Lele Mohende da ari pinokodungkuno Yahya
Haratia tewali manusia
1 Iso-isono die wita'ea nahinapo, sawali koie Haratia dahomo. Ronga koie Haratia dahomo merongaakono Apu Alla. Koie Haratia yahomo Apu Alla. 2 Iso-isono koie Haratia dahomo merongaakono Apu Alla, 3 ronga mentete koie Haratia kai pinadadi luwu da da'a. Saliwano Iaa, luwu da da'a, mau te'asa, nahina danta da'a. 4 Koie Haratia pu'uno toraaha, ronga koie toraaha da pokomolinyaahomo to manusia. 5 Koie da molinyaa koniwinca hai laro rondomaa, ronga koie da rondoma nai pokopopatee. 6 Kai leu me'asa miano tinenano Apu Alla da meneehako i Yahya. 7 Nileuhakono tewali saksii nta leleako koie da molinyaa, kando memparasaea luwu miano. 8 Koie i Yahya na'iaa da molinyaa, te'iaasi leleako da molinyaa. 9 Molinyaaha da santo'u-to'uno da pokomolinyaaho pera manusia, leuhomo die hai wita'ea. 10 Koie da molinyaa dahomo die hai wita'ea, ronga Apu Alla ari weweuho koie wita'ea mentete hai Iaa, sawali miano wita'ea nasando to'orio. 11 Leu hai wonuano, sawali ihi wonuano nasando me'ehee. 12 Sawali luwu miano da ehee ronga parasaeaho, namoweehira kuasa kando tewali anano Apu Alla. 13 Kando tewali anano Apu Alla na'iaa mebinta hai miano motu'ando, na'iaa po'eheno miano, sawali mebinta hai Apu Alla. 14 Koie Haratia tewaliomo manusia ronga dakitamo mperonga. Dakitamo ontoo kuasano da owose hi ari moweeho Tamano nangkua Ana nte'iaano, kato ontoo menonano hi owose pompeehawano Apu Alla cita. 15 Kai leu i Yahya tuluraa dadaano koie Haratia ronga mekora mogau kanahi, "Diemo da ari tinulurangku danta leu merumbuihakuo, sawali kolaloo owose ka'iaa i'aku, kana'umpe peri'ouho da'a ka'iaa i'aku." 16 Tende owoseno pololarono, kato awaa luwunto pompeehawano da sai hina puraano. 17 Boku Parentano Apu Alla pinokodungkuno nabii Musa, sawali pompeehawa ronga pompotisu da menona mebinta hai Yesus Kristus. 18 Nahina te'asa miano da ari ontoo Apu Alla, saliwano koie Ana nte'iaano hai inampuhano Tamano da ari pokomentoda'akita'o.
Da nileleakono i Yahya pompobaho
19 Kanamo die polawanino i Yahya tempondo meleu awaa opia pua'ima ronga miano Lewi mpebinta hai Yerusalem, tinenado ponggawano miano Yahudi mpetukanaiho kinaiho iaa. 20 Kai polawani koie i Yahya sai mowuni-wuni kanahi, "Na'iaa i'aku koie Mokole Pompokosalama." 21 Yahopo kando petukanaiho, "Kicana koie, co'omo bara nabii Elia?" Kai polawani, "Na'iaa." "Co'omo bara koie nabii danta leu?" Kai polawani Yahya, "Na'iaa." 22 Kando kanahi, "Kicana koie, po'awaakami inaico, kako to'ori mo'awaakondo miano da tenakami. Nde'e, hapa nta kanahiu?" 23 Kai polawani, "I'akumo die da kinahiino nabii Yesaya, 'Miano da mehohou hai lueno papawu kanahi, "Mimpokoteakono'o nta salano Apu." ' " 24 Ronga ko'ira da tinenado miano golonga Farisi 25 mpetukanaiho, "Ki sa'iaa co'o Mokole Pompokosalama, ki sa'iaa Elia, ki sa'iaa nabii danta leu, yo hapa kau pompobaho?" 26 Yahopo koie i Yahya kai lawanihira kanahi, "Aku mobaho'ako e'e, sawali koie da mentade perongamiu da sai tino'orimiu, 27 yahomo danta leu merumbui. Sawali mau huda'akono'o sandalano, naku pantasi." 28 Luwu koie kadadiahano hai Betania tindaa mata oleo hai laa e'e Yordan, nte popobaho'ano i Yahya.
Ana Dombano Apu Alla
29 Sameantanomo kai ontoo i Yahya hi leu i Yesus tepo'awaakono. Kai kanahi i Yahya, "Ontoopo, Ana Dombano Apu Alla da kikihio dosano wita'ea. 30 Iaamo da kinahiincu, danta leu merumbui, sawali kolaloo owose ka'iaa i'aku, kana'umpe peri'ouhomo da'a kaku da'a. 31 Iso-isono, mau i'aku naku da'a to'orio kinaiho Iaa, sawali leungku mopobaho'ako e'e, kando mento'orio miano Israil hicuamo Iaa." 32 Kai pontulura da inontono koie i Yahya kanahi, "Ariaku ontoo Sangkoleono Apu Alla da kana ticokou mebinta hai langi hi tudu hai wawono kando pono-ponoha. 33 Koie tempo naku da'apo to'orio kinaiho Iaa, sawali Apu Alla da ari tena'aku mobaho'ako e'e, hina mo'awaakuo, 'Kiu ontoo koie Sangkoleono Apu tudu hai wawono koie miano kando pono-ponoha, yahomo danta mobaho'ako Sangkoleono Alata'ala.' 34 Koie luwu ariakumo ontoakono'o matangku, yahomo kaku mangaku hicuamo Iaa Anano Apu Alla."
Ana guruno i Yesus da iso-iso
35 Sameantanomo dahomo mentade koie i Yahya meronga orua miano ana guruno. 36 Sa'ontoo hi tealo i Yesus kai kanahi, "Ontoopo Ana Dombano Apu Alla." 37 Sando podeaho ko'ira orua ana guruno, nilakodo nunutako i Yesus. 38 Sawali i Yesus hina molihe hai bungku kai ontohira hindo daa nunutako, yahomo kai petukanaihira kanahi, "Yo hapa da inu'ungkemiu?" Kando polawani kanahi, "O Rabi, hai hapa dahamiu moo'ia?" (Rabi batuano tuangguru.) 39 Kai koharatia koie i Yesus, "Mileumo ontoo pantamiu." Kando mperonga nde'e lako ontoo poo'iahano. Koie wotu dahomo tete opaa kiniwia, nangkuamo kando poo'ia merongaa. 40 Orua'ira da modeaho koie da tinulurano i Yahya ronga nunu'o i Yesus, koie da me'asa meneehako i Andreas, petilano i Simon Petrus. 41 Isono i Andreas lako u'ungkee i Simon ronga mo'awaakono kanahi, "Aricamimo awaa koie Kristus." (Kristus batuano Mokole Pompokosalama). 42 Koie i Andreas wawaa i Simon lako hai Yesus. Sa'o'ontoo kai koharatia, "Co'o Simon, anano Yohanes. Co'o nta neeu i Kefas." (Kefas pengkenano Petrus, batuano "watu".)
I Yesus boboihira i Filipus ronga i Natanael
43 Sameantanomo kai pepatudu koie i Yesus nta lako hai Galilea. Kai tepo'awaakono i Filipus ronga koharatia, "Leumo nunu'aku!" 44 Koie i Filipus pebintaano hai Betsaida, kampodo i Andreas ronga i Petrus. 45 Kai lako koie i Filipus kando tepo'awa i Natanael, kai po'awaakono kanahi, "Aricamimo tepo'awaakono koie miano da teburi hai Boku Parentano nabii Musa ronga raro nabii, yahoo i Yesus, anano i Yusuf da mebinta hai Nazaret." 46 Sawali Natanael namolawani kanahi, "Tule'io bara da'a anu da moico danta saba hai Nazaret?" Kai polawani i Filipus, "Leumo ontoo panta'u." 47 Sa'ontoomo koie i Yesus hi leu i Natanael, kai koharatia, "Ontoopo die miano da pantasi nineehako miano Israil to'u, nai molincu pelaroano." 48 Kai petukanaiho i Natanael koie i Yesus kanahi, "Kana'umpe kami nto'oriaku?" Kai lawanio, "Nai da'apo boboico i Filipus, Ku'ontokomo hai pu'u ngkeu ara." 49 Kai kanahi i Natanael, "O tuangguru, Comiu Anano Apu Alla. Comiu mokoleno Israil." 50 Kai lawanio i Yesus kanahi, "Kau parasaea tendenomo hicu kanahi ariaku ontoko koie hai pu'u ngkeu ara? Dakopo nta mo'onto da kolalo owose ka'iaa koie." 51 Kai koharatia penda, "Parasaea to'umo, santo'u-to'uno dakomiu nta ontoo langi teboa, kando mperuru mala'ekati tii ronga sabe hai ra'ino Ana Nto Manusia."
Ndo'ua kawi'a hai Kana
1 Oleo ko'otolu dahoo me'asa ndo'ua ngkawi'a hai Kana wonua Galilea, ronga tinano Yesus dahoo itai na'ico. 2 Koie i Yesus ronga ana guruno itaihiramo niboboi hai ndo'ua. 3 Sapurano anggurudo, koie tinano Yesus mo'awaakono kanahi, "Puraamo anggurudo." 4 Kai lawanio kanahi, "Ina, hapa da kanahiu hai Aku? Nai da'apo dungku'o tempongku." 5 Sawali koie tinano Yesus namo'awaakondo ko'ira da mpontadehi kanahi, "Ki hapa dahano tenakomiu, miweweuhomo." 6 Na'ico, dahoo onoo bengki watu da tepasadia nta pe'uwohia nunu'o atorano agama Yahudi, ihino asa bengki dahoo da halu pulu litere dungku da asa etu rua pulu litere. 7 Kai tena'ira koie i Yesus ko'ira da mpontadehi kanahi, "Ihianiakono'o e'e ko'ira bengki." Kando ihianio nde'e dungku kai pono. 8 Yahopo kai tena'ira kanahi, "Pontambumo te'ete, kami wawaakono'o koie ponggawano ndo'ua." Kando wawaakono'o nde'e, 9 kai sile'o koie e'e hi tewalimo angguru, sawali nasai to'orio pebintaano, hina nte'iaasi ko'ira da mpontadehi da to'orio. Yahomo kai boboiho koie tama ntei ndo'ua, 10 ronga mo'awaakono kanahi, "Biasano miano mosabahako angguru da moico kando mendo'uo mperi'ou, perumbuinopo kindo molangumo kai sabahako da sai da'a lalo'ea moico. Sawali co'o, dungku diekana dakosi modio angguru da moico." 11 Koiemo peto'o tekangka, mata iso niweweuno i Yesus hai Kana wonua Galilea, mentoda'ano hi owose kuasano kando memparasaeaho ana guruno. 12 Sa'arino koie, melako'iramo i Yesus, tinano, raro mpetilano, ronga ira ana guruno hai Kapernaum, kando poo'ia na'ico opia oleo.
I Yesus mokowuaho raha mpesombaa
13 Okudaamo oleo owoseno miano Yahudi, yahoo oleo Ntepulosi'a, kai sabe koie i Yesus hai Yerusalem. 14 Hai uluano raha mpesombaa medaahandomo miano pabalu sapi, domba, ronga ticokou, naamo miano da mentotoro mpontuka doi na'ico. 15 Kai poweweu wosu koie i Yesus mebinta hai ula niwoti, yahopo kai saarihira luwu miano ronga kadadi, kana domba ronga sapi, kando mpeluarako mebinta hai uluano raha mpesombaa. Kai balengka'o medando miano mpontuka doi kai tekamburako doido. 16 Yahopo kai tena'ira ko'ira da mpobalu ticokou kanahi, "Alaa kami wawaa luwu. Mi'osie weweuho rahano Tamangku tewali laica mpebalu-balu'a." 17 Yahopo kando pokopehawa'o ko'ira ana guruno da teburi hai Boku Haratiano Apu Alla, "Tendenomo pompeehawaku rahamiu kai kana da kokaa pelaroangku." 18 Ko'ira ponggawano miano Yahudi mpekakahi'iramo ronga i Yesus kando kanahi, "Tanda hapa hiu daa nta popo'ontonicami kau moseka moweweu da kana diie?" 19 Kai lawanihira i Yesus, "Rowa'omo die raha mpesombaa, mangkumo wanguo larono otolu oleo." 20 Kanahi'iramo ko'ira miano Yahudi, "Pato pulu onoo ta'u mengkauno miano hedoo die raha mpesombaa kai ari. Daako bara nta tule'i wanguo larono otolu oleo?" 21 Mainakaa da patuduno koie raha mpesombaa yahoo wotoluno. 22 Perumbuinopo hi pewangumo mebinta hai matea, yahopo kando pokopehawa'o ko'ira ana guruno ronga parasaeaho hapa da ari kinahiino, ronga da teburi hai bolo Boku Haratiano Apu Alla.
I Yesus to'orio luwu miano
23 Daanopo koie i Yesus hai Yerusalem konaa oleo owose Ntepulosi'a, me'aluo miano da parasaeaho, tendenomo hindo ontoomo ko'ira peto'o tinekangkaako da niweweuno. 24 Sawali i Yesus nasai parasaeahira, kana'umpe hina nto'orihirasi luwu miano. 25 Nangkuamo kasai paraluu da'a te'asa miano da mo'awaakono mekona dadaano miano, tendenomo hina nto'orio ihi mpelaroano to manusia.
I Yesus ronga Nikodemus
1 Dahoo me'asa miano golonga Farisi da meneehako Nikodemus, ponggawano miano Yahudi. 2 Me'asa malo kai leu awaa i Yesus ronga kanahi, "O tuangguru, dakamisi to'orio hicua Comiu guru da tinenano Apu Alla. Kana'umpe nahina te'asa miano da to'ori moweweu tinekangkaako kana da niweweumiu, ki sai da'a merongaa Apu Alla." 3 Kai lawanio koie i Yesus, "Santo'u-to'uahano Kupo'awaakoko: Nahina te'asa miano danta to'ori mewiso hai pomparentaano Apu Alla ki sai pinokohina mpendua." 4 Kai kanahi i Nikodemus, "Kana'umpe kai to'ori pinokohina mpendua koie miano ki motu'amo? Dahopo bara nta to'ori mewiso penda hai tiano tinano, yahopo kai pinokohina mbule?" 5 Kai polawani koie i Yesus, "Santo'u-to'uahano Kupo'awaakoko: Ki sai tehina miano mebinta hai e'e ronga Sangkoleono Apu, koie miano nai da'a nta to'ori mewiso hai pomparentaano Apu Alla. 6 Miano da tehina hai to manusia dada'iaangkosi miano, sawali miano da pinokohinano Sangkoleono Apu, toraako Sangkoleono Apu. 7 Osie banga kicu kanahi, 'Co'o nai tewali sai pinokohina mpendua.' 8 Sangkoleono Apu kana ngalu da mepuuri dahano po'eheno, cita te'iaasi modeaho ruruno, sawali nai tino'ori pebintaano atawa nta pe'o'alaano. Kanamo ko'ira miano da pinokohinano Sangkoleono Apu." 9 Kai petukana i Nikodemus, "Ki kana'umpe kai to'ori kana koie?" 10 Koharatia'omo koie i Yesus, "Co'o koie guruno miano Israil, kana'umpe kasau to'orio? 11 Santo'u-to'uahano Kupo'awaakoko: Koie da nigaumami, koto'orio, ronga kotuluraa kona ari ontoo, sawali comiu nami ehe parasaea. 12 Nami mparasaea hicu pontuluraakomiu hapa da ari kadadia die hai wita'ea, lalo'eahopo kicu pontuluraakomiu da mekona hai suruga. 13 Nahina miano da ari sabe hai suruga, saliwano Iaa da tii mebinta hai suruga, yahoo Ana Nto Manusia. 14 Ronga kana to'usi i Musa hi ari montoehako ule tambaga hai keu ntinisakako hai lueno papawu, nta kanamo koie Ana Nto Manusia ki tinoehako, 15 kando mpo'awa tora ngkaidaaha pera miano da parasaeaho." 16 Tende pololarono Apu Alla die wita'ea kai weehakita'o Ana nte'iaano, kai pera miano da parasaeaho osie mate, sawali mo'awa tora ngkaidaaha. 17 Kana'umpe kai tena'o Apu Alla Anano kai leu die hai wita'ea, na'iaa nta hukumaa wita'ea, sawali nta mokosalama'o. 18 Inai da parasaeaho nai da'a nta awaa hukuma, sawali da sai parasaeaho awaamo hukumano Apu Alla, kana'umpe nasai ehe parasaeaho Ana nte'iaano Apu Alla. 19 Ronga diemo dadaano kando nihukuma, dahomo da molinyaa die hai wita'ea, sawali to manusia nangkolalo ehee da rondoma ka'iaa da molinyaa, kana'umpe niweweundo mosa'oo. 20 Kana'umpe pera miano da moweweu mosa'o kokoleaho da molinyaa, ronga nai ehe mesabahako dahano molinyaa, hina nta inonto niweweuno da mosa'o. 21 Sawali inai da weweuho da menona ehee da molinyaa, kai mentoda da niweweuno hi daasi nunu'o po'eheno Apu Alla.
Pontulurano i Yahya dadaano i Yesus
22 Sa'arino koie, kai lako i Yesus ronga ana guruno hai wonua Yudea, ronga mpoo'ia na'ico kai pompobaho. 23 Koie na'ana i Yahya dahoo mopobaho hai Ainon okudahio Salim, hina me'alu e'e kokeena, ronga me'aluhira miano da meleu nta nibaho. 24 Kana'umpe koie tempo, i Yahya nai da'apo niwiso hai bolo ngkatorungku. 25 Ana guruno i Yahya ronga miano Yahudi menteposala'ako daa-daano pepokomowuahano wotolu nunu'o atorano agama Yahudi. 26 Nangkuamo kando meleu hai Yahya mo'awaakono kanahi, "O tuangguru, koie miano da perongamiu hai asa poleno e'e Yordan, da ari tinuluramiu dadaano, dahoo na'ana mopobaho, ronga luwu miano lako hai Iaa." 27 Kai lawanihira i Yahya kanahi, "Nahina te'asa miano da mo'ala panta tarono, ki sai pinoweehi mebinta hai Apu Alla. 28 Comiu na'amiu saksii'aku, hicu ari kanahi, 'Na'iaa i'aku Mokole Pompokosalama, sawali da tinena meri'ouhakono.' 29 Da kohaku'ako koie tina niwawa, yahoo tama niwawa. Sawali koie tokiano tama niwawa, da mentade okudahio ronga modedeaho, taperano mohende modedeaho koie suarano tama niwawa. Kanamo koie mohendeku na'angku, taperano sanaa larongku. 30 Iaamo danta kolalo te'angga, sawali i'aku nta sateru-terurungkumo." 31 Inai da mebinta hai suruga, kolaloo te'angga ka'iaa luwu miano die hai wita'ea. Inai da mebinta die hai wita'ea, iaa miano wita'ea, ronga hi pogau, gaunomo miano wita'ea. Inai da mebinta hai suruga, Iaamo da liaho luwu. 32 Hi pogau, te'iaasi mekona da inontono ronga da pinodeano, sawali nai te'asa miano da parasaeaho da nigauno. 33 Miano da parasaeaho koie da nigauno, akui'omo kamenonaano Apu Alla. 34 Koie da tinenano Apu Alla, da pinokodungkuno yahoo haratiano Apu Alla, kana'umpe Apu Alla ariomo weehakono'o Sangkoleono da sai hina upuano. 35 Tendenomo hi lou'o i Ama Anano, yahomo kai ari weehakono'o luwu kai kuasaiho. 36 Miano da parasaeaho Anano Apu Alla po'awaamo toraa samengka-mengkauno, sawali miano da sai nunu'o po'eheno Anano Apu Alla, nai da'a nta mo'awa toraaha, sawali sa'o larono Apu Alla danta inawa ngkaida'ano.
I Yesus ronga tina Samaria
1 Kando podeaho ko'ira miano golonga Farisi hi me'a-me'alumo miano da nibahono Yesus ronga da tewali ana guruno ka'iaa i Yahya, 2 sawali santo'u-to'uahano, koie i Yesus nai da'a mopobaho, te'iaasi ko'ira ana guruno. 3 Sato'orio koie i Yesus, lako'omo bintanio Yudea, kai pohule hai Galilea. 4 Koie sala danta lako hai Galilea tealohio wonua Samaria. 5 Kai dungku nde'e hai me'asa kampo wonua Samaria da meneehako Sikhar, okudahio wita hi ari i Yakub weehakono'o i Yusuf anano iponoha. 6 Kokeena dahoo pinewuwuno i Yakub. Tende mokokauno koie i Yesus, kai totoro hai pampano koie pinewuwu, kira-kira totoro oleo. 7 Kai leu koie tina Samaria nta mo'ala e'e, nangkuamo koie i Yesus kai koharatia, "Poweehaku kaku pondo'u." 8 Kana'umpe ko'ira ana guruno melako'iramo hai kampo nta mpo'oli danta mengkinaando. 9 Kai lawanio koie tina Samaria, "Yo hapa Co'o miano Yahudi kau po'ita mondo'u hai aku miano Samaria?" (Kana'umpe miano Yahudi nando mentepokona miano Samaria.) 10 Polawaniomo i Yesus, "Kiu daa to'orio hapa hi daa moweeko Apu Alla, ronga to'orio da mogau'akoko kanahi, 'Poweehaku mondo'u,' matantuomo daako nta mo'ita hai Iaa, ronga dahomo ari moweeko e'e pompokontora." 11 Kanahiomo koie tina, "Tamano, nahina katambumiu ronga taperano olaro die pinewuwu. Hai hapa nta po'awaamiu koie e'e da mompokontora? 12 Dakomiu bara kolalo owose ka'iaa tamamami i Yakub, da ari weekami die pinewuwu, ronga pondo'uanomo kai tii raro anano ronga luwu pinotuwuno?" 13 Koharatia'omo i Yesus, "Pera miano da mondo'u die e'e dahosi nta mokokondo'u mbule. 14 Sawali miano da mondo'u e'e hicu daa nta moweeho, nai da'a nta paisa mokokondo'u samengka-mengkauno. Kana'umpe koie e'e hicu daa nta weeho, koiemo danta tewali mata e'e hai wotoluno, danta sosolo ngkaida'a ronga mokontoraa dungku salemba-lembahino." 15 Kai kanahi koie tina, "Tamano, Mimpoweehaku koie e'e, kaku osiemo mokokondo'u, ronga kaku osiemo nte leu na'ai montambu e'e." 16 Kai tena'o koie i Yesus, "Lakomo boboiho samporau, kami mperonga leu na'ai." 17 Kai polawani koie tina, "Nahina samporangku." Koharatia'omo koie i Yesus, "Menonaa da kanahiu hi sahina samporau; 18 kana'umpe dahoo olima samporau, ronga da da'a diekana, na'iaa samporau." 19 Kai kanahi koie tina, "Diekana kupaha'omo hicua Comiu me'asa nabii. 20 Pembue'amami mpesombaando die hai wawo ntangkeno. Sawali kanahimiu, pesombaando miano hai Yerusalem." 21 Kai koharatia i Yesus koie hai tina, "Parasaeahakumo, dahosi nta leu tempono kando mpesomba miano hai Ama, na'iaamo die hai tangkeno, ronga na'iaasi penda hai Yerusalem. 22 Comiu miano Samaria mpesomba hai Apu da sai tino'orimiu, icami mpesomba hai Apu da tino'orimami, kana'umpe salama'a pebintaano hai miano Yahudi. 23 Sawali dahosi nta leu tempono, deenapo diekana dungku'omo, dahando ko'ira da santo'u-to'u mpesomba hai Ama, nta mpesomba kana da pompotisuno Sangkoleono Apu da menona. Kana'umpe yahomo da po'eheno i Ama koie daakana. 24 Apu Alla yahoo Sangkoleo, ronga danta mesombaiho, nai tewali sai mesomba kana da pompotisuno Sangkoleono Apu da menona." 25 Kai kanahi koie tina, "Kuto'orio hi daa nta leu koie Mokole Pompokosalama da meneehako Kristus. Ki lako leu, Iaamo danta motisukami luwu." 26 Koharatia'omo koie i Yesus, "I'akumo die da mogau'akoko diekana." 27 Koie tempo meleuhiramo ana guruno, kando mentekangka hi daa mogau'akono koie tina. Sawali nai te'asa miano da metukanaiho koie tina kanahi, "Hapa da paraluu'u?" atawa metukanaiho Yesus, "Hapa kami daa mogau'akono?" 28 Kai pohule koie tina bintaa gumbano na'ico, kai lako hai kota mo'awaakondo pera miano kanahi, 29 "Mileumo ontoo koie miano da mo'awaakuo pera da ari niweweungku. Yahomo ntada'a koie Mokole Pompokosalama." 30 Yahopo ko'ira miano kando mpeluarako mebinta koie hai kampo, kando lako dahano Yesus. 31 Koie tempo ko'ira ana guruno dahira konainoo abakio i Yesus kanahi, "Hia guru, Mintewawemo." 32 Sawali nalawanihira, "Dahosi kinaangku da sai tino'orimiu." 33 Kando mpekapetukanai ko'ira ana guruno kanahi, "Dahoo bara miano da ari mowawaakono danta kinaano?" 34 Kai lawanihira i Yesus, "Kinaangku yahoo nunu'o po'eheno da ari tena'aku ronga hedoo pohedoano kai ari. 35 Na'iaa bara kanahimiu, 'Dahopo opaa wotiti, kai leu wula mpesangki'a?' Sawali Kukanahiakomiu, mi'ontoopo lilicukomiu uma da mokunimo, motaha'omo nta sinangki. 36 Diekana ko'ira da mpesangki mpo'awahiramo gadindo, ronga wua da sinangkido yahoo miano da awaa tora ngkaidaaha, nangkuamo kando mperonga mohende da mpohawu ronga da mpesangki. 37 Kicana koie, menonaamo die parere: Suere da mohawu, ronga suere da mesangki. 38 Kutenakomiu kami lako mpesangki dahamiu sai paisa mohedo, kami alaa wuano ariando suere miano mpohedo." 39 Tendenomo hi pontulura koie tina kanahi, "Ariomo koie miano mo'awaakuo pera da ari niweweungku," yahomo kai me'alu miano Samaria koie hai kampo da memparasaeaho i Yesus. 40 Dadi, tempondo ko'ira miano Samaria tepo'awaakono i Yesus, mokorahira titiaho kai poo'ia hai ira. Kai poo'ia nde'e kokeena orua oleo mengkauno. 41 Ronga e'elenguahomo me'alu miano da parasaeaho tendenomo da pompotisuno. 42 Yahomo kando po'awaakono koie tina kanahi, "Kako parasaea, na'iaa hiu ari tulurakami, sawali pantamamimo da modeaho, ronga koto'oriomo hicuamo Iaa santo'u-to'uno Gurusalamano wita'ea."
I Yesus mohule hai Galilea
43 Sakoano orua oleo i Yesus moo'ia na'ico, nalako'o hai Galilea. 44 Wotoluno i Yesus ariomo kanahi hi sahina te'asa nabii da te'angga hai wonuano. 45 Sawali sadungkunomo hai Galilea, ndona mesanaa ko'ira miano Galilea melawatio, kana'umpe arihiramo mentepo'awa hai Yerusalem daando pendo'ua Tepulosi'a ronga ontoo luwu tinekangkaako da ari niweweuno kokeena.
I Yesus pokontidoo anano miano da mohedo hai rahano mokole
46 Kai pohule penda koie i Yesus hai Kana wonua Galilea, ariano moweweu e'e tewali angguru. Koie hai Kapernaum dahoo me'asa miano da mohedo hai rahano mokole, ana ntamano dahoo morungku. 47 Sapodeaho hi leumo i Yesus hai Galilea mebinta hai Yudea, nalako'o lawa'o kai pe'e'etaa kai leu pokontidoakono'o anano da te'etemo kai mate. 48 Kai koharatia koie i Yesus hai iaa kanahi, "Ki sami po'onto peto'o tinekangkaako, nami da'a nta parasaea." 49 Kai polawani koie miano kanahi, "Apua, Mileumo hi sai da'apo mate anaku." 50 Koharatia'omo koie i Yesus, "Pohulemo, dahosi nta tido ana'u." Parasaeahomo koie miano hapa da kinahiino i Yesus, yahopo kai pohule. 51 Dahopo hai laa sala, leuhiramo lawa'o atano mo'awaakono hi tidomo anano. 52 Kai petukanaihira ki tete opia kai petampu'u tido. Kando lawanio kanahi, "Induwa tonga oleo tete me'asa nai da'amo moreo." 53 Yahopo kai pokopehawa'o koie tamano ana'ate, koiemo wotuno dahano koharatia i Yesus, "Dahosi nta tido ana'u." Yahomo kai parasaea ronga luwu ihi laicano. 54 Koiemo peto'o ko'orua tinekangkaako da niweweuno pohuleno hai Galilea mebinta hai Yudea.
Mompokontido konaa oleo mpekolia
1 Sa'arino koie, naleuho oleo owoseno miano Yahudi, ronga Yesus sabe'o hai Yerusalem. 2 Okudahio pinewamba da meneehako "Pinewamba Domba" hai Yerusalem, dahoo me'asa lowi da ari niweweu, poneendo miano Ibrani Betesda, dahoo olima pe'olu-olua lilicu'o. 3 Koie hai pe'olu-olua me'aluo miano morungku da meleleha: da mopusu, da motince, da lungkuho, da mentotarimaa koie e'e kai teribua. 4 Kana'umpe dahoo tempono kai nte tii mala'ekatino Apu ribua'o koie e'eno lowi; inai da teperi'ou mewiso hai bolo e'e da teribua, mau ki rungku hapa, dahoo nta tido. 5 Na'ico dahoo me'asa miano da tolu pulumo hoalu ta'u mengkauno morungku. 6 Sa'ontoo i Yesus koie miano da leleha kokeena, ronga hina nto'orio hi mengkaumo kana koie, yahomo kai petukanaiho, "Mokeako bara tido?" 7 Kai polawani koie miano da morungku, "O ponggawa, nahina ka'asi miano da ehe tiihakoaku koie hai bolo e'e ki konainoo teribua. Ronga yahopo kaku daa me'o'ala koie hai lowi, peri'ouhomo suere miano tii." 8 Kai tena'o koie i Yesus, "Pewangumo, kau alaa empeu kau lolako." 9 Ronga koiesi tempo kai tido, kai alaa empeno kai lolako. Sawali koie oleo konaa oleo mpekolia. 10 Nangkuamo koie, ko'ira ponggawano miano Yahudi kando awaiho koie miano da tinapuno tido kanahi, "Die oleo yahoo oleo mpekolia, ronga co'o nai tewali lemba'o empeu." 11 Sawali nalawanihira, "Miano da ari mokontidoaku, koiemo da tena'aku alaa empengku kaku lolako." 12 Kando petukanaiho, "Inaiho koie miano da tenako, kau alaa empeu ronga lolako?" 13 Sawali koie miano da tinapuno tido nasai to'orio inai neeno, kana'umpe koie i Yesus isaamo mebinta hai tongado ko'ira miano me'alu. 14 Perumbuino kando tepo'awa i Yesus ronga koie miano hai uluano raha mpesombaa, kai kanahi, "Diekana tidokomo, osiemo penda moweweu dosa, kau osie mo'awa da lalo'eapo mosa'o." 15 Kai peluarako nde'e koie miano, yahopo kai lako montuluraakondo ko'ira miano Yahudi hicuamo i Yesus da ari mokontidoo. 16 Nangkuamo koie, ko'ira miano Yahudi kando mokea pakaseaho i Yesus, kana'umpe hinangkua oleo mpekolia kai ari mokontidoo. 17 Sawali nalawanihira kanahi, "Tamangku yahosi mohedo dungku diekana, kuamo na'angku kaku pohedo." 18 Nangkuamo ko'ira miano Yahudi kando lalo'ea mekora nta pepatee, na'iaa koma hi sai po'angga oleo mpekolia, sawali nirongaakonomo hi neehakono'o Apu Alla Tamano, batuano mokompengkenaa wotoluno ronga Apu Alla.
I Yesus tuluraa danta tekona hai wotoluno
19 Kai lawanihira i Yesus, "Santo'u-to'uahano Kupo'awaakokomiu: Koie Ana nahina da to'ori niweweuno pantano, ki sai ontoo da niweweuno Tamano. Kana'umpe hapa da niweweuno Tamano, koiesi na'ana danta niweweuno Anano. 20 Kana'umpe hina lou'o koie i Ama Anano, nangkuamo kai tisu'akono'o pera luwu da niweweuno. Deenapo nta tisu'akono'o pohedoa da kolalo owose ka'iaa ko'ira, dahamiumo nta mentekangka. 21 Kana'umpe kana Tamano hi wangusakohira miano mate ronga mokontorahira, kanasi na'ana koie Ana ki pokontorahira pera miano da ineheno. 22 Apu Alla nai po'otuhi hukumano te'asa miano, sawali ariomo weehakono'o kuasa Anano kai otuhio ko'ira luwu, 23 kando poko'owose'o luwu miano koie Anano kana pompoko'owosedo Tamano. Inai da sai pa'angga'o koie Ana, nai da'a pa'angga'o i Ama da tena'o. 24 Santo'u-to'uahano Kupo'awaakokomiu: Inai da podedeaho haratiaku ronga da parasaeaho da ari tena'aku, dahoo nta tora ngkaida'a, nai da'amo nta awaa hukuma, kana'umpe bintaamo mateaha kai polinca hai toraaha. 25 Santo'u-to'uahano Kupo'awaakokomiu: Dahoo nta leu tempono, deenapo dungku'omo, dahando miano mate nta podedeaho suarano Anano Apu Alla, ronga da mpodeaho dahira nta tora. 26 Kana'umpe Tamangku dahoo toraaha hai laro wotoluno, yahomo kai poweeho toraaha hai laro wotoluno Anano. 27 Ronga ariomo weehakono'o koie kuasano nta po'adilino, kana'umpe Iaamo Ana Nto Manusia. 28 Mi'osiemo tekangkaako kimi mpodeaho koie, kana'umpe dahosi nta leu tempono, dahando nta mpodeaho suarano Ana Nto Manusia pera miano mate da hai bolo ngkoburu, 29 ronga ko'ira da moico niweweundo, dahiramo nta mpewangu nta tora ngkaida'a, sawali da mosa'o niweweundo, dahiramo nta mpewangu mpontarima hukuma. 30 Nahina da to'ori niweweungku pantaku. Kicu po'otuhi, nunu'o da pinodeangku. Nangkuamo kai adili po'otuhincu, kana'umpe na'iaa po'ehengku, sawali po'eheno Tamangku da ari tena'aku. 31 Kicu gau'o daa-daano wotolu mpantaku, nahina da ehe parasaeaho gauku. 32 Dahoo penda da mogau'ako I'aku, yahoo Tamangku, ronga dahakusi to'orio koie da nigauno mekona wotolungku hi menona. 33 Aricomiumo montena lako awaa i Yahya, ronga koie da tinulurano menonaa. 34 Naku da'a paraluu kai saksii'aku to manusia, sawali Kuna ngkanahi kana koie kami mesalama. 35 Koie i Yahya kana to'u hulu da melanga ronga koniwinca, yahomo da pokomohendekomiu te'iaasi asantonia. 36 Sawali dahoo me'asa saksiicu da kolalo owose ka'iaa i Yahya, yahoo koie pohedoano Tamangku hi ari tena'aku kaku weweuho. Koiemo pohedoa da niweweungku diekana da tewali saksiicu, hicua Tamangku da ari tena'aku. 37 Nangkua Tamangku da ari tena'aku, yahomo kaicua Iaa saksiicu. Suarano nami mpaisa modeaho, rupano nami mpaisa ontoo, 38 ronga haratiano nai tepoo'ia hai wotolumiu, kana'umpe nasami mparasaeaho da tinenano. 39 Kami pomparesa ihino Boku Haratiano Apu Alla, nangkua ponto'orimiu dahamiu nta mo'awa tora ngkaidaaha. Mainakaa koiemo boku saksiicu. 40 Sawali nasami ehe leu hai Aku, kami mpo'awa tora ngkaidaaha. 41 Naku paraluu nirereeno to manusia. 42 Sawali dahakusi to'orio bolo mpelaroamiu hi sahina poloumiu Apu Alla. 43 Kaku leu nangkua kuasano Tamangku, sawali nasami ntarimaaku. Sawali ki leu suere miano kuasano pantano, dakomiusi nta tarimaa. 44 Kana'umpe kami daa nta to'ori parasaea, hi te'iaasi nirereeno miano da po'ehemiu, sawali nasami ehe moweweu kai rereekomiu Apu Alla? 45 Mi'osie kanahi hicu daa nta pokompekara-karakomiu hai ra'ino Tamangku; danta pokompekara-karakomiu yahoo i Musa, dahamiu momperahi-rahi. 46 Kana'umpe kimi lako parasaeaho i Musa, matantuomo dakomiu nta parasaeahaku. Kana'umpe koie da ari niburino i Musa yahoo mekona hai Aku. 47 Sawali ki sami mparasaeaho koie da ari niburino, kana'umpe kami daa nta parasaeaho da ari nigauku?"
I Yesus moweehira mpongkaa lima rewu miano
1 Sa'arino koie, namompolee koie i Yesus hai tahi Galilea da meneehako na'ana tahi Tiberias. 2 Kando mesosolo miano me'alu mperumbuihakono, tendenomo hindo ari ontoo peto'o tinekangkaako hi daa pokontidohira miano morungku. 3 Kai sabe koie i Yesus ronga ana guruno kando mentotoro hai wawo ngkabumbu. 4 Koie tempo okudaamo oleo owoseno miano Yahudi, yahoo oleo Ntepulosi'a. 5 Kai pento'a koie i Yesus ontoo hi me'alumo miano da mesosolo leu awaa, kai petukanaiho i Filipus kanahi, "Hai hapa dahanto nta mo'oli roti, kando mpongkaa di'ira miano?" 6 Kai koharatia kana koie, hina mokea ontoo hapa danta niweweuno i Filipus, kana'umpe hina daasi to'orio hapa danta niweweuno pantano. 7 Kai polawani i Filipus kanahi, "Rua etu doi pera kito po'oliakondo roti, ndoda'apo nta mpekoa'ako, mau ki tee'asa sibindo." 8 Kanahiomo koie me'asa ana guruno da meneehako i Andreas, petilano i Simon Petrus, 9 "Diceena dahoo me'asa anadalo da modio lima boto roti ronga rua boto ica, sawali nando da'a nta mpekoa'ako ko'ira miano da me'alu." 10 Kai koharatia koie i Yesus, "Tena'iramo kando mentotoro." Kokeena molueho dahano ko'ewo, kando mentotoro nde'e ko'ira miano, kira-kira lima rewu me'alundo, te'iaapo tama mpena. 11 Yahopo i Yesus kai alaa koie roti ronga montarimakasi hai Apu Alla, kai titila'akondo'o ko'ira miano da mentotoro. Kanasi penda poweweuno ica, kando mpongkaa ronga memowohi. 12 Samowohindomo, kai tena'ira ana guruno kanahi, "Mingkompuluo torano, kai osie da'a da tehawiako." 13 Kando kompuluo nde'e koie torano da olima roti hindo arimo mpongkaa, pono'o da hopulu orua be'u. 14 Tempondo ko'ira miano ontoo niweweuno da tinekangkaako, kando mengkanahi, "Menonaamo, Iaamo die nabii danta leu hai wita'ea." 15 Tendenomo hina nto'oriomo koie i Yesus hindo daa nta leu alaa pakisaa'o tewali mokoledo, yahomo kai lako mesuahako pantano hai tangkeno.
I Yesus lolako hai wawo ntahi
16 Sakiniwianomo, kando mentii ko'ira ana guruno i Yesus hai tahi, kando mpe'ulea hai bangka, 17 nta mompole me'o'ala hai Kapernaum. Rondomaamo, sawali koie i Yesus nai paisa leu awahira. 18 Koie tempo, tahi owose'o hembono, kana'umpe hina mokora ngalu. 19 Sa'arindomo mpebose kira-kira onoo kilo mentalano, kando tibo ontoo i Yesus hi daa lolako hai wawo ntahi, leu okudahio bangkado, yahomo kai taperando momee. 20 Sawali namogau'akondo kanahi, "I'akusi die, mi'osie momee." 21 Sanaa'omo larondo nta lawa'o hai bangkado. Koiesi wotu kando dungku hai wiwi ntahi dahando mpe'o'ala.
Miano me'alu mo'u'ungke Yesus
22 Sameantanomo, dahirapo miano me'alu da mpoo'ia hai asa poleno tahi, ronga da tino'ori matantundo, te'iaasi me'asa bangka da da'a na'ico. Ndoto'oriomo hindo melakomo ana guruno Yesus koie hai bangka, sawali i Yesus nai da'a lako itai. 23 Da'a mengkau kando meleu labu opia bangka da mpebinta hai Tiberias, okudahio ariando miano me'alu mpongkaa roti, hi ari Yesus barakati'o. 24 Sando ontoo ko'ira miano me'alu hi sai da'a na'ico i Yesus ronga ana guruno, nampe'uleahira ko'ira hai bangka, kando mpompole hai Kapernaum u'ungkee.
Roti da mompokontora
25 Samentepo'awandomo ko'ira miano me'alu ronga i Yesus, kando mpetukanaiho, "O tuangguru, nimpia kami leu na'ai?" 26 Kai lawanihira kanahi, "Santo'u-to'uahano Kupo'awaakokomiu: Kami u'ungkeaku, na'iaa himi ontoo peto'o tinekangkaako, sawali tendenomo himi arimo mpongkaa roti kami mowohi. 27 Mi'osie mpohedo mo'u'ungke tinoraako danta hancuru, sawali tinoraako da sai nta pura dungku samengka-mengkauno da mebinta hai Ana Nto Manusia. Kana'umpe yahomo da ari pineto'ono Apu Alla Tamano." 28 Yahopo kando mpetukanaiho, "Hapamo danta niweweumami, kako nunu'o da po'eheno Apu Alla?" 29 Kai lawanihira i Yesus, "Diemo pohedoa da po'eheno Apu Alla, yahoo parasaeaho da ari tinenano." 30 Kando kanahi, "Peto'o hapa ona danta niweweumiu, kako ontoo ronga parasaeakomiu? Hapa danta hinedomiu? 31 Pembue'amami mentinoraakondo hai tonga lueno papawu yahoo manna, kana da teburi hai Boku Haratiano Apu Alla, 'Pinakaako rotino suruga.' " 32 Yahopo i Yesus kai po'awaakondo, "Santo'u-to'uahano Kupo'awaakokomiu: Na'iaa i Musa da ari moweekomiu roti suruga, sawali Tamangku da moweekomiu roti da santo'u-to'u mebinta hai suruga. 33 Kana'umpe roti da mebinta hai Apu Alla, koiemo da mebinta hai suruga, ronga da mokontoraa manusia hai wita'ea." 34 Kando mengkanahi, "O Apua, Mi'e'elengua moweekami koie roti." 35 Kai koharatia i Yesus hai ira, "I'akumo die roti da mompokontora; inai da leu hai Aku, nai da'amo nta paisa mokohuloo, ronga inai da parasaeahaku, nai da'amo nta paisa mokokondo'u. 36 Sawali ariakumo mo'awaakomiu: mau kimi arimo ontoaku, nami da'asi parasaea. 37 Pera miano hi ari Tamangku weehaku, dahira nta meleu hai Aku, ronga pera da leu hai Aku, naku da'a nta paisa lawa suurako. 38 Kana'umpe kaku tii mebinta hai suruga, na'iaa nta moweweu da po'ehengku, sawali nta moweweu nunu'o po'eheno da ari tena'aku. 39 Ronga diemo da po'eheno da ari tena'aku, yahoo luwu pera miano hi ari weehaku, kai osie da'a da isa, kana'umpe I'aku danta wangusakohira oleo kiama'a. 40 Diemo da po'eheno Tamangku, yahoo pera miano da ontoo koie Ana ronga parasaeaho, po'awahiramo toraaha samengka-mengkauno, ronga dahakumo nta pokompewanguhira oleo kiama'a." 41 Kando mpetampu'u ko'ira miano Yahudi mpengunguliakono i Yesus, tendenomo hi ari kanahi, "Akumo die roti da tii mebinta hai suruga." 42 Kando kanahi, "Na'iaa bara Iaa koie anano i Yusuf, ronga tinano tamano dakitasi to'orio; kana'umpe kai to'ori kanahi, 'Aku die tii mebinta hai suruga'?" 43 Kai lawanihira i Yesus, "Mi'osie mpengunguli. 44 Nahina te'asa miano danta to'ori leu hai Aku, ki sa'iaa Tamangku da ari tena'aku danta wawaa koie miano hai Aku, ronga dahaku nta wangusako ki dungku oleo kiama'a. 45 Dahoo teburi hai bokudo nabii kanahi, 'Dahoo nta motisu'ira Apu Alla.' Ronga luwu miano da ari modeaho ronga tarimaa pompotisuno Tamangku, dahira nta leu hai Aku. 46 Koie na'iaa kanahi, ki daamo miano da ari ontoo i Ama. Te'iaasi Iaa da mebinta hai Apu Alla, yahomo da ari ontoo i Ama. 47 Santo'u-to'uahano Kupo'awaakokomiu: Inai da parasaeahaku dahomo nta tora samengka-mengkauno. 48 Akumo die roti da mompokontora. 49 Ko'ira pembue'amiu da ari mpongkaa roti manna hai tonga lueno papawu matehirasi na'anda. 50 Diemo roti da tii mebinta hai suruga; inai da kaaho, nai da'amo nta mate. 51 Akumo die roti da mompokontora da tii mebinta hai suruga. Ki daa te'asa miano da kaaho, dahoo nta tora samengka-mengkauno. Ronga koie roti hicu daa nta moweekomiu, yahoo ihi wotolungku, koiemo da potorahira miano hai wita'ea." 52 Nangkuamo koie, kando mpekakahi ko'ira miano Yahudi kanahi, "Kana'umpe Iaa koie miano kai to'ori weehakita'o ihi wotoluno kato mengkaaho?" 53 Yahopo kai koharatia koie i Yesus hai ira, "Santo'u-to'uahano Kupo'awaakokomiu: Ki sami ngkaaho ihi wotoluno Ana Nto Manusia, ronga ndo'uo reano, nahina toraaha hai laro wotolumiu. 54 Inai da kaaho ihincu ronga ndo'uo reaku, dahomo nta tora salemba-lembahino, ronga dahaku nta mokompewanguo oleo kiama'a. 55 Kana'umpe wotolungku santo'u-to'uno yahoo kinaa, ronga reaku yahoo nindo'u. 56 Inai da kaaho ihincu ronga ndo'uo reaku, poo'iahomo hai Aku ronga poo'iahakumo hai iaa. 57 Kana hi tena'aku Tamangku da tora, kaku tora tendenomo Iaa, kanamo na'ana miano da kaahaku dahoo nta tora tendenomo I'aku. 58 Diemo roti da tii mebinta hai suruga, nai kana roti da ari kinaando pembue'amiu, perumbuino matehirasi. Inai da mongkaa die roti dahomo nta tora salemba-lembahino." 59 Koiemo luwu da nigauno i Yesus tempono mompotisu hai laica sambahea'a hai Kapernaum.
Me'aluo ana guruno Yesus da bintanio
60 Sa'arindo mpodedeaho koie da nigauno i Yesus, me'aluo ana guruno da kanahi, "Mobea'o die pompotisu, inai danta tule'i mompokonunu?" 61 Hina nto'orio hai pelaroano koie i Yesus hindo daa mpengungu ko'ira ana guruno, kai koharatia, "Dahoo bara gauku pokomoleluo parasaeamiu? 62 Ronga nta kana'umpemo, kimi lako ontoo Ana Nto Manusia sabe mbule ariano da'a? 63 Da mokontoraa miano yahoo Sangkoleono Apu Alla, kicua kuasano miano nahina gunano. Gau hicu daa mogau'akokomiu yahoo gauno Sangkoleono Apu Alla da mompokontora. 64 Sawali dahoo simbaumiu da sai parasaea." Kana'umpe i Yesus nanto'orio metampu'u isono, inai da sai parasaea ronga inai danta soroakondo'o pedaluno. 65 Kai koharatia penda, "Nangkuamo koie Kupo'awaakokomiu, hi sahina te'asa miano da to'ori leu hai Aku, ki sai po'eheno Tamangku." 66 Metampu'u koie tempo, me'aluhiramo ana guruno da bintanio, nando da'amo nunu'o.
Mangakuno i Petrus
67 Kai petukanaihira ko'ira ana guruno i Yesus da hopulu orua kanahi, "Dakomiumo bara na'amiu nta bintaniaku?" 68 Kai polawani i Simon Petrus kanahi, "O Apua, hai naipo ona nta lako'amami? Koie gaumiu yahoo gau pompokontora dungku samengka-mengkauno. 69 Ronga cami parasaeakamimo, ronga koto'oriomo hicua Comiu miano mewota tinenano Apu Alla." 70 Kai lawanihira koie i Yesus, "Na'iaa bara I'aku da ari tindahakokomiu die da hopulu orua miano? Sawali koie da me'asa simbaumiu yahoo bilisi." 71 Koie da kinahiino yahoo i Yudas, anano Simon Iskariot, simbaudo da hopulu orua ana guruno, kana'umpe iaamo danta soroakondo'o pedaluno.
I Yesus ronga raro mpetilano
1 Sa'arino koie, nasisimbu'o koie i Yesus hai wonua Galilea, nasai ehe hai Yudea, kana'umpe ko'ira miano Yahudi kokeena ndona daa mokea pepatee. 2 Koie tempo okudaamo oleo owoseno miano Yahudi, yahoo oleo owose Bantea Ato Riri. 3 Kando kanahi petilano, "Osiemo moo'ia na'ai, lakomo hai Yudea, kando ontoo ko'ira ana guru'u hapa da niweweuu. 4 Kana'umpe nahina te'asa miano da wuniako niweweuno, ki mokea kai telele. Kiu tule'i moweweu da tinekangkaako kana koie, kahioomo kando ontoko pera miano." 5 Kana'umpe mau raro mpetilano, nahinamo da parasaeaho. 6 Kai lawanihira i Yesus kanahi, "Nai da'apo dungku tempongku, sawali comiu nahina sai tewaliano, mentaaho oleomiu. 7 Miano wita'ea nai to'ori kokoleakomiu, sawali I'aku, Kuna ngkinokolea, tendenomo Kuna sadia tisu'akondo'o niweweundo da mosa'o. 8 Milakomo pantamiu koie hai ndo'ua. I'aku Kuda'apo nta lako, kana'umpe tempongku da'apo dungku." 9 Kanamo koie polawanino, yahoo Iaa poo'iahomo hai Galilea. 10 Sawali salakodomo ko'ira petilano hai ndo'ua, kai perumbui na'ana lako, sawali namekangio. 11 Kando me'u'ungkee ko'ira ponggawando miano Yahudi koie hai ndo'ua, ronga mengkanahi, "Maina daahano?" 12 Ko'ira miano me'alu dahira memburuiho, dahoo da kanahi, "Iaa koie miano moico." Sawali dahoo penda da kanahi, "Dahoo mokomporehira miano me'alu." 13 Sawali nasahina te'asa miano da moseka gau'o hai ra'ino miano me'alu, kana'umpe ndona momeetakohira ponggawando miano Yahudi.
Pontulurano Yesus mekona hai wotolu mpantano
14 Dahiramo tangasa mpendo'ua, kai sabe koie i Yesus hai uluano raha mpesombaa, yahopo kai pompotisu. 15 Mebangaohira ko'ira miano Yahudi na'ico, ronga kanahi, "Kana'umpe die miano kai me'alu tino'orino, mainakaa nai paisa mesicola?" 16 Kai lawanihira koie i Yesus, "Pompotisuku na'iaa mebinta hai wotolu mpantaku, sawali yahoo pompotisuno da ari tena'aku. 17 Inai da mokea nunu'o po'eheno Apu Alla, dahoo nta to'orio koie pompotisuku hi pebinta hai Apu Alla, atawa hi pebinta hai wotolu mpantaku. 18 Miano da mompotisu'ako pekirino pantano, dahoo mokea kai nireree; sawali miano da mo'u'ungke kai tereree koie da tena'o, koie miano mongkotee, nai hina kuleno. 19 Na'iaa bara nabii Musa da ari moweekomiu Boku Parentano Apu Alla? Sawali nahina te'asa miano da monunu koie Boku Parentano nabii Musa. Yo hapa kami mokea pepateaku?" 20 Kando mpolawani ko'ira miano me'alu, "Dahoo lawuico setani! Inai da mokea pepateko?" 21 Kai lawanihira i Yesus, "Te'iaapo me'asa tinekangkaako da niweweungku konaa oleo mpekolia, mentekangkakomiumo luwumiu. 22 Koie i Musa tenakomiu kami mpesuna (santo'u-to'uahano, koie suna na'iaa petenano i Musa, sawali mebinta hai ira pembue'anto). Ronga comiu mpesuna konaa oleo mpekolia. 23 Kimi mposuna miano konaa oleo mpekolia, kanahimiu kai osie molimpaki parentano nabii Musa, yo hapa kai mosa'o laromiu hicu pokontidoo wotoluno miano konaa oleo mpekolia? 24 Osie mo'otuhi kara-karano miano nunu'o da inontomiu, sawali kimi mpo'otuhi, kahioomo kami nunu'o da menona."
Menonaa bara i Yesus Mokole Pompokosalama?
25 Kando kanahi ko'ira miano da mpoo'ia hai Yerusalem, "Na'iaapo bara die miano da inu'ungke nta pinopatendo? 26 Ontoopo hi pogau hai ra'indo miano me'alu ronga nahinasi da tabe'o. Dahiramo bara ko'ira pamarentanto to'orio hicuamo Iaa koie Mokole Pompokosalama? 27 Sawali mekona die miano toto'orio maina pebintaano. Ki lako leu Mokole Pompokosalama, nahina te'asa miano danta to'orio pebintaano." 28 Daano koie i Yesus mompotisu hai uluano raha mpesombaa, kai pekora koharatia, "Menonaa bara minto'oriaku ronga minto'orio pebintaangku? Sawali kaku leu na'iaa po'ehe mpantaku, ronga koie da ari tena'aku menonaa, naamo nami da'a to'orio. 29 I'aku, Kuto'orio, kana'umpe nangkua pebintaangku hai Iaa, ronga Iaamo da ari tena'aku." 30 Kando mokea nta rako'o, sawali nasahina da mokohenderio, kana'umpe nasai da'apo dungku tempono. 31 Sawali simbaudo ko'ira miano me'alu, me'aluo da parasaeaho ronga kanahi, "Ki lako leu Mokole Pompokosalama, dahoo ntada'a nta moweweu tinekangkaako da me'a-me'alupo ka'iaa da niweweuno die miano?" 32 Ndopodeahomo ko'ira miano golonga Farisi hindo daa mpemburuako i Yesus, nangkuamo koie, ko'ira kapala pua'ima ronga miano golonga Farisi kando pontena miano mparonda hai raha mpesombaa kando rako'o. 33 Kai koharatia koie i Yesus, "Da'amo mengkau nta peronganto, yahopo kaku lako daahano da ari tena'aku. 34 Dakomiu nta u'ungkeaku, sawali nami da'a nta awaaku, kana'umpe nami da'a nta to'ori dungku'o daahangku." 35 Ko'ira miano Yahudi pada ngkanahi'iramo, "Hai hapamo nta lako'ano, kasato da'a nta awaa? Dahoo bara mokea lako hai suere wonua dahando tekamburako miano Yahudi hai wonuando miano Yunani, kai potisu'ira? 36 Hapa maksuuno koie kai kanahi: 'Dakomiu nta u'ungkeaku, sawali nami da'a nta awaaku,' ronga, 'Nami da'a nta to'ori dungku'o daahangku'?"
E'e ntoraaha
37 Oleo kompura-puraano koie ndo'ua, koiemo oleo da kontu'uma, kai pewangu mentade koie i Yesus kai pekora koharatia, "Inai da mokokondo'u, leumo hai Aku kai pondo'u. 38 Inai da parasaeahaku, kana da teburi hai bolo Boku Haratiano Apu Alla, 'Dahoo nta sosolo e'e ntoraaha mebinta hai bolo mpelaroano.' " 39 Koie da kinahiino yahoo Sangkoleono Apu danta tinarimando da parasaeaho, kana'umpe koie Sangkoleono Apu nai da'apo leu, hina sai paisapo i Yesus pinoko'owose. 40 Dahoo opia simbaudo ko'ira miano me'alu da mpodeaho koie da kinahiino i Yesus mengkanahi, "Menonaa die miano yahomo koie nabii danta leu." 41 Meha penda da mengkanahi, "Iaamo die Mokole Pompokosalama." Dahoo penda suereno da kanahi, "Na'iaa, Mokole Pompokosalama na'iaa hai Galilea pebintaano. 42 Kana'umpe da teburi hai bolo Boku Haratiano Apu Alla, koie Mokole Pompokosalama leeno i Daud mebinta hai kampo Betlehem, poo'iahano i Daud iponoha." 43 Nangkuamo nde'e ko'ira miano me'alu ndompekakahiako Iaa. 44 Dahoo opia miano da mokea rako'o, sawali nahina te'asa da henderio.
Pamarentano miano Yahudi nando parasaea
45 Ko'ira da memparonda hai raha mpesombaa da tinena rako'o i Yesus pohule'iramo hai ira kapala pua'ima ronga miano golonga Farisi, kando pinetukanai, "Yo hapa kasami wawaa na'ai?" 46 Polawanihiramo ko'ira miano mparonda, "Nahinapo miano da ari mogau kana Iaa." 47 Kando polawani ko'ira miano golonga Farisi, "Dahomo bara koie miano mokomporekomiu na'amiu? 48 Nahina te'asa pamarentanto ronga miano Farisi da parasaeaho. 49 Sawali ko'ira miano me'alu da parasaeaho, da sai to'orio Boku Parentano nabii Musa, kahioomo kando mesilaka!" 50 Kai petukana koie Nikodemus simbaudo, da ari leu hai Yesus iponoha, kanahi, 51 "Dahoo bara koie Boku Parentano nabii Musa otuhio tesalano miano, ki sai paisapo pinodea gauno ronga tino'ori niweweuno?" 52 Kando mpolawani kanahi, "Hioo, miano Galilea bara na'au? Paresaa isala Boku Haratiano Apu Alla, dakomo nta to'orio hi sahina te'asa nabii danta saba mebinta hai Galilea."
Tina da meduluakono da sa'iaa samporano
53 Kando pohule tee-tee'asa miano hai laicando.
1 Sawali koie i Yesus nalako'o hai tangkeno Zaitun. 2 Dumondo'ea leuhomo penda hai raha mpesombaa, ronga luwu miano meleuhiramo hai Iaa. Kai totoro ronga potisu'ira. 3 Kando meleu ko'ira guru agama ronga miano golonga Farisi da mpowawaakono me'asa tina da ari nirakodo hi daa meduluakono da sa'iaa samporano. Kando pokompentadee koie tina hai tongado miano, 4 yahopo kando po'awaakono i Yesus kanahi, "O tuangguru, die tina kako rako'o hina daa meduluakono da sa'iaa samporano. 5 Hai bolo bokuno nabii Musa dahoo parenta da tenakita, kato watuiho koie tina daakana dungku kai mate. Kana'umpe nta kanahimiu?" 6 Kando petukana kana koie hindona daa soba-soba'o, kando to'ori pokontesala'o. Sawali i Yesus nantutungku moburiako wua limano hai wita. 7 Sawali ndona metutukanai ngkaidaaho, nangkuamo kai pento'a ronga koharatia, "Inai da sai madosa hai comiu, iaamo kai peri'ou watuiho koie tina." 8 Kai tutungku mbule koie i Yesus moburi hai wita. 9 Sando podeaho koie da kinahiino, kando melako tee-tee'asa miano, metampu'u da motu-motu'a. Perumbuino te'iaamo koie i Yesus pantano ronga koie tina da mentade kokeena. 10 Yahopo kai pento'a koie i Yesus petukanaiho koie tina kanahi, "Hai hapa medahando? Nahina bara te'asa miano da hukumako?" 11 Kai polawani koie tina, "Nahina, Apua." Kai koharatia koie i Yesus, "Aku na'angku, naku da'a nta hukumako. Lakomo, metampu'u diekana, osiemo moweweu dosa."
I Yesus yahoo huluno wita'ea
12 Kai pogau'akondo penda koie i Yesus ko'ira miano me'alu kanahi, "Akumo die huluno wita'ea, inai da nunu'aku, nai da'a nta rondoma salano, sawali dahoo nta molinyaa torano." 13 Kanahi'iramo ko'ira miano golonga Farisi, "Co'o saksii'o wotoluu panta'u, nai menona koie da kanahiu." 14 Kai lawanihira i Yesus kanahi, "Mau kicu saksii'o wotolungku pantaku, menonaa koie da kinahiincu, kana'umpe Kuna nto'orio pebintaangku ronga nta pe'o'alaangku. Sawali nami da'a to'orio ki maina pebintaangku ronga ki maina nta pe'o'alaangku. 15 Kimi mpo'otuhi kara-karano miano, da ninunumiu yahoo carano miano wita'ea. I'aku nahina te'asa miano inotuhincu kara-karano. 16 Sawali kicanano kaku po'otuhi kara-kara, menonaa, kana'umpe na'iaa pantaku, dakamisi meronga Tamangku da ari tena'aku. 17 Hai bolo Boku Parentano nabii Musa da nidiomiu dahoo teburi, 'Ki saksii'omo orua miano, koiemo da menona.' 18 Saksiino wotolungku dahoo orua, I'aku ronga Tamangku da ari tena'aku." 19 Kando kanahi, "Hai hapa dahano Tamau?" Kai polawani i Yesus, "I'aku ronga Tamangku nami da'a to'orio. Kimi daa to'oriaku, dakomiu nta to'orio na'ana Tamangku." 20 Tempono mompotisu hai uluano raha mpesombaa dahanomo gau'o ko'ira luwu, okudahio poti mpowiso'a doromaa. Ronga nahinapo te'asa miano da mokorako'o, nasai da'apo dungku tempono.
I Yesus na'iaa to wita'ea
21 Kai pogau'akondo penda i Yesus kanahi, "Dahakumo nta lako, ronga dakomiumo nta u'ungkeaku, sawali dakomiumo nta mate hai bolo dosamiu. Dahangku nta lako, nami to'ori nta dungku'o." 22 Kando mengkanahi ko'ira miano Yahudi, "Nta lako'o bara menono'o, yahomo kai daa kanahi, 'Nta lako'angku nami to'ori nta dungku'o'?" 23 Kai koharatia i Yesus hai ira, "Comiu pebintaamiu die hai wita'ea, sawali I'aku mebinta hai suruga. Comiu to wita'ea, I'aku na'iaa to wita'ea. 24 Nangkuamo itonia Kupo'awaakokomiu himi daa nta mate hai laro dosamiu, kana'umpe nasami ehe parasaea hicua I'akumo die." 25 Yahopo kando mpetukana, "Inaico ona koie?" Kai lawanihira, "Kana hicu ari mo'awaakokomiu mebinta isono. 26 Dahopo me'alu Kudaa nta mo'awaakokomiu ronga mokompekara-karakomiu. Sawali koie da ari tena'aku menonaa, ronga hapa da pinodeangku hai Iaa, koiemo da nileleakongku hai wita'ea." 27 Nando da'a to'orio hi daa mogau'akondo daa-daano Tamano. 28 Nangkuamo koie kai koharatia i Yesus, "Tabea kimi arimo toehako Ana Nto Manusia, yahopo kami daa nta to'oriaku, hicuamo wotolungku koie da nigauku, ronga i'aku naku paisa koweu-weu da mebinta hai wotolu mpantaku, sawali da nigauku yahoo mekona hi ari motisu'aku Tamangku. 29 Ronga Iaa da ari tena'aku sadia merongaaku, nai paisa bintaaku mompanta, kana'umpe Kuna sadia moweweu da po'eheno."
Pompotisu da menona mompokolalesa
30 Sa'arino koharatia kana koie i Yesus, me'aluomo miano da parasaeaho. 31 Yahopo kai pogau'akondo ko'ira miano Yahudi da parasaeaho, "Kimi toramo nunu'o da pompotisuku, comiumo ana guruku da santo'u-to'u. 32 Dakomiumo nta to'orio pompotisu da menona, ronga yahomo koie danta pokolalesakomiu." 33 Kando mpolawani kanahi, "Cami die leeno i Ibrahim, nako paisapo tepo'ata mau hai nai. Kana'umpe kau kanahi hico daa nta pinokolalesa?" 34 Kai lawanihira i Yesus, "Santo'u-to'uahano Kupo'awaakokomiu: Pera miano da moweweu dosa, dahanomo tepo'ata hai dosa. 35 Ronga koie miano da tepo'ata, nai da'a nta moo'ia ngkaida'a hai bolo laicano ponggawano, sawali koie ana dahosi nta moo'ia ngkaida'a hai bolo laicano tamano. 36 Dadi, ki lako koie Ana pokolalesakomiu, dakomiu nta lalesa santo'u-to'u. 37 Dahakusi to'oricomiu hicua leeno i Ibrahim, sawali mina mokea pepateaku, hina sami ntarimaa pompotisuku. 38 Hapa da inontongku mebinta hai Tamangku, koiemo da tinulurangku. Kanasi na'amiu, weweuho hapa hi ari potisukomiu tamamiu." 39 Kando mpolawani kanahi, "Tamamami yahoo i Ibrahim." Kai koharatia i Yesus, "Kicua wainto comiu anano i Ibrahim, dakomiumo nta weweuho da ari niweweuno i Ibrahim. 40 Sawali da niweweumiu yahoo nta pepateaku, mainakaa da pinokodungkuku hai comiu yahoo da menona, da pinodeangku mebinta hai Apu Alla. Nai poweweuhako da kana koie i Ibrahim. 41 Da niweweumiu yahomo niweweuno tamamiu." Kando mpolawani kanahi, "Cami die na'iaa ana mpesosanto'oria. Tamamami te'iaasi me'asa, yahoo Apu Alla pantano." 42 Kai lawanihira i Yesus kanahi, "Kicua Apu Alla koie tamamiu, dakomiu nta meehawa'aku, kana'umpe Aku die mebinta hai Apu Alla, ronga diekana dahakumo na'ai. Na'iaa po'ehengku pantaku kaku leu, sawali Iaa da ari tena'aku. 43 Yo hapa kasami mpaha'o da kinahiincu? Nasami podedea to'uo da nigauku. 44 Nangkua ponggawano bilisi tamamiu, yahomo kami ehe nunu'o po'eheno. Iso-iso pohedoano yahoo mompepate miano, nai ehe monunu da tekona, kana'umpe nahina da menona hai pekirino. Hi pogau kule, sipanomo koie, kana'umpe wotoluno kule ronga petamaanomo kule. 45 Sawali hicu po'awaakokomiu da menona, nami ehe parasaeahaku. 46 Dahoo bara te'asa miano hai comiu da tule'i tisu'o hicu ari moweweu dosa? Hicu pogau da menona, hapa kasami parasaeahaku? 47 Miano da mebinta hai Apu Alla ehe'o mompodedea haratiano Apu Alla. Sawali comiu nasa'iaa mebinta hai Apu Alla, koiemo sababuno kasami ehe mompodedea." 48 Kando mpolawani ko'ira miano Yahudi kanahi, "Nai da'a bara menona kanahimami, co'o koie miano Samaria da nilawuino setani?"
Peri'ouho Yesus da'a ka'iaa Ibrahim
49 Kai polawani i Yesus, "Nai da'a lawuihaku setani. Dahaku pa'angga'o Tamangku, sawali mina mpa'are-are'aku. 50 Naku da'a mo'ita kai reree'aku miano. Dahoo me'asa da mokea kaku nireree, koiemo danta otuhio kara-kara. 51 Menonaa hicu kanahi, inai da nunu'o haratiaku nai da'a nta mate samengka-mengkauno." 52 Kando mengkanahi ko'ira miano Yahudi, "Diekana koto'oriomo hi daa lawuico setani. Kana'umpe koie i Ibrahim mengkauhomo mate, kanapo na'anda ko'ira raro nabii, sawali kanahiu, 'Inai da nunu'o haratiaku, nai da'a nta mate samengka-mengkauno.' 53 Owo-owoseko bara ka'iaa pembue'anto i Ibrahim da matemo, kanapo ko'ira nabii? Ponto'oriu Co'o koie inai?" 54 Kai polawani i Yesus, "Kicu reree'o wotolungku pantaku, mau te'ete nahina anggano. Da pa'angga'aku yahoo Tamangku, koiemo da kinahiimiu Apumiu, 55 mainakaa nami da'a to'orio. Sawali I'aku Kuto'orio. Kicu kanahi, naku da'a to'orio, dahakumo mekulepi kana comiu. Sawali Kuna to'orio ronga Kuna nunu'o haratiano. 56 Mohende to'uo pembue'amiu i Ibrahim hi daamo nta ontoo oleo nta leuhangku, deenapo ontoomo, nangkuamo kai mohende." 57 Kando kanahi ko'ira miano Yahudi, "Umuruu nai da'apo koa lima pulu ta'u, kanahiu dakomo ontoo i Ibrahim?" 58 Kai lawanihira i Yesus kanahi, "Santo'u-to'uahano Kupo'awaakokomiu: Peri'ouhaku da'a ka'iaa koie i Ibrahim." 59 Kando mporuru watu ko'ira miano Yahudi nta watuiho, sawali namekalenguakondo bintaa uluano raha mpesombaa.
Miano da mopusu sakidihano
1 Dahomo koie i Yesus lolako kai ontoo me'asa miano da mopusu sa'isono tehina. 2 Kando mpetukana ko'ira ana guruno i Yesus kanahi, "O tuangguru, inai da madosa, kai tehina mopusu die miano, iaa pantano atawa miano motu'ano?" 3 Kai polawani i Yesus, "Na'iaa iaa ronga na'iaa miano motu'ano, sawali kai inonto kuasano Apu Alla da mohedo hai wotoluno koie miano. 4 Paraluu'o kato weweuho pohedoano Apu Alla hi daa tena'aku hi daapo molinyaa; kana'umpe ki malomo, nahina te'asa miano da tule'i mohedo. 5 Akumo die huluno wita'ea solama hicu daapo die hai wita'ea." 6 Sa'arino koharatia kana koie, name'iliiho hai wita, kai geru'o koie ilino da hai wita, yahopo kai lerukiakono'o hai matano koie miano. 7 Ronga tena'o kanahi, "Lakomo mero'u hai lowi da meneehako Siloam." (Batuano "tinena".) Kai lako nde'e koie miano mero'u, kai pohule, ko'ontoomo. 8 Luwu da peka'okudahi laicano ronga pera miano da nte ontoo tempono mo'ita-ita mengkanahi'iramo, "Na'iaa bara koie miano da nte totoro mo'ita-ita?" 9 Dahoo da kanahi, "Menonaa, iaamo." Dahoo penda da kanahi, "Na'iaa, namengkenaa hulano." Wotoluno koie miano kanahi, "Menonaa, i'akumo." 10 Mengkanahi'iramo, "Kana'umpe matau, kau to'ori ko'onto?" 11 Kai polawani, "Koie miano da meneehako i Yesus mogeru wita kai lerukio matangku, yahopo kai tena'aku lako mero'u hai lowi Siloam. Sa'arincu koie, nilakoku ko'onto." 12 Kando mpetukanaiho, "Maina daahano koie miano?" Kai lawanihira, "Naku da'a to'orio." 13 Yahopo kando wawaa koie miano da ari mopusu hai ira miano golonga Farisi. 14 Koie oleo ariano i Yesus mogeru wita kai pokontidoo matano yahoo oleo mpekolia. 15 Nangkuamo koie, kando mpetukana na'anda ko'ira miano golonga Farisi, ki kana'umpe koie matano kai to'ori ko'onto. Kai polawani, "Koie miano lerukiakono'o wita matangku, yahopo kaku pero'u, diekana ko'ontoakumo." 16 Kanahi'iramo nde'e ko'ira asa ntilara miano golonga Farisi, "Koie miano na'iaa tinenano Apu Alla, kana'umpe hina molimpaki atorano oleo mpekolia." Asa ntilara penda kanahi'iramo, "Kana'umpe koie me'asa miano ngkodosa kai to'ori moweweu tinekangkaako da kana koie?" Pegagahi'iramo nde'e. 17 Mpetukanahiramo penda ko'ira miano golonga Farisi kanahi, "Nde'e co'o, kana'umpe ponto'oriu koie miano, hina arimo pokongko'ontoo matau?" Kai polawani, "Iaa me'asa nabii." 18 Sawali ko'ira ponggawano miano Yahudi nasando ehe parasaea ki daa mopusu koie miano tonia, yahopo diekana kai ko'onto. Nangkuamo koie, kando boboihira miano motu'ano, 19 kando petukanaihira, "Yahomo bara die anamiu, da kinahiimiu da mopusu sa'isono hina? Kana'umpe kai to'ori ko'onto diekana?" 20 Kando polawani ko'ira miano motu'ano, "Menonaa die anamami, ronga mopusuo sa'isono hina. 21 Sawali kana'umpemo kai to'ori ko'onto diekana, nako da'a to'orio, ronga inai da ari mokongko'ontoo matano. Mimpetukanaihomo pantano. Motu'aamo, dahomo nta to'ori tuluraa wotolu mpantano." 22 Kando kanahi kana koie ko'ira miano motu'ano, hindona momee hai ira ponggawano miano Yahudi, kana'umpe boboto gau'iramo kanahi, inai da lako akui'o hicuamo Yesus koie Mokole Pompokosalama, dahoo nta niluarako mebinta hai laica sambahea'a. 23 Koiemo sababuno ko'ira miano motu'ano kando kanahi, "Motu'aamo, mimpetukanaihomo pantano." 24 Yahopo kando boboiho penda koie miano da ari mopusu kando petukanaiho, "Po'awaakami sameno-menonaano hai ra'ino Apu Alla. Dakamisi to'orio koie miano yahoo miano ngkodosa." 25 Kai polawani kanahi, "Kicua koie miano ngkodosa, naku da'a to'orio. Te'iaasi da tino'orincu, i'aku isono mopusuaku, diekana ko'ontoakumo." 26 Kando petukanaiho penda, "Hapa ari poweweuno co'o? Kana'umpe poweweuno kau ko'onto?" 27 Kai lawanihira kanahi, "Ariakumo montuluraakokomiu, sawali nasami ehe mompodedea; yo hapa kami daapo metukana penda? Mokeakomiu na'amiu ntada'a tewali ana guruno?" 28 Dahiramo tota'isala'o ronga kanahi, "Co'o ana guruno koie miano, sawali cami ana guruno i Musa. 29 Dakamisi to'orio Apu Alla hi ari koharatia hai Musa. Sawali koie miano, nako to'orio ki maina pebintaano." 30 Kai polawani koie miano kanahi, "Tekangkaaku i'aku, ki sami da'a to'orio pebintaano, mainakaa Iaamo da ari mokongko'ontoakuo matangku. 31 Da tino'orinto koie Apu Alla hi sai pontarima amalano miano ngkodosa, sawali miano da pangkuku ronga nunu'o po'eheno. 32 Mebinta iponoha dungku diekana, nahinapo miano da ari mompodea ki daa da ari mompokongko'onto miano da sahinaano mopusu. 33 Ki sa'iaa koie miano ntinenano Apu Alla, nai to'ori nta kohapa-hapai." 34 Kando mpolawani, "Co'o koie tehina hai bolo dosa, hapa kau mokea potisukami?" Nangkuamo kando saario koie miano da ari mopusu kai peluarako. 35 Koie lele podeahomo i Yesus hindo ari saario koie miano kai peluarako. Perumbuino kando tepo'awa kai kanahi, "Dakosi bara parasaeaho Ana Nto Manusia?" 36 Kai lawanio, "Naiho koie, Apua, kaku parasaeaho na'angku?" 37 Kai lawanio i Yesus, "Dakomo ontoo, deenapo koie da mogau'akoko, Iaamo." 38 Kai kanahi, "Parasaeahakumo, Apua!" Yahopo kai sudu mesombaiho. 39 Kai koharatia i Yesus, "Kaku leu die hai wita'ea nta mo'adili, kai ko'onto miano da mopusu, ronga kai mopusu miano da ko'onto." 40 Kando mpodeaho ko'ira miano golonga Farisi da meda'a kokeena ronga mengkanahi, "Maksuu'u hico mopusu na'amami?" 41 Kai lawanihira i Yesus, "Kimi daa wainto mopusu, nami da'a madosa; sawali mina ngkanahi, 'Ko'ontokami,' yahomo kami e'elengua mengkodosa."
Tumpu mpakani da kolaro
1 "Santo'u-to'uahano Kupo'awaakokomiu: Miano da mewiso hai boso domba sai montealohi wamba, sawali momone hai katondo, koiemo miano mpononako ronga parampo. 2 Sawali inai da mewiso hai wamba, koiemo tumpu mpakani. 3 Koie da modaga wamba ungkahiakono'o wamba koie tumpu mpakani, ronga ko'ira domba ndopodeaho suarano. Kai boboihakondo'o neendo kuu-kuu'o boto, kai wawahira kando mpeluarako. 4 Kindo mpeluarakomo ko'ira luwuo dombano, peri'ouhomo kando mperumbuihakono, kana'umpe ndona nto'orio suarano. 5 Sawali kicua suere miano, nando da'a nta ponunu, deenapo dahira nta mpolaisio, kana'umpe nasando to'orio suarano." 6 Koiemo hi ari momparereakondo i Yesus, sawali nasando paha'o hapa petuduano. 7 Kai koharatia penda i Yesus, "Santo'u-to'uahano Kupo'awaakokomiu: Akumo die wambano koie boso domba. 8 Luwu miano da meri'ou leu ka'iaa I'aku, ko'iramo miano mpononako ronga parampo. Nangkuamo ko'ira domba kasando ehe mogiu suarando. 9 Akumo die wambano koie boso, inai da mewiso tealo hai Aku, dahoo nta salama. Dahoo nta mewiso ronga meluarako kai po'awa mongkaa. 10 Kai leu koie miano mpononako, te'iaasi nta mononako ronga mompepate, kai tii mososa'o. Sawali I'aku kaku leu, yahoo kando to'ori mo'awa toraaha da me'alu barakatino. 11 Akumo die tumpu mpakani da kolaro. Tumpu mpakani da kolaro weehako penaano tendenomo ko'ira dombano. 12 Sawali kicua miano nigadi, da sa'iaa tumpu mpakani ronga sa'iaa ntei domba, ki po'onto dahu lampu leunio, dahoo nta molaisihira ko'ira domba. Kai totopaihira koie dahu lampu, kando mentekamburako mpolai. 13 Kai polai koie miano, hina nte'iaasi mo'oleo gadi, yahomo kasai pompaduli ko'ira domba. 14 Akumo die tumpu mpakani da kolaro. Kuto'orihira ko'ira dombangku, kanasi na'anda ndoto'oriaku, 15 kana hi to'oriaku Tamangku, kanamo na'angku Kuto'orio Tamangku. Yahomo kaku weehako penaangku tendenomo ko'ira dombangku. 16 Dahirapo penda ko'ira dombangku da sai mpe'asa boso na'ai. Dahakusi nta wawahira na'anda, kando podedeaho suarangku, kando mpedulu tewali asa lunu ronga me'asa pakanindo. 17 Kai lou'aku Tamangku, tendenomo hicu weehako penaangku, kaku to'ori tarimaa mbule. 18 Nahina te'asa miano da to'ori alaa penaangku, sawali Kuna weehakono'o nunu'o po'ehengku. Kuasaaku weehakono'o penaangku ronga kuasaaku nta tarimaa mbule. Diemo tugasincu da ari tinarimangku mebinta hai Tamangku." 19 Tendenomo koie gauno i Yesus, kando mpekakahi penda ko'ira miano Yahudi. Me'aluo da kanahi, 20 "Dahoo lawuiho setani kai molawu; yo hapa kami mpompodedea?" 21 Sawali dahoo penda da kanahi, "Koie na'iaa gauno miano da nilawuino setani. To'orio bara setani mompokongko'onto miano mopusu?"
I Yesus sai inehe
22 Da'a mengkau naleuho oleo pinokomaroahano hi ari pinule mbule koie raha mpesombaa hai Yerusalem. Koie tempo yahoo wula ngkoseo. 23 Koie i Yesus dahoo tade-tade hai uluano raha mpesombaa hai pe'olu-olua da meneehako pe'olu-oluano Sulaiman. 24 Kando melibutio ko'ira miano Yahudi ronga kanahi, "Te'impiapo kau daa nta ari-ari weweukami sai awaa laro? Kicuamo co'o Mokole Pompokosalama, po'awaakamimo kai mentee." 25 Kai lawanihira i Yesus, "Ariakumo mo'awaakomiu, sawali nasami parasaea. Ko'ira pohedoangku da ari hinedongku hai laro neeno Tamangku, koiemo buktiino da tewali saksiicu. 26 Sawali nasami ehe parasaea, kana'umpe nasa'iaa comiu dombangku. 27 Ko'ira dombangku ndopodedeaho suarangku, ronga Kuto'orihira, ronga ndomenunu'aku. 28 Dahaku nta weehira tora ngkaidaaha, yahomo kasando da'a nta binasa dungku samengka-mengkauno. Mau te'asa miano nahina danta alahira mebinta hai limangku. 29 Ariomo Tamangku weehaku ira, ronga kolalo owose kuasano ka'iaa luwu da da'a. Nahina nta tule'i alahira mebinta hai limano. 30 I'aku ronga Tamangku bobotokami." 31 Yahopo penda ko'ira miano Yahudi kando mpo'ala watu nta watuiho i Yesus. 32 Sawali i Yesus nangkoharatia, "Me'aluomo niweweungku da moico hi ari tena'aku Tamangku da inontomiu. Ki maina koie sababuno kami daa nta watuihaku?" 33 Kando mpolawani ko'ira miano Yahudi kanahi, "Na'iaahako koie pohedoau da moico kako daa nta watuico, sawali hiu paruruo Apu Alla, kana'umpe co'o to manusia kau mokea mengkengkenaiho Apu Alla." 34 Kai lawanihira i Yesus kanahi, "Dahoo teburi hai Boku Parentano nabii Musa da nidiomiu, 'Koharatia'omo Apu Alla, "Comiu yahoo pe'apua." ' 35 Koie Boku Haratiano Apu Alla nai to'ori niboli'i. Dadi, kicuamo Apu Alla neehakondo'o pe'apua ko'ira miano da tarimaa haratiano, 36 dakomiupo bara nta kanahi hicu daa paruruo Apu Alla, tendenomo hicu kanahi, 'Aku Anano Apu Alla.' Mainakaa ariomo tindahakoaku Tamangku ronga tena'aku tii die hai wita'ea. 37 Ki saku weweuho pohedoano Tamangku, mi'osie parasaeahaku. 38 Sawali Kuna weweuhosi ronga nami ehesi parasaeahaku, koiepo koma niweweungku kami mparasaeaho, kami nto'ori to'uo hi boboto'akuo Tamangku, ronga I'aku na'angku boboto'akono." 39 Kando mokea rako'o penda koie i Yesus, sawali nasando poko'ungkaario.
I Yesus hai asa poleno laa e'e Yordan
40 Pompoleemo koie i Yesus hai laa e'e Yordan ariano mopobaho i Yahya iponoha, kai poo'ia kokeena. 41 Me'aluhira miano da meleu awaa ronga kanahi, "Koie i Yahya nahina te'asa niweweuno tinekangkaako, sawali luwu da kinahiino mekona die miano menonaa." 42 Ronga me'aluo miano da parasaeaho i Yesus kokeena.
Mateano i Lazarus
1 Dahoo me'asa tama da meneehako i Lazarus da konainoo morungku. Poo'iahano hai Betania, kampono i Maria ronga i Marta tuaino. 2 I Maria koiemo tina da ari soloriakono'o mina mowondu hai karuno i Yesus kai kikihiakono'o wuuno. Koie i Lazarus da morungku yahoo petilado. 3 Orua'ira koie petilano i Lazarus mokatuo lele i Yesus kanahi, "Apua, koie miano da niloumiu dahoo morungku." 4 Sapodeaho i Yesus koie lele, kai koharatia, "Koie rungku nai da'a nta mo'ala penaa, sawali kai pinokomentoda hi owose kuasano Apu Alla, ronga kai pinoko'owose Anano Apu Alla." 5 Koie i Yesus taperano lolarohira i Marta, i Maria, ronga i Lazarus. 6 Nangkuamo sapodeaho hi daa morungku koie i Lazarus, pomperadamiopo moo'ia orua oleo. 7 Sa'arino koie, kai po'awaakondo ana guruno kanahi, "Leumo kato mpohule hai Yudea." 8 Sawali ko'ira ana guruno ndona ngkanahi, "O tuangguru, da'apo mengkau ko'ira miano Yahudi ari mokea watuicomiu. Dakomiu bara mokea mohule penda kokeena?" 9 Kai lawanihira i Yesus kanahi, "Nai da'a bara hopulu orua damu hai larono me'asa oleo? Miano da lolako meanta nai da'a nta tesube, kana'umpe dahosi ontoo wita'ea da molinyaa. 10 Sawali ki lako malo, dahoo nta tesube karuno, kana'umpe nasahina dahano molinyaa." 11 Sa'arino koie, nangkoharatia'o, "Simbauto i Lazarus dahoo tekoturi, sawali dahakumo nta lako mokompewanguo." 12 Kanahi'iramo ko'ira ana guruno, "Apua, ki daa tekoturi, dahomo nta tido." 13 Mainakaa, kai kanahi i Yesus dahoo tekoturi, batuano, koie Lazarus mateemo, sawali ponto'orindo hi kanahi dahoo tekoturi, dahoo moturi kana biasa. 14 Nangkuamo koie, kai pogau mongkote i Yesus kanahi, "I Lazarus mateemo. 15 Sawali mohende'aku hi saku da'a kokeena koie wotu, kana'umpe koiemo da kolalo moico kami nto'ori parasaea. Leumo kato melako awaa diekana." 16 Koie i Tomas da meneehako Didimus mogau'akondo ko'ira simbaudo ana guruno i Yesus kanahi, "Leumo kato lako salako'o, kato mate merongaa."
I Yesus mokompewanguo i Lazarus
17 Sadungkuno koie i Yesus, namodeaho hi opaamo oleo ari kinoburu koie i Lazarus. 18 Koie Betania okudaa mebinta hai Yerusalem, kira-kira tolu kilo mentalano. 19 Me'aluhiramo miano Yahudi da meleu awaa i Marta ronga Maria nta lilimboihira tendenomo hi matemo petilado. 20 Sapodeaho koie i Marta hi leumo i Yesus, nalako'o lawatio, yahoo koie i Maria dahosi hai laica. 21 Kanahiomo i Marta hai Yesus, "O Apua, kicanano dakomiu na'ai, nai da'a nta mate petilaku. 22 Sawali diekana kuto'oriosi hi daasi nta moweekomiu Apu Alla pera hapamo da pino'itamiu." 23 Kai polawani i Yesus kanahi, "Petila'u dahomo nta mewangu mbule." 24 Kai polawani i Marta, "Dahakusi to'orio hi daasi nta mewangu mbule kindo mpewangumo miano mate ki leumo oleo kiama." 25 Kai polawani i Yesus, "Akumo pewanguano miano mate ronga da mompokontora. Inai da parasaeahaku, mau ki matemo, dahoo nta tora. 26 Nangkuamo koie, pera miano da tora kai parasaeahaku, nai da'a nta mate samengka-mengkauno. Parasaeakosi bara koie?" 27 Kai polawani i Marta, "O Apua, parasaeahaku hicua Comiu Mokole Pompokosalama, Anano Apu Alla, danta leu hai wita'ea." 28 Sa'arino mogau kana koie, kai lako boboiho i Maria petilano ronga mburuiho kanahi, "Dahoo leu tuangguru, ronga mokea tepo'awaakoko." 29 Sapodeaho koie, namewanguo i Maria tekara-karai kai lako awaa i Yesus. 30 Koie tempo nai da'apo i Yesus mewiso hai kampo, dahopo ariando tepo'awa i Marta. 31 Tempondo ko'ira miano Yahudi da lilimboiho hai laicano ontoo i Maria da tekara-karai meluarako, nilakodomo menunutako, ponto'orindo dahoo lako merurumate hai koburu. 32 Sadungkuno i Maria daahano i Yesus ronga ontoo, nilakono sudu hai karuno kai kanahi, "O Apua, kicanano dakomiu na'ai, nai da'a nta mate petilaku." 33 Sa'ontoo i Yesus hi daa mewowo koie i Maria ronga ko'ira miano Yahudi da perongano, nai poko'aporakoo pelaroano tendeno mopoe larono ronga itai masusa. 34 Kai petukanaihira, "Hai hapa ariamiu koburuo?" Kando lawanio, "Apua, mileumo ontoo!" 35 Kai pewowo i Yesus. 36 Kando kanahi ko'ira miano Yahudi, "Ontoopo, taperano lolaroo!" 37 Sawali dahoo ko'ira simbaudo da kanahi, "Iaamo da ari mompokongko'onto miano mopusu, nai da'a nta tule'i bara totonga'o i Lazarus kai osie mate?" 38 Kai mosa'o penda larono koie i Yesus, yahopo kai lako hai koburu. Koie koburu yahoo me'asa bolo watu da tinangowiako penda watu. 39 Kai koharatia koie i Yesus, "Lincaa koie watu!" Kai polawani koie Marta petilano koie da mate, "Apua, dahomo tewuha, kana'umpe ipatoomo mate." 40 Polawaniomo i Yesus, "Naku da'a bara mo'awaakoko, kiu parasaea, dakomo nta ontoo owoseno kuasano Apu Alla?" 41 Yahopo kando lincaa koie watu. Kai peso'e koie i Yesus hai langi ronga koharatia, "O Ama, Kupontarimakasi himina modedeahaku. 42 Kuto'oriosi himi sadia modedeahaku, sawali kaku kanahi kana koie tendenomo miano me'alu da mpentade lilicu'aku, kando parasaea hicua Comiu da ari tena'aku." 43 Sa'arino koharatia kana koie, namekoraa mehou kanahi, "Lazarus, leumo, peluarakomo!" 44 Koie miano mate peluarakoomo; karuno ronga limano dahosi tepungoako kae pewaluno, kai tii ra'ino tetutuwiako pongkikihi hondo. Kai tena'ira kanahi, "Wuwuhio powaluno kai to'ori lolako."
Boboto'ando powawaino miano Yahudi nta pepatee i Yesus
45 Ko'ira miano Yahudi da leu awaa i Maria, me'aluo da parasaea tempondo ontoo koie da niweweuno i Yesus. 46 Sawali dahoo asa ntilara simbaudo ko'ira miano Yahudi da lako mo'awaakondo ko'ira miano golonga Farisi hapa da ari niweweuno koie i Yesus. 47 Nangkuamo, ko'ira kapala pua'ima ronga miano golonga Farisi boboihira pongadila'eano agama kando mentekongko, yahopo kando kanahi, "Hapa nta poweweunto, kana'umpe koie miano me'aluomo niweweuno da tinekangkaako. 48 Kito poturusio, luwu miano dahira nta parasaeaho, yahopo miano Roma kando daa nta leu sosa'oo raha mpesombaanto ronga pokohancuru'o luwu wonuanto." 49 Sawali dahoo me'asa simbaudo da meneehako i Kayafas, da tewali pua'ima'ea koie ta'u, da kanahi, "Comiu nahina da tino'orimiu. 50 Ronga nami mpaha'o hi kolalo koguna ki mate te'asa miano metotaroihira miano me'alu, ka'iaa ki hancuru luwuo ihino wonuanto." 51 Kai pogau kana koie i Kayafas, na'iaa pekirino pantano, sawali kana pua'ima'ea koie ta'u dahoo mogau kana nabii, hi daa nta mate i Yesus tendenomo miano Yahudi. 52 Ronga na'iaa te'iaa miano Yahudi, sawali nta pumpusakohira kando meboboto ko'ira anano Apu Alla da tekamburako. 53 Metampu'u koie oleo ko'ira powawaino miano Yahudi meboboto'iramo nta mepatee i Yesus. 54 Nangkuamo koie, kasai ehe i Yesus sabahako wotoluno hai ra'indo miano me'alu Yahudi. Kokeenamo pebintaano kai lako hai kampo da meneehako Efraim okudahio lueno papawu. Poo'iahanomo kokeena meronga ko'ira ana guruno. 55 Koie tempo okudaamo oleo owose Ntepulosi'a, nangkuamo kai me'alu miano da melako hai Yerusalem nta pokomowuaho wotolundo meri'ou nunu'o atorano agama. 56 Dahiramo mentade hai uluano raha mpesombaa kando daa u'ungkee i Yesus, ronga pada mpekapetukanai, "Kana'umpe po'awau? Dahoo bara nta leu hai ndo'ua?" 57 Kando pogau kana koie, kana'umpe ko'ira kapala pua'ima ronga miano golonga Farisi arihiramo moluarako parenta ki da'a miano da to'orio daahano Yesus, kando pontulura kando to'ori rako'o.
I Maria minakio karuno Apu Yesus
1 Dahopo onoo oleo nta leuhano ndo'ua oleo Ntepulosi'a, lako'omo koie i Yesus hai Betania, poo'iahano i Lazarus da ari pinokontorano. 2 Kokeena arihiramo kokarehoakono i Yesus, ronga i Marta da montadehi. I Lazarus ronga ko'ira suere miano mpongkaahiramo merongaa i Yesus. 3 Yahopo koie i Maria kai alaa da mentonga litere mina narwastu aslii da mohali olino, kai solorio karuno i Yesus, yahopo kai kikihiakono'o wuuno. Nangkuamo kai mowondu asa bolo laica tendenomo koie mina-mina. 4 Sawali koie Yudas Iskariot, ana guruno i Yesus danta oru soroakondo'o pedaluno, nangkanahi, 5 "Yo hapa koie mina mowondu kasai nibalu tetolu etu doi pera, kai titila'akondo'o miano ngkadee-dee?" 6 Kai kanahi kana koie, na'iaa hi pompaduli ko'ira miano ngkadee-dee, sawali nangkua miano mpononako. Manturu'omo nte mo'ala koie doi da nidiono hai bolo kas da inungkaarino. 7 Kai koharatia koie i Yesus, "Poturusiomo. Kai weweuho, dahano nta pinokopehawa oleo pekoburuangku. 8 Kana'umpe miano ngkadee-dee sadiakomiusi mperonga, sawali I'aku nato da'amo nta mperonga ngkaida'a."
Sincolo-ngkolondo nta pepatee Lazarus
9 Kando mpodeaho ko'ira miano Yahudi da me'alu hi daa koie i Yesus hai Betania. Kando melako nde'e, na'iaa te'iaasi nta ontoo i Yesus, sawali ronga i Lazarus da toramo mbule. 10 Yahopo ko'ira kapala pua'ima kando boboto nta mepatee itai i Lazarus. 11 Kana'umpe tendenomo iaa, kai me'alu miano Yahudi da sai ehemo nunu'ira kapala pua'ima ronga parasaeaho i Yesus.
I Yesus nilawati hai Yerusalem
12 Sameantanomo kando mpodeaho ko'ira miano da leu mpendo'ua oleo Ntepulosi'a, hi daamo i Yesus hai tonga sala me'o'ala hai Yerusalem. 13 Kando mpo'ala riri kormaa, kando lako lawa'o, ronga mpogora kando daa kanahi, "Sombakomiu Apua! Nibarakati'o miano da leuhako neeno Apu, mokoleno miano Israil." 14 Kai awaa koie i Yesus kolodai mongura, yahopo kai pe'uleahio, kana da teburi hai Boku Haratiano Apu Alla: 15 "Osie momee, ana ntina Sion, ontoopo Mokole'u daa leu me'ulea hai ana ngkolodai." 16 Isono, ko'ira ana guruno i Yesus ndoda'apo paha'o koie kadadia, sawali pewangunopo i Yesus ronga pinoko'owose, yahopo kando pokopehawa'o koie da ari kadadia hi pekona hai wotoluno kana da teburi hai Boku Haratiano Apu Alla. 17 Ko'ira miano da meda'a tempono i Yesus boboiho Lazarus mebinta hai bolo ngkoburu, ronga mokompewanguo mebinta hai raro miano mate, i'iramo da leleako hapa da ari niweweuno. 18 Nangkuamo ko'ira miano me'alu kando lako awaa, tendenomo hindo podeaho hicua Iaa da ari moweweu koie da tinekangkaako. 19 Kando pada ngkanahi ko'ira miano golonga Farisi, "Mi'ontoomo pantamiu, nahina nta to'ori niweweunto. Luwu miano hai wita'ea leuhiramo menunutako."
I Yesus tuluraa hi daa nta mate
20 Tempondo meleu miano me'alu hai Yerusalem nta mesambahea daano oleo owose, dahira opia miano Yunani da itai. 21 Kando lako ko'ira miano tepo'awaakono i Filipus da mebinta hai Betsaida wonua Galilea, kando kanahi, "O ponggawa, mokeakami ntepo'awaakono i Yesus." 22 Yahopo koie i Filipus kai lako mo'awaakono i Andreas. Arinopo koie, kando lako orua'ira mo'awaakono i Yesus. 23 Kai lawanihira i Yesus kanahi, "Dungku'omo tempono dahano nta pinoko'owose Ana Nto Manusia. 24 Santo'u-to'uahano Kupo'awaakokomiu: Ki sai tuuna koie wukuno gandum hai wita ronga mate, nta dada'iaangkosi asa botono; sawali ki lako mate, yahopo kai daa nta me'alu wuano. 25 Inaiho da me'o'oloiho penaano, dahoo nta isa penaano, sawali inai da sai rorondoo penaano die hai wita'ea, dahoo nta tora samengka-mengkauno. 26 Inai da tewali miano ntinenaku, kahioomo kai nunu'aku, ronga hai hapa daahangku, koiesi nta daahano. Miano ntinenaku dahoo nta inangga hai Tamangku. 27 Diekana taperano te'antai larongku, hapa nta kanahincu? Dahaku bara nta kanahi, 'O Ama, bintaakuo adie karasai'? Na'iaa, kana'umpe tendenomo danta kadadia diekana-kana, yahomo kaku leu. 28 O Ama, poko'owose'o neemiu!" Yahopo kai pinodea suara mebinta hai langi, "Ariakumo poko'owose'o, ronga dahakupo penda nta poko'owose'o!" 29 Ko'ira miano me'alu da mpentade na'ico ronga mpodeaho kanahi'iramo, "Arumai unino guntu." Dahoo penda da kanahi, "Me'asa mala'ekati da mogau'akono." 30 Kai polawani i Yesus kanahi, "Koie suara da pinodea na'iaa tendenomo I'aku, sawali tendenomo comiu. 31 Diekana temponomo die wita'ea nta inadili. Ronga diekana temponomo nta ninangi koie da kuasaiho wita'ea. 32 Sawali I'aku kicu tinoehako mebinta hai wita, dahaku nta wawahira luwu miano leu hai Aku." 33 Kai pogau kana koie, kai mentee dadaano hi daa nta mate hai keu mpinotalambe. 34 Kando kanahi ko'ira miano me'alu, "Aricamimo podeaho mebinta hai Boku Parentano nabii Musa hi daa nta tora samengka-mengkauno koie Mokole Pompokosalama. Kana'umpe kami ngkanahi hi daa nta tinoehako koie Ana Nto Manusia mebinta hai wita? Inai koie Ana Nto Manusia?" 35 Kai lawanihira i Yesus, "Te'iaamo asantonia koie da molinyaa nta merongakomiu. Lolakomo hi daapo molinyaa, kai osie saru tongokomiu da rondoma. Inai da lolako dahano rondoma, nai to'orio hai hapa nta dungku'ano. 36 Parasaeahomo koie da molinyaa, hi daapo merongakomiu, dakomiumo saru nta tewali miano da tora hai molinyaahano." Sa'arino kanahi kana koie, kai bintanihira i Yesus lako dahando sai nta awaa.
Sababuno miano Yahudi kasando parasaea
37 Ronga mo'osino me'alu tinekangkaako da niweweuno koie i Yesus hai ra'indo, nando ehesi parasaeaho. 38 Kai kadadia koie luwu, nunu'o hapa da ari pinokodungkuno nabii Yesaya, "O Apua, naiho da parasaea hapa da nileleakomami? Ronga, hai nai ariano Apu mepopo'ontoniako hi mokora kuasano limano?" 39 Nangkuamo koie kasando tule'i parasaea, kana'umpe ario penda Yesaya kanahi, 40 "Apu Alla ario pokomopusuo matando, ronga pokomoteaho larondo, kando osie ko'ontoako matando, kai osie te'ungkahi pekirindo, kando osie tegili hai Aku, kaku pokontidohira." 41 Kai kanahi kana koie i Yesaya, dahoo tuluraa dadaano i Yesus. Kana'umpe ariomo ontoo meri'ou owoseno kuasano. 42 Mau kicana koie, dahosi me'alu ponggawano miano Yahudi da parasaeaho. Sawali tendenomo miano golonga Farisi yahomo kasando moseka mangaku hai suere miano, te'iaamo kando tinabe lako hai laica sambahea'a. 43 Kana'umpe hindona ngkolalo ehee nirereeno to manusia ka'iaa nirereeno Apu Alla.
Haratiano Apu Alla da mo'adili
44 Sawali namekora mogau koie i Yesus kanahi, "Inai da parasaeahaku, na'iaa te'iaa I'aku da pinarasaeano, sawali ronga Iaa da ari tena'aku. 45 Ronga miano da ontoaku, ontoo itai Koie da ari tena'aku. 46 Kaku leu die hai wita'ea kana me'asa hulu da molinyaa, kai osie pera miano da parasaeahaku moo'ia dahano rondoma. 47 Ronga miano da modedeaho pompotisuku, sawali nai ponunu, na'iaa I'aku nta adili'o, kana'umpe kaku leu na'iaa nta mo'adili die wita'ea, sawali nta pokosalama'o. 48 Miano da sai eheaku ronga sai monunu pompotisuku, dahomo hakim danta adili'o, yahoo haratiano Apu Alla da ari pinokodungkuku, koiemo hakim danta adili'o ki dungku oleo kiama. 49 Na'iaa po'ehe mpantaku kaku pogau, sawali po'eheno Tamangku da ari tena'aku. Iaamo da parentaaku kaku pokodungku'o hapa danta ino'awangku. 50 Ronga Kuto'orio parentano hicua pu'uno tora ngkaidaaha. Hapa da nigauku yahoo hi daa parentaaku Tamangku."
I Yesus uwohio karudo ana guruno
1 Da'apo dungku nta leuhano oleo Ntepulosi'a, to'oriomo i Yesus hi dungkumo tempono dahano nta bintaa die wita'ea kai pohule hai Tamano. Pololarono nai mo'otu hai ira miano da parasaeaho hai wita'ea, ronga lolarohira dungku kompura-puraano. 2 Koie malo, dahiramo konainoo mperonga mpongkaa koie i Yesus ronga ana guruno, kai leu ponggawano bilisi mburuo hai bolo mpelaroano i Yudas Iskariot, anano i Simon, nta alaa soroakondo'o pedaluno i Yesus. 3 To'oriomo i Yesus hi arimo Tamano weehakono'o luwu kai kuasaiho. Ronga to'oriosi penda hicua pebintaano hai Apu Alla, yahomo kai daa nta mohule mbule hai Apu Alla. 4 Nangkuamo koie, kai pewangu luuhio babu mentiino, kai po'ala handu kai kokorako hai aano. 5 Sa'arino koie, kai posali e'e hai katoa, kai uwohio karudo ana guruno, ronga kikihiakono'o handu da tekokorako hai aano. 6 Sadungkuno hai Simon Petrus, kai kanahi koie i Petrus, "Apua, hapa kaicua Comiu da uwohio karuku?" 7 Kai lawanio i Yesus kanahi, "Hapa da niweweungku, nau da'apo nta to'orio diekana, sawali dakosi nta to'orio perumbuino." 8 Kai kanahi i Petrus, "Mi'osie to'umo, Apua, uwohio karuku." Kai polawani i Yesus, "Ki saku uwohio karu'u, nau da'a nta mo'awa tilari mebinta hai Aku." 9 Kai kanahi i Simon Petrus, "Kicana koie, Apua, osie te'iaa karuku, sawali lima ronga rapangku na'ana." 10 Kai lawanio i Yesus, "Miano da arimo mebaho, mowuamo luwu wotoluno; nai da'amo paraluu me'uwohi penda, tabeano karuno. Kana'umpe mowuakomiumo, sawali nai da'apo luwumiu." 11 Kana'umpe hina nto'oriomo inai danta soroakondo'o pedaluno. Yahomo koie kai koharatia, "Mowuakomiumo, sawali nai da'apo luwumiu." 12 Sa'arino uwohio karudo, kai pokonaa pakeano, kai pohule totoro. Yahopo kai pogau'akondo, "Mimpaha'omo bara koie da ari poweweungku comiu? 13 Poneemiu I'aku guru ronga Apua. Koie da kanahimiu, menonaa. Kana'umpe menonaaku guru ronga Apua. 14 Dadi, kicua I'aku gurumiu ronga Apumiu hicu arimo uwohio karumiu, paraluu'o kami mpeka'uwo-uwohiako karumiu. 15 Kana'umpe ariakumo moweekomiu conto, kami weweuho kana da ari poweweungku comiu. 16 Santo'u-to'uahano Kupo'awaakokomiu: Me'asa ata nai da'a owo-owose ka'iaa apuno, atawa da tinena ka'iaa da mopotena. 17 Kimi nto'oriomo die luwu, dakomiumo nta konantuara kimi weweuho. 18 Kaku kanahi nai da'a mekona hai luwumiu. Dahakusi to'orio da ari nirurukincu. Sawali nai tewali sai mondo da teburi hai Boku Haratiano Apu Alla kanahi, 'Miano da merongaaku mongkaa, koiemo da tewali pedalungku.' 19 Dahaku mo'awaakomiu diekana, hi sai da'apo kadadia, kana'umpe ki dungkumo kadadia, kami mparasaea hicuamo I'aku die Mokole Pompokosalama. 20 Santo'u-to'uahano Kupo'awaakokomiu: Inai da tarimaa miano ntinenaku, iaamo da tarimaaku; ronga inai da tarimaaku, koiemo da tarimaa da ari tena'aku." 21 Sa'arino koie i Yesus koharatia, te'antaihomo pelaroano kai kanahi, "Santo'u-to'uahano, dahoo me'asa miano hai comiu danta soroaku hai pedalungku." 22 Kando mpeka'onto-onto ko'ira ana guruno, nasando to'orio inai da kinahiino. 23 Dahoo koie me'asa ana guruno i Yesus da nilouno, dahoo mehonda okudahio hai muanano. 24 Simon Petrus kode limaa koie ana guruno da telou kai petukanaiho i Yesus, kinaiho koie da pinatuduino. 25 Ruma-rumaihomo koie ana guruno da mehonda okudahio i Yesus kai petukanaiho, "O Apua, inaiho koie miano?" 26 Kai polawani i Yesus kanahi, "Miano da pinoweehincu roti da ari tinudu bolo mangkoona, koiemo mianono." Sa'arino koharatia kana koie, namo'alaa roti kai tuduo hai bolo mangkoona, yahopo kai weehakono'o Yudas, anano Simon Iskariot. 27 Sa'arino koie i Yudas tarimaa koie roti, namewiso'o ponggawano bilisi hai bolo mpelaroano. Yahopo i Yesus kai tena'o, "Hapa da mokea niweweuu, weweuhomo merare." 28 Sawali nasai te'asa miano hai ira da totoro mongkaa da paha'o hapa patuduno kai daa kanahi arumai hai Yudas. 29 Hinangkua Yudas da mo'ungkaariakondo doi, ponto'orindo ko'ira ana guru, dahoo tena'o mo'oli hapa-hapa danta pinake hai oleo owose, atawa tena'o moweehira doi miano ngkadee-dee. 30 Sa'arinomo koie Yudas tarimaa koie roti, nilakono meluarako. Koie wotu maloomo.
Parenta da tonia
31 Sapeluarakonomo koie Yudas, kai koharatia i Yesus, "Diekana dahomo nta pinoko'owose Ana Nto Manusia, ronga tendenomo Iaa, Apu Alla dahomo nta pinoko'owose. 32 Ki pinoko'owose Apu Alla tendenomo Iaa, Apu Alla wotolu mpantano danta poko'owose'o. Ronga dahano nta poko'owose'o diemo kana. 33 Raro anaku, nai da'amo mengkau nta poo'iangku merongakomiu. Dakomiumo nta u'ungkeaku, sawali ari kanahincu hai ira ponggawano miano Yahudi, kanasi koie Kupo'awaakokomiu: dahangku nta lako, nami da'a nta to'ori dungku. 34 Kupoweekomiu parenta da tonia, yahoo kami mpada mpekalolaro; kana pololarongku comiu, kai kanamo koie kimi mpekalolaro. 35 Kicanamo koie, luwuo miano dahiramo nta to'orio hicuamo comiu ana guruku, koiemo kimi mpekalola-lolaro."
I Yesus mokompehawa'o i Petrus
36 Kai petukana koie i Simon Petrus hai Yesus kanahi, "Apua, hai hapa ona dahamiu nta lako?" Kai lawanio kanahi, "Dahangku nta lako, diekana nau da'apo nta to'ori lako nunu'aku, sawali perumbuino dakosi nta lako nunu'aku." 37 Kai kanahi i Petrus, "Apua, kana'umpe kasaku da'a nta to'ori nunukomiu diekana? Ehe'aku mate tendenomo Comiu!" 38 Kai polawani i Yesus, "Menonaa bara, eheko mate tendenomo I'aku? Santo'u-to'uahano Kupo'awaakoko: Nai da'apo nta totorea manu, pentolukomo ari mehapuihaku."
Yesus sala da dungku hai Ama
1 "Mi'osie dindaso mpelaroa. Parasaeaho Apu Alla ronga parasaeahaku na'angku. 2 Hai rahano Tamangku me'aluo poo'iaha. Ki sai da'a kana koie, nahina gunano kaku po'awaakomiu hicu daa nta lako mompasadia'akomiu nta daahamiu. 3 Kicu aripo lako kokeena mompasadia'akomiu nta daahamiu, kaku pohule mbule wawakomiu daahangku; kai maina daahangku yahosi nta daahamiu. 4 Ronga maina nta lako'angku, dakomiusi to'orio salangku." 5 Kanahiomo koie i Tomas, "Apua, nako da'a to'orio nta lako'amiu, kana'umpemo kako daa nta to'orio salamiu?" 6 Koharatia'omo koie i Yesus, "I'akumo die pesalaa da menona ronga toraaha. Nahina miano danta dungku'o Tamangku ki sai tealo hai Aku. 7 Kimi daasi to'oriaku, matantuomo dakomiu nta to'orio Tamangku. Die kana-kana minto'oriomo ronga mi'ontoomo." 8 Kanahiomo i Filipus, "Apua, tisu'akami'o koie Tamamiu, koie koa'omo." 9 Koharatia'omo i Yesus, "Mengkauhakumo merongakomiu, Filipus, kana'umpe kasau da'apo to'oriaku? Inai da ontoaku, ontoomo Tamangku. Kana'umpe kau kanahi, 'Tisu'akami'o koie Tamamiu.' 10 Nau da'a bara parasaea hico boboto Tamangku? Hapa da kinahiincu die, na'iaa gauku pantaku, sawali Tamangku da merongaaku, Iaamo da weweuho koie pohedoa. 11 Parasaeamo hico boboto Tamangku, atawa sakura-kurano, parasaeamo tendenomo koie pohedoangku. 12 Kupo'awaakokomiu: Inai da parasaeahaku, koie miano dahoo nta to'ori weweuho da hinedongku, deenapo da kolalo owose ka'iaa koie. Kana'umpe nta lako'aku hai Tamangku. 13 Nangkuamo ki hapa pino'itamiu mentete neengku, dahaku nta weweuho, nangkua nta tereree'ano i Ama tendenomo Anano. 14 Hapamo pino'itamiu tendenomo neengku, dahaku nta weweuho."
Dandi nta leuhano Sangkoleono Alata'ala
15 "Kimi daasi lou'aku, dakomiumo nta nunu'o perano petenaku. 16 Dahaku nta mo'ita hai Tamangku kai poweekomiu te'asa Pontulumi danta merongakomiu salemba-lembahino. 17 Koie Sangkoleono Apu Alla yahomo danta pokomentoda'o dadaano Apu Alla da santo'u-to'u. Ko'ira miano hai wita'ea nando tarimaa, tendenomo nasando ontoo ronga nasando to'orio. Sawali comiu minto'orio, kana'umpe Iaamo peronga ngkaida'amiu, ronga danta moo'ia hai pelaroamiu. 18 Naku da'a nta bintakomiu kana ana elu. Dahakusi nta leu mbule awakomiu. 19 Te'iaamo te'asantonia kasando ontoaku miano wita'ea, sawali comiu dakomiusi nta ontoaku. Kuna daasi tora, kanamo na'amiu dakomiusi tora. 20 Koiemo oleo dahamiu nta to'orio hico boboto I'aku ronga Tamangku, kanamo comiu boboto'akuo, kanasi na'angku boboto'akokomiu. 21 Miano da tarimaa parentangku ronga weweuho, koiemo da lou'aku. Ronga Tamangku dahoo nta lou'o koie miano da lou'aku. I'aku na'angku nta lou'o, ronga nta popo'ontoniakono'o wotolungku." 22 Kai petukana i Yudas (na'iaa Yudas Iskariot) kanahi, "Apua, yo hapa kaicua hai cami dahamiu nta mepopo'ontoako, kasa'iaa hai miano wita'ea?" 23 Kai polawani koie i Yesus, "Ki da'a miano da lou'aku, dahoo nta nunu'o pompotisuku, ronga Tamangku dahoo nta lou'o. I'aku ronga Tamangku dakami nta leu hai iaa, kako mperonga mpoo'ia. 24 Miano da sai lou'aku nai nunu'o pompotisuku, ronga koie pompotisuku na'iaa mebinta hai Aku, sawali haratiano Tamangku da ari tena'aku. 25 Luwu koie ariaku mo'awaakokomiu daantopo mperonga. 26 Sawali koie Pontulumi, yahoo Sangkoleono Alata'ala da tinenano Tamangku tendenomo neengku, yahomo danta motisukomiu ronga mokompehawakomiu luwu hapa Ku'ari mo'awaakokomiu. 27 Mapuhi mpelaroa Kudiohakokomiu'o; mapuhi mpinehawa Kuweekomiu. Koie mapuhi Ku'ari weekomiu nai pengkena mapuhino wita'ea. Osie dindaso ronga momee. 28 Aricomiumo modeaho Ku'ari kanahi, 'Dahaku nta lako, sawali dahakusi nta leu mbule awakomiu.' Kimi daasi lou'aku, matantuomo dakomiu nta mohende hicu lako hai Tamangku, kana'umpe Tamangku owo-owose'o ka'iaa I'aku. 29 Kupo'awaakokomiu diekana hi sai da'apo kadadia, kai dungku kadadia, kami mparasaeamo. 30 Nai da'amo nta me'alu Kupogau'akokomiu, kana'umpe leuhomo da parentaa die wita'ea. Sawali nahina kuasano hai wotolungku. 31 Koie luwu kai kadadia, kai to'orio miano wita'ea hicu lou'o Tamangku, ronga Kuna nunu'o pera dahano tena'aku. Mimpewangumo, kato mpolinca mebinta na'ai."
I Yesus laano angguru
1 "Akumo pu'uno angguru da santo'u-to'u, ronga Tamangku da piaraa. 2 Pera lasino da sai kowua serewio, ronga da kowua pokowuaho kai tetiani me'alu wuano. 3 Aricomiumo pinokomowua tendenomo pompotisuku comiu. 4 Kahioomo kami ntora boboto'akuo, ronga Aku boboto'akomiu. Kanasi koie lasi nai to'ori kowua mpanta ki te'otu hai laano, kanamo comiu nami nto'ori nta kowua ki sami ntora boboto'akuo. 5 Akumo laano angguru, ronga comiu yahoo lasi-lasino. Inai da tora boboto'akuo ronga Aku boboto'akono, dahoo nta kowua me'alu. Kana'umpe ki sami boboto'akuo, nahina danta to'ori niweweumiu. 6 Inai da sai tora boboto'akuo, dahoo nta nibasiako kana lasi da mate, kai tinawuhako ronga hinawiako hai langa api kai kokaa. 7 Kimi sadia boboto'akuo, ronga pompotisuku mo'iahio pelaroamiu, po'itamo hapa da pinokeahakomiu, dakomiumo nta pinoweehi. 8 Kimi ngkowua me'alu, Tamangku nta tereree, nta mentoda'anomo hicua comiu ana guruku."
Parenta mekalolaro
9 "Kana hi lou'aku Tamangku, kanasi na'angku polouku comiu. Kahioomo kami e'elengua toraako pololarongku. 10 Kimi nunu'o petenaku, dakomiumo nta tora hai pololarongku, kana I'aku hicu nunu'o petenano Tamangku ronga toraako polouno. 11 Luwu koie Kupo'awaakokomiu, kai poo'ia mohendeku hai pelaroamiu, ronga dahomo nta mondo mohendemiu. 12 Diemo petenaku: yahoo kami mpada mpekalolaro kana pololarongku comiu. 13 Nahina pololaro da kolalo owose ka'iaa pololarono miano da soroo penaano tendenomo tokiano. 14 Comiumo tokiangku kimi nunu'o hapa da petenaku. 15 Naku da'amo neehakokomiu'o ata, kana'umpe ata nai to'orio hapa da niweweuno apuno. Sawali Kuna neehakokomiu'o tokia, hicuna mo'awaakomiu luwu da pinodeangku hai Tamangku. 16 Na'iaa comiu da rurukiaku, sawali I'aku da rurukicomiu. Kaku potorokomiu kami lako ronga kowua'ako wua da sai nta paisa pura. Yahomo Tamangku kai weekomiu pera da pino'itamiu hai laro neengku. 17 Diemo parentangku hai comiu, kami mpada mpekalolaro."
Miano wita'ea kokoleahira i Yesus ronga ana guruno
18 "Ki kokoleakomiu miano wita'ea, mimpeehawa'o hindo peri'oumo kokoleahaku. 19 Kicanano dakomiu mpengkena miano wita'ea, dahira nta loukomiu kana wotolu mpantado. Sawali Kuna arimo tindahakokomiu mebinta hai ira, nami da'amo mpengkena. Koiemo sababuno kando kokoleakomiu. 20 Mimpehawa'o hapa Ku'ari mo'awaakokomiu, me'asa ata nai da'a mokulaloiho apuno. Kindo ari pakaseahaku, dahira nta pakaseakomiu na'amiu. Kindo ari nunu'o pompotisuku, dahira nta nunu'o pompotisumiu. 21 Sawali luwu koie kando weweukomiu, tendenomo neengku, kana'umpe nando da'apo to'orio Koie da ari tena'aku. 22 Kicanano saku da'a leu ronga montuluraakondo ko'ira luwu, nai da'a nta hina dosando. Sawali diekana, nando to'ori nta mehapuiho dosando. 23 Miano da kokoleahaku, kokoleaho Tamangku. 24 Ki saku da'a paisa moweweu kana da sai paisa niweweundo miano suere, matantuomo nando da'a nta madosa; sawali diekana mau dahiramo ontoo, dahirasi kokoleahaku kanapo Tamangku. 25 Kai kadadia kana koie, nangkua nta menonaano da teburi hai Boku Parentano Musa da nibasando kanahi, 'Kando kokoleahaku nahina sababuno.' 26 Dahaku nta montena'akokomiu me'asa Pontulumi da mebinta hai Tamangku, yahoo Sangkoleono Apu da mongkote, danta pokomentoda'o da menona mekona hai Aku. 27 Ronga comiumo saksiicu, kana'umpe metampu'u isono iponoha kato mperonga."
E'elengua parasaea
1 "Kaku po'awaakokomiu die luwu, kai osie molelu parasaeamiu. 2 Nami da'a nta niwukahi mewiso hai laica sambahea'a. Ronga dahoo nta da'a tempono, miano da mepatekomiu nta kanahi, koie niweweuno po'eheno Apu Alla. 3 Kando weweukomiu kana koie, hina sando da'apo to'orio Apu Alla ronga I'aku. 4 Sawali diekana Kupo'awaakokomiu, ki lako dungku koie kadadia, dakomiumo nta mokopehawa'o hicu ari mo'awaakokomiu."
Pohedoano Sangkoleono Alata'ala
"Naku da'a mo'awaakokomiu iso-isono, kana'umpe dakitapo mperonga. 5 Sawali die dahaku nta lako hai Tamangku da ari tena'aku, ronga nahinasi miano da metukana hai hapa nta lako'angku. 6 Diekana tewaliomo mopoe laromiu, tendenomo hicu po'awaakokomiu hicu daa nta lako. 7 Sawali namenona koie da kinahiincu: kicu lako dahoo nta kolalo moico dadaamiu. Kana'umpe ki saku lako, koie Pontulumi nai da'a nta leu awakomiu. Sawali kicu lako, dahaku nta tena'o kai leu hai comiu. 8 Ronga ki leu Sangkoleono Apu, dahoo nta popahangiakondo'o miano wita'ea dadaano dosando, dadaano hicu mongkote, ronga dadaando kindo inadili. 9 Popahangi'ira hindo kodosa, nasando ehe parasaeahaku. 10 Popahangi'ira hicu mongkote, Kuna lako hai Tamangku, ronga nami da'amo nta paisa ontoaku. 11 Popahangi'ira hindo daa nta inadili, kana'umpe da kuasaiho wita'ea ario nihukuma. 12 Dahopo me'alu hicu daa nta mo'awaakokomiu, sawali nami da'apo nta tule'i tarimaa. 13 Sawali ki lakomo leu koie Sangkoleono Apu da mongkote, Iaamo danta wawakomiu kami nto'orio luwu pompotisu da menona. Kana'umpe nai da'a nta mogau nunu'o po'eheno pantano, sawali nunu'o da ari pinodeano hai Apu Alla. Ronga dahoo nta mo'awaakokomiu hapa danta kadadia perumbui. 14 Koie Sangkoleono Apu dahoo nta poko'owose'aku, kana'umpe dahoo nta mo'awaakokomiu da ari tinarimano hai Aku. 15 Luwu da da'a hai Tamangku, I'aku da ko'apuako. Nangkuamo koie kaku kanahi, ki hapa danta pinokodungkuno Sangkoleono Apu hai comiu tinarimano mebinta hai Aku."
Susa ronga mohende
16 "Da'amo mengkau kasami ontoaku, sawali nta te'asantoniasi penda dakomiumo nta ontoaku mbule." 17 Kando mpekapetukanai ko'ira ana guruno, "Hapa koie patuduno kai daa kanahi, 'Da'amo mengkau kasami ontoaku, ronga nta te'asantoniasi penda dakomiumo nta ontoaku mbule'? Ronga kai daa kanahi, 'Nta lako'aku hai Tamangku'?" 18 Kando kanahi, "Hapa batuano hi daa kanahi, 'Da'amo mengkau'? Nato da'a to'orio da patuduno." 19 Koie i Yesus to'orio hindo daa nta metukanaiho, dadi polawaniomo, "Tonia kanahincu, da'amo mengkau kasami ontoaku, ronga nta asantoniasi penda kami ontoaku mbule. Yahomo bara koie da nigaumiu? 20 Santo'u-to'uahano Kupo'awaakokomiu: Dakomiu nta mpewowo ronga mperurumate, sawali ko'ira miano hai wita'ea dahira nta memohende. Dahoo nta mopoe laromiu, sawali perumbuino poe laromiu nta teboli'i tewali kahendepa. 21 Tina danta ko'ana masusa'o, kana'umpe dungku'omo tempono mepoeri; sawali ki pompokohinamo, dahomo nta kolumpee susano hina mohendemo, na'arimo mompokohina me'asa ana'ate die hai wita'ea. 22 Kanamo comiu, diekana dahoo masusa laromiu, sawali dakitasi nta mentepo'awa penda, ronga dakomiumo nta mohende, naamo nahina te'asa miano danta to'ori alaa kahendepamiu. 23 Koie oleo nahinamo danta pinetukanaakomiu hai Aku. Santo'u-to'uahano Kupo'awaakokomiu: Hapamo da pino'itamiu hai Tamangku tendenomo neengku, dahoo nta weekomiu. 24 Dungku diekana, nami mpaisapo mo'itaako neengku. Po'itamo, dakomiumo nta mo'awa, kai koa mohendeno laromiu. 25 Luwu die Kudaa mogau'akokomiu yahoo parere. Sawali dahosi nta leu tempono, naku da'amo nta momparere, sawali mogau mongkoteakokomiu mekona Tamangku. 26 Koie oleo kimi mpo'ita, mi'amalaakomo neengku hai Tamangku. Naku da'a kanahi hicu daa nta mo'itaakokomiu hai Tamangku. 27 Kana'umpe Tamangku naloukomiu, tendenomo himi lou'aku, ronga mina mparasaea hicu pebinta hai Apu Alla. 28 Menonaa, pebintaangku hai Tamangku kaku leu die hai wita'ea. Sawali diekana dahakumo nta bintanio die wita'ea, kaku pohule hai Tamangku." 29 Kando kanahi ko'ira ana guruno, "Ontoopo, diekana dakomiumo mogau mongkote, nami da'a momparere. 30 Diekana koto'oriomo himi nto'orio luwu, ronga da'amo paraluu miano metukanaicomiu. Yahomo kako parasaea hicua pebintaamiu hai Apu Alla." 31 Kai lawanihira i Yesus kanahi, "Parasaeakomiumo bara diekana? 32 Ontoopo, dahoo nta leu tempono, deenapo dungku'omo, dahamiu nta mentekamburako mpohule bintaaku kaku poo'ia mpanta. Mau kana koie, naku da'a mompanta, kana'umpe i Ama dahosi merongaaku. 33 Luwuo die Kupo'awaakokomiu, kai momapu toraamiu tendenomo I'aku. Dakomiu marasai die hai wita'ea, sawali potende'o laromiu. Kunangiomo kuasano wita'ea!"
I Yesus amalaakondo ana guruno
1 Sa'arinomo koharatia kana koie, kai peso'e hai langi ronga me'e'eta, "O Ama, diekana dungku'omo tempono. Poko'owose'o Anamiu, kai poko'owosekomiu Anamiu. 2 Aricomiumo weehaku kuasa hai luwuo to manusia da sinoromiu hai Aku, kaku poweehira tora samengka-mengkauno. 3 Diemo tora da sai hina upuano, yahoo kindo to'oricomiu Apu Alla da menona, ronga to'orio Yesus Kristus da tinenamiu. 4 Ariakumo poko'owosekomiu die hai wita'ea, ronga moko'ario pohedoa himi ari tena'aku. 5 Nangkuamo koie, O Ama, mimpoko'owose'aku hai ra'imiu, kana himi ari poko'owose'aku daanopo sai hina wita'ea. 6 Ariakumo leleako neemiu hai ira miano wita'ea himi ari soroakuo. Ko'ira mianomiu himi ari weehakuo, ndonunu'omo haratiamiu. 7 Diekana ndoto'oriomo luwu Mi'ari weehaku hi pebinta hai Comiu. 8 Kana'umpe luwuo haratiamiu hai Aku, ariakumo mokodungku'o hai ira, ronga ndotarimaamo. Ndoto'ori to'uomo hicua hai Comiu pebintaangku, ronga parasaeahiramo hicua Comiu da ari tena'aku. 9 Kaku amalaakondo; naku da'a amalaakondo miano wita'ea, te'iaasi da ari tinarimangku hai Comiu, kana'umpe ko'ira yahoo mianomiu. 10 Ko'ira luwu mianongku yahosi mianomiu, ronga mianomiu yahosi mianongku. Ronga iramo da poko'owose'aku. 11 Diekana pohule'akumo hai Comiu. Kubintaamo wita'ea, sawali i'ira medahirapo hai wita'ea. O Ama da mewota, dagai'akondo'o kuasano neemiu Mi'ari weehaku, kando boboto kana Comiu ronga I'aku. 12 Daamamipo mperonga, ariakumo dagai'akondo'o kuasa neemiu himi ari weehaku. Arincu dagai'ira, nahina te'asa da isa, tabeano koie me'asa miano da metuaraako nta isa, kai menona da teburi hai Boku Haratia. 13 Diekana dahakumo nta lako hai Comiu. Luwuo die dahaku mo'awaakondo hicu daapo die hai wita'ea, kando penasa to'uo mohendeku. 14 Ariakumo mokodungku'akondo'o haratiamiu, yahomo miano wita'ea kando kokoleahira. Kana'umpe nasa'iaamo ira miano wita'ea, kanamo na'angku na'iaa i'aku miano wita'ea. 15 Naku da'a mo'ita kami wawahira mebinta hai wita'ea, sawali Kupo'ita kami dagai'ira mebinta hai ponggawano bilisi. 16 Kana I'aku na'iaa mebinta hai wita'ea, ira na'anda yahosi. 17 Tindahako'iramo tewali umatimiu mentete hai pompotisumiu da menona, kana'umpe koie haratiamiu menonaa. 18 Kana himi tena'aku leu hai wita'ea, kanasi na'angku Kutena'ira die hai wita'ea. 19 Kaku soroo wotolungku hai Comiu tendenomo i'ira, kando tetindahako na'anda tewali umatimiu tendenomo haratiamiu da menona. 20 Na'iaa te'iaa ira die kaku daa amala, sawali ronga pera miano danta parasaeahaku, tendenomo haratia da nileleakondo. 21 Po'itangku hai Comiu, Ama, kando meboboto, kana Comiu ronga I'aku, kato meboboto mponoha, kando parasaea ko'ira miano wita'ea hicua Comiu da ari tena'aku. 22 Ariakumo moweehira pereree'a, kana himi ari moweehaku, kando boboto mponoha kana cita die. 23 I'aku boboto'akondo ronga Comiu boboto'akuo, kai koa bobotodo. Dahomo miano wita'ea nta to'orio hicua Comiu da ari tena'aku, ronga himina lou'ira kana poloumiu Aku. 24 O Ama, mokeahaku ko'ira miano himi ari weehaku, kako mperonga mpoo'ia mau ki hai hapa dahamami meda'a, kando to'ori ontoo pompoko'owosemiu I'aku, kana'umpe Mina meri'ou lou'aku kai da'a die wita'ea. 25 O Ama da mongkote, ko'ira miano wita'ea nahina da to'oricomiu, sawali I'aku Kuna nto'oricomiu, ronga di'ira miano ndoto'orio hicua Comiu da ari tena'aku. 26 Ariakumo mo'awaakondo neemiu, ronga naku da'a nta ari-ari mo'awaakondo, kai da'a hai pelaroando koie pololaro himi ari moweehaku. Ronga I'aku dakamimo nta meboboto."
I Yesus nirako
1 Sa'arinomo koie i Yesus amala, kando mpompole ronga ana guruno hai laa e'e Kidron, kando mpewiso hai uma da da'a kokeena. 2 Koie i Yudas, danta soroakondo'o pedaluno, to'orio koie daahando; kana'umpe manturu'omo koie i Yesus nte kompuluhira ana guruno kokeena. 3 Lako'omo nde'e i Yudas koie hai uma mowawa asa kompi tantara Roma, kai tii ko'ira miano mparonda hai raha mpesombaa tinenado kapala pua'ima ronga miano golonga Farisi. Dahira mpowawa sandata ronga hulu. 4 Koie i Yesus to'oriomo danta kadadia hai wotoluno, dadi lako'omo okudahi'ira kai petukana kanahi, "Naiho da inu'ungkemiu?" 5 Kando polawani kanahi, "I Yesus miano Nazaret." Kai lawanihira, "Akumo die." Koie i Yudas, miano danta soroakondo'o pedaluno, dahomo mentade hai pampando. 6 Tempono i Yesus kanahi, "Akumo die," nilakodo soro bungku kando teroranggahako. 7 Kai petukana penda, "Naiho da inu'ungkemiu?" Kando mpolawani kanahi, "I Yesus miano Nazaret." 8 Koharatia'omo i Yesus, "Ariakumo mo'awaakokomiu, I'akumo die. Ronga kicuamo I'aku da inu'ungkemiu, ko'ira miano suere poturusihiramo kando lako." 9 Kai pogau kana koie, nangkadadiamo da ari kinahiino meri'ou, "O Ama, ko'ira miano ari sinoromiu hai Aku, nahina da silaka." 10 I Simon Petrus da mompetangki taa, rabu'o kai tongka'o biri muanano koie atano pua'ima'ea da meneehako i Malkhus. 11 Kai koharatia koie i Yesus hai Petrus, "Tampila'o mbule koie taa'u. Naku da'a bara nta tarimaa koie pondo'ua ngkarasai da ari pinatantuno Tamangku?"
I Yesus hai ra'ino i Hanas
12 Ko'ira tantara Roma ronga ponggawando kai tii miano Yahudi da memparonda hai raha mpesombaa ndorako'omo i Yesus ronga pungoo. 13 Iso'ando wawaa hai ra'ino i Hanas, ponino Kayafas. Kayafas yahoo pua'ima'ea koie ta'u. 14 Ronga iaamo da ari oliwihira ko'ira miano Yahudi hi kolalo moico ki mate me'asa miano metotaroihira luwuo suku.
I Petrus mehapuiho i Yesus
15 Koie i Simon Petrus ronga me'asa simbaudo ana guruno i Yesus perumbuihiramo nunutako i Yesus. Koie simbauno pewiso'o merongaa i Yesus hai ulua laicano pua'ima'ea, kana'umpe hindona mekato'ori koie pua'ima'ea. 16 Sawali i Petrus poo'iahomo hai bungku mpinewamba. Koie simbauno da to'orio pua'ima'ea meluarako mogau'akono koie tina da modaga pinewamba, kai wawaa koie i Petrus mewiso hai laro ulua. 17 Kanahiomo koie tina, "Na'iaa bara co'o na'au ana guruno koie miano?" Kai polawani i Petrus, "Na'iaa." 18 Koie tempo mokoseoho, dadi ko'ira sangkinaa ronga da mpodaga mpo'alahiramo halo, kando pompekaa api kando mpenguru. Koie na'ana i Petrus dahomo mentade, kando mperonga mpenguru.
Pua'ima'ea metukanaiho i Yesus
19 Kai petampu'u koie pua'ima'ea metukanaiho i Yesus kana'umpe daa-daano ana guruno ronga da pompotisuno. 20 Kai polawani koie i Yesus, "Dahangku nte mogau hai ra'indo miano me'alu, ronga nte pompotisu'angku hai laica sambahea'a ronga raha mpesombaa, dahando mentekongko luwu miano Yahudi. Naku paisa mogau mpewuwuni. 21 Hapa kami daa metukanaihaku? Petukanaihiramo ko'ira miano da ari podeaho pompotisuku; matantuomo dahira nta to'orio hapa da ari kanahincu." 22 Dahomo mogau koie i Yesus, kai tapa'o koie miano mpodaga da mentade na'ico, ronga kanahi, "Kanamo bara koie kiu lawanio pua'ima'ea?" 23 Kai koharatia koie i Yesus, "Kicu daa tesala, tisu'akuo tesalaku, sawali ki menona da kanahincu, yo hapa kau tapa'aku?" 24 Yahopo kai petena i Hanas kando wawaakono'o i Kayafas pua'ima'ea, dahosi tepungo.
I Petrus mehapuiho i Yesus penda
25 Koie i Simon Petrus dahosi mentade menguru na'ico. Kando kanahi ko'ira miano, "Na'iaa bara co'o ana guruno?" Kai pehapu kanahi, "Na'iaa." 26 Kai kanahi koie atano pua'ima'ea, yahoo petilano miano da ari tinongkano birino i Petrus, "Na'iaa bara co'o da inontongku hai uma merongaa koie miano?" 27 Kai pehapu penda i Petrus. Koiesi tempo kai totorea manu.
I Yesus hai ra'ino i Pilatus
28 Dumondo'ea ndowawaamo koie i Yesus mebinta hai laicano Kayafas kando lako hai rahano gubernur. Ko'ira miano Yahudi nando mpewiso hai bolo raha, te'iaamo kindo limpakio atorano agama, kana'umpe dahira nta tewawe moko'owose'o oleo Ntepulosi'a. 29 Nangkuamo koie, kai peluarako i Pilatus awahira kai kanahi, "Hapa da niweweuno die miano kami daa pokompekara-kara'o?" 30 Kanahi'iramo, "Ki sa'iaa miano mosa'o, nako da'a nta wawaakokomiu'o." 31 Kai kanahi i Pilatus, "Mi'alaamo ronga mi'otuhiomo kara-karano nunu'o atoramiu." Sawali ko'ira miano Yahudi ndona ngkanahi, "Icami nako tewali otuhio kara-karano miano kai pinopate." 32 Kanamo koie kai dungku menona ari kinahiino Yesus mekona carano hi daa nta mate. 33 Sapewisono mbule koie Pilatus hai bolo rahano, kai boboiho i Yesus ronga metukanaiho, "Co'omo bara mokoleno miano Yahudi?" 34 Kai polawani i Yesus, "Hapa koie da pinetukanaakou mebinta hai pelaroau, atawa dahoo miano da mo'awaakoko dadaangku?" 35 Kai kanahi i Pilatus, "Ponto'oriu i'aku die miano Yahudi? Da soroko hai aku, yo miano sasuku'u ronga ko'ira kapalando pua'ima. Hapa nde'e da ari niweweuu?" 36 Kai polawani i Yesus, "Pomokole'angku na'iaa die hai wita'ea. Kicanano die wita'ea, dahiramo nta memadalo mianongku kaku osie sinoro hai ponggawando miano Yahudi, sawali pomokole'angku nasa'iaa diceena." 37 Kai petukanaiho i Pilatus, "Dadi mokole bara co'o?" Kai polawani i Yesus, "Kanahiu hicua I'aku mokole. Yahomo koie kaku tehina ronga kaku leu die hai wita'ea, kaku pokomentoda'o da menona. Pera miano da ehee pompotisu da menona, podedeaho kanahincu." 38 a Petukanaamo koie i Pilatus, "Hapa koie da menona?"
Kara-karano i Yesus inotuhi nta pinopate
38 b Kai peluarako koie i Pilatus mogau'akondo ko'ira miano Yahudi kanahi, "Naku da'a mo'awa tesalano die miano. 39 Sawali nunu'o biasamiu, tapio oleo owose Ntepulosi'a, sadiahaku mobintani miano ntetorungku. Po'ehemiusi bara kaku bintaniakomiu'o mokoleno miano Yahudi?" 40 Kando mpogora kanahi, "Osie, osie Iaa! Sawali i Barabas!" Koie i Barabas miano mperukusi.
1 Yahopo koie Pilatus kai alaa i Yesus, kai pontena miano rasaiho. 2 Ko'ira sorodadu mpo'enahiramo songko ngkoriu, kando pokompesongkoakono'o. Sa'arino koie, ndopokompebabuakono'omo babu mentii olondoro. 3 Kando mesosaba hai ra'ino mpehohou kanahi, "Sombakomiu, mokoleno miano Yahudi!" Yahopo kando tapalio ra'ino. 4 Kai peluarako penda koie Pilatus kanahi, "Ontoopo, kupeluarako leu wawaakomiu'o, kami nto'orio hi saku po'awa mau te'asapo tesalano." 5 Kai saba koie i Yesus, dahomo mesongko ngkoriu ronga mebabu mentii olondoro. Kai kanahi i Pilatus, "Mi'ontoomo, diemo mianono!" 6 Tempondo ko'ira kapala pua'ima ronga ko'ira da memparonda hai raha mpesombaa me'ontoo, nilakodo mpogora kanahi, "Basiropaa! Basiropaamo!" Kai kanahi i Pilatus, "Mi'alaamo kami basiropaa pantamiu, kana'umpe i'aku naku po'awa tesalano." 7 Kando mpolawani ko'ira miano Yahudi kanahi, "Nunu'o atoramami, nai tewali sai pinopate, kana'umpe hina angga'o wotoluno Anano Apu Alla." 8 Sapodeaho koie i Pilatus, kai tetiani momee. 9 Kai pewiso mbule hai bolo rahano, kai petukanaiho i Yesus, "Hai hapa pebintaau?" Sawali i Yesus nasai polawani. 10 Kanahiomo nde'e koie i Pilatus, "Hapa kasau ehe mogau'akuo? Nau da'a bara to'orio hicu kuasa nta mokontebintako, ronga hicu kuasa nta basiropako?" 11 Kai polawani i Yesus kanahi, "Ki sai da'a Apu Alla moweeko kuasa, mau te'ete nahina kuasau hai Aku. Nangkuamo koie miano da soroaku hai co'o, owose'o dosano ka'iaa ico'o." 12 Sapodeaho koie i Pilatus, kai mokea ki kana'umpe kai tebintani koie i Yesus. Sawali ko'ira miano Yahudi nantetianimo mpogorado kanahi, "Kimi lako bintaa, na'iaa comiu tokiano mokole'ea. Die miano da angga'o wotoluno mokole, koiemo pedaluno mokole'ea!" 13 Sapodeaho koie da kanahindo, namontena'o miano kando wawaa koie i Yesus meluarako, yahoo i Pilatus totoro'omo hai kadera pongadila da meneehako Horo Watu, gau Ibranino Gabata. 14 Koie wotu kira-kira totoro oleo, ronga ki meanta, yahoo oleo owose Ntepulosi'a. Kai kanahi i Pilatus, "Diemo mokolemiu." 15 Kando mpogora kanahi, "Popateemo! Popateemo! Basiropaa!" Kai kanahi Pilatus, "Po'ehemiu bara kaku basiropaakokomiu'o mokolemiu?" Kando mpolawani ko'ira kapala pua'ima kanahi, "Nahina cami mokolemami saliwano mokole'ea Roma!" 16 Nangkuamo koie Pilatus kai soroakondo'o kai nibasiropa.
Nibasiropaano i Yesus
17 Kando mewawaa koie i Yesus meluarako dahomo lemba'o keu mpinotalambeno me'o'alahio kabumbu da meneehako Kabumbu Tolobe Rapa, gau Ibranino Golgota. 18 Na'icomo nibasiropaano, merongaa orua miano, me'asa hai suwano, me'asa hai muanano, i Yesus da meitonga. 19 Kai pontena i Pilatus kando pompaso buri hai keu mpinotalambeno i Yesus da kanahi, "Yesus miano Nazaret, mokoleno miano Yahudi." 20 Me'aluo miano Yahudi da basaa koie buri, kana'umpe ariando basiropaa koie i Yesus okudahio kota, ronga koie da teburi yahoo gau Ibrani, gau Latin, ronga gau Yunani. 21 Yahopo kando kanahi ko'ira kapala pua'imando miano Yahudi hai Pilatus, "Osie moburi: 'Mokoleno miano Yahudi,' sawali miburio: 'Kanahino: I'akumo mokoleno miano Yahudi.' " 22 Kai lawanihira i Pilatus, "Hapa da ari niburincu, kahioomo kai kana koie." 23 Sa'arindo ko'ira sorodadu basiropaa i Yesus, nilakodo alaa babuno, kando tila opaa'o, me'asa miano asa sibi. Kando alaa penda babu mentiino. Koie babu mentiino nahina seuniano, hinoru mebinta hai wawo dungku hai padano asa lewesi. 24 Nangkuamo koie, kando pada mengkanahi ko'ira sorodadu, "To'osie hia'o die babu mentiino, sawali toloterei'o kai tino'ori inai danta awaa." Kanamo koie kai pengkena da teburi hai Boku Haratiano Apu Alla, "Arihira mpetitila'o pakeaku, ronga loterei'o babu mentiincu." Kanamo koie ari poweweundo ko'ira sorodadu. 25 Okudahio dahano tebasiropa i Yesus dahandomo mpentade tinano, ronga tina'ateno, naamo i Maria samotu'ano Klopas, ronga i Maria Magdalena. 26 Kai ontoo tinano ronga ana guru da nilouno dahoo mentade hai pampano, kai koharatia hai tinano, "O Ina, koiemo kowati ana'u." 27 Koie hai ana guruno nilouno koharatia'omo, "Koiemo kowati tinau." Metampu'u koie tempo poo'iahomo koie tinano i Yesus hai laicano koie ana guruno.
Taweano i Yesus
28 Sa'arino koie, hina nto'oriomo i Yesus hi arimo luwu pohedoano, kai koharatia, "Mokokondo'uaku." Kai pogau kana koie, kai mondo da teburi hai bolo Boku Haratiano Apu Alla. 29 Na'ico dahoo mangkoona da ko'ihiako angguru da mo'olo, kando tuduo bungano watu mpasi mongura, yahopo kando tangkeaho hai wulu, kando taduako hai wiwino Yesus. 30 Kai lawa'o kai koharatia, "Koa'omo!" Arino koie kai tungkuwako rapano, namo'otuo penaano. Sorodadu sada'o tiano Yesus 31 Koie oleo, oleo Dumaa, ronga sasumoono oleo, petampu'uanomo oleo mpekolia. Nangkuamo koie, ko'ira ponggawando miano Yahudi nando ehe ki poo'ia ko'ira maeati tebaehako hai keu mpinotalambe konaa oleo mpekolia. Kana'umpe koie oleo mpekolia, oleo da owose. Nangkuamo koie, kando meleu mpo'ita hai Pilatus kai nilotu karudo ko'ira miano, kando tiihako maeatido mebinta hai keu mpinotalambe. 32 Yahopo kando leu ko'ira sorodadu lotu'o karudo ko'ira da orua miano da perongano tebasiropa. 33 Sawali sando dungku'o i Yesus, kando ontoo hi matemo, nando da'amo lotu'o karuno. 34 Sawali koie me'asa simbaudo ko'ira sorodadu sada'akono'o padanga hai tiano, nilakono sosolo rea ronga e'e. 35 Dahoo miano da ontoo koie kadadia, ronga koie da nileleakono menonaa. To'oriomo hi menona, kai leleako kami mparasaea na'amiu. 36 Kana'umpe kai kadadia kana koie, nangkua koa'ano da teburi hai Boku Haratiano Apu Alla kanahi, "Nahina te'asa wukuno da nilotu." 37 Dahoo penda ayati da kanahi, "Dahira nta soso'ee miano da ari sinakudo."
Kinoburuano i Yesus
38 Sa'arino koie, naleuho i Yusuf da mebinta hai Arimatea mo'ita hai Pilatus kai alaa maeatino i Yesus. Koie i Yusuf ana guruno i Yesus, sawali namewuwuniako hina momee hai ira miano Yahudi. Sawukahio i Pilatus, yahopo kai lako tiihako koie maeatino. 39 Koie Nikodemus da ari leu malo hai Yesus itaiho na'ana. Dahoo mowawa mina mur ronga mina-mina mowondu tolu pulu kilo mobeano. 40 Ko'iramo orua miano da ari tiihako maeatino i Yesus kando waluakono'o kati ronga mina-mina'o, nunu'o sarano miano Yahudi hi polamo miano mate. 41 Da'a mentala ariando basiropaa, dahoo uma dahano koburu da tonia, nahinapo ihino. 42 Hina okuda dahano koie pekoburua, ronga oleo mpekolia dahomo nta oru metampu'u, kokeenamo dahando koburuo i Yesus.
Pewanguano i Yesus
1 Komeanta oleo Mincu, dahopo rondoma, koie i Maria Magdalena lako'iramo hai koburu, kando ontoo koie watu pontangowino koburu hi telincamo. 2 Kai pekalulu lako u'ungkee i Simon Petrus ronga koie ana guru nilouno i Yesus, kai po'awaakondo kanahi, "Arihiramo alaa Apu Yesus mebinta hai koburu, ronga nako to'orio ki maina ariando lako dioho." 3 Yahomo koie i Petrus ronga salakono kando lako hai koburu. 4 Orua'ira pada mpekalulu, sawali namera-merare koie simbauno, yahomo kai peri'ou dungku hai koburu. 5 Kai kokou mompetetelei hai bolo ngkoburu, ontoomo powalu da terambahako na'ico, sawali nasai da'a mewiso. 6 Koie Simon Petrus da merumbui tade-tadeno mewiso hai bolo ngkoburu, ronga ontoo koie powalu da terambahako. 7 Sawali ari powaluno rapano nai okuda, dahoo telulumi ntesinca. 8 Koie simbauno Petrus da meri'ou dungku, pewiso'omo itai ontoo kai parasaea. 9 Dungku koie tempo, nando da'apo paha'o da teburi hai Boku Haratiano Apu Alla hi daa nta mewangu mebinta hai matea. 10 Arino koie yahopo kando pohule.
I Maria Magdalena ontoo i Yesus
11 Sawali koie i Maria dahosi mentade hai wamba ngkoburu kai daa mewowo. Dahomo mewowo kai daa mompetetelei hai bolo ngkoburu. 12 Kai ontoo orua mala'ekati da mepakea mopila. Dahando totoro ariano leleha maeatino Yesus, me'asa hai taro rapano kai tii me'asa hai pada ngkaruno. 13 Kando petukana ko'ira mala'ekati kanahi, "O ina, hapa kau daa mewowo?" Kai polawani i Maria, "Ario inala Apungku, naku da'a to'orio ariando dioho." 14 Sa'arino kanahi kana koie, kai pegili molihe hai bungkuno, na'ontoo i Yesus hi daa mentade na'ico, sawali nai da'apo to'orio hicua Iaa. 15 Kai petukanaiho kanahi, "O ina, yo hapa kau daa mewowo, inai da inu'ungkeu?" Ponto'orino i Maria, miano da mohedo hai uma, yahomo kai kanahi, "O ponggawa, kicuamo comiu da lincaa maeatino, po'awaakuo dahamiu dioho, kaku lako alaa." 16 Kai koharatia koie i Yesus, "Maria!" Kai pegili i Maria ontoo hicua i Yesus, kai kanahi, "Rabuni!" (batuano "guru"). 17 Kai koharatia i Yesus, "Osie ungkaariaku, kana'umpe naku paisapo sabe hai Ama. Sawali lakomo hai ira petilaku mo'awaakondo, diekana dahaku sabe hai Tamangku ronga Tamamiu, Apu Alla Apungku ronga Apumiu." 18 Lako'omo koie i Maria Magdalena mo'awaakondo ana guruno hi arimo ontoo i Yesus, ronga luwu da ari nigauno.
I Yesus mepopo'ontoako hai ira ana guruno
19 Koiesi malono Senee kando mpekompulu ana guruno hai me'asa laica da tetagili wambano ndona momee hai ira miano Yahudi. Kai tibo koie i Yesus leu mentade hai tongado kai koharatia, "Kahioomo kai momapu laromiu." 20 Sa'arino koharatia kana koie, kai popo'ontoniakondo'o limano ronga tiano. Sando ontoo hicua Iaa, kando memohende. 21 Kai koharatia penda, "Kahioomo kai momapu laromiu. Kana Tamangku hi tena'aku, kai kanasi hicu tenakomiu." 22 Yahopo kai puurihira ronga kanahi, "Mintarimaamo Sangkoleono Alata'ala. 23 Kimi ampuniakono'o sinalakino miano, dahoo Apu Alla nta ampunio; ki sami ampunio, nai da'a na'ana Apu Alla nta ampunio."
I Yesus mepopo'ontoako hai Tomas
24 Sawali koie i Tomas da meneehako i Endua, simbaudo ana guruno da hopulu orua, nai da'a itai tempono i Yesus leu awahira. 25 Kanahi'iramo ko'ira simbauno i Tomas, "Aricamimo cami ontoo Apu Yesus." Sawali i Tomas nangkanahi, "Ki saku paisapo ontoo limano da ari pinaso ronga wiso'o limangku, kai tii ki saku paisapo hedoo tiano ariano sinaku, naku da'a to'u nta parasaea." 26 Sa'arino tealo koie asa mincu, nampekompuluhira penda ko'ira ana guruno, ronga i Tomas dahomo itai. Luwu wamba ario tinagili. Sawali i Yesus nantibo mentade hai tongado kai koharatia, "Kahioomo kai momapu laromiu." 27 Yahopo kai koharatia hai Tomas, "Ontoomo limangku ronga hedoomo. Ronga tiangku pengkaemo hedoakono'o limau, kau osiemo bata-bata, sawali parasaeamo." 28 Nangkuamo kai polawani i Tomas kanahi, "Apungku, Apu Alla Apungku!" 29 Kai koharatia i Yesus, "Yahopo kau parasaea hiu ontoakumo. Konantuaraa miano da parasaeahaku, mau ki sai da'a ontoaku."
Patuduno kai niburi die Boku Haratia
30 Dahopo me'alu tinekangkaako da ari niweweuno i Yesus hai ra'indo ana guruno da sai teburi die hai boku. 31 Sawali da teburi die hai bolo boku koa'omo kami mparasaea hicuamo koie i Yesus Mokole Pompokosalama, Anano Apu Alla, ronga kimi mparasaeahomo neeno, dakomiumo nta mo'awa toraaha.
21
I Yesus mepopo'ontoako hai ira ana guruno hai wiwi ntahi Tiberius
1 Sa'arino koie namepopo'ontoakoo penda i Yesus hai ira ana guruno hai wiwi ntahi Tiberias. Kana die dadaano: 2 Koie hai wiwi ntahi dahiramo mpekompulu: i Simon Petrus, i Tomas da meneehako i Endua, i Natanael da mebinta hai Kana hai wonua Galilea, ko'ira anano Zebedeus, ronga koie orua ana guruno meha. 3 Kai po'awaakondo i Simon Petrus simbauno kanahi, "Nta lako'aku mepuka ica." Kando kanahi, "Nta lakokami nunuko." Kando mpebangka nde'e. Sawali koie asa malono nando mpo'awa ica. 4 Dahomo nta tepidi nirarano oleo, kai tibo mentade i Yesus hai wiwino tahi, sawali nasando da'a to'orio hicua Iaa. 5 Kai pogau'akondo kanahi, "Raro anaku, dahosi bara pe'inahumiu?" Kando mpolawani kanahi, "Nahina." 6 Kai tena'ira kanahi, "Basiako pukamiu hai muanano bangka, dakomiumo nta mo'awa ica." Yahopo kando nunu'o da kanahino, nangkuamo nde'e kasando kuramio wuatako koie puka hina dompa me'alu icano. 7 Kanahiomo koie ana guru nilouno i Yesus hai Petrus, "Koiemo Apu Yesus!" Sapodeaho koie i Petrus, kai pebabu, nasai da'a mebabu, kai pelosiako hai bolo ntahi. 8 Ko'ira ana guruno meha leuhiramo wawaa bangkado, kando mesinta'o koie puka da pono'ako ica, nasando da'asi mentala mebinta hai wiwi ntahi, te'iaasi kira-kira asa etu metere. 9 Sadungkudo hai wita, ndo'ontoomo wea api, ronga ica kai tii roti hai wawono koie wea api. 10 Kai koharatia koie i Yesus, "Ndoka powawa na'ai te'opia boto ica da ari nirakomiu." 11 Yahopo koie i Petrus kai sabe hai bangka ronga rentaa koie puka hai wita, pono'ako ica owose asa etu lima pulu otolu boto me'aluno. Sawali mau ki me'alu kana koie, nai da'asi tehia koie puka. 12 Kai boboihira koie i Yesus kanahi, "Leumo kato mpongkaa." Nahinamo te'asa ana guruno da moseka metukana kinaiho Iaa, kana'umpe ndona nto'oriomo hicua Apu. 13 Kai leu koie i Yesus mo'ala roti moweehira, kanasi na'ana ica. 14 Na'icomo kompentoluano i Yesus mepopo'ontoako hai ira ana guruno solama pewanguno mebinta hai matea.
Piaraakuo ko'ira dombangku
15 Sa'arindomo mpongkaa, kai koharatia i Yesus hai Simon Petrus, "Simon, anano Yohanes, dakosi bara lou'aku ka'iaa ko'ira?" Kanahiomo, "Menonaa, Apua, dakomiusi to'orio hicu daasi loukomiu." Kai koharatia koie i Yesus, "Piaraakuo ko'ira ana dombangku." 16 Kompenduano koharatia i Yesus, "Simon, anano Yohanes, dakosi bara lou'aku?" Kanahiomo i Petrus, "Menonaa, Apua, dakomiusi to'orio hicu daasi loukomiu." Kai koharatia koie i Yesus, "Pakaniakuo ko'ira dombangku." 17 Kompentoluno koie i Yesus metukanaiho, "Simon anano Yohanes, dakosi bara lou'aku?" Kai mopoe larono koie i Petrus, nangkompentolunomo metukanaiho. Kai polawani, "Apua, Comiu da to'orio luwu, dakomiusi to'orio hicu daasi loukomiu." Kai koharatia koie i Yesus, "Piaraakuo ko'ira dombangku. 18 Santo'u-to'uahano Kupo'awaakoko: Hiu daapo mongura, dakopo kokorio aa'u kau lako hai hapa dahano po'eheu, sawali kiu motu'amo, dakomo nta taarako limau, kai pungorico suere miano kando wawako dahano sai po'eheu." 19 Kanamo koie i Yesus hi po'awaakono kana'umpe nta daano ki daa nta pinopate ronga kai nireree Apu Alla. Sa'arino koie nangkoharatia'o, "Leumo nunu'aku."
Ana guru da nilouno i Yesus
20 Tempono i Petrus tegili molihe, kai ontoo hi daa merumbuihakondo ana guru da nilouno i Yesus, yahoo da ari mehonda okudahio i Yesus tempondo mperonga mpongkaa, da ari metukana kanahi, "Apua, inaiho koie miano danta sorokomiu?" 21 Sa'ontoo koie ana guru, kai petukana i Petrus hai Yesus, "Hapa nta dadino koie miano?" 22 Kai lawanio i Yesus, "Ki po'ehengku kai mentaa umuruno koie miano dungku kaku leu mpendua, koie na'iaa pasipoleu. Yahoo co'o, leumo nunu'aku." 23 Kai teleleako nde'e hai ira miano mparasaea hi sai da'amo koie ana guruno nta mate, mainakaa koie i Yesus nai da'a kanahi kana koie. Da kanahino, "Ki po'ehengku kai mentaa umuruno koie miano dungku kaku leu mpendua, koie na'iaa pasipoleu."
Pontutuwino gau
24 Koiemo ana guruno i Yesus da ontoo luwu da ari kadadia kai tuluraa, ronga da ari burio, naamo toto'oriomo hapa da tinulurano hi menona. 25 Dahopo me'alu da ari niweweuno i Yesus, sawali kicanano niburi koie luwu hai boku, upuo wita'ea nai da'a nta poko'uleaho bokuno.