John 1

Ini se Mid-ingaranan ne Lalag ne Mibpebaluy ne Menusiyà

1 Rengan te warà pà limbaha ini se misan engkey en, ne raan en ketà ke mid-ingaranan te Lalag. Ne iyan kineingarani kandin ne Lalag su igkepayag din ke langun ne netahù te itungan te Eleteala. Ne raan sikandin ne ruma te Eleteala su Eleteala red dema sikandin. 2 Dut te warà pà melimbag ini se misan engkey en ne duma en sikandin te Eleteala. 3 Ne impepevayà kandin ne midlimbag te Eleteala ke langun taman, ne warà misan seveka rut te nelimbag ke kenà impepevayà kandin. 4 Sikandin ke ebpuunan te umur te menusiyà, ne ke umur din se ebpekerayag te itungan te langun ne menusiyà. 5 Ne nekeandlag ke kerayag din diyà te kerusireman, ne ke kerusireman ne warà mekeevuk dut te kerayag. 6 Duen senge etew ne mid-ingaranan ki Juan ne midsuhù te Eleteala. 7 Iyan din kinesuhua ki Juan ne ebpepemenduen din mekeatag dut te kerayag ne si Hisus su apey ke langun ne ebpekerineg dut te penduan ne ebpekeperetiyaya. 8 Si Juan ini ne kenà ke kerayag, ugaid ne sikandin ke edseysey mekeatag kayi te kerayag. 9 Su ini ke benar ne kerayag ne mibpebaluy ne etew, ne nekeuma en kayi te ampew te dunya su edrayag dut te itungan te langun ne menusiyà. 10 Nekeuma en sikandin kayi te ampew te dunya, ugaid ne warà mekekilala kandin ke menge etew misan impepevayà kandin ke kinelimbag dut te dunya. 11 Nekeuma sikandin kayi te inged din, ne misan ke kereremigey rin ne Hudiyanen ne warà midtelimà kandin. 12 Ugaid ne misan engkey ne etew se midtelimà wey mibperetiyaya en kandin ne mibehayan din te ketenged te egkevaluy ran ne tuney ne menge anak te Eleteala. 13 Ne iyan dalan te kinekevaluy ran ne menge anak te Eleteala ne kenà bineelan dà te menusiyà, etawa impenganak te menge etew rà ne amey, su iyan dan Amey ne Eleteala. 14 Ne ke mid-ingaranan te Lalag ne mibpebaluy en ne menusiyà ne mid-ubpà en kayi te keytew. Ne lilimuen nevenar sikandin, wey ke langun ne egkehiyen din ne benar. Nekita rey ke geyip ne gehem din ne imbehey kandin te Eleteala su sikandin ke budtung ne Anak te Amey rin ne Eleteala. 15 Ne mibpenurù si Juan mekeatag kandin ne impenawag din se egkahi te, “Ini ve ke etew ne impenudtul ku keniyu te, ‘Duen senge etew ne ebpeketundug kediey, ugaid ne misan ebpeketundug dà kediey ne sikandin se muna pà ne mepurù kediey, su ketà te warà e pà in-anak ne raan en ketà sikandin.’” 16 Geina te dekelà ke limù din ne sikitew langun ne mibehayan din te penaub, ne ini se penaub ne warà kegkepupus din. 17 Su si Moises ke nekepeneheewit te penduan te Eleteala kayi te langun tew ne menge menusiyà, ugaid ne si Hisu Kristu ke mibpepayag ne limù te Eleteala wey ke benar mekeatag te Eleteala. 18 Warà senge etew rà ne nekekita te Eleteala, liyu rà dut te budtung ne Anak din ne si Hisu Kristu, su iyan dan layun teleduma. Ne sikandin ke mibpesabut keytew mekeatag dut te Eleteala ne Amey rin.

Ke Impesabut ni Juan Ke Ebpembunyag

19 Duen menge etew ne mibpendiyà te ki Juan su riyà sikandin te ripag te wayig ne Hurdan se ebpembunyag te menge etew. Ini se nekeuma ne menge terebpelengesa wey menge inenakan ni Levi su midsuhù dan dut te egkeunutan te menge Hudiyanen te ebpeinsaan dan si Juan te, “Entei ka?” 20 Ne mepeyag ini se intavak ni Juan su warà din in-eles se egkahi te, “Kenà siaken si Hisu Kristu, ke Impasad te Eleteala ne Ebperetuen din.” 21 “Engkey ke ve, si Iliyas ka?” ke sikandan. “Kenà,” ke si Juan. “Ne engkey ke ve iya? Maa sikuna en iya ayan ke ebpelambas te Lalag te Eleteala ne impasad din?” ke sikandan. “Kenà,” ke si Juan. 22 “Ne idtarem nu kenami,” ke sikandan, “ke engkey ka su apey rey egkepenudtul diyà te midsuhù kenami. Engkey se egkekahi nu mekeatag keykew?” 23 Midtavak si Juan ne ke migkahi rin ne iring dut te impesurat ne Lalag te Eleteala ki Isayas ke mibpelambas te Lalag te Eleteala rengan ne migkahi sikandin te, “Siaken ke etew riyà te tanà ne kenà egkeubpaan te etew ne ebpenawag dut te menge etew ne ed-uvey kedì, ne migkahi a te, ‘Mehaan ebpekeuma ke Kerenan, ne tidtuwa niyu ke ibayà din, ne iyan din meana ne tilaka niyu ke hinawa niyu su apey kew egkepenehana te kebpekeuma rin.’ ” 24 Ne ayan se ebpenginsà ki Juan ne menge suhù te menge Peresiyu, 25 mid-insà dan maa te, “Embiya kenà sikuna si Hisu Kristu, ne kenà sikuna rema si Iliyas etawa ke mibpelambas te Lalag te Eleteala, ne meambe ke ebpembunyag ka te menge etew?” 26 Midtavak si Juan te, “Siak ne iyan ku ibunyag se wayig, su apey ran egkeandam te kedtelimà ketà te senge etew ne riyà te keniyu ne kenà niyu egkekilala,” ke si Juan. 27 “Ebpekeuma sikandin se ebpeketundug kedì, ugaid ne misan ke telumpà din ne kenà a edait ne ed-ekar.” 28 Langun kayi ne riyà med-ulaula te inged ne Bitanya riyà te ripag te wayig ne Hurdan su riyà si Juan se ebpembunyag.

Si Hisus ke Ebpekeiring te Impelengesa ne Nati te Bilibili

29 Midtundug be maa ne hewii ne nekita ni Juan si Hisus se ebpelingguma ne migkahi en sikandin dut te menge etew ne uvey rin te, “Ayan de be ke etew ne iring te ibpelengesa ne nati te bilibili ne imbehey te Eleteala apey ke langun ne salà te menusiyà ne egkeawà. 30 Ini ve ke etew ne impenudtul ku keniyu te, ‘Duen senge etew ne ebpeketundug kediey, ugaid ne misan ebpeketundug dà kediey ne sikandin se mepurù pà kedì, su raan en ketà sikandin te warà e pà in-anak.’ 31 Pehaney en,” ke si Juan, “ne warà ku pà mekilala ke engkey an sikandin, ugaid ne mibpengkayi a te ebpembunyag te menge etew te wayig su apey egketueni rut te menge kevuwaran ne Israyil se ebpekeuma en sikandin.” 32 Ne mibpenudtul pà maa si Juan mekeatag ki Hisus te, “Nekita ku ke Kedesenan ne Ebpetuntul te Menusiyà ne midragid te melepati ne riyà ebpuun te langit ne mibpehunrerenà diyà te kandin, ne warà din ewai.” 33 “Ne warà ku pà lavew metueni te sikandin en bes iya ke midsuhù te Eleteala,” ke si Juan, “ugaid ne ke Eleteala ne midsuhù kedì te ebunyag te wayig ne ingkahi rin kedì te, ‘Embiya egkekita nu en arà se Kedesenan ne Ebpetuntul te Menusiyà ne ebpehunrerenà diyà te etew ne kenà din ed-ewaan, ne egketuenan nu be imbe te sikandin ke ebpembunyag ibpepevayà dut te kedlumun te Kedesenan ne Ebpetuntul te Menusiyà diyà te menge etew ne mibperetiyaya.’ 34 Ne nekita ku en iya ini,” ke si Juan, “ne egkehiyen ku en keniyu te sikandin en iya ke Anak te Eleteala.”

Ke Neuna ne Edumdumaan ni Hisus

35 Ne ke neketundug ne hewii ne ketà en maa si Juan se ebpekidlalag dut te deruwa ne edumdumaan din. 36 Nekita rà ni Juan se edsahad si Hisus, ne migkahi en te, “Ayan de be ke etew ne iring te ibpelengesa ne nati te bilibili ke mid-andam te Eleteala ne ibehey rin!” 37 Ne wey merineg dut te deruwa ne edumdumaan din ke lalag ni Juan ne midtundug dan en ki Hisus. 38 Ne midteren si Hisus ne midlilingey ne nekita rin ke deruwa ne etew ne edtundug kandin ne mid-insà te, “Meambe ke edtundug kew kedì?” Ne migkahi ran te “Rabi, (ne iyan din meana ne Meyterù) endei ka ed-ubpà?” 39 Ne midtavak si Hisus te, “Duma kew en kedì su apey niyu egkekita.” Ne mibpekiduma ran en kandin te ed-inteng dut te ed-ubpaan din. Ne meapun en dutun ne wey ran med-ulì ne merukilem en. 40 Ne senge etew kayi te deruwa se nekerineg te nekahi ni Juan ne miduma ki Hisus ne mid-ingaranan ki Andres, su teleari ran ki Simon Pedro. 41 Arà dà ne mid-awà en sikandin se ebpemengà ki Simon ke suled din. Nekita rin dà ne migkahi te, “Netuen dey en ke ed-ingaranan te Mesiyas.” (Seveka ne ngaran ini ni Hisu Kristu, ke Impasad te Eleteala ne Ebperetuen din.) 42 Ne mibperuma din en si Simon diyà te ki Hisus. Nekeuma ran dà ne midtengtengan en ni Hisus si Simun ne migkahi en te, “Sikuna si Simon, ke anak ni Juan, ugaid ne edsembian ku ke ngaran nu ki Sipas.” (Ayan se ngaran ne Sipas ne neked-iring ded te Pedro su ke meana rin ne “Batu”.)

Mibpemilì ni Hisus si Pilipi wey si Natanael

43 Ne ke neketundug ne hewii ne nepegitung ni Hisus ne ebpendiyà te pruvinsiya ne Geliliya. Ketà ne nevalak din si Felipe ne migkehiyan din en te, “Duma ka kedì.” 44 Si Felipe ne etew ne riyà ebpuun te inged ne Bitsaida, ke inged en ni Andres wey si Pedro. 45 Ketà ne mibeyaan ni Felipe si Natanael ne migkehiyan din en te, “Nekita rey en ke etew ne ingkesurat ni Moises diyà te riberù te menge penduan te Eleteala, wey ingkesurat ded dema dut te menge etew ne mibpelembas te Lalag te Eleteala rengan. Si Hisus ke ngaran din, ke anak ni Husi ne riyà ebpuun te Neserit.” 46 Ne rutun ne migkahi en si Natanael te, “Maa, ruen bes etew ne riyà ebpuun te Neserit ne ruen egkegaga rin?” Midtavak si Pilipi te, “Iyan tumù se pengkayi ka su intengi nu.” 47 Guna su nekita ni Hisus si Natanael se ebpelingguma kayi te kandin ne migkahi te, “Ayan be ke tidtu ne inenakan ni Israyil su warà edtelevan din.” 48 Mid-insà si Natanael te, “Meambe ke egkekilala a nikuna?” Midtavak si Hisus te, “Nekita ku sikuna ketà te levut te kayu ne ed-ingaran te igira te warà pà med-ipanew si Felipe te edtawag keykew.” 49 “Meyterù,” ke si Natanael, “sikuna ves iya ke Anak te Eleteala! Sikuna en iya ke Edatù keytew ne menge kevuwaran ni Israyil!” 50 Migkehiyan ni Hisus si Natanael te, “Maa iyan nu rè bes kebperetiyaya kediey, Natanael, se nekahi ku te nekita ku sikuna se riyà te medmeriyù ne levut te kayu ne igira? Ugaid ne muna pà se kebpekeperetiyaya nu ke egkekita nu en ke mekegeyip ne ed-ul-ulaan ku.” 51 Ne migkahi en si Hisus kandan te, “Benar ini se egkehiyen ku keniyu te egkekita niyu ke lesang te langit ne egkevukaan, ne ke suluhuen te Eleteala ne egkekita niyu se mekepemenayik ne mekepemenaug se ebpengkayi te ke Impeanak te Menusiyà.”

John 2

Ke Kewingan Diyà te Inged ne Kana

1 Guna su nekederuwa ne hewii ketà ne ruen kewingan diyà te inged ne Kana ne lusud te inged ne Geliliya. Ne midtelavuk ke iney ni Hisus ketà te kewingan. 2 Ne ketà dema si Hisus wey ke edumdumaan din su neinggat dan te edtelavuk ketà te kewingan. 3 Guna su neamin en ke inumen dan ne binu su kurang pà kandan ne mibeyaan en te iney ni Hisus se egkahi te, “Warà en duma ne binu.” 4 “Tebiyà dà keykew, Inà,” ke si Hisus, “te kenà a nu uyawi te ed-ul-ulaan ku. Su warà pà meuma ke hewii te kebpekita ku te gehem ku riyà te menge etew.” 5 Ne migkahi en ke iney ni Hisus dut te menge sugsuhuen te, “Dumai niyu te misan engkey se idsuhù din.” 6 Ne ruen enem ne timan ne kelalew ne edtehuan te wayig su ruen edtenuran ne betasan te menge Hudiyanen mekeatag te kebpenlùlù. Ne uman seveka ne kelalew ne egketehuan te epat etawa enem ne latà ne wayig. 7 Ne migkehiyan en ni Hisus ke menge sugsuhuen te, “Pengipenua niyu ini se kelalew te wayig,” ke sikandin. Ne mibpengipenù dan en iya rema ke menge kelalew. 8 Neipus dan te ebpenekeru ne migkahi en si Hisus te, “Sekilut kew be keniyan te wayig ne ewita niyu en diyà te egkamal te egkeenen.” Ne mid-ewit dan en diyà te kandin, 9 ne migeraman din ke wayig ne nevaluy en ne binu. Warà din metueni ke endei ebpuun ini se binu (ugaid ne ke menge sugsuhuen ne midsekilut ketà se netau). Dutun ne midtawag din en ke meama ne ebpengesawa 10 ne migkahi te, “Iyan tew nelayaman ne betasan te embiya ruen kevurunan tew ne iyan tew id-una te ebpeinum ke meupiya ne binu, ne embiya ve su ebpengevulung dan en ne arà pà ne ibpeinum ke binu ne mekurangkurang se nanam din. Ugaid ne sikuna,” ke se meama “ne ke meupiya ne binu ne impememewri nu te ebpehendad su ini pà ne impelepew nu.” 11 Ini se mid-ulaula ni Hisus diyà te inged ne Kana, lusud te inged ne Geliliya, se neuna ne mekegeyip ne mibeelan din. Impekita rin ke gehem din, ne ketà be ne nekeperetiyaya iya ke edumdumaan din kandin. 12 Neipus arà se kewingan ne mibpendiyà si Hisus, ke iney rin, ke menge ari rin, wey ke edumdumaan din te inged ne Kapirnawum. Nekeuma ran ketà ne mid-ubpà dan te nekebpipira ne hewii.

Mibpendiyà si Hisus te Nekebpuru ne Valey te Eleteala

13 Ne rutun ne mehaan en ne egkeuma ke hewii te kegkevurun te menge Hudiyanen diyà te Hirusalim te kedtumana ran dut te Pista te Kedsehari te Suluhuen te Eleteala, ne arà be ne mibpendiyà si Hisus diyà te Hirusalim. 14 Guna su nekeuma ran ne midlusud en si Hisus diyà te Nekebpuru ne Valey te Eleteala, ne nekita rin ke ebpemendehang te menge sapì, menge bilibili, wey menge melepati, su ini se menge binatang ne impemendehang dan ne iyan din egkeetehan ne ibpelengesa. Ne ruen dema ketà menge etew ne ebpesemsembiey te pirak te idsenge vevansa ne inged kayi te pirak te menge Hudiyanen. 15 Nekita rà ni Hisus sikandan ne midsuvid en sikandin te idlambit din kandan, ne midsegseg din en langun te kebpeluwal kandan, abpeg ke menge bilibili wey sapì. Misan ke lemisaan dut te menge etew ne ebpenambì te pirak ne mibpemunggad din, abpeg dut te pirak dan ne insivurak ni Hisus. 16 Ne migkehiyan din en ke menge etew ne ebpemendehang te melipati te, “Ipengawà niyu ayan! Kenà niyu beeli ne pedian ini se Baley te Amey ku ne Eleteala!” 17 Ne netenuran dut te edumdumaan din ke impesurat ni David ke mibpelambas te Lalag te Eleteala rengan se egkahi te, “Na Eleteala ku, iring te apuy ne edrugrugkayew kayi te diralem ku ini se kegkenuhun ku te ini se valey nu ne egkeedatan.” 18 Ne rutun ne mid-insaan si Hisus te egkeunutan te menge Hudiyanen te, “Engkey ve se mekegeyip ne ibpekita nu ne tuus te mibehayan ka te gehem te Eleteala te iring ketà ne mid-ulaula nu?” 19 Ne midtavak si Hisus te, “Rundusa niyu ini se Baley te Eleteala ne lusud te tetelu ne hewii ne ibpeitindeg ku en manen ini se valey.” 20 “Epat ne pulù wey enem ne rahun se kineveeli kayi te valey! ke sikandan. Maa, ibpeitindeg nu maa te lusud te tetelu rà ne hewii?” 21 Ugaid ne warà dan mesebuti se ini se valey ne migkahi ni Hisus ne ke lawa rin. 22 Guna su neuma en ke hewii te nevanew en si Hisus, ne arà pà ne netenuran dut te edumdumaan din ini se nekahi rin. Ne mibperetiyaya ran ke impesurat ne Lalag te Eleteala mekeatag te kegkevanew ni Hisus abpeg dut te nekahi rin mekeatag te sikandin. Netuenan ni Hisus ke Netahù te Itungan te Menge Etew 23 Gewii pà ni Hisus diyà te Hirusalim te kedtuman dan te Pista te Kedsehari te Suluhuen, ne merakel se mibperetiyaya kandin su nekita ran ke geyip ne mid-ulaula rin. 24 Ugaid ne warà midsarig si Hisus dut te nelalag dan ne kebperetiyaya ran kandin su netuenan din ke engkey se netahù te itungan te langun ne menge etew. 25 Su misan warà midtarem kandin te engkey se metahù te itungan te menge etew, ne netuenan din en ke engkey ke netahù te itungan dan.

John 3

Mibpendiyà si Nikudimu te ki Hisus

1 Duen senge etew ne egkeunutan te menge Hudiyanen ne mid-ingaranan ki Nikudimu. Senge etew ini ne sakup te neumpungan ne ed-ingaranan te Peresiyu. 2 Senge kerukileman ne mibpendiyà sikandin te ki Hisus ne migkahi te, “Meyterù, netuenan dey se midsuhù ka te Eleteala te ebpenurù kenami, su warà etew ne ebpekevaal te mekegeyip embiya kenà duen gehem te Eleteala riyà te kandin.” 3 Migkahi si Hisus te, “Sebenarvenar ini se igkahi ku keykew te warà senge etew rà ne ebpekelusud diyà te Edetuan te Eleteala embiya kenà sikandin edsaup pà ebpeanak.” 4 Migkahi si Nikudimu te, “Menu ve ke lukes en ne etew te ebpesaup ebpeanak? Engkey, edlived pà maa sikandin dut te hetek te iney rin su apey igkesaup igkeanak sikandin?” 5 “Sebenarvenar ini se igkahi ku keykew,” ke si Hisus, “te warà senge etew rà ne ebpekelusud diyà te Edetuan te Eleteala embiya kenà sikandin edsaup pà ebpeanak te ibpepevayà te wayig wey ke gehem dut te Kedesenan ne Ebpetuntul te Menusiyà. 6 Su ke id-anak te menusiyà ne menusiyà dà iya, ugaid ne embiya igkesaup en sikandin te igkeanak ibpepevayà dut te gehem te Kedesenan ne Ebpetuntul te Menusiyà ne egkevaluy en sikandin ne anak te Eleteala. 7 Kenà nu ve igkeselekawi,” ke si Hisus, “te kinelalag ku te, ‘Mebpesaup kew pà langun mebpeanak.’ 8 Embiya idsempità ta ne edsamber ke keramag ne misan endei egkesuat ne ebpevayà. Embiya edsamber ne egkerineg nu, ugaid ne warà nu metueni ke endei ebpuun etawa endei ebpesinaru. Iring ded dema ketà ke langun ne mibpeanak te Kedesenan ne Ebpetuntul te Menusiyà, su egketuenan dan iya misan kenà dan egkesebutan.” 9 “Egkememenu ve ini?” ke si Nikudimu. 10 Midtavak si Hisus te, “Mevantug ka ura ne ebpemandù dut te menge kevuwaran ni Israyil, ne meambe ke kenà nu egkesebutan ini se migkahi ku? 11 Benar iya ini se egkehiyen ku su netuenan dey te benar ini se impesabut dey keniyu, ne netitihusan dey ke nekita rey en, ugaid ne warà niyu peretiyayaa ke migkahi rey. 12 Embiya kenà ka ebperetiyaya te ini se ibpenurù ku kenikew mekeatag te ulaula kayi te ampew te dunya,” ke si Hisus, “ne iyan nu pè be peretiyayaa ke iyan ku en ibpenurù mekeatag te ulaula riyà te langit. 13 Su warà pà duma ne nekependiyà te langit liyu rà dut te sikandin arà ne riyà ebpuun te langit ne mibpepengkayi ne Impeanak te Menusiyà. 14 “Rengan te kemulu pà ensi Moises diyà te tanà ne kenà egkeubpaan te etew,” ke si Hisus, “ne ruen mibeelan din ne uled ne galang ne intampak din diyà te kayu ne intunggul rin. Na,” ke si Hisus, “diyà te keuhetan din ne hewii ne ibpeketunggul dema ini se Impeanak te Menusiyà. 15 Iyan din kebpekevitin diyà te kayu su apey langun ne ebperetiyaya kandin ne ebpeketelimà te umur ne warà edtemanan din. 16 “Su kayi ebpuun te rekelà ne limù te Eleteala rut te langun ne menge etew kayi te ampew te dunya ne warà din ingkenuhuni ke budtung ne anak din, ugaid ne midsuhù din te ebpatey riyà te pinebelavag ne kayu su apey langun te ebperetiyaya kandin ne kenà edusaan te Eleteala ugaid ne ebpeketelimà dan te umur ne warà edtemanan din. 17 Su iyan kinesuhù te Eleteala rut te Anak din kayi te ampew te dunya su apey kenà edusaan ke menge etew, ugaid ne apey ran igkepeliyu. 18 “Ne misan engkey ne mibperetiyaya rut te Anak te Eleteala ne kenà en egkesuhat te kedusa te Eleteala, ugaid ne langun ne warà mebperetiyaya kandin ne insivey en te Eleteala ne edusaan su warà dan medtelimà ki Hisus ke budtung ne Anak te Eleteala. 19 Iyan kedusa te Eleteala te menge etew su nekeuma en kayi te ampew te dunya si Hisus ke ed-ingaranan te Kerayag su ebpekerayag dut te itungan te langun ne menusiyà, ugaid ne iyan dan midtumù ke kerusireman tumin dè be dut te rayag su meraat ke ulaula ran. 20 Ne misan engkey en ne etew ne ed-ulaula te meraat ne kenà egkesuat te merayag wey kenà dan ed-uvey te merayag su apey kenà egkepayahan ke ulaula ran ne meraat. 21 Ugaid ke etew ne metidtu se ulaula rin ne ed-uvey dut te merayag su apey egkepayahi ke ulaula rin, su apey egkekita ke ulaula rin ne riyà ebpuun te gehem te Eleteala.”

Si Hisus wey si Juan ne Ebpemunyag

22 Netaman ketà ne mibpendiyà si Hisus wey ke edumdumaan din te inged ne Hudiya. Ne mid-ubpà dan ketà te nekebpipira ne hewii su ebpembunyag si Hisus te menge etew. 23 Ne si Juan dema ne ebpembunyag te menge etew riyà te inged ne Inun uvey te inged ne Salim su merakel ne wayig diyà. Ne ruen menge etew ne ebpemekeuma su ebpebunyag dan kandin. 24 (Su arà ne hewii ne warà pà bilenggua si Juan.) 25 Ne ruen menge edumdumaan ni Juan ne ebpekidlewanà te senge etew ne Hudiyanen. Iyan dan ibpelewaney ne atag te edtenuran ne betasan te menge Hudiyanen te kedlùlù. 26 Ketà ne mibpendiyan en ke edumdumaan ni Juan te kandin se egkahi te, “Meyterù, netenuran nu ves ke ruma nu riyà te ripag te wayig ne Hurdan ne arà se nekahi nu! Riyà guntaani sikandin se ebpembunyag ne iyan pà merakel ne menge etew ne ebpendiyà te kandin su ebpebunyag.” 27 Migkahi si Juan te, “Warà etew ne ebpekekuwa te ketengdanen embiya kenà ebehayan te Eleteala. 28 Ne sikiyu en iya ke menge titihus te migkahi ku te, ‘Kenà siaken si Hisu Kristu ke Impasad te Eleteala ne Edatù kayi te menge etew, ugaid ne pineuna e rà kandin su apey ku egkepenehana ke ibpevayà din.’ 29 Embiya idsempità ta,” ke si Juan, “ke ruen egkewingan ne ke meama ne ed-esawa ne ini se ebpekehaked dut te meritan, kenà ke egkuyug dut te egkewingen; ugaid ne ketà dema sikandin te uvey. Ne embiya egkerineg din en ke meama ne neked-esawa en ne ebpekidlalag en dut te esawa rin, ne dekdekelà se kegkehalew rin. Ini ve imbe ke sempità ku,” ke si Juan, “mekeatag ki Hisus wey siaken. Nehalew ad nevenar su nekekuyug a kandin te ebpenehana dut te netandang ku en ke ibayà din te ebpekeuma. 30 Ketà be ne ebpekeiseg pà se bentuhan ni Hisus, ugaid ne siaken ne ebpekeembavà.”

Sikandin ne Riyà Ebpuun te Langit

31 Riyà ebpuun te langit si Hisus ne sikandin ke mepurù pà dut te langun. Ugaid ke etew ne kayi rà ebpuun te dunya ne menusiyà dà sikandin, ne iyan din dà edlelahen ke ulaula kayi te dunya. Ugaid sikandin arà se riyà ebpuun te langit se mepurù pà dut te langun. 32 Iyan din edlelahen ne ke nekita rin wey ke nerineg din diyà, ugaid ne warà utew etew ne ebpemineg kandin. 33 Ugaid ne ke etew ne mibperetiyaya te penurù din, ne ibpekepekita rin te iyan dà edlelahen te Eleteala ne benar. 34 Si Hisus ke midsuhù te Eleteala ne iyan ibpepenudtul ne ke Lalag te Eleteala dut te ebpelumunan sikandin te Kedesenan ne Ebpetuntul te Menusiyà ne imbehey kandin te Amey rin ne Eleteala. 35 Su igkelimù nevenar te Eleteala ini se anak din ne midsuhù din, ne imbehey rin kandin ke gehem te ebayàbayà te langun taman. 36 Ne langun ne ebperetiyaya dut te Anak te Eleteala ne egkevehayan te umur ne warà edtemanan din; ugaid ne langun ne kenà ebperetiyaya dut te Anak te Eleteala ne kenà egkevehayan te umur ne warà edtemanan din, nasì pà te iyan igkevehey kandan ke kedusai te Eleteala te warà edtemanan din.

John 4

Ke Meritan ne Riyà Ebpuun te Inged ne Semeriya

1 Nerineg dut te menge Peresiyu ke tudtul te iyan pà merakel ne menge etew se ebpendiyà te ki Hisus su ebpebunyag wey ebpesakup kandin dut te menge etew ne ebpendiyà te ki Juan. 2 (Ugaid ne iyan benar ne kenà si Hisus ke ebunyag te menge etew su ke edumdumaan din dà.) 3 Guna su nerineg ni Hisus te nepenudtulan, ne mid-awà en diyà te inged ne Hudiya ne mid-ulì en sikandin diyà te inged ne Geliliya. 4 Ugaid ne ini se ralan ne ibpevayà din te ed-ulì ne kayi ebayà te inged ne Semeriya. 5 Ne guna su ebpevayà en sikandin te inged ne Semeriya ne nekeuma en sikandin te senge inged ne lusud ded te Semeriya ne ed-ingaranan te Sikar, inged ini ne uvey te tanà ne imbehey ni Hakub dengan dut te anak din ne si Jose. 6 Ne kayi te tanà ini ne ruen ne ingkalut ni Hakub dengan. Nekeuma si Hisus ketà ne mibpinuu dut te uvey te kalut su neluhat sikandin te kineipanew rin, su ketà ne neudtu en ke andew. 7 Guna su ebpinpinuu en sikandin ne ruen meritan ne nekeuma su edsekeru ne riyà ebpuun te inged ne Semeriya. Ne migkahi en si Hisus kandin te, “Bayi, peinuma a nu.” 8 (Iyan din kinevuyù te wayig diyà te kandin su mibpendiyà ke edumdumaan din te senge inged su ebpemasa te egkekaan dan.) 9 “Ey,” ke se meritan, “siaken ne etew a te Semeriya, ne meambe ke egnganey ka kedì te ked-inum nu su Hudiyanen ke ma?” (Iyan din kebpekelalag te iring kayi su kenà ebpemegayun ke menge Hudiyanen dut te menge etew te Semeriya.) 10 Midtavak si Hisus te, “Bayi, embiya perem egketuenan nu rà ke engkey ke ibehey te Eleteala, ne embiya perem egkekilala nu rà ke engkey a ini se ebuyù keykew te egkeinum, ne sikuna pà nasì se ebuyù te egkeinum nu kayi te kedì,” ke si Hisus. “Ne igkevehey ku keykew ke wayig ne ebpekevehey te kegkeuyag.” 11 “Mama,” ke se meritan, “memenuwen nu ve se kebpekekuwa nu keniyan te wayig ne ebehey te kegkeuyag? Su warà ma idsekilut nu ne meralem pà maa ini se wayig! 12 Su maa,” ke se meritan, “muna ke pà ki Hakub ke keep-epuan dey? Su sikandin ke midtabun kenami kayi te kalut ini ne kayi mid-inum sikandin wey ke menge anak din, abpeg dut te menge ayam din ne pineinum kayi dema.” 13 Migkahi si Hisus manen te, “Ke menge etew ne ed-inum kayi te wayig te ini ne kalut ne edsaup pà lavew ebpekeinum. 14 Ugaid ke etew ne ed-inum te wayig ne ibehey ku kandin, ne kenà en edsaup ebpekeinum. Su ini se wayig ne ibehey ku kandin ne iring te sebseb ne edtevur diyà te lusud te hinawa rin su puunan te kegkeuyag din, ne ebehey te umur ne warà edtamanan din.” 15 “Mama,” ke se meritan, “peinuma e ves nikuna keniyan te wayig su apey kenà ad edsaup ebpekeinum, ne kenà ad ebpekepengkayi se edsekeru.” 16 “Na, ulì ke pà,” ke si Hisus, “ne engaya nu ve ke esawa nu su lived kew kayi.” 17 “Warà ma esawa ku,” ke se meritan. “Benar an se lalag nu ne warà esawa nu,” ke si Hisus. 18 “Su kelelima ke en mekesawa, ugaid ne ayan se ebpeniwaley guntaani keykew ne kenà nu esawa. Ini se ingkahi nu en kedì ne benar.” 19 “Mama,” ke se meritan, “netuenan ku te ayan se lalag nu ne lalag te etew ne ebpelambas te Lalag te Eleteala. 20 Ne ruen id-insà ku,” ke se meritan. “Mekeatag te keep-epuan dey te Semeriya ne kayi ran imbe ebpengarap te Eleteala te ini ne buvungan. Ugaid ne sikiyu ne menge Hudiyanen ne iyan niyu nekahi se riyà dà te inged ne Hirusalim se ed-ubpaan te ebpengarap te Eleteala.” 21 “Tenuri nu ini, Bayi,” ke si Hisus, “su ruen hewii ne egkeuma ne kenà en kayi rà ne buvungan etawa riyà dà te Hirusalim ebpengerapa te menge etew ke Amey tew ne Eleteala. 22 Su sikiyu ne menge etew te Semeriya ne matag kew en edsimba ne warà niyu metueni ke engkey se edsimbaan niyu. Ugaid ne sikami se menge Hudiyanen, ne netuenan dey mulà ke edsimbaan dey su kayi ebpuun te kenami ne menge Hudiyanen ne ruen ebpekehemew ne ebpeliyu te menusiyà. 23 Na,” ke si Hisus te, “neuma en ke hewii te embiya benar ne edsimba ke menge etew te Eleteala ne Amey tew ne med-arap dan ibpepevayà te Kedesenan ne Ebpetuntul te Menusiyà dut te Eleteala wey kayi ebpuun te tidtu te hinawa ran, wey kayi te keduma ran te benar ne penurù ne impayag dut te Eleteala. Ini ve se egkiyuhan te Eleteala ne ulaula rut te menge etew ne edsimba kandin. 24 Ke Eleteala ne warà lawa rin, tembù be kenà egkekita sikandin. Ke menge etew ne edsimba te Eleteala ne medsimba te ibpehenat te tidtu ne hinawa wey sebenarvenar te keduma ran dut te penurù ne impayag te Eleteala.” 25 Ke se meritan, “Netuenan ku te ruen ebpekeuma ne Impasad te Eleteala ne Ebperetuen din te langun ne ed-ingaranan ki Kristu ke Mesiyas. Ketà te kebpekeuma rin, ne ibpesabut din keytew ke langun.” 26 Ke si Hisus te, “Siaken en iya ini se ebpekidlalag keykew arà se migkahi nu ne si Kristu.” 27 Kemulu pà ne ebpekidlalag si Hisus dut te meritan ne nekeuma en ke edumdumaan din, ne nengeinuinu ran se ebpekidlalag si Hisus ketà te meritan. Ugaid ne warà seveka rà kandan ne nekeinsà dut te meritan ke engkey se lakew rin ki Hisus, ne warà dan mekeinsà ki Hisus ke engkey arà se ebpengesaken dan. 28 Arà dà ne intelau en dut te meritan ke idsekeru rin ne mid-ulì en. Nekeuma rà sikandin ne impemenudtul din en dut te menge etew. 29 “Pengkayi kew su intengi niyu eyè se etew su intarem din kedì ke langun ne mid-ulaula ku. Engkey, eyè en buwa ke Impasad te Eleteala ne Edatù te langun ne ebpenerengen tew?” kahi rut te meritan. 30 Nerineg den dà ne migenat dan en se ebpendiyà te ki Hisus. 31 Ketà te warà pà mekeuma ke menge etew ne migkahi en ke edumdumaan ni Hisus te, “Mama, iyan tumù ne kaan ke pà.” 32 “Kaan kew en,” ke si Hisus, “su ruen egkeenen ku ne warà niyu metueni.” 33 Ne rutun ne mibpein-inseey ran te egkahi te, “Maa, ruen bes buwa mibehey kandin te nekaan din?” 34 “Iring te egkeenen ku,” ke si Hisus, “ini se kedtumana ku te kiyug te Eleteala ne midsuhù kedì te ed-imasad dut te helevek ne imbehey rin kedì. 35 Kenà bes duen besaanan niyu ne egkahi te, ‘Epat pà ne vulan ne arà pà ne egkeuma ke ked-ehani.’ Ugaid,” ke si Hisus, “ne idtarem ku keniyu te sendenga niyu ma ayan se menge etew ne ebpelingguma en, su embiya idsempità ta ne iring dan te melutù ne parey ne ed-eheniyen su kenà meuhet ne ebperetiyaya ran kedì. 36 Su ke etew ne ed-ehani ne ebeyaran, ne embiya id-upama ta ne ke etew ne ebpesabut mekeatag kedì ne ruen ded dema egkeehani rin, ugaid ne iyan din egkeehani ke merakel ne ebpeketelimà te umur ne warà edtamanan din. Ketà ne ke mibuvur te Lalag te Eleteala, wey ke mid-ehani te bahas dut te kebpemenudtul te Lalag te Eleteala ne elin dan egkehalew. 37 Benar iya ke besaanan dut te keep-epuan ne egkahi te, ‘Ruen ebuvur, ne ke ruma se ed-ehani.’ 38 Sikiyu,” ke si Hisus, “ne midsuhù ku te ed-ehani rut te warà niyu geleveka te kebuvur. Su duma ne etew se migelevek te kebuvur ketà, ugaid ne sikiyu en maa ke ed-ehani rut te gelevek dan.” 39 Gewii te kayi pà te ralan ini se menge etew te Semeriya ne ebpendiyà te ki Hisus, ne merakel dut te sikandan se nekeperetiyaya kandin su sabap dut te nekahi te meritan kandan te, “Intarem din kedì ke langun ne mid-ulaula ku.” 40 Guna su nekeuma en ini se menge etew te Semeriya ne mibuyù dan ki Hisus te kenà pà bevayà medlaus, ne ketà dema ne mid-ubpà si Hisus te nekederuwa ne hewii. 41 Ne merakel pà lavew ne menge etew se mibperetiyaya kandin su nerineg dan ke penurù din. 42 Migkehiyan dan ke meritan te, “Mibperetiyaya key en ne kenà ma ketà dà ebpuun dut te nekahi nu kenami, ugaid ne kayi te nerineg dey en dema ke penurù din ne netuenan dey se benar en iya ne sikandin ke netendù te Eleteala ne ebpeliyu te menusiyà.”

Neulian ni Hisus ke Anak ne Meama dut te Senge Etew ne Mepurù te Gubirnu

43 Guna su nepupus en se deruwa ne hewii, ne midlaus en ensi Hisus diyà te inged ne Geliliya. 44 Su ruen ketà pehaney ne nekahi ni Hisus te, “Ke etew ne ebpelambas te Lalag te Eleteala ne kenà ed-edatan te menge etew diyà te muney ne inged din.” 45 Guna su nekeuma ran diyà te inged ne Geliliya ne nengehalew ke menge etew ketà su neketelavuk dan te kevurunan diyà te Hirusalim dut te Pista te Kedsehari te Suluhuen, ne nekita ran ke langun ne mid-ulaula ni Hisus diyà. 46 Netaman ketà ne midlived si Hisus kayi te inged ne Kana lusud te Geliliya, ke inged ne ruen wayig ne pinebaluy rin ne binu. Ketà ne ruen etew ne mepurù se ketengdanan din diyà te gubirnu te inged ne Kapirnawum ne ruen anak din ne meama ne ebpekedaru. 47 Nerineg dut te mepurù se nekeuma en si Hisus kayi te Geliliya te riyà ebpuun te inged ne Hudiya, ne mibayaan din en ne mibpemuyù kandin te ebperumaan din diyà te Kapirnawum su ebpevawian ke anak din ne egkerandung te kemetayen. 48 Nerineg dà ni Hisus ne migkehiyan din en te, “Embiya kenà kew ebpekekita te tuus ne ebpekegeyip ne kenà kew ebperetiyaya.” 49 “Mama,” ke se mepurù te ketengdanan din, “duma ke pà kedì te kenà pà ebpatey ke anak ku.” 50 Ke si Hisus te, “Na, ulì ke en su neulian en ke anak nu.” Ne mibperetiyaya ke meama rut te migkahi ni Hisus kandin, ne mid-ulì en. 51 Guna su nepawà te riyan dan pà te ralan ne nesinuhung dan en ke menge sugsuhuen din ne migkahi ran te, “Neulian en ke anak nu ne ederaru.” 52 Ne mid-insaan din en sikandan te, “Keenu neulii ke anak ku?” “Gevii te nepulid en ke andew ne mid-engked ke kedetenga rin,” ke sikandan. 53 Nerineg din arà ne netenuran din en te gevii te nepulid ke andew ke kinekahi ni Hisus kandin te, “Neulian en ke anak nu ne ederaru.” Arà dà ne mibperetiyaya en ki Hisus, abpeg dut te langun ne sikandan kayi te lusud te valey rin. 54 Ini ve ke ikeruwa ne mekegeyip ne mid-ulaula ni Hisus kayi te lusud te inged ne Geliliya gewii te kineulì din te riyà ebpuun te inged ne Hudiya.

John 5

Ke Etew ne Neuhet en se kedaru Rin ne Neulian ni Hisus

1 Ne warà dà utew meuhet maa ketà ne mibpendiyà si Hisus te Hirusalim su ruen pista te menge Hudiyanen. 2 Diyà te Hirusalim ne ruen bengawan ne ebpevayaan te menge etew ne ebpeneheewit te menge bilibili ne ibpelengesa, ne uvey ketà te bengawan ne ruen linew ne ed-ingaranan te kinehiyan ne Hudiyanen te Bitsaida. Ruen lelima ne ed-elungan ne nekelingut kayi te kilid en te wayig. 3 Merakel ne menge etew ne ederaru ne ebpengirehà ketà te ed-elungan, ruen pisek, ruen pungkù, ne ruen en midtibas te ayew. (Su edtahad dan te kedsevu ketà te wayig. 4 Su ruen andew ne ebpehunrerenà ke suluhuen te Eleteala te kebpesevu rin ketà te wayig. Ne arà be ne ke egkeuna ne etew ne ederaru ne ebpeketiher te edsevu pà ke wayig ne egkeulian ke misan engkey en ne sakit din.) 5 Ne ruen ketà meama ne nekedtetelu en nepulù wey walu ne rahun se kederaru rin. 6 Nekita ni Hisus sikandin se ed-id-irehà ketà ne netuenan din se neuhet en nevenar ini se daru rin. Ne mid-insaan ni Hisus te, “Maa, egkiyug ka ne egkeulian?” 7 “Mama,” ke se meama ne ederaru, “warà ruma ku ne ebpekesepuwat kedì te ebpetiher keniyan te wayig ke embiya edsevu. Su embiya seveka ku rà se ebpengkeniyan te wayig, ne ruen ebpekeuna kedì.” 8 Ne migkahi si Hisus te, “Enew ka, luluna nu ke ikam nu, ne ipanew ke en.” 9 Arà dà iya ne neulian en ini se etew, ne midlulun din en se ikam din ne mid-ipanew en. Ini ne hewii ne Sepetu, ke Hewii te Ked-imeley ran. 10 Guna su nekita rut te menge egkeunutan te Hudiyanen ke mibawian ni Hisus ne migkahi ran te, “Meambe ke ebava ka te ikam nu gunteani? Maa kenà ka edtanud te ini ke Hewii ne Id-imeley ne ebpekerimpas ka dut te penduan tew ke ed-ewit ka te ikam nu?” 11 Midtavak ini se meama te, “Su ke etew ne nekeulì kedì ne iyan migkahi te, ‘Luluna nu ke ikam nu ne ipanew ke en.’ ” 12 “Engkey arà ne etew,” ke se menge Hudiyanen, “se migkahi keykew te ibpelulun ke ikam nu ne ibpeipanew ka?” 13 Ugaid ne warà metueni rut te meama ke enta se mibawì kandin su ruen merakel ne etew ketà te uvey te wayig ne mid-awà en si Hisus. 14 Warà dà meuhet ketà ne nekita en ni Hisus ini se meama riyà te lusud te Nekebpuru ne Valey te Eleteala. “Intengi nu ve,” ke si Hisus, “neulian ke en te daru nu! Na, kenà ke en be baal te salà su apey ka kenà egkerasey te tuwas pà dut te daru nu ne ebpekesuhat keykew.” 15 Arà pà ne midlihawang ke meama su ebpendiyà te menge egkeunutan te menge Hudiyanen su idtarem din kandan te si Hisus bes iya ke nekevawì kandin. 16 Ne ketà puunan ne neepes ke menge egkeunutan te Hudiyanen ki Hisus su mibawì sikandin ketà te Hewii ne Id-imeley. 17 Tembù be migkahi si Hisus kandan te, “Taman guntaani ne warà med-imeley ke Amey ku ne Eleteala te egelevek, ne iyan e pè be rema kenà megelevek.” 18 Nerineg den dà ke migkahi ni Hisus, ne neisab dan se ebpemengà te ralan te ked-imetayi ki Hisus su nekerimpas sikandin dut te penduan ne egkahi te kenà egkapakey ne egelevek dut te Andew ne Id-imeley, ne ikeruwa rin ne mibpekidrepeng sikandin te Eleteala su migkahi rin se Eleteala ke Amey rin.

Ke Umur ne Warà Edtemanan Din ne Riyà Ebpuun te Anak te Eleteala

19 Ketà ne migkahi si Hisus kandan te, “Sebenarvenar ini se egkehiyen ku te siak ke Anak te Eleteala ne warà egkeveelan ku te kediey rà ne kiyug. Iyan dà ebeelan ku ne arà se nekita ku riyà te ulaula te Amey ku, su ini se ebeelan din ne iyan dema se edumaan ku. 20 Su ke Amey ku ne Eleteala ne rekelà se limù din kedì ne Anak din, ne ibpekita rin kedì ke langun ne ed-ul-ulaan din. Ne ruen muna pà ne ibpekita rin kedì ne ed-ul-ulaan ku ne igkegeyip niyu. 21 Su ke Amey ku ne Eleteala se ebanew te menge etew ne minatey ne ed-uyahen din maan, ne iring ded dema ketà te siaken ne Anak din su ed-uyag a te piya engkey ne egkiyuhan ku,” ke si Hisus. 22 Kenà ke Amey ku ne Eleteala se egkukum te menge etew, ugaid ne imbehey rin kedì ke Anak din ke gehem te kegkukum te langun ne menge etew. 23 Iyan din kinesarig kedì su apey siaken ne Anak din ne egkereyrey rut te langun ne menge etew, iring te kedeyreya ran te Amey ku. Su misan engkey en ne etew ne kenà edeyrey kedì ne kenà dema edeyrey dut te Amey ku ne Eleteala ke midsuhù kedì. 24 “Sebenarvenar ini se egkehiyen ku ne misan engkey ne etew ne ebpemineg te lalag ku wey ebperetiyaya rut te midsuhù kedì, ne ebpeketelimà dut te umur ne warà edtemanan din. Ne kenà en edusaan su nekepeliyu en sikandin te kepepatey ne warà edtemanan din, ne ebpekeubpà en diyà te Eleteala taman te taman. 25 Sebenarvenar ini se egkehiyen ku, misan ke menge etew ne iring te minatey en su sabap dut te salà dan ne neuma en ke hewii ne egkerineg dan ke lalag ku, ke Anak te Eleteala, ne arà se ebpemineg ne egkevehayan te behu ne umur. 26 Ke Amey ku se ebpuunan te umur su sikandin se ebpekevehey te umur, ne iring ded be ketà ke kedì ne Anak din su ke gehem din ne imbehey rin kediey ne ebpekevehey e red dema te umur. 27 Ne kenà ketà dà taman, su imbehey rin lavew kedì ke gehem te kegkukum te menge etew su siaken iya ke Impeanak te Menusiyà. 28 “Kenà kew ve meselekawi kayi su ruen hewii ne ebpekeuma ne langun ne riyà te menge leveng ne egkerineg dan ke suwara ku, 29 ne ketà ne egemew ran dut te leveng dan. Ne langun te metidtu ne egkevanew ran su riyà ebpekeubpà te Eleteala su neketelimà dan te umur ne warà edtamanan din, ugaid ne langun be rut te nekevaal te meraat ne ulaula ne egkevanew red su edusaan.”

Ke Menge Titihus Mekeatag ki Hisus

30 Ne migkahi manen si Hisus te, “Embiya kenà ke gehem te Eleteala ne imbehey rin kedì ne warà egkeveelan ku, su iyan ku rà kegkukum ne endei se igkahi rin kedì ne arà se edumaan ku te kegkukum. Tembù be ke kegkukum ku ne metidtu. Su kenà kedì ne kiyug se edtumanen ku, ugaid ne ke kiyug dut te midsuhù kedì se edtumanen ku. 31 “Upama ini, embiya siaken dà se ebpekehiyen te kedì ne hinawa, ne kenà egkepehimbenar te ruma ne etew. 32 Ugaid ne ke Amey ku ne ebpeninindeg kediey ne netuenan ku te egkererihan se kebpenitihus din kediey. 33 “Duen midsuhù niyu riyà te ki Juan su ebpeinsaan niyu ke engkey se siak, ne benar ke migkahi rin mekeatag kediey. 34 Kenà a ebpegungeyà te etew rà se edtitihus kediey, ugaid ne ebpetenuran ku keniyu ke kedtitihus ni Juan su apey kew ebpekeperetiyaya wey egkepeliyu dut te keberedusaan. 35 Su si Juan ne iring te sulù ne midsilà, ne nehalew kew ne ebpemineg dut te mehaan dà ne penurù din. 36 “Ugaid ne ruen mevaher pà dut te kedtitihus ni Juan mekeatag kedì. Ini se helevek ne imbehey kedì dut te Amey ku ne Eleteala, ne ini se ebpesabut keniyu te siak ke midsuhù din kayi. 37 Ne ke Amey ku ne midsuhù kedì ne ebpeketitihus dema mekeatag kedìey. Warà niyu merineg ke suwara rin wey warà niyu mekita sikandin. 38 Ne warà niyu telimaa ke lalag din su warà kew ma mibperetiyaya kediey ke midsuhù din. 39 Mibpengedian niyu ke lalag te Eleteala ne impesurat dengan su iyan niyu kunaan ke ketà kew ebpekehaked te umur ne warà edtemanan din. Ne langun ne impesurat ketà ne edlalag mekeatag kedì. 40 Ugaid ne kenà kew egkiyug ne ebpengkayi te kedì su apey kew perem ebpekehaked te umur ne warà edtamanan din. 41 “Kenà iyan ku ebpemengaan se kegkereyù kedì te menge etew. 42 Ugaid ne netuenan ku te warà te hinawa niyu se kedlimù te Eleteala. 43 Iyan ku impengkayi ne ibpepevayà te gehem dut te Amey ku ne Eleteala, ne warà kew medtelimà kedì. Ugaid ne embiya ruen ebpekeuma ne ebpemandù keniyu te kandin dà ne gehem, ne edtelimaan niyu mulà sikandin. 44 Memenu ma se kebperetiyaya niyu embiya iyan niyu rà ebpemengaan se kegkereyù keniyu te menge ruma niyu, ugaid ne warà niyu pemengaa ke ralan te kegkereyù ne riyà ebpuun te budtung ne Eleteala? 45 “Iyan niyu kunaan ke siaken se ed-isuhat keniyu te kevenar diyà te etuvangan te Amey ku ne Eleteala, ugaid ne kenà en iya. Su ruen seveka ne ed-isuhat te kevenar keniyu ketà te hewii te kegkukum ne si Moises su dekelà ke sarig niyu te penduan ne intahak din. 46 Embiya benar ne mibperetiyaya kew rut te impesurat ki Moises dengan, ne ebperetiyaya kew kedì dema su ke impesurat kandin ne mekeatag kedì. 47 Ne ketà be embiya warà kew mibperetiyaya te lalag ne impesurat din,” ke si Hisus, “ne memenu ve se kebperetiyaya niyu kayi se egkehiyen ku?”

John 6

Pinekaan ni Hisus ke Lelima Ne Ngivu ne Etew

1 Guna su neipus ini, ne midlived en si Hisus diyà te ripag te Ranew te Geliliya (ne ed-ingaranan dema te Ranew te Tibiriya). 2 Ne ruen denda ne menge etew ne mid-eguyut kandin su nekita ran ke mekegeyip ne mid-ulaula rin te kebpemawì din dut te menge etew ne ebpenderaru. 3 Ne midtekereg en si Hisus wey ke menge edumdumaan din diyà te buvungan ne mibpinuu ran en. 4 Su ketà ne hewii ne edanirani en ke hewii ne edtenuran te menge Hudiyanen ne ed-ingaranan te Pista te Kedsehari te Suluhuen. 5 Midsandeng si Hisus ne nekita rin ke denda ne menge etew ne ebpelingguma, ne migkehiyan din si Felipe te, “Endei kiyu ebpekekuwa te egkekaan ne ibpekaan tew keniyan te renda ne menge etew?” 6 (Migkahi rin ini su ebpenggeraman din si Felipe, ugaid ne netuenan din ma ke engkey se ed-ul-ulaan din.) 7 Midtavak en si Felipe te, “Misan pipira pà ne hatus ne pirak se ibpemasa ta te egkeenen te iring keniyan se kerakel dan ne kenà pà ebpeketukid kandan misan idsenge sungit dà.” 8 Ne senge etew ne edumdumaan ni Hisus ne ed-ingaranan ki Andres, ke ari ni Simon Pedro, ne migkahi te, 9 “Duen ini batà ne meama ne midlulutù te lelima ne timan ne pan wey deruwa ne timan se serà. Ugaid ne ebmemenuwen dè be ayan se engkayi ne kerakel te menge etew?” 10 Migkahi si Hisus te, “Ibpemepinuu niyu en ayan se menge etew.” (Ne ruen gumegebà ketà ne meluag.) Ne rutun dan en mebpinuu, ne menge lelima ne ngivu se meama liyu ke meritan batà. 11 Arà dà ne migkuwa ni Hisus ke lutù te batà, ne mibpeselamatan din te Eleteala, ne mibpenevìtevì din ne imbehey rin dut te edumdumaan din te idtukid diyà te menge etew ne mibpinuu. Iring din ded dema ke serà, ne migkaan dan langun taman te nevulung dan. 12 Guna su nevulung dan en ne migkahi en si Hisus dut te edumdumaan din te, “Punpuna niyu ke langun ne samà su apey kenà egkereeti.” 13 Arà dà ne mibpunpun dan en ke samà dut te pan, ne ruen sepulù wey deruwa ne binevey se netimuan te samà dut te lelima ne timan ne pan. 14 Guna su nekita rut te menge etew ke mekegeyip ne mid-ulaula ni Hisus ne migkahi ran te, “Ini en ke ebpelambas te Lalag te Eleteala ne ibpepengkayi rin te ampew te dunya.” 15 Netuenan ni Hisus se mid-uvey ran kandin su ebeelan dan sikandin ne ratù dan misan kenà egkiyug sikandin. Tembù be mid-ewaan dan ni Hisus ne midtekereg diyà te buvungan te sikandin dà.

Mid-ipanew si Hisus diyà te Divavew te Wayig

16 Guna su meapun en, riyà en midtupang ke menge edumdumaan din te beyvey te ranew. 17 Ne mid-untud dan en te avang su ed-apet dan te edlived diyà te inged ne Kapirnawum. Guna su mibmerusirem en ne warà pà lavew si Hisus, ne midlaus dan en te ed-apet. 18 Netekew ne mibmevaher ke keramag, ne midekelà ke baleg te wayig. 19 Guna su neketantal dan en te menge lelima ne kilù, ne arà pà ne nekita ran si Hisus se ebpelingguma ne ed-ipanew kayi te divavew te wayig. Ne nengeandek dan nevenar! 20 “Kenà kew meandek!” ke si Hisus, “su siaken ini.” 21 Nerineg dan ke suwara rin ne nengehalew ran ne impeuntud dan en si Hisus kayi te avang. Guna su nekeuntud en sikandin te avang, ne segugunà ne nekerunggù dan en dut te inged ne ebayaan dan. 22 Nepawà ketà ne ke menge etew ne pinekaan ne riyà pà lavew te ripag te ranew ne netuenan dan te seveka rà ke avang ne diyà te beyvey te ranew. Netuenan dan dema te si Hisus ne warà pà mekeruma dut te edumdumaan din su ke edumdumaan din dà ke mibpenguntud te avang. 23 Ne rutun te uvey te mibpekeenan kandan ne mibpeselamat si Hisus te Eleteala ne ruen midunggù ne menge avang ne riyà ebpuun te Tibiriya. 24 Guna su nekita rut te denda ne menge etew te warà en si Hisus wey misan ke edumdumaan din, ne mibpenguntud dan en te menge avang se ebpendiyà te inged ne Kapirnawum su ebpemengaan dan si Hisus.

Ke Egkeenen ne ebpekevehey te Umur ne Warà Edtemanen Din

25 Guna su nekerunggù dan ne netuen dan en si Hisus. “Meyterù,” ke sikandan “keenu ka mekeuma kayi?” 26 Midtavak si Hisus te, “Sebenarvenar ini se egkehiyen ku, ebpemengà kew kedì su nekekaan kew te pan ne nengevulung kew, ugaid ne warà kew mekesabut ke engkey se meana kayi te mekegeyip ne ed-ul-ulaan ku. 27 Kenà niyu iyan pegelepi ke egkeenen kayi te ampew te dunya su edsahad dà. Ugaid,” ke si Hisus, “ne iyan benar ne pegelepi niyu ke egkeenen ne ebpekevehey te umur ne warà edtemanan din. Ini se egkeenen ne siaken ke Impeanak te Menusiyà ke ebehey keniyu, su ruen gehem ku ne imbehey kedì te Amey ku ne Eleteala.” 28 Migkahi ke menge etew te, “Engkey se ed-ul-ulaan dey su apey key ebpeketuman te kiyug te Eleteala?” 29 Ne midtavak si Hisus te, “Ini se ul-ulaa niyu su apey kew ebpeketuman te kiyug te Eleteala, peretiyaya kew kedì ke midsuhù te Eleteala.” 30 Ne migkahi ran en te, “Engkey pà se ruma ne mekegeyip ne ed-ul-ulaan nu ne ibpekita nu kenami su apey key ebpekeperetiyaya? 31 Su ke menge keep-epuan tew rengan ne iyan dan migkaan ne ed-ingeranan te mana te riyà dan pà te tanà ne kenà egkeubpaan te menge etew, iring dut te impesurat ne Lalag te Eleteala ne egkahi te, ‘Ke egkeenen ne riyà ebpuun te langit se imbehey kandan ni Moises.’ ” 32 “Sebenarvenar ini se egkehiyen ku,” ke si Hisus, “ke egkeenen ne imbehey ni Moises te keep-epuan niyu ne kenà ke tidtu ne egkeenen ne riyà ebpuun te langit, su ke Amey ku ne Eleteala se ebehey te tidtu ne egkeenen ne riyà ebpuun te langit. 33 Su ke egkeenen ne ibehey te Eleteala, ne sikandin arà se mibpengkayi te ampew te dunya su ebehey te menge etew te umur ne warà edtemanen din.” 34 “Mama,” ke sikandan, “behayi key en keniyan te egkeenen ne nekahi nu ne kenà edsahad dà su warà edtemanan din.” 35 Ne migkahi si Hisus te, “Siaken arà se egkeenen ne ebehey te umur ne warà edtemanan din. Ke etew ne eduma kedì su ebperetiyaya ne iring te etew ne kenà en egkevitil. Uya, ke etew ne edsarig kedì ne iring te etew ne kenà en ebpekeinum. 36 Na iring te intarem ku en keniyu,” ke si Hisus, “ne misan nekita niyu en ke ed-ul-ulaan ku, ne kenà kew pà lavew iya ebperetiyaya kedì. 37 Ke langun ne menge etew ne ibehey kedì te Eleteala ne sikandan ke eduma kedì, ne langun ne eduma kedì ne warà senge etew rà kandan ne kenà ku edtelimaan. 38 Su mid-ewaan ku ke langit ne mibpengkayi a te ampew te dunya su apey ku egketuman ke kiyug dut te midsuhù kedì, kenà kedì ne kiyug. 39 Su ini ke kiyug te Eleteala ne midsuhù kedì te langun ne etew ne imbehey rin kedì ne eduma kedì, ne warà senge etew rà kandan ne kenà egkevehayan te umur ne warà edtemanan din, ne ebenawen ku pà sikandan langun ketà te ketepusan ne hewii te kegkukum,” ke si Hisus. 40 “Su ini ve ke kiyug te Amey ku ne Eleteala te langun ne nekesabut te siaken ke Anak din ne ebperetiyaya ran kedì ne ebpeketelimà dan te umur ne warà edtemanan din, ne siaken se ebanhew kandan ketà te ketepusan ne hewii te kegkukum.” 41 Arà be ne neepes ke menge egkeunutan te Hudiyanen dut te nelalag ni Hisus te, “Siaken ke egkeenen ne riyà ebpuun te langit.” 42 Ne mibpemengasak dan te, “Maa, kenà si Hisus ded ini ke anak ni Jose? Su egkekilala tew ke amey rin wey ke iney rin dema. Na meambe ke nekahi rin se riyà sikandin ebpuun te langit?” 43 Midtavak si Hisus te, “Engked kew en te ebpemivig. 44 Su warà senge etew rà ne eduma kediey ke kenà ke Amey ku ne Eleteala ke midsuhù kedì se ebpenehana te hinawa rin te ebperetiyaya, ne ebenawen ku sikandin dutun te akir din ne hewii te kegkukum. 45 Duen impesurat te menge etew ne mibpelembas te Lalag te Eleteala rengan ne egkahi te, ‘Langun ne menge etew ne ebpesebuten te Eleteala,’” ke si Hisus, “ne langun ne ebpemineg te ibpesabut kandin dut te Amey ku ne Eleteala ne eduma kedì. 46 Kenà iyan ku kegkahi ne ruen etew ne nekekita te Amey ku ne Eleteala su siaken dà ke riyà ebpuun te Eleteala se nekekita kandin su riyan a mibpuun te kandin. 47 Sebenarvenar ini se egkehiyen ku ne ke etew ne mibperetiyaya kediey ne egkevehayan te umur ne warà edtemanen din. 48 Su siaken arà ke egkeenen ne ebpekevehey te umur ne warà edtemanan din,” ke si Hisus. 49 “Benar ne nekekaan ke keep-epuan niyu te egkeenen ne ed-ingeranan te mana rut te riyà dan te tanà ne kenà egkeubpaan te etew, ugaid ne minatey ran ded lavew. 50 Ugaid ne ini se tidtu ne egkeenen ne riyà ebpuun te langit, ne piya engkey ne etew ne egkaan ketà ne ebpeketelimà te umur ne warà edtemanan din. 51 Siaken ke tidtu ne egkeenen ne riyà ebpuun te langit ne ebpekevehey te umur. Ke etew ne egkaan kayi ne warà kemetayen te himukud din. Su ke egkeenen ne ibehey ku ne ini en iya se lawa ku su apey ebpeketelimà ke langun ne etew kayi te ampew te dunya te umur ne warà edtemanan din.” 52 Guna su nerineg dut te menge egkeunutan te Hudiyanen ke migkahi ni Hisus ne nekedlewanà dan te, “Ebmemenuwen din te ebehey ke lawa rin keytew te ebpekaan?” 53 Ne midtavak si Hisus te, “Sebenarvenar iya ini se egkehiyen ku keniyu, embiya kenà kew egkaan te lawa ku wey embiya kenà kew ed-inum te lengesa ku ne kenà kew egkevehayan te umur ne warà edtemanan din. 54 Su ke etew ne egkaan te lawa ku wey ed-inum te lengesa ku ne egkevehayan te umur ne warà edtemanan din, ne ebenawen ku sikandin ketà te hewii ne kebpupusa te dunya. 55 Su ini se lawa ku ke tidtu ne egkeenen, ne ini se lengesa ku ke tidtu ne ed-inumen ne ebpekevehey te umur ne warà edtemanan din. 56 Ne misan engkey ne etew se egkaan te lawa ku ne ed-inum te lengesa ku ne sikandin ne kayi ebpekeubpà te kedì, ne siaken dema ne diyan a ebpekeubpà te kandin. 57 Ke Amey ku ne Eleteala ne midsuhù kedì ne ruen umur din ne warà edtemanan din ne ketà ebpuun ne ruen kedì ne umur. Ne iring dema ketà ke etew ne egkaan kediey, egkevehayan sikandin te umur su kayi ebpuun te kediey. 58 Ini ve ke egkeenen ne riyà ebpuun te langit, ne kenà ini iring dut te egkeenen ne ed-ingaranan te mana ne nekaan dut te keep-epuan niyu su mibpematey ran. Su ke etew ne egkaan kayi te egkehiyen ku ne egkeenen ne egkeuyag sabap kedì.” 59 Ini ke migkahi ni Hisus te kebpenurù din diyà te valey ne ebpengedian te menge Hudiyanen te penduan dan diyà te inged ne Kapirnawum.

Merakel ne Midsuwey te Eduma ki Hisus su Melugkà se Hinawa Ran

60 Merakel dut te menge etew ne eduma kandin se nekerineg kayi te impenurù din ne migkahi ran te, “Merehen ne egkerumaan ini se impenurù din. Engkey rà buwa iya se ebpemineg kayi?” 61 Netuenan ni Hisus te ebpemekedlewanà dan su atag dut te impenurù din ne migkahi en te, “Maa, ebmelugkà ini te hinawa niyu? 62 Upama ke embiya egkekita niyu ke Impeanak te Menusiyà ne ebpekelesed su ed-ulì diyà te ebpuunan din, ne engkey ve se pegitungan niyu, muna pà buwa se kegkelugkai te hinawa niyu? 63 Iyan dà ebpekevehey te umur ne warà edtemanan din ne ke Kedesenan ne Ebpetuntul te Menusiyà, su warà egkegaga te etew rà dè duen. Ini se migkahi ku keniyu ne riyà ebpuun te Kedesenan ne Ebpetuntul te Menusiyà ne ebpekevehey te umur ne warà edtemanan din. 64 Ugaid ne ruen ruma niyu ne warà mebperetiyaya kediey.” (Migkahi ini ni Hisus su netuenan din en neraan ke engkey se warà mebperetiyaya kandin wey ke ed-ulug kandin diyà te kunterà din.) 65 Ne midsaup maa sikandin migkahi te, “Tembù be migkahi ku keniyu te warà senge etew rà ne ebpekeruma kediey embiya kenà egkepenehana ke hinawa rin dut te Amey ku ne Eleteala.” 66 Arà dà iya ne merakel en dut te menge etew ne eduma kandin se mibpekidsuwey en, ne kenà dan en eduma kandin. 67 Ketà ne nekehiyan ni Hisus ke sepulù wey deruwa ne edumdumaan din te, “Menu sikiyu, ebpekidsuwey kew en rema kediey?” 68 Migkahi si Simon ke mid-ingaranan ki Pedro te, “Sikuna ke Kerenan dey ne endei key pè be ebpesinaru? Su sikuna rè ma ke ebpenurù te ralan te kebpeketelimà te umur ne warà edtemanan din. 69 Ne mibperetiyaya key en keykew su netuenan dey se sikuna ke Berekat ne midsuhù te Eleteala ne ebpekemalen.” 70 Migkahi en si Hisus dut te edumdumaan din te, “Maa, kenà ke sepulù niyu wey deruwa se mibpemilì ku? Ugaid ne seveka keniyu se sakup ni Setanas ke datù te pekaid.” 71 Iyan din ini egkehiyen ne si Hudas ke anak ni Simon Iskeriyuti. Su misan senge etew si Hudas dut te sepulù wey deruwa, ne sikandin se ed-ulug ki Hisus diyà te menge kunterà din.

John 7

Mibpendiyà si Hisus te Kevurunan

1 Guna su nekeipus si Hisus te kebpenurù din ne midlauglaug en sikandin kayi te menge inged lusud te Geliliya. Kenà sikandin egkiyug ne ebpendiyà te lusud te inged ne Hudiya su ruen ketà menge egkeunutan te Hudiyanen ne egkiyug ne ed-imatey kandin. 2 Ne mehaan en dema ketà egketuman ke kevurunan te menge Hudiyanen ne ed-ingeranan te Pista te Menge Sabung. 3 Tembù be migkehiyan si Hisus dut te menge ari rin te, “Iyan tumù ne awà ka kayi ne telavuk ka te kevurunan diyà te inged ne Hudiya su apey mekekita ke menge etew ne eduma keykew te mekegeyip ne ed-ul-ulaan nu. 4 Su warà etew ne ed-eles te ed-ul-ulaan din embiya egkiyug sikandin ne egkevantug. Geina te ed-ul-ulaan nu ini se mekegeyip ne iyan tumù ne ibpekita nu riyà te langun ne menge etew.” 5 (Migkahi ini rut te menge ari ni Hisus su misan sikandan ne kenà dan ebperetiyaya kandin.) 6 Midtavak si Hisus kandan te, “Warà pà mekeuma ke dait ne hewii te kebpayag ku rut te ed-ul-ulaan ku. Ugaid ne sikiyu, ne piya engkey ne hewii ne neked-iring dà diyà te keniyu. 7 Su kenà ma egkeepes keniyu ke menge etew ne egkunterà te Eleteala, ugaid ne egkeepes dan kedì su layun a edsawey kandan dut te meraat ne ulaula ran. 8 Una kew en pendiyà te kevurunan,” ke si Hisus “su warà pà mekeuma ke dait ne hewii te kebpayag ku rut te menge ulaula ku.” 9 Arà dà ke migkahi ni Hisus ne mibpelintetahak en sikandin kayi te Geliliya. 10 Guna su mid-ipanew en ke menge ari ni Hisus ne edtelavuk dut te kevurunan ne midtundug ded dema sikandin, ugaid ne ed-eles-eles dà sikandin. 11 Ne ketà te pista, ne mibpemengà si Hisus dut te menge egkeunutan te Hudiyanen. “Endei en be sikandin?” ke sikandan. 12 Duen merakel ne ebpevutbutehey mekeatag kandin ketà te menge etew ne nevurun. Ruen egkahi te, “Si Hisus ne meupiya ne etew.” Ne ruen ruma pà ne egkahi te, “Kenà, su ibpesuwey rin ke menge etew.” 13 Ne geina te egkeandek dan dut te menge egkeunutan te Hudiyanen ne kenà dan utew ibperineg te menge ruma ran ke kedlalag dan. 14 Guna su edluukanan en ke kevurunan ne mibpendiyan en si Hisus te Nekebpuru ne Valey te Eleteala su ebpenurù dut te menge etew. 15 Ne ruen ketà menge egkeunutan te Hudiyanen ne midtelavuk ne nengeinuinu ran. “Endei ebpuun ini se ketau rin” ke sikandan “su warà ma sikandin mekepengadì?” 16 Nerineg ni Hisus ke migkahi ran ne migkahi en kandan te, “Ini se ibpenurù ku ne kenà kayi ebpuun te ketau ku su riyà ebpuun te Eleteala ne midsuhù kedì. 17 Ke etew ne egkiyug ne edtuman te kiyug te Eleteala ne egketuenan din ke penurù ku ke embiya egenat te Eleteala etawa kayi rà dèduen te hinawa ku. 18 Su ke etew ne ebpenurù te kandin dà dèduen ne hinawa, ne ebpemengà dà te kegkevantug din. Ugaid ne ke etew ne iyan din ebpemengaan se kegkevantug dut te midsuhù kandin, ne egkeserihan ke lalag din su kenà tarù ini se ibpenurù din. 19 Maa, kenà ke apù niyu rengan ne si Moises,” ke si Hisus “ke mibehey keniyu te menge penduan? Ugaid ne netuenan ku te warà seveka rà keniyu ne midtuman dut te penduan din. Ne meambe ke egkiyug kew ne ed-imatey kediey?” 20 “Ed-em-emungan ke ves buwa te vusew!” ke se menge etew. “Su enta ma se egkiyug ne ed-imatey keykew?” 21 Ne migkahi si Hisus te, “Duen seveka ne mid-ulaula ku ne mekegeyip ne langun niyu ne nengeselekawan su ketà te Hewii ne Id-imeley. 22 Ruen seveka ne penduan ne intahak ni Moises dengan ne insuhù din keniyu te ed-etus te behu pà ne in-anak embiya meama (asal kenà diyà dà ebpuun te ki Moises ini se betasan niyu ne ed-etus su raan en ini ne betasan te keep-epuan niyu), ne ed-etus kew misan ketà te Hewii ne Id-imeley. 23 Ne embiya egkepakey ne ed-etusan se meama te Hewii ne Id-imeley su apey egketuman ke penduan ni Moises, ne meambe ke egkeepes kew kedì ketà te neulian ku te kinebawì ku arà se meama ne ederaru dut te Hewii ne Id-imeley? 24 Kenà kew ed-isuhat te kukuman te kayi rà te egkekita niyu, ugaid ne ed-isuhat kew te kukuman te ibpeunsad dut te benar.”

Mid-insà ke Menge Etew diyà te Kevurunan ke Embiya si Hisus ke Impasad te Eleteala ne Ebperetuen Din

25 Duen menge etew ketà te inged ne Hirusalim ne nekerineg dut te migkahi ni Hisus ne migkahi te, “Engkey, kenà ini iya ke etew ne ebpemengaan dut te menge egkeunutan te Hudiyanen su ed-imetayan dan? 26 Intengi niyu ma se ebpenurù ded sikandin kayi te merakel ne etew. Kema ke benar ded buwa ne netuenan dut te menge egkeunutan tew te sikandin iya ke nekahi ne Impasad te Eleteala ne Ebperetuen din, su warà peengkera sikandin se ebpenurù. 27 Ugaid ne ini se kebpekeuma rut te Impasad te Eleteala ne Ebperetuen din, ne warà kun egketau ke endei ebpuun sikandin, ugaid ne ini ne netuenan tew red ke mibpuunan din.” 28 Gewii ni Hisus te ebpenurù diyà te Nekebpuru ne Valey te Eleteala ne nerineg din arà se lalag dan ne migkahi sikandin te impekerahing din te, “Kunaan niyu ke nekilala a niyu wey netuenan niyu ke endei a ebpuun, ugaid ne idtarem ku keniyu te warà a mibpengkayi te kediey rà ne kiyug su iyan midsuhù kedì ne ke Eleteala ne benar, ugaid ne warà niyu metueni ke entei sikandin. 29 Ugaid ne netuenan ku mulà sikandin su riyan a ebpuun te kandin, ne iyan dema sikandin se midsuhù kedì.” 30 Ne edsigkemen dan en perem si Hisus ketà, ugaid ne warà neketikà ne egawed kandin su warà pà ma mekeuma ke intail ne hewii te Eleteala te kegkesigkem kandin. 31 Merakel se mibperetiyaya te sikandin en ke nekahi ne Ebperetuen ne Impasad te Eleteala, ke sikandan te, “Ini en iya ke egkepenareng tew ne Edatù su warà en ebpekelawan dut te menge mekegeyip ne ed-ul-ulaan din.” 32 Nerineg te menge Peresiyu ke menge etew ne ebpebutbutehey mekeatag ki Hisus ne tembù be sikandan wey ke menge mepurù te terebpelengesa se midsuhù te menge gurudyà dut te Nekebpuru ne Valey te Eleteala te ibpesigkem si Hisus. 33 Migkahi si Hisus te, “Kenà utew meuhet ne ed-ewaan ku sikiyu su ed-ulì ad diyà te midsuhù kedì. 34 Ne ebpemengà kew kedì, ugaid ne kenà a niyu egketuen su kenà kew ma ebpekependiyà te ebpesineruwan ku.” 35 Ketà ne mibpein-inseey ke menge egkeunutan te Hudiyanen te, “Endei ve buwa ebpesinaru sikandin se kenà tew egketuen? Ebpendiyà buwa sikandin te inged te menge etew ne kenà Hudiyanen ke mid-ulian te menge ruma tew ne Hudiyanen, su ebpenurù sikandin te menge etew ne kenà Hudiyanen. 36 Su meambe,” ke se menge egkeunutan te Hudiyanen, “ke nekahi rin se, ‘Ebpemengà kew kedì, ugaid ne kenà a niyu egketuen.’ Ne nekahi rin pà se, ‘Kenà kew ebpekependiyà te ebpesineruwan ku.’ Engkey ve buwa se meana rut te nekahi rin?”

In-upama ni Hisus te Sikandin ke Puunan te Wayig ne Edtudà ne Ebpekevehey te Umur ne Warà Edtemanan Din

37 Ketà te mewri ne hewii te pista, su arà ke pinekerekelà ne hewii te menge Hudiyanen te kedtanud dan, ne mid-itindeg en si Hisus ne pinekerahing din se egkahi te, “Ke etew ne ebpekeinum ne mebpengkayi te kedì ne med-inum. 38 Su embiya ed-inum en sikandin kayi te kedì,” ke si Hisus, “ne iring dut te impesurat ne Lalag te Eleteala ne egkahi te, ‘Ke etew ne mibperetiyaya kediey,’ embiya idsempità ta, ‘ne riyà ebpuun te hinawa rin ne ruen wayig ne edtudà ne ebpekevehey te umur ne warà edtemanan din.’” 39 (Ini se impesabut ni Hisus mekeatag dut te Kedesenan ne Ebpetuntul te Menusiyà ne mehaan en ebpekeubpà diyà te menge etew ne ebperetiyaya kandin. Ugaid ne ketà ne hewii ne warà pà ingkevehey ni Hisus ke Kedesenan ne Ebpetuntul te Menusiyà ne ibpeubpà din kandan su warà pà nevanew si Hisus dut te Amey rin ne Eleteala te kebpekeulì din diyà te langit te kedeyù kandin te Amey rin.) 40 Guna su nerineg dut te merakel ne etew ne nevurun ketà ne ruen migkahi te, “Ini en iya ke ebpelambas te Lalag te Eleteala ke ebpenerengen tew.” 41 Ne ruen duma ne migkahi te, “Sikandin en iya ke Impasad te Eleteala ne Ebperetuen din.” Ugaid ne ruen ruma pà ne migkahi te, “Kenà, su kenà diyà ebpuun te lusud te inged ne Geliliya ke Ebperetuen te Eleteala. 42 Su impesabut te insurat ne Lalag te Eleteala te ini se Impasad din ne Ebperetuen ne kayi ebpuun dut te inenakan ni David ne riyà kun id-anak te inged ne Bitlihim ke inged dengan ni Dabid.” 43 Ketà be ne warà meseveka ke itungan dut te menge etew mekeatag ki Hisus. 44 Duen ketà egkiyug en ne edsigkem ki Hisus, ugaid ne warà ebpeketikà ne egawed kandin.

Warà Mibperetiyaya ki Hisus ke Menge Egkeunutan te Hudiyanen

45 Guna su mid-ulì en ke menge gurudyà te Nekebpuru ne Valey te Eleteala ne mid-insaan dan en dut te menge mepurù te terebpelengesa wey ke menge Peresiyu te, “Meambe ke warà niyu meewit sikandin kayi?” 46 Ne midtavak ke menge gurudyà te, “Iyan dey warà kedsigkema kandin ne warà key pà mekerineg te etew ne ebpasal iring ketà te kebpasal din.” 47 Ne migkehiyan dan en maa dut te menge Peresiyu te, “Maa, sikiyu ves dema ne nelimbungan din en? 48 Maa, ruen misan seveka kayi te sikami ne egkeunutan te Hudiyanen ne ebperetiyaya kandin, abpeg te menge Peresiyu? Warà en iya! 49 Ini se merakel ne etew ne miduma en kandin ne warà dan mekesabut dut te penduan ni Moises ne intahak keytew, ne igkeantug dan diyà te apuy nerakà.” 50 Ne dutun si Nikudimu ke senge etew ne Peresiyu ne mibpekidlalag ki Hisus se migkahi te, 51 “Kayi te penduan tew ne kenà egkepakey ne ebpedselaan ke etew ke kenà ibpepinuu pà te kukuman su ebpenginsaan pà sikandin.” 52 -53 “Meambe,” ke se menge ruma rin, “ebpeninindeg ka kandin su riyà ka rema ebpuun te inged ne Geliliya? Besaa nu ke impesurat ne Lalag te Eleteala ne ketà nu egketueni te warà ebpelambas te Lalag te Eleteala ne egemew riyà te lusud te inged ne Geliliya.”

John 8

Ke Meritan

1 Neipus ketà ne mibpengulien ke langun ne menge etew, ugaid ne si Hisus ne midtekereg sikandin diyà te buvungan ne ed-ingaranan te Ulivu. 2 Guna su nepawè en ne mibpaneypaney si Hisus se edlived kayi te Nekebpuru ne Valey te Eleteala. Miburun maa ke langun ne menge etew kayi te kandin, ne mibpinuu en sikandin se ebpenurù kandan. 3 Ketà ne ruen menge meyterù te penduan wey menge Peresiyu se mibpengkayi te ki Hisus su mid-ewit dan ini se meritan ne nehumangan ne midlangkadlangkad te esawa rin, ne impeitindeg dan ke meritan kayi te etuvangan te menge etew. 4 “Meyterù,” ke se menge etew ne mid-ewit te meritan, “nesempenan dey ini se meritan ne midlangkadlangkad te esawa rin. 5 Kayi te penduan ni Moises ne edumaan tew, embiya ruen etew ne iring kayi ne edrumbahen te vatu taman te ebpatey. Na, engkey en be se keykew ne kegkukum kayi te meritan ini?” 6 Iring ketà se migkahi ran ki Hisus su ebpemengaan dan se ralan te id-isuhat dan ne kewagib dut te idtavak din. Ugaid ne midungkug si Hisus ne midsurat te terù din kayi te tanà. 7 Gewii ran te ed-insà ki Hisus ne midtenggak en sikandin se egkahi te, “Embiya ruen keniyan te keniyu ne warà mekevaal te meraat ne ulaula ne iyan med-una medtimbag kandin te vatu.” 8 Nekahi rin dà arà ne midungkug en maa sikandin ne midsurat kayi te tanà. 9 Ne nerineg den dà arà se intavak ni Hisus ne mid-awà dan en te idseveka te egenat dut te lukes taman te iyan dà nesamà si Hisus wey ke meritan ne ed-it-itindeg kayi te etuvangan din. 10 Ne midtenggak en maa si Hisus se egkahi te, “Na, Bayi, endei embe sikandan? Maa, warà embe seveka kandan ne nesamà ne ed-isuhat keykew te kewagib?” 11 “Warà en, Mama,” ke se meritan. “Na,” ke si Hisus te, “siak dema ne warà id-isuhat ku keykew ne kewagib. Ulì ke en be ugaid ne kenà ke en maa baal te meraat ne ulaula.”

Si Hisus ke Sulù ne Ebpekerayag te Itungan dut te Langun ne Menge Etew kayi te Ampew te Dunya

12 Ne migkahi pà maa si Hisus diyà te menge etew te, “Siaken ke sulù ne ebpekerayag te itungan te langun ne menge etew kayi te ampew te dunya. Piya engkey ne eduma kedì ne kenà en ed-ipanew diyà te kerusireman su egkereyahan en ke itungan dan kayi te rayag te sulù ne ebehey te umur ne warà edtemanan din.” 13 Guna su nerineg te menge Peresiyu ne migkahi ran te, “Sikuna red se edtitihus te keykew rà ne hinawa. Tembù be ini se migkahi nu ne kenà tidtu ne titihus ini.” 14 Ne migkahi si Hisus kandan te, “Piya edtitihusan ku ke kedì ne hinawa ne egkedserihan niyu ke lalag ku ne benar. Su netuenan ku ke endei a ebpuun ne endei a ebpesinaru, ugaid ne sikiyu mulà ne kenà niyu egketuenan ke endei a ebpuun etawa ke endei a ebpesinaru. 15 Embiya egkukum kew te ulaula te menge etew ne kenà egkedserihan se kegkukum niyu su kayi rà dèduen te kememenusiyai ne itungan, ugaid ne siaken ne kenà a egkukum te misan engkey en. 16 Ugaid ne embiya egkukum a,” ke si Hisus pè maa, “ne egkeperetiyaya niyu ne benar su kenà siaken dà su deruwa rey rut te Amey ku ne Eleteala ne midsuhù kedì se egkukum. 17 Su ruen nekesurat te penduan niyu ne egkahi te, ‘Embiya egkeseveka se bitiyara rut te deruwa ne etew ne edtitihus, ne benar se lalag dan.’ 18 Edtitihusan ku ke kedì ne hinawa, ne ke Amey ku ne Eleteala ne midsuhù kedì se edtitihus dema mekeatag kedì.” 19 Nerineg dà dut te menge Peresiyu ne migkahi ran en te, “Endei ma ke Amey nu?” “Warà a niyu metueni ke entei a etawa ke Amey ku,” ke si Hisus. “Su embiya netuenan a nikiyu ne egketuenan niyu rema ke Amey ku.” 20 Ini ke migkahi ni Hisus dut te kebpenurù din diyà te Nekebpuru ne Valey te Eleteala uvey te edtehuan te ibehey te Eleteala. Ne warà midsigkem kandin su warà pà ma metuman ke hewii ne intail te Eleteala kandin. 21 Ne migkahi pà maa si Hisus diyà te menge egkeunutan te Hudiyanen te, “Ed-ewaan ku en sikiyu ne ebpemengà kew kediey su apey kew ebpekepeliyu, ugaid ne kenà e ma nikiyu egketuen ne ebpematey kew red keniyan te salà niyu ne kenà egkepesahad. Su kenà kew ebpekependiyà te ebpesineruwan ku.” 22 Ne mibpein-inseey ke menge unutan te Hudiyanen te, “Migkahi sikandin te, ‘Kenà kew ebpekependiyà te ebpesineruwan ku.’ Engkey se ibpesabut din, ed-ehet buwa sikandin?” 23 Ne midtavak si Hisus te, “Sikiyu ne ini kew rà te ampew te dunya, ugaid ne siaken ne riyan a ebpuun te divavew. Uya, sikiyu ne kayi kew ebpuun te kelibutan, ugaid ne siaken ne diyan a ebpuun te langit. 24 Tembù be intarem ku en keniyu,” ke si Hisus, “te ebpematey kew red keniyan te salà niyu ne kenà egkepesahad. Uya embiya kenà kew ebperetiyaya te siaken arà ke intarem ku keniyu ne riyà ebpuun te Eleteala ne ebpematey kew red keniyan te salà niyu ne kenà egkepesehad.” 25 “Engkey ke ma iya?” ke se menge Peresiyu. Ne midtavak si Hisus te, “Intarem ku en keniyu ke entei a igenat dut te aney en ne kebpenurù ku taman en gunteani. 26 Merakel pà se igkekahi ku wey igkeisuhat ku mekeatag te menge ulaula niyu. Ugaid ne iyan ku rà ibpesabut te menusiyà ne endei rà ke nerineg ku rut te midsuhù kedì, ne egkedserihan nevenar sikandin.” 27 Warà mekesabut ke menge Hudiyanen te migkahi rin mekeatag te Amey rin ne Eleteala. 28 Ne geina te warà dan mesebuti ne migkahi en maa si Hisus te, “Ketà te hewii ne kedlensanga niyu ke Impeanak te Menusiyà diyà te pinebelevag ne kayu ne ketà niyu egkesebuti te siaken arà se intarem ku keniyu ne riyà ebpuun te Eleteala. Ne ketà ne egketuenan niyu rema te warà ebeelan ku te kedì dà ne hinawa, ugaid ne iyan ku rà igkahi ne endei rà ke ibpekahi kedì dut te Amey ku ne Eleteala. 29 Ne ke Amey ku ne midsuhù kedì,” ke si Hisus, “ne eduma kedì. Kenà a rin ebpedtedayan su iyan ku rà edtumanen ke ebpekesuhat te hinawa rin.” 30 Ne merakel dut te nekerineg te lalag ni Hisus se mibperetiyaya kandin.

Ke Menge Etew ne Ebaal te Meraat ne Egkeuripen te Salà

31 Ne migkehiyan ni Hisus ke menge Hudiyanen ne mibperetiyaya en kandin te, “Embiya ibperayun niyu ke keduma niyu rut te menge penurù ku keniyu ne benar kew en ne edumdumaan ku. 32 Ne egkesebutan niyu ke benar ne penurù mekeatag te Eleteala ne ketà puunan ne egkevelukasan kew.” 33 Nerineg den dà ne migkahi ran en te, “Sikami ne menge inenakan ni Abraham ne warà key pà keenu meuripen te misan entei en. Ne meambe ke nekahi nu se egkevelukasan key?” 34 “Sebenarvenar ini se egkehiyen ku keniyu,” ke si Hisus, “te misan entei ne ebaal te meraat ne egkeuripen te salà. 35 Ini se uripen ne kenà ebpekeubpà ketà te baley te kerenan din taman te taman, ugaid ne ke tuney ne anak se ebpekeubpà ketà taman te taman. 36 Geina te siak se Anak te Eleteala, ne embiya egkevelukasan ku en sikiyu ne kenà kew en egkepengunguripen. 37 Netuenan ku,” ke si Hisus, “te inenakan kew ni Abraham, ugaid ne iyan niyu ebpemengaan se kebpatey ku su kenà kew ma ebpemineg te penurù ku keniyu. 38 Iyan ku egkehiyen ne endei rà ke ibpekahi kedì dut te Amey ku, ugaid ne sikiyu ne iyan niyu ed-ul-ulaan ke netuenan niyu rut te amey niyu.” 39 Ne migkahi ran te, “Iyan dey keep-epuan si Abraham.” Ne migkahi si Hisus te, “Embiya ma benar kew ne inenakan ni Abraham, ne iyan niyu ma ebeelan ke mibeelan din dengan. 40 Ugaid ne kenà ma ayan ke ulaula niyu su ebpemengà kew te ked-imatey niyu kedì misan iyan ku rà migkahi keniyu ke benar ne ibpekahi kedì dut te Amey ku ne Eleteala. Ne kenà be iring ketà ke ulaula ni Abraham dengan. 41 Sikiyu, ne iyan niyu ebeelan ne endei rema ke mibeelan dut te amey niyu.” Migkahi ran te kegkeepes dan te, “Kenà key ini menge anak dà te ingkehingey! Netuenan dey ke engkey se amey rey, su ke sebseveka ne Eleteala!” 42 “Na,” ke si Hisus “embiya ke Eleteala iya maa ke amey niyu, ne igkelimù a nikiyu su diyan a mibpuun te kandin. Ne kenà kedì ne kiyug se kinepengkayi ku su sikandin ke midsuhù kedì. 43 Meambe ke kenà niyu egkesebutan ke egkehiyen ku? Iyan iya se kenà kew egkiyug ne eduma te ibpenurù ku. 44 Su ke datù ma te pekaid se amey niyu ne iyan niyu edumaan ke kandin ne kiyug. Terebunù sikandin te aney en, ne edsungkanger dut te benar su iyan dè ma nekepenù te bèbà din ne tarù. Embiya edlalag sikandin ne tarù su edumaan din ke kandin ne kiyug, su teruen ma sikandin ne apù sikandin te tarù. 45 Ugaid ne sebenarvenar mulà ini se lalag ku,” ke si Hisus, “ne kenà kew ebperetiyaya kediey. 46 Na, engkey keniyu se ebpeketitihus te ruen meraat ne ed-ul-ulaan ku? Warà! Ne embiya benar se lalag ku ne meambe ke kenà kew ebperetiyaya kedì? 47 Arà se etew ne benar ne anak te Eleteala ne ebpemineg te menge lalag te Eleteala. Ugaid ne sikiyu ne kenà din menge anak, tembù kenà kew ebpemineg.”

Si Hisus wey si Abraham

48 Ne midtavak ke menge Hudiyanen ki Hisus te, “Benar iya vuwa ke nekahi rey geina ne riyà ka ebpuun te inged ne Semeriya ne midsuukan ka te vusew.” 49 “Warà a ini suuki te vusew,” ke si Hisus. “Su iyan ku ed-ul-ulaan ini ne pekinegan dut te Amey ku, ugaid ne ebpegkeyà kew kedì. 50 Kenà ku iyan ebpenemaran ke kebantug kedì te menge etew, ugaid ne Eleteala se metau ne edtuganur te kegkevantug ku, wey sikandin se edtampil kedì. 51 Sebenarvenar ne ini se idtarem ku keniyu te piya entei en se eduma te ibpenurù ku ne kenè en ebpatey.” 52 “Na benar iya ne midsuukan ka te vusew,” ke se menge Hudiyanen. “Su misan si Abraham wey ke langun ne mibpelembas te Lalag te Eleteala rengan ne mibpematey ran ded ma. Ne meambe ke migkahi nu te, ‘Misan entei en ne eduma te penurù ku ne kenè en ebpatey?’ 53 Ke keep-epuan dey ne si Abraham ne minatey en, ne engkey, muna ke pà bes kandin? Wey ke mibpemelambas te Lalag te Eleteala ne mibpematey ran ded lavew. Engkey ke ma te keykew ne kebpegpegitung?” 54 Ne midtavak si Hisus te, “Embiya ebantug a te hinawa ku ne warà pantag din ke bentuhan ku. Ugaid ne iyan ebantug kedì ke Amey ku ne Eleteala, ke iyan egkehiyen niyu ne Eleteala niyu. 55 Warà niyu metueni ke entei sikandin, ugaid ne siaken mulà ne netuenan ku sikandin,” ke si Hisus. “Embiya ve migkahi ku te warà ku metueni sikandin, ne teruen a iring keniyu. Ugaid ne netuenan ku nevenar sikandin ne edtumanen ku ke menge lalag din kediey. 56 Nehalew si Abraham ke keep-epuan niyu rengan su netuenan din te ibpepengkayi a su ebpebaluy ne menusiyà, tembù be nehalew sikandin su ebpenerengen a rin.” 57 Ne migkahi ke menge Hudiyanen te, “Engkey en se kinepekekita nu ki Abraham te warà pà melelima nepulù se rahun nu?” 58 “Sebenarvenar ne ini se egkehiyen ku keniyu,” ke si Hisus, “te warà pà in-anak si Abraham ne raan ad.” 59 Arà dà ne mibpurut en ke menge Hudiyanen te vatu su idrumbag dan ki Hisus, ugaid ne mibpeniyuksiyuk si Hisus ne mid-awà ketà te Nekebpuru ne Valey ne te Eleteala.

John 9

Neulian ni Hisus ke Etew ne Neketakin Kandin se Pisek

1 Ketà te ked-ip-ipanew ni Hisus ne nekita rin ini se etew ne neketakin kandin se nepisek en. 2 “Mama,” ke se menge edumdumaan ni Hisus, “meambe ke midtakin ayan ne kegkepisek din? Engkey ki salà, kandin be etawa ke menge lukes din?” 3 Ne migkahi en si Hisus te, “Kenà kayi ebpuun te kandin ne salà etawa riyà te menge lukes din. Nepisek sikandin su apey egkekita kayi te kegkeulii rin ke gehem te Eleteala. 4 Taman te meandew pà,” ke si Hisus, “ne iyan iya se egelevek ki pà dut te gelevek te midsuhù kedì. Su egkeuma ke merukilem ne warà en ebpekehelevek. 5 Taman te kayi e pà te ampew te dunya ne siaken ke sulù ne ebpekerayag te itungan te menge etew.” 6 Neipus din te egkahi ini, ne mid-ileb en diyà te tanà ne intevuley rin en ke ileb din te tanà su apey ebudtà. Ne indekudas din en ke vudtà diyà te mata rut te nepisek. 7 Ne migkahi en sikandin te, “Pendiyà ke be te linew ne ed-ingaranan te Siluan ne pendapug ke ve ketà.” (Iyan meana te Siluan ne “Midsuhù”.) Arà dà ne mibpendiyà en ke pisek ne mibpendapug en ketà sikandin. Nekeipus ne midlived sikandin ne ebpekekita en. 8 Guna su nekita rut te menge etew riyà te sepiring din wey ke menge etew ne nekekita kandin te kebpememuyù din ne mibpein-inseey ran te, “Maa, kenà ini red ke meama ne ebpinpinuu su ebpememuyù?” 9 Ruen migkahi te, “Ayan ded iya sikandin!” Ne ruen ruma ne migkahi te, “Kenà, su nekedrahid dà ke paras dan.” Ne migkahi en ke meama ne nepisek pehaney te, “Siaken iya ini ke nepisek.” 10 “Ne meambe,” ke sikandan, “engkey ma se kegkeulii te mata nu?” 11 Midtavak sikandin te, “Iyan nekeulì te mata ku arà se etew ne ed-ingaranan ki Hisus. Su mid-ilevan din ke tanà ne intevuley rin ke ileb din su apey mebudtà, ne arà ke indekudas din te mata ku. Ne migkehiyan a rin te, ‘Pendiyà ka te linew ne ed-ingaranan te Siluan ne pendapug ke ve ketà.’ Ne mibpendiyan a rema te linew ne guna su nekeipus a se ebpendapug ne ebpekekita ad.” 12 “Na endei be sikandin?” ke sikandan. Ne midtavak en sikandin te, “Idita en.”

Impenginsà Dut te Menge Peresiyu Mekeatag Dut te kegkeulii Rin

13 Ne miduma ran en ke neulian ne pisek diyà te menge Peresiyu. 14 Ne arà ne hewii se kinevaal ni Hisus te budtà ne nekeulì dut te pisek ne Hewii te Id-imeley. 15 Nekeuma ran diyà te menge Peresiyu ne mid-insaan en maa sikandin ke engkey se imped-ulaula ni Hisus kandin te kegkeulii te mata rin. Ke sikandin te, “Indekudas din ke budtà kayi te mata ku ne pinependapug a rin, ne ketà ne nekekita ad.” 16 Nerineg dà dut te menge Peresiyu ne ruen migkahi te, “Ini se etew ne mibawì keykew ne kenà ebpuun te Eleteala su kenà edtanud sikandin dut te Hewii ne Id-imeley.” Ne ruen ruma pà ne migkahi te, “Engkey, duen belisalà ne etew ne ebpekevaal te menge ulaula ne mekegeyip?” Ketà ne kenà dan en ebpemegayun. 17 Ne mid-insaan dan en manen ke etew ne neulian te, “Na sikew, nekahi nu te sikandin se kineulii te mata nu, engkey ve se nepegitung nu mekeatag kandin?” Ke sikandin te, “Ebpelambas sikandin te Lalag te Eleteala.” 18 Ugaid ne warà peretiyayaa te menge egkeunutan te Hudiyanen te nepisek ini se etew neraan, tembù be impetawag dan ke menge lukes dut te pisek, 19 ne mid-insà dan dut te menge lukes te, “Engkey, ini iya ke anak nu? Maa, daan en iya ne pisek sikandin te kineanak kandin? Ne memenu ve se kinekeulii te mata rin?” 20 Ne midtavak ke lukes din te, “Uya, anak dey iya sikandin ne intakin kandin ayan se kegkepisek din. 21 Ugaid ne warà dey metueni ke engkey se kinepekekita rin en, ne warà dey metueni ke engkey se nekeulì kandin. Iyan tumù ne sikandin en se insai niyu ne igketarem din ma su egketau en sikandin.” 22 Ini ke intavak dut te menge lukes din su neandek dan dut te menge egkeunutan te Hudiyanen. Su ruen neumpungan te menge egkeunutan te embiya ruen etew ne ebperetiyaya te si Hisus ke Impasad te Eleteala ne Ebperetuen, ne ibpeawà sikandin dut te baley ne ebpengedian te menge Hudiyanen te penduan dan. 23 Tembù be migkahi ke menge lukes din te, “Iyan niyu en insai sikandin su egketau en ma sikandin.” 24 Ne rutun ne mid-umew ran en maa te ebpelived ke neulian ne pisek ne migkahi ran te, “Na iyan nu rà kehiya ke benar su ini ka te etuvangan te Eleteala. Su netuenan dey te ini ne etew se nekeulì keykew ne belisalà ne etew.” 25 “Kenà ku egketuenan embiya belisalà sikandin etawa kenà,” ke se neulian ne pisek, “ugaid ne iyan ku netuenan te pehaney ne nepisek a ne huntaani ne ebpekekita ad.” 26 “Ne engkey ve se imped-ulaula rin keykew?” ke sikandan. “Ne mibmenumenu rin be se kegkeulii te mata nu?” 27 “Migkahi ku en ura keniyu,” ke se neulian ne pisek, “ne warà kew ma mebpehimbenar. Ne meambe maa ke ibpesulit niyu pà kedì? Maa egkiyug kew rema ne eduma kandin?” 28 Neepes dan ketà ne meraat se lalag dan kandin, ke sikandan te, “Ew, edumdumaan ke ves nikandin, ugaid ne sikami mulà ne edumdumaan key rut te ebpelambas te Lalag te Eleteala rengan ne si Moises. 29 Netuenan dey nevenar te mibpekidlalag ke Eleteala ki Moises, ugaid ne ini se etew ini ne warà dey metueni ke endei sikandin nekepuun.” 30 Migkahi ini se neulian te, “Asal mekegeyip! Warà niyu metueni ke endei sikandin ebpuun misan ruen gehem din ne nekeulì te kegkepisek ku. 31 Netuenan tew te kenà ebpemineg ke Eleteala rut te etew ne belisalà, ugaid ne iyan din ebpeminehen ke etew ne ed-adat kandin wey edtuman te kiyug din. 32 Su aney en te kinelimbaha te dunya ne warà pà nerineg tew ne etew ne ebpekeulì te etew ne nekeraan kandin se kegkepisek din. 33 Embiya kenà suhù te Eleteala ini se etew,” ke se neulian ne pisek, “ne warà igaga rin te ebpekevaal te iring kayi.” 34 Migkahi ke menge egkeunutan te, “In-anak ka te mekesesalà, ne meambe ke ebpenunganunga ka ebpenurù kenami?” Arà dà ne impeawà dan en sikandin ne migkehiyan dan te kenà en ebpelusuren dut te baley ne ebpengedian te menge Hudiyanen te penduan dan.

Nepisek ded Dema ke Menge Etew ne Warà pà Mebperetiyaya ki Hisus

35 Guna su nerineg ni Hisus ke imped-ulaula ran dut te etew ne neulian din, ne mibpemengà din. Guna su netuen din ne mid-insaan din te, “Maa, mibperetiyaya ke en be rut te Impeanak te Menusiyà?” 36 Ne midtavak ke meama te, “Kehiya nu kedì ke entei sikandin, Mama, su apey a ebperetiyaya kandin.” 37 “Nekita nu en,” ke si Hisus, “su sikandin en iya ini ke ebpekidlalag keykew.” 38 “Embiya sikuna ves,” ke se meama, “ebperetiyaya a keykew.” Arà dà ne mibpengarap en ki Hisus. 39 Migkahi si Hisus te, “Iyan ku impengkayi te ampew te dunya su edtimbangen ku ke menge etew su apey ke menge etew ne nerusireman te kegkepisek dan ne edtelimà kedì ne ebehayan ku te kerayahan. Ugaid ne ke kenà edtelimà kedì su engkungkun ne nekita ran ke kerayahan ne ebpelekapan ku ke mata ran.” 40 Ruen menge Peresiyu ne nekerineg dut te lalag ni Hisus ne migkahi ran en te, “Engkey se migkahi nu, menge pisek key rema?” 41 Ne midtavak si Hisus te, “Embiya nepisek kew iring dut te etew ne warà pà nevehayi te kerayahan, ne warà perem kegkeisuhat keniyu. Ugaid ne geina te migkahi kew te, ‘Ebpekekita key en,’ ne arà se kegkeisuhat keniyu te kewagib su kenà kew ma eduma.”

John 10

Ke Sempità ni Hisus Mekeatag dut te Tumetuganur te Menge Bilibili

1 Ne ruen insempità ni Hisus te, “Sebenarvenar ini se egkehiyen ku keniyu, embiya ruen etew ne edlusud te tudilan te menge bilibili ugaid ne kenà ebpevayà te humawan su ed-ambak, ne tekawen sikandin etawa tulisan. 2 Ugaid ke etew ne edlusud te humawan, ne sikandin ke tumetuganur dut te bilibili. 3 Embiya edlusud sikandin ne ebpuwasan dut te ebantey ke humawan. Ne ebpekekilala ke bilibili te suwara rin ke ed-umawen din dut te ngaran dan su ibpelihawang dan. 4 Ne embiya ve nekelihawang dan en ne ed-una en ke tumetuganur, ne edtundug en ke menge bilibili su egkekilala ran ke kandin ne suwara. 5 Kenà dan edtundug te selakew ne etew, inemulà se ebpelahuy ran kandin su kenà den ma egkekilala ke kandin ne suwara.” 6 Ini ke insempità ni Hisus kandan, ugaid ne warà dan mesebuti ke meana rin. In-upama si Hisus te sikandin ke Meupiya ne Tumetuganur te Menge Bilibili ne ke menge Bilibili se menge Etew ne Mibperetiyaya Kandin 7 Ne migkahi maa si Hisus kandan te, “Sebenarvenar ini se egkehiyen ku keniyu: ne iyan a ke gumawan te tudilan ne ibpevayà dut te menge bilibili. 8 Langun ne mid-una kedì su ebpenurù ne egkahi te midsuhù te Eleteala ne iring dan te menge tekawen wey tulisan. Ugaid ne ke menge bilibili ne timbang te menge etew ne warà dan mebpemineg kandan. 9 Siaken ke humawan, ne misan engkey se edlusud kayi te kedì ne igkepeliyu sikandin. Iring sikandin te bilibili ku ne medlusud wey medluwal se ebpemengà te kegkaan din su egkeventayan ku ma sikandin. 10 Ke tekawen ne iyan din kedlusud dut te tudilan su ebpenakew, ed-imatey wey ederaat. Ugaid,” ke si Hisus, “ne iyan ku kinepengkayi su apey ku igkepeliyu ke menge etew ne ebpeketelimà dan te penaub te Eleteala igenat guntaani abpeg dut te umur ne warà edtamanan din. 11 “Siak ke meupiya ne tumetuganur,” ke si Hisus, “su andam a ne ebpebpatey apey kenà mekeiri ini se menge bilibili ku. 12 Ke etew ne edsukayan dà ne ebantey te bilibili ne kenà tidtu ne tumetuganur, ne warà kegkenuhun din kandan su kenà ma kandin ne bilibili. Ne ed-ewaan din su ebpelahuy ke ruen egkekita rin ne leew ne asu ne ebpekeuma. Ketà be ne warè en ebpekevantey kayi te bilibili, ne igketangag en te leew ne asu ini se bilibili ne ke ruma ne egurunsuwey en. 13 Iyan kebpelahuy rut te edsukayan dà ne ebantey su kenà tidtu ne tumetuganur, ne warà kegkenuhun din ketà te menge bilibili. 14 -15 “Siaken,” ke si Hisus, “ke meupiya ne tumetuganur ne ke menge etew ne iring te menge bilibili ku. Netuenan ku ke Amey ku, ne netuenan a rin dema. Ne iring ded dema kayi te menge bilibili ku ne eduma kedì su egkekilala ku sikandan ne egkekilala a ran dema, ne andam a ne ebpebpatey te selidig kandan. 16 Ruen pà ruma ne menge bilibili ku,” ke si Hisus “ne warà pà kayi te lusud te tudilan. Ed-ewiten ku ve sikandan kayi te tudilan ini ne ebpemineg dan kedì, ne egkevaluy ran ne senge luyuran dà ne seveka rà dema se tumetuganur kandan su siaken dà. 17 “Igkelimù a te Amey ku ne Eleteala su andam a ne ebpebpatey kandan. Iyan ku kebpebpatey su apey ku metelimà ded ketà te kegkevanew ku. 18 Warà a tehela te misan entei en ne etew te ebpebpatey, ugaid ne kedì en ne kiyug. Su ruen gehem ku te edselidig te umur ku, ne ruen gehem ku te ed-awì maa ketà te kegkevanew ku. Su ini ke insuhù kedì te Amey ku ne Eleteala.” 19 Guna su nerineg dut te menge Hudiyanen ini se impenurù ni Hisus ne warà dan meseveka. 20 Merakel kandan se migkahi te, “Midsuukan sikandin te vusew! Ebunehen! Meambe ke ebpemineg kew kandin?” 21 Ugaid ne ruen duma ne migkahi te, “Embiya ma midsuukan te vusew sikandin, ne kenà iring kayi se kebpenurù din! Ne ebmemenu ve se vusew te ebpekekità ke pisek?”

Warà Mebperetiyaya ki Hisus ke Menge Hudiyanen

22 Ne neuma en ke hewii te kevurunan te menge Hudiyanen ne ed-ingaranan te Edtepeney diyà te Nekebpuru ne Valey te Eleteala diyà te inged ne Hirusalim, ne arà ne hewii ne ed-uran-uran. 23 Ne riyà si Hisus ed-ip-ipanew te palàpalà te Nekebpuru ne Valey te Eleteala ne ed-ingeranan te Palàpalà ni Datù Salomon. 24 Ne rutun ne miburun ke menge egkeunutan te Hudiyanen diyà te ki Hisus su mid-insaan dan te, “Keenu key pà nikuna edteremi ke entei ka? Embiya maa sikuna en ke Edetuen ne Impasad te Eleteala, ne ikahi nu en kenami.” 25 Midtavak si Hisus te, “Nekahi ku en keniyu, ugaid ne warà kew ma mebperetiyaya. Ini se mekegeyip ne ulaula ku ne insuhù kedì te Amey ku ne Eleteala ne iyan tuus te sikandin ke midsuhù kedì, 26 ugaid ne warà kew ma mebperetiyaya su warà kew ma mekelusud kayi te tudilan te bilibili ku. 27 Su ke menge etew ku ne timbang te bilibili ku,” ke si Hisus “ne ebpemineg dan kedì su egkekilala ren ma ke suwara ku. Egkekilala ku sikandan ne eduma ran kedì. 28 Ebehayan ku sikandan te umur ne warà edtamanan din wey kenà en ebpatey ke gimukud dan, ne warà senge etew rà ne ebpekeahew kandan dut te edtingkungan te palad ku,” ke si Hisus. 29 “Su iyan mibehey kandan kedì ne ke Amey ku ne Eleteala ne warà repeng se gehem din, ne warà senge etew rà ne ebpekeahew kandan dut te edtingkungan te palad din. 30 Su seveka key rà dut te Amey ku ne Eleteala.” 31 Guna su nerineg te menge Hudiyanen ke lalag ni Hisus ne mibpemurut dan en maa te menge batu su idrumbag dan kandin. 32 Ne migkahi si Hisus te, “Merakel se impekita ku keniyu ne meupiya ne ulaula ku ne insuhù kedì te Amey ku ne Eleteala. Ne endei ve rapit ne ulaula ku ke rait ne idrumbeha niyu kedì te batu?” 33 “Kenà iyan dey idrumbag keykew te batu,” ke se menge Hudiyanen “ne ayan se meupiya ne ulaula nu, ugaid ne ayan se kedsumpalit nu te Eleteala. Su egkahi ka te Eleteala ka, ugaid ne etew ke rà ma!” 34 Ne migkahi si Hisus kandan te, “Ruen impesurat diyà te keniyu ne penduan te migkahi ke Eleteala, ‘Ragid kew kedì ne Eleteala.’ 35 Netuenan tew,” ke si Hisus, “ke impesurat ne Lalag te Eleteala ne benar ne warà kegkesembii rin taman te taman su migkahi rin te imperagid dan te Eleteala ke menge keep-epuan tew ne mibehayan din dut te lalag din. 36 Su siaken, ne mibpemilì a te Amey ku ne Eleteala ne impepengkayi a te ampew te dunya, ne meambe ke egkekahi niyu se edsumpeliten ku ke Eleteala embiya egkehiyen ku te Anak a te Eleteala? 37 Iyan ku ebeelan ne arà se insuhù kedì te Amey ku ne Eleteala, ugaid ne embiya kenà ne kenà a niyu peretiyayaa. 38 Ugaid ne embiya iyan ku ebeelan ne arà se insuhù din kedì, ne misan kenà kew ebperetiyaya te menge lalag ku ne peretiyaya kew kayi te menge baal ku ne mekegeyiip ne ebpuun te gehem din. Su kayi niyu egketueni te seveka key rà, siaken wey ke Amey ku, su kayi sikandin te kedì, ne riyan e rema te kandin.” 39 Nerineg den dà ke lalag ni Hisus ne edsigkemen dan en maa perem, ugaid ne nekelihawang ma sikandin. 40 Ketà be ne mid-awà en si Hisus kayi te inged ne Hirusalim ne mid-apet te wayig ne Hurdan ne mibpendiyà te inged ne mipebunyahan ni Juan dengan, ne ketà mid-ubpà sikandin. 41 Merakel ne menge etew se mibpendiyà te kandin ne ebpeleglelahey ran te, “Warà mekegeyip ne mid-ulaula rengan ni Juan, ugaid ne langun ne migkahi rin mekeatag te ini ne etew ne benar iya.” 42 Ne merakel ne etew se mibperetiyaya kandin.

John 11

Ke Kinepatey ni Lasaru

1 Duen meama ne edaru ne ed-ingaranan ki Lasaru ne riyà ed-ubpà te inged ne Bitanya. Duen deruwa ne etevey rin ne dutun ded dema ed-ubpà ne ed-ingaranan ki Maria wey si Marta. 2 (Si Maria ini ke meritan ne mibùbù te periyemut diyà te paa ni Hisus ne mibpunas din te bulvul din. Ne meeman din arà se ederaru ne si Lasaru.) 3 Mibpesuhuan kayi te deruwa ne etevey ni Lasaru si Hisus ne iyan dan intelaan se, “Mama, ebpekedaru ini se sepekat nu ne igkelimù nu nevenar.” 4 Guna su nerineg ni Hisus ne migkahi te, “Ini se daru ni Lasaru ne kenà pà ini ke ibpatey rin, ugaid ne iyan din kebpekedaru su apey iyan egkereyù ne ke Eleteala wey siak dema ke Anak din ne egkereyù.” 5 Dekelà te hinawa ni Hisus ensi Marta ki Maria wey si Lasaru. 6 Ugaid ne misan iring ketà, ne nerineg din te edaru si Lasaru ne mid-ubpà pà lavew sikandin te nekederuwa ne hewii. 7 Nepupus pè be arà ne migkehiyan din ke edumdumaan din te, “Kuwa kew en su edlived kiyu maa diyà te lusud te inged ne Hudiya.” 8 “Meyterù,” ke se menge edumdumaan din, “warà pà utew meuhet se kedrumbaha ran perem keykew te batu. Ne meambe ke edlived ke en maa?” 9 Ne migkahi si Hisus te sempità din te, “Maa, kenà sepulù wey deruwa ne uras te senge keandew? Ne embiya ed-ipanew ki te meandew ne kenà ki ebpekesiud su ruen ma rayag ne ebpeketayew keyta. 10 Ugaid ne embiya ed-ipanew ki te merukilem ne ebpekesiud ki su merusirem en ma ne kenà ki en ebpekekita.” 11 Iring ketà se nekahi ni Hisus te sempità din ne migkahi en maa te, “Nekelipereng en arà se sepekat tew ne si Lasaru, ugaid ne ebpendiyan a su apey ku mepukew sikandin.” 12 Midtavak ke edumdumaan din te, “Embiya nekelipereng dà sikandin ne meupiya su egkeulian ded sikandin.” 13 Iyan meana te migkahi ni Hisus ne minatey en si Lasaru, ugaid ne kunaan dan ke andang dà ne kedlipereng arà se egkehiyen din. 14 Arà dà ne impayag ni Hisus kandan te, “Minatey en si Lasaru, 15 ugaid ne apey kew mekeperetiyaya ketà te ked-uyaha ku kandin, ne meupiya su warà a ketà te kinepatey rin. Kuwa kew embe su ebpendiyà kiyu te kandin.” 16 Dutun ne senge etew ne edumdumaan din ne ed-ingaranan ki Tomas (ne mid-ingaranan dan dema te Seping) se migkahi riyà te menge ruma rin te, “Eduma kiyu kandin su apey ki ebpekeunung kandin te ebpatey.”

Si Hisus ne Iyan Ebpembanew Wey ke Ebpuunan te Umur ne Warà Edtemanan Din

17 Guna su nekeuma en si Hisus diyà te Bitanya ne nerineg din en te neked-epat en ne hewii se kineleveng ki Lasaru. 18 Ini se inged ne Bitanya ne uvey red te inged ne Hirusalim su menge tetelu buwa ne kilù se elet din. 19 Ne merakel ne Hudiyanen se riyà ebpuun te Hirusalim ne mibpendiyà te engki Marta wey ki Maria su edlenganen dan dut te kinepatey te meeman dan. 20 Guna su nerineg ni Marta se ebpekeuma en si Hisus ne midsinuhung din en, ugaid ne si Maria ne riya ded te valey. 21 Ne migkahi si Marta diyà te ki Hisus te, “Mama, embiya kayi ke rà perem ne kenà ded ebpatey ke meeman ku. 22 Ugaid ne netuenan ku te misan guntaani ke ruen ebuyuen nu te Eleteala ne ibehey rin keykew.” 23 “Egkevanew red arà se meeman nu,” ke si Hisus. 24 “Uya,” ke si Marta, “netuenan ku se egkevanew red sikandin keuremà dut te kebenawa te menge minatey ketà te mewri ne hewii.” 25 Ne migkahi si Hisus te, “Iyan a imbe ke ebpembanhew ne iyan a imbe ebpuunan te umur ne warà edtamanan din. Ke etew ne ebperetiyaya kedì ne misan ebpatey sikandin ne biviyag ded ke gimukud din ne ed-ubpà diyà te Eleteala taman te taman. 26 Su ke etew ne ebperetiyaya kedì,” ke si Hisus, “ne ruen umur din ne warà edtemanan din wey kenà en ebpatey ke himukud din. Menu, Bayi, ebperetiyaya ke en be kayi?” 27 Ne midtavak si Marta te, “Uya, mibperetiyaya a te sikuna ke Impasad te Eleteala ne Ebperetuen, ke Anak din ne impepengkayi rin te ampew te dunya.”

Midsinehew si Hisus Dut te kegkeyru Rin ki Maria wey ki Marta

28 Guna su nekahi arà ni Marta ne mid-ulì en ne midnènaasan din si Maria te, “Keniyan en si Hisus ne in-insà ka rin.” 29 Nerineg dà ni Maria ne mid-itindeg ne migaangaan se edsinuhung ki Hisus. 30 (Warà pà mekeuma si Hisus kayi te inged dan su diyà pà lavew sikandin te nesinehungan ni Marta.) 31 Guna su nekita dut te menge Hudiyanen ne edlangan ki Maria te kayi pà te valey te nekeitindeg su edlihawang ne midtundug dan su iyan dan kunaan ke ebpendiyà te leveng su riyà sikandin edsinehew. 32 Nekeuma rà si Maria riyà te ki Hisus ne mid-uvey rin en ne midlangkeb sikandin se edsinehew. Ke sikandin te, “Mama, embiya kayi ke rà perem ne kenà ded perem ebpatey ke meeman ku.” 33 Guna su nekita ni Hisus se edsinehew si Maria, wey midsinehew dema ke menge Hudiyanen ne miduma kandin, ne mibmeraat ke nanam din te kegkeyru rin. Ne ed-eleg-ehen en sikandin se egkahi te, 34 “Endei niyu ileveng?” Ne midtavak dan te, “Kayi ke en, Mama, su ebayaan tew.” 35 Ketà ne nekesinehew en si Hisus. 36 “Intengi niyu ma,” ke se menge Hudiyanen, “igkelimù nevenar ni Hisus si Lasaru.” 37 Ugaid ne ruen migkahi te, “Maa, kenà ini ke etew ne nekeulì te pisek ne meama? Embiya nekeulì sikandin te pisek, ne meambe ke warà din bawii si Lasaru su apey warà mebpatey?”

Ke Kinevanew ni Hisus ki Lasaru

38 Ne mibmeraat en maa ke nanam ni Hisus te kegkeyru rin ketà te nekeuvey en sikandin dut te leveng. Ini se leveng ne riyà te surung, ne ruen dekelà ne batu ne in-alang dut te humawan. 39 “Iawà niyu ayan se batu!” ke si Hisus. Ne migkahi si Marta ke etevey dut te minatey te, “Mama, memawù en su neked-epat en ne andew ini se kineleveng kandin.” 40 “Migkahi ku en keykew te embiya ebperetiyaya ka ne egkekita nu arà se ebpekereyù te Eleteala,” ke si Hisus. 41 Ketà ne midlilid dan en ke batu ne in-alang ne midlingakà en si Hisus diyà te langit se ebpengeningeni te, “Dekelà se kegkereyù ku keykew, Amey ku, su ebpeminehen nu ini se ebuyuen ku. 42 Netuenan ku te lelayun ka ebpemineg kedì, ugaid ne iyan ku kebpengeningeni guntaani su apey ebpekeperetiyaya ke menge etew ne ini te uvey ku te sikuna ke midsuhù kedì.” 43 Nekeipus sikandin se egkahi ne mid-umew rin te merahing ne suwara te, “E, Lasaru, lihawang ke en.” 44 Arà dà ne migemew en ke minatey su nevanew en. Ne nevukusan te saput ke lawa rin abpeg ke velad din wey ke paa rin, ne misan ke vuked din ne nevukusan dema te saput. “Ewai niyu sikandin te bukus,” ke si Hisus, “su apey ebpekewaleng.”

Mibentaan Ke Menge Mepurù te Terebpelengesa wey Ke Menge Meyterù te Penduan Te Kedsigkem ki Hisus

45 Merakel dut te menge Hudiyanen ne miduma ki Maria se nekekita rut te mid-ulaula ni Hisus ne mibperetiyaya kandin. 46 Ugaid ne ruen duma kandan ne mibpendiyà te menge Peresiyu su ebpenudtul dut te mid-ulaula ni Hisus. 47 Arà dà ne mibpendiyà ke menge mepurù te terebpelengesa wey ke menge Peresiyu su eburun diyà te menge pekilukesen te Hudiyanen. Guna su nevurun dan en ne migkahi ran te, “Engkey se ed-ul-ulaan tew? Su merakel se mekegeyip ne ed-ul-ulaan ni Hisus! 48 Embiya ebpedterayen tew sikandin ne langun ne menge etew ne ebperetiyaya en te sikandin ke Impasad te Eleteala ne Ebperetuen. Ne embiya iring en ketà, ne egkerineg dut te egkeunutan tew ne riyà te Ruma ne ebpeveyaan ki te menge sundaru ran ne edereetan dan ini se Nekebpuru ne Valey te Eleteala wey ini se pehinged tew te menge Hudiyanen.” 49 Ketà ne migkahi ini se senge etew ne mepurù te terebpelengesa ne ed-ingaranan ki Keyipas, su ketà ne hewii ne sikandin ke pinekemepurù te langun ne menge terebpelengesa, ke sikandin te, “Warà menge itungan niyu! 50 Warà niyu ves mesebuti te iyan dà tumù ne senge etew rà se ebpatey tumin dè be ke langun ne menge Hudiyanen su apey kenà mereeti ini se pehinged tew te menge Hudiyanen.” 51 (Migkahi rin ini te kenà kandin dà ne itungan, ugaid ne geina te sikandin ke pinekemepurù dut te langun ne menge terebpelengesa te arà ne hewii ne nekekahi sikandin neraan te si Hisus se ebpatey ne idselidig te langun ne menge Hudiyanen. 52 Ne kenà ke menge Hudiyanen dà se egkeselidigan te kebpatey rin, ugaid ne apey langun ne nevaluy ne anak te Eleteala ne egkevurun te egkeseveka misan endei ne menge inged.) 53 Ne igenat dè be ketà ne andew ne mibpemengà en te menge egkeunutan te Hudiyanen te ralan te ked-imatey ran ki Hisus. 54 Tembù be warà en mebpekitakita si Hisus dut te merakel ne etew ketà te inged ne Hudiya, ugaid ne mibpendiyà sikandin te inged ne ed-ingaranan te Ipraim uvey te tanà ne kenà egkeubpaan te etew. Ne ketà sikandin med-ubpà wey ke edumdumaan din. 55 Ne ebpelundani en ke kevurunan te menge Hudiyanen ne ed-ingaranan te Pista te Kedsehari te Suluhuen. Ne merakel en ne menge etew ne ebpuun te ebalàbalà ne menge inged se ebpenekereg dan diyà te Hirusalim su edtumanen dan ke betasan te menge Hudiyanen mekeatag te kebpenlùlù su apey ran ebpekeamung dut te kevurunan. 56 Mibpemengà dan si Hisus ne gewii ran te egkevurun diyà te Nekebpuru ne Valey te Eleteala ne mibpein-inseey ran te, “Engkey se antap niyu, ebpengkayi red buwa si Hisus etawa kenà?” 57 Ruen insuhù te menge mepurù te terebpelengesa wey ke menge Peresiyu te piya engkey se egketau ke endei si Hisus ne igkahi kandan su apey ran igkepesigkem.

John 12

Mibperiyemutan en Neraan ke Lawa ni Hisus te Kedleveng Kandin

1 Enem pà ne hewii ne egkeuma ke kevurunan ne ed-ingaranan te Pista te Kedsehari te Suluhuen ne mibpendiyà si Hisus te inged ne Bitanya, ke inged ni Lasaru ke mibanew rin. 2 Ketà te valey ni Lasaru ne mibair dan te kevurunan su igalewhalew ran ki Hisus. Si Marta se ebpenendad ne elin ketà si Lasaru wey si Hisus se ebpengaan. 3 Ne migkuwa ni Maria ini se dekelà ne pelenaan te periyemut ne mepurù nevenar su mibeelan dut te ed-ingaranan te Nardu. Ne mid-uvey rin si Hisus ne imbùbù din diyà te paa rin, ne mibpunasan din te bulvul din. Ne nekeeneb kayi te lusud te baley te keemut din. 4 Ne seveka rut te edumdumaan ni Hisus, si Hudas Iskeriyuti ke ed-ulug kandin, se midlalag ki Hisus te, 5 “Babeba!” ke sikandin. “Nerèdeetan ini su pira buwa nehatus se elehà din? Iyan tumù ne indehang ini se periyemut ne ke elehà din ne igkepemehey riyà te menge etew ne ayuayu.” 6 Kenà iyan din kinekahi te iring ketà ne ke kegkeyru rin dut te menge ayuayu, ugaid ne tekawen sikandin. Su sikandin ke ebpetugenuren dut te edtehuan te kureta en ni Hisus, ugaid ne ebpengpenguan din mulà. 7 Ugaid ne migkahi si Hisus te, “Pedteraya niyu sikandin! Ne ibpetahù ded kandin ke samà ne periyemut su apey ruen idsapu rin te lawa ku ketà te idleveng ad. 8 Su ke menge ayuayu ne lelayun kew red ebpemekeduma ne egketevangan niyu sikandan, ugaid ne siak ne kenà ad meuhet kayi te keniyu.” 9 Nerineg dut te merakel ne menge Hudiyanen te riyà si Hisus te inged ne Bitanya ne mibpemendiyà dan. Ne kenà iyan dan dà kinependiyà ne mekeatag ki Hisus, ugaid ne iyan dan dema ed-intengan ne si Lasaru ke mibanew rin. 10 Ne iyan netahù te itungan te menge unuten te terebpelengesa ne ebpeimetayan dema si Lasaru. 11 Su atag te kinekevanew kandin ne merakel ne Hudiyanen se midsuwey en dut te ibpenurù dan su kayi ran en mibperetiyaya ki Hisus.

Ke Kinelusud ni Hisus Diyà te Hirusalim ne Mid-untud te Nati te Kudà su tuus ini te Datù Sikandin Dut te Menge Hudiyanen

12 Guna su nepawè en ne nerineg dut te merakel ne menge etew ne edtelavuk te kevurunan te Hirusalim se ebpekeuma kun si Hisus. 13 Ne mibpenguwa ran te dawun te menge niyug ne midsinuhung dan si Hisus se egkerag te, “Edeyuen tew ke Eleteala! Ne menu ma ke ebpeneuven te Eleteala ini se ebpekeuma, su midsuhù din te ralan te ketengdanan din. Menu ebpeneuven te Eleteala ini se nepemilì ne Ebperetuen te menge kevuwaran ni Israyil!” 14 Ne migkuwa ni Hisus se nati ne kudà ne mid-untud sikandin iring dut te impesurat ne Lalag te Eleteala ne egkahi te, 15 “Sikiyu ne mehinged te Hirusalim, kenà kew meandek! Su ebpekeuma en ini ke ratù niyu ne ed-untud te nati te kudà.” 16 Ketà ne hewii ne warà mesebuti ini rut te edumdumaan din. Ugaid ne guna su nevanew en si Hisus wey nevantun en diyà te langit, ne netenuran dan arà se kedlusud ni Hisus diyà te Hirusalim ne netuman ke impesurat ne Lalag te Eleteala rengan. 17 Ini se menge etew ne nekekita ki Hisus te ked-umawa rin wey kebenawa rin ki Lasaru ne mibpemenudtul. 18 Tembù be mibpenelavuk ke merakel ne etew ki Hisus su nerineg dan ini se ulaula rin ne mekegeyip. 19 Guna su nekita rut te menge Peresiyu ke denda ne etew ne edtelavuk ki Hisus ne mibpeleglelahey ran te, “Tengteng kew be, warà en bes egkegaga tew! Su ke denda ne etew ne eduma en kandin!”

Ke Migkahi ni Hisus Mekeatag te Kemetayen Din

20 Ne ruen menge Gerisihanun ne mibpekiduma te menge Hudiyanen te ebpendiyà te Hirusalim su edtelavuk dan dema te pista ne ebpengarap dan te Eleteala. 21 Mibpendiyà dan te ki Felipe, senge etew ne ruma ni Hisus ne riyà ebpuun te inged ne Bitsaida lusud te inged ne Geliliya, ke sikandan te, “Egkesuat key ne ebpekibalak ki Hisus.” 22 Ne intarem ini ni Felipe riyà te ki Andres. Ne rutun ne mibperumeey ran en se ebpendiyà te ki Hisus ne mibpenudtul dan kandin. 23 Migkahi si Hisus te, “Neuma en ke hewii te ebpekeulì ke Impeanak te Menusiyà diyà te Amey rin su ebeheyan rut te kandin ne bentuhan. 24 Sebenarvenar ini se egkehiyen ku keniyu: embiya kenà ibpemula ini se senge lahas ne venì diyà te tanà ne kenà egkeumanan su senge lahas dè ma. Ugaid ne embiya ibpemula en, ne edtuvù ne ebehas te merakel. Iring ded dema ketà te siak,” ke si Hisus, “su embiya igkeleveng ad ne merakel se egkevehayan te umur ne warà edtemanan din. 25 Embiya ruen etew ne iyan din ebpekinuhunan se umur din ne kayi te ampew te dunya, ne nasì ne egkewarà kandin. Ugaid ne ke etew ne edtuman te kiyug ku su warà kebpekinuhun din te umur din kayi te ampew te dunya, ne ebpeketelimà te umur ne warà edtemanan din. 26 Su ke etew ne egkiyug ne eduma te penurù ku,” ke si Hisus, “ne iyan din ibpeuna te hinawa rin te ked-iniyug din te kandin ne kiyug su apey mekeruma kedì, ne piya endei a ne ketà dema ke edsugsuhuen ku. Ne ke etew ne edtuman te penurù ku, ne egkereyù te Amey ku ne Eleteala.” 27 Ne migkahi pà maa si Hisus dut te edumdumaan din te, “Egkevehatan nevenar se hinawa ku guntaani. Engkey vuwa se egkehiyen ku te kebpengeningeni ku ki Amà? Maa, iyan ku ebuyuen kandin te kenà a meked-ulaula te ini se merasey ne ebpekeuma? Kenà! Su iyan ku impengkayi te ampew te dunya ne ed-etuvangen ku iya ini se merasey.” 28 Ne ketà ne migkahi en sikandin dut te amey rin te, “Amà, ipekita nu ke bentuhan nu kayi te menge etew!” Ne ruen en suwara ne riyà ebpuun te langit ne migkahi te, “Impekita ku en ke kegkevantug ku ketà te mid-ulaula nu, ne ibpekita ku pà maa ini se kegkevantug ku kayi te ed-ul-ulaan nu.” 29 Ne ketà ne merakel se menge etew ne nekerineg te suwara ne ruen migkahi te, “Miduruhung!” Ne ruen ruma ne migkahi te, “Suluhuen te Eleteala ne mibpekidlalag ki Hisus.” 30 Ne migkahi si Hisus te, “Kenà iyan kinekahi te Eleteala ne ruen ibpayag din kedì, ugaid ne apey niyu egketueni te ebpeminehen a rin. 31 Ini en ke hewii te kegkukum te Eleteala te langun ne menusiyà kayi te ampew te dunya ne kunterà din. Egketalew en si Setanas ke datù te pekaid ne midatù kayi te ampew te dunya. 32 Ne siak, embiya idtunggul ad diyà te pinebelavag ne kayu ne ebpuyuken ku ke langun ne menge etew te ebpengkayi te kedì.” 33 (Ini se migkahi ni Hisus ne impayag din ke ralan te ked-imetayi kandin.) 34 Migkahi ke merakel ne etew te, “Iyan tew nesebutan kayi te impesurat ne Lalag te Eleteala ne kenà ebpatey ke Impasad te Eleteala ne Ebperetuen din. Ne meambe maa ke migkahi ka te sikuna ke Impeanak te Menusiyà ne idtunggul ka riyà te pinebelavag ne kayu? Embiya iring ketà, ne engkey ma ini se Impeanak te Menusiyà?” 35 Ne midtavak ni Hisus te sempità ne, “Ke sulù ne ebpekerayag te itungan niyu ne kayi en te keniyu, ugaid ne kenà en meuhet ne ed-awà. Ne taman te kayi pà te keniyu ke sulù ne rumai niyu su apey kew kenà meuma te merusirem, su ke etew ne ed-ipanew diyà te merusirem ne kenà ebpeketuntul te ibayà din. 36 Taman te kayi pà te keniyu ke sulù, ne serihi niyu su apey kew ebpekehemew te kerayahan.”

Ke Menge Etew ne Kenà Ebperetiyaya

Neipus ni Hisus se kinelalag din ketà ne mid-awà en ne mid-eles kandan. 37 Misan merakel en ne mekegeyip ne mid-ulaula rin ne nekita ran ne warà dan mebperetiyaya kandin, 38 su apey egketuman en ke migkahi ni Isayas ke ebpelambas te lalag te Eleteala rengan ne egkahi te, “Eleteala, warà utew mibperetiyaya te impesabut dey! Warà utew midsabut rut te gehem ne impekita nu kandan!” 39 Ne ruen dema ingkahi ni Isayas mekeatag te kenà dan kebpekeperetiyaya, ke sikandin te, 40 “Mibpelekapan dan te Eleteala su apey kenà dan ebpekekita. Ne mibpekeresen ke itungan dan su apey ran kenà ebpekesabut. Ne iyan pè be se ked-uvey ran kedì te ebperetiyaya su apey ku igkepeliyu sikandan!” 41 Migkahi ini ni Isayas su netuenan din dengan ke rekelà ne gehem ni Hisus ke Ibpeanak te Menusiyà ne ini se edlalag din mekeatag kandin. 42 Misan iring ketà se lalag ni Isayas ne ruen ded lavew merakel ne menge egkeunutan te Hudiyanen ne mibperetiyaya ki Hisus. Ugaid ne warà dan mebpepayag su neandek dan dut te menge Peresiyu ke ibpeawà dan na kenà dan ebpekelusud dut te baley ne ebpengedian te menge Hudiyanen te penduan dan. 43 Su iyan dan pinedlabi ke kedeyù kandan te menge etew, tumin dè be ke kedeyù te Eleteala kandan. 44 Ne impekerahing ni Hisus se kegkahi rin te, “Entei se mibperetiyaya kedì, ne kenà siaken dà se ebperetiyayaen din su elin ded dema ke midsuhù kedì. 45 Ne entei se nekekita kediey ne nekekita red dema sikandin dut te Amey ku ne Eleteala ne midsuhù kedì. 46 Mibpengkayi a ne kerayag kayi te ampew te dunya su apey ku egkereyahi ke itungan dut te menge etew su apey ke langun ne ebperetiyaya kedì ne kenè en egkerusireman ke itungan dan. 47 “Piya entei ne nekerineg te menge lalag ku ugaid ne kenà din edtumanen,” ke si Hisus, “ne kenà siaken se ed-isuhat kandin te kerusaan. Su kenà iyan ku impengkayi ne ed-isuhat te kerusaan kandan, ugaid ne apey ran ebpekepeliyu dut te kerusaan dan. 48 Ugaid ne ruen ed-isuhat te kerusaan dut te menge etew ne mid-engkenà kedì wey warà medtelimà te menge lalag ku. Su ini se menge lalag ku ne warà dan telimaa ne ini red se ed-isuhat te kerusaan kandin ketà te mewri ne hewii. 49 Uya, su ini se menge lalag ku ne kenà kayi ebpuun te kediey rà,” ke si Hisus, “ugaid ne insuhù kedì te ibpelalag dut te Amey ku ne Eleteala ne iyan midsuhù kedì. 50 Su netuenan ku te ini se insuhù din kedì te ibpelalag ne ini en iya ke ebpekevehey te umur ne warà edtemanan din. Ketà ne iyan ku rà egkehiyen ne engkey se ibpelalag din kedì.”

John 13

Midlùluan ni Hisus Ke Menge Paa dut te Menge Edumdumaan Din

1 Senge hewii pà ne egketuman ke kevurunan te menge Hudiyanen ne ed-ingaranan te Pista te Kedsehari te Suluhuen. Netuenan ni Hisus se neuma en ke hewii ne ked-awà din kayi te ampew te dunya su ed-ulì en diyà te Amey rin ne Eleteala. Dekdekelà ke limù din dut te langun ne menge etew kayi te ampew te dunya ne midtelimà kandin, ugaid ne guntaani ne impekita rin kandan ke rimahas te limù din kandan. 2 Guna su meapun en ne edlavung pà ensi Hisus wey ke edumdumaan din, ne neketahù en si Setanas ke datù te pekaid diyà te itungan ni Hudas ke anak ni Simon Iskeriyuti te ed-ulug ki Hisus. 3 Ugaid ne netuenan ni Hisus te imbehey en kandin dut te Amey rin ke kebayàbayà te langun taman. Netuenan din dema se riyà ebpuun sikandin te Eleteala, ne riyà ded lavew ed-ulì. 4 Ne mid-itindeg si Hisus ketà te egkeenan dan ne midluung din ke kumbalà din ne impipinding din ke tuwalya. 5 Neipus din arà ne migkuwa rin se pelenggana ne mibusbusan din te wayig, ne mibpenlùluan din ke menge paa te edumdumaan din ne mibpemunasan din dut te tuwalya rin. 6 Mid-uvey sikandin ki Simon ne mid-ingaranan ki Pedro, ne migkahi en si Pedro te, “Sikuna se Kerenan dey, na engkey sikuna ves maa se edlùlù te paa ku?” 7 Ne midtavak si Hisus te, “Ini se ed-ul-ulaan ku guntaani ne kenà nu pà iya egkesebutan, ugaid ne iseg-iseg ne egkesebutan nu red.” 8 Ke si Pedro te, “Kenà egkepakey ne iyan ka ebpenlùlù te paa ku!” Ne migkahi si Hisus te, “Embiya kenà ku edlùluan ke paa nu, ne kenà ke en ruma dut te edumdumaan ku.” 9 Ne nekekahi si Pedro te, “Embiya ves iring ketà, ne kenà iyan nu rà lùlui ini se paa ku su misan ini se velad ku wey ulu ku rema.” 10 Migkahi si Hisus te, “Ke etew ne nekepemihù en ne metilak en, ne iyan dà edlùluan ke menge paa rin su ruen lipupuk din. Iring ded dema te sikiyu su langun niyu ne netilak en ke itungan niyu liyu ketà te senge etew keniyu.” 11 (Su netuenan din en ke engkey arà se ed-ulug kandin tembù be migkahi sikandin te, “Langun niyu ne metilak en liyu ketà te senge etew.”) 12 Guna su nekeipus si Hisus te edlùlù te paa ran ne inseluub din en maa ke kumbalà din ne midlived sikandin ketà te ebpinuuwan din te egkaan. Ne mid-insaan din ke edumdumaan din te, “Maa, nesebutan niyu ve ini se mid-ulaula ku keniyu? 13 Iyan niyu id-umew kedì ne ke Meyterù niyu wey ke Kerenan niyu, ne benar ma iya arà. 14 Su embiya siaken ke Kerenan niyu wey ke Meyterù niyu se mibpenlùlù te paa niyu ne dait ne pelùlùluey kew rema te menge paa niyu. 15 Su ini se impekita ku keniyu,” ke si Hisus, “ne ledawan keniyu su apey niyu egkeiringi riyà dut te menge ruma niyu. 16 “Sebenarvenar ini se egkehiyen ku, warà uripen ne iyan en mepurù dut te ebpengunguripen kandin. Iring ded dema dut te edsugsuhuen, kenà iyan mepurù sikandin dut te edsuhùsuhù kandin. 17 Embiya egkesebutan niyu en ini se penurù ku keniyu, ne igkehalew niyu nevenar ke egkerumaan niyu! 18 “Kenà langun niyu se egkesuhat kayi te edlelehan ku,” ke si Hisus, “su netuenan ku ke engkey se netahù te hinawa te uman seveka keniyu ne mibpemilì ku, ne netuenan ku ke engkey se ebpulid kedì te menge kunterà ku. Ugaid ne ruen impesurat ne Lalag te Eleteala rengan ne egketuman en ne egkahi te, Ke etew ne mibpekidtuhen kedì ne iyan ded nevaluy ne kunterà ku. 19 “Tembù be ebpeketuenan ku ini keniyu te warà pà med-ulaula su apey ketà te hewii te kegkeuma rin ne ebpekeperetiyaya kew te siaken iya ke intarem ku keniyu ne impasad te Eleteala. 20 Sebenarvenar ini se egkehiyen ku,” ke si Hisus, “misan entei ne etew se edtelimà dut te edsuhuen ku, ne siaken se midtelimà din dema. Ne ke etew ne edtelimà kediey ne midtelimà din dema ke Amey ku ne midsuhù kediey.”

Migkahi ki Hisus Neraan te Ruen Ed-ulug Kandin te Ked-imetayi

21 Nekeipus si Hisus se edlalag ne mibmerungkug nevenar sikandin ne impayag din dut te menge edumdumaan din te, “Sebenarvenar ini se egkehiyen ku keniyu te ruen senge etew kayi te keniyu ne ed-ulug kediey su apey a meimetayi.” 22 Nerineg dut te menge edumdumaan din ne nekedsirà dan su warà dan metueni ke engkey ini se ibpesabut din. 23 Ne ruen durug ni Hisus te ebpinuu ne seveka rut te edumdumaan din ne igkelimù din nevenar. 24 Arà be ke mid-uyewan ni Simun Pedro te, “Insai nu si Hisus ke entei ini se egkehiyen din.” 25 Ne midsandig sikandin ki Hisus ne mid-insaen din en te, “Entei ma se ed-ulug keykew, Kerenan?” 26 Midtavak si Hisus te, “Ideluwit ku ini se pan kayi te savew ne endei ve ketà se ebehayan ku ne arà imbe sikandin.” Arà dà ne indeluwit din en ke pan dut te savew ne imbehey rin en ki Hudas ke anak ni Simon Iskeriyuti. 27 Guna su migkuwa ni Hudas ke pan, ne mid-awuk en kandin si Setanas ke datù te pekaid. Ne migkehiyan en ni Hisus sikandin te, “Ini se ed-ul-ulaan nu ne gègeeni nu en!” 28 Langun dut te edumdumaan ni Hisus ne warà dan mesebuti ke migkahi rin. 29 Ne geina te si Hudas ke ebpetugenuren rut te edtehuan te kureta ran ne ruen edumdumaan din ne nekepegitung te midsuhù ni Hisus sikandin te ebpepemasa te igastu ran te pista etawa ebpevehayen ni Hisus diyà te menge ayuayu. 30 Migkaan ni Hudas ke pan ne midlihawang en, ne merukilem en ketà.

Ke Behu ne Suhù ni Hisus te Kebpelimlimuey

31 Guna su migenat en si Hudas ne migkahi en si Hisus dut te edumdumaan din te, “Mehaan en egkekita ke memenu kerekelà ke gehem dut te Impeanak te Menusiyà. Ne kayi ebpuun te kedtuman din te kiyug te Amey rin ne egkekita red dema ke kerekelà te gehem te Amey rin ne Eleteala. 32 Ne embiya egkekita ke kerekelà ne gehem te Eleteala kayi te kedtuman te Anak din te kiyug din, ne ibpekita rema te Amey rin ke kerekelà te gehem ku, ne ini ne mehaan en egked-ulaula. 33 “Sikiyu se edumdumaan ku,” ke si Hisus, “ne iring te menge anak ku, ne kenè en meuhet ne warà ad kayi te keniyu. Ketà ne ebpemengà kew kedì, ne ini se egkehiyen ku keniyu guntaani ne iring dut te intarem ku rut te menge Hudiyanen te, ‘Kenà kew ebpekependiyà te ebpesineruwan ku.’ 34 “Na, ruen behu ne suhù ne ibpetuman ku keniyu te iyan iya se pelimlimuey kew. Iring dut te kegkelimù ku keniyu ne arà se iringi niyu te kebpelimlimuey niyu. 35 Embiya ebpelimlimuey kew,” ke si Hisus, “ne egkekita te langun ne menge etew te sikiyu ne menge edumdumaan ku.”

Migkahi si Hisus Neraan te Ebparew si Pedro te Teleduma Ran

36 Mid-insà si Simon Pedro ki Hisus te, “Ebpendei ke ma?” Midtavak si Hisus te, “Kenà ke pà ebpekeruma diyà te ebpesineruwan ku, ugaid ne egketaman ne ebpeketelukun ke red.” 37 “Kerenan,” ke si Simon Pedro, “meambe ke kenà a ebpekeruma keykew guntaani? Kenà ku sikew ed-ewaan su ebpekid-unung a kenikew te ebpatey.” 38 Migkahi si Hisus te, “Maa, ebpekid-unung ka kedì te ebpatey? Sebenarvenar ini se egkehiyen ku keykew te kenà pà ed-ukarà ke manuk, ne ketetelu nu en ibparew te kenà a nu egkekilala.”

John 14

Si Hisus se Ralan te Ebpendiyà te Amey Rin

1 Ne migkahi pà maa si Hisus dut te edumdumaan din te, “Kenà kew egkeuru. Sarig kew te Eleteala wey sarig kew red dema kediey. 2 Merakel se egkeubpaan diyà te baley te Amey ku, ne ebpendiyan a su ebpenehana a te egkeubpaan niyu. Su kenà ku egkehiyen ini keniyu embiya kenà benar. 3 Ne embiya ebpekependiyan ad,” ke si Hisus, “ne egkepenehenaan ku en sikiyu te ubpaan niyu, ne edlived a kayi su ebpeneheewiten ku sikiyu su apey misan endei a ne ketà kew red dema. 4 Netuenan niyu en ke ibayà diyà te ebpesineruwan ku.” 5 Migkahi si Tomas te, “Kerenan, warà dey metueni ke endei ka ebpesinaru! Ne memenu ve se kegketueni rey te ralan ketà?” 6 Midtavak si Hisus te, “Siaken ke ralan te Eleteala, siaken ke ebpuunan te benar, ne siaken ded ke ebpuunan te umur ne warà edtemanan din. Warà etew ne ebpekependiyà te Amey ku embiya kenà kayi ebpevayà te kediey. 7 Geina te netuenan a niyu en,” ke si Hisus “ne egketuenan niyu en rema ke Amey ku. Ne egenat guntaani ne egketuenan niyu en sikandin su nekita niyu en.” 8 Migkahi si Felipe te, “Kerenan, ipekita nu kenami ke Amey nu ne Eleteala, ne nesesangan en kenami.” 9 Ne migkahi si Hisus te, “Neuhet en se kebpekiduma ku keniyu ne maa Felipe, warà nu pè bes metueni ke entei a? Su piya entei ne nekekita kediey ne nekita rin en dema ke Amey ku. Ne meambe ke migkahi nu te, ‘Ipekita nu kenami ke Amey nu’? 10 Meambe Felipe, warà ke pè bes mebperetiyaya te ini te kedì ke Amey ku, ne siaken ne riyan a te kandin? Ini se menge lalag ku keniyu ne kenà kayi rà ebpuun te kedì ne itungan su ke Amey ku ne ini med-ubpà te kedì ne kandin ne vaal ini. 11 Peretiyayaa niyu nevenar ini se egkehiyen ku te riyan a te Amey ku, ne ini sikandin te kediey. Ne embiya merehen kew ne ebperetiyaya te egkehiyen ku, ne iyan niyu peretiyayaa ke menge tuus ne impekita ku keniyu. 12 Sebenarvenar ini se egkehiyen ku,” ke si Hisus, “misan entei en ne edsarig kediey ne ebpekevaal iring dut te mibeelan ku. Uya, muna pà se egkeveelan din su geina te ed-ulì ad diyà te Amey ku. 13 Ne misan engkey se ebuyuen niyu diyà te Eleteala kayi sabap dut te kedsarig niyu kediey ne ibehey ku keniyu su apey egkekita ke gehem te Amey ku ebpapevayà dut te ulaula ku ne Anak din. 14 Su misan engkey se ebuyuen niyu sabap dut te kedsarig niyu kediey, ne ibehey ku keniyu.”

Impasad ni Hisus te Ibpepengkayi Rin Ke Kedesenan ne Ebpetuntul te Menusiyà

15 “Embiya egkelimù kew kediey,” ke si Hisus, “ne edtumanen niyu ini se menge suhù ku keniyu. 16 Ne ebuyù a riyà te Amey ku su apey rin igkevehey keniyu ke Edtavang keniyu ne ebpekesambì kedì, ne kenà edsuwey keniyu taman te taman. 17 Sikandin ini ke Kedesenan ne Ebpetuntul te Menusiyà ke ebpesabut keniyu te benar mekeatag te Eleteala,” ke si Hisus. “Kenà ini egketelimà te menge etew kayi te ampew te dunya ne warà medtelimà kedì su kenà dan egkekilala sikandin ne kenà dan ebpekesabut ke entei sikandin. Ugaid ne nesebutan niyu en ke entei sikandin su ebpekiduma sikandin keniyu wey diyà mid-ubpà sikandin te keniyu. 18 “Ne kenà ku sikiyu ed-ewaan,” ke si Hisus, “iring te menge ilu su edliveran ku red sikiyu. 19 Kenà en utew meuhet ne kenà ad egkekita rut te menge etew kayi te ampew te dunya ne warà medtelimà kedì, ugaid ne egkekita e red nikiyu su siaken ne egkeuyag a, ne egkeuyag kew red dema. 20 Ketà te hewii te egkevanew a ne ketà niyu egketueni te siak wey ke Amey ku ne egkeseveka key rà, ne egkesebutan niyu rema te ini kew te kedì ne riyan a dema te keniyu. 21 Misan entei ne etew se edtelimà te menge suhù ku ne edtumanen din,” ke si Hisus, “ne sikandin ke egkelimù kediey. Ne igkelimù dema dut te Amey ku arà se etew ne egkelimù kediey. Ne igkelimù ku rema sikandin, ne ibpayag ku kandin te siaken ke ruma rin.” 22 Migkahi en si Hudas (kenà si Hudas ne anak ni Simon Iskeriyuti) te, “Kerenan, ne meambe ke kayi ke rà ebpepayag te kenami ne kenà ka diyà ebpepayag dut te menge etew ne warà medtelimà keykew?” 23 Midtavak si Hisus te, “Uya, su kenà dan egkelimù kediey su ke etew ne egkelimù kediey ne iyan din edtumanen ke menge suhù ku. Ne igkelimù sikandin dut te Amey ku, ne sikami ki Amà ne riyà key te kandin su ed-ubpà. 24 Ugaid ne ke etew ne kenà egkelimù kediey, ne kenà din dema edtumanen ke menge suhù ku. Ini se lalag ku ne imperineg ku keniyu ne kenà kayi rà ebpuun te itungan ku, ugaid ne riyà ebpuun te Amey ku ke midsuhù kediey. 25 “Nekahi ku en ini keniyu te ini e pà te keniyu,” ke si Hisus. 26 “Ugaid ne misan ed-ewaan ku en sikiyu ne ruen en edsuhuen te Amey ku ne ebpekesambì kediey ne edtavang keniyu. Ini se edtavang keniyu ne ke Kedesenan ne Ebpetuntul te Menusiyà su sikandin se ebpenurù keniyu te langun taman, ne ebpetenuran din dema keniyu ke langun ne migkahi ku. 27 Uya, misan ed-ewaan ku en sikiyu, ne edtahakan ku sikiyu te kebmelintad te hinawa niyu. Ini se kebmelintad te hinawa niyu ne ibehey ku keniyu ne kayi ebpuun te kediey. Ke menge etew kayi te ampew te dunya ne kenà ebpekevehey te kelintad ne iring kayi, ketà be ne kenà kew meuru, ne kenà kew meandek.” 28 “Nerineg niyu en ke migkahi ku te, ‘Ed-ewaan ku sikiyu, ugaid ne edliveran ku red sikiyu,’ ” ke si Hisus. “Embiya benar ne igkelimù a nikiyu ne igkehalew niyu su ed-ulì a riyà te Amey ku su sikandin ke mepurù pà kediey. 29 Idtarem ku en ini keniyu guntaan te warà pà med-ulaula su embiya egked-ulaula en ini ne ebpekeperetiyaya kew red misan warà ad. 30 Kenà en utew meuhet se kebitiyara ku keniyu su ebpekeuma en si Setanas ke datù te pekaid ne egkamal kayi te ampew te dunya,” ke si Hisus. “Ne warà ma bayàbayà din kediey, 31 ugaid su apey metueni te menge etew kayi te ampew te dunya te igkelimù ku ke Amey ku ne tembù be edtumanen ku ke langun ne insuhù kediey te Amey ku. Na, kuwa kiyu en su ed-awà ki en kayi.”

John 15

Impeiring ni Hisus te Sikandin ke Benar ne Lawa te Pinemula wey ke Subpang din ne ke Menge Etew ne Mibperetiyaya Kandin

1 Ne mibpenempità si Hisus dut te edumdumaan din te, “Siaken ke benar ne lawa te pinemula ne iyan be edtuganur dut te pinemula ne ke Amey ku ne Eleteala. 2 Embiya ruen subpang ku ne kenà ebahas, ne id-awà din. Ne langun ne menge subpang ku ne ebpemehas ne ebpenemperan din su apey merapung ke bahas din. 3 Ne iring kew en dut te menge subpang ne mibpenemperan su sabap dut te Lalag te Eleteala ne impemula ku riyà te itungan niyu rut te impenurù ku. 4 Ketà be ne kenà kew ebpitas kediey,” ke si Hisus, “ne kenà a rema ebpitas keniyu. Su ke subpang ne egkepitas dut te lawa te pinemula ne kenà ebpekevahas, ne iring kew rema te subpang su kenà kew ebpekevahas embiya ebpitas kew rut te kebperetiyaya niyu kedì.” 5 Ne migkahi maa si Hisus te, “Siaken ke lawa te pinemula ne sikiyu ve ke menge subpang. Ke subpang ne kenà ebpitas kediey ne diyan a rema te kandin ne ebpemehas te merapung. Ugaid ne embiya ebpitas kew kediey, ne warè egkeveelan niyu. 6 Su ke etew ne ebpitas kediey,” ke si Hisus, “ne igketimbag sikandin iring dut te subpang ne idtimbag su egenguwen. Embiya nehangu en, ne eburunen ne idtimbag diyà te apuy su ebinsulan. 7 Ugaid ne embiya kenà kew ebpitas kediey su intahù niyu te hinawa ke penurù ku,” ke si Hisus, “ne misan engkey se ebuyuen niyu kediey ne ibehey ku keniyu. 8 Su embiya ebpemehas kew te merapung ne egkereyù ke Amey ku ne Eleteala, ne iring ketà se kegketueni te sikiyu ne benar ne edumdumaan ku. 9 “Ini se kegkelimù ku keniyu,” ke si Hisus, “ne iring te kegkelimù dut te Amey ku kediey, ne kenà kew pitas dut te limù ku keniyu. 10 Embiya edtumanen niyu ini se menge suhù ku keniyu ne kenà kew egkepitas kayi te limù ku keniyu, iring ded dema kedì te midtuman ku ke menge suhù te Amey ku kediey ne kenà a rema egkepitas diyà te limù din kediey. 11 Mibpeketuenan ku ini keniyu su apey niyu igkehalew te kebpeneheewita niyu te menge suhù ku iring dut te kegkehalew ku te kebpeneheewit ku te suhù kedì te Amey ku,” ke si Hisus. “Ne ketà ne egkehalew kew nevenar! 12 Ne ini ve ke suhù ku keniyu te pelimlimuey kew iring dut te limù ku keniyu. 13 Embiya ruen etew ne ebpebpatey su limù din dut te ruma rin, ne arà en imbe ke punggus te limù. 14 Ne sikiyu ke menge sepakat ku embiya edtumanen niyu ini se menge suhù ku keniyu. 15 Kenà en be edsugsuhuen ke id-umew ku keniyu su kenà egketuenan dut te edsugsuhuen ke ebeelan dut te edsuhùsuhù kandin. Ugaid ne iyan ku en mulà id-umew keniyu ne menge sepekat ku su langun te nerineg ku riyà te Amey ku ne Eleteala ne impayag ku keniyu. 16 Kenà sikiyu se mibpemilì kediey ugaid ne siaken se mibpemilì keniyu, ne midtendù ku sikiyu te ebpemenudtul dut te Meupiya ne Tudtul su apey kew mekepemehas te ulaula ne ebpekesuhat te hinawa te Eleteala su ebpekeperayun ke keupiya rin. Embiya iring ketà ne misan engkey ne ebuyuen niyu riyà te Amey ku ne Eleteala sabap dut te kebperetiyaya niyu kediey, ne ibehey rin keniyu. 17 Ini ve ke suhù ku keniyu,” ke si Hisus, “te pelimlimuey kew.”

Ke Menge Etew ne Egkunterà ki Hisus

18 “Embiya edèdeetan kew te menge etew kayi te ampew te dunya ne egkunterà te Eleteala,” ke si Hisus, “ne kenà kew meinuinu su tentenuri niyu te siak ke neuna ne ingkeepes dan. 19 Embiya ruma kew ran te egkunterà te Eleteala kayi te ampew te dunya, ne kenà kew ran edèdeetan. Ugaid ne geina te mibpemilì ku sikiyu ne kenà kew en duma nikandan, tembù be egkeepes dan keniyu. 20 Tentenuri niyu iya ke migkahi ku te, ‘Warà uripen ne iyan en mepurù dut te ebpengunguripen kandin,’ ” ke si Hisus. “Ne embiya midrasey a ran, ne iyan kew pè be kenà resaya ran. Embiya midtuman dan ke penurù ku, ne edtuman dan dema dut te penurù niyu. 21 Iyan dan kedresaya keniyu ne sabap dut te kebperetiyaya niyu kediey su warà dan metueni ke Eleteala ne midsuhù kedì. 22 Embiya warà a mebpengkayi te ampew te dunya,” ke si Hisus, “te ebpayag dut te lalag ku kandan, ne warà igkeisuhat kandan te salà. Ugaid ne geina te impayag ku en ini kandan ne warà en liwahì dan. 23 Ketà be ne misan entei se egkeepes kediey, ne igkeepes din rema ke Amey ku ne Eleteala. 24 Duen mid-ulaula ku ne nekita ran ne mekegeyip ne warà meveeli te misan entei ne menusiyà, ne embiya ve perem warà dan ini mekita ne ruen igkeliwahì dan te salà dan,” ke si Hisus. “Ugaid ne nekita ran en ini, ne ingkeepes key ran ki Amà. 25 Ugaid ne iyan ebpuun te kegkeepes dan kedì ne egketuman ke impesurat diyà te penduan dan ne egkahi te, ‘Neepes dan kedì misan warà puunan din.’ ” 26 Ne migkahi pà maa si Hisus te, “Ibpepengkayi ku te keniyu arà se ed-ingeranan te Edtavang ne riyà ebpuun te Amey ku su sikandin ke Kedesenan ne Ebpetuntul te Menusiyà ne ebpesabut keniyu te benar mekeatag te Eleteala. Ne embiya ebpekeuma en sikandin kayi ne ebpesabut sikandin mekeatag kediey. 27 Ne ebpesabut kew rema mekeatag kediey su igenat te rudsuan te kinepenurù ku kayi te ampew te dunya ne telteleduma kiyu en.”

John 16

1 “Langun kayi ne migkahi ku keniyu,” ke si Hisus, “su apey kew kenà edsuwey kedì ketà te hewii ne egked-ulaula ini. 2 Su ke menge etew ne mid-engkenà kedì ne ebpeawà keniyu rut te baley ne ebpengedian te menge Hudiyanen te penduan dan. Uya, su egkeuma ke hewii ne ke etew ne ed-imatey keniyu ne iyan din kunaan ke netuman din ke kiyug te Eleteala. 3 Iring ketà se ed-ul-ulaan dan keniyu su warà dan metueni ke Amey ku ne Eleteala wey warà a ran dema metueni. 4 Ugaid ne egkehiyen ku ve ini keniyu neraan,” ke si Hisus, “su embiya egked-ulaula en ini ne egketenuran niyu te ingkekahi ku en keniyu. Ini ne warà ku kehiya keniyu te aney en,” ke si Hisus, “su geina te ebpemekeduma kiyu pà.”

Ke Helevek Dut te Kedesenan ne Ebpetuntul te Menusiyà

5 “Ugaid ne guntaan te ed-ulì ad diyà te Amey ku ke midsuhù kedì, ne warà senge etew rà keniyu ne mid-insà kediey te, ‘Endei ka ebpesinaru?’ 6 Guntaan te migkehiyan ku sikiyu, ne egkemutuwan kew en. 7 Sebenarbenar ini se egkehiyen ku keniyu,” ke si Hisus, “iyan pà meupiya ne egkeewaan ku sikiyu, su embiya kenà ne kenà ebpengkayi se Edtavang keniyu. Ugaid ne embiya egenat ad ne ibpepengkayi ku sikandin kayi te keniyu. 8 Ne ketà te kebpekeuma rin ne ibpesabut din dut te menge etew kayi te ampew te dunya ke ulaula ne meraat, ne ibpesabut din dema ke ulaula ne metidtu wey ibpesabut din dema mekeatag te kedusa te Eleteala te menge etew ne warà mebperetiyaya kandin. 9 Ibpesabut din kandan te meraat ke ulaula ran su warà dan mebperetiyaya kediey,” ke si Hisus. 10 “Ibpesabut din kandan ke ulaula ne metidtu su ketà te ked-ulì ku diyà te Amey ku ne egketuenan dan se netuman ku en ke langun ne insuhù din kediey, ne id-anew ad nikiyu te mata. 11 Ne ibpesabut din dema ke kedusai kandan te Eleteala su neisuhat en te kukuman si Setanas ke datù te pekaid ke unuten dan te egkunterà te Eleteala.” 12 “Merakel pà perem,” ke si Hisus, “se egkehiyen ku keniyu, ugaid ne kenà niyu pà egketegkad. 13 Ugaid ne ketà te kebpekeuma dut te Kedesenan ne Ebpetuntul te Menusiyà kayi te keniyu, ne sikandin en ke ebpetuntul keniyu te langun ne benar. Ne ini se ibpesabut din ne kenà kayi rà te kandin ne itungan, ugaid ne iyan din ibpesabut ne endei rà ke nerineg din diyà te Amey ku ne Eleteala. Ne ibpesabut din ded lavew keniyu ke egked-ulaula ne ebpelingguma,” ke si Hisus. 14 “Ne ebentuhen a rin su ibpesabut din ke menge lalag ku keniyu wey ke ulaula ku. 15 Langun ne riyà te Amey ku ne kediey red dema, tembù be migkahi ku keniyu ne ibpesabut din keniyu ini se menge lalag ku su ke lalag te Amey ku ne kedì ded dema ne lalag.”

Ke Egkemutu ne Iyan Din Egkeveluyan ne Kehelawan

16 “Kenè en utew meuhet ne id-anew a niyu te mata, ugaid ne iseg-iseg ne egkekita a niyu red,” ke si Hisus. 17 Duen edumdumaan din ne mibpein-inseey te, “Engkey se meana kayi te migkahi rin te, ‘Kenè en utew meuhet ne id-anew a niyu te mata, ne iseg-iseg ne egkekita a niyu red.’ Ne migkahi pà maa sikandin te, ‘Su ed-ulì ad diyà te Amey ku.’ ” 18 Ne mibpein-inseey ran maan te, “Engkey ve vuwa ini se kinekahi rin te ‘kenà utew meuhet’? Kenà tew egkesebutan ayan.” 19 Netuenan ni Hisus te ruen id-insà dan kandin ne migkahi en sikandin te, “Geina ne migkahi a te, ‘Kenè en utew meuhet ne id-anew a niyu te mata, ne iseg-iseg ne egkekita a niyu red.’ Maa, ini ve arà se ibpein-inseey niyu? 20 Sebenarvenar ini se egkehiyen ku, ebpekesinehew kew kayi te egketemanan ku, ugaid ne ke menge etew ne ed-engkenà kediey ne egkehalew ran. Ne misan egkemutu kew, ne iyan din egkeveluyan ne egkehalew kew. 21 Iring ded dema te meritan ne ebpelelesut en te ked-anak din su neuma en ke kegkerasey rin. Ugaid ne embiya nekehemew en ke vatà, ne egkelipatan din en ke mesakit su nehalew sikandin dut te behu pà ne in-anak din. 22 Ne iring kew re be rema ketà su guntaani ne egkemutu kew, ugaid ne ebpekidbalak e red maa keniyu ne egkehalew kew nevenar, ne warà misan entei ne ebpekeawà kayi te kehelawan niyu. 23 “Embiya egkeuma en arà se hewii,” ke si Hisus, “ne warà en kemeyidan te ebuyù kew kediey. Sebenarvenar ini se egkehiyen ku te misan engkey se ebuyuen niyu riyà te Amey ku, embiya sabap dut te kebperetiyaya niyu kediey ne ibehey rin keniyu. 24 Taman guntaani ne warà kew pà mibuyù diyà te kandin sabap dut te kebperetiyaya niyu kediey. Buyù kew en kandin sabap dut te kebperetiyaya niyu kediey, na egketelimà niyu se rekelà ne kehelawan niyu.”

Netalew ni Hisus Ke Datù te Pekaid ne Egkamal Kayi te Ampew te Dunya

25 “Ini se impesabut ku keniyu ne ralan te sempità,” ke si Hisus. “Ugaid ne ruen hewii ne egkeuma ne kenà ad ebpenempità su iyan ku kebpekidlalag keniyu mekeatag te Amey ku ne metidtu rà ne lalag. 26 Embiya egkeuma en arà se hewii ne iyan kew en buyù riyà te Amey ku su sabap te kebperetiyaya niyu kediey, su kenà en siaken se ebuyù keniyu diyà te Amey ku. 27 Su igkelimù kew nevenar te Amey ku ne Eleteala geina te igkelimù a niyu sabap geina te mibperetiyaya kew te riyan a ebpuun te kandin. 28 Uya,” ke si Hisus, “diyan a mebpuun te Amey ku su mibpengkayi a te ampew te dunya, ne guntaani ne ed-ewaan ku en ini se dunya su ed-ulì ad diyà te Amey ku.” 29 Ketà ne migkahi ke edumdumaan ni Hisus te, “Kenà en sempità se lalag nu kenami guntaani su metidtu rà ke lalag nu guntaani. 30 Netuenan dey en te netuenan nu ke langun, su misan ke menge insà ne warà pà ingkeinsà keykew ne netuenan nu. Tembù be mibperetiyaya key en te riyà ka ebpuun te Eleteala.” 31 Ne migkahi si Hisus kandan te, “Maa, mibperetiyaya kew en be guntaani? 32 Mehaan en egkeuma ke hewii ne egurunsuwey kew su ed-ulì kew riyà te ed-ubpaan niyu, ne egkeewaan a niyu en. Ugaid ne misan egkeewaan a niyu en ne kenà ma sebseveka ku rà, su iyan ku ruma ne ke Amey ku ne Eleteala. 33 “Langun kayi ne migkahi ku keniyu,” ke si Hisus, “su apey ebmelintad ke hinawa niyu te kebpekidseveka niyu kediey. Su kayi te ampew te dunya ne edresayen kew te menge etew ne ed-engkenà kediey. Ugaid ne misan iring ketà ne kenà niyu ebpilaya ke hinawa niyu, su netalew ku en ke datù te pekaid ne migkamal kayi te ampew te dunya!”

John 17

Mibpengeningeni si Hisus Mekeatag Dut te Menge Edumdumaan Din

1 Guna su nepasad ni Hisus te egkahi diyà te edumdumaan din, ne midlingakà diyà te langit se ebpengeningeni te, “Amà, ini en ke hewii te kedtumana nu ke kiyug nu. Ipekita nu te menge etew ke raman ne kenà egkeseupama dut te Anak nu apey ku ibpekepekita ke raman nu ne kenà egkeseupama. 2 Su imbehey nu kediey se kebayàbayà dut te langun ne menusiyà apey ke menge etew ne imbehey nu kediey ne egkevehayan te umur ne warà edtemanan din. 3 Su ke ralan te kebpeketelimà te umur ne warà edtemanan din ne arà se kegkesebuti te menge etew te sikew rà iya ke benar ne Eleteala, wey egkesebutan dan dema te siaken si Hisu Kristu ke Anak nu ne midsuhù nu. 4 Su kayi te dunya ne impekita ku en ke kerekelà te gehem nu kayi te ulaula ku, ne ke insuhù nu kediey ne nepasad ku en. 5 Na guntaani, Amà, te ed-ulì ad diyà te etuvangan nu ne iulì nu en kediey ke raman ku ne kenà egkeseupama iring dut te aney en ne raman ku te riyan e pà te keykew te warà pà limbaha ini se dunya. 6 “Ini se menge etew kayi te dunya ne imbehey nu kediey, Amà,” ke si Hisus, “ne impesabut ku en kandan mekeatag te sikew ne Eleteala. Su andang dan ne keykew te warà nu pà imbehey kediey, ne midtuman dan en ke insuhù nu kandan. 7 Ne netuenan dan en uman te ini se langun ne egkeveelan ku ne riyà dà ebpuun te keykew. 8 Su impenudtul ku en kandan ke impesabut nu kediey ne mibperetiyaya ran en ini. Su netuenan dan te riyà a iya ebpuun te keykew, ne mibperetiyaya ran te sikuna ke midsuhù kedì. 9 “Ketà be, Amà, ne ibpengeningeni ku sikandan,” ke si Hisus. “Kenà ku iyan ebuyuen diyà te keykew se tevangi nu ke menge etew ne warà medtelimà kedì, ugaid ne iyan ku ebuyuen ne tevangi nu ke menge etew ne imbehey nu kediey su keykew red ma sikandan. 10 Su langun kayi ne menge etew ne kediey ne keykew red, ne ke langun ne menge etew ne keykew ne kediey red dema. Ne kayi te kandan se puunan te egkereyù a. 11 Ne guntaani ne ed-ulì ad diyà te keykew ne kenà ad ed-ubpà kayi te dunya, ugaid ne ini se menge etew ta ne kayi ran ded te ampew te dunya. Is, Amà ne berekat,” ke si Hisus, “ipata nu sikandan te ralan te kerekelà te gehem te ngaran nu ne imbehey nu kediey su apey meseveka sikandan iring dut te kegkeseveka ta. 12 Su gewii te ini e pà te kandan ne mid-ipat ku sikandan te ralan te kerekelà te gehem te ngaran nu ne imbehey nu kediey. Uya, mid-ipat ku sikandan su warà seveka rà kandan ne neawà liyu rà ketà te senge etew ne iyan dà nekahi neraan ne ed-ulug kediey. Neawà sikandin su apey egketuman ke impesurat ne Lalag nu. 13 “Ne guntaani,” ke si Hisus, “ne ed-ulì ad diyà te keykew, Amà, ugaid ne geina te kayi e pà te ampew te dunya ne ebuyuen ku te menu ma ke egkehalew ran iring dut te dekelà ne kegkehalew ku. 14 Su langun ne menge lalag nu ne impesabut ku en kandan, ugaid ne ingkeepesi ran dut te menge etew kayi te ampew te dunya ne migkunterà keykew su geina te mibpekidsuwey ran dut te menge kunterà nu, iring te siaken ne warà a mebpekid-amur te menge kunterà nu. 15 Kenà ku iyan ebuyuen keykew ne iawà nu ini se menge etew ta kayi te dunya, ugaid ne iyan ku ebuyuen keykew te ipata nu sikandan su apey ran kenà meahew ni Setanas ke datù te pekaid. 16 Su sikandan ne kenà duma rut te menge etew kayi te ampew te dunya ne egkunterà kenikew,” ke si Hisus, “iring kedì te kenà a ruma dut te menge etew ne egkunterà kenikew. 17 Su geina te ke lalag nu ke ebpuunan te langun ne benar, ne kayi puunan ne beluya nu sikandan ne tuney ne sugsuhuen nu su apey idtepeney ran ke hinawa ran diyà te keykew. 18 Su iring te kinesuhù nu kediey kayi te ampew te dunya, ne edsuhuen ku rema sikandan su apey ran ikepesabut ke lalag nu dut te langun ne menusiyà. 19 Su atag dut te limù ku kandan ne idrumakan ku keykew ini se hinawa ku su apey ran dema idrumakan nevenar ke hinawa ran keykew. 20 “Kenà ku iyan dà ebuyuen keykew,” ke si Hisus, “ne ini se menge etew ta guntaani, ugaid ne ke langun ne ebperetiyaya kediey keuremà sabap dut te kebpemesabut dan. 21 Su apey langun te sikandan ne meseveka, Amà, iring te ini ka te kedì wey riyan a rema te keykew. Uya, meseveka ran perem kayi te keyta su apey ebpekeperetiyaya ke menge etew kayi te ampew te dunya te midsuhù a nu. 22 Ne ini se kegkevantug ku ne imbehey nu kedì ne imbehey ku rema diyà te kandan, su apey egkeseveka ke itungan dan iring te kegkeseveka ta. 23 Su riyan a te kandan iring dut te ini ka rema te kediey, apey egkeseveka rà ke itungan dan. Ne ketà ne egketuenan te langun ne menusiyà te midsuhù a nikuna, ne egketuenan dan dema te igkelimù nu sikandan iring dut te limù nu kediey. 24 “Is, Amà, ini se menge etew ne imbehey nu kediey,” ke si Hisus, “ne iyan ku kiyug ne riyà dan te kediey ne ed-ubpaan su apey ran egkekita ke mekegeyip ne raman ku. Su ini se raman ku ne imbehey nu kediey su ingkelimù a nikuna rengan te warà pà limbaha ini se dunya. 25 “Is, Amey ku ne metidtu,” ke si Hisus, “ini se menge etew kayi te ampew te dunya ne egkunterà kenikew, ne warà dan metueni ke entei ka. Ugaid ne netuenan ku sikew wey ini se menge etew ne imbehey nu kedì ne netuenan dan te sikuna ke midsuhù kediey. 26 Impesabut ku en kandan ke entei ka, Amà, ne ini ne ibperayun ku pà te ebpesabut kandan apey ebmeilut ke kebpelimlimuey ran iring dut te limù nu kediey su apey riyan a rema te kandan.”

John 18

Ke Kedsigkem Ki Hisus

1 Guna su nekeipus si Hisus te ebpengeningeni ne mid-awà en sikandin abpeg dut te edumdumaan din, ne mid-apet dan te beuhan ne ed-ingaranan te Kidrun. Su ruen pemulaan dutun ne mibpemulaan te menge kayu ne ketà dan be midseruk. 2 Ne si Hudas, ke ed-ulug ki Hisus te ked-imatey, ne neketuntul ketà su tatap ne egkevurunan eni Hisus dut te edumdumaan din. 3 Ketà ne nekeuma en kayi te pemulaan si Hudas se midumaan te menge sundaru wey ke menge gurudyà rut te Nekebpuru ne Valey te Eleteala se midsuhù dut te menge mepurù te terebpelengesa wey ke menge Peresiyu. Nekeuma ran en se ebpenusulù ne sangkap dan nevenar te metarem. 4 Ugaid ne netuenan ni Hisus ke langun ne egketemanan din ne midsinuhung din en sikandan se egkahi te, “Engkey ma ini se ebpemengaan niyu?” 5 Midtavak dan te, “Si Hisus ne ebpuun te Nesarit.” “Siak ini ke ebpemengaan niyu,” ke si Hisus. Ne elin en dema dut te menge sundaru si Hudas, ke ed-ulug ki Hisus. 6 Guna su nekahi ni Hisus te, “Siaken en iya ini,” ne nekesunud dan ne nengepiley ran. 7 Ne mid-insà maa si Hisus te, “Entei iya ini se ebpemengaan niyu?” Ne midtavak dan maa te, “Si Hisus ne ebpuun te Nesarit.” 8 Migkahi en maa si Hisus te, “Migkahi ku en ura keniyu te siaken en ini iya. Embiya ve siaken ke ebpemengaan niyu, ne kenà niyu rà iamung te edsigkem ini se menge ruma ku.” 9 (Iring ketà se kinekahi rin te kenà ibpeamung te edsigkem ke menge ruma rin su apey ini se nekahi rin dut te kinepengeningeni rin geina ne egketuman te, “Warà seveka rà, Amà, ne egkeawà dut te langun ne menge etew ne imbehey nu kediey.”) 10 Nekita rà ni Simon Pedro se iring ketà ne mid-ulavut din ke sundang din ne midtibas din en ke sugsuhuen dut te pinekebmepurù te terebpelengesa, ne nesamping en ke kewanan ne telinga rin. Ini se edsugsuhuen ne ed-ingaranan ki Malco. 11 Ne midawey ni Hisus si Pedro se egkahi te, “Ilipi nu ayan se sundang nu! Su engkey, iyan nu kunaan ke kenà ku egkegaga te edtigker ke kemeresayan ne imbehey kedì te Amey ku?”

Mibpeneheewit si Hisus Diyà te ki Anas

12 Ketà ne midsigkem dan en si Hisus ne mibakù dan en dut te menge sundaru wey ke unuten dan abpeg dut te menge gurudyà ne Hudiyanen. 13 Ne riyà dan unai te ed-ewit si Hisus te ki Anas, ke enuhang ni Kayipas ke pinekemepurù dut te langun ne terebpelengesa te arà ne rahun. 14 Si Kayipas ke nekekahi rut te menge Hudiyanen te iyan dà tumù se senge etew rà se ebpatey ne ebpekeselidig dut te langun ne menge etew.

Imparew ni Pedro te Teleduma Ran ki Hisus

15 Guna su neewit dan en si Hisus, ne midteltelukun en si Simon Pedro wey senge etew pà ne edumdumaan ni Hisus. Ini se senge etew ne edumdumaan ni Hisus ne andang ne nekilala dut te keunutan te terebpelengesa, ne ketà be ne nekeruma sikandin ki Hisus te edlusud diyà te lamalama rut te valey te keunutan te terebpelengesa. 16 Ugaid ne si Pedro ne riyà dà te luwal te humawan. Ne ketà ne mibpelilived diyà te gumawan ini se seveka ne edumdumaan ni Hisus ne nekilala rut te egkeunutan te terebpelengesa ne midlelehan din en ke meritan ne ebantey rutun te gumawan te ebpelusuren si Pedro, ne arà dà ne impelusud din en. 17 Ne ketà ne mid-insà ke meritan ne ebantey te humawan ki Pedro te, “Maa, kenà ka senge etew ne edumdumaan keniyan te etew ne midsigkem?” Midtavak si Pedro te, “Kenà, kenà siak!” 18 Ne rutun te lamalama ne mid-uyag dan te apuy te uring ke menge sugsuhuen kayi te valey elin dema ke menge bantey rut te nekebpuru ne valey te Eleteala su ebpenginarang dan su meadsil. Ne arà dà dema ne mid-uvey en si Pedro su ed-inarang dema sikandin.

Mibpenginsaan si Hisus Dut te Pinekemepurù te Menge Terebpelengesa

19 Ne mibpenginsaan ni Anas ke Pinekemepurù te menge Terebpelengesa si Hisus mekeatag dut te edumdumaan din wey ke penurù din. 20 Ne midtavak si Hisus te, “Ini se penurù ku ne warà mekeeles su riyà te merakel ne etew. Su riyan a layun mibpenurù te menge valey ne ebpengedian te Hudiyanen te penduan dan wey riyà dema te Nekebpuru ne Valey te Eleteala su arà ke egkevurunan te langun ne menge Hudiyanen. Warà impenurù ku ne nekeeles. 21 Ne meambe ke iyan a nu ed-insaan? Iyan nu insai,” ke si Hisus, “ke nekerineg kediey su netuenan dan ke migkahi ku kandan.” 22 Guna su nekahi ini ni Hisus ne midtabpì en sikandin te seveka ne gurudyà. Ke se gurudyà te, “Sikuna pè be iya se ebpeketikàtikà ne ebpenumpan te iring keniyan kayi te Pinekemepurù te menge Terebpelengesa!” 23 Migkahi si Hisus kandin te, “Embiya meraatey ini se migkahi ku, ne kehiya nu ke engkey se meraat kayi te etuvangan te merakel. Ugaid ne embiya warà meraat din, ne meambe ke midtabpì a nu?” 24 Neipus ni Anas te ed-insà si Hisus ne impelaus din en diyà te ki Kayipas ke enuhang din ne iyan Pinekemepurù te langun ne menge terebpelengesa. Si Hisus ini ne nevakù pà lavew.

Imparew maa ni Pedro te Teleduma Ran ki Hisus

25 Ne ketà te lamalama te Pinekemepurù te menge Terebpelengesa ne ed-inarang pà lavew si Pedro. Mid-insaan te menge etew sikandin te, “Kenà ka senge etew ne edumdumaan keniyan te etew an?” Ugaid ne mibparew si Pedro, “Kenà, kenà siaken!” 26 Ne ruen ketà seveka ne edsugsuhuen te Pinekemepurù te menge Terebpelengesa ne megeget din arà se nesempingan ni Pedro te telinga rin. Ne migkehiyan din en si Pedro te, “Iring te nekita ku sikuna geina riyà te kedsigkema rey ki Hisus, ne engkey, duma ka nikandin?” 27 Ne mibparew en maa ni Pedro te, “Kenà!” Ne arà dà iya ne mid-ukarà en ke manuk.

Mid-ewit Dan si Hisus Diyà te ki Pilatu ke Gubinedur ne Rumanu

28 Ed-awà ketà te valey ni Kayipas ne mid-ewit dan si Hisus se ebpendiyà te turuhan ni Pilatu ke gubinedur ne Rumanu, ne mesmeselem pà. Ugaid ne ke menge egkeunutan te Hudiyanen ne kenà edlusud ketà te turuhan su apey ran kenà mekesurang dut te edtenuran ne betasan mekeatag te ebpenlùlù. Su embiya edlusud dan te valey te menge etew ne kenà eduma te edtenuran dan ne betasan dan te kedlùlù, ne kenà dan ebpekeamung dut te kevurunan dan te Pista te Kedsehari te Suluhuen. 29 Geina te arà ke betasan dan ne midlihawang si Pilatu su edsinuhung kandan ne ke sikandin te, “Engkey ma se id-isuhat niyu ne kukuman kayi te etew ini?” 30 Midtavak ke menge egkeunutan te, “Embiya warà salà din ini ne kenà dey ebpeneheewiten kayi te keykew.” 31 Ne migkahi si Pilatu kandan te, “Kua niyu sikandin ne iyan kew en kukum kandin su ruen ma penduan niyu ne egkerumaan.” Ne migkahi ke menge egkeunutan te, “Geina te sikami ne Hudiyanen ne egkekemalan dut te sikiyu ne menge Rumanu ne warà ketau rey te kebpeimatey kandin.” 32 (Ned-ulaula ini su apey metuman ke nekahi ni Hisus se idlansang sikandin diyà te pinebelavag ne kayu te kebpeimetayi kandin.) 33 Ne midsurì medlusud si Pilatu diyà te turuhan ne mid-umew rin si Hisus ne mid-insaan te, “Maa, datù ke ves ini te menge Hudiyanen?” 34 Midtavak si Hisus te, “Maa, keykew rà ayan ne itungan se in-insà nu kedì te ratù a etawa riyà nu merineg ini te ruma ne etew?” 35 Migkahi si Pilatu te, “Meambe, Hudiyanen a? Su keykew red ne menge ruma ne Hudiyanen wey ke menge mepurù te terebpelengesa ke mibpeneheewit keykew kayi te kedì. Ne engkey se mid-ulaula nu?” 36 Midtavak si Hisus te, “Ini se kedì ne edetuan ne kenà kayi te ampew te dunya, su embiya ma kayi ne mibpekibunù en ke menge sakup ku apey kenà a mesigkem te menge Hudiyanen. Ugaid ne ini se edetuan ku ne kenà kayi te ampew te dunya.” 37 Ketà ne migkahi si Pilatu te, “Engkey, ratù ke ves?” Midtavak si Hisus te, “Benar ayan se nekahi nu ne ratù a! Su iyan ku kinepengkayi te ampew te dunya ne impeanak te menusiyà su ebpesabut a rut te benar. Ne misan entei en ne etew se edtampil dut te benar, ne ebpemineg kediey.” 38 Arà dà ne mid-insà si Pilatu te, “Engkey se meana te benar?” Nekahi rin dà arà ne midlihawang en maa si Pilatu riyà te menge Hudiyanen ne migkahi te, “Warà egketuen ku ne id-isuhat ku kandin. 39 Ugaid ne kayi te keniyu ne ruen betasan niyu te embiya egkeuma en ke Pista te Kedsehari te Suluhuen ne ibpelihawang ku se senge etew ne bilanggù ne ebuyuen niyu. Maa, egkesuatan niyu ve ne ibpelihawang ku ini se ratù niyu te menge Hudiyanen?” 40 Nerineg den dà arà ne mibpemensag dan te, “Kenà, kenà sikandin! Iyan tumù ne si Barabas!” (Si Barabas ini ne tulisan.)

John 19

Migkukum Dan te Ed-imetayan si Hisus

1 Nerineg dà arà ni Pilatu ne midlusud en maa sikandin te turuhan din ne migkuwa rin en si Hisus ne imperuug din en. 2 Guna su neipus dan te edruug sikandin ne ruen impetengkulu kandin ne mibeelan te menge sundaru ne ruhiyen ne wahed, ne pinelelembung dan te merihà su uvag kun datù. 3 Ne mid-uvey ran sikandin te kedsumpelita ran te, “Mebereumur ka, ne ratù te menge Hudiyanen!” Ne arà pà ne midtabpì dan sikandin. 4 Ne midlihawang en manen si Pilatu riyà te menge etew ne migkahi te, “Ibpelihawang ku en maa sikandin kayi te keniyu su apey niyu metueni te warà iya netuen ku ne kewagib ne idselaa kandin.” 5 Ne ketà ne midlihawang en si Hisus se impetengkulu te ruhiyen wey midlelembung te merihà. Ke si Pilatu te, “Tengtengi niyu en be sikandin su ini en!” 6 Guna su nekita rut te menge mepurù te terebpelengesa wey ke menge gurudyà si Hisus ne mibpemensag dan en te, “Idlansang sikandin diyà te ebpebelevahan ne kayu!” Ne migkahi si Pilatu te, “Iyan kew en lansang kandin diyà te pinebelavag ne kayu, su warà egketuen ku ne arus ne ibpatey rin.” 7 Ne migkahi ke menge Hudiyanen te, “Kayi te penduan dey ne iyan iya se ebpeimetayan ini se etew su edsumpalit sikandin su egkahi te Anak te Eleteala.” 8 Guna su nerineg ni Pilatu ini ne mid-iseg se kegkeandek din. 9 Midlusud maa si Pilatu riyà te turuhan din ne med-insà maa si Hisus te, “Endei ke ma ebpuun?” Ugaid ne warà medtavak si Hisus. 10 Ne migkahi en maa si Pilatu te, “Meambe ke kenà ka edtavak? Warà nu ves metueni se siaken se ebayàbayà te kebpeliyu keykew etawa kebpelansang ku keykew riyà te kayu!” 11 Ne midtavak si Hisus te, “Warà bayàbayà nu kediey embiya kenà Eleteala se mibehey keykew. Tembù ke etew ne mibpeewit kediey kayi te keykew ne muna pà ke salà din dut te keykew.” 12 Guna maa su nerineg ni Pilatu arà ne neilut nevenar ke hinawa rin te kebpemengà din te ralan te kebpeliyu din ki Hisus. Ugaid ne mibpemensag maa ke menge Hudiyanen te, “Embiya iyan nu ibpeliyu ini se etew, ne egkunterà ka dut te ratù tew riyà te Ruma ne si Cesar. Su iring kayi ne etew se edatùdatù ne egkunterà ki Cesar.” 13 Nerineg dà ini ni Pilatu ne mibpeneheewit din en si Hisus te edlihawang ne mibpinuu sikandin te ebpinuuwan din te egkukum diyà te mid-ingeranan te Saag ne Simintu. (Ne kayi te kinehiyan te Hibruhanen ne “Gebata.”) 14 Ne ketà ne ed-ikeremaen dà ke Pista te Kedsehari te Suluhuen ne malù en egkeudtu ke andew. Ne migkahi si Pilatu dut te menge Hudiyanen te, “Ini en ke datù niyu!” 15 Ne mibpemensag ke menge Hudiyanen te, “Id-awà su ed-imetayan! Ibpelansang nu sikandin diyà te kayu!” Migkahi si Pilatu te, “Maa, ibpelansang ku ve ini se ratù niyu riyà te pinebelavag ne kayu?” Ne mibpemensag ke menge mepurù te terebpelengesa te, “Seveka rà se ratù dey ne si Cesar dà.” 16 Arà dà ne imbehey en kandan ni Pilatu si Hisus diyà te kandan te ibpelansang sikandin diyà te kayu.

Inlansang si Hisus Diyà te Pinebelavag ne Kayu

Ketà ne mid-ewit dan en si Hisus. 17 Ne midlihawang en si Hisus se edtiang dut te pinebelavag ne kayu su ebpendiyà dan en te dapit ne ed-ingaranan te menge “Tulan te Ulu.” (Ne riyà te kinehiyan te Hibruhanen ne ed-ingaranan te “Gulguta.”) 18 Ne rutun dan inlansang si Hisus diyà te pinebelavag ne kayu, ne ruen deruwa ne etew ne inlansang dan dema diyà te kayu te idsenge riveluyà ni Hisus. 19 Ne ruen insurat ni Pilatu ke gubinedur ne impetahù diyà te divavew rut te pinebelavag ne kayu. Ne ini se insurat din ne egkahi te, “Si Hisus ne riyà ebpuun te Nesarit, ke Ratù te menge Hudiyanen.” 20 Merakel ne menge Hudiyanen se nekevasa ketà su ini se midlensangan dan ki Hisus ne uvey red ma te inged ne Hirusalim. Ne ini se insurat ne kinehiyan te Hibruhanen, Latin ke kinehiyan te menge etew te Ruma, wey ke kinehiyan te menge Gerisiyanen. 21 Migkahi ke menge mepurù te terebpelengesa riyà te ki Pilatu te, “Warà nu perem insurat ‘Ke Datù te menge Hudiyanen,’ ugaid ne iyan nu rà perem insurat ne ‘Migkahi rin te Siaken ke Datù te menge Hudiyanen.’ ” 22 Ne migkahi si Pilatu te, “Ke insurat ku en ne arà dà iya!” 23 Guna su neipus te menge sundaru te kedlansang dan ki Hisus diyà te pinebelavag ne kayu ne migkuwa ran ke menge belegkas din ne mibaadbaad dut te epat ne sundaru. Migkuwa ran dema ke inlelembung din ne mid-avel ne warà penai rin. 24 Migkahi ke menge sundaru te, “Kenà tew ini ebpenebtevasen, ugaid ne ebunutbunut ki su apey tew egkekita ke engkey se ebpekegkemuney.” Ini ke mid-ulaula ran su apey egketuman ke impesurat ne Lalag te Eleteala rengan ne egkahi te, “Mibaadbaad dan ke velegkas ku, ne mibunutbunutan dan ke inlelembung ku.” Ne ini iya ke mid-ulaula te menge sundaru. 25 Ne uvey ketà te pinebelavag ne kayu ne mid-it-itindeg ke iney ni Hisus, elin ke ayà din ne suled te iney rin, ne si Maria ke esawa ni Kelupas wey si Maria ne ebpuun te Magdala. 26 Guna su nekita ni Hisus ke iney rin wey ke edumdumaan din ne ibpengelimù din nevenar, ne migkehiyan din ke iney rin te, “Inà, ini ke anak nu.” 27 Ne migkehiyan din dema ke edumdumaan din te, “Ini en ke iney nu.” Ne in-awà dè be ketà ne andew ne diyan en med-ubpà ke iney ni Hisus te edumdumaan din.

Ke Kinepatey ni Hisus

28 Ketà ne netuenan ni Hisus te langun ne insuhù kandin ne nepasad din en ne migkahi en sikandin te, “Ebpekeinum a.” Migkahi rin ini su apey egketuman ke impesurat ne Lalag te Eleteala rengan. 29 Ruen ketà kelalew ne netehuan te tebà. Ne ruen migkuwa ran ne in-ered kayi te tebà, ne intahù dan diyà te reisek ne subpang ne ed-ingaranan te “isupu” ne arà be ke insugkar dan diyà te bèbà ni Hisus. 30 Mid-esep ni Hisus ini se tebà ne migkahi en sikandin te, “Nepasad en ke langun ne insuhù kediey.” Ne midungul dà sikandin ne minatey en. Mibpilak Dan ke Tengkiliran ni Hisus 31 Ne mibpendiyà ke menge Hudiyanen te ki Pilatu su ebuyuen dan te ebpenlepuan dan ke paa rut te menge etew ne impenlansang diyà te kayu su apey ran ebpatey te mehaan ne egkeawà en ke bangkey ran. Ini ke ed-ul-ulaan dan su arà en ke keepunan te Diyemaat ne ebpekesurang dut te penduan dan embiya ruen bangkey riyà te pinebelavag ne kayu dut te hewii te Sepetu ke Hewii te Id-imeley ran. Ne ini ne Sepetu ne edtenuran dan nevenar su egketuman ke Pista ran te Kedsehari te Suluhuen. 32 Migkiyug en si Pilatu ne mibpendiyan ke menge sundaru ne mibpenlepuan dan ke menge paa rut te deruwa ne etew ne inlansang diyà te idsengeriveluyà ni Hisus. 33 Ugaid ne guna su kayi ran en te ki Hisus ne nekita ran se minatey en ne warà dan en penlepui sikandin. 34 Ugaid ne ruen seveka ketà ne sundaru ne mibpilak din ke tengkiliran ni Hisus, ne arà dà ne ruen midtudà ne lengesa ne nekedsawug te wayig. 35 Su siaken ini ke midsurat kayi ne edtitihusan ku te benar ini su nekita ku en iya. Uya, netuenan ku te benar ini, tembù be insurat ku su apey kew ebpekeperetiyaya. 36 Ned-ulaula ini su apey egketuman ke impesurat ne Lalag te Eleteala rengan ne egkahi te, “Warà misan seveka ne tulan din ne egkelepù.” 37 Ne ruen pà ruma ne Lalag ne impesurat te Eleteala ne egkahi te, “Edtengtengan dan ini se etew ne mibpilak dan.”

Ke Kineleveng ki Hisus

38 Nepasad ini ne ruen senge etew ne ed-ingaranan ki Husi riyà ebpuun te Eremetiya se mibpendiyà te ki Pilatu su ebuyuen din ke bangkey ni Hisus. (Si Husi ini ne eduma rema ki Hisus, ugaid ne in-eles din dà su egkeandek sikandin dut te menge egkeunutan te menge Hudiyanen.) Ne migkiyug si Pilatu te egkuan ni Husi ke bangkey ni Hisus, ne arà dà ne mibayaan en ni Husi ke bangkey ni Hisus ne mid-ewit din en. 39 Si Nikudimu, ke etew ne mibpekibalak ki Hisus te senge kerukileman, se miduma kandin. Ne mid-ewit sikandin te menge lelima nepulù ne kilù ne periyemut pined-amut ke deruwa ne susun, mira wey alus. 40 Ne migkuwa ran en ke bangkey ni Hisus ne mibukusan dan te meputì ne saput, ne inragkes dan en ketà ke periyemut su arà ke betasan te menge Hudiyanen te kedleveng. 41 Ne diyà te uvey te midlensangan ki Hisus ne ruen pemulaan te menge kayu. Ne ketà ne ruen leveng ne edlevengan, ugaid ne warà pà melevengi. 42 Ne geina te Diyemaat en arà ne mehaan en egkeuma ke Hewii te Ked-imeley ran wey merani rema ini se edlevengan, ne ketà dan en inleveng si Hisus.

John 20

Ke Kinevanew ni Hisus

1 Guna su mesmeselem te Akad ne mibpendiyà si Maria Megdelina te midlevengan ki Hisus te merusirem pà. Nekeuma ketà sikandin ne nekita rin te neawè en ke vatu ne inlekeb dut te gumawan te leveng. 2 Nekita rin dà ne mibpelelahuy en se ebpendiyà te ki Simon Pedro wey arà se edumdumaan ni Hisus ne igkelimù din utew. Ne migkahi en si Maria kandan te, “In-awà dan en dut te midlevengan ki Hisus ke Kerenan tew, ne warà dey metueni ke endei ran ewita.” 3 Nerineg dà ni Pedro wey arà se ruma rin ne edumdumaan ni Hisus ne mibpendiyan dan en te leveng. 4 Mibpelelahuy ran se deruwa ne etew, ugaid ne neunaan dut te ruma rin si Pedro te kebpekeuma riyà te leveng. 5 Midsiniling din en ne iyan din nekita ke meputì ne saput ne imbukus, ugaid ne warà medlusud sikandin. 6 Ne si Simon Pedro ke neketundug kandin, ne midlusud en mulà, ne nekita rin ke saput ne meputì 7 wey ke saput ne imbukus dut te ulu ni Hisus. Nengelempì en ini, ugaid ne nekedsivey se kinekesavuk din. 8 Ne arà pà ne midlusud ke neuna ne nekeuma ne edumdumaan ni Hisus. Nekita rin dà arà ne mibperetiyaya sikandin te nevanhew si Hisus. 9 (Misan warà dan pà lavew mekesabut dut te impesurat ne Lalag te Eleteala ne egkahi te egkevanew si Hisus.) 10 Ketà dà ne mid-ulì en ke deruwa ne edumdumaan ni Hisus.

Mibpekitakita si Hisus ki Maria Magdalena

11 Ugaid ne si Maria ne diyà te lihewangan te leveng ed-it-itendeg se edsinehew. Gewii rin te edsinehew ne midsiniling din ke leveng, 12 ne rutun te leveng ne nekita rin se deruwa ne suluhuen te Eleteala ne utew mèmeputì se velegkas dan. Diyà dan mibpinuu te nesevukan te bangkey ni Hisus, seveka riyà te egkeulunan din, ne seveka kayi te egkeiwaran din. 13 Mid-insà dan ki Maria te, “Bayi, engkey ma ini se idsinehew nu?” Ke si Maria te, “Migkuwa ran ke bangkey rut te Kerenan tew ne warà ku metueni ke endei ran ewita!” 14 Nekeipus dà te edlalag ne midlilingey ne iyan din nekita si Hisus se ed-it-itindeg, ugaid ne warà din mekilala sikandin. 15 “Bayi,” ke si Hisus, “engkey ma ini se idsinehew nu? Engkey se ebpemengaan nu?” Iyan kunaan ni Maria ke arà se etew ne edtuganur ketà te pemulaan, tembù be migkahi sikandin te, “Mama, embiya iyan ka migkuwa rut te bangkey rin ne kehiya nu kedì ke endei nu ewita sikandin su apey ku egkekuwa.” 16 “Maria,” ke si Hisus. Nerineg din dà arà ne midsinaru en si Maria ne migkehiyan din en te kinehiyan te Hibruhanen te, “Ew, Rebuni!” (Su riyà te kinehiyan te Hibruhanen ne iyan din meana ne “Meyterù.”) 17 Ne migkahi en si Hisus kandin te, “Kenà a nu pà geweri su warà e pà mekeulì diyà te Amey ku. Ugaid ne beyai nu ke menge suled ku ne penudtuli nu ve sikandan te, ‘Ed-ulì a riyà te Amey ku ne ke Amey nu red dema, ke Eleteala ku ne ke Eleteala nu red rema.’ ” 18 Arà dà ne mibayaan en ni Maria Megdelina ne mibpenudtulan din en ke edumdumaan ni Hisus te nekita rin si Hisus ne mibpenudtul din dema kandan ke langun ne lalag ni Hisus.

Mibpekitakita si Hisus dut te Menge Edumdumaan Din

19 Ne ketà te hewii te Akad te merukilem en ne nevurun en ke menge edumdumaan ni Hisus diyà te senge baley, ne mibpemintù dan su egkeandek dan dut te menge egkeunutan te Hudiyanen. Ne netetau ran te kayi en mekeitindeg si Hisus te teliwarà dan. Ke sikandin te, “Na, mebmelilintad ke hinawa niyu!” 20 Nekeipus te edlalag ne impekita rin kandan ke menge velad din ne nepelian dut te lansang, ne impekita rin ded dema ke tengkiliran din ne mibpilak. Ne arà iya ne nengehalewhalew nevenar ke edumdumaan din te kebpekekita ran dut te Kerenan dan. 21 Ne migkahi en maa si Hisus te, “Na, mebmelilintad ke hinawa niyu! Ne iring dut te midsuhù a te Amey ku ne Eleteala,” ke si Hisus, “ne edsuhuen ku rema sikiyu.” 22 Neipus din te egkahi ini ne mibperiyupan din sikandan se egkahi te, “Na, ebpelumunan kew en dut te Kedesenan ne Ebpetuntul te Menusiyà!” 23 “Embiya ebpeseharen niyu ke menge salà te etew ne egkepesehad ini, ugaid ne embiya kenà niyu ebpeseharen ke menge salà din ne kenà dema ini egkepesehad.”

Si Hisus Wey si Tomas

24 Ketà te kinepekitakita ni Hisus dut te menge edumdumaan din ne warà ketà si Tomas (ne mid-ingaranan te Seping). 25 Guna su neuma rut te edumdumaan ni Hisus si Tomas ne mibpenudtulan dan te, “Nekita rey ke Kerenan tew.” Ne migkahi si Tomas te, “Kenà a ebperetiyaya keniyan te nevanew sikandin taman te egkekita ku ke mibpevayaan te lansang diyà te menge velad din wey taman pà te edtiyuken ku wey edsepuwen ku ke nepelian te bangkew riyà te tengkiliran din.” 26 Nekedsenge pedian maa ketà ne nevurun ke menge edumdumaan ni Hisus diyà te senge valey ne rutun en dema si Tomas. Ne mibpemintù dan, ugaid ne misan iring ketà ne neketekew en maa si Hisus nekeitindeg diyà te teliwarà dan. Ke sikandin te, “Na, mebmelilintad ke hinawa niyu.” 27 Arà dà ne migkahi en sikandin diyà te ki Tomas te, “Tengtengi nu ini se velad ku, ne tiyuka nu ini se palad ku abpeg dut te palì te tengkiliran ku ne sepuwa nu rema! Engked ka te keduwaruwa nu, ne peretiyaya ka!” 28 Migkahi si Tomas te, “Sikuna ke Kerenan ku, ne Eleteala ku!” 29 Migkahi si Hisus kandin te, “Maa, arà pè be ne mibperetiyaya ka su nekita ad nikuna! Ugaid ne idtarem ku ini, egkehalew nevenar ke menge etew ne ebperetiyaya kedì misan warà dan mekekita kediey!” 30 Merakel pà se mid-ulaula ni Hisus ne mekegeyip ne nekita rut te edumdumaan din ne warà ikesurat en kayi te riberù ini. 31 Ugaid ne ini se mekegeyip ne ulaula ne ingkesurat kayi su apey kew ebpekeperetiyaya te Anak te Eleteala si Hisus, ne ebpekeperetiyaya kew rema te sikandin ke Impasad te Eleteala ne Ebperetuen, su embiya ebperetiyaya kew kandin ne ebpeketelimà kew te umur ne warà edtemanan din.

John 21

Mibpekitakita si Hisus Dut te Pitu ne Edumdumaan Din

1 Guna su nekesahad en se pipira ne hewii ne mibpekitakita maa si Hisus dut te edumdumaan din diyà te beyvey te ranew ne ed-ingaranan te Tibiriyas. Ne iring kayi se ned-ulaula te kinepekitakita rin. 2 Nengevurun ketà ensi Simon Pedro, si Tomas (ne ed-ingaranan te Seping), si Natanael (ne ebpuun te inged ne Kana lusud te Geliliya), ne elin dema ke deruwa ne anak ni Sibidiyu, wey ruen pà ketà deruwa ne edumdumaan ni Hisus. 3 Ne migkahi en si Simon Pedro te, “Ebpenginsedà e pad.” Migkahi en ke menge ruma rin te, “Eduma key keykew.” Arà dà ne mibpendiyan dan en te wayig ne mid-untud dan en te avang se ebpenginsedà, ugaid ne nepewpewaan dan se ebpenginsedà ne warà dan mekeutel. 4 Guna su nepawà en ne riyan en si Hisus mid-it-itindeg te beyvey te wayig, ugaid ne warà mekilala dut te edumdumaan din. 5 Ne migkahi si Hisus kandan te, “Na engkey, menge suled, nekeutel kew red?” Midtavak dan te, “Warà en iya!” 6 Migkahi si Hisus te, “Iantug niyu ayan se biyala niyu keniyan te egkekewanan te avang niyu su apey kew ebpekeutel.” Arà dà ne in-antug dan en ke biyala ran ne wey ran gelengkena ne kenà dan en egkegaga su merakel ke neutel. 7 Nekita ran ini ne migkehiyan en dut te edumdumaan ni Hisus ne igkelimù din si Pedro te, “Sikandin ayan ke Kerenan tew!” Guna su nerineg ni Pedro te si Hisus bes arà ne ingkeseluub din maa ke kumbalà din (su mibpenluung ma sikandin) ne midlumbuk en sikandin diyà te wayig se ebpeebpet diyà te ki Hisus. 8 Ne mid-untud te avang ke menge ruma rin se ebpeketundug kandin ne eguyud dut te biyala ran ne nekeutel te merakel ne serà. Ne kenà dan utew meriyù dut te tebtevasan te wayig su warà dà buwa mebmehatus ne meyterù. 9 Guna su nekerunggù dan en ne iyan dan nekita se mid-ug-uhanga ne baha ne ruen ketà serà ne intuug ne ruen dema pan ne in-init. 10 Ne migkahi si Hisus kandan te, “Ewita niyu kayi ke duma ne serà ne neutel niyu.” 11 Ne midlived si Simon Pedro riyà te avang ne miguyud din en ke biyala ne midsipek te derekelà ne serà, su iyan din kerakel ke neutel ne mehatus wey lelima nepulù wey tetelu. Ne misan iring ketà se kerakel din, ne warà mevindas ke biyala. 12 Migkahi en si Hisus te, “Kuwa kew en ne ramag kew en!” Ne warà senge etew rà kandan ne neketikà ne ed-insà te, “Entei ka?” su netuenan dan en ma te si Hisus iyan ini ke Kerenan dan. 13 Ne migkuwa ni Hisus ke pan diyà te apuy ne mid-umun-umun din kandan, ne iring ded dema ketà ke serà. 14 Iketelu en ini te kebpekitakita ni Hisus dut te edumdumaan din te nevanew en sikandin. 15 Nekeipus dan se egkaan ne migkahi en si Hisus diyà te ki Simon Pedro te, “Simon, sikuna ini ke anak ni Juan, maa igkelimù a nu ve te muna pà dut te kegkelimù te ruma?” “Uya, Kerenan,” ke si Simon, “netuenan nu en se igkelimù ku sikuna.” Ne migkahi si Hisus te, “Tugenura nu ini se menge etew ku ne iring te nati te bilibili.” 16 Ne migkahi pà maa si Hisus te, “Simon, sikuna ini ke anak ni Juan, maa igkelimù a nu?” “Uya, Kerenan,” ke si Simon, “netuenan nu en se igkelimù ku sikuna.” Ne migkahi en maa si Hisus te, “Tugenura nu ini se menge etew ku ne iring te bilibili.” 17 Ne migkahi pà maa si Hisus te, “Simon, sikuna ini ke anak ni Juan, maa igkelimù a nu?” Nerineg dà ni Pedro ne nemutu se hinawa rin su iketelu en ini te kedsulit ni Hisus te ed-insà kandin ke ruen limù din. Arà be ne migkahi en sikandin te, “Netuenan nu ke langun, Kerenan, ne netuenan nu en se igkelimù ku sikuna!” Migkahi en si Hisus te, “Tugenura nu ini se menge etew ku ne iring te menge bilibili ku. 18 Sebenarvenar ini se idsempità ku keykew ne embiya ke menguwed pà ne iyan ka edsesebitan, ne misan endei ka egkiyug ne riyà ka ebpesinaru. Ugaid ne embiya egkelukes ke en ne ebpekererepa ka ne ruen ruma ne ebpesebitan keykew ne edtuyuken ka riyà te kenà nu egkiyuhan.” 19 (Iring ketà se kinekahi ni Hisus su idtarem din ke ralan te kemetayen ni Pedro ne ebpekereyù te Eleteala.) Ne migkahi en si Hisus kandin te, “Duma ka kediey!” 20 Guna su nerineg ni Pedro se lalag ni Hisus ne midlilingey sikandin ne iyan din nekita ne edtundug kandan ke edumdumaan ni Hisus ne igkelimù din iya. Sikandin ini ke midsandig ki Hisus dut te kinelavung dan te warà pà mebpatey si Hisus, ne sikandin ini ke mid-insà ki Hisus te, “Entei ma se ed-ulug keykew, Kerenan?” 21 Guna su nekita ni Pedro sikandin ne migkahi en diyà te ki Hisus te, “Kerenan, engkey ve rema se egketemanan kayi te ruma ta ini?” 22 Ne midtavak si Hisus te, “Embiya iyan ku egkesuatan se biviyag pà sikandin taman ketà te kedlived ku kayi te ampew te dunya, ne maa engkey ve se keykew ketà? Kenà merakel se pegitunga nu, ugaid ne ruma kew kedì.” 23 Ketà ne nekeeneb ke tudtul dut te langun ne eduma ki Hisus te kenà en ebpatey ini se senge etew rut te edumdumaan din. Ugaid ne kenà ma arà ke migkahi ni Hisus se kenè en ebpatey su iyan din migkahi te, “Embiya iyan ku egkesuatan se biviyag pà sikandin taman ketà te kedlived ku kayi te ampew te dunya, ne maa engkey ve se keykew ketà?” 24 Ne ini se senge etew ne edumdumaan din ne migkahi ni Hisus ne warà duma ke kenà siaken iya ke midsurat kayi. Ne langun kayi te nekesurat ini ne nemetmetaan ku, ne edtitihusan ku te langun kayi ne benar. 25 Ruen pà lavew merakel ne mid-ulaula ni Hisus ne warè en ikesurat. Su embiya id-amin te edsurat ne antap ku ne misan ini se lusud te linengkevan ne kurang pà ne edtehuan.