1

Reweng Ata Poli Ciri Manusian

1 Pu’ung du wangkan manga Reweng; Reweng hitu cama-cama agu Mori Keraéngy, agu Mori Keraéngy Reweng hitu. 2 Hia du wangkan muing cama-cama agu Mori Keraéng. 3 Sanggéd ménan dédék Lihas agu émé toé manga Hia toé kéta manga can ata mangan, oné mai sanggéd so’ot poli dédékd. 4 Hiay pu’un mosé, agu mosé hitu te gérak manusiay. 5 Gérak hitu néra oné nendepy agu nendep hitu toé ngancéng koda Hian. 6 Main cengata ata wuat le Mori Keraéng, ngasangn hi Yohanés; 7 mai diha te téing sakasi latang te gérak hitu, kudut lut hia sanggéd ata ngancéng imbis. 8 Hia toé gérak hituy, maik hia paka téing sakasi latang te gérak hitu. 9 Gérak ata tu’ungn, hitut téing gérak néténg ata, rémé kudut mai oné lino. 10 Reweng polig mangan oné lino, agu lut Hia lino ho’o dédékn, maik lino ho’o toé pecing Hiay. 11 Hia mai oné paéng decukn, maik sanggéd ata decuk'N situ toé tiba Hias. 12 Maik sanggéd ata te tiba di’a Hia, téing Liha kuasa te ciri anak de Mori Keraéngs, isét ata imbi oné ngasang Diha; 13 ata situt dading toé oné mai dara ko oné mai humer de nai, toé kolé landing le ngoéng de cengata ata rona, maik oné mai Mori Keraéngn. 14 Reweng hitu poli ciri manusian, agu ka’éng baling itéy, agu ité poli ita néra'N, néra hitut téing Hia ného Anak Léca de Ema, penong le widang agu molor tu’ung. 15 Hi Yohanés ata téing sakasi latang te Hia agu kepok’n, taén: “Ho’o dé Hia, ata hiot taé daku du tombo laku nenggo’o: Musi mai aku, manga cai’n Hia atat be bolon mai aku, ai Hia poli mangan du toé dimanga’g aku.” 16 Ai oné mai penongN, sanggéd ité poli tiba widang momang lawang widang mohas; 17 ai Adak Taurat ata widang li Musa, maik widang momang agu ata molorn mai oné mai hi Yésus Kristus. 18 Toé kéta manga cengatan ata poli ita Mori Keraéng; maik Anak léca de Mori Keraéng, ata manga oné lobo pa’a de Ema'N, Hia dé ata tombon.

Sakasi Di Yohanés Latang Te Weki Run

19 Ho’oy dé sakasi di Yohanés du ata Yahudi oné béndar Yérusalém wuat pisa taus imam agu ata Léwi kamping hia, kudut te réi: “Céing léng hau?” 20 Tura liha agu toé gorin te pali, taén: “Aku toé hi Mésias.” 21 Poli hitu réi kolé lisé agu hia: “Émé nggitu, céing weli hau ga? Cala hi Élia?” Mai walé diha: “Toé, yé!” “Cala hau nabi ho’ot kudut cai?” Walé kolé liha: “Toé, yé! Toé aku!” 22 Landing hitu mai kolé réi disé agu hia: “Céing weli ata te tu’ungm hau ga? Ai kudut di’a tombon lami kamping isé ata wuat ami. Apa weli taém latang te weki rum hau?” 23 Walé kolé liha: “Akuy dé reweng hiot kepok mtaung oné satar mambak: pandé helek koé salang de Morin! Cama ného ata poli taé di nabi Yésaya.” 24 Agu oné mai ata situt wuat, manga pisa taus ata Parisi. 25 Réi lisé kamping hia, mai taéd: “Co’o tara ngancéng cebong ata laingm hau, émé toé hau hi Mésias, toé hi Élia, agu toé kolé nabi hitut kudut maiy.” 26 Mai walé di Yohanés agu isé, taén: “Aku cebong ata le waé; maik oné beréha méu hesé Hia ata toé baé le méuy, 27 ngong Hia, ata cai bemusi mai akuy. Te tiwit sepatu’N kaut toé remog aku.” 28 Sanggéd situ manga oné Bétania besina mai waé Yordan, osang palang cebong atan hi Yohanés.

Mori Yésus Anak Jimbal De Mori Keraéng

29 Ného diangn ga hi Yohanés ita main Mori Yésus mai nggere- cé’é hiay, agu mai taén: “Lélo ga Anak Jimbal de Mori Keraéng, ata koso ndékok de lino. 30 Ngong Hia dé hiot poli taé laku, nenggo’o: Be musi mai aku te mai cengata, ata poli cai be bolon mai aku, ai Hia poli manga du toé di mangag aku. 31 Agu weki rug kolé aku, laring cain toé baé Hiak, maik latang te hitu tara maig aku agu cebong le waé, kudut ata Israél baé Hiay.” 32 Agu hi Yohanés téing sakasi, mai taén: “Aku poli ita Nai Nggeluk wa’u éta mai awangn ného tekur jaway, agu ka’éng be-éta mai Hiay. 33 Agu aku kolé danong toé di baé Hiak, maik Mori Keraéng ata susung aku te cebong le waéy, poli téing rewengn agu aku: Émé ita le hau Nai Nggeluk hitut wa’u béta mai cengata ata agu ka’éng be-éta mai Hiay, Hia hitu dé kudut te cebong manusia le Nai Nggeluk. 34 Polig itan laku Hia, ho’og laku téing sakasin: Hia ho’o tu’ung Anak de Mori Keraéng.”

Ata Nungku de Mori Yésus te Laring Cain

35 Ného diang leson ga hi Yohanés hesé nitu koléy agu sua taus ata nungkun. 36 Agu du ita liha lakon Mori Yésus, mai taé diha: “Lélo ga, hio dé Anak Jimbal de Mori Keraéng!” 37 Dengé le ata nungku situt sua tau apa ata curup diha hitu, itug kali ngod isé lut Mori Yésusd. 38 Maik Mori Yésus holés nggere-musiy. Ita Liha, te isé lorong Hias, itu kali réin agu isé: “Apa kéta hitut kawé de méu?” Mai taéd agu Hia: “Rabi (ngong te nggo’o: Guru) nia wan ka’éng Dité?” 39 Mai taé Diha agu isé: “Mai ga, manga kaut itan le méu.” Itug kali ngod isé agu ita lisé nia wan Hia ka’éngn, agu leso hitu isé ka’éng camas agu Hia; du hitu anggat ongga pat. 40 Cengata oné mai isét sua ata dengé curup di Yohanés, agu ata lut Mori Yésus, ngasangn hi Andréas asé di Simon Pétrus. 41 Hi Andréas laring cain ngo cumang ka’én hi Simon, agu mai taén: “Ami poli cumang agu hi Mésias (ngong hi Kristus)” 42 Dadé hia liha oné Mori Yésus. Lélo agu rupa di’a kéta hia le Mori Yésus, mai taéN: “Hau Simon, anak di Yohanés, ngasangm te caron hi Kéfas (ngong: Pétrus).” 43 Ného diang leson kolé ga, Mori Yésus poli ngalis'N te ngo nggere-oné Galiléa, Hia cumang agu hi Pelipus, agu mai taén ngong hia: “Mai ga, lut Akuh!” 44 Hi Pelipus hitu oné mai Bétsaidan, béndar disé Andréas agu hi Pétrus. 45 Hi Pelipus cumang agu hi Natanaél, agu mai taén ngong hia: “Ami poli cumang Hiagm, ata hiot caro di Musa oné Surak Taurat agu le sanggéd nabi, Mori Yésus anak di Yosép oné mai Nazarét.” 46 Mai taé di Natanaél agu hia: “Ba’ang kéta néng, manga ata di’an oné mai Nazarét ko?” 47 Mai taé di Pelipus ngong hia: “Mai agu lélo ga!” Ita le Mori Yésus hi Natanaél mai kamping Hiay agu tombo latangt hia: Lélo ga, ho’o dé cengata ata Israél tu’ung, toé manga tangké cekoén oné hia.” 48 Mai taé di Natanaél kamping Hia: “Co’o tara baég aku Lité?” Mai walé de Mori Yésus agu hia: “Du toé di bénta li Pelipusm hau, polig itam hau Laku wa mai pu’u haju ara.” 49 Mai taé di Natanaél kamping Hia: “Rabi, Ité Anak de Mori Keraéng, Ité Raja data Israél!” 50 Walé de Mori Yésus, mai taéN: “Méséng tombo Laku agu hau: Aku ita hau wa mai pu’u haju ara, itu tara imbin le hau? Hau kudut te ita kolé apa ata céwé mésén oné mai hitu.” 51 Poli hitu taé le Mori Yésus oné hia: “Aku tombo agu hau, moro matan, ata tu’ungn hau te ita léngay awang, agu sanggéd malékat de Mori Keraéng nggere-wa nggere-étas mai cé’é Anak Manusia.”

2

Kawing Oné Kana

1 Du leso te telun manga ramé kawing oné Kana hitut oné tana Galiléa, agu endé de Mori Yésus manga kolé nituy; 2 Mori Yésus agu ata nungkun bénta kolés oné ramé kawing hitu. 3 Du tiong te taungs anggor disé, mai taé de endé de Mori Yésus ngong Hia: “Taungs waé anggor disé ga.” 4 Mai taé de Mori Yésus agu hia: “Apa weli ngoéng dité oné mai Aku endé? Toép di rapak lesog Aku.” 5 Maik endé de Mori Yésus taé agu isét wintuk laing: “Apa kaut ata curup Diha kamping méu, pandé taung situ le méu!” 6 Nitu manga enemd gumbang ata ngai nekekd, te waca lorong adak data Yahudi, néténg-néténg gumbang ngancéng na’a sua ko telu lorang waé. 7 Mori Yésus curup agu isét wintuk laing: “Téku pandé penong taungs gumbang situ le waé.” Agu téku tu’ung lisé waé pandé penong gumbang situ. 8 Poli hitu mai taé de Mori Yésus ngong isé: “Téku ga, agu ba ga oné ata tu’an ramé ho’o.” Itug kali bad lisé. 9 Du poli cemekn waé hitut poli ciri anggor, le ata tu’an ramé hitu, agu toé baé liha nia main, maik ata gatang ata téku waé hitu, baé lisé og béntan liha hiat kopé harat, 10 agu taé oné hia: “Data do, olong kéta téti anggor ata di’ad, agu émé poli taung posod ata le inung ga, itu po inung ata toé di’ad; maik de hau na’a kéta kid anggor di’a so’o dengkir te ho’on.” 11 Tanda lenget hitut pandé le Mori Yésus oné Kana, tana Galiléa, ata te laring cain oné mai sanggéd tanda lenget Diha. Agu le hitu Hia pandé bong ngasang’N agu sanggéd ata nungku’N imbi Hias.

Mori Yésus Oné Kapérnaum

12 Poli hitu Mori Yésus ngo oné Kapérnaumy, cama-cama agu endé’N agu asé ka’é’N agu sanggéd ata nungku’N, agu ka’éngs isé nitu pisa leso kanangs.

Mori Yésus Pandé Nggeluk Mbaru de Mori Keraéngy

13 Du tiong cai leso ramé Paska data Yahudi, Mori Yésus ngo oné Yérusalémy. 14 Oné natas Mbaru de Mori Keraéng hitu repéngs Liha ata papalélé lembu, mbé, jimbal agu tekur jawa, agu ata paluk séng lonto nitus. 15 Hia pandé kalus oné mai wasé, itug kali wur sanggéd taung isé oné mai Mbaru de Mori Keraéng, agu sanggéd mbé, jimbal, lembu disé; séng data paluk waci-wécak kéta taungs Liha wa tana, nggitu kolé méja disé pandé walék taungs Liha. 16 Ngong ata pika tekur jawa curups Liha: “Emi taungs apa so’o cé’é mai ho’od, néka pandé amba laing le méu Mbaru de Ema Daku.” 17 Itu di nukn le sanggéd ata nungkun, te manga tulis: “Le momang Mbaru Dité pandé muntung laing Aku!” 18 Ata tu’ad Yahudi koléng Mori Yésus, mai taéd: “Tanda apa le Hau ngancéng toto agu ami, te Hau manga hak'M te pandé nenggitu?” 19 Mai walé de Mori Yésus agu isé: “Rongkas damang le méu Mbaru Nggeluk ho’o, oné telu leso kaut Aku ngancéng hesé kolén.” 20 Mai kolé taé data Yahudi ngong Hia: “Pat mpulu enem ntaung hesén lata Mbaru Nggeluk ho’o, mai kaut Hau ngancéng pandén oné telu lesoy?” 21 Maik betuan Diha Mbaru Nggeluk ho’o ngong weki Run. 22 Musi main, du poli to’on oné mai ata mata, nitu di nukn lata nungku’N te apa hitut poli tombo’N Liha. Agu imbi tu’ung lisé Surak Nggeluk agu sangged taung reweng ata poli curup le Mori Yésus. 23 Agu du ngai oné Yérusalém’n Hia tédéng ramé Paska, do kéta ata imbi laing ngasang Diha, ai isé poli ita sanggéd tanda ata pandé Diha. 24 Maik weki Run Mori Yésus toé imbi iséy, ai pecing taungs isé Liha. 25 Agu ali toé cedekn can koé ata téing sakasi agu Hia latang te manusia, ai pecing Liha apa ata mangan oné nai de manusia.

3

Gejék Agu hi Nikodémus

1 Manga cengata ata Parisi ngasangn hi Nikodémus, hia cengata ata tu’an oné agama Yahudi. 2 Hia mai le wiéy oné Mori Yésus, agu mai taén: “Rabi, baé lami, te Ité mai ného Guru ata wuat le Mori Keraéngt; ai toé kéta manga cengatan ata ngancéng pandé tanda lengét ného pandé Dité hitu, émé toé kempéng le Mori Keraéng.” 3 Mai walé de Mori Yésus, taén: “Aku curup agu hau, moro matan, émé cengatan ata toé loas koléy, hia toé ngancéng itan Adak de Mori Keraéng.” 4 Mai taé di Nikodémus ngong Hia: “Co’o ngancéng ata te loas koléy émé hia tu’a gi? Ngancéng weli hia ngo kolé oné tuka de endén kudut loas koléy?” 5 Mai walé de Mori Yésus: “Aku curup agu hau, ata te tu’ungn émé ca ata toé loas oné mai waé agu Nai Nggeluk, hia toé ngancéng ngo oné Adak de Mori Keraéngn. 6 Manusia loas oné mai ata tu’an, ata serani loas oné mai Nai Nggeluk. 7 Néka lenget laing le hau émé nggo’o taé Daku agu hau: méu paka loas kolém. 8 Buru, solok nggere-nia kaut ngoéngn agu dengé le hau maon, landing toé baé le hau mai nia main agu ngo nggere-niay. Nggitu kolé dé sanggéd ata situt loas oné mai Nai Nggelukd.” 9 Mai walé di Nikodémus, taén: “Co’o kéta moléy jarin apa hitu?” 10 Mai walé de Mori Yésus: “Musuk hau guru data Israél, toé kolé pecing le hau apa situ ko? 11 Aku tombo agu hau, tu’ung-tu’ung kéta ami tombo latangt apa situt pecings lami agu ami ata sakasi latangt apa situt ita lamid, maik toé imbis le méu sakasi dami. 12 Toé imbi le méu, du Aku tombo agu méu latangt cao-ca oné lino, co’o kong imbin le méu, émé tombo Laku latangt taé Surga? 13 Toé kéta cengatan ata poli ngo éta Surgan, hanang Hia hitut poli wa’u éta mai Surgan, ngong Anak Manusia. 14 Agu cama ného hi Musa te téti liha ular nggere-éta oné satar mambak, nenggitu kolé Anak Manusia paka téti nggere-étay, 15 kudut sanggéd ata situt imbi Hia, haéng mosé tédéng lén. 16 Ai nenggitu mésén momang de Mori Keraéng latangt lino ho’o, wiga Hia téing Anak'N ata léca kudut sanggéd ata imbi Hia toé matas, maik haéng mosé tédéng lén. 17 Ai Mori Keraéng susung Anak'N oné lino toé te toto bicar de lino, maik te pandé selamaks Liha. 18 Céing kaut ata imbi Hia, toé manga hena le wahéng; céing kaut ata toé imbin, poli mangan ka’éng oné wahéngy, ai hia toé imbi oné ngasangd Anak léca de Mori Keraéng. 19 Agu ho’oy wahéng hitu: gérak poli cain oné lino, maik manusia céwé lélak ka’éng oné nendép itu pong oné gerak, ai sanggéd pandé disé da’atd tu’ung. 20 Ai céing kaut ata pandé da’at, kodoy lisé gérak agu toé mai oné gérak hitus, kudut sanggéd taung pandé da’atd situ toé haéng le géraks; 21 maik céing kaut ata pandé molor, hia mai oné géraks kudut ita si’ang te sanggéd situ pandé oné Mori Keraéngs.”

Sakasi di Yohanés Latangt Mori Yésus

22 Poli hitu Mori Yésus agu ata nungku'N ngo oné tana Yudéa agu Hia ka’éng nituy cama-cama agu isé agu cebong atas. 23 Maik hi Yohanés kolé, cebong ata kin oné Ainon ruis béo Salim, ai nitu do waé, agu ata mai nitus te cebong, 24 ai du hitu hi Yohanés toé di na’a oné buiy. 25 Manga ndu-ndél taud ata nungku di Yohanés agu cengata ata Yahudi landing wintuk te pandé nggeluk weki. 26 Itu kali maid isé oné hi Yohanés agu mai taéd ngong hia: “Rabi, ata hiot cama agu ité be sina mai waé Yordan, agu landing Hia ité poli téing sakasi, Hia cebong ata koléy agu do kétas ata ngo oné Hias.” 27 Mai walé di Yohanés: “Toé kéta manga cengatan ata ngancéng emi can apa te weki run, émé toé widang oné hia éta mai Surgan. 28 Méu kolé ngancéng téing sakasi, ai aku poli curup: Aku toé hi Mésiask, maik wuatg aku pado olok oné mai Hia. 29 Ata ngaran wina molas hiat kopé harat; maik haé reba dihat kopé harat ata hesé ruis hia agu ata séngét hias nisang kéta naid dengé reweng dihat kopé harat hitu. Hituy nisang nai daku, agu te ho’on nisang naig hitu penongy. 30 Hia paka tambang méséy, maik aku paka ciri koék. 31 Céing ata mai éta main, hia manga béta mai sanggén taung; céing ata mai oné mai linon, ka’éng boné linoy agu gejék curup dé linoy. Céing ata mai éta mai Surgan manga béta mai sanggéd ménan. 32 Hia téing sakasi latangt apa situt itan agu situt dengén, maik toé kéta manga cengatan ata tiba sakasi Diha situ. 33 Céing ata tiban sakasi Diha situ, hituy turan Liha, te Mori Keraéng hitu molorn. 34 Ai céing ata wuat le Mori Keraéng, Hia ata caingn reweng dé Mori Keraéng, ai Mori Keraéng widang Nai Nggeluk toé manga beténgn. 35 Ema momang Anakn agu poli widang sanggéd cao-ca oné Hia. 36 Céing kaut ata imbi Anak, hia haéng mosé tédéng lén, maik céing kaut ata toé lorong Anak, hia toé manga ita mosén, maik ruak de Mori Keraéng téjé kin lobo hia.”

4

Gejék Agu Inéwai Samaria

1 Du baég le Mori Yésus, te sanggéd ata Parisi poli dengén, landing Hia haéng agu cebong ata nungku céwé do oné mai hi Yohanés 2 -- koném po weki Run Mori Yésus toé cebong ata laingy, maik co’os ata nungku'N -- 3 Hia néng ga legong tana Yudéa agu holés koléy nggere-oné tana Galiléa. 4 Hia paka liba kétay tana Samaria. 5 Itug kali cain Hia oné ca béndar oné Samaria, ata ngasangn Shikar ruis tana ata téing li Yakob danong oné anakn, hi Yusuf. 6 Nitu manga perigi di Yakob. Mori Yésus poso kétay le lako, landing hitu Hia lonto lupi perigi hituy. Du hitu anggat ongga campulusua ga. 7 Itu wan cain cengata inéwai Samaria kudut téku waé. Mai taé de Mori Yésus agu hia: “Téing koé Aku waé inung.” 8 Ai sanggén taung ata nungku’N poli ngo oné béndar té weli hang. 9 Mai taé de inéwai Samaria hitu ngong Hia: “Ba’ang néng ga, Ité ca ata Yahudit, tegi kolé waé inung agu aku ata Samaria?” (ai ata Yahudi toé curup taud agu ata Samaria) 10 Mai walé de Mori Yésus agu hia: “Émé pecing le hau latang té widang de Mori Keraéng, agu céing Hia ho’ot curup agu hau: Téing Aku inung! Toé te toé hau tegi agu Hia, agu Hia poli téing agu hau waé mosé.” 11 Mai taéd inéwai hitu kamping Hia: “Mori, Ité toé manga émbér té tékun agu délemn perigi ho’o; mai nia main Lité paéngn waé mosé hitu? 12 Cala Ité kali ata céwé mésén oné mai ema dami hi Yakob, ata téing perigi ho’o agu ami agu ata poli inung dungka le weki run hia agu lawang sanggéd anakn agu paéngn?” 13 Mai walé de Mori Yésus agu hia: “Céing kaut ata inung waé ho’o hia te masa koléy, 14 maik céing kaut ata inung waé ata kudut téing Laku agu hia, hia toé masa koléy tédéng lén, maik waé ata kudut téing Daku agu hia, kudut ciri mata waé oné weki dihay ata mboas molém taung dengkir tédéng lén.” 15 Mai taéd inéwai hitu kamping Hia: “Mori, téing koé aku waé inung hitu, kudut aku toé masa kolék agu toé maléng mai kolé cé’é ho’og te téku waé.” 16 Mai taé de Mori Yésus agu hia: “Kolé ga, bénta ronam agu mai cé’é ho’oy.” 17 Mai taé de inéwai hitu: “Aku toé manga ronag.” Mai kolé taé de Mori Yésus agu hia: “Tu’ung kéta taé de hau hitu, ai hau toé tu’ung manga ronam, 18 ai hau poli manga limad ronam agu ata mangan ho’o oné hau, toé kolé rona de hau. Oné tombo ho’o molorm hau.” 19 Mai taéd inéwai hitu kamping Hia: “Mori, ho’og baé tu’ungn laku ga, Ité cengata nabit. 20 Empo dami suju éta poco ho’os, mai taé de méu ga Yérusalém dé osang baté suju data.” 21 Mai taé de Mori Yésus agu hia: “Imbi kaut Akuh, oé enu, tiong cai cekengn te méu kudut suju hi Ema toé oné poco ho’o, toé kolé oné Yérusalém. 22 Méu suju apa ata toé baé le méu, ami suju apa ata baé lamin, ai selamak tua oné mai wa’u Yahudin. 23 Maik manga kaut rapak leson agu te ho’on poli cain ga, té isét suju laing tu’ungn kudut suju hi Ema oné Nai agu molor, ai hi Ema lélak ata situt suju nenggitu. 24 Mori Keraéng hitu Nai agu céing kaut ata suju Hian, paka suju Hia oné Nai agu molor.” 25 Mai walé de inéwai hitu kamping hia: “Pecing laku, hi Mésias kudut maiy, ngong hi Kristus; émé cai Hia, kudut Hia dé ba keréba sanggéd cao-ca oné ami.” 26 Mai taé de Mori Yésus agu hia: “Akup Hia, ho’ot rémé gejék agu hau.” 27 Du hitu cais ata nungku’N agu lenget kétas, ai Hia rémé tombon agu cengata inéwai. Maik toé kéta cengatan ata cukung te réi: “Apay ngoéng de hau, enu?” ko: “Apay tombo Dité agu hia?” 28 Og lego wan gumbangn inéwai hitu nitu, itu kali ngo oné béndarn agu tombo oné sanggén ata manga nitu: 29 “Oé, mai é, lélo damang dé! Manga cengata ata ngancéng tombo taung agu aku, sanggéd cao-ca ata poli pandé daku. Cala hitup hi Kristus?” 30 Op ngod isé pé’ang oné mai béndar hitu agu ngo oné Mori Yésus. 31 Rémé nenggitun ata nungku’N nék Hia, mai taéd: “Rabi, hangt di.” 32 Maik mai taé Diha ngong isé: “Oné Aku manga hang ata toé baéy le méu.” 33 Mai taéd ata nungku'N situ cama taud: “Aram manga dadi ata ba cao-ca oné Hia te hang laing?” 34 Mai taé de Mori Yésus ngong isé: “Hang Daku ngong émé pandés Laku ngoéng Diha hitut wuat Aku, agu pandé polis gori'N situ. 35 Toé weli nenggo’o taé de méu: Téké pat wulang caig cekeng ako? Maik Aku taé agu méu: Lélo dé baling méu agu lélo taung uma ata polis té’éd agu ngancéng te akos. 36 Ho’o muing hiat ako tiba lahén, agu hiat ligot wua te mosé tédéng lén, wiga ata wécak wini agu hiat ako cama-cama nisang naid. 37 Ai sangged so’o, laing tu’ungn dé go’ét ho’o: Hiat cengata te wécak wini, ata iwon te ako. 38 Aku wuat méu te ako apa hitut toé rébok de méud; ata bana ata rébokd méu te ako rébok disé.” 39 Agu do kéta ata Samaria oné mai béndar hitu, imbi Hias le dengé tombo de inéwai hitu, ata sakasi: “Hia taé agu aku sanggéd taung apa ata poli pandé dakud.” 40 Woko cais ata Samaria situ oné Mori Yésus, tegi lisé oné Hia, kudut Hia ka’éng agu iséy; itu kali ka’éngn Hia nitu sua leso béhéngn. 41 Agu céwé do kolé ata situt imbi landing curup Diha, 42 mai taéd ngong inéwai hitu: “Imbig lami, maik toé landing taé de hau, ai poli dengé le rug ami Hia, agu pecing lami té Hia tu’ung Ata Selamak de lino.”

Kolé Nggere-oné Galiléa

43 Du sua leso wa ga, Mori Yésus kolé nitu main nggere-oné Galiléa, 44 ai poli sabi le Run Mori Yésus, toé manga cengatan nabi ata hiangn lata oné tana de run. 45 Agu du cain Hia oné Galiléa, tiba di’ay lata Galiléa situ ai isé poli ita sanggéd situt pandé Diha oné Yérusalém du ramé hitu, ai rud isé kolé onés du ramé hitu.

Mori Yésus Pandé Ina Anak de Pegawé de Raja

46 Og holés kolé nggere-oné Kana oné tana Galiléan Mori Yésus, oné béo hiot pandé Liha waé ciri anggor. Agu oné Kapérnaum manga cengata pegawé de raja ata rémé betin anakn. 47 Du dengén liha, caig Mori Yésus oné mai Yudéan nggere-oné Galiléa, itug kali ngon hia oné Mori Yésus agu tegi, dasor Hia mai agu pandé ina anakn, ai anakn hitu kudut matay. 48 Mai taé de Mori Yésus agu hia: “Émé toé di ita le méu tanda agu tanda lengét, toé di imbi le méu.” 49 Mai taé de pegawé hitu ngong Hia: “Mori, mait ga rémé koé toé di matan anak daku.” 50 Mai taé de Mori Yésus agu hia: “Ngoh ga, anak de hau moséy!” Ata hitu imbi curup hitut taé de Mori Yésus agu hia, itug kali ngon. 51 Du ngai oné beréha salangn kin hia, cumang nitus liha mendin kudut te tura agu hia, ai anakn ina gi. 52 Mai hia réi agu isé, ongga pisay anakn hitu pu’ung inan. Walé disé: “Oné meseng ongga ca, morag pémpangn.” 53 Nitug nukn le pegawé de raja hitu, ina du hitu néng oné méséng Mori Yésus curup agu hia: “Moség anakm.” Itug kali imbi kolén hia lawang agu sanggéd haé kilon. 54 Agu hitu dé tanda lenget te suan ata pandé de Mori Yésus du kolén oné mai Yudéa nggere-oné Galiléa.

5

Pandé Ina Ata Beti Du Leso Sabat Oné Tiwu Bétésda

1 Poli hitu manga leso ramé disét Yahudi, Mori Yésus ngo nggere-oné Yérusalém. 2 Oné Yérusalém ruis Lewang Jimbal, manga ca tiwu, ngasangn Bétésda oné curup Ibranin. Oné lupi tiwu Bétésda hitu manga limad molang 3 do kétas ata beti halas kid oné molang situ: Mangas ata buta, ata denggo-doat wa’i agu ata péko. Isé géréng gégon waé tiwu hitu. 4 Ai émé ného palén wa’u malékat de Morin oné tiwu hitu agu pandé gégo waé hitu; céing kaut ata laring cain cembur oné tiwu hitu ina muing betin; koném beti apa kaut. 5 Nitu manga cengata ata telumpulu alo ntaung gi betin. 6 Du ita le Mori Yésus ata hitu, ngai halas kin nitu, agu ali pecing Liha naisn gé betin, mai taé de Mori Yésus agu ata hitu: “Asa, ngoéngm hau te inah ko?” 7 Mai walé data hitu: “Mori, toé kéta manga cengatan ata te téti aku nggere-oné tiwu hitu émé rémé gégon waé, hituk di aku kudut ngo lembo oné waé hitug, manga’g ata cai olon.” 8 Mai taé de Mori Yésus: “To’oh ga, lulungs locém agu lakoh ga.” 9 Du hitu muing di’a betin ata hitu, itu kali tétis locén agu lakoy gi. Maik leso hitu leso Sabat. 10 Ali hitu, mai curup data tu’a disét Yahudi agu ata hitut poli inan: “Leso ho’o leso Sabat. Hau néka cu’ung locém.” 11 Mai walé data hitu: “Ata hiot pandé ina beti daku, Hia hitut taé agu aku: Tétis locém agu lakoh ga.” 12 Mai réi disé agu hia: “Céing ata hitu te taé agu hau: Tétis locém agu lakoh ga?” 13 Maik ata hitut poli ina betin, toé baé liha céing ata hitut pandé ina hia, ai Mori Yésus ného baon moran ngo oné réha ata do nitu. 14 Ného cepisan, Mori Yésus cumang agu ata hitu oné Mbaru de Mori Keraéng, mai taén ngong Hia: “Polig dé inan beti de hau, néka pandé ndékok kolé, boto hena koléh le beti ata céwé da’atn.” 15 Ngo nggere-pé’angy ata hitu, tombo liha oné isét tu’ad Yahudi, kali Mori Yésus hitut poli pandé ina hia. 16 Landing hitu, ata tu’ad Yahudi humer kéta naid te pandé susa Mori Yésus, ai Hia pandé ina atay oné leso Sabat. 17 Maik mai taé Diha agu isé: “Ema Daku gori dengkir te ho’on, ali hitu, Aku gori nenggitu kolék.” 18 Méséng nggitu isét tu’ad Yahudi tambang kétas buber naid te mbelé Hia, toé landing Hia pandé mora leso Sabat, maik landing le taé Diha kolé te Mori Keraéng, Ema Run Hia. Ali hitu weki Run Hia te cama agu Mori Keraéngy.

Sakasi de Mori Yésus Latang te Weki Run

19 Og walé ata tu’ad Yahudi situ le Mori Yésus; “Aku taé agu méu, tadan, Anak toé ngancéng pandé apa kaut le téti nai Run, émé toé ita Liha apa ata pandé de Ema, ai apa ata pandé li Ema, hitu kolé ata pandé de Anak. 20 Ai hi Ema momang Anak, itu tara toid Liha oné Anak sanggéd taung situt pandé le weki run Hia ngot Hia toi oné Anak, sanggéd gori ata céwé méséd kolé oné mai gori so’o, wiga lengets méu. 21 Ai cama ného hi Ema pandé to’o isét mata agu pandé mosés, nenggitu kolé Anak pandé mosé céing kaut ata ngoéng laing Liha. 22 Hi Ema toé manga toto bicar céing ko céing kaut, maik poli téing Liha kuasa te beté bicar hitu oné AnakN, 23 kudut sanggéd ata situt hiang hi Anak cama ného hiang hi Ema. Céing kaut ata toé hiang hi Anak, cama ného toé hiang hi Emay hitut wuat Hia. 24 Aku taé agu méu: ata tu’ungn kéta, céing ata séngét tombo Daku, agu imbi Hia hitut wuat Aku, hia haéng mosé tédéng lén, agu toé manga kolé wahéng tédéng lén, ai hia poli hésing oné mai matan nggere-oné mosé. 25 Aku taé agu méu: Moro matan, te cai leson, agu polig cain, te sanggéd ata mata dengé reweng de Anak de Mori Keraéng, agu isét dengén, te mosés. 26 Ai cama ného hi Ema manga mosé oné weki de Run, nenggitu kolé téing Liha oné Anak manga mosé oné weki de Run. 27 Agu Hia poli téing kuasa oné Anak'N kudut beté bicar, ai Hia Anak Manusiay. 28 Néka lenget laing le méu, ai tiong te rapak leson, sanggéd ata oné boa dengé reweng Dihas, 29 agu isét poli pandé di’a to’os wa mai boad kudut tiba mosé tédéng lén, maik isét poli pandé da’at du rémé moséd, to’o kolés kudut tiba wahéng tédéng lén. 30 Aku toé ngancéng pandé apa-apa oné mai weki rug; Aku beté bicar lorong apa ata poli dengé Daku, agu beté bicar Daku agiln ai Aku toé lorong ngoéng de weki Rug, maik lorong ngoéng Diha hitut wuat Aku. 31 Émé Aku sakasi latang te weki Rug, sakasi Daku hitu, toé molorn; 32 manga ata bana te téing sakasi latang te Aku, agu pecing Laku, sakasi hitut téing Diha laing salangn. 33 Méu poli jera atas oné hi Yohanés, hia poli téing sakasi ata laing salangn. 34 Maik Aku toé pinga laing sakasi de manusia; maik tara curupn Laku, kudut ita le méu mosé selamak. 35 Hia cama ného culu ata dila te téing gérak, agu toé béhéng le méu mantén gérak hitu. 36 Maik manga ca kétay sakasi Daku ata céwé mésén oné mai sakasi di Yohanés, ngong sanggéd taung gori ata poli téing li Ema kamping Aku, kudut pandés Laku. Gori situ kolé ata pandé Daku te ho’on, agu sanggéd pandé Daku situ te téing sakasi latang te Aku, te Aku ho’o wuat le Ema'G. 37 Hi Ema ata wuat Aku, Hia koléy ata téing sakasi latang te Aku. Méu toé dé’it manga dengén reweng Diha, nenggitu kolé tara'N, toé dé’it ita le méu, 38 agu reweng Diha toé manga temern oné méu, ai méu toé imbi Aku ata jera Diha. 39 Bo kali seber tu’ungs méu te bacang Surak Nggeluk, ai bet de méu, le bacang Surak Nggeluk situ haéng le méu mosé tédéng lén. Musuk Surak Nggeluk situ téing sakasi latang té Aku, 40 maik méu toé mai oné Akum kudut haéng mosé tédéng lén. 41 Aku dé toé nanang hiang le manusiak. 42 Maik latang te méu, pecing kéta muing Laku nais. Méu toé manga momang Mori Keraéngs. 43 Mai Daku le ngasang de Ema'G, maik méu toé tiba Akum; bo woko mai ata bana le ngasang de run, tiba hia le méu. 44 Co’o kaut tara ngancéng imbin le méu, émé méu kawé hiang oné mai cama taus, maik toé kawé hiang hitut mai éta mai Mori Keraéng hitut ca-y kali? 45 Néka nggo’o ma’ut de méu, Aku kudut toto sala de méu oné ranga di Ema; maik ata buang méu hi Musa, hitut deming laing le méu. 46 Ai émé imbi hi Musa méu, toét-toé méu imbi kolé Akum, ai hia poli tulis latang te Aku. 47 Maik émé méu toé imbis apa situt tulis diha, co’o kétas kong imbid le méu apa so’ot curup Daku?”

6

Mori Yésus Téing Hang Lima Sebu Ata

1 Poli hitu Mori Yésus angkak ngo be sina mai sano Galiléa, ngasang banan sano Tibérias. 2 Do kétas ata londang lut Hia, ai ita lisé tanda lenget situt pandé Diha latang te isét beti. 3 Mori Yésus ngo nggere-éta goloy agu lonto camas nitu agu ata nungku'N. 4 Leso adak Paska, adak mésé data Yahudi ruis gi. 5 Du lélo le Mori Yésus ata baling mai Hia, ita Liha do tu’ungs ata holi te mai oné Hia, mai taé'N ngong hi Pelipus: “Weli nia lité roti te hang data so’o?” 6 Réi hitu Diha kudut damang hi Pelipus, ai pecing Liha co’o ngai Liha pandén. 7 Mai walé di Pelipus agu Hia: “Koném weli roti ata sua ratus dinar molé, toé kin rangko latang te isé so’o, alim po pati gici ca pu’ild kaut.” 8 Cengata oné mai ata nungku'N, hi Andréas asé di Simon Pétrus, pa’u rewengn kamping Hia: 9 “Ho’o manga anak koé ata manga lima mongkod rotin agu suad ikang; maik capa laings to’ong kudut téing lawa do so’o?” 10 Mai taé de Mori Yésus: “Jera lontos le méu ata do situ.” Nitu tebel kéta remang, itus kali lontod ata do situ, am lima sebud dod ata rona. 11 Poli hitu, Mori Yésus emi roti situ, étan wali di’a, agu pati péar oné isét lonto nitu; nenggitu kolés ikang situ pati péars Liha latang te ata dos situ, poro ngoéngd. 12 Woko poli becurd taung ata do situ, mai taé'N agu ata nungku'N: “Nongko taung sanggéd roti situt récid boto manga ata oké bod.” 13 Og kali ligot taungs lisé sanggéd roti situt récid agu na’a oné campulusua rotod, penong taung le roti siot lima mongko, ata réci hang diséd. 14 Du poli itan lata do situ tanda lenget ata pandé Diha, mai taéd: “Hia ho’o tu’ung kéta nabi hitut mai oné tana linoy.” 15 Ai pecing le Mori Yésus, isé mai nitus kudut te dadé Hia te teti ciri raja laingy. Itu kali Hia lako lentang hanang koé'N nggere-oné poco.

Mori Yésus Lako Lobo Waéy

16 Du mané répg tana, sanggéd ata nungku de Mori Yésus, ngo sili sanos agu léti wangkas 17 te ngo nggere-sina Kapérnaums. Nendep molé tana ga toé tara tuay Mori Yésus, 18 céwén kolé cai bombang mésé ai leng bailn buru warat. 19 Remon wa ga aram lima ko enem kilo métér tadangn bisé wangka disé, ita lisé Mori Yésus lako kauty lobo waé mai ruis wangka disé. Isé rantang kéta taungs. 20 Maik mai taé Diha ngong isé: “Aku ho’o, néka rantang!” 21 Isé te poto Hia nggere-oné wangka, agu ca repa mata kaut caig wangka hitu lupi tacik hitut baté ngo disé.

Lawa Do Kawé Mori Yésus

22 Ného diangn, lawa do situt ngai ka’éng besinad toég manga itan lisé wangka, maik hio ca kali bao. Mori Yésus toé léti cama oné wangka hitut léti data nungku'N, maik ata nungku'N kanang situt ngo. 23 Maik rémé nggitun, tuad pisa wangka bana ata mai oné mai Tibérias ruis baté hang roti disé du poli étan wali di’a le Mori Yésus. 24 Lété itan lata do te Mori Yésus toég manga nitun, agu ata nungku'N kolé toé, isé léti wangka situ agu angkak te ngo nggere-oné Kapérnaum kudut kawé Mori Yésus.

Mori Yésus Roti Te Mosé Laing

25 Du cumangn lata do situ Mori Yésus be sina mai tacik hitu, mai taéd ngong Hia: “Rabi, oné pisa kaut Tité cai cé’é ho’od?” 26 Mai walé de Mori Yésus: “Aku taé agu méu, moro matan, kawé Aku de méu, toé landing le ita tanda lenget situ, maik ali méu poli hang roti situ agu becurm. 27 Seber koém te gori, toé latang te hang bara hitut ngancéng pandé calang laing, maik latang te hang hitut ngancéng te mosé tédéng lén, hitut téing le Anak Manusia oné méu, ai Hia ata poli palasn le Mori Keraéng Ema.” 28 Mai walé disé agu Hia: “Apa ata pandé dami kudut ngancéng kawé ata henan oné Nai de Mori Keraéng?” 29 Mai walé de Mori Yésus: “Ho’o kéta gori ata henan oné nai de Morin; méu paka imbi oné Hia ata wuat le Mori Keraéng.” 30 Mai kolé réi disé: “Tanda apa kéta pandé Dité kudut ita lami, kudut ami imbi Itékm? Gori apa kéta hitut pandé Dité? 31 Empo dami poli hang Mana oné satar mambak, ného manga ata poli tulisd: Isé poli téing Liha roti éta mai Surga.” 32 Mai walé de Mori Yésus: “Taé tu’ung Daku agu méu; moro-matan, toé hi Musa hitut téing méu roti éta mai Surga, maik roti ata tu’ungn kéta, roti hitut téing de Ema Daku éta mai Surga. 33 Ai roti hitut oné mai Mori Keraéng, hituy roti ata wa’u éta mai Surga agu téing mosé oné lino.” 34 Maig taé disé: “Mori, téing tédéng koékm ami roti hitu.” 35 Mai wantil de Mori Yésus: “Akuy roti hitut te mosé laing; céing kaut ata mai oné Akuy, hia toé manga darem kolén, agu céing kaut ata imbi Aku, hia toé manga masa kolén. 36 Maik Aku poli tombon agu méu: Koném poli ita Akus méu, maik toé kin tara imbi le méu. 37 Sanggéd taung ata situt téing li Emag oné Aku, te mai oné Akus, agu céing situt mai cé’é Akus, hia toé okéy Laku. 38 Ai Aku poli wa’u éta mai Surga, toé kudut pandé lorong ngoéng Daku, maik kudut lorong Hia hitut poli wuat Aku. 39 Agu ho’o kétay ngoéng Dihat wuat Aku, poro sanggéd taung ata poli téingd Liha latang te Aku, néka manga ata morad, maik pandé to’os Laku du cemol lino. 40 Ai ho’oy ngoéng de Ema Daku; kudut sanggéd taung ata siot poli ita Anak agu imbi Hias, ita mosé tédéng lén agu porong Aku pandé to’o isé du cemol lino.” 41 Itug kali ndu’usd ata Yahudi landing Hia, ai poli taé Diha: “Akuy roti hitut wa’u éta mai Surga.” 42 Mai kolé taéd: “Toé néng hi Yésus anak di Yosép Hia ho’o ko, ata endé-eman pecing tu’ungs lité? Co’o kaut Hia tara nenggo’on taén: Aku poli wa’u éta mai Surgag?” 43 Mai walé de Mori Yésus agu isé: “Méu néka ndu’usm. 44 Toé kéta manga cengatan ata mai oné Akum, émé toé poto Liha Ema ata wuat Aku, agu hia pandé to’oy Laku du cemol lino. 45 Manga tulisd oné surak de sangged nabi: Agu sanggéd isé te toing le Mori Keraéngs. Agu néténg ata, ata poli dengé agu tiba toing oné mai hi Ema, mai cé’é Akus. 46 Sanggéd situ toé nggo’o ga, te manga atan ata poli itan hi Ema. Hanang Hia hitut mai oné mai Mori Keraéngn, Hiay ata poli ita hi Ema. 47 Aku taé agu méu: Ata tu’ungn kéta, céing ata imbi Aku, hia te haéng mosé tédéng lén. 48 Akuy dé roti te mosé laing. 49 Empo de méu poli hang mana oné satar mambak agu isé poli matad ga. 50 Ho’oy roti ata wa’u éta mai Surga: Céing kaut ata hangn, hia toé ngancéng matay. 51 Akuy dé roti te mosé laing, ata poli wa’u éta mai Surgag. Céing kaut ata hang roti ho’o, hia te haéng mosé tédéng lén. Roti ho’ot téing Daku, hituy weki Daku ata téing Laku te mosé de lino.” 52 Sanggéd ata Yahudi léwang cama taud, agu mai taéd: “Co’oy Hia ho’o ngancéng téing weki'N te hang dité?” 53 Mai taé de Mori Yésus: “Aku taé agu méu, ata tu’ungn kéta, émé méu toé hang weki de Anak Manusiam agu inung dara'N, méu toé manga mosé oné wekis. 54 Céing ata hang weki Daku agu inung dara Daku, hia paéng mosé tédéng lén, agu Aku pandé to’o hia du cemoln lino. 55 Ai weki Daku tu’ung-tu’ung kéta latang te hang, nenggitu kolé dara Daku, tu’ung-tu’ung te inung. 56 Céing kaut ata hang Weki Daku agu inung Dara daku, hia ka’éng oné Akuy agu Aku oné hiak. 57 Cama ného hi Ema hitut mosé ata wuat Aku, agu Aku mosé li Emak, nenggitu kolé, céing ata hang weki Daku, hia hitu te mosé Lakuy. 58 Ho’o dé roti ata poli wa’u éta mai Surga, toé roti ného hiot hang de empo de méu, agu isé polisg matad. Céing kaut ata hang roti ho’o, hia te haéng mosé tédéng lén.” 59 Sanggéd so’o, tombos le Mori Yésus oné Kapérnaum du toing oné Mbaru ngaji'N.

Dod Ata Nungku Ata Hedongs

60 Du poli dengéd taung tombo situ, dod ata nungku de Mori Yésus ata curup nenggo’o: “Curup ho’o cirang kéta bailn, céing ata ngancéng ta’ongn te séngétn?” 61 Pecing le Mori Yésus, ngga’uts ata nungku’N landing tombo Diha situ. Mai taé’N ngong isé: “Co’o tombo hitu, pandé gégo imbi de méu ko? 62 Co’o émé ita le méu Anak Manusia ngo nggere-éta osang hitut baté ka’éngn? 63 Nai de Morin ata téing mosé, weki dité toé kéta manga betua laingn. Sanggéd tombo Daku situ kamping méu, hitus dé nai ata téing mosé. 64 Maik manga oné mai méun ata toé imbid.” Ai du wangkan muing pecing le Mori Yésus, céing ata toé imbin agu céing kudut te pika Hia. 65 Mai kolé taé Diha: “Landing hitu poli Laku tombon agu méu: Toé kéta manga cengatan ata te mai oné Aku, émé toé widang li Ema latang te hia.” 66 Pu’ung nitu maid ga, do kétas ata nungku Diha, hedong toé lut Hia kolés.

Tura Di Pétrus

67 Maig taé de Mori Yésus agu rasul situt campulu sua: “Asa méu; toé kolé hedongm ko?” 68 Mai walé di Simon Pétrus ngong Hia: “Mori, ngo kolé oné céingkm di ami? Reweng Dité tu’ung-tu’ung reweng te mosé tédéng lén; 69 agu poli imbid lami agu pecing te Ité ata nggeluk oné mai Mori Keraéng.” 70 Mai walé de Mori Yésus agu isé: “Toé weli weki rug Aku ata pilé méut campulusua ho’o? Maik cengata oné mai méu ata jing da’atn.” 71 Betuan curup Diha ngong hi Yudas anak di Simon Iskariot; koném po hia cengata oné mai isét campulusua, maik hia te pika Mori Yésus.

7

Mori Yésus Ngo Oné Yérusalém

Te Lut Ramé Pondok Daun

1 Poli hitu Mori Yésus lako léok Galiléa, ai Hia toé gorin te ka’éng kaut oné Yudéa, ai nitu manga ata Yahudi nanang te ala Hias. 2 Du hitu ramé disét Yahudi ruis gi, leso ramé Pondok Daun. 3 Mai taé de asé-ka’én Mori Yésus agu Hia: “Ngot Ité cé’é mai ho’o ga nggere-oné Yudéa, kudut sanggéd ata nungku Dité ita kolé sanggéd pandé Dité. 4 Ai toé manga cengatan te pandé cao-ca oné pété ceha, émé hia ngoéng te tiba lata doy. Émé nenggitu pandé Dité, toto taram oné tana lino.” 5 Ai asé-ka’é ru’N kaut toé imbi Hias. 6 Mai taé de Mori Yésus agu isé: “Leso Daku toéd caiy, maik latang te méu mangam taung linga. 7 Lino ho’o toé manga rangkat méud, maik rangkat Akuy, ai Aku poli sabid latang te sanggéd pandé da’at diha. 8 Ngom ga oné ramé hitu, Aku toé ngok nitu, ai toé di rapak leso’G.” 9 Nenggitu reweng Diha latang te isé, itu kali ka’éng kiN oné Galiléa. 10 Maik du poli ngod asé-ka’é de Mori Yésus oné ramé hitu, itu kali ngon kolé Hia nitu, maik lakoN toé ita lata doy. 11 Ata tu’ad isét Yahudi kawé Hia oné ramé hitu agu mai taéd: “Nia Hia?” 12 Agu do kéta dengé siwi-sok oné lawa do situ latang te Hia. Manga ata taé nenggo’o: “Hia ata di’ay.” Mai tungku data iwod: “Toé yé, Hia pandé wéléng ro’éngy.” 13 Maik lagit cengatan koé ata cukungn te curup mésé-mésé latang te Hia ai rantang ata tu’ad isét Yahudis.

Mori Yésus Téing Sakasi Weki Run

14 Du rémé kéta ruda olon ramé hitu, Mori Yésus ngo oné Mbaru de Mori Keraéngy agu toing atay nitu. 15 Lenget kéta taungs ata tu’ad Yahudi, agu mai taéd: “Co’o kétay ata ho’o, do kéta pecingn, musuk toé olo nungkuy.” 16 Mai walé de Mori Yésus agu isé: “Toing Daku toé oné mai weki Rug, maik oné mai Hiat wuat Akuy. 17 Céing kaut ata lut ngoéng Diha, ata hitu ngancéng pecing, ot toing Daku so’o oné mai Mori Keraéngd ko oné mai weki Rug. 18 Céing ata curup oné mai weki run, ata hitu kawé te hiang weki run, maik céing-céing ata kawé hiang latang te Hia hitut wuatN, hia laing salangn agu toé manga ata toé molorn oné hia. 19 Toé weli hi Musa ata poli téing adak Taurat oné méu? Maik lagit cengatan koé oné mai méu ata pandé lorong adak Taurat situ. Co’o tara kudut ala Akus méu?” 20 Mai wantil data do situ: “Hau hena le koro de jing da’at; céingy ata kudut te ala Hau?” 21 Mai walé de Mori Yésus agu isé: “Musuk ca di pandé Daku, lengét ta’a méu ga. 22 Jari, poli wintasn li Musa kudut sunat kéta taung méu - ata tu’ungn sunat hitu toé oné mai hi Musan, maik oné mai empo ditén – agu méu sunat atam oné leso Sabat. 23 Émé ca ata, sunat oné leso Sabaty, boto lagé adak di Musa, co’o weli méu tara rabo Akus, méséng Aku pandé ina labok taung wekin cengata manusia du leso Sabat? 24 Néka beté-bicar lut apa ata ita le mata, maik beté-bicar ata agiln tu’ung.”

Ndél Landing Nia Main Mori Yésus

25 Mai taé data iwon weki Yérusalém: “Cala Hia ho’op ata kudut ala lisé ta? 26 Agu lélo de Hia curup sara nain agu isé toé manga curup apa-apa kamping Hia. Aram pecing tu’ung le adak laing dité, te Hia ho’o hi Kristus? 27 Maik latang te ata ho’o, pecing lité, nia main baté ka’éngn, maik du nia cain hi Kristus, toé manga cengatan ata pecing nia main baté pu’ungn. 28 Du rémé toingn Mori Yésus oné Mbaru de Mori Keraéng mai taé Diha: “Bo kali pecingk Aku le méu agu nia maig Aku, maik mai Daku toé sara Rug, landing le wuat Dihat molor ata toé pecing le méu. 29 Aku pecing Hiak, ai Aku mai oné mai Hiag agu Hia ata wuat Aku.” 30 Bo kudut te deko Hia lisé, maik toé kéta cengatan ata cadi Hian, ai toé di hitu leson. 31 Maik oné mai isét do situ, manga dod ata imbi Hia, agu mai taéd: “Émé cai hi Kristus, ngancéng kéta Hia pandé tanda lenget ata céwé do oné mai Hia ho’o?” 32 Ata Parisi dengé sai-saok data situ landing Hia, itu tara isét imam kepala agu ata Parisi jera ata lami Mbaru de Mori Keraéng kudut deko Hia. 33 Mai taé de Mori Yésus: “Téké cekoén kali ga, Aku manga cama-cama agu méug, poli hitu Aku kudut ngo éta Hiat wuat Aku. 34 Méu te kawé Akum, maik méu toé ita Akum ai méu toé ngancéng ngo oné osang baté ka’éng Daku.” 35 Mai curup cama taud ata Yahudi situ: “Kudut ngo nggere-nia kétag Hia wiga ité toé ngancéng cumang agu Hia? Asa manga tenangn kudut ngo oné baté ka’éng data mbéot oné ata Yahudi agu kudut te toing ata Yahudi? 36 Apa weli betuan taé Diha te nggo’o: Méu te kawé Akum, maik méu toé ngancéng cumang Akum, agu: méu toé ngancéng ngo oné osang baté ka’éng Dakum?”

Waé Ata Pu’un Mosé

37 Du leso cemoln hitu kétag adak mésé hitu, hesé Mori Yésus agu mai taéN: “Céing-céing ata masa waéy, co’om mai inung oné Akuy! 38 Céing kaut ata imbi Akun, ného ata poli taé de Surak Nggeluk: oné mai pucu diha lalang kéta waé mosé.” 39 Betuan taé Diha, ngong Mori Keraéng Nai Nggeluk, ata kudut tiba lisét imbi Hia; tara toé di wa’uy Nai Nggeluk hitu ai Mori Yésus toé di bongy. 40 Pisa taus oné mai ata do situ ata dengé taung sanggéd reweng situ, mai taéd: “Hia ho’o tu’ung-tu’ung nabi ata kudut te maiy.” 41 Mai taé data iwod: “Hia ho’o hi Mésias.” Maik manga kolé wantil data iwon: “Toé ta, hi Mésias toé mai oné mai Galiléan. 42 Ai taé de Surak Nggeluk, hi Mésias hitu waé di Daudy, oné mai béo Bétléhém, baté ka’éng di Daud médé.” 43 Wiga mangan ndu-ndél taud ata do situ landing Hias. 44 Manga pisa taus oné mai isé kudut te deko Hias, maik toé kéta cengatan ata cukungn te cadi Hia.

Mori Yésus Kambé Li Nikodémus

45 Itug kali ngod ata lami situ oné adakd sanggéd imam agu ata Parisi, ata nenggo’o taéd agu isé: “Co’ob tara toé ban le méu Hia?” 46 Mai walé data lami situ: “Toé dé’it manga repéng lami cengata manusia ata curup ného ata hitu!” 47 Mai walé data Parisi situ agu isé: “Wéléng kolég méu ko? 48 Manga weli cengatan oné mai isét adak ata imbi Hian, ko cengatan oné mai ata Parisi? 49 Maik ata do so’o ata toé pecing Taurats nahé mata kéta taungs!” 50 Cengata oné mai weki disé, hi Nikodémus ngasangn, hiot danong poli cumang agu Mori Yésusn, taé agu isé: 51 “Co’o néng Adak Taurat dité, wahéng ata toé olong séngét torokn agu toé olong pecing lata apa ata poli pandé Diha?” 52 Mai walé disé: “Asa ata Galiléa kolé hau ta? Damang céca di’a oné Surak Nggeluk, kudut pecing le hau toé manga nabi ata mai oné mai Galiléa.”

Inéwai Ata Loma

53 Itug kali isé kolé bilang mbarud,

8

1 maik Mori Yésus ngo nggere-éta golo Zaitun. 2 Du le gula ucap, Hia manga koléy oné Mbaru de Mori Keraéng, agu sanggéd taung ro’éng mai oné Hias. Hia lontoy agu toing isé. 3 Mai isét pecing Taurat agu ata Parisi dadé nggere-oné Hia cengata inéwai ata regéng lisé du loma latay. 4 Pandé lonto lisé inéwai hitu oné bahi-réha kétay agu mai taé disé ngong Mori Yésus: “Rabi! Inéwai ho’o regéng lami du rémé loma taud. 5 Hi Musa oné terungku Taurat, susung ité kudut peké le watu inéwai nenggitu. Co’o le nuk Dité latang te loma hitu?” 6 Tombo disé hitu kudut damang Hia, kudut manga campitn te pandé sala Hia. Maik Mori Yésus tengguk kauty agu tulis le rempa liméN wa tana. 7 Agu woko aping kéta réi disé, to’o agu hesé Hia agu mai taén ngong isé: “Céing-céing oné mai méu ata toé kéta manga ndékokn, hia damang ata laring cain peké watu oné inéwai ho’o.” 8 Itu kali tengguk kolén Hia agu tulis wa tanay. 9 Maik woko poli dengén lisé curup hitu itus kali ca cad ngod, pu’ung oné mai ata tu’a laing. Cemoln ga, téké kaut Mori Yésus agu inéwai hitu ata mengkek kin oné baté ka’éngn. 10 Itu kali hesén Mori Yésus, agu mai taén ngong hia: “Oé enu, nias ata do so’o bao ga? Asa manga cengatan bao ata wahéng hau?” 11 Mai walé de inéwai hitu: “Toé manga o Mori.” Mai kolé taé de Mori Yésus: “Aku kolé néng toé wahéng hauk. Ngoh ga, agu pu’ung ho’o main muing ga néka pandé ndékok koléh.”

Mori Yésus Gérak de Lino

12 Mori Yésus curup koléy oné isé, mai taéN: “Akuy de gérak de lino; céing-céing ata lut Aku, ata hitu toé manga lako oné nendepn, maik manga gérakn oné mosén.” 13 Mai wantil data Parisi agu Hia: “Tombo kéta sakasi weki Rum Hau, sakasim hitu toé molorn.” 14 Mai walé de Mori Yésus ngong isé, taéN: “Alim po Aku tombo sakasi latang te weki Rug, maik sakasi Daku hitu molorn, ai pecing le Rug, nia maig Aku maig, agu nggere-niak Aku ngog. 15 Beté bicar de méu lorong wolo de manusia, Aku toé beté- bicar latang cengatan kaut, 16 maik alim po Aku téeing beté-bicarK, beté-bicar hitu molorn, ai Aku toé hanang koég, maik cama-cama agu Emag ata wuat Aku. 17 Agu oné Surak Taurat de méu manga tulis, sakasi data sua tau, laing salangn kéta. 18 Aku ata téing sakasi latang te weki Rug, agu Emag kolé hitut wuat Aku, téing sakasi latang te Aku.” 19 Mai kolé taé disé agu Hia: “Niay néng Ema de Hau?” Mai walé de Mori Yésus: “Aku agu Ema Daku toé pecing le méu. Émé pecing Aku méu, pecing bon kolé Ema Daku.” 20 Sanggéd curup situ tombo le Mori Yésus ruis baté na’a cao-ca du Hia rémé toing oné Mbaru de Mori Keraéng. Agu toé manga cengatan te deko Hia, ai toéd cai leson.

Mori Yésus Toé Oné mai Lino Ho’on

21 Mai kolé taé de Mori Yésus agu isé: “Aku kudut ngok ga, agu méu kudut kawé Akum, maik méu te mata oné ndékoks. Oné osang baté ngo Daku, toé ngancéng ngos méu.” 22 Wiga maig taé disét Yahudi situ: “Asa kudut te ala le weki Run Hia, itu tara nggo’o taén: Oné osang baté ngo Daku, toé kéta ngancéng ngos méu?” 23 Itu kali mai taé de Mori Yésus ngong isé: “Méu mai wa mais, Aku mai éta maig; méu oné mai lino ho’os, Aku toé oné mai lino ho’og. 24 Itu tara nggo’on bao taé Daku agu méu, te méu mata oné ndékoks; ai émé toé imbi Aku méu, te Akuy de Hia, méu mata oné ndékoks.” 25 Maig taé disé ngong Hia: “Céing kéta néng Hau?” Mai wantil de Mori Yésus agu isé: “Apay néng curup Daku agu méu be bolon? 26 Do kid situt paka curups Laku, agu kudut bicars laku latang te méu; maik Hiat wuat Aku, ata molor tu’ung kéta, agu apa situt poli dengé Daku oné mai Hia, hitu kolés ata tombo Daku agu lino ho’o.” 27 Toé tingo lisé, kali curup hitu oné isé ngong Hia Ema. 28 Maig taé de Mori Yésus: “Émé poli téti étan le méu Anak Manusia, itu pong pecing le méu te Akuy dé Hia, agu Aku toé pandé cao-ca sara naig, maik Aku curup apa situ ného poli toing Diha Ema oné Aku. 29 Hia hitut poli wuat Aku, Hia kempéng Akuy. Hia toé ondang Aku hanang koég, ai Aku pandé taung situt henan oné nai Diha.”

Molor Ata Pandé Céla Laing

30 Du poli taung sanggéd curup situ le Mori Yésus, dod ata, imbi Hia. 31 Mai taé Diha agu ata Yahudi situt imbi Hias: “Émé temer kin imbi de méu latang te sanggéd reweng Daku, méu tu’ung-tu’ung ata nungku Dakum, 32 agu méu te pecing, ata molorn, agu molor hitu te pandé céla méu laingy.” 33 Mai walé disé: “Ami ho’o waé di Abrahamkm. Agu toé dé’it manga ciri mendi data laingkm. Co’o tara nggo’on taé de Hau: Méu kudut célam?” 34 Mai wantil de Mori Yésus agu isé: “Aku taé agu méu, ata tu’ungn kéta, néténg ata hitut manga ndékokn, hia hitu mendi de ndékoky. 35 Agu ata ngasang mendi, toé ka’éng kin oné mbaruy, maik ngasang anak kali ka’éng oné mbaruy dengkir tédéng lén. 36 Jari, émé Anak hitu pandé céla méuy, méu tu’ung-tu’ung célam.”

Waé di Abraham Ata Toé Oné Mai Morid

37 “Pecing kolé Laku, méu waé di Abraham, maik méu lémét kudut mbelé Akum, ai curup Daku toé tiba oné nai de méu. 38 Apa ata ita Daku oné Emag, hitu kolé ata curup daku, agu nenggitu kolé wintuk de méu latang te apa ata poli dengé le méu oné mai emas.” 39 Mai walé disé agu Hia: “Ema dami hi Abraham.” Mai taé de Mori Yésus agu isé: “Émé tu’ung kéta méu anak di Abraham, toét-toé méu te pandé ného apa ata poli pandé di Abraham. 40 Maik méu kudut te mbelé Akum, Aku ata tombo molor oné méu, molor hitut dengé Laku oné mai Mori Keraéng; gori nenggitu toé manga pandé li Abraham. 41 Méu pandé gori de ema rus.” Mai walé disé: “Ami toé wing berakm. Ca’y kali ema dami, Mori Keraéng.” 42 Mai taé de Mori Yésus ngong isé: “Émé Mori Keraéng ema de méu, méu te momang Akum; ai Aku mai oné mai Mori Keraéng agu ho’o ga Aku manga cé’é ho’ok. Mai Daku, toé mai le nai Rug, maik ali wuat Diha. 43 Co’o tara toé tingon le méu curup Daku? Ai méu toé ngancéng dekon reweng Daku. 44 Méu mai oné mai emas ata jing da’at, wiga méu nanang pandé apa ata ngoéng de emas. Hia ata mbeléd manusia pu’ung kéta du wangkan, agu hia toé mosé laing patén, ai oné hia toé mangay molor. Émé manga tombo nggopétn hia, hitu curup de run, ai hia ata nggopét, agu améd sanggéd nggopét. 45 Maik landing Aku, curup laing molord agu méu, méu toé imbi Akum. 46 Céing oné mai méun ata manga baté caun te Aku manga pandé ndékok? Émé Aku curup molor, co’o weli tara toé imbig Aku le méu? 47 Céing ata mai oné mai Mori Keraéngn, hia séngét reweng de Mori Keraéngy, ali hitu le méu tara toé séngéd, ai méu bom mai oné mai Mori Keraéngs.”

Olong Manga Mori Yésus Po Hi Abraham

48 Sanggéd tu’a data Yahudi koléng Mori Yésus: “Toé weli tu’ung taé dami te Hau ata Samariah agu hena le jing da’ath?” 49 Walé de Mori Yésus: “Aku toé hena le jing da’at, maik Aku hiang Emag, agu méu toé hiang Akum. 50 Maik Aku toé kawé hiang te weki Rug; manga ca’y ata kawén agu Hia kolé ata beté-bicar. 51 Aku curup agu méu ata tu’ungn kéta, céing ata lut reweng Daku, hia toé manga matan dengkir lén.” Mai kolé walé de tu’a data Yahudi situ ngong Hia: 52 “Ho’og pecingn lami, Hau hena le jing da’at. Ai hi Abraham polig matan, nenggitu kolés sanggéd nabi, maik mai taé de Hau: Céing ata lut reweng Daku, toé manga matan dengkir lén. 53 Nahét céwé kéta mésé Hau hitu po ema dité hi Abraham ata poli matan! Sanggéd nabi kolé poli taungs matad; kudut te cama agu céing kéta weli Hau hitu ga?” 54 Walé de Mori Yésus: “Émé Aku naring kaut weki Rug, toé kéta manga belar koé cekoén. Ema Daku hitut naring Aku, Hia hitut taé de méu: Hiay Mori Keraéng dami, 55 égém toé pecing le méu Hia, maik Aku pecing Hiak, agu émé nggo’o taé Daku: Aku toé pecing Hiak, Aku ho’o ata nggopét, cama ného méu, maik Aku pecing Hiak, agu Aku lut reweng Dihak. 56 Ema de méu hi Abraham, nisang kéta nain ai hia te ita leso Dakuy agu poli itan liha, wiga hia nakay le ita hitu.” 57 Wiga mai taé data tu’ad Yahudi agu Hia: “Uwa de Hau toé di limampulu ntaungy, agu Hau ga poli ita hi Abraham?” 58 Wantil de Mori Yésus agu isé: “Aku curup agu méu, moro matan, du toé di loas hi Abraham, Aku mangak ga.” 59 Itu kali pili watu disé te peké Hia; maik morag Mori Yésus nitu main, agu ngoy oné mai Mbaru de Mori Keraéng.

9

Ata Buta Du Pu’ung Loasn

1 Du rémé libaN Mori Yésus, ita Liha cengata ata buta pu’ung du loasn. 2 Réi data nungkuN oné Hia: “Rabi, céingy ata pandé ndékok, weki run ata ho’o ko ata tu’an, wiga hia loas agu butan?” 3 Walé de Mori Yésus: “Toé hia, agu toé kolé ata tu’an, maik sanggéd gori de Mori Keraéng paka ita oné hias. 4 Ité paka pandé gori Diha hitut wuat Aku du rémé manga kin leso; ai émé caig wié, toé manga cengatan kolé ngancéng te gori. 5 Du rémé manga oné linog Aku, Akuy gérak de lino.” 6 Woko poli taungs tombod Liha curup situ, Hia ipo wa tanay, halok Liha ipo hitu agu tana, poli hitu doés oné mata data buta hio bao, 7 agu mai taén ngong hia: “Ngoh ga, lembo wekim oné tiwu Siloam.” Betuan Siloam, ngong: “Hiat wuat.” Ngoy ata hitu agu lembo wekin, itug kali kolén agu welag matan. 8 Maik haé béon agu isé situt danong baé hia ata buta agu ata lénggéy, mai taéd: “Cala hia ho’op hiot sanggar-sanggar bon limén te tegi?” 9 Mai taé data iwod: “Tu’ung, hia ho’o!” Walé kolé data iwod: “Toé hia, maik ata cama tara diha!” Maik taé de run ata buta hitu: “Tu’ung, aku hia!” 10 Mai taé disé ngong hia: “Co’o kaut tara ngancéng welan mata de hau?” 11 Mai walén: “Ata hitut ngasangn hi Yésus, acel Liha tana luma du mata daku, agu mai taén ngong aku: Ngo oné tiwu Siloam agu lembo wekim. Itug kali ngog aku, agu du poli lembo wekig, aku ngancéng ita atak.” 12 Maig taé disé agu hia: “Nia weli Hia ga?” Mai walén: “Toé baég laku.” 13 Itu kali dadén lisé ata hitut butay baon oné ata Parisi. 14 Leso du acel tana de Mori Yésus agu pandé wela mata data hitu, du leso Sabat. 15 Landing le hitu, isét Parisi réi agu hia, co’oy kaut tara ngancéng welan matam. Mai walén: “Pandé doés Liha tana oné mata daku, poli hitu aku ngo lembo wekig, wiga ho’ok aku ngancéng ita atak.” 16 Mai kolé taéd ata iwod ata Parisi situ: “Ata ho’o toé mai oné mai Mori Keraéngn, ai Hia toé hiang leso Sabaty.” Tungku kolé lata iwod: “Ba’ang kétag néng ga ca ata ndékok ngancéng pandé tanda lenget nenggitu?” Wiga mangag léwang taud cama isén. 17 Mai kole taéd ngong ata buta hitu: “Agu hau ga, co’o weli taé de hau latang te Hia, ai Hia poli pandé wela mata de haun?” Mai walén: “Hia cengata nabiy.” 18 Maik ata Yahudi situ toé imbi lisé, hitut baon hia butay, agu ho’og ita atan, wiga béntan lisé ata tu’an, 19 mai réid agu isé: “Ho’o tu’ung anak de méu hitut taés hia loas agu butan? Émé nggitu co’o tara ngancéng ita atan gé hia?” 20 Mai walé data tu’a hitu: “Ata pecing damin kali, hia ho’o anak damiy loas agu butan, 21 maik co’o kaut hia te ho’on tara ngancéng ita atay, hitug toé pecing lami, agu céing ata pandé wela matan, toé kolé pecingy lami. Réi kaut weki run, tu’ag hia, hia ngancéng tombo latang te weki run.” 22 Tara nenggitun tombo data tu’an, ai isé rantang ata Yahudis, ai isét Yahudi poli ce naid céing ata tura Hia hi Mésias, ata hitu néka ka’éng cama agu iséy. 23 Itu tara nggo’o taé data tu’an: “Hia tu’a gi, réi kaut weki run.” 24 Itu kali bénta kolé te suangkalin ata hitut baon butay, mai taéd ngong hia: “Curup kéta ata tu’ungn oné ranga de Mori Keraéng; Pecing lami hia hitu ata ndékoky.” 25 Mai walén: “Ata ndékok ko toé ata hitu, toé pecing laku; maik ca kaut pecing daku, aku baon butak, ho’o ga ngancéng ita atak.” 26 Mai taéd ngong hia: “Co’oy pandé Diha oné hau? Co’o molé Liha pandé wela matam?” 27 Mai walén: “Baog curup daku, maik toé séngét le méu; co’o tara nanang te séngét koléd le méu? Cala méu nanang kolé te ciri ata nungku Diham?” 28 Cang agu mbéis mai taéd ngong hia: “Hau ata nungku Diha, maik ami kali ata nungku di Musakm. 29 Pecing lami, Mori Keraéng poli curup agu hi Musa, maik latang te Hia toé pecing lami, mai nia main Hia. 30 Mai walé data hitu agu isé: “Ba’ang kéta toé pecing de méu, mai nia main Hia, musuk Hia poli pandé wela mata daku. 31 Pecing lité te Mori Keraéng toé séngét ata ndékoky maik ata nggeluk agu ata pandé sanggéd ngoéng Diha. 32 Pu’ung danong main dengkir te ho’on, toé kéta dengé dé’it te manga ata hitut ngancéng pandé wela mata data hitut loas agu butan. 33 Émé toé mai oné mai Mori Keraéngn ata hitu, Hia toé ngancéng pandé apa-apay. 34 Mai walé disé: “Hau ho’o loas kéta déméng agu ndékokm, jari hau kudut toing amih?” Itu kali wur nggere-pé’angn hia lisé. 35 Dengé le Mori Yésus, te hia poli wur nggere-pé’angn lisé. Poli hitu Mori Yésus cumang agu hiay, mai taén: “Imbi le hau Anak Manusia?” 36 Mai walé data hitu: “Céing néng Hia Mori? Kudut aku imbi Hiak.” 37 Mai taé de Mori Yésus ngong hia: “Hau toé kanang ita Hiah; maik Hia ho’ot rémé tombon agu hau, Hiap hitu!” 38 Mai taén: “Imbi laku Mori.” Itu kali sujun, io Hian. 39 Mai taé de Mori Yésus: “Aku mai oné linok te beté-bicar kudut céing ata toé ita, ngancéng itan, agu kudut céing ata ngancéng ita atan ciri butay.” 40 Sanggéd tombo situ, dengé lata pisa taus ata Parisi ata manga nitus, agu mai taéd ngong Hia: “Co’o weli betuan hitu ga, ami kolé butakm?” 41 Walé de Mori Yésus agu isé: “Émé buta méu, toé manga ndékoks; maik landing le taé rus méu: Ami ita atakm, itu tara manga kin ndékoks.”

10

Ata Lami Jimbal Ata Dia

1 Aku curup agu méu: Moro matan, céing ata ngo oné kandang jimbal, toé lorong paray onén, maik tuké lut pété bana, hia hitu ata takoy agu ata rampoky; 2 maik céing ata ngo dungka paray onén, hia ata lami jimbaly. 3 Latang te hia, hiat lami céngka para agu sanggéd jimbal situ séngét rewengn, hia bénta gici cas jimbaln lut ngasang de rud, agu todang nggere-pé’angs. 4 Émé pé’ang kéta taungs sanggéd jimbal ga, hia lako bolo mai iséy, agu jimbal situ lut hias, ai pamot lisé reweng diha. 5 Maik émé ata bana, toé gorid te lut ngot losi molés oné mai hiad, ai toé pecing lisé reweng data bana.” 6 Hituy curup de Mori Yésus ata ba le rapang moléy agu isé maik toé kéta haéng pa’éln lisé, apay betuan Hia tara curup nenggitun agu isé. 7 Te cangkalin kolé taé de Mori Yésus: “Aku taé agu méu, moro matan, Akuy parad jimbal situ. 8 Sanggéd ata situt mai bolo mai Akus, isé situ ata tako agu ata rampoks, agu sanggéd jimbal situ toé séngét isés. 9 Aku ho’o cama ného para; Céing ata ngo lut Akuy onén, hia te mo’éngy, agu hia te nggere-oné-nggere-pé’angy te kawé remang oné satar. 10 Ata tako, mai kaut te tako agu te mbelé, agu te pandé cipot taung; mai Daku kudut isé paéng mosé agu paéng héla-haé. 11 Akuy ata lami jimbal hitut di’a. Ata lami jimbal di’a, oké mosén latang te sanggéd jimbaln; 12 maik ata pala hitut toé ata lami laing, agu toé ata ngarad jimbal situ, émé ita main serigala, pencangs jimbal situ, itu kali losin, wiga serigala hitu cekel agu pandé mbihi-mbehars jimbal situ. 13 Losi muing hia, ai hia ca ata palay kali, agu toé pingas liha jimbal situ. 14 Akuy ata lami jimbal situt di’a, agu pecings Laku jimbalg, jimbal Daku kolé pecing Akus, 15 cama ného hi Ema pecing Akuy, nenggitu kolék Aku pecing hi Ema, agu Aku oké moség latang te sanggéd jimbalg. 16 Oné Aku manga kolé jimbal bana, ata toé oné mai kandang ho’od; jimbal situ todang kolés Laku, agu isé te séngét reweng Dakus, agu isé te ciri ca impungs agu ca ata lamid. 17 Hi Ema momang Akuy, landing Aku téing moség kudut tiba kolén. 18 Toé cengatan te ngancéng emi oné mai Akun, maik téings Laku lorong ngoéng nai Rug. Aku manga kuasag te téing, agu manga kuasag te emi kolén. Ho’oy perénta ata tiba Laku oné mai Emag.” 19 Wiga teka kolé léwang taud ata Yahudi landing curup hitu. Do oné mai isé, taéd: 20 “Hia hena le jing da’aty agu wédoly; co’o tara séngét Hias méu?” 21 Mai wantil data iwod: “Curup hitu, toé curup data hena le jing da’at; ngancéng weli jing da’at pandé wela mata data buta?”

Mori Yésus Toé Tiba Lata Yahudi

22 Toé béhéng poli hitu, tuag leso ramé mésé, Wé’é Mbaru de Mori Keraéng oné Yérusalém; du hitu cekeng duréng. 23 Mori Yésus lako-lakoy oné Mbaru de Mori Keraéng oné kecaka di Salomo. 24 Isét Yahudi hesé léok Hias, agu mai taéd ngong Hia: “Téké kéta capa béhéngn Ité ondang ami ugu-égé? Émé Ité hi Mésias tombo si’ang kéta agu ami.” 25 Mori Yésus walé isé: “Poli curupn Laku agu méu, maik toé imbi le méu; sanggéd gori situt pandé Daku, le ngasang de Ema, hitus ata téing sakasi latang te Aku, 26 maik toé imbi le méu, ai méu toé jimbal Dakum. 27 Sanggéd jimbal Daku séngét reweng Dakus, agu Aku pecing taungs isé, agu isé lorong Akus, 28 agu Aku téing isé mosé tédéng lén, agu isé poli itan muing toé manga calangd dengkir lén, agu toé kéta cengatan te rumbu isé oné mai limé Daku. 29 Ema Daku ata téing isé oné Aku, céwé mésén oné mai céing kaut agu toé kéta cengatan ata ngancéng rumbu isé oné mai limé de Emag. 30 Aku agu hi Emag, cakm kali.” 31 Cengkalin kolé isét Yahudi emi watu kudut peké Mori Yésus. 32 Mai taé de Mori Yésus ngong isé: “Dod wintuk ata di’ad oné mai Ema Dakud pu’ud ata totos Laku agu méu; pandé nia oné mai gori situ ata ngancéng peké laing Aku le méu?” 33 Mai walé data Yahudi situ: “Toé landing can wintuk di’aM tara kudut pekém Hau lami, maik ali Hau mbéis Mori Keraéngh, agu soho de Hau, musuk cengata manusiah, cama kaut le weki Rum ného Mori Keraéng.” 34 Mai wantil de Mori Yésus ngong isé: “Toé néng manga tulisn oné Kitab Taurat de méu: Aku poli téing reweng: Méu Mori Keraéngm? 35 Émé isé, oné céing cain curup hitu, caro Mori Keraéngs, égém Surak Nggeluk toé ngancéng koarn, 36 ngancéng taé kin weli le méu ko, oné Hia hitut pandé nggeluk Liha Ema, agu hitut poli wuat Liha oné tana lino; Hau mbéis Mori Keraéng! Landing kaut poli curup Laku: Aku Anak de Mori Keraéng? 37 Émé toé pandés Laku gori de Emag, néka imbik Aku le méu, 38 maik émé pandés Laku, agu méu toé imbi Akum, tamat imbis kali gori situ, kudut méu ngancéng pecing agu haéng pa’éld te Hia Ema manga oné Akuy agu Aku oné Hia Emak.” 39 Cengkalin kolé, te damang, te deko Hia lisé, maik Hia mo’éng oné mai limé disén.

Mori Yésus Be Sina Mai Waé Yordany

40 Ného cepisan, Mori Yésus ngo kolé besina mai waé Yordany, nggere-sina osang baté cebongn danong li Yohanés, Hia ka’éng nituy. 41 Dod ata mai oné Hia, agu mai taéd: “Bo kali hi Yohanés toé manga pandé ca tanda lengetn maik sanggéd situ taé dé’its liha latang te ata ho’o, toé kéta manga salang be pé’angd.” 42 Agu do kétas ata nitu imbi Hias.

11

Pandé To’o Kolén Hi Lazarus

1 Manga cengata ata laing betin, ngasangn hi Lazarus, oné mai Bétania, béo di Maria agu asén hi Marta. 2 Hi Maria, hituy inéwai hiot luma dé’it wa’i de Mori Yésus le mina bengé agu koso laing le wukn. 3 Hi Lazarus hitut beti, nara disé. Inéwai situ sua jera ngo tombo agu Mori Yésus: “Mori, hia hiot momang Dité, betiy.” 4 Du dengé tombo hitu le Mori Yésus, mai taén: “Beti hitu toé manga mata laingn, maik kudut toto mésén kuasa de Mori Keraéng, ai le beti hitu Anak de Mori Keraéng te bongy.” 5 Bo kali tu’ung Mori Yésus momang hi Marta agu ka’én, agu hi Lazarus. 6 Koném poli dengén Liha, te beti hi Lazarus, kunjung kéta Hia ka’éng sua leson kolé oné osang nia Hia mangan. 7 Maik poli hitu mai taéN ngong ata nungkuN: “Kolé oné Yudéat gé!” 8 Mai taéd ata nungku situ ngong Hia: “Guru, ho’o koé di isét Yahudi damang te peké Ités, ngoéng kid Ité te ngo kolé sina itu?” 9 Mai walé de Mori Yésus: “Toé weli campulusua jam ca leso? Céing ata lako leso, toé manga timpok wa’in ai hia ita gérak de lino ho’oy. 10 Maik émé manga ca ata lako le wié, wa’in hena le timpoky, ai toé manga gérak oné wekin.” 11 Nenggituy curupN, poli hitu mai taéN ngong isé: “Hi Lazarus, asé-ka’é dité, rémé toko lémotn, maik Aku ngo nitu kudut kéngko hia wa mai tokon.” 12 Mai taé data nungkuN situ ngong Hia: “Mori, émé lémot hia, hia te di’ay.” 13 Maik wan de Mori Yésus, ata toko kali ngong mata, alang nuk disé curup lémot de Mori Yésus ngong lémot tu’ung. 14 Ngéséng nggitu, curup tulak kéta le Mori Yésus: “Hi Lazarus matay gi, 15 maik delék Laku woko toé mangak Aku du hitu, ai hitu céwé di’an latang te méu, kudut méu ngancéng imbim. Mai ga ité ngo sina hiat.” 16 Hi Tomas, hiot alitn hi Didimusy, taé taung agu haén, ngong ata nungku situ iwod: “Mai ga, ngo kolét ité kudut mata cama laing agu Hiat.” 17 Du cai de Mori Yésus, pat lesog hi Lazarus poli boakn. 18 Béo Bétania ruis agu Yérusalémy, am telu kilo métér tadangn. 19 Dog ata Yahudi nitu, mai cé’é hi Marta agu hi Maria te lémbu isé landing le mata narad. 20 Du dengé li Marta te caig Mori Yésus, hia ngo curu Hiay, maik hi Maria kali ka’éng oné mbaruy. 21 Maig taé de Marta ngong Mori Yésus: “Mori, damang émé no’ot Ité, nara daku toé manga matan. 22 Maik te ho’on kolé pecing laku, Mori Keraéng te téing agu Ité, sanggé ménan situt tegi Lité oné Hia.” 23 Mai taé de Mori Yésus agu hi Marta: “Naram te mosé koléy.” 24 Mai taé di Marta ngong Hia: “Bo hitun, pecing laku, hia te mosé koléy lété sanggéd ata mosé kolés du leso cemol.” 25 Maig walé de Mori Yésus: “Akuy to’o agu mosé, céing ata imbi Akun hia te moséy, koném poli matan, 26 agu néténg ata situt mosé agu imbi Akus, toé ngancéng mata dengkir lén. Imbi le hau curup ho’o?” 27 Mai taé di Marta: “Yo Mori, imbi laku, Ité hi Mésias, Anak de Mori Keraéng, ata mai oné lino ho’oy.” 28 Du poli curup hitun, hia ngo bénta asé-ka’én hi Mariay, agu saok oné Hia: “Guru, manga sina hioy, agu hia bénta Hauy.” 29 Dengé hitu hi Maria, hidi-hadan to’on agu cumang Mori Yésus. 30 Maik du hitu, Mori Yésus toé di caiy oné béo hituy. Hia rémé oné osang baté cumangn Hia li Marta. 31 Du ita lata Yahudi situt cama laing agu hi Marta oné mbaru hitu te lémbu hia, hi Maria hidi-hada to’on agu ngo pé’ang tanan lut lisé, ai bet disé, hia ngo oné boay kudut rétang nituy. 32 Du cain hi Maria oné osang nia mangan Mori Yésus agu ita Hia, hi Maria cunem wa wa’i Dihay agu mai taén ngong Hia: “Mori, émé manga dé Ité du hitu, toé manga matan nara daku.” 33 Du Mori Yésus ita rétang di Mariay, agu ata Yahudi situt mai kolé agu hias, wéong kéta naiN; bélot tu’ung nai Diha, og mai taéN: 34 “Nia boakn le méu?” Mai walé disé: “Mori, mai agu lélo dé!” 35 Rétang’g Mori Yésus. 36 Mai taé data Yaudi: “Lélo dé, momang tu’ung Liha hia.” 37 Maik pisa tau oné mai isé, taéd: “Hiay ata pandé wela koléy mata data buta ba’ang toé kéta ngancéng Liha pandén, wiga ata ho’o toé matay?” 38 Wéong kolé nai de Mori Yésus, itug kali ngo oné boa hitun, boa hitu ca liang ata tadu le watuy. 39 Mai taé de Mori Yésus: “Téti watu hitu!” Hi Marta, weta di teriha hitu, taé agu Mori Yésus: “Mori, wau gi, ai ho’ot pat leso poli matan.” 40 Mai taé de Mori Yésus: “Toé weli poli taé Daku, agu hau: Émé imbi le hau, hau te ita dirap de Mori Keraéngh?” 41 Og kali tétin lisé watu hitu, itug kali congan Mori Yésus nggere-éta, mai taéN: “Ema, Aku wali di’a agu Iték, ai Ité séngét Akut. 42 Pecing laku Ité pinga mtaung Akut, maik ali ata do so’ot hesé baling mai Aku, taé Laku, kudut imbi lisé, te Itéy hitut poli wuat Aku.” 43 Du poli curup hitun, kinda Hia, agu kepok: “Lazarus, pé’angh ga!” 44 Hi Lazarus hitut poli matan, main oné mai, wa’i agu limén ngai pongo le buingd, agu rangan rokot kin le kemboku. Mai taé de Mori Yésus ngong isé: “Cacas wuwus situ, agu ondang hia lakon.”

Bantang Kudut Mbelé Mori Yésus

45 Dod oné mai ata Yahudi, situt mai lélo hi Maria, agu ita le weki rud apa hitut poli pandé de Mori Yésus, imbi Hias. 46 Maik manga ata ngo oné isét Parisi agu tombo oné isé sanggéd apa situt poli pandé de Mori Yésus. 47 Itug kali isét imam kepala agu ata Parisi bénta Adak Agama kudut neki weki, mai taéd: “Co’o kali pandé dité ga? Ai ata hitu do pandé tanda lengetn. 48 Émé ondang lité Hia, kéorn sanggén ata imbi Hias, agu isét Roma te mais, rumbu osang nggeluk dité agu uku dité.” 49 Cengata oné mai isé, hi Kayafas, Imam Mésé du ntaung hitu, taé agu isé: “Méu toé manga pecing apas, 50 agu toé tingo-naém, te céwé di’an latang te méu, émé cengatan mata te uku dité, itu po sanggén uku dité ho’o mempo.” 51 Apa hitut curup diha, toé oné mai weki run hia, maik landing le Imam Mésé hia oné ntaung hitu, itang liha, hi Yésus te mata latang te uku hituy. 52 Agu toé latang te uku hitu kanang, maik latang kolé te impung agu pandé neki cas Anak de Mori Keraéng situt bégas. 53 Pu’ung oné mai leso hitud isé ca nais te mbelé Hia. 54 Landing hitu, Mori Yésus toé ngo koléy oné ranga data do oné isét Yahudi; Hia angkak nitu main ngo oné tana ruis satar mambak, oné ca béndar hitut ngasangn Éfraim, nitu Hia ka’éng cama laing agu ata nungkuN. 55 Du hitu tiong leson ramé Paska data Yahudi, agu dod ata oné tana hitu ngo oné Yérusaléms kudut pandé nggélok wekid be bolon Paska hitu. 56 Isé kawé Mori Yésus agu cang hesé oné Mbaru de Mori Keraéngd, isé taé cama taud: “Co’o le nuk de méun? Mai ko toé Hia oné taé ho’o?” 57 Rémé nggitun taung ata imam kepala agu ata Parisi poli téing perénta kudut néténg ata situt baén nia Hia mangan, tombo oné isé kudut isé ngancéng deko Hias.

12

Mori Yésus Palasy Oné Bétania

1 Enem leso be bolon Paska, Mori Yésus ngo oné Bétaniay, osang baté ka’éng di Lazarus hitut pandé to’oy le Mori Yésus oné mai ata matan. 2 Nitu pandé ramé te Hia, agu hi Marta ata wintukn, agu cengata ata cama hang agu Mori Yésus, hi Lazarus. 3 Itug kali hi Maria emi ca beréha botol mina narwastu hitut wegit kétay, poli hitu luma oné wa’i de Mori Yésus agu koso di’a le wukn, bengé mina hitu néndong taung oné mbaru hitu. 4 Maik hi Yudas Iskariot, ca ata nungku de Mori Yésus, hitut kudut komét pika Hian, mai taén: 5 “Co’o tara toé pika telu ratus dinarn mina narwastu ho’o, kudut séngn ga téing oné isét lénggés.” 6 Curup hitu diha, toé landing le nuk ata lénggéy, maik hia hitu ata takoy, hia dondé emi kaut séng ata na’a oné kas situt cau diha. 7 Mai taé de Mori Yésus: “Ondangn hia pandé nenggitun nuk leso boak Daku. 8 Ai sanggéd ata lénggé dondé manga agu méus, maik Aku toé dondég manga agu méu.

Nekek Weki Kudut Mbelé Hi Lazarus

9 Do kétas ata Yahudi dengé Mori Yésus manga sina hituy wiga mai disé toé landing Mori Yésus kanangs, maik kudut lélo hi Lazarus hitut poli pandé to’o kolén oné mai ata matan. 10 Itu kali imam kepala nekek taung weki kudut mbelé kolé hi Lazarus; 11 ai liha kaut tara dod ata Yahudi legong isé agu imbi Mori Yésus.

Naka Tiba Mori Yésus Oné Yérusalém

12 Ného diang leson du ata do situ mai naka dengé te Mori Yésus ngai oné salangn mai nggere-cé’é Yérusalémy. 13 Isé emi saung-saung cigir agu ngo curu Hia cang agu rewe-raos ciékd: “Hosana! Naring kéta Hiat mai le ngasang de Morin, Raja data Israél!” 14 Mori Yésus ita ca Keledai rémé uwan, itu kali létin Liha, ného hiot poli tulisn: 15 “Néka rantang, olé molas Sion, Lélo gah, ho’og cain Rajam, Lonto lobo ca anak keledaiy.” 16 Du wangkan, ata nungku de Mori Yésus toé pecing lisé latangt sanggéd situ, maik du poli bongn lata Mori Yésus, itu di nukn lisé te hitu poli tulisn ngong Hia agu poli pandén kole lisé latang te Hia. 17 Ata do siot cama laing agu Hia, du Hia bénta hi Lazarus pé’ang oné mai boan agu pandé to’o oné mai ata matan, téing sakasi latang te Hia. 18 Ali hitu ata do situ ngo curu Hias ai dengé lisé, Hiay hitut pandén tanda lenget situ. 19 Maig taéd ata Parisi situ cama taud: “Ita le rus méu, te méu toé kéta manga cir koé cekoés, lélo dé temu tana lino mai lut Hias.”

Mori Yésus Tombo Matan

20 Oné mai isét ngo te ngaji du leso ramé hitu, manga pisa taus ata Yunani. 21 Ata situ ngo oné hi Pelipus, ata oné mai Bétsaida tana Galiléa, mai taéd ngong hia: “Keraéng, ami ngoéng te cumang agu Mori Yésuskm.” 22 Mai hi Pelipus tombo oné hi Andréas, mai hi Andréas agu hi Pelipus tombo oné Mori Yésus. 23 Mai walé de Mori Yésus, taéN: “Ho’og leson te bongy Anak Manusia. 24 Aku taé agu méu: Moron, émé weras gandum toé pa’u wa tana agu matay, hia ca weras kin, maik émé matay, do cir wuan. 25 Céing ata momang mosén, hia te mamur mosén, maik céing ata toé momang mosén oné lino ho’o, hia te mo’éng mosé tédéng lén. 26 Céing ata tiba Akuy, hia paka lut Akuy, agu nia Aku mangag nitu kolé sekontu Daku mangan. Céing ata tiba Aku, hia te hiang le Emag. 27 Te ho’on wakar Daku kenduty, agu co’o kéta Laku taén? Ema, mo’éng koé Aku oné mai leso ho’o? Toé, ai latang te hitu muingk Aku tara maig oné leso ho’o. 28 Ema bong koéy ngasang Dité.” Dengég reweng éta mai Surga: “Polig bongn Laku, agu Aku te bong koléy.” 29 Isét do ata manga nitun, dengé reweng hitu, mai taéd: “Pasat hitu é! Manga kolé taé data iwod, cengata malékat curup agu hiay.” 30 Rimbag le Mori Yésus: “Reweng hitut poli dengén, toé landing Aku, maik landing méu.” 31 Ho’og ruda olon beté-bicar te lino ho’o, te ho’on muing Hiat kuasa lino ho’o, te wéwéng nggere-pé’angy. 32 Agu Aku émé téti nggere-étak oné mai lino, Aku poto taung ata te mai oné Aku. 33 Apa ho’o taé Liha te toi, co’o molé Hia matan. 34 Mai walé data do situ: “Ami poli dengé oné mai adak Taurat, te hi Mésias mosé tédéng lén. Co’o kéta molég néng taé de Hau te Anak Manusia paka téti nggere-étay? Céing néng Anak Manusia hitu?” 35 Mai walé de Mori Yésus ngong isé: “Témé cekoég kali leson, gérak manga baling mai méuy. Lakom ga rémé manga agu méun gérak hitu, boto nendep ata kuasa méu. Céing ata sedep oné nendepy, toé dé pecing liha niay olon lakon. 36 Imbi koé oné gérak hitu, rémé manga oné méun gérak hitu, kudut méu ciri anak de gérakm.” Du poli curup hitun Mori Yésus ngo gi boto ita liséy.

Co’o Ata Yahudi Tara Toé Ngancéng Imbid

37 Koném dod tanda lenget pandé le Mori Yésus wa ranga disé, maik toé kin imbi lisé Hia, 38 kudut rapakn curup hiot caing le nabi Yésaya: “Mori, céing ata imbin keréba dami? Agu oné céingy toton limé kuasa de Mori Keraéng?” 39 Landing hitu, isé toé ngancéng imbid, ai poli kolé curupn li Yésaya: 40 “Hia poli pandé buta matad, agu tadu salang naid kudut néka ita le matad agu néka idep oné naid, itu kali holés, wiga Aku pandé ina isék.” 41 Curup ho’o di Yésaya ai hia poli ita dirapn agu poli curup latang te Hian. 42 Maik dod kolé oné mai isét tu’a ata imbi Hiad, maik landing lata Parisi, isé toé tura tulak, boto kenis. 43 Ai isé céwé ngoéng hiang cama manusia, itu po hiang Mori Keraéngs.

Curup de Mori Yésus Ata Beté-bicar

44 Itug kali kepokn Mori Yésus, taéN: “Céing kaut ata imbi Aku, hia toé imbi Akuy, maik imbi Hia hitut poli wuat Akun; 45 agu céing kaut ata ita Aku, hia ita Hia hitut poli wuat Aku. 46 Aku poli wa’u oné lino ho’og ného gérak, kudut néténg ata situt imbi Akus, néka ka’éng oné nendeps. 47 Agu émé ca ata pinga curup Dakuy, maik toé pandés Liha, Aku toé beté-bicarn, ai mai Daku toé kudut beté-bicar lino, maik kudut ba selamak hia. 48 Céing kaut ata toé tiba Aku agu toé séngét reweng Daku, hia poli manga ata te bicarn, ngong curup hitut poli taé Laku, hituy te bicar hia du cemol lino. 49 Ai curup Daku situ toé oné mai mu’u Rug Aku, maik hi Ema hitut wuat Aku. Hiay ata perénta Aku, kudut wéwa apa situt paka tombos Laku, agu caings Laku. 50 Agu pecings Laku perénta situ Diha ngong mosé léwé lén. Jari, apa situt curup Laku, caings Laku ného situt baté curup Diha Ema oné Aku.”

13

Mori Yésus Waca Wa’i Data NungkuN

1 Rémé nggitun du toéd pu’ung ramé Paska, poli pecing le Mori Yésus, caig leson kudut ngo oné mai lino ho’on nggere-éta hi Ema. Hia momang taungs ata paéngN oné lino ho’o, agu Hia momang isé dengkir agu cemol. 2 Du rémé recap disé hang camad, jing da’at poli saok nanéng oné nai di Yudas Iskariot anak di Simon kudut pika Hia. 3 Pecing le Mori Yésus te Eman poli téing sanggé-ménan agu Hia te mai oné mai Mori Keraéng agu kolé oné Mori Keraéng. 4 Itug kali to’on Mori Yésus agu loak jubaN. Hia emi ca nggebar pongo awakN, 5 poli hitu légé waé oné bintang, agu pu’ung waca wa’i data nungkuN agu koso le nggebar hiot pongo oné awakN. 6 Caig Hia oné hi Simon Pétrus. Mai taé di Pétrus ngong Hia: “Mori, Ité kudut waca wa’i daku?” 7 Mai walé de Mori Yésus ngong hia: “Apa ho’ot pandé Laku, toé di pecing le hau te ho’on, tai di po pecing le hau.” 8 Mai taé di Pétrus ngong Hia: “Ité néka kéta waca wa’i dakut dengkir tain!” Mai walé de Mori Yésus: “Émé toé wacas Laku wa’im, hau toé tiba cimpa oné mai Akuh.” 9 Mai taé di Simon Pétrus ngong Hia: “Mori, néka hanang wa’ig kaut, maik limég agu ulug kolé!” 10 Mai taé de Mori Yésus agu hia: “Céing ata poli cebong, hia asig waca kolé wekin, waca kaut wa’in kali ga, ai hia poli nggélok taungn. Méu kolé poli nggéloks, maik toé sanggés taung.” 11 Ai pecing Liha, céing hitut téing Hia. Itu tara mai taén: “Toé sanggés taung méu nggélokm.” 12 Du Hia poli waca wa’i disén, Hia sélék kolé juban, agu kolé baté lonton, maig taéN ngong isé: “Pecing weli le méu betuan apa hitut poli pandé Laku agu méu? 13 Méu caro Aku Guru agu Mori, bo hitu lé’én, ai Guru agu Mori muingk Aku. 14 Jari, émé Aku waca wa’is, Aku ho’o Mori agu Gurus, émé nggitu méu kolé néng paka waca wa’i taus; 15 ai Aku poli téing ca toming latang te méu, kudut méu kolé pandé cama ného hitut poli pandé Laku agu méu. 16 Aku taé agu méu: Moro matan, mendi toé ngancéng béta mai morin, ko cengata ata wuat laing toé ngancéng béta mai hiat ata wuatn. 17 Émé pa’él taung so’o le méu, di’a de mosés méu émé pandés le méu. 18 Toé ngong sanggés taung méu curup Daku. Baé Laku, céing situt poli lir Laku. Maik paka cai oloy tulis ho’o: Ata hitut hang roti Daku, poli téti tundéln agu Aku. 19 Aku curup agu méu ho’o muing, be bolon mangad sanggéd situ, kudut émé tuay apa hitu, imbig dé le méu, te Akuy dé Hia. 20 Aku taé agu méu: Tada laingn, céing ata tiba ata hitut wuat Laku, hia tiba Akuy. Agu céing ata tiba Aku, hia tiba Hiat wuat Akuy.”

Mori Yésus Langga Hi Yudas

21 Du poli curup nenggitun Mori Yésus, bélot kéta naiN, itu kali wan sakasin: “Aku taé agu méu, moron, cengata oné mai méu te téing Akuy.” 22 Ata nungkuN situ lélo taud, isé sesenga’is, céing hitut kindat Diha. 23 Cengata oné mai ata nungku de Mori Yésus, ata hitut momang Diha, bérit ruis Hiay du racap wanangn. 24 Repang oné ata nungku hitu hi Simon Pétrus, mai taén: “Réy dé, ngong céing Diha hitu!” 25 Ata nungkuN hitut lonto ruis Mori Yésus holés agu mai taén ngong Hia: “Mori, céing hitu?” 26 Mai walé de Mori Yésus: “Hia hitu, hiat ata téing roti ata poli bembon Laku.” Du poli curup nenggitun, Hia emi Roti, bemboy agu téing hi Yudas, anak di Simon Iskariot. 27 Du poli tiban roti hitu li Yudas, hia hena le jing da’aty. Mai taé de Mori Yésus ngong hia: “Apa ata nanang laing te pandém, pandé gélang ga.” 28 Maik toé kéta manga cengatan oné isé situt lonto hang cama ata pecingn, co’o betuan curup hitu de Mori Yésus ngong hi Yudas. 29 Ngéséng hi Yudas ata cau kas wiga manga ata nggo’o betd, te Mori Yésus jera hi Yudas weli apa ata sékékn latang te taé hitu, ko téi apa-apa agu ata lénggé. 30 Du poli tiban li Yudas roti hitu, itu kali gélang-gélang ngon. Du hitu wiég tana.

Perénta Weru

31 Du poli ngon hi Yudas, maig taé de Mori Yésus: “Ho’o ga Anak Manusia te bongy, agu Mori Keraéng te bong oné Hiay. 32 Émé Mori Keraéng bong oné Hiay, Mori Keraéng te bong Hia kolé oné wekiN, agu te bong muing Hia. 33 Ngong sanggés méu anak Daku, téké cekoén kali ga, Aku manga cama agu méuk. Méu te kawé Akum agu ného hiot poli taé Laku agu ata Yahudi: Oné osang ngo Daku, toé kéta ngancéng méu ngos, nenggitu kolé néng taé muing Laku te ho’on agu méu. 34 Aku téing perénta weru agu méu, ngong kudut méu paka momang taus, cama ného Aku poli momang méuk, nenggitu kolé méu paka momang cama taus. 35 Ali hitu, pecing taung lata, te méu ata nungku Dakum, ngong émé méu momang cama taus.”

Mori Yésus Langga Hi Pétrus

36 Mai taé di Simon Pétrus agu Mori Yésus: “Mori, te nggere-nia Ité ngod?” Mai walé de Mori Yésus: “Oné osang baté ngo Daku, hau toé ngancéng lut Aku te ho’on, maik tai hau ngancéng lut Akuh.” 37 Mai taé di Pétrus ngong Hia: “Mori, co’o tara toé ngancéng lut Itég aku rémé nggo’on? Maram aku oké moség latang te Ité!” 38 Mai walé de Mori Yésus: “Ngancéng hau oké mosém latang te Aku? Ce tu’ungn Aku taé agu hau: Du toé di kakor lalong, hau poli pali Akum telu ngkalin.”

14

Mbaru Diha Ema

1 Néka simpung naim, imbi kaut agu Mori Keraéng, imbi kaut kolé oné Aku! 2 Oné Mbaru de Ema Daku dod osang te ka’éng. Émé toé nggitu, toét toé tombos Laku agu méu, ai ngo Daku nitu te ambi osang latang te méu. 3 Agu émé poli ngo nitug Aku agu poli ambi osang latang te méu, Aku mai kolék, agu dadé méu oné osang Daku, kudut oné osang nia mangag Aku, méu kolé manga nitum. 4 Agu nggere-niak Aku ngog, pecing le méu salang ngo nitu. 5 Mai taé di Tomas ngong Hia: “Mori, toé pecing lami te nggere-nia Tité ngod. Jari, co’og lami pecingn salang ngo nitu?” 6 Mai walé de Mori Yésus agu hia: “Akuy dé salang, agu molor agu mosé! Toé kéta cengatan ata ngancéng ngo oné hi Ema, émé hia toé palé Akuy. 7 Émé méu pecing Akum, toét toé, méu pecing kolé Ema Dakum. Te ho’on méu pecing Hiam, agu méu poli ita Hiam.” 8 Mai taé di Pelipus ngong Hia: “Mori, toi koé ami hi Ema hitu: remo damang hitu latang te ami.” 9 Mai walé de Mori Yésus ngong hia: “Naisg Aku cama-cama agu méuk Pelipus, maik hau toé kin pecing Akuh? Céing ata poli ita Akun hia poli ita hi Ema. Co’og taé de hau ga: Toto koé agu ami hi Ema hitu. 10 Toé néng imbi le hau ko te Aku manga oné hi Emak, agu hi Ema manga oné Akuy? Apa hitut taé Laku agu hau, toé curup oné mai weki Rug Aku, maik hi Ema, hitut ka’éng boné Akuy, Hia ata pandéd sanggéd situ. 11 Imbi koé Akum, te Aku boné hi Emak agu hi Ema bonén Akuy, ko mbasit co’on imbi koé landing sanggéd gori situ. 12 Aku taé agu méu: Tadan kéta, céing ata imbi Akun, hia te pandé kolés sanggéd gori situ, ngo-ngot gori ata céwé mésén oné mai hitu. Ai Aku ngo éta hi Emak; 13 agu apa kaut ata tegi de méu le ngasang Daku, sendos Laku kudut Hi Ema bong oné Anaky. 14 Émé méu tegi apa kaut oné Aku, le ngasang Daku, sendos Laku.”

Mori Yésus Reké Hiat Campé

15 “Émé momangk dé Aku le méu, méu luts sanggéd perénta Daku.” 16 Aku te tegi oné hi Ema, te téing liha agu méu cengata ata campé bana kudut Hia loréng méu tédéng lén, 17 ngong nai molor. Lino ho’o toé ngancéng tiba Hian, ai lino ho’o toé ita Hiay agu toé pecing Hiay. Maik méu baé Hiam, ai Hia loréng méuy, agu te ka’éng oné méuy. 18 Aku toé kudut pencang méu ného anak lalom. Aku mai kolé cé’é méu. 19 Téké cekoén kali ga, lino toé ita kolé Akuy, maik méu ita Akum, ai Aku mosé, agu méu kolé te mosém. 20 Du hitu di te pecing le méu, te Aku boné hi Emak, agu méu boné Akum, agu Aku kolé boné méuk. 21 Céing kaut ata caud perénta Daku, agu pandés liha, hiay ata momang Akun. Agu céing kaut ata momang Akun, hia te momang le Ema Dakuy. Aku kolé te momang hiak, agu te toi weki Rug oné hia.” 22 Hi Yudas hiat toé hi Iskariot taé agu Hia: “Mori, co’ot Ité tara toto wekid agu ami agu toé latang te lino?” 23 Mai walé de Mori Yésus: “Émé ca ata momang Akuy, hia te lorong curup Dakuy, Ema Daku te mohas hiay, agu Ami te mai oné hiakm agu ka’éng cama laing agu hiakm. 24 Céing ata toé momang Aku, hia toé lorong curup Dakuy, agu curup situt dengé de méu, toé de curup oné mai Akud, maik oné mai hi Ema, ata wuatg Aku. 25 Sanggéd situ taés Laku agu méu rémé koé cama laing agu méug Aku, 26 maik Hiat campé, ngong Nai Nggeluk, hitut wuat Liha Ema le ngasang Daku, Hiay dé ata kudut toing sanggé-ménan oné méu, agu te pandé tingengd le méu sanggéd taung situt poli taéd Laku oné méu. 27 Hambor agu meler pedeng te méu Laku. Hambor agu meler Daku téing méu Laku, agu apa hitut téing Laku, toé ného hitut téing de Lino oné méu. Néka simpung agu néka rantang. 28 Polip le méu dengén te Aku poli taé agu méu: Aku ngok, maik Aku mai kolék cé’é méu. Émé momang tu’ungk Aku le méu, naka laing dé le méu ngo Daku éta hi Ema. Ali hi Ema céwé mésén oné mai Aku. 29 Agu te ho’on muing taé Laku agu méu, be bolon jarid sanggéd situ kudut imbi le méu émé jari apa hitu. 30 Aku toég manga kolé do curupg agu méu, hiat kuasan lino ho’o maiy, agu hia toé kéta manga kuasa koé cekoén oné weki Daku. 31 Maik kudut pecing le lino ho’o te Aku momang hi Emak, agu Aku pandé kéta taungs ného baté perénta Diha Ema oné Aku. To’o ga, mai ngot Ité cé’é mai ho’od.”

15

Pu’u Anggor Ata Molor

1 “Akuy dé pu’u anggor ata molor, agu Ema Daku ata rébokn. 2 Néténg rengka oné Aku situt toé wuas, rociks Liha, maik néténg rengka ata wuad, dawings Liha kudut tambang recut wuad. 3 Bo kali méu nggélokm ga le curup ata poli taé Laku agu méu. 4 Ka’éng ga oné Aku agu Aku oné méuk. Cama ného rengka toé ngancéng wua kaut le run, émé hia toé cing oné mai pu’u anggory, nenggitu kolé néng méu, toé wuam émé toé ka’éng oné Akum. 5 Akuy dé pu’u anggor, méu rengkad. Céing ata ka’éng oné Akun agu Aku ka’éng oné hiak, hia te wua doy, ai be pé’ang mai Aku, méu toé ngancéng pandé apa-apas. 6 Céing ata toé ka’éng oné Akun, hia te rocik oké pé’angy ného rengka, agu dangon ga. Poli hitu congko lata oké oné api te tapas. 7 Émé méu ka’éng oné Akum, agu curup Daku ka’éng oné méus, tegi apa kaut ngoéngs, méu te tibas. 8 Oné apa ho’o te bong Ema Daku, ngong émé méu do wuas, agu ali hitu dé ga méu ata nungku Dakum.”

Perénta Kudut Momang Tau

9 “Ného hi Ema poli momang Akuy, nenggitu kolé néng Aku poli momang méug, ka’éng ga oné momang Daku hitum. 10 Émé méu lut perénta Dakum, méu te ka’éng oné momang Dakum, ného Aku lut perénta de Emag, agu ka’éng oné momang Dihak. 11 Sanggéd situ taés Laku agu méu kudut nisang nai Daku manga oné méuy agu nisang nai de méu ciri penongy. 12 Ho’oy perénta Daku: Porong méu momang taus, ného Aku poli momang méug. 13 Toé manga momang ata be lé main oné mai momang de cengata hitut oké mosén latang te haé reban. 14 Méu haé reba Dakum, émé pandés le méu situt perénta Laku agu méu. 15 Méu toé kolé caro mendim Laku ai mendi toé mopo apa hitut pandé de morin, maik Aku bénta méu haé reba, ai Aku poli tombo agu méu, sanggéd situt poli dengé Laku oné mai Ema Daku. 16 Toé méu ata lir Aku, maik Aku ata lir méu. Aku poli wérét méu kudut méu ngo agu cir wua, agu wuas hitut temer kin, kudut apa situt tegi le méu oné Ema Daku le ngasang Daku, téings Liha oné méu. 17 Ho’oy perénta Daku oné méu: Momang ga cama haé atas.”

Lino Ho’o Kodo Mori Yésus Agu Ata NungkuN

18 “Émé lino ho’o kodo méuy, nuk di’a te hia poli olo kodo Akun itu po méu. 19 Émé rapangn méu oné mai linos toét toé lino momang méuy ného paéngn. Landing woko méu toé oné mai linos, maik Aku poli lir méu oné mai lino, itu tara kodos méu le lino. 20 Nuk dé apa hiot poli taé Laku agu méu: Cengata mendi toé kéta céwé teke éta oné mai morin. Émé isé poli pandé da’at Akud, isé kolé te pandé da’at méu; émé isé poli lut reweng Dakud, isé kolé te lut taé de méus. 21 Landing sanggéd situ pandés lisé agu méu soho ngasang Daku, ai isé toé baé Hia, hitut poli wuat Akun. 22 Émé rapangn, Aku toé maik, agu toé curup agu isé, isé dé toé manga ndékokd. Landing te ho’on ga toé manga tadod kolé latangt ndékok disé. 23 Céing kaut ata kodo Akuy, hia kolé kodo Ema Dakuy. 24 Émé rapangn Aku toé pandés oné beréha isé sanggéd gori ata toé dé’it pandés lata bana, tandan isé toé manga ndékokd. Maik ho’o ga koném po poli itad taung sanggéd situ lisé, isé kodo Akus agu hi Emag. 25 Maik reweng situt poli tulis oné buku Taurat disé, paka rapaks: Isé kodo Akus toé kéta manga campitn. 26 Émé mai Hiat campé hitut kudut katu Laku oné mai hi Ema, ngong “Nai Molor” ata pé’ang oné mai hi Eman, Hia te sakasi latang te Aku. 27 Maik méu kolé paka ciri sakasi, ai méu du wangka pu’ung muingm ga cama laing agu Akum.”

16

Metek Nai

1 “Sanggéd taung so’o tombos laku agu méu, kudut méu néka doét Akum. 2 Méu te kenim, ngot cai leson, te néténg ata situt paki méu, nuk koé disé ga pandé ata di’an latang te Mori Keraéng. 3 Isé pandé nenggitu, ai toé pecing lisé, ngot hi Ema, ngot Aku. 4 Maik sanggéd so’o curups laku agu méu, kudut émé caig leson, nukg le méu te polis curupd Laku agu méu.”

Gori Dihat Campé

“Sanggéd so’o, toé curup Laku agu méu du pu’ungn, ai lawang ho’o, Aku ngai cama-cama kig agu méu; 5 maik te ho’on, Aku ngo éta Hia hitut poli wuatg Aku, agu toé manga cengatan oné mai méu ata réi agu Aku: Nggere-niat Ité ngod? 6 Maik le taé Laku sanggéd situ agu méu, itu tara wéong nais. 7 Maik tu’ung kéta ho’ot taé Daku agu méu: Céwé di’an latang te méu émé ngok Aku. Ai émé toé ngok Aku, Hiat campé toé mai cé’é méuy; maik émé ngok Aku, Aku te wuat Hia mai nggere-cé’é méuy. 8 Émé mai Hia, Hia te pandé lino ho’o kudut pecing ndékok, molor agu beté-bicar, 9 ngong ndékok: Landing isé toé kin di imbi Akus; 10 ngong molor: Ai Aku ngo éta Emag, agu méu toé ita Aku kolém; 11 ngong beté-bicar: ai hiat kuasan lino ho’o polig wahéngn. 12 Ngai do kid apa situt paka tombos Laku agu méu; maik te ho’on, toéd ngancéng polad le méu. 13 Maik émé caig Hia, ngong Nai Molor, Hia te ampil méu nggere-oné sanggéd molor; ai Hia toé te curup oné mai mu’u Run, maik sanggéd situt dengé Dihat hitus ata curupd Liha agu tombos Liha oné méu co’os cirid sanggéd apa situ du leso tai. 14 Hia te bong Akuy, ai Hia te keréba oné méu, apa situt tiba Liha oné mai Akud. 15 Sanggéd-ménan situ Diha Emas morid, situ kolé léléng Dakus morid; landing hitu curup muing Laku: Hia te keréba oné méu, sanggéd situt tiba Liha oné mai Akud.”

Olo Wéong Po Ontong

16 “Téké cekoén kali ga, méu toé ita Aku kolém, agu téké cekoén kolé méu te ita Akum.” 17 Dengé curup situ, pisa taus oné mai ata nungkuN taé cama taud: “Apa betuan taé Diha agu ité: Téké cekoén kali ga, méu toé ita Akum, agu téké cekoén kolé ga, méu te ita Akum? Agu: Aku ngo éta hi Emak?” 18 Maig taé disé: “Apay betuan curup Diha tenggo’o: Téké cekoén kali ga? Toé pecing lité apa betuan.” 19 Pecing le Mori Yésus, isé kudut manga réid agu Hia, maig taéN ngong isé: “Manga gejék cama taus, reweng hiot taé Daku bao: Téké cekoén kali ga, méu toé ita Akum, agu téké cekoén kali ga, méu te ita Akum? 20 Aku curup agu méu: Moron matan, méu te rétang agu jéjéng, maik lino ho’o te nakay; méu te wéongm, maik wéongs hitu te caling ciri kais nai. 21 Cengata inéwai lengn mésé betin du redu loas anakn, maik du poli loas anakn, hia toég nuk kolés betin, ai naka cengata manusia poli loas oné linon. 22 Nenggitu kolé méu te ho’on, hanang ata wéongs, maik Aku te ita méu kolé agu nisang nais, agu toé kéta manga cengatan ata ngancéng rumbun nisang naim hitu oné mai méu. 23 Agu du leso hitu, toé manga réi apa-apas agu Aku. Aku taé agu méu: Moron, sanggéd taung situt tegi de méu agu hi Ema, te téings Liha agu méu le ngasang Daku. 24 Dengkir te ho’on, méu toéd manga tegi can kolé le ngasang Daku. Tegi ga manga kali tiban le méu, kudut penong kais nais. 25 Sanggéd taung so’o curups Laku agu méu le rapang molés. Te cai leson, Aku toé kolé curup agu méu le rapang molé, maik tulak kéta keréba hi Ema agu méu. 26 Du leso hitu, méu te ngaji le ngasang Daku. Aku dé toé taé agu méu te Aku tegi latang te méu oné hi Ema, 27 ai weki Run hi Ema momang méu, ai méu momang tu’ung Aku agu imbi te Aku mai oné mai Mori Keraéng’g. 28 Aku mai oné mai hi Ema, agu Aku mai nggere-oné lino; Aku lego kolé lino agu ngo oné hi Ema.” 29 Mai taé data nungkuN: “Lélo, ho’od Ité tombo dungka kétay, toég rapang koléy. 30 Ho’og pecingn lami, te Ité pecing sanggéd-ménan, agu te co’on ata réi oné Ité. Ali hitu tara imbin lami, te Ité mai éta mai Mori Keraéngd.” 31 Mai walé de Mori Yésus agu isé: “Imbig le méu ho’o ga? 32 Lélo, kudut cai leson, ngot polig cain, te méu mbihi-mbehar ngo néténg osang de rus, agu méu te pencang Aku hanang koég. Maik toé hanang koég Aku, ai hi Ema loréng Akuy. 33 Sanggéd situ taé Laku agu méu, kudut méu delék hambor agu meler oné Aku. Oné lino ho’o méu cukung kélo-balém, maik mberes koé nais, Aku poli pandé kodan lino ho’o.”

17

Ngaji de Mori Yésus Latang te Ata NungkuN

1 Nenggituy curup de Mori Yésus. Itu kali congan nggere-éta awang, mai taéN: “Ema caig leson; bong koé Anakm, kudut Anakm bong itéy. 2 Cama ného Ité poli téing oné Hia kuasa latang te sanggéd situt mosé, nenggitu kolé Hia, te téing mosé tédéng lén oné sanggéd situt poli téing Lité agu Hia. 3 Ho’oy mosé tédéng lén hitu, ngong isé pecing Ité, Mori hitut ca kanang kali ata tu’ungn, agu pecing hi Yésus Kristus ata wuat tu’ung Litéy. 4 Aku poli bong Ité oné lino ho’o, ali poli pandéd gori situt téing Lité agu Aku te wintuks. 5 Landing hitu yo Ema, bong koé Aku oné ranga Rud Ité, ali bong hitut nipu Laku oné ranga Dité be bolon mangan lino ho’o. 6 Aku poli toi ngasang Dité oné sanggéd ata situt téing Lités agu Aku oné mai lino ho’o. Isé situ, Dités morid, agu Ité poli téing isé oné Aku, agu isé lut tu’ung curup Dités. 7 Te ho’on pecing lisé, te sanggéd situt téing Lité agu Aku, mai oné mai Itéd. 8 Ai sanggéd curup situt caings Lité agu Aku, polis Laku caingd agu isé, agu polisg tibad lisé. Pecing kéta tu’ung lisé, te Aku mai oné mai Itég, agu imbi lisé, te Ité ata wuatg Aku. 9 Aku ngaji te isék. Toé latang te lino ho’o ngaji Daku, maik latang te isé situt poli téing oné Akud Lité, ai isé, Dités morid, 10 agu sanggéd paéng Daku, paéng Dité, agu sanggéd paéng Dité, paéng Daku, agu Aku poli bong oné isé. 11 Aku toég manga kolé oné lino, maik isé, manga kid oné lino ho’o, agu Aku ngo oné Iték. Yo Ema ata Nggeluk, tinu koé isé le ngasang Dité, ngong ngasang Dité hitut poli téing oné Akuy, kudut isé ciri ca cama ného Ités. 12 Lawang cama laing agu iség Aku, Aku tinu isé le ngasang Dité, ngong ngasang Dité hitut poli téing oné Akun; Aku poli lami iség, agu toé kéta cengatan oné mai isé ata ampus, bom hia hiot ata ngoéng te ampusy, kudut rapakn apa ata poli tulis oné buku nggeluk. 13 Maik te ho’on Aku ngo oné Iték, agu curup taung situ Laku, rémé ngai manga kig Aku oné lino ho’o, kudut penong nisang nai Daku oné weki disé. 14 Aku poli téing oné isé curup Dité, agu lino ho’o kodo isé, ai isé toé oné mai linod, cama ného Aku toé oné mai lino ho’og. 15 Toé tegi Laku, kudut Ité toé emi isé oné mai linod, maik kudut Ité képé isé oné mai situt da’atd. 16 Isé toé oné mai linod, cama ného Aku, toé oné mai lino’G. 17 Nggeluk koé isé oné molor; reweng Dité hitu dé kolé molorn. 18 Cama ného Ité poli wuat Aku mai oné lino ho’o, nenggitu kolé Aku poli wuat isé ngo oné lino; 19 agu Aku pandé nggeluk weki Rug latang te isé, kudut isé ciri nggeluks oné molor. 20 Toé latang te isé so’o kanang ngaji Daku, maik latang kolé te ata situt imbi Akus ali tombo disé; 21 kudut isé ciri cas, cama ného Ité yo Ema oné Aku, agu Aku oné Iték, kudut isé kolé oné Ités, kudut imbi le lino ho’o, Ité ata wuatg Aku. 22 Agu Aku poli téing néra oné isé, hitut téing Lité agu Aku, kudut isé jiri cas kali, cama ného Ité, cat kali: 23 Aku manga oné Ité, Ité manga oné Akut, kudut isé jepek ciri cas, te pecing le lino, te Ité ata wuatg Aku agu Ité momang isé cama ného Ité momang Aku. 24 Yo Ema, ngoéng Daku, poro nia kaut mangag Aku, isé kolé manga cama laing agu Akus, isé situt poli téing Lité agu Aku, kudut isé lélo néra Dakus, hitut poli téing Lité agu Aku, ai Ité momang tu’ung Aku, du toéd mangan lino ho’o. 25 Yo Ema ata agil, bo muing lino ho’o, toé baé itéy, maik Aku baé Iték agu pecing lisé so’o, te Ité ata wuatg Aku; 26 agu Aku poli toin ngasang Dité oné isé, agu Aku te toin, kudut mohas hitut téing Lité oné Aku, manga oné iséy, agu Aku oné isék.”

18

Dekon Mori Yésus

1 Du poli taung curup sanggéd situ le Mori Yésus, Hia ngo pé’ang nitu main, cama laing agu ata ngungkun, agu ngo be sina mai waé Kidrons. Nitu manga ca po’ong; agu Hia ngo oné po’ong hitu cama-cama agu ata nungkun. 2 Hi Yudas hitut pika Mori Yésus, pecing kolé osang hitu, ai do ngkalin Mori Yésus lipur nitu agu ata nungkun. 3 Main kolé hi Yudas nitu agu lawa serdadu, agu ata lami Mbaru de Mori Keraéng, situt jera le imam kepala agu ata Parisi jemut agu lentéra, culu agu harat. 4 Mori Yésus ata pecing taung apa situt kudut hena wekin, ngo nggere-oloy, agu mai taéN ngong isé: “Kawé céing méu?” 5 Mai walé disé: “Hi Yésus oné mai Nazarét.” Mai taén ngong isé: “Ho’ok Aku.” Hi Yudas hiot pika Hia hesé kolé nituy cama laing agu iséy. 6 Du taé Liha agu isé: “Ho’ok Aku,” hedong isé, agu renggemd wa tana. 7 Mai Hia réi kolé: “Kawé céing méu?” Mai taéd: “Hi Yésus oné mai Nazarét.” 8 Mai walé de Mori Yésus: “Poli Laku taé agu méu, ho’ok Aku. Émé Aku hitut kawé de méu, ondang koé ngod isé so’o.” 9 Tara nenggitun curup Diha, kudut cai olon curup hiot taé dé’it Liha: “Oné mai isé situt téings Lité agu Aku, toé kéta ondang cengatan Laku te copéls.” 10 Itu kali hi Simon Pétrus, hitut sélék banjarn, werus banjar hitu, lebat liha sinan oné mendi de Imam Mésé, wiga capék muing tilu wanangn, ngasangn mendi hitu: hi Malkus. 11 Mai taé de Mori Yésus ngong hi Pétrus: “Na’a kolé oné bakon banjar hitu; toé weli Aku paka inung Piala hitut téing liha Ema agu Aku?” Mori Yésus Oné Ranga Di Hanas –

Hi Pétrus Pali Mori Yésus

12 Itu kali lawa serdadu situ agu tu’ad, agu sanggén taung isét lami situ jera lata Yahudi, deko Mori Yésus agu waséy lisé. 13 Itu kali todangn lisé, olong oné hi Hanas, ai hi Hanas hitu amang di Kayafas, ata ntaung hitu téti ciri Imam Méséy. 14 Agu hi Kayafas hitu ata wahéng dé’it ata Yahudi: “Céwé di’an émé mata cengatan te cépé sanggéd wa’u.” 15 Hi Simon Pétrus agu cengata ata nungku bana lut Mori Yésus. Ata nungku hitu, pecing Imam Méséy hia cama-cama agu Mori Yésus ngo nggere-oné natas de Imam Mésé, 16 maik hi Pétrus ka’éng be pé’ang ruis lewang. Ata nungku hio ca bao, hiot pecing Imam Mésé, kolé pé’angy, gejék agu inéwai situt lami lewang, poli hitu dadé hi Pétrus nggere-oné. 17 Maig taé de inéwai ata lami para hitu ngong hi Pétrus: “Toé weli hau ca ata nungku data hitu?” Mai walé di Pétrus: “Toé, ta!” 18 Rémé nggitun sanggéd mendi agu isét lami Mbaru de Mori Keraéng poli saré apid, ai ces du hitu, agu isé hesé pisu apis nitu. Hi Pétrus kolé pisu api nituy, cama-cama agu isé. 19 Itu kali wangkan Imam Mésé réi Mori Yésus latang te ata nungkun agu sanggéd toing Diha. 20 Mai walé de Mori Yésus agu hia: “Aku tombo tulak agu lino ho’o: Aku toing mtaung oné sanggéd mbaru ngaji agu oné Mbaru de Mori Keraéng, osang baté impungd ata Yahudi; toé dé’it manga cehad curup Daku. 21 Co’o tara réi Akum hau? Réi kaut isé situt poli dengé apa ata poli curup Daku agu isé; moro matan, pecing lisé apa ata poli curup Laku.” 22 Du lari curup hitun Hia, cengata ata lami, hitut hesé nitu, baka du rangaN cang agu mai taén: “Nenggitu kéta waléN agu Imam Mésé?” 23 Mai walé de Mori Yésus ngong hia: “Émé salan curup Daku hitu, torok damang le hau salangn, landing émé molorn curup Daku, co’o tara repek le bakag Aku le hau?” 24 Itug kali hi Hanas jera dadé Hia, agu pongo liu liméN nggere-oné ranga di Kayafas, Imam Mésé hitu. 25 Hi Simon Pétrus ngai hesé pisu apin. Mai taé data hitu ngong hia: “Toé weli hau ca ata nungku Diha?” 26 Pali liha, mai taén: “Toé, ta!” Mai kolé taé de cengata mendi de Imam Mésé, cengata haé dading de mendi hiot campuk tilun li Pétrus: “Toé weli hau ca bao, ita laku lé po’ong, cama-cama agu Hiah?” 27 Pali kolé li Pétrus, agu du hitu kakors lalong.

Mori Yésus Oné Ranga di Pilatus

28 Itug kali dadén lisé Mori Yésus oné mai hi Kayafas nggere-oné mbaru de Gubernur. Du hitu gula kin tana. Weki rud isé toé ngo boné mbaru de Gubernur boto rinek wekid, ai isé kudut hang Paskas. 29 Ali hitu, hi Pilatus ngo nggere-pé’ang isé, mai taén: “Co’o tara mbotékn le méu ata ho’o?” 30 Mai walé disé ngong hia: “Émé toé ata da’at Hia ho’o, toé mboték cé’é itéy lami.” 31 Mai taé di Pilatus ngong isé: “Dadé Hia le méu, agu beté-bicarN lorong ruku wahéng de rus.” Mai taé data Yahudi situ: “Ami toé ngancéng bicar te paki can koé ata.” 32 Nenggitu muing cai olon, kudut rapak curup de Run Mori Yésus, hiot curup dé’it Liha te toi co’oy tai Hia mataN. 33 Itug kali hi Pilatus ngo nggere-oné mbaru de Gubernur, poli hitu bénta Mori Yésus liha, agu mai réin: “Kom Hau ho’o raja disét Yahudi?” 34 Mai walé de Mori Yésus: “Co’o curup hitu dité, teka oné mai nai de rud, ko ali manga ata tombo agu ité latang te Aku?” 35 Mai taé di Pilatus: “Ata Yahudik néng aku ko? Uku Rum agu imam kepala ata dadé Hau nggere-cé’é ranga daku; apa néng ata poli pandé de Hau lawang ho’o?” 36 Mai walé de Mori Yésus: “Adak Daku toé oné mai lino ho’on; émét adak Daku oné mai lino ho’on, toét-toé, mendi Daku poli to’od te dungkang, kudut Aku néka téing oné ata Yahudik; maik adak Daku toé cé’é mai lino ho’on.” 37 Mai taé di Pilatus ngong Hia: “Jari, Raja weli Hau ko?” Mai walé de Mori Yésus: “Taé dité Aku rajak. Ai latang te hitu Kaku tara loasg, agu latang te hitu Kaku tara maig oné lino ho’o, kudut Aku téing sabi latang te molor; néténg ata situt oné mai molord, te pinga reweng Dakus.” 38 Mai taé di Pilatus ngong Hia: “Apa néng molor hitu?”

Mori Yésus Wahéng Te Matay

38 Du poli curup nenggitun, hi Pilatus ngo kolé nggere-pé’ang te cumang agu isét Yahudi, agu mai taén ngong isé: “Toé kéta manga ita salan laku ata ho’o. 39 Landing weli ga, laséngs méu, émé du paska aku ledo cengatan latang te méu. Goris méu ko, kudut lego raja data Yahudi latang te méu?” 40 Mai kolé ciék disé: “Néka ata ho’o, maik hi Barabas!” Hi Barabas ho’o cengata ata rampoky.

19

1 Itug kali hi Pilatus poto Mori Yésus, agu jera ata te luca Hia. 2 Sanggéd serdadu situ rojok ca songkok karot te na’a éta uluN, agu wéngko lisé onén juba lango, 3 agu cang ngo nggere-olod, mai taéd: “Tabé o raja data Yahudi!” Poli hitu sinan pok baka du rangaN. 4 Ngo kolé be pé’ang hi Pilatus agu mai taén ngong isé: “Lélo dé, aku dadé Hia nggere-cé’é méu, kudut baé le méu, te aku toé kéta ita cekoén sala oné Hia.” 5 Itug ngo pé’angn Mori Yésus, tesong songkok karotN agu wéngko juba lango. Mai taé di Pilatus agu isé: “Lélo ga manusia ho’o!” 6 Du ita hias imam kepala agu ata lami situ, ciék kéta taungs isé: “Pangkot oné panggol Hia, pangkot oné panggol Hia!” Mai taé di Pilatus ngong isé: “Emi Hia, agu pangkot oné panggol Hia; ai aku toé kéta manga ita koé salan oné Hia.” 7 Mai walé data Yahudi situ agu hia: “Ami manga rukugm, lorong rukugm hitu, Hia paka matay, ai Hia taé le Run, Anak de Mori Keraéngy.” 8 Du dengé curup hitun hi Pilatus, danga-danga kéta rantangn; 9 og ngo nggere-oné mbaru de Gubernur agu mai taén ngong Mori Yésus: “Nia main néng Hau?” Maik Mori Yésus toé gorin te walé. 10 Mai taé di Pilatus agu Hia: “Toé gorim Hau te curup agu aku? Toé pecing le Hau ko te aku manga kuasag kudut lego Hau agu manga kuasag kolé te panggol Hau?” 11 Mai walé de Mori Yésus: “Hau toé manga kuasa koé cekoém latang te Aku, émé kuasam hitu toé téing éta main. Landing hitu, hia hitut téing Aku nggere-cé’é ranga de hau; céwé méséy ndékokn.” 12 Pu’ung nitu main hi Pilatus anor te lego Hia, maik sanggéd ata Yahudi ciéks: “Émé lego lité ata ho’o, laing ité toé haé reba di Kaisért. Néténg ata situt rékéng weki rud ného rajay, ata hitu lawang Kaiséry.” 13 Du dengé curup hitu li Pilatus, jera liha ba be pé’angy Mori Yésus, agu hia lonto oné seriga toto bicarn ngasangn Litostrotos, curup Ibranin: Gabata. 14 Leso hitu, leso irug paska, anggat ongga campulusua. Mai taé di Pilatus ngong ata Yahudi situ: “Ho’o de Rajas!” 15 Itug kali ciékd isé: “Mbér Hia! Mbér Hia! Pangkot oné panggol Hia!” Mai taé di Pilatus ngong isé: “Paka pangkot oné panggol laku Rajas ko?” Mai walé de imam kepala: “Ami toé manga Rajagm, hanang Kaisér kali!” 16 Cemoln ga, hi Pilatus condo Mori Yésus nggere-oné isé te pangkot oné panggoly.

Mori Yésus Pangkot Oné Panggoly

16 Tibag lisé Mori Yésus. 17 Déméng pola panggoln Hia ngo nggere-pé’ang te ngo oné osang hitut ngasangn Kalvari, curup Ibranin: Golgota. 18 Nitu Hia pépék oné panggoln lisé, cama-cama agu Hia kolé manga suad ata bana, cecupu agu cecupu, Mori Yésus oné be réhay. 19 Agu jera li Pilatus, na’a apa ata tulis bétan panggol hitu, runingn: “Yésus ata Nazarét Raja data Yahudi.” 20 Dod ata Yahudi ata bacang tulis hitu, ai osang baté pangkotn Mori Yésus ruis béndary, agu curup situ tulis oné curup data Ibrani, Latin agu Yunani. 21 Maig taé de imam kepala disét Yahudi ngong hi Pilatus: “Ité néka tulis: Raja data Yahudi, landing le taé olé Run: Aku de Raja data Yahudik.” 22 Mai walé di Pilatus: “Apa ata poli tulisn laku meler kin tulisn.” 23 Du poli pangkotn Mori Yésus le sanggéd serdadu situ, emi kolé lisé ceca pakén, poli hitu pati laing pat’y kudut néténg serdadu ca naéy agu emi kolé lisé juban. Juba hitu toé manga palang ja’ikn, tenung kaut laing ca’y, wangka éta main haéng wan. 24 Landing hitu mai taé cama taud: “Néka wirot gici koé lité, maik nampo moléy lité kudut céing ata delékn. Ai nenggitu ata kopn kudut cai olon apa hitut tulis oné Surak Nggeluk: “Isé pati ceca paké Daku néténg-néténg isé agu le téka nampo moléy juba Daku.” Nenggitu de ata poli pandé le serdadu situ. 25 Ruis panggol de Mori Yésus hesé endén agu sanggéd asé-ka’é de endéN hi Maria wina di Kléopas agu hi Maria Magdaléna. 26 Du ita endéN Mori Yésus, agu ata nungku hitut momang Diha cimping Hiay, maig taéN ngong endéN: “Endé, ho’o dé Anakm!” 27 Poli hitu mai taéN ngong ata nungkuN: “Ho’o dé endém!” Agu wangka nitu main ata nungku hitu tiba hia oné mbarun.

Rowan Mori Yésus

28 Poli hitu, ai pecing le Mori Yésus, te sanggéd cao-ca polis ga, maig taéN: Kudut cai olod situt tulis oné Surak nggeluk: “Aku masa waék.” 29 Nitu manga ca gumbang ata penong le anggor héo. Mai isé tuduk le bunga karang ata poli bembo oné anggor héon le laro, poli hitu takung oné mu’u de Mori Yésus. 30 Du poli inung anggor héo hitun Mori Yésus, mai taéN: “Poli ga!” Itug kali tenggukn sa’iN agu beté naiN.

Pucu de Mori Yésus Ceka le Korungy

31 Ai leso hitu, leso nangket, agu kudut du leso Sabat tobo situ toé ndéong kid oné haju panggols, ai Sabat hitu leso ramé mésé – itu kali maid ata tu’a data Yahudi oné hi Pilatus, te tegi agu hia, te pandé tepos wa’i data situ, agu na’a was tobod. 32 Itug kali maid serdadu pandé tepo wa’i data hitut laring cain, agu wa’i diha hitut cengata, hiot pépék cama agu Mori Yésus oné haju pannggol, 33 maik du caid isé oné Mori Yésus agu Hia polig mataN, toé pandé tepo lisé wa’iN, 34 maik cengata oné mai serdadu situ rodak pucuN le korung; wiga concang daraN agu waé. 35 Agu ata hitut ita le mata run, ata sakasi laingy, agu tu’ung kéta sakasin hitu, agu pecing liha, te hia curup laing molorn, kudut imbi kolé le méu. 36 Ai mangan sanggéd situ, kudut rapakd situt tulis oné Surak Nggeluk: “Toé manga tokon ata pandé tepos.” 37 Agu manga kolé tulis iwod taén: “Isé te lélo Hia hitut poli rodakn lisé.”

Boakn Mori Yésus

38 Poli hitu hi Yusuf oné mai Arimatéa – hia ata nungku de Mori Yésus, maik ceha moléy ai rantang ata Yahudi – tegi oné hi Pilatus, kudut hia sendo koéy na’a wan rapu de Mori Yésus. Agu hi Pilatus sendo tegi diha. Itu kali main hia agu na’a wa rapu hitu. 39 Hi Nikodémus kolé mai nituy. Hiap hiot laring cain mai le wié oné Mori Yésus. Hia ba mina ata poli haor le mina mur agu gaharu, am telumpulu kilod mendon. 40 Isé téti rapu de Mori Yésus, wuwus le lipa hemél, agu luma lisé le mina bengé, lorong adak data Yahudi du boak rapu. 41 Ruis osang baté pangkot oné panggol de Mori Yésus, manga ca po’ong. Oné po’ong hitu manga ca boa weru ata toé di boak atan. 42 Ai leso hitu, leso nangket disét Yahudi, boa hitu kolé toé tadang nitu main, itu kali boak nitun lisé rapu de Mori Yésus.

20

To’on Mori Yésus

1 Du leso laring cain minggu hitu le gula ucap du nili-nelak kin tana hi Maria Magdaléna, ngo lé boa de Mori Yésus, agu ita liha watu tadu boa polig na’a pé’angn oné mai boan. 2 Itug kali mburukn hia kawé hi Simon Pétrus, agu ata nungku bana hitut momang le Mori Yésus, mai taén ngong isé: “Mori Yésus polig emi latan oné mai boan agu toé kolé pecing lami niay wan lolingn Hia.” 3 Itug kali ngon hi Pétrus agu ata nungku bana hitu, ngo lé boas. 4 Isét sua mburuk cama-cama, maik ata nungku bana hitu mburuk céwé gélang itu po hi Pétrus, wiga cai oloy lé boa. 5 Hia ngandek nggere-onéy, ita towé wuwusN wa tana, maik hia toé ngo bonéy. 6 Caig hi Simon Pétrus musi mai hia, agu lampuk ngo boné boa hitun. Ita liha towé wuwusn wa tana. 7 Maik towé mboku hiot baon manga éta ulu de Mori Yésusy, toé na’a ruis wuwusn hitu maik lupi palé banan agu poli lepetn. 8 Itug kali onén kolé ata nungku hitut bana, hiot bao cai olo lé boa, itas liha agu imbiy. 9 Ai lawang ho’o toéd pecing lisé curup de Surak Nggeluk te Hia to’o kolé oné mai ata mataN. 10 Itus kali koléd ata nungku situ nggere-oné mbarud.

Mori Yésus Toto Wekin Agu Hi Maria Magdaléna

11 Maik hi Maria hesé ruis boa hituy agu rétangy. Cang agu rétangn hia ngandek nggere-oné boa hituy, 12 agu itas liha sua taus malékat paké ceca bakoks, hiat cengata lonto éta mai uluN agu hiat cengata wa wa’iN oné osang baté lolingn Mori Yésus. 13 Mai taé de Malékat situ agu hia: “Endé, co’o tara rétangm hau?” Mai walé de Maria agu isé: “Mori daku polig emi latan, toé pecing kolé laku nia na’an Hia lata?” 14 Du poli curup hitun, holés hia nggere-musi, ita Mori Yésus hesé nituy, maik toé pamotg liha te hituy Mori Yésus. 15 Mai taé de Mori Yésus agu hia: Endé, co’o tara rétangm hau? Kawé céing hau?” Nuk di Maria ata hitu ata lami po’ong, mai taén ngong Hia: “Keraéng, émé ité hitut emi Hia, toi koé agu akuy niay wan na’an lité kudut ngancéng emin laku.” 16 Mai taé de Mori Yésus ngong hia: “Maria!” Holés hi Maria, agu mai taén le curup Ibrani: “Rabuni!” ngong: “Gurug!” 17 Mai taé de Mori Yésus ngong hia: “Néka cau Aku, ai Aku toé di ngo éta hi Emag, maik ngo oné taung asé-ka’é Daku, agu tura oné isé te ho’on Aku te ngo éta Emag agu Ema de méu; éta Mori Keraéng Daku agu Mori Keraéng de méu.” 18 Ngoy hi Maria Magdaléna agu mai taén agu ata nungkun: “Aku poli ita Mori Yésusg!” Agu te Hia kolé ata curup sanggéd taung situ agu hia.

Mori Yésus Toto WekiN Agu Ata NungkuN

19 Du wiég tana, leso laring cain minggu hitu sanggéd ata nungku de Mori Yésus impung oné ca osangs, situt tadu taungs parad, ai isé rantang ata tu’ad Yahudis. Rémé nggitun caig Mori Yésus agu hesé oné be réha iséy agu mai taén: “Hambor agu meler oné méu.” 20 Agu poli tombo hituN, Hia toto liméN agu pucuN oné isé; ata nungkuN situ naka taungs du ita Morid. 21 Cangkalin kolé Mori Yésus taé agu isé: “Hambor agu meler oné méu. Cama ného hi Ema wuat Akuy, nenggitu kolé te ho’on Aku wuat méuk.” 22 Agu du poli curup nenggituN, Hia pur iséy, agu mai taéN: “Tiba ga Nai Nggeluk. 23 Émé ampongs le méu ndékok data, ndékok data situ te ampongs, agu émé mai taé de méu, ndékok data kong kid mangad, ndékok disé manga kid.”

Mori Yésus Toto Wekin Oné hi Tomas

24 Maik hi Tomas, cengata oné mai ata nungkuN situt campulusua, le caron hi Didimus, toé manga cama-cama agu isén du mai nitun Mori Yésus. 25 Maig taé data nungku iwod situ agu hia: “Ami poli ita Mori Yésusgm!” Mai walé di Tomas agu isé: “Émé toé di ita laku pakét paku oné liméN agu toé di puci mosog oné palang lewo paku hitu, agu toéd puci limég oné pucuN, toé kéta imbi cekoén laku.” 26 Alo leso nitu main, ata nungku de Mori Yésus impung kolés oné mbaru hitu agu hi Tomas manga cama agu iséy. Ngai tadud para, cain Mori Yésus agu hesé bahi-réha iséy, maig taéN: “Hambor agu meler oné méu.” 27 Poli hitu mai taéN ngong hi Tomas: “Puci oné pucu Daku mosom, agu lélo limé Daku, agu puci onén limém oné pucu Daku! Hau néka toé imbi koléh, maik imbi kali ga.” 28 Mai walé di Tomas agu Hia: “Yo Mori agu Mori Keraéng daku.” 29 Mai taé de Mori Yésus agu hia: “Landing le poli ita Akum, tara imbim hau. Mosé di’a isét toé ita, maik imbis.”

Betuan Injil Ho’o Tara Tulisn

30 Bo ngai dod tanda lenget bana ata pandé de Mori Yésus wa ranga data nungkun, ata toé tulis oné buku ho’os, 31 maik sanggéd so’ot mangad poli tulisd kudut imbi le méu te Mori Yésus hitu hi Mesias, Anak de Mori Keraéng, agu landing imbis hitu, méu manga mosés oné ngasang Diha.

21

Mori Yésus Toto Wekin Oné Sanggéd Ata NungkuN Lupi Sano Tibérias

1 Ného cepisan, Mori Yésus toto wekiN kolé oné ata nungkun, oné lupi sano Tibérias. Hia toto wekiN nenggo’o: 2 Oné lupi sano hitu lonto liup nitus, isé Simon Pétrus, Tomas, hiot alitn hi Didimus, hi Natanaél oné mai Kana tana Galiléa, sanggéd anak di Zébédéus agu sua taus ata nungku banan. 3 Mai taé di Simon Pétrus agu isé: “Aku ngo ndala ikangk.” Mai taé disé ngong hia: “Ami kolé iwo ngo agu hau.” Itu kali ngod tuké lobo wangka maik le wié hitu lagit haéng cemongkon lisé. 4 Du gérakn tana, Mori Yésus hesé oné lupi sanoy, maik ata nungku situ toé baé lisé te hitu Mori Yésus. 5 Mai curup de Mori Yésus agu isé: “Oé asé-ka’én manga deléks méu ko?” Mai walé disé: “Toé manga o Ité.” 6 Mai taé de Mori Yésus oné isé: “Oké kolé ndalas hitu oné racap wanangn wangka, méu te manga haéngs.” Itu kali wécakn ndalad, toé ngancéng poto kolén lisé ai dod ikang. 7 Mai taé data nungku hitut momang de Mori Yésus, ngong hi Pétrus: “Hitu Mori Dité.” Du dengé li Pétrus te hitu Mori Yésus, itu kali kelémbuk ceca pakén, ai hia mbolangy, agu téker nggere-wa Sanoy. 8 Ata nungku situ iwod, mai agu wangkad ai isé ruis oné tana masa; anggat ceratus métér tadangn, agu isé poto ndalad hitut penong le ikang. 9 Du caid isé pé’ang tana masa, ita lisé api gawok ata manga ikang agu roti bétan. 10 Mai taé de Mori Yésus agu isé: “Ba koé pisa mongkon ikang situt hitus di dekod le méu.” 11 Hi Simon Pétrus léti wangka ata penong kéta le ikang mésé agu poto ndalan nggere-pé’ang tana masa: ceratus lima mpulu telu mongko dod. Koném nenggitus dod, landing ndala hitu toé manga betén. 12 Mai taé de Mori Yésus ngong isé: “Mai, jumik ga!” Toé kéta cengatan oné mai ata nungku situ ata cung te réi Hia: “Céing néng Ité?” Ai pecing muing lisé te Hia Mori Yésus. 13 Mori Yésus ngo ruis iséy, emi roti agu téing isé; nenggitu kolé ikang situ. 14 Hitut te telu ngkalin Mori Yésus toto wekiN agu ata nungkuN lawang poli to’on oné mai ata mata.

Lami Koés Jimbal Daku

15 Du poli jumikd, Mori Yésus réi hi Simon Pétrus: “Simon, anak di Yohanés, asa hau, céwé momang Akuh ko isé so’o?” Mai walé di Pétrus ngong Hia: “Yo Mori, pecingp Lité te aku momang Iték.” Mai taé de Mori Yésus ngong hia: “Lami koés jimbal Daku.” 16 Mai kolé taé de Mori Yésus te sua ngkalin: “Simon, anak di Yohanés, asa hau, momang Akuh ko?” Mai wantil di Pétrus agu Hia: “Yo Mori, pecing Lité, te aku momang Iték.” Mai taé de Mori Yésus ngong hia: “Lami koés jimbal Daku.” 17 Mai kolé taé de Mori Yésus te telu ngkalin: “Simon, anak di Yohanés, asa hau momang Akuh ko?” Wéong kéta nai di Pétrus, ai telu ngkali bailn Mori Yésus taé hitut: “Asa hau, momang Akuh ko?” Agu maig taén ngong Hia: “Mori, pecing taung Lité sanggé-ménan, pecing Lité te aku momang Ité.” Mai taé de Mori Yésus ngong hia: “Lami koés jimbal Daku.” 18 Aku curup agu hau: Moro matan, du rémé rebam hau le rum pongo awakm, agu lako ngo nia ngoéngm, maik émé tu’ah ga, hau te lendor limém, agu ata bana te pongo awakm, agu todang nggere-oné osang ata toé ngoéng laing le hau. 19 Sanggéd so’o curup Liha te toi co’oy tai matan hi Pétrus agu bong Mori Keraéngn. Du poli curup nenggitun, Hia curup agu hi Pétrus: “Lut Akuh ga.”

Ata Nungkun Hitut Momang de Mori Yésus

20 Du holésn hi Pétrus, ita liha te ata nungku hitut momang de Mori Yésus rémé lut isén, ngong ata nungku hiot du isé rémé hang cama lonto ruis Mori Yésus, agu hiot taén: “Mori, céing de ata hitut kudut téing Ité?” 21 Du itan ata nungku hitu li Pétrus, mai taén ngong Mori Yésus: “Mori, co’oy tai cemoln hia ho’o?” 22 Mai walé de Mori Yésus: “Émé ngoéng’g Aku kudut hia ondang mosé dengkir mai kolég Aku, hitut toé nipu de hau. Maik hau kali lut Akuh.” 23 Og manga tombo lobo mu’u te weki situ, te ata nungku hitu toé manga matan. Maik Mori Yésus toé manga taén ngong hi Pétrus te ata nungku hitu, maik émé ngoéng’g Aku, te matay kudut hia ondang mosé dengkir agu mai kolég Aku, hitut toé nipu de hau.”

Turung Cemoln

24 Hiay ata nungku ata téing sakasi latang te sanggéd so’o agu poli tulisd, agu pecing lité, te sakasi sabi situ diha tu’ungd kéta. 25 Ngai do kid kolé sanggéd situt iwod ata pandé le Mori Yésus, maik émé sanggéd situ paka tulis taungs pijir kétas, nuk daku bo anggatn lino ho’o toé remo te na’a sanggéd situt paka tulis.