1

1 Sii sa pagampaganay na kapapantagan den so Katero. So Katero na ped o Allah, na so Katero na aya den so Allah. 2 Ipoon sa poonan na ped sekaniyan o Allah. 3 Nggolalan rekaniyan so kiyaadena ko langon taman, na da den a satiman bo a kaaden a ba makaliyoliyo rekaniyan a kiyaadena on. 4 Madadalem rekaniyan so kaoyagoyag, na giyangkai a kaoyagoyag na aya solo a pelindaw ko manga taw. 5 So solo na pesindaw sii ko kaliboteng, na da den ai kalangkolobi o maliboteng. 6 Aden a mama a siyogo o Allah a aya ngaran iyan na si Yahiya. 7 Miyakaoma sekaniyan kaan iyan matero ko langon a taw so makapantag sangkoto a solo kaan siran makaparatiyaya sabap ko kapeseksii niyan on. 8 Si Yahiya na kena a ba so solo, ka miyakaoma kaan iyan kapeseksii so solo. 9 Samaoto na so tito a solo a pelindaw ko oman i isa a taw na pepakaoma ko doniya. 10 Ogaid na apiya pen miyaaden so doniya a nggolalan rekaniyan na da sekaniyan kilalaa o doniya isako sisii sekaniyan on. 11 Miyakaoma sekaniyan ko manga nganin a rek iyan, ogaid na so bangsa niyan a manga taw na da iran sekaniyan tarimaa. 12 Ogaid na so langon a tomiyarima rekaniyan a miyamaratiyaya on na bigan iyan sa kabenar a mabaloy a manga wata o Allah. 13 Na miyabaloy siran a manga wata iyan a kena a ba sii ko kamamanosiyai a okit sabap ko kabaya o lawas, o di na takdir o taw, ka so den so Allah i Ama iran. 14 So Katero na miyabaloy a manosiya na komiyaden rektano. Mapepeno sekaniyan a limo ago tito a benar. Na miyailay ami so bantogan iyan, a so bantogan o botong a Wata o Ama. 15 Miseksi si Yahiya mipantag rekaniyan, na inipananalo niyan a "Giyai so mama a pitero aken isako teroon ko a 'Sekaniyan a pekaoma a pekatalondog raken na lawan raken, ka kapapantagan sekaniyan den sa da raken pen kimbawataan.' " 16 Sabap ko mitataralo a limo iyan na sektano langon na miyamakatarima sa madakel a manga rakmat, a so oman i isa on na pagomanan sa isa pen. 17 So Kitab na initoron a nggolalan ko Mosa, ogaid na so limo ago so tito a benar na miyakatalingoma a nggolalan ki Isa Al Masih. 18 Da a taw a ba miyakailay ko Allah. So botong a Wata o Allah a pakatatayaan o Ama na aya rekaniyan miyakapayag. ? 19 So manga Yahodi sa Yarosalim na somiyogo siran ki Yahiya sa manga imam ago manga Libitiyo kaan iran kaisei o antawaa sekaniyan 20 Na pitero iyan kiran so benar a da den a piyagma iyan, ka inipemataan iyan a "Kena a ba saken so Al Masih." 21 Iniise iran on a "Antawaa ka bes? Ba seka si Iliyas?" Tig iyan a "Kena." Iniise iran pen a "Ba seka so Nabi?" Tig iyan a "Kena." 22 Na tig iran a "Na, teroa ngka rekami o antawaa ka kaan aden a kisembag ami ko somiyogo rekami. Antonaa i mapetero o ka makapantag sa ginawa ngka?" 23 Inisembag kiran i Yahiya so manga katero o nabi Isayas a "Saken so sowara a pepananalo sii ko mitataog a kaden a dii tero sa 'Pakatitowa niyo so lalan a pagokitan o Kadnan.' " 24 So siran oto a siyogo ki Yahiya a poon ko manga Parisi 25 Na inisean iran sekaniyan peroman a "O kena a ba seka so Al Masih, o di na so Iliyas, o di na so Nabi na ino ka pepanalawat?" 26 Pitero kiran i Yahiya a "Saken na aya ipepanalawat aken na ig, ogaid na sisan rekano so sakataw a di niyo katawan. 27 Sekaniyan so pekaoma a pekatalondog raken na apiya so iket o tinilas iyan na kena a ba ako mapapatot a pemboka on." 28 Palaya ini miyaolaola roo sa Bitani sii sa sabala a lawasaig a Yordan a ron pepanalawat si Yahiya. 29 Sii ko talondog a gawii na miyailay i Yahiya si Isa a pepekaantap rekaniyan, na tig i Yahiya a "Kataya so Nati a Bilibili o Allah a pepakadaan iyan so dosa o doniya! 30 Sekaniyan so pitero aken isako teroon ko a 'Aden a mama a pekaoma a pekatalondog raken a lawan raken ka kapapantagan sekaniyan den sa da raken pen kimbawataan.' 31 Gowani na di aken katawan o antawaa sekaniyan, ogaid na somiyong ako sii a pepanalawat sa ig kaan sekaniyan mapayag ko manga taw sa Israil." 32 Na miseksi si Yahiya a tig iyan a "Miyailay aken so Roh a petena a poon sa kasorgaan a datar o marapatik na komiyaden rekaniyan. 33 Da aken sekaniyan makilala gowani, ogaid na so Allah a somiyogo raken sa kapenalawat aken sa ig na pitero iyan raken a 'Keilay ngka so Roh a petena ago keden ko isa a mama; sekaniyan so penalawat ko Soti a Roh.' 34 Na miyailay aken ai, na pepamataanan aken a sekaniyan so Wata o Allah." 35 Kagiya talondog a gawii na ndodoo peman si Yahiya a ped iyan so dowa ko manga sokbat iyan, 36 Na kagiya mailay niyan a somiyagad si Isa na tig iyan a "Kaoto so Nati a Bilibili o Allah!" 37 Kagiya maneg o dowa a sokbat so pitero i Yahiya na tiyondog iran si Isa. 38 Dominingil si Isa na miyailay niyan a petondogen iran sekaniyan, na iniise iyan kiran a "Antonaa i pepelobaan iyo?" Somimbag siran a "Rabi," (maana a 'Goro') "anda ka mababaling?" 39 Tig iyan a "Onot kano raken na ilaya niyo." Na miyonot siran on na miyailay iran o anda mababaling, na komiyaden siran rekaniyan sangkoto a gawii ka manga alas kowatro oto sa kegabi. 40 So isa sangkoto a dowa a sokbat a miyakaneg ki Yahiya a tomiyondog ki Isa na si Andriyo a pagari i Simon Pidro. 41 Pimbabanog nggagaan i Andriyo si Simon a pagari niyan na pitero iyan on a "Minitoona ami so Al Masih" (Aya maana niyan na 'Kiyaidinan'). 42 Na inowit iyan si Simon ki Isa. Tintengan sekaniyan i Isa na pitero iyan a "Seka bes si Simon a wata i Yahiya. Ipoon imanto na mbetowan ka sa Sipas." (Aya maana niyan na Pidro') 43 Kagiya talondog a gawii na piyasad i Isa sa ginawa niyan a song sa Galili. Minitoona iyan si Pilipi na pitero iyan on a "Pegonot ka raken." 44 Si Pilipi na taw sa Bitsaida a so inged a babalingan i Andriyo ago si Pidro. 45 Pimbabanog i Pilipi si Natanil na pitero iyan on a "Minitoona ami so mama a inisorat o Mosa ago so manga nabi sii ko Kitab. Sekaniyan si Isa a taw sa Nasarit, a wata i Yosop." 46 “Ba aden bes a mapiya a ba pekapoon sa Nasarit?" a iniise i Natanil. "Onot ka raken na ilaya ngka," a inisembag i Pilipi. 47 Kagiya mailay i Isa si Natanil a pegantap rekaniyan na tig iyan makapantag on a "Kataya so tito a taw sa Israil a da on so kapamagakal!" 48 Iniise i Natanil a "Ino ako ngka katawi?" Tig i Isa a "Miyailay aken seka isako ndodoo ka ko atag o kayo a korma sa da reka pen katawaga i Pilipi. 49 Tig i Natanil a "Goro, seka den so Wata o Allah! Seka so Solotan a Israil!" 50 Na tig i Isa a "Miyaratiyaya ka bes sabap ko kiyateroa ko reka on a miyailay aken seka sii ko atag o kayo korma? Pekailay ka sa lebi pen a piyakamemesa a di giyai!" 51 Na tig iyan pen a "Teroon ko rekano a mataan den a keilay niyo a kelekaan a kasorgaan ago so manga malaikat o Allah a manik manog den sii ko Wata Manosiya."

2

1 Kagiya makadowa den gawii na aden a kakewing sa inged a Kana roo sa Galili. Ndodoo si ina i Isa 2 Na biyantowan mambo si Isa ago so manga sokbat iyan ko kakewing. 3 Kagiya kalenganan siran sa arak na so ina i Isa na pitero iyan rekaniyan a "Da den a arak iran." 4 Somimbag si Isa a "Babay, ino ngka raken peteroa? Da pen maoma so oras aken." 5 Pitero i ina iyan ko manga talasogoay a "Nggolaolaa niyo so apiya antonaa i isogo iyan rekano." 6 Na aden a pakatitindegen roo a nem timan a omoy a ator a petegoan sa ig a pegosaren o manga Yahodi ko kapelompiyo a aya iran adat. Oman i isa on na peketagoan sa walo polo o di magatos ka litro a ig. 7 Pitero i Isa ko manga talasogoay a "Pamenoa niyo a ig angkai a manga omoy." Na piyameno iran a tetaman ko manga ngari iyan. 8 Tig iyan kiran pen a "Imanto na sakedo kano ron na wita niyo ko komikibir ko bangkiti." Na inowit iran on 9 Na tiyaaman o komikibir so ig a miyabaloy den a arak. Di niyan katawan o anda poon apiya pen katawan o manga talasogoay a somiyakedo ron. Tiyalowan iyan so mangangaroma 10 Na pitero iyan on a "Adat den a aya pekaonaan menat a arak na so lebi a mapiya, na amay ka makapangondaya minom so manga banto na go bo nata so kena a ba tanto a mapiya a arak. Ogaid na imanto ngka pen pagenata so lebi a mapiya!" 11 Giyangkai a monapona ko piyakamemesa a manga nanao a piyakiilay i Isa na sii miyanggolaola sa Kana roo sa Galili. Piyayag iyan roo so bantogan iyan, na miyaratiyaya on so manga sokbat iyan. 12 Oriyan ai na si Isa ago si ina iyan, so manga pagari niyan a manga mama, ago so manga sokbat iyan na miyamanong siran sa Kapirnaom, na komiyaden siran roo ko miyamakapira gawii. 13 Sa masa oto na magaan den so Pista ko Paska o manga Yahodi na somiyong si Isa sa Yarosalim. 14 Sii ko Timplo na miyaoma niyan so manga taw a dii ndadagang sa manga sapi, manga bilibili ago manga marapatik ago so pen so dii sesambiay sa pirak a kioontod roo. 15 Mandiyadi na mimbaal si Isa sa badas a tiyalitali na piyamogaw niyan siran langon roo ko liyo o Timplo a rakes o manga bilibili ago manga sapi, na pilalayang iyan so manga lamisaan o dii sesambiay sa pirak, na tiyowal iyan so manga pelata iran. 16 Na pitero iyan ko dii ndadagang sa manga marapatik a "Pangowita niyo ai sa liyo! Di niyo mbaloya a padian so Walay o Ama aken!" 17 Kiyatanodan o manga sokbat iyan a misosorat ko Kitab a "So kasigi aken ko Walay ngka, ya Allah, na aya raken nggegep." 18 Kagiya mailay ai o manga olowan o manga Yahodi na inatowan iran si Isa a tig iran a "Antonaa i nanao i mapekiilay ngka rekami a kiporiba sa aden a kabenar ka sa kiyanggolaolaa ngka sii?" 19 Simbag siran i Isa a "Gebaa niyo angkai a Timplo na mbangonen aken peroman sii ko soled o telo gawii." 20 Tig o manga Yahodi a "Miyakapat polo ago nem ragon a kiyabangona sangkai a Timplo na mbangonen ka bes peroman ko soled o telo gawii?" 21 Ogaid na aya pitero i Isa a timplo na so lawas iyan. 22 Sabap san na kagiya maoyag sekaniyan a poon ko miyamatay na kiyatanodan o manga sokbat iyan a miyatero iyan ai. Na piyaratiyaya iran so misosorat ko Kitab ago so miyatero i Isa. 23 Sii ko katatago i Isa roo sa Yarosalim sii ko Pista ko Paska na madakel a miyaratiyaya rekaniyan ko kiyailaya iran ko piyakamemesa a manga nanao a di niyan dii nggolaolaan. 24 Ogaid na si Isa na da niyan kiran sarigen a ginawa niyan ka katawan iyan piyapiya so langon a taw. 25 Di den kailangan a teroon rekaniyan o apiya antawaa so makapantag ko manosiya, ka katawan iyan o antonaa i madadalem ko poso o manga taw.

3

1 Aden a isa a olowan o manga Yahodi a bebetowan sa Nikodimos a ped sekaniyan ko manga Parisi. 2 Miyakaisa a gagawii na somiyong sekaniyan ki Isa na pitero iyan on a "Goro, katawan ami a goro ka a siyogo o Allah, ka da a makapenggolaola sa piyakamemesa a manga nanao a di ngka dii nggolaolaan liyo ron o mipageepeda iyan so Allah." 3 Somimbag si Isa a "Teroon ko reka a mataan den a da a ba pekailay ko Ndatoan o Allah taman sa di imbawata peroman." 4 Iniise i Nikodimos a "Andamanaya i kipembawataan ko taw amay ka miyakatoa den? Mataan a di niyan kegaga a ba makasoled peroman ko tiyan o ina iyan kaan mimbawata peroman!" 5 Somimbag si Isa a "Teroon ko reka a mataan den a da a pekasoled ko Ndatoan o Allah taman sa di imbawata a nggolalan ko ig ago so Roh. 6 So inimbawata o manosiya na manosiya mambo, na so inimbawata o Roh na niyawa mambo. 7 Di ka pememesa ko pitero aken reka a disomala a imbawata ka peroman. 8 Pesember so ndo sa apiya anda kebaya somong. Pekeneg ka so kapesember iyan ogaid na di ngka katawan o anda pepakapoon o di na anda pegantap. Datar ai mambo so kipembawataan ko oman i isa a inimbawata o Roh." 9 “Andamanaya i kakeolaola ini?" a iniise i Nikodimos. 10 Tig i Isa a "Kikilalaan ka a goro sa Israil na di ngka bes seboten angkai a manga nganin? 11 Teroon ko reka a mataan den a di ami dii teroon so katawan ami ago di ami dii seksian so miyailay ami, ogaid na di niyo terimaan so katero ami. 12 Pitero aken rekano so makapantag ko manga nganin sangkai a doniya na da niyo paratiyayaa. Sabap roo na andamanaya i kaperatiyayaa niyo o teroa ko rekano so makapantag ko ndodoo sa kasorgaan? 13 Da den a miyakapanik sa kasorgaan a rowar ko Wata o Manosiya a miyanog a poon sa kasorgaan. 14 Na datar o kinitongkolen o Mosa ko nipay a tombaga roo ko mitataog a kaden na disomala a mitongkol mambo so Wata o Manosiya 15 Kaan so oman i isa a peparatiyaya rekaniyan na makatarima sa kayoyagoyag a da a kaposan iyan. 16 “Kagiya tanto a pekebabayaan o Allah so doniya na inibegay niyan so botong a Wata iyan kaan so oman i isa a peparatiyaya rekaniyan na di pekanaraka, ka kebegan baden sa kaoyagoyag a da a kaposan iyan. 17 Ka siyogo o Allah so Wata iyan sii sa doniya a kena a ba an iyan masala so doniya, ka sabap sa an masabet so doniya a nggolalan rekaniyan. 18 “Apiya antawaa i peparatiyaya rekaniyan na di den kesala. Na so di rekaniyan peratiyaya na miyasala den, ka da niyan paratiyayaa so botong a Wata o Allah. 19 Na so kiyasalaa kiran na mipepasod sii: So solo na somiyong sii sa doniya ogaid na kiyababayaan o manga taw so maliboteng a di so maliwanag ka marata so manga galebek iran. 20 Oman i dii nggolaola sa marata na ipekegowad iyan so maliwanag na di den song ko solo ka ipekelek iyan o ba mapayag so di niyan dii nggolaolaan. 21 Ogaid na so taw a ipepaginetaw niyan so tito a benar na pesong ko solo kaan mailay piyapiya a so di niyan dii nggolaolaan na aya niyan kapetomana ko kabaya o Allah." 22 Oriyan ai na somiyong si Isa sa Yodiya na tomiyareg roo sa miyamakapira gawii a pepanalawat a ped iyan so manga sokbat iyan. 23 Si mambo si Yahiya na dii manalawat roo sa Ainon a marani sa Salim ka madakel a ig roo, na pepamanong on so manga taw a pemakisalawat. 24 (Sa masa oto na da pen makalaboso si Yahiya.) 25 Na aden a Yahodi a miyakindaowa ko manga sokbat i Yahiya makapantag ko ontol a okit a kapelompiyo. 26 Na somiyong siran ki Yahiya na pitero iran on a "Goro, so mama a minipagepeda a ka roo ko sabala a lawasaig a Yordan a piseksian ka na pepanalawat sekaniyan imanto na pepamanong on so langon a taw!" 27 Tig i Yahiya a "Da a ba kekowa o taw a apiya antonaa o di on began o Allah. 28 Sekano den i makapeseksi ko kiyateroa ko sa kena a ba saken so Al Masih, ka matag ako siyogo a miyaona a di sekaniyan. 29 Aya kirek ko pengaromaan na so mangangaroma. Ogaid na so layok o mangangaroma na penayaon iyan sekaniyan a pemamakineg, na tanto sekaniyan a kebabaya amay ka maneg iyan so lagam o mangangaroma. Giyanan i kapekebabaya aken, na miyatarotop den imanto. 30 Disomala a pepekala sekaniyan ago pepekababa ako." 31 Sekaniyan a pepekapoon sa poro na lawan ko kalangolangon, na sekaniyan a poon sa doniya na kadodoniyai na aya di niyan dii teroon na kadodoniyai. Sekaniyan a pepekapoon sa kasorgaan na lawan ko kalangolangon. 32 Ipeseksi iyan so miyailay niyan ago miyaneg ogaid na da a ba peterima ko katero iyan. 33 Ogaid na so tomiyarima ko katero iyan na pimataanan iyan a benar so Allah. 34 Ka so siyogo o Allah na di niyan dii teroon so manga katero o Allah, ka da a diyangka o kipembegan on o Allah ko Roh. 35 So Ama na pekebabayaan iyan so Wata na miyapadalem iyan so langon taman ko kapaar iyan. 36 So peparatiyaya ko Wata na aden a kaoyagoyag iyan a da a kaposan iyan, ogaid na so pegongkir ko Wata na di den pekakamal sangkoto a kaoyagoyag, ka lalayon on so rarangit o Allah.

4

1 Miyaneg o manga Parisi a si Isa na madakel a taw a dii masokbat ago pepanalawatan iyan a di si Yahiya. 2 (ogaid na aya benar na kena a ba si Isa i dii manalawat, ka so manga sokbat iyan). 3 Kagiya maneg ai i Isa na inawaan iyan a Yodiya ka kesoy sa Galili. 4 Sii ko kapesong iyan sa Galili na mipenisagad iyan a Samariya. 5 Miyakaoma sekaniyan ko isa a siti sa Samariya a bebetowan sa Sikar a kena a ba mawatan ko lopa a inibegay i Yakob ko wata iyan a si Yosop. 6 Ndodoo so paridi a rek i Yakob, na miyontod si Isa ko obay o paridi, ka diyokawan ko kapelalakaw niyan. Na magaan den oto maoto a alongan. 7 Miyakaoma so isa a babay a taw sa Samariya ka segeb, na pitero on i Isa a "Pakainoma ko ngka." 8 Samaoto na da roo so manga sokbat iyan ka tomiyaros siran sa siti ka pemasa siran sa pangenengken. 9 Tig o babay a Isamariyan a "Yahodi ka na Isamariyan ako. Ino ka raken pengni sa ig a mainom ka?" (Ka di den makipagepeda so manga Yahodi ko manga Isamariyan.) 10 Somimbag si Isa a "O katawi ngka so pamemegayan o Allah ago antawaa i pepangni reka sa ig na seka o kowan i pemangni rekaniyan na mbegan ka niyan sa ig a pepangoyag." 11 “Sir," a tig o babay, "da a ba ngka kisageb na madalem so paridi. Anda ngka kowaa ngkanan a pepangoyag a ig? 12 Ba ka lawan ki Yakob a apo tano a migay rektano sangkai a paridi? Pepeginom sekaniyan sii ago so manga wata iyan taman ko manga pangangayamen iyan." 13 Somimbag si Isa a "Oman i peginom sangkai a ig na kewaw peroman 14 Ogaid na apiya antawaa i pekainom ko ig a imbegay aken on na di den kewaw. Ka so ig a imbegay aken on na pembaloy a bowalan sii sa ginawa niyan a pepekabowak on so ig a pepamegay sa kaoyagoyag a da a kaposan iyan." 15 Tig o babay a "Sir, begi ako ngka sangkai a ig kaan di ako den kewaw ago di sii den pekasong sa kasegeb aken." 16 Pitero rekaniyan i Isa a "Baling ka na kowaa ngka si karoma ngka na kasoy kano sii." 17 Tig o babay a "Da a karoma ko." Tig i Isa "Benar so pitero o ka a da a karoma ngka 18 Ka miyakalima ka den mapangaroma, na so mama a itetapi i ka imanto na kena a ba ngka tito a karoma. Benar angkai a pitero o ka." 19 Tig o babay a "Masisipat aken, Sir, a nabi ka. 20 So manga apo ami a manga taw sa Samariya na miyamanimba sii sangkai a palaw, ogaid na sekano a manga Yahodi na di niyo dii teroon a giya Yarosalim na aya patot a darpa a ron pesimba so manga taw." 21 Tig i Isa a "Paratiyayaa ko ngka, Babay, ka pekatalingoma so masa a kena a ba giyangkai a palaw aya pen a Yarosalim i darpa a ron iyo simbaa so Ama. 22 Sekano a manga Isamariyan na pesimbaan iyo so di niyo katawan. Sekami a manga Yahodi na katawan ami so pesimbaan ami, ka so kakesabet na miyakapoon ko manga Yahodi. 23 Ogaid na pekatalingoma so masa ago kapapantagan den a so tito a pepamaniniba na simbaan iran so Ama a nggolalan ko Roh ago tito a benar, ka so datar ai a pepamanimba i kebayaan o Ama a pesimba rekaniyan. 24 So Allah na niyawa, na so pemanimba rekaniyan na disomala a simba a nggolalan ko Roh ago tito a benar." 25 Pitero on o babay a "Katawan ko a song sii so Al Masih (a bebetowan sa Inidinan o Allah), na amay ka makaoma na pekitokawan iyan rektano so langon taman." 26 Somimbag si Isa a "Saken sekaniyan a di reka dii makimbitiyarai." 27 Minitabo saya den a kiyakasoy o manga sokbat i Isa na tanto siran a miyamemesa kagiya mailay iran sekaniyan a dii makimbitiyarai ko babay. Ogaid na da a isa kiran bo a ba minise sa "Antonaa i kabaya a ka," aya pen o ba iran miise a "Ino ngka dii mbitiyaraian angkai a babay?" 28 Mandiyadi na inibagak o babay so omoy niyan na komiyasoy ko siti na pitero iyan ko manga taw roo a 29 “Onot kano raken na ilaya niyo so mama a pitero iyan raken so langon a miyanggolaola ko. Ba sekaniyan den so Al Masih?" 30 Giyoto a inawaan iran so siti na miyamanong ki Isa. 31 Samaoto na pesekaten o manga sokbat si Isa a tig iran a "Goro, kan ka den." 32 Tig iyan a "Aden a pangenengken a ken aken a di niyo katawan." 33 So kiyanega on o manga sokbat na miyamagisei siran a "Ba aden a miwit rekaniyan sa pangenengken?" 34 Tig i Isa a "Aya pangenengken aken na so katomana ko ko kabaya o somiyogo raken ago so kapasada ko ko galebek a inisangan iyan raken. 35 Ba kena a di niyo dii teroon a 'Pat pen olan a kakeoma o kaperagon?' Teroon ko rekano a langkaw kano na ilaya niyo so manga pangomaan! Miyamakatoa den so manga onga na kepakay den a peragonen. 36 So peperagon na pesokayan, na pepanimoon iyan raken so manga taw a pekakowa sa kaoyagoyag a da a kaposan iyan kaan makaperengarengan mababaya so peseod ago so peperagon. 37 Benar so pananaroon a 'Peseod so isa na peragon so ped.' 38 Siyogo aken sekano sa kaperagona niyo ko manga per a da niyo nggalebeka. So manga ped i minggagalebek on, na sekano i makaperagon ko miyanggalebek iran." 39 Na madakel ko manga Isamariyan sangkoto a siti a miyamaratiyaya ki Isa sabap ko katero o babay a "Pitero iyan raken so langon a miyanggolaola ko." 40 Sabap roo na kagiya mamakaoma so manga Isamariyan ki Isa na inakol iran on a komaden kiran pasin, na komiyaden roo sa miyakadowa gawii. 41 Na madakel pen a miyamaratiyaya rekaniyan kagiya maneg iran so manga katero iyan. 42 Pitero iran ko babay a "Miyaratiyaya kami den imanto a kena a ba sabap ko miyatero o ka, ka sekami den i miyakaneg ko katero iyan, na katawan ami a mataan den a sekaniyan so Pepanabet ko doniya!" 43 Kagiya mapopos so dowa gawii na miyawa roo si Isa na somiyong sa Galili. 44 (Si den si Isa i miyakatero sa 'So nabi na kena a ba pagaadati ko rek iyan a inged.) 45 Kagiya makaoma si Isa sa Galili na tiyarima sekaniyan o manga taw roo ka miyailay iran den so langon a pinggolaola niyan roo sa Yarosalim sii ko pista, ka miyakasong siran roo mambo. 46 Mandiyadi na komiyasoy si Isa sa Kana sii sa Galili a roo niyan miyabaloy so ig a arak. Na ndodoo so sakataw a olowan o gobirno a so wata iyan a mama na pekesakit roo sa Kapirnaom. 47 Kagiya maneg angkoto a olowan a miyakaoma si Isa sa Galili a poon sa Yodiya na somiyong sekaniyan ki Isa na inakol iyan on a somong sa Kapirnaom kaan iyan mapakapiya so wata iyan a pakapapatain. 48 Pitero rekaniyan i Isa a "O di niyo mailay so manga nanao ago manga piyakamemesa na di kano den peratiyaya!" 49 “Sir," a tig o olowan, "onot ka raken sa da pen kapatay o wata aken!" 50 Tig i Isa a "Baling ka, ka miyakabager den so wata a ka." Na miyaratiyaya so mama ko pitero on i Isa na miyaling. 51 Sii ko kapembaling iyan na inalaw sekaniyan o manga talasogoay niyan na piyanotol iran on a miyakabager den so wata a iyan. 52 Iniise iyan kiran o antonaa oras i kiyapakabager iyan na tig iran a "Kagai ko alaona na miyada on so panenggaw." 53 Na kiyatanodan o ama iyan a giyoto so oras a kiyateroa on i Isa sa "Miyakabager den so wata a ka." Sabap roo na miyaratiyaya sekaniyan ago so langon a ped iyan ko walay niyan. 54 Giyanan i ikadowa a nanao a pinggolaola i Isa kagiya makaoma sa Galili a poon sa Yodiya.

5

1 Oriyan ai na komiyasoy si Isa sa Yarosalim ka aden a pista roo o manga Yahodi. 2 Sii sa Yarosalim a marani ko gimowa a bebetowan 'Gimowa sa Bilibili,' na aden a papaigoay ron a bebetowan sa Bitsaida ko basa a Yahodi, na lima a pekesirongan a liyoliyowan ko melilibeta on. 3 Madakel a pepanga sasakit a kikaiiga roo, a manga bota, manga sadir ago manga mapaparalais a lawas iyan. 5 Ndodoo so isa a mama a pekesakit ko soled o telo polo ragon ago walo. 6 Miyailay sekaniyan i Isa a miiga roo na katawan iyan a miyatey den angkai a masosowa iyan, na iniise iyan on a "Kebaya ka makabager?" 7 Tig o pekesakit a "Sir, da a ba raken pekatago sangkanan a papaigoay igira a miyakolibog so ig on. Na igira a pepanamar ako ron somong na aden den a miyakaona raken tomepad." 8 Na pitero on i Isa a "Tindeg ka na awidi ngka so dempas ka na lalakaw ka!" 9 Sarta den a miyakabager so mama, na piyorot iyan so dempas iyan na lomiyalakaw. Minitabo ai ko Gawii a Idedeke. 10 Sabap roo na pitero o manga Yahodi ko a mama a miyapakabager a "Gawii imanto a Idedeke na da sa Kitab o ba ngka awidi so dempas ka." 11 Somimbag sekaniyan a "So mama a miyakapiya raken na pitero iyan raken a 'Awidi ngka so dempas ka na lalakaw ka.' " 12 Iniise iran a "Antawaa ngkai a mama a somiyogo reka sa awidi ngka so dempas ka na lalakaw ka?" 13 Ogaid na so taw a miyapiya na di niyan katawan o antawaa sekaniyan, ka miyawa roo si Isa sabap ko madakel a taw sangkoto a darpa. 14 Oriyan oto na minitoona sekaniyan i Isa ko Timplo na pitero rekaniyan i Isa a "Miyakapiya ka den imanto. Di ka den pendosa ka o ba baden aden pen a lebi a marata a keokitan ka." 15 Na lomiyalakaw so mama na pitero iyan ko manga Yahodi a si bes si Isa i miyakapiya rekaniyan. 16 Sabap sii na pipoonan somatro o manga Yahodi si Isa ka di niyan dii nggolaolaan angkai a manga galebek ko Gawii a Idedeke. 17 Na pitero kiran i Isa a "So Ama aken na lalayon dii nggalebek taman imanto na saken mambo na dii nggalebek." 18 Sabap sii na baden miyakala a kapepanamari o manga Yahodi sa kambonoa iran on, ka kagiya kena bo a ba giya kiyasogoka niyan ko Gawii a Idedeke, ka bitowan iyan pen so Allah sa Ama iyan, na giyoto i kiyabaloya niyan ko ginawa niyan a datar o Allah. 19 Na simbag siran i Isa a "Teroon ko rekano a mataan den a so Wata na da a ba niyan mapenggolaola a ba sekaniyan bo, ka aya niyan bo mapenggolaola so pekeilay niyan a dii nggolaolaan o Ama iyan. Ka apiya antonaa i dii nggolaolaan o Ama na aya mambo pesowaan o Wata. 20 So Ama na pekebabayaan iyan so Wata na pepakiilay niyan ko Wata so langon a di niyan dii nggolaolaan. Na pekiilay ron pen o Ama so lebi pen a manga ala a galebek a di giyai a kiyamasaan iyo den kaan kano pamemesa. 21 Ka datar o kapegoyaga o Ama ko miyamatay ago pembegan iyan siran sa kaoyagoyag na so mambo so Wata na pembegan iyan sa kaoyagoyag so kebayaan iyan megay. 22 So Ama na di niyan kokomen so apiya antawaa, ka inisarig iyan ko Wata so langon a kapengokom 23 Kaan mabantog o langon a taw so Wata a datar o kapembantoga iran ko Ama. So di pembantog ko Wata na di niyan mambo pembatogen so Ama a somiyogo rekaniyan. 24 “Teroon ko rekano a mataan den a so pepamakineg ko katero aken ago peparatiyaya ko somiyogo raken na aden a kaoyagoyag iyan a da a kaposan iyan. Na di sekaniyan den kesala, ka miyakatepas baden a poon ko kapapatay na sii ko kaoyagoyag. 25 “Teroon ko rekano a mataan den a pekatalingoma so masa ago miyakatalingoma den a keneg o miyamatay so sowara o Wata o Allah na penga ooyag so pemakineg on. 26 Datar o Ama a pekepoonan o kaoyagoyag na biyaloy niyan mambo so Wata iyan a pekepoonan o kaoyagoyag 27 Na bigan iyan pen sa kapaar sa kapengokom, ka sekaniyan so Wata o Manosiya. 28 Di niyo ai pememesan, ka pekatalingoma so oras a keneg o langon a miyamatay so sowara niyan 29 Na pemakaliyo siran ko manga kobor. Siran oto a miyakanggolaola sa mapiya na penga ooyag a pekakamal sa kaoyagoyag, na siran oto a miyakanggolaola sa marata na penga ooyag ago kesala. " 30 Da a ba ko mapenggolaola a ba saken bo. So kapengokom aken na datar bo o di raken dii teroon o Allah, na ontol so kapengokom aken ka aya antap aken na kena a ba so katomana ko kabaya aken ka so kabaya o somiyogo raken. 31 O saken bo i peseksi makapantag sa ginawa ko na so ipeseksi aken na di ketarima. 32 Ogaid na aden a ped a peseksi makapantag raken, na katawan aken a benar so iniseksi iyan makapantag raken. 33 Siyogo iyo so manga taw ki Yahiya na piseksian iyan so tito a benar. 34 Ogaid na di aken kailangan so kapeseksi o manosiya, ka aya bo a kiyaaloya ko sii na an kano manga sasabet. 35 Si Yahiya na datar o solo a tinteman ago pesindaw, na inikababaya iyo so sindaw niyan sa da matey. 36 Ogaid na aden a dii seksi makapantag raken a lawan pen ko kiyaseksii raken i Yahiya. So manga galebek a di aken dii nggolaolaan a inibegay raken o Ama aken sa kapasada ko ron na aya dii seksi makapantag raken sa so Ama i somiyogo raken. 37 Na so Ama a somiyogo raken na miyakaseksi mambo makapantag raken. Da niyo maneg so sowara niyan ago da niyo mailay so paras iyan, 38 Na so katero iyan na kena a ba madadalem rekano, ka di niyo peratiyayaan so siyogo iyan. 39 “Di niyo dii piyapiyaan mangadi so misosorat ko Kitab ka mapipikir iyo a nggolalan sii na kekowa niyo so kaoyagoyag a da a kaposan iyan. Giyanan den i manga Sorat a dii seksi makapantag raken, 40 Na apiya oto na minda kano raken somong kaan iyo makowa angkanan a kaoyagoyag. 41 “Da a kipantag raken o kapembantoga raken o manga taw. 42 Liyo ron pen na katawan aken so madadalem ko poso iyo. Katawan aken a kena a ba niyo pekebabayai so Allah. 43 Somiyong ako sii, sii ko ingaran o Ama aken na di ako niyo terimaan. Ogaid na o aden a song rekano sii ko rek iyan a ingaran na sekaniyan i terimaan iyo. 44 Kabaya iyo a pepodin kano o oman i isa rekano ogaid na di niyo penanamaran a podin kano o isaisa a Tohan. Kagiya ka maoto na andamanaya i kapakaparatiyaya niyo? 45 “Di niyo pipikira o ba saken i pendimanda rekano ko hadapan o Ama. Ka aden a di rekano dii ndimanda, a si Mosa a aya niyo sasarigan. 46 O benar a piyaratiyaya niyo si Mosa na peratiyayaan ako niyo mambo, ka inisorat iyan so makapantag raken. 47 Ogaid na kagiya da niyo paratiyayaa so inisorat iyan na andamanaya i kaperatiyayaa niyo ko manga katero aken?"

6

1 Oriyan oto na rominipag si Isa ko Ranaw a Galili (a aya den Ranaw a Tibiriyas). 2 Tanto a madakel a taw a tomiyondog rekaniyan ka miyailay iran so piyakamemesa a manga nanao a pinggolaola niyan ko kiyapakapiyaa niyan ko pepanga sasakit. 3 Tomiyakedeg si Isa ko bobongan na miyontod roo a ped iyan so manga sokbat iyan. 4 Sa masa oto na magaan den so Paska a pista o manga Yahodi. 5 Na lomiyangkaw si Isa na kagiya mailay niyan so miyakadakedakel a taw a pepamanong rekaniyan na tig iyan ki Pilipi a "Anda tano makapemasa sa paan a pekikan sangkai a madakel a taw?" 6 Pitero iyan ai ka tipengan iyan si Pilipi, ka katawan den i Isa o antonaa i penggolaolaan iyan. 7 Somimbag si Pilipi a "Apiya dowa gatos a pelata a pirak na di magetoon a ipemasa sa paan a apiya maito bo a pekikan ko oman i isa kiran." 8 Na so isa ko manga sokbat iyan, a si Andriyo a pagari i Simon Pidro, na tig iyan ki Isa a 9 “Aden a bago a mama sii a lima timan a paan iyan a bantad ago dowa a seda. Ogaid na antonaa i lalaw ai sii sangkai a madakel a taw?" 10 Tig i Isa a "Pakaontoda niyo so manga taw." Madakel a balili sangkoto a kaden, na miyamangontod so manga taw a aya kadakel iran na manga lima nggibo a manga mama. 11 Oriyan iyan na kinowa i Isa so paan na piyanalamatan iyan so Allah, na pimbagibagi iyan ko manga taw a moontod roo. Giyai mambo i inikidia niyan ko seda, na langon siran miyamakakan sa taman den sa kabaya iran. 12 Kagiya manga oosog siran na pitero iyan ko manga sokbat iyan a "Panimoa niyo so miyasama iran kaan da a ba on keolai." 13 Na piyanimo iran ai, na so miyasama o miyamakakan ko lima timan a paan a bantad na minipeno ko sapolo ago dowa a reban. 14 Kagiya mailay o manga taw sangkai a piyakamemesa a nanao a pinggolaola i Isa na pitero iran a "Matamataan a sekaniyan so nabi a song sii sa doniya!" 15 Miyasipat i Isa a songowan iran sekaniyan ago kapetan iran kaan iran mabaloy a dato iran, na giyoto a miyawa sekaniyan roo ka somiyong ko bobongan a da a ped iyan. 16 Kagiya merimon den na tomiyondagay so manga sokbat iyan ko ranaw 17 Na miyageda siran ko awang na mipoon siran romipag ko ranaw a song siran sa Kapirnaom. Ogaid na miyakaliboteng den na da siran pen masono i Isa. 18 Sa oras oto na tanto a mimbegel so ranaw ka pesember so mabager a ndo. 19 Kagiya makapora siran sa manga lima o di na nem ka kilomitro na miyailay iran si Isa a pelalakaw ko liyawaw a ig a pepakarani ko awang. Miyanga alek siran 20 Ogaid na pitero kiran i Isa a "Saken den! Di kano pekalek." 21 So kiyanega iran sii na miyababaya siran na piyakapageda iran si Isa ko awang, na sagogona a miyakadongko so awang ko darpa a pepegantapan iran. 22 Kagiya mapita na so madakel a taw a mitelimbagak ko sabala a ranaw na kiyatanodan iran a sasatiman bo a awang roo gowani ago da on makada si Isa a ped o manga sokbat iyan, ka tomiyolak siran a di iran ped. 23 Ogaid na aden a ped a manga awang a poon sa Tibiriyas a miyamakadongko den a marani ko darpa a kiyanan iran ko paan oriyan o kiyapanalamat o Kadnan. 24 Na kagiya mailay o manga taw a da roo si Isa taman ko manga sokbat iyan na miyamangeda siran sangkoto a manga awang na somiyong siran sa Kapirnaom ka pembanogen iran si Isa. 25 Kagiya matoon iran si Isa roo ko sabala a ranaw na iniise iran on a "Goro, anda i kiyapakaoma ngka sii?" 26 Pitero kiran i Isa a "Teroon ko rekano a mataan den a pepangilobaan ako niyo ka miyamakakan kano ko paan ago miyanga oosog a kena a ba sabap sa miyailay niyo so piyakamemesa a manga nanao. 27 Di niyo penamari so pangenengken a keredak, ka so pangenengken a ketatap sa taman sa pakataman a pepakabegay ko kaoyagoyag a da a kaposan iyan. Giyangkai a pangenengken na imbegay rekano o Wata o Manosiya, ka so Allah a Ama na migay rekaniyan sangkoto a kapaar." 28 Kagiya maneg iran ai na iniise iran ki Isa a "Antonaa i sowaan ami a aya mi kapenggolaolaa ko manga galebek a ipapaliyogat o Allah?" 29 Tig i Isa a "Giyai so galebek a ipapaliyogat rekano o Allah: paratiyayaa niyo so siyogo iyan." 30 Na iniise iran on a "O giyanan na antonaa a piyakamemesa a nanao i pekiilay ka rekami kaan ami mailay ago makaparatiyaya reka? Antonaa i sowaan ka? 31 So manga apo tano na mikekan sa roti roo ko mitataog a kaden a so den so misosorat ko kitab a 'Bigan iyan siran sa paan a ken iran a poon sa kasorgaan.' " 32 Tig i Isa a "Teroon ko rekano a mataan den a kena a ba si Mosa i migay rekano ko paan a poon sa kasorgaan, ka so Ama aken i pepamegay rekano sa tito a paan a poon sa kasorgaan. 33 Ka so paan a ipembegay o Allah na sekaniyan a pepekapanog a poon sa kasorgaan a pepamegay sa kaoyagoyag ko doniya." 34 Tig iran a "Sir, pembegi kami ngka lalayon sangkai a paan." 35 Pitero kiran i Isa a "Saken so paan a pepangoyag. Apiya antawaa i pesong raken na di den keor, na apiya antawaa i peparatiyaya raken na di den kewaw. 36 Ogaid na miyatero aken rekano den a apiya miyailay ako niyo na da ako niyo paratiyayaa. 37 So langon a ipembegay raken o Ama aken na song raken, na apiya antawaa i pesong raken na di aken den pekaawaan. 38 Ka miyanog ako sii a poon sa kasorgaan kaan aken mipenggolalan so kabaya o somiyogo raken, a kena a ba so rek aken a kabaya. 39 Na giyai i kabaya o somiyogo raken: a da den a ilangen aken ko langon a taw a inibegay niyan raken, ka pagoyagen aken siran peroman ko maori a alongan. 40 Ka giyai i kabaya o Ama aken, a so oman i isa a seboten iyan o antawaa so Wata ago peparatiyaya rekaniyan na kebegan sa kaoyagoyag a da a kaposan iyan, na pagoyagen ko sekaniyan peroman ko maori a alongan." 41 Kagiya maneg ai o manga Yahodi na piyanarotaroan iran si Isa sabap ko pitero iyan a "Saken so paan a miyanog a poon sa kasorgaan." 42 Na tig iran a "Ba kena a sekaniyan si Isa a wata i Yosop? Katawan tano si ama iyan ago si ina iyan. Ino niyan peteroa a miyanog sekaniyan a poon sa kasorgaan?" 43 Simbag siran i Isa a "Di kano pepanarotaro. 44 Da a sakataw bo a ba raken pekasong taman sa di matonda o Ama a somiyogo raken, na pagoyagen ko sekaniyan ko maori a alongan. 45 Misosorat sii ko Sorat o manga nabi a 'Langon a manosiya na pemangendaon o Allah.' Na so oman i pepamakineg ko Ama ago pepakasowa ko ipepangendao niyan on na pesong raken. 46 Ogaid na kena a ba aya maana ini na aden a miyakailay ko Ama, ka sekaniyan a poon ko Allah na aya bo miyakailay ko Ama. 47 “Teroon ko rekano a mataan den a so taw a peparatiyaya na aden a kaoyagoyag iyan a da a kaposan iyan. 48 Saken so paan a pepangoyag. 49 So manga apo iyo na komiyan sa roti roo ko mitataog a kaden, na apiya oto na miyamatay siran bo. 50 Ogaid na so paan a di aken dii teroon na giyoto so pepakapanog a poon sa kasorgaan kaan so apiya antawaa i pekakan on na di petay. 51 Saken so paan a pepangoyag a miyanog a poon sa kasorgaan. Apiya antawaa i pekakan sangkai a paan na pekeoyagoyag sa taman sa pakataman. Na so paan a imbegay aken na so sapo aken a imbegay aken kaan maoyag so doniya." 52 Kagiya maneg ai o manga Yahodi na mindadaowaiya siran a iniise iran a "Andamanaya i kimbegan rektano a mama ini ko sapo iyan a ken tano?" 53 Na pitero kiran a Isa a "Teroon ko rekano a mataan den a taman sa di kano koman ko sapo o Wata o Manosiya ago di maginom ko rogo iyan na da rekano so kaoyagoyag. 54 Apiya antawaa i pekan ko sapo aken ago peginom ko rogo aken na aden a kaoyagoyag iyan a da a kaposan iyan na pagoyagen ko sekaniyan ko maori a alongan. 55 Ka so sapo aken na aya tito a pangenengken, ago so rogo aken na aya tito a panginginomen. 56 So pekan ko sapo aken ago peginom ko rogo aken na tatap so kadadalem iyan raken, na tatap mambo a kadadalem aken rekaniyan. 57 Siyogo ako o oyagoyag a Ama na oyagoyag ako mambo sabap ko Ama, na datar oto mambo a so pekan raken na keoyag sabap raken. 58 Giyai i paan a miyanog a poon sa kasorgaan. Kena ini a ba datar o roti a kiyan o manga apo iyo a miyamatay bo, ka so pekan sangkai a paan na keoyagoyag sa taman sa pakataman." 59 Pitero ai i Isa sii ko kapepangendao niyan sii ko sinagoga sa Kapirnaom. 60 Madakel ko manga sokbat iyan a miyamakaneg sii a tig iran a "Maregen a kakesabota sangkai a katero iyan. Antawaa i pekatarima on?" 61 Na apiya da rekaniyan matero na katawan i Isa a dii manarotaro so manga sokbat iyan makapantag ko katero iyan, na pitero iyan kiran a "Ba inikada ini o sarig iyo raken? 62 Antonaa i mapemikir iyo o mailay niyo so Wata o Manosiya a kesoy sa poro ko kakadenan iyan gowani? 63 Aya pepamegay sa kaoyagoyag na so Roh. So sapo na di niyan ai kegaga. So manga katero a miyatero aken rekano na aya pepamegay sa kaoyagoyag sii ko niyawa. 64 Ogaid na aden a ped rekano a di pemaratiyaya." (Pitero ai i Isa ka ipoon sa poonan na katawan iyan o antawaa kiran i di pemaratiyaya ago antawaa i tipo rekaniyan.) 65 Na tig iyan pen a "Giyanan i sabap a pitero aken rekano a da a ba raken pekasong o di bo perowa o Ama." 66 Sabap sangkai a manga katero i Isa na madakel ko manga sokbat iyan a miyawa rekaniyan na da on den magonotonot peroman. 67 Na giyoto a iniise i Isa ko sapolo ago dowa a sokbat a "Ba kano kebaya a magawa mambo?" 68 Somimbag si Simon Pidro a "Kadnan, antawaa i kapegapasan ami? Sisii reka so manga katero a pepamegay sa kaoyagoyag a da a kaposan iyan. 69 Na sasarigan ami ago katawan ami a seka so Soti a Siyogo o Allah." 70 Na pitero kiran i Isa "Ba kena a saken i miyamili rekano a sapolo ago dowa? Ogaid na kaiiblisan so isa rekano." 71 Aya piyakailatan iyan na si Yodas a wata i Simon Iskariyot, ka apiya pen isa sekaniyan ko sapolo ago dowa a sokbat na aya den tipo ki Isa.

7

1 Kagiya maipos ai na miyagenebeneb si Isa sii sa Galili. Di niyan kabaya o ba lalakaw roo sa Yodiya ka kagiya kekadiyaten o manga Yahodi roo a kambonoa iran on. 2 Sa masa oto na magaan den so pista o manga Yahodi a bebetowan sa 'Pista ko manga Lawig.' 3 Sabap san na so manga pagari i Isa a manga mama na pitero iran on a "Patot a awa ka sii na song ka sa Yodiya kaan mailay o manga sokbat ka so manga piyakamemesa a di ngka dii nggolaolaan. 4 Ka da a ba dii nggalebek sa masolen o kabaya iyan a mbaloy a kikilalaan. O di ngka dii nggolaolaa angkai a manga ala a galebek na payaga ngka a ginawa ngka ko dalem a doniya." 5 Ka apiya so manga pagari niyan na da iran sekaniyan paratiyayaa. 6 Pitero kiran i Isa a "Da pen maoma so oras aken. Apiya antonaa oras na keparoan rekano. 7 Di kano kikagowad o doniya. Ogaid na ipekegowad ako niyan ka pepamataanan aken a manga rarata so manga galebek iyan. 8 Song kano roo ko pista. Di ako pen song sangkai a pista ka da pen maoma so osto a oras aken." 9 Na kagiya matero ai kiran i Isa na mitelimbagak sa Galili. 10 Ogaid na kagiya makasong den so manga pagari niyan ko pista na somiyong roo mambo si Isa, ogaid na kena a ba marayag a kiyalalakaw niyan ka pageemaan. 11 So manga olowan a manga Yahodi na di ran dii mbanogen si Isa roo ko pista a ipepangingise iran o anda sekaniyan, 12 Na aden a madakel a taw a dii mamagtonga makapantag rekaniyan. So ped na tig iran a "Mapiya sekaniyan a mama," ogaid na tig o manga ped a "Kena, ka ba niyan baden peselibaa so manga taw." 13 Ogaid na da a ba dii tero sa marinayag makapantag rekaniyan ka ipekelek iran so manga olowan o manga Yahodi. 14 Sii ko kiyalooki ko pista na somiyong si Isa ko Timplo na miyangendao. 15 Na tanto a miyamemesa so manga olowan o manga Yahodi a tig iran a "Andamanaya i kiyapakasowa a mama ini sangkai a mala a katao a da sekaniyan mapangendao o manga goro tano?" 16 Somimbag si Isa a "So ipepangendao aken na kena a ba ko rek, ka poon ko somiyogo raken. 17 Apiya antawaa i kebaya nggolaola ko kabaya o Allah na ketokawan iyan o ba so ipepangendao aken na poon ko Allah o di na ba saken i mbayabaya ko di aken dii katero. 18 So dii mbayabaya ko di niyan dii katero na pepanamaran iyan so rek iyan a bantogan. Ogaid na so pepanamar ko bantogan o somiyogo rekaniyan na benar sekaniyan a da a ba on kapamokeg. 19 Ba di si Mosa i migay rekano ko Kitab? Ogaid na da den a isa rekano bo a ba on petoman. Ino niyo pananamari a kambonoa niyo raken?" 20 Somimbag so madakel a taw a "Sosookan ka a saitan! Antawaa i mananamar sa kambonoa niyan reka?" 21 Pitero kiran i Isa a "Satiman bo a mala a galebek a pinggolaola ko na inipamemesa niyo langon. 22 Ogaid na inisogo rekano i Mosa so kapanoria niyo ko manga wata iyo, na sabap sii na petoriin iyo siran apiya pen Gawii a Idedeke. (ogaid na aya benar na kena ini a ba poon ki Mosa ka poon ko manga apoapoan iyo), 23 Na o kepakay a toriin so isa a wata ko Gawii a Idedeke kaan di kesogok so Kitab o Mosa na ino ako niyo kerarangiti sabap ko kiyapakapiyaa ko ko langon o lawas o mama ko Gawii a Idedeke? 24 Di kano pengokom a ipepasod ko pekeilay niyo, ka ipepasod ko ontol a kokoman." ? 25 Iniise o ped a taw sa Yarosalim a "Ba di sekaniyan so mama a kebayaan iran mono? 26 Ilaya niyo man ka pepangosiyat sekaniyan ko hadapan o madakel a taw na da den a ba iran on dii teroon! Ba mataan den a katawan o manga olowan a sekaniyan so Al Masih? 27 Ogaid na katawan tano o anda poon a mama ini, na amay ka makaoma so Al Masih na da a ba matao o anda sekaniyan poon." 28 Na sii ko kapepangendao i Isa ko Timplo na pitero iyan sa matanog a "Ba mataan a katawan ako niyo ago katawan iyo o anda ako poon? Kena a ba saken i miyakambayabaya ko kiyasong aken sii. So somiyogo raken na benar, na di niyo sekaniyan katawan. 29 Ogaid na katawan aken sekaniyan ka poon ako rekaniyan, na sekaniyan i somiyogo raken." 30 So kiyateroa sii i Isa na tipengan iran sekaniyan domakep, ogaid na da a ba on miyakaseko, ka da pen maoma so oras iyan. 31 Apiya pen oto na madakel a manga taw ko malilimod a miyaratiyaya rekaniyan a tig iran a "Amay ka makaoma so Al Masih na di sekaniyan mangaday penggolaola sa madakel pen a manga piyakamemesa a di so miyanggolaola angkai a mama!" 32 Miyaneg o manga Parisi so madakel a taw a di ran ai dii pamagtonga makapantag ki Isa. Sabap san na siran ago so manga poporo a imam na somiyogo sa manga gordiya a ndakep ki Isa. 33 Pitero i Isa a "Di bo matey a kasisii aken rekano pen na go ako bo kesoy ko somiyogo raken. 34 Pembabanogen ako niyo ogaid na di ako niyo ketoon, na so ketagoan raken na di kano ron pekasong." 35 Na mimbibitiyarai so manga Yahodi a tig iran a "Anda bes song angkai a mama a di tano ron ketoon? Ba song sekaniyan ko babalingan o manga Yahodi a mipaparak ko manga siti sa Grisiya ago roo sekaniyan pepangendao ko manga Grigo? 36 Antonaa i maana o pitero iyan a 'Pembabanogen ako niyo ogaid na di ako niyo ketoon ago di kano pekasong ko ketagoan raken?' " 37 Na sii ko kaposan a gawii ko pista a aya mala a gawii na tominindeg si Isa na pitero iyan sa matanog a "O pekewaw ka na song ka raken ago inom! 38 So peparatiyaya raken, a so den so pitero o Kitab, na poon sa dalem a ginawa niyan na pembowalan on so manga lawasaig a pepangoyag a ig." 39 Giyangkai a pitero iyan na makapantag ko Roh a magaan den matarima o siran oto a pepamaratiyaya ki Isa. Sa masa oto na da pen mibegay so Roh, ka da pen kabantogi si Isa. 40 Kagiya maneg o manga taw roo angkai a manga katero i Isa na tig o ped kiran a "Mataan den a giyangkai a mama na so Nabi." 41 Pitero o manga ped a "Sekaniyan so Al Masih." Ogaid na tig o ped a "Kena bes a ba pekapoon so Al Masih sa Galili? 42 Ba kena a pitero o Kitab a so Al Masih na kiyababadan ki Daod ago roo ipembawata sa Bitlihim a so siti o Daod?" 43 Na miyabagi so manga taw sabap ki Isa. 44 So ped kiran na kebayaan iran sekaniyan domakep ogaid na da a ba on miyakaseko. 45 So peman so manga gordiya a piyakasong ki Isa na komiyasoy siran ko manga poporo a imam ago so manga Parisi. Na iniise iran ko manga gordiya a "Ino niyo sekaniyan da sii wita?" 46 Somimbag so manga gordiya a "Da den pen a taw a miyakatero a ba datar angkoto a mama!" 47 Somimbag so manga Parisi a "Ba kano niyan mambo miyaakal? 48 Ba aden a isa ko manga olowan o di na manga Parisi a miyaratiyaya rekaniyan? 49 Da den, ka so bo so madakel oto a taw a di manga tatao ko Kitab. Na inisinta siran baden o Allah!" 50 Na si Nikodimos, a miyakasong gowani ki Isa, na isa sangkoto a manga olowan, na pitero iyan kiran a 51 “Kabasa o Kitab a di tano kekokom so apiya antawaa sa da tano ron pen kapemakinega ago kapariksaa ko miyanggolaola niyan." 52 Somimbag siran a "Ba ka poon mambo sa Galili? Paganadi ngka so Kitab na ketokawan ka a da a nabi a ba pekapoon sa Galili." 53 Oriyan oto na mimbabaling siran langon.

8

1 Ogaid na somiyong si Isa ko Palaw a Olibi. 2 Teked a kapipita na komiyasoy sekaniyan ko Timplo. Mitimotimo on so manga taw na miyontod sekaniyan ago miyangendao. 3 Sii ko di niyan dii katero na so manga goro ko Kitab ago so manga Parisi na miyowit siran on sa babay a miyatibowa a dii sina, na piyakaadap iran ko manga taw. 4 Na pitero iran ki Isa a "Goro, giyangkai a babay na miyatibowa a dii sina. 5 Sii ko Kitab tano na inisogo o Mosa a so datar ai a babay na perobakan a ator taman sa matay. Antonaa den i mapetero o ka?" 6 Pitero iran ai ka petepengan iran sekaniyan kaan iran midimanda. Ogaid na baden tominikoro si Isa na inisorat iyan a tindoro iyan ko lopa. 7 Na sii ko kipetarosen iran ko kapepangingisei ran on na tominindeg si Isa a tig iyan kiran a "Apiya antawaa rekano i da den makandosa na aya niyo ron pakaonaa lomebad sa ator." 8 Na tominikoro peroman si Isa na misorat ko lopa. 9 Kagiya maneg iran ai na misekataw siran roo mamangawa a aya miyaona na so manga lokes, na aya roo bo minibagak si Isa ago so babay. 10 Tominindeg si Isa na pitero iyan on a "Anda siran den, Babay? Ba da a miyalamba kiran a ndaneg reka?" 11 Tig o babay a "Da, Sir"..... Na tig i Isa a "Saken mambo na di aken seka ndanegen. Lalakaw ka den na di ka den pendosa peroman." 12 Na pitero peroman i Isa ko madakel a taw a "Saken i solo o doniya. So pegonot raken na di den pekalalakaw ko maliboteng ka ndodon so solo a pepangoyag." 13 Pitero rekaniyan o manga Parisi a "Seka bo i dii seksi makapantag ko ginawa ngka; so di ngka dii teroon na di ketarima." 14 Tig i Isa a "Apiya pen saken i dii seksi makapantag ko ginawa ko na benar so di aken dii teroon, ka katawan aken o anda ko poon ago anda ko song. Ogaid na sekano na di niyo katawan o anda ko poon o di na anda ko song. 15 So kapepangokom iyo na ipepasod ko kamamanosiyai a kokoman. Kena a ba ako dii kokom ko apiya antawaa. 16 Ogaid na o kokom ako na so ikokom aken na benar, ka kena a ba saken bo i pengokom, ka saken ago so Ama a somiyogo raken. 17 Misosorat ko Kitab iyo a igira a miyagayon so dowa a saksi na ketarima so ipeseksi iran. 18 Saken so isa a dii seksi makapantag ko ginawa ko, na so Ama a somiyogo raken na di mambo dii seksi makapantag raken." 19 Iniise iran rekaniyan a "Anda bes so Ama a ka?" Somimbag si Isa a "Di ako niyo katawan aya pen so Ama aken. O katawi ako niyo na katawan iyo mambo so Ama aken." 20 Pitero ini langon i Isa sii ko kapepangendao niyan roo ko Timplo sii ko darpa a katatagoan ko baitalmal. Na da a ba on domiyakep ka da pen maoma so oras iyan. 21 Pitero kiran peroman i Isa a "Magawa ako na pembabanogen ako niyo, na pematay kano a da karilai so manga dosa niyo. Di kano pekasong ko songowan aken." 22 Na miyamagisei so manga Yahodi a tig iran a "Ba sekaniyan pegeget? Ba giyanan i sabap a pitero iyan a di tano pekasong ko songowan iyan?" 23 Simbag siran i Isa a "Sekano na poon sa baba; saken na poon sa poro. Sekano na ped sangkai a doniya; saken na kena a ba ped sangkai a doniya. 24 Pitero aken rekano a pematay kano a da karilai so manga dosa niyo; o di niyo peratiyayaa a saken so miyatero aken o antawa ako, na mataan den a pematay kano a da karilai so manga dosa niyo." 25 Na iniise iran on a "Antawaa ka bes? Tig i Isa a "Saken so miyatero aken rekano ipoon den sa poonan. 26 Madakel pen a mapetero aken a kikokom rekano. Ogaid na benar so somiyogo raken, na aya bo a di aken dii teroon sii sa doniya na so miyaneg aken a miyatero iyan." 27 Na da iran sabota a aya di kiran dii teroon i Isa na makapantag ko Ama iyan. 28 Na pitero kiran pen i Isa a "Amay ka mitongkol iyo so Wata o Manosiya na ketokawan iyo a saken so miyatero aken o antawa ako, na da a ba ko dii nggolaolaan a saken i di ron dii mbayabaya, ka aya bo a di aken dii teroon na so inipangendao raken o Ama. 29 So somiyogo raken na mipageepeda aken. Da ako niyan ndarainonen a makambibisa, ka lalayon aken dii nggolaolaan so ikasosoat iyan." 30 Na sii ko di sii dii kateroa i Isa na madakel a miyamaratiyaya on. 31 Pitero i Isa ko manga Yahodi a miyamaratiyaya rekaniyan a "O petomana niyo so manga ndao aken na mataan a manga sokbat aken sekano. 32 Ketokawan iyo so tito a benar, na so tito a benar na aya rekano pekabalokas." 33 Somimbag siran a "Manga kiyababadan kami ko Ibrahim na da kami den mapangongoripen o apiya antawaa. Antonaa i maana o pitero o ka a kebalokasan kami?" 34 Tig i Isa a "Teroon ko rekano a mataan den a oman i dii ndosa na oripen o dosa. 35 So oripen na kena a ba lalayon maaped ko pamiliya, ogaid na so wata na ped on den sa taman sa pakataman. 36 Sabap san na o kabalokasi kano o Wata na kebalokasan kano den. 37 Katawan ko a manga kiyababadan kano ko Ibrahim. Apiya pen oto na pepanamaran iyo a kambonoa niyo raken, ka di niyo terimaan so ndao aken. 38 Di aken dii teroon so piyayag raken o Ama aken, ogaid na aya niyo dii nggolaolaan na so miyatero rekano o ama iyo." 39 Somimbag siran a "Si Ibraham na aya mi ama." Tig i Isa a "O benar a manga wata kano o Ibrahim na penggolaolaan iyo so datar o pinggolaola niyan. 40 Ogaid na imanto na pepanamaran iyo a kambonoa niyo raken, a saken so mama a miyakatero rekano ko tito a benar a miyaneg aken a poon ko Allah. Da a pinggolaola o Ibrahim a datar ai. 41 Pesowaan iyo so manga galebek o ama iyo." Somimbag siran a "Kena a ba kami manga wata sa di kawing. Isaisa bo a ama ami a so den so Allah." 42 Pitero kiran i Isa a "O so Allah i ama iyo na pekebabayaan ako niyo o kowan, ka miyakapoon ako ko Allah na sisii ako den imanto. Kena a ba saken i miyakambayabaya ko kiyasong aken sii, ka sekaniyan i somiyogo raken. 43 Ino niyo di sebota so di aken dii teroon? Aya sabap ai na di niyo keraw i ba niyo peterimaa so manga katero aken. 44 Rek kano o ama iyo a so Iblis, na kebayaan iyo tomoman so manga kabaya o ama iyo. Talibono sekaniyan ipoon sa poonan. Da niyan den pamayandegen so tito a benar, ka da rekaniyan so benar. Igira a pepemokeg sekaniyan na di niyan dii teroon so pepekapoon ko parangay niyan, ka bokeg sekaniyan ago ama o langon o manga kabokegan. 45 Ogaid na saken na di aken dii teroon so tito a benar, na giyanan i sabap a di niyo raken kaperatiyayaa. 46 Antawaa rekano i mipemataan iyan a miyakandosa ko? O aya ko dii teroon na so tito a benar na ino ako niyo di peratiyayaa? 47 Apiya antawaa i rek o Allah na pepamakinegen iyan so manga katero o Allah. Ogaid na kena a ba kano rek o Allah, na giyanan i di niyo kapemakineg." 48 Simbag o manga Yahodi si Isa a "Ba di benar so pitero ami a Isamariyan ka ago sosookan a saitan?" 49 Somimbag si Isa a "Kena a ba ako sosooki a saitan, ka pagaadatan aken so Ama aken, ogaid na kena a ba ako niyo pagaadati. 50 Kena a ba ko kabaya a pembantogen ako. Aden a kebaya sii, na sekaniyan i pekakokom on. 51 Teroon ko rekano a mataan den a apiya antawaa i petoman ko katero aken na di den pekaokit sa kapatay." 52 Na pitero rekaniyan o manga Yahodi a "Imanto na katawan ami a sosookan ka a saitan! Miyatay so Ibrahim, na miyamatay mambo so manga nabi, ogaid na pitero o ka a apiya antawaa i petoman ko katero o ka na di den pekatintim ko kapatay. 53 Ba ka lawan pen ko ama ami a Ibrahim a miyatay den? Na miyamatay mambo so manga nabi. Antawaa ka bes ko kapipikira ngka on?" 54 Tig i Isa a "O bantoga ko a ginawa ko na da a bali o bantogan aken. Aya pembantog raken na so Ama aken, a so pitero iyo a Tohan iyo. 55 Apiya oto na di niyo sekaniyan katawan, ogaid na katawan ko sekaniyan. O teroa ko a di aken sekaniyan katawan na makapemokeg ako a lagid iyo. Ogaid na katawan ko sekaniyan ago petomanen aken so katero iyan. 56 So ama iyo a si Ibrahim na tanto a miyababaya sii ko kaiinama niyan ko kakeilaya niyan ko gawii a kasong aken sii. Na miyailay niyan na miyakapiya a ginawa niyan." 57 Na pitero rekaniyan o manga Yahodi a "Da pen malima polo ragon a idad ka, na miyailay ngka bes si Ibrahim?" 58 Tig i Isa a "Teroon ko rekano a mataan den a sa da pen kimbawataan ko Ibrahim na kapapantagan ako den" 59 Kagiya maneg ai o manga Yahodi na miyamorot siran sa manga ator a iperobak iran on. Ogaid na rominirong si Isa na inawaan iyan so Timplo.

9

1 Sii ko kapelalakaw i Isa na miyailay niyan so mama a mabobota ipoon ko kinimbawataan on. 2 'So manga sokbat iyan na iniise iran on a "Goro, antawaa i miyakandosa a kiyasabapan ko kabobota niyan isako imbawata? Sekaniyan den, o di na so manga lokes iyan?" 3 Somimbag si Isa a "Kena a ba sekaniyan i miyakandosa o di na so manga lokes iyan. Inimbawata sekaniyan a bota kaan mapayag so galebek o Allah a nggolalan ko keokitan iyan. 4 Disomala a nggolaolaan tano so manga galebek o somiyogo raken sii ko kadadaondaw niyan pen, ka pekatalingoma so kagagawii a da den a ba makapenggalebek. 5 Sii pen ko kasisii aken sa doniya na saken i solo o doniya." 6 Kagiya matero ai i Isa na domiyoda ko lopa, na inibonaw niyan ko bote so ayog iyan na inisising iyan ai ko mata ngkoto a mama. 7 Na pitero iyan on a "Ika roo den na panagop ka sii ko Papaigoay sa Silowam," (aya maana ngkai a ngaran na 'Siyogo.') Na somiyong on so mama na miyanagop on na komiyasoy a pepakailay den. 8 Mandiyadi na so manga siringan iyan ago so miyamakailay ron gowani ko kapepamangni niyan na iniise iran a "Ba kena a giyai so mama a kaoontod bo den a dii mamamangni?" 9 Tig o manga ped a "Sekaniyan den." So ped na tig iran a "Kena, ka datar iyan baden sa paras." Ogaid na pitero o pepamangni a "Saken den so mama." 10 Na iniise iran on a "Andamanaya i kiyapakapiya o manga mata ngka?" 11 Inisembag iyan a "So mama a bebetowan sa Isa na miyonaw sa bote na inisising iyan ai ko manga mata ko, na pitero iyan raken a 'Song ka roo sa Silowam na panagop ka on.' Na somiyong ako roo na kagiya makapanagop ako na miyakailay ako den." 12 Iniise iran a "Anda den sekaniyan?" Tig iyan a "Di aken katawan. 13 Mandiyadi na inowit iran ko manga Parisi so mama a mabobota gowani. 14 Gawii oto a Idedeke ko kiyabonaw i Isa sa bote ago so kiyapakapiyaa niyan ko manga mata o bota a mama. 15 Na iniise rekaniyan mambo o manga Parisi o andamanaya i kiyapakailay niyan. Tig iyan a "Sinisingan iyan sa bote a manga mata ko, na miyanagop ako na sarta a miyakailay ako den." 16 So ped ko manga Parisi na tig iran a "Giyangkoto a mama a minggolaola sii na kena a ba poon ko Allah, ka di niyan petomanen so Kitab mipantag ko Gawii a Idedeke." Ogaid na tig o manga ped a "Andamanaya i kapenggolaolaa o baradosa ko piyakamemesa a manga nanao a datar ai?" Na sabap sii na miyabagi siran. 17 Giyoto a inisean iran peroman so mama a "Pitero o ka a piyakapiya niyan so manga mata ngka; o benar ai na antonaa i mapetero o ka mipantag rekaniyan? Na tig o mama a "Nabi sekaniyan." 18 Ogaid na da paratiyayaa o manga olowan o manga Yahodi a ba mabobota gowani so mama ago miyakailay den taman sa piyakitawag iran so manga lokes iyan. 19 Na iniise iran kiran a "Ba giyai so wata iyo a mama a pitero iyo a mabobota isako imbawata? Andamanaya i kapepakailay niyan imanto?" 20 Somimbag so manga lokes iyan a "Katawan ami a giyai so wata ami ago mabobota isako imbawata. 21 Ogaid na di ami katawan o andamanaya i kapepakailay niyan imanto, o di na antawaa i miyakapiya ko manga mata niyan. Iseen iyo ron; matoa den sekaniyan na pekasembag mipantag sa ginawa niyan." 22 Pitero ini o manga lokes iyan ka ipekelek iran so manga Yahodi, ka miyakapagayonayon siran sa apiya antawaa i peteroon iyan a si Isa na so Al Masih na pekaawaan ko sinagoga. 23 Giyanan i sabap a kiyateroa o manga lokes iyan sa "Matoa sekaniyan den. Isei niyo baden." 24 Na tiyawag iran peroman so mama a inimbawata a bota na pitero iran on a "Sii ko hadapan o Allah na teroa ngka so benar! Katawan ami a so mama a miyakapiya reka na baradosa." 25 Somimbag so mama a "Di aken katawan o ba baradosa ago so di. Aya bo a katawan ko na bota ako gowani, na pepekailay ako imanto." 26 Iniise iran on a "Antonaa i inikidia niyan reka? Andamanaya i kiyapakapiyaa niyan ko manga mata ngka?" 27 Somimbag sekaniyan a "Miyatero aken rekano den na da niyo paratiyayaa. Ino niyo kebayaan mamakineg peroman? Ba niyo kabaya a mabaloy kano mambo a manga sokbat iyan?" 28 Na giyoto a piyagongatongat iran sekaniyan a tig iran a "Seka i sokbat angkoto a mama, ogaid na manga sokbat kami o Mosa! 29 Katawan ami a miyakimbitiyarai so Allah ki Mosa, ogaid na si aki ini na apiya so poonan iyan na di ami katawan." 30 Pitero o mama a "Sayana ini a piyakamemesa! Apiya niyan pen piyakapiya a manga mata ko na di niyo katawan o anda sekaniyan poon! 31 Katawan tano a di pagamponen o Allah so pangni o manga baradosa, ogaid na so taw a pesimba rekaniyan ago dii nggolaola ko kabaya iyan na aya niyan pegamponen. 32 Ipoon ko kiyaadena ko doniya na da den miyaneg a ba aden a miyakabekar ko manga mata o mama a inimbawata a bota. 33 O giyangkai a mama na kena a ba poon ko Allah na da a ba niyan mapenggolaola." 34 Somimbag siran a "Mitataralo so di ngka dii kambaradosa ipoon ko kinimbawataan reka, na petepengan kami ngka bes mangendao?" Na biyogaw iran poon ko sinagoga. 35 Kiyatokawan i Isa a piyakaawa iran so mama ko sinagoga, na kagiya matoon iyan sekaniyan na tig iyan a "Ba ka peparatiyaya ko Wata o Manosiya?" 36 Somimbag so mama a "Antawaa sekaniyan, Sir? Teroa ngka raken kaan aken sekaniyan maparatiyaya." 37 Tig i Isa a "Miyailay ngka den, ka sekaniyan so di reka dii makimbitiyarai imanto." 38 Na pitero o mama a "Peparatiyaya ako, Kadnan!" Na taros a sinimba iyan si Isa. 39 Pitero i Isa a "Somiyong ako sangkai a doniya ka kokomen aken kaan mamakailay so manga bota, ago an manga bobota so pepamakailay." 40 So ped ko manga Parisi a ndodoo a ped iyan na miyaneg iran so kiyateroa niyan sii, na iniise iran ki Isa a "Ba ngka dii teroon a manga bota kami mambo?" 41 Tig i Isa a "Opama ka manga bota kano na da a kasalaan iyo. Ogaid na sabap sa di niyo dii teroon imanto a pepekailay kano na lalayon rekano pen so kasalaan iyo."

10

1 "Teroon ko rekano a mataan den a so taw a di magokit ko pintoan ko kasoled iyan ko kodal o manga bilibili, ka baden pemanik ko salakaw a pagokitan, na tekaw sekaniyan ago tanganiyaya. 2 Ogaid na so pesoled on a pegokit ko pintoan na giyoto so tomatagikor ko manga bilibili. 3 Sekaniyan i pelekaan o petemeng ko pintoan, na pepamakinegen o manga bilibili so sowara iyan. Ipepananalo niyan so oman i ngaran o rek iyan a manga bilibili na pegagaken iyan siran sa liyo. 4 Amay ka mapakaliyo niyan so langon a rek iyan a manga bilibili na magona sekaniyan kiran, na petondogen sekaniyan o manga bilibili ka katawan iran so sowara niyan. 5 Di siran den tondog ko salakaw a tomatagikor; pelagoyan iran sekaniyan baden, ka di iran kekilala so sowara o salakaw a taw." 6 Giyai so bayambayanan a piyanotol kiran i Isa, ogaid na da iran sabota so maana o di niyan kiran dii teroon. 7 Kagiya ka maoto na pitero peroman i Isa a "Teroon ko rekano a mataan den a saken so pintoan a pegokitan o manga bilibili. 8 So langon o somiyong sii a miyaonaan aken na manga tekew ago manga tanganiyaya, ogaid na da kiran pamakineg so manga bilibili. 9 Saken so pintoan. Apiya antawaa i soled a magokit raken na kesabet. Na somoled sekaniyan lomiyo a pepekatoon sa kapenateban iyan. 10 So tekew na aya bo a kapekaoma niyan na an makapamanekew, makapamamono ago makapaminasa. Miyakaoma ako kaan kabegi so manga taw sa kaoyagoyag, a so kaoyagoyag a matatarotop piyapiya. 11 “Saken so mapiya a tomatagikor ko manga bilibili. So mapiya a tomatagikor ko manga bilibili na iperila iyan so kaoyagoyag iyan para bo ko manga bilibili. 12 So matag pesokayan, a kena a ba tomatagikor o di na kirek ko manga bilibili, na amay ka mailay niyan so maila a aso a pegantap kiran na pagawaan iyan so manga bilibili na pelagoy. Na pesikemen o aso so manga bilibili na pakapembelabelagen iyan siran. 13 So pesokayan na pelagoy ka matag sosokayan a di niyan tatagoon sa ginawa so manga bilibili. 14 “Saken so mapiya a tomatagikor ko bilibili. Katawan aken so manga bilibili aken na katawan ako iran mambo 15 A datar o Ama a katawan ako niyan ago katawan aken so Ama. Na iperila aken so kaoyagoyag aken para ko manga bilibili. 16 Aden a ped a manga bilibili aken a kena a ba matatago sangkai a tangkal a bilibili. Disomala a agaken aken siran mambo, na pemakinegen iran so sowara ko. Na keisaisa so talon a bilibili a isaisa a tomatagikor kiran. 17 “Pekebabayaan ako o Ama ka iperila aken so kaoyagoyag aken kaan aken makowa peroman. 18 Da a taw a ba niyan raken mabelag so kaoyagoyag aken, ka iperila aken a saken bo i di on dii mbayabaya. Aden a kapaar aken sa kiperilaan ko ko kaoyagoyag aken, ago aden pen a kapaar aken sa kakowaa ko ron peroman. Giyai i inisogo raken o Ama aken." 19 Na miyabagi peman so manga Yahodi sabap sangkai a manga katero i Isa. 20 Madakel kiran a dii tero sa "Sosookan sekaniyan a saitan ago pembetengen! Ino niyo pemakinega?" 21 Ogaid na tig o manga ped a "Kena a ba ini katero o taw a sosookan. Ba mapekapiya o saitan so manga mata o bota?" 22 Riyaot so pista a kapeselaselaa ko kiyasotiya ko Timplo roo sa Yarosalim. Giya masa oto na panenggaw, 23 Na dii ndalakaw si Isa sii ko Timplo ko darpa a bebetowan sa 'Liyoliyowan o Solaiman.' 24 Pitimoan sekaniyan o manga Yahodi na pitero iran on a "Ay katey a kaalangalanga ngka ko pamikiran ami? O seka so Al Masih na teroa ngka rekami sa da den a pageemaan on." 25 Tig i Isa a "Miyatero aken rekano den ogaid na da ako niyo paratiyayaa. So manga galebek a di aken dii nggolaolaan sii ko ingaran o Ama aken na aya dii seksi makapantag raken. 26 Ogaid na di kano peratiyaya ka kagiya kena a ba kano ped ko manga bilibili aken. 27 Pepamakinegen o manga bilibili aken so sowara ko. Katawan aken siran na petondogen ako iran. 28 Pembegan aken siran sa kaoyagoyag a da a kaposan iyan na di siran den pekanaraka. Na da a ba kiran pekaagaw ko katatangana ko kiran. 29 So Ama aken a aya migay kiran sii raken na lawan ko kalangolangon. Na da a ba kiran pekaagaw ko katatangana kiran o Ama. 30 Saken ago so Ama na isaisa bo." 31 Na miyamorot peroman so manga Yahodi sa manga ator a iperobak iran ki Isa, 32 Ogaid na pitero iyan kiran a "Piyakiilay aken rekano so madakel a manga pipiya a galebek a inibegay raken o Ama a penggolaolaan ko. Anda sangkai a manga galebek i kesabapan ko kaperobaki niyo raken?" 33 Somimbag so manga Yahodi a "Kena a ba sabap ko mapiya a galebek ka a kaperobaki ami reka ka sabap sa piyagitowito o ka so Allah. Ka apiya pen matag ka manosiya na di ngka dii teroon a seka na Tohan." 34 Na pitero kiran i Isa a "Ba di misosorat ko Kitab iyo a pitero o Allah a 'Manga Tohan kano'? 35 Siran oto a kiyatoronan ko katero o Allah na bitowan iyan sa manga tohan, na di den keribat so Kitab. 36 Kagiya ka maoto na ino niyo peteroa a saken a pinili o Ama ago siyogo iyan sii sa doniya na miyagitowito ko Allah ko kiyateroa ko sa 'Saken so Wata o Allah'? 37 Di patot o ba ako niyo paratiyayaa o kena a ba ko pesowaa so manga galebek o Ama aken. 38 Ogaid na o pesowaan ko ini na apiya pen o di ako niyo peratiyayaa na paratiyayaa niyo so manga galebek kaan iyo katokawi ago masabot a so Ama na madadalem raken, ago madadalem ako mambo ko Ama." 39 Mandiyadi na tipengan iran peman domakep si Isa, ogaid na miyakapalagoy sekaniyan baden ko kapaar iran. 40 Komiyasoy romipag si Isa ko lawasaig a Yordan sii ko darpa a ron dii manalawat si Yahiya gowani, na komiyaden sekaniyan roo. 41 Na madakel a taw a miyamanong on, na pitero iran a "Si Yahiya na da nggolaola sa piyakamemesa a nanao, ogaid na benar so langon a pitero iyan makapantag sangkai a mama." 42 Na madakel a manga taw a miyaratiyaya ki Isa roo.

11

1 Aden a mama a miyasakit a bebetowan sa Lasaro a mababaling sa Bitani a so inged i Mariyam ago so pagari niyan a si Marta. 2 Si Mariyam na aya miyodod gowani sa ikekamotan ko ai o Kadnan na inisising iyan on so bok iyan. Na so laki niyan a si Lasaro na aya pekesakit. 3 Na piyakisongowan o magari a babay si Isa a tig iran a "Kadnan, pekesakit so madaseg ka a ginawai." 4 Kagiya maneg ai i Isa na tig iyan a "Giyangkai a sakit i Lasaro na kena a ba niyan petain. Miyanggolaola ini kaan kabantogi so Allah, na nggolalan sii na kebantogan mambo so Wata o Allah." 5 Pekebabayaan i Isa si Marta, ago so pagari niyan, ago si Lasaro. 6 Apiya pen oto na kagiya maneg iyan a pekesakit si Lasaro na komiyaden sekaniyan sa miyakadowa pen gawii roo ko darpa a katatagoan on. 7 Oriyan iyan na pitero iyan ko manga sokbat a "Komasoy tano sa Yodiya." 8 Tig o manga sokbat a "Goro, da pen ai matey na tipengan o manga Yahodi a kaperobaki reka a ator, na ba ka roo den kesoy?" 9 Somimbag si Isa a "Ba kena a sapolo ago dowa ka oras so kadaondaw? Apiya antawaa i pelalakaw sii ko kadaondaw na di kirepang, ka pepakailay sabap ko kaliwanag o doniya. 10 Ogaid na o pelalakaw sekaniyan ko kagagawii na kirepang sekaniyan, ka da on so kaliwanag." 11 Kagiya matero iyan ai na pitero iyan pen a "So ginawai tano a si Lasaro na miyakatorog. Ogaid na songowan ko ka pokaon aken." 12 Tig o manga sokbat a "O totoroga sekaniyan, Kadnan, na baden pekapiya." 13 Aya mapemamaana i Isa na si Lasaro na miyatay den, ogaid na aya mapipikir o manga sokbat na matag domedeke sekaniyan a totorogen. 14 Kagiya ka maoto na pitero kiran i Isa sa marayag a "Miyatay si Lasaro, 15 Ogaid na sabap rekano na miyababaya ako sa kada aken roo a ped iyan kaan kano makaparatiyaya. Na, songowan tano sekaniyan.." 16 Na si Tomas a bebetowan sa 'Miyadowa,' na pitero iyan ko ped a manga sokbat a "Mamangonot tano langon ko Goro kaan tano ron mirakes a mbonoon!" 17 Kagiya makaoma si Isa na kiyatokawan iyan a miyakapat den gawii a kinikoboren ki Lasaro. 18 Giya inged a Bitani na manga telo baden ka kilomitro a kawatan iyan sa Yarosalim, 19 Na madakel a manga Yahodi a mintel ki Marta ago si Mariyam, ka teyoan iran siran sabap ko kiyapatay o laki ran. 20 Kagiya maneg i Marta a magaan den makaoma si Isa na lominiyo sekaniyan ka inalaw niyan si Isa, ogaid na mitelimbagak si Mariyam sa walay. 21 Na pitero i Marta ki Isa a "O ba bo sisii ka, Kadnan, ka di o kowan petay so laki aken! 22 Ogaid na katawan ko a apiya imanto na mbegan ka o Allah sa apiya antonaa i pengnin ka on." 23 Pitero rekaniyan i Isa a "Keoyag peroman so laki ngka." 24 Tig i Marta a "Katawan ko a keoyag sekaniyan bo sii sa alongan a maori a kakeoyag o miyamatay." 25 Na pitero i Isa a "Saken so pepangoyag ko miyamatay ago so kaoyagoyag. Apiya antawaa i peparatiyaya raken na apiya pen matay na keoyag bo. 26 Na oman i isa a oyagoyag a peparatiyaya raken na di den petay. Miyaratiyaya ka sii?" 27 Tig iyan a "Oway, Kadnan. Miyaratiyaya ako a seka so Al Masih a so Wata o Allah a somiyong sii sa doniya." 28 Kagiya matero ini i Marta na miyaling na pitero iyan sa masolen ki Mariyam a pagari niyan a "Sisaya so Goro, na kabaya iyan a makipembitiyarai reka." 29 Kagiya maneg ai i Mariyam na minggagaan gomanat na somiyong rekaniyan. 30 Samaoto na da pen makaoma si Isa sa kaingedan ka ndodoo pen ko darpa a inalawan on i Marta. 31 Na so manga Yahodi a ndodoo ko walay a ped i Mariyam a peteyo rekaniyan na tiyondog iran sekaniyan kagiya mailay iran a minggagaan tomindeg ago lomiyo, ka aya katao iran on na song ko kobor ka roo nggoraok. 32 Miyakaoma si Mariyam ko darpa a katatagoan ki Isa, na kagiya mailay niyan on na somiyodiyod ko hadapan iyan a tig iyan a "Kadnan, o ba bo sisii ka, ka di o kowan petay so laki aken!" 33 Kagiya mailay i Isa a penggoraok si Mariyam a datar mambo o manga Yahodi a miyonot on na gomininawa sa madalem a tanto a mikerata a ginawa niyan. 34 Na iniise iyan a "Anda niyo sekaniyan inikobor?" Tig iran a "Onot ka rekami, Kadnan, na ilaya ngka." 35 Na somigad si Isa. 36 Mandiyadi na pitero o manga Yahodi a "Ilaya niyo; mataan a tanto niyan a pekebabayaan si Lasaro!" 37 Ogaid na so ped na tig iran a "Miyapakapiya angkai a mama so mata o bota! Ba niyan di kegaga a kipelidasen iyan ki Lasaro ko kapatay?" 38 Miyakaginawa peman si Isa sa madalem na somiyong ko kobor. Giyai na liyang a so gimowa iyan na inolen a ator. 39 Pitero i Isa a "Kowaa niyo ron so ator." Tig i Marta a babay o miyatay a "Kadnan, miyado sekaniyan den imanto, ka miyakapat den gawii a kinikoboren on!" 40 Pitero rekaniyan i Isa a "Ba aken reka da matero a keilay ngka so bantogan o Allah o peratiyaya ka?" 41 Na taros a kinowa iran on so ator, na lomiyangag si Isa na tig iyan a "Penalamatan ko seka, Ama, ka kagiya inampon ako so pangni aken. 42 Katawan ko a lalayon ako ngka pegamponen, ogaid na pitero aken ai sabap ko madakel a taw a kititindeg sii kaan iran maparatiyaya a seka i somiyogo raken." 43 Oriyan o kiyateroa niyan sii na miyananalo si Isa sa tanto a matanog a tig iyan a "Lasaro, liyo ka!" 44 Na lominiyo so miyatay a giya manga lima niyan ago manga ai na kikabobongkosan sa onong, na aden a dinis a mibobongkos sa olo niyan. Na pitero kiran i Isa a "Bengkasi niyo na pakalalakawa niyo." 45 Na madakel ko manga Yahodi a miyamanibaw ki Mariyam na kagiya mailay iran so pinggolaola i Isa na miyaratiyaya siran on. 46 Ogaid na so ped kiran na miyamanong ko manga Parisi na piyanotolan iran siran ko pinggolaola i Isa. 47 Sabap roo na miyakipagopakat so manga Parisi ago so manga poporo a imam ko manga pangongokom na pitero iran a "Antonaa i sowaan tano ka giya mama oto na dii nggolaola sa madakel a piyakamemesa a manga nanao? 48 O pakinggolaola tano ron so datar ai na peratiyaya rekaniyan so langon a taw, na song sii so manga Iromanen na mbinasaan iran so Timplo tano ago so bangsa tano!" 49 Na so isa kiran a si Kayapas a aya maporo a imam sangkoto a ragon na pitero iyan kiran a "Da den a imeleng iyo! 50 Ba niyo di sebota a tomo rektano a matay so sakataw a mama para ko manga taw a di sa ba mabinasa so langon a bangsa tano?" 51 Da niyan ai teroa a poon ko pamikiran iyan ka sabap sa maporo sekaniyan a imam sangkoto a ragon na inalamat iyan a petay si Isa para ko manga Yahodi, 52 Na kena bo a ba para ko manga Yahodi, ka para mambo ko manga wata o Allah a mipaparak ko mbalabala kaan iyan siran matimo ago mapakaisaisa. 53 Na ipoon den sangkoto a gawii na kekadiyaten o manga olowan o manga Yahodi a kambonoa iran ki Isa. 54 Sabap sii na di den perinayag lomalakaw si Isa sii ko manga Yahodi. Somiyong sekaniyan baden ko darpa a marani ko mitataog a kaden, sii ko inged a bebetowan sa Ipraim, na komiyaden roo a ped iyan so manga sokbat iyan. 55 Magaan den so Paska o manga Yahodi na madakel a taw a miyamanong sa Yarosalim a poon ko dii pagonayonayan ka itoman iran roo so adat ko kapelompiyowa ko ginawa iran sa di pen kakeoma o Paska. 56 Di ran dii mbabanog si Isa, na sii ko kapekelimod iran ko Timplo na pepamagisei siran a "Antonaa i pamikiran iyo? Ba sekaniyan di song ko pista?" 57 So manga poporo a imam ago so manga Parisi na inisogo iran a o aden a makatokaw o anda si Isa na paliyogat a iripot iyan kaan iran madakep.

12

1 Nem pen gawii a di kakeomai ko Paska na somiyong si Isa sa Bitani a ron mababaling si Lasaro a inoyag iyan a poon ko miyamatay. 2 Na pitiyagaran iran roo si Isa sa inggabi niyan. Si Marta i pepengenat, na si Lasaro na isa ko miyakaatoang a ped i Isa. 3 Si Mariyam na kominowa sa tenga sa kilo a lana mamot a tanto a mala i arga a pimbaalan a lombos a nardo, na inodod iyan ko ai i Isa na inisising iyan on so bok iyan. Na miyabembar so kamot o lana ko dalem a walay. 4 Ogaid na si Yodas Iskariyot a isa ko manga sokbat i Isa a aya on tipo na pitero iyan a 5 “Ino da pesaa angkai a lana mamot sa telo gatos a pelata a pirak kaan mibegay ko manga miskin?" 6 Pitero iyan ai a kena a ba sabap sa ba niyan tatagoa sa ginawa so manga miskin, ka sabap sa tekew sekaniyan. Na sekaniyan i sasanaan ko pontir a petegoan ko pirak iran na olaola niyan den so kapepanekewi niyan on. 7 Na pitero i Isa a "Taregi ngka sekaniyan! Miyapananago iyan angkai a lana para ko gawii a kipelebengen raken. 8 So manga miskin na lalayon rekano maaped, ogaid na saken na kena a ba lalayon ako niyo mipegepeda." 9 Tanto a madakel a Yahodi a miyamakaneg sa ndodoo si Isa sa Bitani, na miyamanong siran roo a kena bo a ba sabap ki Isa, ka pagilain iran pen si Lasaro a inoyag iyan a poon ko miyamatay. 10 Sabap sii na pikediyat pen o manga poporo a imam a kambonoa iran mambo ki Lasaro, 11 Ka sabap rekaniyan na madakel ko manga Yahodi a miyamanalikod kiran ka miyamaratiyaya siran ki Isa. 12 Kagiya talondog a gawii na so tanto a madakel a taw a domiyarpa ko Pista na miyaneg iran a magaan den makaoma si Isa sa Yarosalim. 13 Sabap roo na miyangowa siran sa manga pakong o palmira na mililiyo siran ka pagalaon iran sekaniyan a ipepelalis iran a "Podin so Allah! Karakmatan so pekaoma sii ko ingaran o Kadnan! Karakmatan so Solotan sa Israil!" 14 Miyakatoon si Isa sa mangoda a kimar na mikoda on, a so den so misosorat ko Kitab a 15 “Di kano pekelek, hey manga taw sa Siyon. Ilaya niyo, ka pekaoma so Solotan iyo a kokoda ko nati a kimar." 16 Da sabota o manga sokbat iyan angkai a miyanggolaola sa masa oto. Ogaid na kagiya kabantogan si Isa na kiyatademan iran a misosorat ai langon ko Kitab makapantag rekaniyan, na giyoto mambo i pinggolaola iran on. 17 So madakel a taw a maaped ki Isa isako talowan iyan si Lasaro a liyo ko kobor sii ko kiyaoyaga niyan on a poon ko miyamatay na di ran ai dii pamanotolen. 18 Na sabap sa miyaneg den o madakel a taw a pinggolaola i Isa angkoto a piyakamemesa a nanao na mililiyo siran mambo sa kapagalawa iran on. 19 Na mimbibitiyarai so manga Parisi a tig iran a "Mapegilailay a da den a ba tano mapenggolaola. Ilaya niyo man; miyamangonot rekaniyan so dalem a doniya!" 20 Aden a manga taw sa Grisiya a maaped ko miyamakasong ko pista sa Yarosalim kaan mamakasimba. 21 Somiyong siran ki Pilipi a taw sa Bitsaida roo sa Galili na pitero iran on a "Sir, kebaya kami makipagilay si Isa." 22 Siyongowan i Pilipi si Andriyo na pitero iyan on ai. Na miyonot si Andriyo ki Pilipi na pitero iran ai ki Isa. 23 Tig i Isa a "Miyaoma den so oras a kakebantogi ko Wata o Manosiya. 24 Teroon ko rekano a mataan den a so satiman a od a bantad na tatap den a sasatiman taman sa di mapamola ko lopa ago matay. Ogaid na o matay ini na pemangonga sa madakel. 25 So taw a pekebabayaan iyan so kaoyagoyag iyan na pagilangen iyan baden. Na so ipekegowad iyan so kaoyagoyag iyan sangkai a doniya na pagongowan iyan para ko kaoyagoyag a da a kaposan iyan. 26 Apiya antawaa i kebaya raken manalagad na disomala a pegonot raken kaan apiya anda ako na ndodon mambo so pepanalagad raken. Na apiya antawaa i pepanalagad raken na mbentogen o Ama aken. 27 Imanto na tanto a masososa a niyawa ko, na antonaa i mapetero aken? Ba ko peteroa a 'Ama, lidasi ako ngka ko keokitan aken sangkai a oras? Kena, ka aya inisong aken sii na an aken kaokiti angkai a oras. 28 Ama, pakibantogen ka so Ingaran ka!" Na aden a sowara a poon sa kasorgaan a tig iyan a "Piyakibantog aken den na pekibantog aken peroman." 29 So madakel a taw a kititindeg roo na miyaneg iran so sowara na pitero iran a "Mindadalendeg man!" Na tig o ped a "Aden a malaikat a miyakimbitiyarai ron!" 30 Pitero kiran i Isa a "Kena a ba raken sabap a kiyatero angkai a sowara, ka sabap rekano. 31 Imanto so gawii a kokomen so doniya. Imanto na so Iblis a ndadato sangkai a doniya na kilebad sa liyo. 32 Na saken na amay ka itongkol ako a poon ko lopa na tondaan aken so langon a taw ko ginawa ko." 33 Sii ko kiyateroa niyan sii na piyayag iyan so okit o kapetay niyan. 34 Na pitero rekaniyan o madakel a taw a "Pitero o Kitab tano a dayon sa dayon a kaooyagoyag o Al Masih. Ino ngka peteroa a disomala den a kitongkol so Wata o Manosiya? Antawaa bes angkai a Wata o Manosiya? 35 Somimbag si Isa a "Di bo matey a kasisii rekano o solo. Lalakaw kano sii ko katatago rekano pen o solo, ka o ba rekano miraot so maliboteng. Ka so pelalakaw ko maliboteng na di niyan katawan o anda pepekaantap. 36 Paratiyaya kano ko solo sii ko kasisii niyan rekano pen kaan kano mabaloy a manga wata o kaliwanag." Na kagiya matero ini i Isa na inawaan iyan siran ago mitepok. 37 Na apiya pen miyanggolaola i Isa angkai langon a piyakamemesa a manga nanao ko kamamasaan iran na da iran sekaniyan paratiyayaa. 38 Giyanan i kinitoman o katero o Nabi Isayas a "Hey Kadnan ko, antawaa i miyaratiyaya ko totol ami na antawaa i kiyapayagan ko kapaar o Kadnan?" 39 Sabap sii na da siran makaparatiyaya, ka pitero pen o Isayas a 40 “Biyota niyan so manga mata iran ago piyakategas iyan so manga poso iran kaan iran di kiilay a manga mata iran ago an iran di kisabot so manga poso iran ka o ba siran baden makateklid na go aken siran bo kapiyapiyai." 41 Pitero ini o Isayas ka miyailay niyan so bantogan i Isa, na pitero iyan so makapantag rekaniyan. 42 Apiya pen oto na madakel a manga olowan o manga Yahodi a miyamaratiyaya ki Isa, ogaid na sabap ko manga Parisi na da iran ai payaga ko manga ped, ka o ba siran mapakaawa ko sinagoga. 43 Ka miyatomo iran a podin siran o manga taw a di sa ba so Allah i podi kiran. 44 Pitero pen i Isa sa matanog a "So taw a peparatiyaya raken na kena bo a ba saken i peparatiyayaan iyan ka sekaniyan mambo a somiyogo raken. 45 Na so pepakailay raken na aya niyan pekeilay na so somiyogo raken. 46 Somiyong ako sii a solo sa doniya kaan so oman i peparatiyaya raken na di makakakaden ko maliboteng. 47 “Apiya antawaa i pepakaneg ko manga katero aken a di niyan bo tomanen na kena a ba saken i kokom rekaniyan. Ka kena a ba aya inisong aken sii na ba ko pengokoma so doniya, ka sabap sa an aken masabet. 48 So taw a tomiyalikod raken ago di terima ko manga katero aken na aden a kokom rekaniyan, ka so katero a miyatero aken na aya on kokom sii sa alongan a maori. 49 Ka kena a ba saken i dii mbayabaya ko di aken dii katero, ka so Ama a somiyogo raken na inisogo iyan raken o antonaa i peteroon ko ago andamanaya i kapeteroa ko ron. 50 Na katawan ko a so sogoan iyan na pepekaagak ko kaoyagoyag a da a kaposan iyan. Kagiya ka maoto na so di aken dii teroon na aya di raken dii pakitero o Ama."

13

1 Salongan pen oto a da kaomai ko Pista a Paska na katawan i Isa a miyaoma den so oras a kapagawai niyan sangkai a doniya ka song ko Ama. Lalayon iyan pekebabayaan so manga pagtaw niyan a sisii sa doniya, na pekiilay niyan kiran imanto so katatarotop o kapekebabayai niyan kiran. 2 Penggabi si Isa ago so manga sokbat iyan, na so Iblis na miyatago iyan den ko poso i Yodas Iskariyot a wata i Simon a katipowa niyan ki Isa. 3 Katawan i Isa a miyapadalem o Ama so langon taman ko kapaar iyan; na katawan iyan a miyakapoon sekaniyan ko Allah ago kesoy ko Allah. 4 Na tominindeg si Isa sii ko di ran dii kanggagabi na inendaan iyan so kimon iyan na mitinambed sa towaliya. 5 Na taros a miyodod sa ig ko palanggana na pipoonan iyan mamangonab so manga ai o manga sokbat iyan a ipesising iyan on so towaliya a ititinambed iyan. 6 Kagiya miraot sekaniyan ki Simon Pidro na tig i Pidro a "Pagonaban ka bes a manga ai aken, Kadnan?" 7 Somimbag si Isa a "Di ngka katawan imanto so maana o di aken dii nggolaolaan ogaid na kasabotan ka bo amay." 8 Tig i Pidro a "Di aken reka den pekionaban so manga ai aken!" Ogaid na somimbag si Isa a "O di aken seka kaonabi na da a labet ka raken." 9 Tig i Simon Pidro a "O giyanan, Kadnan, na kena bo a ba giya ai aken i onabi ngka, ka so pen so manga lima ko ago so olo aken!" 10 Pitero rekaniyan i Isa a "So miyakapeigo na lompiyo langon so lawas iyan na di den kailangan a kapangonab iyan liyo ron so manga ai niyan. Sekano langon na miyalompiyo den liyo ko sakataw rekano." 11 Katawan den i Isa o antawaa i tipo ron, na giyanan i kiyateroa niyan sa "Miyalompiyo kano den liyo ko sakataw rekano." 12 Oriyan o kiyapangonabi i Isa ko manga ai iran na siyolot iyan peroman so kimon iyan na miyontod ko darpa iyan ko lamisaan. Na iniise iyan kiran a "Siyabot iyo so pinggolaola ko rekano? 13 Pembetowan ako niyo sa 'Goro,' ago 'Kadnan,' na benar anan ka saken den. 14 O saken a aya niyo Kadnan ago goro i miyangonab ko manga ai niyo na patot a pangonaban mambo o oman i isa rekano so manga ai o ped iyan. 15 Bigan aken sekano sa ladiyawan kaan iyo masowa so pinggolaola ko rekano. 16 Teroon ko rekano a mataan den a da a oripen a ba lawan ko kadnan iyan, na da a siyogo a ba lawan ko somiyogo rekaniyan. 17 Imanto a kiyatokawan iyo angkai a manga nganin na perakmatan kano o nggolaolaa niyo ai. 18 “Kena a ba sekano langon i di aken dii teroon. Katawan aken so piyamili aken, ogaid na disomala a kitoman so misosorat ko Kitab a 'So mama a pepagatoang raken ko paan na rinido ako niyan.' 19 Pitero aken rekano ai imanto sa da niyan pen kanggolaola kaan amay ka manggolaola na peratiyayaan iyo a saken so miyatero aken o antawa ako. 20 Teroon ko rekano a mataan den a so taw a terima sa apiya antawaa a siyogo aken na saken i terimaan iyan. Na so terima raken na so somiyogo raken i terimaan iyan." 21 Oriyan o kiyateroa sii i Isa na tanto a masososa a niyawa niyan na pitero iyan sa marayag a "Teroon ko rekano a mataan den a so isa rekano na tipo raken." 22 Miyakatetentenga so manga sokbat, ka kalilibogan siran o antawaa i pitero iyan. 23 So isa ko manga sokbat a aya den pakatatayaan i Isa na moontod a makaaabay ki Isa. 24 Na pitiniyasan i Simon Pidro a tig iyan a "Iseen ka o antawaa i pitero iyan." 25 Na rominda angkoto a sokbat sa rareb i Isa na tig iyan a "Antawaa, Kadnan?" 26 Tig i Isa a "Sekaniyan i ndewagan aken sa paan amay ka misindot aken ko ladiya." Na kominowa sa paan na kagiya misindot iyan na inidawag iyan ki Yodas a wata i Simon Iskariyot. 27 So den so kiyakowaa i Yodas ko paan na somiyook rekaniyan so Iblis. Na pitero on i Isa a "Nggagaanen ka nggolaola so penggolaolaan ka." 28 Na da a isa kiran bo a kioontod roo ko lamisaan a ba miyakasabot o ino to peteroa i Isa. 29 Miyapamikir o ped a kagiya si Yodas i sasanaan ko pirak na o ba on pitero i Isa a pamasaa niyan so kailangan iran para ko pista, o di na ba niyan begi so manga miskin. 30 Na so den so kiyakowaa i Yodas ko paan na lominiyo, na miyagagawii den. 31 Kagiya maipos si Yodas na pitero i Isa a "Imanto na kiyabantogan so Wata o Manosiya, na kiyabantogan mambo so Allah a nggolalan rekaniyan. 32 Na kagiya kiyabantogan so Allah a nggolalan rekaniyan na mbentogen mambo o Allah so Wata sii ko ginawa niyan, na magaan den a kakebantoga niyan on. 33 Manga wata aken, di ketey a kasisii aken rekano pen. Pembabanogen ako niyo, ogaid na teroon ko rekano imanto so pitero aken ko manga Yahodi a di kano pekasong ko songowan aken. 34 Mbegan ko sekano sa bago a sogoan: Kababayai o oman i isa so ped iyan. Datar o kiyababayai aken rekano na disomala a kebabayaan o oman i isa so ped iyan. 35 O kababayai o oman i isa so ped iyan na kekilala o langon a taw a manga sokbat aken sekano." 36 Iniise on i Simon Pidro a "Anda ka song, Kadnan?" Somimbag si Isa a "Di ka raken pekaonot imanto ko songowan aken ogaid na pekatondog ka raken amay." 37 Iniise i Pidro a "Ino ako reka di pekaonot imanto, Kadnan? Makatitiyagar ako matay para reka!" 38 Na pitero on i Isa a "Mataan a makatitiyagar ka matay para raken? Teroon ko reka a mataan den a sa di pen komoko so manok na ipepalaw ako ngka sa makatelo."

14

1 Pitero pen i Isa a "Di niyo pekisosa so manga pamikiran iyo. Sasarigan iyo so Allah na sarigi ako niyo mambo. 2 Sii ko walay o Ama aken na madakel a pirowangan on. Song ako roo ka petiyagar ako sa darpa para rekano. Di aken rekano ai peteroon o di benar. 3 Na amay ka makasong ako roo ago makatiyagar ako sa darpa para rekano na kesoy ako sii ka pekaonoten ko sekano sa katatagoan raken kaan kano ron mambo matago. 4 Katawan iyo so lalan ko songowan aken." 5 Pitero on i Tomas a "Kadnan, di ami katawan o anda ka song. Andamanaya i kaketokawi ami ko lalan?" 6 Inisembag i Isa a "Saken so lalan, ago so tito a benar, ago so kaoyagoyag. Da a taw a ba pekasong ko Ama o di raken makaokit. 7 O mataan den a katawan ako niyo na katawan iyo mambo so Ama aken. Na ipoon imanto na katawan iyo sekaniyan den ago miyailay niyo." 8 Tig i Pilipi a "Kadnan, pakiilain ka rekami so Ama na ikesoat ami den." 9 Somimbag si Isa a "Miyatey den a kaaped aken rekano, na ba ako ngka pen di katawi, Pilipi? So miyakailay raken na miyailay niyan mambo so Ama. Ino ngka pen peteroa a 'Pakiilain ka rekami so Ama?' 10 Ba ngka di peratiyayaa a madadalem ako ko Ama, ago madadalem raken so Ama? So manga katero a di aken rekano dii teroon na kena a ba saken i dii mbayabaya ko di aken on dii kateroa, ka so Ama a komakaden ko dalem a ginawa ko na aya dii nggolaola sangkai a manga galebek iyan. 11 Paratiyayaa niyo so pitero aken a madadalem ako ko Ama ago madadalem raken so Ama. Ogaid na o di niyo ai peratiyayaa, na paratiyaya kano baden sabap sangkai a manga ala a galebek. 12 “Teroon ko rekano a mataan den a apiya antawaa i peparatiaya raken na penggolaolaan iyan so manga galebek a di aken dii nggolaolaan. Na penggolaolaan iyan so lawan pen sii, ka song ako ko Ama. 13 Na apiya antonaa i pengnin iyo sii ko ingaran aken na nggolaolaan ko kaan kabantogi so Ama a nggolalan ko Wata. 14 O pengni kano raken sa apiya antonaa sii ko ingaran aken na penggolaolaan ko." 15 “O pekebabayai ako niyo na tomanen iyo so manga sogoan aken. 16 Na pengni ako ko Ama na mbegan kano niyan sa salakaw a Salinggogopa kaan sekaniyan makakaden sii rekano sa taman sa pakataman. 17 Sekaniyan so Roh a pekepoonan o tito a benar. So doniya na di niyan ketarima so Roh ka di niyan keilay aya pen o ba niyan makilala. Ogaid na katawan iyo sekaniyan ka komakaden sekaniyan sii rekano imanto, na kedalem sekaniyan rekano amay. 18 Di aken sekano ipendarainon a datar o manga ilo, ka kesoy ako rekano. 19 Di ini matey na di ako den keilay o doniya, ogaid na keilay ako niyo. Na kagiya oyagoyag ako na keoyag kano mambo. 20 Sii sangkoto a gawii na ketokawan iyo a madadalem ako ko Ama aken, ago madadalem kano raken, ago madadalem ako rekano. 21 So taw a tomiyarima ko manga sogoan aken ago petomanen iyan pen na aya raken pekebabaya. Kebabayaan o Ama so pekebabaya raken, na kebabayaan aken sekaniyan mambo ago pekikilala ko ron a ginawa ko." 22 Si Yodas a kena a ba si Yodas Iskariyot na pitero iyan ki Isa a "Kadnan, ino ngka rekami pekikilalaan a ginawa ngka ago kena a ba sii ko doniya?" 23 Inisembag i Isa a "Apiya antawaa i pekebabaya raken na tomanen iyan so katero aken. Kebabayaan sekaniyan o Ama aken, na saken ago so Ama aken na song rekaniyan ago keden kami ron. 24 So kena a ba raken pekebabaya na di niyan tomanen so manga katero aken. Na so manga katero a pekeneg iyo na kena a ba aken rek, ka poon ko Ama a somiyogo raken. 25 Pitero aken rekano ai sii ko kasisii aken rekano pen. 26 Na so Salinggogopa, a so Soti a Roh a sogoon o Ama sii ko ingaran aken, na pengendao rekano ko langon taman na pekitanodan iyan rekano so langon taman a miyatero aken rekano den. 27 “Imbagak aken rekano so kalilintad. So rek aken a kalilintad na aya ko rekano ipembegay. Na so kipembegan aken on rekano na kena a ba datar o kipembegan on o manga manosiya. Di niyo pekisosa so manga pamikiran iyo ago di kano pekelek. 28 Miyaneg iyo so pitero aken rekano a magawa ako na kesoy ako bo rekano. O pekebabayai ako niyo na kebabaya kano sabap ko kasong aken ko Ama, ka so Ama na lawan raken. 29 Pitero aken ai rekano imanto sa da niyan pen kanggolaola kaan amay ka maolaola ini na makaparatiyaya kano. 30 “Na di ako rekano makipembitiyarai sa matey, ka pekaoma so Iblis a ndadato sangkai a doniya. Da den a ba niyan kapaar sii raken 31 Ogaid na so den so inisogo raken o Ama na giyoto den i di aken dii nggolaolaan kaan katokawi o doniya a pekebabayaan ko so Ama. Na ganat kano; somong tano roo."

15

1 Pitero pen i Isa a "Saken i tito a itado o waged a obas, na so Ama aken na aya on kisapadan. 2 Oman i sapak a makakakampet raken a di magonga na potolen iyan on. Na pelompiyon iyan so oman i sapak a pegonga kaan makaonga sa madakel. 3 Miyalompiyo kano den a nggolalan ko katero a miyatero aken rekano. 4 Kakaden kano sii raken ka keden ako sii rekano. So sapak na di magonga o kena a ba makakakampet ko itado. Na datar kano niyan mambo a di kano pekaonga o kena a ba sii kano raken komakaden. 5 “Saken so itado o waged a obas na sekano i manga sapak. So taw a komakaden sii raken ago komakaden ako sii rekaniyan mambo na pekaonga sa madakel, ka o mabelag kano raken na da den a ba niyo mapenggolaola. 6 So taw a kena a ba sii raken komakaden na ipelebad sa liyo a datar o sapak, na kegango. Na penimoon ai ago ipelebad ko apoy a ron ketotong. 7 O sii kano raken komakaden ago sii rekano mambo komakaden so manga katero aken na makapemangni kano sa apiya antona onon i kabaya iyo na pagamponen so pangni niyo. 8 Sii ko kapepamangonga niyo sa madakel na pekebantogan so Ama aken, na mapepakiilay niyo mambo a manga sokbat aken sekano. 9 “Datar o kapekebabayai raken o Ama a pekebabayaan ko sekano mambo. Tatap kano ko kapekebabayai aken rekano. 10 O petomana niyo so manga sogoan aken na ketatap ka ko kapekebabayai aken rekano a datar o kiyatomana ko ko manga sogoan o Ama aken na tatap ako ko kapekebabayai niyan raken. 11 Miyatero aken rekano angkai a manga nganin kaan sii rekano madalem so kapekebabaya aken, ago an matarotop so kapekebabaya iyo. 12 Giyai i sogoan aken: Kababayai o oman i isa so ped iyan a datar o kiyababayai aken rekano. 13 Aya da den a lawan iyan a kapekebabayai o taw ko manga ginawai niyan na so kiperilaan iyan ko kaoyagoyag iyan para kiran. 14 Na manga ginawai aken sekano o nggolaolaa niyo so ipesogo aken rekano. 15 Di aken sekano den mbetowan sa manga oripen, ka so oripen na di niyan katawan so dii nggolaolaan o kadnan iyan. Ka bitowan aken sekano baden sa manga ginawai aken, ka piyakitokawan aken rekano so langon taman a miyatero raken o Ama aken. 16 Kena a ba sekano i minili raken ka saken i miyamili rekano, na initoro aken sekano a melalakaw sa kapemangonga niyo sa onga a kemboway. Sabap san na apiya antonaa i pengnin iyo ko Ama sii ko ingaran aken na imbegay niyan rekano. 17 Na giyai i sogoan aken rekano: kababayai o oman i isa so ped iyan. 18 “O kagowaden kano o doniya na tatanodi niyo a saken i miyaona a inikagowad iyan. 19 Opama ka ped kano ko doniya na kebabayaan kano o doniya, ka rek kano niyan. Ogaid na kena a ba kano rek o doniya ka piyamili aken sekano a poon ko doniya. Sabap sii na ipekegowad kano o doniya. 20 Tademi niyo so pitero aken rekano a 'Da a oripen a ba lawan ko kadnan iyan.' O siyatro ako iran na setroon kano iran mambo. O tiyoman iran so katero aken na tomanen iran mambo so katero iyo. 21 Langon taman ai na penggolaolaan iran rekano sabap raken ka di iran katawan so somiyogo raken. 22 Opama ka da ako sii makasong a miyakimbitiyarai kiran na da a kasalaan iran. Ogaid na imanto na da a ba iran kisapeng ko dosa iran. 23 So taw a ipekegowad ako niyan na ipekegowad iyan mambo so Ama aken. 24 Opama ka da aken nggolaolaa so manga ala a galebek ko kamamasaan iran a da den a ped a ba on miyakanggolaola na da a kasalaan iran. Ogaid na imanto na apiya miyailay iran den so miyanggolaola ko na inikagowad ako iran ago so pen so Ama aken. 25 Ogaid na giyanan i kinitoman o misosorat ko Kitab iran a 'Inikagowad ako iran sa da a sabap iyan.' 26 “Pekasongen aken rekano so Salinggogopa a poon ko Ama. Giyanan so Roh a pekepoonan o tito a benar ago pepakapoon mambo ko Ama. Amay ka makaoma na peseksian iyan so makapantag raken. 27 Na peseksi kano mambo makapantag raken, ka minipagepeda aken sekano ipoon sa poonan."

16

1 "Pitero aken rekano ai langon kaan di kelobay so paratiyaya niyo. 2 Pekaawaan kano iran ko manga sinagoga, na pekaoma so masa a so apiya antawaa i mbono rekano na aya mapipikir iyan na pepangongonotanan iyan so Allah. 3 Penggolaolaan iran ai ka di iran katawan so Ama aya pen o ba ako iran katawi. 4 Na pitero aken rekano ai kaan amay ka mapenggolaola ini na ketoosan iyo a miyatero aken rekano den. Da ko rekano ai teroa sa poonan ka mipageepeda ako niyo pen. 5 “Ogaid na song ako imanto ko somiyogo raken ogaid na da a isa rekano bo a ba raken minise sa 'Anda ka song?' 6 Ka baden tanto a mikerata a ginawa niyo sabap sa pitero aken rekano den angkai a kesowasowa. 7 Ogaid na teroon ko rekano a mataan den a tomo rekano a kapagawa aken, ka o di ako sii mawa na di rekano song so Salinggogopa. Ogaid na o makaawa ako na pekasongen aken sekaniyan rekano. 8 Na amay ka makaoma sekaniyan na pemataanan iyan ko manga taw sa doniya so tito a benar makapantag ko dosa, ago so kaontol, ago so kapengokom o Allah. 9 Pemataanan iyan kiran a madodosa siran, ka di ako iran peratiyayaan. 10 Pemataanan iyan kiran so makapantag ko kaontol, ka song ako ko Ama na di ako niyo den keilay. 11 Na pemataanan iyan kiran pen so makapantag ko kapengokom o Allah ka kagiya so ndadato sangkai a doniya na miyakokom den. 12 “Madakel pen a mapetero aken rekano, ogaid na di niyo kekena imanto. 13 Ogaid na amay ka makaoma so Roh a pekepoonan o tito a benar na penggonanaon kano niyan ko langon a tito a benar. Kena a ba sekaniyan i pembayabaya ko kapetero iyan, ka aya niyan bo peteroon na so pekeneg iyan. Na pekitokawan iyan rekano so da pen mitalingoma. 14 Mbentogen ako niyan, ka so ketarima iyan a poon raken na pekitokawan iyan rekano. 15 So langon a rek o Ama na rek aken mambo. Giyanan i kiyateroa ko ron a so ketarima o Roh a poon raken na pekitokawan iyan rekano. 16 “Di bo ini matey na di ako niyo den keilay, na di bo peman matey na keilay ako niyo." 17 Na miyamagisei so manga sokbat iyan a tig iran a "Antonaa angkai a pitero iyan a 'Di bo matey na di ako niyo den keilay, na di bo peman matey na keilay ako niyo,' ago so tig iyan a 'Sabap sa song ako ko Ama'?" 18 Tig iran a "Antonaa i maana angkai a pitero iyan a 'di bo matey?' Di tano seboten so di niyan dii teroon." 19 Katawan den i Isa a kebayaan iran rekaniyan mise, na p;itero iyan kiran a "Ba aya di niyo dii pamagisei na so maana o pitero aken a 'Di bo matey na di ako niyo den keilay, na di bo peman matey na keilay ako niyo bo? 20 Teroon ko rekano a mataan den a nggoraok kano ago pendiyagaw, ogaid na kebabaya so doniya. Pekerata a ginawa niyo ogaid na kesembian so rata a ginawa niyo sa kapekebabaya. 21 Igira a magaan den mbawata so babay na mararata a ginawa niyan ka kagiya pembaliliten. Ogaid na amay ka makambawata na kelipatan iyan so kiyarasay niyan ka kebabaya sekaniyan sa aden a wata a inimbawata sa doniya. 22 Giyai mambo i keolaola niyo, ka imanto na mararata a ginawa niyo, ogaid na makipegilaya ako rekano bo peroman na tanto kano a kebabaya. Na da a ba rekano pekaagaw sangkoto a kababaya iyo. 23 Sangkoto a gawii na kena a ba saken i pengniyan iyo sa apiya antonaa. Ka teroon ko rekano a mataan den a so Ama na imbegay niyan rekano so apiya antonaa i pengnin iyo ron sii ko ingaran aken. 24 Taman imanto na da den a ba niyo piyangni sii ko ingaran aken. Imanto na pangni kano, ka pekatarima kano kaan matarotop so kapipiya a ginawa niyo. 25 “Pitero aken ai langon rekano a nggolalan ko manga abayabayan. Ogaid na pekaoma so masa a di aken den pekaokiten so peteroon ko rekano ko manga abayabayan, ka peteroon ko rekano so makapantag ko Ama sa masagogod a katero. 26 Sii sangkoto a gawii na pengni kano rekaniyan sii ko ingaran aken. Kena a ba aya ko dii teroon a ba saken i pengni ko Ama para rekano, 27 Ka so den so Ama na pekebabayaan kano niyan ka kagiya pekebabayaan ako niyo ago miyaratiyaya kano sa miyakapoon ako ko Allah. 28 Miyakapoon ako ko Ama na somiyong ako sa doniya. Imanto na ngganatan ko so doniya ka kesoy ako bo ko Ama." 29 Na pitero o manga sokbat iyan a "Imanto na masagogod den a di ngka dii katero a kena a ba pepakaokita ko manga abayabayan. 30 Kiyatokawan ami imanto a katawan ka den so langon taman, na di ngka den kailangan a ba reka isean o apiya antawaa. Sabap sii na peparatiyayaan ami a poon ka ko Allah." 31 Tig i isa a "Peparatiyaya kano bes imanto? 32 Ilaya niyo man ka pekatalingoma so masa, na kapapantagan den imanto, a pemangiparak kano; pembabaling kano ago pagawaan ako niyo a da a ped aken. Ogaid na kena a ba ako mabobotong, ka mipageepeda aken so Ama. 33 Pitero aken ai rekano kaan makalilintad a ginawa niyo sii ko kaiisaisa niyo ago saken. Sii sa doniya na pekaokit kano sa manga karomasayan, ogaid na pakapipiyaa niyo a ginawa niyo ka miyadaag aken den so doniya!"

17

1 Oriyan o kiyateroa sii i Isa na lomiyangag sekaniyan sa langit na pitero iyan a "Ama, miyakatalingoma den so oras. Bantoga ngka so Wata a ka kaan ka mabantog o Wata. 2 Bigan ka sekaniyan sa kapaar ko langon a manosiya kaan iyan kabegi sa kaoyagoyag a da a kaposan iyan so langon a taw a inibegay ngka rekaniyan. 3 Giyai i kaoyagoyag a da a kaposan iyan: so katawi iran reka, a so isaisa a tito a Tohan, ago si Isa Al Masih a siyogo o ka. 4 Biyantog aken seka sii sa doniya ko kiyapasada ko ko galebek a inibegay ngka raken a penggolaolaan ko. 5 Imanto, Ama, na bantoga ko ngka sii ko kaaped aken reka ko bantogan a rek aken isako sisii ako reka sa da pen kaadena ko doniya. 6 “Piyakitokawan ko seka ko manga taw a inibegay ngka raken a poon ko doniya. Rek ka siran gowani na inibegay ngka siran raken, na tiyoman iran so katero o ka. 7 Katawan iran imanto a so langon taman a inibegay ngka raken na poon reka. 8 Ka inibegay aken kiran so manga katero a inibegay ngka raken, na tiyarima iran. Katawan iran a mataan den a miyakapoon ako reka, na piyaratiyaya iran a seka i somiyogo raken. 9 “Ipepangangarapan aken siran. Kena a ba so doniya i ipepangangarapan aken, ka siran oto a inibegay ngka raken, ka rek ka siran. 10 So langon a rek aken na rek ka mambo, na so langon a rek ka na rek aken. Na sii ako kiran kiyabantogan. 11 Imanto na song ako reka. Di ako den keden sii sa doniya, ogaid na sisii siran pen ko doniya. Hey Soti a Ama, pagipata ngka siran a nggolalan ko kapaar o ingaran ka, a so ingaran a inibegay ngka raken, kaan siran maisaisa a datar o kaiisaisa ta. 12 Sii ko kaaped aken kiran pen na piyagipat aken siran a nggolalan ko kapaar o ingaran ka a inibegay ngka raken. Lininding aken siran, na da den a sakataw bo a ba kiran miyada a rowar ko mama a aya bagian iyan na pekanaraka, kaan mitoman so misosorat ko Kitab. 13 “Imanto na song ako reka, ogaid na sii ko kasisii aken pen sa doniya na di aken kiran dii teroon angkai a manga nganin kaan sii kiran madalem so matatarotop a kapipiya a ginawa ko. 14 Inibegay aken kiran so katero o ka na inikagowad siran o doniya, ka kena a ba siran ped ko doniya a datar aken mambo a kena a ba ped ko doniya. 15 Kena a ba aken reka pepangniya a kowaan ka siran a poon ko doniya, ka pepangnin ko a lindinga ngka siran baden ko Iblis. 16 Kena a ba siran ped ko doniya a datar aken mambo a kena a ba ped ko doniya. 17 Senggain ka siran a rek ka a nggolalan ko tito a benar. So katero o ka na aya den so tito a benar. 18 Datar o kiyasogoa ngka raken sa doniya na siyogo aken siran ko doniya. 19 Na isenggay aken a rek ka so ginawa ko para kiran kaan matarotop a kisenggain kiran mambo a rek ka. 20 “Kena bo a ba so miyamaratiyaya raken i ipepangangarapan aken, ka siran oto mambo a pemaratiyaya raken amay ka maneg iran so katero iran. 21 Pengnin ko a maisaisa siran langon a datar o kaiisaisa ta, Ama, a madadalem ka raken ago madadalem ako reka mambo. Pengnin ko a ketatap a kadadalem iran rekta kaan maparatiyaya o doniya a seka i somiyogo raken. 22 “Inibegay aken kiran so bantogan a inibegay ngka raken kaan siran maisaisa a datar ka ago saken a isaisa bo 23 A madadalem ako kiran ago madadalem ka raken kaan matarotop a kaiisaisa iran kaan katokawi o doniya a seka i somiyogo raken ago pekebabayaan ka siran a datar o kapekebabayai ngka raken. 24 Hey Ama, kabaya aken a so manga taw a inibegay ngka raken na keped siran raken apiya anda ko matatago kaan iran mailay so bantogan aken a inibegay ngka raken sabap ko kiyababayai ngka raken sa da pen maaden so doniya. 25 “Hey Ama a Maontol, so doniya na di ka niyan katawan. Ogaid na katawan aken seka, na katawan angkai a manga ped aken a seka i somiyogo raken. 26 Piyakitokawan ko seka kiran na iteros aken a kapepakitokawi ko reka kaan iran kababayai so manga ped a datar o kapekebabayai ngka raken, ago an matatap a kadadalem aken kiran.

18

1 Kagiya mapasad ai mangangarapan i Isa na lomiyalakaw sekaniyan a ped iyan so manga sokbat iyan roo ko sabala o Balintad a Kidron. Sangkoto a darpa na aden a sapadan on, na somiyoled on si Isa ago so manga sokbat iyan. 2 Si peman si Yodas a aya on tipo na katawan iyan mambo angkai a darpa ka omanoman roo den dii makitimo si Isa ko manga sokbat iyan. 3 Na giyoto a somiyong roo si Yodas a oonotan o salompok a manga sondaro ago so ped ko manga gordiya ko Timplo a siyogo o manga poporo a iman ago so manga Parisi. Kiaawid siran sa manga barabad, manga solo ago manga gomaan. 4 Katawan i Isa so langon a keolaola niyan, na giyoto a inalaw niyan siran a tig iyan a "Antawaa i pepangilobaan iyo?" 5 Tig iran a "Si Isa a so Taw sa Nasarit." Tig i Isa a "Saken." Na si Yodas a aya on tipo na tomitindeg roo mambo a ped iran. 6 Kagiya teroon kiran i Isa a "Saken," na miyakandod siran na miyanga ooteng sa lopa. 7 Na inisean siran peroman i Isa a "Antawaa i pepangilobaan iyo?" Somimbag siran a "Si Isa a so Taw sa Nasarit." 8 Tig i Isa a "Miyatero aken rekano den a saken. O saken i pepangilobaan iyo na pakapalagoya niyo angkai a manga ped aken." 9 Aya kiyateroa niyan sii na an mitoman so gopen iyan miyatero ko Allah a "Da a sakataw bo ko langon a inibegay ngka raken a ba raken miyada." 10 Si Simon Pidro na aden a pedang iyan, na binindas iyan ago liyakot iyan so oripen o maporo a imam na miyasapil on so kawanan a tangila niyan. Aya ngaran angkoto a oripen na si Malkos. 11 Pitero i Isa ki Pidro a "Tagoba ngka so pedang ka. Ba aken di keinomi so tagayan a inibegay raken o Ama?" 12 Mandiyadi na so manga sondaro a ped o kapitan iran ago so manga gordiya a manga Yahodi na diyakep iran si Isa na piyatong iran. 13 Inowit iran mona ki Anas a so panogangan a mama i Kayapas a aya maporo a imam sangkoto a ragon. 14 Si Kayapas i miyakamosawir ko manga Yahodi sa tomo a matay so sakataw a mama para ko langon a taw. 15 Si Simon Pidro ago so isa a sokbat na tiyondog iran si Isa. Kagiya giyangkai a sokbat na katawan o maporo a imam na miyonot sekaniyan ki Isa ko kiyasoled iyan ko kalamalama o walay o maporo a imam 16 Ogaid na mitelimbagak si Pidro roo ko liyo o gimowa. Na lominiyo bo angkoto a isa a sokbat a katawan o maporo a imam na inimbitiyarai niyan so raga a talasogoay a tomatameng ko gimowa, na piyakasoled iyan si Pidro. 17 Na pitero angkoto a raga ki Pidro a "Ba kena a isa ka ko manga sokbat a mama oto?" Tig i Pidro a "Kena a ba saken!" 18 Mosim oto a panenggaw, na so manga oripen ago so manga gordiya na mimbiyag siran sa apoy a pekedeg a manga waga, na kititindeg siran roo ko melilibeta ko apoy a di siran dii pepaig. Na miyobay kiran si Pidro na tomitindeg roo a ped iran a dii pepaig. 19 So peman so maporo a imam na inisean iyan si Isa mipantag ko manga sokbat iyan ago so manga ndao niyan. 20 Somimbag si Isa a "So kapepangendao aken na lalayon maririnayag, ka sii den ko soled o manga sinagoga ago sii ko Timplo a dii telabokan o langon a manga Yahodi. Da den a ba aken miyatero a pageemaan. 21 Ino ako ngka pen pepangingisei? Isei ngka so manga taw a miyamakaneg raken, ka katawan iran so miyatero aken." 22 Kagiya teroon ai i Isa na tingel sekaniyan o isa a gordiya a tomitindeg ko obay niyan, ago tig iyan a "Ino ka pekaraw tero sa datar anan ko maporo a imam?" 23 Simbag sekaniyan i Isa a "O aden a ribat ko pitero aken na payaga ngka so ribat on. Ogaid na o benar so pitero aken na ino ako ngka tengela?" 24 Oriyan oto na si Anas na piyakiwit iyan si Isa a mapapatong pen roo ki Kayapas a so maporo a imam. 25 Sii ko katitindeg roo i Simon Pidro a dii pepaig na pitero iran on a "Ba kena a isa ka ko manga sokbat iyan?" Na inipelaw i Pidro a tig iyan a "Kena a ba saken!" 26 Na so isa ko manga oripen o maporo a imam a tonganay o mama a kiyasapilan i Pidro sa tangila na iniise iyan on a "Ba ko seka da mailay roo ko sapadan a ped ka niyan?" 27 Inipelaw ai peman i Pidro na sarta den a aden a komiyoko a manok. 28 Kagiya mapasad so kinidarpaan ki Isa ki Kayapas na inowit iran sekaniyan ko torogan o gobirnador a Iromanen. Teked oto a kapipita. So manga Yahodi na da siran pamanoled ko torogan, ka giyanan i kasogoka iran ko taritib iran mipantag ko kapelompiyo, na o magiyoto na di keparo o ba siran kan ko inggabi ko Paska. 29 Sabap roo na lominiyo kiran si Pilato na iniise iyan kiran a "Antonaa i dimanda niyo sa mama ini?" 30 Somimbag siran a "O da sekaniyan makasela na di ami sii den witen." 31 Pitero kiran i Pilato a "Sekano i kowa rekaniyan na go niyo ron kokomen so Kitab iyo." Tig o manga Yahodi a "Di rekami perowa o ba ami bonoa so apiya antawaa." 32 Miyanggolaola ini kaan mitoman so manga katero i Isa a aya niyan kiyapayaga ko okit a kapetay niyan. 33 Komiyasoy somoled si Pilato ko torogan na tiyawag iyan si Isa, na inisean iyan a "Ba seka so Solotan o manga Yahodi?" 34 Somimbag si Isa a "Pakaise a ka nan, o di na ba ini reka pitero o ped makapantag raken?" 35 “Kena a ba ako Yahodi," a inisembag i Pilato. "So bangsa ngka a manga taw ago so manga poporo a imam i miyalad reka sii raken. Antonaa i pinggolaola ngka?" 36 Tig i Isa a "So ndatoan aken na kena a ba ped sangkai a doniya. O so ndatoan aken na ped sangkai a doniya na makipetidawa so manga sakop aken kaan ako di kepalad ko manga Yahodi. Ogaid na so ndatoan aken na kena a ba sii ped." 37 Iniise i Pilato a "Solotan ka bes? Somimbag si Isa a "Benar so pitero o ka a solotan ako. Aya sabap a kinimbawataan raken ago so kiyasong aken sii sa doniya na an aken mipemataan so tito a benar. Oman i isa a tomatampil ko tito a benar na pepakinegen ako niyan." 38 Tig i Pilato a "Antonaa bes i tito a benar?" Kagiya matero ini i Pilato na lominiyo peman na tig iyan ko manga Yahodi a "Da den a ba ko miyatoon a kasalaan iyan. 39 Ogaid na aya adat iyo na mbokaan ko so isa a kalaboso a pengnin iyo igira a miyaoma angkai a Paska. Ba niyo kabaya a bokaan ko rekano so solotan o manga Yahodi?" 40 Na milalalis siran baden a tig iran a "Kena a ba sekaniyan, ka si Barabas!" Na si Barabas na tanganiyaya.

19

1 Mandiyadi na kinowa i Pilato si Isa na piyakipelalambitan iyan sa maregen. 2 Na somiyolampid so manga sondaro sa sangkad a soroken a waged na tiyago iran ko olo i Isa, na siyolotan iran sekaniyan sa kimon a maloto i kariga. 3 Pepamangobay siran on a di ran dii teroon a "Mamboway so solotan o manga Yahodi!" Na pisetengela iran sekaniyan. 4 Oriyan iyan na lominiyo peroman si Pilato na pitero iyan ko madakel a taw a "Ilaya niyo; ka pagowiten ko sekaniyan rekano kaan iyo katokawi a da den a ba ko miyatoon a kasalaan iyan." 5 Giyoto a lominiyo si Isa a sasangkad sa soroken a waged ago ndiditar sa maloto i kariga a kimon. Na pitero kiran i Pilato a "Katii so mama!" 6 Sii den ko kiyailaya rekaniyan o manga poporo a imam ago so manga gordiya na milalalis siran a "Totoka ngka sekaniyan ko kros, totoka ngka ko kros!" Na pitero kiran i Pilato a "Sekano i kowa on na totoka niyo ko kros, ka da den a miyatoon aken a kasalaan iyan." 7 Somimbag so manga Yahodi a "Aden a kitab ami na pitero angkoto a kitab a paliyogat a mbonoon sekaniyan, ka bitowan iyan a ginawa niyan sa Wata o Allah." 8 Kagiya maneg ai i Pilato na kiyaomanan baden a kaalek iyan. 9 Na komiyasoy somoled ko torogan na iniise iyan ki Isa a "Anda ka miyakapoon?" Ogaid na da den sembag si Isa. 10 “Di ako ngka sembagen?" a tig i Pilato. "Ba ngka di katawi a aden a kapaar aken sa kabokai aken reka ago aden a kapaar aken sa katotoka ko reka ko kros?" 11 Tig i Isa a "Da o kowan a kapaar ka raken o da reka began o Allah. Sabap san na so taw a miyalad raken sii reka na aya lebi pen a mala i dosa." 12 Ipoon roo den na miyanamar si Pilato sa kabokai niyan ki Isa, ogaid na baden milalalis so manga Yahodi a "O bokai ngka a mama nan na kena a ba ka ginawai o Solotan sa Roma! Ka apiya antawaa i di niyan dii teroon a dato sekaniyan na ridoay o Solotan!" 13 Kagiya maneg ai i Pilato na inowit iyan si Isa sa liyo na miyontod sekaniyan sii ko darpa a dii kokoman a bebetowan sa 'Piyagatoran,' a sii ko basa a Yahodi na 'Gabata.' 14 Gawii oto a Ipetiyagar ko Paska na magaan den oto maoto a alongan. Na pitero i Pilato ko manga Yahodi a "Katii so Solotan iyo!" 15 Ogaid na milalalis siran a tig iran a "Bonoa ngka sekaniyan, bonoa ngka, totoka ngka ko kros!" Tig i Pilato a "Kabaya iyo a pakitotok aken so Solotan iyo ko kros?" Somimbag so manga poporo a imam a "Da a solotan ami a rowar ko Solotan sa Roma!" 16 Na taros a piyalad kiran i Pilato si Isa kaan matotok ko kros. 17 Mandiyadi na kinowa o manga sondaro si Isa na inagak iran sekaniyan a mapoposai ko kros. Inowit iran ko darpa a bebetowan sa 'Darpa a Lagas a Olo,' (sii ko basa a Hibriyo na 'Golgota.') 18 Tiyotok iran sekaniyan roo ko kros, na aden pen a dowa kataw a mama a tiyotok iran ko manga kros sii ko mbala a kilid iyan, a si Isa na sii ko pageletan iran. 19 Misorat si Pilato sa karatola na piyakitago iyan sii ko kros. Aya inisorat on na "Si Isa a taw sa Nasarit a Solotan o manga Yahodi." 20 Madakel a manga Yahodi a miyamakabatiya sii, ka so darpa a ron tiyotok si Isa ko kros na kena a ba mawatan ko siti, na inisorat ai sa basa a Hibriyo, basa a Roma, ago basa a Grigo. 21 So manga poporo a imam o manga Yahodi na pitero iran ki Pilato a "Di ngka on soraten 'So Solotan o manga Yahodi,' ka 'Pitero a mama ini a Saken so solotan o manga Yahodi.' " 22 Somimbag si Pilato a "So inisorat aken na minisorat aken den!" 23 Kagiya matotok o manga sondaro si Isa ko kros na kinowa iran so manga nditaren iyan na biyagi iran sa pat bagi, a nggagaisa bagi ko oman i sondaro. Da on mirakes so kimon iyan a inaol langon a poon sa poro taman sa baba a da a ba on pamanaiya. 24 Na tig o manga sondaro ko oman i ped iyan a "Di tano ai kisiin; meripa tano baden o antawaa i pekakowa on." Miyanggolaola ini kaan mitoman so misosorat ko Kitab a "Pimbagibagi iran so manga nditaren aken, na piripaan iran so kimon aken." Na giyoto i pinggolaola o manga sondaro. 25 Na marani ko kros i Isa na tomitindeg on si ina iyan, so pagari i ina iyan, si Mariyam a karoma i Klopas, ago si Mariyam Magdalina. 26 Kagiya mailay i Isa si ina iyan ago so sokbat iyan a pekebabayaan iyan a tomitindeg ko obay niyan na pitero iyan ki ina iyan a "Babay, katii so wata a ka." 27 Na pitero iyan ko sokbat iyan a "Kataya so ina a ka." Na ipoon roo den na piyakabaling angkai a sokbat si Mariyam sa walay niyan. 28 Oriyan oto na si Isa, a katawan iyan a miyapasad den so langon taman, na an mitoman so Kitab na pitero iyan a "Pekewaw ako." 29 Aden a omoy roo a mapepeno a soka, na biyasa iran so pangamek a soka, na tiyangen iran ko sapak a kayo a hisop na inidokor iran ko ngari i Isa. 30 Kagiya kataaman i Isa so soka na pitero iyan a "Miyapasad den!" Oriyan iyan na domiyonga sekaniyan na inirila iyan so niyawa niyan. 31 Gawii oto a Ipetiyagar, na piyangni o manga Yahodi ki Pilato a pakipelelepoon iyan so manga ai o manga mama a miyatotok ko kros ago pakikowaan iyan roo so manga lawas iran. Di kabaya o manga Yahodi o ba matatago roo pen so manga bangkay sii ko manga kros ko telondog a gawii, ka mala oto a Gawii a Idedeke. 32 Sabap san na somiyong roo so manga sondaro na pilelepo iran mona so ai o isa a mama na go bo peman so ped iyan a miyatotok ko kros a ped i Isa. 33 Ogaid na kagiya raoten iran si Isa na miyailay iran a miyatay sekaniyan den, na da iran pelelepoa so manga ai niyan. 34 Ogaid na so isa ko manga sondaro na inisoker iyan baden so bangkaw niyan sa kilid i Isa, na sarta den a tomiyoga on so rogo ago ig. 35 So taw a miyakailay sangkai a miyanggolaola na pimataanan iyan ai kaan kano mambo makaparatiyaya. Benar so iniseksi iyan, na katawan iyan a di niyan dii teroon so benar. 36 Miyanggolaola ini kaan mitoman so katero o Kitab a "Da a tolan iyan a ba keropet." 37 Na aden pen a isa a katero o Kitab a "Pagilain iran sekaniyan a siyoker iran." 38 Kagiya mapasad ai na si Yosop a taw sa Arimatiya na inakol iyan ki Pilato a makowa niyan so lawas i Isa. Si Yosop na kaom i Isa, ogaid na pageemaan iyan ai, ka ipekelek iyan so manga olowan o manga Yahodi. Miniyog si Pilato na giyoto a siyongowan i Yosop na kinowa niyan so lawas i Isa. 39 Si Nikodimos a miyakipagilaya ki Isa ko miyakaisa a gagawii na miyonot ki Yosop a maawid sa manga telo polo ka kilo a ikekamotan a sasaogan sa manga mamot a mira ago alos. 40 Kinowa iran so lawas i Isa na biyongkosan iran sa manga dinis a sotra a irarakes on so ikekamotan, ka giyai i adat o manga Yahodi ko dii katiyagara ko bangkay ko kipelebengen on. 41 Aden a sapadan ko darpa a ron tiyotok si Isa ko kros, na aden a bago a kobor on a da den katagoi sa miyatay. 42 Na sabap sa Gawii oto a Ipetiyagar a magaan den so Gawii a Idedeke o manga Yahodi ago kagiya marani bo angkoto a kobor na tiyago iran roo si Isa.

20

1 Teked a kapipita ko Akad a malo pen maliboteng na somiyong si Mariyam Magdalina ko kobor na miyailay niyan a miyakowa on den so ator a isasapeng ko gimowa iyan. 2 Miyalalagoy sekaniyan ago somiyong ki Simon Pidro ago so isa a sokbat a pekebabayaan i Isa, na pitero iyan kiran a "Kinowa iran so Kadnan ko kobor na di ami katawan o anda iran tiyago!" 3 Mandiyadi na gomiyanat si Pidro ago so isa a sokbat a song siran ko kobor. 4 Miyalalagoy siran a dowa ogaid na magaan i kapalalagoy so isa a sokbat a di si Pidro na miyaona sekaniyan makaoma ko kobor. 5 Lomingkong sekaniyan ka siyorong iyan na miyailay niyan so manga sotra a dinis a mibebetad roo, ogaid na da sekaniyan soled. 6 Miyaori makaoma si Simon Pidro na miyanaros somoled ko kobor. Miyailay niyan so manga dinis a mibebetad roo 7 Ago so mosala a inibongkos ko olo i Isa. Da ini mitapi ko manga dinis ka makekedet a misisibay metad. 8 Taros a somiyoled on mambo so isa a sokbat a miyaona makaoma ko kobor, na kagiya mailay niyan ai na miyaratiyaya. 9 Ka taman sa masa oto na da iran pen sabota so misosorat ko Kitab a disomala a keoyag si Isa a poon ko miyamatay. 10 Na miyaling so manga sokbat. 11 Ogaid na tomitindeg si Mariyam roo ko liyo o kobor a penggoraok. Sii ko kapenggoraok iyan na lomingkong sekaniyan ka siyorong iyan so soled o kobor 12 Na miyailay niyan roo so dowa a malaikat a kindiditar sa mapoti a moontod ko kiyabetadan ko lawas i Isa. So isa on na sii ko kiyaolonan iyan ago so isa on peman na sii ko dasigan. 13 “Babay, ino ka penggoraok?" a iniise iran on. "Kinowa iran so Kadnan aken," a tig iyan, "na di aken katawan o anda iran tiyago!' 14 Kagiya matero iyan ai na dominingil si Mariyam na miyailay niyan si Isa a tomitindeg roo, ogaid na da niyan makilala a giyoto bes si Isa. 15 Na pitero on i Isa a "Ino ka penggoraok, Babay? Antawaa i pepangilobaan ka?" Aya katao ron i Mariyam na sekaniyan so kisapadan, na tig iyan a "O seka i kominowa rekaniyan, Sir, na teroa ngka raken o anda ngka tiyago kaan aken kasongowi, ka kowaan ko sekaniyan." 16 Pitero on i Isa a "Mariyam! " Somiyangor rekaniyan si Mariyam na pitero iyan sa basa a Hibriyo a "Raboni!" (a aya maana niyan na Goro). 17 Pitero i Isa a "Di ako ngka teyongi, ka da ako pen makasong sa poro ko Ama. Songowi ngka baden so manga pagari aken na teroa ngka kiran a song ako sa poro ko Ama aken ago Ama iyo mambo, a so Tohan aken ago Tohan iyo mambo." 18 Na taros a somiyong si Mariyam Magdalina ko manga sokbat na tig iyan a "Miyailay aken so Kadnan!" Na pitero iyan kiran a miyatero on i Isa angkai a manga nganin. 19 Kagiya magagawii den sa alongan oto a Akad na matitimo so manga sokbat ko soled o rowang, na tatanggalan so manga pintoan ka ipekelek iran so manga olowan o manga Yahodi. Na miyakagemaw si Isa a tomitindeg ko look iran a tig iyan a "Malalayon rekano sa kalilintad!" 20 Kagiya matero iyan ai na piyakiilay niyan kiran a manga lima niyan ago so kilid iyan, na tanto a miyababaya so manga sokbat ko kiyailaya iran ko Kadnan. 21 Pitero peroman i Isa a "Malalayon rekano so kalilintad! Datar o kiyasogoa raken o Ama na sogoon aken sekano mambo." 22 So kiyateroa niyan sii na iniiyop iyan kiran so napas iyan a tig iyan a "Tarimaa niyo so Soti a Roh. 23 O perilaan iyo ko apiya antawaa so manga dosa niyan na minirila rekaniyan den. Na o di niyo rekaniyan perilaan so manga dosa niyan na da rekaniyan den mirila." 24 So isa ko sapolo ago dowa a manga sokbat a si Tomas a bebetowan sa "Miyadowa," na kena a ba kiran maaped ko kiyapakagemaw i Isa. 25 Na pitero rekaniyan o ped a manga sokbat a "Miyailay ami so Kadnan!" Ogaid na pitero kiran i Tomas a "Taman sa di aken mailay so poneng o totok ko manga lima niyan, ago maseko o tindoro aken so lakaw o manga totok, ago maaper o lima ko so pali ko kilid iyan na di ako den peratiyaya." 26 Kagiya makawalo den gawii na matitimo peman so manga sokbat ko walay na ped iran si Tomas. Apiya pen tatanggalan so manga pintoan na miyakagemaw si Isa na tomitindeg ko look iran a tig iyan a "Malalayon rekano so kalilintad." 27 Na pitero iyan ki Tomas a "Ilaya ngka so manga lima ko, na sekon ka on a tindoro o ka. Betera ngka a lima ngka na apera ngka so pali ko kilid aken. Di ka den pendowadowa ka paratiyaya ka baden!" 28 Na pitero rekaniyan i Tomas a "Kadnan aken ago Tohan aken!" 29 Pitero rekaniyan i Isa a "Ba ka miyaratiyaya sabap sa miyailay ako ngka? Rarakmatan so siran oto a miyaratiyaya apiya pen da ako iran mailay." 30 Madakel pen a piyakamemesa a manga nanao a pinggolaola i Isa a kiyamasaan o manga sokbat iyan a da mamangisorat sangkai a ribro. 31 Ogaid na miyamangisorat ai kaan iyo maparatiyaya a si Isa na aya den Al Masih, a so Wata o Allah, ago an kano pekatarima sa kaoyagoyag sabap ko kapeparatiyayaa niyo ko ingaran iyan.

21

1 Oriyan ai na miyakiilay peroman si Isa ko manga sokbat iyan roo sa kilid a Ranaw a Tibiriyas. Na aya kiyapakiilay niyan na datar ai: 2 Si Simon Pidro ago si Tomas a bebetowan sa "Miyadowa," si Natanil a taw sa Kana sii sa Galili, so manga wata i Sibidi ago so dowa a ped a manga sokbat na matitimo siran. 3 Pitero kiran i Simon Pidro a "Panginseda ako." Na pitero iran on a "Magonot kami reka." Na giyoto a lomiyalakaw siran na miyageda siran ko awang, ogaid na sii sangkoto a miyababasa gawii na da den a ba iran miyakowa a seda. 4 Kagiya teked a kapipita na tomitindeg si Isa roo ko kilid a ragat, ogaid na da makilala o manga sokbat a giyoto bes si Isa. 5 Inipananalo kiran i Isa a "Manga pagariya, ba aden a miyakowa niyo a seda?" Tig iran a "Da den." 6 Na pitero iyan kiran a "Sisiren iyo so biyala niyo ko makakawanan o awang, ka pekakowa kano ron." Na giyoto a inisisir iran on so biyala, na da iran magaga o ba iran maroran sabap ko tanto a madakel a manga seda a miyakowa iran. 7 So sokbat a pekebabayaan i Isa na tig iyan ki Pidro a "Giyoto bes so Kadnan!" So den so kiyanega on i Simon Pidro a giyoto so Kadnan na initinambed iyan so ilalapis iyan a nditaren, ka lomelekas sekaniyan, na tominipo ko ig. 8 So ped a manga sokbat na miyamanong sa titib a meeda siran ko awang a penggamiten iran so biyala a mapepeno a manga seda, ka kena a ba siran mawatan ko ipameted, ka manga lima polo bo repa a kawatan iran on. 9 Kagiya mamanepad siran ko awang na miyailay iran roo so apoy a pekedeg a manga waga a aden a pegiyaon on a manga seda, na aden pen a paan on. 10 Na pitero kiran i Isa a "Wita niyo sii so ped ko manga seda a gopen iyo miyakowa." 11 Giyoto a miyageda si Simon Pidro ko awang na giyamit iyan so biyala ko ipameted na mapepeno a manga ala a seda a magatos ago lima polo ago telo a kadakel iran langon. Ogaid na apiya pen tanto ini a madakel na da den makisi so biyala. 12 Pitero kiran i Isa a "Song kano sii na pita kano." Da den a isa bo ko manga sokbat a ba miyakaraw ron mise sa "Antawaa ka?" ka miyakilala iran a sekaniyan so Kadnan. 13 Na miyobay kiran si Isa na kinowa niyan so paan na inipamegay niyan kiran, na datar oto mambo a inikidia niyan ko seda. 14 Ikatelo ai a kiyapakiilay i Isa ko manga sokbat iyan oriyan o kiyaoyag iyan a poon ko miyamatay. 15 Kagiya makapasad siran koman na iniise i Isa ki Simon Pidro a "Simon a wata i Yahiya, ba ako ngka pekebabayai sa lawan ko kapekebabayai raken angkai a manga ped?" "Oway, Kadnan," a tig iyan. "Katawan ka a pekebabayaan ko seka." Pitero i Isa a "Pakakana ngka so manga nati a bilibili aken." 16 Na iniise i Isa sa ikadowa a "Simon wata i Yahiya, pekebabayaan ako ngka bes?" Tig iyan a "Oway, Kadnan, katawan ka a pekebabayaan ko seka." Na pitero i Isa a "Tagikora ngka so manga bilibili aken." 17 Iniise i Isa sa ikatelo a "Simon wata i Yahiya, ba ako ngka pekebabayai?" Na mikerata a ginawa i Pidro ka iniise rekaniyan i Isa sa miyakatelo a "Ba ako ngka pekebabayaan?" na tig iyan a "Kadnan, katawan ka so langon taman. Katawan ka a pekebabayaan ko seka!" Tig i Isa a "Pakakana ngka so manga bilibili aken. 18 Teroon ko reka a mataan den a sii ko kangoda ngka na seka i dii nditar sa ginawa ngka, na miyakasong ka ko apiya anda i kebayaan ka somong. Ogaid na amay ka malokes ka na merepa ka, na salakaw a taw a penditar reka ago pagowiten ka niyan ko di ngka kebayaan somong." 19 Sii ko kiyataroa sii i Isa na piyayag iyan so okit o kapetay i Pidro a imbantog iyan ko Allah. Kagiya matero iyan ai na pitero rekaniyan pen i Isa a "Pegonoti ako ngka!" 20 Dominingil si Pidro na miyailay niyan a petondog kiran so isa a sokbat a pekebabayaan i Isa. Giyanan so sokbat a rominda sa rareb i Isa ko kiyagabi iran ago iniise iyan on a "Kadnan, antawaa i tipo reka?" 21 Kagiya mailay sekaniyan i Pidro na pitero iyan ki Isa a "Kadnan, antonaa i kearongan sangkoto a mama?" 22 Somimbag si Isa a "O kabaya aken a oyagoyag sekaniyan den taman ko kakesoy aken na antonaa i labet ka on? Pegonoti ako ngka baden!" 23 Sabap ko kiyateroa niyan sii na miyakalangkap so totol sii ko magariari a giyangkoto a sokbat na di petay. Ogaid na da teroa i Isa a ba di petay angkoto a sokbat, ka tig iyan a "O kabaya aken a oyagoyag sekaniyan den taman ko kakesoy aken na antonaa i labet ka on?" 24 Giyangkai a sokbat a miyatero i Isa na aya dii seksi sangkai a manga miyaolaola ago aya on misorat. Na katawan ami a benar so totol iyan. 25 Na madakel pen a ped a pinggolaola i Isa, na o inisorat so oman i isa on na aya arangan aken on na so dalem a doniya na di ron kemin so manga ribro a penga sosoratan.