1

1 Mulaa abwe bugul gegewel hi gan, Baaba iyoho i gan, iya alona Yehoba, ge Baaba iya Yehoba. 2 Abatelipuna elana iya iyoho alona Yehoba. 3 Iya eliyana Yehoba bugul gegewena i ginolil. Binimala iya nigeya, bugul bolo hi gan nige nihi gagan, yaa iya eliyana inoke hi masal. 4 Iya elana yawal i gan, ge yawal o iya gamagalau wala mwananal. 5 Mwananal i yana gogou gamwanaa, yaa gogou mwananal o nige i aatena. 6 Tau etega alana Diyon, iya Yehoba i patuna i nem panayawi. 7 Iya i nem mwananal wasana i wasaan, inoke gamagalau gegewel wasa ya nihi hago ge nihi abulilek. 8 Iya nige mwananal i oola, yaa i nem mwananal wasana i wasaan. 9 Mwananal tutunahotina, toto mwananal ni pek gamagalau gegewel elal, iya i nem panayawi. 10 I nem i minaa panayawi, yaa bwagana iya eliyana Yehoba panayawi i ginol, he panayawi gamagaliliyau nige hi aatena te henala iya. 11 I nem i minaa totona wana labi elana, yaa wana labi gamagaliliyau nige hi pwapwamwa pahe. 12 Yaa bolo hi pwamwa heyan ge alana hi abulilek-an, i talam bosowailiya nihi tabwa Yehoba natunau. 13 Hi tabwa Yehoba natunau nige tage panayawi tamanina wana pamasal elana, o ebo gamagalau wali nuwatu elana, yaa Yehoba i ab pavavaluna-agil. 14 Baaba i tabwa gamagal, inoke avala ta mina ga sauga kekeisi, mulolu ge baaba tutunahotina i kalaopopwi. Wana wasawasa ha kite, i ola Yehoba Natuna maisena ya wana wasawasa, i neem Tamana elana. 15 Wasana Diyon Tobabitaiso i wasaan, i yogayoga i ba, "Toto ya heiya te bana ge valila ya ba, 'Toto i nenem ewa iya i bwata lakeyau, kaiwena iya i gan houwa mulaa abwe ya masal.' " 16 Iya mulolu i kalaopopwi, inoke gegewela wana mulolu ta pwawa i pem hikahikani. 17 Yehoba Logugui i pek Mosese elana ge iya i pamasal gamagalau elal, yaa mulolu ge baaba tutunahotina i masalem Yeisu Keliso elana. 18 Nige sauga etega gamagal etega Yehoba i kikite, yaa Yehoba Natuna maisena ya, iya i ola Yehoba, ge iya alona Tamana hi mitoyawa, iya yaka Yehoba i pankitela. 19 Yudiya wali tohouwa bolo Yelusalema, topowon enuna avaliyau ge un Libai enuna al hi patunal hi na Diyon elana hi nel hi ba, "Henala owa?" 20 Diyon nige i mimikekei, yaa analiya i lahe ge i ba bubun i ba, "Nau nige Mesaiya i oola." 21 Yaka hi neli al hi ba, "He binimala henala owa? Owa Ilaitiya?" Diyon i ba, "Nau nige Ilaitiya i oola." Yudiya hi nel al hi ba, "Age owa palopita bwabwatana toto i nenem?" Analiya i lahe i ba, "Nigeya." 22 Yaka Yudiya hi ba, "He henala owa? Ga nu ba ola totom kaiwem? Nu ba pasapu eliyama, inoke naha na bolo hi patunama wali wasa naha pek bubun." 23 Diyon Yudiya analiya i lahe palopita Aiseya wana baaba elana i ba, "Nau toto i yogayoga uleya i ba, 'Babala wana kamwasa ku pasapu.' " 24 Bolo Yudiya wali tohouwa hi patunal, gamwaliyaa enuna Palisi. 25 Heliya hi nel Diyon elana hi ba, "He hauna kaiwena ge u papababitaiso, ebo owa nige Mesaiya, o Ilaitiya o ebo palopita toto bwabwatana i oola?" 26 Diyon analiya i lahe i ba, "Nau wewel elana ya papababitaiso, yaa etega iyoho i talmilila gamwamiwa nige ku aatena. 27 Iya i nenem ewa, yaa nau nige no waisi i gagan ge tage aena ana os ana hihiu na sokal." 28 Bugul gegewena ya i gana Bedani elana, wewel Yolidani labi leunati. He Diyon i papababitaisowa wewel Yolidani elana. 29 Hi kenu lan i gan, inoke Diyon matana i nok Yeisu i kite i nanawa elana, yaka i ba, "Ku kite! Iya Sipi Natuna toto Yehoba i patunam panayawi gamagaliliyau wali gegi ni ahek yoho! 30 Iya te bana ge valila ya ba, `Tau toto i nenem ewa, iya i bwata lakeyau, kaiwena iya i gan houwa mulaa abwe ya masal.' 31 Saugena o nau nige ya aatena henala bana ya babaa, yaa ya nem gamagalau ya pababitaisol wewel elana, puna heiya te iya na pamasal Isileli elal." 32 Inoke Diyon i wasa al i ba, "Nau valila nige ya aatena henala i nenem, yaa toto i patunau ge wewel elana gamagalau ya pababitaisol i baem elau i ba, 'Tau toto nu kite Yayaluwa Bwabwalena ni lau ge ni minaa elana, he iya te Yayaluwa Bwabwalena elana ni papababitaiso.' Inoke Yayaluwa Bwabwalena ya kite i loem labulabumwa i ola bunibuni ge i lau i minaa elana. 34 Ya kiteya matawa, heiya te ya ba, 'Tau ya iya Yehoba Natuna.' " 35 Lan i gan al, Diyon iyoho i taltalmilil al alonau ge wana tohago eluwa, 36 ge sauga Diyon Yeisu i kite i nanawa, inoke i ba, "Ku kite! Iya Sipi Natuna toto Yehoba i patunam!" 37 Sauga tohago ali toto eluwa hi hago Diyon baaba o i baunan, yaka hi tatauliulil Yeisu enaa. 38 Yeisu i tagena sikal i kitel, yaka i nelil i ba, "Hauna gun nuwamiu?" Tohago hi ba, "Labai, ga u miminaa?" (Vilan "Labai" ana pasikal heiya "topankite.") 39 Yeisu analiya i lahe i ba, "Ku nem yaka nuku kite." Inoke avaliya Yeisu hi na wana abamina hi kite, ge lan o avaliya hi miminaa to. He sauga o iyaka po kilok kokoyavi ana labi elana. 40 Bolo Diyon wana baaba hi hago ge hi tatauliulil Yeisu enaa, he etegana te Andulu, Saimon Pita talina. 41 Inoke houwan hot Andulu i na talina Saimon i loyaan ge wana wasa i pek i ba, "Mesaiya iyaka ha pwawa." (Vilan "Mesaiya" pana Gilik elana ana pasikal hi ba "Keliso," ana sapu heiya "Yehoba wana hilihili gamagalina.") 42 Yaka Andulu Saimon i en pwatanik Yeisu elana. Yeisu matana i nok Saimon i gayawaan, yaka i ba, "Owa Saimon, Diyon natuna, yaa alam ya tun Sipas." (Alan "Sipas" ana pasikal pana Gilik elana hi ba "Pita," ana sapu heiya "pat.") 43 Lan i gan al, inoke Yeisu i nuwatu ni nok ni na Galili. Pilipi i pwawa ge i baek elana i ba, "U nem u toulilau." 44 Pilipi wana panuwa te Betesaida, he panuwa o Andulu ge Pita al wali panuwa. 45 Pilipi Nataniyel i pwawa, yaka i baek elana i ba, "Tau toto wasana Mosese i lelelian Logugui ana buki elana, ge palopitau al hi lelelian, iyaka ha pwawa, iya Yeisu gagama Nasaleta, Yosepa natuna." 46 Yaka Nataniyel i nel i ba, "Age bosowaina ya waisi etega ni neem Nasaleta?" Yaka Pilipi i ba, "He u nem ga ta na u kite." 47 Sauga Yeisu Nataniyel i kite i nanawa elana, yaka i ba, "Tau ya iya Isileli tutunahotina etega, ge nige kakawi etega i gagana elana." 48 Inoke Nataniyel i nel Yeisu elana i ba, "Ga i ola ge u atenau?" Yeisu i ba, "Ya kitewa u misiyo poga punaa, mulaa abwe Pilipi i yogaagiwa." 49 Yaka Nataniyel i baek Yeisu elana i ba, "Topankite, owa Yehoba Natuna, ge owa Isileli wali kin!" 50 Yeisu i ba, "U abulilek kaiwena ya ba, 'Ya kitewaa poga punaa.' Toto ya nige i bwabwaya, yaa abwe bugul bwabwayal enuna nu kitel." 51 Yaka Yeisu i ba al i ba, "Ya ba tunahot eliyamiu, abwe nuku kite labulabum ni mwapwela ge Yehoba wana aneloseyau nihi haha ge nihi laulau Gamagal Natuna elana."

2

1 Lan eluwa i mowasi, abwe alolon hagalena etega hi ginola Galili awanina Kena elana. Yeisu hinana i nok hagali o elana, 2 ge Yeisu alonau wana tohago hi awanunil hi nok al alolon o elana. 3 Sauga oine i mowasi, inoke Yeisu hinana i baek elana i ba, "Iyaka nige wali oine etega al i gagan." 4 Inoke Yeisu hinana anana i lahe i ba, "Nevenak, hauna kaiwena baaba ya u baunan elau? No sauga nigeya ga i pwapwawa." 5 Yaka Yeisu hinana i baek totuwalali elal i ba, "Ebo hauna gun ni baunan eliyamiu, nuku ginol ola wana baaba." 6 Mulaa abwe Yudiya nihi anan, nimaliya ge wali bugubugul nihi ul ni ola wali tapwalolo ana logugui, inoke toto o kaiwena ulubwal pat elana hi ginoliliya ali gewi esiwa (6) iyoho to, maisena ge maisena bosowaina wewel ni minaa gamwanaa ana bwata ni ola 100 lita. 7 Yaka Yeisu i baek totuwalali elal i ba, "Wewel ku wage ulubwal nuku pakalaopopwil." Inoke wewel hi wage ge ulubwal hi pakalaopopwil i na ana siga awaliyaa. 8 Yaka Yeisu i baek totuwalali elal i ba, "Sauga ya enuna ku wage ge ku na ku pek tau toto hagali i kauni elana." Yaka hi ginol i ola Yeisu wana baaba, 9 ge tau toto hagali i kauni wewel toto Yeisu i pil ge i tabwa oine i im bose. Nige i aatena te oine o ga i noem, yaa totuwalali bolo wewel hi wage hi atena. Yaka tau toto hagali i kauni toalolon melutauina i yogaan i nok elana, 10 ge i baek elana i ba, "Sauga gegewena oine amnana waiwaisana ta teli tagilan houwan, ge sauga gamagalau iyaka hi im nabiyan ge amnaliya i pwawa, inoke abwe oine toto nige amnana i wawaisi hot ta teli tagilan. Yaa owa nige u giginol ola. Oine amnana waiwaisana hot u kukuhikan ana siga sauga ya, abwe u teli tagilan." 11 Ginol yawiyawi toto ya Yeisu wana ginol yawiyawi houwan hot, i ginola awan Kena elana labi Galili. Ginol o elana wana wasawasa i pamasal, inoke wana tohago hi abulilek-an. 12 Alolon hagalena enaa, yaka Yeisu alonau hinana, talinau ge wana tohago hi nok hi na Kapeniyama, inoke hi miminaa ga o lan enuna. 13 Sauga iyaka kelaubwa Yudiya wali Nopalegi Hagalena ana sauga, inoke Yeisu i nok i na Yelusalema. 14 Yeisu i na Limi Bwabwalena ana bakubakuwa, inoke gamagalau enuna i pwawal bulumakau, sipi ge bunibuni hi lolopalipali, ge enuna hi misiyo wali teibol elana ge mani hi lololopatal. 15 Inoke hihiu enuna i ahe enibinibi i ginol, ge eliyana gamagalau avaliyau wali bulumakau ge sipi i takel tagilagil Limi Bwabwalena tolinaa, ge mani ana tololopatal wali teibol i kukupapagena-an ge wali mani i tagakayakaya-an, 16 ge i baek bunibuni ali topalipali elal i ba, "Bugul bolo ya ku bugul egonagil! Bahi al Nam wana limi nuku giginol ni oola wami abamaket!" 17 Yaka tohago Buki Bwabwalena ana baaba hi nuwahikan, toto i ba, "Wam limi ana nunuwana i tau atewa i ola ginaha." 18 Yaka Yudiya hi baek Yeisu elana hi ba, "He ginol yawiyawi etega u ginol naha kite, inoke naha atena tunahot Yehoba wam gasisi i pewa te ginol ya u ginol." 19 Yeisu Yudiya analiya i lahe i ba, "Ebo Limi Bwabwalena ya nuku pasamwalekaleka, inoke lan eton elana na pamilil al." 20 Yudiya Yeisu anana hi lahe hi ba, "Baliman ana gewi poti sikis te limi ya hi taltali, yaa owa u ba, 'Lan eton elana na pamilil al.' " 21 Yaa Limi Bwabwalena toto bana ge Yeisu i babaa, he iya tuwana bana. 22 Inoke sauga i lutem yaomala, wana tohago wana baaba o hi nuwahikan, inoke Buki Bwabwalena ana baaba ge Yeisu wana baaba hi abulilek-an. 23 Sauga Yeisu iyoho Yelusalema Nopalegi Hagalena ana sauga elana, gamagalau hi gewi wana ginol yawiyawi i ginolil hi kite, inoke hi abulilek elana. 24 Yaa Yeisu nige i oolak elal ge i memelteli-agil, kaiwena gamagalau gegewel wali nuwatu i atena. 25 Nige tage wana aatena i kaubwa ge abwe gamagal etega wana wasa ni pek gamagalau wali nuwatu kaiwena, yaa i atena te hauna iyoho gamagalau ateliyaa.

3

1 Tau etega Yudiya wali tohouwa etegana alana Nikodimas, iya boda Palisi gamagalina etega. 2 Bulin etega i na Yeisu elana ge i ba, "Labai, ha atena owa topankite etega u neem Yehoba elana, kaiwena nige gamagal etega bosowaina ginol yawiyawi ni ginol ni ola owa, ebo Yehoba nige i miminek elana." 3 Yeisu Nikodimas anana i lahe i ba, "Ya ba tunahot eliyam, nige bosowaina gamagal etega Yehoba wana abalogugui ni kite ana siga ebo Yehoba ni ab pavavaluna." 4 Yaa Nikodimas i ba, "Ebo gamagal etega iyaka i matuwa, ga nihi ab ola-an? Nige bosowaina ni ulutuk sikal hinana tinenaa ge hinana ni ab paeluwana al." 5 Yeisu Nikodimas anana i lahe i ba, "Ya ba tunahot eliyam, nige bosowaina gamagal etega ni ulutuk Yehoba wana abaloguguiya ana siga ebo Yehoba ni ab pavavaluna wewel ge Yayaluwa Bwabwalena elana. 6 Gamagal tamana ge hinana tuwana hi ab yawalina i gan, yaa ebo Yayaluwa Bwabwalena gamagal o ni ab pavavaluna, inoke abwe yayaluwana yawalina ni gan. 7 Bahi atem ni yoyou no baaba kaiwena, toto ya ba, 'Ebo nuwamiu nuku ulutuk Yehoba wana abaloguguiya, he Yehoba ni ab pavavaluna-agimiu.' 8 Mana i towa i yu olak labi toto nuwana ni noek. Butuna ta hago, yaa nige ta aatena te ga i yu noem ge ga i totowa noek. He Yayaluwa Bwabwalena wana tuwalali i ola ya to gamagalau gegewel bolo i ab pavavaluna-agil eliyalil." 9 Yaka Nikodimas i nel al Yeisu elana i ba, "Baaba toto u baunan ga ni masal ola?" 10 Yeisu i ba, "Owa Isileli wali topankite bwabwatana etega. He ga i ola ge no baaba ana sapu nige u aatena? 11 Ya ba tunahot eliyam, bugul toto ha atena te ha baunan, ge toto ha kite te ha wasaan, yaa komiu wama baaba nige ku aabulilek-an. 12 Sauga ebo ya baaba bugul bolo hi masala panayawiya kaiweliya, yaka no baaba nige ku aabulilek-an. He ga abwe nuku abulilek ola ebo na baaba bugul bolo hi masala labulabumwa kaiweliya? 13 Nige gamagal etega i haha labulabumwa, iyai ya te Gamagal Natuna, iya i loem labulabumwa. 14 Mosese kopa i ahe mwata kakanununa i ginol ge i teli heyan suki elana uleya, he i ola ya te Gamagal Natuna abwe nihi teli heyan kolos elana, 15 inoke gamagalau gegewel bolo hi abulilek elana yawaliliya hot nihi ahe." 16 "He Yehoba panayawi i nunuwana-an nabiyan, yaka Natuna maisena hot i talamwan, inoke henala ebo ni abulilek-an nige ni yayaomal, yawalina hot ni ahe. 17 Yehoba Natuna i patuna i lau panayawiya, nige tage gamagalau panayawi ni pakotil, yaa ni pwamwalil. 18 Gamagal toto i abulilek elana nige ana kot i gagan, yaa toto nige i aabulilek, iya ana kot i mowasi ge ana lahi hi baunan haba, kaiwena nige i aabulilek Yehoba Natuna maisena alana elana. 19 He yatala puna i ola hiwe: mwananal iyaka i nem i tuk panayawi, yaa gamagalau nuwaliya i noek gogou elana, mwananal nige nuwaliya i oola, kaiwena wali pagan i nak. 20 Bolo ginol nanakina hi awaawaginol, mwananal hi pihigelgel-an ge nige hi nonok mwananala, kaiwena nige nuwaliya i oola wali pagan nanakina mwananal ni pamasal. 21 Yaa bolo wali ginol i sapu ge i tunahot hi nok mwananala, kaiwena nuwaliya ni mwananal te toto hi ginol hi ginola Yehoba wana gasisi elana." 22 Yaka sauga etega Yeisu alonau ge wana tohago hi na labi Yudiya, inoke alonau hi miminek ga o, ge gamagalau i papababitaisol. 23 Diyon Tobabitaiso al ge gamagalau i papababitaisol, iya iyoho Ainon awan Salim gegelinaa, kaiwena labi o elana wewel i bwata. Inoke gamagalau hi noknok elana ni pababitaisol. 24 He saugena o Diyon nigeya ga hi teteli dela. 25 Diyon wana tohago enuna avaliya Yudiya etega hi peawabalgigil highig paganina kaiwena, hauna toto nihi toulil ge bosowailiya nihi sapu Yehoba matanaa. 26 Yaka tohago o hi nok hi na Diyon elana hi ba, "Topankite, tau toto valila alom wewel Yolidani labena leunati ge wasana u wasaan, he iya iyoho sauga e gamagalau i papababitaisol, ge gamagalau gegewel to hi noknok elana o." 27 Analiya i lahe i ba, "Nige bosowaina bugul etega ni gan gamagal etega elana iyai te ebo Yehoba ni talamwan elana. 28 He komiu totomiu valila ku hago ya te ya ba, 'Nau nige Mesaiya i oola, yaa Yehoba i patunau houwan Mesaiya awonaa.' 29 Toalolon melutauina iya te toalolon meluyovana i aahe, yaa toalolon melutauina wana heliyam i matamatan toalolon melutauina alona ge toalolon meluyovana nihi vin, inoke iya iyoho i lalaegan. Inoke sauga toalolon melutauina anana i hago, yaka i yaliyaya nabi. He nau no yaliyaya i ola to, ge no yaliyaya iyaka i olaolaek. 30 Iya alana ni bwatabwata ya, ge nau alau ni lolowa ya." 31 "Tau toto i neem natiya, iya gamagalau gegewela i bwata lakela. Tau toto i neem panayawiya, iya panayawi gamagalina ge i baaba bugul bolo hi masamasal panayawiya kaiweliya. Yaa tau toto i neem labulabumwa, iya gamagalau gegewela i bwata lakela. 32 Iya bugul bolo i kitel ge i hagoem labulabumwa wasana i wasaan, yaa wana baaba nige gamagal etega i aabulilek-an. 33 Yaa henala ebo wana baaba ni abulilek-an, he iya iyaka i patunahot te Yehoba iya tobaaba tunahot. 34 Toto Yehoba i patuna iya Yehoba anana i baubaunan, kaiwena Yehoba Yayaluwana i pek elana i kalaopopwi. 35 Tamana Natuna i nunuwana-an ge bugul gegewena i teli nimanaa. 36 Henala ebo Yehoba Natuna ni abulilek-an, he iya yawalina hot iyaka i pwawa, yaa henala ebo Yehoba Natuna ni towani, yawal o nige ni pwapwawa, yaa Yehoba wana huga i minaa elana."

4

1 Palisi wasa hi hago te Yeisu iyaka gamagalau hi gewi i ahel i patohago-agil ge i pababitaisol, inoke wana tohago iyaka Diyon wana tohago hi gewi lakel. 2 He Yeisu nige totona gamagal etega i papababitaiso, wana tohago ya te hi giginol. 3 Sauga Yeisu i atena te iya wasana Palisi iyaka hi hago, yaka labi Yudiya i eguluwan ge i sikal al i na labi Galili. 4 Kamwasa toto Yeisu i noek, labena Sameliya elana te i nosolaa, 5 inoke i na i vin Sameliya awanina etega alana Saika. Awan o nige ana bwaga i yayapu bilibili toto Yakobo i pek natuna Yosepa elana. 6 Wewel kenken etega iyoho to valila Yakobo i ken. Nawanawa kaiwena Yeisu tuwana i aliga, inoke i misiyowa wewel kenken awana bebenaa. Sauga o iyaka i ola alalati bwagatau. 7 Sauga o Yeisu wana tohago iyaka hi na panuwaa aanan nihi pwapwamola, inoke abwe Sameliya yovana etega i nok wewel wagi kaiwena. Yaka Yeisu i baek yova elana i ba, "Tab bosowaina wewel nu wage nu pem na im?" 9 Sameliya yovana i baek Yeisu elana i ba, "Owa Yudiya gamagalina ge nau Sameliya yovana. He ga i ola ge u baem elau tage wewel na wage nu im?" Yova baaba o i baunan, kaiwena Yudiya nige avaliyau Sameliya hi heliheliyam. 10 Yeisu yova anana i lahe i ba, "Binimala nu atena hauna toto Yehoba i guyauan, ge binimala nu atena henala nau ge wewel ya awanun elam, inoke nu awanun elau ge wewel yawalina gaganina na pewa." 11 Yaka yova i ba, "Tonowak, wewel kenken ya i milau, he nige wam ewagiwagi i gagan ge tage wewel nu wage. Wewel yawalina gaganina ga nu aheya? 12 Age owa tubuma Yakobo u bwata lake? Iya wewel kenken ya i pem elama, ge iya alonau natunau, avaliyau wali sipi ge wali bulumakau, valila wewel kenken ya hi imwimwa." 13 Yeisu yova anana i lahe i ba, "Gamagalau gegewel bolo wewel ya hi im, abwe nihi walem al, 14 yaa henala ebo wewel ni im toto nau na pek elana, he nige ni wawalem al. Wewel toto na pek elana ni tabwa wewel i bwanabwana pitpit ge yawal mihomihotina ni pek." 15 Yova i ba, "Tonowak, wewel toto o u pem na im, inoke bahi na wawalem al ge bahi na nenem wewel kenken ya elana wewel na wawagi al." 16 Yeisu i ba, "U na ga lagom u yogaan ge alom nuku nem." 17 Yova i ba, "Nige lagou i gagan." Yaka Yeisu yova anana i lahe i ba, "He tunahot te u ba, `Nige lagou i gagan.' 18 Valila u alolon panimala panuna, ge tau toto sauga ya alom ku mina nige lagom i oola. He ewasi u ba tunahot." 19 Yova i ba, "Tonowak, he iyaka ya atenawa age owa palopita etega. 20 Ama Sameliya tubumeyau oya ya elana te hi kukululu Yabowaine elana, yaa komiu Yudiya ku ba tage abatapwalolo iyai ya te Yelusalema." 21 Inoke Yeisu i ba, "Yova, no baaba ya nu abulilek-an. Sauga i nenem gamagalau nihi kululu Tamaliya elana, yaa nige oya ya elana i oola o ebo Yelusalema elana. 22 Komiu Sameliya ku kululuek toto nige ku aatena elana; yaa ama Yudiya ha kululuek Yabowaine toto ha atena elana, kaiwena pwamwal ana aatena iyaka Yehoba i pamasala ama Yudiya eliyama. 23 Yaa sauga i nenem ge iyaka i vin, inoke Yayaluwa Bwabwalena wana gasisi elana gamagalau nihi tapwalolo tunahot Tamaliya elana alona ge wali ginol tutunahotina. He totapwalolo ololal o heliya Tamala i loyaagil. 24 Yehoba iya yayaluwa, inoke bolo hi kululu elana Yayaluwa Bwabwalena wana gasisi elana te nihi tapwalolo, alona ge wali ginol tutunahotina." 25 Yova i ba, "Ya atena te Mesaiya iyoho i nenem, ge sauga ebo ni nem, inoke abwe bugul gegewena ni pwamwananal eliyama." (He "Mesaiya" pana Gilik elana ana pasikal hi ba "Keliso," ana sapu heiya "Yehoba wana hilihili gamagalina.") 26 Yeisu anana i lahe i ba, "He nau te ya baaba elam e." 27 Sauga o wana tohago hi sikal elana, ge ateliya i you kaiwena hi kite Yeisu i baaba yova etega elana. Yaa nige etega tage ni nel yova elana ni ba, "Hauna nuwam?" o ebo ni nel Yeisu elana ni ba, "Ga i ola ge u baaba yova elana?" 28 Yaka yova wana ulubwal i eguluwai ge etimwawa i sikal i na panuwaa. Inoke i baek gamagalau elal i ba, 29 "Ku nem ga gamagal etega ku kite, iya pagan gegewena bolo ya ginolil i baunan elau. Bi ola ge iya Mesaiya?" 30 Yaka gamagalau hi gewi panuwa hi eguluwai ge hi nowanik nihi na Yeisu elana. 31 Sauga yova i egon enaa, inoke tohago hi baek Yeisu elana hi ba, "Topankite, aanan ga etega u an." 32 Yaa analiya i lahe i ba, "Au i gan, toto komiu nige ku aatena." 33 Yaka tohago hi pebaaba-agil hi ba, "Age gamagal etega aanan i pwatanim elana?" 34 Inoke Yeisu i ba, "Au heiya te toto i patunau wana nuwatu na ginol ge wana tuwalali na pwamowasi. 35 Komiu wami baaba etega ku ba ola hiwe: 'Waikena esopali iyoho i mina yaka abwe lovetomwa ge pahi ana sauga.' Yaa na baewa eliyamiu, matamiu ni nok eyowa ku kite! Enona iyaka i matuwa ge bosowaina pahi. 36 Sauga e topahi molana i ahiahi, eyowa enona i pahipahi yawal mihomihotina kaiwena. Inoke togalauma ge topahi nihi yaliyaya pamaisena. 37 Baaba toto i ba, 'Etega i galauma, ge etega al i pahi,' he iyaka i tunahot i ola hiwe. 38 Sauga ya na patunamiu nuku nok nuku na eyowa toto valila nige ku tutuwalali-an enona nuku pahi. Gamagalau getogal eyowa hi tuwalali-an, ge komiu wali tuwalali enona ku pwawa." 39 Sameliya awanina o elana gamagalau hi gewi Yeisu hi abulilek-an yova wana wasa kaiwena, toto i ba, "No pagan gegewena bolo ya ginolil i baunan elau." 40 Inoke sauga hi na Yeisu elana, yaka hi awanun elana avaliya ga nihi minamina, inoke lan labui Yeisu i minaa ga awan o elana, 41 ge gamagalau hi gewi al hi abulilek Yeisu wana panpankiti kaiwena. 42 Yaka gamagalau hi baek yova elana hi ba, "Nige tage wam baaba ya kaiwena ge ha abulilek, he iyaka totoma wana baaba ha hago ge ha atena tunahot tau ya iya panayawi ana Topwamwal." 43 Lan labui o i mowasi, yaka Yeisu labi Sameliya i eguluwai ge i nok i na labi Galili. 44 (He Yeisu iyaka i ba haba wana tohago elal i ba, "Palopita etega totona wana panuwa gamagaliliyau nige hi aawatauwan.") 45 Sauga i na i vin Galili, yaka Galili gamagaliliyau Yeisu wana vin hi yaliyaya-an, kaiwena valila hi na Yelusalema Nopalegi Hagalena kaiwena ge wana ginol gegewena hi kite bolo i ginolil sauga o elana. 46 Yeisu i nok al i na Kena, Galili awanina, awan o elana valila wewel i pil ge i tabwa oine. Sauga o elana gamaman ana totuwalali bwabwatana etega natuna melutauina i kasiyebwa Kapeniyama elana. 47 Sauga tau o Yeisu wasana i hago te iyaka i sikalem Yudiya ge i vin Galili, inoke i nok i na elana, ge i awanun ni nok ni na natuna ni pwamolu, kaiwena wawaya o ana kasiyebwa iyaka i pulowan. 48 Yeisu i baek elana i ba, "Ebo nige ginol yawiyawi ge abanuwa ahi nuku kikite, he nige nuku aabulilek." 49 Yaka gamaman ana totuwalali i ba, "Tonowak, u nem ga ta na natu u kite abwe mulaa ni aliga." 50 Yeisu i baek elana i ba, "U sikal, natum nige ni aaliga." Tau o Yeisu wana baaba i abulilek-an inoke i egon. 51 Iya iyoho ya i nawanawa kamwasaa, yaka wana totuwalali i pwawal ge wana wasa hi pek hi ba, "Geman iyaka i molu." 52 Inoke i nelil hauna kilok matana elana ge natuna tuwana i heluwan, yaka hi ba, "Nolu kokoyavi wan kilok te tuwana i heluwan ge i tultul." 53 Inoke wawaya tamana i nuwatu nolu kilok matana toto o elana te Yeisu i baek elana i ba, "Natum nige ni aaliga." Yaka tau o alonau ge wana limi ana heniheni gegewel hi abulilek. 54 He ginol yawiyawi labuina to Yeisu i ginol sauga i sikalem Yudiya ge i na Galili.

5

1 Sauga etega al, Yeisu i nok i na Yelusalema Yudiya wali tapwalolo hagalena etega kaiwena. 2 Yelusalema ana abaulutuk etegana alana hi ba "Sipi ali Nog". Wewel opop etega iyoho abaulutuk o labenaa, alana pana Hibilu hi ba Betesada. Gonu abaminamina ali gewi nimala panuna hi talil painan. 3 Gonu o tokasiyebwa hi gewi wali abamina, bolo tomatakai, bolo aeliya i kom, ge bolo nige bosowailiya tuwaliya nihi palamwalamwaniu. 5 Tau etega iyoho to i kasiyebwa baliman ana gewi teti eit. 6 Yeisu tau o i kite i kenukenu, ge i atena sauga yayapona hot i kasiyebwa, yaka i neli i ba, "Tab nuwam nu molu?" 7 Tokasiyebwa Yeisu anana i lahe i ba, "Tonowak, sauga wewel i nemunemu, nige o tolabe etega i gagan ge tage ni labeyau ge na gailau wewela. Sauga ebo ya lalabose tage na na na gailau wewela, he gamagal etega iyaka i gailau houwa." 8 Yaka Yeisu i baek tau elana i ba, "U lut, wam abakenu u ahe, ge u nawanawa." 9 Inoke sauga o i molu, i lut, wana abakenu i ahe, ge i nawanawa. He lan Sabwata te bugul ya i gan. 10 Inoke Yudiya wali tohouwa hi baek tau toto Yeisu i pwapwamolu elana hi ba, "Lan Sabwata te lan e. Logugui i lopwali te lan Sabwata elana wam abakenu nu kalivai ge nu nawanawa." 11 Yaka analiya i lahe i ba, "Tau toto i pwamolowau i ba, 'Wam abakenu u ahe ge u nawanawa.' " 12 Yaka Yudiya hi nel hi ba, "Hauna tau i baewa elam ge wam abakenu u ahe ge u nawanawa?" 13 Tau toto abwe i molu nige i aatena henala ge i baek elana, kaiwena boda i bwata wewel labenaa ge Yeisu iyaka i lelisola gamwaliyaa. 14 Yeisu abwe tau o i pwawaa Limi Tapwalolowa, ge i baek elana i ba, "U kite, iyaka u molu al. Wam gegi paganina nu paveyaho, eba abwe bugul nanakina hot etega ni gan al elam." 15 Yaka tau i egon i na Yudiya wali tohouwa wali wasa i pek i ba, Age Yeisu te i pwamolowau. 16 Yudiya Yeisu hi pihigelgel-an ge hi papalomwan-an, kaiwena Yeisu gamagalau i pwamolol Sabwata elana. 17 Yaka Yeisu i baek elal i ba, "Nam iyoho sauga gegewena i tuwatuwalali, ge nau al ya tuwatuwalali." 18 Inoke Yudiya hi logasisi nabi nuwaliya Yeisu nihi lopaaliga. Nige tage Sabwata ana logugui ya te i leke, yaa Yehoba i awa tamani, he i ola te i ba iya alona Yehoba hi olaolaek. 19 Yaka Yeisu i baek Yudiya elal i ba, "Ya ba tunahot eliyamiu, Yehoba Natuna nige bosowaina bugul etega totona ni ginol, yaa ginol toto i kiteya Tamana elana ya te bosowaina ni ginol. Ginol toto Tamana i giginol, he Natuna al i giginol. 20 Tamana Natuna i nunuwana-an, ge ginol toto iya i giginol, gegewena i mimi panpankiti Natuna elana. Ginol toto sauga ya nige i bwabwata, yaa Tamana ginol bwabwatal hot ni pankite inoke ni awaawaginol, ge komiu nuwamiu nuku ahe. 21 Kaiwena Tamana toyaomal i palutil ge yawaliliya i pek, inoke i ola al te Natuna yawal ni pek gamagalau bolo i hihilel elal. 22 Etega al, Tamana nige gamagal etega i papakot, yaa yatala ana logugui gegewena i pek Natuna elana, 23 nuwana gamagalau gegewel Natuna nihi awatauwan ni ola Tamana hi awatauwan. Henala ebo Natuna nige i aawatauwan, he Tamana, iya i patuna, nige i aawatauwan." 24 Yeisu i ba al, "Ya ba tunahot eliyamiu, henala ebo no baaba ni hago ge toto i patunau ni abulilek-an, iya iyaka yawal hot i pwawa ge nige ni lalahi, he iyaka yaomal i tataluwan ge i na yawal hot elana. 25 Ya ba tunahot eliyamiu, sauga iyoho i nenem--he iyaka i vin--inoke toyaomal Yehoba Natuna anana nihi hago, ge bolo ebo anana nihi hago, yawal hot nihi ahe. 26 Tamana iya yawal puna, inoke i ola al i talam Natuna iya yawal puna. 27 Iya Gamagal Natuna, inoke Tamana i teli iya gamagalau gegewel ali toyatala. 28 "Bahi atemiu ni yoyou baaba ya kaiwena: sauga iyoho i nenem ge toyaomal bolo salaiya anana abwe nihi hago, 29 inoke nihi lutem ali salaiya. Bolo ginol waiwaisana hi ginol nihi lut yawal hot elana, ge bolo ginol nanakina hi ginol nihi lut lahi nihi pwawa. 30 Nige bosowaina bugul etega na ginol totou no nuwatu elana, yaa ya papayatala i ola ya te Nam i baem elau. No papakot i sapu ge i olaolaek, kaiwena nige ya lologasisi tage totou no nuwatu na ginol, yaa toto i patunau wana nuwatu na ginol." 31 Yeisu i ba al, "Ebo totou wasau na wasaan, nasi nige ana abulilek ni gagan. 32 Yaa etega al iyoho wasau i wasawasa-an, ge ya atena baaba bolo i baunan kaiweu i tunahot. 33 Valila gamagalau enuna ku patunal hi na Diyon Tobabitaiso elana, ge Diyon wasa tutunahotina i wasaan elal. 34 Nau nige ya nunuwatu tage gamagal etega ni wasa inoke no wasa ni labe ge ni patunahot, yaa Diyon wana wasa ya gopamasal kaiwena nuwau nuku abulilek ge mwal nuku pwawa. 35 Diyon iya i ola odam i tau ge i yana, inoke sauga kekeisi ya nuwamiu i noek mwananalina elana ge ku yaliyaya-an. 36 "Yaa no ginol ona hi wasaagau, ge wasa o Diyon wana wasa i bwata lake. Tuwalali bolo ya ginolil Nam i pem elau inoke ya awaawaginol, ge hi pamasalau te Nam i patunau. 37 Ge Nam toto i patunau, iya totona wasau i baubaunan. Yaa anana nige sauga etega ku hahago, ge maninina nige ku kikite. 38 Komiu wana baaba nige ku aahe ge ku aabulilek-an, kaiwena toto i patuna nige ku aabulilek elana. 39 Komiu Buki Bwabwalena ku vavasili ge ku nuwanuwatu-an, kaiwena ku nuwatu te ana baaba elana yawal hot nuku pwawa. He Buki Bwabwalena ana baaba bolo ya hi baaba nau kaiweu, 40 yaa komiu ku towaagau, nige ku nenem elau ge yawal hot ku aahe." 41 "Nige ya nuwanuwatu gamagalau wali tobal kaiwena. 42 Yaa ya atenamiu; ya atena Yehoba ana nunuwana nige i gagan atemiwa. 43 Nam alana elana ya nem, yaka komiu ku towaagau, yaa ebo gamagal etega totona alana elana ni nem, he ku yaliyaya-an. 44 Nuwamiu te alomiyau nihi tobalagimiu, yaa nige ku lologasisi Yabowaine toto maisena hot ni tobalagimiu. He abwe ga nuku abulilek ola? 45 Bahi nuku nunuwatu tage nau na wolemiu Nam elana. Mosese heiya te abwe ni wolemiu, yaa komiu ku nuwatu tage iya ami tolabe. 46 Binimala Mosese wana baaba nuku abulilek-an, inoke nau al nuku abulilek-agau, kaiwena wasau i lelelian. 47 Yaa kaiwena wana leleli nige ku aabulilek-an, he no baaba abwe ga nuku abulilek-an ola?"

6

1 Yaka abwe sauga etega Yeisu Hoga Galili (o ebo ta ba Hoga Taibeliyas) i alupanet-an i na labena etega. 2 Inoke boda bwabwatana hi nodatu Yeisu hi noulil, kaiwena wana ginol yawiyawi toto tokasiyebwa hi gewi i pwamolol hi kite. 3 Yeisu i na i ha oyaa ge alonau wana tohago hi misiyo. 4 Sauga o, Yudiya wali Nopalegi Hagalena iyaka i kelaubwa. 5 Yeisu matana i nok boda bwabwatana i kitel hi nenem elana, yaka i baek Pilipi elana i ba, "Nasi aanan ga ta pwamolaa ge gamagalau ya nihi an?" 6 Yeisu i ba ola o, nuwana Pilipi ni labose, kaiwena iya iyaka i atena te hauna nasi i giginol. 7 Pilipi Yeisu anana i lahe i ba, "Binimala ebo mani silba ali gewi tu handeled ta ahe ge beleid ta pwamolaya, he bwagana ta gotomwatomwa-an pakekeisi ge ta guyauan, yaa nasi nige bosowaina gegewel nihi pwawa." 8 Yeisu wana tohago etega alana Andulu, iya Saimon Pita talina, i ba masal i ba, 9 "Geman etega hiwe, ana beleid toto bali hi ginoliya, ali gewi nimala panuna, ge ana moti kekeisi eluwa. Yaa gamagalau gegewel ya nasi nige bosowailiya!" 10 Yaka Yeisu i ba wana tohago elal i ba, "Ku ba gamagalau nihi misiyoan." He labena o elana mwawin i siun bubun, inoke gamagalau gegewel hi misiyoan mwawin pwatanaa, gamwaliyaa bolau ali gewi tabam paib tausan. 11 Inoke Yeisu beleid i ahel i ba mulolu Yehoba elana, yaka abwe i pek wana tohago elal ge hi guyauan gamagalau bolo hi misiyoan elal. Moti i ahel ge i ginol al i ola to. Inoke gamagalau hi anan ana siga ali luvi i pwawa. 12 Sauga hi anan ge gegewel tineliya i kiya, yaka Yeisu i baek wana tohago elal i ba, "An teli gegewena ku bugul papahe, bahi etega ni nanak bwagabwaga." 13 Inoke an teli hi bugul papahe ge ana egowa elulutega eluwa hi usan pakalaopopwil, an teli o i neem beleid toto bali hi ahe hi ginoliya ali gewi nimala panuna elal. 14 Inoke gamagalau bolo Yeisu wana ginol yawiyawi ya hi kite hi ba, "Tunahot iya palopita toto abwe i nenem panayawi." 15 Yeisu iyaka i atena te gamagalau nuwaliya nihi nok elana ge nihi palawakik ni tabwa wali kin, yaka maisena ya i egon i na i ha al oyaa. 16 Sauga i kokoyavi, Yeisu wana tohago hi na hi lau hoga Galili, 17 hi gaiha wagaa, ge hi kuki nihi alupanet Kapeniyama. Sauga bulin i gan, Yeisu nige ga i sisikal elal. 18 Mana gasigasisena i towa ge hoga i bagol. 19 Yaka hi levaleva ee ali bwaga ana yapu i ola paib o ebo sikis kilomita, abwe Yeisu hi kite i nawaa hoga pwatanaa i nenem wagaa, inoke hi lovakun. 20 Yaa Yeisu i baek elal i ba, "Bahi lovakun, nau te." 21 Inoke alona wali yaliyaya Yeisu hi ahe i gaiha wagaa, yaka etimwawa waga i tuk labi toto nuwaliya nihi noek elana. 22 Lan i gan al, inoke boda bolo hi eguluwagil hi minaa Hoga Galili labena etega, hi atena nolu waga maisena ya te i gan. Hi atena Yeisu nige alonau ge wana tohago hi gagaiha waga o elana, yaa tohago heliya ya hi kuki ge hi egon. 23 He waga enuna hi neem awan Taibeliyas hi tuk hi tana labi o gegelinaa, labi toto elana ge Babala beleid i ahe, i ba mulolu Yehoba elana, ge i pek boda hi an. 24 Sauga boda hi kite Yeisu nige i gagan to labi o elana, ge wana tohago al nige hi gagan, inoke hi gaiha waga elal ge hi lelipanet hi na Kapeniyama Yeisu ana loya kaiwena. 25 Sauga boda bolo o Hoga Galili hi alupanet-an hi na Kapeniyama, inoke Yeisu hi pwawaa to. Yaka hi baek elana hi ba, "Topankite, hauna sauga u nem labi ya elana?" 26 Analiya Yeisu i lahe i ba, "Ya ba tunahot eliyamiu, nige tage ginol yawiyawi bolo ya ginolil ku kite ge kaiwena ku loyaagau, yaa beleid ya pewa ku an ge tinemiu i kiya kaiwena te ku loyaagau. 27 Bahi nuku lologasisi aanan toto abwe ni nak kaiwena. Yaa nuku logasisi aanan toto i mimihot ge ana abapwamowasi yawal mihomihotina, aanan o Gamagal Natuna ni pewa eliyamiu. He Tamana Yehoba iyaka i pamasal te iya i awa wawaisi-an." 28 Yaka boda hi baek Yeisu elana hi ba, "Ga naha ginol ola ge tuwalali bolo Yehoba nuwana naha ginolil?" 29 Analiya i lahe i ba, "Tuwalali toto Yehoba nuwana i ola hiwe: toto iya i patuna nuku abulilek-an." 30 Yaka gamagalau hi baek Yeisu elana hi ba, "Ginol yawiyawi etega u ginol, inoke naha kite ge naha abulilek-agiwa. Tubumeyau valila aanan toto manna hi an uleya, i ola Buki Bwabwalena ana baaba i ba: `Aanan i loem labulabumwa i pek hi an.' He hauna gun owa nasi nu ginol?" 32 Yaka Yeisu i baek elal i ba, "Ya ba tunahot eliyamiu, nige tage Mosese aanan i loem labulabumwa iyaka i pewa, yaa Nam aanan i loem labulabumwa tutunahotina sauga ya i pewa eliyamiu. 33 He aanan toto Yehoba i pewa i loem labulabumwa ge yawal hot i pek gamagalau panayawi elal." 34 Yaka hi ba, "Tonowak, aanan ya sauga gegewena nu pem naha anan." 35 Yeisu i baek elal i ba, "He nau aanan toto yawalimiu ni pewa. Toto ebo ni nem elau nige ni gagalebu, ge toto ebo ni abulilek-agau nige sauga etega ni wawalem al. 36 Yaa i ola te ya ba haba eliyamiu: iyaka ku kiteyau, yaa nige ku aabulilek-agau. 37 Gamagalau bolo Nam ni pem eliyau, gegewel nihi nem elau, ge sauga nihi nem, nige etegana na papatuna owaowani. 38 Kaiwena nau ya loem labulabumwa ge toto i patunau wana nuwatu na ginol, nige nau totou no nuwatu i oola. 39 Toto i patunau wana nuwatu te bolo gegewel i pem elau bahi etega na papayaomal, yaa lan mowamowasena elana na palutil yaomal elana. 40 Kaiwena Nam wana nuwatu te gamagalau gegewel bolo mataliya i nok Natuna hi kite ge hi abulilek-an, yawaliliya mihomihotina nihi ahe ge lan mowamowasena elana na palutil yaomal elana." 41 Yudiya Yeisu anana hi hago i ba, inoke baaba ya kaiwena heliya ya hi loba kaiwena. "Nau aanan toto i loem labulabumwa," 42 Hi ba, "Tau ya iya Yeisu, Yosepa natuna. Tamana ge hinana ta atenal ya." "He ga i ola ge i ba, 'Nau ya loem labulabumwa'?" 43 Yeisu i baek elal i ba, "Ku bakuhu, bahi loloba gamwamiwa. 44 Nige etega bosowaina ni nem elau ebo Nam toto i patunau nige ni nunul pwatanim elau, inoke lan mowamowasena elana na palutem yaomala. 45 Palopitau hi leleli hi ba, 'Gegewel Yehoba ni pankitel.' Inoke bolo Nam wana baaba hi hago ge wali aatena hi aheya elana, he gegewel nihi nem elau. 46 Yaa nige tage gamagal etega Nam i kite, yaa toto i neem Yehoba elana, he iya ya te i kite. 47 Ya ba tunahot eliyamiu, toto ebo ni abulilek-agau, he iya yawalina hot iyaka i ahe. 48 He nau aanan toto yawalimiu ni pewa. 49 Tubumiyau aanan toto manna hi an uleya, yaa iyaka hi aliga. 50 Yaa aanan toto i loem labulabumwa, gamagal toto ebo ni an nige ni aaliga. 51 He nau te aanan yawalina gaganina toto i loem labulabumwa. Ebo gamagal etega aanan ya ni an, inoke yawalina ni mihot sauga gegewena. Aanan ya iya tuwau, toto na talamwan ge gamagalau gegewel panayawiya yawaliliya hot nihi ahe." 52 Yudiya baaba o hi hago, inoke heliya ya gamwaliyaa hi awabalgig nabi hi ba, "Tau ya, ga ni ola ge tuwana ni pem ta an?" 53 Yeisu i baek elal i ba, "Ya ba tunahot eliyamiu, ebo Gamagal Natuna tuwana nige nuku aan ge saliyana nige nuku iim, nige yawalimiu ni gagan. 54 Toto ebo tuwau ni an ge saliyau ni im, iya yawalina mihomihotina i gan, inoke lan mowamowasena elana na palutem yaomala. 55 Kaiwena tuwau iya aanan hot ge saliyau iya wewel hot. 56 Henala ebo tuwau ni an ge saliyau ni im, iya i minaa elau ge nau ya minaa elana. 57 Nam yawalina gaganina i patunau ge iya kaiwena yawaliu i gan. Inoke i ola al to, henala ebo tuwau ni an, he nau kaiweu yawalina ni gan. 58 He toto o iya te aanan toto i loem labulabumwa. Tubumiyau aanan toto manna hi an, yaa abwe hi aliga. Yaa henala ebo aanan ya ni an, yawalina ni mihot sauga gegewena." 59 Yeisu baaba ya i baunana awan Kapeniyama elana, sauga i panpankiti limi tapwalolo gamwanaa. 60 Sauga tohago Yeisu wana baaba o hi hago, yaka hi gewi hi ba, "Panpankiti ya i gasisi hot. Henala nasi ni atena?" 61 Yeisu i atena te wana tohago hi hawohawol wana baaba o kaiwena, yaka i baek elal i ba, "Bi ola ge no baaba ya i panuwanuwatu-agimiu ge amnamiu i apanak? 62 Yaa ga i ola ebo binimala nuku kite Gamagal Natuna ni na ni ha wana abamina elana toto valila i miminaa? 63 Yehoba Yayaluwana iya te bosowaina yawal ni pek gamagalau elal, gamagalau totoliya nige bosowailiya. He baaba bolo ya baunanagil eliyamiu iya Yehoba Yayaluwana ge yawal ni pewa. 64 Yaa komiu enuna nige ku aabulilek." (He Yeisu iyaka i atena te bolo nige nihi aabulilek-an ge toto abwe ni wasaan Yudiya elal.) 65 Yeisu i ba vevehe al i ba, "Bolo nige ku aabulilek kaiwemiu te ya ba, 'Nige etega bosowaina ni nem elau ebo Nam nige aatena ni pepek elana ge ni nem.' " 66 Sauga o elana, Yeisu wana tohago hi gewi hi sikal ge nige al hi totoulil. 67 Yaka i nel bolo ali toto elulutega eluwa elal i ba, "Yaa komiu, nuwamiu al nuku egon?" 68 Saimon Pita Yeisu anana i lahe i ba, "Babala, henala abwe elana naha noek? Owa heiya te wam baaba yawal mihomihotina ni pem. 69 He iyaka ha atena ge ha abulilek age owa Yehoba wana Gamagal Bwabwalena." 70 Yeisu i baek elal i ba, "He nau ami toto elulutega eluwa ya hilemiu, age? Yaa alomiu etega iya Seitani awana toabina." 71 Yeisu i baaba Yudasa toto Saimon Isikaliyota natuna bana. He bwagana iya bolo elulutega eluwa avaliya etega, yaa abwe Yeisu ni wasaan.

7

1 Sauga o enaa, yaka abwe Yeisu i nawanawa labi Galili gamwanaa. Nige nuwana ni na ni nawanawa labi Yudiya gamwanaa, kaiwena Yudiya wali tohouwa nuwaliya nihi lopaaliga. 2 He Yudiya wali hagali bwabwatana etegana alana Epanapana Hagalena ana sauga i kelaubwa, 3 inoke Yeisu talinau hi baek elana hi ba, Labi ya nu eguluwan nu na Yudiya, inoke wam tohago wam ginol yawiyawi ona nihi kite. 4 Ebo gamagal etega nuwana wasana ni bwata ge boda nihi atena, he wana ginol ona nige ni giginol susumian. Ginol yawiyawi ona u awaawaginol, he nu ginola mwananala inoke gamagalau gegewel panayawiya nihi kite. 5 Bwagana iya talinau, he nige hi aabulilek eliyana. 6 Yaka Yeisu i baek talinau elal i ba, "No sauga hot nigeya ga i pwapwawa, yaa komiu wami sauga ya te sauga gegewena. 7 Nige bosowaina gamagalau panayawi nihi pihigelgel-agimiu, yaa nau hi pihigelgel-agau, kaiwena ya baek elal ya ba, 'Wami pagan i nak.' 8 Komiu ku nok ku na Yelusalema hagaliya. Nau nigeya ga na nonok, kaiwena no sauga nigeya ga i vivin." 9 Yeisu baaba o i baunan talinau elal, yaka nige i nonok, i minaa ya Galili. 10 Yeisu talinau hi egon hi na hagaliya, eliyaa yaka abwe iya i nok al, yaa nige i nonomasamasal, i nonosusumi ya. 11 Hagali gamwanaa Yudiya wali tohouwa Yeisu hi loyaan ge hi nel hi ba, "Iya ga?" 12 Boda gamwanaa gamagalau hi loliwaliwan nabi Yeisu kaiwena. Enuna hi ba, "Iya tau waiwaisana," yaka enuna al hi ba, "Nigeya, iya gamagalau i nul pagegel." 13 Yaa nige etega i babaa tagil boda bwabwatana gamwanaa, kaiwena Yudiya hi lovakun wali tohouwa elal. 14 Hagali iyaka i lilinuwane, yaka Yeisu i na i tuk Limi Bwabwalena ana bakubakuwa ge i panpankiti. 15 Yudiya nuwaliya hi ahe wana panpankiti kaiwena, ge hi ba, "Tau ya nige i vavasili, yaa ga i ola ge wana aatena i bwata?" 16 Yeisu analiya i lahe i ba, "No panpankiti ya, nige totou no nuwatu elana i oola, yaa i neem toto i patunau elana. 17 Ebo gamagal etega nuwana ni ginol ni ola Yehoba wana nuwatu, inoke abwe ni atena te no panpankiti i neem Yehoba elana, o ebo totou no nuwatu elana. 18 Gamagal toto ebo i baaba totona wana nuwatu elana, he nuwana totona ana tobal ni ginol ge wasana ni gan. Yaa toto i tuwalali toto i patuna ana tobal kaiwena, iya tobaaba tunahot ge nige kakawi i gagana elana. 19 Mosese Logugui i pewa eliyamiu, age? Yaa komiu nige etega Logugui o i hehenapu-an. He ga i ola ge nuwamiu nuku lopaaligau?" 20 Gamagalau Yeisu anana hi lahe hi ba, "Tabam yayaluwa bibikena i ulutuk elam te u baaba ei! Henala ge nuwana ni lopaaligawa?" 21 Yeisu analiya i lahe i ba, "Ginol yawiyawi etega ya ginol, yaka gegewemiu nuwamiu ku ahe ge ku nuwanuwatu-an. 22 Yaa ku nuwatu ga! Mosese gotomwa yoho paganina ana logugui i pewa eliyamiu, inoke komiu gotomwa yoho paganina ku giginola Sabwata elana. (He nige tage Mosese i telipuna-an, yaa i neem tubumiyau houhouwel hot elal.) 23 He bosowaina wawaya melutauina gotomwa yoho paganina ni ahe Sabwataa ebo ana lan i pwawaa, ge Mosese wana logugui o bahi nuku leleke. Inoke hauna kaiwena gamagal ya pwamolu hoti Sabwataa ge ku hugaagau? 24 Bahi al nuku hilihiliek bugul ali awa elana, yaa sapu elana te nuku hilihiliya." 25 Yaka gamagalau Yelusalema enuna hi ba, "Tau toto tage tohouwa hi lolopaaliga heiya e?" 26 "Ku kite! I baaba boda gamwanaa ge tohouwa nige hi babaa lahiek eliyana. Bi ola ge hi atena tau ya iya Mesaiya?" 27 "Yaa sauga ebo Mesaiya ni nem, nige gamagal etega wana abanem ni aatena. He kila tau toto ya wana abanem ta atena ya." 28 Yeisu iyoho ya i panpankiti boda elal Limi Bwabwalena gamwanaa, i baaba anana i bwaya i ba, "He tage ku atenau ge no abanem al ku atena? Nau nige totou ya nenem. Nam i patunau te ya nem ge iya wana pagan i sapu. Iya nige ku aatena, 29 yaa nau ya atena, kaiwena iya i patunau ge ya neem elana." 30 Yeisu i ba ola o, inoke Yudiya nuwaliya nihi lib ge nihi yowan. Yaa nige bosowaina gamagal etega nimana ni teli tuwanaa, kaiwena wana sauga nigeya ga i vivin. 31 Yaa boda gamwanaa gamagalau hi gewi hi abulilek Yeisu elana, yaka hi ba, "Sauga ebo Mesaiya ni nem, nasi tab tau ya wana ginol yawiyawi ni lake? He nigeya, iya te Mesaiya." 32 Palisi hi hago boda hi lololiwaliwan kekei Yeisu kaiwena i ola to. Yaka avaliyau ge topowon bwabwatal, Limi Bwabwalena ana pulisimanau hi patunal hi nok tage Yeisu nihi lib ge nihi yowan. 33 Yaka Yeisu i ba, "No minamina alowau komiu sauga kakaubwaina ya, inoke abwe na eguluwagimiu ge na sikal na na toto i patunau elana. 34 Abwe nuku loyaagau, yaa nige nuku pwapwawau, kaiwena nige bosowaina nuku noek labi toto ya nana ya miminaa." 35 Yudiya wali tohouwa ya awawal hi pebaaba-agil hi ba, "Tau ya ga i nonoek ge nasi ta loyaan nige ta pwapwawa? Age i nana Gilik awanina ona bolo Yudiya hi miminaa, inoke ni panpankiti Gilik elal?" 36 "Iya i ba, 'Abwe nuku loyaagau, yaa nige nuku pwapwawau.' Ge i ba, 'Nige bosowaina nuku noek labi toto ya nana ya miminaa.' He wana baaba o ana sapu ga i ola?" 37 Hagali ana lan mowamowasena, iya lan bwabwatana hot, Yeisu i lut ge i baaba anana i bwata i ba, "Toto ebo ni walem, ni nem elau ge ni im. 38 He toto ebo ni abulilek-agau, inoke wewel yawalina gaganina ni sani tagilem atenaa, i ola Buki Bwabwalena ana baaba." 39 Yeisu i baaba Yayaluwa Bwabwalena bana, iya gamagalau bolo hi abulilek Yeisu elana abwe nihi ahe. Sauga o elana Yayaluwa Bwabwalena nigeya ga hi aahe, kaiwena nigeya ga Yehoba Yeisu i papalutem yaomala ge i papawasawasa. 40 Boda bwabwatana gamwanaa, gamagalau enuna Yeisu wana baaba o hi hago, yaka hi ba, "Tunahot tau ya iya palopita toto Yehoba i bateli abwe ni nem." 41 Enuna al hi ba, "Iya Mesaiya." Yaa enuna hi ba, "Mesaiya nige ni neneem Galili! 42 Buki Bwabwalena i ba Mesaiya abwe ni neem Deibid tubutubunina elana, ge nihi aba Bedeliyema awan toto valila Deibid i miminaa." 43 Inoke Yeisu kaiwena gamagalau boda hi paeluwa, tomaha wali nuwatu. 44 Enuna nuwaliya nihi lib ge nihi yowan, yaa nige gamagal etega nimana i teteli Yeisu tuwanaa. 45 Inoke pulisimanau bolo Limi Bwabwalena ana tomatahikan hi sikal hi na topowon bwabwatal avaliyau Palisi elal, yaka abwe heliya hi ba, "Hauna kaiwena nige ku aahe ge ku pwapwatanim?" 46 Yaka analiya hi lahe hi ba, "Nige sauga etega gamagal etega wana baaba i oola tau ya wana baaba!" 47 Yaka Palisi hi baek pulisimanau elal hi ba, "Bi ola ge komiu al nuwamiu i liwan ahe? 48 Ama Palisi alomeyau ge tologugui, tab etega ha abulilek elana? 49 Nigeya hot! He boda ya te hi abulilek elana, heliya Mosese wana Logugui nige hi aatena, heliya Yehoba iyaka i ba haba abwe ni lahel!" 50 Nikodimas, iya Palisi wali boda etega ge iya valila i nok ga i na Yeisu elana, i baek alonau elal i ba, 51 "Wala logugui i ba bahi gamagal etega ana logugui ta giginol ebo nigeya ga wana baaba ta hahago kot elana ge ta pwapwawa hauna gun i ginol panak." 52 Anana hi lahe hi ba, "He ga i ola, age owa al u neem Galili? U na ga Buki Bwabwalena u ahe u vasili bubun, inoke abwe nu atena te nige palopita etega ni neneem Galili."

8

1 Yaka gamagalau gegewel hi egonan hi na tomaha ona wali limiya, yaa Yeisu i egon i na i ha Oya Olibe. 2 Lan i gan al mweluluga kekeisi, Yeisu i sikal i na Limi Bwabwalena ana bakubakuwa, yaka boda hi nowanik hi na hi mipainan, ge iya i misiyo i panpankiti elal. 3 Logugui ana topankite avaliyau ge Palisi yova etega hi ahe hi en tukan, yova o hi pwawaa ganawal paganina elana. Inoke hi patalmilil boda mataliyaa, 4 yaka hi baek Yeisu elana hi ba, "Topankite, yova ya hi pwawa hoti alona tau etega hi gaganawal. 5 He Logugui elana Mosese i ba yova gaganawalina ololana ya naha loipati ana siga ni aliga. Yaa owa wam nuwatu ga i ola?" 6 Nel ya hi neli tage Yeisu nihi paona ge ana woliwoli nihi ginol. Yaa Yeisu i lokululu ge nimana gigina elana i leleli bilibiliya. 7 Heliya iyoho ya hi mimi nelnel elana, yaka i mat ge i ba, "Ebo komiu etega nige gegi etega i giginol, inoke iya pat ni alihouwan yova ya elana." 8 Yaka i lokululu al ge i leleli bilibiliya. 9 Wana baaba o hi hago, yaka maisena ge maisena i egoegon, i telipunaa tonowakau elal i na ana siga gegewel hi egonan haba. Yeisu maisena ya hi eguluwai alona ge yova iyoho ya i taltalmilil. 10 Yeisu i mat ge i baek yova elana i ba, "Vaini, gamagalau gegewel heliya ga? Nige etega i mimina ge ni pakotiwa?" 11 Yova Yeisu anana i lahe i ba, "Tonowak, nige etega." Yaka Yeisu i ba, "Nau al ge nige na papakotiwa. He u egon ge bahi al nu gegegi." 12 Yeisu i baek al gamagalau elal i ba, "Nau panayawi ana mwananal. Toto ebo ni toulilau nige al ni nanawaa gogouwa, iya yawal ana mwananal ni ahe." 13 Yaka Palisi hi baek elana hi ba, "Totom wasam te u wasawasa-an ei, he nige bosowaina ana abulilek-an ni gan." 14 Yeisu Palisi analiya i lahe i ba, "Bwagana ebo totou wasau na wasawasa-an, he bosowaina ya te ana abulilek-an ni gan, kaiwena ya atena te ga ya noem ge ga ya nonoek. Yaa komiu nige ku aatena te ga ya noem o ebo ga ya nonoek. 15 Komiu wami kite ge wami hilihili i ola gamagalau wali hilihili. Yaa nau nige gamagal etega ya hihile ge ana lahi ya babaunan. 16 Yaa binimala ebo gamagal etega na hile ge ana logugui na baunan, he no logugui i sapu ge i tunahot, kaiwena nige totou logugui o ya giginol, yaa Nam toto i patunau iya alou. 17 Komiu wami logugui elana hi leli lowan te ebo gamagalau eluwa wali wasa ni olaolaek, he i tunahot. 18 Nau totou wasau ya wasawasa-an, i ola al Nam toto i patunau, iya al wasau i wasawasa-an." 19 Yaka Yudiya Yeisu hi neli hi ba, "He tamwam ga?" Analiya i lahe i ba, "Nau nige ku aatenau, ge Nam al nige ku aatena. Ebo binimala nuku atenau, inoke Nam al nuku atena." 20 Yeisu baaba bolo ya i baunanagil, sauga iya iyoho i panpankiti Limi Bwabwalena gamwanaa, labi toto mulolu ana abateliteliya. Yaa nige gamagal etega Yeisu i lilib ge ni yowan, kaiwena wana sauga nigeya ga i vivin. 21 Yeisu i baek al Yudiya elal i ba, "Ya eegon, ge abwe nuku loyaagau, yaa nige nuku kikiteyau. He wami gegi elana nuku yaomal. Komiu nige bosowaimiu nuku nem labi toto ya nonoek." 22 Yaka Yudiya wali tohouwa hi ba, "Iya i ba, 'Komiu nige bosowaimiu nuku nem labi toto ya nonoek.' Baaba o ana sapu ga i ola? Age totona yawalina ni pwamowasi?" 23 Inoke Yeisu i ba vevehe al i ba, "Komiu ku neem paiya, nau ya neem natiya. Komiu panayawi toto ya gamagaliliyau, nau nige panayawi toto ya gamagalina i oola. 24 Heiya ge kaiwena ya ba, 'Wami gegi elana nuku yaomal.' He ebo nige nuku aabulilek te 'Nau heiya te nau,' inoke wami gegi elana nuku yaomal." 25 Yaka Yudiya hi neli hi ba, "Yaa henala owa?" Analiya Yeisu i lahe i ba, "He nau heiya te toto valila ya wasaan eliyamiu. 26 Bugul i gewi bosowaiu na baunan kaiwemiu ge ami lahi na ginol. Yaa nige ya babaunan, kaiwena toto i patunau iya tobaaba tunahot ge bugul bolo ya hagowa elana ya te na baunan komiu panayawi gamagaliliyau eliyamiu." 27 He Yudiya nige hi aatena te Yeisu age i baaba Tamana kaiwena. 28 Inoke Yeisu i ba, "Sauga Gamagal Natuna nuku teli heyan kolos elana, inoke abwe nuku atena te 'Nau heiya te nau,' ge nuku atena nige bugul etega totou ya giginol, yaa toto Nam i pankiteyau te ya baubaunan. 29 He toto i patunau iya alou. Iya nige i mimiluwagau, kaiwena sauga gegewena bugul bolo i yaliyaya-an te ya giginolil." 30 Gamagalau bolo Yeisu wana papaatena o hi hago, hi gewi hi abulilek-an. 31 Yaka Yeisu i baek bolo wana panpankiti hi abulilek-an elal i ba, "Ebo nuku minaa no panpankiti elana, he komiu no tohago hot. 32 Inoke baaba tunahot nuku atena ge baaba tunahot o ni sokalimiu." 33 Yaka Yeisu anana hi lahe hi ba, "Ama Abalahama tubutubunau, nige sauga etega ha tutuwalali loloyowan gamagal etega elana. Ga i ola ge u ba, 'Baaba tunahot ni sokalimiu'?" 34 Yeisu i baek elal i ba, "Ya ba tunahot eliyamiu, gamagalau gegewel bolo gegi hi awaawaginol, heliya gegi wana totuwalali loloyowanil. 35 Totuwalali loloyowanina nige i mimihot wana babala alonau ge natunau ali boda elana, yaa babala natuna i mihot boda o elana. 36 He ebo Yehoba Natuna ni sokalimiu, yaka abwe nuku tabwa gamagalau sokasokalil hot. 37 Ya atena te komiu Abalahama tubutubunau. Yaa nuwamiu hot nuku lopaaligau, kaiwena no panpankiti ku towani. 38 Bugul bolo ya kiteya Nam elana ya wasawasa-an, yaa komiu pagan bolo ku aheya tamamiu elana te ku giginol." 39 Inoke anana hi lahe hi ba, "Ama tamama te Abalahama." Yaka abwe Yeisu i ba, "Ebo binimala Abalahama natunau komiu, he wami ginol ni ola iya wana ginol. 40 Baaba tunahot bolo ya hagoem Yehoba elana heiya te ya baunan eliyamiu, yaa komiu nuwamiu hot nuku lopaaligau. Abalahama ginol ololana o nige i giginol. 41 He komiu wami ginol i ola ya te tamamiu wana ginol." Yaka anana hi lahe hi ba, "Ama nige ganawal natunau i oola. Ama tamama iyai te Yehoba maisena." 42 Inoke Yeisu i baek al elal i ba, "Ebo binimala Yehoba iya tamamiu, he nasi nuku nunuwana-agau, kaiwena nau ya miminaa elana te ya nem e. He nau nige totou ya nenem, iya i patunau. 43 Ga i ola ge no baaba nige nuwamiu i sasapuan? Kaiwena nige nuwamiu i oola no baaba nuku hago. 44 Komiu tamamiu Seitani, iya natunau komiu, ge sauga gegewena nuwamiu tamamiu wana nuwatu nuku toulil. I neem abatelipuna elana iya totaulol, ge nige sauga etega i oolak baaba tunahot elana, kaiwena nige baaba tunahot i gagana elana. Sauga ebo i kakawi, he iya wana pagan hot to, kaiwena iya tokakawi ge kakawi paganina gegewel tamaliya. 45 Yaa kaiwena nau baaba tunahot ya baubaunan, komiu nige ku aabulilek-agau. 46 Age ku nuwatu tage nau togegi? Ebo ku nuwatu ola o, he no gegi etega nuku pamasal ge nuku patunahot. Yaa ebo ya baaba tunahot, he ga i ola ge nige ku aabulilek-agau? 47 Yehoba natunau Yehoba wana baaba hi hago. Komiu nige Yehoba wana baaba ku hahago, kaiwena komiu nige Yehoba natunau i oola." 48 Yudiya Yeisu anana hi lahe hi ba, "Tabam ha ba bubun ya te ha ba owa Sameliya gamagalina ge yayaluwa bibikena i ulutuk elam!" 49 Yaka analiya i lahe i ba, "Nige yayaluwa bibikena i uulutuk elau. Nau Nam ya awatauwan, yaa komiu nige ku aawatauwagau. 50 Nau nige ya lologasisi tage alau na teli heyan, yaa etegana iyoho nuwana alau ni teli heyan, ge iya Tohilihili sasapona hot. 51 Ya ba tunahot eliyamiu, toto ebo no baaba ni henapuan nige bosowaina ni yaomal." 52 Inoke Yudiya hi baek elana hi ba, "Yaka abwe ha atena tunahot age yayaluwa bibikena i ulutuk elam! Abalahama ge palopitau iyaka hi yaomal, inoke owa u ba, 'Toto ebo no baaba ni henapuan nige bosowaina ni yaomal.' 53 Tubuma Abalahama iyaka i yaomal! Age owa u bwata lake? Ge palopitau al iyaka hi yaomal! He u nuwatu tage henala owa?" 54 Yeisu analiya i lahe i ba, "Ebo binimala totou alau na teli heyan, he nasi alau ni tabwa bugul bwagabwaga ya. Yaa Nam toto komiu ku ba, 'Iya wama Yabowaine,' iya alau i teliteli heyan. 55 He iya nige ku aatena, yaa nau ya atena. Binimala ebo na ba, 'Iya nige ya aatena,' he nau na tabwa tokakawi ni ola komiu. Yaa iya ya atena ge wana baaba ya henapuan. 56 Valila tubumiu Abalahama i nuwatu tage no sauga masal panayawi ni kite, inoke i yaliyaya; ge sauga i kite, yaka nuwana i waisi." 57 Yaka Yudiya hi baek elana hi ba, "Wam baliman nigeya ga pipti i pwapwawa, inoke ga i ola ge u ba tage Abalahama u kite?" 58 Analiya i lahe i ba, "Ya ba tunahot eliyamiu, mulaa abwe Abalahama i masal, nau iyoho ya gangan." 59 Yeisu wana baaba o kaiwena, yaka pat hi ahe tage nihi loipati, yaa i bunsumi, ge abwe Limi Bwabwalena ana bakubaku i eguluwai.

9

1 Sauga Yeisu i nawanawa kamwasaa, inoke tomatakai etega i kite, matana i kaiek hinana tinenaa. 2 Wana tohago hi neli hi ba, "Topankite, henala wana gegi kaiwena ge tau o hi ab matana i kai? Iya totona wana gegi o ebo hinana ge tamana wali gegi kaiwena?" 3 Yeisu i ba, "Nige iya wana gegi o ebo hinana ge tamana wali gegi kaiwena i oola ge matana i kakai. Matana i kai inoke bosowaina Yehoba wana gasisi ni tuwalaliya elana ge gamagalau nihi kite. 4 Sauga ya lan iyoho ya i gangan, inoke toto i patunau wana tuwalali ta ginol ga. Bulin i nenem ge nige bosowaina gamagal etega ni tuwalali. 5 Sauga nau iyahe panayawiya, he nau panayawi ana mwananal." 6 Yeisu baaba o i baunan enaa, yaka i kuluvi bilibiliya, kuluvena elana pweyapweya i ginol, ge i ahe i abut tomatakai matanaa. 7 Inoke i baek elana i ba, "U nok u na wewel opop Sailowama elana matam u ul." (Alan Sailowama ana sapu te Papatuna.) Yaka tau o i nok i na matana i ul, ge i sikal matana i waisi ge bugul i kitel. 8 Tau o wana heliyamwau ge gamagalau bolo valila hi kite i loloawanun hi ba, "Tau toto valila i mimisiyo ge i loloawanun heiya eba e?" 9 Inoke enuna hi ba, "Ibwe, tauina te." Yaa enuna hi ba, "Nige i oola. Ana awa ya te i ola iya". Yaa tau o totona i ba, "He nau te." 10 Yaka hi neli hi ba, "He ga i ola ge matam u panana?" 11 Analiya i lahe i ba, "Tau toto alana hi ba Yeisu, pweyapweya i ginol, i ahe i abut matawa, yaka i ba, 'U nok u na Sailowama matam nu ul.' Inoke ya na matau ya ul, yaka matau i waisi ge bugul ya kitel." 12 Inoke hi neli hi ba, "Tauina iya ga?" Analiya i lahe i ba, "Nige ya aatena." 13 Inoke gamagalau tau toto valila matana i kai hi ahe ge hi pwatanik Palisi elal. 14 He lan Sabwata elana te Yeisu pweyapweya i ginol ge i abut tomatakai matanaa inoke matana i panana. 15 Inoke Palisi al hi nel hi ba, "Ga i ola ge matam i waisi?" Analiya i lahe i ba, "Yeisu pweyapweya i abut matawa, ya na matau ya ul, inoke sauga o matau i waisi ge bugul ya kitel." 16 Yaka Palisi enuna hi ba, "Tau ya nige i neneem Yehoba elana, kaiwena Sabwata ana logugui nige i hehenapu-an." Enuna al hi ba, "Ginol yawiyawi ololana o togegi bosowaina ya ni ginol?" Yaka ali boda hi paeluwa ge hi awabalgig. 17 Inoke abwe Palisi hi nel al tau toto valila matana i kai elana hi ba, "Yaa owa wam nuwatu ga i ola tau o kaiwena? Kaiwena owa te matam i abubun." Tau o analiya i lahe i ba, "Iya palopita etega." 18 Yaa Yudiya wali tohouwa nige hi aabulilek te tau o valila matana i kai ge iyaka i waisi. Inoke tamana ge hinana ali baaba hi patuna hi nem elal, 19 yaka hi nelil hi ba, "He natumiu e, toto ku ba tage valila ku ab ge matana i kai? Ga i ola ge sauga ya matana i waisi?" 20 Tamana ge hinana hi ba, "Ha atena te iya natuma, ge ha atena te sauga ha ab matana i kai. 21 Yaa nige ha aatena te ga i ola ge matana i waisi, o ebo henala matana i sawal ge i mwapwela. He ku neli; iya iyaka i bwaya, inoke bosowaina totona wasana ni wasaan." 22 Tamana ge hinana hi ba ola o kaiwena Yudiya wali tohouwa hi lovakunagil. He heliya logugui iyaka hi ginol te henala ebo Yeisu ni awa Mesaiya-an, nasi nihi lopwali bahi avaliya nihi tatapwalolo al wali boda elana. 23 Heiya te kaiwena tamana ge hinana hi ba, "Iya iyaka i bwaya; ku neli." 24 Inoke Palisi tau toto valila matana i kai hi yogaan i tuk paeluwana, ge hi baek elana hi ba, "Nu papasila Yehoba matanaa ge nu baaba tunahot! Ama ha atena tau o iya togegi." 25 Yaka i baek elal i ba, "Nige ya aatena ebo iya togegi o ebo nigeya. Yaa toto ya atena, heiya te valila matau i kai ge sauga ya iyaka i waisi!" 26 Inoke hi neli hi ba, "He hauna gun i ginol elam? Ga i ginol ola ge matam i mwapwela?" 27 Analiya i lahe i ba, "Iyaka ya ba haba eliyamiu, yaa komiu nige ku hahago. Hauna kaiwena nuwamiu na baunan al nuku hago? Tabam komiu al ge nuwamiu nuku tabwa wana tohago." 28 Yaka hi ba panapanak-an ge hi baek elana hi ba, "Owa tau o wana tohago, yaa ama Mosese wana tohago. 29 Ama ha atena te Yehoba i baaba Mosese elana ge logugui i pek. Tau ei nige ha aatena te ga i noem!" 30 Inoke analiya i lahe i ba, "Nuwau i gewagewa-agimiu! Kaiwena ku ba, 'Nige ha aatena ga i noem,' yaa iya te matau i abubun ge i waisi. 31 Ta atena te Yehoba nige i lalaegan togegi elal. He i laegan te bolo hi awatauwan ge wana nuwatu hi ginol. 32 Abatelipuna elana i nem ana siga sauga e, nige sauga etega wasa ta hahago tage gamagal etega toto hi ab matana i kai, matana nihi abubun ge ni waisi. 33 Binimala tau ya nige ni nonoem Yehoba elana, he nige bosowaina bugul ololana ya etega ni ginol." 34 Yaka hi baek elana hi ba, "Owa gegi elana u masala ge u bwayaa! Ga i ola ge tage nu panpankiti eliyama?" Inoke hi take tagilan ge i egon. 35 Yeisu tau wasana i hago te hi take tagilan, inoke i loyaan, ge sauga i pwawa, yaka i baek elana i ba, "Tab u abulilek Gamagal Natuna elana?" 36 Tau o i ba, "Tonowak, henala Gamagal Natuna? No wasa u pem inoke na abulilek elana." 37 Yeisu i ba, "Iyaka u kite haba; iya te sauga ya alom ku liwaliwan e." 38 Inoke tau o i ba, "Babala, iyaka ya abulilek." Inoke i loepwakoku ge i kululu Yeisu elana. 39 Yeisu i ba, "Ya nem panayawiya ge gamagalau wali pagan na teli tagilan mwananala, inoke tomatakai mataliya nihi panana, ge bolo tage mataliya waiwaisana mataliya ni kai." 40 Palisi enuna bolo hi minaa Yeisu labenaa, wana baaba hi hago, yaka hi nel hi ba, "He ga i ola? Age u ba tage ama al matama i kai?" 41 Yeisu i baek elal i ba, "Binimala ebo nuku ba, `Ama matama i kai,' he Yehoba nige ni lalahemiu ni oola komiu togegi. Yaa komiu ku ba, `Ama matama i waisi,' inoke wami gegi iyoho nige i momowasi."

10

1 Yeisu i ba, "Ya ba tunahot eliyamiu, henala ebo nige ni uulutuka sipi ali gana ana nog elana, yaa gana ni mwena likaan ge ni tuk, iya tokaoma ge toaluoyaoya. 2 Yaa toto ebo ni ulutuka nog elana, iya sipi ali tomatahikan. 3 Nog ana tomatahikan nog ni pwela eliyana, yaka ni tuk ge wana sipi alaliya ni lumenil, inoke wana sipi anana nihi hago ge ni nulil tagilagil tola. 4 Sauga iyaka wana sipi i nulil ge hi tagil tola, inoke iya ni nohouwa ge sipi nihi noulil, kaiwena anana ana gun hi atena. 5 Sipi nige gamagal getoga nihi nonoulil, yaa nihi lou luwan, kaiwena nige anana ana gun hi aatena." 6 Yeisu ba gohalibe ya i baunan Palisi eliyalil, yaa ana sapu nige hi aatena. 7 Yaka i ba vevehe al i ba, "Ya ba tunahot eliyamiu, nau sipi ali gana ana nog. 8 Bolo hi nem houwa gegewel tokaoma ge toaluoyaoya, inoke analiya sipi nige hi hahago. 9 He nau nog; henala ebo ni ulutuka elau iya ni mwal. Iya ni tuk ge ni tagil, inoke mwawin waiwaisana ni pwawa. 10 Tokaoma i nem nige bugul getoga kaiwena i oola, yaa kaoma kaiwena, tagapaaliga kaiwena, ge apapanak kaiwena. Yaa nau ya nem inoke no sipi yawaliliya nihi pwawa, yawal kalakalaopopwina. 11 "Nau sipi ali tomatahikan waiwaisana. Sipi ali tomatahikan waiwaisana yawalina i talamwan ni yaomal sipi kaiweliya. 12 Tau toto i tuwalali mola kaiwena, iya nige sipi ali tomatahikan hot i oola, ge nige tonsipi i oola. Sauga ebo ni kite wanuka bekikina i nenem yaka sipi ali en ni pek ge ni lou luwagil, inoke wanuka sipi ni taltalagil ge ni takel pwatpwatagil. 13 Tau o sipi i lou luwagil, kaiwena i tuwalali mola kaiwena, he nige i nuwanuwatu sipi kaiweliya. 14 "Nau sipi ali tomatahikan waiwaisana. No sipi ya atenal ge heliya hi atenau, 15 i ola te Nam i atenau ge nau Nam ya atena. Ge yawaliu ya talamwan na yaomal sipi kaiweliya. 16 No sipi enuna al hi gan, heliya nige gana ya sipiliyau i oola. Heliya al na ahel ge nihi nem. Anau nihi hago, inoke sipi ali yawi ni maisena ge ali tomatahikan ni maisena. 17 Nam i nunuwana-agau, kaiwena yawaliu ya talamwan na yaomal--inoke abwe al na ahe pasikal. 18 Nige gamagal etega bosowaina yawaliu ni pwamowasi, yaa totou te ya talamwan. No gasisi i gan yawaliu na talamwan na yaomal, ge no gasisi i gan na ahe pasikal. O logugui ya aheya Nam elana i ola to." 19 Yeisu wana baaba o kaiwena inoke Yudiya boda hi paeluwa al. 20 Hi gewi hi ba, "Yayaluwa bibikena i ulutuk elana ge i kokona tei. Ga i ola ge wana baaba ku lalaegan-an?" 21 Yaa enuna hi ba, "Wana baaba nige i oola tau toto yayaluwa bibikena i ulutuk elana." "He yayaluwa bibikena bosowaina ya tomatakai mataliya ni abubun ge ni waisi? Nige bosowaina!" 22 Saugena o tultul ana sauga, ge Yudiya wali tapwalolo hagalena etega i gan Yelusalema, hagali o wali Limi Bwabwalena ana pwabwabwalena nuwahikanina. 23 He Yeisu iyoho i nawanawa abanawanawa etega Limi Bwabwalena ana gana gamwanaa alana hi ba "Solomon wana Epanapana." 24 Yaka Yudiya hi na Yeisu hi mipainan ge hi baek elana hi ba, "Hauna sauga ge abwe nuwama nu ba pasapu? He nu ba bubun naha hago ebo owa Mesaiya o ebo nigeya?" 25 Yeisu analiya i lahe i ba, "Iyaka ya ba haba eliyamiu, yaa komiu nige ku aabulilek-an. Ginol yawiyawi bolo Nam alana elana ya ginolil heliya hi pamasalau, 26 yaa nige ku aabulilek kaiwena komiu nige no sipi i oola. 27 No sipi anau hi hago ge ya atenal, inoke heliya hi toulilau. 28 Yawal mihomihotina ya pek elal ge nige nihi yayaomal. He nige gamagal etega bosowaina ni kaluoel nimwau elana. 29 Heliya Nam i pem elau, ge iya bugul gegewel i bwata lakel. Inoke nige gamagal etega bosowaina ni kaluoel Nam nimanaa. 30 Nau alou ge Nam ha maisena ya." 31 Baaba o kaiwena, inoke Yudiya pat hi pebugul al tage Yeisu nihi loipati. 32 Yaa Yeisu i baek elal i ba, "Ginol waiwaisal hi gewi Nam i pem iyaka ya ginolil ge ku kitel. He hauna toto kaiwena ge nuwamiu nuku loipatagau?" 33 Yaka anana hi lahe hi ba, "Nige wam ginol waiwaisal etegana kaiwena i oola ge tage naha loipatagiwa, yaa kaiwena u ba bwagabwaga ge Yehoba u hewa likaan. He owa gamagal ya, inoke u ba tage owa Yabowaine!" 34 Yeisu analiya i lahe i ba, "Wami Buki Bwabwalena ana leleli etega Yehoba anana i pamasal i ola hiwe: Nau ya ba, 'Komiu yabowaineyau.' 35 Yehoba baaba ya i baunan gamagalau elal ge i ba tage heliya yabowaineyau, ge Buki Bwabwalena ana baaba i tunahot sauga gegewena. 36 Inoke sauga nau ya ba, 'Nau Yabowaine Natuna,' he ga i ola ge ku ba tage ya ba bwagabwaga ge Yehoba ya hewa likaan? He nau Nam i hileyau ge i patunau ya nem panayawi. 37 Binimala ebo nige Nam wana tuwalali ya giginol, inoke bahi no baaba nuku aabulilek-an. 38 Yaa wana tuwalali ya awaawaginol, inoke ebo nige no baaba ku aabulilek-an, he no tuwalali o nuku abulilek-an. Inoke nuwamiu ni sapu ge nuku atena te Nam i minaa elau ge nau ya minaa Nam elana." 39 Yaka nuwaliya al Yeisu nihi lib ge nihi yowan, yaa hi pihapul ge i noluwagil. 40 Inoke Yeisu i sikal wewel Yolidani i kalapanet-an, ge i na i miminaa labi toto valila Diyon gamagalau i pababitaisoliya. 41 Gamagalau hi gewi hi nok elana, ge heliya ya hi baaba hi ola, "Diyon Tobabitaiso nige ginol yawiyawi etega i giginol, yaa baaba gegewena bolo i baunanagil tau ya kaiwena hi tunahot." 42 Inoke labi o elana gamagalau hi gewi hi abulilek Yeisu elana.

11

1 Tau etega alana Lasalo i kasiyebwa, iya alonau nunau Meli ge Mata wali panuwa Bedani. 2 (Meli toto ya iya te enonu bwalena waiwaisana i holek Babala aenaa, ge kokowana pupunona elana i pwamwagamwaga. He iya nuna Lasalo te i kasiyebwa.) 3 Inoke yowau labui ya baaba hi patuna Yeisu elana hi ba, "Babala, wam heliyam toto u nunuwana-an i kasiyebwa nabi." 4 Sauga Lasalo wana kasiyebwa wasana Yeisu i hago, inoke i ba, "Kasiyebwa toto ya nige ana nuwatu i oola tage gamagal ni payaomal, yaa Yehoba wana gasisi ni masal ge gamagalau alana nihi teli heyan. I ola al ginol o eliyana Yehoba Natuna alana nihi teli heyan." 5 Mata alona ge talina avaliya ge nuliya Lasalo Yeisu i nunuwana-agil. 6 Yaa sauga Lasalo wana kasiyebwa wasana i hago, yaka lan eluwa i minaa ga awan toto i miminaa. 7 Inoke abwe i baek wana tohago elal i ba, "Ta sikal ta na Yudiya." 8 Yaka anana hi lahe hi ba, "Topankite, abwe ya te Yudiya tage hi loloipat-agiwa, yaka nuwam nu sikal al labi o elana?" 9 Yeisu tohago analiya i lahe i ba, "Lan gamwanaa kilok matana auwa ali gewi tuwel mulaa abwe sabwelu ni lobek, age? He ebo gamagal ni nawanawa lan gamwanaa, aena nige ni tutupaan ge ni sosogu, kaiwena panayawi ana mwananal elana matana i mwananal. 10 Yaa ebo i nanawaa bulin gamwanaa, he aena ni tupaan ge ni sogu, kaiwena nige wana mwananal." 11 I ba ola o, yaka abwe i ba vevehe al i ba, "Wala heliyam Lasalo i kenu mati; na nok ge abwe na palut." 12 Tohago hi baek elana hi ba, "Babala, ebo i kenu mati, he abwe amnana ni waisi." 13 Yeisu i baaba Lasalo wana yaomal bana, yaa wana tohago hi nuwatu tage i kenu ya. 14 Yaka abwe baaba enona hot i baunan elal i ba, "Lasalo iyaka i aliga. 15 Yaa komiu ami labe kaiwena, inoke ya yaliyaya te nau nige ya miminek o, kaiwena toto ya abwe ni paabulilek-agimiu. He ta egon ta na ta kite." 16 Yaka Tomas, iya alana etega al Didimas, i baek wana pan tohago elal i ba, "Ehei, kila al ge ta nok, inoke avala ta yaomal toyawa." 17 Sauga Yeisu i vin Bedani, inoke wana wasa hi pek te Lasalo hi teli salaiya lan esopali iyaka i mowasi. 18 Awan Bedani ge Yelusalema ali bwaga ana yapu tabam i ola ya te kilomita eton, 19 inoke Yudiya hi gewi hi nok hi na Mata alona ge talina Meli elal nuwaliya nihi pwawaisi nuliya wana yaomal kaiwena. 20 Sauga Mata wasa i hago Yeisu iyoho i nenem, inoke i tagil limiya i nok ni na ni pwawa kamwasaa, yaa Meli i miminaa limiya. 21 Mata i na i vin Yeisu elana, yaka i ba, "Babala, binimala owa iyahe aloma, he nu nige ni yayaomal. 22 Yaa bwagana o, ya atena hauna gun ebo nu awanuni Yehoba elana, sauga ya ni pewa." 23 Yeisu i baek elana i ba, "Num abwe ni lut al." 24 Mata i ba, "Ya atena te abwe ni lut al lan mowamowasena elana, sauga toto gamagalau gegewel nihi lut al." 25 Yeisu i baek elana i ba, "Nau lut al ge yawal. Toto ebo ni abulilek-agau, bwagana ebo ni yaomal, yawalina ni gan; 26 ge toto yawalina gaganina, ebo ni abulilek-agau, nige ni yayaomal. Tab no baaba o u abulilek-an?" 27 Mata i ba, "Ibwe Babala, ya abulilek te owa Mesaiya, Yehoba Natuna, toto tage abwe i nenem panayawi." 28 Sauga i baaba Yeisu elana enaa, yaka i sikal i na i walgumu talina Meli elana i ba, "Topankite iyahe i vin, ge i neliwa." 29 Sauga Meli baaba o i hago, yaka etimwawa i lut i tagil ge i nok ni na Yeisu ni kite. 30 (He Yeisu nigeya ga i tutuk panuwaa, iyoho ya i minamina labi toto Mata i pwapwawaa.) 31 Yudiya bolo avaliya Meli hi miminaa limi gamwanaa ge nuwana hi pwawapwawaisi, hi kite Meli etimwawa i lut ge i na i tagil, inoke hi nuwatu tage i nana salaiya ge ni lonuwanak. Yaka hi lutan hi toulil. 32 Meli i na i vin labi toto Yeisu i miminaa, inoke sauga i kite, yaka i na i loepwakoku Yeisu aenaa ge i ba, "Babala, binimala owa iyahe aloma, he nu nige ni yayaomal." 33 Yeisu i kite Meli i kahin, ge i ola al Yudiya bolo alonau hi nem hi lokahin, inoke atena i lomwan ge nuwana i nak nabi. 34 Inoke i nel i ba, "Tuwana ga ku teliya?" Anana hi lahe hi ba, "Babala, u nem ga, ta na u kite." 35 Yaka Yeisu i kahin. 36 Inoke Yudiya hi ba, "Ku kite, i nunuwana-an nabiyan!" 37 Yaa enuna hi ba, "He valila tomatakai i sawal yaka matana i panana, inoke ga i ola ge nige Lasalo i lalabe ge bahi ni aaliga?" 38 Yeisu atena i lomwan nabi al ge i nok i na salaiya. He salai o hi ken tukan labilabiya ge pat bwabwatana etega hi ahe awana hi paankausiya. 39 Yaka Yeisu i ba, "Pat ku pakul egonan." Yaa Mata, iya Lasalo nuna, i ba, "Babala, iyaka lan esopalena te i kenukenu salaiya. He iyaka bwalena ni gan!" 40 Yeisu i baek elana i ba, "Tab ya baewa elam ya ba, 'Ebo nu abulilek-agau inoke Yehoba wana gasisi nu kite'?" 41 Yaka pat toto eteli kaus hi pakul egonan. Yeisu matana i ha labulabumwa inoke i ba, "Ateu owa Nam, kaiwena no awanun iyaka u hago. 42 Ya atena sauga gegewena no awanun u hago, yaa ya ba ola o gamagalau bolo hi taltalmilil ya kaiweliya, inoke nihi abulilek te owa u patunau." 43 Sauga Yeisu i baaba haba, yaka i yoga anana i bwata i ba, "Lasalo, u tagilim!" 44 Yaka i lut i tagil. He valila tuwana ana os kama yayapona hi ahe aena ge nimana hi avan, ge kaliko etega hi ahe maninina hi os. Inoke Yeisu i baek gamagalau elal i ba, "Ku na tuwana ana os ku leke yoho, inoke ku teli ge ni nawanawa." 45 Yudiya bolo hi na Meli elana ge Yeisu wana ginol hi kite, hi gewi hi abulilek elana. 46 Yaa enuna hi na Palisi elal ge Yeisu wana ginol hi wasaan. 47 Inoke topowon bwabwatal avaliyau ge Palisi, Yudiya wali tologugui wali nogogo etega hi yogaan, ge hi ba, "Ga ta ginol ola tau ya kaiwena? He ginol yawiyawi hi gewi i awaawaginol!" 48 "Ebo nige bugul etega ta giginol elana ge ginol ololana o ni awaawaginol ya, he nasi gamagalau gegewel nihi abulilek elana. Yaka Loma nihi nem wala Limi Bwabwalena nihi ahe, ge avalau wala gamagalau nihi apapanak-agila." 49 Tologugui o avaliya etega alana Kaiyapa, iya baliman o topowon bwabwatal wali tohouwa, i ba masal i ba, "Gewagewa komiu! 50 Age nige ku aatena kamwasa etega toto eliyana ge bosowaina ni labemiu? I waisi te gamagal maisena ni yaomal gamagalau kaiweliya, ge bahi kila Yudiya gegewela nak ta pwapwawa." 51 He Kaiyapa nige totona wana nuwatu i oola ge baaba o i baunan. Yaa baliman o iya topowon bwabwatal wali tohouwa, inoke i palopisai te Yeisu abwe ni yaomal boda Yudiya gegewel kaiweliya. 52 Ge Yeisu i yaomal nige Yudiya ya kaiweliya i oola, yaa Yehoba natunau gegewel kaiweliya, bolo hi minek labi tomaha ge tomaha elal, inoke ni bugul papahel nihi tabwa boda maisena. 53 Inoke i telipuna lan o ge i nok, Yudiya wali tohouwa hi nuwanuwatu ga nihi ola ge Yeisu nihi lopaaliga. 54 Inoke nuwatu o kaiwena Yeisu nige i nonomasamasal Yudiya gamwaliyaa, yaa alonau wana tohago hi egon, hi na hi minaa ga panuwa etega alana Ipileimi, iyoho labi kekevana labenaa. 55 Yudiya wali Nopalegi Hagalena ana sauga iyaka i kelakelaubwa, inoke bolo hi miminek awan ge awan ona elal hi nowanik hi na Yelusalema ali abwabubun paganina kaiwena, mulaa abwe Nopalegi Hagalena ana sauga. 56 Gamagalau o hi loyaloya Yeisu kaiwena, ge Limi Bwabwalena gamwanaa hi talmilil ge hi pebaaba-agil hi ba, "Ga ku nuwatu ola? Tab nasi ni nem hagali ya elana?" 57 He topowon bwabwatal avaliyau ge Palisi iyaka logugui hi ginol ge hi ba, "Ebo gamagal etega Yeisu wana abamina ni atena, wama wasa ni pem, inoke naha ba nihi lib ge nihi yowan."

12

1 Lan sikis ya i mina ge abwe Nopalegi Hagalena ana sauga, inoke Yeisu i na Bedani, awan toto Lasalo i miminaa, iya te Yeisu valila i palutem yaomala. 2 Aanan etega hi ginol Yeisu kaiwena. Mata aanan i habwe ge i lovilovivina gamagalau kaiweliya, ge Lasalo alonau gamagalau iyoho hi misiyo, avaliya Yeisu hi aanan. 3 Yaka Meli enonu bwalena waiwaisana ge molana bwabwatana, alana nad, ana bwata i ola lita awalehina, i ahe. Inoke i na i holek Yeisu aenaa, ge abwe kokowana pupunona elana i pwamwagamwaga. Enonu bwalena limi gamwana i kalaopopwi. 4 Yeisu wana tohago avaliya etega alana Yudasa Isikaliyota, iya abwe Yeisu ni wasaan, i ba, 5 "Binimala enonu ya ta palian, molana mani silba ali gewi tili handeled ta ahe, ge ta pek togulagula elal." 6 He nige tage i nuwanuwatu togulagula kaiweliya ge i ba ola o, yaa kaiwena iya tokaoma. Wali mani ana kalopu iya i matahikan, ge sauga i gewi mani i pipikaome totona kaiwena. 7 Yaka abwe Yeisu i ba, "U pialiyoho ya! Wana nuwatu ni ginol ge tuwau ni abubun nonowe o teliteli kaiwena. 8 Komiu sauga gegewena alomiyau ya togulagula, yaa nau nige sauga gegewena alomiu i oola." 9 Yudiya boda bwabwatana Yeisu wasana hi hago te iya iyoho Bedani, inoke hi nowanik hi na elana. He nige iya kaiwena ya i oola ge hi nonok, yaa nuwaliya al Lasalo, iya Yeisu i palutem yaomala, nihi kite. 10 Inoke topowon bwabwatal hi nuwanuwatu tage Lasalo al ge nihi lopaaliga, 11 puna kaiwena Lasalo wana lut al kaiwena Yudiya hi gewi hi olak Yeisu elana ge hi abulilek-an. 12 Lan i gan al, boda bwabwatana bolo hi nowanik Nopalegi Hagalena kaiwena wasa hi hago Yeisu i nanawa Yelusalema. 13 Inoke vegavega ginebi lamwaliya hi govel ge hi bugulagil hi na Yeisu hi kite kamwasaa. Inoke hi nonoyogayoga hi ba, "Hosana! Babala ta tobalan!" "Yehoba ni ba muloluan, iya i nem Babala alana elana!" "Yehoba ni ba muloluan, iya Isileli wala Kin!" 14 Yeisu donki etega i ahe i heya pwatanaa, i ola Buki Bwabwalena ana baaba i ba: 15 "'Saiyoni gamagaliliyau, bahi lovakun! Ku kite, wami kin i nenem eliyamiu, i heya donki natuna elana." 16 Sauga o wana tohago ginol o ana sapu nigeya ga hi aatena. Yaa Yehoba Yeisu i palut ge i pawasawasa enaa, inoke abwe hi nuwatu Buki Bwabwalena ana baaba i ba ola o Yeisu kaiwena, ge hi nuwahikan te bugul bolo o hi ginol elana. 17 He valila boda bwabwatana Yeisu hi kite Lasalo i yogaan ge i palutem yaomala, inoke heliya Yeisu wana ginol wasana hi palelu. 18 Gamagalau hi gewi Yeisu wana ginol yawiyawi o wasana hi hago, inoke hi nok hi na Yeisu hi kite kamwasaa. 19 Inoke Palisi heliya ya hi pebaaba-agil hi ba, "Nuwatu toto ta nuwatuan ge tage ta ginol, iyaka nige bosowaila! Ku kite, gamagalau gegewel iyaka hi olak elana ge hi toulil." 20 Bolo hi na Yelusalema Nopalegi Hagalena ana tapwalolo kaiwena, he gamwaliyaa Gilik gamagaliliyau enuna iyoho. 21 Heliya hi nok hi na Pilipi elana, iya i neem panuwa Betesaida labi Galili gamwanaa, ge hi ba, "Tonowak, nuwama Yeisu naha kite." 22 Yaka Pilipi i nok i na i baek Andulu elana, ge ali toto eluwa hi na Yeisu wana wasa hi pek. 23 Inoke Yeisu i baek elal i ba, "Sauga iyaka i vin ge Yehoba Gamagal Natuna ni pawasawasa. 24 Ya ba tunahot eliyamiu, ebo witi pwatumwina etega nige ni sosoguek bilibiliya ge ni aaliga, he ni maimaisena ya. Yaa ebo ni aliga, inoke abwe ni siun ge ni enon, enona ni pohaka ge ni gewi. 25 Henala ebo yawalina ni nunuwana-an, he abwe ni payaomal. Henala ebo yawalina panayawiya nige ni nunuwana-an, he nige ni papayaomal, yaa ni kukuhikan ana siga yawal mihomihotina ni pwawa. 26 Ebo gamagal etega nuwana ni tuwalali kaiweu, he ni toulilau, ge ebo hauna labi elana na minaa, iya al ni minaa. Inoke gamagal toto i tuwalali kaiweu alana Nam ni teli heyan." 27 Yaka abwe Yeisu i ba, "Sauga ya yayaluwau i pulowan, ge nige ya aatena ga na ba ola. Age na ba, 'Nam, bahi lomwan ya ni mamasal eliyau'? Nigeya, he lomwan ya kaiwena te ya nem. 28 Nam, alam nu teli heyan ge nu pawasawasa." Inoke anan etega i loem labulabumwa i ba, "Alau iyaka ya pawasawasa, ge abwe na pawasawasa al." 29 Sauga gamagalau bolo hi taltalmilil o anan hi hago, yaka enuna hi ba, "Gulumwawa butuna to." Yaa enuna al hi ba, "Anelose etega to i baaba elana o." 30 Yeisu i baek elal i ba, "Anan toto ku hago, nige nau o labe kaiwena i oola, yaa komiu ami labe kaiwena. 31 Sauga ya Yehoba panayawi gamagaliliyau wali pagan ni hile ge ali lahi ni baunan; ge sauga al ya Yehoba panayawi ana babala Seitani ni pakokove ge ni tagatagil-an. 32 Yaa nau, sauga ebo nihi teli heyagau kolos elana, inoke gamagalau gegewel na ahel nihi nem elau." 33 He i ba ola o, inoke i pamasal bwaliga ga ni yaomal ola. 34 Yaka boda hi ba masal hi ba, "Ha hago Logugui i ba tage Mesaiya iya ni mihot sauga gegewena. He ga i ola ge owa u ba, 'Gamagal Natuna abwe nihi teli heyan kolos elana'? Gamagal Natuna toto bana u baaba, he iya henala?" 35 Yeisu i baek elal i ba, "Nasi mwananal alomiu sauga kekeisi al ya. Inoke nuku nawanawa sauga mwananal iyehe alomiu, ge bahi gogou ni gogogou-agimiu. Kaiwena toto i nawaa gogouwa nige i aatena te ga i nonoek. 36 Sauga mwananal iyehe alomiu, nuku abulilek elana, inoke nuku tabwa mwananal natunau." Sauga Yeisu i baaba haba, yaka i egon i na i bunsumi ge nige hi kikite. 37 Bwagana Yeisu ginol yawiyawi hi gewi i ginolil gamagalau mataliyaa, yaa nige hi aabulilek elana. 38 Inoke palopita Aiseya wana baaba i patunahot, toto i ba: "Babala, henala wama wasa i abulilek-an? Ge henala Babala wana gasisi i kite i ola te sauga ya i giginol?" 39 Nige bosowailiya nihi abulilek kaiwena Aiseya i ba al i ba: 40 Yehoba mataliya i pakai, ge wali nuwatu i pagogou, inoke nige bosowailiya nihi kite mataliyaa, o ebo nuwaliya ni sapu. Yehoba i ba, "Nige bosowailiya nihi nuwasikal elau ge na pwamolol." 41 He Aiseya Yeisu wana wasawasa i kite, inoke i baaba Yeisu bana i ola to. 42 Yaa bwagana, Yudiya wali tohouwa hi gewi hi abulilek Yeisu elana. Yaa wali abulilek nige hi babaa tagilan, kaiwena Palisi hi lovakunagil eba nihi teli tagilagil wali limi tapwalolowa ge bahi avaliyau nihi tatapwalolo al wali boda elana. 43 Nuwaliya te alaliya gamagalau nihi teli heyan, nige nuwaliya Yehoba alaliya ni teli heyan. 44 Yeisu i baaba anana i bwata i ba, "Henala ebo ni abulilek elau, nige i aabulilek nau ya elau, yaa i abulilek al toto i patunau elana. 45 Henala ebo ni kiteyau, he toto i patunau iyaka i kite al. 46 Nau ya nem panayawiya ya ola mwananal, inoke bolo hi abulilek elau, gegewel nige nihi miminaa gogouwa. 47 "Ebo gamagal etega no baaba i hago ge nige i hehenapu-an, he nau nige na papayatala, kaiwena ya nem nige tage gamagalau panayawi na payatalal, yaa na pwamwalil. 48 Henala ebo o en ni pem ge no baaba ni towani, he iyaka ana toyatala i gan. Baaba bolo ya baunan te bwaliga ni payatala sauga mowamowasena elana. 49 He i ola to, kaiwena nige ya babaa totou no nuwatu elana, yaa Nam toto i patunau o logugui i pem ga na ba ola ge hauna baaba na baunan. 50 Ge ya atena Nam wana baaba yawal mihomihotina i pamasal. Inoke baaba gegewena bolo ya baunan, he i ola te Nam i baunanim ge na baunan."

13

1 Nopalegi Hagalena ana sauga iyaka i kelaubwa hot. Yeisu i atena te wana sauga iyaka i vin ge panayawi toto ya ni eguluwai ge ni sikal ni na Tamana elana. Wana gamagalau bolo hi minaa panayawiya i nunuwana-agil, inoke i nunuwana-agil nabiyan i na ana siga wana yaomal elana. 2 Yeisu alonau ge wana tohago heliya iyoho kokoyavi enona hi aanan. Seitani nuwatu iyaka i paulutuk-an Yudasa Isikaliyota Saimon natuna elana ge Yeisu ni wasaan. 3 He Yeisu i atena te Tamana gasisi ge bugul gegewena i teli nimanaa, ge i atena iya i neem Yehoba elana ge ni sikal al Yehoba elana. 4 Inoke aanan i lut luwan, ana kama toto yayapona i loho i teli, ge tawel i ahe i lataavan henuwaninaa. 5 Yaka wewel i holek mwaha etega elana, inoke i telipuna tohago aeliya i ulul ge tawel toto i lataavana henuwaninaa i ahe i pwapwamwagamwaga. 6 Sauga i ul vin Saimon Pita elana, yaka Pita i nel i ba, "Babala, nasi aeu nu ul?" 7 Yeisu Pita anana i lahe i ba, "Sauga ya hauna gun ya awaawaginol ana sapu nige u aatena, yaa bwaliga abwe nu atena." 8 Pita i ba, "Bahiwa! Bahi sauga etega aeu nu uul." Yaka Yeisu i ba, "Ebo nige aem na uul, he nige al nu oola no tohago." 9 Saimon Pita i ba, "Babala, ebo i ola o, he bahi aeu ya nu uul, yaa nimwau ge kokowau al nu ulil." 10 Yeisu i ba, "Ebo gamagal etega ni highig, he tuwana bikena gegewena iyaka i mowasi. Inoke nige ni highig al, besena ya te aena ni ul. Komiu iyaka ku yanayana, yaa nige gegewemiu hot i oola." 11 He Yeisu iyaka i atena te henala abwe ni wasaan, heiya te kaiwena i ba, Nige gegewemiu hot ku yanayana." 12 Sauga tohago aeliya i ulil haba, yaka ana kama yayapona i ahe i galoi al, inoke i na i misiyo al abanaa. Yaka i nel wana tohago elal i ba, "Tab ku atena hauna gun abwe ya ginol eliyamiu? 13 Komiu ku awa topankite-agau ge ku awa babala-agau, he ku ba bubun tei, kaiwena nau ya ola to. 14 He nau wami Babala ge wami Topankite aemiu iyaka ya ul, inoke komiu al alomiyau aeliya nuku ul. 15 Wami abagagayawa iyaka ya ginol, inoke nuku ginol ni ola no ginol eliyamiu. 16 Ya ba tunahot eliyamiu, totuwalali nige wana babala i bwabwata lake, ge elopapatuna nige ana topapatuna i bwabwata lake. 17 No ginol puna hot ana sapu iyaka ku atena, ge ebo nuku ginol ola, inoke ana yaliyaya nuku pwawa. 18 Yaa baaba toto ya baunan, nige gegewemiu bamiu i oola. He bolo ya hilel ya atenal. Yaa Buki Bwabwalena ana baaba ni tunahot, toto i ba, 'Tau toto alou ha anan mwaha maisena elana, iya iyaka i pihigelgel elau.' 19 He wami wasa ya pewa pahuwala te, inoke sauga ebo ginol o ni masal, yaka nuku abulilek te 'Nau heiya te Nau.' 20 Ya ba tunahot eliyamiu, henala ebo bolo ya patunal ni atupahel, he i atupaheyau, ge henala ebo i atupaheyau, he toto i patunau i atupahe al." 21 Sauga Yeisu i ba ola o, inoke yayaluwana i pulowan nabi, yaka i ba masal ya i ba, "Ya ba tunahot eliyamiu, komiu etega abwe ni wasaagau." 22 Tohago mataliya hi peluwaluwan-an avaliyau elal, nuwaliya i gewagewa nige hi aatena henala bana ge Yeisu i babaa. 23 He Yeisu wana tohago avaliya etega, toto i nunuwana-an nabiyan, i misiyowa Yeisu labenaa. 24 Saimon Pita matana i nok tohago o elana, inoke awana i palamwalamwaniu-ek elana tage Yeisu ni neli henala ge bana i babaa. 25 Inoke tohago o i gena nok Yeisu elana ge i nel i ba, "Babala, henala bana?" 26 Inoke Yeisu i ba, "Nasi beleid awahinena na paululowan mwaha gamwanaa na pahun ge na pek elana. He gamagalina iya." Yaka beleid i pahun ge i pek Yudasa Isikaliyota Saimon natuna elana. 27 Sauga Yudasa beleid i ahe, inoke sauga o Seitani i ulutuk elana. Yaka Yeisu i baek elana i ba, "Bugul toto tage u giginol, he etimwawa nu ginol." 28 Yaa tohago bolo hi misiyoan abaanan elana, nige hi aatena hauna kaiwena ge Yeisu i ba ola o Yudasa elana. 29 Yudasa iya wali mani ana kalopu i matahikan, inoke tohago enuna wali nuwatu tage Yeisu i baek elana ni nok ni na bugul enuna ni pwamola hagali kaiwena, o ebo mani enuna ni pek togulagula elal. 30 Sauga Yudasa beleid i ahe i an, yaka sauga o i tagil ge i egon. He bulin iyaka i gan. 31 Yudasa i egon enaa, yaka Yeisu i ba, "Sauga ya Gamagal Natuna wana wasawasa gamagalau nihi kite, ge iya eliyana Yehoba wana wasawasa al nihi kite. 32 He iya eliyana te Yehoba wana wasawasa nihi kite, inoke Yehoba totona Gamagal Natuna ni pawasawasa, ge etimwawa ni ginol ola. 33 Natuwau, nige alowau komiu ta miminabi. He abwe nuku loyaagau, yaa sauga ya na ba eliyamiu ni ola te valila ya baek Yudiya wali tohouwa elal: 'Nige bosowaimiu nuku noek labi toto ya nonoek.' 34 Logugui vavaluna sauga ya na pewa: nuku penununuwana-agimiu. He nuku penununuwana-agimiu ni ola nau ya nunuwana-agimiu. 35 Ebo nuku penununuwana-agimiu, inoke eliyana gamagalau gegewel nihi atena age komiu no tohago." 36 Saimon Pita i nel Yeisu elana i ba, "Babala, ga u nonoek?" Yeisu i ba, "Nige bosowaim sauga ya nu toulilau ge nu noek labi toto nau ya nonoek, yaa bwaliga abwe nu toulilau." 37 Inoke Pita i baek elana i ba, "Babala, ga i ola ge nige bosowaina sauga ya na touliliwa? Ya talamwagau na yaomal kaiwem." 38 Yaka anana Yeisu i lahe i ba, "Tunahot u talamwagiwa nu yaomal kaiweu? Ya ba tunahot eliyam, nasi nu alahagau paeton, mulaa abwe kamkam melutauina ni kahin."

14

1 Yeisu i baek wana tohago elal i ba, "Bahi atemiu ni bwanabwana! Nuku melteli Yehoba elana ge nuku melteli al elau. 2 Nam wana limi elana abamina i gewi, inoke na nok ge abamiu na lovivina-an. Binimala ebo nige abamina, he nige bosowaina na ba ola to. 3 Sauga ebo na nok ge abamiu na lovivina-an haba, yaka abwe na sikalim na ahemiu alowau komiu, inoke ebo ga na minaa, komiu al nuku minaa. 4 Labi toto ya nonoek ana kamwasa ku atena ya." 5 Tomas i baek elana i ba, "Babala, nige ha aatena te ga u nonoek, he abwe kamwasa ga naha atena ola?" 6 Inoke anana Yeisu i lahe i ba, "Nau kamwasa, ba tunahot ge yawal. Nige bosowaina etega ni noek kamwasa getoga elana ge ni nok Nam elana, iyai te nau elau. 7 Binimala ebo nuku atenau bubun, he inoke Nam al nuku atena. Sauga ya elana ge ta nanawa awolaa Nam iyaka ku atena ge iyaka ku kite." 8 Inoke Pilipi i ba, "Babala, Tamwam u pankitema, yaka wama nuwatu ni paolaolaek." 9 Yeisu i baek Pilipi elana i ba, "Pilipi, age nige u aatenau, bwagana alowau komiu iyaka ta minabi? Henala ebo i kiteyau, he iyaka Nam i kite. Inoke ga i ola ge u ba, 'Tamwam u pankitema'? 10 Age nige u aabulilek te nau ya minaa Nam elana ge Nam i minaa elau? Baaba bolo ya baunan eliyamiu nige totou no nuwatu i oola. Yaa Nam iya i minaa elau ge wana tuwalali i awaawaginol. 11 No baaba nuku abulilek-an te, toto ya ba, 'Nau ya minaa Nam elana ge Nam i minaa elau.' Yaa ebo baaba ya nige ku aabulilek-an, he tuwalali bolo ya ginolil kaiweliya inoke nuku abulilek. 12 Ya ba tunahot eliyamiu, henala ebo ni abulilek elau, he iya ginol bolo ya ginolil abwe ni ginolil. Ge ginol bwabwatal ni ginolil, ginol bolo iyaka ya ginolil ni bwata lakel, kaiwena nau ya nana Nam elana. 13 Ge hauna ebo nuku awanuni alau elana, na ginol ni ola wami awanun. Inoke no ginol o elana Nam alana na teli heyan ge na pawasawasa. 14 Hauna gun ebo nuku awanuni alau elana, nasi na ginol." 15 Yeisu i ba, "Ebo nuku nunuwana-agau, inoke no logugui nuku henapuan. 16 Na awanun Nam elana inoke Tolabe etega al ni pewa, ge iya alomiu sauga gegewena. 17 Tolabe o, iya Yayaluwa toto Yehoba ana aatena tutunahotina i pamasal. Gamagalau panayawi nige bosowailiya nihi ahe ali tolabe, kaiwena nige hi kikite ge nige hi aatena. Yaa iya komiu ku atena, kaiwena komiu alomiu ge i minaa eliyamiu. 18 Nige na eeguluwagimiu ni oola mwawamwawas, yaa abwe na nem al eliyamiu. 19 Sauga kekeisi abwe gamagalau panayawi nige nihi kikiteyau al, yaa komiu nuku kiteyau. Kaiwena nau yawaliu i gan, inoke komiu al yawalimiu ni gan. 20 Lan toto o elana abwe nuku atena nau ya minaa Nam elana, ge komiu ku minaa elau, ge nau ya minaa eliyamiu. 21 Henala ebo no logugui ni ahe ge ni henapuan, he iya te i nunuwana-agau. Toto i nunuwana-agau, Nam gamagal o i nunuwana-an, ge nau al ya nunuwana-an ge totou na pamasalau elana." 22 Yaka Yudasa (nige toto Yudasa Isikaliyota i oola) i ba, "Babala, ga i ola ge nu pamasaliwa eliyama ge nige nu papamasaliwa gamagalau panayawi elal?" 23 Anana Yeisu i lahe i ba, "Ebo etega ni nunuwana-agau, no panpankiti ni henapuan. Yaka Nam gamagal o ni nunuwana-an, inoke alou Nam naha nok elana ge aloma naha mina. 24 Toto ebo nige i nunuwana-agau, he nige no panpankiti ni hehenapu-an, inoke nige naha mamasal elana. He panpankiti toto ku hago nige totou no nuwatu i oola, yaa i neem Nam toto i patunau elana. 25 "Baaba bolo ya ya baunan eliyamiu sauga nau iyehe alowau komiu. 26 Yaa Tolabe, Yayaluwa Bwabwalena, iya alau elana abwe Nam ni patunam, inoke bugul gegewena ni pankitemiu ge baaba gegewena bolo ya baunan eliyamiu ni panuwahikagimiu. 27 Nuwa laumwal ya eeguluwan eliyamiu; no nuwa laumwal ya pewa eliyamiu. Nuwa laumwal ololana o nige bosowaina panayawi ni pewa te nau na pewa. Bahi atemiu ni bwanabwana ge nuku lolovakun. 28 "Iyaka ku hago te ya ba, 'Ya eegon yaa abwe na sikalim al eliyamiu.' Binimala nuku nunuwana-agau, he nuku yaliyaya te ya nana Nam elana, kaiwena iya i bwata lakeyau. 29 Wami wasa ya pewa pahuwala te mulaa abwe bugul bolo o ni gan, yaka sauga ebo ni gan inoke nuku abulilek. 30 Iyaka sauga nige i yayapu ge tage alowau komiu ta liwaliwan al, kaiwena panayawi ya ana babala Seitani iyoho i nenem. Nige wana gasisi i gagan elau, 31 yaa ya talamwagau kaiwena nuwau panayawi nihi atena te Nam ya nunuwana-an ge wana logugui gegewena i baunan eliyau ya ginolil. Ku nem, labena ya ta eguluwai."

15

1 "Nau oine hot puna, ge Nam iya toeyowa. 2 Lala bolo hi siuna eliyau ge nige hi eenon, gegewel ni gotomwa yohil, yaa lala gegewel bolo hi enon ni abubunil, laliya bolo hi nak ni tomwa yohil, inoke nihi enon nabi. 3 Komiu iyaka ku waisi kaiwena baaba bolo ya baunan eliyamiu iyaka i abubunimiu. 4 Nuku minaa eliyau, inoke nau na minaa eliyamiu. Nige bosowaina lala etega totona ni enon ebo nige ni miminaa puna elana. I ola al komiu nige bosowaina nuku enon ebo nige nuku miminaa eliyau. 5 "Nau oine puna ge komiu lalana. Henala ebo ni minaa elau, ge nau na minaa elana, iya ni enon nabi. Yaa ebo nuku miluwagau, nige bosowaina bugul etega nuku ginol. 6 Henala ebo nige ni miminaa elau, iya i ola lala toto hi aliyoho ge i yakiwa. Lala ololana o hi bugul papahe inoke hi yoho tukan ginahaa ge nihi kalas. 7 Ebo nuku minaa elau ge no baaba ni minaa eliyamiu, bugul bolo nuwamiu nuku awanun kaiweliya, inoke nuku pwawa. 8 Ebo nuku enon nabi ge nuku ola no tohago, he toto ya Nam ni pawasawasa. 9 "Nau ya nunuwana-agimiu, i ola ya te Nam i nunuwana-agau. He nuku minaa no nunuwana gamwanaa. 10 Ebo no logugui nuku henapuan, inoke nuku minaa no nunuwana gamwanaa, ni ola nau Nam wana logugui ya henapuan ge ya minaa wana nunuwana gamwanaa. 11 Baaba ya ya baunan eliyamiu inoke no yaliyaya ni mina eliyamiu ge wami yaliyaya ni pakalaopop. 12 He no logugui iya hiwe: nuku penununuwana alomiyau elal ni ola nau ya nunuwana-agimiu. 13 Nige gamagal etega wana nunuwana ana bwata ni oola toto yawalina i talamwan wana heliyamwau kaiweliya. 14 Ebo nuku ginol ni ola no logugui, he komiu no heliyamwau. 15 Nige al na aawa totuwalali-agimiu, kaiwena totuwalali nige i aatena te wana tonowak hauna i giginol. Yaa nau ya awa heliyamwau-agimiu, kaiwena bugul gegewena bolo ya hagoem Nam elana iyaka ya pamasal eliyamiu. 16 Komiu nige ku hihileyau, yaa nau ya hilemiu nuku nok nuku na nuku enon, ge enomiu o ni mihot. Inoke hauna gun ebo nuku awanuni alau elana, Nam ni pewa. 17 He no logugui iya hiwe: nuku penununuwana-agimiu." 18 Yeisu i ba, "Ebo panayawi gamagaliliyau nihi pihigelgel-agimiu, nuku nuwahikan te hi pihigelgel-agau houwan. 19 Binimala ebo nuku minek panayawi gamagaliliyau ali boda elana, inoke nihi nunuwana-agimiu ni ola komiu avaliyau. Yaa komiu nige ku miminek ali boda elana, nau ya hilemiwa gamwaliyaa. Inoke heiya te kaiwena panayawi gamagaliliyau hi pihigelgel-agimiu. 20 Baaba toto ya baunan eliyamiu nuku nuwahikan i ola hiwe: 'Totuwalali nige wana babala i bwabwata lake.' Ebo hi palopalomwan-agau, he komiu al ge nihi palopalomwan-agimiu. Ebo no baaba hi henapuan, he komiu al ge wami baaba nihi henapuan. 21 Nau kaiweu pagan ya nihi ginol eliyamiu, kaiwena toto i patunau nige hi aatena. 22 Binimala nige na nenem ge wali wasa na pepek, he nige ali woliwoli ni gagan wali gegi kaiwena. Yaa sauga ya nige wali epaepakuna i gagan wali gegi kaiwena." 23 "Toto ebo i pihigelgel-agau, he i pihigelgel al Nam elana. 24 Ginol ololal nige sauga etega gamagal etega i giginol, nau ya ginol gamwaliyaa. Binimala nigeya, inoke nige ali woliwoli ni gagan wali gegi kaiwena. He ginol yawiyawi ya ginolil iyaka hi kite, yaa bwagana o, alou ge Nam hi pihigelgel-agima. 25 I masal i ola to inoke baaba toto wali Logugui ana buki gamwanaa i patunahot, toto i ba, 'Hi pihigelgel-agau bwabwage nige wali puna i gagan.' 26 "Abwe Tolabe ni nem, iya Yayaluwa toto Yehoba ana aatena tutunahotina ana topamasal ge i tagilem Nam elana. Iya na patuna eliyamiu ni neem Nam elana ge wasau ni wasaan. 27 Yaa komiu al ge wasau nuku wasaan, kaiwena i telipunaa sauga toto tuwalali ya telipuna, alowau komiu ya."

16

1 "Baaba ya ya baunan eliyamiu ni pagasisi-agimiu ge bahi nuku sosogu. 2 Bwaliga abwe nihi ba nuku tagil wali limi tapwalolowa ge nige alomiyau nuku tatapwalolo al. Ge sauga i nenem, ebo gamagal etega ni tagapaaligamiu, he i nuwatu tage Yehoba wana tuwalali to i ginol o. 3 Ginol ololana o nihi ginol eliyamiu kaiwena nige alou ge Nam hi aatenama. 4 Baaba ya ya baunan eliyamiu, inoke ebo ana sauga ni vin, no baaba ya nuku nuwahikan. He valila nige wami wasa ya pepewa houwan bugul ya kaiweliya, kaiwena nau iyoho ya eliyamiu." 5 "He sauga ya ya eegon ya nana toto i patunau elana. He komiu nige etega ku nenelau te ga ya nana, 6 yaa atemiu i lomwan no baaba o kaiwena. 7 Yaa ya ba tunahot eliyamiu: wami waisi kaiwena te nau ya eegon, kaiwena ebo nige na eegon, Tolabe nige ni nenem eliyamiu. Yaa ebo na egon, inoke abwe na patuna ni nem eliyamiu. 8 Ge sauga ni nem, panayawi gamagaliliyau wali gegi ni pankitel, ge ni pankitel henala i sapu, ge ni pankitel Yehoba abwe ni payatalal ge ali lahi ni baunan. 9 Wali gegi ni pankitel, kaiwena nige hi aabulilek elau. 10 Ni pankitel henala i sapu, kaiwena nau ya nonok ya nana Nam elana, he nige al nuku kikiteyau. 11 Ge ni pankitel Yehoba abwe ni payatalal, kaiwena panayawi ya ana babala Seitani iyaka i payatala ge ana lahi i baunan." 12 "Bugul i gewi nabi iyoho nuwau na baunan eliyamiu, yaa eba nige bosowaimiu i oola. 13 Yaa sauga Yayaluwa toto Yehoba ana aatena tutunahotina ana topamasal ni nem, iya ni nulimiu ge baaba tutunahotina gegewena nuku atena. He nige totona wana nuwatu ni babaunan, yaa toto i hago ya te ni baunan, ge bugul bolo hi gagan sauga mulaa ni pamasal eliyamiu. 14 Iya nuwatu ni ahem elau ge ni pamasal eliyamiu, inoke eliyana alau ni pawasawasa. 15 Bugul gegewena toto Nam elana, he nau eliyau. Heiya te kaiwena ge ya ba Yayaluwa Bwabwalena ni ahiahiya eliyau ge ni papamasal eliyamiu." 16 Yeisu i ba vevehe al i ba, "Sauga kekeisi abwe nige nuku kikiteyau, yaa sauga kekeisi al abwe nuku kiteyau." 17 Wana tohago enuna hi pebaaba-agil hi ba, "Wana baaba ana sapu ga i ola toto i ba, 'Sauga kekeisi abwe nige nuku kikiteyau, yaa sauga kekeisi al abwe nuku kiteyau'? Ge i ba al, 'Nau ya nana Nam elana.' " 18 Heliya iyoho hi pepenelnel-agil hi ba, "Ana sapu ga i ola ge i ba, 'Abwe sauga kekeisi'? Wana baaba ana sapu kila nige ta aatena." 19 Yeisu i atena te wana tohago nuwaliya nihi nel elana, yaka i baek elal i ba, "Bi ola ge ku penelnel-agimiu no baaba ana sapu kaiwena, toto ya ba, 'Sauga kekeisi abwe nige nuku kikiteyau, yaa sauga kekeisi al abwe nuku kiteyau'? 20 Ya ba tunahot eliyamiu, abwe nuwamiu ni nak ge nuku kahin, yaa panayawi gamagaliliyau nihi yaliyaya. Lomwan nuku pwawa, yaa wami lomwan abwe ni pil ni na yaliyaya elana. 21 Ebo yova wana sauga ab, lomwan i pwawa, kaiwena wana sauga iyaka i vin. Yaa sauga ebo wawaya iyaka i sogu, inoke wana lomwan nige al i nunuwahikan, kaiwena i yaliyaya te wawaya iyaka i masal panayawi. 22 I ola al sauga ya komiu atemiu i lomwan, yaa abwe na kitemiu al ge nuku yaliyaya, ge nige gamagal etega wami yaliyaya ni aahek yoho. 23 Lan o elana nige bugul etega nuku neneli elau. Ya ba tunahot eliyamiu, hauna gun ebo nuku awanuni alau elana, Nam ni pewa. 24 Valila ge i nem ana siga sauga ya, nige alau elana bugul etega ku aawanuni. He nuku awanun, inoke nuku pwawa ge yaliyaya nuku kalaopopwi." 25 Yeisu i ba vevehe al i ba, "No baaba eliyana ya ba kakanun ya. Yaa sauga i nenem abwe nige al na babaa kakanun eliyamiu, yaa Nam kaiwena na ba hoti ya. 26 He sauga o alau elana nuku awanun. Nige ya babaa ola te tage kaiwemiu na awanun Nam elana, 27 kaiwena Nam totona i nunuwana-agimiu. I nunuwana-agimiu kaiwena komiu ku nunuwana-agau ge ku abulilek te nau ya neem Yehoba elana. 28 Nau ya neem Nam elana ge ya lau panayawi; he sauga ya panayawi ya eeguluwai ge ya sisikal Nam elana." 29 Yaka wana tohago hi ba, "He sauga ya iyaka u ba hoti te, nige ba kakanun i oola. 30 He iyaka ha kite te bugul gegewena u atena. Nige tage gamagal etega ni nel ga eliyam ge abwe wana nel nu lahe. He toto o i paabulilek-agima te owa u neem Yehoba elana." 31 Yeisu i baek wana tohago elal i ba, "Iyaka abwe ku abulilek sauga e? 32 Ana sauga iyoho i nenem, he iyaka i vin, ge abwe gegewemiu nuku liliwaliwali nuku na tomaha ona wami panuwaa, ge maiseu ya nuku eguluwagau. Yaa nige maiseu ya i oola, kaiwena alou Nam. 33 "Nuwau nuku atilaumwal kaiwena ku minaa eliyau, heiya ge kaiwena baaba bolo ya ya baunan eliyamiu. Abwe palopalomwan nuku pwawa panayawi elana. Yaa atemiu ni matuwa, kaiwena panayawi wana gasisi iyaka ya pakokove."

17

1 Yeisu baaba bolo ya i baunan haba, yaka matana i lihin labulabumwa ge i ba, "Nam, sauga iyaka i vin. Natum nu pawasawasa, inoke Natum ni pawasawasa-agiwa. 2 Kaiwena gasisi u pek elana gamagalau gegewel ni logugui-agil, inoke bosowaina yawal hot ni pek gamagalau gegewel elal bolo u pek elana. 3 Ge yawal hot iya te owa Yabowaine tutunahotina maisem nihi atenawa, ge Yeisu Keliso iya u patuna nihi atena. 4 Iyaka alam ya pawasawasa panayawiya, kaiwena tuwalali toto u pem ge na ginol, iyaka ya pwamowasi. 5 Nam, he nuwau sauga ya alou owa ta mina ge alau nu pawasawasa, ni ola te valila alou owa ta minaa wasawasa o elana mulaa abwe panayawi i gan. 6 "Iyaka ya pamasaliwa gamagalau elal, bolo u aheliya panayawi ge u pem elau. He heliya wam gamagalau ge abwe u pem elau. Inoke wam baaba hi henapuan, 7 ge iyaka hi atena te bugul gegewena bolo u pem elau hi neem elam. 8 Baaba bolo u pem eliyau iyaka ya baunan eliyalil, he iyaka hi hago ge hi yaliyaya-an. Inoke hi atena te tunahot nau ya neem elam, ge hi abulilek-an te owa u patunau. 9 Ya awanun kaiweliya. Nige ya aawanun panayawi gamagaliliyau kaiweliya, yaa bolo u pem elau kaiweliya, kaiwena heliya wam gamagalau. 10 No gamagalau gegewel heliya wam gamagalau, ge wam gamagalau gegewel heliya al no gamagalau. Ge gamagalau ya elal gamagalau panayawiya no wasawasa hi kite. 11 "He nau ya nonowa elam. Nige na miminaa al panayawi, yaa heliya nihi miminaa ga panayawi. O Nam Bwabwalena, alam wana gasisi elana nu matahikagil--he alan o iyaka u pem elau--inoke nihi tabwa maisena ni ola owa ge nau kila maisena. 12 Sauga alowau ha mina, alam wana gasisi elana ya matahikagil, he alan o iyaka u pem elau. Ya nolibulibu-agil, inoke nige etega i yayaomal, iyai ya te tau toto nuwana yaomal, inoke Buki Bwabwalena ana baaba i patunahot." 13 Nau ya nonowa eliyam, yaa sauga nau iyehe panayawi, no awanun o ya baunan, inoke no yaliyaya ateliya ni kalaopopwi. 14 Wam baaba ya baunan eliyalil, inoke panayawi gamagaliliyau hi pihigelgel-agil, kaiwena nige hi miminek panayawi gamagaliliyau ali boda elana, i ola nau nige ya miminek ali boda elana. 15 Ya awanun nige tage nu aheliya panayawi, yaa nu nolibulibu-agil Seitani elana. 16 Heliya nige hi miminek panayawi gamagaliliyau ali boda elana, i ola nau nige ya miminek panayawi ali boda elana. 17 Wam baaba i tunahot, inoke nuwau wam baaba tutunahotina ni tuwalaliya elal ge eliyana nu pwabwabwalena-agil wam tuwalali kaiwena. 18 Ya patunal hi tagil panayawi i ola u patunau ya nem panayawi. 19 Heliya kaiweliya ya pwabwabwalena-agau elam, kaiwena nuwau heliya al nihi bwabwalena hot elam. 20 "Nige ya aawanun ya te bolo ya kaiweliya, yaa ya awanun al bolo tohago ya wali wasa eliyana ge abwe nihi abulilek elau kaiweliya. 21 Ya awanun te heliya gegewel nihi tabwa maisena. O Nam, nihi minaa eliyala ni ola te owa u minaa elau ge nau ya minaa elam. Nihi tabwa maisena inoke panayawi gamagaliliyau nihi abulilek-an te owa u patunau. 22 Iyaka u pawasawasa-agau, inoke wasawasa o eliyana nau iyaka ya pawasawasa-agil, inoke heliya nihi tabwa maisena ni ola owa ge nau kila maisena. 23 Nau ya minaa elal ge owa u minaa elau, inoke ginol o eliyana nuwau heliya nihi tabwa maisena hot. Yaka panayawi nihi atena te owa u patunau ge bolo o u nunuwana-agil i ola u nunuwana-agau. 24 "Nam, bolo u pem elau, nuwau alowau naha mipamaisena labi toto nau na minaa, inoke no wasawasa nihi kite. He wasawasa o u pem elau kaiwena u nunuwana-agau mulaa abwe panayawi i gan. 25 Nam, Tosasapona hot owa, panayawi nige hi aatenawa, yaa nau ya atenawa, ge bolo u pem elau iyaka hi atena te owa u patunau. 26 Iyaka ya pamasaliwa elal, ge na ginol hikahikani, kaiwena nuwau nihi penununuwana-agil ni ola owa u nunuwana-agau, ge nuwau al na minaa elal."

18

1 Yeisu i awanun haba Tamana elana, yaka alonau wana tohago hi egon hi na sinawel Kidilon hi kalapanet-an ge hi na hi ha labena etega. He ebwakil olibe ana gungun etega iyoho labi o elana, inoke alonau wana tohago hi na hi tuk gamwanaa. 2 Yudasa toto Yeisu i wasaan labena o i atena bubun, kaiwena sauga i gewi Yeisu alonau ge wana tohago hi nana hi mimigogo labi o elana. 3 Inoke Yudasa alonau tolohaveyan ali boda etega, avaliyau ge Limi Bwabwalena ana pulisimanau enuna, bolo topowon bwabwatal ge Palisi hi patunal, hi nok hi na gungun o elana. He elikaya, odam ge elohaveyan hi noahel. 4 Yeisu iyaka i atena te hauna nasi ni gan elana, yaka i pulinok elal ge i ba, "Henala ge ku loyaan?" 5 Anana hi lahe hi ba, "Yeisu gagama Nasaleta." Yaka Yeisu i ba, "Nau te." (He Yudasa toto Yeisu i wasaan iyoho to alonau i taltalmilil.) 6 Sauga Yeisu i ba, "Nau te," inoke hi talsikal ge hi sogu bilibiliya. 7 Yeisu i nelil al i ba, "Henala ge ku loyaan?" Yaka hi ba, "Yeisu gagama Nasaleta." 8 Inoke analiya i lahe i ba, "He iyaka ya ba haba eliyamiu, nau te. Ebo ku loyaagau, inoke alowau bolo ya nuku piluwagil ge nihi egon." 9 I ba ola o, inoke wana baaba i tabwa tunahot, toto i ba, "Nam, bolo u pem elau nige etega ya papayaomal." 10 Saimon Pita wana elohaveyan kilepana i gan, inoke i kukuyagin abanaa ge topowon bwabwatal wali tohouwa wana totuwalali tanana toto labena awonaa i goyoho. Tau o alana Malkas. 11 Yaka Yeisu i baek Pita elana i ba, "Wam elohaveyan kilepana u teli pasikal abanaa. U nuwatu lomwan ana kom toto Nam i pem bahi na iim?" 12 Tolohaveyan ali boda avaliya wali tologugui, avaliyau ge Yudiya wali pulisimanau, Yeisu hi lib. Inoke hi yowan 13 ge houwan hi pwatanik Anasa elana. Anasa iya Kaiyapa yawana, Kaiyapa lagona tamana. Kaiyapa iya topowon bwabwatal wali tohouwa baliman o elana. 14 He Kaiyapa te i baek Yudiya wali tologugui elal i ba, "I waisi te gamagal maisena ni yaomal gamagalau kaiweliya." 15 Saimon Pita alona ge tohago etega al Yeisu hi noulil. Tohago toto o iya ana aatena i gan topowon bwabwatal wali tohouwa elana. Inoke iya alona Yeisu hi na hi tuk topowon bwabwatal wali tohouwa wana bakubakuwa, 16 yaa Pita i notalmilila bakubaku ana nog elana. Yaka tohago toto ana aatena i gan topowon bwabwatal wali tohouwa elana, i sikal i na i ba yova toto nog ana tomatahikan elana ge abwe Pita i en tukan. 17 Inoke yova toto nog ana tomatahikan i baek Pita elana i ba, "Age owa al tau o wana tohago etega?" Yaka Pita i ba, "Nigeya, nau nige i oola." 18 Panuwa i tultul, yaka totuwalali ge pulisimanau ginaha hi ton ge hi milipainan hi loloamwaligu. Inoke Pita i nok i na alonau hi talmilil ge hi amwaligu. 19 Topowon bwabwatal wali tohouwa Yeisu i neli wana tohago kaiweliya ge wana panpankiti al kaiwena. 20 Yaka Yeisu i ba, "Sauga gegewena ya baaba mwananala gamagalau elal. Ya panpankitiya limi tapwalolo ona elal ge Limi Bwabwalena elana, heliya Yudiya gegewel wali abamimigogo. Nige baaba etega ya babaa sume. 21 Inoke hauna kaiwena ge u nelau? Bolo no baaba hi hago nu nelil. Heliya no baaba gegewena hi atena." 22 Sauga Yeisu i ba ola o, yaka pulisiman etega toto i talmilila gegelinaa, Yeisu gegenana i taganepal ge i ba, "Hauna kaiwena ge u ba lahi topowon bwabwatal wali tohouwa elana i ola o?" 23 Yaka Yeisu i ba, "Ebo baaba etega ya ba panak, nu baunan gamagalau gegewel nihi hago. Yaa ebo ya ba bubun, he hauna kaiwena ge u taganepalau?" 24 (He ewasi Anasa Yeisu alona ge ana eyowan iyaka i patuna i nem Kaiyapa elana, iya topowon bwabwatal wali tohouwa.) 25 Saimon Pita iyoho i taltalmilil ge i amwaamwaligu, inoke gamagal etega i baek elana i ba, "Age owa al tau o wana tohago etega?" Yaka i alaha i ba, "Nigeya, nau nige i oola." 26 Topowon bwabwatal wali tohouwa wana totuwalali etega, iya tau toto tanana Pita i gogoyoho tutuna, i baek Pita elana i ba, "Owa heiya ya kitewa alom Yeisu olibe ana gungun gamwanaa, age?" 27 Yaka Pita i alaha al, ge sauga o elana kamkam melutauina i kahin. 28 Yudiya Yeisu hi ahe Kaiyapa wana limiya, ge hi en pwatanik Loma wali gavana Pilato wana limiya. Sauga o iyaka mweluluga lan i gangan. Nige hi tutuk gavana wana limiya, kaiwena ebo ni pabikel ge nige bosowailiya Nopalegi Hagalena enona nihi an. 29 Yaka Pilato i na i tagil Yudiya elal ge i nelil i ba, "Tau ya hauna gegi i ginol ge kaiwena ku wole?" 30 Anana hi lahe hi ba, "Binimala nige gegi etega ni giginol, he nige naha een pwatanim elam." 31 Pilato i ba, "He ku ahe ku na ku pakot totomiu wami logugui elana." Yaka Yudiya hi ba, "Yaa komiu Loma wami logugui nige i tatalam te tage ama Yudiya gamagal etega ana logugui naha ginol ge naha ba ni aliga." 32 He i masal i ola to, inoke Yeisu wana baaba ni tabwa tunahot, toto valila i baunan ge i pamasal hauna kaba yaomal elana ni yaomala. 33 Pilato i sikal i na limi gamwanaa, yaka Yeisu i yogaan ge i neli i ba, "Owa Yudiya wali kin?" 34 Yeisu i baek elana i ba, "Baaba toto u baunan totom wam nuwatu, o age gamagalau enuna wasau hi baunaniwa?" 35 Pilato Yeisu anana i lahe i ba, "Age u nuwatu nau Yudiya gamagalina, ine? Wam panuwa gamagaliliyau avaliyau ge wali topowon bwabwatal te hi ahewa ge hi telewa nimwawa. Hauna u ginol panak?" 36 Yeisu i ba, "No abalogugui nige i miminaa panayawi ya elana. Binimala ebo ni ola, he awau toabinau nihi lut nihi lohaveyan kaiweu, ge bahi Yudiya nihi yoyowanau. Yaa nigeya, no abalogugui nige i miminaa labena ya elana." 37 Pilato i ba, "Oo, he age owa kin!" Anana Yeisu i lahe i ba, "He totom te u ba, 'Owa kin.' Nuwatu toto kaiwena ge nain i abau ya nem panayawiya i ola hiwe: baaba tutunahotina na wasaan gamagalau elal. Gamagalau gegewel bolo hi minek baaba tutunahotina elana anau hi hago." 38 Inoke Pilato i nel i ba, "He baaba tutunahotina hauna kaba bugul?" Yaka i na i tagil al Yudiya elal ge i ba, "Nige ana woliwoli puna etega ya pwapwawa ge tage ana lahi na baunan. 39 He ku atena te baliman maisena ge maisena, Nopalegi Hagalena ana sauga elana, toulutuk dela etega na sokal kaiwemiu ge ni tagil. Tab nuwamiu komiu Yudiya wami kin na sokal kaiwemiu?" 40 Anana hi lahe hi yoga hi ba, "Nigeya, iya nige i oola! Ama nuwama Balabas!" Yaa Balabas iya totaulol ge tokaoma.

19

1 Inoke Pilato i ba tolohaveyan Yeisu hi ahe ge hihiu elololina elana hi nibinibihan. 2 Yaka pepesala hi ahe hi ginol ana hanahana ge hi teli kokowanaa. Kaliko yayapona matana pepol i ola kin ali kaliko, hi ahe ge hi pagaloi, 3 yaka hi nonok elana ge hi babaa, "Atema owa, Yudiya wali kin!" Inoke gegenana hi tataganepal. 4 Pilato i na i tagil al boda elal ge i ba, "Ku laegan! Na en tagilan nuku kite, inoke nuku atena te nige ana woliwoli puna etega ya pwapwawa ge tage ana lahi na baunan." 5 Inoke Yeisu i notagil, ana hanahana pepesala iyoho kokowanaa, ge kaliko yayapona matana pepol i galoi iyoho tuwanaa. Yaka Pilato i ba, "Ku kite! Tauina iya hiwe!" 6 Sauga topowon bwabwatal ge wali pulisimanau Yeisu hi kite, yaka hi yoga hi ba, "U lokolosan! U lokolosan!" Pilato analiya i lahe i ba, "Totomiu ku ahe ku na ku lokolosan. Nau nige ana woliwoli puna etega ya pwapwawa ge tage ana lahi na baunan." 7 Inoke Yudiya Pilato anana hi lahe hi ba, "Ama wama logugui etega i gan, ge logugui o i ba ni yaomal, kaiwena i ba tage iya Yehoba Natuna." 8 Sauga Pilato baaba o i hago, yaka i lovakun nabi hot. 9 Inoke i na i tuk al wana limi gamwanaa ge Yeisu i neli i ba, "He owa ga u neem?" Yaa Yeisu nige Pilato anana i lalahe. 10 Yaka Pilato i ba, "Nige nuwam nu baem elau? Tab u atena no gasisi i gan bosowaiu na sokaliwa o ebo na ba nihi lokolosagiwa?" 11 Yaka Yeisu i ba, "Binimala Yehoba nige gasisi ni tatalamwan elam, he nige wam gasisi ni gagan ge nu lologugui-agau. Inoke bolo hi talamwagau nimwamwa, heliya wali gegi wam gegi i bwata lake." 12 Sauga o elana Pilato kamwasa i loya ge Yeisu ni sokal. Yaa Yudiya hi ganyogayoga hi ba, "Ebo tau ei nu sokal, he nige Sisa wana heliyam i oola owa. Henala ebo totona i ba iya kin, iya i pihigelgel Sisa elana." 13 Sauga Pilato Yudiya wali baaba o i hago, inoke Yeisu i en tagilan noleleya, yaka Pilato i misiyo topapayatala wali abamisiyowa, abamisiyo o i minaa limi bebena etega alana hi ba, "Bwalal Pat." He alana pana Hibilu hi ba, "Gabata." 14 Lan o Nopalegi Hagalena ana lan lovivina, ge sauga o iyaka kelaubwa alalati bwagatau. Yaka Pilato i baek Yudiya elal i ba, "Wami kin iya hiwe." 15 Yudiya hi yoga hi ba, "U ahe u egonan! U ahe u egonan! U na u lokolosan!" Pilato i nelil i ba, "Nuwamiu wami kin na lokolosan?" Topowon bwabwatal anana hi lahe hi ba, "Nige wama kin etega al i gagan, iyai ya te Sisa maisena." 16 Yaka Pilato Yeisu i talamwan elal ge nihi lokolosan. Inoke tolohaveyan Yeisu hi ahe. 17 Totona ana kolos hi pakalivai ge i tagil panuwa tolinaa i na labi toto hi ba "Pana Babaloma." (He pana Hibilu hi ba "Goligota.") 18 Inoke hi lokolosana to. Gamagalau labui alonau hi lokolosil, etegana ana kolos hi pamilila labena awonaa, ge etegana labena gegebanaa, yaa Yeisu i minaa luwaluwala. 19 Pilato leleli etega i ginol ge i ba hi tagahikan Yeisu ana kolos elana. Leleli i ba, "Yeisu gagama Nasaleta, Yudiya wali kin." 20 Yudiya hi gewi leleli o hi vasili, kaiwena labi toto Yeisu hi lokolosana nige ana bwaga i yayapu panuwa bwabwatana elana, ge leleli o hi leli pana Hibilu, pana Loma ge pana Gilik elana. 21 Yudiya wali topowon bwabwatal hi nok hi na Pilato elana hi ba, "Binimala bahi nu leleli ola te, 'Yudiya wali kin.' Ya nu leli te, 'Tau ya i ba: Nau Yudiya wali kin.' " 22 Pilato analiya i lahe i ba, "Leleli toto iyaka ya leli, he iyaka ya leli." 23 Sauga tolohaveyan Yeisu hi lokolosan haba, yaka ana kaliko hi ahe ge hi wali, he teli wali ana gewi esopali, tolohaveyan maisena ge maisena tomaha ona ali kaliko. Ana holahola awaa al hi ahe, ge hi kite kaliko maisena ya te elana hi ginoliya, ge nige ana hel tubwi i gagan. 24 Inoke hi ba, "Bahi ta kukuleleli-an. He pat ta ahe ta galavenu-an, inoke henala ebo pat toto ana etotohi gaganina ni ahe, he ta pek elana." Hi ginol ola o, inoke Buki Bwabwalena ana baaba hi patunahot, toto i ba: "O kaliko hi wali hi guyauan elal, ge pat hi galavenu-an ge nihi kite henala o kama ni ahe." He tolohaveyan wali ginol i ola to. 25 Yeisu hinana alona talina, avaliyau Meli toto Kolopas lagona ge Meli Magidala yovana, hi talmilil ana kolos gegelinaa. 26 Yeisu matana i nok hinana i kite, ge tohago toto i nunuwana-an nabiyan i talmilil gegelinaa, yaka i baek hinana elana i ba, "Nevenak, natum tei." 27 Yaka i baek al tohago elana i ba, "Hinam tei." Inoke sauga o tohago nevenak i ahe, i na i matahikan wana limiya. 28 Yeisu i atena wana tuwalali gegewena iyaka i mowasi, inoke Buki Bwabwalena ana baaba ana patunahot kaiwena i ba, "Ya walem." 29 Oine manumanunina ana patuna etega iyoho to. Balou hi ahe hi pahun oine manumanunina elana i vinum, yaka hisopa lana etega hi ahe balou hi howa, inoke hi paelu heyan Yeisu hohopenaa. 30 Sauga i im, yaka i ba, "Iyaka i mowasi." Inoke kaununa i pwabun lowan, yaka yawalina i talamwan i mowasi. 31 Lan o Sabwata ana lan lovivina, ge lan ni gan Sabwata bwabwatana alana gaganina etega. Yudiya nige nuwaliya Yeisu ge alonau tuwaliya ni kukukiya kolos elana ge Sabwata ni pwawa, inoke hi na hi awanun Pilato elana ge ni ba tolohaveyan Yeisu ge alonau aeliya nihi tagagabom, ge tuwaliya nihi bugul lowan. 32 Yaka tolohaveyan hi nok hi na gamagalau bolo avaliya Yeisu hi lokolosagil, etegana aena hi tagagabom, yaka abwe hi na labuina al aena hi tagagabom. 33 Yaa sauga hi nok Yeisu elana, hi kite yawalina iyaka i mowasi, inoke aena nige hi tatagagabom. 34 Yaa tolohaveyan etega gau i ahe Yeisu luluna i howa, yaka etimwawa saliya ge wewel i sani tagil. 35 Tau toto bugul ya i kite i gan, iya i wasaan, ge wana wasa i tunahot. I atena wana baaba i tunahot, ge iya i wasa inoke komiu nuku abulilek. 36 Bugul ya i gan inoke Buki Bwabwalena ana baaba i patunahot, toto i ba, "Nige tutuwana etega ni mwamwagabom." 37 Ge Buki Bwabwalena ana baaba etega al i ba, "Toto hi howa nihi gayawaan." 38 Bugul ya i mowasi, yaka Yosepa gagama Alimadiya i na Pilato elana Yeisu tuwana ni patalam. He Yosepa iya Yeisu wana tohago etegana, yaa i tohago sumi, kaiwena Yudiya wali tologugui i lovakunagil. Pilato i talam, yaka i nok i na Yeisu tuwana ni ahe. 39 Nikodimas alona Yosepa hi nok, Nikodimas toto valila bulin gamwana i nok i na Yeisu i kite. Iya enonu bwalena waiwaisana, meya alona ge alos hi vikuhu, i noahe, ana pulowan i ola teti kiloglem (30 kg). 40 Heliya Yeisu tuwana hi ahe, enonu bwalena waiwaisana o elana hi paenonu, yaka kaliko waiwaisana ge yayapona hi ahe tuwana hi avan. He hi ginol i ola to, i ola Yudiya wali yaomal ana teliteli paganina. 41 Labena toto Yeisu hi lokolosana, eyowa etega i minaa to. Eyowa o gamwanaa salai etega hi ken tukan, salai o i vavaluna ge nigeya ga gamagal etega i kekenuwa. 42 Lan o Yudiya wali lan lovivina, yaka lan ni gan lan Sabwata, ge salai o i mikelaubwa. Inoke Yeisu tuwana hi kalivai hi na hi teliya to.

20

1 Wik ana lan houwan elana mweluluga kekeisi, panuwa nigeya ga i mwamwananal, yaka Meli Magidala yovana i na salaiya, inoke i kite pat toto salai awana ana epaankaus iyaka hi pakul egonan. 2 Yaka i patalelu sikal i na Saimon Pita ge tohago toto etega elal, tohago toto Yeisu i nunuwana-an nabiyan. Inoke i ba, "Babala tuwana iyaka hi ahe salaiya, ge nige ha aatena te ga hi teliya!" 3 Inoke Pita alona ge tohago toto etega hi egon nihi na salaiya. 4 Ali toto eluwa hi patalelu, yaa tohago toto etega alona i patalelu luwai, i na i vin houwa salaiya. 5 I imowan tuk, ge kaliko toto Yeisu tuwana ana os i kite, yaa nige i tutuk. 6 Saimon Pita mulaa abwe i vin, yaka i tatahot i na i tuk salaiya. Kaliko toto Yeisu tuwana ana os iyoho i kite abanaa, 7 ge i ola al kaliko toto kokowana ana os i kite. Nige i miminaa tuwan ana os elal, yaa ana awa i ola te gamagal etega i gagabom ge i teli getogaan. 8 Yaka tohago toto etega, toto i vin houwa salaiya, mulaa abwe i tuk al, inoke i kite ge i abulilek. 9 (He Buki Bwabwalena ana baaba ana sapu nigeya ga hi aatena, toto i ba Yeisu abwe ni lutem yaomala.) 10 Yaka tohago hi sikal hi na wali limiya. 11 Meli iyoho i taltalmilil salai tolinaa i kahikahin. I kahikahin gamwanaa inoke i imowan tuk salaiya, 12 yaka aneloseyau labui i kitel kaliko yayanana hi galoi, hi misiyowa toto Yeisu tuwana i kenukenuwa. Etegana i minaa kokowana abanaa, ge etegana i minek aena abanaa. 13 Inoke hi neli hi ba, "Yova, hauna kaiwena ge u kahikahin?" Yaka analiya i lahe i ba, "No Babala tuwana iyaka hi ahe egonan, he nige ya aatena te ga hi teliya." 14 Sauga i ba ola o, yaka i tagena sikal ge i kite Yeisu i taltalmilil, yaa nige i aatena te age iya Yeisu. 15 Yaka Yeisu i nel elana i ba, "Yova, hauna kaiwena ge u kahikahin? Henala u loloyaan?" Meli i nuwatu tage eba iya toeyowa, yaka i baek elana i ba, "Tonowak, ebo no Babala tuwana u kalivai egonan, he no wasa u pem ga u teliya, inoke na nok na na na ahe." 16 Yeisu i baek elana i ba, "Meli!" Yaka Meli i milil pil, ge i pana Hibilu i ba, "Laboni!" (Baaba ya ana sapu heiya "topankite.") 17 Yeisu i baek elana i ba, "Bahi nu pipihikagau ge nu kukuhikagau! Kaiwena nigeya ga ya sisikal ya haha Nam elana. Yaa u nok u na taliwau elal ge wali wasa nu pek te, 'Ya sisikal ya nana Nam ge komiu Tamamiu elana, no Yabowaine ge wami Yabowaine elana.' " 18 Inoke Meli Magidala yovana i nok i na i baek tohago elal i ba, "Babala iyaka ya kite." Ge baaba toto Yeisu i baunan elana i wasaan elal. 19 Lan toto o, iya wik ana lan houwan, sabwelu iyaka i lobek ge bulin i gan, he tohago heliya iyoho hi mipamaisena limi etega elana, ge ana nog hi loka kaus, kaiwena Yudiya wali tologugui hi lovakunagil. Inoke Yeisu i na i tuk i talmilil gamwaliyaa, yaka i ba, "Atemiu ni laumwal!" 20 Baaba o i baunan enaa, yaka nimana ge luluna i pankitel. Sauga tohago Babala hi kite, inoke hi yaliyaya nabi. 21 Yeisu i ba vevehe al i ba, "Atemiu ni laumwal! Komiu na patunamiu nuku nok, ni ola nau Nam i patunau ge ya nem." 22 Baaba o i baunan, yaka i yana yohoek tohago elal ge i ba, "Yayaluwa Bwabwalena ku ahe. 23 Ebo gamagalau wali gegi Yehoba matanaa nuku nuwayoho, he Yehoba iyaka i nuwayoho; ebo gamagalau wali gegi nige nuku nunuwayoho, he Yehoba nige ni nunuwayoho." 24 Sauga Yeisu i masal wana tohago elal, he tohago bolo ali gewi elulutega eluwa avaliya etega alana Tomas (iya alana etega al te Didimas) nige i miminaa alonau elal. 25 Yaka wana pan tohago wana wasa hi pek hi ba, "Babala ha kite." Yaka Tomas i baek elal i ba, "Ebo nige ana nel mulina na kikite nimanaa ge nimwau gigina na teteliya mul o eliyana, ge ebo nige nimwau na teteliya lulunaa, ana gau mulina gamwanaa, he nige na aabulilek." 26 Wik maisena i mowasi, tohago heliya iyoho limi gamwanaa, avaliya ge Tomas. Nog hi loka kaus, yaa Yeisu i na i tuk i talmilil gamwaliyaa ge i ba, "Atemiu ni laumwal!" 27 Inoke i baek Tomas elana i ba, "Nimwau u kitel ge nimwam gigina nu teliya hiwe. Yaka nimwam nu paelu ge nu teliya luluwa o gau mulina gamwanaa. Bahi al nuwa eleluwa, yaa nu abulilek." 28 Tomas i baek elana i ba, "No Babala ge no Yabowaine!" 29 Yaka Yeisu i baek elana i ba, "U kiteyau inoke abwe u abulilek? He bolo nige hi kikiteyau ge hi abulilek, Yehoba ni muloluagil." 30 Yeisu ginol yawiyawi hi gewi al i ginolil wana tohago mataliyaa, yaa nige leli tukanina i gagan buki ya gamwanaa. 31 He wasa bolo ya lelena i gan inoke nuku abulilek te Yeisu iya Mesaiya, Yehoba Natuna, ge wami abulilek o kaiwena iya alana elana yawalimiu hot nuku pwawa.

21

1 Sauga etega al Yeisu i masal al wana tohago elal Hoga Taibeliyas ana talbwasiya. He i gan i ola hiwe. 2 Saimon Pita, Tomas (iya alana etega al Didimas), Nataniyel (iya gagama Kena Galili awanina), Sebedi natunau eluwa avaliyau ge tohago eluwa al hi mipamaisena. 3 Saimon Pita i baek alonau elal i ba, "Nau ya nana ya lologi." Yaka heliya hi ba, "Ha nonowa aloma owa." Inoke hi nok hi na hi gaiha wagaa, ge hi na hi logi matavi, yaa bulin o nige moti etega hi lologe. 4 Mweluluga sabwelu i haha, Yeisu i na i talmilil talbwasiya, yaa tohago nige hi aatena te iya Yeisu. 5 Inoke i yoga nok elal i ba, "Alowau, tab moti etega ku loge?" Anana hi lahe hi ba, "Nigeya." 6 Yaka i baek elal i ba, "Wami vineya ku alipaloek waga bebena toto nimamiu labena awomiu elana, inoke moti enuna nihi ona." Inoke vineya hi alipalo hogaa, ge nige bosowailiya nihi momol pahe waga gamwanaa, kaiwena moti hi gewi nabi hi ona. 7 Yaka Yeisu wana tohago toto i nunuwana-an nabiyan, i baek Pita elana i ba, "Babala to!" Sauga Saimon Pita i hago tohago o i ba, "Babala to," inoke ana kaliko toto i loho i teli, i ahe i galoi, i supeni lau hogaa ge i gayutuk. 8 Tohago gegewel al waga elana abwe hi gotuk, ge vineya hi gomomol moti hi kalaopop gamwanaa, kaiwena nige ali bwaga i gagan datuwa, ana yapu tabam wan handeled mita ya. 9 Sauga hi gotuk ge hi gailau, ginaha hi kite ge moti enuna iyoho ginaha kiyalina gamwanaa, ge beleid enuna al hi kite. 10 Yaka Yeisu i baek elal i ba, "Moti bolo abwe ku logel enuna ku pwatanim." 11 Yaka Saimon Pita i na i ha wagaa, inoke vineya i momol tukan datuwa. Moti bwabwatal hi kalaopop vineya gamwanaa, ali gewi 153 He bwagana moti ali gewi i ola o, yaa vineya nige i mamalabu. 12 Yeisu i baek elal i ba, "Ku nem ku anan." He nige bosowailiya tage etega ni nel elana ni ba, "Henala owa," kaiwena iyaka hi atena te iya Babala. 13 Inoke Yeisu i nok i na beleid i ahe i pek elal, ge i ginol i ola al to moti elana. 14 He Yeisu wana lut al enaa, wana masal paetonina te wana tohago elal. 15 Sauga hi anan haba, yaka Yeisu i baek Saimon Pita elana i ba, "Saimon Diyon natuna, tab u nunuwana-agau nabiyan, ge bolo ya wali nunuwana i bwata lake?" Pita i ba, "Ibwe, Babala, u atena te ya nunuwana-agiwa." Yaka Yeisu i baek elana i ba, "No sipi natunau nu paanil." 16 Yeisu i ba paeluwana i ba, "Saimon Diyon natuna, tab u nunuwana-agau nabiyan?" Pita i ba, "Ibwe Babala, u atena te ya nunuwana-agiwa." Yaka Yeisu i baek elana i ba, "No sipi nu matahikagil." 17 Yeisu i nel paetonina Pita elana i ba, "Saimon Diyon natuna, tab u nunuwana-agau?" Pita atena i lomwan kaiwena Yeisu i nel paetonina i ba, "Tab u nunuwana-agau?" Yaka i ba, "Babala, owa bugul gegewena u atena. U atena te ya nunuwana-agiwa." Yaka Yeisu i baek elana i ba, "No sipi nu paanil. 18 Ya ba tunahot eliyam, wam sauga heval totom am belet u gimwan ge u nok labi toto nuwam nu noek. Yaa bwaliga ebo nu liki, nimwam nu latahin inoke gamagal etega ni yowaniwa ge ni nuliwa nu nok labena toto nige nuwam nu noek." 19 Yeisu i ba ola o ge i pamasal bwaliga Pita hauna kaba yaomal elana ni yaomala ge Yehoba alana ni pawasawasa. Inoke i baek Pita elana i ba, "U toulilau!" 20 Pita i tagena sikal ge tohago toto etega, toto Yeisu i nunuwana-an nabiyan, i kite i noulilem eliyaa. (He iya te valila aanan ana sauga elana i gena nok Yeisu elana ge i ba, "Babala, henala ge ni wasaagiwa?") 21 Sauga Pita tohago o i kite, inoke i nel Yeisu elana i ba, "Babala, yaa tau ya nasi ga ni ola?" 22 Anana Yeisu i lahe i ba, "Binimala ebo nuwau iya ni mina ana siga na sikalim al, he ga i ola elam o? Owa nige wam labi i oola to. Owa u toulilau." 23 Yaka wasa kakawi etega i lelu Yeisu ana tototoulil gamwaliyaa tage tohago toto o nige ni yayaomal. Yaa Yeisu nige i babaa ola te nige ni yayaomal. Yaa iya i ba, "Binimala ebo nuwau iya ni mina ana siga na sikalim al, he ga i ola elam o?" 24 Tohago toto ya iya te bugul bolo ya i wasaan ge i leli lowan buki ya gamwanaa. Ge ta atena iya wana wasa i tunahot. 25 Yeisu bugul hi gewi nabi al i ginolil. Binimala ebo maisena ge maisena leli lowanina ni gan, he ya nuwatu panayawi nige i bwabwata ge buki bolo nihi leli o abana ni gan.