Masaka Ngka so Mipantag ki Isa
Pemekasan

Giyangkai a maito a Ribro mipantag ki Isa Masih na poon ko Kitab Indil. Penguin ami a materang ka sa kabatiyaa ngka ko totolan mipantag ko kaoyagoyag ago so mango ndao i Isa a minisorat o ped a paganay a miyangongonotan on - Si Matiyo, si Marko, si Lokas, ago si Yahiya. Baanda ngka pen kababayai matiya so ped ko Kitab Indil.
Pagimbitaren ami seka sa kasorati ngka rekami mipantag ko ped a da a bayad iyan a manga inipanorat.

Si Isa - so mama a miyatotol
Da a ped a taw a ba niyan miyarampat so totolan ko dalem a doniya a ba datar i Isa.
Minimbamata sefcaniyan sa Palistin isako masa a kiyasakopa o manga taw sa Roma sa Palistin ko paganay a magatos ragon.
Sa kapapantagan oto na inisogo i Agosto a Solotan sa Roma a milista so langon a taw sangkoto a ndadatoan iyan. Somiyong so oman i isa a taw sa siti a pimbawataan on kaan milista. Si mambo si Yosop na giyanatan iyan so siti a Nasarit roo sa Galili na somiyong sa Yodiya ko siti o Daod a bebetowan sa Bitlihim, ka mbawataan sekaniyan o Daod. Miyonot on si Mariyam a ipagaayon iyan kaan siran milista. Sa maoto na maogat si Mariyam, na sii ko katatareg iran roo na miyaoma den so kapembawata iyan. Mimbawata sa mama a popaw sa lawas iyan. . . Sii ko ikawalo gawii a aya den katoria ko wata na iningaranan iran sa Isa, ka aya on inibeto o malaikat sa da on pen kikeraringen. Lokas 2:1, 3-7, 21
Oriyan o miyakatelo polo ragon na si Pilato a gobirnador a Iromanen na siyala iyan sekaniyan ko kapatay.
Sabap sangkoto a pitero i Isa na miyanamar si Pilato sa kapekaliyowa niyan on, ogaid na ba den milalalis so manga Yahodi a tig iran a 'O pekaliyowa ngka a mama nan na kena a ba ka ginawai o Solotan sa Roma! Apiya antawaa i di niyan dii teroon a dato sekaniyan na ridoay o Solotan!'
So kiyanega sii i Pilato na inowit iyan si Isa sa liyo, na miyontod sii ko darpa a dii kokoman a bebetowan sa 'Piyagatoran.' . . .Gawii oto a ipetiyagar ko Paska na baanda maoto a alongon. Na pitero i Pilato ko manga Yahodi a 'Katii bo so Solotan iyo!' Na milalalis siran somembag a tig iran a 'Bonoa ngka sekaniyan, bonoa ngka, totoka ngka ko kros!'
Tig i Pilato a 'Ba niyo kabaya a pakitotok aken so Solotan iyo ko kros?'
Somimbag so manga poporo a imam a tig iran a 'Da a solotan ami a liyo ko Solotan sa Roma!'
Na taros a piyalad iyan kiran si Isa kaan matotok ko kros. Yahiya 19:12-16

Si Isa - so da a lagid iyan sa kaoyagoyag
So maporo a kapaar iyan
So kapaar iyan ko kabager o manga inaden o Allah Sii ko di ran dii kapelayalayag na tiyorog si Isa. Na somiyamber so tanto a mabager a ndo sa ranaw, na pekepeno so awang a ig, na riyaot siran a piyakaleklek. Miyobay so manga sokbat ki Isa na piyokaw iran a tig iran a 'Kadnan, Kadnan, pekigaled tano.' Miyagenaw sekaniyan, na siyaparan iyan so ndo ago so ig a dii mbegel sa manga ala. Gominek siran na lomingen den. Na tig iyan kiran a 'Anda den so paratiyaya niyo?' Na miyaiek siran ago miyamemesa, na miyamagisei siran a tig iran a 'Antawaa a mama ini a apiya so ndo ago so ig na pesogoon iyan, na makimbabaya siran on?' Lokas 8:23-25
So kapaar iyan ko di pengaiilay Miyamemesa so manga taw roo, ka kagiya sii ko kapepamangendaowa niyan kiran na lagid o aden a kapaar iyan, ka kena a ba lagid o manga goro ko Kitab. Sarta den a somiyoled ko masgit iran so sakataw a mama a sosookan a saitan. Na kominisek sekaniyan, a tig iyan a 'Hey Isa a taw sa Nasarit, antonaa i pagangin ka rekami? Ba ka sii somiyong kaan kami ngka mabinasa? Katawan aken o antawaa ka. Seka so Soti a Siyogo o Allah!'
Na tiyapaosan i Isa so saitan a tig iyan a 'Rerenek ka, na liyo ka rekaniyan!' Na piyakatetaliya o saitan a lawas o mama, na kominisek sa matanog na lominiyo ron. Palaya siran den miyamemesa, na miyamagisei siran a tig iran a 'Antonaa ini? Bago a ndao! Aden a kapaar iyan, ka apiya so manga saitan a pesogoon iyan na makimbabaya siran on!' Marko 1:22-27

So kapaar iyan ko paniyakit
Sa maoto na so panogangan i Simon a babay na makaiiga roo a dii keyaw, na pitero iran somambot ki Isa. Inobay niyan angkoto a babay, na tiyayongan iyan a lima niyan na biyowat iyan. Na miyada on so mayaw, na siyakaw niyan siran. Kagiya magabi den ko kiyasedep o alongan na piyamangowit o manga taw ki Isa so langon a pepangasasakit ago kisosookan a saitan.
Na so langon a taw sa inged oto na sii siran mitimotimo ko obay o pintoan o walay. Mandiyadi na piyamakabager iyan so madakel a gomegedam sa mbarambarang den a paniyakit, na piyamakaliyo niyan so madakel a saitan ko kisosookan. Marko 1:30-34

So da a lagid iyan a kiyapatay ago kiyaoyag i Isa
So Sokbat a Paolo na inisorat iyan: Piyalad aken rekano so miyatarima aken a lebi a mala i kipantag a giyai: miyatay so Masih sabap ko manga dosa tano a aya kiyatoman o misosorat ko Kitab. Minilebeng sekaniyan ago miyaoyag sii ko ikatelo gawii a aya kiyatoman o misosorat ko Kitab. 1 Korinto 15:3-4

So kiyapatay niyan
Kagiya makaoma siran ko kaden a bebetowan sa 'Lagas a Olo' na ron iran tiyotok si Isa ago so dowa kataw a kontra ko manga kros, a so isa on na makakawanan iyan, ago so isa on na madidiwang iyan. Lokas 23:33
So Masih a da a dosa niyan na inibilang o Allah a rek iyan so kadostaan sabap rektano kaan sii ko kaiisaisa tano ago sekaniyan na mibilang a rektano so kaontol o Allah. 2 Korinto 5:21
So Sokbat a Pidro na inisorat iyan: Sekaniyan den i miyakaawid ko manga dosa tano sii ko lawas iyan sii ko kros, kaan tano mapokas ko kapaar o kadostaan, kaan tano makapagiinetaw a ipapantag ko kaontol. Na miyakanggolalan ko manga pali iyan na miyapakapiya kano den. 1 Pidro 2:24

So kiyaoyag iyan a poon ko miyamatay
Aya mabager a karina ko tito a benar a pekelimen i Isa na so kiyaoyag iyan a poon ko miyamatay.
Sii ko Akad a kapipita na komiyabalaga siran somong ko kobor a makaaawid ko ikekamotan a pitiyagar iran. Miyaoma iran so kobor a kiyalekaan, ka miyalilid den so ator a poon ko gimowa iyan. Na somiyoled siran on, ogaid na da iran mailay so lawas o Kadnan a Isa. Sii ko kapakatitindeg iran roo a kikalilibogan makapantag sii na tekaw den miyakagemaw so dowa kataw a mama a tominindeg ko obay ran a kindiditar sa pepamangindat a nditaren. Miyaiek so manga babay, na miyakatolong siran. Pitero kiran o manga mama a 'Ino niyo pepangilobaa so oyagoyag sii ko miyamatay? Da sekaniyan sii, ka miyaoyag bo. Tanodi niyo so pitero iyan rekano isako ndodoo pen sa Galili, a tig iyan a "So Wata o Manosiya na disomala a kepalad ko kapaar o baradosa a manga mama. ago ketotok ko kros, na keoyag bo sii ko ikatelo gawii."' Na kiyatademan o manga babay so manga katero iyan . . . Lokas 24:1-8
Na makapantag ko katotohani ron na miyapayag a Wata sekaniyan o Allah a miyakanggolalan ko mala a gees sii ko kiyaoyag iyan a poon ko miyamatay. Sekaniyan si Isa Masih a Kadnan tano. Roma 1:4

So da a lagid iyan a penontoten i Isa
Tanto sekaniyan a mala i gees
Tig i Isa a: 'Kiyabegan ako sa langon a kapaar roo sa kasorgaan ago sii sa doniya.' Matiyo 28:18

Pepenonoatan sekaniyan
'Saken so paan a pepangoyag. Saden sa pesong raken na di den keor, ago saden sa peparatiyaya raken na di den pen kewaw.' Yahiya 6:35

Pembegay sekaniyan sa sindaw ko kahlibotengi rektano
'Saken i solo sa doniya. Saden sa pegonot raken na di den pekalalakaw ko maliboteng, ka ndodon so kaliwanag a pepangoyag.' Yahiya 8:12

Ipembegay niyan so siyap iyan
'Saken so mapiya a tomatagikor ko manga bilibili. So mapiya a tomatagikor ko bilibili na iperila iyan so kaoyagoyag iyan sabap ko manga bilibili. Da a taw a ba niyan raken mabelag so kaoyagoyag aken, ka iperila aken a saken bo i dii ron mbayabaya. Aden a kapaar aken sa kiperilaan aken on, ago aden pen a kapaar aken sa kakekowaa ko ron peroman. Giyai i inisogo raken o Ama aken a penggolaolaan ko.' Yahiya 10:11, 18

Ipetopa niyan so kakelinding
'Saken so pintoan. Apiya antawaa i soled a magokit raken na kesabet. . . So tekew na aya bo a kapekaoma niyan na an makapamanekew, makapamamono ago makapaminasa. Miyakaoma ako kaan siran kabegi sa kaoyagoyag, a so kaoyagoyag a madidiyangka piyapiya. . . Pepamegan aken siran sa kaoyagoyag a da a kaposan iyan, na di siran den pemakanaraka. Na da a ba kiran pekaagaw ko katatangana ko kiran. So Ama aken a aya kiran raken migay na lawan ko kalangolangon. Na da a ba kiran pekaagaw ko katatangana kiran o Ama.' Yahiya 10:9-10, 28-29

Ipetopa niyan so kaoyagoyag sii ko oriyan o kapatay
'Saken so pepangoyag ko miyamatay ago so kaoyagoyag. Saden sa peparatiyaya raken na apiya pen matay na keoyag bo. Na oman i isa a pekeoyagoyag a peparatiyaya raken pen na di den petay. Miyaratiyaya ka sii?' Yahiya 11:25-26
Sekaniyan i lalan ko Tohan 'Saken so lalan, ago so tito a benar, ago so kaoyagoyag. Da a taw a ba pekasong ko Ama o di raken makaokit.' Yahiya 14:6

Perilaan iyan so dosa
Kagiya tomepad na inowit on o manga taw so sakataw a maatay a ped ko lawas iyan a miiga ko dalagan.
Miyailay i Isa a aden a paratiyaya iran, na pitero iyan ko maatay a lawas iyan a 'Pakapipiyaa ngka a ginawa ngka, Wata aken, ka miyapapas so manga dosa ngka.' So kiyanega on o ped ko manga goro ko Kitab na pitero iran ko ped iran a 'Si aki ini na pepagitowitoon iyan so Allah!'
Katawan den i Isa so mapipikir iran na tig iyan a 'Ino niyo pepamikira ngkanan a marata? Anda i malebod a penggolaolaan? Ba so kapapasa ko manga dosa o taw o di na so kapakambowata ko maatay a lawas iyan kaan makalalakaw? Pekiilay aken rekano a so Wata o Manosiya na aden a kapaar iyan sa doniya sa kakepapasa niyan ko manga dosa.' Na tig iyan ko maatay a lawas iyan a 'Mbowat ka. Kowaa ngka so dalagan ka, na baling ka.' Na mimbowat sekaniyan na miyaling. So kiyailaya sii o madakel a taw na miyaiek siran, na biyantog iran so Allah a migay sangkanan a kapaar ko manosiya. Matiyo 9:2-8

Katawan iyan so pekatalingoma
Bitowan i Isa a ginawa niyan sa Wata o Manosiya na tig iyan a: 'So kapapantagan oto na pekagemaw so nanao ko Wata o Manosiya roo sa langit, na pemboboko so langon a mbatabataa sa doniya. Keilay ran so Wata o Manosiya a pepakaoma a sisii ko manga gabon sa langit a misasarta on so mala a gees ago bantogan. Na sogoon iyan so manga malaikat iyan a sarta a magoni a bogiyong sa matanog, ka panimoon iran so piyamili iyan a taw a poon ko pat a pidoro a alam, a poon ko kaposan o doniya taman ko sabala a kaposan iyan. . . Pengaada so langit ago so doniya, ogaid na di den keda so manga katero aken.' Matiyo 24:30-31, 35

Da a poonan iyan ago da a ikepos iyan
Tig i Isa a: Teroon ko rekano a matamataan den a sa da pen kimbawataan ko Ibrahim na kapapantagan ako den.' Yahiya 8:58
'Ama, na sii ko kamamasaan ka na bantogen ka raken so andang a bantogan aken isako sisii ako reka sa da pen kaadena ko doniya.' Yahiya 17:5
'Ka aya inisong aken sii a poon sa kasorgaan na kena a ba sabap sa an aken matoman so rek aken a kabaya, ka so kabaya o somiyogo raken.' Yahiya 6:38

Sekaniyan na Tohan
Tig i Isa a: 'Saden sa miyakailay raken na miyailay niyan mambo so Ama. Ino ngka pen dii teroa a "Pakiilain ka rekami so Ama?" Ba ngka di peratiyayaa a sisii ako ko Ama, ago sisii raken so Ama? So manga lalag a di aken rekano dii teroon na kena a ba saken i dii mbayabaya ko di aken on dii kateroa, ka so Ama a sisii raken lalayon na aya dii nggolaola sangkai a manga galebek iyan. Paratiyayaa ako niyo ko kiyatero aken sa sisii ako ko Ama, ago sisii raken so Ama. O di, na paratiyaya kano sabap sangkai a manga galebek.' Yahiya 14:9-11
'Saken ago so Ama na isaisa bo.' Yahiya 10:30
Piperomanan mise o maporo a imam a tig iyan a 'Ba seka so Masih a so Wata o Mapopodi a Tohan?'
Tig i Isa a 'Oway, saken den. Na keilay niyo bo so Wata o Manosiya a makaoontod ko kawanan o Mamaapaar, ago pepakaoma a sisii ko manga gabon sa langit.' Marko 14:61-62

Si Isa - ko kapeketondaa niyan ko ped
Imanto na madakel a pamikiran mipantag ki Isa Masih ogaid na masisimalaw so kailaya ko pitibarangan a katero a miyakapoon ko minindarpai niyan sekaniyan.

So mama a kalilid
Kagiya makapasad mangosiyat si Isa ko madakel a taw na miyamemesa siran ko kiyapangosiyat iyan, ka kagiya so di niyan kiran dii kapangosiyat na oonotan a kapaar ka kena a ba sekaniyan datar o manga goro iran ko Kitab. Matiyo 7:28-29
Pitero iran* ko babay a 'Miyaratiyaya kami den imanto a kena bo a ba sabap ko pitero o ka, ka sekami den i miyakaneg ko katero iyan, na katawan ami a mataan den a sekaniyan so Pananabet sa doniya!' Yahiya 4:42
*So manga taw a poon sa inged a Sikar

Si Pidro - a isa ko tanto niyan a dii ngginawai
Kagiya makaoma si Isa ko inged a Kaisariya Pilipi na inisean iyan so manga sokbat iyan a tig iyan a 'Antawaa kon so Wata o Manosiya a kabasa o manga taw?'
Tig iran a 'Aden a dii tero sa si Yahiya a Pananalawat. So ped na di ran dii teroon a si Iliyas, na tig o manga ped a si Yarimiyas o di na isa ko manga nabi.'
Na tig i Isa a 'Sekano den, antonaa i mapetero iyo o antawa ako?' Somimbag si Simon Pidro a tig iyan a 'Seka so Masih a so Wata o Allah a oyagoyag.' Matiyo 16:13-16

So olowan o manga baraamal
Na da den tero si Isa. Pitero on peroman o maporo a imam a 'Sii ko ingaran o oyagoyag a Tohan na sepa ka rekami o ba seka so Masih a so Wata o Allah.'
Simbag i Isa a tig iyan a 'Benar so pitero o ka. Na teroon ko rekano a poon imanto na keilay niyo so Wata o Manosiya a makaoontod ko kawanan o Lebi a Mamaapaar, ago pekaoma a sisii ko manga gabon sa langit.' So kiyanega on o maporo a imam na kinisi iyan so kimon iyan sa kiyararangiti ron, na tig iyan a 'Piyagitowito iyan so Allah! Da den a lalaw a kapakapeseksia tano ko ped. Miyaneg iyo imanto so kiyapagitowito iyan! Antonaa i pamikiran iyo?'
Somimbag siran a tig iran a 'Patot a mbonoon sekaniyan!' Mandiyadi na piyanodaan iran a paras i Isa ago piraneg iran. Pisetengela iran pen, a tig iran a 'Hey Masih, iring ka sa nabi, na antoka ngka o antawaa i lomiyampes reka.' Matiyo 26:63-68

Si Pilato - a aya rekaniyan komiyokom a Iromanen
Na pitero i Pilato ko manga poporo a imam ago so madakel a taw a 'Da a ba aken miyatoon a isela sangkai a mama.' Lokas 23:4

So sasanaan a aya on somiyala
So olowan o manga sondaro ago so manga ped iyan a pepagipat ki Isa na so kiyamasai iran ko linog ago so ped a miyanggolaola na tanto siran a miyaiek a tig iran a 'Benar den a Wata sekaniyan o Allah!' Matiyo 27:54
Sii ko oriyan o kiyapatay niyan ago so kiyaoyag iyan, na so manga agama o pengongonotan ki Isa Masih na magaan a kiyapakala iyan. Kena a ba maaalangalang so pamikiran o miyangaoonaan a miyangongonotan ki Isa Masih makapantag ko kaporo o bantogan i Isa - lagid o kiyaosaya on ankai a manga ayat:

So Allah na dii tero a dii makanggolalan ki Isa
Sii ko miyangaoona a gawii na so Allah na omanoman iyan dii imbitiyarai so manga apoapoan tano sii ko pimbarambarangan a okit a miyakanggolalan ko manga nabi. Ogaid na sii sangkai a pepangaoori a gawii na inimbitiyara tano niyan a miyakangolalan ko Wata iyan. Initoro sekaniyan o Allah a makapekawali ko langon taman, na ron miyakanggolalan a kiyaadena o Allah ko alam. Isisindaw niyan so tihaya o bantogan o Allah, na peparangain iyan so tito a katotohani ron. Aawidan iyan so langon taman a dii makanggolalan ko mala i kapaar a katero iyan.
Na kagiya matiyagar iyan so kakelompiyowa ko manga taw ko dosa iran na miyontod sekaniyan ko kawanan o Lebi a Mala roo sa kasorgaan. Hibriyo 1:1-3

Si Isa na Kadnan:
Isa Masih . . . lalayon sekaniyan lagid o Allah ko katotohani ron, na da niyan pamikira i ba niyan baasa komapet angkanan a kapendatara niyan ko Allah. Ka inibibay niyan ba den angkanan a pangkatan iyan, na inisolot iyan so kaooripeni ron, na miyabaloy a lagid o manosiya. Na kagiya makimasa a meroropa sa manosiya na miyangalimbabaan sekaniyan, na miyangongonotan ko Allah apiya miniyarong ko kapatay, a so kiyapatay niyan ko kros. Sabap saya na iniporo sekaniyan o Allah ko lebi a maporo, na bigan iyan sa ingaran a makalalawan ko oman i ngaran, kaan so langon a kaaden roo sa kasorgaan, ago sii sa doniya, ago sa didalem a doniya na pemakasodod siran sa kapepodiya iran ko ingaran i Isa, na peteroon o oman i isa kiran a mataan den a Kadnan si Isa Masih, na giyoto i kakebantogi ko Allah a so Ama. Pilipos 2:5-11

Si Isa - ko kapeketondaa niyan reka
So ped a taw na kiyatepengan iran sekaniyan mono. So ped na di niyan sekaniyan kikilalaan. So ped na di iran kabaya o ba iran paratiyayaa so pekelimen iyan makapantag kiran. Datar iyan bo imanto.
Di kepakay o ba ka pagalangalang.
'Saden sa di raken tomatampil na makasosopak raken.' Lokas 11:23

Pamakinega ngka sekaniyan
Teroon ko rekano a matamataan den a saden sa pepakaneg ko katero aken ago peparatiyaya ko somiyogo raken na aden a kaoyagoyag iyan a da a kaposan iyan. Na di sekaniyan den kesala ka kagiya miyakatepas ba den a poon ko kapapatay na sii ko kaoyagoyag. Teroon ko rekano a matamataan den a pekatalingoma so oras ago giyai den imanto a keneg o miyamatay so sowara o Wata o Allah, na pengaooyag so pemakaneg on.' Yahiya 5:24-25

Tarimaa ngka so kailangan ka
O teroa tano a da den a kadostaan tano na pepagakalan tano a ginawa tano, na da rektano so tito a benar. O peteobata tano so manga dosa tano na kesarigan tano so Allah sa kakepapasa niyan ko manga dosa tano sabap ko kaontol iyan, na sotin tano niyan ko langon a kamarataan. O teroa tano a da tano den makandosa na lagid o ba tano peteroa a bokeg so Allah, na da rektano so katero iyan. 1 Yahiya 1:8-10
Na da den a ped a ron ketoon so kakesabet, ka sii sa dalem a doniya na da den a salakaw a ingaran a inibegay o Allah sii ko manosiya a ron makapenggolalan a kakesabet tano. Manga Galebek 4:12

Pagitonga ngka so gona niyan
Tiyalowan i Isa so madakel a taw ago so manga sokbat iyan sa somong siran on, na pitero iyan kiran a 'O aden, a kebaya raken monot na pakalipati niyan a ginawa niyan, na pegonot raken a peserakan matay sabap raken. Ka apiya antawaa i kebaya sa kakesabet o kaoyagoyag iyan na ba den keilang so niyawa niyan. Ogaid na apiya antawaa i kedaan sa kaoyagoyag sabap raken ago so Mapiya a Totol na di den mailang so niyawa niyan. O makowa o taw so dalem a doniya a sarta a ba den mailang so niyawa niyan na antonaa i miyalaba niyan? Na antonaa i kibegay o taw a ipekakasoy o niyawa niyan?' Marko 8:34-37

Paratiyayaa ngka sekaniyan
Saden sa peparatiyaya ko Wata o Allah na so atay niyan na di niyan ai dii ipemataan. Na saden sa di peratiyaya ko Allah na lagid o ba niyan pipikira a bokeg so Allah, ka kagiya da niyan paratiyayaa so iniseksi o Allah makapantag ko Wata iyan. Na aya iniseksi iyan na giyai: inibegay rektano o Allah so kaoyagoyag a da a kaposan iyan, na giyangkai a kaoyagoyag na sisii ko Wata iyan. Saden sa ndodon den so Wata na rek iyan angkai a kaoyagoyag, na saden sa da on so Wata o Allah na da on so kaoyagoyag. 1 Yahiya 5:10-12

So kiyaimbitara niyan reka
Tig iyan a: 'Sekano langon a dodokawan maawid ko mapened a awid iyo, na song kano raken, ka pekadekeen ko sekano. Sanganen iyo so kokoong aken, na pakipangendao kano raken, ka makarorondan ako ago mangangalimbabaan. Na pekadeke kano, ka so kokoong aken na malebod a kapegawidi ron, na makep so pekiawidan aken rekano.' Matiyo 11:28-30