Huan 1

Ka Kagi no Ligkatan to Kouyagan no Malogot

1 Dongan, ko wa pad nohimu ka kalibutan, sikandin no oghingaranan to Kagi, tahan no duon dio to langit. Sikandin ka duma to Magboboot woy Magboboot ian sikandin. 2 Ligkat to kabinunsuran, tahan on nokoruma ka Kagi to Magboboot. 3 Pinabayo kandin ka tibo no nighimu to Magboboot. Waro mohimu ka agad sagboka ko kono no pinabayo kandin. Salupungan din do to Magboboot to nighimu. 4 Kandin ian ka pigpuunan to kouyagan woy ka soin no kouyagan ka ogkabat-ow to goinawa to mgo otow. 5 Oglayag ka sikan no igbat-ow dio to tibo no igmarusilom to goinawa to mgo otow. Waro nakagdoog ka marusilom dio to sikan no malayag. 6 Nigsugu to Magboboot ka sagboka no lukos; ka ngaran din si Huan 7 oyow oghun-a ogpakanangon to mgo otow to nangnangonon bahin to sika Talagbat-ow to goinawa ran. Nignangonnangon su oyow ogpamminog ka tibo no mgo otow oyow ogtuu to sikan no Talagbat-ow pinabayo to kagi rin. 8 Kono si Huan ka soin no igbat-ow; kandin ka nigpohitaga to ogpakasundul pad ka soini no Talagbat-ow. 9 Soin no ogpakasundul, kandin ka malogot no igbat-ow to goinawa to tibo no koot-otawan kai to soin no kalibutan. 10 Duon sikandin kai to soin no kalibutan no pinabayo kandin nighimu to Magboboot ka soin no kalibutan di waro tokora to mgo otow to sikandin ian ka ogpakabat-ow. 11 Agad dio to kandin no ugpaan waro sikandin tinawaa. 12 Di agad hontow no nigtinawo kandin no nigtuu on kandin, pigbogayan to katondanan to ogkohimu sikandan no mgo anak to Magboboot. 13 Ka poghimu kandan no anak to Magboboot kono no pinabayo to nig-anak to inoy ran; kono man ian ka ig-abin to otow. Nigligkat do to kabogbogan to Magboboot to sikandin on ka Amoy noy ko ogtuu kid on. 14 Soin no oghingaran to Kagi, nigpootow woy nig-ugpo kai to kanta to soin no kalibutan. Ogkoy-u lagboy sikandin woy malogot do ian ka kandin no ogpangagion. Nigkita noy ka karayawi rin no ka ogligkatan to sika karayawi ka Magboboot su kandin ka bugtung no Anak to Magboboot. 15 Kandin ka innangon to sika nigsugu to Magboboot no si Huan. Nigbansagon si Huan no kagi rin, “Soini ka innangon ku kaniu. Nigkagi ad to, ‘Sikan no ogpakasundul koddi, niglabow pad ka katondanan din to koddi no katondanan su duon on sikandin woy a nootow, tahan on sikandin.’ ” kagi ni Huan. 16 No, ogligkat to kandin no dakol no kohoy-u kanta, waro ogtamanan to igpulusi din kanta tibo. 17 Impasulat to Magboboot ka tahan no Balaod dio to mgo Hudiu pinabayo ki Moisis. Di kuntoon ka kamalogotan, nigdatong on pinabayo ki Hisu Kristu tagkos to dakol no igkohoy-u rin kanta. 18 Waro otow no nakakita to Magboboot. Agad sagboka, waro. Ka bugtung no Anak to Magboboot no sikandin ka layun dio to longod to Amoy rin no nokog-unawa ka goinawa ran, kandin ka nighitaga kanta bahin to Magboboot.

Ka Pogwali ni Huan no Talagbautismu

19 Ka mgo igbuyag to mgo Hudiu dio to Hirusalim, nigsugu dan ka duma no mgo talagpanubad, mgo Libita to oghondio ki Huan oyow og-inso ki Huan ko hondoi nigpuun ka kandin no katondanan. 20 Nigtabak kandin no wa din holosi sikandan. Kagi rin, “Kono no sikoddi ka Im-imanan to mgo Koot-otawan.” 21 Kagi ran kuwo kandin, “Hontow ka naan? Sikoykow buwa si Elias?” Nigtabak ni Huan, “Kono no sikoddi.” Kagi ran man do to, “Koykow buwa ka sika so talagnangon to kagi to Magboboot no ogtagaran noy.” “Kono no sikoddi,” kagi ni Huan. 22 “Nangoni koy to katondanan nu,” kagi ran. “Nangoni koy oyow duon igkatabak noy to mgo nigsugu kanami. Nokoy ka ignangon nu bahin to katondanan nu?” 23 Nigtabak si Huan to, “Sikoddi ka ogbabansagon dio to holholawan; lantasi now ka dalan woy gawhani now ka ogbayaan to Lagboy no Igbuyag ta oyow ogkatul-id.” Unawa ka kagi ku to nigpasulat to Magboboot ki Isaias dongan. 24 Ka mgo Parisiu ka nigsugu to sikan no mgo lukos no nighondio ki Huan. 25 Duon dod ig-inso dan ki Huan. Kagi ran, “Manio naan to ogpabautismuan nu ka mgo otow ko kono ka no Im-imanan to mgo Koot-otawan woy ko kono ka si Elias woy ko kono ka no talagnangon to kagi to Magboboot; manio naan?” 26 Nigtabak si Huan to, “Hoo, ogpabautismuan ku to woig. Di duon kai to kanta ka otow no wa now pad tokora. 27 Ogpakasundul koddi ka soin no lukos. Di kono no litos ka koddi no katondanan agad to oghokad to kandin no sandals.” 28 Nohimu soini dio to Bitania no lunsud, dio to doipag no woig no oghingaranan to Hordan su dio ka ogpabautismuanan ni Huan to mgo otow.

Ka Karniru to Magboboot

29 Ka sunud no allow, nigkita ni Huan si Hisus no dio to dalan no oghondio to kandin. Kagi rin to mgo otow, “Pitow kow dio. Soinid on ka nati to karniru to Magboboot su kandin ka ogpakimatoy oyow ogkaawo ka salo to tibo no mgo otow kai to kalibutan. 30 Kandin ian ka innangon kud kaniu to duon ogpakasundul koddi ka sagboka no lukos no niglabow ka katondanan din to koddi no katondanan su tahan on sikandin woy a mootow. 31 An-anayan,” kagi rin, “wara a mataga ko hontow no otow sikandin. Di ka koddi no tuud ian to ogpabautismu to woig oyow ogpatokoron ku sikandin to mgo taga Israil.” 32 Nò, nakatitigus on si Huan to, “Nigkita kud ka Gimukud to Magboboot no ogpohulughulug no ogkounawa to salapati no ogligkat dio to langit. Niglatun on ki Hisus no wa mogwoil. 33 Wara a pad poron nigtokod ko hontow sikandin. Di ka Magboboot no nigsugu koddi to ogpabautismu to woig, nignangonan a rin. Kagi rin koddi, ‘Ogkitoon nu ka Gimukud ku no oglatun to sagboka no lukos. Sikan no lukos, ogbautismuan din ka mgo nigtuu pinabayo to Gimukud ku.’ 34 Nigkita kud soini,” kagi ni Huan, “woy ognangonan ku sikaniu to soini ka Anak to Magboboot.”

Ka Nokohun-a no mgo Hibatoon ni Hisus

35 Ka sunud no allow duon dio si Huan duma to darua no sakup din 36 no nigkita rin si Hisus no ogligad. Kagi rin kuwo to mgo sakup din, “Pitow kow; sooyo ka nati to karniru to Magboboot.” 37 Nigdinog ka sikan no darua no sakup ni Huan to kagi rin. Nò, pigluyud dan on si Hisus. 38 Niglingi si Hisus no nigkita rin sikandan no ogluyud. Kagi rin kuwo kandan, “Nokoy ka ogkuon now?” Nigtabak no nig-inso to, “Hondoi ka og-ugpo, Rabai?” Ka lituk to Rabai, ‘Maistru.’ 39 Kagi ni Hisus, “Duma kow woy pitow kow.” Nò, nigduma ian no nigkita ran ka datongan din. Nig-ugpo dio to kandin sikan no allow su mahapun on. 40 Si Andres no hari ni Simon Pedro ka sagboka no lukos no nigluyud on ki Hisus. 41 Nig-agpas pamitawa ka kandin no kakoy no si Simon. No, kagi rin kuwo to sikan no kakoy rin, “Nigkita noy on ka Im-imanan to mgo Koot-otawan.” Ka Kristu ka dangob no kagi no un-unawa ka lituk to Im-imanan. 42 Nò, nigduma rin si Simon dio ki Hisus. Pogkita ni Hisus kandin nigkagi to, “Sikoykow si Simon no anak ni Huan. Oghingaranan ka ki Sipas.” Ka ngaran si Sipas woy ka ngaran si Pedro un-unawa ka kalitukan to soin no darua no ngaran. “Batu” ka kalitukan.

To Pog-umow ni Hisus ki Pilipi woy si Natanial

43 Ka sunud no allow, nigboboot si Hisus to oghondio to Galilia. Nigtagbu rin si Pilipi no nigkagi to, “Usi, duma ka koddi.” 44 Bitsaida ka ugpaan ni Pilipi no lunsud ian ni Andres woy si Pedro. 45 Nò, nigpamitawan ni Pilipi si Natanial. Ko nigkita rin nignangonan din no kagi rin, “Nakitaan noy si Hisus no taga Nasarit no anak ni Husi. Sikandin ian ka duon to sulat ni Moisis duon to Balaod ta. Woy sikandin ian ka insulat to mgo talagnangon to kagi to Magboboot.” 46 Kagi ni Natanial, “Umba soini nò! Waro buwa no maroyow ko taga Nasarit!” Kagi ni Pilipi, “Ogduruma ki pad; pitow ka.” 47 Pogkita ni Hisus ki Natanial, nigkagi si Hisus bahin kandin to, “Pitow kow! Soini ka sagboka no taga Israil no kono ki ogpakasawoy to batasan din, mgo kagi rin.” 48 Noinuinu si Natanial no nigkagi sikandin. Kagi rin, “Manio to ogtokoron a nu?” Nigtabak si Hisus no kagi rin, “Ko dio ka pad to lobut to kayu no igira no ogholong ka pad no waro ka pad umawa ni Pilipi, nigkita kud sikoykow.” 49 Nigtabak si Natanial kuwo ki Hisus. “Buyag,” kagi rin, “Koykow ka Anak to Magboboot. Koykow ian ka Labow no Igbuyag to mgo taga Israil.” 50 Nig-inso ni Hisus kandin, “Ogtuu kad su nakakagi a to nigkita kud sikoykow dio to lobut to sikan no kayu no igira? Ogkitoon now pad ka dakoldakol no igkoin-inuan now.” 51 Nò, kagi rin kandan, “Malogot ka soin no ogkagion ku kaniu. Ogkitoon now pad ka gapun no ogkaboklas no ogkitoon now ka mgo diwata no suguanon to Magboboot no oghondini to koddi no Kakoy to Koot-otawan woy og-uli dio.”

Huan 2

Ka Kasal dio to Kana

1 Ka igkatatolu no allow duon ka kasal dio to lunsud to Kana no sakup to Galilia. Duon dio ka inoy ni Hisus no nig-amut to kasalan. 2 Songo nigtugunan si Hisus mgo hibatoon din dio to kasalan no nig-amut dan on. 3 Ko warad on ka inumanon dan, nigkagi to inoy ni Hisus ki Hisus. Kagi rin, “Warad on ka inumanon dan; noubus on!” 4 Kagi ni Hisus to inoy rin “Manio, Ino, to og-insaan a nu? Kono pad no allow ku to ogtuman ka bantaan to Magboboot koddi kai to soi kalibutan.” 5 Kagi to inoy rin kuwo to mgo suguonon, “Tumana now ka agad nokoy no igsugu din,” kagi to inoy rin. 6 Duon dio to sikan no baloy ka hon-om no kuron no nohimu to batu. Kara sagboka no kuron, ogkasoloran to marani to songo gatus no litru no woig. Duon ka mgo kuron dio su ka batasan dut Balaod to mgo Hudiu to malasi ogpanhugas. 7 Insugu ni Hisus ka mgo suguonon to, “Hiponaa now ka mgo kuron to woig.” Nò, pinasimil dan ka woig. 8 Kagi ni Hisus kuwo kandan, “Sakuga now; ihatod now dio to igbuyag to mgo suguanon to mangasawa.” Inhatod dan on dio to kandin 9 no pigtimtiman din ka sika woig no nabawi on no inumanon. Waro mataga ka sika igbuyag to suguonon to mangasawa ko hondoi mogligkat ka inumanon. Nataga atag ka mgo suguanon no nigsakug. Nò, pig-umawan to sika igbuyag ka sika ogpangasawa 10 no kagi rin kuwo kandin, “Ka tahan no batasan to mgo otow, igpohun-a ran ka maroyow no inumanon. Ko dakol ka pog-inum to mgo magaliug, no konad on ogkananaman ka pog-inum dan, ian igpoinum ka mad-ang on. Di sikoykow, atag, noindanan nud ka maroyow no inumanon no kuntoon on igpoinum to mgo otow ka maroyow.” 11 Ko nigbalig ni Hisus ka sikan no woig no nohimu to inumanon dio to lunsud to Kana no sakup to Galilia, sikan ian ka an-anayan no igkabolongbolong no pighimu rin. Nigpapitow on si Hisus to kabogbogan din. Nò, nohogot on ka pogtuu to mgo hibatoon din kandin. 12 Ko naponga on, nanhondio si Hisus, ka inoy rin, mgo hari rin woy ka mgo hibatoon din to lunsud to Kapirnaum no pila ro no allow ran dio.

Ka Pogdogil ni Hisus to mgo Ogbaligya dio to Dakol no Ampuanan

13 Nighondio si Hisus to Hirusalim su magaan on ka pagkoonan to mgo Hudiu no oghingaranan to Pagkoonan to Paligad. 14 Ko nokouma on, nighondio to Dakol no Ampuanan to mgo Hudiu. Dio din kitaa ka mgo otow no ogbaligya to baka, mgo karniru, mgo salapati. Duon dod ka mgo ogsaliu to kalkalasi no salapi no ogpinpinnuu duon to lamisaan dan no masalsaliuoy to salapi. 15 Nò, nighimu ni Hisus ka lubid no lalamposoy no sikan ian ka indogil din to mgo baka, mgo karniru dio to libuwasan. Agad nigbalintuad din ka mgo lamisaan to mgo ogsalsaliu to salapi no nakasawod on ka salapi dan. 16 Nò, nigsugu din ka mgo ogbaligya to salapati no duon to kulungan to, “Awaa now soini tibo. Ko now himua ka baloy to Amoy ku to palingki now.” 17 To nigdinog ka mgo hibatoon din, nigdoromdom dan ka inkasulat to Tahan no Kasulatan no impasulat to Magboboot bahin ki Hisus. Kagi “Kai ro ian moubus ka goinawa ku, Magboboot, to soini no baloy nu no nalogdog kai to goinawa ku no unawa to hapuy.” 18 Nig-inso ka mgo Hudiu ki Hisus, “hondoi ka pighimu nu no kabolbolonganan no igpatuu to duon katondanan nu to oghimu to soini?” 19 Nigtabak si Hisus to maralom no kagi. Kagi rin, “Ko oggulakon now ka soin no baloy to Magboboot, oghimu a oghutuk to tatolu ro no allow.” 20 Kagi to mgo Hudiu, “Umba bag ian sikoykow nò! Kahop-atan no tuid woy hon-om ka poghimu noy to soin no Dakol no Ampuanan. No sikoykow atag, tatolu ro bag no allow ka poghimu nu oghutuk? Ka ku kow!” 21 Di ka lituk to kagi ni Hisus atag, ian ka lawa rin no ogkamatoy di ogkootawan to igkatatolu no allow. 22 Nò, ko nootawan on si Hisus, pigdoromdom to mgo hibatoon din to soin no innangon din. Nò, nigtuuan on ka impasulat to Magboboot dut Tahan no Kasulatan woy ka kagi ni Hisus.

Nataga si Hisus ka Duon dio to Goinawa to mgo Otow

23 To dio pad to Hirusalim to Pagkoonan to Paligad si Hisus, mohon-ing no mgo otow no nigtuu kandin su nigkita ran ka mgo koin-inuan din no impakita rin kandan. 24 Di si Hisus atag, wa din pad mogsalig to sikan no mgo otow su natagaan din on ka batasan to tibo no mgo otow. 25 Wa din awosa to ognangonan sikandin to batasan to mgo otow su agad waro ognangon kandin, natagaan din ka duon to goinawa ran.

Huan 3

Si Hisus woy si Nikodimu

1 Duon ka sagboka no igbuyag to mgo Hudiu no oghingaranan to mgo Parisiu. Si Nikodimu ka ngaran din. 2 Songo karukiloman nighondio ka sikan no lukos ki Hisus. Kagi rin ki Hisus, “Maistru, nataga koy on to koykow ka maistru no insugu to Magboboot su kono ka ogpokohimu to sikan no mgo koin-inuan ko waro ka Magboboot dio to koykow.” 3 Kagi ni Hisus kuwo kandin, “Soini ka malogot no ogkagion ku koykow, Usi, to agad hontow, kono ogpakasolod to Pogsugu to Magboboot ko kono pad oghutuk ogpokootow.” 4 Nig-inso si Nikodimu kandin to, “Ogkoomonu man ka otow to oghutuk ogpokootow ko buyag on sikandin? Konad ogkoimu no oglibong dio to gotok to inoy rin oyow ogkohutuk no ogkootow kandin. Ka ku kow!” 5 Nigtabak pad si Hisus to, “Soini ka malogot no ogkagion ku koykow, Usi, to agad hontow, kono ogpakasolod sikandin to Pogsugu to Magboboot ko kono ogpokootow sikandin pinabayo to woig woy pinabayo to Gimukud to Magboboot. 6 Ko og-anak ka otow, songo otow rod ka ig-anak din. Woy ko oghutuk ki ogkootow pinabayo to Gimukud to Magboboot ogkoimu kid on no anak to Magboboot.” 7 Kagi pa ni Hisus to, “Kono ka ogkabolongbolong to ignangon ku koykow to og-awoson nu to ogkohutuk ka ogkootow.” 8 Duon pananglitan ni Hisus. Kagi rin, “Ka soin no kalamag, agad hondoi, ogkalkalamag do duon. Ogdinogon ta ka ogdaragonu di wa ki mataga ko hondoi buwa ogligkat woy ko hondoi buwa ogdoog. Unawa ian ka otow no nootow nighutuk no pinabayo to Gimukud to Magboboot. Kono ki ogpakakita ko moomonu ka pogkootow rin.” 9 Nig-inso ni Nikodimu ki Hisus. Kagi rin, “Ogkoomonu to ogpakatood to soin no innangon nu?” 10 Nigtabak ni Hisus no nig-inso to, “Koykow ka sagboka no nabantug no maistru to tinuuan to mgo Hudiu woy kono ka ogpakasabut to soin? 11 Malogot ka soin no ogkagion ku koykow,” kagi ni Hisus. “Ignangon noy ka natagaan noy woy ignangon noy atag ka nakitaan noy. Di waro atag no sagboka now no ogtuman to ignangon noy. 12 Ko kono kow ogtuu ko ignangonan ku kaniu bahin kai to soin no kalibutan, ogmoomonu kow buwa oyow ogtuu kow ko ignangon ku kaniu bahin to ogpuun dio to langit no ugpaan to Magboboot? 13 Waro pad otow no nokohondio to langit dio to Magboboot ko kono no sikoddi no Kakoy to Koot-otawan no dia a nigpuun.” 14 Kagi pa ni Hisus, “Ko dio pad to holholawan nighihipanow woy si Moisis, in-ampow rin ka ulod no nohimu to boronsi dio ampow to malayat no tukod Ogkounawa ian koddi no oghingaranan a to Kakoy to Koot-otawan. Songo igpaampow a dio to krus no songo oglindogon. 15 oyow ka tibo no ogtuu koddi ogkootawan do no waro katamanan dio to Magboboot.” 16 “Sikan su imbogoy to Magboboot ka bugtung no Anak din to ogkamatoy oyow kandin on ka oglipuas to salo to mgo otow su dakol lagboy so goinawa rin to tibo no mgo otow kai to soin no kalibutan. Agad hontow, no ogtuu kandin, kono ogkamatoy ka sikan no otow, ogkootawan do no waro katamanan dio to Magboboot. 17 Waro impohondini to Magboboot ka Anak din to soin no kalibutan oyow oglogparan din ka mgo otow. Ian din tuud dii to ogpangabangan din ka mgo otow. 18 Sikan no mgo otow no ogtuu to Anak to Magboboot, kono oglogparan to Magboboot. Di sikan no mgo otow atag, no waro nigtuu, nabobootan on su waro man nigtuu to sika bugtung no Anak to Magboboot. 19 Soini ka tuud to ogbobootan. Nighondini to soin no kalibutan ka Igbat-ow to pogdoromdom to mgo otow. Di kono ogkoiniat ka mgo otow to soin no igbat-ow su konon gustu ran to ogkabat-awan ka sumsumanan dan su maroot man ka oghimuon dan. 20 Sikan su sikan no otow no oghimu to maroot, agad nokoy no kalasi, maroot din ka igbat-ow. Kono din ogkoiniatan to ogkabat-awan su kono no gustu rin to ogkitoon ka mgo oghimuon din no maroot. 21 Di sikan no mgo otow no maroyow ka oghimuon dan, ogpabat-awan dan ka oghimuon dan oyow igpakita ran ka nighimu ran no insugu to Magboboot.”

Si Hisus woy si Huan no Talagbautismu

22 Naponga to sikan, nanhondio si Hisus, mgo hibatoon din to Hudia no probinsia. Dio dan nig-ugpo woy nigpasonob dan ka mgo nigtuu on. 23 Songo dio si Huan no Talagbautismu to Inon no lunsud no marani to Salim no lunsud. Songo rio nigbautismu sikandin su dakol ka woig dio. Nò, nighondio ki Huan ka mgo otow oyow ogpabautismu sikandan. 24 Nohimu rin pad soini su wa pad man napirisu si Huan. 25 No, nigpaap-apuloy ka duma no sakup ni Huan woy ka sagboka no Hudiu bahin to batasan to tinuuan to mgo Hudiu to ogpanhugas. 26 Nò, nanhondio ki Huan ka soin no mgo ogpaap-apuloy. Kagi ran kuwo kandin, “Maistru, naromdom ka rod buwa to sikan no otow no duma nu dio to doipag to Hordan no woig no kandin ka innangon nu kanami. Nò, songo igpabautismu rin ka mgo otow; ogmanhondio ka tibo no mgo otow kandin.” 27 Nigtabak si Huan to, “Balagad, su agad hontow, waro katondanan dan ko wa bogayi to Magboboot. 28 Kaniu naan, nigdinog kow on to kagi ku ko nignangonan kud sikaniu no kagi ku, ‘Kono no sikoddi ka Im-imanan to mgo Koot-otawan. Di pinohun-a a kandin.’” 29 Nigparagas nigkagi si Huan to pananglitan. Kagi rin, “Ko duon lukoson no ogpangasawa, sikan ka tagtuun to boi. Ka sikan no amigu to lukos no ogtagad kandan ogkarago ko ogdinog on to lagong to sikan no ogpangasawa. Sikan ian ogkohogot ka igkarago ku.” kagi ni Huan. 30 “Awoson no ogdakol ka kandin no bantug woy ogdoisok do ka koddi.” kagi ni Huan. 31 Duon dod kagi ni Huan. Kagi rin, “Sikandin no ogpuun dio to langit, labow sikandin to tibo. Di atag sikandin no ogligkat to soin no kalibutan, soin no kalibutan ka ugpaan din woy tongod to soin no kalibutan sikan ian ka ogkagion din. Di sikandin no nigligkat dio to langit, kandin ka niglabow to tibo. 32 Ignangon din ian ka nigkita rin woy ka nigdinog din. Di manalingboka ro ka ogtuu to kagi rin. 33 Di atag, sikan no mgo otow no ogtuu on to innangon din, sikan ian ka mgo otow no ogmalogoton dan ka kagi to Magboboot. 34 Sikandin so pigsugu to Magboboot no si Hisu Kristu, ko nokoy ka kagi to Magboboot sikan dod ka ignangon din kanta su waro katamanan no imbogoy kandin to Gimukud to Magboboot. 35 Dakol ka goinawa to Magboboot no Amoy to Anak din no nigsaligan din sikandin woy imbogoy kandin ka tibo no katondanan. 36 Sikan no otow no nigtuu to Anak to Magboboot ogkouyag ka sikan no otow no waro katamanan dio to langit. Di sikan no otow no kono ogbabali to Anak din, kono ogkouyag dio. Kono ogkaawo ka igkabou to Magboboot to sikan no mgo otow taman to waro katamanan.”

Huan 4

Si Hisus woy ka Boi no Taga Samaria

1 Nigdinog ka mgo Parisiu to molmohon-ing pad kun ka mgo ogkasakup ni Hisus no ogpabautismuan din to mgo ogkasakup ni Huan. 2 Di kono no si Hisus ka nigbautismu; ka hibatoon din do ian ka nigpabautismu. 3 Ko nakarinog woy si Hisus to soin no nangnangonon, nig-ongkod sikandan dio to Hudia no niglibong dio to Galilia. 4 Nakabayo sikandan dio to loin no ugpaan no oghingaranan to Samaria no oghondio to Galilia. 5 Nò, nokouma dio to marani to lunsud to Samaria no oghingaranan to Sikar. Marani ka Sikar to sikan no tano no imbogoy to minuna ran no si Hakub dut anak din no si Husi. 6 Duon dod dio ka maralom no balun no pighimu ni Hakub. Nò, nigpinnuu no oghimoloy si Hisus marani to balun su naboloy to poghipanow ran no mariu no marani on ogmougtu ko nigdatong. 7 ,8 Nigparagas ka mgo hibatoon din dio to lunsud oyow ogbolion dan ka ogkoonon dan. Ko dio dod ka mgo hibatoon din, nokouma ka songo matig Samaria no boi no ogsakaru dio to balun. Kagi ni Hisus kandin, “Og-inum a kun.” 9 Nabolongbolong ka sikan no matig Samaria no boi no nigtabak din to, “Nokoy soini! Hudiu ka woy matig Samaria a no boi no ogbuyuan a nu to woig.” Sikan ian ka kagi rin. Kono ogpakag-alkuy ka mgo Hudiu to mgo matig Samaria. 10 Nigtabak si Hisus to, “Ko nataga ka poron to sikan no igbogoy to Magboboot koykow woy ko nataga ka ko hontow ka ogbuyu koykow kuntoon to woig, koykow on ka ogbuyu koddi no nabogayan kad poron to sikan no woig no igkouyag nu.” 11 Kagi to sikan no boi, “Buyag, waro igsakug nu; maralom lagboy ka balun. Hondoi ka naan ogkuo to sika woig no igkouyag ku? 12 Ka minuna ta no si Hakub, imbogoy rin kanta no pinanganak din to soini no balun. Soini ka woig no litos no ogkoinuman din, mgo anak din, tibo no mgo ayam din. Og-inso a ko labow ka buwa ki Hakub?” 13 Nigtabak si Hisus to, “Agad hontow no otow ka og-inum to woig to soin no balun, ogkoibog oghutuk no og-inum. 14 Di agad hontow ka og-inum to sikan no woig no igbogoy ku, konad on ogkoibog no oghutuk to og-inum. Sikan su ka sikan no woig no igbogoy ku ka woig no igkouyag no waro katamanan. Ogkounawa ian to sagboka no sobsob no og-ugwak dio to diralom nu no kono ogkootian.” 15 “Buyag,” kagi to sikan no boi, “Bogayi a nud to sikan no woig oyow kona ad on ogkoibog no og-inum woy oyow kona ad on oglibong kai to ogsakaru.” 16 Kagi ni Hisus kandin, “Oghondio ka pa; angoy ka to asawa nu. Libong kow kai.” 17 “Waro asawa ku,” kagi to sikan no boi. “Malogot ian ka sikan no tabak nu to waro asawa nu” kagi ni Hisus. 18 “Nig-asawa nu ka lalimma no lukos no ogtagtagooran ka ro duon to sikan no lukos kuntoon. Malogot ka tabak nu koddi,” kagi ni Hisus. 19 Kagi to sikan no boi, “Buyag, ogpakasabut ad on to duon katagaanan nu no talagnangon ka to kagi to Magboboot.” 20 Duon dod ig-alkuy to boi kandin. Kagi rin, “Ka kanami no minuna no matig Samaria, pig-ampuan dan ka Magboboot kai to soin no bubungan. Di sikaniu no mgo Hudiu, ignangon now to og-awos to dio ki ro og-ampu to Hirusalim to sika Dakol no Ampuanan.” 21 Nigtabak ni Hisus kandin to, “Igi, malogot ka soin no ogkagion ku to duon allow no konad ogkaampuan ka Magboboot kai to soin no bubungan woy ko rio to Hirusalim. 22 Kaniu no matig Samaria, waro kow mataga ko hontow ka og-ampuan now. Kanami no Hudiu, nataga koy atag ko hontow ka og-ampuan noy su ka sikan no otow no ogpangabangan din ka mgo otow, Hudiu sikandin. 23 Di Igi, ogpokouma ka allow, no kai on ian no pinabayo to kabogbogan to Gimukud to Magboboot ka malogot no pog-ampu to mgo otow dio to Amoy no Magboboot. Unawa ian ka mgo otow no ogkoiniatan to Magboboot no Amoy no og-ampu kandin. 24 Waro lawa to Magboboot no kono ki ogpakakita kandin no pinabayo to Gimukud din woy malogot no pogsimba ta ka litos do no pogsimba ta kandin.” 25 Nigtabak ka sikan no boi to, “Nataga a to ogpokouma ka Im-imanan to mgo Koot-otawan. Ko ogpokouma on, sikandin ka ognangon kanta to agad nokoy.” 26 Kagi ni Hisus, “Sikoddi no og-alkuy koykow, sikoddi ian ka sikan no Im-imanan to mgo Koot-otawan. 27 Nò, ko og-alukuy pad si Hisus to sikan no boi, nanlibong on ka mgo hibatoon din. Nabolongbolong ko nigkita ran to og-alkuyan din ka boi. Di wa dan mokoinso to boi ko nokoy ka ogkuon din. Agad waro mokoinso ki Hisus to manio to ogkagian din ka boi. 28 Nò, nig-ongkoran to boi ka igsakaru rin no nig-uli dio to lunsud. Kagi rin kuwo to mgo otow dio to lunsud, 29 “Mgo sulod, duma kow koddi su duon nakitaan ku no lukos no innangon din koddi ka tibo no pighimu kud. Sikandin on buwa ka Im-imanan tanow.” 30 Nò, nig-ongkod sikandan to sikan no lunsud no nanhondio ki Hisus. 31 Ko dio dod to lunsud ka boi, nighinggat poron si Hisus to mgo hibatoon din. Kagi ran, “Buyag, koon ka pa.” 32 Di nigtabak si Hisus kandan to, “Duon pogkoon ku no wa now matagoi.” 33 Nò, nigmoin-insooy ka mgo hibatoon din to, “Duon buwa nig-alap kandin to koonon?” 34 Kagi ni Hisus, “Ka koonon ku ka pogpaagad-agad ku to igsugu koddi woy oyow ogkapongaan ku ka tibo no impohimu rin koddi.” 35 Nig-inso si Hisus, “Duon buwa tahan no kagi now to ‘Hop-at pad no bulan woy ki oggaani?’ No ogkagian ku sikaniu no ogpitawon now ka mgo kamot now. Nohinug on ka bogas dan no litos on ian to oggaanion ta. 36 Ogbayaran ka sikan no mgo otow no oggaani. Ka sikan no mgo otow no nagaani on, ogkootawan no waro katamanan sikandan dio to langit. Nò, ka sikan no nig-orok to kagi to Magboboot woy ka sikan no oggaani, narago on sikandan no darua. 37 Malogot ka tahan no kagi to, ‘Og-orok ka sagboka no otow no ian oggaani ka loin no otow.’ ” 38 Kagi pad ni Hisus, “Pigsugu ku sikaniu oyow oggaani kow to soin no mgo otow no kono no sikaniu ka talag-orok to kagi to Magboboot dio to goinawa ran no waro now ikabaybayari. Ka duma no mgo otow, sikandan ka nabaybayaran woy sikaniu ka napulusan to kandan no nighimu.” Soini ka kagi ni Hisus kuwo to mgo hibatoon din. 39 Nigtuu ki Hisus ka mohon-ing no mgo taga Samaria ligkat to sikan no lunsud su ka innangon to sikan no boi to, “Innangon din koddi ka tibo no nighimu kud.” 40 Nò, ko nokouma ka mgo taga Samaria dio to longod din, nighinggat dan sikandin to og-ugpo pad dio to kandan. Nò, nig-ugpo woy si Hisus to darua no allow. 41 To nig-uugpo dio to kandan, mohon-ing pad ka nigtuu kandin tongod to kandin no nangnangonon kandan. 42 Kagi to mgo otow to sikan no boi to, “Ogtuu koy on ki Hisus di konad on ka koykow ro no innangon Ogtuu koy on su nigdinog koy on to kandin no kagi. Woy nataga koy on to kandin man ian ka sika Talagpangabang to mgo otow kai to soin no kalibutan.”

Nigbawian ni Hisus ka Anak to Songo Igbuyag

43 Nig-ugpo woy si Hisus dio to darua no allow no nanhipanow on no nighondio to Galilia 44 agad malogot no nigkagi rin to kono ogtahuron ka talagnangon to kagi to Magboboot dio to kandin no lunsud. 45 Di ko nokouma dio to Galilia, nigtinawo ka mgo otow ki Hisus. Pigtinawo dan su pigkita ran ka tibo no pighimu ni Hisus dio to Hirusalim su songo nighondio ka mgo otow no og-amut to sikan no Pagkoonan to mgo Hudiu. 46 Nigparagas pad woy si Hisuss no niglibong dio to Kana no songo lunsud to probinsia to Galilia no ian ka lunsud no nohimu on ka woig to inumanon. Duon dio to Kana ka sagboka no talagbulig to gobirnu no nigligkat dio to Kapirnaum. Nigdaralu ka anak din no lukos no dio dod to baloy rin dio to Kapirnaum. 47 Ko nakarinog on to nokouma si Hisus duon to Galilia no ogligkat to Hudia, nigtagbu dio ka sikan no lukos ki Hisus. Pighinggat din si Hisus to ogduma kandin dio to Kapirnaum oyow ogbawian din pad ka anak din no ogdaralu no kai naan do to liog din ka goinawa rin. 48 Nigtabak si Hisus to, “Sikaniu, ko kono kow ogkita to kabolbolonganan, kona a now ogtuuan.” 49 Di pighutuk nighinggata to sikan no igbuyag. Kagi rin, “Buyag, agpas ka. Ogduruma ki pad ian to kono pad ogkamatoy ka anak ku.” 50 Kagi ni Hisus kuwo kandin, “Uli kad, Usi. Ogkouyag do ka anak nu.” Nigtuu ka sikan no lukos to kagi ni Hisus no nighipanow on no og-uli. 51 Ko dio pad to dalan, natagbu to mgo suguonon din no pignangonan to, “Noulian on ka anak nu.” 52 Nig-insaan din ka mgo suguonon ko kon-u buwa noulii. Nigtabak sikandan to, “Gabii no ogkolis nabolow on ka lawa rin.” 53 Nigsumansuman ka sikan no amoy to sikan no oras ian no nignangonan ni Hisus sikandin to ogkouyag do ka anak din. Su sikan ian, nigtuu on ki Hisus ka sikan no lukos woy tibo no mal-alunggun. 54 Soini, ian ka igkarangob no kabolbolonganan no nighimu ni Hisus ko nokouma dio to Galilia no ogpuun dio to Hudia.

Huan 5

Ogbawian ni Hisus ka Lukos dio to Nalinsobuk

1 Pila buwa no allow no duon pagkoonan to mgo Hudiu no nighondio si Hisus to Hirusalim no og-amut. 2 Nokolingut to alad ka lunsud no Hirusalim. No, dio to sikan no gumawan no bayaanan to mgo ayam no karniru, dio to solod, duon sagboka no nalinsobuk no oghingaranan to Bitsata to kinagian to Hinibriu. Dio to ilis to nalinsobuk duon lalimma no pinayag. 3 Duon to sikan no mgo pinayag ka mohon-ing no mgo malotoy no otow no ogmanhibathibat. Duon ka mgo nabutud, mgo napulid, woy ka mgo kono oggoram to lawa ran. 4Ogtatagad ka soin no mgo otow to ogkasiu-siu ka woig su oghondio to sikan no woig ka songo diwata no suguanon to Magboboot no ogkasiuan din ka woig. Di waro mataga ka mgo malotoy ko kon-u ogpokouma ka diwata. Nò, ka sika an-anayan no otow no oglogsad dio to woig no ogkasiu on, ogkoulian on ka sikan no otow, agad nokoy ka dalu rin. 5 Duon sagboka no otow no katoluan woy wawalu no tuid din ka dalu rin. 6 Nakitaan ni Hisus to soin no lukos no natagaan din to nalugoy on nighibathibat no nigtatagad no nigkagian ni Hisus sikandin. Nig-inso din, “Usi, ogkoiniat ka ko ogkoulian ka?” 7 Nigtabak ka sikan no malotoy to, “Hoo poron, Buyag, di waro duma ku to oghonat koddi dio to woig ko ogkasiuan on. Ko dio a pad to dalan, ogpokohun-a on ka dangob no otow.” 8 Nigsugu on ni Hisus kandin to, “Onow kad; sasindog ka, honata nu ka ikam nu no uli kad on.” 9 Sikan do ian no nabawian on ka dalu to sikan no lukos. Nò, nig-onow, nigsasindog, nighonat din ka ikam din woy nighipanow on. Allow ran to Oghimoloy ian ko nabawian on. 10 Nakakita ka mgo igbuyag to mgo Hudiu to soin no lukos no nabawian on ka dalu rin. Nò, kagi ran kuwo kandin, “Kuntoon ka Allow ta to Oghimoloy. Kono no litos to Balaod ta ko oghonat ki to ikam ta.” 11 Nigtabak ka nabawian to, “Pigsugu a to sikan no otow no nigbawi koddi to ogpohipanowan a.” 12 Nig-inso to sikan no mgo igbuyag to, “Hontow buwa ka sikan no otow no nigsugu koykow to oghonat to ikam nu woy to oghipanow ka?” 13 Di waro mataga ka sikan no nabawian on ko hontow ka ngaran to nigsugu kandin su niglonus si Hisus su mohon-ing so mgo otow no nalibulung dio. 14 Nò, waro malugoy no pigkita ni Hisus ka sikan no otow dio to Dakol no Ampuanan. Kagi ni Hisus kuwo kandin, “Nò, man, noulian kad on! Kono ka oghutuk ogpakasalo su ko oghutuk ka, ogkoumaan ka buwa to molmohirap pad no masakit nu.” 15 No nighipanow on ka soin no nabawian no nignangonan din on ka mgo igbuyag to mgo Hudiu to, “Si Hisus ian ka nigbawi koddi.” 16 Nò, nigbunsud ka mgo igbuyag to Hudiu no ogmarooton dan si Hisus su waro nigpaagad-agad to Balaod to mgo Hudiu to nigbawian din ka otow no nigdaralu to Allow ran to Oghimoloy. 17 Di nigtabak si Hisus tongod to sikan no pighimu rin to Allow ran to Oghimoloy. Kagi rin, “Ka Amoy ku no Magboboot, konad oghimoloy to kandin no oghimuon. Nò, songo unawa a ian kandin.” 18 Bahin to soini duon bantaan to mgo igbuyag to mgo Hudiu to goinawa ran to ogkamatoy si Hisus su kono ogpaagad-agad to Balaod dan to Allow ran to Oghimoloy. Kono no sikan do ka igbayung dan kandin; duon dod ka pignangon din to Amoy rin ka Magboboot; pigpagsokod sikandin to Magboboot su nig-iling no Amoy rin ka Magboboot.

Ka Katondanan ni Hisus no Anak to Magboboot

19 Ka tabak ni Hisus kandan, “Malogot ka soini ogkagion ku kaniu. To sikoddi no Anak to Magboboot, kona a ogpokohimu to agad nokoy. Ka ogkitoon ku rio to Amoy ku ro ka oghimuon ku; songo sikan do ka oghimuon ku. 20 Sikan su dakol ka goinawa to Magboboot no Amoy to Anak din no ogpapitawon din kandin ka tibo no oghimuon din. Agad ogpapitow rin pad ka madmaroyow woy ogkoin-inuan kow. 21 Og-uyagon to Magboboot ka namatoy su oyow ogkootawan on. Agad koddi no Anak din, songo og-uyagon ku ka agad hontow no ogkoiniatan ku to og-uyag. 22 Ka Magboboot no Amoy, kono ogboboot ka agad hontow. Imbogoy rin koddi no Anak din ka malogot no katongod din to ogboboot 23 oyow songo ogsayoon a to mgo otow no ogkounawa to ogsayoon dan ka Magboboot no Amoy. Sikan no otow no kona a no Anak din ogsayoon, songo kono din ogsayoon ka Amoy ku no nigsugu koddi.” 24 Kagi pa ni Hisus kuwo to mgo ibuyag to Hudiu, “Malogot ka soini ogkagion ku kaniu. Sika otow no ogpamminog to kagi ku woy ogtuu on to Amoy ku no Magboboot no nigsugu koddi to oghondini a to tano, ogkouyag on ka sikan no otow no waro katamanan dio to langit. Kono ogkalogparan ka sikan no otow su nakalipuas to kamatayon din no duon on kouyagan din.” 25 Kagi rin to, “Songo malogot ka soi ogkagion ku kaniu. Tibon otow, ogkounawa to namatoy su nakaawoy to Magboboot. No, ogpokouma on, nò, noumaan kid on to allow no ogdinogon to mgo otow no ogkounawa to namatoy sikandan to kagi ku. Woy sikan no otow no ogpamminog to kagi ku, ogkouyag do no waro katamanan. 26 Ka Magboboot no Amoy ku ka pigpuunan to kouyagan woy songo pighimu rin ka Anak din no ogpuunan to kouyagan 27 Woy nigbogoy ka Magboboot to katondanan koddi no Anak din to ogboot to mgo otow su koddi ka Kakoy to Koot-otawan.” 28 “Kono kow ogkabolongbolong to kagi ku,” kagi ni Hisus to mgo otow, “to ogpokouma ka allow no ogdinogon to tibo no namatoy ka ig-umow ku. 29 Ko ogdinog sikandan no namatoy no og-onow ka tibo. Sikan no otow no nighimu to maroyow ogkouyag no waro katamanan dio to Magboboot. Di sikan no otow no maroot so batasan din, ogkouyag di ogkalogparan do sikandin.”

Ka Nakatitigus ki Hisus

30 Kagi pa ni Hisus, “Kona a ogboboot to mgo otow to koddi no goinawa. Ogpamminog a ro to kagi to Magboboot ko nokoy ka ignangon din koddi. Woy maroyow ka koddi no igboot su kono no koddi no bobootan ka oghimuon ku. Ka tuud ku ian ka pogboot to sikan nigsugu koddi no Magboboot. 31 Ko koddi do ka ognangon to malogot ka kagi ku, kono kow ogpakatuu ko sagboka ku ro. 32 Dokad di duon dangob no ogtitigus koddi. Nataga a to malogot ka innangon din bahin koddi.” 33 “Kaniu no mgo igbuyag to mgo Hudiu, nigsugu now ka mgo duma now dio ki Huan no Talagbautismu to og-inso bahin koddi. Nò, pigtitigusan din on no malogot ro ka innangon din bahin koddi. 34 Di kona a og-awos to ogtitigus ka mgo otow koddi. Oghingaranan ku si Huan no duma now oyow ogpakatuu kow buwa kandin no ogkapangabangan kow to Magboboot oyow ogkouyag kow no waro katamanan. 35 Ogkounawa ka innangon ni Huan no Talagbautismu to sagboka no ilawan no naparokatan on no ogmalayag. Ko pila ro no bulan, narago kow to sikan no igbat-ow to dalan now dio to Magboboot” 36 “Di duon nigtitigus koddi no labow pad to innangon ni Huan. Ka igpohimu koddi to Amoy ku, ian ogtitigus koddi to pigsugu a to Amoy ku no Magboboot. 37 Agad ka Magboboot no Amoy ku no nigsugu koddi dini, nigtitigus on koddi. Di waro kow nigdinog to lagong din woy waro kow nigkita to Magboboot. 38 Woy waro now isabuk ka kagi rin dio to goinawa now su waro kow nigtuu koddi no pigsugu din. 39 Nig-anad kow to inkasulat dio to Tahan no Kasulatan su nahan now ko ogtinawo kow, ian ka ligkatan to kouyagan now no waro katamanan. Di duon to sikan no Nasulatan ka innangon bahin koddi. 40 Di sikaniu atag, kono kow on ogkoiniat oghondini to koddi oyow duon porom ka kouyagan no waro katamanan. 41 Ko sikoddi,” kagi rin, “kona a og-awos to ogsayoon a to mgo otow. 42 Di nataga a kaniu to waro goinawa now to Magboboot. 43 Nighondini a to ngaran to Amoy ku no Magboboot di kona a now man ogsagmanon. Di ko oghondini ka songo otow no ligkat to kandin no goinawa do ka katondanan, ogsagmanon now sikandin atag. 44 Ogmonuon now to ogtuu koddi su ogmol-olinoy kow ro ogmasaysayooy di waro kow nigpoomot to ogkasayo kow to bugtung no Magboboot.” 45 “Kono kow ogsumansuman to koddi ian ka ogdiklamo kaniu dio to Amoy ku no Magboboot. Si Moisis no im-imanan now to ogpangabang kaniu, sikandin ka ogdiklamo kaniu. 46 Ko nigtuu kow pa porom to kagi ni Moisis, songo ogtuu kow koddi kuntoon su nigsulatan man bahin koddi. 47 Di ko kono kow ogtuu to kandin no insulat, ogmomonu kow naan no ogtuu to koddi no kagi?”

Huan 6

Nigpakoon ni Hisus ka Lalimma no Libu no mgo Otow

1 Nataman on soini, nigtalipag woy si Hisus dio to doipag to Lanow to Galilia. Songo oghingaranan ka sikan no lanow to Tibirias. 2 Nigsundul ki Hisus ka mohon-ing lagboy no mgo otow su nigkita ran ka pighimu rin no inkoinuinu ran ko nigbawian din ka mgo nandaralu. 3 Ko nigduung dan ka balutu, nanduma ni Hisus ka mgo hibatoon din dio to malmalopot do no bubungan. Dio nigmaminuu sikandan. 4 Marani on ogpokouma ka pagkoonan to mgo Hudiu no oghingaranan to Pagkoonan to Paligad. 5 Nò, nigtonggak si Hisus no nigkita rin ka mohon-ing lagboy no mgo otow no ogdalapak kandin. Nò, nig-insaan din si Pilipi, “Hondoi ki buwa ogboli to paan no litos no igpakoon ta to soin no mgo otow?” 6 Sikan ka inso din su oyow og-ol-ologan din ko nokoy buwa ka igtabak ni Pilipi kandin. Ka malogot, nataga on si Hisus to oghimuon din to ogpakoon to mgo otow. 7 Nigtabak si Pilipi no kagi rin, “Pila buwa no libu, Buyag, ka litos to ogboli to paan no litos to soin no mohon-ing no mgo otow woy kono do no litos to ogpakoon to soin no mgo otow!” 8 Duon ka sagboka no hibatoon ni Hisus no si Andres no kakoy ni Simon Pedro no nignangon ki Hisus to, 9 “Duon bato no lukos kai no nig-alap din ka lalimma no malison no paan woy darua no molintok no ngalap to woig no nalutu on. Di kono do buwa ogkalogob ka tibo soini no mgo otow.” 10 Kagi ni Hisus, “Papinnuua now ka mgo otow.” Nò, naminnuu on ka mgo otow dio to toolan su maluag ka toolan dio. Duon inat marani to lalimma no libu no mgo lukos. 11 Ko naminpinnuu on ka mgo otow, nigpurut ni Hisus ka sikan no lalimma no malison no paan. Ko nigpasalamatan din ka Magboboot, impanlogob din ka paan dio to mgo otow no naminpinnuu. Songo nigtalad din pad ka ngalap to woig no darua. Nigkoon on ka tibo no mgo otow no nallantoy on ka tibo. 12 Ko nallantoy on ka mgo otow nigsugu ni Hisus ka mgo hibatoon din. Kagi rin, “Pamuruta now ka mgo lotibon oyow kono ogkaraat agad to molintok.” 13 Nò, namurut dan on ka tibo no lotibon to paan no naponu on ka sampulu no bukag woy darua to mgo lotibon to sika lalimma no paan. 14 To nigkita ka mgo otow to nighimu ni Hisus ka koin-inuan no ogdakolon din ka paan, mgo isda, kagi ran, “Soini man naan ka sika Talagnangon to kagi to Magboboot no innangon to mgo talagnangon dongan to ogpokouma kai to kalibutan.” Ian ka kagi ran. 15 Nò, nataga si Hisus to duon bantaan dan to ogpogoson dan poron to sikandin on ka Labow no Igbuyag dan. Nò, niglonus ian no nigtakorog si Hisus no sagboka rin do dio to bubungan no malopot.

Oghipanow si Hisus to Laplap to Woig

16 Ko mahapun on, nigtupang ka mgo hibatoon ni Hisus no oghondio to lanow. 17 Nan-untud to balutu no ogtalipag poron dio to doipag to lanow no oghondio porom to Kapirnaum. Nigmarusilom do duon no wa pad makasundul si Hisus dio to kandan. 18 Nò, nigdakol on ka luwak to lanow su maagbot ka kalamag. 19 Ko nigpamogsoy to marani to hon-om no kilumitru ka mgo hibatoon din, nigkita ran si Hisus no oghihipanow dio to laplap to woig no ogmarani on dio to balutu ran. Nò, nahallok lagboy sikandan. 20 Di kagi ni Hisus kandan, “Kono kow ogkahallok su koddi do soini.” 21 Narago sikandan no pinountud dan on sikandin to balutu ran. Pogkountud on ni Hisus, nakaratong on to nigduungan dan.

Namangho ka mgo Otow ki Hisus

22 Sunud no allow, ka mgo otow no nagalat dio to doipag to lanow nigdoromdom dan to nigkita ran to sagboka ro no balutu. Woy songo nataga sikandan to waro nakasakoy si Hisus to sikan no balutu no nig-unturanan to mgo hibatoon ni Hisus no wa nigduma si Hisus kandan; wa mog-untud si Hisus. 23 Di nigduung ka mgo loin no balutu no ogligkat to Tibirias to sikan no masolom. Nigduung dio to marani to pigkoonan to nalibulung no mgo otow no nigkoon to paan no nigpasalamatan ni Hisus 24 Nò, ko nigkita to mgo otow to waro dio si Hisus woy ka mgo hibatoon din, nan-untud on ka sikan no mgo otow to sikan no loin no mgo balutu no nighondio to Kapirnaum oyow ogpamitawon dan si Hisus ko hondoi nigdolog.

Si Hisus ka Paan no Ogbogoy to Kouyagan

25 To nigkita ka mgo otow ki Hisus dio to doipag to lanow to sikan no pigkoonan dan, nig-inso dan ki Hisus. “Maistru,” kagi, “kon-u ka mokouma kai?” 26 Nigtabak si Hisus kuwo kandan. Kagi rin, “Malogot ka soin no ogkagion ku kaniu. Waro a now pamitawa su nakasabut kow to sikan no ingkoin-inuan no nighimu kud. Namitow kow koddi su nallantoy kow on to paan.” 27 Nig-udlingan pad ni Hisus sikandan no kagi rin, “Kono no ian now ogpoomotan ka koonon no ogkamolu do su ian now porom ogpoomotan ka sikan no koonon no kono ogkamolu no ogpuunan to kouyagan now no waro katamanan. Sikoddi, no Kakoy to mgo Koot-otawan,” kagi ni Hisus, “ogbogoy a kaniu to soini no koonon su pigbogayan ad to Amoy ku no Magboboot ka katondanan.” 28 Nig-inso dan ki Hisus, “Ogmonuon noy naan oyow ogtumanon noy ka mgo igsugu to Magboboot?” 29 Nigtabak si Hisus no kagi rin, “Soini ro ka oghimuon now. Tuu kow koddi su koddi ka nigsugu din kai to kaniu.” 30 Nig-inso dan, “Nokoy ka koykow no igpapitow no igkoin-inuan no oyow ogkitoon noy oyow ogtuu koy to kagi nu? Nokoy naan buwa?” 31 Kagi pa to mgo otow, “Ka minuna ta, ko rio alapa ki Moisis to sikan no holholawan, nigkoon to koonon no oghingaranan to mana no nigpuun dio to langit. Nakasulat man to Tahan no Kasulatan. Kagi to diblu, ‘Imbogoy ni Moisis ka paan no nigligkat to langit.’ ” 32 Nigtabak si Hisus no kagi rin, “Malogot ka soini no ogkagion ku kaniu. Kono no si Moisis ka ogligkatan to sikan no kalasi no paan. Ian ka ogligkatan ka Magboboot no Amoy ku. Agad kuntoon, ka Amoy ku ian ka ogbogoy to malogot no igkouyag ta no ogligkat dio to kandin. 33 Ka paan no igbogoy to Magboboot kuntoon, sikandin ian no nighondini no nigligkat dio to langit no ugpaan to Magboboot. Kandin ian ka nigbogoy to igkouyag to mgo otow kai to soin no kalibutan oyow ogkouyag no waro katamanan.” 34 Kagi to mgo otow kuwo ki Hisus, “Buyag, kanunoy koy bogayi to sikan igkouyag no paan.” 35 Nigtabak si Hisus kandan. Kagi rin, “Koddi ian ka sikan no paan no igkabuhi to mgo otow. Sikan no otow no ogtuu koddi, konad oggutasan woy sikan no mgo ogtuu koddi, konad ogkoibog no og-inum. 36 Inkagi kud on kaniu no nakakita kow on koddi di waro kow man ian mogsalig. 37 Tibo no mgo otow no nigpamootan to Amoy ku, sikandan ian ka ogtuu koddi. Woy agad hontow no ogtuu koddi, kono ku og-ongkoran sikandan; ogsagmanon ku ro sikandan 38 su nighondini a no ogligkat dio to langit pogtuman to pogboot to sika nigsugu koddi. Kono ian no tuud ku to ogtuman to koddi no goinawa. 39 Soini ka pogboot to nigsugu koddi. Ian to kono ogkalagak dio to dalan no oghondio to Magboboot ka agad sagboka to tibo no imbogoy rin to ogtuu koddi. Woy goinawa rin ian to ogpootawan ku sikandan to mohuri no allow. 40 Ian su soini ka goinawa to Amoy ku no Magboboot ian to sikan no otow no ogtokoron a rin to Anak a to Magboboot woy ogtuu ka sika otow koddi, ogkootawan ka sikan no otow no waro katamanan dio to kandin. Woy koddi, ogpootawan ku sikandin to sikan no mohuri no allow ta kai to soini no kalibutan. Ian ka goinawa to Amoy ku no Magboboot.” 41 Nò, nigmugongmugong ka mgo Hudiu su ka sikan no kagi rin to kandin ka sikan no igkouyag no ogligkat dio to langit. 42 Nò, nigkagi ran to, “Ka soin no otow, si Hisus, anak ni Husi. Nataga ki man ko hontow ka amoy rin, mgo inoy rin. Ko sikan naan, manio buwa to ignangon din to nigligkat dio to langit?” 43 Nigkagi ni Hisus kuwo kandan to, “Hagtong kow ka ogmugongmugong. 44 Kono ogpakapasakup koddi ka mgo otow ko kono oghun-a og-umow kandan to Amoy ku no nigsugu koddi dini. Agad ogpootawan ku ka sika mgo otow to sika mohuri no allow ta kai to soin no kalibutan. 45 Duon nigsulat to mgo talagnangon to kagi to Magboboot dongan no kagi ran, ‘Og-anaron to Magboboot ka tibo no mgo otow.’ ” Sikan ka nakasulat. Nò, sikan no mgo otow no ogdinog no ogkaanad to Magboboot, ogtuu ka sika otow koddi. 46 “Di kono no ian igpasabut ku to duon ka agad sagboka no otow no nigkita rin ka Amoy ku no Magboboot. Sikoddi do ka nigkita to Amoy su dio a nigligkat kandin.” 47 Nigparagas nigkagi si Hisus to, “Malogot ka soin no ogkagion ku kaniu. Sikan no otow no ogtuu, ogkouyag no waro katamanan. 48 Koddi ka paan no ogbogoy to igkouyag to mgo otow. 49 Nigkoon to mgo minuna now ka paan no oghingaranan to mana ko dio sikandan to holholawan. Di namatoy rod sikandan. 50 Di soini no paan no ogligkat dio to langit no innangon ku kaniu, ko ogkoonon to agad hontow ka soini no paan, ogkootawan no waro katamanan.” 51 Kagi ni Hisus, “Sikoddi ka sika igkouyag no paan no ogligkat dio to langit. Ko ogkoonon now ka soin no paan, kono kad on ogkamatoy. Ka igbogoy ku no paan, sikan ka koddi no lawa oyow ogkootawan ka mgo koot-otawan no waro katamanan.” Ian ka kagi ni Hisus. 52 Nò nigpaap-apuloy ka mgo igbuyag to mgo Hudiu no kagi ran, “Ka ku kow! Ogmonuon naan to soin no otow no ogbogoy kanta to lawa rin oyow ogkoonon ta?” 53 Kagi ni Hisus kandan, “Malogot ka soin no ogkagion ku kaniu bahin koddi no Kakoy to Koot-otawan. Ko kono now ogkoonon ka lawa ku, woy ko kono now og-inumon ka langosa ku, waro malogot no kouyagan now.” 54 Kagi pa ni Hisus, “Sikan no mgo otow no ogkoon to lawa ku woy og-inum to langosa ku, ogkouyag sikandan no waro katamanan. Agad koddi, og-uyagon ku sikandan to sikan no mohuri no allow. 55 Ian su ka koddi no lawa ka malogot no koonon woy koddi no langosa ka malogot no inumon. 56 Sikan no otow no ogkoon to lawa ku woy og-inum to langosa ku, ogkasalupong ki. 57 Ka Amoy ku no ogligkatan to tibo no igkouyag, nigsugu a rin dii. Nò, sikandin ka ogligkatan to koddi no malogot no igkouyag. Songo unawa ka sikan no otow no ogkoonon din ka lawa ku, ogbogayan ku sikandin to ogkootawan do no waro katamanan. 58 Soini naan ka paan no ogligkat dio to langit. Kono no unawa to sikan no paan no nigkoon to mgo minuna now no namatoy ro sikandan. Sikan no mgo otow no ogkoonon dan ka soin no paan, ogkootawan do no waro katamanan.” 59 Sikan ian ka innangon ni Hisus ko nig-aanad dio to anaranan to mgo Hudiu dio to lunsud to Kapirnaum.

Ka mgo Kagi no Ogbogoy to Ogkouyag no Waro Katamanan

60 Ko nigdinog ka mgo sakup, mohon-ing no nigkagi to, “Mohirap ka soin no innangon din. Hontow buwa ka ogpakasabut to soini?” 61 Di nataga si Hisus dio to goinawa rin to ogmugongmugong ka mgo sakup din bahin to sikan no in-anad din. Nò, nig-inso din kandan to, “Nakabalabag buwa to pogtuu now ka soini no innangon kud? 62 Nò, ko ogkasasow kow to soini,” kagi ni Hisus, “ko pananglitan, koddi no Kakoy to koot-otawan, ko ogkitoon a now on no ogbatunon ad dio to ogligkatan ku, nokoy pad buwa ka sumansuman now? 63 Ka Gimukud to Magboboot ka ogbogoy to kouyagan no waro katamanan. Kono ogkohimu pinabayo to goinawa to otow. Sikan no in-anad ku kaniu, nigpuun dio to Gimukud to Magboboot no pinabayo to soini, ogbogayan kow to kouyagan no waro katamanan. 64 Di duon kai to kaniu no waro nigtuu.” Sikan ka kagi su nataga on tahan si Hisus ko hontow kandan ka kono ogtuu. Songo nataga ko hondoi no hibatoon din ka ogtabod pad kandin. 65 Kagi ni Hisus kuwo to mgo sakup din, “Nataga a man to duon no kono ogtuu koddi.” Sikan ka tuud ku to ognangon kaniu to kono ogpakatuu ka agad hontow ko waro pogboot to Amoy ku. 66 Nò, mohon-ing no ogpasakup porom ki Hisus, konad on ogduma kandin; konad ogpasakup su ka sika no innangon din. 67 Nò, nig-inso ni Hisus ka sika no sampulu woy darua no hibatoon din no nig-alam din to, “Sikaniu, songo ongkod kow buwa koddi?” 68 Nigtabak si Simon Pedro no nig-inso din to, “Buyag, hontow buwa ka ogdumaan noy ko konon sikoykow? Sikoykow naan do ka ogligkatan to kagi no kouyagan noy no waro katamanan. 69 Ko sikanami, nigtuu koy on no nataga koy on to sikoykow ian ka matuwarong no pigsugu to Magboboot no nigligkat dio to kandin to oghondini to soi kalibutan.” 70 Kagi ni Hisus kuwo kandan, “Sikoddi, nig-alam ad kaniu no sampulu woy darua. Di duon sagboka kaniu no sakup ni Satanas.” 71 Si Hudas no anak ni Simon Iskarioti ka innangon din. Su si Hudas, agad kandin ka duma no hibatoon no nig-alam ni Hisus, ogtaboron din pad si Hisus.

Huan 7

Waro Pogtuu to mgo Hari ni Hisus Kandin

1 Ko nigponga ka soin no in-anad ni Hisus no igmasakit to goinawa to mohon-ing no mgo otow, nighihipanow on woy si Hisus dio do to Galilia. Kono dan oghihipanow dio to Hudia su ka mgo igbuyag to mgo Hudiu, ogkoiniatan dan porom to oghimatoy ki Hisus su ka in-anad din. 2 Nò, marani on ka allow to sika poglimudlimud to mgo Hudiu no oghingaranan dan to Pagkoonan to mgo Pinayag. 3 Nò, kagi to mgo hari ni Hisus kandin, “Hipanow ka; oghondio ka to Hudia oyow ogkitoon to mgo sakup nu dio ka oghimuon nu no kabolbolongan kun. 4 Dio nu ipapitow su kono igholos to mgo otow ka oghimuon dan su ian dan ogkoiniatan oyow ogmabantug ka ngaran dan. Ko oghimuon nu ka mgo igkoinuinu no papitawa nu ka tibo no mgo otow; kono no dii ro no mgo otow.” 5 Ian do ka kagi ran su agad hari ni Hisus sikandan wa dan pad nigtuu kandin. 6 Kagi ni Hisus kuwo to mgo hari rin, “Waro pad mokouma ka litos no allow ku to oghondio to ogtuman to bantaan to Magboboot koddi. Di kaniu, tibo no mgo allow litos ko oghipanow kow. 7 Sikaniu, kono no usig now ka mgo otow kai to kalibutan. Di sikoddi atag, pig-usig a to mgo otow su ungod ku ognangoni sikandan to maroot ka oghimuon dan.” 8 Nigkagi pa ni Hisus no kagi rin, “Kaniu man, hipanow kow dio to Pagkoonan. Di sikoddi atag, kona a pad ogduma kaniu su waro pad mokouma ka litos no allow ku no oghondio.” 9 Sikan ka kagi rin kandan no nig-ugpo pad sikandin dio to Galilia no waro mogduma kandan. 10 Ko nanhipanow on woy ka mgo hari rin, songo nighipanow si Hisus. Di sagboka rin do atag to oghipanow. Pigholosan din ka mgo otow to poghipanow rin. 11 Nò, dio to Hirusalim to sika Pagkoonan ogpamitawon to mgo igbuyag to mgo Hudiu si Hisus. Kagi ran, “hondoi buwa si Hisus?” Sikan ka inso dan. 12 Ka mgo nalibulung no mgo otow dio, ognaasnaasan dan do bahin kandin. Duon mgo otow no kagi ran, “Maroyow no lukos sikandin.” Di kagi to duma no mgo otow, “Kono man no maroyow sikandin su oggawayan din ka mgo otow.” 13 Nignaasnaas do sikandan su ogkahallok do to mgo igbuyag to mgo Hudiu. 14 Ko pokogbotak on ka Pagkoonan, nighondio si Hisus to Dakol no Ampuanan to mgo Hudiu. Nò, nig-anad to mgo otow dio. 15 Noinuinu ka mgo Hudiu dio to pog-anad din no kagi ran, “Nokoy buwa soini nò! Dakol ka katagaanan to soin no lukos no waro man nig-anad kai to kanami.” 16 Nigtabak si Hisus kuwo kandan to, “Kono ogligkat to koddi no goinawa ka soin no ig-anad ku kaniu. Nigligkat dio to Magboboot no nigsugu koddi. 17 Sikan no otow,” kagi ni Hisus, “no ogkoiniat to oghimu to insugu to Magboboot, ogkataga sikandin to in-anad ku, ko dio buwa ogpuun to Magboboot woy ko ogkagion ku ro duon to koddi do no goinawa to ogboot. 18 Sikan no otow no ogkagi no ogligkat to kandin do no goinawa no ogboot ogkoiniatan din to ogkasayo ka kandin no ngaran. Di sikan no otow atag no ian din igkoiniat to ogkasayo ka sika nigsugu kandin, ogkatuuwan ka sikan no otow woy kono din og-ubatan ka mgo otow.” 19 Nigkagian ni Hisus ka mgo igbuyag to mgo Hudiu. Kagi rin, “Nigbogoy ni Moisis kaniu ka Balaod no impasulat to Magboboot kandin dongan. Di sikaniu, waro agad sagboka kaniu no ogtuman to soini no Balaod. Manio naan to duon bantaan now to oghimatoy koddi?” 20 Ka nalibulung no mgo otow ka nigtabak. Kagi ran, “Pigsoloran ka to busow. Hontow naan ka oghimatoy koykow porom?” 21 Di nigtabak si Hisus no kagi rin, “Nigbawian kud ka sagboka no lukos to sikan no Allow to Oghimoloy no noinuinu kow tibo to pighimu kud. 22 Nigsugu ni Moisis to igpatuli ka mgo anak now no lukos. Si Moisis ka nigsugu kaniu di ka mgo minuna pad ni Moisis songo igpatuli ka mgo anak dan. Di sikanta kuntoon, ogtulion ta ka mgo bato to Allow ta to Oghimoloy. 23 Ogtulion ta ka bato to Allow ta to Oghimoloy oyow to pogtuman ta ka sikan no sagboka no sugu ni Moisis. Ko sikan ian ka kaniu no oghimu ko Allow ta to Oghimoloy, manio naan to ogkabolu kow koddi to nigbawian kud ka sagboka no otow to Allow ta to Oghimoloy? 24 Kono now ogbobooti ka duma now to pinabayo to ogkitoon now ro. Woy ka ro ogboot ko ogkatagaan nu ko litos.”

Sikandin buwa ka Im-imanan ta?

25 Duon duma no mgo otow no dio to Hirusalim og-ugpo no kagi ran, “Soini buwa ian ka otow no oghimatayan porom to mgo igbuyag ta. 26 Nò, kai man do ogkakagi dio to tangkaan to mgo otow di waro agad sagboka no ogsapad kandin. Nataga buwa ka mgo igbuyag ta to soini ka Im-imanan to mgo Koot-otawan. 27 Di ko ogpokouma ka Im-imanan ta, waro gindawanan ta ko hondoi ogligkat kandin. Di nataga ki atag ko hondoi no otow no soini.” Ian ka kagi to mgo otow. 28 Nigbabansagon si Hisus to pog-anad dio to Dakol no Ampuanan dan. Kagi rin, “Nò, nakatokod kow kun koddi woy natagaan a now kun ko hondoi a nigpuun. Di kono sikoddi no pogboot to oghongkai. Ka nigsugu koddi no malogot sikandin no waro kow mogtokod kandin. 29 Di sikoddi atag, ogtokoron ku man sikandin su dio a man nigligkat no kandin ka nigsugu koddi.” 30 Ko nakaponga nigkagi si Hisus, nigdakop to mgo igbuyag poron. Di waro makatood sikandan su waro pad mokouma ka allow rin. 31 Di mohon-ing no otow no nalibulung dio no nigtuu on kandin. Nigkagi to, “Kandin man ian buwa ka Im-imanan ta su waro otow no ogpokohimu to mgo koin-inuan to labow to sikan no nighimu rin.” Mgo Talagbantoy no Impaalap dan Oyow to Pogdakop ki Hisus 32 Nakarinog ka mgo igbuyag to Parisiu to mgo otow no ognaasnaas do to mgo duma ran bahin ki Hisus. Nò, ka sikan no mgo Parisiu woy ka mgo igbuyag to mgo talagpanubad ka nigsugu to mgo sundalu no talagbantoy to ampuanan dan oyow ogdakopon dan on si Hisus. 33 Kagi ni Hisus kuwo to mgo otow, “Malopot naan do ka pog-ugpo ku kai to kaniu no oghipanow ad dio to sikan no nigsugu koddi. 34 Ogpamitawon a now, di kona a now on ogkitoon su kono kow man ogpakasundul dio to ogdatongan ku.” 35 Nigmoin-insooy ka mgo igbuyag to mgo Hudiu no ogsawayan dan no kagi ran, “Oghondoi buwa og-ugpo ka soin no lukos no kono ta ogkitoon sikandin? Ka goinawa rin buwa ian to oghondio to duma ta no mgo Hudiu no nakaamut to mgo Griego no otow. Og-anaron din buwa ka sikan no mgo Griego.” 36 Nigkagi pad sikandan to, “Nokoy buwa ka kalitukan to kagi rin ko nignangon to ogpamitawon ta sikandin no kono ta ogkitoon sikandin. Woy nokoy buwa ka kalitukan ko nignangon to kono ki ogpakasundul dio to ogdatongan din?” Sikan ian ka mgo inso to mgo igbuyag to Hudiu.

Ka Woig no Ogpokouyag

37 To noumaan on to mohuri no allow to sikan no Pagkoonan dan no soini ka labow no allow, nò, nigsasindog si Hisus dio no nigbabansagon. Kagi rin, “Wow mgo sulod, mgo anggam. Sikan no otow no ogkoibog to og-inum, oghondini koddi oyow og-inum.” 38 Ogkounawa ian to nigpasulat to Magboboot dio to Tahan no Kasulatan nokani. Kagi, “Sika otow no nigtuu koddi, duon dio to goinawa rin no ogkounawa to og-ugwak no bougan no oglibuwas no ian ka ogbogoy to kouyagan to mgo duma rin ko ogkoibog to og-inum.” 39 Ka litukan to soin no kagi ni Hisus bahin to mgo bougan, sikan ka Gimukud to Magboboot no magaan no ogtinawo to mgo nigtuu kandin. Ko nigkagi si Hisus dio to sikan no Pagkoonan, wa pad bogayi ka mgo otow su wa pad mamatoy si Hisus no wa pad batuna dio to langit. Mohon-ing so mgo Sumsumanan to mgo Otow Bahin ki Hisus 40 Ko nigdinog ka mgo otow to mgo in-anad ni Hisus, nigkagi ka duma to, “Soini buwa ian ka sika Talagnangon to kagi to Magboboot no ogpokohun-a to sikan no ogtagaran ta.” 41 Kagi to duma, “Soini ian ka Im-imanan to mgo Koot-otawan.” Di nigtabak ka duma no kagi ran, “Wa mogligkat dio to Galilia ka Im-imanan ta. 42 Ian ka inkasulat to Magboboot dio to Tahan no Kasulatan to pinanganak ni labow no Igbuyag Dabid ka Im-imanan ta woy to dio kun to Bitlihim mootow no ian ka lunsud ni Dabid dongan.” 43 Nò, mohon-ing so mgo sumansuman dan tongod ki Hisus. 44 Duon mgo otow no ogkoiniatan dan to ogdakopon dan porom si Hisus. Di waro makatood to ogdakop kandin.

Waro Mogtuu ka mgo Igbuyag to mgo Hudiu

45 Ko niglibong ka mgo sundalu no talagbantoy dio to mgo igbuyag to talagpanubad woy ka mgo Parisiu nig-insaan ka mgo talagbantoy, “Manio to waro kow makarakop?” 46 Nigtabak ka mgo talagbantoy to, “Waro pad otow no ogpakakagi no unawa ki Hisus.” 47 Nig-inso ka mgo Parisiu to mgo talagbantoy, “Sikaniu, songo nagawayan kow on buwa? 48 Og-inso koy kaniu ko duon buwa ka sagboka kanami no igbuyag now woy ko sagboka no Parisiu no nigtuu kandin? Waro man! 49 Soini no nalibulung no mgo otow kuntoon no ogpamminog ki Hisus, waro gindawanan dan to Balaod ni Moisis. Ogkoumaan do sikandan to tungayow no ogligkat to Magboboot.” 50 Si Nikodimu ka sikan no igbuyag no Parisiu no nighondio ki Hisus ko marusilom. Kagi rin kuwo to mgo duma rin no igbuyag, 51 “Duon to Balaod ta to kono ta ogkabobootan ka otow no nabayungan ko kono ta pad ogkohusoy. Agad woy tad ogboboot ko ogkatagaan tad ka salo din.” 52 Nig-inso ka mgo duma rin no igbuyag to, “Agad sikoykow, taga Galilia ka? Basa ka to Tahan no Kasulatan ta oyow ogkataga ka to waro isulat to Galilia ka ogligkatan to agad sagboka no talagnangon to kagi to Magboboot.”

Huan 8

Ka Boi no Nakitaan ko Nakalibug

1 Nan-uli ka tibo no mgo otow, di si Hisus, nighondio to sikan no bubungan no oghingaranan to Olibu. 2 Ko mapawo on, niglibong si Hisus dio to Dakol no Ampuanan dio to Hirusalim. Nalimuran to mgo otow sikandin no nigpinnuu si Hisus woy nig-anad kandan. 3 Ko og-aanad pad, nigduma to mgo talag-anad to Balaod dan woy ka mgo Parisiu ka songo boi no nakitaan no oghulid to kono no asawa rin. Impasasindog dan ka sikan no boi dio to taliwaro to mgo otow. 4 Kagi to mgo talag-anad, mgo Parisiu kuwo ki Hisus, “Maistru, nakitaan ka soin no boi no oghulid to kono no asawa rin. 5 Duon to Balaod ta ka insugu ni Moisis to ogdogpakon to batu ka unawa to soini no boi hantod to ogkamatoy. Sikoykow man, nokoy ka kagi nu bahin to soin no boi?” 6 Soini ka inso dan ki Hisus oyow og-ol-ologan dan porom ko ogpaagad-agad si Hisus to Balaod dan woy ko kono. Ian oyow ko konon litos ka tabak din, sikan ka igbayung dan kandin. Nò, si Hisus, nig-unduk woy nigsulat dio to tano to tinuru din. 7 Ko pighutuk dan insaa, nigtonggak on si Hisus no kagi rin kuwo kandan, “Ko hontow kai kaniu no waro salo, kandin ka oghun-a ogdogpak to batu.” 8 Nò, nighutuk niglukbu woy nigsusulat nighutuk dio to tano. 9 Di ka mgo talag-anad, mgo Parisiu, ko nigdinog to kagi rin, tag sagboka kandan no oghipanow. Ka buyagbuyag no mgo lukos ka nighun-a taman to ka boi naan do ka nagalat dio ki Hisus. 10 Nigtonggak si Hisus no kagi rin to sikan no boi, “Igi, hondoi ka mgo nigbayung koykow? Warad nagalat no sagboka no ogbobootan sikoykow?” 11 Nigtabak ka boi no kagi rin, “Warad, Buyag.” Kagi ni Hisus, “Songo kono ku ogbobootan sikoykow. Uli ka di kono kad oghutuk oghimu to salo.”

Si Hisus ka Ogbat-ow to Goinawa to mgo Otow

12 Nokoy pad, nighutuk nigkagi si Hisus to mgo otow. Kagi rin, “Koddi ka Igbat-ow to goinawa to mgo otow kai to soin no kalibutan. Sikan no otow no ogpasakup koddi, kono no dio to marusilom ka igkabuhi din. Duon kouyagan din no waro katamanan.” 13 Kagi to mgo Parisiu ki Hisus, “Kono no malogot ka ogkagion nu su ogligkat do to koykow no goinawa ka ogdoromdomon nu to ogkagi to soini. Ogtitigus ka ro to koykow no goinawa.” 14 Kagi ni Hisus, “Agad naan, malogot ka kagi ku su nataga a man to ogligkatan ku woy ka ogdatongan ku. Di sikaniu atag, waro kow mataga ka ogligkatan ku woy ka ogdatongan ku. 15 Sikaniu, ogboboot kow ro to kaniu no ogdoromdoman. Di sikoddi atag, kono a ogboboot to agad hontow. 16 Di pananglitan, ko ogbobootan ku ka songo otow, malogot ian no igboot ku. Di konon sikoddi do ka ogboot to soini. Ka Amoy ku no Magboboot no nigsugu koddi ka duma ku to ogboot. 17 Nasulat to Balaod now to malogot ka kagi ko ogtitigus ka darua no otow ko un-unawa ka ignangon dan. 18 Nò man, koddi ka sagboka no ogtitigus to tuud ku dii woy ka Amoy ku no nigsugu koddi no oghongkai, kandin ka igkadarua no ogtitigus to tuud ku kai.” 19 Nig-inso dan si Hisus, “Hondoi og-ugpo ka Amoy nu?” Nigtabak si Hisus to kagi rin, “Waro a now tokora woy songo waro now tokora ka Amoy ku su ko nigtokod kow porom koddi no ogkatagaan now ka Amoy ku ko hondoi mog-ugpo.” 20 Sikan ka kagi ni Hisus ko og-aanad dio to solod to Dakol no Ampuanan dan no dio to marani to taguanan to salapi no igbogoy to mgo otow. Mohon-ing so otow ka ogbayo dio di waro makarakop kandin su wa pad mokouma ka litos no allow rin.

Kono kow Ogpokohondio to Datongan ku

21 Kagi pa ni Hisus kandan to, “Koddi, og-awa a pad dini. Ungod a now ogpamitawa di kona a now ogkitoon. Ogkamatoy kow ro no wa maawo ka salo now. Kono kow ogpakasundul dio to ogdatongan ku.” 22 Moin-insooy ka mgo Hudiu no ogsamilian dan. Kagi ran, “Manio buwa ka sikan no kagi rin to kono ki ogpakasundul dio to kandin no ogdatongan? Nokoy buwa ka kalitukan? Oghimatayan din buwa ka lawa rin!” 23 Nigtabak si Hisus to sikan no mgo otow. Kagi rin, “Sikaniu, dii kow ro to tano ogligkat di sikoddi, nigligkat a dio to langit. Sikaniu taga dii kow to kalibutan di sikoddi, kona a no taga dii to kalibutan.” 24 Kagi pa ni Hisus, “Nignangonan kud sikaniu to ogkamatoy kow ro duon no waro maawo ka salo now. Nò, malogot soini ko kono kow ogtuu to koddi ka nigtagaran now no Im-imanan to mgo Koot-otawan.” 25 Nig-inso kandan ki Hisus, “Hontow naan sikoykow?” Nigtabak ni Hisus no kagi rin, “Amana soin no mgo otow no ulit. Unawa ian to nokani no innangon ku kaniu.” 26 “Sikoddi, mohon-ing porom ka kagi ku bahin kaniu woy mohon-ing ka igboot ku porom to oghimuon now. Di kona a su ian ku ignangon kaniu ka nigdinog kud to sikan no nigsugu koddi kai to soin no kalibutan no malogot ka tibo no ignangon din.” 27 Di waro kandan makasabut to nigkagian sikandan to Magboboot no Amoy ka innangon din. 28 Nò, kagi pa ni Hisus kuwo kandan. “Koddi no Kakoy to Koot-otawan, ig-ampow a now dio to krus no oglindogon now ka sikan no krus. Bali pad naan, ogkataga kow on to koddi ka nigtagaran now no Im-imanan to mgo Koot-otawan. Songo ogkataga kow on to kono ogligkat to koddi no bobootan ka agad nokoy no oghimuon ku di ka ignangon ku kaniu ka ig-anad koddi to Amoy ku. 29 Kandin no nigsugu koddi, kona a rin og-ongkoran su ian ku oghimuon ka maroyow no igkarago din,” kagi ni Hisus. 30 Nò, mohon-ing no mgo otow no nigdinog to soin no kagi ni Hisus, nigtuu on sikandan kandin

Ka Kamalogotan, ian Ogbogoy Kaniu to Kalipuasan

31 Nò, nigkagian ni Hisus ka mgo Hudiu no nigtuu on kandin. Kagi rin, “Ko ian now ro ogtumanon ka ig-anad ku, malogot no sakup ku sikaniu. 32 Woy ogtokoron now on ka malogot no ka kamalogotan, ian ogbogoy kaniu to kalipuasan.” 33 Nigtabak kandan no kagi ran, “Pinanganak koy ni Abraham. Agad kon-u, waro koy sugua to kono no duma noy. Manio to nigkagi nu to duon igpalipuas kanami? Nokoy ka kalitukan to soini?” 34 Nigtabak si Hisus kuwo kandan. Kagi rin, “Malogot ka soin no ogkagion ku kaniu. Agad hontow no ungod ogpakasalo, ogkouripon kandin to salo din. 35 Ka uripon, ka talagbanwa to baloy ka tagtuun kandin. Kono amana no ogpokougpo dio to sagboka no lunggunan. Di ka anak to talagbanwa, patalaamoy ian taman to katamanan. 36 No ko sikoddi no Anak to Magboboot, ko ogpalipuason ku sikaniu to salo now, litos ian no ogkalipuwasan kow; kono kow on no oripon. 37 Nataga a man to pinanganak kow ni Abraham. Di duon bantaan now koddi to oghimatayan a now su kono kow man ogtinawo to ig-anad ku kaniu. 38 Koddi, ignangon ku kaniu no impakita to Amoy ku koddi. Di sikaniu, ogpaagad-agad kow to ogsuguon to kaniu no amoy.” 39 Nigtabak kandan kuwo ki Hisus. Kagi ran, “Si Abraham ka kanami no amoy.” Kagi ni Hisus, “Ko malogot pa porom no anak kow ni Abraham, songo oghimuon now porom ka pighimu ni Abraham. 40 Di kuntoon, oghimatayan a now no sikoddi ka ognangon kaniu to malogot no pigdinog ku no ogligkat to Magboboot. Di duon atag bantaan now to oghimatoy koddi. Waro moghimu si Abraham no unawa to soini! 41 Oghimuon now to pighimu to amoy now no maroot.” Nigtabak kandan to, “Kono koy no anak dio to libuwasan. Sagboka ro ka kanami no amoy; ka Magboboot ian.” 42 Kagi ni Hisus kuwo kandan, “Ko amoy now ka Magboboot, duon porom goinawa now koddi su dio a man to nigligkat no kuntoon, kai ad on. Waro a moghondini to koddi no katondanan ko kono no igpaalap a rin do. 43 Manio naan to kono kow ogpakasabut to ogkagion ku? Kono kow ogpakasabut to kono now ogtinawoon ka koddi no ignangon. 44 Sikaniu, amoy now si Satanas woy ka goinawa now ian to oghimu to agad nokoy no igkoiniat din. Sikandin, tahan no talagbunu no nigbunsud ko iam pad mohimu ka kalibutan. Waro nigpaginlabot to kamalogotan su waro man dio to kandin ka malogot no kinagian. Ko og-uubat sikandin batasan din ian to ubaton woy sikandin ka ogligkatan to tibo no mgo ubat. 45 Di sikoddi, ignangon ku kaniu ka malogot do no ignangon. Sikan ian no kono now ogtuuan ka koddi no ignangon.” 46 Nig-inso pad ni Hisus to, “Hontow dapit kaniu ka nakatitigus to nakasalo a? Waro! Ko ogkagi a kaniu to malogot no kinagian, manio to kono kow ogtuu koddi? 47 Sikandin no ogligkat dio to Magboboot, ogpamminog atag to kagi to Magboboot. Sikaniu atag, waro kow mogligkat dio to Magboboot no ian kono kow ogpamminog kandin.”

Si Hisus woy si Abraham

48 Nigtabak ka mgo igbuyag to mgo Hudiu. Kagi ran ki Hisus, “Malogot man ian ka kagi noy to taga Samaria ka no nigsoloran ka to busow.” 49 Nigtabak si Hisus, “Waro a masolori to busow. Ko sikoddi, ogsayoon ku ka Amoy ku. Di sikaniu atag, ogsumpaliton a now ro. 50 Di kona a ogpatahud to mgo otow ka koddi no ngaran. Di duon ogtahud koddi no sikandin ka ogboboot to pogsayo koddi.” 51 Kagi pad ni Hisus, “Malogot ka soin no ogkagion ku kaniu. Sikan no otow no ogtumanon din ka ig-anad ku, kono ogkamatoy sikandin.” 52 Kagi to mgo Hudiu kuwo kandin, “Otowoy ra! Kuntoon, nataga koy on to nigsoloran ka to busow. Si Abraham, mgo talagnangon to kagi to Magboboot, tibo, namatoy ro. Di sikoykow atag no kagi, ko ogtumanon to otow ka kagi nu, kono ogkamatoy sikandin. 53 Woy ka mgo talagnangon to kagi to Magboboot nokani, tibo, namatoy on. Kono nu buwa ignangon to labow ka to kanami no amoy no si Abraham no namatoy on? Nokoy ka pogtuu nu koykow? Hontow ka man?” 54 Nigtabak si Hisus, “Ko ogpatahud ku ka koddi no ngaran, waro pulus to sikan igtahud koddi. Di ka Amoy ku ka ogsayo koddi no sikandin kun ka Magboboot now. 55 Di wa kow nigtokod kandin di sikoddi, pigtokod ku atag sikandin. Ko ignangon ku pa to wa ku tokora, ubaton a no ogkounawa kaniu. Di nataga a man kandin woy ogtumanon ku ka ogkagion din. 56 Dongan, narago lagboy ka apu now no si Abraham to sikan no allow to sika poghondini ku. Nò, natagaan din soini no narago on.” 57 Kagi to mgo Hudiu kuwo ki Hisus, “Waro pad nokouma ka kalimmaan no tuid no inkootow nu no nakakita kad ki Abraham! Ka ku kow!” 58 Kagi ni Hisus, “Malogot ka soin no ogkagion ku kaniu to waro pad mootow si Abraham, duon ad on tahan.” 59 Nò, nabolu lagboy ka mgo Hudiu. Nò, nigmamurut kandan ka mgo batu no ogdogpakon dan porom si Hisus. Di si Hisus, niglonus on no nig-ongkod dio to Dakol no Ampuanan.

Huan 9

Pigbawian ni Hisus ka Otow no Inkabato din no Nabutud

1 Poghipanow si Hisus, mgo hibatoon din nigkita rin ka songo lukos no nabutud ligkat to pogkootow rin. 2 Nig-inso ka mgo hibatoon din kandin to, “Buyag, hontow ka nakasalo kandan to inkootow rin ka inkabutud? Sikandin buwa woy ko ginikanan din?” 3 Nigtabak si Hisus. Kagi rin, “Wa labot to kandin no salo woy ko salo to amoy rin mgo inoy rin to nabutud sikandin. Di nigbogoy ka Magboboot to nabutud oyow ogkitoon ka kabogbogan to Magboboot ko ogbawian din ka nabutud. 4 Oghimuon tanow ka insugu to sikan no nigsugu koddi to duon dod allow ta. Ogpokouma on ka marusilom no warad ogpokohimu, agad hontow. 5 To duon a rod kai to soin no kalibutan, koddi ka igbat-ow to sumsumanan to mgo otow.” 6 Ko nakapongan nigkagi, nig-ilob si Hisus dio to tano no pig-amutan din ka ilob din to basak. Nò, impoid din ka basak dio to mata to sikan no nabutud. 7 Nò, kagi rin kuwo kandin, “Dio ka ogpandop-ug to sikan no nalinsobuk no woig no oghingaranan to Siloam.” Ka kalitukan to Siloam, “Pinaalap.” Nò, nighondio ka nabutud, nigpandop-ug on sikandin woy niglibong no nakakita on. 8 Pogkita to mgo otow dio to songo baloy ran woy ka duma no mgo otow no nigkita kandin no ogbuyuan din to salapi dongan, kagi ran, “Soini buwa ian ka otow no ogpinpinnuu no ogpamuyu to salapi kanta!” 9 Nigtabak ka duma to, “Hoo sikandin man ian.” Duon dod duma no nigtabak no kagi ran, “Kono no soini; ogkounawa ro kandin.” Nò, nigkagi on ka sikan no nabawian on. Kagi rin, “Sikoddi man ian.” 10 Nig-insaan dan sikandin, “Noomonu ka man to ogpakakita kad on?” 11 Nigtabak ka nabawian. Kagi rin, “Sikan no lukos no ngaran din si Hisus, nighimu rin ka basak no ian din impoid to mata ku. Nò, nigsugu a rin to oghondio to sikan no woig no oghingaranan to Siloam woy to ogpandop-ug a dio. Nò, nigpaagad-agad a no oghondio no nigpandop-ug ad no nakakita ad on.” 12 Nig-inso ka mgo otow, “Nighondoid naan si Hisus kuntoon?” Nigtabak ka nabawian to, “Wa kud matagoi ko hondoid on.”

Pig-insoinso ka mgo Parisiu to Pogbawi to Nabutud

13 No, nigduma ran ka nabutud no nabawian dio to mgo Parisiu. 14 Sikan no allow no nighimu ni Hisus ka basak woy pigbawian din ka nabutud, sikan ka Allow to mgo Hudiu to Oghimoloy. 15 Nò, to nokouma on dio to mgo Parisiu, nig-insaan dan ka sikan no nabawian to noomonu kandin to nakakita on. Kagi rin kuwo kandan, “Nigpoiran din ka mata ku to basak woy pinapandop-ug a rin no kuntoon ogpakakita ad on.” 16 Kagi to duma no mgo Parisiu bahin ki Hisus, “Soin no lukos nò! Waro sugua to Magboboot su kono ogtuman to Balaod ta to kono ki ogtalabau ko Allow ta to Oghimoloy.” Di nigkagi ka mgo duma ran no kagi ran to, “Kono ogkohimu ka koin-inuan ko duon salo din.” No nabaad ka goinawa ran. 17 Hutuk man do insaa to mgo Parisiu ka sikan no nabawian. Nig-inso dan, “Sikoykow, nokoy ka koykow no goinawa kandin su ka koykow no mata ka nigbawian din?” Nigtabak no kagi rin, “Talagnangon to kagi to Magboboot sikandin.” 18 Di ka soin no mgo buyag to Hudiu, kono ogtuu to nabutud ka soin no lukos woy nabawian on taman to nigpaangoy ran ka amoy mgo inoy to sikan no lukos. 19 To nokouma on, nig-inso dan to, “Soini ka anak now no innangon now to nabutud ligkat to pogkootow rin? Manio buwa to ogpakakita on sikandin?” 20 Nigtabak ka amoy rin mgo inoy rin to, “Nataga koy man to soini ka anak noy woy to nabutud ligkat to pogkootow rin. 21 Di waro koy mataga atag to manio ko ogpakakita kuntoon. Woy waro koy mataga ko hontow ka nigbawi to mata rin. Inso kow kandin su balubato on sikandin. Ogkataga to ogtabak ko noomonu ka lawa rin.” 22 Sikan ian ka intabak to amoy rin, mgo inoy rin su ogkahallok to mgo igbuyag to Hudiu su duon pigsabutan dan to mgo igbuyag. Innangon to mgo igbuyag dan to kono ogpakasolod no og-ampu to anaranan dan ka sika otow no ognangonnangon to si Hisus ka Im-imanan to mgo Koot-otawan. 23 Sikan ka kagi to amoy rin mgo inoy rin to, “Inso kow kandin; balubato on man sikandin.” 24 Nò, hutuk umowa ka sikan no nabutud no kagi ran kuwo kandin. “Nangoni koy to malogot no kai ki to tangkaan to Magboboot. Ka kanami no mgo buyag nu nataga koy to makasasalo no otow ka sikan no lukos no pigbawian ka mata nu.” 25 Nigtabak ka nabawian kandan. Kagi rin, “Koddi, wara a mataga ko makasasalo sikandin woy ko kono. Di nataga a atag to nabutud ad di kuntoon ogpakakita ad.” 26 Kagi ran kuwo kandin, “Pigmonu ka rin to pigbawi to mata nu?” 27 Nigtabak to, “Nignangonan kud on sikaniu di waro kow nigpamminog. Manio naan to oghutuk kow og-inso? Agad sikaniu, ogkoiniatan now buwa to ogpasakup kow kandin.” 28 Nò, ogsamilian dan porom sikandin no kagi ran, “Koykow, nigpasakup kad kandin? Di kanami atag, sakup koy ni Moisis. 29 Nataga koy to nigkagian to Magboboot si Moisis. Di soin no lukos nò, wa koy mataga ko hondoi mogligkat sikandin.” 30 Nigtabak ka nabawian. Kagi rin, “Ka ku kow! Ogkoinuinu ki kaniu su waro kow mataga ko hondoi nigligkat di nigbawian din ka mata ku. 31 Nataga ki to kono ogpamminog ka Magboboot to mgo makasasalo. Di ka otow no ogtahud to Magboboot woy ogtuman to igsugu din, ogpamminog ka Magboboot kandin. 32 Ligkat pad to kabinunsuran to soin no kalibutan taman to kuntoon, waro a makarinog to duon ogbawi to mata to otow no igkootow rin ka inkabutud din. 33 Ko waro mogligkat ka soin no lukos dio to Magboboot,” kagi to sikan no nabawian, “waro porom ogkohimu rin no ogkounawa to soini.” 34 Nabolu on ka mgo igbuyag to Hudiu no nigtabak sikandan to nabawian. Nig-inso dan, “Umba sikoykow! Og-anad ka kanami porom? Sikoykow no nootow ka no nabutud woy makasasalo ka di kuntoon nig-anad kad on kanami no mgo talag-anad to tinuuan ta? Ka ku kow!” Nò, pigdogil dan sikandin no kono dan ogbogoy to oghutuk og-ampu dio to anaranan dan. 35 Pogdinog ni Hisus to nigdogil dan ka lukos, nigpamitow rin sikandin. Ko nigkita rin sikandin, nig-inso din, “Nigtuu kad on to Kakoy to mgo Koot-otawan?” 36 Nigtabak ka sika nabawian, “Buyag, nangoni a ko hontow sikandin oyow ogtuu a kandin?” 37 Kagi ni Hisus, “Nakakita kad kandin. Koddi ian ka ogkagi koykow kuntoon.” 38 Kagi to sika lukos, “Buyag, ogtuu ad on koykow.” Nò, nigluhud dio to tangkaan ni Hisus no ogsimba kandin. 39 Duon dod kagi ni Hisus to, “Nighondini ad to soi kalibutan oyow koddi ka ogpatokoron ka mgo otow ko nigtuu woy ko waro. Ka mgo otow no waro mataga to Magboboot no inat nabbutud sikandan, ogpakahimata. Woy ka mgo otow atag no nahan dan no ogpakakita kandan on ka ogkounawa to ogkabutud.” 40 Nakarinog ka duma no mgo Parisiu no marani kandin. Nò, nig-insaan dan si Hisus to, “Intagkos koy nikoykow to noiling koy to nabutud?” 41 Nigtabak si Hisus kandan to, “Ko nabutud kow pa no waro kow makasabut, waro porom salo nu. Di kuntoon su nignangon kow man to nakasabut kow on, duon on salo now.”

Huan 10

Ka Pananglitan Bahin to Talagbantoy to Karniru

1 Duon mgo pananglitan ni Hisus to mgo otow. Kagi rin, “Malogot ka soin no ogkagion ku kaniu. Sikan no otow no kono ogbayo to gumawan to alad to karniru no ogpamanoik do duon dio to alad, panakow ka sikan no otow woy pan-agow. 2 Di sikan no otow no ogsolod to gumawan, kandin ka talagbantoy to karniru. 3 Ogpulasan to talagbantoy to gumawan no ogpakasolod sikandin. Ogtokoron to mgo karniru rin ka lagong din. Og-umawan din ka kandin no karniru no ogdumoon din ka karniru rin dio to libuwasan. 4 Ko oglibuwas ka tibo, oghun-a ka sikan so talagbantoy no ogluyud ka mgo karniru su ogtokoron dan ka kandin no lagong. 5 Kono ogluyud to dangob no otow. Ogpallaguy ro duon su wa dan tokora ka lagong to songo otow.” 6 Sikan ian ka pananglitan ni Hisus kandan. Di waro makasabut sikandan to kalitukan.

Si Hisus ka Maroyow no Talagbantoy

7 Nighutuk nignangon si Hisus kandan oyow ogpakasabut porom sikandan. Kagi rin, “Malogot ka soin no ogkagion ku kaniu. Koddi ka gumawan to sikan no alad to karniru. 8 Ka tibo no dangob no mgo ogpan-anad no nokohun-a koddi to ogbantoy to mgo karniru porom, ogkounawa sikandan to mgo ogpan-agow woy mgo ogpanakow. Di ka mgo ogtuu koddi, ogkounawa sikandan to mgo karniru ku. Omunaan waro nigpamminog ka mgo karniru kandan.” 9 Kagi pa ni Hisus to, “Koddi ka gumawan. Sikan no otow no ogbayo kai to koddi, ogkalipuwasan ka sikan no otow to salo dan. Woy ogkounawa sikandin to karniru no ogpakalibuwas to ogpamitow to igkouyag din woy ogpakasolod dio to alad. 10 Ka panakow, ogsolod oyow ogpanakow woy ogpanhimatoy to mgo karniru no ogkaraat on. Sikoddi atag, ian ku nighondini oyow ogkabogayan ka mgo otow to kouyagan no waro katamanan.” 11 Koddi ka maroyow no talagbantoy to mgo karniru ku no ogpanagana ad on to ogpakimatoy to koddi no karniru. 12 Ka otow no ogbayaran do no ogbantoy to karniru, ko ogkitoon din ka mabolu no ogdawi to karniru, ogkahallok. Og-ongkoran din do ka mgo karniru no ogsalsalia on su kono man no sikandin ka tagtuun to karniru. Nò, ogdawion to sika mabolu ka karniru woy ogpokogsuwoysuwoy on ka duma. 13 Ogpallaguy ka sikan no ogpabantayan su kono no tagtuun to karniru sikandin. Waro goinawa rin to mgo karniru. 14 “Koddi ka Maroyow no talagbantoy to karniru. Nataga a ko hontow ka koddi no karniru woy nataga ka karniru ku koddi. 15 Ogkounawa ian to Amoy ku songo nataga koddi woy nataga a to Amoy ku. Agad ka koddi no kamatayon ka igliwan ku to kamatayon to mgo karniru ku.” 16 Nigkagi ni Hisus to pananglitan din. “Duon dod dangob no mgo karniru ku no waro pad makasolod to soin no alad. Og-angayon ku pad sikandan no ogpamminogon dan to kagi ku. Nò, ko naangoy on, sagboka ro sikandan no puntuk woy sagboka ro ka talagbantoy kandan tibo. 17 Dakol so goinawa to Amoy ku koddi su nigpanagana ad to igtob-us a to ogkamatoy oyow ogkouyag a ro. 18 Waro agad hontow no ogpakaboot to kamatayon ku; koddi ka ogboot. Duon katondanan ku to ogboot to ogpakimatoy a woy duon katondanan ku to ogkohutuk a ogkootawi. Soini ian ka insugu to Magboboot no Amoy ku koddi.” 19 Nò, ka mgo igbuyag to mgo Hudiu, ko nigdinog on to soin no kagi, waro nig-uunawa ka sumsumanan dan. 20 Mohon-ing ka nigkagi to, “Nigsoloran to busow ka soini. Nalangog on sikandin. Manio to ogpamminog ki kandin?” 21 Di kagi to mgo dangob, “Kono ogpakanangon ka nigsoloran to busow no unawa to kagi rin. Woy kono ogpakabawi ka busow to mata to mgo nabutud.”

Pig-iniugan si Hisus to mgo Hudiu

22 Ko tig-uran on, duon ka songo pagkoonan to mgo Hudiu no narago lagboy ka pogdoromdom dan. Nighingaranan dan soini to Pagkoonan to Pigtantanuran to Ampuanan dan. 23 To oghihipanow si Hisus dio to sika malayat no balkon to Ampuanan dan no oghingaranan to Balkon ni Solomon no 24 piglinglingotan to mgo Hudiu sikandin. Kagi ran kuwo ki Hisus, “Kon-u koy naan ognangoni ko sikoykow ka Im-imanan to mgo Koot-otawan woy ko kono? Ko sikoykow ian, nangoni koy on, kono koy on ogholosi.” 25 Nigtabak si Hisus kandan to, “Nignangonan kow on di wa kow nigtuu. Ka koddi no pighimu to ngaran to Amoy ku no Magboboot, sikan ian ka igkataga now to pigsugu a rin. 26 Di kono kow ogtuu su kono kow no duma to sikan no mgo sakup ku no oghingaranan ku to karniru ku. 27 Ogpamminog ka karniru ku to kagi ku. Nataga a kandan woy og-unugon a ran. 28 Ogbogayan ku sikandan to ogkootawan no waro katamanan. Kono ogpakaagow ka agad hontow kandan kai to koddi. 29 Ka Amoy ku no nigbogoy kandan kai to koddi, sikandin ka niglabow to tibo no waro ka agad hontow no ogpakaagow to mgo nigtuu dio to pogbantoy to Amoy ku. 30 Sikanami to Amoy ku woy sikoddi, sagboka koy ro.” Ian ka kagi ni Hisus. 31 Nò, pogdinog to mgo Hudiu to kagi ni Hisus, nigpurut dan ka mgo batu no igdogpak dan porom kandin. 32 Di nigkagian ni Hisus sikandan to, “Mohon-ing so maroyow no pighimu kud kai to kaniu no insugu to Amoy koddi. Nokoy buwa ka pighimu ku kai to kaniu to ogdogpakon a now porom?” 33 Nigtabak ka mgo Hudiu no kagi ran, “Ka mgo nighimu nu kono ian ogbatuon ka. Ka tuud noy, ian su nigsumpalit nud ka Magboboot. Otow ka ro porom. Manio to ogpogsokod ka to Magboboot?” 34 Nigtabak si Hisus kandan to, “Duon nasulat to Tahan no Kasulatan ta ka kagi to Magboboot bahin to mgo igbuyag ta dongan no nigkagi to, ‘Mgo magboboot kow.’ 35 Natagaan ta to malogot ka tibo no nigpasulat to Magboboot. Nò, nighingaranan din to mgo magboboot ka sikan no mgo igbuyag no nasaligan din to kagi rin. 36 Sikoddi, nig-alam ad to Magboboot no Amoy ku no nigsugu a rin kai to kalibutan. Nò, manio naan to ogbayung now to ogsumpalit a to Magboboot to pignangonan kud sikaniu to Anak a to Magboboot? 37 Ko kona a oghimu to igsugu to Amoy ku, kono kow ogtuu koddi. 38 Di ko oghimuon ku ka insugu koddi, agad kona a now ogtuuan, tuu kow to sikan no oghimuon ku oyow ogkataga kow woy ogpakasabut kow on to duon kai to koddi ka Amoy ku woy duon a dio to Amoy ku.” 39 Nò, pighutuk dan dakopa poron si Hisus di nakabutuas do duon sikandin. 40 No, nighipanow si Hisus no nighutuk nighondio to doipag to woig to Hordan. Nighondio to sikan no nokani no nigbautismuan ni Huan no nig-ugpo do dio. 41 Mohon-ing so mgo otow no nanhondio ki Hisus. Kagi ran, “Waro nighimu si Huan to mgo igkoinuinu di malogot man ka tibo no innangon din bahin to soin no lukos.” 42 Nò, nigtuu on kandin ka mohon-ing no mgo otow dio. Huan 11

Ka Kamatayon ni Lasaru

1 Duon ka sagboka no lukos no og-ugpo dio to lunsud to Bitania no si Lasaru ka ngaran din no nigdaralu sikandin. Matatalahari si Lasaru ki Maria woy si Marta no mgo ataboy rin no tibo nig-ugpo dio to Bitania. 2 Soini no Maria, ian ka boi no nigbus-ug to mohomut no agua dio to paa ni Hisus woy nigtarapuan din to bulbul din. Ka kandin no maama no si Lasaru ka nigdaralu. 3 No, intugun to soin no patalahari no boi dio ki Hisus. no kagi ran, “Buyag, nigdaralu on ka lagboy no amigu nu no si Lasaru.” 4 Ko nigdinog ni Hisus ka kagi to sikan no nigsugu, kagi rin, “Kono no igkamatoy ni Lasaru ka soini no dalu rin; sikan do ian oyow ogkitoon ka kabogbogan to Magboboot. Woy pinabayo to soini, koddi no Anak din, songo ogsayoon a.” 5 Dakol man so goinawa ni Hisus to sikan no mgo patatalahari no si Maria woy ka kakoy rin woy si Lasaru. 6 Di ko nigdinog on to nigdaralu si Lasaru, nigpalinggalat pad kandin to darua no allow dio to kandan no pigdatongan. 7 Ko natuman ka darua no allow, kagi ni Hisus kuwo to mgo hibatoon din, “Oglibong kinow pad dio to Hudia.” 8 Kagi to mgo hibatoon din kandin, “Buyag, pila no allow no pigligad no pigdogpaka ka porom to mgo Hudiu! Nò, oglibong ka rod naan dio?” 9 Nigtabak si Hisus to pananglitan. Kagi rin, “Duon sampulu no oras woy darua woy ki ogkoumaan to marusilom. Ko oghipanow ki ko maawang pad, kono ki ogpakarogpak dut dalan su maawang man! 10 Di ko oghihipanow ki ko marusilom, ogpakarogpak ki ro su waro igbat-ow ta.” 11 Sikan ka kagi ni Hisus kandan. Nò, duon dod kagi rin kandan. Kagi rin, “Nighirogo on ka duma ta no si Lasaru; di oghondian ta oyow ogpukowon ku pad sikandin.” 12 Kagi to mgo hibatoon din, “Di Buyag, ko nohirogo do maroyow; ogkoulian do ka dalu rin.” 13 Ka litukan to kagi ni Hisus, ian to namatoy on si Lasaru. Di sikandan, nahan dan atag no nohirogo do duon ka lituk to kagi rin. 14 Nò, nignangonan ni Hisus do duon to, “Namatoy on si Lasaru 15 di narago ad to wara a rio ko namatoy sikandin oyow ogkatimulan ka pogtuu now to ogkitoon now. Oghondio kid kandin.” Sikan ka kagi ni Hisus. 16 Si Tomas, no si Soping ka angga din, nigkagian din ka duma rin no mgo hibatoon. Kagi rin, “Ogduma kinow to Maistru oyow ogpokounung ki ogkamatoy.”

Ka Igkootawi woy ka Igkabuhi

17 Nò, ko nokouma dio woy si Hisus, nignangonan sikandin to hop-at on no allow ka insabal si Lasaru dut pilang. 18 Ka lunsud to Bitania, marani to tatolu no kilumitru do ko ogligkat ki dio to lunsud to Hirusalim. 19 To marani ka Bitania to Hirusalim, mohon-ing no mgo Hudiu no taga Hirusalim no nighondio ki Marta woy si Maria. Ogtalapon dan ka goinawa to sika patalahari no darua to kamatayon to maama ran. 20 Nò, to nakarinog si Marta to marani on si Hisus, niglibuwas sikandin oyow ogtagbu kandin. Di nigpalinggalat si Maria dio to baloy ran. 21 To nokogtagbu on, kagi ni Marta kuwo ki Hisus, “Buyag, ko duon kad kai porom, waro mamatoy ka maama ku. 22 Di nataga a to agad nokoy no ogbuyuon nu dio to Magboboot, ogbogayan ka.” 23 Kagi ni Hisus kuwo kandin, “Ogkootawan pad ka maama nu.” 24 “Hoo man ian,” kagi ni Marta, “nataga a to uromo to mohuri no allow to soin no kalibutan ko ogkootawan ka mgo namatoy, songo ogkootawan ka maama ku.” 25 Kagi ni Hisus kandin, “Igi, koddi ka ogligkatan to igkootawi to mgo namatoy. Woy koddi ka ogligkatan to kouyagan no waro katamanan. Sika otow no ogtuu koddi, agad ogkamatoy ka lawa rin, ogkootawan do dio to Magboboot. 26 Woy sika otow no koddi do ka igkabuhi din woy ogtuu ka sikan no otow koddi, ogbogayan ku sikandin to kouyagan no waro katamanan. Og-inso a koykow, Igi, ko ogtuu ka to soini no ignangon ku?” 27 “Hoo man, Buyag,” kagi rin, “Ogtuu a ian to sikoykow ka Anak to Magboboot no Im-imanan to mgo Koot-otawan no oghondini to soin no kalibutan.”

Nakasinogow si Hisus

28 Ko naponga nigkagi, nig-uli si Marta dio to baloy. Nighondio to longod to hari rin no pignaasnaasan din ka hari rin. Kagi rin, “Nokouma on ka Maistru,” kagi, “no og-umowon ka rin.” 29 To pogdinog ni Maria, nigsasindog sikandin woy niglibuwas no nig-agpas oyow ogtagbu ki Hisus. 30 Wa pad mokouma si Hisus dio to lunsud. Dio pad to dalan no natagbu rin si Marta. 31 Ka mgo Hudiu dut baloy no ogtalapon dan ka goinawa ni Maria, to nigkita ran si Maria no ogsasindog no og-agpas oghipanow, nigsundul dan do. Sikan ka pigsundul dan su nahan dan no oghondio to nigsabalan no ogpandalawit. 32 Nò, ko nokouma si Maria dio ki Hisus, nigluhud dio to tangkaan din no ogpohoy-uhoy-u no kagi rin, “Buyag,” kagi, “ko duon kad kai porom, waro mamatoy ka maama ku kuntoon.” 33 Ko nigkita si Hisus to ogsisinogow si Maria mgo Hudiu no nigluyud kandin, lagboy no masakit ka kandin no goinawa. 34 Nig-inso din, “Hondoi now isabal?” Kagi ran, “Duma ka, Buyag, pitow ka.” 35 Nò, nakasinogow on si Hisus. 36 Ko nigkita ka mgo Hudiu to nakasinogow si Hisus, nigkagi ka duma to, “Pitow kow, dakol so goinawa rin kandin.” 37 Di duon dod duma, no kagi ran, “Nigbawian din ka mata to mgo nabutud. Kono din buwa ogkapogongan ka kamatayon ni Lasaru?”

Nootawan si Lasaru

38 Nò, nohutuk mohoy-u si Hisus. Nighondio to sabalanan din no pilang no inlokob dan ka dakol no batu. 39 Nigsugu ni Hisus to, “Awaa now ka batu no inlokob.” Di si Marta, ataboy to namatoy, nigkagian din si Hisus. Kagi rin, “Buyag, masongot on. Hop-at on no allow rin dut sabalanan.” 40 Kagi ni Hisus kuwo kandin, “Sumsumana nu ka inkagi ku koykow, Igi. Nignangon a to ogtuu ka ro no ogkitoon nu ka igsayo to Magboboot.” 41 Nò, nig-awo dan ka sikan no batu no inlokob. Si Hisus, niglonghag dio to langit no kagi rin, “Amo, ogpasalamat a koykow to ogpamminog ka koddi. 42 Nataga a to agad kon-u no allow, ogpamminog ka koddi. Di soini ka kagi ku kuntoon su ka mgo otow kai oyow ogtuu to pigsugu a nud.” 43 To naponga nig-ampu, nigbabansagon nig-umow. Kagi rin, “Wow Lasaru, libuwas ka!” 44 Nò, niglibuwas ka namatoy no nabuhi on. Nabodboran pad agad ka bolad din, mgo ka paa rin to sikan no imbodbod dan dut namatoy woy duon dod paniu dut langlanguwan din. Kagi ni Hisus kuwo kandan, “Awaa now ka imbodbod kandin oyow ogpokouli dio to baloy rin.”

Ka Bantaan to Pogkamatoy ki Hisus

45 Nò, mohon-ing so mgo Hudiu no ogpanumbaloy dio ki Maria, ko nigkita ran ka pighimu ni Hisus, nigtuu on ki Hisus sikandan. 46 Di duon dod duma no mgo otow no nighondio to mgo Parisiu woy nignangon to pighimu ni Hisus. 47 Ko nigdinog, nigmanangnangonoy ka mgo igbuyag to talagpanubad, mgo Parisiu woy ka mgo dangob no igbuyag to mgo Hudiu. Kagi ran, “Ogmonuon tad buwa ki Hisus su mohon-ing ka igkoinuinu no oghimuon din. 48 Ko ogbogoy ki oyow ogparagas on ka oghimuon din, ogpasakup buad ka tibo no mgo kootawan. Ko ogpakatood, ogbobootan ki buwa to mgo taga Ruma no igbuyag no ogmanhondini woy ogpagulak dan buwa ka soin no Dakol no Ampuanan ta woy ogkakaawo ka katondanan ta kai to mgo duma ta no mgo Hudiu.” 49 Di nakakagi ka sagboka no si Kaipas ka ngaran din. Kandin ka Labow to mgo Talagpanubad to sikan no tuid. Kagi rin, “Waro nanaan gindawanan now to soini! 50 Wa kow pad makasabut to ian do litos kanta ko sagboka ro ka ogpakimatoy to tibo no mgo otow oyow kono ki ogkoubus.” Ian ka kagi ni Kaipas. 51 Nò, ka sikan no kagi, waro nigligkat to kandin no goinawa. Di su kandin ka Labow to mgo Talagpanubad to sikan no tuid, impasolod to Magboboot ka sikan no kagi to goinawa rin no ka litukan ian to ogpakimatoy si Hisus to mgo Hudiu. 52 Agad kono no mgo Hudiu do. Ogpakatagkos ka tibo no mgo otow no ogtuu kandin agad hondoi ogmokougpo kai to soin no kalibutan oyow sagboka ro so lawa to tibo no ogtuu. 53 Nò, ian ka allow no nigbobootan to mgo igbuyag to mgo Hudiu to ogpohimatayan dan si Hisus. 54 Nò, si Hisus, warad nighihipanow dut tangkaan to mgo Hudiu. Di nighipanow on woy si Hisus no oghondio to songo lunsud no oghingaranan to Epraim no marani ian to holholawan. Dio nig-ugpo sikandin woy ka mgo hibatoon din. 55 Magaan ogkatuman on ka sika pagkoonan to mgo Hudiu no oghingaran dan ka Pagkoonan to Paligad. Dio nigdolog to lunsud to Hirusalim ka mohon-ing no mgo otow no ogligkat to mgo hilit, mgo mallintok no lunsud. Nighondio woy nigbunsud ka Pagkoonan oyow oghimuon dan ka batasan to mgo Hudiu to oghugas oyow ogpakatangko sikandan ka Magboboot ko ogpakasolod to Dakol to Ampuanan ko ogpokouma on ka pagkoonan. 56 Ko rio to Dakol no Ampuanan dan, ogpamitawon dan si Hisus no nigpoin-insooy, “Nokoy ka koykow no goinawa ko ogsolod to pagkoonan si Hisus woy ko kono?” 57 No, ka mgo igbuyag to mgo talagpanubad woy ka mgo Parisiu, nigsugu dan ka mgo otow to ogpanangon kandan ko ogkitoon dan si Hisus su oyow ogdakopon dan porom.

Huan 12

Nigbus-ugan si Hisus to Mohomut no Agua dio to Bitania

1 Ko duon hon-om naan do no allow woy ogbunsud ka Pagkoonan to Paligad, nighondio si Hisus to Bitania no ugpaan ni Lasaru no pig-uyag din ko namatoy on. 2 Nò, nighimu to mgo otow dio ka pagkoonan ki Hisus woy songo nig-amut si Lasaru. Si Marta ka talaghonat. 3 No si Maria, nig-alap din ka songo kalasi no ogkounawa to lana no oghingaranan to naldu. Nò, nigbus-ugan din ka paa ni Hisus no ka bulbul din no malayat ka igtarapu rin to paa rin. Mahal lagboy ka imbus-ug din no subla to songo salmonan no nigsokol dio to baloy ka ngarog to mohomut. 4 No, nigkagi ka sagboka no hibatoon ni Hisus no si Hudas no anak ni Iskarioti. Kandin ian ka ogbantaan to ogtabod pad ki Hisus. Kagi rin, 5 “Manio to waro ibaligya ka soin no mohomut to tatolu no gatus no putow no salapi. Naraat ian; nabogayan porom ka mgo publi to sikan no salapi.” 6 Waro goinawa ni Hudas to mgo publi. Ian do duon ka kagi rin su kandin ka talagtalipun to salapi woy malasi rin puruta ka salapi no litos to kandin no igkoiniat. 7 Di nigsaparan ni Hisus si Hudas no kagi rin, “Balagara nu sikandin. Sikan no pighimu rin koddi, sikan ka igtagad din to kamatayon ku ko igsabal ad. 8 Agad nokoy allowa, duon kai kaniu ka mgo publi. Di sikoddi atag, kona a no malugoy dini to kaniu.”

Ka Bantaan to Oghimatoy ki Lasaru

9 Ko nakarinog ka mgo Hudiu to duon si Hisus dio to Bitini, mohon-ing ka nanhondio kandin. Darua ka tuud dan. Si Hisus ka sagboka woy si Lasaru no nouyag on ko namatoy ka dangob no tuud dan. 10 Sikan ian ka nigbantaan to mgo igbuyag to talagpanubad to songo ogpohimatayan dan si Lasaru 11 su mohon-ing no mgo Hudiu, pig-iniugan dan on ka sikan no mgo igbuyag dan no nigtuu on ki Hisus su nigkita ran si Lasaru no nouyag on.

Nakaroog si Hisus to Pogsolod din to Hirusalim

12 Ko sunud no allow, nigdinog ka mohon-ing no mgo otow to nigdatong on dio to Pagkoonan dio to Hirusalim to songo ogdatong si Hisus dio to Hirusalim. 13 To nakarinog, nanabukan dan ka mgo lalasangan no duon dod dohun to kalasi no kayu no ogkounawa to niug. Nanhipanow on no ogtagbu ki Hisus no layun on ogbabansagon no ogsayo to Magboboot. Nigbabansagon dan, “Ogsayoon ta ka Magboboot! Ogkapulusan ka soini no lukos no oghondini to ngaran to Magboboot. Ogkapulusan pad to Magboboot ka soini no Labow no Igbuyag to mgo taga Israil.” 14 No, nakakita si Hisus to nati to asno no nig-unturan din on. Un-unawa ka soin no pighimu rin to sikan no nasulat to Tahan no Kasulatan. 15 Kagi dio to sika nolulun, “Kaniu no og-ugpo dio to lunsud to Hirusalim kono kow ogkahallok! Pitow kow! Magaan on ogpokouma ka Lagboy no Igbuyag now no nig-untud to nati to asno.” Sikan ka kagi dio to Nasulatan. 16 Ka mgo hibatoon din, waro pad makasabut to sikan no allow to nohimu dan. Di ko nouyag on si Hisus no nig-uli on dio to langit, nakaroromdom sikandan to soini naan ka kagi to Tahan no Kasulatan no natuman on to sikan no allow no nig-untud si Hisus to nati to asno. 17 No, ka sikan no mohon-ing no mgo otow no duon dio ki Hisus to nouyag din si Lasaru no pinalibuwas din on dio to sabalanan to pig-umow rin, sikandan ka nignangon to duma no mgo otow to pighimu ni Hisus. 18 Nò, sikan ka tuud to ogtagbu ka sikan no mohon-ing no mgo otow ki Hisus su nigdinog to soin no nighimu rin no koin-inuan. 19 Nò, nigmakagkagioy ka mgo Parisiu no kagi ran, “Pitow kow! Ogmonuon tad to naatangan kid. Pitow kow naan dio! Tibo no mgo koot-otawan, og-unug on kandin.”

Og-alukoy Porom ka mgo Kono no Hudiu ki Hisus

20 Agad duon ka mgo Griego no otow no nighondio to Hirusalim to og-ampu ko duon on ka Pagkoonan. 21 Ko nokouma on, nighondio ka soin no mgo otow ki Pilipi. Taga Bitsaida no songo lunsud to Galilia si Pilipi. Kagi to soin no mgo otow no kono no Hudiu kuwo ki Pilipi, “Sulod, og-alkuy koy porom ki Hisus.” 22 Nighondio si Pilipi ki Andres woy nignangonan din sikandin. Nigduma si Andres ki Pilipi dio ki Hisus woy nignangonan dan on. 23 Kagi ni Hisus kuwo kandan, “Nokouma on ka allow no sikoddi no Kakoy to Koot-otawan, dakol ka pogsayo to Magboboot koddi pinabayo to kamatayon ku. 24 Malogot ka soin no ogkagion ku kaniu,” kagi ni Hisus. “Sagboka ro ka tipaka taman to og-ulugon on dio to diralom to tano. Ogkamolu ka luiton woy oglibuwas ka mata no ogtubu on woy ogtuga soini. 25 Sikan no otow,” kagi, “no igkannugun din ka kouyagan din, ogkawaraan nasi to soini. Di sikan no otow no kono din ogkannugun ka kandin no kouyagan kai to soin no kalibutan, ogbogayan sikandin to kouyagan no waro katamanan dio to Magboboot.” 26 Kagi pa ni Hisus, “Ko duon otow no ogpasakup koddi, og-unug ka sikan no otow to tibo no sugu ku su oyow agad hondoi a, songo dio sikandin. Ogsayoon to Amoy ku no Magboboot ka sikan no ogbulig koddi.” 27 “Kuntoon, ogmamasakit so goinawa ku. Nokoy buwa ka ogbuyuon ku? Ogbuyu a buwa to, ‘Amo, kono ka ogbogoy to ogkoumaan a to soin no igkabaybayari ku.’ Di kona ad ogbuyu to sikan su ka igkoirapi ku ka tuud ku to oghondini to soin no kalibutan. 28 Amo, ipasayo nu ro ka koykow no ngaran,” kagi ni Hisus. No, duon kagi no nigligkat dio to langit. Kagi, “Pigsayo on ka ngaran ku woy oghutukon ku pad ogpasayo.” 29 Nigdinog ka mgo otow no ogmanasasindog dio ka daging do no nignangon to lugung do duon. Di kagi to duma, “Nigkagian sikandin to diwata no suguanon to Magboboot.” 30 Di nigkagi si Hisus kuwo kandan, “Ka sikan no kagi no nigligkat to langit, sikaniu ka tuud din; kono no si koddi. 31 Kuntoon ka allow to ogbobootan ka tibo no mgo koot-otawan kai to soin no kalibutan. Kuntoon, ogkaroog ka igbuyag to soin no kalibutan no si Satanas. 32 Sikoddi atag, ko igkalansang ad on dio to krus woy oglindogon dan on, ogpalimuron ku ka tibo no mgo koot-otawan dini to koddi su oyow ogtuu on porom.” 33 Soin no kagi ni Hisus, ka igpatokod din to mgo otow to moomonu ka igkamatoy rin. 34 Nò, nigtabak ka mgo nalibulung no otow kuwo kandin. Kagi, “Naanad koy to Balaod ni Moisis to kono ogkamatoy ka Im-imanan to mgo Koot-otawan. Ko sikan ian, manio buwa to ignangon nu to igpaampow to krus ka Kakoy to mgo Koot-otawan? Hontow buwa ka soin no Kakoy to mgo Koot-otawan?” 35 Kagi ni Hisus kuwo kandan to pananglitan. Kagi, “Duon dini to kaniu ka sikan no igbat-ow, di magaan ogkaawo. Hihipanow kow dio to nabat-awan no dalan to duon dod nigduma kaniu no malayag oyow kono kow ogkoumaan to marusilom. Sikan no otow no oghipanow to marusilom no waro igbat-ow rin, kono ogkataga ko hondoi sikandin ogdolog. 36 Omunaan tuui now ka soini no malayag to duon pad kai sikandin kuntoon oyow ogkohimu kow no mgo otow no nabat-awan on ka goinawa now.” Ko napongan nigkagi si Hisus, nighipanow on no piglonusan din sikandan.

Waro Pogtuu ka mgo Hudiu ki Hisus

37 Agad mohon-ing so mgo ogkoinuinu no pighimu ni Hisus dio to tangkaan dan, wa dan pad atag tuui sikandin 38 oyow ogkatuman ka kagi ni Isaias no talagnangon to kagi to Magboboot dongan no nasulat to Tahan no Kasulatan. Kagi, “Buyag, hontow buwa ka nigtuu to nangnangon noy?” “Hontow buwa ka nakasabut to impapitow nu to koykow no kabogbogan?” 39 Sikan no kagi no nigpasulat to Magboboot ki Isaias ka kono dan ogpakatuu. No duon dod dangob no kagi no impasulat ki Isaias. Kagi, 40 “Nigbobootan to Magboboot sikandan oyow kono ogpakakita to dalan dio to kandin. Nigpamootan din to makogal so ulu ran oyow kono ogpakasabut to nangnangonon din. Pighonduon to Magboboot oyow kono ogpakatangko kandin su oyow og-awoon din ka salo dan. 41 Sikan ka kagi ni Isaias tongod ki Hisus su nakitaan din ka karayawi ni Hisus no nigkagi bahin kandin.” 42 Wa nigtuu ka tibo no mgo otow ki Hisus. Di nigtuu ka mohon-ing no mgo igbuyag to mgo Hudiu. Di wa dan nangoni ka mgo duma ran su ogkahallok to mgo Parisiu ko kono dan ogpasoloron to og-ampu dut anaranan dan. 43 Madmarayow kandan ka pogsayo to duma ran to sika pogsayo to Magboboot kandan.

Ian Ogboboot ka Kinagian ni Hisus

44 Nò, nigbabansagon si Hisus no kagi rin, “Sikan no otow no ogtuu koddi, kono no sikoddi do ka ogtuuan din ko kono no songo ogtuuan din dod ka nigsugu koddi. 45 Agad sikan no otow no ogkitoon a rin, songo ogpakakita ka nigsugu koddi. 46 Nighondini a to soin no kalibutan oyow koddi ka igbat-ow to doromdom now oyow sikan no otow no nigtuu koddi, kono din layun og-ugpo to marusilom.” 47 “Ko duon otow no ogpamminog to ig-anad ku, di kono din ogtumanon, kono no sikoddi ka ogboboot kandan. Wara a nighondini to oyow ogboot to mgo otow kai to soin no kalibutan. Nighondini ad oyow ogkapangabangan ku ka mgo otow. 48 Sikan no mgo otow no og-iniugan a ran no kono dan ogtumanon ka kagi ku, duon ogboot kandan woy oglogpad uromo. Ka kagi ku no innangon ku kaniu, sikan ka ogboboot kandan to mohuri no allow. 49 Malogot ian soini su kono ogligkat to koddi no goinawa ka kagi ku. Ka Magboboot no Amoy ku no nigsugu a rin, kandin ka nigsugu to nokoy ka ogkagion ku.” 50 Kagi pa ni Hisus to, “Nataga a to soini no insugu to Amoy ku, sikan ian ka ogligkatan to kouyagan now no waro katamanan. No, ka ogkagion ku, ian ka igsugu to Amoy ku.”

Huan 13

Oghugas ni Hisus ka Paa to mgo Hibatoon din

1 Nò, sikan no Pagkoonan to Paligad, ogpokouma on ko ogkapawo. Nò, nataga si Hisus to noumaan on sikandin to pog-uli din ligkat to soin no kalibutan no oghondio to Amoy rin dio to Langit. Layun no duon goinawa rin to mgo sakup din kai to soin no kalibutan woy impatokod din ka dakol no goinawa rin taman to nig-uli dio to Langit. 2 Nò, ogkokoon si Hisus woy ka mgo hibatoon din to sikan no poglabung dan. Nò, nakasolod on si Satanas to goinawa ni Hudas no anak ni Simon Iskarioti to ogpanabod din si Hisus. 3 Di si Hisus, nataga to nigbogayan to Magboboot no Amoy sikandin to tibo no kabogbogan no ogligkat kandin woy nataga to dio to Magboboot ka ogligkatan din woy dio og-uli. 4 Sikan ian, nighagtong nigkoon si Hisus no nigsasindog. Nig-awo din ka kinabo din woy pigholon din no igtarapu. 5 No, nig-itisan din ka palanggana to woig no nigbunsud nighugas to mgo paa to mgo hibatoon din woy nigtarapuan din to sikan no pigholon din no manggad. 6 Nò, nokouma dio ki Simon Pedro to oghugas to kandin no paa. Nig-inso ni Pedro ki Hisus, “Buyag, oghugasan nu buwa ka koddi no paa?” 7 Nigtabak si Hisus kandin to, “Kono ka pad ogpakasabut to lituk to oghimuon ku kuntoon. Di uromo, ogpakasabut ka.” 8 “Nò,” kagi ni Pedro kandin, “Kono ku ogpahugasan koykow ka koddi no paa.” Nigtabak si Hisus to, “Ko kono nu ogpohugasan koddi ka paa nu, kono kud on no hibatoon sikoykow.” 9 “Buyag,” kagi ni Pedro, “hugasi nu agad ka bolad ku, mgo ulu ku. Kono no paa ku ro.” 10 Kagi ni Hisus kandin, “Sikan no otow no nigpamarigus, malinis ka lawa rin, konad on ogpamarigus oghutuk. Ka paa rin do ka oghugasan din. Malinis kow tibo; ka sagboka ro ka kono no malinis.” 11 Nigkagi to “Malinis ka tibo; ka sagboka ro ka kono no malinis” su natagaan din tahan ko hontow ka ogtabod kandin. 12 Ko naponga si Hisus poghugas to mgo paa ran, insalaub din ilibong ka akob to kinabo din woy niglibong dio to lamisaan. No, nig-inso din kandan, “Nakasabut kow to kalitukan to pighimu kud kaniu? 13 Oghingaranan a now to Maistru woy Buyag. Litos man ian su maistru a now woy Igbuyag a now. 14 Sikoddi no Igbuyag now woy Maistru now, nighugas ad to kaniu tibo no mgo paa. Nò, sikaniu, songo moghughugasoy kow porom to paa now. 15 Nigbogoy a kaniu to panag-ilingan oyow oghimuon now soini no pighimu kud kaniu. 16 Malogot ka soin no ogkagion ku kaniu,” kagi ni Hisus. “Waro oripon no labow to igbuyag din woy waro suguanon no labow to sika nigsugu kandin. 17 Kuntoon to nataga kow on to soini no malogot, ogkapulusan kow ko oghimuon now soini.” 18 “Wara a mogkagi bahin kaniu tibo. Nataga a man to goinawa to tibo no pig-alam kud. Di og-awos to ogkatuman pad ka inkasulat to Magboboot dio to Tahan no Kasulatan. Kagi, ‘Duon sagboka no lukos no malasi og-amut to ogkoon no nig-usigon a rin.’ Soini ka kagi to Tahan no Kasulatan.” 19 “Ignangon ku kaniu ka soin no nangnangonon kuntoon oyow ko ogkatuman on soini, ogtuu kow on to koddi ian ka Im-imanan to mgo Koot-otawan.” 20 Kagi pa ni Hisus, “Malogot ka soin no ogkagion ku kaniu. Agad hontow ka ogtinawo to otow no ogsuguon ku, songo ogtinawoon a rin. Agad ko ogtinawoon a, songo ogtinawoon din ka nigsugu koddi no Amoy ku no Magboboot.”

Impanoy Inangon ni Hisus to Pogpanabod Kandin

21 Ko nakaponga nigkagi si Hisus, masakit lagboy so goinawa rin no nignangonan din sikandan to, “Malogot man ian; duon sagboka kaniu no igpanabod a rin.” 22 Nigmapipitawoy on ka mgo hibatoon din no nasasow sikandan su kono ogpakasabut ko hontow ka tuud to kagi rin. 23 Nò, duon ka sagboka no hibatoon ni Hisus no dakol so goinawa rin kandin no dio to longod din ogpinnuu. 24 Nò, pigkamoy ni Simon Pedro no kagi rin, “Insaa nu ko hontow ka ogtabod kandin.” 25 Nò, niglingi ki Hisus no nig-inso, “Buyag, hontow buwa ka ogpanabod koykow?” 26 Nigtabak si Hisus no kagi rin, “Ighalit ku pad soin no paan to sabow. Sikan no otow no ogbogayan ku, sikandin ian.” Nò, nigpurut din ka songo pisang no paan, inhalit din on, woy pigbogayan din si Hudas no anak ni Simon Iskariot. 27 To nigpurut ni Hudas ka paan no inhalit to sabow, nigsolod si Satanas no igbuyag to mgo busow kandin. Kagi ni Hisus kuwo ki Hudas, “Agpasa nud ka oghimuon nu.” 28 Di waro makasabut ka mgo duma rin dio to lamisaan to innangon ni Hisus kandin. 29 Duon duma no hibatoon no nahan dan no pigsugu ni Hisus sikandin to ogboli to og-awoson dan no litos to sika Pagkoonan. Songo duon goinawa ran ko nigsugu din buwa to ogbogayan din ka mgo publi to salapi. Sikan ka goinawa ran su si Hudas ian ka talagtalipun to salapi dan. 30 Nò, ko nigpurut on ni Hudas ka sikan no pisang no paan nigsasindog no nigparagas on nighipanow. Nò, marusilom on ian.

Ka Iam no Sugu

31 Ko niglibuwas on si Hudas, nigkagi si Hisus. Kagi rin, “Kuntoon, sikoddi no Kakoy to Koot-otawan, igpapitow ka karayawan ku. Agad songo igpapitow ka karayawan to Magboboot to soin no oghimuon ku. 32 Ko ka karayawan to Magboboot, nigpapitow on pinabayo koddi no ka Magboboot ka ogpapitow dio to kandin ka karayawan ku no Kakoy to Koot-otawan. Woy oghimuon din ogparagasa soini.” 33 Kagi pad ni Hisus, “Nò, mgo sulod no inat anak ku sikaniu, malopot naan do ka pog-ugpo ku kai to kaniu. Ogpamitawon a now. Di ka kagi ku kaniu, unawa ian to kagi ku to mgo igbuyag to Hudiu no nig-iling a to ‘Kono kow ogpakasundul dio to ogdatongan ku.’ ” 34 Duon on iam no igsugu ku kaniu. Soini ian. Dakola now ka goinawa now to mgo duma now. Ilinga now dio to duma now ka goinawa ku kaniu. 35 “Sikan ian ka ogtokoron to tibo no mgo otow to hibatoon ku sikaniu ko ogmarakdakoli kow to goinawa now.”

Ignangon on ni Hisus to Pogligal ni Pedro Kandin

36 Nig-inso ni Simon Pedro ki Hisus, “Buyag, hondoi ka ogdolog?” Nigtabak si Hisus to, “Kono ka pad ogpakasundul,” kagi, “di uromo, ogpakasundul ka ro.” 37 Kagi ni Pedro kuwo kandin, “Buyag, manio to kona a ogpakasundul koykow kuntoon? Nigpanagana ad to ogpakimatoy a no ogduma koykow.” 38 Nigtabak ni Hisus no nig-inso ki Pedro, “Ogpakimatoy ka nanaan duma koddi? Nò, Pedro, malogot ka soin no ogkagion ku koykow. Woy og-ukalo on ka manuk to ogkapawo on ko tatolu kad ogligal to waro a nu tokora.”

Huan 14

Si Hisus ka Dalan no Oghondio to Amoy rin

1 Kagi pa ni Hisus kuwo to mgo hibatoon din, “Kono kow ogkasasow dio to goinawa now. Ogsalig kow nasi to Magboboot; songo salig kow koddi. 2 Dio to Amoy ku duon mohon-ing so ogkougpaan. Oghun-a ad dio su ogpanagana a to datongan now. Ko kono pa porom no malogot soini, kono ku porom ognangonan sikaniu. 3 Ko rio ad on woy ko ogpakapanagana ad on to igtagad ku kaniu, oglibong a oyow og-angoy a kaniu oyow ko hondoi a longod, songo dio kow. 4 Nataga kow pa porom ka dalan no oghondio to ogdatongan ku.” 5 Kagi ni Tomas kuwo kandin, “Buyag, waro koy mataga ko hondoi ka ogdolog. Ogmomonu koy naan,” kagi rin, “oyow ogpakabatuk koy to dalan nu?” 6 Kagi ni Hisus kuwo kandin, “Koddi ka dalan woy koddi ka kamalogotan, woy koddi ka ogligkatan to kouyagan now. Waro agad hontow no ogpokohondio to Amoy ku no Magboboot ko kono ogbayo koddi. 7 Kuntoon, su nataga kow on man koddi, songo ogkataga kow on porom to Amoy ku. Nò, ligkat kuntoon no pigtokod now on ka Amoy ku woy nakakita kow on kandin.” 8 Kagi ni Pilipi kuwo kandin, “Buyag, ipapitow nu kanami ka Amoy nu no litos on ian kanami.” 9 Nig-inso ni Hisus kandin, “Pilipi, nalugoy ad kai to kaniu no wara a now pad matagoi? Sikan no otow no nigkita koddi songo nakakita to Magboboot no Amoy ku. Manio to sikan pad atag ka kagi nu to, ‘Ipapitow nu ka Amoy nu?’ ” 10 Woy nig-inso si Hisus to, “Waro ka naan mogtuu, Pilipi, to Amoy ku woy sikoddi, sagboka ro ka lawa noy? Waro mogligkat to koddi no goinawa ka kagi ku kaniu; nigligkat to Amoy ku no duon kai to koddi. Kandin ian ka ligkatan to oghimuon ku. 11 Tuui now ro to sikoddi, duon a to Amoy ku woy ka Amoy ku, songo duon kai to koddi. Ko kono kow ogtuu to soini, tuu kow on ian koddi tongod to mgo koin-inuan no pighimu ku. 12 Malogot soini ignangon ku kaniu,” kagi ni Hisus. “Ka sikan no otow no ogtuu koddi, ogpokohimu to ogkounawa to koddi no oghimuon woy labow ka kandin no oghimuon su og-uli a dio to Amoy ku. 13 Agad nokoy no ogbuyuon now koddi, ko oghingaranan now ka ngaran ku, oghimuon ku soini oyow ogkasayo ka Amoy ku pinabayo koddi no anak din. 14 Ko ogbuyu kow, agad nokoy to koddi no ngaran, oghimuon ku soini.”

Intaga to Ogpokouma ka Gimukud to Magboboot

15 “Ko duon goinawa now koddi,” kagi ni Hisus, “ogtumanon now ka mgo insugu ku kaniu. 16 Ogbuyu a to Amoy ku oyow ogbogayan kow to duma no Talagbulig no ogdurumaruma kaniu taman to waro katamanan. 17 Kandin ka Gimukud to Magboboot no ogpasabut kaniu to malogot bahin to Magboboot. Kono ogpakatinawo kandin ka mgo otow no wa nigtuu koddi kai to soin no kalibutan su kono ogpakakita kandin woy su waro dan tokora kandin. Di sikaniu, ogtokoron now ro su og-ugpo man kai to goinawa now no kono ogkaawo.” 18 Kagi pa ni Hisus, “Oghipanow a di kono kow ogbalagaron no waro duma now; oglibong a ro kai. 19 Konad on no malugoy no kono ogpakakita koddi ka mgo otow no waro nigtuu. Di sikaniu, ogkakitaan a now ro. Woy su nouyag a man, songo ogkouyagan kow. 20 Ko ogpokouma ka allow to igkootawi ku to kamatayon ku, ogkataga kow on to salupung a to Amoy ku. Woy ogkataga kow to songo unawa ka nasalupung kinow ro. 21 Sikan no mgo otow,” kagi ni Hisus, “ko ogtinawoon dan ka mgo insugu ku woy ko ogtumanon dan, sikan ian ka mgo otow no duon goinawa ran koddi. Ka sikan no mgo otow no duon goinawa koddi, songo duon goinawa to Amoy ku kandan. Agad sikoddi, dakol ka goinawa ku kandan woy songo ogpatokod a kandan.” 22 Si Hudas, sangoy ro ni Hudas Iskarioti, nigkagi ki Hisus. Kagi rin, “Buyag, manio ka kanami ro ka igpatokod nu to sikan no innangon nu? Manio to kono no tibo no mgo otow kai to soin no kalibutan ka ogpatokoron nu?” 23 Nigtabak si Hisus, “Sikan no mgo otow no dakol so goinawa ran koddi, ogtumanon dan ka ig-anad ku. Ko ogtumanon dan, dakol so goinawa to Amoy ku kandan. No, kanami no darua to Amoy ku, og-ugpo koy dio to kandan. 24 Ka kono ogtuman to in-anad ku, sikan ian no mgo otow no waro goinawa ran koddi. No, ka in-anad ku kaniu no nigdinog now, kono ogligkat koddi ka sikan ko kono no dio ogpuun to Amoy ku no kandin ka nigpohondini koddi.” 25 “Soini ka innangon ku kaniu ko kai a pad to kaniu. 26 Ogpohondini on pad to Amoy ku ka Gimukud din pinabayo to ngaran ku no Kandin ka Talagbulig kaniu. Kandin on ka og-anad kaniu to tibo woy ogparoromdomon kow nikandin to sikan no innangon kud kaniu. 27 Kono kow ogkasasow woy dokow ogkahallok su ko oghipanow ad on dio to Amoy ku, iggalat ku ka kalinow dio to goinawa now. Kono no ogkounawa to kalinow to mgo kootawan kai to soin no kalibutan; ogligkat koddi ka iggalat ku kaniu no kalinow.” 28 Nigdinog now ka kagi ku to oghipanow a pad di oglibong a ro kai to kaniu. Ko duon goinawa now koddi, ogkarago kow on porom su dio a ogdatong to Amoy ku no labow pad sikandin koddi 29 Nignangonan ku sikaniu kuntoon no kai a pad to tano oyow ko ogkatuman on soini, ogtuu kow on. 30 Kono kud on ogmalayaton ku ka kagi ku kaniu kuntoon su marani on ka sikan no talagboot to soin no kalibutan no si Satanas ian. Di kono ogpakaroog koddi. 31 “Di ogtumanon ku ka tibo no insugu to Amoy ku oyow ogkataga ka mgo otow no waro nigtuu to dakol so goinawa ku to Amoy ku. Nò, oghipanow kid on.”

Huan 15

Si Hisus ka Malogot no Lawa to Bunal

(Ruma 8 :31 -39 ; 1 Kurintu 13 :1 -13 ; 1 Huan 3 :11 -24 ; 4 :7 -21 ) 1 Nigkagi si Hisus to pananglitan din kuwo to mgo hibatoon din, “Koddi ka malogot no lawa to bunal to ubas woy ka Amoy ku ka Talag-uyamu. 2 Ogpanamporon din ka sugpang ku no kono ogbogas woy ogpugpugan din ka tibo no mgo sugpang no ogpamogas su oyow ogmaawang woy ogkatimulan pad to bogas dan.” 3 “Sikaniu naan,” kagi ni Hisus, “maawang on ka kaniu no goinawa pinabayo to impanganad ku kaniu. 4 Palinggalat kow dini to koddi woy sikoddi songo ogpalinggalat a dio to kaniu. Ko ogkaawo ka sugpang dio to lawa to bunal, konad on ogbogas su nakaawoy on ka sugpang dio to lawa rin. Ogkounawa ian kaniu. Ko kono kow ogpalinggalat dini to koddi, songo kono ogpamogas ka pogtuu now.” 5 “Sikoddi ka lawa to bunal to ubas woy sikaniu ka mgo sugpang. Kaniu no ogpalinggalat dini to koddi woy songo ogpalinggalat a dio to kaniu, ogpakapamogas kow to marasig su ko wara a dio to kaniu, waro ogkohimu now. 6 Sikan no otow no kono ogpalinggalat dii to koddi, ogkounawa sikandin to sugpang no ogtamporon dio to lawa rin no ogkagangow on. Oglimuron ka mgo nagangu no sugpang woy ogsilaban on soini. 7 Ko ogpalinggalat kow dii to koddi woy oggongonan now ka koddi no kinagian, ogpakapamuyu kow to agad nokoy woy ogkatinawo now no ogbogayan kow to Magboboot. 8 Ko layun kow ogpamogas, ogkasayo ka Amoy ku pinabayo to dakol ka bogas now no ogkatokod to hibatoon ku sikaniu.” 9 “Ogkounawa to goinawa to Amoy ku koddi ka koddi no goinawa kaniu. Ungod kow og-ugpo to maroyow oyow kono kow ogkaawo kai to taliwaro to pusung ku. 10 Ko ogtumanon now ka mgo insugu ku, ogpalinggalat kow to goinawa ku. Ogkounawa ian koddi,” kagi ni Hisus, “no songo pigtuman ku ka igsugu to Amoy ku koddi no omunaan nigpalinggalat ka goinawa rin dii to koddi. 11 Sikan ka nangnangonon ku kaniu oyow duon igkarago now no unawa to igkarago ku woy oyow oghogot woy malogot ka igkarago now. 12 Soini ka igsugu ku kaniu, dakola now ka goinawa now to mgo duma now no unawa ka goinawa ku kaniu. 13 Ka dakol lagboy so goinawa to songo otow dio to mgo duma rin, sikan ian ka ogpakatobus to kamatayon dan. 14 Nò, sikaniu ka duma ku ko ogtumanon now ka mgo igsugu ku kaniu.” 15 Kagi pa ni Hisus kuwo to mgo hibatoon din, “Kona ad on oghingaran kaniu to suguonon ku su waro mataga ka mgo suguonon to oghimuon to igbuyag din. Oghingaranan ku sikaniu to mgo amigu ku,” kagi ni Hisus, “su nignangonan kow on to tibo no innangon to Amoy ku koddi. 16 Konon sikaniu ka nig-alam koddi. Koddi ian ka nig-alam kaniu woy nigsugu kud sikaniu oyow ogpokohimu kow to maroyow no bogas to pogtuu now no kono ogkaawo Ian oyow ogbogayan kow to ogbuyuon now dio to Amoy ku ko ogsampit kow to ngaran ku. 17 Soini ka igsugu ku kaniu to dakola now ka goinawa now to mgo duma now.”

Ka Pog-usig Kaniu Ligkat to Mgo Waro Nigtuu

18 “Agad ko nasundug kow kai to kalibutan to mgo otow no waro pad nigtuu, sumsumana now no sikoddi ian ka nokohun-a no nasundug. 19 Ko waro kow pad nigtuu, dakol dod so goinawa ran kaniu to songo wa kow nigtuu su unawa kow kandan. Di nig-alam kud on sikaniu no kono kow on no unawa kandan su nigtuu kow on man. Sikan ian no nasundug kow to mgo waro nigtuu. 20 Sumsumana now ka kagi ku kaniu to, ‘Kono no labow ka katondanan to suguanon to ogsugu kandin.’ Ko ogkabaybayaran ad to mgo otow no waro nigtuu, songo ogkabaybayaran kow nikandan. Ko ogtumanon dan ka koddi no innangon kandan, songo ogtumanon dan ka kaniu no ignangon. 21 Ka soini tibo, oghimuon dan dio to kaniu tongod to nigtuu kow koddi su waro nigtokod to hontow ka nigsugu koddi. 22 Waro porom nakasalo sikandan to waro nigtuu koddi ko wara a moghondini woy nig-anad ku sikandan. Di to nignangonan kud on, kuntoon, konad on ogpakabalibad sikandan to duon salo dan. 23 Ka otow no nasundug koddi, songo nasundug ka Amoy ku. 24 Waro dan porom makasalo koddi ko waro dan kitaa ka pighimu ku no koin-inuan no waro nohimu to duma no otow, agad hontow otawa. Di kuntoon nakakita sikandan to nighimu ku no nasundug a woy ka Amoy ku. 25 Dokad di nakatood soini su oyow ogkatuman ka nasulat to Tahan no Kasulatan ran bahin koddi. Kagi, ‘Nasundug a agad waro nighimu ku kandan.’ ” 26 “Di ogpohondion ku pad ka Talagbulig kaniu no ogligkat dio to longod to Amoy ku. Kandin ka Gimukud to Magboboot no ko ogpokouma on, ogpasabut kaniu to malogot. Kandin ka ogtitigus kaniu no nigtuu bahin koddi.” 27 “Agad sikaniu,” kagi ni Hisus, “songo ogtitigus kow on to mgo otow bahin koddi su nigduma kow koddi ligkat pad to kabinunsuran taman to kuntoon.”

Huan 16

1 Duon dod kagi ni Hisus to mgo hibatoon din to, “Sikan ka innangon ku kaniu su oyow kono kow og-ituos to pogtuu now. 2 Sikan ka kagi ku su duon allow no kono kow ogpakasolod to anaranan now to mgo og-ampu su nigtuu kow koddi. Ogpokouma rod ka allow no nahan to duma no mgo otow no maroyow ian to Magboboot ko oghimatoy kaniu no nigtuu. 3 Ka soini no oghimuon dan kaniu, ian su waro mogtokod to Magboboot no Amoy woy wara a ran tokora to Anak a rin. 4 Di nignangonan ku sikaniu to soini oyow ko ogkoumaan kow on uromo no ogkaroromdoman now ka soin no innangon ku kaniu.”

Ka Oghimuon to Gimukud to Magboboot

“Wa kow nangoni to sikan no pogbunsud to pog-anad ku su duon a pad man no ogdumaruma kaniu. 5 Di magaan ad on og-uli dio to sikan no nigsugu koddi. Di agad sagboka kaniu, waro kow mog-inso ko hondoi a ogdolog! 6 Masakit lagboy so goinawa now su ka soin no innangon ku kaniu. 7 Dokad di soini no kagi ku kaniu, malogot ian woy maroyow ian kaniu ko oghondio a to Amoy ku su ko kona a moghondio, kono ogpokouma dii ka Gimukud to Magboboot no kandin ka Talagbulig kaniu. Di ko oghondio a, ogpohondinion ku sikandin. 8 No, ko ogpokouma on sikandin, ogpatokoron din ka mgo otow kai to soin no kalibutan to makasasalo sikandan woy nokoy ka matuwarong woy ogkataga sikandan to ogbobootan to Magboboot to mgo makasasalo. 9 Ogpatokoron din ka mgo otow to makasasalo sikandan su waro mogtuu koddi to anak a to Magboboot. 10 Bahin to nokoy ka matuwarong ogpatokoron din to nigmatarong ad su oghondio a to Amoy ku no kona ad on ogkitoon nikaniu. 11 Ogpatokoron din to ogbobootan to Magboboot ka tibo no makasasalo su unawa ki Satanas no nigbobootan on to Magboboot to kandin no igkalogpad.” 12 “Mohon-ing pad porom ka ignangon ku kaniu,” kagi ni Hisus, kuwo to mgo hibatoon din, “di kono kow pad ogpakasabut. 13 Di ko ogpokouma on kai to kaniu no mgo nigtuu ka Gimukud to Magboboot no sikandin on ka ogpasabut kaniu bahin to malogotan woy kandin ka og-anad kaniu to tibo no malogot no ogligkat dio to Magboboot. Kono ogligkat dio to kandin no goinawa ka kagi rin. Ka innangon din atag ka ogdinogon din no ogligkat to Magboboot. Woy ignangon din to nokoy ka ogpakatood uromo. 14 Ogsayoon a rin su ligkat to koddi ka duma no ignangon din kaniu. 15 Agad nokoy ka dio to Amoy ku, salupungan noy ro sikan. Sikan ian naan ka kagi ku to ogpoitaga kaniu to Gimukud to Magboboot ka ignangon ku kandin.” Ka Igkaaras woy ka Igkarago to mgo Hibatoon ni Hisus 16 Kagi pad ni Hisus to, “Konad on ogkalugoy no kona a now ogkitoon. Di songo kono ogkalugoy no ogkitoon a now man do.” 17 Nò, nigpoin-insooy ka duma no mgo hibatoon ni Hisus to “Nokoy buwa ka lituk to kagi rin no nignangon din to kono ogkalugoy no kona a now ogkitoon. Woy songo kono ogkalugoy no ogkitoon a now man do. Agad duon kagi rin to ‘Oghondio ad to Amoy ku.’ 18 Nokoy buwa ka lituk to ‘kono ogkalugoy?’ Wa ki makasabut to kalitukan to kagi rin,” kagi to mgo hibatoon din. 19 Nataga on si Hisus to og-insaan dan porom sikandin to kalitukan to kagi rin. Nò, kagi ni Hisus kuwo kandan, “Nignangonan kud to ‘Kono ogkalugoy no kona a now ogkitoon woy songo kono ogkalugoy no ogkitoon a now man do.’ Ka kalitukan to soini no kagi ku, sikan buwa ka igpoin-insooy now? 20 Malogot ka soini no ogkagion ku kaniu,” kagi ni Hisus. “Ogmaninsinogow kow woy ogmandawot kow di ka mgo otow no waro nigtuu, ogkarago do sikandan. Di sikaniu, atag, ogmasakit lagboy so goinawa now di ogkasoipan do so goinawa now no masakit to igkarago now. 21 Soini ka pananglitan ku. Ko oghayoran ka boi, masakit lagboy su allow rin on to og-anak. Di ko niglosut on ka bato, ogkalingawan din on ka igkoirapi rin su narago on man to duon on anak din. 22 Ogkounawa ian kaniu kuntoon,” kagi ni Hisus kuwo to mgo hibatoon din. “Duon masakit to goinawa now kuntoon di ogkohutuk a now pad ogkakitoi. Nò, ogkarago lagboy ka goinawa now no agad hontow, kono ogpakaawo to sika igkarago now.” 23 Ogparagas on to ogkagi si Hisus. Kagi rin, “Ko ogpokouma on ka Gimukud to Magboboot, kona a now insoi to agad nokoy. Malogot ka soin no ogkagion ku kaniu. Ko duon ogbuyuon now to Amoy ku no ogsampitan now ka ngaran ku, ogbogayan kow. 24 Taman to kuntoon,” kagi ni Hisus, “waro now pad nig-inso ka agad nokoy dio to Magboboot pinabayo to ngaran ku. Pamuyu kow oyow ogbogayan kow oyow ogkohimu no duon malogot no igkarago now.”

Nakaroog si Hisus to Kalibutan

25 “Pigkagi kud pinabayo to pananglitan kuntoon. Di ogkoumaan kow to allow no kona ad on ogkagi to pananglitan. Ogpan-utason kud to ogkagi kaniu bahin to Amoy ku. 26 Ko ogkoumaan kow to sikan no allow, ka Amoy ku ka ogbuyuan now no ogsampiton now ka ngaran ku. Konad no og-awos no dii kow pad ogbuyu to koddi 27 su ka Amoy ku, dakol so goinawa rin kaniu. Dakol ian so goinawa rin kaniu su dakol man so goinawa now koddi woy su nigtuu kow to nigligkat ad dio to kandin.” 28 Kagi pad ni Hisus, “Malogot ian to nigligkat ad dio to Amoy ku no Magboboot no nighondini to soin no kalibutan. No, kuntoon, og-uli ad dio to Amoy ku.” 29 Kagi to mgo hibatoon din to, “Nò man, kuntoon nalituk on ka kagi nu su konad no mgo pananglitan. 30 Nakasabut koy on to nataga ka to tibo, agad nokoy. Kono koy on ogpokoinso pad koykow su ogkataga ka to nokoy duon to goinawa noy. Nò, nigtuu koy on to dio ka nigpuun to Magboboot.” 31 Nigtabak si Hisus no pig-insaan din sikandan to, “Ogtuu kow on?” 32 Nigparagas nigkagi to, “Ogkoumaan kow, nò, noumaan kow on to allow no ogpokogsuwoysuwoy kow no og-uli dio to kaniu no mgo baloy. Nò, sagboka ku naan do. Dokad di, kona a no sagboka ro su ka Amoy ku ka duma ku.” 33 “Nignangonan kow to soini oyow duon maroyow no goinawa now pinabayo to pogkasagboka kow ro koddi. Ogbaybayaran kow to mgo otow no wa nigtuu kai to soin no kalibutan. Di kono kow ogkahallok su naroog kud ka tibo no maroot kai to soin no kalibutan.”

Huan 17

Ka Pog-ampu ni Hisus Bahin to mgo Hibatoon din.

1 Naponga si Hisus no nigkagi to mgo hibatoon din no niglonghag dio to langit no og-ampu. Kagi rin, “Amo, nigdatong on ka allow ku. Sayaa nu ka Anak nu oyow ka anak nu, songo ogsayo koykow dio to tangkaan dan. 2 Pigbogayan a nud, Amo, to koykow no kabogbogan oyow ogkabogayan ku to ogkootawan no waro katamanan ka tibo no mgo otow no imbogoy nud koddi. 3 Sikan no otow no ogkootawan no waro katamanan, ogkataga to koykow ka malogot no Magboboot. Woy ogkataga sikandan to sikoddi ka nigpohondini nud to kai to soin no kalibutan. 4 Nigsayo a koykow, Amo kai to soin no kalibutan tongod to napongaan kud on ka insugu nud koddi. 5 Nò, kuntoon, Amo, ipalibong nu ka kabogbogan ku dio to tangkaan nu kuntoon. Sikan ka kabogbogan ku no dia a pad to longod nu woy nohimu ka soin no kalibutan.” 6 “Nigpatokod ku sikoykow dio to mgo otow no pig-alam nu ligkat kai to soin no kalibutan no insalig nud koddi. Koykow ka tagtuun kandan dongan di insalig nu koddi. Nò, pigtuman dan ka innangon nu kandan. 7 Nataga on to tibo no imbogoy nu koddi no dio ian mogligkat to koykow. 8 Nignangonan kud sikandan to impakagi nu koddi woy nigtinawo dan on. Nataga to malogot ian to dio a nigligkat to koykow. Woy nigtuu on sikandan to koykow ian ka nigpaalap koddi. 9 Og-ampuan ku sikandan kuntoon. Kono ku og-ampuan ka mgo otow kai to soin no kalibutan no waro nigtuu. Ian ku ro og-ampuan ka sikan no mgo otow no insalig nud koddi su koykow ka tagtuun kandan. 10 Tibo no mgo sakup, koykow ka tagtuun kandan, songo koddi ka tagtuun to tibo; sikandan tibo, salupungan ta sikandan. Woy ogsayoon a pinabayo kandan. 11 Di Amo, kona ad ogmalugoy kai to soin no kalibutan su og-uli a dio to koykow. Di sikandan, palinggalat do kai to soin no kalibutan. Woy Amo, koykow no waro salo, bantayi nu sikandan pinabayo to kabogbogan nu no unawa ian to kabogbogan no imbogoy nud koddi. Bantayi nu oyow kono ogkalagak dio to dalan no oghondio to koykow oyow ka tibo, ogkasagboka ro dio to koykow no unawa si koddi woy sikoykow, salupungan ki ro. 12 Ko duma a pad kandan, koddi ka nigbantoy kandan pinabayo to kabogbogan to koykow no ngaran no imbogoy nud koddi. Nigbantayan kud sikandan no waro nalagak sikandan; sagboka ro kandan ka nigsuwoy to dalan no oghondio to koykow no ian ka lukos no tahan no ogkalogparan sikandin. Nakasuwoy oyow ogkatuman ka impasulat nu dio to Tahan no Kasulatan dongan. 13 “Magaan a ro og-uli dio to koykow. Nigparinog ku sikandan oyow songo ogkarago ka soin no mgo nigtuu no waro kulang no ogkounawa ian koddi no dakol so igkarago ku. 14 Nignangonan kud sikandan to innangon nu di nasundug sikandan to mgo waro nigtuu to warad paginlabot to soin no kalibutan. Ogkounawa ian koddi, kona a ogpaginlabot to soin no kalibutan. 15 Kona a ogbuyu to og-awoon nu sikandan to soin no kalibutan. Ian ku ro ogbuyuon to ogbantayan nu sikandan oyow kono ogkaroog ni Satanas. 16 Songo unawa sikandan koddi; warad labot dan to kalibutan. 17 Pinabayo to kagi nu no ian malogot, indani nu sikandan to ogtuman to koykow no goinawa. 18 Ogsuguon ku sikandan dio to mgo waro nigtuu kai to soin no kalibutan no unawa ian to nigsugu a nud kai to soin no kalibutan. 19 Tongod to soini, igbogoy ku rio to koykow ka koddi no goinawa oyow ogtuman lagboy to koykow no goinawa sikandan. 20 Kono no sikandan do ka og-ampuan ku. Og-ampuan ku rod ka sikan no mgo otow no ogtuu pad uromo ko ogdinogon dan ka nangnangonon dan. 21 Og-ampuan ku sikandan tibo oyow ko ogtuu on sikandan, ogkasagboka ro so lawa ran. Ka goinawa ku to sikandan woy sikanta, Amo, salupungan kinow no ogkounawa to kanta, salupungan kid. Sikan ka goinawa ku to salupungan sikandan oyow ogtuu ka mgo waro pad nigtuu to nigsugu a nud. 22 Nigbogayan kud sikandan to unawa no katondanan to imbogoy nud koddi oyow ogkasalupung do sikandan su unawa koykow woy koddi, nasalupung ki ro. 23 Duon a dio to kandan, woy sikoykow, duon ka kai to koddi oyow ogkasagboka lagboy sikandan to goinawa ran. Sikan oyow ogkataga ka mgo waro nigtuu to nigsugu a nu woy duon goinawa nu kandan no un-unawa ka goinawa nu dii to koddi. 24 “Amo, ogkoiniatan ku to uromo no oghondio to koykow ka mgo ogtuu no insalig nud koddi. Ka koiniatan ku oyow ogkitoon dan ka karayawi ku no imbogoy nud koddi su dakol man ka goinawa nu koddi to waro pad ka soin no kalibutan.” 25 “Matuwarong ka, Amo. Woy Amo, waro mogtokod koykow ka mgo waro nigtuu koykow. Di sikoddi, nataga a koykow woy ka sikandan no insalig nud koddi, nataga on to sikoykow ka nigsugu koddi. 26 Impatokod kud sikandan bahin koykow woy ogparagason ku pad to oghimu oyow ogkoilingan dan to koykow no goinawa dio to duma ran woy oyow songo og-ugpo a dio to kandan no goinawa.”

Huan 18

Ka Pogdakop ki Hisus

1 Ko nakaponga nig-ampu si Hisus, nighipanow duma to mgo hibatoon din. Piglappas dan ka sagboka no bougan no oghingaranan to Kidron no nigsolod to songo pinamula no kayu. 2 Si Hudas no hibatoon din no ogpanabod ki Hisus, nataga ko hondoi buwa ka soin no pinamula no kayu su malasi oglimudlimud dio si Hisus woy ka mgo hibatoon din. 3 Nò, nigduma ni Hudas ka mohon-ing no sundalu no taga Ruma woy duma no mgo talagbantoy to sika Dakol no Ampuanan to mgo Hudiu. Ka mgo igbuyag to talagpanubad woy ka mgo Parisiu ka pigsugu to mgo talagbantoy. Tibo sikandan, nig-alap dan ka mgo ilawan dan woy ka mgo pupud, mgo moirob mgo kayu no panagana iglampos dan. Nanhondio to sikan no pinamula no kayu. 4 Nataga si Hisus to tibo no ogpokouma kandin. Nò, ko nakatagbu on sikandan woy ki Hisus, nigsagdok. Nig-inso ni Hisus kandan to, “Hontow ka ogpamitawon now?” 5 Nigtabak dan to, “Si Hisus no matig Nasarit ka ogpamitawon noy.” Kagi ni Hisus, “Sikoddi man ian.” Si Hudas no nigtabod kandin, duon dio to longod to mgo sundalu. 6 Ko nignangonan ni Hisus to, “Sikoddi man ian,” nig-ituos sikandan no nakalay-ung sikandan dio to tano. 7 Nighutuk nig-inso si Hisus to, “Hontow ka ogpamitawon now?” Nigtabak to, “Si Hisus no matig Nasarit.” 8 Kagi ni Hisus, “Nignangonan kud sikaniu to sikoddi ian ka ogpamitawon now. Ko sikoddi naan ka ogpamitawon now, kono now ilagkos ka soini no duma ku no mgo lukos.” 9 Nigkagi rin soini oyow ogkatuman ka kandin no innangon to Magboboot. Kagi rin, “Amoy, waro ka agad sagboka no otow no nigsalin to sikan no imbogoy nud koddi.” 10 Nò, nasisinikot si Simon Pedro no nighulabut din ka moirob din no nigsilap ka kawanan no talinga to suguonon to sikan no Labow to mgo talagpanabud. Si Malku ka ngaran to sikan no suguonon. 11 Kagi ni Hisus kuwo ki Pedro, “Itagob nu, Usi, ka moirob nu. Nahan nu buwa to kona a og-aguantoon to sikan no igkabaybayari ka imboot to Amoy ku koddi.”

Si Hisus dio to Tangkaan ni Annas

12 Nò, ka sika mgo sundalu, tagkos to igbuyag dan, woy ka sikan no mgo talagbantoy to Dakol no Ampuanan, nigdakop dan si Hisus woy nigbanggutan dan sikandin, 13 woy nigduma ran sikandin dio ki Annas. Anogang ni Kaipas si Annas no si Kaipas ka Labow to Igbuyag to mgo Talagpanubad to sikan no tuid. 14 Si Kaipas ian ka nigtambag to mgo Hudiu to litos ko sagboka ro no otow ka ogkamatoy to salo to tibo no otow.

Nighoholos si Pedro ki Hisus

15 Ko nigduma ran si Hisus dio, nigsundul ki Hisus si Simon Pedro woy ka duma no hibatoon din. Nakasolod ka sikan no dangob no hibatoon dio to lama to Labow to mgo Talagpanubad su nigtokod do to sikan no Igbuyag. 16 Si Pedro, wa mogsolod; dio do to limang to gumawan nig-ugpo. Nò, ka sikan no hibatoon ni Hisus no ogtokoron to sikan no Igbuyag, niglibong dio to gumawan. Nigkagian din ka boi dio no talagbantoy to gumawan woy impasolod din si Pedro. 17 Kagi to sikan no boi kuwo ki Pedro to, “Agad sikoykow songo hibatoon ka buwa to sikan no lukos no nigdakop dan.” Nigtabak si Pedro to, “Kona a no duma rin!” 18 Mahagsil ian dio no nigtotomog to uling ka mgo suguonon to sikan no igbuyag woy ka sikan no mgo talagbantoy. Dio ogmanhinarang. Nò, songo oghinarang si Pedro dio to longod dan.

Pig-insoinso si Hisus to Labow no Talagpanubad

19 No, dio si Hisus to baloy ni Annas no pig-insoinso dan si Hisus bahin to mgo hibatoon din woy ka ig-anad din. 20 Nigtabak si Hisus kuwo kandan to, “Nigkagi a no impapitow kud dio to mgo otow ka tibo no in-anad ku. Pig-anad a dio to mgo anaranan to mgo og-ampu woy dio to sikan no Dakol no Ampuanan ta no sikan ka limuranan to tibo no mgo Hudiu. Waro ku iholos ka kagi ku. 21 Manio to sikoddi ka og-insaan now? Ian now insoi ka mgo otow no nakarinog koddi su sikandan ka nataga on to in-anad ku.” 22 Ko nakaponga nigkagi si Hisus, nigtagpi to sagboka no talagbantoy kandin no kagi rin kandin, “Umba bag sikoykow su oglangub ka no ogtabak to soin no buyag to talagpanubad?” 23 Si Hisus, nigtabak no waro nig-atu. Kagi rin, “Ko nig-uubat a pa, titigus kow kai to tangkaan to soin no mgo otow to ubat ku. Di ko malogot ka kagi ku atag, manio naan to nigtagpi on a nu?” 24 Nò, nigparuma ni Annas si Hisus no nabanggutan dod dio ki Kaipas no sikandin ka Labow to mgo Talagpanubad.

Nighoholos man do si Pedro ki Hisus

25 Ko si Pedro pad, dio dod to marani to hapuy no oghinarang. Nig-inso ka duma no mgo otow kandin to, “Hibatoon ka rod buwa to sikan no lukos?” Nigligal si Pedro to, “Kona a no hibatoon din.” 26 Duon dio ka sulod to sika otow no nasipsip ni Pedro ka talinga rin. Suguonon ka soin no otow to sikan no Labow to mgo Talagpanubad. Nig-inso din to, “Pigkita kud sikoykow buwa no nigduma ka ki Hisus ko dio to sikan no pinamula to kayu?” 27 Nighutuk nigligal si Pedro. No sikan do ian no nig-ukalo ka manuk.

Ogtangko si Hisus ki Pilatu

28 Ko si Hisus pad. Ko solomsolom pad, inhatod dan si Hisus ligkat to baloy ni Kaipas no oghondio to sikan no dakol no baloy to gobirnador no taga Ruma no si Pilatu. Waro nigsolod to baloy ka mgo Hudiu su konon litos kandan no oglop-ang to Balaod to tinuuanan dan su ko ogkaligsoman kono ogpakakoon kandan to poglabung dan to Pagkoonan to Paligad. 29 Nò, niglibuwas si Pilatu dio to kandan no kagi rin, “Nokoy ka igbayung now to soin no lukos?” 30 Nigtabak sikandan no kagi ran, “Ko waro salo to soin no otow, wa noy alapa kai to koykow.” 31 Kagi ni Pilatu, “Kaniu ro ka ogboboot no sikan no Balaod to mgo Hudiu ka ogtumanon now.” Nigtabak ka mgo Hudiu to, “Kono ogbogoy ka koykow no balaod to oghimatayan noy ka otow.” 32 Soini ka innangon dan oyow ogkatuman ka innangon ni Hisus to kamatayon din to oghimatayan ka lawa rin dio to krus. 33 Nighutuk nigsolod si Pilatu to dakol no baloy rin no pinarani rin on si Hisus. Nig-inso si Pilatu ki Hisus to, “Koykow ka Labow no Igbuyag to mgo Hudiu?” 34 Mgo inso dod ka intabak ni Hisus. Nig-inso to, “Ligkat to koykow no goinawa ka soin no inso nu? Ko kono, nignangonan kad to mgo otow?” 35 Nigtabak si Pilatu to, “Bak Hudiu a! Ka duma nu no mgo Hudiu woy ka mgo igbuyag to talagpanubad now ka nighatod koykow kai to koddi no gobirnador. Nokoy man ka salo nu?” 36 Nigtabak si Hisus to, “Kono no kai to kalibutan ka koddi no pogsugu. Ko kai to soin no kalibutan ka pogsugu ku, pokog-ogot-ogot ka mgo sakup ku oyow kona a porom ogkapurut to mgo igbuyag to mgo Hudiu. Di kona a no Igbuyag kai to soin no kalibutan.” 37 Nig-inso si Pilatu kandin to, “Songo Labow no Igbuyag ka naan?” Kagi ni Hisus, “Koykow ian ka nigkagi. Ko sikoddi, sagboka ro ka tuud ku no oghondini to soin no kalibutan. Ogpohitaga ku ka malogot do no pog-anad dio to mgo otow. Ko hontow ka ogkoiniatan lagboy to ogpamminog to sikan no malogot, ogpamminog koddi.” 38 Nig-inso ni Pilatu, “Nokoy naan ka malogot?” Di wa din nigtagad to tabak no niglibong dio to libuwasan dio to mgo Hudiu. Kagi rin kuwo kandan, “Waro ku man matagoi ka agad sagboka no salo din 39 Di duon kaniu no batasan. Ko soin no Pagkoonan to Paligad, ogpalibuwason ku ka sagboka no pinirisu. Ka goinawa now buwa to ogpalibuwason ku ka soin no Labow to Igbuyag to mgo Hudiu?” 40 Di nigbabansagon to mgo otow no ogtabak to, “Kono no soin no lukos; si Barabas ka ogpalibuwason nu.” Nò, si Barabas ka ribildi.

Huan 19

Nigbobootan si Hisus to Ogkamatoy

1 Nò, nigpalamposan ni Pilatu si Hisus to mgo sundalu. 2 Woy niglubid to mgo sundalu ka mgo dugi no nighimu ran ka igkogos. Impakogos dan to ulu ni Hisus. Songo pigsalauban dan sikandin to moitom-itom no manggad noindanan to mgo Igbuyag di liagan do duon. 3 Ko napongaan on to nigsalaub woy ka kogos din, tag sagboka no sundalu ka nigdani ki Hisus no ogsumpalit do duon to tahud dan. Kagi ran, “Kumusta ka, Labow to Igbuyag to mgo Hudiu!” woy nigtagpi dan ka langlanguwan din. 4 Nighutuk niglibuwas si Pilatu to libuwasan to tangkaan to mgo Hudiu. Kagi rin kuwo kandan to, “Pitow kow, ogpalibuwason ku dii to tangkaan now si Hisus oyow ogkataga kow to waro ku matagoi ka salo din agad sagboka.” 5 Nò, niglibuwas si Hisus no nasalauban on to sikan no moitom-itom no manggad woy duon ka sikan no kogos din no dugi. Kagi ni Pilatu kuwo kandan, “Pitow kow! Soinid ka lukos!” 6 Ko nigkita ka mgo igbuyag to talagpanubad woy ka mgo talagbantoy to Dakol no Ampuanan ki Hisus, nigbabansagon to, “Ipalansang nu sikandin dio to krus.” Nigdogaroga si Pilatu no kagi rin, “Kua now on. Kaniu on ka oglansang dio to krus. Waro makasalo to balaod noy no taga Ruma.” 7 Nigtabak ka mgo Hudiu to, “Duon kanami no sugu to Balaod noy. Ko ogpaagad-agad koy to sikan no sugu, ogpohimatayan sikandin su nignangon sikandin to kandin kun ka Anak to Magboboot.” 8 Ko nigdinog ni Pilatu ka soin no imbayung dan, dakol on ka igkahallok din. 9 Nò, nighutuk nigsolod si Pilatu dio ki Hisus. Nò, nig-insaan din si Hisus to, “hondoi ka malogot no pigligkatan nu?” Di waro mogtabak si Hisus. 10 Nò, nig-inso ni Pilatu, “Kona a nu ogtabakon? Waro ka buwa mataga to duon katondanan ku to ogpalibuwas koykow woy to ogpalansang koykow dio to krus?” 11 Nigkagi si Hisus. Kagi rin, “Duon katondanan nu koddi su nabogayan ka to Magboboot. Ko waro ka rin mabogayi, waro man porom katondanan nu koddi. Nò, sikan no otow no inhatod a rin kai to kaniu, niglabow ka salo din.” 12 Ko nigdinog ni Pilatu to soin no kagi ni Hisus, nigpamakutan din oyow ogpalibuwason din si Hisus. Di nigbabansagon ka mgo Hudiu to, “Ko ogpalibuwason nu si Hisus, kono kad on no amigu to labow no igbuyag now dio to Ruma no si Sisar. Agad hontow no og-abinon to sikandin ka Labow no Igbuyag, usig sikandin to Labow now.” 13 Ko nigdinog ni Pilatu ka soin no kagi, nigduma rin si Hisus dio to libuwasan. Nigpinnuu si Pilatu dut pinnuuanan to talagboot. Duon ka soin no pinnuuanan dio to soog no nohimu ka soog no batu no oghingaranan to Hinibriu to “Gabata” no ian ka kandan no kinagian. 14 Sikan ka allow to igtagad dan to sunud no allow no Pagkoonan to Paligad no kono ogpakatalabau ka mgo Hudiu. Marani on ogkougtu ian ko niglibuwas si Pilatu. Kagi rin kuwo to mgo Hudiu, “Wow mgo Hudiu, soini on ka kaniu no Labow no Igbuyag.” 15 Nigbabansagon kandan to pogtabak dan to, “Himatayi now; ipalansang nu dio to krus.” Nig-inso si Pilatu, “Ogpohimatayan ku ka kaniu no Labow no Igbuyag?” Nigtabak ka mgo igbuyag to talagpanubad. Kagi, “Warad duma no labow no igbuyag noy. Si Sisar do ka labow no igbuyag noy.” 16 Omunaan, nigbogoy ni Pilatu to igpalansang on si Hisus dio to ampow to krus.

Si Hisus, Niglansang dio to Krus

No nig-alap to mgo sundalu si Hisus dio to ogkamatayan din. 17 Niglibuwas on woy si Hisus to lunsud no nigtiang din ka krus din no nanhondio to tano no oghingaranan dan to Golgota ko Hinibriu no kinagian. Ka kalitukan to sikan no kagi, ‘Bokog to Ulu.’ 18 Ko nigdatong on dio, piglansangan dan sikandin dio to krus. Songo duon darua no lukos no impalansang dan to mgo krus dio to managkiliran ni Hisus. 19 Nigpasulatan ni Pilatu ka manipis no kayu no imparokot dan dio to ampow to ulu ni Hisus. Soini ka impasulat din. Kagi, “Hisus no taga Nasarit, Labow no Igbuyag to mgo Hudiu.” 20 Mohon-ing ka mgo Hudiu no nigbasa to soin no insulat su kono no mariu to lunsud ka krus ni Hisus. Tatolu ka kinagian to sikan no insulat ni Pilatu. Duon to Hinibriu. Linatin woy Ginirigu. 21 Nigkagi to mgo igbuyag to talagpanubad ki Pilatu. Kagi, “Waro nu porom isulat to ‘Labow no Igbuyag to mgo Hudiu.’ Insulat nud porom to ‘Nignangonan din to sikandin ka Labow no Igbuyag to mgo Hinibriu.’ ” 22 Nigtabak si Pilatu to, “Ka inpasulat kud, kono ku ogbalbalawan.” 23 Nò, ko inlansang on si Hisus to mgo sundalu nigloglogoban dan on ka manggad din to hop-at no sundalu. Songo nigkuo dan ka kinabo din no hinabol no waro toia. 24 No, nigmakagkagioy ka soin no hop-at no sundalu. Kagi ran, “Ko tad oggision; oghantak kid do ko hontow ka ogdoog, sikandin ka tagtuun.” Soini no nighimu ran no oghantak oyow kono ogkagisi ka sikan no kinabo din, sikan ian ka natuman no nakasulat to Tahan no Kasulatan. Kagi, “Nigloglogoban dan ka manggad ku woy pighahantakan dan ka kinabo ku.” Sikan ka inkasulat. No, ian ka nighimu to sika mgo sundalu. 25 No, marani ro dio to krus ni Hisus ogmanasasindog ka inoy rin, woy ka kakoy to inoy rin, woy si Maria no asawa ni Kliopas, woy si Maria Magdalina. 26 Ko nigkita ni Hisus ka sika no hibatoon din no dakol so goinawa rin kandin no ogsasindog dio to longod to inoy rin, nigkagian din ka inoy rin bahin to sikan no hibatoon din. Kagi, “Ino, sikandin on ka anak nu.” 27 Woy nigkagian din ka sikan no hibatoon din to, “Usi, sikandin on ka inoy nu.” Nò man, nigpakiino sikandin no dio on to kandin nig-ugpo ka inoy ni Hisus.

Ka Kamtayon ni Hisus

28 Nataga on si Hisus to natuman on ka tibo no insugu kandin. Nigkagi sikandin to, “Ogkoibog a to og-inum” oyow ogkatuman ka nakasulat to tahan no diblu. 29 Duon marani to krus ka sagboka no boung no mangilu no bino. Nig-olod to songo otow ka molintok no kotson dio to sikan no bino no pigtuik din ka kotson to kayu no oghingaranan to hisop woy intaruwoy rin dio to bo-bo ni Hisus. 30 Ko nigsupsup on ni Hisus ka mangilu no bino, nigkagi rin to, “Natuman on ka tibo.” No, nig-unduk woy inlibuwas din ka gimukud din.

Pigsugkal ka Kilid ni Hisus

31 Nò, nig-inso ka mgo igbuyag to mgo Hudiu ki Pilatu ko ogbogoy to ogkapantigan ka mgo lison to sikan no tatolu su magaan do porom og-awaa ka lawa to namatoy su allow ran to oghimu to igtagad to Allow ran to Oghimoloy to sunud no allow. Dakol ka igtahud dan to sikan no allow woy kono ogkaayun to Balaod dan ko ogkagalat ka mgo namatoy to krus to sikan no Allow ran to Oghimoloy. 32 Nighoo si Pilatu. Nò, nigpantigan to mgo sundalu ka lison to sikan no darua no lukos no songo nighimatayan dan dio to krus no si Hisus ka igkatatolu ran. 33 Di ko nigmarani on ki Hisus, nigkita ran to namatoy on. Nò wa dan on atag pantigi ka lison din. 34 Di nigdugsuan do to sagboka no sundalu ka kiliran ni Hisus to kommag din oyow ogkatagaan din ko namatoy on. To pogdugsu kandin, nakalibuwas ka langosa woy woig ligkat to kiliran din. 35 Sikoddi no si Huan, nigkita kud ka tibo soini woy ogtitigus a kuntoon oyow songo ogtuu kow. Malogot man ka kagi ku; ogkasaligan ka kagi ku. 36 Nohimu soini oyow ogkatuman ka kagi to Magboboot dio to Tahan no Kasulatan. Kagi, “Waro pantigi ka bokog din; agad sagboka, waro.” 37 Agad duon ka dangob no impasulat to Magboboot nokani no natuman. Kagi, “Oglonghagon to mgo otow ka sikan no otow no narugsuan dan.”

Ka Pogsabal ni Hisus

38 Naponga soini, duon dio ka sagboka no lukos no si Husi no taga Arimatia. Sakup ni Hisus sikandin di inholos din ka mgo otow su ogkahallok to mgo igbuyag to mgo Hudiu. Nighondio sikandin ki Pilatu no nigbuyu din ka lawa ni Hisus. Nigbogoy si Pilatu no nig-awo din on. 39 Nò, nigduma si Nikodimu ki Husi dio to krus. Si Nikodimu ka sikan no otow no nighondio ki Hisus ko marusilom. Kuntoon, nig-alap din ka kahop-atan no kilus woy lalimma no mohomut. Nokogsoogsoog on ka sikan no mohomut to oghingaranan dan to mira woy alows. 40 Inlogsad on to soi darua no lukos ka lawa ni Hisus. Nigbukusan dan ka lawa rin to tol-ob no litos no igbukus to namatoy no duon isabuk ka sikan no mgo mohomut to tol-ob. Nighimu ran ka soini no batasan to mgo Hudiu dio to lawa to mgo namatoy woy ran isabal. 41 Marani to sikan no pighimatayan dan ki Hisus duon ka songo pinamula no duon to sikan no pinamula ka pilang no sabalanan to namatoy di iam pad mohimu; waro pad sabali to namatoy. 42 Dio dan isabal ka lawa ni Hisus su marani woy su magaan on ogpokouma ka igbunsud to Allow to mgo Hudiu to Oghimoloy.

Huan 20

Warad on Lawa to Sabalanan

1 Ko magaan ogkapawo to allow to Dominggo, niglouy si Maria Magdalina to pigsabalan. Ko nokouma dio nigkita rin to noonsig ka batu no inlokob to pilang. 2 Nò, nigpallaguy no nighondio ki Simon Pedro woy ka sikan no dangob no hibatoon no duon dakol no goinawa ni Hisus kandin. Nignangonan sikandan to, “Nigkuo dan ka lawa ni Hisus to pigsabalan dan. Wa ki mataga ko hondoi ran isabuk.” 3 Nò, nighipanow si Pedro woy ka sikan no duma rin no hibatoon no oghondio to sikan no sabalanan. 4 Nigpallaguy ka darua di matmatallong ka dangob ki Pedro no nokohun-a nigdatong dio to sabalanan. 5 Nigsoilang sikandin no nakakita to maputi no imbukus dan to lawa di waro mogsolod to pilang. 6 Nokouma on si Simon Pedro no nigparagas nigsolod to pilang. Nigkita rin ka imbukus no manggad dio. 7 Woy nigkita rin ka paniu no impakulubow on to ulu ni Hisus dio to dapit no natapid on. 8 Nò, ka sikan so nokohun-a mokouma dio to pilang, nigparagas nigsolod. Ko nigkita rin ka tibo, nigtuu on sikandin to nouyag on si Hisus. 9 Di waro pad makasabut sikandan to sikan no Tahan no Kasulatan to Magboboot no nignangon to ogkootawan si Hisus. 10 Nò, nouli on ka mgo hibatoon din.

Nigpapitow si Hisus ki Maria Magdalina

11 Di si Maria Magdalina, waro makaruma. Ogsisinogow ro dio to libuwason to sabalanan. Pogsisinogow niglukbu oyow soilangan din dio to solod to sabalanan, 12 no nigkita rin ka darua no diwata no suguanon to Magboboot no maputi so kinabo dan. Ogpinnuu ka diwata dio to nasabukan to lawa ni Hisus. Nigpinnuu ka sagboka dio to ogkoulunan din porom; ka dangob dio to kasikaran porom. 13 Nig-inso ka diwata ki Maria to, “Igi, manio to ogsinogow ka?” Nigtabak si Maria to, “Ogsinogow a su nigkuo dan on ka lawa to Igbuyag ku no wara a mataga ko hondoi ran on isabuk.” 14 Ko nakaponga no ogkagi, niglingi no nigkita rin si Hisus no nigsasindog dio di wa din tokora ko si Hisus ian. 15 Kagi ni Hisus kuwo kandin, “Igi, manio to ogsinogow ka? Hontow ka ogpamitawon nu?” Nahan ni Maria no talagbantoy to pinamula si Hisus. No kagi rin kuwo kandin, “Anggam, ko si koykow ian ka nighalin to lawa rin, nangoni a ko hondoi nu isabuk su ogkuon ku ro.” 16 Nigkagi ni Hisus kandin. Kagi rin, “Maria!” Nigtangko sikandin ki Hisus no nigkagi to Hinibriu. Kagi rin, “Rabonai.” Ka kalitukan, “Maistru.” 17 Kagi ni Hisus kuwo kandin to, “Kona a nu pa gongoni su wara a pad batuna dio to Magboboot no Amoy dio to langit. Oghondio ka pad to mgo sulod ta no nangoni nu sikandan to oghondio a pad to Amoy ku no songo Amoy now ian. Sikandin ka Magboboot ku woy sikandin ian ka Magboboot now.” 18 Nò, nighondio si Maria Magdalina to mgo hibatoon ni Hisus no kagi rin kuwo kandan, “Nakakita ad to Igbuyag ta.” Songo nignangon din ka tibo no innangon ni Hisus kandin.

Nigpakita si Hisus to mgo Hibatoon din

19 Ko marusilom on to sika allow to Dominggu, nalimud ka mgo hibatoon ni Hisus dio to songo baloy. Nakandaruan on ka mgo lokob su ogkahallok to mgo igbuyag to mgo Hudiu. Nò, nakarongan do si Hisus nigpakita dut taliwaro kandan no kagi rin, “Kono kow ogkahallok; ka kalinow, ogduma kaniu.” 20 To naponga nigkagi to soini, impapitow rin kandan ka pali to mgo bolad din woy kiliran din. To nigkita ran, nataga on to si Hisus ian woy narago on lagboy to nigkita ran sikandin. 21 Nighutuk nignangon si Hisus to, “Ogduma kaniu ka kalinow.” Nigsugu din sikandan no kagi rin, “Songo ogsuguon ku sikaniu no ogkounawa to nigsugu ad to Amoy ku no Magboboot.” 22 Ko nighagtong nigkagi si Hisus, pig-uwangan din sikandan no kagi rin kuwo kandan, “Tinawaa now ka Gimukud to Magboboot.” 23 Ko ogpasayluan now ka salo to mgo otow, ogkapasaylu ro. Di ko kono now ogpasayluon ka salo to songo otow, songo kono ogpasayluon.

Ogtambabo si Tomas

24 No, si Tomas no oghingaranan dan to soping ka songo duma ran no tahan no hibatoon ni Hisus. Waro naka-amut si Tomas dio ko nigpakita si Hisus to duma no hibatoon din. 25 Su waro dio, nignangonan noy sikandin to, “Nakakita koy ki Hisus.” Di nigtabak si Tomas to “Ko sikoddi, woy ad ogtuu ko ogkitoon ku ka pali to lansang dut bolad din woy ogsapuon ku ka mgo pali din. Agad ko kono ku ogsamsamon ka pali to kiliran din, kona a man ogtuu to nootawan on.” 26 Ko natuman ka wawalu no allow, nalimudlimud nighutuk ka mgo hibatoon ni Hisus dio to sagboka no baloy. Duon on si Tomas. Nalokoban on ka baloy di nakarongan do ian si Hisus nigpakita dio to taliwaro dan no kagi rin, “Ogduma kaniu ka kalinow.” 27 No, kagi rin ki Tomas, “Usi, dii nu ka tinuru nu. Pitow ka, kai nu to bolad ku. Woy pitow ka, isamsam nu ka bolad nu kai to kiliran ku. Hagtong kad, Usi, to ogtambabo; tuu kad on.” 28 Nigtabak si Tomas no kagi rin, “Lagboy no Igbuyag ku woy ka Magboboot ku.” 29 Kagi ni Hisus kuwo kandin, “Nigtuu kad on koddi su tongod to pigkitaan a nud. Di ogkapulusan ka sikan no otow no nigtuu no agad waro nigkita koddi.”

Ka Tuud to Pogsulat to Soini no Diblu

30 Mohon-ing pa no koin-inuan ka nighimu ni Hisus dio to tangkaan to mgo hibatoon din no wa ikasulat kai to soin no diblu. 31 Di insulat kud soini, oyow ogpakatuu kow to si Hisus ka Anak to Magboboot woy sikandin ka Im-imanan to mgo Koot-otawan. Agad inkasulat oyow ogkootawan kow no waro katamanan ko ogtuu kow on kandin.

Huan 21

Nigpapitow si Hisus to Papitu no Hibatoon din

1 Nigpakita man do si Hisus nighutuk dio to mgo hibatoon din dio to lanow no oghingaranan to Tibirias. Ka unawa to soini ka pogpakita rin kandan. 2 Nigmaam-amutoy si Simon Pedro, si Tomas no oghingaranan to soping, si Natanial no taga Kana no sakup to Galilia, ka darua no anak ni Sibidiu, woy songo darua no hibatoon ni Hisus, tibo, nigmaam-amutoy. 3 Kagi ni Simon Pedro kuwo to mgo duma rin to, “Ogsisigay a.” Kagi ran kandin, “Songo ogduma koy ro.” Nò, nighipanow on dio to woig woy nan-untud to balutu ran. Nigsisigay to tibo no marusilom di waro noutol. 4 To nigsilo do ka allow, dio to pantad ogsasindog si Hisus. Di waro pad tokora to mgo hibatoon din to si Hisus ian. 5 Ko marani on to pantad ka balutu ran ran, nig-umow si Hisus kandan. Nig-inso din ko duon ngalap dan no noutol dan. Nigtabakan dan to, “Waro; agad sagboka, waro.” 6 Kagi rin kuwo kandan, “Dio now sisigay to kawanan to balutu now su duon ngalap dio.” Nò, nigtoon dan on ka sigay ran no mohon-ing ka nigsagad no ngalap to sigay ran no kono dan ogkagoon to oghusud. 7 No, ka hibatoon no nigdakoli ni Hisus to goinawa rin, nigkagian din si Pedro no kagi rin, “Ka Lagboy no Igbuyag ta ian.” To pogdinog ni Pedro to Lagboy no Igbuyag naan sikan, piglogdak din ka akob to kinabo din su niglobas man sikandin. Nò, nigtinugpu on dio to woig. 8 Di ka duma no hibatoon no nagalat to balutu, nighusud dan to sigay no naponu to ngalap su marani on to pantad; kawaluan no dopa ro duon. 9 Ko niglogsad sikandan, nigkita ran ka paan woy duon pigtomogan no hapuy no duon ogtuugon no ngalap. 10 Nigkagi ni Hisus kandan to, “Alapa now ka duma no noutol now no ngalap.” 11 Nokoy naan, nighondio to balutu si Simon Pedro no nighokad din ka sigay no naponu to mgo dakol no ngalap. Duon songo gatus to ngalap woy kalimmaan woy tatolu. Di agad ko mohon-ing ka nigsagad, waro magisi ka sigay. 12 Kagi ni Hisus kandan, “Dii kow on, oglom-ag kinow.” Di waro agad sagboka no hibatoon din no niglangob nig-inso to “Hontow ka?” Nataga ian to sikandin ka Lagboy no Igbuyag dan no si Hisus. 13 Nigmarani si Hisus kandan no pigpurut din ka paan woy impanbogoy kandan. Songo impanbogoy rin ka sikan no ngalap. 14 Sikan ka igkatatolu no pogpakita ni Hisus to mgo hibatoon din to nootawan on.

Si Hisus woy si Pedro

15 To nakaponga nigkoon, nigkagian ni Hisus si Pedro. Nig-inso din to, “Koykow Simon, anak ni Huan, labow ka goinawa nu koddi to goinawa koddi to soini no mgo duma nu?” Nigtabak si Pedro to, “Hoo, Buyag; nataga ka to duon goinawa ku koykow.” Kagi ni Hisus kandin, “Bantayi nu ka mgo anak to karniru ku,” 16 Nighutuk nig-inso si Hisus kandin to, “Simon, anak ni Huan, duon goinawa nu koddi?” Kagi ni Simon, “Hoo man naan, Buyag. Nataga ka to duon goinawa ku koykow.” Kagi ni Hisus, “Bantayi nu ka koddi no mgo karniru.” 17 Nighutuk man do nig-inso si Hisus ki Pedro to, “Simon, anak ni Huan, dakol ka goinawa nu koddi?” Masakit on so goinawa ni Pedro to soini so igkatatolu no inso ko duon goinawa rin kandin. No, nigtabak to, “Buyag, nataga ka to tibo. Nataga ka man to dakol ian ka goinawa ku koykow.” Kagi ni Hisus kuwo kandin, “Bantayi nu ka mgo karniru ku.” 18 “Malogot ka soin no ogkagion ku koykow. Ko balubato ka pad, nigpanagana kad no nighipanow kad on no sikoykow ka nigboot ko hondoi ka ogdolog. Di Usi, ko ubanon kad on, ogparoropoon kad no ogbanggutan ka to songo otow no og-alapon ka dio to kono nu ogkoiniatan porom.” 19 Sikan ka innangon ni Hisus oyow ogkataga porom to ogbayaan ni Pedro to igkamatoy rin no oyow ogsayoon din ka Magboboot. No, kagi ni Hisus ki Pedro to, “Unug ka koddi, Usi.”

Si Hisus woy ka Sika Dang-ob no Hibatoon din

20 Nigbalikid si Pedro no nigkita rin ka sikan no dangob no hibatoon no ogluyud no marani to poka ran. Sikandin ian no dakol so goinawa ni Hisus no nig-inso kud ki Hisus to sikan no poglabung dan ko hontow ka ogtabod kandin. 21 Ko nigkita ni Pedro sikandin, nig-inso din ki Hisus to, “Buyag, nokoy naan on ka ogkoumaan to kandin uromo?” 22 Nigtabak si Hisus kandin to, “Agad ko ogkoiniatan ku to ogkootawan sikandin taman to poglibong ku, nokoy naan so labot nu kandin? Sikoykow, unug ka ro koddi.” 23 Ko narinog on ka sikan no tabak ni Hisus, nahan to mgo nigtuu no kono ogkamatoy ka sikan no hibatoon. Di loin ka lituk to kagi ni Hisus. Kagi rin atag, “Ko sikan ka goinawa ku to kono ogkamatoy sikandin taman to iglibong ku kai to soin no kalibutan, waro man labot nu, Pedro.” Waro din nignangon to kono ogkamatoy sikandin. 24 Koddi ian ka nigsulat to tibo soini no nakakita a man to insulat kud. Agad nataga koy dii to malogot ka soin no insulat kud.

Ka Katamanan

25 Mohon-ing dod ka mgo nighimu ni Hisus. Ko ogsulatan ka papil to tibo, kono no litos buwa ka soin no kalibutan to ogtaguan to sikan no mgo diblu.