1

1 Ilo jinoin Naan eo, im Naan ippān Anij, im Naan Anij. 2 E in ilo jinoin ippān Anij. 3 Ear kōṃṃan men otemjej, im ejjeḷọk men eo Ear jab kōṃṃane, men eo eṃōj kōṃanṃane. 4 Mour ilo E, im mour meram an armej ro. 5 Im meram ej romaak ilo marok, im marok ear jab bōk e. 6 Eṃōj jilkintok juon armej jān Anij, im etan Jon. 7 E in ej itok kōn kōnnaan, bwe en kōnnaan kōn Meram, bwe armej otemjej ren tōmak kōn e. 8 E jab Meram eo, a ear itok bwe en kōnnaan kōn Meram eo. 9 Eo Meram e ṃool, ej kameram armej otemjej, im itok ñan laḷ. 10 E ar pād i laḷ, im Ear kōṃanṃan laḷ, im laḷ e jaje E. 11 E ar itok ñan men ko An, im ro doon raar jab bōk E. 12 A ro raar bōk E, Ear leḷọk ñan er bwe ren erom nejin Anij, ñan ro rej lōke Etan, 13 Ro raar ḷotak, jab jān bōtōktōk, jab jān ankilaan kanniōk, jab jān ankilaan armej, a jān Anij. 14 Im Naan ear kanniōk im pād ipped, (im jaar kallimjek An aiboojoj, aiboojoj āinwōt an juon wōt ri keotak jān Jemān) e obrak kōn jouj im ṃool. 15 Jon ej kōnnaan kōn E, im laṃōj im ba, “E in Eo iar kōnono kake, Eo ej itok ālikū eṃṃan jān eō; bwe E kar ṃokta jān eō!” 16 Bwe kōj otemjej jaar bōk jān An e obrak im jouj ioon jouj. 17 Bwe ar letok kien kōn Moses, a jouj im ṃool raar itok kōn Jisōs Kraist. 18 Ejjeḷọk armej ear lo Anij jabdewōt iien; juon wōt Nejin E ar keotak, Ej pād i ubōn Jemān, Ear kwaḷọk E. 19 Im men in Jon ej kōnnaan, ke ri Ju ro raar jilkinḷọk ñan e pris ro im ro ri Livai jān Jerusalem bwe ren kajjitōk ippān, “Wōn kwe?” 20 Im ej kwaḷọk, im jab kaarmejjete; im ej kwaḷọk, “Ña I jab ri Kraist.” 21 Im rej kajjitōk ippān, “Innām ekōjkan? Kwōj Ilaija ke?” Im e ba, “I jab e.” “Kwe ri kanaan eo ke?” Im e uwaak, “Jaab.” 22 Innām re ba ñan e, “Wōn kwe, bwe kōmin uwaak ro raar jilkintok kōm? Ta eo kwōj ba kōn kwe?” 23 E ba, “Ña ainikien juon ej laṃōj i āne jeṃaden, Kwōn kajiṃwe iaḷ an Irooj, āinwōt Aiseia ri kanaan ear ba.” 24 Im ro jilkintok er jān Parisi ro. 25 Im rej kajjitōk ippān im ba ñan e, “Innām etke kwōj peptaij, eḷaññe kwō jab ri Kraist, ak Ilaija, ak ri kanaan eo?” 26 Jon ej uwaak er im ba, “Ña ij peptaij kōn dān, a Juon ej jutak eoḷōpemi, Eo koṃ jaje; 27 Aet Eo ej itok ālikū, to in juj ko An I patkake bwe in jeḷate.” 28 Eṃōj kōṃanṃan men kein ilo Betani i reeaar in Jordan, ijo Jon ear peptaij ie. 29 Raan eo ilju Jon ej lo Jisōs itok ñan ippān im ba, “Lo, Lamb an Anij, Eo ej bōkḷọk an laḷ jerọwiwi! 30 E in eo ij ba kake, ‘Ālikū juon eṃṃaan Ej itok e utiej jān eō, bwe Ear ṃokta jān eō.’ 31 Im iar jaje E, a bwe kōn kwaḷọk E ñan Israel, kōn men in ij itok im peptaij ilo dān.” 32 Im Jon ej kōnnaan im ba, “Iar lo Jetōb kālaḷtak, āinwōt ṃuḷe, jān lañ, im Ej pād ioon. 33 Im Iar jaje E, a Eo ear jilkintok eō bwe in peptaij ilo dān, Ear ba ñan eō, ‘Ioon Eo kwō naaj lo Jetōb kālaḷtak im pād ioon, E in eo ej peptaij ilo Jetōb Kwōjarjar.’ 34 Im iar lo im kōnnaan bwe E in Nejin Anij.” 35 Bar juon, raan eo ilju, Jon e jutak, im ruo iaan rū kaḷoran; 36 Im ej kallimjek Jisōs ke ej etetal im e ba, “Lo, Lamb an Anij!” 37 Im ro rū kaḷoran, erro rej roñ an kōnono, im rej ḷoor Jisōs. 38 Innām Jisōs ej oktak im lo aer ḷoor E, im E ba ñan er, “Ta eo koṃro pukot e?” Re ba ñan E, “Rabbai (ukōtōn naan in Ri Kaki), Kwōj pād ia?” 39 E ba ñan er, “Itok im koṃ naaj loe.” Kōn men in rej itok im lo ijo Ej pād ie, im pād Ippān ilo raan eo; bwe e nañin emān awa. 40 Juon iaan ro raar roñ an Jon kōnono, im ḷoor E, e Andru, jaten Saimōn Piter. 41 Ṃokta ej pukot Saimōn jein im ba ñan e, “Kōm ar lo Messaia” (ukōtōn naan Kraist). 42 Ej āñintok e ñan Jisōs. Ke Jisōs ej lo e, E ba, “Kwe Saimōn nejin Jon, naaj likūt etaṃ Sipas” (ukōtōn naan in Piter). 43 Ilo raan eo ilju Jisōs e kōṇaan ilọk ñan Galili, im Ej lo Pilip; im Jisōs e ba ñan e, “Kwōn ḷoor Eō.” 44 Im Pilip e ri Betseida, jikin kweilọk an Andru im Piter. 45 Pilip ej lo Natanael im ba ñan e, “Kōm ar lo E, eo Moses ilo kien, im ro ri kanaan raar je kake, Jisōs ri Nazeret, nejin Josep.” 46 Im Natanael e ba ñan e, “Jabdewōt men eo eṃṃan ej itok jān Nazeret ke?” Pilip e ba ñan e, “Kwōn itok im lo e.” 47 Jisōs ej lo Natanael itok ñan Ippān im E ba ñan e, “Lo, ri Israel e ṃool, ejjeḷọk ṃoṇ ippān!” 48 Natanael e uwaak im ba ñan E, “Kwō jeḷā ña jān ia?” Jisōs e uwaak im ba ñan e, “Ṃokta jān an Pilip kūrtok eok, ke kwaar pād iuṃwin wōjke fig, Iar lo eok.” 49 Natanael e uwaak im ba ñan E, “Rabbai, Kwe Nejin Anij; Kwe Kiiñ in Israel.” 50 Jisōs e uwaak im ba ñan e, “Bwe Ij ba ñan eok, ‘Iar lo eok iuṃwin wōjke fig,’ kwōj tōmak ke? Kwō naaj lo men ko reḷap jān men kein.” 51 Im E ba ñan e, “E ṃool, e ṃool, Ij ba ñan eok, tokālik kwō naaj lo lañ e peḷḷọk, im enjeḷ in Anij rej wanlōñḷọk im wanlaḷtak ioon Nejin armej.”

2

1 Im raan eo kein ka jilu juon pālele ilo Kena in Galili, im jinen Jisōs ej pād ijo. 2 Im rej jiroñ Jisōs im ro rū kaḷoran, bwe ren itok ñan pālele eo. 3 Im ke e mat wain, jinen Jisōs e ba ñan E, “Ejjeḷọk wain ippāer.” 4 Jisōs e ba ñan e, “Kōrā, etke kwōj kajjitōk Ippa kōn men eo? Awa eo Aō e jañin itok.” 5 Jinen e ba ñan ro ri karijer, “Men eo jabdewōt Ej ba ñan koṃ, koṃwin kōṃanṃane.” 6 Im jiljino jāpe dekā in dān rej pād ijo, āinwōt ṃanit in karreo an ri Ju ro, joñoul im jiljilimjuon ak roñoul im ḷalem gallon ilo juon ñe ej lōñ. 7 Jisōs e ba ñan er, “Koṃwin teiñ jāpe in dān ko kōn dān.” Im rej teiñi im lōñ. 8 Im Ej ba ñan er, “Koṃwin kōtọọrḷọk kiiō, im bōkḷọk ñan irooj in kwōjkwōj.” Im rej bōkḷọk. 9 Ke eṃōj an irooj in kwōjkwōj edjoñ dān erom wain, im e jaje jān ia eo, (a ro ri karijer raar kōtọọrḷọk dān re jeḷā) irooj in kwōjkwōj ej kūrtok ḷeo pālele, 10 Im ba ñan e, “Armej otemjej rej letok wain eo eṃṃan ṃokta, im ke eḷap aer idaak, innām eo e nana; a kwaar kōjparok wain eo eṃṃan ñan iien in.” 11 Men in jinoin kakōḷḷe ko An, Jisōs ej kōṃṃane ilo Kena in Galili, im kwaḷọk An aiboojoj; im rū kaḷoran rej tōmak E. 12 Ālikin men in Ej wanlaḷtak ñan Kaperneum, E, im jinen, im ro jaten, im ro rū kaḷoran; im rej pād ijo jab elōñ raan. 13 Im e paak kwōjkwōj in kijoone an ri Ju ro, im Jisōs ej wanlōñḷọk ñan Jerusalem. 14 Im Ej lo ilowaan tempel ro rej wiakake kau koṃaan im sip ko im ṃuḷe ko, im ro rej wia kōn ṃani rej jijet. 15 Im ke eṃōj An kōṃanṃan kein deñḷọk kooḷ, Ej kadiwōjḷọk er otemjej jān tempel, im sip ko, im kau koṃaan ko; im lutōkḷọk ṃani an ri wia kōn ṃani, im ukōji tebōḷ ko aer; 16 Im E ba ñan ro rej wiakake ṃuḷe ko, “Koṃwin bōkḷọk men kā jān ije; koṃwin jab kōṃṃan iṃōn Jema iṃōn wia.” 17 Im rū kaḷoran rej keememej bwe ar je, Eḷap Aō kijejeto bwe en eṃṃan aer kōjerbal ṃweo iṃōṃ. 18 Innām ri Ju ro re uwaak im ba ñan E, “Ta kakōḷḷe eo Kwōj kwaḷọk ñan kōm bwe Kwōj kōṃṃan men kein?” 19 Jisōs e uwaak im ba ñan er, “Koṃwin kọkkure tempel in, im iuṃwin jilu raan I naaj kajerkak e.” 20 Innām ri Ju ro re ba, “Tempel in raar kōṃṃane iuṃwin eñoul im jiljino iiō, im Kwō naaj kajerkak e iuṃwin jilu raan ke?” 21 A Ear kōnono kōn tempel eo ānbwinnen. 22 Innām ke eṃōj An jerkakpeje jān ro re mej, rū kaḷoran rej keememej Ear ba men in; im rej tōmak Jeje ko, im naan eo Jisōs ear ba kake. 23 Im ke Ej pād i Jerusalem ilo kwōjkwōj in kijoone, ilo raan in kwōjkwōj elōñ rej lōke Etan, ke rej lo kakōḷḷe ko Ear kōṃṃani. 24 A Jisōs e jab make lōke E ñan er, bwe E jeḷā armej otemjej, 25 Im ejjeḷọk An aikuj bwe armej en kōnnaan kōn armej, bwe E jeḷā men eo ilowaan armej.

3

1 Im juon armej iaan Parisi ro, etan Nikodimōs, irooj in ri Ju ro. 2 E in ear itok ñan E ilo boñ im ba ñan E, “Rabbai, kōm jeḷā bwe Kwe ri Kaki itok jān Anij, bwe ejjeḷọk armej ej maroñ in kōṃanṃan kakōḷḷe ko kwōj kōṃṃani eḷaññe Anij e jab pād ippān.” 3 Jisōs e uwaak im ba ñan e, “E ṃool, e ṃool, Ij ba ñan eok, eḷaññe armej e jab bar ḷotak, e jāmin lo aelōñ in Anij.” 4 Nikodimōs e ba ñan E, “Ekōjkan armej e maroñ ḷotak ñe e rūtto? E maroñ bar deḷọñ ilowaan lọjien jinen, im bar ḷotak ke?” 5 Jisōs e uwaak, “E ṃool, e ṃool, Ij ba ñan eok, eḷaññe armej e jab ḷotak jān dān im Jetōb, e jab maroñ deḷọñ ilo aelōñ in Anij. 6 Men eo ej ḷotak jān kanniōk e kanniōk, im men eo ej ḷotak jān Jetōb e jetōb. 7 Kwōn jab bwilōñ bwe Ij ba ñan eok, ‘Eṃṃan koṃwin bar ḷotak.’ 8 Kōto ej uuki ijo e kōṇaan, im kwōj roñ an tōñetōñ, a kwō jaje kake ijo ej itok ie tok, im ijo ej ilọk ie ḷọk; āindein ro otemjej rej ḷotak jān Jetōb.” 9 Nikodimōs ej uwaak im ba ñan E, “Ekōjkan an maroñ men kein?” 10 Jisōs e uwaak im ba ñan e, “Kwe ri kaki in Israel, im jab jeḷā men kein ke? 11 E ṃool, e ṃool, Ij ba ñan eok, kōmij kōnono men eo kōm jeḷā, im kōnnaan men eo kōm ar loe, im koṃ jab bōk am kōnnaan. 12 Eḷaññe Iar kwaḷọk ñan koṃ men ko an laḷ, im koṃ jab tōmak, ekōjkan ami tōmak, eḷaññe Ij kwaḷọk ñan koṃ men ko an lañ? 13 Im ejjeḷọk armej ear wanlōñḷọk ñan lañ, a Eo ear wanlaḷtak jān lañ, Nejin armej Ej ilo lañ. 14 Im āinwōt Moses ear lelōñḷọk jedpānit eo ilo āne jeṃaden, āindein naaj lelōñḷọk Nejin armej; 15 Bwe jabdewōt eo ej tōmak ilo E en mour indeeo. 16 Bwe kōn an Anij yokwe laḷ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo. 17 Bwe Anij ear jab jilkintok Nejin ñan laḷ bwe En ekajet laḷ, a bwe laḷ en mour kōn E. 18 Jab ekajet eo ej lōke E; a eṃōj ekajet eo e jab lōke E, bwe ear jab lōke etan juon wōt Nejin Anij ear keotak. 19 Im men in ekajet eo, bwe meram e moottok ñan laḷ, im armej rej yokwe marok eḷap jān meram, bwe jerbal ko aer re nana. 20 Bwe jabdewōt eo ej kōṃanṃan nana ej kōjdate meram, im e jab itok ñan meram ñe ab kauwe jerbal ko an. 21 A eo ej kōṃanṃan ṃool, ej itok ñan meram, bwe en alikkar jerbal ko an, bwe ar kōṃṃani ilo Anij.” 22 Ālikin men kein Jisōs im ro rū kaḷoran rej itok ñan āne Judia, im Ej pād ijo im peptaij. 23 Im barāinwōt Jon ej peptaij ilo Inon e paak Selim, bwe eḷap dān ijo; im rej itok im peptaij. 24 Bwe jañin joḷọk Jon ṇa ilowaan kalbuuj. 25 Innām e waḷọk juon akwāāl ippān ro rū kaḷoran Jon im juon ri Ju kōn karreo. 26 Im rej itok ñan Jon im ba ñan e, “Rabbai, Eo ear pād ippaṃ i reeaar in Jordan, Eo kwōj kōnnaan kake, lo, E in ej peptaij, im armej otemjej rej ilọk ñan Ippān.” 27 Jon ej uwaak im ba, “Armej e jab maroñ in bōk jabdewōt, eḷaññe ar jab leḷọk ñan e jān lañ. 28 Koṃ make kōnnaan kōn eō, bwe Iar ba, ‘I jab ri Kraist,’ a ‘bwe jilkintok eō ṃokta jān E.’ 29 Eo ippān lio ej ḷeo pāleen; a jeran ḷeo, eo e jutak im roñjake, eḷap an lañlōñ kōn ainikien ḷeo. Innām eñin aō lañlōñ e obrak. 30 E naaj ḷapḷọk, a ña I naaj dikḷọk. 31 Eo ej itok jān lañ E utiej jān otemjej; eo e jān laḷ e ri laḷ, im ej kōnono kōn laḷ. Eo ej itok jān lañ E utiej jān otemjej. 32 Im men eo ear loe im roñjake, men in Ej kōnnaan kake, im ejjeḷọk armej ej bōk An kōnnaan. 33 Eo ear bōk An kōnnaan, ej sil men in bwe Anij e ṃool. 34 Bwe Eo Anij ear jilkintok Ej kōnono naan ko an Anij, bwe Anij e jab letok Jetōb ñan E kōn joñak. 35 Jeman ej yokwe Nejin, im Ear letok men otemjej ilo Pein. 36 Eo ej lōke Nejin, mour indeeo an; im eo e jab lōke Nejin e jāmin lo mour, a illu an Anij ej pād ioon.”

4

1 Innām ke Irooj e jeḷā ekōjkan Parisi ro raar roñ bwe Jisōs ej kōṃṃan im peptaij elōñ rū kaḷoran jān Jon, 2 (Meñe Jisōs e make jab peptaij, a ro rū kaḷoran) 3 Ej ilọk jān Judia, im bar ilọk ñan Galili. 4 Im eṃṃan En deblọk Sameria. 5 Innām Ej itok ñan jikin kweilọk i Sameria, etan Saikar, e paak bukwōn eo Jekob ear leḷọk ñan Josep nejin. 6 Im aebōj an Jekob ej pād ie. Innām Jisōs bwe Ej ṃōk kōn An etetal, Ej jijet iturin aebōj eo; im e nañin joñoul im ruo awa. 7 Juon kōrā in Sameria ej itok bwe en itōk; Jisōs ej ba ñan e, “Kwōn letok ñan Eō bwe In idaak.” 8 Bwe rū kaḷoran raar ilọk ñan jikin kweilọk eo bwe ren wiaik ṃōñā. 9 Innām kōrā in Sameria eo e ba ñan E, “Etke Kwe ri Ju Kwōj kajjitōk dān in idaak jān eō, ña kōrā in Sameria?” (Bwe ri Ju ro im ro ri Sameria re jab kōṃṃao ippān doon.) 10 Jisōs e uwaak im ba ñan e, “Eḷaññe kwaar jeḷā men eo Anij ej letok, im Eo ej ba ñan eok, ‘Kwōn letok ñan Eō bwe In idaak;’ kwō naaj kar kajjitōk Ippān, im Enaaj kar lewōj ñan eok dān in mour.” 11 Kōrā eo e ba ñan E, “Irooj, ejjeḷọk kein itōk Ippaṃ, im aebōj in e ṃwilaḷ; innām jān ia Aṃ dān in mour? 12 Kwe eḷap jān jemād Jekob, eo ear letok ñan kōm aebōj in, im e make idaak, im ro nejin im kidu ko an ke?” 13 Jisōs e uwaak im ba ñan e, “Ro otemjej rej idaak dān in re naaj bar maro. 14 A jabdewōt eo ej idaak dān eo I naaj leḷọk ñan e, e jāmin bar maro indeeo; a dān eo I naaj leḷọk ñan e, enaaj aebōj ilo e im naaj tọọrtok ñan mour indeeo.” 15 Kōrā e ba ñan E, “Irooj, Kwōn letok dān in ñan eō, bwe in jab maro, im jab itōn itōk ijin.” 16 Jisōs ej ba ñan e, “Kwōn ilām kūrtok ḷeo pāleṃ, im itok ijin.” 17 Kōrā e uwaak im ba, “Ejjeḷọk ḷeo pāleō.” Jisōs e ba ñan e, “E ṃool aṃ ba, ‘Ejjeḷọk ḷeo pāleō’; 18 Bwe kar ḷalem ḷeo pāleṃ; im eo ej pād ippaṃ kiiō e jab ḷeo pāleṃ; ilo men in e ṃool aṃ ba.” 19 Kōrā ej ba ñan E, “Irooj, ij kab kile Kwe ri kanaan. 20 Ro jemem raar kabuñ ioon toḷ in; im koṃ ba, Ilo Jerusalem ijo armej ren kabuñ ie.” 21 Jisōs ej ba ñan e, “Kōrā, kwōn tōmak Eō, awa ej itok, ñe koṃ jāmin kabuñ ñan Jemami ioon toḷ in, ak ilo Jerusalem. 22 Koṃij kabuñ ñan men eo koṃ jaje kake: kōm jeḷā eo kōmij kabuñ ñan e, bwe mour jān ri Ju ro. 23 Awa ej itok, im kiiō, ñe ri kabuñ re ṃool renaaj kabuñ ñan Jemeir ilo Jetōb im ilo ṃool; bwe Jemeir ej pukot ro āierwōt bwe ren kabuñ ñan E. 24 Anij e Jetōb: im ro rej kabuñ ñan E, ren kabuñ ilo jetōb im ilo ṃool.” 25 Kōrā e ba ñan E, “I jeḷā bwe Messaia ej itok (eo etan Kraist); ñe Ej itok, Enaaj kwaḷọk men otemjej ñan kōm.” 26 Jisōs e ba ñan e, “Ña E, Ña Ij kōnono ñan eok.” 27 Im ilo iien in rū kaḷoran rej itok, im bwilōñ bwe Ej kōnono ippān kōrā; a ejjeḷọk armej e ba, “Ta eo Kwōj pukot?” ak, “Etke Kwōj kōnono ippān?” 28 Innām kōrā eo ej likūt kein itōk, im ej ilọk ñan jikin kweilọk im ba ñan armej raṇ, 29 “Koṃwin itok, im lo armej eo ear kwaḷọk ñan eō men otemjej iar kōṃṃani; e maroñ bwe E in ri Kraist ke?” 30 Innām rej ilọk jān jikin kweilọk, im itok ñan Ippān. 31 Im ilukwōn iien in, rū kaḷoran rej kajjitōk Ippān im ba, “Rabbai, Kwōn ṃōñā.” 32 A E ba ñan er, “Kijiō bwe In ṃōñā, men eo koṃ jaje kake.” 33 Kōn men in, rū kaḷoran re ba ñan doon, “Jabdewōt armej e ar bōktok ñan E bwe En ṃōñā ke?” 34 Jisōs ej ba ñan er, “Kijiō bwe in kōṃanṃan ankilaan Eo e ar jilkintok Eō, im bwe In kaṃōjḷọk jerbal eo An. 35 Koṃ jab ba ke, ‘Ñe emān allōñ, innām iien ṃadṃōd?’ Lo, Ij ba ñan koṃ, Koṃwin reiḷọk, im lale jikin kallib ko; bwe kiiō re mouj ilo iien ṃadṃōd. 36 Im eo ej ṃadṃōd ej bōk oṇān, im ej aintok leen ñan mour indeeo; bwe eo ej kallib im eo ej ṃadṃōd ren jiṃor lañlōñ. 37 Bwe ilo men in e ṃool naan eo, ‘Juon ej kallib, im bar juon ej ṃadṃōd.’ 38 Iar jilkinḷọk koṃ bwe koṃwin ṃadṃōd ijo koṃ ar jab jerbal ie; bar jet raar jerbal, im koṃij deḷọñ ilo aer jerbal.” 39 Im elōñ iaan ro ri Sameria ilo jikin kweilọk eo rej tōmak E kōn naan an kōrā eo ear kōnnaan, “Ear kwaḷọk ñan eō men otemjej iar kōṃṃani.” 40 Innām ke ri Sameria rej itok, rej akweḷap ñan E bwe En pād ippāer; im Ej pād ijo iuṃwin ruo raan. 41 Im bar elōñ rej tōmak kōn An in naan; 42 Im re ba ñan kōrā eo, “Kiiō kōm tōmak, jab kōn aṃ kōnono; bwe kōm ar make roñjake, im jeḷā bwe e ṃool E in Ri Lọmọọren laḷ.” 43 Im ilọkōn ruo raan Ej ilọk jān ijo, im ilọk ñan Galili. 44 Bwe Jisōs e make kōnnaan, bwe ejjeḷọk naan in nōbar ri kanaan ilo āne eo an. 45 Innām ke Ej itok ñan Galili, ri Galili rej bōk E, bwe raar lo men otemjej Ear kōṃṃani i Jerusalem ilo kwōjkwōj; bwe barāinwōt raar ilọk ñan kwōjkwōj. 46 Innām Jisōs ej bar itok ñan Kena in Galili, ijo Ear kōṃṃan dān erom wain. Im juon irooj ej pād ijo, nejin eṃṃaan e nañinmej i Kaperneum. 47 Ke ej roñ bwe Jisōs ear itok jān Judia ñan Galili, ej ilọk ñan Ippān, im akweḷap ñan E bwe En wanlaḷtak im kemour nejin, bwe e nañinmej wōt jidik. 48 Innām Jisōs ej ba ñan e, “Eḷaññe koṃ jab lo kakōḷḷe ko im men in bwilōñ ko, koṃ jāmin tōmak.” 49 Irooj e ba ñan E, “Irooj, Kwōn wanlaḷtak ṃokta jān an nejū mej.” 50 Jisōs ej ba ñan e, “Kwōn ilọk, nejiṃ e mour.” Im armej ej tōmak naan eo Jisōs ear ba ñan e, im ej ilọk. 51 Im ke ej wanlaḷ, ri karijeran rej ioon e, im kōnnaanōk e, im ba, “Nejiṃ e mour.” 52 Innām ej kajjitōk ippāer, “Jete awa e jino an mourḷọk?” Im re ba ñan e, “Inne ke juon awa nañinmej in bwil e jako jān e.” 53 Innām jemān e jeḷā, bwe ilo awa eo, iien eo Jisōs ear ba ñan e, “Nejiṃ e mour”; im e make tōmak kab nukun otemjej. 54 Eñin bar kein ka ruo kakōḷḷe Jisōs ej kōṃṃane, ke Ej itok jān Judia ñan Galili.

5

1 Ālikin men kein juon kwōjkwōj an ri Ju ro; im Jisōs ej wanlōñḷọk ñan Jerusalem. 2 Im ilo Jerusalem e paak kōjām in sip juon ḷwe, rej likūt etan ilo naan in Hibru Betesda, ḷalem an portiko. 3 Ilo er elōñ armej iaan ro re ṃōjṇọ, im re pilo, im re kūrro, im re akā rej babu. 5 Im juon armej ej pād ijo, ear nañinmej iuṃwin jilñuul im ruwalitōk iiō. 6 Ke Jisōs ej lo an babu, im kile bwe e to an pād im āinwōt, Ej ba ñan e, “Kwō kōṇaan bwe kwōn mour ke?” 7 Ḷeo e nañinmej ej uwaak E, “Irooj, ejjeḷọk armej ippa, ñe dān liṃaajṇoṇo, bwe en likūt eō ilowaan ḷwe; a ñe ij deḷọñ, bar juon ej tuwaak ṃokta jān eō.” 8 Jisōs ej ba ñan e, “Kwōn jerkak, im bōk kiniōṃ im etal.” 9 Im e ṃōkaj an armej eo mour, im bōk kinien, im etal; im raan eo raan in Jabōt. 10 Innām ri Ju ro re ba ñan eo e kar mour, “Rainin Jabōt: im e jab mālim bwe kwōn bōk kiniōṃ.” 11 A ej uwaak, “Eo ear kemour eō, E in ear ba ñan eō, ‘Kwōn bōk kiniōṃ im etal.’” 12 Innām rej kajjitōk ippān, “Wōn armej eo ear ba ñan eok, ‘Kwōn bōk kiniōṃ im etal?’” 13 A ḷeo ear mour e jaje wōn eo; bwe Jisōs ear make ḷọk jān ijo, im elōñ armej rej pād ie. 14 Tokālik Jisōs ej loe ilowaan tempel, im E ba ñan e, “Lo, kwōj mour wōt; kwōn jab bar kōṃanṃan nana, ñe ab ḷapḷọk an nana itok ñan eok.” 15 Armej eo ej ilọk, im kōnnaanōk ri Ju ro, bwe Jisōs eo E ar kemour e. 16 Im kōn men eo ri Ju ro rej matōrtōre Jisōs, bwe Ear kōṃṃan men kein ilo Jabōt. 17 A Jisōs e uwaak er, “Jema ej jerbal ñan iien in, im Ña Ij jerbal.” 18 Innām kōn men in ri Ju ro eḷapḷọk aer pukot bwe ren ṃan E, bwe Ear jab kọkkure wōt raan Jabōt, a barāinwōt Ej ba Anij e Jemān, im make kōṃṃan E āinwōt Anij. 19 Innām Jisōs e uwaak im ba ñan er, “E ṃool, e ṃool, Ij ba ñan koṃ, Nejin e jab make maroñ kōṃanṃan jabdewōt, a men eo Ej lo Jemān kōṃṃane; bwe men ko jabdewōt Ej kōṃṃani, men kein barāinwōt Nejin ej kōṃanṃani āindein. 20 Bwe Jemān ej yokwe Nejin, im kwaḷọk ñan E men otemjej Ej make kōṃanṃani; im Enaaj kwaḷọk ñan E jerbal ko reḷap jān men kein, bwe koṃwin bwilōñ. 21 Bwe āinwōt Jemān ej kajerkakpeje ro re mej, im kemour er; āindein barāinwōt Nejin enaaj kemour eo E kōṇaan. 22 Bwe Jemān e jab ekajet armej, a Ej likūt ekajet otemjej ñan Nejin: 23 Bwe armej otemjej ren koutiej Nejin, āinwōt rej koutiej Jemān. Eo e jab koutiej Nejin, e jab koutiej Jemān eo Ear jilkintok E. 24 E ṃool, e ṃool, Ij ba ñan koṃ, Eo ej roñjake Aō in naan, im lōke Eo ear jilkintok Eō, an mour indeeo, im e jāmin itok ilo ekajet; a ear ilọk jān mej ñan lowaan mour. 25 E ṃool, e ṃool, Ij ba ñan koṃ, Awa ej itok, im e moottok, ñe ro re mej renaaj roñ ainikien Nejin Anij; im ro rej roñjake re naaj mour. 26 Bwe āinwōt an Jemān mour ej ilo E, āindein barāinwōt Ear leḷọk ñan Nejin bwe An mour en ilo E: 27 Bwe Ear leḷọk kajoor ñan E bwe En kōṃanṃan ekajet, bwe E Nejin armej. 28 Koṃwin jab bwilōñ kōn men in; bwe awa ej itok, ilo eo ro otemjej rej pād ilo lōb ko, renaaj roñ ainikien, 29 Im naaj diwōjtok; ro raar kōṃṃan eṃṃan, ñan jerkakpeje in mour: im ro raar kōṃanṃan nana, ñan jerkakpeje in ekajet. 30 I jab make maroñ in kōṃanṃan men eo jabdewōt: āinwōt Ij roñ Ij ekajete; im Aō ekajet e wānōk: bwe I jab pukot ankil Aō wōt, a ankilaan Jema eo Ear jilkintok Eō. 31 Eḷaññe Ña Ij make kōnnaan kōn Eō, Aō kōnnaan e jab ṃool. 32 Bar juon Ej kōnnaan kōn Eō; im I jeḷā bwe kōnnaan eo Ej kōnnaan kōn Eō e ṃool. 33 Koṃ ar jilkinḷọk ñan Jon, im ear kōnnaan kōn ṃool. 34 A kōnnaan Ij bōke e jab jān armej: a Ij kōnono men kein bwe koṃwin mour. 35 E ar lamp eo ej urur im romaak; im ewor iien koṃ ar kōṇaan lañlōñ ilo an meram. 36 A ewor kōnnaan kōn Eō eḷap jān eo an Jon, bwe jerbal ko Jema ear letok ñan Eō bwe In kaṃōjḷọk er, jerbal kein Ij kōṃṃani, rej kōnnaan kōn Eō, bwe Jema ear jilkintok Eō. 37 Im Jema eo Ear jilkintok Eō, Ear kōnnaan kōn Eō. Koṃ ar jab roñ ainikien, ak lo wāween jabdewōt iien. 38 Im naan eo An e jab pād ilo koṃ; bwe Eo Ear jilkintok E, koṃ jab tōmak E. 39 Koṃij pukot ilo Jeje ko, bwe ilo er koṃij ḷōmṇak ami mour indeeo; im kein rej kōnnaan kōn Eō. 40 Im koṃ jab kōṇaan itok ñan Ippa, bwe koṃwin bōk mour. 41 I jab bōk nōbar jān armej raṇ. 42 A I jeḷā koṃ, bwe yokwe Anij e jab pād ilo koṃ. 43 Ij itok ilo etan Jema, im koṃ jab bōk Eō; eḷaññe bar juon enaaj itok ilo etan make, koṃ naaj bōk e. 44 Ekōjkan ami maroñ in tōmak, koṃij bōk nōbar jān doon, im jab pukot nōbar jān Anij E wōt. 45 Koṃwin jab ḷōmṇak bwe I naaj kinaakḷọk koṃ ñan Jema; juon ej kinaakḷọk koṃ, Moses eo koṃij kōjatdikdik koṃ kake. 46 Bwe eḷaññe koṃ ar tōmak Moses, koṃ naaj kar tōmak Eō, bwe ear jeje kōn Eō. 47 A eḷaññe koṃ jab tōmak jeje ko an, ekōjkan ami naaj tōmak naan ko Aō?”

6

1 Ālikin men kein, Jisōs ej ilọk ñan loṃaḷo jab uweo, loṃaḷo in Galili, bar juon etan Taibiriōs. 2 Im eḷap jar rej ḷoor E, bwe raar lo kakōḷḷe ko An Ear kōṃṃani ñan ro raar nañinmej. 3 Im Jisōs ej wanlōñḷọk ioon toḷ, im jijet ijo ippān ro rū kaḷoran. 4 Im e paak kwōjkwōj in kijoone, kwōjkwōj an ri Ju ro. 5 Im ke Jisōs ej reiḷọk, im lo eḷap jar rej itok ñan E, E ba ñan Pilip, “Je naaj wiaik pilawā jān ia, bwe rein ren ṃōñā?” 6 Im E ba men in bwe En mālejjoñ e; bwe E make jeḷā men eo Enaaj kōṃṃane. 7 Pilip e uwaak E, “Rūbukwi silliñ kōn wia pilawā e jab bwe kōn er, bwe jabdewōt iaer en bōk jidik.” 8 Juon iaan rū kaḷoran, Andru jaten Saimōn Piter, e ba ñan E, 9 “Juon ḷaddik ijin, ḷalem pilawā barli ippān, im ruo ek; a ewi tokjān men kein ippān elōñ armej?” 10 Jisōs e ba, “Koṃwin kajijet armej raṇ.” Im elōñ wūjooj ijo. Innām armej rej jijet, bwinier nañin ḷalem tọujin. 11 Im Jisōs ej bōk pilawā ko; im ke eṃōj An jar, Ej ajej ñan ro rej jijet: im barāinwōt ek ko āinwōt aer kōṇaki. 12 Ke re mat, E ba ñan ro rū kaḷoran, “Koṃwin aini ṃōttan ko re bwe, bwe ejjeḷọk iaer en jako.” 13 Innām rej aini, im rej kalōñ joñoul im ruo iep kōn ṃōttan ko re bwe jān ḷalem pilawā barli, rej pād wōt ippāer ṃōjen aer ṃōñā. 14 Im armej raṇ ke raar lo kakōḷḷe eo Jisōs ear kōṃṃane, re ba, “E ṃool E in ri kanaan eo ej itok ñan laḷ.” 15 Innām ke Jisōs e jeḷā, bwe re kōṇaan itok im bōk E kōn kajoor, im kōṃṃan bwe En kiiñ, E bar make ilọk ñan toḷ. 16 Im ke e jota, ro rū kaḷoran rej wanlaḷ ñan loṃaḷo, 17 Im uwe ioon wa, im rej ilọk ioon loṃaḷo ñan Kaperneum. Im iien in e marok, im Jisōs e jañin itok ñan ippāer. 18 Im e poktak loṃaḷo kōn an ḷap kōto ej uuki. 19 Innām ke eṃōj aer aōṇōṇḷọk jilu ak emān ṃaiḷ, rej lo Jisōs etetal ioon loṃaḷo, im kepaak wa; im rej lōḷñọñ. 20 A E ba ñan er, “Ña E; koṃwin jab lōḷñọñ.” 21 Innām re kōṇaan bōk E ioon wa; im e ṃōkaj an wa tōkeak i āne rej ilọk ñan e. 22 Raan eo ilju, ke armej, ro raar jutak ioon āne i reeaar in loṃaḷo, rej lo ejjeḷọk bar juon wa ijo, a juon wōt, im Jisōs ear jab uwe ippān ro rū kaḷoran ioon wa eo, a rū kaḷoran raar make uwe; 23 (A bar jet wa raar tartok jān Taibiriōs e paak āne ijo raar ṃōñā pilawā, ke eṃōj an Jisōs jar.) 24 Innām ke armej rej lo bwe Jisōs e jab pād ijo, im jab ro rū kaḷoran; rej barāinwōt uwe ioon wa ko, im itok ñan Kaperneum, im pukot Jisōs. 25 Im ke eṃōj aer lo E i loṃaḷo jab uweo, re ba ñan E, “Rabbai, Kwaar itok ñan ijin ñāāt?” 26 Jisōs e uwaak er im ba, “E ṃool, e ṃool, Ij ba ñan koṃ, Koṃij pukot Eō, jab bwe koṃ ar lo kakōḷḷe ko, a bwe koṃ ar ṃōñā pilawā ko im ar mat. 27 Koṃwin jab jerbal kōn ṃōñā eo ej jako, a kōn ṃōñā e naaj pād wōt ñan mour indeeo, men eo Nejin armej Enaaj lewōj ñan koṃ; bwe Anij Jema Ear sil E.” 28 Innām re ba ñan E, “Ta eo kōmin jerbal kake, bwe kōmin jerbale jerbal ko an Anij?” 29 Jisōs e uwaak im ba ñan er, “Men in jerbal an Anij, bwe koṃwin lōke Eo Ear jilkintok.” 30 Innām re ba ñan E, “Innām ta kakōḷḷe eo Kwōj kwaḷọk e, bwe kōmin lo, im tōmak Eok? Ta eo Kwōj jerbale? 31 Ro jiṃṃad raar ṃōñā manna i āne jeṃaden; āinwōt ar je, E ar leḷọk ñan er pilawā jān lañ bwe ren ṃōñā.” 32 Innām Jisōs ej ba ñan er, “E ṃool, e ṃool, Ij ba ñan koṃ, E jab Moses eo ear lewōj ñan koṃ pilawā jān lañ; a Jema ej lewōj ñan koṃ pilawā e ṃool jān lañ. 33 Bwe pilawā an Anij Eo ej itok jān lañ, im leḷọk mour ñan laḷ.” 34 Innām re ba ñan E, “Irooj, iien otemjej, Kwōn letok pilawā in ñan kōm.” 35 Im Jisōs ej ba ñan er, “Ña pilawā in mour; eo ej itok ñan Eō e jāmin kwōle; im eo ej lōke Eō e jāmin maro indeeo. 36 A Iar ba ñan koṃ, Koṃ ar lo Eō im koṃ jab tōmak. 37 Ro otemjej Jema ear letok ñan Eō, renaaj itok ñan Ippa; im eo ej itok ñan Eō, e pen Aō jāmin joḷọk e. 38 Bwe Iar itok jān lañ, jab bwe In kōṃanṃan ankil Aō, a ankilaan Eo ear jilkintok Eō. 39 Im men in ankilaan Jema, ear jilkintok Eō, bwe iaan ro otemjej Ear letok ñan Eō ejjeḷọk juon en jako, a Inaaj kajerkakpeje e ilo raan eo āliktata. 40 Im men in ankilaan Eo ear jilkintok Eō, bwe er otemjej rej lo Nejin, im lōke E, ren bōk mour indeeo; im I naaj kajerkak e ilo raan eo āliktata.” 41 Innām ri Ju ro rej lotaan E, bwe Ear ba, “Ña pilawā eo ej wanlaḷtak jān lañ.” 42 Im re ba, “E in E jab Jisōs, nejin Josep, je jeḷā jemān im jinen ke? A ekōjkan An ba ‘Iar wanlaḷtak jān lañ’?” 43 Jisōs e uwaak im ba ñan er, “Koṃwin jab lotaan ippān doon. 44 Ejjeḷọk armej ej maroñ itok ñan Ippa eḷaññe Jema eo E ar jilkintok Eō E jab ipertok e: im I naaj kajerkake ilo raan eo āliktata. 45 Ro ri kanaan raar je, Im Anij enaaj katakin er otemjej. Ro otemjej raar roñ jān Jema, im ar katak, rej itok ñan Eō. 46 Ejjeḷọk juon armej ear lo Jema, a Eo wōt jān Anij, Ear lo Jema. 47 E ṃool, e ṃool, Ij ba ñan koṃ, Eo ej tōmak, mour indeeo ippān. 48 Ña pilawā eo, pilawā in mour. 49 Ro jemami raar ṃōñā manna ilo āne jeṃaden, im re mej. 50 Pilawā in ej itok jān lañ, bwe armej en ṃōñā jān e im jāmin mej. 51 Ña pilawā eo e mour ear wanlaḷtak jān lañ. Eḷaññe jabdewōt armej ej ṃōñā jān pilawā in, enaaj mour indeeo; aet, im pilawā eo I naaj lewōj e kanniōkō, men eo I naaj lewōj bwe en kemour laḷ.” 52 Innām ri Ju ro rej akwāāl ippān doon im ba, “Ekōjkan armej in E maroñ letok ñan kōj kanniōkin bwe jen ṃōñā?” 53 Innām Jisōs e ba ñan er, “E ṃool, e ṃool, Ij ba ñan koṃ, Eḷaññe koṃ jab ṃōñā kanniōkin Nejin armej, im jab idaak bōtōktōkin, ejjeḷọk mour ilo koṃ. 54 Eo ej ṃōñā kanniōkō, im idaak bōtōktōkō, an mour indeeo; im I naaj kajerkak e ilo raan eo āliktata. 55 Bwe kanniōkō men in ṃōñā e ṃool, im bōtōktōkō men in idaak e ṃool. 56 Eo ej ṃōñā kanniōkō, im idaak bōtōktōkō, ej pād ilo Ña, im Ña ilo e. 57 Āinwōt Jema e mour Ear jilkintok Eō, im Ña Ij mour kōn Jema; barāinwōt eo ej ṃōñā Ña, e in enaaj mour kōn Ña. 58 Men in pilawā eo ear wanlaḷtak jān lañ: jab āinwōt ro jemami raar ṃōñā im re mej; eo ej ṃōñā pilawā in enaaj mour indeeo.” 59 Men kein Ear ba ilowaan iṃōn kweilọk, ke Ear katakin ilo Kaperneum. 60 Innām elōñ iaan ro rū kaḷoran, ke eṃōj aer roñjake, re ba, “Naan in naan e pen; wōn e maroñ in roñjake?” 61 Ke Jisōs e make jeḷā bwe rū kaḷoran rej lotaan kōn men in, E ba ñan er, “Men in ej ḷōkatipe koṃ ke? 62 Ekōjkan eḷaññe koṃ naaj lo an Nejin armej wanlōñḷọk ñan ijo Ear pād ie ṃokta? 63 Jetōb ej kemour; kanniōk ejjeḷọk an kakajooror: naan ko Iar kōnono ñan koṃ kaki, rej Jetōb, im rej mour. 64 A jet iaami re jab tōmak.” Bwe Jisōs e jeḷā jān jinoin, wōn ro re jab tōmak, im wōn eo enaaj ketak E. 65 Im E ba, “Kōn men in Iar ba ñan koṃ, bwe ejjeḷọk armej e maroñ itok ñan Ippa, eḷaññe Jema e jab leḷọk ñan e.” 66 Jān iien eo, elōñ iaan ro rū kaḷoran rej jepḷaak, im jab bar etetal Ippān. 67 Innām Jisōs e ba ñan joñoul im ruo, “Koṃ barāinwōt kōṇaan ilọk ke?” 68 Saimōn Piter e uwaak E, “Irooj, kōm naaj ilọk ñan wōn? Ippaṃ naan ko naan in mour indeeo. 69 Im kōm ar tōmak im jeḷā, bwe Kwe Juon eo E kwōjarjar an Anij.” 70 Jisōs e uwaak er, “Iar jab kāālōt koṃ joñoul im ruo, im juon iaami e tepiḷ ke?” 71 Ej kōnono kōn Judas, nejin Saimōn Iskariōt, bwe e juon iaan joñoul im ruo, im enaaj ketak E.

7

1 Im ālikin men kein Jisōs ej etetal i Galili: bwe E jab kōṇaan etetal i Judia, bwe ri Ju ro rej pukot bwe ren ṃan E. 2 Kiiō epaak an ri Ju ro kwōjkwōj in iṃōn kōppād. 3 Innām ro jaten re ba ñan E, “Kwōn ilọk jān ijin, im ilọk ñan Judia, bwe barāinwōt rū kaḷoraṃ ren lo jerbal ko Aṃ Kwōj kōṃṃani. 4 Bwe ejjeḷọk armej ej kōṃṃan jabdewōt men eo ijo ettino, im e make kōṇaan bwe en alikkar. Eḷaññe Kwōj kōṃṃan men kein, Kwōn kwaḷọk Eok ñan laḷ.” 5 Bwe ro jaten re jab lōke E. 6 Innām Jisōs e ba ñan er, “Aō iien e jañin itok; a iien eo ami e pojak iien otemjej. 7 Laḷ e jab maroñ kōjdate koṃ; a ej kōjdate Eō, bwe Ij kōnnaan kōn e, bwe jerbal ko an re nana. 8 Koṃwin ilọk ñan kwōjkwōj in: I jab ilọk ñan kwōjkwōj in kiiō; bwe iien eo Aō e jañin jejjet.” 9 Ke eṃōj An ba men kein ñan er, Ej pād wōt i Galili. 10 A ke eṃōj an ro jaten ilọk ñan kwōjkwōj eo, innām E barāinwōt ilọk, jab alikkar, a āinwōt ilo ettino. 11 Innām ri Ju ro rej pukot E ilo kwōjkwōj im ba, “Ewi ḷeo?” 12 Im jar eo eḷap aer ñūrñūr ñan doon kōn E: bwe jet re ba, “E armej eṃṃan”; bar jet re ba, “Jaab; a Ej kejebwābweik armej raṇ.” 13 A ejjeḷọk armej ej kōnono alikkar kōn E, bwe re mijak ri Ju ro. 14 Kiiō enañin ilukwōn kwōjkwōj Jisōs ej wanlōñ ilowaan tempel im katakin. 15 Innām ri Ju ro re bwilōñ im ba, “Ekōjkan an armej in jeḷā lōta ko, bwe Ear jab katak kaki?” 16 Jisōs e uwaak er im ba, “Naan in katak eo Aō, e jab Aō, a an Eo ear jilkintok Eō. 17 Eḷaññe jabdewōt armej e kōṇaan kōṃanṃan ankilaan, e naaj jeḷā kōn naan in katak eo, eḷaññe e jān Anij, ak Ij kōnono kōn Ña wōt. 18 Eo ej kōnono jān e make ej kappukot an aiboojoj; a Eo ej kappukot aiboojoj an Eo ear jilkintok Eō, E in e ṃool, im ejjeḷọk jab wānōk ilo E. 19 Moses ear lewōj kien ñan koṃ ke, im ejjeḷọk juon iaami ej pokake kien eo? Etke koṃij pukot in ṃan Eō?” 20 Jar eo re uwaak im ba, “Juon tiṃoṇ Ippaṃ; wōn eo ej pukot bwe en ṃan Eok?” 21 Jisōs e uwaak im ba ñan er, “Iar kōṃanṃan juon jerbal, im koṃ otemjej bwilōñ kake. 22 Moses ear lewōj ñan koṃ ṃwijṃwij, (ak men eo e jab an Moses, a an ro jiṃṃad); im ilo raan in Jabōt koṃij ṃwijṃwij armej. 23 Eḷaññe armej ilo Jabōt ej bōk an ṃwijṃwij, bwe en jab kọkkure kien Moses; koṃij illu ñan Eō bwe Iar kōṃṃan juon armej mour otem mour ilo Jabōt ke? 24 Koṃwin jab ekajet kōn men eo ilikin, a koṃwin ekajete ekajet eo e ṃool.” 25 Innām jet iaer jān Jerusalem re ba, “E in e jab Eo rej pukot bwe ren ṃan E ke? 26 Im, lo, Ej kōnono alikkar, im ejjeḷọk aer ba ñan E. E maroñ ke bwe irooj raṇ re kanooj kile bwe E in ri Kraist? 27 A je jeḷā armej in ijo Ej itok jān e; a ñe ri Kraist ej itok ejjeḷọk armej ej jeḷā ijo Ej itok jān e.” 28 Innām Jisōs ej laṃōj ilowaan tempel ke Ej katakin im ba, “Koṃ jeḷā Ña, im koṃ jeḷā ijo Ij itok jān e: a Ña I jab itok kōn Ña, a Eo e ar jilkintok Eō e ṃool, Eo koṃ jaje. 29 A Ña I jeḷā E; bwe Ña jān E, im Ear jilkintok Eō.” 30 Innām rej pukot bwe ren jibwe E: a ejjeḷọk armej ej likūt pein ṇa ioon, bwe awa eo An e jañin moottok. 31 Im elōñ iaan jar eo rej tōmak E im ba, “Ñe ri Kraist ej itok, Enaaj kōṃanṃan kakōḷḷe ko elōñ jān men kein armej in Ej kōṃanṃani ke?” 32 Parisi ro rej roñ bwe armej rej ñūrñūr kake men kein kōn E, im Parisi ro im pris ro reḷap rej jilkinḷọk ri jelōk bwe ren jibwe E. 33 Innām Jisōs e ba ñan er, “Jidik wōt iien Ij pād ippemi, im Ij ilọk ñan Eo ear jilkintok Eō. 34 Koṃ naaj pukot Eō, im koṃ jāmin lo Eō, bwe ijo Ij pād, koṃ jab maroñ in itok ie.” 35 Innām ri Ju ro re ba ñan doon, “Enaaj ilọk ñan ia, bwe kōmin jab lo E? Enaaj ilọk ñan ro re jeplōklōk ippān ro ri Grik, im katakin ro ri Grik ke? 36 Naan rot naan in Ej ba, ‘Koṃ naaj pukot Eō, im jāmin lo Eō; im ijo Ij pād, koṃ jab maroñ in itok ie’?” 37 Ilo raan eo āliktata, raan eḷap ilo kwōjkwōj, Jisōs ej jutak im laṃōj im ba, “Eḷaññe jabdewōt armej ej maro, en itok ñan Ippa, im idaak. 38 Eo ej lōke Ña, āinwōt Jeje ko rej ba, ‘Jān ilowaan enaaj tọọr ḷọk river ko an dān in mour.’” 39 A Ej kōnono men in kōn Jetōb, Eo ro rej lōke E renaaj bōke; bwe ar jañin letok Jetōb eo, bwe ar jañin kaiboojoj Jisōs. 40 Innām elōñ armej, ke rej roñ naan in, re ba, “E ṃool E in ri Kanaan eo.” 41 Bar jet re ba, “E in ri Kraist.” A bar jet re ba, “Ri Kraist ej itok jān Galili ke? 42 Jeje ko raar jab ba bwe ri Kraist ej itok jān ineen Devid, im jikin kweilọk Betleem, ijo ear pād ie ke?” 43 Innām armej rej jepel jān doon kōn E. 44 Im jet iaer re kōṇaan jibwe E; a ejjeḷọk armej ej likūt pein ioon. 45 Innām ri jelōk raṇ rej itok ñan pris ro reḷap im Parisi ro; im re ba ñan er, “Etke koṃ ar jab āñintok E?” 46 Ri jelōk rej uwaak, “Ejjeḷọk armej ear kōnono āinwōt armej in.” 47 Innām Parisi ro re uwaak er, “Barāinwōt koṃ jebwābwe ke? 48 Jabdewōt iaan irooj raṇ, ak Parisi raṇ, ear tōmak E ke? 49 A jar in re jaje kien, rej lia.” 50 Nikodimōs ej ba ñan er (eo ear itok ñan E ilo boñ, e juon iaer), 51 “Kien eo ar ej liaakḷọk armej ṃokta jān an roñ jān e, im jeḷā men eo ej kōṃṃan ke?” 52 Rej uwaak im ba ñan e, “Kwe barāinwōt ri Galili ke? Kwōn pukot im lale, bwe ejjeḷọk juon ri kanaan ej itok jān Galili.” 53 Im armej otemjej rej ilọk ñan ṃo ko iṃweir.

8

1 Jisōs ej ilọk ñan toḷ Olivet. 2 Im ke e raantak E bar deḷọñ ilowaan tempel, im armej otemjej rej itok ñan E, im Ej jijet im katakin er. 3 Im skraib ro im Parisi ro rej āñintok ñan e juon kōrā, ar jibwe ilo ḷōñ: im ñe eṃōj aer kajutak e eoḷap, 4 Re ba ñan E, “Ri Kaki, kōrā in jibwe ilo ḷōñ, ilo an kōṃanṃane wōt. 5 Im Moses ear jiroñ kōm ilo kien, bwe ren kade ro āinwōt; a ta eo Kwōj ba?” 6 Rej ba men in bwe ren kapo E, bwe en wor men in kinaakḷọk E ippāer. A Jisōs e jirḷọk, im jeje kōn addiin ioon bwidej. 7 Im ke rej kajjitōk makij Ippān, Ej jutak im ba ñan er, “Eo iaami ejjeḷọk an jerọwiwi, en kade ṃokta kōn juon dekā.” 8 Im Ej bar jirḷọk im jeje ioon bwidej. 9 Im ke rej roñjake, rej ilọk juon im juon, jino ippān eo e rūtto ñan eo āliktata; im Jisōs e make pād wōt, im kōrā e jutak eoḷap ijo e ar pād ie. 10 Ke eṃōj an Jisōs jutak im lo ejjeḷọk armej a kōrā eo wōt, e ba ñan e, “Kōrā, ewi ro raar kinaakḷọk eok? Ejjeḷọk juon ear liaakḷọk eok ke?” 11 E ba, “Irooj, ejjeḷọk.” Im Jisōs e ba ñan e, “Im Ña I jab liaakḷọk eok; kwōn ilọk im jab bar jerọwiwi.” 12 Innām Jisōs e bar kōnono ñan er im ba, “Ña, meram in laḷ; eo ej ḷoor Eō e jāmin etal ilo marok, a enaaj an meram in mour.” 13 Innām Parisi ro re ba ñan E, “Kwōj kōnnaan kōn Kwe; Aṃ kōnnaan e jab ṃool.” 14 Jisōs e uwaak im ba ñan er, “Im eḷaññe Ña Ij kōnnaan kōn Eō, e ṃool Aō kōnnaan: bwe I jeḷā ijo Iar itok jān e, im ewi Ij ilọk ie ḷọk; a koṃ jaje ewi Ij itok jān e, ak ilọk ieḷọk. 15 Koṃ ekajete kōn kanniōk; I jab ekajet armej. 16 Im eḷaññe Ij ekajete, e ṃool Aō ekajet; bwe Ña I jab make iaō, a Ña im Jema eo ear jilkintok Eō. 17 Aet im jeje ilo kiemi, kōnnaan an ruo armej e ṃool. 18 Ña juon Ij kōnnaan kōn Eō, im Jema eo Ear jilkintok Eō, Ej kōnnaan kōn Eō.” 19 Innām re ba ñan E, “Ewi Jemaṃ?” Jisōs e uwaak, “Koṃ jab jeḷā Ña ak Jema; eḷaññe koṃ ar jeḷā Ña, barāinwōt koṃ naaj kar jeḷā Jema.” 20 Jisōs ear kōnono naan kein ilowaan iṃōn ṃani ke Ej katakin ilowaan tempel; im ejjeḷọk armej ej likūt pein ioon, bwe awa eo An e jañin itok. 21 Innām Jisōs e bar ba ñan er, “Ij ilọk, im koṃ naaj pukot Eō, im koṃ naaj mej ilo jerọwiwi ko ami; ijo Ij ilọk ie ḷọk, koṃ ban itok ie tok.” 22 Innām ri Ju ro re ba, “Enaaj make ṃan E ke? Bwe E ba, ‘Ijo Ij ilọk ie ḷọk, koṃ ban itok ie tok’.” 23 Im E ba ñan er, “Koṃ jān laḷ; Ña jān lañ. Koṃ an laḷ in; Ña I jab an laḷ in. 24 Innām Iar ba ñan koṃ, bwe koṃ naaj mej ilo jerọwiwi ko ami; bwe eḷaññe koṃ jab tōmak bwe Ña E, koṃ naaj mej ilo jerọwiwi ko ami.” 25 Innām re ba ñan E, “Wōn Kwe?” Im Jisōs e ba ñan er, “Ña eo Iar barāinwōt ba ñan koṃ jān jinoin. 26 Elōñ men ko Ippa bwe In kōnono kaki, im ekajete kōn koṃ: a Eo ear jilkintok Eō e ṃool; im Ij kōnono ñan ro ri laḷ men ko Iar roñ jān E.” 27 Re jab kile bwe Ear kōnono ñan er kōn Jemān. 28 Innām Jisōs e ba ñan er, “Ñe eṃōj ami lelōñḷọk Nejin armej, iien eo koṃ naaj jeḷā bwe Ña E, im ejjeḷọk Aō make kōṃanṃan; bwe āinwōt Jema ear katakin Eō, men kein Ij kōnono. 29 Im Eo ear jilkintok Eō, Ej pād Ippa; Jema ear jab likūt Eō make iaō; bwe iien otemjej Ij kōṃṃan men ko rej kabuñbūruon.” 30 Ke Ej kōnono naan kein, elōñ rej tōmak E. 31 Innām Jisōs ej ba ñan ri Ju ro rej tōmak E; “Eḷaññe koṃij pād wōt ilo Aō in naan innām koṃ rū kaḷora re ṃool, 32 Im koṃ naaj jeḷā ṃool, im ṃool enaaj kōṃanṃan anemkwōjami.” 33 Re uwaak E, “Kōm ineen Ebream, im ejjeḷọk iien kōm ar ri karijer ñan jabdewōt armej; ekōjkan Aṃ ba, ‘Koṃ naaj anemkwōjami’?” 34 Jisōs e uwaak er, “E ṃool; e ṃool, Ij ba ñan koṃ, Jabdewōt eo ej kōṃanṃan jerọwiwi, e ri karijeran jerọwiwi. 35 Im ri karijer e jab pād ilo eṃ indeeo; a Nejin ej pād indeeo. 36 Innām eḷaññe Nejin enaaj kōṃanṃan anemkwōjami, koṃ naaj anemkwōjami wōt. 37 I jeḷā bwe koṃ ineen Ebream; a koṃij pukot bwe koṃwin ṃan Eō, bwe ejjeḷọk jikin Aō naan ilo koṃ. 38 Ij kōnono men ko Iar lo ippān Jema; im koṃij barāinwōt kōṃanṃan men ko koṃ ar roñjake ippān jemami.” 39 Re uwaak im ba ñan E, “Ebream e jemem.” Jisōs e ba ñan er, “Eḷaññe koṃ ro nejin Ebream, koṃ naaj kar kōṃanṃan jerbal ko an Ebream. 40 A kiiō koṃij pukot bwe koṃwin ṃan Eō, armej Eo ear kōnono ñan koṃ men in ṃool, men eo Iar roñ jān Anij; men in Ebream ear jab kōṃanṃane. 41 Koṃij kōṃanṃan jerbal ko an jemami.” Re ba ñan E, “Kōm ar jab ḷotak ilo ḷōñ; juon wōt Jemem, Anij.” 42 Jisōs e ba ñan er, “Eḷaññe Anij ej jemami, koṃ naaj kar yokwe Eō; bwe Iar waḷọktok im itok jān Anij: Iar jab make itok, a Ear jilkintok Eō. 43 Etke koṃ jab meḷeḷe Aō kōnono? Bwe koṃ jab maroñ roñ Aō in naan. 44 Koṃ jān jemami tepiḷ eo, im ṃōṃ ko an jemami koṃ kōṇaan kōṃanṃani; e ri uror jān jinoin, im e jab jutak ilo ṃool, bwe ejjeḷọk ṃool ilo e. Ke ej kōnono riab, ej kōnono jān men ko an; bwe e ri riab, im jemān riab. 45 A bwe Ij ba ñan koṃ men eo e ṃool, koṃ jab tōmak Eō. 46 Wōn iaami ej ṇa ruō kōn jerọwiwi? Im eḷaññe Ij kōnono ṃool, etke koṃ jab tōmak Eō? 47 Eo e jān Anij ej roñjake naan ko an Anij; kōn men in koṃ jab roñjake, bwe koṃ jab jān Anij.” 48 Innām ri Ju ro re uwaak im ba ñan E, “E jab eṃṃan ke am ba, Kwe ri Sameria, im juon tiṃoṇ Ippaṃ?” 49 Jisōs e uwaak, “Ejjeḷọk tiṃoṇ Ippa, a Ij wūjtake Jema, im koṃij kajekdọọn Eō. 50 A I jab pukot Aō aiboojoj; juon Eo ej pukot im ekajete. 51 E ṃool, e ṃool, Ij ba ñan koṃ, eḷaññe armej ej pokake Aō in naan, e jāmin lo mej.” 52 Innām ri Ju re ba ñan E, “Kiiō kōm jeḷā bwe tiṃoṇ Ippaṃ. Ebream ear mej, im ri kanaan ro; im Kwōj ba ‘Eḷaññe armej ej pokake Aō in naan, e jāmin edjoñ mej.’ 53 Kwe eḷap jān jemād Ebream, eo e mej ke? Im ri kanaan re mej; wōn Kwe ilo aṃ make kōṃṃan eok?” 54 Jisōs e uwaak, “Eḷaññe Ij kaiboojoj Ña, Aō aiboojoj jekdọọn; Jema ej kaiboojoj Eō, kōn Eo koṃij ba, ‘E amim Anij.’ 55 Im koṃ ar jab jeḷā E; a Ña I jeḷā E; im eḷaññe Ij ba, I jab jeḷā E, I naaj ri riab āinwōt koṃ, a I jeḷā E, im Ij pokake An in naan. 56 Jemami Ebream ear lañlōñ bwe enaaj lo Aō raan; im e ar lo e im ṃōṇōṇō.” 57 Innām ri Ju re ba ñan E, “Kiiō e jañin lemñoul Aṃ iiō, im Kwaar lo Ebream ke?” 58 Jisōs e ba ñan er, “E ṃool, e ṃool, Ij ba ñan koṃ, ṃokta jān Ebream, Ij pād.” 59 Innām rej jibwe dekā bwe ren kad E, a Jisōs ej tilekek, im ilọk jān tempel.

9

1 Im ke Ear kijoone, Ej lo juon armej e pilo jān iien ḷotak. 2 Im ri kaḷoran rej kajjitōk Ippān im ba, “Rabbai, wōn e ar jerọwiwi, armej in, ak jemān im jinen, bwe ear ḷotak im pilo?” 3 Jisōs e uwaak, “Armej in ear jab jerọwiwi, ak jemān im jinen; a bwe jerbal ko an Anij ren waḷọk kōn e. 4 Eṃṃan In jerbale jerbal ko an Eo ear jilkintok Eō ke e raan; boñ ej itok ñe ejjeḷọk armej ej maroñ in jerbal. 5 Ke Ij pād i laḷ, Ij meram in laḷ.” 6 Ke eṃōj An kōnono āinwōt, E kaplo ioon bwidej, im iiōki bwidej kōn iādatōltōl, im ej kapit mejān armej eo e pilo kōn bwidej eo, 7 Im ba ñan e, “Kwōn ilọk im kwaḷ mejaṃ ilo ḷwe Siloam” (ukōtōn naan in, ar jilōkḷọk). Innām ej ilọk, im kwaḷ, im itok im loḷọkjeṇ. 8 Innām ro ri turun, im ro raar lo e ṃokta bwe ear ri owar, re ba, “E in e jab eo ear jijet im uññar ke?” 9 Jet re ba, “E in eo;” bar jet re ba, “Jaab, a ej āinwōt eo;” a e ba, “Ña eo.” 10 Innām re ba ñan e, “Ekōjkan mejaṃ repeḷḷọk?” 11 E uwaak im ba, “Juon armej etan Jisōs, ear iiōki bwidej, im kapit meja im ba ñan eō, ‘Kwōn ilọk ñan Siloam, im kwaḷe’; innām iar ilọk im kwaḷe, im loḷọkjeṇ.” 12 Im re ba ñan e, “Ej pād ia?” E ba, “I jaje.” 13 Rej āñinḷọk eo e kar pilo ṃokta ñan Parisi ro. 14 Im raan eo, ke Jisōs ear iiōki bwidej im kapeḷḷọk mejān, raan Jabōt. 15 Innām Parisi ro rej bar kajjitōk ippān ekōjkan an loḷọkjeṇ. Innām e ba ñan er, “Ear likūt bwidej ṇa ioon meja, im iar kwaḷe im loḷọkjeṇ.” 16 Innām jet iaan Parisi ro re ba, “Armej in e jab jān Anij, bwe E jab lale Jabōt.” Bar jet re ba, “Ekōjkan an armej ri jerọwiwi kōṃanṃan kakōḷḷe ko āinwōt in?” Im re jepel jān doon. 17 Re bar ba ñan ḷeo e pilo, “Ta eo aṃ ba kōn E, bwe Ear kapeḷḷọk mejaṃ?” Ej ba, “E ri kanaan.” 18 A ri Ju ro re jab tōmak kōn e, bwe e kar pilo im ar loḷọkjeṇ, ñan iien eo rej kūrtok jemān im jinen ḷeo ear loḷọkjeṇ. 19 Im rej kajjitōk ippāerro im ba, “Ḷe in nejemi eo koṃ ba e ar ḷotak im pilo ke? Innām ekōjkan an loḷọkjeṇ kiiō?” 20 Jemān im jinen re uwaak im ba, “Kōmro jeḷā bwe e nejem, im bwe ear ḷotak im pilo; 21 A ekōjkan an loḷọkjeṇ kiiō kōm jaje; ak wōn eo ear kapeḷḷọk mejān kōm jaje. E rūtto, koṃwin kajjitōk ippān, enaaj make kōnono kōn e.” 22 Jemān im jinen re ba naan kein, bwe re mijak ri Ju ro; bwe eṃōj an ri Ju ro pepe, eḷaññe jabdewōt armej ej kwaḷọk bwe E ri Kraist, re naaj joḷọk e jān iṃōn kweilọk. 23 Kōn men in jemān im jinen re ba, “E rūtto; koṃwin kajjitōk ippān.” 24 Innām re bar kūrtok armej eo e kar pilo im ba ñan e, “Kwōn nōbar Anij; kōm jeḷā armej in E ri jerọwiwi.” 25 E uwaak im ba, “I jaje E ri jerọwiwi ke, jab ke; juon men in I jeḷā, bwe ke I kar pilo, kiiō ij loḷọkjeṇ.” 26 Innām re bar ba ñan e, “Ta eo Ear kōṃanṃan ñan eok? Ekōjkan An kapeḷḷọk mejaṃ?” 27 E uwaak er, “Eṃōj aō kōnnaanōk koṃ ekkein, im koṃ ar jab roñjake; etke koṃ kōṇaan bar roñjake? Koṃ barāinwōt kōṇaan bwe koṃwin ri kaḷoran ke?” 28 Im rej kajjirere kake im ba, “Kwe ri kaḷoran, a kōm ri kaḷoran Moses. 29 Kōm jeḷā bwe Anij ear kōnono ñan Moses, a kōn Ḷe in, kōm jaje ijo E jān e.” 30 Armej eo ej uwaak im ba ñan er, “Ekwe men in juon men in bwilōñ, bwe koṃ jaje ijo E jān e, im Ear kapeḷḷọk meja. 31 Je jeḷā bwe Anij e jab eọroñ ro ri jerọwiwi; a eḷaññe jabdewōt armej ej kabuñ ñan Anij, im kōṃanṃan ankilaan, Ej eọroñ e. 32 Jān jinoin laḷ ejjeḷọk en ear roñ bwe jabdewōt armej e ar kapeḷḷọk mejān eo ej pilo ke ear ḷotak. 33 Eḷaññe armej in e jab jān Anij, e jab maroñ in kōṃanṃan jabdewōt.” 34 Re uwaak im ba ñan e, “Kwaar ḷotak ilo jerọwiwi wōt, im kwōj katakin kōm ke?” Im rej joḷọk e. 35 Jisōs ej roñ bwe raar joḷọk e, im ke eṃōj An lo e, E ba ñan e, “Kwōj lōke Nejin Anij ke?” 36 E uwaak im ba, “Irooj, wōn Eo bwe in lōke E?” 37 Im Jisōs e ba ñan e, “Kwaar lo E, im E eo ej kōnono ñan eok.” 38 Im e ba, “Irooj ij lōke Eok.” Im ej kabuñ ñan E. 39 Im Jisōs e ba, “Iar itok ñan laḷ in kōn ekajet, bwe ro re jab loḷọkjeṇ ren loḷọkjeṇ; im ro rej loḷọkjeṇ ren pilo.” 40 Ro iaan Parisi ro rej pād Ippān rej roñ naan kein im ba ñan E, “Kōm barāinwōt pilo ke?” 41 Jisōs e ba ñan er, “Eḷaññe koṃ pilo, ejjeḷọk jerọwiwi ippemi; a kiiō koṃij ba, ‘Kōm loḷọkjeṇ,’ ami jerọwiwi ej pād wōt.

10

1 E ṃool, e ṃool, Ij ba ñan koṃ, eō e jab deḷọñ ilo kōjām ilowaan oror in sip, a ej uwelōñḷọk ilo bar juon iaḷ, e in ri kọọt im ri rakimi. 2 A eo ej deḷọñ ilo kōjām e seperd in sip ko. 3 Ri lale kōjām ej kapeḷḷọk ñan e; im sip rej roñjake ainikien, im ej kūr sip ko an kōn etaer, im tōl ḷọk er. 4 Im ke ej kadiwōjḷọk sip ko an, ej ilọk iṃaer ḷọk, im sip ko rej ḷoore, bwe re jeḷā ainikien. 5 Im re jāmin ḷoor eo e kāāl ñan er, a renaaj ko jān e, bwe re jaje ainikien ro ri e kāāl.” 6 Būrabōḷ in Jisōs ej kōnono ñan er, a re jaje ta men ko Ej kōnono ñan er kaki. 7 Innām Jisōs e bar ba ñan er, “E ṃool, e ṃool, Ij ba ñan koṃ, Ña kōjām in sip ko. 8 Ro otemjej raar itok ṃokta jān Eō, rej ri kọọt im ri rakimi, a sip raar jab eọroñ er. 9 Ña aor; eḷaññe jabdewōt armej ej deḷọñ kōn Ña, e naaj mour, im enaaj deḷọñ im diwōj, im lo kijen. 10 Ri kọọt ej itok bwe en kọọt im ṃan im kọkkure. Ña Ij itok bwe ren bōk mour, im bwe ren bōk elōñ. 11 Ña seperd eṃṃan. Seperd eṃṃan ej leḷọk an mour kōn sip ko. 12 A eo e ri jerbal, im jab seperd, im e jab an sip ko, ej lo kidu wolf itok, im ej likūt sip, im ko, im kidu wolf ej jibwe er, im kajeplōklōk er. 13 Ri jerbal ej ko, bwe e ri jerbal, im e jab kaorōk sip ko. 14 Ña seperd eṃṃan, im I jeḷā ro Aō, im ro Aō re jeḷā Ña, 15 Āinwōt Jema e jeḷā Ña, im Ña I jeḷā Jema; im Ij likūt Aō mour kōn sip ko. 16 Im bar jet Aō sip, re jab jān oror in; eṃṃan barāinwōt In āñintok er, im renaaj roñ ainikiō; im renaaj juon wōt bwij, im juon seperd. 17 Kōn men in Jema ej yokwe Eō, bwe Ij likūt Aō mour bwe In bar bōk e. 18 Ejjeḷọk armej ej bōke jān Eō, a Ña Ij make likūt e. Ij maroñ bwe In likūt e, im Ij maroñ bwe In bar bōke. Kien in Iar bōk jān Jema.” 19 E bar waḷọk jepel ippān ri Ju ro kōn naan kein. 20 Im elōñ iaer re ba, “Tiṃoṇ Ippān, im Ej wūdeakeak. Etke koṃij roñjake?” 21 Bar jet re ba, “Naan kein jab naan ko an eo juon tiṃoṇ Ippān. Tiṃoṇ ej maroñ in kaloḷọkjeṇ eo e pilo ke?” 22 Im kiiō kwōjkwōj in leḷọk i Jerusalem, im iien e piọ. 23 Im Jisōs ej etetal ilowaan tempel ilo portiko an Solomon. 24 Innām ri Ju ro rej itok im kōpooḷ E im ba ñan E, “Ewi toun Aṃ dāpij ṃool jān kōm? Eḷaññe Kwe ri Kraist, Kwōn kōnnaanōk kōm alikkar.” 25 Jisōs e uwaak er, “Iar kōnnaanōk koṃ, im koṃ jab tōmak; jerbal ko Ij kōṃanṃani ilo etan Jema, rej kōnnaan kōn Eō. 26 A koṃ jab tōmak bwe koṃ jab iaan Aō sip, āinwōt Iar ba ñan koṃ. 27 Aō sip rej roñjake ainikiō, im I jeḷā er, im rej ḷoor Eō. 28 Im Ij leḷọk ñan er mour indeeo, im re jāmin jako indeeo, im ejjeḷọk en enaaj kotak er jān Peiū. 29 Jema, eo Ear litok ñan Eō, Ej eḷap jān otemjej; im ejjeḷọk armej ej maroñ in kotak er jān pein Jema. 30 Ña im Jema kōmro wōt juon.” 31 Ri Ju ro rej bar jibwe dekā ko bwe ren kade. 32 Jisōs e uwaak er, “Elōñ jerbal ko reṃṃan Iar kwaḷọk ñan koṃ jān Jema; kōn jerbal ōt iaan jerbal ko koṃij kade Eō?” 33 Ri Ju ro re uwaak im ba, “Kōm jab kade Eok kōn jerbal eṃṃan, a kōn blaspim, im bwe Kwe juon eṃṃaan, Kwōj make kōṃṃan Eok Anij.” 34 Jisōs e uwaak er, “E jab jeje ilo kiemi, Ij ba Koṃ Anij ke? 35 Eḷaññe Ear likūt etaer anij, ro naan in Anij ear itok ñan er (im Jeje ko re ban jako), 36 Koṃij ba kōn E, eo Jema ear kokwōjarjar, im jilkintok ñan laḷ, ‘Kwōj blaspim,’ bwe Iar ba, ‘Ña Nejin Anij ke’? 37 Eḷaññe I jab kōṃanṃan jerbal ko an Jema, koṃwin jab tōmak Eō. 38 A eḷaññe Ij kōṃanṃani, meñe koṃ jab tōmak Eō, koṃwin tōmak jerbal ko; bwe koṃwin jeḷā im meḷeḷe bwe Jema ej ilo Ña, im Ña ilo E.” 39 Rej bar pukot bwe ren jibwe, a Ej ko jān peir. 40 Im Ej bar ilọk i reeaar in Jordan ilo āne eo ijo Jon e ar peptaij ṃokta, im Ej pād ijo. 41 Im elōñ rej itok ñan E im ba, “Jon ear kōṃanṃan ejjeḷọk kakōḷḷe, a men otemjej Jon ear kōnono kōn armej in, re ṃool.” 42 Im elōñ rej tōmak E ijo.

11

1 Juon armej e nañinmej, etan Lazerōs, ri Betani, jikin kweilọk an Meri im Marta jein. 2 Meri in eo ear kapit Irooj kōn men in kapit, im kōṃōrāik neen kōn koḷan bōran, jein im jaten ṃaan Lazerōs e nañinmej. 3 Innām jein im jaten kōrā rej jelōkḷọk ñan E im ba, “Irooj, lo, eo Kwōj yokwe e nañinmej.” 4 Ke Jisōs ej roñjake, E ba, “Nañinmej in e jab bwe en mej, a kōn an Anij aiboojoj, bwe Nejin Anij en aiboojoj kake.” 5 Im Jisōs ej yokwe Marta, im jaten kōrā, im Lazerōs. 6 Ke eṃōj An roñ bwe e nañinmej, iien eo Ej pād wōt ruo raan ijo Ear pād ie. 7 Ālikin iien eo Ej ba ñan ro rū kaḷoran, “Jen bar ilọk ñan Judia.” 8 Rū kaḷoran re ba ñan E, “Rabbai, ekkein ḷọk ri Ju ro raar pukot bwe ren kade Eok, im Kwōj bar ilọk ñan ijo ke?” 9 Jisōs e uwaak, “E jab joñoul im ruo awa ilo raan ke? Eḷaññe jabdewōt armej ej etetal ilo raan e jab tipñōl, bwe ej lo meram in laḷ in. 10 A eḷaññe armej ej etetal ilo boñ, e tipñōl, bwe meram e jab ilo e.” 11 Ej ba men kein, im tokālik Ej ba ñan er, “Jerad Lazerōs ej kiki; a Ij ilọk bwe In kọruj e jān kiki.” 12 Innām rū kaḷoran re ba, “Irooj, eḷaññe ej kiki enaaj mour.” 13 A Jisōs ej kōnono kōn an mej, a rej ḷōmṇak bwe Ear kōnono kōn kakkije ilo kiki. 14 Innām Jisōs e ba ñan er alikkar, “Lazerōs e mej. 15 Im Ij ṃōṇōṇō kōn koṃ bwe Iar jab pād ijo, bwe koṃwin tōmak; a jen etal ñan ippān.” 16 Innām Tomas, āt eo juon Didimōs, ej ba ñan rū kaḷoor ro jet, “Barāinwōt kōjeañ jen ilọk, bwe jen mej Ippān.” 17 Ke Jisōs ej itok, E jeḷā bwe eṃōj an pād ilo lōb iuṃwin emān raan. 18 Im Betani epaak Jerusalem, enañin ruo ṃaiḷ jān e. 19 Im elōñ iaan ri Ju ro, re kar itok ñan ippān Marta im Meri, bwe ren kaaenōṃṃan er kōn jeir im jatier ṃaan. 20 Innām ke Marta ej roñ bwe Jisōs ej itok, ej ilọk im ioon E, a Meri ej jijet wōt ilowaan eṃ. 21 Innām Marta ej ba ñan Jisōs, “Irooj, eḷaññe Kwaar pād ijin, jeiō im jatū ṃaan e jāmin kar mej. 22 Im I jeḷā bwe kiiō, jabdewōt men eo Kwō naaj kajjitōk ippān Anij, Enaaj lewōj ñan Eok.” 23 Jisōs ej ba ñan e, “Jeoṃ im jatūṃ ṃaan enaaj bar jerkak.” 24 Marta e ba ñan E, “I jeḷā enaaj bar jerkak ilo jerkakpeje eo ilo raan āliktata.” 25 Jisōs e ba ñan e, “Ña jerkakpeje eo im mour eo. Eo ej lōke Eō, meñe e mej, enaaj bar mour. 26 Im jabdewōt eo ej mour im lōke Eō, e jāmin mej indeeo. Kwōj tōmak men in ke?” 27 Ej ba ñan E, “Aet, Irooj, iar tōmak bwe Kwe ri Kraist, Nejin Anij, Eo ej itok ñan laḷ.” 28 Im ke eṃōj an kōnono āinwōt, ej ilọk im wūnojidikdik ñan Meri jaten kōrā im ba, “Ri Kaki ej ijin im Ej kūr eok.” 29 Ke eṃōj an roñjake, e ṃōkaj an jutak im ilọk ñan Ippān. 30 Kiiō Jisōs e jañin itok ilowaan jikin kweilọk, a Ej pād ijo Marta ear ioon E ie. 31 Innām ri Ju rej pād ippān ilowaan eṃ, im kaaenōṃṃan e, ke rej lo Meri, bwe e ṃōkaj an jutak im ilọk, rej ḷoor e, im ḷōmṇak ej ilọk ñan lōb bwe en jañ ijo. 32 Innām ke Meri ej itok ijo Jisōs ej pād ie im lo E, ej buñ iturin neen im ba ñan E, “Irooj, eḷaññe Kwaar pād ijin, jeiō im jatū ṃaan e jāmin kar mej.” 33 Innām ke Jisōs ej lo an jañ, im barāinwōt ri Ju rej itok ippān tok rej jañ, Ej limō ilo an im būroṃōj, 34 Im ba, “Ewi ijo koṃ ar likūt e?” Re ba ñan e, “Irooj, kwōn itok im loe.” 35 Jisōs e jañ. 36 Innām ri Ju rej ba, “Lo e nañin ḷap An yokwe e.” 37 Im jet iaer re ba, “Armej in Eo ear kaloḷọkjeṇ eo e pilo, Ear jab maroñ in kōṃanṃan bwe armej in e jāmin kar mej ke?” 38 Innām Jisōs ej bar limō ilo E im itok ñan lōb eo. E juon roñ, im juon ejṃaan ej pād ioon. 39 Jisōs e ba, “Koṃwin joḷọk ejṃaan eo. Marta, jein im jaten eo ear mej, ej ba ñan E, “Irooj, ilo iien in e puwaḷ, bwe emān raan ear mej.” 40 Jisōs ej ba ñan e, “Iar jab ba ñan eok ke, ‘Eḷaññe kwōj tōmak, kwō naaj lo aiboojoj an Anij’?” 41 Innām rej kaṃakūt ejṃaan eo. Im Jisōs ej jar im ba, “Jema koṃṃool bwe Kwaar eọroñ Eō. 42 Im I jeḷā bwe Kwōj roñjake Eō iien otemjej, a kōn armej ro rej jutak ijin Iar ba, bwe ren tōmak bwe Kwaar jilkintok Eō.” 43 Im ke eṃōj An kōnono āindein, Ej laṃōj kōn ainikien eḷap, “Lazerōs, kwōn itok!” 44 Im eo ear mej ej itok, kūtimi pein im neen kōn nuknuk in mej, im turun mejān lukwōje kōn bwinin mej. Jisōs e ba ñan er, “Koṃwin kōtḷọk e bwe en ilọk.” 45 Innām elōñ iaan ri Ju rej itok ñan ippān Meri, im lo men ko Jisōs ear kōṃṃani, rej tōmak E. 46 A jet iaer rej ilọk ñan Parisi ro, im kōnnaanōk er men ko Jisōs ear kōṃṃani. 47 Innām pris ro reḷap im Parisi ro rej kokweilọklọk ro ri pepe im ba, “Ta eo jej kōṃṃane? Bwe armej in Ej kōṃanṃan elōñ kakōḷḷe. 48 Eḷaññe jej likūt E āinwōt, armej otemjej renaaj tōmak E, im ri Rom renaaj itok im kọkkure jikōd im bwijjed.” 49 Im juon iaer etan Keiapas, e pris eo eḷap ilo iiō in, ej ba ñan er, “Koṃ jab jeḷā ñan jidik, 50 Im koṃ jab ḷōmṇak bwe eṃṃan ñan kōj bwe juon armej en mej kōn armej raṇ, im bwij otemjej ren jab jako.” 51 Im e make jab kōnono men in, a e pris eo eḷap ilo iiō in, ej rūkaanij bwe Jisōs enaaj mej kōn bwij eo, 52 Im e jab kōn bwij eo wōt, a bwe barāinwōt En kobaik ñan doon ro nejin Anij rej jeplōklōk. 53 Innām jān raan eo im ālikin rej pepe ippān doon bwe ren ṃan E. 54 Innām Jisōs e jab bar etetal alikkar ippān ri Ju ro, a Ej ilọk jān ijo ñan juon āne epaak āne jeṃaden, ilo juon jikin kweilọk etan Ipreim, im Ej pād ijo ippān ro rū kaḷoran. 55 Im epaak kwōjkwōj in kijoone an ri Ju ro, im elōñ rej ilọk jān āne eo ñan Jerusalem ṃokta jān kwōjkwōj in kijoone bwe ren karreo er. 56 Innām rej pukot Jisōs im kōnono ñan doon ke rej jutak ilowaan tempel, “Ta eo koṃij ḷōmṇak? E jāmin itok ñan kwōjkwōj ke?” 57 Pris ro im Parisi ro raar likūt juon kien, bwe, eḷaññe jabdewōt armej e jeḷā ijo Ej pād ie, en kwaḷọk e bwe ren jibwe E.

12

1 Innām jiljino raan ṃokta jān kwōjkwōj in kijoone, Jisōs ej itok ñan Betani, ijo Lazerōs ej pād ie, eo Jisōs ear kajerkak e jān ro re mej. 2 Ijo raar kōṃṃan kejota ñan E. Im Marta e ri jerbal ñan er, a Lazerōs e juon iaan ro rej jibadek Ippān im ṃōñā. 3 Innām Meri ej bōk juon bọun nard erreo, men in kapit eḷap oṇān, im ej kapit neen Jisōs im kōṃōrāik neen kōn koḷan bōran. Im ṃweo e obrak kōn ñaj jān men in kapit eo. 4 A juon iaan ro rū kaḷoran, Judas Iskariōt, eo enaaj ketak E, e ba, 5 “Etke ar jab wiakake men in kapit in kōn jilubukwi silliñ, im leḷọk ñan ro ri jeraṃōl?” 6 Ej ba men in, jab bwe ej bōk ñan ro ri jeraṃōl, a bwe e ri kọọt, im bōjọ ippān, im ej bōk men ko ilowaan. 7 Innām Jisōs e ba, “En pād wōt; ear kōjparok men in ṃae raan eo, raan in kalbwin Eō. 8 Bwe ri jeraṃōl rej pād ippemi iien otemjej, a Ña I jab pād ippemi iien otemjej.” 9 Innām elōñ iaan ri Ju ro kajoor rej jeḷā bwe Ej pād ijo, im rej itok jab kōn Jisōs wōt, a bwe ren barāinwōt lo Lazerōs, eo Ear kajerkakpeje jān ro re mej. 10 A pris ro reḷap rej pepe bwe ren barāinwōt ṃan Lazerōs, 11 Bwe kōn e elōñ iaan ri Ju ro rej ilọk im lōke E. 12 Ilo raan eo ālik elōñ armej ro raar itok ñan kwōjkwōj, ke rej roñ bwe Jisōs ej itok ñan Jerusalem, 13 Rej bōk ra ko raan wōjke pam, im ilen ioon E, im laṃōj, “Hosana! E ṃōṇōṇō Eo ej itok ilo etan Irooj, eo Kiiñ in Israel!” 14 Im Jisōs, ke eṃōj An lo koon donkey, Ej jijet ioon, āinwōt raar je, 15 “Kwōn jab mijak, kwe jiroñ nejin Zaion; lo, aṃ Kiiñ ej itok, im jijet ioon koon donkey.” 16 Men kein rū kaḷoran re jaje ṃokta, a ke eṃōj an Jisōs aiboojoj, rej keememej bwe ar jeje men kein kōn E, im bwe raar kōṃṃan men kein ñan E. 17 Innām armej ro raar pād Ippān ke Ear kūrtok Lazerōs jān lōb eo, im kajerkakpeje e jān ro re mej, rej kōnnaan kake. 18 Barāinwōt kōn men in armej rej ilām ioon E, bwe rej roñ E ar kōṃṃan kakōḷḷe in. 19 Innām Parisi ro re ba ñan doon, “Koṃwin lale ekōjkan ami bane. Lo, ri laḷ otemjej rej ilọk ilọkōnḷọk.” 20 Im jet ri Grik iaan ro rej itok bwe ren kabuñ ilo kwōjkwōj eo. 21 Innām rein rej itok ñan Pilip, eo jān Betseida i Galili, im kajjitōk ippān im ba, “Irooj, kōm kōṇaan lo Jisōs.” 22 Pilip ej itok im ba ñan Andru; im Andru ej itok, im Pilip, im rej kōnnaanōk Jisōs. 23 Im Jisōs ej uwaak er im ba, “Awa e moottok, bwe Nejin armej en aiboojoj. 24 E ṃool, e ṃool, Ij ba ñan koṃ, eḷaññe ineen wit e jab buñ ilo bwidej im mej, ej make pād; a eḷaññe e mej, ej jebar elōñ leen. 25 Eo ej yokwe an mour, mour enaaj jako jān e; im eo ej kajekdọọn an mour ilo laḷ in, enaaj kōjparok e ñan mour indeeo. 26 Eḷaññe jabdewōt armej ej jerbal ñan Eō, en ḷoor Eō, im ijo Ij pād ie, ijo barāinwōt ri karijera enaaj pād ie. Im eḷaññe jabdewōt armej ej jerbal ñan Eō, Jema enaaj koutiej e. 27 Kiiō e pok būruō; im ta eo I naaj ba? ‘Jema, kwōn lọmọọr Eō jān awa in’? A kōn men in Iar itok ñan awa in. 28 Jema, kwōn kaiboojoj Etaṃ.” Innām juon ainikien ej itok jān lañ im ba, “Iar kaiboojoj e, im I naaj bar kaiboojoj e.” 29 Innām armej ro re jutak im roñjake, re ba, “E jourur;” bar jet re ba, “Juon enjeḷ ej kōnono Ippān.” 30 Jisōs e uwaak im ba, “Ainikien in ear itok jab kōn Ña, a kōn koṃ. 31 Kiiō ekajete laḷ in; kiiō naaj kadiwōjḷọk irooj in laḷ in. 32 Im Ña, eḷaññe rej lelōñḷọk Eō jān laḷ, I naaj ipertok armej otemjej ñan Eō.” 33 Ej kōnono men in, bwe En bakajjien wāween mej eo Enaaj mej kake. 34 Jar eo re uwaak E, “Kōm ar roñ jān kien bwe ri Kraist ej pād indeeo; im ekōjkan Aṃ ba naaj lelōñḷọk Nejin armej?” 35 Innām Jisōs e ba ñan er, “Meram ej pād ippemi jidik wōt iien. Koṃwin etetal iien meram ej pād ippemi, ñe ab marok en itok iomi; bwe eo ej etetal ilo marok e jaje ijo ej ilọk ie ḷọk. 36 Iien meram ej pād ippemi, koṃwin lōke meram, bwe koṃwin nejin meram.” Jisōs ej kōnono men kein im ilọk im tilekek jān er. 37 A meñe Ear kōṃṃan elōñ kakōḷḷe iṃaan mejeir, re jab tōmak E, 38 Bwe en jejjet naan Aiseia ri kanaan ear kōnono, Irooj, wōn ej tōmak am in naan? Im ñan wōn ar kwaḷọk pein Irooj? 39 Kōn men eo re ban tōmak, bwe Aiseia e bar ba, 40 Ej kapilo mejeir, im kapen būrueir; bwe ren jab lo kōn mejeir, im jeḷā kōn būrueir, im ukeḷọk ippāer, im In jab kemour er. 41 Men Kein Aiseia ear ba, bwe ear lo An aiboojoj im kōnono kōn E. 42 A elōñ iaan irooj raṇ raar tōmak E, a kōn Parisi ro re jab kwaḷọk E ñe re ab joḷọk er jān iṃōn kweilọk. 43 Bwe rej yokwe nōbar an armej eḷap jān nōbar an Anij. 44 Im Jisōs ej laṃōj im ba, “Eo ej lōke Eō, e jab lōke Eō a Eo ear jilkintok Eō. 45 Im eo ej lo Eō ej lo Eo ear jilkintok Eō. 46 Ña meram I moottok ñan laḷ, bwe jabdewōt eo ej lōke Eō en jāmin pād ilo marok. 47 Im eḷaññe jabdewōt armej ej roñ naan ko Aō, im jab kōjparoki, I jab ekajet e; bwe Iar jab itok bwe In ekajet laḷ, a bwe In lọmọọren laḷ. 48 Eo ej joḷọk Eō im jab bōk naan ko Aō, juon ippān enaaj ekajete; naan eo Iar kōnono, men in enaaj ekajete ilo raan eo āliktata. 49 Bwe Iar jab make kōnono jān Eō, a Jema eo ear jilkintok Eō, Ear letok ñan Eō kien, men eo In ba im men eo In kōnono kake. 50 Im I jeḷā bwe kien eo An ej mour indeeo. Innām men ko Ij kōnono kaki, im āinwōt Jema ear ba ñan Eō, āindein Aō kōnono.”

13

1 Kiiō ṃokta jān kwōjkwōj in kijoone, kōn an Jisōs jeḷā bwe awa eo An e moottok bwe En ilọk jān laḷ in ñan Jemān, Ear yokwe ro doon rej pād i laḷ, im Ej yokwe er ñan jeṃḷọkōn. 2 Im ilo kejota, eṃōj an tepiḷ likūt ilo būruon Judas Iskariōt, nejin Saimōn, bwe en ketak E, 3 Jisōs e jeḷā bwe Jemān ear likūt men otemjej ilo pein, im bwe Ear itok jān Anij, im ilọk ñan Anij, 4 E jutak jān kejota, im utūk nuknuk ko An; im Ej bōk nuknuk in kōṃōrā, im kañūrñūr kake. 5 Innām Ej lutōk dān ilo jāpe, im jino An kwaḷe neen ro rū kaḷoran, im kōṃōrāik kōn nuknuk in kōṃōrā eo Ear kañūrñūr kake. 6 Im Ej itok ñan Saimōn Piter, im ej ba ñan E, “Irooj, kwōj kwaḷe neō ke?” 7 Jisōs e uwaak im ba ñan e, “Men eo Ij kōṃṃane kwō jaje kiiō, a kwō naaj meḷeḷe tokālik.” 8 Piter e ba ñan E, “Kwō jāmin kwaḷe neō indeeo.” Jisōs e uwaak e, “Eḷaññe I jab kwaḷe eok, ejjeḷọk aṃ ājinkōj Ippa.” 9 Saimōn Piter e ba ñan E, “Irooj, jab neō wōt, a barāinwōt peiū im bōra!” 10 Jisōs e ba ñan e, “Eo ear tutu eṃṃan en kwaḷe neen wōt, a ej erreo otem erreo. Im koṃij erreo, a jab koṃ otemjej.” 11 Bwe E jeḷā eo enaaj ketak E; kōn men in E ba, “E jab koṃ otemjej erreo.” 12 Innām ke eṃōj An kwaḷe neir, im bōk nuknuk ko An, im bar jibadek; E ba ñan er, “Koṃ jeḷā ke men eo Iar kōṃanṃan ñan koṃ? 13 Koṃ likūt eta Ri Kaki im Irooj, im eṃṃan ami ba, bwe Ña āindein. 14 Innām eḷaññe Ña, ami Irooj im Ri Kaki, Iar kwaḷe neimi, eṃṃan koṃwin kwaḷe neen doon. 15 Bwe Iar lewōj ñan koṃ juon joñak, bwe koṃwin barāinwōt kōṃṃan āinwōt Iar kōṃṃan ñan koṃ. 16 E ṃool, e ṃool, Ij ba ñan koṃ, ri karijer e jab utiej jān irooj eo an; barāinwōt ri jelōk e jab utiej jān eo ej jilkinḷọk e. 17 Eḷaññe koṃ jeḷā men kein, koṃ ṃōṇōṇō eḷaññe koṃij kōṃanṃani. 18 I jab kōnono kōn koṃ otemjej; I jeḷā ro Iar kāālōt er. A bwe en kaṃool jeje in, Eo ej ṃōñā Aō pilawā, ej depḷọk Eō kōn jiṃwin neen. 19 Jān iien in Ij ba ñan koṃ ṃokta jān an itok, bwe ñe e moottok, koṃwin tōmak bwe Ña E. 20 E ṃool, e ṃool, Ij ba ñan koṃ, eo ej bōk jabdewōt eo Ij jilkinḷọk e ej bōk Ña, im eo ej bōk Ña, ej bōk Eo ear jilkintok Eō.” 21 Ke eṃōj an Jisōs ba āindein, Ej poktak ilo An, im kōnnaan im ba, “E ṃool, e ṃool, Ij ba ñan koṃ, bwe juon iaami enaaj ketak Eō.” 22 Innām rū kaḷoran rej kallimjek doon, im jaje wōn eo Ej kōnono kake. 23 Im juon iaan ro rū kaḷoran, eo Jisōs ej yokwe e, ej atartar ioon ubōn Jisōs. 24 Innām Saimōn Piter, ej romeje im ba, “Kwōn kōnnaanōk kōm wōn eo Ej kōnono kake.” 25 Innām ej atartar ioon ubōn Jisōs, im ej ba ñan E, “Irooj wōn eo?” 26 Jisōs e uwaak, “Eo Ij leḷọk ṃōttan kijen ñan e, ñe eṃōj Aō katutu e.” Im ke eṃōj An katutu ṃōttan kijen, Ej bōk im leḷọk ñan Judas, nejin Saimōn Iskariōt. 27 Im ālikin ṃōttan kijen eo, Setan ej deḷọñ ilo e. Innām Jisōs e ba ñan e, “Men eo kwōj kōṃṃan kwōn kōṃṃane ṃōkaj.” 28 Ejjeḷọk iaan ro rej jibadek Ippān jeḷā en ta Ear kōnono men in ñan e. 29 Bwe jet iaer rej ḷōmṇak, kōn an bōjọ pād ippān Judas, bwe Jisōs ear ba ñan e, “Kwōn wiaik men ko jej aikuj ilo kwōjkwōj,” ak bwe en leḷọk jabdewōt ñan ro ri jeraṃōl. 30 Innām ke eṃōj an bōk ṃōttan kijen, e ṃōkaj an diwōjḷọk, im e boñ. 31 Ke eṃōj an ilọk, Jisōs e ba, “Kiiō Nejin armej e aiboojoj, im Anij ej aiboojoj kōn E. 32 Im Anij enaaj kaiboojoj E ilo E make, im enaaj ṃōkaj An kaiboojoj E. 33 Ajri re dik, kiiō bar jidik wōt iien Ij pād ippemi. Koṃ naaj kappukot Eō, im āinwōt Iar ba ñan ri Ju ro, ‘Ijo Ij ilọk ie ḷọk koṃ jab maroñ in itok,’ āindein Ij ba ñan koṃ. 34 Kien ekāāl Ij lewōj ñan koṃ, koṃwin yokwe doon; āinwōt Iar yokwe koṃ, koṃwin barāinwōt yokwe doon. 35 Ilo men in armej otemjej renaaj jeḷā bwe koṃij rū kaḷora, eḷaññe koṃij yokwe doon.” 36 Saimōn Piter e ba ñan E, “Irooj, Kwōj ilọk ñan ia?” Jisōs e uwaak e, “Ijo Ij ilọk ie ḷọk, kwō jab maroñ in ḷoor Eō kiiō, a tokālik kwō naaj ḷoor Eō.” 37 Piter e ba ñan E, “Irooj, etke I jab maroñ in ḷoor Eok kiiō? I naaj likūt aō mour kōn Eok.” 38 Jisōs e uwaak e, “Kwō naaj likūt aṃ mour kōn Eō ke? E ṃool, e ṃool, Ij ba ñan eok, kako e jāmin kūr ṃokta jān aṃ kaarmejjet Eō alen jilu.

14

1 En jab pok būruemi, koṃwin lōke Anij, koṃwin barāinwōt lōke Eō. 2 Ilo iṃōn Jema elōñ jikin. Eḷaññe jab āindein, I naaj kar kōnnaanōk koṃ ṃokta; bwe Ij ilen kōppojak jikōmi. 3 Im eḷaññe Ij ilām kōppojak jikōmi, I naaj bar itok im bōk koṃ ñan Eō, bwe ijo Ij pād ie, barāinwōt koṃwin pād ie. 4 Im ijo Ij ilọk ie ḷọk koṃ jeḷā iaḷ.” 5 Tomas ej ba ñan E, “Irooj, kōm jaje ijo Kwōj ilọk ie ḷọk, im ekōjkan am jeḷā iaḷ?” 6 Jisōs e ba ñan e, “Ña iaḷ, im ṃool, im mour. Ejjeḷọk armej ej itok ñan Jema, eḷaññe jab kōn Eō. 7 Eḷaññe koṃ ar jeḷā Ña, barāinwōt koṃ naaj kar jeḷā Jema; im jān iien in koṃ jeḷā E, im ar lo E.” 8 Pilip e ba ñan E, “Irooj, Kwōn kwaḷọk Jemaṃ ñan kōm, innām eṃōj.” 9 Jisōs e ba ñan e, “E nañin etto Aō pād ippemi, im kwō jaje Ña ke, Pilip? Eo ear lo Ña, ear lo Jema; im ekōjkan aṃ ba, ‘Kwōn kwaḷọk ñan kōm Jemaṃ’? 10 Kwō jab tōmak ke bwe Ña ilo Jema, im Jema ilo Ña? Naan ko Ij kōnono ñan koṃ, I jab kōnono jān Ña, a Jema ej pād ilo Ña, Ej kōṃanṃan jerbal ko An. 11 Koṃwin tōmak Eō, bwe Ña ilo Jema im Jema ilo Ña, ak eḷaññe jab āinwōt, koṃwin tōmak Eō kōn jerbal ko wōt. 12 E ṃool, e ṃool, Ij ba ñan koṃ, eo ej lōke Ña, jerbal ko Ij kōṃanṃani, enaaj kōṃṃani barāinwōt; im jerbal ko reḷap jān kein enaaj kōṃṃani, bwe Ij ilọk ñan Jema. 13 Im jabdewōt men eo koṃ naaj kajjitōk ilo Eta, men in I naaj kōṃanṃane, bwe Jema en aiboojoj ilo Nejin. 14 Eḷaññe koṃ naaj kajjitōk jabdewōt ilo Eta, men in I naaj kōṃṃane. 15 Eḷaññe koṃij yokwe Eō, koṃ naaj kōjparok kien ko Aō. 16 Im I naaj jar im kajjitōk ippān Jema, im Enaaj lewōj ñan koṃ bar juon Ri Kaaenōṃṃan, bwe En pād ippemi indeeo, 17 Jetōb in ṃool, Eo laḷ e ban bōk E, bwe e jab lo E, im e jab jeḷā E. A koṃ jeḷā E, bwe Ej jokwe ippemi, im Enaaj pād ilo koṃ. 18 I jāmin likūt koṃ atajinemjen, I naaj iwōj ñan koṃ. 19 A jidik iien, im laḷ e jāmin bar lo Eō, a koṃij lo Eō; kōn Aō mour, koṃ naaj mour barāinwōt. 20 Ilo raan eo koṃ naaj jeḷā bwe Ña ilo Jema im koṃ ilo Ña, im Ña ilo koṃ. 21 Eo kien ko Aō ippān, im ej kōjparoki, e in eo ej yokwe Eō. Im eo ej yokwe Eō Jema enaaj yokwe e, im I naaj yokwe e, im I naaj kwaḷọk Eō ñan e.” 22 Judas (jab Iskariōt) e ba ñan E, “Irooj, ekōjkan Aṃ naaj kwaḷọk Eok ñan kōm, im jab ñan laḷ?” 23 Jisōs e uwaak im ba ñan e, “Eḷaññe armej ej yokwe Eō, e naaj kōjparok Aō in naan; im Jema enaaj yokwe e, im Kōm naaj itok ñan e, im jokwe ippān. 24 Eo e jab yokwe Eō e jab kōjparok naan ko Aō. Im naan eo koṃij roñjake e jab Aō, a an Jema eo Ear jilkintok Eō. 25 Men kein Iar kōnono ñan koṃ, ke Ij pād ippemi. 26 A Ri Kaaenōṃṃan, E Jetōb Kwōjarjar, Eo Jema enaaj jilkintok ilo Eta, Enaaj katakin koṃ men otemjej, im kakememej men otemjej ñan koṃ, men ko Iar ba ñan koṃ. 27 Aenōṃṃan Ij likūt ṇa ippemi, Aō aenōṃṃan Ij lewōj ñan koṃ. Ña Ij lewōj ñan koṃ, jab āinwōt an laḷ lewōj. En jab pok būruemi, im en jab lōḷñọñ. 28 Koṃ ar roñ ekōjkan Aō ba ñan koṃ, ‘Ij ilọk, im bar iwōj ñan koṃ.’ Eḷaññe koṃ ar yokwe Eō, koṃ naaj kar lañlōñ, bwe Ij ilọk ñan Jema, bwe Jema eḷap jān Ña. 29 Im kiiō Iar ba ñan koṃ ṃokta jān an itok, bwe, ñe e moottok, koṃwin tōmak. 30 Tokālik I jāmin bar kōnono elōñ ippemi, bwe irooj in laḷ in ej itok, im ejjeḷọk men eo an ilo Ña. 31 A bwe laḷ en jeḷā bwe Ña Ij yokwe Jema, im āinwōt Jema e ar letok kien ñan Eō, āindein Ij kōṃṃan. Koṃwin jutak, jen ilọk jān ijin.

15

1 Ña Ij vain e ṃool, im Jema e Ri kallib. 2 Jabdewōt ra ilo Ña e jab jebar leen, Ej bōkḷọk, im ra jabdewōt ej jebar leen, Ej karreoik e, bwe en orḷọk an jebar leen. 3 Kiiō koṃ erreo kōn naan eo Iar kōnono ñan koṃ. 4 Koṃwin pād ilo Ña, im Ña ilo koṃ. Āinwōt ra e ban make jebar leen, eḷaññe e jab pād ilo vain; āindein barāinwōt koṃ bane, eḷaññe koṃ jab pād ilo Ña. 5 Ña vain, koṃ ra ko. Eo ej pād ilo Ña, im Ña ilo e, e in ej jebar elōñ leen, bwe ñe koṃ jepel jān Ña koṃ ban kōṃṃan jabdewōt. 6 Eḷaññe armej e jab pād ilo Ña, joḷọk e āinwōt ra, im ej aemedḷọk; im rej āt er, im juḷọk ilo kijeek, im tile er. 7 Eḷaññe koṃij pād ilo Ña, im naan ko Aō rej pād ilo koṃ, koṃwin kajjitōk jabdewōt eo koṃ kōṇaan, im naaj kōṃṃane ñan koṃ. 8 Ilo men in Jema ej aiboojoj, bwe koṃij jebar elōñ leen; im āindein koṃ naaj rū kaḷora. 9 Āinwōt Jema ear yokwe Eō, barāinwōt Iar yokwe koṃ; koṃwin pād wōt ilo Aō yokwe. 10 Eḷaññe koṃij kōjparok kien ko Aō, koṃ naaj pād ilo Aō yokwe; im āinwōt Iar kōjparok kien ko an Jema, im Ij pād ilo An yokwe. 11 Men kein Ij kōnono ñan koṃ bwe Aō lañlōñ en pād ilo koṃ, im bwe ami lañlōñ en obrak. 12 Eñin kien eo Aō, Bwe koṃwin yokwe doon, āinwōt Iar yokwe koṃ. 13 Ejjeḷọk yokwe ippān armej eḷap jān yokwe in, bwe armej en leḷọk an mour kōn ro jeran. 14 Koṃ ro jera, eḷaññe koṃij kōṃṃan men ko Ij jiroñ koṃ. 15 I jāmin bar ṇa etami ri karijer, bwe ri karijer e jaje men eo irooj eo an ej kōṃṃan; a Iar ṇa etami ro jera, bwe men otemjej Iar roñ jān Jema Iar kwaḷọk ñan koṃ. 16 Koṃ ar jab kāālōt Eō, a Ña Iar kāālōt koṃ, im likūt koṃ bwe koṃwin ilọk im jebar leen, im bwe leen eo ami en pād wōt, bwe jabdewōt men eo koṃ naaj kajjitōk ippān Jema, En lewōj ñan koṃ. 17 Men kein Ij jiroñ koṃ, bwe koṃwin yokwe doon. 18 Eḷaññe laḷ ej kōjdate koṃ, koṃij jeḷā bwe ear kōjdate Eō ṃokta jān koṃ. 19 Eḷaññe koṃ an laḷ, laḷ enaaj kar yokwe men eo an; a bwe koṃ jab an laḷ, a Iar kāālōt koṃ jān laḷ, kōn men in laḷ ej kōjdate koṃ. 20 Koṃwin keememej naan eo Iar ba ñan koṃ, ‘Ri karijer e jab utiej jān irooj eo an.’ Eḷaññe raar matōrtōr Eō, renaaj barāinwōt matōrtōre koṃ. Eḷaññe raar kōjparok Aō in naan, renaaj barāinwōt kōjparok ami naan. 21 A men kein otemjej renaaj kōṃanṃan ṇae koṃ kōn Eta, bwe re jaje Eo ear jilkintok Eō. 22 Eḷaññe Iar jab itok im kōnono ñan er, ejjeḷọk jerọwiwi enaaj kar ippāer, a kiiō ejjeḷọk men in kadikḷọk aer jerọwiwi. 23 Eo ej kōjdate Eō ej barāinwōt kōjdate Jema. 24 Eḷaññe Iar jab kōṃanṃan ippāer jerbal ko ejjeḷọk bar juon armej ear kōṃṃani, enaaj kar jeḷọk jerọwiwi ippāer, a kiiō raar lo im kōjdate Ña im Jema. 25 A men in, bwe en jejjet naan eo jeje ilo kieir: Raar kōjdate Eō im ejjeḷọk unin. 26 A ñe Ri Kaaenōṃṃan ej itok, Eo I naaj jilkinwōj ñan koṃ jān Jema, E Jetōb in ṃool, Eo ej itok jān Jema, Enaaj kōnnaan kōn Eō. 27 Im koṃ barāinwōt kōnnaan, bwe koṃ ar pād Ippa jān jinoin.

16

1 Men kein Iar kōnono ñan koṃ, bwe koṃwin jab tipñōl. 2 Re naaj joḷọk koṃ jān iṃōn kweilọk ko. Aet awa ej itok ñe jabdewōt eo ej ṃan koṃ enaaj ḷōmṇak bwe ej jerbal ñan Anij. 3 Im men kein renaaj kōṃṃan ñan koṃ, bwe re jab jeḷā Jema ak Ña. 4 A men kein Iar kōnono ñan koṃ, bwe ñe ej itok aer awa koṃwin keememej er, ekōjkan Iar kōnnaanōk koṃ. Im men kein Iar jab ba ñan koṃ jān jinoin, bwe Iar pād ippemi. 5 A kiiō Ij ilọk ñan Eo ear jilkintok Eō, im ejjeḷọk iaami ej kajjitōk Ippa, ‘Kwōj ilọk ñan ia?’ 6 A bwe Iar ba men kein ñan koṃ, būroṃōj ear kobrak būruemi. 7 Ijoke Ij ba ñan koṃ naan e ṃool, eṃṃan ñan koṃ bwe In ilọk, bwe eḷaññe I jab ilọk, Ri Kaenōṃṃan e jāmin iwōj ñan koṃ. A eḷaññe Ij ilọk, I naaj jilkinwōj E ñan koṃ. 8 Im ñe Ej itok, Enaaj ṇa ruōn laḷ kōn jerọwiwi im kōn kwōjarjar im kōn ekajet: 9 Kōn jerọwiwi, bwe re jab lōke Eō; 10 Kōn kwōjarjar bwe Ij ilọk ñan Jema, im koṃ jab bar lo Eō; 11 Kōn ekajet, bwe ar ekajete irooj in laḷ in. 12 Bar elōñ men ko Ippa bwe In ba ñan koṃ, a koṃ jab maroñ in bōki kiiō. 13 A ñe Eo Jetōb in ṃool Ej itok, enaaj tōl koṃ ñan lowaan ṃool otemjej, bwe E jāmin kōnono jān E make, a jabdewōt men eo Enaaj roñjake, men in Enaaj kōnono, im Enaaj kwaḷọk ñan koṃ men ko renaaj itok. 14 E naaj kaiboojoj Ña, bwe Enaaj bōk jān men eo Aō, im E naaj kwaḷọk e ñan koṃ. 15 Men otemjej an Jema Aō; kōn men in Ij ba bwe Enaaj bōk jān men eo Aō, im Enaaj kwaḷọk e ñan koṃ. 16 Jidik wōt iien, im koṃ jab bar lo Eō; im bar jidik wōt iien, im koṃ naaj lo Eō.” 17 Innām jet iaan ro rū kaḷoran re ba ñan doon, “Ta men in Ej ba ñan kōj, ‘Jidik wōt iien, im koṃ jab bar lo Eō, im bar jidik wōt iien, im koṃ naaj lo Eō’; im, ‘Bwe Ij ilọk ñan Jema’?” 18 Innām re ba, “Ta men in Ej ba, ‘Jidik wōt iien’? Je jaje ta eo Ej kōnono.” 19 Innām Jisōs ej kile bwe re kōṇaan kajjitōk Ippān, im E ba ñan er, “Koṃ kajjitōk ippān doon ke kōn men eo Iar ba, ‘Jidik wōt iien im koṃ jab bar lo Eō, im bar jidik wōt iien im koṃ naaj lo Eō’? 20 E ṃool, e ṃool, Ij ba ñan koṃ, koṃ naaj jañ im limō, a laḷ enaaj lañlōñ; im koṃ naaj būroṃōj, a ami būroṃōj enaaj oktak ñan lañlōñ. 21 Kōrā ke ej eñtaan ej būroṃōj, bwe e moottok awa eo an, a ke e ḷotak nejin, e jab bar keememej eñtaan kōn lañlōñ bwe juon armej e ḷotak ilo laḷ. 22 Im kiiō koṃij būroṃōj, a I naaj bar lo koṃ, im enaaj lañlōñ būruemi, im ejjeḷọk en ej bōk ami lañlōñ jān koṃ. 23 Ilo raan eo enaaj jeḷọk ami kajjitōk Ippa. E ṃool, e ṃool, Ij ba ñan koṃ, eḷaññe koṃ naaj kajjitōk ippān Jema, Enaaj lewōj ñan koṃ ilo eta. 24 Koṃ jañin kajjitōk jabdewōt ilo Eta. Koṃwin kajjitōk im koṃ naaj bōk, bwe ami lañlōñ en obrak. 25 Men kein Iar kōnono ñan koṃ ilo naan ko rettino, a iien ej itok, ñe I jāmin bar kōnono ñan koṃ ilo naan ko rettino, a I naaj kwaḷọk ñan koṃ alikkar kōn Jema. 26 Ilo raan eo koṃ naaj kajjitōk ilo Eta, im I jab ba ñan koṃ bwe I naaj jar im kajjitōk ippān Jema kōn koṃ. 27 Bwe Jema ej make yokwe koṃ, bwe koṃ ar yokwe Eō, im tōmak bwe Iar itok jān Anij. 28 Iar itok jān Jema, im itok ñan laḷ; bar juon, Ij likūt laḷ, im ilọk ñan Jema.” 29 Rū kaḷoran re ba ñan E, “Lo, kiiō Kwōj kōnono alikkar, im jab kōnono ilo naan eo ettino. 30 Kiiō kōm jeḷā bwe Kwō jeḷā men otemjej, im Kwō jab aikuj bwe jabdewōt armej en kajjitōk Ippaṃ; kōn men in kōmij tōmak bwe Kwaar itok jān Anij.” 31 Jisōs ej uwaak er, “Koṃij tōmak kiiō ke? 32 Lo, awa ej itok, aet, e moottok, ñe koṃ naaj jeplōklōk, koṃ otemjej ñan jikōmi, im naaj likūt Eō make Iaō. “Ijoke I jab make Iaō, bwe Jema ej pād Ippa. 33 Men kein Iar kōnono ñan koṃ, bwe ilo Ña koṃwin aenōṃṃan. Ilo laḷ koṃij eñtaan, a koṃwin ṃōṇōṇō; Ña Iar bōk anjọ ioon laḷ.”

17

1 Naan kein Jisōs ear kōnono, im reiḷọk ñan lañ im ba, “Jema e moottok awa eo; Kwōn kaiboojoj Nejiṃ, bwe Nejiṃ en kaiboojoj Kwe; 2 Āinwōt Kwaar letok ñan E kajoor ioon kanniōk otemjej, bwe En leḷọk mour indeeo ñan er otemjej Kwaar letok ñan E. 3 Im men in mour indeeo, bwe ren jeḷā Kwe juon wōt Anij e ṃool, im Jisōs Kraist, eo Kwaar jilkintok. 4 Iar kaiboojoj Eok ioon laḷ; Iar kaṃōjḷọk jerbal eo Kwaar letok ñan Eō bwe In kōṃṃane. 5 Im kiiō O Jema, Kwōn kaiboojoj Eō kōn Kwe wōt kōn aiboojoj eo ear pād Ippa im Ippaṃ ṃokta jān laḷ. 6 Iar kwaḷọk Etaṃ ñan armej ro Kwaar letok ñan Eō jān laḷ; ro Aṃ ṃokta, im Kwaar letok er ñan Eō, im raar kōjparok Aṃ in naan. 7 Kiiō ro jeḷā bwe men otemjej jabdewōt Kwaar letok ñan Eō, jān Kwe. 8 Bwe Iar leḷọk ñan er naan ko Kwaar letok ñan Eō, im raar bōki, im kanooj jeḷā bwe Iar itok jān Kwe, im raar tōmak bwe Kwaar jilkintok Eō. 9 Ij jar kōn er. I jab jar kōn laḷ, a kōn ro Kwaar letok ñan Eō, bwe er Aṃ. 10 Im men otemjej Aō Aṃ, im Aṃ Aō, im Ij aiboojoj ilo er. 11 Im kiiō eṃōj Aō pād ilo laḷ, a er rej pād ilo laḷ, im Ij iwōj ñan Eok. Jema Kwōjarjar, Kwōn kōjparok er ilo Etaṃ wōt, ro Kwaar letok ñan Eō, bwe ren juon wōt, āinwōt Kōj. 12 Ke Iar pād ippāer ilo laḷ, Iar kōjparok er ilo Etaṃ, ro Kwaar letok ñan Eō; im Iar oṇaake er, im ejjeḷọk juon iaer e jako, a dien mej eo, bwe en kaṃool Jeje ko. 13 A kiiō Ij iwōj ñan Eok, im men kein Ij kōnono ilo laḷ, bwe Aō lañlōñ en obrak ilo er. 14 Iar leḷọk ñan er naan eo Aṃ, im laḷ ear kōjdate er bwe re jab jān laḷ, āinwōt Ña I jab jān laḷ. 15 I jab jar bwe Kwōn bōk er jān laḷ, a bwe Kwōn kōjparok er jān eo e nana. 16 Re jab jān laḷ, āinwōt Ña I jab jān laḷ. 17 Kwōn kokwōjarjar er ilo ṃool; Aṃ in naan ṃool eo. 18 Āinwōt Kwaar jilkintok Eō ñan laḷ, āindein Ij jilkinḷọk er ilo laḷ. 19 Im Ij kokwōjarjar Eō kōn er, bwe ren barāinwōt kwōjarjar ilo ṃool. 20 Ak I jab jar kōn rein wōt, a barāinwōt kōn ro renaaj lōke Eō kōn aer in naan; 21 Bwe er otemjej ren juon, āinwōt Kwe, Jema ilo Ña, im Ña ilo Kwe, bwe er barāinwōt ren ilo Kōj, bwe laḷ en tōmak bwe Kwaar jilkintok Eō. 22 Im aiboojoj eo Kwaar letok ñan Eō, Iar leḷọk ñan er, bwe ren juon, āinwōt Kōj juon, 23 Ña ilo er im Kwe ilo Ña, bwe ren weeppānḷọk ilo juon im bwe laḷ en jeḷā bwe Kwaar jilkintok Eō im yokwe er āinwōt Kwaar yokwe Ña. 24 Jema, I kōṇaan bwe ro Kwaar letok ñan Eō, ren pād Ippa ijo Ij pād ie, bwe ren lo Aō aiboojoj Kwaar letok ñan Eō, bwe Kwaar yokwe Eō ṃokta jān jinoin kōṃanṃan laḷ. 25 O Jema e wānōk, laḷ ear jab jeḷā Kwe, a Ña Iar jeḷā Kwe, im rein raar jeḷā bwe Kwaar jilkintok Eō. 26 Im Iar kwaḷọk Etaṃ ñan er, im I naaj kwaḷọk e, bwe yokwe eo Kwaar yokwe Eō kake, en pād ilo er, im Ña ilo er.”

18

1 Ke eṃōj an Jisōs kōnono naan kein, Ej ilọk ippān ro rū kaḷoran im eḷḷā jān wea Kidron, ijo juon jikin kallib, E im rū kaḷoran rej deḷọñ ilowaan. 2 Im Judas, eo ear ketak E, e barāinwōt jeḷā jikin eo, bwe e makij an Jisōs ar ilọk ñan ijo ippān ro rū kaḷoran. 3 Innām Judas, eṃōj an bōk jar an ri tariṇae im ro ri kabōjrak jān pris ro reḷap im Parisi ro, rej itok im ewor lamp im romaak im kein tariṇae ippāer. 4 Innām Jisōs, bwe E jeḷā men otemjej ren itok ioon, Ej ilọk im ba ñan er, “Wōn eo koṃij pukot e?” 5 Re uwaak E, “Jisōs ri Nazeret.” Jisōs e ba ñan er, “Ña E.” Im barāinwōt Judas, eo ear ketak E, e jutak ippāer. 6 Kiiō ke Ear ba ñan er, “Ña E,” rej jenlik, im buñ ioon bwidej. 7 Innām Ej bar kajjitōk ippāer, “Wōn eo koṃij pukot e?” Im re ba, “Jisōs ri Nazeret.” 8 Jisōs e uwaak, “Iar ba ñan koṃ bwe Ña E; innām eḷaññe koṃij pukot Eō, kōtḷọk rein bwe ren ilọk.” 9 Bwe en jejjet naan eo Ear kōnono: “Iaan ro Kwaar letok ñan Eō, e jab jako juon iaer jān Eō.” 10 Innām juon jāje ippān Saimōn Piter, im ej nōōre, im jepak ri karijeran pris eo eḷap, im bukwe lọjilñin anmooṇōn. Etan ri karijer eo Malkōs. 11 Innām Jisōs e ba ñan Piter, “Kwōn likūt jāje ṇe aṃ ṇa ilo nien; kab eo Jema eo ar letok ñan Eō, In jāmin idaak ke?” 12 Innām jar eo im kapen im ri kabōjrak an ri Ju ro rej jibwe Jisōs, im liāp E, 13 Im āñinḷọk E ñan Annas ṃokta, bwe e jemān lio pāleen Keiapas, pris eo eḷap ilo iiō in. 14 Im Keiapas in, eo ear pepe ñan ri Ju ro bwe eṃṃan juon armej en mej kōn armej raṇ. 15 Im Saimōn Piter ej ḷoor Jisōs, im bar juon rū kaḷoran; rū kaḷoran eo pris eḷap e jeḷā, im ej deḷọñ ippān Jisōs ilowaan iṃōn pris eo eḷap. 16 A Piter e jutak ilikin kōjām eo. Innām rū kaḷoor eo pris eḷap e jeḷā, ej ilọk im kōnono ñan lio, eo ej lale kōjām, im kadeḷọñ Piter. 17 Innām jiroñ eo, ri lale kōjām, e ba ñan Piter, “Kwō barāinwōt juon iaan ro rū kaḷoran armej in ke?” E ba, “Jaab.” 18 Im ro ri karijer im ri kabōjrak rej jutak ijo, raar kōjọ kijeek kōn mālle, bwe e piọ, im rej rañrañ; im Piter e jutak ippāer im make rañrañ. 19 Innām pris eo eḷap ej kajjitōk ippān Jisōs kōn ro rū kaḷoran, im kōn An naan in katak. 20 Jisōs e uwaak e, “Iar kōnono alikkar ñan laḷ. Iien otemjej Iar katakin ilowaan iṃōn kweilọk ko im ilowaan tempel, ijo ri Ju ro otemjej rej kweilọklọk ie; im ilo ettino ejjeḷọk Aō kōnono. 21 Etke kwōj kajjitōk Ippa? Kwōn kajjitōk ippān ro raar roñjake Eō, ta eo Iar ba ñan er; lo, rein rej jeḷā ta eo Iar ba.” 22 Ke eṃōj An kōnono āindein, juon iaan ri kabōjrak ro rej jutak iturin, ej ubrare Jisōs kōn pein im ba, “Āindein Aṃ uwaak pris eo eḷap ke?” 23 Jisōs e uwaak e, “Eḷaññe Iar kōnono nana, kwōn kōnnaan kōn nana eo; a eḷaññe eṃṃan, etke kwōj ubrare Eō?” 24 Annas ear jilkinḷọk E ke Ej ellok wōt, ñan Keiapas pris eo eḷap. 25 Im Saimōn Piter ej jutak im rañrañ e. Innām re ba ñan e, “Kwō barāinwōt juon iaan ro rū kaḷoran ke?” Ej kaarmejjete im ba, “Jaab.” 26 Juon iaan ro ri karijeran pris eo eḷap, nukun eo Piter e ar bukwe lọjilñin, e ba, “Iar jab lo eok ilo jikin kallib eo Ippān ke?” 27 Innām Piter ej bar kaarmejjete E, im e ṃōkaj an kako ikkūr. 28 Innām rej āñinḷọk Jisōs jān Keiapas ñan Pritoriōm, im e jibboñ. Im er re jab deḷọñ ilowaan Pritoriōm eo bwe ren jab ettoon, a bwe ren ṃōñā kwōjkwōj in kijoone. 29 Innām Pailat ej diwōjḷọk ñan er im ba, “Ewi naan in kinaakḷọk koṃij bōk ṇae armej in?” 30 Re uwaak im ba ñan e, “Eḷaññe Ear jab ri nana, kōm jāmin kar ketak E ñan eok.” 31 Innām Pailat e ba ñan er, “Koṃwin make bōk E, im ekajet E kōn kiemi.” Ri Ju re ba ñan e, “E jab mālim bwe kōmin ṃan jabdewōt armej.” 32 Bwe naan jān Jisōs en jejjet, eo Ear ba im bakajjien wāween mej eo Enaaj mej kake. 33 Innām Pailat ej bar deḷọñ ilowaan Pritoriōm, im kūrtok Jisōs im ba ñan E, “Kwe kiiñ an ri Ju ro ke?” 34 Jisōs e uwaak, “Kwōj ba men in jān kwe make, ak ro jet raar ba men in ñan eok kōn Eō ke?” 35 Pailat e uwaak, “Ña ri Ju ke? Ri aelōñ eo Aṃ im pris ro reḷap raar ketak Eok ñan eō. Ta eo Kwaar kōṃṃane?” 36 Jisōs e uwaak, “Aelōñ eo Aō e jab jān laḷ in; eḷaññe Aō aelōñ jān laḷ in, innām ro karijera renaaj kar ire, bwe en jab ketak Eō ñan ri Ju ro. A kiiō Aō aelōñ e jab jān ijin.” 37 Kōn men in Pailat ej ba ñan E, “Innām Kwe kiiñ ke?” Jisōs e uwaak, “Kwōj ba wōt. Ña kiiñ. Kōn men in Iar ḷotak, im kōn men in Iar itok ñan laḷ, bwe In kōnnaan kōn ṃool. Er otemjej jān ṃool rej eọroñ ainikiō.” 38 Pailat e ba ñan E, “Ta eo ṃool?” Im ke eṃōj an ba men in, ej bar diwōj ñan ri Ju ro im ba ñan er, “Ij lo ejjeḷọk ruōn. 39 A juon ami ṃanit, bwe in kōtḷọk juon ñan koṃ ilo kwōjkwōj in kijoone. Innām koṃ kōṇaan bwe in kōtḷọk ñan koṃ Kiiñ an ri Ju ro ke?” 40 Innām er otemjej rej bar laṃōj im ba, “Jab armej in, a Barabbas!” A Barabbas e ri kowadoñ.

19

1 Innām iien eo, Pailat ej bōk Jisōs im deñḷọk E. 2 Im ri tariṇae rej pirōk wōjke kālōklōk, im likūt e ṇa ioon bōran, im rej kanuknuk E kōn nuknuk e būrōrō, 3 Im rej itok ñan E im ba, “Yokwe Eok, Kiiñ an ri Ju ro!” im rej ubrar E kōn peir. 4 Innām Pailat ej bar diwōjḷọk im ba ñan er, “Lo, Ij āñinwōj E ñan koṃ, bwe koṃwin jeḷā I jab lo ṇotaan.” 5 Innām Jisōs ej diwōjḷọk, Ej pālōk pāllin kālōklōk eo, im kōṇak nuknuk eo e būrōrō. Im Pailat e ba ñan er, “Lo, Armej eo!” 6 Innām ke pris ro reḷap im ri kabōjrak rej lo E, rej laṃōj im ba, “Debwāāl E, debwāāl E!” Pailat e ba ñan er, “Koṃeo, koṃwin bōk E, im debwāāl E, bwe I jab lo ruōn.” 7 Ri Ju ro re uwaak e, “Juon am kien, im kōn kien eo eṃṃan En mej, bwe Ear make kōṃṃan E nejin Anij.” 8 Innām ke Pailat ej roñ naan eo, eḷapḷọk an mijak. 9 Im ej bar deḷọñ ilowaan Pritoriōm im ba ñan Jisōs, “Kwōj jān ia?” A ejjeḷọk an Jisōs uwaak e. 10 Innām Pailat e ba ñan E, “Kwō jab kōnono ñan eō ke? Kwō jaje ke bwe ij maroñ in debwāāl Eok, im ij maroñ in kōtḷọk Eok?” 11 Jisōs e uwaak e, “Ejjeḷọk aṃ maroñ ṇae Eō, eḷaññe jab lewōj ñan eok jān lañ. Kōn men in eo ear ketak Eō ñan eok, eḷapḷọk an jerọwiwi.” 12 Jān iien in Pailat ej pukot bwe en kōtḷọk E, a ri Ju ro rej laṃōj im ba, “Eḷaññe kwōj kōtḷọk armej in bwe En ilọk, kwō jab jeran Sizar. Jabdewōt eo ej make kōṃṃan e juon kiiñ, ej kōnono ṇae Sizar.” 13 Innām ke Pailat ej roñ naan eo, ej āñinḷọk Jisōs, im ej jijet ioon kein jijet in ekajet ijo etan Pevment, a naan in Hibru Gabbeta. 14 Im iien in iien kōppojak kwōjkwōj in kijoone, im e nañin joñoul im ruo awa. Im ej ba ñan ri Ju ro, “Lo ami Kiiñ!” 15 A rej laṃōj, “Joḷọk E, joḷọk E, debwāāl E!” Pailat e ba ñan er, “In debwāāl ami Kiiñ ke?” Pris ro reḷap re uwaak, “Ejjeḷọk am kiiñ, a Sizar wōt.” 16 Innām ej ketak E ñan er bwe ren debwāāl E. 17 Im rej bōk Jisōs, im Ej bōk debwāāl eo An im ilọk ñan ijo etan jikin ḷat in bar, āt eo juon ilo Hibru, Golgota. 18 Ijo rej debwāāl E, im bar ruo Ippān, juon i anmiiñ im juon anmooṇ, im Jisōs eoḷap. 19 Im Pailat ear je juon kakōḷḷan im likūt e ioon debwāāl. Im ear je, “JISŌS RI NAZERET KIÑ AN RI JU RO.” 20 Innām elōñ iaan ri Ju ro rej kōnono kakōḷḷe in, bwe ijo raar debwāāl Jisōs epaak jikin kweilọk, im ar jeje ilo Hibru, im Rom, im Grik. 21 Innām pris ro reḷap an ri Ju ro re ba ñan Pailat, “Kwōn jab jeje, ‘Kiiñ an ri Ju ro,’ a ‘bwe Ear ba, “Ña, kiiñ an ri Ju ro”.’” 22 Pailat e uwaak, “Men eo iar jeje, eṃōj aō jeje.” 23 Innām ro ri tariṇae, ke eṃōj aer debwāāl Jisōs, rej bōk nuknuk ko An im ajej emān ṃōttan, im kajju ḷọk ñan ri tariṇae otemjej juon ṃōttan; im barāinwōt kopā. A kopā eo ejjeḷọk katin, eje jān lañ ñan laḷ. 24 Innām re ba ñan doon, “Jen jab kekōle, a kakōḷḷe bwe jen jeḷā an wōn; bwe en kaṃool jeje eo e ba, Raar kajjuḷọk Aō nuknuk ippāer, im kōn nuknuk ko Aō raar kōjerbal kein pepe.” Innām ri tariṇae raar kōṃṃan men kein. 25 A jinen, im jein im jaten jinen kōrā Meri lio pāleen Kliopas, im Meri Magdalini, rej jutak iturin debwāāl eo an Jisōs. 26 Innām ke Jisōs ej lo jinen im rū kaḷoran eo Ej yokwe e jutak iturin, E ba ñan jinen, “Kōrā, lo, nejiṃ!” 27 Im E ba ñan rū kaḷoran eo, “Lo, jinōṃ!” In jān awa eo rū kaḷoran eo ej bōk lio ñan jikin. 28 Ālikin men in, Jisōs e jeḷā bwe ar kaṃōjḷọk men otemjej kiiō, bwe en kaṃool jeje, E ba, “Ij maro.” 29 Im e pād ijo juon jāpe elōñ kōn vinegar, im rej katutu matmat ilo vinegar eo im likūt e iṃaan hissop im likūt e ṇa i lọñiin. 30 Innām ke eṃōj an Jisōs bōk vinegar eo, E ba, “Eṃōj!” Im Ej jirḷọk im kōtḷọk An. 31 Innām ri Ju ro, bwe iien kōppojak, bwe ubeir ren jab pād ioon debwāāl ko ilo Jabōt (bwe Jabōt eo raan eḷap), rej kajjitōk ippān Pailat bwe ren ruje neir, im bwe ren bōkḷọk er. 32 Innām ri tariṇae rej itok im ruje neen eo ṃokta, im eo bar juon ar debwāāl e ippān. 33 A ke rej itok ñan Jisōs im lo bwe eṃōj An mej, re jab ruje neen. 34 A juon iaan ro ri tariṇae, ej wākari katin kōn ṃade, im e ṃōkaj an bōtōktōk im dān tọọr ḷọk. 35 Im eo ej loe, ej kōnnaan, im kōnnaan eo an e ṃool; im e jeḷā bwe ej ba ṃool, bwe koṃwin barāinwōt tōmak. 36 Bwe ar kōṃanṃan men kein, bwe en jejjet Jeje eo, Juon diin e jāmin moruj. 37 Im bar juon Jeje ej ba, Re naaj kallimjek Eo raar wākare. 38 Im ālikin men kein, Josep ri Arimatia, e rū kaḷoran Jisōs, a ilo ettino bwe e mijak ri Ju ro, ej kajjitōk ippān Pailat bwe en bōkḷọk ubōn Jisōs, im Pailat e ba, “Aet.” Innām ej itok im bōkḷọk ubōn eo. 39 Im barāinwōt Nikodimōs ej itok, eo ear itok ṃokta ñan Jisōs ilo boñ, im ej bōktok juon iiōk in mōr im aloes, e nañin jibukwi bọun. 40 Innām rej bōk ubōn Jisōs, im kūtimi ilo nuknuk linen ko ippān toḷaj ko, āinwōt ṃanit an ri Ju ro kallib. 41 Im ijo raar debwāāl E, juon jikin kallib, im ilo jikin kallib eo juon lōb ekāāl, re jañin likūt armej ilowaan. 42 Innām rej likūt Jisōs ilowaan, bwe raan in kōppojak an ri Ju ro (bwe epaak lōb eo).

20

1 Ilo raan eo ṃokta ilo wiik, ke e jimmarok, Meri Magdalini ej itok ñan lōb eo, im ej lo ejṃaan e peḷḷọk jān lōb. 2 Innām ej ettōr im itok ñan Saimōn Piter im ñan rū kaḷoran eo juon, eo Jisōs ej yokwe, im ba ñan erro, “Raar bōkḷọk Irooj jān lōb eo im kōm jaje ijo raar likūt E ie.” 3 Innām Piter ej ilọk, im rū kaḷoran eo juon, im rejro ilọk ñan lōb eo. 4 Im rejro jiṃor ettōr; im rū kaḷoor eo juon ej ettōr jān Piter, im ṃōkaj ḷọk ṃokta ñan lōb eo. 5 Im ej jirḷọk, im lo ilowaan nuknuk linen ko rej pād, a e jab deḷọñ ilowaan. 6 Innām Piter ej itok im ḷoor e, im ej deḷọñ ilowaan lōb eo, im lo nuknuk linen ko rej pād, 7 Im napkin eo ej kūtimi bōran, e jab pād ippān nuknuk linen ko, a limi im kamakeḷọk iaan ilo juon jikin. 8 Innām barāinwōt rū kaḷoor eo juon, eo ej itok ṃokta ñan lōb eo, ej deḷọñ, im lo im tōmak. 9 Bwe ñan iien in re jaje Jeje eo, bwe Ej aikuj in jerkakpeje jān ro re mej. 10 Innām rū kaḷoor rejro bar ilọk ñan ṃweo iṃweir. 11 A Meri ej jutak i nabōj iturin lōb eo im jañ, im ke ej jañ ej jirḷọk ilo lōb eo, 12 Im ej lo ruo enjeḷ, rej kōṇak nuknuk mouj, rej jijet, juon i bōran, im eo juon i neen, ijo ubōn Jisōs e kar pād ie. 13 Im re ba ñan e, “Kōrā, etke kwōj jañ?” E ba ñan er, “Bwe raar bōkḷọk aō Irooj, im I jaje ijo raar likūt E ie.” 14 Im ke eṃōj an kōnono āinwōt, ej oktaklik im lo Jisōs e jutak, im e jaje e Jisōs. 15 Jisōs e ba ñan e, “Kōrā, etke kwōj jañ? Wōn eo kwōj pukot e?” Ej ḷōmṇak E ri kallib, im e ba ñan E, “Ḷeiō, eḷaññe Kwaar bōkḷọk E jān ijin, Kwōn kwaḷọk ñan eō ijo Kwaar likūt E ie, im I naaj bōkḷọk.” 16 Jisōs e ba ñan e, “Meri.” Ej oktaklik im ba ñan E, “Rabbonai!” ukōtōn naan, Ri Kaki. 17 Jisōs e ba ñan e, “Kwōn jab uññūr Eō, bwe I jañin wanlōñḷọk ñan Jema; a kwōn ilọk ñan ro jeiō im jatū im ba ñan er, ‘Ij wanlōñḷọk ñan Jema, im Jemami, im ñan Aō Anij, im ami Anij.’” 18 Meri Magdalini ej itok im ba ñan ro rū kaḷoor, “Iar lo Irooj,” im ekōjkan Ear kōnono men kein ñan e. 19 Innām raan eo ke e jota, raan eo ṃokta ilo wiik, ñe e kilōk kōjām ko ijo rū kaḷoor rej pād ie, bwe re mijak ri Ju ro, Jisōs ej itok im jutak eoḷap er im ba ñan er, “Aenōṃṃan ñan koṃ.” 20 Im ke eṃōj An ba āindein, Ej kwaḷọk pein im katin ñan er. Innām rū kaḷoor rej lañlōñ ke rej lo Irooj. 21 Innām Jisōs e bar ba ñan er, “Aenōṃṃan ñan koṃ. Āinwōt Jema ear jilkintok Eō, āindein Ij jilkinḷọk koṃ.” 22 Im ke eṃōj An ba men in, Ej uuki ioer im ba ñan er, “Koṃwin bōk Jetōb Kwōjarjar. 23 Jerọwiwi ko an jabdewōt eo koṃij juḷọki, re jako; im jerọwiwi ko an jabdewōt eo koṃij dāpiji, re jāmin jako.” 24 A Tomas, juon iaan joñoul im ruo, āt eo juon Didimōs, e ar jab ippāer ke Jisōs ej itok. 25 Innām rū kaḷoor ro jet, re ba ñan e, “Kōm ar lo Irooj.” A ej ba ñan er, “Eḷaññe I jab lo ilo pein kōnjan dila ko, im likūt addiō ilo kōnjan dila, im karuñḷọk peiū ilo katin, I jāmin tōmak.” 26 Im ilọkōn ruwalitōk raan rej pād ilowaan eṃ, Tomas ippāer; kōjām ko re kilōk, Jisōs ej itok, im E jutak eoḷōpeir im ba, “Aenōṃṃan ñan koṃ.” 27 Im E ba ñan Tomas, “Kwōn letok addiṃ, im lale peiū; im letok peiṃ, im karuñḷọk e ilo katō, im kwōn jab pere a tōmak.” 28 Im Tomas e uwaak im ba ñan E, “Kwe aō Irooj im aō Anij.” 29 Jisōs e ba ñan e, “Tomas, bwe kwaar lo Eō, kwaar tōmak? E ṃōṇōṇō ro raar jab lo, im rej tōmak.” 30 Im bar elōñ kakōḷḷe Jisōs ej kōṃṃani iṃaan mejān ro rū kaḷoran, ar jab je er ilo bok in. 31 A eṃōj je men kein bwe koṃwin tōmak bwe Jisōs e ri Kraist, Nejin Anij, im bwe kōn ami lōke, koṃwin bōk mour ilo etan.

21

1 Ālikin men kein Jisōs ej bar weaaktok ñan ro rū kaḷoran iturin loṃaḷo in Taibiriōs, im e wāween de in An weaaktok. 2 Saimōn Piter, im Tomas āt eo juon Didimōs, im Natanael jān Kena in Galili, im ro nejin Zebedi, im bar ruo rū kaḷoran rej jiṃor ijo. 3 Saimōn Piter ej ba ñan er, “Ij ilen eọñōd.” Re ba ñan e, “Barāinwōt kōmij uwe ippaṃ.” Rej ilọk, im uwe ioon wa; im ilo boñ eo ejjeḷọk kuṇaer. 4 A ke jimmarok, Jisōs e jutak ioon parijet; a rū kaḷoor re jaje E Jisōs. 5 Innām Jisōs e ba ñan er, “Ajri raṇ, ewor ke kijemi?” Re uwaak E, “Ejjeḷọk.” 6 Im E ba ñan er, “Koṃwin door ok i anmooṇōn, im koṃ naaj lo.” Kōn men in rej door ḷọk, im kiiō re ban tōbwe, bwe elōñ ek. 7 Innām rū kaḷoor eo Jisōs ej yokwe ej ba ñan Piter, “E Irooj!” Innām ke Saimōn Piter ej roñ, “E Irooj,” ej kōṇake kopā eo an, bwe e keelwaan, im ej kālọk i lọjet. 8 A rū kaḷoor ro jet rej itok ilo wa e dik, (bwe re jab ettoḷọk jān āne, a āinwōt 300 ne), im ipertok ok eo im ek ko. 9 Innām ke rej tōkeak i āne, rej lo kijeek mālle ijo, im ek ioon, im pilawā. 10 Jisōs e ba ñan er, “Koṃwin bōktok jet iaan ek ko koṃ ar tōbwe kiiō.” 11 Saimōn Piter ej ilọk im ipertok ok eo ñan āne elōñ kōn ek ko reḷap, 153, a meñe elōñ, ok e jab rup. 12 Jisōs e ba ñan er, “Koṃwin itok im ṃōñā.” Im ejjeḷọk juon iaan ro rū kaḷoor e peran in kajjitōk Ippān, “Wōn Kwe?” Re jeḷā E Irooj. 13 Innām Jisōs ej itok im bōk pilawā im leḷọk ñan er, im barāinwōt ek. 14 Iien in alen kein ka jilu Jisōs ej weaaktok ñan ro rū kaḷoran, ālikin iien eo Ear jerkakpeje jān ro re mej. 15 Innām ke eṃōj aer ṃōñā, Jisōs e ba ñan Saimōn Piter, “Saimōn nejin Jon, kwōj yokwe Eō eḷap jān rein ke?” E ba ñan E, “Aet, Irooj; Kwō jeḷā Ij yokwe Eok.” E ba ñan e, “Kwōn naajdik lamb ko Aō.” 16 E bar ba ñan e alen kein ka ruo, “Saimōn nejin Jon, kwōj yokwe Eō ke?” E ba ñan E, “Aet, Irooj; Kwō jeḷā Ij yokwe Eok.” E ba ñan e, “Kwōn seperd Aō sip.” 17 Ej ba ñan e alen kein ka jilu, “Saimōn nejin Jon, kwōj yokwe Eō ke?” Piter ej būroṃōj bwe E ba ñan e alen kein ka jilu, “Kwōj yokwe Eō Ke?” Im e ba ñan E, “Irooj, Kwō jeḷā men otemjej; Kwō jeḷā ij yokwe Eok.” Jisōs E ba ñan e, “Kwōn naajdik Aō sip. 18 E ṃool, E ṃool, Ij ba ñan eok, ke kwaar inono kwaar make kañūrñūr eok, im etetal ijo kwō kōṇaan etal ie, a ñe kwō naaj ḷōḷḷap, kwō naaj erḷọke peiṃ, im bar juon enaaj kañūrñūr eok, im āñinḷọk eok ijo kwō jab kōṇaan.” 19 Ej kōnono men in bwe En bakajjien wāween mej eo enaaj kaiboojoj Anij kake. Im ke eṃōj An kōnono men in, Ej ba ñan e, “Kwōn ḷoor Eō.” 20 Innām Piter ej oktaklik im lo rū kaḷoor eo Jisōs ej yokwe ej ḷoor E, eo ej atartar ioon ubōn ilo kejota eo im ba, “Irooj, wōn eo ej ketak Eok?” 21 Innām Piter ej lo e im ba ñan Jisōs, “Irooj, ekōjkan armej in?” 22 Jisōs e ba ñan e, “Eḷaññe I kōṇaan bwe en pād wōt ṃae iien Ij itok, ta men in ippaṃ? Kwōn ḷoor Eō.” 23 Innām naan in e buñbuñ ḷọk ippān jemjein jemjaten, bwe rū kaḷoor in e jāmin mej; a Jisōs e jab ba ñan e, “E jāmin mej;” a, “Eḷaññe I kōṇaan bwe en pād wōt ṃae iien Ij itok, ta men in ippaṃ?” 24 Rū kaḷoor in eo ej kōnnaan men kein, im ar jeje men kein, im je jeḷā bwe an kōnnaan e ṃool. 25 Im bar elōñ men ko Jisōs ear kōṃṃani, im eḷaññe rej jeje men ko otemjej jeḷọk, ij ḷōmṇak laḷ e jab maroñ in dāpij bok ko renaaj jeje kake.