuli-yatniamni re korni. Rlarna pa enekneka rtai tiemna riy maka Uplerlawna hiwliaini edon natniapal ma'ta la reranni-kiorni. 5 Kongoha re edonna rodi plolli pa rwunu-rwenna rimormiori re, mere eneknek to'amde ramuki-rama'al hare, nla' nana wolla wolima. Kongoha re nhienni la hare, de emeknekama hodai nhienni wal lia hare. 6 La'a wolan tetema wolima, de rimormiori re rahak talan pa rmati, yoma rwarora de samomuounu de ir mat niek wa mere taken niana yoma mak klehu rimormiori aranni edon nwakriania re. 7 Kongoha re yamkekni de rtot nohora kud mak kiwa knehelia ar ralma. La o'tani re de emolmolla wutu-lai miaha e natniapal la. Herni-gaini rtot nohora rimormiori. 8 Moratnu raplalahwa pa emekneka patke'a moratnu. Ne nihini re emekwalima ohdawra nihini. 9 Ne la' ihranu re de, emeknekama enala hadom la ra rwowa, de nhoi niohora rain mnotna. Ne liwarni de yetanni emolmolla kreta kuda riwnu-halli mak kler la ar ralma. 10 Ne li'irnu re de naruri-nalai miemna, onnila li'irnu re rodia nhienni pa emekwalima hodai. Pede rnairia li'irnu pa rnahora-rnala'a rimormiori la wolla wolima. 11 Ira ray wamueheni ed mak kodi plolli la ira. Ne ray die ed mak kodi plolli la hu'ula matmiat liawan de. Ir rayni nan yawetni la'a makden Ibrani de riwra: Abadon (nnia'eratni de wnieyata-wnianiawu) ne la'a yawala Yunani de riwra Apolion (nnia'eratni de mak kweyata-kwaniawu). 12 Matmiati liawna idni nlardoin wa. La'pa nhorwua dewade matmiat liawna wornu la'pa wotellu hota rmai wiali. 13 Nhorwua noma Uplerlawna hopopanni la' wonemni nega noknokni dewade utlin de lira nwatiawua katri'ana maha makden la Uplerlawna gaini de, uhunu wogata. 14 Lir de nakot la hopopna wonemni de niwra: ”Muewar doinia hopopna wogata re mak kawniut lia gerlawna Efrat de!” 15 Dewade rewar doinia hopopna re wogata. Hare er mak ha wniahi'a-wniayod tiarga pa rawuwu-raweiya lera, wolla, wenu, anni maka Uplerlawna Nakottarg oleka wa, totpena rwunu-rwenna rimormioria nohkeran di wawannu la' noha-rai honona, maka rhakra la ralamni re'eni wotelu. 16 Noma a'utlin nan lira ida niwra: ”E rawok nana mak kodia kuda ya'ara mutnu, de liawanni yuta rahu woru.” 17 Noma a'umkek memna mak kha'a re rnair momuoga rain mnotna maka rala ra rwowa ihranu re, pede yamkekni mermera laliairia, ponpona me marmara pa emeknekamde lali. Kuda-kuda re o'tani emekneka singa o'tani. Ne ai mormiori nor mokla-mahu, me lali rlergot lola wawni ralamni. 18 Ai mormiori nor mokalli, me lali mak klergot la kuda re wawni ralamni narieiniande rimormiori makden la nohkerna nhiakra id la wotel ralamni (sepertiga) pala matia. 19 Kuda re rurni-laini rwatiawua nurnu me la' walia li'irnu. Li'irnu re emekneka niy o'tani yoma kuda re rnairia li'iru pa ra rnahora-rnala' rimormiori. 20 Mere la'pa rimormiori re korni-tre'eni mak edon kler la matmiati mana, hota edonan wal pia rolli nhiolli-lietni. Ir edonna rollia hegana-kawnu me uplerni-upmatni re nhioini-tnianni la' limni enni la maha, maha wawahra, pi'ra-watu, au, de uplera-upmati mak edonna kwo'la-klekru. 21 Ir wal pia edonna rhopliala hihi'ini-yapyapni mak kpa'eini-kpahala emekneka wniunu-wnienna, lira-yatu nohkerna, yalira-yaliai me kamnelu-kamna'a.
Uplerlawna hopopanni mak ktorreria puk ke' mak kapniopna
1 Noma a'umkek nana hopopna mak karuri-kalai id to'a nwatiawu Ilyamou-Watyatoha pa nernu, de wowta-kakma npupun nana pa emek naniayarni, ne ohni ida, nle'lu nan o'tani. La' gaini mana emeka lera layarni ne lakni emekneka ai lomarni. 2 La limni de e ntorreria puk ke'a pniopna ida mere nahniari. Lakni walli malganan de natnikil la tah'i lawna, ne lakni walli malwiru de natnikil la nohkerna. 3 Ne nhaun de emolmolla ohpora-ohdiawra rapolu. La'pa nhaun pa nhorwua dewade kukur lawna nwahla nhiaunnu pa re'eni wo'itu. 4 La'pa kukru de nhaur re'eni wo'itu, dewade agiwa ghorta lira re, mere a'utlin de lira ida nwatiaga Ilyamou-Watyatoha pa niwra: ”Muwunmua hya' maka kukru wo'itu re rakotkota ne yana mhuorta re.” 5 Ne hopopan mak khapet tiarga lora me ra' de nran limni walli malganan la lyanti marna 6 pa nwet la Uplerlawna-Mempulwatnu nanni, totpa naplol nohora hopopan de lirni. Yoma Uplerlawna-Mempulwatnu ed mak kden la Ilwo'itu-Darwionema (Sorga), Makohi-maka'ara, kawilla-kayomtia noheri-woru lyanti nayanni, ne E' ed mak kodi plolli pa nodi liarni. Hopopan de niwra: ”Ee, ler maka rawuwu-rawei ntutu-nte' olek di. Pede dodo'ondi de Uplerlawna-Mempulwatnu hota Nhi' nana-nyap niana hya' maka Net tiarg oleka wa. 7 Yoma la'pa ratlin nana hopopna wo'itnu de nega noknokni, de hota Uplerlawna Nhi' nana-nyap niana hya' maka Nano'targ oleka wa mere ululu rimormiori raplin mua'ta, de Nlernohora hya' mak Enakot nohora oleka la makwohorulu-ktatrulu mak khima-kre' E kniarni.” 8 Nhor nioma lira mak kwatiaga Ilyamou-Watyatoha mak a'utlin olek de, nakot owa'an mai a'u niwra: ”Mlia' pa mua'ala puka pniopna mak kawnieran de la'a hopopan mak khapet tiarga lora-ra' de limni ralamni.” 9 Pede alia wuaka puka pniopna ku' della hopopan de. Noma nakot mai a'u: ”Mu'ala hadi pa mu'una. Hota omu'una de, nmer lia apanmu, mere hota la' o nurmu de minmi'na emeka gan tiuru.” 10 Dewade aga'ala puka pniopna ku' della limni ralamni pa a'una. La a nu'ru de nwoliamnia gani turnu. Mere atiella de a apnu ndorni-ndehen nohor mernu. 11 Nhorwua noma nhopan pa alia ukot nohor owa'an la'a hya' maka Uplerlawna Nror targa (Nakot targa) oleka pa hota hairi-hairi, me la'a noh pa'etu-rai piatatra nora leta-leta ror wut nieka wniareini-wniahaurnu honona hota ha rlernana.
Riy woru makodi Uplerlawna lirni-tunnu
1 La'pa nhorwua noma rala ai dieulu id mai a'u de emeka ntot nohora lie'ena nhio'ota, ne rakot mai a'u riwra: ”Mlia' pa mliewta (mhuo'ota) Uplerlawna roma kreini la Yerusalem me katri'ana (mesbah) mak kden hande. Ne mhuora (mriekna) riy wo'ira er maka rkola tieru-rawur nehla la' hande wali. 2 Mere yan memmemna mhuora-mliewta la Uplerlawna roma kreini gaini to'orni. Yoma la' gaini to'orni de, ral hade la'a riy mak edonna katga Orgahi-Orha'a. Hota hare er mak kwatei-kwahapra leta Yerusalem maka Uplerlawna gahani, la wolla terampwogata wehrani woru. 3 Ne hota Aghopan doini A tniornu (saksi) riy woru mak kakot nohora A li'ru-tu'nu. Hota rnairia raini yaluli pa ra rtutga ralam mayo'oni me ralam mehrani onnila rimormiori do'oni-halli. Ne rla rakot nohora A li'ru-tu'nu la wolla terampwogata wehrani woru. 4 Riy maroro'a ri de, au Saitun maroro'a irhatta, ne wa'du wniatatgenni rora makden la Orgahi-Orha'a Uplerlawna-Mempulwatnu gaini ralamni. Uplerlawna mak ktorna nohkerna tirni me, krautia lyanit marna ga'arni. 5 La'pa hameni niwra ntutga yatyatni la mak kakot nohora A li'ru re, hota ha rage'a ai pa ra rkuhi-rho'ora arwalli re. La emkade pede he'-he' maka khi' yatyat la ira, de hota pala matia. 6 Ir er mak kodi plolli pa ktutuw lyanti pa otna yana nturu, la' ler maka ir rhaun pa rakot nohor ma'ta lira mak kwatiaga Uplerlawna. Ir er makodi plolli wal pia ger ormata re honona rwal lia rara. Ne rodi plolli wal pia rhi'a mehra-mau, lui-nuhru nor wutga hya'-hya' to' pa ra rliwar nohkerna la ir ralma-rior wamueheni. 7 La'pa irakot nohora A li'ru-tu'nu pa nhorwua dewade hamormiori ida mak klergot la hu'ul matmiat liawan de, nora ir pa rwadorni-rwadehena la'pa hamormior die nwenna ira. 8 Ne rmat pia inonni re klololi-klalalia la loi liawna-talan lawna la'a letlawan maka rla rwair targa ir Matromni la auwlakar hananni. Let de nana tniotnohorni (kiasan) de de Sodom nora Mesir yoma riy mak kdella let de, do'oni-halli werat rehia. 9 Rimormiori mak kwatiawua hairi-hairi, noh pa'etu-rai piatatra nor wutga leta-leta ror wut nieka wniareini-wniahaurnu hota rpoi-rkeka mak kodia A li'ru-tu'nu re inonni mak kuli-kewta la' lera wotel riehennu. Ne hota riy rahmena rhuwria mati-molu re inonni. 10 Riy mak edon kpesiay Uplerlawna makden la nohkeran di wawannu hota rahepur meman la ha rora matmiatni-molmuollu. Hota ri'a re ramuki-rahepur nohora ha rora matmiatni pede rahe'i-rahepru ra'ana-remnu me idma nala limtutnu la ida. Rahepuepur reri yoma makodia A li'ru-tu'nu re rora, ta'en niana rodi owa'an ir la nniahora-nniala'a yoma rmati olekwa. 11 La'pa lera wotel rehenu dewade Uplerlawna Nala aran mormiori pa nla owa'ana ha rora inonni noma rrora ramat pa rtutrieri. Dewade riy honona mak kamkek nana de ramta'at wenna. 12 Irrora ratlin de lira polpuolu ida nwatiawua Ilyamou-Watyatoha pa niwra: ”Ee! Mmiai lia heyanan di.” Ne mak edon kpesiay Uplerlawna re ramkek nana irrora re rha'at la Ilyamou-Watyatoha, de wowta-kakma npupun nana re. 13 La' ler de meman pa noha nruru-rai nwo'la. La nhiakra id la termid ralamni (sepersepuluh) la let de, de namkoha-namnanna. Ne riy riwnu wo'itu rler la matmiati yoma la' noha nruru-rai nwo'la de. Riy korni ramta'at momuou pa riwa: ”Ine! Orgahi-Orha'a O'a, Uplerlawna-Mempulwatnu mak kdella Ilwo'itu-Darwionema O'a. O' ed maka ha ra'uli-rawedi rhu'ru-rhelma pa nodi liarni.” 14 Matmiat liawna wornu to'or olek la wa. Mere mkillia, matmiat liawna wotellu de kekeneka nhari owa'ana.
Noknoka re'eni wo'itnu
15 Dewade Uplerlawna hopopanni mak kmai lia wo'itnu nega noknokni. Pa tatlin de Uplerlawna hopopanni-lili'irnu la Ilyamou-Watyatoha rhaunu-rhaun pa riwra: ”Plola-mneha la nohkerna wawannu dodo'ondi de ed olek la it Orgahi-Orha'ani limni ralamni, me la' walia mak E Ntutmuata-nkewra'a pa Namori-nalewna rimormiori. Hota E' ed mak kodi plolli pa nodia liarni.” 16 Dewade riy terampworu wehrani wogata mak khi' o'ta-mata mak kamtatan la liwangen tiutulu mak kden la Uplerlawna gaini ralamni de, honona rwaltiora-rwaltieman la Uplerlawna lakni nayanni. 17 Rhar lirni pa riwra: ”Orgahi-Orha'a Uplerlawna Makodi plolli, mak kdena ne mak kden olek la. Ama'uli-mawedi O'a yoma Omniairi oleka O plolmu pa ma Mpuarehi-mpuatali. Ne O hairmu nawnianin wa. 18 Rimormiori mak kahmena klernohora Orgahi-Orha'a de hururi-wowo'ora mere nte' olek la lerni pa Omulgota hankeranmu ne nte' olek wal lia lerni pa Omhudi-mpuara rimormiori mak kmati ri wa pa Omuala siewa-kai la mak khima-kre' O kniarmu, de makwohorulu-ktatrulu me la' walia O mutmu-rahamu honona mak ka'unni-kamta'ata, mak khu'ru-khelam tiy O'a kuku'uni-lalawanni. Dodo'ondi wa de nte'la lerni pa Mpueyata-mpuaniawua riy mak kweyata-kwaniawua ir rimormior wialli la nohkeran di wawannu.” 19 Ne hota Uplerlawna romni nayanni la Ilyamou-Watyatoha mana nhiarni naphyar wia ne tamkek nana luwuau-koplahu maka Uplerlawna riorni-liaini genni. Ne hita-tlena kukru-gauru idma nhaur nan ida me nohkerna nruru-rai miarna nwo'la lol etnu liolli. Ne otna tah'i muti mana ntur wuerwerta (hujan es).
Patke'a nora niy liawna
1 Noma plin-plinnianamde tamkek la lyanti de hadomdoma namehi-nayona. De patke' ida nhi'a lera la naniayarni pa nhapar rer lia wolla. La o'tani de nnairia wutu-lai maka rala wtiona termida wehrani wor pua ra ralipa-ralaiya. 2 Patke' de e na'apuapnu ne wolanni mana ntu'tu pa niwa nayor wia pa polpuolu-hawaunia la apun mehrani. 3 Me a'umkek wal lia lyanti de hadomdom etla de edonna tamkek targa. De niy liawna mermera ida, de o'tani wo'itu me dudallu termida. La o'tani nenenna, de rnair momuoga wutu-lai ida. 4 Nnairia li'irnu pa na nnunia wtiona no' lyanti re la' nhiakra wotelu ralamni (sepertiga) pa nwalia la nohkerna wawannu. Nhor nioka niy liawan de ntutrier lia pat mak kiwa kmor die gaini totpena niwa nlumua a'nani. 5 Noma pat de nakrehen gota a'nani muanke'a ida mak hota nodi plolli la rimormiori nohkeran di, de nnairia lie'ena mnotna. Mere papay die, Uplerlawna hopopanni ida nwarui niana la inni riwni, pa nodia la Uplerlawna la liwangen tiutulu die. 6 Dewade pat de nawlar pia nokru wo'orletna-kawurloini, la'a gen miaka Uplerlawna Nwahi' targ oleka la e wa. La' gen die, de hota e rtera-rlahu nana lera riwnu ida rahu woru terampwonema. 7 Dewade ar lawna la Ilyamou-Watyatoha. Uplerlawna hopopanni o'ta-mata ida mak kwawa Mikhail, nora hopopanni re, rtutria niy liawan de. Ne niy liawan de hopopanni mana rre' teman la niy liawan de pa rrora Mikhail ra'ara. 8 Mere Mikhail nala niy liawan della yawa. Noma niy liawan de nor wut nieka hopopanni re, Uplerlawna edon Nwayow nohora pa rden la Ilyamou-Watyatoha. 9 Mere enor wutga hopopanni re, de rnaklia la pliorni pa rerun la nohkerna wawannu. Hadi de niy kolkuolu inhatta mak kwawa Hegana amlawanni onde Setan inhatta maka kodia pudi-akla la rimormiori nohkeran di. 10 Rnaklia la pliorni dewade utlin de lira prakrahka ida nwatiawua Ilyamou-Watyatoha pa niwra: ”Lera inhatti pa Uplerlawna Nalewna rimormiorni. Dodo'ondi Uplerlawna Ntutga lodanni-hairni. La'pa dodo'ondi de Ray maka Uplerlawna Nano'targa pa Namori-nalewna rimormiori de Ntutga plolli-mneheni. Yoma hegana amlawanni mak kwaghala riy makpesiay la Uplerlawna gaini ralamni la' lelera-melmela re, ema rho'or dodioini oleka la Ilyamou-Watyatoha. 11 It mutwualli makpesiay re, rrehi-rtarg olek hegana amlawanni onnila Dum A'na matmiatni me rarni mak kaktiowur doin la la it do'oni-halli wawannu, me onnila edon rawlar lia matmiati mere yeher nek pa rla rakot nohora Uplerlawna lirni-tunnu la'a Yesus. 12 Hade pede Ilyamou-Watyatoha nor wutga mniotni honona rpa rahe'i-rahepru! Mere nohkerna wawannu nor wutga lora-wo'ora rler la matmiat liawna yoma hegana amlawanni nerun pa ntutg oleka hankeranni-ralmha'arni, yoma enatga de hota edon nalo'on wali ne lerni pa nhi' yatyatni nhor olekwa.” 13 La'pa niy liawan de natga de rhopli oleka la noha wawannu, pede nhapartikil targho'a pat maka kayoria a'na muanke' de. 14 Mere ral oleka ih lawna liwarni wor lia' pat de totpena nnem pa nla' geni id la wo'orletna-kawurloini mak Uplerlawna Nwahi' targ oleka la e' wa, totpena nmormiori-nlewlewna, yoma hota ha rtera-rlahga la hande pa nla' nana anni wotelu rehenu totpa yana niy liawan de nka'ma nana. 15 Dewade niy de npira gera liawanni pa nawlar niohora pat de, totpena gera nwau dioinia la. 16 Mere nohkerna nhima-nre'a pat de, de nohkerna nwer wawni pa nlumu-ntella ger maka niy liawan de npir de. 17 Noka niy liawna nahankeran doin la' pat de, pa la nhokra-nlai tiargho'a patke' de a'nani korni, de la'a riy honona mak khu'ru-khelam la Uplerlawna lirni-tunnu, me mak kakot nohora Yesus. 18 La' pede niy liawan de nmeh'a natuttutrieria la enhu'ula-ga' laini.
Hamormiori kapliahan mera mak klergot la tah'i lawna ralamni
1 Noma a'umkek nan walia hamormiori ida nlergot la tah'i lawna ralamni. Hamormior die dudallu termida me o'tani wo'itu. La dudallu honona re, de rnairia wutu-lai nenenna. Me la' o'tani re de e rhorat targa nan yapolu-yaliella la Uplerlawna yoma niwra e' de Uplerlawna inhat e'a. 2 Hamormiori miaka a'umkek nan de, de emolmolan nekama oh dawar mak klol au hananni. Ne lakni emolmolla beruang, ne hgotni emekneka ohdawra mak klihir matmata-khaw riarara hgotni. Dewade niy liawan de nala rurni-laini me tullu-petan wamueheni la hamormiori die. 3 La'a o'tani id la hamormiori o'tani re wo'itu, de yamkekni emeknekama no' lawna enni maka rala wehla ra rwen oleka de mere matmiat tiehra. Mak kden la noha uhunu-ewatni-ewatni-lahwani, mak edon kpesiay Yesusa, er rlernohor reria hamormior die pa e rwer rer wiawni la hamormior die. 4 Ne honona re ra'uli niy liawan de yoma enal oleka plolli-mneheni la hamormiori die. Ne ir mana ra'uli wialia hamormiori die (yoma rwarora de Uplerlawna inhatta hade). Pede honona re riwra: ”Riy id mana edonna nareh niana hamormior di! Taken niana riy rora hadi ra'ara, yoma edon rpar nana.” 5 Uplerlawna Nhur niohora hamormior die pa nakot nohora tullu-petanni, me nalernu-naha'a Uplerlawna kotni-nanni. Uplerlawna Nhur niohor walia pa nodi plolli pa nla' nana wolla terampwogata wehrani woru. 6 Hade pede napolu-naliella Uplerlawna kotni-nanni. La' walia napolu-naliella Uplerlawna genni-tienni la Ilyamou-Watyatoha nor wutga riy makpesiay mak kden hande. 7 Uplerlawna Nhur niohor walia pa nora Uplerlawna mutnu-pepanni rahuri-rawo'ora, ne nala ir la yawa. Ne lodna-hairi, noh pa'etu-rai piatatra, leta-leta ror wut nieka wniareini-wniahaurnu, de honona mak kden la lyanti nayanni di, de e ed mak ktorna-krautia. 8 Hota hamormiori die ed maka rimormior mak kden noha wawannu rhu'ru-rhelma. Eneknek to'a riy maka nanni e rhorat targ oleka la puka maka rken tiarga rimormiori honona nanni mak hota kmormiori pia nodi liarni, de edonna rhu'ru-rhelam la hamormior die. Puk de, de Dum A'na maka rwenan de gahani, ne la' ler maka Uplerlawna edon Nohi-na'ar ma'ta nohkeran di, de e rhorat targ oleka la puka, de riy honona nanni mak hota kler la mormiori-dardiari. 9 La' hade pede la'pa mirur lia yatlina de mhiu'ula tlinmi-mpiera matmi la lir mak ha rakot mak emkadilla: 10 Uplerlawna Netli olek la pa rtorna makpesiay doma, ne makpesiay dom to' mana Eneti olek la pa rler la wniunu-wnienna. Pa hota plol toto' pa rler la roma nhio'la ralamni onde wniunu-wnienna. La' hade pede la'pa makpesiay mlier la hare, de mitatahan nek ralammi la kropna-krieutu ralamni me mdienrer lia pesiaymi.
Hamormiori mak klergot la noha ralamni
11 Noka a'umkek nan walia hamormiori id owa'ana nlergot la nohkeran di ralamni. Hamormior die dudallu woru de emolmolla dum a'na dudallu. Mere nhar lirni de emekneka niy liawna lirni. 12 Hamormiori di de nlernan plola-mneha la hamormior mak kala' ulu. Ne nala plola-mneh de, pa nodia hamormior mak kala' ulu die lirni me kniarni. La' nohkeran di wawannu honona de nterna pa rkola tieru-rawur nehla la hamormiori maka kala' ul die mak ululu nado'or nohor no' lawan mak dodo'ondi di nmog olek de. 13 Hamormior wornu de nhi'a hihi'a-yapyapi yawiru-yawewla mak kamehi-kayona mak ktutga e rurni-laini totpa rod riy lia klieratni. La riy rahu gaini ralamni de nhi'a ai pa nwatiawu mueman la lyanti pa nerun la noha wawannu. 14 Emkade pede Uplerlawna Nhur niohora hamormior wornu de nnairi rurni-laini pa nhi'a hihi'a-yapyapi yawiru-yawewla mak kamehi-kayona na nalahara riy honona mak kmormior lia noha wawannu re honona, la'a hamormior mak kala' ulu die rerieini. Me enhopan wali rira pa rariria atiehra ida totpena riy rhu'ru-rhelam e'a. Rariria atiehra de rtolliohora hamormior miak kala' ulu die, maka rala wehla ra rwen olek de, mere matmiat tiehra. 15 Uplerlawna Nhur niohora hamormior wornu de pa nala atiehra de aranni totpena naltieri, ne nhopan pa rwunu-rwenna riy honona mak edonna khu'ru-khelam la uplera-upmat die. 16 Rimormioria kuku'uni-lalawanni, makakleha-maktaru, ata onde marna, de hamormiori wornu de ntekal reria pa rhoiya limni malganna onde reranni pa rkenia kniaunu. 17 Hamormior wornu de edon nwayow pa riy ra'olu-rala'a hadomdoma, eneknek to'ama riy maka kniau de nden la limni onde reranni, yoma kniau de ed mak kodia aharia hamormiori mak kala' ulu die nanni onde wniarekanni la' nanni de. 18 Riy mak katu kwateti-kwaneha hota er maka rna'erit nan hadi. Riy meni mak katu de hota nwarekna hamormiori mak kala' ulu die kniaunu nnia'eratni. Yoma rhor nohor (rrekan nana) kniaunu de, de nla' nana rahu wonema terampwonema wehrani wonema. Wniarekan de, de nnia'eratni de rimormiori id e'a.
Dum A'na nor mutnu-rahanu
1 Nhorwua noma a'umkek owa'ana yamkeka ida. A'umkek de Dum A'na de Ntuttutrier lia wo'or Sion wawannu, Nor rewre'wa riy riwnu rahu ida terampwogata wehrani wogata maka rhorat targa Dum A'na de nanni la rima-rima reranni-kiorni me Dum A'na de amni nanni wali. 2 Ne a'utlin walia lira yetanni nwatiaga Ilyamou-Watyatoha de emekneka yo'or lawna ne, anin lawna mak kodia ihini-turnu pa kukur lawna ema rgorrernia. Lir de a'utlin de emolmolla tiwla-prai mak kwatiaga riy maka kahe'i-kahepru. 3 La'a liwangen tiutulu die gaini me hamormiori re wogata ror wutga o'ta-mata mak kpepan reria liwangen tiutulu die gaini, de riy riwnu rahu ida terampwogata wehrani wogata re, e rwahniarnar reria nhiar warwuaru ida. La'a nhiar de de, riy id mana ta'en niana rwahniara, enekneka riy riwnu rahu ida terampwogata wehrani wogata re, de riy mak kwatiawua nohkerna wawannu, maka Yesus rarni na Ntuwu-nhai nian oleka inhatta re. 4 Ir edon rheik nan ma'ta do'a-hala, emeka tuwari-laweru mak katiak reria totpena edon nora patke'a ralira-raliai. Ir er mak klernohor reria Dum A'na de lol meni-meni to'a. La'a rimormiori honona, de ir er maka Yesus Ntuwu-nhaiya totpena Nhi' ir pa emolmolan nekama liola (limtutnu) maka ral ulu la'a Uplerlawna nor Dum A'na. 5 Ir edonna rputra-rpalak taru me edonna rhi' taru do'a-hala kuku' eti.
Yamkeka la hopopna wotelu
6 Noma a'umkek nana hopopna id wali die nnem tutul lia lyanti pa nakot nohora Kot Kalwieda-Paitiota mak kodi unut la tuw di, me la'pa nodi liarni. Hopopan de e nnem la lyanti totpena nakot nohor la'a hairi-hairi me la'a noh pa'etu-rai piatatra nora leta-leta ror wut nieka wniareini-wniahaurnu, la'a riy honona la' nohkeran di wawannu. 7 Hopopan de nhaun pa niwra: ”Mhiu'ru-mhielma, mi'unni-mimta'ata Uplerlawna-Mempulwatnu, me mi'uli-miwedia la' gen tiutullu. Yoma nte' olek la mai lerni pa Uplerlawna Ntoran watghudi la rimormiori honona. Mtiuklia E'a. E' ed mak khi' nana lyanti, nohkerna, lora-wo'ora, me ger ormata re honona.” 8 Hopopna wornu, mak klernohora hopopna mak kala' ulu wal pia nhari lirni niwra: ”Babel de, de let matmiat liawan ida ntuini lie'enu-nlawra hgerni (rweyata-rwaniawua olekwa), yoma riy makden hande, de rtota hairi-hairi pa rhoitio'or doini-rtahnei dioini Uplerlawna, emolmolan nekama patke' yata ida nala arak mikmikri na nhuri ama'wua muanke'a pa na na'hira re.” 9 Noma hopopna mak wotellu nma nlernohora hopopna maroro'a mak kala' ulu re pa nhaunu niwra: ”Hameni ed mak kola tieru-kawur nehla la hamormior die nora uplera-upmatni, me maka rlernan nan walia kniaunu la reranni onde limni, 10 de riy de hota nemnia Uplerlawna lari hankeranni mak kodia E yawenan lawanni. Ne hota Uplerlawna hankeranni-ralmha'arni la ira edon nwadur nan oke'a. Pede riy mak khu'ru-khelam la hamormiori die nora atiehrani, de hota rnahora-rnala'a la ai kwiari liali la hopopna-hopopna mak kakleha do'a-hala (malaikat) gaini ralamni, me la' walia Dum A'na de gaini ralamni. 11 Lelera-melmela, de mak kola tieru-kawur nehla la hamormior die nor atiehrani, me riy honona mak knairia hamormior die nanni pa ra rtapla (rakniaga), de hoho'a-hayaya la ai mormiori ralamni edonna nakatetia. 12 Hota emkade pede ina-nara mak kla' Uplerlawna mutnu-rahanu, mak khu'ru-khelma Uplerlawna lirni-tunnu me mak kden rer lia pesiaymi la Yesus, mitetehra ralammi la' hya'-hya' to'owa. 13 Nhorwua dewade a'utlin nan walia lira ida nwatiawua Ilyamou-Watyatoha pa niwra: ”Mhuorta hadilla. La'pa nwaga (mulai) la dodo'ondi, de rimormiori miak kmat lia Orgahi-Orha'a nanni de mlier la unut lawna.” Uplerlawna Nhiw Lululli Niwra: ”Plola hota ir rrena la ir liwatnu-odawni. Yoma hota la' ira dnienrerni (setia) la' Uplerlawna de ed maka ir rlernan owa'ana nhierannu wniahlani.”
Rieiki-wnio'ora la nohkerna
14 Nhorwua noma a'umkek nana kakam wok wawahra ida. La'a kakam de wawannu, yamkekni emolmolla Rimormiori ida e Namtatna. La o'tani de e Nnairia wutu-lai miaha. Me e Ntorreria wehla plalahwa ploklokra sabit maka rnairia pa ra rorin la nhyi' ralma. 15 Nhor nioma hopopna id owa'an pa nlergot la Uplerlawna romni nayanni, nhaun pa nakot la Mak kamtatan la kakam de wawannu niwra: ”Mrian la wehlamu de pa ma Mpuahewar wa, yoma nte' olek la lerni pa noha nreiki wo'orni wa”. 16 Noma Mak kamtatan la kakma wawannu de Nala wehla plalahwa ploklokar (sabit) de na Nwahewra noha wawannu. 17 Noma a'umkek owa'an hopopna id to' wal pia nlergot la Uplerlawna romni nayanni mak kden la Ilyamou-Watyatoha. Ntorrer wialia ta'wa ploklokra ida. 18 Nhorwua noma hopopna id owa'ana mak kodi plolli la ai la'a katri'ana, nwatiawu katri'ana de pa nma nhaun pa nakot la hopopan mak ktorreria ta'wa mak kaploklokar de, niwra: ”Muala ta'wamu de pa ma mtietia la' anggur wo'oni makden la noha wawannu yoma wo'oni re rgawar wa!” 19 Pede hopopan de naloiyernia ta'wani la noha wawannu pa na nwatetia anggur re wo'oni. Nhoru nioma nhopliala gen miaka ra rahmia anggur turu die, maka nnia'eratni de Uplerlawna Nahankerna-ralmha'ara. 20 Anggur wo'a de rahmia hare turnu la'a leta to'orni. Ne nwatiaga gen miaka ra rahmia anggur turu re de rara nwawuau emolmolla ger wawuau olieta kilu rahu wotelu, me rara tullu re'a id rehenu.
Hopopna nora mehra-mau lawna wo'itu
1 Nhorwua noma a'umkek nan la Ilyamou-Watyatoha de hadoma mak kamehi-kayona me edon tamkek targa. A'umkek la de Uplerlawna hopopanni riy wo'itu mak kodi plolli la mehra-mau lawna la' hohoni wa. Eda di de la'awa hohoni la Uplerlawna Nhuri-nwalia hankeranni-ralmha'arni. 2 La' noma a'umkek walia hadomdom emeknekama hletan lawna mak kamememi, de nawniotra-nawniah'a nor ai. A'umkek walia riy mak ka'unut nan oleka yoma ir rahmena rhu'ru-rhelam la hamormiori me uplera-upmatni ne edonna rwayow pa hamormiori die nanni mak ha wniarekna de rahu wonema, terampwonema, wehrani wonema de ha rtapla la ir reranni-kiorni. Riy mak ka'untu re raprir lia hletna aratni pa ra rtorreria hadom emeka gitara (kecapi) mak Uplerlawna Nal nana la ira. 3 Honona re rwatunu-rwahniara Musa, Uplerlawna hopopan de, nhiarni me la' wali Dum A'na nhiarni mak emkadilla: ”Orgahi-Orha'a Uplerlawna mak kden la tutullu-lolo'oni! O inponmu de nahedu-nawairia ami, me O hihi'imu-yapyapmu takenia mparor nana. Mhi' oleka Ray lia rimormiori makden la hairi-hairi honona! Tnioranmu plolli-mneheni! O hihi'imu-yapyapmu ploloi-plele'era mai am lia nohkeran di wawannu. 4 Hota he' wal pia edonna namta'at O'a, Orgahi-Orha'u ne? Me hota he' wal pia edonna nakot nohora O tutulmu-lolo'omu Matromlawnu ne? Ntut tiar lia O muemeh'a nanpa Mmuou-mpitna. Rimormior nohkerna honona hota rma rkolla O lakmu, yoma iramkek nana hihi'imu-yapyapmu makden la plol wawannu.” 5 Nhor nioma a'umkek walia Uplerlawna roma kreini la Ilyamou-Watyatoha, de Uplerlawna romni (Kemah) me gen lululi maka rkenia Uplerlawna riora-liaini, deullu-tatarni la ralamni de nhiarni naphyariari. 6 Noma hopopna wo'itu mak kodi plolli la mehra-mau liawna re wo'itu mana, rlergot la Uplerlawna romni ralamni. Honona re naniayarni maka ratenin nana la ahwa mnurnuhru, de rmou-rwitna me liplipa-kamka'ma. Ne ihranu de ral maha ra rwowa. 7 La' noma hamormiori id la' hamormiori wogata, nala lari miaha la hopopna re wo'itu. Lari miaha re rpenpuen lia Uplerlawna mak kodi plolli pa nodi liarni de yawenan lawanni. 8 La Uplerlawna romni ralamni de ai miokla npupun nana. Ai miokal de nnia'eratni de Uplerlawna hititni-repreparni tutullu-lolo'oni plollolli-mneneheni. Ne la'pa mehra-mau liawna re wo'itu mak hopopna re wo'itu rodia re de edonna rtutu-rte' ma'ta, de riy id mana ta'en niana nhu'ru la Uplerlawna romni de ralamni.
Uplerlawna larni mak kodia yawenan lawanni
1 Noma a'utlin walia lir lawna ida nwatiawu Uplerlawna romni nayanni pa nakot la hopopna re wo'itu, niwra: ”Mlia' pa mtiowur doinia Uplerlawna larni hankeranni re wo'itu mak kodia Uplerlawna yawenan lawanni la'a nohkerna wawannu.” 2 Noma hopopna ida nala' ul pua ntowur doinia Uplerlawna yawenan lawanni mak kden la lar di la'a noha wawannu. Dewade rimormiori honona maka rala hamormiori yatyat de nanni wniarekanni ha ra rtapal nana re me rruru'u-rtowtowar la uplera-upmatni de, honona re rlernana wihila-wa'ala mak nananni nhona. 3 Nhorwua noma hopopna wornu nwalia lari mak kodi Uplerlawna yawenan lawanni la hletan lawna. Dewade hletan lawna de nwal lia rar mak kahuwu-kawoini emekwalima rimormiori maka rwenan nana rarni. Nreiniande hamormiori honona miak kdella lor gahani re pala matia. 4 Nhor nioma hopopna wotellu nwal dioinia larni mniotni la'a gerlawna re, me la' walia ger ormata re, dewade gera re honona rwal lia rara. 5 Noka a'utlin de hopopan mak kodi plolli la gera-tah'i nhar lirni pa niwra: ”Uplerlawnu ne, ami edonna mrehgor niana plolmu-mnehemu moumu-witanmu re! O' ed mak kden ulg olekwa me O' ed mak kdenreri. Niukum lawan mak Omulernu ri, de raplola! 6 Yoma hare er mak kwunu-kwen oleka Uplerlawna mutnu-rahanu, me ir er mak kwen oleka makwohorulu-ktatrulu. Pede dodo'ondi de O' ed mak kala rara pa ir remun la. Yoma plolli inhatta pa orgahi re rlernana nhiakarni de.” 7 Noma a'utlin de lira nwatiaga lutur katri'ana pa niwra: ”Orgahi-Orha'a Uplerlawna-Mempulwatnu, Makden la Ilwo'itu-Darwionema, Mak kodi plolli la haneknek wawannu. Plol toto'a de hya' maka Omua Mukmua rira de edonna npa'eini-npahala.” 8 Nhor nioma hopopna wogatni nhuria larni mniotni la' lera. Dewade lera nodi plolli pa nhit amutni-aki'ira rimormiori. 9 La'pa lera nhit amutni-aki'ir rimormiori re, noma rwohora-rtatra Uplerlawna kotni-nanni mak kodi plolli pa Nala niukum lawna rilla' rimormiori. La'pa emkade ho'mana riy id mana edonna nhoitio'or doini-ntahnei dioinia nhiolli-lietni, ne nahmena na'uli-nawedia Uplerlawna la gen tiutullu. 10 Nhor nioma hopopna wolimni nhuria larni mniotni la hamormiori yatyat de liwangen tiutullu. Dewade riy honona mak katlin la hamormiori die genni-tienni honona rewre'wa pa rler la mel'uta-malienni. Ne rimormiori ri honona rpolpuol inni-rwakwak amni onnila Uplerlawna larni mniotni mak irlernana. 11 Dewade honona re rlokra-rhautia Uplerlawna la Ilyamou-Watyatoha yoma la'a wihila-wa'ala re mehrani-maunu la' temni. La emkade ho'mana riy id mana edonna nhoitio'or doini-ntahnei dioinia hihi'ini-yapyapni. 12 Nhorwua noma hopopna wonemni nhuria larni mniotni la gerlawna Efrat de. Dewade gerlawna die mana nkerna-nhau, totpena Uplerlawna Nwahi' targa pa ray-ray mak kwatiaga tipru re honona rala' lol ralamni. 13 Noma a'umkek nan walia hegana wotelu, de yamkekni emekneka kakhar gera. Ida nlergot la niy liawan de wawni ralamni, id la hamormiori mak klergot olek la tah'i lawna de wawni, me id owa'an la hamormiori mak kalahar pa khi'a makwohorulu-ktatrulu, die wawni. 14 Hegana re rhi' la'a-mai nieka hihi'a-yapyapi mak kamehi-kayona mak ktutga ruri-lai totpena nawiru-nawewla rimormiori. Hegana re wotelu rla rtot nana ray-ray re la'a noheri woru, ne rawok pa rna'ohma yawunu-yawenna la' ler mak hota Uplerlawna-Mempulwatnu Nano'taru olek pa Nkuhi-nho'or doini arwalli re. Uplerlawna-Mempulwatnu de ed mak kodi plolli la hanek-harahu wuawannu. 15 ”Mitlina! Hota Amuai die emekneka mak kwuri-kgalmu. La' hade pede hota nhioratmi la' temmi me mitiak reria nhiolmi-lietmi ilu-wniehwami pa nkalwiedweda, totpena hota mlier la unut lawna. Mhi' inonmi emeknekama riy ida mak edon kanin matni mere natiak reria hyonni-hyanni de hota edonna nmola-nma'a la rira yamkekni, yoma edon natliawihi.” 16 Noma hegana re rawoka ray-raya re la'a gen miaka Ibrani ha rweta la Harmagedon. 17 Nhorwua noma hopopna wo'itnu ntow dioinia larni mniotni la darat letgara. Dewade lir lawna ida nwatiaga liwangen tutulu la' Uplerlawna romni nayanni pa niwra: ”Niukmu hohoni hadi!” 18 Dewade hita-tlena nkaili-nkaili me kukru-gauru mana yetanni idma ni'it nan ida la' walia noha nruru-rai nwo'la. La ululu meman la Orgahi-Orha'a Na'ohi-na'ara nohkeran di nora lyanti la'pa ntutu-nte'ela lera hohoni di, de edonna tamkek ma'ta noh nruru-rai nwo'la mak emkadi. 19 Letlalawan Babel de ema rlihir apieyera la nhiakra wotelu. Me la' walia leta-leta makden la noheri woru-lyanti nayanni re honona mana, ha rweyata-rwaniaga. Yoma Uplerlawna edon Nhoratdoinia letlalawna Babel pede Nala E lari hankeranni pa Nala la Babel nemnia. Lar die ed mak kodia Uplerlawna yawenan lawanni. 20 Noha-rai honona ratniepar wehlihi-radgaur wat muetma me wo'ora-kawur re honona mana emeka ha nhiera-nhiapua. 21 Otan tah'i muti nwal lia watu (hujan es) muaka weratni tatia'u terampwolima ntur pua nwatiawua lyanti pa ntuin la rira o'tani. Rimormiori pala wniohorni-tniatarni la Uplerlawna yoma la'a otna mak ktur pua kwal lia es matmiat liawan de.
Niukum lawna la'a letlawna Babel
1 Nhorwua noma la hopopna id la wo'itu mak ktorreria lari re wo'itu nmai pia nakot mai a'u niwra: ”Hyalia, mliernohora a' pua atiutga niukum matmiati la'a letlawan maka rken tiarga la gerlawna harahu re aratni. Letlalawan de, emolmolan nekama patke' ida mak khi'inde nalira-naliai liawna. 2 Ray-ray makden la nohkeran di wawannu honona de emolmolan neka rora patke' de ralira-raliai. Me mak khol lia noha wawannu mana honona re rma'wu, yoma ra'ana-remnia pat mak kalira-kaliai die tgo'oni-arakni.” 3 Noma Uplerlawna Nhiwni Nodi plolli mai a' pua hopopan de nod a lia wo'orletna-kawurloini. A'umkek de patke' yata ida nha' nana hamormiori id de wullu nmer mutmutni. Ne la inonni de e rhorat targa la'a-maiya wniohora-tniatra la'a Uplerlawna nanni. Hamormiori die o'tani wo'itu ne dudallu termida. 4 Patke' de nnairia ray rayanni ungu me rain mer mutmutni, me rala leli-maha me watu-watu welli werta (kulau) nor wutga dirma watnu (mutiara) ra ralipa-raka'ma nana. La' limni de e ntorreria lari maha ida de npenpuen lia kdeha-ktiahli maka e inonni welli, me nhioi-tniani uplera-upmati. 5 La' patke' de reranni de er rtapal targa nana ida mak kodi nnia'eratni mak kayade'a, de riwra:
Babel letlalawna inhatte
Mak kwatutu-kwaye'a riy la' meni-meni to' pa ralira-raliai, me kwatutu-kwaye'a riy la' meni-meni to' pa rhi'a hya'-hya' to'owa mak kakdeha-kaktiahli, ralira-raliai, rhoi-rtania uplera-upmati. 6 Noma a'umkek patke' yat de suksukni de nwunu-nwenan lawna Uplerlawna mutnu-rahanu mak kakleha do'a-hala mak kod niohor Yesus lirni-tunnu, pede emeknekama riy mak suksukni de totpa nemun lawna arka la'pa npehera-nma'wu. La'pa a'umkek nana de awuer rer wia'wu. 7 Noma hopopan de nakot mai a'u niwra: ”Hyalia, nihya'pa o' ema rtaplelleltaru emkadena?! Mai pia a'ukot nohora o la hya' mak kayade'ela patke' dena me mak kayade' wal lia' hamormiori maka ha nha' nan de. De hamormiori miaka o'tani wo'itu me dudallu termida. 8 Hamormiori die, hade nmormiori lia ululu, mere dodo'ondi de ha nmati olekwa. Hota kekwal die ha nlergot la hu'ul lawna matmiati-molmuolu ralamni. Rimormiori miak kden la noha wawannu, mere nanni edonna rhorat ma'ta la'a lerni Uplerlawna edonna Nhi' ma'ta nohkeran di, la puka riy mak kmormiori pia nodi liarni, de hota rheduma la hamormiori die yamkekni. Yoma hamormiori die ululu ed olek la. La' lera-mela ri de nmolg olekwa, mere hota nahniar owa'ana. Mere hamormior die ho'mana hota nlernana Uplerlawna niukamnu pa rrinnia la ai mormiori ralamni (binasa). 9 He' maka kwarora-kwalai samomuou, de hota nna'erit nana de. Yoma hota o'tani wo'itu re de nnia'eratni de wo'ora mandiditu, maka patke' de ha namtatan rer lia. 10 Ne o'tani re wo'itu de nnia'eratni de ray wo'itu. Hota wolim de rtuini olekwa, ne la id de enod mia'ta plolli. Ne id owa'an de edonna nmai mia'ta. Hota la'pa nmai die, Uplerlawna e Net tiarga oleka pa nodi plolli de edonna nalo'on wali. 11 Ne hamormiori miaka kden olek la noha wawannu nmol mueman la dodo'ondi. Hota e nhi' ray lia ray mak mandawawni re. Hamormior die ed mak khi' ray pia nodi plolli de nhiolli-lietni emekwalima ray mandiditu re. Hota ray die, nlernana Uplerlawna niukamnu pa rrinnia la ai mormiori ralamni. 12 Dudallu termida maka mumkeka re hota la'a ray termida mak edonna kte'la ma'ta la kniarni. Mere hota rala plola-mneha tniorna-riautu la ira pa rodi plolli emekwali hamormior die, pa ror rewre'wa hamormiori die rtorna-rrautu edon nalo'on wali. 13 Ray termida ri, honona rla' lir ida pa honona re rala ruri-lai me tniorna-riautu la hamormiori die. 14 Hota ir er maka kwatrom mdudud niana Dum A'na pa rawunu-ra'ara. Mere hota Dum A'na de Nala ir la yawa. Yoma Ray Maktorna-krautu la mak kodi plolli honona la nohkerna-rai miarna etnu-liolli, me Orgahi-Orha'a la noh marna nora lyanit marna. Ne mak kor rewre'wa E'a pa rmai, de rimormiori makdenrer (setia) lia pesiayni la E'a. Ir er maka Npolga, me ema rwalir nian oleka pa rhi'a E mutnu. 15 Ne gerlawna re maka rken tiarga letlawna Babel (maka rtot nohora-rpat nohora patke' yat de), de nnia'eratni de riy honona mak kwatiawua lodna-hairi, noh pa'etu-rai piatatra nora leta-leta ror wut nieka wniareini-wniahaurnu. 16 Dudallu termida maka mumkeka re, de ray-ray hare. Ne ror wutga hamormior die rewre'wa pa edon rtelan nana-raut nan owa'an patke' yatyat de. La' hade pede hota ir rler teman la patke' yat de pa reyahru hyonni-hyanni honona, me rhi' nana de natliawihi. Ne hota rtota inonni pa rlihir matmata-rhaw riarara patke' de ne rrinnia la ai mormiori ralamni. 17 Yoma Uplerlawna ed mak kal oleka kirkira-ralma-riora la ir wa pa rhi' emkade. Yoma Enala ralma-rior la ira pa rla' lira ida pa rotil targa plolli-mneheni tniorna-riautu la hamormior die, totpena enodi plolli. Ne la' talan emkade pede hya' maka Uplerlawna Nror targ oleka de hota ntutu-nte'ewa. 18 Patke' maka omumkek de, de hota letlawan mak kodi plolli olek la'a ray-ray miak kden la nohkerna wawannu inhatte.”
Babel wnieyatni-wnianiawnu
1 Nhorwua noma a'umkek de hopopna id to' wal die, nwatiawua Ilyamou-Watyatoha pa nernu. Nmai die nodi plolli-ntaryatnu ne hitni-reparni nhi' nana lodna-hairi la' noha wawannu leler momuoga. 2 Nhaun matmiati pa niwra: ”Babel, let matmiat liawan de, ntuini lie'enu-nlawra hgerni la hadi wa! Dodo'ondi de nwal lia hegana-kawnu kukai-kumata puonni. La'a hande onu-ma'nu maka rmakriarni ne maka rimormiori sukni atia' la honona rawok taru. 3 Let Babel de, rweyata-rwaniawua yoma nhiolli-lietni illu-wniehwani emolmolan nekama patke' yatyat ida mak kala arak mikmikri na nhuri ama'wua muanke'a pa na na'hira re. Emkade walia mak kden letlawna Babel re, rtota makden la hairi-hairi honona pa rhi' do'a-ryap hiala me rhoi-rtan lia uplera-upmati. Ray-ray nohkeran di mana ror wutga makden Babel re rhi' do'a-ryap hiala pa emolmolan nekama muanke'a nor pat yatyata ralira-raliai. Ne mak kwadakna re rler la re'a-tniaru onnila makden Babel re ralamni rapal niana re'a-tniaru pripanni-fa'anni.” 4 Noma a'utlin walia lira ida nwatiaga Ilyamou-Watyatoha pa niwra: ”Mak klernohor A'u mliergot la let matmiat liawan de ralamni. Yana mliernohora makden hande do'oni-halli pa hota mliernan walia niukum lawna. 5 Yoma do'oni-halli nniutanni tullu la ntut lia lyanti pede dodo'ondi de Awueyata-wuaniawua. 6 Aghopan pa A hopopnu (malaikat) rhi'a la makden Babel, de emekwalima makden Babel re rhi' olek la A mu'tu-rah'u. Nhiolli-lietni maka rhi' nana de Agala narehi-nalawna la'pa rti'il nana la woru ralamni hya' maka rhi'a-ryapia. Babel niukamnu di emeka lar penpuen lia ha mermueru maka rala la Babel nemnia, wuhurni nareh dioin la maka Babel rala la riy dom to'a 7 Nlernan niukum lawna mana emekwalima e tullu-petanni, me emekneka nmori-ndar lia re'a-tniaru pripanni-fa'anni wawannu. Yoma patke' yatyat Babel de nmeh'a nwaror la ralamni niwra: ”A' di de orkotkotni-ornananni id a'u. Hota a'g edonna upalu pa ako'a-ghera.” 8 La' hade pede hota la ler id ralamni tutut pua nler la rehka-lara, knio'a-kniakru lol etnu-liolli, nor wutga matmiati-molmuolu. Ne hota ai mana nlomra mutni-ki'ira la genni. Yoma Orgahi-Orha'a Uplerlawna ed mak kodi plolli. E' ed mak ketlia do'oni-halli re.” 9 Ray-ray makden la nohkerna wawannu, maka kor oleka makden Babel rre'a-rtaru me rhi' do'a-ryap hiala emolmolan nekama muanke'a nor wutga patke' yatyata dudu-niei, de hota honona re koko'a-herera me rapolu-ratnian niohora let maka ai nram doin pa mokalli npupun nan momuoga. 10 Hota honona re rtutrier lia oliet pa rpoi-rkek reria yoma rahala yanhi'pa rlernan niukum de wali. Ray-ray re riwra: ”Adoo! Let lawan orkotkotni-ornananni, let mak karuri-kalai, mtatan di nekpa nler la wnieyata-wnianiawu, matmiati-molmuolu mak kamehi-kayona.” 11 Mak kwadakan la noha wawannu mana koko'a-herera, pa raluli-rahona riwra: ”Inee! Hota makden hande id mana hota edon nma naweli it hyonni-hyanni owa'ana, 12 hota it wuini-krapnu lelli-kdielli, kulau me dirma watnu re ror wut nieka rewni-lawarni mak kamnurnuhru, ungu me mermera maka welli werta, me augalli, ror wut nieka maka rhi'a la pi'ra, mnotna, onde maka rhi'a la ora-au welli wierta rora watu liawna mak welli wierat wali, 13 kayu manis, rampa-rampa, ayalli maka ha ra rtutnia, mur, la'pa anggur turnu, wu'ru saitun, wetra' ota, metma, me lembu, pipi-duma, kereta nor wutga kuda, me ata-wa'ara. Hare honona hota makden Babel edon raweli owa'ana.” 14 Mak kwadakna re rehela Babel de pa rakot la riwra: ”Ina-nara makden Babel miy re, miy re'emi-tniarmi, pripanmi-fa'anmi, emolmolan nekama lodan mak kweher doini oleka wa.” 15 Mak kwadakan pa kre'a-ktarg olekwa onnila Babel de raweli ir hyonni-hyanni, de ihranu wolwo'la pa rtutrier lia olietleta, yoma ramta'at la yanhi'pa irlernan walia ira nhiakarni la' hade. Ir rre' wal pia rko'a-rkakru me raluli-rahona. 16 Rhar lirni pa riwra: ”Adoo! Let mak kakota-kanan di nhudgaur weee! Eh! Emolmolan nekama ray patke'eni pede namrehi-namda'ar nohora hewewatni-naniayarni mak kamnurnuhru, ungu me mermera maka welli werta ror wut nieka leli-maha, watu-watu samomuou muemna me mutiara re. 17 Mere mtatandi nekpa re'eni-tniarnu pripanni-fa'anni re ema rwatlena.” Yurakna honona la kapli, me kapli mniotni honona re mak khopla-klara, makahaka i'na-ya'ana, rtutrier wiutwut lia oliet pa ramkek reria. 18 Honona re polpuolu-hawaunia, yoma ai nram doinia letlawan de. Rhaun pa riwra: ”Eh! Maiya nohkeran di de, leta id mana edonna emeka let di!” 19 Noma rkeni awu la o'tani re yoma ir wal pia raluli-rahona let de, me rapolu-ratniani. Rkakur pa riwra: ”Adoo! Let orkotkotni-ornananni dine! Omlier nek la yatlorni-yatra'ani. O wulmu-we'elmu ed mak kariei pia orkapli re honona rre'a-rtaru. Mere mtatan di nekpa ha mutlialawna re emeka ha yattiarmua.” 20 Oi! Ilyamou-Watyatoha nahe'i-nahepur nohora letlawan de yamdieranni. Hei! Makodia Uplerlawna lirni-tunnu, me makwohorulu-ktatrulu la'pa miy hononmi mak kla' olek la Uplerlawna mutnu, mimuki-mihepru. Yoma Uplerlawna ed mak kala niukum lawan de, pa na nawahla makden hande nhiolli-lietni yotyotni-yatyatni maka rhi' oleka tiy miy wia. 21 Nhorwua dewade hopopna mak karuri-kalai ida na'ala watu liawna id pa nwa'ala la tah'i lawna ralamni pa niwra: ”Emkadilla let Babel maka ha rwetwet la nanni, de hota nodi ruri-lai lia wnia'alli, totpena na nweyata-nwaniaga. 22 Preheni-mkaini nho'owa pa he'i-hepru, tiwla-prai noknoka yetni-warna hota hohoni-hadewa. Ne mak kwewla mnotna me pi'ra la'pa tukna-tukna honona re, hota edon rakoki-rayapi owa'an wa. Edon ratlin owa'ana patke'a re rtutu'tu watra'a owa'ana. 23 Hota riy edon ramkek owa'ana let de hulu-wa'du hitni-reparni, onde e ratlina mukni-heparnu la'a mehlima-marya'a. Hota letlawan de nler la niukum mak emkade, yoma mak kwadakna re mak kdella let de er mak kre'a-ktaru krehelia nohkeran di, ne makden hande er mak knairia lira-yatu nohkerna pa ra rtot meman makden la hairi-hairi honona pa rler la klieratni. 24 Babel o' de ro'ona natniutu, me keur lawna narie'a (omlier la niukum lawna) yoma o' ed mak kwunu-kwenna makwohorulu-ktatrulu la'pa Uplerlawna mutnu-rahanu korni wali, de riy honona mak edon kpa'eini-kpahal la Uplerlawna ralma-riorni.”
He'i-hepur lawna la Ilyamou-Watyatoha
1 La'pa nhorwua noma a'utlin nana hadom yetanni emolmolla mutlialawna ida la'a Ilyamou-Watyatoha rhaunu riwra: ”Haleluya! Mai pia ta'uli-tawedi it Uplerlawanni la'a gen tutullu-lolo'oni yoma E' ed mak kodi plolli. Ita Uplerlawanni de ed mak kamori-kalewn ita. E' ed mak ktorreria watghudi lokarni me tatiaili lahannu. 2 Niukum de edon npa'eini-npahala. Eneti olek la niukum lawna la letlalawan de mak ktot nohora patke' yata ida, mak kor muanke'a nhi'inde ralira-raliai. Emkade wal lia mak kdella letlalawan de rtot pa nohkerna-raikieran di mniotni rhi' do'a-ryap hiala me rhoi-rtan lia uplera-upmati. Uplerlawna Nukmua Babel yoma riy mak kdella let de er mak kwenna Uplerlawna hopopanni (Uplerlawna mutnu-rahanu).” 3 Noma riy rariahu re rhaun pa rakot owa'ana riwra: ”Haleluya! Hota ma'uli-mawedi owa'an O la'a tutulmu-lolo'omu! Ai miokla mak Omulerun de na'an amutni-aki'ira let matmiat liawan de, ne hota ta'en niana ai die rwarum nana pa nodi liarni.” 4 Dewade o'ta-mata riy terampworu wehrani wogata re ror wut nieka hamormiori re wogata ruh' idma-rrama lia'ar la Uplerlawna mak kamtatna la liwangen tiutullu pa riwra: ”Amin Haleluya! Mai pia ta'uli-tawedi Uplerlawna.” 5 Noma lira ida nwatiawu liwangen tutulu de pa niwra: ”Makpesiay honona mak khima-kre'a Uplerlawna la'pa kuku'uni-lalawanni, hononmi mak ka'unni-kamta'ata E'a, de mi'uli-miwedia Uplerlawna la genni-tienni.” 6 Nhorwua dewade a'utlin emekneka lir wok lawna ida yetanni emeknekama yo'or lawna, ne anin lawna mak kodia ihini-turnu pa kukru-gauru idma na'it nan ida. A'utlin lirni re riwra: ”Haleluya! Ya'uli-yawedi tiy O'a Uplerlawnu ne, mak kdella tutullu-lolo'oni! Yoma Omtiorna-mriautu la hanek-harahu wuawannu! 7 Mai pia tamuki-tahepur nohora me ta'uli-tawed E la'a genni-tienni! Yoma nte' olek la lerni-melli maka ha rhoiya la Dum A'na de mehlimni-marya'ani pa rma rawoka wa. Ne Pat Mak kmehlim de e nnairi oleka 8 hewewta-naniairia mak kamnurnuhru mak kmou-kwitna mak klipa-ka'ma de, maka Uplerlawna Nal oleka la.” Naniair de nnia'eratni de nhioli-lieta, ilu-wniehwa mak kaplol la Uplerlawna yamkekni mak Uplerlawna mutnu-rahanu rhi'a-ryapi oleka la nohkerna wawannu. 9 Noma hopopan de nakot mai a'u niwra: ”Mhuorat targa lira ri: He' maka klernana polpuolu-wakwaka la Dum A'na mehlimni, de hota ed mak klernana unut lawna.” Noma hopopan de na'itr owa'an la lirni mai a'u niwra: ”Lir di, de plola yoma Uplerlawna ed mak kakot nana de.” 10 Na'nama awualtior la hopopan de gaini ralamni pa agiwra guh' idma-riama lia'ara mere nwayotli a'u, niwra: ”Yana, yana! Pen neka mkiola tieru-muawur nehla la Uplerlawna Nmeh'a. Yoma a' niek de hopopan to' a'u la Uplerlawna, emekwali o'a me emekwalia o mutwualmu maka kod reria Uplerlawna lirni-tunnu maka Yesus Nakota re. Yoma he' ed mak kod reria Uplerlawna lirni-tunnu maka Yesus Nakota re, plol toto' pa ir de emekwali a' pua am rewre'wa pa makot nohora Uplerlawna lirni-tunnu maka Uplerlawna Nalharia.”
Riy mak kha'a kud wawahra
11 Edon nalo'on wali ne a'umkek de Ilyamou-Watyatoha ema rhar dioinia ne kud wawahra ida ntutrier lia rialma. Mak kha' kud de nwawa riy Mak kdenreri (setia) me riy Makden la Plol wawna. E' ed maka khudi-kpara la plol wawannu me edonna nwehwa hal la ar ralma. 12 Matni emekneka ai miormiori, ne la o'tani de wutu-lai harahu ranie'era. La inonni de e rhorat targa nan memeh'a ida, ne hota Enmeh'a nanpena ed mak kat niohora nnia'eratni. 13 Rayanni mak Ennair de, de npenpuen lia' rara. Ne rweta la Uplerlawna Lira Nnio'oni-Wawa Niatnu. 14 Mak ktorreria keki-rautu re la'a Ilyamou-Watyatoha rha'a kud wawahra pa rlernohor reri E'a, me ema ramrewrehwa la naniairi mak kamnurnuhru wawahra mak momuou. 15 La' mak knairia raini npenpuen lia rara de, wawni ralamni de wehla ya'ara ida nlergotgota de namnarnarta. Ne hota wehla mnarnarat de ed mak Nodia pa na Ntipna-nhewra rimormioria noheri woru pa hota Entorna-nrautia de emekneka mak knairia lie'ena mnotna. E' ed maka kwatei-kwahapra arwalli pa emekwalima riy rhoplia anggur wo'a la gen miaka ra rahmia anggur turnu. Emkade pede Ntutga Uplerlawna Makodi plolli pa nodi liarni, hankeranni-ralmha'arni la'a nohkeran di mniotni onnila do'oni-halli lawan rehia. 16 La'a rayanni me la' kowarni de e rhorat targa nan mak emkadi: |scRAY MAKTORNA-KRAUTU LA MAKODI PLOLLI HONONA LA' NOHKERNA-RAI MIARNA ETNU-LIOLLI, ME ORGAHI-ORHA'A LA NOH MARNA NORA LYANIT LAWNA.|r 17 Noma a'umkek nan walia hopopna ida ntutrier lia lera hititni-repreparni. Nhaun pa nakot la akaka re honona mak knema-ktai lia darat lawna niwra: ”Mai pia mrie'ela mior la Uplerlawna ya'anlawna-yemunlawanni di! 18 Mmiai pa mrie'ela mi'ina hare honona mak rarni ktur lia wewna wawannu de ihini-rarni, emekwali ray-ray ri ihini-rarni me mak kodia ahu namni la ar ralma, me riy mak karuri-ka'orta ihini-rarni, me la' walia mak kha'a kuda re, me kudni re ihini-rarni, me rimormiori kuku'uni-lalawanni, ata-wa'ara, hopopna-lili'iru me marna-wuhura ihini-rarni.” 19 Noma umkek walia hamormior yatyat de mak kmalawan la Uplerlawna nora ray-ray nohkerna ror wutga mak ktorreria ir poka-hidarni rawok pa totpena rtutria Mak kha' nana kud wawahra de nora mak ktorreria poka-hidarni. 20 Edon nalo'on wali ne Mak kha' kud wawahra de Ntorna hamormior die nor wut nieka makwohorulu-ktatrulu mak putputra-palpalka de. Makwohorulu-ktatrulu mak putputra-palpalka de, ed mak khi' oleka hihi'a-yapyap miaka riy edon ramkek ma'ta pa riy rheduma, totpena rpesiay hamormiori yatyat de. Enhi' hihi'a-yapyap mak kamehi-kayona pa nhi'nande nwotra-ntalia riy maka ha rala hamormiori die kniaunu me rru'u-rtowar la hamormior die atiehrani. Mak kha' de Ntorna hamormiori die nor wut nieka makwohorulu-ktatrulu mak putputra-palpalak de dewade Enakul mormioria la ai liali maka klomlomra pa klolda. 21 Noma Nala wehla ya'ara mak klergot la wawni ralamni de pa na Ntipna-nhewra hare honona mak klernohora hamormior die pa iha re mana ema ruran nana mak ha rwenan nana re ya'anni. Noka ra'an pa rpeher memna.
Rakot nohor Yesus Nora makpesiay E'a rodi plolli la anni riwnu ida
1 Nhorwua noma a'umkek nana hopopna ida nwatiawua Ilyamou-Watyatoha pa nernu. La' limni de entorreria konsi hu'ul matmiat liawna ralamni, me ntorrer wialia ranti lawna ida. 2 Dewade ntorna niy liawan mak kolkuol die, maka rhoiya la Hegana amlawanni onde Setan inhatte, pa ntoran nana na'nama rkenia ranti la limni totpena rnahor nana la anni riwnu id ralamni. 3 Noma hopopan de nhawlakrernia niy liawan de la hu'ul matmiat liawan de ralamni. Nhor nioma naslot apitga na'nama nho'la-nwent owa'ana lola tio'ora, totpena niy liawan de yana nodi pudi-akla owa'an la rimormioria nohkerna wawannu. Yoma hota edonna nwo'la-nlekur nana anin tetema riwnu ida. Mere Uplerlawna Neti oleka de la'pa anni riwnu ida nhorwua nanpena rwe'er doinia ranit lawna de pa rala pa nhi' pudi-akla owa'an oke' to'a. 4 Noma a'umkek de riy ramtatan la liwangen tiutulu mak klernana plolli totpa retlia niukum lawan de. A'umkek nan de riy mak kmati oleka yoma rahmena rwaltiora-rwaltieman la hamormior yatyat de nora uplerni-upmatni, de rmori owa'ana. Ir er mak edon klernan et mia'ta hamormior yatyat de kniau la' ir limni onde reranni-kiorni. Mere yeher to' pa rakot nohora Yesus hihi'ini-yapyapni me Uplerlawna lirni-tunnu pa nreiniande rotna tiernu. La' hade pede irmori owa'ana pa rodi plolli pa emekwalia ray totpa ror rewre'wa Ray Makamori-Kalewna mak Uplerlawna Nano'tarua pa nalo'on nana anni riwnu ida. 5 Hota emkadella yamori mulaliaini. Mere hota riy dom to' owa'ana la riy mak kmati re, de edon ramori owa'ana nla' nana anni riwnu id mahnekni. 6 Mere hota mati maka ramoria la mulaliaini rlernan unut lawne! Ir er maka Uplerlawna Nwalir niana la' E gahani. Hota la matmiati re'eni wornu de ir edonna rlernana. Hota ir er mak kla' o'ta-mata (imam) mak khima-kre'ela Uplerlawna Nora Yesus Kristus. Ne hota ir wal pia rodi plolli pa emekwalia E'a la anni riwnu ida.
Rrinnia hegana amlawanni la ai mormiori ralamni
7 La'pa mahnekni mana anni riwnu ida, dewade hegana amlawanni mana rwe'er doinia la hu'ul matmiat liawna ralamni de. 8 Ne hota la nputra-npalak targho'ola rimormiori makden la hairi-hairi, la noheri-woru lyanti nayanni maka rweta la Gog, me Magog. Hegan de nalahar nan ntargho'ola rpa nawoka-nale'ga re pa totpena ra'ara. Maka ha nawoka-nale' niana re, de emek en liu'wu-tan miakmu. 9 Hota rwatiawu nohkerna-rai miarna uhunu-ewatni-ewatni-lahwani pa rma rle'ga likti-lar maka Uplerlawna mutnu-rahanu ha rdella de, de let maka Uplerlawna Nhilpai-nmanatu de. Mere hota lyanti nalernia ai mormiori pa na nlomar wenwenan momuoga re. 10 Ne hota hegana amlawanni mak ka'ohpa-kalahara hare de hota rrinnia la ai liali mak klomlomar pa klolda. La gen die ed maka rnakul targ ulga hamormior die nora makwohorulu-ktatrulu putputra-palpalak della. Rnahora-rnala'a ir la gen die pa nodi liarni.
Niukum lawna hohoni
11 Nhor nioma a'umkek nana liwangen tiutulu wo'a wahra ida, de E' ed maka kaliwna la liwangen tutul die. Lyanti me nohkerna mana ta'en niana ndella E matni nayanni pede nmol tietema. 12 Ne a'umkek de mati-molu kuku'uni-lalawanni raprir pia rpepan reria liwangen tutul die gaini ralamni. Noma puk ke'a-puk lawna re honona de rawnial momuou. Noma puka id to'a de puka riy mak kmormiori pa nodi liarni. Dewade retlia mak kmati re niukamnu edonna npa'eini-npahal et mieman la maka ha rhi' nana, yoma er momuou lia puka re ralamni. 13 Noma la tah'i lawna mana nal walia riy maka e nlumu-ntelan nan oleka re. Maka'ala riy aranni (Matmiati) nora Noh mati-rai miolu mana ral walia mati-molu re. Ne mati-molu re honona mana retlia ira niukamnu de edonna npa'eini-npahal la'a hya' maka irhi'a-ryapi oleka wa. 14 Nhorwua noma Maka'ala riy aranni nor wutga Noh mati-rai molu mana rrinnia la ai miormiori ralamni. Ai miormiori liawna di de rrekan nana la matmiati re'eni wornu. 15 Riy maka nanni edonna rhorat targa la puka riy mak kmormiori pia nodi liarni, de hota rrinnia momuoga la ai mormiori ralamni.
Lyanit warwuaru nora noh warwuaru
1 La' noma a'umkek nan walia lyanit warwuaru nora noh warwuaru. Lyanti nora nohkeran mak kala' ul muemna ema rmol tietema, me la' walia tah'i lawna mana edon tamkek nan walia. 2 La'pa a'umkek de Let mak kmou-kwitna, mak kakleh do'a-hal de maka rweta la Yerusalem Warwuaru, ema rhuriernia la Ilyamou-Watyatoha pa nerun la yawa, yoma Uplerlawna ed mak kal hade. Let de liplipa-kamka'ma nohora Uplerlawna tutullu-lolo'oni pa emolmolla patke'a maka ralipa-raka'ma pa hota ramehlim wutga la a'na muanke'a ida. 3 Noma a'utlin de lir lawna ida nwatiaga liwangen tiutul pa niwra: ”Mitlina! Dodo'ondi de Uplerlawna genni mana nden wut lia rimormiori ha rden la. Hota Enhi'a ir la E mutnu-rahanu pa Nora re rden wut lia geni-tiena ida. Uplerlawna Nden wut lia ira, ne ir mana rkola tieru-rawur nehla rer lia E'a. 4 Ne E' ed maka knah ir luini-nuhranu la ir gaini. Matmiati-molmuolu, ralam mawla, lui-nuhru onde mehra-mau mana edon olekwa. Yoma hya' maka tamkeka me ta'eram nana la ulul geni re, de edon olekwa. 5 Dewade Mak kamtatan la liwangen tutul die niwra: ”Mitlina! Dodo'ondi de Aghi'a hare honona de warwuaru momuoga.” Enakot wal mai a'u, niwra: ”Mhuorta hadi, yoma lira-tunu ri de ha plollola re, ne hota hare er maka riy rpesiaya.” 6 Me Nakot wali: ”Dodo'ondi memna Aghi' ahorga hare honona mak Awuaror taru oleka wa! A'g ed maka ha rweta la Alpa nor Omega, yoma A'g ed mak kala' ulu me A' wual pia ed mak kden la li'iru. La' he'a-he' to' maka tiernu kerna, de hota A'g ed maka katera-kalahga nora ger ormata mak kodia miormiori-dardiari plalahwa pa edon ntutu-nte'a. Ger di de Agal neka la he'-he' mak kwahaka. A'g edon u'olu hadi. 7 Riy mak ka'untu la hegana amlawanni yoma edonna rhoitio'or doin ir pesiayni mai A'u mere rkol reri pitpit lia, hota A'g ed mak kala A ra'u-pa'lu mak A'ukottaru ri honona la ira. Ne A'g ed mak khi' Uplerlawan la ira. Ne irpolg A' die ir Amni. 8 Mere mak kho'ola li'iru, mak edon kpesiay, mak khi' do'a-kyap hiala kdeha-ktiahli, makwunu-makwenna, mak kalira-kaliai, mak knairia lira-yatga nohkerna, mak kru'u-ktowar la uplera-upmati, me riy mak ka'ohpa-kalahara, de hota rrinnia la ai lali mormiori mak klomlomra pa klolda, de la matmiati-molmuolu maka rweta la matmiati-molmuolu re'eni wornu.”
Yerusalem warwuaru
9 Riy ida la'a hopopna re wo'itu mak ktorreria lari niemun geni mak kpenpuen lia Uplerlawna niukamnu re wo'itu mak ktawli'iru, nmai pia nakot mai a'u niwra: ”Mai pia atiutga patke' maka riwra ramehlima la'a Dum A'na de.” 10 Dewade Uplerlawna Nhiw Lululli mana Nodi plolli mai a' pua hopopan de nod a lia wo'or tutulu id hananni. Entut a lia Yerusalem, Uplerlawna letni de, nwatiawu Ilyamou-Watyatoha pa nernu, Uplerlawna ed mak kal hade. 11 A'umkek de let de liplipa-kamka'ma yoma Uplerlawna hitni-reparni ndain nana. Me homarni-layarni emekneka watu welli werta, de namrehi-namda'ar la watga baiduri pandan, yamkekni namememi emekneka watu liplipa. 12 Lutarnu mana rwadialaw nana (nadadna pa natulu) me puohrani termida wehrani woru. Ne la puohrani re mana Uplerlawna hopopanni-lili'irnu rhapet reria nenenna. La' puohra re honona de e rhorat targa Israela duratni termida wehrani woru re nanni. 13 La anni matni re honona de puohra lawna wotel muana rapal tiarg oleka re. Wotel die rapal lia tipru, wotel die ra'i, wotel die tranna, me wotel die warta. 14 Lutur let de e rwatatga la watu liar pianulu termida wehrani woru. La watu liar pianulu re de, de e rhorat targa la riy termida wehrani woru re nanni maka rhopan pa rodia Dum A'na de lirni-tunnu. 15 Hopopan mak kmai a' die ntorreria lie'ena maha, maka nnairia pa na nlewta let de uhunu-ewatni nor wutga puohrani me lutarnu. 16 Let de nnairia ewatni-lahwani wogata re. Lahwani emekwalima ewatni. Dewade hopopan de nlewta let de nnairia lie'enni de, noma nlernana lahwani, ewatni, nora tullu de stadia riwnu termida wehrani woru (2,400 kilu). 17 La'pa hopopan de nlewta lutur lawan de kpaunu, de nlernana kpaunu de elu rahu ida terampwogata wehrani wogata (60 meter). Liewat maka hopopan de nnairia, de emekwalima liewat maka rimormiori ha rnairia la' lera-lera. 18 Rhi'a lutur de, de rnairia watu baiduri pandan, mere la'pa leta tetema de rnairia mah ihi mak kamememi pa liplipa-kamka'ma me momo'a-marmara. 19 Watu liar pianulu termida wehrani woru la let de, de ramrehi-ramda'ar nohora watu-watu mak weli werweratni. De watu liar pianulu de rnairia watu motmota mak kwawa baiduri pandan, wornu de rnairia watu motmota mak kwawa nilam, wotellu de rnairia watu motmota mak kwawa yakut. Wogatni de rnairia watu motmota mak kwawa samrud. 20 Wolimni de rnairia watu mermera na'itra wawahra mak kwawa baiduri sepah, wonemni de rnairia watu mermera mak kwawa delima, wo'itnu de rnairia watu marmara mak kwawa ratna cempaka, wo'awni de rnairia watu motmota mak kwawa pitus, wosiewni de rnairia watu marmara mak kwawa topas, termidni de rnairia watu motmota mak kwawa krisopras, termida wehrani idni de rnairia watu motmota mak kwawa lasuardi, me la'a termida wehrani wornu de rnairia watu ungu mak kwawa kecubung. 21 Puohra lawna termida wehrani woru re de, rnairia mutiara id la puohra nenenna. La let de talan lawanni de rnairia maha ihini mak kamememi pa liplipa-kamka'ma me momo'a-marmara. 22 A'g edonna umkek nana roma-krei la let de ralamni, yoma Orgahi-Orha'a Uplerlawna-Mempulwatnu Makodi plolli E inhatte Nmeh'a nor wutga Dum A'na de Nwauga roma-krei die. 23 La let de edon rwahaka lera-wolla lairni yoma Uplerlawna preheni-mkaini hitita-lomlomr oleka la let de. Ne Dum A'na de Nlipa-nka'ma pa Nwauga wa'du mormiori. 24 Rimormiori nohkeran di hota rala' lola lelerni ralamni, ne ray-ray mana rodia re'eni-tniarnu pa rmai wia let de ralamni totpa rala ra rhi'a la limtutnu. 25 Let de puohrani hota nahniaria lelera. Me edonna rho'la targa re yoma la' hande de melmela hadamonna. 26 Noheri woru re'eni-tniarnu re me mak khi' ir pa ratulu-rapetna re, hota rod miomuoga la let de ralamni pa rhi'a la limtutnu totpena rhu'ru-rhelam la Uplerlawna. 27 Mere la'pa rimormior miaka khi'a-kyapia do'a-hala kdeheni-ktiahlani onde maka rhoi-rtan lia uplera-upmati, la'pa mak kputra-kpalka, de edonna ror la'a let de ralamni. Mere eneknek to'ama riy maka ha rhorat tar nanni la puka riy mak kmormiori pa nodi liarni.
1 Hopopan de ntut wualia gerlawna mak kodia mormiori-dardiari, mai a'u. Gerlawna mak kamememi pa itamkek de nlipa-nka'ma pa emeka wat mi'na, de nwatiawua Uplerlawna nor Dum A'na de liwangen tiutullu pa nwau 2 liola talan lawna letgarni la let de ralamni. La gerlawan de aratni walli-walli, ora-au mak kawo' nana orwo'a-auwo'a mak kodi mormiori-dardiari. Au die nawo'ola anni ida, de nawo' nana re'eni termida wehrani woru, pede wolla-wolla nenenna de rlernana wo'oni. Au die tawni de rnairia la koda-atiawi la rimormior nohkerna wawannu. 3 La let de ralamni de it edonna tlernana hya' maka Uplerlawna Nhorghala-nwaghala. Uplerlawna nora Dum A'na de liwangenni-mtatangenni ed mak kawniau lia let de letgarni. Ne Uplerlawna mutnu-rahanu makpesiay re hota rhima-rre' rer lia E'a. 4 Ne hota ramkek meman la E gaini ralamni. Ne rhorat targa E nanni la hare reranni. 5 La' ler de edonna rtutin wa'du, me lera mana edonna nhita-nrepra yoma melmela hadamonan la hande, yoma Orgahi-Orha'a Uplerlawna ed mak khita-krepar la hande. Hota Uplerlawna mutnu-rahanu re er mak kre'ela pa rodi plolli wal pia nodi liarni.
Yesus maimiaini
6 Dewade hopopan de nakot mai a'u niwra: ”Lira-tunu maka ha rakot nohora la yamkekmu di ralamni de raplol momuou ne hota riy rpesiaya. Orgahi-Orha'a Uplerlawna-Mempulwatnu maka Nhiw Lululli Nodi plolli la makwohorulu-ktatrulu (nabi) pede rwohorulu-rtatrulu, ed maka Nhopan doinia hopopanni (malaikat) pa nma ntutga la mak khima-kre'a E kniarni la'a hya' mak hota kler pa kmai wia.” 7 Yesus Nakota de: ”Mpiaror kalwiedwed hari! Hota A'g ed mak kler pa kmai wia. He' ed mak klernohora hya' maka ha rakot targa la Puk di ralamni de, hota ler la unut lawna.” 8 Yohansi a'u ed mak katlina la a tli'nu me mak kamkek memna la a ma'tu di. La'pa hare honona de aliernana la hopopan de dewade ariu'u lia yaw pa atiuk lia me agiwa ghu'ru-ghelam la hopopan de 9 mere nakot mai a'u: ”Yana mhu'ru mai a'u, mere mhu'ru la Uplerlawna. Yoma a' niek de, E' ed mak khopn a'u pa emekwalia omuora inmu-narmu ammu-hyalmu makwohorulu-ktatrulu, me riy honona mak katlina-katailla lira-tunu la' Puk di ralamni. 10 Ne a'ukot tiy o' de: Yan memmemna muwunmua lira-tun muaka ha rakot targa la Puk di ralamni. Yoma hota lerni-melli la mak ha rakot taru ri nler pa nmai wia. 11 Riy mak kler la yatyatni-halalli, me mak kru'u-ktowar la uplera-upmati, de plolli nek la ir wa. Mere riy mak khi'a hya' mak kaplol la Uplerlawna yamkekni me riy mak kakleha do'a-hala mhi' emkade pa nodi liarni.” 12 Mpiahniorta Yesus lirni hadi: ”Hota edon nalo'on wali ne Amuai, ne Agodia siewa-kai pa Agala wuahla rimormiori hihi'ini-yapyapni. Siewa-kai die nlernohora hya' maka ha rhi' nan oleka wa. 13 A' di de ed mak ha rweta la Alpa nor Omega yoma A'g ed mak kden ulu, me A' wual pia ed mak ktawli'iru. 14 Unut lawna nden la riy mak kpo'a-kpah'ia rainia plalahwani pa nmou-nwitna yoma hota ir er mak klola puohra leta la rialma pa rlernana orwo'a-auwo'a mak kodia mormiori-dardiar die. 15 Mere riy mak kwehwa-klakta kdeheni-ktiahlani, me mak kpesiaya lira-yatga nohkerna, me mak kalira-kaliai, mak kwunu-kwenna, mak kru'u-ktowar la uplera-upmati, mak ka'ohpa-kalahara la'pa mak kakota lol nurnu onde wniehwani ntutga, de ir honona rden la let de to'orni. 16 Yesus A'g inhatti. A'u'enyatg oleka A hopopnu totpena nodia lira ri tiy miy pa miala la krei-krei re honona. A' di de Daud duratni-waitni A'u. Wtion mak kreprepar la tipru A'g inhatti.” 17 Uplerlawna Nhiw Lululli, me Pat Mak kmehlima nakot walia: ”Mmiai wia!” Mak katlin ho' hadi mana niwra: ”Mmiai wia!” He' ed maka tiernu kerna, de mlier pa mmiai wia. Ne he' ed maka ralamni kwahak pa nemun de mtipua ger mak kodia mormiori-lewlewan de pa miemnia de plolli nek la miy nniemanmi. 18 Mhioratreria me! La'pa he' to'a mak katlin oleka lira-tunu mak aghorat targa ri, de yana mi'itra-milawan la. Yoma he' na'itra, de hota Uplerlawna ed mak ka'itar la niukamnu la'a nala mehra-mau liawna maka rakot oleka la puk di ralamni. 19 Ne la'pa he' ed maka kteti akpuri-akdahia hya' maka rakot targa la puk di, de hota Uplerlawna edonna Nala e nhiakarni la maka rakot targa la puk di ralamni, de la nhiakra orwo'a-auwo'a mormiori die me la let mak kmou-kwitan la do'a-hala wawannu de. 20 E' maka kakot nohora hare honona re plollolli, ed mak kiwra: ”Plola pa Alier pa Amuai wia.” Ne Yohansi a'ukot walia: ”Plola, Orgahi-Orha'a Yesus Mmuai wia.” 21 Awuak de Orgahi-Orha'a Yesus pena Nala ra'ani-pallu la'a Uplerlawna mutnu-rahanu honona. Amin (Plola).