Eyangelia Hnei Ioane Hna Xiwamomon

1

1 Ri hna whane ko re Logo, ka hna ile sei Makaze ko re Logo, ka Makaze ko re Logo. 2 One komelei hna ile sei Makaze ri hna whan. 3 Hnei nubonengo hna popol' o re nodei ac' ileoden, ka deko se ace hna popole me deko hna popole hnei nubonengo. 4 Ile sei nubenengo ko re waruma; ka ono re waruma ko re nerene no re ngom. 5 Ka ci niri ri nashene ko re neren; ka ono re nashene deko ma kedi. 6 Omelei ko re ngome hna siatone hnei Makaze, yelen, Ioane. 7 Hna pina ke nubone bane thu asesekoni, thu co asesekoni o re neren, ha thu une ko re nodei ngom' ileodene weno nubon. 8 Deko ma nubone ko re neren' omelei, roi di nubone ko re bane asesekoni o re neren. 9 Omelei ko re nidi neren, me thu anerenini o re nodei ngom' ileodene ci pina ome ri ten. 10 Hna ser' ome ri ten' o re awe ke nubonengo, ka ono re ten' o re awe hna popole hnei nubonengo, ka ono re ten' o re awe deko ma cara jewe du nubonengo. 11 Hna shedolu ke nubonengo jeu' o re re kani nubonengo, ka ono re re kani nubonengo deko ma kedi nubonengo. 12 Roi di buic' ileoden' o re hna kedi nubonengo, nubonengo hna nunuo buic' o re nene thu co re tei Makaze; omelei ke buic' o re ci une jeu' o re acekini nubonengo. 13 Ka deko hna hnapo buice wene ri dra, se deko wene ri alaien' o re hnengom, se deko wene ri alaien' o re ngom; roi di siwai Makaze. 14 Hna ahnengomeni o re Logo; ka nubonengo hna mune punu'ma sej, (ka ehnije hna ule o re sanangome ni nubonengo, ono re sanagomeil' inom' o re Tenengoiene hnasa so ni Cecewaien,) ha cece hnen' o re ci ra gupane ne seseko. 15 Ioane ciaehngeni nubonengo, ne ci kaie ne ci ie, ko, Ome ke nubonengo o re hnego hna ie, ko, Nubonengo o re ci lengelu ri pejogo ha mece ri pogo; wen' o re nubonengo ko re hna dan, ka inu hna diri te. 16 Ka ej' ileodene ha hna kedi o re ci ra gupane ne ile ko re ci ra gupane wene ri ha cece nubonengo. 17 Hnei Mose hna ekanon' o re wathebo, ka siwai Iesu Keriso ko re ci ra gupane ne ile ko re seseko. 18 Deko te ngome hna rowo Makaze; ka ono re Tenengoiene me hnasa so, ma ile ri yewanono ni Cecewaien, nubonengo hna aehngenito nubonengo. 19 Ome ko re hna lae natane hnei Ioane, ma hna siane hnei si Juda o re nodei thu-hule ne nodei si Levi serei Jerusalema co eto nubone, ko, La ke nubo? 20 Ile nubone me aehngeni, ka deko ma pudon, ka nubone ci ie ahngane, ko, Inu deko ma Keriso. 21 Ile buice me eto nubone, ko, Ka nge ko? Nubo Elia? Kei nubone, ko, Inu deko. Nubo se perofeta? Kei nubone ci cedi, ko, Deko. 22 Ile buice me ie du nubone, ko, Ka la ke nubo? ehnije ha thu co cedi buic' o re hna sia xehnij. Ka nge ko re enengoco ni nubo? 23 Kei nubone, ko, "Inu ko re lakaie ri hnahnerece, ko, Anetitini o re kara ni Iehova," inom' o re hnei Isaia perofeta hna ie. 24 Ka nodei faresi ko re hna sian. 25 Ile buice me eto nubon, ne ci ie du nubone, ko, Nge ke nubo ci bapataizo, nubo ngei deko ma Keriso, ka se deko Elia, ka se deko perofeta? 26 Ioane ci cedi buice, ko, Inu ci bapataizo o tin; ka ci sere ri nidini buhnije kome sa, buhnije deko ma ule; 27 Nubonengo ko re ci lengelu ri pejogo ka ha mece ri pogo, deko ma ekowe ke inu co cengebot' o re hna ataceni o re rue cada arada ni nubonengo. 28 Hna ilon' o re nodei ac' omelei i Bethabara ri wone kazo i Ioridano, omelei ko re hnei Ioane hna bapataizo il. 29 1I Orore Ioane ci ule Iesu ci lengebote du nubon, ile nubone me ie, ko, Da ule o re Arenio ni Makaze, o re thu geigeion' o re nia no re ten' o re aw. 30 Ome ke nubonengo o re hnego hna ie, ko, Ha ci lengelu ri pejogo ko se ngome ha mece ri pogo, wen' o re hna dane ke nubonengo, ka inu hna diri te. 31 Ka inu deko hna ule kaceni nubonengo; roi di kome, ko, nubonengo co ahngabote du Iserael, wen' omelei ha pina ke inu co bapataizon' o tin. 32 Ioane ci lae nata, ne ci ie, ko, Hnego hna ule o re Uiewaieni ci dedelu thela ri aw' ineko din, ne ci toene ri poaieni nubonengo. 33 Ka inu deko hna ule kaceni nubonengo; roi di nubonengo o re thu siato nu co bapataizo o tin, hna beredone du nu, ko, Nubon' o re nubo co ule o re Uiewaieni ci dedelu, ne ci te ri pon, oni nubone ko re co bapataizo o Uiewaieni Hmijoc. 34 Ka hnego hna ule, ka hnego hna lae natane te, ko, omelei ko re Tenengoieni Makaze. 35 Orore yawe Ioane ci ser, ne ile ko se rue kokonieni nubon. 36 Nubone ci ule Iesu ci leng, ile nubone me ie, ko, Da ule o re Arenio ni Makaze! 37 Ono re rue kokoniene ci taedengi o re enengoco ni nubon, ile bushengone me lenge leu Iesu. 38 Ka Iesu ci tha hnidelo, ne ci rowo bushengone ci hue leu, ile nubonengo me beredone du bushengone, ko, Hmengo ci there nge? Kei bushengone ci ie du nubonengo, ko, Rabi, (omelei hna ureie, ko, Thu yeno,) ngewao ke bua ci mune il? 39 Kei nubonengo du bushengone, ko, Hue te co ule. Bushengone ci hue te ne ci ule o re hnamune ni nubonengo; ka bushengone hna menenge hnasese ne nubonengo ri ran' omelei, ka ineko ten ko re gula ran. 40 Ka Anederea ace celuaiene ne Simona Peteru kome sa bushengon' o re ci taedengi Ioane ne ci lenge leu nubonengo. 41 Nubone ci uni dan' o re nidi celuaieni nubone Simona, ne ci ie du nubone, ko, Ehnije hna uni o re Mesia, (omelei hna ureie, ko, Keriso.) 42 Ile nubone me hue te nubone lo du Iesu. Ka Iesu ma rowo nubon' ile nubonengo me beredone, ko, Nubo Simona, tei Iona, co kaio nubo Kefa, (omelei ma hna ureie, ko, Peteru.) 43 Ka orore Iesu ci di leng' i Galili, ka nubonengo ci one Filip, ne ci beredone du nubone, ko, Hue leu nu. 44 Ka serei Bethesaida ke Filip, ono re menenge ni Anederea ne Peteru. 45 Ka Filipo ci one Nathanyel, ne ci ie du nubone, ko, Ehnije hna uni o re hnei Mose hna xiwamomone ri wathebo, ka se hnei nodei perofeta te, ko, Iesu serei Nazareth, tei Iosefa. 46 Ilei Nathanyel me ie du nubone, ko, Numu se ace me roi wenei Nazareth? Kei Filipo ci ie du nubon, ko, Hue te, ha thu ule. 47 Iesu ci rowo Nathanyel ci huebote du nubonengo, ile nubonengo ci beredo nubone, ko, Da ule o re nidi si Iserael, deko se cihmuge sei nubon! 48 Kei Nathanyel ci ie du nubonengo, ko, Hna eragaione ke bua ci rowo nu? Iesu ci cediton, ne ci thamumucane du nubone, ko, Inu hna ule nubo hadu ri ten' o re acua be deko hna kaio nubo hnei Filip. 49 Kei Nathanyel ci cedi nubonengo, ko, Rabi, bua ko re Tenengoieni Makaze; bua ko re doku ni si Israel. 50 Iesu ci cediton, ne ci thamumucane du nubone, ko, Nubo ci une wen' o re hnego hna ie, ko, Inu ha ule nubo hadu ri ten' o re acua? nubo co ule te o re nodei ace me hmaiai ri pon' omelei. 51 Nubonengo ci beredone du nubone, ko, Seseko, seseko, inu ci ie du buhnije, ko, oiru buhnije co ule o re awe me kapabot, ka ono re nodei angela ni Makaze co icelo ne co icelu ri pon' o re Tei ngom.

2

1 Кa ri rane me therion' ile me aace hmenueneni i Kena i Galili, ka omelei te ko re kodaruieni Iesu. 2 Ka hna teno Iesu te ne nodei kokonieni nubonengo jeu' o re aace hmenueneni. 3 Ka ma deko wain, il' o re kodaruieni Iesu me ie du nubonengo, ko, Buice ha deko wain. 4 Kei Iesu ci beredone du nubone, ko, Hmenew, nge ke nubo du nu, be deko ma pina ko re eziego. 5 Kei il' o re kodaruieni nubonengo ci ie jeu' o re nodei sinemenenge, ko, Ono re ace nubone ngei co ie du buhnij, ilonelo. 6 Ka ci hmor' omelei ko re nodei cei ete me sikes bane iruaba leu' o re lata ni si Juda, etha tu ca etha theri ko re bath ko re hmaiaiil. 7 Kei Iesu ci beredone du buice, ko, Acecenilo o re nodei cei hnei tin. Ile buice me aceceni ca pina ri peic. 8 Kei nubonengo ci beredone du buice, ko, Zelo onom, ne yoselo jeu' o re token' o re noken. Ile buice me yose. 9 Ma hna kua tubunide ko re necen' o re noken' o re tini hna ureie bane wain, ka nubone deko ma ule wene il, roi ko re nodei sinemenenge hna ze o re tini ha ule,) il' o re necen' o re nokene me kaion' o re ngome be ci lae hmenew, 10 Ne ci ie du nubone, ko, Ono re nodei ngom' ileodene ci thawadan' o re waina me roi, ka ma hna kua hmaiaione ko re nodei ngom, ile me kanon' o re waina me nia; ka nubo ha hna ane o re waina me roi ca pina onom. 11 Omelei ko re aehngenijeu me hna dane naeni Iesu hna ilewan' i Kena i Galili, ne ci aehngeniton' o re sanangome ni nubonengo; ka ci une du nubonengo ko re re kokonieni nubonengo. 12 Thuben' omelei ile nubonengo me lenge kazo i Kaparenauma, nubonengo, ne kodaruieni nubonengo, ne re celuaieni nubonengo, ne ile te ko re re kokonieni nubonengo; ka buice deko ma meneng' omelei acala ko re bu. 13 1 Ka ha acene ko re paseka ni si Juda, ka Iesu ci lenge kadio i Jerusalem, 14 Ne ci unitone ri hneruala o re nodei ngome ci itico kau, ne mamoe, ne din; ne nodei ngome ci eto jeu' o mani ci memeneng. 15 Nubonengo ma hna ilewan' o re moce wene ri wacene me waiam, ile nubonengo me uwoto buic' ileoden' obote ri hneruala, ne nodei mamoe, ne nodei kau; ne ci piebot' o re mani no re nodei ngome ci eto jeu' o mani, ne ci keda peicelu rod' o re nodei laulau. 16 Nubonengo ci beredone jeu' o re nodei ngome ci itico dm, ko, Yoselo o re nodei ac' om, hage ilon' o re hneruala ni Cicango bane 'ma itic. 17 Il' o re re kokonieni nubonengo me uan' o re hna xiwamomone, ko, Ono re alaiene me hmaiai jeu' o re hneruala ni bua hna akotoni nu. 18 Ile me ie ko re nodei si Juda, du nubonengo, ko, Nge ko re kacene nubo ci aehngeni du xehnij, nubo ma ci ilon' o re nodei ac' omelei? 19 Kei Iesu ci cediton, ne ci thamumucane du buice, ko, Cazebot' o re 'ma om, ka theri ko re ade ran' ile inu me aseri yawe. 20 Il' o re si Juda me ie, ko, Foti sikese ko re nodei kenerekene ko re hna aseri o re hnemala om, ka mгЬo co aseri yawe di ri ade ran eme theri? 21 Roi di nubonengo hna beredon' o re hneruala me hneiwa ni nubonengo. 22 Ka ma hna wienilo yawe thela ri hna taeto ke nubonengo, il' o re re kokonieni nubonengo me hmekelan' o re hnei nubonengo hna beredon' omelei; ka buice ci kedi o re eberedo hna xiwamomon, ne ile te ko re eberedo hnei Iesu hna beredon. 23 Nubonengo be ile i Jerusalema ri nokene paseka, waace ci une jeu' o re acekiwaieni nubonengo, buice ma ule o re nodei aehngenijeu hnei nubonengo hna ilewan. 24 Ka Iesu deko hna nueto nubonengo ko du buic, wen' o re nubonengo ha rowon' o re nodei ngom' ileoden, 25 Ka deko ma nidi ace du nubonengo ko re ngome co aehngeni o re lata ni ngom, wen' o re nubonengo ha rowon' o re nodei ace ri hnoren' o re ngom.

3

1 Omelei ko se ngome se faresi, Nikodimo ko re yeleni nubon, se toane ni si Juda. 2 Nubone ci huebote du Iesu ri rid, ne ci ie du nubonengo, ko, Rabi, ehnije ha rowone bua ko re Thu yeno hna lengelu thela sei Makaze, wen' o re deko se ngome ha thu ni co ilon' o re nodei aehngenijeu hnei bua hna ilone ngei me tako kei Makaze sei nubon. 3 Iesu ci cediton, ne ci thamumucane du nubone, ko, Seseko, seseko, inu ci ie du nubo, Ngei me deko ma hnapone yawe ko re ngome nubone tha thu ni ko co ule o re baselaia ni Makaze. 4 Kei Nikodimo ci ie du nubonengo, ko, Ha thu ni korione co hnapon' o re ngome ma ha hmaiai? ilo, nubone ha thu ni co ha rewe okonelo ri ore no re hmaieni nubon, ne co hnapon? 5 Iesu ci ceditone, ko, Seseko, seseko, inu ci ie du nubo, ko, Ngei me deko ma hnapon' o re ngome wene ri tini ne Uiewaieni Hmijoc, nubone tha thu ni ko co okonelo ri baselaia ni Makaze. 6 Ono re hna hnapone wene ri hnengom, hnengome ko komelei; ka ono re hna hnapone wene ri Uiewaien, uieni ko komelei. 7 Hage uran' o re hnego hna ie du nubo, ko, Nidi ace buhnije co hnapone yawe. 8 Ci hnane ko re yengo wene ri guhne nubone ci alan, nubo ci taedengi o re yepelemumu ni nubon, ka deko ma ule sere ile ke nubon, ca ha ci hue ile ke nubon; inomelei ko re nodei ngom' ileodene hna hnapone wene ri Uiewaien. 9 Kei Nikodimo ci cedi, ne ci ie du nubonengo, ko, Ha thu ni korione co ilewan' omewalei? 10 Iesu ci cediton, ne ci thamumucane du nubone, ko, Ilo, nubo ko re thu yeno ni si Iserael, ka deko ma cara jeu omelei? 11 Seseko, seseko, inu ci ie du nubo, ko, Ehnije ci ie ono re hnei ehnije hna cara jewe, ka ehnije ci lae nata ono re hnei ehnije hna ule; ka buhnije deko ma kedi o re hnei ehnije hna lae natan. 12 Ngei inu me ie du buhnij' o re nodei ace no re ten' o re aw, ka buhnije deko ma kedi, co korione ke buhnije co kedi kacene inu ngei co ie du buhnij' o re nodei ace nomeloi ri aw? 13 Deko se ngome hna icelo omeloi ri aw, roi ke nubon' o re hna icelu sere ri aw, ono re Tei ngom ma ha ile ri aw. 14 Ka inom' o re hnei Mose hna kedilo re ran' o re une ri hnahnerec, se inomelei ha co kedilo re ran' o re Tei ngom, 15 Thu deko di ma tango ko re ngome me sa ci une du nubon, roi di nubone co numu o re waruma tha thu ase ko. 16 Wen' o re naeni Makaze hna raton' o re ten' o re aw, ca ile nubonengo me nunuone te o re Tei nubonengo sa so, thu deko di ma tango ko re ngome me sa ci une du nubon, roi di nubone co numu o re waruma tha thu ase ko. 17 Wen' o re Makaze deko hna siaton' o re Tei nubonengo ome ri tene co hnaelon' o re ten' o re aw, roi di co awarumani o re ten' o re awe hnei nubon. 18 Ono re ngome ci une du nubon, deko co hnaelo ke nubon; roi di ha hnaelo onome ko re ngome deko ma un, wen' o re nubone deko ma une jeu' o re yelen' o re Tei Makaze me sa so. 19 Ka ome ko re hnaelo, ko, ha pina ko re neren' ome ri ten, ka ono re nodei ngome ci hnoron' o re nashene ri pon' o re neren; wen' o re nia ko re ta ruace ni buic. 20 Ka ono re ngome ci ru' o re nia nubone ci kogon' o re neren; ka se deko ma huebote jeu' o re neren, da ahngabote ko re ta ruace ni nubon. 21 Roi di ono re ngome ci ru' o re seseko ci huebote jeu' o re neren, thu ahngabote ko re ta ruace ni nubone, ko, ha hna ilone siwai Makaze. 22 Thuben' omelei Iesu ci lenge ne ile ko re re kokonieni nubonengo jeu' o re node Judea, ne ci mune omelei sese ne buic, ne ci bapataizon. 23 Ka se ci bapataizone te kei Ioane i Ainon, aceno Salim, wen' o re hmaiai ko re tin' omelei; ka buice ci huebot, ile me bapataizo buic. 24 Ka be deko hna cedo Ioane, ri 'ma ewoth. 25 Il' o re re kokonieni Ioane ne si Juda me icakore ti o re la se. 26 Ka buice ci huebote du Ioane, ne ci ie du nubone, ko, Rabi, nubon' o re hna ile sei bua ri wone kazo i Ioridano, ka o re hnei bua hna asesekoni, da ule, nubone ci bapataizo, ka ono re nodei ngom' ileodene ci hue du nubon. 27 Ka Ioane ci cedi, ne ci ie, ko, Tha thu ni ko ko se ngome co kedi o se ace ngei me deko hna kanu nubone wene ri aw. 28 Buhnije co cede re kodego o re hnego hna ie, ko, Inu deko Keriso, ka ha hna sia nu ri tadani nubonengo. 29 Ono re ngome ha numu ceni, nubone ko re ngome be ci lae hmenew; ka ono re re kan' o re ngome be ci lae hmenewe ci sere ne ci taedengi nubon, ne ci opodo hmaiaione wen' o re lanengoce no re ngome be ci lae hmenew; inomelei ha iu ko re ci opodone inu. 30 Nubonengo co kebene ko, ka inu co waami ko. 31 Ono re ngome serei meloi nubonengo ile ri pon' o re nodei ac' ileoden; ka ono re ngome wene ri ten' o re awe wene ri ten' o re awe ke nubon, ka nubone ci enengocon' o re ten' o re aw; ka ono re ngome serei meloi nubonengo ha ile ri pon' o re nodei ac' ileoden. 32 Ka ono re hnei nubonengo hna rowon, ka hna canaeon, omelei nubonengo ci lae buretan, ka deko ngome ci kedi o re hnei nubonengo hna lae buretan. 33 Ono re ngome ci kedi o re hna lae bureta ni nubonengo ci ataceni acikacene, ko, seseko ke Makaze. 34 Nubonengo o re hnei Makaze hna siatone ci beredon' o re nodei eberedo ni Makaze, wen' o re Makaze deko ma tuone co nunuo nubonengo o re Uiewaien. 35 Ono re Cecewaiene ci raton' o re Tenengoien, ne ci nunuon' o re nodei ac' ileodene jeu' o re aranine ni nubonengo. 36 Nubon' o re ci une jeu' o re Tenengoiene ha numu o re waruma tha thu ase ko; ka nubon' o re deko ma une jeu' o re Tenengoiene deko co ule o re waruma; roi di ko re kaicaraawe ni Makaze co toene ri poni nubon.

4

1 Ma rowone kei Retok, ono re nodei faresi hna taedengi, ko, Iesu ci lae nodei kokoniene me waace ri poni Ioane ne ci bapataizo buic; 2 (Roi di Iesu deko hna bapataizon, ka hnei nodei kokonieni nubonengo;) 3 Ile nubonengo me nue di o Judea, ne ci lenge kadio yawe i Galili. 4 Ka nubonengo co lenge ri nidino Samaria. 5 Ma shedolu ke nubonengo ri se meneng' i Samaria, yelene Saikar, acenon' o re gula node hnei Iakobo hna kanu Iosefa, tei nubon. 6 Omelei ko re wi ni Iakobo. Iesu ma nidranidra hna lenge ci munelu so ri pa wi, ka ineko sikes ko re gula ran. 7 Ile me huebote ko se hmenewe si Samaria co ze wi; kei Iesu ci beredone du nubone, ko, Thue inu kua. 8 (Ha hue ko re re kokonieni nubonengo jeu' o re meneng, co itico kaka.) 9 Kei il' o re hmenewe i Samaria ci ie du nubonengo, ko, Nge ke bua me si Juda, kedi me ci sibo kua sego me hmenewe i Samaria? wen' o re si Juda deko ma ihuejeu ne ile ko re si Samaria. 10 Iesu ci ceditone ne ci thamumucane du nubone, ko, Kacene nubo me ule o re itutuo ni Makaze, ne nubon' o re ci ie du nubo, ko, Thue inu kua, kacene nubo ha hna sibo nubon, ka nubone ha hna kanu nubo o re wi me waruma. 11 Kei il' o re hmenewe ci ie du nubonengo, ko, Retok, bua deko cei, ka iweiai ko re wi, ka wene ko ile ke bua o re wi me waruma? 12 Ilo bua hmaiai ri pon' o re cecehnij, Iakobo, o re hna kanu ehnij' o re wi, ka hna kuane wen' ome ke nubon, ne re tei nubon, ne nodei sini nubon? 13 Iesu ci cediton, ne ci thamumucane du nubone, ko, Ono re ngom' ileodene co kua wene ri wi ome co di kua yawe; 14 Ka ono re ngome co kua wene ri wi inu co kanu nubone nubone deko co di kua e iara oiru; ka ono re wi inu co kanu nubone co ile ri hnore ni nubone ono re wi me ci uralo jeu' o re waruma tha thu ase ko. 15 Il' o re hmenewe me ie du nubonengo, ko, Retok, thue inu o re wi omelei, thu deko ma di kua ke inu, ka thu deko ma huebot' ome ke inu co ze. 16 Kei Iesu ci beredone du nubone, ko, Ho hue co dakori o re cahmanieni nubo, ne huebot' om. 17 Il' o re hmenewe me ie, ko, Inu deko cahman. Kei Iesu ci beredone du nubone, ko, Seseko ko re hnei nubo hna ie, ko, Inu deko cahman; 18 Wen' o re nubo ha hna hmenuene no re nodei mocahmane me xara faiv; ka nubon' o re ci menenge sese ne nubo onome deko cahmanieni nubo; oniile ko re hnei nubo hna ie. 19 Kei il' o re hmenewe ci ie du nubonengo, ko, Retok, inu ci rowone, ko, perofeta ke bua. 20 Ono re re cecehnije hna hnelu ome ri wec, ka kei buhnije ci beredone, ko, Jerusalema ko re nidi guhnene bane hne. 21 Kei Iesu ci beredone du nubone, ko, Hmenew, taedengi du nu, ba thu pina ko re ezien, ile buhnije deko co hne du Cecewaien' ome ri wec, ka se deko i Jerusalem. 22 Buhnije deko ma ule o re buhnije ci hne jewe, ka ehnije ha ule o re hnei ehnije hna hne jewe, wen' o re wenei si Juda ko re waruma. 23 Ka ba thu pina ko re ezien, ka ha om, ono re nodei ngome thu nidi hne co hne du Cecewaiene ri uieni ne ile ko re seseko, wen' o re Cecewaiene ci thereton' o re nodei ngome me inomelei co hne du nubonengo. 24 Uiewaieni ke Makaze, ka buic' o re thu hne du nubonengo co hne ri uieni ne ile ko re seseko. 25 Kei il' o re hmenewe ci ie du nubonengo, ko, Inu ha ule ha ci lengelu ko re Mesia, se yelene yawe Keriso; ma shedolu ke nubonengo ile nubonengo co aehngeni du ehnij' o re nodei ac' ileoden. 26 Kei Iesu ci beredone du nubone, ko, Oni inu komelei o re ci enengoco ne nubo. 27 Ile me pinalu ko re re kokonieni nubonengo, ne ci urane wen' o re nubonengo ci eberedo ne il' o re hmenew; roi di deko se ngome me ie du nubonengo, ko, Bua ci there nge? ca, Nge ke bua ci eberedo ne nubon? 28 Il' o re hmenewe me anelu o re cei ni nubon, ne ci hue jeu' o re meneng, ne ci ie jeu' o re nodei ngome, 29 Ko, Da hue te co ule o re ngome hna thati ie du nu o re nodei ac' ileodene hnego hna ilon; nubone ngei Keriso, ca nge? 30 Ile buice me kokorobote sere ri meneng, ne ci pinalu sei nubonengo. 31 Be tako ke nubon' il' o re re kokoniene ci ilewa nubonengo, ne ci ie, ko, Rabi, kodarulo. 32 Kei nubonengo ci beredone du buice, ko, Inu ha numu bane kaka buhnije deko ma ule. 33 Ile me enengoco ko re re kokoniene, ko, Numu ngome ngei hna thue nubonengo kaka? 34 Ilei Iesu me beredone du buice, ko, Ome ko re kakago, co ru' o re alaieni nubonengo hna siato nu, ne co anize o re ruace ni nubonengo. 35 Buhnije deko ma ie, ko, Сo foa te ko re ade cekol' ile me pina ko re co thethuma? ka da ule, inu ci ie du buhnije, ko, Ngaralo ke buhnij, ne ule o re ta toto, ha kehnede ka ha ele thethuma. 36 Ka nubon' o re ci kini ha numu thuben, ne ci sanelo o re kakaile jeu' o re waruma tha thu ase ko, thu opodone seнe ko re thu ca ne ile ko re thu kin. 37 Inomelei, seseko ko re hna ie, ko, Kome sa ci ca, ka ome sa ci kini. 38 Hnego hna sia buhnije co kini o re buhnije deko hna ushiwan; hnen' osotene ko hna ushiwan, ka buhnije hna rolo ri ushiwa ni buic. 39 Ka xaranumu ko re nodei si Samaria ci une du nubonengo ri meneng' omelei, wen' o re gure enengoco hnen' o re hmenewe hna lae natane, ko, Hnei nubonengo hna thati beredone du nu o re nodei ac' ileodene hnego hna ilon. 40 Ma pina sei nubonengo ko re nodei si Samaria, ile buice me cue nubonengo co mune sese ne buic; ile nubonengo me mune omelei tu ko re rue ran. 41 Waace te ko re nodei ngome ci une wen' o re eberedo ni nubonengo ko. 42 Ka kei buice ci ie jeu' o re hmenewe, ko, Ehnije deko yawe ma une wen' o re gure enengoco ni nubo, ka ehnije ko hna taedengi, ka ehnije ha ule, seseko, ome ko re Keriso o re thu awarumani o re ten' o re aw. 43 Thuben' o re rue ran' ile nubonengo me nue di omelei, ne ci lenge kadio i Galili. 44 Ka Iesu hna lae natane, ko, Deko ma mece ko se perofeta ri node ni nubone ko. 45 Ma shedolu ke nubonengo i Galili, il' o re nodei si Galili me kedi nubonengo, wen' o re buice ha hna ule o re nodei ace hnei nubonengo hna rueton' i Jerusalema ri noken, ka buice se hna hue te jeu' o re noken. 46 Ilei Iesu me shedolu yawe i Kena i Galili, omelei ko re hnei nubonengo hna ilewan' o re tini bane wain, ka ci tango ko re tenen' aicahmane no se toan' i Kaparenauma. 47 Nubone me taedengi, ko, ha shedo kei Iesu i Galili thela i Judea, ile nubone me huebote du nubonengo, ne ci kewiwi du nubonengo, ha thu lenge co aroini o re tei uubon, wen' o re ha ba thu tango ke nubon. 48 Kei Iesu ci beredone du nubone, ko, Kacene buhnije deko ma ule o re nodei aehngenijeu ne nodei neapareuni, kacene buhnije deko ma un. 49 Kei il' o re toane ci ie du nubonengo, ko, Retok, dai lenge te, da tango ko re tenego. 50 Kei Iesu ci beredone du nubone, ko, Ho hue, ha roi ko re tei nubo. Il' o re ngome me kedi o re eberedo hnei Iesu hna beredone du nubon, ile nubone me hue. 51 Be ci hue kadio ke nubon, ile me ekedi ne nubone ko re nodei sinemenenge ni nubon, co lae nata, ko, Ha roi ko re tei bua. 52 Ile nubone me eto buice, ko, Nubone ha roi hodrael? Kei buice ci ie du nubone, ko, Oxedide ri gula rane me sevene ci takolu sei nubone ko re ereu. 53 Il' o re cecene me cara jewe, one komelei ko re gula rane hnei Iesu hna beredone du nubone, ko, Ha roi ko re tei nubo. Ile nubone me une ne ile ko re hnamenenge ni nubon. 54 Omelei ko re aehngenijeu me rewone naeni Iesu hna ilewatone be hna shedo ke nubonengo i Galili thela i Judea.

5

1 Thuben' omelei ile me nokene kei si Juda, ka Iesu ci lenge te i Jerusalem. 2 Ha ile i Jerusalema ri daden' o re palani mamoe ko re lacele, Bethesda ko re yelen, ri pene Hebera, ha numu veraneda me faiv. 3 Ci me thaet' omelei ko re nodei ngome xaranumu me nidranidra, ne namanashen, ne gukida, ne nese; esore ci bungi o re aisoisoni o re tin. 4 Wen' o re ci icelu ko re angela ri se eziene jeu' o re lacele co aisoisoni o re tin; ka ono re ngome ci ice da lu, thuba hna aisoisoni o re tin, ile nubone me roibot, wene ri uede nubone se hna numu. 5 Ka omelei ko se ngome hna uede thoti eite ko re nodei kenereken. 6 Ka Iesu ci rowo nubone ci thaet, ka ci cara jewe, ko, hatui ke nubon' inomelei, ile nubonengo me beredone du nubone, ko, Ilo, nubo ci alane co roibot? 7 Il' o re ngome me uede ci cedi nubonengo, ko, Retok, inu deko ngome co kedi nu jeu' o re lacele me be ci aisoisoni o re tin, ka be ci icelu ke inu, ile me ibetu da kome sa. 8 Ilei Iesu me beredone du nubone, ko, Pucalo, yoselo te o re guhne ni nubo, ka bo hue. 9 Ile me canga roibote ko re ngom, ka nubone ci yose o re guhne ni nubone, ne ci hue; ka one komelei ko re sabath. 10 Il' o re nodei si Juda me ie jeu' o re ngome hna aroini, ko, Ome ko re sabath, deko ma ekowe ke nubo co adeni o re guhne ni nubo. 11 Kei nubone ci cedi buice, ko, Nubon' o re hna aroini nu, hna beredone du nu, ko, Yoselo o re guhne ni nubo, ka ho hue. 12 Ile buice me eto nubone, ko, La ko re ngome hna ie du nubo, ko, Yoselo o re guhne ni nubo, ka ho hue? 13 Ka ono re ngome hna aroini deko ma ule la ngei? wen' o re Iesu hna lenge cerugoc, ma omelei ko re nodei ngome xaranumu. 14 Thuben' omelei Iesu ci rowo nubone ri hneruala, ne ci beredone du nubone, ko, Dale, ha hna aroini nubo; hage ru' o re nia yawe da ina du nubo ko re nia me hmaiai 15 Be me hue ko re ngom, ne ci ie jeu' o re nodei si Juda, ko, hnei Iesu ko re thu aroini nubon. 16 Wen' omelei ci tha leu Iesu kei si Juda, ne ci there co atangoni nubonengo, wen' o re hnei nubonengo hna ilewan' omelei ri sabath. 17 Ka Iesu ci cedito buice, ko, Cicango ci iara ruace ko, ka inu te se ci ruac. 18 Wen' omelei nodei si Juda ci tace hmaiai ko co atangoni nubonengo, wen' o re nubonengo deko hna thawalan' o re sabathe so; ka hnei nubonengo hna beredone te, ko, Makaze ko re nidi Cecewaieni nubonengo, ci aekoweni nubonengo ne Makaze. 19 Ilei Iesu me beredone du buic, kei nubonengo, ko, Seseko, seseko, inu ci ie du buhnije, ko, Ono re Tenene tha thu ni ko co ruace kani nubone ko, ka roi ko re hnei nubone hna ule o re Cecewaiene hna rue; ka ono re nodei ace nubonengo ci rueton, ono re Tenene se ci rue te omelei. 20 Wen' o re Cecewaiene ci wahnacoron' o re Tenen, ne ci aehngeni du nubon' o re nodei ac' ileodene hnei nubonengo hna ilewan; ka nubonengo co aehngenitone du nubon' o re nodei ruace me hmaiai ko ri pon' omelei, thu urane ke buhnij. 21 Se inom' o re Cecewaiene ci apucanilo o re nodei tango, ne ci aroini buic; se inomelei ko re Tenene co aroini o re nodei ngome nubone ci alan. 22 Ka Cecewaiene deko co hnengon' omesa, ka nubonengo ha hna thati nunuon' o re co hnengone jeu' o re Tenen. 23 Thu ahmani o re Tenene ko re nodei ngom' ileoden, se inome buice ci ahmani o re Cecewaien. Ono re ngome deko ma ahmani o re Tenene nubone se deko ma ahmani o re Cecewaiene te o re hna siato nubone lu. 24 Seseko, seseko, inu ci ie du buhnije, ko, Ono re ngome ci taedengi o re enengocoiego, ne ci une du nubonengo o re thu siato nu, nubone ha numu o re waruma tha thu ase ko, ka deko co pina ri hnaelo; ka ha hue sere ri tango jeu' o re waruma. 25 Seseko, seseko, inu ci ie du buhnij, ba thu pina ko re gula ran, ka ha om, ono re nodei tango co taedengi o re lanengoce no re Tei Makaze, ka buic' o re ci taedengi co waruma. 26 Wen' o re se inom' o re Cecewaiene ha numu waruma sei nubonengo ko, se inomelei nubonengo hna nunuone jeu' o re Tenene co numu waruma sei nubone ko; 27 Ka hnei nubonengo hna nunuo nubon' o re nene co hnengon, wen' o re nubone ko re Tei ngom. 28 Hage uran' omelei, wen' o re ba thu pina ko re gula ran, il' o re nodei ngom' ileodene ri nodei pua co taedengi o re lanengoce ni nubon; 29 Buice co kokorobot; ono re nodei ngome hna ru' o re roi son' o re roilo me waruma; ka ono re nodei ngome hna ru' o re nia son' o re roilo me hnaelo. 30 Imi tha thu ni kago ko co ru' o se ac; inu ci hnengone leu' o re inu ci taedengi; ka inu ci hnengo netiton; wen' o re inu deko ma there so o re alaiego, roi ko re alaien' o re Cecewaien' o re thu siato nu. 31 Ngei inu co asesekoni nu ko, deko ma seseko ko re hnego hna asesekoni. 32 Roi di kome sa ci asesekoni nu, ka inu ha ule, ko, seseko ko re eberedo nubonengo ci asesekoni nu. 33 Hnei buhnije hna siane du Ioane, ka hnei nubone hna lae natan' o re seseko. 34 Ka inu deko ma kedi o re hna asesekoni wenei ngom; ka inu ci ie o re nodei ac' omelei, thu waruma ke buhnij. 35 Nubone ko re nerene me niri ne kadre; ka buhnije hna alane co opodone ti o re nerene sei nubone ri se ezien. 36 Inu ha numu bane asesekoni me nidi ace ri poni Ioane; omelei ko re nodei ruace hnei Cicango hna nunuo nu co anize, ka omelei ko re nodei ruace inu ci ilone bane asesekoni nu, ko, hnei Cecewaiene hna siato nu. 37 Ka hna asesekoni nu kei Cecewaien' o re thu siato nu; buhnije deko te hna taedengi o re laberede ni nubonengo, ka deko ma ule o re yeahnga ni nubonengo. 38 Ka ono re eberedo ni nubonengo deko ma ile ri hnore ni buhnij, wen' o re buhnije deko ma kedi nubon' o re hnei nubonengo hna siaton. 39 Therelo o re eberedo hna xiwamomon; wen' o re buhnije ci uane, ko, wene komelei ko re waruma tha thu ase ko; ka one komelei ko re ci asesekoni nu. 40 Ka buhnije ci ke co huelu du nu, ha thu numu o re waruma. 41 Inu deko ma kedi o re bane ahmani wenei ngom. 42 Ka inu ha ule buhnije, ko, deko ma ile ri hnore ni buhnije ko re ci rane ni Makaze. 43 Ha pina ke inu ri acekini Cicango, ka buhnije deko ma kedi nu; kacene ngei me pina kome sa ri yeleni nubone ko, ile buhnije me kedi nubon. 44 Korione ke buhnije co une ma ci kedi ke buhnij' o re bane ahmani wenei buhnije ko, ka deko ma there o re bane ahmani wenei Makaze so? 45 Hage uan' inu co ikiwata buhnije du Cecewaien; pan' ome sa co ikiwata buhnij, ono Mose o re buhnije ci une jewe. 46 Ka ngei buhnije ci kedi Mose kedi nu lo te; wen' o re hnei nubone hna xiwamomo nu. 47 Ka ngei buhnije deko ma kedi o re hnei nubone hna xiwamomon, korione ke buhnije co kedi te o re nodei enengocoiego?

6

1 Thuben' omelei Iesu ci lenge ri wone kadio o re lacele Galili ca Tiberias. 2 Ka ci lenge leu nubonengo ko re nodei ngome xaranumu, wen' o re buice ci ule o re nodei aehngenijeu hnei nubonengo hna ruetone ri pon' o re nodei ued. 3 Ilei Iesu me erelo ri wec, ne ci mune hnaseselu ne nodei kokonieni nubonengo. 4 Ka haj acene ko re paseka, se nokene ni si Juda. 5 Iesu ci ngeritonelo, ne ci rowon' o re nodei ngome xaranumu hmaiai ci huelo du nubonengo, ile nubonengo me beredone du Filipo, ko, 0 ke eje co itico areto ile thu kaka ke buic? 6 Nubonengo hna beredon' omelei thu co tubunidi nubon; ka nubonengo ha rowo kacen' o re nubonengo ha co rueton. 7 Kei Filip ci cedi nubonengo, ko, Tangoko ma kue buice ko re areto hna iticone hrien' o re ta denari me tu handed, thu etha numu ke buic' o re gukaka me waiam. 8 Ile me ie du nubonengo ko se kokonieni nubonengo, ono Anederea, ace celuaiene ne Simona Peteru, ko, 9 Ome ko se yenakunu me numu areto bali me faiv, ne rue wara wa'ie, ka nge komelei son' o re xaranumu inom. 10 Kei Iesu ci beredone, ko, Amenengonilu o re nodei ngom. Ka hmaiai ko re ta nekeye ri guhnen' omelei. Ile me menengelu ko re nodei mocahman, ineko xara faive thausane hna ieie. 11 Ilei Iesu me kabanelo o re ade areto, ne ci hne, ne ci nunuone jeu' o re re kokonien; il' o re re kokoniene ci thawabote du buice ci memenengelu, ne rue wa'ie te, ekowe ne ile ko re alaieni buic. 12 Ma neli ke buic, ile nubonengo me beredone jeu' o re re kokonieni nubonengo, ko, Cina thaethogone lo o re ta gu menen, thu deko ma cil' o se ac. 13 Ile buice me cina thaethogon, ne ci aceceni o re so gucenge me tuelev, hnen' o re ta gumenene no re ade areto bali me faiv, ta therene di o re hnei buice hna kaka. 14 Ma ule ko re nodei ngom' o re aehngenijeu hnei Iesu hna ilewan, ile buice me ie, ko, Seseko, ome ko re perofeta hna ie, ko, co lengelu ome ri ten. 15 1Г Ka ma rowone kei Iesu, ko, buice ha co huebote co yothi nubonengo ha thu aseri toko nubonengo, ile nubonengo me lenge unide yawe ri wec. 16 Ma lakid, il' o re re kokonieni nubonengo ci icelu ri cele, 17 Ne cite ri koe, ne ci ia kadio ri lacele i Kaparenauma. Ha ridi kom, ka deko ma shedo sei buice kei Iesu. 18 Ile me tharoro ko re cele hnen' o re yengo me tac. 19 Buice ma hna xaru ineko tuenti faive ca thoti ko re nodei setadia, ile buice me ule Iesu ci lenge jo ri pon' o re cele, ne-ci acenon' o re koe, ile Ъхаce me pareu. 20 Ka nubonengo ci beredone du buice, ko, Inu kiore, hage pareu ke buhnij. 21 Ile buice me kedi nubonengo lo ri koe ne ile ko re opodon; ka ile me canga cede ko re koe ri gula node buice ci ia jewe. 22 Ri beore, ono re nodei ngome xaranumu hna sere ri wone kadio o re lacele, hna ule deko yawe se berew' omelei, roi di ko re berewe hna te ile ko re re kokonieni nubonengo; ka Iesu deko hna lenge te ri koe sese ne ile ko re re kokonieni nubonengo; ka ono re re kokonieni nubonengo so ko re hna ia; 23 (Ka hna cede ko se ta yekoe ko serei Tiberias, acenon' o re gula node hnei buice hna kaka areto ri thuba hna hne hnei Ketok;) 24 Ka ma ule ko re nodei ngome xaranumu, ko, ha tako kei Iesu omelei ne ile ko re re kokonieni nubonengo, ile buice se ci telu te ri koe, ne ci ia i Kaparenauma ci there Iesu jo. 25 Ma one nubonengo ke buice ri wone kadio o re lacele, ile buice me ie du nubonengo, ko, Rabi, bua hna shedo ome hodrael? 26 Iesu ci ceditobuic, kei nubonengo, ko, Seseko seseko, inu ci ie du buhnije, ko, buhnije deko ma there nu wen' o re buhnije hna ule o re nodei aehngenijeu; roi di wen' o re hnei buhnije hna kane re kaka areto, ca ile me nel. 27 Hage ushiwane bane son' o re kaka me thu momoc, ka roi ko re kaka me iara ileko ca pina ri waruma tha thu ase ko, pan' o re Tei ngome co kanu buhnij' omelei wen' o re hnei Makaze Cecewaieni hna ataceni acikaceni nubon. 28 Kei buice ci ie du nubonengo, ko, Nge ko re pa 'hnij, thu rue te ke ehnij' o re ushiwa ni Makaze? 29 Iesu ci ceditone ne ci thamumucane du buice, ko, Ome ko re ushiwa ni Makaze, ko, buhnije co une du nubon' o re hnei nubonengo hna siaton. 30 Ile buice me ie du nubonengo, ko, Nge ko re aehngenijeu bua ci rue, thu ule ke ehnij, ne thu une te du bua? nge ko re ruace ni bua? 31 Ono re re cecehnije hna kaka mana ri hnahnerec, inom' o re hna xiwamomone, ko, Hnei nubonengo hna nunuo buic' o re areto wene ri awe bane kaka. 32 Ilei Iesu me beredone du buice, ko, Seseko, seseko, inu ci ie du buhnij, Mose deko hna kanu buhnij' o re areto wene ri aw; ka roi kei Cicango co nunuo buhnij' o re nidi areto wene ri aw. 33 Ka nubone ko re areto ni Makaze o re hna huelu sere ri aw, ne ci' kanon' o re waruma jeu' o re ten' o re aw. 34 Ile buice me ie du nubonengo, ko, Retok, da iara teke ehnij' o re areto omewalei. 35 Kei Iesu ci beredone du buice, ko, Inu ko re areto thu waruma; ono re ngome ci huebote du nu, nubone deko yawe co di kaka; ka ono re ngome ci une du nu, nubone deko te yawe co di kua. 36 Ka hnego hna ie du buhnije, ko, Buhnije ha hna ule nu, ka deko ma un. 37 Buic' ileoden' o re hna nunuo nu hnei Cecewaiene co huebote du nu, ka ono re ngome ci huebote du nu inu deko co uwo nubone bot. 38 Wen' o re deko hna icelu ke inu sere ri awe thu co ru' o re alaiego, roi ko re alaieni nubonengo o re'hna siato nu. 39 Ome ko re alaien' o re Cecewaien' o re hna siato nu, ko, Inu deko co nue cil' ome sa hnei nubonengo hna nunuo nu, roi di inu co apucanilo ri rane hna dirin. 40 Ka ome ko re alaieni nubonengo o re hna siato nu, ko, Ono re nodei ngom' ileodene ci ule o re Tenene ne ci une du nubon, buice co numu o re waruma tha thu ase ko; ka inu co apucani buice lo ri rane hna dirin. 41 Ile me nengoce shrongo nubonengo kei si Juda, wen' o re hnei nubonengo hna beredone, ko, Inu ko re areto hna icelu sere ri aw. 42 Kei buice ci ie, ko, Ilo, ome deko Iesu, tei Iosefa, ka ilo, eje deko ma ule o re cecene ne hmaieni nubon? ka korione nubone ci ie, ko, Inu ha hna icelu sere ri aw? 43 Wen' omelei Iesu ci ceditone ne ci thamumucane du buice, ko, Hage nengoce shrongo ke buhnij. 44 Tha thu ni ko ko re ngome co huebote du nu ngei me deko ma iye nubone lo hnei Cecewaien' o re hna siato nu; ka inu co apucani nubone lo ri rane me hna dirin. 45 Ha hna xiwamomone ri nodei perofeta, ko, Co yeno buic' ileodene hnei Makaze. Koiko ono re nodei ngom' ileodene ci taedengi ne ci yenone sei Cecewaien, buice ci huebote du nu. 46 Deko di ma ule Cecewaien ko se ngome, ka roi ke nubone ma sere sei Makaze, nubone ha ule o re Cecewaien. 47 Seseko, seseko, inu ci ie du buhnije, ko, Ono re ngome ci une du nu nubone ha numu o re waruma tha thu ase ko. 48 Inu ko re areto thu waruma. 49 Ono re re ceceni buhnije hna kaka mana ri hnahnerec, ka ha tango ke buic. 50 Ome ko re areto hna icelu sere ri aw, ngei me kakane ko re ngom, nubone deko co tango. 51 Inu ko re areto thu waruma o re hna icelu sere ri aw. Ngei o se ngome co kakan' o re areto ome nubone co waruma e iara oiru; ka ono re areto inu co kanon, omelei ko re hnengome inu, inu ha co kanone bane warama no re ten' o re aw. 52 Il' o re si Jnda me icakore ko buic, ne ci ie, ko, Ha thu ni korione ko re ngom' ome co kanon' o re hnengome ni nubone bane kaka? 53 Iesu ci beredone du buice, ko, Seseko, seseko, inu ci ie du buhnij, Ngei buhnije deko ma kane re kakan' o re hnengome no re Tei ngom, ne ci kane re kuan' o re dra ni nubon, buhnije ha deko te waruma ri hnore ni buhnij. 54 Ono re ngome ci kane re kakan' o re hnengome inu, ne ci kane re kuan' o re drago, nubone ha numu o re waruma tha thu ase ko; ka inu co apucani nubone lo ri rane me hna dirin. 55 Wen' o re nidi kaka ko re hnengome inu, ka nidi kua ko re drago. 56 Ono re ngome ci kane re kakan' o re hnengome inu, ne ci kane re kuan' o re drago, nubone ha ile ri hnorego, ka inu ri hnore ni nubone di. 57 Se inom' o re Cecewaiene me ci wieni ko hna siato nu, ka inu ci roi ko wenei Cicango, se inomelei ko re ngome ci kane re kaka nu, nubone co waruma te wene inu. 58 Ome ko re areto hna icelu sere ri aw; deko ma inom' o re re ceceni buhnije hna kaka mana, ile me tangolu; ono re ngome ci kakan' o re areto ome co waruma e iara oiru ko. 59 Hnei nubonengo hna beredon' o re nodei ac' omelei be ci ininata ri sunago i Kaparenauma. 60 Ka ma taedengi ko re nodei kokonieni nubonengo me waac, ile buice me ie, ko, Nure ko re enengoco omelei. La ko re thu ni co taedengi? 61 Ma rowone kei Iesu ri hnore ni nubonengo, ko, ono re re kokonieni nubonengo ci enengoco shrongo ti omelei, ile nubonengo me beredone du buice, ko, Ilo, omelei ci lae yokeuni buhnij? 62 Korione buhnije ngei co ule o re Tei ngome ci icelo jeu' o re guhnene ni nubone koda? 63 Uieni ko re ci aroini, ka deko ma nidi ace ko re hnengom; ono re nodei enengoco hnego hna ie du buhnij, omelei uieni ne waruma. 64 Ka osotene buhnije deko ma un. Wen' o re Iesu hna rowo buice wene ri hna whan' o re deko ma un, ne il' o re thu wakewio nubonengo. 65 Ile nubonengo me beredone, ko, Wen' omelei hnego hna ie du buhnije, ko, Tha thu ni ko ko re ngome co huelu du nu ngei me deko hna kanu nubone naeni Oicango. 66 Thuben' omelei waace ko re nodei kokonieni nubonengo ci yewe yawe, ka deko ma hue te yawe ne nubonengo. 67 Ilei Iesu me beredone jeu' o re xara tuelev, ko, Buhnije ngei se ci alane co yewe te? 68 Kei Simona Peteru ci cedi nubonengo, ko, Retok, ehnije co hue ko du la? Sei bua ko re nodei eberedo no re waruma tha thu ase ko. 69 Ka ehnije ci kedi, ne ci ule kacen, ko, bua ko re Keriso, Tenengoieni Makaze me iara wieni ko. 70 Iesu ci cedito buice, ko, Inu ngei deko hna ure buhnije xara tuelev, ka diabolo kome sa buhnij? 71 Nubonengo ci beredo Juda Isekariot, tei Simona, wen' o re nubone ko re thu wakewio nubonengo, ka nubone kome sa no re xara tuelev.

7

1 Thuben' omelei Iesu ci lenge jo i Galili; ka nubonengo deko ma alane co leng' i Judea, wen' o re nodei si Juda ci there co ataetoni nubonengo. 2 Ka acene ko re nokene ri 'ma punu'ma ni si Juda. 3 Ile me ie du nubonengo ko re re celuaieni nubonengo, ko, Nue di kom, ka ho hue i Judea, thu ule ko re re kokonieni nubo o re ta ruace nubo ci rue. 4 Wen' o re deko se ngome ci ruace ri gucerugoc, ka nubone ci alane co ahngabote di; ngei nubo ci ru' o re nodei ac' omelei aehngeni nubo bote jeu' o re ten' o re aw. 5 Wen' o re se deko ma une te du nubonengo ko re re celuaieni nubonengo. 6 Iesu ci beredone du buice, ko, Be deko ma pina ko re eziego, ka ha iara ezieni buhnije di. 7 Tha thu ni ko ko re ten' o re awe co kogo buhnij; roi di ci kogo nu, wen' o re inu ci lae nata ni buice, ko, nia ko re ta ruace ni buic. 8 Ho zi hue ke buhnije jeu' o re noken' om; inu deko co kane re hue te onome jeu' o re noken' om, wen' o re be deko ma pina ko re eziego. 9 Ma hna beredon' omelei ke nubonengo, ile nubonengo me munelu da i Galili. 10 Ma hna hue jeu' o re nokene ko re re celuaieni nubonengo, ile nubonengo me lenge te, ka deko ma Unge ahngan, roi di ineko hna cerugoc. 11 Il' o re nodei si Juda ci there nubonengo ri noken, ne ci ie, ko, O ke nubonengo? 12 Ci icakore hmaiaio nubonengo ko re xaranumu. Kei il' osotene ci ie, ko, Ngome me roi ke nubon; ka kei il' osotene di, ko, Deko, ka nubone ci amenuni o re nod. 13 Roi di deko se ngome me ie ahnga nubonengo wen' o re ci pareuon' o re nodei si Juda. 14 Ri nidin' o re noken' ilei Iesu me lenge te jeu' o re hneruala, ne ci ininata. 15 Il' o re nodei si Juda me uran, ne ci ie, ko, Hna thu ni korione ko re ngom' om' o re ta tusi me deko hna yenon? 16 Iesu ci cedito buic, ne ci beredone, ko, Deko wene inu ko re ci ininata hnego, roi di siwai nubonengo o re hna siato nu. 17 Ngei o se ngome ci alane co ru' o re alaieni nubonengo, nubone co cara jewe o re hna ininatan, ilo siwai Makaze, ca nge inu ci ie wene inu ko. 18 Ono re ngome ci ie nubone ko, nubone ci there o re bane ahmani nubone ko; ka ono re ngome ci there co ahmani nubonengo o re hna siato nubon, seseko ke nubon, ka deko se gula me deko ma netiti sei nubon. 19 Mose ngei deko hna kann buhnij' o re wathebo? ka deko kome sa buhnije ci ninen' o re wathebo. Nge ke buhnije ci there co atangoni nu di? 20 Ile me cedi nubonengo ko re nodei ngome, ko, Sei nubo ko re demoni. La ko re ci there co atangoni nubo? 21 Iesu ci ceditone ne ci thamumucane du buice, ko, Inu ha hna ilon' o se ruac, ka buhnij' ileodene ci uran. 22 Hnei Mose hna nue du buhnij' o re co peritomon, (ka deko wenei Mose, roi di wene ri nodei yejecen,) ka buhnije ci peritomon' o re ngome ri sabath. 23 Ka ngei me peritomon' o re ngome ri sabath, thu deko ma cie o re wathebo ni Mose, ilo, buhnije ci cenge nia nu wen' o re hnego hna nidi aroini o re ngome ri sabath? 24 Hage ialu leu' o re waegogo, ka roi co ialuone leu' o re ci hnengone me netit. 25 Ile me ie kosotene serei Jerusalem, ko, Ilo, ome deko ma nubon' o re buice ci there co ata* ngoni? 26 Ka da ule, nubone ci nengoc' ahngan, ka buice deko ma ie o se enengoco du nubon. Ha ule ngei ko re nodei toane, ko, nubon' ome ko re nidi Keriso, ca? 27 Roi di eje ha ule wene ile ke nubon' om; ka ma pina ko re Keriso deko se ngome co ule wene ile ke nubonengo. 28 Ile me tuane kei Iesu ri hneruala be ci ininata, ne ci beredone, ko, Buhnije ha ule nu, ka buhnije ha ule te wene ile ke inu. Inu deko hna huelu wene inu ko; ka seseko ke nubonengo o re hna siato nu, ka buhnije deko ma ule nubonengo. 29 Ka inu ha ule nubonengo, ka sere sei nubonengo ke inu; ka hnei nubonengo hna siato nu. 30 Ile buice me there co cori nubonengo; ka deko ngome ci ngeni o re wanine du nubonengo, wen' o re be deko ma pina ko re ezieni nubonengo. 31 Ka waace wene ri xaranumu ci une du nubonengo, ne ci ie, ko, Ma pina ko re Keriso nubone ngei co ilon' o re nodei aehngenijeu ri pon' o re hnei nubon' ome hna ilon? 32 Ci taedengi ko re nodei faresi, ko, ono re xaranumu ci icakori te nubonengo o re nodei ac' omelei, il' o re nodei faresi ne il' o re nodei toka-thu-hule ci sian' o re nodei necumone co cori nubonengo. 33 Ilei Iesu me beredone du buice, ko, Gukokode so ko re inu co hne ome sei buhnij, ile inu me hue du nubonengo o re hna siato nu. 34 Buhnije co there nu, ka deko co one nu, ka ono re guhnego inu ci hue ile buhnije deko co hue te jewe. 35 Il' o re nodei si Juda me ie ko buice, ko, O ke nubone co hue ilè thu deko ma one nubone ke ej? nubone ngei co hue jeu' o re nodei ngome hna etha kawilebote me nodei Eleni, co ininatan' o re nodei Eleni. 36 Nge ko re enengoco nubone ci ie, ko, Buhnije co there nu ka deko co uni, ka ono re guhnego inu ci hue ile buhnije deko co hue te jewe? 37 Ri rane me hna dirin, ono re rane me hmaiai ri noken, Iesu ci thelalo, ne ci tuan, ne ci beredone, ko, Ngei o se ngome di kua huebote du nu ha thu kua. 38 Ono re ngome ci une du nu, inom' o re hna ie ri eberedo hna xiwamomone, ko, co thabote wene ri hnore ni nubone ko re nodei lacele no re wi me waruma. 39 (Hnei nubonengo hna beredon' omelei ri pon' o re Uiewaien, ba thu kedi ko re nodei ngome ci une du nubonengo, wen' o re be tako ko re Uiewaieni Hmijoc; ka wen' o re be deko hna asanangomeni Iesu.) 40 Waace ko re nodei ngome wene ri xaranumu ci taedengi o re gure eberedo omelei, buice ci ie, ko, Seseko nubon' ome ko re perofeta. 41 Ka osotene ci ie, ko, Nubone ko re Keriso. Ka osotene ci ie, ko, Ilo, co kurulo i Galili ko re Keriso? 42 Ilo, deko hna ie ri eberedo hna xiwamomone, ko, Keriso co puja i Davita, ka serei Bethelem, omelei ko re hnamenenge ni Davita? 43 Ile me thube rewonebote ko re nodei ngome weno nubonengo. 44 Ka osotene buice ci alane co cori nubonengo; ka deko ngome hna ngenibote du nubonengo o re wanin. 45 Ile me hue yawe ko re nodei necumone jeu' o re nodei toka-thu-hul, ne nodei faresi, ile buice me ie du buice, ko, Nge ke buhnije deko ma hue te nubone lo. 46 Kei il' o re nodei necumone, ko, Deko ngome hna nengoc' inom' o re ngom' omelei. 47 Ile me cedi buice ko re nodei faresi, ko, Ilo, ha hna amenuni buhnije te? 48 Ilo, ci une du nubone ko se ngome wene ri nodei toan, ca wene ri nodei faresi? 49 Roi di ono re nod'ome me tha ule ko o re wathebo ha hnaelo. 50 Ile me ie du buice kei Nikodimo, (ono re hna huebote du nubonengo ri rid, nubone kome sa buice,) 51 Ko, Ilo, ci ahnaeloni o re ngome ko re wathebo ni ej, ka deko hna dane co taedengi nubon, ne co ule ono re hnei nubone hna ilone te? 52 Ile buice me cedi, ne ci ie du nubone, ko, Ka nubo se serei Galili, ca? Therelo, ne ule, ko, deko ma kurulo i Galili ko se perofeta. 53 Ile me etha hue ke buice jeu' o re nodei hnamenenge ni buice ko.

8

1 Iesu ci lenge jeu' o re wec' Elaio. 2 Ka ri beore nubonengo ci shedo yawe ri hneruala, ile me huebote du nubonengo ko re nodei ngom' ileoden; ka nubonengo ci munelu, ne ci ininata buic. 3 Il' o re nodei thu xiwamomo ne nodei faresi ci hue ti du nubonengo o se hmenewe hna othewaea, hna cori be ci othewaea; ile buice ci aseri nubone lo ri nidin, 4 Ne ci ie du nubonengo, ko, Thu yeno, ono re hmenew' ome hna, othewaea, hnei ehnije hna kuni lu ko be ci othewaea. 5 Ka ri wathebo Mose hna awa xeje, ko, co etulelu o re ngom' inomelei; ka nge ko re enengoco nibua? 6 Hnei buice hna ie omelei thu co tubunidi nubonengo ha thu numu bane ikiwata nubonengo. Ka Iesu ci thidilu, ne ci xiwamomo ri rawa hnen' o re wanin. 7 Ka buice ci eto kamomoco nubonengo, ile nubonengo me thelalo, ne ci beredone du buice, ko, Roi ko re ngome deko hna ru' o re nia co cedo dane du nubon' o re ete. 8 Ile nubonengo me thidilu yawe ne ci xiwamomo ri rawa. 9 Buice ma hna taedengi, ile me kiwatane ko ko re hnore ni buic, ha ile me etha okonebote hna whane ri mohma ca pina ri hna dirin; ka Iesu di so, ne il' o re hmenewe ci serelo ko ri nidin. 10 Ma thelalo kei Iesu, ka deko ma rowon' o se ngom, ka ono re hmenewe di so, ile nubonengo me beredone du nubone, ko, Hmenew, ha o ke buice thu ikiwata nubo? Ilo, deko ngome ci ahnaeloni nubo? 11 Kei nubone ci ie, ko, Tangoko, ca Retok. Ilei Iesu me beredone du nubone, ko, Ka inu se deko co ahnaeloni nubo; ho hue, ka hage runia yawe. 12 Ilei Iesu me beredone yawe du buic, kei nubonengo, ko, Inu ko re nerene no re ten' o re aw; ono re ngome ci hue leu nu, nubone deko co hue jo ri nashen, roi di nubone co numu o re nerene me waruma. 13 Il' o re nodei faresi me ie du nubonengo, ko, Nubo ci asesekoni nubo ko; deko ma seseko ko re enengoco ni nubo. 14 Iesu ci ceditone ne ci thamumucane du buice, ko, Ka ngei inu ci asesekoni nu ko, seseko ko re enengocoiego; wen' o re inu ha ule sere ile ke inu, ka ha ci hue ile ke inu; ka buhnije deko ma ule sere ile ke inu, ka ha ci hue ile ke inu. 15 Buhnije ci ialu leu' o re hnengom, ka inu deko ma ialuon' o se ngom. 16 Ka ngei inu co ialuon, seseko ko re inu co ialuon; wen' o re deko inu so, roi ke inu ne Cecewaien' o re hna siato nu. 17 Ka ha hna xiwamomone ri wathebo ni buhnije, ko, Seseko.ko re hna ikiwatane hnen' o re rue ngom. 18 Inn ci asesekoni nu ko, ka se ci asesekoni nu kei Cecewaien' o re hna siato nu. 19 Ile buice ci ie du nubonengo, ko, О ko re ceceni nubo? Iesu ci ceditone, ko, Buhnije deko ma ule nu ne Cicango. Kacene buhnije ha ule nu buhnije se co ule Cicango te. 20 Hnei Iesu hna beredon' o re nodei ас' omelei ri cengen' o re ta itutuo be ci ininata ri hneruala; ka deko ngome ci cori nubonengo, wen' o re be deko ma pina ko re ezieni nubonengo. 21 Il ei Iesu me beredone yawe du buice, ko, Inu ha ci hue, buhnije co there nu, ka buhnije co tango ne ile ko re nia buhnij; ka buhnije tha thu ni ko co hue te jeu' o re inu co hue il. 22 Il' o re nodei si Juda ci ie, ko, Nubone ngei co atangoni nubone ko? wen' o re nubone ci ie, ko, Buhnije tha thu ni ko co hue te jeu' o re inu co hue il. 23 Kei nubonengo ci beredone du buice, ko, Buhnije wen' ome ri ten, ka inu di wen' omeloi; buhnije wen' ome ri ten' o re aw, ka inu di deko wen' ome ri ten' o re aw. 24 Wen' omelei hnego hna ie du buhnije, ko, Buhnije co tango ti o re nia buhnij; ka ngei buhnije deko ma kedi, ko, inu komelei, buhnije co tango ti o re nia buhnij. 25 Ile buice me ie du nubonengo, ko, La ke nubo? Iesu ci beredone du buice, ko, Оnekoil' o re hnego hna ie du buhnije ri hna whan. 26 Inu ha numu o re nodei ace me waace co ie ne co ialuo buhnije te; ka seseko ke nubonengo o re hna siato nu; ono re nodei ace hnego hna taedengi sei nubonengo inu ci ie omelei jeu' o re ten' o re aw. 27 Buice deko ma cara jewe, ko, nubonengo hna beredon' o re Cecewaiene du buic. 28 Ilei Iesu me beredone du buice, ko, Buhnije ma hna kedilo re ran' o re Tei ngom, ile buhnije co cara jewe inu komelei, ka inu deko ma rue kago ko o se ac; ka se inom' o re hnei Cecewaiene hna yeno nu, se inomelei inu ci ie te. 29 Ha ome sego ke nubonengo o re thu siato nu; deko ma nue nu di kei Cecewaien, wen' o re inu ci iara ru' o re nodei ace ci aopodoneni nubonengo. 30 Nubonengo ci beredon' o re nodei ac' omelei, ile me une du nubonengo ko re nodei ngome me waac. 31 Ilei Iesu me beredone jeu' o re nodei si Juda ci une du nubonengo, ko, Ngei buhnije ci kuni o re enengocoiego, ile buhnije co nodei nidi kokoniego; 32 Ka buhnije co ule o re seseko, ka ono re seseko co nue gupa buhnije bot. 33 Ile buice ci cedi nubonengo, ko, Ehnije nodei re tei Aberaham, ka deko te hna amosiceni jeu' o se ngom; co korione bua ci ie, ko, co nue gupa ehnije bot? 34 Iesu ci cedito buice, ko, Seseko, seseko, inu ci ie du, buhnije, ko, Ono re ngome ci ru' o re nia nubone ko re sinemenenge no re nia. 35 Ka ono re sinemenenge deko ma iara menenge ri hnameneng; ka roi ko re Tenene ci iara menenge ko. 36 Ngei o re Tenene co nue gupa buhnije bot, ile me nidi nue gupa buhnije bot. 37 Ka inu ha ule buhnije nodei re tei Aberaham; one di buhnije ci there co atangoni nu, wen' o re deko ma ile ri hnore ni buhnije ko re enengocoiego. 38 Inu ci ie ono re hnego hna ule sei Cicango; ka buhnije ci rue di o re hnei buhnije hna ule sei ceceni buhnij. 39 Buice ci cedi, ne ci ie du nubonengo, ko, Aberahama ko re cecekaij. Iesu ci beredone du buice, ko, Kacene buhnije nodei re tei Aberaham, ile buhnije co ilon' o re ruace ni Aberaham. 40 Ka onome buhnije ci there co atangoni nu di, ono re ngome hna ie du buhnij' o re seseko, o re hnego hna taedengi sei Makaze; Aberahama deko hna ruac' inomelei. 41 Buhnije ci ru' o re ta ruace no re ceceni buhnij. Kei buice ci ie du nubonengo, ko, Ehnije deko re tei wenei me eno; sa so ko re cecehnij, ono Makaze. 42 Kei Iesu ci beredone du buice, ko, Kacene Makaze ko re ceceni buhnij, kacene buhnije co hnoro nu; wen' o re inu hna huelu sere sei Makaze, ka inu deko hna hue kanelu, ka hnei nubonengo hna siato nu. 43 Nge ke buhnije deko ma cara jewe o re enengocoiego? ka wen' o re bunnije tha thu ni ko co taedengi o re enengocoiego. 44 Buhnije wenei ceceni buhnij, ono re diabolo; ka buhnije ci alane co ilon' o re rereuian' o re ceceni buhnij. Nubone ko re thu kucokuco wene ri hna whan; ka deko ma sere pode ri seseko, wen' o re deko se gula seseko sei nubon. Nubone ngei ci ie o re cihmug, wene ko nubone komelei; wen' o re thu cihmuge ke nubon, ka cecen' o re cihmug. 45 Ka wen' o re inu ci ie o re seseko, buhnije deko ma une du nu. 46 La ko re ngome buhnije co aehngeni o re nia inu? ka ngei inu ci ie o re seseko, nge ke buhnije deko ma une du nu? 47 Ono re ngome me wenei Makaze nubone ci taedengi o re eberedo ni Makaze; ka buhnije deko ma taedengi, wen' o re deko wenei Makaze ke buhnij. 48 Ile me cedi ko, re nodei si Juda,ne ci ie du nubonengo, ko, Ilo, ehnije deko hna ie netitone, ko, si Samaria ke nubo, ka sei nubo ko re demoni? 49 Iesu ci ceditone, ko, Inu deko demoni; roi di inu ci ahmani Cicango; ka buhnije ci abini nu di. 50 Inu deko ma there o re bane ahmani nu, ka kome sa ci there ne ci anetitini te. 51 Seseko, seseko, inu ci ie du buhnije, ko, Kacen' o se ngome co ninen' o re enengocoiego, ile nubone deko co ule o re tango e iara oiru. 52 Il' o re nodei si Juda me ie du nubonengo, ko, Onom' ehnije ha ule sei nubo ko re demoni. Ha tango kei Aberahama ne nodei perofeta; ka kei nubo ci ie, ko, Kacen' o se ngome co ninen' o re enengocoiego, ile nubone deko co ule o re tango e iara oiru. 53 Ilo, nubo hmaiai ri pon' o re cecehnij, ono Aberahama ma ha tango? ne nodei perofeta se ha tango; ka nubo, la? 54 Iesu ci ceditone, ko, Inu ngei co ahmani nu ko deko ma nidi ace ko re ci ahmani nu; Cicango ci ahmani nu, ka kei buhnije ciie, ko, nubonengo ko re Makaze ni buhnij. 55 Buhnije deko ma ule nubonengo, ka inu ha ule nubonengo, ka ngei inu co ie, ko, inu deko ma ule nubonengo, ile me cihmuge ke inu inome buhnij; roi di inu ha ule nubonengo, ka inu ci ninen' o re eberedo ni nubonengo. 56 Aberaham, ceceni buhnij, hna opodone ma ule o re ranego; ka nubone hna ule, ile me katra ti. 57 Il' o re nodei si Juda me ie du nubonengo, ko, Be deko ma fifeti ko re nodei kenerekene ni nubo, ka nubo ha hna ule Aberaham? 58 Iesu ci beredone du buice, ko, Seseko, seseko, inu ci ie du buhnij, Inu onekoile ko, be deko ma hnapo Aberaham. 59 Ile buice me yo ete co etu nubonengo; ka Iesu ci acerugoceni nubonengo ko, ne ci talebote ri hneruala, ka nubonengo ci lenge ri nidini buic, ka inomelei ci canga lenge ko.

9

1 Be ci lenge jo ke nubonengo ile me rowon' o se ngome me namanashene wene te ko ri hna hnapon. 2 Ka ci eto nubonengo ko re re kokonieni nubonengo, ko, Rabi, la ko re nia, nubon' om, ca cecene ne hmaieni nubon, wen' o hna hnapo nubone namanashen? 3 Iesu ci ceditone, ko, Deko ma nia ke nubon' om, se deko ko re cecene ne hmaieni nubon; roi di thu aehngeni o re ruace ni Makaze ri poni nubon. 4 Roi ke inu co ru' o re ta ruace ni nubonengo o re hna siato nu be ran, ka ba thu rid, ile me tha thu ni кo ko se ngome co ruac. 5 Inu be ome ri ten, ile me bane nerene nome ri tene ke inu. 6 Nubonengo ma hna beredon' omelei, ile me kadewe ri rawa, ne ei atedreni o re rawa wene ri hna kadeu, ne ci wone ri rue waegogo no re ngome namanashene hnen' o re rawa me tedre, 7 Ne ci beredone du nubone, ko, Ho hue ke nubo, ne hneiebote ri lacele Siloam, (omelei hna ureie. Hna sian.) Ile nubone me hue ne ci hneiebot, ne ci huebote yawe ma ha iule. 8 Il' o re nodei ngome me si hngiore ni nubon, ne nodei ngome hna ule nubone kodihne me namanashen, ci ie, ko, Deko ma nubon' ome ko re ci menenge co sibo ac? 9 Ngosotene ci ie, ko, Oni nubon. Kei il' osotene di, ko, Ineko nubon. Ka kei nubone, ko, Oni inu komelei. 10 Ile buice me eto nubone, ko, Hna aiuleni korione ko re rue waegogo ni nubo? 11 Nubone ci cedi, ne ci ie, ko, Ono re ngome yelen' Iesu hna atedreni o re rawa, ile nubone me wone ri rue waegogoiego, ne ci ie du nu, ko, Ho hue ke nubo jeu' o re lacele Siloam, co hneiebot; ile inu me hue ne ci hneiebot, ha ile me iulebote ke inu. 12 Ile buice me ie du nubone, ko, О ke nubon? Kei nubone, ko, Inu tha ule ko. 13 Ile buice me hue ti o тe ngome thuba namanashene jeu' o re nodei faresi. 14 Ka ri sabathe ko re hnei Iesu hna atedreni o re rawa ne ci aiuleni o re rue waegogo ni nubon. 15 Il' o re nodei faresi me eto nubone yawe, ko, Hna korione nubo hna iulebot? Ile nubone me ie du buice, ko, Hnei nubone hna won' o re rawa me tedre ri rue waegogoiego, ile yiu me hneiebote ne ci iule. 16 Il' osoten' o re nodei faresi me ie, ko, Deko wenei Makaze ko re ngom' omelei, wen' o re nubone deko ma ninen' o re sabath. Ka esotene ci ie, ko, Korione ko re ngome me nia me thu ni co ilon' o re nodei aehngenijeu me inomelei? Ha ile me ithuba ke buic. 17 Ile buice me ie yawe jeu' o re thuba namanashene, ko, Nge ko re enengoco ni nubo ri poni nubon, wen' o re nubone ha hna aiuleni o re rue waegogo ni nubo? Kei nubone, ko, Perofeta ke nubon. 18 Ono re nodei si Juda deko ma kedi, ko, nubone namanashene koda, ile me iulebote di, ca ile buice me kaion' o re cecene ne hmaieni nubon' o re hna aiuleni. 19 Ile buice me eto bushengon, ne ci ie, ko, Ome ko re tei hmengo, o re hmengo ci ie ko hna hnapone me namanashen? korione nubone ci iulebot' onom? 20 Kei bushengone ci cedi buic, ne ci ie, ko, Ehne ha ule ome ko re tenehn, ka hna hnapone namanashen. 21 Ka ehne tha ule ko hna korione nubone ci iulebot' onom; ka ono re ngome hna aiuleni o re rue waegogo ni nubon' ehne se tha ule ko; nubone ha ngome nata, da eto nubone ko, pani nubone ko co ie. 22 Hnen' o re cecene ne hmaieni nubone hna ie omelei wen' o re ci pareuon' o re nodei si Juda, wen' o re nodei si Juda ha hna wathebone, ko, kacene se ngome co ie nubonengo ko re Keriso, ile me co uwo nubone bote wene ri sunago. 23 Wen' omelei hna ie ko 're cecene ne hmaieni nubone, ko, Nubone ha ngome nata, da eto nubonelo. 24 Ile buice me ha rewe kaion' o re ngome thuba namanashen, ne ci ie du nubone, ko, Nubo ahmani Makaze; ehnije ha ule ngome me nia ko re ngom' omelei. 25 Kei nubone ci cedi, ko, Nubone ngome me nia ngei, ka inu tha ule ko. Sa so ko re ac' inu ha ule, ko, namanashene ke inu kodihne, ka onom' inu ci iulebot. 26 Buice ci ie du nubone yawe, ko, Nge ko re hnei nubone hna ilone du nubo? nubone hna aiuleni korion' o re rue waegogo ni nubo? 27 Kei nubone ci cedi buice, ko, Inu ha hna ie du buhnij, ka buhnije deko ma kedi; nge ke buhnije ci alane co taedengi yawe? Ilo, buhnije ci di nodei kokonieni nubonengo te? 28 Ile buice me papa nubon, ne ci ie, ko, Ehme di ko re kokonieni ic; roi ke ehnije nodei kokonieni Mose. 29 Ehnije ha ule hnei Makaze hna beredone du Mose, ka ic' omelei ehnije tha ule ko wene il. 30 Il' o re ngome me cedi, ne ci ie du buice, ko, Ace bane urane kom, buhnije tha ule ko wene ile ke nubonengo, ka nubonengo ha hna aiuleni o re rue waegogoiego. 31 Eje ha ule, ko, Makaze deko ma canaeon' o re nodei ngome me nia, roi di ngei o se ngome ci hmegigio Makaze, ile nubonengo co canaeo nubon. 32 Deko hna taedengi wenekoda, ko, Hnei se ngome hna aiuleni o re rue waegogo no re ngome hna hnapone namanashen. 33 Ngei me deko ma wenei Makaze ke nubonengo omelei, ile me tha thu ni ko ke nubonengo co ilon' o se ac. 34 Buice ci cedi, ne ci ie du nubone, ko, Nubo hna hnapone matra re nia, ka nubo ci ininata xehnije di? Ile buice me uwo nubone obot. 35 Hnei Iesu hna canaeone, ko, hnei buice hna uwo nubon' obot; ka nubonengo ma hna one nubon, ile me beredone du nubone, ko, Ilo, nubo ci une jeu' o re Tei Makaze? 36 Kei nubone ci cedi, ko, Koiwane komewalei, ca Retok, thu une ke inu du nubonengo? 37 Iesu ci beredone du nubone, ko, Nubo ha hna ule nubon, ka ha ome ke nubone ci enengoco ne nubo. 38 Kei nubone ci ie, ko, Retokengo, inu ci un. Ile nubone me hnelu du nubonengo. 39 Kei Iesu ci beredone, ko, Ha pina ke inu ome ri tene co anetitini, ha thu iulebote ko re nodei ngome deko ma ule; ka thu anamanasheneni o re nodei ngome ci iule. 40 Ngosoten' o re nodei faresi ma ile sei nubonengo ci taedengi omelei, ile buice me ie du nubonengo, ko, Ehnije ngei ko re ta namanashen? 41 Kei Iesu ci beredone du buice, ko, Ngei me namanashene ke buhnij, ile me deko ma numu nia ke buhnij; ka onom, wen' o re buhnije ci ie, ko, Ehnije ci iule, ile ekoulu ko ko re nia buhnij.

10

1 Seseko, seseko, inu ci ie du buhnij, Ono re ngome deko ma okonelo ri pakage no re hnekage ni mamoe, ka ci icelo ri se lene ko, nubone ko re thu eno ne thu thoeo ac. 2 Ka ono re ngome ci okonelo ri pakage nubone ko re thu cumo mamoe. 3 Ono re thu cumo pakage ci toebote du nubon, ka ono re nodei mamoe ci taedengi o re lanengoce ni nubon; ka nubone ci etha kaio yelen' o re nodei mamoe ni nubone ko, ne ci hue ti buic' obot. 4 Nubone ngei ci hue ti obot' o re nodei mamoe ni nubon' ile nubone ci hue da, ka ono re nodei mamoe ci hue leu nubon, Wen' o re buice ha ule kacen' o re lanengoce ni nubon. 5 Buice deko co hue leu' o re aceni, ka buice co sico nubon, wen' o re buice deko ma acidanon' o re lanengoce no re aceni. 6 Hnei Iesu hna beredon' o re aekoweni omelei du buic, ka buice deko ma cara jeu' o re hnei nubonengo hna beredone du buic. 7 Ilei Iesu me beredone yawe du buice, ko, Seseko, seseko, inu ci ie du buhnije, ko, Inu ko re pakage bane son' o re nodei mamoe. 8 Ono re nodei ngom' ileodene hna pina da, buice ko re nodei thu eno ne nodei thu thoeo ac; ka ono re nodei mamoe deko hna taedengi du buic. 9 Inu ko re pakag. Kacen' o se ngome ce-okonelo lene sego, nubone co waruma; ka nubone co okonelo jo ne co okonebote jo, ne co numu kaka. 10 Ono re thu eno deko ma hue gupabot, ka roi co eno, ne co atangoni, ne co aniani; ha pina ke me inu thu numu ke buic' o re waruma, ka thu numu hmaiai. 11 Inu ko re thu cumo roio mamoe; ono re thu cumo roio mamoe ci nue o re ci roi ni nubone bane son' o re nodei mamoe. 12 Ka ono re ngome ci kone thuben, ka deko thu cumo mamoe, ka ono re nodei mamoe deko sini nubon, nubone ci ule o re luko ha ci huebot, ile nubone me nue di o re nodei mamoe ne ci sic; il' o re luko co kukuce ne co aenewenibot' o re nodei mamoe. 13 Ono re ngome ci kone tbubene ci sic, wen' o re nubone ko re thu kone thuben; ka ci wenekelon' o re nodei mamoe. 14 Inu ko re thu cumo roion; inu ha ule o re nodei mamoego, ka buice se ha ule nu. 15 Inom' o re Cecewaiene ci rowo nu, se inomelei inu ci ule di o re Cecewaien; ka inu co nue o re ci roi inu bane son' o re nodei mamoe. 16 Ka inu ha numu se nodei mamoe ko, me deko wen' ome ri hnekag; ka inu ha co hue te buic, ka buice co taedengi o re lanengocego; ile me co sa so ko re ehna mamoe, ka co sa so ko re thu cum on. 17 Wen' omelei Cicango ci rato nu, wen' o re inu ha co nue o re ci roi inu, thu co yose yawe. 18 Deko se ngome co thedi omelei sego, ka inu ko ha co nue. Inu ha numu nene co nue o re ci roi inu, ka inu ha numu nene co yose yawe. Hnego hna kedi o re wathebo omelei wene sei Cicango. 19 He me ithuba yawe ko re nodei si Juda, wen' o re nodei eberedo omelei. 20 Waace buice ci ie, ko, Sei nubone ko re demoni, ka ha one ke nubon. Nge ke buhnije ci taedengi nubon? 21 Ka osotene ci ie, ko, Ome deko enengoco no re ngome me Ome i demoni thu re waegogo no re ntmm demoni, ni co aiuleni o namanashen? 22 Ka omelei hna ile ri nokene akabesini i Jerusalem, ka ha kenereken. 23 Ka Iesu ci lenge jo ri hneruala ri veraneda ni Solomona. 24 Ile me sa guru nubonengo ko re nodei si Juda, ne ci ie du nubonengo, ko, Bua ci arewereweni ehnije ca hodrael? Kacene bua ko re Keriso da beredo ahngane du xehnij. 25 Iesu ci cedito buice, ko, Hnego hna ie du buhnij, ka buhnije deko ma kedi. Ono re nodei ruace hnego hna ilone ri acekini Cicango, omelei ci asesekoni nu. 26 Ka buhnij e deko ma kedi, wen' o re buhnije deko nodei mamoego, inom' o re hnego hna ie du buhnij. 27 Ono re nodei mamoego ci taedengi o re lanengocego, inu ha ule buic, ka buice ci hue leu nu. 28 Ka inu ci kanu buic' o re waruma tha thu ase ko, ka buice deko co tango e iara oiru, ka deko ngome co thedi buice bote wene ri araninego. 29 Kebene ri pon' o re nodei ace ileodene kei Cicango o re hna nunuo buice du nu; ka deko ngome me tace co thedi buice bote frene ri aranine ni Cicango. 30 Inu ne Cecewaiene sa jo so ko ke ehn. 31 Il' o re si Juda me yo ete yawe, co etu nubonengo. 32 Ilei Iesu me beredone du buice, ko, Acala ko re nodei ruace me roi hnego hna aehngeni du buhnije wenei Cicango; tan' o re ruace me nge buhnije ha co etu nu? 33 Il' o re si Juda me cedi nubonengo, ko, Ehnije deko co etu nubo tan' o re ruace me roi, ka roi di tan' o re lahma, wen' o re nubo me ngome ci ilo nubo ko bane Makaze. 34 Iesu ci cedito buice, ko, Deko hna xiwamomone ri wathebo ni buhnije, ko, "Hnego hna ie, ko, Buhnije nodei makaze"? 35 Kacene nubonengo hna beredone, ko, Buice nodei makaze, wen' o re hna pina du buice ko re eberedo ni Makaze, (ka tha thu ni ko co atakoni o re eberedo hna xiwamomon,) 36 Ilo, buhnije ci ie nubon' o re hnei Cecewaiene hna ahmijoceni, ka hna siaton' ome ri tene, ko, Nubo ci lahma, wen' o re hnego hna ie, ko, Inu ko re Tei Makaze? 37 Ngei inu deko ma ilon' o re nodei ruace ni Cicango, hage kedi nu. 38 Ka ngei inu ci ilon, ka buhnije deko ma kedi nu, roi di kedilo o re nodei ruac, thu ule, ne thu cara jewe ke buhnije, ko, hulo ri hnorego kei Cecewaien, ka inu hulo ri hnore ni nubonengo. 39 Ile buice ci there yawe co cori nubonengo, ka nubonengo ci nu' unido buic, 40 Ne ci lenge yawe ri dadeni Ioridano jeu' o re guhnen' o re hnei Ioane hna bapataizo ri dan, ne ci mune omelei. 41 Ile me huebote du nubonengo ko re nodei ngome me waac, ne ci ie, ko, Ioane deko hna ilon' o se aehngenijeu; roi di seseko ko re nodei enengoco ileodene hnei Ioane hna ie nubone ti. 42 Ka waace ko re nodei ngome ci une du nubonengo omelei.

11

1 Ci uede ko re ngom, ono Lazaro, serei Bethani, hnamenenge ni Maria ne Matha me acе celuaien. 2 Omelei ko re Maria o re thu aseni Retok' o wakacu me bure muro, ka hna tiribot' o re rue wata ni nubonengo hnen' o re yehawo ni nubon, ka isingene nubone ko re ci ued, ono Lazaro. 3 Il' o re rue isingene nubone ci siane du nubonengo ne ci ie, ko, Retok, da rowon, ci taeto ke nubon' o re bua ci rän. 4 Ci canaeone kei Iesu ile nubonengo me beredone, ko, Deko co nidi tango ko re ued' omelei, roi di bane ahmani Makaze, ka thu co ahmani o re Tei Makaze ti. 5 Iesu ci rato Matha, ne ace celuaiene ne nubon, ne Lazaro te. 6 Ka nubonengo ma canaeone, ko, Ci uede ke nubon, ile nubonengo me munelu yawe ko tu ko re rue rane ri hnameneng' omelei. 7 Thuben' omelei ile nubonengo me beredone jeu' o re re kokonieni, ko, Eje ba hue yawe i Judea. 8 Il' o re re kokoniene me ie du, nubonengo, ko, Rabi, ono re nodei si Juda hna there co etu bua kodihne, ka bua ha co lenge yawe omelei? 9 Iesu ci ceditone, ko, Ilo, deko ma tueleve ko re nodei gula rane ri ran? Ngei me hue jo ri rane ko se ngom, nubone deko ma cedi, wen' o re nubone ci ule o re nerene nome ri ten. 10 Ka ngei me hue jo ri ridi ko se ngom, nubone co cedi, wen' o re ha deko nerene sei nubon. 11 Omelei ko re hnei nubonengo hna beredon; ka thuben' omelei ile nubonengo me beredone du buice, ko, Ha thaeti kei Lazaro, o re kaj, ka inu ha ci hue co inidi nubone bot. 12 Ile me ie du nubonengo ko re re kokonieni nubonengo, ko, Retok, ngei nubone ci thaet, ile me roi ke nubon. 13 Roi di Iesu hna beredon' o re tango ni nubon, ka hnei buice hna uane, ko, hnei nubonengo hna beredon' o re ci thaeti ha thu podepod. 14 Ilei Iesu me beredo ahngane du buice, ko, Ha tango kei Lazaro. 15 Ka inu ci opodone weno buhnij, ma tako ke inu, thu une ke bunnij; ka eje ba hue du nubon. 16 Ile me ie kei Toma, (o re hna ato yelene Didimo,) jeu' o re re kokoniene kani nubone, ko, Ba hue te ke ej, ha thu tango sese te ke eje ne nubonengo. 17 Ma shedo kei Iesu ile nubonengo me rowone, ko, ha foa ko re rane ni nubone ri pua. 18 Ka Bethani eaceno ne il' o Jerusalem' ineko fifetin ko re nodei setadia. 19 Xara waace ko re nodei si Juda hna huebote du Matha ne Maria, co athaberidini bushengon, wen' o re isingene bushengon. 20 Ci taedengi kei Matha, ko, ha shedo kei Iesu, ile nubone me hue co icadawene ne nubonengo; ka Maria ci hne di ri 'ma. 21 Ilei Matha me ie du Iesu, ko, Retokengo, kacene bua da hna nae ome kacene deko hna tango ko re isingene inu. 22 Ka onom' inu ha rowone, ko, ono re nodei ac' ileodene bua co sibonone sei Makaze, Makaze co nunuo bua. 23 Kei Iesu ci beredone du nubone, ko, Co roilo yawe ko re isingene nubo. 24 Kei Matha ci ie du nubonengo, ko, Inu ha rowone, ko, nubone co roilo yawe ri co roilo yawe ri rane me hna dirin. 25 Kei Iesu ci beredone du nubone, ko, Inu ko re co aroinilo yawe, ne ile ko re waruma; ono re ngome ci une du nu, ngei ma tango, nubone co waruma. 26 Ka ono re nodei ngom' ileodene me roi ko ne ci une du nu, buice deko co tango e iara oiru. Ilo, nubo ci kedi omelei? 27 Kei nubone ci ie du nubonengo, ko, Egewa, Retok, inu ci uan, bua ko re Keriso, Tenengoieni Makaze, ono re co lengelu ome ri ten. 28 Nubone ma hna ie inomelei, ile nubone me hue, ne ci kaie unido Maria celuaieni nubon, ne ci ie, ko, Ha pina kei Retok, ka nubonengo ci kaio nubo. 29 Ci taedengi omelei ke nubon, ile nubone me canga pucalo, ne ci hue du nubonengo. 30 Be deko ma shedo kei Iesu ri hnameneng, ka be omelei ko ri hnei Matha hna icadawene ne nubonengo. 31 Il' o re nodei si Juda ma ile sei nubone ri 'ma ci athaberidini nubon, ma ule, ko, Maria ci canga pucalo, ne ci hue obot, ile buice me hue leu nubon, ne ci ie, ko, Nubone ha ci hue jeu' o re pua co mane omelei. 32 Ma pina kei Maria omelei sei Iesu, ne ci ule nubonengo, ile nubone me caralu ri rue arada ni nubonengo, ne ci ie du nubonengo, ko, Retok, kacene bua da hna nae ome kacene deko hna tango ko re isingene inu. 33 Iesu ci rowo nubone ci mane, ka ono re nodei si Juda hna huebote sese ne nubone se ci mane te, ile nubonengo ci hxo ri hnore ne ci sheusheu; 34 Kei nubonengo, ko, O ke buhnije hna ula nubone il? Kei buice ci ie du nubonengo, ko, Retok, dai lenge te co rowon. 35 Ilei Iesu me yanadraibot. 36 Ile me ie ko re nodei si Juda, ko, Da ule, hmaiai ko re nubonengo hna ra nubon! 37 Ka osotene buice ci ie, ko, Deko ma thu ni ko re ngom' om, o re hna aiuleni o re ta waegogo no re namanashene, co cue thu deko ma tango ko re ngom' om? 38 Ka Iesu ci hxo yawe ri hnore ni nubonengo ne ci lengebote jeu' o re pua, malu komelei, ka hna ane o re ete ri peic. 39 Ilei Iesu me beredone, ko, Yosebot' o re ete. Kei Matha, isingene nubone hna tango, ci ie du nubonengo, ko, Retok, nubone ha bi onome ngei, wen' o re ha foa ko re rane ni nubon. 40 Kei Iesu ci beredone du nubone, ko, Inu deko hna ie du nubo, ko, kacene nubo da co un, ile nubo co ule o re nene ni Makaze? 41 Ile buice me yosebot' o re ete hnei tango hna thaeti il. Bei Iesu me ngeritonelo re ran, ne ci beredone, ko, Cicango, inu ci oretone du bua, wen' o re bua hna canaeo nu. 42 Ka inu ha rowone bua ci iara canaeo nu; ka wen' o re xaränumu ci sere gurule hnego hna beredon, thu kedi ke buice hnei bua hna siato nu lu. 43 Ma hna beredon' omelei ke nubonengo, ile nubonengo me tualo re rane, ko, Lazaro ke! Okonebot. 44 Ile me okonebote ke nubone hna tango, hna xetul' o mano ko re rue wata ne ile ko re rue wanke ni nubon; ka hna xetul' o gutauele ko re paegogo ni nubon. Kei Iesu ci beredone du buice, ko, Cenge nubone bot, ne nue nubone bote thu hue. 45 Ka waace ko re nodei si Juda o re hna huebote du Maria hna une du nubonengo, ma ule o re nodei ace hna ilewane hnei Iesu. 46 Ka osotene di buice ci hue jeu' o re nodei faresi, ne ci lae nata ni buic' o re hnei Iesu hna ilewan. 47 Il' o re nodei toka-thuhule ne nodei faresi me asanilo o re nodei thu eman, ne ci ie, ko, Nge ke ej, wen' o re ngom' omelei ci ru' o re nodei aehngenijeu me waac? 48 Kacene eje ci nue nubone di inom, il' o re nodei ngom' ileodene co une du nubon, ka ono re nodei si Rome co huebote ne co thedi o re hnamenenge ne il' o re nodej. 49 Il' ome sa buic, ono Kaiafa, ono re toka-thu-hule ri kenereken' omelei, ci ie du buice, ko, Buhnije tha ule ko o se ac; 50 Ka deko ma uane, ko, nidi ace so xeje co tango ko re ngome me sa bane win' o re nod, thu deko co tango ko re nod' ileoden. 51 Nubone deko ma ie gupan' omelei, ka nubone ma toan' o re nodei thu-hule ri kenereken' omelei, ile nubone me perofetane, ko, Co tango kei Iesu bane 'win' o re nod; 52 Ka deko bane win' o re nod' omelei so, roi di nubonengo co sanelo thu sa so ko re re tenengoieni Makaze hna etha kawilebot. 53 Ile buice me ekoti wene ri ran' omelei, thu co atangoni nubonengo. 54 Wen' omelei Iesu deko ma lenge ahnga yawe i Judea, ka nubonengo ci lenge jeu' o re node me acenon' o re hnahnerec, jeu' o re menenge yelen' Eferaim ne ci mune sese te omelei ne nodei ko konieni nubonengo. 55 Ka ha ci acene ko re paseka ni si Juda, ka waace buice ci hue sere ri node jeu' o Jerusalem, be deko ma ezien' o re paseka, co aburuiani buice ko. 56 Ile buice me there Iesu, ne ci etha nata ko buice be ci me sere ke buice ri hneruala, ko, Nge ko re ci uane buhnij? Nubone ngei deko ma huebote jeu' o re noken; 57 Ka ono re nodei toka-thuhule ne nodei faresi hna aseri o re wathebo, ko, Kacen' o se ngome ha ule o re nubonengo ci mune il, nubone co aehngeni ha thu cori nubonengo ke buic.

12

1 Ile Iesu me shedolu i Bethani, be sikese ko re nodei ran, ile me ni o re paseka; omelei kei Lazaro hna tango, ono re hnei Iesu hna aroini yawe sere ri tango. 2 Buice hna hngoronatan' omelei o re kodaru so nubonengo, ka Matha hna sinemeneng, ka Lazaro hna kane re kaka ne nubonengo. 3 Ilei Maria me yose o re cenge wakacu me bure muro sa ko re paun, nidi nade me hma-re-wanecen ne ci aseni o re rue wata ni Iesu, ne ci tiri o re rue .wata ni nubonengo hnen' o re yehawo ni nubon, ile me cece ko re 'ma hnen' o re yebonen' o re wakacu. 4 Ile me ie kome sa o re re kokonieni nubonengo, ono Juda Isekariot, tei Simona, ono re ha co wakewio nubonengo, 5 Ko, Wen' o re nge deko hna iticon' o re wakacu me bure muro ome bane thuba denari me theri handed, ile me kanone jeu' o re nodei ngome me deko ac? 6 Nubone deko hna ie omelei wen' o re nubone hna rän' o re nodei ngome deko ac, ka wen' o re nubone ko re ngome thu eno, ka sei nubone ko re guceng, ka nubone hna adon' o re nodei ace hna padengid. 7 Ilei Iesu me beredone, ko, Hage ilo nubon; nubone hna ane omelei ca pina ko re rane bane ula nu. 8 Ha iara ome sei buhnije ko re nodei ngome deko ac; ka inu deko ma iara hne ome sei buhnij. 9 Ha ule ko re nodei si Juda me xaranumu, ko, nubonengo ci mune omelei, ile buice me huebot; ka deko co ule Iesu so, roi di co iue Lazaro te, ono re hnei nubonengo hna aroini yawe sere ri hna tango. 10 Il' o re nodei toka-thu-hule me ekoti co atangoni Lazaro te; 11 Wen' o re nodei si Juda me waace ci hue, ne ci une du Iesu weno nubon. 12 Ma ore yawe, ci taedengi ko re nodei ngome xaranumu hna huebote jeu' o re nokene, ko, ha ci lengelo kei Iesu i Jerusalem, 13 Ile buice me lae adra pam, ne ci hue co icadawene ne nubonengo, ne ci kaie, ko, Hozana, iala roion' o re Doku ni si Iseraela ci lengelo ri acekin' Iehova. 14 Iesu ma uni o se asina be waam, ile nubonengo me toene ri poni nubon, se inom' o re hna xiwamomone, 15 Ko, Nubo hage pareil, ca çenewe me tenen' i Ziona, da ule o re Doku ni nubo ci lengebot, ci toene ri tenen' o re asina. 16 Ono re re kokonieni nubonengo deko ma cara jewe ri hna whan' o re nodei ac' omelei, ka ma hna ahmani Iesu ile buice me uane, ko, ha hna xiwamomon' o re nodei ac' omelei weno nubonengo, ka hnei buice hna ilon' o re nodei ac' omelei du nubonengo. 17 Ile me lae natane ko re nodei ngome hna ile sei nubonengo be hna kaio Lazaro sere ri pua, ne ci aroini nubone sere ri hna tango. 18 Wen' omelei ci icadawene ne nubonengo ko re nodei ngome xaranumu, buice hna taedengi, ko, hnei nubonengo hna ilewan' o re aehngenijeu omelei. 19 Ile me enengoco ko buice ko re nodei faresi, ko, Buhnije ha ule, buhnije tha thu ni ko ko se ac? da ule, ci hue leu nubone ko re ten' o re aw' ileoden. 20 Ka omelei kosoten' o re nodei si Eleni hna kane re huebote te co hne ri noken; 21 Buice ci huebote du Filip, serei Bethsaida i Galili, ne ci et o nubon, ne ci ie, ko, Retok, ehnije ci di ule Iesu. 22 Ilei Filipo me hue ne ci ie du Anederea, ilei Anederea ne Filipo me ie di du Iesu. 23 Ilei Iesu me cedito buic, kei nubonengo, ko, Ha pina ko re eziene bane ahmani o re Tei ngom, 24 Seseko, seseko, inu ci ie du buhnij, Kacen' o se wawhite deko ma nara ri rawa ne ci momoc, nubone ci hmore so; ka ngei me momoc, ile me ua hmaiai. 25 Ono re ngome co wahnacoron' o re ci roi ni nubone nubone co aniani; ka ono re ngome ci kecon' o re ci roi ni nubon' ome ri ten, nubone co numu o re waruma tha thu ase ko. 26 Kacen' o se ngome co sinemenengoiego, roi ke nubone co hue leu nu; ka ri guhne inu ci hne ile co ile sego ko re sinemenengoiego. Ono re ngome co sinemenengoiego Cicango co ahmani nubone te. 27 Ci sheusheu onome ko re hnorego; ka nge ko re pago co" ie? Cicango, dai awarumani nu wene ri gula ran' om? ka wen' omelei ha pina ke inu jeu' o re gula ran' om. 28 Cicango, ahmani o re acekini bua. Ile me kulu ko re laberede wene ri awe, ko, Ьт ha hna ahmani, ka inu ha co ahmani yawe. 29 Il' o re nodei ngome ci me ser' omelei, ne ci taedengi ci ie, ko, 'Hne. Kosotene ci ie, ko, Ci nengoce du nubone ko re angela. 30 Ka Iesu ci cedi, kei nubonengo, ko, Deko hna kulu ko re labered omelei so nu, ka so buhnije di. 31 Onome ko re co anetitini o re ten' o re aw; co udi obot' onome ko re ci necene nome ri ten. 32 Ka inu di co iyelo o re nodei ngom' ileodene du nu, ngei ma kedi nu lo mado re ran. 33 Hnei nubonengo hna beredon' omelei, ci aekoweni o re taeto ha co pina du nubonengo. 34 Il' o re nodei ngome me cedi nubonengo, ko, Ehnije ha hna taedengi wene ri wathebo, ko, ci iara sere pode kei Keriso; ka nge ko re enengoco ni nubo, ko, Ha co kedilo mado re ran' o re Tei ngom? La ko re Tei ngom' omelei? 35 Ilei Iesu me beredone du buice, ko, Ha gukokode di ko re nerene sei buhnij, ho hue jo be ome sei buhnije ko re neren, da pina du buhnije ko re nashen. Ono re ngome ci hue ri nashene nubone deko ma ule ci hue ile ke nubon. 36 Kedilu o re neren, be ome sei buhnije ko re neren, thu co ilo buhnije bane re tenen' o re neren. Iesu ma hna beredon' omelei ile nubonengo me leng, ne ci oeo buic. 37 Ka ma ase hna ilewane ke nubonengo o re nodei aehngenijeu me waac' inomelei ri tadani buic, roi di buice deko ma une du nubonengo. 3§ Ha thu iu ko re eberedo hnei Isaia perofeta hna ie, ko, "Retok, hnei la hna kedi o re nata hnij? ka hna ahngabote du la ko re wanine ni Iehova?" 39 Ka buice tha thu ni ko co un, wen' o re hnei Isaia hna ie yawe, ko, 40 "Nubonengo hna anamanasheneni o re nodei waegogo, ni buic, ka hna ataceni o re hnore ni buic, thu deko co ule ke buice hnen' o re nodei waegogo, ne deko co uane hnen' o re hnore ni buic, da lereie, ile inu co 'aroini buic." 41 Omelei ko re hnei Isaia hna ie be ci ule ke nubon' o re nerene ni nubonengo, ne ci ie nubonengo. 42 Ka waace ko re nodei toane ci une du nubonengo, ka buice deko ma aehngeni, wen' o re nodei faresi, da uwo buice wene ri sunago; 43 Wen' o re nidi ace du buice ko re bane ahmani wenei ngom, ri pon' o re bane ahmani wenei Makaze. 44 Iesu ci tuan, ne ci beredone, ko, Ono re ngome ci une du nu nubone deko ma une du nu so, roi di du nubonengo te o re thu siato nu; 45 Ka ono re ngome ci ule nu nubone ci ule nubonengo te o re thu siato nu. 46 Ha pina ke inu bane nerene nome ri ten, thu deko co menenge ri nashene ko re nodei ngom' ileodene ci une du nu. 47 Ka ngei o se ngome ci taedengi o re nodei enengocoiego, ka deko ma kedi, inu deko ma ahnaeloni nubon, wen' o re deko ma pina ke inu co ahnaeloni o re ten' o re aw, roi di co awarumani o re ten' o re aw. 48 Ono re ngome ci udi nu, ka deko ma kedi o re nodei enengocoiego, sei nubone ko ko re bane ahnaeloni nubon; ono re enengoco hnego hna ie, omelei bane ahnaeloni nubone ri rane me hna dirin. 49 Inu deko ma ie kago ko, ka ono re Cecewaiene hna siato nu, hnei nubonengo hna nunuo nu o re wathebo, ono re pago co rue ne pago co ie. 50 Ka inu ha ule bane waruma tha thu ase ko ko re wathebo ni nubonengo. Ka inu ci ie o re nodei ac' inom' o re hnei Cecewaiene hna beredone du nu, one komelei inu ci ie ko.

13

1 Be deko ma noken' o re paseka, Iesu ha rowon, ha pina ko re eziene ni nubonengo bane erelo ser' ome ri tene jeu' o re Cecewaien; ka nubonengo ma hna ran' o re re kani nubonengo ome ri ten, nubonengo ci ra buice ko ca pina ri bun. 2 Ka ma ase hna kaka re lakidi, ka diabolo ma hna ane ri hnore ni Juda Isekariot, tei Simona, co wakewio nubonengo; 3 Ka Iesu ma rowon, hnei Cecewaiene hna nunuon' o re nodei ac' ileodene jeu' o re rue aranine ni nubonengo; ka sere sei Makaze ke nubonengo, ka nubonengo ha ci lenge yawe du Makaze; 4 Ile nubonengo me thelalo, ma ase hna kodaru, ne ci onetonebot' o re so kokoe ni nubonengo, ne ci kaban' o re gutawel, ne ci wacaoro nubonengo ko. 5 Ile nubonengo me pie tini jeu' o re kumeti, ne ci whane co aseni jo o re nodei wata no re re kokonien, ne co tiribote hnen' o re gutawele hna wacaoro nubonengo. 6 Ka nubonengo ci lengebote du Simona Peteru, ka kei nubone ci ie du nubonengo, ko, Retok, bua ha co aseni o re rue watago? 7 Iesu ci cediton, ne ci thamumucane du nubone, ko, Ono re ace inu ha ci rue nubo tha ule ko onom, roi di nubo co ule oiru. 8 Kei Peteru ci ie du nubonengo, ko, Bua tangoko co aseni o re rue watago ca e iara oiru. Iesu ci cedito nubone, ko, Kacene inu deko ma aseni nubo kacene nubo ha deko se gula sa sego. 9 Kei Simona Peteru ci ie du nubonengo, ko, Retokengo, deko rue watago so, roi ko re rue waninego ne ile te ko re hawogo. 10 Iesu ci beredone du nubone, ko, Nubon' o re be hna se ha thati kabesi, ka deko ma nidi ace co aseni nubone yawe, ka roi ko re rue wata so; ka ha kabesi ke buhnij, ka deko buhnij' ileoden. 11 Nubonengo hna rowo kacen' o re thu wakewio nubonengo, wen' omelei hnei nubonengo hna beredone, ko, Deko ma kabesi ke buhnij' ileoden. 12 Ma ase hna aseni o re nodei wata ni buic, ile nubonengo me kaban' o re so kokoe ni nubonengo, ne ci munelu yawe, ne ci beredone du buice, ko, Buhnij e ci cara jeu' o re hnego hna ilone du buhnij? 13 Buhnije ci kaio nu, ko, Thu Íeno, ne Retok; ka roi ko re buaije ci ie, wen' o re inu oniil. 14 Ka ngei inu, me Doku ne Thu yeno ni buhnij, ma hna aseni o re nodei wata ni buhnij, ile me ekowe ke buhnije di co easeni o re nodei wata ni buhnij. 15 Wen' o re hnego hna kanu buhnij' o re tu, ko, inom' o re hnego hna ilone du buhnij, inomelei buhnije co ilone te. 16 Seseko, seseko, inu ci ie du buhnije, ko, Ono re sinemenenge deko ma ile ri pon' o re thu musio nubon; ka ono re hna siane deko ma ile ri poni nubon' o re thu sia nubon. 17 Kacene buhnije ha ule o re nodei ac' omelei ha hnahneone ke buhnije ngei ma ilone te. 18 Inu deko ma ie buhnij' ileoden; inu ha ule o re hnego hna ureie; ka thu iu ko re eberedo hna xiwamomone, ko, "Ono re ngome ci kaka areto sese ne inu ha hna ngeni o re kacabada ni nubone du nu." 19 Inu ha hna ie onome du buhnije be deko ma iu, sone ngei ma iu buhnije ha thu kedi, ko, inu oniil. 20 Seseko, seseko, inu ci ie du buhnije, ko, Ono re ngome co kedi o re ngom' inu ha co sian, nubone co kedi nu; ka ono re ngome co kedi nu, nubone co kedi o re thu siato nu. 21 Ma hna beredon' inomelei kei Iesu, ile me sheusheu ke nubonengo ri hnor, ne ci lae nata, ne ci beredone, ko, Seseko, seseko, inu ci ie du buhnij, ome sa buhnije co wakewio nu. 22 Il' o re re kokonieni nubonengo ci etha iule ko buice ne ci mmaga, ko, la ngei ko re ngome nubonengo hna beredon. 23 Ka ci thaeti ko se kokonieni nubonengo ri yewanono ni Iesu, ono re hnei Iesu hna hnoron. 24 Uei Simona Peteru me thumo nubon, pani nubone co etone, ko, La ko re ngome hnei nubonengo hna beredon. 25 Ile nubon' o re ci thaeti ri yewanono ni Iesu me ie du nubonengo, ko, Retok, la ngei? 26 Ilei Iesu me ceditone, ko, Ono re ngom' inu co kanone jewe o re gukaka ma hna kusie, omelei nubon. Ile nubonengo me kusie o re gukaka ne ci kanu Juda Isekariot, tei Simona. 27 Thuben' o re gukaka, ilei, Satana me rolo ri hnore ni nubon. Ilei Iesu me beredone du nubone, ko, Ono re ace nubo ha co ilon, canga ilonelo. 28 Ka deko se ngome ci kane re kaka me ule wen' o re nge nubonengo ci beredon' omelei du nubon. 29 Ngosotene ci uan, wen' o re sei Juda ko re gucenge, ko, hnei Iesu baa beredone du nubone, ko, pani nubone co iticon' o re nodei ace me ekowe ne il' o re noken, ca, pani nubone co kanon' o se ace jeu' o re nodei ngome me deko ac. 30 Ma hna kedi o re gukaka ke nubon' ile nubone me eanga okonebot; ka ha rid. 31 Ma hna okonebote ke nubon, ilei Iesu me beredone, ko, Ha hna ahmani onome ko re Tei ngom, ka hna ahmani Makaze hnei nubon. 32 Ka kacene me ahmani Makaze hnei nubon, ilei Makaze co ahmani nubone hnei nubonengo ko, ne co canga ahmani nubon. 33 Nodei tenen, ha gukokode di ke inu sei buhnij; buhnije co there nu, ka inome hnego hna ie jeu' o re si Juda, se inomelei inu ci ie onome du buhnije te, ko, Ono re inu co hue ile buhnije tha thu ni ko co hue te jewe. 34 Inu ci kanu buhnij' o re wathebo kabesi, Buhnije co etha era ko buhnij; se inome hnego hna ra buhnije se inomelei buhnije co etha era ko buhnije te. 35 Ome ko re kacen, ono re nodei ngom' ileodene co ule kacene buhnije ko re nodei kokoniego, ko, buhnije ngei co etha era ko buhnij. 36 Kei Simona Peteru ci ie du nubonengo, ko, Retok, bua ha ci lenge il? Iesu ci cedito nubone, ko, Ono re inu ha ci hue ile nubo tha thu ni ko co hue leu nu onom, ka nubo co hue leu nu oiru. 37 Kei Peteru ci ie du nubonengo, ko, Retokengo, wen' o re nge inu tha thu ni ko co lenge leu bua onom? inu co nue o re ci roi inu bane wini bua. 38 Iesu ci cedito nubone, ko, Ca, nubo co nue o re ci roi ni nubo bane wigo? Seseko, seseko, inu ci ie du nubo, Deko co kukereke ko re coco ca dane co ha theri caçereo nu ke nubo.

14

1 Hage unia ko re hnore ni buhnij, buhnije ci une du Makaze, unelo te du nu. 2 Waace ko re nodei hnamenenge ri hneruala ni Cicango; kacene me deko kacene inu ha hna ie du buhnij. Ka inu ha ci hue co hngorcnatan' o re guhnene bane so buhnij. 3 Ka ngei inu co hue co hngoronatan' o re guhnene bane so buhnij, ile inu co huelu yawe co yothi buhnije lo du nu ko, ha thu menenge sese ne inu ke buhnij. 4 Ka buhnije ha ule o re inu ha ci hue il, ka buhnije se ha ule o re len. 5 Kei Toma ci ie du nubonengo, ko, Retokengo, ehnije deko ma rowon' o re bua ha co lenge il, ka co korione ke ehnije co rowon' o re kara. 6 Kei Iesu ci beredone du nubone, ko, Inu ko re len, ne ile ko re seseko, ne ile ko re waruma. Deko ngome ci hue du Cecewaien, me deko hna lene sego. 7 Kacene buhnije ha hna ule nu, ile buhnije co ule Cicango te; ka wene onome buhnije ci cara jewe dunubonengo ne ci ule nubonengo. 8 Kei Filipo ci ie du nubonengo, ko, Retokengo, aehngenitone du xehnij' o re Cecewaien, ile me ha wien. 9 Kei Iesu ci beredone du nubone, ko, Ha tui ke inu hna menenge sese ne buhnij, ka nubo deko ma ule nu, ca Filip? ono re ngome ci ule nu nubone se ci ule te o re Cecewaien. Ka nge ke nubo ci ie, ko, Aehngenilo du xehnij' o re Cecewaien? 10 Ilo nubo deko ma uan, inu hulo ri hnore ni Cecewaien, ka Cecewaiene hulo ri hnorego? Ono re nodei enengoco hnego hna ie du buhnij, inu deko hna ie kago ko, ka ono re Cecewaiene me hulo ri hnorego, nubonengo ci ru' o re nodei ruac. 11 Buhnije da kedi nu lu, ke, inu bulo ri hnore ni Çecewaien, ka Ceqewaiene hulo ri hnorego; ca se roi co kedi nu, wen' o re nodei ruae. 12 Seseko, seseko, inu ci ie du buhnije, ko, Ono re ngome ci une du nu, ono re nodei ruace inu ci rue, nubone se co rue te; ka nubone co ru hmaiaione ri pon' omelei, wen' o re inu ha ci hue du Cicango. 13 Ka ono re nodei ac' ileodene buhnije co sibone ri yelego, inu co ilon' omelei, ha thu ahmani o re Cecewaiene hnei Tenen. 14 Ka ngei buhnije co sibo ace ri yelego inu co ilon. 15 Ngei buhnije ci hnoro nu, ninenelo o re nodei wathebogo; 16 Ile inu co sibo Cecewaien, ka nubonengo co nunuo buhnij' o se Nekonekatu ko, ha thu mune sese ne buhnij' e iara oiru; 17 Ono re Uiewaieni me seseko; tha thu ni ko ko re ten' o re awe co kedi nubonengo, wen' o re buice deko ma ule, ka deko ma cara jewe du nubonengo; ka buhnije la ule nubonengo, wen' o re nubonengo ci hne ome sei buhnij, ka co ile ri hnore ni buhnij. 18 Inu deho co nue buhnije di, da inom' o re ta tei tango; ka inu co huelu yawe du buhnij. 19 Ha gukokode di, il' o re ten' o re awe deko co ule nu, roi ke buhnije co ule nu ko; wen' o re waruma ke inu, co waruma ke buhnije te. 20 Ri ran' omelei buhnije co ule, ko, inu hulo ri hnore ni Cicango, ka buhnije ri hnorego, ka inu ri hnore ni buhnij. 21 Ono re ngome ma ha numu o re nodei wathebogo, ne ci ninen' omelei, nubone ci hnoro nu; ka ono re ngome ci hnoro nu, ono Cicango co hnoro nubone te, ka inu co hnoro nubon, ka inu ko co aehngeni nu du nubon. 22 Ile me ie du nubonengo kei Juda, (deko Isekariot,) ko, Retob nge ke bua co aehngeni bua ko du xehnij, ka deko jeu' o re ten' o re aw? 23 Iesu ci ceditone ne ci thamumucane du nubone, ko, Ngei o se ngome co hnoro nu, nubone co ninen' o re enengocoiego; ka Cicango co hnoro nubone te, ile ehne co huelu du nubon, ne co menenge sese ne nubon. 24 Ka ono re ngome deko ma hnoro nu nubone deko ma ninen' o re enengocoiego; ka ono re enengoco buhnije ci taedengi deko enengocoiego, roi di eberedo ni Cicango, o re hna siato nu. 25 Inu ci ie o re nodei ac' omelei du buhnije be ome ke inu sei buhnij. 26 Ka ono re Nekonekatu, ono re Uiewaieni Hmijoc, ma co siatone ri yelego kei Cecewaien, nubonengo co yeno buhnij' o re nodei ac' ileodene, ne co auaneni buhnij' o re nodei ac' ileoden, hnego hna ie du buhnij. 27 Inu ha co nue o re dongodongo sei buhnij, inu co kanu buhnij' o re dongodongo inu; inu deko ma kanon' inom' o re ten' o re awe ci kanon. Hage unia ko re hnore ni buhnij, ne hage pareu. 28 Buhnije ha hna taedengi o re hnego hna ie du buhnije, ko, Inu ha ci hue, ka inu ha ci huelu yawe du buhnij. Ngei ma hnoro nu ke buhnij, ile buhnije co opodone wen' o re hnego hna ie, ko, inu ka ci hue du Cecewaien, wen' o re hmaiai ri pogo kei Cicango. 29 Ka onom' inu ha hna ie du buhnije be deko ma iu, thu kedi ke buhnije ngei ma ha iu. 30 Inu deko yawe co enengoco iweiai ne buhnij, wen' o re ha ci huebote ko re ci necene nome ri ten, ka deko ace ni nubone sego. 31 Ka thu ule ko re ten' o re awe, ko, inu ci hnoron' o re Cecewaien; ka inom' o re hnei Cecewaiene hna ahniwoto nu, se inomelei inu ci rue ko. Pucalo, eje ba hue.

15

1 Inu ko re nidi vin, ka Cicango ko re thu ruaba hnevin. 2 Ono re nodei omen' inu ileodene me deko ma ua nubonengo co yosebot; ka ono re nodei omene ci ua nubonengo co ruaban, thu ua hmaiai. 3 Ha kabesi ke buhnije hnen' o re enengoco hnego hna ie du buhnij. 4 Buhnije hne ome ri hnorego, ka inu ri hnore ni buhnij. Inom' o re omene tha thu ni ko co ua kani nubone ko, ngei me deko ma te pode ri vin, se inomelei tha thu ni ko ke buhnij, ngei me deko ma hne ome ri hnorego. 5 Inu ko re vin, buhnije ko re nodei omen; ono re ngome ci hne ome ri hnorego, ka inu ri hnore ni nubon, nubone co ua hmaiai; wen' o re tha thu ni ko ke buhnije co ru' o se ace ngei me ithua ne inu. 6 Ngei me deko ma hne ome ri hnorego ko se ngom, ile me cili nubone bot, se inom' o re omen, ha ile me nese; ka ono re nodei ngome co ci sanelo, ne co cedone ri iei, ha ile me reul. 7 Ngei buhnije me hne ome ri hnorego, ka ono re enengocoiego me hne ri hnore ni buhnij, buhnije co sibon' o re nodei ace buhnije ci alan, ha ile me ilone so buhnij. 8 Buhnije ngei ci ua hmaiai bane ahmani Cicango komelei, ka co ilo buhnije bane nodei kokoniego. 9 Se inom' o re Cecewaiene ci rato nu se inomelei inu ci ra buhnije te; hnedi ko ke buhnije ri ci räne inu. 10 Ngei buhnije ci ninen' o re nodei wathebogo, buhnije co hne di ko ri ci räne inu, se inome inu ha hna ninen' o re nodei wathebo ni Cicango, ne ci hne di ko ri ci räne nubonengo. 11 Inu ha hna ie o re nodei ac' omelei du buhnij, thu co hne di ko ri hnore ni buhnije ko re opodone inu, ne cо aceceni buhnije hnen' o re opodon. 12 Ome ko re wathebogo, ko Buhnije co etha era ko buhnij, se inome inu ha hna ra buhnij. 13 Deko ngome me numu ci räne hmaiai ri pon' ome,ko, cо nue ke nubon' o re ci roi ni nubone bane son' o re re kani nubon. 14 Buhnije ngei co ru' o re nodei ace hnego hna awa buhnij, ile buhnije co nodei kago. 15 Inu deko yawe co ie buhnije nodei sinemeneng, wen' o re sinemenenge deko ma ule o re ace ci ilone hnen' o re doku ni nubon; ka hnego hna ie, ko, buhnije nodei kago, wen' o re inu ha hna aehngeni du buhnij' o re nodei ac' ileodene hnego hna taedengi wenei Cicango. 16 Buhnije deko hna ure nu, ka inu ha hna ure buhnije di, ne hna aseri buhnij, thu co hue ne co ua ke buhnij, ne co iara ahnga ko re wawene ni buhnij; thu nunuo buhnije ko re Cecewaien' o re nodei аc 'l eodene buhnije co sibone ri yelego. 17 Ome ko re inu ci awa buhnije, ko, Etha era ko buhnij. 18 Ngei ma kogo buhnije ko re ten' o re aw, buhnije ha ule, ko, buice hna kogo dago, ka buhnije hna dir. 19 Kacene buhnije da wene ri ten' o re aw, il' o re ten' o re awe co hnoron' o re re kani buic; ka buhnije deko wene ri ten' o re aw, roi di inu hna ure buhnije wene ri ten' o re aw; wen' omelei ci kogo buhnije ko re ten' o re aw. 20 Uanelo o re enengoco hnego hna ie du buhnij, ko, Ono re sinemenenge deko ile ri pon' o re doku mi nubon. Buice ma hna tha leu nu, ile buice co tha leu buhnije te; kacene buice da ninen' o re enengocoiego buice co ninen' o re enengoco ni buhnije te. 21 Ka ono re nodei ac' ileoden' omelei buice co rue du buhnije wen' o re yelego, wen' o re buice deko ma ule nubonengo o re thu siato nu. 22 Kacene da deko hna huelu ke inu co lae nata ni buic, kacene buice deko ma numu nia; ka onome buice deko se ace bane kui' o re nia buic. 23 Ono re ngome ci kogo nu nubone ci kogo Cicango te. 24 Kacene inu da deko hna rue ri tadani buic' o re nodei ruace me deko hna rue hnei se ngome ko, kacene buice deko ma numu nia; ka onome buice ha hna ule, ka ha hna kogo nu ne Cicango te. 25 Ka thu iu ko re eberedo hna xiwamomone ri wathebo ni buice, ko, "Buice hna kogo papa nu." 26 Ka ma pina ko re Nekonekatu, ono re inu co siane du buhnije wenei Cecewaien, ono re Uiewaieni me seseko, ma co lengelu siwai Cecewaien, nubonengo co lae nata nu. 27 Ka buhnije te se co lae natan, wen' o re buhnije hna menenge sego wene ri hna whan.

16

1 Hnego ha ie du buhnij' o re nodei ac' omelei, thu deko ma cara ke buhnij. 2 Buice ha co uwo buhnij' obote ri nodei sunago; ka ba thu pina ko re ezien, ono re ngome co ridi atangoni buhnije co uane ke nubone, ko, nubone ci ru' o re ushiwa ni Makaze. 3 Buice co ru' o re nodei ac' omelei du buhnije wen' o re buice deko ma ule o re Cecewaiene ne inu. 4 Ka inu ha hna ie du buhnij' o re nodei ac' omelei, sone ngei ma iu ko re ezien, ile buhnije me uan' o re hnego hna ie du buhnij. Inu deko hna ie o re nodei ac' omelei koda, wen' o re inu hna menenge sei buhnij. 5 Ka onome inu ha ci hue du nubonengo o re hna siato nu, ka deko se ngome buhnije ci eto nu, ko, Bua ha ci lenge il? 6 Roi di wen' o re hnego hna ie o re nodei ac' omelei du buhnij, ile me cece ko re hnore ni buhnije hnen' o re ci sheusheu. 7 Roi di inu ci ie du buhnij' o re seseko, ko, Roi bane so buhnije co hue ke inu; ka ngei me deko ma hue ke inu, il' o re Nekonekatu deko co lengelu du buhnij; ka ngei inu me hue, ile inu co sia nubonengo du buhnij. 8 Ma pina ke nubonengo, ile nubonengo co anetitini o re ten' o aw, wen' o re nia, ne ile ko re netit, ne ile ko re co lae thuben. 9 Ko, ono re nia, wen' o re buice deko ma une du nu. 10 Ka ono re netit, wen' o re ha ci hue ke inu du Cicango, ile buhnije deko y awe co ule nu. 11 Ka ono re co lae thuben, wen' o re co hnengon' o re ci necene nome ri ten. 12 Inu ha numu nodei ace me waace co ie du buhnij, ka buhnije tha thu ni ko co taedengi onom. 13 Roi di ma pina ke nubonengo, ono re Uiewaieni me seseko, nubonengo co iye buhnije lo ri seseko ileoden, wen' o re nubonengo deko co beredo kani nubonengo ko, roi di nubonengo co lae natan' o re nodei ace nubonengo hna canaeon; ka nubonengo co aehngeni du buhnij' o re nodei ace co pina. 14 Nubonengo co ahmani nu, wen' o re nubonengo co yose te sego, ne co aehngeni du buhnij. 15 Ono re nodei ac' ileodene sei Cecewaiene nodei acego; wen' omelei hnego hna ie, nubonengo co yose te sego, ne aehngeni du bu16 Dai asasa buhnije deko co ule nu, ka dai asasa te ne buhnije co ule nu, wen' o re ha ci hue ke inu jeu' o re Cecewaien. 17 Il' osoten' o re re kokonieni nubonengo ci etha nata ko buice, ko, Nge komelei nubonengo ci beredone du xeje, ko, Dai asasa buhnije deko co uie nu; ka dai asasa te ile buhnije co ule nu; ka, Wen' o re mu ha ci hue jeu' o re Cecewaien? 18 Buice ci ie, ko, Nge komelei nubonengo ci beredone, ko, Dai asasa? eje deko ma cara jeu' o re hnei nubonengo hna beredon. 19 Iesu ha rowone buice ci di eto nubonengo, ile nubonengo me beredone du buice, ko, Ilo, buhnije ci etha there ko buhnij, wen' o re ace hnego hna ie, ko, Dai asasa buhnije deko co ule nu, ka dai asasa te ile buhnije co ule nu? 20 Seseko, seseko, inu ci ie du buhnije, ko, Buhnije co mane ne co leleron, ka ono re ten' o re awe co opodone di; buhnije co sheusheu, ka ono re ci sheusheu buhnije co ureie thu opodone di ke buhnij. 21 Ma ba thu hnapo ko re hmenew, ile me unia, wen' o re ha pina ko re eziene ni nubon; ka ma hna hnaponebot' o re morow, nubone deko ma uane yawe o re hna ushiwa, wen' o re ci opodone ma hnapon' o se ngom' ome ri ten. 22 Buhnij' onome ha numu sheusheu, ka inu co ule buhnije yawe, il' o re hnore ni buhnije co opodon, ka deko ngome co thedi buhnij' o re ci opodone buhnij. 23 Ri ran' omelei buhnije deko co sibo sego o se ac. Seseko, seseko, inu ci ie du buhnij, Ono re nodei ac' ileodene buhnije co sibo sei Cecewaiene ri yelego, nubonengo co nunuo buhnij. 24 Kodihne ca one kome buhnije deko hna sibon' o se ace ri yelego. Ka sibonelo, ka kedilu te, thu cece ke buhnije hnen' o re opodon. 25 Hnego hna ie o re nodei ac' omelei du buhnije ri aekoweni, ka ba thu pina ko re ezien, ile inu deko co ie yawe du buhnije ri aekoweni, ka inu co ie ahngane du buhnij' o re Cecewaien. 26 Ri ran' omelei buhnije co sibone ri yelego, ka inu deko ma ie du buhnije, ko, inu cio sibo Cecewaiene so buhnij; 27 Wen' o re Cecewaiene se ci ra buhnij, wen' o re buhnije ci hnoro nu, ne ci uane, ko, inu sere sei Cecewaien. 28 Hna huelu ke inu sere sei Cecewaien, ka hna pina ke inu ome ri ten; ka inu ha co nue di o re ten' o re awe ha thu hue jeu' o re Cecewaien. 29 Il' o re re kokonieni nubonengo me ie du nubonengo, ko, Dale, onome bua ci beredo ahngan, ka deko ma beredon' o re aekoweni. 30 Onom' ehnije ha ule bua ci rowo kacen' o re nodei ac' ileoden, ka deko ma nidi ace ko re ngome co etoeto búa; wen' omelei ehnije ci uane bua hna lengelu thela sei Makaze. 31 Iesu ci cedito buice, ko, Пo, buhnije ha kedi onom? 32 Da ule, ba thu pina ko re gula ran, ka ha om, buhnije co etha enewebote jeu' o re re kani buhnij, ne co nue nu di so; ka deko ma inu di so, wen' o re ha ome sego ko re Cecewaien. 33 Hnego hna ie o re nodei ac' omelei du buhnij, thu numu ke buhnij' o re dongodongo wenei inu. Buhnije co numu o re ushiwa ome ri ten; ka tacelo ke buhnij, inu ha hna amosiceni o re ten' o re aw.

17

1 Iesu ma hna beredon' o re nodei ac' omelei, ile nubonengo me ngeretonelo re rane jeu' o re aw, ne ci beredone, ko, Cicango, ha pina ko re ezien, ahmani o re Tenengoieni bua, thu ahmani bua di ko re Tenengoieni bua. 2 Naeni bua hna nunuo nubon' o re musion' o re nodei ngome' ileoden, thu kanone ke nubon' o re waruma tha thu ase ko du buic' ileodene naeni bua hna nunuo nubon. 3 Omewaore ko re waruma tha thu ase ko, ko, Buice co rowo bua, o re nidi Makaze me hnasa so, ne Iesu Keriso, o re hnei bua hna siaton. 4 Inu ha hna ahmani bua ome ri ten; inu ha hna anize o re ruace naeni bua hna nunuo nu co rue. 5 Cicango, onomewaore da ahmani nu hnasese ne bua ne ile ko re nerene hna ile se 'thewe be deko ten' o re aw. 6 Inu ha hna aehngeniton' o re acekiwaieni bua jeu' o re nodei ngome naeni bua hna nunuo nu wene ri ten' o re aw; ngome ni bua ke buic, ka naeni bua hna nunuo buice du nu; ka buice ha hna ninen' o re eberedo ni bua. 7 Onomewaore buice ha hna rowon, siwa sei bua ko re nodei ac' ileodene naeni bua hna nunuo nu. 8 Wen' o re inu hna nunuo buic' o re nodei eberedo naeni bua hna nunuo nu, ka buice ha hna kedi; ka buice ha hna nidi ule, ko, hna lengelu ke inu siwa sei bua; ka buice ha hna kedi, ko, naeni bua hna siato nu. 9 Inu ci hne so buic; inu deko ma hne son' o re ten' o re aw, ka so buice di o re naeni bua hna nunuo nu, wen' o re ngome ni bua ke buic. 10 Ono re nodei ace inu ileodene nodei ace ni bua, ka ono re nodei ace ni bua nodei ace inu: ka hna ahmani nu hnei buic. 11 Ka onomewaore inu deko ma hne ome ri ten, ka buice di ha ome ri ten; inu ha co lenge du bua. Cecewaiene hmijoc, cumo buice ri acekiwaieni bua, buic' o re naeni bua hna nunuo nu, thu hnasa so ke buice se inomewaore ethew. 12 Be hna mune ke inu sei buic' ome ri ten, hnego hna cumo buice ri acekiwaieni bua, ka hnego hna cumo buic' o re naeni bua hna nunuo nu; deko ma tako kome sa, tei hnaelo so ko re tako; thu iu ko re eberedo hna xiwamomon. 13 Onomewaore inu ha ci lenge du bua; inu ha hna beredon' o re nodei ao' omelei ome ri ten, ha thu aiuni o re opodone inu ri hnore ni buic. 14 Inu ha hna nunuo buic' o re eberedo ni bua; ka ono re ten' o re awe ci kogo buic, wen' o re buice deko wene ri ten' o re aw, se inomewaore inu deko wene ri ten' o reaw. 15 Inu deko ma sibo bua, ko, pani bua co kaba buice lo wene ri ten' o re aw; roi di pani bua co cumo buic, da nia. 16 Buice deko wene ri ten' o re aw, se inomewaore inu se deko wene ri ten' o re aw. 17 Ahmijoceni buice hnen' ö re sesekoile ni bua; ono re eberedo ko re sesekoile ni bua. 18 Inomewaore naeni bua hna siato nu ome ri ten, se inomelei inu co sia buice di ome ri ten. 19 Ka inu ci ahmijoceni nu ko so buic, ha thu ahmijoceni buice hnen' o re seseko. 20 Ka inu tangoko ma hne so buice ome so, roi di so buice te o re co une du nu wen' o re enengoco ni buic; 21 Thu salu so ke buic' ileoden, se inome bua Cicango ri hnorego, ka inu ri hnore ni bua, thu salu so ke buice ne ethew, ha thu kedi ko re ten' o re awe, ko, naeni bua hna siato nu. 22 Ka ono re nerene naeni bua hna nunuo mi inu ha hna nunuo buice te, thu salu so ke buice se inomewaore ethewe me sa so. 23 Inu hulo ri hnore ni buic, ka bua hulo ri hnorego, thu nidi salu so ke buic; ha thu ule ko re ten' o re awe ko naeni bua hna siato nu, ka hna ra buice se inome bua ci ra nu. 24 Cicango, inu ci alane, ko, buic' o re naeni bua hna nunuo nu co menenge sese ne inu, thu ule ke buic' o re sanangome inu, o re naeni bua hna nunuo nu, wen' o re naeni bua hna ra nu be deko hna ane ceden' o re ten' o re aw. 25 Cecewaiene me netiti ke, ono re ten' o re awe deko ma rowo bua, ka inu ha rowo bua, ka buic' ome ha rowon, naeni bua hna siato nu ko. 26 Ka inu ha hna aehngeni du buic' o re acekini bua, ka inu co aehngeni ko, ha thu ile ri hnore ni buice ko re ci rän' inom' o re ci räne ni bua du nu, ka inu hulo ri hnore ni buice te.

18

1 Iesu ma hna beredon' omelei, ile nubonengo ne re kokonieni nubonengo me lenge thawalan' o re lacele, yelene Kederon, omelei ko re toto, nubonengo ci rolo ile ne ile ko re re kokonieni nubonengo. 2 Ka Juda, o re thu wakewio nubonengo, ha ule o re guhnen, wen' o re Iesu ha waace hna lenge jeu' omelei sese ne nodei kokonieni nubonengo. 3 Dei Juda me hue jeu' omelei, ma hna lae se kote ngom, ne ile ko re nodei necumon, wene ri nodei toka-thu-hule ne nodei faresi; sei buice ko re nodei lamepa, ne nodei thena, ne so ne iru. 4 Iesu ci rowon' o re nodei ace co pina du nubonengo, ile nubonengo me kaikaio ne ci ie du buice, ko, Buhnije ci there la? 5 Kei buice ci cedi nubonengo, ko, Iesu serei Nazareth. Ile nubonengo me beredone du buice, ko, Ome ki inu. Ka omelei te sei buice kei Juda, o re thu wakewio nubonengo. 6 Ma hna beredone ke nubonengo, ko, Ome ki inu, ile buice me hue wacoshebune ne ci cacaralu hadu ri rawa. 7 Ile nubonengo me eto buice yawe, ko, Buhnije ci there la? Ile buice me ie, ko, Iesu serei Nazareth. 8 Iesu ci ceditone, ko, Inu ha hna ie du buhnije, ko, Ome ki inu; ka ngei buhnije ci there nu nue buice bot' ome ha thu hue; 9 Ha thu iu ko re eberedo hnei nubonengo hna beredone, ko, Deko ma tako sego kome sa buic' о re naeni bua hna nunuo nu. 10 Sei Simona Peteru ko re soad, ka nubone ci usebot, ne ci wosebote il' o re sinemenenge no re toka-thu-hul, ne ci helonebot' o re adra'iwa ni nubone me nata. Malakas ko re yelen' o re sinemeneng. 11 Ilei Iesu me beredone du Peteru, ko, Ronelu yawe o re soade ni nubo ri ken; ono re nejei naeni Cicango hna nunuo nu inu hage co kuan, ca? 12 Il' o re kote ngom, ne nodei necumon, ne nodei toane ni si Juda ci icoro Iesu ne ci wothi nubonengo. 13 Ne ci iye nubonengo lo hna dane du Anas, wen' o re nubone ko re cekini Kaiaia, o re toka-thuhule ri kenereken' omelei. 14 Ka Kaiafa ko re ngome hna ie du si Juda, ko, Roi ko se ngome me sa co tango bane win' o re nod. 15 Ile me hue leu Iesu kei Simona Peteru ne il' o se kokonien; ka hna ule kacen' o re kokonien' omelei hnen' o re toka-thu-hul, ile nubone me okonelo te sei Iesu ri 'ma no re toka-thu-hul. 16 Ka Peteru ci sere ri pa'ma obot. Ile me okonebote yawe ko re kokonien' omelei, o re hna ule kacene hnen' o re toka-thu-hul, ne ci ie jeu' o re thu cumo pa'ma, ne ci hue ti Peteru lo hulo. 17 Ile me ie du Peteru ko re cenewe thu cumo pa'ma, ko, Ilo, nubo deko se kokonien' o re ngom' omelei? Ile nubone me ie, ko, Inu deko. 18 Ci ser' omelei ko re nodei sinemenenge ne ile ko re nodei necumon, ne ci athoe o re iei, wen' o re ceon, ne ci shego. Ilei Peteru me sere sese ne buice ne ci shego te. 19 Il' o re toka-thu-hule me etoeto Iesu o re re kokonieni nubonengo ne ile ko re hna ininatane naeni nubonengo. 20 Iesu ci cedito nubone, ko, Hnego hna ie ahngane jeu' o re ten' o re aw, ka hnego hna iara ininatane ri sunago ne ri hneruala, o re hna sanelo ile ko re nodei si Juda; ka inu deko hna ie cerugocon' o se ac. 21 Ka nge ke nubo ci eto nu? eto buic' o re hna taedengi o re hnego hna ie du buic. Dale, buice ha ule o re nodei ace hnego hna ie 22 Ma hna ie omelei ke nubonengo, il' ome sa no re nodei necumone ci sere omelei ci ceto Iesu ne ci ie, ko, Nge ke nubo ci cedi inomelei o re toka-thu-hul? 23 Iesu ci cedito nubone, ko, Kacene inu hna ie nian, da ie o re nia; ka ngei me roi, nge ke nubo ci ridi nu? 24 Hnei Anas hna sia nubonengo ma hna wose jo du Kaiafa, o re toka-thu-hul. 25 Ka Simona Peteru ci sere ne ci shego. Ile buice me ie du nubone, ko, Ilo, nubo deko se kokonieni nubon, ca? Ka nubone ci cacere ne ci ie, ko, Inu deko. 26 Ile me ie kome sa no re nodei sinemenenge no re toka-thuhul, kani nubon' o re hnei Peteru hna ciebot' o re adra'iwa ni nubone, ko, Inu deko hna ule nubo ri toto sei nubon, ca? 27 Ilei Peteru me cacere yawe; ha ile me canga kukereke ko re coco. 28 Ile buice me iye Iesu bote sere sei Kaiafa, jeu' o re 'ma hnengon, be ci kapadran; ka buice deko ma okonelo te ri 'ma hnengon, da bure nia ke buic; buice dai kakan' o re paseka. 29 Ilei Pilato me okonebote du buice ne ci ie, ko, Nge ko re enengoco ni buhnije bane ikiwatan' o re ngom' om? 30 Kei buice ci cedi ne ci ie du nubone, ko, Kacene nubone da deko ma thu ru' o re nia kacene ehnije deko co nue nubone du bua. 31 Ilei Pilato me ie du buice, ko, Buhnije yothi nubonelo, ne hnengo nubone leu' o re wathebo ni buhnij. Il' o re si Juda me ie du nubone, ko, Deko ma ekowe ke ehnije co atangoni o re ngom. 32 Ha thu iu ko re eberedo ni Iesu hnei nubonengo hna beredon, be ci aehngeni ke nubonengo o re tango ha co pina du nubonengo. 33 Ilei Pilato me okonelo yawe ri 'ma bane hnengon, ne ci kaio Iesu, ne ci ie du nubonengo, ko, Ilo, nubo ko re Doku ni si Juda? 34 Kei Iesu ci cedito nubone, ko, Ilo, nubo ci ie kani nubo ko komelei, ca hnei se ngome ko hna ie nu du nubo? 35 Kei Pilato ci cedi, ko, Inu si Juda? Ono re node ni nubo ne ile ko re nodei thu-hule hna nue nubo du nu; nge ko re hnei nubo hna rue? 36 Iesu ci ceditone, ko, Deko wene ri ten' o re awe ko re baselaiago; ngei me wene ri ten' o re awe ko re baselaiago il' o re nodei sinemenengoiego co irue, thu deko co nue nu jeu' o re si Juda; ka onome deko wen' ome ko re baselaiago. 37 Kei Pilato ci ie du nubonengo, ko, Ka nge, nubo doku ko? Iesu ci ceditone, ko, Oniil, doku ke inu. Wen' omelei hna hnapo цu, ka wen' omelei ha pina ke inu ome ri ten, ha thu lae natan' o re seseko. Ono re ngom' ileodene wene ri seseko ci taedengi o re lanengocego. 38 Kei Pilato ci ie du nubonengo, ko, Nge ko re seseko? Ma hna ie omelei, ile nubone me okonebote yawe jeu' o re nodei si Juda, ne ci ie du buice, ko, Inu deko ma uni o se nia ni nubon. 39 Ka lata ni buhnije, ko, inu co nnebpte du buhnije ko se ngome ri paseka; ilo, buhnije ci alan' inu co nuebote du buhnij' o re Doku ni si Juda? 40 Ile buic' ileodene me kaie hmalo yawe, ne ci ie, ko, Deko omelei ic, ka roi ke Baraba. Ka Baraba ko re thu eno.

19

1 Ilei Pilato me yothi Iesu, ne ci begi nubonengo. 2 Ka ono re nodei soja ci kadan' o re hnakote guraace me iwie, ne ci arebitonelu ri drai ni nubonengo, ne ci akokoeni nubonengo o re kokoe me nilac, 3 Ne ci ie, ko, Kolo, Doku ni si Juda I Ile buice me ceto nubonengo. 4 Ilei Pilato me okonebote yawe, ne ci ie du buice, ko, Da ule, inu ci hue te nubone bote du buhnij, thu ule ke buhnij, inu deko ma uni o se nia ni nubon. 5 Ilei Iesu me okonebote te hna decone jo ko o re hnakote guraace me iwie, ne il' o re kokoe me nilac. Ilei Pilato me ie du buice, ko, Da ule o re ngom! 6 Ma ule nubonengo ko re nodei toka-thu-hnl, ne nodei necumon, ile buice me kaie hmalo, ne ci ie, ko, Asatauroni, asatauronilo. Kei Pilato ci ie du buice, ko, Yothi nubone lo ke buhnij, ne asatauroni, wen' o re inu deko ma uni o se nia nubon. 7 Ile me cedi nubone ko re nodei si Juda, ko, Ehnije ha numu wathebo, ka ha ekowe ke nubone co tango leu' o re wathebo ni ehnij, wen' o re hnei nubone hna ilo nubone ko, ko, Tei Makaze. 8 Ma taedengi kei Pilato o re enengoco omelei, ile nubone me pareu hmaiai; 9 Ne ci okonelo yawe ri 'ma, hnengon, ne ci ie du Iesu, ko, Nubo sere il? Ka Iesu deko te me cedito nubon. 10 Ilei Pilato me ie du nubonengo, ko, Nubo deko ma cedi nu? nubo deko ma ule inu ha numu nene co asatauroni nubo, ka inu ha numu nene co nue nubo bot? 11 Kei Iesu ci ceditone, ko, Kacene da deko hna kanu nubo wene ri awe nubo deko nene ri pogo; wen' omelei nubon' o re hna kanu nu du nubo ha numu nia hmaiai ri pon. 12 Wene onome Pilato ci there co nue nubonengo bot; ka ono re nodei si Juda ci kaielo re ran, ne ci ie, ko, Kacene bua co nuebot' o re ngom' ome bua deko kani Kaisara; ono re ngome ci ilo nubone ko bane doku nubone ci icuhma ne Kaisara. 13 Pnato ci taedengi o re enengoco omelei, ile nubone me hue te Iesu obot, ne ci menenge ri guhnene yelene, ko, Hna-kawioete; ka pene Heberan, Gabatha. 14 Omelei ko re bane hngoronatan' o re paseka, ka ineko sikes ko re gula ran; ile nubone me ie jeu' o re si Juda, ko, Da ule o re Doku ni buhnij! 15 Ile buice me kaielo re ran, ko, Yoselo, yoselo, asatauroni nubone lo. Kei Pilato ci ie du buice, ko, Ilo, inu co asatauroni o re Doku ni buhnij? Il' o re nodei tokathu-hule ci cedi, ko, Ehnije deko doku, ka Kaisara so. 16 Iie nubone me nue nubonengo du buic, ha thu asatauroni. Ha ile buice me yothi Iesu ne ci iye nubonengo lo. 17 Ka nubonengo ci adeni o re satauro ni nubonengo, ne ci hue jeu' o re guhnen, y el en, guhnen' o re banac; ka yelene pene Heberan, Golgotha. 18 Omelei buice ci asatauroni nubonengo lo, ne ile ko se xara tu sese te ne nubonengo ri rue dajan, ka Iesungo ri nidin. 19 Ka Pilato hna xiwamomon' o re tusi acikacen, ne ci atoe omeloi ri pesatauro. Ka ome ko re hna xiwamomone, ko, IESU SEREI NAZARETH, DOKU NI SI JUDA. 20 Waace ko re nodei si Juda hna ieie o re tusi acikacen' omelei; wen' o re ha acenon' o re menenge ko re guhnene hnei buice hna asatauroni Iesu il; ka hna xiwamomone pene Hebera, ne Eleni, ne Rom. 21 Ile me ie du Pilato ko re nodei toka-thu-ule ni si Juda, ko, Hage xiwamomon, Doku ni si Juda, roi di hnei nubone ko hna ie, ko, Inu Doku ni si Juda. 22 Kei Pilato ci cedi, ko, Ono re hnego hna xiwamomon' omelei ha hna xiwamomone ko. 23 Ma ase hna asatauroni Iesu ko re nodei soja, ile buice me yose o re so kokoe ni nubonengo, ne ci thawa ae foa, ha thu atran' o re ade soja; ne ile te ko re yekokoe; ka ono re yekokoe deko hna yese, ka hna kada odenon. 24 Ile buice me enengoco ko buice, ko, Eje hage thapanebot, roi ke eje co ilo lotan omelei, bane so la ngei; ha thu iu ko re eberedo hna xiwamomone, ko, "Hnei buice hna thawabote sei buic' o re so kokoego, ka hnei buice hna ilo lotan' o re yekokoego." Omelei ko re nodei ace hna ilone hnen' o re nodei soja, 25 Ka ci sere ri daden' o re satauro ni Iesu ko re kodaruieni nubonengo, ne ile ko re celuaien' o re kodaruieni nubonengo, ono Maria hmenue ni Kalepo, ne Maria Magedalin. 26 Iesu ci rowon' o fe kodaruieni nubonengo, ne il' o re kokonieni hnei nubonengo hna hnorone ci sere acen, ile nubonengo me beredone jeu' o re kodaruieni nubonengo, ko, Hmenew, da ule di o re tei nubo! 27 Ile nubonengo me beredone te jeu' o re kokoniene, ko, Da ule o re hmaieni nubo! Ka wene ri gula ran' omelei ono re kokonien' omelei ci yothi nubone lo, ne ci hiane ri hnamenenge ni nubone ko. 28 Thuben' omelei Iesu ha rowone, ko, ha hna anize o re nodei ac' ileoden, thu aiuni o re eberedo hna xiwamomon, ile nubonengo me beredone, ko, Inu ci di kua. 29 Ka ci hmor' omelei ko re nejei ha cece hnei vinega; ile buice me aceceni o reyecenengo hnei vinega, ne ci atoe n bu' re hisop, ne ci kedilo jeu' o re tubeberede ni nubonengo. 30 Iesu ma hnakuan' o re vinega, ile nubonengo me beredone, ko, Ha as. Ile nubonengo me thidibot' o re drai ni nubonengo, ne ci nueton' o re uien. 31 Il' o re nodei si Juda me kewiwi du Pilato, ha thu aedini o re nodei wata ni buic, thu co yothi buice lu, thu hage ha roi di ko ko re ade hnengome ri satauro ri sabath, omelei ko re rane bane hngoronatan, (ka rane hmaiai ko re sabath' omelei.) 32 Ile me huebote ko re nodei soja ne ci aedini o re rue wata no re hna dane ne il' ome sa hna asatauroni sese te ne nubonengo. 33 Buice me kulo du Iesu, ne ci ule, ko, nubonengo ha taeto, ile me deko ma aedini o re rue wata ni nubonengo ke buic; 34 Roi di ome sa no re nodei soja ci wi' o caace ri thedaate ni nubonengo, ile me canga thabote ko re dra ne tin. 35 Ka ono re ngome hna ule ci lae natan,ka seseko ko re enengoco hnei nubone hna lae natan; ka nubone ha ule nubone ci ie o re seseko, ha thu une ke buhnij. 36 Ka hna ilon' o re nodei ac' omelei thu iu ko re eberedo hna xiwamomone, ko, "Deko co anemunamani o se dure kaze ni nubonengo." 37 Ka ci ie te ko se gure eberedo hna xiwamomone, ko "Buice co ule nubon' o re hnei buice hna wie o caac." 38 Thuben' omelei ilei Iosefa, Serei Arimathea, se kokonieni Iesu me unide wen' o re ci pareuo si Juda, ci sibo Pilato, thu*co yose o re hneiwa ni Iesu. Ilei Pilato me nue. Ile nubone me lmebote ne ci yose o re hneiwa ni nubonengo. 39 Ci huebote te kei Nikodimo, ono re hna huebote kodihne du Iesu ri rid, ka nubone hna hue ti bot' o re muro hna acethenece ne alo, ineko wane handede ko re paun. 40 Ile buice me yoselu o re hneiwa ni Iesu, ne ci xetul' o mano lino, ne ile ko re sereie me bone buruia, se inom' o re lata ni si Juda ma co ula. 41 Ka ha omelei ko re toto ri guhnene hnei buice hna asatauroni Iesu il, ka ri toto ko se pua kabesi be deko tango hna ulan. 42 Buice hna ula Iesu omelei, wen' o re bane hngoronatane ni si Juda, ka acene ko re pua.

20

1 Ri rane me hna dane ri wik, ci huebote kei Maria Magedalin, ri kapadrane me beiaridijeu' o re pua, ne ci ule o re ete ma hna yosebote wene ri pua. 2 Ile nubone me nyanyad, ne ci hue du Simona Peteru ne il' o re kokoniene hnei Iesu hna hnoron, ne ci ie du bushengone, ko, Buice ha hna vothi Retoke wene ri pua, ka ehnije deko ma ule o re hnei buice hna ane nubonengo il. 3 Ilei Peteru ne il' o re kokonien' omelei me okonebote ne ci hue jeu' o re pua. 4 Ka bushengone ci nyanyade sese; ka ono re kokonien' omelei ci nyanyade thawala Peteru, ne ci pina da ri pua. 5 Nubone ci molu, ne ci ule o re mano ci hmor, ka nubone deko ma okonelo. 6 Ile me huebote te îkei Simona Peteru ci hue leu nubone ne ci okonelo di ri pua, ne ci ule o re mano ci hmor. 7 Negutauelete, hna xetul'o re drai ni nubonengo, deko ma hmore sese ne il' o re mano, ka hna ewa odenone ri se guhnene ko. 8 Ile me okonelo te ko re kokonien' omelei hna pina da jeu' o re pua, ka nubone se ci ule, ile nubone me kedi. 9 Ka buice be deko ma carа jeu' o re eberedo hna xiwamomone, ko, Roi ke nubonengo co wienilo yawe sere ri hna tango. 10 Il' o re rue kokoniene me hue yawe jeu' o re hnamenenge ni bushengone ko. 11 Ka Maria ci sere ko obote ri pua, ne ci mane; ka be ci mane ke nubon, ile nubone ci theron' o re hnoren' o re pua, 12 Ne ci ule o re rue angela hna kokoeo gada ci meneng, ome sa ri drai, ka ome sa ri rue arada, ono re hna nidete ile ko re hneiwa ni Iesu. 13 Ile bushengone me ie du nubone, ko, Hmenew, nge ke nubo ci mane? Kei nubone ci ie du bushengone, ko, Wen' o re buice ha hna yose o re Dokugo, ka inu deko ma ule o re hnei buice hna ane nubonengo il. 14 Ma hna ie omelei, ile nubone me hnidelo, ne ci ule Iesu ci ser, ka nubone deko ma ule, ko, Iesu kulu. 15 Iesu ci beredone du nubone, ko, Hmenew, nge ke nubo ci mane? nubo ci there la? Nubone ci uane, ko, nubonengo ko re thu ruaba toto, ile nubone me ie du nubonengo, ko, Retok, kacene nubo ha hna yothi nubonengo, da ie du nu o re hnei nubo hna ane nubonengo il, inu ha thu yothi nubonengo. 16 Kei Iesu ci beredone du nubone, ko, Maria. Nubone ci tha hnidelo ne ci ie du nubonengo, ko, Raboni, (omelei, ko, Thu yeno.) 17 Iesu ci beredone du nubone, ko, Hage rue nu; wen' o re inu be deko hna icelo du Cicango; ka ho hue jeu' o re re kokoniego, ne ie du buice, ko, inu ha ci icelo du Cicango, ne Cecewaieni buhnije te; ka Makazego, ne Makaze ni buhnije te. 18 Ilei Maria Magedaline ci huebote ne ci lae natan' o re re kokoniene, ko, nubone ha ule o re Doku, ka hnei nubonengo hna beredon' omelei du nubon. 19 Ri lakidi no re ran' omelei, ono re rane me hna dane ri wik, ma hna thingi o re ta pa 'ma no re hna sanelo ile ko re re kokonien, wen' o re ci pareuo si Juda, ile me lengebote kei Iesu ne ci thela ri nidin, ne ci beredone du buice, ko, Dongodongo ke buhnij. 20 Mahna beredon' omelei, ile nubonengo me aehngenitone du buic' o re rue aranine ne thedaate ni nubonengo. Il' o re re kokoniene me opodone co ule o re Doku. 21 Iesu ci beredone yawe du buice, ko, Dongodongo ke buhnij. Inom' o re Cecewaiene hna siato nu se inomelei inu ci sia buhnije te. 22 Ma hna beredon' omelei, ile nubonengo me nono bote du buic, ne ci beredone, ko, Kedilu o re Uiewaieni Hmijoc; 23 Ka ono re nia no re nodei ngome buhnije co nuebot, omelei co nue ko du buic; ka ono re nia buhnije co ile ti, omelei co ile ti ko. 24 4 Ka kome sa no re xara tuelev, ono Toma se yelene yawe Didimo, hna tako sei buice ri hna lengebote kei Iesu. 25 Ile me ie du nubone ko re re kokoniene, ko, Ehnije ha hna ule Retok. Ka nubone ci ie du buice, ko, Kacene inu deko ma ule ri rue aranine ni nubonengo o re thuba watutu, ne ci ronelo o re waninego ri thuba watutu, ne ci ronelo o re waninego ri thedaate ni nubonengo kacene inu deko co kedi. 26 Ka thuben' o re nodei rane me eit, ha hulo yawe ri 'ma ko te re kokonieni nubonengo, ka sei buice kei Toma; ile me lengebote kei Iesu, ma hna thingi o re nodei pa'ma, ne ci thela ri nidini buic, ne ci beredone, ko, Dongodongo ke buhnij. 27 Ile nubonengo me beredone du Toma, ko, Ngenibot' o re wanine ni nubo, ka da ule o re rue araninego; j ka ngenibot' o re aranine ni nubo, ne ronelo ri thedaatego; ka hage iara rewerew, roi co kedilu. 28 Kei Toma ci cedi ne ci ie du nubonengo, ko, Dokugo! ne Makazego! 29 Iesu ci beredone du nubone, ko, Nubo ci kedi wen' o re nubo ci ule ca Toma? Ha hnahneone ke buic' o re ci kedi me deko ma ule. 30 Waace di ko re nodei kacene hnei Iesu hna ilewane ri tadan' о re re kokonieni nubonengo, ka deko. hna xiwamomone ri tusi om; 31 Ka ha hna xiwamomon' o re nodei ac' omelei, thu uane ke buhnije, ko, Iesu ko re Keriso, Tenengoieni Makaze; ka ha thu une ke buhnij, ile me numu o re waruma wen' o re acekini nubonengo,

21

1 Thuben' omelei Iesu hna aehngeni nubonengo yawe ko jeu' o re re kokonieni ri lacele Tiberias; ka inome ko re nubonengo hna ahngabot. 2 Ko, hna sanelo kei Simona Peteru, ne Toma, se yelene yawe Didimo, ne Nathanyel serei Kena i Galili, ne rue tei Zebedaio, ne il' o se rue kokonieni nubonengo. 3 Kei Simona Peteru ci ie du buice, ko, Inu ha ci hue co eken. Kei buice ci ie du nubone, ko, Ehnije se'Ъo hue te ne nubo. Ka buice ci hue, ne ci canga icelo ri koe, ka ri rid' omelei buice deko ma uni o se ac. 4 Ka ri beore Iesu ci thela ri pajele; ono re re kokoniene deko ma ule, ko, Iesu kulu. 5 Ilei Iesu me beredone du buice, ko, Nodei tenen, buhnije ha numu ace bane ia. Kei buice ci ie du nubonengo, ko, Deko 6 Ile nubonengo me beredone du buice, ko, Nuebot' o re eoce ri gula nata no re koe, ile buhnije co uni. Ile buice me nuebot, ka onome buice tha thu ni ko co kuri o re eoc, wen' o re nodei wa'ie me waac. 7 Ile me ie du Peteru ko re kokoniene hnei Iesu hna hnorone, ko, Retoke kulu. Ma taedengi kei Simona Peteru, ko, Retoke kulu, ile nubone me kokoeon' o re yepele we ni nubon, (wen' o re ha guba ke nubon,) ile nubone me dedebote ri cele. 8 Ka ci huebote ko re re kokoniene ri koe me waiam, (wen' o re deko ma thuaiai ke buice sere ri nod, ka ineko tu handede ko re kubit,) ne ci kurilo o re eoc, ne ile ko re nodei wa'ie. 9 Ma cede ke buic' ile buice me ule o re hna iei, ka wa'ie hna ane ri pon, ne il' o re areto. 10 Kei Iesu ci beredone du buice, ko, Hue ti lo wene ri eo wa'ie hnei buhnije hna ridi onom. 11 Ile me icelo kei Simona Peteru ne ci kurilo o re eoce ri kurubu ha cece hnen' o re eo wa'ie me hmaiai, wane handede ne fifeti theri, ka deko ma zezene ko re eoce hnen' o re eo wa'ie me hmaiai. 12 Kei Iesu ci beredone du buice, ko, Hue te co kaka. Ka deko kome sa o re re kokoniene me hnore pebe co eto nubonengo, ko, La ke bua? roi di buice ha ule, Retoke kioren. 13 Ilei Iesu me lengebote ne ci yose o re areto, ne ci thawa du buic, ne ile te ko re ta wa'ie. 14 Omelei ha therione naeni Iesu hna aehngeni nubonengo ko jeu' o re re kokoniene ma hna wienilo yawe sere ri tango. 15 Ma ase hna kaka ke buic, ilei Iesu me beredone du Simona Peteru, ko, Simona, tei Iona, nubo ci hnoro nu ri poni buic' om? Kei nubone ci ie du nubonengo, ko, Egewa, Retok, bua ha rowon' inu ci hnoro bua. Kei nubonengo ci beredone du nubone, ko, Thueil' o re nodei arenio inu. 16 Nubonengo ci beredone di yawe du nubone, ko, Simona, tei Iona, nubo ci hnoro nu? Kei nubone ci ie du nubonengo, ko, Egewa, Retok; bua ha rowon' inu ci hnoro bua. Kei nubonengo ci beredone du nubone, ko, Thueil' o re nodei mamoego. 17 Ka nubonengo ha theri beredone du nubone, ko, Simona, tei Iona, nubo ci hnoro nu? Ci unia kei Peteru, wen' o re hnei nubonengo ha therione hna beredone du nubone, ko, Nubo ci hnoro nu? Ile nubone me ie du nubonengo, ko, Retok, bua ci rowo kacen' o re nodei ac' ileoden; bua ci rowone inu ci hnoro bua. Ilei Iesu me beredone du nubone, ko, Thueil' o re nodei mamoego. 18 Seseko, seseko, inu ci ie du nubo, Be yenakunu ke nubo, nubo hna wacaoro nubo ko, ka hna hue jeu' o re hnei nubo hna alan; ka ma mohma ke nubo, ile nubo co ngenibot' o re aranine ni nubo, ka kome sa co wacaoro nubo, ne co hue te nubo jeu' o re nubo deko ma alan. 19 Nubonengo hna beredon' omelei co aehngeni o re рengen' o re tango ni nubone bane ahmani Makaze. Ma hna beredon' omelei ke nubonengo, ile nubonengo me beredone di du nubone, ko, Hue leu nu. 20 Peteru ci hnidelo ne ci ule o re kokoniene hnei Iesu hna hnorone ci hue leu te, ka onijo ko nubon' o re hna thaeti ri yewanono ni Iesu ri hna kodaru re lakid, ka thu ie, ko, Retok, la ko re co wakewio bua? 21 Peteru ci ule nubon, ile nubone me ie du Iesu, ko, Retok, korio nubone te? 22 Iesu ci beredone du nubone, ko, Kacene inu ci ala nubone co bungi ca pina ke inu, nge komelei du nubo? Nubo hue leu nu ko. 23 Ile me mece gurule ko re enengoco omelei sen' o re ace re celuaiene, ko, deko co tango ko re kokonien' omelei. Ka Iesu deko hna beredone du nubone, ko, Deko co tango ke nubon; roi di, ko, Kacene inu ci ala nubone co bungi ca pina ke inu, nge komelei du nubo? 24 Omelei ko re kokoniene thu lae natan' o re nodei ac' omelei, ka thu xiwamomon' o re nodei ae' omelei; ka eje ha ule seseko ko re hnei nubone hna lae natan 25 Ka waace di ko re nodei ace hnei Iesu hna ilewan, ka ngei me thati xiwamomon' ileoden, inu ci uane deko ma kueil' o re ten' o re awe ko re nodei tusi ngei ma co xiwamomon. Amen.