1 Assalamu Alaikum sa leka Tiupilus. Na madakel kanu manga taw i binatalu nilan su kategel'ilan semulat sa kanu manga tudtulan makapantag sa kanu napagukit-ukitan nu langun nu sekami. 2 Inisulat'ilan su endaw i nadtalu nilan sa lekami na silan bantu i nakadsaksi kanu nia ba sa iniganat sa ganatan enggu silan bantu i nakapayag kanu kahanda nu Kadenan makapantag kanu Masih. 3 Na kagina ka maitu mapulu na sabap sa napangagian ku sa mapia su nia iganat sa punan-punan nin na napagitung ku i basi nia mapia na isulat ku bun sa padtundug-tundugen ku 'bpia-pia sa leka. 4 Na nia ba i atag a kinadsulat ku sa leka Tiupilus ka enggu nengka matalanged i benal su langun nu inipamandu sa leka.
Inipayag'u Malaikat su pantag kanu Kambata kanu Yahiya a 'Bpanalawat
5 Na kanu timpu a si Datu Hirud pan i pendatu lu sa bangsa na Yudia na aden 'bpangurban lu a nia nin ngala na si Sakarias a ped kanu lumpukan nu manga 'bpangurban a binedtuan sa Abiya. Nia nin kaluma na si Ilisabit a tupu nu mapulu sa langun nu manga 'bpangurban a si Harun. 6 Na natalima den nu Kadenan i ikelas su atay nilan dua taman sa 'bpaginugutan nilan su langun nu pangitaban nu Kadenan sa da kulang'in. 7 Ugaid'a da silan embata kagina si Ilisabit na bayas enggu matua den silan dua. 8 Na kanu isa a gay na minggalebek si Sakarias enggu su manga tagapeda nin a 'bpangurban lu kanu Timpul a 'bpagagaman lu sa Awrusalim. 9 Sabap kanu adat-betad'u manga 'bpangurban lu sa Yudia na sekanin i napamili a temutung kanu tutungen a mamut lu kanu tudtugan lu sa ludep'u Timpul a 'bpagagaman. Na linemudep den mambu sekanin. 10 Na madakel a manga taw lu sa liu i 'bpangeni-ngeni kanu kutika nu kapedtutung a entu. 11 Na aden malaikat a mibpayag kani Sakarias a pedtindeg sia kanu kawanan nu tudtugan bantu. 12 Guna su nailay ni Sakarias su malaikat na nakakedu enggu naawan na makatu sa kinagilek'in. 13 Na nia pidtalu nu malaikat na "Da ka 'gkagilek Sakarias, natalima nu Kadenan su pinangeni-ngeni nengka. Na su kaluma nengka a si Ilisabit na kaadenan den na wata a mama na nia nengka lun ibedtu na si Yahiya. 14 Na ngin den a kapia na manggiginawa i leka enggu madakel pan i ped a enggalaw-galaw amaika igemaw den sekanin. 15 Mabaluy sekanin a badtug a mama lu kanu adapan nu Kadenan. Na di sekanin manginem sa apia ngin a makalangut. Na iganat kanu endaw den i kagemaw nin na kalangkapan den sekanin nu Suti a Ruh nu Kadenan. 16 Na makapatidtu nin pan su manga tupu nu Israil lu kanu Kadenan. 17 Makauna pan sekanin kanu Mapulu nin. Na su Suti a Ruh nu Kadenan bu i mataw sa lekanin a mana bun su kinagkakataw nin kanu Nabi Ilias kanu naipus den a manga gay. Na sabap kanu usiatan nu Yahiya na magaga nin mapaulit su embabatay sa mamagayun silan 'bpaluman. Enggu sabap kanu indawan nin na su manga taw a dili mamaginugut kanu panduan nu Kadenan na makadsendit enggu makatidtu sa mapia. Na sabap bun sa lekanin na kaingatan nu madakel a taw su kapegkauma nu Kadenan a Mapulu." 18 Na inidsa ni Sakarias kanu malaikat i "Panun i kataw ku lun i nia ba, kagina ka saki na matua aku den maitu bun mambu su kaluma ku." 19 Na nia inisawal'u malaikat na "Saki su Giabrail a panunugun nu Kadenan na lu aku demun pedtindeg sa adapan nin sa kinasugu nin sa laki sa edtalun ku sa leka i nia ba a mapia a tutuma. 20 Ugaid'a kagina ka di nengka 'bpaginugutan su nia ba a suguan nin na maawa den su suala nengka taman kanu kutika a tumanen den. Di ka den makadtalu taman kanu kauma nu inibpasad ku sa leka." 21 Na gagalu nu kabpangangapa nu manga taw kani Sakarias na 'gkangagaip silan kagina ngintu ka mauget gaid sekanin lu sa ludep'u Timpul a 'bpagagaman. 22 Guna su nakaliu den sekanin na di nin den silan pakambitiala. Na natagu den sa ginawa nilan i nakailay sekanin sa kabarakatan lu kanu ludep'u Timpul a 'bpagagaman kagina ka di den sekanin pakadtalu na penggilubasan nin bu silan kanu lima nin. 23 Guna su napupus den su lekanin a kutika a kapenggalebek lu kanu Timpul a 'bpagagaman na minuli den sekanin. 24 Da gaid mauget na migkagingay den su kaluma nin a si Ilisabit na di den pendiliu si Ilisabit sa namakalima ulan. 25 Nia pidtalu ni Ilisabit na "Sabap kanu kinatabang'u Kadenan sa kagkagingay ku na initangka nin den su kapapegkaya nu manga taw sa laki."
Inipayag'u Malaikat su pantag kanu Kambata kanu Isa al-Masih
26 Kanu ikanem ulan nu kagingay ni Ilisabit na pinanutuman nu Kadenan su malaikat'in a su Giabrail lu sa inged a Galili a binedtuan sa Nasarit. 27 Aden lu babay a laga a kapakawingan kanu mama a bedtuan sa Yusup a tupu nu Nabi Daud. Nia ngala nu babay bantu na si Mariam. 28 Na minubay den su malaikat kani Mariam enggu inilakit'in su tutuma sa "Assalamu alaikum, sangat a inikalimu ka nu Kadenan ka pinalihalan ka nin." 29 Ugaid'a masela a inikalidu na ginawa ni Mariam su entu ba a pidtalu nu malaikat taman sa 'gkagaip sekanin kagina di nin kasabutan u ngin i maena nu pidtalu nin a entu. 30 Nia pidtalu nu malaikat kani Mariam na "Da ka 'gkagilek Mariam, pinalihalan ka nu Kadenan! 31 'Gkagingay ka taman sa makambata ka sa wata a mama. Na nia nengka ibedtu lun na Isa. 32 Mabadtug sekanin taman sa sekanin ba i kabedtuan sa Tunggal'u Kadenan a Labi a Mapulu. Su Kadenan i maluy sa lekanin a sultan a mana su katupuan nin a su Nabi Daud. 33 Sekanin ba i endatu kanu manga tupu nu Nabi Yakub sa taman sa taman enggu su endatuan nin na dala kapupus'in." 34 Daka nia pidtalu ni Mariam kanu malaikat na "Panun a entu ka laga aku pan?" 35 Na nia inisawal'u malaikat na "Su Suti a Ruh nu Kadenan i lemangkap sa leka asal'a 'gkagingay ka sa ukit a kagaipan enggu makatingguma bun su bagel'u Kadenan sa leka. Na kagina ka maitu na su nia a wata na kabedtuan sa Suti enggu Tunggal'u Kadenan. 36 Na 'gkalendem ka su pagali nengka a si Ilisabit na di kun sekanin embata. Ugaid'a saguna na naadenan sekanin sa namakanem ulan den sa apia maitu sa matua den gaid sekanin. 37 Saben-sabenal na su Kadenan mambu i pakagaga sa endaw i di 'gkagaga." 38 Na nia pidtalu ni Mariam na "Adidi na ulipen aku bu mambu nu Kadenan. Na nia ku kalilinian na matuman su pidtalu nengka sa laki." Na minawa den su malaikat.
Su Kinakakap'u Sitti Mariam kanu Ilisabit
39 Na da matana-tana na nagadil den enggu minggagan den makaw si Mariam ka linemu kanu dalepa ni Ilisabit a lu sa kanu manga bakulud'a Yudia. 40 Na lu sekanin linemudep kanu walay ni Sakarias na sinalam'in den si Ilisabit. 41 Na su kinakineg bu ni Ilisabit kanu kinasalam'i Mariam sa lekanin na mimbagkuas su kagingay ni Ilisabit lu kanu didalem'u tian nin enggu linemangkap den kani Ilisabit su Suti a Ruh nu Kadenan. 42 Entu pan ka nadtalu ni Ilisabit sa matanug i "Da pagidsan nengka a babay a napalihalan nu Kadenan enggu maitu bun mambu su wata a embatan nengka. 43 Na enduken ka saki i inikalimu a kabpawangan nu ina nu Mapulu ku? 44 Na sabap sa kinalilini nin na mimbagkuas su wata sa didalem'a tian ku kanu endaw demun i kinakineg ku kanu salam'engka. 45 Sangat den i kagkapia na manggiginawa nengka ka naginugut ka kanu pasad'u Kadenan sa leka a matuman den."
Su Kinapugi nu Sitti Mariam
46 Na nia pidtalu ni Mariam na "Su Kadenan na pinugi ku. 47 Na nasuat su ginawa ku ka ibpelipuas aku nu Kadenan. 48 Sabap sa 'gkagkalendem aku nin bun a ulipen nin a mababa i kambetad-betad'in na iganat saguna taman sa taman na langun nu manga taw sia sa liwawaw na dungia na medtu den sa laki sa napalihalan a babay. 49 Na su Kadenan a Barakat i minggulalan kanu sangat a masela a kangagaipan sia sa laki na saben-sabenal na Suti su ngala nin. 50 Iganat kanu nangauna a katupuan taman kanu makatundug lun na ipebpagilay nin su limu nin kanu apia entain a magilek sa lekanin. 51 Inikayanteng'in kanu manga lima nin a mabagel enggu tinagayak'in su langun nu manga masandag a taw apeg'u manga kahanda nilan. 52 Binugaw nin kanu tulugan nin su manga datu a tamegesen ka nia nin inipulu na su mababa i muletad'in a manga taw. 53 Nia maitu na inumanan nin sa madakel a lidseki su langun nu penggutem entu pan ka binugaw nin su manga kawasa sa dala nganin a napananggit'ilan. 54 Initagu nin sa ginawa su inibpasad'in a limu kanu manga katupuan tanu enggu tinabangan nin su manga ulipen nin a taw na Israil, 55 ka nagkalendem'in bun mambu su kinapaamad'in sa limu kanu Nabi Ibrahim taman kanu langun nu nangauli a tupu nin." 56 Na lu migkakaleben si Mariam kani Ilisabit sa namakatelu ulan na entu pan ka minuli sekanin sa walay.
Su Kinambata kani Yahiya a 'Bpanalawat
57 Na nauma den su kutika a kagemaw nu wata ni Ilisabit. Na mimbata sekanin sa wata a mama. 58 Na nakineg'u manga pagubay nin enggu su manga pagali nin su entu ba a migkapia-pia a limu nu Kadenan a nakatingguma sa lekanin. Na langun nilan na minamung enggalaw-galaw sa lekanin. 59 Guna su nakawalu gay den i umul'u wata na linemu den menem su manga pagali enggu su manga pagubay nilan ka pebpaletaken nilan su wata sia kanu adat-betad'ilan. Na nia nilan kiug na ipedsangay kanu ama nin a si Sakarias. 60 Ugaid'a nia pidtalu nu ina nin na "Di mapakay ka nia ngala na wata a nan na si Yahiya." 61 Na nia nilan pidtalu kani Ilisabit na "Babu, dala man isa bu kanu manga pagali nengka i aden ngala nin a mamba." 62 Na pinggulibasan nilan si Sakarias ka ibpagidsa nilan lun u ngin i ibedtu nin kanu wata nin. 63 Na nia pinangeni ni Sakarias na su pedsulatan. Daka inisulat'in den i "Nia nin ngala na si Yahiya." Na sangat den a nangagaip su manga taw lu. 64 Kanu entu demun ba a kutika na pakagaga den menem pedtalu si Sakarias. Saleta na linudsuan nin den mambu mamugi su Kadenan. 65 Su manga pagubay nilan na sangat den a nangagilekan. Na su manga tudtulan makapantag kanu entu ba a nanggula na nakapayapat den kanu embala-bala a manga bakulud lu sa Yudia. 66 Apia entain i pakakineg kanu entu ba na 'bpamikilen nilan i makapantag kanu entu a wata. Na nia nilan pakaidsa sa ginawa nilan na "Ngin basi i embaluyan nu nia a wata?" Ka mana su nasipat'ilan lun i su limu nu Kadenan na lu sa lekanin.
Su Kinapugi nu Sakarias kanu Kadenan
67 Na linangkapan nu Suti a Ruh su ama ni Yahiya a si Sakarias taman sa ibpangusiat'in den su kadtalu nu Kadenan sa 68 "Pugin tanu su Mapulu a Kadenan nu manga taw sa Israilka nauma den su kapedtabang'in kanu manga ulipen nin enggu su kapapembaya-baya nin kanilan. 69 Pinagadilan tanu nin sa mabagel a 'bpaninindega sia kanu manga tupu nu ulipen nin a su Nabi Daud. 70 Inibpasad'in sa nauget den a gay a sia nin pinanggulalan kanu manga suti a nabi nin, 71 na ipaninindeg tanu nin kanu manga kuntela tanuenggu pangalawan tanu nin bun kanu bagel'u manga 'gkabensi sa lekitanu. 72 Na pidtalu nu Kadenan pan i ipaamad'in su limu nin kanu manga katupuan tanuenggu tumanen nin su kapasadan nin. 73 Na su maya ba a kinabpasad'in kanu katupuan tanu a su Nabi Ibrahim na inibpasad'in i 74 ilipuas tanu nin kanu 'bpagukag sa lekitanuasal'a masimba tanu sekanin sa di tanu 'gkagilekan 75 enggu suti enggu ikelas i atay tanu sia kanu adapan nin taman a bibiag tanu pan. 76 Seka menem wata ku na nia ibedtu nu manga taw sa leka na nabi nu Kadenan a Labi a Mapulu.Makadtatangguna ka kanu Mapulu ka enggu nengka mapagadil su lalan a 'bpagukitan nin. 77 Na ibpangusiat'engka kanu manga ulipen nin su ukit a kalipuasan nilansia makanggulalan kanu kapangampun nin kanu kabaladusan nilan. 78 Na su Kadenan tanu na sangat a malimu enggu mapadtaya.Na su kinauma nu kinapalipuas'in sa lekitanuna mana su kaliwanag'u katibuas a pinasigay nin a ganat sa sulega. 79 Apia ka maitu na sia tanu pan sa dungia na kagilekan tanu matay.Ugaid'a su ukit'u Kadenan sa lekitanu na mana su kasigay nu katibuasa mapatuntul sa lekitanu lu sa kalilintad kanu adapan nu Kadenan." 80 Na su wata a entu ni Sakarias na migkasela enggu matulanged. Na lu sekanin migkakaleben kanu tawan-tawan a dalepa taman kanu gay a kinabpapayag'in lu kanu manga taw nu Israil.
Su Kinambata kanu Isa al-Masih
1 Na kanu entu a timpu na inisugu nu Sultan sa Ruma a su Augustus i bilangen su langun nu taw a sakup'in asal bu na katawan nin i kadakel'u taw a pegkuayan nilan sa bad'u pantialian nilan lu kanu pendatuan nin a Ruma. 2 Na nia ba i nauna a kinabilang kanu kapenggubilnadul ni Kurinius lu sa Siria. 3 Na maya ba i kinabilang kanu manga taw na uman i isa na ipabpedsulat'in den i ginawa nin lu kanu uman i inged a pimbatan kanilan. 4 Na linemu su mama a bedtuan sa Yusup a ganat sa inged a Nasarit a sakup'u Galili. Ugaid'a sabap sa tupu sekanin nu Nabi Daud na nia wagib na lemu sekanin sa Bitlihim a sakup'u Yudia a pimbatan kanu Nabi Daud ka ipasulat'in 5 lu su ngala nilan dua kani Mariam. Na magingay den su entu ba a babay a inibpasad'in sa pangaluman nin. 6 Na kanu timpu a lu silan sa Bitlihim na nauma su kutika a kambata nin. 7 Na mimbata sekanin sa paganayan a wata a mama na pinutus'in sa ginis enggu pinaiga nin lu kanu pegkanan nu manga binatang. Sabap sa madakel gaid i manga taw a 'bpaguli lu sa Bitlihim na da den 'gkaigan nilan lu kanu manga walay a natumpan ka entu ba su timpu a pembilangen su taw.
Su manga Pedtuganul sa Bili-bili
8 Na saleta na kanu entu ba a magabi na aden manga pedtuganul sa manga bili-bili lu sa dalem'u entu a dalepa ka pedtamengan nilan su manga bili-bili nilan. 9 Na pibpayagan silan enggu inipailay nu Kadenan sa kanilan su sigay nin. Na naawan silan na makatu sa kinagilek'ilan. 10 Ugaid'a nia pidtalu nu malaikat sa kanilan na "Sekanu san a manga taw, da kanu 'gkagilek! Ka ilay nu, sinemia aku ka aden ibpelakit ku sa lekanu a mapia a kadtalu nu Kadenan enggu sangat a makagkapia sa ginawa nu langun nu manga taw sia sa liwawaw na dungia. 11 Kanu nia demun ba a gay na nakagemaw den lu kanu dalepa nu Nabi Daud sa Bitlihim su 'Bpamelipuas kanu langun nu manga taw, su wata a mama a binedtuan sa Masih a Mapulu sa Langun. 12 Na nia nin amadan na mailay nu su entu a wata a pinutus sa ginis enggu pinaiga lu kanu pegkanan nu manga binatang." 13 Daka nakatekaw demun nakauma i madakel a manga malaikat ka pinugi nilan den su Kadenan. 14 Nia nilan pidtalu na "Pebpugin nami su Kadenan a Mapulu lu sa sulega enggu palilintaden nin su manga taw a nalilinian nin sia sa liwawaw na dungia." 15 Na guna su ginemanat den su manga malaikat ka mimbalingan den silan sa sulega na uman i isa kanu entu a manga pedtuganul sa manga bili-bili na midtalu sa "Huy, lemu tanu sa Bitlihim ka enggu tanu mailay u ngin i nanggula lu a mana su pidtalu nu malaikat a sinugu nu Kadenan." 16 Na midtagad-tagad den silan lemakaw taman sa natun nilan si Mariam enggu si Yusup. Na nailay nilan bun su wata a 'bpagiga lu kanu pegkanan nu manga binatang a mana su kayu a tinaung. 17 Guna su nailay nu manga pedtuganul sa manga bili-bili su wata na pidtalu nilan den lu kanu manga taw su langun nu pidtalu nu malaikat sa kanilan a makapantag kanu entu ba a wata. 18 Na langun nu manga taw a nakakineg kanu pidtalu nu manga pedtuganul sa manga bili-bili na nangagaip den. 19 Ugaid'a initagu sa ginawa ni Mariam i langun nu napagukit-ukitan nilan enggu di 'gkaawa kanu ginawa nin su pantag kanu manga 'gkanganggula nilan. 20 Na mimbalingan den su manga pedtuganul sa manga bili-bili a ipedsengal'ilan su kapebpugi kanu Kadenan sa kanu nakineg'ilan enggu su nailay nilan kanu entu a pidtalu nu malaikat kanilan.
Su Kinapananggit kanu Isa lu kanu Timpul a 'Bpagagaman
21 Na guna su nakawalu gay den i umul'u wata a entu na nauma den su kutika a kapebpaletak lun a mana su adat-betad'u manga Yahudi. Na nia nilan inibedtu lun na si Isa ka namba i ngala a inibedtu lun nu malaikat sa da pan sekanin igkalaling. 22-24 Na guna den mapasad su kutika a kinalimpiu kani Mariam a sia luyud kanu nakadalem kanu Kitab Taurat'u Nabi Musa na linemu si Yusup enggu si Mariam sa Awrusalim ka migkurban silan a mana su inisugu nu Kadenan sia kanu Kitab Taurat a "Dua timan a malapati udi na dua timan a manatad," enggu inisalig'ilan kanu Kadenan su wata kagina nakadalem bun sia kanu Kitab Taurat i "Langun na mauna embatan a mama na alus a inggay kanu Kadenan." 25 Kanu entu a kutika na aden mama a lu pegkaleben sa Awrusalim a bedtuan sa Simiun. Ikelas i atay nin enggu balaamal. Na 'bpagangapa bu sekanin sa kapalipuas'u Kadenan kanu manga taw. Saleta na pinalihalan den sekanin nu Suti a Ruh nu Kadenan. 26 Na tinalanged sa lekanin nu Kadenan i di sekanin matag matay taman sa di nin mailay su Masih a inibpasad'u Kadenan. 27 Na linemu si Simiun kanu Timpul a 'bpagagaman ka inagak'u Suti a Ruh nu Kadenan. Na saleta na init den ni Yusup enggu si Mariam su Isa lu kanu 'bpagagaman a entu ka inggulalan nilan den su ukit'u pangitaban. 28 Na kinua ni Simiun su wata ka sinapipi nin enggu nanginsukulen sekanin kanu Kadenan. 29 Guna su maitu na nia nin pidtalu na "Hu Kadenan ku na tinuman nengka den mambu su pasad'engka.Na su ulipen nengka na makalilintad den i ginawa nin upama kuan nengka den. 30 Kagina nailay nu dua embala a mata ku su kabpelipuas'engka 31 a pigkahanda nengka a makineg enggu mailay nu langun nu manusia sia sa liwawaw na dungia. 32 Na sekanin su maliwanag a makapayag kanu ungaya nengka a makalipuas kanu manga taw a dikena-Yahudi.Sabap sa lekanin na kabadtugan su manga taw na Israil." 33 Na su 'gkalumay na nagaip kanu pidtalu ni Simiun pantag kanu wata nilan. 34 Na inipangeni-ngeni ni Simiun i palihalan silan nu Kadenan enggu pidtalu nin kani Mariam i "Itagu nu sa ginawa i nia ba, su wata nengka na napamili nu Kadenan sa kanu kapebpadadsang enggu kapebpapulu kanu madakel a taw sia sa Israil. Saleta na sekanin i tanda a pedsungkangen nu manga taw kanu panduan nu Kadenan, 35 ka enggu nin makapayag su manga inipagema nilan a kahanda. Na matepuk den mambu su atay nengka a manabia ka pan i apuy a mayaw." 36-37 Na aden babay a balu a lukes den gaid a binedtuan sa Anna a wata nu Pinual a tupu nu Asir. Na inenggan sekanin nu Kadenan sa kategelan a ebpun kanu kabarakat'in. Na nakapitu lagun bu i kinadtitiwalay nin na saguna na nakawalu pulu enggu pat lagun sekanin. Na magabi sa malamag na pedsimba bu sekanin lu sa Timpul a 'bpagagaman ka 'bpangeni-ngeni kanu Kadenan enggu pebpuasa. 38 Kanu entu demun ba a kutika na nauman nin si Yusup enggu su kaluma nin taman kanu wata nilan. Na midsukul-sukul sekanin kanu Kadenan taman sa inipayag'in i pantag kanu entu ba a wata sa kanu manga taw a 'bpagingapa sa kagkahanda nu Kadenan sa makapambaya-baya su Awrusalim. 39 Guna su napasad'i Yusup enggu si Mariam su langun nu galebek'ilan sa ukit a pangitaban na minuli den silan kanu pegkalebenan nilan lu sa Nasarit a sakup'u Galili. 40 Na migkasela bun su wata enggu migkabagel taman sa mimbalaitungan. Na 'gkasipat sa lekanin i nakapalihala lun su limu nu Kadenan.
Su Kapembitialay nu Isa enggu su manga Gulu nu Kitab
41 Na uman lagun na 'bpelu sa Awrusalim su manga lukes'u Isa ka pedtalabuk silan kanu Kanduli nu Kalipuas. 42 Guna su nakasapulu enggu dua lagun den i umul'u Isa na pinaunut sekanin nu manga lukes'in a mana bun su adat-betad'u agama nu manga Yahudi. 43 Guna su napasad su entu a kinandidilimudan na minuli den silan. Ugaid'a migkalidtabun su Isa lu sa Awrusalim sa dala katukawi nu manga lukes'in. 44 Nia nilan kataw na lu bun sekanin kanu manga tagapeda nilan. Guna su nakasagay den i kinalalakaw nilan na pinangilay nilan su kanakan nilan lu kanu manga pakat enggu pagali nilan. 45 Guna su da nilan matun lu na mimbalingan silan sa Awrusalim ka lu nilan menem pinangilay. 46 Na su ikatelu nin a gay na natun nilan sekanin lu kanu Timpul a 'bpagagaman a nia nin ped 'bpamagagayan na su manga gulu nu Kitab a manga Yahudi. Na 'bpakikineg sekanin enggu 'bpangingidsa sa manga dait a ibpagidsa. 47 Na sabap kanu manga katigan nin enggu su madalem a kenal'in na su langun nu nakakineg lun na nangagaip. 48 Guna su nailay sekanin nu manga lukes'in na nagaip silan enggu nia nadtalu nu ina nin na "Nginan Uting ka inigkumaya kami nengka? Amaika si ama nengka enggu saki na sangat a nalidu i ginawa nami sa kabpangilay sa leka." 49 Nia nin inisawal na "Enduken ka 'bpangilayn aku nu? Di nu katawan i wagib a enggalebeken ku su galebek'u Ama ku?" 50 Ugaid'a di nilan 'gkasabutan su maena nu inisumpat'in. 51 Guna su maitu na minunut den su Isa sa kanilan lu sa Nasarit na lu ba na sangat i katulanged'in sa kani ama nin enggu si ina nin. Na initagu sa ginawa ni Mariam su langun nu nia ba a napagukit-ukitan nilan. 52 Na pegkasela bun su Isa enggu mabagel i kenal'in taman sa 'gkalilinian sekanin nu Kadenan enggu su manga taw.
Su Yahiya a 'Bpanalawat
1 Na su ikasapulu enggu lima lagun nu kapendatu nu Sultan Tiberius lu sa Ruma na nia gubilnadul'u Yudia na si Puntius Pilatu. Na si Datu Hirud menem i pegkamal sa Galili enggu su suled'in a si Pilip na pegkamal sa sakup'u Ituria enggu Trakunitis enggu lu sa Abilinia na si Lusanias i datu lu. 2 Na si Annas enggu si Kaipas i mapulu sa langun nu manga 'bpangurban nu Yahudi kanu entu ba a timpu. Na nakatingguma su kadtalu nu Kadenan kanu Yahiya a wata ni Sakarias kanu timpu a lu sekanin kanu tawan-tawan a dalepa. 3 Na guna su maitu na midtaneb-taneb den su Yahiya kanu sakup'u lawas'a ig sa Jordan enggu nia nin ibpangusiat na kapasalawat sa tanda na kadtaubat asal'a maampun su kadusan. 4 Na nia nin galebek na mana su nakadalem kanu Kitab'u Nabi Isayas a nia nin pidtalu na" Aden taw a 'bpanawag sa matanug lu kanu tawan-tawan a dalepa sa'Pagadil'u su lalan a 'bpagukitan nu Mapulu! Pakatidtu nu su entu a 'bpagukitan nin. 5 Su manga pageletan nu bakulud na katampulan, su bakulud enggu su manga palaw na mapantal, enggu su manga lalan a bigkug na 'gkatidtutaman sa su manga makasap a lalan na 'gkatilak. 6 Ka langun nu manusia sia sa liwawaw na dungiana mailay nilan mambu su kabpelipuas'u Kadenan.' " 7 Na madakel gaid a manga taw i midtimu-timu ka papedsalawat silan kanu Yahiya lu kanu lawas'u ig. Nia nin pidtalu na "Sekanu a manga tupu nu manga nipay! Entain i midtalu sa lekanu sa kapalaguyan nu su pakatingguma a lipunget'u Kadenan? 8 Ka amaika maitu na enggalebek kanu sa kapianan a mana su penggalebeken nu taw a tidtu a midtaubat. Di nu temagu sa ginawa i tupu kanu bun nu Nabi Ibrahim. Ka nia taman a madtalu ku sa lekanu na apia su manga watu ba nia na magaga nu Kadenan maluy sa tupu nu Nabi Ibrahim! 9 Na napagadil den su kapa a ipedtibpad kanu manga kayu a dili 'bpagunga sa mapia enggu ibpagidtug lu kanu pegkaleg a apuy." 10 Na inidsan nu manga taw su Yahiya sa "Amaika maitu na ngin i enggulan nami?" 11 Nia nin inisumpat na "U entain sa lekanu i dua timan i banggala nin na inggay nin su satiman sa entain i dala enggu entain i aden pegken nin na enggan nin su entain i dala." 12 Na aden manga taw a 'bpangubela sa buis i nakauma ka papedsalawat bun mambu silan lu kanu lawas'u ig. Na nia nilan inidsa na "Gulu, ngin i mapia a enggulan nami?" 13 Na nia nin inisumpat na "Da kanu mangetuk sa subela kanu wagib a pegkuan." 14 Na aden menem manga sundalu a minidsa bun sa "Sekami menem na ngin i alus a enggulan nami?" Nia nin pidtalu sa kanilan na "Di nu 'bpangua su kuleta nu sa apia entain sa ukit a peges enggu di nu pedsenditi su taw sa dikena benal. Edsukuli nu su sukay nu." 15 Kagina ka maitu na masela su inam'u manga taw enggu su ped menem na penggeda-geda sa basi su Yahiya ba nia su Masih. 16 Guna su maitu na nia inisumpat'u Yahiya kanu manga taw na " 'Bpanalawatan ku sekanu kanu ig ugaid'a pidsan ka maitu na aden pan pakauma sia a salawatan kanu nin kanu Suti a Ruh nu Kadenan enggu salawatan kanu nin bun sa apuy ka enggu kanu kasayaban. Na labi pan i kabarakat'in kumin sa laki, na apia su kabekal ku kanu iket'u ampis'u ay nin na di aku makadait. 17 Na inadil'in den su 'bpagusalen nin sa kapapembayug asal'a makapadsenggaya nin su matimegas enggu su ukap. Na su matimegas na itagu nin kanu kamalig'in a 'bpelimudan sa bantad ugaid'a su ukap na tutungen nin lu kanu apuy a di den pebpatay." 18 Na madakel pan i inipangusiat'i Yahiya kanu kapebpayag'in kanu Mapia a Tutuma. 19 Ugaid'a dinaway nu Yahiya su Datu Hirud kanu manga madakel a pinggalebek'in a malat apeg den su kinapangaluma nin kani Hirudias a kaluma nu ali nin a mama a si Pilip. 20 Na sabap kanu entu a kinasapal'u Yahiya na inumanan pan nu Datu Hirud su galebek'in a malat ka inipabilanggu nin su Yahiya.
Su Kinasalawat kanu Isa al-Masih
21 Ugaid'a kanu unan nu kinabilanggu nu Yahiya na sinalawatan nin su langun nu taw lu kanu ig na sinalawatan nin bun mambu su Isa al-Masih. Na guna makapasalawat su Isa al-Masih na nangeni-ngeni sekanin saleta na naguka su langit 22 taman sa nangalimbaba su Suti a Ruh a linemagid sa malapati. Daka aden nakineg a suala a ganat sa sulega sa maya "Seka su wata ku a pinadtaya. Sangat i 'gkasuat aku sa leka." 23 Na manga telu pulu lagun den i umul'u Isa kanu kinaludsu nin enggalebek kanu kahanda nu Kadenan.
Su Tarsilan kanu Yusup taman kanu Katupuan nin
Na nia talima nu taw lun na su Isa na wata nu Yusup, a wata a mama nu Hili, 24 na sekanin menem na wata a mama nu Matat, a wata a mama nu Libi, a wata a mama nu Milki, a wata a mama nu Yanna, a wata a mama nu Yusup. 25 Sekanin menem na wata a mama nu Matatias, a wata a mama nu Amus, a wata a mama nu Nahum, a wata a mama nu Isli, a wata a mama nu Naggai. 26 Sekanin menem na wata a mama nu Maat, a wata a mama nu Matatias, a wata a mama nu Simihi, a wata a mama nu Yusik, a wata a mama nu Yuda, 27 a wata a mama nu Yuanas, a wata a mama nu Raisa, a wata a mama nu Sirubabil, a wata a mama nu Sialtial, a wata a mama nu Nairi, 28 a wata a mama nu Milki, a wata a mama nu Addi, a wata a mama nu Kusam, a wata a mama nu Ilmadam, a wata a mama nu Ir. 29 Na sekanin menem bantu na wata a mama nu Yusua, a wata a mama nu Eliasar, a wata a mama nu Yurim, a wata a mama nu Matat, a wata a mama nu Libi. 30 Sekanin menem bantu na wata a mama nu Simiun, a wata a mama nu Yahuda, a wata a mama nu Yusup, a wata a mama nu Yunan, a wata a mama nu Iliakim, 31 a wata a mama nu Milia, a wata a mama nu Mina, a wata a mama nu Matata, a wata a mama nu Natan, a wata a mama nu Nabi Daud. 32 Sekanin menem bantu na wata a mama nu Yisi, a wata a mama nu Ubid, a wata a mama nu Buas, a wata a mama nu Salmun, a wata a mama nu Nasun, 33 a wata a mama nu Aminadab, a wata a mama nu Aram, a wata a mama nu Arni, a wata a mama nu Hisrun, a wata a mama nu Parez, a wata a mama nu Yahuda, 34 a wata a mama nu Nabi Yakub, a wata a mama nu Nabi Iskak, a wata a mama nu Nabi Ibrahim, a wata a mama nu Tira, a wata a mama nu Nahur. 35 Sekanin menem bantu na wata a mama nu Serug, a wata a mama nu Riyu, a wata a mama nu Paleg, a wata a mama nu Ebir, a wata a mama nu Silak, 36 a wata a mama nu Kainan, a wata a mama nu Arpaksad, a wata a mama nu Sim, a wata a mama nu Nabi Nuh, a wata a mama nu Lamik, 37 a wata a mama nu Mitusila, a wata a mama nu Inuk, a wata a mama nu Yarid, a wata a mama nu Mahalalil, a wata a mama nu Kinan. 38 Sekanin na wata a mama nu Inus, a wata a mama nu Sit, a wata a mama nu Adam, a wata a mama nu Kadenan.
Su Kinasasat kanu Isa al-Masih
1 Na kanu kinalangkap'u Suti a Ruh kanu Isa al-Masih lu kanu lawas'a ig'u Jordan na inagak den sekanin nu Suti a Ruh taman sa nakalu sekanin kanu tawan-tawan a dalepa. 2 Na dalem'u nakapat pulu gay na sinasat sekanin lu nu Datu na Giadsal. Na nagutem gaid su Isa al-Masih kanu kinaipus'u entu a manga gay ka dala makakan sekanin. 3 Na nia pidtalu nu Datu na Giadsal sa lekanin na "Amaika seka su tunggal'u Kadenan na edtalu ka sa watu a nan i embaluy a pan." 4 Ugaid'a nia inisumpat'u Isa al-Masih na "Nia man nakadalem kanu Kitab na 'Dikena bu man sia mauyag i taw kanu kakan nin sa pegken.' " 5 Na inagak menem sekanin nu Datu na Giadsal lu kanu malambeg a inged ka inipailay nin sa sakelap bu su langun nu pendatuan sia sa liwawaw na dungia. 6 Nia pidtalu nu Datu na Giadsal sa lekanin na "Inggay ku sa leka su bagel'ilan sa kakamal enggu su kakawasan nilan ka pinasegedan bu i nia sa laki enggu mapakay a inggay ku kanu apia entain a mapamili ku. 7 U simban aku nengka na inggay ku sa leka su langun nu entu." 8 Na nia menem inisumpat'u Isa al-Masih na "Nia nakadalem kanu Kitab na 'Simba ka su Kadenan nengka a Mapulu, sa sekanin bu paginugutan nengka.' " 9 Guna su maitu na inialat menem sekanin nu Datu na Giadsal lu kanu puntiuk'u Timpul a 'bpagagaman lu sa Awrusalim. Na nia nin menem pidtalu na "Amaika seka ba su Tunggal'u Kadenan na 'bpatiulug ka kun ba na. 10 Kagina nia nakasulat kanu Kitab na'Sugun nu Kadenan su manga malaikat'in sa katiakap'ilan sa leka. 11 Nakasulat bun i 'Sapipin ka nilan ka enggu di kagkaidan su manga ay nengka lu kanu manga watu.' " 12 Nia inisawal'u Isa al-Masih na "Nia man nakasulat kanu Kitab na 'Di ka pembatalua su Kadenan nengka a Mapulu.' " 13 Guna su nakapasad su Datu na Giadsal kanu manga sasat'in kanu Isa al-Masih na tinagak sekanin gagalu nu Datu na Giadsal. 14 Na minuli den su Isa al-Masih lu sa Galili a linangkapan nu kabarakat'u Suti a Ruh. Na nakalapat den kanu embala-bala a dalepa su makapantag sa lekanin. 15 Namamandu sekanin lu kanu manga 'bpagagaman nu manga Yahudi enggu pinugi sekanin nu langun nu manga taw.
Su Kinakias kanu Isa al-Masih
16 Na guna su linemu su Isa sa Nasarit a pendadalepan nin kanu wata pan sekanin na minangay sekanin lu kanu 'bpagagaman a mana bun su 'gkalayaman nin kanu Gay nu Kabpangintelenen nu manga Yahudi. Na tinemindeg sekanin ka namatia sa Kitab lu kanu manga taw. 17 Na inidual'ilan sa lekanin su Kitab a inisulat'u Nabi Isayas. Na binelat'in den su linulun a Kitab taman sa nia nin natun lu ba a nakadalem na 18 "Pinalihalan aku nu Ruh nu Kadenan, kagina inibetad aku nin a makapayapat kanu Mapia a Tutuma lu kanu manga miskinan.Na sinugu aku nin sia ka enggu ku makapayag kanu manga sinangkalian i kabutawanan den silan, enggu su manga di pamakailay na makapailay ku den silan, taman kanu 'gkangaumis na makapandaya-daya den silan. 19 Na papedsabutan ku bun i nia den ba su kutika a makatingguma su limu nu Kadenan sa kapalipuas'in kanu manga ulipen nin." 20 Guna su napasad'in matia su entu ba a Kitab na linulun nin den menem ka inimbalingan nin kanu pedtuganul lun. Na entu pan ka minayan sekanin. Na pedsusulimanen sekanin nu manga taw lu kanu 'bpagagaman. 21 Na nia nin pan pidtalu sa kanilan na "Samaya na natuman den mambu i nia ba a manga ayatan nu Kitab sa kanu nia bun ba a kutika nu kinakineg'u lun." 22 Na pinugi sekanin nu langun nu manga taw enggu nagaipan nilan sekanin ka mamis i kanggudila nin sa nia nilan pedtalun na "Ngin i nia, kena namba su wata nu Yusup!" 23 Guna su maitu na pidtalu nu Isa sa kanilan i "Natalatantu i panindilen aku nu sa edtalun nu i maya ba 'Tabib, gamuti ka muna i ginawa nengka!' Na nia nin maena na 'Enggalebek ka sia kanu dalepa a ginemawan nengka su entu ba a nakineg'ami a pinggalebek'engka lu sa inged a Kapurnaum.' 24 "Na edtalun ku sa lekanu su bantang na dala nabi a pedtaliman san kanu lekanin demun a dalepa. 25 Saben-sabenal a edtalun ku sa lekanu na benal man a madakel i nabalu a babay sia sa Israil kanu gay a bibiag pan su Nabi Ilias kanu kutika a dala kaulan sa nakatelu lagun enggu tenga. Na sangat a kinanggutem i tinemingguma kanu sakup'u dalepa tanu. 26 Apia ka maitu na da man sugua nu Kadenan su Nabi Ilias a makadtabang kanu manga nabalu a babay sia sa Israil ka lu nin sinugu kanu balu a babay a dikena-Yahudi a lu pendalepa sa Sarepta a sakup'u Sidun. 27 Na kanu timpu a bibiag pan su Nabi Ilisiyu na madakel bun gaid a taw i midsakit sa debpig sia sa Israil. Apia ka maitu na sabap sa di silan 'bpaginugut kanu Kadenan na dala isa bu kanilan i migkapia kanu entu ba a sakit nia tabia na su mama a dikena-Yahudi a si Naaman a ganat lu sa dalepa na Siria." 28 Na guna su nakineg'u manga taw lu kanu 'bpagagaman nu manga Yahudi su pidtalu nu Isa na sangat i kinasakit'u ginawa nilan. 29 Na midtindeg su uman i isa kanilan ka ginuyud'ilan su Isa lu kanu puntiuk'u bakulud a lu bun ba kanu inged'ilan, ka nia nilan 'gkapagitung na idtug'ilan sekanin lu kanu madalem bantu a baugan. 30 Pidsan ka maitu na da makatalus su kahanda nilan ka linemakaw demun sekanin taman sa tinalapas'in su madakel a taw.
Su Kinabugaw kanu Saitan
31 Na guna su maitu na linemu menem su Isa al-Masih kanu inged a Kapurnaum a sakup'u Galili ka nangusiat sekanin lu kanu manga taw sa Gay nu Kabpangintelenen nilan. 32 Na sabap sa aden 'gkakamalan kanu kadtalu nin na labi a nangagaip su manga taw lu kanu manga usiatan nin. 33 Saleta mambu na lu kanu 'bpagagaman nu manga Yahudi na aden lu ba mama a inasukan na saitan. Na inibpedan nin sa katanug su kinalalis'in sa 34 "Huy, Isa sa Nasarit, ngin i kahanda nengka sa lekami? Ngintu sinemia ka asal'a masikesa kami nengka? Katawan ku u entain ka, seka su Suti a ganat kanu Kadenan." 35 Ugaid'a binugaw nu Isa su minasuk kanu mama a entu sa "Lenek ka san! Awa ka san sa mama a nan." Na linunuk'u saitan su mama bantu lu kanu adapan nilan entu pan ka inawan sekanin nu saitan sa dala nin pamakaidani. 36 Na nagaip su manga taw taman sa nakapamagidsaya silan sa "Ngin i nia ba? Badtug besen i nia a mama ka 'gkasugu nin su manga tunung taman sa pinaawa nin silan sa ukit'u bagel'in enggu kamal'in." 37 Na su manga tudtulan a pantag kanu Isa na nakapayapat kanu embala-bala a pagingedan.
Su Kinapagkapia nu Isa al-Masih kanu Pedsakit
38 Na ginemanat den su Isa lu kanu 'bpagagaman nu manga Yahudi ka tinemalus sekanin lu kanu walay ni Simiun. Na su panugangan ni Simiun a babay na pegkayaw na nadtalu nilan kanu Isa al-Masih i pantag sa lekanin. 39 Na inubay nu Isa su babay a entu lu kanu 'bpagigan nin ka pinagkapia nin. Na naawa den su mayaw nin enggu midtindeg enggagan su babay a entu ka tinalagadan nin silan. 40 Guna su sinemedep den su senang na langun nu aden pakat'in a pedsakit sa embalang-balang a manga sakit na pinananggit'ilan den lu kanu Isa. Na pendapenetan nin bu su uman i isa na pegkapia den su manga sakit'ilan. 41 Maitu bun su manga saitan na namakaawa silan kanu inasukan nilan. Na nia nilan pakalalis na "Seka su Tunggal'u Kadenan!" Kagina ka natawan nilan i sekanin su Masih a ganat kanu Kadenan na sinapalan nu Isa su manga saitan bantu sa di den silan edtalu. 42 Guna su 'gkatibuas na ginemanat den su Isa kanu dalepa ka linemu menem sekanin kanu dalepa a tawan-tawan. Na pinangilay den sekanin nu madakel a taw. Na guna nilan matun na 'bpagayukan nilan sa di pan babaya sekanin makaw. 43 Ugaid'a nia nin pidtalu kanilan na "Inibpaliugat sa laki i makapangusiat ku lu kanu ped a manga dalepa su mapia a kadtalu nu Kadenan pantag kanu kapendatu nin ka namba i sinuguan nin sa laki a enggulan ku." 44 Na nangusiat sekanin lu kanu manga 'bpagagaman na Yahudi a sakup'u pagingedan na Yudia.
Su Isa al-Masih enggu su manga Patutuges
1 Kanu isa a gay a 'bpangusiat su Isa lu kanu ligid'u lanaw nu Ginisarat na pedsaseka bu su madakel a taw lu ka enggu silan pakakineg kanu kadtalu nu Kadenan. 2 Na nailay nu Isa su dua timan a awang sia kanu ligid'u lanaw a inikilid'u manga patutuges ka penggagasan nilan su manga ambit'ilan. 3 Na guna su maitu na nageda den su Isa kanu satiman a awang a nia lun kigkuan na si Simiun. Na inipakalud'in sa paidu entu pan ka nagagayan sekanin enggu nangusiat kanu manga taw. 4 Guna su nakapasad sekanin mangusiat na pidtalu nin kani Simiun i "Kalud kanu enggu iulug'u su ambit'u ka enggu kanu makakua sa madakel a seda." 5 Na nia inisumpat'i Simiun kanu Isa na "Mapulu, nalugat kami gaid mangambit kagina magabi na da bun nakua nami. Ugaid'a kagina ka seka demun i midtalu lun sa laki na iulug ku su ambit'ami." 6 Guna su naulug den su ambit'ilan na nakakua den silan sa madakel gaid a seda taman sa nia bu sama na makisi su ambit'ilan. 7 Na kinayap'ilan su manga kaped'ilan a manga patutuges ka enggu silan pakatabang. Minubay mambu silan ka binatun nilan den su ambit'ilan enggagan. Nalulanan den su dua timan a awang taman sa napenu den na seda enggu sama bu di makageled. 8 Guna su nailay ni Simiun Pitru su nanggula bantu na sinemugiud sekanin sia kanu adapan nu Isa ka nia nin pidtalu na "Hu Mapulu na ganati aku den ka suti ka gaid ka saki na baladusa aku man." 9 Sabap kanu entu ba a madakel a seda i nangakua nilan na nagaip den si Simiun apeg'u manga kaped'in. 10 Na maitu bun mambu si Yakub enggu si Yuhan a manga wata ni Zabidi. Na silan bantu su manga tagapeda ni Simiun sa galebekan.Saleta na nia pidtalu nu Isa al-Masih kani Simiun na "Da ka 'gkagilek, ka iganat saguna na nia ka den pangua na su manga taw a pakasibay sia kanu lalan a matidtu." 11 Mandiadi na nakakilid'ilan su manga awang'ilan enggu initagak'ilan den su langun taman nilan ka minunut silan kanu Isa al-Masih.
Su Kinapagkapia sa Sakit a Debpig
12 Na kanu timpu a lu su Isa al-Masih kanu isa a inged na aden lu mama a pedsakit sa debpig. Guna nin mailay su Isa al-Masih na sinemugiud sekanin kanu adapan nin enggu pinagayukan nin sa "Hu Mapulu, na amaika miug ka na makapagkapia aku nengka." 13 Na kinawa nu Isa su mama a entu ka inipu nin. Na nia nin pidtalu na "Uway, pegkiug aku. 'Gkapia ka den!" Na midsambuta gaid i kinaawa nu sakit'u mama a entu. 14 Na pidtutuman den nu Isa su entu a mama sa nia nin pidtalu na "Di ka pedtalua sa apia entain i makapantag sa nanggula nengka. Ugaid'a lu ka den muna kanu manga 'bpangurban ka dait man a ipailay nengka sa kanilan su lawas'engka. Na entu pan ka 'gkanduli ka, ka enggu nengka makapailay kanu manga taw i naulian ka den. Na maitu ba i wagib a kapaginugut sia kanu suguan nu Nabi Musa." 15 Pidsan ka maitu na su tudtulan a pantag kanu kinabadtug'u Isa na nakapayapat den sa embala-bala a inged. Na madakel gaid a manga taw i mindidilimudan ka 'bpakikinegen nilan su manga usiatan nu Isa enggu pinagkapia nin kanu manga sakit'ilan. 16 Ugaid'a nia katatapan kanu manga gay na 'bpelu sekanin kanu dalepa a da taw nin ka 'bpangeni-ngeni sekanin kanu Kadenan.
Su Mama a Minatay i Lawas'in
17 Na aden isa a gay a 'bpangusiat su Isa al-Masih na nia 'bpamagagayan lu na su manga taw a lusud kanu lumpukan a Parisiyu enggu su manga gulu nu pangitaban a lu nakabpun sa Galili, sa Yudia enggu sa Awrusalim. Na su kabarakat'u Kadenan na linemangkap sa lekanin sa makapagkapia nin su aden sakit'in. 18 Guna su maitu na aden manga mama a pembantialen nilan su kaped'ilan ka minatay den i lawas'in na pedtukawan nilan 'bpananggit su entu a mama lu kanu ludep'u walay kanu adapan nu Isa. 19 Sabap sa di silan pakaludep ka madakel a taw lu na namantek silan lu kanu atep'u walay. Na linekat'ilan den su atep ka lu nilan initudtun kanu adapan nu Isa su ped'ilan a pedsakit. 20 Na su kinailay bu nu Isa kanu kasela nu salig'ilan kanu Kadenan na nia nin bu nadtalu kanu mama a pendalu na "Pakat ku, inampun den su kadusan nengka!" 21 Na nia nadtalu sa ginawa nu manga taw a lusud kanu lumpukan a Parisiyu enggu su manga gulu na "Ssst, entain basi i nan a mama a nakasakutu sa Kadenan? Entain pan i makapangampun sa kabaladusan u dikena su Kadenan bu?" 22 Ugaid'a natawan den nu Isa su entu ba a manga itungan nilan. Nia nin pidtalu sa kanilan na "Enduken ka pebpapalawa kanu? 23 Ngin i kalangan nu lun, endaw basi i malemu a edtalun ku sa 'Inampun ku den su kabaladusan nengka, ' udi na edtalun ku i 'Edtindeg ka enggu lakaw ka?' 24 Ugaid'a ipaamad ku sa lekanu i aden kamal'u Kaka nu Manusia sia sa dungia sa kaampun nin sa kabaladusan." Saleta na nia nin pidtalu kanu mama a minatay i lawas'in na "Saki i pedsugu sa leka na edtindeg ka! Na it ka i igan nengka a nan ka uli ka den!" 25 Kanu entu demun ba na midtindeg den su entu a mama sia kanu adapan nu manga taw enggu pinananggit'in su igan nin ka minuli den sekanin a midsukul-sukul kanu Kadenan. 26 Daka su langun nu manga taw na nangagaip den silan enggu linemudsu den silan mugi kanu Kadenan. Na sangat a nangagilekan silan. Na nia nilan pidtalu na "Nakailay kami sa nanggula a di nami den kalipatanan."
Pantag kani Libi
27 Na kinapasad'u entu na linemiu su Isa enggu nia nin nailay na si Libi a 'bpangubela sa buis'u Yahudi kanu entu ba a dalepa a 'bpagagayan sekanin sia kanu kamalig'in. Na nia pidtalu nu Isa sa lekanin na "Unut ka sa laki!" 28 Daka tinagak'in su langun taman nin ka minunut den mambu sekanin kanu Isa. 29 Na pigkandulian ni Libi su Isa sa masela lu kanu walay nin. Na madakel a 'bpangubela i mindidilimudan lu apeg den su manga ped a taw. 30 Guna su maitu na mibpapalawa su manga taw a lusud kanu lumpukan a Parisiyu enggu su manga gulu nu pangitaban kanu 'bpamangunut kanu Isa al-Masih sa nia nilan pidtalu na "Ngintu ka ibpagatuang'engka su manga 'bpangungubela sa buis enggu su manga ped a dupang?" 31 Na nia inisumpat'u Isa sa kanilan na "Dikena nia pakapangilay sa taligamut su manga mabagel ka su manga pedsakit i 'bpangilay sa taligamut. 32 Dikena nia nin sabap i kinasia ku i pedtawagen ku su manga ikelas ka su manga baladusa ka enggu silan makadtaubat."
Pantag kanu Kabpuasa
33 Na nia nilan pidtalu kanu Isa al-Masih na "Su 'bpamangunut kanu Yahiya a 'Bpanalawat na mategel silan 'bpuasa enggu edsambayang na maitu bun su 'bpamangunut kanu lumpukan a Parisiyu. Ugaid'a su 'bpamangunut sa leka na 'bpaginem enggu pegkan pan silan." 34 Nia pidtalu nu Isa sa kanilan na "Dikena wagib a 'bpuasa su manga taw a pegkuyug sa kawingan amaika san pan su taw a pegkawingen. 35 Ugaid'a mauma su kutika a kuan den su mama a kinawing na entu pan ka pabpuasan silan a manga pegkuyug." 36 Na pidtalu nin pan sa kanilan su pakenalan sa maya ba "Da taw a kemisi sa pedtinang a balegkas'in ka itapi nin lu kanu pedtenu a balegkas'in ka di den makandaita 37 enggu da taw a demiken sa ig a unga na ubas lu kanu labing a uyut a upis a kambing ka endaw i kambula-bula nin na di makadsakembut su uyut na makisi taman sa mabubus su dalem'in. 38 Katawan tanu i nia dait a dikenan tanu sa ig'u unga na ubas na su bagu udi na su uyut a makadsakembut ka apia pembula-bula na di makisi enggu di mabubus su dalem'in. 39 Dala isa bu a malilini sa bagu a alak amaika makainem sa danden a alak ka nia nilan bu edtalun na 'Mapia su danden.' "
Pantag kanu Gay nu Kabpangintelenen
1 Na kanu Gay nu Kabpangintelenen nu manga Yahudi na su Isa al-Masih enggu su ped'in na minukit silan lu kanu pangangawidan. Na su 'bpamangunut sa lekanin na tinemupu sa unga na bantad ka inukad'ilan sia kanu lima nilan enggu kinan nilan. 2 Daka isa kanu manga taw a lusud kanu lumpukan a Parisiyu i midtalu sa "Ngintu ka pinggula nu su sungkang kanu pangitaban nu Gay nu Kabpangintelenen?" 3 Na nia inisawal'u Isa sa kanilan na "Nginan da nu mabatia su pinggula nu Nabi Daud kanu kinagutem'in enggu su manga kaped'in? 4 Linemudep sekanin kanu Timpul a 'bpagagaman enggu kinemua sekanin sa pan na su entu a pan na ipendulang kanu Kadenan. Apia ka maitu na kineman sekanin enggu inenggan nin bun su manga ped'in. Na katawan tanu i ipedsapal i entu sia kanu Kitab'u Nabi Musa ka su manga 'bpangurban bu i wagib a keman lun." 5 Na daka pidtalu nin pan kanilan i "Su Kaka nu Manusia i Mapulu a pegkakataw kanu Gay nu Kabpangintelenen."
Su Mama a Minatay i Ngelay nin
6 Na kanu isa a Gay nu Kabpangintelenen na linemu sekanin kanu 'bpagagaman nu manga Yahudi ka 'bpamandu sekanin. Na aden besen lu mama a migkintul i ngelay nin a kawanan. 7 Saleta na lu bun mambu su manga gulu na pangitaban enggu su manga taw a lusud kanu lumpukan Parisiyu ka pedsipatan nilan su Isa al-Masih ka enggu nilan 'gkailay u papegkapian nin su mama sa kanu Gay nu Kabpangintelenen asal'a kasenditan nilan sa pedsungkang sekanin kanu panduan nu manga Yahudi. 8 Ugaid'a katawan den nu Isa su manga kahanda nilan enggu nia nin pidtalu kanu mama a migkintul i ngelay nin na "Tindeg ka enggu sia ka sa kasangulan ku." Guna su maitu na pinggula nu mama a entu su pidtalu nu Isa. 9 Na pidtalu nu Isa sa kanilan i "Ngin i kalangan nu lun kanu nakadalem sia kanu Kitab na enggula tanu sa mapia udi na malat kanu Gay nu Kabpangintelenen? Na ngintu dait a tabangan tanu su taw udi na binasan tanu silan kanu entu a gay?" 10 Na inilay nin silan langun na nia nin pidtalu kanu mama a entu a migkintul i ngelay na "Betel ka i ngelay nengka a nan!" Na pinggula nin su entu, saleta na su lima nin na migkapia den mambu! 11 Guna su maitu na miniseg den su sakit'a ginawa nilan kanu Isa taman sa mimbibitiala silan u panun i pakaidan nilan sa lekanin.
Su Kinapamili kanu manga Sapulu enggu Dua a 'Bpamangunut kanu Isa al-Masih
12 Na su entu demun ba a gay na tinemakedeg den su Isa lu sa palaw. Na su nalalamagan na nangeni-ngeni den sekanin kanu Kadenan. 13 Guna su mapita den na tinawag'in den su 'bpamangunut sa lekanin ka pinamili nin su sapulu enggu dua kataw a manga mama. Na nia ba i mabaluy a masugu nin 14-15 na si Simiun a nia nin lun inibedtu na Pitru, si Anduk su suled'i Simiun Pitru, si Yakub, si Yuhan, si Pilipus, si Bintulumi, si Mataya, si Tumas, si Yakub a wata ni Alpayus, si Simiun a binedtuan sa ribildi, 16 si Yahuda a wata ni Yakub enggu si Yahuda Iskalia a nabaluy a tinemipu kanu Isa.
Su Kinapangusiat'u Isa al-Masih lu kanu Kadatalan na Palaw
17 Guna su linemudus su Isa al-Masih enggu su manga kaped'in na lu silan midtaman kanu maulad a datal na madakel kanu 'bpamangunut sa lekanin i lu enggu sangat i kadakel a manga taw i nangalimud a ganat sa Yudia, sa Awrusalim, enggu ganat sa manga inged a sia tampal sa dedsan nu lagat sa Tair enggu Sidun. 18 Na linemu su entu a manga taw asal'a makineg'ilan su usiatan nu Isa enggu makapagkapia su sakit'ilan. Na pinagkapia nin bun su manga taw a inasukan na saitan. 19 Sabap kanu kabarakat a ganat sa lekanin na nakapagkapia nin silan tanan taman sa langun nu manga taw na 'bpagapas sa maami nilan su Isa. 20 Na linengian nin su 'bpamangunut sa lekanin ka nia nin pidtalu na "Palihalan kanu a manga miskinanka lu sa Mauli a Gay na sampulenan kanu lu sa pendatuan nu Kadenan. 21 Na palihalan bun su sekanu a 'gkangagutem sagunaka enggan kanu bun nu Kadenan sa kauyagan a makasukul sa lekanu.Maitu bun su sekanu a 'bpaguguliang na palihalan kanu bun, ka lu sa Mauli a Gay na sekanu i edtatawa. 22-23 "Na sabap sa masela i salig'u kanu Kaka nu Manusia na makatingguma den su kabensi nu manga ped a taw sa lekanu enggu su kakias'ilan sa lekanu taman sa pagkayan kanu nilan enggu bedtuan kanu nilan sa daluaka. Na maya ba i pinakaidan nu manga katupuan nilan kanu nangauna a nabi. Kagina ka maitu na dait a enggalaw-galaw kanu bun enggu 'bpapayudtu kanu ka natalanged'u su masela a balas ganat kanu Kadenan a pinagadil'in lu sa sulega. 24 "Ugaid'a duan-duan nin den su manga kawasa sagunaka naipus den su langun nu kinagkakalilini nilan sia sa dungia. 25 Na duan-duan nin bun su manga pedsamundala sa kauyagan sagunaka silan menem i enggutem lu sa Mauli a Gay.Na duan-duan nin bun su entain i pedtatawa sagunaka sekanu menem i maguguliang lu sa Mauli a Gay. 26 Na duan-duan nu den amaika pugin kanu nu langun nu manga taw sia sa liwawaw na dungiaka maya bun ba i kinapakaid'u manga katupuan nilan kanu manga 'bpenabi-nabi. 27 "Ugaid'a pakikineg'u sa mapia su pedtalun ku sa lekanu, ikalimu nu sa senep sa atay su kuntela nu. Tabangi nu sa mapia su 'gkabensi sa lekanu. 28 Ipangeni-ngeni nu sa Kadenan i kaumanan su lidseki nu apia entain i pedsinta sa lekanu sa mawag. Na ipangeni-ngeni nu bun su apia entain a pedtipu sa lekanu. 29 Amaika tebpin ka nu taw sia sa kawanan a pipi na ilengi nengka lun su biwang. Na amaika kuan nu taw su lambung'engka na makin enggi ka kanu nasama a banggala nengka. 30 Na enggi ka menem su apia entain a 'bpangeni sa leka. Na amaika kuan nu taw su tamuk'engka na di ka den ipabpaguli lun. 31 Na endaw i dait a pakaidan nu manga tagapeda nengka sa leka na maitu bun ba i paukiti nu sa kanilan. 32 "Na amaika nia nengka bu ikalimu na su taw a malimu sa leka na ngin i mapagasil'engka lun? Apia su manga baladusa na ikalimu nilan bun su malimu sa kanilan! 33 Na amaika nia nengka bu 'bpia-pianan na su taw a minggalebek sa leka sa mapia na ngin i mapagasil'engka lun? Apia su manga baladusa na maitu bun ba i enggulan nilan. 34 Na amaika nia nengka bu pasembayn sa manga gulimet'engka na su taw a maantap'engka i makauli bun su pinasembayan nengka na enduken ka mangingalap ka sa balas'in? Apia su taw a malat i palangay nin na pasembayn nin bun su pagidsan nin asal'a makua nin bun su alaga na pinasembayan nin. 35 Pidsan ka maya ba na nia wagib na ikalimu nu su kuntela nu enggu 'bpia-piani nu silan. Na pasembay nu silan sa di ka manganganay i iuli nilan pan. Kagina ka maitu na inaden sa lekanu su masela a balas enggu su napagatay nu na nia nin kalagidan na mana su atay nu manga wata nu Kadenan a Labi a Mapulu sabap sa inikalimu nin bun su manga taw a di mataw sa ginawa enggu su manga taw a malat i palangay. 36 Pangalimuan kanu sa mana bun su kalimu nu Ama nu.
Pantag kanu Kabpanendit
37 "Na da kanu manendit sa ped a manga taw ka enggu di kanu sikesan nu Kadenan lu sa Mauli a Gay. Di nu bun demaway su ped a taw ka enggu kanu di kawagiban lu sa Mauli a Gay. Ilila nu kanu kaped a taw su manga galebek'ilan sa lekanu a malat ka enggu kanu ampunen nu Kadenan. 38 Enggi nu su manga ped a taw ka enggan kanu nu Kadenan sa balas taman sa maasek-asek enggu mamelapay kanu puyuan nu su matalima nu lun. Na su asadan nu inenggay nu sa manga taw na entu bun ba i asadan nu Kadenan sa balas'in sa lekanu." 39 Na pidtalu nu Isa sa kanilan su nia a pakenalan nin: "Na amaika aden isa a di pakailay na dili maagak'u isa bun a di pakailay. Na amaika enggulan nilan i entu ba na madua silan maulug sa kakal. 40 Na dala isa a mulit i kalawanan nin su gulu nin. Ugaid'a amaika mapasad den su inipamandu lun na magidsan den i natawan nilan dua. 41 "Ngintu ka madsima nengka su puling'u suled'engka inunta na di nengka besen ipedtagu sa ginawa su leka a puling a mana den lendu. 42 Di dait a edtalun nengka kanu suled'engka i 'Hu kaka, na ampun ka bu na iawa ku i puling a nan sa mata nengka' na inunta na di nengka 'gkadsima su leka a puling a mana den lendu a minetu san kanu mata nengka. Na seka menem a makibadtugen na badtud ka muna su mana den lendu a minetu kanu mata nengka entu pan ka mailay nengka sa mapia enggu mapia i kaawa nengka kanu puling'u suled'engka. 43 "Na su kayu a mapia i kabpaguyag-uyag'in enggu 'gkatayud na di munga sa mawag. Na maitu bun su kayu a magasa enggu dili 'gkatayud na dili mambu munga sa mapia. 44 Na sia nengka katawan i embiasan na kayu kanu unga nin. Di ka makagupu sa unga na kayu kulema lu kanu kayu a teneken udi na di munga su saging a pakal sa bagiaw. 45 Kagina ka maitu na su taw a mapia i palangay nin na nia nin makapayag na su kapia nu palangay a ganat kanu atay nin. Na su mawag menem a taw na nia nin bun makapayag na su kawag'a palangay nin a ebpun kanu mawag a atay nin. Na sabap sa endaw i nakadalem enggu 'bpamelapay den kanu atay nu taw na entu bun ba i edtalun nu ngali nin.
Su Pakenalan a pantag kanu Kambalay
46 "Na ngintu ka pembedtuan aku nu sa Mapulu inunta na di nu pamun ipenggulalan su inisugu ku sa lekanu? 47 Na apia entain i semia sa laki sa pakikinegen nin sa mapia su pitua ku taman sa paginugutan nin na ipailay ku sa lekanu i kalagidan nin. 48 Na makalagid sekanin kanu mama a mimbalay. Na kinemalut sekanin sa madalem enggu linudsuan nin mudsud su palaus'u walay nin lu kanu liwawaw nu lakungan. Sabap sa mabagel i kinabudsud lun na guna degan su lawas'u ig na dala mageba. 49 Ugaid'a apia entain i makakineg kanu pitua ku na nia mauli lun na di nin paginugutan na nia nin kalagidan na su mama a mimbalay sa dala nin embageli mudsud su palaus'in. Daka guna den masugat'a degan na nagubal taman sa nabinasa a benal su walay a entu."
Su Panunugun nu 'Gkaunutan nu Ruma
1 Guna su napasad den nu Isa edtalu kanu langun nu taw su entu na linemu den sekanin sa Kapurnaum. 2 Na aden lu 'gkaunutan na sundalu na Ruma na aden panunugun nin a ipegkalimu nin gaid. Na pendalu su entu a panunugun enggu pedsakalmaut den. 3 Guna makineg'u 'gkaunutan nu sundalu na Ruma su pantag kanu Isa na sinemugu sa 'gkangaunutan nu manga Yahudi sa lemu pan su Isa sa lekanin ka enggu nin makapagkapia su panunugun nin. 4 Na nauma nilan su Isa na pinamagayukan nilan sa lemu pan sekanin. Na nia nilan pidtalu na "Su nia ba a mama na Ruma na dait a kabalasan nengka sekanin. 5 Ipegkalimu nin su manga Yahudi taman sa napaumbal sekanin sa 'bpagagaman nami." 6 Guna su maitu na minunut den kanilan su Isa.Na guna su masiken den sekanin kanu walay na sinumbak den nu manga pakat'u 'gkaunutan a pinanutuman nin silan sa nia nilan edtalun kanu Isa na "Mapulu, di ka den ibpagangga sa ginawa nengka i entu. Di dait a palun ku pan seka kanu walay ku. 7 Maitu bun da ku ikalang i makadait kanu ginawa ku i lemu aku pan sa leka. Ugaid'a apia edtalun nengka bu i 'gkapia su panunugun ku na 'gkapia den. 8 Saki mambu na inenggan aku bu sa kamal a ganat kanu mapulu pan sa laki. Aden bun manga sundalu ku. Na amaika sugun ku su isa kanilan sa 'Lu ka, ka enggula ka i nia' na enggulan nin, udi na 'Sia ka' na semia sekanin. Na edtalun ku kanu ulipen ku i 'Enggalebek ka i nia' na enggalebeken nin bun." 9 Guna su nakineg'u Isa su nia na nagaip sekanin. Na linemengi sekanin ka pidtalu nin kanu madakel a taw a pedtundug sa lekanin i "Da aku pamun makailay sa maya ba i kasela na salig'in apia sia kanu manga taw sa Israil." 10 Na mimbalingan den su manga pidtutuman lu kanu walay nu 'gkaunutan na sundalu na Ruma na mapia den mambu su ulipen nin a entu a pendalu.
Su Tunggal a Wata nu Balu
11 Guna su naipus i entu na minangay su Isa al-Masih lu kanu inged a Nain. Na minunut den sa lekanin su 'bpamangunut lun enggu su makapal a manga taw. 12 Endaw i kinauma nilan kanu bengawan nu inged bantu na pakadsumbak silan sa madakel a taw a pembantial sa mama a ibpelebeng. Na su mama a minatay na tunggal enggu su ina nin na balu den. Na madakel kanu manga taw a ebpun kanu dalepa nilan i 'bpagunut kanu ina nu minatay sa kabpelebeng lun bantu. 13 Guna su nadsima nu Mapulu a su Isa su babay a entu na sangat a nalat i ginawa nin lun. Nia nin pidtalu na "Aday Babu, telen ka den 'bpaguliang." 14 Na inubay nu Isa su inibantial kanu bangkay ka inami nin, saleta na su manga pembantial lun na mibpalen. Na nia nin pidtalu kanu minatay na "Uting, saki ba i pedtalu a nia, embangun ka!" 15 Na mimbangun mambu sekanin enggu nagagayan taman sa midtalu. Na inipalad sekanin nu Isa lu kanu ina nin. 16 Naadenan na gilek su manga taw enggu pinugi nilan su Kadenan sa nia nilan pidtalu na "Mibpapayag den sia sa lekitanu su barakat a nabi!" enggu "Inipapait'u Kadenan sia su 'bpamelipuas sa lekitanu a manga ulipen nin!" 17 Na su entu a tudtulan pantag kanu Isa al-Masih na nakapayapat den kanu sakup'u Yudia enggu lu kanu nakabalibet a manga pagingedan.
Su manga Sinugu nu Yahiya a 'Bpanalawat
18 Na su 'bpamangunut kanu Yahiya a 'Bpanalawat na pidtalu nilan sa lekanin su langun nu entu ba a nanggula. 19 Na tinawag den nu Yahiya su dua kataw a 'bpamangunut lun ka sinugu nin silan lu kanu Isa al-Masih, ka inipaidsa nin i "Ngintu seka ba su inibpasad'u Kadenan a pakauma atawa ka mamamati kami pan sa ped?" 20 Guna su nakauma den silan lu kanu Isa na pidtalu nilan den i "Sinugu kami nu Yahiya a 'Bpanalawat ka ipabpagidsa nin u ngintu seka ba su inibpasad'u Kadenan a pakauma atawa ka mamamati kami pan sa ped?" 21 Na kanu entu a kutika na madakel den a taw i pinagkapia nu Isa kanu manga sakit'ilan. Na su manga naasukan na manga saitan na pinaawa nin den kanilan enggu su manga di pakailay na pinailay nin silan. 22 Mandiadi na sinumpatan nin su manga sinugu ni Yahiya sa "Embalingan kanu den enggu edtalu nu kanu Yahiya u ngin i nangailay nu taman sa ngin i nangakineg'u na su di pamakailay na namakailay den, su manga tiud na namakalakaw 'bpaluman enggu su entain i 'gkapasangan na sakit a debpig na migkapia den. Na su manga bisu na nakakineg den, su minatay na mimbibiag 'bpaluman enggu su Mapia a Tutuma na inipangusiat den kanu manga miskinan. 23 Na palihalan su entain i dala endua-dua su atay nin pantag sa laki." 24 Guna su nakaganat den su 'bpamangunut kanu Yahiya na linemudsu den su Isa al-Masih edtalu-talu lu kanu madakel a taw makapantag kanu Yahiya. Nia nin pidtalu na "Su kinalu nu kanu Yahiya lu sa tawan-tawan a dalepa na ngin i napanganganay nu a mailay nu lun? Ngin basi, su laun a tiugaw a 'gkasugat'a sambel? 25 U di na enduken ka 'bpeliu kanu? Ngin i 'gkalilinian nu lu 'bpagilay? Su mama a mimbalegkas sa matinang i palas'in? Na su mamba i palas'in na 'gkauyag lu kanu dalem'u tulugan nu manga datu. 26 Edtalun nu sa laki i nia nu besen kabpeliu na enggu kanu pakailay sa nabi. Uway, inunta na nakailay kanu bun sa masela i kinalawan nin sa nabi. 27 Kagina si Yahiya na sekanin i nakadalem sia kanu Kitab a maya ba i pidtalu nu Kadenan, 'Paunan ku sa leka su Pedsugun ku, ka enggu nin 'gkapagadil su lalan nengka.' 28 Edtalun ku sa lekanu i su Yahiya na badtug a da limbang'in sia kanu langun nu manga mama a naguyag-uyag sia sa liwawaw na dungia. Ugaid'a apia entain i makaludep kanu pendatuan nu Kadenan na apia ngin i kababa na 'gkatamanan nin lu na kalawanan nin pan su 'gkatamanan nu Yahiya saguna!" 29 Na nakineg sekanin nu langun nu manga taw labi-labi den su manga 'bpangubela sa buis. Na napasalawat silan kanu Yahiya ka silan ba mambu i namaginugut a manga baladusa enggu pedsalig silan kanu inipanutuma nu Kadenan. 30 Ugaid'a su manga taw a lusud kanu lumpukan a Parisiyu enggu su manga gulu na pangitaban na silan bantu su tinemaligkud kanu kahanda nu Kadenan taman sa da silan pasalawat kanu Yahiya. 31 Pidtalu pamun nu Isa i "Ngin i kalagidan ku lun i nia a manga taw sa saguna a nia a gay? Ngin basi i pagidsan nilan? 32 Mana silan manga wata a 'bpagagayan bu lu sa padian. Uman i isa na lalisan nin su ped'in sa'Pedtambulan nami den sekanuna di kanu pedsagayan, na pembayukan nami den sekanu sa makalat sa ginawaugaid'a di kanu 'bpaguliang.' 33 Su kinauma ni Yahiya a 'Bpanalawat na mibpuasa sekanin enggu dili 'bpanginem sa makalangut. Ugaid'a nia nu pedtalun na 'Inasukan sekanin na saitan.' 34 Guna su maitu na nakauma menem su Kaka nu Manusia sia sa liwawaw na dungia a pegkan enggu 'bpaginem. Nia nu menem pedtalun na 'Ilay nu ba i mama a nan a busawn enggu palalangut. Nia nin pakat na su manga 'bpangubela sa buis enggu su manga baladusa!' 35 Apia ka maitu na su kataw nu Kadenan na naamad a benal lu kanu langun nu namedtalima sa lekanin."
Su Kinalu nu Isa al-Masih kanu Walay nu Taw a Lusud kanu Lumpukan a Parisiyu
36 Na aden isa a taw a lusud kanu lumpukan a Parisiyu a bedtuan sa Simiun i minenggat kanu Isa al-Masih sa lu pan keman kanu walay nin. Na minunut den mambu su Isa al-Masih lu kanu walay nin. Na daka sinemandang den silan ka kineman. 37 Na lu ba kanu dalepa a entu na aden pegkaleben a babay a sundal. Na sabap sa nakineg'in i lu pegkan su Isa al-Masih kanu walay nu taw a lusud kanu lumpukan a Parisiyu na nananggit sekanin lu sa tamuk a 'bpanaguan sa lana a mamut na pinenu-penu nin sa kamutan. 38 Na lu sekanin midtindeg kanu taligkudan nu Isa al-Masih sia kanu ubay nu ay nin. Na 'bpaguguliang sekanin taman sa 'gkalumes den nu lu nu mata nin su ay nu Isa. Daka pedsidsingan nin kanu buk'in su ay nu Isa al-Masih ka asal bu na 'gkamalan. Na 'bpaniumen nin su ay nu Isa enggu pembubusan nin sa kamutan. 39 Guna den mailay nu taw a lusud kanu lumpukan a Parisiyu su entu ba na nia nadtalu nu ginawa nin na "Nah, amaika tidtu-tidtu a nabi i mama a nia na wagib i katawan nin u entain ba i nia a babay a 'bpagipu sa lekanin. Na maitu bun katawan nin u ngin i ukit a kabpaguyag-uyag'in." 40 Na pidtalu nu Isa sa lekanin i "Simiun, aden pedtalun ku sa leka."Nia nakasumpat'i Simun na "Ngintu ba? Edtalu ka sa laki, Gulu." 41 Nia pidtalu nu Isa na "Aden kun dua kataw a manga mama a minutang sa kuleta lu kanu pabpangutang. Na su sakataw na minutang sa lima gatus a pilak na su sakataw menem na lima pulu a pilak i inutang'in. 42 Na guna su maitu na apia entain den kanilan dua na di den makagaga mayad sa utang'in. Bali, pinunas den nu inutangan nilan su ngala nu dua kataw a entu a taw. Guna su maitu na entain ba kanilan dua i labi a mapadtaya sa lekanin?" 43 Nia inisumpat'i Simun na "Kalangan ku lun na su masela bun i nautang'in."Na pidtalu nu Isa i "Entu ba, nakasugat ka!" 44 Daka linengian nin su babay enggu pidtalu nin kani Simiun,"Ngintu Simiun, 'gkailay nengka i babay a nia? Nakasia aku kanu walay nengka na da aku nengka enggi sa ig a makagagas ku sa ay. Ugaid'a sekanin na nagagasan nin su ay ku kanu lu nu mata nin enggu pinakamalan nin su ay ku sa pinanidsingan nin kanu buk'in. 45 Da aku nengka masakaw sa sinium aku nengka ugaid'a sampay saguna na di pamun pedtelen sa kabpanium'in kanu ay ku sa endaw demun i kinauma ku sia. 46 Da nengka demun pagadili sa lana a mamut i ulu ku. Ugaid'a sekanin na tinaneb'in den sa kamutan i ay ku a nia. 47 Na edtalun ku den sa leka i su tidtu-tidtu a kinapadtaya nin sa laki a inipailay nin na namba i amadan nu kadakel'u kabaladusan nin a inampun den. Ugaid'a apia entain i paidu bu i kinaampun lun na paidu bun mambu i kapadtaya-taya lun." 48 Na pidtalu nu Isa kanu babay i "Su kabaladusan nengka na inampun den." 49 Na su ped a manga ana lu kanu pendulangan na nakambibitiala sa "Entain i namba a mama a apia su kabaladusan na 'bpagampunen nin?" 50 Ugaid'a pidtalu nu Isa kanu babay i "Sabap kanu salig'engka kanu Kadenan na namba i nakatebus sa leka kanu manga kabaladusan nengka. Na lu ka den, embaya-baya ka den."
Su Pakenalan nu Pembubul kanu Embalangan nu Lupa
1 Guna su natana-tana den na nangasagadan den nu Isa al-Masih su manga inged a magidsan i madidu enggu masela sa kabpangusiat'in sa Mapia a Tutuma pantag kanu kapendatu nu Kadenan. Na midtatanggunut sa lekanin su sapulu enggu dua kataw a 'bpamangunut lun. 2 Na su manga babay a inawan nin sa sakit enggu su manga inasukan nu saitan a pinaawa nin na minunut bun sa lekanin. Na isa sa kanilan si Mariam a binedtuan sa Magdalina. Na sekanin bantu su inasukan nu pitu timan a saitan a pinaawa nu Isa. 3 Maitu bun si Yuhana a kaluma ni Kusa a 'gkaunutan nu penggalebek sa tulugan ni Datu Hirud. Na maitu bun si Susana enggu madakel pan i ped a manga babay a pinagusal'ilan su kuleta nilan sa kinatabang'ilan kanu Isa al-Masih taman kanu 'bpamangunut lun. 4 Na da den pinda na kapegkauma nu manga taw a ganat sa midtundug-tundug den a inged a 'bpelu kanu Isa. Guna su natimu-timu su madakel a taw na pidtalu nin su pakenalan nin. 5 Nia nin pidtalu na "Aden kun mama a 'bpelu sa dalem ka pedsaud sa uni. Na su kinasaud'in lun na su ped a uni na lu nakaidtug kanu lalan nu manga taw. Na nadakudak enggu kinan bu nu manga papanuk. 6 Su ped menem na lu nakaidtug kanu liwawaw nu tangkapa. Sabap kanu lupa a manipis a nataguan nin na mamala na nalanes den su leteb'in. 7 Na su ped menem na lu nakaidtug kanu teneken a damautan a naguyag-uyag ugaid'a inigeled bu nu utan a teneken. 8 Na su ped a lu nakaidtug kanu mapia a lupa na minetu sa mapia enggu minunga sa nakamagatus takep uman i satiman a lagas."Na nia den mauli lun na pidtalu nu Isa sa matanug i "Pakikineg kanu 'bpia-pia, di nu bu mapalambas sia kanu bala a tangila nu."
Su Maena nu Pakenalan
9 Na ibpagidsa nu 'bpamangunut lun u ngin kun i maena na pakenalan nin bantu. 10 Nia nin inisumpat na "Su tidtu-tidtu na makapantag kanu kapendatu nu Kadenan na inipagena kanu manusia sa nauget den a gay. Ugaid'a ipebpayag ku sa lekanu su kahanda nin. Na su ped a manga taw a dili 'bpaginugut sa laki na ipayag ku kanilan sa ukit a manga pakenalan'ka matag silan pedtulik na di nilan pedsusulimanen, enggu apia 'gkakineg'ilan bun na di nilan kasabutan.' 11 "Nia ba i maena nu pakenalan ku. Na su manga uni bantu na entu den ba su upaman nu kadtalu nu Kadenan. 12 Na su manga uni a lu nakaidtug kanu ligid'u lalan na entu ba i kalagidan nu entain i 'bpakikineg kanu Kadenan. Ugaid'a guna makauma su Datu na Giadsal na inagaw nin su kadtalu nu Kadenan kanu atay nilan asal bu na di silan makapalitiala enggu di silan makalipuas. 13 Na su uni menem a lu nakaidtug kanu liwawaw nu tangkapa na entu ba menem i kalagidan nu taw a 'bpakikineg sa kadtalu nu Kadenan enggu apia pedtaliman nilan sa mapia na dili pedsenep kanu atay nilan kagina mangagan bu i kabpaginugut'ilan. Na amaika makatingguma den su kabatalu kanilan na makasibay silan kanu lalan a matidtu. 14 Na su isa menem a uni a lu nakaidtug kanu utanen a lupa enggu madakel i tenek'in na entu ba menem i kalagidan nu entain i 'bpamakikineg, ugaid'a sabap kanu manga lidu nu ginawa enggu su manga kaaden na uyag-uyag a makagkapia sa ginawa apeg den su kapegkalilini sa malat-mapia na nalipatanan nilan su salig'ilan kanu Kadenan taman sa da den masabpet'ilan a mapia. 15 Na su uni menem a lu nakaidtug kanu masebud a lupa na nia menem ba i kalagidan nu manga taw a nakikineg kanu kadtalu nu Kadenan enggu initagu nilan sa ginawa taman sa sinemenep den kanu atay nilan i kabpaginugut'ilan lun. Na silan bantu i nakatigkel taman sa nakasabpet silan sa mapia.
Pantag kanu Palitan
16 "Na katawan nu i dala isa a taw i temutud sa palitan a dapengan nin sa kalanda udi na ibetad kanu aung'u katri nin ka nia pan mula na lu dait ibetad kanu 'bpanaguan sa palitan ka enggu mailay nu taw a 'bpeludep su kaliwanag'in. 17 Maitu bun mambu apia ngin i ipagena nengka na lemiu bun sa malinawag enggu apia ngin i putusen nengka na makagemaw bun kanu putus'in. 18 Kagina ka maitu na itagu nu sa ginawa su langun nu kadtalu ku ka apia entain sa lekanu i nakatuntay kanu kadtalu nu Kadenan na edsisinggumanan nu Kadenan su natuntayan nilan kanu kadtalu nin. Ugaid'a su entain menem i da nin talima su kadtalu nu Kadenan na apia mana bu tepung su natuntayan nin na iawa bun nu Kadenan sa lekanin."
Su Kinauma nu Ina nu Isa al-Masih
19 Na nakauma den su ina nu Isa enggu su manga ali nin lu kanu 'bpangusiatan nin. Ugaid'a sabap kanu makapal a manga taw na di silan pakaandung. 20 Aden isa a taw a midtalu kanu Isa sa "Si ina nengka enggu su manga suled'engka na nan sa liu pedtindeg ka 'gkapanganganay nilan i makapamagilaya kanu." 21 Ugaid'a nia nin pidtalu kanu manga taw na "Nia ku ina enggu manga suled na su apia entain i 'bpakikineg enggu 'bpaginugutan nin su kadtalu nu Kadenan."
Su Kinapatelen nu Isa al-Masih kanu Sambel
22 Na kanu isa a gay na nageda su Isa al-Masih kanu awang apeg'u 'bpamangunut lun. Na pidtalu nin sa kanilan i "Lemipag tanu." Na ginemanat den silan. 23 Na su kapembedtas'ilan kanu lanaw na nakatulug su Isa. Na da matana-tana na sinemambel sa sangat i kabagel'in. Na sama bu di igeled'a ig su awang'ilan, benal den a makagkaid. 24 Na inangayan nu 'bpamangunut lun su Isa al-Masih ka pinukaw nilan. Nia nilan pidtalu na "Mapulu! Mapulu, gedam ka! Matay tanu den!"Na mimbuat su Isa al-Masih ka pinatelen nin su sambel enggu su bagel na tinemelen den taman sa natekaw demun su kinalinaw nu lanaw. 25 Daka nia nin pidtalu kanu 'bpamangunut lun na "Endaw den nakasangul su palitiaya nu kanu Kadenan?"Na nangagaip silan enggu nagilekan taman sa namagidsaya silan sa "Ngin den i nia a mama ka 'gkasugu nin i sambel enggu bagel na 'bpaginugutan nilan?"
Su Kinapagkapia kanu Mama a Inasukan na Saitan
26 Na linemayag den su Isa al-Masih enggu su 'bpamangunut lun na lu silan nakadunggu sa dalepa a binedtuan sa Girasa a nakadsalipag bun nu Galili. 27 Guna su tinemepad den su Isa lu kanu dedsan na inalaw sekanin nu mama a lu ba kanu dalepa a entu. Na su entu a mama na inasukan na manga saitan enggu nauget den di pembalegkas enggu di 'bpaguli sa walay ka lu pegkakaleben kanu 'bpamelebengan a manga takub. 28 Na guna nin mailay su Isa na linemalis sekanin sa matanug enggu sinemugiud den kanu ay nu Isa sa nia nin nadtalu sa matanug na "Isa a Tunggal'u Kadenan, enduken ka 'bpangutiapan aku nengka? 'Bpangenin ku sa leka i di aku pedsikesa." 29 Na nadtalu nin i entu kagina pembugawn nu Isa su manga saitan sa maawa kanu lawas'u mama. Na madakel den a manga saitan i nakaasuk lun. Apia pembilanggun sekanin nu manga taw lu taman sa pegkandaduan nilan pan na penggetasen nu manga saitan su manga lantay-lantay na makin nilan ipedsedseg sekanin lu sa tawan-tawan a dalepa. 30 Na inidsa nu Isa sa lekanin i "Entain i ngala nengka?"Nia nin inisawal na "Sakian-kian," kagina madakel den a saitan i nakaasuk sa lekanin. 31 Na pidsasalumanan den nu manga saitan mangeni kanu Isa sa di den silan ipait lu sa Kalut a Nangilem-kilem. 32 Na aden manga gembut lu kanu pipi nu bakulud na pinangeni nu manga saitan kanu Isa i lu silan ba ipaasuk. Na miniug sekanin. 33 Na minawa den su manga saitan lu kanu mama a entu ka lu silan minasuk kanu manga gembut. Na langun nu manga gembut bantu na namalalaguy enggagan lu kanu takilidan nu bakulud ka namedtibpu lu kanu lanaw. Na nangaled silan langun. 34 Na guna mailay nu manga mama a pedtuganul kanu entu ba a manga gembut su nanggula nu ayam'ilan na nalalaguy den silan enggagan ka inipayapat'ilan kanu manga taw sa inged taman lu sa kanu manga taw sa dalem su nailay nilan. 35 Na madakel a taw i nameliu ka inilay nilan u ngin i nanggula. Guna nilan mauma su Isa na aden den balegkas'u mama a entu a naawan na saitan enggu nakatidtu den mambu su itungan nin. Kagina ka maitu na nangagilekan silan. 36 Su langun nu nakailay kanu entu a nanggula na inilakit'ilan kanu madakel a taw u panun i kinapagkapia nin kanu mama a inasukan a manga saitan. 37 Mandiadi na langun nu taw kanu dalepa a Girasa na namugaw kanu Isa kagina naawan silan na makatu sa kinagilek'ilan. Daka nageda den mambu su Isa kanu awang ka gemanat den. 38 Na su mama a entu a naawan na manga saitan na 'bpamagayuk den kanu Isa sa paunuten nin den sekanin. Ugaid'a pinauli sekanin nu Isa sa nia nin pidtalu na 39 "Uli ka, ka panudtul ka u ngin i initabang'u Kadenan sa leka." Na mindadalakaw den su entu a mama kanu inged ka inipayapat'in den su pinakaidan lun nu Isa.
Su Wata a Babay a Minatay enggu su Babay a 'Bpamundaken na Lugu
40 Na guna su linemipag embalingan su Isa kanu lanaw na inalaw den sekanin nu madakel a taw kagina 'bpangangapan nilan bun sekanin. 41 Na aden isa a mama a binedtuan sa Yairus i nakauma. Sekanin i pegkamal kanu isa a 'bpagagaman nu manga Yahudi. Na sinemugiud den sekanin kanu Isa ka 'bpagayuken nin i munut su Isa lu kanu walay nin 42 kagina su tunggal-tunggal a wata nin a babay a nakasapulu enggu dua lagun i umul'in na pebpaya.Guna su minunut su Isa kani Yairus na pidtalikupan den silan nu makapal a taw. 43 Na nakaamung kanu madakel bantu i isa a babay a pebpulugu bu kanu dalem'a nakasapulu enggu dua lagun. Na naibped den i pantiali nin sa kapapenggamut'in. Na da den isa bu a nakapagkapia kanu sakit'in. 44 Guna su nakaubay sekanin kanu taligkudan nu Isa na inami nin su bibil'u lambung'u Isa. Na midsambuta i kinatelen nu kapebpulugu nin. 45 Na nakaidsa nu Isa i "Entain i minami a nan sa laki?"Uman i isa na pebpalaw. Mandiadi na nia pidtalu ni Pitru na "Mapulu, nalibet ka na madakel a nia a taw enggu pendadsegen ka nilan." 46 Ugaid'a pidtalu nu Isa i "Uway, ugaid'a aden minami sa laki ka katawan ku i aden linemiu kanu kabarakat ku." 47 Guna su natawan nu babay a entu i natukawan sekanin na kinemegkel sa gilek'in ugaid'a makin minubay ka sinemugiud kanu Isa a lu den ba kanu adapan nu madakel a taw. Na pidtalu nin kanu Isa i sabap kanu kinaami nin kun sa lekanin na midsambuta demun i kinaawa nu dalu nin. 48 Na nia pidtalu nu Isa sa lekanin na "Manga dua na manga wata sabap kanu salig'engka kanu Kadenan na namba i kinagkapia nengka. Na embaya-baya ka den!" 49 Saleta na su kapedtalu bantu nu Isa na nakauma su panunugun ni Yairus. Na nia nin pidtalu kani Yairus na "Hu Mapulu, ampun ka bu ka nauma den na limu nu Kadenan su wata nengka na basi di ka den 'bpelingasa su Gulu." 50 Ugaid'a nakineg'u Isa su pidtalu nu mama a entu na nia pidtalu nu Isa kanu Yairus na "Pakat, da ka 'gkagilek, paginugut ka bu kanu Kadenan na 'gkapia pamun sekanin." 51 Guna su nakauma silan lu kanu walay ni Yairus na dala pinaunut'u Isa lemudep lu kanu walay nia tabia na si Pitru, si Yuhan enggu si Yakub taman kanu ama enggu su ina nu wata. 52 Na uman i isa lu na 'bpamelesing sa kabpaguliang'in enggu 'gkalidu i ginawa nilan ka minatay su wata a entu. Nia pidtalu nu Isa na "Sekanu a manga taw na da kanu 'bpamanguliang ka da pan matay i wata a nia, pedtulug bu sekanin!" 53 Na langun nilan na namagumpak bu sa lekanin kagina natawan nilan i minatay den su entu a wata. 54 Daka kinapetan nu Isa su wata sia sa lima enggu tinawag'in sa "Bai, embangun ka!" 55 Na mimbalingan su ngiawa nin enggu midtindeg edtagad-tagad. Na sinugu nu Isa su lukes'in sa enggan nin sa pegken su wata ka enggu makakan. 56 Na su manga lukes'in na nangatembang ugaid'a inibpaliugat'u Isa kanilan i di nilan edtalu-talun sa apia entain u ngin i nanggula.
Su Kinasugu kanu Sapulu enggu Dua a 'Bpamangunut kanu Isa al-Masih
1 Na tinawag'u Isa al-Masih su sapulu enggu dua a 'bpamangunut lun ka binulig-bulig'in silan enggu inenggan nin silan sa kabarakat enggu kamal sa silan den i mapaawa kanu manga saitan enggu mapagkapia kanu manga pedsakit. 2 Sinugu nin den su 'bpamangunut lun sa gemanat den silan ka enggu nilan makapangusiat su pantag kanu kapendatu nu Kadenan enggu makapagkapia nilan su manga pendalu. 3 Na nia nin inidtutuma sa kanilan na "Da kanu edtatanggit sa apia ngin kanu kabpelalakaw nu, da tungked, da leban, da pegken, dala kuleta maitu bun i balegkas na endaw bu i dinemeket sa lawas. 4 Ka apia endaw a dalepa i temalima sa lekanu na di kanu magalat-alat sa walay taman sa di nu pan ganatan su entu a dalepa. 5 Na amaika di kanu pedtaliman nu manga taw na ganati nu su entu ba a dalepa. Na ibpalu nu su ay nu lu kanu lupa ka enggu 'gkaawa su libubuk'u entu a dalepa lu kanu ay nu. Na entu ba i tanda a makadsaksi kanilan kanu kinasungkang'ilan." 6 Na ginemanat den su 'bpamangunut kanu Isa al-Masih ka tinaneb'ilan den su langun nu embala-bala a manga dalepa ka ibpangusiat'ilan den su Mapia a Tutuma nu Kadenan enggu papegkapia bun silan sa pedsakit.
Su Kinandua-dua nu Datu Hirud
7 Guna su nakineg'u Datu Hirud a pegkamal sa Galili su langun nu nanggula na benal a dili pakatelen i ginawa nin ka aden midtalu sa mimbibiag 'bpaluman su Yahiya a 'Bpanalawat. 8 Na midtalu su ped sa mibpayag su Nabi Ilias. Na su ped menem na midtalu sa isa kanu manga paganayan a nabi na mimbibiag 'bpaluman. 9 Nia nadtalu nu Datu Hirud na "Inipatebped ku su ulu nu Yahiya a 'Bpanalawat ugaid'a entain basi i mama a nia a 'bpanudtulen nu manga taw." Na 'bpangilayn nu Datu Hirud den temegel su Isa.
Su Kinapakan kanu manga Taw a manga Lima Ngibu
10 Na guna den makambalingan su manga sinugu nu Isa al-Masih na pinanudtul'ilan sa lekanin su langun nu pinggalebek'ilan. Entu pan ka pinaunut'u Isa al-Masih silan ka inisibay nin enggu pidtapik'in silan lu kanu dalepa a binedtuan sa Bitsaida. 11 Guna su nakineg'u madakel a manga taw i lu silan mibpawang na nanundug silan. Na tinalima mambu silan nu Isa sa mapia enggu nangusiat sekanin makapantag kanu kapendatu nu Kadenan enggu pinagkapia nin su manga taw a aden manga sakit'in. 12 Na guna su edsukilep den na inubay den sekanin nu sapulu enggu dua a 'bpamangunut lun sa nia nilan pidtalu na "Gulu, sabap sa nakambisa-bisa i nia ba a dalepa na basi paawa ka den i manga taw a nan ka enggu silan makapayapat kanu nakabalibet a manga dalepa enggu makalu sa dalem ka enggu silan makapangilay sa makan nilan enggu katulugan nilan." 13 Nia nin inisumpat kanilan na "Sekanu bu i mataw kanu makan nilan."Na pidtalu nu 'bpamangunut lun i "Nah! Dala pegken nami sia, nia tabia na lima timan bu a nia a pan enggu dua timan a seda. Na panun i leka, mamadian kami sa ipakan sa manga taw a nan? Di kami makagaga!" 14 Na aden manga lima ngibu a manga mama i tinemalabuk lu.Na nia nin pidtalu sa kanilan na "Pandudulumpuk'u su kapaayan nu kanu manga taw sa masiken enggaga lima pulu kataw." 15 Na entu den ba i pinggalebek'u 'bpamangunut lun. 16 Na kinua nu Isa al-Masih su lima timan a pan enggu su dua timan a seda na tinemingada lu sa langit ka pinangeni-ngeni nin kanu Kadenan i kaumanan su lidseki taman sa pinanebi nin su manga pan enggu pinangusi nin su manga seda. Entu pan ka inenggay nin kanu 'bpamangunut lun asal'a makaenggay nilan menem kanu manga taw a entu. 17 Daka nakakan su langun nu manga taw taman sa nangausug silan tanan. Na pinangua nu 'bpamangunut lun su nasama kanu pegken taman sa sapulu enggu dua kabukag i nalimudan nilan lun.
Su Kinatuntay nu Simiun Pitru
18 Na kanu isa a gay na 'bpangeni-ngeni su Isa al-Masih a sekanin bu na lu bun su 'bpamangunut lun. Na inidsan nin silan sa "Ngin i antapan nu madakel a manga taw makapantag sa laki?" 19 Nia nakasumpat'u 'bpamangunut lun na "Nia katigan nu ped na seka kun su Yahiya a nanalawat. Su ped na seka kun su Nabi Ilias. Su ped menem na nia nilan pedtalun na seka kun na isa kanu nangauna a nabi a mimbibiag 'bpaluman." 20 Na nia menem inidsa nu Isa kanilan na "Uway ba ugaid'a sekanu mambu na ngin i antapan nu lun?"Na nia sinemumpat na si Pitru sa "Seka man su Masih a inibpasad'u Kadenan." 21 Na inibpaliugat'u Isa al-Masih kanu 'bpamangunut lun i di nilan edtalun i nia ba a natuntayan nilan sa kanu apia entain pan a taw.
Pantag kanu da pan Mauma
22 Na pidtalu nin pan kanu 'bpamangunut lun i "Su Kaka nu Manusia na dait a malasay. Di sekanin taliman nu manga 'gkangaunutan apeg su manga mapulu nu 'bpangurban taman kanu manga gulu nu pangitaban. Na nia dait na paimatayan nilan pan. Ugaid'a su ikatelu nin gay na pambangunen nu Kadenan sekanin ka embibiag." 23 Daka pidtalu nin kanu langun nu manga taw lu i "Amaika aden isa sa lekanu i miug munut sa laki na dait a lipatanan nin su kahanda nu ginawa nin ka nia nin lamigen uman-uman gay na su kapamusay nin kanu kayu a pinambalawaga sa kanu kaunut'in sa laki. 24 Na entain menem i kalilingayan nin i umul'in na makin den matay. Ugaid'a entain i matay sa lilingay nin sa laki na makin maguyag-uyag sa da den taman nin. 25 Na ngin basi i mapagasil'u taw amaika magaga nin semakup su sakadungia inunta na tinabanan su ginawa nin nia mauli lun na masikesa pan sekanin. 26 Na apia entain a taw i ikaya nin i 'bpaginugut sekanin sa laki enggu kanu kadtalu ku na ikaya bun sekanin nu Kaka nu Manusia kanu katingguma nin a linangkapan nu sigay enggu su sigay nu Ama taman kanu sigay nu manga malaikat a suti. 27 Ugaid'a saben-sabenal i aden sia ba sa lekanu i dili matag matay taman a di nilan mailay su kapendatu nu Kadenan."
Su Kinasigay nu Isa al-Masih
28 Guna su nakalabi sakapadian den i kinaipus'a kinadtalu nu Isa sa kanu entu ba na pinaunut'in si Pitru, si Yakub enggu si Yuhan. Na tinemakedeg silan kanu palaw ka lu silan nangeni-ngeni. 29 Na su kutika nu kabpangeni-ngeni nu Isa na midsalin su buntal'u beneng'in taman sa midsalin su balegkas'in ka migkaputi a benal enggu sinemigay. 30 Na da matana-tana na natekaw demun embuat su dua kataw a mama a pembitiala sa lekanin na entu ba besen su Nabi Musa enggu su Nabi Ilias 31 a pedsigay silan dua sa sigay a ganat sa sulega. Na ipembitiala nilan su Isa pantag kanu kahanda nu Kadenan a mangagan den 'gkauma su kapatay nin lu sa Awrusalim. 32 Na si Pitru enggu su manga ped'in na minatay na tulug ugaid'a endaw i kinagedam'ilan na nailay nilan su sigay nu Isa al-Masih enggu su dua kataw a manga mama a pedtindeg kanu ubay nin. 33 Kanu kinaganat'u dua kataw a entu a mama kanu Isa na pidtalu ni Pitru sa lekanin i "Hu Mapulu, ngin a kapia i nakasia kami ka mumbal kami sa telu timan a balal. Satiman i leka, satiman i kanu Nabi Musa enggu satiman i kanu Nabi Ilias." Na nia nin kabantangan na mana su di bun 'gkaimamanan ni Pitru u ngin i pidtalu nin a entu. 34 Gagalu nu kapedtalu-talu ni Pitru na minggabun sa makapal taman sa natangguban silan. Na nangagilekan su 'bpamangunut kanu Isa al-Masih sa kanu kinatanggub'u gabun kanilan. 35 Na saleta mambu na nakineg'ilan su suala a lu ebpun kanu gabun a entu. Nia nin pidtalu na "Nia ba i wata ku a napamili ku. Na pakikineg'u sekanin." 36 Guna su napupus su suala a entu na sakataw bun den nu Isa al-Masih kanu pedtindegan nin. Na da den i entu edtalu-talua nu 'bpamangunut lun sa apia entain su nailay nilan kanu entu ba a kutika.
Su Kinagkapia nu Wata a Inasukan na Saitan
37 Na kanu mapita na mimbaba den su Isa al-Masih enggu su telu kataw a 'bpamangunut lun ganat lu kanu palaw na inalaw den menem'u madakel a taw su Isa al-Masih. 38 Na aden mama lu kanu madakel a taw a 'bpanawag sa "Gulu, 'bpangenin ku sa leka i ilay ka pan i wata ku a entu a tunggal-tunggal a wata a mama. 39 Na inasukan sekanin na saitan enggu pakatekaw demun pakalalis enggu papegkegkelen nu saitan taman sa papembula-bulan nin su ngali nin. Na pakagkaid enggu malibpes i kapedtingguma nin lun. 40 Nangeni aku den sa tabang kanu 'bpamangunut sa leka sa paawan nilan i saitan a entu ugaid'a sa maya na di nilan 'gkagaga." 41 Nia inisumpat'u Isa al-Masih na "Ngin den a kada na salig i manga taw a nia saguna enggu malegen kanu papedtidtun! Ngin ba i kauget a kadtangen ku sa lekanu enggu katigkel ku sa lekanu? Isia nengka i wata nengka a nan." 42 Gagalu na kabpagagak'in kanu wata na tinunggad'u saitan su wata ka pedsaingen den. Ugaid'a pinaawa nu Isa su saitan enggu migkapia su wata taman sa inimbalingan nin lu kanu ama nin. 43 Na su langun nu manga taw na nangagaip kanu entu a mabagel a kamal a inenggay nu Kadenan sia kanu Isa al-Masih.
Pantag kanu Kapatay nu Isa al-Masih
Kanu kapegkagaip'u manga taw kanu langun nu galebek'in na inisaleta nin edtalu kanu 'bpamangunut lun i 44 "Di nu 'bpelipatani su nia ba a pedtalun ku sa lekanu na su Kaka nu Manusia na makapalad den lu kanu manga kuntela nin." 45 Ugaid'a di nilan 'gkasabutan su manga kadtalu nin a entu. Na ibpagema kanilan su maena nu pedtalun nin ka enggu di nilan 'gkatuntayan. Na 'gkagilekan silan 'bpagidsa pantag kanu maena nin.
Pantag kanu Kabadtugan
46 Guna su maitu na mibpapalawa su 'bpamangunut lun sa entain den i mapulu sa kanilan langun. 47 Ugaid'a su kinatuntay bu nu Isa al-Masih kanu 'gkagkahanda nilan na kinemua sekanin sa wata ka pinatindeg'in sia kanu tapid'in. 48 Na pidtalu nin kanilan i "Apia entain i temalima sa maya ba a wata kanu ingala ku na mana bun saki i tinalima nin enggu apia entain i temalima sa laki na tinalima nin bun su sinemugu sa laki. Ka u entain i ibaba nin i ginawa nin kanu manga ped'in na entu ba i mabadtug sa langun!"
Pantag kanu Kinadtampil
49 Na nia pidtalu ni Yuhan kanu Isa al-Masih na "Mapulu, nakailay kami sa mama a pinamugaw nin su manga saitan sa sia nin ininggulalan kanu ngala nengka. Na sinapalan nami kagina dikena tanu kaped." 50 Nia pidtalu nu Isa al-Masih sa lekanin na "Di nu sekanin pedsapali kagina apia entain i di pedsungkang sa lekanu na entu ba i madtampil'u."
Su Inged a Samaria a da Talima sa Kanilan
51 Na sagay-sagay na pegkasiken bun su kutika a kapauli kanu Isa lu sa sulega na tinalanged'in mambu sa ginawa nin i lemu sekanin sa Awrusalim. 52 Sinemugu sekanin sa taw a pinauna nin lu sa kanu inged a Samaria ka enggu nilan 'gkapagadilan su kapegkauma nin. 53 Ugaid'a da kiug su manga taw sa Samaria sa katalima nilan lun ka nasabutan nilan i lu sekanin pebpawang sa Awrusalim. 54 Na guna mailay nu 'bpamangunut lun a si Yuhan enggu si Yakub i maitu besen na nia nilan pidtalu na "Mapulu, u miug ka bu na mangeni kami sa apuy a ganat sa sulega ka idadsang'ami kanilan ka enggu silan 'gkabinasa." 55 Ugaid'a linemengi su Isa ka pidtaluan nin silan. 56 Guna su maitu na lu silan minangay kanu ped a inged.
Su Namagigiling sa 'Bpamangunut kanu Isa al-Masih
57 Na su kabpelalakaw nilan lu kanu lalan na aden mama a midtalu sa "Munut aku sa leka sa apia endaw den." 58 Nia pidtalu nu Isa na "Uway, ugaid'a su manga asu a maila na aden lingkab'ilan, su manga papanuk na aden bun salag'ilan ugaid'a su Kaka nu Manusia na dala 'gkaigan nin." 59 Na nia nin menem pidtaluan su sakataw a mama sa "Huy pakat, unut ka sa laki."Ugaid'a nia pidtalu nu mama a entu na "Mapulu, pauli aku pan muna ka apasen ku pan i makalebeng ku si ama." 60 Nia inisumpat'u Isa na "Padtaday ka den su manga namamatay ka silan bu i lemebeng kanu manga minatay. Ugaid'a nia ka enggula na ipayag'engka su kapendatu nu Kadenan." 61 Na aden menem sakataw a midtalu sa "Mapulu, munut aku sa leka. Ugaid'a muli aku pan ka magetaw aku muna kanu sakambinabatan ku." 62 Nia pidtalu nu Isa sa lekanin na "Apia entain i lemudsu demadu na malibpes i kalengi nin kanu naukitan nin ka makasibay su kapendadu nin. Na mana bun su taw a endua-dua i paginugut'in na makasibay bun i galebek'in taman sa da katagan nin lu kanu pendatuan nu Kadenan."
Su manga Pinalakaw nu Isa al-Masih
1 Na guna su napasad i entu na namili menem su Mapulu a su Isa sa pitu pulu enggu dua a manga mama. Na pinalakaw nin silan sa enggaga dua kataw taman sa pinauna nin lu kanu langun nu manga dalepa a kagkahanda nin a 'bpagangayan nin. 2 Pidtalu nin kanilan i "Aden masabpet a masela ugaid'a nia paidu na su penggalebek lun. Pangeni nu kanu kigkuan sa 'gkasabpet sa umanan nin su gumagalebek kanu 'gkasabpetan nin. 3 Lakaw kanu den! Ugaid'a katawan nu i pedsugun ku sekanu lu sa liu a mana bun su manga bili-bili a makasimbul kanu manga makagkaid a asu a maila. 4 Na da kanu edtatanggit sa talepi atawa ka puyuan maitu bun su ampis'a ay. Di nu ibpagangga sa ginawa nu su kasalam sa apia entain a madsumbak'u a manga taw. 5 "Na apia endaw kanu makaangay a walay na salam'u su kigkuan lun sa 'Assalamu Alaikum.' 6 Na amaika taliman nu taw sa malinawag su salam'u na itabun nu Kadenan su kalilintad lu kanu entu a taw. Na amaika di nin taliman su salam'u na pangeni nu kanu Kadenan i di nin palilintaden. 7 Na alus i lu kanu endadalepa kanu walay nu tinemalima sa lekanu. Na kan kanu enggu inem kanu sa endaw taman i inggay nilan ka wagib a taliman nu gumagalebek su sukay nin. Da kanu mamagalat-alat sa walay. 8 "Amaika lemudep kanu sa inged na sakawn kanu na kan nu i endaw i initalagad sa lekanu. 9 Pagkapia nu su apia entain a pendalu kanu dalepa bantu enggu nia nu edtalu kanu langun nu manga taw lu na 'Su kapendatu nu Kadenan na pakauma den sa lekanu.' 10 Ugaid'a u makauma kanu lu kanu dalepa a di kanu sakawn nu manga taw na liu kanu sa lalan saleta na edtalu nu, 11 'Apia su libubuk bu a ganat sia sa inged'u a makadeket kanu manga ay nami na pubpugen nami bun. Na nan den ba i amad sa nawagiban kanu. Na sabuti nu i su kapendatu nu Kadenan na nakasupeg den.' 12 Ibpasad ku sa lekanu i mauma su kabangkit kanu dungia na nia pan lamigen nu Kadenan na su inged a Sudum kumin sa kanu entu a dalepa.
Su Inged'u di 'Bpamaginugut
13 "Na duan-duan nu den a manga taw sa Kurasin enggu sekanu a manga taw sa Bitsaida! Ka temala kanu sa sikesa nu Kadenan. Ka u mana bu ka lu nanggula sa Tair enggu Sidun su pakagaip-gaip a galebek a nanggula sia sa lekanu na nauget den silan mimbalegkas sa saku enggu minayan lu kanu manga aw asal'a makapailay nilan i midtaubat silan kanu manga kabaladusan nilan. 14 Na lu kanu Gay nu Harikiamat na nia pan ikalimu nu Kadenan na su taw na Tair enggu Sidun kumin sa lekanu a manga taw sa Kurasin enggu Bitsaida. 15 Na sekanu menem a taw sa inged sa Kapurnaum na ngintu ka 'gkapaginagkay nu i makandaludaya kanu lu sa sulega inunta na lu kanu besen makaidtug'u Kadenan kanu dalepa nu Namamatay." 16 Pidtalu pan nu Isa kanu manga mama a pabpelakawn nin i "Apia entain i temalima kanu inipamandu nu na mana bun su inipamandu ku i tinalima nin. Na entain menem i menda sa lekanu na mana bun saki i inendan nin. Na entain menem i di temalima sa laki na mana bun su sinemugu sa laki i da nin talima."
Su Mapia a Pinanudtul'u manga Pinalakaw
17 Na sangat a pedsisigalaw su mimbalingan a pitu pulu enggu dua a manga mama. Nia nilan nadtalu na "Mapulu, sabap sa ininggulalan nami su ngala nengka na apia su manga saitan na namaginugut sa lekami." 18 Nia inisumpat'u Isa kanilan na "Nailay ku su kinadadsang'u Datu na Giadsal a mana den su kilat a ganat sa sulega. 19 Ilay ka! Inenggan ku sekanu sa kamal enggu kabarakat ka enggu kanu makalakaw lu sa di kanu kagkaidan nu manga nipay enggu ulang na maitu bun ba kalawanan nu langun su bagel'u manga kuntela nu na dala makagkaid sa lekanu. 20 Nia mauli lun na da kanu pedsisigalaw pantag kanu kinapaginugut'u manga saitan ugaid'a edsigalaw kanu ka su manga ngala nu na nakasulat den mambu kanu Libelu nu Manga Makalipuas a lu sa sulega."
Su Kinanggalaw-galaw nu Isa al-Masih
21 Na kanu entu a kutika na sangat den a nagalaw su Isa ka pinalihalan den nu Suti a Ruh nu Kadenan taman sa nia nin nadtalu na "Hu Ama ku a Mapulu lu sa sulega enggu sia sa dungia na midsukul-sukul aku sa leka kagina inipagema nengka su kahanda nengka lu kanu manga balaitungan enggu kanu manga nakatuntay ugaid'a inipayag'engka bun lu kanu manga taw a mana su manga wata a dala pepeleng'in. Uway Ama, ka nia ba besen i makadait kanu kalilinian na ginawa nengka." 22 Na ipedtalus bun nu Isa su kapedtalu-talu nin lu kanu manga taw sa nia nin pidtalu na "Su Ama ku i minenggay sa laki sa langun taman. Dala isa bu a mataw lun u entain su wata nia tabia na su Ama. Maitu bun dala mataw kanu Ama nia tabia na su wata enggu su apia entain a mapamili nu wata a makapayag sa lekanin." 23 Nia menem pidsangul'u Isa al-Masih na su 'bpamangunut lun ka pidtalu nin sa dala ped a nakakineg lun i "Sangat a napalihalan kanu ka nailay nu su langun taman a pinggula ku. 24 Na saben-sabenal a nia ku madtalu sa lekanu na madakel i manga nabi enggu manga datu i nalilini milay kanu 'gkailay nu ugaid'a da nilan mailay. Na nalilinian nilan makikineg su langun nu 'gkakineg'u ugaid'a maitu bun ba, dala nilan makineg."
Su Pakenalan a pantag kanu Mama sa Samaria
25 Na kanu isa a gay na aden sakataw a gulu bun nu pangitaban nu manga Yahudi i midtindeg sia kanu luk'u manga taw ka batalun nin su Isa, sa nia nin inidsa na "Hu Gulu, ngin den basi i dait a enggulan ku a matalima ku su uyag-uyag a da taman nin?" 26 Nia inisawal'u Isa na "Ngin i nakadalem sia kanu Kitab? Ngin i natuntayan nengka lun?" 27 Nia nin inisumpat na "Nia nakadalem sa Kitab Taurat na 'Dait a padtayan tanu su Kadenan a Mapulu sa Langun sa senep kanu atay tanu, su ngiawa tanu enggu su bagel tanu taman kanu pamikilan tanu' enggu nia bun nakadalem na 'Dait a padtaya ka su manga tagapeda nengka sa mana bun su kapapedtaya nengka kanu ginawa nengka.' " 28 Nia pidtalu nu Isa na "Nakasugat su inisawal'engka. Na entu ba i enggula ka, ka enggu nengka matalima su uyag-uyag a da tedtab'in." 29 Kagina ka pegkiugan nu gulu nu pangitaban a ipedtindeg'in su ginawa nin na inidsa nin kanu Isa i "Nah, entain basi i tagapeda ku?" 30 Na nia inisumpat'u Isa na "Aden kun mama a 'bpeludus lu sa Yariku ebpun sa Awrusalim. Na pinagayanan sekanin nu manga tulisan na linuasan nilan enggu pinametay nilan taman sa initagak'ilan na sama bu da matay. 31 Na natabu i aden besen pedsagad a 'bpangurban lu kanu lalan bantu. Ugaid'a guna nin madsuliman su entu ba a mama na makin nin sinibayan. 32 Maitu bun minukit su mama a balaagama kanu manga Yahudi a tupu nu Libi. Na pidtulikan nin bu su entu ba a mama taman sa sinibayan nin pan. 33 Na da gaid mauget na aden menem 'bpagukit lu a mama a taw sa Samaria ugaid'a guna nin mailay su mama bantu na makin nin inubay ka sangat a nalat i ginawa nin lun. 34 Na binubusan nin kanu gamut a lana enggu alak ka entu pan ka binausan nin su manga pali nu mama. Daka inilulan nu taw a entu sa Samaria su mama kanu ayam'in ka pidtapik'in lu kanu walay a pedtumpan. Na lu nin ba tiniakapan enggu pinagadilan nin sa langun taman su mama. 35 Guna su 'gkapita na inabat'in su kuleta ka inenggay nin kanu mama a kigkuan kanu entu ba a walay. Nia nin pan pidtalu kanu kigkuan na 'Patiakapi ka sekanin ka endaw i di ganapan nu nia ba a kuleta na bayadan ku bu sa leka kanu kambalingan ku sia.' " 36 Na inidsa pan nu Isa kanu gulu bantu na "Seka, ngin i kalangan nengka lun? Endaw kanu telu kataw a minukit i nabaluy a tagapeda nu mama a pinagayanan nu manga tulisan?" 37 Na nia inisumpat'u gulu nu pangitaban na "Su nalimu sa lekanin."Na pidtalu pan nu Isa sa lekanin i "Maitu ba, ilingi ka mambu."
Su Kinatukaw nu Isa al-Masih kani Marta enggu si Mariam
38 Kanu kabpelalakaw nu Isa al-Masih enggu su 'bpamangunut lun na nakauma silan sa manga kawalayan. Na aden lu ba babay a bedtuan sa Marta a sinemakaw kanilan lu kanu walay nin. 39 Na aden ali nin a bedtuan sa Mariam na lu demun 'bpagagayan kanu ubay nu ay nu Isa ka 'bpakikineg kanu manga usiatan nin. 40 Ugaid'a madakel a benal i penggalebeken ni Marta na napalak den i itungan nin. Na minubay sekanin ka pidtalu nin kanu Isa i "Aday mambu Mapulu, enduken ka di nengka demun 'gkadsima i pinabpuluan nu ali ku a nan sa laki i langun na manga galebek a nia! Edtalu ka bu sa lekanin i tabangan aku nin!" 41 Nia inisumpat'u Isa sa lekanin na "Marta, Marta, 'gkalidu i ginawa nengka ka 'gkasimpang ka na madakel a pikilan. 42 Ugaid'a nia dait na tumpungen nu taw sa satiman bu i pamikilan nin na entu ba i napamili ni Mariam na di den alus a iawa sa lekanin."
Su Kinapamandu makapantag sa Kapangeni-ngeni
1 Na kanu isa a gay na 'bpangeni-ngeni su Isa al-Masih lu kanu isa a dalepa. Na guna makapasad na aden isa kanu 'bpamangunut lun i midtalu sa "Mapulu, pamandu kami pan sa ukit a kapangeni-ngeni a mana su kinapamandu nu Yahiya a 'Bpanalawat kanu 'bpamangunut lun." 2 Nia pidtalu nu Isa sa kanilan na "Amaika 'bpangeni-ngeni kanu na maya ba i untul'u, 'Hu Kadenan a Ama nami a lu sa sulega, su suti a ngala nengka i labi a pagadatan nami.'Bpangenin nami i makauma den mangagan su kandatu nengka sia kanu liwawaw na dungia. 3 Enggi kami sa kauyagan a makan nami sa uman-uman gay. 4 Na ampun ka bu su kabaladusan nami lu sa Mauli a Gay, ka 'bpangampunen nami bun mambu su uman i isa a minggula sa malat sia sa lekami.Na itangka kami nengka sa kanu manga sasat.' " 5 Na pidtalu pamun nu Isa al-Masih kanu 'bpamangunut lun i "Upama isa sa lekanu i alus i lemu kanu walay nu pakat'in sa luk i gay enggu nia nin madtalu na 'Sunged aku pan sa telu timan a pan 6 kagina aden pakat ku a nakauma lu sa laki a ganat sa mawatan. Na dala pakapakan nami lun!' 7 "Na upama nia inisumpat'u pakat'engka lu sa ludep na 'Awa ka san! Di aku pedsamuka ka nakapamintu aku den enggu 'bpangintelenen kami den kanu manga wata ku. Di aku den pakambuat enggu di ku den seka kaenggan.' 8 Na ngin i kalangan nu lun? Nia ku madtalu sa lekanu na apia pedsalig sekanin sa 'bpakat bun silan na di pamun sekanin embuat taman sa di sekanin menggay ugaid'a sabap kanu kapedtegel'u pakat'in na embuat su mama lu sa ludep ka inggay nin su langun a 'bpangenin nin. 9 "Tembu nia ku madtalu sa lekanu kanu kapangeni-ngeni kanu Kadenan na pangeni kanu ka aden matalima nu na edsamikal kanu sa kapangilay ka aden matun nu enggu panalam kanu lu kanu bengawan ka kaukan kanu. 10 Kagina su langun nu 'bpangeni na makatalima, su edsamikal sa kapangilay na makatun enggu su 'bpanalam lu sa bengawan na kaukan. 11 "Na da basi sia sa lekanu a manga lukes i enggan nin su wata nin sa nipay a nia nin 'bpangenin na seda. 12 U di na nia nin inggay kanu wata nin a 'bpangeni sa leman na ulang. 13 Na apia ngin den i kalat'a palangay nu na katawan nu menggay sa mapia su wata nu. Na labi-labi den mambu su Ama nu lu sa sulega ka inggay nin su Suti a Ruh sa kanu apia entain i 'bpangeni sa lekanin."
Su Isa al-Masih enggu su Datu na Giadsal
14 Na aden pabpagawan nu Isa al-Masih a saitan ka di nin papedtalun su mama a inasukan nin. Ugaid'a guna su nakapaawa nin den su saitan na nakadtalu den su mama enggu nagaip su madakel a taw. 15 Ugaid'a su ped na nia nilan pedtalun na "Su Bilzibul a Datu na Giadsal i minenggay sa lekanin sa kabarakatan kanu kinapaawa nin kanu manga saitan." 16 Su ped menem na kiugan nilan matalu su Isa sa pebpegesen nilan sa kapangaden nin sa kagaipan ka asal bu na makapailay nin i benal su kabarakat'in na ganat sa Kadenan. 17 Ugaid'a katawan den nu Isa su langun nu 'gkapagitung'ilan na nia nin pidtalu kanilan na "Apia endaw a pendatuan i mambad-bad i taw nin ka mamagukag na dili den makagaus sa mauget, ka su sakambinabatan a di den mataw mamagayun na makabpipitas den. 18 Na kagina ka maitu na amaika 'bpamagukag su lumpukan nu pendatuan nu Datu na Giadsal na panun ba i kagkauget'u kamal'in? Inunta na pidtalu nu i pinaawa ku su saitan ka sinugu aku nu Bilzibul a Datu na Giadsal. 19 Na amaika maya ba i ukit a kinapaawa ku lun na panun menem i ukit a kinapaawa lun nu manga mulit'u? Na nambunba i amadan nin sa di kanu pakasugat. 20 Ugaid'a amaika sabap sa kabarakat'u Kadenan i kinapaawa ku kanu manga saitan na nia den ba i amadan nin sa nakatingguma den su kapendatu nu Kadenan sia sa lekanu." 21 "Na upama aden mabagel a mama a napagadil'in den su langun nu matalem'in a ipedtameng'in kanu walay nin enggu su tamuk'in na di den kadadagan. 22 Ugaid'a amaika aden menem makalawan lun sa bagel enggu abpeten nin magukag taman sa tabanan su mama a kulang i bagel'in na langun nu matalem a pedsaligan nu tinabanan na panguan den nu tinemaban ka pamagumunen nilan. 23 "Ka apia entain i dili munut sa laki na saben-sabenal a pedsungkang sa laki enggu su dili temabang sa laki sa kapamelimud sa taw na silan bantu mambu i 'bpamugaw sa taw. 24 "Na amaika maawa den su saitan sia kanu lawas'u taw na edsugud-sugud den temegel ka mangilay menem sa kapangintelenan nin. Na amaika di sekanin makatun sa kapangintelenan nin na nia nin mapagitung na 'Embalingan aku lu kanu lawas'u taw a entu a andang a pegkalebenan ku.' 25 Na su kambalingan nin bantu na nia nin kailay kanu lawas'u taw na limpiu den enggu mapia den a pegkalebenan. 26 Daka lemiu sekanin ka magakat sa pitu timan pan a manga saitan a lawan pan sa lekanin i kalat'a palangay nin ka silan menem i masuk kanu taw a entu. Na amaika manggula ba i entu na su taw a andang a inasukan na labi den i kapasang lun ka nalawanan pan su nauna a gedamen nin." 27 Guna nin mapasad edtalu-talu i nia ba na aden babay sia kanu lumpukan nu manga taw i midtalu sa matanug sa "Pinalihalan su babay a mimbata sa leka enggu napasusu sa leka!" 28 Nia inisumpat'u Isa na "Uway ugaid'a pidsan ka maitu na labi-labi a mapia i manggiginawa nu entain i makikineg enggu maginugut kanu kadtalu nu Kadenan."
Su Tanda nu Nabi Yunus
29 Na enggu su pedtalikupan nu madakel a manga taw su Isa na nia nin pidtalu na "Basaula den menem a manga taw i nia ka 'bpaginagkay silan sa kagaipan ugaid'a dala amadan a makaenggay kanilan nia tabia na su tanda kanu Nabi Yunus a nakadalung den saguna. 30 Kagina su nanggula nu Nabi Yunus na tanda kanu manga taw sa Ninibah na maitu bun mambu su manggula nu Kaka nu Manusia na tanda kanu manga taw sa saguna. 31 Amaika mauma den su Gay a Kabangkit kanu dungia na embuat su Bai nu dalepa a Sibah lu sa sebangan ka betadan nin sa kawagib a isikesa kanu manga taw ba nia saguna. Kagina sekanin na ganat pan lu sa tedtab'a dungia ka 'bpakikinegen nin su manga mapia a kadtalu nu Ragya Sulaiman. Maitu bun mambu aden bun sia 'bpamandu a labi-labi pan i kabagel'in kanu manga kadtalu nu Ragya Sulaiman. 32 Sabap sa tinaligkudan nilan den su kapembaladusa nilan kanu gay a kinakineg'ilan kanu usiatan nu Nabi Yunus na kanu Gay a Kabangkit kanu dungia na su manga taw nu Ninibah na embuat ka betadan nilan sa kawagib a isikesa kanu manga taw saguna. Na saben-sabenal na aden sia 'bpapayag a labi-labi pan i kabagel'in kanu manga kadtalu nu Nabi Yunus ugaid'a di nu 'bpaginugutan!
Su Palitan nu Badan
33 "Dala taw a temutud sa palitan nia mauli lun na idalung'in udi na dapengan nin sa kalanda, ka nia pan mula na ibetad kanu 'bpanaguan sa palitan ka enggu mailay nu taw a 'bpeludep su kaliwanag'in. 34 Su mata nengka na namba i palitan nu badan nengka. Amaika matingaw su mata nengka na mapia i kaludep'u malinawag kanu badan nengka ugaid'a amaika maugat i dusa nengka na malubay su mata nengka a mana bun su nalibet ka nu malibuteng sia sa didalem'u pakubulan. 35 Na ingati ka besen su malinawag bantu sa di 'gkalibuteng. 36 Na kagina ka maitu na amaika sia kanu atay nengka na linemangkap den su kaliwanag sa dala budseng-budseng'in na malinawag den mambu su kinatuntay nengka sa mana bun su kinasigay nu palitan sa leka."
Su Kinadaway nu Isa al-Masih kanu manga Taw a Lusud kanu Lumpukan a Parisiyu
enggu su manga Gulu nu Pangitaban 37 Na guna makapasad mangusiat su Isa al-Masih na inenggat sekanin keman nu isa kanu manga taw a lusud kanu lumpukan a Parisiyu. Na minunut den mambu sekanin lu sa ludep ka sinemangkig kanu lamisan. 38 Na nagaip su taw a lusud kanu lumpukan a Parisiyu ka nailay nin su Isa al-Masih a kineman sa dala pamanaw. 39 Daka nia pidtalu nu Mapulu a su Isa al-Masih na "Sekanu a manga taw a lusud kanu lumpukan a Parisiyu na makalagid kanu sa manga taw a penggagasan nilan su liu nu sakedu enggu lampay nilan inunta na maledsik pamun su ludep'in. Na nia nin maena na apia 'bpia-pianan nu pan i palangay nu sia kanu mata nu manga taw na saben-sabenal a sia sa didalem'u atay nu na sangat a napenu na kanapsu enggu kadaluakan. 40 Madupang-dupang kanu! Natalatantu i su Kadenan i nangaden kanu lawas tanu. Na amaika balapantag su kabpia-pia kanu liwawaw nu lawas tanu na labi-labi pan su sia sa didalem. 41 Kagina ka maitu na dait a makapagikelas su atay nu sa idsakat'u su ginawa nu lu kanu manga miskinan. Na namba i ukit'u taw a matalima nu Kadenan a suti. 42 "Na duan-duan nu den ka minenggay kanu sa zakat a talutup taman sa apia su manga paninu nu na pedsakatan nu bun. Ugaid'a inidtalipenda nu su kapatidtu kanu wagib a sia kanu atay nu enggu su kinapadtaya nu kanu Kadenan. Na namba i dait a enggalebeken nu sa di nu makadtalipenda su ped a suguan nu Kadenan. 43 "Na duan-duan nu ka nia den masela sa ginawa nu na sekanu i makapagagayan kanu ayanan nu badtug a taw lu kanu 'bpagagaman enggu nia nu kalilinian na makilala kanu sa kapulu na muletad sa apia lu kanu bun 'gkatabu sa padian. 44 "Na duan-duan nu den ka su palangay nu na makalagid kanu lebeng a da linsam'in. Na langun nu manga taw a pakatalapas lun na di nilan katawan u ngin i lu sa didalem. Na maitu ba su manga taw a 'bpaginugut sa lekanu ka di nilan 'gkatuntayan su nakadalem kanu atay nu." 45 Na isa kanu manga gulu nu pangitaban nu manga Yahudi i midtalu sa "Gulu, su kinadtalu nengka sa nia ba na pinabpayan kami nengka." 46 Nia inisumpat'u Isa al-Masih na "Maitu bun su sekanu a manga gulu nu pangitaban, duan-duan nu den ka inipapusay nu kanu manga taw su maugat a galebek inunta na sekanu na da nu demun matika metel su kemel'u ka enggu nu silan katabangan enggalebek kanu entu a panduan nu. 47 "Na duan-duan nu den ka minumbal kanu sa manga mapia gaid a tampat'u manga nabi inunta na entu ba su manga nabi a inipabunu nu manga kalukesan nu. 48 Nia mauli lun na inumbalan nu sa tampat na su pinggula nu bantu na inipaamad'u i isa kanu pan a nakaayun kanu manga kalukesan nu sa kinaimatay nilan kanu manga nabi. 49 Na sabap kanu labi lawan a kategel'u Kadenan na pidtalu nin i 'Sugun ku kanilan su manga nabi enggu su manga ped pan a taw. Na maaden sa kanilan i pangimatayan enggu su ped na pakapasangan nilan.' 50 Na sabap kanu entu a kinapatay nu langun nu manga nabi iganat kanu kinalimbag kanu dungia na dait a sikesan su manga taw sa saguna den ba a nia a gay. 51 Uway ba, iniganat kanu kinaimatay kani Abil taman kanu kinaimatay kani Sakarias sia kanu pageletan nu pegkurbanan nu Timpul a 'bpagagaman enggu su Suti a Bilik na edtalun ku sa lekanu i su langun nu manga taw sa saguna ba nia a gay na silan den i makapangaku sa sikesa kanu langun nu manga nabi a pinangimatayan! 52 "Sekanu a manga gulu nu pangitaban na duan-duan nu den ka inipagena nu su gunsi a wagib a makauka kanu 'bpanuntutan. Na sekanu ba namba i di pegkiug 'bpeludep enggu 'bpagungenen nu su malilini lemudep ka di nu pabpeludepen." 53 Guna su ginemanat den su Isa kanu entu ba a dalepa na lu den ba linemudsu i kinabensi nilan lun kanu kabpangingidsa enggu kapendaway nilan sa lekanin, 54 ka asal'ilan bu 'gkasigkeman sa kadtalu a sungkang kanu kanilan a pangitaban.
Su Kapabpagingat
1 Saleta na kanu ngibu-ngibuan den i manga taw a mindidilimudan taman sa 'gkangadampuan den nu ped su ped'in na pidtalu nu Isa al-Masih kanu 'bpamangunut lun i "Pangingat kanu sa kanu pakembang'u manga taw a lusud kanu lumpukan a Parisiyu a kabpamagigiling'ilan. 2 Ka dala natangguban a di kasawan enggu apia ngin a ibpagena na makapagemaw bun. 3 Tembu apia ngin i edtalun nengka sia kanu malibuteng na makineg bun lu kanu malinawag enggu apia ngin i ipagedunga nengka lu kanu ludep'u bilik na mana ibpelalis lu kanu bungan nu walay i katanug'in.
Su Tidtu a Ikagilek
4 "Na nia ku madtalu sa lekanu a manga pakat ku na di nu ipegkagilek su entain i mangimatay sa lekanu na nia mauli lun na da den ped a 'gkagaga nin. 5 Ugaid'a itutulu ku sa lekanu u entain i tidtu-tidtu a ikagilek'u na nia dait a ikagilek'u na su Kadenan ka sekanin ba i makagaga kemua kanu napas'u taw taman sa magaga kanu nin lemaleg lu sa naraka. Saben-sabenal i sekanin ba i tidtu-tidtu a ikagilek'u. 6 Na kena aden ba lima timan a pamugun a 'gkabpasa sa dua lad a kuleta? Na apia ka maitu na dala man isa bu kanu entu a manga pamugun i nalipatanan nu Kadenan. 7 Apia su kalebung'u buk'u ulu nu na katawan nin. Tembu ba da ka 'gkagilek sa apia ngin a penggulan, ka seka man na labi pan a balaalaga kanu madakel a manga pamugun.
Su Kapaginugut kanu Isa al-Masih enggu su dili Kapaginugut
8 "Na talangeden ku sa lekanu i apia entain i makadtalu sia kanu manga kaped'in sa maya ba 'Umat aku kanu Isa, ' na namba su taw a taliman nu Kaka nu Manusia lu kanu adapan nu langun nu manga malaikat lu sa sulega. 9 Ugaid'a apia entain menem i kemias sa laki sia sa dungia na mapayag bun mambu i kaenda nu Kaka nu Manusia sa lekanin lu kanu adapan nu malaikat'u Kadenan. 10 Na apia entain i makatika edtalu sa malat kanu Kaka nu Manusia na aden pamun su kaenggay lun sa ampun. Ugaid'a u entain i makasakutu kanu Suti a Ruh nu Kadenan na di den maampun. 11 "Na amaika pananggiten ka nilan lu sa adapan nu manga 'bpangukum enggu su 'gkangaunutan lu sa 'bpagagaman nu manga Yahudi na di ka 'bpelidua i ginawa nengka sa panun i kapaninindeg'engka sa ginawa nengka udi na ngin i edtalun nengka, 12 ka su entu demun ba a kutika na su Suti a Ruh i temutulu sa leka sa ngin i dait a edtalun nengka." 13 Na aden mama lu kanu makapal a manga taw i midtalu kanu Isa sa "Gulu, amaika mapakay na edtalu ka bu kani kaka i inggay nin den sa laki su kawalis ku kanu pantiali ni ama." 14 Nia inisumpat'u Isa na "Manga dua na suled na entain i minenggay sa laki sa baya-baya sa pagumunen ku sa lekanu dua su pusaka nu?" 15 Saleta na ipedtalus'in bun su kapedtalu-talu nin lu kanu madakel a taw sa "Edsipat kanu taman sa pangingat kanu sa kanu embalang-balang a ukit a kanapsu ka su ginawa nengka na dikena lu 'bpagunut-unut kanu kakawasan nengka ka aden pamun lawan sa kuleta." 16 Pidtalu pan nu Isa al-Masih kanilan su nia ba a pakenalan sa "Aden kun mama a kawasa. Na aden lupa nin a pedtidtu gaid i manga pinamula lun. 17 Na nia natagu sa ginawa nin na 'Nah, da besen kataguan ku sa langun na nasabpet ku a nia. Ngin basi i enggulan ku? 18 Nah, katawan ku den, gubalen ku i kamalig ku a nia ka mumbal aku menem sa masela a kataguan ku sa manga nasabpet a nia enggu su manga ped pan a pantiali ku. 19 Na nia den ba i natagu sa ginawa ku,"Alakaula na ngin den a kapia na bagi i laki. Langun na nasasangan a mapangilay ku kanu dalem'a pila lagun pan na napagadil ku den! Na di ku den lidun i ginawa ku. Nia mapia na keman aku sa mapia, minem aku taman sa enggalaw-galaw aku." ' 20 "Ugaid'a pidtalu nu Kadenan i 'Babal ka. Saguna bun ba nia a magabi na padtuden den su napas'engka. Na dala katagan nu langun taman ba nia a pinagadil'engka kanu ginawa nengka.' " 21 Na nia pan pidtalu nu Isa na "Na entu ba i kapagukitan nu taw a tinemagu sa kakawasan a kanu ginawa nin bu ugaid'a miskinan lu kanu adapan nu Kadenan."
Su Salig kanu Kadenan
22 Entu pan na pidtalu nu Isa al-Masih kanu 'bpamangunut lun i "Kagina ka maitu na nia ku madtalu sa lekanu na di nu 'bpelidua i ginawa nu pantag kanu makan nu a makauyag sa lekanu udi na balegkas'u a makabaus kanu lawas'u. 23 Ka su ginawa tanu na labi-labi pan a balapantag kumin kanu pegken tanu enggu su lawas tanu na maitu bun labi pan i kabalapantag'in kumin kanu ngin i pembalegkasen tanu. 24 Nia nu man pagitung na su manga kakuak na dikena silan pedtalimulan atawa ka 'bpanimun nilan su manga nasabpet'ilan. Dala kanilan i manga kamalig atawa ka lugenan ugaid'a su Kadenan i papegkan kanilan. Na natalatantu i labi-labi kanu pan a pinadtaya nin kumin kanu nan a manga papanuk. 25 Na apia 'gkabusibug i pagitung'u na dala makagaga sa lekanu mapagkalendu sa umul'u sa apia sagay bu. 26 U di nu magaga enggula su paidu bu a entu na ngintu basi ka 'bpelidun nu pan i ginawa nu pantag kanu ped a nasisita? 27 "Na pagitung'u bun u panun ba i kabpaguyag-uyag'u manga pamulan lu sa dalem. Na dikena silan penggalebek atawa ka pembalegkasan nilan i ginawa nilan. Ugaid'a nia ku madtalu sa lekanu na apia su Datu a si Ragya Sulaiman apeg'u kakawasan nin na dala makabpalas sa nalepengan nin su isa bu a mapia i palas'in kanu manga pamumulan bantu. 28 Pidsan pan ka maitu na inaden bun nu Kadenan su langun nu manga 'bpagetu a utan lu sa dalem sa apia nia nin pan kaaden i madala bun namag ka masagugunay i kabidsul lun nu manga taw. Na ngintu ka di kanu besen 'bpaginugut sa sekanin ba i natatalanged a makapangaden sa ukit a kapambalegkas sa lekanu? Na da demun salig'u kanu Kadenan! 29 Na di nu gaid ipembuku sa ginawa su kapangilay nu kanu manga makan nu enggu su manga mapanginem'u, udi na ngin i mapia a 'gkatamanan nu, 30 ka katawan nu den i pakapagitung bun su manga munapik a taw sa entu ba. Na liu san na katawan bun nu Kadenan u ngin i saben-sabenal a nasisita nu. 31 Ugaid'a pangilay nu i kandatuan kanu nu Kadenan ka inggay nin mambu sa lekanu su langun nu nia a manga nasisita nu.
Su Kakawasan lu sa Sulega
32 "Na sekanu a embabaidu a 'bpamangunut sa laki na di nu 'bpelidua i ginawa nu ka di bun pakinugunan nu Ama nu i kaenggay nin kanu pendatuan nin sa lekanu. 33 'Bpapasa nu su langun nu manga tamuk'u ka idsakat'u kanu manga miskinan. Nia dait a mapagadil'u lu sa sulega na su pendikenan a dili 'gkalat enggu lu nu ba itagu su balas'u kakawasan nu a dili madadag ka dala manegkaw lun enggu dala bun malanap-lanap a maminasa lun. 34 Sabap sa apia ngin i malegen sa ginawa nu na makadtatanggunut bun mambu su atay nu. 35 "Na pangingat kanu sa apia ngin a makatingguma, embalegkas kanu enggu talanged'u i pegkaleg su manga palitan nu 36 a mana su manga panunugun a 'bpangingat taman sa 'bpagangapan nilan su datu nilan a ebpun sa 'gkawingan ka amaika makauma den na kaukan nilan semambut su bengawan ka salamen nilan. 37 Na ngin a kapia i manggiginawa nu manga panunugun a entu amaika kauman nu datu nilan i dikena silan pedtulug taman sa naingatan nilan su kapegkauma nin. Na edtalun ku sa lekanu su bantang na malilini su entu a datu taman sa edsambi sa balegkas ka paayanen nin silan ka talagaden nin sa pegken. 38 Na sangat a mapia i manggiginawa nin kanu manga panunugun nin amaika nakapagadil den silan kanu kutika a kauma nin, apia nia nin kauli na luk i gay atawa ka magan mapita. 39 Na makasalig i ginawa nu kigkuan sa walay amaika katawan nin i kauma nu tanegkawn taman sa dili nin papamanteken kanu walay nin. 40 Na sekanu ba a nan mambu na alus i pangingat kanu ka natalatantu den i su Kaka nu Manusia na makatingguma sa kutika a di nu 'gkatukawan."
Su Kasaligan a Panunugun
41 Na minidsa si Pitru sa "Mapulu, ngin i pakenalan ba nia, sekami i 'gkasugat'in udi na su langun nu manga taw?" 42 Nia inisumpat'u Isa na "Ngin i kalangan nengka lun? Entain i matulanged enggu balaitungan a panunugun? Na sekanin ba i mapamili nu datu nin kanu manga ped'in sa katayud kanu walay nin enggu su kaumun sa pegken kanu manga kaped'in a panunugun sa kanu kutika a inidtakena nin. 43 Na sangat a mapia i manggiginawa nu entu a panunugun a napamili amaika nia kauman nu mapulu nin i ipenggulalan nin su alus a galebekan a inisugu lun. 44 Uway ba, entu den ba a panunugun i saligan nu datu a temuganul kanu langun-langun na pantiali nin. 45 Ugaid'a amaika natagu kanu ginawa nu entu a panunugun i 'Mauget gaid 'bpaguli su Mapulu, ' enggu nia pan liu san na amaika mametay den kanu ped a panunugun magidsan i babay enggu mama taman sa keman enggu endalangutan den sa subela. 46 Na matalanged i kauman nu mapulu nin sa da nin kaingati taman sa kanu entu a kutika na da nin pan katawi. Na tedtaden den sekanin nu mapulu nin enggu makasapali den kanu bagi nu manga munapik a taw. 47 "Amaika su panunugun ka apia katawan nin bun i ipedsugu sa lekanin nu mapulu nin na di nin 'bpaginugutan udi na di nin penggalebeken na pedsikesan sekanin sa 'bpelebpadan. 48 Ugaid'a su panunugun a di nin katawan i ipedsugu sa lekanin nu mapulu nin na aden nanggalebek'in a dait a kalebpadan na aden bun sikesan nin ugaid'a dikena mapasang. Na u entain i madakel i nakaenggay lun na madakel bun i matuntut lun. Na u entain menem i nameluntu i kadakel a nakaenggay lun na sangat bun mambu i kadakel a matuntut lun."
Su Masih i Sabapan na Kambad-bad'u manga Taw
49 Na pidtalu pamun nu Isa i "Sabap sa kanu kinasambulak sa apuy a inisikesa nu Kadenan i kinasia ku sa liwawaw na dungia na nia ku pan temun i kemaleg den. 50 Ugaid'a aden pamun kamalasayan a alus a matala ku a mana aku bun pedsalawatan na alus a pedtaliman ku i entu. Ugaid'a taman sa di pan matuman i entu ba na di pan makatelen i manggiginawa ku. 51 Ngin i antapan nu lun, sinemia aku ka enggu ku 'gkasapalan su kabpamagukag sia sa liwawaw na dungia? Edtalun ku sa lekanu na dikena kalilintad i kahanda ku ugaid'a nia alus na mamakadsenggaya su manga taw a aden salig'in sa laki enggu su manga taw a di 'bpamaginugut. 52 Na iganat saguna na su sakambinabatan a lima kataw na mapagumun-umun sa telu kataw na semungkang kanu dua kataw enggu dua kataw na semungkang sa telu kataw. 53 Pagukagen nu ama nin su manga wata nin a mama enggu pagukagen nu manga wata nin a mama su ama nilan. Pagukagen nu ina nin su manga wata nin a babay enggu pagukagen nu manga wata a babay su ina nilan. Su panugangan a babay na pagukagen nin su manga mamanugang lun a babay enggu su manga mamanugang a babay na pagukagen nin su panugangan nilan a babay."
Su Katuntay nu Taw sa Kutika
54 Na pidtalu pamun nu Isa kanu manga taw i "Amaika makailay kanu sa gabun a pakauma ebpun sa sedepan na 'gkatuntayan tanu i mangagan den bantu mulan na mulan den. 55 Amaika magedam'u i semambel sa pamiwangan na 'gkatuntayan tanu i manenang na bali semenang den bantu. 56 Manga mapadayu a manga taw! Sabap sa langun nu nailay nu sia sa dungia enggu sia sa kawang-kawangan na magaga nu magalamat su ula-ula nu gay. Na ngintu ka di nu 'gkagaga pedtuntay i maena nu nia demun ba a kutika?
Pantag kanu Kabpagukag
57 "Na ngintu ka di nu 'gkagaga mapapagayun su ginawa nu sa dait atawa ka wagib? 58 Amaika aden isa a mangaden sa leka sa bitiala taman sa pananggiten ka nin sa walay na kukuman na pakategel ka den sa maatul sa mapia su entu a bitiala sa di pan makasampay sa walay na kukuman. Ka u di, na iten ka nin kanu 'bpangukum taman sa ipalad ka nin sa manga pedtameng sa bilangguan ka ipabilanggu ka nin. 59 Na nia ku madtalu sa leka na lu ka den ba matangen taman sa entu den ba i sabap'a kaibped'u langun nu kuleta nengka sa kapanidtu nengka sa kanu entu a kasalan nengka."
Pantag kanu manga Dusa nu Taw
1 Kanu entu demun ba a kutika na aden manga taw lu a pedtalun nilan kanu Isa su pantag kanu manga taw sa Galili. Na pinaimatayan nu gubilnadul Pilatu su entu a manga taw sa Galili lu kanu Timpul a 'bpagagaman sa Awrusalim kanu kutika a pedsumbali silan sa kurban. Na nia nin nanggula na nakadsimbul su lugu nilan kanu lugu nu manga ayam a ipegkurban. 2 Nia inisumpat'u Isa na "Kagina ka minatay silan sa maitu ba i ukit'in na ngintu ka nia nu 'gkatagu sa ginawa na masela gaid i kadupangan nilan kanu manga ped a taw sa Galili? 3 Dikena! Ugaid'a amaika dili nu edtaubatan su manga kabaladusan nu na mamamatay kanu bun. 4 Na ngin i nanggula nu sapulu enggu walu kataw a entu a minatay lu sa Silaum a naudtangan nu lawan i kalambeg'in a kuta? Na ngin i antapan nu lun, silan bantu na lawan pan i kangasela na kabaladusan nilan kanu manga ped a taw sa Awrusalim? 5 Dikena maitu! Nia ku madtalu sa lekanu na amaika dili nu den edtaubatan su kabaladusan nu na mamamatay kanu bun." 6 Na pidtalu nu Isa kanu manga taw su pakenalan nin na "Aden isa kun a mama a namula sa kayu kulema lu kanu 'bpamumulanan nin. Na kanu isa a gay na tinukaw nin ka basi aden den unga nu kayu nin. Na dala natun nin lun. 7 Na nia nin pidtalu kanu pedtuganul lun na 'Ilay ka ba i kayu kulema a nia, nakatelu lagun den saguna na 'bpagaluyan aku den sia na da pamun unga nin. Na makin tibpad ka a nan ka matag 'gkaibped i kasebudan na lupa a nan na da bun guna nin.' 8 "Ugaid'a nia pidtalu nu pedtuganul lun na 'Mapulu, padtaday ka pan sa nia ba a lagun. Tukawan ta muna sa kalutan ku sa embala-bala ka taguan ku sa makagkasebud lun ka basi 'gkapia pamun. 9 Na amaika munga pamun na sangat i kapia nin. Ugaid'a upama ka di bun munga na entu pan ka tibpaden ku den.' "
Su Babay a Bekut
10 Kanu isa a Gay nu Kabpangintelenen na 'bpangusiat su Isa lu kanu isa a 'bpagagaman nu manga Yahudi. 11 Na aden babay lu a pindadalemetan na saitan sa pinadsakit'in sa nakasapulu enggu walu lagun. Na nabekut den su babay a entu taman sa di den makambetel sa matidtu. 12 Guna mailay nu Isa su babay na kinayap'in enggu nia nin pidtalu na "Aduanin Babu, maawa den i sakit'engka a nan." 13 Na inipu bu nu Isa su babay a entu na midsambuta i kinagkapia nin taman sa matidtu den i kadtindeg'in. Saleta mambu na pinugi nu babay su Kadenan. 14 Kagina ka pinaawa nu Isa su saitan sa Gay nu Kabpangintelenen na nalipunget su pegkamal kanu 'bpagagaman. Na nia nin pidtalu kanu manga taw na "Da kanu pedsia kanu Gay nu Kabpangintelenenen ka aden man nem gay a alus a ipenggalebek. Kagina ka maitu na sia kanu sa kanu entu a manga gay ka enggu makapagkapia su manga sakit'u." 15 Nia inisawal sa lekanin nu Mapulu a su Isa na "Sekanu a manga tagakalen na basi alus bun i bekalan nu su sapi nu udi na su kuda nu ka painem'u sa apia Gay nu Kabpangintelenen. 16 Na ngintu ka di nu 'gkatuntayan i 'gkaalus man a pandaya-dayan ku sa Gay nu Kabpangintelenen su nia ba a babay a tupu nu Nabi Ibrahim a linigkenan nu Datu na Giadsal sa sakit sa nakasapulu enggu walu lagun?" 17 Guna su maitu ba i inisumpat'in na nakagkaya su manga 'bpagatu sa lekanin saleta na su ped a madakel a taw na penggalaw-galaw ka penggalebeken nin su manga 'gkagaipan.
Su Pakenalan pantag kanu Unud'u Tikap
18 Na daka inidsa nu Isa i "Ngin basi i kalagidan nu kapendatu nu Kadenan udi na panun a entu i katus'engka lun? 19 Nia nin kalagidan na su unud'a pamumulan a tikap a inibubul'u mama lu kanu malinawag'in. Na guna su minetu enggu migkasela na mimbaluy a mana kasela na sapun a kayu taman sa pidsasalagan na manga papanuk."
Su Pakenalan pantag kanu Pakembang
20 Inidsa nu Isa edsaluman i "Ngin basi i kalagidan ku kanu kapendatu nu Kadenan? 21 Nia nin kalagidan na su pakembang a inisimbul'u babay kanu sakabatia a inadum a tapung taman sa kinemembang den su inadum bantu."
Su Masimpit a Pintuan
22 Kanu gagalu nu kabpagangay nu Isa lu sa Awrusalim na 'bpamandun nin bun su manga taw lu kanu uman i 'gkasagadan nin a pagingedan enggu manga kawalayan. 23 Na aden minidsa sa lekanin sa "Mapulu, ngintu paidu bu a taw i makalipuas kanu manga kabaladusan nilan?"Nia inisawal'u Isa na 24 "Ibped'u su kategel'u sa makasengel kanu lu ba sa maninit a entu a pintu ka nia nin bantang na madakel i pedsagikel ugaid'a di silan makagaga lemudep. 25 Amaika makambuat su kigkuan sa walay ka pintuan nin den su bengawan saleta na sekanu na lu kanu den makadtindeg-tindeg sa liu ka 'bpanampaken nu su pintu. Na nia nu edtalun na 'Mapulu, ukai kami pan.' " Nia nin menem isawal na 'Di ku katawan u endaw kanu ganat a manga taw.' 26 "Na nia nu menem makasumpat na 'Sekitanu bun namegkan enggu namanginem taman sa nakapamandu ka pan lu sa lekami.' 27 "Ugaid'a edsalumanan nin edtalu i 'Di ku katawan u endaw kanu ganat a manga taw. Sekanu a manga mindaluaka na awai aku nu den.' 28 "Na makapaguguliang kanu den taman sa makapangingiteg kanu ka mailay nu su Nabi Ibrahim, su Nabi Iskak enggu su Nabi Yakub apeg den nu ped a manga nabi a lu silan sa sulega a pendatuan nu Kadenan saleta na sekanu na ipaidtug kanu den sa mawatan. 29 Na aden pan ped a manga taw a ganat sa sedepan enggu sebangan enggu ganat sa dua embala a balangkayan na paayanen den silan lu kanu Kanduli nu Kapapedtampung lu sa ludep'a pendatuan nu Kadenan ka inadil den su dait a kaayanan nilan. 30 Uway ba, saben-sabenal na aden manga taw a natalatantu i mababa su kambetad-betad'ilan na silan bantu i ipulu nu Kadenan. Na maitu bun menem su manga taw saguna a natalatantu i mapulu i kambetad-betad na ibaba silan nu Kadenan lu sa Mauli a Gay."
Su Kinalidu na Ginawa nu Isa al-Masih sa Awrusalim
31 Na guna menem makauma su manga taw a lusud kanu lumpukan a Parisiyu kanu entu ba a kabpangusiat'in na nia nilan pidtalu kanu Isa al-Masih na "Awa ka den sia, ka ipapembunu ka nu Datu Hirud." 32 Nia pidtalu nu Isa na "Edtalu nu bu sa buaya a entu a matipu i maya ba 'Nia bantang na pamugawn ku pan i manga saitan a nia enggu pagkapian ku pan i sakit'u manga taw a nia saguna taman sa amag na amisendaw na mapasad ku den i kahanda ku sia.' 33 Apia ka maitu na nia nasasangan na makatalus aku saguna taman sa amag enggu amisendaw ka di 'gkaalus i sia matay su manga nabi tanu nia tabia na lu sa Awrusalim! 34 "Kanugu nin! Awrusalim, Awrusalim, su pagingedan a namunu i taw nin kanu manga nabi enggu linemebpad kanu langun nu sinugu nu Kadenan. Na pegkiugan ku gaid i matimu ku su langun nu taw nengka a mana su kabpelukup'u ina na manuk kanu pipis'in. Nakapila bu i kabpagapas ku lun na ipegkias'u bun. 35 Saben-sabenal na su pagingedan nu na pandayan den mambu nu Kadenan! Natalatantu na di aku nu den mailay taman sa di nu madtalu i 'Palihalan su pakauma sia kanu ingala nu Kadenan.' "
Su Mama a Pedsakit a Pinagkapia nu Isa al-Masih
1 Na kanu isa a Gay nu Kabpangintelenen na lu kineman su Isa al-Masih kanu walay nu isa a 'gkaunutan kanu lumpukan a Parisiyu. Na pedsipatan demun sekanin nu manga taw. 2 Na guna su linemudep den sekanin kanu walay na aden mama a linemebag su lawas'in a sama bu di pebpatay lu kanu adapan nu Isa. 3 Na inidsan nu Isa al-Masih su manga taw a lusud kanu lumpukan a Parisiyu enggu su manga gulu nu pangitaban sa "Ngintu, inalus'u Kitab i pagkapian su sakit sa Gay nu Kabpangintelenen atawa ka dili?" 4 Na dala silan edtalu sa apia ngin. Na tinawag'u Isa su mama ka pinagkapia nin entu pan ka pinaganat'in. 5 Na pidtalu nin pan kanilan i "Upama, aden sa lekanu i wata nin a maulug sa kalut udi na su ayam'in a sapi a kapun na ngintu di nu kuan semambut ka Gay nu Kabpangintelenen? Ugaid'a dala enggula lun i entu sa lekanu." 6 Na di nilan 'gkasumpatan su entu ba a inidsa nu Isa.
Su Kababa na Ula-ula enggu su Kapangalimuan
7 Guna su nasipat'u Isa al-Masih kanu manga ana i 'bpamagagawan nilan su pagagayanan nu manga balabangsa na pidtalu nin su maya ba a pakenalan lu kanu langun nu taw a pendidilimudan, 8 "Amaika enggaten ka na ped manalabuk kanu pegkalilang na da ka magagayan lu kanu 'bpagayanan nu mapulu sa langun ka basi aden mapulu pan sa leka a pinasabut. 9 Na ubayn ka nu nagana sa leka ka edtalun nin i 'Awa ka san ka nia ka paayan i mapulu a nia sa leka.' Na sabap sa entu ba na lu ka makaayan kanu mababa sa langun a pagagayanan na kayan ka gaid. 10 Ugaid'a sabap sa entu na amaika aden menggat sa lekanu na lu kanu ayan kanu 'bpagagayanan nu mababa sa langun. Na amaika makauma su nagana sa leka na edtalun nin i 'Huy pakat, ayan ka sia. Sia ka sa mapia a nia a 'bpagayanan!' Nia maitu na malu ka makapangandag kanu manga tagapeda nengka. 11 Kagina apia entain i nia nin enggiginawan na sekanin na bantug na ibaba nu Kadenan enggu entain menem i ibaba nin su ginawa nin na sekanin menem i ipulu nu Kadenan." 12 Na pidtalu nu Isa kanu nagana sa lekanin i "Amaika magana ka sa maudtu atawa ka malulem na di ka menggat su pakat'engka, suled'engka atawa ka pagali nengka udi na pagubay nengka a kawasa asal bu na enggaten ka nilan bun lu kanu walay nilan na mana nilan bun binayadan su inigkapia nengka sa kanilan. 13 Na u 'gkanduli ka na nia ka pagakat na su miskinan, su manga lepu, su di pakalakaw enggu su manga di pakailay 14 ka enggu ka 'gkapalihalan nu Kadenan. Apia di ka nilan magaga semuli sa kapagakat'ilan sa leka na su Kadenan bu i mataw lun kanu gay a kambibiag'u manga taw a suti."
Su Pakenalan kanu Masela a Kanduli
15 Guna makineg'u isa kanu manga mama a 'bpamagagayan lu kanu lamisan su entu na nia nin pidtalu kanu Isa al-Masih na "Ngin den a masela i palihala nu entain i makakan kanu Kanduli sa Mauli a Gay lu kanu pendatuan nu Kadenan." 16 Nia pidtalu nu Isa sa lekanin na "Aden isa kun a mama a 'bpagadil sa kanduli a masela gaid taman sa nagakat sa madakel a taw. 17 Guna su nauma den su gay a kapegkanduli na sinugu nin su ulipen nin sa pangangayan nin su langun nu pinagakat'in na nia pidtalu nu ulipen na 'Sia kanu den ka napagadil den su langun taman.' 18 "Daka nangumbal den sa dalinan su uman i isa. Su nauna a napagakat'in na nia nin pidtalu na 'Nakapamasa aku sa lupa saguna na nia mapia na mailay ku na idtud-tud aku nengka lun bu.' 19 "Na su sakataw menem na nia nin pidtalu na 'Aden napamasa ku a sawati a sapi a kapun. Na saguna ba nia i kapedtukaw ku lun u entain i ipagayun ku sa kadadu ku lun na idtud-tud aku nengka lun bu.' 20 "Na su ikatelu menem na nia nin pidtalu na 'Bagu aku kinawing na di aku pan makatalabuk.' 21 "Na minuli den su panunugun nin ka pinanudtul'in su langun a entu kanu mapulu nin na sangat a nalibuteng i atay nu mapulu nin. Nia nin pidtalu na 'Pamagayas ka, lu ka kanu manga lalan a entu enggu manga kalsada nu inged ka pangakat ka su langun nu manga miskinan, su manga di pakailay, su manga tiud taman den kanu manga ped a sadil.' 22 "Na da matana-tana na pidtalu nu panunugun nin i 'Mapulu, natuman su suguan nengka ugaid'a maluag pamun lu sa ludep.' 23 "Nia pidtalu nu mapulu na 'Lu ka den kanu manga masela a kalsada nu dalepa taman pan lu sa dalem ka 'bpaliugati ka su apia entain a taw asal'a mapenu i walay ku a nia. 24 Na nia ku mambu madtalu sa lekanu na apia satiman bu a mumu nu kanduli ku na da isa a makananam lun kanu langun nu mibpalaw sa laki.' "
Su Inibpaliugat sa Kabaluy a Mulit
25 Na madakel a benal i minunut kanu Isa. Na linemengi sekanin ka pidtalu nin kanu manga taw i 26 "Apia entain i miug munut sa laki na di mabaluy a mulit ku nia tabia na saki i lamigen nin kumin kani ama nin, si ina nin, si kaluma nin enggu su manga wata nin taman kanu manga suled'in a babay-mama apeg den mambu su ginawa nin. 27 Na apia entain i di nin pusayn su lekanin a kayu a pinambalawaga taman sa di munut sa laki na di 'gkaalus a mabaluy a mulit ku. 28 "Na upama aden isa sa lekanu i 'bpagitung sa kambalay nin sa kuta na pagitungen nin muna u ngintu makadtun su kuleta nin taman sa kapasad'u kuta a entu ka entu pan na ludsuan nin. 29 U di nin enggulan i entu ba na amaika nia bu mapasad na su 'bpalausan nin ka naibped den su kuleta nin na apia entain i makailay lun na pagumpaken nin su mama a pembalay 30 sa nia nilan edtalun na 'Nan su mama a linemudsu embalay ugaid'a da nin bun mapasad su pembalayn nin.' 31 "Isa pan a upaman na aden kun datu a aden sapulu ngibu i sundalu nin na 'bpangabpet pembunua sa ped a datu a aden bun dua pulu ngibu a sundalu nin. Na pagitungen nin muna sa mapia u ngintu makaatu sekanin kanu 'bpagukagen nin a datu. 32 Na amaika nia nin kalangan na di sekanin makaatu na semugu sekanin sa kasaligan nin ka alawn nin su entu a datu sa gagalu na di pan pakauma ka mumbal silan sa kapasadan. 33 Kagina ka maitu na dala isa bu sa lekanu i mabaluy a mulit ku amaika nia masela sa ginawa nin na su langun taman nin. Ka nia dait a umat ku na saki i pandatun nin sa ginawa nin.
Su Timus a da Katagan nin
34 "Na mapia i nanam'a timus ugaid'a amaika maawa su katimus'in na ngintu makaulit pan su katimus'in? 35 Da katagan nin sia kanu lupa udi na sia kanu pedtambakan sa maledsik. Kagina ka maitu na idtug bu."Na u 'bpamakikineg kanu na di nu mapalambas bu kanu tangila nu!"
Su Bili-bili a Nadadag
1 Kanu isa a kutika na midtatalabuka su manga 'bpangubela sa buis taman kanu manga baladusa ka 'bpamakikineg silan kanu kabpangusiat'u Isa. 2 Ugaid'a su manga taw a lusud kanu lumpukan a Parisiyu enggu su manga gulu nu pangitaban na 'bpeludsuan nilan den pedsudi. Nia nilan pedtalun na "Ngin basi i mama a nia a pebpakaten nin enggu 'bpagamung pegkan sa manga baladusa a nan a taw?" 3 Daka nia pidtalu nu Isa al-Masih kanilan na aden telu timan a manga pakenalan sa maya ba, 4 "Upama aden isa sa lekanu i aden bili-bili nin a magatus timan enggu nadadag su satiman lun. Na ngintu, di nin tagaken su siyaw pulu enggu siyaw a nasama ka pangilayn nin su nadadag a entu taman sa di nin matun? 5-6 Guna su natun nin na sangat a napia mambu i ginawa nin taman sa napamasidaw nin enggu pinusay nin muli. Na mimbabadtug sa natun nin su nadadag a bili-bili nin. Na migkanduli sekanin enggu nia nin pidtalu na 'Enggalaw-galaw tanu ka natun ku su nadadag a bili-bili ku!' 7 Na maitu bun ba i madtalu ku sa lekanu, kagina ka pidtaubatan nu isa a baladusa su dusa nin na masela pan mambu i kagkakalini lu sa sulega kumin sa kanu siyaw pulu enggu siyaw kataw a 'bpagagama a nia nilan kataw lun na pakasugat silan."
Su Pilak a Nadadag
8 Na aden pan pakenalan nu Isa sa nia nin pidtalu na "Upama ka aden babay a aden sapulu timan a kuleta nin a pilak na nadadag su satiman lun. Na tutudan nin su palitan nin enggu payupasan nin su lusud'u walay nin ka dalidipen nin mangilay taman sa matun nin. 9 Guna nin matun na pinanawag'in su manga pakat'in enggu su manga pagubay nin ka pedtalun nin i 'Natun ku den su kuleta ku a nadadag na enggalaw-galaw tanu!' 10 Na maitu bun ba i madtalu ku sa lekanu na sangat i kalilini nu manga malaikat'u Kadenan amaika aden isa bu a baladusa a pidtaubatan nin mambu su dusa nin."
Su Wata a Mama a Midtadin-tadin
11 Na pidtalu pamun nu Isa i "Aden kun mama a dua kataw i wata nin a kanakan. 12 Na nia pidtalu nu ali a wata nin na 'Ama, inggay nengka den su kakawasan a nan a ibpagumun nengka sa laki.' Daka pimbad den mambu nu ama nin kanilan. 13 "Na su nakapila gay bu na pibpasa nu ali su nakaumun sa lekanin. Na su temundug a gay na madakel den i kuleta nin enggu linemakaw sekanin sa mawatan a dalepa. Na dikena besen ka lu nin ba pidsamundala su manga kuleta nin. 14 Na pindamasia nin temegel su langun taman nin. Na guna masugat'a gutem su dalepa a entu na da den nasama sa lekanin. 15 Na minggalebek sekanin kanu mama a lu ba pegkaleben kanu dalepa bantu. Na lu sekanin inipapait'u mama sa dalem ka papedtuganulen nin sa manga gembut! 16 Na sabap kanu kapegkagutem'in na kiugan nin den keman su upis'u munggu a ipapegkan nin kanu entu a manga gembut. Nia maitu na dala taw lu a menggay lun sa pegken! 17 "Na entu den ba mambu i kutika a nakaimaman sekanin na nia natagu sa ginawa nin na 'Langun na pedsukayan ni ama a penggalebek na subela-subela i kapegkan nin. Na saki a nia na 'bpelunusan aku gaid! 18 Na muli aku mambu ka lemu aku kani ama ka edtalun ku lun i 'Ama, nakandusa aku sa Kadenan taman sa leka, 19 na da den kaalus'in i tawagen aku nengka pan a wata nengka. Na itimbang aku nengka den kanu 'bpanukayan nengka a penggalebek.' 20 Na ginemanat den sekanin ka minuli lu kani ama nin."Saleta na mawatan pan sekanin na nasandeng den ni ama nin na entu pan ka ginagawan taman sa napalalaguy nin malaw enggu nagakes'in ka pinanium'in. 21 "Nia nadtalu nu wata nin na 'Ama, nakandusa aku kanu Kadenan taman sa leka. Na 'gkayan aku ka di den alus a itimbang aku nengka a wata nengka.' 22 "Ugaid'a nia pan mula na tinawag'u ama nin su ulipen nin ka sinugu nin sa 'Enggagan ka! Kua ka su mapia sa langun a lambung lu sa walay ka embalegkasi ka sekanin enggu edsisingi ka taman sa edtalumpai ka, 23 daka kua ka su pinagkasebud a sapi ka sumbali ka entu pan ka 'gkanduli tanu sa masela! 24 Sabap sa nia ba a wata ku na nia ku lun talima na minatay na dikena besen ka bibiag bun. Natadin sekanin na saguna pan nakambuat.' Bali linudsuan den su kapegkanduli. 25 "Saleta na su wata nu mama a kaka na lu sa dalem. Ugaid'a su kabpaguli nin na nakineg'in su manga palabuni-bunian. 26 Na tinawag'in su isa a panunugun ka inidsa nin u ngin i 'gkanggula a nan san sa walay. 27 Na nia nakasumpat'u ulipen na 'Su ali nengka na minuli den. Sabap sa nakauli sekanin sa da bun baya-baya nin na inipasumbali ni ama nengka su pinagkasebud a sapi.' 28 "Na nasakit i ginawa nu kaka taman sa da den sekanin talus lu kanu ludep'u walay. Na si ama nin den i linemiu ka pinamagayukan nin sa temalus den su wata nin a entu a kaka. 29 Na nia nin bu inigkelid kani ama nin na 'Ngin den mambu i nia na lagunan den na penggalebekan ku bu seka sa manabia ka pan i ulipen aku na da ku seka malampawi. Inunta na apia su bumbul'a kambing na da nengka makaenggay sa laki a makagkanduli ku sa manga pakat ku. 30 Ugaid'a nan a wata nengka a naibped'in su pantiali nengka sa kinadsundal'in na guna su minuli sekanin na ngintu ka sinumbali nengka pan su sangat i kasebud'in a sapi!' 31 "Na nia nadtalu nu ama nin na 'Tu, da ku seka mapitas na langun na kaaden ku na leka man tanan. 32 Ugaid'a alus i 'gkanduli ta ka edsukul-sukul ta kanu Kadenan ka su ali nengka a minatay na saguna na mimbibiag den. Sekanin a midtadin-tadin na nakambuat den saguna.' "
Su Pakenalan pantag kanu Matindep a 'Gkasaligan
1 Na pidtalu pan nu Isa al-Masih kanu 'bpamangunut lun su maya ba a pakenalan,"Na aden kawasa a mama a ipedsalig'in su manga pantiali nin sa kanu isa a mama. Na su pedsaligan nin na 'gkasenditan sa pembinasan nin kun su kuleta a ipedsalig lun. 2 Na inipatawag'u mapulu nin a kawasa ka inidsan nin sa 'Aden 'gkakineg ku a makapantag sa leka. Na kagina ka maitu na iuli nengka su lisibu nu langun na aden utang'in kanu pantiali ku ka iganat saguna na da den galebek'engka sia sa laki.' 3 "Nia natagu sa ginawa nu mama a pedsaligan na 'Amaika iawa aku den nu mapulu ku a nia kanu galebekan ku na ngin basi i enggulan ku? Di aku makagaga enggalebek sa maugat enggu kayan aku mamangeni. 4 Nah, katawan ku den i enggulan ku, apia maawa aku pan kanu galebekan ku na aden pamun mabpakat ku a temalima sa laki.' 5 "Na pinasuguan nin su langun nu aden utang'in kanu mapulu nin ka inidsan nin su nauna sa langun sa 'Pila i utang'engka kanu mapulu ku?' 6 "Daka nia inisawal'u mama na 'Magatus kabarilis a lana a mamut.' " Nia pidtalu nu mama a 'gkasaligan a tagakalen na 'Nia su listan na utang'engka. Ayan ka, ka enggu nengka kasambian sa lima pulu bu!' 7 "Daka su sakataw menem i inidsan nin sa 'Seka, pila i utang'engka kanu mapulu ku?' " Nia nin inisawal na 'Sangibu kaasadan a bantad.' " Nia pidtalu nu entu a 'gkasaligan na 'Nia su utang'engka na sambi ka enggagan sa walu gatus!' 8 "Na sabap kanu entu a pinggalebek'in a katindep'a itungan na pamedtan nu mapulu nin su entu a mama a salimbuten. Ka benal mambu a labi pan i kabalaitungan sa kadudungiay su manga taw a di 'bpaginugut sa Kadenan kumin kanu manga ulipen nu Kadenan." 9 Na pidtalu pamun nu Isa i "Da kanu 'gkasingit. Nia pan mula na pagupakat kanu sa manga taw a sia makanggulalan kanu pilak'u. Ka su pilak bantu na da katagan nin lu sa Mauli a Gay. Na sekanu ba a nan i matatalanged a matalima lu sa sulega. 10 "Ka apia entain i kasaligan sa paidu i alaga nin na kasaligan bun mambu sa masela i katagan nin. Ugaid'a entain menem i salimbuten sa paidu bu i alaga nin na labi pan a salimbuten sa masela i katagan nin. 11 Na amaika di ka kasaligan sa kakawasan sia sa dungia na panun ba i kasalig sa leka sa suti a pantiali lu sa sulega. 12 Enggu upama ka da ka kasaligi kanu dikena leka a kakawasan na dala menggay sa leka sa suti a pantiali lu sa sulega. 13 "Na dala ulipen a dua kataw i mapulu nin ka nia nin manggula na kabensian nin su sakataw na kalilinian nin su sakataw. Na pagungayan nin su sakataw enggu edsudian nin menem su sakataw. Amaika nia den masela sa ginawa nengka su pilak na dala sa atay nengka su Kadenan."
Pantag kanu Palangay nu manga Taw a Lusud kanu Lumpukan a Parisiyu
14 Na nakineg'u manga taw a lusud kanu lumpukan a Parisiyu su entu a kadtalu nu Isa al-Masih. Na sabap sa silan na napsu sa kuleta na pidsaumput'ilan sekanin. 15 Ugaid'a pidtalu nu Isa al-Masih sa kanilan i "Sekanu bun i mibpanday kanu ginawa nu sa matidtu kanu sia kanu mata nu manga taw inunta na su Kadenan i pakailay kanu atay nu. Ka endaw i balaalaga sia sa liwawaw na dungia na kasemu-semuan lu kanu adapan nu Kadenan. 16 "Su Kitaban nu Nabi Musa enggu su sulat'u manga nabi na nakapayag den taman kanu kutika nu Yahiya a 'Bpanalawat. Na ganat den kanu entu na su Mapia a Tutuma a pantag kanu kapendatu nu Kadenan na nakapayag den. Na uman i isa na 'bpagapas gaid sa makaludep kanu entu a pendatuan. 17 Ugaid'a nia pan lemun nu sulega enggu su dungia i silan i madala kumin sa kaawan na kapantag su manga madidu a titik'u Kitab. 18 "Na apia entain a mama i imbelag'in su kaluma nin enggu mangaluma sa ped na pembaladusa kanu kaluma nin ka pegkiuga i entu. Na apia entain a mama i mangaluma sa babay a nakambelag na pegkiuga bun.
Su Pakenalan a pantag kanu Kawasa a Mama enggu si Lasarus
19 "Na aden kun mama a kawasa a benal a mimbalegkas sa matinang a lambayung enggu mapia i palas'in enggu sangat a pegkakalilini uman gay. 20 Na aden mambu mama a sangat i kamiskin nin a bedtuan sa Lasarus na mimbakataw i lawas'in. Na uman-uman gay na pembantialen den lu kanu bengawan nu walay nu kawasa a entu a mama 21 ka 'bpanganganayn ni Lasarus i makakan kanu puput'u kinan nu kawasa a mama. Na aden antu na manga asu i 'bpeliu ka pendila kanu bakataw nin. 22 "Na da matana-tana na minatay si Lasarus, su mama a entu a miskinan. Na pinananggit'u manga malaikat lu kanu tapid'u Nabi Ibrahim lu sa sulega. Mandiadi na minatay mambu su kawasa a mama na inilebeng sekanin. 23 Lu sa dalepa nu Namamatay na pedtala sa masakit su kawasa a mama. Guna sekanin pedtingada na nailay nin su Nabi Ibrahim enggu su mama a miskinan na pedtapid silan lu sa sulega. 24 Na nanawag sekanin sa 'Aday! Hu Ama ku a Nabi Ibrahim, ikalimu aku nengka pan, ka u mapakay bu na sugu ka pan si Lasarus sa isumbuk'in pan i sawanay kanu tindulu nin sa ig ka denggawan nin pan i dila ku a nia, ka sangat a 'gkapasangan aku kanu nia ba a apuy.' 25 "Na nia inisawal'u Nabi Ibrahim na 'Hu Datu, 'gkagkalendem'engka pamun su langun na mapia sa ginawa nengka a nakua nengka kanu kutika a bibiag ka pan. Inunta na si Lasarus na langun na kamalasayan na lekanin den tanan. Ugaid'a saguna a gay na nia den sekanin sa laki enggu 'gkapia mambu i ginawa nin kumin sa leka a pedtala sa malasay. 26 Na liu sa nan na nabpageletan tanu na madalem a baugan sa upama aden miug medtas ganat sia ka seman na di makaukit. Maitu bun su ganat san ka miug semia na di bun masulut.' 27 "Nia nadtalu nu mama a kawasa na 'Apia ka maitu Ama na 'bpangenin ku sa leka i upama mapakay na sugu ka pan si Lasarus lu kanu walay ni ama ku, 28 ka aden lu ba manga suled ku a lima kataw a mama. Palu ka sekanin ka enggu nin silan 'gkapangindaw ka enggu silan pakaingat. Na di silan makasia sa nataguan ku a nia a sangat i kalasay nin.' 29 "Ugaid'a nia pidtalu nu Nabi Ibrahim na 'Aden pan kanilan su Kitab'u Nabi Musa enggu su ped a manga nabi a mapaingat kanilan. Na wagib kanu manga suled'engka i mamakikineg kanu indawan nu entu a manga Kitab.' 30 "Nia nakasumpat'u kawasa a mama na 'Ama, kulang pamun i entu! U aden bu embibiag a minatay a makalu kanilan na natalatantu a edtaubat silan kanu kabaladusan nilan.' 31 "Ugaid'a nia pidtalu nu Nabi Ibrahim na 'Amaika di silan makikineg kanu Nabi Musa enggu su manga ped pan a nabi na di bun silan magaga mapapalitiaya apia nia nin maukit i aden embibiag a minatay.' "
Pantag kanu Kabpangingat
1 Na pidtalu nu Isa al-Masih kanu 'bpamangunut lun i "Natalatantu a makatingguma su manga sasat, ugaid'a dalem ka maitu na labi den a sangat a temala sa malasay su taw a 'bpanasat. 2 Na mapegkag pan a kasikesan nu taw a entu i 'bpaliwatuan sekanin sa masela a galingan a watu ka idtug den lu kanu lagat amaika makapasibay nin sa lalan a matidtu su manga mababa i muletad'in a taw. 3 "Kagina ka maitu na pangingati nu su manga galebek'u. Amaika nakandusa su suled'engka na pangindaw ka sekanin. Na amaika edtaubat den na ampun ka sekanin. 4 Apia ka maitu na amaika nakandusa sekanin sa leka sa nakapitu kanu nagagabian na uman makanggula sa makaisa na embalingan sa leka ka edtalun nin i maya ba sa 'Midtaubat aku den a benal' na ampun ka mambu sekanin."
Pantag kanu Salig
5 Pidtalu nu 'bpamangunut kanu Isa al-Masih i "Embageli ka i salig'ami." 6 Na nia inisawal'u Isa na "Dikena nia nin pantag na matangka su salig, ka amaika nalepeng bu nu salig'u a mana su kasela na lagas'a tikap na magaga nu den semugu i sapun a kayu sa badtuden nin i ginawa nin ka lu nin ipamula sa lagat na entu pan na paginugutan ka nin!
Su Galebekan nu Panunugun
7 "Upama ka aden isa sa lekanu i aden ulipen nin a pendadu lu sa dalem udi na pedtameng sa bili-bili na su kauli nin na ngintu, 'gkaalus a edtalun nu lun i 'Hu talus ka, ayan ka sia, ka kan ka den!' 8 Na dikena man i alus a edtalun nu lun ka nia pan mula na nia nu madtalu lun na 'Pagadil ka sa ipenggabi ku na pamalung ka sa mailut enggu panalagad aku pan. Na endaw i kapasad ku na entu pan ka kan ka enggu inem ka mambu.' 9 Sabap sa pinaginugutan ka nu entu a 'bpanunugun na dili nin mapaginagkay i pangenian ka nin sa sukul. 10 Na maitu kanu bun ba, amaika nanggalebek'u den su langun nu manga inisugu sa lekanu na nia alus a madtalu nu na 'Sekami na ulipen kami bu a dala pantag'in na tinuman nami bu i alus a galebek'ami.' "
Su Sapulu Kataw a Mindebpig
11 Na su kabpagangay nu Isa lu sa Awrusalim na lu minukit sa pageletan nu dalepa a Samaria enggu Galili. 12 Guna su 'bpeludep den sekanin kanu kawalayan na sinumbak sekanin nu sapulu kataw a manga aden debpig'in. Na sabap kanu sakit'ilan na di silan 'bpagubay kanu Isa. 13 Na tinawag'ilan su Isa sa matanug gaid,"Nabi Isa! Mapulu, ikalimu kami nengka pan!" 14 Saleta na nailay silan nu Isa na nia nin pidtalu kanilan na "Lu kanu den kanu manga 'bpangurban ka ipaamad'u i mapia den su lawas'u." Bali linemu den silan na lu pan silan kanu lalan na migkakapia den silan. 15 Guna su isa kanilan i nakadsima sa naawa su sakit'in na mimbalingan ka pinugi nin sa matanug gaid su Kadenan. 16 Na sinemugiud den sekanin kanu adapan nu Isa ka nanginsukulen sekanin. Na su entu besen a mama na taw sa Samaria. 17 Na midtalu su Isa sa "Aden sapulu a naawan sa sakit ugaid'a sakataw bu i mimbalingan. Na ngintu endaw den basi minangay su siyaw kataw a manga ped'in? 18 Enggu ngin i nia ka da salakaw a nakambalingan a namugi kanu Kadenan nia tabia na su lapu bu a nia?" 19 Daka pidtalu nu Isa sa lekanin i "Edtindeg ka, ka lu ka den. Sabap kanu salig'engka kanu Kadenan na mapia ka den saguna."
Pantag kanu Kauma nu Kandatu nu Kadenan
20 Na aden gay a inidsa nu ped a manga taw a lusud kanu lumpukan a Parisiyu kanu Isa al-Masih u kanu i kauma nu kandatu nu Kadenan. Nia nin inisawal na "Su kandatu nu Kadenan na dala tanda lun sa maya-maya i kauma nin. 21 Sabap sa sia bun kanu atay nu i kandatu nu Kadenan kanu manga taw na da isa bu a makadtalu sa 'Ilay ka, nia den ba!' atawa ka 'Entu den ba!' " 22 Daka nia nin pidtalu kanu 'bpamangunut lun na "Makauma su kutika a madsinganin nu i mailay nu sa apia sapelek bu kanu entu a kutika su Kaka nu Manusia sia sa dungia. Ugaid'a apia ngin pan na di nu bun mailay. 23 Aden bun makadtalu sa leka sa 'Sandeng ka ba i entui, ' udi na 'Ilay ka ba i entui.' Ugaid'a di ka a benal 'bpeliu sa nia maitu na pangilayn nengka. 24 Sabap sa amaika mauma den su gay a kapegkauma nu Kaka nu Manusia sia sa liwawaw na dungia na nia lun kalagidan na mana su ipedtalas a kilat sia sa kawang-kawangan a pakatayaw kanu pat a pisuk'u dungia. 25 Ugaid'a da pan mauma su entu ba a gay na sangat a temala sa malasay su Kaka nu Manusia taman sa ikias sekanin nu manusia a 'bpaguyag-uyag sa saguna ba a nia a timpu. 26 "Na mana bun su timpu nu Nabi Nuh, maitu bun ba amaika mauma den su gay nu Kaka nu Manusia, 27 ka kanu entu a timpu na langun nu manga taw na 'bpamegkan enggu 'bpamanginem, su manga mama na 'bpamangaluma enggu su manga babay na 'bpamangaluman taman sa di pan makaludep su Nabi Nuh kanu masela a kapal'in. Guna su nakauma su kinagkadalem na langun nilan na namamatay. 28 "Na maitu bun ba su timpu nu mama a si Lut a nakadalung den na langun nu taw na kineman sa endaw i magaga nin enggu namanginem silan. Namamasa silan enggu mibpapasa, midtalimulan enggu mimbabalay silan. 29 Ugaid'a su gay a ginemanat den si Lut sa inged a Sudum na minulan sa apuy enggu sandawa a lu ganat sa sulega a minimatay kanu langun nu taw sa inged a Sudum. 30 "Na maitu den ba i manggula amaika mauma den su gay a kabpayag'u Kaka nu Manusia. 31 Na kanu entu ba a gay na su mama a lu sa liu na walay nin na di den alus i makaludep kanu walay nin ka panguan nin su langun taman nin. Maitu bun ba su mama a lu matabu sa dalem na di den alus a muli pan sekanin kanu walay nin. 32 Tademi nu su kaluma ni Lut a di 'bpaginugut kanu Kadenan na linemengi kanu naganatan nin a sabapan na kinapatay nin. 33 Apia entain pan i mamikal sa mapia i katamanan nin na dala bun matalima nin! Ugaid'a apia entain i munut sa laki a taligkudan nin su kapia na manggiginawa nin na sekanin ba i makatalima kanu uyag-uyag a da taman nin. 34 Ka nia nin kabantangan na kanu nambunba a magabi a kauma nu Kaka nu Manusia na aden dua kataw a pedtulug kanu sawalu bu a igan na kuan den i sakataw enggu matabun su sakataw. 35 Na aden dua kataw a manga babay a pegkisal sa makan na kuan den i sakataw enggu su sakataw menem na matabun. 36 Na aden dua kataw menem a manga mama lu sa dalem na kuan den su sakataw ugaid'a matabun su sakataw." 37 Na inidsa nu 'bpamangunut kanu Isa al-Masih i "Nah, Mapulu, endaw i entu basi?"Nia nin inisumpat na "Tademi nu i endaw embulig su manga kakuak na aden lu ba pegken nilan na lu nu ba malemu matun su bangkay."
Su Pakenalan pantag kanu Balu a Babay
1 Aden isa a gay a pidtalu nu Isa al-Masih kanu 'bpamangunut lun su pakenalan a ukit a matutulu silan sa kapangeni-ngeni sa uman-uman gay taman sa di silan masemu sa kapagangapa sa isumpat'u Kadenan kanu kabpangeni-ngeni nilan. 2 Na nia nin pidtalu kanilan na "Aden kun 'bpangukum a kupul a dala gaid ipegkangingili nin apia su Kadenan. 3 Na aden mambu balu a babay kanu dalepa nu entu a 'bpangukum na pembabalingan sa lekanin ka 'bpelingasa sa tabang. Nia nin pidtalu na 'Hu mapulu, tabangi aku sa kanu 'gkambalay ku sa bitiala ka 'gkapasangan aku.' 4 "Na nauget den a gay na di ibpamamantag'u entu a 'bpangukum su entu a babay. Na guna su nauli den na natagu sa ginawa nin i 'Nah, di ku bun mambu ipegkagilek su Kadenan enggu da gaid 'bpagadatan ku a pagidsan ku a taw. 5 Ugaid'a sabap sa pakalingasa den a benal i balu a entu a babay na ipaninindeg ku den sekanin. Ka apia ngin pan na embabalingan bun ka lingasan aku nin.' " 6 Na ipedtalus bun nu Isa su kapedtalu-talu nin sa "Pakikineg'u su katigan nu salimbuten a nan a 'bpangukum. 7 Ka su bantang'in na su Kadenan bu i papedtaya kanu manga taw a 'bpangeni sa tabang sa magabi sa malamag na sagugunay demun i kadtabang'in kanilan. 8 Na nia ku madtalu sa lekanu na lampian nin su manga taw a entu enggu enggulan nin semambut. Ugaid'a pidsan ka maitu na amaika makauma den sia sa liwawaw na dungia su Kaka nu Manusia na ngintu basi makatun sekanin sa taw a aden salig'in kanu Kadenan?"
Su Pakenalan pantag kanu Taw a Lusud kanu Lumpukan a Parisiyu enggu su
'Bpangubela sa Buis 9 Na pidtalu nin pan su nia ba a pakenalan lu kanu manga taw a nia nilan pedsaligan na su tindeg'u ginawa nilan enggu pedsudian nilan su ped. 10 Nia nin pidtalu na "Aden kun dua kataw a mama i linemudep sa kanu Timpul a 'bpagagaman ka nangeni-ngeni. Su sakataw na lusud kanu lumpukan a Parisiyu enggu su sakataw na 'bpangubela sa buis. 11 Su taw a lusud kanu lumpukan a Parisiyu na mimbisa-bisa edtindeg enggu nangeni-ngeni sekanin pantag kanu ginawa nin sa 'Hu Kadenan ku, pedsukul-sukul aku sa leka ka dikena aku napsu a taw, di aku salimbuten a mama enggu dikena maledsik i palangay ku a mana su manga ped a taw. Dikena aku mana su nan a 'bpangubela sa buis 12 taman sa balapuasa enggu baladsakat aku sia kanu langun nu manga pantialian ku.' 13 "Ugaid'a su mama a 'bpangubela sa buis na matangka gaid i tinindegan nin na apia su bias'in na di nin gaid mabatun ka 'gkayan mambu. Saleta na 'gkapanampak'in su laleb'in enggu pakapanalentek ka nia nin 'gkadtalu kanu ginawa nin na 'Kadenan ku na ikalimu aku nengka ka katawan ku a benal i saki su taw a sangat a mimbaladusa.' 14 "Na guna su maitu na su kinauli nilan na su mama a 'bpangubela sa buis i nakasugat kanu Kadenan kumin kanu mama a lusud kanu lumpukan a Parisiyu. Kagina apia entain i ipulu nin i ginawa nin na namba i ibaba nu Kadenan. Ugaid'a su entain menem i ibaba nin i ginawa nin na sekanin ba i ipulu nu Kadenan."
Su Kinapamalihala nu Isa al-Masih kanu manga Wata
15 Na pinananggit bun mambu nu manga taw su manga wata nilan a mangadidu lu kanu Isa al-Masih ka enggu nin silan kadapenetan. Guna su nailay nu manga 'bpamangunut sa lekanin su entu na sinapalan nilan su manga taw. 16 Ugaid'a tinawag'u Isa al-Masih su manga wata ka pinaubay nin saleta na pidtalu nin i "Di nu 'bpagungena su manga wata a nan, suguti nu a makasia silan sa laki ka su maya ba kanu manga wata a nia i makalusud kanu kapendatu nu Kadenan. 17 Saben-sabenal na apia entain i di temalima kanu kapendatu nu Kadenan a maya ba kanu kinatalima nu manga wata a nia na natalatantu i dili silan makalusud lu ba."
Su Kawasa a Mama
18 Na isa kanu manga 'gkaunutan nu Yahudi i minidsa kanu Isa al-Masih sa "Matidtu a Gulu, ngin i enggulan ku asal'a matalima ku su uyag-uyag a da taman nin?" 19 Nia inisumpat'u Isa al-Masih sa lekanin na "Ngintu ka pedtawagen aku nengka sa matidtu? Na dala man ped a matidtu ka su Kadenan bu. 20 Ugaid'a katawan nengka den su manga kasuguan nu Kadenan a 'Da ka 'gkiuga, da ka mimatay, da ka manegkaw, da ka manendit sa dikena benal, da ka edsalimbut, pagadati ka su ama nengka enggu su ina nengka.' " 21 Nia inisumpat'u mama a entu na "Langun nu nia na ipenggulalan ku den iganat pan sa manguda aku pan." 22 Na guna makineg'u Isa al-Masih su entu ba na nia nin pidtalu na "Manga dua na suled, aden pamun satiman a kulang'engka. Nia pan dait na 'bpasan nengka muna su langun nu kaaden nengka entu pan ka inggay nengka sa kanu manga miskinan ka enggu maaden su kakawasan nengka lu sa sulega. Entu pan na embalingan ka sia ka unut ka sa laki." 23 Ugaid'a guna makineg'u mama su entu a kadtalu nu Isa na nalidu gaid i ginawa nin ka subela-subela i kakawasan nin. 24 Na guna mailay nu Isa al-Masih i nalidu i ginawa nu mama na nia nin pidtalu na "Mapasang a benal kanu manga kawasa i kaludep'ilan kanu kapendatu nu Kadenan! 25 Ka nia pan malemu kanu unta i kaludep'in kanu pesu nu lagum kumin kanu kaludep'u kawasa kanu kapendatu nu Kadenan." 26 Na su manga taw a nakakineg lun na minidsa sa "Amaika maitu na entain besen i malipuas?" 27 Nia inisumpat'u Isa al-Masih na "Endaw i di magaga nu taw na su Kadenan i makagaga lun." 28 Na midtalu si Pitru sa "Na panun menem i maya ba sa lekami a nia a initabun nin su langun-langun ka enggu makadtatanggunut sa leka?" 29 Na pidtalu nu Isa al-Masih sa kanilan na "Edtalun ku sa lekanu i bantang na langun na taw a temagak sa walay nin udi na kaluma nin atawa ka suled'in udi na manga lukes'in taman kanu manga wata nin asal bu na manggalebek'in su suguan nu Kadenan, 30 na makatalima sa maitu ba i kadakel'in sia sa dungia enggu sia kanu manga mauma a timpu na makatalima bun silan sa uyag-uyag a da taman nin."
Su Ikatelu a Kinapayag'u Isa al-Masih kanu Kapatay nin
31 Na pinadsenggay nu Isa al-Masih su sapulu enggu dua a pinamili nin ka pidtalu nin kanilan i "Ilay nu. 'Bpelu tanu sa Awrusalim ka lu den ba matuman su langun nu nakasulat'u manga nabi a pantag kanu Kaka nu Manusia. 32 Na makapalad den sekanin lu kanu manga dikena-Yahudi na edsudian nilan, pagkayan nilan, panudan nilan 33 enggu pamadasan nilan taman sa imatayan nilan. Ugaid'a su ikatelu nin gay na embibiag sekanin 'bpaluman." 34 Ugaid'a da kasabuti nu 'bpamangunut lun su langun nu pidtalu nin. Su maena nin na inipagena kanilan. Da nilan katawi u ngin i pidtalu-talu nu Isa al-Masih.
Su Mama a di Pakailay lu sa Yariku
35 Na guna su pakasiken den su Isa al-Masih sa Yariku na aden mama a di pakailay a 'bpagagayan sia kanu ligid'u lalan ka 'bpamangeni. 36 Na guna nin makineg su madakel a pedsagad na minidsa sekanin sa "Ssst, ngin i 'gkanggula?" 37 Nia nilan inisumpat sa lekanin na " 'Bpagukit su Isa a taw sa Nasarit." 38 Na inilalis'in i "Tupu nu Daud a su Isa, ikalimu aku nengka pan!" 39 Na su manga taw lu sa unan nu Isa al-Masih na sinapalan nilan su mama sa temelen sa kabpelalis'in ugaid'a makin nin pinakatanug su kabpelalis'in sa "Tupu nu Daud, ikalimu aku nengka pan!" 40 Na mibpalen su Isa al-Masih ka inisugu nin i paubayn nilan i di pakailay a entu. Guna den makasiken na inidsan nu Isa al-Masih sa 41 "Ngin i 'gkalilinian nengka a makadtabang ku sa leka?"Nia nin nakasumpat na "Mapulu, nia ku kiug na makailay aku." 42 Na nia mambu pidtalu nu Isa al-Masih sa lekanin na "Makailay ka! Ka su salig'engka i napagkapia sa leka." 43 Na entu demun ba na nakailay su mama taman sa pidtatanggunutan nin su Isa al-Masih enggu midsukul-sukul sekanin kanu Kadenan. Guna mailay nu madakel a taw su entu ba na pinugi nilan bun mambu su Kadenan.
Su Isa al-Masih enggu si Sakayus 1 Na nauma nu Isa su dalepa a Yariku taman sa pakalampas den silan. 2 Na aden mama lu a bedtuan sa Sakayus. Na sekanin i mapulu nu manga 'bpangubela sa buis kanu entu a dalepa enggu kawasa gaid. 3 Na pedtukawan nin 'bpagilay u entain su Isa. Ugaid'a sabap sa makapal su taw na di nin 'gkailay ka madidu a mama si Sakayus. 4 Na nalalaguy sekanin lu sa unan ka namusug kanu kayu asal bu na mailay nin su Isa a pedsagad. 5 Na guna su nauma den nu Isa su entu a kayu na tinemingada sekanin ka nia nin pidtalu na "Sakayus, pamagayas ka san embaba ka lu aku pedtumpa sa lekanu." 6 Na namagayas gaid embaba si Sakayus ka sangat a napia i ginawa nin na pinatalus'in su Isa. 7 Na langun nu manga taw lu na nakailay enggu migkenu silan kanu entu a pinggula nu Isa sa nia nilan pidtalu na "Ngintu ka lu sekanin 'bpangintelenen kanu walay nu baladusa a mama?" 8 Ugaid'a midtindeg si Sakayus enggu nia nin pidtalu na "Mapulu, pakikineg ka pan. Inggay ku i sabad sa kakawasan ku a nia kanu manga miskinan enggu amaika aden napagakalan ku na bayadan ku sa makapat matakep su nadsalimbut ku lun." 9 Nia pidtalu nu Isa sa lekanin na "Nakatingguma den sia saguna su kalipuasan kagina nia a mama na tupu bun mambu nu Nabi Ibrahim. 10 Namba i sabap'a kinasia nu Kaka nu Manusia ka 'bpangilay enggu pabpelipuasen nin su nakasibay."
Su Pakenalan pantag kanu Kuleta a Bulawan
11 Na gagalu nu kabpagitung'u manga taw kanu langun na nanggula lu kanu walay ni Sakayus na pedtalu-talu bun su Isa sa pakenalan kagina ka masiken den silan sa Awrusalim enggu 'gkapangingalap'u manga taw i mangagan den ipayag'u Kadenan su kahanda nin sa kandatu nin. 12 Na nia nin pidtalu na "Aden kun masela a taw a 'bpelu sa mawatan a dalepa ka enggu nin manggalebek i sekanin ba i mapamili a sultan entu pan ka muli. 13 Na da pan sekanin makaganat na tinawag'in su sapulu kataw a ulipen nin ka pinangenggan nin sa kuleta a bulawan saleta na pidtalu nin kanilan i 'Ipamantiali nu sa panun i kaiseg'in sa gagalu na da aku sia.' 14 "Ugaid'a nabensian sekanin nu manga taw nu dalepa nin taman sa inipatundug'ilan sa kanu 'gkasaligan sa edtalun nin i 'Di nami 'gkalilinian i endatuan kami na mama a nia.' 15 "Apia ka maitu na su entu a mama na mimbaluy bun a sultan na entu pan ka minuli sekanin. Daka inipatawag'in su langun nu ulipen a inenggan sa kuleta a bulawan ka enggu nin maamad u ngin den i kasela na napantiali nilan. 16 "Na su nauna na minubay den ka midtalu sa 'Mapulu, nakapantiali aku sa nakasapulu natakep su kuleta a bulawan a inenggay nengka sa laki.' 17 "Nia nadtalu nu Sultan na 'Mapia! Mategel ka a ulipen. Sabap sa aden katulangedan nengka sia kanu manga madidu bu a galebek na pakamalen ku mambu seka sa sapulu kainged.' 18 "Na su ikadua menem a ulipen na minubay ka midtalu sa 'Mapulu, nakapantiali aku sa nakalima natakep su kuleta a bulawan a inenggay nengka sa laki.' 19 "Nia inisumpat'u Sultan na 'Mapia na seka i saligan ku kanu lima kainged.' 20 "Na nakauma menem su ikatelu a ulipen a nia nin pidtalu na 'Mapulu, nia bun su kuleta nengka a bulawan. Na mapia ka pinutus ku kanu musala ku ka inulaman ku gaid. 21 Sabap sa tamegesen ka gaid na inikagilek ku seka. Na katawan ku bun i pebpunduten nengka su dikena nengka inibetad enggu pagaganin nengka su dikena seka i namula lun.' 22 "Nia pidtalu nu Sultan kanu ulipen nin na 'Babal ka! Seka den i da lantek'in a ulipen ku! Sa kadtalu nengka a nan na ipaamad ku sa leka i 'gkawagiban ku bun seka. Katawan nengka i tamegesen aku ka pebpunduten ku su dikena ku inibetad enggu pagaganin ku su dikena saki i namula lun. 23 Na ngintu ka da nengka itagu sa bangku su kuleta ku, ka amaika kuan ku den kanu kauli ku na unut den su iseg'in?' 24 "Daka nia pidtalu nu Sultan kanu manga pedtindeg-tindeg lu na 'Kua nu su kuleta a bulawan san sa lekanin ka inggay nu lu kanu ulipen a entu a aden sapulu a kuleta nin a bulawan.' 25 "Nia nilan pidtalu na 'Mapulu, di ka den ka aden den sapulu a kuleta nin!' 26 "Nia inisumpat'u Sultan na 'Saben-sabenal na apia entain i kasaligan kanu inenggay ku lun na umanan ku pan. Ugaid'a su taw a di 'gkasaligan na apia ngin i kapaidu nu lekanin na ipaawa ku lun bun. 27 Na makapantag menem kanu manga taw a 'bpagukag sa laki na u entain i di malilini sa kapendatu ku sia na it'u sia ka imatayi nu sia kanu adapan ku.' "
Su Kinaludep'u Isa al-Masih sa Awrusalim
28 Guna su nadtalu nu Isa den su langun nu nia ba na entu pan ka tinemakedeg menem sekanin lu sa Awrusalim. 29 Guna su pakasupeg den sekanin lu kanu manga dalepa a bedtuan sa Betpaig enggu Bitani a lu mag kanu palaw a bedtuan sa Ulibus na sinugu nin su dua kataw kanu manga pinamili nin 30 a maya ba i tutuma nin kanilan,"Lu kanu kanu dalepa a nan sa 'gkasangulan nu ka endaw i kaludep'u na makailay kanu sa manguda a kuda a iniketan a da pan kagkudai. Na bekali nu ka tundan nu sia. 31 Amaika aden midsa sa lekanu sa 'Nginan ka pembekalan nu i manguda a kuda ku a nan?' na nia nu edtalu na 'Nasisita nu Mapulu su nia.' " 32 Na ginemanat den silan taman sa natun nilan su pidtalu nin kanilan. 33 Na guna su pembekalan nilan den su manguda a entu a kuda na midtalu su kigkuan lun sa "Nginan ka pembekalan nu i kuda ku a nan a manguda?" 34 Na nia nilan inisawal na "Nasisita nu Mapulu su nia." 35 Na tinundan nilan den su manguda a entu a kuda. Na inampisan nilan kanu manga lambung'ilan su manguda a kuda ka pinagkuda nilan su Isa al-Masih. 36 Guna su nakagkuda den su Isa al-Masih na inibelat'u manga taw lu kanu lalan su manga lambung'ilan. 37 Na guna su masiken den silan kanu 'bpeludusan kanu untul'u bakulud'u Ulibus na linemudsu den mamugi su langun nu 'bpamangunut lun enggu midsukul-sukul silan sa matanug kanu Kadenan ka nangailay nilan su langun a kagaipan a kabarakatan. 38 Nia nilan pidtalu na" Palihalan su datu a pakauma sia a sinugu nu Kadenan! Na sekanin i makanggulalan kanu kalilintad a ebpun kanu Kadenan.Pugin tanu su Kadenan lu sa sulega!" 39 Na aden bun manga taw a lusud kanu lumpukan a Parisiyu a nakasimbul lu kanu madakel a taw na midtalu sa "Gulu, edtalu ka bu kanu 'bpamangunut a nan sa leka i temelen silan magingel." 40 Nia pidtalu nu Isa na "Nia ku madtalu sa lekanu na amaika temelen silan na apia su manga watu ba nia na lemalis." 41 Guna su pakasiken den sekanin sa Awrusalim enggu napanuliman nin na ginagawan sekanin taman sa minigis mambu su lu nin. 42 Nia bu nadtalu nu Isa na "Duan nin den su sekanu a manga taw sa Awrusalim. U katawan nu bu sa saguna a gay u ngin i dait a enggulan nu asal'a makua nu su kalilintad na enggulan nu. Na pila ginawa ka inipagema man i nia ba sa lekanu. 43 Kagina aden gay a makauma a libeten nu kuntela nu sa tambak su alad'u ka ukitan nilan na gumpisen kanu nilan den sa embala-bala, 44 ka tidtu den a lupeten kanu nilan apeg su manga wata nu a ludep kanu sakup'u. Na sabap sa da nu itagu sa ginawa su kinauma nu Kadenan asal'a makalipuas kanu na da den edsama a watu lu kanu kuta nu ka pantalen nilan den."
Su Kinapamugaw nu Isa al-Masih kanu manga Pendagang lu kanu Timpul a
'Bpagagaman 45 Daka linemudep su Isa al-Masih lu kanu lama-lama nu Timpul a 'bpagagaman ka linudsuan nin mamugaw su manga padagang lu. 46 Nia nin pidtalu kanilan na "Nakadalem kanu Kitab i 'Su walay ku na walay a 'bpangeni-ngenian' ugaid'a inumbal'u a salag'u manga tanegkawn!" 47 Na uman-uman gay den na 'bpangusiat su Isa lu kanu Timpul a 'bpagagaman. Ugaid'a su manga mapulu nu 'bpangurban enggu su manga gulu nu pangitaban taman kanu 'gkangaunutan na 'bpagitungen nilan u panun ba i kaimatay nilan sa lekanin. 48 Ugaid'a dili 'gkasulut i kaimatay nilan lun ka mindidilimudan su makapal a manga taw lu sa lekanin ka 'bpamakikineg lun taman sa ipedtagu nilan sa ginawa su manga usiatan nin.
Su Idsa makapantag kanu Tindeg'u Isa al-Masih
1 Kanu isa a gay na guna su 'bpamandu enggu 'bpangusiat su Isa kanu Mapia a Tutuma na minubay su manga mapulu nu 'bpangurban enggu su manga gulu nu pangitaban taman den kanu manga 'gkangaunutan. 2 Nia nilan pidtalu sa lekanin na "Edtalu ka kun sa lekami u ngin i kawagib'engka ka penggulan nengka su langun nu nia? Entain basi i minenggay sa leka sa kawagib sa enggulan nengka su langun nu nia?" 3 Nia inisumpat'u Isa na "Idsan ku mambu sekanu na sawal'u sa laki i nia ba. 4 Na ngintu su kinapanalawat'u Yahiya na ebpun kanu Kadenan udi na ebpun bu kanu manusia?" 5 Na mimbibitiala den silan sa "Amaika nia tanu edtalun i ebpun sa Kadenan na idsa nin sa lekitanu u ngintu ka di tanu 'bpalitialan su Yahiya.' 6 Ugaid'a upama ka edtalun tanu menem i 'Ebpun bu sa manusia, ' na langun nu taw ba nia na malantay sa lekitanu sa watu kagina masela i paginugut'ilan sa su Yahiya na nabi!" 7 Kagina ka maitu na nia nilan nakasawal na "Di nami katawan u endaw ganat su kabpanalawat'in." 8 Na nia pidtalu nu Isa al-Masih kanilan na "Amaika maitu na di ku bun edtalun sa lekanu u endaw nakaebpun su kawagib ku sa kapenggula ku sa langun nu nia."
Su Pakenalan pantag kanu Partida
9 Daka linudsuan edtalu nu Isa kanu manga taw su pakenalan a nia,"Aden kun mama a namula sa ubas kanu lupa nin. Daka pinaapinan nin kanu manga partida nin ka linemaug-laug sekanin sa mawatan a dalepa. Na nauget gaid sekanin mimbalingan. 10 Guna su nauma den su kapedsabpet sa ubas na sinemugu sekanin sa isa kanu ulipen nin ka pegkua sa umun nin kanu nasabpet a entu a ubas lu kanu lupa nin. Ugaid'a pinametay nu manga gumagalebek kanu inawidan sa ubas su ulipen nu mama taman sa pinauli nilan sa dala nait'in. 11 Na sinemugu menem su kigkuan 'bpaluman sa isa kanu ulipen nin na maitu bun ba pinametay nu manga gumagalebek a entu enggu pinagkaya nilan ka pinauli nilan a dala nait'in a apia ngin. 12 Na sinugu nin menem 'bpaluman su ikatelu a ulipen nin na pinalian nu manga 'bpamenggalebek enggu inidtug'ilan lu sa liu. 13 "Nia nadtalu nu kigkuan kanu inawidan a ubas na 'Ngin i mapia a enggulan ku? Nah, katawan ku den! Nia mapia na nia ku palun na su wata ku a mama a tunggal enggu pinadtaya ka basi sekanin pan i pagadatan nilan.' 14 "Ugaid'a endaw i kinailay nu manga 'bpamenggalebek lun na nia nilan pinamagayunan enggu nia nilan pidtalu na 'Nia ba su tunggal a wata nu kigkuan kanu pamulan. Na imatayan tanu ka enggu tanu makua i langun na pantialian nin a nia!' 15 Na ginuyud'ilan lu sa liu na alad ka inimatayan nilan den."Na nia pidtalu nu Isa,"Nah sekanu, ngin i antapan nu lun? Ngin den basi i pakaidan nu kigkuan kanu manga gumagalebek? 16 Na maya ba i enggulan nin na pangimatayan nin su manga 'bpamenggalebek lu enggu isalig'in su lupa nin sa ped."Na guna su nakineg'u manga taw i nia ba na nakapanalentek silan enggu nia nilan pidtalu na "Ssst, di man 'gkawagib i entu!" 17 Na pidtulikan nin silan ka inidsan nin silan sa "U maitu na ngin i maena nu nia ba a pantuka a nakadalem kanu Kitab, 'Su watu a inendan nu manga panday sa walay na entu ba besen i nabaluy a balapantag kanu langun na watu nu walay'? 18 Na uman i maulug lu kanu watu bantu na malupet den enggu amaika kaulugan nu watu bantu su apia entain na matapung-tapung den."
Su Kapembayad sa Buis
19 Na su manga gulu nu pangitaban enggu su manga mapulu nu 'bpangurban na kiugan nilan den semigkem su Isa kanu entu ba a kutika kagina katawan nilan den i silan i 'gkasugat'u pakenalan nu Isa. Ugaid'a di nilan 'gkasulut ka 'gkagilekan silan kanu madakel a taw. 20 Guna su maitu na 'bpanuluten nilan bun i kadulatan nilan su Isa taman sa sinemukay den silan sa manga taw ka maya kun sa 'bpamagigiling sa 'bpaginugutan nilan su Isa. Na 'bpangingidsan nilan asal bu na masigkem'ilan su Isa ka enggu nilan mait lu kanu 'gkasaligan nu gubilnadul. 21 Nia nilan pidtalu na "Gulu, katawan nami su pedtalun nengka enggu su ibpamandu nengka na wagib enggu di ka mapambidaya sa taw. Nia nin kabantang na ipedtutulu nengka pan su matidtu a lalan a sangul kanu Kadenan. 22 Na edtalu ka sa lekami u ngintu pakasungkang kanu kitaban tanu i mamayad kami sa buis lu kanu Sultan sa Ruma?" 23 Ugaid'a nasipatan silan nu Isa kanu akal'ilan na nia nin pidtalu na 24 "Ipailay nu sa laki su kuleta nu. Na entain i ki buntal lun enggu entain i ki ngala lun?"Nia nilan nakasumpat na "Su Sultan sa Ruma." 25 Daka nia pidtalu nu Isa na "Kagina ka maitu na inggay nu kanu Sultan su endaw i lekanin na maitu bun mambu su endaw i kanu Kadenan na inggay nu bun kanu Kadenan." 26 Na di nilan 'gkasigkeman sa amadan su Isa lu kanu makapal a taw, mandiadi na di den silan pedtalu-talu ka nagaip silan kanu manga inisumpat'in kanilan.
Pantag kanu Kambibiag'u Minatay
27 Na su manga Sadusis a manga taw a di 'bpamaginugut sa embibiag pamun su minatay lu sa Gay na Harikiamat na linemu silan kanu Isa ka inidsan nilan sekanin sa 28 "Gulu, sia sa lekami na nakadalem kanu Kitab'u Nabi Musa i maya ba 'Amaika matay su mama na matagak'in su kaluma nin a dala wata nilan na nia wagib na mapangaluma menem'u suled'in su entu a balu nu kaka nin ka enggu makapamuliataw su minatay a suled'in.' 29 Na aden kun pitu kataw a edsusuled na su kaka nilan bu i nakagkaluma ugaid'a minatay a dala wata nin. 30 Na su ikadua menem i nangaluma kanu balu ni kaka nin na minatay bun. 31 Na maitu bun su ikatelu kanu edsusuled taman sa naibped matay su pitu kataw a edsusuled na dala bun makambata su entu a babay. 32 Nia mauli lun na minatay bun mambu su babay. 33 Na amaika mauma den su Gay na Harikiamat na entain den ba sa kanilan i kaluma nin kagina nagkaluma nin silan a pitu kataw?" 34 Nia inisawal'u Isa kanilan na "Su manga taw saguna na mangaluma enggu pangaluman. 35 Ugaid'a su manga babay-mama a dait a makatalima sa uyag-uyag a da taman nin lu sa Mauli a Gay na di den 'gkaluma atawa ka di den mapangaluma. 36 Na sabap sa nia nilan nalagidan na mana su manga malaikat na da den sa kanilan su kapatay 'bpaluman. Na silan ba i manga wata nu Kadenan, a manga wata a mimbibiag 'bpaluman. 37 Na apia sia kanu Kitab'u Nabi Musa pantag kanu kayu a pegkalaw-kalaw na inipaamad'in su kambibiag 'bpaluman nu manga minatay sia kanu kinatawag'in kanu Kadenan sa Kadenan nu Nabi Ibrahim, su Kadenan nu Nabi Iskak enggu su Kadenan nu Nabi Yakub. 38 Na dikena sekanin i Kadenan nu namamatay ka sekanin i Kadenan nu manga bibiag. Mandiadi na apia namakadalung den silan na bibiag bun silan lu kanu adapan nu Kadenan." 39 Na aden kanu manga ped a gulu nu pangitaban i midtalu sa "Gulu, mapia i nakasumpat'engka a nan!" 40 Na entu den ba taman i nadtalu nilan kagina di den 'bpagelag i ginawa nilan sa mangingidsa pan silan.
Su Pantag kanu Masih
41 Na inidsa nu Isa kanilan i "Panun basi i kinadtalu lun i su Masih na tupu nu Nabi Daud? 42 Kagina su Nabi Daud demun i midtalu lun sia nakadalem kanu Kitab Zabur sa'Nia pidtalu nu Kadenan kanu Mapulu ku na" Ayan ka pan sia tampal sa kawanan ku, 43 taman sa pasugiuden ku su manga kuntela nengka kanu palad'u ay nengka." ' 44 Na pedtawagen nu Nabi Daud su Masih sa 'Mapulu, ' na panun bantu i kinabedtu sa tupu nin su mapulu nin pan?" 45 Na su kabpakikineg'u langun nu taw sa lekanin na nia pidtalu nu Isa al-Masih kanu 'bpamangunut lun na 46 "Pangingati nu su manga gulu nu pangitaban a pendadalakaw silan a linemambung sa mapia i palas'in ka nia nilan 'gkalilinian na pagadatan nu manga taw silan, apia lu sa kanu manga padian udi na lu kanu 'bpagayanan nu manga mapulu lu kanu manga 'bpagagaman taman pan lu kanu pegkakanduli sa masela. 47 Na silan bantu i mimbusaw-busaw mangua kanu 'bpangangawidan nu manga babay a balu. Na malendu i kapangeni-ngeni nilan ka ipebpagilay nilan i balaagama a benal silan. Na su sikesa kanu entu ba a taw na da den limbang'in i kasakit'in."
Su Tidtu a Ipedsakat
1 Na su kinapangingilay nu Isa sa embala-bala na nailay nin su kawasa a manga mama a 'bpagulug sa zakat lu kanu kaun a 'bpagulugan sa kuleta lu kanu Timpul a 'bpagagaman. 2 Na nailay nin bun su balu a babay a 'bpagulug bun sa dua timan a pilak. 3 Na pidtalu nu Isa i "Talangeden ku sa lekanu i su inulug'u balu a babay na nalawanan nin su langun nu inulug'u ped a taw, 4 kagina su inulug'ilan a zakat na subela bu nu manga kakawasan nilan ugaid'a su nia ba a balu a babay na midsinapulan den sa kinaenggay nin sa zakat apia nia nin pan kaaden na di den sekanin makakan." 5 Na aden ped a manga taw na pembibitiala pantag kanu sangat i kapia nin a palas'a watu a inibpalabuat kanu Timpul a 'bpagagaman taman pan kanu manga mapia a inipangenggay nu manga taw lu kanu Timpul a 'bpagagaman. Na midtalu su Isa sa 6 "Na mauma su kutika a dala masama kanu langun nu manga watu a 'gkailay nu a namakapaguntul san ka matagayak den langun."
Su Kapagukag enggu su Kapamilanggu
7 Na inidsan nilan su Isa sa "Gulu, kanu i kanggula sa entu ba? Ngin i mailay nami a tanda sa kataw nami lun i nakauma den su kutika a entu?" 8 Nia inisawal'u Isa na "Pangingat kanu, di kanu pabpagakal sa ped'u. Na aden madakel a manga taw a semia a nia nilan edtalun na 'Saki su Masih, ' udi na 'Su Gay na Harikiamat na nauma den!' Ugaid'a da kanu 'bpagunut. 9 Da kanu 'gkagilek amaika makakineg kanu sa pembu-bunua enggu manga samuk. Na alus a manggula muna i nia ugaid'a dikena nia nin maena i edsambuta den su kabangkit kanu dungia." 10 Na nia nin pan pidtalu na "Su manga masela a bangsa na embunua enggu su manga mabagel a datu na mamagabpeta den embunua. 11 Na aden manga linug a sangat i kabagel'in maitu bun aden masela a kanggutem enggu su manga taw sa embala-bala na temala sa malasay na maaden bun i pakatiawan-tiawan a manggula taman sa aden manga masela a tanda a mailay a ganat sa kawang-kawangan. 12 "Ugaid'a dili pan makatingguma su langun nu nia ba na mangasigkem kanu den enggu pamakaidanan kanu nilan. Na sabap sa paginugut'u sa laki na mait kanu den lu kanu manga 'bpagagaman nilan entu pan ka lu kanu den matagu sa bilangguan. Na ipalad kanu nilan den lu kanu adapan nu manga datu enggu su manga gubilnadul 13 taman sa mabaluy kanu a saksi ku sa kanilan a makapantag sa laki. 14 Kagina ka maitu na padtamel'u su pagitung'u sa taman sa di pan 'gkauma su kutika a entu enggu di kanu 'bpelidu sa ginawa sa kapaninindeg'u sa ginawa nu, 15 ka itutulu ku sa lekanu su manga kadtalu enggu su dait a katulangedan. Na da isa bu kanu manga kuntela nu i makagaga matu udi na malaw kanu kadtalu nu. 16 Na ipalad kanu den nu manga lukes'u, manga suled'u udi na su manga pagali nu atawa ka su manga pakat'u taman sa ipasigkem'ilan su manga ped'u ka imatayan nilan. 17 Sabap kanu salig'u sa laki na mabensi den sa lekanu su langun na manga taw. 18 Ugaid'a saki i mataw sa lekanu na da mabinasa sa lekanu apia sawalu bu kanu buk'u. 19 Sabap kanu katigkel'u na maya ba i ukit a kalipuas'u sa ginawa nu."
Su Kabinasa kanu Awrusalim
20 Na pidtalu nin pamun i "Amaika mailay nu den su Awrusalim a nalibet'a manga sundalu na entu den ba i kataw nu lun sa mangagan nin den binasan. 21 Na su lu sa Yudia na pabpalaguyn den silan lu sa palaw na su lu sa ludep'a siudad na pabpagawan bun. Na su entain menem i dala masakup lu kanu entu na di den paludepen 22 sabap sa entu den ba su Gay a Kabangkit kanu dungia, ka matuman den bantu su langun a kadtalu a inipayag den sia kanu Kitab. 23 Duan-duan den nu manga babay a magingay enggu su manga aden wata nin a pedsusu pan kanu entu ba a kutika, ka sangat a mapait enggu lawan pan a sikesa a ganat kanu Kadenan i matalima nu manga taw sia sa sakup'a dalepa a nia. 24 Na aden ped kanu manga taw i pangimatayan sa kiping, su ped menem a mabiag na madtapik lu sa ped a pagingedan. Na su Awrusalim na dakudaken den nu manga taw a dikena-Yahudi taman sa mapupus den su kutika a inenggay nu Kadenan kanilan.
Su Kambalingan nu Kaka nu Manusia
25 "Na maaden su manga masela a tanda a manggula sia kanu senang, su ulan-ulan enggu su manga bitun. Na sabap sa ikagilek'u langun nu bangsa sia kanu liwawaw na dungia su dagus'u lagat enggu su kadedsa nu bagel na kaawan na inam den silan. 26 Sabap sa matadin den kanu lalan nilan su manga bitun, su senang, su ulan-ulan enggu su langun na pedsigay sia sa kawang-kawangan na malunuk den su manga mama kanu gilek'ilan sa kabpangangapa nilan sa ngin i makauma sia sa liwawaw na dungia. 27 Saleta na 'bpapayag den su Kaka nu Manusia lu kanu manga gabun a mimbarakat enggu sinemigay. 28 Na amaika lemudsu den su langun na nia ba a 'gkanggula na nan den ba! Imamani nu sa mapia enggu edsisigalaw kanu ka masiken den su kapedtebus'u Masih sa lekanu kanu kabaladusan nu."
Su Pakenalan pantag kanu Kayu Kulema
29 Daka pidtalu nu Isa al-Masih kanilan su pakenalan sa maya ba " 'Gkalendem'u su kayu kulema enggu su manga ped pan a kayu. 30 Na amaika mailay nu den i 'bpeludsu den penggulaun na katawan nu den i mangagan den su kabpanenang. 31 Na mambunba, amaika mailay nu den i langun na nia ba a tanda a manggula na katawan nu den i mangagan den mauma su kandatu nu Kadenan sia sa dungia. 32 "Tademi nu i nia ba, su langun na nia ba a tanda na matuman sa di pan maibped matay i langun na taw sa saguna ba nia a gay. 33 Na magubal pan su kawang-kawangan enggu su dungia ugaid'a su manga kadtalu ku na da kagubal'in. 34 "Na ingati nu su ginawa nu sa makambulug-bulug sa subela a kagkalilini, kabpelangut enggu su lidu na ginawa nu sa kapaguyag-uyag. Nia liu san na pakatekaw demun pakauma su Gay a Kabangkit kanu dungia a mana su litag a pakatekaw ka demun 'gkabitin, 35 ka makatingguma den i nia ba a gay kanu langun nu taw sia sa liwawaw na dungia. 36 Ugaid'a pangingat kanu enggu tatap'u su kabpangeni-ngeni sa Kadenan sa makalipuas kanu sa nia ba a makatingguma enggu makadtindeg kanu sa adapan nu Kaka nu Manusia." 37 Na uman-uman gay na lu den ba 'bpamandu su Isa kanu Timpul a 'bpagagaman ugaid'a amaika magabi na 'bpeliu sekanin sa Awrusalim ka lu menem pegkalalamagan kanu bakulud'u Ulibus. 38 Na uman mapita-pita na langun nu manga taw na 'bpelu kanu Timpul a 'bpagagaman ka 'bpamakikineg sa lekanin.
Su Kapedtipu kanu Isa al-Masih
1 Kanu entu a kutika na pedsiken den su kanduli nu manga Yahudi a nia lun ipembedtu na su Kapegkanduli kanu Pan a Dala Pakembang'in atawa ka su Kanduli nu Kalipuas. 2 Na su mapulu nu manga 'bpangurban enggu su manga gulu nu pangitaban na 'bpangilay den sa ukit a di katawan nu madakel a taw i kaimatay nilan kanu Isa, ka 'gkagilekan silan kanu manga taw. 3 Na inasukan nu Datu na Giadsal si Yahuda a binedtuan sa Iskalia, a isa kanu sapulu enggu dua a 'bpamangunut kanu Isa al-Masih. 4 Daka linemu den si Yahuda kanu manga mapulu nu 'bpangurban enggu su manga mapulu nu pedtameng kanu Timpul a 'bpagagaman ka pidtatabangan nilan den magitung u panun i kapalad'i Yahuda kanu Isa lu sa kanilan. 5 Na nalilini silan taman sa pibpasadan nilan si Yahuda sa enggan nilan sa kuleta. 6 Na minayun mambu si Yahuda sa kanu entu na linemudsu den mangilay sa mapia a ukit a matipu nin su Isa sa da den pepeleng'u madakel a taw. 7 Na nauma den su gay a Kapegkanduli kanu Pan a Dala Pakembang'in na entu ba su kutika a alus a panumbalin den su pipis'u bili-bili a ipegkurban sa Kalipuas. 8 Na pinauna nu Isa si Pitru enggu si Yuhan sa nia nin pidtalu kanilan na "Lu kanu den ka papagadil'u silan sa pegken tanu kanu nia ba a Kanduli nu Kalipuas." 9 Na inidsa nilan kanu Isa i "Endaw i kalilinian nengka a tumanen tanu kanu nia a Kanduli?" 10 Na nia nin nadtalu na "Pakikineg aku nu, kanu kauma nu lu sa siudad na makadsumbak kanu sa mama a pebpusay sa manaut a binangga a aden ig'in. Na tundug'u sekanin kanu ludepan nin a walay 11 ka entu pan ka edtalu nu kanu kigkuan sa walay i 'Ibpagidsa nu Gulu u endaw kun i bilik a kakanan nin kanu Kanduli nu Kalipuas apeg'u 'bpamangunut sa lekanin.' 12 Na tutulun kanu nin sa maulad a bilik lu sa pulu a aden langun taman nin na lu nu den ba pagadila su entu." 13 Na ginemanat den silan enggu taman sa natun nilan su langun nu inipapata nu Isa al-Masih sa kanilan. Na lu nilan den ba pinagadil su Kanduli nu Kalipuas.
Su Kanduli nu Isa al-Masih
14 Guna su nauma den su kutika nu kakan nilan na lu den sinemandang su Isa al-Masih kanu lamisan apeg den nu sapulu enggu dua a sinugu nin. 15 Na nia nin pidtalu kanilan na "Sangat a napanganganay ku i makan tanu su nia a Kanduli sa unan nu di aku pan malasay. 16 Na nia ku madtalu sa lekanu, taman sa di matuman su langun nu maena nu Kanduli a nia lu kanu pendatuan nu Kadenan na di aku den manganduli 'bpaluman." 17 Na kinua den nu Isa al-Masih su sakedu ka midsukul-sukul sekanin kanu Kadenan enggu nia nin pidtalu kanu 'bpamangunut lun na "Kua nu i nia ka pamaginemay nu minem. 18 Na edtalun ku sa lekanu i di aku pan makainem sa ig a ubas taman sa di mauma su kutika na kandatu nu Kadenan." 19 Na kinua nin menem su pan enggu midsukul-sukul sekanin kanu Kadenan na entu pan ka inipangenggay nin kanu 'bpamangunut lun saleta na pidtalu nin i "Nia ba su badan ku a ibpangenggay ku sa lekanu. Na kan nu i nia ba a tanda a tademan nu sa laki." 20 Na maitu bun inidual'in kanilan su sakedu kanu kinapasad'ilan gemabi ka pidtalu nin i "Su nia a sakedu na nia ba i bagu a kapasadan nu Kadenan a tiniapan nin kanu lugu ku. Sabap sa lekanu na 'bpagududen nin su lugu ku. 21 Na bantang-bantang'in na su temipu sa laki na sia bun ba sa ibpamagatuang tanu a nia. 22 Na su Kadenan i migkahanda sa alus a kapatay nu Kaka nu Manusia. Ugaid'a nia den duan-duan nin na su mama a pedtipu sa lekanin." 23 Na namagidsaya den silan u entain den sa kanilan i makatika lun enggula.
Su Kinabpalawa sa Entain i Badtug sa Langun
24 Na da matana-tana na mibpapalawa su 'bpamangunut lun sa entain den sa kanilan i maantap'ilan sa labi a mabadtug. 25 Nia pidtalu nu Isa al-Masih kanilan na "Nia ukit'u manga datu nu manga bangsa na sangat a pendatuan nilan su manga taw nilan. U aden bagel'u 'gkaunutan na nia nilan kalilinian na kagelalan silan sa masela. 26 Kena maitu sia sa lekanu. Nia pan mula na dait a engguay-guay su badtug sa langun sa kababa na muletad enggu su palangay nu 'gkaunutan na entu ba i 'gkaalus a panunugun nu madakel. 27 Na entain kun i mabadtug, su namagagayan sia sa lamisan atawa ka su nanalagad lun? Su bantang'in na su namagagayan mambu! Ugaid'a ilay nu den, isa aku sa lekanu. Ininggihad ku su ginawa ku sa mana nu den ulipen. 28 Saben-sabenal na iganat sa ganatan na da aku nu mapitas kanu langun nu gay a kapembatalu sa laki. 29 Kagina ka maitu na ibpagenggay ku sa lekanu su kakamal'u kanu pendatuan a mana bun su kinaenggay lun nu Ama ku sa laki, 30 asal bu na makakan kanu enggu makainem lu kanu lamisan ku a lu sa sulega taman sa makaayan kanu lu kanu kulesi nu pegkamal, entu pan ka makaamung kanu den kemukum kanu sapulu enggu dua a manga bangsa a tupu nu Israil."
Su Kinadtalu nu Isa al-Masih pantag kanu Kakias'i Simiun Pitru sa lekanin
31 "Simiun, Simiun, pakikineg ka! Na pinangeni nu Datu na Giadsal i batalun kanu nin langun a mana su taliawid a 'bpagukap sa bantad. 32 Ugaid'a inipangeni-ngeni ku seka Simiun Pitru, sa su salig'engka na di kemelas. Na su kambalingan nengka sa laki na embageli ka su salig'u manga suled'engka a nia." 33 Nia inisumpat'i Simiun Pitru na "Mapulu ku! Da ka endua-dua, ka munut aku sa leka lu sa bilangguan taman sa dua ta matay." 34 Nia pidtalu nu Isa na "Nia ku madtalu sa leka Pitru na taman sa di pan makakuku su manuk kanu katibuas na makatelu aku nengka pan ikias sa di aku nengka katawan."
Su Pilak, su Balutuan enggu su Kiping
35 Nia pidtalu nu Isa na "Su kutika a kinasugu ku sa lekanu sa dala kuleta, dala balutuan enggu dala talumpa na ngintu aden kulang sa lekanu?"Na nia nilan nakasumpat na "Apia ngin na dala." 36 Na pidtalu pamun nu Isa i "Ugaid'a saguna na apia entain i aden kuleta nin atawa ka balutuan nin na pananggiten nin enggu apia entain i dala kiping'in na 'bpasan nin su lambung'in ka mamasa sa satiman. 37 Na su nakadalem kanu Kitab na 'Makalalagit sekanin kanu bagi nu manga talibunu, ' na saben-sabenal na tumanen nin sa laki. Na endaw i nakasulat pantag sa laki na matuman den ba nia." 38 Na midtalu su 'bpamangunut lun sa "Ilay ka! Nia su dua timan a kiping!"Na nia nin pidtalu kanilan na "Nasasangan den i nan!"
Su Kinapangeni-ngeni lu sa Bakulud'u Ulibus
39 Na ginemanat su Isa al-Masih kanu siudad ka mana bun su 'gkalayaman nin na linemu sa bakulud'u Ulibus apeg'u 'bpamangunut lun na minunut sa lekanin. 40 Guna su lu den silan na pidtalu nin kanilan i "Ipangeni-ngeni nu i di kanu magaga nu manga sasat." 41 Na ginemanat sekanin ka tinemangka den kanilan. Guna su manga pila lepa i kinatangka nin kanilan na midtinggaleb sekanin ka nangeni-ngeni den. 42 Nia nin pidtalu na "Ama ku, u malinawag bu kanu ginawa nengka na iawa nengka den i nakadakuntul a nia a kamalasayan ku. Ugaid'a apia ka maitu na dikena su laki a kiug i 'gkaunutan ka su leka man a kahanda i alus a matuman." 43 Na su malaikat a ganat sa sulega na mibpayag lu sa lekanin ka pimbagelan nin su ginawa nin. 44 Na kanu sangat a kinalidu na ginawa nin na makin sekanin nangeni-ngeni sa senep kanu atay nin taman sa su ating'in na mana su lugu a pedtagatak lu kanu lupa. 45 Na kanu kinadtindeg'in ebpun sa kinapangeni-ngeni nin na mimbalingan sekanin kanu 'bpamangunut lun. Na nauman nin silan a 'bpamedtulug ka linemangkap kanu badan nilan su lidu na ginawa. 46 Na nia nin pidtalu kanilan na "Nginan ka 'bpamedtulug kanu saguna? Gedam kanu den! Ka pangeni-ngeni kanu sa di kanu magaga nu manga sasat."
Su Kinasigkem kanu Isa al-Masih
47 Na gagalu nu kapedtalu-talu nu Isa al-Masih na nakauma su madakel a taw a nia nilan naunutan na si Yahuda a isa kanu sapulu enggu dua a 'bpamangunut lun ka sekanin i napatuntul kanu manga taw bantu. Na inubay nin su Isa al-Masih ka sinium'in. 48 Ugaid'a nia pidtalu nu Isa na "Nginan Yahuda, su kapedtipu nengka kanu Kaka nu Manusia na sia nengka initanda kanu kapedsium'engka sa laki?" 49 Na guna su nailay nu 'bpamangunut lun su entu a 'gkanggula na midtalu silan sa "Mapulu, ngin i nia, matu tanu?" 50 Na isa kanu 'bpamangunut i minatu na tinimbas'in sa guluk su ulipen nu mapulu sa langun nu manga 'bpangurban na naawa su tangila nin a kawanan. 51 Ugaid'a midtalu su Isa sa "Telen kanu den." Na inami nin su tangila nu mama na midsambuta demun i kinaulit'in. 52 Daka pidtalu nu Isa kanu pedsigkem sa lekanin a manga mapulu nu 'bpangurban enggu su manga mapulu nu pedtameng sa Timpul a 'bpagagaman taman kanu manga 'gkangaunutan i "Nginan ka sinemia kanu a minggumatalem, dupang aku? 53 Sekitanu bun lu sa Timpul a 'bpagagaman uman gay na di aku nu pedsigkemen. Ugaid'a kutika nu i nia ba, a nia pakagaga na su kalibuteng'u atay."
Su Kinakias'i Simiun Pitru kanu Isa al-Masih
54 Daka sinigkem'ilan su Isa ka pinananggit'ilan lu kanu walay nu mapulu sa langun nu manga 'bpangurban. Na pedtundug bun si Pitru ugaid'a matangka. 55 Na aden tumeg a pegkaleg lu kanu luk'u lama-lama na linemumpuk si Pitru kanu 'bpamagagayan a nakalibet lu ba. 56 Guna sekanin madsusuliman nu isa a ulipen a babay na pidtalu nin i "Nia ba a mama na tagapeda nu nasigkem a nan." 57 Ugaid'a inibpalaw ni Pitru na nia nin pidtalu na "Astaga! Di ku katawan i entu a mama!" 58 Da matana-tana na aden menem mama a nakadsima sa lekanin sa nia nin pidtalu na "Seka na isa ka kanu 'bpamangunut sa lekanin!"Ugaid'a nia pidtalu ni Pitru na "Di! Kena maitu." 59 Guna su nakaiseg-iseg den na aden menem mama a ipedtegel'in sa nia nin pidtalu na "Da den kabpelis'in na tagapeda nilan i mama a nia, kagina nia a mama na taw bun sa Galili." 60 Nia pidtalu ni Pitru na "Alakaula! Di ku katawan i pedtalu-talun nengka a nan!" Kanu pedtalu-talu pan sekanin na midsambuta demun i kinakuku nu manuk. 61 Na linengian nu Mapulu a su Isa si Pitru. Na nagkalendem'i Pitru su kadtalu nin sa maya ba "Na makatelu nengka pan madtalu i di aku nengka katawan taman sa di pan makakuku su manuk kanu katibuas." 62 Na linemiu den si Pitru enggu 'bpaguliang ka sangat i kinagkalat'a ginawa nin.
Su Kapedtataungat kanu Isa al-Masih
63 Na su manga mama a pedtameng kanu Isa na 'bpagungat enggu pembetay lun. 64 Dinapengan nilan su mata nin ka 'bpagidsan nilan sa "Antuk ka u entain i minetay a entu sa leka." 65 Na madakel pan i pidtalu nilan sa ukit a kapapegkaya nilan lun.
Su Kinadsaksi nu Isa al-Masih
66 Guna su migkapita den na su 'gkangaunutan nu manga Yahudi, su manga mapulu nu 'bpangurban enggu su manga gulu nu pangitaban na midtimu-timu den ka inipait'ilan su Isa lu kanu walay a pidtimu-timuan nilan. 67 Inidsan nilan su Isa sa "Edtalu ka sa lekami, seka ba su Masih?"Nia nin inisumpat na "Amaika edtalun ku na di kanu maginugut 68 enggu amaika aden idsa ku sa lekanu na di aku nu bun sumpatan. 69 Ugaid'a iganat saguna taman sa taman na su Kaka nu Manusia na makapagagayan den 'bpia-pia lu tampal kanu kawanan nu Kadenan a Labi a Mapulu." 70 Na 'bpangingidsan nilan langun sa "Ngintu, seka ba su Tunggal'u Kadenan?"Nia nin inisumpat kanilan na "Nakasugat kanu." 71 Nia nilan menem pidtalu na "Nambunba! Di kami den 'bpangilay sa kaped a makadtanud lun ka nakabpun demun sa ngali nin."
Su Kinait kanu Isa al-Masih lu kani Pilatu
1 Na midtindeg su langun nu mindidilimudan lu ka pinananggit'ilan su Isa lu kani gubilnadul Puntius Pilatu. 2 Na sinenditan nilan den sa nia nilan pidtalu na "Nasigkem'ami i nia ba a mama a 'bpamandun nin su manga taw sa di pakatidtu. Na pedsapalan nin su manga taw sa di menggay sa buis lu kanu Sultan sa Ruma enggu 'bpamagigiling sa sekanin su Masih a Mapulu nu manga Yahudi." 3 Na inidsan sekanin nu gubilnadul Pilatu sa "Seka ba su datu nu manga Yahudi?"Nia nin inisawal na "Nasugat i pedtalun nengka." 4 Daka pidtalu ni gubilnadul Pilatu kanu manga mapulu nu manga 'bpangurban enggu su madakel a taw i "Dala katawan ku a kadupangan nu mama a nia." 5 Ugaid'a makin nilan bun ipedtegel sa nia nilan pedtalun na "Sabap kanu kabpangusiat'in na papendudupan nin su langun nu taw sa dalepa na Yudia iganat sa Galili taman den sia."
Su Kinait kanu Isa al-Masih lu kanu Datu Hirud
6 Guna su nakineg'u gubilnadul Pilatu su maitu ba na inidsa nin i "Ngintu taw sa Galili i nia a mama?" 7 Guna nin katuntayi i su Isa na ganat kanu dalepa a pegkamalan ni Datu Hirud na inipapait'in su Isa lu kani Hirud ka su entu a kutika na lu bun mambu si Datu Hirud sa Awrusalim. 8 Na nagalaw si Datu Hirud guna su nailay nin su Isa kagina nakineg'in su manga tudtulan pantag sa lekanin. Na nauget'in den pegkiugan 'bpagilaya. Nia nin 'gkapanganganay na mailay nin su manga kagaipan a galebek'u Isa. 9 Na pinangingidsan den nu Datu Hirud su Isa ugaid'a apia sataga na da den sekanin edtalu. 10 Na su manga mapulu nu manga 'bpangurban enggu su manga gulu nu pangitaban na labi den a miniseg su sakit'a ginawa nilan sa kapedsendit'ilan kanu Isa. 11 Na su Datu Hirud apeg den nu manga sundalu nin na midsudi kanu Isa enggu 'bpagumpaken nilan sekanin. Na pinambalegkas'ilan sa matinang na entu pan ka inimbalingan nilan lu kani gubilnadul Pilatu. 12 Na kanu entu demun ba a gay na nakabpakat su Datu Hirud enggu si gubilnadul Pilatu a andang a dili 'bpagayun.
Su Kukuman kanu Isa al-Masih
13 Na inipatawag'u gubilnadul Pilatu su langun nu manga mapulu nu 'bpangurban enggu su manga 'gkaunutan taman kanu manga taw. 14 Nia nin pidtalu kanilan na "Pinananggit'u sa laki su nia a mama ka pedtalun nu na 'bpamandun nin su manga taw sa pakasibay. Na pidsima-sima ku sekanin san kanu adapan nu na dala amadan a 'gkabenalan sekanin kanu manga ipedsendit'u lun. 15 Na maitu bun si Datu Hirud, da nin katuni sa kadupangan su nia a mama na inipauli nin sia sa lekitanu. Nailay nu den! Da nanggalebek'a mama a nia a sabapan a kaimatay lun. 16 Na palebpadan ku bu ka paulin ku den." 17 Na uman Kanduli nu Kalipuas na pabpeliu sa sakataw a nasigkem si gubilnadul Pilatu. 18 Ugaid'a su langun nu madakel a taw na pegkisek den tanan sa "Itutuk'u i mama a nia ka paliu ka si Barabas." 19 Na sabap sa kabpagatu ni Barabas sa gubilnu enggu nakapatay sia kanu siudad na nabilanggu sekanin. 20 Na kagina ka nia 'gkalinian nu gubilnadul Pilatu na butawanan su Isa na inimbitiala nin 'bpaluman su makapal a entu a manga taw. 21 Ugaid'a nia nilan ibpamelalis na "Itutuk'u! Itutuk'u!" 22 Na pidtalu ni gubilnadul Pilatu kanilan sa kanu ikatelu nin den i "Ngin den i kadupangan nin? Dala katawan ku mambu a sabap'in a imatayan sekanin! Na palebpadan ku bu ka butawanan ku den." 23 Ugaid'a pedsasalengan 'bpelalis su madakel a taw sa "Alus a itutuk'u sekanin!" Na bali nia nakagaga na su madakel a taw. 24 Guna su maitu na sinugutan den nu gubilnadul Pilatu su kiug'u madakel a taw. 25 Na pinaliu nin si Barabas a 'bpangenin nilan a makaliu ugaid'a su Isa menem i inipalad'in kanu manga taw sa endaw bun i kiug'ilan lun.
Su Kinatutuk kanu Isa al-Masih
26 Guna su ginuyud'ilan den su Isa na nakadsumbak silan sa mama a bedtuan sa Simiun a ganat sa Sirin a 'bpeludep sekanin sa Awrusalim. Na inipapusay lun su kayu a pinambalawaga ka ipedtundug'in kanu Isa. 27 Na madakel a taw i tinemundug lun taman kanu manga babay a 'bpamanguliang enggu penggagawan silan kanu Isa. 28 Ugaid'a linengian nu Isa silan ka pidtalu nin i "Duan nin su manga babay na Awrusalim, di aku nu 'bpaguliangi ugaid'a nia nu uliangi na su ginawa nu enggu su manga wata nu 29 ka pakauma den su gay a edtalun nu manga taw i 'Sangat a mapia i bagi nu manga babay a dala embabata udi na su entain i dala 'gkagingay enggu su dala den makapasusu sa wata.' 30 "Ka nan den ba su kutika a edtalun nu taw kanu palaw i 'Tampuli aku den, 'udi na edtalun nilan kanu bakulud i 'Ipagena aku nengka pan.' 31 Kagina amaika naminasa silan sa laki a mana su kayu a mailaw pan na ngin menem i pakaidan nilan sa kayu a magangu a mana sa lekanu a manga baladusa?" 32 Na aden pan dua kataw a manga mama a talibunu i ginuyud'ilan bun a ipedtagapeda nilan kanu Isa ka 'bpagimatayan bun mambu. 33 Na guna silan makauma kanu dalepa a bedtuan sa Takulab'a Ulu na initutuk'u manga sundalu nu Ruma su Isa enggu su dua kataw a talibunu sia kanu manga kayu a pinambalawaga. Na su sakataw na tampal sa kawanan nu Isa enggu su sakataw menem na tampal sa biwang. 34 Nia pidtalu nu Isa na "Ama ku, ampun ka bu su langun na manga taw a nia ka natalatantu i di nilan 'gkasabutan u ngin i penggulan nilan." Na pinamagumun nu manga sundalu su balegkas'in sa ukit a inipaganggana sa talang. 35 Na su manga taw lu na pedtulik bu saleta na su manga 'gkaunutan nu manga Yahudi na pedtataungaten nilan su Isa. Nia nilan pedtalun na "Nadtabangan nin su ped a manga taw na patabangi nu lun bun i ginawa nin amaika tidtu a sekanin su Masih a pinamili nu Kadenan!" 36 Na pedtataungaten bun sekanin nu manga sundalu enggu 'bpagubayn nilan ka 'bpagenggan nilan sa madsem a alak 37 taman sa nia nilan pedtalun na "Ssst, pendatu-datun nu manga Yahudi! Edtabangi ka su ginawa nengka!" 38 Na initagu su tanda a nakasulat lu kanu pulu nu nataguan sa lekanin sa maya ba "Nia ba su Datu nu manga Yahudi." 39 Na isa kanu mama a talibunu a initutuk lu i sakutu i kadtalu nin sa "Dikena seka ba su Masih? Ilipuas'engka su ginawa nengka apeg'ami." 40 Na su sakataw menem i dinemaway lun, nia nin pidtalu na "Nginan ka di nengka den ipegkagilek su Kadenan? Na magidsan-idsan bun i nakabetad sa lekitanu a sikesa. 41 Su lekita na wagib den kagina nasabpet ta den su alus a matalima ta. Ugaid'a sekanin na dala pinggula nin a nakasibay." 42 Na nia nin pidtalu kanu Isa na "Isa, 'gkalendem aku bu amaika endatu ka den." 43 Nia pidtalu nu Isa sa lekanin na "Edtalun ku sa leka su bantang na saguna bun ba a nia na makaunut ka sa laki lu sa sulega."
Su Kinapatay nu Isa al-Masih
44 Na guna su mangagan den maudtu na dala den embelat su senang enggu migkalibuteng su langun nu lusud'u inged taman sa manga tenganaik sa malulem. 45 Saleta na su kinagkalibuteng'u senang na su kuletina a lu kanu pageletan nu bilik'u Timpul a 'bpagagaman na naupak sa luk. 46 Nia nakatekik sa matanug'u Isa na "Ama ku, san ku den mambu kanu palad'engka itabun su ngiawa ku." Na entu demun ba na napadtud su napas'u Isa. 47 Guna su nailay nu 'gkaunutan nu sundalu su entu a nanggula na napugi nin su Kadenan sa nia nin pidtalu na "Ay su Kadenan ku. Benal a suti i mama a nia." 48 Na guna mailay nu manga taw a nangalimud lu su langun nu nanggula a kinatutuk kanu Isa na namanguli den silan a 'bpanampaken nilan su laleb'ilan ka pegkalat gaid i nanggiginawa nilan. 49 Na su langun nu nakakilala kanu Isa enggu maitu bun su manga babay a minunut lun ganat sa Galili na lu silan tinemindeg sa matangka ka pedsandengen nilan. 50-51 Na aden mama a Yahudi a bedtuan sa Yusup a ganat kanu inged a Arimatia. Na matidtu i atay nin enggu 'bpagadatan sekanin a taw. Na isa sekanin a 'bpaginagkay kanu kauma nu kandatu nu Kadenan. Apia ka isa sekanin kanu manga 'gkangaunutan lu na dala sekanin makaayun kanu kinaimatay kanu Isa. 52 Na pinangadap'in si gubilnadul Pilatu ka pinangeni nin su bangkay nu Isa. 53 Daka inibaba nin su bangkay nu Isa ka pinutus'in sa unung taman sa initampat'in lu kanu kinalutan a watu. Entu a tampat na dala pan katagui sa minatay. 54 Na su entu a gay, a gay na Giamat na 'gkauma den su Gay nu Kabpangintelenen nu manga Yahudi. 55 Su manga babay a minunut kanu Isa ebpun sa Galili na tinemapik bun kanu Yusup taman sa nailay nilan su tampat enggu panun i kinatagu lu ba kanu bangkay nu Isa. 56 Daka minuli silan ka nagadil silan sa manga patial enggu manga ped pan a lana a mamut sa kanu minatay. Kanu Gay nu Kabpangintelenen na nangintelenen silan ka entu ba i inibpaliugat'u Kitab.
Su Kinambibiag'u Isa al-Masih 'Bpaluman
1 Na mapita-pita pan gaid kanu gay na Akad na mimbalingan menem su manga babay ka pinananggit'ilan su manga kamutan a pinagadil'ilan kanu lawas'u minatay. 2 Na nia nilan nauman na su masela a watu a inidapeng kanu bengawan nu tampat na naagil den. 3 Daka linemudep silan ugaid'a da nilan den matun su bangkay nu Isa. 4 Saleta na nagaip silan sa entu a nanggula ka nakatekaw demun nakatindeg kanu ubay nilan i dua kataw a manga mama a mimbalegkas sa matinang i sigay nin. 5 Sabap kanu gilek'ilan na sinemugiud su manga babay na nia pidtalu nu manga mama sa kanilan na "Enduken ka 'bpangilayn nu su taw a bibiag sia kanu manga minatay? 6 Na da sia sekanin ka mimbibiag 'bpaluman. Ngintu ka di nu 'gkatademan su pidtalu nin sa lekanu kanu lu pan sekanin sa Galili sa 7 'Su Kaka nu Manusia na makapalad lu kanu manga mama a baladusa taman sa makatutuk sekanin lu kanu kayu a pinambalawaga ugaid'a embalingan bun sekanin ka embibiag kanu ikatelu nin gay.' " 8 Na entu pan ka nagkalendem'u manga babay su pidtalu nin. 9 Na minuli den silan ka pinanudtul'ilan su nanggula bantu kanu sapulu enggu isa a 'bpamangunut kanu Isa al-Masih taman kanu manga ped'ilan. 10 Nia bantu lu a manga babay na si Mariam a Magdalina, si Yuhana enggu si Mariam a ina ni Yakub. Na silan enggu su manga ped'ilan a babay na pinanudtul'ilan lu kanu manga sinugu su nanggula bantu. 11 Ugaid'a nia nilan lun kataw na pedsasabelawan silan nu manga babay taman sa da silan paginugut. 12 Ugaid'a si Pitru na nalalaguy lu kanu tampat'u Isa al-Masih. Na dinemukum sekanin na nia nin nailay na su unung'u Isa al-Masih na da den lu su lawas'in. Na minuli sekanin a 'gkagaip kanu entu a nanggula.
Su Kinaangay nu Dua Kataw a 'Bpamangunut lu sa Imaus
13 Kanu entu demun ba a gay na aden dua kataw a 'bpamangunut bun kanu Isa al-Masih i 'bpagangay sa Imaus, manga sapulu enggu isa kakilumitru i kawatan nin sa Awrusalim. 14 Na 'gkambitiala nilan kanu kabpelalakaw nilan su entu ba a nanggula. 15 Gagalu na kapembitiala nilan enggu kapebpalawa nilan na minubay su Isa ka tinemapik den kanilan makaw. 16 Na 'gkailay nilan bun sekanin ugaid'a di ipedsugut'u Kadenan i kakilala nilan lun. 17 Nia pidtalu nu Isa al-Masih kanilan na "Ampun aku bu manga dua na suled na ngin i sabapan udi na ngin i pembitialan nu a nan gay nu 'bpelakaw?"Na mibpalen silan ka 'gkalimeng gaid i buntal'ilan. 18 Isa kanilan si Keliupas na entu ba i minidsa sa lekanin sa "Ngin basi a nan, seka bu i nakabagu san sa Awrusalim a da pamun makatuntay sa nanggula kanu naipus a nia a padian?" 19 Inidsa nin i "Ngin i nanggula?"Nia nilan inisumpat na "Su pantag kanu nanggula a entu nu Isa a ganat sa Nasarit a mamis i kanggudila nin enggu barakat i galebek'in sia kanu kaadapan nu Kadenan enggu kanu manga taw. 20 Na pinaimatayan sekanin nu manga mapulu nu 'bpangurban nami enggu su manga pegkamal taman sa inipatutuk'ilan lu kanu kayu a pinambalawaga. 21 Kanugu nin ka masela i inam'ami sa sekanin ba i makapambaya-baya sa Israil. Na liu san na saguna ba a nia i ikatelu nin gay iganat kanu kinapatay nin. 22 Pidsan ka maitu na su ped'ami a manga babay na ginaip kami nilan ka linemu silan kanu tampat'u Isa kagina sa mapita-pita, 23 ugaid'a da nilan matun su bangkay nin. Na mimbalingan silan ka pidtalu nilan i nakailay silan sa manga malaikat a nia nilan pidtalu na bibiag su Isa al-Masih. 24 Na su manga tagapeda nami den i linemu kanu tampat. Na maitu bun ba kanu manga babay i nadtalu nilan na da nilan matun su bangkay nin." 25 Daka nia pidtalu nu Isa al-Masih kanilan na "Ngin den a kababal i lekanu na nginan ka pedtatanggiten nu su di kapaginugut kanu kadtalu nu manga nabi! 26 Na natalatantu i alus a malasay su Masih ka enggu nin kaludsuan su sigay nin." 27 Na tinapsil den nu Isa al-Masih kanilan u ngin i nakadalem kanu langun nu manga Kitab a pantag sa lekanin iganat kanu Kitab'u Nabi Musa taman kanu ped a nakasulat'u manga nabi. 28 Guna su nakasiken den silan kanu dalepa a 'bpagangayan nilan na namagigiling su Isa sa mawatan pan i lekanin a pebpawangan. 29 Ugaid'a pinabpalen nilan ka nia nilan pidtalu na "Sia ka den, unut ka sa lekami ka pedsukilep den enggu pegkalibuteng den." Na lu den mambu sekanin minunut kanilan. 30 Na guna su minayan sekanin sia kanu lamisan na kinua nin su pan ka midsukul-sukul sekanin kanu Kadenan entu pan ka pinanebi nin ka inipangenggay nin kanilan. 31 Daka nakilala nilan sa tidtu. Ugaid'a natekaw demun sekanin nalangiap. 32 Nia nadtalu nu uman i isa kanilan na "Dikena ba mana su teneb sekanin a sinemenep kanu atay ta sa kapembitiala nin sa lekita lu kanu lalan gagalu nu kapedtapsil'in kanu Kitab'u manga nabi?" 33 Na midtagad-tagad den silan embalingan sa Awrusalim. Na nauman nilan pamun su sapulu enggu isa a 'bpamangunut kanu Isa al-Masih apeg den su manga taw a midtimu-timu. 34 Ugaid'a da pan makadtalu su dua kataw na inunanan den silan edtalu nu 'bpamangunut sa "Uway, benal! Benal mambu a mimbibiag 'bpaluman su Isa al-Masih ka napailay sekanin kani Simiun Pitru!" 35 Daka ginugud'u dua kataw su nanggula nilan lu sa lalan taman kanu kinakilala nilan lun kanu kinatebi nin sa pan.
Su Kinabpapayag'u Isa al-Masih lu kanu 'Bpamangunut sa lekanin
36 Na gagalu nu kapedtalu-talu nilan kanu entu na nakatekaw demun nakadtindeg su Isa a sinalam'in silan sa "Assalamu Alaikum!" 37 Ugaid'a linemangkap su gilek enggu mana su nangawan silan na makatu ka nia nilan kataw lun na pimbuatan silan na manginggilek. 38 Ugaid'a nia nin pidtalu kanilan na "Nginan ka malimeng kanu? Di 'gkaalus i adenan nu sa kabpamagalang-alang su manga atay nu! 39 Ilay nu i lima ku a nia enggu ay ku a nia, benal a saki bun man i nia ba! Ami aku nu enggu edsusuliman aku nu. Su manga aluak na dala sapu nin enggu dala tulan nin ugaid'a saki na aden sapu ku enggu tulan ku!" 40 Guna su pidtalu nin i nia na inipailay nin su lima nin enggu su ay nin kanilan. 41 Saleta na pedsimbul i kapegkagaip'ilan enggu lilini nilan taman sa di pamun silan pakapangimbenal na inidsan nin silan sa "Aden makan sia?" 42 Na inenggan nilan sa tinapa a seda. 43 Na kinua nin ka kinan nin lu ba kanu adapan nilan. 44 Daka pidtalu nin kanilan i "Nia den ba su pidtalu ku sa lekanu kanu gay a pedtatagapeda tanu pan na 'Langun-langun nu sia nakadalem kanu Kitab'u Nabi Musa pantag sa laki maitu bun kanu sulat'u ped a manga nabi taman kanu Kitab Zabur na inalus i natuman den mambu.' " 45 Daka pinatuntayan nin kanilan su manga ayatan nu Kitab 46 enggu pidtalu nin kanilan i "Nia ba i nakadalem kanu Kitab na 'Dait a temala sa malasay su Masih taman sa matay sekanin enggu embibiag 'bpaluman kanu ikatelu nin gay 47 enggu dait a ibpangusiat sia kanu ingala nu Masih iganat den sia sa Awrusalim taman kanu langun nu manga taw sia sa liwawaw na dungia su kadtaubat kanu manga dusa enggu su ukit a kaampun nu Kadenan kanu entu a dusa. 48 Na sekanu i edtalu u ngin i nasaksian nu kanu nia ba a nanggula. 49 Na saki ba nia na sugun ku sia sa lekanu su Suti a Ruh a inibpasad'u Ama ku, . Ugaid'a pagingapa kanu pan sia sa inged a nia taman sa di pan ipalangkap sa lekanu su Kabarakat'u Kadenan a ganat sa sulega."
Su Kinabpapulu nu Isa al-Masih lu sa Sulega
50 Na pinangunanan nin silan sa kinaliu nilan kanu siudad 'bpawang sa Bitani. Na lu ba na inikayang'in su lima nin ka pinalihalan nin den silan. 51 Na gagalu nu kabpamalihala nin kanilan na ginanatan nin den silan ka pinabpapulu sekanin nu Kadenan lu sa sulega. 52 Na sinimba nilan sekanin entu pan ka mimbalingan silan lu sa Awrusalim a sangat a 'gkangapia i ginawa nilan. 53 Na uman-uman gay na lu den silan pendidilimudan kanu Timpul a 'bpagagaman ka pebpugin nilan su Kadenan.
Wassalam