1 Gij mona ongga Allah onotunggom mebif enesi, bera Ofa ongga efen ofoka Oga enofoguma sis fob. Oga insa koma enofoguma morototuma jera Allah fob. Noba Oga insa koma bera morototuma erek Allah. 2 Noba gij mona ongga sis dojunmeni bera Oga insa koma eneker jera Allah fob. 3 Ofa bera ongga ontunggom mar nomnaga. Noba mar nomnaga ongga enahuma bera en jeska Ofa ojgomu. 4 Ofa bera ongga eita eiteij ah ongga efeinah gu rusnok. Noba eiteij ah ongga efeinah insa koma bera erek eisa ongga orocunc rot mar ongga tenten gu rusnok nomnaga. 5 Noba mebi insa kef bera erek motkobah rot efen mar ongga oska ofoukou ojgomu. Noba Oga insa koma efen eisa ongga ejinten gij motkobah nomnaga fob, tina motkobah onocohun keingg eisa koma jinaga guru. 6 Allah obk osnok egens ongga efen ofoka Yohanes. 7 Ofa en jeskaseda efesij mar ongga tenten osok gij eisa insa koma. Ofa efesij rot mar insa koma jeskaseda rusnok rufoukou rimeg rot fogora rua tein rumororu. 8 Yohanes bera enerek eisa insa koma guru, tina ofa en jeskaseda efesij mar ongga tenten osok gij eisa insa koma gu rusnok ojgomu. 9 Jeska Ofa ongga erek eisa ongga tenten nou rusnok nomnaga bera emen gu mebif. 10 Ofa ongga efen ofoka Oga bera ongga ontunggom mebif nomnaga, noba ebeibeyaif Ofa en gu mebif fob. Tina rusnok rinejginaga rot Ofa enesi. 11 Ofa en skoita efen rusnok Yahudi, tina efen rusnok insa koma rungkoja Ofa ojgomu. 12 Tina rusnok enjgineg rufoukou ruroun Ofa noba rudou ororu Ofa rot tenten. Jefeda Ofa eita owesa efek gu rua jeskaseda rija erek Allah efen efeser. 13 Rua rineja erek Allah efen efeser oisouska risinsa rudou os rot guru. Noba rusnok enjgineg runocunc rua erek koma guru. Tina Allah esinsa bera ongga ocunc rua erek efen efeser ojgomu. 14 Ofa ongga efen ofoka Oga insa koma en gu mebif erek osnok egens noba eker morototuma jera rusnok. Ofa bera erek Allah efen efesa ongga egensmes. Noba memef mek Ofa efen owesa efek. Owesa efek koma bera Ofa esinsa esma jeska efen meka Allah. Noba Ofa otunggom mar nomnaga oisouska efen odou ongga oufamofa noba ongga ororu mar ongga tenten ojgomu. 15 Yohanes insa koma ongga Allah ombk sis fob bera anggot mar ongga tenten osok gij Ofa. Jeska ofa ois gu rusnok oida, "Ofa kef bera ongga didif dimfesij gu iwa rot sis fob. Ofa bera ongga didif danggot rot oida, Ofa ongga ongkahma otoij didif bera efen ofoka ongga ekirsa jeska didif. Jeska gij mona ongga didif dunjuj jeska ameina, beda Ofa enofoguma sis fob." 16 Noba oisouska odou ongga eskeiramera eteb rot mimif bera Ofa eita oufamofa eteb gu mimif odudu dokun deika ojgomuja. 17 Jeska Allah eita efen hukum gu rusnok oisouska Musa. Tina oisouska Yesus Kristus bera mimif misma efen oga ongga tenten jera oufamofa eteb erek insa koma ojgomu. 18 Rusnok egema tein rinek Allah enesi. Tina efen efesa egensmes ongga erek Allah, Ofa bera engker desi Allah. Noba oisouska efen oga bera Ofa oncunc gu mimif rot Allah erek jeni. 19 Sis fob ebirfager Yahudi gij kota Yerusalem rubk rerin imam-imam jera rineya jeska rusnok ebic Lewi skoita Yohanes jeskaseda rijeka gu ofa oida, "Bua bera idu?" Kef bera osok gij mar ongga ofa oroun gu rua insa koma. 20 Ofa enedemdemi mar gij odou efesi jeska rua guru, tina ofa agot mar rot tomnomna gu rua ojgomu. Ofa agot gu rua oida, "Didif bera Kristus egens koma ongga emen guru." 21 Jefeda rua rijeka gu ofa deika oida, "Jefeda bua bera idu? Bua bera nabi Elia ongga ongksons en fob ei?" Tina ofa oroun gu rua oida, "Didif bera nabi Elia tein guru." 22 Beda rua rijeka gu ofa deika oida, "Jefeda bua bera idu? Bagot gu memef rot tenten jeskaseda memef moksons noba magot rot gu rua ongga rumbk memef skoita bua tein. Bagot gu memef osok gij mar ongga bua butunggom jah sif." 23 Beda Yohanes era mar ongga nabi Yesaya anggot gij Mar Efeyi Ebsi osok gij ofa sis fob fogora ofa oroun gu rua oida, "Didif bera osnok egens koma ongga agerir mar gij monuh ongga mebi oska rot oida iwa itunggom moroju ongga edeider nou Tuhan ongga emen!" 24 Erek koma beda ebirfager Yahudi rubk rineya jeska ebic Farisi skoita Yohanes. 25 Rua rijeka gu ofa oida, "Bua banggot rot oida bua bera Kristus ongga emen guru, era nabi Elia guru, era nabi enjgineg tein guru. Jefeda bua bita baptis gu rusnok rot meidu?" 26 Beda Yohanes oroun gu rua oida, "Didif dira mei direita baptis gu rusnok. Tina osnok egens ongga iwa inejginaga rot enesi bera eneker gu ifekesa fob. 27 Ofa bera omokahma otoij didif. Tina didif dedin dufoka ongga enadaij nou dugif gu mebi noba dusuwa Ofa efen marfeb tumu sandal jeska okoda tein jinaga guru." 28 Rusnok insa koma rinjeka joug Yohanes gij monuh Betania ongga angh jah mei Yordan enama. Ofa eita baptis gu rusnok jah suma. 29 Gij mona egema deika, beda Yohanes ek Yesus enen skoita Ofa. Beda Yohanes agot gu rusnok jah suma oida, "Iwa ik, jeska osnok egens kef bera erek Allah efen domba efer. Ofa en jeskaseda osuwa rusnok jeska rerin mar ongga oska! 30 Ofa bera ongga didif dimfesij mar rot sis fob. Gij mona insa koma bera didif danggot rot oida, osnok egens emen okahma otoij didif. Tina Ofa bera efen ofoka ongga aksa ekirsa jeska didif. Jeska gij mona ongga ameina eneker rot didif enesi, beda Ofa enofoguma fob. 31 Erek didif dita baptis gu rusnok Yahudi jeskaseda rua rinsejah nou mona ongga Kristus emen fogora osuwa rusnok jeska rerin mar ongga oska. Tina gij mona insa koma bera didif disinsa dinejginaga rot oida Ofa koma bera Kristus egens ongga emen guru." 32 Erek koma beda Yohanes agot oida, "Didif dik Efena Ebsi ojuj jeska mebaga noba ah esij Ofa erek mem monggeta mos ongga ojuj jeska mebaga. 33 Onjoros mona insa koma bera didif dinejginaga rot idu ongga emen erek Kristus egens ongga omoskotu mimif enesi. Tina Allah, ongga obk didif jeskaseda dira mei direita baptis gu rusnok, bera agot gu didif oida, 'Gij mona ongga bua bik Efena Ebsi onjuj jeska mebaga noba eker esij osnok egens, beda bua bimejginaga rot oida osnok egens koma bera ongga emeita baptis gu rusnok oisouska Efena Ebsi.' 34 Didif dingk rot mar insa koma fob. Noba didif dagot gu iwa rot tenten oida, osnok egens insa koma bera Allah efen efesa." 35 Gij mona egema deika beda Yohanes eja jah mei Yordan morototuma jera efen goforoka ongga gororu ofa. 36 Nou ongga ofa ek Yesus ecira jah suma beda ofa agot oida, "Goga gek, jeska Ofa koma bera erek Allah efen Domba Efer!" 37 Yohanes efen goforoka koma geg mar ongga ofa anggot insa koma, jefeda goga gororu Yesus ojgomu. 38 Nou ongga Yesus ekikif noba ek goga, beda Ofa agot gu goga oida, "Goga godou os meidu?" Beda goga goroun oida, "Akeina Guru, Bua biker sinefo?" 39 Beda Ofa oroun gu goga oida, "Goga gororu Didif fogora gemek rot ojgomu si." Jefeda goga insa koma gororu Yesus noba goga gek monuh ongga Ofa eker gij. Noba goga geker jera Ofa gij monuh insa koma jeska nou monjomjom fob. 40 Gegema jeska goga insa koma ongga eg rot mar ongga Yohanes agot osok gij Ofa fogora ororu Ofa bera Andreas, ongga Simon Petrus efen mokora. 41 Beda Andreas eja rot ebeirens skoita efen mokosa Simon Petrus jeskaseda agot gu ofa oida, "Simon, memef mek Kristus ongga omosuwa rusnok jeska rerin mar ongga oska fob!" 42 Beda Andreas oroun Simon skoita Yesus. Beda Yesus agot gu ofa oida, "Bua bera Simon ongga Yohanes efen efesa. Tina Didif dimejeka bua bufoka Kefas." (Ofoka Kefas morototuma erek Petrus). 43 Gij mona egema deika beda Yesus ecira jah monuh Galilea. Ofa ek Filipus jah suma, beda Ofa agot gu ofa oida, "Bua buroru Didif ojgomu." 44 Filipus ojga jeska kota Betsaida. Noba Andreas jera Petrus geker jah suma tein. 45 Filipus ejek Natanael jah suma, beda agot gu ofa oida, "Memef mek osnok egens koma ongga Musa onggu mar rot gij buku hukum sis eteb fob. Ofa bera ongga nabi-nabi runggu mar rot sis fob tein. Ofa efen ofoka Yesus ongga Yusuf efen efesa. Noba Ofa ojga jeska kota Nazaret." 46 Tina Natanael agot gu Filipus oida, "Didif dinek mar egema tein orogna jeska kota Nazaret ongga erek oufa enesi!" Erek koma tina Filipus agot oida, "Bua bija noba bik Ofa ojgomu." 47 Nou ongga Yesus ek Natanael encira skoita Ofa, beda Ofa agot rot Natanael oida, "Osnok egens kef bera erek rusnok ongga Israel rot tenten. Ofa odou ororu mar ongga tenten ojgomu." 48 Beda Natanael ejeka gu Ofa oida, "Bua bijginaga rot didif jeska guaidu?" Beda Yesus oroun oida, "Erek Filipus enagot mar gu Didif rot bua enesi, tina Didif dik bua bingker gu mega ara efeyi owohoh." 49 Beda Natanael agot gu Yesus oida, "Akeina Guru, Bua bera Allah efen efesa rot tenten! Bua bera Raja egens koma ongga emen jeskaseda ofoka ereij keingg rusnok Israel." 50 Beda Yesus agot gu ofa oida, "Bua budou ororu didif ebeibeyaif jeska bua big Didif dagot oida Didif dingk bua biker gu mega ara efeyi owohoh. Tina gij mona kahma bera bua bimek mar ongga onswos eteb ekirsa jeska mar insa koma si." 51 Beda Yesus agot gu rua nomnaga oida," Didif dagot rot tenten oida iwa nomnaga imek mebaga ohoda jera Allah efen malaikat-malaikat ongga rusok noba rujuj jeska mebaga skoita Didif, Rusnok Efesa si."
1 Erek koma beda gij mona jueka deika rusnok gij kota Kana ongga angh gij monuh Galilea ruina maat ofoukou keingg rua ongga rumoskotuma. Noba Yesus efen mosu eneker jah rifekesa tein. 2 Noba rua ruis gu Yesus jeskaseda Ofa jera efen ruforoker tein rin noba rit maat insa koma morototuma. 3 Askesi rusnok rufoukou jah suma rit maat ros, beda rerin anggur efei oisa fob. Jefeda Yesus efen mosu agot gu Ofa oida, "Rerin anggur efei ongga rimej nomnaga oisa fob." 4 Tina Yesus oroun oida, "Ameina, enadaij nou Didif dita mar ebeibeyaif guru. Jeska mona ongga Didif dumocunc rot dedin owesa efek bera enen enesi." 5 Beda Yesus efen mosu agot gu rusnok ongga rumfij oida, "Iwa itunggom mar nomnaga ongga Ofa anggot rot gu iwa ojgomu." 6 Yesus ek debeji cinja erfens jah suma. Rusnok Yahudi rira mei jeska debeji insa koma jeskaseda rurot risinsa jeni erebent agama agot rot. Noba debeji egens egens insa koma ok mei liter erek wuntin egens. 7 Beda Yesus agot gu rua ongga rumfij oida, "Iwa yageya mei gij debeji koma nomnaga." Jefeda rua rageya mei gij debeji insa koma nomnaga onjoros ebera rot fob. 8 Beda Ofa agot gu rua oida, "Iwa yutkinaja mei insa koma oskiyai gij mok osku beda ita gu rua ongga rumfij rerin ebirfaga jah sif." Jefeda rua rurka mei insa koma skoita ebirfaga mod koma. 9 Nou ongga ofa ej mei insa koma beda mei koma eja erek anggur efei fob. Ofa enejginaga rot anggur efei insa koma bera en jeska sinefa guru. Tina rusnok ongga rumfij insa koma bera rijginaga rot fob. Beda ebirfaga egens insa koma ois gu orna egens ongga oskotu arja jah suma. 10 Beda ofa agot gu orna egens koma oida, "Erek giskini bera rusnok rita anggur efei ongga ongkoska gu rerin ruhujir rot sismeni fog. Nou ongga rua rinj anggur efei ongga oufamofa ofoukou fob, beda rua rita anggur efei ongga onotka eteb guru gu rua ojgomu. Tina anggur efei ongga dij ainsa kef bera ongga erek ongkoska eteb ekirsa jeska anggur efei ongga mimif minj gij rahah insa koma tein." 11 Jefeda mar ongga Yesus ontunggom insa koma bera erek mar onswos ongga Ofa orocunc rot sismeni gij kota Kana ongga angh gij monuh Galilea. Ofa ocunc rot efen ofoka ongga aksa eteb, noba efen ruforoker rudou ororu rot tenten oida Ofa bera Allah efen efesa. 12 Nou ongga koma oisa fob, beda Yesus eja jah kota Kapernaum morototuma jera efen mosu ni, efen mokoser ni, jera rusnok enjgineg tein ongga rudou os ruroru Ofa tein. Rua ringker gij kota insa koma nou mona ongga estir ojgomu. 13 Gij mona eteb egens ongga ofoka Paskah en doida fob, beda Yesus eja jah kota Yerusalem. 14 Ofa oira gij momas ongga angh rejrej Mod Allah jah suma. Tina Ofa ek rusnok ebireira ongga ruhu mar erek sapi ni, domba ni, jera mem monggeta tein jah suma. Noba Ofa ek rusnok eneya ongga riferwei rusnok rerin fifi ongga erek toga toga tein. 15 Jefeda Ofa era marfeb erek mar ongga erangha rua rot fogora Ofa ekemeji rusnok insa koma jeska momas koma fob. Noba Ofa tein ekemeji rerin sapi-sapi jera domba-domba tein jeska momas koma ongga angh rejrej Mod Allah. Beda Ofa otkinaja meja ongga rusnok insa koma ringker gij jeskaseda riferwei rusnok rerin fifi fogora rerin fifi esiri suma suma. 16 Beda Ofa agot gu rua ongga ruhu mem monggeta oida, "Iwa yurka yeyin mem kef jeska ojgomu! Enadaij nou iwa ira Mod ongga Akeina efen kef erek mod ongga rusnok ruhu mareibra noba ringk mar gij erek koma guru!" 17 Nou ongga Yesus efen ruforoker ringk mar insa koma nomnaga, beda rudou ah keingg sons rot mar ongga nabi runggu gij Mar Efeyi Ebsi sis fob. Rua runggu rot oida, "Didif Dudou okora eteb rot bebin mod. Koma bera omotunggom didif fogora dagos rot si." 18 Erek koma beda rusnok Yahudi jah suma ragot gu Yesus oida, "Idu ongga eita owesa efek gu Bua fogora bunotunggom mar insa koma gij momas kefi! Jefeda Bua butunggom mar onswos nou mimif tein jeskaseda bucunc rot bebin owesa efek erek koma ojgomu." 19 Beda Yesus agot gu rua oida, "Iwa yuhoda Mod Allah ongga aksa eteb kef, beda Didif dimei mod kef sons gij mona rara orgomu si." 20 Tina rua ongga Yahudi ragot oida, "Wah! Rusnok rimfarur gij ari mega ofoj setka tohkuru noba cinja erfens jeskaseda rii Mod aksa kefi. Teinefa fogora Bua bimei Mod kef sons gij mona orgomu erek komo. Koma enadaij jinaga guru!" 21 (Tina ainsa koma tein Yesus efesij rot esinsa efen efaga ongga Ofa enjeka erek mod koma. 22 Noba gij mona ongga Yesus endebecki jeska agos fob, beda efen ruforoker rudou ah keingg rot mar insa koma ongga Ofa anggot gu rusnok Yahudi sis fob. Beda rudou ororu ojgomu rot mar ongga rusnok runggu gij Mar Efeyi Ebsi osok gij mar insa koma tein. Noba rua rijginaga rot oida mar ongga Yesus anggot gij mona insa koma osok gij esinsa efen efaga ongga erek Mod Allah bera erek tenten fob.) 23 Yesus oira gij kota Yerusalem jeskaseda ruina maat keingg morototuma jera rusnok Yahudi enjgineg rot rerin mona eteb egens ongga ofoka Paskah. Noba gij mona insa koma bera rusnok rufoukou rudou eredi rot Ofa, jeska rua ringk mar onswos ofoukou ongga Ofa orocunc rot fob. 24 Tina Yesus odou eneredi rot rua guru, jeska Ofa ejginaga rot mar ongga angh gij rusnok rudou efesi fob. 25 Enadaij nou rusnok egema tein ruftuftu Ofa rot rusnok rerin rita mar guru, jeska Ofa ejginaga rot mar meidu ongga angh gij rusnok rudou efesi fob.
1 Osnok egens ongga ofoka Nikodemus eneker jah suma. Ofa bera jeska ebic Yahudi ongga ofoka Farisi. Ofa efen ofoka ongga aksa eteb tein. 2 Gij motu egens beda ofa en skoita Yesus noba agot gu Ofa oida, "Akeina Guru, memef mejginaga rot oida Bua bera erek Guru egens ongga Allah ombk fob. Jeska rusnok egema tein runocunc rot mar ongga onswos erek Bua buncunc rot fob guru. Jefeda koma orocunc rot oida Allah bera ongga onofij Bua." 3 Beda Yesus agot gu ofa oida, "Kef bera ongga tenten oida, erek rusnok rinesma riteij ah juens deika guru, beda enadaij nou rua ruira jera rusnok ongga Allah ofoka ereij keingg jinaga guru." 4 Beda Nikodemus agot oida, "Tina erek osnok egens onokona fob, teinefa fogora ofa esma eiteij ah juens deika erek koma? Jeska enadaij nou ofa oira sons gij mosu efen otkonu guru. Jefeda ofa esma eiteij ah juens deika erek teinefa?" 5 Beda Yesus oroun gu ofa oida, "Ongga tenten bera, erek osnok egens enesma eiteij ah oisouska mei jera oisouska Efena Ebsi guru, beda enadaij nou ofa oira jera rusnok ongga Allah ofoka ereij keingg jinaga guru. 6 Erek giskini bera rusnok risma riteij ah gij mona ongga rua runjuj jeska rerin rusu fob. Tina rusnok bera risma eiteij ah ongga efeinah oisouska Efena Ebsi ojgomu. 7 Erek Didif dagot gu bua oida bua bucosu rot bisma biteij ah juens deika, beda bineita budou ongga oubsaha rot koma guru. 8 Rusnok rufos eciyi rot mof ongga okurc rua, noba rua rig mof insa koma tein. Tina rua rinejginaga rot mof koma okurc jeska sinefa guru. Noba rua rinejginaga rot mof koma okurc jah gaidu guru, jeska rinek mof koma gu riteij tein guru. Erek koma tein rot rusnok ongga risma eiteij ah ongga efeinah deika jeska Efena Ebsi. Rua rinek mar koma gu riteij guru. Tina rua rijginaga rot oida rerin eiteij ah ongga efeinah fob." 9 Beda Nikodemus ejeka gu Yesus oida, "Koma bera erek teinefa?" 10 Yesus oroun gu ofa oida, "Bua bera erek rusnok Yahudi efen Guru egens ongga ofoka aksa. Teinefa fogora bua budou enebriyi gij mar insa koma guri. 11 Memef magot rot tenten osok gij mar ongga memef mejginaga rot fob. Noba memef mefesij rot mar ongga memef mek fob, tina iwa yukoja rot mar insa koma ojgomu. 12 Noba Didif dimfesij gu bua osok gij mar ongga angh gu mebif fob, tina budou onororu mar insa koma guru. Jefeda erek Didif difesij gu bua osok gij mar ongga angh gu mebaga, beda budou onororu mar koma tein jinaga guru. 13 Jeska Didif, Rusnok Efesa, bera ongga onjuj jeska mebaga ojgomu. Noba didif bera dumosok jah mebaga sons tein si. 14 Sis fob nabi Musa agei mar egens ongga ofa ontunggom jeska tembaga erek magosu esij moskur. Beda ofa aha mar koma erek aksa skoita rusnok ongga Israel. Erek koma tein, rusnok rumofra Rusnok Efesa erek aksa tein. 15 Rua rimeita mar erek koma jeskaseda rusnok nomnaga ongga ruroru Ofa rot tenten bera rimesma eiteij ah ongga ah aibin ojgomuja. 16 Allah odou okora rot rusnok mebif erek eteb doska. Jefeda Ofa obk efen efesa orna ongga egensmes jeskaseda rusnok ongga ruroru Ofa rot tenten bera rineseiseifa guru, tina rua rimesma eiteij ah ongga ah aibin si. 17 Allah onobk efen efesa insa koma jeskaseda oga ojga rot oida rusnok nomnaga rerin mar ongga oska guru. Tina Allah obk efen efesa jeskaseda oskotu rusnok oisouska Ofa esinsa ojgomu. 18 Allah onocunc rusnok ongga ruroru efen efesa fob erek oska guru. Tina Ofa oncunc rusnok ongga runororu efen efesa insa koma guru erek oska sis fob. Jeska rudou okoja rot Allah efen efesa ongga egensmes insa koma fob. 19 Allah bera oga ojga rot rusnok rerin rita mar erek kef oida, Ofa efen eisa bera oira gu mebif fob. Tina rusnok insa koma rukoja rot efen eisa. Rua rudou os riker gij motkobah ojgomu, jeska mar ongga rua rutunggom ojgomuja bera erek ofogog. 20 Rusnok ongga rutunggom mar ongga ofogog bera rudou okoja rot eisa koma. Rua runoira gij eisa guru, jeska eisa koma bera ongga orocunc rot tomnomna oida rerin rita mar erek ofogog ojgomu. 21 Tina rusnok ongga rudou os ruroru mar ongga oufa bera ruira gij eisa insa koma fob. Noba eisa insa koma orocunc rot tomnomna oida rerin rita mar ongga oufa bera runtunggom oisouska Allah ojgomu." 22 Nou ongga koma oisa fob, beda Yesus jera efen ruforoker ricira jah monuh Yudea. Beda Ofa eker jah suma jera rusnok ongga ruroru Ofa, fogora eita baptis gu rusnok jah suma. 23 - 24 Gij mona ongga rusnok rinaha Yohanes gij mod oskusk enesi, beda ofa eita baptis gu rusnok gij monuh Ainon ongga angh doida Salim. Jeska mei ofoukou enah jah suma, noba rusnok rufoukou rinja skoita ofa jeskaseda ofa eita baptis gu rua. 25 Yohanes efen ruforoker rineya ongga ruga omosokuma jera rusnok Yahudi enjgineg osok gij rerin erebent agama egens. Erebent egens insa koma agot rot teinefa rusnok Yahudi rira mei rurot risinsa rifaga jeni hukum agama ojgomu. 26 Jefeda rua rija skoita Yohanes noba ragot gu ofa oida, "Akeina Guru, budou ah keingg rot osnok egens koma ongga bua bifesij mar rot gu memef gij mona ongga mimif mingker gu mei Yordan enama sis fob ei? Ebeibeyaif Ofa bera eita baptis gu rusnok tein. Noba rusnok rufoukou rija skoita Ofa ojgomu." 27 Beda Yohanes oroun gu rua oida, "Allah ojgomu bera ongga ocunc gu rusnok rot mar ongga rua rutunggom nou Ofa. 28 Iwa isinsa yagot rot tenten oida iwa ingg didif dagot sis fob oida, didif bera dinerek Kristus ongga emen guru. Tina Allah ombk didif jeskaseda disejah rusnok rudou efesi jeskaseda ruroun Ofa. 29 Iwa isujohu rot mar erek kef oida, gij mona ongga rusnok ruina maat keingg rua ongga rumoskotuma, beda igers bera ongga en jeskaseda oskotu efen arja ojgomu. Tina ofa efen mohuj insa koma bera ongga ont desi ofa ojgomu. Noba mohujir insa koma rig mar ongga igers enagot gu rua fogora rudou efaga ouka rot ojgomu. Erek koma tein, didif dudou efaga ouka rot mar ongga didif dingg osok gij Yesus koma ongga eita baptis gu rusnok fob. 30 Ebeibeyaif Ofa bera efen ofoka ongga eja erek aksa eteb. Noba didif dedin dufoka bera oin degini jeska Ofa ojgomu." 31 Beda Yohanes agot deika oida, "Ofa ongga en jeska mebaga fob bera efen ofoka ongga aksa ekirsa jeska rusnok nomnaga. Rusnok bera ringker gu mebif, noba rua ragot mar osok gij meidu ongga mebif efen ojgomu. Tina Ofa ongga en jeska mebaga bera efen ofoka ongga aksa ekirsa. 32 Jeska Ofa efesij osok gij mar ongga Ofa esinsa engg noba engk fob. Tina rusnok rukoja rot mar insa koma ongga Ofa emfesij rot ojgomu. 33 Noba rusnok ongga ruroun mar ongga Ofa emfesij rot rurocunc rot oida Allah oga bera erek tenten ojgomu. 34 Ofa ongga Allah ombk fob bera efesij mar rot Allah oga ojgomu. Jeska Allah eita Efena Ebsi gu Ofa rot ongkas fob. 35 Mifmin Mika Allah odou okora eteb rot Ofa ongga erek efen efesa insa koma. Noba Allah eita efen owesa efek eteb gu Ofa ongga erek efen efesa jeskaseda Ofa ofoka ereij keingg mar nomnaga tein. 36 Noba rusnok ongga ruroru Ofa efen oga rot tenten ojgomu bera rimesma eiteij ah ongga ah aibin ojgomuja. Tina rusnok ongga rukoja Ofa efen oga bera rinesma eiteij ah ongga efeinah jinaga guru. Noba Allah omofra mar okum keingg gu rua rot si."
1 Rusnok ongga ebic Farisi ringg rot oida rusnok rufoukou bera rin skoita Yesus fogora Ofa eita baptis gu rua. Jefeda rusnok ongga ruroru Yesus rija erek ekirsa jeska rua ongga ruroru Yohanes. 2 Tina Yesus esinsa eneita baptis gu rusnok insa koma guru. Ofa obk efen ruforoker jeskaseda rita baptis insa koma gu rua. 3 Nou ongga Tuhan Yesus ejginaga rot oida rua ongga Farisi ringg mar insa koma osok gij Ofa fob, beda Ofa eja jeska monuh Yudea noba oksons jah monuh Galilea. 4 Tina moroju ongga Ofa encira gij jah monuh Galilea bera eris monuh Samaria deis tein. 5 Askesi Ofa encira gij monuh Samaria ros beda Ofa ensaga gu kota egens ongga ofoka Sikhar. Sikhar koma angh doida mekta egens ongga Yakub ongh gu efen efesa Yusuf sis eteb fob. 6 Noba mei ofok ongga Yakub eji mebi nou sis eteb fob bera enah jah suma tein. Yesus ofonskos jeska Ofa encira yes fob, noba mowa ot deis tein. Jefeda Ofa eker keingg ofons doida mei ofok insa koma. 7 Nou ongga ojaga egens ongga efen ojga jeska monuh Samaria insa koma en jah mei ofok jeskaseda ageya mei, beda Yesus agot gu ofa oida, "Bita mei egema gu Didif jeskaseda dij." 8 (Ainsa koma tein Yesus efen ruforoker nomnaga rija jah kota jeskaseda ringk maat jah suma.) 9 Beda ojaga egens koma agot gu Yesus oida, "Didif dudou oubsaha jeska Bua bijeka didif rot mei erek koma. Jeska Bua bera erek rua ongga Yahudi. Noba didif bera jeska rusnok ongga Samaria." (Ofa agot erek koma jeska erek giskini bera rusnok Yahudi rudou oska skoita rusnok Samaria.) 10 Beda Yesus agot gu ofa oida, "Bua binejginaga rot teinefa Allah eita mar ongga oufamofa eteb gu rusnok rot oubji fob enesi. Noba bua binejginaga rot Didif, ongga dinjeka bua rot mei tein enesi. Jeska erek bua bijginaga rot Didif fob, beda bua bera ongga bimerejgei Didif nou mei ojgomu. Beda Didif dimeita mei ongga eita eiteij ah ongga efeinah gu bua si." 11 Tina ojaga egens koma agot oida, "Tuan, erek koma beda Bua bageya mei ongga eiteij ah koma jeska sinefa? Jeska Bua bebin marfeb jera ember egema guru. Noba mei ofok kef erek eja degini doska. 12 Erek koma tein, memef mesma mei ofok insa kef jeska mefmen meimowa Yakub. Noba ofa jera efen efeser jera efen sapi ofoukou bera rinj mei jeska mei ofok kef ojgomu. Bua busujohu rot oida bebin bufoka bera erek aksa ekirsa jeska Yakub ei. Mei kef bera eskeira eteb!" 13 Beda Yesus oroun gu ofa oida, "Erek rusnok rij mei jeska mei ofok insa kef, beda magon en rua nou mona ongga estir deika ojgomu. 14 Tina mei ongga Didif dita gu rusnok bera angh gij rua erek mei eiteij ongga eya ojgomuja. Magon enen rua rot mei deika jinaga guru. Jeska mei insa koma bera ereita eiteij ah ongga efeinah ongga ah aibin ojgomuja." 15 Beda ojaga egens insa koma agot gu Yesus oida, "Tuan, bita mei insa koma egema gu didif tein jeskaseda magon enen didif deika guru. Beda didif dunoksons jah mei ofok insa kef jeskaseda dageya mei deika guru." 16 Beda Yesus agot gu ofa oida, "Bua bija burohrus bebin obhina jah sif fog." 17 Tina ojaga egens koma agot oida, "Didif dedin edahina egema guru." Beda Yesus agot gu ofa oida, "Koma erek tenten ojgomu. 18 Jeska onjoros deisef bera bua bahi igers erek ofosma cinja fob. Noba orna egens ongga bua bingker jera ebeibeyaif bera enerek bebin obhina guru." 19 Beda ojaga egens koma agot oida, "Tuan, ebeibeyaif didif dijginaga rot oida Bua bera erek nabi egens rot tenten ojgomu. 20 Memef jera mefmen meimower bera rugif gu Allah gu memaga ongga angh jah sif. Tina iwa ongga Yahudi ragot oida rusnok rugif gu Allah gij kota Yerusalem ojgomu, noba gij monuh enjgineg bera guru. Bua busujohu rot mar insa koma erek meidu?" 21 Beda Yesus oroun gu ofa oida, "Kef bera tenten oida, gij mona egens ongga emen beda enadaij nou rusnok ruga omosokuma rot monuh kenefo ongga tenten nou rua jeskaseda rugif gu meka Allah gij deika guru. 22 Iwa ongga rusnok Samaria jah sif bera idou enebriyi gij rot teinefa fogora iwa yugif gu Allah guru. Tina memef ongga Yahudi modou ebriyi gij rot teinefa fogora memef mougif gu Ofa. Jeska Ofa ongga omoskotu rusnok nomnaga jeska rerin mar ongga oska bera omorogna jeska rusnok ongga Yahudi. 23 Gij mona ongga emen, beda rusnok ongga rugif gu Allah rot tenten bera rumougif gu Ofa oisouska Efena Ebsi jera efen oga ongga tenten ojgomu. Noba ongga tenten bera, mona insa koma ensaga fob. Jeska Allah esinsa tein bera ohca rusnok ongga rudou os rugif gu Ofa erek insa koma ojgomu. 24 Allah bera erek Efena ojgomu, noba erek rusnok rudou os rugif gu Ofa, beda rua rugif gu Ofa oisouska Efena Ebsi noba oisouska efen oga ongga tenten tein ojgomu." 25 Beda ojaga egens insa koma agot oida, "Didif dijginaga rot oida Kristus, ongga omosuwa rusnok jeska rerin mar ongga oska, bera emen si. Jefeda gij mona ongga Kristus insa koma en fob, beda Ofa omoftuftu mimif osok gij mar insa koma nomnaga." 26 Beda Yesus agot gu ofa oida, "Didif, ongga dinefesij mar jera bua ebeibeyaif, bera Kristus insa koma." 27 Ainsa koma tein Yesus efen ruforoker ruksons en jeska kota fob. Rua rudou oubsaha jeska rua rik Ofa efesij mar jera ojaga egens insa koma. Tina rua rinejeka gu Ofa osok gij mar meidu ongga Ofa enefesij rot jera ojaga egens koma guru. Noba rua tein rinejeka gu Ofa rot mar meidu ongga ojaga egens koma odou os rot tein guru. 28 Jefeda ojaga egens insa koma eja jeska efen debeji nou mei ongga ofa orka jah suma, beda ofa oksons gu efen rusnok gij kota jah suma. 29 Beda ofa agot gu rua oida, "Iwa in ebeirens fog jeskaseda ik osnok osodosa egens ongga anggot mar gu didif rot mar ongga disinsa dutunggom sis fob. Ofa ejginaga rot mar insa koma fob erek teinefa? Ofa bera Kristus egens koma ongga emen ei era gurei?" 30 Jefeda rusnok rufoukou rin skoita Yesus. 31 Askesi rusnok insa koma rineja skoita Yesus, beda Ofa efen ruforoker rirejgei Ofa jeskaseda Ofa et maat egema fob. 32 Tina Yesus agot gu rua oida, "Didif dit dedin maat eneya ongga iwa inejginaga rot guru." 33 Jefeda efen ruforoker rijeka joug moguma oida, "Idu bera ongga eita maat gu Ofa fob?" 34 Beda Yesus agot oida, "Allah ombk Didif jeskaseda dutunggom mar ongga Ofa odou ejginaga rot ojgomu. Koma bera ongga ereita owesa efek gu Didif erek maat ongga eita owesa efek gu mifaga. Noba Didif duh dudou efesi rot ongkas gij mar koma jeskaseda dutunggom mar insa koma onjoros omoisa fog. 35 Gij mesta insa kef erek giskini bera iwa yagot oida, 'Mesta tohkuru deika beda maat ongga angh gij mekeni efen efek fogora mohoturu fog.' Tina iwa ik rot koisoisa ojgomu fog, jeska rusnok rufoukou bera rinsejah jeskaseda ruroru Allah oga. Rua bera erek maat ofoukou ongga angh gij mekeni rot efen efek fogora ihoturu fog. 36 Noba erek rusnok ongga ruhoturu maat efej risma rufons rot, beda erek koma tein rusnok ongga ruroun rusnok enjgineg skoita Allah jeskaseda risma eiteij ah ongga ah aibin bera rimesma rufons ongga ongkoska eteb rot si. Jefeda rua ongga rirefa marsi jera rua ongga ruhoturu maat efej bera rita rudou ongga efaga ouka morototuma rot. Beda erek koma tein, rusnok nomnaga ongga ruroun rusnok enjgineg skoita Allah bera rudou emefaga ouka morototuma rot si. 37 Giskini rusnok ragot oida, 'Rineya rirefa marsi beda rineya tein ruhoturu efen maat efej tein.' Noba mar ongga rua ragot insa koma bera tenten ojgomu. 38 Noba erek rusnok ruhoturu maat ongga rua risinsa rinerefa marsi nou guru, beda erek koma tein Didif dubk iwa jeskaseda iroun rusnok skoita Allah. Rusnok enjgineg rinsejah rua jeskaseda risma Allah oga sis fob. Tina iwa bera ongga imoroun rua skoita Allah si." 39 Nou ongga ojaga egens insa koma emfesij gu efen rusnok Samaria oida Yesus efesij gu ofa rot mar ongga ofa esinsa ontunggom sis fob, beda rusnok rufoukou rudou ororu rot oida Yesus bera Kristus koma ongga emen. 40 Jefeda nou ongga rusnok Samaria rin skoita Ofa, beda rua ruis gu Ofa jeskaseda Ofa eker morototuma jera rua ojgomu. Beda Ofa eker jera rua nou mona egeka deika. 41 Nou ongga rua ringg mar ongga Ofa omftuftu rot, beda rineya rufoukou tein ongga ruroru Ofa gij mona insa koma. 42 Rua insa koma ragot gu ojaga egens koma oida, "Sismeni bera bua bimfesij gu memef rot mar ongga Yesus anggot gu bua, jefeda memef tein mororu Ofa gij mona insa koma. Tina ebeibeyaif memef tein mengg rot mar ongga Ofa emfesij fob. Jefeda memef mejginaga rot tenten fob oida Ofa bera raja egens koma ongga omoskotu rusnok jeska rerin mar okum." 43 Nou ongga mona egeka insa koma oisa fob, beda Yesus otoiru jah monuh Galilea. 44 Sis fob Yesus agot oida, "Rusnok runoroun nabi-nabi ongga rugja jeska risinsa rerin monuh guru." 45 Erek koma tina gij mona ongga Ofa ensaga gij monuh Galilea fob, beda rusnok jah suma ruroun Ofa rot rudou ongga eskeiramera. Sis fob rineya jeska monuh insa koma ringk mar ongga Ofa otunggom gij kota Yerusalem nou mona ongga Paskah, jeska rua tein rinja jah Yerusalem nou mona eteb insa koma tein. 46 Beda Yesus eja jah kota Kana ongga angh gij monuh Galilea insa koma juens deika. Sis fob Ofa otunggom mei jeskaseda eja erek anggur efei jah suma. Ebirfaga egens ongga ofoka aksa eker gij kota Kapernaum. Noba ebirfaga egens insa koma efen efesa ongga maren eteb. 47 Ofa engg rot oida Yesus bera en jeska monuh Yudea, noba Ofa engker gij monuh Galilea insa koma. Jefeda ofa eja ebeirens skoita Yesus noba erejgejgei Ofa jeskaseda en gu kota Kapernaum beda eita eskeira gu efen efesa insa koma. Jeska efen efesa insa koma bera doida nou ongga anggos fob. 48 Beda Yesus agot gu ofa jera rusnok enjgineg jah suma oida, "Teinefa fogora iwa idou os ik Didif ducunc mar onswos ongga orotunggom rusnok rudou oubsaha rot sismeni fog fogora iwa imororu Didif erek komo." 49 Tina ebirfaga egens insa koma agot gu Yesus oida, "Tuan, bin ebeirens jeska dedin edesa doida nou ongga anggos." 50 Beda Yesus agot gu ofa oida, "Bua bija, jeska bebin ebesa emeita eskeira si. Ofa enagos guru." Ebirfaga egens koma odou ororu mar ongga Yesus anggot insa koma rot tenten fob. Jefeda ofa oksons gu efen mod. 51 Askesi ofa encira gu moroju ros, beda efen osnok egens ongga omfij ofa en skoita ebirfaga egens koma. Beda ofa agot gu ebirfaga egens koma oida, "Bebin ebesa eskeira sons fob." 52 Beda ebirfaga egens koma ejeka gu ofa oida, "Dedin edesa eita eskeira erek aras egaho fob?" Beda osnok egens ongga omfij koma agot gu ofa oida, "Neeka erek aras egens, beda efen ofos ofoufem ojuj fob." 53 Meka egens insa koma ejginaga oida neeka, erek aras egens, bera Yesus agot gu ofa rot oida, "Bebin ebesa emeita eskeira si. Ofa enagos guru." Jefeda ofa jera rusnok nomnaga ongga ringker gij efen mod tein ruroru Yesus gij mona insa koma. 54 Mar onswos ongga Yesus oncunc rot insa koma bera erek ofosma jueka ongga Ofa ontunggom gij mona ongga Ofa en jeska Yudea jah Galilea deika.
1 Gij mona egema deika beda Yesus eja jah kota Yerusalem jeskaseda ororu Yahudi efen mona eteb egens ongga ruina maat eteb keingg gij. 2 Mei ofokai egens, ongga rijeka oida Mei Betesda gij Yahudi rerin ruga, bera angh jah suma. Noba modwok cinja angh rejrej mei insa koma tein. Noba mei insa koma angh doida kota koma efen montoj egens ongga rusnok rijeka ofoka oida, Montoj Domba-domba. 3 Rusnok ongga marenir erek riteij ofou jera rua ongga raki emageima bera ringker gij modwok insa koma doida mei. 4 (Jeska erek malaikat egens jeska Tuhan en noba ahaisomu gij mei insa koma fogora ecira, beda osnok egens ongga oira gij mei insa koma rot sismeni bera eita eskeira.) 5 Erek koma, noba orna egens ongga efen aki emageima gij ari mega ofoj setka orgomu noba cinja orfomu enahca doida mei insa koma fob. 6 Nou ongga Yesus ek gu ofa, beda Yesus ejginaga gij odou efesi oida orna egens insa koma bera efen aki emageima gij ari mega ofoj ofoukou fob. Beda Yesus agot gu ofa oida, "Bua budou os bita eskeira tein ei." 7 Beda ofa oroun gu Yesus oida, "Tuan, gij mona ongga Malaikat ahaisomu gij mei fogora mei ecira, beda rusnok egema tein runoufij didif jeskaseda duira gij mei insa koma guru. Noba askesi didif dija deci deci skoita mei insa koma, beda rusnok enjgineg riker gij mei rot sismeni fog. Jefeda dineita eskeira jeska mei insa koma guri." 8 Beda Yesus agot gu ofa oida, "Bua but ojgomu. Noba bita bebin meidibi beda bija." 9 Ainsa koma tein osnok egens insa koma eita eskeira fob. Jefeda ofa eita efen meidibi beda ecira erek giskini. Mona ongga Yesus eita eskeira gu osnok egens insa koma bera gij mona ongga Sabat. 10 Nou ongga rusnok Yahudi rik osnok egens insa koma ongga eita eskeira fob noba orka efen meidibi, beda rua ruga etaha joug ofa oida, "Deisef bera mona ongga Sabat. Noba mifmin agama erebent agot oida rusnok runorka mar gij mona ongga Sabat insa kef guru!" 11 Tina ofa agot gu rua oida, "Osnok egens ongga eita eskeira gu didif bera anggot gu didif oida, 'Bua bita meidibi beda bija.' " 12 Beda rua rijeka gu ofa oida, "Idu bera anggot gu bua oida bita bebin meidibi beda bija erek koma?" 13 Tina osnok egens koma enejginaga rot oida idu ongga anggot mar erek insa koma gu ofa guru. Jeska rusnok rufoukou jah suma noba Yesus enja jeska fob. 14 Erek dansusk beda Yesus ek osnok egens insa koma gij Mod Allah ejmeg. Beda Ofa agot gu osnok egens insa koma oida, "Bua bita eskeira fob. Jefeda bunororu mar ongga oska deika guru jeskaseda mar ongga okum ekirsa enesiri keingg bua rot deika guru." 15 Erek koma beda osnok egens koma eja skoita ebirfager Yahudi insa koma noba agot gu rua oida, "Yesus bera ongga eita eskeira gu didif." 16 Beda rusnok ongga Yahudi insa koma rudou ofogog skoita Yesus, jeska Ofa eita eskeira gu osnok egens insa koma gu mona ongga Sabat. 17 Tina Yesus agot gu rua oida, "Dedin Akeina bera ofij rusnok ojgomuja. Jefeda Didif tein dumofij rusnok ojgomuja tein." 18 Mar ongga Yesus anggot insa koma bera orotunggom rudou efesi erek ofogog ekirsa deika skoita Ofa, noba rudou os ragob Ofa ojgomu. Jefeda rua ragot oida, "Sismeni bera Yesus otunggom mar insa koma ongga mifmin agama erebent agot oida mineita gij mona ongga Sabat jinaga guru. Noba ebeibeyaif Ofa agot oida Allah bera erek efen meka! Jefeda Ofa osujohu rot oida Ofa bera morototuma erek Allah teino!" 19 Rua insa koma rudou ofogog skoita Yesus, tina Ofa agot gu rua oida, "Enadaij nou Didif, Rusnok efesa, dita mar rot disinsa ojgomu guru. Jeska Didif, ongga Ofa efen efesa, dudou os dita mar ongga Didif dik Akeina ontunggom fob ojgomu. 20 Akeina odou okora rot Didif ongga efen efesa. Noba Ofa oncunc gu Didif rot mar nomnaga ongga Ofa esinsa odou os fob. Tina Akeina omocunc mar oisouska Didif ongga erek ekirsa jeska mar ongga dutunggom insa koma fogora idou omoubsaha eteb ekirsa rot si. 21 Akeina bera efen owesa efek jeskaseda ofra rusnok jeska ranggos fogora eita eiteij ah ongga efeinah gu rua. Erek koma tein Didif, ongga Allah efen efesa, bera efen owesa efek jeskaseda eita eiteij ah ongga efeinah gu rusnok ongga dudou os rot ojgomu. 22 Ongga tenten bera, Akeina enagot rot rusnok rerin rita mar ongga erek oufa era erek oska guru. Tina Ofa eita owesa efek gu Didif, ongga Ofa efen efesa, jeskaseda duga ojga rot mar insa koma ojgomu. 23 Ofa eita mar insa koma gu Didif jeskaseda rusnok nomnaga rumofra dedin dufoka erek aksa eteb morototuma erek rua rufra Allah efen ofoka erek aksa eteb tein. Noba osnok egens ongga onofra dedin dufoka erek aksa eteb guru, beda koma erek ofa onofra Allah efen ofoka erek aksa eteb tein guru. Jeska Allah bera ongga ombk Didif skoita rusnok fob. 24 Kef bera ongga tenten oida, osnok egens ongga eg mar ongga Didif duftuftu rot, noba ofa ororu Allah ongga ombk Didif fob, beda ofa emesma eiteij ah ongga ah aibin si. Didif dunocunc ofa erek oska guru. Noba ofa eneja eseiseifa rot efen mar ongga oska guru, tina ofa emesma eiteij ah ongga efeinah si. 25 Kef bera erek tenten oida, Mona eimofoj egens ongga emen bera ensaga fob. Noba gij mona insa kef rusnok ongga rinseiseifa bera rimeg Didif, ongga Allah efen efesa, dedin duga. Noba rua ongga ringg rot duga insa koma bera rineseiseifa deika guru, tina rua rimesma eiteij ah ongga ah aibin si. 26 Allah bera efen owesa efek jeskaseda eita eiteij ah ongga efeinah gu rusnok. Noba erek koma tein Ofa eita owesa efek gu Didif, ongga efen efesa, jeskaseda dita eiteij ah ongga efeinah gu rusnok. 27 Noba Ofa tein bera eita owesa efek gu Didif, ongga efen efesa, jeskaseda duga ojga rot rusnok nomnaga rerin rita mar. Jeska Didif bera erek Rusnok Efesa tein. 28 Iwa idou onoubsaha rot mar ongga ai juens dimagot erek kef guru oida, gij mona egens ongga emen beda rusnok ongga ranggos fob bera rimeg rot dedin duga si. 29 Beda rua nomnaga rimedebecki jeska ranggos si. Noba rua ongga rita mar ongga oufamofa sis fob bera rimesma eiteij ah ongga ah aibin. Noba rua ongga rita mar ongga oska sis fob bera rimesma okum eteb jeska Allah ojgomu." 30 Beda Yesus agot deika oida, "Didif dineita mar oisouska disinsa dudou ejginaga rot guru. Tina Didif duga ojga rot rusnok rerin rita mar oisouska meidu ongga Allah oncunc gu Didif fob. Jefeda mar ongga Didif danggot rot insa koma bera erek tenten ojgomu. Jeska Didif dineita mar jeskaseda disinsa dudou eskeira rot guru. Tina Didif dita mar jeskaseda direita Allah odou eskeira rot. Jeska Ofa bera ongga ombk Didif. 31 Erek Didif dagot mar rot disinsa, beda iwa inejginaga rot oida mar ongga danggot bera erek tenten ei era gurei. 32 Tina osnok egens ongga enjgineg bera emfesij mar rot Didif fob. Noba Didif dijginaga rot oida mar ongga ofa emfesij osok gij Didif bera erek tenten ojgomu. 33 Iwa bera yumbk yeyin rusnok skoita Yohanes ongga eita baptis gu rusnok jeskaseda ijeka ofa rot mar ongga ofa onotunggom. Noba ofa oroun mar ongga tenten gu iwa fob. 34 Ongga tenten bera Didif dunocosu rot rusnok enjgineg ragot mar osok gij Didif guru. Tina Didif dagot mar erek insa koma jeskaseda iwa imesma eiteij ah ongga efeinah ojgomu. 35 Yohanes oga insa koma bera erek lampu ongga eisa rot eteb nou rusnok. Noba gij mona ongga estir bera iwa idou eskeira rot mar ongga ofa omftuftu rot gu iwa. 36 Tina mar enjgineg ongga agot mar osok gij Didif bera enahuma ros. Noba mar koma bera agot mar osok gij Didif erek ekirsa jeska mar ongga Yohanes anggot osok gij Didif fob. Didif dutunggom mar ongga Akeina obk Didif rot ojgomuja onjoros omoisa fob. Noba mar insa koma bera ongga orocunc rot tenten oida Akeina bera ombk Didif skoita rusnok fob. Mar insa koma bera erek mar ongga anggot rot Didif jah rusnok rudou ojgomu. 37 Noba Akeina ongga ombk Didif, Ofa tein bera agot rot mar ongga Didif dutunggom. Iwa ineg Ofa efen oga noba inek Ofa tein guru. 38 Noba iwa inesah efen oga gij idou efesi tein guru. Jeska iwa idou onororu Didif ongga Ofa ombk skoita iwa fob guru. 39 Iwa ifokor rot iskusk gij Mar Efeyi Ebsi jeska iwa isujohu rot oida oga insa koma bera emereita eiteij ah ongga ah aibin gu iwa. Noba Mar Efeyi Ebsi insa koma bera ongga agot mar ongga tenten osok gij Didif. 40 Tina iwa idoubu joug in skoita Didif jeskaseda isma eiteij ah insa komo. 41 Didif dunohca rusnok jeskaseda rua risitit mar rot Didif guru. 42 Tina Didif dijginaga rot mar ongga angh gij idou efesi fob. Noba Didif dijginaga rot oida idou onokora rot Allah erek tenten guru. 43 Didif din jeska dedin Akeina, noba Didif difesij mar oisouska Ofa efen ofoka ojgomu. Erek koma tina iwa idou os yukoja Didif. Tina gij mona ongga osnok egens enjgineg en skoita iwa, noba ofa efesij mar rot esinsa ojgomu, beda iwa iroun ofa rot idou ongga eskeira ojgomu. 44 Iwa idou os isitit isinsa ifoka moguma, tina iwa inereni jeskaseda ita mar ongga Allah emesitit yeyin ifoka rot guri. Ofa bera Allah ongga egensmes ojgomu. Noba mar insa koma bera eragou joug iwa rot fogora idou onororu Didif guru. 45 Tina enadaij nou iwa isujohu rot oida Didif dumot jah Allah odou noba ducunc iwa erek oska guru. Jeska nabi Musa esinsa bera omocunc iwa erek oska jah Allah odou si. Noba ofa bera ongga iwa yuisum gij rot oida omoskotu iwa jeska yeyin mar ongga oska si, tina guri. 46 Erek iwa iroru mar ongga Musa omftuftu rot sis fob, beda iwa imororu Didif tein. Jeska sis eteb fob bera Musa onggu mar osok gij Didif. 47 Tina erek iwa inororu mar ongga Musa onggu rot sis fob guri, beda erek koma tein iwa inororu mar ongga Didif duftuftu rot gij mona deisef tein guru."
1 Nou ongga mar insa koma oisa fob, beda Yesus eja jah meren Galilea enama. (Meren koma efen ofoka Tiberias tein.) 2 Noba rusnok rufoukou ruroru Ofa jah suma, jeska rua ringk rot mar onswos ofoukou ongga Ofa orocunc rot gij mona ongga Ofa eita eskeira gu rerin rusnok ongga marenir fob. 3 Nou ongga Ofa ensaga jah gu meren insa koma fob, beda Ofa osok memaga ofog oduma noba eker jah suma jera efen ruforoker. 4 Mona insa koma bera erek doida mona eteb egens ongga Yahudi ruina maat keingg jeni rerin erebent agama. 5 Nou ongga Yesus ek rusnok rufoukou rinen skoita Ofa, beda Ofa agot gu Filipus oida, "Mimif mingk roti nou rusnok kef nomnaga erek sinefo?" 6 (Yesus ejginaga rot mar ongga ai juens Ofa omotunggom, tina Ofa ereni Filipus erek koma jeskaseda ek rot oida Filipus odou ororu Ofa rot tenten fob ei era gurei.) 7 Beda Filipus oroun gu Yesus oida, "Akeina, koma erek roti ofoukou doska. Erek mimif mifarur gij mesta cinja orfomu nou fifi, beda koma adaij nou mingk roti oskiyai tein nou rua orofosut egens egens insa kef ojgomu, tina guru." 8 Beda Yesus efen oforoka eneya ongga ofoka Andreas, ongga Petrus efen mokora, agot oida, 9 "Akeina, oforoka orna egens enofogif. Noba ofa efen roti ofog cinja jera mos ofokai orijka. Tina koma enadaij nou rusnok rufoukou doska jah sif." 10 Beda Yesus agot oida, "Iwa yubk rusnok nomnaga jeskaseda riker fog." Monuh insa koma bera meskeingg efen ofoukou. Noba runer ongga ringker jah suma erek rufok ribu cinja. 11 Beda Yesus eita roti ofog cinja insa koma. Beda Ofa ois oufamofa eteb skoita Allah rot roti insa koma. Beda Ofa ekeba roti insa koma gu rusnok rufoukou ongga ringker gu meskeingg efen jah suma. Ofa otunggom mar erek koma tein rot mos orijka insa koma. Ofa ekeba maat insa koma gu rua nomnaga onjoros ereya rua nomnaga fob. 12 Nou ongga rusnok insa koma rit maat oisa fob, beda Yesus agot gu efen ruforoker oida, "Iwa ihoturu roti jera mos ofod jeskaseda maat insa koma enseiseifa guru. 13 Jefeda rua ruhoturu maat ofod jah suma. Noba oisouska roti ofog cinja ongga Yesus ekeba rot sismeni bera rua ruhoturu maat ofod ongga ok morungga eteb setka kungkob erfeka." 14 Nou ongga rusnok jah suma rik mar onswos insa koma ongga Yesus oncunc fob, beda rua ragot moguma oida, "Ofa bera nabi egens ongga ranggot gij Mar Efeyi Ebsi oida emen gij mona kahma si." 15 Yesus ejginaga gij odou efesi fob oida rua rudou os rucunc Ofa erek rerin raja egens. Jefeda Ofa eja jeska monuh insa koma noba eja jah memaga ofog oduma jeskaseda eker gu esinsa. 16 Nou motu insa koma beda memef ongga Yesus efen ruforoker mecira jah meren Galilea efembra. 17 Erek motu fob noba Yesus onoksons skoita memef enesi. Jefeda memef meifef meg egens noba meja jah kota Kapernaum ongga angh gu meren enama. 18 Tina ebeibeyaif mof eteb edi memef doska, noba meren ofog omotoijma erek aksa tein. 19 Nou ongga memef mongku meg insa koma erek kilometer cinja erfens jeska meren efembra fob beda memef mek Yesus ecira esij mei odog skoita memef, jefeda memef memeesa eteb rot. 20 Tina Yesus agot gu memef oida, "Iwa inemeesa guru, jeska Didif bera Yesus." 21 Beda modou eskeira sons noba memef moroun Ofa gij meg. Noba ainsa koma tein meg ongga memef mengker gij ensaga gu kota Kapernaum fob. 22 Gij mona egema deika beda rusnok ongga ringker gij monuh ongga angh gu meren enama ruhca Yesus. Rua rijginaga rot oida memef ongga efen ruforoker bera menja fob, noba Ofa onororu memef guru. Noba rua tein rijginaga rot oida neeka fob bera meg egens ongga eja jeska rerin monuh insa koma ojgomu. Tina rua rinek Yesus guru. 23 Beda meg egema ongga en jeska kota Tiberias ensaga gu monuh insa koma ongga rusnok rit roti ongga Yesus ois oufamofa gu Allah rot neeka fob. 24 Nou ongga rua rig rot oida Yesus jera efen ruforoker rineker jah suma deika guru, beda rua rifef meg jeskaseda rija jah kota Kapernaum noba ruhca Yesus jah suma ojgomu. 25 Nou ongga rusnok insa koma rik Yesus gij kota Kapernaum ongga angh jah meren enama, beda rua ragot gu Ofa oida, "Akeina Guru, Bua bin jah sif gij mona juaho?" 26 Beda Yesus agot gu rua oida, "Kef bera tenten oida, iwa inohca Didif jeska iwa ik Didif duncunc mar ongga onswos fob guru. Iwa yuhca Didif jeska iwa int maat noba ereya iwa fob. 27 Iwa inereni jeskaseda ita maat ongga dansusk eja erek esemba ojgomu guru. Tina ireni rot ahais jeskaseda iroru dedin duga ojgomu. Jeska koma bera erek maat ongga angh rot ongkoska ojgomuja, noba ongga eita eiteij ah rot ah aibin ojgomu tein. Didif, Rusnok Efesa, bera dimeita maat erek insa koma gu iwa, jeska Akeina Allah bera oncunc rot oida Ofa odou eskeiramera eteb rot Didif fob." 28 Beda rusnok insa koma rijeka gu Yesus oida, "Memef meita mar erek meidu jeskaseda Allah odou eskeira rot memef tein?" 29 Beda Yesus oroun oida, "Allah odou os rot oida iwa ita mar erek kef: Iwa idou ororu efen efesa ongga Ofa ombk skoita iwa fob rot tenten ojgomu." 30 Jefeda rua ragot oida, "Bua butunggom mar onswos egema ongga orocunc nou memef fog, beda memef mudou omororu Bua si. Jefeda Bua bumocunc mar onswos erek meidu? 31 Musa tein orocunc rot mar onswos gij mona ongga ofa eita maat ongga ojuj jeska mebaga gu mefmen meimowa gij mona ongga rua rincira gu monuh ongga mebsta tuturu. Jeska runggu gij Mar Efeyi Ebsi oida, 'Musa eita maat gu rua jeska mebaga.' Jefeda Bua tein bucunc rot mar onswos erek meidu skoita memefo." 32 Beda Yesus agot gu rua oida, "Ongga tenten bera, Musa eneita maat jeska mebaga ongga erek tenten guru. Tina ebeibeyaif dedin Akeina bera ongga eita maat ongga tenten gu iwa jeska mebaga. 33 Jeska Allah efen maat insa koma bera erek Ofa ongga onjuj jeska mebaga noba ongga eita eiteij ah ongga efeinah gu rusnok." 34 Beda rusnok insa koma ragot oida, "Tuan, bita maat insa koma egema gu memef tein ojgomuja." 35 Beda Yesus agot oida, "Didif bera erek maat ongga eita eiteij ah ongga efeinah gu rusnok. Noba osnok egens ongga en skoita Didif bera mosona enen ofa deika guru. Noba osnok egens ongga odou ororu Didif rot tenten bera magon enen ofa tein deika guru. 36 Koma erek mar ongga Didif danggot gu iwa fob. Iwa ik Didif fob, tina idou onororu Didif rot tenten enesi. Koma erek Didif danggot ainsa koma gu iwa sis fob. 37 Rusnok nomnaga ongga Allah eita gu Didif fob bera rimen skoita Didif si. Didif dumoroun rua erek dedin rusnok si. Noba Didif dunokoja rua jinaga guru. 38 Didif dunojuj jeska mebaga jeskaseda dutunggom mar ongga disinsa dudou os rot guru. Tina Didif dunjuj jeska mebaga jeskaseda dutunggom mar ongga Allah odou os rot ojgomu. 39 Noba mar ongga Ofa odou os rot bera erek kef oida, osnok egens tein jeska rusnok nomnaga ongga Allah eita gu Didif bera eneseiseifa guru. Didif dumofra rua nomnaga jeska ranggos gij mona ongga enja ejgwaga ensaga fob si. 40 Noba kef tein bera ongga Akeina Allah odou os rot. Ofa odou os rot oida rusnok rudou ebriyi gij rot oida Didif bera erek Ofa efen efesa, noba ruroru Didif rot tenten ojgomu. Beda rua rimesma eiteij ah ongga ah aibin si. Noba gij mona ongga enja ejgwaga esaga fob, beda Didif dumofra rua jeska ranggos si." 41 Erek koma beda rusnok Yahudi ruga erahah osok gij Yesus, jeska Ofa agot oida, "Didif bera erek maat ongga onjuj jeska mebaga." 42 Rineya ragot oida, "Yesus kef bera Yusuf efen efesa. Memef mejginaga rot Ofa efen meka insa koma jera mosu tein. Teinefa fogora Ofa agot oida Ofa onjuj jeska mebaga fob erek komo!" 43 Tina Yesus agot gu rua oida, "Yuga enerahah rot mar erek koma guru. 44 Akeina bera ongga obk Didif fob. Noba Akeina bera ongga oroun rusnok skoita Didif ojgomu. Erek Allah onoroun rua guru, beda enadaij nou rua rin skoita Didif guru. Beda Didif dumofra rusnok ongga Allah oroun skoita Didif jeska ranggos gij mona ongga enja ejgwaga fob. 45 Sis fob rua ongga nabi-nabi runggu gij Mar Efeyi Ebsi oida, 'Allah omoftuftu efen rusnok.' Noba rusnok nomnaga ongga ringg rot mar ongga Akeina omftuftu gu rua fob, fogora ruroru mar insa koma tein, rua bera ongga rimen skoita Didif. 46 Rusnok egema tein rinek Allah guru. Tina Didif, ongga din jeska Allah, bera dik Ofa fob. 47 Kef bera erek tenten oida, osnok egens ongga ororu dedin duga bera emeita eiteij ah ongga ah aibin si. 48 Didif bera erek maat ongga eita eiteij ah ongga efeinah gu rusnok. 49 Sis fob, gij mona ongga yeyin imower rincira gij monuh ongga mebsta tuturu, beda rua rit maat ongga onjuj jeska mebaga ongga rijeka ofoka Manna. Erek koma tina gij mona kahma deika beda rua tein ranggos erek giskini ojgomu. 50 Tina maat ongga en jeska mebaga ebeibeyaif bera enahuma. Noba osnok egens ongga et maat insa koma bera enagos jinaga guru. 51 Didif bera erek maat ongga onjuj jeska mebaga. Noba maat insa koma bera efena ebah. Osnok egens ongga et maat insa koma bera emeita eiteij ah ongga ah aibin ojgomuja. Noba maat insa koma bera erek difaga ongga dimaha jah jeskaseda rusnok rimesma eiteij ah ongga efeinah." 52 Erek koma beda rusnok Yahudi insa koma ruga omosokuma rot oida, "Teinefa fogora osnok egens kef eita esinsa efen efaga jeskaseda memef met erek maat erek komo!" 53 Beda Yesus agot oida, "Kef bera ongga tenten oida, erek iwa inet Didif, Rusnok Efesa, dedin difaga guru, noba iwa inej dedin dugufu tein guru, beda enadaij nou iwa isma eiteij ah ongga efeinah tein jinaga guru. 54 Jeska rua ongga rit dedin difaga noba rij dedin dugufu bera rimeita eiteij ah ongga ah aibin si. Noba Didif dumofra rua jeska ranggos gij mona ongga enja ejgwaga fob. 55 Jeska dedin difaga bera erek maat ongga tenten. Noba dedin dugufu bera erek mar ongga tenten nou rusnok jeskaseda rij ojgomu. 56 Rua ongga rit dedin difaga noba rij dedin dugufu bera rimeita rudou ongga egens jera Didif fob. Noba Didif dudou erek egens jera rua tein. 57 Allah, ongga eita eiteij ah ongga efeinah gu rusnok, bera ongga ombk Didif fob. Noba Didif bera dinsma diteij ah jeska Ofa tein. Jefeda osnok egens ongga et dedin difaga bera emesma eiteij ah ongga efeinah jeska Didif tein si. 58 Didif dinerek maat insa koma ongga yeyin imower rint sis fob guru. Rua rit maat insa koma, tina gij mona kahma deika beda rua ranggos erek giskini ojgomu. Didif bera erek maat ongga onjuj jeska mebaga gij mona ebeibeyaif. Noba osnok egens ongga ent maat insa kef bera emesma eiteij ah ongga ah aibin ojgomuja si." 59 Yesus agot mar insa koma nomnaga gij mona ongga Ofa oftuftu rusnok Yahudi gij rerin mod ongga rua rum riteij gu Allah gij. Mod koma angh gij kota Kapernaum. 60 Nou ongga Yesus efen ruforoker rig rot mar insa koma nomnaga ongga Ofa omftuftu gu rusnok Yahudi fob, beda rua ragot moguma oida, "Mar ongga Ofa oftuftu insa koma bera okum eteb. Enadaij nou rusnok rudou ebriyi gij rot koisoisa jinaga guru!" 61 - 62 Yesus ejginaga gij odou efesi rot mar ongga ruga erahah rot erek insa koma, jefeda Ofa agot gu rua oida, "Erek mar ongga Didif dumftuftu insa koma orotunggom idou efesi erek oska rot, beda idou omokum gij mona ongga iwa ik Didif, Rusnok Efesa, duksons jah monuh mebaga tein. 63 Rusnok rerin owesa efek jeskaseda rita eiteij ah ongga efeinah gu rusnok enjgineg jinaga guru. Efena Ebsi Allah bera ongga eita eiteij ah ongga efeinah gu rusnok ojgomu. Mar ongga Didif dimfesij rot insa koma bera en oisouska Efena Ebsi Allah. Noba koma bera ongga eita eiteij ah ongga efeinah gu rusnok. 64 Tina rineya jeska iwa inororu dedin duga rot tenten enesi." (Gij mona ongga sismeni bera Yesus ejginaga gij odou efesi rot rusnok idu ongga runororu Ofa rot tenten guru, jera idu ongga emeja jeska Ofa tein.) 65 Ofa agot oida, "Didif dagot mar erek insa kef, jeska sis fob Didif danggot gu iwa rot oida, erek Allah onoroun rusnok skoita Didif guru, beda enadaij nou rua risinsa rin skoita Didif tein guru." 66 Nou ongga Yesus anggot mar insa koma oisa fob, beda Ofa efen ruforoker rineya ongga rufoukou rija jeska Ofa noba runororu Ofa deika guru. 67 Beda Yesus ejeka gu efen ruforoker rufok setka kungkob erfeka oida, "Iwa idou os ija jeska Didif tein ei?" 68 Beda Simon Petrus oroun gu Ofa oida, "Tuhan, erek memef meja jeska Bua, beda memef meja skoita idu deiko. Jeska mar ongga Bua buftuftu rot bera ongga ereita eiteij ongga ah aibin gu rusnok. 69 Noba ebeibeyaif memef mudou ejginaga rot oida Bua bera osnok egens ongga ebsi komowa ongga Allah omobk. Noba memef mudou ororu Bua fob." 70 Beda Yesus agot oida, "Tenten, Didif duncunc iwa ongga ifok setka kungkob erfeka jeskaseda iroru Didif. Tina Didif dijginaga rot fob oida osnok egens jeska iwa bera erek Bilis." 71 Yesus emfesij mar insa koma osok gij Yudas, ongga Simon Iskariot efen efesa. Yudas bera egens jeska Yesus efen ruforoker rufok setka kungkob erfeka, tina gij mona kahma deika bera ofa emekikif jeska Yesus.
1 Nou ongga mar insa koma oisa fob, beda Yesus ecira rejrej monuh Galilea. Ofa odobu joug ecira gu monuh Yudea, jeska rusnok Yahudi rerin ebirfager rineya jah suma ongga rudou os ragob Ofa. 2 Gij mona insa koma bera rusnok Yahudi rerin mona eteb egens ongga rijeka ofoka oida, "Mona ongga rusnok rii modwok fogora ruina maat keingg," bera ensaga fob. 3 Jefeda Yesus efen mokosa agot gu Ofa oida, "Ongga oufa bera Bua bija jeska monuhif noba bija jah kota Yerusalem nou mona eteb jeskaseda rusnok ongga ruroru Bua bimek Bua butunggom mar onswos deika. 4 Jeska osnok egens ongga odou os oida efen ofoka eiskiskma bera enedemdemi mar onswos ongga ofa ontunggom guru. Erek Bua buntunggom mar onswos rot tenten fob, beda bucunc bisinsa rot bebin owesa efek skoita rusnok rufoukou deika ojgomu." 5 (Yesus efen mokoser insa koma oh mojen gu Ofa erek koma jeska rua rudou onororu rot oida Ofa bera Kristus ongga emen enesi.) 6 Tina Yesus agot gu efen mokoser insa koma oida, "Mona eimofoj ongga adaij nou Didif jeskaseda dija jah Yerusalem bera enesaga enesi. Tina iwa ija jah suma gij mona ongga idou os rot ojgomu. 7 Rusnok mebif rudou onofogog rot iwa guru. Tina rusnok mebif rudou ofogog rot Didif, jeska Didif dagot mar rot tenten osok gij rerin mar ongga oska. 8 Jefeda iwa ija jah suma nou mona eteb insa koma. Didif dineja jah suma enesi. Jeska mona eimofoj ongga adaij nou Didif jeskaseda dija jah suma bera enesaga enesi." 9 Yesus agot mar insa koma gu efen mokoser, beda Ofa eker gij monuh Galilea ojgomu. 10 Nou ongga Yesus efen mokoser rija jah Yerusalem nou mona eteb egens insa koma fob, beda Yesus tein eja jah suma. Tina Ofa onocunc rot esinsa gu rusnok rufoukou jah suma guru. 11 Noba gij mona ongga ruina maat keingg insa koma, beda ebirfager Yahudi rineya jah suma ruhca Yesus. Rua rijeka joug rusnok oida, "Iwa bera ik Yesus fob ei?" 12 Rusnok rufoukou ongga rin nou mona eteb insa koma bera rifesij mar moguma osok gij Yesus. Rineya ragot oida, "Ofa bera erek osnok egens ongga oufamofa eteb ojgomu." Noba rineya ragot oida, "Guru, Ofa orokrusa rusnok ojgomu." 13 Tina rua rinefesij mar insa koma rot tomnomna guru, jeska rua rimeesa rot oida ebirfager Yahudi rumotkonu oska skoita rua rot. 14 Askesi mona ongga eteb insa koma enecira ros, beda Yesus oira gij momas ongga angh rejrej Mod Allah, noba Ofa oftuftu mar gu rusnok jah suma. 15 Nou ongga rusnok insa koma ringg mar ongga Ofa oftuftu rot beda rua rudou oubsaha eteb. Rua ragot moguma oida, "Ofa onofokor aksa guru, jefeda teinefa fogora Ofa odou ebriyi eteb gij Mar Efeyi Ebsi erek komo." 16 Beda Yesus agot gu rua oida, "Mar ongga Didif duftuftu gu rusnok bera enen jeska Didif guru. Tina mar insa koma bera en jeska Ofa ongga ombk Didif ojgomu fob. 17 Noba rusnok ongga rudou os rot mar ongga Allah odou ejginaga rot bera rijginaga oida mar ongga Didif duftuftu bera en jeska Allah ojgomu, noba enen jeska Didif guru. 18 Jeska rusnok ongga ruftuftu rot mar ongga en jeska risinsa rudou efesi bera ruhca rufoka ongga eiskiskma ojgomu. Tina rusnok ongga rudou os rufra rerin ebirfaga ongga obk rua efen ofoka erek aksa, rua koma bera ongga ruftuftu mar ongga tenten ojgomu. Rua rerin rudou efesi ongga erek aharukamoka ojgomu. 19 Musa eita Tuhan efen hukum gu iwa sis fob. Tina iwa inororu hukum insa koma rot tenten guru. Jefeda iwa idou os yagob Didif rot meidu?" 20 Tina rusnok jah suma ragot gu Ofa oida, "Ah, merei ok Bua fob. Idu bera odou os agob Bua?" 21 Beda Yesus agot gu rua oida, "Didif dita eskeira gu osnok egens fob noba iwa idou oubsaha eteb jeska Didif duntunggom mar koma gij mona ongga Sabat. 22 Tina iwa tein itunggom mar gij mona ongga Sabat ojgomu. Jeska Musa obk rusnok Yahudi jeskaseda riris rufom mareij ofos jeska rerin riser orna. (Tina Yahudi rerin rimower ongga rutunggom mar koma gij mona ongga Musa enagot rot enesi.) Noba iwa bera iris ifom mareij ofos jeska yeyin iser insa koma gij mona ongga Sabat tein. 23 Hukum egens jeska Musa agot rot oida rusnok rineita mar gij mona ongga Sabat guru. Tina iwa iris ruforoker rufom mareij ofos jeska gij mona ongga Sabat tein, jeska iwa isujohu rot oida mar ongga iwa intunggom insa koma bera erek ofoufem tein. Jefeda teinefa fogora iwa yutkonu oska jeska Didif dita eskeira gu osnok egens rot ongkas gij mona ongga Sabat tein erek komo. 24 Iwa inoga ojga rot rusnok oisouska mar ongga iwa isujohu rot rua guru. Tina yuga ojga rot rua oisouska mar ongga erek tenten rot rua ojgomu." 25 Nou ongga rusnok enjgineg ringg rot mar insa koma nomnaga, beda rudou eineina gij rot. Ruaragot oida, "Ofa koma bera ongga mifmin ebirfager rineya rudou os ragob ojgomu. 26 Tina Ofa oftuftu mar gu rusnok rot tomnomna ojgomu, noba rusnok enjgineg rineyahehir joug Ofa rot guru. Erek ebeibeyaif mifmin ebirfager rusujohu rot oida Ofa bera Kristus egens koma ongga emen ei? 27 Tina mimif mijginaga rot oida Ofa koma bera ojga jeska Nazaret. Noba Kristus egens ongga emen bera minejginaga rot efen ojga guru." 28 Ainsa koma tein Yesus oftuftu mar gij momas ongga angh rejrej Mod Allah ros. Ofa ois gu rusnok ongga ranggot mar insa koma oida, "Iwa isujohu rot oida iwa ijginaga rot Didif fob. Noba iwa isujohu rot oida iwa ijginaga rot dedin monuh ongga dujga jeska tein fob. Tina Didif dinen oisouska disinsa dedin owesa efek guru. Noba Ofa ongga ombk Didif fob bera eita mar ongga erek tenten ojgomu. Noba iwa inejginaga Ofa rot tenten guru. 29 Tina Didif dijginaga Ofa rot tenten fob. Jeska Didif din jeska Ofa. Noba Ofa bera ongga ombk Didif jah sif fob." 30 Nou ongga Yesus anggot mar insa koma oisa fob, beda rusnok jah suma rudou os ragei Ofa jeskaseda ragob Ofa. Tina rusnok egema tein rinagei Ofa guru, jeska efen mona ongga eimofoj bera enesaga enesi. 31 Tina rusnok rufoukou jah suma rudou ororu Ofa ojgomu. Rua ragot oida, "Ofa bera Kristus egens koma ongga emen. Jeska Ofa ontunggom mar onswos ofoukou fob." 32 Ebirfager Yahudi jeska ebic Farisi rig rot mar ongga rusnok insa koma rimfesij rot osok gij Yesus fob. Jefeda rua jera rineya ongga ebirfager imam-imam rubk rerin tentarer jeskaseda ragei Yesus. 33 Ainsa koma tein Yesus enefesij mar gu rusnok ros. Ofa agot oida, "Didif dineker jera iwa erek mona estir deika ojgomu, beda Didif dumoksons skoita Ofa ongga ombk Didif jah sif. 34 Gij mona insa koma bera iwa imohca Didif, tina inek Didif guru. Noba iwa ineja jah monuh ongga Didif dingker gij tein guru." 35 Beda rusnok Yahudi jah suma ragot moguma oida, "Ofa eja jah monuh sinefo fogora munohca Ofa erek koma guru? Erek Ofa emeja eker jera mifmin rusnok Yahudi ongga ringker gij kota kota rusnok Yunani rerin fogora oftuftu rua jah suma ei? 36 Ofa agot gu mimif oida, 'Iwa imohca Didif, tina inek Didif guru.' Noba Ofa agot tein oida, 'Iwa ineja jah monuh ongga Didif dingker gij guru.' Koma efen ofou bera erek meidu. Mimif minejginaga rot guru." 37 Gij mona ongga Yahudi rerin mona eteb egens insa koma doida omoisa fob, beda Yesus ot gij momas ongga angh rejrej Mod Allah noba agot gu rusnok rufoukou jah suma oida, "Osnok egens ongga magon enen ofa, beda ofa en skoita Didif noba ej mei ojgomu. 38 Noba gij Mar Efeyi Ebsi bera runggu oida, 'Osnok egens ongga odou ororu Didif fob, beda mei ongga erek eiteij ah bera emeya jeska efen odou efesi ojgomuja.' " 39 Mar orocunc insa koma ongga Yesus emfesij rot bera osok gij Efena Ebsi Allah. Gij mona insa koma Allah onobk Efena Ebsi skoita rusnok enesi, jeska Yesus enedebecki jeska anggos rot efen ofoka ongga aksa eteb enesi. Tina gij mona kahma deika beda rua ongga ruroru Yesus fob bera rinsma Efena Ebsi Allah fob. 40 Nou ongga rusnok jah suma ringg mar ongga Yesus emfesij insa koma fob, beda rua ruga emesedema rot. Rineya ragot oida, "Tenten, Ofa bera nabi egens koma ongga runggu gij Mar Efeyi Ebsi oida emen si." 41 Beda rineya ragot oida, "Ofa bera Kristus egens koma ongga emen." Tina rineya ragot oida, "Erek koma guru. Kristus ongga emen insa koma bera onojga jeska monuh Galilea guru. 42 Jeska Mar Efeyi Ebsi agot oida Kristus ongga emen bera omojuj jeska raja Daud efen rusnok ongga rujga jeska Betlehem ongga erek raja Daud efen kota tein ojgomu." 43 Jefeda rusnok insa koma rudou onoitij rot oida Yesus bera erek idu guru. 44 Rineya rudou os ragei Ofa, tina rusnok egema tein rinagei Ofa guru. 45 Nou ongga mar koma oisa fob, beda tentarer insa koma ongga ebirfager Yahudi rumbk jeskaseda ragei Yesus bera ruksons skoita rua. Beda ebirfager insa koma rijeka tentarer koma oida, "Teinefa fogora iwa inagei Yesus noba iroun Ofa skoita memef jah sif guro." 46 Beda tentarer insa koma ruroun oida, "Ofa oftuftu mar erek ofoufem ekirsa jeska rusnok enjgineg rumftuftu mar gu mimif sis fob." 47 Beda rua ongga ebic Farisi insa koma ragot oida, "Ah! Yesus orokrusa iwa tein ojgomu! 48 Jeska mifmin ebirfager Yahudi jera rua ongga ebic Farisi egema tein runororu Ofa guru. 49 Tina rusnok ongga runok rufoka gij guru erek iwa tein bera rudou osumsumu rot hukum Musa ojgomu. Allah omofra okum keingg iwa nomnaga si!" 50 Tina osnok egens eneya jeska ebic Farisi insa koma ongga ofoka Nikodemus. Gij mona insa koma ofa enefesij mar jera Yesus enesi. Ofa agot oida, 51 "Mifmin hukum erebent agot oida munofra mar okum keingg rusnok ebeirens guru. Tina mimif mig mar ongga rua rimfesij nou risinsa sismeni fog." 52 Tina rua ruroun gu ofa oida, "Erek bua bujga jeska monuh Galilea tein jefeda budou egens jera Ofa ei? Bua bik Mar Efeyi Ebsi ojgomu, jeska mar koma bera enagot mar egema tein rot nabi egens ongga ojga jeska monuh Galilea jinaga guru!" 53 (Beda rua nomnaga rimekebema fogora rija jah rerin mod.)
1 Nou ongga koma oisa fob, beda Yesus eja jah memaga ofos ongga ofoka Zaitun. 2 Tina gij rahah beda Ofa oksons jah Mod Allah gij kota Yerusalem. Noba rusnok rufoukou rin skoita Ofa, beda Ofa oftuftu mar deika gu rua. 3 Beda rusnok Yahudi rerin Guru-Guru hukum agama jera rineya ongga ebic Farisi rurohrus ojaga egens ongga ensiri jera ojaga egema efen mahina. Beda rua riradgodu ojaga egens insa koma jeskaseda ot jah rusnok insa koma rudou. 4 Beda rua ragot gu Yesus oida, "Akeina Guru, memef magei ojaga egens kef askesi ofa esiri jera ojaga egema efen mahina. 5 Noba hukum Musa agot rot oida mimif mira mamu miredi ofa onjoros anggos rot efen mar ongga oska insa koma ojgomu. Bua busujohu rot mar insa kef erek teinefa?" 6 Rua rijeka gu Yesus osok gij mar insa koma jeska rua runsujohu gij rudou efesi fob oida, erek Ofa onoitij rot mar insa koma guru, beda rua rumocunc Ofa erek oska. Jeska koma tein bera ekirsa rot hukum Musa. Beda rua rumocunc Ofa tein erek oska rot. Beda Yesus enagot mar rot ebeirens guru. Tina Ofa eker jah suma noba era etma otufou orogu mar gij mebi ojgomu. 7 Beda rua rijeka gu Yesus rot mar insa koma juens deika. Jefeda Yesus ek rua noba agot oida, "Rua jeska ifekesa ongga runotunggom mar ongga oska egema tein enesi bera rij mamu sismeni fogora riredi ofa ojgomu." 8 Beda Yesus era etma otufou orogu mar deika gij mebi. 9 Rua nomnaga rijginaga rot oida mar ongga oska enah gij rudou efesi tein. Jefeda nou ongga rusnok insa koma rig mar ongga Yesus anggot gu rua fob, beda rua koma egens egens rija jeska Yesus noba ruksons jah rerin mod. Sismeni runa ofos rija jeska, beda rua ongga erek ruforoker rija tein onjoros ojaga egens insa koma ot gu esinsa jah suma ojgomu. 10 Beda Yesus ek gu ofa noba agot oida, "Asoka, rusnok ongga ragei bua bera rija guaidu? Idu bera ongga ocunc bua erek oska ebeibeyaifo?" 11 Beda ofa oroun gu Yesus oida, "Tuan, rua insa koma nomnaga rinja fob, jefeda rua runocunc didif erek oska deika gurei." Beda Yesus agot oida, "Koma tenten, noba Didif tein dunocunc bua erek oska guru. Bua bija ojgomu, tina bineita mar ongga oska egema deika guru." 12 Gij mona egema deika beda Yesus efesij mar gu rusnok. Ofa agot oida, "Didif bera erek eisa nou rusnok. Noba osnok egens ongga ororu Didif, beda ofa eneker gij motkobah deika guru. Tina ofa emeker gij eisa ongga eita eiteij ah ongga efeinah si." 13 Beda rineya jeska ebic Farisi ruga erahah rot oida, "Mar ongga Bua bimfesij bera osok gij Bua bisinsa ojgomu. Koma onocunc oida mar insa koma bera erek tenten guru. Jefeda memef mokoja rot mar ongga Bua bimfesij rot ojgomu." 14 Beda Yesus oroun oida, "Tenten, mar insa koma ongga Didif dimfesij rot bera osok gij Didif disinsa ojgomu. Tina mar insa koma bera erek tenten ojgomu. Didif dijginaga rot monuh ongga Didif din jeska. Noba Didif dijginaga rot monuh ongga Didif dimeja gij tein. Tina iwa bera inejginaga rot monuh ongga Didif din jeska guru. Noba iwa inejginaga rot monuh ongga Didif dimeja gij tein guru. 15 Iwa yuga ojga rot rusnok oisouska mar ongga rusnok mebif rusujohu rot ojgomu. Didif dunoga ojga rot rusnok guru. 16 Tina erek Didif duga ojga rot mar gu rusnok, beda Didif duga ojga rot mar erek tenten ojgomu. Jeska Didif dineita mar insa koma rot disinsa ojgomu guru. Dedin Akeina ongga obk Didif jah sif bera eneker jera Didif. 17 Noba yeyin hukum agot rot oida, 'Erek rusnok egeka gagot rot mar ongga oska ongga osnok egens egema ontunggom fob, beda mar ongga goga ganggot insa koma bera erek adaij nou ojgomu.' 18 Didif dagot mar ongga tenten osok gij mar ongga disinsa dutunggom. Noba Akeina ongga ombk Didif bera agot rot oida mar ongga Didif dutunggom bera erek tenten tein." 19 Beda rua rijeka gu Yesus oida, "Bebin mekeb eker sinefa?" Beda Yesus oroun oida, "Iwa inejginaga rot Didif guru. Noba iwa inejginaga rot dedin Akeina tein guru. Jeska erek iwa ijginaga rot Didif fob, beda iwa ijginaga rot dedin Akeina tein ojgomu." 20 Yesus anggot mar insa koma nomnaga gij mona ongga Ofa oftuftu mar gu rusnok gij momas ongga angh rejrej Mod Allah. Jah suma bera rusnok raha burwa egens gij. Noba rusnok rikeba rerin fifi eneya gij burwa insa koma. Tina rusnok egema tein rinagei Ofa gij mona insa koma guru, jeska efen mona ongga eimofoj rot bera enesaga enesi. 21 Erek koma beda Yesus agot gu rusnok insa koma deika oida, "Didif dimeja jeska iwa si. Beda iwa imohca Didif, tina iwa imeja eseiseifa jeska iwa iroru mar ongga oska ojgomuja ros. Jefeda enadaij nou iwa ija jah monuh ongga Didif dimeja gij jinaga guru." 22 Jefeda rua ragot moguma oida, "Ofa agot oida, mimif mineja jah monuh ongga Ofa emeja gij guru. Koma efen ofou oida Ofa emagob esinsa ojgomu ei?" 23 Beda Yesus agot oida, "Monuh mebif kef bera ongga iwa yeyin, tina Didif din jeska mebaga ojgomu. 24 Didif danggot rot oida iwa imeja eseiseifa jeska iwa iroru mar ongga oska ojgomuja. Noba erek iwa inororu Didif oisouska mar ongga Didif duncunc rot disinsa guru, beda iwa imeja eseiseifa si." 25 Beda rua ragot oida, "Erek koma jefeda Bua bera idu?" Beda Yesus agot oida, "Gij mona ongga sismeni onjoros mona deisef tein bera Didif dimfesij gu iwa osok gij Didif fob. 26 Noba yeyin mar ofoukou enjgineg tein ongga Didif dumocunc ongga erek oska. Tina Didif difesij mar gu rusnok osok gij mar ongga Didif dig jeska Ofa ongga ombk Didif fob ojgomu. Noba Ofa bera agot mar ongga tenten ojgomu." 27 Rusnok insa koma rudou enebriyi gij oida Ofa emfesij mar osok gij efen meka Allah guru. 28 Jefeda Yesus agot gu rua oida, "Gij mona ongga iwa yufra Didif, Rusnok Efesa, beda idou emebriyi gij rot oida Didif bera Ofa ongga emen. Noba iwa imejginaga rot oida mar ongga Didif dimfesij rot bera onoisouska mar ongga disinsa dudou os rot guru. Tina Didif duftuftu mar ongga Akeina omftuftu gu Didif sismeni fob ojgomu. 29 Ofa ongga ombk Didif bera eker jera Didif ojgomuja. Jeska mar nomnaga ongga Didif duntunggom bera jeskaseda direita Ofa efen odou ongga eskeiramera rot ojgomu. Jefeda Ofa eneja jeska Didif jinaga guru." 30 Rusnok rufoukou ongga ringg mar insa koma ongga Yesus omftuftu rot bera ruroru Ofa. 31 Erek koma jefeda Yesus agot gu rusnok Yahudi insa koma ongga ruroru Ofa oida, "Erek iwa ita mar ongga Didif duftuftu ojgomuja, beda iwa imerek rusnok ongga ruroru Didif rot tenten fob. 32 Beda idou emebriyi gij mar ongga tenten ojgomu tein. Noba mar ongga tenten insa koma bera omosuwa iwa jeska yeyin mar okum ongga angh keingg iwa si." 33 Beda rua ragot gu Yesus oida, "Memef bera monjuj jeska Abraham. Memef monofij rusnok enjgineg erek rerin rusnok ongga rumfij rua jinaga guru. Jefeda Bua bagot rot oida memef momosuwa jeska mar meidu?" 34 Beda Yesus agot oida, "Rusnok ongga rutunggom mar ongga oska bera rugif gu rerin mar ongga oska insa koma ojgomuja. Enadaij nou rua rusuwa risinsa jeska mar insa koma jinaga guru. 35 Rua ongga rufij rusnok enjgineg bera runoira jera rusnok insa koma rerin ribskir ojgomuja guru. Tina orna egens ongga oira jera efen ebskir bera emeker erek koma ojgomuja. 36 Jefeda erek Allah efen efesa osuwa iwa, beda iwa isuwa rot tenten fob si. 37 Didif dijginaga rot oida iwa nomnaga bera yunjuj jeska Abraham. Tina rineya jeska iwa rudou os ragob Didif ojgomu, jeska iwa yukoja mar ongga Didif duftuftu rot. 38 Didif dimfesij rot mar ongga Akeina oncunc gu Didif fob. Tina iwa ita mar ongga yeyin imower runcunc gu iwa ojgomu fob." 39 Beda rua ragot oida, "Abraham bera erek mefmen meimowa." Beda Yesus agot oida, "Erek iwa bera Abraham efen rusnok ongga runjuj jeska ofa rot tenten, beda iwa imeita mar ongga oufamofa erek Abraham eita sis fob. 40 Didif bera osnok egens ongga difesij rot mar ongga tenten. Noba mar insa koma bera Didif dingg jeska Allah fob. Tina rineya jeska iwa rudou os ragob Didif rot ojgomu. Abraham eneita mar ongga oska erek koma sis fob guru. 41 Jefeda iwa bera iroru mar ongga oska erek yeyin iker runtunggom sis fob ojgomu tein." Tina rua ragot gu Ofa oida, "Memef minerek rusnok ongga rinejginaga rot rerin rika guru! Allah bera erek mefmen meka. Mefmen meka egema bera enofogu guru." 42 Beda Yesus agot gu rua deika oida, "Erek Allah bera yeyin Ika rot tenten fob ei, beda iwa idou okora rot Didif tein ojgomu. Jeska Didif din jeska Allah, noba dingker jera iwa fob. Didif dinen oisouska disinsa dedin owesa efek guru, tina Allah bera ongga ombk Didif fob. 43 Iwa idou enebriyi gij mar ongga Didif dimfesij rot guru, jeska iwa yukoja mar ongga Didif duftuftu rot ojgomu. 44 Ongga tenten bera iwa irek Bilis efen efeser noba ofa erek yeyin ika ojgomu. Jeska iwa idou os itunggom mar ongga Bilis odou os rot ojgomu. Sis mona ongga dojunmeni onjoros mona deisef tein, Bilis bera erek rusnok ongga ragob rusnok enjgineg. Ofa okoja mar ongga tenten ojgomuja. Jeska mar ongga tenten enah gij ofa odou efesi jinaga guru. Gij mona ongga Bilis ocuwei mar gu rusnok, beda koma orocunc rot efen eita mar ojgomu. Ofa bera erek rusnok ongga rucuwei mar ojgomuja. Noba ofa tein oftuftu rusnok enjgineg jeskaseda rucuwei mar morototuma erek ofa ojgomu tein. 45 Didif difesij rot mar ongga tenten ojgomu, tina iwa inororu dedin duga guri. 46 Iwa inek Didif dutunggom mar ongga oska egema tein guru. Jefeda erek Didif difesij rot mar ongga tenten ojgomu, beda teinefa fogora iwa inororu dedin duga insa koma guri. 47 Rusnok ongga erek Allah efeser bera ruroun mar ongga Allah anggot rot gu rua ojgomu. Tina iwa inoroun mar ongga Ofa anggot rot gu iwa guru, jeska iwa inerek Ofa efen rusnok guru." 48 Erek koma beda rusnok Yahudi insa koma ragot gu Yesus oida, "Memef mosujohu rot oida Bua bera oska erek rua ongga Samaria, noba efena ofogog bera oira gij budou efesi fob. Koma erek tenten ei?" 49 Beda Yesus oroun gu rua oida, "Efena ofogog onok Didif guru. Didif dugif gu dedin Akeina. Tina iwa inougif gu Didif guru. 50 Didif dunohca dufoka ongga aksa guru. Tina Akeina odou os rot oida Didif disma dufoka ongga aksa. Noba Ofa bera ongga oga ojga rot rusnok nomnaga rerin rita mar. 51 Kef erek tenten oida, osnok egens ongga ororu mar ongga Didif duftuftu rot bera enagos guru." 52 Beda rusnok Yahudi insa koma ragot gu Yesus oida, "Ebeibeyaif memef mejginaga rot tenten oida efena ofogog ok Bua fob! Jeska rusnok ongga rufoka aksa erek Abraham jera nabi-nabi ongga ensis tein ranggos fob. Tina Bua bagot oida rusnok ongga ruroru mar ongga Bua buftuftu rot bera rinagos guru. 53 Erek Bua busujohu rot oida bufoka aksa ekirsa jeska mefmen meimowa Abraham efen ofoka ei. Ofa tein anggos fob. Noba nabi-nabi ongga ensis ranggos fob tein. Jefeda Bua busujohu rot oida Bua birek idu?" 54 Beda Yesus oroun oida, "Erek Didif dufra disinsa dufoka erek aksa, beda koma onorocunc rot oida dufoka erek aksa rot tenten guru. Dedin Akeina bera ongga ofra dufoka erek aksa. Noba iwa yagot oida Ofa bera erek yeyin Allah. 55 Iwa inejginaga Ofa rot tenten guru. Tina Didif dijginaga Ofa rot tenten fob. Erek Didif dagot oida dinejginaga Ofa rot tenten guru, beda koma erek Didif ducuwei mar morototuma erek iwa. Tina Didif dijginaga Ofa rot tenten fob, noba Didif duroru mar ongga Ofa anggot rot tenten tein fob. 56 Sis eteb fob yeyin imowa Abraham odou erirei eteb jeska ofa ejginaga rot oida Didif dimen si. Ofa ejginaga rot mar insa koma fob, noba ofa odou eskeira eteb rot tein." 57 Beda rusnok Yahudi insa koma ragot gu Yesus oida, "Bua bera erek buforoka ros, tina Bua bagot oida Bua bik Abraham ongga anggos sis eteb fob ei?" 58 Beda Yesus agot gu rua oida, "Kef erek tenten oida, gij mona ongga Abraham onojuj jeska efen mosu enesi bera Didif dunofoguma." 59 Beda rusnok insa koma ragei mamu jeskaseda riredi Ofa, tina Ofa edemi esinsa jeska rua, beda Ofa eja jeska Mod Allah.
1 Gij mona egema deika, askesi Yesus enecira gu moroju, beda Ofa ek osnok orna egens ongga eiteij ofou. Sis fob osnok egens koma onjuj jeska efen mosu rot eiteij ofou erek koma. 2 Beda Yesus efen ruforoker rijeka gu Ofa oida, "Akeina Guru, osnok egens kef onjuj jeska efen mosu rot eiteij ofou jeska ofa efen mar ongga oska ei, era efen meka jera mosu bera ongga gegan mar ongga oska ei?" 3 Beda Yesus oroun gu rua oida, "Ofa efen mar ongga oska era meka jera mosu gegan mar ongga oska bera onotunggom ofa fogora onjuj rot eiteij ofou guru. Osnok egens kef onjuj jeska mosu rot eiteij ofou jeskaseda oisouska ofa bera Allah omocunc rot efen owesa efek ongga eteb gu rusnok. 4 - 5 Askesi mona ongga eimofoj enahuma ros, beda mimif mita mar ongga Allah ombk Didif rot ojgomu. Noba askesi Didif dingker gu mebif ros, beda Didif direk eisa nou mebif. Tina motkobah emen si. Noba askesi motkobah insa koma enah, beda rusnok rineita mar gij deika guru." 6 Nou ongga Yesus anggot mar insa koma fob, Ofa oj oskurfi gij mebi. Beda Ofa orohoh oskurfi insa koma jera mebi oskiyai fogora orotunggom mohtefa rot. Beda Ofa aha mohtefa insa koma gij osnok egens insa koma eiteij. 7 Beda Ofa agot gu osnok egens insa koma oida, "Bua bija beda but busum gij mei ongga ofoka Siloam." (Siloam efen ofou, Ombk). Jefeda osnok egens koma eja noba ot efen osum gij mei insa koma. Beda ofa eja gu efen mod rot eiteij ongga eskeira fob. 8 Rusnok ongga ringker doida ofa efen mod noba rua ongga rik ofa erejgei rusnok nou fifi bera ragot rot rudou ongga oubsaha oida, "Wah! Osnok egens kef bera ongga eker doida moroju noba erejgei rusnok nou fifi ojgomuja!" 9 Rineya ragot oida, "Tenten koma bera ofa!" Tina rusnok rineya ragot oida, "Guru, ofa efen osum erek morototuma jera ofa ongga erejgei nou fifi ojgomu." Beda ofa ongga eita eiteij eskeira fob koma agot oida, "Tenten, didif bera ofa koma!" 10 Beda rua rijeka gu ofa oida, "Biteij eskeira fogora bik mar erek teinefa?" 11 Beda ofa oroun oida, "Osnok egens ongga ofoka Yesus otunggom mohtefa beda Ofa aha mohtefa koma gij diteij. Beda Ofa obk didif gu mei Siloam jeskaseda dut dusum jah suma. Jefeda didif dija jah suma noba dut dusum. Beda ainsa koma tein diteij eskeira fogora dik mar koisoisa tein." 12 Beda rua rijeka gu ofa oida, "Osnok egens koma eker guaidu?" Beda ofa agot oida, "Didif dinejginaga rot guru." 13 - 14 Yesus eita eskeira gu osnok egens insa koma efen eiteij gij mona ongga Sabat. Beda rusnok insa koma ruroun osnok egens koma ongga eita eiteij eskeira skoita ebirfager ongga ebic Farisi. 15 Beda rua ongga ebic Farisi insa koma rijeka joug ofa oida, "Bebin biteij eskeira erek teinefa?" Beda ofa oroun gu rua oida, "Tuan, Ofa aha mohtefa gij diteij, beda didif dut dusum, noba ebeibeyaif diteij eskeira fogora dik mar fob." 16 Beda rineya jeska ebic Farisi insa koma ragot oida, "Yesus koma bera enen jeska Allah guru. Jeska Ofa otunggom mar insa koma gij mona ongga Sabat, noba koma bera erek mar ongga oska!" Tina rineya ragot oida, "Guru, Ofa jeska Allah ojgomu. Jeska osnok egens ongga otunggom mar ongga oska bera eneita owesa efek jeskaseda orocunc rot mar onswos erek insa koma jinaga guru." Jefeda rua ruga omosokuma erek koma osok gij Yesus. 17 Beda rua rijeka gu osnok egens insa koma ongga eiteij eskeira deika oida, "Bua bera ongga bita biteij ongga eskeira jeska Ofa, jefeda bua busujohu rot oida Ofa bera erek idu?" Beda osnok egens koma oroun oida, "Ofa bera erek nabi egens." 18 Rua ongga ebic Farisi insa koma rudou onororu oida osnok egens koma efen eiteij ongga ofou sis fob guru. Jefeda rua rubk rusnok enjgineg jeskaseda rujoroun ofa efen meka jera mosu skoita rua. 19 Beda rua rijeka gu ofa efen meka jera mosu insa koma oida, "Goga gagot oida gegan gesa orna egens ongga eiteij ofou. Noba goga gagot oida osnok egens kef bera ofa. Tina ofa koma bera efen eiteij ongga ek mar erek giskini. Jefeda teinefa fogora ofa ek mar erek koma fobo?" 20 Beda osnok egens koma efen meka jera mosu gagot oida, "Tuan tenten, ofa koma bera erek magef mafman masa. Noba ofa onjuj jeska efen mosu rot eiteij ofou. 21 Tina magef manajginaga rot teinefa ofa ek mar ebeibeyaif erek koma guru. Noba magef manajginaga rot idu ongga eita eskeira gu ofa guru. Iwa ijeka ofa ojgomu. Jeska ofa orna fob, jefeda adaij nou ofa agot mar rot esinsa ojgomu." 22 Goga gagot mar erek insa koma jeska goga gemeesa rot ebirfager Yahudi. Jeska ebirfager Yahudi ruga eris rot oida rusnok ongga ragot oida Yesus bera Kristus egens ongga emen, beda enadaij nou rua ruira gij Mod ongga Yahudi rum riteij gu Allah gij deika guru. 23 Rua ruga eris rot mar insa koma, jefeda goga gagot gu rua oida ofa orna fob, jefeda rijeka gu ofa rot ojgomu. 24 Jefeda rua rubk rusnok jeskaseda ruroun osnok egens insa koma ongga eita eiteij eskeira gij mer efesi jeskaseda rijeka joug ofa juens deika. Beda rua ragot gu ofa oida, "Bagot mar rot tenten jah Allah odou rot osnok egens insa koma. Jeska memef mejginaga rot oida Ofa ongga eita eskeira gu bua bera erek rua ongga rita mar ongga oska ojgomu!" 25 Beda ofa oroun gu rua oida, "Didif dinejginaga rot oida Ofa bera erek rua ongga rita mar ongga oska era ongga oufa tein guru. Tina mar egens ongga didif dijginaga fob bera oida sis fob diteij ofou, tina ebeibeyaif diteij eskeira fogora dik mar fob." 26 Beda rua rijeka gu ofa deika oida, "Ofa otunggom mar meidu gu bua? Teinefa fogora Ofa otunggom biteij eskeira erek komo?" 27 Beda ofa oroun oida, "Didif dimfesij rot mar insa koma gu iwa fob. Tina iwa idou okoja rot ojgomu. Iwa idou os ig osok gij mar insa koma deika rot meidu? Iwa idou os iroru Ofa erek efen ruforoker tein ei?" 28 Beda rua rifena oskereta ofa beda ragot oida, "Bua bera erek Ofa efen oforoka egens! Tina memef bera erek Musa efen ruforoker. 29 Memef mejginaga rot oida Allah emfesij mar gu Musa sis fob. Tina Ofa insa koma bera erek idu? Memef menejginaga rot efen ojga tein guru." 30 Beda osnok egens insa koma oroun gu rua oida, "Wah, didif dudou oubsaha rot iwa. Jeska Ofa otunggom mar ongga ongkoska eteb erek eita eskeira gu diteij, tina iwa ongga irek mefmen ebirfager inejginaga rot Ofa efen monuh tein guri. 31 Memef mejginaga rot oida Allah eneg rot mar ongga rusnok ongga rita mar ongga oska rum riteij gu Ofa rot guru. Tina Ofa eg mar jeska rusnok ongga rugif gu Ofa rot tenten noba ongga rutunggom mar ongga Ofa odou os rot ojgomu. 32 Sis mona ongga Allah ontunggom mebif onjoros deisef tein, bera memef meneg mar rot osnok egens egema tein ongga otunggom rusnok ongga runjuj jeska mosu rot riteij ofou erek riteij eskeira jinaga guru. Tina Ofa ontunggom mar insa koma fob. 33 Erek Ofa enen jeska Allah guru, beda enadaij nou Ofa otunggom mar onswos erek koma jinaga guru." 34 Beda rua ruroun gu ofa oida, "Bua bunjuj jeska bebin mosib rot budou ongga efen mar ongga oska. Jefeda bua bera erek idu fogora buftuftu mar gu memef erek komo!" Rua ragot mar insa koma beda rukoja ofa jeska Mod ongga Yahudi rum riteij gij. 35 Nou ongga Yesus engg rot oida ebirfager Farisi okoja osnok egens insa koma jeska Mod ongga rusnok rum riteij gij, beda Ofa ohca osnok egens koma. Beda Yesus agot gu ofa oida, "Bua budou ororu Rusnok Efesa rot tenten ei?" 36 Beda ofa ejeka gu Yesus oida, "Tuan, idu bera Rusnok Efesa? Bagot gu didif rot jeskaseda didif duroru Ofa ojgomu." 37 Beda Yesus agot gu ofa oida, "Bua bingk Ofa fob. Jeska Didif, ongga difesij mar gu bua ebeibeyaif, bera Rusnok Efesa." 38 Beda ofa agot oida, "Tuhan, dudou ororu Bua ojgomu!" Beda osnok egens insa koma es okeibi gu mebi noba ougif gu Yesus. 39 Beda Yesus agot gu ofa oida, "Didif din gu mebif jeskaseda duga ojga rot rusnok rerin rita mar. Noba Didif din jeskaseda rua ongga riteij ofou rik mar, noba rusnok ongga rik mar rija erek riteij ofou." 40 Rineya jeska ebic Farisi rig mar ongga Yesus anggot insa koma gu osnok egens koma. Jefeda rua ragot gu Yesus oida, "Bua bagot oida memef meiteij erek ofou tein ei!" 41 Beda Yesus agot oida, "Iwa ita mar erek rusnok ongga riteij ofou, beda idou enebriyi gij mar ongga iwa intunggom guru. Jefeda mar ongga oska enah gu iwa guru. Tina jeska iwa yagot oida iwa ita mar rot koisoisa erek rusnok ongga rik mar rot koisoisa fob, beda idou ebriyi gij mar ongga iwa itunggom. Jefeda mar ongga oska ah gu iwa ros."
1 Yesus agot oida, "Kef bera erek tenten oida, osnok egens ongga onoira gij momas egens ongga rungk mera joug domba-domba oisouska montoj guru, tina ofa osoka tera mera insa koma ojgomu, beda ofa bera erek rusnok ongga rukoreka mar ojgomu. 2 Noba osnok egens ongga oira momas insa koma oisouska montoj ojgomu, ofa bera ongga ont joug domba-domba insa koma. 3 Noba osnok egens ongga ot gu montoj bera ohoda montoj koma nou ofa ongga ont joug domba-domba insa koma. Noba domba-domba insa koma ruroru ofa efen oga. Ofa era rufoka ois gu rua, beda ofa eja okag rot rua. 4 Ofa oroun efen domba-domba nomnaga insa koma orogna jeska momas. Beda ofa eja okag rot rua, noba rua rutoij ofa jeska rua rijginaga rot ofa efen oga. 5 Tina domba-domba insa koma runororu rusnok ongga rua rinejginaga rot enesi jinaga guru. Rua rumoku jeska rua, jeska rinejginaga rot rerin ruga guru." 6 Yesus efesij mar ongga orocunc insa koma gu rusnok Yahudi, tina rudou enebriyi gij mar insa koma efen ofou guru. 7 Rusnok insa koma rudou enebriyi gij mar orocunc insa koma efen ofou guru. Jefeda Yesus agot gu rua rot efen ofou oida, "Kef erek tenten oida, Didif bera erek montoj nou domba-domba insa koma jeskaseda ruira gij montoj. 8 Noba rusnok ongga rungkag rot Didif erek nabi-nabi ongga ebireira jera Guru-Guru ongga oska bera rirek rusnok ongga rusok tera mera jeskaseda ruira momas insa koma fogora rukoreka mar ojgomu. Tina domba-domba rineg rua insa koma ruga jinaga guru. 9 Didif bera erek montoj insa koma. Noba rusnok ongga ruira oisouska Didif bera dumoskotu rua jeska rerin mar ongga oska. Rua bera erek domba-domba insa koma ongga rumoira gij momas efesi noba ongga rurogna tein jeskaseda rit meskeingg ofok ongga ereinahtah ojgomuja. 10 Rua ongga rukoreka mar bera rin jeskaseda ragei mar ongga rusnok egema rerin. Noba rua rin jeskaseda ragob rusnok noba ruhoda rot rerin mar fogora orowora. Tina Didif din jeskaseda dita eiteij ah ongga efeinah gu rusnok. Noba eiteij ah insa koma bera erek ongkoska eteb. 11 Didif bera erek gembala egens ongga ont joug efen domba-domba rot odou ongga oufamofa eteb. Noba Didif duitij rot oida dimagos jeskaseda dedin domba-domba risma eiteij ah ongga efeinah. 12 Rusnok enjgineg rut joug gembala efen domba-domba jeskaseda risma rufons rot. Tina rua runot joug domba-domba insa koma rot iskusk morototuma erek gembala esinsa ot joug domba-domba koma rot iskusk guru. Jeska gij mona ongga rua rik serigala egens ongga enen, beda rua rimeesa fogora rua raha domba-domba jah noba ruku jeska. Beda serigala insa koma osoka keingg domba-domba. Beda domba-domba insa koma nomnaga rimekebema dogdog. 13 Rusnok insa koma ongga runt joug domba-domba ruku ojgomu, jeska rua rudou onokora rot domba-domba insa koma erek tenten guru. Rua runt joug domba-domba insa koma jeskaseda risma fifi rot ojgomu. 14 - 15 Didif bera erek gembala egens ongga ont joug efen domba-domba rot odou ongga oufamofa. Didif dijginaga rot dedin domba-domba insa koma morototuma erek dedin Akeina ejginaga rot Didif tein. Noba dedin domba-domba insa koma rijginaga rot Didif erek Didif dijginaga rot dedin Akeina. Noba Didif duitij rot oida dagos jeskaseda dedin domba-domba risma eiteij ah ongga efeinah. 16 Didif dedin domba-domba enjgineg tein ongga runoira jera dedin domba-domba insa kef enesi. Jefeda Didif ducosu rot duhoturu rua jeskaseda rua riker morototuma jera dedin domba-domba insa kef tein. Rua tein rimeg rot dedin duga si. Beda gij mona insa koma bera Didif dedin domba-domba ebic egens ojgomuja. Noba rua rerin Didif erek osnok egens ongga dunt joug rua ojgomuja. 17 Dedin Akeina odou okora rot Didif, jeska Didif duitij rot oida dagos jeskaseda disma diteij ah deika sons ojgomu. 18 Erek Didif dunoitij rot guru, beda enadaij nou rusnok ragob Didif guru. Tina Didif duitij rot oida dagos ojgomu. Jeska Didif disinsa bera ongga dagot rot oida Didif dimagos ojgomu. Noba Didif disinsa bera ongga dagot rot oida Didif dimesma diteij ah sons deika ojgomu. Jeska dedin Akeina ombk Didif jeskaseda dita mar insa koma ojgomu si." 19 Nou ongga rusnok Yahudi rig mar insa koma beda rua ruga omosokuma rot mar ongga Yesus emfesij gu rua insa koma fob. 20 Rineya ongga erek rufoukou ragot oida, "Efena ofogog egens bera oira gij efen odou efesi fob, jefeda Ofa erek merei fob! Memef meneg rot mar ongga Ofa agot deika guru!" 21 Tina rineya ragot oida, "Osnok egens ongga merei ok Ofa bera enagot mar ongga onswos erek Ofa anggot insa koma fob guru. Noba enadaij nou osnok egens ongga merei ok eita eskeira gu rusnok ongga riteij ofou erek Ofa ontunggom insa koma guru." 22 Mona eteb egens ongga Yahudi ruina maat erek rireisisi keingg risinsa rot mona ongga rimower rii Mod Allah gij Yerusalem bera ensaga fob. Noba mesta ongga ongk meifirna ensaga gij mona insa koma tein. 23 Ainsa koma tein Yesus ecira gu Mod Allah insa koma efen majmeg ongga rusnok Yahudi rijeka oida, Majmeg Salomo. 24 Beda ebirfager rusnok Yahudi rumohoturuma rejrej Ofa. Beda rua ragot gu Ofa oida, "Teinefa fogora Bua bifesij mar ongga orotunggom modou erek eineina gij rot Bua ojgomuja. Erek Bua bera Kristus egens koma ongga emen, beda bagot erek koma rot koisoisa gu memef ojgomu foga." 25 Beda Yesus oroun gu rua oida, "Didif danggot erek koma gu iwa fob, tina idou onororu Didif rot guru. Noba mar ongga Didif dutunggom oisouska Akeina efen owesa efek bera orocunc erek koisoisa rot Didif fob. 26 Tina iwa inororu duga guru, jeska iwa inerek dedin domba-domba guru. 27 Rusnok ongga rirek dedin domba-domba bera ruroru dedin duga. Didif dijginaga rot rua, noba rua ruroru Didif. 28 Beda Didif dita eiteij ah ongga ah aibin gu rua, jefeda rua rinagos jinaga guru. Noba rusnok enjgineg rinagei rua jeska Didif jinaga guru. 29 Dedin Akeina bera ongga eita rusnok ongga rirek domba-domba insa koma gu Didif. Ofa bera efen ofoka ongga aksa ekirsa jeska mar nomnaga. Noba enadaij nou rusnok ragei domba-domba insa koma jeska Didif jinaga guru. 30 Jeska Didif jera dedin Akeina bera erek egens morototuma." 31 Beda ebirfager Yahudi insa koma ragei mamu jeskaseda riredi Yesus rot deika. 32 Tina Yesus agot gu rua oida, "Didif duntunggom mar ofoukou ongga erek oufamofa eteb nou dedin Akeina fob. Jefeda iwa itkonu oska eteb skoita Didif rot kenefo fogora idou os yagob Didif rot erek komo?" 33 Beda rua ruroun oida, "Mar oufamofa eteb ongga Bua buntunggom enereita modou otkonu oska rot Bua guru. Tina memef modou os magob Bua jeska Bua bagot oida Bua bera morototuma erek Allah. Jefeda koma erek Bua buga oruh rot Allah, jeska Bua bera erek rusnok giskini ojgomu!" 34 Beda Yesus agot gu rua oida, "Runggu gij yeyin Buku hukum Musa sis fob rot mar ongga Allah anggot erek kef oida, 'Didif dagot oida iwa bera erek Allah.' 35 Runggu gij Mar Efeyi Ebsi insa koma nou rusnok oida rua ongga ruroru Allah oga bera erek Allah tein. Noba mar insa koma ongga angh gij Mar Efeyi Ebsi bera erek tenten ojgomu. 36 Jefeda erek Didif dagot oida Didif bera erek Allah efen efesa tein, beda teinefa fogora iwa yagot oida koma erek duga oruh Allah rot erek komo. Jeska Didif bera ongga Allah oncunc noba Ofa ombk Didif skoita rusnok mebif fob. 37 Erek Didif dineita mar ongga Akeina onobk Didif rot guru, beda iwa inororu Didif guru. 38 Iwa idou os yukoja Didif. Beda ita mar erek koma ojgomu. Tina iroru mar ongga Didif duntunggom ongga Akeina ombk Didif rot. Beda iwa imejginaga rot koisoisa oida Didif bera erek egens morototuma jera dedin Akeina." 39 Nou ongga ebirfager Yahudi ringg mar insa koma beda rua rudou os ragei Yesus rot mar ongga Ofa anggot insa koma, tina Ofa edemi jeska rua. 40 Erek koma beda Yesus oksons jah mei Yordan enama gu monuh ongga Yohanes eita baptis gu rusnok gij sis fob. Beda Ofa eker jah suma. 41 Beda rusnok rufoukou rija skoita Yesus jah suma. Rua ragot oida, "Sis fob Yohanes onocunc rot mar onswos guru. Tina mar nomnaga ongga Yohanes emfesij rot Yesus insa kef bera erek tenten ojgomu." 42 Noba rusnok rufoukou gij monuh insa koma ruroru Yesus tein.
1 Osnok egens ongga ofoka Lazarus maren eteb fob. Ofa eker gij kota Betania. Noba efen meyeserga Maria jera Marta bera geker gij kota insa koma tein. 2 Maria insa koma bera ongga otkinaja mar ongga efen ensesa esij Tuhan Yesus ebirfaga. Noba ofa era efen ebirfaga efeji akseij orot Yesus efen aki sis fob. Ofa efen meyera Lazarus insa koma ongga maren eteb. 3 Jefeda Maria jera Marta gobk osnok egens jeskaseda eja agot gu Yesus oida, "Tuhan, bebin obhuj ongga bua budou okora rot bera maren eteb." 4 Nou ongga Yesus engg rot mar insa koma fob, beda Ofa agot oida, "Erek ofa maren, tina ofa enagos rot guru. Mar insa koma edi ofa jeskaseda rusnok rumofra Allah ofoka erek aksa eteb. Noba oisouska mar insa koma bera Allah efen efesa emesma ofoka ongga aksa eteb tein si." 5 Yesus odou okora rot Marta jera Maria jera Lazarus tein. 6 Erek koma tina gij mona ongga Ofa engg rot oida Lazarus maren eteb, tina Ofa eneja skoita ofa rot ebeirens guru. Ofa eker gij efen monuh insa koma erek mona egeka deika. 7 Nou ongga mona egeka insa koma oisa fob, beda Ofa agot gu efen ruforoker oida, "Mimif mija sons jah monuh Yudea." 8 Tina efen ruforoker ragot gu Ofa oida, "Akeina Guru, sis fob bera rusnok jah suma rudou os ragob Bua. Teinefa fogora Bua budou os buksons jah suma erek koma?" 9 Beda Yesus agot oida, "Mowa eisa ojgomuja erek aras setka kungkob erfeka. Jefeda rusnok ongga ricira askesi mowa eisa ros bera runokockereta mamu guru. Jeska rua rik mowa efen eisa gij mebi kef ojgomu. 10 Tina erek rua ricira askesi motkobah ros, beda rua rukockereta mamu ojgomu. Jeska rua rinek eisa guru." 11 Erek koma beda Yesus agot oida, "Mifmin muhuj Lazarus ahca fob. Tina Didif dimeja jah suma noba dibs ofa fogora edebecki ojgomu." 12 Beda Yesus efen ruforoker ragot oida, "Tuhan, erek ofa ahca, beda ofa efaga emeita eskeira si." 13 Yesus agot oida Lazarus ahca, tina koma erek orocunc rot oida Lazarus bera anggos fob. Tina Yesus efen ruforoker rusujohu rot oida Lazarus ahca erek giskini ojgomu. 14 Jefeda Yesus agot gu rua rot koisoisa oida, "Lazarus bera anggos fob. 15 Ecka bera Didif dineja ebeirens skoita ofa guru. Noba koma bera omofij iwa rot jeskaseda iwa idou omororu Didif ojgomu. Mimif minja skoita ofa." 16 Beda Tomas (ongga rinjeka ofoka Kembar tein) agot oida, "Mimif muroru Yesus jeskaseda magos morototuma jera Ofa ojgomu." 17 Nou ongga Yesus ensaga gu kota Betania, beda Ofa eg rot oida Lazarus anggos fob, noba rusnok rinsah efen efaga gij mansu mamu ongga erek efen moksu nou mona tohkuru fob. 18 Kota Betania bera erek kilometer orgomu jeska kota Yerusalem. 19 Noba rusnok Yahudi rufoukou bera rinja jah kota Betania jeskaseda ribisa morototuma jera Marta jera Maria rot Lazarus. 20 Nou ongga Marta eg rot oida Yesus enen, beda ofa eja jeskaseda orodosu Ofa gu moroju. Tina Maria eker gij efen mod efesi. 21 Beda Marta agot gu Yesus oida, "Tuhan, erek Bua bin jah sif sis fob, beda dedin ediyera enagos guru. 22 Tina didif dudou ororu rot tenten oida ainsa kef tein bera Allah emeita mar ongga Bua birejgei Ofa rot si." 23 Beda Yesus agot oida, "Bebin ebiyera emedebecki noba efena ebah deika si." 24 Beda Marta oroun oida, "Didif dijginaga rot oida gij mona ongga enja ejgwaga fob, beda ofa emedebecki noba efena ebah deika si." 25 Beda Yesus agot oida, "Didif bera ongga dufra rusnok jeska ranggos, noba ongga dita rifena ebah sons gu rua tein. Rua ongga ruroru Didif bera rimesma eiteij ah si. Koma nou rusnok ongga ranggos fob tein. 26 Noba rusnok nomnaga ongga rifena ebah ros noba ruroru Didif, beda rua rinagos deika guru." Beda Yesus agot gu Marta oida, "Bua budou ororu mar ongga Didif danggot ainsa kef fob ei?" 27 Beda Marta oroun oida, "Tuhan, tenten. Didif dudou ororu oida Bua bera Kristus ongga Allah efen efesa ongga emen gu mebif rot tenten ojgomu." 28 Nou ongga Marta anggot mar insa koma gu Yesus fob, beda ofa oksons skoita efen mokosa Maria. Beda ofa agot gu Maria esinsiyai ojgomu, "Guru en fob, noba Ofa odou os efesij mar jera bua." 29 Nou ongga Maria eg mar insa koma, beda ofa ot noba eja ebeirens skoita Yesus. 30 Yesus onoira gij kota Betania enesi, tina Ofa eker jah mebah gu monuh ongga Marta orodosu Ofa gij. 31 Maria efen mohujir Yahudi ongga ribisa morototuma jera ofa rik ofa orogna rot ebeirens jeska mod. Jefeda rua ruroru ofa jeska rua rusujohu rot oida ofa eja jah mansu mamu ongga Lazarus odog jeskaseda ribisa rot ofa jah suma. 32 Tina Maria eja teisis jah monuh ongga Yesus engker gij. Nou ongga ofa ek Yesus jah suma, beda ofa es okeibi gu mebif beda agot oida, "Tuhan, erek Bua bin jah sif sis fob, beda dedin ediyera enagos guru." 33 Nou ongga Yesus ek Maria ebisa noba efen mohujir tein ongga ribisa, beda Ofa odou okum noba odou okora tein. 34 Beda Ofa ejeka gu Maria oida, "Iwa insah efen efaga guaidu?" Beda rua ragot oida, "Tuhan, buroru memef jah suma." 35 - 36 Beda Yesus ebisa. Jefeda rua ongga Yahudi jah suma ragot oida, "Tenten, Ofa tein odou okora eteb rot Lazarus." 37 Tina rineya jah suma ragot oida, "Erek Yesus eita eskeira gu osnok egens ongga eiteij ofou, teinefa fogora Ofa eneita eskeira gu Lazarus jeskaseda ofa tein enagos guri." 38 Yesus odou okora noba oubsaha eteb rot Lazarus. Beda Ofa eja jah Lazarus efen moksu. Moksu insa koma bera erek mansu gij mamu eteb. Noba rusnok rira mamu eteb rurof joug mansu insa koma awesi. 39 Yesus agot gu rusnok jah suma oida, "Iwa yuhoda mamu efeyi jeska mansu kef." Beda Marta, ongga Lazarus efen meyesa, agot oida, "Tuhan, ofa anggos gij mona tohkuru fob. Ofa efaga efen embah tein fob." 40 Beda Yesus agot gu ofa oida, "Budou ofoj joug rot mar ongga Didif danggot gu bua fob ei. Jeska Didif danggot rot oida erek bua buroru Didif rot tenten, beda bua bimek Allah efen owesa efek eteb si." 41 Jefeda rusnok ruhoda mamu eteb insa koma jeska mansu efesi fob. Beda Yesus eyajga gu mebaga noba agot oida, "Akeina, Didif duis oufamofa gu Bua, jeska Bua bingg rot mar ongga Didif direjgei Bua rot fob. 42 Didif dijginaga rot oida Bua big mar nomnaga ongga Didif difesij gu Bua. Tina Didif dagot mar erek kef jeskaseda rusnok ongga rut jah sif rimeg rot tein. Didif dudou os jeskaseda rua rudou ororu rot tenten oida Bua bera ongga bumbk Didif fob." 43 Nou ongga Yesus anggot mar insa koma fob, beda Ofa agerir rot oga eteb oida, "Lazarus, bua burogna jeska mansu koma!" 44 Ainsa koma tein Lazarus, ongga anggos sis fob, bera eja orogna jeska mansu insa koma. Meifeti ongga rusnok rirajgej efen etma, jera aki jera osum tein bera enah tumu ofa ros. Beda Yesus agot gu rua oida, "Iwa yuhoda meifeti jeska ofa jeskaseda ofa ecira ojgomu." 45 Rusnok Yahudi rufoukou ongga runjogog Maria gij mona insa koma rik rot mar ongga Yesus ontunggom fob. Beda rufoukou jeska rua insa koma ongga rudou ororu Yesus tein. 46 Tina rineya rija teisis skoita ebirfager ebic Farisi noba rifesij gu rua rot mar nomnaga ongga Yesus ontunggom insa koma fob. 47 Beda ebirfager imam-imam jera rua ongga ebic Farisi ruhoturu morototuma jera ebirfager Yahudi rineya jeskaseda rifesij mar moguma osok gij Yesus. Rua ragot moguma oida, "Ofa orocunc mar onswos ofoukou fob. Jefeda mimif mita mar erek meidu rot? 48 Erek mimif mudou orons rot ojgomu, beda rusnok rufoukou rumororu Ofa si. Beda raja Kaisar efen tentarer rimen fogora rumohoda mifmin Mod Allah noba rut keingg mimif nomnaga." 49 Osnok egens jeska rua insa koma ongga ofoka Kayafas. Rua runcunc ofa erek ebirfaga imam egens ongga ofoka aksa nou tahun insa koma fob. Ofa agot oida, "Iwa idou osumsumu ojgomu. 50 Ongga oufa ekirsa nou mimif bera Ofa agos nou mifmin rusnok Israel nomnaga ojgomu. Beda mifmin monuh insa kef eneseiseifa jeska mimif guru." 51 Kayafas esinsa onosujohu rot mar insa koma guru. Tina jeska ofa erek ebirfaga imam ongga ofoka aksa, jefeda ofa agot rot mar ongga Allah oncunc gu ofa gij odou efesi oida Yesus emagos nou rusnok Yahudi nomnaga. 52 Noba Ofa emagos tein nou Allah efen efeser ongga eberbera fogora ohoturu rua nomnaga erek Allah efen efeser ongga ebic egens. 53 Jefeda gij mona insa koma rua ongga ebirfager Yahudi ruga eris rot oida rumohca moroju jeskaseda ragob Yesus. 54 Erek koma jefeda Yesus enecira rot tomnomna gu rusnok Yahudi rifekesa deika guru. Ofa eja jeska monuh insa koma, beda eja jah kota Efraim ongga angh doida monuh egens ongga owowa. Noba Ofa eker jah suma morototuma jera efen ruforoker. 55 Mona eteb egens nou rusnok Yahudi ongga ofoka Paskah bera ensaga doida fob. Noba rusnok Yahudi rufoukou rinja jah kota Yerusalem jeskaseda rita mar jeni erek rerin erebent anggot rot, fogora risejah nou mona ongga Paskah. 56 Rusnok jah suma ruhca Yesus. Rua rut jah Mod Allah ejmeg noba rijeka joug moguma oida, "Ofa en jah sif nou mona ongga Paskah ei era gurei?" 57 Tina ebirfager imam-imam jera rua ongga ebic Farisi ranggot gu rusnok fob oida, "Erek iwa ik Yesus jah sif, beda yagot gu memef rot ebeirens ojgomu." Rua ragot mar erek koma, jeska rua rudou os ragei Yesus gij mona insa koma.
1 Nou mona eteb ongga ofoka Paskah ensaga doida fob, erek mona cinja erfens deika, beda Yesus onjogog efen mohujir gij kota Betania. Lazarus engker gu Kota Betania gij mona mona ongga ofa anggos fob. (Lazarus bera ongga Yesus omfra jeska anggos sis fob.) 2 Yesus efen mohujir risejah maat jeskaseda rit morototuma jera Ofa. Marta bera ongga ecka maat gu rua insa koma. Noba Lazarus tein bera et maat morototuma jera rua. 3 Beda Maria orka fanin eteb egens ongga ebera rot miniyi ongga efen ensesa. Miniyi insa koma efen efera osok eteb doska. Beda ofa otkinaja miniyi insa koma esij Yesus aki jeskaseda orocunc rot efen odou ongga okora eteb rot Ofa. Beda ofa era efen ebirfaga efeji akseij orot Yesus aki. Beda mar efen ensesa insa koma efen eyejkita eberbera gij mer efesi insa koma. 4 Erek koma noba Yesus efen oforoka egens ongga ofoka Yudas Iskariot, ongga emekikif jeska Yesus gij mona kahma, ofa bera eneker jah suma tein. 5 Ofa agot oida, "Miniyi ongga efen ensesa insa koma bera efen efera osok eteb doska. Koma efen efera osok morototuma erek osnok egens esma ofons gij tahun egens ongga emfarur rot fob. Teinefa fogora ofa onohu mar insa koma beda ekeba efen fifi eteb gu rusnok ongga rufojingki ojgomu guri." 6 Tina Yudas odou onokora rot rusnok ongga rufojingki erek tenten guru. Ofa agot mar erek koma jeska ofa bera ongga ont joug Yesus jera efen ruforoker rerin fifi. Noba giskini ofa era fifi eneya insa koma nou esinsiyai ojgomu. 7 Beda Yesus oroun gu Yudas oida, "Binagot mar erek koma rot Maria guru. Mar ongga ofa otunggom jera mar efen ensesa insa koma bera erek tenten ojgomu. Jeska ofa ensejah dedin difaga rot fogora rusnok rimesah difaga gij moksu efesi. 8 Rusnok ongga rufojingki bera riker gij ifekesa ojgomuja fogora yufij rua ojgomuja. Tina Didif dineker gu ifekesa ojgomuja deika guru." 9 Gij mona insa koma tein rusnok Yahudi rufoukou rig rot oida Yesus bera eker gij Maria efen mod. Jefeda rua rija jah suma jeskaseda rik Yesus. Noba rua tein rudou os rik Lazarus tein ongga Yesus omfra jeska anggos sis fob. 10 - 11 Rusnok ringk mar onswos ongga Yesus otunggom rot Lazarus, jefeda rusnok rufoukou ringkikif jeska rerin ribirfager Yahudi noba rua ruroru Yesus ojgomu. Jefeda ebirfager Yahudi ruga eris rot oida rimagob Lazarus tein. 12 Gij mona egema deika beda rusnok Yahudi rufoukou ongga rinja jah Yerusalem nou mona ongga Paskah bera rig rot oida Yesus emen jah suma. 13 Jefeda rua riris ayug ofoka rot efeyi fogora rurosu moroju nou Yesus jeskaseda rugif gu Ofa. Beda rua ruis rot ruga eteb oida, "Oufamofa eteb gu Allah. Oufamofa eteb gu Ofa ongga en oisouska Allah ofoka. Oufamofa eteb gu Ofa ongga erek Israel efen raja!" 14 Beda Yesus eita keledai efer egens noba eker esij keledai insa koma. Koma morototuma erek runggu gij Mar Efeyi Ebsi sis fob oida, 15 "Iwa ongga ingker gij kota Zion inemeesa guru. Jeska yeyin raja egens emen skoita iwa eifef keledai efer egens." 16 Gij mona insa koma Yesus efen ruforoker rudou enejginaga rot oida nabi runggu mar insa koma osok gij Yesus sis eteb fob enesi. Tina gij mona ongga Yesus omfra jah mebaga fob, beda rua rudou ah keingg rot oida mar ofoukou ongga rusnok runtunggom skoita Yesus bera ah jeni erek nabi-nabi runggu rot gij Mar Efeyi Ebsi sis eteb fob. 17 Rusnok riskemba ongga ringk Yesus ois mar gu Lazarus gij mamu efesi fogora Lazarus efena ebah sons sis fob bera rifesij rot mar insa koma gu rusnok enjgineg ojgomuja. 18 Jefeda rusnok rufoukou ongga rig rot mar onswos insa koma rija jeskaseda rurodosu Yesus tein. 19 Nou ongga rusnok ebic Farisi rik mar insa koma, beda rusum oskusk rot. Jefeda rua ragot moguma oida, "Mifmin owesa efek ensiri fob, jeska ebeibeyaif rusnok riskemba doska rudou os ruroru Ofa ojgomu!" 20 Rusnok rineya ongga enerek Yahudi guru bera rin jah kota Yerusalem jeskaseda rugif gu Allah gij mona ongga Paskah insa koma tein. 21 Rua rija skoita Yesus efen oforoka egens ongga ofoka Filipus jeskaseda rijeka joug ofa rot Yesus. (Filipus bera ongga ojga jeska kota Betsaida ongga angh gij monuh Galilea.) Rua ragot oida, "Tuan, memef modou os mefesij mar jera Yesus." 22 Beda Filipus agot rot mar insa koma gu Andreas. Noba Andreas jera Filipus gagot rot gu Yesus. 23 Yesus agot gu rusnok koma oida, "Mona ongga Didif, Rusnok Efesa, disma dedin dufoka ongga aksa eteb bera ensaga fob. 24 Kef erek tenten oida, Didif bera erek marsi gandum efej egens. Erek rusnok rinesah marsi gandum efej koma gij mebi guru, beda marsi angh erek egens ojgomuja. Tina erek risah marsi koma gij mebi, beda marsi koma eja erek ofoukou doska. 25 Jeska osnok egens ongga eita mar ongga ofa esinsa odou os rot gij efen eiteij ah insa kef, beda efen eiteij ah koma emeseiseifa si. Tina osnok egens ongga aha mar rot efen eiteij ah nomnaga jeskaseda ororu Didif, beda ofa emeita eiteij ah ongga efeinah noba ongga ah aibin si. 26 Noba osnok egens ongga odou os ofij Didif, beda ofa ororu Didif ojgomu. Jefeda ofa tein emeker gij monuh nomnaga ongga Didif dimeja gij si. Noba orofosut osnok egens egens ongga ofij Didif, bera Akeina omofra rua rerin rufoka erek aksa tein si. 27 Ebeibeyaif Didif dudou okum eteb. Tina Didif dinagot oida, Akeina buskotu Didif jeska mar okum insa kef guru. Jeska Didif din jeskaseda dita difera okora gij mona insa kef. 28 Noba Didif duis oida, Akeina bita mar ongga omorofra bufoka erek aksa eteb ojgomu." Nou ongga Yesus anggot mar insa koma fob beda oga egens jeska mebaga agot oida, "Didif dinta mar ongga orofra dufoka erek eteb fob. Noba Didif dimeita mar erek insa juens deika si." 29 Rusnok ongga runt jah suma rig oga egens insa koma. Beda rua ragot oida mar insa koma bera erek moc ogugur. Tina rineya ragot oida mar insa koma bera erek malaikat ongga agot mar skoita Yesus. 30 Beda Yesus agot oida, "Oga insa koma ongga iwa ingg fob bera en jeskaseda ofij iwa fogora imororu mar ongga danggot rot ojgomu. Koma enen jeskaseda ofij Didif guru. 31 Mona ongga Allah omofra mar okum eteb keingg rusnok mebif ongga ofogog bera ensaga fob. Ebeibeyaif ofa ongga erek ebirfaga efena ofogog gu mebif bera emesiri gu Allah si. 32 Noba erek rusnok rufra Didif jah skida, beda Didif dumoroun rusnok rufoukou skoita Didif." 33 Yesus agot mar insa koma jeskaseda orocunc rot oida ai juens beda Ofa emagos tumu mega salib. 34 Beda rusnok rufoukou jah suma ragot oida, "Gij Musa efen buku hukum, Tuhan agot oida Ofa ongga enen erek Kristus bera efena ebah rot ah aibin ojgomuja. Tina Bua banggot oida rusnok rumofra Ofa, Rusnok Efesa, jah skida. Ofa ongga Bua bijeka oida Rusnok Efesa bera erek idu?" 35 Beda Yesus agot gu rua oida, "Didif ongga erek eisa bera dineker jera iwa dektek deika guru. Jefeda iwa icira gij eisa insa koma ojgomuja, beda motkobah onocohun keingg iwa deika guru. Erek iwa icira gij motkobah, beda iwa inejginaga rot monuh ongga iwa inja gij guru. 36 Iwa iroru Didif ongga erek eisa askesi Didif diker gu ifekesa ros jeskaseda iwa ija erek rusnok ongga ringker gij eisa." Nou ongga Yesus emfesij rot mar insa koma fob, beda Ofa eja jeska rusnok koma noba Ofa edemdemi esinsa jeska rua. 37 Yesus oncunc rot mar onswos ofoukou jah gu rusnok Yahudi rifekesa, tina rua runororu Ofa guru. 38 Tina mar insa koma ah jeni erek nabi Yesaya onggu rot gij Mar Efeyi Ebsi sis eteb fob. Ofa onggu rot oida, "Tuhan, memef memfesij rot Bua gu rusnok fob. Noba rua rik rot bebin owesa efek eteb fob, tina runororu moga rot guri." 39 Noba mar ongga Yesaya runggu tein sis fob bera orocunc rot meidu rusnok runororu guru. Ofa onggu rot mar erek kef oida, 40 "Allah ontunggom riteij erek ofou jeskaseda rinejginaga rot mar ongga rua rik guru. Noba Ofa of joug rudou efesi jeskaseda rudou enebriyi gij mar guru. Jefeda rua rinen skoita Ofa jeskaseda risma eiteij ah ongga efeinah guru. Noba Ofa onosuna rot rerin mar ongga oska jeska rudou efesi tein guru." 41 Yesaya onggu rot mar insa koma osok gij Yesus ongga emen gij mona kahma, jeska Allah oncunc rot Yesus efen owesa efek eteb gu Yesaya gij odou efesi sis fob. 42 Ebirfager Yahudi rineya rufoukou rudou ororu Yesus tein. Tina rua rimeesa rot rusnok Yahudi ongga ebic Farisi, jefeda rua rinagot rot tomnomna oida rudou ororu Yesus fob guru. Rua rimeesa oida rua ongga ebic Farisi riyahehir joug rua fogora runoira gij Mod Allah deika guru. 43 Rua rudou os oida rerin ruhujir risitit rufoka ojgomu. Noba rua runosujohu rot teinefa Allah esitit rusnok ongga ruroru Ofa rot tenten guru. 44 Beda Yesus agot oida, "Osnok egens ongga odou ororu Didif bera ororu Allah ongga ombk Didif tein. 45 Noba osnok egens ongga ek Didif bera ek Ofa ongga ombk Didif fob. 46 Didif din gu mebif erek eisa jeskaseda rusnok ongga ruroru Didif bera rineker gij motkobah deika guru. 47 Osnok egens ongga eg rot dedin duga, tina ofa onororu duga insa koma guru, beda Didif dunocunc ofa erek oska enesi. Jeska Didif dinen gu mebif jeskaseda duga ojga rot idu ongga erek oska guru. Tina Didif din gu mebif jeskaseda duskotu rusnok jeska rerin mar ongga oska. 48 Mar egens ongga enjgineg omocunc rot oida rusnok ongga rukoja dedin duga noba runororu Didif guru bera erek oska. Mar egens insa koma bera mar ongga Didif difesij rot gu rusnok. Noba mar ongga Didif difesij rot insa koma bera omorocunc rot rusnok nomnaga rerin rita mar gij mona ongga enja ejgwaga si. 49 Mar ongga Didif dumftuftu fob bera enen jeska Didif guru. Jeska dedin Akeina Allah ongga ombk Didif bera ducunc gu Didif rot mar ongga dimefesij jera mar ongga dumoftuftu gu rusnok. 50 Noba Didif dijginaga rot oida rusnok risma eiteij ah ongga ah aibin oisouska rudou ongga ororu Allah oga rot tenten ojgomu. Jefeda Didif difesij rot mar ongga Allah oncunc gu Didif fob ojgomu."
1 Mona eteb egens ongga ofoka Paskah ensaga doida fob. Yesus ejginaga rot oida mona ongga Ofa eja jeska mebif noba oksons skoita efen Meka gu mebaga bera ensaga fob. Ofa odou okora rot efen rusnok ongga runroru Ofa fob. Noba Ofa odou okora rot rua ojgomuja onjoros Ofa anggos tein. 2 Yesus jera efen ruforoker riker morototuma jeskaseda rit maat nou motu. Gij mona insa koma bera Bilis oncunc gu Yudas Iskariot gij odou efesi jeskaseda ekikif jeska Yesus. 3 Yesus ejginaga rot oida Allah eita owesa efek gu Ofa jeskaseda otunggom mar ongga Ofa esinsa odou os rot ojgomu. Noba Ofa ejginaga rot oida Ofa en jeska Allah gij mona ongga sismeni, noba ai juens beda Ofa omoksons skoita Allah deika si. 4 Jefeda askesi rua rint maat morototuma, beda Yesus ot noba osuwa meifeti ongga Ofa ergi esij efen meisoufa. Beda Ofa eita handuk noba erajgej joug okum ofoj. 5 Beda Ofa otkinaja mei gij mongkei mos egens. Beda Ofa era mei insa koma orot efen ruforoker raki. Beda Ofa era handuk insa koma orosuna mei jeska raki. 6 Nou ongga Ofa omot Petrus aki tein, beda Petrus agot oida, "Tuhan, enadaij nou Bua but dedin daki erek koma guru." 7 Beda Yesus oroun gu ofa oida, "Ebeibeyaif budou enebriyi gij rot mar meidu fogora Didif dut bebin baki erek kef enesi. Tina gij mona kahma beda budou emebriyi gij si." 8 Beda Petrus agot oida, "Tuhan guru. Bua bunot dedin daki jinaga guru." Beda Yesus oroun oida, "Erek Didif dunot bebin baki guru, beda bua binerek dedin oforoka egens guru." 9 Beda Petrus agot oida, "Tuhan, erek koma jefeda bunot bebin baki ojgomu guru. Tina Bua but dedin ditma jera dibirfaga nomnaga tein." 10 Beda Yesus agot oida, "Nou ongga osnok egens osiomu gij mei fob, beda efen efaga bera erek eskeira fob. Dansusk beda ofa ocosu rot ot efen aki ojgomu. Iwa bera erek eskeira fob, tina osnok egens eneya jeska iwa bera eneskeira guru." 11 Yesus ejginaga rot idu ongga engker gu rifekesa ongga emekikif jeska Ofa. Jefeda Ofa agot erek insa koma oida osnok egens eneya jeska rua bera eneskeira guru. 12 Nou ongga Ofa ot rua insa koma rerin raki oisa fob, beda Ofa ergi efen meifeti esij meisoufa deika. Beda Ofa eker sons gu meja. Beda Ofa ejeka gu rua oida, "Iwa idou ebriyi gij mar ongga Didif duntunggom insa koma nou iwa fob ei? 13 Iwa ijeka Didif erek Akeina noba erek Guru noba erek Tuhan tein. Noba mar koma ongga iwa ijeka Didif bera erek tenten ojgomu. Didif bera erek Guru jera Tuhan. 14 Jefeda erek Didif, ongga yeyin Guru jera Tuhan, duin keingg dudou efesi fogora dufij iwa erek insa koma, beda iwa tein yuin keingg idou efesi fogora imofijma tein ojgomu. 15 Didif duntunggom mar insa koma erek orocunc nou iwa jeskaseda iwa tein ita mar erek insa koma moguma. 16 Kef erek tenten oida osnok egens ongga ofij efen ebirfaga bera efen ofoka enaksa ekirsa jeska ebirfaga efen ofoka guru. Noba osnok egens ongga efesij mar nou efen ebirfaga bera efen ofoka enaksa ekirsa jeska ebirfaga ongga obk ofa efen ofoka guru. 17 Erek iwa idou ebriyi gij mar insa koma efen ofou beda iwa itunggom mar morototuma erek Didif duntunggom fob ojgomu. Beda iwa imesma oufamofa eteb rot si. 18 Mar ongga Didif dimfesij insa kef bera nou iwa nomnaga guru. Didif dijginaga rot idu ongga Didif duncunc fob. Tina mar ongga runggu gij Mar Efeyi Ebsi sis fob bera ai juens emah gij efera fob si. Mar koma agot oida, 'Osnok egens ongga et maat morototuma jera Didif bera odou engkikif jeska Didif fob.' 19 Mar insa koma enah gij efera enesi. Tina Didif difesij rot mar insa koma gu iwa ebeibeyaif jeskaseda gij mona ongga iwa ingk rot mar insa koma fob, beda iwa idou omororu rot tenten oida Didif bera Kristus ongga emen si. 20 Kef erek tenten oida, rua ongga ruroun osnok egens ongga Didif dumbk fob, beda koma erek rua ruroun Didif tein. Noba rus ongga ruroun Didif, beda koma erek rua ruroun Allah ongga ombk Didif tein." 21 Nou ongga Yesus anggot mar insa koma fob, beda Ofa odou okum eteb. Beda Ofa agot rot tomnomna gu efen ruforoker jah suma oida, "Didif dudou os dagot gu iwa rot oida osnok egens jeska iwa ifekesa bera emekikif jeska Didif." 22 Beda Yesus efen ruforoker insa koma rimeyajgema rot rudou ongga eineina gij, jeska rua rinejginaga rot koisoisa osok gij idu ongga Yesus emfesij rot guru. 23 Didif, ongga Yesus efen oforoka egens ongga Ofa odou okora rot bera dingker desi Ofa. 24 Noba Simon Petrus agot mar ohunhunu gu didif jeskaseda didif dijeka Yesus rot idu insa koma ongga emekikif jeska Ofa. 25 Jefeda didif dagot gu Yesus oida, "Tuhan, idu bera ongga emekikif jeska Bua?" 26 Beda Yesus agot oida, "Didif dimec roti kef gij mok osku. Noba Didif dimeita roti kef gu ofa ongga odou emekikif jeska Didif." Beda Yesus eita roti noba ec roti insa koma gij mok osku. Beda Ofa eita roti koma gu Yudas Iskariot, ongga Simon efen efesa. 27 Nou ongga Yudas eita roti insa koma jeska Yesus, beda ainsa koma tein Bilis oira gij efen odou efesi. Beda Yesus agot gu ofa oida, "Mar ongga ai juens bua bumotunggom bera butunggom koma rot ebeirens ojgomu." 28 Memef nomnaga ongga mengker jah suma jera Yesus modou enebriyi gij mar ongga Ofa anggot insa koma gu Yudas enesi. 29 Yudas bera ongga ont joug mefmen fifi. Jefeda rineya jeska memef rusujohu rot oida Yesus obk Yudas jeskaseda engk maat nou mona ongga Paskah, era obk ofa jeskaseda ekeba fifi gu rusnok ongga rufojingki. 30 Yudas eita roti insa koma ongga Yesus ec gij mok osku noba eita gu ofa. Beda ofa eja ebeirens jeska rua. Noba erek motu fob. 31 Nou ongga Yudas eja jeska rua fob, beda Yesus agot oida, "Ebeibeyaif rusnok rumofra Didif, Rusnok Efesa, dedin dufoka erek aksa eteb. Noba rusnok rumofra Allah efen ofoka erek aksa eteb oisouska mar ongga ai juens Didif dumotunggom. 32 Noba erek rusnok rumofra Allah ofoka erek aksa eteb oisouska mar ongga Didif dumotunggom, beda erek koma tein Allah omofra Didif, efen efesa, dufoka erek aksa eteb oisouska esinsa efen owesa efek ojgomu. Noba gij mona ongga estir deika beda Ofa omotunggom mar insa koma tein si." 33 Beda Yesus agot gu efen ruforoker oida, "Edeser, ai juens bera Didif dimeja jeska iwa. Iwa imohca Didif, tina iwa inek Didif guru. Didif dimfesij rot mar insa koma gu ebirfager Yahudi fob. Noba ebeibeyaif Didif difesij rot mar insa koma gu iwa tein. 34 Didif dagot rot mar ongga efeinah gu iwa erek kef oida, iwa idou omokorema moguma ojgomuja. Iwa idou omokorema morototuma erek Didif duncunc dudou ongga okora rot iwa tein fob. 35 Jeska erek iwa ita idou ongga omokorema, beda rusnok enjgineg rimejginaga rot tenten oida iwa bera erek dedin ruforoker si." 36 Erek koma beda Simon Petrus ejeka gu Yesus oida, "Tuhan, Bua bija jah guaidu?" Beda Yesus oroun oida, "Monuh ongga Didif dimeja gij ebeibeyaif bera bua bunororu Didif jah suma guru. Tina gij mona kahma beda bua bumororu Didif jah suma si." 37 Beda Petrus ejeka gu Yesus oida, "Tuhan, teinefa fogora enadaij nou didif duroru Bua jah suma ebeibeyaif guru? Jeska didif dinsejah gij dudou efesi jeskaseda dagos morototuma jera Bua." 38 Beda Yesus oroun gu ofa oida, "Bua bagot oida binsejah gij budou efesi jeskaseda bagos morototuma jera Didif fob. Tina ongga tenten bera, erek mongkukar orna onoga nou motu insa kef rot ofosma egeka enesi, beda bua bisinsa bumorot keingging rot ofosma egeka gu rusnok oida bua binejginaga rot Didif guru."
1 Erek koma beda Yesus agot gu efen ruforoker oida, "Iwa idou onokumkum rot mar ongga Didif dimfesij insa koma gu iwa guru. Tina ita idou ongga ororu Allah jera Didif rot tenten ojgomu. 2 - 3 Akeina efen mod ongga eteb doska. Noba mod koma efen morongsu ofoukou doska tein. Noba Didif dimeja okag rot iwa jah suma jeskaseda disejah morongsu egens nou iwa. Nou ongga Didif dinsejah mar nomnaga nou iwa fob, beda Didif dumoksons skoita iwa. Beda Didif dumoroun iwa sons jah suma jeskaseda iwa tein ifaga ouka morototuma jera Didif. Didif difesij rot mar insa koma ebeibeyaif, jeska mar insa koma bera erek tenten ojgomu. 4 Noba iwa ijginaga rot moroju ongga eja suma fob." 5 Beda Tomas agot gu Yesus oida, "Tuhan, memef menejginaga rot monuh ongga Bua binja gij enesi. Jefeda memef mejginaga rot moroju ongga eja jah suma erek teinefa?" 6 Beda Yesus oroun oida, "Didif bera ongga erek moroju. Didif bera ongga tenten. Noba Didif bera ongga dita eiteij ah ongga efeinah gu rusnok tein. Noba rusnok ruroru moroju egens koma skoita Allah oisouska Didif ojgomu. 7 Iwa ijginaga rot Didif erek tenten fob. Jefeda iwa ijginaga rot dedin Akeina tein erek tenten fob. Koma tenten, jeska ebeibeyaif iwa ik Didif fob, jefeda koma erek iwa ijginaga rot Ofa tein fob." 8 Beda Filipus agot gu Yesus oida, "Tuhan, bucunc Mekeb Allah gu memef, beda modou eskeira rot koma ojgomu." 9 Tina Yesus agot oida, "Filipus, Didif dingker jera iwa rot mona ongga dektek fob, tina bua binejginaga rot Didif enesei. Osnok egens ongga ek Didif fob bera ek Akeina Allah fob tein. Jefeda teinefa fogora bua bagot gu Didif oida, bucunc Akeina Allah gu iwa erek komo. 10 Erek budou onororu rot oida Didif jera dedin Akeina bera erek egens gurei. Mar ongga Didif dimfesij gu iwa enen jeska Didif disinsa ojgomu guru. Tina mar insa koma bera en jeska Akeina ongga engker morototuma jera Didif, noba ongga agot mar oisouska Didif. 11 Erek Didif dagot rot oida Didif jera dedin Akeina bera erek egens ojgomu, beda iwa ita idou ongga ororu mar insa koma rot tenten ojgomu. Era ita idou ongga ororu mar insa koma jeska iwa ingk mar onswos ofoukou ongga Didif duncunc rot gu rusnok fob. 12 Kef erek tenten oida, osnok egens ongga ororu Didif rot tenten fob bera omotunggom mar morototuma erek Didif duntunggom fob si. Noba rua ongga rudou ororu mar insa koma bera rumotunggom mar ongga eteb ekirsa jeska mar ongga Didif duntunggom fob si. Jeska Didif dimeja skoita dedin Akeina. 13 Noba erek iwa irejgei Didif rot mar oisouska dedin dufoka, beda Didif dimeita mar insa koma nou iwa si. Didif dimeita mar insa koma nou iwa jeskaseda rusnok rumofra Allah ofoka erek aksa eteb. 14 Erek iwa irejgei Didif rot mar meidu ojgomu, beda Didif dimeita mar insa koma nou iwa si." 15 Erek koma beda Yesus agot deika oida, "Erek iwa idou okora rot Didif erek tenten, beda iwa imotunggom mar ongga Didif danggot rot si. 16 - 17 Didif dumois gu Allah beda Ofa omobk mar egens enjgineg jeskaseda ofij iwa. Mar insa koma bera Efena Ebsi Allah ongga omocunc rot mar ongga tenten gu iwa gij idou efesi. Ofa bera eker jera iwa rot mona ongga ah aibin ojgomuja. Rusnok mebif runororu Ofa guru, jeska rua rinek Ofa noba rua rinejginaga rot Ofa guru. Tina iwa ijginaga rot Ofa, jeska Ofa eker jera iwa ebeibeyaif. Noba Ofa emeker gij idou efesi tein ojgomuja. 18 Didif dinaha iwa jah guru erek ruforokai ongga rerin meka jera mosu guru. Tina Didif dumoksons skoita iwa si. 19 Gij mona ongga dektek deika guru, beda rusnok mebif rinek Didif deika guru. Tina iwa imek Didif si. Jeska erek Didif disma eiteij ah ongga efeinah beda iwa imesma eiteij ah ongga efeinah tein si. 20 Gij mona insa koma iwa imejginaga rot tenten oida Didif jera Akeina bera erek egens, noba iwa jera Didif bera erek egens tein. 21 Rusnok ongga rijginaga rot mar ongga Didif danggot rot, noba rua rugif gu mar insa koma tein, rua bera ongga rudou okora rot Didif erek tenten. Beda dedin Akeina odou omokora rot rua ongga rudou okora rot Didif. Didif dudou okora rot rua tein, beda Didif dumocunc disinsa gu rua si." 22 Erek koma beda Yudas (Yudas ongga toga jeska Yudas Iskariot) agot oida, "Tuhan, Bua bumocunc bisinsa skoita memef, tina Bua bunocunc bisinsa skoita rusnok enjgineg guru. Koma rot meidu?" 23 Beda Yesus oroun oida, "Erek rusnok rudou okora rot Didif, beda rua rumororu mar ongga Didif dumftuftu fob si. Beda dedin Akeina odou omokora rot rua. Beda Ofa jera Didif mamen skoita rua, noba maker jera rua. 24 Rusnok ongga rudou onokora rot Didif guru, rua bera runororu mar ongga Didif dumftuftu rot guru. Noba mar insa koma ongga Didif dumftuftu rot bera enen jeska Didif guru, tina mar insa koma bera en jeska Akeina ongga ombk Didif fob. 25 Didif difesij mar insa koma nomnaga askesi diker morototuma jera iwa ros. 26 Tina gij mona kahma beda Ofa ongga emen jeskaseda ofij iwa bera omoftuftu rot mar nomnaga gu iwa. Noba Ofa omofij iwa jeskaseda idou ah keingg rot mar nomnaga ongga Didif dumftuftu rot gu iwa sis fob si. Ofa insa koma ongga omofij iwa bera Efena Ebsi ongga Akeina omobk oisouska dedin dufoka. 27 Didif dimeita idou efesi erek eskeiramera eteb. Noba eskeiramera ongga angh gij dudou efesi bera emen jeska Didif tein si. Didif dineita idou ongga eskeiramera insa koma gu iwa morototuma erek rusnok mebif rita rudou ongga eskeiramera gu rusnok enjgineg guru. Jefeda iwa ineita idou efesi ongga okum era emeesa rot mar guru. 28 Iwa ingg Didif dagot fob oida Didif dimeja jeska iwa, tina Didif dumoksons skoita iwa deika si. Erek iwa idou okora rot Didif erek tenten, beda idou eskeira rot oida Didif dumoksons skoita dedin Akeina ojgomu. Jeska Ofa bera efen ofoka ongga aksa ekirsa jeska Didif. 29 Mar insa koma enen enesi, tina Didif dagot rot mar insa koma gu iwa ebeibeyaif jeskaseda gij mona ongga Didif dinja jeska iwa fob, beda idou emah keingg rot mar insa koma fogora imororu Didif rot tenten si. 30 Didif dinefesij mar gu iwa rot dektek deika guru, jeska ofa ongga efen owesa efek erek ebirfaga efena ofogog gu mebif bera doida ensaga fob. Noba ofa efen owesa efek egema tein jeskaseda ofoka ereij keingg Didif jinaga guru. 31 Tina ofa en jeskaseda rusnok mebif rijginaga rot fob oida Didif dudou okora rot dedin Akeina. Jefeda Didif dumotunggom mar jeni erek Akeina anggot gu Didif rot sis fob si. Mimif minja ebeibeyaif."
1 Erek koma beda Yesus agot deika oida, "Didif bera erek mofun efaga mosu ongga tenten, noba Akeina Allah, ongga ot joug mofun insa koma, bera erek osnok egens ongga ef mar gij mekeni. 2 Noba orofosutut mofun efen efetma ongga enefek jinaga guru bera Ofa eyah jeska beda eij jeska ojgomu. Noba orofosutut mofun efetma ongga efen efek fob bera Ofa eseda efetma koma deci deci jeskaseda mofun efetma insa koma eskeira nomnaga. Noba gij mona kahma beda mofun efen efetma insa koma efen efek erek ekirsa deika. 3 Noba erek koma tein yeyin idou efesi erek eskeira fob tein. Noba koma bera en oisouska mar ongga Didif dumftuftu gu iwa fob. 4 Noba mofun efen efetma ongga angh gu esinsa bera efen efek jinaga guru. Tina erek mofun efen efetma ebiedi jera mofun ebic enjgineg ojgomu, beda efen efek ofoukou. Erek koma tein nou iwa. Erek idou eja erek egens jera Didif, beda Didif dimeja erek egens jera iwa. Beda iwa imek mar ongga oufamofa gij yeyin iteij ah. Tina guru, beda inek mar ongga oufamofa gij yeyin iteij ah guru. 5 Didif bera erek mofun efaga mosu, noba iwa bera erek mofun efen efetma tein. Noba erek rusnok rita rudou ongga egens jera Didif noba Didif dita dudou ongga erek egens jera rua, beda rua rimek oufamofa eteb gij rerin riteij ah si. Jeska erek rudou eneja egens jera Didif guru, beda enadaij nou rua rik mar ongga oufamofa gij rerin riteij ah guru. 6 Noba rua ongga rudou eneja erek egens jera Didif guru, beda Allah emeij rua jeska erek rusnok rij mofun efen efetma ongga ebriyi fob jeska. Mofun efen efetma insa koma eja erek ofora, noba rusnok ruhoturu mofun efen efetma insa koma beda rij gij mah fogora et noba eribseb nomnaga ojgomu. 7 Iwa ita idou ongga egens jera Didif ojgomuja, noba dedin duga bera angh gij idou efesi tein ojgomuja. Beda iwa irejgei Didif rot mar meidu ongga idou os rot ojgomu. Beda Didif dimeita mar insa koma gu iwa si. 8 Erek rusnok rik rot yeyin ita mar ongga oufamofa gij iteij ah kef, beda rua rumofra Allah ofoka erek aksa eteb rot. Noba koma bera ongga orocunc rot oida iwa iroru Didif rot tenten fob. 9 Didif dudou okora rot iwa morototuma erek Akeina odou okora rot Didif. Iwa iroru mar ongga Didif dumftuftu gu iwa fob jeskaseda Didif ducunc dudou ongga okora rot iwa ojgomuja. 10 Didif duroru mar ongga Allah anggot rot gu Didif fob, noba Ofa ocunc odou ongga okora rot Didif ojgomuja. Erek koma tein, erek iwa iroru mar nomnaga ongga Didif danggot rot gu iwa fob, beda Didif dumocunc dudou ongga okora rot iwa ojgomuja. 11 Didif dimfesij rot mar insa koma nomnaga gu iwa fob jeskaseda iwa ita idou ongga erirei eteb rot morototuma erek Didif dudou erirei eteb tein. Beda yeyin idou emefaga ouka erek eteb ekirsa rot ojgomuja. 12 Mar egens ongga Didif dagot rot gu iwa bera erek kef oida, iwa ita idou ongga omokorema morototuma erek Didif dudou okora rot iwa. 13 Erek osnok egens agos nou efen mohujir, beda mar egens koma bera orocunc erek ekirsa jeska mar nomnaga rot oida ofa odou okora eteb rot efen mohujir insa koma. 14 Noba erek iwa ita mar ongga Didif danggot rot gu iwa fob, beda koma omorocunc rot oida iwa bera erek dedin edohujir ongga tenten. 15 Didif dinejeka iwa erek rusnok ongga rufij rerin ebirfaga deika guru. Jeska rusnok ongga rufij rerin ebirfaga bera rinejginaga rot mar ongga ofa otunggom guru. Tina Didif dijeka iwa erek dedin edohujir ojgomu. Jeska Didif dimfesij rot mar nomnaga ongga Didif dingg jeska Akeina gu iwa fob. 16 Iwa inocunc Didif erek yeyin ihuj egens guru. Tina Didif bera ongga duncunc iwa erek dedin edohujir fob. Noba Didif dubk iwa jeskaseda ija noba itunggom mar ongga oufamofa gij yeyin iteij ah kef. Mar ongga oufamofa insa koma bera emah rot mona ongga ah aibin ojgomuja. Beda gij mona ongga iwa irejgei mar gu Allah oisouska dedin dufoka, beda Ofa emeita mar insa koma gu iwa si. 17 Mar egens ongga Didif dagot rot gu iwa bera oida, iwa ita idou ongga omokorema ojgomuja." 18 Erek koma beda Yesus efesij deika gu efen ruforoker oida, "Erek rusnok mebif rudou oska rot iwa, beda idou ah keingg rot oida sismeni bera rudou oska rot Didif fob. 19 Erek iwa ita idou ongga egens jera rusnok mebif, beda rua rudou okora rot iwa tein morototuma erek rudou okora rot rusnok enjgineg ongga mebif efen. Didif duncunc iwa fob jeskaseda ineja erek egens jera rusnok mebif deika guru. Jefeda ebeibeyaif rusnok mebif rudou oska rot iwa tein. 20 Iwa idou ah keingg rot mar ongga Didif danggot sis fob oida, osnok egens ongga ofij efen ebirfaga bera onofoka aksa ekirsa jeska efen ebirfaga insa koma guru. Jefeda erek koma tein, erek rusnok rutunggom mar ongga oska gu Didif ongga direk yeyin ebirfaga, beda rua rumotunggom mar ongga oska skoita iwa tein si. Noba erek rusnok ruroru mar ongga Didif duftuftu fob, beda rua rumororu mar ongga iwa yuftuftu tein si. 21 Rua rimeita mar insa koma nomnaga gu iwa jeska iwa bera erek dedin rusnok ongga ruroru Didif fob. Jeska rua rinejginaga rot Ofa ongga ombk Didif fob guru. 22 Erek Didif dinen jeskaseda difesij mar gu rua guru, beda rerin mar ongga oska enah gu rua tein guru. Tina Didif dimfesij mar gu fob, noba rua rukoja rot mar insa koma ojgomu. Jefeda rerin mar ongga oska enah gu rua ojgomuja. 23 Noba osnok egens ongga odou oska rot Didif, beda ofa tein odou oska rot dedin Akeina. 24 Didif duntunggom mar onswos ofoukou gu rifekesa fob. Rusnok enjgineg runotunggom mar erek insa koma jinaga guru. Noba erek Didif dunotunggom mar insa koma guru, beda rerin mar ongga oska enah gu rua ojgomuja guru. Tina rua ringk mar insa koma ongga Didif duntunggom fob. Erek koma tina rua rudou oska rot Didif jera dedin Akeina tein ojgomu. 25 Erek koma tina rua rita mar erek insa koma ojgomu jeskaseda mar ongga nabi runggu gij Mar Efeyi Ebsi sis eteb fob bera emah gij efera si. Mar ongga runggu rot bera oida, 'Didif dineita mar egema tein ongga oska fogora rudou oska rot Didif guru, tina rudou oska rot Didif ojgomu.' 26 Didif dumobk Ofa ongga omofij iwa si. Ofa emen jeska dedin Akeina. Ofa bera Efena Ebsi ongga ocunc rot mar ongga tenten gij rusnok rudou efesi. Ofa bera Akeina Allah Efena Ebsi. Gij mona ongga Ofa ensaga fob, beda Ofa omocunc rot mar ongga tenten osok gij Didif. 27 Beda iwa ifesij mar ongga tenten osok gij Didif gu rusnok enjgineg tein. Jeska gij mona ongga Didif duncunc iwa erek dedin ruforoker onjoros deisef tein bera iwa iroru Didif ojgomuja fob.
1 Didif dimfesij rot mar insa koma nomnaga gu iwa fob jeskaseda idou enesiri rot guru. 2 Jeska gij mona kahma bera rusnok rumokoja iwa fogora inoira gij mod ongga rusnok rum riteij gu Allah gij deika guru. Koma tenten, jeska gij mona kahma bera rusnok rimagob rineya jeska iwa. Noba rua rumosujohu rot oida mar insa koma erek rumofij Allah. 3 Rua rimeita mar erek insa koma jeska rua rinejginaga Allah rot tenten guru. Noba rua rinejginaga Didif rot tenten tein guru. 4 Didif difesij rot mar insa koma gu iwa ebeibeyaif jeskaseda gij mona ongga iwa ik mar insa koma, beda iwa idou emah keingg rot oida Didif dinsisi joug iwa rot mar insa koma." Beda Yesus agot gu efen ruforoker deika oida, "Gij mona ongga sismeni bera Didif dinefesij gu iwa osok gij mar okum ongga rusnok rimeita gu Didif enesi. Jeska gij mona insa koma onjoros mona deisef tein bera Didif diker jera iwa ojgomuja. 5 Tina ebeibeyaif Didif duksons skoita Ofa ongga ombk Didif jah sif sis fob. Tina iwa inejeka gu Didif rot monuh ongga Didif dimeja gij guru. 6 Noba ebeibeyaif idou okum noba okora tein jeska Didif dimfesij rot mar insa koma gu iwa fob. 7 Tina erek Didif dija jeska iwa beda koma bera omofij iwa ojgomu. Jeska gij mona ongga Didif dinja fob, beda Didif dumobk Ofa ongga omofij iwa si. Noba erek Didif dineja jeska iwa guru, beda Ofa ongga omofij iwa bera enen guru. 8 Noba gij mona ongga Ofa ongga omofij iwa ensaga fob, beda Ofa omocunc gu rusnok mebif rot tenten oida rerin mar ongga oska ros. Ofa omoftuftu rua rot oida rerin mar ongga oska ros, noba rot teinefa Allah omofra mar okum eteb keingg rusnok rot rerin mar ongga oska si. 9 Ofa omocunc gu rusnok mebif rot oida rerin mar ongga oska ros, jeska rua runororu Didif enesi. 10 Ofa omocunc gu rua oida rusnok risma rudou ongga efen mar ongga oska oskiyai tein guru, jeska Didif dija skoita Allah. Beda rusnok rinek Didif deika guru. 11 Noba Ofa omocunc gu rusnok oida Allah omofra okum keingg rusnok ongga rerin mar ongga oska ros si. Jeska Ofa omfra mar okum keingg Bilis, ongga ebirfaga efena ofogog ongga angh gu mebif fob. 12 Didif dudou os dagot mar deika gu iwa, tina mar koma omorotunggom idou efesi erek okum ekirsa rot, jefeda dinagot rot mar insa koma enesi. 13 Tina gij mona ongga Ofa ongga omofij iwa en fob, beda Ofa omocunc gu iwa rot mar ongga iwa imotunggom si. Jeska Ofa bera Efena Ebsi ongga orocunc rot mar ongga tenten. Ofa onocunc rot mar ongga en jeska Ofa esinsa guru. Tina Ofa emagot rot mar ongga Ofa engg jeska Didif fob. Beda Ofa omocunc gu iwa gij idou efesi rot mar ongga emen gij mona kahma si. 14 Ofa omorocunc rot dedin dufoka ongga aksa, jeska Ofa emeg rot mar ongga Didif danggot fob, beda Ofa omocunc rot mar insa koma gu iwa gij idou efesi tein si. 15 Didif dagot rot mar insa koma ongga Efena Ebsi omocunc gu iwa jeska, mar nomnaga ongga Akeina efen bera Didif tein dedin." 16 Erek koma beda Yesus agot oida, "Erek dektek guru, beda iwa inek Didif deika guru. Noba gij mona ongga estir, beda iwa imek Didif deika si." 17 Beda rineya jeska Yesus efen ruforoker ragot moguma oida, "Mar ongga Ofa anggot insa koma bera efen ofou erek meidu? Mimif mudou enebriyi gij guru. Jeska Ofa agot oida, 'Erek dektek guru, beda iwa inek Didif deika guru. Noba gij mona ongga estir, beda iwa imek Didif deika si.' Noba Ofa tein agot oida, 'Erek koma jeska Didif dija skoita dedin Akeina.' Mar insa koma tein efen ofou erek meidu?" 18 Noba rua rijeka moguma oida, "Ofa tein agot oida, 'Gij mona ongga estir ojgomu.' Mimif mudou enebriyi gij mar insa koma efen ofou tein guri." 19 Yesus ek rot oida efen ruforoker rudou os rijeka joug Ofa rot mar insa koma efen ofou. Jefeda Ofa agot gu rua oida, "Iwa ijeka joug moguma rot mar ongga Didif danggot insa koma oida, gij mona ongga dektek guru, beda iwa inek Didif deika guru. Noba gij mona ongga estir beda iwa imek Didif deika si. 20 Ongga tenten bera, gij mona insa koma beda iwa imebisa rot noba idou omokumkum eteb rot, tina rusnok mebif rudou emefaga ouka eteb rot tein. Iwa idou omokumkum rot, tina gij mona kahma deika beda idou emerirei eteb rot. 21 Nou ongga ojaga egens engker rot efen efesa, beda ofa otkonu okora eteb rot. Jeska mona ongga efen efesa omojuj jeska ofa bera ensaga fob. Tina gij mona ongga eferetefa insa koma onjuj jeska ofa fob, beda ofa onosujohu eteb rot otkonu ongga okora insa koma deika guru. Jeska ebeibeyaif ofa odou eskeira eteb rot efen eferetefa insa koma fob. 22 Erek koma rot iwa tein. Ebeibeyaif idou okum rot jeska Didif dimeja jeska iwa. Tina Didif dimek iwa deika si. Beda gij mona insa koma idou emerirei eteb rot si. Noba enadaij nou rusnok enjgineg rutunggom mar skoita iwa fogora idou okum deika jinaga guru. 23 Gij mona insa koma bera enadaij nou iwa irejgei Didif rot mar deika guru. Jeska ongga tenten bera iwa imerejgei rot mar teisis skoita Allah oisouska dedin dufoka ojgomu. Beda Ofa emeita mar meidu ongga iwa irejgei Ofa rot si. 24 Onjoros mona deisef tein bera iwa inerejgei Allah rot mar oisouska dedin dufoka enesi. Tina ebeibeyaif iwa imerejgei rot mar ojgomu, beda Ofa emeita mar insa koma gu iwa jeskaseda idou emerirei erek eteb ekirsa rot ojgomuja." 25 Beda Yesus agot deika gu efen ruforoker oida, "Didif dira mar orocunc jeskaseda difesij rot mar insa koma nomnaga gu iwa fob. Tina gij mona kahma beda Didif dinera mar orocunc jeskaseda difesij mar gu iwa deika guru. Didif dimera oga erek giskini jeskaseda difesij mar gu iwa osok gij Akeina. 26 Gij mona insa koma beda iwa isinsa imerejgei Akeina rot mar ofoukou oisouska dedin dufoka. Didif disinsa dinerejgei mar gu Allah nou iwa deika guru. 27 Akeina Allah esinsa odou okora eteb rot iwa. Ofa odou okora eteb rot iwa jeska iwa idou okora rot Didif, noba iwa idou ororu rot oida Didif din jeska Ofa fob. 28 Didif din gu mebif jeska Akeina. Noba ebeibeyaif Didif dimeja jeska mebif noba duksons skoita Akeina." 29 Beda Yesus efen ruforoker ragot oida, "Ebeibeyaif Bua bagot mar gu memef rot buga ongga giskini ojgomu. Jeska Bua binera mar ongga erek orocunc rot deika guru. 30 Bua bijginaga rot mar ongga memef modou os mejeka rot gu Bua fob. Jefeda enadaij nou memef mejeka mar gu Bua deika guru. Jeska ebeibeyaif memef modou ejginaga rot koisoisa oida Bua budou ebriyi gij mar nomnaga fob. Koma bera orofij memef jeskaseda modou ororu rot tenten oida Bua bin jeska Allah fob." 31 Beda Yesus oroun gu rua oida, "Jefeda ebeibeyaif iwa iroru Didif rot tenten fob ei? 32 Iwa ig mar kef rot koisoisa fog oida, gij mona kahma beda iwa imemekebema. Iwa egens egens imoksons jah yeyin mod. Iwa imaha Didif jah ojgomu. Tina gij mona insa koma beda Didif dineker gu disinsiyai guru, jeska Allah bera eker morototuma jera Didif ojgomuja. 33 Didif dimfesij mar insa koma gu iwa jeskaseda iwa ita eiteij ah ongga eskeiramera. Iwa imesma ifera okora jeska rusnok mebif si. Tina yuku ifos rot ojgomu, jeska rusnok mebif rerin owesa efek bera ensiri gu Didif fob."
1 Nou ongga Yesus emfesij mar insa koma nomnaga gu efen ruforoker fob, beda Ofa eyajga gu mebaga noba om eiteij gu Allah. Ofa agot oida, "Akeina, dedin mona eimofoj adaij nou jeskaseda dagos bera ensaga fob. Bufra dedin dufoka erek aksa eteb jeskaseda dumofra bufoka erek aksa eteb tein. 2 Bua bita owesa efek ongga ekirsa jeska rusnok nomnaga rerin gu Didif fob. Bua bita dufoka erek insa koma fob jeskaseda Didif, ongga bebin ebesa, dimeita eiteij ah ongga ah aibin gu rusnok ongga Bua buroun skoita Didif erek dedin ruforoker fob. 3 Noba erek rusnok rijginaga rot Bua ongga erek Allah egens ongga tenten fob, noba rua rijginaga rot Didif Yesus Kristus, ongga Bua bumbk sis fob tein. Koma bera ongga ereita eiteij ah ongga ah aibin gu rua. 4 Didif dumfra bebin bufoka erek aksa oisouska mar nomnaga ongga Didif duntunggom gu mebif fob. Jeska Bua bera ongga bumbk Didif gu mebif sis fob. 5 Akeina, ebeibeyaif Didif dimen skoita Bua. Jefeda Didif duis gu Bua jeskaseda Bua bucunc rot dedin dufoka ongga aksa skoita rusnok mebif. Bufra dedin dufoka aksa morototuma erek nafnan nafoka ongga aksa gij mona ongga Bua bunotunggom mebif enesi. 6 Didif dumftuftu mar osok gij Bua gu dedin ruforoker insa koma ongga Bua buncunc nou Didif sis fob. Noba Bua bita rua insa koma gu Didif fob. Rua bera rugif gu dedin duga fob. 7 Noba ebeibeyaif rua rijginaga fob rot oida mar nomnaga ongga Bua bita gu Didif bera en jeska Bua. 8 Didif dimfesij rot mar nomnaga ongga Bua buncunc gu Didif fob. Noba rua ruroru mar insa koma rot tenten fob. Rua rijginaga rot tenten oida Didif din jeska Bua. Noba rua rudou ororu rot tenten oida Bua bera ongga bumbk Didif skoita mebif fob. 9 Didif dudou os dum diteij gu Bua nou rua. Tina Didif dunom diteij nou rusnok mebif ongga enjgineg guru. Didif dum diteij gu Bua nou dedin ruforoker insa koma ongga Bua bita gu Didif sis fob ojgomu. Jeska rua bera ongga Bua buncunc erek bebin rusnok fob. 10 Mar nomnaga ongga Didif dedin bera erek Bua tein bebin. Noba mar nomnaga ongga Bua bebin bera erek Didif tein dedin. Noba oisouska mar ongga rua rutunggom bera rusnok rimek rot dedin dufoka ongga aksa eteb. 11 Didif dineker gu mebif erek dektek deika guru, tina Didif dimen skoita Bua. Tina dedin ruforoker insa koma rimeker gu mebif ojgomu. Akeina ongga erek ebsi komowa eteb, Bua but joug rua rot ahais oisouska bebin bufoka ongga efen owesa efek eteb. Bebin bufoka insa koma morototuma erek dedin dufoka ongga Bua bita gu Didif fob. But joug rua jeskaseda rua riker morototuma erek egens ojgomuja. Koma erek nagef nafnan nadou ongga erek egens tein. 12 Gij mona ongga Didif dingker jera rua bera Didif dunt joug rua oisouska bebin bufoka ongga efen owesa efek eteb. Bebin bufoka insa koma bera morototuma erek dedin dufoka ongga Bua bita gu Didif sis fob. Didif dunt joug rua insa koma fob, noba osnok egens jeska rua bera eseiseifa. Ofa bera ongga emesma okum eteb ojgomu jeskaseda mar ongga runggu rot ofa gij Mar Efeyi Ebsi sis fob bera ah gij efera fob. 13 Ai juens beda Didif dimen skoita Bua. Tina Didif dum diteij rot mar insa koma ebeibeyaif jeskaseda dedin ruforoker rimesma rudou ongga erirei eteb morototuma erek Didif dudou ongga erirei eteb tein. 14 Didif dumftuftu mar ongga Bua banggot rot gu rua fob. Noba ebeibeyaif rusnok mebif rudou oska rot rua tein. Koma jeska rudou enerek egens jera rusnok mebif deika guru. Koma morototuma erek Didif ongga dudou enerek egens jera rusnok mebif guru. 15 Didif dunois gu Bua jeskaseda Bua bufra rua jeska mebif ebeibeyaif guru. Tina Didif duis gu Bua jeskaseda Bua but joug rua jeska Bilis ongga ofogog doska. 16 Rua rudou enerek egens jera rusnok mebif guru morototuma erek Didif ongga dudou enerek egens jera rusnok mebif tein guru. 17 Bua bisejah rua rudou efesi erek ebsi komowa oisouska bebin buga ongga tenten. Jeska mar ongga Bua buftuftu rot bera erek tenten ojgomu. 18 Bua bumbk Didif skoita rusnok mebif sis fob. Noba erek koma tein, ebeibeyaif Didif dumobk rua skoita rusnok mebif. 19 Didif disejah dudou efesi jeskaseda dufij Bua. Noba koma bera omofij rua tein jeskaseda rua risejah gij rudou efesi fogora rumofij Bua oisouska bebin buga ongga tenten. 20 Didif dum diteij gu Bua nou dedin ruforoker insa koma. Tina Didif dum diteij tein nou rusnok nomnaga ongga rimeg rot mar ongga dedin ruforoker rumftuftu gu rua fogora ruroru Didif tein. 21 Akeina, Didif dum diteij gu Bua jeskaseda rua riker erek egens. Koma morototuma erek nagef ongga nadou egens. Noba Didif dum diteij jeskaseda rudou eja erek egens jera nagef tein. Beda rusnok mebif rudou omororu rot tenten oida Bua bera ongga bumbk Didif fob. 22 Didif dita owesa efek gu rua morototuma erek owesa efek ongga Bua bita gu Didif fob jeskaseda rua riker erek egens ojgomuja. Koma morototuma erek nagef ongga naker erek egens ojgomuja. 23 Didif dita dudou erek egens jera rua, noba Bua bita budou erek egens jera Didif jeskaseda rua rerin rudou eja erek egens morototuma ojgomuja. Beda rusnok mebif rimejginaga rot tenten oida Bua bera ongga bumbk Didif gu mebif fob. Noba rua rimejginaga rot oida Bua budou okora rot dedin ruforoker insa koma morototuma erek budou okora rot Didif tein. 24 Akeina, Didif dudou os rot oida dedin ruforoker ongga Bua bita gu Didif fob rimeker morototuma jera Didif gij monuh ongga Didif dingker gij. Didif dudou os rot oida rua rik dedin dufoka ongga aksa eteb jah suma. Bua bera ongga bita dufoka ongga aksa insa koma gij mona ongga Bua bunotunggom mebif enesi, jeska Bua budou okora rot Didif. 25 Akeina, Bua bera ongga bita mar ongga oufamofa. Noba rusnok mebif rinejginaga rot Bua guru, tina Didif dijginaga rot Bua fob. Noba dedin ruforoker insa koma rijginaga rot oida Bua bera ongga bubk Didif gu mebif fob. 26 Didif duncunc gu rua rot bebin bita mar fob. Noba Didif dumocunc rot mar insa koma gu rua deika jeskaseda rudou omokora rot rusnok enjgineg morototuma erek Bua budou okora rot Didif. Beda rudou emeja erek egens jera Didif."
1 Erek koma beda nou ongga Yesus om eiteij gu Allah rot mar insa koma fob, beda Ofa eja morototuma jera efen ruforoker jah mei Kidron enama. Mekeni egens ongga mega zaitun efeda enah jah suma. Rua riker jah suma. 2 Yudas, ongga engkikif jeska Yesus fob, ejginaga rot mekeni egens insa koma tein, jeska Yesus enja jah suma morototuma jera efen ruforoker erek ofosma ofoukou sis fob. 3 Jefeda Yudas oroun tentarer ebic egens jera rusnok enjgineg tein ongga ebirfager imam-imam noba ebirfager Farisi rubk jah suma. Rusnok insa koma rurka mah eisa, jera lampu, jera rerin meiteb aksa tein. 4 Yesus ejginaga rot mar nomnaga ongga ai juens rumotunggom skoita Ofa. Jefeda Ofa ojorodosu rua noba agot gu rua oida, "Iwa bera yuhca idu?" 5 Beda rua ruroun gu Ofa oida, "Memef mohca Yesus ongga ojga jeska kota Nazaret." Beda Yesus agot gu rua oida, "Didif bera Ofa." (Ainsa koma tein Yudas ot jah suma morototuma jera rusnok insa koma.) 6 Nou ongga Yesus anggot oida, "Didif bera Ofa," skoita rua, beda rua risesif jah rijmeg noba risiri gu mebif. 7 Beda Yesus ejeka gu rua deika oida, "Iwa bera yuhca idu?" Beda rua ragot oida, "Memef mohca Yesus ongga ojga jeska kota Nazaret." 8 Beda Yesus agot oida, "Didif danggot ainsa koma gu iwa fob oida Didif bera Ofa." Iwa yuhca Didif ojgomu, jefeda isuwa dedin ruforoker kef ojgomu. 9 Rua rusuwa Yesus efen ruforoker. Beda mar koma ah jeni erek mar ongga Yesus anggot rot sis fob oida, "Rua ongga Akeina Allah eita gu Didif bera eneseiseifa guru," koma bera angh gij efera fob. 10 Erek koma beda gij mona insa koma Simon Petrus orka efen meiteb aksa tein. Jefeda ofa eita efen meiteb eragob osnok egens jeska rusnok ongga rin skoita Yesus insa koma fogora efen osu jah ognosk esiri jeska. Ofa bera osnok egens ongga omfij ebirfaga imam-imam ongga ofoka aksa. (Ofa efen ofoka Malkus). 11 Beda Yesus agot gu Petrus oida, "Bua bisah bebin meiteb ojgomu. Didif dunoku jeska mona eimofoj insa kef ongga dimesma difera okora gij guru. Jeska mar insa kef bera ororu Akeina odou ejginaga rot fob." 12 Erek koma beda tentarer insa koma jera rerin komandan jera rusnok Yahudi ongga runt joug Mod Allah ragei Yesus gij mekeni insa koma. 13 Rua rirakid efen etma beda oroun Ofa skoita imam egens ongga ofoka Hanas. Hanas bera ongga imam egens enjgineg ongga ofoka Kayafas efen mefina. Kayafas bera erek ebirfaga imam ongga ofoka aksa gij tahun insa koma. 14 Kayafas bera ongga anggot gu ebirfager Yahudi sis fob oida, ongga oufa ekirsa nou rua bera osnok egens agos nou rusnok Israel nomnaga ojgomu. 15 Erek koma beda Simon Petrus jera didif gotoij Yesus jah ejmeg. Didif dijginaga ebirfaga imam-imam egens koma fob, jefeda didif dutoij Yesus gij momas ongga ah rejrej mod egens ongga imam insa koma engker gij. 16 Tina Petrus eker jah mebah doida montoj. Beda didif durogna jeska momas insa koma, noba dagot mar gu ojaga egens ongga ot joug montoj insa koma. Beda didif duroun Petrus gij momas insa koma tein. 17 Erek koma beda ojaga egens insa koma agot gu Petrus oida, "Bua bera Yesus efen oforoka egens tein ei?" Beda Petrus oroun gu ofa oida, "Erek koma guru." 18 Motu insa koma erek meifina, jefeda rusnok ongga rumfij imam-imam jera rusnok ongga rut joug imam-imam rukub mah. Noba rua rut rejrej mah efembra insa koma. Petrus ot gu mah efembra insa koma tein. 19 Erek koma beda ebirfaga imam-imam ongga ofoka aksa ejeka joug Yesus osok gij efen ruforoker noba osok gij mar ongga Yesus oftuftu gu rusnok. 20 Beda Yesus oroun gu ofa oida, "Didif dimfesij mar rot tomnomna gu rusnok fob. Didif duftuftu mar gij mod ongga rusnok rum riteij gu Allah gij fob, noba Didif dumftuftu mar gij Mod Allah tein fob. Rusnok Yahudi rufoukou ongga ruhoturu jah suma bera ringg mar jeska Didif fob. Didif dinefesij mar ongga didemi jeska rusnok enjgineg tein jinaga guru. 21 Jefeda iwa ijeka joug Didif rot meidu? Iwa ijeka joug rusnok ongga ringg mar ongga Didif dumftuftu fob ojgomu. Rua bera ongga rijginaga rot mar ongga Didif dimfesij fob." 22 Nou ongga Yesus anggot mar insa koma fob, beda osnok egens ongga ofij imam-imam obu Yesus gu osum. Beda ofa agot gu Yesus oida, "Enadaij nou Bua bagot mar rot buga erek koma gu ebirfaga imam-imam ongga ofoka aksa guru!" 23 Beda Yesus agot gu ofa oida, "Erek Didif danggot mar ongga oska rot, beda bucunc rot ojgomu. Tina enadaij nou bua bubu osnok egens ongga efesij mar ongga tenten guru." 24 Beda imam Hanas insa koma obk Yesus rot efen etma ongga rirakid fob skoita imam Kayafas ojgomu. 25 Erek koma beda askesi Petrus ot gu mah efembra insa koma, beda rusnok jah suma ragot oida, "Bua bera osnok egens ongga ororu Yesus tein ei?" Tina Petrus oroun oida, "Erek koma guru." 26 Osnok egens ongga omfij ebirfaga imam-imam ongga ofoka aksa ot jah suma tein. Ofa efen mokosa ongga Petrus era meiteb eris efen osu fob. Ofa agot gu Petrus oida, "Didif dik bua but morototuma jera Yesus gij mekeni fob." 27 Tina Petrus orot keingging juens deika rot oida mar ongga osnok egens insa koma anggot fob bera erek tenten guru. Beda ainsa koma tein mongkukar orna egens oga fob. 28 Gij rahah tentena beda rusnok insa koma ruroun Yesus jeska Kayafas efen mod skoita Gubernur gij monuh insa koma efen mod. Rua risinsa runoira gij Gubernur efen mod guru. Jeska Gubernur insa koma bera erek rusnok ongga Yahudi guru. Noba ororu rusnok Yahudi rerin agama erebent bera erek rua ruira gij rusnok ongga Yahudi guru rerin mod, beda koma orotunggom rua erek oska. Beda koma tein eragou joug rua fogora rinet maat jera rusnok Yahudi nou mona eteb ongga ofoka Paskah gij mona insa koma tein guru. 29 Jefeda Gubernur Pilatus orogna jeska efen mod jeskaseda efesij mar jera rusnok insa koma. Beda ofa agot gu rua oida, "Iwa icunc Ofa rot efen mar ongga oska erek meidu?" 30 Beda rua ruroun oida, "Erek Ofa eneita mar ongga oska guru, beda memef monoroun Ofa skoita bua guru." 31 Beda Pilatus agot oida, "Iwa yagei Ofa ojgomu, noba icunc rot efen mar ongga oska ororu isinsa yeyin agama erebent ojgomu." Beda rua ragot oida, "Tina mefmen owesa efek jeskaseda moga ojga rot oida Ofa agos rot efen mar ongga oska bera enah guru." 32 (Nou ongga rua ranggot mar insa koma, beda mar koma angh gij efera fob jeni erek Yesus anggot rot teinefa Ofa emagos sis fob). 33 Erek koma beda Pilatus oira sons gij efen mod efesi noba ejeka joug Yesus oida, "Bua bera rusnok Yahudi rerin raja ei?" 34 Beda Yesus ejeka gu ofa oida, "Bua bisinsa budou os bijeka Didif rot mar koma ei, era rusnok enjgineg ranggot rot mar insa koma gu bua fob ei?" 35 Beda Pilatus oroun oida, "Didif dinerek rusnok ongga Yahudi guru. Bua bebin rusnok jera bebin ebirfager imam-imam ongga ruroun Bua skoita Didif ojgomu. Bua buntunggom mar ongga oska fob erek meidu?" 36 Beda Yesus oroun oida, "Dedin owesa efek erek raja bera enen jeska mebif guru. Erek dedin owesa efek ongga en jeska mebif, beda dedin rusnok rimagobuma jera rua ongga Yahudi insa koma jeskaseda rinagei Didif guru. Tina guru, jeska dedin owesa efek erek raja bera en jeska monuh enjgineg ojgomu." 37 Beda Pilatus agot gu Yesus oida, "Jefeda Bua bera erek raja egens ei?" Beda Yesus oroun oida, "Bua bera ongga bagot oida Didif direk raja egens. Didif dunjuj jeska dedin ameina erek osnok mebif egens jeskaseda difesij rot mar ongga tenten gu rusnok. Noba rusnok nomnaga ongga rudou os ruroru mar ongga tenten bera rig rot dedin duga." 38 Erek koma beda Pilatus agot gu Yesus oida, "Meidu bera erek mar ongga tenten?" Nou ongga ofa anggot mar insa koma, beda ofa oksons skoita rusnok Yahudi. Beda ofa agot gu rua oida, "Didif dijeka joug osnok egens insa koma fob, tina didif dinek rot efen mar ongga oska egema tein guru. 39 Tina ororu yeyin erebent egens gij mona ongga Paskah bera didif dumosuwa yeyin osnok egens jeska mod oskusk. Jefeda iwa idou os rot oida didif dusuwa Ofa ongga erek raja Yahudi ei?" 40 Beda rusnok insa koma ruis oida, "Bunosuwa Ofa guru. Bua busuwa Barabas ojgomu." (Barabas bera osnok egens ongga oh mosoruk ofoka skoita raja Kaisar sis fob.)
1 Erek koma jefeda Pilatus obk efen tentarer jeskaseda ruroun Yesus orogna beda rangha Ofa. 2 Beda tentarer insa koma rahaisomu rot Yesus fogora rua rira mega mofun efetma ongga ofogog noba rirajgej Yesus ebirfaga. Beda rua rita meifeti ongga efeb titnetna ekeni ofom ahta erek raja ergi tumu Yesus. 3 Beda rua ruis oida, "Memef mougif gu Bua ongga raja Yahudi." Rua rutunggom mar ongga oska erek insa koma ofosma ofoukou. Noba rua rubu Ofa osum tein. 4 Erek koma beda Pilatus eja skoita rusnok Yahudi juens deika beda agot gu rua oida, "Iwa ik, jeska didif dumoroun Yesus skoita iwa. Didif dudou os jeskaseda iwa ijginaga rot oida didif dinek rot efen mar ongga oska egema tein guru." 5 Jefeda tentarer insa koma oroun Yesus skoita Pilatus. Mofun efetma ongga ofogog bera ah esij Yesus ebirfaga ros, noba meifeti ongga erek raja rirgi bera angh tumu Ofa ros. Beda Pilatus agot oida, "Iwa ik Ofa kef." 6 Nou ongga ebirfager imam-imam jera rua ongga runt joug Mod Allah rik Yesus, beda rua ruis oida, "Yutob Ofa tumu mega salib ojgomu!" Rua ruis mar insa koma ojgomuja. Tina Pilatus agot gu rua oida, "Iwa yutob Ofa tumu mega salib ojgomu, tina didif disinsa dinek rot Ofa efen mar ongga oska jinaga guru." 7 Beda rua ongga Yahudi ruroun oida, "Ofa anggot rot oida Ofa bera Allah efen efesa. Noba ororu mifmin hukum agama bera Ofa agos rot mar insa koma ojgomu." 8 Nou ongga Pilatus eg rot mar insa koma, beda ofa odou emeesa rot eteb ekirsa. 9 Ofa oira sons gij efen mod beda ejeka gu Yesus oida, "Bua bin jeska guaidu?" Tina Yesus onoroun mar sons gu ofa guru. 10 Beda Pilatus agot oida, "Teinefa fogora Bua binagot mar gu didif guru. Jeska didif dedin owesa efek jeskaseda dusuwa Bua era bagot rot oida rutob Bua tumu mega salib." 11 Beda Yesus agot oida, "Bebin owesa efek jeskaseda buga ojga rot Didif bera en jeska Allah ojgomu. Noba rua ongga rurka Didif skoita bua bera rerin mar ongga oska erek ekirsa jeska bua bebin mar ongga oska." 12 Nou ongga Yesus anggot mar insa koma fob, beda Pilatus odou os osuwa Ofa ojgomu. Tina rusnok Yahudi ruis oida, "Erek bua busuwa Ofa, beda koma orocunc rot oida budou onororu raja Kaisar oga rot tenten guru. Jeska raja Kaisar agot oida osnok egens ongga ofra esinsa ofoka erek raja egens bera engkirsa rot ofa efen hukum tein." 13 Nou ongga Pilatus engg rot mar ongga rua ranggot insa koma fob, beda ofa oroun Yesus jah kursi egens ongga Gubernur engker esij gij mona ongga ofa oga ojga rot rusnok rerin mar ongga oska. Kursi insa koma angh gij monuh egens ongga ofoka Semfag Mamu. (Gij Yahudi oga monuh insa koma efen ofoka Gabata.) 14 Mona insa koma bera mona ongga rusnok Yahudi risejah mar nou Paskah. Rua rinsaga gu kursi insa koma erek mowa ot deis fob. Beda Pilatus agot gu rusnok Yahudi oida, "Kef bera yeyin raja." 15 Tina rua ruis oida, "Burka Ofa jeska ojgomu, noba intob Ofa tumu mega salib ojgomu!" Rua ruis mar insa koma ojgomuja. Beda Pilatus agot gu rua oida, "Teinefa fogora iwa idou os oida didif dutob yeyin raja kef tumu mega salib erek komo?" Beda rua ongga ebirfager imam-imam ragot oida, "Mefmen raja egens ojgomu, noba ofa bera ofoka Kaisar!" 16 Erek koma jefeda Pilatus eita Yesus gu rua jeskaseda rutob Ofa tumu mega salib. Jefeda tentarer jah suma ruroun Yesus jeskaseda rutob Ofa tumu mega salib. 17 Rua raha mega salib eteb esij Yesus ejmeg jeskaseda Ofa esinsa orka mega insa koma jah monuh egens ongga rijeka oida, Monuh Mosta Ebirfaga Oboha. (Gij Yahudi oga bera rijeka monuh insa koma oida Golgota.) 18 Beda rua rutob Yesus tumu mega Salib jah suma. Noba rua rutob gosnok gegeka tumu mega salib jah suma morototuma jera Yesus tein. Rua rutob egens jeska goga jah Yesus ognosk, noba gegema jah Yesus egris. 19 Noba Pilatus onggu mar gij papan beda rua raha papan insa koma tumu mega salib ongga runtob Yesus tumu. Mar ongga ofa onggu tumu papan koma agot oida, "" 20 Noba rusnok Yahudi rufoukou rik mar ongga ofa onggu gij papan insa koma jeska ofa onggu mar insa koma gij Yahudi oga jera Latin oga jera Yunani oga. Noba monuh ongga rua runtob Yesus tumu salib gij bera ah doida kota Yerusalem. 21 Beda ebirfager imam-imam Yahudi ragot gu Pilatus oida, "Bua bunogu gu papan rot oida Ofa bera raja Yahudi erek koma guru. Tina bugu rot oida Ofa ejeka esinsa erek Raja Yahudi ojgomu." 22 Beda Pilatus oroun gu rua oida, "Mar ongga didif dunggu rot bera ah erek koma ojgomu." 23 Nou ongga tentarer runtob Yesus tumu mega salib fob, beda rua rita Yesus efen meisoufa noba rikeba erek tohkuru jeskaseda rua egens egens rita egema tein morototuma. Noba rua tein rita efen meifeti egens ongga aksa. Meifeti insa koma bera ongga osnok egens eb meifeti, tina efen ofofu erek efetma enah gij guru. 24 Jefeda tentarer insa koma ragot oida, "Enadaij nou mimif mikris meifeti insa kef ongga oufamofa guru. Jefeda mimif mita mar egens ongga omorocunc rot oida idu jeska mimif bera emesma meifeti kef." Mar ongga rua runtunggom insa koma bera angh gij efera jeni erek runggu gij Mar Efeyi Ebsi sis fob. Jeska runggu gij Mar Efeyi Ebsi sis eteb fob osok gij Yesus oida, "Rua rikeba dedin meisoufa orofosut egens egens. Noba rua rutunggom mar egens jeskaseda rik rot oida idu jeska rua bera rimesma dedin meisoufa." Jefeda mar ongga tentarer runtunggom insa koma fob bera ah jeni erek runggu gij Mar Efeyi Ebsi sis fob. 25 Yesus efen mosu jera efen mokosa jera Maria ongga Klopas efen mohona jera Maria jeska Magdalena, rua nomnaga runt doida Yesus, ongga angh tumu mega Salib. 26 Nou ongga Yesus ek efen mosu jera didif, ongga Ofa odou okora rot, beda Ofa agot gu magef oida, "Ameina, ofa kef bera erek bebin ebesa." 27 Beda Ofa agot gu didif oida, "Ofa kef bera erek bebin mosib." Jefeda gij mona insa koma didif duroun Yesus efen mosu jeskaseda ofa eker gij dedin mod. 28 Erek koma beda Yesus ejginaga rot oida mar nomnaga bera oisa fob. Beda Ofa agot oida, "Magon en Didif." Ofa agot mar insa koma jeskaseda mar ongga runggu gij Mar Efeyi Ebsi rot mar insa koma bera emah gij efera jeni erek runggu sis fob. 29 Jah suma bera osnok egens efen mok osku ongga rutkinaja anggur efei ongga ekemba gij. Jefeda tentara egens ec meifeti gij anggur efei insa koma. Beda ofa erajgej meifeti insa koma tumu mega hisop efetma egens. Beda ofa osk mega efetma rot meifeti insa koma gu Yesus awesi jeskaseda ej. 30 Nou ongga Yesus omna anggur efei ongga ekemba insa koma oskiyai, beda Ofa agot oida, "Mar nomnaga oisa fob." Beda Ofa efen ebirfaga ojuj noba Ofa agos fogora aha efeni gij fob. 31 Mona insa koma bera mona ongga rusnok Yahudi risejah mar nou mona ongga Sabat ongga doida enesaga fob. Tina mona ongga Sabat insa koma bera erek ofoufem ekirsa jeska giskini. Noba rusnok Yahudi runodou os oida rusnok rifaga enah tumu mega salib gij mona ongga Sabat guru. Jefeda rua rirejgei Pilatus jeskaseda ofa obk efen tentarer fogora riyah rusnok raki ongga angh tumu mega Salib ros. Beda rua rimagos ebeirens fogora tentarer ridaga rifaga jeska mega salib. 32 Jefeda tentarer rin noba riyah osnok egens aki ongga angh tumu mega Salib jah suma. Beda rua riyah osnok ongga egeka aki tein ongga angh tumu mega salib doida Yesus. 33 Tina nou ongga tentarer insa koma rin skoita Yesus, beda rua rik oida Ofa agos fob. Jefeda rua rineyah Yesus efen aki guru. 34 Tina tentara egens jeska rua era efen meitefa oroduis Yesus gij efembra. Beda ainsa koma tein ogufu jera mei eya jeska Yesus efaga. 35 (Osnok egens ongga engk rot mar insa koma fob bera ongga emfesij rot gu memef. Ofa bera erek osnok egens ongga efesij mar ongga tenten ojgomu. Noba ofa ejginaga rot oida mar ongga ofa emfesij rot insa koma bera erek tenten tein ojgomu. Noba ofa efesij rot mar insa koma jeskaseda iwa tein idou ororu rot.) 36 Mar insa koma nomnaga encira fob jeskaseda mar ongga runggu gij Mar Efeyi Ebsi sis fob bera angh gij efera erek jeni fob. Jeska sis fob runggu rot oida, "Ofa efen ofora egema tein enebs guru." 37 Noba mar enjgineg ongga runggu gij Mar Efeyi Ebsi sis fob bera erek kef oida, "Rua rurumba gij Ofa ongga rusnok ruduis fob." 38 Osnok egens ongga ofoka Yusuf ongga ojga jeska kota Arimatea en skoita Pilatus noba erejgei ofa jeskaseda Pilatus eita Yesus efaga gu ofa. (Yusuf bera osnok Yahudi egens ongga ororu Yesus fob. Tina ofa edemi mar insa koma gij odou efesi jeska ofa emeesa rot ebirfager Yahudi.) Pilatus oitij rot, jefeda Yusuf eja noba orka Yesus efaga jeska. 39 Noba Nikodemus, ongga orodosu Yesus gij motu egens sis fob, ofij Yusuf gij motu insa koma. Ofa orka miniyi ongga efen ensesa erek kilo setka orgomu jah suma. 40 Goga gedaga Yesus efaga beda gos miniyi insa koma esij Yesus efaga. Beda goga gera meifeti gorond Yesus efaga. (Rusnok Yahudi risejah rusnok ongga ranggos rifaga erek koma fogora risah gij moksu.) 41 Mekeni egens enah doida monuh ongga runtob Yesus tumu mega salib gij. Noba gij mekeni insa koma bera rusnok runtunggom moksu egens ongga erek mansu fob. Noba rua rinesah mar agos gij mansu efesi insa koma enesi. 42 Goga gesah Yesus efaga gij mansu egens insa koma jeska mansu koma bera ah doida kota. Noba goga godou os gotunggom mar insa koma rot ebeirens jeska ai juens beda Yahudi efen mona ongga Sabat enesaga. Noba goga gocosu rot gesejah mar ororu rerin agama erebent nou mona ongga Sabat insa koma.
1 Erek rahah tentena beda Maria ongga jeska Magdalena eja jah Yesus efen moksu. Noba erek motkobah ros. Nou ongga ofa ensaga jah suma beda ofa ek, tina mamu eteb egens onof joug Yesus gij moksu awesi deika guru. 2 Jefeda ofa ofof skoita Simon Petrus jera didif, ongga Yesus efen oforoka egens ongga Ofa odou okora rot, jeskaseda efesij rot mar insa koma gu magef. Ofa agot gu magef oida, "Rusnok rineya rurka Yesus efaga jeska efen moksu fob. Noba memef menejginaga rot monuh ongga rua raha efen efaga gij guru." 3 Jefeda Petrus jera didif mafof skoita Yesus moksu. 4 Tina didif dufof ebeirens jefeda disaga rot sismeni gu Yesus moksu. 5 Beda didif dugif noba dugog joug gij mamu efesi. Didif dik meifeti jah suma, tina dunoira guru. 6 Beda Simon Petrus ensaga jah suma. Ofa oira gij moksu beda ek meifeti jah suma tein. 7 Noba ofa ek meifeti ongga rusnok rira nou rirajgej Yesus ebirfaga tein. Meifeti insa koma erek oug fob noba ah ai yes jeska meifeti ongga enjgineg insa koma. 8 Beda didif tein duira gij moksu. Didif dik mar insa koma beda dudou ororu rot oida Yesus endebecki jeska anggos rot tenten fob. 9 (Memef modou enebriyi gij mar ongga nabi runggu gij Mar Efeyi Ebsi ongga agot oida Yesus emedebecki jeska anggos enesi.) 10 Erek koma beda magef maksons jah mefmen mod. 11 Tina Maria ot jah moksu insa koma gu mebah noba ebisa ojgomuja. Askesi ofa ebisa ros, beda ofa ougif noba ek gij mansu efesi. 12 Beda ofa ek malaikat egeka ongga ergi meisoufa ongga erek ebsi komowa. Goga geker esij mofka ongga rangha Yesus efaga gu neeka fob. Egens eker jah mofka agosu, noba egens eker jah mofka emaga. 13 Beda goga gejeka gu Maria oida, "Asoka, bua bibisa rot meidu?" Beda ofa agot gu goga oida, "Rusnok rineya rurka dedin Tuhan efaga jeska moksu fob, noba didif dinejginaga rot monuh ongga rua rangha efen efaga gij guru." 14 Nou ongga Maria anggot mar insa koma, beda ofa ekikif noba ek Yesus onot jah suma. Tina ofa enejginaga rot oida Ofa bera Yesus enesi. 15 Beda Yesus agot gu ofa oida, "Ojaga, bua bibisa rot meidu? Bua buhca idu?" Ofa osujohu rot oida Yesus bera osnok egens ongga ot joug mekeni jah suma, jefeda ofa agot oida, "Tuan, Bua bera ongga burka Yesus efaga jeska fob ei. Bua burka efen efaga jah sinefo? Bagot gu didif jeskaseda dijeita efen efaga ojgomu." 16 Beda Yesus agot gu ofa oida, "Maria." Beda Maria eyajga Yesus noba agot gij Yahudi oga oida, "Rabuni!" (Koma efen ofou erek Guru.) 17 Beda Yesus agot gu ofa oida, "Bua binagei Didif guru, jeska Didif dineja skoita dedin Akeina enesi. Tina bua bija noba bagot rot gu dedin edohujir. Bagot gu rua oida Didif dumoksons skoita dedin Akeina ongga erek iwa tein yeyin Ika, noba skoita dedin Allah ongga erek iwa tein yeyin Allah." 18 Beda Maria eja agot gu Yesus efen ruforoker oida, "Didif dik Tuhan fob!" Noba ofa agot gu memef rot mar ongga Yesus anggot insa koma gu ofa fob. 19 Nou ongga erek motkobah fob beda memef, ongga Yesus efen ruforoker, momohoturuma fob. Memef mof joug montoj mod rot ahais fob, jeska memef memeesa rot ebirfager Yahudi. Beda Yesus orogna keingg memef noba ot gu mefekesa. Beda Ofa agot gu memef oida, "Didif duis gu Allah jeskaseda Ofa eita idou ongga eskeira gu iwa." 20 Beda Ofa ocunc efen etma jera efembra gu memef. Nou ongga memef mek Ofa, beda modou efaga ouka eteb rot. 21 Beda Yesus agot gu memef juens deika oida, "Didif duis gu Allah jeskaseda Ofa eita idou ongga eskeira ojgomu. Sis fob Akeina obk Didif jah mebif. Noba erek koma tein Didif dubk iwa skoita rusnok enjgineg." 22 Nou ongga Ofa anggot mar insa koma fob, beda Ofa ofc gu rua beda agot oida, "Iwa isma Efena Ebsi ojgomu. 23 Erek iwa isuna rot rusnok enjgineg rerin mar ongga oska, beda ahah Allah eiteij bera rerin mar insa koma onsuna rot tenten fob. Noba erek iwa inosuna rot rusnok enjgineg rerin mar ongga oska guru, beda ahah Allah eiteij bera rerin mar ongga oska insa koma enah gu rua ros." 24 Nou ongga Yesus ocunc esinsa gu memef ongga erek efen ruforoker fob, beda Tomas (ongga rijeka ofoka Kembar tein) bera enofogu jah suma guru. 25 Dansusk beda memef mefesij gu Tomas rot oida memef mek Tuhan Yesus fob. Tina Tomas agot gu memef oida, "Didif dudou onororu mar ongga iwa inagot gu didif guru. Erek didif disinsa dik Yesus efen efen ofamosma tumu etma, noba dahtec efera ofamosma jeska paku, noba dahtec efera ofamosma jeska meitefa ongga ruroduis Ofa efembra, beda didif tein dumororu rot oida Ofa efena ebah sons si." 26 Erek ari egens deika memef momohoturuma gij mod egens. Noba Tomas tein enofoguma jera memef gij mona insa koma. Memef mof joug montoj rot ahais fob. Tina Yesus orogna jah suma noba ot jah mefekesa deika. Beda Ofa agot gu memef oida, "Didif duis gu Allah jeskaseda Ofa eita idou ongga eskeira gu iwa ojgomu." 27 Beda Ofa agot gu Tomas oida, "Tomas, bua bik dedin ditma, noba bahtec dedin difera ofamosma. Noba bahtec dedin difera ofamosma gu difembra." Beda Ofa agot deika gu Tomas oida, "Tomas, bua bineita budou ongga egeka erek koma guru. Tina bua buroru rot tenten ojgomu." 28 Beda Tomas agot gu Yesus oida, "Bua bera dedin Tuhan jera Allah." 29 Beda Yesus agot gu ofa oida, "Bua budou ororu oida Didif difena ebah sons fob jeska bua bik Didif gu bisinsa biteij fob. Tina ongkoska eteb nou rusnok ongga rinek Didif guru, tina rudou ororu oida Didif difena ebah sons fob." 30 Yesus orocunc mar onswos ofoukou deika ongga memef mek gu meiteij tein fob. Tina didif dinefesij rot mar insa koma nomnaga gij surat Injil Efeb kef guru. 31 Tina mar nomnaga ongga didif dunggu rot gij surat kef bera jeskaseda iwa imororu rot tenten oida Yesus bera Kristus egens koma ongga en fob. Noba Ofa bera erek Allah efen efesa rot tenten tein. Noba erek iwa iroru mar insa koma nomnaga, beda iwa imesma eiteij ah ongga efeinah oisouska Yesus Kristus efen ofoka si.
1 Gij mona ongga egema deika, beda Yesus ocunc esinsa gu memef ongga erek efen ruforoker deika. Ofa ocunc esinsa gu memef gu meren Galilea. Ofa ocunc esinsa erek kef oida, 2 rineya jeska memef meker morototuma jah meren Galilea efembra. Memef insa koma bera didif Yohanes ni, Simon Petrus ni, Tomas (ongga rijeka Kembar) ni, Natanael ongga ojga jeska Kana gij monuh Galilea ni, Zebedus efen efesa ni, jera Yesus efen goforoker egeka enjgineg tein. 3 Erek koma beda Simon Petrus agot oida, "Didif dimeja jah meren ogbug jeskaseda duhca mos." Beda memef ongga enjgineg jah suma magot oida, "Memef tein mororu bua." Jefeda memef nomnaga meifef meg beda meja jah meren ogug. Memef mohca mos nou motu insa koma, tina menagei egema tein guru. 4 Erek rahah tentena beda Yesus orogna jah suma noba ot gu meren efembra. Tina memef menejginaga rot oida Ofa koma bera Yesus enesi. 5 Beda Ofa ois gu memef oida, "Edohuji, iwa yagei mos fob ei?" Beda memef moroun oida, "Guru." 6 Beda Ofa agot oida, "Iwa ij yeyin jala jah meg ognosk ojgomu, beda iwa imagei mos egema." Jefeda memef motunggom jeni erek koma, beda memef magei mos ofoukou doska. Erek enadaij nou memef mofra jala insa koma jeska mei gij meg efesi guru, jeska mos ofoukou insa koma bera erek okum eteb doska. 7 Beda didif, ongga Yesus efen oforoka egens ongga Ofa odou okora rot, dagot gu Petrus oida, "Ofa koma bera Tuhan Yesus!" Nou ongga Petrus eg didif dagot mar insa koma, beda Ofa ergi efen meisoufa sons. (Ofa ergi meisoufa erek oskiyai gij meg ojgomu). Beda ofa osoka gij mei jeskaseda eja skoita Yesus. 8 Beda memef ongga Yesus efen ruforoker rineya meifef meg sons gu meren efembra. Noba memef moku mefmen jala ongga ebera rot mos insa koma jah ejmeg. Gij mona insa koma memef meker erek meter wuntin egens jeska meren efembra. 9 Nou ongga memef nomnaga monjuj jeska meg gu mei efembra, beda memef mek mah efesi. Noba mos enah gu mah efesi insa koma. Noba roti enah jah suma tein. 10 Beda Yesus agot gu memef oida, "Iwa yurka mos egema ongga yanggei fob." 11 Beda Simon Petrus oira gij meg insa koma noba oku jala ongga ebera rot mos eteb gu mebsta. Memef mofosuit mos gij jala insa koma. Noba mos ongga efaga eteb bera erek wuntin egens noba setka cinja noba orgomu. Noba mefmen modou oubsaha rot tein jeska erek mos eteb ofoukou doska, tina mefmen jala enebga jinaga guru. 12 Beda Yesus agot gu memef oida, "Iwa it maat kef ojgomu." Beda memef nomnaga menejeka gu Yesus oida, "Bua bera idu," erek koma guru. Jeska memef nomnaga mejginaga fob oida Ofa bera Tuhan Yesus. 13 Beda Yesus eita roti ofog egens jera mos noba eita maat insa koma gu memef fogora met. 14 Sis mona ongga Ofa endebecki jeska agos fob, beda mona insa koma bera erek ofosma orgomu ongga Ofa oncunc esinsa gu memef ongga efen ruforoker fob. 15 Nou ongga memef met maat insa koma oisa fob, beda Yesus agot gu Petrus oida, "Simon ongga Yona efen efesa, bua budou okora rot Didif ekirsa jeska bebin obohujir insa kef rudou okora rot Didif ei?" Beda Petrus oroun oida, "Tuhan, Bua bijginaga fob rot oida didif dudou okora eteb rot Bua." Beda Yesus agot oida, "Erek koma beda bua but joug rusnok koma ongga erek dedin domba-domba nomnaga." 16 Beda Yesus agot juens deika oida, "Simon ongga Yona efen efesa, bua budou okora rot Didif ei?" Beda ofa oroun oida, "Tuhan, Bua bijginaga fob rot oida didif dudou okora eteb rot Bua." Beda Yesus agot oida, "Erek koma beda bua but joug rusnok koma ongga erek dedin domba-domba nomnaga." 17 Beda Yesus agot rot ofosma juomu deika oida, "Simon ongga Yona efen efesa, bua budou okora rot Didif ei?" Beda Petrus odou okumkum jeska Yesus ejeka gu ofa rot mar insa koma erek ofosma juomu fob. Beda ofa agot gu Yesus oida, "Tuhan, Bua bijginaga rot mar nomnaga fob. Jefeda Bua bijginaga fob rot oida didif dudou okora eteb rot Bua." Beda Yesus agot gu ofa oida, "But joug rusnok koma ongga erek dedin domba-domba nomnaga. 18 Kef bera erek tenten oida, gij mona ongga bua bumforoka bifes ros, beda bua bijginaga rot birakid bebin mokobu rejrej bifembra noba bua bija gij monuh sinefo ongga bua bisinsa budou os rot fob. Tina gij mona ongga bua bunokona fob, beda bua bumoj bitma nou noba rusnok rimerakid bebin bitma insa koma noba ruroun bua gij monuh egens ongga bua bunodou os bija gij guru." 19 (Yesus efesij rot mar insa koma jeskaseda orocunc rot oida gij mona kahma beda rusnok rimagob Petrus. Noba mar insa koma bera omofra Allah ofoka erek aksa tein si.) Erek koma beda Yesus agot gu Petrus oida, "Petrus, bua buroru Didif ojgomu." 20 Beda Petrus ekikif noba ek didif, ongga Yesus odou okora rot, dutoij goga. (Didif bera ongga diker doida Yesus gij mona ongga memef nomnaga ment maat morototuma gu meja. Beda didif dijeka Ofa oida, "Tuhan, idu bera emekikif jeska Bua?") 21 Nou ongga Petrus ek didif dutoij goga, beda ofa agot gu Yesus oida, "Tuhan, teinefa rot ofa koma ongga otoij nagef?" 22 Beda Yesus agot gu Petrus oida, "Erek Didif dudou os oida ofa efena ebah ojgomuja onjoros Didif duksons, beda koma bera onofoufem nou bua guru. Tina bua buroru Didif ojgomu." 23 Yesus anggot mar insa koma osok gij didif ojgomu. Jefeda ruforoker rineya koma ragot moguma rot oida, "Ofa egens koma bera enagos jinaga guru!" Tina Yesus enagot oida didif dinagos jinaga guru, erek koma guru. Ofa agot oida, "Erek didif dudou os jeskaseda ofa efena ebah ojgomuja onjoros Didif duksons, beda koma bera onofoufem nou bua guru." 24 Didif Yohanes bera ongga dimfesij rot mar insa koma nomnaga, noba ongga dunggu rot mar insa koma nomnaga gij Surat Injil Efeb egens kef fob. Noba memef mejginaga rot oida mar nomnaga ongga didif dimfesij rot bera erek tenten ojgomu. 25 Yesus ontunggom mar enjgineg tein ongga erek ofoukou doska fob. Noba erek rusnok runggu gij buku-buku rot mar insa koma nomnaga, beda didif dusujohu rot oida mebif bera eteb enadaij nou jeskaseda misah buku-buku insa kef rot nomnaga gij jinaga guru. Ainsoma.