Yedi Yesule Siduc Madicne Kwelengkewec

1

Lukadi Yesule siduc Teofilusle kwelengkewec

1-3 Teofilus sugucnene, hewacnonggang wiyac noine fikewec, yogo kwelengkegelegabac. Ngic-ngigac yenge funginacniyac ofelu dongenginang aibaba fikewec yogo nganilu yenge siduc madicnele kwelec kwekwe aiibong. Yenge aibaba fikewec yogolec siduc edocnubaibong. Aime homacnedi yogo nganilu molickelu kwelengkeibong. Na yogolec ailu siduc edocnubaibong ailu kwelengkeibong yogo wosaelu funginacnihac fike-ofewec yogo yegena alingkelu kwelengkegelebe nalic ainale ngagesiiba. 4 Ga yowa yago wafelu, yowa wedugeleibong, yogolec noine aigac, yogo nalic ngagedamecte.

Angelo monicti Sekariya fikecnowec

5 Abiyale bole-alingkacni depec-baba ngic monic gawec, wacine Sekariya. Ye Yudeya himongte ngictau monic Herode, yele damengka gawec. Yele ngigacine, wacine Elisabet, ye Aronte fikesawec, iwacni. 6 Aime ngic-ngigac yogo yeke Wapongte dongewa dondonne benang gaiboc. Ailu Sugucnele mimiloc yowa nga yefe-yowa sasawa balaibelu sowacnenginec mikac gbagbacne gaiboc. 7 Ailu yeke hufing, ilec Elisabet ye gboli mikac game yeke gacgu ngic-ngigac dandang aiiboc. 8 Aime dameng hewac iwa Sekariya ye Wapongte dongewa bole-alingfocine yengeholec bole baibong, 9 yenge aibabanginang balaibelu madi depecte hasoc hoine madicne yogo kwendangkenale wacngineng kwelengke-lolu banganibong, Sekariyale wac fikewec. Depecte hasoc yogo kwendangkenoga damengngine kwesime ye Ibu-kuluc kwelina fewec. 10 Feme ngic-ngigac habutowadi Ibu-kuluc yogolec lobeina Wapong milockelu domaibong. 11 Inguc aibong Sugucnele angelo monicti hasoc hole-holele alata iwa Sekariya fikecnolu alata foleinapec iwa domame, 12 ye yogo nganilu kwatackelu hangoc sugucne aiwec. 13 Inguc aime angelodi yanguc edowec, “Sekariya, ga mi hangocguna! Wapongti mimilocgone biyac ngagegeleyec, ailu ngigacgone Elisabet ye madec monic gobeelu bageledaicte. Aime gboligone ye wacine Yohane wackedamec! 14 Madecgonedi gale kwele-madic nga belic-belic aidaicte. Aime ngic-ngigac homacnedi ye fikenale ailu inguchac kwele-madic ngagedaingte. 15 Yogo yangucte, yedi Sugucnele dongewa sugucne aidaicte. Ailu waing nga misa sanangne monic mi nodaic. Ye nenggacte gobe kwelina ngiyeemewa Tili Asudi biyac kweleine wakeicnele ailu, 16 Israel ngic-ngigacfocine bocyac mengocebame yenge kwelengineng Sugucne Wapongngineng, yela hefaliyedaingte. 17 Ailu madec ye mamac mengocebame kwelengineng hefaliyeme adu-madecfocnginengte angac ngagedaingte, ailu yowa kwekwe ngic yenge ngage-ngage dondonne bafuwayelenale bole badaicte. Ailu yedi Sugucnele dongewa gacgu Elaiyale aibaba nga kucka ingucne bagidaicte. Inguc bagacgu ngic-ngigac baefecebame yenge Sugucnele dongewa efeckelu yele ngic-ngigacfocine ailu gadaingte.” 18 Inguc mime Sekariyadi angelo yanguc edowec, “Naneicne ngic-dandangine, nga ngigacne inguchac, ye hifaine biyac bocyac aime gale yowa wenucka ngagebec noine aidaicte?” 19 Mime angelodi yanguc miwec, “Na Gabrieldi, Wapongte dongewa domac-aigabac, ailu ye yeuctiyac ga yowa edocgunogale salecnume wele siduc madicne yago edocgugabac. 20 Ngagegic: Yowa migabac yogolec damengngine kwesime wiyac noine fikedaicte. Ga yowane mi ngagesingkegamecte yowagone miyac aime gacgu wiyac migabac yogo, damengngine kwesi fikeme, hadeng yogowahac ga yowagoneholec hatacmac aidamecte.” 21 Aime ngic-ngigac-aling yenge Sekariyale wangec domabong ye Ibu-kulucka dameng dalicne benang domame ngageboc aiibong. 22 Inguc aibong, ye lobeina walu yowaine mikac aime yowa edocebanale yefe basackeme yenge biyac ngage-motoibong, “O, ye Ibu-kulucka felu yowa gung-didicka ingucne nganigac.” Iwa domalu yowaine monic mi fikeme moledi sugu sosoc aiwec. 23 Aime Sekariyale depec-babale bole-dameng motome, ye walu macina hefaliye hikewec. 24 Hikeme dameng mi daliweme ngigacine Elisabet ye gobeholec ailu tamacne 5 sangke-sangke galu yanguc ngagewec, 25 “Yago Sugucnele aibaba monic, yedi nale ngagesilu dameng yagowahac gamene basawelenale, aibaba yago ainelegac. Ilec ngic-ngigac yenge nale yowa kwekwe hatacmac mi aineledaingte.”

Angelo monicti Maria fikecnowec

26 Aime Elisabet ye tamacneine 6 aime, Wapongti angelo monic, wacine Gabriel, ye saleme taon monic, wacine Nasaret, Galili prowins, iwa hikewec. 27 Hikelu ngigac-neleweng monic ngickolec mi faicne, wacine Maria, ye fikecnowec. Aime Maria ye ngic monic, wacine Yosefe, yeholec bingecka gaiboc. Aime Yosefe ye Dawidile fikesaweckacni. 28 Aime angelodi Mariale yanguc miwec, “Asec, Sugucnedi gaholec gagac, yambunginedi gala fagacte ga kwele-madic ngagedamec!” 29 Inguc mime Maria ye yogo ngagelu ngageboc sugucne aiwec, “Angelodi omale inguc edocnugac,” yogolec ngagelu dabiyelu ngage-ngage bole bocyac bawec. 30 Ngage-ngage bole badomame, angelodi yanguc edowec, “Maria, Wapongti gale ngageme madickecaigacte mi hangocguna. 31 Ailu ngagegic, ga gboli monic gobeelu badamecte. Ga madec yele wacine Yesu wackedamec! 32 Madec yogo ye feicne aidaicte. Ye Wapong Feicnetowanonggeng yele madec, yele wacine inguc wackedaingte. Aime Wapong Sugucnedi ye fungineine Ngictau Dawidile bole ingucneyac lacnome iwa damongkedaicte. 33 Damongkelu yedi Yakobole gbolifocine yengele ngictau ailu damengngine fafa-sanang fadaicte, nga mac-himongine damongkelu, miyac-miyacine mikac gaginowagac.” 34 Mime Mariadi angelo yanguc edowec, “Ngickolec monic mi facaigabac, nga yogo wenucka fikenelenale migic?” 35 Inguc uwacnome miwec, “Tili Asudi gala wame Feicnetowale kucti gale folalac ailu somecgudaicte. Yogolec ailu gboligone gbagbacne benang fikedaicte, yele wacine Wapongte Madec wackedaingte. 36 Ngagegic, gale aling moniyang Elisabet, ye ngigac-dandangine ailu sifu ye madec gobeewec. Ye hufing gacaigac mibong, ye gobeholec aime tamacneine 6 biyac aigac. 37 Omale Wapongte aibaba yogo kpungke-kpungkeine mikac.” 38 Inguc mime Mariadi miwec, “Ngagegic, na Sugucnele kwelec-adu, ilec yowa migic, yogo nalic fikeneledaic.” Mime, angelo ye hegilelu hefaliye hikewec.

Mariadi Elisabet nganinogale hikewec

39 Dameng mi daliweme Maria ye efeckelu taon monic Yuda yengele sifec himongka fawec, iwa biyac hikewec. 40 Hikegacgu Sekariyale macka fewec. Felu Elisabet wenac madic micnowec. 41 Micnome Elisabet Mariale yowa ngageme, gboli gobeina ngiyewec, idi kwatackelu uc fific aiwec. Aime Tili Asudi Elisabetla wakeme, 42 ye sugucnehac aukwelu miwec, “Ngigac hewacnonggang gagic, ga yambungkolec, nga gboli gobegona ngiyegac, ye yambungineholec. 43 Nale Sugucnele nenggacinedi nala kwesime aibaba yago fikenelegac, yogo aibaba sugucne. 44 Ngagegic, wenac madic yowagone miyengka hedecnedi ngagebe gboliye gobena beliyelu uc fific aigac. 45 Ngigac, ga, Sugucnedi yowa edocguwec, yogo noine fikedaicte inguc ngagesingkeing, ngigac ingucne ga kwele-angackolec.”

Maria ye Wapong mitengkewec

46-48 Mime Mariadi miwec, “Wapong ga nganicnulu ngageng na kwelec-adugone wawaine benang ailu gaiba. Yogolec ailu ube-kwelenedi Sugucne asec-asec aigelebe, Asunedi Wapong, asa-babane gale ailu angackeme beliyegac. Ngic-ngigac fikesawec ainowagaing yengi ngagenelelu, ‘ye kwele-angackolec’ inguc minowagaing. 49 Sugucne Kuctowa Fileinedi aibaba sugucne benang aineleyec, nga yele wacine gbagbacne benang. 50 Fikesaweckacni fikesawec, yele alang bacnocaigaing, yele kwele-sowacti yengele witiwa fagidaicte. 51 Nga yenge yengileng kwele ngage-ngagengineng yogo ngagebong feicne aigac yengela kuc-pasi balu moleine sungkelu bagi-locebame singsang kwecaigaing. 52 Ailu yedi damong ngic bolenginangkocni baicebawec, nga ngic-ngigac wawaine gaibong, yenge bafangebawec. 53 Aime ngic nosingte homalu gagaing, yenge yeicne wiyac madicne yelelu bawakeyelewec, ailu mafatowanginengkolec, yengebac molenginang wiyac monic mi lolu moc salecebame hikeibong. 54-55 Wapong ye ngambononggeng Abrahamtacni fikesawec ai-ofeibong, nga aifenowagaingte yowaine edocebawec, yogo mi ngigeckewec, ye kwelec kwekwefocine Israel yengele kwele-sowac ailu baficebawec.” 56 Milu Maria ye tamacne habackang inguc Elisabetkolec gacgu hatacmac macina hefaliye hikewec.

Yohane fikewec

57 Hikeme Elisabet ye gboli fike-fike damengngine bangkaleme madec fikewec. 58 Fikeme macfocine nga yeicne alingfocine yengi Sugucnedi kwele-sowac aicnowec yogo ngagelu yeholec momoc beliyeibong. 59 Aime hadeng 8 aiyemewa yenge madec yogo soc tofaine helockeningte welelu yele wacine Sekariya, mamacinele wase baningte inguc miibong. 60 Inguc mibong nenggacine Elisabetdi kpatalalu miwec, “Miyac, yele wacine Yohane wackenoga.” 61 Mime yengi yanguc miibong, “Gale alingfocgone yengelacni wac ingucne monic mi wackeibong fagac.” 62 Inguc milu moledi sosoc ailu mamacine uwacnoibong, madec wacine ma wackenoga. 63 Uwacnobong Sekariyadi hibi kweleng-kwelengte tafe, yogo moledi sosoc aiyeleme lacnobong yanguc kwelengkewec, “Madec yele wacine Yohane.” Inguc kwelengkeme yenge sasawadi ngageboc aiibong. 64 Ailu dameng iwahac Sekariya beluine hefaliyeme ye hatacmac yowa mimi ailu Wapong mimadickelu gawec. 65 Game macfocine yenge sasawadi hangocebawec nga ngic-ngigac Yudeya sifec-himongtowawa gaibong, yenge aibaba fikewec, yogolec mingagec ailu gaibong. 66 Aime Sugucnele kucti gboliholec gawecte ailu ngic-ngigac yenge siduc yogo ngagelu, yenge yowa yogo ngage-ngagenginang lolu yanguc ngagelu uwayeleibong, “Gboli yogodi gacgu wenuc ainowagac?”

Sekariyadi sinaic yowa miwec

67 Aime Tili Asudi gboli mamacine Sekariyale kwelewa wakeme, yedi sinaic yowa yanguc miwec, 68 “Sugucne Israel yengele Wapong ye mitengkenang, omale yedi ngic-ngigacfocine nongileng wele fuli bacnubawec. 69-70 Ailu ye esecne benang Wapongte sinaic mimi yengele micka yowa lolu miwec, yogo balaibelu bole-ngicine Dawidi, yele fikesaweckacni asa-baba ngic sanangne fikewec, 71 yedi ngabafocnonggeng gagaing nga ubedi wikecnubacaigaing, yengele molewacni bamoctonubadaicte. 72-73 Aime Wapongti fungnonggeng Abrahamta mimipang sanangne miwec, yogo ngagesilu dodoficnonggeng gbagbacne balaibelu fungfocnonggengte kwele-sowac aiyelecaigac. 74-75 Nonge ngabafocnonggeng yengele molewacni bamoctocnubame, Gaga-damengnonggeng fagacsoc hangoc mikac yele dongewa gbagbacne nga dondonne ailu kwelec kwekwe gadabelengte. 76 Aime nale gboli, gagi molickelu Sugucnele yefe bamadickelu yefe hole-wenengkecte yanguc wacgudaingte, Ga Wapong Feicnetowanonggeng yele sinaic mimi. 77 Ga ngage-ngage yanguc weduyeledamecte, yele ngic-ngigacfocine aibaba bikicnginengkolec hegilelu asa bacebame wasecne aidaingte. 78 Aime Wapongnonggeng, angacine nga kwele-sowac feicne benang ainolecaigac inguc fikedaicte. Aime yele angactowainele kucti wenac ingucne nongilang walu 79 kundung kwelina nga homacte folalacka gagaing, yenge baangolecebame nongileng kwele-mogungte yefewa ganangte fungnonggeng damongkelu yefe yogo edalicnubadaicte.” 80 Aime gboli ye socine suguleme kwele-ngage-ngageine sanangkewec, ailu himong kisiwa gacgu Israel ngic-ngigac yengele dongewa fikelu yegengkenale damengnginele wangec gawec.

2

Yesu madec fikewec

1-2 Aime Roma himongte ngictau monic, wacine Sisa Agustus, yedi himongne himongne wac-alingngineng bamadickeningte yowa lome hikeyackewec. Dameng iwa ngic monic, wacine Kwirinius, yedi Siria himongte gawana galu molic-molic boleine wac-aling bawec. 3 Aime ngic-ngigac sasawadi wac-alingngineng bamadickeningte macngineng fawecsoc hikeyackeibong. 4 Aime Yosefe ye Nasaret taon Galili prowins iwa gawec. Ye Dawidile fikesaweckacni, ilec ailu hegilelu Yudeya prowins Dawidile taon kpisicne, wacine Betelehem, iwa hikewec. 5 Aime ngigac-bingecine Maria ye gobeholec aiwec. Aime yeke momoc wacnginec wac-alingka kwelengkeningte hikeiboc. 6 Yeke iwa hike sulumeboc kogoc fike-fike-dameng kwesiwec. 7 Aime yeke mac ngiye-ngiye sawaine monic mi fawecte, yeke lobeina ngiyeboc, molic-molic madecnginec fikewec. Fikeme Mariadi kpolucti ebeckelu lama-bulumaka duwacka iwa lome haulu fawec.

Angelodi lama-damong siduc edocebawec

8 Aime deboleme lama-damong gocne yenge Betelehem kpanggewa lamafocngineng damongebalu gaibong. 9 Inguc gacgubong Sugucnele angelo monicti iwa fikeyelewec. Fikelu Sugucnele hulili-kwelengtowadi baangolecebame yenge hangoc sugucne aiibong. 10-11 Aime yedi yanguc edocebawec, “Ngenge hangoc mi aining! Yakumac benang ngengele ailu Dawidile taon kpisicna Mesia Sugucne fikegac, ye umacnginangkocni bamoctocngebadaicte. Ngic-ngigac sasawadi yele ailu beliyeyackedaingte, na siduc madicne yogo mibe yegengkengelegac. 12 Gboli yogo ngenge wenuc bafuwaningte ma yago ngelegabac, ngenge hikelu lama-bulumaka yengele duwacka kogoc monic kpolucti ebeckeicne fame bafuwadaingte.” 13 Ye inguc miyemewa iwahac honocmengte angelo habu sugucne, yenge fikelu yeholec domalu Wapong mimadickelu yanguc miibong, 14 “Wapong, wac feicne, wileng honocmengka fadaic, nga himongka yengela bengong badaic. Wapongti ngic kwele-efec aiyelegac.” 15 Aime angelo yenge honocmengka hefaliye febong, lama-damong yenge yengilangkac mingagec ailu miibong, “Betelehem taonka aibaba yogo fikeme Sugucnedi edocnubagac, ilec biyac hikelu yogo nganinang.” 16 Inguc milu yenge biyac hikelu Maria nga Yosefe ailu gbolinginec duwac kwelina fawec, yogo yenge biyac bafuwacebalu nganicebaibong. 17 Nganicebalu angelodi gboli yele yowa miwec, yogo edocebabong ngageyackeibong. 18 Aime lama-damong yenge siduc aiibong, yogo ngic-ngigac sasawadi ngagelu mimedec aiyackeibong. 19 Mariadibac aibaba fike-welewec yogo kweleina lolu ngagesilu gawec. 20 Aime angelodi lama-damong edocebawec, yogo sasawa noine nganilu ngageibongte ailu, yenge hefaliyelu Wapong wacine bafelu mitengkelu hikeibong.

Yesu madec wac lacnoibong

21 Aime hadeng 8 motome yenge kogoc soc tofaine helockeningte damengngine kwesime ye wacine Yesu wackeibong. Wac yogo ye nenggacine mi gobeemewa angelodi biyachac wackewec.

Simeon nga Anna yeke Yesu madec Ibu-kulucka nganiiboc

22 Gacgu Mosesle yefe-yowa yogo balaibelu suwe-suwe damengngineng yogo motome yenge kogockahac Sugucnele dongewa fikenale Yerusalem bafeiboc. 23 Yogolec Sugucnele yefe-yowawa yanguc kwelengkeicne fagac, “Molic-molic madec fikedaingtesoc, yenge Sugucne yeicne sugu aidaingte.” 24 Aime yeke suwe-suwe dameng iwa depecte sic alingkacni, tudiling yaeckang, me gomoc-gomoc madecine yaeckang locepanoga, yogo Sugucnele yefe-yowawa fagac, yeke yogo balaibelu bahikeiboc. 25 Dameng iwa ngic monic Yerusalem gawec, wacine Simeon. Ye ngic dondonne, ailu ye Wapong alang bacnolu Tili Asuholec gawec. Ye Israel-ngic yengela mibakoloc aiyelenale wangec aiwec. 26 Ailu ye mi homanale Sugucnele Mesia fikeme nganinogale Tili Asudi esecne biyachac mifikecnowec. 27 Aime Yesule nenggac-mamac yekele yefe-yowa fawec, yogo balaibelu gbolinginec Ibu-kulucka bafeiboc. Bafeboc Asudi Simeon biyachac kweleina wakeme Ibu-kuluc kwelina felu 28 kogoc moleina hoba-domalu yedi Wapong mimadickelu yanguc miwec, 29-30 “Sugucnene, na kwelec ngicgone, dongenedi Asa-baba ngicgone nganidactele miing, yogo biyac nganigabac, kwele-bengongkolec gagane babangkale neleng hikedacte. 31 Aime ngic-ngigac sasawadi ye nganiebongka ga yefe yogo biyac bamadickemec. 32 Gboli yago yedi Israel yengele alingkacni miyac, yenge bayegengngebame yogodi angocngineng aidaicte, ailu Israel ngic-ngigacfocgone yenge wac feicne yeledamecte.” 33 Mime gboli yogo nenggac-mamacine yeke yele yowa yogo ngagelu mimedec aiiboc. 34 Inguc aime Simeonti yambungebalu gboli yogo nenggacine Maria yowa yanguc edowec, “Ngagegic, Israel-ngic homacnedi madec yago yele ailu wawedaingte, nga homacnedibac yele ailu fangkelu domadaingte, aibaba inguc fikenale Wapongti mimoctowec. Nga bocyac yengi ye nganilu ngaba ailu yowa kwekwe aidaingte. 35 Aibong Maria ga, doicti kwelegona hudule fitec ingucnedi helockedaingte. Inguc aime ngic-ngigac bocyac yengele ngage-ngage sangkelu fawec, yogo yegengke fikedaicte.” 36 Aime Wapongte sinaic mimi ngigac monic gawec, wacine Anna, ye inguchac Ibu-kulucka gawec. Ye Fanuelle adu, ye Asere fikesaweckacni. Ye ngic balu yeholec hifa 7 gacgume ngaweine homawec. 37 Homame ye hosec gacgume hifaine 84 aiwec. Ailu ye Ibu-kuluc mi hegilelu deboc hadeng nosing-sawe ailu Wapong milockelu gawec. 38 Gacgu dameng yogowahac Annadi Maria ngama yengele emewa wele domalu Wapong mimadickewec. Yerusalem ngic-ngigac yenge fuli bacebanale wangec gaibong, gboli yogolec siduc yenge mime yegengkeyelewec.

Nasaret hefaliye hikeibong

39 Aime Yosefe nga Maria yeke Sugucnele yefe-yowadi migac, yogo sasawa balaibelu aiyackeboc motome, yenge Galili prowinswa hefaliyelu Nasaret taonnginang hikelu gaibong. 40 Gacgu madec yogo suguleme Wapongte baba-madicti yela fame ye kuc nga ngage-ngage motoc wakeicne fikecnowec.

Yesu ye madec hakicti Ibu-kulucka fewec

41 Aime Yesule nenggac-mamac yeke Ewalicebaicnele hombang ngagesilu hifasoc Yerusalem iwa hikelu gaiboc. 42 Ailu yenge hombangte aibaba balaibelu, Yesu ye hifaine 12 aiyemewa yenge momoc hombangte hikeibong. 43 Hikelu iwa gacgubong hombang dameng yogo motome yeke hefaliye weleebocka, Yesu ye Yerusalem iwa ngiyewec. Nga nenggac-mamacine yeke mi ngagelu wele 44 yanguc ngageiboc, “Ye ngic-ngigac habu yengeholec yefewa gagac.” Inguc ngagelu yeke hadeng moniyang yefewa hikelu Yesu monic mi bafuwaiboc. Inguc aime yeki ye basackelu agofocngineng nga alingfocngineng yengela lolicke hikelu 45 basackelu monic mi bafuwaibocte yeke hatacmac hefaliyelu Yerusalem taonka basackenicte hatac hikeiboc. 46 Hike basackeboc hadeng habackang motome Ibu-kuluc kwelina felu Yesu bafuwaiboc. Bafuwaboc ye Ibu-kuluc kwelina wewedu yengele kebangka ngiye ngageyelelu mi-uwac aiyelewec. 47 Aime Yesudi ngage-ngageholec ngic sasawa yowangineng ameine bafaliyewecte yenge mimedec ailu yanguc ngageibong, yogo wiyac feicne aigac. 48 Aime nenggac-mamac yeke ye nganilu kwatackelu nenggacinedi yanguc edowec, “Madec, ga omale aibaba ingucne ainotegic? Aime mamacgoneholec noke gale ngageboc ailu ga basacgulu gagabelec.” 49 Inguc mime yedi yanguc edocepawec, “Ngeke omale basacnugabiyec? Na mamacnele macka gagabac, yogo mi ngagegabiyec, me?” 50 Inguc mime yeke yowa yogolec dabiyeiboc. 51 Aime ye nenggac-mamacine yekeholec hatac hefaliyelu Nasaret macka hikelu micnginec balaibelu gawec. Game nenggacinedi aibaba sasawa fikewec, yogo ngage-ngageina lolu gawec. 52 Aime Yesule ngage-ngage nga socine sugule-sanangkeme, Wapong nga ngic-ngigac yenge momoc ngani-lingkeibong.

3

Yohanedi boleine fungkewec

1 Ngictau Sisa Tiberio, ye hifa 15 dameng inguc biyac gawec. Dameng iwa ngic monic, wacine Pontius Pailat, yedi Yudeya himongte gawana gawec. Gaemewa Herode ye Galilile damong, nga gbaine, wacine Filip, yedi Ituraia nga Trakoniti himongte damong, nga Lisania ye Abilenele damong, inguchac gaibong. 2 Inguc gaebongka Annas nga Kaifas yeke depec-baba ngic micne gaiboc. Dameng yogowahac Sekariyale madec Yohane ye himong kisiwa gacgume Wapongte yowadi yela kwesiwec. 3 Kwesime Yohane ye Yodan misa neboc nga neboc himong falegac, iwa lolickelu misa lowaebongka kwelengineng hefaliyeme bikicngineng miyac ainale mime yegengkeyelewec. 4 Yowa yogo Wapongte sinaic mimi Yesaiyadi miwec, yele hibiwa yanguc kwelengkeicne fagac, “Himong kisiwa wawac monic yanguc fikegac, ‘Sugucnele yefe wesackelu hole-wenengkening. 5 Lumo sasawa someckeyackening, nga kupic-fegeng sasawa yogo hole-wenengkening, ailu yefe adec adec bamadickebong dondonne aidaic, nga yefe hauc-ofecineholec hemusungkening. 6 Nga Wapongti aibaba yogo balu bikicnonggeng baickedaicte, yogo ngicne ngicnedi nganiyackedaingte.’” 7 Inguc aime ngic-ngigac homacnedi Yohanela hikelu misa lowayelenale edobong, Yohanedi yanguc miwec, “Hemale gbolifocine, ngenge Wapongtacni ameine kwesinale aigac, iwacni nalic hikeningte madi sawang-yowa edocngebawec? 8 Ngenge, kwelengineng hefaliyeme ilec silicina noine bafuwadaingte. Aime ngenge yangucteyac ‘Abraham ye ngambononggeng,’ i mi ngagedabiyeng. Wapong ye hoc yago nalic mime Abraham ngambofocine fikeyackedaingte. 9 Aime naka monic ye biyac yoc fungina fagacte, yoc gocne noine madicne mi aidaingte, yoc yogo sasawa welu dacka wikecebadaingte.” 10 Inguc mime ngic-ngigac yengi uwacnoibong, “Inguc aime nonge wenuc aidabelengte?” 11 Mibong yowangineng yanguc bafaliyeyelewec, “Monicti ngakpiine yaeckang bagagac, ye monicine hemoctolu monic ye ngakpiine mikac gagac, ye bafickedaic. Nga monic ye noba-nosingkolec gagac, ye aibaba ihac aidaic.” 12 Mime takes-baba gocne yengi inguchac wele misa lowayelenale miibong, “Wewedu, nonge wenuc aidabelengte?” 13 Mibong yanguc edocebawec, “Ngenge moneng baningte mingeleicne, moneng silicina badaing, moneng ewalilu mi badaing.” 14 Mime hudu-baba ngic gocne yengi inguchac Yohane uwacnoibong, “Aime nonge wenuc aidabelengte?” Mibong yanguc miwec, “Ngenge losi-aibaba me kwesacka ailu migbedicka monickacni moneng mi badaing. Ngenge bolenginengte fuli bacaigaing, yogo sugu ngagebong andoine aidaic.” 15 Aime ngic-ngigac yenge Mesiale wangec gaibongte ailu “Yohane ye hocne Mesia ngama.” Kwelenginang inguc ngageibong. 16 Inguc ngageibongte Yohanedi yowangineng yanguc bafaliyeyelewec, “Na misa lowangelegabac, ngic lobena weledaicte, yedibac Tili Asu nga dackolec lowangeledaicte. Ailu yeicne kucti nale kuc ewaligac, na ingucnedi yele hige-ebecte witicine lukebe nalic mi madickedaicte. 17 Ye fokine sugucne molewa bawelelu wit yafoineholec baic-baicte sobengka fame, yogo filalu baucepalu yafoine baickelu noine yogo bakpaduc ailu nosing-macina lolu yafoine pelengkelu dac hoba-hobaine mikac, iwa wikeme feme lobedaicte.” 18 Yohane ye yowa silicine ingucne bocyac milu ngic-ngigac mimiloc aiyelelu siduc madicne edocebalu gawec.

Herodedi Yohane muc-macka lowec

19 Aime ngictau Herodedibac gbainele ngigac, wacine Herodias, hise balu aibaba sowacne gocne bocyac aicnolu gawec, aime Yohanedi aibaba sowacne yogolec sawang-yowa Herode edoyackewec. 20 Edome Herodedi aibaba sowacne hatacmac taockelu, Yohane ngaba aicnolu muc-macka lowec.

Yohane ye muc-macka mi feluyac Yesu misa lowacnowec

21 Aime ngic-ngigac sasawadi misa lowaebongka, Yesu ye inguchac misa lowawec. Lowalu Wapong milockelu domaemewa honocmeng angkeme 22 Tili Asudi tudiling nangole silic ingucne ailu Yesula wame, honocmengkacni mic-yowa monic yanguc fikewec, “Ga nale angac-madecne, na ga ngani-angac aigelecaigabac.”

Yesu ngesa-ngambofocine yengele wac-aling

23 Yesu ye hifaine 30 aiyemewa boleine fungkewec. Aime ngic-ngigac yenge yanguc ngageibong: Ye Yosefele madec. Nga Yosefe ye Helile madec 24 nga Heli ye Matat-le madec. Matat ye Liwaile madec nga Liwai ye Melkile madec. Melki ye Yanaile madec nga Yanai ye Yosefele madec. 25 Yosefe ye Matatiale madec nga Matatia ye Amosile madec. Amosi ye Nahumte madec nga Nahum ye Esilile madec. Esili ye Nagaile madec 26 nga Nagai ye Mahatale madec. Mahata ye Matatiale madec nga Matatia ye Semengte madec. Semeng ye Yosekle madec nga Yosek ye Yodale madec. 27 Yoda ye Yonangte madec nga Yonang ye Resale madec. Resa ye Serubabelle madec nga Serubabel ye Sialtielle madec. Sialtiel ye Nerile madec 28 nga Neri ye Melkile madec. Melki ye Adile madec nga Adi ye Kosamte madec. Kosam ye Elimadamte madec nga Elimadam ye Erile madec. 29 Eri ye Yosuwale madec nga Yosuwa ye Eliesale madec. Eliesa ye Yorimte madec nga Yorim ye Matatale madec. Matata ye Liwaile madec 30 nga Liwai ye Simeonte madec. Simeon ye Yudale madec nga Yuda ye Yosefele madec. Yosefe ye Yonamte madec nga Yonam ye Eliakimte madec. 31 Eliakim ye Meleale madec nga Melea ye Menale madec. Mena ye Matatale madec nga Matata ye Natante madec. Natan ye Dawidile madec 32 nga Dawidi ye Yesile madec. Yesi ye Obedele madec nga Obede ye Boasle madec. Boas ye Salmonte madec nga Salmon ye Nasongte madec. 33 Nasong ye Aminadapte madec nga Aminadap ye Adaminte madec. Adamin ye Ramte madec nga Ram ye Hesorongte madec. Hesorong ye Peresle madec nga Peres ye Yudale madec. 34 Yuda ye Yakobole madec nga Yakobo ye Aisakle madec. Aisak ye Abrahamte madec nga Abraham ye Terale madec. Tera ye Nahorle madec 35 nga Nahor ye Serukle madec. Seruk ye Reule madec nga Reu ye Pelekle madec. Pelek ye Eberile madec nga Eberi ye Selale madec. 36 Sela ye Kainante madec nga Kainan ye Arpaksatle madec. Arpaksat ye Siemte madec nga Siem ye Noale madec. Noa ye Lamekte madec, 37 nga Lamek ye Metuselale madec. Metusela ye Enokte madec nga Enok ye Yaretle madec. Yaret ye Mahalalelle madec nga Mahalalel ye Kenante madec. 38 Kenan ye Enosile madec nga Enosi ye Setle madec. Setdi Adamte madec nga Adamti Wapongte madec.

4

Aleng Sugucnenginengti Yesu lokwesac aicnowec

1 Aime Tili Asudi Yesu kweleine bawakeme Yodan misawacni hefaliye ofeemewa yedi himong kisiwa mengockeme hikeiboc. 2 Yesu ye iwa hikegacgume hadeng 40le kwelina Aleng Sugucnenginengti iwa lokwesacka lowec. Dameng iwa Yesu ye nosing mikac game hadeng 40 motome ye nosingte homawec. 3 Nosingte homame Aleng Sugucnenginengti yanguc edowec, “Ga Wapongte madec gagamecka, hoc yago miyengka nosing aina!” 4 Inguc mime Yesudi bafaliyecnolu yanguc miwec, “Hibiwa yowa yanguc kwelengkeicne fagac, ‘Ngicti nosingka sugu mi gadaicte.’” 5 Mime yedi Yesu himong hewac monicka mengocke felu himong sasawa gamangnginengkolec edaliwec, yogo folo-folo bapilackeme nganime 6 miwec, “Himong yagolec wac feicne nga kuc sasawa damongkenogale esecne neleibong, nga monic me monic yogo lacnonogale kuc fanelegac. 7 Ilec na ketadi holeneleengka yogo sasawa hegilebe gale aiyackenale angacnugac.” 8 Inguc mime Yesudi yanguc bafaliyecnowec. “Hibiwa yowa yanguc kwelengkeicne fagac, ‘Sugucne Waponggone, ye moniyang sugu ketadi holecnolu kwelec kwecnodamec!’” 9 Mime yedi hatacmac mengockeme Yerusalem hikelu Ibu-kuluc witina sawawa benang wilini domawec, yogolec witina lome domame edowec, “Ga Wapongte Madec noine benang gagamecka gageuc yagowacni wintackelu himongka haunong! 10 Hibiwa yowa yanguc kwelengkeicne fagac, ‘Ye gale ailu angelofocine edocebame yengi ga damonggudaingte,’ 11 Ailu ‘Yengele molengineng witina sesegubong posa monicti higegone mi helockedaicte.’” 12 Inguc mime Yesudi yanguc miwec, “Yowa yanguc miicne fagac, ‘Ga Sugucne Waponggone lokwesacka mi lonong!’” 13 Mime Aleng Sugucnenginengti lokwesac sasawa aibibiyeme motome, hegile hikelu dameng monicte wangec gawec.

Nasaret yenge Yesule takicebawec

14 Aime Tili Asudi Yesula wakelu fame, ye Galili prowinswa hatacmac hefaliye hikeme, mac-himong falegac sasawadi siducine ngageyackeibong. 15 Aime yedi kpakpaduc macnginang felu weduyeleme ngic-ngigac sasawadi ye mimadickeibong. 16 Aime Yesu ye no-sugulec macine Nasaret, iwa hatac hikewec. Hikelu, kpakpaduc macka fecaigac, aibaba yogo balaibelu Sabatka iwa fewec. Felu Wapongte hibi wafenale domame, 17 yengi Wapongte sinaic mimi Yesaiyale hibi-kpadidiweicne yogo lacnobong, bafilamelu hibiwa Mesiale yowa yanguc fawec, yogo bafuwawec. 18 “Waweweine yenge siduc madicne edocebanogale Sugucnedi bawosaecnume, yele Asudi naholec gagac. Ailu witicka gagaing, yenge witicngineng mikac aidaingte, nga donge-pisicti donge-hilac ainogale edocebanogale yedi salecnuwec. Salecnume kwesi umackolec gagaing, yenge umacngineng ewalicebalu baickedacte. 19 Ailu Sugucnelacni dameng madicne welengelegac, yogo inguchac mibe yegengkedaicte.” 20 Wafelu Yesudi hibi yogo hatacmac kpadidiwelu hibi-damong lacnolu wangiyeme, kpakpaduc macka ngic-ngigac ngiyeibong, yenge sasawadi dongengineng yela hilaibong. 21 Hilabong yedi yanguc edocebawec, “Wapongte hibiwa wafebe ngagegaing, yogolec noine yakumac fikengelegac.” 22 Aime yele mickacni yowa miwec yogodi kwele-efec nga yowa kucineholec aiwecte ngic-ngigac sasawadi yele ngagebong nalic aime mimedec ailu yele uwanaguibong, “Ngic yago ye Yosefele madecti inguc migac!” 23 Inguc mibong edocebalu miwec, “Yowa miicne monic fagac, ailu ngenge yogo biyac edocnunogale yanguc migaing, ‘Dota, gageuc bamadicnaguc!’ Ailu hatacmac yanguc edocnunogale aigaing, ‘Ga Kapeneam macka bole baengka siducgone ngagecaigabeleng, yogo yawa himonggona inguchac baengka nganinang!’” 24 Milu hatacmac yanguc taockelu miwec, “Na noine edocngebagabac, Wapongte sinaic mimi monic, ye yeicne himongka hikeme ngic-ngigac yengi ye nalic mi sebiledaingte. 25 Aime Elaiya gawec, dameng iwa Israel himongka ngigac-hosec homacnedi gaibong. Gacgubong Wapongti ngageme mac mi welewec, aime hifa habackang, nga tamacne 6 himong iwa loloc fikewec. 26 Fikeme Wapongti Elaiya saleme Israel ngigac yengela mi hikewec. Aime Sarepat macka Saidon himongka ngigac-hosec monic gawec, yelabac salewec. 27 Nga Wapongte sinaic mimi Elaisadi Israel himongka gawec, dameng iwa ngic-ngigac homacnedi waic-sanangkolec gaibong, yengelacni monicti mi madickewec. Aime Siriahocni ngic monic wacine Naman, yedi sugubac madickewec, yogo foinac benang.” 28 Aime ngic-ngigac sasawa kpakpaduc macka ngiyeibong, yenge yogo ngagelu kwelengineng aalic 29 fangkeme Yesu igockelu baickelu taon lobeina hauibong. Haulu macngineng kupicka ngiyewecka dengge monic domawec, iwa hikelu wikebong haunale ngagelu mengocke hikeibong. 30 Hikebong, yebac ngic-ngigac hewacnginang kwegi-locebalu hikewec.

Yesudi aleng wonongkolec yebiyewec

31 Yesu ye Galili prowinsle taon monic wacine Kapeneam, iwa haulu Sabat damengka ngic-ngigac Wapongte yowa weduyelewec. 32 Weduyeleme yele wewedudi bolele hibi bacaigaing, yengele silic ingucne kucineholec weduyeleme, ngic-ngigac yenge ngagebong, feicne aiwec. 33 Aime kpakpaduc macka ngic monic gawec. Aime aleng wonongkolecti kweleina ngiyeme gawec, yedi yowa kucineholec aukwelu miwec, 34 “Aa, Yesu Nasaret-hocni, nongela wiyac monic mi aidamec. Ga basowalecnubadamecte welegic, me? Na ngagegabac, ga Wapongte ngic gbagbacne.” 35 Inguc mime Yesu ye aleng yowa sanangne aicnolu yanguc edowec, “Ga waickelu ngickacni ofelu hikec!” Inguc mime aleng ye ngic wepackeme hewacnginang waweme, yelacni ofelu hikewec. Ailu ye ngic yogo monic mi basowalewec. 36 Aime ngic-ngigac sasawadi yogo nganilu mimedec ailu, mingagec ailu yanguc miibong, “Ye oma yowa balu gagac? Ngic yago ye kuc sasawa nga wac sugucneholec gagac, yedi aleng wonongkolec mic-yowainedi yebicebame ofelu hikegaing.” 37 Inguc fikeme Yesule siducti himong iwa macsoc neboc nga neboc hikeme ngageyackeibong.

Yesudi ngic-ngigac bamadicebawec

38 Aime Yesu ye kpakpaduc mac hegilelu Simonte macka hikeme, Simon sefengngine soc-dac sugucne aicnome fawec. Fame Yesudi ye bamadickenale edoibong. 39 Edobong Yesu ye domalu ngigac fame nganilu, soc-dac yowa sanangne edolu kpatalacnome, soc-dac yogo ngigac i hegilelu hikewec. Hikeme ye dameng yogowahac fangkelu ngani-damong aiyelewec. 40 Aime wenac-dongeine haunale aiyemewa, ngic-ngigac sasawadi agofocngineng huc fungine fungine aiyeleicne, yenge bacebalu Yesula kwesiibong. Kwesibong, Yesudi moleine hucnginengkolec sasawa witinginang lolu bamadicebayackewec. 41 Bamadicebame aleng inguchac ngic-ngigac bocyac yengelacni ofelu yanguc wackeibong, “Ga Wapongte Madec.” Aime ye Mesia, yogo ngageibongte yenge yowa yogo mi miningte mimacebawec. 42 Aime mac saeme, Yesu ye mac yogo hegilelu himong monic ngic mikacka hikeme, ngic-ngigac yenge ye basackeibong. Basackelu bafuwabong, yengeholec galu mac monicka mi hikenale kpatalacnoibong. 43 Inguc mibongbac yanguc edocebawec, “Mac-himong gocne fagac, iwa inguchac hikelu Wapongte ngani-damongte siduc madicne mibe yegengkeyeledaicte. Wapongti yogolec hocne salecnuwec.” 44 Inguc milu Yudeya himongka kpakpaduc macngineng falewec, iwa hikelu Wapongte yowa miweduc aiyelelu gawec.

5

Yesu ye molickelu mic-tengtengfocine bacebawec

1 Dameng monicka Yesu ye lifuc, wacine Genesaret, mecina domaemewa ngic-ngigac yenge kwesilu Wapongte yowa ngagelu igocnagulu hewalingkebong, ye hewacnginang domawec. 2 Domalu donge hilalu nganime wage yaeckang lifuc mecina domaiboc. Aime misa-sic baba ngic yenge wagengineng lobong domame uficngineng suwelu gaibong. 3 Aime Yesu ye wage monic, yogo Simonte wage, iwa fengiyelu Simon edome yedi wage kpisicnemac igockeme lifucka feme ngic-ngigac edocebalu weduyelewec. 4 Aiyeleme motome Simon yanguc edowec, “Misa-sic banogale lifucka misa gbolongne fagacka, iwa hikelu uficngineng wikelu misa-sic baning.” 5 Inguc mime Simonti yowaine bafaliyecnowec, “Sugucnene, nonge awecnac debocka doic-bole balu gabeng mac saeme sic monic mi bagabeleng, aime gagi migicte sifu hikelu ufic wikedacte.” 6 Mime yenge uficngineng iwahac wikelu sic homacne benang baibong. Babong uficngineng wakelu lokenogale aiwec. 7 Inguc aime yenge agofocngineng wage monicka ngiyeibong, yenge moleiyac holeyelebong welelu baficebaibong. Baficebabong sic wage yaeckangka lobong wakelu wage yeke misawa haunicte aiiboc. 8 Simon Pita ye aibaba yogo nganilu Yesule higewa ketadi badulu ewe holecnolu yanguc miwec, “Sugucne, na bikickolec aigabacte ga hegilecnulu hikec!” 9 Inguc mime Simonkolec gaibong, yenge sic homacne benang baibongte ailu mimedec aiibong, yogolec ailu inguc miwec. 10 Nga Sebedile madeckecine, Yakobos nga Yohane, yeke Simonkolec misawa sic balu gacgu nganilu mimedec aiiboc. Aime Yesudi Simon edolu yanguc miwec, “Ga mi hangocguna! Ga misawa sic babadi, yakumac ngic-baba aidamecte.” 11 Aime yenge wagengineng balu mecina lolu wiyac sasawa hegilelu Yesu balaibeibong.

Yesudi ngic monic waic-sanangkolec bamadickewec

12 Aime Yesu ye taon monicka gacgume ngic monic waic-sanangti socine wakeme sowalebenangkeicne, ye iwa galu Yesu nganilu ketadi holecnolu haicine himongka heluluckelu wackemic aicnolu miwec, “Sugucne, ga ngageng nalic aime nalic bamadicnung gbagbackedacka, me?” 13 Inguc mime Yesudi moleine sungkelu bauwalu miwec, “Madickecte ngagegabac.” Inguc mime iwachac ngic yela waic-sanang fawec i miyac aiwec. 14 Hegileme Yesudi mimackelu miwec, “Ga socgona aibaba fikegac yogolec ngic monic mi edodamec, depec-baba ngic yela hikelu socgone edalidamec! Aime Mosesdi depecte miwec, yogolec silicina lodamec! Yenge depecgone yogo nganilu ngage-motodaingte.” 15 Aime Yesule siducti sugucne benang sawelu hikeme ngic-ngigac habutowa homacnedi yenge yele yowa ngageningte, ailu yedi ngic-ngigac huckolec bamadicebanale kwesiibong. 16 Inguc aibong Yesu ye dameng homacne hegilecebalu himong kisiwa hike Wapong milockelu gawec.

Yesudi ngic monic hige-moleine homaicne bamadickewec.

17 Gacgu dameng monicka Yesu ye Wapongte yowa edocebalu weduyeleme Farisaio nga Wapongte yefe-yowale wewedu ngic gocne Galili nga Yudeya mac-kpisicne sasawa ailu Yerusalem taon, iwacni kwesilu ngiyeibong. Nga Sugucnele kucti Yesula fawecte huckolec bamadicebawec. 18 Inguc fawecte ngic gocnedi huckolec ngic monic hige-moleine homaicne dembengka lolu tengkelu mac kwelina Yesule haicka loningte ngagelu tengkelu hikeibong. 19 Tengke hikebong, ngic-ngigac homacnedi hedickelu domabong yenge ye Yesule haicka loningte yefe basackelu ngic yogo mac witina tengke felu mac witine nebocine basulumelu iwa yefe ngic hewacnginang Yesule emewa dembengkolec lobong hauwec. 20 Haume Yesu ye ngage-ngagesingngineng nganilu yanguc miwec, “Ngic ga, bikicgone biyac miyac aigac.” 21 Inguc mime Wapongte yefe-yowale wewedu ngic nga Farisaio yenge yengilangkac yanguc ngageibong, “Ngic yogo ma ngicti Wapong fecnogac? Wapong moniyangti sugubac, bikic nalic hegiledaicte.” 22 Yesu ye kwelenginang ngagesiibong, yogo nganilu yanguc edocebawec, “Ngenge omale kwelenginang inguc ngagegabiyeng? 23 Weni yogodi efecne aigac, ‘Bikicgone miyac aigac,’ minoga me yanguc, ‘Ga fangkelu hikec!’ 24 Aime Ngicte Madec ye himongka bikic hegile-hegilele bole-yowa nga kuc facnogac, yogo ngageningte mibe ngagening.” Yesudi inguc milu hige-moleine homaicne yele yanguc miwec, “Ga edocgugabac, fangkelu dembenggone balu macgona hikec!” 25 Mime iwahac puling ngicti, ngic sasawa yengele dongewa fangkelu dembengine facaigac, yogo balu Wapong wacine feicne mitengkelu macina hikewec. 26 Hikeme sasawadi kwatacke-benangkelu mimedec ailu Wapong wacine feicne mitengkeibong. Ailu hangocebame miibong, “Nonge aibaba ingucne mi ngani-nganiine yakumac dongenonggengti nganigabeleng.”

Yesudi Liwai wackewec.

27 Inguc mibong Yesu ye iwacni walu hike takes-baba ngic monic wacine Liwai, ye takes-baba macka ngiyeme nganilu yanguc edowec, “Ga wele na balaibecnuc!” 28 Mime Liwai ye fangkelu wiyac sasawa hegilelu Yesu balaibewec. 29 Aime Liwai ye Yesule ailu macina nosing sugucne lobeme takes-baba nga ngic-ngigac homacnedi yengeholec ngiyelu nosing noibong. 30 Inguc aibong Farisaio nga yengele Wapongte yefe-yowale wewedu ngic yenge ngagebong nalic mi aime Yesu mic-tengtengfocine yengele yowa kwelu yanguc miibong, “Ngenge omale takes-baba nga bikickolec yengeholec nosing misa nogaing?” 31 Mibong Yesudi yanguc miwec, “Socngineng huc mikac gacaigaing, yenge dotala mi hikecaigaing. Hucnginengkolec, yengibac dotala hikecaigaing. 32 Na ngic dondonne bacebanogale mi waiba, Na bikickolec yenge wacebabe kwelengineng hefaliyenale waiba.”

Yesudi nosing-sawe ailu ganogale nangeng yowa miwec

33 Aime ngic-ngigac gocnedi Yesu yanguc uwacnoibong, “Yohanele mic-tengtengfocine nga Farisaio yengele mic-tengtengfocngineng yenge dameng homacne nosing-sawe galu mimiloc bole bacaigaing. Nga gale mic-tengtengfocgone yengebac nosing misa nocaigaing.” 34 Inguc mibong Yesudi bafaliyelu miwec, “Ngic monicti ngigac-baba damengngine bangkaleme agofocine yengeholec galu nosing-sawe ainogale nalic mi midaicte. 35 Aime gacgu dameng monicka yengelacni ngic yogo bahikedaingte, dameng iwabac, nosing-sawe aidaingte.” 36 Yesu ye taockelu nangeng yowa yanguc edocebawec, “Monicti ngakpi gbolicnacni sindacine helocke balu esecna nalic mi lolu gbododaicte. Inguc aidaictewa ngakpi gbolicne sowaledaicte aime gbolicne nga esecne wetulecepame nalic mi aidaicte. 37 Me madi waing gbolicne bokong sic socinedi baicne esecna kweme haudaicte? Inguc aidaictewa waing gbolicnedi bokong esecne yogo kwouckeme sowalelu misaine wadaicte. 38 Waing gbolicnebac, bokong gbolicna kweme haudaicte. 39 Aime ngic monicti waing esecne biyachac nowec, yedi waing gbolicne nonale angac nalic mi ngagedaicte, yanguc sugu midaicte, waing esecne, yogo madicne benang.”

6

Yesudi Sabatle yowa miwec

1 Yesu ye Sabat dameng monicka wit bolewa yefe leemewa mic-tengtengfocine yenge wit noine bamoctolu socine litolu nobong 2 Farisaio gocnedi nganicebalu uwayeleibong, “Ngenge Sabat damengka aibaba mi aiaiine yogo omale aigaing?” 3 Uwayelebong Yesudi yanguc bafaliyeyelewec, “Dawidi nga agofocine nosingte homalu aibaba aiibong, yogo mi wafe-ngagec aicaigaing, me? 4 Ye Wapongte Ibu-kulucka felu bret Wapongte ibu loicne, yogo balu yeicne nolu agofocine inguchac yelewec. Nga bret yogo depec-baba ngic yenge sugudi nalic nodaingte, nga gocnedibac miyac.” 5 Milu yanguc edocebawec, “Ngicte Madec ye Sabatle Sugucne.”

Yesu Sabat damengka ngic monic moleine homaicne bamadickewec.

6 Aime Sabat dameng monicka Yesu ye kpakpaduc macka felu Wapongte yowa weduyelewec, iwa ngic monic mole-foleine homaicnedi yengeholec ngiyewec. 7 Aime Wapongte yefe-yowale wewedu ngic nga Farisaio, yenge Yesudi Sabat damengka huckolec baba-madic bole monic bame nganilu yowawa loningte dongenginengti nganilu domaibong. 8 Aime Yesudi ngage-ngagengineng nganilu ngic yele yanguc miwec, “Ga fangke ofelu hewacnonggang domac!” Inguc mime ngic ye fangke felu hewacnginang domaemewa, 9 Yesudi yanguc edocebawec, “Wiyac monic uwangelebe: Sabat damengka weni yogodi aiaine aigac? Aibaba madicne me aibaba sowacne aiyelenoga, ailu homanogale aigaing agofocngineng baficebanogale migac, me gocne basowalecebanogale migac?” 10 Inguc milu dongeine lengani-welengani ailu nganicebalu ngic yele miwec, “Ga molegone sungkec!” Inguc mime ye moleine sungkeme moleine madickeme 11 yenge aalic sugucne benang ngagelu yengungtiyac Yesu wenuc aicnoningte mingagec aiibong.

Yesudi mic-tengteng 12 bawosaecebawec

12 Yesu ye dameng iwa milockenale kupicka felu debocka yeicnac Wapong milockelu gacgume 13 mac saeme mic-tengteng habutowa wacebame hikebong, yengele kwelinacni mic-tengteng 12 bawosaecebalu wacngineng salecebaicne wacebawec. Nga salecebaicne yengele wacngineng yanguc: 14 Simonte wacine monic Yesudi Pita wackewec, ailu yele gbaine Endru. Yakobos nga Yohane, nga Filip nga Batolomeu, 15 nga Mataio nga Tomas. Ailu Alfaiusle madec Yakobo nga Simon, ye Selot wackeibong. 16 Ailu Yakobos madecine Yudas, nga Yudas Iskariot, yedi gacgu Yesu kwesackelu mudockeme badaingte.

Yesudi ngic-ngigac homacne bamadicebawec

17 Aime Yesu ye kupicka mic-tengtengfocine 12 yengeholec walu himong wenengngine monicka mic-tengteng alingfocine homacne yengeholec domawec. Aime ngic-ngigac homacnedi Yudeya himong neboc nga neboc, nga Yerusalemkocni ailu Tair nga Saidon kiwecnginacpec mac-himong falegac, iwacni kwesiibong. 18 Kwesilu Yesule yowa ngageningte, nga yedi hucngineng bamadicebanale kwesiibong. Ailu aleng wonongkolec ngic yenge inguchac momoc kwesilu madickeibong. 19 Aime yele kucti yengela falockeme ngic-ngigac sasawadi madickeibong, yogolec ailu yenge sasawadi ye oiyaningte ngageibong.

Yesudi ngic kwele-sowackolec yengele miwec

20 Inguc aibong Yesu ye dongeine mic-tengtengfocine yengela hilalu miwec, “Waweweine gagaing, ngenge kwele-angackolec, Wapongte ngani-damong yogo ngengele. 21 Nga yakumac nosingte homagaing, ngenge kwele-angackolec, ngenge gacgu nosing nolu gebecngebadaicte. Ailu hii kwele-sowackolec yakumac gagaing, ngenge kwele-angackolec, ngenge gacgu gouwedaingte. 22 Nga Ngicte Madeckolec gagaingte ailu kweledi wikecngebalu misowalecngebadaingte. Ailu lobina locngebalu wac sowacne wacngebadaingte, yogo ngenge kwele-angackolec. 23 “Dameng iwa kwele-madic ngagelu wintacke fec-wac ailu beliyedaing. Ngenge honocmengka fulingineng sugucne wangecngineng fagac. Aime yengele ngambofocngineng yengi esecne Wapongte sinaic mimi yengela aibaba ihac aiyeleibong. Yesudi moneng-mafaholec gagaing yengele miwec. 24 “Nga moneng-mafaholec gagabiyeng, ngenge umacnginengkolec, ngenge wiyac angacineholec ngengilangkac biyac babong motowec. 25 Nosing nogebec yakumac aicaigaing, ngenge umacnginengkolec, ngenge gacgu nosingte homadaingte. Nga yakumac gouwelu gagabiyeng, ngenge umacnginengkolec, ngenge gacgu kwele-sowac ngagelu hiyadaingte. 26 Ailu ngic-ngigac yengi mimadicngebalu gagaing, ngenge umacnginengkolec, yengele ngambofocngineng esecne sinaic mimi kwesacine inguchac mimadicebalu gaibong.

Ngabafocgone yengele angac ngagedamec

27 “Ailu yowanele hedec kwecaigaing, ngengebac yanguc edocngebagabac, Ngenge ngabafocngineng yenge ago aiyelelu angacka gadaing ailu kweledi wikecngebacaigaing, yenge aibaba madicne aiyelelu gadaing. 28 Ailu sawec-yowa sowacne edocngebacaigaing, yenge yambungebalu gadabiyeng, ailu basowalecngebacaigaing, yengele ailu milockelu gadabiyeng. 29 Aime monicti munggunggone neboc wedaicte ingucne, ga nebocgone inguchac hegiledamec, nga monicti ngakpigone witina badaicte ingucne, ga ngakpigone kwelina inguchac hegileng badaic. 30 Aime gala wiyac monicte milocgudaingte, yenge wiyac yogo yeledamec, ailu monicti geicne wiyac ewalicgulu bame, hatacmac bafaliyegelenale mi micnodamec. 31 Ngic yenge hocne aibaba i aiyeleningte ngagesicaigaing, ngenge aibaba silicine yogoyac aingeledaing. 32 “Nga yenge ago aingelelu angac ngagecaigaing, ilec ngenge inguchac ago aiyelelu angac ngagedaingtewa, ngengela kwele-madic-yowa homacne mi minoga. Bikic-baba aling yenge wenuc ago aiyelelu angac ngagecaigaing, ngenge inguchac yenge ago aiyelelu angac ngageyeledaing. 33 Nga aibaba madicne aingelecaigaing, yenge aibaba madicne aiyeledaingtewa, ngengele kwele-madic-yowa mi minoga. Bikic-baba aling yenge yogo inguchac aicaigaing. 34 Ailu yanguc ngagening, ngengelacni tofa aibong ameine badaingtewa, ngengele kwele-madic-yowa mi minoga. Ngic bikicnginengkolec yenge inguchac bikickolec agofocngineng wiyacngineng ameineholec yelecaigaing. 35 Ailu ngenge ngabafocngineng yengele angac ngagelu aibaba madicne aiyeledaing. Ailu amengineng hegilebong, yengela fadaic, badungeleningte mi ngagesidaing. Inguc aidaingtewa aibaba madicnele fulingineng sugucne fadaicte, aime Mamacngineng Wapong Feicnetowanonggeng yele adu-madecfocine aidaingte. Ye ngic-ngigac kpaomaine nga wac sowacneholec ailu ngic kindololoholec aibaba madicne aiyelecaigac. 36 Ngenge Mamacnginengti kwele-sowac aingelecaigac, silicine ingucneyac ngengi yenge kwele-sowac aiyelegadaing.

Yesudi ngage-wosaecte yowa miwec

37 “Ga ngic-ngigac mi sulecebadamec, inguc aidamectewa ye inguchac mi sulecgudaicte. Ailu ga ngic-ngigac ngage-wosaec aiyelelu umacngineng mi mimoctodamec, inguc aidamectewa ye ga inguchac wosaecgulu umacgone mi mimoctodaicte. Ga sowacnengineng hegiledamec, aime ye inguchac gale sowacne hegiledaicte. 38 Ngenge wiyacngineng balu ngic-ngigac yeledaing, inguc aidaingtewa, Sugucnedi wiyacngineng ameine kweme haume kpendaelu kpung kwedaicte. Ailu hatacmac kweme wakelu sotingkelu nebocine tabunginang wame badaingte. Yogo yangucte, ngenge ngic wiyacngineng umacine wosaelu yelecaigaing, umacine silicine ingucneyac yengi ameine wosaelu ngeledaingte.” 39 Aime Yesudi hatacmac nangeng yowa yanguc edocebawec, “donge-pisic monicti donge-pisic agoine monic nalic mi mengockedaicte, yeke momocyac longka haudabiyecte. 40 Nga hibi-mac madec monicti weweduine yele feicne mi aidaicte. Wewedu ye madecfocine weduyeleyackeme motome yele silic ingucneyac aiyackedaingte. 41 “Aime ga wenucte agogonele dongewa gochakic fagac, yogo nganilu geicne dongewa yoc kebangine fagac, yogo mi ngagesigic? 42 Inguc ailu agogonele nalic yanguc mi midamecte, ‘Ago, ngageengka dongegona gochakic fagac baickenogale ngagegabac.’ Kwesac ngic, ga geicne dongewa yoc kebangngine sugucne fagac yogo mi nganilu i nalic mi baickedamecte. Geicne dongewacni yoc kebangngine sugucne baickelubac, agogonele dongewa gochakic fagac, yogo nalic ngani-motolu baickedamecte.

Yesudi ngic nongileng fungine yocka soc holelu miwec

43 “Yoc monic madicna noine sowacne nalic mi fikedaicte, me yoc sowacna noine madicne nalic mi fikedaicte. 44 Aime yoc sasawa yenge noinenginengti funginengineng bayegengkecaigac. Ga muc somangineholec iwacni fik noine nalic mi bamoctodamecte, ailu waing noine yogo tambong-tambongkacni nalic mi bamoctodamecte. 45 Ngic madicne yele kwelewacni wiyac madicne ofedaicte. Nga ngic kindololoholec, yele kwelewacni wiyac sowacne ofedaicte. Yogo yangucte: Wiyac kwele-ngage-ngageina wakelu fagac, yogo hocne micti mime yegengkedaicte.

Yesudi ngage-ngagesingte yowa miwec

46 “Ngenge omale Sugucne wacnuc-aigaing, ailu sifu yowane hegilelu mi balaibecnucaigaing? 47 Aime monicti welelu yowane ngagelu i balaibelu boleine inguchac badaictewa, ye ngic weningucne, yogo edalicngebadacte. 48 Aime ngic monic ye mac banale milu himong falime fapacladeng fikeme yogolec kwelina bosingngine wikeme hauwec, ngic yogo ye ingucne. Ye mac sanangne bawecte mac lumongtowa kwesilu mac nalic mi basowaledaicte. 49 Aime ngic-ngigac gocne yowane ngagelu boleine mi bacaigaing, yenge ngic monic ye mac banale milu bosingngine himong pelecne iwa falime haudaicte, ye ingucne. Aime mac kweme misa sugulelu mac yogo biyac fuwangke walu kwososockedaicte.” 7

Yesudi hudule damongte kwelec kwekweine bamadickewec

1 Aime Yesu ye yowa yogo ngic-ngigac edocebayackeme ngagebong motome Kapeneam macka hikewec. 2 Iwa hikelu hudule damong monicte kwelec kwekweinedi homanogale ailu fawec. Ye ngic madicne, sugucneine alang bacnocaigac. 3-4 Inguc aime hudule damongti Yesule siduc ngagelu Yuda-ngic micnefocngineng gocne Yesula salecebame hikelu hataecnolu miibong, “Ga hudule damongte kwelec kwekweine monic bamadickedamecte, ilec biyac welec. Hudule damong ye ngic madicne, ga nalic welelu ye bafickenong! 5 Ye ngic-ngigac aling nongileng angac ngagecaigac, ailu yedi molickeyeleme kpakpaduc macnonggeng baibong.” 6-7 Edobong Yesu ye yengeholec hikelu mac bangkaleme hudule damongti agofocine gocne salecebame yanguc edoningte hikeibong, “Sugucnene, damenggone homacne mi hegilenong. Ailu na oma madicnenele ga macne kwelina ofedamecte, na ingucnedi gala nalic mi fudacte, ilec ga iwa domalu yowa sugu miyengka nale kwelec kwekwene madickena. 8 Yogo yangucte, na ingucneyac, ngic kucnginengkolec yengele bagewa ganogale locnuibong. Ailu nale bagewa huduc ngicfocne gacaigaing. Aime monicte hikec mibe hikedaicte nga monicte welec mibe weledaicte. Aime kwelec kwekwenele yago bac, mibe badaicte.” 9 Inguc mime Yesu ye yogo ngagelu kwatackewec, ailu hefaliyelu habu ye balaibeibong, yenge yanguc edocebawec, “Mibe ngagening: Israel himongka ngage-ngagesingngineng kucineholec ingucne monic mi nganiiba.” 10 Aime ngic salecebawec, yenge damongte macka hefaliye hikelu nganibong kwelec kwekweine ye hucine miyac aiwec.

Yesudi ngigac-hosec monicte madec homaicne bagboliyewec

11 Aime Yesu ye mac monic wacine Nain, iwa hikeme mic-tengtengfocine nga ngic-ngigac homacnedi ye balaibeibong. 12 Hikelu taonte odale nu sugucna domalu, madec monic homawec, yele kponggbong tengkelu waibong. Madec yogo ye ngigac-hosec monicte madec moniyang sugu, aime ngic-ngigac homacnedi ye balaibelu taonkacni waibong. 13 Inguc wabong Sugucne ye ngigac yogo nganilu kweleine sowaleme yanguc miwec, “Ga mi hiyanong!” 14 Inguc milu lelu katapa yogo oiyame madec tengkeibong, yenge hegilelu domabong Yesudi miwec, “Madec, edocgugabac, ga fangkec!” 15 Mime madec homaicnedi fangkelu yowa miwec. Aime Yesudi madec yogo hatacmac nenggacine lacnowec. 16 Lacnome ngic-ngigac yenge yogo nganilu kwatackelu homacne hangocebame, Wapong wacine mitengkelu yanguc miibong, “Wapongte sinaic mimi sugucne monicti nongilang fikelu gagac.” Nga “Wapongti ngic-ngigacfocine nongileng yugucnubalu gagac.” 17 Aime siduc idi Yudeya himongka nga himong gocne nebocina ngiyegac, iwa hikeme sasawadi siduc yogo ngageyackeibong.

Yohanedi mic-tengtengkecine yaeckang Yesula salecepawec

18-19 Aime Yohanele mic-tengtengfocine yenge siduc yogo aibong Yohanedi mic-tengtengkecine yaeckang wacepame weleboc yeke Sugucnela hikelu yanguc milu uwacnonicte salecepawec, “Kwesinolenogale miwec, yogo ga me monicte wangec ganoga?” 20 Inguc milu salecepame yeke Yesula hike sulumelu yanguc milu uwacnoiboc, “Kwesinolenogale miicne, yogo ga me monicte wangec ganoga? Yohane misa-lowacti yogo uwagelelu ngagenogale gala salecnupagac.” 21 Ailu dameng iwahac Yesu ye ngic-ngigac hucnginengkolec nga kuc-wawa, ailu alengkolec aling homacne bamadicebawec, ailu donge-pisic homacne bamadicebame dongengineng hilaibong. 22 Ilec yanguc edocepalu miwec, “Ngeke hikelu wiyac ngani-ngagec aigabiyec, ilec siduc Yohane aicnodabiyec! Donge-pisicti dongengineng hilacaigaing nga hige-sowac yengi yefe hikegaing, ailu waic-sanangnginengkolec, yenge socngineng madickegac. Ailu hedec-fong yenge yowa ngagegabiyeng, nga homaicne, yenge gboliyegaing, ailu ngic waweweine yenge siduc madicne ngagegabiyeng. 23 Nga monicti nale ngage-yaec mi aigac, ye kwele-angackolec gagac.”

Yesudi Yohanele fungine miyegengkeyelewec

24 Aime Yohanele mic-tengtengkecine yeke hikeebocka, Yesudi yele yanguc milu habu edocebawec, “Ngenge himong kisiwa oma wiyac nganinogale hikeibong? Komba monic gbelongti weme lec-welec aime, yogo nganiningte hikeibong, me? 25 I miyac, aimebac oma wiyac nganinogale hikeibong? Ngic monic wambacine hibiineholec, me? Ngagegaing, ngic ngakpingineng hibine madicne holecaigaing nga himongte angacka gagaing, yengi ngictaule macka gacaigaing. 26 Ngenge Wapongte sinaic mimi monic nganinogale hikeibong, me? Ye hocne Wapongte sinaic mimi gocne sasawa ewalicebagac, inguc hocne edocngebagabac. 27 Yele hocne hibiwa yanguc kwelengkeicne fagac, ‘Ngagegic, na mic-yowa mimine salebe yedi hocne molickegelelu yefegone bamadickegeledaicte.’ 28 Mibe ngagening, ngigackacni fike-ofeibong yengelacni monicti Yohane nalic mi ewalidaicte. Aime ngic Wapongte ngani-damongte kwelina bawacnagulu gagac, yedibac Yohanele feicne aigac.” 29 Aime ngic-ngigac sasawa yenge yogo ngagelu, takes-baba yengeholec momoc, esecne Yohanela hikelu misa lowaibongte ailu yanguc miibong, “Wapong ye yowa noine nga dondonnele damongine,” inguc miibong. 30 Nga Farisaio ailu Wapongte yefele ngage-ngage ngic, yengibac Wapongti yefe esecne miyelewec, yogo lobeelu Yohanela hikelu misa monic mi lowaibong. 31 Aime Yesudi miwec, “Yangucteyac aling yago yengele silicngineng yanguc, 32 yenge adu-madecfocngineng yenge sobengka ngiyecaigaing ingucne. Yenge ngiyelu yengungtiyac yanguc milu wacnagucaigaing, ‘Nonge kpeng fitobeng ngenge omale gee mi webiyeng nga kwele-sowac gee holebeng omale mi hiyabiyeng?’ 33 Yogo yangucte, Yohane misa-lowacti welelu bret nga waing monic mi nome ngenge ‘ye alengineholec’ miibong. 34 Nga Ngicte Madec ye wele nosing misa nome micaigaing, ‘Nganining, ye nosing misa efecne mi nocaigac, ailu misa sanangne nolu kapaine aicaigac, ailu takes-baba nga bikickolec yengele agongineng.’ 35 Aime Wapong ngage-ngage-motocine yogo noine aigac, ilec adu-madecfocine yengele aibabadi Wapong yeicne bayegengkedaicte.”

Bikic-baba ngigac monicti Yesule hige suwewec

36 Farisaio ngic monic, wacine Simon, ye Yesuholec nosing nonale macina wackeme yele macka feme ngiyeiboc. 37 Aime bikic-baba ngigac monic ye taon iwa gawec, yedi, “Yesu ye Simonte macka ngiyegac,” inguc mibong ngagelu kilung monic, wacine alabastros posadi baicne, i sandaineholecti hoine madicne yogo balewec. 38 Balelu Yesu lobeinahaic, higeina domalu hiyame donge-misainedi walu Yesule higewa holeme, ye hodoc-susucinedi suwecnolu higeine muduckewec, ailu sanda hoine madicne idi higeine lowacnowec. 39 Inguc aime Farisaio ngic Yesu wackewec yedi nganilu yeicnahac yanguc ngagewec, “Ngigac welegac ye bikickolec, ilec ailu ngic yago ye Wapongte sinaic mimi noine aigacka, ye bikic-baba ngigacti bauwalu aibaba yago aigac yogo nalic ngagedecka.” 40 Inguc ngageme Yesudi yanguc edowec, “Simon, yowa monic edocgunogale ngagegabac.” Inguc mime miwec, “Oc, wewedu minong.” 41 Mime yanguc edowec, “Ngic yaeckang yeke moneng-damong monic yelacni tofa aiiboc, monicti moneng 500 nga monicti moneng 50 inguc. 42 Aime yeke ameine yogo baducnonicte aibibiyelu gaebocka, ye amenginec hegilewec. Hegileme yekelacni weni yogodi moneng-damongte angac homacneyac felu ngagedaicte?” 43 Uwacnome Simonti bafaliyewec, “Moneng homacne hegilecnowec yedi, inguc ngagegabac.” Mime Yesudi miwec, “Ngage-wosaec ailu yowa noine migic.” 44 Aime ngigacta haic hefaliyelu Simon yanguc edowec, “Ga ngigac yago nganic! Na macgona ofebe higenele misa monic mi nelegic, yedibac donge-misainedi higene suwelu yeicne hodoc-susucinedi higene bakelengkegac. 45 Aime na macgona ofebe, wenac madicte mi muducnugic, nga yedibac ofegabac, iwacniyac higena muduckegac. 46 Ailu hodocne sandadi monic mi lowanelegic, yedibac higene sanda hoineholecti lowanelegac. 47 Ilec edocgube ngagec: Ye angacine homacne edalicnugacte bikicine homacneyac hegilecnobe miyac aiyackegac. Monic ye bikicine kpisicnemac hegilecnoicne, yedibac, angac kpisicnemac facnogac.” 48 Inguc milu ngigac yanguc edowec, “Bikicgone yogo biyac hegilegelegac.” 49 Mime ngic-ngigac gocne yeholec ngiyeibong, yenge yengungtiyac mingagec ailu miibong, “Yago ma ngic? Ye bikicngineng inguchac hegileyelegac.” 50 Aime Yesudi ngigac micnowec, “Ngage-ngagesinggonedi mime bikicgone baickebe wasecne aigamec. Kwele-efeckolec hikec!”

8

Ngigac homacnedi Yesu balaibeibong

1 Inguc aime Yesu ye taon nga mac alingka lolicke hikelu, Wapongte ngani-damongte siduc madicne edocebalu gawec. Aime mic-tengtengfocine 12, 2-3 ailu ngigac gocne alengkolec nga hucnginengkolec bamadicebawec, yenge yeholec momoc hikeibong. Aime ngigac yenge monengngineng Yesu nga mic-tengtengfocine baficebalu gaibong. Ngigac homacnedi inguc aiibong, yengelacni monic wacine Maria, wacine monic Magadalen, yelacni aleng 7 yebiyecnowec. Nga monic Yoana, ngaweine Kusa, ye Herodele moneng-damong, ailu monic wacine Susana.

Huc-wasec wicke-wickele nangeng yowa

4 Aime ngic-ngigac yenge taon ngiye-lewecsoc, iwacni Yesula welelu habu sugucne aibong, yedi nangeng yowa yanguc edocebawec, 5 “Wasec wicke-wicke ngic monicti huc-wasec wickenale bolewa hikewec. Hikelu wasec wickeme wasec gocnedi gilolu yefewa holebong ngic yengi witina edeibong, aime nango yengi kwesilu nowackeibong. 6 Nga gocnedi gilolu posa tolowa holelu kwac kwodubong himong misaine mikac aiwecte sokuwelu homaibong. 7 Aime wasecne gocnedi gilolu kpinding kwelina holebong yenge momoc sockayac sugulebong kpindingti hole-homacebawec. 8 Aime wasec gocnedibac gilolu himong madicna holelu kwacine kwodulu noine 100 sasawa fikeyackewec.” Inguc milu sugucnehac yanguc wackelu edocebawec, “Monic ye hedeckolecti yowa yago ngagedaic.”

Yesudi nangeng yowale fungine edocebawec

9 Mime mic-tengtengfocine yenge nangeng yowale fungine, ilec uwacnobong 10 yanguc edocebawec, “Wapongte ngani-damongte ngage-ngage sangkeicne, yogo ngengi sugu ngage-motoningte biyac ngeleicne. Aime gocne yenge dongengineng hilacgu sifu mi nganidaingte, nga hedecnginengti ngagegacgu nalic mi ngage-motoningte nangeng yowa sugu yeleicne. 11 “Nangeng yowale fungine yogo yanguc: Huc-wasec yogo Wapongte yowa. 12 Aime wasec yefewa holewec, yogo gocne yenge yowaine ngagebong, Aleng Sugucnenginengti welelu yengi Sugucne ngagesingkenogale aibong, yedi wasecne mi ainingte yowa yogo kwelenginangkocni baickeyelegidaicte. 13 Wasec posa tolowa holewec, yogo ngic gocnedi Wapongte yowa ngagelu angacka biyac bacaigaing, nga kwelenginang godocine monic mi bawecte dameng kpisicnemac fame lokwesac dameng kwesime yenge hegiledaingte. 14 Aime wasec kpindingka holewec, yogo ngic gocnedi Wapongte yowa ngageibong, yenge gaganginengte ngageboc, nga hiye-monengnginengte lokwesacka ailu himongte gagawa ngani-angac ailu gaibong, idi yowa hole-homame noine sowacne ailu miyac aicaigac. 15 Aime wasec himong guwecineholecka holewec, yogodibac ngic gocne yenge Wapongte yowa ngagelu kwelenginang lolu yefe dondonne nga madicne bagacaigaing. Inguc bagacgu tatakic mikac noine bafuwacaigaing.

Hifa kwendangkelu mi someckenoga

16 “Aime ngic monicti hifa kwendangkelu hebecti hemackelu mi heluluckedaicte, me mac fafa bageina lome mi ngiyedaicte. Yogo miyac, ye ngiye-ngiyeina lome ngiyeme ngic-ngigac macka ofedaingte, yenge hifa angocine yogo nganiyackedaingte. 17 Aime wiyac sasawa sangkeicne fagac, yogo dondonne fikedaicte, nga wiyac someckeicne fagac, yogo gacgu hifa angocina yegengkedaicte. Yogo sangkeicne mi fagidaicte. 18 Aime monic ye wiyac facnodaictewa, ye wiyac hatacmac lacnodaicte nga monic ye wiyac mi facnodaictewa, yelacni wiyac facnogac ingucne ngagesigac, yogo inguchac ewalidaicte. Ilec ailu ngenge yowa ngagegabiyeng, yogo ngagelu, ngage-motolu gadabiyeng.”

Yesule nenggac gbafocine

19 Aime Yesule nenggac nga gbafocine yenge yela hikebong ngic-ngigac homacnedi hedickeibongte ailu nalic mi nganiibong. 20 Inguc aibong gocne yengi Yesula yanguc mibong fewec, “Nenggac gbafocgone yenge kwesilu nganicguningte lobina domagaing.” 21 Mibong Yesudi miwec, “Wapongte yowa ngagelu balaibecaigaing, yengi nenggac gbafocne aigaing.”

Dibong gbelong yeki Yesule yowa ngageiboc

22 Dameng monicka Yesu ye mic-tengtengfocine yengeholec wagewa felu yanguc edocebawec, “Nongileng lifuc nebocina hikenang.” Inguc mime iwa hikeebongka, 23 Yesu ye gung fame gbelong sugucne welelu misa lifucka weme misa siwinelu wage bamungkenogale aime yenge haunogale aiibong, 24 ailu mic-tengtengfocine yenge Yesula lelu yeuckelu miibong, “Sugucne, Sugucne, nongileng misawa haunogale aigabeleng!” Mibong Yesudi fangkelu gbelong nga dibong mikpatalac aiyeteme gbelong miyac aime lifuc ye kalong kwelu fawec. 25 Fame mic-tengtengfocine yengele miwec, “Ngenge ngage-ngagesingngineng mikac mecne.” Aime mic-tengteng yenge hangocebame kwatackeibong ailu yengungtiyac ngani-welec ailu miibong, “Ye oma ngic? Ye gbelong nga dibong yowa edocepame yowaine ngagegabiyec.”

Yesudi ngic monictacni aleng yebicebawec

26 Aime Yesu nga mic-tengtengfocine yenge lifuc falockelu Gerasa ngic yengele himongka hikeibong. Himong yogo Galili lifuc nebocina. 27 Hike sulumebong, Yesu ye wagewacni walu taon yogowacni ngic monic alengfocineholec bafuwawec. Ngic yogo ye dameng dalicne biyachac senggang gacgu macka aneng mi ngiyelu dongesiwa gacaigac. 28 Yedi Yesu nganilu dacineholec aukwelu Yesule emewa wafalu yanguc wackewec, “Yesu, Wapong Feicnetowale Madec, nala wiyac monic mi aidamec. Na yowa milu wasicgugabac, ga doicka mi locnudamec!” 29 Aime Yesudi ngic yelacni aleng yebiyeme ofelu hikenale biyac edowec, ilec inguc miwec. Aleng wonongkolec yogodi dameng dalicne aicnome ngic yengi balu senti hige-moleine hefelu damongkebong ngiyelu ye sen welockeme alengti mengockelu himong kisiwa hikelu gawec. 30 Aime Yesudi uwacnowec, “Ga wacgone ma?” Uwacnome miwec, “Na wacne Habu sugucne.” Aleng homacnedi yele kwelewa haulu gaibongte ailu yedi wacine inguc miwec. 31 Aime yenge Yesu yanguc miwasic aicnoibong, “Ga long sugucnebenang iwa salecnubang mi haunang!” 32 Nga himong iwa bec-habu sugucnedi fegengka sulukwelu gaibong aleng yenge yebicebame becka hauningte Yesu miwasic aicnobong yedi inguc ainingte ngageyelewec. 33 Ailu yenge yebicebame ngickacni ofe-walu bec-habu yengela haubong bec yenge fegengkacni gasackelu lifuc kwelina haulu misa kpokpocne nolu homayackeibong. 34 Aime bec-damong yenge aibaba fikewec, yogo nganilu hangoc hikelu siduc misugulebong taonka nga macka hikeme 35 ngic-ngigac yenge yogo ngagelu aibaba fikewec, yogo nganiningte Yesula kwesiibong. Kwesilu ngic alengkolec gawec, ye nganibong, yedi ngage-motolu ngakpi holelu Yesule higewa ngiyewec. Inguc ngiyeme yenge nganilu hangocebawec. 36 Ailu ngic alengfocineholec gawecti wenucka madickeyec, yogo dongenginengti aibaba fikeme nganiibong, yengi siduc aiyeleibong. 37 Aiyelebong Gerasa ngic yengele himong, filefocine sasawadi homacne benang hangocebawec. Ilec ailu Yesu ye himong, yogo hegilenale edoibong. Edobong Yesudi hefaliyelu hikenale wagewa feme 38 ngic aleng yebiyecnowec, yedi Yesuholec hikenale uwacnome Yesudi salelu yanguc edowec, 39 “Ga macgona hefaliye hikelu Wapongti pasi sugucne aigelegac, yogo miyengka yegengkena.” Inguc mime ngic ye hikelu Yesudi yela pasitowa bawec, yogo taonka ngic-ngigac sasawa mime yegengkeyeleyackewec.

Yesudi ngigac yaeckang bamadicepawec

40 Yesu ye lifuc nebocinacni kwesiyemewa ngic-ngigac yenge yele wangec gaibongte ailu ye hefoleibong. 41-42 Aime kpakpaduc macte damong monic wacine Yairus, ye welewec. Ye aduine moniyang sugu, hifaine 12 aiyemewa homanogale aiwecte ailu ngic ye welelu Yesule higewa wafalu macina lenogale dogbac aicnowec. Aicnome yenge leebongka, ngic-ngigac habu sugucnedi hewalingkelu feine feine leibong. 43 Aime ngigac monic ye sac-dale ailu gacgume hifaine 12 aime monicti ye bamadickenale yefe mi bafuwawec. 44 Ye habu yengele kebangka Yesule lobewa yefe lelu ngakpi daleinele witic susucine oiyame sacine biyac kelengkeme 45 Yesudi uwawec, “Madi oiyacnugac?” Mime yenge “mi ngagegabeleng.” Mibong Pitadi edowec, “Sugucne, ngic-ngigac homacnedi wabunggulu hedicgugaing!” 46 Mime Yesudi yanguc miwec, “Monicti oiyacnume kuc monicta leme ngagegabac.” 47 Inguc mime ngigac ye biyac ngagewec, “Na bafuwacnugac hocne,” inguc ngagelu sangke-sangke hikenogale aibibiyelu dengdeng kweme welelu Yesule higewa wawewec. Ailu Yesu oiyawec nga wenucka madic-madic biyac benang fikecnowec, yogo ngic-ngigac yengele dongewa mifickeyackewec. 48 Miyackeme Yesudi yele yanguc miwec, “Adune, ngage-ngagesinggonedi bamadicgugacte ga kwele-efeckolec hikenong!” 49 Aime Yesu ye yowa midomaemewayac kpakpaduc macte damong, yele mackacni ngic monic yowa yanguc bawelewec, “Adugone biyac homayec, ga wewedu hatacmac umac mi lacnoc!” 50 Mibong Yesudi yogo ngagelu Yairus edolu miwec, “Ga hangoc mi ainong! Ngage-ngagesinggone sugu loengka ye gagaine hatacmac kwesidaicte.” 51 Inguc milu macka lekwesilu monicti macka mi feningte kpatalalu Pita nga Yohane ailu Yakobos nga adu nenggac-mamackecine, yengi sugu feningte miwec. 52 Nga ngic-ngigac nebecine yenge adule hisonggong aibong Yesudi edocebawec, “Ngenge hii hegilening, adu ye mi homayec, ye gung fagac.” 53 Inguc mime yenge adu ye biyac homayec, inguc ngageibongte ailu kucine bawalu migoi aicnoibong. 54 Aime Yesudibac adule molewa balu wackelu miwec, “Adu, ga fangkec!” 55 Inguc mime ilucine hatacmac hefaliye-weleme iwayac fangkelu ngiyeme Yesudi nosing lacnoningte edocebawec. 56 Nga nenggac-mamackecine yeke kwatackelu ngani-angac aiiboc. Yesudi ngic monic mi edonicte kpatalayetewec.

9

Yesudi mic-tengtengfocine 12 bole baningte salecebawec

1 Aime Yesu ye mic-tengtengfocine 12 wacebame weleyackebong aleng sasawa yebicebaningte nga huc fungine fungineholec bamadicebaningte bole-yowa nga kuc sasawa yelewec. 2 Yelelu Wapongte ngani-damongte yowa edocebaningte nga huckolec bamadicebaningte salecebalu 3 yanguc edocebawec, “Ngenge yefele wiyac monic mi balu hikedaing, hiye nga nosing ailu yasu me moneng monic mi badaing, me ngakpi yaeckang mi bahikedaing. 4 Nga mac monicka hike sulumebong, yenge mac holengelebong ngenge mac iwayac sugu ngiye-fangkec aibong motome taon monicka hikedaing. 5 Nga taon monicte ngic-ngigac yenge mi sebicngebabong ngenge taon yogo hegilelu higenginangkocni lube webong wame yenge yogo nganibong aibaba yogodi sowacnengineng edalicebadaic.” 6 Mime yenge macsoc hikelu siduc madicne mibong yegengkeme galu huc-doickolec bamadicebalu gaibong.

Herodedi Yesule fungine ngagenale aiwec

7 Inguc aime Galili prowinsle gawana sugucne, Herode yedi wiyac sasawa fikewec, ilec siduc ngageme gocne yenge yanguc miibong, “Yohane misa-lowac ye homackacni gboliyelu fangkelu gagac.” Inguc miibongte ailu ngagelu medeckewec. 8 Mibong gocnedi yanguc miibong, “Elaiya fikelu gagac,” nga gocne yengi miibong, “Wapongte sinaic mimi biyachac benang gaibong, yengelacni monicti welegac.” 9 Aime Herodedi yanguc miwec, “Nani mibe Yohane ubeine biyachac welockeibong, nga yagobac ma ngicte siduc ngagegabac.” Milu Yesu nganinale milu gawec.

Yesudi ngic 5 tausen nosing gumecebawec

10 Aime salecebaicne yenge hefaliye hikelu bole baibong, yogolecte siduc Yesu bacnoyackeibong. Bacnoyackebong motome, yedi mic-tengtengfocine 12 yenge sugu bacebalu mengocebame tembucngineng ngiyenogale taon monic wacine Besaida, iwahaic hikeibong. 11 Hikebong habutowa yenge yogo ngagelu ye balaibeibong. Balaibebong, yedi mac holeyelelu Wapongte ngani-damongte mime yegengkeyeleme huckolec yenge bamadicebawec. 12 Mac aweleme mic-tengtengfocine 12 yenge Yesula welelu miibong, “Himong yago ngicine mikacka gaebengka mac awelegacte habu salecebang mac-himong ngiye-legac, iwa lelu nosing bafuwa nolu iwa fadaing.” 13 Mibong yanguc miwec, “Ngengi nosing yelebong noning!” Mime yanguc bafaliyeibong, “Nonge bret 5 nga misa-sic yaeckang balu gagabeleng. Nga yenge habu sugucneyac, ilec nonge nosing fuli nalic mi badabelengte.” 14 Ngic yogo yengele dzalengineng 5 tausen ingucti gaibong. Ilec ailu inguc miibong. Mibong Yesudi mic-tengtengfocine edocebalu miwec, “Ngenge ngic-ngigac edocebabong, yenge habu-50 habu-50 inguc kpaduckelu ngiyening.” 15 Mime mic-tengteng yenge ngic-ngigac inguc ainingte edocebabong sasawadi wangiyeibong. 16 Wangiyebong Yesudi bret 5 nga misa-sic yaeckang, yogo balu dongeine hilame honocmengka feme yambungkelu bauckewec. Bauckelu ngic-ngigac botoc balu yeleningte, mic-tengtengfocine yeleme 17 yengi botoc balu ngic-ngigac yelebong sasawadi nogebec ailu nosing tofaine notiwa aiibong, yogo kpaduckebong haulu damba 12 wakewec.

Pitadi Yesule fungine miyegengkeyelewec

18 Yesu ye dameng monicka yeicnakac Wapong milockelu gaemewa mic-tengtengfocine yeholec gaibong yenge uwayelewec, “Ngic-ngigac yenge nale ma micaigaing?” 19 Mime miibong, “Gocnedi Yohane misa-lowac micaigaing, nga gocnedi Elaiya micaigaing, ailu gocne yengibac Wapongte sinaic mimi monic esecne, yedi gboliyelu gagac micaigaing.” 20 Inguc mibong miwec, “Aime ngenge ngengung nale ma micaigaing?” Mime Pitadi miwec, “Ga Wapongte Mesia.” 21 Mime, yenge yowa yogo ngic monic mi edocebaningte mimacebawec.

Yesu homalu homackacni hatacmac fangkenale edocebawec

22 Yogo yangucte miwec, “Ngicte Madec ye doic sugucne homacne ngagedaicte. Aime Yuda-ngic micnefocngineng nga depec-baba ngic micne ailu Wapongte yefe-yowale wewedu ngic yenge ye kweledi hegilelu webong homadaicte. Aime homame hadeng habackang aime hatacmac gboliyelu fangkedaicte.”

Yesudi yeicne balaibenogale yowa miwec

23 Aime yenge sasawa yanguc edocebawec, “Monic ye na balaibecnunogale ngagegacka, ye yeicne soc-kweleinele angac bawalu hadengsoc malicpongine bafangke tengkelu balaibecnudaic. 24 Monic ye yeicne gagaine sebilenale ngagelu boleine bacaigacka, ye gagaine sangkecnodaicte. Nga nale ailu gagaine hegiledaicte, yedibac gagaine fikecnodaicte. 25 Ilec ailu monic ye himongte wiyac sasawa bafuwalu balu gacaigac, yedibac gagaine sangkecnoyackedaicte me yeicne basowalenagudaicte. Yele gagaine yogo noine mikac aidaicte. 26 Aime ngic monicti nale ngageme gameineholec aigac ailu nale yowale ngageme gameineholec aidaictewa, Ngicte Madec ye Mamacinele nga angelofocinele nga yeicnele hulili-kwelengtowanginengkolec kwesidaicte, dameng iwa ye ngic yogolec inguchac ngageme gameineholec aidaicte. 27 Nga yago domagaing, ngengelacni gocne yenge mi homaebongkayac Wapongte ngani-damong weleme nganidaingte, yogo noine benang edocngebagabac.”

Yesule soc hefaliyelu haic monic aiwec

28 Aime yowa yogo miwec, ilec Sonda moniyang ingucne motoemewa Yesudi Pita nga Yakobos ailu Yohane bacebame milockeningte kupicka feibong. 29 Felu milockeemewa haic mesuinedi hefaliyelu silicine monic aime ngakpiine angolelu pilatac ingucne benang aiwec. 30 Inguc aiyemewa iwahac ngic yaeckang, Moses nga Elaiya yeke fikelu yeholec mingagec aiiboc. 31 Yeke hulili-kwelengngineholecti fikelu, Yesudi Yerusalem hikelu gagaine bamoctolu hegilecebalu fenale mingagec aiibong. 32 Nga Pita agokecineholec, yenge gung-kwomoc faibong. Faibongkacni gboliye fangkelu Yesu hulili-kwelengngineholec nga ngic yaeckang yeholec domaboc nganicebaibong. 33 Aime ngic yaeckang yeke Yesu hegilelu hikeebocka Pitadi Yesu edolu miwec, “Sugucnene, yagowa gabeng angacine aigacte fale habackang banang: Gale monic, Mosesle monic, nga Elaiyale monic.” Ye wiyac monic mi ngagelu moc miwec. 34 Yowa milu domaemewa kaguwa monicti fikelu walu somecebame hangoc ailu kaguwa kwelina domaebongka 35 kaguwa kwelinacni malac monic yanguc wackelu miwec, “Yago nale madecne bawosaeicne, ngenge yele yowa ngagedaing!” 36 Ailu malac miyac aime yenge donge hilalu Yesu yeicnakac domame nganiibong. Nganilu mic-tengteng yenge yowa mikac ailu domaibong. Aime dameng iwa wiyac nganiibong, ilec ngic monic mi edoibong.

Yesudi madec monic alengkolec bamadickewec

37 Mac saeme Yesudi mic-tengtengfocine habackang yengeholec kupickacni hauebongka ngic-ngigac habu sugucnedi bafuwaibong. 38 Aime habu yengele hewackacni ngic monicti Yesu wackelu miwec, “Wewedu, ga welelu madecne nganic, na madecne moniyang sugu. 39 Aleng monicti madecne bame ye aukweme alengti balu wepackelu socine bakuctungkelu bame micinacni sofololoc ofecaigac. Ailu aleng yogodi madec basowale-benangkelu dameng moniyang moniyang sugu hegilecaigac. 40 Aime mic-tengtengfocgone yenge aleng yebiyenogale edocebabe yenge aibibiyegabiyeng.” 41 Mime Yesudi miwec, “Dameng yagolec ngic-ngigac aling yago ngenge ngage-ngagesingngineng mikac ailu aibabangineng kosa-balasaineholec aigabiyeng. Dameng dalicne ngengeholec momoc ganogale tatakic ainelegac. Ga madecgone nala bawelec!” 42 Mime madec ye emeina balu leemewa aleng wonongkolecti madec wepackeme himongka wawelu socine tengteng kweme Yesudi aleng yowa sanangne aicnolu madec bamadickelu mamacine hatacmac lacnowec.

Yesu weningte fungine yeuctiyac miwec

43 Lacnome ngic-ngigac yenge Wapongte kuctowaine ingucne nganilu ngani-welec ailu ngagebong wiyac feicne aiwec. Ailu yenge Yesule bole sasawa nganilu ngani-welec aiibong. Inguc aiyebongka ye mic-tengtengfocine yanguc edocebawec, 44 “Ngenge hedec lolu yowa yago ngagening! Mi daliweemewa Ngicte Madec mudockelu losi yengele molewa lobong wedaingte.” 45 Mime mic-tengtengfocine yenge yowa yogo mi ngage-motoningte kwele nga ngage-ngagengineng fongkewec. Fongkeme yenge Yesule yowa mi ngage-motolu fungine hatacmac uwacnoningte hangocebawec.

Feicne gagale yowa

46 Aime mic-tengteng yengelacni madi feicne aidaicka, ilec yengungtiyac yowangineng fec-wac aiwec. 47 Inguc aibong Yesudi kwele ngage-ngagenginang fawec, yogo biyac nganilu madec hakic monic balu yeicneholec lome domame 48 yanguc edocebawec, “Monic ye nale wacte ngagelu madec yangucne sebiledaicte, ye na inguchac sebicnudaicte. Nga na sebicnudaicte, ye na salecnuwec ye inguchac sebiledaicte. Ilec ailu ngengele hewackacni ye bawacnagulu gadaicte, yedibac feicne aigac.” 49 Inguc mime Yohanedi yanguc miwec, “Sugucne, ngic monicti wacgone wackelu aleng yebicebame nganibeleng. Ailu nongilengkolec mi gagacte kpatalacnobeleng.” 50 Mime yedi miwec, “Monicti bolenonggengte ngaba mi aigac, yedi agononggeng aigac. Ilec ailu mi kpatalacnodaing.”

Yesu ye Yerusalem fenogale hikewec

51 Yesu ye honocmengka fenogale damengngine bangkale weleme ye ngage-ngageine Yerusalem iwa lolu hikewec. 52 Hikeme ye ngic gocne salecebame yenge molickelu noba-nosing nga mac fale bamadickeningte Samariale mac monicka hikelu sulumeibong. 53 Hike sulumelu Yesu ye Yerusalem hikedaicte, inguc ngageibongte Yesu hekecnoibong. 54 Inguc aibong mic-tengtengkecine, Yakobos nga Yohane, yeke yogo nganilu yanguc miiboc, “Sugucne, nalic mibeng honocmengkacni dac walu ngic yago lobecebayackena, yogo nalic aidabelengte, me?” 55 Miboc Yesudi hefaliyelu ngelengke-yetewec. [“Ye miwec, ‘ngeke mi ngagelu kwelenginec weni fikegaic. 56 Ngicte Madec ye ngic mi basowalecebanogale welewec. Ye bacebame wasecne ainingte welewec.’”] Inguc aime mic-tengtengfocine yengeholec mac monicka hikeibong.

Yesu balaibe-balaibele yefe

57 Yefewa hikelu ngic monicti edolu yanguc miwec, “Ga iwa me iwa hikedamectesoc na balaibecgulu gaholec ganogale ngagegabac.” 58 Mime Yesudi yanguc bafaliyecnowec, “Kate-hoda yenge himong kwelina fafanginengkolec, nga sawawa nango yenge selengnginengkolec, aime Ngicte Madectibac mac fafaine mikac.” 59 Milu ngic monic yanguc edowec, “Ga welelu na balaibecnuc!” Mime ngic yedi miwec, “Sugucne, ngagenelengka lelu mamacne longkelubac weledacte.” 60 Inguc mime yanguc bafaliyecnowec, “Hegilec, homacine yenge yengung longnaguning, gabac hikelu Wapongte ngani-damongte yowa miyengka yegengkena.” 61 Nga ngic monicti yanguc miwec, “Sugucne, balaibecgunogale ngagegabac, aimebac na hikelu alingfocne edocebalubac weledacte, yogo nalic, me?” 62 Mime Yesudi yanguc edowec, “Ngic monic ye ngage-ngageine biyac saleluhuc hefaliye-nganic aidaicte, ngic ingucnedi Wapongte ngani-damongtesoc mi aigac.”

10

Yesudi ngic 72 salecebawec

1 Yogo motome Sugucne ye ngic 72 bawosaecebalu yaeckang yaeckang heucebame yengileng taon nga mac-kpisicna hikenogale ngagesiwec, taon iwa yenge molic-molic salecebalu yanguc edocebame hikeibong, 2 “Nosing noine homacnedi houwelu fagac, nga bole-ngictibac efecnemac. Ilec ailu ngenge nosing fileine, milockebong yedi bole-ngic salecebame yengi hikelu noine bakpaduc aidaingte. 3 Ngagegabiyeng, ngenge lama madecinedi kate-hoda yengele kebangka gagaing, silicine yogolecsoc salecngebagabac. Ngenge yakumac iwa hikedaingte! 4 Ngenge moneng-ebec me hiye nga hige-ebec mi badaing. Ailu yefewa ngic monic bafuwalu yowa mi badaing. 5 “Nga mac iwa me iwa fenogale ngenge felu ‘Kwele-mogung ngengela fadaic!’ Inguc milu fedaing. 6 Inguc mibong kwele-mogung ngic monic iwa ngiyegacka ngengele kwele-mogungti yela fadaicte, nga mi ngiyegacka kwele-mogung, yogo hatacmac ngengilang hefaliyengeledaicte. 7 Bole-ngic yenge bolenginengte bole-fulingineng bafuwadaingte, idi madickedaicte, ilec mac ngeledaicte, iwahac ngiyeebongka nosing nga misa ngeledaicte, yogo nodaing. Mac-boneng monic mi hikedaing. 8 “Ailu taon monicka hikebong mac holengelelu, ngenge wiyac monic noningte ngelebong, yogo nodaing. 9 Nga taon iwa hucnginengkolec yenge bamadicebalu ngic-ngigac yanguc edocebadaing, ‘Wapongte ngani-damongti ngengela biyac wele bangkalelu fagac.’ 10 Nga taon monicka febong mac mi holengelebong, ngengebac mac yefenginang lelu yanguc edocebadaing, 11 ‘Ngengele macnginengte lubedi higenonggeng bakatackeme, nonge yogo inguchac pelengkebeng walu idi sowacnengineng edalicngebadaicte. Ailu ngenge sifu yanguc ngagedaing! Wapongte ngani-damongti yawa biyac bangkalelu kwesi fagac.’ 12 Ailu wowosae damengngine lobewa kwesidaicte, mac yogolec ameine umacne benang, yogo Sodom mac-himongka umac fikedaicte, yogo ewalilu umacneyac fikeyeledaicte, yogo edocngebagabac.

Kwele mi hefaliyegaing, yengele yowa

13 “Korasin taonka ngic-ngigac nga Besaida taon filefocine ngenge umacnginengkolec aidaingte. Ngengela kuc-pasi mi ngani-nganiine bocyac biyac fikewec. Pasi ingucne Tair nga Saidon macka fikedaicka, yenge bikicnginengte kwele-sowacte wambac biyac holelu wele defe lowa ngiyelu kwele-hefaliyec aidabong. 14 Aime wowosae damengka Wapongti Tair nga Saidon aling, yenge ameine efecnemac yeledaicte, ngengebac ameine umacneyac ngeledaicte. 15 Ailu Kapeneam, ngenge honocmengka fedaingte inguc ngagegaing, me? Miyac benang, homac macka bacngebalu hike-hikele silicka aigaing. 16 “Na salecngebabe, monicti hedecine ngengela lodaicte, ye hedecine nala lodaicte. Nga ngenge lobengebadaicte, ye na lobecnudaicte. Ailu na salecnuwec, ye inguchac lobeedaicte.”

Ngic 72 salecebawec yenge hefaliye kwesiibong

17 Aime ngic 72 yenge belic-belicka hefaliyelu miibong, “Sugucne, nonge wacgone wackebeng aleng yenge inguchac yowanonggeng ngagelu hikegabiyeng.” 18 Mibong Yesudi bafaliyeyelewec, “Aleng Sugucnenginengti pilatac ingucne honocmengkacni walu holeme nganiiba. 19 Nga ngenge hema nga wame-wame witinginang edesocebadaingte, ailu losingineng nga yele alingfocine sasawa yenge ngengele bagewa gadaingte, ilec bole-yowa nga kuc biyac ngeleiba balu gagaing inguc ngagedaing. Aime wiyac monicti nalic mi basowalecngebadaicte. 20 Nga alengti yowangineng ngagelu hikegabiyeng, ilec bocyac mi beliyedaing. Wac-alingngineng honocmengka kwelengkeicne fagac, yogolecbac homacne benang beliyedaing.”

Yesudi Wapong mimadickewec

21 Aime dameng iwahac Tili Asudi Yesu aicnome belic-belicte angacti bawakeme yowa yanguc miwec, “Mamac, honocmeng nga himong fileine, ngic aling ngage-ngage-motocnginengkolec nga fitilelu gagaing, yenge wiyac sasawagone yago mi nganiningte balu sangkeing. Ailu adu-madec kpisic-kpisic, yenge wiyac yago bayegengkeyeleing, ilec mimadicgugabac. Mamac, ga yogo nganilu kwelegone madickena, yogo noine. 22 “Mamacnedi wiyac sasawa nelewec bagagabac. Aime monicti Madecte fungine nalic mi ngagedaicte, Mamacti sugu ngagedaicte. Ingucneyac monicti Mamacte fungine nalic mi ngagedaicte, Madecti sugubac ngagedaicte. Ailu Madec ye ngic-ngigac bawosaecebalu edalicebadaicte, yenge inguchac Mamac nganidaingte.” 23 Aime Yesu ye mic-tengtengfocine yengela hefaliyelu yengele sugu yanguc milu edocebawec, “Ngenge aibaba fike-ofegac dongenginengti nganigaing, ngenge kwele-angackolec. 24 Molic-molic Wapongte sinaic mimi nga ngictau homacnedi, ngenge wiyac nganigaing yogo nganinogale ngagelu sifu mi nganiibong. Nga ngenge hedecnginengti ngagecaigaing, yogo inguchac ngagenogale aiyeleme monic mi ngageibong, ilec edocngebagabac.”

Samaria ngicti ngic monic bafickewec

25 Aime Wapongte yefele ngage-ngage ngic monicti wele Yesu lokwesacka lonale ngagelu yanguc miwec, “Wewedu, na aibaba wenuc ailu gaga-sanang badacte?” 26 Inguc mime Yesudi yanguc bafaliyecnowec, “Yefe-yowa hibiwa kwelengkeicne fagac, ga hibi iwa wenuc wafe-ngagec aicaigic?” 27 Mime ngicti yanguc bafaliyecnowec, “‘Ga kwelegone, ilucgone nga kucgone ailu ngage-ngagegone sasawa bucbucyac Sugucne Wapong ago aicnolu angac ngagecnolu gadamec!’ Ailu, ‘Geicne aigelecaigac silicine ingucneyac agogone gagac, ye ago balu angac ngagecnolu gadamec!’” 28 Mime Yesudi yanguc edowec, “Yowa dondonne milu bafaliyenelegic, ga ingucne ailu, gaga badamecte.” 29 Aime Yesule dongewa ngic yeuctiyac dondonne ainagunale uwacnolu miwec, “Aime nale ago gagac yogo ma benang?” 30 Uwacnome Yesudi yanguc bafaliyecnowec, “Ngic monicti Yerusalemkocni Yeriko taonka haunale haulu hise ngic yengele molewa holeme yengi ngakpi-kpolucine hemoctolu webong homanoga aime wikebong fame hikeibong. 31 “Faemewa depec-baba ngic monicti inguc yefe haulu ngic fawec, ye nganilu kwegegengkelu nebocina yefe hikewec. 32 Hikeme depec-baba ngic yengele babafic ngic monicti inguchac iwa hauwec. Haulu ngic yogo nganime fame ye inguchac kwegegengkelu neboc-yefe hikewec. 33 Aime Samaria ngic monicti yefe yogohac balaibelu haulu ngic fawec, ye nganilu yele kweleine sowaleme 34 yela lelu heloc misa nga waing misaine kweme waic sackolecka haume ebeckewec. Ebeckelu yeicne donggi witina lolu yowa-macka bahikelu ngani-damong aicnowec. 35 “Aime mac saeme siliwa moneng yaeckang yowa-mac-damong lacnolu yanguc edowec, ‘Ga ngic yago ngani-damong aicnolu gadamec! Na hatacmac hefaliyelu moneng gocne wikedamecte, ilec ameine geledacte.’” 36 Inguc milu Yesudi Wapongte yefele ngage-ngage ngic uwacnowec, “Aime hise ngic yengele molewa sowalewec, ngic habackang yengelacni ngic madi, yele ago aiwec, ga wenuc ngagegic?” 37 Inguc uwacnome yedi bafaliyelu miwec, “Yele kwele-sowac ngagelu bafickewec, yedi.” Inguc mime, Yesudi yanguc edowec, “Gageuc hikelu ye aiwec, ingucneyac aidamec!”

Yesudi Mata nga Maria yugucyepawec

38 Aime Yesu nga mic-tengtengfocine yenge hikegacgu mac monicka sulumeibong. Aime ngigac monic wacine Mata, yedi Yesu macina fenale hefolewec. 39 Hefoleme Matale kwaine monic, wacine Maria, yedi Sugucnele higewa wangiyelu yowaine ngagewec. 40 Ngageemewa Matadibac lec-welec ailu yekeholec mi ngiyelu wele domalu Yesu yanguc edowec, “Sugucne, ga nale ngageboc mi aigic. Na neicnac ngani-damong bole banogale aigabac kwane hegilecnugac, ye edoengka baficnuna.” 41 Mime Sugucnedi bafaliyecnowec, “Mata, Mata, ga wiyac homacnele ngageboc ailu umac bagic. 42 Ailu wiyac moniyang sugu yogobac baengka madickedaicte. Maria ye wiyac madicne wosaelu balu gagac, i monicti yelacni nalic mi baickedaicte.”

11

Mimilocte yefe

1 Yesu ye dameng monicka hikelu hewacine monicka milockeme motome mic-tengtengfocine yengelacni monicti miwec, “Sugucne, Yohane ye mic-tengtengfocine wenuc milockeningte weduyelewec, ga inguchac ingucne gocne wedunolenong!” 2 Mime Yesudi miwec, “Ngenge yanguc milu milockedaing, ‘Mamac, gale wac gbagbacne fadaic. Aime ngani-damonggone yogodi welenoledaic. 3 Ga hadengsoc nosing socnonggeng noledamec! 4 Nonge ngic yengele ame hegilegabeleng, ilec gagi inguchac bikicnonggeng hegilenolenong. Ga lokwesacka mi locnubadamec!’”

Sanangkelu galu milockenoga

5 Milu edocebawec, “Ngengelacni monicti deboc hewacina agoine monicte macka lelu midaicte, ‘Agone, ga bret ebec habackang baficnunong ameine lobewa geledacte. 6 Na agone monicti yefe dalickacni kwesilu debocka macna welegac aime nosingne mikac aime oma gumenogale kpungkegabac.’ 7 “Ye inguc mime agoine mac kwelina ngiyelu midaicte, ‘Ga umac mi nelenong! Nunonggeng biyac holelu adu-madecfocne naholec gung fagaingte nalic mi fangkelu bageledacte.’ 8 Na edocngebabe, ye agoinele ailu bret mi lacnodaickale milu ye dogbac ailu uwacnodaicte, ilec ailu ye fangkelu bret lacnodaicte. 9-10 “Ilec ailu migabac, milockening, aime yedi wiyac ngeledaicte, nga basackening, ailu bafuwadaingte, nga nuwa holening, aime ye nu laliyedaicte, ilec ngenge milockebong, ameine ngeledaicte, nga basackelu noine bafuwadaingte, ailu nuwa holebong nu laliyengeledaicte. 11 “Aime ngengele hewackacni mamac monicte madecinedi misa-sicte uwacnome hema sowacne nalic mi lacnodaicte 12 nga kokolec hucinele uwacnome wame-wame nalic mi lacnodaicte. 13 Ngenge sowacne aicaigaingti sifu adu-madecfocngineng kwele-madicte wiyac madicne yeleningte ngage-motogaing. Ilec yanguc ngagening, honocmeng Mamacnginengti aibabangineng madicne ingucne benang aicaigac, nga Tili Asuine yelenale uwacnodaingte, yenge Tili Asuine nalic yeledaicte.”

Yesu ye male kucka aleng yebicebadaicte?

14 Aime Yesu ye dameng monicka aleng monic ye yowaine mikac, yogo ngickacni yebiyewec. Yebiyeme alengti ngickacni ofelu leme ngic yowaine mikac gawec, yedi yowa mime ngic-ngigac yenge ngani-welec aiibong. 15 Nga ngic-ngigac gocne yengebac yanguc miibong, “Yogo aleng yengele ngictaungineng Belsebul yele kucka aleng yebiyecebagac.” 16 Aime gocne yengebac Yesu kucine wosaeningte ngagelu honocmengkacni pasi kucineholec monic banale edoibong. 17 Edobong Yesudi ngage-ngagenginang biyac ngagelu yanguc edocebawec, “Himong monicte ngic-ngigacti ngaba ainagulu siyeckedaingtewa, himong yogo kisi fikedaicte, mac monicti mac monicte witina waweme miyac aidaicte. 18 Nga Aleng Sugucnenginengti siyeckelu yeuctiyac yebicnagudaictewa, ye nga alingfocine nalic mi sanangkelu domadaingte. Aime ngengebac sifu nale migaing, ‘Ye Belsebuldi aicnome yele kucka aleng yebicebacaigac, yogodi nalic mi aidaicte.’ 19 Nani Belsebul yele kucka aleng yebicebadacka, ibac ngenge madecfocngineng yengi male kucka aleng nalic yebicebadaingte? Inguc aime yenge ngage-wosaec aingeledaingte. 20 Nga Wapong ye kucine lome na yogodi aleng yebicebagabacka, Wapongte ngani-damongti ngengela biyac weleyec, yogo ngagedaing. 21 “Ngic kucineholec monicti hudule woc-wiyacine balu macinele damong gaemewa mafaine madicne fadaicte. 22 Nga ngic monicti kucine hatacmac yela welelu yeholec wenagulu ewalidaictewa yedi ngic yele hudule woc-wiyac ewalicnoyackedaicte. Ewalime mac fileinedi hudule wiyacte kucka sanangne gawec, yogo miyac aime ngic kucine sugucnedi yele woc-wiyacine hise balu heuckelu ngic-ngigac gocne yeledaicte. 23 “Inguc aime monic ye nale agone mi aigac ye kweleinedi hegilecnugac. Nga monicti naholec bakpaduc bole mi badaicte, ye nale wiyac bame singsalolong fikenale bole bacaigac.

Aleng hatacmac hefaliyecaigac

24 “Aleng wonongkolec yedi ngickacni ofelu himong misaine mikac, iwa hikelu mac nale ngiye-ngiyeine basackelu lolickelu gacaigac. Gacgu mac ngiye-ngiyeine monic mi bafuwadaictewa yeuctiyac yanguc midaicte, ‘Macne esecne ngiyelu hegileiba, iwayac hatacmac hefaliyelu hikenogale ngagegabac.’ 25 Inguc milu hikelu mac yogo pelengkelu bamadickeicne nganilu 26 hatacmac hefaliye hikelu alengfocine 7 mengocebame kwesidaingte. Alengfocine yogo yengi ye ewalilu sowacne benang aigaing, yenge baceba kwesilu mac iwa micnengineng ngiyedaingte. Aime ngic ye molic-molic sowacne gawec, yogo ewalilu sowacne benang gadaicte.”

Aling weni yenge kwele-angackolec aigaing

27 Yesu ye yowa inguc miyemewa ngigac monicti habu yengele hewackacni wackelu miwec, “Ngigac bacgulu kogocka damongguwec, ye kwele-angackolec.” 28 Wackeme Yesudi ilec ailu yanguc miwec, “Wapongte yowa ngagelu balaibecaigaing, yengebac kwele-angackolec.”

Pasi kucineholec monic fikeme nganidaingte

29 Aime ngic-ngigac habu yenge mocyac welelu fabong Yesu ye yowa taockelu yanguc miwec, “Dameng yagolecte ngic-ngigac, ngenge aling sowacne benang. Ngenge kucne wosaeningte ngagegaing. Ailu pasi kucineholec fikengelenale milocnugaing, pasi ingucne ngengela nalic mi fikeme nganidaingte. Yonala pasi kucineholec fikewec, yogo sugu fikengeledaicte. 30 Omale Yonala pasi kucineholec fikewec, yogo Niniwe taonte ngic-ngigac yengi nganiibong. Yonala fikewec silicine ingucneyac Ngicte Madecta fikeme nganidaingte. 31 Aime Seba himongte ngigac-tau ye Solomonte ngage-ngage-motoc banogale himong mendengngina sautkacni welewec. Aime ngagening, yakumac monicti Solomon ewaligac. Ilec ailu ngigac-tau ye wowosae damengka ngengeholec fangke domalu aibabangineng woasaelu ngengele sowacne mingeledaicte. 32 Niniwe taonte ngic yenge Yonale mimiloc yowa ngagelu kwele-hefaliyec aiibong. Aime ngagening, yakumac monicti Yona ewaligac. Ilec ailu Niniwe ngic yenge wowosae damengka ngengeholec fangke domalu ngengele aibabangineng wosaelu ngengele sowacne mingeledaingte.

Socnginengte angoc

33 “Monicti hifa kwendangkelu sangke-sangke me pakec bageina nalic mi lodaicte, ye hifa yogodibac ngiye-ngiyeina lome ngiyeme angocina ngic-ngigac yenge ofelu angocine nganidaingte. 34 Aime Dongegonedi socgonele hifa aigac, aime dongegone madicne fame socgone sasawa baangoleyackedaicte. Nga ga donge-heloc me donge-sowac bagadamecte me dongegone sowaledaictebac soc-kwelegone kundung kweyackedaicte. 35 Ilec ailu ga angocgone fagac, yogo kundung kwedaickale ailu damongkelu bagadamec! 36 Aime soc-kwelegonedi kundung mikac angockolec sasawa fadaictewa socgone angocti sawelu fadaicte. Yogo hifa monic angoctowaineholec baangolecgucaigac, yogo ingucne.”

Yesu ye Farisaio nga mimiloc yowale wewedu ngic yengele fungine miwec

37 Aime Yesu ye yowa miyemewa Farisaio monicti yeholec nosing nonale wackeme yele macka feme ngiyeiboc. 38 Wangiyeboc ye moleine mi suwelu moc sugu nosing nonogale aime Farisaiodi yogo nganilu kwatackemebac, 39 Sugucnedi edowec, “Farisaio ngenge pele-tasengineng lobine sugu suwecaigaing, nga ngenge kwelenginengti ngani-angac aibong aibaba sowacne ngengela wakeicne fagac. 40 Ngenge kapaine! Lobine wiyac bawec, yedi kwelinele inguchac bawec. 41 Ngengi yogolec ailu waweweine kweledi doficebalu yeledaing! Inguc aibong wiyacngineng sasawa gbagbacne aidaicte. 42 “Farisaio, ngenge lomboc nga gime ailu mendangngineng sasawa yogolec botoc balu 10 yogowacni moniyang botoc balu Wapong lacnocaigaing. Ailu aibaba dondonne nga Wapong ago balu angac ngageningte, yogobac kpaoma ailu hegilecaigaing, ilec ngenge umacnginengkolec. Ngenge aibaba madicne yogo balaibedabiyeng ailu tofaine mi hegiledaing. 43 Farisaio, ngenge kpakpaduc macka ngiye-ngiye molic-molic iwa ngiyenogale aicaigaing, nga maket sobengka alang-baba aingeleningte angac ngagecaigaing, ilec ngenge umacnginengkolec. 44 Dongesi maine mikac ngic yenge mi ngagelu moc sugu witina lec-welec aicaigaing, ngenge dongesi yogo ingucne gagaing, ilec ngenge umacnginengkolec.” 45 Inguc mime Wapongte yefele ngage-ngage ngic yengelacni monicti edowec, “Wewedu, ga inguc milu nonge inguchac misowalecnubagic.” 46 Mime Yesudi yowa ameine yanguc bafaliyecnowec, “Wapongte yefele ngage-ngage ngic, ngenge inguchac umacnginengkolec! Ngenge ngic yengele lobenginang mafa, ngicti babalesoc miyac, yogo locaigaing, ailu ngengileng umacngineng efecne aidaicte, wiyac monic baficebaningte mole monic mi yelecaigaing. 47 “Ngambofocngineng yenge Wapongte sinaic mimi esecne wehomacebabong homaibong yogo yengele dongesi bafangkecaigaing, ilec ngenge umacnginengkolec. 48 Yengi Wapongte sinaic mimi wehomacebaibong, ailu ngengi dongesingineng bacaigaing, ngenge yogo ailu yanguc mibong yegengkegac, ‘Nonge aibabanonggang kwele moniyang gagabeleng.’ 49 Ngengele ailu Wapongte ngage-ngage-motocti biyachac miwec, ‘Wapongte sinaic mimi nga salecebaicne, yengela salecebabe yengi gocne wehomacebadaingte nga gocne weyebic aiyeledaingte.’ 50 Ilec ailu himong funginacniyac ofegacgu Wapongte sinaic mimi wehomacebabong sacngineng wawec, yogolec ameine yakumac ngic-ngigac gagabiyeng, ngengelacnidi baduyeledaingte. 51 Ameine yogo Abel wehomabong yele sackacni molickelu ofegacgu Sekariyale sacka ofegac. Yengi Sekariya alata nga Ibu-kuluc kweline hewacnginac wehomaibong. Oc, ngic-ngigac aling yago ngenge ameine yogo baduyackedaing, ilec edocngebagabac. 52 “Wapongte yefele ngage-ngage ngic, ngenge Wapong ngagecnoningte ki, yogo baickeibong. Ailu ngenge ngengileng iwa mi feibong, aime ngic-ngigac yenge fenogale aiyebongkabac aka biyac locaigaing ilec ngenge umacnginengkolec.” 53 Aime Yesu ye hegilelu lobina hauwec. Haume Wapongte yefe-yowale wewedu ngic nga Farisaio, yengi yele ngage-sowalelu uuwa fungine fungine uwacnoibong. 54 Aime yowaine gocne lilome banang milu yele damong balu gaibong.

12

Wiyac sangkeicne yegengkenale yowa

1 Aime ngic-ngigac homacne benang, ten tausen ngama ingucnedi kpaduckelu yengungtiyac feine feine domaibong. Inguc aibong Yesudi mic-tengtengfocine, yengele sugu ngagelu molickelu yanguc miwec, “Ngenge Farisaio yengele kwesac-aibabangineng yogolec ngani-homalu gadabiyeng, yogo yis ingucne bretka sawecaigac. 2 Aime wiyac monic ebecineholec fagac, yogo gacgu yegena fikedaicte, nga sangke-sangkeine fagac, yogo ngageyackedaingte. 3 Ilec ailu ngenge kundungka yowa sasawa micaigaing, yogo angocina ngagedaingte, nga kweline kpisicne hedecnginang sangic-sangic migaing, yogo mac witina domalu mibong yegengkedaicte.

Ngic yengele hangoc mi aidaing

4 “Ailu agofocne, ngagegaing, ngic gocne yengi socngineng wehomalu hatacmac basowalecngebanale kuc basackecaigaing, ngenge yengele mi hangocngebadaic! Yogo edocngebagabac. 5 Nga ngic monictebac hangocngebadaic! Yedi wehomangebalu dac-sanangka wikecngebame hauningte bole-yowa nga kuc balu gagac, oc, yelebac hangocngebadaic! Yogo migabac. 6 Ailu nango hakic 5 maketka lobong siling yaeckangti fuli bacaigaing, Wapongti nango yogo yengelacni monic nalic mi ngigeckedaicte. 7 Ailu ngengele hodoc-docngineng edomeng, yogo ingucne wawafeine. Ngenge sawawale nango aling sugucne yenge ewalicebagaing, ilec ngenge mi hangocngebadaic.

Yesule mibong yegengkedaic

8 “Ngic monicti ngic-ngigac yengele dongewa nale midaicte, ‘Na yele aling aigabac.’ Ngicte Madecti yele inguchac Wapongte angelofocine yengele dongewa, ‘ye nale ngic’ midaicte. 9 Nga ngic monic ye ngic-ngigac yengele dongewa nale mi mime yegengkedaictewa, nani ye inguchac Wapongte angelofocine yengele dongewa mi mibe yegengkedaicte. 10 Ailu ngic monic ye Ngicte Madecte yowa sowacne mime, yele bikic hegiledaicte, nga monicti Tili Asule bole misowaledaicte, yele bikic hegile-hegilelesoc mi fagac. 11 Ailu ngic yenge bacngebalu kpakpaduc macka nga gamangte ngic micne nga ngic sugucne gocne, yengele dongewa locngebadaingte, ngenge dameng iwahac, ‘ameine wenuc bafaliyenoga, me oma yowa minoga,’ milu yogolec ngageboc mi aidabiyeng! 12 Yogo yanguc: Tili Asudi dameng iwahac yowa midaingte, yogo micnginang lodaicte.”

Moneng-mafaholec ngic yengele yowa

13 Aime ngic-ngigac habu yengele hewackacni ngic monicti Yesu micnowec, “Wewedu, haene ye mamacte mole-damoc yeicnac balu gagac, ilec ming nebocine botoc balu nelena.” 14 Mime Yesudi yanguc bafaliyecnowec, “Ngic, ngekele woc-wiyac botoc banogale damong me ngage-wosaecte ngic monicti mi locnuwec.” 15 Inguc milu taockelu yengele yanguc miwec, “Ngagelu gadaing! Monic moneng-mafatowa idi yeicne gagale silicine yogo mi bafuwadaicte. Ilec ngenge moneng-mafatowale wac sowacneholec aidaingkale damongngineng badabiyeng!” 16 Milu nangeng yowa monic yanguc edocebawec, “Ngic monic moneng-mafatowaholecti boleina nosing noine homacne aime 17 nosingngine mac wenuwa lonogale ngage-bibiyelu 18 yanguc ainale ngagewec, ‘Nosing-macne kpisicne gocne domagac, yogo hembalackelu sugucnehac basugulelu balu nosing nga wiyacne madicne sasawa kpaduckelu iwahac kpatulecebadacte.’ 19 Kpatulebe motome neicne kwelena yanguc ngagedacte, ‘Hifa homacnelesoc wiyac madicne kpaduckegabac, ilec gagane baefeckelu bagabac ailu belic-belicka gadacte.’ 20 “Mime Wapongti yele yanguc miwec, ‘Ga ngic-kapa, deboc yagowahac ga ilucgone ewalicgube homadamecte. Nga wiyacgone bakpaduc ailu gagi yogo hegiledamecte, yogo gocne yengi badaingte.’” 21 Milu Yesudi hatacmac taockelu yanguc miwec, “Monic ye yeicnele ailu himongte wiyac madicne bakpaduc aidaicte, ye Wapongte dongewabac wiyac madicne mikac gagac, yele gagaine yogolecsoc aidaicte.”

Mimedec mi ainingte yowa

22 Yogolec ailu Yesudi mic-tengtengfocine yanguc edocebawec, “Oma nosing nonoga nga socnonggeng oma ngakpi-kpolucti holelu ganoga milu, ngenge gaganginengte mimedec mi aidaing! 23 Gagadi nosing ewaligac, nga socti ngakpi-kpoluc ewaligac, yogo edocngebagabac. 24 Ngenge aoc-aoc nganicebaning! Yenge hole-duwenoc me noluwang mi fayelegacte, Wapongti sifu nosing moc yelecaigac. Aime Wapongte dongewa ngenge nango yengele feicne aigaing. 25 Nga ngengelacni monicti mimedec ailu gacgu yogolec gaga-damengngine kpisicnemac hatacmac nalic mi badaliwedaicte. 26 Ngenge wiyac kpisicne ingucnele aibibiyelu tofaine gocnele ingucneyac ngageboc mi aigadaing! 27 “Ngenge daling moc siyeckecaigaing nganicebaning! Yenge muc mi yumulu boletowa mi bacaigaing, ailu sifu sugulecaigaing. Aime ngictau Solomon ye esecne ngakpiine hibine madicne holelu gawec, yele hibi-angoctowadi sifu daling yengele hibi keleng-keleng mi ewaliwec, yogo edocngebagabac. 28 Aime daling mac-sobengka moc siyeckegaing yenge yakumacte sugu fikegaing nga saeme helockelu dacka wikedaingte. Nga daling benang ingucne Wapongti wambac holeyelecaigac, ngenge daling ewalicebabong yedi ingucneyac ngengele ngage-ngagesingngineng kpisicnemac fagac aime sifu ngakpi-kpolucngineng taockelu ngeledaicte. 29 “Ilec ngenge, ‘oma nosing nonoga nga misa wenuwacni fila nolu ganogale’ micaigaing, ngenge mimedec yogo hegiledaing! 30 Nga himongka ngic-ngigac yenge yogo baningte mihiyac homacne aiyebongka Mamacnginengti ngenge wiyac yogo kpungkecaigaing, yogobac biyac ngagecaigac. 31 Ngenge Wapongte ngani-damong bafuwaningte bole badaing, ailu wiyac yogo hocne inguchac taockelu ngeledaicte.

Wiyac madicne honocmengka balu ganoga

32 “Habu-hakic, Mamacngineng ye ngani-damongngine ngelenale ngageme madickecaigacte ngenge mi hangocngebadaic! 33 Ngenge mafangineng salebong ngic-ngigac yengi fuli bayackebong moneng yogo balu waweweine gagaing kwele-madicka wiyac yeledaing. Ilec ailu ngenge moneng-ebec nalic mi lokenale bafuwadaing, ilec wiyacngineng madicne kucine mi wadaicte yogo honocmengka kpaduckebong, iwa hise ngicti mi weledaingte, nga unedi mi basowaledaingte. 34 Omale wiyacngineng madicne fagac, iwahac kwele-angacngineng fadaicte.

Ngicte Madec kwesidaicte

35 “Ngenge kpolucngineng sanangne kwelu hifangineng kwendangkelu efeckelu gadaing. 36 Ngic sugucne ye baba-tumang mackacni welelu nuwa holeme kwelec kwekwefocinedi yele wangec gacgu nu biyac laliyedaingte, ngenge efeckelu ingucneyac gadaing. 37 Aime sugucnenginengti welelu kwelec kwekwefocine yenge gung-gboli gaibong, inguc bafuwacebadaicte, yenge kwele-angackolec. Na noine edocngebagabac, ye yengele kwelec kwenale yeuctiyac kpolucine bangkacne kwelu ‘ngiyeebongka’ mime ngiyebong nosing bawele yeleme nodaingte. 38 Ye deboc hewac-hewac me mac sae-saele gung-gboli gabong wele nganicebadaicte, kwelec kwekwe yogo yenge kwele-angackolec. 39 “Aime hise-baba ngic ye mac heuckelu fecaigac. Mac fileine monic ye hise ngic ma damengka kwesidaicte, inguc ngagelu ye hise ngicte aka holecnodaicte. 40 Ilec ailu Ngicte Madecte dameng mi ngageebongka kwesinale ngenge ingucneyac efeckelu gadabiyeng.”

Bole-madec madicne ingucne gadabiyeng

41 Aime Pitadi miwec, “Sugucne, nangeng yowa migamec yogo nongele me sasawa yengele migic?” 42 Inguc mime Sugucnedi yowaine yanguc bafaliyecnowec, “Mac-damong madicne monic ngage-ngage-motockolec gacgu sugucneinele yowa mimiine balaibecaigac, sugucneinedi mac-damong ingucne bole-yowa lacnome ye bole-madecfocine yengele micnengineng ailu nosing damengka miwecka heuckelu noningte yeledaicte. 43 Yeleme sugucneinedi hefaliye kwesilu nganime, kwelec kwekweinedi bole yogo bayackedaictewa ye kwele-angackolec. 44 Inguc aime sugucneinedi wiyacine sasawa damongkenale micnodaicte, yogo noine benang. 45 Ailu kwelec kwekwe ye yeuctiyac yanguc ngagesidaicte, ‘Na sugucnene dameng dalicne gacguhac kwesidaicte.’ Inguc milu ye kwelec kwekwe ngic-ngigac gocne wecebalu sugucneinele wiyac nowackelu misa sanangne nolu kapaine aidaicte. 46 Inguc aigalu ye wangec mi gacgu kwelec kwekwe sugucneinele hadeng nga kwesi-kwesi dameng mi ngageemewa sugucne ye weledaicte. Kwesime kwelec kwekwe yogo welockelu baickeme haulu ngage-ngagesingngineng mikac yengeholec gadaicte. 47 Aime kwelec kwekwe monic ye sugucneinele yowa ngagelu mi efeckeme gadaicte, ye hudu sugucneyac wedaicte. 48 Nga kwelec kwekwe monic ye sugucneinele bole-yowa mi ngagelu hudu hihile aibaba gocne aidaictewa, ye hudu efecnemac wedaicte. Ilec monic ye wiyac sugucne lacnome balu game fikedaicte, ye micnome sugucneyac lacnodaicte. Nga wiyac homacne damongkenale bole-yowa lacnome badaicte, ye uwacnome wiyac sugucneyac benang lacnodaicte.

Kwele moniyang mi fikedaicte

49 “Na himongka dac habune habune fitobe lobenale waiba. Aime dac yogo biyac lobeme kwelene madickedaicte. 50 Aime kpanang doicti somecnudaicte. Ailu yogo ngagebe kwelenedi umaleme gacgu bolene yogo motome kwelene madickedaicte. 51 Na himongka kwele-mogung bafuwanogale waiba, ngenge inguc ngagegaing, me? I miyac benang, na heucebanogalebac waiba, yogo edocngebagabac. 52 Yogo yanguc: Yakumac nga galu fedaicte, iwa mac kwelina ngic-ngigac 5 yenge siyeckelu gadaingte. Habackang yengi yaeckang yekeholec ngaba aidabiyengte, nga yaeckang yeki habackang yengeholec ngaba-ngaba ainagudaingte. 53 Aime fouckelu mamacti madeckolec ngaba aidaicte, nga madecti yedi mamackolec ngaba aidaicte. Ailu nenggac ye aduineholec ngaba aidaicte, nga adudi nenggacineholec ngaba ainagudabiyecte. Nga yengau yeke fouckelu ngaba ainagudabiyecte.”

Dameng ngani-wosaecte miwec

54 Aime Yesudi inguchac habu sugucne yengele yanguc miwec, “Ngenge wenac hau-hauina kaguwa monic nganilu yanguc biyac micaigaing, ‘Mac sugucne kwedaicte.’ Inguc mibong mac kwecaigac. 55 Nga gbelong laiwapec weme nganilu yanguc micaigaing, ‘Himong dacine aidaicte.’ Mibong inguc aicaigac. 56 Kwesac ngic, ngenge himongka nga sawawa wiyac fikecaigac, yogo nganilu wosaecaigaing. Omale yakumac dameng gagabeleng, yogolec aibaba mi nganilu wosaecaigaing?

Yowa wosaenoga

57 “Omale ngenge aibaba wenidi dondonne aigac yogo ngengung mi wosaecaigaing? 58 Ngabagone monicti yowawa locgunale bacgume ngeke momoc yefewa hikelu, ga iwahac ngabagoneholec yowanginec miboc madickenale bole badamec! Inguc mi aidamectewa ye ngage-wosaec ngic yela locgume ngage-wosaec ngicti lebe-ngicta locgume lebe-ngicti muc-macka locgudaicte. 59 Locgume ga iwa ngiyecgu ngabagonele moneng ameine bucbuc benang badulu sugu muc-mackacni wadamecte, yogolec edocgugabac.”

13

Bikic hegilelu kwele-hefaliyec ainoga

1 Dameng iwahac ngic gocne yengi Yesu siduc yanguc aicnoibong, “Galili ngic gocne yengi depecnginengte sic lobelu Wapong hasoc holecnolu gabong, Pailatdi mime ngicfocine yengi hikelu Galili ngic wehomacebalu sacngineng yogo depecnginengte sic sacineholec kpatulebong atang aiwec.” 2 Mibong Yesudi uwayelewec, “Ngic homaibong yengele bikicti Galili ngic sasawa, yengele bikic ewaligac inguc fikeyelegac, ngenge inguc ngagesigaing, me? 3 I miyac benang! Ngengebac kwelengineng mi hefaliyedaingte, ngenge sasawadi yenge homaibong, ingucneyac homayackedaingte, yogo edocngebagabac. 4 Nga Siloam mac-daledi heliyelu ngic-ngigac 18 witinginang walu wehomacebawec. Ilec ngenge wenuc ngagesigaing, yengele bikicti Yerusalem ngic-ngigac sasawa gagaing, yengele ewaligac, me? 5 I miyac benang! Ngengebac kwelengineng mi hefaliyedaingte ngenge sasawadi yenge homaibong, ingucneyac homayackedaingte, yogo edocngebagabac.”

Fik yocti noine monic mi aiwec, ilec nangeng yowa

6 Aime Yesudi yowa monic nangeng yowa yanguc edocebawec, “Ngic monic ye fik yoc monic waing bole kwelina duweme domawec. Aime ye hikecgu noine basackelu 7 waing bolele damong yanguc edolu miwec, ‘Yoc yogolec noine basackelu gabe hifa habackang biyac aigac, ailu ye omale moc domalu himong helocine nowackegac? Ilec ga yoc yogo welockelu wikedamec!’ 8 “Mime waing bole damongti miwec, ‘Sugucnene, hegileng hifa yago inguchac domaemewa fungina heuckelu himong gocne helockolec lodacte. 9 Inguc aibebac lobewa noine madicne aidaicte ngama. Nga noine mi aidaictewa ga nalic helockelu wikedamec!’”

Sabatka Yesudi ngigac lobe-ngosoc bamadickewec

10 Aime Sabat dameng monicka Yesu ye kpakpaduc mac monicka felu wewedu bole bame 11 ngigac monic iwahac ngiyewec, ye hucte aleng monicti lobeine bakatackeme ye lobe-ngosoc gacgueme hifaine 18 biyac aiwec. Aime lobeine nalic mi badondongnagudaicte. 12 Aime Yesudi ye nganilu wackeme yela weleme miwec, “Ngigac, ngagegic: Hucgone baickebe miyac aigac.” 13 Milu moleine witina loemewa ngigac ye lobeine biyac dondongkeme fangke domalu Wapong mimadickewec. 14 Aime kpakpaduc macte damong yedibac Yesudi Sabatka baba-madic bole bawecte aalic ngagelu ngic-ngigac yanguc edocebalu miwec, “Hadeng 6 fagac, iwa bole banoga. Ilec ngenge dameng iwa kwesibong bamadicngebadaicte, nga Sabat damengkabac miyac.” 15 Mime Sugucnedi yowaine yanguc bafaliyecnowec, “Kwesac ngic, ngenge sasawa bulumaka nga donggifocngineng misa yelenogale Sabat damengka lukecebacaigaing, ngenge macnginangkocni walu bacebalu hikecaigaing i madicne. 16 Aime ngigac yago Abrahamte gboliwacni, ye Aleng Sugucnenginengti hifa 18 biyachac hefeme gacgume Sabat damengka lukenogale aigabac, i ngagebong mi madickegac, me?” 17 Aime Yesudi ngabafocine ameine inguc bafaliyeyeleme yenge gameebawec. Nga ngic-ngigac nebocine yengebac pasi feicne sasawa bame nganiibong, yogolec angacebawec.

Mastet hucinele nangeng yowa miwec

18 Aime Yesudi miwec, “Na oma wiyacka nangeng yowa mibe, ngenge Wapongte ngani-damongte silicine nalic ngage-motodaingte? 19 I mastet hucine ingucne: Ngic monicti mastet hucine balu boleina duweme yogo sugulelu yoc bangkacne aime sawawa nango yengi welelu mangngina yafo holedaingte.”

Yiswa nangeng yowa miwec

20 Inguc milu Yesudi hatacmac yanguc miwec, “Wapongte ngani-damong, i oma wiyacka yefe soc holebe ngagening: 21 I yis ingucne, aime hatac flawa 20 kg balu yisholec bakuctungkelu bame sugulelu bucbuc aidaicte.”

Nu kpisicnele yowa

22 Aime Yesu ye taonka nga macka lolickelu ngic-ngigac yengela wewedu bole balu Yerusalem hikenogale hikewec. 23 Hikeemewa ngic-ngigac gocne yengi uwacnolu miibong, “Sugucne, ngic-ngigac efecnemac yen sugudi wasecne aidaingte, me?” Mibong Yesudi yanguc bafaliyewec, 24 “Ngic-ngigac homacne yengi Wapongte ngani-damongka fenogale aibibiyedaingte, inguc edocngebagabac. Ilec ailu ngenge nu kpisicna fenogale bole sanangne badabiyeng! 25 Nga mac fileinedi fangkelu nu holeme ngenge lobina domalu nuwa holelu midaingte, ‘Sugucne, nu witiyenoleengka funang!’ “Mibong bafaliyengelelu midaicte, ‘Ngenge wenuwacni? Na mi ngagecngebagabac!’ 26 “Inguc mime ngengi midaingte, ‘Gaholec nosing misa noibeng ailu gagi nongele yefewa domalu edocnubalu wedunoleing, nonge.’ 27 “Mibong, yedibac hatacmac edocngebadaicte, ‘Ngenge wenuwacni? Na mi ngagecngebagabac! Ngenge bikickolec aicaigaing, ilec ngenge nale dongewa baickening!’ 28 “Aime Abraham, Aisak nga Yakobo ailu Wapongte sinaic mimi sasawa Wapongte ngani-damongka ngiyegaing nganicebadaingte. Nga ngengebac lobeina wikecngebabong haudaingte. Iwa ngenge hiyalu mic hisalangkelu gadaingte. 29 Aime ngic-ngigac yenge wenac ofe-ofeinacni nga hau-hauinacni nga not ailu sautkacni kwesilu Wapongte ngani-damongka ngiyelu noba-nosing nodaingte. 30 Ailu gocne yakumac lobeina gagaing, yengi molic-molic aidaingte, nga molic-molic gagaing, yengibac lobe aidaingte.”

Yesudi Yerusalemte kwele-sowac aiwec

31 Dameng iwahac Farisaio gocne yengi welelu Yesule miibong, “Herodedi ga wehomacgunogale migac, ilec ga himong yago hegilelu hikenong!” 32 Inguc mibong Yesudi yanguc bafaliyeyelewec, “Ngenge hikelu kate-hoda yogo yanguc edoning, ‘Ngagegic, yakumac nga saeme aleng yebicebalu huckolec bamadicebalu, nga fangkelu bolene motodaicte.’ 33 Aime Wapongte sinaic mimi, yenge himong gocna nalic mi wehomacebadaingte, yenge Yerusalem iwa sugu wehomacebadaingte, inguc fagac. Ilec ailu yakumac nga saeme ailu fangkelu hikedacte. 34 “Yerusalem, Yerusalem, ngenge Wapongte sinaic mimi wehomacebacaigaing, ailu Wapongti ngic ngengela salecebame, yenge posadi wikelu hole-homacebacaigaing. Aime kokolec nenggacinedi adu-madecfocine kwegecine bageina ekongebacaigac, na dameng homacne adu-madecfocngineng silicine ingucneyac kpaducngebanogale ngagesigabac, ngengebac yogolec takicngebagac. 35 Ngagegaing, yakumac ngenge ngengung macngineng damongkelu gacgu ngenge hatacmac mi nganicnudaingte. Nga doma fecgu yanguc midaingte, ‘Sugucnele wacka ngic welegac, ye yambungkolec.’ Inguc miyebongka ngenge dameng iwahac hatacmac nganicnudaingte.”

14

Sabat damengka Yesudi ngic soc bokungkolec bamadickewec

1 Yesu ye Sabat dameng monicka Farisaio yengele micne-baba monicte macka nosing nonale feme Farisaio yengi ye aibabaine ngani-ngagec ailu ngiyeibong. 2 Iwahac ngic monic socine bokungkolec ailu siwineicne, ye welelu Yesule haicka domawec. 3 Aime Yesudi Wapongte yefele ngage-ngage ngic nga Farisaio uwayelewec, “Sabatka ngic bamadicebanogale yefe monic fagac me miyac?” 4 Mime yenge ameine monic mi bafaliyebong, Yesudi ngic yogo moledi balu bamadickelu saleme hikeme 5 yanguc edocebawec, “Ngengelacni monicte madec me bulumaka monic misa long monicka ede-tantangkelu haume, Sabat dameng aime ye sifu biyac hike fuluckeme ofedaicte.” 6 Mime yenge yowa ilec ameine bafaliyenogale aibibiyeibong.

Ngic monic ye bawacnagudaic

7 Aime iwayac ngic gocne wacebame, yenge ngiye-ngiye molic-molicka wosaelu iwa ngiyebong, Yesudi nganicebalu yowa nangengngine yanguc milu edocebawec, 8 “Hatacmac baba-tumangte nosingka wacgume, iwa ga nosingte ngiye-ngiye molic-molicka biyac mi ngiyedamec. Gacgu wacngebayec, ngengelacni ngic sugucne monic wackeyecka weleme, 9 ye nga ga ngeke momoc wacngepagac, yedi welelu yanguc edocgudaicte, ‘Ga baicke-waengka ngic yagodi ngiyena.’ Inguc mime gamegume ngiye-ngiye moto-motoina benang hike ngiyedamecte. 10 Wacgume ga hikelubac, ngiye-ngiye moto-motoina ngiyedamec. Aime ye wele nganicgulu yanguc midaicte, ‘Agone, ga ngiye-ngiye molic-molicka felu ngiyec!’ Inguc mime ngic-ngigac biyac ngiyegaing yengele dongewa yedi wac feicne geledaicte. 11 I yangucte, monic ye yeicne soc bafeemewa, yedi bawadaicte, nga monic ye socine bawaemewa, yedi bafedaicte.” 12 Aime Yesu ye ngic wackewec, yele inguchac yowa monic yanguc miwec, “Ga wenacka me aweleme nosing nonole aling gocne wacebanogale, iwahac agofocgone, me ngic hae-gba, me alingfocgone me moneng-mafanginengkolec gale emewa gagaing, yenge mi wacebadamec. Omale yenge gacgu ameine ngama hatacmac badugelebong, i mi madickedaicte. 13 Ga wacebanogale noba-nosing bamockedamecte, dameng iwa ngic waweweine nga pulingngine nga hige-sowac ailu donge-pisic wacebadamec! 14 Yenge ameine nalic mi badugeledaingte ilec ailu ga kwele-angackolec gadamecte. Ailu nosing yogolec ameine, ngic-ngigac dondonne homaibong, yenge gboliyelu fangkedaingte, dameng iwa hocne ameine badamecte.”

Yesudi nosingte tutumangka hike-hikele nangeng yowa miwec

15 Inguc mime yenge nosing nongiyelu yowaine ngagelu yengelacni ngic monicti Yesu edowec, “Monic ye Wapongte ngani-damongka felu nosing nongiyedaicte, ye kwele-angackolec.” 16 Inguc mime Yesudi yanguc edowec, “Ngic monicti noba-nosing sugucne bamockenale ngagelu ngic-ngigac homacne yengele yowa lolu wacebawec. 17 Wacebame nosing nonole dameng weleme ye kwelec kwekweine saleme yedi ngic wacebawec, yenge edocebanale hikelu miwec, ‘Ngenge kwesining, wiyac sasawa biyac bamockeicne ngiyegac.’ 18 “Inguc mime ngic sasawadi migbedic ailu ngic molic-molic yedi yanguc miwec, ‘Na himong monic fuli babac, yogo hikelu nganinogale ngagegabac, ilec ailu ngageng mi sowalena.’ 19 “Aime monicti miwec ‘Na bafalo 10 bolele ailu fuli bacebabac, ilec hikelu boleina esoicebanogale ngagegabac, ilec ailu ngageng mi sowalena.’ 20 “Inguc mime monicti miwec, ‘Na ngigac babac, ilec ailu nalic mi fudacte.’ 21 “Aime kwelec kwekwe ye hikelu yowa yogo sasawa sugucneine edome sugucneinedi aalic ngagelu kwelec kwekwe yanguc edowec, ‘Ga taon yefeina nga yefe-gogocka biyac hikelu ngic-ngigac waweweine nga pulingngine ailu donge-pisic nga hige-sowac, yenge mengocebalu kwesinong.’ 22 “Inguc mime kwelec kwekwedi hikelu miwec, ingucneyac ailu hefaliyelu yanguc edowec, ‘Sugucnene, ga migic, yogo biyac aiyackegabac, aime mac kwelinabac ngiye-ngiye fagachac.’ 23 “Inguc mime sugucneinedi miwec, ‘Ga yefe sugucna nga macte yefe gogoc fayackegac, iwa hikelu ngic-ngigac nganicebaengka kwesiningte sanangneyac milu mengocebang kwesilu, yengi macne kweline yago wakening. 24 Ngic esecne wacebabe hegileibong, yengelacni monicti nosingne lobeicne, yogo nalic mi nolu ngagedaicte, yogo edocngebagabac.’”

Yesu balaibenogale yowa

25 Yesu hikeme ngic-ngigac habutowadi ye balaibelu hikebong, hefaliye nganicebalu yanguc miwec, 26 “Ngic monic ye wele balaibecnunoga ngagesigac, ye yeicne nenggac-mamac, ailu ngigac adu-madecfocine, ailu ngic hae-gba nga yeme-kwa ailu yeicne gagaine inguchac mi lobeedaictewa, ye nale mic-tengteng nalic mi aidaicte. 27 Ailu monic ye yeicne malicpongine mi tengkelu balaibecnudaictewa, ye nale mic-tengteng nalic mi aidaicte. 28 “Ngengelacni ngic monicti donge hila-hilale mac-dale monic banogale ngagegac, ye mac nalic bayackedaicte me miyac, ilec ye waicke ngiyelu molickelu woc-wiyac fuliine wafelu alingkedaictewa madickedaicte. 29 Aime ye molickelu inguc mi ailu moc fungine sugu fungkelu balu mac tofaine mi badickedaictewa, ngic-ngigac yenge yogo nganilu kucine bawalu 30 yanguc midaingte, ‘Ngic yogo ye mac banogale ailu kucine monic mi fawecte, mac bole mi bamoctowec.’ 31 “Me ngictau monicti ngicfocine 10 tausen moc bacebame hikelu ngictau monic ye ngicfocine 20 tausen welebong, yengeholec wenagudaingte, yogo mi madickedaicte. Ye wangiyelu yanguc ngage-wosaec aidaicte, nale ngicfocne 10 tausen, yenge ngabafocne kwesidaingte nalic wecebadaingte me miyac. 32 Yogo nalic mi aidaictewa, yenge dalickayac gaebongka yedi kwelec ngic kwele moniyang wenuc fikenale saleme hikedaicte. 33 Ilec ngengelacni monicti yeicne wiyac sasawa mi lobedaictewa, ye nale mic-tengteng nalic mi aidaicte. 34 “Kiwec yogo wiyac madicne. Ailu kiwecti hiyalu angacine mikac aidaictewa, ye angacine hatacmac nalic mi bafuwadaicte. 35 Kiwec ingucnedi nosing witina wikebeng angacine mi aidaicte, ailu himong helocine nosing bolewa fadaicte, yogodi kpatuleebengka silicine ingucneyac mi aidaicte. Yogo moc wikecaigaing. Hedeckolecti yowa yago ngagedaic.”

15

Lama sangkeicnele nangeng yowa

1 Takes-baba ngic ailu bikic-baba sasawa yenge Yesule yowa ngagenogale yele emewa hikeyackeibong. 2 Ailu Farisaio nga Wapongte yefe-yowale wewedu ngic yenge yowa kwelu damengsoc yanguc milu gaibong, “Ngic yago ye bikic-baba sebicebalu yengeholec nosing nocaigac.” 3 Inguc mibong Yesudi nangeng yowa monic holelu yanguc edocebawec, 4 “Ngengelacni ngic monic ye lamafocine 100 facnodaicte. Inguc facnome lama habu iwacni monic sangkeme fileinedi wenuc aidaicte? Ye lama 99 hegilecebame himong kisiwa domabong, hikelu lama moniyang yogo basackegacgu bafuwadaicte. 5 Bafuwalu beliyelu aticina lolu atickelu hikedaicte. 6 Balu macina hike sulumelu ngic agofocine ailu soc-tofafocine emeina gagaing, yenge wacebalu yanguc edocebadaicte, ‘Na lamane sangkewec, yogo bafuwagabacte, ngenge kwesibong naholec beliyenang.’ 7 Pasi ingucne ngic bikickolec moniyangti sugu kwele-hefaliyec aime belic-belic silicine ingucneyac honocmengka fikedaicte, yogo edocngebagabac. Nga ngic-ngigac 99 yenge kwele-hefaliyecte yefe mi kpungkelu dondonne biyachac gagaing, yengele ailu belic-belic ingucne mi fikedaicte.

Moneng sangkeicnele nangeng yowa

8 “Me ngigac monic ye siliwa monengngine 10 bagacgu monic wikeme sangkedaictewa ye wenuc aidaicte? Ye hifaine kwendangkelu mac pelengkelu sanangneyac basackegacgu bafuwadaicte. 9 Bafuwalu ngigac agofocine ailu soc-tofafocine emeina gagaing, yenge wacebalu yanguc edocebadaicte, ‘Na monengne wikebe sangkewec, yogo bafuwagabacte, ngenge kwesibong naholec beliyenang.’ 10 Aime ngic bikickolec monicti kweleine hefaliyeme Wapongte angelo yenge yengungtiyac ingucneyac beliyedaingte, yogo edocngebagabac.”

Madec sangkeicnele nangeng yowa

11 Yesudi yowa taockelu yanguc miwec, “Ngic monic ye madeckecine yaeckang gaiboc. 12 Aime madecine kpisicnedi mamacine edowec, ‘Mamac, ga moneng-mafa gocne heuckelu nale nebocine neleng naneuc balu gadacte.’ Inguc mime mamacnginecti woc-wiyacine heuckelu madeckecine yetewec. 13 “Yeteme dameng mi daliweme madec dicine ye moneng-mafaine kpaduckeyackelu balu himong dalicna hikewec. Hikelu iwa himongte gagawa moneng-mafatowaine balu gawec, yogo wikeyackewec. 14 Wikeyackeme miyac aime himong iwa loloc fikeme ye nosing nga wiyac sasawale kpungkewec. 15 Kpungkelu himong yogolec fileine monic yela hikeme bole-madec bame yedi becine damongkenale bec-odawa saleme lewec. 16 Lelu bec yengi nosing socine noibong, yogo nonale aicnowec, aime monicti nosing monic mi gumelu gaibong. 17 “Inguc aime ye yeuctiyac gagaine ngani-motolu miwec, ‘Mamacte bole-madecfocine yenge nosing nogebec aicaigaing. Aime nanibac yawa nosingte homalu homanogale aigabac. 18 Ilec na fangkelu mamacnela hikelu yanguc edodacte, “Mamac, na honocmengte aling yenge ailu gale dongewa momoc bikic bafuwaiba, 19 ilec hatacmac madecgone wacnudaingte, idi mi madickedaicte. Ga sifu bacnung bole-madecfocgone yengelacni monic ingucne ailu gadac,” ’ inguc ngagelu hikewec. 20 “Aime madec ye dalickayac leemewa mamacinedi biyac ngani-motolu yele kweleine sowaleme yela gasacke hike hobalu mimuduc aicnome 21 madecinedi miwec, ‘Mamac, na honocmengte aling yenge ailu gale dongewa momoc bikic bafuwaiba, ilec madecgone hatacmac wacnudaingte, idi mi madickedaicte.’ 22 “Aimebac mamacti kwelec kwekwefocine yanguc biyac edocebawec, ‘Ngenge biyac-biyac hikelu ngakpi dale madicne benang balu kwesi holecnobong haume gbongte ling holecnolu hige-ebec higeina holecnobong hauna. 23 Ngenge hikelu bulumaka madecine buweicneyac, yogo bawelebong welu nongileng momoc no-angac ainang. 24 Madecne yago ye biyac homawec, inguc ngageibeng, aiyemewa ye gagaine hatacmac bafuwagac. Ye sangkeweckacni hatacmac bafuwagabeleng.’ Inguc mime yenge no-angactowa aiibong. 25 “Inguc aibong madecine sugucnedi nosing bolewa gacgu kwesilu mac bangkalelu kwesilubac gee holelu webong fawecte ucine ngagelu 26 kwelec kwekwe monic wackeme weleme uwacnowec, ‘Yogo omale inguc fikegac?’ 27 “Inguc mime kwelec kwekwedi ameine yanguc bafaliyewec, ‘Gbagone wesipilic mikac gacgu madicne macka hatacmac hefaliyegacte ailu, mamacgonedi mime bulumaka madecine buweicneyac wegabeleng.’ 28 “Inguc mime haeine ye aalic ngagelu lobina domalu macka fenale mi aicnome mamacinedi walu macka fenale mibakoloc aicnome, 29 haeinedi mamacine yanguc edowec, ‘Ngagegic, na hifa edomeng gale kwelec bole bagalu yowagone monic mi hegileiba. Inguc balu gabe agofocne yengeholec noning madecine monic nonogale monic mi noleing, miyac. 30 Aime madecgone yogo ye woc-wiyacgone yefe ngigackolec galu wickeyackelu kwesime gagibac yele ailu bulumaka madecine buweicne sugucneyac wegic.’ 31 “Inguc mime mamacinedi miwec, ‘Madecne, ga damengsoc naholec gacaigic, nga nale wiyac sasawa yogo gale hocne. 32 Aime nongileng yakumac beliyelu no-angac aidabeleng. Gbagone yogo ye biyac homawec, inguc ngageibeng, aiyemewa ye gaga hatacmac bafuwagac. Ye sangkeweckacni hatacmac bafuwagabelengte, inguc ainang.’”

16

Yesudi ame badu-badule yowa miwec

1 Yesudi mic-tengtengfocine yowa yanguc edocebawec, “Ngic monic moneng-mafaholec yedi moneng-damong ngic monic bawec. Bame ye yeholec galu yele moneng-mafa damongkelu gawec. Damongkelu game gocne yengi yele yanguc milu edoibong, ‘Moneng-damonggone yogo ye moneng-mafagone mi damongkelu kosa locaigac.’ 2 “Inguc aime yedi moneng-damongine wackeme weleme edowec, ‘Ga aibabagone sowacne mibong ngagecaigabac. Moneng-damongne hatacmac nalic mi gadamecte. Ga ilec moneng-mafale nga bolegonele siduc sasawa kwelengkelu nelec.’ 3 “Inguc mime moneng-damong yeuctiyac yanguc ngagewec, ‘Ngic sugucnedi moneng-damong bole nalacni baickedaicte. Aime na mac bole-babale lokawedacte ailu kucne mi fagacte, milockenoc ngic ainogale gamenugac, ilec wenuc aidacte? 4 O, yakumac ngagegabac. Bolewacni baicnubong miyac ailu gocne yengi macnginang wacnuningte aibaba monic aidacte.’ 5 “Inguc ngagelu ngic sasawa sugucnele ame balu gaibong, yenge filesoc filesoc wacebawec. Wacebame ngic molic-molic fewec, ye uwacnowec, ‘Ga sugucnene yelacni tofa edomeng aiing?’ 6 “Inguc mime yanguc bafaliyecnowec, ‘Oliwa helocine dram 100.’ “Inguc mime edowec, ‘Ga tofale hibigone balu biyac ngiyelu dram 50 sugu kwelengkec.’ 7 “Milu ngic monic uwacnowec, ‘Nga ga tofa edomeng aiing?’ “Uwame bafaliyecnolu miwec, ‘Wit be 800, ilecsoc.’ “Inguc mime edolu miwec, ‘Ga ame-hibigone balu 640 sugu kwelengkec.’ 8 “Inguc aigacgu moneng-damong sowacne ye ngage-wosaec ailu aiwecte, moneng-mafa fileinedi mimadickewec. Ilec himongte aling yengi angocte aling ewalicebalu umacneyac baficnagucaigaing.

Yesudi moneng-mafale yowa miwec

9 “Nani yanguc edocngebagabac, moneng-mafa ye dondonne miyac, ngenge wiyac yogo balu ngic baficebabong ago fikedaingte. Inguc aibong moneng-mafale dameng miyac aidaicte, iwa fafa-sanang macka bacngebadaingte. 10 “Ngic monic ye wiyac kpisicnemac madicne damongkecaigac, ye inguchac wiyac sugucne nalic damongkelu gadaicte. Nga monic ye kwesac ailu wiyac kpisicnemac madicne mi damongkecaigac, ye inguchac kwesac ailu wiyac sugucne madicne nalic mi damongkedaicte. 11 Aime ngenge yowa mi balaibelu himongte moneng-mafa sowale-sowaleine madicne mi damongkedaingte ingucne, ngic monicti wiyac madicne noine damongkeningte molenginang nalic mi lodaicte. 12 Ailu ngenge yowa mi balaibelu ngic monicte moneng-mafa madicne mi damongkedaingte ingucne, iwahac ngengele wiyac mimoctolu ngelenale ngage-lilickedaicte. 13 “Bole-madec moniyangti ngic sugucne yaeckang yekele kwelec nalic mi kwedaicte. Ye monicte angac ngagelu monic lobeedaicte, me monicta wetackelu monic hegiledaicte. Ngenge, Wapong nga moneng-mafa yekele kwelec sockahac nalic mi kwedaingte.”

Yesudi Farisaio ngic yengele miwec

14 Yesudi yowa yogo mime Farisaio yenge hiye-monengte angac sugucne fayelewecte ailu yogo ngagelu midelec aicnoibong. 15 Aibong Yesudi yanguc edocebawec, “Ngic yenge dondonne mingeleningte, ngenge yogo yengele dongewa aibaba dondonne aicaigaing. Nga Wapongtibac wiyac kwelenginang fagac, yogo ngageyackegac. Yogo yangucte, ngic yenge wiyac monicte ngagebong feicne aicaigac, yogo Wapongti nganime aibaba sowacne benang aigac. 16 “Mosesle yefe-yowa nga Wapongte sinaic mimi yengele yowadi mibong yegengkeme ofecgu Yohane fikewec dameng iwa motogac. Aime iwacni ofecgu ngic-ngigac yenge Wapongte ngani-damong mibong yegengkegac. Mibong yegengkeme ngic-ngigac yenge sanangkelu iwa fegaing. 17 Himong nga honocmeng baickeboc miyac aidaicte, yogo doicineholec, nga Wapongte yefe-yowa yogowacni sisine tofaine baic-baicine yogobac mi fikedaicte, miyac benang. 18 Ngic monic ye ngigacine hegilelu ngigac monic badaicte, ye selo aibaba aidaicte, nga monic ye ngigac hegileicne badaicte, ye ingucneyac selo aibaba aidaicte.”

Lasaros nga mafa ngic yekele nangeng yowa

19 Aime Yesudi hatacmac yanguc miwec, “Moneng-mafaholec ngic monic gawec, ye gic-ngakpiine madicne linengti baicne, ailu ngakpiine witina sasacne silicine madicne holelu hadengsoc noba-nosingtowaholec nga nogebec ailu angac witina gawec. 20 Nga yele mac-yefeina, oda lobina ngic monic waweweine gawec, wacine Lasaros. Ye socine waicti wakeyackeicne, aime ngic yengi iwahac lobong falu gawec. 21 Fame ngic moneng-mafaholec yele tebowacni nosing kapucine walu gawec, ye yogo nonogale ailu gawec. Aime hoda yengi kwesilu waicine nobolickelu gaibong. 22 “Gacgu ngic waweweinedi homame angelo yengi ye bahikelu Abrahamte emewa lobong game ngic moneng-mafaholec ye inguchac homame longkeibong. 23 Longkebong ye homac macka galu iwa doic sugucne ngagewec. Inguc ngagecgu donge hilalu nganime Abraham dalicka benang ngiyewec, aime Lasaros nganime yele emewa ngiyewec. 24 Inguc nganilu wackelu micnowec, ‘Abraham ngambone, na yawa dac kwelina doic sugucne ngagegabac, ilec ailu ga kwelegone nale sowaleme Lasaros saleengka hike mole-gbongngine susucinedi misawa kpomulucke welelu beluna lome mogungkena.’ 25 “Inguc mime Abrahamtibac yanguc miwec, ‘Ngambone, ga wiyac monic ngagesigamec. Ga himongka gaengka ngic-ngigac yengi woc-wiyac madicne madicne gelebong balu gaengka, Lasarosbac wiyac sowacne sugu lacnoibong. Yakumac Lasaros yawa bamogungkegaing, aime gabac doic ngagegic. 26 Ailu hatacmac taockelu migabac, hewacnonggang kwiyetowa loicne fagac. Inguc aime monicti yawacni falockelu gala fudaicte me iwacni yawa wele-wele, yogo aibibiyenoga.’ 27 “Inguc mime moneng-mafaholecti yanguc micnowec, ‘Mamac, inguc aime ga Lasaros mimiloc aicnolu saleengka mamacte macka hikena. 28 Hae-gbafocne 5 iwahac gagaing, yenge doic yagowahac weledaingkale, ye hikelu sawang-yowa milu edocebadaic.’ 29 “Inguc mime Abrahamti yanguc miwec, ‘Yenge Moses nga Wapongte sinaic mimi yengele yowa ngagegacgu ngagesingkedaing.’ 30 “Inguc mime moneng-mafaholec gawecti miwec, ‘Abraham ngambone, yogo miyac. Ngic monicti homackacni gboliyelu hike edocebamebac kwele-hefaliyec aidaingte.’ 31 “Inguc mime Abrahamti yanguc miwec, ‘Yenge Moses nga Wapongte sinaic mimi yengele yowa mi ngagelu hegiledaingtewa ngic monicti homackacni gboliyelu mime yenge inguchac nalic mi balaibedaingte.’”

17

Bikicte yowa

1 Aime Yesudi mic-tengtengfocine yengele yanguc miwec, “Ngic-ngigac aibaba sowacne ainingte lokwesac, yogodi himongka fikedaicte. Nga ngic monicti ngic-ngigac agofocine lokwesac ingucne aiyeledaicte, ye umacineholec. 2 Ye adu-madecfocngineng kpisicne yengelacni monic aicnome sowacne aidaickale, ye biyac balinga ubeina ubeecnolu kiwecka wikebong haume, ibac madickedec. 3 Ngenge ngengileng damongnagulu gadabiyeng. Agogone monicti bikic bafuwadaickale ga miheduc aicnodamec. Aime ye kweleine hefaliyeme, bikicine hegiledamec. 4 Nga ye hadeng moniyangte kwelina alecine 7 ngama ga basowalecgulu, dameng 7 inguchac gala hefaliye welelu yanguc midaicte, ‘Bikic yogo aibacte kwele-sowac ngagegabac.’ Inguc midaictewa bikicine hegiledamec.”

Ngage-ngagesingte yowa

5 Aime salecebaicne yenge Sugucnele miibong, “Ga ngage-ngagesingnonggeng basugulenolec.” 6 Inguc mibong Sugucnedi yanguc bafaliyeyelewec, “Ngage-ngagesingngineng kpisicne mastet hucine ingucne fangelegacte ngenge fik yoc yogo ye yeuctiyac godocine fuluckelu kiwecka haulu domanale edobong, ye yowangineng ngagelu nalic haulu domadaicte. 7 “Aime ngengelacni monicti kwelec kwekweine bame bolewa himong heuckelu gadaicte, me lama-bulumaka damongkedaicte, yedi bolewacni kwesilu macka ofeme sugucneinedi wangiyelu nosing nonale mi midaicte. 8 Yebac yanguc sugu edodaicte, ‘Ga ngakpigone holelu nosingne bamadickelu ngani-damong ainelelu wangec domac. Wangec domaengka nobe motome ga nosing nalic nodamecte.’ 9 Sugucneinedi kwelec kwekwe bole-yowa inguc lacnome, ye yowaine ngagelu bole bayackedaicte, ilec kwele-madic-yowa mi edodaicte. 10 Ngenge inguchac wiyac ainingte mingeleicne, yogo bamoctoyackelu yanguc midaing, ‘Nonge kwelec kwekwe sugu ailu bolenonggeng moc bagabeleng.’”

Ngic 10 yenge waic-sanangkolec madickeibong

11 Yesu inguc milu Yerusalem hikenogale yefe balaibelu Samaria nga Galili hewacnginac hikewec. 12 Hikelu mac-aling monicka felu ngic 10 waic-sanangnginengkolec yefewa wabong bafuwacebawec. Aime yenge dadalesuc edi domalu 13 wackelu miibong, “Yesu, Sugucne, ga nongele kwelegone sowalena.” 14 Inguc mibong Yesudi nganicebalu yanguc edocebawec, “Ngenge hikelu depec-baba ngic fikeyelelu socngineng edalicebaning.” Mime yenge yefewa hikeebongka socngineng madickewec. 15 Aime madickeibong yengelacni monicti socine madickeme nganilu hefaliye wele dacineholec aukwelu Wapong afeewec. 16 Afeelu Yesule higewa haic mesuinedi heluluckelu wawe falu yele kwele-madic yowa miwec. Aime ngic yogo ye Samaria ngic. 17 Ye inguc aime Yesudi uwacnowec, “Na ngagebe ngic 10 yenge madickegaing, nga ngic 9 yenge weni? 18 Ngic yago ye aling monickacni yengele hewackacni ye sugudi Wapong afenale hefaliye kwesigac, nga gocne yenge inguchac aibong nalic aidaicka.” 19 Milu Yesudi yele yanguc miwec, “Ga fangkelu hikenong, ngage-ngagesinggonedi bamadicgugac.”

Farisaio yenge Wapongte ngani-damongte Yesule uwacnoibong

20 Farisaio gocne yengi Wapongte ngani-damong ma damengka kwesidaicte, ilec Yesu uwacnobong yanguc bafaliyeyelewec, “Wapongte ngani-damong kwesime ngenge yogo dongedi nalic mi nganidaingte. 21 Ailu yanguc nalic mi midaingte, ‘Ngenge nganining, ye ya, me ngenge nganining, ye edi.’ Ngagegaing, Wapongte ngani-damong yogo hewacnginang fagac.” 22 Inguc milu mic-tengtengfocine yengele yanguc miwec, “Gacgu dameng monic kwesime ngenge Ngicte Madecte hadeng moniyang sugu nganiningte aingeledaicte, ailu nalic mi nganidaingte. 23 Aime ngic-ngigac yengi ngengele yanguc midaingte, ‘Ngenge nganining, ye edi,’ me ‘Ngenge nganining, ye ya.’ Inguc mibong mi balaibecebadaing, ailu iwa biyac mi hikedaing. 24 Yogo yangucte, sawawa pilatac bame angocti nebockacni nebocka hikecaigac, Ngicte Madec ye ingucneyac kwesi-kwesi damengka yegengkedaicte. 25 Molickelubac ngic yakumac gagaing yengi ye lobeebong, doic homacne ngagedaicte. 26 “Noale damengka aibaba fikewec, Ngicte Madecte kwesi-kwesi damengka aibaba inguchac fikedaicte. 27 Ngic-ngigac yenge nosing misa nolu ngic-ngigac baba-tulec aiibong, nga mamac yenge miibong, ‘Na adune ngic lacnodacte.’ Inguc ailu gaebongka, Noa wagewa feme misa sugulelu wiyac sasawa someckeyackeme sowalelu miyac aiyackewec. 28 Nga Lotile damengka aibaba inguchac fikewec. Ngic-ngigac yenge nosing misa nolu woc-wiyac fuli balu salelu noba-nosing baduwec ailu mac balu gaibong. 29 Aime hadeng monicka inguc ailu gaebong Loti Sodom taon hegilewec, hadeng iwahac Wapongti ngageme honocmengkacni dac nga salfa posa yenge mac ingucnedi walu wiyac sasawa lobeyackeme miyac aiyackewec. 30 Aime Ngicte Madec fikelu yegengkenale damengngina aibaba ingucneyac fikedaicte. 31 “Dameng iwa ngic me ngigac monic ye mac witina ngiyedaicte, ailu woc-wiyacine mac kwelina ngiyeme, ye yogo banogale mac kwelina mi fedaic. Nga monic ye nosing bolewa domadaicte, ye inguchac macina hefaliye mi hikedaic. 32 Loti ngigacinela aibaba fikewec, ngenge yogo ngagesidaing. 33 Ngic monic ye gagaine sebilenale bole balu gadaicte, ye gagaine wikeme sangkecnodaicte, nga monic ye gagaine wikeme sifuwedaicte, ye gagaine fikecnodaicte. 34 Deboc iwahac ngic yaeckang yeke mac fafa moniyang witina faebocka, yekelacni monic balu monicbac hegilebong fadaicte. 35 Nga ngigac yaeckang yeke momoc iwahac domalu flawa lalicke domaboc, yekelacni monic balu monicbac hegilebong domadaicte. 36 [Nga ngic yaeckang yeke nosing bolewa hikeboc, yekelacni monic balu monicbac hegilebong bolewa gadaicte, yogo edocngebagabac.”] 37 Inguc mime mic-tengtengfocine yengi uwacnoibong, “Sugucne, aibaba yogo wenuwa fikedaicte?” Uwacnobong Yesudi yanguc bafaliyeyelewec, “Aoc-aoc nango yenge sic kpeleckeicne fagaing, iwa tumanecaigaing.”

18

Ngigac monic ngage-wosaec ngicti bafickenogale miwec

1 Mic-tengteng yenge damengsoc tatakic mikac mimiloc bole balu ganingte Yesudi nangeng yowa monic yanguc holelu edocebawec, 2 “Yowa ngage-wosaec ngic monic ye taon monicka gawec. Ye Wapongte hangoc mi ailu gawec, nga ngic-ngigac yengele alang-baba monic mi ailu gawec. 3 Aime taon yogowahac ngigac-hosec monic gawec, ye damengsoc yela kwesilu yanguc milu gawec, ‘Ngabafocne yenge basowalecnunogale ailu gagaingte, nale yowa dondonne milu baficnudamec.’ 4 “Ngigac ye inguc milu game ngage-wosaecti bafickenale yowaine mi ngagelu gawec. Aime lobeina ngigac yele takickeme ngage-wosaec ngic yeuctiyac yanguc ngagewec, ‘Na Wapongte hangoc mi ailu gagabac, nga ngic yengele alang-baba monic mi ngagegabac. 5 Aime ngigac-hosec yago ye damengsoc nala kwesilu hataenelelu gagac, ilec ailu yowaine bamadickebe. Inguc mi aidactewa, ye damengsoc kwesime takicnu-benangkedaicte.’” 6 Aime Sugucnedi yanguc miwec, “Ngenge yowa ngage-wosaecti aibaba dondonne mi balaibewec, yedi yowa miwec, yogo ngagesidaing. 7 Wapongti ngic-ngigacfocine bawosaecngebawec, ngengele ailu ngage-yaec mi aigac. Ngenge deboc hadeng ye baficngebanale hinginengti yela hikeme ye ngengele ailu aibaba dondonna hocne baficngebadaicte. 8 Ailu damengngineng mi daliweme aibaba dondonne fikengelenale bole biyac badaicte, yogo edocngebagabac. Aime Ngicte Madecti kwesidaicte, iwa ngic-ngigac ye ngagesingkegaing, ngic-ngigac yogo bafuwacebadacte, homacne gagaing me miyac.”

Takes-baba nga Farisaio yekele siduc

9 Ngic gocne yenge yengileng ngagebong dondonne aime gocne lobeebalu gagaing, yengele ngagelu Yesudi nangeng yowa monic holelu yanguc miwec, 10 “Ngic yaeckang, Farisaio monic nga takes-baba monic, yeke Wapong milockenogale Ibu-kulucka feiboc. 11 Felu Farisaiodi domalu yeicnele kweleina ngagelu yanguc milu milockewec, ‘Wapong, na ngic gocne, hise ngic nga aibaba sowacne me kaiselo aicaigaing, yenge ingucne miyac. Ailu takes-baba ngic edi, na ye ingucne miyac, ilec kwele-madic edocgugabac. 12 Ailu Sondasoc hadeng yaeckang nosing-sawe gacaigabac, ailu wiyac sasawa balu gagabac, yogo 10kacni botoc balu moniyang gelecaigabac.’ 13 “Aime takes-baba ngic yedi Farisaiole nebecina dadalicne domalu honocmengka hilame fenale ngage-bibiyelubac, ngosockelu mondacina welu yanguc sugu milu milockewec, ‘Wapong, na bikic-baba, ga nale kwelegone sowalena.’ 14 “Aime takes-babadi aibabaine inguc miwecte Wapongte dongewa ngic dondonne ailu macina hikewec, yogo edocngebagabac. Nga Farisaio yebac miyac. Ngic monic ye yeicne soc bafedaicte, yedi ye bawadaicte, nga monic ye yeicne soc bawadaicte, yedi bafedaicte.”

Yesudi adu-madec yengele miwec

15 Ngic-ngigac gocne yengi Yesudi sabacfocngineng moledi oiyacebanale yela bacebalu kwesiibong. Kwesibong mic-tengteng yengi nganicebalubac kpatalayeleibong. 16 Kpatalayelebong Yesudibac wacebalu miwec, “Yenge nala nalic kwesining, ngenge aka mi holeyelening. Wapongte ngani-damong yogo adu-madec-gogoc ingucne yengele. 17 Foinac, monic ye adu-madec kpisicne wiyac bacaigaing, yogo ingucne Wapongte ngani-damong mi badaicte, ye Wapongte ngani-damongka nalic mi fedaicte, i miyac benang, yogo edocngebagabac.”

Ngic mafaholecti Yesuholec yowa miwec

18 Ngic micne monicti Yesu uwacnowec, “Wewedu madicne, na aibaba wenuc ailu gaga-sanang badacte?” 19 Inguc mime Yesudi yanguc bafaliyecnowec, “Ga omale madicne wacnugic? Wapong moniyangti sugu madicne gagac. 20 Ga Mosesle yefe-yowa yago biyac ngageing, ‘Ga kaiselo mi aidamec, ngic-ngigac mi wehomacebadamec, hise mi badamec, micka lolo mi aidamec, ailu nenggac-mamacfocgone alang bayeledamec.’” 21 Inguc mime ngic yedi yanguc bafaliyewec, “Ga migic, yogo sasawa soc-gboliyac galu aiibadi aicaigabac.” 22 Inguc mime Yesudi yogo ngagelu yanguc edowec, “Ga wiyac monicte sugu aibibiyegic, yogo yanguc aidamec. Mafagone sasawa fagac, yogo saleengka moneng hilockeme yogodi ngic-ngigac waweweine baficebadamec. Inguc aiyengka wiyac madicne honocmengka fikegeledaicte. Aime wele balaibecnudamec.” 23 Inguc mime ngic ye yowa yogo ngagelu ye moneng-mafatowaine homacne facnowecte ailu kwele-umac sugucne bafuwawec. 24 Yesudi ngic ye nganime kwele-umac bame yanguc miwec, “Ngic moneng-mafatowaholec yenge Wapongte ngani-damong kwelina feningte boletowa benang badaingte. 25 Kameldi bungic yefina nalic mi fedaicte, nga ngic moneng-mafatowaholec ye ingucnedi Wapongte ngani-damongka mi fedaicte.” 26 Inguc mime ngic-ngigac yenge yowa yogo ngagelu uwacnoibong, “Inguc aime madi nalic wasecne aidaicte?” 27 Inguc mibong Yesudi miwec, “Ngic ngenge aibaba gocne baningte kpungkecaigaing, yogo Wapongti nalic badaicte.” 28 Inguc mime Pitadi miwec, “Ngagegic, nonge sasawa hegilelu ga balaibecgulu gagabeleng.” 29-30 Inguc mime Yesudi yanguc miwec, “Na foinac edocngebagabac, ngic monic ye Wapongte ngani-damongte ailu macine me ngigacine me adu-madecfocine nga ngic hae-gbafocine ailu nenggac-mamac hegilecebalu gagac, yele yanguc fikedaicte, ye molic-molic mac, nga ngic hae-gbafocine yengeholec gawec, yogo ewalilu himongka gaga damengngina hatacmac homacne badaicte. Ailu motome himong silicine monic kwesidaicte, iwa gaga-sanang ingucneyac badaicte.”

Yesu yeicne homalu fangkenale miwec

31 Aime Yesudi mic-tengtengfocine 12 lobina baceba lelu yanguc edocebawec, “Ngagegaing, nongileng Yerusalem fedabelengte. Fenoga iwa Wapongte sinaic mimi yengi molic-molic Ngicte Madecte yowa, hibinginang kwelengkeibong, yogolecte noine fikedaicte. 32 Aime ngic yengi ye balu lobong Israel yengele alingkacni miyac, gocne yengele molewa feme yengi midelec nga mife-miwa aicnolu misofoc aicnodaingte. 33 Ailu hududi ye wegacgu wehomadaingte. Aime ye hadeng habackang aiyemewabac, hatacmac gboliyelu fangkedaicte.” 34 Inguc mime mic-tengteng yenge yowa yogo ngagelu monic mi ngage-motoibong. Yowa ilec fungine yogo yengela sangke-sangke fame Yesudi yowa miwec, yogo monic mi ngage-motoibong.

Yesudi donge-kpisic ngic monic bamadickewec

35 Yesu Yeriko taon bangkaleme ngic donge-pisic monicti yefe mendengngina ngiyelu woc-wiyacte milocebalu gawec. 36 Ailu ngageme ngic-ngigac habutowadi ewalilu lec-welec aibong uwawec, “Yogo wenuc aigaing?” 37 Uwame edoibong, “Yesu Nasaret-hocni, yedi welelu hikegac.” 38 Inguc mibong yedi sugucneyac wackelu miwec, “Yesu Dawidile gboli, nale kwelegone sowalena.” 39 Wackeme ngic-ngigac haicina hikeibong, yengi kpatalacnobong waickelu ngiyenale edobong yedibac hatacmac wackewec, “Dawidile gboli, nale kwelegone sowalena.” 40 Wackeme Yesudi domalu donge-pisic yela baleningte edocebame yenge emeina balebong Yesudi yanguc uwacnowec, 41 “Na oma wiyac aigelenogale ngagegic?” Mime yanguc bafaliyecnowec, “Sugucne, dongene yakuc hilanogale ngagegabac.” 42 Inguc mime Yesudi edowec, “Ngage-ngagesinggonedi bamadicgunale, ga yakuc dongegone hilanong.” 43 Inguc mime ngic ye yogowahac dongeine hilalu Yesu nganilu balaibelu Wapong mimadickeme ngic-ngigac sasawa yenge yogo nganilu Wapong mitengkeibong.

19

Sakiasdi Yesu nganinogale aiwec

1 Yesu Yeriko falockelu leemewa 2 takes-baba ngic yengele micne monic moneng-mafatowaineholec, wacine Sakias, ye iwahac gawec. 3 Yedi Yesu ye ngic weningucne milu nganinogale ngagewec. Ailu ye ngic bangkacnele ailu, ngic-ngigac homacne yengele kebangka domalu Yesu nalic mi nganiwec. 4 Inguc aime Yesudi yefe lenogale lewec, ye ngic-ngigac yengele hewackacni iwa molickelu gasacke lelu fik yoc monic domawec, yogolec witina felu donge hilalu ngiyewec. 5 Ngiyeme, Yesudi iwa lekwesilu dongeine hilame feme edowec, “Sakias, na yakumac macgona fulu ngiyedacte, inguc ngagegabac, ga biyac wanong.” 6 Inguc mime Sakiasdi yockacni biyac-biyac walu Yesu kwele-madicka hobalu mengockeme macina hikeiboc. 7 Hikeboc ngic-ngigac sasawa yenge yogo nganilu ngagebong nalic mi aime miibong, “Yesu bikic-baba ngic yele macka omale hikegac?” 8 Inguc mibong Sakiasdi iwahac domalu Sugucnele miwec, “Sugucne ngagenong, mafane balu gagabac, yogolec nebocine ngic-ngigac waweweine yeledacte, nga gocne kwesac aiyelelu wiyac baiba, yengele ameine alec 4 balu hatacmac yeledacte.” 9 Inguc mime Yesudi yanguc miwec, “Wapongti yakumac mac kweline yagolec filefocine bikicngineng baickeme wasecne aigaing. Ngic yago ye inguchac Abrahamte fikesaweckacni. 10 Yogo yangucte, Ngicte Madec ye ngic-ngigac sangkeicne basacebalu kpaducebadaicte ailu bikicngineng baickenale wawec.”

Kwelec kwekwe ngic 10 moneng baibong, ilec nangeng yowa

11 Ye inguc milu hike Yerusalem taon bangkaleme, ilec yenge yanguc ngageibong, “Wapongte ngani-damong yogo dongenonggang benang biyac yegengkedaicte.” Inguc ngageibongte ailu Yesudi yowa nangengngine monic holelu taockelu yanguc edocebawec, 12 “Ngic monicti ngic sugucnele alingkacni fikelu, yedi yanguc ngagedaicte, ‘Na himong dalicka hikebe, yengi ngictau wac nelebong hefaliyelu himong yagolec ngictau aidacte.’ 13 Aime ye hikenogale milu kwelec kwekwefocine 10 wacebalu moneng 10 wacine mina botoc balu filesoc filesoc yelelu midaicte, ‘Na hikeebewa ngenge moneng yagodi lanagulu moneng bole babong kwesilu noine nganidac.’ 14 “Nga ngic yele mac moniyangfocine, yengibac ye kweledi wikeibong. Inguc aime ye hikelu ngic gocne yanguc milu edocebalu salecebame hikeibong, ‘Yedi nongele ngictau ganale angac mi ngagegabeleng.’ 15 “Aime ye iwa game yengi ngictau wac lacnobong gacgu hatacmac hefaliyelu himongngina kwesiwec. Kwesilu kwelec kwekwefocine moneng yelewec, yogo noine wenuc basuguleibong, yogo ngagenale wacebawec. 16 “Wacebame kwelec kwekwe molic-molic yedi welelu miwec, ‘Sugucne, na moneng neleing, yogo basugulelu moneng 10 hatacmac bafuwaiba.’ 17 “Inguc mime ngictaudi yanguc miwec, ‘Ga kwelec kwekwe madicne ailu bole madicne baing. Ga yowa miiba, balaibelu wiyac kpisicne madicne damongkeingte taon 10 damongebanogale bole-yowa nga kuc gelegabac.’ 18 “Aime kwelec kwekwe lobe, yedi kwesilu miwec, ‘Sugucne, moneng neleing, yogolec moneng 5lesoc hatacmac basuguleiba.’ 19 “Inguc mime ngictaudi miwec, ‘Ga taon 5 yogolec damong locgugabac.’ 20 “Aime kwelec kwekwe monicti welelu miwec, ‘Sugucne, monenggone yago kpoluc kwelina sangkebe ngiyewec, yago nganic. 21 Ga ngic dacine ailu gocne kpakpaduc bolele moneng lobong sifu yengelacni bacaigic. Nga gocne bolewa hole-duwec aibong sifu yengelacni noine kpaduckecaigic, ilec gale hangocnume inguc aiiba.’ 22 “Inguc mime ngictaudi miwec, ‘Ga kwelec kwekwe sowacne benang, yowagone bafaliyebe yogodi hicgudaicte. Na ngic dacine ailu kpakpaduc bolele moneng mi lolu sifu bacaigabac. Nga bolewa hole-duwec mi ailu sifu noine kpaduckecaigabac, yogo biyac ngagegic. 23 Aime ga omale monengne yago moneng bengka mi loing? Inguc aidengka hefaliyelu monengne yogo nebocineholec badaba.’ 24 “Inguc milu ngic-ngigac gocne iwahac domaibong, yengele yanguc miwec, ‘Ngenge moneng yogo ewalilu kwelec kwekwe monengngine 10 facnogac, ye lacnoning.’ 25 “Inguc mime yengi miibong, ‘Sugucne, ye monengngine 10 biyac fagac.’ 26 “Inguc mibong yanguc bafaliyeyelewec, ‘Ngic monic wiyac gocne facnogac, ye wiyac hatacmac lacnodaingte nga monic ye wiyac monic mi facnogac, ye wiyac fagac, yogo ingucneyac ewalidaingte, yogo edocngebagabac. 27 Aime ngabafocne yago yenge nani ngictaungineng galu damongebanogale takicebawec, ngenge ngic yogo yawa baceba kwesilu dongena wehomacebaning.’”

Yesudi ngictau ingucne ailu Yerusalem fewec

28 Yesu yowa inguc mime motome ye molickelu Yerusalem fewec. 29 Felu kupic wacine Oliwa, yogolec emewa kwesilu Betfage nga Betani mac-himong bangkalelu mic-tengteng yaeckang, yanguc milu salecepawec, 30 “Ngeke dondonne hikelu mac-himong yefe molic-molicka ngiyegac, iwa felu donggi madecine monic ngicti witina mi ngiyeicne, yogo witickebong domagac. Domame ngeke i bafuwalu witic lukelu balu yawa welenic. 31 Aime monicti midaicte, ‘Ngeke omale donggi madecine lukegabiyec?’ Inguc uwangeteme ngeke yanguc midabiyec, ‘Sugucne ye yogodi bole banale migac.’” 32 Yesudi inguc milu ngic salecepame hikelu ye miwec, yogo sasawa bafuwaiboc. 33 Bafuwalu donggi madecine lukeboc filefocinedi uwayeteibong, “Ngeke omale donggi madecine lukegabiyec?” 34 Inguc mibong yeki miiboc, “Sugucne ye yogodi bole banale migac.” 35 Inguc milu yeke donggi madecine yogo Yesula balu hikeiboc. Ailu Yesudi felu ngiyenale yeke ngakpinginec dalicne hemoctolu donggi madecinele witina weasickelu Yesu fenale bafickeiboc. 36 Bafickeboc ye felu ngiyeme hikeemewa, iwa ngic-ngigac yenge ngakpi dalengineng hemoctolu yefeina lumackeibong. 37 Aime Yerusalem emeina Oliwa kupicte yefe hau domagac, iwa yele mic-tengtengfocine habu sugucne yenge pasi nganilu gaibongte ailu kwele-madic ngagelu beliyelu uc sugucneholec Wapong mimadickelu yanguc miibong, 38 “Ngictau Sugucnele wacka welegac, ye yambungineholec. Honocmengka kwele-efec fame sawawa wilini wac feicne fadaic.” 39 Wackelu mitengkebong Farisaio gocne habu yengele kebangka domaibong, yengi Yesule miibong, “Wewedu, ga mic-tengtengfocgone miyeleengka waickening.” 40 Inguc mibong Yesudi yanguc bafaliyeyelewec, “Yenge waickebong posa yengi aukwedaingte, yogo edocngebagabac.” 41 Yesu Yerusalem bangkalelu taon yogo nganilu ngic-ngigac yengele hiyalu 42 yanguc miwec, “Ngenge yangucteyac kwele-mogungkolec ganingte yefe ngani-motobong madickedaicka. Aime yefebac yakumac sangke-sangke fame dongenginang mi yegengkedaicte. 43 Ngengele damengngineng monic weledaicte, iwa ngabafocngineng yenge neboc nga neboc wabungngebalu himong heuckelu habuwebong feme igocngebadaingte. 44 Igocngebalu yengi basowalecngebadaingte, adu-madecfocngineng ngengele kebangka gagabiyeng, yenge wehomacebayackebong himongka fadaingte. Ailu ngengele kwelina posa monic hegilebong monicti monicte witiwa mi ngiyedaicte, i Wapongti weleyec, ngenge yogo mi ngani-motogaing.”

Yesudi Ibu-kulucka wiyac salebong yebicebawec

45 Ailu Yesudi Ibu-kulucte oda kwelina felu ngic-ngigac yengi wiyac salelu fuli balu gabong, yenge yebicebalu 46 yanguc edocebawec, “Yowa yanguc kwelengkeicne fagac, ‘Na Ibu-kulucne yagodi mimilocte mac aidaic.’ Aime ngengibac mac yogo bafaliyebong, ‘Hise-baba yengele sangke-sangke mac aigac.’” 47 Aime Yesudi hadengsoc Ibu-kulucka wewedu bole baemewa depec-baba ngic micne nga Wapongte yefe-yowale wewedu ngic ailu habu yengele micnefocngineng yenge Yesu wehomanogale aibibiyelu gaibong. 48 Aime ngic-ngigac yenge yele yowa ngagepangkelu gaibong nga yowaine monic hegileningte mi ngageibong. Yogolec ailu ngaba yenge ye baickeningte yefe monic mi bafuwaibong.

20

Madi Yesu bole-yowa lacnowec

1 Yesu ye dameng monicka Ibu-kulucka ngic-ngigac edocebalu weduyelelu siduc madicne edocebame, depec-baba ngic micne nga Wapongte yefe-yowale wewedu ngic ailu Yuda-ngic micnefocngineng yenge yengileng bucnac wele haicina domalu 2 uwacnolu miibong, “Edocnubac, ga ma kucka bole yogo bagamec, me madi bole-yowa yogo gelewec?” 3 Mibong yanguc milu bafaliyeyelewec, “Aime na inguchac uwangelebe edocnuning: 4 Yohanedi misa-lowac bole balu gawec, bole yogo honocmengkacni me ngickacni?” 5 Mime yenge yengilangkac mingagec ailu yanguc miibong, “‘Yogo honocmengkacni,’ inguc midabelengtewa, aime ye yanguc uwanoledaicte, ‘Aime ngenge omale ye mi ngagesingkeibong?’ 6 Me ‘ngickacni’ inguc midabelengtewa, ngic-ngigac yenge Yohane ye Wapongte sinaic mimi, inguc kwelenginengti ngagesingkegaingte ailu, posadi wickelu hole-homacnubadaingte.” 7 Inguc milu yanguc bafaliyecnoibong, “Nonge bole yogo wenuwacni welegac, i mi ngagegabeleng.” 8 Mibong Yesudi yanguc bafaliyewec, “Inguc migaingte, na inguchac ma kucka bole bacaigabac, yogo mi edocngebadacte.”

Waing bolele damong sowacne

9 Inguc milu Yesudi yowa nangengngine ngic-ngigac yanguc edocebawec, “Ngic monicti waing boleina waing duwewec. Duweme motome ye waing bole damongkeningte ngic gocne bafuwacebalu yengeholec yowa hefeibong, ailu yeicnebac dameng dalicne himong monicka ganale hikewec. 10 “Hikegacgume waing noine babale dameng weleme kwelec kwekweine monic saleme waing bolele damong yengela hikeme yengi waing noine, nebocine ye lacnoningte hikewec. Hikeme waing bolele damong yengi kwelec kwekwe yogo welu moc benang salebong hikewec. 11 Hikeme bole fileinedi inguc nganilu hatacmac monic salewec. Saleme hikeme waing bolele damong yengi ye inguchac welu aibaba sowacne benang aicnolu moc benang salebong hikewec. 12 Aime hatacmac kwelec kwekweine monic saleme hikeme alecine habackang aime ye inguchac webong sacine wame yebiyebong hikewec. 13 “Inguc aime bole fileinedi miwec, ‘Na wenuc aidacte? O, madec benangne angac ngagecnocaigabac, ye salebe hikeme ye alang bacnodaingte mecne.’ 14 “Milu saleme waing bolele damong yengi ye nganilu yengilangkac mingagec ailu miibong, ‘Yedi gacgu bole yago edeme feme yeicne aidaicte, nongileng ye wehomalu yele himong nga mole-damocine nongileng aidaic.’ 15 Inguc milu madec yogo balu fuluckebong bole lobina haume wehomaibong.” Milu Yesudi uwayelewec, “Bole fileine yogodi waing bolele damong yengele wenuc aiyeledaicte? 16 Ye kwesilu waing bolele damong wehomacebame homayackebong, waing bole yogo bole damong gocne yengele molewa lodaicte.” Mime yenge i ngagelu yanguc miibong, “Inguc benang mi fikedaic.” 17 Inguc mibong Yesudi nganicebalu yanguc miwec, “Fungine omale yanguc kwelengkeicne fagac, yogo ngagedaing, ‘Mac-baba ngic yenge posa yogo hegilelu wikeibong, posa idi mac unggulucinele posa-bosing sanangne aiwec domagac.’ 18 Ngic-ngigac sasawa yenge posa idi witiwa wawecebadaicte, yenge socngineng lokeyackedaicte. Nga posa yogodi yengele feiwa wawecebadaicte, posa idi hepelecebame kapuc kwedaingte.” 19 Aime Wapongte yefe-yowale wewedu ngic, nga depec-baba ngic micne, yenge Yesudi yengele yowa nangengngine miwec, yogo biyac ngage-motoibongte ailu iwayac banogale aiibong, ailu ngic-ngigac yengele hangocebamebac hegileibong.

Yesu takesle uwacnoibong

20 Ilec yenge Yesu nganibiyelu ngicfocngineng salecebaibong, yenge yowaine ngagegaing silic yela hikeibong. Hikelu oma yowa wenuc mime ngagelubac prowinsle ngic micne yele molewa loningte ngageibong. 21 Ailu ngic yogo yenge Yesule miibong, “Wewedu, yowa migic nga wiyac wedunolegic, yogo noine sasawa ailu Wapongte yefe, yogo sugu ngic-ngigac edocebalu weduyelelu yowa monic-mi monic-mi mi aicaigic, gale inguc ngagecaigabeleng. 22 Ilec edocnubac: Nonge takes ngictau Sisa nalic lacnodabelengte me miyac?” 23 Inguc mibong Yesudi kwesacngineng ngani-motolu yanguc edocebawec, 24 “Ngenge moneng yogo monic edalicnubong nganibe! Iluc nga hibi ya male?” Mime miibong, “Yogo Sisale.” 25 Mibong Yesudi miwec, “Ilec ngenge Sisale wiyac yogo Sisa lacnodaing, nga Wapongte wiyac yogo Wapong lacnodaing!” 26 Inguc mime yenge kwatackelu ngic-ngigac yengele dongewa micka lolo aicnolu ye banogale yogo aibibiyebong yowangineng ameine inguc bafaliyewec, ilec ngage-bibiyelu yowa monic mi miibong.

Homackacni fangke-fangke ilec uwacnoibong

27 Aime Sadyusi yenge homackacni fangke-fangke monic mi fagac, inguc micaigaing, yengelacni gocnedi Yesula wele uwacnolu miibong, 28 “Wewedu, Mosesdi yowa yanguc kwelengkenolewec, ‘Ngic monic ye ngigac balu gboliine mikac gacgu homame ngic yele gbainedi haeinele hosec balu gboliholec ailu haeinele wac bafangkelu gadaicte.’ 29 Dameng monicka hae-gba 7 gaibong. Galu haengineng molic-molicti ngigac balu gboli mikac moc gacgu homadaicte. 30 Homame gbainedi haeinele hosec balu 31 moc gacgu homadaicte. Aime gbanginecti hosec, yogo balu inguchac gboliine mikac gacgu homame hae-gba 7 yenge ngigac yogoyac balu gbolifocngineng mikac gacgu homayackebong 32 ngigac ye inguchac homadaicte. 33 Ngigac ye ngic 7 yengele ngigacngineng ailu gacgu homackacni fangke-fangke damengka hae-gba 7 yengelacni male ngigac aidaicte?” 34 Inguc mibong Yesudi yanguc bafaliyeyelewec, “Himong yagolec gaga damengka ngicti ngigac bagaing, nga mamac yenge migaing ‘Na adune ngic lacnodacte.’ 35 Aime ngic-ngigac yenge homackacni gboliyelu fangke-fangke, nga gaga-sanang banogale aidaingte, yenge iwa ngawe-ngigac mi aidaingte. 36 Yenge homackacni fangke-fangke, yogolec fungine aigaing. Nga Wapongte adu-madecfocine ailu angelo ingucne galu hatacmac nalic mi homadaingte. 37 Aime homackacni fangke-fangke fagac, yogo Mosesdi inguchac kwelengkelu mime yegengkeyelewec. I yanguc, yoc-kpisicka dac lobeme ye nganiemewa yowa yanguc fikewec, ‘Na Abraham nga Aisak nga Yakobo yengele Wapongyac gagabac.’ 38 Gbolicne gagale Wapong, nga homaicne yengele Wapong miyac. Yele ngani-nganiwa sasawadi gaganginengkolec aigaing.” 39 Aime Wapongte yefe-yowale wewedu ngic gocne yenge yanguc miibong, “Wewedu, yowa madicne benang migic.” 40 Aime ilec lobeina yenge hangocebame monicti uuwa hatacmac mi uwacnoibong.

Yesu Dawidile gboli miibong

41 Inguc aime Yesudi miwec, “Ngenge yowa yanguc ngagesidaing: Ailu yowa yanguc fagac, ‘Mesia ye Dawidile gboli.’ 42 Nga Dawidi ye yeuctiyac Miti geewa yanguc miwec fagac, ‘Sugucnedi nale Sugucne edowec, “Ga folenapec ngiyeengka 43 gacgu ngabafocgone locebabe higegone bageina muki ingucne aidaingte.” ’ 44 Ilec Dawidi ye ‘nale Sugucne’ wackewecti wenucka yele gboli aigabac?”

Yesudi Wapongte yefe-yowale wewedu ngic yengele sawang-yowa miwec

45 Aime Yesu ye ngic-ngigac sasawa yengele dongewa mic-tengtengfocine yanguc edocebawec, 46 “Ngenge Wapongte yefe-yowale wewedu ngic yengele ngani-motolu gadabiyeng! Yenge ngakpi dale madicne holelu mac-boneng ganogale angac ngagedaingte, nga maketka hikebong ngic-ngigac yengi yengele wenac madic miyeleningte angacngineng sugucne fagac. Ailu kpakpaduc macka nga nosing hodocine hole-holele damengngina ngiye-ngiye molic-molicka ngiyenogale angacebacaigac. 47 Ailu yenge ngigac-hosec yengele mac ewalicebacaigaing. Ailu ngage-madickeyeleningte mimiloc dalicneyac milockecaigaing. Kwesac ingucne aicaigabiyengte yenge ameine umacneyac badaingte.”

21

Ngigac-hosec monicti ibu lowec

1 Aime Yesu ye donge hilalu nganime moneng-mafaholec yenge ibungineng Ibu-kulucte katapawa lobong haume, 2 ngigac-hosec waweweine monicti toya-hakic yaeckang, sugu lome haume nganilu 3 yanguc miwec, “Ngigac-hosec waweweine yagodi moneng lome ngic sasawa ibu logabiyeng, yogo ewalicebalu logac, yogo noine benang edocngebagabac. 4 Yogo yanguc, yenge mafatowangineng wakelu fagac, iwacni nebocine ibungineng logabiyeng, nga ngigac yebac facnowec yogo sasawa loyackegac.”

Ibu-kuluc sowaledaicte

5 Aime gocne yenge Ibu-kulucte hibine madicnedi baicne aime ibu nga wiyac haic fungine funginedi Ibu-kulucka Wapong kwele-madicka lacnolu gaibong, yogodi Ibu-kuluc hibineholec ainale lesoine lolu gaibong, yogo nganilu siduc mibong Yesudi yanguc edocebawec, 6 “Mac yogo ngani-angac homacne aigaing. Dameng monic weleme, iwa sasawa hembalackedaingte. Ailu posa monicti monicte feiwa hegilebong mi ngiyedaicte.”

Yesu kwesinale yowa

7 Inguc mime yenge uwacnoibong, “Wewedu, aibaba migic, yogo ma damengka fikedaicte, nga dameng iwa oma aibaba fikeme nganilubac dameng bangkalegac inguc ngagedabelengte, ilec edocnubac.” 8 Inguc mibong Yesudi miwec, “Monicti kwesacka mengocngebadaickale, ngage-homalu gadaing. Homacnedi welelu nale wac wackelu midaingte, ‘Na Mesia,’ ailu ‘Dameng biyac bangkalegac.’ Inguc mibong mi balaibecebadaing! 9 Nga yuwenactowa ailu ube-kwekwe uctowaineholec fikeme ngagelu ilec medecngebame hangoc mi aidaing! Omale, wiyac ingucne molickelu fikedaicte, nga damengbac iwayac mi miyac aidaicte, miyac.” 10 Ailu hatacmac taockelu miwec, “Himong gocne yenge himong gocne yengeholec yuwenac ainagudaingte, nga ngictau monicte alingti ngictau monicte aling yengeholec ngaba ainagudaingte. 11 Ailu memeyatowa sugucne badaicte, nga loloc-dameng fikeme huc sugucne himong monicka nga monicka inguchac fike-hikedaicte. Nga sawawa aibaba silicine fungine fungine, hangoc-hangocine fikeme nganidaingte. 12 “Aibaba ingucne mi fikeemewayac yenge nale wacte ailu weyebic aingelelu bacngebalu kpakpaduc macte damong yengele molewa locngebadaingte. Aime yenge muc-macka locngebabong ngictau nga gawana yengela bacngebalu hikedaingte. 13 Nga ngenge dameng iwayac nale mimi-yegeng yowa edocebaningte yefe fikengelenale, 14-15 nani ngage-ngage-motoc ngelelu yowa micnginang lodacte. Inguc aibe ngabafocngineng yengele hewackacni yowa ngeledacte, yogo monicti nalic mi bawadaicte, me wedaicte. Ilec ailu ngenge yengele dongewa yowa minang milu mibamoc mi aidaing. 16 Aime nenggac-mamac nga hae-gbafocngineng ailu sac-tofa nga agofocngineng yengi mudocngebalu ngaba yengele molewa locngebabong, ngengelacni gocne wehomacebadaingte. 17 Aime nale wacte ailu sasawadi kweledi wicngebabong 18 ngengele hodocnginengte hodoc-docngineng monictibac nalic mi sifuwedaicte. 19 Ngenge sanangneyac domadaingtewa ngengileng gaganginengte gaga-sanang badaingte.

Yerusalem sowaledaicte

20 “Aime hudu-baba ngic habu yenge Yerusalem hewalingkedaingte, dameng iwa yanguc biyac ngagedaingte, taon sowalenale dameng biyac welegac. 21-22 Dameng yogo ame badu-badu dameng, aime yowa sasawa kwelengkeicne fagac, ilec noine fikedaicte. Ilec ailu Yudeya himongka gagaing, yenge dameng iwa hikelu kupicka fedaing, nga Yerusalem kwelina gagaing, yenge hikelu lobina haudaing, ailu lobina gagaing, yenge Yerusalem kwelina mi fedaing! 23 Himong yagowa umac sugucne fikeme ngic-ngigac ngaba aiyeledaingte. Ilec ailu dameng iwa ngigac gobeholec gagaing, nga nenggac kogoc amuc gumecebacaigaing, yenge umacnginengkolec. 24 Aime ngaba yenge hudule fitecti ngic gocne wehomacebalu gocne witicebalu himongne himongne baceba hikelu locebadaingte. Aime Israel yengele alingkacni miyac yengi kwesilu Yerusalem higenginengti edesockelu gaebongka damengngineng yogo motome hikedaingte.

Ngicte Madec hatacmac kwesidaicte

25 “Dameng iwa wenac nga tamacne ailu asocmeng yengela sowi fikedaicte. Aime himongne himongne yenge kwele-umac balu dingongka domalu kiwec dibongte uc ngagelu ngageboc ailu kauc badaingte. 26 Ailu sawawa wiyac kucineholec sasawa yenge sulingkedaingte, ilec ngic-ngigac yenge umac yogodi himongka fikenale ngagelu ngageboc nga hangoc ailu homa-gbolic aidaingte. 27 Aime ngagedaingte dameng iwa yenge Ngicte Madec ye kuc nga hulili-kwelengngineholecti kaguwa kwelina kwesime nganidaingte. 28 Aibaba yogo fikenale aiyemewa umackacni bamoctocngebabong feningte dameng bangkalegacte ailu fangkelu hodocngineng bafangkelu nganilu domadaing.”

Yesudi damengte yocka nangeng yowa holelu miwec

29 Aime Yesu ye yowa nangengngine yanguc edocebawec, “Ngenge fik yoc nga yoc sasawa nganilu ngagedaing. 30 Yoc yenge hekengngineng fosedaingtewa, wenac dameng bangkalegac, inguc ngengung biyac ngagedaingte! 31 Ngenge wiyac sasawa migabac yogo fikeme nganilu yanguc ngagedaing, Wapongte ngani-damong biyac bangkalecnubagac. 32 “Foinac, aling yago, yenge mi homaebongkahac wiyac yogo fikeyackedaicte. 33 Aime himong nga honocmeng, yeke miyac aidabiyecte, nga nale yowa idibac nalic mi miyac aidaicte, yogo noine benang. 34 “Aime kwele-sifuc nga misa-nonole ailu himongte ngageboc yogodi baumalecngebadaickale, ngenge damongngineng banagudaing! Hadeng yogodi biyac fikengeledaic ilec. 35 Yogo yangucte, hadeng yogodi himongne himongne subadi sic wecaigac, ingucnehac ngic-ngigac sasawa yengela fikedaicte, 36 ilec ngenge damengsoc damongnagulu mimiloc bole bagadaing. Bagacgu wiyac sasawa yogo fikenoga aigac, yogo ewalilu kuc balu Ngicte Madec, yele dongewa sanangkelu domadaingte.” 37 Aime dameng iwayac Yesu ye hadengsoc Ibu-kulucka wewedu bole balu gawec. Balu gacgume mac aweleme kupic monic wacine Oliwa, iwa hikeme deboleme ngiyelu gawec. 38 Game mac saeme ngic-ngigac sasawa yenge Ibu-kulucka yele yowa hatacmac ngageningte hikelu gaibong.

22

Yudasdi Yesu baningte mipangkewec

1 Hombang monic, bret yis mikac, wacine monic Ewalicebaicnele hombang micaigaing, hombang yogo bangkalewec. 2 Aime depec-baba ngic micne nga Wapongte yefe-yowale wewedu ngic yenge Yesu homacka lonogale yefe monic bafuwanogale ngagesilu ngic-ngigac yengele hangocebame aibibiyeibong. 3 Mic-tengtengfocine 12 yengelacni monic Yudas wacine monic Iskariot, ye Aleng Sugucnenginengti yele kwele-ngage-ngageina haume, 4 yedi hikelu depec-baba ngic micne nga Ibu-kulucte lebe-ngic damongngine, yengeholec ngiyelu Yesule yefe wenuc balu yengele molewa lonale yowa mingagec aiibong. 5 Aime yenge kwele-madic ngagelu moneng gocne lacnoningte milu yowa hefeibong. 6 Yudasdi yengeholec kwele moniyang ailu yefe wenuc bafuwalu habu yenge yeholec mi gaebongka ye sangke-sangke galu Yesu yengele molewa lonale donge hilalu gawec.

Ewalicebaicnele hombangte lama madecineholec nosing lobelu bamockeiboc

7 Gaemewa bret yis mikac, ilec hombangka lama madecine wecaigaing, hadeng yogo weleme 8 Yesudi Pita nga Yohane yanguc milu salecepawec, “Ewalicebaicnele hombangte lama madecineholec nosing nonangte ngeke hikelu wiyac bamockenic!” 9 Inguc mime uwacnolu miiboc, “Wenuwa bamockenacte ngagesigic?” 10 Miboc bafaliyeyetelu yanguc miwec, “Ngeke hikelu taonka fedabiyecte, iwa ngic monic misa-hebecine kukuwelu weleme yeholec luwelu balaibe lelu ye mac monicka feme ngeke yeholec felu 11 mac fileine yanguc edodabiyec, ‘Wewedudi gale yanguc uwagac: Mac kweline weni iwa mic-tengtengfocne yengeholec Ewalicebaicnele hombangte nosing nodabelengte?’ 12 Inguc miboc yedi mac sawawa kweline sugucne iwa wiyac biyac loicne ngiyeyackegac, yogo edalicngepame ngeke iwa nosing bamockedabiyec.” 13 Aime yeke hikelu Yesudi miyetewecsoc ngic yogo bafuwalu Ewalicebaicnele hombangte nosing bamockeiboc.

Ewalicebaicnele hombangte nosing noibong

14 Aime nosing-nono dameng weleme Yesudi salecebaicne yengeholec nosing nonogale ngiyelu 15-16 yanguc edocebawec, “Ewalicebaicnele hombangte nosing yago ngengeholec nonogale homacne ainelegac. Na nosing yago hatacmac mi nolu gaebewa Wapongte ngani-damong kwelina hombangte fungine fikedaicte yogo nolubac doicka fedacte. I noine edocngebagabac.” 17-18 Inguc milu kap monic balu Wapong kwele-madic micnolu miwec, “Na yanguc edocngebagabac, Na waing noinele misaine hatacmac mi nolu gaebewa Wapongte ngani-damong weledaicte, ilec ngenge wiyac yago balu ngengung lanagulu noning.” 19 Inguc milu bret monic balu Wapong kwele-madic edolu baucke yelelu yanguc miwec, “Yago soc-biucne, yago ngengele ailu loicne. Ngenge yogo nolu nale ngagesilu inguc nolu gadaing!” 20 Nosing nobong motome ye kap inguchac balu miwec, “Kap yago sacnele dodoficnonggeng gbolicne, yogo ngengele ailu sotingkeicne. 21-22 “Ailu Ngicte Madec ye Wapongti yefe micnowecka hikedaicte hocne nga ngic doicka locnudaicte ye nosing tebowa momoc ngiyegabeleng, aime ngic yogo yedibac basowalenowagac.” 23 Inguc mime mic-tengtengfocine yengungtiyac uwanaguibong, “Madibac nongileng hewackacni aibaba yogo aidaicte.”

Madi feicne aigac

24 Aime mic-tengteng yenge yengileng hewackacni madi feicne gagac, ilec yowangineng fec-wac aime 25 Yesudi edocebalu miwec, “Himongka ngictaufocngineng yenge ngic damongebalu mic-tengtengfocngineng bacebacaigaing. Bacebalu micaigaing, ‘Nonge babaficngineng gagabeleng.’ 26 “Ngengibac inguc mi aidaing! Monic ye feicne aigac, ye waicne aidaic, nga micnengineng gagac, yedi tofafocngineng yengele bole-madec ingucne gadaic. 27 Madi feicne aigac? Nosing moc ngiyelu nodaicte me bole-madec nosing holelu gagac? Nosing moc ngiyelu nodaicte, yogodi ingucne. Aime nanibac ngengele hewacka bole-madec ingucne gagabac. 28 Nga na lokwesac kwelina gaebewa ngenge na mi hegilecnulu gaibong. 29 Mamacnedi ngani-damongte kuc molena lowec, ingucneyac nani ngani-damongte kuc molenginang lodacte. 30 Lobewa ngenge naholec galu ngani-damongte nosing nga misa nolu ngiyedaingte. Ngenge inguchac ngictaule bole balu Israel yengele fungfocngineng 12 fagac yengele aibabangineng wosaelu mimoctodaingte.

Yesu ye Pitadi bisockenale mime yegengkewec

31 “Simon, Simon, ga ngagenong, Aleng Sugucnengineng ye ngic yenge wit yafoine webong wanale kpendaec-aigaing, yogo ingucne madicnacni bafaliyecngebame sowaleningte biyac alingkelu milockeneleyec. 32 Aime Simon, gabac ngage-ngagesinggone wikeengka mi wanale, nani gale ailu inguc biyac mimiloc bole babac. Ailu ga kwelegone hefaliyeme nala hatacmac welelu mic-tengteng alingfocgone basanangebadamec!” 33 Aime Pitadi miwec, “Sugucne, gaholec muc-macka haunogale nga homanogale biyac efeckebac.” 34 Mime Yesudi edowec, “Pita, na yowa edocgube ngagec, yakumac deboc yagowahac kokolec ngicne mi hiaemewa ga bisocnung alecine habackang aidaicte.”

Yesudi mic-tengtengfocine miyelewec, wiyac balu gadaing

35 Aime Yesudi edocebalu miwec, “Molic-molic salecngebabe hikeibong, dameng iwa moneng-ebec me hiye me hige-ebec mi balu gaibong, ailu wiyac monicte waweibong me?” Mime yengi miibong, “Miyac.” 36-37 Mibong Yesudi miwec, “Hibiwa yanguc kwelengkeicne fagac, yogo nala noine fikedaicte, ilec edocngebagabac. Yogo yanguc, ‘Yengi yele kindololo ngic miibong.’ Nale ngagelu yowa miibong fagac, i yakumac noine fikeyackegac. Ilec ailu yakumacbac yanguc migabac: Monic ye moneng-ebeckolec me hiyeineholec gagac, ye yogo badaic. Ailu hudule fitec mikac gagac, ye ngakpitowaine saleme moneng hilockeme yogodi hudule fitec fuli badaic.” 38 Mime mic-tengtengfocine yengi yanguc miibong, “Sugucne nganic, nonge hudule fitec yaeckang balu gagabeleng.” Mibong miwec, “I andoine.”

Yesudi Getsemane bolewa Wapong milockewec

39 Milu Yesu ye inguc ailu gawec, ailu mac hegilelu Oliwa kupicka hikeme mic-tengtengfocine balaibelu hikeibong. 40 Hike sulumebong edocebalu miwec, “Ngenge lokwesacka feningte milockelu sanangkening!” 41 Inguc milu ye mic-tengtengfocine hegilecebalu sawaine kpisicnemac loceba lelu ketadi holelu 42 yanguc milu Wapong milockewec, “Mamac, ga ngageng nalic aime kap yago nalacni baickenong! Ailu nale angac miyac, geicne angac nga ngage-ngage idibac sanangkedaic.” 43 [Inguc milockeemewa angelo monicti honocmengkacni wa fikecnolu basanangkeme, 44 Yesu ye ngageme umale-benangkeme sanangneyac milockeme sengilangnginedi sac ingucne ailu himongka wawec.] 45 Milockeme motome fangkelu mic-tengtengfocine yengela hefaliye lelu nganicebame yenge kwele-sowac ailu gung fabong 46 yanguc edocebawec, “Ngenge omale gung fagaing? Ngenge lokwesacka fedaingkale fangke milockelu sanangkening!”

Ngaba yenge Yesu baibong

47 Aime Yesu ye yowa milu domaemewayac ngic-habu gocnedi yela kwesiibong. Nga mic-tengteng 12 yengelacni monic Yudas, yedi molickeyelelu Yesu emeina muduckenale yela bangkaleme 48 Yesudi micnowec, “Yudas, ga Ngicte Madec muduckelu losi yengele molewa locnugic, me?” 49 Mime Yesu mic-tengtengfocine habu balu domaibong, yenge aibaba sowacne yogo fikenogale aime nganilu uwacnolu miibong, “Sugucne, nonge hudule fitecti wecebanang, me?” 50 Aime yengelacni monicti depec-baba ngic micne yele kwelec kwekwe welu hedecine folewahaic welockeme wamebac 51 Yesudi miwec, “Ngenge aibaba yogo hegilening!” Inguc milu kwelec kwekwe ngicte hedecine bauwalu bamadickewec. 52 Aime Yesu banoga kwesiibong, yogo depec-baba ngic micne nga Ibu-kulucte lebe-ngic micne-babangineng ailu Yuda-ngic micnefocngineng, yengele yanguc miwec, “Ngenge ngic sowacne baningte ingucne hudule fitec nga gbalucnginengkolec kwesigaing. 53 Aime ngengeholec Ibu-kulucka hadengsoc gaiba iwa omale na mi bacnuibong. Nga yakumacbac kundungte kucti ngengele dameng aigac.”

Pita ye Yesule bisockewec

54 Inguc aime yenge Yesu balu depec-baba ngic micnele macka bahikeibong. Pita ye lobenginang sawaine dalisucyac balaibecebalu hikewec. 55 Hikeme ngic gocne yenge macte oda kwelina sobeng hewacina dac fitobong lobeme folalu ngiyeebong, Pita yengele hewacka wangiyewec. 56 Aime kwelec-adu monicti Pita dacka ngiyeme donge hila nganilu miwec, “Ngic yago ye Yesuholec gacaigac.” 57 Inguc mime Pitadi bisockelu miwec, “Ngigac, ga migic, na ye mi ngagecnogabac.” 58 Mime dameng mi daliweme ngic monicti Pita ngani-motolu miwec, “Ga hocne yengelacni monic.” Inguc mime Pitadi miwec, “Ngic, ga ngagegic, na mikac.” 59 Aime awa moniyang ingucne domaemewa, ngic monicti hatacmac sanangkelu miwec, “Noine benang, ngic yago ye Galili ngic, ye hocne yele alingka gacaigac.” 60 Mime Pitadi yanguc bafaliyewec, “Ngic, ngagegic, ga migic yogo na mi ngage-motogabac.” Milu yowa yogo mi mimoctome kokolec ngicne wackewec. 61 Wackeme Sugucne hefaliyelu Pita nganime, Pita ye Sugucnedi yele yowa miwec, yogo ngagesiwec, “Kokolec ngicne deboc yagowa mi wackeemewa, na mi ngagecnugic milu bisockeengka alecine habackang aidaicte.” 62 Aime Pita lobeina haulu kwele-sowac sugucne ailu hiawec.

Damong yenge Yesu migoi aicnolu weibong

63 Ngic Yesule damong gaibong, yenge Yesu migoi aicnolu welu 64 dongeine kpolucti ebeckelu miibong, “Madi wecgugac, sinaic mimi gagickabac minong.” 65 Milu yenge aibaba fungine fungine aicnolu misulec aicnoibong.

Yesu ye Yuda-ngic tutumangnginengte dongewa domawec

66 Aime mac saeme Yuda-ngic micnefocngineng, nga depec-baba ngic micne ailu Wapongte yefe-yowale wewedu ngic yengileng bucnac, yenge kpatuleebongka Yesu Yuda-ngic yengele tutumangtowawa balelu 67 yanguc miibong, “Ga edocnubanong, ga Mesia, me?” Mibong yanguc bafaliyeyelewec, “Edocngebabe nalic mi ngagesingkedaingte, 68 nga uuwa uwangeledacte ameine nalic mi bafaliyedaingte. 69 Yakumac nga doma fenowagac iwa Ngicte Madec Wapong Kuctowa fileine yele foleinapec ngiyedaicte.” 70 Mime yengi miibong, “Inguc aime ga Wapongte Madec me?” Mibong, yedi miwec, “Inguc migaing i noine. Na gagabachac.” 71 Inguc mime yengi miibong, “Yeuctiyac mibasanang ainagugac, nongileng hatacmac mi kauc badabelengte. Yeicne micti mime biyac ngagegabeleng.”

23

Yesu Pailatla bahikeibong

1 Milu kpatulelu ngiyeyackeibong, yenge sasawa fangkelu Yesu balu Pailatla bahikelu 2 iwa yowawa lobong domame fungngineine miibong, “Ngic ya ye ngic-ngigacfocnonggeng yengela yefengineng basifuwelu takes Sisa lacnoningte kpatalayelelu yeicnele micaigac ‘Na Mesia, ngictau monic,’ inguc micaigac.” 3 Inguc mibong Pailatdi uwacnolu miwec, “Ga Yuda-ngic yengele ngictau, me?” Mime bafaliyelu miwec, “Yogo hocne gageuc migic.” 4 Aime Pailatdi depec-baba ngic micne nga habu yengele miwec, “Ngic yagodi mimipang yowa monic mi ewaliwec, sowacneine basackegabac.” 5 Mime yengebac sanangkelu miibong, “Ye ngic-ngigac weduyeleme kwele fangke-fangke Galilihocniyac fungkelu aiyele kwesicgu Yudeya himongka sawelu iwa motogac.”

Yesu Herodela bahikeibong

6 Inguc mibong Pailat ye yogo ngagelu uwayelewec, “Ngic yago Galilihocni, me?” 7 Ailu ye Yesule fungine ngagelu Herodedi himong damongkegac, ye iwacni, inguc ngagewec. Ngagelu Herodedi dameng iwahac Yerusalem inguchac gawecte Yesu saleme yela hikewec. 8 Aime Herode ye Yesule siduc biyac ngagewecte Yesudi aibaba kucineholec gocne bame nganinogale ngagelu gawec. Inguc ngagelu dameng dalicne Yesu basackelu gawecte ailu Yesu yela bahikebong kwele-madic benang ngagewec. 9 Ngagelu Yesu uuwa homacne uwacnowec, aime yedibac uuwa ameine monic mi bafaliyecnome 10 depec-baba ngic micne, nga Wapongte yefe-yowale wewedu ngic yengi wele domalu yele fungine sanangneyac benang miibong. 11 Herode nga hudu-babale ngicfocine yenge ye lobeelu migoi aicnolu ngakpi monic hibiineholec holecnobong haume, Pailatla hatacmac salecebame bahikeibong. 12 Aime Herode nga Pailat yeke esecne ngaba-ngaba gaiboc hadeng iwahac ago-ago aiiboc.

Yesu homanale Pailatdi ye mimoctowec

13 Aime Pailat ye depec-baba ngic micne nga micne-baba ailu ngic-ngigac wacebame weleyackebong 14 yanguc milu edocebawec, “Ngic yago ye ngic-ngigacfocnonggeng kwelengineng bafangkecaigac, inguc milu bawelegabiyeng. Nga wiyac nganilu yowawa logaing, yogo nani ngengele dongewa uwacnobe miyac aigac. Aime sowacneine basackegabac. 15 Nga Herode ye inguchac ngagelu moc bafaliyeme balu welegaing. Inguc aime, ngic yagodi sowacne monic mi aiyecka nani homacka lodactelesoc mi aigac, yogo ngage-motodaing. 16 Inguc aime ye weboting gocne aicnolu hegilebe hikenale ngagegabac.” 17 [Ailu ewalicebaicnele hombang damengka gawanadi ngic moniyang muc-mackacni lukecnoningte, aibaba i fawecte] 18 habutowa sasawadi yenge aukwelu miibong, “Ye wehomalu Barabas lukenolec!” 19 Barabas ye molic-molic taonka ngic-ngigac yenge kwele fangke-fangke aibaba ailu ngic wehomawecte, muc-macka loibong. 20 Nga Pailat yedibac Yesu lukecnome hikenale ngagelu ngic-ngigac yengela hatacmac sanangkelu miwec. 21 Mime yenge aukwelu miibong, “Ye malicpongka weng homana, ye malicpongka weng homana!” 22 Aukwebong dameng habackang aime, Pailatdi edocebalu miwec, “Ngic yago ye oma sowacne benang bafuwawec? Na sowacneine monic mi bafuwalu homacka lodactelesoc mi aigac. Inguc aime weboting aicnolu hegilebe hikenale ngagegabac.” 23 Mime yenge malicpongka homanale sanangkelu dacineholec aukwelu Pailatle yowa ewalilu hendolong bafuwaibong. Inguc aibong 24 Pailat ye yengele yowa ngageyelelu Yesu mimoctowec. 25 Ailu ngic yogo kwele fangke-fangke aibaba aigacgu ngic wehomame muc-macka lobong ngiyewec, ye lukecnoningte miibong, ye lukecnolu Yesubac molenginang lome ngage-ngagengineng balaibeningte hegileyelewec.

Yesu malicpongka weibong

26 Hegileyeleme hudu-baba ngic yengi Yesu bahikelu nganibong ngic monic Sairini taonkacni, wacine Simon, ye nosing bolewacni weleme yefewa bafuwalu yedi Yesule malicpong tengkenale aicnobong tengkelu Yesu balaibewec. 27 Aime ngic-ngigac habu sugucnedi balaibeibong, yengele hewackacni ngigac homacne yenge yele mihiyac ailu kwele-sowac sugucne aiibong. 28-30 Inguc aibong Yesudi hefaliyelu yanguc edocebawec, “Dameng monic weleme, iwa ngic-ngigac yenge yanguc midaingte, ‘Ngigac hufing nga kogoc mi baibong, ailu amuc mi gumecebaibong, yenge kwele-angackolec.’ ‘Dameng iwa ngic-ngigac yenge kupicte midaingte, “Witinonggang walu famacnubac!” Nga fegengte yanguc midaingte, “Fouckelu somecnubac!” ’ Ilec ailu Yerusalemkocni ngigac-adu, ngenge nale mi hiyaning! Ngenge ngengileng nga adu-madecfocngineng, yengele ailubac hiyaning! 31 Yoc sabaineholec domaemewa yela aibaba ingucne aigaing. Aime yoc ye biyac homaicne, ibac sowale-benangkedaicte.” 32 Aime kindololo ngic yaeckang yeke Yesuholec wecepaningte inguchac bacepalu hike 33 himong monic wacine Hodoc-luwe, iwa hikelu Yesu malicpongka weibong ailu kindololo ngic monic folewapec nga monic kanawapec, inguc wecepaibong. 34 Wecebabong Yesudi miwec, “Mamac, bole bagaing, yogo mi ngage-motolu aigaingte ailu ga bikicngineng hegilenong!” Ailu yenge ngakpi-kpolucine loling monic ailu bauckelu lanaguibong. 35 Ngic-ngigac yenge wiyac fikewec, i ngani domaebongka Yuda-ngic micnefocnginengkolec yenge inguchac misulec aicnolu miibong, “Ye Wapongte Mesia bawosaecine aigacka, ye ngic-ngigac gocne baficebawec, ingucneyac yeicne baficnaguna.” 36 Aime hudu-baba ngic yenge inguchac midelec aicnolu yele emewa welelu waing hobecineholec yela sungkecnolu 37 yanguc miibong, “Ga Yuda-ngic yengele ngictau gagickabac geicne baficnaguc!” 38 Aime yele hodoc feina yowa yanguc kwelengkeicne domawec, “Yago Yuda-ngic yengele ngictau.”

Kindololo ngic yaeckang Yesuholec wecepaibong

39 Nga kindololo ngic yaeckang yekelacni monic domawec, yedi Yesu mimi-soling aicnolu miwec, “Ga Mesia aigicka geicne baficnagulu noke inguchac baficnupac!” 40 Inguc mime agoinedi kpatalacnolu yowa aicnolu miwec, “Ga ye ameine bagac ingucneyac bagamec, Wapongte mi hangocgugac, me? 41 Nokilec kindololononggecte ameine aibaba dondonne inguc ainotegaing nga ngic yago yedibac sowacne monic mi bafuwawec.” 42 Inguc milu Yesule miwec, “Yesu, ga ngani-damonggona hike sulumelu ngictaule bole balu na ngagesicnudamec!” 43 Mime Yesudi miwec, “Yakumac hocne naholec honocmengka gadabelecte, yogo foinac benang edocgugabac.”

Yesu homawec

44 Aime wenacka dameng 12 kilok aime iwahac mac kundung kwelu himong sockelu falu game 3 kilok aiwec. 45 Aime wenac-dongeine kundung kwewec, dameng iwahac Ibu-kulucka kpoluctowa kuluc-kweline gbagbacne benang nuina domacaigac, yogo fouckeme yaeckang aiwec. 46 Aime Yesudi malac sugucneyac wackelu miwec, “Mamac, ilucne molegona logabac!” Inguc mime asuine kwedickewec. 47 Aime hudu-baba ngic yengele damongti inguc nganilu Wapong mimadickelu miwec, “Ngic yago ye sowacneine mikac, i noine.” 48 Aime ngic-ngigac sasawa yenge aibaba fikewec, yogo ngani-ngagec ainogale kwesiibong, yenge aibaba yogo fikeme nganilu mondacngineng welu hiyalu macnginang hikeibong. 49 Nga Yesule alingfocine sasawa nga ngigac gocne Yesu balaibelu Galilihocni kwesiibong, yengebac welelu dalicka domalu aibaba fikewec, yogo nganiibong.

Yesu henebewa lobong fawec

50-51 Aime Yuda himongka taon monic Arimatea iwacni ngic monic gawec wacine Yosefe. Ye Yuda-ngic yengele tutumangtowale memba monic. Ye ngic ulucne nga aibabaine dondonne ailu Wapongte ngani-damongte wangec gawec. Aime ye agofocinedi yowa miibong nga aibaba aiibong, ilec ngageme mi madickewec. 52 Mi madickeme ye Pailatla hikelu Yesule kponggbong banale uwacnowec. 53 Uwacnome ngagecnome ye Yesule kponggbong bamoctolu lineng-kpoluc yogodi ebeckelu bahikelu dongesi monic gbolicne, iwa loibong. Nga dongesi yogo posa yefina gufulu bamadickeicne. Aime i gbolicne, ngic monic iwa mi longkeicne. 54 Aime hadeng yogo Sabatle efec-tafec dameng aime, Sabat dameng fungkenogale aiwec. 55 Aime Galili prowinswacni ngigac gocne Yesu balaibelu gaibong, yenge Yosefe balaibelu dongesiwa hikelu Yesule kponggbong loibong, yogo ngani-ngagec ailu 56 hatacmac hefaliyelu macnginang hikelu kponggbong ilec sanda hoine madicne baba-madic aiibong, ailu Sabatle yefe fagac, i balaibelu bole mikac ngiye-ngageibong.

24

Yesu homackacni gboliye fangkewec

1 Sonda ubiyacte mac sae-saele ngigac yenge sanda hoine madicne baba-madic aiibong, yogo balu dongesiwa hikeibong. 2 Hikelu nganibong posatowa dongesi yefeine hedickeicne yogo biyac balu igockeicne, aime dongesi nuine moc angkelu domame, 3 ngigac yenge dongesi kwelina felu Sugucne Yesule kponggbong basackeibong. 4 Ailu yenge oma wiyac fikegac milu ngage-bibiyelu domaebongka iwahac ngic yaeckang, ngakpinginec kwalacne benang angocineholec, yeki welelu dongenginang fikelu domaiboc. 5 Domaboc ngigac yenge hangocebame ngosockelu haicngineng himongka heluluckelu ngiyeebongka, ngic yaeckang yeki yanguc edocebaiboc, “Ngenge ngic gagaineholec omale dongesiwa basackegaing? 6 Ye hocne Wapongti homackacni biyac bagboliyeme fangkeyec, yawa mi fagac. Aime ye Galili hikeebongka yowa edocngebawec, yogo ngagesidaing. 7 ‘Ngicte Madec ye bikic-baba yengele molewa lobong, yengi balu malicpongka webong homadaicte,’ yogo fikenale miwec. ‘Aime hadeng habackang aime, hatacmac gboliyelu fangkedacte.’” 8 Mime ngigac yenge yedi yowa yogo biyac miwec, i ngagesiibong. 9 Ngagesilu dongesiwacni hatacmac hefaliye hikelu salecebaicne 11, nga agofocngineng aibaba sasawa fikewec, yogo edocebayackeibong. 10 Ngigac hikeibong, yenge wacngineng Maria Magadalen, nga Yoana ailu Maria Yakobos nenggacine, ailu ngigac gocne yenge momoc hikeibong, yenge siduc yogoyac salecebaicne edocebaibong. 11 Aime ngigac yenge yowa miibong, i yenge ngagebong sisifucine aime yowangineng mi ngagesingkeibong. 12 Inguc aime Pita ye sifu fangke gasackelu dongesiwa hikewec. Hikelu dongesiwa fakanelu nganime kpolucti sugu ngiyewec. Ye inguc nganilu ngage-ngage bole balu hatacmac hefaliye hikewec.

Ngic yaeckang yeke Emeus yefewa Yesu nganiiboc

13 Aime hadeng iwahac ngic yaeckang Yesu balaibecaigaic, yeke mac monic wacine Emeus, iwa hikenogale hikeiboc. Mac, yogo Yerusalemkocni dalicneine 11 kilomita, ingucne ngiyewec. 14 Aime yeke aibaba sasawa fikewec, ilec mingagec ailu hikeiboc. 15 Yeke yowa ilec mingagec ailu ngage-ngage bole balu hikeebocka, Yesu yeicne hikelu yekela fikeyeteme yekeholec hikeibong. 16 Ailu donge basifuc aiyeteme yeke ye nalic mi ngani-motoiboc. 17 Inguc aime Yesudi uwayetelu miwec, “Ngeke yefewa oma wiyacte ngekilackac mingagec aigaic?” Mime yeke kwele-sowac silic ailu waickelu domaiboc. 18 Domalu monic wacine Kleopas, yedi uwacnolu miwec, “Ga kwilic ngic moniyangti sugu Yerusalem gaebengka, Sonda yogolec kwelina iwa aibaba fikeyec yogo mi ngagegic, me?” 19 Mime yedi miwec, “Oma aibaba fikeyec?” Inguc mime yeki edolu miiboc, “Yesu Nasaret-hocni yela aibaba fikeyec. Ye Wapongte sinaic mimi monic, ailu Wapong nga ngic yengele dongewa yowa miwec, nga aibaba sasawa bawec, yogo kucineholec benang aiwec. 20 Aime depec-baba ngic micne nga micnefocnonggeng, yengi ye homanale milu gamang yengele molewa lobong, yengi malicpongka webong homawec. 21 Aime nonge yanguc ngagelu gaibeng: Ye hocne Israel ngic-ngigac witickacni lukecnubadaicte. Ailubac aibaba fikewec, yogolec hadeng yakumac habackang aigac. 22-23 Aime ngigac gocne nongele alingkacni, yenge yakumac ubiyacte benang dongesiwa hikelu kponggbongine basackegaing. Basackelu hefaliye welelu yanguc edocnubagaing, ‘Angelo yaeckang yeki fikenolelu yanguc migaic, “Yesu biyac gboliyelu fangkeyec gbolicne gagac!” ’ Inguc edocnubabong kwatackegabeleng. 24 Nongelacni ngic gocnedi dongesiwa hikelu ngigac yenge migaing inguc benang bafuwagaing, ailu yeicnebac mi nganigaing.” 25 Miboc Yesudi edocepawec, “Ngeke ngage-ngagenginec mikac, nga kwelenginec bengone benang, aime Wapongte sinaic mimi yenge biyachac yowa sasawa miibong, yogo biyac mi ngagesingkecaigaic. 26 I yanguc fikenale miibong, ‘Mesia ye doic ngageme motome wac-bingec feicne nalic badaicte.’” 27 Aime yeicne siduc Wapongte hibiwa kwelengkeicne fayackegac, i Mosesle hibiwacni molickelu hikecgu Wapongte sinaic mimi sasawa yengi yele siduc kwelengkeibong, ilec fungine mime yegengkeyetewec. 28 Aime mac hikenogale hikeiboc, yogo bangkalelu Yesu ye mochac hikenogale silic ingucne aime, 29 yeki kpatalacnolu miiboc, “Mac aweleme kundung kwenale aigac, ga nokeholec hikenang!” Inguc miboc yekeholec macka felu ngiyeibong. 30 Yesu ye yekeholec ngiyelu nosing nonogale bret balu yambung-yowa milu bauckelu yeteme, 31 dongenginec lokeme Yesu ngani-motoebocka, ye iwahac mime aockeme 32 yekilackac mingagec ailu miiboc, “Noine benang, yefewa Wapongte hibile fungine edocnupalu wedunotelu mime yegengkeme kwelenonggecti fangke-benangkegac.” 33 Aime yeke iwahac fangkelu hefaliye hatacmac Yerusalem hikelu salecebaicne 11, agofocnginengkolec kpatulelu ngiyeebongka bafuwacebaiboc. 34 Bafuwacebaboc yengi edocepalu yanguc miibong, “Sugucne ye noine homackacni gboliyelu fangkegac, ye Simon fikecnogacyac!” 35 Mibong yeki yefewa yekela aibaba fikewec, nga Yesudi bret bauckeme ngani-motoiboc, ilec siduc aiyeleiboc.

Yesudi alingfocine fikeyelewec

36 Aiyeleboc yenge yowa i ngagelu ngiyeebongka, Yesu yeicne hewacnginang domalu miwec, “Kwele-efec ngengela fadaic.” 37 Inguc mime yenge kwatackelu hangocebame ngageibong, “Ngic ilucine nganigabeleng.” 38 Inguc ngagebong miwec, “Ngenge omale mimedec ailu ngageboc aigaing? 39 Ibac naneuc gagabac, ngenge hige-molene nganining. Iluc yengebac luwe-biuc mikac ilec wele oiyacnulu ngagening, nabac luwe-biuckolec.” 40 Inguc milu hige-moleine edalicebame 41 yenge kwatackeibong, ailu kwele-madictowa ngagelu sifu mi ngagesingkeibong, aime yedi uwayelelu miwec, “Ngenge nosing monic lobong ngiyegac, me?” 42 Mime yenge misa-sic lobeicnele nebocine lacnobong 43 balu dongenginang nowec. 44 Nolu yanguc edocebawec, “Ngengeholec gaibawa yanguc biyac edocngebaiba: Wiyac sasawa nale ngagelu Mosesle yefe-yowale hibiwa, nga Wapongte sinaic mimi yengele hibiwa, ailu Miti geewa kwelengkeicne fagac, yogo sasawa noine fikedaic.” 45 Inguc milu yedi iwayac ngage-ngagengineng mime yegengkeyeleme Wapongte hibi ngage-motobong 46 yanguc taockelu miwec, “Ilec ailu yanguc kwelengkeicne fagac: Mesia ye doicka webong homame hadeng habackangka hatacmac gboliyelu fangkedaicte. 47 Aime yenge yele wacka kwelengineng hefaliyebong, bikic hegileyelenale yefe yogo Yerusalem mackacni fungkelu himongne himongne yowa mibong yegengkelu hikedaicte. 48 Aime ngengela aibaba i hocne dongenginang fikegac, yogo mibong yegengkedaic. 49 Ailu Mamacnedi mipangkelu miwec, nani yogo salengelebe badaing. Ailu ngenge taon yago mi hegileebongka wilengkacni kuc ngeledaicte, i noine.”

Yesu honocmengka fewec

50 Aime Yesu ye molickeyeleme taon hegilelu lobeina Betani mac-kpisicna hikelu iwa moleine bafangkelu yambungebalu 51 gaemewa, Wapongti bame honocmengka fewec. 52 Feme yenge afeelu angac sugucne ngagelu Yerusalem hatacmac hefaliye hikelu 53 damengsoc Ibu-kulucka galu Wapong mimadickelu gaibong.